... svasti śaka-varṣātīta 959 mārggaśīra-māsa, tithi pratipada śukla-pakṣa, pa, po, śu, vāra duṅulan·dukut·, cāra bāyabyastha, jyeṣṭa-nakṣatra, śakrăgni-devatā, dhr̥ti-yoga, vava-karaṇa, Irikā divaśany ājñā śrī mahārāja rakai halu śrī lokeśvara dharmmavaṅśa Airlaṅgānantavikramottuṅgadeva, tinaḍaḥ rakryān· mahāmantrī I hino śrī saṁgrāmavijayaprasādottuṅgadevī, Umiṅsor= I rakryān· kanuruhan· pu dharmmamūrtti narottama dānaśūra, I piṅsornyājñā śrī mahārāja kumonakan ikāṁ rāma jātaka I kamalagyan· sapasuk thāni kabeḥ, thāni vatək· paṅkaja, Atagan· kəlpu rambai, gave mā 1 masavaḥ tampaḥ 6 hinajyan· māsu 6 mā 7 ku 4, len· drabya-hajiniṁ gagā, kbvan· pasəR̥han·, tka riṁ lvaḥ, R̥ṇək·, tpi-tpi, vaulu-vulu prakāra kabeḥ, piṇḍa samudāya māsu 17 mā 12 ku 2 sā 2 ya tikā Inaṇḍəḥ An· patahila drabya haji māsu 2 Aṅkan asuji-māsa I śrī mahārāja, magiliṁ-giliṅan· tan pārik·, tan· papādapaṁL̥yə:, tan· papagaḍuḥ, tan· papilih mas·, len· drabya-hajiniṁ kalagyan· saṇḍuṅan· māsu 2 mā 10 milu Inaṇḍəḥ matahila māsu 2 kakalaṅan· madrabya-haji mā 1 ku 2 Inaṇḍəḥ matahila drabya haji mā 1 Atəhər· tan· knā riṁ pinta palaku, buñcaṁ haji, turun·-turun· sakupaṁ sātak·, sukhaduḥkha magə:ṁ maḍmit· denikāṁ vargga hatur·, vargga patiḥ mvaṁ juruniṁ kalagyan· raṇu riṁ dharmma, kevalānəmva drabya haji Iṁ sīma ḍavuhan· I kamalagyan· riṁ tambak· riṁ variṅin· sapta juga parṇnahanya kāliḥ,

sambandha, śrī mahārāja madaməl· ḍavuhan· riṁ variṅin· sapta, lmaḥnikāṅ anak thāni riṁ kamalagyan·, puṇyahetu tan· svărtha, kahayvaknaniṁ thāni sapasuk· hilir· lasun paliñjvan·, sijana-tyəsan·, pañjiṁ gantiṁ, tālan·, daśapaṅkaḥ, paṅkaja, tka riṁ sīma parasīma, kalaṁ, kalagyan·, thāni jumput·, vihāra śāla, kamŭlan·, parhyaṅan·, para patapān·, makamukhyabhuktyan· saṁ hyaṁ dharmma riṅ īśānabhavana maṅaran· I surapura, samaṅkana kveḥnikāṁ thāni kavāhan· kaḍəḍətan· cariknya denikāṁ kantən· tmahan· baṅavān· Amgat· ri variṅin· sapta, dumadyakan· Unānikāṁ drabya haji mvaṁ hilaṁnikāṁ carik· kabeḥ, Āpan· durlabha kavnaṅan i katambakanikāṁ baṅavān· Amgat· de para sāmya makabehan·, tan· pisan· piṇḍva tinambak· para sāmya, ndātan· kavnaṁ juga parṇnaḥnya, samaṅkana ta śrī mahārāja lumkas· Umatagaknikāṁ tanayan thāni sakalrān deni kīrti pratāpa śrī mahārāja, Inatag· kapva saṁrabdha mabuñcaṁhajya maḍavuhana, sampun ta siddha kadamlanikāṁ ḍavuhan· de śrī mahārāja, subaddhāpagəḥ huvus· pəpət· hilīnikāṁ bañu, Ikāṁ baṅavān· Amatlū hilīnyāṅalor·, kapva ta sukhamanaḥnikāṁ maparahu samaṁhulu maṅalap· bhāṇḍa ri hujuṁ galuḥ, tka rikāṁ para puhavaṁ para baṇyāga saṅkā riṁ dvīpāntara, samañuntən· ri hujuṁ galuḥ, Ikāṅ anak thāni sakavāhan· kaḍəḍətan· savaḥnya, Atyanta sarvvasukhani manaḥnya makāntaṁ kasavaha muvaḥ savaḥnya kabeḥ An· pinunṇyan· tinambak· hilīnikāṁ baṅavān· Amgat· riṁ variṅin· sapta de śrī mahārāja, mataṅyan· ḍavuhan· śrī mahārāja parṇnaḥnikāṁ tambak· riṁ variṅin· sapta, samaṅkana ta śrī mahārāja māṅan-aṅan· ri tan· tguhanikāṁ ḍavuhan· deni kveḥnikāṁ vvaṁ mahyūn· maṁL̥bura yaśa, ri sḍaṅanyan· tan· tiṅgīn· rakṣān·, parṇnaḥnya Umahana, mataṅyan ikā Anak thāni I kamalagyan· tka ri kalagyanya katuduḥ momaha I samīpanikāṁ ḍavuhan· riṁ variṅin· sapta, An· sīma ḍavuhan· śrī mahārāja parṇnahanya, Umivyə Ikāṁ samananā sakahayvakna saṁ hyaṁ ḍavuhan·, Atəhər· paṅaṇḍəḥ drabya haji māsu 10 Ikāṁ I kamalagyan·, tahilaknanya I śrī mahārāja Aṅkan asuji-māsa, kapaṅgiha riṁ tambak· riṁ variṅin· sapta, Ikaṁ kalagyan· saṇḍuṅan· milu Inaṇḍəḥ matahila drabya haji māsu 2 kapaṅgiha riṁ tambak· denikāṁ vargga hatur· Aṅkan asuji-māsa, kakalaṅan· maṅaṇḍəḥ mā 1 kapaṅgiha riṁ tambak· denikāṁ vargga patiḥ, pirak· salumari ri deśanya satahilanya tan· piritən·, ḍalānyan· lmaḥnya ḍinavuhan· śrī mahārāja, dumadyakan· kr̥tāniṁ rāt·, mvaṁ punarjīvani bhuktyan· saṁ hyaṁ sarvvadharmma, sīma parasīma, kalaṁ kalagyan· thāni jumput·, vihāra, śāla, kamŭlān·, parhyaṅan·, para patapān· kabeḥ, makatəvəka paṁḍiri śrī mahārāja makaḍatvan· I kahuripan·, An sira sākṣāt· sumiram ikīṁ rāt· kabeḥ riṅ anurāgāmr̥ta, mahudanakan· kīrtti, Umaṅun· sakaparipūrṇnākna saṁ hyaṁ sarvvadharmma, ri paməpəgni kayovanāniran sinīvi ri yavadvīpamaṇḍala, hetuniran· paṁlrākan· dharmma kuśalamūla, tirutirūniṁ rāt kabeḥ, kapva magavaya yaśa, Āpan· maṁkana pinakasvabhāvaniṁ kadi sira ratu cakravartti, Umaṅun· pamaṅgihanikāṁ rāt· hita pratidina, paṁliṅgānanikāṁ sabhuvana ri tan· svărtha kevala śrī mahārāja, yāvat· kavaṅunaniṁ yaśa donanya, An· kapva kinalimbaṁ juga denira, sahana saṁ hyaṁ sarvvadharmma kabeḥ, maṁkana kāraṇanikāṁ I kamalagyan· An· sinĭma de śrī mahārāja, vineḥ makmitana praśāsti muṅgveṁ titik· vuṅkal·, mvaṁ katmvani drabya-hajini kalaṁ kalagyan· I sīma ḍavuhan· I kamalagyan· riṁ tambak· riṁ variṅin· sapta denikāṁ vargga hatur· mvaṁ vargga patiḥ, kapaṅgihāpagəha kalilirananiṁ vka-vetnya hlam· tka ri dlāhaniṁ dlāha, An· sīma ḍavuhan· śrī mahārāja parṇnaḥnya, tan· kolah-ulaha deniṁ nāyaka pratyaya, tka riṁ piṅhai vahuta rāma, mvaṁ sakveḥnin· samaṅkana, karuhun· saṅ anāgata prabhu, Atəhər· ta Ikeṁ I kamalagyan· tka ri kalaṁ kalagyan· tan· katamāna deni vinava saṁ mānak katrīṇi, paṅkur·, tavan·, tirip·, piṅhai vahuta lāvan· saprakāra saṁ maṅilala drabya haji vulu-vulu ri daṅū, paṁrāma, pabatu-batu pavaraṅka, ma drabya-hajyan·, makādi miśra, para-miśra, paṅuraṁ, kriṁ, paḍəm·, manimpiki, limus galuḥ, maṁriñca, maṁhuri, paraṁ, suṅka, dhūra, paṅaruhan·, taji‚ vatu tajəm·, sukun·, halu varak·, rakasaṁ, piniṅlai, kataṅgaran·, ramanaṁ, tapa haji, Air haji, malaṅdaṁ, L̥ca, lab-lab·, kutak·, taṅkil·, tr̥pan·, salyut·, vatu valaṁ, pamaṇikan·, sikpan·, tirvan·, vilaṁ thāni, viji kavaḥ, tiṅkəs·, māvī, manambaṅi, tuhan· juḍi, juru huñjman·, juru jalir·, pabi(sar·,) {± 14 akṣ. lost} (miśra hino, mi)śrāṅinaṅin·, – – – – – pabuvuḥ, kḍi, valyan·, {± 27 akṣ. lost.} ma- (ḍahi,) {± 19 akṣ. lost} [mamijila]k(ə)n· vuriniṁ kikir·, vaṅkay· kābunan·, mamūk·, mamu[mpaṁ,] {± 19 akṣ. lost} vatək i jro {3 akṣ. ille.} {3 akṣ. ille.} {± 20 akṣ. lost}n·, tka ri kalaṁ kalagyanya, ma{3 akṣ. lost}nugraha śrī [mahārāja] {± 12 akṣ. lost} (nya ta rāmanta ri) {4 akṣ. lost} han· {± 53 akṣ. lost} (32–35)

134-136LXI 9, 249501