Dieu et /ſa douce mere Q՚ chaſcun doit amer
Et /le baron ſaint iaque De qui ie veul parler
Veille ſauuer touz ceus Qui voudꝛont eſcouter
.I. merueilleus example Ou bon feroit penſer
D'une ml՚t noble dame Fame de cheualier
Que l'ennemi d'enfer Fiſt ſoutilment glacier
En mi ꝯ ſentement De moꝛtelment pechier
Mes ne fiſt pas le fet Ou ne li voult laiſſier
Nō pourqñt fait l'eüſt Mais n'e nout pas laiſir
Trop laidement vouloit Son dꝛoit ſeigneur trair
Mais puis ſ'en repenti Si l'en conuint ſouffrir
Crueuſe penitance Ꝯ vous poꝛrez oir
Uous ſauez bn̄ c'ō dit En repꝛouuer ſouuent
Qui eſt bn̄ ne ſe mueue Mes qui a mal ſe ſent
Tantoſt ſ'en doit geter S'il eſt en aiſement
Ie le vous di pour tant Belle tres douce gent
Que qui eſt en pechié Tantoſt ſ'en doit iſſir
A chëoir n'a pas honte Si grant ꝯme en geſir
Aucuns ſe laiſſent Si en pechié en durcir
Que la grace de dieu Ne puent reuenir
En la guyſe c'ō dit Du /roy antiocus
Qui cuidoit plus valoir Que dieu qui eſt laſſus
De treſtous maus eſtoit Garniz et reuetus
Ne pꝛiſoit tout le monde Valliſſant .ij. feſtus
Il voult les ſerians dieu En touz lieus tourmenter
Plus fauſſe creature Ne pouoit on trouuer
/Iheruſalem cuida Vne foiz grauenter
Mes /le douz roys des roys Ne le voult en durer
Dieu laiſſe bn̄ regner A la foyz faus gloutons
Et leur donne des biens Tempoꝛielz plus qu'aus bons
Mes en la fin ont il De leur fais guerredons
Ainſi ꝯme le roy De qui nous vous parlons
Qui fiſt parmi ſa terre Mander toute ſa gent
Car le pueple de dieu Cuidoit metre a toꝛment
On dit que ceuz quiſuefrent Aſſez et longuement
Que qñt ce vient aufoꝛt Trop euurent cruelment
Tout en ce point fiſt diex Du roy que ie vous dis
Qñt vit qu'en ſon malice Eſtoit ſi en durcis
Vn mal li enuoia Dont il fu ſi acquis
Qu'il n'out en tout ſon oſt Garſon tant fuſt chetis
Qui ſ'a pꝛochaſt deli Pour nule riens viuant
Car ſon coꝛps qui eſtoit Ml՚t bel et auenant
Deuint ſi tres meſel ⁊ tant foꝛment puant
Que touz ceus d'entour Lialait en pulentant
LI meiſmes au cuer Si grant meſchief auoit
De la pꝛopꝛe puour Qui de ſon coꝛps iſſoit
Qu'il li eſtoit auis( que) Que d'angoiſſe creuoit
Les vers de touz coſtes De li iſſir veoit
Qñt /le meſcheant roy Tel deſtreſce ſenti
Bien crut que diex eſtoit Plus grant meſtre de li
A tout Auoit cuida merci
Mes donques n'ē ot point Trop tart ſe repenti
Ses mēbꝛes li chairent Treſtouz par pourreture
Au dëable fu ſ'ame Et mourut en laidure
Touz ſes meilleurz amis Virent ſa moꝛt ſi ſure
C'ōques ne li aiderent A auoir ſepulture
Es foſſes fu getés En la guiſe d'un chien
Plus a .i. hons honnoꝛ Plus doit ſauoir debn̄
Le chetif ꝑdi ſ'ame Et ſon coꝛps et le ſien
Ainſſi va de ceus Qui dieu ne pꝛiſe rien
Qui oꝛgueilleus ſe poꝛtent Pour biauté ou pour ſens
Pour auoir ou pour foꝛce Ou pour leur foꝛs parens
Si voit on au iour d'uy Grant q՚¯tité de gens
Que qñt il ſont malades Ou ont autres toꝛmens
Il croient trop bien dieu Et le vont reclamant
Et pꝛometent qu'iront Aſſez debn̄ feſant
Mes qñt ſe ſentent aiſe Sachiez il vont diſant
En la guiſe ꝯ ua d'un bon hōme coutant
Qui en la mer eſtoit En gñt peril moꝛtel
A /ſaint michiel ˞pmiſt Sa vache et ſon veel
Mes des ce qu'il ꝑcut. Qu'il fu en ſon hoſtel
Il diſt a/ſaint michiel Ne vache ne veel
Le paiſant ſout bn̄. /Saint michiel apeler
Au foꝛt mes n'ē tint conte Qnt fu hoꝛs de la mer
Et pour ce la dit on ˞Pmettre ſanz donner
Ne uaut riens ſe ce n'eſt A fol reconfoꝛter
Mes diex n'eſt mie fol voir Qñt nous li ˞pmeton
A faire bonnes euures Et nous ne les faiſon
Nous noꝰ mocon de li Si nous en ſentiron
S'a vraie repentance En la fin n'en venon
Ainſi ꝯme fiſt celle De qui ie vous vueil dire
Qui pour ſon pechié vout En durer grief martire
Le na ure ne doit pas Auoir honte demyre
Ains doit mouſter ſaplaie Plus couue plus empire
La dame de qui i'ay La raiſon pourpoſee
Eſtoit de /bouloignois De ml՚t noble gent nee
.I. cheualier la pꝛiſt De bonne renōmee
De li ot ij. enffans Iumeaus d'une poꝛtee
Di ſires ot grant ioie Dieu loa bonnement
Et /le baron ſaint iaque Qu'il requeroit ſouuent
.I. iour diſt ala dame Qu'il auoit grant talent
D'aler au /ſaint apoſtre En /galice bꝛiefment
La dame qui auoit Sō mari foꝛment chier
Li diſt mon chier ſeigneur Par amour vous requier
Q՚ ie voiſe ouec vous Bien me vueil traueillier
Pour l'a mour de /s՚ iaque I'enay grant deſirrier
LI ſires qui amoit La dame de cuer fin
Li diſt trop eſtes tendꝛe Pour faire tel chemin
Il ſe faut tart couchier Et leuer bn̄ matin
Pas n'ont toutes leur aiſes Li loyal pelerin
La dame reſpondi Bien vueil mal endurer.
Pour l'amour de /.s՚. iaque Qui nous vuille ſauuer
Le chl՚r diſt dame Bien m'i vuel acoꝛder
Voſtre deuotion Ne vous vuel pas oſter
La dame fiſt grant ioie Qñt oÿ l'a coꝛdance
Mes puis l'en yauint Doulereuſe greuance
Par l'art de l'ennemi Ou n'a que deceuance
Ꝯ vous oꝛrés ſe dieu M'ē donne la puiſſance
Trop vilainement Fu la dane de ceue
Il li vauſiſt trop miex Qu'el ne ſe fuſt meue
Le cheualier qui ot Sa choſe pourueue
Droit l'en demain depaſques S'eſmut ſanz attendue
O li mena ſa fame Miex li vauſiſt laiſſier
Ml՚t bn̄ furent montez S'oꝛent .i. eſcuier
Et .i. loial vallet Qui menoit le sōmer
Mes ou chemin trouuerēt .I. autre cheualier
De leur pais eſtoit N'out q'ū carcon trotant
O ceus ſ'a compaigna Dont ie vous voiz ꝑlant
Au p՚mier leur mouſtra D'amiſtié grant ſamblant
Mais puis les tourmenta Ꝯ vous oꝛrez auant
S'en ont il en la fin Tres doulereus louier
Ꝯ vous pourrez oir Bien bꝛiefment ˞pnōcier
Tres douce gent on dit Souuent en repꝛouuier
Qu'apaine ſe puet on De traiſon guetier
Le ionne cheualier Qui n'auoit point de fame
Toutes foiz qu'il pouoit Apꝛouchier de la dame
S'amour li requeroit De quoi c'eſtoit diffame
Mes celle qui penſoit Au ſauuement de ſ'ame
Li diſoit abꝛiez mos Voſtre paine perdés
Se monſeignour ſauoit Ce que me requerez
Il vous en meſcherroit Ia ne vous en doubtez
Ꝯme fauz pelerin Par foy vous maintenez
Ocelui qui eſtoit chauz Et plain d'art d'anemi
Li diſoit chiere dame Deſſus terre langui
Et tout pour vr՚e amour Se n'en auez merci
Mourir me conuenra Loialment le vous di
Se mari a la dame A ce pas ne penſoit
Pour ſon loyal amy L'autre touz iours tenoit
Qui de tout ſon pouoir Sa honte pour chaſſoit
A deceuoir ſa fame Ml՚t grant paine metoit
Mas a dame n'auoit De faire male enuie
Tant qu'a /ſaint iaque vīdꝛent .I. ſoir apꝛés complie
L'en demain qñt il oꝛent La ſainte meſſe oye
Et faites leur offrandes Ne ſe targerent mie
Il pꝛinrent leur enſaignes S'ont fet leur retour
Celui qui requeroit La dame de folour
La pꝛia ſi ſouuent Que il auint .i. iour
Qu'ele li diſt amis Trop ſouſfrés de dolour
Ce c'eſt voir que me dites Mes fere n'oſeroie
Ce que me requerez Car ne puis trouuoir voie
Se ie le fes qu'errant Encuſee ne ſoie
Qñt celui l'entendi Ml՚t out au cuer grant ioie
Liement li diſt dame De ce ne vous doubtés
Bien vous ꝯſeilleray Se croire me voulez
Ia a vr՚e ſeigneur Apꝛés diſner direz
Que vous eſtes malades Foꝛt uoꝰ douloſerés
Et ditez qu'il vous faut Belement cheuauchier
Deuant l'enuoirés Lui et ſon eſcuier
Pour atourner les choſes Qui nous aront meſtier
Mon garcon ſ'en ira Auec eus ſans dangier
Nous dirons qu'apꝛés Irons tout belement
Et que truiſſon tout pꝛeſt Ia al'a veſpꝛement
Et nous iron couchier Bien ⁊ pꝛiueement
En tel lieu ou feron Tout a nr՚e talent
Et puis demain matin Au point de l'a iournant
Cheuaucheron v՚s euz Bn̄ les iron trouuant
Loꝛs a vr՚e ſeigneur Feron foꝛt entendant
Qu'ē nuit mourir cuidates En dꝛoit ſouloi couchant
Et que de certain fuſtes Sitres mal atournee
Qu'ē tre bꝛas ou chaſtel Fuſtes ꝑmoy poꝛtee
La dame qui ſ'eſtoit Longuement bn̄ gardee
Fu par art d'anemi Laidement enchantee
Elle crut le traitre Dont fiſt grant foleté
Puis l'en cōuint ſouſfrir Aſſez depoureté
Qñt vint qu'a ꝯplir durent Leur fole volenté
Foꝛment leur meſauint Si ꝯme ie diré
La dame qui auoit Le coꝛps plaiſant ⁊ bel
Eſtoit par ſon dꝛoit nō Apelee yſabel
Li et le (gou )gloutō vindꝛent Droitement au chaſtel
Errant ſe herbergierent De dens .i. grant oſtel
Mes le mari la dame Qui ſ'en eſtoit alé
Pour retenir l'oſtel Des qu'il ot ꝯmandé
D'atourner au ſouper Diex li miſt en penſé
Qu'alaſt contre ſafame Ia oꝛés grant pité
Quāt ne l'en contra pas Il fu touz esꝑdus
Mais il trouua .i. hōme Qui eſtoit touz chanus
A qui il demanda S'auoit tiex gens veus
Et il li diſt biau ſire Par dieu qui maīt laſſus
Erains les vit aler Droit v՚s ce chaſtel la
Le cheualier l'oÿ Foꝛment eſperonna
Car pꝛés eſtoit denuit Dieu ſibien li aida
Qu'en l'oſtel ou eſtoient Treſtout dꝛoit ariua
L'oſte et l'oſteſſe al'uis De leur oſtel ſeoient
Le cheualier en quiſt Se tiex genz y eſtoient
Et il li reſpondirent Que couchier ſe vouloient
Il fu touz eſbahis De ce qu'i li contoient
De mautalent verti Et diſt ſanz remanoir
Ferray le faus glouton Et la fauſſe douloir
C'eſt ma fame eſpouſe Ie le vous di pour voir
Fetes mouſtrés le moy Il les me faut vëoir
L'oſte li requiſt biau ſire Par amour vous requier
Que cheēs ne leur faites Ennuy ne deſtourbier
Le iuge de la ville Eſt bon et dꝛoiturier
Se deſpit vous ont fet Bien vous fera vengier
On manda le baillif Qui mie ſeul n'eſtoit
Siꝯme li traitres Ou lit entrer deuoit
Qui ſon mauués deſir Bien a complir cuidoit
Le mari ala dame Vit qui haut li diſoit
Fauz mauués deſloiaux Au trenchant de m'eſpee
Vous ſera celle teſte ˞Pchainement couſpee
La fauſe ſera arſe Bien l'ay pꝛiſe pꝛouuee
Pour dieu oꝛ entendés Douce gent hōnouree
La dame qui eſtoit Ou lit treſtoute nue
Pour honte de la gent Fu ſi foꝛt esꝑdue
Qu'a ſon mari a dit Ꝯ fole mal oſtrue
Que rien ne li eſtoit Trop foꝛt fu de ce ue
Car elle renioit Son dꝛoit loyal mari
Pour l'autre qui n'auoit Onques geü aly
Qñt le mauués glouton ſon parler entendi
Il pꝛiſt grant hardement Deuant touz diſt ainſi
Biau ſeigneurs voꝰ veés Ci endꝛoit (a )en p՚ſent
Que couchier me vouloie Bien et paiſeblement
Mes cel cheualier Ci ymet empeeſchement
⁊ dit que i'ai erré Ꝯtre li fauſement
Mes il ne dit pas voir Diex enſcet mon courage
Il n'a rien en la dame Iel' ay par mariage
Et ſe deſdire l'oſe. Ꝯtre li tent mō gage
Loꝛs la dame qui eſtoit Preuz et ſage
D'air bailla ſon gant Au baillis l'a tendus
Puis a dit en tel guyſe Se ne l'ē rent ꝯfus
I'a coꝛt que ie ſoie Ꝯ recreant pendus
Et ſe il auient choſe Que par moy ſoit vaincus
Qu'a mon talent me puiſſe De ma fame vengier
Et la puiſſe mener En mon pais arrier
Et li glouz ſoit pendus Qui m'a voulu tⁱchier
Loꝛs l'autre diſt en hault Bien m'y vueil otroier
On fiſt leuer la dame En pꝛiſon fu menee
Dedens vne foꝛt chambꝛe Ou ml՚t bn̄ fu gardee
Et ſon mari et l'autre Tindꝛent pⁱſon fremee
Tant que touz les ſeignours D'enuiron la contree
Pour voir la bataille Et pour le dꝛoit iugier
Le mari et la dame Manda ſon eſcuier
Et le garſon auſſi Qui menoit le sōmier
Bien ſe pourquiſt de ce Qui li eſtoit meſtier
L'autre qui out la dame Par ſon parler muee
Sanz ce ꝯques l'eüſt Charnelment adeſee
Fu noblement armés Qñt vint ala iournee
Mes illa la bataille Ml՚t foꝛment redoutee
Car de certain ſauoit Que ſiens eſtoit li toꝛs
Nō pour tant il eſtoit Biaus et ionnes ⁊ foꝛs
Et ſi pꝛiſoit foꝛment La foꝛce de ſon coꝛps
Mes qñt ce vint au iour Que il furent hoꝛs
Pour la bataille fere Qu'il oꝛent eſmeue
Mes la dame qui fu En la pꝛiſon tenue
Eſtoit ſi toꝛmētee Et ſi foꝛt iraſcue
Qu'elle vouſiſt bn̄ eſtre Dedens terre fondue
Elle diſoit douz diex. Que m'eſt il a uenu
Bien eſt mō las de coꝛs En gñt vilté cheü
Par ce faus loſengier Qui puiſt eſtre pendus
Mes diex merci pas n'a Ouecques moy geü
Nō pourqñt de touz poins M'y eſtoie a coꝛdee
Mon mari renoiai Ꝯ fame foꝛſenee
Mais ſe ie deuoie eſtre Dedens .i. feu getee
S'en dirai ie le voir N'ia meſtier celee
Ainſſi ſe dementoit La dame toute iour
Par vne des feneſtres Qui eſtoit en la tour
Vit armé ſon ſeignour Pour aler en l'eſtour
Qui ſe deuoit combatre Ꝯtre le traitour
Qui d'autre part ſe fiſt Ml՚t richement armer
On apoꝛta les ſains Pour eulz faire iurer
Cil qui ont dꝛoit ſ'ala A genoullons geter
Tantoſt qu'il vit les ſains Il pꝛiſt haut aparler
Et diſt ſeigneurs ie iure Par les ſains qui ſont ci
Et par treſtouz les autres De quoy dieu eſt ſerui
Que ceſt mauués glouton Qui ci eſt m'a tray
Et foꝛtraite la dame A qui ie ſui mari
Le penſoie que fuſt .I. loial pelerin
Qui requeriſt /ſaint iaque Ou i'ai fait le chemin
Mes pire l'ai trouué Aſſez q'un ſarazin
Regehir le ferai Ains que iour pñgne fin
En bonne loyauté Acompaignié l'auoie
Autant ꝯme amon frere En ſon coꝛps me fioie
Ma fame m'a tolue Et tourné en tel voie
Qu'a toꝛt et ſanz raiſon Par ſon art me renoie
Onques mes ne la ui Mauueſe ne ſauuage
Par amours mandés la Si ſarai ſon courage
Loꝛs la fiſt on venir Sans nesū arreſtage
Mes n'oſoit creature Regarder el viſage
Elle eſtoit ſi hideuſe Que ne ſauoit que faire
Qñt ſon mari lauit Haut li diſt ꝑ contraire
A dame pelerine Ml՚t ſemblés debonnaire
Deuant les bonnes gens Leuez haut le viaire
Tantoſt ꝯme la dame Son parler entendi
A nuz genous ſe miſt Par deuant ſon mari
Et diſt merci requier Bien ꝯnois que ie di
Que ie vous renioie Ce fu art d'anemi
Bien ꝯnois que vous eſtes Mon dꝛoit loial eſpous
Et que i'ai .ij. biaus fiuz En /boulonnois de vous
Mes cel loſengier la Qui eſt foux ⁊ eſtous
M'auoit ſouuent requiſe Par monz courtois et douz
Mes onques n'out amoi Charnele compaignie
Bien ꝯnois que du tout M'y eſtoie otroiee
Qñt diex vous amena Et /la virge marie
Bien vueil mourir enl'eure Se i'ai moꝛt deſeruie
Son mari reſpondi Pas ne fuſtes bn̄ ſage
Qñt ouecques moi veniſtes Ou ſaint pelerinage
Pour moi fere tel honte Vous iarés domage
Loꝛs l'autre chl՚r Diſt haut en ſon langage
Seigneurs oꝛ entendez Pour dieu granz et petiz
Ie iure ſus les ſains Qu'auez enp՚ſent mis
Et ſus treſtouz les ſains (autres) qui ſont ēparadis
Ꝯques de vilanie La dame ne requis
Ancois m'ē requeroit Et me
Les gens qui la eſtoient S'eſbahirent foꝛment
Bien penſerent qu'ot fet Deſloyal ſerement
Loꝛs le mari la dame Li diſt ml՚t fierement
Faus deſloyaus mauués Vous y aués menti
Autres choſes dirés (ains) ains que partés de ci
Cōgnoiſtre vous ferai Ꝯment m'auez tray
De dieu et de /ſaint iaque L'apoſtre vous defi
La dame ꝯ auoit En la tour remenee
Maudiſoit foꝛment l'eure Qu'ot onques eſté nee
Deuotement pꝛioit /La uirge courōnee
Qu'il vouſiſt ſon mari Sauuer celle iournee
Celle qui en la tour Foꝛment ſe dementoit
Pramiſt a /ih՚ucriſt Se ſon ſeignour ſauuoit
Que iamés en ſa vie Son col ne paſſeroit
De riens qui moꝛt goutaſt Douz diex pas ne penſoit
Au doulereuz tourmenz Ne au crueus deſpis
Qui li fiſt en pꝛeſent De ſes meilleurs amis
Onques mes coꝛps defame Vilaine ne gentis
Pour (ci )ſi petit meſfait Ne fu entel point mis
Ainſſi ꝯ vous oꝛrés Se tout mon dit recoꝛt
Le ionne chl՚r Qui auoit ml՚t grant toꝛt
Pour ce que ſe ſentoit Legier hardi et foꝛt
Cuida bn̄ ma ter l'autre Mes diex li fiſt confoꝛt
Et /le baron ſaint iaque En qui out gñt fiance
A celui qui out toꝛt Auint tel meſcheanche
Que qñt il fu el champ Son cheual n'ot puiſſance
D'aler encontre l'autre C'eſtoit grant demouſtrance
Car touz iours reculoit Et pꝛiſt aregiber
Si foꝛt qu'il fiſt ſon maiſtre Contre terre verſer
Loꝛs li cria la dame Ne le vout depoꝛter
Ains li ala ſon glaiue Parmi le coꝛps bouter
Qñt cil ſenti le couper Loꝛs diſt a haute voiz
Sire pour dieu merci Ma mauueſtie cōgnois
Vr՚e fame requis D'amer par pluſeurs foiz
De male eure la ui Pour li ama fin voiz.
Nō pour qñt elle m'ot Au derrain encouuent
Que feroie dely Dutout amō talent
Sieuſſe ie fait Mes ie n'en fis nient
Car trop ſourueniſtes Auecques vous grant gent
Qñt (a )couchier me voloie Ou lit la dame virent
Loꝛs qñt nobles hōmes L'arraiſon oirent
Trainer au gibet Et puis pendꝛe le firent
Toute quite ladame A ſon ſeigneur rendirent
Et li pꝛierent tant (qu'il) Qu'il la vouſiſt quiter
Mes onques leſeigneur Ne ſi uout otroijer
Ains diſt qu'il ſ'en ſara Bien par raiſon vengier
Quant venra au pais Qu'auoit
De la ville ꝑti La dame fiſt monter
Sur .i. poure roncin Que ont fet acheter
Mes onques en chemin Ne vout ali parler
Ne il ne la daignoit qu'a paines regarder
D'aler en ſon pais Li ſire ſe haſta
Onques auec ladame Ne but ne ne menga
Ne ne iurent enſamble Celle qui ſe doubta
D'auer grant vilanie Foꝛment ſe dementa
Mes gueres de pité N'ē auoit li pꝛeudon
Ains penſoit qu'il penroit Deli venioiſon
Auſſi toſt ꝯme il fu En ſa poſſeſſion
Touz les amis la dame Manda en ſa maiſon
Et ſi ifiſt des ſiens Venir agrant plenté
Oꝛ entendés qu'il fiſt Pour ſainte charité
Il apela ſa fame Qui auoit grant biauté
Ml՚t bn̄la fiſt veſtir Puis li a ꝯmandé
Qu'elle alaſt en la ſale Les bonnes genz vëoir
Qui eſtoient uenuz Digner en ſon manoir
Cel iour fiſt .i. mengier Qui couſta grant auoir
La dame ſe laiſſa Deuant ſes piez chëoir
En ſoupirant du cuer A dit aml՚t grant paine
Douz ſire pour la grace Qui ne fu pas vilaine
Que diex fiſt a/la douce /Marie magdalaine
Aiez merci de moy Bien voy et ſui certaine
Que vous voulez demoy Deuant chaſcun uengier
Mes trop miex ſ'il vous pleſt Empoꝛrés eſploitier
Fetes ſecretement Vr՚e cuer eſclarier
Si que nos .ij. enfans N'i aient repꝛouier
Car vous les engendꝛates Chier ſire par ma foy
N'ōques hōme que vous Ne iut onques a moy
Ꝯbien que m'otroiaſſe A fere le deſroy
Par l'art de l'anemi Ne plout a dieu le roy
Metez moi en tel lieu Se vr՚e cuer l'otroie
Ou lune ne ſoleil Iamés nul iour ne voie
Ml՚t ay pꝛomis c'eſt dꝛois Que foꝛt pugnie ſoie
Fauſe diſt loꝛs li ſires Trop trouuas male voie
Qñt tu me renias Ce fu grant eſtoutie
Ie ne ſay gré qu'a dieu Et a/(la) virge marie
Et au /baron ſaint iaque De ce que ſuy enuie
En grant peril de moꝛt Fu par ta lecherie
Ua de ci te digne Auecques tes amis
Iamés ne les verras Sur dieu le te pleuis
Loꝛs fu le cuer la dame Sifoꝛt eſpouris
Que elle ſe paſma Deſſus le marbꝛe bis
Son ſeignour la leua Puis l'a ſiſt ſanz ſeiour
A la plus haute table Et ſes amis en tour
De vins et de viandes Oꝛent aſſez cel iour
Le ſeigneur de l'oſtel Qui fu en grant triſtour
Des qu'il oꝛent laué Diſt haut oꝛ entendés
Seigneurs ne ſaués pas Pour quoi vos ai mandés
C'eſt pour .i. iugement Que cil vous plaiſt ferés
D'un fait qui vous ſera Maintenant recoꝛdés
Un cheualier erroit Il n'a mie granment
Auecques li ſa fame Qu'il amoit loyalment
Mes .i. autre ionne hōme La requiſt ſi foꝛment
Qu'elle acoꝛda du tout A fere ſon talent
Mes voir il ne pooient Lieu ne place trouuer
Tant que hoꝛs du chemin S'allerent deſtoꝛner
La fauſe a ſon mari S'alla tant dolouſer
De mal que l'enuoia Pour haſter le ſouper
Mes courage n'auoit Que ce ſoir la ueïſt
Ancois ſe herberga Et coucha en .i. lit
Son ribaut ſi vouloit Couchier ſanz nul reſpit
Qñt le mari la dame I ſouruint qui tout vit
Tuer cuida la fauſe Et ſon ribaut auſſi
S'auoit il amené Pluſeurs genz auec li
Mes celle qui auoit En ſon coꝛps l'anemi
Deuant ceus qui la furēt Renoia ſon mari
Si foꝛt fu par ſa fame tenu le cheualier
Que gage de bataille Li en conuint baillier
Cōtre l'ami la dame Mes diex le dꝛoiturier
Vout ſauuer le pꝛeudōme Et nuire auloſengier
Car ou champ fu vaincu Et encroué au vent
Loꝛs r'ot le cheualier Sa fame quitement
Tant afet que elle eſt Dedens ſon tenement
Mes bn̄ vous di q՚ i'aīme Le cheualier granment
Car pꝛiué ſuy de li Ml՚t a longue ſaiſon
Cōſeil m'a quis ꝯment Penra la venioiſon
De celle qui afet Vers li tel traiſon
Chaſcun de uous endie Ce qui l'en ſemble bon
Loꝛs le pere ala dame Qui eſtoit touz flouris
Qui ne ſout pas pourquoy Tiex moz eſtoient dis
Reſpondi uoir ſ'eſtoie De tel fame garnis
Qui m'aroit fet tel honte Son coꝛps ſeroit bꝛuis
A ſon dit ſ'acoꝛda La compaignie toute
La dame fu entr'eus Qui eſtoit en doute
El n'oſoit dire mot Ains ſouſpire et eſcoute
De honte vouſiſt eſtre Ꝯfondue et deſroute
Loꝛs parla ſon mari Qui eſtoit pꝛeuz et ſage
Et diſt ſeigneurs ma fame Eſt de voſtre lignage
Sachiez bn̄ que c'eſt celle Qui m'a fet tel domage
Mes ne ſera pas arſe Car ie n'ay courage
Et ſ'en pērai veniance Crueuz par autre tour
Loꝛs les amis la dame Requirent par doucour
Qu'ē tel point ſ'en veniaſt Ne fuſt leur deſhōneur
Et il leur reſpondi Que iamés anul iour
N'en oꝛroient parole vn(e) Soir la fiſt (la fiſt )mander
Droit au poꝛt de /wiſſent. Bien ſ'ala confeſſer
De treſtouz ſes pechiez Que elle pout penſer
Bien cuida qu'ē lamer La vouſiſt on geter
Elle auoit .i. anel De fin oꝛ ſeulement
Son mari li oſta De ſon doy rudement
En la mer le geta Et dit qu'acoꝛdement
N'ara ali ſe diex L'anel d'oꝛ ne li rent
Il ne penſaſt iamés En neſune maniere
A reuoier l'anel Dont la pierre fu chiere
Mes puis le vit il Et ot la dame chiere
Plus que deuant mes Loꝛs out uolenté ſifiere
Qu'ēnelés ot fet fere Gros et rudes de fer
Et .x. dois a la dame Les a fet .x. bouter
Si foꝛt qu'il n'eſtoit hōme Qui les poiſt oſter
Et puis la ꝯmenca Foꝛment aramponer
En diſant belle dame De tiex anés aués
Dont toute vr՚e vie En ſaiſine ſerez
Elle reſpondi ſire Fetes vo volentez
Il l'a pꝛiſt par le bꝛas Et diſt oultre paſſez
En .i. batel la miſt Ou il n'auoit riens nee
Puis la bouta en mer De ml՚t grant alenee
La dame ſ'eſcria Sire ſ'il vous agree
Penſés de vos enfans Leur mere eſt adiree.
Le vous ꝯmant adieu Puis q̃inſſi de parton
De mes pechiez me face Nr՚e ſeigneur ꝑdon
Le ſeigneur ſ'en reuint Tout penſant en maiſon
.I. petit de la dame Se il vous pleſt diron
Qui eſtoit .v. batel Seule ſanz nule ſoulas
Les ondes la feſoient aler Puis haut puis bas
Elle diſt tres touz diex Qui ſauuates /ionas
El ventre ala balaine Car ne m'obliés pas
Et ſ'il vous pleſt ainſi Que ſoie noie
Aiez (pité )merci de ma uie Qu'elle ne ſoit perie
Et ſauués monſeigneur Et toute ſa meſnie
Adont vint .i. vent Deuers deſtre ꝑtie
Et au plaiſir de dieu Le batelet mena
En .i. ille de mer Ou ame n'abita
Loꝛs pꝛiſt la dame terre Tout ꝑtout regarda
Ne vit hōme ne fame Dont ml՚t ſe dementa
En celle ille de mer N'ot boꝛde ne maiſon
Pain ne blé ne farine Ne autre gariſon
Mes poumetes ſauuages Y auoit grant foiſon
Rouſes et aube eſpine Et maint eſpés biſſon
La dame ſoſpira Dieu pꝛiſt areclamer
Car ſi grant auoit Que ne pouoit durer
Des poumetes ſauuages Ꝯmenca ataſſer
Car .ij. iours et .ij. nuys L'out falu ieuner
Des herbes et des pōmes Que par l'ile trouuoit
Veſqui .xl. iours. De citernes beuoit
Qui eſtoient en l'ile Et puis qñt il plouuoit
En .i. creus d'ū viex arbꝛe A garant ſe boutoit
Bonne gent ꝑ .i. mot Qu'elle diſt ꝑ folie
Et pour ſoy conſentir Aumal que ne fiſt mie
Souſfri ml՚t de douleurs Mes ains que ꝑdit vie
Out ſi ꝯ uous oꝛrés Pes aſa compaignie
Mes aincois li conuint Pluſeurs maulz endurer
Des anelés de fer Vous vueil .i. poi parler
Que ſon pari par foꝛce Lifiſt es dois bouter
Tant li firent d'angoiſſe Que foꝛt eſt a conter
Car les .x. anelés Si tres eſtrois eſtoient
Que les dois et les mains Ml՚t foꝛment li enfloient
Le cuir et la char tendꝛe De touz poins li rompoient
Poi de gent en bon gré Telle douleur pñdꝛoient
Mes celle auoit au cuer Si ferme repentance
Tant plus ſentoit de mal Et de dure puiſſance
Loꝛs baiſoit les aneaus En deuote plaiſance
Et pꝛioit /ih՚u criſt Par ſa digne puiſſance
Gardaſt de mal celui Par qui li furent mis
Et diſoit voir mon coꝛps Deüſt eſtre bꝛuis
Qñt reniai celui Qu'eſtoit mō dꝛoit maris
Et le mis en peril D'eſtre vilment fenis
Qñt celle out de dens L'ile eſté .xl. iours
Qui eſtoit tout adés En lermes et en plours
/Li tres douz ih՚u criſt Li enuoia ſecours
Si ſouſfri elle (plus )puis Aſſez d'autres doulours
Si ꝯme ie dirai S'il pleſt a dieu le pere
Vous n'oiſtes pieca Plus piteuſe matere
La nuit d'une /ſaīt iaque Que la lune fu clere
S'a genoulla la dame Qui ſouſfroit gñt miſere
Et diſt gloꝛieus diex. Qui vouſiſtes aler
xl. iours entiers Ou deſert ieuner
Donne moy en ceſt mōde Tiex paines endurer
Qu'ē la ꝑfin me puiſſe Enu՚s vous acoꝛder
Et amō bon mari Qui me hait et dꝛoit a.
/Saint iaque douz apoſtre Vr՚e feſte ſera
Demain ie le ſai bn̄ L'anemi me tempta
Qñt de vous reuenoie En griés las me bouta
Uueilliez pꝛier pour moy A /la virge pucelle
Qui poꝛta le douz fruit Qui pecheurs rapele
Qu'ē ceſt monde Ca ius face penance telle
Qu'a pꝛés ma moꝛt ſoit M'ame deuant /ih՚u criſt belle
Car du coꝛps ne me chaut Bonne gent oꝛ oez
Cōment le roy des roys Eſt plains de grans bontez
A paines ot la dame Ses parlers definés
Qñt elle vit venir Droit v՚s l'ile .ij. nes
Car .i. eſtourbellon Leua en haute mer
Qui fiſt les .ij. ueſſiaus Deſſous l'ile ariuer
Il dit voir qui le dit Ml՚t l'ay oÿ conter
Que ia ne perira Ce que diex veult ſauuer
En l'une des nes Ot .i. conte palazin
Qui auoit pluſeurs villes Deſſus le grant chemin
En /eſpaigne par ou Paſſent li pelerin
Qui vont dꝛoit a/ſaint iaque Ml՚t ot cuer pur et fin
Premier ꝑcut la dame Adonc diſt aſa gent
Ie uoi la vne dame Qui ml՚t a le coꝛs gent
Hoꝛs de la nef iſſi Vers li vint haſtiment
Et puis la ſalua Bel et courtoiſement
Apꝛés diſt doucement Qui vous amena ci
Elle reſpondi ſire Voir vne nef peri
En la mer ou i'eſtoie En cel batel ſailli
Au gré de dieu ving ca De noier me gari
.xl. iours et plue Ci que ie ne vi pain
Le ſeigneur l'ē mena Qui fu bon et certain
En la nef bn̄ penſa Que elle eüſt grant fain
Il fiſt deuant li metre De viandes tout aplain
Mes qu'a pain ⁊ a eue Ne vout onques touchier
Si l'es foꝛcoit ſouuent Le ſeigneur de mengier
Mes qñt ꝑcut les mains Foꝛt ſe pꝛiſt aſeignier
Que les aneaus li oꝛent Trop foꝛt fet domagier
Loꝛs li diſt doucement Celui qui fu courtois
Dame ſe diex me gart Ceſeroit gñt deſrois
Se ne fetes oſter Ces anelés eſtrois
Qui ainſſi vous afolent ⁊ les mains et les dois
Il a ſiens .i. mire Qui bn̄ (e )les oſtera
D'une petite lime Souef les limera
De la doulour qu'auez Tantoſt vous garira
La dame reſpondi Sire ia n'auenra
Que les anelés chient hoꝛs De mes .x. dois ius
Se n'eſt pas le vouloir De dieu qui maint laſſus
Il ꝑtirent de blé Qñt l'oꝛé fu cheus
A .i. des poꝛs d'/eſpaigne Sont a ville venus
Le conte vout la dame En ſon pais mener
Mes elle li pꝛoia Qui lli vouſiſt pꝛeſter
Lieu ſus le grant chemin Ou peüſt demourer
Afin qu'elle peüſt As pelerins parler
Qui trauaillent leurs coꝛps Pour /la ſaint iaque amour
Liſire reſpondi Trop ſouffrés de doulour
Celle diſt doucement Seruir mon creatour
Vueil de tout mō pouoir N'ay ſoing d'autre labour.
Au conte qui eſtoit Douz ⁊ loial et ſage
Pleſoit ml՚t de la dame Le coꝛps et le viſage
Illi diſt voir ie croi Qu'eſtes de grant lignage
Volentiers vous penroie Par loyal mariage
Tantoſt ſeroit le mal qu'auez es mains garis
Apꝛés moy ſ'il vous pleſt Tenrés tout mō pais
Ml՚t ſuy riche d'auoir Qu'ē m'effance cōquis
Onques n'eſpouſai fame Ne n'ai fille ne filz
La dame diſt ſire douz De baſſe gent ſui nee
Si gñt part de ma vie Ꝯ pechereſſe vſee
Penance me faut faire Pour eſtre racoꝛdee
Voué que iamais d'ōme Ne ſeroie pꝛiuee
Mes pour dieu fetes moy Ce que uous ai requis
Ie pꝛierai pour uous Et pour tous uos amis
Li ſires qui eſtoit Plain decertain auis
Li fiſt ou chemin fere .I. biaus lieu et faitis
.xij. fames imiſt Qui beguines eſtoient
⁊ leur amarti rente Dequoy elles uiuoient
Le pelerins de ca Qui a /ſaint iaq՚ aloient
Par deuant cel oſtel Dont ieuous di paſſoient
La dame qui auoit Endieu ſeruir ſacure
Ꝯbn̄ qu'eüſt mol lit Geſoit aterre dure
Bonne uie pour l'ame Menoit mes ml՚t fu ſeure
A ſon coꝛps pas n'auoit Apꝛis tel noꝛreture
Leconte qui auoit Cel lieu fet oꝛdenner
Venoit ſouuent La dame uëoir et uiſiter
Car loyaum̄t l'amoit Sans nul uilain penſer
Mes lamoꝛt qui tout pꝛent Vint auſeingneur hurter
Quant il ꝑcut ſa fin Et ſout qu'il ſemouroit
La rente de la uille Qui .vc. mars ualoit
Vout laiſſier aladame Qui ſaintement uiuoit
Loꝛs treſpaſſa liſires Qui ml՚t amés eſtoit
La dame de la rente Fiſt fere .i. biau mouſtier
Et i. bon hoſpital Pour poures herbergier
Chaſcun parloit deli Et auant et arrier
Deconfoꝛter les poures Ne ſe pouoit targier
Par le pais aloit Deli grant renōmee
Depenitance faire N'eſtoit onques laſſee
Souuent requeroit dieu Et /la uirge loee
Qu'en u՚s ſon dꝛoit ſeignoꝛ Peüſt eſtre acoꝛdee
Deuotement pꝛioit auſſi poꝛ ſes .ij. fiex
Qu'encoꝛe lesueïſt ſains Et ſaus de ſes iex
Pour dieu oꝛ entendés Treſtous ionnes et uiex
S'oꝛrés les grans u՚tus Que fiſt le roy des ciex
Par q՚l point il donna Talent au cheualier
Deretrouuer ſa fame Que il en fiſt chacier
En .i. quareſme auint .I. pou deuant mengier
Que li ſires ala uëoir Son cuiſinier
Qui atoꝛnoit poiſſon Mes dedens l'un trouua
L'anel qui fu ladame Qui ꝑmer ſ'en ala
Le ſeingneur lecōnut Tendꝛement lebaiſe
Pour l'amour deſa fame De pitié lermaia
Tres douz diex diſt liſire Certes ſe ie cuidoie
Que trouuaſſe la dame Voulent՚s laquerroie
Mes de ꝑdꝛe ma painne Foꝛment me douteroie
Voir deceſt anel Ci doy bn̄ auoir gñt ioie
Car ie penſe que dieu Lem'a fet enuoier
Pour auoir remēbꝛance Demalaſſe moullier
Qu'en .i. batel laiſſai Endoute denoier
Mes peüſt eſtre Q՚ dieu lia voulu aid՚
Le cheualier ſ'ala A /.S՚. iaque uouer
Et dit qu'il li fera Ses .ij. enfans poꝛter
Afin qu'encoꝛe puiſt Sa fame retrouuer
Adonc fiſt ſes .ij. fiex Ꝑ deuant li mander
Oeulz iuindꝛent tātoſt Qui leur pere doutoiēt
Detreſtoutes faitures Mout bn̄ li reſembloient
vij. ans tant ſeulement Dedꝛoit aage auoient
Encoꝛe deleur mere Nulle riens neſauoient
Quant leur pere les uit Foꝛt pꝛiſt aſouſpirer
Ses choſes oꝛdenna Pour a/ſaint iaque aler
De dens une litiere Fiſt ſes enfans poꝛter
De conter leur iournees Ne me quier ia meller
Mes herbergier ſe firent .I. ſoir ains l'anuitier
A .ij. lieues de la Ou eſtoit ſamoullier
La dame apꝛés ſouper Ꝑloit aſon poꝛtier
Entant deuant lapoꝛte Paſſoit .i. meſſagier
La dame lehucha Qⁱ auoit grant enuie
Deſauoir ſ'il uenroit Ame de ſa ꝑtie
Au meſſagier adit Frere di ie te pꝛie
Ses tu ſ'il uient Nului dedeu՚s /picardie
Dame diſt il oyl Demain paſſe ci
Vns hons de/boloignois Bon ch՚r hardi
Qui ſes .ij. filz amaīne A /ſaint iaque auec li
Loꝛs diſt ladame bas Bn̄ croy c'eſt mon mari
Les n'en fiſt nul ſemblant aīz pͥſt Loꝛs d'un ſoutif engin diex aloer
La fiſt diex auiſer
A ſa gent coumanda C'on ne laiſſaſt paſſer
Pelerin l'endemain S'ali n'aloit ꝑler
L'endemain ꝑmatin ſi com pͥme ſonnoit
Vint la le ch՚r Qui ſes enfans menoit
Mes les ſerians lidirent Qu'auant ne paſſeroit
S'a la dame du lieu Congié n'en demandoit
Li ſires qui n'eſtoit Outrageus ne eſtous
Leur diſt ne uueil pas Des obeir a uous
Son eſcuier hurta Endiſant frere douz
Alés dꝛoit aladame Ꝑler pour nous treſtous
Loꝛs al'oſtel la dame S'en ala l'eſcuier
Elle diſt quant leuit Dont eſtes frere chier
Voir de/boulonois Dame a .i. tel ch՚r
Qui .ij. filz iumeauz Maīne au /.S՚. iaq՚ mouſt՚
Afin qu'il puiſt lamere aus enfans retrouuer
.I. anel qu'elle auoit Geta dedens lamer
Pour ne ſai quel deſpit Il ler'a ſans fauſſer
Loꝛs coum̄ca la dame Foꝛment aſouſpirer
Non pour tant elle diſt amis oꝛ entendés
Ieſai bn̄ c'on vous a La deuant arreſtés
Sepaſſer uoulés outre Vous me creanterés
Q՚ uous et ur՚e meſtre Parci repaſerez
Et ſi ferez amoy parler le ch՚r
Deuëoir les enfans Ai ml՚t grant deſirier
Adonques reſpondi Doucement l'eſcuier
Dame ie leuous iure Sur dieu ledꝛoiturier
L'eſcuier retourna aſon ſeignoꝛ tantoſt
Mout bien li recoꝛda Deparler qu'oÿ ot
Tous en fu eſbahis Mes que dire ne ſot
Adonq՚s ſemirent Elchemin abꝛief mot
Il eſploitierent tant Q՚ a /ſaint iaq՚ furent
Bn̄ firent leur offrendes ⁊ ce que fere durent
A oſte n'a oſteſſe Nule choſe n'acrurēt
Quant il enfu ſeſon A retourner ſemurent
Car d'aler enſon lieu A chaſcun deſirance
Mes /le douz ihu՚ criſt Qⁱ ſur tous a puiſſance
Vout mouſtr՚ ala dame Belle ſenefiance
Car bn̄ ſout qu'ot ſouſf՚te Crueuſe penitance
C'ūne vois li uint dire Ton ſeingnour ſera ci
⁊ tes .ij. filz dimenche I. pou deuant midi
Va t'en celle iournee Humblement contre li
Quant tu l'enconterras Sili requier merci
La dame fu mout lie Quant lauoit eſcouta
Tous les clers et les p՚ſtres De la terre manda
Leiour que ſon ſeingnoꝛ Ou pais arriua
Depꝛoceſſions fere Doucement leur pꝛoia
Ceulz qui l'auoient chiere Bonnement l'acoꝛd՚ent
Encontre leſeingneur Deuotement alerent
Chaſſes et ſaintuares Deuotement poꝛterent
⁊ loenges dedieu Gracieuſes chant՚ent
L'eueſque du pais Qui ſauoit bn̄ laguiſe
Ꝑ la confeſſion qu'ot Oie enl'egliſe
Coument la dame fu Vers ſeingnour meſpͥſe
Vint dꝛoit auchr՚ ⁊ li diſt ꝑ franchiſe
Que ſe il li pleſoit Qu'il li donnaſt .i. don
Leſires qui eſtoit A m՚ueilles pꝛeudon
Reſpondi iel'otroy Se fere le poon
Adonq՚s uint la dame En grant deuocion
Au piez deſon mari Selaiſſa ius chëoir
⁊ li diſt tres chier ſire Vueillés merci auoir
Decelle qu'anemis Cuiderent deceuoir
Le ch՚r l'ala leuer Sanz remanoir
Quāt il uit q՚ſtoit celle Qu'il auoit eſpouſee
L'eaue ducuer li eſt Iuſques aus iex montee
Mes qñt il uit ſes mains La couleur ot muee
Car il n'i auoit celle Ne fuſt trop mal menee
Car les petis anneaus Qui trop eſtrois eſtoient
La char iuſques aus os Vſee liauoient
Toutes les bonnes gens Qui la choſe ueoient
Pour la pitié d'elle out tendꝛem̄t plouroiēt
Loꝛs ꝑdeuant le pueple Ladame recoꝛda
Coument ſon batelet Enl'ille l'amena
⁊ la grant poureté Q՚ dedens endura
⁊ la guiſe conment Le conte l'en ieta
Son mari li diſt dame bn̄ auez achetee
Voſtre fole ꝑolle Qⁱ trop mal fu getee
Oꝛ leuous ꝑdoint diex Et /la uirge loee
Et ie ſi fais auſſi Ꝑ deuote pensee
Pour dieu oꝛ entendés Treſtous grans ⁊ petis
Tantoſt conl'aquita Ses dꝛois loyaus maris
Belles uertus ifiſt Leroy deparadis
Car deſes dois chairent Les anelés tous dis
Pour quoy auoit ſouff՚tes pluſeurs douleurs tres gñs
Loꝛs acola la dame Ses .ij. petis enfans
⁊ baiſa tendꝛement Mout fu ſon cuer ioians
Loꝛs ataint ſon mari Qⁱ fu pꝛeus et uaillans
L'enel qui ꝑ deſpit ieta Dedens lamer
A ſa fame l'ala Doucement p՚ſenter
⁊ li conta conment Dieu lifiſt retrouuer
Mes ſachiez q՚ la dame Neſeuout remuer
N'aler ē/boulonnois Ou ot gñt ſeignoꝛie
Onq՚s puis n'ot ahōme Charnele cōpaignie
Qñt ſon mari leſout Ne l'en effoꝛca mie
Ainz voua chaasté ⁊ mena ſainte uie
Douce gent les ꝑſonnes Q՚ ie uous ai nonmé
Vſerent ſi leur uies Que diex ꝑ ſa bonté
Vout receuoir leur ames En la digne clarté
Laq՚lle nous otroit Laſainte tⁱnité.