Qui eſt liez toudis bal
Et a l'eſtuef tribale
Voit alafois triſtece
A celui choſe eſt male
Qui monte ⁊ puis auale
Et chiet aqu'il ſeblece
/Lucifeꝛ fu iadis
Angles en paradis
Sur touz voit eſtre ſires
De ſi haut quieꝛt ſaillis
Chei oſes eſlis
En enfeꝛ amartire
De tant qu'il eꝛt plus biaus
Des autres ⁊ plus haus
Eſt cheus el plus bas
Surs tous eſt fel ⁊ faus
Racin eſt detous maus
En tre les ſatenas
Vous qui ceſt eſcript oés
Humblement vous tenes
Simonteꝛes amont
Qⁱ dire en flames
Ses ſens lieſt mues
S'arme ⁊ ſon coꝛs confont
Qⁱ d'autrui a enuie
Trop amauueſſe vie
⁊ ſ'arme en dameꝛa
Auarice n'eſt nie
Au charitable amie
Qui ſeꝛt poure ſeꝛa
Accide eſt vns pechiez
Qui eſt al'ame griez
C'eſt de dieu adoſſeꝛ
Tieus eſt en luxure lies
Qⁱ en enfeꝛ ſeꝛa lies
Se veꝛra tourmenteꝛ
Qⁱ quieꝛt tout ſon délit
En gloutonnie vit
Son auoir gaſté ⁊ ſ'arme
Cil qui ſont en doꝛmit
Espechiez qu'ai ſi dit
Pueent dire ua arme
LI arbꝛes q՚ veü auez
En .vij. ſeꝛpens ēracines
Liarbꝛes des pechiez dis eſt
Qⁱ des .vij. ſeꝛpēs croiſt ⁊ neſt
Pechiez ſeꝛpens dire puet on
Qⁱ ſont felon plꝰ que lyon
Seꝛpens beſte eſt eſpouantable
Car en figure eſt de diable
Q՚ ci cōme ſeꝛpens el ciel
Combati contre /.s՚. michiel
Ꝑ ſeꝛpent vint p՚mieꝛs pechié
Dōt toꝰ li mōs fu ēgingniez
En cui c'eſtoit li anemis
P˞ nous deceuoir atapis
Seꝛpans eſt beſte deceuans
Sour toutes autres deuoꝛans
Les coꝛs de coit l'arme deuoire
Qñt en enfeꝛ les puet ēcloꝛre
Dont nous decoit qñt noꝰ pechons
De voꝛe sōmes ſ'en pechié mourons
Chaſcūs ſe mouſtre ꝑ painture
Deꝛrieꝛe en humaine figure
Des .vij. la contenance
Puet on noteꝛ ⁊ la ſemblāce
Sour l'arbꝛe touz mōt՚ noꝰ pleſt
Qⁱ del'oꝛgueil vienēt ⁊ neſt
Car a dont ſur l'arbꝛe mōtōs
Qñt les delis del coꝛs queꝛons
Onq՚s nos cueꝛs ſolle ne ſont
Tout dis voulons mont՚ amont
La ou nous cuidōs ēpais uiure
Icelle qui ꝑ tout fait cuire
En deꝛrieꝛe nous trebuche arrieꝛe
Deteꝛre iſſons ⁊ repairons
Et non pour qñt pou y faiſſons
Eſcript trouuōs en /l'euengille
Q՚ parmi letuiau d'une aguille
Pourroit miex .i. chameus paſſeꝛ
Q՚ ia riches hōs puiſt entreꝛ
Auec dieu el regne des ciex
Car en richeſce giſt oꝛguiex
Deus fois ſe point i'ai oï dir
Cil qui contre eſguillon eſtriue
Deus fois mueꝛt q՚ ēuis mueꝛt
Car lemoꝛt d'enfeꝛ en aquieꝛt
Cil mueꝛt en uis qui lait arrieꝛe
Richoiſſes gñs maiſſōs de pieꝛre
Qⁱl a toute ſa uie aquis
Pou penſe d'autre paradis
Se diex nel fait qͥ p˞ nꝰ tous
Eſpendi ſon ſanc p՚ſcious
Sire eſt de tout le mōt ⁊ roys
⁊ p˞ nous vot mourir ē crois
⁊ vainqui l'oꝛguillous s՚pent
Qⁱ dont regnoit ſur toute gēt
De lui nous deuroit ſouuenir
Qñt il daīgna p˞ nous mourir
⁊ nous deurions humelieꝛ
Et p˞ ſoie amour tout laiſſieꝛ
⁊ p˞ auoir remiſſion
De nos maus mourir ē sō non
Entendes ſa ſoit hōs ſoit fame
Q՚ vaut qñt on met riche lame
Sur coꝛs qui pourrit entr՚e
Qñt de dens .i. ſacu de pieꝛre
Deſimple oeure faite uolt geſir
Cil qui tout fiſt aſon plaiſſir
Entre nous humblemēt naſqui
Entre nous humblemēt veſqui
Oꝛ n'eſt nus hōs ſ'il n'a denieꝛs
Qⁱl ne ſoit oꝛguilleus ⁊ fieꝛs
S'il mueꝛt on li fait vne lame
Com ſe touz iours ifuſt li arme
Chaſcū chaſcūne ſur ce bee
⁊ dient tant bn̄ eſt ouuree
Et pꝰ dela ēdꝛoit ſ'en vont
P˞ l'arme autre oꝛoisō nefont
De l'arme cuidēt ml՚t degent
Q՚ ce ne ſoit foꝛs el q՚ vant
Car ſe bn̄ le voir ē ſauoient
Ie croi autre choſe ēfeꝛoient
⁊ ml՚t enſont ſ'en ſeuſſent
Le iour q՚ il mourir deuſſēt
Ia puis ſe di bon iour n'aroiēt
Car ala moꝛt adés penſeꝛoiēt
⁊ non p˞qñt onq՚s ne fine
Sur nous ne veigne agñt rauine
Helas bon ifeꝛoit penſeꝛ
⁊ de touz maus faire ceſſeꝛ
Si c'om ne fuſt mie ſouſpꝛis
Qⁱ garnis eſt n'eſt deſconfis
Ꝑ celui dieu qui diſt letroſne
Plꝰ ſeure eſt ce croi l'aumoſne
Faite qñt en uie eſt li coꝛs
Q՚lle ne fait qñt il eſt moꝛs
Qnt il eſt moꝛs qui ſaura dire
En q՚l point lapꝛiſt noſtre ſire
Bn̄ fais c'om fait ē vie plaine
Hōme ⁊ fame abōne fin maine
Vn ſonge vꝰ vourai conteꝛ
Proi vꝰ quel weilliez eſcouteꝛ
Car tel choſe oir ipourrez
Dōt alafois ipenſeꝛez
En fable oir ⁊ en tendꝛe
Pue ō ſouuēt eſſemple pñdꝛe
Vne heure auint que ie penſoie
En trues que el penſeꝛ eſtoie
Ml՚t m՚ueilleus ſi m'ē doꝛmi
Tantoſt en mō doꝛmāt ſi ui
.I. arbꝛe veꝛt (⁊) gñt ⁊ fouillu
⁊ ameꝛueille bn̄ fueillu
Mais vne fueille n'ot mie
Chaſcune pechié ne ſenefie
Sur l'arbꝛe vne dame ſeoit
Qⁱ ml՚t bn̄ aournee eſtoit
Si com fuſt vne empeꝛeis
Des oiſſillōs ooit les cris
⁊ le ſoulas ⁊ le deduit
De qñque vouloit iour ⁊ nuit
Deuant lui faiſſoit vieleꝛ
⁊ pour li eſpaudir trōpeꝛ
Mais a ſa ſeneſtre partie
Eſtoit vne eſchiele dꝛecie
Deſus vne fame montoit
Sous ſon bꝛas .i. linſel poꝛtoit
Laface auoit laide ⁊ oſcure
Li maufes enlaide figure
(Li maufes en laide figure)
L'eſchiele a vne main ſouſtient
En l'autre maī .i. crochet tient
⁊ diſſoit moꝛt tout li la vie
Car de pechiez eſt ētechie
Va pꝛi toi vigueꝛeuſſemēt
L'eſchiele tieng ſeuremēt
Lauie n'ot de tout ce mie
Car de tout deliz ot ꝑtie
Iouiaus ot ⁊ ſi eſt ſi awglee
Q˜ ce elle n'en tendoit mie
Car li arbꝛes ſur quoi ſeoit
De .vij. viſces moꝛtiex naiſſoit
.Vij. racines de .vij. pechies
Naiſſoiēt ml՚t bn̄ m'ē apens
De l'oꝛgueil qui eſtoit roine
En mi naiſſoit vne racine
Ꝑ mi le gueule d'un ſeꝛpent
Adeſtree eſtoit fieꝛemēt
De .ij. diables ml՚t tres lais
Car chaſcūs eꝛt ml՚t ꝯtrefais
Courōne ⁊ ſeptre li donnoiēt
Auec tout ce li comandoiēt
Q՚ tant q՚ li ſiecles duraſt
Ꝑ tout le mōde elle regnaſt
Elle reſpont tant cō viurai
Plain pié de tr՚e nepeꝛdꝛai
Ainz aqueꝛraii de plꝰ en plus
Car plus de moi n'eſt poiſſās nꝰ
Es cieus fui ia dame clamee
⁊ idemenai gñt poſnee
Mais ceus qui dōt ſur moi regna
Mout laidement ius me bouta
⁊ mi ⁊ tous ceus qui mes՚uoiēt
Et qui de ma ꝑtie eſtoiēt
Puiſſe di ai regne ſa ius
V՚s moi ne pot onq՚s pꝰ nus
P˞ moi chl՚r et pourgois
Maintienēt bn̄ toutes mes lois
Meſmemēt en religion
Ai ie ſeꝛians agñt foiſſon
Qⁱ tout ſont ia amoi aclin
⁊ ſeꝛont iuſticiez en la fin
Chainoine cleꝛc p՚ſtre diacre
Tout ont de moy aucūne tache
Mie ne le tenez agas
Tout ai conqⁱs ⁊ haut bas
⁊ damoiſſelles ⁊ gñs dames
Et ml՚t d'autres cōmunes fames
Qⁱ ſont cointes ⁊ aceſmans
⁊ qui demainēt gñs bobans
Mais ml՚t me tolēt demes lois
Li iacopin ⁊ coꝛdelois
⁊ non pour qñt toꝰ me gueꝛie
Qⁱ ſouuent eſt de mameſnie
Si ai de ſous moy .vi. pⁱnceſſes
Qⁱ ſont duchoiſſes ⁊ conteſſes
⁊ ſi me ſont apeꝛtenans
Et de moi leur tr՚e tenans
C'eſt ire enuie ⁊ auarice
Luxure accide auec .i. viſce
Q՚on apelle gloutenie
De chaſcune ai ſa foi pleuie
Ceꝛtes trop me m՚ueilleꝛoie
Se ie par tout pouoir n'auoie
Uenez amoi conteꝛ dame ire
Q՚ maint hōme auez fait ocire
A moi deuez venir p՚mieꝛe
Car poꝛtee auez ma banieꝛe
Treſdont c'ociſt /cains /abel
Son fr՚e dont ml՚t me fu bel
Ie ai en contre .i. roy afaire
Qⁱ nous fait toute gñt ꝯtraire
Il raigne en paradis laſſus
Bn̄ ſai n'oſſe venir ſaius
Dites moi quel pouoir auez
⁊ qu'auez fait nel me celez
Treſdont qu'/adans māga lapōme
Dame tueꝛ ai fait maīt hōme
Teꝛres ardoir ⁊ eſcillieꝛ
Dieu aifait ſouuēt renoieꝛ
Deſeſpeꝛeꝛ ⁊ pariureꝛ
Et de ca meꝛ ⁊ de lameꝛ
⁊ ſ'ai deuiſſe maīt toꝛmēt
Ꝑ coi peꝛiſſēt ml՚t degent
Si fais ſouuēt pꝛince de tr՚e
P˞ peu de choſe entreꝛ ēgueꝛre
Ꝑ coi poure gēt sōt hōnis
⁊ il meiſmes deſconfit
Ie ai par tout ml՚t gñt pooir
Soit ꝑ folie ou par ſauoir
Dame que vꝰ diroie plus
Entout ceſt monde n'eſt cleꝛs nꝰ
Qⁱ peüſt deſcrire nelire
Ne letoꝛment ne le martire
Q՚ i'ai fet ſouſfrir maīte gent
Ꝑ courrous ⁊ par mautalēt
Contre celui qui laſſus eſt
Pourron ml՚t bn̄ ſeil vꝰ pleſt
Dame ꝑtie vꝰ aideꝛai
Iusqu'a la moꝛt ne vꝰ faudꝛai
Racinne ſui de ml՚t derains
Veꝛs ⁊ foillus ē tieꝛs ⁊ ſains
Cauenez auant dame ēuie
Si me contes de vr՚e vie
⁊ q՚lle enſeigne vꝰ poꝛtez
Piece a moi cōte n'auez
Gñt meſtieꝛ ai de vr՚e aie
Contre /ih՚u lefil /marie
M'anſeigne dame vne flour a
Qⁱ deſus .J. ſeꝛpens eſta
La fleur voit on apeꝛtement
Le ſeꝛpent tient couu՚tement
Q՚ on ne le connoiſſe mie
P˞ miex couurir latricheꝛie
Laflour bel ſemblāt ſenefie
Li ſeꝛpens du cueꝛ le boiſſie
Entre moy ⁊ ma ſeꝛeur ire
Auons fait mainte gent occirre
Et /ſon fil chacieꝛ /iacob
Mais onq՚s ne latienſt acop
Pꝰ fis /ioſeph entreꝛ empꝛil
Ꝑ ſes freꝛes ſicōme cil
Qui fu en ml՚t gñt auenture
Es deſeꝛs fis mainte murmure
Encontre /moyſen mouuoir
Mais onquez ſur lui n'oï pouoir
Pꝰ fis /ſaoul /dauid chachieꝛ
Neq՚dent nel pot damag՚
Car diex ſes ſires li aidoit
Enqui ſeꝛuice adés eſtoit
Ou fuſt adꝛoit ou fuſt atoꝛt
Pꝰ fis ih՚m iugieꝛ amoꝛt
As /apoſtres auſi maīt m̃tire
Feisme entre moi dame ire
Enreligion ſui plantee
⁊ ꝑ tout ſui enracinee
Q՚ nuls ne me peut eſſoꝛbeꝛ
Foꝛs ſeulem̄t ꝑconfeſſeꝛ
⁊ ne pour qñt reuieng ap՚s
Iane ſeꝛa on ſi ꝯfeſſes
Q՚ voules q՚ ie plus vꝰ die
Ades a mal faire eſtudie
Iamés ne ſeꝛoit dis mez vices
Ne racontes toꝰ mes maliſces
Gens conduiroie a os banie
Contre /le ſoudan de /ꝑſie
Onques point ne voꝰ eſmaies
Car ie ai enmoi vne vaīne
Qui de conſeil eſt toute plaīne
DAme auariſce ou eſtes voꝰ
piecha q՚ ne contai auouz
Vous aués bn̄ ſai maīnt .d՚.
Qu'auez voꝰ fait aesꝑgnieꝛ
A vſureꝛ ateꝛmineꝛ
Vos eſcrins vaudꝛai deſfeꝛmeꝛ
Car ne pout eſtre sāz denieꝛ
Nuls hons qui vuele vſurieꝛ
Dame au eſoing voit on l'ami
denieꝛs ai pour voꝰ ⁊ pour mi
Mais petit me ſaries degré
Se faiſoie tant de bōte
Q՚ po˞ noient lez vous p՚ſtaſſe
Car de ce ne vient nulle craſſe
Denieꝛ vōt toſt mais ne reuienēt
Seignour ſt՚ tout cil qⁱ lez tiennēt
S'il vous plaiſt ains c'uſe l'ai
Onze pour douze voꝰ pꝛeſtrai
Ainſi aiie chachie maīt hōme
A poureté c'en eſt la sōme
/Arras /amiens ⁊ en /loꝛraīne
Ai ie pꝛeſte maīte ſemaīne
En /rōmenie en/lombardie
Aige p՚ſte toute mauie
Emmaīte vile em/piq̃die
Ai t՚mine toute mauie
Et ſi vous di qu'au ꝯmench՚
Les ſai ml՚t bn̄ a planoieꝛ
Si c'ō aplaine lechat
Tant ꝯ li di eſchiek ⁊ mat
Nulle choſe dōneꝛ ne veul
Car onq՚s faire ne le ſueul
Se ce n'eſtoit tien ce põ ce
Autrem̄t ne feꝛoie ie
Carite ai ſi enchachie
⁊ ſacompaigne courtoiſie
Q՚ on ne ſauroit ouqueꝛre
Pour nulle paīne ennulle t՚re
bn̄ le ſachiez caſcune eſt moꝛte
Et qñt /larres vint ala poꝛte
Du riche hōme a cui i'eſtoie
Faire aumoſne ne li laiſſoie
El monde n'a Roy ne roine
Neriche hōme qⁱ ne m'ē cline
Car ꝑ touz les lieuz ou ie vois
Cri on amoi ahaute vois
Dame bn̄ venue ſoies
Ci ſ'il voꝰ plaiſt voꝰ heb՚giez
Et ie demeure volent՚s
Ou esꝑgnieꝛ puis mez denieꝛs
Car a l'oſtel /ſaint iulien
Fait bon ou il ne couſte rien
Et me fille eſt ſi bn̄ pꝛouuee
Qu'al'apoſtoille l'ai donnee
C'eſt conuoitiſe qⁱ as iuges
Oꝛ ⁊ argent fait mettre ē huces
Car bn̄ ſentent enriquoꝛike
Et entreſtout l'art de fi ſique
P˞ ce q՚ l'une eſt lucratiue
⁊ liautre ml՚t burſſatiue
Si fait cheuauch՚ biaꝰ cheuaꝰ
Aus p՚las ⁊ aus cardinaus
Car entout ceſt monde n'eſt nus
Tant ſoit heꝛmites ne renclus
Acui ma fille ne puiſt plaire
Et qui n'en ait ſouuēt afaire
Bn̄ le ſachiez tout adeliure
Sans ma fille ne pout nus viure
Il n'eſt pꝛinces dus coins ne roys
Ne face bꝛiſieꝛ dꝛois ⁊ lois
Ia dꝛoiture n'apꝛocheꝛa
Celui ou ma fille ſeꝛa
Car fauſete ⁊ foi mentie
Toute dis li tiennēt ꝯpaignie
Eſq՚uin ne baillif nemaire
Ne li oſent faire ꝯ traire
Tout ſt՚ obeiſſant ali
Dame po˞ veꝛité voꝰ di
Nus poures ne peut auoir dꝛoit
Enq՚l lieu q՚ ma fille ſoit
Elle dōne conſeil d'embleꝛ
⁊ detoulir ⁊ de robeꝛ
Et qñt touez noꝰ acoꝛdons
Ml՚t gñt pouoir ꝑtout auōz
Q՚ vouz feꝛoie ie lont conte
Mainte gent vont ꝑ moi ahōte
Moꝛs eſt /alixandꝛez li roys
Qui me touli ml՚t demez dꝛois
Dame vo gent eſt bn̄ pꝛouuee
Et ꝑtout maīne gñt poſnee
Tout le ſiecle pouons deſtruire
Nus n'oſeꝛa ruire nemuire
Oes il ꝯ uient dame accide
Q՚ voꝰ fachies amoi aide
Mais ieme crieng detraisō
Cail a en vous goufanon
En ſeīgne de mon anemi
Q՚ ains ie ne ting a ami
Dame car ne doutes demi
Car n'ai talent de faire ainſi
Ains me lairoie les dens t˜ire
Sime gart diex detoꝰ bn̄s faire
Sachiez g'i fis poindꝛe sō non
P˞ lui faire deꝛriſion
Male pensee geteꝛ peur
Ie ne le feꝛoie anul fueꝛ
Car tez amis eſt mez amis
Si en deuons plꝰ eſtre amis
/Le pule iſrl՚ fis eꝛreꝛ
Souuent ydoles aoureꝛ
Dont /moiſez ſecourouchoit
Ou autrez qⁱ lez gouu՚noit
Dont diex loꝛ enuoioit tēpies
Qui lez peꝛiſſoit c'eſtoit piez
Et q՚ mez /le Roi ſalemon
Qͥ tant ꝑ eſtoit ſages hon
Donnaige tel puiſſon a bouire
Ꝑ quoi il le cōuint meſcroire
Et auſi fiſtent autre troi
Car il treſpaſſoient loꝛ loi
Et leſſoient loꝛ dꝛoit chemī
Dont il pꝛendoient pute fin
Meiſmem̄t oꝛ as creſtiens
Deſtourne ie afaire bn̄s
Car qñt deuoient meſſe oir
Ie leur fais enloꝛ lis geſir
Et qñt il enuont au mouſt՚r
L'un a l'autre fais ꝯſeill՚r
Ioueꝛ bourdeꝛ iengleꝛ ⁊ rire
Ou aſſés toſt d'autrui meſdire
Maint iuont donc loꝛ oꝛoiſon
Ceꝛtes ne vaut mie .j. bouton
Ie l'os bn̄ dire ⁊ bn̄ m'afice
Q՚ loiaues ſui entoꝰ ſeꝛuice
VEnés auant dame luxure
Acointez voꝰ de vo dꝛoiture
Encontre celui ai afaire
Qͥ ml՚t peu pꝛiſe voſt՚ afaire
Gardez q՚ bn̄ ſoiez garnie
Et bn̄ maintenes vos amies
De touz ceuls qu'aués pⁱs atrape
Gardes q՚ nus ne voꝰ eſchape
Dame adés fais vo volenté
Et enyueꝛ ⁊ en eſté
Armurez me deues pꝛeſteꝛ
De quoi ie me puiſſe apꝛeſteꝛ
Oꝛgueillous dꝛas riches iouaus
Aumoſnieꝛe chainture aniauz
Boire ⁊ meng՚ en le cheꝛie
Adont feꝛai cheualeꝛie
Non pour qñt ie voꝰ ai ſeꝛuie
Ml՚t loiaum̄t toute mauie
Car ſanz raiſon ⁊ sāz dꝛoiture
J'ai fait pechié cōtre nature
Lez .v. cites dez /ſodomites
Ꝑ mon engieng furent deſtruites
Dont diex delaſſuz gñt ire ot
En ſes filles fis pechié /loth
Ꝑ la gloutonnie deluin
⁊ la lignie /bengamin
Ꝑ moi fu pꝛés toute eſſillie
/Dauis pecha en la fame /urie
/Amon en la fame /abſalon
Qui puiſſe di ociſt /amon
/Abſalon es famez /dauid
Aꝑtem̄t fiſt sō délit
/Salemons damez q՚ meſcines
En ſauie ot .viic. roines
Et .iii. cens amies auſſi
Ꝑ quoi dieu delaſſus gueꝛpi
Et ſeꝛui lez ma homueꝛies
De ſez fames de ſez amies
Ꝑ tout le mont ai en mō nō
Plantee foꝛnicatōn
Sachiez qu'a mainte damoiſele
Fais ꝑdꝛe le nō de pucelle
Coiement lez fais acoleꝛ
Baiſieꝛ pinchieꝛ luitieꝛ taſteꝛ
Karole danſſez ⁊ eſpꝛinghes
Fais eſbaudir pour lez meſchinez
Tabours ⁊ muſez ⁊ viellez
Fais eſbaudir po˞ ces pucelles
Sachies c'eſt fine veꝛites
Ꝑ moi peꝛiſt virginités
Q՚ mes papelars ⁊ beguines
Souuent doinz de mes deſciplinez
Q՚ voulez q՚ ie plꝰ vous die
Tant ai fait faite puteꝛie
Aduteꝛe ⁊ ribaudie
Engens mōdainz ⁊ encleꝛgie
Q՚ nus dire ne le poꝛroit
Se a toꝰ iours viure voloit
Veullies deuant veulliez deꝛrieꝛe
Ml՚t ai de gens ama banieꝛe
ENtendés amoi gloutōnie
Trez dont auez eſté m'amie
Q՚ feiſtes le p՚mieꝛ hōme
⁊ ſa fame meng՚ la pōme
Gñt beſoīg ai de ur՚e aie
Et de voſtre cheualeꝛie
Qñt vo banieꝛe ſuz leues
Enml՚t de lieuz pouoir aués
.J. hanap ia ⁊ .j. pot
Paieꝛ ifaites maīt eſcot
EN touz les lieuz ouie poꝛrai
dame a uo gré voꝰ ſeꝛuirai
Ꝑ vo conſeil ⁊ le ſatan
Fis la pōme meng՚ /adam
Sitoſt qu'o fait le p՚mieꝛ moꝛs
Regna cha ius pechies ⁊ moꝛs
Sur lui ſur toute ſa lignie
Dont en y nfeꝛ a gñt ꝑtie
/Noe fis meng՚ le roisoin
Yures enfu ꝯme de vin
Et cōme yures ſe deſcouuri
L'un de ſes fis l'en eſcharni
Mais liautres le recouuri
Litieꝛs de ce engemiſſoit
Et de ꝑ font cueꝛ ſoupiroit
Qñt ſ'ez veilla ſi beney
De dieu celui qui le couuri
Mais acelui qui l'eſcharni
Ml՚t ireem̄t lemau diſt
De cel naſcuirent ce dit on
Vilain ribaut ſeꝛf ⁊ gloutō
oꝛ eſt ie voꝰ di ſalignie
Ꝑ tout lemont ſi eſſauchie
C'apaīgne itrouueꝛoit onmie
Deſobꝛe gent vne ꝑtie
Auuin vont tout petit ⁊ gñt
⁊ tant emboiuent li auqñt
Dont ꝑ euls naiſt telle mellee
Qͥ ne puet eſtre dez mellee
Ou ſoit adꝛoit ouſoit atoꝛt
Qui n'iait aucū hōme moꝛt
Ieſui dame de mainte teꝛre
Winſſe plantai ⁊ /engleterre
Les couſtumez ont /engles tenu
Des letemps /le bon Roy artu
Q՚ licoꝛs reſpondi ſour lui
Dont puiz au cueꝛ ot gñt anui
Winſe ce vouz diſt loꝛ latins
Et bons hoꝛs limeꝛs eſt vins
/Galois /tiois ⁊ /aualois
Maintenēt bn̄ toute mez lois
En /flandꝛez ai maīt bō ſeꝛiāt
A /jpꝛe (abour) a /bꝛuges ⁊ a/gant
Lipoure vont a la cheꝛeuoiſe
Ou la bonne eſt aml՚t gñt oure
Ou amies ou au lieuekin
Lie nfanchon tempꝛe l'apñdent
P˞ la doucour ap՚s quoi tendent
Et tant iuont mi gloutō cel
Qu'il endeuiennent larroncel
Et qñt il n'ont plus q՚ deſpendꝛe
Si emblent tant q՚ il vont pendꝛe
Ainſi atel fin ſont venu
Pluſour ⁊ ione ⁊ quenu
Que voꝰ feꝛoie pluz l'ōt conte
Qui me mētient va tout ahonte
Ꝑ tout on ꝯnoiſt bn̄ m'ē ſeīgne
D'/iſlande iuſqu'ē /alemaigne
Toutes sōmez enrachinees
Ꝑ tout ⁊ feꝛmem̄t plantees
Entoꝰ lez tans aidieꝛ voꝰ veul
Foꝛs enq̃reſme maladez ſuel
Eſtre (quareſme) chaſcū an vne foiz
Ꝑ .xl. iours .j. ⁊ trois
Toutes enauons aſouffrir
⁊ de noz gens vont ml՚t peꝛir
Mais apꝛés reuieng en ueꝛtu
Auſſi grande ꝯdeuant fu
Pour dieu dame ne doutez rien
Iln'eſt nuls hōs ie ſai bn̄
Tant ſoit enu՚s dieu papelars
Ne ſoit enuieus ou eſchars
Preceus glous ou luxurieus
V dire plainz ou oꝛ gueilleuz
Ceꝛtes ie ne ſai nul ꝑ fait
Q՚ deuons l'une au ec lui n'et
Dame ſoues fieꝛe ⁊ eſtoute
Nes li paſteur ne voient goute
Qⁱ ſont enmil'arbꝛe rampe
Car loꝛ oeul ſont ſi a ombꝛe
De fuelles ⁊ de veꝛs raiſſiauz
Q՚ ne lez peut touch՚ ſolauz
Car ſ'ilaꝑtem̄t veoient
Tout qñt qu'il dient il feꝛoiēt
Q՚l choſe eſt ce dit oꝛgueuls
Q՚ tu as dit ⁊ dire veus
Cōment dame nel ſauez mie
N'entendés nient d'allegoꝛie
Il nouz dient en /ih՚ucriſt
Qñt il ala ꝑ le pais
Pour pꝛeechieꝛ ⁊ ſarmouneꝛ
Son peule qu'il vouloit ſauueꝛ
/Si de ſipleap՚s lui aloient
De ſimplez dꝛas veſtuz eſtoient
N'auoient mie dꝛas roiaus
A pié aloit chaſcuns deſchaus
Ne cheuauchoient nul deſtrieꝛ
N'eſtoient oꝛgueilleus ne fieꝛ
Souuent lez ſeꝛuoit li pluz ſire
Sans en uie eꝛent ⁊ ſanz ire
Sans gloutonnie ⁊ ſanz luxure
Ne en eulz n'auoit nulle oꝛdure
Qñt fain auoient li painz d'oꝛge
Souef aualoit enloꝛgoꝛge
Ml՚t eꝛt loꝛuie nete ⁊ pure
D'oꝛ ne d'argent n'auoient cure
Ne de palais ne de chaſtiauz
Auec aus eſtoit li ſoulauz
Qui leur veue enluminoit
Sique nuls d'euls ne chaloit
Foꝛs ſeulem̄t li ſathenas
Qui ſe miſt ens ou /fel iudaz
Et no ſeur coouuoitiſe auſſi
ñt Qaus /iuis leuendi
Meſmement /ſainz iehanz baptiſtez
Viuoit ſi ꝯme .j. ſeinz heꝛmitez
Q՚ de poul de camel veſture
Veſtoit aſachar aſpꝛe ⁊ dure
Qñt auoit aucq՚s gñt famine
Dont mengoit aucune racine
Ou laouſtez ou miel ſauuage
Ainſi veſqui enl'eꝛmitaige
Qñt dut /ihu՚s ou /flū iour daī
Baptiſieꝛ il n'oſoit ſamain
Metre ſur lui ſ'a doute non
Car bn̄ ſeur qⁱl ieꝛt diex ⁊ hom
Oꝛe .j. oꝛeſtrez meſſe dira
Le coꝛs dieu enſez mains tēra
Et vſeꝛa tel ſacrement
Qñt aura fait aſſez bꝛiemēt
Vourra aleꝛ boire ⁊ mengieꝛ
Sans contredit ⁊ sāz dang՚
De dꝛus mes de .iij. ou de .iiij.
Aſes del'un plus q՚ del'autre
S'il a bon vin qui li talente
A ſon compaignō le p՚ſante
Tien ie t'en doins ap՚s m'ā donez
Cilz crut ſus vne vigne ōne
De tieus ia ne pueēt viure
Se il ne ſont chaſcū iour iure
Longuemēt bn̄ ſai en tel lieu
Ne puet on mie tenir dieu
Ap՚s conuoitēt riches dꝛas
Riches hoſtieus d'argēt hanas
Riche del riche acourtoiſſie
P˞ plus monteꝛ enſeignoꝛie
Ainſi rampēt tous dis amont
Tant que il ē mi l'arbꝛe sōt
Ou des pechiez loꝛ deliz ont
Telle eſt la vie de ceſt mont
De tieus ia qui pour leur vies
Sauueꝛ entrēt en a baies
Qⁱ ia ne deueniſſēt mōine
S'il peuſſēt deuenir chanoīne
Aucun dient cui vie plaiſt
Dont delis de char viēt ⁊ naiſt
Q՚ ia dis fu foꝛte nature
Plꝰ c'oꝛe aſſés ⁊ ml՚t plus dure
Petit vaut c'ō enſi ſecueure
⁊ ne dit on li cueꝛs fait l'ueure
Plus q՚ ne facēt li lonc iour
Ou voit poure gent ē langour
S'aſes eusēt pain ameſure
Se leur ſeꝛoit riche peuture
Qⁱ vraiemēt dieu ameꝛoit
De qñqu'il li demandeꝛoit
P˞roit ml՚t bn̄ eſtre aſeur
Pulſanti apeꝛietur
Qñt chaſcune ot bn̄ aſcoutee
Celle qui ſur l'arbꝛe eꝛt mōtee
Qⁱ dite eſtoit del mont la vie
De gñt leeſce en haut ſ'eſcrie
Humaine moꝛs ie ſui roine
Ne ſoiez iamés ma voiſine
Se tues p՚s demoy ſit'ē fui
P˞ dieu ne me fai nul anui
LI moꝛs reſpōs ml՚t as oꝛgueil
Veſci ie t'apoꝛt .i. linſuel
Auec moi aras compaignie
Ne te weil plus ſouſfrir ē vie
Ie te ſui venue tapeꝛ
Cuidoies tu touſdis regneꝛ
Ml՚t toſt ſeꝛas noire ⁊ oſcure
Car tu ies cendꝛe ⁊ pourreture
Toute ta char mēgeꝛōt veꝛ
Soit en eſté ou en yueꝛ
Au telle con tu ci me vois
Seꝛas en tre ci ⁊ .i. mois
Pour dieu meꝛci ce dit liuie
Ne me fai ceſte felonnie
.I. iour entieꝛ n'ai pas veſcu
⁊ ia viens tapeꝛ mon eſcu
De dens t՚re ne ſai manoir
Pren tant q՚ veus demō avoir
Sime dōnez encoꝛe reſpit
Li moꝛs reſpont i'ai endeſpit
Ce que t'as dite tel parole
Car tu l'as ꝑlee ml՚t fole
Se tu viuoies .xm. ans
Petis teſembleꝛoit li tans
Ie ne demant autre auoir
Foꝛs que ton coꝛs ce veüge auoir
Dont ne ſeꝛoit nulle dꝛoiture
En mou trouuee n'en nature
Se tout afait en mi ma voie
⁊ poure ⁊ riche nepꝛenoie
P˞ dieu l'ai moi mand՚ le p՚ſtre
Sili gehirai tout mō eſtre
Et pechiez dont ſui entechie
Si cōme fāme couroucie
Q՚ veus mandeꝛ nepues ꝑleꝛ
A painez pues l'angueteꝛ
Bn̄ vois qu'il te conuiēt mourir
Ne de mes maīs nepues fuir
Mil m'a tendent oꝛ en ceſt heure
Ie ne puis ci faire demeure
Atandu as trop longuement
La painne hauce irieement
Si li donna .i. ſi gñt cop
Q՚ li ⁊ l'arbꝛe ius abat
De la noiſſe qu'adont oÿ
De mon doꝛmāt trus treſſailly
Gñt paour ai ⁊ non pour qñt
L'arbꝛe fis paindꝛe maītenāt
Q՚ ie nel meſiſſe en ou bli
Ce que i'en vi ⁊ qu'en oÿ
Tout ainſi com veü l'auoie
Plus ē feꝛoie ſe le ſauoie
Le mirouoir de vie apelai
⁊ de moꝛt ce q՚ fait en ay
Car qui en .i. miroeꝛ ſemire
De ce qñ ſa face a adire
Puet cōnoiſtre ⁊ aꝑceuoir
Tout autreſi ſachiez pour voir
Qñt voir ⁊ hoir ces pechiez
⁊ aucuns des ciens adꝛeciez
Et puet de la moꝛt ramēbꝛeꝛ
Auoir par ceſte remābñce
Vie en ceſt ſiecle ē l'autre eſt moꝛs
Et c'eſt pourreture li coꝛs
Se ſachent tout ala ꝑ cloſe
Q՚ ꝑ faite fu ceſte choſe
Si com nous diſt cilz qⁱ l'ecriſt
L'an /nr՚e ſeign˞ ih՚ucriſt
Mil .cc. ſeſſante et ſix
Le iour /ſaint marcel de /paris
C'eſt au cōmancement d'eſté
Tieꝛs iour apꝛés letrinité
P˞ ce le volt ē rōmans faire
Li lay ē pꝛengnēt eſſemplaire
Huit cens d'une rime ⁊ .viij. veꝛs
Pou plus pou mains ē fiſt /robeꝛs
P˞ ce c'om l'apeloit /del oulme
Fiſt cil d'un houlme naiſtre .i. houlme
Dis ⁊ .viij. veꝛs fiſt en latin
Mais oꝛ vꝰ pꝛi touz ē lafin
S'il a en aucun lieu meſpꝛis
Vilainemēt ne ſoit repꝛis
Car il n'eſt nulz ce mot parole
Soit hōs ſoit fame ou cleꝛs d'eſcolle
Ne die tel choſe ala fois
Dont aucūs tienēt loꝛ bou fois
⁊ dit que tieus cō ſeille autrui
Qⁱ poure conſeil dōne alui
P˞ ce requieꝛ ꝑ charité
Ancois p˞ dieu ⁊ pour pitié
Part li dōnez ē vos bn̄s fais
Atant de ſon ſonge metais