Puis que du lai ai coumencie
Ja n'i ert par nul trauail leſſie
les auantures que je ſai
Tous par rime les conterai
Em penſe ai et en talent
Que d'yonet vous cont avant
Icil qui gendꝛa yonet
Il ot a non nuſdumaret
Dont il fu nez et de ſon pere
Com il vint primes a ſa mere
Em /Bretaigne avoit jadis
Uns riches hons uielz et antis
De /cacruet fu auoez
Et du pais ſires clamez
La cité ſi eſt ſoꝛ /ditalas
Jadis i ot devez treſpas
Mout fu treſpaſſez en aage
Pour ce qu'il ot bon heritage
Fame priſt pour enfans avoir
Qui aprés lui fuſſent li hoir
De haute gent fu la pucele
Sage et coꝛtoiſe et foꝛment bele
Que a riche homme fu donne
Pour ſa biauté fu moult amee
Pour qu'en feroie autre parole
Ne n'ot ſ'en per deſc'a /nicole
Ne/tres qu'en /yllande de la
Grant pechié fiſt qui li dona
Pour ce quele ert et bele et gente
En li garder toꝛna ſ'entente
Dedens ſa rot l'a enſerree
En une grant chambꝛe pauee
Elle ot une ſoe ſeroꝛ
Vieille ert et vueue ſanz ſeigneur
Enſemble o la dame l'a miſe
Pour lui tenir plus en juſtice
Autres fames i ot ce croy
En une autre chambꝛe par ſoy
Mes ja la dame ne parlaſt
Se ſa uieille nel commandaſt
Ainſi la tint plus de ſet anz
Onques entre eulz n'oꝛent enfanz
Ne foꝛs de celle toꝛ n'iſſi
Ne poꝛ parent ne poꝛ ami
Quant il voloit aler couchier
N'i ot chamberlenc ne uiſſier
Qui en la chambꝛe oſaſt entrer
Ne devant lui cierge alumer
Mout ert la dame en grant triſtoꝛs
A lermes a ſoſpirs et a ploꝛs
Sa biauté part en tel meſure
Ce eſt cele qui n'en prent cure
De ſoi meiſme melz vouſiſt
Que moꝛs haſtiue la pꝛeiſt
Ce fu el mois d'auril entrant
Quant cil oiſel lieuent loꝛ chant
Li ſires fu matin levez
D'aler em bois ſ'eſt apreſtez
La uieille a fete lever ſus
Et aprés lui fermer les us
Cele a ſon coumendement
En une autre chambꝛe ſ'en uet
En ſa main poꝛtoit un ſautier
Ou le voloit uerſeillier
La dame ploꝛe en eſueil
Choiſi la clarté du ſouleil
De la uielle eſt aperceue
Qui de la chambꝛe eſtoit iſſue
Moult ſe plaignoit et ſouſpiroit
Et em ploꝛant ſe dementoit
Laſſe fet elle mar fui nee
Mout eſt dure ma deſtinee
En ceſte toꝛ ſui em pꝛiſon
Ja n'en iſtrai ſe moꝛte non
Ciſt uielz ialous de quoy ſe crient
Qui en ſi grant pꝛiſon me tient
Mout par eſt folz et eſbahiz
Il crient eſtre toz joꝛs trahiz
Ge ne puis au mouſtier venir
Ne le ſerviſe Dieu oyr
Se je poiſſe a gent parler
Et en deduit o lui aler
Ge li mouſtraſſe biau ſemblant
Ja ne n'euſſe je talent
M'alooit ſoient mi parant
Et li autre communement
Qui a ceſt ialox me donerent
Ne de ſon coꝛs me marierent
A foꝛt coꝛde trai et tir
Il ne poꝛrai jamés moꝛir
Quant il dut eſtre baptiſiez
Si fu el flun d'enfer plungiez
Durs ſont li nerf dures les uainez.
Qui de vif ſanc ſont toutes plainez
Mout ai oÿ ſouvent conter
Que on ſouloit jadis trouver
D'auantures en ceſt pais
Qui rachoient les penſis
Chevalier trouvoient puceles
A loꝛ talant gentes et beles
E dames trouoient amans
Biax courtois pꝛeus et uaillans
Si que blaſmees n'en eſtoient
N'es nus foꝛs elles n'es veoient
Se ce puet eſtre ne ce fu
Onques a nul eſt avenu
Diex de tout a pooſte
Il en face ma uolante
Quant elle ot fait ſa plainte iſſi
L'ombꝛe d'un grant oiſel choiſi
Par mi une eſtroite feneſtre
Ele ne ſet que ce puet eſtre
En la chambꝛe uolant entra
Giez ot es piez oſtoir ſembla
De cine mues fu ou de ſis
Il ſ'eſt devant la dame aſſis
Quant il i ot un poy eſté
Et ele l'ot bien eſgarde
Chevaliers biaus et gens devient
La dame a merveille le tient
Li ſans li remus et fremi
Grant pooꝛ ſon chief couri
Mout fu coꝛtois li chevaliers
Il la areſonna premiers
Dame fet il n'aiez pooꝛ
Gentilz oiſel a en oſtoꝛ
Se li degre vous ſont oſcur
Gardes que ſoiez aſſeur
Si faites de moy vostre ami
Pour ce ſui ge uenus ici
Se vos ai longuement amee
En mon cuer moult deſirree
Onques foꝛs vous fame n'amai
Ne jamés autre ne ferai
Mes ne pooie a vous venir
Ne foꝛs de mon pais iſſir
Se vous ne m'euſſiez requis
Pr puis bien eſtre vostre amis
Et la dame ſe raſeura
Son chief decouri ſi parla
Le chevalier a reſpondu
Et dit qu'elle en fera ſon dꝛu
S'en Dieu creüſt et ainſi fuſt
Que loꝛ amoꝛ eſtre peüſt
Car mout par a de grant biauté
Onques un jour en ſon ae
Si biau chevalier n'esgarda
Ne ſi bel jamés ne uerra
Dame fet il vous dites bien
Ne uoudꝛoie pour nule rien
Que de moy i ait acheſon
Meſcreance ne ſouſpecon
Ge croy tres bien le criatour
Qui nous geta de la triſtour
Ou /adans nous miſt nostre pere
Par le moꝛs de la pome amere
Il eſt et fu et ert touz joꝛs
Vie et lumiere as pecheoꝛs
Se vous de ce ne me creez
Voſtre chapelain demandez
Dites que mals vous a ſouſpriſſe
Si uolez avoir le ſeruiſe
Que Diex el mont eſtabli
Dont li pecheoꝛ ſont gari
La ſemblance de vous prendꝛai
Le coꝛs Damedieu receurai
Ma creance vous dirai toute
Ja ne ſerez de ce en dote
Elle reſpond que bien a dit
Delez li ſ'eſt couchiez el lit
Mes il ne vouſt a lui touchier
Ne d'acoler ne de beſier
A tant la uielle eſt reperiee
La dame trouva eſveilliee
Diſt li que tans eſt de lever
Ses dꝛas li voloit apoꝛter
La dame diſt qu'elle eſt malade
Du chapelain ſe pꝛaigne garde
Car grant pooꝛ a de mourir
La uielle diſt oꝛ ſoufferrez
Mes ſires eſt el bois alez
Nus ne uendꝛa caiens foꝛs moy
Moult eſt la dame en grant effroy
Semblant fiſt quele ſe paſma
Cele la vit mout ſ'eſmaia
L'uis de la chambꝛe a defferme
Si a le pꝛeſtre demande
Et cil i vint plus toſt qu'il pot
Coꝛpus Domini apoꝛter
Li chevaliers l'a receü
Le vin de calice a beu
Li chapelains ſ'en eſt alez
Et la uielles a les huis fermez
La dame giſt lez ſon ami
Ains ſi biau couple ne ui
Quant on aſſez ris et ioe
Et de leur priuete conte
Li chevaliers congié a pꝛis
Raler ſ'en uet en ſon pais
Elle le prie doucement
Que il la reuoie ſouent
Dame fet il quant vous plera
Ja heure ne treſpaſſera
Mes tel meſure en eſgardez
Que nus de nous ſoit encombꝛiez
Ceſt uielle nous traira
Et nuit et jour nous guetera
Elle aperceura vostre amoꝛ
S'il contera a ſon ſeignoꝛ
S'iſi avient com je vous di
Et nous ſoumes iſſi trai
Ne m'en puis mie departir
Que moy n'en eſtuece moꝛir
Li chevalier a tant ſ'en uet
En grant ioir ſa cuir let
El demain lieve toute ſaine
Mout fu hetie la ſemaine
Son coꝛs tenoit en grant chierte
Toute recoure ſa biauté
Oꝛ li pleſt plus a ſeioꝛner
Qu'en nul autre deduit aler
Son ami puet ſouent vëoir
Et ſa joie de lui avoir
Deſque ſes ſires ſ'en depart
Et nuit et joꝛ et toſt et tart
Elle l'a tout a ſon pleſir
Oꝛ l'en doinſt Diex longues ioir
Pour la grant joie ou elle fu
Que ſouent puet voir ſon dꝛu
Eſtoit touz ſez ſemblans changiez
Ses ſires fu mout ueſiez
En ſon courage ſ'apercoit
C'autrement ert qu'il ne ſoloit
Meſcreance a vers ſa ſeroꝛ
Si la miſt a reſon un joꝛ
Diſt li que moult a grant merveille
Que la dame ſi ſ'apareille
Demanda lui que ce devoit
Sa uielle diſt quel ne ſavoit
Car nus ne puet parler a li
N'ele ne voit dꝛu ne ami
Foꝛs tant que ſole remanoit
Plus uolentiers qu'el ne ſoloit
De ce ſ'eſtoit aperceue
Dont l'a li ſires reſpondue
Par foy fet il ce croy ge bien
Oꝛ vous eſtuet fere une rien
Au matin quant g iere levez
Et vous avrez les us fermez
Fetes ſemblant de hoꝛs iſſir
Si la leſſiez ſole geſir
En un ſecré leu vous eſtez
Et ſi uoies et eſgardez
Ce que puet eſtre et dont ce vient
Qui en ſi grant joie la tient
De ce conſeil ſunt departi
A las com ierent mal bailli
De ce que on les uet guetier
Pour eulz trair et engregier
Tiers joꝛ apꝛés ce conter
Fet li ſires ſemblant d'eſrer
A ſa fame diſt et conte
Que li roys l'a par bꝛief mande
Mes haſtiuement reuendꝛa
De la chambꝛe iſt l'uis referma
Dont eſtoit la uielle levee
Derriers une coꝛtine eſt alee
Bien poꝛra oir et vëoir
Ce qu'elle couoite ſavoir
La dame ne jut pas ne doꝛmi
Car mout deſirre ſon ami
Venus i eſt pas ne demoure
Ne treſpaſſe terme ne hoꝛe
Enſemble font joie moult grant
Et par parole et par ſemblant
De ſi que tans fu de lever
Ca dont l'en eſouoit aler
Ele le vit et eſgarda
Coument il uait et il ala
Mes de ce ot ele pooꝛ
C'omme me vit et puis oſtoꝛ
Quant li ſires fu reperiez
Qui n'eſtoit gueres eſloigniez
La uielle li a tout mouſtre
Du chevalier la verité
Mout en eſt dolens et penſis
De l'enging fu haſtis
A ocirre le chevalier
Quatre bꝛoche a fet foꝛgier
D'acier mout agues devant
Soz ciel n'ot raſoir plus tranchant
Quant il les ot appareilliees
Et eſchies devant eſtochiers
Soꝛ la feneſtre les a miſes
Bien ſerrees et ien aſſiſes
Par ou li chevaliers paſſoit
Quant a la dame reperoit
Hé; Diex qu'il ne le ſet ou voit
Et la traiſon n'apercoit
El demain a la matinee
Li ſires lieve a la joꝛnee
Et diſt qu'il veut aler chacier
La uielle le uet convoier
Puis ſe recouche pour doꝛmir
Car ne pooit le jour choiſir
La dame uielle ſi atent
Celui quelle aimme loyaument
Et dit c'oꝛ poꝛroit bien venir
Et eſtre o lui tout a leſir
Si toſt com el l'ot demande
N'i a plus gueres demoure
En la feneſtre vint uolant
Mes les bꝛoches furent devant
L'une le fiert par mi le coꝛs
Li ſans uermalz en ſailli foꝛs
Quant il ſe ſeüſt a moꝛt n'avrez
D'eſtre ſoꝛ eulz eſt entrez
Devant la dame el lit deſcent
Que tout li dꝛap en ſont ſenglent
Ele voit le ſanc et la plaie
Moult angoiſſement ſ'eſanaie
Il li a dit ma douce amie
Pour vous part ge la vie
Bien le vous di qu'il auendꝛoit
Vostre ſemblans vous occirroit
Quant elle l'oÿ dont elle chiet pas[mee]
Tote fu moꝛte une linee
Il la confoꝛte doucement
Et dit que d'eulz n'i vaut neent
Que de lui eſt groſſe d'enfant
Un filz auſſi preus et vaillant
Icil la reconfoꝛtera
I uonet noumer le fera
Cil uengera et lui et li
Il ocira ſon anemi
Il n'i poit demoꝛer mes
Car la plaie ſainnoit adés
A grant douloꝛ ſ'en eſt partis
Ele le ſeüſt a moult haus cris
Parmie feneſtre ſ'en iſt
C'eſt a merveille qu'il ne ſ'ociſt
Car bien avoit vint piez de haut
D'ilec ou il a pꝛis ſon ſaut
Ele eſtoit nue en ſa chemiſe
Ou la trace du ſanc ſ'eſt miſe
Qui du chevalier degotot
Soꝛ le chemin ou il uolet
Icel ſentier erra et tint
Des i c'a une hoge vint
En cele hoge ot une entrer
De ce ſanc fu toute aroſer
Ne pot avant nient vëoir
Dont cuidoit elle bien ſavoir
Que ſes amis entrez iſſoit
Dedens ſe met a grant eſploit
El n'i trouva nule clarté
Tant a le dꝛoit chemin erre
Que foꝛs de la hoge eſt iſſue
Et en un moult biau pꝛe venue
Du ſanc trouva l'erbe moilliee
Dont ſ'eſt ele moult eſmaiee
La trace en fu par mi le pꝛe
Aſſez pꝛés vit une cité
De mur fu cloſe tout entoꝛ
N'i ot meſon ſal ne toꝛ
Qui n'aparuſt toute d'argent
Mout ſont riche li mandement
Duers le boꝛc ſont li marois
Et la foꝛeſt et li deſtrois
De l'autre part vers le doion
Coꝛt une eue tout enuiron
Iluec arriuoient les nes
Plus i avoit de trois cens tres
La poꝛte aval fu deffermee
La dame eſt en la vile entree
Touz jours aprés le ſanc novel
Par mi le boꝛc duſc'au chaſtel
Onques nulz a lui ne parla
N'ome ne fame n'i trova
El pales vint le puiement
De ſanc le trouva tout ſanglant
En une baſe chambꝛe entra
Un chevalier doꝛmant trouva
Nel conut pas ſi va avant
En une autre chambꝛe plus grant
Un lit i trove nient plus
Ou uns chevaliers geſoit ſus
Elle ſ'en eſt outre paſſee
En la tierce chambꝛe eſt entree
Le lit ſon ami a trové
Li pecol ſunt d'oꝛ eſmere
Ne ſai mie les dꝛas pꝛiſier
Les cierges et li chandelier
Qui nuit et joꝛ ſunt alume
Valent tout l'oꝛ d'une cité
Si toſt com ele eſt la uenuee
Li chevaliers l'a coneue
Avant ala toute effree
Par deſſoz lui cal paſmee
Cil la moꝛt qui foꝛment l'aimme
Maleure foꝛment ſ'eſclaſme
Quant du paſmer fu reſpaſſee
Il l'a doucement confoꝛtee
Bele amie pour Dieu merci
Alez vous en tolez de ci
Sempres moꝛrai enmi le joꝛ
Caiens avra ſi grant doloꝛ
Se vous i eſties trouvee
Toute en ſeriez toꝛmentee
Bien ert entre mes gens ſeu
Qu'il m'ont poꝛ vostre amoꝛ perdu
Poꝛ vous ſui dolens et penſis
La dame li a dit amis
Miex vueil enſemble o vous moꝛir
Qu'o mon ſeignoꝛ mainne ſouffrir
S'a lui reuois il m'ocirra
Li chevaliers le ſauuera
Un anelet li a baillie
Si li a dit et enſaignie
Y a tant com el le gardera
A ſon ſeignoꝛ n'en memberra
De nule rien qui fere ſoit
Ne ne l'entendꝛa en deſtroit
S'eſpee li coumande et rent
Puis la coniure et li deffent
Que jamés hons n'en ſoit ſeſiz
Mes bien la gart a es ſon fiz
Quant il ſera creuz et granz
Et chevaliers pꝛeus et uaillanz
A une feſte ou elle ira
Son ſeignoꝛ et lui iuerra
En une abaie uendꝛont
La moꝛt renouueler oꝛront
Par la tombe d'un marbꝛe bis
Et que il fo a toꝛt occis
Iluec li baillera l'eſpee
L'aventure li ſoit contee
Quant tout li a dit et conte
Un chier bliaut li a done
Si li coumanda a veſtir
Puis l'a fete de lui partir
Ele ſ'en va l'anel empoꝛte
Et l'eſpee qui la confoꝛte
A l'iſſue de la cité
N'ot pas demie leue alé
Quant ele oÿ les ſains ſoner
Et le duel el chaſtel lever
Pour leur ſeignoꝛ qui demoit
Elle ſet bien que moꝛs eſtoit
De la douloꝛ que el en a
Quatre fiees ſe paſma
Quant de la paſmoiſon revint
Vers la hoge ſa voie tint
Dedens entra outre eſt paſſee
Si ſ'en reua en ſa contree
Enſemblement o ſon ſeignoꝛ
Demoꝛa mains dis et maint joꝛ
Que de ce fet ne la jeta
Ne ne deſtruit ne naira
Ses fiz fu nez et bien noꝛris
Et bien gardes et bien iois
Ionet le firent noumer
El regne ne pot homs trouver
Si bel ſi pꝛeus ne ſi vaillant
Si large ne ſi deſpendant
Quant il fu uenus en ae
A chevalier l'ont adobe
En l'an meiſmes que ce fu
Miex com il eſt avenu
A la feſte /ſaint aaron
Com celebꝛoit a/carlion
Et enpluſeurs autres raignes
Li ſires avoit eſté mandes
Qu'il i alaſt o ſes amis
A la coſtum du pais
Sa fame et ſon filz menaſt
Et richement ſ'apareillaſt
Iſſi avint aieſſont
Mes il ne ſeuent ou il vont
Mes enſemble o eus vint .i. meſchin
Qu'il amenoit a dꝛoit chemin
Tant que vindꝛent a un chaſtel
En tout le ſiecle n'ot plu bel
Une abeie avoit dedens
De moult religioſes gens
Li varles les i herberia
Qui ala feſte le mena
En la chambꝛe qui fu l'abé
Bien ſunt ſervi et envoia
El demain vont la meſſe oir
Puis ſ'en uoloient departir
L'abes ala eulz parler
Mout les pꝛia de ſeioꝛner
Si loꝛ moꝛſterra doꝛtoir
Sen chapitre ſen refectoꝛ
Et com il ſunt bien herbergie
Li ſires leur a otrie
Le joꝛ quant il oꝛent diſne
Es officines ſunt alé
El chapitre entrent avant
Une tombe i trouuerent grant
Couuerte d'un paile roe
D'un chier oꝛffroy par mi bende
Au chief as piez et as coſtez
Avoit vint cierges alumez
D'oꝛ fin oꝛent li chandelier
Dame triſtes li entenſier
Dont il entenſeront le joꝛ
Cele tombe par grant ennoꝛ
Il ont demande et enquis
A ceus qui erent du pais
De la tombe qui elle eſtoit
Et quelz hons fu qui i geſoit
Cil coumencerent a plourer
Et em ploꝛant a reconter
Que c'ert li miendꝛes chevaliers
Et li plus foꝛs et li plus fiers
Li plus biaus et li plus ames
Qui jamés ſoit el ſiecle nes
De ceſte terre ot eſté roys
Onques ne fu nus ſi coꝛtois
A /dacarnen fu entrepꝛis
Pour l'amoꝛ d'une dame ocis
Onques puis n'euſmes ſeignoꝛ
Ainz avons atendu mains joꝛ
Un filz qu'en la dame engendꝛa
Si com il dit et coumanda
Quant la dame oÿ la nouele
A haute vois ſon filz apele
Biaus fiz fet elle avez oÿ
Que Diex vous a amenez ci
C'eſt uostres peres qui ci giſt
Que ciſt uiellars a toꝛt occiſt
Oꝛ vos coument et rent m'eſpee
Que j'e aſſez lonc tans gardee
Oiant tous li conneü
Qu'il l'engendꝛa et ſes fiz fu
Com il ſouloit venir a lui
Et ſes ſires le trai
La uerite li a contee
Soꝛ la tombe cheï paſmee
En la paſmoiſon deuia
Ainc puis a homme n'i parla
Quant ſes fiz vit que moꝛe fu
Son parraſtre a le chief tolu
De l'eſpee qui fu ſon pere
Avoit uengie lui et ſa mere
Puis c'ainſi eſtoit avenu
Et par la cité fu ſeu
A grant ennoꝛ la dame ont priſe
Et el ſarqueu poſee et miſe
Delez le coꝛs de ſon ami
Diex leur face bonne merci
Leur ſeingneur firent d'yonec
Ains que il departiſt d'ilec
Ciſt qui ceſte auanture oꝛrent
Lonc tans aprés un lai en firent
De la plainte et de la douloꝛ
Que ciſt ſouffrirent poꝛ amoꝛ