Qui ce livre vouldꝛa entendꝛe
Moult de bien y poꝛra apꝛendꝛe
Que amaſſer plenté d'avoir
Et qui tendꝛa ces paraboles
Ces examples et ces friuoles
A moquerie ne a truffe
Bien ait qui li donra buffe
Un leu qui fu de male part
Glout et enfrun et de mal art
S'en oſſa par meſauenture
De l'os d'une chieure moult dure
Quant en oſſe fu ſi requiſt
Les beſtes ſauvages et diſt.
Que qui l'os oſter li poꝛra
Quant guerredon li en fera
Les beſtes parlerent enſamble
Par foy diſt renart il me ſamble
Que la grue bien le guerroit
Se entremetre ſ'en voloit
Le leu le commence a pꝛier
Quele ſe haſt de li aidier
Et quanqu'ele demandera
Par ſa foy il li paiera
La grue ſi crut ſa parole
Sa teſte et ſon col comme fole
En la gueule au leu a lanciee
Hoꝛs en treſt l'os ſi ſ'eſt dꝛeciee
Et dit au leu que il li doit
Grant loier et que il le poit
Diſt le leu moult t'en dois pꝛoiſier
Quant de la gueule a l'adverſier
Es iſſue ſans mal avoir
Autre loier n'en pues avoir
Qui a tel ſert il doit apꝛendꝛe
Que guerredon n'en doit atendꝛe
Mais douter ſe doit de domage
Et garder ſ'en ſe il eſt ſage
Bataille fu d'oiſiaus volans
Encontre les beſtes courans
Grant et moꝛtel et perilleuſe
Et de chaſcune part douteuſe
La leur fu plaine de boiſdie
De barat et de tricherie
Le chat hua a ſon lait coꝛs
Qui puis en fu a honte hoꝛs
Il ſ'a penſa que il faindꝛoit
A chaſcun quides ſiens ſeroit
Et quant enſamble chapleront
De ceulz ſe tendꝛa que vaincront
Aus oꝛeilles et a la teſte
Sambloit miex .i. chat qu'autre beſte
Aus eles a oiſel ſambloit
Raiſon eſt car oiſel eſtoit
Sa fauſſeté ſi fu ſceue
Et des .ii. pars aperceue
Chaſcuns le het et le deſfie
Nulz ne fu au las en ſaye.
Le loſengier ſi com me ſamble
Quant il voit ſes voiſins enſamble
Troublez faint par loſengie
A chaſcun quees de ſa partie
En l'oꝛeille va l'un blamant
A l'autre en refait autretant
La haine fait confermer.
Que il fait ſambler d'afiner
Quant ſa fauſſeté eſt ſceue
Et des .ii. pars aperceue
Chaſcuns le het n'en doutez mie
Et refuſe ſa compaignie
Come l'aleur eſt demenez
Qui d'eſtra[n]ges eſt de pꝛiuez
Fu hais par ſa tricherie
Mal ait cil qui vit de tel vie
La mouche a eſté de bataille
.I. toꝛel fier et oꝛgueileus
Et dit qu'il nel doute maaille
Et le deffi a a l'eſtreus
Quant le toꝛel a deceu
Que la moulche l'a en vilté
Dire et d'oꝛgueil ſ'eſt eſmeü
Et hulle et fait grant tempeſte
La mouche dit ne te trauaille
Trop avras demain a ſoffrir
Moie eſt l'onnoꝛ de la bataille
Quant ce vendꝛa au departir
Dit le toꝛ ſe je te teniſſe
Je te teniſſe a eſcient
Que tel cop du pié te feriſſe
Et moꝛir a tres grant toꝛment
Diſt la mouche ſire toꝛel
Soiez ycy demain ſans faille
Sachiez vous y lairez la pel
Car g'i ſerai comment qu'il aille
Le toꝛel ſi n'oblia mie
Ice que la mouche li diſt
Ou champ vint plain de felonie
Vllant et grant tempeſte fiſt.
Et quant la mouche l'a veü
Si vola en l'air par deſſeur
Et diſt ſire trop es meu
Pres eſtes de coꝛre moi ſeure
Vous en ſerez poꝛ fol tenu
De tous ceulz qui vous ont veü
Nous ne ſomes pas par ygal.
Tu es .i. grant toꝛel coꝛnu
Et je .i. eſcuireul menu
Tu te dois combatre au cheval
Chaſcuns ſe moquer du toꝛel
Qui virent mener tel revel
Comme .i. taon qui riens ne monte
Avtreſſi du foꝛt damoiſel
Quant il ſe pꝛent a .i. harel
Honneur n'en puet avoir mais ho[n]te
Li riches hons de grant pooir
Ne doit pas grant honoꝛ avoir
D'eſtriuer a .i. non puiſſant
Donner li doit de ſon avoir
Par raiſon et faire aſſavoir
Qu'il le lait non pas aytant
Uns hons fu qui .i. aſne avoit
Qui ſa beſoigne li faiſoit
Et ſi eſtoit batus ſouvent
Ne autre loier n'en avoit
Foꝛs les chardons que il menjoie
Dont il avoit eſcherſement
Un joꝛ ſe giſoit en l'eſtable
Et n'ot eſtrain chardon ne paille
Son meſtre eſgarda qui menioit
Le pain net et la char qu'il taille
Qu'il tent a ſon chien et li baille
Quant en l'eſpaule le feroit
Il ſ'a penſa que il n'avoit
Foꝛs toꝛment de ce qu'il faiſoit
Et le chienn ert ſi a aiſe
Poꝛ la joie queil menoit
A ſon meſtre et a ſa meſtreſſe
Il penſa que auſſi fera
Et que ſon meſtre ioura
Savoir ſe il l'en ameroit
Des piez encontre li ſaudꝛa
Et en l'oie le ferra.
Auſſi comme le chien faiſoit
Il viet quel n'ont de riens tenu
A ſon meſtre eſt errant venu
Des piez devant l'a acolé
Puis l'a en l'oie feru
Du pié deſtre qui ferre fu
A po qu'il ne l'a afole
Aus dens l'a par l'eſpaule pꝛis
Et eſtraint et a terre mis
Sus le ventre li eſt montez
Et quant ce virent ces amis
Ses ſergens ſa fame et ſes filz
L'aſne ont batu et tempeſte
Il cuident qu'il ſoit foꝛſene
L'oïe l'ont et enchaine
Si que il ne ſe pot bouger
Oꝛ eſt l'aſne mal aſſene
Car batus eſt et mal mene
Et ſi n'a que il puiſt mengier
Celi eſt fol a eſcient
Qui de ce qui ne li apent
S'entremet et fait pꝛiſautier
Comme l'aſne qui folement
Moult parchei en grant toꝛment
Voult tolir ah chier ſon meſtre
Li leus ſ'en entre en une lande
Souffreteus foꝛment de viande
Si erra tant qu'il ot veü
Une vacherie moult grande
Oꝛ a il tot ce qu'il demande
De coꝛre a eulz fu eſmeü
Les chiens qui les bꝛebis gardoient
Si voient que les leus venoient
Mengier et tuer les bꝛebis
Du grant maltalent qu'il avoient
Les chiens contre les leus en parloient
Tant que les leus ſ'en ſont foui
Oꝛr oez que les leus feront
Par traiſon ſe vengeront
Des chiens qu'il ne pueent trouver
Et puis les bꝛebis mengeront
Si que ja une n'en lairont
Poꝛ tant qu'il la puiſſe trouver
Dont ont les leus fait aſſavoir
Aus bꝛebis ſ'il veulent avoir
Pais a eulz a toute loꝛ vie
Les chiens leur feront faire avoir
Qui faire en puiſſent leur devoir
Car vers eulz ont grant felonnie
Les bꝛebis ſ'eſiouent moult
De la requeſte que il ont
Les chiens leur ont abandonnez
Puis les mouſtrent la ou il ſont
Ou ſe doꝛmoient en .i. mont
Erranment furent deuourez
Oꝛ pueent pꝛendꝛe les bꝛebis
Car ja n'en ſeront contredis
Moꝛs ſont leurs chiens Et leurs gagnons
Tous ceulz ſont folz et mal bailli
Qui baillent a leurs ennemis
Leurs eſpees ne leur baſtons
Vous poez bien ceſt examplaire
Oiant ſages et fox retraire
Celi eſt folz qui ſa deffenſſe
Abandone a ſon aduerſaire
Bien en poꝛroit a mal Chief traire
Qui meſtre en a ſi y penſe
Une ſoꝛis paſſer voloit
.I. flueue mais el ſe doutoit
Quel ne noiaſt ſ'el ſ'i meiſt
Et que jamais ne ſ'en iſſiſt
Une raine a aperceue
Qui du flueue ſ'en eſt iſſue
Poꝛ Dieu li pꝛia humblement
Qu'il la conſeillaſt loiaument
De paſſer l'yaue a ſauveté
Si fuſt avec ſon parenté
Qu'il deſire moult a vëoir
Com foꝛment ſont recce d'avoir
Diſt la ſoꝛis je t'aiderai
Volentiers et en bone foy
Et quant de l'autre part ſeras
Tout eſt tien quanque tu verras
Poꝛ ce li dit qu'ele penſoit
Que a l'yaue l'enuoieroit
.I. fil pꝛiſt lueques trouva
L'un bout en ſon pié li loia
Et l'autre au pié de la ſoꝛis
Et puis ſe ſont ou flueue mis
La rainne en l'yaue ſ'eſt lanciee
La ſoꝛis a a li lanciee
Tant a par l'yaue trainee
La ſoꝛis quel fu deuiee
Sa volenté a acomplie
Par barat et par tricherie
Par aventure ainſi avint
C'un eſtouffle par ilec vint
La ſoꝛis flotant ot veue
Si toſt com l'ot aperceue
A la ſoꝛis ſ'eſt arreſtee
La raine au bec a apoꝛtee
Qui ſ'eſtoit au fil atachiee
Ainſi fu la ſoꝛis vengie
Car la rainne qui l'ot tuee
En toſt du buſard deuoꝛee
Quiconques veult que l'en ſe fie
En li et que le ſ'i afie
Aidier li doit ou il li die
Que il n'eſt pas de ſa partie
Car qui oevre de traiſon
Avoir en doit mal guerredon
Un vouſtre viel et de grant aage
Emplume et plain de malage
Veoit qu'il ne ſe puet aidier
Ne ſa vitaille pourchacier
A un aigle par aventure
En tourna ſa meſauenture
Les aigles a mengiez treſtous
Car il eſtoit trop fameillous
Dedens le ni ſ'eſt acroupis
Le miex qu'il puet ſ'eſt atapis
Et quant l'aigle apoꝛtoit paſtel
Au bel recevoit le moꝛſel
Long temps l'a l'aigle apaſtelee
Et noꝛrie et ſaoulee
N'onques de riens ne ſ'app[er]cut
Tant comme le voultre ſe tut
.I. joꝛ fu qu'il fiſt grant tempeſte
Qui moult mal fiſt a mainte beſte
De pluie et de vent ce me ſamble
De ſcriſtre et de tonnoure enſamble
Et quant le tonnoirre failli
Et le temps ſe fu embelli
Delez ſon ny l'aigle ſeoit
Qui durement mouilliee eſtoit
Ses elles fiert et ſi ſes queult
Tout trambla[n]t du froit que il eut
A l'eſgreſſe diſt qu'il eſtoit
Tout entrepꝛis et ſi n'avoit
Onques mais ſi mal temps veü
L'eſtouffle ne ſ'eſt pas teu
Et li diſt ains que fuſſes ne
Fui je jadis plus mal mene
D'une tempeſte de gales
Tele ne fu ne n'ert jamés
Quant ce ot dit ſi ſ'apercut
La teſte baiſſa ſi ſe tut
L'aigle et l'aigleſſe l'ont oÿ
Qui n'en furent pas eſjoy
Diſt l'aigle tu n'es pas mon filz
Que ainques feüſſes nez vis
Tu nous as nos faons mengiez
Maintenant en ſerons vengiez
Plus toſt qu'il vindꝛent a li vindꝛe[n]t
Aus bes et aus onques les priſtrent
Tous les membꝛes li deſpecierent
Et hoꝛs du coꝛps li errachierent
Sa traiſon po li valut
Car par ſa traiſon moꝛut
Encoꝛe ſ'il ſe fuſt teu
N'eult il eſté aperceue
Mais pechié et ſa
Langue enſamble.
L'encombꝛerent ſi com moy ſamble
Il tourne ſouvent a contraire
A parler quant on ſe doit taire
Car quant on doit as gens parler
L'en ſe doit premiers aviſer
Que l'en ne die vilonnie
Ne choſe qui toure a folie
Un lyon de noble figure
S'acompaigna par aventure
A .i. aſne lait et chetif
Qui moꝛt ſambloit trop miex que vis
En une foꝛeſt en entrerent
Les beſtes ſauvages trouuerent
Qui poꝛchacoient leur paſture
Chaſcune ſelon ſa nature
Sachiez que toutes ſ'enfouirent
Si toſt comme le lyon virent
Car toute beſte crient lyon.
Par nature et par raiſon
Quant le lyon les regarda
Errant a l'aſne commanda
Qu'il ſe haſtaſt de requener
Poꝛ les peſtes eſpoenter
L'aſne fiſt ſon commandement
Il recana ſi laidement
Et ſi hault c'onques tel tempeſte
Ne fiſt onques mais nule beſte
Car il ſambloit apertement
Que rompu fuſt le firmament
Et que tous deüſt deualer
Et toute riens acrauenter
Les beſtes tel poour en vrent
Que il ne ſoꝛent ou il furent
Ne nule part n'oſent fouir
Car tout oirent retentir
El bois entour et environ
L'aſne renfoꝛca ſa raiſon.
Et cria plus hideuſement
Qu'il ne fiſt au commencement
Le lyon aus beſtes en vint
Et celes qu'il volt
A l'aſne diſt tes toy bernart
Bien en as deſervi ta part
Dont cuida bernart l'oꝛelu
Le fol le lourt et le pelu
Poꝛ le bꝛaire qu'il avoit fait
Que par igal au lyon fait
Sire lyon ce dit bernart
Vostre copains n'eſt pas muſart
Il n'a ou monde beſte nee
Qui plus de moy ſoit redoutee
Ce diſt le lyon ne ſcaroit
Ton pooir et qui ne taroit
Onques en ſa vie veü
Il devroit eſtre eſpoir meu
Qui t'oꝛroit ſi hydeuſement
Recaner et ſi hautement
Je meiſme paour euſſe
De toy ſe ne te conneuſe
Mais qui tres bien te connoiſtoit
Ja ton recaner ne creindꝛoit
Ceulz de qui tu es congneu
Et qui ont autre fois veü
Qui ont deſpit ton parenté
Toy et toute ſa pooſte
Aucun ſont qui poꝛ hault crier
Et poꝛ glatir et poꝛ jangler
Cuident c'on leur doie obeir
Et honoꝛer et chier tenir
Qui bien vouldꝛoit tex gens nomme[r]
Bernars les devroit apeler
Car au parler puet on ſavoir
Liquel doivent honoꝛ avoir
Uns hons oꝛgueilleus
Cruel et enuiſus
Si volt aler chacier
.I. toꝛel eſgarda
A qui il commanda
Qu'il li veniſt aidier
La vache et la bꝛebis
En a auſſi requis.
Qui volentiers yront
A la voie ſe mentent
Tous .iiii. et ſ'apareillent
Plus lonc ſejoꝛ n'i font
.I. cert ont encontre.
Tout .iiii. l'ont frape
Tant que il l'ont occis
.IIII. quartiers en font
Poꝛ ce que .iiii. ſont
Devant l'eulz les ont mis
Seignoꝛ dit le lyon
Oez que nous feron
Je veil ce cerf partir
La premiere partie
Je l'ai bien deſervie
Qui ne vauldꝛa mentir
Pourquoi que je ſui roy
Raiſon eſt par ma foy
Que j'aie la ſeconde
La tierce le plus foꝛt
Larai je m'i acoꝛt
Se n'en ſui j'en meconte
La uatre qui vouldꝛa
Prendꝛai je a qui plaira
Entendez vous ce conte
Le lyon par meſtrie
Ot tout en ſa baillie
Entendez que ce monte
Qui ert en compaignie
D'un cruel plain d'envie
N'en puet avoir foꝛs honte
Quant il a gaaignie
Et il eſt hault et lie
Si vient ſon compaignon
Qui pꝛent tout a ſa part
Et l'apele muſart
Traitre et glouton
Un leu et .i. agnel
Buuoient du ruiſſel
Qui deſcendoit du mont
Le leu vit l'aignelet
Qui ſambla tendꝛet
Si le deſirra moult
Une achoiſon querra
De quoi il le metra
A moꝛt et a toꝛment
Et puis l'eſtranglera
Ainſi com il vouldꝛa
Et fera ſon talent
Il a dit a l'aignel
Tu me lairas ta pel
Cuivert et deſlioal
Tu troubles le ruiſſel
Dont ne m'eſt mie bel
Autre fois m'as fait mal
L'aignelet li a dit.
Entendez .i. petit
Raiſon et bone et vraie
Vous eſtes par deſſus
Et je ſui de ca jus
Troubler ne vous poꝛroie
Dit le leu autre fois
Paſſe a ja .ix. mois
M'en as tu fait deſpit
De l'aignel ne piet eſtre
J'eſtoie encoꝛe a neſtre
Si com ma mere dit
Tu dis que j'ai menti
Trop ſui oꝛe amenti
Quant ſi parles a moy
J'ai eſté trop ſouffrable
Ce ſoit par le dëable
Quant plus je te ſouffri
L'aignelet a mengie
Ainſi ſ'en eſt vengie
Le leu par ſon outrage
Onques ne li meſfiſt
N'aignelet ne li diſt
Ne foꝛfait ne outrage
Chaſcuns ſe doit garder
De mauvais encontrer
Se Damedieu me voie
Qui n'en puet eſtriuer
A li ne doit iangler
Mais aler en ſa voie
Un chien fu qui paſſoit
.I. flueue et ſi poꝛtoit
.I. quartier de mouton
En l'yaue ſe miroit
Son obmre reſambloit
.I. chien de ſa facon.
La char li volt tolir
Que il voit reſplendir
Si a ſa gueule ouuerte
La char ſi li chai
Dolut li de ſa parte
Aſſez de char avoit
Et l'autrui convoitoit
Dont il perdi ſa pꝛoie
Qu'autreſſi li ſeroit
S'ainſi l'en auenoit
Chaſcun en avroit joie
Cil qui veult a la gent
Tolir a eſcient
Le leur et ſans raiſon
A trop bon dꝛoit perdꝛoit
Le ſien que il avroit
Com le chien le mouton
Un jay bel et iolif
Devint lait et chetif
Par ſon oultrecuidance
Car il ſe foꝛioy
Poꝛ ce que il oÿ
Faire de li loange
Il ot en grant deſpit
Tous les iays que il vit
O eulz ne daigne aler
O les paons ſe traioit
Poꝛ ce que il cuidoit
Au paon reſambler
Quant les paons le virent
En grant deſpit le tindꝛent
Et le vouldꝛent tuer
Ses pennes li arrachent
Et benquent et menacent
Si qu'il ne puet voler
Aus yays eſt retoꝛnez
Plume et malmene
Coꝛroucie et dolant
Il l'ont d'entr'eulz oſte
Et bechie et hurte
Si qu'il fu tout ſanglant
Qui ſes parens renee
Pour mener grant poſnee
Et pour honnoꝛ avoir
Aucun temps reuendꝛa
Qu'il ſ'en repentira.
Par dꝛoit le pues ſavoir
Un aigle pꝛis avoit
.I. lieure qu'il menioit
Mais encoꝛe ert en vie
.I. moiſſon le gardoit
Qui au lieue diſoit
Rampoſnes et folie
Chetif diſt le moiſſon
Moult fus fol et bꝛicon
Quant tu te leſſas pꝛendꝛe
Riens ne te vault ploꝛer
Ne te pues eſchaper
Moꝛs es ſans plus atendꝛe
Tu eſtoier ſaillans
Et legier et courans
Auſſi comme .i. oiſel
Oꝛ eſt cy atrape
Et honni et mate
Et y lairas la pel
Que t'ont valu tes ſans
Roſtruenges et maulz
Que ſoloies ſavoir
Il n'a ſouz ciel leurier
Ne chien ne lyonnier
Qui te peüſt avoir
Quant acrhier ne doutoies
Ne revel ne cremoies
Vaillant .iiii. boutons
Car trop ien te ſavras
Garder toi de leurs pas
Et bouter es buiſſons
Celui qui te plaindꝛa
Et qui te ploꝛera
Certes avra toꝛt
Quant garder te ſavoies
Et ſi ne te gardoies
Bien eſt que ſoies moꝛt
Quant ſ'ot dit le moiſon
Et fine ſa raiſon.
Tantoſt fu deuoure
D'un eſpeurier ramage
Moult fu po de domage
Car trop avoit dure
Se le moiſſon ſceüſt
Qu'avenir li deüſt
Foꝛment ſe fuſt doute
Ja le lieure n'eüſt
Eſcharni qu'il peüſt
Ne dit adverſité
Pechié eſt et folie
De dire en vilonnie
A hom deſconfoꝛte
Tel eſt oꝛ hui ennui
Qui demain n'i ert mie
Ains perdꝛa ſa ſante
Le chien fiſt adiourner
aus plais pour demander
A la bꝛebis .i. pain
Qu'il avoit pꝛeſte
Cil diſt en loiauté
Qu'il ne moꝛoit de fain
Certes diſt la bꝛebis
Par ma foy vous plevis
Qu'il a dit fauſſeté
Onques joꝛ qu'il veſquiſt
Aide ne me fiſt
Ne pꝛeſt n'autre bonte
Trop bons teſmoins en oÿ
Diſt le chiez par ma foy
Qui bien le iurerent
Oꝛ les fai dont venir
Diſt le juge et oir
Vouldꝛai que il diront
Le leu tout primerain
A mis avant ſa main
Qui a ſa foy mentie
Et diſt qu'il y eſtoit
Quant le chien y avoit
Preſte de pain partie
L'eſcoufle et le buſart
Eſtoient d'autre part
Qui diſtrent que il virent
Que le chien li bailla
Le pain et ſ'en ala
Et nient plus n'en oyrent
Il convint qu'el rendiſt
Vouſiſt ou ne vouſiſt
Le pain quele n'ot mie
Treſtous les faus teſmoins
Qui ſont et pres et loins
Enuoit Diex d'ure vie
Qui doit aus plais aler
Il ſe doit bien douter
De faus teſmoins atendꝛe
Il font le dꝛoit uſer
Et le toꝛt releuer
Poꝛ fiance de pꝛendꝛe
Une lime d'acier
Qu'ert chiez .i. ſerrurier
Trouva .i. fol ſerpent
Il la cuida mengier
Si la pꝛiſt a rungier
Trop angoiſſeuſement
Les dens ſont deſpeciees
Rompues et bꝛiſiees
Et il furent ſanglant
La lime ſ'eſt moquie
De quoi c'eſt grant folie
Et li a dit bꝛiement
Fol ſerpent maloſtru
Poꝛ quoi me runges tu
Dont ne ſui je d'acier
Je menjue le fer
Si ert dur comme enfer
Et tu me veulz mengier
Maſche hardiement
Et eſtrain bien la dent
Ja ne m'en ſentirai
Tu t'en iras ſanglant
Coꝛroucie et dolant
Et je m'en moquerai
Folie eſt d'eſtriuer
Ne de guerre mener
A plus puiſſant de li
Qui ſ'en poꝛroit garder
Sens ſeroit d'eſtriuer
La riote et le plai.
Un larron fame pꝛiſt
Qui moult gr[an]s noces fiſt
De toute la valee
Moult firent lieement
Treſtout communement
C'un qui fu en la place
Ses voiſins li ont dit
Qu'il entende au deduit
Et face lieement
Par foy diſt il ſeigneurs
Je penſoie oꝛe ailleurs
Et vous dirai comment
J'oÿ jadis conter
Que Diex voult marier
Le ſileil a la lune
Moult deſplut a la gent
Chaſcun en fu dolent
Diex leur diſt en commune
Ce n'eſt pas a mon veil
Que demenez tel duel
Dites qui ce vous fait
Sire ce mariage
Nous toꝛne a grant domage
Chaſcuns le ſcet partout
Il n'eſt c'un ſeul ſoleil
Si ne ſauons conſeil
Quant eſt en ſa chalour
Si eſchauffe le monde
Entour a la reonde
Qui tout eſt en doleur
Quant marié ſera
Soleil engenderra
Plus bel bien le ſavez
Adonques il duira
Treſtous embꝛaſera
Sire ai[n]cois nous tuez
Il n'a cy c'un larron
Et tant le redouton
Qui ne ſauons que faire
Quant marié ſera
Enfans engendꝛera.
Qui ſeront deputaire
Il nous poꝛra grever
Et le nostre rober
Car il reſambleront
Au pere et a la mere
Raiſon eſt par /saint pere
Je ja bien ne feront
L'en doit moult redouter
Et fuire et eſchiuer
Multepli de mauvés
Et les bons eſſaucier
Et amer et pꝛoiſier
Car trop n'en ert jamais
Une aronde eſgardoit
.I. vilain qui ſemoit
Son champ en ſon coꝛtil
Elle a dit aus oiſiaus
Que chaſcuns ſoit iſniaus
D'oſter ſoy de peril
La ſemence cueillon
Et nous en ſaoulon
Que ſemme ce vilain
Nous nous repentiron
Se croiſtre le leſſon.
Ce vous di pour certain
Les vilains en feront
Les rez ſi nous pꝛendꝛont
Et metront a toꝛment
Les oiſiaus l'eſcharnirent
De ce que il oirent
Et n'en firent noient
Quant la chanure leva
L'aronde retoꝛna
Les oiſiaus ſi leur pꝛie
Alons tout eſrachier
Ce chanure et debꝛiſier
[...]
[...]
[...]
Le vilain n'y eſt mie
Au matin y alon
Ne doutons .i. bouton
Riens qu'il face ne die.
L'aronde ſi fu ſage
Et ne fu pas ſauvage
Mais la gent douta moult
Qui pꝛennent les oiſiaus
Tant ſachent eſtre iſniaus
A leurs rez que il fout
Os maiſons a la gent
Qui la doutent foꝛment
S'eſt alee anichier
Et ſa moꝛt y a une
Et miſe en leur baillie
Si l'en tiennent plus cher.
Oꝛ ſont moult repentans
Les oiſiaus et dolans
Qu'il ne crurent l'aronde
Car il ſont atrapez
Pris et acouuetez
Aus rez partout le mo[n]de
Ne je ne me merueil
Dont qui ne croit conſeil
Si ſ'en repent ſouvent
Quant l'en li dit raiſon.
Il eſt fol et bꝛicon.
S'il ſcet et ne l'entent.
L'en ſe doit conſeillier
Quant vient au commencier
S'eſt maniere de ſage
Car qui trop atendꝛoit
A paine eſcheueroit
En la fin le domage.
Un grant vilain pele
Gras et bien ſaoule
S'aſſiſt en ſa maiſon
.I. haſterel devant
L'ala ſouvent poignant
En bibet ou taon.
Un cop geta en vain
Le vilain de ſa main
Sus la teſte pelee
Malement le bleca
Sa mouche n'atoucha
Dont point ne li a gree
La mouche ſe trauerſe
Poignant fu et diuerſe
C'eſtoit contre ſa moꝛt.
Le vilain aticha
Et il ſe coꝛrouca
Et li diſt qu'il a toꝛt
Il la cuida ferir
Mais il ſot bien fouir
Et grunchier en volant
Une tres grant paumee
S'eſt le vilain donnee
Il en geta .i. ris
Et jura /saint Denis
Que tant y ruera
Qu'en aucune maniere
Ou devant ou derriere
A ferme l'ataindꝛa
Il l'ataint ſus ſa teſte
Si n'en fiſt pas grant feſte
Ains feri en ſeurſant
Toute l'a eſcachiee
Sa teſte en fu ſouilliee
Deſſus le front en hault
Je tieng a grant folie
De faire vilennie
A plus poiſſant de ſoy
La en pert bien la vie
Sage eſt qui ſe chaſtie
Qu'il n'en voiſt a belloy
Un cop eſt toſt rue
Et .i. home tue
Fol eſt qui ne ſe doute
Trop enchacier fait mal
A pié et a cheval
Bon fait tenir ſa route
Oꝛ oez d'un lyon
Qui ſe point ou talon
D'une beſche d'eſpine
Il ne l'a ſot oſter
Ne ne pot endurer
L'angoiſſe qui n'afine
Moult fu foꝛment dolent
Car il ne ſot comment
Il puiſt ſanté avoir
Miex amaſt a moꝛir
Que tant de mal ſentir
Se fuſt a ſon voloir
Il n'a beſte trouvee
En toute la contree
Qui le ſache guerir
Du mal dont il enrage
Et point ne ſ'aſſouage
Prez eſtoit de moꝛir
Moult pꝛez d'ilec avoir
.I. paiſtre qui gardoit
Une grant bercherie
Le lyon l'apercut
Qui en tant come il put
Envers li ſ'abandonne
Le paſteur ſ'eſt doute
Que ne ſoit fauſſeté
De ſon humilité
Derrieres ſes bꝛebis
S'eſt couchiez et tapis
Mais le lyon ſ'auance
Son pié li a tendu
Moult a bien entendu
Le paſteur qui li faut
Le pié pꝛiſt en ſa main
De merde et ſonc plain
Il le tert et ſ'en faut
Gveris fu li lyon
Par petit d'achoiſon
Le paſteur en mercie
Et li baiſe la main
Le paſtour de ſon pain
Li a donne la mie
Le paſtoꝛ fu jugie
A moꝛt par ſon pechié
Apres ceſte aventure
Liez fu a l'eſtache
Le prevoſt le menace
De moꝛt cruel et dure
Le paſtour ſi crioit
Merci quanqu'il pooit
Mais nulz n'y volt entendꝛe
Le lyon l'a veü
Qui bien l'a congneu
Sa bonte li voult rendꝛe
Il eſt du bois ſailli
Tout dꝛoit ſ'en vient a li
Bruiant de grant fierte
Le prevoſt ſ'en fouy
Et chaſcun le ſuivi
Foꝛment eſpoente
Nul ne ſavoit eſcrire
La grant joie ne dire
Que li fiſt le lyon
De la dolour li poiſe
Plus de .c. fois la boiſe
En la bouche ou menton.
Le pꝛevost et la gent
Retournerent bꝛiement
Qui tous ſont eſbahi
Le paſtour eſgarderent
Que a trouver cuiderent
Deuoure et occis.
Paſtour diſt le prevoſt
Il n'eſt home qui t'oſt
Faire mal ne hontage
Poꝛ l'amoꝛ du lyon
Treſtout te pardonne
Plus n'y avras domage
Di nous comment ce vet
Que ce lyon te fait
D'amoꝛ tel demouſtrance
Se nulz te meffaiſoit
Bien ſai qu'il l'occirroit
S'en pꝛendꝛoit la venjance
Par foy diſt le berchier
Il vint a moy l'autr'ier
Malade en ſon talon
De lo oÿ grant pitié
Si li gueri ſon pié
N'i ſai autre raiſon
Pour .i. po de ſervice
Qu'il fiſt par ſa franchiſe
Le paſtour au lyon.
Ot il ſauve ſa vie
De moꝛt qu'ot deſervie
D'une homicidion
La bonte n'i ert perdue
Qui ne recoit rendue
Sage eſt qui bonte fait
Pour une en auon .c.
Ainſi /Jheſu le rent.
Que l'en aoure et crient.
Un aſne traveillie
Dolant et traveillie
.I. keu y eſt venu
Si le ravi a nu
De ſa gueule baee
Il ot moult grant pitié
Du las qui traveillie
Eſtoit et endoꝛmi
En la quele partie
Sens tu greigneur hachie
Diſt le leu bel ami
La ou tu tiens ta poe
Me dueil plus qu'en la ioe
Que j'ai toute rompue
D'un cop que .i. aſnier
Me donna devant hier
D'une groſſe maſcue
L'aſne cuide eſtre pꝛis
Deuoure et occis
Du leu haſtiuement
Le leu de li avoit
Tel pitié qu'il ploꝛoit
Et l'en peſoit foꝛment
Se .i. hom deſloial
Se repentoit du mal
Qu'aroit fait en ſa vie
Tout le bien qu'il feroit.
Des gens tenus ſeroit
Mal et ypocriſie
Chaſcuns ſe doit garnir
En ſon premier venir
De bien faire et ſavoir
Hons de malvais renon
Traitre ne larron
Ne poꝛ honour avoir
Un leu eſtoit mucie
Et de pꝛez enchacie
Si ne pooit fouir
En .i. bꝛueil ſ'eſt lancie
Et tapi et mucie
Paour ot de moꝛir
Un home ſe ſeoit
Lez li qui regardoit
Le l'en merci li pꝛie
Poꝛ Dieu biaus dous amis
Je ſui a la moꝛt mis
Neant eſt de ma vie
S'il te pleſt je vivrai
Ou ſe non je moꝛrai
C'eſt a ta volenté
Le veneur vient cy
Qui ja n'avra merci
De ce las ne pitié
Car il me het de moꝛt
Et ce n'eſt mie toꝛt
Je l'ay bien deſervie
Mais ſe puis eſchaper
Que ſauf m'en puiſſe aler
J'amenderai ma vie
J'ay grant pitié de toy
Dit le bouuier par foy
Ja par moy ne moꝛras
Au veneeur dirai
Si toſt com le verrai
Que par dela t'en vas
Sire vostre merci.
Je demourai dont cy
Poꝛ Dieu de moy penſez
Li archier ſont venu
De berſer eſmeü
Et les ars enteſez
Ou eſt le leu alé
Qui eſt cy deuale
Fiſt li arbaleſtiers
Il toꝛna par dela
Si toſt com devala
Ce reſpont le bouuier
Et puis leur a gaignie
La ou il ert mucie
Mais pas ne l'entendirent
Oultre ſ'en ſont paſſez
Plus n'i ſont arreſtez
N'onques puis n'y revindꝛent
Sire dit le bouuier
Bien poez deſbouchier
Vous eſtes eſchape
Se ne fuſt m'aye
Vous fuſſiez hoꝛs de vie
Et pꝛis et atrape
La langue ſoit ſauvee
Et de Dieu honoꝛee
Dit le leu biaus amis
Les ex ſoient creuez
Et tous eſbourbelez
Qu'en la teſte as aſſis
Encuſe me cuidas
Quant tu guignas en bas
Si feis meſpꝛoiſon
Autre choſe penſoies
Que tu ne leur diſoies
Si eſtoit traiſon.
Qui pꝛomet a la gent
Ou bonté ou argent
Que faire ne puet mie
Apres regaingne en bas
Que n'en nel face pas.
Li fait grant vilennie
[G]oupillez nouuiaus nez
Furent pꝛis et poꝛtez
D'un aigle a ſes faons
Penſa qu'il leur donroit
Et leur deſpeceroit
Tous par menus lardons
Le gourpill ſi requiſt
L'aigle qu'il li rendiſt
Poꝛ Dieu ſes gourpilles
Puis diſt que non feroit
Et que il en donroit
La char a ſes aiglo[n]s
Le goꝛpil fu dolant
Quant ne pot autremant
Grant feu a alume
Deſſous le ny a l'aigle
Malement l'apareille
De paour eſt paume
Les aigles baillierent
Du grant chaut qu'il ſenterent
Mais ne poꝛent foir
L'aicle ne ſcet que faire
En hault commence a bꝛaire
Et bien cuide moꝛir
Rendez rendez lairon
Ou ycy vous pendꝛon
Dit le pere au gourpil
Treſtous les te rendꝛai
Diſt l'aygle par ma fay
Si m'oſte le peril.
Le goꝛpil par ſon art
Si fiſt l'aigle couart
St li rendi ſa parte
Onques ſon biau prier
N'i pot avoir meſtier
Ne de batre ſa teſte
Par ce poez ſavoir
Que qui ne puet auoi
Le ſien puet depꝛoier
Aucun art doit penſer
Et faire et aviſer
Dont il ſe puiſt aidier
Un cheval ſi ſe vit
En .i. pꝛe ou peſſoit
A li vint .i. lyon
Et li diſt qu'il eſtoit
Bon mire et qu'il ſavoit
De tous mauls gueriſon
Sire dit le cheval
Lonc temps a que j'ai mal
En .i. des piez derriere
Se me poez guerir
Bien le vous puis merir
En aucune maniere
Frere dit le lyon
Couche toy ſi verron
Le mal apertement
Je ne me puis couchier
Ce reſpont le deſtrier
Si en ſui moult dolent
Souffrez dit le lyon
Quanque nous vous feron
Et ne regibez mie
Le cheval bien ſavoit
Que le lyon penſoit
A tolir li la vie
Baiſſiez vous ſire miere
Si verrez par derriere
Dit le cheval le mal
Bien vit que li lyons
Le voult pꝛendꝛe au talon
Oꝛ oez du cheval
De ſes .ii. piez arriere
A ſi frape le miere.
Que il l'a afronte
Mire diſt le cheval
I cuit que de ce mal.
N'avrez jamais ſanté
Folz eſtoit le lyon
Quant volt par traiſon
Decoivre le cheval
Car ſe il bien vouſſiſt
Tex .xiiii. en vainquiſt.
Et leur rendiſt eſtal.
Qui veult par traiſon
Ouurer bien eſt raiſon.
Que il en ait hontage
S'il ſe puet autrement
Deliurer de tourment
De mal et de domage
Li coulon ſi cremirent
L'oiſelierre qu'il virent
Prenant leur compaignons
Il parlerent enſamble
Ca dit l'un ce me ſamble
Comme oiſeleurs felons
Deſtruit nostre lignage
Et nous fait grant domage
Treſtous nous occira.
Se n'avona .i. garant
Sage pꝛeu et parlant
Qui nous garantira
Il ont de l'eſpeurier
Fait leur gonfanonnier
Leur juge et leur ſeigneur
Qui .i. et .i. le pꝛent
Et le va deuourant
Treſtous de joꝛ en joꝛ.
Trop mauvais juge auon
En l'eſpeurier felon
Ce dit .i. qui le vit
Ja ne nous deffendꝛa
Mais tous joꝛs mengera
Car de nos ſans ſe vit
Il nous eſt plus nuiſant
Que l'oiſeleur devant
Chaſcuns le puet vëoir
Quant juge le feiſmes
Et ſus nous le meiſmes
Ce fu par non ſavoir
Il crient plus l'oiſelier
Qui l'aloe eſpeurier
Mal nous en deffendꝛa
Quant les verra venir
Poꝛ nous pꝛendꝛe et murtrir
D'eſpeurier ſ'en fuira
A peril eſchiuer
Se doit on bien garder
De chëoir en greignour
Comme les coulons furent
Qui abandon moꝛurent
Poꝛ leur mauvais ſeigneur
Un fol cheval heoit
.I. cerf qui li avoit
Trop malement meffait
Aſſaudꝛe ne l'oſoit
Car ſes coꝛnes doutoit
Que poignantes voit
Un veneeur requiſt
Qu'aide li feïſt
Du cerf metre a la moꝛt
Et il le ſeruiroit
Tous les joꝛs qu'il viuroit
Car moult ſe ſentoit foꝛt
Le veneur l'a pꝛis
Qui tantoſt li a mis
Et le frain et la ſele
Bien eſtoit le cengla
Uns eſperons chauca
Qui oꝛent grant roelle
Sus le cheval ſailli
Et le cerf acailli
Qui moult eſtoit courant
Et par mons et par vaus
Et par plains et par gaus
L'ala foꝛment chacant
Le cerf riens ne poꝛtoit
Qui moult legier eſtoit
Poꝛ noiant le chacoient
Jamais ne le preiſſent
Poꝛ coꝛre qu'il feiſſent
Grant folie faiſoient
Le cheyal ſ'ert ſaillant
Et traveillie foꝛmant
Ce n'ert mi merveille
Grans cops le va ferant
Et derriere et devant
Et trop mal l'apareille
Le venerres felons
Si fiert des eſperons
Si que li ſans en ſault
Mais le cheval avant
Ne puet ne tant ne quant
Car le cuer ſi li fault
Il a l'omme requis
Qui ſus li eſt aſſis
Que il ſe ſueffre atant
Et qu'il le lait aler
Par les champs paſturer
Comme il faiſoit devant
Aler ne te lairai
Diſt li hons par ma fay
Car a moy t'ez ſouſmis
Mais tant com tu vivras
Tous joꝛs me ſeruiras.
De gré ou a enuis
Le cerf ſ'out onques mal
Mais moꝛt fu le cheval
Par ſi grant felonnie
Qui tuer le cuidoit
Poꝛ ce que il avoit
Le veneur en aye
Par qui fu derompu
A moꝛt et confundu
Si comm oÿ avez
Par ſon outrecuidance
Fu il mis a outrance
Et a la moꝛt alez
L'en a ſouvent fiance
En tel dont grant nuiſance
Vient puis bien le ſavez
Poꝛ ce ſe fait trop mal
Qui ſe ſouſmet a mal
Poꝛ faire autrui grietez
Il avient moult ſouvent
Que l'en veult grant toꝛment
Faire a ſon contraire
L'en ſe met a la moꝛt
Ou en grant deſconfoꝛt
Bien l'e oÿ retraire
Un coꝛbel ſi eſtoit
En .i. arbꝛe et menioit
.I. petit de fromage
Renart l'a aviſé
Qui toſt fu aviſé
De faire li domage
Diſt renart par ma foy
En tout le mont ne ſoy
Nule ſi bele beſte
Comme vous dant coꝛbel
Car fuſſent auſſi bel
Et de coꝛps et de teſte
Il n'eſt oiſel volans
Plus de vous ſoit plaiſant
Qui vous verroit eſtendꝛe
Trop groſſe vois avez
Quant vous chanter volez
Plus n'y a que repꝛendꝛe.
Le coꝛbel l'a oÿ
Moult ſ'en eſt eſjoy
Si ſ'eſt dont effoꝛcie
De cler chanter et hault
Car lie eſtoit et baut
Contre mont ſ'eſt dꝛecie
Si com ſon bec ouvri
Poꝛ eſclarcir ſon cri
Li chay le fromage
Renart deſſous eſtoit
Qui riens plus n'atendoit
Si le pꝛiſt comme ſage
Le coꝛbel ſ'eſt moquie
Qu'il avoit engignie
Si diſt en ſon langage
Par foy ſire coꝛbel
Vous chantez oꝛ moult bel
Se n'avez le fromage
Qui croit quanque il ot
Il eſt muſart et ſot
Il eſt ſouvent dolant
Trop eſt de mencongiers
Et de faus loſengiers
Poꝛ decoivre la gent
Une chieure pꝛenant
Vit une autre geſant
Son lit li a requis
oꝛ Dieu qu'il li preſtaſt
Tant qu'il les chaaillaſt
Ses chaaillos petis
Cele en ot grant pitié
Son lit li a leſſie
Et cele y faonna
Et quant elle requiſt
Que ſon lit li rendiſt
Cele le rampoſna
Po d'amoꝛ m'avez fet
Encoꝛ nului ne vet
De mes petis faons
Oꝛ m'en volez chacier
Certes po m'avez cher
Le ſejoꝛ n'eſt pas lons
Quant je le vous preſtay
Diſt l'autre par ma fay
Ce ne fu qu'a une heure
Oꝛ y avez eſté
[.]IIII. lons joꝛs d'eſté
N'eſt ce pas grant domage
Puis que je n'en ay grez
Plus n'y demoꝛerez
Par la foy que vous doy
Oꝛ toſt voidiez mon lit
Vous n'i gerrez ennuit
Si aiſt Diex a moy
Certes ſe fuſſent grant
Diſt l'autre mi enfant
Poꝛ toy ne m'en partiſſe
Mais oꝛ m'en partirai
Et ſi te merirai
Encoꝛ ceſte franchiſe
Gardez vous de preſter
Et du uostre liurer
A gent de male foy
Car ja gré n'en ſaront
Et rendꝛe nel voudꝛont
Pieca qu'eſpꝛouue l'oÿ
Le criquet ot diſete
En [yver ]et pouerte
Au fourmi eſt venu
En ploꝛant li requiſt
Que bonté li feïſt
D'un po de blé menu
Et qu'il moꝛroit de fain
Ja n'en avroit demain
Se il n'avoit aye
Oez ſire criquet
Se malement vous vet
C'eſt par vostre folie
Quant je me pourchacoie
Du blé et garniſſoie
De coi ſeruoies tu
Il reſpont je chantoie
Et grant joie menoie
Mais oꝛ ſui abatu
Sire empres je chanter
Deuſſiez bien baler
Le fremi li a dit
Ja ne vous aiderai
Ne bien ne vous ferai
Certes tant ſoit petis
Gueres ne m'ameroit
Cil qui me loeroit
Que le mien vous donnaſſe
Et quant j'aroie fain
Ou en nuit ou demain
Au bois querre l'alaſſe
On doit en ſa jonece
Gaaignier la richece
Dont ſon vivre en avant
Et cil qui ce ne fet
Povre et chetif ſ'en vait
Droit eſt par /saint amant
Il ot en une lande
Une beſt moult grande
Qui avoit lon la viſte
El menioit les toꝛiaus
Les cers et les cheuriaus
Et li dain et la biche
Tant qu'il n'ot riens leſſie
Que treſtout n'ot mengie
C'un treſtout ſeul toꝛel.
Il diſt en ſon langage
Ce n'eſt pas grant domage
Se de moy as la pel.
A bon dꝛoit nous as moꝛs
Treſtous foibles et foꝛs
Car nulz n'y ot aye
S'au primier d'un acoꝛt
Fuiſſions et d'un reſſoꝛt
Ne fuſſes oꝛ en vie
Se toutes t'euſſon
Hurtees d'un randon
Tu fuſſes deuouree
L'une a l'autre n'aida
Car chaſcune cuida
Eſtre plus depoꝛtee
L'un doit l'autre garder
Et deffendꝛe et tenſer
Auſſi com ſoy meiſme
Qui ainſi le feroit
Partout ſeur ſeroit
Mais ycy fault la rime
Dela la mer griffaingne
Oultre une grant montaigne
Ot jadis .i. royaume
Dont le roy eſtoit ſinge
Chaſcune choſe et nice
Si ot de taigne hyaume
Deux bachelers erroient
Qui par le mont queroient
Auentures diverses
En ce royaume entrerent
Grant plenté y trouverent
Singes et autres beſtes
Devant loy les manda
Le roy et commanda
Qu'il dient verité
De ce qu'il requerra
Ou moꝛir les fera
A duel et a vilté
Dit l'un je vous dirai
Sire ce que ſarai
[...]
Oꝛe dont dit le roy
Que te ſamble de moy
Et de mes chevaliers
Sire il n'a roy en terre
Qui peüſt tenir guerre
A vous ne a vos gens
Vous eſtes plus puiſſans
Et bel et auenans
Et plus c'uns autres gens
Vous eſtes plus grant ſire
Et plus large com ſans ire
Et plain de coꝛtoiſie
Qu'/alixandꝛes n'eſtoit
Ou temps que il vivoit
De ce ne dout je mie
Uoſtre chevalerie
Eſt de biauté garnie
De bonté et de ſens
Chaſcun a courtoiſie
En ſon cuer herbergie
Qui y maindꝛa tous temps
Li roys ſ'en eſjoy
Quant ſi loer l'oÿ
Grant don li a donne
Chaſcun de ſa meſnie
Quanqu'il a en baillie
Li a habandonne
Li roys .i. compaignon
L'avoit mis a raiſon
Et requiert qu'il li die
Qui li eſtoit avis
De li et du pays
Et de ſa baronnie
Si penſa qu'il aroit
Trop plus ſe voir diſoit
Que n'ot ſon compaignon.
Qui mencongier eſtoit
De quanqu'il li diſoit
Et ſi ot maint bel don
Sire roys eſcoutez
Fait il et ſi oꝛrez
Ce qu'il m'en eſt avis
Singe lait et pele
Deuez eſtre apele
Vous et tous vos amis
Vous n'eſtes mie gens
Mais ſinges oꝛs pullens
Et plain de cruauté
Et tout vostre pays
Mauvés eſt ce m'eſt vis
Riens n'y a de bonte
Les beſtes l'aſſaillirent
Quant leſdengier l'oirent
Et tout l'ont deuoure
Fol fu de dire voir
Car bien pooit ſavoir
Qui en aroit mal gré
Mentir pour gré avoir
Vault miex que dire voir
Et perdꝛe coꝛps et vie
Voir dire ſans domage
Deuroit tout home ſage
Car mentir eſt folie
Un biau cheval de pris
Poignot vers .i. larris
Par une eſtroite ſente
[Un Aſnes a encontre]
Qui y eſtoit entre
De gaus poꝛtoit bien .xxx.
Quant le cheval le vit
De li ot grant deſpit
Et foꝛment ſe deſroie
Il li diſt par ayr
A moy dois obeir
Et leſſier moi la voie
Moult ay heu grant los
Es tournois et es os
De maint vaillant baron
Et tu chetis puans
N'ez pas obeiſſans
A ma noble facon.
Se jamais t'encontroie
Certes je t'occirroie
Se n'obeis a moy
Poꝛ ce que chargiez ez
Et que poꝛtes grans fez
Ceſte foys ſoufferrai
Sire moult de mercis
Bien ſai que j'ai meſpꝛis
Jamais ne m'auendꝛa.
Quant venir vous verrai
[...]
Ja fai ne me tendꝛa
Ains que paſſe le mois
Fu le cheval redois
Chetif et mal mene
v fieus poꝛter fu mis
Deſcharne et chetis
Et poi[n]t ne fu ame
L'aſne ſi l'a veü
Qui bien l'a congneu
Pris l'a a rampoſner
Ou ſont oꝛ vos loꝛains
Vos ſeles et vos frains
Que ſoliez poꝛter
Bien poꝛroie oꝛe aler
Delez vous et paſſer
Venus eſtes au bas.
Pris avez mon meſtier
Dont je me ſoy aidier
Si devez dire hé las
Oꝛgueil ne vault nëant
Ce n'eſt c'un po de vant
Qui toſt eſt cheus jus
Le roy de majesté
Eſſance humilité
Qui tout voit de laſſus
Lez une grant fontaine
Sus gravier clere et ſainne
S'eſt .i. cerf arreſte
En l'yaue ſe mira
Ses coꝛnes eſgarda
Ou moult ot de biauté
Tant li plurent foꝛment
Qu'il ne pꝛiſoit noient
Membꝛe que il eüſt
Mais domage li firent
Car a la moꝛt le mirent
Ains que .v. ans eüſt.
Les jambes a veues
Grelles loialment oſſues
Si les pꝛiſt a blanmer
Mon foꝛps fait il eſt grant
Et charneus et peſant
Si n'es poꝛront poꝛter
Les veneurs les virent
Qui foꝛment l'aſſaillirent
Et il pꝛiſt a fouir
Plus toſt c'un olifant
Il n'eſt deſtrier courant
Qui le poiſt conſuiure
En .i. bois eſt entre
Mal l'en eſt encontre
Si vous dirai comment
Ses coꝛnes l'arreſterent
Aus bꝛanches ou hurterent
Si le pꝛiſtrent la gent
Les jambes deſpꝛiſoit
Et petit les amoit
Dont bien eüſt confoꝛt
Ses coꝛnes trop amoit
Et iooit et pꝛiſoit
Poꝛ ce ot il la moꝛt
Une maniere avon
Que loons et amon
Souvent nostre domage
Et nostre pꝛeu heon
De ce grant toꝛt avon.
Eſpꝛouuon ce langage
Les veneurs chacoient
Aus chiens que il avoient
Les lieures par les champs
Les lieures ſi fouirent
Devant les chiens qu'il virent
Tous de paoꝛ tramblans
Un flueue ont aviſé
Si ſe ſont aviſé
Que noier ſi yront
Si ne les aront mie
Les chiens faus plains d'envie
Ne ja n'en mengeront
Quant pres du flueue vindꝛent
Et les rainnes oyrent
Q ſus la riue eſtoient
En l'yaue ſont ſaillies
Mais ne ſont pas noies
Que bien noer ſavoient.
Un des lieures les vit
A ſes compaignons dit
Ne nous occions mie
Comme ces beſtes cy
Qui mais n'aront merci
Car perdue ont leur vie
Plus foꝛt de vous cremon
Et c'eſt dꝛois et raiſon
Auſſi ſomes doutez
De plus foibles de nous
Si ne leur volons nous
Ne mal n'aduerſitez
Oꝛ treſtous retoꝛnon
Ja .i. ſeul ne verron
De cele gent dernee
Encoꝛ poꝛron avoir
Ce me dit mon eſpoir
Mainte bone joꝛnee
Apres le temps pluie
Et let et ennui
Vient le bel ce ſavez
Apres les grans coꝛrous
Et les duelz et les plours
Rauron joies aſſez
L'en ſe doit confoꝛter
Et nient deſconfoꝛter
Poꝛ choſe qui aviengne
Chaſcuns ſe doit pener
Du mal entr'oublier
Et que bien ſe maintiegne
Un chaſtel grant et bel
Fu fonde de nouvel
En une grant valee
Lez une grant montaingne
Haute et moult griffaigne
Dont ſouvent neſt fumee.
Ceulz du chaſtel oyrent
Dont foꝛment ſ'eſbahirent
La montaingne uller
Et hault crier et bꝛaire
Auſſi com fuſt tonnairre
Et treſtoute croller
De grant paour tramblerent
car l'eure ne garderent
Que le mont tourmentaſt
Sus eulz et ſus la ville
Ou de gent ot bien mile
Dont ja .i. n'eſchapaſt
Quant ce temps fu paſſe
Si ſe ſont apenſe
Que eulz vëoir yront
Qu'a on en la montaigne
De coi choſe ſe ſaigne
Et que tout en chairont
Un moqueur ſi vit
Une ſoꝛis ſi dit
Bien ſai que c'a eſté
La montaigne eſtoit pꝛains
Si a gete grans plains
Et puis a enfante.
Une laſſe ſoꝛis
En queurt par ce larris
Bien la poez vëoir
Poꝛ petit d'achoiſon
A moult grande tencon
Bien ſe doit a pooir
Chaſcun commence a dꝛe
Et affermer et dire
C'onques mais tel paoꝛ
N'oꝛent joꝛ qu'il veſquiſt
Poꝛ choſe qu'il veïſt
Ne par nuit ne par joꝛ.
Tel menace moult foꝛt
De mehaing ou de moꝛt
Qui petit pueent faire
Qui bien les connoiſtroit
Leurs moes ne craindꝛont
Une poꝛrie poire
Un taon ſi ſ'aſſiſt.
Sus .i. Mulet qu'il vit
Aler par mi la voie
Qui moult chargie eſtoit
D'un grant fais qu'il poꝛtoit
Ou de cyre ou de ſoye
Quant vi[n]t a la veſpꝛer
Si ſe pꝛiſt a penſer
Le taon et a dire
Ahy ſire mules
Vous poꝛtez trop grant fez
Je ne vous veil plus nuire
[I]l eſt volez arriere
Oꝛ eſtes plus legiere
Fait il ſire mulet
Poꝛte m'as longuement
Je t'ai moult malement
Greue et trop meffait
Le mulet li reſpont
Tu ne poiſes pas mont
Gueres ne m'as greue
Mon fais poiſe autretant
Com il faiſoit devant
Que tu fuſſes leue.
Avcun cuident crever
Plus foꝛt d'eulz ou tuer
Mais ment ne leur meſfont
Car gens de grant pooir
Et plains de grant avoir
De po grevez ne ſont
Mes membꝛes rampoſnerent
Le ventre et ſe tennerent
Que il li ont tant fait
Jamais ne le peſtront
Ne bien ne li feront
Ainſi ſe ſont retrait
Pourquoi avona griement
Painne et trauaillement
Ce li ont dit les membꝛes
[.]III. fois au mains le joꝛ
Te peſſent a ſejoꝛ
Bien en que tu te membꝛes
Nous te ſeruons nous te poꝛtons
Nous te veons nous te loons
Et te faiſons baignier
Nous te querons char et poiſſon
Connins perdꝛis volille oiſon
Et ſi eſt tout poꝛ ton mengier
Tel demaine tourment
Entre la bone gent
Qui puis avra aſſez
Comme ſeigneur et meſtre
De toi tenir et peſtre
Nous ſommes moult penez
Tu ne fais riens poꝛ nous
Et nous nous ſomes tous
Poꝛ toy mis a la moꝛt
Oꝛ ai ce que poꝛras
Jamais ne nous n'avras
Ayde ne confoꝛt
Le ventre leur reſpont
Qu'il ne ſceuent qu'il font
Qui ſi le contralient
Ne ſui pas vo ſeignoꝛ
Ains vous ſerf nuit et joꝛ.
Et pes quelque nulz dient
De tout ce que menius
Je vous envoie le jus
A chaſcun ſa partie
Dont vous eſtes noꝛris
Et levez et furnis
Et ſouſtenous en vie
Les membꝛes ont deſpit
De ce que il leur dit
Et ſont tous d'un acoꝛt
Que jamais a nul joꝛ
A li n'arons amoꝛ
Et qu'il n'ont mie toꝛt
Grant piece ſe ceſſerent
Qu'encoꝛ n'ameniſtrerent
Que il peüſt mengier
Foibles furent foꝛment
Car ſans ſouſtenement
Ne ſe poꝛent aidier.
Aperceus ſe ſont
Que grant folie font
Et de ce me recoꝛt
Des oꝛ mais aideront
Au coꝛps et le peſtront
Et ſeront d'un acoꝛt
Il eſt aſſez de tez
A qui l'en fait bontez
Et plus et folement
Qui ja gré n'en ſaront
Ne ſamblant n'en feront
Iel vous di loiaument
Dont il ont povreté
Et ſouffrete et late
Veu ay l'eſamplaire
Qui ſont obeiſſans
Et humbles et ſeruans.
De quanqu'il pueent faire
Un leu vit en ſa voie
Un grant chien qu'abaioit
Gras et roſne et gros
.I. po a toy parlaſſe
Dit le chien ſe j'oſaſſe.
Mais toſt m'aroies moꝛt
La mal ne te feray
Dit le chien par ma foy
Di ce que tu voudꝛas
Trop volentiers ſceuſſe
Dit le leu ſe peuſe
Comme tu es ſi gras
J'ai aſſez a mengier
Comme je ay meſtier
Ne je n'ay fain ne ſoy
Et ſi ne fais nëant
Foꝛs qu'abaie foꝛment
Tous ceus que par nuit oÿ
Tu as entour ton col
Qui eſt et gras et mol
De cuir .i. grant loyen
Di moy que ſenefie
Eſt ce par moquerie
Je li vi des antan
L'en me lye par jour
Et met en .i. deſtour
Dit le chien biaus amis
Que n'aie congnoiſſance
N'ayde n'aliance
A nul de ce pays
Miex vouldꝛoie moꝛir
Que pour mon ventre emplir
Fuſſe lie par jour
J'ai petit a mengier
Mais hoꝛs ſui de dangier
De meſtre et de ſeigneur
Qui ſe jut en ſervage
Foꝛt et grief et hontage
Poꝛ ſon ventre engreſſier
Il n'eſt mie aſſez ſage
Qui ſe tient ſon aage
En las poꝛ ſon mengier
Un lyon ſe giſoit
En .i. bois et doꝛmoit
Deſſous .i. abꝛiſſel
Et une ſoꝛiſſele
Si l'aſſault et trepelle
Et mainne grant revel
Le lyon l'engoula
Mais pas ne l'auala
Ains l'encloſt en ſa gueule
La ſoꝛis li requil
Que il ne l'occeiſt
Ainſi n'en ſi po d'eure
Ainſiques li fera
En .i. temps qui vendꝛa
Et ſeuice et bonté
Le lyon ſi ſ'en rit
Qui le pꝛiſe petit
Et tient en grant vilté
Va la ou tu vaudꝛas
Plus mal par moy n'aras
Ce reſpont le lyon
Ja ne me greueras
Ne bonté ne feras
Ne te pꝛiſe .i. bouton
Le lyon ſi fu pꝛis
A .i. ſeul las coulis
Ains qu'il paſſaſt le mois
Dont jamais n'eſchapaſt
Car quant plus foꝛt tiraſt
Et tant fuſt plus deſtrois
Quant ne ſot plus que faire
En hault commence a bꝛaire
Si l'oÿ la ſoꝛis
Tantoſt y eſt venue
Au lacon eſt coꝛue
Si y a ſes dens mis
Aſſez toſt fu cope
Et cil eſt eſchape
Qui eſtoit a la moꝛt
Par ce poez ſavoir
Que grant meſtier avoir
Puet bien le foible au foꝛt
Un rouſſignol eſtoit
En .i. arbꝛe chantoit
Melodieuſement
.I. paon l'eſcoutoit
Grant duel de li avoit
Qu'il li auenoit tant
Une oc pꝛiſt a dire
Par coꝛrous et par ire
Que gré ſavoir ne doi
A celi qui le fiſt
Car po de cure y miſt
Quant miex chanter ne ſoy
Un petit oiſelet
Povre chetif et let
Chante ſi noblement
Et je ne ſai chanter
Tant m'en puiſſe pener
Foꝛs trop hideuſement
Oꝛ entent ma raiſon
Dit /juno au paon
Et ſi te reconfoꝛte
Plus t'a done nature
Qu'a nule creature
Tant ſoit foible ne foꝛte
Tu es ſi oꝛiant
Si bel et ſi plaiſant
Comme l'en puet penſer
Il n'a ſous ciel oiſel
Qui plus de toy ſoit bel
De ce te pues vanter
Quant nature te fiſt.
Moult grant entente y miſt
Et te donna biauté
Au rouſſeignol dous chant
De biauté tant ne quant
N'ai je d'autre bonte.
Le coc fait le matin
Congnoiſtre en ſon latin
Et chante hautement.
Cil aront trop a faire
Qui tout voudꝛoit retraire
De beſtes et de gent
Nature a oꝛdenees
Ses vertus et donnees
Et ſi n'a nulz le tout
Se tu veus tout avoir
Chaſcuns puet bien ſavoir
Que tu es fol et glout
Celi qui a envie
D'autrui fait grant folie
Et ſi vit a doleur
Tout doit a chaſcun plere
Que /Jhesucriſt veult faire
Qui eſt vrai createur
Les riches conteront
Des biens que il aront
En ce ſiecle poꝛquis
Coꝛps que petit ara
De petit contera
Au roy de paradis.
Qui vit en pouerte
Sans point d'iniquite
Moult ara grant richece
Es ciex en paradis
O Dieu et ſes amis
Seront joians et aaiſe
Une chieure ſ'eſtoit
Qui .i. faon avoit
Quele amoit trop foꝛment
Aus champs nel leſſe aler
Giber ne paſturer
Poꝛ le froit qu'il faiſoit
Ains l'alaite en l'eſtable
Et la peſt et li baille
Ce dont il a meſtier
Et ſ'en va peſtre as champs
Tant quele a plains ſes flans
Puis ſ'en reuient arriere
Moult ſouvent le chaſtie
Que il ne croie mie
Le leu ſ'il vait a l'uis
Mais li enferme tiegne
Qu'il ne l'en meſauiengne
Regart par .i. pertuis
Le leu ſi vient a l'us
Oꝛ ſus diſt il oꝛ ſus
Oevre l'uis a ta mere
Je t'apoꝛt a mengier
Trop miex que ne fis yer
Miex te fai que ton pere
Quant le cheurel l'oÿ
Durement ſ'eſjoy
Poꝛ avoir a mengier
Car avis li eſtoit
De la fain qu'il avoit
Qu'il deüſt erragier
A l'uis ſ'en eſt venu
Ferme l'a et tenu
Car ſa mere li diſt
Il voit par .i. pertuis
Le leu qui fu a l'uis
Si ſ'en moqua et riſt.
La dehoꝛs vous tenez
Ja ceens n'enterrez
Foy que je doi mon pere
Se vous y entriez
Vous me mengeriez
Si comme diſt ma mere
Et croire et honoꝛer
Et ſervir et amer
Du cuer entierement
Doit chaſcuns pere et mere
A bon dꝛoit le compere
Qui le fait autrement
Cilz qui ceſt romans fiſt.
Moult de ſa paine y miſt
De quoy il ſe repent
Car les folz qui l'oꝛront
Communement diront
Que il ne vault nëant
S'uns ſage hons fait l'eüſt
A chierté tenu fuſt
Et en auctoꝛite
L'en ſcet bien qui le fiſt
Poꝛ ce l'ont en deſpit
Les folz et en vilté
Un clerc de grant ſcience
Et de grant ſapience
Le fiſt pꝛemierement
Et jel mis en rommans
Poꝛ entendꝛe aus enfans
Et a la laye gent
Diex doinſt beneicon
Au clerc ou au clercon
Qui lira ceſt eſcript
Se il dit poꝛ mon pere
Poꝛ moy et pour ma mere
Requies ſit eis.