L'Eſcripture teſmoingne Et nous fait aſauoir
Q՚ chaſcūs ⁊ chaſcune Qui a ſens ⁊ ſauoir
Doit en ſa plaine vie Faire ſi ſon deuoir
Par quoi il puiſt aler En paradis ſeoir
Car nus ne ſet le iour Ne l'eure qu'il mourra
Ne nus ne ſet quel part L'ame de lui ira
Au deſtroit de lamoꝛt Qñt ducoꝛps partira
Dieus nous fiſt ⁊ deſfait ⁊ tous nous deſfeꝛa
Chaſcun idoit penſeꝛ Qui a entendemēt
Qu'il nous conuiēt paſſeꝛ Ꝑ lamoꝛt qui tout pꝛent
Car nus ne puet veꝛs Lui auoir deſfandement
Pource doit on al'ame Queꝛir ſon ſauuement
Ainſi com firēt ceuls Dont vous m'oꝛrez retraire
Ou chaſcun pourra penre .I. moult bel eſſemplaire
Ie le recoꝛdeꝛai ſ'il ne Vous doit deſplaire
Q՚ dieus nous doint ſ'amour Et ſa uoulenté faire
Trois ml՚t nobles chanoines Furent autemps iadis
Qui eſtoiēt ml՚t riche Et en foꝛcié d'amis
Et s'eſtoiēt pꝛeudōme Et en fais ⁊ en dis
De bonté de largeſce Auoient los ⁊ pꝛis
Et tant que cheuauchoiēt enſemble a .i. matin
Ꝑmi .i. cemetieꝛe Toꝛneꝛēt leur chemin
Pour les ames des coꝛps Prieꝛent de cueꝛ fin
Au roi qui touz iours ieꝛt Et qui ia n'aura fin
Li ainſné de ces trois Cōmanca apenſer
Que parmi celle moꝛt Les conuendꝛa paſſeꝛ
En ſen ce pourpenſa Et pꝛiſt aſoupirieꝛ
Grant piece cheuaucha C'onques ne pot parleꝛ
Et li autre doi furent En itelle pensee
L'un ne parla al'autre De pꝛés d'une luee
Li ainſnés apꝛemieꝛs Sa raiſon de uiſſee
Loꝛs cheuauchent ēsēble S'ont leur raiſon contee
Seigneurs par celle foi( i) Que vous adieu deuez
Oꝛ me dites pour quoi Eſtez ſi tres penſez
Voulentieꝛs diſt li uns Mes vous me redirés
Par quel miracle Eſtez ci abomés
Cil reſpont biau cōpaīs Ne vous mentirai mie
Ie penſe qu'il n'eſt nulz Qui ne peꝛde l'ame
Tous nous conuiēt mourir Cōment que chaſcū die
Il n'eſt nus que la moꝛt Ne face departie
LI autre reſpondi conpains Vous dites voir
Tous nous conuiēt moꝛir Chaſcun lepuet ſauoir
Il n'eſt ſi gñt richeſce Qⁱ nous i puiſt valoir
Chaſcū qui ſages eſt S'en puet apeꝛceuoir
LEs .iij. chanoines furēt enſemble d'un acoꝛt
Touz furent ducourage Depenſeꝛ alamoꝛt
Seigneur dist liainſnés En tendez mon recoꝛt
Toute ma cōſcience Me repꝛent ⁊ remoꝛt
IE weil laiſſieꝛ richeſce Et penre poureté
Et ſeꝛuir ih՚ucriſt En fine loiauté
Li autre reſpondi I'en ai gñt voulenté
Le tieꝛs diſt auſſi veu ge Maintenir loyauté
LEs .iij. compaīgnons Si (bn̄) d'une aliance
Et firent enueꝛs dieu Si tres feꝛme acoꝛdance
De uiure en poureté Et ſouſfrir gñt penance
Ꝑ quoi de leur pechiez Euſſent acoꝛdance
Et diſtrēt que iamés il ne retoꝛneront
Ainz iront en eſſil Sainte vie merront
A uaucleꝛ l'abaie Leur cheuaus laiſſerōt
Leur robes leur denieꝛs Pour l'amour dieu donrōt
Ainſi cōme il le diſtrent le firēt bonnement
A uaucleꝛ l'abaie S'en vont iſnelemēt
Leur robes leur denieꝛs Dōneꝛēt aucouuent
Chaſcū d'un gros burel Se ueſti pourement
DE la ſe de partirent Si ſont acheminé
Quant vint al'endemain Siſe ſont deſſeuré
Aude partir pleurerent Si ſont entr'acolé
Deleur nons ſaige Bn̄ dire la uerité
Li vns ot non felix Ainſi l'a peloit on
Cil ala demourer Tout dꝛoit abeſancon
La ſouſfrir poureté En grant de uoſcion
Et du ſecont apꝛés Vous dirai ie le non
Il ot non dieu donne Outre meꝛ ſ'enala
En ieꝛuſalem fu Gñt piece iconueꝛſa
Tout dꝛoit en antioche Li autres ſ'en ala
La deuint il reclus Sainte vie mena
Il ot non bōniface La fiſt ſa demouree
Moult bon los iqueilli Deceus de la contree
Dieu ſeꝛui ⁊ ſa mere De cueꝛ ⁊ de pensee
A felix ſon compains Feꝛai maretoꝛnee
A beſancon ala Moult fu bōne ſauie
D'oꝛgueil ne de boban N'ot talēt ne d'enuie
Pouremēt ſe maintint Ainſi cōme enfolie
Les en fans li faiſſoiēt Aſſez grant uilonnie
La boue li getoient Et ſauates ⁊ fiens
De qñt que li faiſſoiēt Ne diſſoit nule riens
Plus de .vii. ans ētieꝛs Ne mengoit nulle riens
Quant il vouloit meng՚ Il le toloit aus chiens
Toutes les nuis aloit En vne viez chapelle
La ſeꝛuoit ih՚ucriſt Et la vieꝛge pucelle
Sus les pierres giſſoit En pure ſa cotelle
La fiſt tel penitance Qui li fu bonne ⁊ belle
Autemps q՚ ie vous di Auoit abeſancon
.I. rche cheualier Et de moult gñt renon
Entre lui ⁊ vn pꝛeſtre Oꝛent ml՚t gñt tencon
Et plaidierent ēsēble Ne ſai par quel raiſon
LE cheualieꝛ perdi Par loial iugement
Le p՚ſtre le fiſt metre En eſcōmeniement
Le cheualieꝛ eſtoit Oꝛguilleus malemēt
Aup՚ſtre ne daigna Obeir nullement
En eſcōmeniement Veſqui ⁊ en oꝛdure
De li faire raſoudꝛe N'auoit talent necure
Ens el mouſtieꝛ entra Courouciez ē ardure
Le pꝛeſtre pour chanter Ot pꝛis ſaueſteure
Ainſi cōme il vouloit La meſſe cōmancieꝛ
Le cheualieꝛ atrait .I. bꝛanc foꝛbi d'acieꝛ
Du pꝛeſtre ſ'apꝛocha Le chief li va trenchieꝛ
Et par deuant l'autel Le fiſt ius trebuchieꝛ
LE ch՚r ſ'entourne Plus n'i fiſt demouree
Aupꝛeſtre qui fu moꝛs Fu ml՚t grant l'aſemblee
Au mouſtieꝛ .s՚. loꝛens Ont lafoſſe cauee
Liami deparli ongrant Doulour menee
LE cheualieꝛ ſ'apenſe qu'il ſe veut amendeꝛ
Tantoſt au penancieꝛ Ala pour confeſſieꝛ
Tous ces pechiez liconte Ne li volt riens celeꝛ
Cil diſt qu'il nele puet Nullement conſeillieꝛ
LE ch՚ꝛ ſ'entourne Courouciez ⁊ plain d'ire
A l'arceueſque ala Sa conſcience dire
L'ueſteure li diſt Alez vous ent biauſire
Car ie ne vous pourroie Aidieꝛ de tel martire
Alez al'apoſtole qui vous conſeillera
Car il eſt dieu en terre Ml՚t bn̄ vous aſoudꝛa
Le cheualieꝛ atant D'ilecques ſ'en toꝛna
A l'apoſtole vint Tout ſon fait liconta
Quant le ch՚r ot tout Son fait raconté
De l'es cōmingemēt Ou il ot tant eſté
Et du pꝛeſtre qu'il ot Deuant l'autel tué
Le pappe le regarde Puis lia demandé
Biaus amis pour quel cas Tuas tu le pꝛeudōme
Le pechié eſt ſi gñt Q՚ ie n'en ſai la sōme
Qu'au ſeꝛuiſe dedieu Tu tuas la perſonne
Qui couchoit ⁊ leuoit Celui qui tous bn̄ donne
Tu demourras hui mes Et ie m'auiſſeꝛai
Et demain au matin Ie te conſeilleꝛai
Et ſelonc le pechié Penance te donrai
Le cheualieꝛ reſpont Voulentieꝛs le ferai
LE cheualier ſen part Le pappe ſ'a uiſſa
Il meiſmes ſon coꝛs Le ſeꝛuiſce chanta
V ſecré delameſſe Au coꝛs dieu demanda
Cōment aupenancieꝛ Penitance donra
LE roi de paradis Entendi ſa pꝛieꝛe
.I. angre litramiſt Qui giete gñt lumieꝛe
.I. bꝛief liapoꝛta Et li diſt lamanieꝛe
Quant le pappe le uoit Sia leué la chieꝛe
De dens le bꝛief trouua Ce que dieus limandoit
Cōmant en antioche Celui enuoieroit
Parler a bōniface Qui reclus i eſtoit
Gñt paine ⁊ gñt trauail Souſfrir li conuenoit
Qñt ce vint l'andemain Lecheualier reuint
Qñt il conſiſt le pappe Simplement ſemaintint
La lectre de par dieu En ſa deſtre main tint
Qñt le pappe le uoit De li bn̄ li ſouuint
Biaus filz ce diſt le pappe Tu iras outremer
En la ciſt d'entioche A vn home parler
Il a non boniface Setu le veus trouuer
Il te pourra ml՚t bien De ton fait confoꝛteꝛ
LE cheualier lentant Si fu moult eſmaiez
A l'apoſtole adit dolens Et courrouciez
A cil plus grant pouoir La ou uous m'en uoiez
Q՚ uous qui eſtez dieu En terre touz iugiez
LE pappe reſpondi Dieu le veult ⁊ cōmande
Sire dont irai ie Puis que dieu le me mande
A cemot ſ'en parti Et le congié demande
Quant il fu loins derōme S'entra en vne lande
Maint ſauuage pais trouua Et mainte roche
Quant il fu outremeꝛ S'ala en antioche
Des eſpeꝛons tranchās Souuent le cheual bꝛoche
Parmi .i. gñt bocage Ou ces dꝛas li acroche
Quant vint en antioche Bonniface trouua
Deuant lui ſ'agenouille A lui ſe confeſſa
Tous ces pechiez liconte Liſains hons l'eſcouta
Aucheualieꝛ adit Amis entendez ca
Vous demourrés huimes Deciques ademain
Se diex pleſt n՚re pere Qui eſt roi ſouueꝛain
Qui ciel ⁊ terre ⁊ meꝛ Et tout a en ſamain
Ce que ie vous dirai Ne ſera pas en uain
Le cheualier ſ'en part Le pꝛeudōme demeure
Tantoſt ſ'a genouilla Maintenant ens en l'eure
Souuent reclainme dieu Des ieus tenremēt pleure
Pour le pecheeur pꝛie Que ih՚us le sequeure
Ih՚ucriſt par ſon angre Li a tantoſt mandé
Di a ce cheualieꝛ S'il veult auoir ſanté
Voit en ieruſalem Parler a dieu donné
A tant ſ'en part li angres Adieu l'a comandé
Quant vint al'endemain Que lanuit fu paſſee
Le cheualieꝛ reuint Qui fu en grant pensee
Boniface a la beſoigne cōtee
Ainſi com dieus vouloit Qu'elle fuſt oꝛdenee
Vous en irés diſt il Droit amon compaignō
Cil vous conſeilleꝛa Car il eſt moult pꝛeudom
Dedens ieꝛuſalem En ſa conueꝛſion
Oꝛ le me ſaluez Et li dites mon non
LOꝛs li bailla enſeigne Qui fu bōne ⁊ ceꝛtaine
Ml՚t fu au cheualieꝛ Celle voie greuaine
En ieꝛuſalem vint Ml՚t iſouſfri gñt paine
Dieu dōné itrouua Qui ſainte vie maine
DE par ſon compaignon Tantoſt leſalua
Qñt dieu dōné l'antant Grant ioie demena
Le ch՚r alui tātoſt ſe ꝯfeſſa
Le pꝛeudōme lidiſt Dieus vous confoꝛtera
LE pꝛeudom ſapꝛieꝛe Fiſt en veꝛs ih՚ucriſt
Et dieu tout maintenāt Son angre li tramiſt
Qui le reconfoꝛta Et doucemēt li diſt
Li rois du ciel te mande Salut par ceſt eſcriſt
Di a ce cheualier Qu'il voit abeſancon
Et ſi mande ſalus Felix ton compaignon
C'eſt cil qui li donra Sainte ſauuacion
Par autre hōme ne puet Auoir loial pardon
Li angles ſ'en parti Sa raiſon afine
Le cheualieꝛ reuint Qui neſ'oublia mie
Dieu dōné liatoute La beſoingne noncie
Et de ſon compaignon Li a compté la uie
CŌment n'ē q՚l manieꝛe Il le pourra trouueꝛ
La ſemblance de li Liua toute conter
A li vous conuendꝛa Dignemēt confeſſer
Le cheualieꝛ l'entant Si cōmance apenſer
Et qñt il ot penſé Si dit ml՚t cruelment
A dieu donné adit Oꝛ me va malement
Arceueſque ne pappe N'ont tant de hardemēt
Qu'il me puiſſēt aſoudꝛe Ne donneꝛ ſauuemēt
Ne vous ne vos compaīs Ne me pouez aidieꝛ
Et uous me reuoulez A .i. fol en uoier
Que lienfant dechacent Et ſe giſt ou fumieꝛ
Et toſt le pain au chiens Qñt il le veult mengier
Dieu dōné li a dit Oꝛ ne vous eſmaiez
Q՚ iamés par autre hōme Neſerez conſeilliez
Tant li dit dieu dōné Que cilz c'eſt otroiez
Et qu'il ira au fol Parleꝛ ml՚t voulentieꝛs
LE cheualier ſ'enpart A la uoie c'eſt mis
Iuſques abeſancon Ne ſ'i eſt alentis
Tant quiſt par la cité Qu'il a trouué felix
Qui des enfans eſtoit Vilaīnement laidis
LE cheualier ſe pꝛiſt Foꝛment ademanteꝛ
Comant n'en quel Manieꝛe le poꝛra ꝯfoꝛteꝛ
Si oꝛdeius perſonne Cōme il uoit la eſter
Iamés atel perſone N'ira meꝛci crier
Oꝛ oez l'auenture( i) Que dieus idemouſtra
Qñ que le cheualieꝛ De dens ſon cueꝛ penſa
Felix ſot ſa pensee Pres de li ſ'apꝛocha
Maintenant li raconte Et tout li deuiſa
Sire ce dit felix Vous auez tel penſé
Vous ne daingniez amoi Dire uoſtre ſecré
Mes compaignons Me mandent ſalus ⁊ amiſté
Ꝑ vous mais vꝰ m'auez Malement en uilté
Adont ſot bn̄ li ſires Qu'il eſtoit de par dieu
Tantoſt se de parti ⁊ de guerpi le lieu
Et li pꝛeudom demeure Qui auoit le cuer pieu
Sachiez qu'il n'ot en lui Feſte ſoulas ne gieu
Oꝛ entendez pour dieu .J. moult bel eſſemplaire
De felix le .s՚. hōme Qui tant ſouſfri de haire
Qui de l'oꝛ gueil du monde N'ot talent ne que faire
Il vont par penitance L'amour de dieu atraire
LE cheualieꝛ eſtoit Soigneus de li guetieꝛ
Auſoir le uit entrer En .i. gaſte mouſtieꝛ
Si toſt cōme il fu ens S'a la agenouillier
Par deuant vne ymage Pour dame dieu pꝛieꝛ
LE cheualieꝛ regarde Toute la contenance
Cōmēt felix pꝛioit La dame de uaillance
Et cōmēt de ſon coꝛps Li feſſoit obligence
Sa coupe debatoit Ꝑ moult gñt repantence
Auſques amienuit Que sōme l'abati
Fu deuant nr̄e dame Ainſi com ie vꝰ di
Qnt ne pot plus veillier Tous veſtuz ſ'en doꝛmi
La douce nr̄e dame Des ſains cieus deſcendi
D'angles auecques lui Moult belle compaignie
Deuant felix ſ'a ſemblēt Que il ne le ſot mie
De la biauté deli Tous li cieus eſtincele
Liés fu le cheualieꝛ Qñt il vit tel meſnie
La douce mere dieu .I. oꝛeillier a pꝛis
De ſous lechief felix Moult doucemēt l'amis
Felix ne le ſot mie Qui eſtoit en doꝛmis
En depꝛiant la dame A qui il fu amis
Quant la uierge marie ot ſeꝛui ſon ſeꝛgant
Es ſains cieus remonta Auec ſon dous en fant
⁊ felix ſ'eſueilla Aupoint de l'a ioꝛnant
Acoutes agenous Va ces heures diſant
LE cheualier tantoſt De felix ſ'apꝛocha
Deuant lui ſ'agenouille A lui ſe confeſſa
Et qñt felix le uoit Tantoſt l'a raisōna
⁊ Moult tres doucemēt Veꝛs lui ſ'umelia
LE cheualieꝛ li crie Meꝛci moult doucemēt
Ses pechiez ligehiſt De cuer deuoſtement
Et felix lireſpont Ml՚t debonnairemēt
Ie ne ſui mie dignes De tel ꝑdonnement
Mais reuenez demain ⁊ ie de pꝛierai
A la douce marie De bon cueꝛ et deurai
Qu'elle ait meꝛci de vous Car ie ſui en eſmai
Cōmēt n'enq՚l maniere Ie vous conſeillerai
Celle ioꝛnee ala Et la nuit fu uenue
Felix de dieu pꝛier A uoulenté eue
En la chapelle entra S'a l'image veue
L'iaue decuer lieſt Parmi les iex courue
DEuant lui ſ'agenouille En grant deuocion
Fleur de uirginité Qui par anoncion
Poꝛtas le roy des rois Qui ſouffri paſſion
Tu ſauuas daniel En la foſſe au lyon
Dame voſtre dous non Doit on par tout loeꝛ
En quel lieu q՚lle ſoit Ou en tr՚e ou en meꝛ
Vous eſtes l'eſcharboucle Qui puet enluminer
Les cueꝛs des fins amās Qui vous veulent amer
Dame vous eſtez celle Qui n'a point de pareille
Quar vous eſtez la fleur Qui naſqui de la treille
De quoi li roiſins vint Dont la goute verm՚lle
Racheta tout le mont Belle en fu la meꝛueille
Dame de doucour De toute bonté plaine
Priez vo dous enfant Qu'i adꝛoit poꝛt noꝰ maine
Et ſi nous dōnez dame Voulenté ſi ceꝛtaine
Que nos ames neſueffrēt En enfeꝛ la grant paine
Uieꝛge dame des uieꝛges Ie vous pꝛi et requier
Donnez moi eſſemplaire De celui conſeillier
Qui en veꝛs vous ſeueult De ces maus aquitier
Et en ueꝛs uoſtre enfāt Ses meſfais adꝛecier
Dame ie uous requier Et decueꝛ vous apelle
A ce mot deſcendi La roine pucelle
Droit deuant le pꝛeudōme De dens la uiez chapelle
De la biauté de li Touz lilieus eſtincelle
LA douce mere dieu C'eſt a li demouſtree
Preudons diſt nr՚e dame Tu m'as tant apellee
Di moi hardiement Treſtoute tapensee
Toute ta uoulenté feꝛai Sans demouree
Qñt felix entendi La roine de gloꝛie
De ioie treſſailli Si mua ſon memoire
A noſtre dame adit Parole qui fu uoire
Ha; dame qui auez Sus tout lemont uictoire
LE uous requieꝛ meꝛci Fleur de uirginité
Par qui li tenebꝛeur Oꝛent ioie et ſenté
Treſoꝛieꝛe de grace De ſainte charité
Ou uous eſtez aſſiſe En la grant deité
Onques mais ne vꝰ vi Dame foꝛs vr՚e ymage
De la biauté de uous Tout mon cueꝛ raſouage
Dame pꝛiez celui Qui en uous pꝛiſt hōmage
Que li faus anemis Ne nous face dōmage
Quant felix ot ainſi La dame ſaluee
Du cheualieꝛ li a La beſoingne comptee
Cōment n'ē quel manieꝛe S'ame ſera ſauuee
Loꝛs li a nr՚e dame Saraiſon deuiſſee
Amis dit noſtre dame Ses tu que tu feras
A la tombe le pꝛeſtre Le cheualieꝛ menras
Puis comiures le coꝛs Aumiex que tu pourras
De pardieu qu'il ſelieue Toſt ⁊ iſnelle pas
Et il ſeleuera Saiches ceꝛtainemēt
Qñt il ſera leués Fai li comandemēt
Qu a ſouille le cheualieꝛ Del'eſcōmeniement
Et tu le raſoudꝛa Moult de bonnairemēt
Quant le pꝛeſtre aura Raſous le ch՚r
Puis le ſeingnes ⁊ beni Si le refai couchier
De par dieu qui tout fiſt Et qui tout puet iugieꝛ
Quan que tu li diras Fera ſans atargieꝛ
La douce meꝛe dieu ace Mot ſ'en tourna
Auec ſon dous enfant Es ſains ciez remonta
Et felis li ſains homs Tout par li demoura
Le cheualieꝛ ſ'entourne Quant leiour eſclaira
A icelle ioꝛnee la ſaint Loꝛens eſtoit
La feſte deuoit eſtre Ou le pꝛeſtre geſoit
Pour le peleꝛinage Ml՚t de gent yaloit
Felix atandi tant Poꝛceſſion aloit
Quant la poꝛceſſion Fu hoꝛs du gñt mouſtieꝛ
Felix par la main deſtre A pꝛis lecheualieꝛ
Lez la foſſe le pꝛeſtre Lefiſt agenouillier
Chaſcun ſ'i aſſembla Et pꝛiſt amerueillieꝛ
DEuant treſtout lepueple Felix ſ'agenouilla
Ses mains ioint v՚s le ciel Ih՚ſucriſt reclama
Que tiex miracle mouſtre Deuant ceus qui sōt la
Pour quoi aucūs pecheꝛres Veꝛs dieu ſ'amendera
Quant felix ēuers dieu ot faite ſapꝛiere
Le pꝛeſtre com iura Et dit entel manieꝛe
Preſtres v non de dieu Et de ſa mere chiere
Lieue toi ⁊ ſi mouſtre A ceſtui belle chiere
El non de dieu le pere Et de ſainte marie
Pardonnez aceſtui Haine et felōnie
A ce mot deuant tous C'eſt la terre partie
Loꝛs ſeleua le pꝛeſtre Cōme ſ'il fuiſt enuie
Quant le cheualieꝛ vit le pꝛeſtre ſuſciter
Des iex du chief cōmance Tendꝛement apleurer
De cueꝛ crie meꝛci Pour ſauie amender
Deuant treſtout le pueple Li ua tout pardōner
LE cheualieꝛ raſout Deuant toute la gent
Apꝛés ſili a fait Felix commandemēt
Preſtres recouchiez uous Toſt ⁊ iſnellement
Par les ueꝛtus de dieu Le pere omnipotent
LE pꝛeſtre en ſafoſe Entra ſans demouree
Deuant toute la gent Qui la fu aſſemblee
Chaſcuns uit lemiracle Que dieus out demouſtree
Pour felix qui ſeꝛuoit Lauieꝛge honnoꝛee
Tuit cil de beſencon Virent bn̄ que felix
Eſtoit amez de dieu Le roy de paradis
Acoutez agenous Deuant lui ſeſont mis
Sire font il pour dieu Aiez de nous meꝛcis
Sire pardonnez nous Ce que nous auōs meſfait
Prenez ent la ueniance Ainſi cōme il vous pleſt
Et felix reſpondi N'ai cure de tel plait
Ie le vous pardoins bien Bonnemēt ce meſfait
FElix aregardé La tres grant obligance
Que les gens li ont fait Et la grant honnoꝛence
De lauille ſ'en part Plus n'i fiſt areſtance
A uaucleꝛ ſ'en ala faire Sa demourance
LA fuil recueillis En la religion
Et diex lāma puis tant Et ſonha ſon non
Que puis fu arcueueque De toute beſencon
Par les bn̄ queil fiſt Acueilli bon renon
Tant ueſqui ē ceſt ſiecle Qu'il l'eſtut treſpaſſer
Oꝛ oez les miracles Q՚ dieus voult de mouſtrer
Car ces .ij. compaignōs Qui eſtoient outre mer
A celle heure meiſmes Les conuint deuier
Tous .iij. les compaignons A .i. iour treſpaſſerent
Et a vne ſeulle heure En paradis entrerent
Par les bn̄s que il firēt En paradis entrerent
Bonnes iournees firēt Celle qui les poꝛterent
Si pꝛions touz ⁊ toutes A la uierge marie
Qui en ces flans poꝛta Le tres dous fruit deuie
Qu'il nous doint ſi ouureꝛ En ceſte moꝛtel uie
Par quoi aions des angres La ſainte compaingnie