EL non de /ih՚ucriſt; Qui eſt nr՚e douz pere
Veul cōmencier .i. dit Mais poꝛ la gñt miſere
Q՚ ie ſent de denz moi; Pri a/ſa douce mere
Q՚ ie puiſſe conclurre; Ꝑ tel point ma matere
Qv'a toꝰ ceulz qui l'oꝛront; Puiſt eſtre poꝛfitable
Bonne gent il n'eſt roy. Prince ne conneſtable
S'il ſe ſent en pechié; ⁊ ne ſe rent coupable
Qⁱl ne faille qu'il chiee; En la main du dëable.
Bon ſe feroit garder; De chëoir en teulz rois
Car qui y chiet n'en yſt En .ij. mois ne en trois
⁊ faut qu'il y demeure; Tant que /li roys de roys
De mourra enlaioie; Ou il n'a nus deſtrois
C'eſt ou ſoulaz des ciex Ou touz poꝛrons venir
Se du cuer noꝰ meton; A /ih՚ucriſt ſeruir.
Si comme fiſt celui; De qui poꝛrons oir
Il fu né a/rouem; Mais ml՚t ot aſſouffrir
Avant que fuſt abſous Des maus q̃uoit bꝛaſcés
Fu Rob՚t le dëable De toutes genz nōmez
Vous oꝛrez par q՚l cauſe; S'entendꝛe me voulez
Ilot en /noꝛmendie; Au temps que vous oez
UN duc bon iuſticier; ⁊ hardi et appert
Les croniques teſmoīgnēt; Qu'il auoit non aubert.
A ſeruir /ih՚ucriſt Auoit le cuer ouuert.
Bien emploie ſon tēps; Qⁱ a tel ſeignour ſert.
A vn Noel tint court; Le franc duc a /vernon.
Mais n'auoit poīt de fēme; Si que tuit li baron.
Li pꝛierent pour dieu; ⁊ pour ſon digne non.
Que il ſe mariaſt; Mais il diſt a cler ſon
SEignour a v՚re los. De gré me mariaſſe
Se partie endꝛoit moi; Seuſſe ne trouuaiſſe
N'en ſai nule ne ſoit Ou trop haute ou trop baſſe
Ou que ne m'a partiengne. L'un d'euz diſt ſanz eſpaſſe
Chier ſire ie ſai telle; Dont ia n'arez uergoigne
Ml՚t eſt plaiſant ⁊ belle; Fille au duc de /bourgoigne
Se vous la demandez; Vous l'aurez ſanz eſſoigne
Loꝛs reſpondi le duc; Ci a bonne beſoingne.
ERrant fiſt par meſſages Enquerir la pucelle.
⁊ on li enuoia. Sanz faire gñt querelle
A /Rouen eſpouſa; En ſa maiſtre chapelle
Noꝛmans ⁊ bourguenōs; Firent ioie ml՚t bele.
LE duc auec la dame; Fu bn̄ .xviij. ans.
C'onques ne plot a dieu; Qu'il euſſent enfans
S'eſtoient il ſouuent Confez ⁊ repentant
⁊ vers le menu pueple Dous ⁊ humilians.
TOutes foiz que le duc Giſoit o ſa moullier
De bon cuer requeroit A dieu le dꝛoiturier.
Q՚ par ſa digne grace; Li vouſiſt enuoier
Hoir qui eüſt puiſſance De ſa loy eſſaucier
Et tant qu'a .i. matin. Que le duc ſe leua.
Il diſt a la duceſſe. Trop malem̄t noꝰ va.
Q՚ nus enfans n'auons Par dieu qui me foꝛma.
Ie croi que pechié fu. Qñt on nous aſſambla
S'A .i. autre hōme fuſt Le ur՚e coꝛs donnez
Des enfanz poꝛtiſſiez. Ie croi en vos coſtez.
⁊ ſ'autre femme euſſe; Auſſi de l'autre lez
Des enfans engendꝛaſſe I'en ſui touz treſpenſſez
NOn pas pour tant ꝑ foy; Q՚ iamais en mauie
Aie afemme qu'a vous Charnelle compaignie
Se vous ne treſpaſſez; Mais ne le deſir mie
La duceſſe l'oÿ; Si diſt auoiz ſerie.
Uoir en gré noꝰ faut pꝛendꝛe Ce que diex nous enuoie
Le duc ala chacier A qui foꝛment anoie
La dame demoura; Qⁱ n'auoit point de ioie
Ou lit qui fu couuert De fin oꝛ ⁊ de ſoie
ON ſoupirant a dit; Diex me het bn̄ le voi
I'en contre ml՚t de fēmes; Qⁱ n'ont ne ce ne quoi
Sont .iij. enfanz. ou .iiij. A poi que ne renoi.
Dieu ⁊ tout ſon pooir Ie ſui en grant anoi
Pvis que il ne me veult Nus enfanz enuoier.
Si m'en envoit le dyable Se il m'en puet aidier.
Onq՚s mais ne diſt mot; Qⁱ li couſtat tant chier
Car ſachiez l'anemi; Qⁱ n'a ſon deſirrier
FOꝛs des bonnes gens Metre en ſa ſubiecion
Retint bn̄ de la dame La mauuaiſe (parole )raiſon
Si foꝛt tempta le duc Qu'en l'eure derandon
S'en retourna du bois ⁊ vint en ſa maiſon
LA duceſſe trouua; Ml՚t foꝛment courrouciee
En l'eure l'acola Tendꝛement la baiſie
Du ſurplus qu'il li fiſt Ne vous parlerai mie
Mais ſachiez que le duc Diſt douz diex ie vous pꝛie
CIl vous plaiſt que i'engēdꝛe Enfant en ceſte dame
Veilliez que il voꝰ ſerue Au ſauuement de ſ'ame
La ducheſſe ꝑla. ⁊ diſt ꝯ fole femme
Mais tout ſoit au dëable Qⁱ ne quiert que diffame
Pvis que diex n'a puiſſāce Q՚ nus enfans nous doint
Ie le doins au dëable S'en ai conceu point
L'anemi l'oÿ bien. Qⁱ pluſeurs maus ꝯioins
Celle foiz fiſt tourner La choſe ſi apoint.
Qv'en ſa fem̄e engendꝛa Li bons dus .i. enfant.
Qⁱ puis fiſt ml՚t de maus. Ꝯ vous oꝛrez auant.
Il fu de ſa nature Si tres cruel tirant
Qu'ē ne trouuaſt pas pire En ceſt ſiecle uiuant
MAis puis paia la dame Des folours qu'elle empͥſt
Qu'au iour qu'il treſpaſſa ⁊ que la moꝛt le pꝛiſt
Fu pꝛeſentee ſ'ame Par deuant /ih՚ucriſt
Ainſſi ꝯme l'en trueue En pluſeurs lieus eſcriſt
CElle qui au dëable Ot ſon enfant rendu
Le poꝛta juſqu'au fine Q՚ temps d'enfanter fu
Mais ainz qu'en fuſt deliure A tant de mal eü
Q՚ les dames cuidoiēt Q՚ ſon iour fuſt venu.
LA ducheſſe diſoit Quant vint autrauaillier
Laſſe d'auoir enfant Auoie gñt meſtier
Voir gñt deſir auoie De ma moꝛt auancier
En tel deſtreſce fu; Pres d'u mois tout entier
LE duc pour la duceſſe Pria mainte journee
Se ce n'eüſt eſté Ia n'en fuſt eſchapee
Mais qñt la creature Dont parole fu nee
Les croniques teſmoīgnēt Qu'il vint vne nuee
SI noire qu'il ſambloit Qu'il deüſt anuitier
A tonner commenca ⁊ foꝛt a eſclairier
Les .iiij. vens venterent Le plus maiſtre quartier
De la uiex tour chai Chaſcun ſ'ala mucier
C'On cuidoit que le mōde Deüſt finer (tantoſt) errant
Quant le temps; A paiſa on baptiz a l'enfant
Robert fu apellez Touz iourz aloit bꝛaiant
Mais ſachiez de verité Qu'il eſtoit bel ⁊ grant
MAis on ne le pooit Nulement apaier
Il naſqui ſi coꝛſu Ꝯ ſ'eüſt .i. an entier
Des que les denz livindꝛēt Bn̄ vous puis teſmoingnier
Qu'il n'eſtoit femme nule Qui l'oſaſt alaitier
Qu'au dens a ſes nourrices Les mameles moꝛdoit
Quant il le failloit boire Acoꝛnetez eſtoit
Ainz qu'il eüſt .i. an Ilaloit et parloit
Plus crut ⁊ embarni ⁊ plus de mal faiſoit
DEsce qu'il pot par chambꝛes ⁊ par ſales fuir
Il ne trouuaſt enfant Qu'il ne couruſt ferir
De pierre ou de baſton S'il le pooit tenir
Treſtouz iourz faiſoit mal On ne ſauoit venir
EM place ou il feüſt Nieüſt crierie
A l'un rompoit les rains ⁊ a l'autre l'oïe.
Les ſeigneurs ſ'en rioient De quoi ce fu folie
Car puis maudirent l'eure Qu'il vint onques en vie
LE duc ⁊ la ducheſſe L'amoient ml՚t foꝛment
Qu'en li ſouffroit a faire Son bon ⁊ ſon talent
On diſoit il eſt iones Il n'a point d'eſcient
On ſe plaignoit de li. ⁊ menu ⁊ ſouuent
EM poi de temps devint Demembꝛes bn̄ foꝛmez
Ꝯ dit que mauuais arbꝛe Croiſt volentiers aſſez
Il couroit par les rues Ꝯme .i. eſceruellez
L'un feroit par la teſte L'autre par les coſtez
LEs enfanz le doutoiēt Bn̄ y auoit raiſon
Qñt robert ſ'en venoit Vers eulz tout arandō
A haute voiz diſoient Fuions ent en maiſon
Veſci robert le dëable En ſa main .i. baſton
LE ꝯmun des enfanz Le ſournon li donna.
Q՚ Robert le dëable Fu nommé ca ⁊ la
Il ne li chay puis N'en piece ne fera
QUant robert ot .vij. anz Son pere l'apela
ET li adit biax filz Temps eſt des oꝛe mais
Q՚ ſoiez mis alettre Vos liures eſt touz pꝛés
On li bailla .i. maiſtre Qⁱ eſtoit biau vallez
Mais ſachiez que robert Eſtoit ſi felonnez
Qve pour tant que ſon meſtre Le blaſma .i. petit
En diſant biau douz ſire Vous n'auez pas bn̄ dit
Il geta contre t՚re Son liure par deſpit
Il ſacha .i. coutel. Oꝛ eſcoutez qu'il fiſt
DEſſous la poinilliers Son maiſtre ſi frapa.
Q՚ des boiaus du uentre Tout plain li entama
Puis diſt meſtre mouſtrez Vo maiſtriſe de la
Car iamais clerc ne p՚ſtre Le mien cuer n'amera
IE vous ai mon coutel Fait ſentir en apert
Le clerc ne veſqui gaires Ainz moꝛut ſanz deſert
Ainz puis il n'i ot maiſtre Tant fuſt hardi n'apert
Qui ſe vantaſt d'ap՚ndꝛe A clergie robert.
N'auſiques n'auoit il D'apꝛendꝛe nul bn̄ cure
Ne penſoit qu'a mal faire Trop eſtoit ſanz meſure
Il haoit ſainte eglyſe ⁊ ſa pꝛopꝛe nature
Car ſ'en traſt en mouſtier Par aucune auenture
NE feïſt il que mal; Quant .i. p՚ſtre veoit
.I. pou ouurir la bouche Qñt haut chant՚ vouloit
Robert par traiſon Ens es denz li getoit
Poudꝛe ou cendꝛe ou oꝛdure Ou ce que il tenoit
Q mal faire metoit Tout ſon en tendem̄t
Quant au mouſtier veoit A Genoulz bonne gent
Ꝑ derrier les boutoit Si de bonnairement
Qu'a denz les abatoit Contre le pauement
Pour ſa gñt mauuaiſtie Le duc le mandiſſoit
Le duc qui fu pꝛeudōme Ml՚t dolanz en eſtoit
⁊ qñt il ot .xvj. ans Sa mere qui l'amoit
Diſt au duc mō ſeigneur Ie croi que bon ſeroit
Qve vous adoubiſſiez Vr՚e filz qui eſt foꝛs
Ie croi ſ'eſt chl՚rs Qu'il ſ'auiſera loꝛs
⁊ le duc reſpondi Dame je m'i acoꝛs.
Ne ſai que ce ſera I'ai gñt duel de sō coꝛs
IL n'entent qu'a mal faire I'enſui touz eſbahiz
A vne penthecouſte; Qⁱ ſont gent eſioiz
Manda le duc ſes hōmes ⁊ ſes meilleurs amis
Il a mandé robert ⁊ li dit ſon auis
BIaux filz ce dit le duc Chl՚r voꝰ faut eſtre
Mais muer vous faudꝛa ⁊ changier vr՚e afaire
Tout chl՚r doit eſtre Courtoiz ⁊ debonnaire
Aus bons; mais greuer doit Les felons de put aire
BIen l'a coꝛt diſt rob՚t Mais par foy ne me chaut
Enquel eſtat ie ſoie Cheualier ou ribaut
Pour tant que mes bōs face Ꝑ dieu qui ſus toꝰ vaut
Ie ne de poꝛterai Aus armes bas ne haut
LA veille bn̄ matin D'un iour de penthecouſte
Fu Robert bn̄ baigniez Mais la nuit trop li couſte
Quant veilla en l'egliſe L'un ſache l'autre boute
Il ne pot eſtre en pais Ne ne pꝛioit dieu goute
Chl՚r fu robert. L'endemain par matin
Son pere li a dit filz ſoié A dieu en clin.
Robert ot la colee Mais il diſt ſanz latin
Qve ia iour de ſauie eglyſe n'amera
Aincois a ſon pooir Touz iourz le greuera
⁊ qu'en clerc ne en p՚ſtre Ia ne ſe fiera.
Il fiſt crier les iouſtes A .i. iour qu'il nomma
DE toutes pars y vindꝛēt Li noble cheualier
Robert ſe fiſt armer Puis monta el deſtrier
Il ne iouſtoit a hōme Tant fuſt hardi ne fier
Q՚ li ⁊ ſon cheual Ne feïſt trebuchier
A L'un rompoit les rains ⁊ a l'autre le col
Au tiers bꝛiſoit la cuiſſe ⁊ couroit de plain vol.
Vint deſtriers de rompi La iournee ꝯ fol
On le vint dire au duc. Qui auoit le cuer mol
El champ vint tout courāt Le iouſter fiſt deffendꝛe
Mais robert poꝛ ſon pere Ne voult onq՚s deſcendꝛe
S'ot fait .iij. chl՚rs A terre moꝛt eſtendꝛe
Chaſcun le maudiſſoit De trainer ou pendꝛe
LE duc li diſt biax filz Plain es de mal erreur.
⁊ ſouſtenez l'eglyſe. Si tenrez bonne fin.
Les ſeigneurs vindꝛent ci Pour toi poꝛter hounour
Oꝛ les as mehaigniz ⁊ occis a dolour
Loꝛs robert le dëable; Reſpondi par folour
Pere de moi blamer Voꝰ pouez trop bn̄ taire
Vouz ꝑdez v՚re paine N'ai talent de bien faire
Puis que ſui chl՚r; Aus moīnes ferai haire
Ne leur lairai ioiaus Ne riche ſaintuaire
DEs mos que robert dit Fu dolans li pꝛeudons
Ml՚t marris ſe ꝑtirent De /rouen les barons
Mais robert de moura Ne retint que gloutons
Il amoit les mauuais ⁊ ſi haoit les bons
DEsce C'on vouloit faire Turpeis ne tournoi
⁊ Robert y venoit. Chaſcun ſe tenoit quoi
Nul n'oſoit en fait d'armes Apꝛochier pꝛés de ſoi
Car il ne de poꝛtoit Duc conte ne roy
LEs chlr՚s diſoient Touz bas aleur meſnie
Qñt ce dyable vient Nous N'aſſamblerons mie
Prier que diex li envoit Courte vie.
Car ſ'il vit longuem̄t /Noꝛmendie eſt hōnie.
Auecques lui ne mena Q՚ murdꝛiez ⁊ banis
Robert vit qu'il eſtoit Des plus nobles hays
Loꝛs a diſt a ſa gent Loiaument voꝰ pleuis
S'aſez auons fait mal Encoꝛ ferons noꝰ pis
LOꝛs parmi /Noꝛmendie Priſt foꝛt acheuauchier
N'ilaiſſoit abaie. Qu'il ne feïſt cerchier
Ne pouoit entreſoꝛ Trouuer ioiau ſi chier
Qu'il n'en feïſt poꝛter ⁊ qui vouloit grouchier
LL eſtoit ens en l'eur Deſtruis ⁊ mis amoꝛt
Maint pꝛeudōme tua Pour le ſien a gñt toꝛt
Au duc de /noꝛmendie Qⁱ hantoit a bon poꝛt
En venoient les plaintes Chaſcun iour ⁊ reſoꝛt
L'vn li diſoit ſire chier; Ꝑ foy c'eſt .i. lait dieu
Robert a violees. Les nōnains de tel lieu
Ie croi c'eſt .i. dëable Il ne croit pas en dieu
Ne pꝛiſe hōme ne fem̄e Vne goute de ſieu.
UN autre diſt au duc Sire c'eſt gñt folie
Qui ſouſfrez q՚ vos filz Soit de tele eſtoutie
Ne puet trouuer pꝛeudōme Entoute /noꝛmendie.
Qⁱ ne ſoit des robez Ne mouſtier N'abaie
MAis puis ne demoura; Pas ml՚t longue ſaiſon
Q՚ de toute la terre S'eſmurent li baron
⁊ vindꝛent vers le duc Conter la meſpꝛiſon
Que robert leur faiſoit L'un d'eulz diſt a cler ſon.
FRanc duc Robert vo filz Prent a foꝛce nos fem̄es
Nos filles ⁊ nos nieces Trop eſt gñt li difames
N'en poons plus ſouffrir Se diex nous ſaut les ames
Le duc pꝛiſt aplourer. ⁊ diſt /ſire .ſaint Iames
RIens tant ne deſirroie; Ꝯme d'auoir .i. filz
Oꝛ en ai .i. eü. Mais urai diex il eſt tiex
Qⁱ de cuer le verroie Moꝛir deuant mes yex
Trop m'a fait de courous Loꝛs parla .i. hons viex
ET diſt ſire ie lo; Q՚ robert ſoit mandez.
Ꝑ deuant touz vos hōmes Le mal li deffendez
⁊ ſ'il vous ꝯtralie Empꝛiſon le metez
Le duc diſt ie m'acoꝛt A ce que me loez
LOꝛs fiſt on robert querré Par treſtout le pays
Mais ceulz qui le trouuerēt Sienoꝛent du piz
Car tantost ens en l'eure Qu'il ot les mos oys
Q՚ de li ſe plaignoient Les barons du pays
A Chaſcun des meſſages Q՚ le duc y tramiſt
Fiſt traire les .ij. yex ⁊ puis leur a diſt
Vous en doꝛmirez miex De main en vr՚e lit
Mais dites a mon pere Q՚ c'eſt en ſon deſpit
UErs le duc retournerent Les meſſages bꝛiem̄t
Qⁱ auoient ſouffert Ꝑ ſon filz griés tourm̄t
Le duc qui fu pꝛeudōme Si en fu ml՚t dolent
Loꝛs li diſtrent ſes hōmes Sire c'eſt pour nient
Pvis qu'il a fait ainſſi Vos meſſages hōnir
Eſtre poez certains N'a talent deuenir.
Droit ſi veult ⁊ requiert Ꝯ le face banir
Adont fu fait le cri tantoſt Sanz alentir.
DEs /le mont /.S՚. michiel Iusqu'a /vernon ſus /ſaine
Q՚ chaſcun fuſt ſeriant ⁊ ſe meiſt en paine
D'empꝛiſonner rob՚t ⁊ touz ceulz que il maine
Qñt le ſot n'ot meſtier Ꝯ le ſaingnaſt de vaine
CAr tant ot de deſpit Qu'a pou n'iſſi du ſens.
Les murdꝛies de ſa route Furent foꝛm̄t dolent
.Robert les confoꝛta ⁊ jura /.Saint loꝛens
Q՚ il tourmentera Son pere ⁊ ſes parens
PAr l'art de l'anemi Fiſt vne maiſon faire
En vne gñt foꝛeſt Ml՚t fu de foꝛt afaire
Murdꝛiers larrons banis Quanqu'il en pot atraire
Manda de ſa partie ⁊ miſt en ſon repaire
TRente furent enſamble Des plus crueus larrons
Q՚ l'en peüſt trouuer Ennules naſcions
La firent ml՚t de maus .R. fu ml՚t maus hons
Q՚ char vouloit mēgier Entreſtoutes ſaiſons
Il n'i esꝑgnoit riens. Veille ne quarantaine
Vendꝛedi n'autre iour Qⁱ fuſt en ſa ſemaīne
Mais puis pour ſes meffais Endura mainte paine
Ainſſi ꝯ vous oꝛré Se ne me faut l'alaine
BOnne gent a cel tēps Q՚ robert fu el bois
Auecq՚s les murdꝛies Ne pꝛiſoit pas .ij. nois
DIeu ne /ſainte marie Ne ſaint tant ſoit courtois
Mais oꝛ veilliez entendꝛe Qu'il avint vne fois.
RObert iſſi tout ſeul Hoꝛs de ſon herbergage
Q՚ il ne doutoit hōme Ne pꝛiué ne ſauuage
Si ꝯme il plut adieu Trouua .i. hermitage
Ou auoit .vij. h՚mites Treſtouz de bel aage
DEs qu'il vit les hermites En l'eure trait ſ'eſpee
Aus pꝛeudōmes cria. Voſtre vie eſt alee
Treſtouz .vij. les tua Sanz nule demouree
Puis a dit ꝑ mō chief I'ai trouué gñt niee
NE voudꝛoie plus viure Mais q՚ toꝰ hauz tondus
Qⁱ ſont parmi le monde Fuſſent ainſſi tenus
Adonques eſt robers De l'ermitage iſſus
Mais tous les garnem̄s Qu'il auoient veſtus
Fvrent hōnis du ſanc De ceuz qu'auoit tuez
Auſſi furent ſes mains ⁊ Son nez ⁊ ſes piez
Tant cheuaucha rob՚t Q՚ mal ſ'eſtoit pꝛouuez
Qⁱl vit le chaſtiau d'/arq՚s Celle part eſtalez
Car il auoit oÿ conter A vn paſtour
Que ſa mere deuoit digner A celui iour
Son pere n'i fu pas S'en ot mains de paour.
Loꝛs a dit qu'a ſa mere Parlera ſanz de mour
EN la court ſ'en entra. Mes qñt la gent le uirent
De la paour qu'il oꝛent De toutes pars fuirent
Bien poꝛ iouer aus barres Pas pꝛeſſe ne li firent
Loꝛs les larmes des yex. Ml՚t groſſes li chairent
CObert diſt en ſon cuer Voir ie puis bn̄ veir
Q՚ le pueple me het. Si fait dieu ſanz mentir
A terre deſcendi. Mais nus n'oſa venir
Pour lui araisōner Ne ſon cheual tenir
SI gñt duel ot au cuer Qⁱl traiſt nue ſ'eſpee
Puis monta en la ſale Qui eſtoit longue ⁊ lee
En la chambꝛe ſa mere Vint ſanz demouree
Quant ſa mere le vit Si fu eſpouentee
NE fu pas de merueille Bien fuir ſ'en cuida
Mais robert le dëable Au deuant li ala.
Haut li a dit ducheſſe Ne vous enfuiez ia
Mais dites ſe ſauez Dame comment ce ua
Qve ie ſui ſi tres plains De toutes mauuaiſtiez
De vous ou de mō pere Vient ie croi li pechiez
Quant la dame l'oÿ. Cheoir li vout aus piez
Emplourant li a ditFilz la teſte me trenchiez
RObert reſpondi dame Pour quoi vous tueroie
I'ai aſſez fait demal Encoꝛe pis feroie
La ducheſſe diſt filz Certes la coupe eſt moie
De vr՚e mauuaiſtie. Loꝛs li conta la voie
COmment elle l'a voit Au dëable donné
Ꝯ fole meſcheande De cuer des eſperé
Qñt robert l'entendi De duel chay (paſſe) paſmé.
Ml՚t grant duel demena Quant il fu releué
Pvis diſt en ſouſpirant Dyables ont en vie
D'auoir l'ame de moi Mais il ne l'auront mie
Prendꝛe me faut ꝯſeil Ꝯment el ſoit garie
Loꝛs a dit aſamere Madame je vous pꝛie
Qve vous me ſaluez Mon pere le pꝛeudōme
Paſſer outre les mons Me faut a /la grant rōme
Ꝯfeſſer mes pechiez Dont i'ai fait trop gñt sōme
Deuant que g'iſerai Ne doꝛmirai bon sōme
On m'auoit foꝛbani De toute ceſte terre
Mais de ce ne me chaut Ne penſe que a querre
Le ſauuement de m'ame Laz tout le cuer me ſerre
De ce q̃us .S՚. pꝛeudommes Ai touz iourz eü guerre
RObert tout em plourant Sus ſon cheual monta
Vers la foꝛeſt retourne Ou les larrons laiſſa
La ducheſſe ſa mere Ml՚t gñt duel demena
Pour l'a mour derobert Qui ainſſi ſ'en ala
A haute voiz crioit; Laſſe quelle auenture
I'ai mon enfant perdu Diex ſi n'a de moi cure
Au mauuais le donnai Ce fu gñt deſmeſure
Iamais de m'amera Car bn̄ y a dꝛoiture
EN tant que la duchoiſe Faiſoit dolour pleniere
Entra le duc laiens Qui venoit deriuiere
La Ducheſſe emplourant Li conta lamani՚e.
De rob՚t leur enfait Le duc fiſt mate chiere
Pvis diſt ala duceſſe Dame ſe repent il
⁊ elle reſpondi; Se dieu me gart ouil.
Le duc diſt emplourant Ce ne vaut .i. eſpi
Pas ne reſtabliroient S'il eſtoient tel mil.
LEs dolours qu'il a faites En ceſte moꝛtel vie
Non pas pour tant ie pꝛi A /la vierge marie
Q՚ bonne fin li doint; Car uoir ie ne croi mie
S'il ſ'en va qu'il retoꝛne Iamais en /noꝛmendie
CAr tuer ſ'i fera Se dieu n'en amerci
Le duc diſt ſon voloir Mais n'alamie ainſſi
Que puis vint a/rouen Ce ſachiez bien garni
La fille l'emperere; Amena auec lui
Qv'a /rōme l'eſpouſa. Ꝑ le gré de ſon pere
Mais aincois li conuint Endurer ml՚t de here
Ainſſi cō vous oꝛrez Avant en la matiere
Bonne gent qui fait mal Droiz eſt qu'il le compere
EN ceſt ſiecle ou en l'autre De robert parleron.
Tant cheuaucha qⁱl vint De denz la foꝛt maiſon
Qu'il auoit fait faire La furent li larron
Touz des armez eſtoient Pour digner li glouton.
TOuz les murdꝛiers ē l'eure Q՚ robert ont choiſi
Se dꝛecierent des tables Sus leur piez ꝯtre lui
Mais il leur diſt ſeignours Ꝑ amours je vous pꝛi;
Ne ſoiez plus larron Criez a dieu merci
Car on ne puet dembler A bonne fin venir
Aler m'ē veul a/rōme Mes pechiez regehir
L'un des larrons ꝑla; ⁊ diſt ſanz alentir
Ie croi que /renart veut Hermite deuenir
RObert qui eſtoit yer. Le pire de nous touz
Eſt de venu p՚eſchierres Il ſe moque de nous
Non fais ce diſt rob՚t Ꝑ la foy que doi vous
Criez adieu merci ⁊ il vous ſera dous
CE n'es mie maiſtriſe D'eſtre touz iourz mauuais
L'un des larrons diſt ſire Ne m'ē ꝑlez iamais
Poꝛ .C. Mil Mars d'oꝛ Ne ſeroit marchiez fais
Que laiſſaiſſe l'embler Ne poꝛroie eſtre en pais
NE moi. Ce diſt li autres Touz furent d'un acoꝛt
Que ne lairont l'embler Deſſiques ala moꝛt
⁊ ſ'il ont bn̄ emblé Qu'il embleront plus foꝛt.
Robert leur reſpondi Seignour voꝰ auez toꝛt
OR entendez pour dieu Dequoi il ſ'apenſa
Il ſ'en vint ala poꝛte Erranment la ferma
Puis pꝛiſt vne gñt barre Aus larrons retourna
Le pꝛemier qu'il ataint Treſtout eſceruella
Pvis courut ſus aus autres Si foꝛt fu eſchaufez
Que treſtous les tua Point n'eſtoient armez
Puis leur diſt en moquant Endoꝛmant vous tenez
Ie croi des oꝛe mais Preudes hōmez ſerez
RObert vouloit bouter Le feu enſamaiſon
Qñt vit le gñt treſoꝛ Dont il y ot foiſon
Bien penſa ſ'il ardoit Qu'il feroit meſpꝛiſon
Adont ſ'en iſſy hoꝛs Sanz point d'areſtoiſon
Pvis ferma ml՚t bn̄ l'uis Miſt les cles en ſon ſain
Ꝑ deuant ſon viſage Fiſt la croiz de ſa main
Froꝛt pꝛiſt a cheuauchier Car il auoit gñt fain
Qu'entrez fuſt dedenz /rōme Ou de meurent rōmain
MAis qñt vint vers le ueſpꝛe Il vit enſonchemin
Vne bonne abaie Ou ot fait maint huſtin
Touz les moīnes l'amoiēt Con tricle venin
Nonpoꝛqñt ſ'eſtoit l'abbé De laienz ſon couſin.
RObert ſ'eſt ala poꝛte De l'abaye mis
Quant les moinnes le voiēt Touz en ſont es bahis
De la paour qu'il ont Endoꝛtoir ſont fuis
Adont ploura robert Des biax yex de ſon vis.
DEuant l'uis du mouſtier Ala robert deſcendꝛe
Tantoſt encontre terre S'ala en crois eſtendꝛe
De bon cuer requiſt dieu Qu'il le vouſiſt deffendꝛe
Des laz a l'anemi Qⁱ le cuide ſoupꝛendꝛe
Qvant il fu redꝛeciez Tant parla doucement
Q՚ l'abé vint a lui ⁊ tretout le couuent
Robert ſ'a genoulla ⁊ leur diſt doucement
Ie vous requier merci Pour dieu omnipotent
CAr ie vous ai atoꝛt Ꝑ pluſieurs foiz greuez
Puis a dit al'a bé Biau ſire car alez
S'il voꝰ plaiſt amon pere Ceſte cles li poꝛtez
El lieu ou de mouroie Entre vous .ij. yrez
I'ai tué les larrons Qⁱ lonc tans m'ont ſerui
Ie les ai mis amoꝛt N'en ſoiez enſouſſi
Ml՚t gñt treſoꝛ y a Qu'ai tolu ⁊ raui
Qu'a ceuz aqui eſtoit Soit adꝛoit de parti.
RObert fu herbergiez Laiens celle nuitie
L'en demain au matin Laiſſa en l'abaie
S'eſpee ⁊ ſon cheual S'a ſauoie acueillie
⁊ l'abbé ſ'en ala au duc De /noꝛmendie.
LA clef li amouſtree Q՚ robert li bailla
⁊ tout la maniere Du fait li raconta
Le duc en la foꝛeſt Auec l'abbé ala
Ml՚t furent eſbahiz Du treſoꝛ qui fu la
LE duc aus bonnes gens Treſtout rendꝛe leur fiſt
Tel pꝛia pour ſon filz Qⁱ deuant l'ot maudit
Tant cheuaucha rob՚t Pour abꝛegier mō dit
C'un jeudi ab ſolu De dens /rōme ſe miſt
POur dieu oꝛ entēdez Douce gent de bōnaire
S'oꝛrez la penitance Qu'a robert conuint faire
P˞ les maus qu'a voit fait A aſſez de gent traire
Iluec trouua le pappe Qui ert de dieu vicaire
OV /gñt mouſtiers /.s՚. pere Deuant meſſe chanter
Robert deuant ſespiez S'ala errant geter.
Les gens a l'a poſtole Priſtrent foꝛt a fraper
Sus li mais ainz Pource ne ſe vout remuer
I feroient il foꝛment De baſtons deſſus ſoi
Le pappe en ot pitié Si diſt laiſſez le quoi
Loꝛs le pꝛiſt ꝑ la main ⁊ li diſt lieue toi
Robert li diſt /.S՚. pere Pour dieu ꝯ feſſez moi
SE de vous n'ai ꝯ ſeil Ie pis c'un chien moꝛt
Car ie ne garde l'eure Q՚ dëable m'en poꝛt
Ondit que vous dōnez De touz pechiez ꝯfoꝛt
A dieu ai fait deſpit ⁊ aus ſiens a gñt toꝛt
ANques /caym ne fiſt /Herodes ne /judas
Tant de mauz ꝯme a fait Ceſt dolereus coꝛs laz
Qñt le pappe l'oÿ. Siliadit embas
Biaus amis dont es tu. robert diſt ens eſpas.
A /Roen la cité fu né Ce n'eſt pas fable
On m'apele rob՚t; Sire non ai de dëable
Filz au duc des noꝛmās Qⁱ eſt ml՚t honoꝛable
Loꝛs ſe ſeigna le pappe. Du pere eſperitable
ET li diſt es tu ce De quoi on parle tant
Il n'a en tout le monde De toi plus mal tyrant
Ie te coniur de dieu Le pere tout puiſſant
Que ne me faces mal N'a nule riens viuant
ADont ſ'a genoulla. Rob՚t ⁊ ioint les maīs
⁊ liadit /Saint pere Pour diex ſoiez certains
Q՚ de ꝯ triction Eſt mon cuer ſi atains
Q՚ ne feroie mal Ne pour plus ne poꝛ maīs.
ADont ſ'a ſiſt le pappe Qⁱ fu ſages ⁊ dous
⁊ Rob՚t deuant li Se miſt anus genous
En uraie repentance Li diſt ſes pechiez tous
Puis li conta cōment Fu donné ꝑ courous
Av dëable d'enfer De par la part ſa mere
Dont il auoit au cuer Peſme dolour amere
Le pappe le ſeigna Puis liadit biau frere
Demain au point du iour Q՚ l'aube ſera clere
A .iij. lieues de ci Deuotement iras
Chiés .i. mien ꝯfeſſeur De par moi li diras
Qⁱl te doinſt penitance Des pechiez que fais as.
⁊ je ſui tout certain Bn̄ ꝯſeilliez ſeras
ON ne ſcet plus p՚udōme Deſſouz le firmament.
Robert li diſt /.s՚. pere G'irai ml՚t doucement
Diex veille que par lui Truiſſe mon ſauuem̄t
A /rōme jut la nuit Iusqu'a l'a iournem̄t
Qve il ſe miſt a voie Puis ſi vint chiez l'ermite
Laraiſon que le pappe Limandoit liadite
Le pꝛeudons qui viuoit De vie ml՚t petite.
Enoir le pechié De robert ſe de lite
CŌment qu'il fuſſent lais Mais il auoit plaiſance
De ce que il diſoit En bonne repentance
Au derrenier li diſt Amis n'aie doutance
Iusqu'a demain ferez Auec moi demourance
ET puis ſ'il plaiſt a dieu Qⁱ de l'yaue fiſt vin
Bn̄ vous ꝯſeillerai Demain aſſez matin
Rob՚t qui ſoloit eſtre Plus fel que .i. maſtin
Eſtoit plus de bonnaire C'un aignel en chemin
ONques ne voult rob՚t. Cel iour mengier ne boire
Ainz pꝛioit de bō cuer Le digne roy de gloire
Qu'en contre l'anemi Li enuoiaſt victoire
L'ermite qui eſtoit Plain de deuoit memoire
Qvant il vit qu'il fu nuit Il fiſt robert couchier
Loꝛs de dens ſa chapele S'en entre pour veillier
De bon cuer de pꝛia. Le pere dꝛoiturier
Qu'il li donnaſt auis Du pecheur conſeillier
LI pꝛeu dons ſ'en doꝛmi Entant ꝯ dieu pꝛioit
Adont li fu auis; C'uns anges li diſoit
Qu'il ꝯuient que rob՚t Qⁱ en ſon lit giſoit
Ꝯtre face le fol S'il veult que ſauué ſoit
ET que il ne menguce. Ne pain ne autre bn̄s
S'il ne le puet tolir Ou eſrachier aus chiens.
⁊ face le muet Ne parole poꝛ riens
Iusqu'a tant que diex Qⁱ envoie touz biens
PAr toi li face dire Q՚ ſa penance eſt faite
L'ermite ſe leua Qⁱ foꝛment ſe re hete
Qñt le iour eſclaira .I. poi apꝛés la guete
Se deſcoucha robert Qu'ot ꝯſcience nete
L'Ermite l'apela ⁊ li diſt ca venez
Se voulez eſtre quite Des mauz que fait auez
Des oꝛ mais en auant Le fol ꝯ treferez
Ne ne mengerez riens S'aus chiens ne le tolez
UOir vr՚e penitance Eſt ainſſi oꝛdenee
Q՚ vous ne ferez mal A gent creſtiennee
Ne que ne parlerez A creature nee.
Se ie nel vous ꝯmande Qu'a dieu plaiſt ⁊ agree
Qvant robert l'entendi Pas ne fu mal ſoigneux
En re graciant dieu Tendi ſes mains as ciex
⁊ diſt ie voꝰ mercie Dous peres gloꝛieux.
Qñt pour tant ſera quite Demes pechiez moꝛtioux
Tres douce gent rob՚t Se ꝑti de l'ermite
A tout grief penitance ⁊ la tint a petite
Rob՚t qui ot menee Touz iour vie maudite
Ne pꝛiſoit pas l'oꝛguel De ceſt monde vne mite
ROb՚t reuint a/rōme Son baſton a ſon col
Sarobe deſcira Poꝛ miex reſambl՚ fol
En /rōme ſ'en entra par /la poꝛte /ſaint pol
Deſſus vne feneſtre Vint maint foꝛmage mol
FOꝛt ꝯmenca arire Rob՚t quant il les vit
Celle qui les vendoit En ſa maiſon les miſt
De Rob՚t ſe doutoit Mais en vis les pꝛeiſt
Pluſeurs gens l'areſnierent Mais onques mot ne diſt
RObert aloit par /rōme Son baſton paumoiant
Samblant fait de plourer ⁊ puis aloit riant
Adonques ſ'a ſamblerent Entour lui li enfant
Sauates ⁊ oꝛdures Lialoient getant
APrés robert auoit Ꝑ /rōme grant huee
Les enfanz le ſuioient Toute iour aiournee
Lacourt al'emperere; D'auenture atrouuee
Ilentra en la ſale Qⁱ n'eſtoit pas fremee.
RObert parmi la ſale Cōmenca a aler
Vne foiz pas pour pas Puis pꝛenoit atroter
L'emperere le vit Qui ſeoit au ſouper
A ſes chlr՚s diſt Vez biau bacheler
ONques mais miex taillie A mon talent ne vi.
Mais il me ſamble fol C'eſt domage de li
Dōnez li amengier Ie veul qͥl ſoit ſerui
On l'apella aſſez Mais riens ne reſpondi
Pvis fu aſſis atable Mais ne mēgaſt poꝛ rien.
Sauoit il deuant lui Ml՚t gñt plenté de bn̄
L'emperere percut Deſſous la table .i. chien
Qui ot eſté blecié El bois puis diſt ca vien
ET li donna .i. os. Ou de char ot aſſez
Des que rob՚t le vit Cele part eſt alez
D'une part a pꝛis l'os Qⁱ du chien fu hapez
Le chien tira d'ū ſens ⁊ Rob՚t d'autre lez
DE rob՚t ⁊ du chien Fu ml՚t gñt laatie
L'emperere rioit ⁊ toute ſa maiſnie
Robert qui auoit fain Tyra foꝛment a hie
Au chien eſracha l'os S'en ala char mengie
Qvant l'emperere vit Q՚ robert l'oz runga
Bien penſa qu'il fu fol .I. pain au chien geta
Mais qñt Rob՚t le vit A foꝛce li oſta
Qñt le tint en ſamain En .ij. pars le bꝛiſa
Av chien en a donné La plus grande partie
Puis menga l'autre Piece poꝛ le fain qͥ le grie
Car plus auoit ieuné De iournee ⁊ demie
L'emperere rioit trop foꝛt Pour la folie
A ſes chlr՚s diſt Seignours ſoiez certain
Onques plus courtois fol Ne vit franc ne vilain
Maintenant a tolu A cel chien le ſien pain.
Puis ſi l'en a rendu La moitié tout plain
LOꝛs donna l'en au chien Pain ⁊ char ⁊ poiſſon
Afin que le fol ait Plus large gariſon
Rob՚t li en toli tant Qu'il en ot ſon bon
Tant couru ꝑ laiens En ſa main .i. baſton
C'vn guichet vit ouu՚t S'entra en .i. vergier
La ot vne fontaine Qⁱ ſourt ſus le grauier
Rob՚t y ala boire Pour ſon ſoif eſtanchier
⁊ qñt vint vers le ueſpꝛe Qⁱl dut aler couchier
RObert regarda bn̄ Q՚l part le chien tourna
Tout a dez le ſui Point ne li eſchapa
Tant q՚ poꝛ ſoi doꝛmir Sous .i. degré ala
Li ſainz homs l'aꝑcut De lez li ſe coucha
PAr de coſté le chien S'ala couchier robert
L'empere le vit Si diſt de cuer ouuert
Ꝯ face qu'ait bon lit ⁊ ſoit ml՚t bn̄ couuert.
Loꝛs l'en a poꝛta .i. Vn varlet plus apert
Et .ij. blans dꝛas de lin Qⁱ furent gñt ⁊ lé.
Mais robert n'en ot cure Tout a de hoꝛs geté
L'emperere le ſot Errant acommandé
Ꝯ pꝛeiſt en la voute Du blanc fuerre plenté
LOꝛs poꝛta l'en du fuerre Deſſous Rob՚t grant tas
Il ſe coucha deſſus Car il eſtoit ml՚t laz
De li firent par /rōme Petit ⁊ gñt leur gas
⁊ le tindꝛent pour fol Mais il ne l'eſtoit pas
COmbn̄ qu'il ne mēgaſt Foꝛs ce qu'au chiē toloit
Le chien apercut bn̄ Q՚ chaſcun li donnoit
Pour l'amour de rob՚t Siq՚ foꝛment l'amoit
Tant q̃uint a .i. iour Q՚ li roys court tenoit
IL yuint pour digner .I. ml՚t riche juys
Qui eſtoit receueur Des rentes du pays
Ꝑ ſoi a vne table fu Ml՚t noblem̄t aſſis
Loꝛs pꝛiſt rob՚t ſon chien Entreſes bꝛas l'a mis
Pvis ſacha le iuif .i. poi Par de derrier
⁊ il ſere tourna ſidꝛoit Qu'a ſouhaitier.
Li fiſt robert du chien Le trou du cul baiſier
Loꝛs pꝛiſtrent foꝛt arire Li duc ⁊ li pꝛincier
MAis le iuys en ot. En ſon cuer gñt deſpit.
Loꝛs lait ſon chien aler Maintenant ſanz reſpit
Quanqu'avoit ſus la table Tantoſt par t՚re miſt
Ꝑ amours bonne gent Oez que rob՚t fiſt
IL vit a .i. matin C'on menoit eſpouſer
Vne ione juyue; Ꝯ ot bn̄ fait parer
Robert la courut pꝛendꝛe ⁊ puis l'ala flater
En la plus laide Qu'il pot onques trouuer
Pvis ſ'en couru robert Samacue leuee
Ou il ſot c'on auoit Leur cuiſine atournee
.I. chat bouta tout vif Boullir en leur poꝛee
L'emperere le ſot Si en fiſt gñt riſee.
LOnc temps hanta a/rōme Robert ꝯ tint pour fol
Onq՚s ne but de vin Ne n'oſa ꝑler mot
Ne ne menga riens nee S'auchiēz tolier nel pot
Ne ne giſoit qu'au fuerre Mais puis qñt diex le vout
Remonta en hauteſce ⁊ fu ml՚t chier tenus.
Douce gent entendez Pour diex qui eſt laſſus
S'oꝛrez par quel maniere Robert fu ab ſolus
Huimais poꝛrez oir Gracieuſes vertus
L'Emperere de /rōme Qⁱ a ce temps regnoit
Ot vne jone fille Qⁱ parler ne pooit
Le ſeneſchal de /rōme De tout ſon cuer l'amoit
Ꝑ li ⁊ par les ſiens Ml՚t requiſe l'auoit
MAis onques l'emperere Ne li vout otroier
Loꝛs fiſt le ſeneſchal Ses chaſtiaus enfoꝛcier
Bn̄ cuida l'emperere greuer ⁊ eſſillier
Mais ne de moura pas Ie cuit .i. an entier
Qve .vi. roys ſarrazins ⁊ toute leur maiſnie
Vindꝛent aſſaillir /rōme ⁊ l'ont toute eſſillie
L'emperere le ſot S'en fiſt chiere marie
Ne pour qñt qñt il diſt A ſa cheualerie
IE vous pꝛi biax ſeignoꝛs Q՚ nous nous enſaions
Ꝯtre ces ſarrazins nr՚e dꝛoit deffendons
⁊ il lireſpondirent. Sire bn̄ le voulons
Loꝛs ſ'alerent armer Sanz point d'arreſtoiſon
DE /rōme ſ'ē iſſirent Pour ꝯmencier mellee
Mais meſche leur fuſt Briement celle journee
Se ne fuſt /ih՚ucriſt ⁊ /la vierge honnouree
⁊ Robert ꝯ tenoit Pour fol en la ꝯ tree
CEl iour eſtoit alé Pour boire a la fontaine
Mais vne vois oÿ Plus douce que ſeraine
Qⁱ diſt pꝛen ceſt deſtrier Q՚ ie y ci t'amainne
⁊ ſi t'arme des armes Qui ſont blanches ꝯ laine
RObert N'oſa parler Mais ſus li la croiz fiſt
Loꝛs vint aus blāches armes ⁊ ſ'arma ſanz reſpit
Puis mōta el deſtrier Eſcu ⁊ lance pꝛiſt
La fille l'emperere. Toute la choſe vit
Mais rob՚t necceſſa Tant qu'il vint en l'eſtour
Ou ſarrazins auoient De touz poins le meillour
Il ſ'embati ſus eulz ⁊ feri tant cel iour
Qu'il les en fiſt fuir ⁊ moꝛir a dolour
ET loꝛs vers la fontaine Rob՚t ſ'en retourna
Deſſus le cheual blanc Les armes retourſa
Errant ſ'eſuanoy ⁊ robert demoura.
La fille l'emperere; Tout le fait regarda.
CE lui qui ot le iour Maint ſarrazin tué
Eſtoit par le viſage Foꝛment eſgratiné
L'emperere de /rōme A Ih՚ucriſt loé
Pour ce que li paien Furent des b areté
S'Ot gñt auoir ꝯquis Le ſoir quant on ſoupa
Vint rob՚t en laſale Le roy le regarda
Eſgratiné le vit Foꝛment li empeſa
Puis diſt foi qu'a dieu doi Ceens fauſſe gent a
EN tant qu'auons eſté En ceſt iour la de hoꝛs
Ont ainſſi atourné Ce laz chetif de coꝛs
A ame ne fait mal Nient plus q՚ ſ'il fuſt moꝛs
Il eſt fol de bonnaire ⁊ ſi croi qu'il ſoit foꝛt
UN autre chl՚r. Diſt ſire ne voꝰ chaille
Hui fait auons la hoꝛs Sus paiens la bataille
⁊ il a fait la ſoue Caiens o la merdaille
Le roy li reſpondi Ꝑ foy vaille que vaille
SE ie le voi mal faire Bn̄ l'en ferai vengier
Mais me ſaroit on dire Qui fu le chl՚r
Qⁱ nous a au iour d'ui; Si bn̄ venu aidier
⁊ loꝛs ſ'en vint ſa fille De ſon pere apꝛochier
SI li mouſtroit le fol Que ne pouoit parler
Mais ne ſot l'emperere Ses ſignes auiſer
Loꝛs fiſt a ſa maiſtreſſe En haſte demander
Q՚ c'eſtoit que ſa fille Li uouloit demouſtrer
SA maiſtreſſe diſt ſire Faire veult demouſtrāce
Q՚ le fol vous a fait La bele ſecourance
⁊ qu'il ſ'eſt combatu A eſcu ⁊ a lance
P˞ tant vous envoit diex Diſt le roy gñt meſchance
ON ſeignier la deuez ⁊ vous l'afolez toute.
Comment tendꝛoit ce fol De chl՚rs la route
Ne il n'auroit cheual Ne armes c'eſt ſanz doute
La pucelle ſe tut Car ſon pere redoute
LA choſe demoura Ainſſi iuſq՚s atant
Que ſarrazin reuīdꝛent O empire ml՚t grant
Li rōmain ſ'en iſſirent Mais moꝛs fuſſēt errant
Quant le blanc chl՚r Y vint comme deuant
MAis onq՚s ne pot eſtre Ꝑceu n'auiſé.
Quelle part il tourna Qñt le champ fu finé
Foꝛs ſanz plus la pucelle Qui ot bn̄ auiſé
Ꝯment ſe des arma ⁊ ꝯment fu armé
IIus qu'a la tierce anee La choſe demoura
Q՚ l'oſt des ſarrazins Arriere retourna
L'emperere de /rōme Ses chlr՚s manda
Puis leur a dit ſeigneur Pour dieu entendez ca
IL nous faudꝛa ꝯ batre Vers la gent l'auerſier
Ie vous pꝛi ſ'au ſecours Vient le blanc chlr՚
Qu'ē agait vous metez ⁊ penſez deſploitier
Q՚ ſanz parler anous Il ne puiſt retourner
A Ce mot ſanz plus dire De /rōme ſ'en iſſirent
.xv. des miex montez En .i. agait ſe mirent
⁊ les autres de front Espaiens ſe ferirent
Puis ne demoura gaires Que le chlr՚ vint
Qvi fu touz blans armez ⁊ s'auoit deſtrier blanc
Es paiens ſe feri ⁊ tint Tout nu le bꝛanc
A l'un coupe la teſte ⁊ a l'autre le flanc
De q՚lle part qu'il tourt Fait tout couurir de ſanc
TAntoſt fu deſconfite La fauſſe gent vilaīne
Le blanc chl՚r voient Raler vers la fontaine
Qñt les .xv. rōmains Qⁱ furent en la plaine
Li eſcrierent maiſtre Tyrez a vous uo rene
ET dites qui voꝰ eſtes Ne de con fait pais
Qñt Rob՚t les oÿ Il fu touz eſbahis
Il bꝛo cha au trauers Ꝯtremont .i. larris
A touz leur eſchapa Q˜ .i. qui fu haſtis
SI foꝛt ⁊ de bon cuer Le ſui et haſta.
Q՚ le fer de la lance En ſa cuiſſe laiſſa
Non pourqñt au derrenier Robert leur eſchapa
A la fontaine vint Errant ſe des arma
LEs armeures blanches Miſt ſus le blanc cheual
Loꝛs ne ſot ſ'il tourna Ou amont ou aual
Rob՚t qui ot uers dieu Le cuer bon ⁊ loial
Trait le fer de ſa cuiſſe Qⁱ ml՚t li faiſoit mal.
ENtre .ij. pierres miſt Le fer ſanz demouree
Herbe cueilli ⁊ mouſſe S'a ſa plaie temptee
La fille l'emperere A ml՚t bn̄ regardee
Toute ſa contenance Plus l'amoit q՚ riens nee
RObert eſt a la cour Tout clochant retourna
Loꝛs vint le chl՚r Qui li auoit bouté
Le fer de dens ſa cuiſſe Le fuſt a rapoꝛté
En quoi le fer eſtoit Puis a auroy conté
Qv'au blanc chl՚r pꝛendꝛe Miſt toute ſa puiſſance
⁊ ꝯment en ſa cuiſſe Miſt le fer de ſa lance
Ie me repent foꝛm̄t Q՚ ie l'ai fait greuance
/La mere dieu la veille Deffendꝛe de meſchance
NE ſai ſe pooit eſtre Choſe eſperituel.
Mais ſachiez vraiem̄t Q՚ c'eſt .i. homs moꝛtel
Ie voꝰ dirai ꝯ ſeil Qⁱ ert ⁊ bon ⁊ bel
Gardez n'ait ci entour Ne cité ne chaſtel
Ov ne faciez crier Q՚ qui a vous vendꝛa
Armé de blanches armes ⁊ blanc cheual aura
Pour tant qu'apoꝛt le fer De celle lance la.
Q՚ l'une de ꝑties De l'empire tendꝛa
ET ſ'aura vr՚e fille Qⁱ eſt belle ⁊ par faite
Mais qu'il mouſtre la plaie Qⁱ du fer li fu faite
L'emperere li diſt Ceſt ꝯſeil bn̄ me hete.
Car il me ſamble bon ⁊ gentil ⁊ honneſte.
LOꝛs fu le cri criez Tout par tout le pays
Le ſenechal le ſot; Ml՚t en fu reſiois
Q՚ il n'auoit ſa fille A pou n'eſragoit vis
Bien la cuida auoir Il fiſt que folz nais.
Qve diex l'ot a rob՚t De ml՚t lonc tans lotie
Qu'en fait d'armes l'auoit Loiaument de ſeruie
Auec le chien giſoit Qⁱ ſa plaie ot lechie.
A auoir la pucelle. Certes ne penſoit mie
AIns plouroit tendꝛent La nuit pour ſes pechiez
Le ſeneſchal de /rōme S'eſt ml՚t toſt pourchaciez
De blanc cheual ⁊ d'armes Bien fu appareilliez
L'emperere ſ'il puet Sera bn̄ engingniez
Qv'il miſt en ſa cuiſſe .I. fer de glaiue de dens
Tant endura d'angoiſſe Q՚ il chay au denz
Loꝛs fiſt le ſeneſchal Armer toutes ſes gens
Errant ſ'en vint a/rōme Ml՚t eſtoit biaus ⁊ gens
MAis il auoit le cuer Tout plain de tricherie.
Avoir vouloit la choſe Qu'il n'ot pas deſeruie
Non pour qñt ſi dit on Souuent mainte foie
Q՚ cil qui le bn̄ gaaigne A la foiz ne l'a mie
LE ſeneſchal cuida Ꝑ ſon gñt vantem̄t
Enginier la pucelle Mais on dit bn̄ ſouuent
Q՚ de ce q՚ fol penſe Demeure largement
Il vint al'emperere ⁊ li diſt hautement
Sire ie ſui celui Qui ſ'en vint a l'aſaut
Par .iij. foiz ſus paiens Ml՚t y ſouffri de chaut.
Seneſchal diſt le roy Pour le coꝛs /.S՚. thibaut
Fuſtes vous la pour moi Ouil ſe diex me ſaut
SEneſchal diſt le roy Preuz eſtes ⁊ gentis
Ꝑ m'ame ie cuidoie Que fuſſiez anemis
Sire diſt le traitre N'en ſoiez eſbahis
Loial cuer ne faut point Au foꝛt a ſes amis
LE fer tendi au roy. ⁊ puis ſe trait auant
La plaie li mouſtra Du fer bn̄ aparant
Le chl՚r ꝯ nut ſon fer Tout en riant
Mais il doutoit Le glout; poꝛ ce ſ'ala taisāt
RObert qui fiſt le fol Touz ces parlers ooit
Encoꝛe pour la plaie De ſa cuiſſe clochoit
Mais ſachiez q՚ l'ermite Qⁱ con feſſé l'auoit
De denz ſon hermitage Vne nuit ſe doꝛmoit
LOꝛs li diſt vne voiz Q˜ /rōme ſ'en alaſt
⁊ qu'il cerchaſt la ville Tant que rob՚t trouuaſt
On l'a peloit dëable Ainz qu'a bn̄ ſ'a tournaſt
⁊ puis el non de dieu Li deiſt qu'il ꝑlaſt
L'Ermite qñt fu iour Bōnement ſe leua
Em pꝛiant ih՚ucriſt Vers /rōme ſ'entourna
Le ſeneſchal au roy Sa fille de manda
⁊ il li reſpondi Q՚ volentiers l'ara
ON fiſt mander le pape ⁊ puis vint la pucelle
Qⁱ detoꝛdoit ſes poins ⁊ gratoit ſa maiſſelle
Q՚ bn̄ ſauoit du fait La certaine querelle
Son pere l'amena A l'uis de la chapele
Cel iour fiſt diex a/rōme Gñt vertus en apert
A fin ꝯ conneüſt Le pꝛeudōme robert.
Q՚ treſtouz bas ⁊ haut L'a peloient trubert.
Pour le ſeruice faire Fu ia le liure ouuert
Qvant la ione pucelle Qⁱ point parler ne ſot
Par la a ſon chier pere ⁊ diſt bn̄ vous voi ſot
Qⁱ creez ce traitre Il ment a chaſcun mot
Mais caiens a .i. hōme Qⁱ eſt dous ⁊ deuot
PAr ſa bonté m'a diex La parole rendue
Ꝑ ſignes ne pouoie De riens eſtre creue
Li roys ot ml՚t gñt ioie Quant il l'a entendue
Sa fille qui parla Lonc temps ot eſté mue
MAugré ſien la laiſſa Yluec le ſeneſchal
Qⁱ vit que ſabeſoingne Aloit du tout amal.
Deſcendi de laſale Si vint a ſon cheual
Sanz femme ſ'en fuy Tout le pendant du val
LI roys ot poꝛ ſa fille De la ioie tretant
Qⁱl ne ſe dōna garde Du chetif meſcheant
Loꝛs li diſt l'apoſtoile Ma ſuer ie vous demant
Qⁱ eſt le .S՚. pꝛeudōme Dont vous alez parlant
SIre diſt la pucelle Qⁱ n'eſtoit pas vilainne
Ie vous dira du fait La verité certaine
L'emperere ⁊ le pappe Mena a la fontaine
Le fer d'entre .ij. pierres Sacha aml՚t gñt paine
ON manda le troncon Dont le fer fu partis
Puis furent mis enſamble Mais diex de paradis
Les reioint Si tres bn̄ Qu'a chaſcun fu auis
Ꝯques n'eüſt eſté; Ne rompu ne mau mis
POur les vertus eſtoiēt Ceulz de /rōme ml՚t liez
La fille diſt au pappe Sire de uoir ſachiez
Qu'en ceſte place ci S'est .iij. foiz haubergiez
Celui par qui noꝰ sōmes Des ſarrazins vengiés
IE vi bn̄ par .iij. fois Ꝯment ſe des armoit
Mais ſauoit ne pooie Ou le cheual aloit
Ne les armes auſſi. Mais le ſaint homs uenoit
Geſir auec le chien Ie croi bn̄ qu'il y ſoit.
ON ne m'envoloit croire ⁊ ſi eſt choſe vraie
Pere bn̄ vous a fait Droiz eſt qu'ait bōne paie
Alez parler alui. Voir de riens ne m'eſmaie
Q՚ du fer ne trouuez En ſa cuiſſe la plaie
LI roys ⁊ l'apoſtoile ⁊ pluſeurs gens de bien
S'en vindꝛent vers robert Qⁱ giſoit lés le chien
Ml՚t bel le ſaluerent Mais il ne leur diſt rien
L'emperere li diſt Biax douz amis cha vien
ET me mouſtre ta cuiſſe Ꝑ fine amour te pꝛi
Rob՚t pꝛiſt .i. feſtu ⁊ ioua deſcremie
Au pape fiſt la moe A la fin que il rie
Mais n'en auoit talent Vers robert ſ'umelie
ET li diſt tres douz filz Ie ſui pappe (/climens) clamez
De par dieu vous ꝯmant Qui en croiz fu penez
Q՚ vous parlez amoi Se pooir en auez
A ce mot ſ'eſt Rob՚t A reculons leuez
Av pappe fiſt la figue Puis le ſeigna d'un os
Aus ſignes qu'il faiſoit Sambloit bn̄ eſtre fos
Hé vous venir l'ermite Qui auoit ml՚t bon los
Tantoſt qu'il vit rob՚t Si li a dit ces mos.
Amis entendez moi Ml՚t bn̄ vous ꝯnoiſſons
Voir Rob՚t le dëable Soloit eſtre vos nons
Mais rob՚t l'ōme dieu Bn̄ nōme vous puet ons
Touz nous auez ſauuez En ceſte regions
UOus pouez bn̄ parler Sachiez en bonne foy
Q՚ /le douz ih՚ucriſt Le vous mande ꝑ moi
Rob՚t ſ'agenoulla ⁊ diſt gloꝛieus roy
Liez ſui qñt ai tant fait Qu'a coꝛdé ſui atoi
Gloꝛieus ſire pere Ie doi bn̄ eſtre liez
Quant i'ai fait ma penāce Des maus que i'ai bꝛaciez
Vrai diex donnez moi grace Par vos ſaintes pitiez
Deuons ſeruir touz diz Sanz faire mauuaiſtiez
LE pueple ot ml՚t ioie Qñt robert dut parler
Li roys li voult ſa fille A eſpouſe donner
Mais onques li ſainz Hons ne ſ'i voult acoꝛder
Aincois auec l'ermite S'en ala demourer
MAis puis ne tarda mie Lamontance d'un mois
Q՚ /le douz ih՚ucriſt Li fiſt noncier .iij. fois
Qⁱl retournaſt a /rōme ⁊ que ſelonc les loys
Eſpouſaſt la pucelle Qⁱ le cuer ot courtois
ET qu'il iſtroit d'euz .ij. Encoꝛe tel lignie
De quoi le foi de dieu Seroit ml՚t ſouhaucie
Loꝛs vint Rob՚t a/rōme Sieſpouſa ſ'a mie.
Puis ot il ml՚t gñt fain D'aler (d'aler )en /noꝛmendie
PAr le gré l'emperere S'eſmut o tout gñt gent
Plenté mena sōmiers Chargiez d'oꝛ ⁊ d'argent
Tant fiſt Qu'a /rouen Vint mais en trop grief toꝛm̄t
Trouua ceulz de /rouen Ie vous dirai ꝯment.
LE duc ſi eſtoit moꝛt Qⁱ ml՚t ot bon renon
Prez de /rouen manoit .I. traitre felon
Qⁱ fiſt a la ducheſſe Grief perſecution
Faire la vout ardoir Par moꝛtel traiſon
IL n'auoit el pays Cheual՚r ſi puiſſant
Qⁱ contre le traitre Oſaſt offrir ſon gant
Ne qui ala ducheſſe Poiſt eſtre garant
Qñt rob՚t y ſouruint Qui eſtoit ſon enfant
TOuz ceulz de la ꝯ tree Cuidoient qu'il fuſt moꝛs
Ml՚t bn̄ le reconnurent Qñt virent ſon gñt coꝛs
Foꝛment le redoutoient Les fiebles ⁊ les foꝛs
Ne poꝛ qñt il li diſtrent Les grietez ⁊ les toꝛs
Qve le glout fait ſouffrir A gñt toꝛt aſamere
Robert iura en haut Par /le baron .S՚. pere
Que le glouton fera moꝛir De moꝛt amere.
Si fiſt il bien bꝛiement Oez par quel matere
RObert ne ceſſa onques Deuant qu'il fu tenus
⁊ puis en la pꝛeſence Des gñt ⁊ des menus.
Iehir la traiſon Loier l'en fu rendus
Ileſploita ſi bien Qu'au gibet fu pendus
LA ducheſſe ot gñt ioie Quant el ſot la venue
De robert ſon enfant Qⁱ bien l'ot ſe courue
Adont fu /noꝛmendie De lui quite tenue
Dont conta a la dame Toute ſa conuenue
OIant Maint haut baron Et dames recoꝛda.
Les gñz paines q̃ /rōme Souffri ⁊ endura
⁊ Comment l'emperere Sa fille li donna.
Eſtes vous .v. Meſſages Dont li vns haut parla.
BIau ſalua rob՚t. ⁊ diſt vous ne ſauez.
L'emperere de /rōme De qui eſtes amez
El non de dieu voꝰ mande Q՚ vous le ſecourez
Car le ſeneſchal ſ'eſt Contre lui reuelez
Avoir veult vr՚e femme De riens n'a autre envie.
Robert li reſpondi Voir il penſe folie
Loꝛs manda ſon effoꝛs Par toute /noꝛmendie
Vers /rōme ſ'entourna A ml՚t noble maiſnie
MAis onques ne ſe ſot Tant haſter par eſfoꝛt
Que le faus ſeneſchal N'eüſt l'emperere moꝛt
La fille pour ſon pere Fiſt duel ſi n'ot pas toꝛt.
Et rob՚t fiſt ſes hōmes Touz armer d'un acoꝛt
Pvis ſ'en vint deuant /rōme Ou le ſeneſchal ſiſt
De denz l'oſt ſ'embati ⁊ ſa gent ſanz reſpit
Tantoſt ꝯme robert; Le faus traitre vit.
Il ſ'a pꝛocha deli. ⁊ fierement li diſt
PAs ne m'eſchaperez A cel coup que ie puiſſe
Ne boutas tu le fer; D'une lance en ta cuiſſe
Ie ne coi que iamais; Puis mauuais de toi truiſſe
Mais ton loier auras Aincois q՚ le iour yſſe
TObert ml՚t courouciez; S'en vint au ſeneſchal.
Du hiaume li rompi Le cercle ⁊ le Nazal
Le nez ⁊ la banleure Li a bati aual
Tout en uers pour l'angoiſſe Chay de ſon cheual
RObert en la cité De /romme le mena
On le fiſt eſcoꝛchier ⁊ puis on le ſala
La fille l'emperere Mal pour li conuoita
Mais le ſage teſmoīgne ⁊ on le dit pieca
C'On conuoite tel choſe Dont il ſourt gñt hontage
Rob՚t qui on ſ'enfance Ot eſté ml՚t ſauuage
Vers dieu ⁊ uers sō pꝛieme Fu de ſi bon coꝛage
Q՚ ie croi qu'il conquiſt Des ſainz ciex l'eritage
LE fille l'emperere Ot de li .i. enfant
Ꝯ appella en/france /Dant richart le noꝛmant
Qui fiſt ml՚t de pꝛoueſce Tant comme il fu viuant
De /feſquan l'abaie Fonda ie vous crëant
Avecques /kl՚m; Paſſa outre la mer
Les parens /Guenelon Ne le poꝛrent amer.
Car il ne volu onques A mauuaiſtie penſer
Diex nous veille S'amour Et Sa grace donner.