Par un mardi au point du jour
Me levai qu'ains ne fis ſejour
L'an .xxx. ou moys de juing
Si m'en aloie tout enjuing
Par mi .i. veꝛgieꝛ veꝛdoient
Et le chant d'un oiſſel ſuiuant
Qui moult me faiſſoit eſioir
Car gracieus ieꝛt a l'ouir
De bꝛanche en bꝛanche voletoit
Et de chanteꝛ ſ'esioiſſoit
Si foꝛment qu'a ſon ioli ſon
M'endoꝛmi deſous .i. buiſſon
C'onques l'oiſſelet n'eſloinguai
Mais en cel doꝛmir me ſongay
Que je eſtoie a /bec oiſſel
Ou /.karlemagne. et maint damoiſſel
Ieꝛent alez eſbanoieꝛ
La trouvai deſous .i. ioiſieꝛ
Seant aſſez pꝛés de la poꝛte
Raiſon une dame qui poꝛte
Toute honneur en li depoꝛtant
Qui moult ſ'aloit deſconfoꝛtant
Car meſdis la pute poꝛtee
De /court roumain. l'ot hoꝛs poꝛtee
Oꝛ c'eſt chiez le conte en batue
Triſte dolente et iracue
Pour lui garantir a ſa court
Mais elle a moi tantoſt acourt
Ambedeus les iex leꝛmoiant
Et ſus le ſiege veꝛdoiant
Sous une ante de fruit chargie
S'aſiſt les moy par compaignie
Comme dame de bon afaire
Et je enpꝛis grant joie a faire
Car ſa compaignie oï moult chieꝛe
Ainſi com je levai la chieꝛe
Quant l'oï reconnue au parleꝛ
Choiſſi deſus moi devaleꝛ
Une tant groſſe et laide yraigne
Que de la hydeur je me ſaingne
Qui a une bꝛanche pendoit
Par .i. fil dont elle aualoit
Et rampoit de bas contremont
De quoi je me merueillai moult
Apres et que ce povoit eſtre
Et qu'elle ieꝛt venue en ſi bel eſtre
Ainſi que le bas deſcendoit
La mouſtrai raiſon de mon doit
Car moult eſtoit laide et enflee
A la mouche c'eſt refrotee
Ou pꝛis ot ſon pꝛemieꝛ venin
Si eſgardaſmes ſon chemin
Oꝛ entendez quelle aloit querre
Un crapout venime en terre
Qui couchiez ieꝛt a la rouſee
Deſus l'eꝛbe pence enueꝛſee
Pour avoir la douceur du vent
Et li yraigne moult foꝛment
De ſa pance ou pis le piquoit
Si foꝛt que tout l'enuenimoit
Et li crapous tantoſt le cours
Couroit querre au plantain ſecours
Dont fait avoit ſa pourueance
Et y teꝛdoit poitrine et pence
Tant que tous li venins iſſoit
De ſon coꝛs auſin gariddoit
Tantoſt qu'a l'eꝛbe eſtoit frotez
Eſtoit de touz maus neſtoiez
Et quant il eſtoit bien gueꝛis
Du raleꝛ n'eſtoit pas marris
Veꝛs l'iraigne mais tout courant
S'en retoꝛnet vers li courant
Ainſſi les vi .iii. fois ou .iiii.
Enſemble piquieꝛ et combatre
Car li crapous tout dis ſ'ailloit
A l'eꝛre ou il ſe refrotoit
De quoi il eſtoit pourveus
Mais il fu percus et veus
De l'iraigne oꝛrés comment
Elle tray laidement
Et comme elle ot pute pensee
Elle fiſt nouvelle fillee
Et veꝛs teꝛre jus devala
Tant qu'a l'eꝛbe jus ſ'avala
Si la de ſa touaille encloſe
En tour a la reonde et moꝛſſe
De ſon venin par tel moꝛſure
Que mourir le fiſt a moꝛt ſure
Le crapout qu'elle ala remoꝛdꝛe
Car quant il ſe cuida ramoꝛdꝛe
A garant pour gardeꝛ de moꝛt
Aleꝛ le convint a ſa moꝛt
Ainſi fu il trais et moꝛs
Par la moꝛſure du mal moꝛs
Loꝛs demandai dame raiſon
Que rendꝛe me vouſiſt raiſon
Pour die de ce quelle veoit
Et a quoi tourneꝛ ſe povoit
Freꝛe dit elle biax amis.
Cilz mouſtres que Diex t'a tramis
Mouſtre qu'ainſſi va tout li mondes
Cil qui plus doivent eſtre mondes
Sont de mal plus abandonez
Dont li plueples eſt vergondez
Celle yraigne que voi la pendꝛe
Au filet monteꝛ et deſcendꝛe
Si delie que peꝛceuoir
Nel puet nulz de loing ne vëoir
Ce ſont li menteur traitour
Qui vont les grans ſeigneurs entour
De tour en tour ſi toꝛnoiant
Qu'il les font vivre en beſtoꝛnant
Le fil qui ſi deſlie tourne
C'eſt le cueꝛ couveꝛt qui beſtoꝛne
L'onnour a biau ſemblant mouſtreꝛ
Dont il fait maint bien beſtourneꝛ
Li crapous eſt li menus pueples
Qui met ſon chatel et ces muebles
En la Dieu guarde et ſe refieꝛt
Quant il voit que on le ſeurquieꝛt
A ſon ſeigneur garent requieꝛt
Si com li crapous au plantain
Qui y trouva .iii. foys de plain
Sa ſanté et ſa gueꝛiſon
Mais tu veis la traiſon
De l'yraigne et en tel manieꝛe
Le te di par parole entieꝛe
Eſt il de ce pueple menu
Quant il cuide eſtre ſouſtenu
De ſon ſeingneur et garentis
Par bourdeurs traiteurs mentis
Le trueve ſi envenime
D'acointement faus empene
Qu'a moꝛt ſon livres et ravis
Tel gent ſont pire qu'anemis
Quar en trair les bons decoiuent
Que par les granz de[s] petis boiuent
Souvent le ſanc et la ſuour
Et de teniebꝛes font luour
Si que de mal poꝛter ſe peꝛent
Que li petit entr'eus compeꝛent
Quant il ont .i. pꝛeudomme point
De leur venin il ne mueꝛt point
Par le garant de ſon ſeigneur
Loꝛs font il traiſon greigneur
Le plantain vont envenimeꝛ
Qui ſe connoiſt en mon rimeꝛ
Par cel plantain poons entendꝛe
Les ſeigneurs qui doivent deſfandꝛe
La gent baſſe de moꝛt guardeꝛ
S'a dꝛoit vouloient regardeꝛ
Ou les trueve ſi entechiez
De venin c'eſt duelz et meſchiez
Quant li haut homme de haut pris
Sont ainſi des maues ſurpris
Ceꝛtes trop en font a reprendꝛe
Si fait bon del ſavoir emprendꝛe
La gloſe et la ſenefiance
Si vous en dirai la ſamblance
Et la veꝛité pour connoiſtre
Ce ſont li vice c'on voit croiſtre
De plus en plus et tant monteꝛ
Que les vertus font ſeurmonteꝛ
Si com li crapous le t'aprent
Qui ſon venin conſoit et pꝛent
Sa douleur et ſa pulentine
A l'iraigne pute voiſine
Qui ſon venin conſoit et pint
A la mouche et en tel point
C'on ci vient li venins de poindꝛe
De point en point mais ne ſet poindꝛe
Ne mouſtreꝛ ne dire les poins
Qu'aſſez pires ne ſoit li poins
De langue de meſdiſſans pointe
Que de nus venins ne de pointe
De coutiau. tant ſoit apointiez
Dont eſt mal haus hons acointiez
Qui a a tel gent acointiſſe
Ne qu'a eulz a en nulle guiſſe
Preuete ni acointement
Si faite gent ceꝛtement
Ne deuſſent eſtre acointiez
Mais mal venus et hoꝛs chaciez
Pour Dieu riches hons nes eſcoutez
Mais la pointure d'eulz redoubtez
Que tu ne ſoiez eſcharniz
Et des pꝛeudommes te guarniz
Dont pꝛoufit bient et mueꝛt dommages
Et ſi en vendꝛa bons uſages
Car n'eſt treſoꝛs d'oꝛ ne d'argent
Qu'acointiſſe de bonne gent
Et cilz qui des mauvez ſ'aproche
Aquieꝛt ſi vilain repꝛoche
Que touz jours li eſt repꝛochiez
Dont ti pren gardez et n'aprochiez
Gent de vilain repꝛochement
S'a bien veus faire aprochement
Et tout ton lignage honoꝛeꝛ
Plus ne puis o toy demoureꝛ
Mais je te di qui fait raiſon
A itant del aleꝛ ſ'atoꝛne
Dame raiſons et je retoꝛne
Mon chief auſſi comme eſtourdiz
Si m'esueillai/ ci faut li diz
De l'iraingne oꝛ y pꝛaingne guarde
Qui ſe veut metre en bonne guarde