Dharma Pātañjala author of digital edition Andrea Acri EFEO/EPHE (Université PSL) Paris DHARMA_CritEdDharmaPatanjala.xml

This work is licensed under the Creative Commons Attribution 4.0 Unported Licence. To view a copy of the licence, visit https://creativecommons.org/licenses/by/4.0/ or send a letter to Creative Commons, 444 Castro Street, Suite 900, Mountain View, California, 94041, USA.

 2018 Ed2

Encoded in TEI according to the Conventions of Project DHARMA

Project funded by EFEO/EPHE

various structural changes to adapt the file to new encoding model Adding the @xml:id to obtain a table of contents Initial TEI encoding

siddhir astu

saṅ kumāra ikā manaṅkil ri bhaṭāra, kālanira hana ri puñcakniṅ gunuṅkelāsa, dadi saṅ kumāra mamūjā, maṅhanākәn pañcopacāra, ri huvusnira mamūjā, manambhah ta sira ri bhaṭāra, ri huvusnira manambhah, maluṅguh ta sira, tumañākәn ikaṅ tattva viśeṣa,

liṅnira,

sājñā bhaṭāra, kasihana rānak bhaṭāra, varahәn ikaṅ samyajñāna, yatānyan hilaṅa sandeha rānak bhaṭāra,

sumahur bhaṭāra

hayu iku takvantānaku, ikaṅ samyajñāna ṅaranya, evәh kapaṅguhanya, apa dumeh ya mevәha, yan kva liṅanta, tātan vәnaṅ samyajñāna, yatan hana samādhi, ikaṅ samādhi tan dadi ikā tan kinavruhan saṅ hyaṅ paramārtha, apan kapaṅguhan saṅ hyaṅ paramārtha doniṅ samādhi ginavayakәn, maṅkana liṅ bhaṭāra,

sumahur saṅ kumāra

sājñā bhaṭāra kāsihana ṅhulun varahәn ri lakṣaṇa saṅ hyaṅ paramārtha, maṅkana liṅ saṅ kumāra,

sumahur bhaṭāra,

nihan lakṣaṇa saṅ hyaṅ paramārthānaku kavruhanta ◆

acintyo niṣkalaḥ śāntaḥ, dhruva-m abyaya-m īśvaraḥ, asau sūkṣmaḥ paraḥ śāntaḥ, śivaḥ sakalaniṣkalaḥ ◆

apan sira sinaṅguh acintya, apa tar kavәnaṅ inaṅәn-aṅәn, niṣkala sira tar pāvak, tan pavarṇa, tan baṅ, tan aputih, tar kuniṅ, tan hirәṅ, kapila dvivarṇādi, tan hana ikā kabeh ri saṅ hyaṅ paramārtha,

tātan kәna ri tuha pati, tan palvaṅ tan patambhәh, abyaya juga ya, nitya humidә̄ṅ, sira ta suka tar pahuvusan, inak tar pabalik lāra, hurip tar pabalik pati, sira ta lәvih saṅkeṅ rāt kabeh, sira tika lәvih tar kalәvihan, vibhuḥ ta sira, vibhuḥ ṅaranya, humibәkiṅ rat kabeh, ndātan katon, sira kәtah manon, tan kinavruhan, sira ta maṅavruhi, apan sarvajña sira, sira kumavruhīṅ rat kabeh, sarvakāryakartā sira, sira gumavay ikaṅ rat kabeh, apa byaktinya nihan, kita kabeh mahurip, molah, umambhәk, vruh riṅ abhiprāya, nahan byakti saṅ hyaṅ paramārtha an hana ri kita lāvan iṅ rāt kabeh, ikaṅ hiḍәpta ri saṅ hyaṅ paramārtha, ya ta inaṅәn-aṅәnta ri rahineṅ vәṅi, lәvih pva ṅaraniṅ prajñā, samapada lakṣaṇanya lāvan saṅ hyaṅ paramārtha, ya ta mataṅnyan samādhi ṅaranikaṅ inabhyāsa saṅ mahyun ri suka viśeṣa, apan yekā sinaṅguh kalәpasәn ṅaranya, hana pvekaṅ samādhi ri saṅ hyaṅ paramārtha, ya ta mamәkasakәn saṅaskāra riṅ citta, ya ta sinaṅguh samyajñāna ṅaranya, dudū saṅke mithyājñāna, maṅkana liṅ bhaṭāra,

sumahur saṅ kumāra,

aparan ikaṅ mithyājñāna ṅaranya sājñā bhaṭāra, kasihana ṅhulun varahәn iṅ lakṣaṇanikaṅ mithyājñāna, maṅkana liṅ saṅ kumāra,

sumahur bhaṭāra,

nihan lakṣaṇanikaṅ mithyājñānānaku, ikānaṅ humiḍәp humadhikārākәn sahiṅani kavruhnya, makasādhana pratyakṣa juga, liṅnya, tuhu ikā saṅ hyaṅ paramārtha tan pāvak, tan pavarṇa, apan tayā sira, apa byaktanyan tayā sira saṅ hyaṅ paramārtha, apan tayā saṅkanta ṅuni, mithya pva kita hәlәm, tayātah paranta, ya ta mataṅnya/n tayā paramārtha,

tayā pva saṅ hyaṅ paramārtha, ya ta mataṅnyan tan suvala ikaṅ hulah kabeh, apan yātāyāta iki havak, ikaṅ agave hayu ṅaranya, adva ikā, syapa tumon phalaniṅ gave hayu, syapa saṅkeṅ svarga, syapa pratyakṣa vruh iṅ kahyaṅan, maṅkana liṅnya, tapvan pratyakṣa vruhnya riṅ kahyaṅan, mvaṅ saṅke svarga, ya mataṅnyan adva ikā kabeh, maṅkana taṅ magave hala sinaṅguh pāpa, syapa saṅke naraka, saṅ abyaktā vruhnya riṅ mahāraurava, mataṅnyan pāpaṅ vaṅ magave hala, tapvan hana pratyakṣa vruhnya ri yamani, ya mataṅnyan samenaka ri kita hulahanta, apan yāya hulahanta ri saṅ hyaṅ tayā, maṅkana liṅnya, ya ta mataṅnyan tan pavatәs ikā hulahnya, arok majәmur, ikaṅ hala hayu iriyā, lāvan hiḍәpnya, ikaṅ ambhәk maṅkana, ya ta mithyājñāna ṅaranya, maṅkana liṅ bhaṭāra,

sumahur saṅ kumāra,

takarin tuhu pakṣanikā maṅkana, sājñā bhaṭāra, maṅkana liṅ saṅ kumāra,

sumahur bhaṭāra,

ya ta mataṅnyan mithyājñāna ṅaranya ambhәk maṅkana, apan adva ikā, byaktānyān adva ikā, tuhun tan hanā ikaṅ rāt kabeh, yan tayā saṅ hyaṅ paramārtha, mvaṅ tātan ahuripa kita kabeh, yan tayā saṅ hyaṅ paramārtha, katon pvekiṅ huripta, mvaṅ hananikaṅ rāt kabeh, ya ta paṅavruhananta ri tan tayā saṅ hyaṅ paramārtha,

nihan sahur samithyājñāna, kadi saṅ hyaṅ paramārthātah pinakahuripniṅ rāt kabeh, apan dudū ikaṅ hurip avaknya, yan kva liṅa saṅ para, apa mataṅnyan paramārtha panaṅguh i sira ya ta karih, yan lena saṅke cetanā, apan cetanā pva mūlanikaṅ hurip an hana, ikaṅ cetanā ṅaranya, tan palakṣaṇā ikā, tan pagati, tuhun mabotanā kasornya saṅkeṅ paramārtha, lāvan tan sarvajña,

ika taṅ cetanā maṅkana, ya tekā maṅhanākәn hurip, tan lena ikā yan lena saṅke paramārtha, lāvan nihan patakvanaṅkva ri saṅ para, ikaṅ paramārtha liṅta, an pakalakṣaṇa tayā, cetanā tan pacetana kunaṅ, kari sira, sumahur saṅ para, vāhya ṅaranikātah, yan cetanā saṅ hyaṅ paramārtha, tayā pisaniṅu juga sira, alәṅis tan avayavi, ya ta sinaṅguh śūnya ṅaranya, ya ta sinaṅguh niṣkala ṅaranya liṅ saṅ para maṅkana, ndi ta deśanikaṅ tayā maṅkana, kapan tikiṅ rat kabeh tәka tan hana, sumahur saṅ para, hilaṅ tәkekiṅ rat dlāha, apan tayā saṅkanya ṅūni, apa dumeh ika rat hana vәkasan hana juga tan pakanimitta, hana hana tan pakapūrvakaṅ ginave, maṅkana yan hilaṅ tan hana humilaṅakәn ya, maṅkana liṅ saṅ para, tamatan dadi vastu tan pacetanā, gumaveyāvaknya hana lāvan tayā, kadyaṅgāniṅ lәmah, tan dadi ikaṅ gumaveyāvaknya, saṅ apa gumave hananya mvaṅ hilaṅnya, yan kva liṅa saṅ para, bhaṭāra saṅ hyaṅ paramārtha ṅaranira liṅ mami,

sira vәnaṅ maṅhilaṅakәn maṅhanākәn, apan sira prabhu, vәnaṅ makecchā ikaṅ rat kabeh, sira vicitrān tәmәn, vәnaṅ maṅhilaṅakәn pāpa lāvan lāra, nāhan kadibyan bhaṭāra kinabhaktyan, sumahur saṅ para, hana kapva saṅ hyaṅ paramārtha liṅta, hana sira, ndātan palakṣaṇa, tan pāvak, tan katon, tan kagamәl, tan vәnaṅ inaṅәn-aṅәn, ya sinaṅguh sūkṣma ṅaranya, sumahur saṅ para, avyāhata tañaṅkva vuvusta, sumahur saṅ paramārtha sakāmakāma, tathāpi lakṣaṇā, yan kva liṅa saṅ para, tan katon tah saṅ hyaṅ paramārtha, ndān kāryanira ya katon, ndya gavenira, nyaṅ tiryak lāvan ikiṅ aṇḍabhuvana, tәlas karuhun janma mānuṣa, yeki gavenira, sumahur saṅ para, apa pramāṇanta sumiddhākәn ikā pakṣanta, apa tan pratyakṣa katon bhaṭāra, gumave ikiṅ aṇḍabhuvana, mvaṅ tiryak lāvan janmamānuṣa,

yan kva liṅa saṅ para, nihan śakti bhaṭārān hane kita, ndya ta ya, nihan, ya dumeh kita vruh iṅ heyopadeya, ikiṅ saṅ dumeh kita maṅhiḍәp, suka duhka ri śarīra, ya tekā jñānaśakti bhaṭāra ṅaranya, cetanāmaya dumehnikaṅ rat mahuripa kabeh, rasekā ri hatinta, hana kari sira, tayā kari sira, suṅguh tayā vruh lumakṣaṇe sira, ya tikā dumeh ṅaranya, nihan sahur saṅ para, kadi śakti bhaṭāra cetanā, apan papupulniṅ śarīra ikā magave hiḍәp, ya ta sinaṅguh cetanā ṅaranya, yan maṅkana liṅa saṅ para, mapekaṅ vvaṅ mati maṅipi hana śarīranya tan vikāra, apekā tan pañetanā, māvasānaṅ avuka juga, nahan byaktanikaṅ mithyājñānānaku,

sumahur saṅ kumāra,

kevala salah pveka mithyājñāna sājñā bhaṭāra, apa dumeh ikā maṅkana, kasihana varahәn rānak bhaṭāra, maṅkana liṅ saṅ kumāra,

sumahur saṅ hyaṅ,

nihan prastāvanikā mataṅnyan maṅkana, jñāna bhaṭāra kāla ikā, saṅ pinakāvak bhaṭāra yan pamralayākәn rat, nahan mūlanikaṅ mithyājñāna,

yapvan hanā viku maṅkana jñānanya dlāha, yekā paṅavruhananta tәka mahāpralaya, maṅkana liṅ bhaṭāra,

sumahur saṅ kumāra,

apa ta upāyaniṅ janma yan maṅkana, yatanyan tan kavava riṅ mithyājñāna sājñā bhaṭāra, kasihana varahәn rānak bhaṭāra, maṅkanā liṅ saṅ kumāra,

sumahur bhaṭāra,

nihan deyani janma yan mahyun samyajñāna, tәlu kvehnya, pratyakṣapramāṇa, anumānapramāṇa, āgamapramāṇa, nāhan saṅ pramāṇa tәlu ṅaranya, pratyakṣapramāṇa ṅaranya, ikaṅ vastu tan parakva, yekā pratyakṣapramāṇa ṅaranya, anumānapramāṇa ṅaranya, hana vastu tan katon, ndan siddha hiḍәpniṅ vvaṅ iriya, apan hana cihna paṅavruh iriya, nihan padanya, kadyaṅgāniṅ deśa ri sabraṅ, dadi hiḍәpniṅ vvaṅ riṅ hananya, apan hana katon ikā vvaṅ dudū rūpanya kadyaṅgāniṅ brāhmaṇa lāvan pujut, nambi,

parasi, ya tikā tinonta, athavā hana kәta vastu tan katon, ri deśa ri nūsa kahananya, kadyaṅgāniṅ maṇik, kasturi, kapur kunaṅ, yekā byaktanyān hana nūsa ri sabraṅ, ikā ta jñāna humiḍәp hananikā, yekānumānapramāṇa, āgamapramāṇa ṅaranya, varah-varahniṅ vvaṅ saṅke deśāntara, ndān yan pacihna ikā, yāpvan tan pacihna adva ikā, yapvan hana cihna, ya ta sinaṅguh āgamapramāṇa ṅaranya, nāhan yaṅ pramāṇa tәlu ṅaranya, yatānyan tan kasasar i jñāna, tinut saṅ viku,

saṅ sinaṅguh paṇḍita, tatan vruh ulun ri lakṣaṇanira, matanyan maṅkana hulun apan bhaṭāra paramārtha rakva pinakahuripniṅ rat kabeh, lāvan saṅ paṇḍita, apa mataṅnyan tan vavaṅ sātmaka ri bhaṭāra, maṅkana liṅ saṅ kumāra, sumahur bhaṭāra,

hana kәtah mala ṅaranya, anuṅ rumakәt ri ātmā, ya tekā tan vavaṅ hilaṅ, apan ivәṅ-ivәṅ ikaṅ citta lāvan ātmā, ya tekātәguh sumaputa ri sarvajñāniṅ ātmā, yapvan hilaṅ ikā, niyata saṅ yogīśvarān sātmaka ri bhaṭāra, maṅkana liṅ bhaṭāra,

sumahur saṅ kumāra,

aparan iku sinaṅguh ātmā ṅaranya, ndi ta saṅkanikaṅ mala, kasihana ṅhulun varahәn maṅkana liṅ saṅ kumāra,

nihan pavarahaṅkva ri kita, ikaṅ sinaṅguh ātmā ṅaranya, bhaṭāra saṅ hyaṅ paramārtha, sira sinaṅguh śiva parameśvara, sira ta kaharan āditya, padanira lāvan āditya, ikanaṅ cetanā, ya kaharan tejanira yar āditya, luṅhā pva teja saṅ hyaṅ āditya, lumrā ri daśadeśa, maṅkana tekaṅ cetanā, apan savibhuḥ bhaṭāra humibәkiṅ rāt kabeh,

hana ta māyātattva ṅaranya, sūkṣma padālitnya lavan śivatattva, ndān acetanā kasornya saṅkeṅ śivatattva, deśanya i sor saṅkeṅ śivatattva, yeka tambhayni mamuvus tattva maganal, i sornikā, hana ta kalātattva ṅaranya, i sornikaṅ kalātattva, hana ta rāgatattva, i sorni rāgatattva, hana ta vidyātattva, i sorni vidyātattva, hana ta i sverniṅ pradhānatattva, i sorniṅ pradhānatattva, hana ta triguṇatattva, i sorniṅ triguṇatattva, hana ta buddhitattva, i sorni buddhitattva, hana tāhaṅkāratattva, i sorniṅ ahaṅkāratattva, hana ta manahtattva, i sorni manahtattva, hana ta daśendriyatattva, i sorniṅ daśendriyatattva, hana ta pañcatanmātratattva, i sorniṅ pañcatanmātratattva, hana ta ākāśatattva, i sorniṅ ākāśātattva, hana ta bāyutattva, i sorni bāyutattva, hana ta tejatattva, i sorniṅ tejatattva, hana ta āpyatattva, i sorniṅ āpyatattva, hana ta pṛthivītattva, yeka vәkasniṅ mamuvus tattva, maganal, ika ta kabeh, ya binyāpakan saṅ hyaṅ ātmā, astam bhaṭāra paramakāraṇa, ya mataṅnyan vibhuḥ śakti bhaṭāra vaneh

ndan lakṣaṇanikaṅ saṅ hyaṅ ātmā, an byāpaka irikaṅ tattva samaṅkana, ūtaprota, ūta ṅaranya, kadyaṅgāniṅ miñak haneṅ pə̄han, maṅkana lakṣaṇa saṅ hyaṅ ātmā an byāpaka irikaṅ tattva kabeh, prota ṅaranya, kadyaṅgāniṅ tuntuniṅ maṇik maṅekadeśa, maṅkana lvirnikaṅ ātmā an haneṅ rat kabeh,

ikaṅ ātmā prota ya tekā caritaknānaku, prayatnā ta kita rumәṅә̄varahvarahku, ikaṅ ātmatattva, sarvajña sarvakāryakartā pinakaśaktinikā, vibhuḥ pva ya rikā māyātattva, hilaṅ ta śaktinikaṅ ātmā vәkasan, mari sarvajña, mari sarvakāryakartā, apan mala svabhāvanikaṅ māyā, rumakәt pvekaṅ mala riṅ ātmā, ya ta mataṅnyan mapuṅguṅ svabhāvanya, tuhun cetanāmātra juga ya, vibhuḥ pva ya rikaṅ kalātattva, mapalenan ta ya lavan bhāvanya, kadyaṅgāniṅ anakniṅ tavvan an hana riṅ salyaṅ, maṅkana tekāṅ ātmā an papalenan saṅkeṅ bhāvanya, makaśarīra ikaṅ kalātattva, byāpaka pva ya rikaṅ rāgatattva, mahyun ta ya mañetanā, byāpaka pva rikaṅ vidyātattva, manon ta ya viṣaya vәkasan, apan ikaṅ vidyātattva pinakasuluhnya, ya mataṅnyan panon viṣaya, ndya viṣaya tinonya, yekā pradhānatattva, lakṣaṇanikaṅ pradhānatattva, pәtaṅ tan pacetanā lupa pinakajātinya, cetana lavan pradhānatattva, ya tekā pinapaṅguhakәn de bhaṭāra, cetanā ṅaranya, tutur, pradhāna ṅaranya, lupa, tutur matәmu lāvan lupa, ya tekā maṅhanākәn triguṇa, sattva rajah tamah, lakṣaṇani sattva, prājñā mahaṅan, lakṣaṇaniṅ rajah, adrәs molah, lakṣaṇaniṅ tamah, abyәt apuṅguṅ ikā nāhan lvirni triguṇatattva,

saṅka ri triguṇa mәtu taṅ buddhi, lakṣaṇanya, nda bāhyadarśana ṅaranya, tan pacetana ikaṅ buddhi, ndan makacetanā ya, makacetanā ṅaranya, tan vruh ikaṅ buddhi, ndan kadi vruh ya, tan pahiḍәp ikaṅ buddhi, ndan kadi maṅhiḍәp ya, apan mәtu saṅke tattva rva, tattva rva ṅaranya, ātmā lāvan pradhāna,

saṅke buddhi mәtu tāhaṅkāra, lakṣaṇanya magave hurip lāvan maṅ aku, ndan lakṣaṇaniṅ ahaṅkāra ya, ṅaranya tәlu, si vaikṛta, si taijasa, si bhūtādi, ikaṅ ahaṅkāra si vaikṛta, ya tekā sattva svabhāvanya, ikaṅ ahaṅ kāra si taijasa, ya tekā rajah svabhāvanya, ikaṅ ahaṅkāra si bhūtādi tamah svabhāvanya, nāhan lakṣaṇaniṅ ahaṅkāra, an mijil saṅkeṅ buddhi, tәlu prakāranya, ikaṅ ahaṅkāra si vaikṛta, yekā saṅkaniṅ manah mәtu lāvan daśendriya, daśendriya ṅaranya, śrota, tvak, cakṣuh, jihvā, ghrāṇa, vāk, pāṇi, pāyu, upastha, pada, nāhan kvehniṅ indriya sapuluh, savәlas lāvan manah, lakṣaṇaniṅ manah mamikalpa,

sumahur saṅ kumāra,

takarin tuṅgal ikaṅ manah lāvan buddhi lavan ahaṅkāra, sājñā bhaṭāra,

sumahur bhaṭāra,

dudū ikā, apan lakṣaṇanya tan pada, byaktānyan tan pada, yan kva liṅanta, nihan ikaṅ buddhi adhyavasāya lakṣaṇanya, adhyavasāya ṅaranya, vruhniṅ ahala lāvan ahayu, lāvan niścaya ta ya, ikaṅ ahaṅkāra yekā magave hurip, lāvan prayatna maṅaku jñānanya, kunaṅ ikaṅ manah mamikalpa gavenya, liṅnya, kapan kunaṅ papaṅguha lāvan kahyunku, mvaṅ syapa mapaṅguhaknāku, apa karaṇaṅkvā kunaṅ, ndi deśa kapaṅguhanaṅkvā, nāhan lakṣaṇanikaṅ manah an pamikalpa, lāvan umahas ta ya riṅ daśadeśa, nāhan papalenan i manah sakeṅ ahaṅkāra lāvan buddhi,

ikaṅ ta katәlu, ya tekā cinetanā saṅ hyaṅ ātmā, anәhәr pinakasādhanān paṅgṛhīta viṣaya, ikaṅ śrotendriya ya, haneṅ taliṅa, ikaṅ tvakindriya, ya haneṅ kulit, ikaṅ cakṣuhindriya, ya haneṅ mata, ikaṅ jihvendriya ya haneṅ ilat, ikaṅ ghrāṇendriya ya haneṅ hiruṅ, nāhan taṅ pañcabuddhīndriya ṅaranya, ri denyan pakasahāya buddhin paṅgṛhīta vastuviṣaya, pañcakarmendriya ṅaranya, ikaṅ vakindriya ya haneṅ tutuk, ikaṅ paṇīndriya ya haneṅ taṅan, ikaṅ padendriya ya haneṅ suku, ikaṅ pāyvindriya ya haneṅ lәt, ikaṅ upāsthendriya ya haneṅ bhaga puruṣa, nāhan taṅ pañcakarmendriya ṅaranya, mataṅnyan karmendriya ṅaranya, apan makapūrva karmekā nimittaniṅ ātmān paṅgṛhīta viṣaya ikā, ikā ta kabeh, ya ta daśendriya ṅaranya,

tumambhәh pvekaṅ buddhi ahaṅkāra lāvan manah, ya ta sinaṅguh trayodaśakaraṇa ṅaranya, ya ta sādhananiṅ ātmān paṅgṛhīta viṣaya ikā, kāryanikaṅ ahaṅkāra si vaikṛta ikā kabeh, huvus ikāta,

nihan ta gavenikā ahaṅkāra si bhūtādi, hana pañcatanmātra ṅaranya, śabdatanmātra, sparśatanmātra, rūpatanmātra, rasatanmātra, gandhatanmātra, nahan taṅ pañcatanmātra ṅaranya, amijil saṅke ahaṅkāra si bhūtādi, ikaṅ ahaṅkāra si taijasa, yekā tumuluṅ si vaikṛta lāvan si bhūtādi, an pagave kārya,

nihan lakṣaṇanikaṅ śabdatanmātra, tutupi taliṅanta, hanekaṅ śabda karәṅə̄, yā tekā śabdatanmātra ṅaranya, sparśatanmātra ṅaranya, hana bāyu madrәs kahiḍәp denta, huvus pvekaṅ bāyūmirira kahiḍәpta tisnya ri kulit, ya tekā sparśatanmātra ṅaranya, nihan taṅ rūpatanmātra ṅaranya, sampun sumurup saṅ hyaṅ āditya, hana tejanira kavәkas atunu, ya tekā rūpatanmātra ṅaranya, rasatanmātra, ṅa, kadyaṅgāniṅ vvaṅ mamaṅan rasa mamanis mapahit, huvus pva ya hәnti, hana ta rasanya kavәkas riṅ tutuk, ya tekā rasatanmātra ṅaranya, nihan taṅ gandhatanmātra ṅaranya, kadyaṅgāniṅ hasәp caṇḍana, agaru kunaṅ, huvus luṅhā kukusnya, kavәkas taṅ gandha riya, ya tekā gandhatanmātra ṅaranya, nahan taṅ pañcatanmātra ṅaranya,

saṅke pañcatanmātra, mәtu taṅ pañcamahābhūta, nihan kramanya, ikā śabdatanmātra pamәtvakәn ākāśa, guṇanya śabda, lakṣaṇanya magave ugvan, sakeṅ sparśatanmātra, mәtu taṅ bāyu, lakṣaṇanya maṅulahakәn, guṇanya sparśa, sakeṅ rūpatanmātra, mәtu taṅ teja, lakṣaṇanya prakāśa panas, guṇanya rūpa, sakeṅ rasatanmātra, mәtu taṅ āpah, lakṣaṇanya mәlәs, guṇanya rasa, nәm prakāraniṅ rasāmanis, apahit, apәdәs, asәpәt, ahasәm, ahasin, yekā ṣaḍrasa ṅaranya, saṅke gandhatanmātra, mәtu taṅ pṛthivī, lakṣaṇanya, maganal makakāya, guṇanya ganda, nahan lakṣaṇanikaṅ pañcamahābhūta kavruhana, kunaṅ ikā maraṅkәpana ikaṅ vaneh, apan ikaṅ i sor ya kabyapakan denikaṅ i ruhur, ikaṅ ākāśa muṅgv i ruhur, tumut ta bāyu mataṅnyan rva guṇanya, śabda, sparśa, ikā bāyu mvaṅ ākāśa byāpaka riṅ teja, mataṅnyan tәlu guṇaniṅ teja, śabda, sparśa, rūpa, ikaṅ teja lāvan bāyu ākāśa, byāpaka riṅ āpah, mataṅnyan pat guṇaniṅ āpah, śabda, sparśa, rūpa, rasa, ikaṅ taṅ āpah, teja, bāyu, ākāśa, byāpaka riṅ pṛthivī, mataṅnyan lima guṇaniṅ pṛthivī, śabda, sparśa, rūpa, rasa, gandha, nāhan lakṣaṇanikān pavor guṇa ikaṅ pañcamahābhūta, ya ta ginave bhaṭāra bhuvana,

agәṅ ākāśa miṇḍuhur, ya ta sinaṅguh aṇḍabhuvana ṅaranya, devamānuṣatiryak, nāhan pinakesiniṅ aṇḍabhuvana, ikaṅ i ruhur satyaloka, ikaṅ i sor, yekā mahālokā, i sorniṅ mahāloka, tapoloka, i sorniṅ tapoloka, janaloka, i sorniṅ janaloka, svahloka, i sorniṅ svahloka, bhuvahloka, i sorniṅ bhuvahloka, yeki kahanantānaku, riṅ bhūhloka, ṅaran ikā saptadvīpa, saptārṇava, i sorniṅ bhūhloka, ya tekā saptapātāla ṅaranya, patuṅgaltuṅgalni ṅaranya nihan paṅavruhana, apatāla, hana i sornikā, vetāla, nitāla, netāla, gabhastitāla, vāratāla, rāsatāla, nahan patiṅkahnikaṅ pātāla, i sornikā, yekā mahānaraka, kvehnikā yeka tәlu puluh rva, patapnya, mahāraurava, i sorniṅ mahānaraka, yeki tāmragardabha, tan vā pәtaṅ katunan teja, i sornikaṅ tāmragardabha, ya toṅgvan saṅ hyaṅ kālarudrāgni, āpuy dumilah sadākāla,

i sornikā kulitniṅ aṇḍabhuvana, kumaluṅ i sor i ruhur iriṅan, i sorniṅ kulitniṅ aṇḍabhuvana, ya toṅgvan saṅ hyaṅ śatarudra kumuliliṅ ikeṅ aṇḍabhuvana, ikeṅ kahananta ya ta patimbunani tattva kabeh,

ndan lakṣaṇanikaṅ tattva hana ṅke, kapva umyāpakerikaṅ tattva maganal saṅkeṅ riya, nihan kramanya, bhaṭāra mahulun, byāpaka rikaṅ ātmā, ikaṅ ātmā byāpaka ri māyā, ikaṅ māyā byāpaka ri pradhāna, ikaṅ pradhāna byāpaka riṅ buddhitattva, ikaṅ buddhitattva, byāpaka riṅ ahaṅkāra, ikaṅ ahaṅkāra, byāpaka ri manah, ikaṅ manah, byapaka riṅ daśendriya, ikaṅ daśendriya byāpaka riṅ pañcatanmātra, ikaṅ pañcatanmātra, byāpaka ri pañcamahābhūta, nahan lvirnya, ya ta mataṅnyan pinakapatimbhunaniṅ tattva kabeh, ikaṅ bhūhloka kahananta maṅke, huvus maṅkana,

iṅәtiṅәt mūlaniṅ carita, prastāvanikaṅ cetanā saṅ para, dumeh saṅ yogīśvara tan vaṅvaṅ siddhi, ikaṅ ātmā jәnәk mañetanā, makanimitta mala, ya dumeh ya tan vruha ri jātinya, mahyun pva bhaṭāra vruha ri jātinira, ya mataṅnyan veh ya māvaka, huvusnyan māvak, mabheda ta ya rva, lakilaki lāvan anakәbi, ya tekā mamukti ṣaḍrasa, ṣaḍrasa ṅaranya, amanis, apahit, asәpәt, ahasin, ahasәm, apәdәs, yekā ṣaḍrasa ṅaranya, ya ta pinaṅanya ininumnya, matәmahan śukra riṅ anak laki, śonitāniṅ anakәbi, ikaṅ taṅ śukraśonitā pinapaṅguhakәnira lāvan ikaṅ kāma,

ikaṅ śukraśonitā hana ri garbhāvāsa, ya ta mavīja, yan akveh ikaṅ śukra saṅkeṅ śonitā, yekā dadi lanaṅ, yapvan akveh ikaṅ śonitā saṅkeṅ śukra, yekā dadi vadvan, yapvan pada kvehnya, ya ta dadi kәdi, valavadi, ikaṅ śukra ya dadi tahulan, otvat sumsum, ikaṅ śonitā ya dadi rah dagiṅ puhun vulu, ya sinaṅguh ṣaṭkośa ṅaranya, salvirniṅ makaśukraśonitā ya, maṅkana lvirni janma, yan devatā, yan mānuṣa, yan paśu, yan pakṣi, sarīsṛpa, sthāvara, maṅkanātah titahnyān katon mamaṅun śarīra, ikaṅ śabdatanmātra ya dadi taliṅa, ikaṅ sparśatanmātra, ya ta dadi kulit, ikaṅ rūpatanmātra ya ta dadi mata, ikaṅ rasatanmātra, yekā dadi ilat, ikaṅ gandhatanmātra ya dadi iruṅ, ya tekā pinakoṅgvaniṅ indriya,

sumahur saṅ kumāra,

takarin ikaṅ golaka sinaṅguh indriya sājñā bhaṭāra, maṅkana liṅ saṅ kumāra,

sumahur bhaṭāra,

dudū tekaṅ golaka saṅkeṅ indriya, aganal ikaṅ golaka, ikaṅ indriya sūkṣma ika, nahan lakṣaṇanyān dudū, taha pih tuṅgal ikā indriya lāvan golaka, yan maṅkana liṅanta, mapekaṅ maturu tan paṅgṛhīta viṣaya apan hana matanya tan panon, hana taliṅanya tan paṅrәṅə̄, mataṅan masuku makeruṅ,

ya mataṅnyan saviṣaya riṅ sūkṣma, apan ikaṅ manah ya tinutniṅ indriya, nahan byaktanyān dudū ikaṅ indriya saṅke golaka,

sumahur saṅ kumāra,

apa dumeh ikaṅ maturu matәguh huripnya sājñā bhaṭāra, apan hilaṅ tuturnya, kevala lupa juga svabhāvaniṅ turū, maṅkana liṅ saṅ kumāra,

sumahur bhaṭāra,

ikaṅ pañcabāyu yekānuṅ pinakahurip, apan ya ika mamaṅun śarīra, nihan kramanya, hana nāḍī ṅaranya, otvatni śarīra, hana hagə̄ṅ hana dәmit, buṅkah luṅguhnya ri hәyәhәyәhan, miṇḍuhur tәka ri pusәr, mapaṅ ta ya mareṅ suku, hana mareṅ valakaṅ hana mareṅ taṅan, hana miṇḍuhur mareṅ guruṅguruṅan, tәlu prakāraniṅ guruṅguruṅan, iḍā ṅaran ikaṅ i tәṅәn, yekā dalan i sәkul, piṅgalā ikaṅ i kivan, yeka havanni vvay, suṣumnā ikaṅ i tәṅah, yekā havan i bāyu, nāhan lakṣaṇanikān pinakaguruṅguruṅan, hana ta paṅnya vaneh miṇḍuhur tәka ri mata, lāvan riṅ taliṅa, ikaṅ dudū gāte ruhur miṇḍuhur, yekā tәka ri vunvunan, ya sinaṅguh śivadvāra ṅaranya, yekā tumuluy tәkeṅ gәgәr i valakaṅ, ikaṅ nāḍī malit kabeh, yekā mamәnuhiṅ kulit manuvuhakәn vulu, nāhan lvirnikā nāḍī riṅ śarīra,

ikaṅ taṅ nāḍī kabeh, yekā pinakoṅgvan i pañcabāyu ṅaranya, ri dadinyan lima gavenya, mataṅnyan lima kvehniṅ bāyu, nihan ṅaranya, prāṇa, apāna, samāna, udāna, byāna,

ikaṅ bāyu si prāṇa, ya ta> mataṅnyan umadәgi ikaṅ pañcabāyu kabeh prayatna rumәgәp gavenya, mvaṅ pinakośvāsa gavenya vaneh, uṅgvan ika ri dada, ri hiruṅ hiṅanya i ruhur, ikaṅ bāyu sy apāna, yeka muṅgu ri silit, ri pusәr hiṅanya vaneh, i ruhur, umiṅsor tәkeṅ suku, gavenya asorakәn pinaṅan, matәmahan tahi, ikaṅ ininum matәmahan әyәh, nāhan gave nikaṅ bāyu sy apāna, nihan gavenikaṅ bāyu si samāna, yeka hana ri hati, gavenya umava sārinikaṅ pinaṅan ininum, ri sarvasandhi kabeh, sārinikaṅ pinaṅan vinehnya matәmahana hampru, sārinikaṅ ininum, ya vinehnya matәmahana rah, sārinikaṅ inambuṅ vinehnya matәmahana rәhak, nāhan gavenikaṅ bāyu si samāna, nihan gavenikaṅ bāyu si udāna, sakvehni byāpāra miṇḍuhur, maṅәdapakәn mata lāvan aṅәlapinya nahan gavenya, ikaṅ bāyu si byāna, yeka muṅgv iṅ sarvasandhi kabeh, gavenya yekāmava matuha, lāvan maṅhilaṅakәn inak ambhәk, nahan bhedani gaveni bāyu, ya mataṅnyan pañcabāyu panaṅguh saṅ paṇḍita,

hana ta pratyekanya vaneh ṅaranya, nāga, kūrmāra, kṛkara, devadatta, dhanañjaya,

ikaṅ bāyu si nāga yeka matvab, si kūrmāra, yeka maṅgave kәtәgkәtәg ri avak kabeh, si kṛkara yeka maṅgave vahin, si devadatta yeka maṅvab, si dhanañjaya yeka maśabda, lāvan tan hilaṅ ika saṅkeṅ śarīra, yan tәkaṅ pāti, yeka maṅher i vaṅkay, nahan lakṣaṇanikaṅ bāyu an pinakahurip, ya dumeh ikaṅ maturū tan māti, apan ikaṅ bāyu tamolah cinetanāniṅ ātmā, yapvan māri ikaṅ ātmā cumetaneṅ ya, ikaṅ bāyu yan maṅkana, ya sinaṅguh māti ṅaranya, len saṅkeṅ rikā, ikaṅ nāḍī kahanan ikaṅ bāyu kunaṅ vikāra, mati atah ṅaranya, kadyaṅgāniṅ pinәraṅ rinacun, athavā tībraniṅ lara kunaṅ, nimittani nāḍī vikāra, ya nimittaniṅ pāti vaneh,

sumahur saṅ kumāra,

apa dumehniṅ ātmā māri cumetanerikaṅ bāyu sājñā bhaṭāra, lāvan apa dumehniṅ kalara tәka,

sumahur bhaṭāra,

nihan prastāvanikaṅ ātmā an māri cumetanekaṅ bāyu, hana dharmādharma ṅaranya, dharma ṅaranikaṅ gave hayu, adharma ṅaranikaṅ gave hala, ikaṅ taṅ dharmādharma, ya tekaṅ ginaveniṅ janma, ya tekā maphala, yan agə̄ṅ gavenya hala saṅkeṅ gave hayu, ya nimittanyān paṅhiḍәp lara, yapvan agə̄ṅ ikaṅ gave hayu saṅke gave hala, ya nimittanyān paṅhiḍәp suka, yapvan pada gavenya hala mvaṅ hayu, ya hetunikaṅ sukadukān kapaṅgih deniṅ janma, sәḍәṅ pva ya mamukti karmaphala, sumambi ta ya mamaṅun karmaphala muvah apan gave halahayu satatā lvirnikaṅ karmaphala, hana ta karma mәne ginave sādhananya, mәne kabhukti phalanya, hana ta karmaphala maṅke ginave sādhananya, hәlәm ri janma sovah yan kabhukti phalanya, apa byaktinya nihan, kadyaṅgāniṅ masavah, vadvā, masambevara,

pāri phalaniṅ masavah, dәmak phalani vadvā, tәvas phalani sambevara, nahan byaktinikaṅ karmaphala mәne, ndya karmaphala hәlәm phalanya, hana karma ginave maṅke ndatan vәnaṅ maveh phala maṅke, apa dumeh yan maṅkana, tan vәnaṅ maveh phala maṅke, apan akveh inapekṣanya, ya teka mapan i janma sovah, ikaṅ kabhukti maṅke, yeka phalanikaṅ karma ṅūni, ri janmāntara, ikaṅ phala bhinukti maṅke, ya tekā hәnti bhinukti maṅke, yan mahala, yan mahayu, padeka hәnti phalanya kabeh, ya ta hetuniṅ ātmā māri cumetanekaṅ kaṅ bāyu ri śarīra, padanya kadyaṅgāniṅ apuy manunvi kayu, yapvan hәnti ikaṅ kayu, pәjah ta pratyayanikaṅ apuy, maṅkana tekā ātmā, an phalaniṅ dharmādharma ya mamaṅun śarīra, lavan urip, hәnti pva ikaṅ karmaphala, ya ta hetuniṅ pāti apan tan hanaṅ bhinuktiniṅ ātmā,

nihan sahur saṅ para, kadi karmaphala kәtah mamaṅun hurip, mvaṅ tan ikā hetuniṅ sukaduka bhinukti deniṅ janma, mataṅnyan maṅkana, apan tan katon ikaṅ karmaphala riṅ janma, ya mataṅnyan tan hana karmaphala ṅaranya, apan tan byakta ya, yan kva liṅa saṅ pāra, ya donikaṅ pramāṇa tәlu pinintonakәn ṅūni pūrvaka pratyakṣapramāṇa, anumānapramāṇa, āgamapramāṇa,

ikaṅ aganal, ya kavәnaṅ denikaṅ pratyakṣapramāṇa, ikaṅ sūkṣma ya kavәnaṅ deniṅ anumānapramāṇa, kadyaṅgāniṅ kavuvus saṅ para, anumāna prasiddhā irikaṅ karmaphalān bhinukti deniṅ janma, sumahur saṅ para, tan byakta ṅaranikātah, apan tan vartamāna ri rāt kabeh, apan pratyakṣapramāṇa juga ri kami, yan kva liṅa saṅ para, nihan saṅ hyaṅ āditya, vartamāna katon deniṅ rat kabeh, saṅ mәtu vәṅi kari sira mәtu maṅke, athavā dudū kunaṅ, yāpvan dudū saṅ mәtu vәṅi lāvan saṅ mәtu maṅke, apa pva yan maṅke maṅke, tan papalenan pva rūpanira, apan ivәṅ-ivәṅ rūpanira jvalitanira tuvi pada, lāvan pada panasnira, tejanira, sumahur saṅ para, tuṅgal kәta saṅ hyaṅ āditya, saṅ mәtu vәṅi, sira mәtu maṅke, yan maṅkana liṅa saṅ para, ndi ta havannira maṅavetan, apan sumurup kulvan sira vәṅi, sumahur saṅ para, sumurup i sor i lәmah, havanira yan maluy maṅavetan, yan maṅkana liṅa saṅ para, ndi ta kitān ton sira maluy aṅavetan, lumaku i sor iṅ lәmah, ya kitāṅajarakәn tan tinonya ṅaranya, adva kitān yat amramāṇapratyakṣa juga, apan tan katon saṅ hyaṅ āditya, maluy aṅavetan,

maṅkana pva ya, ya mataṅnyan hana pramāṇa ṅaranya, anuṅ prasiddhā ri kahiḍәpannikaṅ vastu tuhutuhu, huvus rumuhun ikaṅ sūkṣma, ikeṅ pva ikaṅ karmaphala, atyanta sūkṣmanya, ya ta mataṅnyan anumānapramāṇa paniddhānta ri hananya, apan byaktanyan hana, nihan kaṅ sukaduka kapaṅguh deni janma, lāvan rūpanya tan pada,

hana ratu, hana vadvā uma, hana sugi hana duka hana varas, hana lara, nihan taṅ tiryak, magə̄ṅ madәmit, kaniṣṭhamadhyamottama, karmaphala nimittanikaṅ kabeh, sumahur saṅ para, nohan vvāgan ikātah, lāvan i janma tan pāda, kahadaṅadaṅ juga ikātah, yan kva liṅa saṅ para, dadyanku pvaṅ mamaṅan tan kәneṅ varәg, ikaṅ tan pamaṅan ya varәg, yan si kahadaṅadaṅ ya pakṣakna, lavan taṅ vīja tinanәm, kadyaṅgāniṅ pari pinakavinih, kahadaṅadaṅ pvekan pavvaha jahli, jahli tinanәma kahadaṅadaṅ pvekān pavvaha pari, maṅkana hamәṅan ikaṅ rat kabeh, yan si kahadaṅadaṅ pakṣakna, yāpvan si nohan si vvāgan pakṣakna, dadyaṅ vәtu tan pakanimitta yan maṅkana, kadyaṅgāniṅ kәdi amәtәṅānakanaka, kadyaṅgāniṅ mamәh susu vәtu i tahi, maṅkana hamәṅan ikaṅ rat kabeh, yan si nohan si vvāgan pakṣakna, tapvan dadi vastu maṅkana, ya mataṅnyan tan yogya pakṣakna saṅ para,

apa dumeh ikaṅ janma gumave ikā dharmādharma sājñā bhaṭāra, kasihana varahәn rānak bhaṭāra,

sumahur bhaṭāra,

nihan kavruhanantānaku, prastāvanikaṅ dharmādharma, kadadi deniṅ janma, enak kva pahiḍәpnikaṅ ātmā ri viṣaya, atәguh pasambaddhānya lāvan ikaṅ śarīra, ya tekā suka liṅnya, ya mataṅnyan pamet suka,

ikaṅ sukasādhana, ya ta ginṛhītaniṅ buddhi, ikaṅ buddhi ya ta mānaka jñāna, ikaṅ jñāna, ya ta mavṛtti limaṅ puluh kvehnya, ikaṅ vṛtti limaṅ puluh ya tekā mānak akveh tan kavәnaṅ vinilaṅ, ya mataṅnyan akveh prabhedaniṅ janma, akveh ta kahyunya, akveh ta lāranya, akveh ta sukanya,

vṛttinikaṅ buddhi limaṅ puluh, ya tekā ujarakna, nihan prakāranya, hana caturaiśvarya, vvalu kvehnikā lāvan baliknya, hana pañcaviparyaya ṅaranya hana aśakti vvalu likur kvehnya, hana ta tuṣṭi saṅa kvehnya, hana ta aṣṭasiddhi ṅaranya,

ndya ta lakṣaṇanikaṅ caturaiśvarya, anuṅ pinakavījaniṅ buddhi, yan sattva magə̄ṅ iriya, dharma ṅaranya nihan, hana jñāna mahyun rahayu, ikaṅ dharma maṅdadyakәn hayu, yekā inabhyāsanya, śīla rahayu, agәlәm ta ya mayajña, manah rahayu, agәlәm ta ya mabrata, manah puṇya kavәnaṅnya, utsāha ta ri samyajñānādhikṛtā ta ya, agәlәm ta ya mayoga, nāhan inabhyāsanya, ikaṅ ta gave kabeh, athavā salah tuṅgal rva tәlu kunaṅ gaveyakna, dharma ta, ṅaranya, nihan taṅ jñāna ṅaranya, ikaṅ jñāna maṅabhyāsa kapaṅguha saṅ hyaṅ paramārtha, ndan pramāṇa tәlu pinakasuluhnya, ikaṅ samādhi pinakasādhananya, ya sinaṅguh samyajñāna ṅaranya, vairāgya ṅaranya, ikaṅ jñāna tan aharәp ri suka, tan tṛṣṇa ri hurip, ndya suka ṅaranya, nyaṅ bhoga, upabhoga, paribhoga, bhoga ṅaranya, ikaṅ pinaṅan, upabhoga ikaṅ sinaṇḍaṅ, paribhoga ikaṅ kavula vәnaṅvәnaṅ, ikā ta kabeh,ikaṅ ta kabeh Ed. and cod. tan aharәp irika,

hana ta bhoga karәṅə̄, kadyaṅgāniṅ svarga kahyaṅan, tan ahyunātah irikā kabeh, parimāṇa drabyanya, drabyanya ṅaranya, huripnya, tan aharәpātah irika kabeh, ya ta sinaṅguh vairāgya ṅaranya, nihan taṅ aiśvarya ṅaranya, ikaṅ kinahanan deni bhoga upabhoga paribhoga, kinatvaṅan deni padanya janma, ya aiśvarya ṅaranya, ikaṅ ta kapat, ikaṅ dharma, jñāna, vairāgya, aiśvarya, vījani buddhīka kabeh, ndan yan agә̄ṅ sattvaniṅ buddhi ika, yan pakavīja caturaiśvarya, yapvan tamah agə̄ṅ balikni caturaiśvarya, pinakavījanya,

ndya baliknya nihan, adharma, ajñāna, avairāgya, anaiśvarya, adharma ṅaranya, ikaṅ ambhәk manayākәn gave hayu, liṅnya, pradānanikaṅ vvaṅ mapuṇya, mabhojana maveh sәkul tәvas hәnti drabyanya, tan iya ta maphala svarga, maṅkana mamaṅun prāsāda, maṅulur liṅga, mahoma, maṅkana liṅnya ri buddhinya, manayākәn dharmān āgәṅ tamahnya, nihan taṅ ajñāna, ikaṅ ātmāpuguṅ apan tan hana tinutnya, luput saṅkeṅ pratyakṣapramāṇa, anumānapramāṇa, anaiśvarya ṅaranya, duhka sadākāla, nahan kabaliknikaṅ caturaiśvarya, ya tekā pinakavījani buddhi, yan tāmasa ◆

apa byaktiniṅ phalanya, ndya, phalanya nihan, ikaṅ janma yan paṅabhyāsa dharma, yekā nimittanyān kavaveṅ svarga, salvirni bhoga bhinuktinya, hәnti pva phalanikaṅ gave hayu, maṅjanma ta ya riṅ devatā, alavas ya dadi devatā, maṅjanma ta ye mānuṣa, ya tekā dadi ratu, athavā vvaṅ sugih kṛtapuṇya kunaṅ dadinya, apan vәkasnikaṅ bhoga ri svarga ya tumut ri mānuṣa, nihan ta phalaniṅ samyajñāna, yan dadi samādhinya ri bhaṭāra, makasādhana pramāṇa tәlu, sira ta paṅasthūlan bhaṭāra, kadi kasiddhyan bhaṭāra kasiddhyanira, lavan kāṣṭaiśvaryan bhaṭāra, yatanyan valuya janma, apan sakāmakāma sira, asiṅ sakahyunira dadi, sakaharәpnira tәka, nahan kadibyanni samyajñāna yan pinakavījaniṅ buddhi, nihan ta phalani vairāgya, yeki līna riṅ prakṛtiloka, kadi sukaniṅ maturū lvirnikaṅ suka bhinuktinya ṅkāna, salavasnya hana ri prakṛtiloka, maṅjanma ta ya devatā, nahan phalaniṅ vairāgya yan pinakavījaniṅ buddhi, nihan ta phalaniṅ aiśvarya, sira ta prabhu riṅ svarga, ṅke ikaṅ bhoga binuktinya, ri vәkas maṅjanma ta ya devatā, nahan ta phalaniṅ aiśvarya yan pinakavījaniṅ buddhi,

nihan ta phalani baliknya, ikaṅ ambhәk manayākәn gave hayu, māti pva ya dlāha, yekā dadi triyak, paśu, mṛga, pakṣi, sarīsṛpa, sthāvara, paśu ṅaranya, kadyaṅgāniṅ sattva tamolah riṅ ārya, kәbho, sapi, asu, vәk, prakāra, mṛga ṅaranya, ikaṅ sattva tamolah riṅ alas, kadyaṅgāniṅ kidaṅ, mañjaṅan, ityevamādi, pakṣi ṅaranya saprakāraniṅ mәr, kadyaṅgāniṅ manuk,

sarīsṛpa ṅaranya, ikaṅ pvāṅlāh makapaṅlaku dadanya, kadyaṅgāniṅ ulā, lintah, vәdit, irispoh tәktәk lәtuh, sthāvara ṅaranya, kayukayu, odvad, dukut, nahan pratyekaniṅ triyak, ya tikā tәmahaniṅ janma yan pinakavīja adharma, nihan phalaniṅ ajñāna, ya teki maputәran ri devamānuṣatriyak, lāvan svarganaraka, apan akveh ikaṅ gave halahayu kavaṅun denya, ṅūni, punah vvaṅ janmanya, phalaniṅ gavenya hala mvaṅ hayu tan dadi tan kabhukti, ya mataṅnyan kapaṅguh ikaṅ cakrabhāva denya, nahan phalaniṅ ajñāna, yan pinakavījaniṅ buddhi, nihan phalaniṅ avairāgya, yekā mәnәr mare naraka, salvirniṅ lāra bhinuktinya, yan akveh pāpanya, alavas ya haneṅ yamani, yāpvan akәdik gavenya hala, ya ta vineh madadya janma mānuṣa muvah, yekā dadi vvaṅ vikāra, tan ya pada lāvan saṅsārajanma, vudug, vuta, vuṅkuk, tuli, rudan, ayan, vikәt, siṅkәl, bisu, nāhan tәmahanya, nihan ta phalani anaiśvarya, yekā kinasampayan, lāvan tan ya maṅguh sakaharәpnya, mataṅnyan kapanasan sadākāla, momo pvekā manahnya, kadadi taṅ śīla mahala denya, dadi ya mahabәt, maliṅ manumpu, phalaniṅ gavenya maṅkana, ya mataṅnyan tibā ri naraka,

hәnti pva phalani gavenya hala, sinavurakәn ta ya ri madhyapada de saṅ yamabala, ya ta dadi pipīlika, nahan phalani anaiśvarya, yan pinakavījani buddhi, ikaṅ ta kabeh ya tekāpusniṅ janma, anuṅ dumeh yāhiḍәp duhka satatā, ya sinaṅguh saptabandhana ṅaranya, pitu apus apus pitu ṅaranya, nihan ikaṅ inajarakәn kabeh, ndya inajarakәn, yan kva liṅanta, yeki dharma, vairāgya, aiśvarya, adharma, ajñāna, avairāgya, anaiśvarya, nāhan yaṅ saptabandhana ṅaranya, yan apa yan hәnti sasaṅkeṅ cakrabhāva, ya ta karih, yan maṅkana liṅanta, yan paṅguh ikaṅ samyajñāna juga, apan dumeh ikaṅ ātmā maluya ri bhaṭāra paramakāraṇa, maṅkana liṅ bhaṭāra,

sumahur saṅ kumāra,

kāsihana rānak bhaṭāra, varahәn ri sādhananiṅ magave samādhi, maṅkana liṅ saṅ kumāra,

sumahur bhaṭāra,

mәne ikājarakna kaliṅniṅ yogapāda, kunaṅ vījanikaṅ buddhi vuvus hәnti muvah ◆

hana pañcaviparyaya ṅaranya, lvirnya, tamah, moha, mahāmoha, tāmisra, andhatāmisra

tamah ṅaranya, ikaṅ ambhәk mahyun mamukti, ikaṅ bhogaviṣaya, apan iki ya pamuktyananta viṣayasuka, ya mataṅnyan prihtaṅ kasugihan, mahәmāsa, manaṇḍaṅa, mahulun mastrī rahayu, apan tan hana lәviha sakeṅ sukaniṅ dadi vvaṅ, maṅkana liṅnya, ya ta mataṅnyan parәmәni amet bhoga sakala, yekā tamah ṅaranya ◆ nihan taṅ moha ṅaranya, hana rakva lәvih saṅkeṅ māvak, siddhi rakva ṅaranya, dadi māvak dadi tan pāvak, yekā kaharәpku tәmunәṅku, marapvan vәnaṅ humalap sakaharәpku, ya moha ṅaranya ◆ mahāmoha ṅaranya, ikaṅ ambhәk mahyun maṅgihakәna kasiddhyan, donanya kapaṅgihaniṅ aṣṭaiśvarya deku, muktya tāku riṅ svarga mvaṅ mānuṣaloka, yekā mahāmoha ṅaranya ◆ tāmisra ṅaranya, ikaṅ ambhәk maharәp rumaṅkәpanaṅ dveṣa viṣaya, lavan aṣṭaiśvarya ya tāmisra ṅaranya ◆ andhatāmisra ṅaranya, ikaṅ ambhәk humalaṅakәn ikaṅ sukānāgata, lavan humālaṅ ya huvus hilaṅ, ikā ta kalih, ya tekā pinakavījaniṅ buddhi yan agə̄ṅ tamahnya, mamuhāra saṅsāra ika kabeh ◆

hana ta navatuṣṭi ṅaranya, ikaṅ ambhәk matis, pradhānaka, upādānaka, akāla, abhāgya, nahan taṅ ādhyātmikatuṣṭi ṅaranya,

pradhānakatuṣṭi ṅaranya, hana vvaṅ tumon halani śarīranya, ndātan paṅlareri manahnya, paran kunaṅ mahala śarīraṅku, mahala kunaṅ gaveṅku ṅūni, ya ta maphala śarīraṅku maṅke, kunaṅ yatanyan lituhayu ike janmaṅku sovah, ndāk amrih magave hayu maṅke,

salvirniṅ makaphala lituhayu ri janmaṅku sovah, ya gavayaknaṅkva maṅke, maṅkana liṅnya, lumәkas ta ya magave hayu, brata, yan yajña, yan jñāna kunaṅ, yeka pradhānakatuṣṭi ṅaranya, hana ta upādānakatuṣṭi ṅaranya, ikaṅ ambhәk tan malara kavәkasan hutaṅ deni kavvatanya, athavā svabhāvani kavvatanya, kunaṅ ikaṅ gumave kaluputaknani kavvatanya ri saṅsāra, ya ta ginavayakәn ya tan arusuh, yekā upādānakatuṣṭi ṅaranya, hana ta akālatuṣṭi ṅaranya, hana vvaṅ manomahnomah, ndan inaṅgәh ta ya deni raranya, ikaṅ ambhәk mabhaya pinadәmnya riṅ ambhәk matis, yeka akālatuṣṭi ṅaranya, abhāgyatuṣṭi ṅaranya, ikaṅ vvaṅ mandabhāgya, tan pamaṅguh inak ambhәk salavasni dadinya, saṅka ri larany ambhәknya, umәgil ta ya ri saṅ vruh maṅaji saṅ paṇḍita guruni rat kabeh, sira ta panambhahanya, patatakvananya ri prāya, vinarah ta ya de saṅ paṇḍita, kinon ta ya maṅabhyāsa vidhi, enak tāmbhәknyān paṅabhyāsa, ya tekā abhāgyatuṣṭi ṅaranya,

nihan taṅ vāhyatuṣṭi ṅaranya, hana vvaṅ luput saṅke viṣaya, kadyaṅgāni vvaṅ maharәp maraby ahayu, mamaṅana enak, manaṇḍaṅa dodot rahayu kunaṅ, huvus pva kapaṅguh denya, tuṣṭi hatah ṅaranya, hana ta vvaṅ matәmu lāvan kasihnya, tuṣṭi hatah ṅaranya, hana vvaṅ mamet drabya, athavā mamet guṇa kunaṅ huvus kapaṅguh ikaṅ pinetnya, tuṣṭi hatah ṅaranya, hana ta vvaṅ huvus siddhikāryanya ikaṅ sapinetnya, tuṣṭi hatah ṅaranya, hana ta vvaṅ malāra sakit, halvaṅ pva lāranya, tuṣṭi hatah ṅaranya, hana ta vvaṅ mamunuh kәbho sapi paṅanәnya, tuṣṭi hatah ṅaranya, nahan taṅ navatuṣṭi ṅaranya, pinakavījaniṅ buddhi ika kabeh ◆

nihan taṅ aṣṭasiddhi ṅaranya, dāna, adhyayana, śabda, tarka, sauhṛdaya, trayo duhkavighāta, nahan taṅ aṣṭasiddhi ṅaranya,

dāna, ṅaranya, saṅ vәnaṅ umehakәn kāyanira riṅ saṅ paṇḍita, lavan ri saṅsārajanma kunaṅ, lvirni vinehakәn, tәlu prakāranya, kāya, śabda, ambhәk rahayu, nihan ta kapirvan i kasiddhyan, saṅ vәnaṅ maṅāji śāstra purāṇa, tattvajñāna kunaṅ, siddhi hatah ṅaranika, śabda ṅaranya, hanātah huvus maṅabhyāsājinira, dadi sira siddhavākya savuvusnira siddhi, athavā sira dadi maṅrәṅə̄ śabda sakeṅ sūkṣma, saṅka ri tibrani paṅrәṅə̄nira, siddhi hatah ṅaranikā, hana tarkasiddhi ṅaranya, ikaṅ jñāna ton ikaṅ atītānāgatavartamāna, siddhi hatah ṅaranikā, hana ta huvus manәmu guru viśeṣa, siddhi hatah ṅaranikā,

hana ta vәkasnikaṅ kasiddhyan saṅ viku, saṅ yogīśvara juga, apan sira vәnaṅ humilaṅakәn ikaṅ duhka tәlu ṅaranya, hanādhyātmikaduka ṅaran ikā, hanādhidaivikaduhka ṅaranya, hanādhibhautikaduka ṅaranya, rva prakāranikādhyātmikaduka ṅaranya, mānasa, lāvan śārīra, mānasa ṅaranya, kāma, krodha, lobha, bhaya, asūyā, kāma ṅaranya hyun, krodha ṅaranya, galak, lobha ṅaranya, tan pahuvusan maṅarjana dravya, bhaya ṅaranya, takut, asūyā ṅaranya, ikaṅ gәlәm tan vәnaṅ malәs, nahan taṅ duhka saṅkeṅ manah,

nihan taṅ duka saṅkeṅ śarīra, orәm, gigil, śūlān, lārahatin, puyәṅ, kuris, saprakāraniṅ lārān pasaṅkan, yekādhyātmikaduhka, ya tikā hinilaṅakәn saṅ yogīśvara, ādhidaivikaduka ṅaranya, sinambhәr i gәlap, edan, kapasuk iṅ gaṇa bhūta, lāvan piśāca, yeki ādhidaivikaduka ṅaranya, kunaṅ ikaṅ pinәraṅ, pinalu, rinacun, tinәluh, pinatuk iṅ ulā, pinaṅan iṅ vuhaya, saprakāraniṅ lāra saṅkeṅ havak, yekādibhautikaduka ṅaranya, ikā ta kabeh, ya ta hilaṅ de saṅ yogīśvara,

sumahur saṅ kumāra,

kunaṅ apa ta denira saṅ yogīśvārān humilaṅakәn kalāra samaṅkana sājñā bhaṭāra, maṅkana liṅ saṅ kumāra,

sumahur bhaṭāra,

hәlәm ikā hujarakna riṅ yogapāda, apan tan hәnti vṛttinikaṅ buddhi vaneh, ndya vṛttini buddhi vaneh, yan kva liṅanta, hana aśakti ṅaranya, vvalulikur kvehnya, lakṣaṇanya yekā kavruhananta,

ndya ya, yekiṅ daśendriya, tan vәnaṅ humiḍәp riṅ viṣayanya, taliṅa tuli, kulit vudug, mata tan panon, ilat bisu, iruṅ apalәh, tutuk vulaṅun, tan aharәp maṅkana kunaṅ, taṅan kiṅkiṅ, suku lumpuh, silit mrәdu, tan vәnaṅ aṅisiṅ kunaṅ, pәlāt kәdi, nahan lakṣaṇanikaṅ daśendriya, an tan vәnaṅ ri viṣayanya, aśakti hatah ṅaranya,

hana ta baliknikaṅ navatuṣṭi lāvan aṣṭasiddhi, nihan lakṣaṇanya, apradhānaka ṅaranya halani śarīranya, prastāvanyān paṅimpuluniṅ magave hala, anupādānaka ṅaranya, hutaṅnya hiḍәpnya hutaṅni kavvatanya, dadi ya miṅgat, akāla ṅaranya, tan vәnaṅ sumorakәn taṅgәhni raranya, dadi ya muṅpaṅ, tan vәnaṅ tumambhāni sakahinani avaknya, moha ta ya, tan apilih salviranya, viṣayānurasa, hana vvaṅ tumәmu kaharәpnya, ndan lobha ta ya, tan patambhān ikaṅ huvus kapaṅguh denya, hana mabhojanāsukha, alәmәh magave ya, hana tan vәnaṅ rumakṣa hayunya, mvaṅ kalituhayunya, arabi laraṅan, mahәmas tinotohakәnya ri savuṅ judi nita, mahurip an pamuk pva, hana kṣayarāga, hana vvaṅ malāra ndātan tambhān, avәdi maṅinuma mapyak mapahit, matakut mabhaya ri saṅ manambhā,

hana vvaṅ tan patәmu lāvan kasihnya, anaṅis tan vәnaṅ mukti drabyanya, nahan baliknikaṅ navatuṣṭi, aśakti hatah ṅaranikā,

hana ta balikni aṣṭasiddhi, adāna, tar dadi maveveh, astham agaveya dharma, anadhyayana, tan paṅaji, tvas āji svataḥniṅ ṅvaṅ, tan byakta vruha ri viśeṣa, anaśabda, tan paṅabhyāsa kasādhakan, an aku hyaṅ, apa ta gaveyaniṅ mamrih, tvas prihatin ṅvaṅ denya, anatarka, tan katon ikaṅ atītānāgatavartamāna, asauhṛdayaḥ, tan paguru viśeṣa, maguru matәka, ndān kadi parahu vatu, vvādәs maṅәntasakna ri saṅsārasamudra, ya mataṅyan paṅәlәmakәn riṅ mahānaraka,

ndya guru maṅkana marәki riṅ mahānaraka, nihan paṅavruhana, liṅnya, kitātah kahanan bhaṭāra sakala, apan yeki magave liṅga mamaṅun prāsāda, maṅanākәn poya, maṅhanākәn pinaṅan ininum, yeki kahanan saṅ hyaṅ paramārtha, mamaṅan maturū saṅ hyaṅ ikā, lumaku, maluṅguh, asiṅ atah, tulah saṅ hyaṅ ikā kabeh, nora salah ikā kabeh maṅkana liṅnya, ya mataṅnyan dadi humulahakәn apacāra, apan tan hanāpa liṅnya, dadi ya muṅpaṅ, dadin paṅahala dravyaniṅ vaneh, tan apa ikā yan tuhutu kita, apan tuhutu ṅaranya, hayva vәdi pati, apan yekā mahañutan ṅaranya, asiṅ mārganiṅ pati ta pva, apan si pati ikaṅ sinaṅguh kamokṣan ṅaranya,

maṅkana liṅni gurunya, yekā guru manәbakәn i naraka ṅaranya, aśakti ṅaranya, ṅke ri vṛttiniṅ buddhi ◆

nihan taṅ dukatrayavighatah ikā tan vәnaṅ humilaṅakәn dukatraya, apan tan paṅabhyāsa samādhi, mataṅnyan tan paṅabhyāsa samādhi, apan tan maṅkana rakva paramārtha liṅnya, tuhu mata saṅ hyaṅ paramārtha luput saṅkeṅ yoga lāvan samādhi, apan buddhi sira, huvus karuhun ikaṅ rāga dveṣa moha lāvan śarīra tan hana ikā ri bhaṭāra, apa deniṅ samādhi ri sira, apan sira pva deni samādhinira saṅ viku mvaṅ saṅ yogīśvara, yatanyan pada lāvan bhaṭāra, inakunya pvāvaknya pada lāvan bhaṭāra, tan vәnaṅ humilaṅakәn dukanya tәlu, ya ta mataṅnyan aśakti ṅaraniṅ buddhi yan maṅkana,

sumahur saṅ kumāra,

kuraṅ tuṅgal ta vәkas ikaṅ aśakti yan tәka vvalulikur, ndya gәnәpanya,

nihan yaṅ manah mabalik, apan lakṣaṇaniṅ manah mamikalpa, tapvan vәnaṅ mamikalpa, ya ta sinaṅguh medan ṅaranya, nāhan gәnәpnikaṅ aśakti vvalulikur, ikā ta kabeh, nimittaniṅ ātmasaṅsāra apan mamaṅguh vāsanā ikā kabeh riṅ citta, vruh pva saṅ paṇḍita, an makveh vāsanānikaṅ pāpa rumakәt, riṅ citta, ya ta mataṅnyan saṅ viku, matakut ri saṅsāra lāvan duka, hayva jәnәk ri byāpāra riṅ śarīra, huvus karuhun ikaṅ śīla hala hayva ta ginavayakәn, apan yeka mamuhāra lara lāvan saṅsāra, aparan yogya gaveyakna takarih, nyaṅ trikāya paramārtha, ulah rahayu, śabda rahayu, ambhәk rahayu, don ikā sādhananiṅ maṅabhyāsāṅambhәki bhaṭāra,

nihan varah-varah bhaṭāra yeki dәlәn iṅәt-iṅәtәn tәmәn-tәmәn, rāsāna ri hati, apan iki mārga bәnәr, yapvan hana marah ri kita riṅ hayu, ndān apasalahan lavan loka maṅruddha lāvan vvaṅ kabeh tālap hayva vinahil, ndan hayva ta ginavayakәn, yan paropaghāta gumavayakәn dukaniṅ vaneh apan jātiniṅ magave hala, hala tәkeṅ śarīra, yapvan pagave hayu, hayu tәkeṅ śarīra hayu pva kahyuniṅ rat, ya mataṅnyan hayvātah gaveyaknanta hala hәlәm, ikaṅ luput saṅkeṅ guṇadoṣa, maryada parilobha mvaṅ doṣa, yāvat kita luput saṅkeṅ lokabyāpāra, tāmrih ta gave bhakti riṅ bhaṭāra, apan sira śaraṇani vәnaṅ maṅhilaṅakәn pāpa, sira dumeh ṅ vvaṅ amaṅguha suka viśeṣa, ikaṅ inak tan pabalik lara, hurip tan pabalik pati, milv agave tan ilu ginave, vruh tan kinavruhan, ya phalani bhakti ri bhaṭāra,

kunaṅ tәkapniṅ magave bhakti, ya takvānaknanta riṅ saṅ guru, kāṅәnaṅәnātah saṅsāraniṅ dadi janma, si hurip makāvasānaṅ pati, iki pati ṅaranya, viparīta tan hana tuturnya, apan kapasuk ri tamah, vәṅi tan pakanimitta, tayā riṅ āditya,

ya ta kalavasan ṅaranya, balikni hurip lalu tan hinaknya, maṅkana tәhәr hayvāṅhiḍәp sukaduka, kunaṅ tāpan pavārte janma, kadi kvehniṅ hilaṅ kvehni mәtu, ya ta panәṅәranta an pajanma muvah ikaṅ ātmā, huvus rumuhun ta yan hana vvaṅ jātismara, meṅәt ri dadinya ṅūni, tan salah denya tumuduh kavitanya ṅūni pūrvakah lāvan ṅaranya dravyanya, nahan hananyān atutur apa tan hanaṅ tuduhnya ikā kabeh, lәhәṅ marekān rahayu janmanya muvah, maluya dadi vvaṅ gumavayakәna bhakti ri bhaṭāra, mārgani janma kahvata ri hayu, yan yaṅ dadi kita ri saṅsārātah niyata kadyaṅgāniṅ vikāra, tan pada lāvan saṅsārajanma, athavā yan paṅdadyana kәbho sapi asu vәk, yeka kapәtәk tәmәn, apa tan hana gamanani kavruha riṅ heyopadeya, vәnaṅa ta rakva ya mareṅ saṅ paṇḍita, tumakvanakәna kaliṅani janmanya, mvaṅ kalәpasәnni janmanya, yan apa tekān vruha, apan huvus ikaṅ janmanya, tan pasikәban, lәkas ta mәne ṅgәlәk, apa tan kinavruhan tәkaniṅ pati,

sumahur saṅ kumāra,

aparan ikaṅ vāsanā ṅaranya, sājñā bhaṭāra, varahәn ta rānak bhaṭāra,

sumahur bhaṭāra,

ikaṅ karma tan dadi tan kabhukti phalanya, akveh pva kaṅ karma, ya ta mataṅnyan makveh lvirniṅ janma, apan phalanikaṅ karma ya mamaṅun śarīra, yan mahalā karma, mahalā śarīra, yan mahayva karma, mahayva śarīra, mahala māyu pvekaṅ karma, vinaṅun i janma tuṅgal, ya mataṅnyan asilisilih ikaṅ janma riya, huvus dadi devatā phalani gavenya hayu, tәka pva phalaniṅ gavenya hala, matәmahan ta ya tiryak, hәnti pva phalanikaṅ tiryak, tәka ta phala nikaṅ mānuṣa, muvah ta phalanikaṅ karma ṅūni, ya ta bhinuktinyān pamaṅun karma muvah, maṅkana ta jātini janma kabeh, ikaṅ karma huvus bhinukti yekā mamәkasakәn saṅaskāra ri citta sovaṅsovaṅ, ya ta mataṅnyan kadi sinurat ikaṅ karma rumakәt iriya, kadyaṅgāniṅ siṅsәt i havak, ya ta magave tuturni citta, ikaṅ huvus bhinuktinya ṅūni, yan devatā, yan mānuṣa, yan tiryak, ikaṅ karmaphala tinutnya, ya ta bhinuktinya, kapva tekā mamәkasakәn saṅaskāra ri citta, nihan padanya, kadyaṅgān i dyun an pinakavavan vaṅivaṅi, iṅgu kunaṅ, huvus hәnti hisinikaṅ dyun, vinasәhan ta ya pinahalilaṅ ndān hanātah ambhə̄nya, turuṅ hәnti rumakәt rikā dyun, maṅkana tekaṅ vāsanā, an pamәkasakәn saṅaskāra ri citta, asiṅ agə̄ṅ vāsanā ri citta, ya pinakarūpaniṅ janma, apan asiṅ kinalpananiṅ manah ya tinutniṅ karmanya maṅun janma muvah,

saṅ apa sira kumavruhi janma maṅkana sājñā bhaṭāra,

sumahur bhaṭāra,

aku huvus maṅhiḍәp saṅsāra, aneka ikaṅ janma bhinuktiku, vәkasan, tәkani gaveṅku hayu, kavava tāku ri saṅ paṇḍita, vinarah tāku riṅ dharmaśāstra, ya ta inabhyāsaṅku, alavas pvāku gumavayakәn ikaṅ dharmaśāstra, mati tāku, muvah taku, muvah tāku maṅjanma mānuṣa, atutur tāku ri janmaṅku, muvah tāku humulunakәn śarīraṅku ri saṅ paṇḍita, vinarah tāku ri yogadharma, ya ta inabhyāsaṅku ri rahineṅ vәṅi, ya ta ginavayakәnku, alavas aku yogīśvara, sevu tahun lavasku yogīśvara, vinava tāku riṅ svarga, inaranan tāku saṅ nīlalohita, tinariman tāku hanak dara, anak bhagavān dakṣa, saṅ satī ṅaranira, māti pva saṅ satī, kavәkas tāku, maluya tāku yogīśvara, tīkṣṇa pva deṅkv agave samādhi, māti tāku maṅjanma tāku ri bhaṭāra, ndatan vәtu saṅke śuklaśonita, mәtu saṅke yoga bhaṭāra kami, apan lima kveh mami sānak, patuṅgalani ṅaran mami, kuśika saṅ matuha, tumut ta garga, lāvan maitri, saṅ kuruṣya, aku saṅ pātañjala ṅaranku, anak pamuṅsu, ri saṅ pañcarṣi, atutur tāku ri kayogīśvaran, ya mataṅnyan manambhah ri bhaṭāra, sakavvatan mami dadi sira gave saṅkramaṇa,

anaku saṅ kuśika, mabyakta takvanakna, kunaṅ deyanmu pәṇḍәm tāku, maṅkana liṅnira ri saṅ kuśika pinet saṅ garga sira kinon maṅhañuta, luṅhā rasikā, pinet saṅ maitri, sira kinon manunva, luṅhā rasikā, pinet ta saṅ kuruṣya, sira kinon mamaṅguṅa, luṅhā rasikā, pinet tāku, mavәkas ta bhaṭāra, mabhakti anaku, kunaṅ deyanmūsapa tāku, maṅkana liṅ bhaṭāra, tan asove māti ta sira, tәka ta saṅ kuśika, matutur pavәkas bhaṭāra, inalapnira tekaṅ śava, pinәṇḍәmnira, ndātan paveh iṅ kami kabeh, apan kami pinakapamәkasan ri deya mami, tәka ta saṅ hyaṅ brahmā, viṣṇu, indra, yama, baruṇa, kuvera, āgneya, nairiti, bāyabya, aiśānya, sira sumambhәsambhә ri kami kalima, dadi saṅ kuśika kinon mamәṇḍәma śava bhaṭāra, sampun pinәṇḍәmnira, dinuduk sira de saṅ garga, hinañut ta sira, hinalap sira de saṅ kuruṣya, sira umaṅguṅ śava bhaṭāra, tan asove hinalap ta sira de saṅ maitri, sira tānunu śava bhaṭāra, sampun gәni matәmahan avu, luṅhā ta sira kabeh, aku juga kavәkas kumukup havu bhaṭāra, inalapku tāvunira, saṅka ri bhaktiku maguru, ya ta mataṅnyan husapakәn ikaṅ havu ry avaku, vaneh pinaṅkuku, tan sove hilaṅ ta rūpaṅku pātañjala, sarūpa bhaṭāra ṅūni kālanira hurip, trinayana caturbhuja, sphaṭika pakajanmasthāna, samaṅkana ikaṅ rūpa pinaṅguhku, tәka kaṅ devatā kabeh mamūja ri gandhākṣatadīpādi, lāvan kәmbhaṅ saṅkīrṇa, tәka ta saṅ hyaṅ ananta humundaṅ aku, muliha riṅ abhavapāda,

tā vihaṅ hinәnah tāku ri kahyaṅan i kavvatanku, yeki ri śrīkaṇṭhabhuvana ṅaranya, i ruhurni saṅ hyaṅ śrīkaṇṭha, alavas aku riṅ abhavapāda, kinon tāku muṅgva rike brahmāṇḍa, ya tәmahankva guru ri rat kabeh, ya mataṅnyan paṅaji ikaṅ devatā kabeh ṅke riṅ brahmāṇḍa,

hana pva daitya si nīlarudraka ṅaranya, ya ta kumavāśākәn ikeṅ brahmāṇḍa, gәlәṅ tekaṅ devatā kabeh, deni bhaṭārī sarasvatī maṇḍәm ri lidahnya, ya ta mataṅnyan salah ujar, tan matya deni devatā daitya dānava, an umatyanāku, yan hanānak bhaṭāra mәtu saṅke śuklaśonita ya umatyana, maṅkana liṅnya, dadi ikaṅ devatā kabeh, mintakāsih ri saṅ hyaṅ kāma, umanah aku ri rāgivaśa, yatanyan atәmaheṅ hyun, tā vihaṅ ta saṅ hyaṅ kāma, pinanahnira tāku riṅ rāga, dinәlәṅku ta saṅ hyaṅ kāma, ri katigani mataṅku, ya mataṅnyan gәsәṅ avak saṅ hyaṅ kāma matәmahan āvu, huvus maṅkana, tumut ta devatā kabeh, kapva ta ya humaṇḍәm anambhah, apan girigirin an tumon i saṅ hyaṅ kāmān patәmahan āvu, ya ta mataṅnyan panambhah umajarakәn vuvusnikaṅ daitya si nīlarudraka, pәjaha deni tanayanku mәtu saṅkeṅ śuklaśonita, tan vihaṅ pinintakasihan kabeh, kinon ta ya sumomaha ibunta bhaṭārī umā, ya mataṅnyan pakānak saṅ hyaṅ, gaṇapati, lāvan saṅ bhṛṅgiriṭi, katigānaku saṅ kumāra, nāhan kramani dadiṅku ṅūni, mataṅnyan avas deṅkv aṅavruha ikaṅ karmaphalān pamәkasakәn saṅaskāra ri citta, maṅkana liṅ bhaṭāra,

sumahur saṅ kumāra,

ndya ta menaka irikiṅ dadi janma kabeh sājñā bhaṭāra, maṅkana liṅ saṅ kumāra,

sumahur bhaṭāra,

nora kәtah menak irikiṅ janma kabeh anaku, apa pvānuṅ suka ṅaranya, nyapan tahan kva liṅanta, aṅhiṅ ikaṅ kamokṣan juga, yeki suka viśeṣa ṅaranya, apan huvus sātmaka lāvan bhaṭāra paramakāraṇa, maṅkana liṅ bhaṭāra,

sumahur saṅ kumāra,

saṅ apa ta sira sinaṅguh bhaṭāra paramakāraṇa ṅaranira,

sumahur bhaṭāra,

saṅ laṅgәṅ kasūkṣmanira, sira sadāśauca, alilaṅ ta kәneṅ mala, sadāsuka tar pakapūrvakaṅ janma pisaniṅu, tan kadi kami kabeh, sakveh saṅ hyaṅ aṣṭavidyeśāna, huvus karuhun saṅ hyaṅ brahmā viṣṇu lāvan vatәk lokapāla, makapūrvakaṅ saṅsāra rasikā kabeh, kunaṅ saṅka ri gə̄ṅnikaṅ bhaktinira ri bhaṭāra, lāvan tīkṣṇani samādhinira, nahan mataṅyan inalap muliha mareṅ kahyaṅan, tatan maṅkana bhaṭāra paramakāraṇa, sadāsuka juga sira, ndān makāvasāna saṅsāra sira, maṅjanma mānuṣa sira hәlәm, nyapan tahan kva liṅantānaku, tamatan hana gamananira janmānaku, apan sarvajña sira, sira kumavruhi rat kabeh vruh sira ri maṅde saṅsāra, lāvan lāra, ndātan vәnaṅ milagi ya, tan vruh ri deyanya, deni maṅhilaṅakәn lāra,

lāvan hana ta caduśakti ri sira, ndya caduśakti ṅaranya, vibhuśakti, jñānaśakti, kriyāśakti, prabhuśakti,

vibhuśakti ṅaranya, aṅavaśyaḥ, anāveśyaḥ, aṅavaśyaḥ ṅaranya, tā kәneṅ rāga, dveṣa, moha, aṅavaśyaḥ ṅaran ikā, anāveśyaḥ ṅaranya, tar kataman, tar dadi pinakāvak sirātah makāvak sarvabhāva, yeka anāveśyaḥ ṅaranya, ika ta kabeh, yekā vibhuśakti ṅaranya,

nihan taṅ jñānaśakti ṅaranya, dūradarśana, dūraśravaṇa, dūrāt manana, dūrāt masarvajñatā, śravaṇa ṅaranya, rumәṅə̄ hadoh aparәk, dūradarśana ṅaranya, tumon adoh aparәk, athavā tā tutupan kunaṅ ikaṅ vastu, katonātah denira, dūrāt manana ṅaranya, vruh ri jñānaniṅ adoh aparәk, dūrāt masarvajñatā ṅaranya, vruh ri kriyā kabeh, lāvan sarvavastu, nahan taṅ jñānaśakti ṅaranya,

kriyāśakti ṅaranya, manojavitvaṁ, vikaradharmitvaṁ, kāmarūpitvaṁ, manojavitvaṁ ṅaranya, adrәs ira saṅkeṅ manah, apan hana sira ri rat kabeh, ndātan katon, vikaradharmitvaṁ ṅaranya, tar ginave, sirātah magave, kāmarūpitvaṁ ṅaranya, sakaharәpnira tәmahananira, ya pinakarūpanira, nahan ya kriyāśakti ṅaranya,

prabhuśakti ṅaranya, abhītaḥ, akṣayaḥ, ajaraḥ, amaraḥ, apratihatagatiḥ, abhītaḥ ṅaranya, tar matakut, akṣayaḥ ṅaranya, tar pakalvaṅan, ajaraḥ ṅaranya, tā kәneṅ tuha, amaraḥ ṅaranya, tar kәneṅ pāti, apratihatagatiḥ, tan katahәnan, nāhan yaṅ prabhuśakti ṅaranya, ika, ta śakti bhaṭāra ika, ya kabeh, ya ta pinakapaniddha ri śakti bhaṭāra,

sumahur saṅ kumāra,

liṅ bhaṭāra, ṅūni, tar pāvak saṅ hyaṅ paramārtha, tathāpi vinuvus śaktinira, ndya ta rakәtani śakti bhaṭāra paramārtha, sājñā bhaṭāra, saṅ apa katonani kaiśvaryanira sājñā bhaṭāra, maṅkana liṅ saṅ kumāra,

sumahur bhaṭāra,

saṅ yogīśvara sampun siddhātah, sira katonan i śakti bhaṭāra, apan sira humyāpāra ikeṅ rāt kabeh,

sumahur saṅ kumāra,

tan hana pva bhaṭāra, yan ṛṣi siddha juga katonan i śakti bhaṭāra, mataṅnyan tan hana sira, aṅhiṅ śaktinira panәṅәranni hananira, muṅgva ri saṅ paṇḍita pva śakti bhaṭāra, ya mataṅnyan tayā saṅ hyaṅ paramārtha yan maṅkana,

sumahur bhaṭāra,

taha pih tan tayā saṅ hyaṅ paramārtha, apan tan śaktinira vinehakәnira saṅ paṇḍita, ndya saṅkani śakti saṅ paṇḍita karih, yan maṅkana liṅanta, śakti ṅkā ri havaknira juga śakti saṅ siddha,

sumahur saṅ kumāra,

apa dumehnya kābhibyaktā vәkasan sājñā bhaṭāra,

hasih sira bhaṭāra ri saṅ yogi kaliṅanya, apa dumeh sirāsiha ri saṅ yogi, saṅka ri pamrihnira gave samādhi, satatā riṅ rahine vәṅi, ya mataṅnyan asih bhaṭāra ri saṅ yogi, hinilaṅakәnira ta kleśa ri śarīra lāvan lāranira, kābhibyaktā kalāra saṅ yogi vәkasan, apan ikaṅ mala tumutupi śaktiniṅ ātmā ṅūni, hilaṅ marekā mala, yan kva liṅa saṅ para, tan vәnaṅa taṅ ātmā humilaṅakәn malanya juga, apan tan avruh lakṣaṇaniṅ mala, mataṅnyan tan vruh ikaṅ ātmā ri lakṣaṇani mala, apan ivәṅ-ivәṅ avaknya lāvan ikaṅ mala,

ndyāvakaniṅ ātmā yan kva liṅanta, yekā sinaṅguh ātmā liṅ saṅ vruh ri saṅ hyaṅ śāstra, ikā taṅ citta ivәṅ-ivәṅ lāvan mala, taha pih vәnaṅa taṅ ātmā humilaṅakәn malanya, yan kva liṅanta saṅ para, tanora mataṅ dadyana devatā tiryak yan maṅkana, mokṣa ikaṅ janma kabeh yan maṅkana, tinonta pvekaṅ janmasaṅsāra, ya ta paṅavruhananta an tan vәnaṅ ikaṅ ātmā humilaṅakәn malanya, yapvan vәnaṅ humilaṅakәn malanya, ya mataṅnyan sih bhaṭāra ri yogi, apan sira vәnaṅ humilaṅakәn malanira, kadi śakti bhaṭāra, maṅkana śakti saṅ siddha, ya mataṅnyan pada śaktinira lāvan bhaṭāra vәkasan,

sumahur saṅ kumāra,

hana ta kāri bhaṭāra, ri janmasaṅsāra,

mataṅnyan maṅkana, apan siddha samādhi saṅ yogi, apan yekā kābhibyaktan bhaṭāra ri janma, kapaṅguhanira de saṅ yogi, yan vruh riṅ prayogasandhi padanira, kadyaṅgān i apvy aneṅ kayu, apan hamәtvakәn āvaknya, ikaṅ apvy aneṅ kayu, ulihniṅ aṅәsə̄ atah prastāvanyān mәtu, maṅkana tekaṅ miñak, tan vәtu ikā yan tan pinutәran, ika pva vastu maganal tathāpi tan vәtu ikā yan tan inupāya ri sandhi, bhaṭāra paramakāraṇa kari tan kapaṅguha, yatan hanā prayogasandhi, yadyapin vruha ri prayogasandhi, yatan gavayakna, tan kapaṅguh atah bhaṭāra denya, ◉

cittavṛttinirodhākhyaḥ, yogaḥ paramadurlabhaḥ, tasmin yoge samārabdhe, svayam ātmā prakāśate

kaṅ katutur i cittavṛtti, ya sinaṅguh yoga ṅaranya, ndān atyanta ivәhnyān inabhyāsa, apan tan harәp jātiniṅ vaṅ riṅ gave makas, kunaṅ saṅ vairāgya, saṅ huvus varәg ri lārani janma, sira mahyun ri yoga, apan maharәp ri suka viśeṣa ṅaranya, ikaṅ paṅguhan i jāti saṅ hyaṅ ātmā ya sinaṅguh suka viśeṣa ṅaranya, yan apa yan kapaṅguh jāti saṅ hyaṅ ātmā, yan ginavayakәn ikaṅ yogātah,

sumahur saṅ kumāra,

tan kagavaya ikaṅ yoga kahiḍәp tah saṅ hyaṅ ātmā de mami, tamatan ātmā ikā liṅta, yekiṅ citta ṅaranya, mataṅnyan sinaṅguh citta, apan ekaviṣayanya, ya mataṅnyan citta juga kahiḍәp denya, sumahur saṅ pāra, ndya vṛttinya, mataṅnyan citta ṅaranya, nihan grahaṇa, viparyaya, vikalpa, nidrā, smṛti,

grahaṇa ṅaranya, ikaṅ citta manut pramāṇa tәlu, pramāṇa tәlu ṅaranya, pratyakṣa, anumāna, āgama, yekā grahaṇa ṅaranya, hayva ta vineh maṅkana kālani yoga, nihan taṅ vikalpa ṅaranya, ikaṅ jñāna maṅaliṅa varahni sūtra, niṣkriyaḥ puruṣaḥ kumva liṅniṅ aji, nihan arthanya, tar polah saṅ hyaṅ ātmā, maṅkana liṅnikaṅ varah, ya tekāna liṅ ṅaranya, liṅnya nihan,

kaliṅaniṅ tan polah, kadyaṅgāniṅ hru hana ri taṅkulaknya, humәnaṅa ta ya, inalap pva ya saṅke taṅkulaknya, kinәnākәn i talini laras, tumañcәbәka ya ri kinәnanya, humәnaṅa ta ya, maṅkana ta hәnaṅnikaṅ ātmā, nāhan liṅni vikalpa ṅaliṅa varah, hayva ta vineh maṅkana ri kālani yoga, nihan taṅ nidrā ṅaranya, ikaṅ jñāna kadi hilaṅ lvirnyān kahiḍәp, ndān tәhәr ya malupa viparīta tan hana tuturnya, hayva ta maṅkana ri kālaniṅ yoga, vehәn tikaṅ jñāna dumәliṅa ri hati, sthitya hayva cañcala, hayva maṅaṅәnaṅәn, apan hana svapnajñāna ṅaranya, paran inaṅәn-aṅәn vaneh, ikaṅ jñāna matutur i kahiḍәpanya, yekā svapnajñāna ṅaranya, hayva ta vineh maṅkana ri kālani yoga, nihan taṅ sūtra smṛti ṅaranya, ikaṅ jñānātutur ikaṅ vastu bhinuktinya ṅūni, hayva ta vineh maṅkana ri kālaniṅ yoga, nahan vṛttinikaṅ citta lima kvehnya,

yapvan katutupan ikaṅ kabeh, ya tekā sinaṅguh samādhi ṅaranya, ya sinaṅguh samprajñāta, lāvan asamprajñāta, samprajñātātah ṅaranya, ikaṅ samādhi tinahәnan deni pāt, lvirnyān pāt nihan, hana savitarkasamādhi, hana ta vicārasamādhi , hana asmitāsamādhi, hana ānandasamādhi,

ikaṅ jñāna maṅekagraha ri sūkṣma, ya vicārasamādhi ṅaranya, asmitāsamādhi ṅaranya, i ṅkana saṅ puruṣa kaivalya, vinotan viṣaya deniṅ citta, ndātan cetane ya, apa vruh sirān lāra, yāvat cumetane pavotniṅ citta, ya mataṅnyan hәnaṅ juga humiḍәp svacetanānira ikā saṅ hyaṅ ātmā, ānandasamādhi ṅaranya, ikaṅ ātmā tīkṣṇa denya humiḍәp avaknya juga, ya ta mataṅnyan kapaṅguh ikaṅ suka viśeṣa,

ikaṅ pāt ya sinaṅguh samprajñāta ṅaranya, yan tuṅgal yan rva, yan tәlu, yan pāt, samprajñātātah ṅaranya, yapvan tan maṅkana ika kabeh, ya sinaṅguh asamprajñātasamādhi ṅaranya, ikā taṅ asamprajñātasamādhi pūrvaka, ikā ta samprajñātasamādhi,

ya tekā dharmani citta, hana kṣipta ṅaranya, hana vikṣipta ṅaranya, hana vimūḍha ṅaranya, hana nirodha ṅaranya, hana ekagraha ṅaranya,

kṣipta ṅaranya, ikaṅ ambhәk abvaṅ umәsat mareṅ kadohan, vikṣipta ṅaranya, ikaṅ ambhәk ṅunikunik, vimūḍha ṅaranya, ikaṅ ambhәk lәṅә-lәṅә, nirodha ṅaranya, ikaṅ ambhәk aṅhәrәt, ekagraha ṅaranya, inambhәkakna ri tuṅgal, nāhan kvehni dharmaniṅ citta, ikaṅ kṣipta, vikṣipta, vimūḍḥa, vimudā, tan pinakabhūmi ikā deniṅ samādhi, apa pinakabhūminiṅ samādhi takārih, pilih ekagraha lāvan nirodha, salah tuṅgal kunaṅ ya mahīṅaniṅ samādhi, athavā karva kunaṅ,

sumahur saṅ para, vruh ta kami ikaṅ sinaṅguh yoga ṅaranya, apan sabarinyān hәnaṅ ikaṅ citta, ya ta samādhi ṅaranya, yan kva liṅa saṅ para, tan yogya ikaṅ hәnaṅni citta, saṅguhәn yoga, apan hana sira yogīśvara videha lāvan, prakṛtilīna, videha ṅaranya, ikā saṅ yogīśvara hanaṅ luput saṅkeṅ śarīra, māri makāvak ikaṅ aganal, kevala ikā sūkṣmaśarīra pinakāvaknira, prakṛtilīna ṅaranya, māri makāvak ikaṅ śarīra sūkṣma, aparan pinakāvaknira, yekiṅ pradhānatattva juga, rasikā ta saṅ videha lāvan prakṛtilīna, sira ta maharәp kapaṅguhakәnnya kamokṣan, apan huvus tan hana ikaṅ citta ri hiḍәpnya, tan vruh yar paṅher kāla,

ikaṅ karmāśaya, lāvan ikaṅ cittasaṅaskāra, maṅkana pva ya, mataṅnyan tan pramāṇa hәnaṅnikaṅ citta juga, apan tan hәnti ikaṅ anekaviṣaya bhinuktinya, tuturuṅ, apa paṅavruhananta, an tan hәnti, nihan si maṅher ri pradhāna, ṅuniveh ikaṅ videha, yapvan jәnәk amukti kasiddhyan, dadi sira saṅsāra maṅhiḍәp muvah, yāgave cakra ṅaranya, apan tan hana śraddhādi ri sira, apa sinaṅguh śraddhādi ṅaranya, nihan lilaṅni citta, mataṅnyan paṅguh ikaṅ citta malilaṅ, saṅke pamrihnira maṅabhyāsā yoga satatā ri rahineṅ vәṅi,

ndya paṅavruha ri lilaṅni citta, nihan ya maitrī, karuṇā, muditā, upekṣā, ya paṅavruha ri lilaṅni citta,

apa sinaṅguh maitrī ṅaranya, nihan paṅavruhanya, ikaṅ ambhәk prayojanākәn davāniṅ suka saṅ manәmu suka, ya maitrī ṅaranya, karuṇā ṅaranya, ikaṅ ambhәk mrayojanākәn ikaṅ malara mamaṅguha suka, lāvan luputa ri saṅsāra, ya karuṇā ṅaranya, muditā ṅaranya, ikaṅ ambhәk anumoda i saṅ gumave hayu, ya muditā ṅaranya, upekṣā ṅaranya ikaṅ ambhәk humәnәṅ irikaṅ maṅgave hala, nāhan byaktanya ikaṅ lilaṅ ri saṅ yogi,

ikaṅ ta citta malilaṅ ri yogi, ya maṅdadyakәn vīrya, ikaṅ vīrya ya maṅdadyakәn tutur, ikaṅ tutur ya maṅdadyakәn prajñā, ikaṅ prajñā ya maṅdadyakәn samādhi, apa sinaṅguh vīrya ṅaranya, gәlәmniṅ maṅabhyāsā yoga lāvan sādhananya, tutur ṅaranya, vruhnira ri kayogīśvaran, tambhāniṅ saṅsāra, apan ya mārganiṅ maṅguhakәna bhaṭāra, enak pva tuturnira ri bhaṭāra, ya maṅdadyakәna prajñā, apa ta sinaṅguh prajñā, tәpәtnira ri kasamyajñānan tumuduhakәn bhaṭāra, ya mataṅnyan sira tambhāra ṅarani prajñā saṅ yogi, mataṅnyan sira tambhāra ṅaranya, apan abәnәr tәkānya ri bhaṭāra, kadyaṅgāniṅ hru abәnәr lakunya deni hәlār, maṅkana ta prajñā saṅ yogīśvara i bhaṭāra,

apa ta lvirni samādhi saṅ yogi, an sātmaka ri bhaṭāra, nihan, ◉

ātmani cetanaḥ sthitaḥ

hiliṅ ikaṅ citta, kavәkas tekaṅ citta ri saṅ hyaṅ ātmā, ya tekā rumakәt ri bhaṭāra, lana pvekaṅ samādhi maṅkana kapaṅguhanya de saṅ yogi, ya mataṅnyan kapaṅguh ikaṅ kasiddhyan denira,

5 lvirnya kasiddhyan kaniṣṭha, madhya, mottama, mataṅnyan tәlu ikaṅ kasiddhyan, apan tәlu lakṣaṇa saṅ yogi, hana mṛdusambega, hana madhyasambega, hana tībrasambega, mṛdusambega ṅaranya, akәdik denyāṅabhyāsa yoga, lāvan sādhananya, amaṅguh ta sira kasiddhyan ndān malavas ya kapaṅguh, maṅkana ta saṅ madhyasambega, amaṅguh sira kasiddhyan, ndān ri janmanira sovah ikān pamaṅguh, kunaṅ saṅ tībrasambega, tībra tәkapnira gave yoga, lāvan pramāṇanya, ya mataṅnyan paṅguh, ikaṅ yogasiddhi i janmanira maṅke,

sumahur saṅ kumāra,

apa ta kalәvihnikā saṅ tībra, mataṅnyan maṅguh ikaṅ yogasiddhi ri janmanira maṅke sājñā bhaṭāra,

sumahur bhaṭāra,

hananikaṅ īśvarapraṇidhāna ri sira yekā hetunirān vavaṅ paṅguh ikaṅ yogasiddhi, īśvarapraṇidhāna ṅaranya, kapaṅguhan avak bhaṭāra de saṅ yogi,

sumahur saṅ kumāra,

apa lakṣaṇanya paṅguh ikāvak bhaṭāra sājñā hyaṅ mami,

sumahur bhaṭāra,

nihan lakṣaṇani havak bhaṭāra an kapaṅguh de saṅ yogi,

kleśakarmavipākāśayaḥ, aparāmṛṣṭaḥ sadaiveśvaraḥ,

ikaṅ mañetanā saṅ yogi, tan karakәtan deni kleśakarmavipākāśaya, maṅkana lakṣaṇa bhaṭāra, ar paṅguh de saṅ yogi,

kleśa ṅaranya, avidyā, asmitā, rāga, dveṣa, abhiniveśa, karma ṅaranya, gave hala, gave hayu, vipāka ṅaranya, tāśakti phalanya bhinuktiniṅ śarīra, apan ikeṅ śarīra, yeki phalaniṅ karma lāvan sukaduhka, yekā tan kahiḍәp kālaniṅ yoga, ya kaliṅaniṅ tan karakәtan deniṅ kleśakarmavipākāśaya, hana ta śeṣanikaṅ karmaphalān huvus kabhukti, ya ta sinaṅguh āśaya ṅa ranya, ya tikā magave tuturniṅ citta, yan mahala, yan mahayu, ya tekā tan hana ri saṅ yogi, ya kaliṅani tan karakәtan deni āśaya, lāvan sarvajña ta sira, kumavruhi rāt kabeh, sarvakāryakartā sira gumavay ikaṅ rāt kabeh, tātan kalәvihan kaiśvaryanira, maṅkana lakṣaṇa bhaṭāra, sumahur saṅ kumāra, maṅkana taṅ ātmā tan karakәtan deni kleśakarmavipākāśaya, mvaṅ sarvajña ta ya lāvan sarvakāryakartā, tatan kalәvihan kaiśvaryanya, yan kva liṅa saṅ para, karakәtan maraṅ ātmā deniṅ kleśakarmavipākāśaya, apa byaktanya, hananyaṅ mañetanā, kadi mañetanā maraṅ ātmā, yan kva liṅa saṅ para, tan hana ikaṅ rāt kabeh, yatan hanaṅ cetanāniṅ ātmā, ndān sarvajña ya, nyapan tahana kva liṅa saṅ para, tan dadi ya gumaveya dukani avaknya, yan sarvajña ya, kaliṅanya, dudū juga ikaṅ cetanāniṅ ātmā

sājñā bhaṭāra, mevәh takari kapaṅguhan y avaknya bhaṭāra, tan paveh juga kapaṅguha deniṅ janma yan sinәlaṅ lāvan pramāda, kunaṅ pavaraha bhaṭāra ri ṅhulun, anuṅ meman kagaveyanya, ikaṅ inabhyāsanya maṅkana, tumuntun ajñāna saṅ yogi, maṅkana liṅ saṅ kumāra,

sumahur bhaṭāra,

hananyaṅ oṁkāra, ya teki nāmadheya bhaṭāra, inajarakәn, ri sarvaśāstra kabeh, sira japakneṅ rahina vәṅi, apa ta phalaniṅ oṁkāra, yan lana jinapākәn, hilaṅ sarvavighna denira, lāvan kapaṅguh tāvak bhaṭāra,

sumahur saṅ kumāra,

apa lvirni vighna sājñā bhaṭāra,

sumahur bhaṭāra, nihan lakṣaṇani vighna, ◉

byādhiḥ pramādālasyaḥ, sandehaḥ styāna-m eva ca, bhrāntijñānāviratijñānaḥ, bhūmyalābhaś ca cañcalaḥ, ◉

byādhi ṅaranya, kadyaṅgāniṅ lārādhyātmika, vighna atekā, pramāda ṅaranya, tan gumavay ikaṅ yoga lāvan sādhananya, alәmәh magave yoga,

sandeha ṅaranya, salah denya maṅhiḍәp, kunaṅ tan lәpas ṅ vvaṅ maṅabhyāsa yoga, lāvan dadin hana mārga vaneh, anuṅ meman kagavayanya, sakeṅ rikaṅ yoga, maṅkana liṅni sandehanya, vighna atah ṅaranikā, styāna ṅaranya, tan vәnaṅ magave yoga, makanimittaṅ lәhnya mvaṅ luhyan am bhәknya, bhrāntijñāna ṅaranya, vulaṅun aviratijñāna ṅaranya, vuruṅ ma gaveya yoga, bhūmyalābha ṅaranya, tan hanaṅ kaharәpnya, tan pagave yoga, cañcala ṅaranya, iki sadākāla, tan hana kālanyān pagaveya yoga, nāhan taṅ vighna ṅaranya, ya tikā hilaṅ deniṅ japa, huvusnyān hilaṅ ikaṅ vighna, alavanlavan jñānanta, mahyun ta kita magaveya yoga, ya dumeh saṅ yogi maṅabhyāsa, apan phalaniṅ japa ya vәnaṅ maṅabhyāsa yoga, lanā pvekā yoga ginavayakәn, ya mataṅnyan pamәkasakәn saṅaskāra, ikaṅ saṅaskāraniṅ yoga, ya ta magave tutur ri saṅ yogi, ikaṅ tutur ya mamaṅun yoga, muvah, ikaṅ yoga ya mamәkasakәn saṅaskāra muvah ri citta saṅ yogi, lvirnyān tәka hana gə̄ṅ hana rәtrәt lvirnya, hana lima tәkanya, ndātan vuruṅ magavai duhkah ri saṅ yogi,

pira ta kvehnikaṅ kleśa, lavan apa ta lakṣaṇanya,

sumahur bhaṭāra,

nihan lakṣaṇanya ikaṅ kleśa, avidyā, asmitā, rāga, dveṣa, abhiniveśa, samaṅkana lvirni kleśa,

avidyā ṅaranya, ikaṅ jñāna mabalik, liṅnya, ikaṅ ātmā yeki tan lanā, tan hānāpa ta hilaṅ svabhāvanya, kunaṅ ikaṅ pṛthivī āpah teja bāyu ākāśa, yekā laṅgə̄, maṅkana tekaṅ sinaṅguh pavitra, saṅ viku mabrata yogīśvara, yekā sinaṅguh pavitra, adva ateka, apan campur rasikā,

apa nimittanyān campur, apan kasakitan manahnira deni brata, tan panolih ri vāhyasuka, nāhan mataṅnyan campur rasikā, anuṅ pavitra, anakәbi rahayu, yekā pavitra, nahan lvirni kleśa, avidyā mabalik hiḍәpnya, nihan ta asmitā, ikaṅ jñāna tan vruh i papalenan i citta lāvan ātmā, apan ivәṅ-ivәṅ hiḍәpnya ri karva, rāgakleśa ṅaranya, hyun, dveṣakleśa ṅaranya, melik, abhiniveśa ṅaranya, ikaṅ rāga lāvan dveṣa, sarәṅ maṅadәg, yekābhiniveśa ṅaranya, saṅ paṇḍita pva, kahanan tantu abhiniveśa, byaktanya nihan, melika sira riṅ gave mamuhāra lāra lavan saṅsāra, mahyun ta sira ri kalәpasәn maharәp ri hinak tan pabalik lāra, nahan kābhiniveśan saṅ paṇḍita, ikā ta kabeh, avidyā anuṅ bhūminikā, apan yekāpupulan i mithyājñāna,

sumahur saṅ kumāra,

apa ta tambhāni kleśa samaṅkana sājñā bhaṭāra,

sumahur bhaṭāra,

ya kәtah prastāvaniṅ brata ginavayakәn de saṅ yogi, apan ikaṅ kleśa makәndil akveh ta ya, ikaṅ kleśa magə̄ṅ aganal tәkanya, yeki hilaṅ deniṅ brata, lāvan prāṇāyāmayoga, ikaṅ halit tәkanya, yekā hilaṅ deniṅ asamprajñātasamādhi, ikaṅ asamprajñātasamādhi, ya phalaniṅ samprajñātasamādhi, ya phalaniṅ pratyāhārādi, yekā phalaniṅ brata, ikaṅ brata ya phalaniṅ vairāgya, ya phalaniṅ varәg lāra, ikaṅ lāra ṅaranya, yekā tan ya huvusan, apan jātiniṅ māvak juga hanaṅ lāra, ikaṅ māvak yekā mavaluyvaluya ri svarga naraka lāvan mānuṣa, maputәran atah tan pәgat, vruh pva saṅ yogīśvarān maṅkana jātiniṅ māvak, ya mataṅnyan pamrih magave samādhi, yatanyan luputa saṅke cakrabhāva, maṅguhakәna kalәpasәn ṅaranya,

luput saṅke bhāvacakra, umaṅguhakәn pāvak bhaṭāra, nāhan mataṅnyan tan palәhpalәh, apan tәṅitәṅin riṅ lāra jāti saṅ yogi, ikaṅ vaṅ apuṅguṅ bәtah riṅ lāra, padanya, kadyaṅgāniṅ vvaṅ kәna riṅ savaṅni garagatī, tan alāra yan avakniṅ vvaṅ kunaṅ yan mataṅ vaṅ kәnā denya, alāra ikā, saṅ yogi kalaran mata, apan tan enak panon iṅ vaṅ yan kәnā riṅ savaṅni garagatī, matakut pva riṅ lāra jāti saṅ yogi, ya mataṅnyan pagaveṅ samādhi, saha sādhananya, yekā pinrihnira, lāvan brata, apan ikaṅ brata yekā magәsәṅi mala, nyaṅ vvaṅ maṅәsə̄ apuy riṅ kayu, tan polih ikā apuy, yan mәlәs ikaṅ kayu, yapvan akiṅ ikaṅ inәsə̄, irikā mәtu taṅ apuy, maṅkana tekaṅ śarīra lāvan indriya, ṅuniveh ikaṅ citta, brata ya pamahakәṅ iriya, inәsə̄ ta ya deni prāṇāyāmādi, ya mataṅnyan hiḍәp avak bhaṭāra, yāvat kapaṅguh pāvak bhaṭāra, tāvat sakāma yogi,

sumahur saṅ kumāra,

ndya ta lakṣaṇanikaṅ yogasādhana lāvan brata sājñā bhaṭāra,

nihan lakṣaṇanikaṅ yogasādhana, anuṅ paṅavruhantānaku, hana aṣṭāṅga ṅaranya, yama, niyama, āsana, pratyāhāra, prāṇāyāma, dhāraṇā, dhyāna, samādhi, samaṅkana kvehniṅ yogasādhana, yama ṅaranya, ahiṅsā, satya, astainya, brahmacāri, aparigraha, ahiṅsā ṅaranya, tan pamatimati, sahanani prāṇi tan pātyana ikā kabeh, lāvan pātyana takutni māvak pati, mataṅnyan mahābrata ṅaran saṅ viku tan pamātimāti,

hana ta vuvusniṅ vaneh, tan apa rakvaṅ vaṅ mātimāti sattva, yan carva ri saṅ hyaṅ, athavā bhojana kunaṅ, maṅkana pakәnanya, tātan maṅkana saṅ yogi, nihan vaneh tan pamatyana sattva yan parvaṇi kāla, tatān maṅkana saṅ yogi, pisaniṅu sirān pamatyana sarvasattva, ya ta sinaṅguh ahiṅsā ṅaranya, satya ṅaranya, tan madva ri bratanya, tan madva movus, yekā satya ṅaranya, astainya ṅaranya tan paṅahala ṅuniveh maliṅa mas, yekā satya ṅaranya, ya sinaṅguh astainya ṅaranya, brahmacāri ṅaranya, yatanyan tan kalalarana samādhi, ya doniṅ tan parabi, yekā brahmacāri ṅaranya, aparigraha ṅaranya, tar paṅaku sarvadravya, nāhan lakṣaṇaniṅ yamabrata,

niyama ṅaranya, śauca, santoṣa, tapa, svādhyāya, īśvarapraṇidhāna,

śauca ṅaranya, maradināvak, lāvan ambhәk hayva ta kavaśa deniṅ rāga dveṣa moha, maradina movus, hayva muvusakәn maṅlareri vaneh, maradina molah, hayva makolah durbhyāsana, maradin amaṅan, hayva pinaṅan ikaṅ senuhutakәn paṅanәn saṅ viku, lāvan inumәnirājñāna, yekā sinaṅguh śauca ṅaranya, santoṣa ṅaranya, solihanira nasi atah santoṣaknanira, athavā solihnira tinanәm i patapanira, ya santoṣaknanira, tapa ṅaranya, ikaṅ indriya kabeh prihәn sakitana, ri brata lāvan samādhi, yatanyan tan padadyakәn arāga yan panon viṣaya kaliṅanya, tan garjita yan paṅrәṅə̄ kiduṅ menak, athavā paṅgәla kunaṅ, ilatnya muhārāmet pinaṅan, yan pamaṅan rasa menak, nahan lacalacaniṅ tapa ṅaranya, svādhyāya ṅaranya agәlәm aṅunyakәn mantra, astāva ri bhaṭāra,

īśvarapraṇidhāna ṅaranya, umaṅәnaṅәn kasūkṣman bhaṭāra ri rat kabeh, ṅuniveh ry avaknira asthityana bhaṭāra, yatanyan siddhi samādhi, yekā īśvarapraṇidhāna ṅaranya,

sumahur saṅ kumāra,

apa don ikaṅ niyamabratān hinanākәn, apan huvus ikaṅ yamabrata mapagәh pinakabrata saṅ yogi,

sumahur bhaṭāra

mekasthekaṅ yamabrata, kunaṅ yatanyan ta dadya de saṅ yogi, ya ta mataṅnyan gavayakna, ikaṅ niyamabrata, nihan phalanikā tinonta, an kadadi ikaṅ ahiṅsā de saṅ yogi, tātan hana tukar phalanya, vvaṅ adyan tan papraṅ, vvaṅ vanva i tan pataṇḍiṅan, lāvan asih tekaṅ sarvasattva kabeh ri sira, nāhan phalanikaṅ ahiṅsābrata, nihan ta phalaniṅ satya, jātismara vruh ri janmanira ṅūni, nāhan phalani satya yan ginaveyakәn, nihan phalaniṅ astainya, tәka juga ikaṅ dravya ri sira, tan ulihniṅ aṅela, nāhan phalani tan paṅahalāhala, nihan ta phalaniṅ tan parabi, utsāha ri yoga sira, apan tan kalalaran samādhinira, nāhan ta phalaniṅ brahmacāri yan ginaveyakәn, nihan ta phalani jñāna tan paṅaku, siddha asiṅ kāryanya,

nihan ta phalaniṅ niyamabrata ginave, phalani śauca, tan sinasar mārga de sāmānyajanma, mvaṅ kahiḍәp ta saṅ hyaṅ viśeṣa denya, nahan phalani śauca yan ginaveyakәn, nihan ta phalaniṅ santoṣa, agə̄ṅ sukanya tan pavor lāra, nihan ta phalaniṅ tapa, ilaṅ ikaṅ rāga dveṣa moha, mvaṅ ikaṅ kleśa kabeh, nāhan phalaniṅ tapa ginaveyakәn, nihan ta phalaniṅ svādhyāya, papaṅguh sira lāvan saṅ hyaṅ, saṅ inastāvanira pratidīna, nāhan phalaniṅ svādhyāya yan inabhyāsa,

nihan phalaniṅ īśvarapraṇidhāna, siddhi yogi sira, nāhan ta phalaniṅ niyamabrata yan inabhyāsa,

lumәkasa pvāṅabhyāsa yoga mvaṅ sādhananya, ameta ta sira deśa rahayu uṅgvananira, anuṅ salahni vurahan, tātan avalana ri durjana, pavitra ta maradin, yatanyan siddhya jñānanira, yan guhā yan gunuṅ, yan alas yan sapiṅgir i lvah, yan ri nūsa kunaṅ, asiṅ kahyunira huṅgvananira ikā kabeh, yapvan huvusirān moṅgvan, madyusa ta sira, maśocā ta sira rumuhun mācamanā sira, mantranira, aghora, tatpuruṢa kunaṅ, huvus maṅkana, tumama ta sira ri pagavayanira yoga, yan paṅheran, yan guhā, yan umah kunaṅ, mavasuha suku, muṅgva kulvan bhaṭāra athavā kidul bhaṭāra ta kunaṅ, manambhaha ta sira rumuhun, liṅanira bhāva siddha saṅ yogi, maṅkana liṅanira yar panambhah ri bhaṭāra, huvus maṅkana, maluṅguha ta sira, riṅ uṅgvan uṅgvananira, yan pәtaṅ, yan sandhi, yatanyan tan agaliṅa paluṅguhnira, makaphala sovenirāluṅguh, yan pagave yoga, nihan lakṣaṇanira āsana, hana padmāsana, hana bhadrāsana, hana svastikāsana,

nihan lakṣaṇaniṅ padmāsana, ikā talapakan kalih tinumpaṅakәn ri pupu kalih, ya padmāsana ṅaranya, ikaṅ talapakan kalih, umuṅgva i sor iṅ pupu kalih, ya bhadrāsana ṅaranya, svastikāsana ṅaranya, ikā talapakan kalih, umuṅgva ri sәla pupu kalih, ikā lәpalәpaniṅ taṅan kiva tumumpaṅ ri kisapvan, tumumpaṅ tekaṅ atәṅәn lumahātah, ikaṅ valakaṅ mabәnәra paṅadәgnya, tumәṅgə̄ tekā gulū, hayva tumәṅa, hayva tumuṅkul, mabәnәra juga,

ikaṅ mata dәlәṅ tuṅtuṅniṅ iruṅ, athavā mәrama juga kunaṅ, ikaṅ ilat ya humәlәtana ikaṅ huntu i sor i ruhur moga lambe midәma, nāhan lakṣaṇanira āsana,

huvusnyan menak paluṅguhnira, gavayanira tekaṅ pratyāhārayoga, ikaṅ indriya vatәkәn saṅkeṅ viṣayanya, mata hayva vineh manona, taliṅa hayva vineh marәṅə̄, iruṅ hayva vineh maṅambuṅa, kulit hayva vineh mahiḍәpa panas tis, tutuk hayva vineh maṅśabda, taṅan hayva vineh maṅgamәla, suku hayva vineh lumakva, nāhan deniṅ amatәk indriya, manah hayva vineh mamikalpa, buddhi hayva vineh maṅaṅәnaṅәn, ahaṅkāra hayva vineh ṅakva, nāhan deniṅ amatәk tryantahkaraṇa, huvusnyān asimpәn ikā kabeh, ya ta mataṅnyan hәnaṅ ikaṅ citta humidәṅ, tan kva tan kva, ekatva citta, saṅ hyaṅ ātmā ya ta sinaṅguh yoga ṅaranya,

huvusnyān ekatva, gavayәnira ta prāṇāyāmayoga, nihan lakṣaṇanikaṅ prāṇāyāmayoga, recaka, kumbhaka, pūraka, vinәtvaknekaṅ bāyu saṅke rīruṅ, sanehsaneh hayva drәs sahiṅan iṅ maṅisәp bāyu riṅ iruṅ, kuñci ta muvah, ekatva jñānanira, salavasni makuñci, sabhāgyān masove ya, apan anya svajātinira yatan inabhyāsa, ◉

ikaṅ kuñci uttama, tan pamәtvakәn bāyu humәnaṅ juga tan pāmbhәkan, apan cetanā saṅ hyaṅ ātmā, yekā hiniḍәpnira, tan pāntara, ya ta mataṅnyan hilaṅ ikā bāyu ri saṅkanya, apan cinitta cetanā de saṅ hyaṅ ātmā, padanya, kadyaṅgān i vve tumitisi vatu tinunvan mapaṇḍe sәdәṅ mabaṅ hilaṅ juga inisәpni vatu mapanas, maṅkana taṅ bāyu hilaṅ deni cittaniṅ ātmā, ya mataṅnyan viśeṣa ikā ekatvakuñci,

ndan yan huvus ikaṅ recaka, kumbhaka, pūraka, apa ta phalanikaṅ prāṇāyāmayoga, yan kva liṅanta, hilaṅ tamahniṅ ati lavan ikaṅ citta denya, ya mataṅnyan hilaṅ citta saṅ yogi denya, apan ikaṅ manah lavan aṅәnaṅәn anekaparanya, umәsat makalis tan kavәnaṅ tinimpal, yāvat makveh inaṅәn-aṅәn ri kālani yoga, tāvat vuruṅ samādhi saṅ yogi, matakut pva saṅ yogi vuruṅa samādhinira, ya mataṅnyan pinrih ginaveyakәn ikā prāṇāyāma, apan ikaṅ umuṅkus ikaṅ citta humәnaṅ, apan ikaṅ prāṇāyāma atah dumehnya humәnaṅa ikaṅ aṅәnaṅәn makveh, lāvan әsə̄ tekā dhāraṇayoga deni prāṇāyāma,

apa sinaṅguh dhāraṇayoga ṅaranya, ikaṅ citta ekatva atәguh ri svadeśanya, yan ri hati, yan riṅ yavaniṅ śarīra kunaṅ, yan i cittaniṅ ātmā kunaṅ, yan asthitya ekatva bhaṭāra kunaṅ, ikaṅ ta paṅekagrahanikaṅ citta salah tuṅgal ya sinaṅguh dhāraṇā,

dhyānayoga ṅaranya, ◉

nihan ta samādhiyoga ṅaranya † hayva citta hilaṅ prayatnanya ri vvahniṅ hatәmāhan apa, tәhәr cittanya senā ri bhaṭāra sira katәkәn ika dhyāna saṅ yogi ṅkāna, ya taṅkāna † ta ya sinaṅguh samādhi, tahan pihni aṣṭāṅga ya pinakasādhana saṅ yogi an paṅguh ikaṅ kamokṣan, ikā taṅ aṣṭāṅga, ya pinakabahiraṅga deniṅ asamprajñāta,

nāhan de saṅ yogi maṅabhyāsa prastāvanyān kapaṅguh ikaṅ kasiddhyan, ya pinakasādhananirān pagave yoga muvah, prastāvanyan vәnaṅ sakāmakāma, yapvan hilaṅ ikaṅ sahajamala, irikeṅ ta sirān pada lāvan bhaṭāra, sumahur saṅ para, aṅel dahat ta ṅaran ikātah, apan tan paṅdadyakәna kamokṣan ikaṅ yoga inabhyāsa, yan kva liṅta, aparan ya pva madadyakәnaṅ kamokṣan, yan kva liṅtana, sumahur saṅ śaivaka, dīkṣā juga madadyakәn kamokṣan saṅ tamatan sarvajña ta kaṅ ātmā, yan dīkṣā juga paṅhiḍәpa saṅ para, ikaṅ taṅ ātmā yan tan sarvajña tan sinaṅguh ikā kamokṣan, tapvan kadadi ikā kasarvajñaniṅ ātmā deni dīkṣā juga, ya mataṅnyan bhyāsanātah, ikaṅ yoga samādhi mәne gәlәk,

sumahur saṅ kumāra,

ndya ta lakṣaṇanikaṅ kasiddhyan, kapaṅguh de saṅ yogi,

nihan iṅәtaknanta, ikaṅ madadyakәna kasiddhyani saṅ yogi, ikaṅ dhāraṇā, dhyāna, samādhi, rumakәt ta ri ṅkāna, yatanyan ilu saṅ yogi matәmahan pṛthivī, apan ikaṅ dhāraṇā, dhyāna, samādhi rumakәt ri tattva tuṅgal, ya sinaṅguh saṅyama ṅaranya, anuṅ pinakasādhana saṅ yogi magave kasiddhyan, ndān denirānaṅyama, saṅke sor denirānaṅyama, apan tan dadi ikaṅ tattva i ruhur sinaṅyama, hanyātapa ikaṅ tattva i ruhur, ya ta mataṅnyan saṅke sora atah denirānaṅyama rumuhun, yapvan mahyun sira tumirva śaktini siṅha, ikaṅ siṅha sinaṅyama śaktinya, yāpvan mahyun sira tumirva śaktini garuḍa, sinaṅyamanira śaktinya, yapvan mahyun sira vruha ri tәkani pātinira, ikaṅ dharmādharma sinaṅyamanira, aparan ikaṅ dharmādharma ṅaranya, ikaṅ gave hala mvaṅ gave hayu, apan phalani dharmādharma ya magave hurip mvaṅ śarīra, yapvan hәnti phalanikaṅ dharmādharma sinaṅyamanira, tәka pātinira yan maṅkana, yapvan mahyun sira tan kәne lapa vәlәkaṅ, hanāmṛta i sorniṅ guruṅguruṅan, yekā saṅyamanira, yapvan mahyun sira tumona saṅ siddha lāvan devatā, ikaṅ bāyu si udāna saṅyamanira, hana ta jyotih mәtu saṅkeṅ vunvunan ya pinakasuluhnira an ton saṅ siddha lāvan devatā, yapvan mahyun sira katona dumilah avaknira, ikaṅ bāyu si samāna ya saṅyamanira, yapvan mahyun sira gumәsәṅanāvaknira, kadyaṅgāniṅ bhasmaśeṣa, mamәkasaknāvva jugāvaknira, ikaṅ bāyu si samāna ya saṅyamanira,

yapvan mahyun sira tan kapәtәka riṅ lāvan vvai, ikaṅ bāyu si udāna ya saṅyamanira, yapvan mahyun sira tan katona, saṅyamanira panon i vvaṅ vaneh, mvaṅ saṅyamanirāvaknira tan katona, yapvan mahyun sira maṅlayaṅa riṅ ākāśa, saṅyamanirāvaknira mahaṅana kadi kapuk, huvusira mahaṅan vәnaṅ ta sira mamapah i punti, athavā muṅgvaṅ savaṅniṅ garagati kunaṅ, ya ta paṅavruhanira haṅan havaknira, huvus maṅkana, saṅyamanira ta pasāmānyan havaknira lāvan ākāśa, yan aharәp sira sadāyauvana, ikaṅ pañcamahābhūta saṅyamanira sakatuṅgal, ikaṅ pṛthivī saṅyamanira rumuhun, yapvan huvus ikaṅ pṛthivī sinaṅyama denira, byakta sirālvat tan kanin deniṅ khaḍga, tan rәmәk avaknira yan tibeṅ vataṅ, athavā tibeṅ karaṅ juga sira, ikāṅ karuṅ juga sira ikaṅ karaṅ juga rәmәk, avaknira dṛḍha, nahan paṅavruhan riṅ halahniṅ pṛthivī denira, saṅyamanira tekaṅ vve, tan kapәtәk sira yan kalәbu riṅ bañu, sinaṅyamanira teja, paṅavruhani sira yan alah ikaṅ teja denira, tan gәsәṅ sira yan katunu riṅ apuy, sinaṅyamanira ikaṅ bāyu, paṅavruhanirān alah ikaṅ bāyu denira, halah ikaṅ bāyu yan maṅkana, lāvan tan katub sira deniṅ aṅin, ṅuniveh huripnira tan vikāra, ya mataṅnyan dīrghāyuṣa saṅ yogi,

pira ta lavasnira hurip, salavasni pṛthivī tәkāniṅ mahāpralaya dlāha, irikān hilaṅ śarīra saṅ yogi, ndātan vikāra jñānanira, apan tan kәne pāti saṅ hyaṅ ātmā, lāvan prajñā sira tan kәne lupa, saṅyamanira tekaṅ ākāśa, yapvan alah deniraṅ ākāśa, tan tibā juga sira deniṅ avaṅavaṅ, mvaṅ lituhayu tekāvaknira, kahyunhyun vinulat an tar kәne tuha, nāhan byaktanyān alah ikaṅ pañcamahābhūta de saṅ yogi, manta lvirnikaṅ kasiddhyan kapaṅgih de saṅ yogi,

prastāvani prayatnanira, apan hana upasarga ṅaranya, anuṅ kapaṅguh de saṅ yogi, apa sinaṅguh upasarga ṅaranya, ikaṅ pinakadәgi deniṅ pradhā natattva, ya ta maṅguh ri citta, kari pvekaṅ citta de saṅ yogi, hana ta vāsanā nikaṅ sattva rajah tamah, turuṅ tapvan i hilaṅ, ya sinaṅguh upasarga ṅaranya, lvirnya, prajñā, madrәs, mabyәt, upasarganikaṅ sattva ikaṅ prajñā, ya ta māvak ri saṅ yogi, ya ta mataṅnyan panurun prajñā saṅ yogi, apa byaktani prajñā saṅ yogi, ikaṅ aji tapvan denira, vruh sirerya taña, mvaṅ upapāttinya, nahan ta upasarganiṅ sattva, lāvan gavenira ṅambhuṅ gandha vaṅi, athavā gavaynira manon devatārūpa maṅanugrahana lvirnya, upasargani sattva ikā, nihan taṅ upasargani rajah, śakti hiḍәpnira ry avaknira, apan ikaṅ vastu tan kavәnaṅ ri daṅu denira, yekā upasarga rājah, nihan upasarganiṅ tamah, moga pәtaṅ panonira, mvaṅ jñānanira, vulaṅun tan atutur i jñānanira, maṅkana tāvaknira malupa kabeh, abyәt tan vәnaṅ molah upasargani tamah ikā, yapvan maṅkana ikaṅ upasarga kapaṅguh denira, magaveya ta sira prayogasandhi, apuyapuya,

yan pamaṅana sarvāpyak, yapvan agə̄ṅ salah panon lāranira, edan kunaṅ, sikәpәn aṇḍihәn, tambhanana limo lāvan bavaṅ matanira, yapvan atutur kәdikәdik, konәn ta sira tutura ri jñānanira,

sumahur saṅ kumāra,

enak ikā yan parovaṅa sira, yapvan tuṅgaltuṅgal sire patapanira, apa ta upāyanira,

sumahur bhaṭāra,

hana kәta paṅhilaṅ lāra, prastāvanyān dīrghāyuṣa saṅ yogi,

sumahur saṅ kumāra,

kasihana ṅhulun varahәn ikā paṅhilaṅ lāra,

sabarinyān papasah ikaṅ pradhānatattva juga lāvan ātmā, ṅuniveh yan papa saha saṅ hyaṅ ātmā lāvan citta, ya ta hetu saṅ yogi tā kәneṅ lāra,

sumahur saṅ kumāra,

umapa deniṅ amasahakәna saṅ hyaṅ ātmā lāvan pradhānādi,

sumahur bhaṭāra,

ya donikaṅ prayogasandhi tinakonakәn i saṅ guru yapvan an mahyun sira saṅ yogi umasuka irikaṅ vvaṅ vaneh, ikaṅ dharmādharma ya ta pәgat i sira, hana ta śeṣanya kәdikәdik, mataṅnyan tan māti, yapvan huvus pәgat siddhā sira pasukaneṅ vvaṅ vaneh, yapvan mahyun sira maṅguha aṣṭaiśvarya, ikaṅ ekādaśendriya ya saṅyamanira, yapvan alah ikā, kapaṅguh ikaṅ aṣṭaiśvarya denira, apa ta lvirnya nihan, aṇiman, laghiman, mahiman, prāpti, prākāmya, īśitva, vaśitva, yatrakāmāvasāyitva, nāhan yaṅ aṣṭaiśvarya ṅaranya,

aṇiman ṅaranya, maganal avaknira tambhayan vәkasan malit ta ya, apa sinaṅguh alit, vәnaṅ sira masuk mәtu ri pṛthivī, kadyaṅgāniṅ vvaṅ masilurup ri vvai, maṅkana ta saṅ yogi, vәnaṅ masuk mәtu riṅ pṛthivī, maṅkana yan paṅlakulaku, tan kavādha deniṅ gunuṅ karәs iśe pinurugnira, ikā vatu trus ikā denira, ndātan vikāra ikāvaknira, ya ta kaliṅaniṅ alit, laghiman ṅaranya, abyə̄t avaknira tambhayan vәkasan mahaṅan kadi kapuk, ya ta mataṅnyan paṅlayaṅ ri ākāśa, mvaṅ madrәs ta lakunira saṅke manah yekā laghiman ṅaranya, mahiman ṅaranya, tar kalәvihan gə̄ṅnira yar saharәp gə̄ṅa, athavā pinūjā ta sira saparanira, prāptiḥ ṅaranya, sakaharәpira tәka, sakahyunnira hana, nihan arthaniṅ prāpti vaneh, dadi sira gumamәl saṅ hyaṅ vulan saṅkeṅ paliṅgihanira, prākāmya ṅaranya, sakaharәpnira rūpanira, īśitva ṅaranya, maṅadәh tar kādәh, vaśitva ṅaranya, maṅutus, yatrakāmavāsāyitva ṅaranya, sakāmakāma ikā saṅ hyaṅ icchā, yatrakāma ta halitan denira, ṅkānāvasāyitva pramāṇa sira, vәnaṅ ta sira madaṇḍa yan tan kapintuhu ikaṅ inutusnira, nāhan sinaṅguh aṣṭaiśvarya ṅaranya,

an maṅkana kasiddhyan saṅ paṇḍita, tәka ika vighna ri sira, lvirnya, ikaṅ devatā mamava upabhoga mvaṅ anakәbi rahayu, mahalәp sinaṇḍaṅnya, kapva malәvihlәvih hyun, ya ta manuṅsuṅ yogi, syaṅ muliha riṅ svarga, ndān hayva sira maṅguh, apan bañcana ikā, gumaveh vuruṅan i yoga saṅ yogīśvara don- ikā, ya ta mataṅnyan paṅhulihuliha ri hati, aku ahāta tutakneṅkva pasyaṅnikaṅ devatā byaktāku mahiḍәp saṅsāra muvah, apan jātiniṅ śaktiniṅ viṣaya, luput ikaṅ suka viśeṣa denya, ikaṅ lāra tan vuruṅ kabhukti deku, ikaṅ kasiddhyan huvus kabhukti deku, tan ulihkv aṅinakinak, hulihkv agave brata lāvan samādhi, sajīvaniṅ rāt ikā, hilaṅa pva ya deniṅ viṣaya sakarәṅ, lalu kaśmalaṅku, pakṣani kahanan ikā, indrajālasādṛśya, kadi kilat kabhuktinya, yadyan malavas i bhinukti, ndātan vuruṅ maveh lāra, ikaṅ lāra, aneka lvirnya, yāvat pvekaṅ janma katibān lāra, tāvat kadasyatanayā, mevәh maluy janma muvah, aṅhiṅ kәbho sapi asu vәk tәmahanya, yekā katakutku kamu manah, yan aṅgānәn pasyaṅnikaṅ vatәk devatā, maṅkana liṅnira varahvarah ry avaknira,

nihan sahur saṅ para, satus kvehanikaṅ viṣaya kabhukti deniṅ vvaṅ, tan ya maṅhiḍәpa lāra yan vruh ri katattvan bhaṭāra, mataṅnyan maṅkana, apan tan hana tuhutuhun ikaṅ ulah kabeh, mataṅnyan tan hana tuhu, an hilaṅa donikā kabeh, maluya ri saṅkanya, ndi saṅkanya, saṅke saṅ hyaṅ tayā, malilaṅ tan kāvaraṇan, sira sinaṅguh niṣkala ṅaranya, anuṅ kalīnaniṅ rāt kabeh, niyata tan salah paran, maṅkana pva katattvaniṅ janma, mvaṅ kavruhan saṅ hyaṅ paramārtha,

ndya ta mataṅnyan saṅśaya riṅ ulah kabeh, apa mataṅnyan pamuhāra lāra, kabhuktyaniṅ viṣaya, maṅkana ta kәbho sapi asu vәk, sabarinyān mati mulih ri tayā, tamatan dinalih mulih riṅ tayā, apan katon hilaṅ ikaṅ avaknya, yekā inakunta mokṣa, jñānanya lāvan cittanya tan avruh irikā, lāvan ikaṅ tayā an sinaṅguh paramārtha, apa ta paṅupakāranya, ndya kasiddhyan kadadi denya, sumahur saṅ para, tan mokṣa ta ṅaran ikā, yan pamaṅguha kasiddhyan, kunaṅ yan hilaṅ juga, ya mokṣa ṅaranya, yan kva liṅa saṅ para, kapan ta kәta yan tәka, apan dudū ikaṅ ahurip, kadi laṅgə̄ṅnikaṅ hana, kapan tekaṅ tayā yan ta pratyakṣa, sumahur saṅ para, dlāha ri tәkani pralaya, yan tayā ikaṅ rāt kabeh, maṅkana liṅ saṅ para, apa yan mәtu ikā rat kabeh muvah, yekā mājarakәn yan līna ri tayā ikaṅ rāt, apan saṅkeṅ tayā saṅkanya mәtu ṅūni, yan maṅkana liṅa saṅ para, viruddha tekā pakṣanta yan maṅkana, mataṅnyan sinaṅguh viruddha, apan līna riṅ tayā ikaṅ jagat liṅta, mәtu pva ya mәne sinaṅguh ta mәtu saṅkeṅ tayā ikaṅ jagat, adva tan tayā ṅaranikā, yan kalīnani jagat an vәtu, yan kva liṅa saṅ para, tan dadi taṅ paramārtha maṅkana,

sumahur saṅ kumāra,

aparan ikaṅ sinaṅguh saṅ para tayā ulihaniṅ jagat, lāvan saṅkaniṅ jagat mәtu, kasihana varahәn ṅhulun bhaṭāra, ikaṅ sinaṅguh saṅ para tayā paramārtha, yekāna sinaṅguh prakṛtilīna, tayā pasaṅganiṅ citta sattva rajah tamah, lakṣaṇanya pәtaṅ tan pacetanā, apan tan hana kaprajñān iriya,

ṅuniveh ikaṅ cetanā, apa mataṅnyan sinaṅguh ulihaniṅ jagat apan ya ikā kriyāśakti bhaṭāra ṅaranya, māyāmāyā ikā ātmā, ya ta khyāti bhaṭāra paramakāraṇa, yāvat pvekaṅ ātmā cumetanekaṅ prakṛtitattva, tāvat mәtu ikaṅ jagat, yapvan mari ikaṅ prakṛtitattva cinetanā deniraṅ ātmā, līna ikaṅ jagat maluy ri saṅkanya ri prakṛtitattva, maṅkana sthitinikaṅ rāt saṅkanya ṅūni,

sumahur saṅ kumāra,

apa dumehnikaṅ prakṛtitattva sәṅguhәn tayā de saṅ para,

sumahur bhaṭāra,

apan tan hiḍәpnya, ṅuniveh ikaṅ lakṣaṇa, tan paramārtha pvekaṅ tayā sinaṅguh saṅ para viśeṣa, taha tan paramārtha ikā, apan saṅkani jagat lāvan ulihanya, mvaṅ inulihakәn taya, vruh pva saṅ yogi, an tan paramārtha ikaṅ tayā, ya ta mataṅnyan tan ikā phalani samādhi saṅ yogi, ndya ta lakṣaṇa saṅ hyaṅ paramārtha, anuṅ tujuni samādhi saṅ yogi, yan kva liṅanta, ikaṅ cetanā sarvajña saṅ kumavruhi ikaṅ rāt kabeh, sarvakāryakartā, saṅ gumave ikaṅ rāt kabeh, ndi ta kahananira, yan kva liṅanta, kahananira ikaṅ rāt kabeh, ndātan katon, apan tan palakṣaṇa, tan parūpa, tan pahiḍәp, pisaniṅu, apa byaktanyān hana, yan kva liṅanta, nihan utpattisthitilīnani jagat, yeka icchā bhaṭāra, ikaṅ prakṛtitattva, ya sinaṅguh niṣkala ṅaranya, ahyun pva sira gumavaya jagat ya mataṅnyan taṅ ātmā cumetanekaṅ prakṛtitattva, mataṅnyan mәtu nāda saṅkeṅ niṣkala, saṅke nāda mәtu taṅ vindu, saṅkeṅ vindu mәtu taṅ ardhacandra, saṅke ardhacandra, mәtu ta oṁkāra, saṅkeṅ oṁkāra mәtu taṅ tryakṣara, saṅkeṅ tryakṣara mәtu taṅ pañcākṣara, saṅkeṅ pañcākṣara, mәtu taṅ jagat kabeh, nāhan lakṣaṇanikaṅ niṣkalatattvān pamәtvakәna jagat,

sumahur saṅ para, kadi saṅkeṅ prakṛti ikaṅ vindu nāda, apan saṅkeṅ bhaṭāra ikaṅ vindu nāda mәtu, yan maṅkana liṅa saṅ para, yan dadya taṅ dharma tuṅgal sumaṇḍaṅa dharma rva, ndya dharma rva ṅaranya, nyaṅ cetanā lāvan acetanā, ndya ṅaranya cetanā, bhaṭāra paramakāraṇa, ndya acetanā ṅaranya, nyaṅ prakṛtitattva, yekā tan dadi pinakadharmān atuṅgal, padanya, kadyaṅgāniṅ tәṅah ṅve, sәṅguhәn ta tәṅah vәṅi, apa mataṅnyan tan dadi maṅkana bhaṭāra, apan sira vәnaṅ makecchā ikaṅ rat kabeh, yan maṅkana liṅa saṅ para, saṅsāra kapva bhaṭāra yan maṅkana, sadenyan saṅsāra bhaṭāra, yan kva liṅa saṅ para, tan palvir kapva ikiṅ rāt kabeh, denyan tan palvir ike jagat, apa yan kasaṅśayakna, yan maṅkana liṅa saṅ para, ndya jagat tan palvir tinonta, apan ta pva pratyakṣa ya, yāvat tan palvir ikaṅ jagat, tāvat pralaya, pralaya ṅaranya, mәtu vaḍavānala yan tәkā, apan icchā bhaṭāra inapekṣānya, ◉

tәlas sinurat iṅ antiraga pun, iti dharma pātañjala samāpta ◆ titi māsa padūpvan vulan kasapuluh, pañcavara, u, trivara, dva, saptavara, a, aṣṭavara, yama, vuku vuyai, i śaka, parab iṅ sakala lavaṅ gajah guṇa vvaṅ ◆

Andrea Acri edited this text over the years 2006–2011, and published the first editions of it in 2011, the second in 2017. He typed and maintained a text file (2006–2018) which was cast into a TEI structure over the years Converted the text to TEI format 2018–2023. The transcription was changed to comply with DHARMA norms in 2023.

In this digital edition, corrections of misprints in the 2011 edition, as well as more substantial changes (e.g, alternative emendations/reconstructions), have been applied on the basis of the 2017 edition; corrections of misprints in the 2017 edition have been applied tacitly.