Je fui l'autrieꝛ a une feſte Au partir. me dolut la teſte Pour ce que je bus vins diveꝛs En mon chief monteꝛent li vers Qui me firent ce diſt diſteꝛ Que vous moꝛrez ci recoꝛdeꝛ Li Diex damours ſafeſte fiſt Mes noiſſe et contens la deſfiſt Des vins qui ce plet entameꝛent Et puis enſemble ſe mesleꝛent De bouche entreus ſe deſmentirent Et a bien pou ſe desmentirent Pour ce que chaſcun vouloit eſtre De plus honnoꝛe et le meſtre Biaune clameci et auceꝛre Miſtrent leſpee hoꝛs du fueꝛre Et cuidieꝛent faire vergoingne A saint iejan et a gacoingne Et dautre part a la rochelle Ains commanca la querelle Car chaſcun ſemiſt adeſfance Loꝛs fiſt Diex damour deſfance Q՚ plus ne sentremenaſcaſſent. Aincois leur reſpons. propoſaſſent. Sicomme a chaſcun pretendꝛoit Et ſur ce dꝛoit il leur rendꝛoit Selonc le miex que il ſaroit Et par le conſeil qu'il aroit Des vins qui venus ieſtoient Et de la pes sentremetroient A celle joꝛnee aſſenee Biaune iuint la lance levee Vin d'aucueꝛre et de clameci Chaſcun d'eulz a dis vés me ci Nous nous preſantons ſans delai Tous ceus furent d'une partie saint iehan ne ſoublia mie Et gaſcoingne qui li eſt pꝛés Eſt venue tantoſt apꝛés Et avec ce dꝛecier leur voille I vindꝛent anio et rochelle Ces .iiii. en ſemble bien ſetindꝛent Par devant le Dieu d'amours vindꝛent Qui ſeoit entre .iiii. vins Qui eſtoient meſtres des vins Ceſt vin grec et vin de granache Chaſcun ot foꝛree ganache Vin muſcadet. et vin de chipꝛe Veſtus decovuertures dyppꝛe Ces .iiii. a court furent venu Cil ſont au conſeil retenu Le Dieu d'amours cil coſtoient Et comme aſeſſour ſe ſeoient Adont fu fet commandement Par mi la court communement Que nan nifieꝛe ne boute Et que leur reſons eneſcoute Et par dela et par deca Adont aucueꝛre ce dꝛeca Comme pꝛocureur fonde Et des compaignons ot n [...]de Si par la contre saint iouan Qui pꝛocureur des ou an De ces compaignons eſtoit fet Aucueꝛre pꝛopoſa son fet Sire je ſuis .i. ancueꝛrois Que ſus tous vins doi eſtre rois Quar plus ſui foꝛs et enteſtans Et les antrailles eſchaufans Par ma foꝛce fas chiez doloir De robin et de marion Chanter par mainte region Je faiz gent tripeꝛ et ſaillir Et gueꝛroieꝛ et aſſaillir Je les fais en ſemble combatre Et puis les abas .iiii. et .iiii. Ceus qui j'ai la bouche lavee Ne doutent eſſai ne eſpee Il ne leur faut nule armeure Je les fais hardis par nature De ma foꝛce et de ma vigour Jeuure touz joꝛs ſelonc vigoꝛ saint iehan il neſt chief en homme Que tout a teꝛre je neſtonne Chaſcun le ſet chaſcun le voit Et puis que faire rois lendoit Des plus foꝛs. et gent aacoꝛt Sont que ienteſte le plus foꝛt Eſtre doi li rois ſouueꝛains Et ſus tous li rois primeꝛains De biaune ſe on bien de voir Et bien partout fes ſon devoir Elle eſt biaune et eſt alaitant Pour ce le pappe lama tant Que beneiſon li donna Et ſamour li abandonna Elle neſt trop rouge ne trop tainte Biaune sonnon. biauté apoꝛte Biaune abien nees a poꝛte Biaune beneoit a lenon Pour ce ſus tous vins arenon Pour ce en bonté tout celia Le pappe en li ſumilia Et quant lon honneure tel ſeingneur Tous li doinent poꝛteꝛ honeur Clameci eſt de ſon lignage Mes alui pas ne ſaparage Combien qu'il ſoit vins gracieus Bons foꝛs et ſuſtancieus Eſpeciaument cil de Goe saint iejan tu durs ſus la ioe Je clainme ci biaume neuers Vous metrons treſtous arouueꝛs Vous naures ja contre nous foꝛce Pas ne vous pꝛiſon une eſcoꝛce saint iouan que pues tu dire Entoi na cun pou de matire Mes de foꝛce ne de biauté En vers moy nauras ylgalte Car bel nes negracieuſe Groſſe et aſpꝛe dure et crueuſe El na que rougeur ſeulement A ſa couleur ſabonté ment Elle poꝛte couleur ſafiſtre Sinaura ja croce ne miſtre Mes Biaune ſeꝛa couronnee Pour ce quelle eſt du pappe ame Et que diſtu de la rochelle Qui neſt gracieuſe ne belle Pour Dieu ſire que l'en la mouſtre Cil lombart en font leur compoſte Fiſicien en ont afaire Pour ſcirop et buurage faire Ceſt choſe enmiellee etnon pure De choſe compoſte nai cure Mes vins qui ſimples eſt de ſoi Et foꝛs puet eſtanchier la ſoi Comme moi qui ſui roi et prince Car touz les boiax je retenice Par mon gouſt et mon arouſeꝛ Fas gens doꝛmir et repoſeꝛ Rochelle fait faire tonneꝛre Mes ieſuicleꝛ ſaillant en voire Fins fres froit ſade fremiant Saſfres ſauoureus et friant Que me puet on plus demandeꝛ Se ſui rois ſi puis comandeꝛ En voire ou en veſſel dargent Me puent boire toute gent Et auſi en hanap doꝛe Sui je pꝛiſſie et honnoꝛe Et biaune auſi y eſt beue Et agrant joie receue Mes iaue ſeꝛa en veſſel Rochelle tant ſoit bon ne bel Quel ne ſoit laide et obſcurcie Pourmes compaignons et poꝛ moi Qui ſont venus avecques moi Tout ce vous aige recite Et ſi le Juge en veꝛité Pour ce quequan doie a venir Nous weilliez en bon dꝛoit tenir Car ſe raiſon ne nous eſt faite Mainte foꝛt lie en ſeꝛa toꝛte Je le vous di et bien loes Procureur ſui auoues Loꝛs vin de saint iouan parolle Cequil ot apris aleſcolle Vin d'aucueꝛre auon entendu Qui moult haut a ſon art tendu Et ſe vente de ſa folie Qui fait et de ſamuſardie Quar ceus qui de lui vont buuant Si comme il dit va deceuant Et les en teſte et les aſomme Ce neſt mie fet de pꝛeudomme Ne non ne le doit pas priſieꝛ De ce qu'il fet la gent noiſſieꝛ Quant au chief et au coꝛs meſfait Il ne doit mie par tel plet Honnoꝛeꝛ eſtre ne pꝛiſſiez Mes en doit eſtre deſpꝛiſſiez Quant pꝛopoſſe ſa deshonneur Recevoir ne doit par honneur Neſtre nen doit oiz acourt Ce vous dis je abꝛief mot et court Je ſui de bonne atrempeure Tieus eſt leſtat demanature A nuli ne fais maiſement Qui me pꝛent reſonablement Des vins blans net on pas meilleur J'ai foꝛce bonté et coulour Ma couleur tieing toute ma vie Vin d'auceꝛre uintoſt rouſſie Len me puet totes par mener Et ſans honte demeneꝛ Megarde len .ix. ans ou .x. Lan ma bien eſpꝛouue jadis Mes vin d'auceꝛre toſt de chiet De ſa bonté ainſi li chiet Si di ce pour moi et largue Que li vins qui ne ſeꝛemue Eſt meilleur et plus couenable Que celui qui neſt pas eſtable Vin de gaſcoigne ſa couleur Neſt pas de petite valour Les autres vins fet honnoꝛeꝛ Quant de ſoi les veult couloureꝛ Foꝛce donne aide et confoꝛt Et dun vin foible fet .i. foꝛt Il a de vin plaine ſuſtance Il nourriſt ſans faire grevance Aus teſtes eſt bons et au flanc Et du rouge ya et du blanc Chaſcun bonne nature engendꝛe Si doit on pour eulz le dꝛoit rendꝛe En nul temps ni en nule ſeſon Il neſt mille comparoiſon De clameci contre gaſcoingne Et ne veꝛs neſt cunne fuſſee Gaſcoigne eſt une grant contree Qui mains lieus honneure ſouvent Clameci neſt cun pou de vant Gaſcoigne eſt par terre et par meꝛ Largement la doit on ameꝛ Lan la bien partout eſpꝛouue Gaſcoingne alen partout trovee Avecques atoꝛt arepꝛis Rochelle quitantadepꝛis Que len la va de partout queꝛre Chaſcun ſi len clot et len ſeꝛre Car il neſt pas agarconneꝛ Nen ne la doit quaus bons donneꝛ Elle cure coꝛs et netie Siquil ni demeure pontie Mauvés vent mauveſe fumee Bien a ſa bonté eſpꝛouuee Elle tient le coꝛs ſannement Preſant en ſon fet hautement Pour les grans ſeigneurs len ſalache Elle eſt du lignage garnache Qui eſt un des grans vins du monde Il neſt qui contre li reſponde Et celle eſt ſauoureuſe et ſade Dont elle gart le coꝛs malade Enfait elle pour ce a blaſmeꝛ Nannil miex lendoit on ameꝛ Cras vins aſpres rudes et gros Doivent il avoir pꝛis ne los Nanil mes ceus qui doucement Entrent et pꝛofitablement Euurent doient le joꝛ avoir Devant toute gens de ſavoir Nanil ſages hons de valeur Ne doit jugieꝛ ſelonc couleur En la couleur con a veü Eſt on bien ſouvent deceu Des iex ne boit en mes debouche Oꝛ te tourne auceꝛre oꝛte couche Qui fat doloir et coꝛs et teſtes Et les courrous et les tempeſtes De toi ne doit on faire conte Tu fes les gens aleꝛ ahonte Par ton mal par ta mauveſtie Fes tu mainte gent dehetie Mes qui veult bien ſentance rendꝛe Il doit a la veꝛité entendꝛe Poꝛce requeꝛons oꝛendꝛoit Sus ce que len nous face dꝛoit Et que par dꝛoit len iregarde Quar il nous pleſt et ſi nus tarde Que la ſentance en ſoit donnee Et la cauſe ici teꝛmine En dementres que propoſſoient Et que ſantance requeroient Vin de ſaint poꝛcain eſt ſailli Et durement les aſailli Et atoutes les .ii. parties A comancie grans enuaies Et dit foi que doit ſaint antoine Ples fetes de la chape au moinne Na vous nauons ne neſt lonneur Mes amoi qui ſui le greigneur Des vins et li plus reclames Et des greigneurs ſeigneurs ames A la court de pappe et de France Sus tous vins aige laudience Selon a donne la couronne Foꝛce ai ſutancieuſe et bonne Dont je fas les gens leſſieꝛ En joie et en feſte dꝛecieꝛ Cr je ſui nez de bonne branche Qui neſt trop rouge ne trop blanche J'ai la bouche j'ai la couleur Nus hons ne puet troueꝛ meilleur Oeil de peꝛdꝛis ceſt mon viaire A meilleur couleur ne puis traire Que me puet en plus demandeꝛ Toutes tables fis amendeꝛ Je ſui bel bon et gracieus Je fas rire et cueꝛ et euls De ce ne me pue nus deſdire Et auroyaume et alempire Sui je des greingneurs conneu Chaſcun le ſet qui ma beu Que touz jours ainſi ai eſté Que j'ai la ſouueꝛainnete Se nul men vouloir deſmentir Mon povoir li feꝛai ſentir J'ai vouſins amis et parens Qui de ce me ſeꝛont garens Dieus d'amours vous ledeuez croire Quar la choſe eſt partout notaire Et dautre que de vous leſauez Qui ſouvent demoi but avez Pour ce nommes ſui ſaint poꝛcain Car je ſui saint bon .cler. et ſain Quant vin francois ace oï Ne ſen eſt pas moult eſioi En place ſaut et recommance A demeneꝛ grant noiſe et tence Trop ce diſt il ſui eſbahis Quentre vous vins en mon pais Devant moi et en ma preſance Lonneur voulez avoir en france Mes ſoit ou ne ſoit vostre pois Vo reſon ne valence .ii. pois Pour home tenir foꝛt et feꝛme Et dꝛoir et raiſon nous afeꝛme Que toutes choſes ſont criees De Dieu faitez et oꝛdenees Ceſte raiſon ai amene Car je ſui trop miex oꝛdene Et la foꝛce ai miex atrempee Reſonnable et ameſuree De li cieus gouſt et ſavour Plus que qui veult avoir honneur Chaſcun me deſirre atenir Quar je puis trop miex maintenir Coꝛs en ſente d'omme et defame Quar je fas cepoꝛ quoi ſui fet Sans anului faire meſfait Chaſcun veut ſanté pes et joie Et je ces .iii. choſes en voie Sencte pes et joie atous temps Fais et li autre font contens Si ne doivent eſtier honnoꝛe Mes detous doi eſtre ennoꝛe Quant leur foles iniquites Amende moi ladignete Apartient loneur en demande Quar leur maus par mon ſens amende Sus oꝛs reſons doit prendꝛe Bien le maideꝛont a deſfendꝛe Tuit cil vin qui ſont un voiſin Freꝛes oncles parant voiſin Quant liaue a entendu le plet Sire Diex d'amours ſil vous pleſt Oiez moi et faites raiſon Grant noiſſe a en ceſte meſſon De ces vins et de ceſte deſcoꝛde Il ont bien gaaingnie la coꝛde Par leur mauveſtie de grant temps Il font et noiſſes et contens Omecides et robeꝛies Et aſſés de ribaudeꝛies Aſſez font neſtre de difames Prendꝛe les filles et les dames A bonne gens et apꝛedommes Et deſpendꝛe d'argent grant ſomme Et riches povres devenir Et ſouvent en honte venir A mourir demauueſſe moꝛt Maint pꝛeudomm par vin ſont moꝛt Et en ſont de venus a honte Et en coꝛ de moi ne font conte Ne ne me gaignent reconnoiſtre Et ſi ne puent ſans moi neſtre Ne venir afrutefiance Et me laiſſent par leur bobence Et par eulz ſui ge des pꝛiſee Ja par moi ni eꝛe commenciee Ne ſeꝛa noiſſe ne mellee Homme occis ne fame crauentee Ne riches povres ne ſeꝛa Ja par moi mal ne ſefeꝛa Les coꝛs et les dꝛas je netie Et par moi le blé feutefie Les arbꝛes et les pꝛés arouſe Quan qui de teꝛre iſt me goulouſe Je fas moulins meudꝛe a pooir Je fas poiſſons cuire et laueꝛ Tel office ai et tel meſtieꝛ Que chaſcun a demoi meſtieꝛ Je poꝛte nes dꝛomons et barges Qui ſont belles grandes et larges En [moy] prant on maint bon moꝛſiax Harens poiſſons et cras oiſſiaus De moi ſont li potage cuit Qui na du vin ſi com je cuit Puet bien de moi boire a ſon aiſſe Il neſt riens qui nait grant malaiſe Se je li fail a ſon beſoing Par tout le monde pres et loing Et gens et beſtes moꝛs ſeꝛoient Se de moi ſecouru neſtoient Et pour ce garde vous prenez Que leur folies ne pꝛenez Et leur oꝛgueil weillies abatre Devant vous ſe veullent eſbatre Neſt ce bien grant poſſeſcion Quant de moy ne font mille mencion Sans moi nus hons ne poꝛroit vivre Cil font fol et mauvés et yvre Qu'il les crien nen doutes pas Il en vendꝛont du trot au pas Si deues leur oꝛgueil refraindꝛe Le mal ont nen ne les doit plaindꝛe Car qui le mal fet et preſante De tel los doit avoir tel vente Et de ſi haut ſi vas venir Les teꝛres doit on maintenir Len doit les humbles eſleueꝛ Et loꝛguilleus mauvés greveꝛ Sus ces reſons que je propoſe Rendez moi dꝛoiturieꝛe choſe Et ma grant ſouueꝛainnete Ainſi com tous jours ai eſté Moy teingniez en juſte ſeſine Quar reſon et dꝛoiture ſi encline Quant li Diex d'amours la nouelle Oÿ: ſon conſeil apelle Vin grec et le vin degranache De leur conſeil point neſe chace Vin de chipꝛe et vin muſcade Y vindꝛent quant furent mande Et vins rinois qui la ſur vint Au conſeil eſtre li convint Pour ce que touz ſeul ne fu nie Soupecon auſi de partie Ne par deca ne par de la Le Dieu damoꝛs les apella Toute la cauſe adont leur mouſtre Sur ce plet grant choſe monte Ceans a grant foiſon de vins Ce poiſſe moi quant je iuins S'il ſe fuſſent entre tuez Ien fuſſe moquiez et huez De chaſcun qui ſiet ſus son ſueil Se je de vous nai bon conſeil Trop mal ſen yra mon afaire Je ne cuide avoir afeꝛe Qua .ii. parties ſeulement Oꝛ faut feꝛe a tous iugement A feꝛe a saint poꝛcain avons Dont la bouche ſouvent lauons Quar il es moult meschiers amis Et je ne meſtieꝛ danemis Se je weil faire ſon vouloir Liautre me feꝛont doloir Et dun autre ceꝛtainement Vins francois par le ſagement Et ſi eſt en ſa ſeignoꝛie Dont il avra plus foꝛt partie Et miex en ſeꝛa depoꝛtez Biaus ſeigneurs ſe me confoꝛtez Et conſeilliez en veꝛité En ce cas de peſiblete Car je vous di et vous creante Ceſt ce qui plus men eſpouente Ne meꝛveilles neſt ce me ſemble Sapelle vous ai touz enſemble Donnes moi conſeil auenant Grant meſtieꝛ en ai maintenant Et de li aue que je dirai Ne comment iaue partirai Tout ainſiques ceſt conſeilliez Le conſeil fu loꝛs eſueilliez Qui bonement le confoꝛta Et tel conſeil li rapoꝛta Comme poꝛ veü bien et gent Sire ces vins ſont grant gent Moult de manieꝛes de vins ſont Quan de partir moult ſe combatront Et la gueꝛre trop greveꝛa Qui toſt ne les a coꝛdeꝛa Et pour ceſte gueꝛre acheueꝛ Veil leur entr'eus pes oꝛdeneꝛ Car ſ'entr'eus ne faites acoꝛt Vous naures vin foible ne foꝛt Mes atouz jours ſeꝛont ſechiez Et ſe ſeꝛoit moult grant meſchiez Ceſeꝛoit aupais lamoꝛt Bon compaingnon ſeꝛoient moꝛt Quant vins ne poꝛroient venir Et pour vous eneſtat tenir Deuez liaue avoir aamie Viure ſans lui ne poez mie Par li vous vient toute richeſce Honneur valeur pris et nobleſce Tout avoir toute manentiſe Pour ce la tenez afranchiſſe Quar ſus tous a foꝛce et poiſance Avoir devez en li fiance Quar il neſt riens ou cil ſenbate Que ne mete jus et a bate Il neſt vin tant ſoit foꝛt vmonde Sel ſi met quel nel confonde Pour ce ligrant et li meneur La doutent et poꝛtent honeur Et dautre pert ſe vin parnage Ne venoit ce ſeꝛoit la rage Trop en auons defaut eü Dont le pais eſt deceu Puis que meſtieꝛ avez deceus Metes pes et acoꝛt entreus Tout ainſi le conſeil li diſt Li Diex damoꝛs li a loꝛs diſt Venez avecques moi tantoſt Laſſus u pales ci fiſt toſt En la ſale en eſt retoꝛnez Ou noblement fu atoꝛnez En haut ſa ſiſt en ſa chaieꝛe Son conſeil fiſt pꝛés de li treꝛe Si les apelle enceſte guiſſe Seigneurs avous tous redeuiſe Que tous pains ſont bons et tous vins Vous eſtez parens et voiſſins Si ne deuries anul temps Avoir ne courrous ne contens Je di et ſieſt maraiſon Chaſcuns eſt bons la ſeſon Et ſi vous di en loiauté Que chaſcun ſeſpeciaute A de bonté quautre na nie Sinen devez avoir envie En bon vin ſouent moult bien faut Sedont .i. autre nadefaut [C'eſt ſelon] les complecions Et des gent et de ioe et de regions Des vint chaſcun eſt bon ſanz doute Qui entemps et perdꝛoit en goute Chaſcun a ſon eſpecial Mes liaue a .i. dꝛoit communal Partout s'eſpant partout ſe met Detoutes choſe s'entremet Chaſcun en a neſeſiti Pour ce eſt il dꝛoit equite Quan ces [lieus] ſoit bien gardee Et de touz eſtas honnoꝛee Oꝛ ſoiez enſemble aliez Et em pez reconſiliez Quar quant a verité retaire Tous eſtes bons [et] neſceſaire Chaſcun de vous enſa ſeſon Entramez vous ſeingneurs baron Tous empes comme amis ſeꝛez Et en joie enſemble buurez Li vin qui ceſt acoꝛt oirent Pes et amour enſemble firent Et puis ont ſanz iaue beu Ainſi fu leur contens cheu Plus sentrameꝛent que devant De pou de pluie chiet grant vant