atyantādhikaniṅ sukārya vinaṅun śrī Jīvanendrādhipa
tan lyan śrāddha bhaṭāra mokta maluy iṅ somyālayādhiprabhu
maṅke mūrti niran cinarvan apagəh riṅ śvetasiṅhāsana
sakvehniṅ bala mukhya saṅ nr̥pa kabeh dampaty amuṣpa krama.
lvir guntur pakatonan iṅ taḍah anekātryāsusun tar pəgat
mily āpānakabhojanāna ḍumavuh riṅ peka muṅgv iṅ sabhā
len taṅ dāna ri saṅ mahādvija gənəp riṅ śaṅkha tapvan kuraṅ
gohdānādi sabhūṣanāśva ratha len vastrādulur kañcana.
varṇan tiṅkah i saṅ vatək ratu madudvan vətva-vətvan kabeh
vvantən gīta nirakṣarātika vināhyākən laṅə̄nyeṅ gunuṅ
mambətniṅ dyah aṅañjalīniriṅakən deniṅ kakuṅnyekatiZoetmulder suggests ekaki.
śrī nātheṅ Kr̥tabhūmi məṅgəp amaṅun tiṅkah vidagdheṅ raras.
tan sor śrī naranātha riṅ Mataram iṅ tiṅkah laṅə̄niṅ gunuṅ
cārāṅrakta vado hajīki vinaṅun tiṅkah madadyan vukir
harṣekaṅ vvaṅ anon kakuṅ saha lavan dyah ceṭikeṅ āśrama
siṅgih yan tama riṅ laṅə̄ nr̥pati maṅdānī raras tan sipi.
kocap saṅ nr̥pati Pamotan adhikāreṅ rūm praśāsteṅ laṅə̄
ndan tiṅkah gaga vətva-vətvan ira moghānraṅ laṅə̄niṅ gaga
vvantən stry arja kalih jalunyan ahañaṅ ṅkāne siriṅniṅ hənu
prāyāṅjantən ajaṅga riṅ java kapaṅgih ndan matəṅgə̄ gaga.
saṅke śrī parameśvareṅ Lasəm apūrvaṅ vətva-vətvan ləyəp
strī muṅgv iṅ daləm iṅ taman manalukat lāvan kakuṅnyālaṅə̄
apnəd deniṅ aniṅkah uttama laṅə̄nyāmānuṣāṅde ləṅəṅ
toh piṅhe ṅaraniṅ kiduṅnya ginave tiṅkah maveh kuṅ lulut.
vvantən parvata tan sipiṅ kaləṅəṅan sākṣāt pavitrācala
tan len amrətamāsa gīta tuladan kāryātəmah parvata
ndah byaktaṅ jalatuṇḍa taṅ śaraṇa saṅkəp tan hanāṅul kabeh
savvat śrī naranātha riṅ Kahuripan sotan kavīndrānulus.
śrī nātha prabhu saṅ makāntya mahatur banava mavaṅunan səkar miṅiṅ
lañcaṅ-lañcaṅ ikārja padapa tinap sinalisir alunas-lunas puḍak
kuñcupniṅ taravarṣa tīhaṅa mabāhu sarasija mabaṅ katiṅhalan
arcəp varṇanikālayārja riṅ apiṇḍa jari-jariṅan iṅ valantiṅan.
jaṅgāmrik makatambiraṅnya yaśa pāṅin-aṅinanika səh səkar marum
raśminya n pahatəp sminiṅ i riṅ avuvuṅ jalada tuhu ləyəp tiniṅhalan
roṇḍon iṅ kayu kañcanārja kamuḍinya makuniṅ anamar-namar tatur
arjāslat prabhu sanmatāsana lavan vuṅu pinakakatin nikāraras.
sinvām iṅ taru raśmi pātakanikāṅavay-avay i sirirnikāṅ aṅin
tiṅkahnyan pavide rvan iṅ katirah apnəd inaṅit araras vinarṇana
saṅgākāśa lavan vlasapti tali dandan alabuh upalāsəpət gaḍiṅ
tan pendah kadi joṅ səkar manəṅah iṅ jaladhi mara panarkaniṅ mulat.
tuṅgal saṅ kavi maṅləṅəṅ puvavah iṅ banava maṅə maliṅgih iṅ vukir
secchā maṅku karas nirendah apapan kanaka saha tanah nireṅ kapə̄
lvir mahyun mikataṅ sakendriya təhər nəmahakəna palambaṅ iṅ karas
yan sampun srahəneṅ narendra samudāya malar asuṅa sanmateṅ maṅə̄.
na lvirniṅ vətva-vətvan nr̥pati sama samāmuṅvakən kuṅniṅ adyah
byaktekin tan hanāsor laṅənika dinələ̄ riṅ satiṅkah-satiṅkah
siṅgih yan tan haneṅ pūrvaka gati kadi maṅke mahāśrāddha dibya
ṅhiṅ sotniṅ vvaṅ manonton sahananika kabeh laṅgəṅāchattraniṅ rat.