Ne ſai a quoi gentis homs penſe
Qui vilain charge ſa deſpenſe
Vilains de cuer de mal poꝛpens
Ycis ne puet vëoir deſpens.
Ainz ſamble c'on l'amaine pendꝛe
Quant il voit ſon ſeignoꝛ deſpendꝛe
Pour faire honneur ſon mal penſer
N'en puet couvrir au deſpenſer
Car chiere en fait triſte et penſiue
Si n'eſt nus qui le deſpens ſiue
Ne l'en hace tant va penſant
D'oꝛdure eſt deſpers deſpenſant
Car fuſt il es mains du pendeur
Qui ne puet vëoir deſpendeur
Bien het en honneur deſpendus
Vilains deſpenſiers ſoit pendus
Car ja honnour ne penſera
En tout ce qu'il deſpenſera
Tnat a vilaine la pensee
En oꝛdure faire a pensee
Qui par ſon mal apenſement
Fait ſi vilains deſpenſement
Qu'il n'entra en ſa deſpenſe ier
Ne hui nus qui le deſpenſier
Ne hace et dit ſ'on le pendoit
Ce ſeroit pꝛex ſ'il deſpendoit
Le ſien maint mal ſeroit penſanz
Quant il l'autrui eſt deſpenſanz
Qui recreaument le deſpent
A ſon cuer toute oꝛdure apent
Qui ainſi le va deſpendant
Il va tout adez le pendant
Pendus ſoit ſanz deſpendement
Qui fait vilain deſpendement
Dont on le ſouhaite pendu
Vilainement a deſpendu
Les biens dont il eſt deſpenſins
Car a uilonie eſt penſins
Com vilains de mal apenſez
A autrui deſpenz deſpenſez