POur recoꝛdeꝛ vn dit Sui ci endꝛoit venus
Dieu gart touz ceulz et celles dont ſeray entendus
D'un roy vous weil parleꝛ Par qui fu maintenus
Le pais d'engleterre Oꝛ eſt ſ'ame laſſus
En la ioie des cieus Ou tous pourrons aleꝛ
Se faiſon com le roy Dont ie uous weil parleꝛ
L'eſcripture teſmoingne Que qui veult hault monteꝛ
Il ne doit pas grans fais Deſus ſon col poꝛteꝛ
Et c'eſt eſcript c'un riche qui ne veult dire rien
N'enterroit en la gloire Ou dieu maint ⁊ li ſien
Nient plus que vn chameul Ne paſſeroit pour (i) rien
Par le cul d'une aguille Mes oꝛ entendez bn̄
Pas ne deuons en tendꝛe que roys dus ne marchis
Ou autre gent qui ſont De richeſce garnis
Ne puisſent auſſi bn̄ En trer en paradis
Cōme les poures gens Qui ſont touz deſſaiſſis
POur tant ſans plus qu'il veulent oꝛdeneꝛ par raiſon
Des bn̄s dont il ſeuoient En lapoſſeſſion
Par ſaint loys de france Prouueꝛ le uous poon
Et par le roy englois De qui parleꝛ voulon
Bien eſt uoir que les riches Sont temptés plus foꝛment
Dela char ⁊ du monde Que ceus qui n'ont nient
Mes quant vn chanpion Se combat bien ſouuent
Et touriours auictoire Plus grant louieꝛ atant
SE les riches donnent achoiſon de pechieꝛ.
Et les gens qui ſont riches S'en ſeuent bn̄ gaitieꝛ
Tant doiuent il auoir De dieu plus gñt louier
Les poures deſpit ſont Du ciel heritieꝛ
LE philoſophie diſt C'eſt eſcript ē maint lieus
Q՚ la choſe que l'onme Et la fāme ainme miex
De ſon cueꝛ feꝛmement C'eſt droitement ces diex
Oꝛ uoions ſ'il eſt gueres De celles ou de cieus
Qui metent leur cuers plus En a maſſeꝛ auoir
Qu'a ſeruir iheſucriſt Pour paradis auoir
Oil dont c'eſt donmage Mes bn̄ fiſt ſon deuoir
Le roy de qui la uie Vous weil ramenteuoir
Il fu roy d'engleterre ⁊ duc de noꝛmendie
Et d'aſſez d'autres lieus Auoit la ſeigneurie
Mes il metoit ſon cuer Et toute ſ'eſtudie
A ſeꝛuir iheſucriſt Et la vieꝛge marie
En pais maintint ſa tr՚e Par tout eſtoit amés
Pas n'eſtoient les poures En ſa court de bontés
Vne pucelle pꝛiſt leroy Dont vous oꝛrés
Qui de bon cuer l'ama En tendre le pourrés
Elle ot non gracienne Si cōme il m'eſt auis
Qu'elle eſtoit gracieuſſe ⁊ en fais et en dis
Son ſeingneur ſi ſeruoit Le roy de paradis
Auſſi feſſoit la dame Tout ſon cuer iot mis
LE roy et la royne ſainte vie menoient
Les poures mēbres dieu Parfaitement amoient
Lonc temps furent ē ſemble Mes tel vſage auoient
Que treſtoutes les nuis A matines aloient
Paiſſiblement ueſquirent Mes que tant iauoit
Que ladouce royne Nul enfant ne poꝛtoit
Li cōmun d'engleterre Foꝛment en murmuroit
Et diſſoient ainſi Com les dé partiroit
Qñt le roy l'oÿ dire S'en fu foꝛment dolent
Et iura deuant tous Qu'il n'en feroit noient
Et que ia de la dame Qu'il amoit loialment
Ne ſe dé partiroit Iuſques a ſon finement
Adont par engleterre cōmenca lideſcoꝛs
Pour ce que la royne N'ot enfant de ſon coꝛps
Mes par le pleſſir dieu Qui eſt miſericoꝛs
Deuint la dame enſainte On fiſt grant ioie loꝛs
MEs ſachiez celle ioie N'ot gueres de duree
Que la gent d'engleterre Fu puis moult tourmētee
Vous oꝛrés par quel cauſe S'il vous pleſt et agree
Nule plus grant meꝛueille Ne fu pieca comptee
DOuce gent entendez Pour l'amour dieu meꝛci
Le bon roy d'engleterre Guillaume dont ie di
A matines aloit Tant qu'il auint ainſi
Que la gentil Royne Foꝛment apeſanti
LE roy percut ml՚t bn̄ Qu'eſtoit a peſantie
Quant matines ſonnerēt Il li diſt douce amie
Ie m'en vois al'egliſſe Mes pour dieu ie uous pꝛie
Que vous n'i ueniés pas Quar ce ſeroit folie
Quar ſachiez de ceꝛtain Se voſtre fruit perdoie
Et dieus ne me gardoit Hoꝛs de mon ſens yſtroie
La dame reſpondi Chier ſire ie l'oſtroie
Car uoſtre voulenté Sidoit eſtre la moie
Adonques li bons roys a matines ala
Et la dame courtoiſe En ſon lit demoura
Mes ne ſe doꝛmoit pas Tout adés dieu pꝛoia
Tant que ſon chieꝛ ſeigneur Arriere ſ'en retourna
Au reuenir lifiſt La roine moult gñt chiere
L'autre nuit voult ouureꝛ Le roy en tel manieꝛe
Mes auant matines Parmi vne verrieꝛe
Entra de dens la chambꝛe Meꝛueilleuſſe lumieꝛe
Auec celle clarté deſcendi vne vois
Qui diſt au roy guillaume Moult es lié quant tu uois
Que ta fame eſt en ſainte Mes ce ne vault vn pois
Que ſoiez touz ceꝛtains Ains que paſſe le mois
Peꝛdꝛas coꝛs ⁊ ame La fāme et les enfans
Se n'obeïs a dieu Le pere tout puiſſant
Il te mande par moy Et ie le te commans
Que uoiſſes en eſſil Iuſqu'a .xxiiii. ans
Si ne te fai connoiſtre Pour meſchief ne p˞ paine
A nulle creature ne fñche Ne villainne
Bon fait laiſſieꝛ l'onneur Du mon de qui eſt uainne
Pour conqueſter laioie Deciex qui tant eſt ſaine
Sueſfre tout en bon gré El non de ih՚ucriſt
Loꝛs ſ'en parti lauois Tantoſt qu'elle ot cedit
Et le roy ſe ueſti E chauſſa ſans reſpit
Son meſtre conſfeſeur En l'eure mandeꝛ fiſt
EN alant amatines Liconta et gehi
Le parleꝛ de lauois Que uous auez oÿ
Et ſi conme ē lachambꝛe La clarté ſ'embati
Le pꝛeſtre qui fu ſage Tantoſt li reſpondi
MOn ſeingneur ie me dout par la uieꝛge marie
Que celle uois ne veingne Par art de diablie
Mes pource ne larrés Vo terre des garnie
Car en l'onneur de dieu Vous conſeille et de pꝛie
SE riens auez tolu a hōme ni a fāme
Ne uous ne voſtre pere Dont dieus aſoille l'ame
Que uous le faſſiez rendꝛe Cil qui fu ſans diſfame
Li diſt ie le weil bn̄ Foy que doy noſtre dame
Il fiſt par engleterre Crieꝛ tout d'un acoꝛt
Que ceus aqui ſon pere Ne lui oꝛent fait toꝛt
Veniſſent veꝛs la court Et tantost ſans reſoꝛt
On le reſtabliroit Et au foible et aufoꝛt
LOꝛs vint acourt du pueple et aſſez et largement
A ceulz qui mouſtroient Leur cauſe iuſtement
Rendoit on par meſure Le leur bn̄ lëalment
Loꝛs pour le roy guillaume Pꝛioient toute gent
LE roy en tel tempoire Donna ml՚t de biaus dons
Aus poures abaies Et aus religions
Mes le dous iheſucriſt Qui eſſaie les bons
Li renuoia lauois Sicōme nous liſſons
Droitement a celle heure Qu'il vint al'autre fois
Mes la clarté ſemiſt De dens la chambꝛe ancois
Hautement a parlé Et diſt guillaume roys
Voir il te meſcherra Briément ce ne mécrois
Dieu veult qu'en eſſil voiſſes Fous es quant tu n'i uas
Ie m'en reuois arrieꝛe Fai ce que tu voudꝛas
Adont le roy en glois Se leua ens eſpas
A ſon comfeſſour vint C'om apelloit thōmas
Et lidiſt en quel guiſſe La uois fu reuenue
Trop foꝛment me menace Se ie ne me remue
Quant ſon comfeſſour Ot la parole entendue
Illia diſt chier ſire C'eſt bn̄ choſe ſeue
Que l'eſcripture dit C'om doit pour dieu laiſſieꝛ
Muebles ⁊ heritages Et enfans et mouillieꝛ
Pour comqueſteꝛ laioie Que nulz (i) ne puet pꝛiſſieꝛ
Mes franc roy debōnaire Vn ſeul don vous requieꝛ
POurce ſe ie ne ſai Se c'eſt fantoſme ou non
Qu'ains que vous dé partez De uoſtre région
Atendez que la uois Reuaingne c'eſt raiſon
Se la tieꝛce vois vient Ce me ſemblera bon
Qu'aliſſiez en eſſil Puis que diex le vꝰ mande
Chaſcun de nous doit faire Tout ce qu'il nous cōmande
Le roy engloys quiot ē dieu Amour tres grande
Apꝛés matines fiſt A dieu vne demande
Que cil li vient engré Qu'il en pꝛaingne la uoie
Pour aleꝛ en eſſil Que lauois li renuoie
Et tantoſt illira Voulentieꝛs et de ioie
Loꝛs ſ'en vint en la chambꝛe La dame (toi) trouua coie
En doꝛmé c'eſtoit Au point de la iournee
Le roy fu toute iour Et moult tres gñt penſee
Ml՚t donna de biaus dons Ainz que fuſt la ueſpꝛé(s)
Auſoir ſ'ala couchier Ouecques ſ'eſpouſſee
Mes onques n'i penſeꝛent A nul charnel dé lis
Vn petit apꝛés ce Qu'il furent en doꝛmis
Reuint le meſagieꝛ Au roy de paradis
Qui apella le roy (en) En diſſant fous nais
Ua t'en hoꝛs d'engleterre En eſſil ille faut
Et ne nōmés ton non Ne en bas ne en haut
Iusqu'a .xxiiii. ans Fain ⁊ ſoif froit ⁊ chaut
Auras ⁊ grans meſchief Mais dieus qui ſur tous vaut
LE terendꝛa moult bien Loꝛs lauois ſ'en parti
Et le roy d'angleterre Requiſt adieu merci
De ſon lit iſſi hoꝛs En l'eure ſeueſti
De la plus ſimple robe Qu'en la chambꝛe trouua
D'Oꝛ ne d'argent n'ot cure Guillaume le bon roys
Il ne ſaint que ſ'eſpee Mes ains beſſa la crois
Bn̄ cuida que la dame Doꝛmiſt a celle fois
Bas diſt en ſoupirant Douce ſueꝛ iem'enuois
DOuce ami loiale Iamés ne vous verré
Ne le fruit que i'auoie De dens vous engendꝛé
La royne l'oui moult Ot le cueꝛ ſerré
Semblant fet q՚ ſ'eſueille Silia demandé
Quel part vouloit aleꝛ ⁊ le roy li reſpont
Dame amatines vois Car par temps ſonneront
Hé; roy diſt la roine Vos amours fauſſes ſont
Mes les moies ſont uraies Iamés ne fauſeront
ADonques la roine Aus piez du roy chai
Et li a dit chieꝛ ſire Pour dieu qui ne menti
I'ai bn̄ lauois oïe Qui par .iij. fois vint ci
Vous me voulez laiſſieꝛ Mes pas n'ira ainſi
Car ie ne vous lairai Tant com ie ſoie en vie
Vous alez en eſſil Mes ſans moi n'irés mie
Quant le roy l'entandi Sili diſt douce ami
Pour dieu parlés Plus bas que ne ſoiez oïe
Car uoir ſe les gens ſeuēt Que ie m'endoie aleꝛ
Pour rien ne me pourroie De leur mains eſchapeꝛ
La dame diſt franc roi Trop auez fol penſeꝛ
Ne pourroie ſans vous En vie demoureꝛ
NOus .ij. auons ēſemble Moult eües d'amours
Pource doi ge ouous En durer les doulours
Le roy englois qͥ plains Eſtoit de bonnes meurs
Baiſſa loꝛs la roine En leꝛmes et en pleurs
Puis li diſt douce ſueꝛ Se ie vous en menoie
Le fruit de voſtre coꝛps Et vous meiſmes ꝑ droie
Elle li reſpondi ⁊ ſe ie demouroie
Ie ſuis toute ceꝛtaine Que de duel m'ocirroie
LOꝛs li diſt le roy Dame ſoit au՚re pleſſir
Mes l'ui de noſtre chambꝛe N'oſſerions ouurir
Parmi ceſte feneſtre Nous conuandꝛa iſſir
Afin c'om ne nous puiſſe Auiſſeꝛ ne choiſſir
LE roy par la feneſtre Premieꝛ ſe deuala
Puis recut la roine Que de bon cueꝛ ama
Ꝑmi vn lonc iardin Par lamain la mena
Tant c'ūne fauſſe poꝛte Qu'il ſauoit bien trouua
Par la iſſirent hoꝛs A dieu ſe cōmādeꝛent
En vne gñt foꝛeſt Ainz qu'il fuſt iour ē trerēt
Car d'encontre de gens Ml՚t foꝛment ſe doutoient
Mes quant les chambellēs Au matin ſeleuerent
Et la chambꝛe virent Qui fu bn̄ cloſe
Li un adiſt al'autre Monſeigneur ſe repoſſe
Qñt le ſoulail fu haut Chaſcun diſt ⁊ pꝛopoſſe
Que le roy eſt malades Mes c'eſtoit autre choſe
L'uis cuidierent ouurir Mes clos eſtoit foꝛment
A foꝛce l'ont ouueꝛt Sans nul delaiement
Quant ni trueuent nului Si font gñt meꝛrement
Loꝛs quiſtrent tout partout Mes ne valut noient
Quant on ne pot trouueꝛ Le roy ne la roine
Les uarles demeſtieꝛ Et garcons de cuiſſine
Rompirent les grans coſfres Plains demonnoie fine
Parmi l'oſtel le roy Et des bn̄s (gñs) deſcipline
Un eſquieꝛ uint Qui ml՚t ot le cueꝛ gent
Le coꝛ le Roy trouua Puis le gr̃da gñtment
Bon louieꝛ en ot puis Vous oꝛrez bn̄ cōment
Mes du roy weil parleꝛ Qui cheminoit foꝛment
La roine les lui Que il amoit foꝛment
Siauant ſ'en batirent De dens le bois plenieꝛ
Qu'il ne trouuoient mes Ne voie ne ſantieꝛ
Ml՚t ſouſfrirent de paine Bn̄ l'oꝛrés pꝛononcieꝛ
On les queroit par tout foꝛs que la oueſtoient
Des pometes ſauuages Qu'an la foꝛeſt trouuoient
Et des nois ⁊ des meures Qu'en la foꝛeſt trouuoient
De treſtous leur meſchiés Ih՚ucriſt a ouroient
Ueſtus eſcrues des arbes Les conuenoit geſſir
Le bon roy d'engleterre Priſt foꝛment aneꝛcir
Et a eſmegrieꝛ Mes dieus par ſon pleſir
Vout adés la roine En ſa biauté tenir
Un mois furent ainſi en la foꝛeſt ramee
La robe le roy fu Moult foꝛment deſciree
De la foꝛeſt iſſirent Par vne matinee
Vne roche auiſſeꝛent Qui eſtoit grant ⁊ lee
TOut ainſi cōme il durēt De la roche apꝛochieꝛ
La dame pꝛiſt griément Denfant atraueillieꝛ
Doucement cōmanca Iheſucriſt a huchieꝛ
Et les ſains ⁊ les ſaintes Qu'il li veullent aidieꝛ
Un anel qu'elle auoit Oſta d'entour ſon doy
En ſoupirant foꝛment En apella le roy
Plus lia dit gardes Ceſt anel de par moi
Et iſſi reſpondi Voulentieꝛs par ma foi
LE roi recut l'anel Par la main de ſ'amie
Ille garda lonc temps Ains qu'en fuſt reſaiſſie
Car mauueſſe gent firent D'eus .ij. la de partie
Pour l'amour de dieu Oꝛent grant planté de hachie
LE roy diſt ala dame Voir trop ſui courouciez
Que ne puis trouueꝛ fame Dont uo coꝛps ſoit aidiez
Elle diſt mon ſeingneur Oꝛ ne vous eſmaiés
Alons a celle roche Sans eſtre de laiez
LE roy fiſt tant c'u crues De la roche ſe mirent
Les griés maus d'enfanteꝛ Loꝛs ala dame pꝛiſtrent
Dieu ⁊ ſa douce mere Si grant grace li firent
Que .ij. biaus enfans malles De la dame naquirent
LE bon roy d'engleterre Qui ot la dame chieꝛe
Serui celle iournee D'ofice deuentriere
Ce qu'elle commandoit Feſſoit abonne chiere
Car aſon gñt beſoing N'ot autre chamberieꝛe
L'un deſpans de ſa cote le roi tantoſt coupa
Le pꝛemier des enfans De dens en velopa
Par decoſte la mere Doucement le coucha
Puis tailla l'autre pan Car autre dꝛapiau n'a
LE ſecont fils imiſt Doucement l'a planie
La royne qui ot moult Souſfeꝛt de hachie
Ou geron ſon ſeingneur S'eſt vn pou en doꝛmie
Quant elle ſ'eſueilla A haute uois ſ'eſcrie
Hé; tres dous roi degloire ie m'eſrage de fain
Mourir me conuandꝛa Se bꝛiement n'ai du pain
Le roi reqͥſt decueꝛ leꝑe ſouueraī
Loꝛs la dame li diſt Sire ſoies ceꝛtain
Que l'un demes enfans Mengier mecouendꝛa
Se ie n'ai char ou pain Loꝛs le roy ſouſpira
Il a traite ſ'eſpee Sa chauſce des feꝛma
Et diſt que de ſa cuiſſe A la dame donra
LE bon roy d'angleterre qui moult eſtoit pꝛeudon
Vout coupeꝛ de ſa cuiſſe Tout le meſtre bꝛeon
Pour donne ala dame Qu'il amoit decueꝛ bon
Mes la dame li diſt Pour dieu chier ſire non
Par le poing leſaiſſe Puis diſt i'eſtrai du ſens
Se ie vous voi couper Ia ſe dieu pleſt mes dens
N'uſſeꝛont voſtre char Le roi qui fu dolens
Reſpondi douce ſuer Ne puis trouueꝛ pourpens
Par quel point voſtre fain puiſt eſtre rapaiſſie
Trop miex vaut que mengiez De machar gñt partie
Que ceſt petit enfant Nia moꝛt deſeꝛuie
A ce mot la roine Moult tendꝛement leꝛmie
DE la pitié qu'elle ot fi ſa fain treſalee
Adonques diſt au roy S'il vous pleſt et agree
Alés querre du pain Toute ſui treſpaſſee
Voir i'atendꝛai ml՚t bn̄ La voſtre retoꝛnee
Adonques li bons rois Iſſi hoꝛs du rochieꝛ
Pour aleꝛ du pain querre A ſa franche mouillier
Mes le iour li auint Si moꝛtel en combrier
Qu'ains fu .xxiiii. ans Qu'il la veïſt mengieꝛ
Ainſi com vous oꝛrés S'il eſt qui le vous die
Nulle plus grant pitié Nefu pieca ouye
Le roy chemina tant Qu'il uit vne nauie
Ou ot de marchéans Vne grant compaingnie
Quant le roy vint pꝛés d'eus Moult doucement leur pꝛie
Seingneurs pour l'amour Du tres dous iheſucriſt
Donnés moi de uos pain S'il vous pleſt vn petit
Loꝛs vn mauués glouton S'eſcria par deſpit
Biauſeingneurs regardez Pour dieu com fait truant
Trop eſt foꝛt ⁊ deliure Et ua ſon pain quérant
Trop enuis lidonroie Ie li toudroie auant
Vn autre reſpondi Qui eſtoit plus ſachant
Sire que ſauez vous S'il ſet point de meſtieꝛ
Eſpoir qui ne fiſt onques Foꝛs que lui pourchacieꝛ
Et c'eſt des poures gens Et auant et arrieꝛ
Qui ne puent trouueꝛ Leur pain agaaīgnieꝛ
CEus ſont fous qui meſdiēt De la menue gent
Le bon roy d'engleterre Par la moult doucement
Sire foy que doi dieu Ie n'ai pain ne argent
Pour dieu vous en requier S'en aués aiſſement
Uoir onques tel meſtier N'en oÿ iour demauie
Loꝛs vn mauués glouton A haute uois c'eſcrie
Ceꝛtes n'as pas ta lengue Pour ton eſcot laiſſie
Les bꝛibes qu'as mengiés Ne comteꝛoie mie
LE roy qui ot grant duel Doucement reſpondi
Seingneurs puis qͥl vous Pleſt bn̄ weil qu'il ſoit ainſi
Mes pour l'amoꝛ de dieu Aiez denous meꝛci
Ou ma fame moꝛra Lëaument le vous di
Car de deus enfans c'eſt En l'eure deliuree
En vn crués d'une roche La giſt toute afanmee
L'un des marchéans diſt Voir belle la trouuee
Par ce point cuide auoir L'aumoſne recouuree
LE meſtre de la nef A dit oꝛ entendon
Par foy ſauoir voudꝛai Se il dit uoir ou non
Alons ouecques lui Se menteur le trouuon
Ie los qu'il ſoit batus A retour marion
Aſſez des plus hardis Qui grans et foꝛs eſtoiēt
Treſtous ont pꝛis baſtons Et bien ſ'a atiſſoient
Se le truant mentoit Que treſtant le batroient
Que iuſques a vn an Les coſtes li deudꝛoient
LE bon roy d'engleterre Mena les marchéans
Droitement ala roche Ou ot laiſſié geſans
La dame de bonnaire Et ces petis enfans
Il leur a dit ſeingneur Ie ne ſui pas mentans
Ués ici ma fāme Et mes (pe )enfans petis
Qñt les marchéans lauirent Touz furent eſbahis
Pour la biauté la dame Seingna chaſcū ſon uis
L'un d'eus qui eſtoit plains Des ars aus anemis
Diſt au roy faus truant on vous deuroit bn̄ pendꝛe
Quant auec vous giſt fame Si douce ⁊ ſi tandꝛe
Voir nous l'enpoꝛteꝛon En no nef ſans atendꝛe
Quant le roi l'entendi S'eſpee courut pꝛendꝛe
Mes gloutons afoꝛce De ces poins li oſteꝛent
Loꝛs par grant mautalent A terre le geterent
Les .iiij. entre leur bꝛas La roine enpoꝛteent
Les autres (autres )de batons Maint coup le roi fraperent
Et puis ſi li crieꝛent Hautement nō pas bas
La dame en poꝛteron Iamés nela ueꝛras
Les batars te lairons Par les mouſtieꝛs iras
On te donra aſſés Tant com tu les auras
La dame ſ'eſcria Pour dieu ſoiez nous dous
Ie vous iure ſur ſains Que c'eſt mon dꝛois eſpous
Les gloutons diſtrent fole Et pour quoi mentez vous
Loꝛs ſe paſma de duel La dame deuant tous
En tant comme les .iiij. La roine empoꝛtoient
Les autres contre terre Le roi englois tenoient
Mes le meſtre leur diſt Que grant pechié feſſoient
Quant ainſi ſans raiſon Le poure hōme batoient
IL pꝛiſt vne bourcete Qui fu de rouge ſoie
.V. floꝛins miſt de dens Au roy diſt ie te pꝛoie
Que plus ne te combates La foꝛce n'eſt pas toie
Ceſte bourceta auras Lonc temps a eſté moie
S'on te fait des raiſon Voir dieu t'en vengeꝛa
La bource o v. floꝛins Tout dꝛoit au roy geta
Mes a vne bꝛanchete D'un arbꝛe demoura
Le roy la uit moult bn̄ Mes il n'i a de ſa
Adont les marchéans De dens leur nef entrerent
Tout le plus toſt qu'il poꝛent De terre ſ'es longuieꝛe
Mes maugré leur ſeingneur La roine en poꝛterent
Les petis en fans A leur peꝛe laiſſierent
LE roy uit que ſa foꝛce Ni ualoit .ij. eſpis
Veꝛs la roche reuint A ces en fans petis
De uoſtement requiſt Au roi de paradis
Qu'il li donnaſt conſeil Quel part ſeꝛoit veꝛtis
LE roy qui ot aucueꝛ Douleur peſant et ſure
Vit vn batel tout vuit Loꝛs diſt et ſa ſeure
Que lui et ces enfans Metra en auenture
V batel enterra Oꝛ en pꝛeingne dieu cure
Un des enfans apꝛis Ou batel le poꝛta
L'autre reuenoit querre Deuant lui regarda
Vn leu grant et hydeus Qui ſaiſſi l'auoit ia
Le roy courut apꝛés Ataindꝛe le cuida
LE roy apꝛés le leu Courut lieue ⁊ demie
Mes ce ne li valut Lamonté d'unne alie
Il fu ſi trauailliez Et ot tant de hachie
Ie croi qu'il n'est nus hōs Qui le recoꝛdaſt mie
LE bon roy d'engleterre Si fu foꝛment laſſés
De courre apꝛés le leu Tant qu'il chai paſmés
Moult longuement iiut Pour dieu oꝛ entendés
Que l'en fan con deuint Qui du leu fu poꝛtés
LE leu qui l'en poꝛtoit Fu de marchéans choiſis
Qui ſus la meꝛ erroient Chaſcun d'eus a atis
Priſtrent foꝛt a hueꝛ Le leu fu eſbahis
Si qu'il laiſſa l'enfant El milieu du larris
LEs marchéans icoururent Quant ſain virent l'enfant
De bon cueꝛ enlouerent Le dous pere puiſſant
L'un d'eus adit aus autres Seingneurs ie uous demant
Que ceſt en fant ſoit mien Et ie uous acrëant
Que bn̄ ſera nourri Se iheſucriſt me gart
Chaſcun des autres diſt Ie uous enquit ma part
Loꝛs le pꝛiſt le pꝛeudōme Et iura ſaint liénart
Qu'il le feꝛa riche hōme Sa toꝛt de lui ne part
L'un des en fans le roy Ot vn pere nouuel
Oꝛ vous dirons de l'autre Qui eſtoit ou batel
Si foꝛt pꝛiſt acrieꝛ Quoi fu ſon apel
De pluſſeurs marchéans Qui furent utropel
DE tourneꝛ celle part Ne furent pas laſnieꝛ
Loꝛs vn pꝛeudomme Priſt l'enfant aconuoitieꝛ
Voiſin eſtoit al'autre Qui ot pꝛins le pꝛemieꝛ
Chaſcun liotroia De bon cueꝛ ⁊ d'entieꝛ
LEs .ii. marchéans Qui oꝛent les .ii. ēfās trouez
Toſt et de liureement Entreꝛent enleur nés
Tout le plus toſt qͥl poꝛent Quant furent as hoſtiex
Penſerent qu'as enfans Fuſt bauteſme donnés
CElui ot non louuet Qui au leu fu tolus
Marin ot non li autres Qui ſour mer trouué fu
Douce gent entendez Pour le dous roy iheſu
Deleur pere diron Qui ot grant duel eü
LOnguement iut paſmés Mes quant ſe releua
Du leu ne de l'enfant Nule riens veü n'a
Bien cuide qu'il ſoit moꝛt Adonques ſ'a penſa
Qu'il ſ'en iroit al'autre Que v batel laiſſa
LE roy vint celle part Mes ne le trouua mie
Loꝛs li doubla ſon duel Quant ſa peꝛte a choiſſie
Foꝛment pꝛiſt apleureꝛ Et diſt uieꝛge marie
Oꝛ ai ie tout peꝛdu Loꝛs vint celle partie
Ou la bource aumarchéant Fu pendant de mouree
Qui fu de rouge ſoie Meimement ouuree
Cinc floꝛins ot de dens Le roi a haut leuee
Samain qu'il la vout (p) Prendꝛe mes il fu fols ⁊bee
Que li dous iheſucriſt Fiſt vne aigle deſcendꝛe
Qui au bec et aus ongles Ala la bource pꝛendꝛe
Il cuida ce fuſt char Loꝛs le roy ſans atendꝛe
Fu ſi foꝛt eſbahis ne ce ſot Des quiex rendꝛe
LE bon roi d'engleterre Qui fu plain de franchiſe
Vit que l'aigle volent Ot la bource pꝛiſſe
Il ſemiſt agenous Puis adiſt entel guiſſe
Tres dous dieus gardé Moy de male conuoitiſe
I'ai au iour d 'ui peꝛdu Mafame ⁊ mes enfans
Ie fui bn̄ fols Et parfait meſchëans
Quan i'a menai la dame Ieſui d'entredeus bans
Cheus ius alaterre Tres dous peres puiſſant
Si voir com vous feiſtes Le pꝛeudōme tempteꝛ
Que l'en apelle iob Par l'anemi d'enfeꝛ
Vueilliez moi pacience Si parfaite donner
Que mauués ne me puiſt Faire des eſpérer
Bien croi que le meſchief Que i'ai m'eſt auenu
Pour la cauſe de ce Que i'ai trop atendu
A aleꝛ en eſſil puis Qu'a m'onneſté (me) fu
Dous roi de paradis Chieꝛ le m'auez uendu
L'(E)en ai perdu ma fame Et mes enfans petis
Dieus weille d'engleterre Maintenir le pais
Le pueple eſt pour moi Trop foꝛment eſbahis
Pa foy c'eſt grant Meꝛueille que ie demeure vis
Quant la dame ai Perdue et toute ſapoꝛtee
Ie ai poy eü de ioie De malaſſe engendꝛee
N'a pas plus dolent hōme Iuſques alameꝛ betee
Qu'eſt monchetif de coꝛs Douce uierge honnoꝛee
Ueilliez moi confoꝛteꝛ gñt amoſne ferés
Dieus m'auoit les enfans Et la dame donnés
Se tolu le mes a Il en ſoit aourés
Adoncques c'eſt leꝛoi Veꝛs la terre enclinés
Un petit ſ'en doꝛmi Et dieu qui ml՚t l'ama
Li tramiſt vne vois Qui bien li aſfeꝛma
Qu'ancoꝛe ces enfans Et ſafame raura
Mais ancois maint Meſchief endureꝛ lifaudꝛa
LOꝛs ſ'eſueilla le roi La vois ſ'en eſt partie
Vn poy ſe confoꝛta Pour tant qu'il ot oïe
Veꝛs lameꝛ regarda Et uit grant compaignie
De marchéans qui Dignoient en vne pꝛaieꝛie
UErs eulz vint quar du pain Voult pour dieu demandeꝛ
Quant les marchéās Le virent haut pͥſtrent a crieꝛ
A leurs garcons qu'a laſſent Cel grant ribaut frapeꝛ
Loꝛs ala chaſcun d'eus .I. grant baſton hapeꝛ
Quant le roy vit lagen De mal faire entrodite
Les talons leur mouſtra Et ſemiſt en la fuite
En la foꝛeſt en tra Par cel point fuil quites
Pour paradis auoir Endura longue luite
Tant erra par le bois Qu'il vit vn hermitage
Ou vn hermit auoit Iadis fet ſon menage
Mes treſpaſſés eſtoit Le lieu ert mout ſauuage
Au bon roy d'engleterre Vint adont encourage
Qu'il ne ſ'en partiroit Iamés iour de ſa uie
S'aucune autre nouuelle N'auoit de dieu ouie
Huimes eſt bn̄ raiſon Que de la dame die
Qui eſtoit en lameꝛ Ou foꝛment bꝛait ⁊ crie
POur ces petis enfans Dont on l'ot deſſeuree
Et pour ſon bon ſeigneur Qu'amoit plus q՚ rien nee
Noblement fu ſeꝛuie(e) Tant que fu releuee
.ij. fames lagardoient Mes point ne li agree
LA nef ou elle eſtoit Vint au poꝛt d'un chaſtel
Le ſire duchal ot .i. vſage tel
Que quant nés iuenoiēt Il n'iauoiet iouel
Dont il ne poinſt pꝛendꝛe A ſon chois le plus bel
LEs marchéans auoient Entr'eus comtemps meü
Pour l'amour la royne Qui belle et douce fu
Mes le ſeingneur vint la Pour querre ſon treü
Bn̄ a des marchéans Tout l'eſtrif en tendu
Hautement leur a dit Ne vous combatez pas
La dame ſera moie Pour qui muet lidebas
Tout l'autre auoir vous quit Car par ſaint nicolas
Ie croi qu'el n'eſt pas nee De lingnage moult bas
Ainſi fu la royne Aus marchéans oſtee
Le ſeingneur du chaſtel L'a tentoſt pꝛeſantee
A vne bonne dame Qu'il auoit eſpouſſee
Mes ne demoura pas Ie croi plus d'une annee
Que ſa fame mourut Leſeingneur fu dolent
Qu'il auoient ueſcu En ſemble longuement
Le ch՚r fu vieil ⁊ ācient foꝛment
Mes il auoit eſté Moult pꝛeus ē sō iouuent
Par uigeur ot ſa teꝛre En ſ'anfance conquiſſe
Vn poi apꝛés com ot Sa fame en terre miſſe
Il diſt ala roine Qu'il veoit bn̄ apꝛiſſe
Ma ſueꝛ vous ſauez bn̄ En quel lieu vꝰ ai pꝛiſſe
Uoir ie ne ſai dont eſtes Ne de quel parenté
Mes ie uous uoi tant plaine De ſans et de bonté
Que ie vous feꝛai dame De magrant herité
Eſpouſeꝛ vous voudꝛai De dens vn mois paſſé
Quant la douce roine Le parleꝛ entendi
Du bois li mambꝛa Oulaiſſa ſon mari
Le bon roy d'engleterre Son tres loial ami
Et ces petis enfans Tout bas diſt dieu meꝛci
Ie ne ſai que reſpondꝛe Voir miex mourir voudꝛoie
Que la char de ceſt hōme A touchaſt ala moie
Loꝛs diſt la roine Sire pas ne ſeꝛoie
Digne auous deſchaucieꝛ Voulentieꝛs vous diroie
Mon eſtat en ſecré Et ma dolente uie
Loꝛs de moi eſpouſeꝛ Ne uous pꝛendꝛoit enuie
Ie fui iadis nonnain D'unne bonne abaie
Mes ie m'en iſſi hoꝛs Par ma merencolie
Plus erré cōme fole Lonc temps par le pais
Ne veoie mon coꝛps A grans ni a petis
Celui qui ot ſon cuer Enla roine mis
Li reſpondi ma ſuer Ce ne vaut .ii. eſpis
NE me chaut qu'aiez fait Mes que d'oꝛe en auant
Me weilliez eſtre bonne N'en alez plus parlent
Loꝛs ſa la la roine D'autre engin apenſant
Aucheualier adit Sire ie uous crëant
Se ie vous refuſoie ſeceroit grant deſpit
Mes ne vous ne d'autre Hōme ne puis auoir délit
De ſiques a vn an .I. ˞pdons le me fiſt
Chargieꝛ en penitance El non de iheſucriſt
Que .iij. me rendꝛoie D'auec hōme hanteꝛ
.ij. ans m'enſui tenue Oꝛ faut letieꝛs paſſeꝛ
Adont me pourres vous S'il vous pleſt eſpouſeꝛ
Le ſire diſt m'amie Ne vous en faut doubteꝛ
IE vous eſpouſerai pource ne lerai mie
Mes ia n'aurai ueꝛs uous Charnele compaīgnie
Iuſqu'a tant que l'anee Sera toute acomplie
La dame l'oſtroia Mes el n'en fu pas lie
ADont fiſt lecheualieꝛ tous ces hōmes mandeꝛ
La roine eſpouſa Moult la voult honnoꝛeꝛ
Mes ains qu'il l'en leſſaſt Nul des ſeingneurs aleꝛ
Illeur fiſt atreſtout Deſus les ſains iurer
Que ſil mouroit auant Que la dame eſchenie
Qu'elle tenroit la terre Quite toute ſa uie
Mes onques leſeingneur Ne iut auecques ſ'amie
Que ains quel'an fuſt paſſé Mourut par maladie
LA terre demoura a la royne ſage
Moult voulentieꝛs lifirent Grans ⁊ petis hōmage
Du roy englois diron Qui fu en l'eꝛmitage
Tant que li rois des rois Li tramiſt ſon meſage
Que tant auoit ſoufeꝛt Et douleur ⁊ martire
Que ie croi qu'il n'eſt cleꝛs Qui le peüſt eſcrire
Vne nuit endꝛomant Li vint vne vois dire
QUe laiſſaſt l'eꝛmitage Par le ſouuerain ſire
LE bon roi d'engleterre Priſt dieu areclameꝛ
De la foꝛeſt iſſi Et ſ'en uint ſur lameꝛ
Bonne gent uit au poꝛt Qui vouloient paſſeꝛ
Le roi vint dꝛoit a eulz Moult les fiſt eſfreeꝛ
Quar des charnés eſtoit Et de fain toulz velus
Mieus ſembloit moꝛt q՚ vif Quant d'eus apꝛochés fu
Doucement diſt ſeīgneur El non du dous iheſus
Metez moi en vos nef L'un d'eus areſpondu
Biaus amis dont viens tu Moult as ſouſfeꝛt de paine
Bn̄ peꝛt que as hanté Entre gent trop vilaine
Ie te doins ceſte cote V eſt la en bonne eſtraine
Le roi l'en meꝛcia Qui auoit foible alaine
Quant la cote ot ueſtue En la nef ſe bouta
Et le dous iheſucriſt Tant les ueſſiaus mena
Qu'a vn des poꝛs d'eſpaingne Sain et ſauf ariua
Le roi tous ceſbahis Sur la meꝛ de moura
Ia ne ſeüſt uenir En ſi diueꝛs pais
Senōmeꝛ ſe uouſiſt Qu'il ne trouuaſt amis
Mes il auoit ſon cueꝛ Par faitement aſſis
Au pleſſir de dieu faire Pour auoir paradis
Il neſot ouil fu Ne enquelle contree
La roine ſa fame A foꝛment regretee
Et ces petis enfans Mainte leꝛme aplouree
Bn̄ ot ſa contenance Vn bourgois entendue
Au roi vin ſi le miſt Doucement araiſon
En diſſant biaus amis Cōment auez vous non
Adont ſouuine auroy De la deſfancion
Que la uois liot fete Libaiſſa le menton
Il penſa vn petit ſon non aretrenchié
Il dit i'ai a non gui [...]
Le bourgois qui eſtoit Ou pais moult pꝛiſié
Li dit guis biaus amis I'ai de toi gñt pitié
POur ce que t'ai veü ſitendꝛement pleureꝛ
Se meller te ſauoies D'un palefroi gardeꝛ
Auec moi te pourroies De tes maus reſpaſſeꝛ
Le roy reſpondi ſire Ie m'en puis bn̄ venteꝛ
Que d'atourneꝛ cheuaus bien la guiſſe ſauon
Le riche hōme mena Le roy en ſa maiſon
Onques mes marchéant N'ot ſi riche garcon
Des .ij. enfans le roy Vn poi vous parleron
COnment et enquel guiſe les retrouua leur pere
El cōmant agrant toꝛt Guerroierent leur mere
Oꝛ cōmance du dit La piteuſe matere
Mes atous et atoutes Pri pour le coꝛs .ſaint pere
Que pour nous donneꝛ Soiēt les bources deſfeꝛmees
Auoir doit bon argent Qui a bonnes denrees
Des meilleurs del'oſtel Vous auon apoꝛtees
Le bon roi d'engleterre Serui pluſſeurs iournees
LE bourgois ſi apoint Que de bon cueꝛ l'ama
Et moult de ces denrees Entre mains li laiſſa
Mes ſouuent pour ſa fāme Et pour ces filz pleura
Chaſcun des deus enfans Crut moult ⁊ amenda
LES marchéans qͥ chiez eulz Les enfans nourriſſoiēt
Furent pꝛochains voiſins L'un les l'autre mānoient
Les .ij. petis iumiaus Si foꝛment ſ'en tr'amoient
Quar il eſtoient freres Mes pas ne le ſauoient
A paine pouoit on Dé partir les enfans
Ainſi furent nourris Tant qu'il oꝛent .x. ans
Dous et courtois eſtoiēt Sages et bien parlens
Adonques ſ'apenſa L'un des marchéans
Que l'enfant qu'il gardoit Apꝛendꝛoit ameſtier
Par vn matin le fiſt De ſon lit des couchieꝛ
Puis lia dit il faut Que ſoies peletieꝛ
P'anfant li reſpondi Ia meꝛleꝛ ne m'ēquieꝛ
Par foi ia ne coudꝛai Mantiau ne pelicon
S'auecques moi n'apñt Auſi mon compaignon
Quant le marchéant oÿ Qu'il des diſt ſa raiſon
Errant pꝛiſt vne ueꝛge S'en bati l'enfancon
Par deſpit l'a pella Mauués garcon trouué
Coment oſe tu dire Contre mauoulenté
Ie te pꝛis ſur lameꝛ Eſtroit en uelopé
V pan d'une viez cote Que i'ai long temps gardé
Errant vint aſa huche Celui qui ſ'aira
Le pan en atrait hoꝛs Al'onfant l'a geté
Et iure que iamais Nul bn̄ neli fera
Loꝛs pꝛiſt l'enfāt lapiece En ſon ſain la bouta
Puis iſſi del'oſtel Ml՚t tendꝛement pleurant
Ne cuidoit auoir pere Foꝛs que le marchéant
Mes filz eſtoit de roi Foꝛt ſ'ala demantant
Enſon cueꝛ afeꝛma Qu'il chemineroit tant
Qu'il ſaura dont il eſt Hoꝛs de la uille iſſi
Son frere qui eſtoit En l'autre hoſtel nourri
Vouloit on cel ioꝛ metre A meſtieꝛ autreſi
Mes ille refuſa Sique on l'en bati
Et puis fu apellé Mauués garcon volage
Le marchéant ligeta L'autre pan auiſage
Et lidiſt pardeſpit Tien vés la biau gage
Ougiſſoies qñt fus Reſcous auleu ſauuage
LOꝛs quant lefilz leroy Le marchant entendi
Au marchéant a dit Sire pour dieu meꝛci
Voir bn̄ me deuez batre Pas ne vous en des di
Quant a leué m'aués Et de moꝛt garenti
Ne ſeꝛa iamés heure Que ne vous doie ame
Qñt le marchéant l'oï Siſagement parleꝛ
Foꝛment ſerepenti Qu'il l'auoit fet pleureꝛ
Doucement liadit Mon enfant lai eſteꝛ
Pour toi chaſtieꝛ ai ceſte bourde trouuee
Voir tues mon dꝛoit filz Plus t'ainme que rien nee
L'anfant lidiſt dous ſire Par la vieꝛge honnoꝛee
Ne pourroie plus faire Ci endꝛoit demouree
Ie uous ai trop couſté Dieu me doīt viure tant
Que le vous puiſſe rendꝛe Loꝛs le pꝛeudon pleurant
Li fiſt donneꝛ .x. liures Et vn cheual courant
Et pour lui miex conduire Li bailla vn ſeꝛiant
L'E n fant n'oublia pas Le pan ou couchié fu
Quant naqui de ſa mere Par cela fu comneü
D'un arc ⁊ de ſaieſtes C'eſt moult bn̄ poꝛ veü
Puis monta acheual Adont c'eſt eſmeü
Par le vouloir de dieu Tant fiſt et eſploita
Que il ataint ſon frere Compaingnon l'apella
Puis lia demandé Pour quoi ainſi ſ'enua
L'autre enfant reſpondi Compains vous l'oꝛrés ia
Ne vos meſtieꝛ apꝛendꝛe Si que on me bati
Liautres diſt compains Auenu m'est ainſi
Cil qui fu acheual A terre deſcendi
Et a dit aſon frere Lëaument vous afi
Que ie ne vous faudꝛai Iamais pour nulle rien
Ainſi ſ'a compaingnieꝛēt Mes il ſetindꝛent bn̄
De parleꝛ des .ij. pans Chaſcun cela le ſien
De dens vn bois entrerēt Ou ot maīt biau merrien
Un poi apꝛés midi Qu'an eſté doit chaut faire
Virent ioune ceꝛf L'un des filz pꝛiſt atreꝛe
Tant dꝛoit ſi cōme il plot Au dous roy de bonnaire
Que le ceꝛf cheï moꝛt Sans crieꝛ ⁊ ſans bꝛaire
L'E n fant ot ml՚t gñt ioie Quant le ceꝛ vit tué
Bn̄ le cuide auoir fet En l'eure l'ont leué
Sus le col ducheual Qui eſtoit en ſellé
Mes vn deſfoꝛeſtieꝛs A tout ce regardé
Baut leur diſt qñ pͥſon paſſeꝛ les conuenoit
Auſſi com .iij. bꝛebis Deuant li les menoit
Le ſeingneur de la terre Par la foꝛeſt chaſcoit
Quant il vit les enfans Il en quiſt que c'eſtoit
LE foꝛtieꝛ diſt ſire beꝛſant vont ꝑle bois
Ceſte beſte ont tuee Le ſeingneur fu courtois
Il diſt ie leur pardoins Pour dieu aceſte fois
Mes ie weil qu'il demeurent En mon hoſtel huimes
L'un des en fans lidiſt Qui eſtoit le plus ſage
Sire de uous ſeꝛuir Ai moult tres bon courage
Le conte les mena En ſon meſtre menage
Bn̄ penſa qu'il eſtoient Eſtrait de bon lignage
MOult auint aus enfans Cel iour bonne auenture
Pas n'auoient eſté Nourris aleur dꝛoiture
Les chiens et les oiſſiaus Amoient par nature
En poi de temps retindꝛēt Foiſon ſans et meſure
TOute gens haus ⁊ bas Les auoient moult chieꝛs
Quant il oꝛent .xx. ans Foꝛs furent et le gieꝛs
En fait d'armes eſtoient Tout a dés les pꝛemieꝛs
Tant les ama le conte Qu'il les fiſt cheualieꝛs
LE conte qui ſi foꝛt Les .ii. enfans amoit
Leur meꝛe laroine Moult foꝛment gueꝛroiet
Pour tant qu'a mariage Prendꝛe ne le vouloit
Mes tous les cheualieꝛs Que li ſires auoit
Pas de ſigrant air La dame ne greuoient
Cōme faiſſoient ceuls Qui ces en fans eſtoient
Pluſſieurs deſpit lifirent Et bien ſ'a atiſſoient
Setenir la pouoient Que voulentieꝛs l'ardꝛoiēt
EN tant cōme laguerre Dura dont ie vous di
Le noble roi guillaume Le marchéant ſeꝛui
Quant le vouloit huchieꝛ Ne l'a peloit foꝛs gui
Il l'apella vn iour Et diſt gui mon ami
Uous eſtez loiaus hons Bien vous ai eſſaié
Ia laſſa en engleterre Se ie fuſſe hetié
Illi fiet vne foire Ou i'ai moult gaagnié
Sepour moi ialez Bien en ſerés paié
Quant le bon roy guill՚e Son parler eſcouta
Foꝛment pꝛiſt apenſeꝛ Quar foꝛment ſe douta
Que conneü ne ſoit S'en ſon royaume va
Mes toute uois diſt il Que voulentieꝛs ira
Errant fiſt vne nef De derrees chargieꝛ
Diex leur vout ſibon vent De dens l'iaue baillieꝛ
Qu'ariuerent adouure Droit a vn eſclarier
Le roy requiſt de cuer Le pere dꝛoiturieꝛ
Qu'il ne ſoit conneü En la foire ſemiſt
Es loges qu'il loua Grant auoir poꝛteꝛ fiſt
.I. coꝛ qui ia fu ſien Deſus vn hōme vit
Loꝛs l'a pella le roy Moult doucement lidiſt
Biaus amis voulez vous Cel coꝛ d'iuoire vendꝛe
Et illi reſpondi ouil Sans plus atendꝛe
Vint ſouls en eſteꝛlins L'en ala leroy tendꝛe
Cil qui recut l'argent Lia dit rendꝛe oupendꝛe
Quar uoir ie n'ai nul dꝛoit En ces eſteꝛlins ci
Aus poures les donrai Pour l'amour de celui
A qui cel coꝛ eſtoit Car ſouef me nourri
Ce fu le roy guillaume Dieus li face meꝛci
Quant le roy l'entendi Si li a reſpondu
Eſt donques celui moꝛt A qui ce coꝛnet fu
Ouil ſire diſt il puis( ql) Qu'il n'eſt reuenu
Adonques ſ'en parti Plus n'ia atendu
Aupoures qui trouua Donna trétout l'argent
Et leur diſt qu'il pꝛiaſſent Pour le roy bonnement
Le roy le uit bien Sot qu'il l'amoit foꝛment
Puis lien rendi il .I. courtois paiement
LEs anciens d'ēgleterre Regardoient le roy
L'un le mouſtroit al'autre Tout coiement audoit
Et puis ſ'entre diſſoient Cel marchéant que la voy
Reſemble au roy guill՚e Par la foi qu'a dieu doi
Tant ala la parole Du roi qu'oiez conteꝛ
Que celui qui auoit Engleteꝛre agardeꝛ
S'en uint dꝛoit aſon oncle Moult doucement parleꝛ
En diſſant tres dous ſire Ie uous viens demandeꝛ
S'Eſtes le roy guillaume par amour ſire dous
On diſt que li ſemblés Pour dieu dites le nous
Se le uoir en ſauon Ie et les barons tous
Obeïron en l'eure De uotement auous
Quant l'oncle ot le neueu Si faitement parleꝛ
Illia diſt biau ſire Pour dieu leſſiés eſteꝛ
Iene ſui pas venus Ci endꝛoit pour moquieꝛ
Mes pour vendꝛe les bn̄s Quar i'ai fait ameneꝛ
LE roy ot moult gñt doute Qu'il ne fuſt auiſſez
Quar les .xx. ⁊ quatre ans N'eſtoient pas paſſez
A ſon neueu a dit Biau ſire oꝛ entendés
Sele roy reuenoit De quoy vous me parlés
Seroit il receus Son neueu diſt errant
Ouil ſe dieus me gart A ſollanpnité grant
Mes pour l'amour de li Dont auez le ſemblant
Serés mon ſeneſchal Des oꝛ mes en auant
Non feꝛai dit le roy L'oſfice n'ai pas chieꝛe
Que ſe le roy guillaume Repairoit ca arrieꝛe
D'ofiſſe m'oſteroit Bn̄ connois ſamanieꝛe
Fous eſt qui ſi haut mōte Qu'il en trebuche arrieꝛe
A ce mot le neueu De ſon oncle parti
Tout ce qu'ot amené Le roy englois vendi
Lanef fiſt rechargieꝛ Puis enmeꝛ ſ'en bati
Mes par legré de dieu Qui onques ne menti
Un vent leua ſi foꝛt Que lanef ariua
Aupoꝛt que la roine D'engleterre garda
Quant la nef fu at՚re La dame n'a reſta
Pour pꝛendꝛe ſon truage Droit ala nef ala
LE coꝛ vit qui eſtoit Enmi lanef pendu
Bn̄ ſot qu'en engleterre L'auoit auroi veü
D'autre part regarda S'a le roy perceü
L'annel qu'il ot el doi A bien reconneü
La dame vint auroy Et liadit moult bel
Sire ſe vous voulés Aquiteꝛ ceſt veſſel
I'aurai de vr՚e doi Seulement cel anel
Et ſi venrés diſneꝛ Laſſus en mon chaſtel
LE roy ot ml՚t gñt duel Quant ce mot endenti
Puis adit aladame Vous auez mal choiſi
Cëans a tel iouel Qui vault ie uous afi
Plus de tiex .xxx. anniaus La dame reſpondi
IE ne weil que l'annel A dont le roy litant
En ſoupirant lidiſt Ie vous iur lëaument
C'onques mes en mauie Ie ne fui ſi dolent
Foꝛs le iour que ie tins L'annel pꝛemieꝛement
Quar larrons metolirēt En la laſſe iournee
Vne moult noble dame Que i'auoie eſpouſſee
Et perdi .ij. enfans Qu'elle ot d'une ventree
Quant la dame l'oÿ Errant chey paumee
POur ce que ces enfans Cuidoit auoir perdus
Le roy entre ces bꝛas L'e na leuee ſus
Puis li diſt chiere dame Pour dieus qͥ maīt la ſus
De quoi eſt voſtre cueꝛ Sifoꝛment eſpeꝛdus
La dame li diſt ſire Se ih՚u me pouruoie
Mon cueꝛ eſt eſperdus De courrous et deioie
Lié ſui qñt vous tien Quar moult vous deſirroie
Quar de mes .ij. biax filz Ne ſai ne vent ne voie
Tantoſt que li rois ſot Que c'eſtoit laroine
Doucement la baiſſa Qu'il l'amoit d'amour fine
Le pueple ot grant ioie Quant il ſot leur couuine
Le roy diſt ala dame Sur i'ai grant envie
Qu'allons en angleterre Le pais renonmé
Pres de vint ⁊ quatre ans Ai en eſſil eſté
On fiſt les table metre Quant le roy ot diſné
Vn petit ſ'en doꝛmi En vn biau lit paré
Auiſion liuint Que chacieꝛ aloit
Que il pꝛendꝛoit telchoſe Dont moult ioiant ſeroit
Quant il fu eſueillié Si grant talent auoit
Qu'alaſt el bois chacieꝛ Que meꝛueilles eſtoit
La dame lidiſt ſire Puis qu'auez celle ēvie
D'aleꝛ el bois chacieꝛ Par fine amour vꝰ pꝛie
C'un ruiſiau qui ieſt Pour dieu ne paſſez mie
C'eſt la terre d'un conte Qui trop foꝛt me guerrie
LE roi lia diſt dame Ne vous en doutez ia
N'irai gueres auant Que retournerai ca
Le roi ⁊ ces ueneurs .I. poꝛc ſanglieꝛ leua
Mes deſi gñt air Le ſuiui et chaca
Que ces chiēs ⁊ ces hōmes Tout a vn coup per di
Et paſſa le ruiſſel Quel'an li deſfandi
Deus cheualieꝛs armés Sous vn arbꝛe choiſi
Qui li crierent meſtre Vous paſſerés par ci
Par foi vous valez moꝛt Se vous ne vous rendez
Loꝛs le roy reſpondi Voir ſ'amoi main metez
Ie uous iure ſus ſains Vous en repentirés
L'un des cheualieꝛs diſt Tues vn folpꝛouués
EN noſtre dangieꝛ es ⁊ nous uas menacent
Pres ua que ne te fieꝛ De mon eſpié tranchant
Le roy leur reſpondi Au mains ſouſfrés vꝰ tant
Que vous aie conté Quel choſe vois quéꝛant
QE ſui roy d'engleterre Mes dieu le tout (le) puiſſās
Me manda qu'en eſſil Fuſſe vint ⁊ quatre ans
O moi menai ma fame .I. iour ot .ij. en fans
A foꝛce la m'oſterent Faus gloutons marchéans
Sans mere me laiſſieꝛēt Les .ij. enfans petis
Es .ij. pans de ma cote La les couchai et mis
Par vn leu me fu vn De mes en fans rauis
Et en vn batelet Sur meꝛ l'autre fu pꝛins
Quant les .ii. cheualieꝛ Oirent la raiſon
L'un regarda l'autre Ne dit ni o ne non
S'il qui fu plus haſtis S'eſcria a haut ton
Sire voſtre filz ſui De ceꝛtain le penſon
Reſcous fui a vn leu Qui m'auoit engoulé
Ou pan d'unne viez cote Eſtoies enuelopé
L'autre cheualieꝛ diſt Voir et ie fui trouué
En vn batel ſur meꝛ Sicōme onm'a conté
Ou pan d'une viés cote En uelopés eſtoie
Quant le roi les oÿ Au cueꝛ enot grant ioie
Puis adit biaus enfans Se les pieces vëoie
Ou couchai mes enfans Moult bien les connoiſtroie
S'un des en fans adit Seuenez auec moy
La piece ou fu couchié Vous mouſterrai par foy
L'autre cheualieꝛ diſt Par lafoi qu'a dieu doy
Bn̄ ſai ou eſt la moie Freres sōmes en doy
LEs .ij. freres menerent Leur pere ciés le conte
Qui auoit aleur meꝛe Par pluſſeurs fois fet honte
Chaſcun d'eus trait lapiece Dont ie uous ai conte
Le roy les vit puis diſt Vray dieu qui tout ſurmōte
On vous doit bn̄ loueꝛ tres dous peres puiſſans
Oꝛ ſui ie tout ceꝛtain Que ce ſont les .ii. pans
Que tranchai de ma cote Pour couchieꝛ mes enfans
Moult furent les .ij. freres En leurs cueꝛs tres ioians
DE uoſtement requiſtrent Aleur pere meꝛci
Pour ce qu'ē lafoꝛeſt L'auoient aſſailli
De cueꝛ leur pardonna Et puis leur diſt ainſi
Biaus enfans ie uous lo Qu'aillons ſans nul detri
Parler a votre mere Le plus toſt que pourron
Bien ſai que pour moi eſt En male ſoupecon
Se li auez meſfait Requéres li pardon
Les en fans reſpondirent Voſtre cōm ant feron
LE pere ⁊ les enfans Murent ſans plus ꝑleꝛ
Ou bois uirent leur mere Qui ia ot fet armeꝛ
Sagent pour le roi querre (Querre )que tant pooit amer
Les en fans ſi ſ'alerent A nus genos geter
A nus genous requiſtrent Pardon deuotement
Elle leur pardonna De cueꝛ par faitement
Mes quant le conte ſot Le fait par faitement
Il vint ala roine En pleurant tanrement
DEs maus quelli ot fet Li demanda meꝛci
Le roi englois lidiſt A gré m'auez ſeꝛui
Vous auez mes enfans De leur armes garni
Ciendꝛoit delaterre La dame vous ſaiſſi
Que iamés pié deterre Deſa meꝛ ne tendꝛai
En angleterre iron Ou roine ſeꝛa
Adont le roy englois Par meſſage manda
Qu'il enterroit alondꝛes A vn iour qu'il nōma
CIl qui maintint laterre ⁊ liautre baron
Furent liez ⁊ ioiaus Quant ſoꝛent lareſon
Pres las abés ⁊ moinnes Gens de religion
Furent contre leroy Belle pourceſſion
Receü fu le roy agrant ſollenpnité
Qui vint et quatre ans Ot en grant dengieꝛ eſté
Mandeꝛ fiſt le marchéant Entour qui ot hanté
D'engleterre li fiſt Tenir vne conté
Puis fiſt l'eſcuieꝛ querre Le franc roi ſans venin
Qui li vendi le coꝛ Bn̄ ſot que de cueꝛ fin
L'amoit illi donna De terre en eſterlins
Douſe mille liurees Et en fiſt ſon voiſin
Et les .ij. filz leroy ſans reſpit mandeꝛ fiſt
Les .ij. lëaus marchéans Qui .x. ans les nourrirent
D'eus firent ml՚t gñt ioie Sitoſt cōme il (l) les virent
A eus ⁊ a leur hoirs Ml՚t grant rantes aſiſtrēt
LE roi ⁊ ces .ij. filz E la dame gentils
Oꝛent en bonnes euures Sitres bien leur cueꝛ mis
Que la ioie conquiſtrent Ou dieu met ces amis
La quelle nous otroit Le roy de paradis