Sumanasāntaka by Mpu Monaguṇa: Digital Edition

Modifications for complicance with EGC v2 Transform to DHARMA Initial TEI encoding

avighnam astu

saṅ hyaṅ-hyaṅ pinakādideva ni karas para kavi makatattva ṅ akṣara saṅ saṅkan paran iṅ palambaṅ atidurlabha kahanan ira n kavīśvara saṅ sūkṣmê* kukus iṅ tanah kinikir iṅ kuku ri səḍəṅ iṅ aṅrəgəp laṅə̄ māyākāra vinimba nitya sinamādhi* manurunana caṇḍi pustaka sambandhanya k aṅarcanê pada nirâhyun ajar-ajara milva riṅ kavi yekī kāraṇa ni ṅhulun praṇata bhakti ri sira magave namaskr̥ti luṅgah niṅ kalaṅə̄n sapuṅgəl asəkar kakavin inuparəṅgan iṅ laṅə̄ puṣpāñjalya ri jə̄ṅ nira n Sumanasāntaka caritakənâstu sanmatan pūrvaprastuti niṅ kathā hana sira dvija taruṇa suśīla subrata śiṣyâgastya* sira prakāśa karəṅə̄ kasutapan ira nora tan vruha khyātîṅ rāt Tr̥ṇavindu nāma pinakesi niṅ ujar-ujar iṅ kadevatan sakveh niṅ hyaṅ anaṅśayê hyuna nirâṅadəha ri paṅadəg Surādhipa ndan saṅ hyaṅ Suranātha mukhya pinakādi niṅ avədi manaṅśayê hati lvir tan duhkha sira ndan i tvas aviveka riṅ aṅənana de niṅ olaha gūḍhākāra nira n vikalpa kadi tan hana panaha-nahā nirâlaha prāyê saṅ suyaśa n təka ṅ bhaya sakêṅ musuh avədi kaciryanâvədi vvantən rakva varāpsarī linəvih iṅ sa-Haripada vagəd vicakṣaṇa prajña dyah Hariṇī* ṅaranya tuvi vaṅśaja vəka-vəka devaputrikā sākṣāt hrū nikaṅ indracāpa subhagêṅid-iṅidan i hayunya dug siṅī aṅhiṅ sāra hiḍəp hyaṅ Indra śaraṇāśraya paṅalaha śakti niṅ tapa yekī rakva kinon hyaṅ Indra marəkâṅucap-ucapa rahasya riṅ taman śīghrânəmbah acum vulat nika sinuṅsuṅ iṅ ujar amanis priyambada om putrī saṅ anəmva kāṣṭaguṇan aṅhilaṅakəna kaśaktin iṅ tapa aṅhiṅ māsku sinambhavâsiha paṅə̄bana niṅ aśaraṇêṅ kadevatan vvantən brāhmaṇa siddhiśakti magave tapa katəka-təkêṅ surālaya maṅde saṅśaya ni ṅhulun ndan aləməh katəṅəra ri vikalpa niṅ hati saṅkṣepanya lumampahânaku mamañcana maṅənəsa tan parovaṅa eñjiṅ māsku lumakva və̄rakəna riṅ hima sumiliba tan hana vruha nāhan de nira mojar asru paṅutus nira lumarisa tan vruh iṅ bhaya kepvan dyah Hariṇī katon gəgəh i suṅsut ira yadin apakṣa laṅghana rəs lāvan pagəh iṅ kabhaktin ika kāraṇa niki n ubhaya n lumampaha paṅgil paṅhvata janma liṅnya səḍəṅanya karahatana riṅ pamañcanan mantuk dyah Hariṇī manəmbah i* Surendra ri vijila nikā madandana* eñjiṅ maṅkat akañcugâdarupa bhūṣaṇa nika pinasaṅnya tūt hənū tan kvâmbəknya lumampa-lampah* aṅəlih kasusu laku nikâṅhade-hade denyâdharma ri de nirâṅutus amighnanana tapa tatan hanâṅrvaṅi ṅūni n pamvit i jə̄ṅ Surendra maməgəṅ taṅis inimur-imur kinə̄lakən maṅke n sampun adoh* lakunya vənaṅ aṅləpasakəna taṅisnya riṅ havan lagy ânambatakən laranya kasihan pati səsəl anəsəl purākr̥ta tūt mārgāmbara luhnya tan papəgatan drava kadi titis iṅ maṇik bañu kāṅən denya katuhvan iṅ giṇa mamighnani tapa vipathâgave hala yadyastun kavaśā pira ṅ sukha təmun yan amuhara hala ndya don ikā mvaṅ yan tan kavaśā katon tətəp i śāpa nira paṅavaśanya tan vuruṅ kodāsīnan irêka ta pva pinalar-palar ika siha saṅ hyaṅ Īśvara mampəh mātra laranya luhnya pinakembuh i manis i matanya yan vulat luṅsur-luṅsur ikaṅ tapih pinakatambəh i raras i təṅah nikâlaris hrəknyâlvan ya samar-samar tuna-tunâmuvuhi manis i de nikâṅucap aśrī varṇa nikâṅəlih vənəs ikâṅhaləpi kadi vənəs niṅ abrata luṅhā lampah ikânəlat ri hirəṅ iṅ gagana hanan avās hanan samar rəp mukṣânusup iṅ rəməṅ kadi vulan lumaku kasaputan lamad-lamad lvir vintaṅ sumurup katonan ika riṅ vəkasan asəmu marmakê kapə̄ rəm niṅ megha tinūtakənya manicip-nicipi javuh avarṇa cātaka ramyanya n paməgat laṅit ləpas adoh təka ri sadavatā nikaṅ limut agyā de ni panas hyaṅ arka karaṇanya n alisuh atavəṅ-tavəṅ hima prāpta ṅ truh sumaput prabhāva ni lakunya vahu mari huyaṅnya kāṅinan tūt Gaṅgâhavan indracāpa tumurun lari nika sukha mampir iṅ vukir vatv ânuṅgul amarvatâhrit aguhâtupis atiba-tiban latāṅkura ṅkā teka n dumunuṅ lukar ni darupanya pinahayu lugas siniṅsətan* tistis tan hana tīrthayātra viku śakty atapa katəmu śūnya kevala aṅhiṅ handiva-handivâgaravalan katəmu marək anuṅsuṅ iṅ guyu priṅgâtyanta ruhurnya mānuṣa paran vənaṅa mara ri dohnya durgama ṅhiṅ saṅ paṇḍita saṅ huvus tuməmu ṅ aṣṭaguṇa sira vənaṅ marêrika hetu dyah Hariṇī vənaṅ mara kajanman ika saphala devakanyakā lər denya n tumurun savaṅ garagatī tumurun ahavan antih-antihan tiṅhalnyâbayaṅan mamet i patapan saṅ atapa parananya bañcanan* riṅ Vindhyācala* rîndrakīla saləbak vukir ika pinaran katuṅkulan mvaṅ riṅ Revatakāgra Gandhamadanādri masamun apa tan hanâtapa hetunya n bhramitâpəgâkuliliṅan kadi pakalaṅan iṅ niśākara lambuṅ niṅ Himavān kidul hana ta parvata śuci patapan hañar katon tumraṅ* teja nika prabhāva nira saṅ sutapa tilaka niṅ jitendriya aṅlīlâṅililan pahoman ira sə̄h kukus ika maṅadəg nirantara lvīr oṅkāra mavindunāda kadi hənva nira hələm anəmva śūnyatā buddhi dyah Hariṇī tumiṅhal irikaṅ patapan asəmu harṣa niścaya byaktâvās Tr̥ṇavindu ta pva makapājaran iki liṅ ikânəhər marək līlâṅambah i hambal iṅ jalada saṅsaya samar asamun hibək javuh miṅsor lvīr ahavan turun-turunan iṅ gupura sukha hanan kadînulur prāptêṅ parvata śūnya kayvan ika pakṣa vukir asəgəh iṅ hañar ḍatəṅ haryan mvaṅ hujuṅan sakêṅ* pisaṅ alasnya rumarasah amet kalālatā sakveh niṅ vulakan sumaṅgraha bañunya valahar ika pakṣa sāgara jaṅgâṅambəki pakṣa kasturi vaṅinya hinaturakən iṅ drəs iṅ barat vahv âron anak iṅ pakis haji katon sukət i pasusupanya durgama sakveh niṅ kayu nora tan pagati de niṅ anila təka riṅ tr̥ṇāṅkura ndan trāsâsəpi tan paron kapanasan paḍa ragas amalar-malar javuh vaṅkal seṅvan alīt-alīt bataṅ agə̄ṅa hələm i paṅadəgnya riṅ juraṅ lvir tan pahyaṅ ikāṅ alas hana giraṅnya vahu linavad iṅ varāpsarī tapvan marma dahat panuṅsuṅ ika kevala kusuma yayā maveh sukha lumrâkveh* tumibêṅ gəluṅ kadi tinap savaṅ aṅit-aṅitan səkar taji kady âṅəmbaṅ akon aṅantya pakamaṅgala nika tanəmən ya devatī ləṅləṅ niṅ talagânamar tasik anak tuna-tuna kavi nora maṅləṅəṅ * paṅgaṅ vvadnya kakumbah iṅ bañu sulurnya vahu mətu satuṅtuṅ iṅ tanah i groṅ-groṅ i pasir-pasirnya mavatu dyan aniru-niru piṇḍa niṅ karas līlâṅanti darā putihnya kadi śaṅkha madulur aṅurambat iṅ hənī ṅkā ta dyah Hariṇī marâdyus aməḍar təṅah abuṅah amavvahan gaḍiṅ mālih ṣaṭpada niṅ saroruha malivran i vətis ika kesisan tapih romanyâvilətan marê susu nikâniru-niru rakət iṅ lumut-lumut kəmbaṅ niṅ kumudâṅlilir kadi tinaṅhi vinulatan ikâṅdadak məkar

ri sampun ika məntas aṅliga-ligā kadi taman aśarīra devatī titis-titis ikaṅ vəhaṅ satitis iṅ bañu vulakan anumbər iṅ paras *lumə̄ṅ amiluluk* gaḍiṅ kahudanan susu nika kasarambahan bañu sirat ni bañu niṅ gəluṅ kinirab aṅhiribi kukus i sāri niṅ puḍak titis ni madhu niṅ madhubrata baṅun ləṅa vaṅi humaḍaṅ hanêṅ śilā pavitra hana tīrtha nirmala sumaṅgraha ri harəp avarṇa pahyasan hrəbuk-hrəbuk i kəmbaṅ iṅ sarasijâsəmu havu-havu muṅgu riṅ cupu hirəṅ ni kucup iṅ trikañcu suməlat kadi sipat avavan puḍak-puḍak lumampah aṅəlih kaṅelan apa tan tahu mahas-ahas iṅ vanāśrama səkar niṅ asanâmayuṅ* kuniṅ apiṇḍa mamayuṅana kāla niṅ panas paḍâṅrəs atatā ṅ* vuluh kadi harəp təkənakəna tan intar aṅhaḍaṅ gaḍuṅ kadi kamāsihən paḍa lumuṅ baṅun aharəp anuntunêṅ hənū huvus təka riṅ āśramâṅiṅət-iṅət ry ulaha nika məne n panəmbaha nəhər lumaku muṅgah iṅ gupura saṅśaya manaha-nahā marê daləm aluṅguh irikaṅ bukur paṅaraṅanya nəhər asidəhâṅure gəluṅ cəcək masahuran sakê vuri pinakpak ika pinakadūta niṅ hala

bhagavān Tr̥ṇavindu səḍəṅ ajapa nitya Śivasmaraṇa asamādhi kumə̄l katəmu həniṅ i buddhi nira n humənəṅ dvija śukla suśīla sira pinakadarśana riṅ patapan kadi Vaiṣṇavavimba pavulatan ira n pamutər guduha i rare nira ṅūni hati nira hibək sukət aṅrahabi inənə̄ ni rajah tamah ira karaṇanya n aron asəvə̄ atuha pva sira vruh aṅaji guṇa niṅ guru nora kari hana sattvaguṇâmaṅani sukət i buddhi nira n patapa vijayêṅ patapan dvijavara makasādhana yoga nira anukūla ri jə̄ṅ nira sahana niṅ indriya nora vani aṇimā laghimādi kakaratala de ni samādhi nira kamumukṣuhan aṅhaḍa marək akəlir svaśarīra nira ri huvus ni samādhi nira linəsu rakva harəp mijila anəlat rarab iṅ rərəb aṅuraṅi tan panələs harəpan larap iṅ kilat iṅ gagana kadi dinəmvan aganti lumə̄ṅ paṅapə̄ ni gərəhnya kadi mamisiki n hana vāhu ḍatəṅ

mijil munivarâhavan həniṅ i buddhi nira laku nirâṅhade-hade pijər mulat i posik iṅ jaladhi ramya təpi nika katuṅku-tuṅkulan ri tiṅhal ira riṅ bukur saṅ araras vinulatan ira maṅligā-ligā ya kāraṇa nira n parâgaravalan saṅ ahayu tumuluy madan tapih saṅ ugratapa nirvikāra tamuyan vəkas iṅ ahayu riṅ kadevatan salah səmu manis-manis nira baṅun manis iṅ anəmu mitra riṅ hənū dudū sukha nira n mulat paḍa lavan sukha niṅ atamuyan* kadaṅ-kadaṅ ikaṅ turida rāga sampun amatəh milu-milu mamiratyakən manah aniṅsəti həniṅ ni buddhi nira śuddha ni basahan ira n siniṅsətan subaddha daluvaṅ siṅī pinakabaddha nira pamadha* riṅ rajah tamah samar tura-turah ni bhasma nira paṅgəsəṅ ira viṣayâtəmah havu* jamaṅ kadi mahā taraṅtaṅən i sampət ira huvus anampətîndriya marək sira sulakṣaṇâdara maṅakṣama* kaməna nira n paluṅguha katon upaśamâtalaṅkup aṅagəm kayu kanaka supattralepana tamuy nira maseva dharma pakatonan i manah ika bhakti kevala prasiddha guru śiṣya rūpa nira kālih i papupul irêrikaṅ bukur anəmbah ikaṅ apsarī mətu rarasnya tan asarag aṅambək-ambəki ləməs ni luṅayanya kālih ajajar kadi pəpəsa kahambəṅ iṅ susu laris ni jarijinya sampun atalaṅkup inayat inamər marêṅ mukha amatyakən i raśmi-raśmi ni liriṅnya n api miṅay aṅīrakən vulat lanâṅiṅət-iṅət dvijeśvara tumon hayu nika viniveka riṅ hati tulis kanaka vahv inuṅkaban aṅāśraya ri buṅah ika n pabhūṣaṇa ahadyan ahənəṅ nəhər masidəhâsəmu taruban i kāla niṅ gave yadin halivatêṅ sabhā tan alaraṅ haləpakəna maḍampa mās tatur sinaṅśaya nirâlumâluñuta madhya nika kulayən iṅ pasaṅgaman susunya vinaliṅ nirêmva gamələn ri kahiḍəpan ikôṇḍuh-onḍuhan vətisnya kadi marvi maṅgarita paṅkvakəna kahiḍəpanya de nira mukhanya gumavaṅ ya rakva tinahâlvaṅa hilaṅa ri kāla niṅ tiləm hyaṅ iṅ nagara kālasan pavulatanya n anuruni rikaṅ vanāśrama madhubrata baṅun pinañjiṅan ikâṅidəri salaga mətta riṅ səkar puḍak kadi panəmpa-nəmpahan ikâsəmu maniliha lambay iṅ ṭikā amānuṣa hayunya kenaka nikâmulaṅunakəna riṅ jitendriya kayogyan iṅ apiṇḍa ratna liniṅir saparana nika ta pva həmbanən hade kuməḍapa n vulat yan aṅadəg təhər aṅadəga tan paluṅguha yadin lukara kenya tan vruh amahayva kahaləp ika denya n aṅligā savaṅ-savaṅ iṅ aṅhəmū guyu kapantəs ika pamapaganya riṅ vulat

āścarya buddhi bhagavān Tr̥ṇavindu denya ndātan hana hyun ira mātra sumə̄ṅa riṅ tvas kevalya susthira manah nira tan prapañca masvāgatâmanis ujar nira sārjavâtvaṅ rakryan kṣamākəna kamîbu paran kitâri strī tan vruh iṅ bhaya ri durgama niṅ vanādri aṅhiṅ katon kita vənaṅ mara nirvikāra prāptâṅənəs maniluman baṅun indrajāla āsəṅka ni ṅhulun i māsku təkanta maṅko strī niṅ viśeṣapuruṣa prabhu cakravarti tan sah kinuṇḍaṅ i səḍəṅ niṅ aburva-burvan ndā ṅke n katəmva samayanta lavan priyanta strī tan padharma ta kunaṅ kita kāri śoka svāminta tan pahaməṅan kavi tan pavastha* ambəkta vikva manusup-nusupêṅ alas gə̄ṅ sambin hiḍəpta vulikən palarən katəmva anvam kunaṅ kita katuṅhapan iṅ bapebu muṅgv iṅ kadaṅ maṅupapīra* maveh larâmbək mārganta lampus aṅusir vanadeśa śūnya ahyun* lumakva viku kilya rarā viratya hyaṅ-hyaṅ niṅ āśrama kunaṅ kita divyacakṣuh vruh riṅ jitendriya sadābrata tan kənêṅ strī buddhinta mogha mavəlas mulat iṅ daridra prāptânurun paran ikā paṅanugrahanta* rakryan hiḍəpku ri hayunta sakêṅ vanādri ambət ni sinvam iṅ aśoka marê təṅahta molah* kadînəluk-əluk luṅ ikaṅ gaḍuṅ mrik tan sah katon i luṅayanta ləməs-ləməsnya amraṅ baṅ iṅ katirah arja hanê laṭinta tuñjuṅ birū məkar alurv akusū sugandha mālih lurunya mamanis kavavê matanta mimbâmarāśraya tikəlnya hanê halista polah nikaṅ kusumasāri hanê vivalta maṅgiṣṭa vāhu rinəmək tumibê kəcapta paṅhrəṅ nikaṅ bhramara muṅgv i taṅis-taṅista hīs* niṅ tusāra rumarab makajanma luhta sandeha buddhi mami de ni haləpta māsku dūra n manuṣya kita kevala devaputrī de niṅ manarka ri ḍatəṅta mahāprabhāva saṅkê hyaṅ Indra mapa donta varah kamîbu nāhan panarka nira marma dahat rasanya mambə̄ tilam kadi huvus vruh i rumrum iṅ strī śr̥ṅgāra devaduhitā kavəlad hatinya maṅgəh ri buddhi bhagavān kəna bañcananya

suraputrikā sumahur ādara mulat aviraṅ tumuṅkul anaṅis bhagavān rəṅə̄n pavarah i ṅhulun aṅusir aṅāśrayê kadi kita taha tan sakê Surapati n ḍatəṅ aṅənəs amet pradeśa vəgilən mvaṅ asambhava n hyaṅa niṅ āśrama panaha-nahā dvijeśvara hade tuvi tan manuṣya manivi prabhu madulur aburva-burva riṅ alas hayu ni ṅhulun taha tan antuk iṅ aṅalap-alap sakêṅ girivana riṅ apa n rarâharəpa vikva manusupa manəmbahêṅ* viku talun pisaniṅv ajalva kavi mūrchita layat alaṅə̄ manambaṅ anadin bhagavān manəhta huniṅan humulunakən avaknya tan patəbusan tuvi hetu niṅ mara ri jə̄ṅ dvija taruṇa bhaṭāra Dharma maṅutus i ratəṅ nikaṅ brata samādhi kakavaśa təkapta sampun amatəh mətu tan pasaṅkan inucap vulatana tariman ṅhulun phala nika hyaṅən i ṅhulun ri pada saṅ dvija taruṇa kaśuddhyanôtus-utusən pisanīṅv anəṅgaha məne n pasuruhana səkar lavan bañu damu marəkêṅ paturvan aṅisapvakəna suku munīndra riṅ pakasutan tan asambhava n hulun anaṅhuluna yan apuyəṅ dvijarṣi majapa arənah təkapnya n aṅucap kama riṅ ujar amighnani brata tapa mata mesi luh saha taṅis vinulatakən ikā vineh amanisa ajajar pasaṅgraha nikā susu vaṅi ni pipinya lāgi sumaji kadi pādapâṅlih alaris təṅah ika pasənāha ri dvijavara umənəṅ* dvijarṣi rumase vacana nika təkā vaśâṅhamu-hamu smaradūta kevala manisnya n aṅucap ataṅis lanâməlas-arəp vəkasan dvijendra vihikan ry abhimata nika yan pamighnani tapa mətu kadvijātyan ira nora kavədi nira sāhasânapathani

aḍā vipatha ko pakojar iku dhūrta tan aharəp i hayva niṅ tapa huvus vruh aku yan pakona Suranātha karaṇamu ḍatəṅ mamañcana ikaṅ hala gavemu tan vuruṅ amaṅsulana maləsanêri ko məne manuṣya təmahamva tan valuya riṅ surapada vəkasamva devatī yadin śatasahasrabhāgan i sukhaṅku n ataki-taki niṣparigraha tathāpi kapana n samaṅkana sukhaṅkva k aṅusira sukhêṅ surālaya hana pva sukha niṅ manuṣya masamāgama mapa ta gave nikâdhama ləhəṅ juga ṅ anəmva pātaka sakêṅ katuduhana kabañcanâtapa nahan liṅ ira sāhasâṅḍavuhi śāpa nəhər anudiṅî kivâṅdələ̄ prapañca surakanyakā kahilaṅan hurip apəga ri tan sih iṅ Vidhi ri doṣa nika rāga-rāga n aṅusir sutapa pisaniṅūn kabañcana alum kadi gaḍuṅ pinuṅgəl aṅayuh səkar iṅ asana tan vuruṅ pəjah tumuṅkul i harəp dvijarṣi makacāmana rarab i ləbū ni jə̄ṅ nira hanan kadi vaśâṅdələ̄ nəhər aminta vinaluyakən iṅ surālaya məhāh salahasâtəpak jaja manəmbah aḍəkuh amalar kasanmata* apan harəp iṅ antaśāpa karaṇanya n aṅucap amanis maṅañjali dvijarṣi huripən ṅhulun titisanâmr̥ta valuyakənêṅ kadevatan əmās* maṇik anekavastu kəta ṅ enaka panəbusa ni ṅhulun hurip ṅhulun pva kasihan muvah syapa pametana pirak i rikaṅ tapovana mataṅnya k anaṅis panəmbaha ri jə̄ṅta panəbusa ri jīva ni ṅhulun tuhanku bhagavānku hāh sipi lalista vulatana manəhta kāsy-asih harəp muliha tan vənaṅ mulih aṅantya ri kita kita melik i ṅhulun unəṅ niṅ abapebu tiṅhalana denta mapa karika hetu niṅ hənəṅ kədə̄ harəp anona māti kəna śāpa karika kita tan vruh iṅ vəlas ahā mpu vihikan ṅhulun ri vuyuṅanta* kalalarana śuddha niṅ tapa kṣamākəna manəhta tan tugətananta sakasalah i śīla ni ṅhulun prasiddha kita paṇḍitânumata riṅ viguṇa vipatha tan vruh iṅ krama si səmbah ika jampya niṅ kadi kita n luməkasa vuyuṅ iṅ kadi ṅhulun kucup niṅ asanâluru ndan amalar karirisana ri taṅgal iṅ kapat gaḍuṅ lumay aṅolakən tavaṅ aluṅluṅan amalar anəmva rambatan həlaṅ midər anambayaṅ saha taṅis kapanasan amalar drəs iṅ javuh ṅhulun pva kalaran mataṅnya k amalar turunana vara de dvijeśvara ahā pahalavə̄ ta koṅ avakana ṅ kapalaṅ-alaṅ i demu n apsarī kadaṅ-kadaṅa de bapebu pəkuləmva paḍa kari sirêṅ kadevatan pəjah ṅaran iki syapêka ta taṅis-taṅisana mulatâsihêri ko vəlasku ri hayunya sis mapa tikī haməṅana niki yan pəjah məne bhaṭāra Suranātha tiṅhalana de nr̥pati kasih-arəp patik haji huvus kaləmahan śināpa kapana n maluya muvah i pāda saṅ prabhu hilaṅ manə-manəh Surādhipati tan vuruṅa pəjaha riṅ pamañcanan riṅ āśrama vəkas ni jīvita patik haji viphala pakon Surādhipa prabhu prabhu rəṅə̄n taṅis ni Hariṇī kapəgan aputək aṅhiḍəp lara pəjah pinativar kinonakən i tan kavənaṅ ika gave dinohakən ikaṅ gati śināpa sis ya katahā ya katəmu tuluṅən patik haji pati pva balik iṅ hurip lara lalis pva balika ni vəlas Surādhipa vijil sahana saṅ hyaṅ iṅ kusuma vāhu sumalaga nihan lavad* ṅhulun hurip gəlisa ni ṅhulun ya palakunta ri yativara hayva tâsuve kunaṅ yan agəgəh dvijarṣi palalun savuyuṅ* ira sadenya saṅkulən tuhun kita luməṇḍva-ləṇḍva ri śavaṅku gəsəṅən i pañaṇḍi niṅ vuṅū manis ni mata ni ṅhulun labuhən iṅ jaladhi luh irikaṅ tasik madhu raras ni vaja ni ṅhulun hañutən iṅ śrigaḍiṅ i pucak iṅ gunuṅ gula ləməs ni ləṅən i ṅhulun ləpasən iṅ gaḍuṅ aṅəlih aṅolakən tavaṅ laris ni vətis i ṅhulun kəkəsananta kəmitana ni deva niṅ puḍak kəlab ni tapih i ṅhulun suji ya teki pupulakən i posik iṅ səkar pataṅkis i giriṅsiṅ i ṅhulun aṅantya ri ləṅəṅ i kiriñciṅ iṅ bañu pənəd ni laku ni ṅhulun tan asarag valuyakəna ri lampah iṅ liman pəpə̄ ni panaṅisku tan kahuniṅā* ḍavuhakəna ri śabda niṅ cucur ameta maṅunəṅ galuh kita pamorana ni kusut i roma ni ṅhulun ri mimba ni taman ta paṅləpasananta ri rəṅu ni halisku yan tikəl gəmuh ni susu ni ṅhulun vahu mijil tuhañaṅakəna riṅ pucaṅ gaḍiṅ vənəs ni mukha ni ṅhulun hañutən iṅ vulan inəmukan iṅ lamad-lamad pamādapa* ni madhya ni ṅhulun aros kirimakən iṅ aśokapādapa əbun* hana ri tuṅtuṅ iṅ tr̥ṇalatāṅkura patuvavanê luh i ṅhulun lavan pañurigênunus ni paṅavakku rakətakəna denta riṅ tulis luṅid ni kuku ni ṅhulun turuṅ aṅanya ri jaja-jajar iṅ səkar taji nahan śruti ni de nikânaṅis atuṅtuṅ ucapan aməlas-məlas-harəp samasta para deva sūkṣma humənəṅ tinaṅisan ika tan hanâṅlavad arəs hava-havākənâvədi kumə̄l vruh i gəgəh i vuyuṅ* dvijeśvara paḍâṅrəs anaṅis-naṅis taṅis ikā piniturun ika muṅgu riṅ vaneh taṅis-taṅis i deva niṅ kusuma sūkṣma tinaṅisakən iṅ madhubrata taṅis niṅ amarāśrayêṅ vulan avā tinaṅisakən i śabda niṅ cucur taṅis-taṅis i deva niṅ jalada cātaka* manaṅisakən hanêṅ tavaṅ taṅis-taṅis i deva niṅ masa kapat tinaṅisakən i gəntər iṅ patər muvah dyah anu mojar asrət ucapanya tuna-tuna sinambaṅan taṅis mpu ḍaṅ hyaṅ apa tāh inanti ni manəhta paṅuṣadha ri duhkha ni ṅhulun yatan hana hiner manəh dvijavarâsiha humuripana ṅ huvus* pəjah kṣamākəna magə̄ṅ ṅhulun mpu varahən duga-duga mara tan harəp-harəp nahan rasa ni de nikânaṅis aminta vinaluyakən iṅ kadevatan udhāni bhagavān paṅavruhana de nira mulat amanis vavaṅ lipur apuy siniram iṅ javuh paḍa ni suṅsut ira tan agəgəh vavaṅ paḍəm sərəh vaṅi lavan duh iṅ vvah araməs ri vaja paḍa ni de nirâṅucap paran karika tan sihaṅkva ri kitânaku kita karikâpan uttama manuṣya tuvi sāvakanya yan atə̄n mara-mara hiniḍəp kadaṅ-kadaṅ kunaṅ saṅ agave laranta paramārtha nira sira bhaṭāra Śaṅkara lukat ni kapalaṅ nikaṅ sukr̥ta mārga ni kapalaṅ i denta devatī priyanta riṅ anādijanma dadi mānuṣa lituhayu sūryavaṅśaja narendra Raghu rakva mānak aniru prakaśita subhagêṅ purāntara apañjy Aja dhanurdharânvam isi niṅ Raghunagara turuṅ smarātura tuhun kita dine bhaṭāra yugalanya muvah akurənâsihê kita kunaṅ pva siha ni ṅhulun ri kita tan kalavasana dadinta mānuṣa aṅālihana kaprabhun kita lavan saṅ Aja sukha sarājya tuṅgalən tuhun paməkasanta vīja savijîrika kita maluyêṅ kadevatan səkar sumanasântakanta ya tikâməgatakəna ri śāpa ni ṅhulun huvus pva kita mantuk iṅ surapadânaku katəka-təkêṅ vvaluṅ tahun samaṅkana narendra saṅ kavəkas iṅ nagara muliha riṅ kadevatan apaṅgiha muvah lavan kita tuməmvakəna phala nikaṅ kadigjayan mataṅnya pahayun manahta sukhamārga matəmahana rājaputrikā nahan rasa ni de nirâməgati śāpa nira təhər ajar satorasih ri mūla ni dadinya len təmahananya tinalatah irâgalar taṅan kunaṅ pva vəkasan hiḍəpnya ri kaśāpa nika kadi vineh anugraha unəṅnya matəmah luh adrəs i kapə̄ lara turida nikâtəmah taṅis

hāh saṅ mukṣa ri luhku tan pahaməṅan namu-namu pəjah iṅ pasaṅgaman maṅke pvâmbəka niṅ prahāsana bisâṅhari-harih iṅ arəs pinaṅkvakən ṅūni n hyaṅ kita riṅ surālaya manəhta milu matəmahan varāpsarī maṅke pvâṅdadi rājaputra kita her ṅhulun atəmaha rājaputrikā hāh svāmiṅku dudut ṅhulun ri juraṅ iṅ ləpihan alal aṅə̄lakən laṅə̄ həmban riṅ vvat aśokapādapa təṅahku pagaməlana luṅgah iṅ gaḍuṅ suṅsuṅ riṅ maṅunəṅ galuh lulut unəṅku ri kita kaka tan vənaṅ kinas riṅ paṇḍan haḍaṅən ṅhulun lumaku śoka laku-laku ṭikâhavan puḍak nāhan ṅrəs-ṅrəs i samba-sambat ika kāsihan alal apasah lavan priya tan sih niṅ Vidhi mogha tan patuluṅan karaṇa nika manəmvakən lara de niṅ gyānya tuməmva janma saṅ aniṅgalakən iriya riṅ kadevatan amvit matya manəmbah iṅ dvijavarânəhər aṅusapi luhnya riṅ sabuk

huvus praṇata bhakti tan paśaraṇāśraya mati lumah iṅ pamañcanan humuṅ taṅis i sundarī nikaṅ alas hinarivuvu ni śabda niṅ gaguṅ rərəb kusumasāri tan papəgatan kətug i təḍun iṅ ertalîṅ juraṅ luṅ iṅ gaḍuṅ aṅindracāpa humaḍaṅ havana nika madadya mānuṣa hyaṅ Agni hana riṅ śarīra mijil aṅgəsəṅi śava nikâgilaṅ-gilaṅ kasiddhyan ira saṅ dvijarṣi gumave dilah ika karaṇanya n ujvala bukur pamiḍaran ndatan* milu gəsəṅ kadi jalada* rinəṅgan iṅ kilat samantaji paḍəm tuhun hana kukusnya kari sakukus iṅ damar pəjah hayunya milu bhasmibhūta təka riṅ gəluṅ ahavuk amiṇḍa riṅ kukus lumə̄ṅ va nikaṅ asthi mātra kadi śeṣa ni luru ni matanya yan vulat baṅun tura-turah nikaṅ sipat ikaṅ latu-latu tumibā paḍâhirəṅ hilaṅ sinirir iṅ samīraṇa havunya tumuluy anarīra riṅ hrəbuk

saṅ hyaṅ niṅ suraloka tan pahaməṅan namu-namu pəjah iṅ pamañcanan sūkṣmâṅjanma marêṅ Vidarbhanagarī sira ta pinakasāri niṅ sarāt putrī śrī Krathakeśikeśvara nəhər hayu nira kadi ṅūni n apsarī khyāti śrîndumatī panaṅgah i sira n pamukha kadi śaśaṅka pūrṇama *lvīr iṅ svapna vijil nirâdbhuta karəṅvan i vali nira riṅ kadevatan rəmrəm taṅ daśadeśa de ni sahab iṅ jaladakusuma* muṅgu riṅ tavaṅ ləṅləṅ de ni gərəhnya ṣaṭpada malivran apupul irikaṅ limut hrəbuk sumyuk taṅ madhupuṣpavarṣa madulur jaya-jaya ri jayā nr̥pātmajā ṅūni n tuṅgal anak nareśvara lavə̄ manah ira ri vijil nr̥pātmajā ndātan pembuh ikaṅ sukhê sira baṅun bañu humidəṅ aṅanti riṅ ranu maṅke n pembuh anak nirâhayu sinambhava maṅadəha lakṣmi niṅ purī embuh gə̄ṅ kadi sāgara rvab aməpək sukha nira ri vijil nr̥pātmajā rakryan saṅ pinakeña rakva kulavaṅśa vəka-vəka kadaṅ-kadaṅ haji aśrī varṇa nirâraras kadi saroja kinəlabakən iṅ ryak iṅ bañu de niṅ məñcuh aṅambək-ambəki sabhāva nira təka hirəṅ kineriṅan susvan bāhvan agasyak aṅhaləpakən vruh iṅ aṅinakanê tuhan-tuhan lāvan tovi nirâhaləp marəka hadyana kunaṅ asavaṅ priyambada ndan parnah kaka de nirêña nira karva sira paḍa suśīla vīryavan kālih-kālih irâṅharis-haris anusvani rahina vəṅî suputrikā saṅkêṅ svarga hulun tuhâṅgəh ira ṅūni ri hana nira riṅ kadevatan vvaṅ ri jro juru niṅ məṅəs pinarək iṅ vagəd amirit i hatvik iṅ manis sakvan selvan atūt manahnya kalavan kabayan iṅ arəjêṅ kaguṇḍikan tuṅgal riṅ katəkāsihan lavan ikaṅ pinuji pinakagusti riṅ* raras rūm rakryan nr̥paputrikā mava hayunya tuhu ratu ni raśmi niṅ prajā strī māvak caturaṅga sabhya tan athāni panagara təkâhavan ratha prāyâpāmbəkan aśvasañcari lakunya vagəd aniru*lampah iṅ liman nistanya n viparīta rūpa nika tan kasah i pada narendraputrikā himpər peka minantryakən huvus abhūṣaṇa hinaləpakən yayâhala rakryan rājasutânvam eṅgal atuhâṅiṅət-iṅətakən aṅdələ̄ tavaṅ aṅliṅliṅ kinaharṣan iṅ kaka-*kakâmvaṅi sira rinəbut pinaṅkvakən kahyun-hyun kumurəb-kurəb kumədal asriṅ aniru-niru putra niṅ pəñu vahv âhuntv aputih katon səḍəṅ irâsəmu guyu baṅun aṅhəmū mənur solah bhāva nirâmaṅun sih aṅəvah* bapa bapa juga de nirâṅucap yan paṅjaṅkah aṅaṅguh-aṅguhi gumoh lumaris asəmu ləmbu kanyakā mogâhyaṅ sira yan maluṅguh ararəm tumiru-tiru paluṅguh iṅ gaṇa yan sore mulat iṅ vulan vruh avavā vulan anuduhi vimba niṅ vulan endah buddhi nikaṅ vaneh mamitaṅis-mitaṅis i sira harṣa riṅ taṅis eṅgal mary anaṅis pinakpak amanis vulat ira sinave pinaṅkvakən len tekaṅ harəp* iṅ halâhala-halan mamalaku hala hāsyakāraṇa maṅkin tībra raras narendratanayâhayu ri huvus ira n paveh ala anvam tapvan apâsarik hayu nirân inaṅətan apupuk ri vunbunan tan paṅde hala tambəh iṅ hayu bajaṅ-bajaṅ ira mata niṅ lavak bulu pantəs yan pagəlaṅ lave vənaṅ i kāla nira kapəjahan rare bajaṅ tambā niṅ səgu tuṅtuṅ iṅ sərəh aṅimbuhi manis ira yan hanê rahi ndi nyū* danta paḍā məne n ləviha yan marək i sira səḍəṅ pinaṅkvakən lāvan ketaka dūra n aṅhiriba nista nika n inuparəṅgan iṅ ṭikā sakveh niṅ kusumâvənəs pinakataṇḍiṅ ira vavaṅ alum sakêṅ taṅan maṅgəh de niṅ anusvanî sira dudū lavan anak-anakan sinusvakən eṅgal vruh tinitah bisâtaratayan vəgig aṅadəg-adəg vavaṅ tibā guyvan* vruh makukuk bayan tinañakən kahanan ira bisâtukup mata sorêsuk maləbū-ləbū cala kinon ahuvusana ya saṅkan iṅ taṅis harṣânon gigirən sirâṅgyat anəpak bisu-bisu nəhər aṅgigir-gigir dudv aṅkən vəṅi de nira n vruh aṅucap mari bisu-bisu saṅsayâbənər sampun rakva sirâpupak pinakapūrvaka nira n aṅajî munīśvara prajña vruh ri kalīṅa niṅ pada* kadi vruh alavas anulus vicakṣaṇa eṅgal pathya ri kaprayogan i rusit niṅ aji kadi təmah Sarasvatī umvat śīghra tuvuh nirâhayu savaṅ salaga niṅ asanâṅrəṅə̄ gərəh tapvan vruh riṅ iraṅ dahat kalukaran tapih avuda-vudâgəlaṅ*-gəlaṅ tan pendah ləṅəṅ iṅ vuluh gaḍiṅ i kāla ni pamilət i luṅgah iṅ gaḍuṅ mambət madhya nirâvəlū buṅah i varṇa nika kadi giliṅ-giliṅ kuñit nirvā tan paguṇa ṅ pupur pinakapahyas ira təvas aveh kram* iṅ mukha dūrâṅhayvana tan padon sipat irâṅlətuhi* ri həniṅ iṅ matâbiru lāvan taṅ paṅəluk ləṅən viphala yeka karaṇa ni halis nira n tikəl vyarthâṅ tūlahanânukər-nukəri tan vuruṅ amaṅunakən srət iṅ susu sumraṅ-sraṅ mata vahv atə̄n ri ləṅəṅ iṅ gərəh aṅirim-irim lavan riris aṅlūd ry ambək ira n rimaṅ taṅis ikaṅ bhramara kalilipən saḍək hrəbuk yan sore ri huvus nirâhavu-havu vruh amava kalaṅə̄n irêṅ natar aṅhəmban* karas esi bhāṣa pinakānak-anakan ira tan sah iṅ tanah piṇḍa dvādaśavarṣa kāla ni vijil nira rumara-rara n hanê daləm yan paṅhyas-hyasi mogha tan kavanəhan tiniru-tiru sade nirâṅhyasi sotan ta ṅ hyaṅ iṅ Indraloka kapana n tan apənəda təmahnya mānuṣa lakṣmī niṅ nagarâhulap mulat i rūpa nira n ahayu katvaṅ iṅ tulis miṅkil tapvan agə̄ṅ payodhara nirâṅləvihi buṅah i tuṅtuṅ iṅ gaḍiṅ hyaṅ hiṅ* tāman aṅiṇḍarat səmu ni rūpa nira n ahayu muṅgu riṅ taman tistis lālana tan hanâṅiriṅakən laku nira kadi tan tuhan-tuhan molah sumpiṅ irâsanâlum avənəs baṅun avədi ri luñcip iṅ mata paṅrāt niṅ kalaṅə̄n tinurvakən irêṅ vatu karaṅ aṅilo vvay iṅ ranu tan śobhā* humiriṅ lumah makakaraṅ-hulu ləṅən ira mūrchitâṅligā paṇḍan raṅkaṅ aṅə̄bi tan panisi mātra ri sira n apulaṅ lavan hrəbuk amrəm karva karas ləṅəṅ kadi ṭikā piniturun inamər sakêṅ puḍak maṅkin marma narendra māsih anəkāni samaṅinakanê manah nira *buddhi śrī parameśvarī sukha makānak* i sira samanah nirênarih maṅke n tan hana vahv atakvan ahiḍəp nr̥pati təka sirâṅhəmū guyu maṅgəh buddhi nirâjajar lavan anak nira baṅun aṅabehi jīvita *saṅ Bhojânak irâtuhâpagəh ikaṅ guṇa ri sira paṅavruh iṅ ratu sākṣāt prāṇava īśvara nrəpati kāsih ira sira suśīla nītimān aṅhiṅ rakva pakə̄ nareśvara ri bhūmi nira sira sadā janapriya maṅgəh rovaṅ irâṅadəg ri hiḍəp iṅ mulat i sukha nira n paḍâpagəh ndan griṅ saṅ prabhu saṅsayâbvat atələb maṅinak-inaki tan tulus varas təṅrān iṅ hurip iṅ śarīra paḍa rūkṣa mavarah i təkā nikaṅ pati yekā hetu nirâṅutus marəka riṅ dvijavara r̥ṣi śaiva sogata mvaṅ mantrī vinəkas-vəkas nira n anak nira sumiliha ratva hayva len sakveh saṅ vinəkas-vəkas paḍa təñuh tvas ira kahənəṅan mulat juga de niṅ duhkha tumon i kāsy-asih i saṅ kavəkas ira dumeh sirâsiha mojar mātra pəgat-pəgat vəkasan amrih asayut aməlas-məlas-harəp luh lāvan səkəl iṅ taṅis dulur i de nira sumahur i śabda saṅ prabhu he nāthaṅku huvus kapaṅku vacana nrəpati rasa nirâvəkas-vəkas an saṅ Bhoja gumantya ratvakəna yadyapi pəjaha məne nareśvara ndan lvir vyartha ḍavuh ni śabda naranātha ri sama-marək aṅlavad-lavad āpan ṅhiṅ sira keṅə-keṅət* alavas kumalilirana kaprabhun haji śaktin de naranātha hayva ləsu saṅ prabhu tahapana vedya kinkinən śrī devîndumatī katoliha katon uvuh-uvuha nira n katiṅgala *mvaṅ saṅ Bhoja sirânvam ardha kapalaṅ vəkasakəna narendra riṅ prajā ndān amrih-mriha saṅ prabhu syapa parāśrayana sama-marək məne n kari nāhan liṅ sama maṅlavad-lavad i saṅ prabhu lara nira membuh aṅlare vahv âṅlumpuhi saṅsayâmaṅəti roga nira vavaṅ alum sirâvənəs tan polah sira tan kəḍap ṅuni-ṅuni n paṅucapa sira kevalâturū ṅhiṅ maṅguh kalavan miṅəl sahur ira n tinaña-tañan i de nirâlara satya śrī parameśvarī tan avədîṅ pati tumuta ri līna saṅ prabhu ndan devîndumatī tinolih ira kāsy-asiha nira məne n katiṅgala mvaṅ saṅ Bhoja paḍânvam-anvam anaṅis paḍa vihikan i tībra saṅ prabhu kālih-kālih irâpupul tinaṅisan pinəkul ira nəhər sinuṅkəman ai Bhojaṅku vəkaṅku hayva tan asih kita bapa riy arinta kāsihan putrīṅkv Indumatīṅku bhaktya ri kakanta kita sarika sambhavâsiha anvam kāri tuhanku* deṅku kavəkas riṅ iña lavan uvâmalar tuha himpər hantiga niṅ manuk taḍahasih sy anaku tinuvavākən iṅ vaneh vuṅsv amvīta bibinta matya tumutê kapati saṅ ahulun ṅhulun tuhan lvâmbək māsku saṅ aprihêṅ* bhuvana səmbahən iṅ amava rāt kitânaku ai putrîndumatīṅku māsku t ahurup tapih alah ibu kenku kenakən soṅsoṅaṅkva tapihta karvana lavan haji ləpasa mamukṣa-mukṣana səmbah ni ṅhulun alpadharma ri padadvaya paramaviśeṣapaṇḍita pun devîndumatī kayatnakəna de vivudhapati bapebva māsiha mvaṅ saṅ Bhoja muvah vuruk-vurukən iṅ nagara palar anirva saṅ prabhu varṣājñāna parâdhipaṇḍita dumadyakəna kavijayanya riṅ prajā nāhan liṅ parameśvarī tucapa saṅ prabhu kasih-arəp aṅhiḍəp lara saṅ hyaṅ jīva hanê gulū nira lavan kətə-kətəg ira saṅsayâsamun sampun kāku pasāra-sāra ni varah yativara rinəgəp nareśvara tan simpaṅ kadi de nirâṅayatakən panah aṅənani de nirâṅhiḍəp tr̥ṣṇābandhana* riṅ śarīra pinəgat nira manah ira kevalâhəniṅ sadyotkranti linakṣyakən pataṅananya tumutupana simpaṅ iṅ hənū lāvan mantra nikā ndatan dva sira saṅ prabhu vibhu riṅ avak vavaṅ məsat kevalyâśraya sūkṣma māri kahiḍəp mamarəṅi Śivamārga dug məṅā sampun māti nareśvarâtri sakaḍatvan anaṅisi pəjah nirâlara śrī devîndumatī muvah tinaṅisan kapati lumay avak nirâvənəs mādan śrī parameśvarī marək anəmbah i śava haji satya sādara mājar yan sira milva matya pavarah nira karaṇa ni luh niṅ aṅrəṅə̄ he nāthaṅku nihan ṅhulun praṇata bhakti tumuta saparanta tan saha yadyastun kita devatâthava manuṣya huluna pakənaṅkva de haji putrī putra rarā səḍəṅ mərə-mərəh kathamapi tan ikā katoliha patrəmta prabhu yeki haṇḍəmana ni ṅhulun amah aku suṅsuṅ iṅ hənū nā liṅ śrī parameśvarī nəhər apatrəm aməkasi hurip sirâsəgu himpər varṣa tibā nikaṅ luh i Vidarbhanagara humilī mavah-vahan sambat-sambat ikaṅ sarājya gumərəh kadi kətər i gərəh niṅ ampuhan tavvan riṅ kusumâṅjrah iṅ masa kapat paḍa ni taṅis ikā n* rinəṅvakən prāpta ṅ truh kadi səmbu-səmbur i jajâṅavara ri gəmuh iṅ payodhara varṇākāra nikaṅ kuvuṅ-kuvuṅ apiṇḍa pupuk i rahi keṅgutan halis polah niṅ kilat iṅ tavaṅ kadi kəḍap niṅ asamaya kapaṅgihêṅ taman his-hīs niṅ bañu muṅgu riṅ tarətəpan kadi luh iṅ anaṅis pinaṅkvakən muṅgv iṅ maṇḍyusa kāli-kālih ira mogha kadi kinasut iṅ pasaṅgaman keṅər mātra gulū narendramahiṣī kadi cala-cala tan panūt kinol piṅgir niṅ kanin iṅ jajâsəmu mirah kadi karagət i tuṅtuṅ iṅ kuku rāhən siñjaṅ ira n lume miṅay avarṇa vahu kavava de nareśvara śrī devîndumatī ləvəs lara nira n panaṅis asidəhâṅure gəluṅ mambət madhya nirâṅgaluṅgaṅ araras təṅah ira sumave ri saṅ pəjah tan kevran lukar iṅ tapih vijil i luh nira tan inusapan hanê mukha sambat-sambat irâṅrəmək* hati rasanya karaṇa ni taṅis niṅ aṅrəṅə̄

ahā bibi haji ndi sihta vinaliṅku ta kita tulusâsihê ṅhulun muvah bapa haji ndi sihta palakunkva* tulusa ni vəlasta ri ṅhulun ujarta kita ṅūni kāsihana niṅ* jagat anaku sadā pakāśrayan jagat karika māsihêry aku kita pva paḍa tan avəlas maṅaryakən prabhuṅku kita kālih əndi parananta pavuṅu sakarəṅ varah ṅhulun yan iṅ Śivapadâthavêṅ Haripadâthava ləpasa kunaṅ sakêrikā ṅhulun tumuturâpa don iṅ ahurip viphala yan apasah lavan kita patiṅku havanaṅkva muṅsir i padanta bapa tañakənêṅ kadevatan pulahta humənəṅ diṅaryan asagar ndi kari culu-culuhta ri ṅhulun nihan ṅhulun anakta paṅkvakən aḍâtiśaya bapa kita n huvus pəjah prayojana ni deṅkv asambat akusā baribinana kita n paḍâturū palar-palar avuṅva de ni panaṅisku nəhər ajara māsku cəp tuhan nihan tətəlakən hatiṅku bibi muṅgah akəsəl ahənək təkê jaja muvah prih i mataṅku tīsana rahup-rahupana bibi bavva-bavvana pilī*-piliṅan i ṅhulun dumadak aṅhəlu pupukana tulya-tulyana guluṅku kadi meh kahə̄tana rasanya n anaṅis i patinta səmburən ri kāla ni huripta ṅūni bibi sāhasa kita sahasâṅabət ṅhulun hasih bapa hajî* ṅhulun təka sirânuluṅ aṅusapi luh mamaṅkvakən mataṅ ya bibi mah palu ṅhulun alah pavuṅu sakaharəp ṅhulun habət ndya sī yan anuluṅ muvah bapa hajî ṅhulun atəhər ataṅguhê kita syapêka śaraṇāśrayaṅkva ri pəjahta bapa haji nihan dudut ṅhulun apan kaka turuṅ vənaṅ śaraṇa ni ṅhulun apituvin anvam iṅ vayah kadaṅ-kadaṅ adoh sirâsih aləbâmihutaṅanana sī kadi ṅhulun mataṅ yan anakanta riṅ suruvayan ṅhulun alah alapən maran pəjah aḍā hyaṅ aparan ta koṅ Vidhi ṅaranmu tan avəlas adəṅky anon sukha bapaṅku sira māti demu mapa doṣa nira huvus akīrti riṅ jagat lavan bibi tumūt prasiddha tika ko muvah aməjahi tan pakāraṇa mataṅ ya vətu ko rva sānak aku patyani saha bala demu həntyakən

nāhan sambat irânaṅis kaḍəḍətan* lara hati nira tan vənaṅ kinə̄l simsim vāhu hilaṅ maṇiknya kaləbū paḍa-paḍa nira niṣprabhâkucəm* dady âteja katonan iṅ rahina tan paravi vəṅi tiniṅgal iṅ vulan saṅkê rūpa nirâsavaṅ karəbahan gunuṅ alara ri līna saṅ prabhu paṅde niṅ vidhi tan vənaṅ vinadha tiṅhalana kasih-arəp suputrikā kāry anvam ri pəjah nareśvara samaṇḍyusa sira kalavan nareśvarī de niṅ duhkha kədə̄ sirâmalaku milva maṅatigana maṇḍyusê daləm* patrəm vahv* inunus nirênayatakən ri jaja kaka-kakâkrak aṅrəbut maṅkin ghūrṇita śabda niṅ vvaṅ anaṅis vədi kaluputanêṅ* nr̥pātmajā āpan buddhi nirâṅhuvus-huvus apakṣa pəjaha tumutê nareśvara gə̄ṅ tr̥ṣṇâsih arāma-rena kapəgan kapati-pati sirâlarânaṅis drāk siddhânəmu duhkha niṅ dadi manuṣya paṅavaśa ni śāpa saṅ r̥ṣi saṅ Bhoja prihati n tumon kasih-arəp ny avak ira kari de nareśvara kady agriṅ sira de ni duhkha nira tan sah anaṅis i dagan narādhipa āśābhūta marambəhan vətu ni luh nira mulat i narendrakanyakā marmâmaṅku pəgat-pəgat sapitutur* nira tuna-tuna de nikaṅ taṅis rakryan hayva viraṅrvaṅ induṅ ənəbən ta pamanas i laranta tīsakən riṅ svargastha narendra sampun atuhâpituvi* huvus akīrti riṅ jagat pakṣa kṣatriya rāka rakryan apagəh vənaṅa śaraṇa rakryan iṅ hayu ṅhiṅ yan māti kakanta mamrih iṅ ayun kita pəjaha tumūta ri ṅhulun hayvâśâlara duhkha yan bapa haji mvaṅ ibu haji pəjah sirâdulur yāvat janma ṅaranya tan hana tuvuh vatu kaluputa saṅka riṅ* pati tan pendah kadi cakra niṅ ratha təka ṅ dadi niyata midər purih nika saṅkêṅ mr̥tyu təka ṅ hurip kunəṅ ikaṅ pati niyata mijil sakêṅ hurip māyākāra hanêṅ crəmin paḍa nikaṅ dadi sahana-hananya tan sthiti himpər pādapa tan vuruṅ manirarâməkasi tuha tuvuhnya tan lanā tiṅkah niṅ hurip iṅ manuṣya juti tattva nika tan alavas vavaṅ hilaṅ kintv îkaṅ pati jāti tattva nika tan kṣaṇika pinakadharma niṅ dadi eman ṅvaṅ luməkas mamet pati sakêṅ* luməkasa ri kapetan iṅ hurip pə̄ṅpə̄ṅən ta huripta yogya dadahanta makahuluna de munīśvara āpan yan vruh i bheda saṅ rva kalavan vruha ri pasamudāya niṅ tiga icchā nora kasaṅśayêṅ hala lavan hayu niyata luput sakêrika

kumva kunaṅ liṅa rakryan apa hayu nikaṅ hayu yan gavayən ri vruh i saṅ rva bhineda lavan i sira saṅ tri tinuṅgalakən kumva kunaṅ liṅa rakryan apa hala nikaṅ hala yan gavayən ri vruh i saṅ rva bhineda lavan i sira saṅ tri tinuṅgalakən siṅgih ujarta ri saṅ kr̥tasamaya viśeṣa paṅavruh ira kveh nira riṅ nagarêṅ acala paḍa tikā* pinakoṅgvan ira ndin rakəta ṅ sukhaduhkha ri sira satatâbrata tan palabuh lokaparāśraya kāraṇa nira magave hayu tan vipatha saṅ vruh i saṅ vəkas iṅ samaya vinuni de paramādiguru kevala śuddha manah nira linətu-lətuh kapanâlətuha vāhyaśarīra pinuccha nira ri təka niṅ pati tan ginəgə̄ jñāna viśeṣa śarīra nira taya śarīra nirêṅ vəkasan vvaṅ magave hayu yan vruh i sira saṅ amukti gavenya hayu tan dadi tan luput iṅ hayu hayu ni gave nika tan viphala vvaṅ* magave hala yan vruh i sira saṅ amukti gavenya hala tan dadi tan luput iṅ hala hala ni gave nika tan viphala vvaṅ magave hayu tan* vruh i sira saṅ amukti gavenya hayu tan dadi tan tuməmu ṅ hayu hayu ni gavenya tumūt maṅiriṅ vvaṅ magave hala tan vruh i sira saṅ amukti gavenya hala tan dadi tan tuməmu ṅ hala hala ni gavenya tumūt maṅiriṅ saṅ viku gūḍha nihan vulatana mamaṅan təḍa riṅ pahəhan tan təḍa tan śuci ta pva sahana-hana niṅ pinaṅan liṅ ira hetu nirâmbək alokika vinulatan ajrəm apiṇḍa kasop śuddha nikaṅ pratipatti makalarapan uttama niṅ samaya māsku mataṅnyan ikaṅ hayu gavayakənanta səḍəṅ mahurip paṇḍita tovi yayā sira maṅulahakən brata tan kaluṣa buddhy ahəniṅ brata yoga tapa taki-takinta maran kavaśa gəgvana rakryan anəmvakəna vara-varah paramādiguru

anəmu-nəmu kətêkā saṅ sampun kr̥tasamaya vihikan i rasa saṅ hyaṅ tattvajñāna kaləpasən tan ulih-ulih iṅ aṅdoh saṅkêṅ pāda munivara ulih iṅ asaṅu tasyan bhaktîṅ paṇḍita matuha aṅinak-inaka taṅ vvaṅ yāvat* jñāna pinakadon syapa ta sira mamaṅgih tattvajñāna dudu gave hana satata masevā tan byaktanya pinihanan sukr̥ta juga maṅinte lāvan duṣkr̥ta maṅiriṅ hana sira guruputrânak niṅ paṇḍita nagara sahana nira ta rakvâdr̥vya ṅ jñāna pakagurun taha tan ika paniddhan vet niṅ paṇḍita matuha amilihi juga saṅ hyaṅ tattvêṅ uṅgvana rahayu anak iṅ apirak akveh ṅūnî nvamnya paḍa sukha sahana nika ta rakvânirv akveh apirak ika taha tan ika paniddhan vet niṅ śreṣṭha panariman amilihi juga saṅ hyaṅ Śrī tan siṅ kahanan ira kita yayi səḍəṅ anvam prih saṅ hyaṅ rasa kavikun pira karika musuh niṅ vikv aṅhiṅ nəm ikaṅ akas alahakən i daləm tvas pet siṅ soṅgvan ika rarah* alaha pəjaha rakryan yêki svarga ṅaran ika

nā de nirâvara-varah ri narendraputrī tapvan tətəs tinuna sandhi nikaṅ prayoga anvam suśīla guṇamanta kr̥topadeśa saṅkê paṅajyan ira kavruh irâdhiguhya śrī putrikā kapənətan humənəṅ tumuṅkul sampun bhinasmi śava saṅ prabhu de munīndra muṅgv î taman sira cinaṇḍi lavan sudevī sampūrṇa bapra nira ratna mahāprabhāva saṅ Bhoja sampun aṅadəg ri Vidarbharājya svasthā sabhūmi nira bhakty anukūla sādhu mavvat paḍâmarahakən ri sukhanya rakva anvam muvah nr̥pati liṅnya muvah manəmbah sampun sirâyugala ratna viśeṣaputrī rājāṅkurâvilət ikaṅ pakurən savandhu solur lulut sahati ləṅləṅ aluṅluṅan kuṅ saśrī* sakəmbaṅ alaṅə̄ sakurā savīja kayvan ragas paḍa nikaṅ nagarî Vidarbha riṅ vr̥ddharūpa haji devata lahru sākṣāt maṅke n prasiddha kadi kayvan aron akəmbaṅ śrī Bhoja maṅdani sirânvam apiṇḍa rəṅrəṅ vet niṅ kr̥tā ri paṅadəg haji nora duṣṭa ramya ṅ hənū təgal ayun təka riṅ vanādri vāni ṅ vvaṅ aṅhalivatîriya tuṅga-tuṅgal aṅhiṅ gaḍuṅ luṅ ika maṅhabət asriṅ olih mantrī nirâtuha-tuha dvija śaiva boddha kāsih* kaparcaya narendra vənaṅ marê jro prajñêṅgitajña ginulaṅ halu riṅ viveka sojar niṅ āgama tinūt nira tan vimārga sə̄h śāla dharma kuṭi kīrti narendra riṅ rāt vvaṅ śreṣṭhi dharma ginave nira sāri-sāri vvaṅ duṣṭa mogha kapitūt milu dharmabuddhi solah svabhāva haji tan dadi tan tinūtnya śrī Bhoja sampun apagəh sinivîṅ kaḍatvan okər tumiṅhal i saṅ Indumatī hanê* jro āpan samāsa niṅ akarma vayah nirâgə̄ṅ aṅhiṅ svayəmbarakənêṅət-iṅət narendra nā de nirâṅiṅət-iṅət kalavan sudevī sampun vināhyakən irê kulavandhu ri jro riṅ sarvasiddhi tuvin amrətayoga təmbe hə̄man hajînarahakən para taṇḍa mantrī

eñjiṅ śrîndumatī kinon marəka kālih saṅ Sunandâṅiriṅ lāgy âmūrṇama mopavāsa ya ta maṅde suṅkavā niṅ hati tistis meh tumibā ṅ ḍavuh vvalu lumampah tan kva de niṅ harip mukṣa lvīr amarāśrayê mukha nira śrī niṅ vulan tan lumə̄ṅ sampun prāpta sirê daləm praṇata marmâtvaṅ ri jə̄ṅ saṅ prabhu lāvan śrī parameśvarī sira sinambah māsih aṅliṅ rəsəp om rakryan pada Nīlakaṇṭha kinabhaktyantâstu dīrghāyuṣa svasthā tuṅgalən iṅ manuṅgali jagat māskv îbu nā liṅ nira mojar saṅ prabhu māsku tan tugəta niṅ tvastân inundaṅ mami rākanta prihati n harəp mamituhê māsku ndan evəh juga saṅ ratv âsiha len sasambhava muvah yekī pinet ni ṅhulun kady amrat-mrati mās juga ṅvaṅ amagantākən purih niṅ dadi yāvat dharma ṅaranya riṅ dadi manuṣyâvās hivəh yan pinet lvir sūkṣmā maganal bhaṭāra gumave tiṅkahnya yan maṅkana yadyastun jalu-jalv ameta savavanyêṅ janma hayvâsali byaktêvəh niki kimpunah kita yan iṅ strī-strī n mameta priya saṅkṣepanya kita svayəmbarakənaṅkvânugrahaṅkvê kita sakveh saṅ ratu hundaṅən pilihanantâsiṅ sayogyê hati yadyan hyaṅ palakunta māsku yugalantâmrih-mrihaṅkvâṅhyaṅa aṅhiṅ yan hyaṅ Anaṅga kahyuna hade tan pāvak evəh pinet nâjñā saṅ prabhu yogya paṅkvakəna de saṅ mās maṇik niṅ purī āpan māsa nira n prapañca saputən riṅ rāga de hyaṅ Smara tan vruh riṅ sahurâviraṅ mata sira* n paṅyogyanê saṅ prabhu tan maṅguh sira tan miṅəl kadi liṅir mās arca paṅhyaṅ-hyaṅan tan saṅkêṅ avalepa kāraṇa nira n lvir tuhva monabrata kepvan buddhi nirâtəgəg maṅucap agyā-gyān harəp mantuka vahv âdandan anəmbahê nr̥pati mojar saṅ Sunandâṅjavil om yan om huvusən huvus liṅa ni māskv âlah tuhan mājara tan kevə̄* pituturnya de nr̥pasutā mantuk sirêṅ pamrəman strī-strī mājar-ajar gumanti humatur prāptêñjiṅ akveh marək molih tīrtha binuṅbuṅan vinalun iṅ handoṅ sakêṅ parvata maṅde śuddha ri buddhi saṅ prabhu sukhā sampun sirâcāmana

prāsāda sphaṭikâlaṅə̄ ri təṅah iṅ nūsâraras pañcuranya strī-stry âmaṅku puḍak vinimba makaranya lvir ləṅəṅ de ni kuṅnya kady ahyunn* amahayva luṅsur i tapihnya n maṅligā yan hana vvaṅ lāgy ânaṅga susunya saṅka ri pacur niṅ vvai ya tâṅde ṅəlihnya ri prāsāda hanârca ratna ri daləm ndān ardhanārīśvarâhyaṅ vimba śrī naranātha devata lavan devī nirârok śarīra ṅkā saṅ Bhoja maṅarcana pratidinâṅabhyāsa ri svastha niṅ rāt kady âmakpak aṅastvakən ri jayaśatrva* śrī narendra n pamūjā saṅ Bhoja vruh i tattva niṅ japasamādhi n dhāraṇa-dhyānapūrva mvaṅ tiṅkah niṅ adehaśuddhi pinakānuṣṭhāna yan recakādi sampun kālap ulah dvijeśvara mamūjā pathya riṅ Brahmamantra saṅ hyaṅ kūṭarahasyamantra jinapākən de nirâtūt gaṇitri tatkāla nrəpati n paṅuccaraṇakən mantra stutî saṅ hyaṅ arca tan polah viṣayâṅhiḍəp ri sira saṅyogānta riṅ yogya yogan maṅgā tan ləpara ṅ japastava səḍəṅ niṅ jñāna n enak tətəpnya simpaṅ niṅ hati yeki kāraṇa nirânaṅhāra saṅ hyaṅ Śivātma

ri huvus ira mamūjā līlā śuddha manah ira aṅusapi mukha saśrī de niṅ candana karakət mijil aṅinaṅ aṅicchā riṅ vvai niṅ ranu maṅilo nəhər anisigi dantê tuṅtuṅ niṅ gagaṅ inapi tucapa ta para mantrī śaiva brāhmaṇa sugata parəṅ apupul aseva ṅkānê jro paḍa humatur nr̥pati sira maluṅguh riṅ siṅhāsana kanaka aṅiṅət-iṅət i siddhā niṅ kārya n gavayakəna

ndin kāryêvəha riṅ vicakṣaṇa sujanma lituhayu kavi priyambada bhaktîṅ hyaṅ prabhu śakti dhairya saha vāndhava saha bala-kośavāhana yadyan sāgara tambakən satakənâthava vukir alihən ratākəna byaktâvās kavaśanya de nira saṅ uttamapuruṣa viśeṣa riṅ jagat śrī Bhoja pva sira n prasiddha guṇamanta saphala sira bhūmipālaka prajñā* śāstravit iṅgita vruh iṅ apālapan aṅinaki buddhi niṅ marək akveh dr̥vya nirâprameya kadi sāgara papupulan iṅ vvay iṅ nadī vany ânindita riṅ parākrama yan iṅ naya kadi bhagavān Vr̥haspati maṅke pva n hana rājakārya gavayən kakaratala təkap nareśvara śrī devîndumatī svayəmbarakənâmiliha * ratu sasambhavê sira sampun saṅ prabhu motusan maminaṅê para ratu samayogya hundaṅən lāvan saṅ Haja* milva vinvitakən iṅ nr̥pati Raghu katon təkā nira sampun hə̄man irêrikā ta para taṇḍa sama-sama samâṅharəp * gave sorêsuk gumərəh makakrətug abaṇḍuṅ asahuran aganti lor kidul len taṅ vvaṅ maṅusuṅ lakar-lakar ikā vinaca vuhaya de nikaṅ mulat akveh vvaṅ ka gərāh arəp mulata vāhu mətu sinurakan mulih pacəh abvat-hajyan* ikaṅ humuṅ saha garantuṅ atabə-tabəhan paḍâsəlur agyā lagy aṅuhuh sirê harəp alah laku-laku liṅ ikaṅ hanê vuri* tuṅgul paṅharəp osik akrəp asinaṅ kumuliliṅ anamar kuvuṅ-kuvuṅ lvir guntur kamarəkrəkən kayu pətuṅ priṅ asaləsək agəṇṭah iṅ ləbuh evər nora ləgâṅ apaṇḍay anulis para lukis asipət mvaṅ aṅjahit sakveh niṅ ginəlar vruhâṅanam-anam vruh i suruhan ikā silih tuluṅ solah niṅ tama tan hanâtaña ṅaranya huvus adu kabeh dinadyakən paprāsan vinaṅun paḍâcarita parva piniturun atuṅgalan kathā

embuh bhūṣaṇa niṅ təkən vuvuṅ apūrva karacanan ikā təkêṅ pamanisan lāvan tiṅkah ikaṅ paṅastryanan aparpat* ahaləp akilā paḍâhayu-hayu de niṅ mās pinakopacāra sinisik pəñu pinakavuvuṅnya kumram asinaṅ lvir digdāha riṅ astaparvata sənə̄ nika murub apadəlvan iṅ kṣititala aśrī ramya ni de nirâmahayu rājya kaliliran apūrva kādbhuta dahat miṅgar bapra nikê daləm vatu hitəm kuṭa nikaṅ i* yavā lumaṅkuṅ ahirəṅ kulvan vetan agopurâtiśaya lor kidul agupura piṇḍa marpat aruhur kr̥ṣṇākāra paḍâṅlunaṅ kadi gunuṅ kumukus i səḍəṅ iṅ darâvrəg aputih

luṅhā ṅ vr̥tta ri kārya saṅ prabhu paḍâdbhuta sahana nikaṅ vvaṅ aṅrəṅə̄ vvaṅ-vvaṅ pora ḍusun-ḍusun paḍa harəp vihikana mulatêṅ svayambara tan samvas raray aṅhvan iṅ təgal atakvan i təka ni gave nareśvara salvir niṅ baṇijêṅ pəkən taliṅa-lintah anaḍah ucapan gave nika* sampun prāpta samotusan humatur iṅ nr̥pati səḍəṅ irân hanêṅ sabhā enak buddhi narendra de ni panuval para ratu rasa tan vuruṅ təkā lumrā ṅ vr̥tta təkê daləm ri ḍatəṅârya Raghusuta marêṅ svayambara tvas niṅ strī sakaḍatvan aṅdadak aluṅ turida paḍa rumūpakê sira strī-strī harṣa pinə̄m pinañjiṅakən iṅ nagara ri pamihaṅnya riṅ* yayah tan harṣêṅ kavi rakva rena nika monaguṇa pisaniṅūn tumiṅhala ndan rakvêki hinurnya matya saka riṅ tuluyakəna susatya riṅ priya liṅnya n kevala tan hinanti ni papaṅgiha nika pəjahêṅ panambaṅan tapvan māri taṅis-taṅisnya n inalap hinaturakən i jə̄ṅ suputrikā vrā niṅ roma maṅekadeśa ri piliṅ-piliṅan ika baṅun pamer i luh enak riṅ vəkasan manahnya mamalar-malar i pada narendraputrikā āpan svāmi nikā karəṅvan i parəknya ri saṅ Aja təvək nikâpasah antuk saṅ priya maṅdavākən inaləm para kavi sumənāha riṅ kajaṅ yeki n rakva kinonya kady aṅucapâmah aku tuhan alap vaca ṅhulun mogha nyan ya kinonakən vacan ikā ri pamaca nika maṅdadak lumuh svāminyâdadi pustakânuturakən hiḍəp ika pinapagnya riṅ taṅis ṅūnî kāla nika n turuṅ marək i jə̄ṅ nira ṅaran ika ken Madhūdakā saṅ mambaṅ Madhusūdana priya nikā kavi taruṇa marək ri jə̄ṅ haji vidhy âmidhyani kāraṇanya virahênalapan alara luhnya tan pəgat ndah rakryan Jayavaspa teki vəkasan ṅaran ika satəvək nikā marək

para prabhu kaḍaṅhanan turida rāga nira sinaput iṅ smarâmulaṅuni huvus katəka kuṅ nirâhavan ujar tuhun aməlas-arəp riniptakən ira lavan punagi kesy anambaha ri jə̄ṅ nr̥pavaraduhitā hana hyuna nira akiṅkiṅ* aṅalap kasor paḍa tan aprabhu sahana nirârəbut kahulunan vavaṅ nr̥patiputrikā rinəbut iṅ hiḍəp inaṅən-aṅən raras-raras ira hanan kahiḍəp iṅ madhubrata rəṅih-rəṅiha nira n arəs kapaṅkva harasən ləyəp hayu nira n linaṅvakən amūrti kakavin inapus vineh amanisa hanê hati kinubdha kady apəga kāraṇa nira mijil iṅ puḍak dadi ṭikā adandan asənāha sañjata para prabhu ḍatəṅa marê* Vidarbhanagara lanâṅiṅət-iṅət ri pahyasan irâṅinakana ri manah narendratanayā hanâṅdadak anat śarīra manahap-nahap aharəp alantasa n vinulatan paḍâṅalap-alap sipat jənu mənuṅ havu karaṇa suputrikā n aharəpa* muvah saṅ Aja sampun arpat akire lumarisa makamaṅgala dvijavara sahasraśatakoṭi vīra vinidhi nrəpati tumuta śakti sampun ayaśa pənuh sahana niṅ ləbuh təkap i sañjata nika kumaluṅ pinañjər aṅadəg ikaṅ nagara denya kady akalaṅan vihaga saṅ Aja moliha prabhusutā mijil sira śinaṅkhapāṇyan i karaṅ ni patiga niṅ aśoka vahv asalaga ikaṅ bhramara harṣa riṅ kusuma muṅgv i taṅan ira marâṅisəp tan avəliṅ* laki-stry alivəran hañar-hañar apaṅgih adulur akaraṅ-karaṅ səkar arūm katampvan i kucur nikaṅ vvay ataviṅ-taviṅ i lavə-lavə̄ nikaṅ sarasija i sampun i kaśaṅkhapāṇyan ira mañjiṅ i daləm adulur lavan dvijavara anambah* aṅusap ri jə̄ṅ nr̥pati mamvit i ḍatəṅa nirêṅ Vidarbhanagara sinuṅsuṅ iṅ ujar prahāsana nəhər jumaya-jaya* jayā nirê paran ira aum hanaku saṅ pakolihən i tiṅhal iṅ ahayu duməlva jalva rasika kunaṅ pavəkasaṅkva hayva ta bapaṅku tan apənəd iṅ ambək iṅ para-paran rare mara kita ndatan raraya de niṅ amava manah atvaṅêṅ vvaṅ atuha inuttama dhanurdharânaku tathāpi tan ika paṅayāya riṅ kadi kita ikaṅ guṇa ya tan paraṅkəpana maryada rahayu lavə̄ hananya kapalaṅ ikaṅ sakahavan ri bhūmi ni bapaṅku pahayu kita rakṣakâṅanumata sapavvat ika hantusākəna sasambhava haturakənanya māsku tariman ujarku pituhunta hayva kita sāhasa maṅalapa vastu mūlya tinəṅət prasiddha kadaṅ iṅ jagat kita dumadyakəna sukha nikā mataṅnya pahayu pamitran alavas rəsəp karaṇa niṅ vənaṅ aṅalapa vastu tan pamalaku yan iṅ viṣayarāmajātaka purihnya karaṇa niṅ anəmva mās pirak ika karāsikaguṇan ya kāraṇa niṅ oliha raras i manah niṅ adyah araras kaśaktin abhimāna kāraṇa niṅ aṅrarah aṅalapa rājya niṅ ripukula sirat-sirat i de narendra Raghu mojar amanis amadharmakən ri saṅ Aja minuṣṭi pinakādideva hiniḍəp rasa nika kinayogyakən pinituhu putus niṅ adhamā tan ahyuna ruməṅvakəna ri pitutur nirâhayu dahat ya kāraṇa narendraputra makacāmana rarab i ləbū ni jə̄ṅ narapati ri sampun ira mamvit iṅ nr̥pati sarvi laku nira marê narendramahiṣī hanâṅhaḍaṅ aveh sərəh saha taṅis* vagəd ahayu hinəmban iṅ kaka-kaka kataṅgamaṅ aveh səpah nr̥patiputra nəhər amuhun amrih aṅhari-hari* tapih saṅ araras pininta nira mūlya basahan ira raṇḍi paṅhurup ira byatīta ri huvus nirâṅucap-ucap təka sira ri taman narendramahiṣī* ləṅəṅ kadi kadevatan haləp ikâpan ajuraṅ avukir mapājar-ajaran maertali pinañcuran jinalatuṇḍa tinalaga ri sornya kādbhuta dahat ikaṅ kaka-kakânvam adyus anəṅah lavan anak-anakanya ketaka miṅiṅ

kalpadruma taruvara pārijāta vinaṅun bvat asana sakapat abhrâsinaṅ asəmu sakêṅ kadevatan ululnya kanaka pinahat jinriṅjriṅ iṅ anak-anakan maṇik cinaturaṅga lumarap amirah mās jaṅga katirah avilət praləmba nika riṅ tarətəpan alaṅə̄ ṅkānā nr̥patisuta marək ri rena nira sādara satiru-tirun amvit lumarisa ḍatəṅêṅ Vidarbhanagarī bibi nira vihikan marmâsih avəlas asəgəh mamakpak amapag riṅ ucapan amanis nirvighna kita bapa jayêṅ svayambara sadâṅalahakəna ratu rakryān aṅinaṅa* tanayaṅku māsku mapa hetu niṅ avak akuru agriṅ karika kita lavan vaneh brata kunaṅ karaṇa niṅ avənəs hayvânaku kaluṣa kitâhyun iṅ kajayaśatrvan* anuta ri harəp akveh phala nika kaki sarvavighna niyatanya hilaṅ alaradan ndan rakva kadaməlan ikaṅ svayambara kahop riṅ anakəbi rara sakveh para ratu pininaṅ ya teka pilihən sakaharəp alapən de ni ṅhulun ahiḍəp i buddhi saṅ rara kapan harəpa riṅ atuha ṅhiṅ kahyuna nika ratu cakravartitanayâguṇa kavi taruṇa rakryan pva saphala vəka cakravarti tuvi śakti vihikan aṅaji* siṅhākr̥ti tuhu-tuhu siṅhaputra vənaṅ uṅsirən iṅ aśaraṇa byaktânaku mamənaṅa riṅ svayambarasabhâṅalahakəna ratu tan səṅgahən aṅaləm anak syapêka kadi māsku lituhayu vani

tatkālê paṅucap narendramahiṣī tucapa ta para ratnakanyakā osik tan pakavanvan agyaṅ i ḍatəṅ saṅ Aja kadi hañar-hañar mulat tan pātmā kamatəṅgəṅən kalukaran gəluṅ asidəha tan hanâṅucap kady âhə̄m turidanya n osah akəcap lvir anicipi manis nr̥pātmaja vvantən lvir śaśivimba vāhu mijil aṅḍaḍari hayu nikânvam iṅ vayah aṅgə̄ṅ mabrata śuklapakṣa nika paṅlvaṅ i manah ika tan vənaṅ licin rāganya n dadakan tumaṅgal i ḍatəṅ nr̥pasuta kadi tambvaṅ iṅ vulan kr̥ṣṇākāra təṅahnya de ni tapak iṅ suh asəmu*-səmu Rāhv añumbana len taṅ lvir pranitâdagaṅ kira-kiranya sumikəpa vəkas nr̥pātmaja kapraṅ rvêpu kataṇḍəgan turida tan patahənan aṅagəm pralāpita toh toh nyân iṅ agəgvan ambək apagəh mapa tiki n alah aṅgəgə̄ smara aṅlampvâṅusirê padadvaya nirân panikəlakəna tur humaṇḍəma strī saṅsāra sarāga mohita savaṅ vana gahana kalahrvan* iṅ kapat trāsa tvasnya kakiṅkiṅan ginəsəṅan pinaravaśa tinunvan iṅ smara norânīsi manahnya kevala panasbaran alisuh aṅə̄lakən lara maṅke pva n karəṅə̄ gərəh saṅ Aja mañjiṅ aluṅ asəmi kuṅ nikâsəvə̄ endah buddhi nikaṅ vaneh təkap ikâmava turida luput linakṣaṇan muṅkur tan huniṅê ḍatəṅ saṅ Aja mañjiṅ asila ri harəp nareśvarī ndan denyâhyas apahyasan dudu-dudū hiniraṅakən ikê nr̥pātmaja sūkṣmākāra ni raśmi-raśmi ni vulatnya n araras apadəlvan iṅ crəmin* kanyā rvaṅ siki ramya kālih aṅisapvakən anak-anakanya ketaka tuṅgal mājar i putra-putran ika māsku saṅ Aja sira rakva maṅkata ndan hayvâkilayū tuhanku niyata ṅhulun inucap ujar nikâkalib marmanyâpasah ambək eṅgal apadudvan aṅuvahi pamitran aṅdadak strī-strī suksəka vahv agātra turidanya mijil i vijil iṅ payodhara tan sah riṅ salukat gave nr̥patiputra sinalukatakənya tan humuṅ ramyârūm karəṅə̄ manisnya sinameni pamavan ika riṅraṅ iṅ hati* tan samvas ginarut-garutnya hiniḍəpnya saṅ Aja sahasâṅisapvakən sakveh niṅ kuməmit prapañca ni hatinya kuməkəsi taṅisnya riṅ karas āpan buddhi narendraputra kadi tan tulusa duga-dugâṅhalimbaṅa* bhakty ânəmbah i jə̄ṅ ni rena nira məṅgəp amanis agave vulat maliṅ luṅhā tan pracurânəhər-nəhərakən manah iṅ ahayu kāri suksəka

mijil saṅ Aja kādbhutâbhinava rūpa saṅ aṅiriṅ apan paḍâhyaṅ* ahaləp ikaṅ gaja rathâśva sañjata sabhūṣaṇa nika dumilah kasənvan aruṇa sumaṅgraha humerakən vidhi nira n lumarisa kumisik pasaṅgha niṅ ujar baṅun jalada tan pakāla gumərəh ri taya niṅ aṅin aṅḍapur saha kilat *payuṅ -payuṅan iṅ ləbuh kadi səkar sinavuṅ apan anekavarṇa suməkar ikaṅ paṅuṅaṅan huvus vinalunan vəḍihan inuparəṅga riṅ tulis əmās rarânvam inəgəh parəṅ mijil amaṅguṅ asəmu-səmu lakṣmi niṅ masa kapat paḍâlal asənāha tiṅhal amanis vulatakəna ri raśmi-raśmi saṅ Aja hanêṅ gupura tan vavaṅ sira lumampah ataña ri gənəp ni sañjata nira samâsila hanêṅ ləmah muni manuk marahakən i vijilnya tan hana kari sirêṅ palukayan kinon ira kumona ri para juru yan lumakva rumuhun samaṅkana sira n lumampah aḍarat harəp iṅ ulah avās yayanyan ahaləp ri lampah ira ghūrṇita ṅ paḍahi paṅharəp ira kumisik maṅertali tibā saru svara nikâbaruṅ binaruṅan tabə-tabəhan agənturan kadi gərəh humandaru* tibā gubar kumətug asriṅ aniru kətug iṅ hudan vahu ḍavuh arūm uni ni ghaṇṭa niṅ liman aṅuṅkaṅ asahuran i paṅhrik iṅ kuda bisir dvijāti r̥ṣi śaiva boddha śuci sojar ira maṅabhivāda muṅgu ri harəp yathākrama paḍâdarâhaləp agə̄ṅ i vətəṅ ira lavan huvan* riṅ atuha lumampah alaris malah ya tan arampaka ri sadavatā nikaṅ ləbuh agə̄ṅ humuṅ təkap ira n paṅuccaraṇa mantra kadi madhukarâṅisis humalivat kəliṅ vani-vanîṅ usāna pamarakṣa nira mamava bhindivāla palaga baṅun rinavisan vəhaṅnya kalavan ḍaḍa nika paḍa vok təkêṅ suku vulun hibək tatu rujit-rujit kadi tinambalan avak ika varṇa bəntar inavət agə̄ṅ paḍa kabhīma-bhīma kadi dānava mukha-mukha daitya piṇḍa caviri ikaṅ marək i jə̄ṅ narendratanayânvam aguṇa paḍa darśanīya taruṇa titik nagara nora tan vruha n anak vəsi haji tuvi mūlya kavvaṅan ika vatək Madana maṅdadi vvaṅ ujar iṅ mulat i lituhayunya n ahyaṅ araras kunaṅ saṅ Aja Kāmadeva sakalânurun ucapan ikaṅ kapūhan i sira samaṅkana nikaṅ* vvaṅ iṅ paṅuṅaṅan haṅu-haṅun arəbut mulat ri saṅ Aja hanan kadi harəp silih galaha riṅ susu manəvəka riṅ nakhâkas aluṅid paḍâkira-kirâkəkəs mata maliṅ-maliṅ aṅiriṅi kāladeśa sumilib katon kadi silih praṅêṅ halis arəṅv inayat-ayatakənya maṅkin araras ikāṅ amava pavvahan* lituhayu prakaśita kavi mambaṅ uttama rare hañar təka sakêṅ Vidarbhanagarī layat inalapan aṅhañaṅ-hañaṅakən rarānya kavəkas pinañjiṅakən iṅ nagara marək i jə̄ṅ narendratanayā ya kāraṇa ni luhnya mantən amalar-malar i saṅ Aja molihê sira hələm manis ni kakavinya mūla ni papaṅgih ika lavan ikaṅ rinuddha vinalat pinet pəjahanâsənə̄tan i kadaṅnya vinuni karaṇanya yan ləpas adoh paḍâpalarasan lavan jaruman amrih aṅalih ahavan vəṅîṅ ava vulan tinūt i paṅaran-ṅaranya Kavidoṣa vəkasan i ḍatəṅnya riṅ nr̥pasuta ya tīka tan adoh ginəgvan ira bāhu nika vinisikan tinakvanan ira syapêka paḍa saṅ svayəmbarakəna prakaśita pinakādi niṅ vvaṅ ahayu ikaṅ vvaṅ aṅuṅaṅ bvat indravanitâhyas ika pahavasən ta ya n sama hirib kəcapnya n aṅəsah miṅəl ya pavarahnya ri saṅ Aja vavaṅ rəmək hati nira hanâṅuṅaṅ anuṅga*-nuṅgal aṅisapvakən anak-anakanya ketaka miṅiṅ mahâṅjəlagakən hayunya makapaṅhaḍa buṅah i mukhanya tan patalutuh ri kāla saṅ Ajâṅinaṅ vinulatanya ri vulat ira lə̄r matanya lumiriṅ baṅun hañar anūt harəp səpah avədy aṅucapa tumiliṅ miṅe kadi cala rarânvam akire vulat dudu-dudū saṅ aṅəsah i kisapvan iṅ kaka-kaka tupis-tupis i de nirâṅənahakən manah ira tumibê narendratanaya vagəd-vagəd anirva-nirvakən i de nira gaməl inamər nirê taṅan ira təkāsih atabəh sərəh saha pucaṅ nika dalihan irâṅave ri saṅ Aja i sor niṅ asanâsəkar hana sirâṅuṅaṅ araras aliṇḍuṅan kaka-kaka ṅəlih-ṅəlih iṅ ekacitta ri narendrasuta ṅəlih irâhuyaṅ pinəpətan savaṅ-savaṅ i denirâmava vulat-vulat iṅ asamayâvədi n katəṅəra mulat pva saṅ Ajâṅdadak sira miṅe səmu niṅ avarahê katəmvana nira muvah vvaya* sirâhaləp rara sujanma pinavulaṅakən hanêṅ* paṅuṅaṅan gaḍiṅ pinakaputra-putran ira tan sah inarək-arəkan sakê nr̥pasuta ya teka tumurun hinəmban iṅ iñâmava sərəh arənah marək ri saṅ Aja bapâṅinaṅa rakva liṅ ra bibi liṅ nikaṅ aṅujarakən vaśâsəmu guyu pratāpa naranāthaputra kumutug pracalita kadi parvatâgni dumilah ikaṅ vvaṅ aṅuṅaṅ baṅun kusuma sālas anəḍəṅ ika kāri tan papəgatan manahnya ginəsəṅ təkêṅ turida rāga nika paḍa hilaṅ syuh aṅdadi havu ya teka hinañutnya riṅ nr̥patiputra sakala sira pə̄h niṅ arṇava madhu manis niṅ ucapan kaka dyah ari liṅnya sinəpuhan i raśmi niṅ vulat arūm ya teka kinabehan iṅ vvaṅ aṅuṅaṅ mr̥du lalita rasanya rāgakaraṇa raras-raras i denya miṅgək aṅənāni n* aṅucap api tan vruhən hana mulat halisnya minahānya molah amaṅun gət* unəṅ arəṅu maṅlare ri saṅ Aja

strī-stry âṅucap sojar ikā yinuktyan liṅnyê narendrātmaja mūḍhabuddhi akveh sira ṅke nagarī ry Ayodhyā sāmantaputrī paḍa yogya-yogyan. yadyan təkā dlāha sirê Vidarbha tan suṅsuṅən riṅ kakavin vilāpa tan kevva riṅ rāga təkap suputrī bhagnapratijñā mulihêraṅ-eraṅ nāhan vuvusnyê naranāthaputra ndan rakva parnah jaruman gatinya vvantən suputrī paṅadunya yogya marmanya duhkhê saṅ Aja n tan ahyun parnah kakanyâsrak atuṅga yôjar antən hade denta təkôjar apyak putrī paran tan harəpê tuhanku hyaṅ niṅ purī tovi yayā sirâhyun maṅko n marê śrī naranātha Bhoja ambək nira śrîndumatī pakādin ghārâpan atyanta viśeṣaputrī sāmantaputrī sira tā maṅadyah nāhan sahurnyê paṅucap ny arinya bhāvanya miṅgək tumikəl halisnya koṅ aṅdələ̄ solah ikā n asəṅhit gə̄ṅ krodha sojar nika karṇaśūla vvantən kili vrəddha sahur nirâtvaṅ sajñêbu ni ṅvaṅ kṣama ta ṅhulun dyah buddhinta kevalya sumorakən saṅ sāmantaputrîndumatī viśeṣa tan sor sirêṅ janma karājaputryan riṅ vīrya siṅgih sira tan paḍâḍah* ndan yogya ghārâpa hivaṅ nirêbu mūlya n minūlyan krama niṅ dadi vvaṅ nāhan sahur saṅ viku vr̥ddharūpa məṅgəp pratuhv âsəmu pakṣapāta milv âhadenî sira yan lumampah rovaṅ nirâgoṣṭhi vulatnya heva

tucapa ṅ* vvaṅ i paṅguṅ ika kadi vayaṅ jinajar kinudaṅ sakunaṅ-kunaṅ iṅ taliṅa larap i hintən* ika n kuməñar hana tâṅadəg an hayu nika kahiḍəp kadi modahita i kasiṅkab i kenya hana kadi gibah vinuluṅ sinurat paḍa tan humənəṅ sahana niṅ aṅuṅaṅ mavagəd-vagədan amanis-manisan mata nəhər araṅin-raṅinan paṅavak arupit-rupitan susu nəhər aləməs-ləməsan luṅayan sira saṅ sinajinya saṅ Aja juga nora muvah kinire nr̥paputra səḍəṅ sapavulatan aveh ləṅəṅêṅ* aṅuṅaṅ tadanantara meh ləpasa laku nira vəkas iṅ nagara amanis kadi tan pəgata vulat irê salavaṅ-salavaṅ amalar hana niṅ vvaṅ ahaliṅana kori məṅā sasisih araras rinasan patəmu nira vulat rasa tan ləpara kalavan saṅ akūṅ alavas i sira kady avarəg-varəgan apatūtan unəṅ kasih-arəp inatīta tiniṅgalakən i layat nira kāri saṅ ahayu vulatnya tinambaṅ ira nda* atīta sira n kajənəkan akurən vulat esy akadi asalin viṣaya n ləpas i mukha nikaṅ ləbuh iṅ nagara kuṭi śāla lumaṅkuṅ i təpi niṅ ayun tirisanya pənuh panəḍəṅ ni vuṅūnya mamituturi rāga nirêṅ aṅuṅaṅ kadi vah Surasindhu bala saṅ Aja kātatakut gumuruh ratha rəṅga padāti kadi parahu sə̄h adulur humilī gajah aṅgala ghūrṇita piraṅ ivu kady asibū gumuluṅ sagəḍaṅ kahilī gaḍiṅ ika tulalenya lumintah avās* paḍa bhakti hənū nira sakalihatan paḍa tan humənəṅ valaharnya lavan pahatan asaji mīna sayub cumaḍaṅ amapag vaṅi niṅ kusuma vinava niṅ pavana mrik arūm bhramarâsəmu maṅhaturakən i gavenya kiduṅ ri sira kadi maṇḍala ramya ni papupul ikaṅ kayu-kayv asəkar vaṅunanya vuṅū səḍəṅ asinaṅ añaṇḍi minerv aruhur humilī* vulakanya paḍa caluṅanêka katon humaḍaṅ hulu kəmbaṅ ikaṅ gaḍuṅ anəpərakən ri narendrasuta patapan kəna rāga kayu manis ikā sinəpər-səpəran amapag mata jāti ni mata ni vuluh nika tan vriṅ iraṅ aḍahəm haḍavanya rumara-rara harṣaja denya mulat pajajar ni pabañvan ika kapahiriṅ milu kady aṅaraṅ

saṅ Aja sira kaṅelan muṅgah riṅ ratha vəkasan saṅ agajah aturaṅgânuṅgaṅ sabhya ciha-ciha mvaṅ agiliṅan arampak vvaṅ sāmānya tan ahaləp saṅ aḍarat alarêraṅ kagrək-grək magaravalan nr̥pasuta ləpas eṅgal prāptêṅ thāni kuluvutan satəka-təka ni lampah niṅ vadvânamun adulur i harəp i vuri* lumrânəṅkv âyun manasa-nasar havan arupək inambah membuh lvā kadi tinəpa vukir ajajar ahaṇḍap-haṇḍap śūnya maṅililan kadi kukusan amuñjuṅ puñcaknyârnəb inululan hana talaga riṅ agra ndan vvainyâhaṅət ahasin pinara-paran iṅ adyus baryan landəp avukiran suku-suku nika durgâtyantêvəh nika pinaran pinəga tinəpa de niṅ molah ṅūni riṅ alavas sahaja malivat i jro ṅkân līlâməkasi parab dadali nika laki-strī prāptânambər asahuran lura-lurah aparək lvah guṅguṅ vvainya* ḍinavuhan papupulan ikaṅ aṅhvan ramyâḍə̄m aṅariṅ-ariṅ paḍa marək adum uṅgvan yan vvaṅ* śreṣṭhi humalivat asila-sila ri piṅgir niṅ mārgâmalaku sərəh umah atiśaya denyâporaṅ məṅgəp aṅililan vvaṅ ika paḍa humə̄t riṅ buddhy âlumbuṅ alit-alit təka ri sapi nikâlit norâkral-kral aməḍusi talaga nika jugâlvâṅlaṅhuy-laṅhuyakən agə̄ṅ hana ta baṅun amet vvaṅ doṣa n krūra ləkas ikā amava tali lavan kris pamraṅ-mraṅnya habalaṅan sapi nika sinikəpnyâṅrəñcal maṅlavan agalak ri huvus ika katalyan keṇḍit dinval iṅ aṅulaṅ nr̥patisuta kaluṅhâdoh śīghra n saha śakaṭa karaṇa nira n araryan mvaṅ sakveh ni bala nira amarəki pəkən alvā thāny âgə̄ṅ pakuləmana pira ta puluh i dūvanyâkveh sə̄h paḍa vinəgil saṅ Aja kadi hanê jro rājyâpan sira kinəmit sahana-hana nikaṅ sarvāstra lvir pinakapagər ratha turaga tiniṅkah baprâṅrakṣa* sana-sini makagupura haləp niṅ mātaṅgâruhur ajajar tucapa para kadūvan tuṣṭa n paṅhinəpan ira sahana-hana ri deśanyâneka ṅ paḍa pamapag nr̥pasuta sira muṅguh* muṅgv iṅ* bvat halu təpi lor sama humatur aṅantî sor niṅ vāṇḍira magəlar viku haji jənək aṅher iṅ śūnyâlavas amarāt vruh aṅaji sira santoṣâṅdo-dohi narapati nəhər amarahi sampun vr̥ddhâṅgə̄ṅ ulah alaṅə̄ atuha-tuha kadi brəm santən kāku manis ira sira ta marək aluṅguh milv iṅ dāyaka humatur kinasəgəhan apan vruh ṅūnîṅ rājya sira kabeh apituvi paḍa rovaṅ-rovaṅ niṅ maṅikət-ikət mukha niṅ aṅucap aśrī de niṅ mojar akakavin kṣamakəna bapa pavvat niṅ grāmyâdhama kaluṣa padapa hima lavan* centən mepâlpa lihatana* sama duvəga ri rakryan yan tvak hayva hali-halin pinakabañu-bañu ṅke ṅhiṅ yan len juga yan ikā vulatana kakudeśanyâthānî* gəgər asəpi ya tuna-tuna sərəh vvah təkvan tan hana dinadak palapat alas agaryaṅ-garyaṅ tan savəgilana linəṅəṅakən iṅ ambək marmanya n rəsəp alaṅə̄ aluru vahu kalahrvan* kayvanya n śravaṇamasa asəpa humuraṅ avyaṅ rurvan ronya kapavanan analukati təlā vvad niṅ sarvatrəṇa riṅ ayun pəjah aməkasi kiṅkiṅ luṅ niṅ jaṅga kapanasan təvək i ragas i kayvanya n karvâraras alaṅə̄ təṅah i tal ika mambət-mambət kāṅinan aṅəlih* manis i lahaṅ ikâṅhiṅ panraṅ-nraṅ vulat amanis tiniru-tiru niṅ ahyas ronyârjâpatah akiris səḍəṅ iṅ asujimāsâtyantêṅ kaṣṭa gatarasa karikil ika kuməṇḍəṅ tūt mārgâmacəki suku saha panas i hənunyâdoh vve nora pinalaku tuhun amuhara ramyā sakveh niṅ vvaṅ ika jənək jalada kadi pətəṅ yan təmbe niṅ kapat alaṅə̄ javuh aməkasakən rəm riṅ kayvan hañar asəmi vahu mari panaṅis niṅ kālaṅkyaṅ sukha sumayab asiga kadi tinambaṅ vahv înantukan agiraṅ tr̥ṇa taru paḍa məltik vījanya n masa kalima vavaṅ aluru kapiṅrəs tūt mārgâṅəlih alume linaran i kəñar iṅ vai yan luṅhā ṅ* rəməṅ anisih kadi pamanas i kuṅ niṅ kanyā dūra n atələba hañar abañu təgalnya n kānəm tapvan acarəcəh kadi sinipatan aprih mārganyâracək abənər turah i vərəh ikaṅ varṣâsat kāri kasarakat asəmu pupur areh tūt piṅgir niṅ halis inamər brata nika ri səḍəṅ niṅ* māghâdyus rahina vəṅi javuh aṅapitu tan pāntyâdrəs maṅkin akəcəhan aṅura-ṅuraṅi teja hyaṅ candrârka kaginəman sukha salabuh ikaṅ luṅlūṅan māri kapiṅəlih ləbug i paləmahanyâjro riṅ* phālguna puraci patuna-tunahan iṅ ləmbv âsaṅsiṅ tahi papuṅən dvijavara sira baryan rəṅrəṅ mogha humalivat suməpər anasi pə̄han marmanya n śuci vəkasan masa kasaṅa təka traṅ ndan mātrânəlani javuh ya karaṇa ni latəknyâtiṅgar vahv asat anisih sapapikatana gə̄ṅən təmbe niṅ manuk agalak tuhun asəpi hənūnya lvīr agriṅ paḍa caciṅən kusuma sahana māyvan yan vaiśākha paḍa vijah səkar iṅ asana kantun kady ahyun kalarakəna paṅirim-irim ikaṅ varṣâher veh ayu ḍumavuh kadi jaruman aṅinte rāgânīs amava taṅis muvah asəkar alasnya jyeṣṭhâmiṅrvani sahapit tuhun aṅuraṅi rurvan de niṅ varṣa vahu mulih tura-turah i gərəhnyâgupyan meh aməkasana tuna-tuna kadi pamvit niṅ harṣâməkasi taṅis analahasa laṅə̄nyêṅ āṣādhâṅlarani kavi paḍa gumigil aṅinkin tiṅhalnyâniliṅi tavaṅ kamaḍiḍiṅən aṅepv î roganyâṅgəgəs aṅəsah kadi kahapit aṅunṅun muṅgv iṅ śūnya kakilatan nahan ucapan ira mpuṅkv aṅde harṣa ri saṅ Aja vəṅi mara sakamantyan prāptâneka taḍah ira dvijavara sira mālih muṅgv iṅ bvat halu təpi lor para viku juga kāry âgoṣṭhi mvaṅ nr̥patanaya paḍahi marək agupyan śabdanyâmanis inamər kadi paṅucap-ucap niṅ muṅgv i jro jinəm akule apituvi sinamenîṅ gīta śrī nr̥patanaya rasa nika vinivekâneka ṅ pālapan amanis tucapa bala nirâkveh bhāvanya n paṅinum-inum aṅigəl aṅiduṅ asraṅ tvaknyâkveh kadi humilī paḍahi nika guməntər sinraṅ niṅ tabə-tabəhan kadi baribina saṅ hyaṅ riṅ svargâtukupa kapə̄

luṅhā ṅ māsa pilih təṅah vəṅi tiḍəm sahana niṅ aṅinum paḍâturū tistis nora mumik tuhun saṅ Aja tan mrəm amaṅu-maṅu tan kənêṅ turū aṅhiṅ ramya rinəṅvakən panalimur-nalimur ira ri kiṅkiṅ iṅ hati gəṇḍiṅ valyan arūm svaranya karəṅə̄ savəṅi kiniduṅan kiduṅ buvun lor vetan pamalantənan kaparək iṅ lvah adaləm asamīpa paṅdyunan vvaṅnyâvuṅv amasaṅ damar vruh i masanya n amalu-malu meh tibā ṅ ənəm tan paśrī svara niṅ palu dyun asarag təvas amaribini ṅ* vvaṅ aṅrəṅə̄ endah mvaṅ palu vastra ramya kadi de niṅ amalu daluvaṅ rinəṅvakən aṅdyun* karva rabinya tan padivasâviḍiṅan avurahan silih cacad nitya ṅ śabda paḍêṅgal asrak amaləs hinalan* ulih ikâgave ghaṭa strīnyâmet parihāra tan vədi kadūṣana n ahala gave nikā paṭa kahyun-hyun kadi śaiva sogata mapaṅghaṭapaṭa juga hetu niṅ humuṅ sakveh niṅ baṇijêṅ təpas paḍa sumambutakən i sagave nikâlavas norâpək paḍa lobha lābha kaharəpnya n akuṭa-kaṭikan paḍâdamar saṅkəp dvalnya huvus ratəṅ paḍa sumaṅgraha vijila niki n marêṅ pəkən asyaṅ-syaṅ karəṅə̄ humuṅ saṅa-saṅanya səmu niṅ aharəp katumbasa eñjiṅ vāhu huvus ḍavuh pitu muni ṅ* paḍahi baṅun akon adandana sakveh niṅ prajurit paḍâmuṅu ri paṅhavin ika kamənanya maṅkata ardhêñjiṅ pva hiḍəpnya təkvan apuyəṅ ya ta karaṇa nikâturū muvah ṅhiṅ maṅkat saṅ Ajâkəmul-kəmul alañciṅan aṅarahakən sakêṅ ratha saṅ mambaṅ Kavidoṣa tan vənaṅ adoh ri sira marək amaṅku pavvahan prajñā tan kasilib ri tiṅkah iṅ asevaka maṅinakanêṅ tuhan-tuhan vruh riṅ yogya kahənva de nira tinūt sapavarah ika ramya tūt gəgər yekā rakva hənūnya ṅūni n aṅalih saha jaruman ikâməgat gunuṅ śūnyâporaṅ ikaṅ gəgər hana guhā rəbah adaləm arəs tvas iṅ mulat tan pātmā ṅ aṅuṅaṅ hanan kadi hanâṅduhuṅakəna təkā sakêṅ vuri tistis nora marâṅləṅəṅ ri pataninya paḍa kadi sinaṅgan iṅ kavi ṅhiṅ raṅrə̄ gumərəh tinūb niṅ aṅin adrəs aniru gərəh iṅ labuh kapat ṅkānê ləmbah* ikâlaṅə̄ pamaḍəkan vvaṅ ika vija-vijah paḍâṅayar lumrâkveh aputih vuyahnya kasavur sumarasah anamar vvay iṅ* javuh avrā tampər* ikâgəlar kasarakat-sarakat asəmu sāri niṅ puḍak harṣâmbək saṅ Aja n təkâvuya-vuyah mata tuvin aharip kadînusap tambak-tambak akaṇḍa lor kidul i pomahan ika kadi piṇḍa niṅ savah vvaṅnyârampak amet vəlut kadi pucaṅ-pucaṅan iṅ aṅurit katiṅhalan pakṣinyâgəṅ-agəṅ humuṅ kadi kəbo paṅulah avurahan silih buru yan kavrəg paḍa mə̄r* guməntər anamar gərəh iṅ adurugan paḍâvərə̄ abhrā lvir səkar iṅ laṅit braja katon paməvəh i supit iṅ sahiṅ-sahiṅ aṅjrah tan kahanan ləvas pasuṅ ikâsira-sira kadi kəmbaṅ* iṅ karaṅ lvir luṅ niṅ katirah mirah ni suṅut iṅ huraṅ aṅariṅ-ariṅ marêṅ* lumut tūt mārgâharəmis pəjah kadi mənur saka salavə-lavə̄ sumamburat

sampun ləpas ratha narendrasutâpan adrəs saṅ brāhmaṇê vuri lavan rəṣi śaiva boddha agyā paḍânututi tan hana kāry araryan muṅgv iṅ* gajâśva ratha masraṅ alumba-lumba lvah Narmadā katəmu de naranāthaputra saṅ brāhmaṇâsabha-sabhā ri ya sāri-sāri atyanta* nirmala paṅavruhanê śucinya marmanya n uttama vijilnya sakêṅ śaśāṅka sə̄h puṣpa layvan iṅ atīrtha hanê hənīnya kuntul paḍâṅadəg-adəg ri pacar-pacarnya līlā ḍarā ri kalakānya vijah paḍâdyus akveh mayūra maṅigəl ri pasir-pasirnya ṅkāna n pararyan arahup naranāthaputra muṅgv iṅ aśoka sira tan mari śokacitta nyū danta* medi ri manah nira keṅin-eṅin kāṅgək sirânəmu puḍak maṅuḍoḍa riṅ vvai *nya ṅ cakravāka paḍa ramya mahimya-himyan ṅkānê saroruha vəkasnya lavan priyanya manda svaranya karəṅə̄ nira tan sphuṭârūm vinrəg nirâpa ta kalīṅa ni de nirâmrəg haṅśâputih ri təṅah adyus aṅumbaṅ-umbaṅ kombak tinūb iṅ aṅin adrəs aṅiṅgək-iṅgək mogâraras-raras arūm karəṅə̄ svaranya kady âvarah yan alaṅə̄ ri hananya riṅ vvai vadvā nirâdulur i piṅgir aḍanta-ḍanta akveh ləpas paḍa kahañjur adoh lakunya maṅsul muvah saha padāti tinuṇḍa pājar āpan kinonakən aṅantya makuvva*-kuvva śīghrâgave gr̥halatā mrik arūm səkarnya norâkavə̄ paḍa vicakṣaṇa riṅ kalaṅvan andul vuṅū mvaṅ asanâṅjrah i piṅgir iṅ lvah ramyâlaṅə̄ pinarəkanya hanan pamaṅguṅ ndah riṅ samantaji hanâdbhuta mūrti niṅ hyaṅ mātaṅgarūpa pinakārgaḍa riṅ vanādri siṅhâṅḍapur vədi manambah arəs* tumon ya Airāvaṇânurun ujar niṅ anarka-narka ri lvah sabhānya səḍəṅ adyus ahilya-hilyan nora ṅ bhayêriya putus vuhayâluṅâṅlvaṅ* aṅlaṅhuy adrəs anamar gajamīna* mətta himpər karaṅ liman i kāla nikâṅalimpuṅ ambə̄ ni meda ni gajah naranāthaputra sākṣāt inambuṅ ika hetu nika bhramanta abyūran iṅ lvah alətuh kakəbur bañunya vit niṅ saroja kadahut kalavan səkarnya məntas pva yâṅadəg aṅuṅgul i tīra niṅ lvah gaṅgəṅ lavan sarasijâṅhibəki ry avaknya məttâvərə̄ nəhər asumpiṅ aghaṇṭa kambaṅ abhrā katiṅhalan ikā kadi* nāgapuṣpa mevv-îvu saṅkhya ni gajah naranāthaputra ndātan pamarpati ri gə̄ṅnya lavan guṇanya avrəg sakê taṅan alah ḍyam api n rinukrak āpan svabhāva niṅ alit juga ta n tinaṅgəl strī-strī paḍâṅhili lavan raray anvam-anvam adrəs lakunya karikil kavədinya ṅūni maṅke n təkêṅ bhaya sukət rvi* yayān inambah vet niṅ takut pati susup-susupîṅ alas gə̄ṅ akveh marêṅ tahən anuṅtuṅ amet upāya vatv înulurnya sagənuk savaluh salumpaṅ təṇḍas nikaṅ liman avās tinujunya tan len tog tor ndatan dva katibān dan ikaṅ śilā syuh krodha ṅ* liman mata nikâṅdrəṅ* anon vvaṅ akveh riṅ kāyvan* aṅhabalaṅ iṅ kayu-kayv aganti yeka n tumandaṅ aṅayuh paṅ agə̄ṅ katuṅkul syāk* pok rəbah ri valakaṅnya baṅun rinəṅgan vadvā nr̥pātmaja masəṅhit asiṅhanāda sārâkusāra śaraṇāśraya vāni riṅ praṅ krūrâkihal-kihal agə̄ṅ karavalya timbul śūrabratâsira-siran paḍa tan dadi jrih yekâṅlavan paḍa marək pinupul səmutnya kvehnyâpramāṇa satasik ya ta paṅhaḍanya ambək nikaṅ gaja mamatyana nora vāni gə̄ṅnyâprameya sagunuṅ ya ta paṅgajahnya māsə̄* hanêṅ ratha narendrasutâṅagəm hrū laṅkap hanê kiva huvus pinasaṅ talinya sampun minantran inayat saha hastiśikṣā sar cəb tibâṅənani kumbha nikaṅ gajendra sampun kənâmrih aṅusī pulihan tumandaṅ ndan sarvasandhi* ni śarīra nikâgrah aṅrəs yeka n paṅohan aṅadəg mati tan pasāra gor bhoh tibā kadi śilādri rəbah kaliṇḍvan vaṅkenya sakṣaṇa hananya kadîṅ paṅipyan teja prakīrṇa dumilah təka tan pasaṅkan vidyādharâhaləp adəṇḍa hanê təṅahnya utpatti* niṅ dvirada māti mahāprabhāva kalpadruma mrik inalapnya pamurṣitanya lvir puṣpavarṣa tumibê naranāthaputra āścarya buddhi nira sādara* de nirâṅliṅ hyaṅ hyaṅ paran kari kita syapa tā ṅaranta

kənoh patakvanta ri tiṅkah i ṅhulun ṅhulun kasaṅkhya n maṅaran Priyambada svaputra saṅ Citraratha prakāśita sirâdigandharvapatî kadevatan ṅhulun sakêṅ svarga viśāta lālana anuṅga-nuṅgal mahas iṅ vanāntara təkêṅ pasir tan hana tan kalaṅlaṅan laṅə̄ niṅ ambək saparan tinūtakən

ṅke Narmadā ṅhulun acaṅkrama sāri-sāri kañcit kapaṅgih aṅadəg bhagavān Pataṅga pakṣâdyusâpatələsan tumuluy marêṅ lvah mogha ṅhulun tumurun aṅruhurî sirâdyus gə̄ṅ krodha vākcala sira n panibāni* śāpa oyuh gajah təmahanamva maran mari hyaṅ ṅke tôṅgvanamva tan adoh ya sakêrikiṅ lvah nāhan vəkas ni paṅucap nira karṇaśūla tan mithya ri ṅhulun ikaṅ gajaməttarūpa byaktân asaṇḍuta ṅ ujar yan anəṅgah alvā saṅkêṅ amaṅgih* i vuyuṅ bhagavān Pataṅga tapvan śināpa tumuluy matəmah gajendra an maṅkana bvat i vuyuṅ bhagavān Pataṅga kāruṇya buddhi nira riṅ vəkasan sirâsih āpan ṅhulun marək anəmbah apinta*-kāsih maṅhyaṅ ry anugraha nirê rikaṅ antaśāpa mojar sirâsəmu manis təkap iṅ tumiṅhal om hayva saṅśaya ri siddha niṅ antaśāpa tan lupta yan təka hələm saṅ Ajâhavan ṅke tuṅtuṅ ni sañjata nikā havananta mantuk sampun sirâməkasakən vacanântaśāpa luṅhā sira ṅhulun aṅanti humer* təkanta soventa* tan təka ya kāraṇa niṅ* bhramanta məttâvərə̄ pira-piraṅ tahunən byamoha maṅke n ḍatəṅ kita sahâśva sahasra saṅkhya ṅke Narmadâvija-vijah savatək-vatəkta mātəṅga papraṅ aṅiriṅ paḍa sāra śūra mavrəg rəbah binuru ni ṅhulun iṅ paḍə̄man aṅhiṅ kitâmanah anuṅsuṅ iṅ astra tīkṣṇa syuh kumbha ni ṅhulun ikā tinut iṅ paratra ndātan paniṣphala vavaṅ maluyâdadi hyaṅ sākṣāt kitâmr̥ta vijil nikaṅ antaśāpa atyanta gə̄ṅ ni hutaṅ i ṅhulun apramāṇa saṅmohana ṅ pamaləsê kita divyaśastra gandharvaśastra pinajə̄ṅ hyaṅ asañjatêka jñānanta maṅləpasakən saha mantra siddhi atyanta yogya yan ajinta ya kavruhanta kārādhananya saha mantra sahêndikanya pə̄ṅpə̄ṅ ṅhulun vruh i vəkas ni rusit-rusitnya śaktinya kavruhan anambəhanê guṇanta ndātan pamatyani guṇanya yadin guṇanta śatrv âdhamâpituvi tan mati denya mūrcha moghâturū sahana niṅ ripu tan vri rātnya nistanya maṅkana yayā kita yan jayêṅ praṅ he saṅ Priyambada kita n paṅutus paṅajya* moghâviraṅ hulun apan gumave laranta ṅūnî səḍəṅta matəmah gajamattarūpa tan len ṅhulun kaṅaranan karaṇanta māti hā hāh hade saṅ Aja denta manaṅgah eraṅ an sāhasâməjahi ri ṅhulunən gajendra āpan prasiddha kita maṅhvatakən kajanman atyanta gə̄ṅ i hutaṅ i ṅhulunən maluy hyaṅ yadyan sabhūr-bhuvah ikaṅ guṇa kavruhanta tātan sadoṣa yan atambəha vīrya sasvah ndā maṅkanā kita n aṅajya vimohanāstra taṅgap nihan hila-hila ṅ tumulak paveveh an saṅ Priyambada kədə̄ maṅutus maṅajya mary âviraṅ saṅ Aja sampun atiṅkah uṅgvan lor saṅ Priyambada kidul saṅ Ajâtalaṅkup saṅmohanênaji nirêṅgal apan vidagdha sandhinya kāku saha śakti ni devatanya saṅyoga niṅ śaravara mvaṅ ikā tujunya sampun tama stuti nikā saha kūṭamantra saṅhāramantra paḍa kavruh ira prabheda vruh saṅ Priyambada ri harṣa narendraputra an pembuh astra śara sūkṣma mahāprabhāva tiṅkah niṅ apraṅ inucap nira mogha jambat amvit sirâsəmu manis baśa de niṅ ojar he mitra mantuka kakanta lumarya maṅke siddhā ṅ prayojana kita n ḍatəṅêṅ Vidarbha nāhan vuvus nira nəhər* maṅagəm sərəh vvah luṅhâhavan gagana məltuk apan sira hyaṅ

sampun prāpta sirêṅ surālaya Vicitraratha paḍa sukha n tumon sira ndan saṅ kāri kamānuṣan həla-həlâṅucap-ucap i səḍəṅ nirâpupul nistanya n tama de nirâṅaji tathāpi salahasa ri saṅ Priyambada yan təṅhā kadi tan tumuṅkula savet ni karakətan irâṅdələ̄ tavaṅ sandhyākāla pasaṅ damar nr̥patiputra manaḍah i huvus nirâjapa eñjiṅ pūrvaka saṅ Priyambada ginoṣṭhi nira mahuvusan təṅah vəṅi vahv amrəm tumuluy tinaṅhi sira maṅkat asaləsək i tīra niṅ nadī gəntər ni grit ikaṅ rathâməkarakən kucup iṅ asana ramya tūt hənū eñjiṅ kāla nira n təkêṅ pasir alasnya pətəṅ asəmu śeṣa niṅ vəṅi lvir harṣā gaganâsəgəh pavulatanya gərəh ika kadi priyambada moghâśrī kuməḍap kilatnya nəhər aṅluru-luru kadi medi maṅdu-lor kady ânəmbahakən* səkar niṅ asanânisi huyaṅ i riris nikâṅdadak mambə̄ sāgara ramya niṅ laṅit avarṇa tali hurut-urutnya tan pəgat kālaṅkyaṅnya baṅun jukuṅ niṅ amayaṅ ləyəp i lari nikâmaḍəm ḍarat kuntul mə̄r kadi tuṇḍan iṅ banava kāri tan ilu kajahat lanâlayar saṅ hyaṅ candra baṅun bahitra ḍatəṅ iṅ kuləm amava śaśā marê Java megha lvir karaṅ iṅ laṅit kadi vərəh limut ika ri sare nikâputih vahv âmīt i kuvuṅ-kuvuṅnya savaneh karərəban akucəm pəgat-pəgat gəntərnyâvurahan humuṅ kadi katunvan i larap i kilat nikā murub runtuh piṅgir ikâtəmah javuh anūtakən aṅin* alaṅə̄ tibânisih ramya lvir siluman karaṅ ri mukha niṅ muhara paḍa-paḍâṅhapit bañu alvā tiṅkah i mekhalanya ri təṅah paṅadəg-adəgan iṅ marâṅləṅəṅ karvânuṅgul apāntaran sapaṅuhuh kadi gupura sivak sakêṅ adoh lvir hambal sphaṭikâṅ alun turunan iṅ kavi pəjah atuhâṅhañut* laṅə̄ priṅgâhrit təpi niṅ samudra kadi paṅhinəpan* i ləṅəṅ iṅ labuh kapat lvir prāsāda* pukah karaṅ ni paraṅanya hana kadi siluṅluṅ iṅ kavi airtambaṅnya baṅun vvit iṅ truh asəvə̄ kilat avilət alūṅ avaṅkava lumrâvarṇa rəṅit kukusnya sinavat-savat inidəran iṅ guruṇḍaya miṅgut piṇḍa nikaṅ karaṅ liman anuṅkuli* paraṅan i piṅgir iṅ tasik lvir molah tulale nikâmijilakən bañu kadi paṅanak niṅ ertali kahyun-hyun kumucur parəṅ rva tuməḍun ləṅəṅ aṅənani tiṅhas iṅ karaṅ rəmpū* syuh amənir-mənir kadi tinapyan iṅ aṅin aputih sumamburat paṇḍan māti ləṅəṅ sumuṇḍay akaraṅ-hulu karaṅ i sare nikaṅ pasir sakveh niṅ bhramarânaṅis paḍa sumuṅkəm aṅarəki səkar huvus ləvas dinyūs iṅ truh i saṅhub iṅ jaladhi saṅsaya ləṅəṅ arurub-rurub limut hemanyânvam* arūm puḍak nika tumūt pəjah i turuṅ ikâtulis ṭikā

nyū dantâsəpi tuṅga-tuṅgal aṅadəg muṅgv î rəṅat niṅ trəbis ləṅləṅnya n hana riṅ pasir silih ave lāvan ryak iṅ sāgara tan vruh yan tinulis parab sahana niṅ vvahnyâkəmul nīrada de niṅ laṅv anaput katuṅkul i laṅə̄ niṅ nūsa mukṣa n rərəb

mahantən sāk riñcuṅ ləṅəṅ i təpi niṅ sāgara ləyəp palambaṅnyâkveh nora vənaṅa vacan śīrṇa lamukən tulisnyânuṅgal vikv acəpuh atalaṅkup katuruhan tumuṅkul bhāvanyâḍəku-ḍəkuh apiṇḍânasi hatəp ikaṅ prāsāda syuh karahan apa tekâmarikala tibê piṅgir niṅ sāgara kasih-arəp hyaṅ Gaṇapati katampvan* de niṅ ryak mata nira kuməmbəṅ kadi lumuh mulat kady ahyun vuṅvakəna sira yan kāla hasila karaṅ savvaṅ* muṅgv iṅ jaladhi mapa mūlanya ta kunaṅ vilət niṅ megha ry âvak ika sagibah tan pinahuvus vinasvās kady ânabraṅa səmu nikâṅlaṅhviy anəṅah baṅun bhrāntâmaṅgih pasir aharəp aṅlimbaṅa laṅə̄

banava kajahat iṅ lod biṅkas de niṅ alun agə̄ṅ tihaṅ ika gumalaṅgaṅ muṅgv iṅ tuṇḍan ika marək* kadi ta paməkulanya n māsih tan vənaṅ apasah sapati sahuripa ṅvaṅ līṅanya n vruh aṅucapa vukir anak anəlat riṅ vvai* niṅ sāgara ri təṅah kadi sakadaṅa lāvan vvaṅ* mūrchā kavi pasisi səmu-səmu nika sānak lāvan ryak jənək aharas pili-pilih abapenduṅ truh-truh mārga nika ləṅəṅ layar iṅ amayaṅ akveh ṅkānê sornya humalivat karahan aburu marmanya n kedər nəhər avəlah dhvatala rayuṅ ikânraṅ lumrā sə̄h paṅanan ika* bañak aṅidəri nūsā kāraṅnya n midər alaṅə̄ patani kadi jamur syuṅ* rūpanyâmanis atulis kalimutan i siluk niṅ groṅ-groṅ iṅ paraṅan arəs kakavin ika palambaṅ riṅ lambaṅ cinacahakən cəcək ika hana tan sah muny asriṅ baṅun amaca

māry âmet ləṅəṅ iṅ pasir nr̥patiputra lumaris ahavan gunuṅ-gunuṅ ambə̄ niṅ pakis əṇḍah iṅ valahar aṅləvihi vaṅi ni gandha niṅ pupur moghârūm sirarā nikaṅ kayu ragas kadi huləs apulaṅ lavan burat sakveh niṅ kahalintaṅan rumimaṅ ambək ira vinulatan paḍâlaṅə̄ paṇḍan suṇḍay asoṅ latāṅkura paranti para kavi mahas lanâpikat paṅ niṅ campaka śuddhi guṇḍik aṅilo ri harəp ika maṅuṅkul-uṅkuli luṅlūṅanya tikəl-tikəl katitihan papikatan agənət hibək həlar tan śobha ṅ kitiran jarah pili-pilih luput alara kasambət iṅ habət vvantən ramya kadevagurvan aṅuṅaṅ jaladhi kadi kalaṅvan iṅ tulis saṅ muṅgv îriya tan vənaṅ lumaganîndriya nira kavənaṅ binañcana paṅliṅgāna savaṅ-savaṅ ni hayu nîdəman ira səmu niṅ varāpsarī kady âṅanti ri sampunanya n apatūtan aniliba marêṅ surālaya ṅkānêṅ bvat halu sāk durenya kahanan nr̥patanaya tumiṅhal iṅ tulis heman* varṇa nikâsamun katuruhan lutur asamun inambah iṅ cəcək ṅhiṅ devī kavəkas lavan kili paḍâṅadəg-adəg abəbəd-bəbəd hati kady âminta tumūta rūpa nika buddhi saṅ Aja hiḍəpan kamānuṣan ṅkānê rəmbaṅan iṅ juraṅ mpu tapa ramya mamuluku katuṅku-tuṅkulan vuṅkal kedəran aṅjəlag sadədəg iṅ sapi kaparək i piṅgir iṅ galəṅ ləmbunyân ahəle həli n palayanan pavulatan ika de nikaṅ vatu asrak vaṅsulan iṅ kiyâtrət alaṅə̄ ləṅəṅ araras anirva-nirvakən nyāsa lvir minahā gunuṅ pinakapājaran aṅadəg i madhya niṅ juraṅ lvīr apvī kumukus mirah ni kayu teja nika kasaputan himâputih vvai saṅkêṅ* paraṅan ya kadrəsan aṅin kadi siniramakən sumamburat saṅ vr̥ddharṣi katon iṅ agra savaṅ arca lamukən alaṅə̄ kasaṅhuban siṅgih kottaman iṅ vanāśrama sabhā saṅ ataki-taki niṣparigraha kayvanyâvruh acandanâprih atəṅə̄ java huvi kusumâṅjrah iṅ talun kālaṅkyaṅnya ləyəp viśāta baṅun ahyun atapa riṅ aṅin huvus ləpas saṅ hyaṅ lek sumənə̄ prakāśa śuci śukla pinakasuluh iṅ hanêṅ vukir tan sah riṅ daluvaṅ kukap nika subaddha səkar ikaṅ ulur paḍâjaṭā vrenyâṅalvaṅ ikaṅ varāha vana tan parabi sukha manambi riṅ tahən mvaṅ sarpâtapa-tāpan abrata lanâṅaluṣa puyuh ikâkipū-kipū nirdhūma ṅ baləman lumə̄ṅ barəbək iṅ kayu pinaṅan ika n hanêṅ alas

buddhi nrəpatisuta jənək ya kāraṇa nirâṅrəvəṅ alas akuləm sakveh nira saṅ ajar-ajar marək saha kilaṅ hinaturakən ira ramyâṅucap i sakaharəp nirêṅ phala nikaṅ tapa ginavayakən eñjiṅ sira tumurun atūt alas vahu tinor pinakapataləsan deśâsəpi havan ira kālasan sipi kaniṣṭha nika gatarasa aṅluh vvaṅ ika pinanasan ḍinaṇḍa sinipat layat apalarasan akveh pahutaṅan i savah gaganya paḍa tan hana maṅinak-inak lumbuṅnya kasih-arəp aninya ya n* milu katuṅkəb alavas aṅariṅ akveh vray anusup anukət-nukət baṅun amet* kayu parəṅ adulur ḍaṅḍaṅnya luməkas aṅatər səsəh kaṅəlihan savaṅ aṅipil-ipil pakṣinya palatuk* amaduṅ-maduṅ kahiḍəpanya n amahayu* kuvuṅ vvah niṅ kamalagi tumatiṅ katon kadi caluk niṅ anutu-nutuhi kācāryan* alavas inatīta śīrṇa pamicāran ika katuruhan riñcuṅ saka nika sasisih silih jaga murantak aṅəmuki parab norâkṣara kakavin i paṅlarinya paḍa tan hana katəmu ləbur ṅhiṅ candana kasirat agātra mātra ri taviṅnya kari kadi* panu jə̄ṅ niṅ giri gahana kadevagurvan ahaləp lura-lurah arənəb strī-strī dvijakula śuci śuddha saṅ pinakamaṅgala niṅ anaruka tūs niṅ vulakan aṅali mekalanya śatapattra nika məkar arūm sakveh niṅ amaṅan i lumutnya rakva cinacad puru-puru katalu

byatītan meh prāptêṅ nagara saṅ Ajâṅel bala nira araryan ṅkānê jro kuṭi katəmu sakveh para viku tinamvī-tamvī riṅ səḍəṅan amanis de nira mulat apan* prāya ṅ* vastv alpa maṅinaki yan riṅ səḍəṅ aṅel vivakṣan sakveh saṅ para ratu hinundaṅ paḍa təka paḍâkuṇḍaṅ gəṇḍiṅ gumərəh asəlur tan papəgatan tuvin paṅhrik niṅ tuṅgaṅan asahuran lāgi karəṅə̄ ikaṅ sattvâlə̄ṅ śabda nika baṅun asyaṅ-syaṅ aṅuhuh kaḍatvan saṅ Bhojâtiśaya mara gə̄ṅnyâparamita yayâhə̄t maṅke* kārya nira ri ḍatəṅ saṅ para ratu pənuh tamvī-tamvî sahana para taṇḍâlana ṅivə̄ təkêṅ mārgâgə̄ṅ nora pinakapahidvan paḍa hibək ikaṅ rājya* lvir sāgara kahibəkan vvaṅ kadi bañu karaṅ mātaṅgâkāra ni liman ikâneka majajar baṅun ryak polah niṅ dhvaja kagurilap kadrəsan aṅin curik vahvas patrəm lumarap asəmu praṅ-praṅ agalak sanistanya n tan vaspada viṣaya niṅ śabda karəṅə̄ təkap niṅ gəṇḍiṅ mvaṅ grəbəg i laku niṅ vvaṅ mapapagan yayâtah vr̥tta śrī Raghusuta karəṅv an sira təka vulat herən taṅ vvaṅ sanagara paḍâlah rəṅə-rəṅə̄n lumampah saṅ Bhojâmapag i saṅ Ajâpan sira təka kasuṅsuṅ riṅ mārgâṅucap-ucap aluṅguh paḍa sukha parəṅ maṅkat ramyâdulur iniriṅ iṅ vvaṅ sanagara ikaṅ rājya lvir bəntara mukha nikân ardha marupək umah niṅ taṇḍâgə̄ṅ pinakapasənāhê nr̥pasuta kuləm saṅ hyaṅ sandhyā divasa niṅ amūjâjapa-japa təka ṅ pamyāpārê sira vijil ikaṅ sāgara vukir ndatan varṇan tiṅkah ni panaḍah irâkveh cinarita

tiṅkah śrîndumatī n kapiṅ tiga nira n piniḍuḍuk i daləm kathākəna akveh pañcabale ri viṅkiṅan ikaṅ pamiḍuḍukan i sor huvus hibək de niṅ strī paḍa hinyasan cumurigênunus avak ika varṇa sañjata byaktâkūṅa kaləṅgakêṅ panulisan puḍak ikaṅ anulad raras nika tvas niṅ megha dinadyakən vaṅunan uttama pinahuvus iṅ labuh kapat tumpaṅ pitv aruhur sinaptabhuvanâparimita kalaṅə̄nya riṅ tavaṅ truh-truh mvaṅ larap iṅ kilat hatəp ikā karaṇa nika lanâkuvuṅ-kuvuṅ gəntərnyâṅdadi kumbaṅ edran anaṅis hana ləṅəṅ aṅurambat iṅ tətə̄ ryak niṅ tīrtha sinr̥ṣṭi vastra tinulis pinakatiba-tibān linaṅvakən tustus niṅ maṇi sūryakānta dumilah rahina vəṅi dinadyakən damar kəmbaṅ niṅ cirapattra kalpatarupuṣpa sadədəg aṅadəg tigaṅ siki māyā niṅ vulan iṅ samudra madhu śuddha saphala ginave laṅit-laṅit byaktâbyakta nikaṅ tulis vuvuh i kādbhuta nika tulis iṅ huvus tama yan kəmbaṅ kadi mambva rūmnya kadi molaha vinilət i luṅgah iṅ gaḍuṅ mvaṅ yan vvaṅ-vvaṅan arja kady aṅucapâsəmu-səmu guyu de nikā mulat vimba hyaṅ Smara śuddhi de niṅ anulis lvir amanaha manah nr̥pātmajā ṅkā tôṅgvan nr̥patiputrikā piniḍuḍuk tuhu-tuhu sira janma devatī tan sāmānya mahāprabhāva təka riṅ kaka-kaka kadi devakanyakā aśrī pahyas ira bvat Indravanitâmuvuhi haləp ira n hanêṅ sabhā ḍaṅ saṅghâguñəpan bhaṭāra karikâṅrakət ujar ira yan tumon sira sakveh-kveh nira saṅ kadaṅ haji huvus kili marək atatā paḍâtuha mambə̄ parvata pājaran haləp i de nira humaləpakən suputrikā endah mvaṅ sira saṅ rare* hañar ataṅkil ahayu-hayu vahv amekhala mambə̄ maṇḍala riṅ sabhā paṅuparəṅga ni haləp ira riṅ nr̥pātmajā strī-strī vāhu cumampakâsəmu hijo pamulu nika pinantəs iṅ sabhā sampirnyêṅ jaja tan paniṣphala hananya muvuhi haləp iṅ vulaṅ tatur tuṅgal denya mavâmbək abvat atuhan ri parək ika ri jə̄ṅ nr̥pātmajā lvir devī humatur sakêṅ surapadânrahakəna haləp iṅ surālaya

prah-prah nr̥pavaraduhitā ri guṇḍik ira len i kaka-kaka nira yan vruh-vruh agaməl aṅiduṅ lavan vruh aṅavat ya linəṅənan ira embuh pva guṇa nika siniṅhəlan kinaluṅan ya kinaləvihakən sampun pva ya kavi paḍa kāku siṅ guṇa samaṅkana ya kinarahan sakvehnya paḍa marək anaṇḍaṅ anvam araras rara rahayu vagəd sabhyâmanis aṅucap ikāṅ asiṅhəl akaluṅ vahu kavi kakavin ndan rvaṅ puluh ikaṅ* akarah jitākṣara vicakṣaṇa naṭakagiṇa ṅhiṅ dyah Jayaluh ikaṅ inuttamâsisik əmās maṇi nəhər amava

prāpta ṅ rātri yayan katon hayu ni varṇa nira ri vijil iṅ niśākara hyaṅ-hyaṅ niṅ madhumāsa rūpa nira yan kasaṅa kasapuluh tiniṅhalan maṅke n māsa kapat hyaṅ iṅ masa kapat kahiḍəpan ira de nikaṅ mulat cañco strī liṅa niṅ tumon sira məne n huvus atəmu lavan nr̥pātmaja lumrâmintaṅ ahə̄m ri bāhu lumarap jənu nira kanakâṅhulap-hulap embuh sə̄ṅ ni tutup gəluṅ nira murub maṇik ika kadi motar-otaran de niṅ kostubha nīla kādbhuta səkar taji nira sumənə̄ kapañjutan* ūrṇā śuddha huvus hanêṅ rahi nirâsəmu paṅavaka təṅran iṅ hurip ndin ṅgānya ṅ vvaṅ anəmva rūpa kadi rūpa* nira n ahayu rājaputrikā vvaṅ riṅ rājya yayan kapūhan aṅaləm ri sira kadi hañar-hañar mulat aśrī varṇa nira n tuhan saphala yogya n adəgakəna ratva niṅ tulis tan samvas lavaṅ iṅ kaḍatvan inucap milu-milu kavəṅān tiniṅhalan paṅkun mesya ṭikā kayogyan i vətis nira damarana teja niṅ vulan pantəs yan makasumpiṅən kikirən iṅ kuku-kuku nira kosapêṅ laṭi rekhan riṅ kakavin vilāpa kahaləp ni susu nira parantya niṅ parab tan sāhêṅ ratu śakti kenaka ni soca nira yan ikətən səkar taji ekəl roma nirâraras kadi katona rumaraba sakêṅ gəluṅ lukar akveh mahyun aṅuḍva de nira yan ahyas anisigi vajâṅhəmū guyu yogyâsaṅkan aṅin dumadyakəna polah i tikəl i halis nira n cala byaktâgatgat ataṅhya-taṅhya manah iṅ mulat i mukha nira n pasaṅ damar ndin putry âhayu -hayv* amaṅpaṅa hayunya ri hayu nira n ahyas aṅḍiri sakveh niṅ vvaṅ ahadyan akryan asavaṅ hinayu marək i jə̄ṅ nirâlavas pahyas niṅ para pora maṅhiribi pahyas ira hinayu cihna niṅ manūt ekacchattra raras-raras nira paṅə̄ban iṅ ahayu sujanmakanyakā sakveh saṅ ratu tan vənaṅ sahasa kevala humənəṅ aṅantyakən parih aṅlampū suməsəl śarīra nira tan vənaṅ anəkani senakê hati mogânaṅgəl arəs ruməṅvakən i kādbhuta ni hayu narendraputrikā mavvat rāga vilāpa cihna niṅ akūṅ alah aləh akirim-kirim ṭikā akveh pahyas irârəbut kahulunan kahiḍəpan ira de nikaṅ marək rorv aṅ campaka ramya māyun-ayunan ri jaja nira n amaṅya-maṅyani lāvan pādapa tan vənaṅ sah i sirâməpəti gavay ika n səh iṅ gəluṅ tañjuṅ muṅgv i kapə̄ nira n mrik inaṅit marək araras anulya-nulyani prāptôlih kalaṅə̄n ikāṅ asana ramya pinakakalasā nirâturū mvaṅ roṇḍonya tinap rinūpaka tilam sinalinan i səḍəṅ nikâluñut maṅgā səmpalən aṅkən eñjiṅ alapən humatura śayanā nira n rimaṅ svarga n māti kakiṅkiṅan huvus akīrty amihutaṅi laṅə̄ ri jə̄ṅ nira molih varṣa sipat nirârahat i solah ika təka hirəṅ hanê mata kālanya n kahəmū səpah nira baṅun pinakaliḍah ira n hanê tutuk kāsih-kāsih irâlavas karika puṇḍutan ira kasəlap hanê hati ṅhiṅ kəṇḍit nira mās tumūt i parahasyan ira vahu marək sinanmata tambe rakva sira n svayambarakənâmiliha sakaharəp nira prabhu ndān ambək nira kevalâviraṅ i līṅa niṅ umulat anəṅgahâhaṅan āpan tan hana ṅūni kevala sirâmuṅari pinakakabvatan hañar yekā hetu nirâviveka kalavan kaka-kaka vihikan riṅ iṅgita ndātan karkaśa de nirâṅucap-ucap ri pasəlur iṅ ujar sirâṅucap ndi ṅ parva ndi kitâṅrəṅə̄ n* hana kadi ṅhulun amiliha jalva riṅ sabhā yadyastun hana maṅkanā niyata ta pva viraṅ ika kadîraṅ i ṅhulun saṅkṣepanya huvus katon vidhi nareśvara dinulur i tan sih iṅ Vidhi āpan kenaka niṅ kadi ṅhulun aṅanti ri kaka haji yan sirâsiha her-herən palarən hanâsiha bhaṭāra tuməkakəna dharma ni ṅhulun prāptânomaha yogya liṅ nr̥pati sambhava kaharəpa ni ṅhulun muvah yadyastun layata ṅhulun pi tavanən ry ubhaya haji paran kasaṅśaya lāvan yan hana ratv anomaha marā ta sira humaturê nareśvara ndātan kahyuna ni ṅhulun sira tuhun kaka haji sira kevalâharəp hayvâmidhyani ta pva sih-siha nirâmavarəṅəha ri buddhya ni ṅhulun ndak ton duhkha nikaṅ kinədvakən apaṅgiha viphala yan tan paḍâharəp yan kāṅən sukha niṅ licin dumadak ahyun adaluvaṅa harṣa riṅ jamaṅ denya n kilya rarā makāśraya* nareśvara kuməmita kāla niṅ rare yan vr̥ddhâjara dharma riṅ girivanâmagəhakəna ri dharma saṅ viku ramya ṅ vaṅ guru loka sarva təka yan lumaku-laku rinampak iṅ kili maṅke pva n ḍumavuh vidhi nrəpati tan pamavarəṅəh i buddhi ni ṅhulun ṅvaṅ dūra n vənaṅâjñalaṅghana tuhun rasa pəjaha tibêṅ paluṅguhan evəh tan kahiḍəp kalīṅa ni manah nira yan aharəp iṅ svayambara maṅgâṅdadya* limut ṅhulun ri viraṅ i ṅhulun amiliha jalva riṅ sabhā

tuhan i ṅhulun akṣamakəna paṅucap ni manəhta rəṅə̄n vidhi saṅ prabhu sambhava kəkəsakənê hati yogya dahat dumadak pva hade n katəkana rinasan ri manahta tuhan pira hayva nikâṅucapa n ahala yan hiniḍəp mahala pituhun vidhi saṅ prabhu tuhan anipis kaviraṅta hade paḍa vāhu ḍatəṅ sahana-hana* nikaṅ parivāra marək amahur-hurakən ri para ratu pinetnya sirêṅ vəgilən sira saṅ kinabehan inaləm ika rəṅvakənanta tuhan

saṅ nāthêṅ Magadha prabhāva nira tan patəpi kadi laṅit maṅambara lvir vidyādhara darśanīya pakatonan i bala nira śūra dug siṅī ahyaṅ solah irâmanis kavadi de nira lituhayu tan pasiṅsiṅan sākṣāt Indra sakêṅ surālaya kaveni tumuta mijilêṅ svayambara krūrākāra saṅ Aṅganātha sanirukti sira yan aruhur sulakṣaṇa sabhyâmbək nira tan rinakva sira yan prabhu lituhayu sādarâṅucap śakty ânindya mahāprabhāva kumutug bala nira paḍa śūra suśrama tan pendah kadi saṅ hyaṅ Agni mijil amralayakəna rumampaka ṅ jagat siṅhâmbək saṅ Avantinātha kadi saṅ Yama guṇa nira lokapālaka norâdharma ṅaranya rakva yan i bhūmi nira paḍa sukhâgave hayu* sə̄h vadvā nira piṇḍa kiṅkarabalâmava curiga gadāyudhâpupul sākṣāt mr̥tyu curik nirâkas aluṅid baṅun aṅayam-ayam parāṅmukha tan pendah Baruṇânurun saṅ Anupādhipati suyaśa bhūmipālaka himpər sāgara kāṅinan bala nirâṅrvabi* nagara hibək təkê daləm təkvan lvir nira riṅ raṅin dhvaja vəlaṅ-vəlaṅ aputih arok lavan hirəṅ Rāhu mvaṅ śaśivimba rūpa nika kāraṇa ni musuh irâtabəh titir

siṅ solah saṅ Susenā pracalita kadi saṅ Bāyu riṅ buddhi madrəs vadvā-vadvā riṅ ambək lituhayu katəṅər yan pravīrâprih iṅ praṅ himpər seḍuṅ karəsrəs bala nira kumisik lvir gəlap holih asriṅ byakta* syūha ṅ musuh de nira n asəmu hudan sañjatâvor halisyus *ṅhiṅ saṅ Hemāṅgadâtyanta sugih ira hibək mās maṇik rājayogya* līlâcum somya saṅ Vaiśravana paḍa nira n ghorarūpâdavâgə̄ṅ norânaṇḍaṅ yatan mās bala nira satəgal kāla niṅ hanyan aṅjrah sakveh niṅ śatru śīrṇâkuniṅa vulat ikā de nirâpan vah iṅ mās aśrī saṅ Pāṇḍya śuddhākr̥ti nira satirun paṇḍitânvam vidagdha tan kāsy-asih tuhun tan harəp iṅ ulah agasyak yayan sopacāra saṅ hyāṅ Īśāna sākṣāt paḍa nira n ahaləp riṅ sabhā nora tan vruh atyantêṅ yoga kavruh nira karaṇa nira n katvaṅ iṅ śatru śakti vvantən saṅkêry Ayodhyā lituhayu dahatən rājaputrâdvitīya ndan rakvânak mahārāja Raghu saṅ Aja saṅjñā* nirêṅ rāt prakāśa saṅ saptādhikrətâtyanta haləp ira kabeh sor kagə̄ṅan pratāpa* himpər candrâkucəm tan vani mulat i narendrātmaja lvir hyaṅ arka saṅ hyaṅ Brahmâgave rūpa nira kadi paran riṅ raras mār manisnya yadyan gandharva vidyādhara niyata nikâsora riṅ rūpa kālih aṅhiṅ hyaṅ Kāma saṅ sambhava mapaga raras rūm nirêṅ martyaloka sampun pvâṅāśrayê citta nira masuruhan rāga kuṅ don irâṅher ndān ambək ni ṅhulun ṅhiṅ sira juga kadələ̄ n kāptya rakryan suputrī anvam pūrṇêṅ paṅavruh lituhayu taruṇâpālapan kṣatriyāṅśa jaṅgâṅuṅsir kapat ramya nira vinulatan dlāha yadyan patəmva āpan tuṅgal sirêṅ rūm kadi vulan aṅilo vimba niṅ candrakānta *

nāhan ujarnya paḍâsəlur avara-varah kinatuṅgalakən sə̄ṅ i manahnya katon səmu-semu niṅ akuṅ ri narendrasuta ṅhiṅ kakəna* prih ikā sira viṣaya ni goṣṭhi nika n paṅucap rūpa nira sthiti ri tvas ika sinamudāya lavan turida śrîndumatī sukha mār hati nira ruməṅə̄ ry ucapanya rəsəp yan tan avədya sirêṅ vvaṅ atuha hana buddhi nirâməpəra rāga nirê saṅ Ajâvətu taṅis inamər vədi kavruhana liṅ nira mogha lumuh yan aharip araras parihāra nira mojar ikaṅ rinahasyan ira vacana liṅnya rəṅə̄n ta tuhan saṅ ratu tan hana tan lituhayu kadi devata rakva sira ndan paḍa sor sira de saṅ Aja saphala putra narendra Raghu hīṅan ira n sira yogya kaharəpana digjaya rūpa nira śrîndumatī kəna rāga tuhun api hade kadi tan malara de nira mojar apet silib amarani lokika buddhi nira hayva vavaṅ pinisiṅgih ujar ika tuhun hiḍəpən sakarəṅ āpan ikaṅ dadi janma sakaharəp ikā kaka mogha dudū nista nikân apadudvan ibu kaharəp iṅ dadi janma kabeh yan kinatuṅgalakən ndya tika hala nikā tuhanən pituhun māsku mataṅnya kakūṅana saṅ Aja tuvin vvaṅ anakta sira hayva kədə̄ liṅ ira ndan asəmu-səmu harṣa nəhər gumuyu ndah paḍa bindar ikaṅ marək i sira kapeṅin ajalva muvah mogha girahyasən ambək ika katanəhan turidâṅlarani asyaṅ i rovaṅ ikâṅucap-ucapa kinonya marək-marəka liṅnya nihan sanu saṅ ratu pili-pilihan dumən i ṅvaṅ ari vvaṅ-vvaṅ ahadvan agatgat anagu-nagu məṅgəp atəṅv ahəniṅ bhāva nika n kəna rāga hanan asidəhâlupa tan paṅinaṅ vyartha sərəhnya hanê taṅan inagəm-agəm tuhu-tuhv alaṅə̄ bhrānta rumūpaka saṅ suṅana sərəh asūṅa səpah ri vaja len taṅ* agoṣṭhi ri gīta saṅ Aja ginavenya hañar katəka dudv aṅaləm ri palambaṅ ira mamaranî manis iṅ paṅikət śrîndumatī kavəlad hati nira ruməṅə̄ ri rasanya ləṅəṅ lvir jaruman saṅ Ajâmisiki hiḍəp irâsriṅ akon mijila saṅ vvaṅ inuttama sampun adaluvaṅ adoh sira riṅ viṣaya milv atuhâmbək irârarəm arəja suśīla lanâsiḍakəp tan rəṅu tan lumiriṅ duga-duga pakatonan i tiṅhal ira yan paṅucap sira tan paṅucap-ucapa len saka riṅ kavikun strī səḍəṅ iṅ viṣayânvam ahaṅan apasabraṅan ambək ika mvaṅ sira saṅ viku vr̥ddha marək aṅipi nāga milət ri sira yan vulat aṅdu matanya dinulur i halisnya tikəl minahā marma manisnya paḍâṅucapakən i kaharṣa nikā karəṅə̄

viku rājya kavi vruh aṅaji kaharəpku siviṅkva sanu kakavinya palar piguṇana ri parəknya ri jə̄ṅ nr̥pati ulah iṅ paḍa kāsy-asih aṅapi laṅə̄ hiḍəpəṅkva sukha kəmulaṅkva jajanya taṅan ika saput-saputaṅkva susu agaḍuh kavi kāpti mami sanu vənaṅ pasabhā pavukir vijil iṅ pihutaṅ pavadal inani rovaṅ ikânukhani kalavan kalaṅə̄nya vənaṅ anigakən manah iṅ prihatin yadin aṅləṅəṅâdulura maṅusirê trəbis iṅ paraṅan atitih kaharəp mami sanu vəka niṅ pihutaṅ-hutaṅan vruha têṅ kakavin kiduṅ ulah-ulah iṅ vahu-vāhu kavi saparanya pamaṅkvakəna* ləpihan amrih ameta laṅə̄ suməpər-səpərêṅ papihutaṅan i saṇḍiṅ ikaṅ pasisi kaharəpkv alavas* ṅhiṅ abasana vicakṣaṇa riṅ kalaṅə̄n niyatârarasən marək anigi-nigî pamabarnya tapih paṅapusnya hatiṅku laris i paṅavaknya katon adadar pravalanya marêṅ papasaṅan ika ta n kaharəpku sanu puhavaṅ vahu-vahv amr̥ti-mr̥ti katə̄nku* siviṅku sanu turidaṅku kaḍaṇḍa n alavas aharəp vvatən iṅ banava aputək hati niṅ kasarapuṅ alaṅə̄ mulat iṅ pasisi kaputər hati ni ṅhulun alal aharəp tumutêṅ alayar anak iṅ prajurit mətu pajurit* ikaṅ kaharəpku* sanu ləvu ramya niki n katəkana lurugan ri huvuskv atəmu havinəṅkva curiknya saha raṅin ikā payuṅaṅkva tumūt tan arəs yak umilva səḍəṅa nika keṇḍita riṅ palagan

ya ta təmahana tiṅlur denya n śaiva sira sivin ikaṅ apalaran anvam vruh têṅ śāstra viku haji lilu tumakula lampūn dan yan paṇḍita nagara atuha-tuha bagañjiṅ byaktâṅhə̄bi yan inusir kunaṅ amuhara kiṅkiṅ yan bot svan sipi mararas viku mirah aguṇâśrī maṅgəh vikva narapati sira ta sivin aharyan santoṣâmalara dəmak palumutana yan anvam yan vr̥ddhâpuput anadi taha* sanu yan i rantəntâṅhiṅ tyāga juga sivin sipi raras iṅ ataṇḍaṅ deśâdoh mahas alaṅə̄ ləvu sukha niṅ akarvan soṅsoṅ yan jamaṅ anipis pakararas ika paṅkun gantin mvaṅ palu daluvaṅ tuhu marika vuvusta ndan son mogha salah ile təka turida kəna prih de saṅ brāhmaṇa sinivi mulat iṅ avəka mambaṅ prajñā prāya jitasabhā ṅhiṅ amuhara viraṅroṅ heman dhūrta cala nika kunaṅ amuvuhi* rāgī riṅ tvas ni ṅhulun alavas vəka-vəka capaṅ aprih riṅ praṅ vāni panagara aṅavayuha saliṅ-liṅnya n sampun ṅvaṅ apatutan ikaṅ ujar ibu rakryan kadi asyaṅ maṅiṅin-iṅin nahan ucapan ikaṅ strī təmbenyânəmu turida tan avuni ri manahnya n bhrāntâkuṅ managu-nagu hana ta titir anambut vehan milv aṅucap-ucap mavara-varah i rumrūm niṅ sāminya* tan aviraṅ

rare mərə-mərəh pajātyan agəlo vinara-varahan iṅ pasaṅgaman mapaṅ* kumətər aṅgaməl susu taṅanya saha kətə-kətəg sumamburat ulih niṅ amuruk-muruk tinaṅanan ri pataṅanan i sandhi niṅ prəman huvus pva ya tamâharəp vayuha tan rəṇa kadi manah iṅ tamêṅ aji dudū sanu lavan huvus pracacah asriṅ arabi sinivi priyambada huvus tama karāsikanya kadi vah madhu rasa nika riṅ giṇâmanis amakpak aṅucap tuhan tinikəlan halis i səḍəṅ ikâṅgaməl tapih baṅun pəjaha riṅ karaṅ hulu taṅan ṅvaṅ i paṅamər ikâṅalap hati ikaṅ kavi ñamut laṅə̄nya rinasan saha kakavin araśmi riṅ tilam ikaṅ jariji mogha kelu ginaməlnya kinuku hiniḍəp-hiḍəp tanah lanânipati pet manis kavava kelu kadi ləkas ikânulis karas kiduṅnya panurū-nurūnya sahajâṅgaməli susu nəhər kinaṅsyakən pravīra sinivi priyambada tuhun kavatək ulah ika n vanîṅ raṇa añumbu kadi de nika n paṅalavaṅ raṅin i səḍəṅ ika n paṅolakən anaṅtaṅ amapag vulat nəhər aminta linavanan anūt mamaṅkvakən marêṅ susu taṅanya mogha hiniḍəp nika ḍuka-ḍuka niṅ curik siṅī lavan-lavanan i ṅhulun viku mirah lituhayu pinakesi niṅ kuṭi manisnya kadi poh apādapa tiki n mamaragi gula gaṇṭi dug siṅī liriṅnya pinarantyan i ṅhulun iṅ ambyan iṅ umah i səḍəṅ nikânasi dudū svara nikê karinya karəṅə̄ panamaya nika yan parê ṅhulun

nāhan de nika goṣṭhi senak i manahnya panalimur ikâharip mata tan tuṅgal ruməṅə̄ ry ujarnya hana heva hana səmu pacəh məṅən-məṅən strī kryan-kryan paḍa mūla-mūla rabi niṅ kavi muvah aṅucap samaṅkana tan doṣâsiṅ ujarnya mogha minanis-manisan ika tinuṅtuṅan laṅə̄ rakryan kenaka niṅ manuṣya sararā vərə-vərəha yayan papaṅgiha ambək nāgarika* vruhâṅikəta bhāṣa sakurasa savīja riṅ laṅə̄ yan pāyvan kakavin maṅarvana vilah kakavin ika palambaṅ iṅ yaśa yekā Kāma Ratī ṅaranya n araras paḍa kavi savavânak iṅ maṅə̄ luṅhâṅdoha marêṅ pasir kahaləpanya n amarəṅana māsa kārttika sakvan selvan ahimya-himyana manumpaka ri valakaṅ iṅ karaṅ liman ramyâtuntunanêṅ hənī ri surud iṅ rvab i təpi-təpi saṅsayâḍake līlâmeta huraṅ tanah nəhər asumpiṅ asaṅu-saṅu saṅva niṅ maṅə̄ ndak ton harṣa nika n parambakana riṅ bañu tuna-tuna mombak-ombakan kālih-kālih ikâdulur paḍa girahyasən anəmu laṅə̄ ləyəp dahat strīnyâmiṅkasakən tapih jənək amet uvur-uvur agəlar marêṅ təpi byaktâlūma kakə̄ma riṅ bañu hasin vətis ika panahā nikaṅ mulat rūpanya n mahasêṅ* pasir kadi katona mahasa ri samudra niṅ tulis āpan de ni ləyəp-ləyəp ni patəmunya kadi tasik avor lavan laṅit yadyastun yan aṅumbaṅêṅ* jaladhi kavruhan i pamilət iṅ kuvuṅ-kuvuṅ sākṣāt devata devatī mahas-ahas ləṅəṅ aṭika-ṭikan sakêṅ tavaṅ buddhinya n vahu-vahv acaṅkrama marêṅ pasisi vahu mahas lavan priya maṅgā n* tan muliha n panon padulur iṅ layar asəmu matuntunan taṅan solihnya n pakaraṅ-karaṅ vinavanan taṅan ulah-ulah iṅ hañar-hañar apvī niṅ hiliran ya sādhana nikâkəla-kəlana ri piṅgir iṅ tasik piṅgir niṅ paraṅan gihā vatu sumoṅ pinakapasaji riṅ marâṅləṅəṅ* priṅgârəs tinatar hənū nika suməṅka tumurun atupis rəṅat-rəṅat parnah lor maṅuṅaṅ tasik mukha nikā dunuṅan i kəñar iṅ niśākara ṅkāna n paṅhinəpâmaḍaṅ-vulana yadyan aharipa sukha n paḍâmrəma təkvan pvêki n anak vəsi nrəpati kavvaṅan ika vəka niṅ* sinanmata yadyastun kilalan təkap saṅ ahulun pavəkasakəna riṅ marêṅ pasir byakta n mantuka molih-olih alaṅə̄ haturakəna ri jə̄ṅ nareśvara cihnanya n kavi karva kāsih ika vāhu vihikan asabhā-sabhâmasir* nāhan vastu ni denya mojar api doh ndan abhimata nikê suputrikā śrī devîndumatī huvus vruh iṅ apa n kasiliba riṅ ujar samaṅkana *kālap buddhi nirêniriṅ vinava riṅ* ləṅəṅ amasir ahimya-himyana ndan mogâpi hade sahur nira paṅavruhana panalimur manah rimaṅ siṅgih ṅgānya vuvusta ramya ṅ akurən sarara vərə-vərəh paḍâraras luṅhâsaṅva karas tanahnya mahasêṅ pasir adulur ahimya-himyana tan vaṅ mātra kasiṅya mātra manah i ṅhulun irikaṅ ulah samaṅkana ndak ton kevran ikaṅ giṇânivi taṅeh mamaḍana raras iṅ vujaṅ-vujaṅ təkvan tan hana harṣa ni ṅhulun ataṇḍaṅa pasisi huvus tama ṅhulun pora vvaṅ nika tan vruh iṅ puruṣabheda hiliran amukət* hanâmayaṅ moghêraṅ ṅvaṅ* isin maṅambila karaṅ-karaṅan i pasurak niṅ ampuhan aṅhiṅ ryaknya maṅaṅkul-aṅkul ajajar baṅun asəgəh anəmbah iṅ maṅə̄ ambək ni ṅhulun iṅ vukir təka rəsəp mvaṅ aṅaləvihakən sakêṅ pasir de niṅ kveh nira paṇḍitâtapa ri parśva nika kumuliliṅ təkê ruhur yadyastun ṅvaṅ atiṅgalêṅ nagara vikva rara maṅusirê munīśvara ramya ṅ pakṣa vukir yayan ku n aṅuṅaṅ ry abhimata saṅ apakṣa sāgara və̄ṅîṅ māsa kapat ṅhulun milu ri jə̄ṅ nr̥pati mahas-ahas mariṅ vukir saṅ hyaṅ lek i surup hyaṅ arka mijil aṅḍaḍari kadi maṅumbaṅ* iṅ pasir tūban mvaṅ gərəh iṅ patər tan asarag dhvani nika lalitânurū-nurū eñjiṅ meh tumibā ṅ ḍavuh pitu samaṅkana mavuṅu tinaṅhi niṅ cucur abhrā kayvan ikaṅ vukir vijah arūm kadi pinisalinan səkar miṅiṅ len taṅ sarvalatâvilət samar arok baṅun ahurupa luṅgu-luṅguhan sakveh niṅ kayu mās lavan kayu puriṅ paḍa-paḍa masuṅut vəlas-harəp *ṅkānê piṅgir ikaṅ juraṅ pətuṅ ikā paḍa kadi pinituṅtuṅan limut sore ry ampəh ikaṅ javuh kari gərəhnya muni pinakaramya niṅ vukir lāvan megha marantayan tura-turahnya sinirir iṅ aṅin pəgat-pəgat miṅsor miṇḍuhur aṅlayaṅ kadi dinəmvan añavəli kukus carik-carik himpər siñjaṅ iṅ apsarī kasarakat ri laris ika sakê pamañcanan saṅkṣepanya katon kasor i ləṅəṅ iṅ pasisi təkap i ramya niṅ vukir təkvan vighna niṅ aṅləṅəṅ mahasa riṅ pasisi tarahan aṅhaḍaṅ-haḍaṅ śuddha ṅ parvata nityaśâsəmu kadevatan i hana saṅ ugrapaṇḍita ndak gañjar kita yan kitântuka tasik mamaḍana kapavitran iṅ vukir

taham rakryan di ṅ parvata ləviha saṅkêṅ jalanidhi anūsâpaṇḍan raṅkaṅ apasir asaṅhub saha kilat muvah tan pāntyāntyâmpuhan ika baṅun kārttika sadā manuknyâlivran yan vahu mari javuh lvir laru*-laru kuməmbaṅ tuñjuṅ kāṅinan uvur-uvurnyâṅjrah aputih layar niṅ baṇyāgânutakən aṅin aṅdoh kadi limut ləṅəṅ ryaknya n sandhyâmirah asəmu meghânisik ivak laṅit suṅsaṅ lvirnya n maśaśadharamāyā makalaṅan bhaṭārī Śrī pə̄h niṅ jaladhi pinutər lāvan amr̥ta muvah catrâśvâtyanta riṅ aṅuparəṅgê haləp ira tuvin hyaṅ Viṣṇu svāmi nira jənək i jro* jalanidhi mataṅnyan mūlya ṅ sāgara karaṇa niṅ parvata sinor tuhan putrī tan keməṅan iṅ ucapan yogya sahura huvus vruh rakvê* tiṅkah iṅ acala len kṣīrajaladhi apan yan mūḍhā buddhi nira pisaniṅv ânəmu sahur kunaṅ pvâpan prajñā sira sumahur apyak saha guyu ndatan moli n hyaṅ Śrī vinijilakən iṅ kṣīrajaladhi parəṅ lāvan catrāśva kapat ira tekîkaṅ amr̥ta apaṅgih mvaṅ hyaṅ Viṣṇu hana riṅ Anantāsana sadā ya hetunya n sor liṅta ṅ* acala təkap niṅ jalanidhi kaka ndi n sora ṅ parvata təkap i rūm niṅ jalanidhi apan lvir vruh riṅ svarga ṅ aṅahasi puñcak niṅ acala paran saṅkan saṅ hyaṅ Ravi gati niṅ astodayagiri Umādevī sākṣāt mara sira sinaṅguh Girisutā sirâtekā Durgā ṅaran ira kasaṅkhyêṅ tribhuvana vəkas niṅ strī siddhi syapa ta sira devī kadi sira huvus limpad riṅ kāṣṭaguṇan atidurga n tiru-tirun kunaṅ tâpan riṅ bimba ya sira n avās kottaman* ira bhaṭāra hyaṅ Rudra pva sinivi nirâtūt silih asih apaṅgih ṅkānêṅ* Meru sira paḍa siddhaprabhu vibhu* mataṅnyan nora hyaṅ kadi sira mahāsiddhi dahatən anādi n riṅ Liṅgodbhavacarita pamyaktana kaka sirâtekā tūtənkva luməvihakən riṅ mahidhara sakê sakveh niṅ sāgara mapa ta sī madva karika sahur hayvâsove kaka rasa-rasâpan kita bisa tuhankv ibv amvītâlaha tuhu vuvustâhayu dahat

nāhan de nira goṣṭhi ramya tadanantara rahina huvus ḍavuh pitu sakveh niṅ paricārikâṅiriṅa sampun anarima dadar paḍâsalin lāvan saṅ vvaṅ inuttamâhayu sujanma paḍa sira marək sumaṅgraha śrī devîndumatī sirâṅadəg avarṇa ratu ni ləṅəṅ iṅ ṭikâṅaraṅ strī-stry ânekaviśeṣa pakṣa ḍatəṅêṅ paṅuṅaṅan adulur hanêṅ ləbuh ahyaṅ varṇa nika n hinəmban araras pinayuṅan iniriṅ bhinūṣaṇan sakveh niṅ kapapag lumiṅsir avədîṅ* vvaṅ ahaləp akəmul ya riṅ vəṅi pa≤ñjut sañjata len garantuṅ i harəp* prakaṭa baṅun akon sumiṅgaha eñjiṅ ramya tiniṅhalan sahana niṅ paṅuṅaṅan atatâkatap-katap de niṅ pañjut avarṇa vintaṅ anular vədi karahinanânusup-nusup mrik gandhanya huvus kinasturi miṅiṅ rinacana tinulis linaṅvakən vvaṅnyâpiṇḍa surāpsarī saha vimāna vahu təka sakêṅ surālaya vastrâbhrā pinakapralamba hana riṅ valikuvaṅ anamar kuvuṅ-kuvuṅ kram niṅ cavli kukus baṅun truh anisih pinakapaṅuparəṅga niṅ hatəp himpər nīrada citramegha nika riṅ haḍa pinakataviṅ-taviṅ marar* luṅsir baṅ pinakolur-olur i pucak-pucak ika kadi luṅgah iṅ kilat saśrī varṇa nikaṅ payuṅ-payuṅan akrəp asəmu-səmu paṅjrah iṅ jamur akveh varṇa nikā hanan dadu hanan prəcik* asira-siran paḍâṅadəg de niṅ kveh nira saṅ vənaṅ paḍa katon kavənaṅ ira mijil samaṅkana len taṅ biryan amet səkar niṅ asanâniru-niru haləp iṅ payuṅ kuniṅ saṅ hyaṅ sūrya mijil kamantyan abuṅah pavulatan i sabhā nikaṅ kuvu vvaṅnya lvir jaladâkəmul kilat asoṅ hima sahana-hananya riṅ ləbuh de niṅ kvehnya lavan prabhā ni sasinaṇḍaṅ ika lumarap aṅhulap-hulap śaṅkha mvaṅ tarayan mr̥daṅga kumisik mamaji taliṅa niṅ vvaṅ aṅrəṅə̄ vvaṅ-vvaṅ thāni paḍâdulur vahu təkâṅibəki nagara len hanêṅ hənū təkvan riṅ sakurən hanânak ika pat lima marək amilət-milət laku strīnyâṅəmban anuntun āmətəṅ apan maṅəlih ika manamby anusvani aprakprākan apan hilaṅ sasiki lūd kakutil avurahan silih dalih len têkaṅ kaki-kaky amet putu nikā hilaṅ i səḍəṅ ikā silih səḍək liṅ niṅ strīnya mahâkas ī kita harəp mulata kita nininya riṅ vaneh āpan de ni uninta* lāgi ta kitâmupuh i səḍəṅ ikâṅucap kaki ih dūrânaṅisâku yan kita midoṣana pəjahana səṅgahən bahud strī-strī vr̥ddha huvus təkêṅ kabuyutan milu-milu mulat iṅ svayəmbara* aṅhəmban* raray anvam akrak anaṅis vinaliṅ ika putunya rakva ya mojar svāmi nikā nini syapiku hāpa ya kaki* taha tan putunta ya hā hāh tiṅgalakən hade nini təvas kita kabr̥kəkə duhkha kabvatan nāhan liṅ nika hāsyakāraṇa sapolah ika tucapa saṅ para prabhu ginyākən ḍatəṅêrikaṅ pagəlaran paḍa mijila kabeh sirêṅ ləbuh vīrya-vīryan amətvakən hati nirêrikaṅ aṅinakanê vvaṅ iṅ sabhā muntab lvir ni haləp nirâṅarab-arab sama-sama kadi bahni kāṅinan maṅkat śrī Magadheśvarâtri gumuruh paḍahi nira karəṅv agənturan sakveh niṅ maṅuṅaṅ kapūhan i haləp nira paḍa mapipit-pipit mukha kady âṅarvani sumpiṅ endah araras pinatihakən ika n paḍâṅuṅaṅ tuṅgal varṇa nikâbuṅah kadi vulan sasiki pinaravəñca niṅ smara aśrī varṇa saṅ Aṅganātha savatək-vatək ira mapupul paḍâhaləp *himpər sāgara lakva-lakvan ira ramya tan asəpi kapiṅ rva niṅ laku təkvan rūpa nirâsəḍəp tan ahañaṅ huvus amuyahi ri tvas iṅ rimaṅ tan tuṅgal stry aṅaraṅ tumon sira manahnya kalara-lara karvaban laṅə̄ lvir guntur saṅ Avantinātha təka gumrəbəg ahaləp anuṅgaṅ iṅ ratha himpər truh sumaput ləbū nira mələk pətəṅ alimunan aṅhudan havu sakveh niṅ maṅuṅaṅ paḍa mrəm apəpət məpəti mukha ri tuṅtuṅ iṅ sabuk agrah rūpa nikaṅ kaḍatvan i kətug ni paḍahi nira mapratidhvani

liṇḍū lvir saṅ Hanūpādhipati manah ikaṅ strī mulat bhrāntacitta miṅgut-miṅgut halisnyârəṅu-rəṅu kadi tan vvaṅnya kevalya mūrchā katrag santənya kegū hati nika kagivaṅ sāri-sāri prapañca kady ânumbak jajanya n pasidəha təka riñcuṅ təṅahnyâṅgaluṅgaṅ vānîṅ praṅ saṅ Susenā laku nira lumurug kesyan ambək* nirâkras vadvā-vadvān dəlit niṅ tahu rinəbut i rūm niṅ mulat riṅ paniñjon siṅhākārêṅ sabhā yogya vulatana kasaṅkhya n dhanurvedaśāstra sakveh niṅ stry âmapag tiṅhal ira paḍa kənêṅ rāga tībra byamoha ṅhiṅ saṅ Hemāṅgadâkveh asəmu gunuṅ mās katraṅan kāla sandhyā de niṅ siṅhəl kaluṅ mvaṅ karah atip apipit* paṅharəp niṅ lumampah tan pendah puṣpa sālas dadar i bala nirârūm apan sarvavastra gəṇḍiṅ tan karkaśâlvan bhramara kahiḍəpanyâṅisəp sarvasāri saṅ Pāṇḍyâpiṇḍa devâlaku-laku tuvi saṅ paṅruhun paṇḍitâkveh tātan pendah sakêṅ Buddhapada* sahana saṅ boddhapakṣâmpak-ampak śaivarṣy âvarṇa saṅkêṅ Śivapada* paḍa sampun pənuh riṅ paṅavruh sakveh saṅ brāhmaṇâpūrva pavulatan ira lvir sakêṅ Brahmaloka

maṅkat śrī naranāthaputra kadi kārttika vahu təka de nira n laku luh niṅ strī kəna rāga riṅ paṅuṅaṅan kadi riris inusap sakê mukha tiṅhalnyâdu baṅun kilat lumarap aṅluru-luru ri huvus nikaṅ javuh sambat-sambat ikā ginūḍha kadi mətva marəṅana kalaṅvan iṅ patər liṅnyê tvasnya bhaṭāra Manmatha manəhta kavəlas-arəp aṅhiḍəp lara kiṅkiṅ rāga təkânaput prihati mār pinuhara nika tan vənaṅ kinas maṅke kāla nikaṅ svayambara təkâmarupuhi sahasâṅrəmək hati aṅgyat lvir hudan adrəs iṅ katiga tan pakakaraṇa karəṅvan iṅ gərəh t asy-âsih siha saṅ hyaṅ i ṅhulun alah səpərakəna nareśvarātmaja syūhən denta manah nirêṅ lulut unəṅ kətərakəna nəhər təkākəna āpan tan hana len sakê sira pakāśrayan avəlasa riṅ griṅ i ṅhulun tambā rāga siroṣadha prihati jampi turida pinakāmr̥têṅ rimaṅ yadyan laṅghana tan panūta manah i ṅhulun i səḍəṅ ira n pamaṅkvakən ndak ton kədva nirânukūlakəna tan kavaśa hinudanan vulat maliṅ āpan siṅha sirêṅ rahasya niyatârəp-arəpan i tan olya kaprəma byaktâṅrampasa ken dunuṅ susu kayuh təṅah anəkani senakê hati

nahan liṅ ika ri tvas epu vihikan ri manah ika yatan sakāra dahatən ya kāraṇa nikâvuyuṅ ri taliṅanya təka rəṅə-rəṅə̄n i vr̥tta saṅ Aja halisnya pinisitnya tan duga-duga n paṅujivat i səḍəṅ nira n umalivat matanya dinalihnya durjana hənū nira mara ri hatinya tan pamali luh

taṅeh yan ucapən laranya tali niṅ carita valuyanôcapən muvah para prabhu huvus təkêṅ* pagəlaran mapupul asəmu hetva niṅ laya apan gumuruh apratidhvani surak ni bala nira ya tâmaṅun bhaya baṅun hana katona digjaya katona* pəjaha rəbutən salah siki atuṅgalan umah bvat Indranagarâjajar asəmu kaḍatvan iṅ tavaṅ para prabhu mahāprabhāva savaṅ arca maṇik inululan hanêṅ sabhā paḍâsira-siran pratāpa kadi tan hana ləviha sakê haləp nira təka pva saṅ Ajâkucəm sira baṅun śaśadhara matəmah kunaṅ-kunaṅ syapêka tan avədya riṅ kadi sirâguṇa vəka niṅ amədyakən ratu avarṇa madhumāsa kārttika piniṇḍa piniturun adadya mānuṣa ikaṅ vvaṅ aharəp vruhê sira humuṅ sahana-hana nikaṅ vvaṅ iṅ sabhā katon pva sira denya rəp vədi kuməl humənəṅ asəmu sinyukan bañu rare saṅ Aja śakti pustaka ləṅən Raghuvəka vani kavy anuṅgali ikaṅ guṇa hanê sirâgaṇita riṅ kapana kavaśa tarka niṅ mulat prasiddha sira sūtra niṅ karavivaṅśan amagəhakən āgamêṅ prajā rusit niṅ aji ta pva rūpa nira tan hana ratu vənaṅ aṅdələ̄-dələ̄

sampun prāpta sirêṅ* sabhā pinakamaṅgala ni haləp ikaṅ svayambara śrī devîndumatī sirênarahakən mijila vahu huvus bhinūṣaṇan muṅgv iṅ ḍampa sirâpəgâṅənəb-ənəb kətə-kətəg ira mār sumamburat saśry âvarṇa tulis ḍinampan avənəs-vənəs asəmu rakət kapañjutan endah ḍampa nirâpənəd kinajaṅan kusumaśara tinap linaṅvakən ronyêndrāyudha puṣpacāpa pikulanya mamukha-mukha nāga campaka mās tuṅgal nika puṣpaliṅga niṅ aṅarcana ri* pada bhaṭāra Manmatha nāgākāra surat-suratnya tinətəs ni luh iṅ akuṅ amaṅkvakən ṭikā ācārī kalavan karaṇḍan ira saṅ pinituhu ri tatā samâṅiriṅ sampun muṅgv i harəp sirâhaləp* acum nəhər aṅarahakən lumampaha kəṇḍaṅ goṅ muni t aṅkat-aṅkat atərəh dhvani nika karəṅə̄ sakê yava sakveh niṅ maṅuṅaṅ paḍâṅənəb-ənəb raras i hati nika n tumiṅhala maṅkat śrīndumatī garantuṅ ira muny asəmu gula ghināṣa riṅ vaja rūm niṅ paṅlima muṅgu riṅ śrigaḍiṅ iṅ masa kalima tinū hanêṅ kapə̄ aṅlaṅvākən avarṇa kārttika pamatnya gumuruh araras rinəṅvakən lvir tūban kumusuh karəṅvan i panəmpuh ika kadi panəmpuh iṅ javuh

rakryan putrī mijil kābhinava haləp irâpūrva saṅkêṅ kaḍatvan aṅlīlâvās katon bhūṣaṇa nira kuməñar lvir panolih hyaṅ* arka aṅher riṅ gopurâṅrəgrəg i pasaləsək iṅ paṅharəp sə̄h marampak sākṣāt saṅ hyaṅ vulan vāhu mətu riṅ udayādrîniriṅ niṅ grahâkveh mogâhyaṅ de nirâmet hayu mamulaṅunî buddhi niṅ vvaṅ tumiṅhal hyaṅ* Śrī liṅnyê sirâṅiṇḍarat aharəp ametâśrayêṅ martyaloka len tekaṅ vvaṅ suməṅgah Ratih i sira sakêṅ svarga lāvan surastrī bhrantânəṅgah dvicandrâdulur i payuṅ irâtyanta śuddha rva sādəg

menmen rvaṅ siki vāhu rāgavaśa muṅgv i harəp ira marək manimbaṅi hyaṅ niṅ gīta təkânurun kahiḍəpanya ḍatəṅ iniriṅ iṅ tabaṅ-tabaṅ siṅhəlnyârja lavan savitnya katirah vəlas-arəp avilət lavan gaḍuṅ tan pendah kadi nāgapāśa pamanah niṅ Atanu karaṇanya ləṅləṅa nyū dantâkuniṅ aṅhapit gula-gula lvir ikaṅ amava pavvahan* gaḍiṅ tapvan vāla dahat rva sādəg abəbəd niyata kahirisan tvas iṅ mulat təṅgəknyâluṅ apiṇḍa kāṅinana polah ika n asəmu buṅkah iṅ pupus* aṅhiṅ dyah Jayavaspa*paṅhulu manisnya n anilihi mamaṅku pavvahan tan havvan gati saṅ rarâhavu*-havu vvaṅ ahayu tinuras raras nika lūd bhasmāṅkura laṇḍa rakva sira saṅ tuha-tuha nika yan sakêṅ bibi solah seṅər ikâhaṅan gəsəṅ i pāmbəkan ika təkap iṅ smarānala yogyā kuṇḍaṅa niṅ manunvani pamiṅgir amənəma kaḍatvan iṅ musuh mopih vahv amayaṅ-mayaṅ ri hati niṅ mulat anəku-nəku pralāpita tapvan rañca hatinya kevala valəlvan amagəhakən iṅ kakanyakān kāsəṅkanya pilih pucaṅ-pucaṅan iṅ smara rumimaṅa buddhi niṅ kavi yogya n raṅkulən iṅ vanîṅ raṇa təṅahnya pasuṅakəna səmba-səmbahan tapvan vr̥ddha dahat sirêña nira lāvan uva nira paḍâkurug mirah ekəl roma nirâsəlat huvan ikaṅ hayu tumalavuṅan turuṅ ləvas luñcip niṅ kuku pantəs aṅgrəmusa lagy aṅuluṅ-uluṅi rāga niṅ mulat edran tiṅhal irêṅ sabhā baṅun anambəra hinayamakən titik maṅə̄ putrī niṅ kryan anak vəsi nrəpati rakva kaka-kaka nirânvam iṅ vayah pantəs tan pamikārakən hayu rəṅunya muvuhi raras iṅ matâmanis lvir hyaṅ-hyaṅ təka tan hinundaṅ anurun sahana nika paḍâvulaṅ tatur kram niṅ sampir i bāhu mās inapi molah asəmu həlaranya n aṅlayaṅ

ikaṅ mamava* kaṇḍi-kaṇḍi rara vahv agəluṅ ahayu poṣadhan lulut lumut -lumut ikaṅ payodhara vənaṅ paṅuvata səḍəṅ iṅ jajâhənək pupur nika vənaṅ paṅoṣadha piləg niṅ iruṅ apan arūm sakêṅ kapur lukar karika kenya mukhya pinakādi paṅuvata ri rāga niṅ rimaṅ vagəd-vagəd ikāṅ añāmarani varga* pasisi saləmah lavan vukir savarga kalavan vulan mukha nikā kaləṅəṅan ika mitra niṅ cucur təṅahnya vahu vanva riṅ jriṅ aṅəlih vahu vaśa riṅ aśokapādapa sasīma kalavan mayūra gəluṅanya vəka niṅ asanâkadaṅ patər kunaṅ saṅ apahidvan eṅas ahaṅan pavulatan i manahnya riṅ sabhā səkar nika pinintakāsihakən iṅ kavi huvus aṅikət hañar təka kisapvakəna riṅ pravīra kahaləp nika suṅana səpah sakê vaja kayogyan i laṭinya yan kadi duh iṅ vvah ika səsəpən iṅ priyâtaləh anak vəsi narendra rakva rasikā saṅ amava curigâraras dahat aroma maṅunəṅ galuh kahiḍəpanya n apaṅavaka patrəm uttama ikaṅ vvaṅ araṅin vineh curiga kadga sinəpuhan apan vagəd vaśi vajanya mamirah* təkê gusi-gusinya halis ika təkâmraṅ iṅ mulat ikaṅ vvaṅ aṅagəm curik pinakapaṅruhun adulur arəs tvas iṅ mulat asiṅhəl akaluṅ kr̥tārtha riṅ ayun pinakapaṅisi niṅ vanîṅ raṇa surakṣaka kabhīnna-bhīnna baṅun antaka mapupul ahə̄m aṅiṇḍarat vinasvas asipattra sālas asəvə̄ kr̥tala curiga tomarâluṅid

vvaṅ-vvaṅ kasturi sāri niṅ kusuma rūpa saṅ aṅiriṅ inuttamâhayu mevv-ivv âtap avarṇa kuntul aṅusī* pasisi kakilatan hanêṅ tavaṅ yadyastun tulisən samaṅkana pirâvig-aviga nika yan hanêṅ yaśa ṅhiṅ ganya* n dravanən manisnya niyatanya tumuluy atəmah tasik madhu laslāsan vruh iṅ iṅgitâṅinakanêṅ mulat ahayu puji n pakavvaṅan yan tiṅhal kadi tiṅhal iṅ cala-calârəṅu-rəṅu sahajâpuput guyu nistanya n kadi pāvak iṅ madhu manisnya raras ika kadi ṅrəs iṅ hati tan paṅgintir i rūm nirâsəmu jamur hapa-hapa marək iṅ jamur vulan denyâṅlaṅkahakən sukunya kadi tan ləpasa təkap i lon ikaṅ laku məñcuh-məñcuh aṅambək-ambəki pupūnya hana bənər* adəgnya pet ulah kahyun-hyun laris iṅ* vətis tan alaris laku nika minahā hinerakən aṅjiṅjiṅ sasisih məluk tur ika mātra vagəd aniru lampah iṅ tulis strī-strī sabhya vicakṣaṇânagara nora kakuraṅ ika pantəs iṅ sabhā kady ânaṇḍuṅakən rvi de nika lumampah arəṅu sahajâṅhəmu guyu eñjuh prāya nika n vulat riṅ aṅuṅaṅ tan ahulap atavəṅ-tavəṅ taṅan tan pendah salukat jajar gəluṅ ikā lukar i jaja tinumbakan susu kady aṅrakṣa hayunya rūpa nika de ni galak i pamatanya* yan vulat hrū nîruṅnya* lanā katon amatitis pamarayaṅ i halisnya lot mayat varṇākāra nikaṅ vajâkrəp asinaṅ gusi-gusi nika kesisan laṭi ahrit vit ni susunya təkvan aluṅid paḍa-paḍa kadi suṅga niṅ jaja

tucapa tikaṅ vvaṅ iṅ paṅuṅaṅan vagəd aṅucap-ucap liṅ ika suputrikā pinakaratna vinuni ri daləm saṅ Aja sujanma mās kinəmit iṅ nagara vahu təka saphala sira n humambanakənê narapatiduhitā nr̥patanayā katon vədi nira n mulat i para ratu yadin alupa ṅ śarīra sira mūrchita lumaya kavəs huləsana tan bavaṅ-jasunanê səḍəṅ ira kapati niyata sirâṅlilir saṅ Aja saṇḍiṅakəna ri jaja narapatiputrikā n gəluṅa niṅ vvaṅ anaṅis i ṭikā saṅ Aja paṅisya mon sira virāga sadaka pasaji athava yadin padadyana sipat narapatitanayā nr̥pasuta de nira n gagaṅa mon pusuh* usapa mata səkara niṅ aṅhiḍəp smara kunaṅ narapatitanaya saphala n apallavâmbət i təṅah narapatiduhitā nr̥pavaraputrikā n səkara de nira kumuda-paḍa saṅ Aja niśākarā nira maran patəmu paḍa ləṅəṅ para ratu tan padon pisaniṅū sira kaharəpana* tuhu sira śakti vāni paḍa tan hana kakuraṅ ira ndan atiśaya prabhāva saṅ Ajâdbhuta kagiri-giri asana* lavan vuṅū paḍa nira ndya ta hurən* i rika nahan ucapanya yan dinuluran rəṅu* saha kujivat vaja nika tan vənaṅ vinuni keṅis amuhara raras vəkasan anagva-nagvakən i rovaṅ ika ri saṅ Aja cinalukakən mahâpicala harṣa riṅ ujar ajuvət hana ta muvah sira kryan apupul-pupul ahayu raras valu-valu saṅ lumah ry anu patibrata lumaku viku paṅavaśa niṅ nvam iṅ vayah agatgat asalaha jamaṅ hana səmu niṅ manah maru-marun mulat i nr̥pasuta hana vahu-vahv anūt karakətan silih asih akurən nr̥paduhitā kaheva nika məṅgəp aṅaləm aṅupət tuhu-tuhu yan latā paḍa ni buddhi nika kadi nadī cumulu-culuh priyanya pamavanya lulut i saṅ Aja rara ri Vidarbharājya makamukhya nr̥patitanayā paḍa kəna rāga-rāga nika tībra lumuṅ aṅalayan humañutakən lulut-lulut unəṅnya mara ri saṅ Aja bisa sira tan təñuh rinəbut* iṅ turida sanagara

osik buddhi nikaṅ vvaṅ iṅ paṅuṅaṅan tucapa sira narendrakanyakā sampun prāpta ri madhya niṅ pagəlaran para ratu kəna rāga de nira akveh bhāva nira n vimūrchita hanan maṅuvahi makuṭa ndatan tulus dudv âbhāvaka kady aveh səpah abhāvaka kadi tinəvək miṅe midəm len taṅ tībra lulut nirê nr̥pasutā humiḍəp avak irâṅisapvakən de niṅ rāgavaśâmarājaya təkâmulaṅuni ya tinūtnya yan rimaṅ ṅhiṅ kāmīrasa lot ginoṣṭhi nira ramya lavan ikaṅ amaṅku pavvahan mogâṅde tutur iṅ gula drava karəṅvan i vacana nirânamar juruh ambək ni ṅhulun iṅ rarâhayu lavan lituhayu savavân apaṅgiha ndan marmanya n atəmva dūta ləpihan pirəsəpakəna riṅ pralāpita āpan tan hana raśmi niṅ vinaraṅ iṅ vvaṅ atuha tuna de nikâlaṅə̄ ṅhiṅ gandharvavivāha ramya katigâmava sərəh amisāta riṅ pasir* luṅhâhəmbana putra-putran ika gantin arək-arəkanêṅ pararyanan liṅlīṅən kisapun kudaṅ*-kudaṅən iṅ kakavin ulih iṅ aṅdadak-dadak yadyan māliha riṅ vukir sipi laṅə̄nya vinulatan avikva-vikvana aṅhiṅ gīta panəmba-nəmbaha nika n huvus inubhaya mantukêṅ bibi

nāhan liṅ nira n aṅlipur-lipurakən kiṅkiṅ nirê tvas nira kāsih-kāsih irâṅlavan-lavani goṣṭhy âpan huvus vruh kavi vvaṅ śr̥ṅgāra vicakṣaṇâṅrahati sojarnyân asih saṅ prabhu pet-pet harṣa sahurnya rāgakaraṇa vruh riṅ kasə̄ṅan smara yan kanyā ri hiḍəp patik haji hade kahyūnanâpan raray tonən de nr̥pati ndya taṅ madhukarā hānê kucup niṅ səkar lāvan yan ləvasa ṅ rarâpa pakənanyâpan ləvas riṅ raras paṅliṅganya səkar ləvas pisaniṅū kumbaṅ marâṅambuṅa saṅkṣepanya səḍəṅ rarā bvatana kiṅkiṅ hundaṅən riṅ ṭikā maṅgəh de niṅ aṅolakən təṅah ikā* sampun pinaṅkv âṅliga kady aṅgān i səkar nikāṅ asana yan məmbaṅ katampvan riris ṅkāna ṅ ṣaṭpada mivya yan bhramara saṅjñānya n jənək tan midər nāhan denya n apet sahur mətu rarasnya n pāvak iṅ rāsika tambā niṅ rimaṅ aṅlavaṅ-lavaṅi kuṅ pet rāga denyâṅucap lvir truh niṅ madhumāsa kāraṇa ni kiṅkiṅ śrī narendrâsəvə̄ mambə̄ ken lukar iṅ tilam sahur irâtuṅtuṅ rum iṅ saṅgama

kanyā liṅta hade kaharṣana paḍanya salaga kapana n kakūṅana kuṅ jaṅgâṅalayan tathāpi kapana n pamiləta raras iṅ rara n ləvas* dr̥ṣṭāntanya səkar ləvas riṅ apa rakva vulatana məne n kasumpiṅa kiṅkiṅ tībra yan iṅ səḍəṅ rara rarasnya paḍa-paḍa lavan jrah iṅ səkar yêkā têka hade paṅavruhana campaka salaga nika n kinahyunan yadyan sumpiṅa niṅ maṅālihi huləs ləvu raras ika yan pagantyana mambə̄ rūmnya hanêṅ karaṅ hulu taṅan turah ika ruməsəp təkê hati haryan tan hana harṣa ni ṅvaṅ i səkarnya puru-puru rəmək katiṇḍihan* yan layvan pakasumpiṅən hana rarasnya tuhun asəpi solah iṅ ləvas təkvan rakva phalanya mogha pinalayvan asiṅ amupu luṅsuran səkar denya n mantəna rūmnya yan pakirim iṅ vvaṅ ahayu panuval nikā ṭikā ambə̄nya n huvus aṅharas* pipi ya târək-arəkana vaṅinya kuṇḍaṅən mvaṅ yan strī hucapən rarasnya paḍa ta pva* kaharəpana tan tayākəna rūmrūm niṅ rara kanyakā kadi saroruha kumuḍu mijil sakêṅ bañu himpər paṅkaja karyakan vahu məkar paməvəh i raras iṅ səḍəṅ rara tan pendah śatapattra vāhu ləvas iṅ talaga hayu nikaṅ rara n ləvas kanyā ta pva viśeṣa riṅ pavaraṅan raras ika marumah lavan riris antuk niṅ maṅalap kasor karaṇa niṅ tinarima marəkâṅaras pipi riṅ paṅkvan vinarah riṅ akṣara manah vahu tama vahu vanva koluyan āṅ ah vus* kaka liṅnya mogha kavatək ri səḍəṅ ika kinevalânukər yadyan rovaṅa niṅ maṅarvani hənū rumasa-rasana ramya niṅ kapat byaktâlona lakunya sotan ika tan tahu mahas-ahas aṅrəṅə̄ gərəh tapvan vanva dahat tuhun rəṅu nikâmarahakən i harəpnya həmbanən suṇḍaṅ-suṇḍaṅən iṅ təgal payuṅanâsana hari-harin iṅ pararyanan tan gyā-gyākəna de nikā lumaku mon karirisana ri madhya niṅ təgal yan paṅdə̄la paran kunaṅ vənaṅ akona pituhun ika yan lumampaha solahnyêriṅanâpa tan vuruṅa luhnya patulaka nikā yadin kədə̄n ṅhiṅ gānya nya lumampaha n hana gərəh maṅarahakəna kāla* niṅ rəməṅ ndan yan ramya nikaṅ səḍəṅ rara kapiṅ rva niṅ arabi rəsəp tvas iṅ mulat kas-kas pādapa kāṅinan kas i təṅahnya kinayuh aṅəlih vavaṅ tumūt mvaṅ tvasnyâṅasanâṅrəṅə̄ patər adan məkara hinudanan karāsikan kady amrəm kalavan puḍak ṅvaṅ aṅisapvakən arisi kanin ragət-ragət yadyan rovaṅa niṅ lumampah anukū sapara-paran iṅ aṅrarah musuh śodhâta pva hayunya nora kakuraṅnya mata vaja nikā* paḍânulus mambə̄ vīra raras-rarasnya təkap iṅ hañaṅ aṅiriṅ akālihan tapih pantəs-pantəs anuṅgaṅêṅ śakaṭa pamrəgakəna kahaləpnya riṅ hənu aśrī raśmi nikaṅ rarā tuha kapiṅ tiga niṅ arabi mon kapiṅ pata prāyâsih vilaja n kinolakən anaṅgap i vaja nika yan vineh səpah dūrâṅrəṅvana yan kisapvakəna riṅ śayana pisaniṅūn apaṅgila eṅgal vanva visik pisan kadi sadoṣa ginupi tumuluy kataṅgama yogya n* rovaṅa niṅ licin vanavasânusupa ri pasamūha niṅ səkar kuṇḍaṅ-kuṇḍaṅa niṅ mahas-mahas atīrtha riṅ acala mahārakā gaḍuṅ līlânaṇḍaṅa valkalâjar-ajarânalavaha javuh iṅ labuh kapat śrī rājādayitā pi yogya ṅaranya n adulur anusup lavan ratu nāhan de nira nātha* mojar apadudvan ulah-ulah ira n paḍâlulut buddhi śrī naranāthaputra milu rañca ri vulat ira riṅ nr̥pātmajā mūrchâpan vahu-vahv anon rakət aṅiṇḍarat anəmu ṭikā təkâlulut paṅ niṅ kūṅ asəvə̄ vilāpa kakavin tinama-tama nirê daləm hati rakryan ṅke kahananku māsku mapa hetu niṅ asəmu vival salah vulat ahyun suṅsuṅən i ṅhulun karika māsku karaṇa niṅ arəṅva pet ulah om om hayva miṅe nihan ṅhulun amaṅkvakəna ri kita milv aḍampana taṅgap māsku səpahku sampun amirah ruməsəpakəna rāga ni ṅhulun dyah saṅ sāgara katruhan luh apasir panəpi saṅ ahənī-hənī pupur muṅgv î jro hati kuṅta māsku kapana n rvaba sumapatanê kuṅ i ṅhulun ambək ni ṅhulun amrih aṅlayari tan vədi kajahata kombakan halis svargâku n karəmêṅ təṅahta sukha kaprəma kapaguta riṅ karaṅ susu rakryan saṅ madhu niṅ kaḍatvan ulih iṅ hyaṅ amituruni sāri niṅ səkar lvir tavvan pakatonan iṅ kaka-kakâṅrubuṅ ahayu paḍâṅisis vətis de niṅ hyunku tumon manista n agəlaṅ gupura* maṇi duvəg pakolihən ndak lampū pətəṅ iṅ mulat sakahananta ri daləm ibu rohən i ṅhulun

ndah nāhan liṅ narendrātmaja ri hati nirâpan sira bhrāntacitta rakryan putrī marê śrī Magadhapati pənuh vvaṅ manonton marê jro avrəg de saṅ Sunandā kadi lanaṅ aṅusī sāhasânəmbuṅ iṅ hvī ramyâvelā katon riṅ vəkasan aṅililan śrī suputrī tinonton

mojar śrΔ Magadhādhipê nr̥pasutā nihan ibu marəkâkisapvana socaṅkv îbu lavan matanta sakadaṅ paḍa-paḍa dadi niṅ gula drava atyantêbu hayunta tan patatalan tuhu-tuhu n avatāra niṅ Ratih heman māsku yatan papaṅgiha lavan ṅhulun apan avatāra niṅ Smara vruh ku n tan hana sanmatanta hana duṣṭa marəki ri kitâmadohakən tonton denta matanta məṅgəp amanis dumadak arəṅu yan tumon ṅhulun paṅron vimba nikuṅ halista n abənər kuṭila milu ri tuṅtuṅ iṅ hiḍəp tan saṅkêṅ hana doṣa kimburu manahta təka vival apeda ri ṅhulun rakryan janma ni janma ni ṅhulun adadyana ratu tumutêṅ svayambara ndan rakryan ta muvah svayambarakənâmiliha ratu ri madhya niṅ sabhā denya n tan kinasanmatanta palalun sinalahasa ri tan sih iṅ Vidhi ramya ṅvaṅ pinagantakən tulusa tan tulusa tuvi yayâpuput raras nāhan de Magadheśvarâṅucap arūm amalar i sahura nrəpātmajā śrī devîndumatī tan eṅəh apa tan hana manah ira keṅərê sira marma śrī naranātha mantən aṅucap təhər amaḍəm* ikaṅ smarê hati vruh ri vyartha ni kuṅ nirê nr̥pasutā n kadi viphala niṅ ahyun iṅ tulis

ndah mojar saṅ Sunandā ri narapatisutā liṅnya tiṅhal tuhanku nāhan ta śrī mahārāja Magadhapati saṅ yogya petən sivinta yadyastun siddha rakryan sasisihana huləs dlāha lāvan narendra sakveh niṅ strī hanê jro nagara niyata tan sāha saṅkê padanta

sugyan tan vruha māsku yan śrī Magadheśvara sira maṅaran Parantapa sampun śīrṇa musuh nirâvrəg i kaḍatvan ika* mati ri madhya niṅ raṇa aṅhiṅ pat lima śeṣa niṅ karahatan paḍa kavəkas anūt marê sira saṅkṣepanya yathārta* māsku sira yan prakaśita maṅaran Parantapa yan riṅ vīrya lavan guṇa syapa sirâṅləvihana sira yan paḍa prabhu vah* riṅ mās maṇik uttama ndya ṅ adagaṅ luməvihana sira n dhaneśvara sampun pūrṇa kadānaśūran ira kaprakaśita təka riṅ purāntara ṅhiṅ putrī kakuraṅ ni ghāra nira hetu niṅ aṅadu ri māskv aṅədvakən vvantən* deśa ləṅəṅ ri Puṣpapura bhūmi nr̥pati pasamūhan iṅ kavi luh niṅ strī kəna rāga rakva talaganya pinarigi ri layvan iṅ gəluṅ sambatnya n panaṅis ya tâṅdadi madhubrata hana dadi cātakêṅ tavaṅ mambə̄ rūm ni mukhanya sampun atəmah kumuda məkar i tambvaṅ iṅ vulan ṅkā tênduṅ parananta māməṅ-aməṅ an huvus atəmu lavan nareśvara bhuktin sih nira denta ramya niṅ atuntunan adulur akālihan payuṅ yêkā vīrya ṅaranya riṅ kadi kitâhayu pinuji yan amrih iṅ priya ramyâṅarvana ḍampa riṅ para-paran sipi vanəh iṅ akālihan tilam

nāhan liṅ saṅ Sunandâmanis araras arūm de nikâkon atəmva sampun kājar pratāpa nrəpati lavan ikaṅ vīrya sampun tiniṅkah ndātan mlecchā* suputrī n inucapan aṅucap len sakê saṅ narendra mogâsuṅsut məne n ahyuna kinədə-kədə̄ kevalâdoh riṅ ambək

śrī devîndumatī katon səmu ni buddhi nira n alalisê nareśvara āpan* tan hana raśmi-raśmi ni vulat nira pinarəkakən* vavaṅ miṅe yêkā hetu nira n kinon aṅalihâmvita rumuhun anəmbahê sira mambət madhya nirâṅgaluṅgaṅ i panəmbah ira kadi panəmbah iṅ tulis ry aṅkat śrī nr̥paputrikā śrī Magadheśvara kavəlas-arəp kamānuṣan mary âteja səpah nirâsəpa sigit-sigitan ira tibâkusêṅ ləmah tan śobhâkilayū vulat nira səkar nira maṅavay-ave hanêṅ kapə̄ tr̥ṣṇā kūṅ ira tan katolih inatīta nəhər inilagan yayan tumūt

śrī devîndumatī lumampah aṅəlih prāptê saṅ Aṅgādhipa ndātan vany asabhâhaliṅ-haliṅan iṅ ceṭī paḍâkveh marək tan sah dyah Jayavaspa lot linihaṅan bāhunya karvâviḍaṅ āpan kāsih irâlavas tuvin arūm tan sor dahat riṅ hayu

agyā ṅ buddhi saṅ Aṅganātha ri ḍatəṅ nr̥pavaraduhitā marê sira mojar tan panahânəkākən i lulut-lulut ira ri nareśvarātmajā ṅke rakryan mapa hetu niṅ kadi vival mulat ariris apakṣa maṅsula hāh vāliṅku təkâkisapvana kita n təka dumadak adoh təka ṅ tamuy antənku n tuna kapva sihta vinaliṅku tumuta saparanku tan saha māskv induṅ ndi vəkas ni kuṅta palakuṅkva hurupən i lara prih i ṅhulun rāganta mvaṅ unəṅku denya n ahurup tali paṅuvata kiṅkiṅ i ṅhulun vet niṅ tan hana sanmatanta palarəṅkva karika karaṇanta tan sahur dyah saṅ harṣa piniṇḍa ratnavanitâṅaraṅa karaṇa niṅ lanā lulut saṅ kiṅkiṅ ginave rarâhayu sujanma karaṇa niṅ akuṅ tumon kita saṅ rāgānala maṅdadi vvaṅ amanas-manasi hati kita n kinonəṅan saṅ rəs maṅdadi janma rājaduhitâmuhara vədi niṅ ahyunê kita nāhan de nira mojar aṅrəsi hatîniṅət-iṅət apa tan kinahyunan heman vīrya nira mvaṅ uttama ni kaprabhun ira suyaśâdbhutêṅ jagat riṅ rūpâsəmu rūpa niṅ Smara savarga lavan asana riṅ labuh kapat tan kevə̄* viphalaprayāsa hana tan pinakadi kadi kambaṅ iṅ caru

mantən śrī naranātha mojar irikā ta dyah Sunandâṅucap liṅnya dyahku harəp kita vruha ri pāvak niṅ gərəh niṅ kapat nāhan māsku saṅ Aṅganātha pahavās gəntər madadyan ratu yogyâtəmva lavan kitā kita təmah niṅ cātakâmet javuh ṅkānê rājya saṅ Aṅganātha vəkas iṅ ramyê huvus niṅ laga ry antuk saṅ prabhu maṅlurug saha bala lvir vah sakêṅ parvata gəntər niṅ grit ikaṅ rathânəmahakən kuṅ ni vvaṅ iṅ kārttika luh niṅ strī kahañaṅ ri līna ni ratunyâṅde paḍət niṅ ləbū ndan heman tuna rājalakṣmi satəvəknya n rājya nirdevatī hetu śrī naranātha tan sthiti pijər luṅhā madevāśraya de niṅ hyūn ira* n aṅhyaṅa ṅ nagara mogha n kevəhan tan hana ṅhiṅ rakryan pakarājalakṣmi nira marma de nirâṅundaṅa rakryan yan hana sanmatanta ri sirânambāna kiṅkiṅ nira ndak pinta nya səkar tajinta pamahugya mvaṅ sərəh riṅ kajaṅ taṅgap denta məne səpah nira katon heman yatan suṅsuṅən nya ṅ siṅhāsana karvananta pakisapvan māskv i paṅkvan haji nāhan denya n aṅədvakən nr̥pasutâhyun vaspadê saṅ prabhu mogâcūm ararəm vulat nira sinuṅsuṅ riṅ vulat lə̄r* miṅe ndan dūrâhyuna kevalâvədi kumə̄l ambək nirâṅdoh arəs yan tiṅhal kadi tiṅhal iṅ mulat iṅ arcâṅher iṅ uṅgvan bhaya mālih śrîndumatī riniṅriṅ inarih de saṅ Sunandâmava āśābhūta saṅ Aṅganātha ri layad* devī nəhər tan valuy de niṅ bhrānta nirâṅikət rasa palambaṅ paṅlipur luh pinə̄m ṅkānê vatvan ikaṅ salə̄ panulisan marmā rasanyâmanis rakryan saṅ maliṅ iṅ matâmatik i rūpaṅkv âṅəḍap yan vulat kālap denta manahku məṅgəp amanis rūpanta duṣṭêṅ hati mukṣa tvaskv i səḍəṅta mūr syapa ta len saṅkê kitâṅambila eman māsku tuhan-tuhan maliṅ atimpuh duryaśakṣatriya rakryan hayva kita pramāda ri surup niṅ lek məne riṅ vəṅi prāptâmora kakanta hayva kita tan yatnā ry avaktêṅ jinəm sāk niṅ ken avanaṅkva mañjiṅ i parāhasyanta riṅ pamrəman maṅgā matya matâku pə̄kana kukuṅku n paṅguhā riṅ pupū

nahan rasa ni de nirâhyun amaliṅ-maliṅana ri raras suputrikā agə̄ṅ sukha nira n tibā manah i saṅ katuduh arusita pva riṅ manah ri kāpusan ikaṅ smarâpunagi yan valuyana sira de nr̥pātmajā lumakva mapasaṅ-pasaṅ vuyaha yan mulih iriṅ-iriṅən marê daləm atīta sira saṅ narendra maṅaraṅ tucapa sira narendrakanyakā sinuṇḍaṅ inamər kininkin aṅəlih rasa tumayuṅa kabvatan raras tuvin manah ira n prapañca kumətər hati nira mulat iṅ vvaṅ iṅ sabhā baṅun lumaku ri vvat evəh aləyə̄ maṅamər-amər i de nira n laku saharṣa saṅ Avantinātha ri ḍatəṅ saṅ ahayu pinakahyaṅ iṅ sabhā hanan pasiḍakəp hanan pasidəhâṅurah-arih ulah iṅ girahyasən vah iṅ kapitu tan pahī vətu ni rāga nira ri naranāthaputrikā pənuh maṅarape təkêṅ kaka-kakânvam atuha sinarambahan lulut i maṅkana ni de nira n karakətan turida sinaput iṅ manobhava tan enak aṅinaṅ tan enak aṅucap humənəṅ apəga ta n sayâvənəs savet i* pamanas nikaṅ madanabahni ri hati nira maṅkin aṅlare ya kāraṇa nirâṅucap tan aviraṅ suməgə-səgəh i saṅ nr̥pātmajā

rakryan bhāgya kita n ḍatəṅ nihan aluṅguha yayi ri kisapvan i ṅhulun mās lāvan maṇik uttamârja humaḍaṅ pakəna nika panumbasê kita yadyan kaprabhun i ṅhulun suṅakənaṅkva ri kita yayi yan kitâharəp yan praṅ yan kakavin panəkva ni kakanta ri kita yayi yann apaṅgiha yan riṅ kārttikamāsa ramya masa ni ṅhulun aməṅ-aməṅ iṅ pasir vukir kuṇḍaṅ-kuṇḍaṅən i ṅhulun kita mulat-mulata ri kakavinku riṅ yaśa yan māsâsujimāsa ramya masa ni ṅhulun amənəm i rājya niṅ musuh kuṇḍaṅ-kuṇḍaṅa ni ṅhulun kita mulat-mulata ri kavaninku riṅ raṇa

nāhan de naranātha mojar araras mambə̄ laṅə̄ niṅ jinəm siṅgih yan pracacah karas vaśa ri tuṅtuṅ niṅ tanah riṅ kapə̄ siṅ soṅkab ni tutuk nirâvətu laṅə̄ kāmīrasâpet manis pə̄h niṅ harṣa pinə̄m atūt guru-laghunyârjâṅənoh lambaṅa saṅ katvaṅ niṅ avarṇa campaka tumiṅhal sakṣaṇê saṅ prabhu ceṣṭākāra nirênarih vinulatan de saṅ Sunandâtaña māskv induṅ mapa buddhi rakryan i narendra n svāmya rakryan sira yogyâpan kadi mūla tuṅgal apasah maṅke n təmah mānuṣa

yadin kitâtəmva lavan narendra ry Avantideśâtiśayêṅ subhikṣa vvaṅ uttama vvaṅnya kavîṅgitajña pacaṅkramānanta pasir vukirnya gunuṅ Mahākāla ṅaranya ramya kapunpunan de saṅ Avantinātha i pārśva-pārśvanya patīrtha-tīrthan pənuh dvijarṣy âjar-ajar tan imbā sabhā bhaṭārêśvara nityakāla śivāmbha sakveh ni bañunya śuddha kuləm pva saṅ hyaṅ tuvi kr̥ṣṇapakṣa yayâpaḍaṅ de nikaṅ ardhacandra paran tatan ramya nikā parāna pamenanê kāla nikaṅ basanta ikaṅ larâgə̄ṅ mala niṅ śarīra avās hilaṅ māry aṅaveśa denya

tāman saṅ nātha tan popama haləp ika sampun prakāśâdvitīya piṅgir niṅ lvah srəp ātis ny aṅin ika humaras gandha niṅ paṅkaja mrik sākṣāt svargātmakâpan sahana-hana nikaṅ kəmbaṅ aṅjrah paḍârūm heman yan lena saṅkê kita śaraṇa ni kādevatanya n pinūjā nāhan de saṅ Sunandâmirəsəpakən i saṅ yogya karmā sudevī ndān ambək śrī suputrī miṅay atiməs adoh tan hana ṅ rāga mātra sampun vruh saṅ Sunandā karaṇa nika n akon muṅsirê saṅ Pratīpa asrət lampah nirâlon laku-laku jaladânūtakən mārutâlon ndan saṅ kāry âṅaraṅ sis kavəlas-arəp irâmeri luh tan tinolih baryan tiṅhal ri devī sira rasa pəjahâpan rəmək tvas nira syuh limbe-limbe sudevī kadi maṅavay akon milva ri śrī narendra vet niṅ bhrāntâṅikət bhāṣa ri saruṅan ikaṅ patrəm aṅrəs rasanya

ṅhulun yaśana rāga māsku pakadharman ənahana raras niṅ aṅrəṅih hayunta makavāṇḍiranya ya paṅə̄bana para-paranaṅkva yan rimaṅ prasənta ri daləm jinəm titisananta luh i lukar i kenta riṅ tilam susunta pakasādhananta kalavan pipi katiga təṅah maran ləpas

nāhan de śrī narendrânəmahakən i lulut kuṅ nirâvak vilāpa yêkī tan sah ri paṅkvan vinaca tiniliṅan koṅ rinəṅvan vinasvās adrəs luh śrī narendrâṅrasani rasa nikâpan katuhvan rasanya yogyâṅantyêṅ mahantən vacan iṅ alaradan kālapan ratnakanyā rakryan putrī huvus mālih asəmu paṅalih niṅ səkar sālas aṅjrah kveh niṅ guṇḍik nira mvaṅ kaka-kaka rumarâṅasturi mrik vaṅinya lagy âtaṅkis humuṅ hambuluṅan i tali* kenyânamar* ṣaṭpada strī harṣâmbək saṅ Pratīpâmapag iṅ ujar arūm tustus iṅ laṅva-laṅvan

ibu t asy-asih kita kadaṅ-kadaṅa ri səḍəṅ i ṅhulun rimaṅ kita yogya mitra kulabandhv amarasana ri rāga ni ṅhulun pakavarga ni ṅhulun i paṅkvan asisihana raśmi niṅ prəman arənah manahkv aṅaku sānak iri kita patəmvan iṅ jaja pakənaṅkva yan marək i māskv amibikana laṭinta riṅ vaja lumut iṅ payodhara huvus kakiṅan usapanaṅkva riṅ jaja iruṅ i ṅhulun panutulaṅkva luh i pipi ri pamrih iṅ sipat lukar iṅ tapih salinanaṅkva karatala məne n pamaṅkvakən

ndah yêki n liṅ narendrârasa mijila sakêṅ bhāṣa lāvan palambaṅ sotan ta ṅ sāri niṅ rāga piturun i laṅə̄ niṅ kavi bhrāntacitta tan paṅgintir manis niṅ təbu savukir apan tan patuṅtuṅ manisnya marmânyuh prāṇa rūmnyâsəmu paṅucapan iṅ vahv amaṅkv âṅdudut ken rakryan putrī mulat riṅ nr̥pati kadi vulat niṅ ṭikā riṅ vilāpa mojar ta dyah Sunandā vvaya ta sira sivin śakty asaṅjñā Pratīpa sākṣāt svargânurun rūpa ni nagara nira ry Ânupa khyāti riṅ rāt kumbaṅ kəmbaṅ papaṅgihta* kadi patəmu niṅ kārttika mvaṅ basanta

saṅ Arjuna Sahasrabāhu riṅ usāna sira sinivi śakti nītimān prakāśa sira saṅ Daśānana musuh nira huvus ayaśâmatī musuh tathāpi kaparājayêṅ raṇa huvus hinuripan alavas pinañjara hana pva sira saṅ Pratīpa sira rakva vəka nira suśīla digjaya paran pva vəkas uṅsirənta paḍa vastu kita vəka niṅ uttamaprabhu para prabhu kapan paḍâsira lavan sira təvas amilət-milət vulat ameta kita len muvah təvas aṅel midər ibu kapana n pamaṅgiha mataṅnya sira səṅgahənta kaka yogya sira manuvalêṅ ujar* yayi

yadin siddhā rakryan sasisihana rūm niṅ silih asih avās rakryan glānâhuyaṅ apupul i jro* pakasutan hana lvah ramyâlvā prakaśita si Revā ṅaran ika kitâdyusa ṅkānêsuh-isuhana lāvan saṅ ahulun raras niṅ karva svāmi paran ika rakvâṅləvihana marā riṅ tāman tan hana marəka līlā ṅvaṅ aṅənəs yadin madyūsêṅ lvah talaga vulakan śūnya kasənət vənaṅ sāmbək niṅ svāmi tariman apan tan hana mulat kalīṅanyâlah māsku marəka nihan dak parəkakən paran marmantâsuṅsut arəṅu miṅe tan pamituhu paṅantî paṅkvan saṅ prabhu hila-hila ṅ duhkha sivuhən apan māskv âpet-pet hayu pahayu buddhinta ri sira

nāhan liṅ saṅ Sunandâmirəsəpakən i tiṅkah narārya Pratīpa pathya vruh sopapattîṅgita nikaṅ ucap akrəp kəna prih narendra yâṅde tan saṅśayê tvas nira ri ḍatəṅa rakryan suputrî kisapvan kady aṅhyaṅ motusan vallabha mamagəhakən tan vuruṅ niṅ svakārya rakryan putrī miṅe tan vavarəṅəh apa tan tr̥pti rakvê narendra saṅ nātha vruh sira n tan kinaharəpan ikaṅ buddhi maṅkin prapañca āśābhūtânulis ketaka rasa kakavin pə̄h nikaṅ rāga tībra tambā niṅ keraṅan tan vinadal* i liḍah iṅ kāma nāhan rasanya

ibu tan paphala pva ṅ amalar i hayunta səḍəṅta rare syapa māsku kadi ṅhulun aṅurati rāga lavan turida katunan ləpihan kita kinirimakənku karaskv i kita* təka riṅ kararan pva kita mapa* tiki n sahajâpi lupa səḍəṅ iṅ pabəlah turida kinəkəsanku kitêṅ ləpihan makasādhana kuṅkv aṅiṅət-iṅət i rūmta lanā n pinalar aṅadəg pva kitêṅ puḍak araras inastvakən iṅ bhramara vinaliṅku kitâṅ liṅa puji-puji yan ratu niṅ kusuma saṅ apiṇḍa vukir ṅhulun ajar-ajarê kita muṅgva sadā tarukāṅkv i hayunta pamiṣayana rāga səḍəṅkv alulut licinêṅ śayanâkv anusupa ri huləsta sugandha miṅiṅ sipi māsku sukhaṅku katuruna ri sor i təṅahta rari

nāhan de śrī narendrâkakavina maṅani tvas nirê jro dravâṅras ndātan tiṅhal muvah riṅ nr̥pavaraduhitā kevalêraṅ tumuṅkul māry âśābhūta sampun pinəgat ira lulut kuṅ nirê śrī suputrī hetunya n tan vijil luh nira pamaḍəm irêṅ rāgabahnî daləm tvas sampun mālih sudevī kasusu laku nirâṅəñcuh-əñcuh kaṅelan ndan tiṅhal saṅ Susenâṅiriṅakən aṅamər tan vənaṅ sāh amaṇḍəṅ kady âdandan kisapvan yan alihan asilâhyūn amaṅkvê sudevī harṣâgyā-gyān* anuṅsuṅ riṅ ujar akakavin lvir katonêṅ palambaṅ

rakryan saṅ pinunagyakənku śaraṇāśraya tumuluṅa kiṅkiṅ i ṅhulun aṅlū māsku kisapvan i ṅhulun aluṅguha kita yayi hayva saṅśaya t asy-âsih kita māsihê* kavi guṇaṅku palar amaləsêṅ karāsikan lambā kaprabhun i ṅhulun kita rumaṅkəpana saphala yogya tuṅgalən maṅke n prāpta ni māsku tambay iṅ anon vvaṅ ahayu kadi devakanyakā yan riṅ śūnya katəmvananta saha bhūṣaṇa maṅənəsa tan parovaṅa byaktânəṅgaha devatī kaləmahan* ṅhulun iri kita dūra saṅśayā āpan de ni hayunta yogya kita māsku panadinakəna n pinaṅkvakən paṅkvankv îbu paranti niṅ vvaṅ anukər-nukər aṅəsah-əsah pinaṅkvakən śīrṇa syuh ləṅən i ṅhulun pinakarantunan i kuku niṅ epu tan panūt tan pamvas jaja ni ṅhulun vahu varas linavad i panəpak niṅ aṅrəṅih lagy emə̄ pipi ni ṅhulun sabha-sabhā ni vaja niṅ anulak vineh səpah

sojar saṅ nātha kady âṅalapana kasusuk niṅ kənêṅ rāgapāśa kady ânambāna kiṅkiṅ niṅ amalaku suval kevəhan kāladeśa sākṣāt sambat niṅ onəṅ kinirimakən apet-pet manis de ni kuṅnya mambə̄ rūm niṅ katurvan vinuṅu ni jarumanyânəkākən vilāpa tatkāla śrī suputrī sapavulatan aṅantî harəp saṅ Susenā tan kantun saṅ Sunandā marək ataña təhər sopacārâtalaṅkup rakryan sampun kita vruh ri narapati mapâmbəkta māsku n patəmva āpan saṅ nātha sākṣāt Madana midər amet hyaṅ Ratī riṅ kaḍatvan yadyastun māsku siddhâṅhaturakəna hayuntêṅ kisapvan narendra ṅkānêṅ Gəṅgā kitâmena mahas-ahasa riṅ nūsa śūnyê təṅahnya mvaṅ yan rakryan marêṅ Vr̥ndavana taman irânopamêṅ laṅva-laṅvan akveh bhuktinta ramyâmarəkana Yamunā lālanâkuvva-kuvva* rakryan putrī tan eṅəh sira kinədə-kədə̄ yan panivyê narendra siṅgih rakva n rarā suṇṭi masəmu ləṅa suṇṭy âkalis de nirâmbək ndan buddhi śrī Susenā kadi pulut atəguh tan lumer de nirâhyun saṅkṣepanya ndi tan siddha kapalikətana śrī suputrî narendra luṅhā lampah sudevī narapati kavəkas keraṅan tan tinolih kady agriṅ nora rakvâṅinaki laṅu-laṅun yan mulat riṅ sərəh* vvah rakryan putrī jugânuṅgayap i hati nirâtyanta riṅ priṅga viṣṭi maṅkin bhrāntâṅikət bhāṣa panalimur irê tībra niṅ rāga tikṣṇa

dyah mah luṅsuran i ṅhulun pasuṅa ni ṅhulun* iri kita māsku taṅgapən siñjaṅ-siñjaṅa rakryan iṅ paṅaraṅan ri huvus iṅ anulis* pralāpita gə̄ṅ ny âsihku ri māsku yogya suvalən ṅhulun amalaku luṅsuran tapih donyêbū pinakātmarakṣa n amərənkv abasahana təhər pamera* luh rakryan saṅ hinarəp-harəpku śaraṇāśraya mulata ri rāga ni ṅhulun tan sênuṅsir adoh manahta salavasku təka ri kita mogha tan liniṅ ṅhiṅ gānyā hana kāsihanta ḍatu-ḍatva kahulunana tan sahê kita yêkī pañjiṅanaṅkva nitya saparan ṅhulun aṅucap-ucap lavan kita nāhan bhāṣa nira n tiniṅgalakən iṅ paṅaraṅan i layat suputrikā mantən duhkha nirâsamun turida rāga ni manah ira tan tinūtakən śrī Hemāṅgada kabvatan* kuṅ i ḍatəṅ nr̥pavaraduhitā marê sira vvāgan mogha gumanty amukti lara rāga niyata sira tan kinahyunan

śrī devîndumatī ḍatəṅ sira ri saṅ sampun kaciryan smara evəh tan kahiḍəp harəp nira lavan tan hyūn irê saṅ prabhu ndān eman vəkasan katarkan i kalis ny ambək nira n tan rimaṅ aṅhiṅ piṅ rva mulat kapiṅ rva sahajâtuṅtuṅ tikəl niṅ halis sampun vaspada doh i rāga nira tan tuṅgal panononana suṅsut-suṅsut ira n kinon* marəka len tiṅhal nirâṅrəṅvani ākārêṅgita niṅ manah saha vijil niṅ śabda norâkadi ahyun kavruhana n tan ahyun* ika kaprajñān irâpet vival tan vruh śrī naranātha yan tan aharəp rakryan suputrî sira aṅgəṅgə̄ṅ kamadan tr̥ṇāṅkura* hiḍəp saṅ nātha riṅ vvaṅ kabeh hamham parcaya de ni rūpa nira təkvan śakti vānîṅ raṇa kədv âkuṅ makasoṅ larônəṅ ira yan pojar vaśâkon marā

saṅ sākṣāt Smarakanyakā saṅ anarīra ri hati saṅ amiṇḍa riṅ hiḍəp* buddhiṅkv âlal aṅantyakən siha ni māskv ahuyaṅ ajaruman pralāpita maṅke pvā təka tan vavaṅ marək avarṇa kəna guṇa miṅe kitâriris rakryan hayva kakanta māsku sinaranta kalalah ibu rāga ni ṅhulun saṇḍaṅ bhakta samotusankv apuyəṅ an layat alisuh amet rarâhayu ndātan polih aṅel aṅulvan aṅavetan aṅidəri kaḍatvan iṅ musuh maṅke pva n hana māskv arūm pakavayaṅ-vayaṅən amərən iṅ pasaṅgaman tan pātmā rasa kaprəman saśayanânəkənakəna śarīra ni ṅhulun nāhan de naranātha mojar avuyuṅ sira vəkasan adoh suputrikā śrī putrī katibān ujar haji tan eṅəh apuji sira yan tuhan-tuhan ājñālaṅghana yogya danḍan apa tan hana sahur ira pakṣa māliha simbantən haji molihâmidhi balik sira kavidhi dinaṇḍa niṅ smara

sakveh saṅ marək uttamottama vival mundur paḍâmid miṅe* aṅheman ri narendra yan sira tan antuk śrī suputrī mulat mvaṅ strī-strī paricārikā paḍa humuṅ maṅyogyanî saṅ prabhu ḍyam têkî vəkasan tuhun hana mulat yan saṅ Sunandâṅucap rakryan tiṅhalanâtpada nrəpati sākṣāt ṣaṭpadâmet səkar maṅher-her i daləm taman makapaṅanty-antyan kucup niṅ mənur maṅke n mūr aṅalih cumuṇḍuk i Vidarbhâpakṣa tan mantuka āpan marma nira n ḍatəṅ kita karəṅv an paṅjrah iṅ campaka śrī Hemāṅgada laṅva-laṅvan asana ndātan məkar kābunan saṅsāra kṣaya saṅsayâluru lume de niṅ Smarākhyâpanas heman māsku kucup ni buddhi nira yan tan sanmatan kāsihan ṅhiṅ gānya n məkara n kitâṅlavada māskv âpan gərəh niṅ kapat vvantən rājya nirê* Kaliṅga kita yogya hyaṅ-hyaṅanyâhaləp təkvan parśva nikaṅ Mahendragiri hetunya n kadîndrālaya gəntər ny ampuhan iṅ mahodadhi karəṅv âgənturan tan pəgat aṅhiṅ donya mamuṅva saṅ prabhu lavan māsku n katurvān apə̄m rakryan tan kasasar hayunta kavavê saṅ nātha Hemāṅgada āpan buddhi nirâbənər tan arusit vruh ry ambək iṅ dug rimaṅ hənvanta n marəkê kisapvan ira kevalya ṅhulun tan saha yêkī don i manəhta mājara ri mārganta n sukhâsaṅgama aṅhiṅ yogya sivinta tan patatalan trus tuñjuṅ iṅ kaprabhun prajñā vany anulus bisâṅaji dhanurvedâdhika vruh nira yan riṅ kīrty anivārya śuddha hana sor niṅ candravimbâkucəm tustus niṅ ratu śakti digjaya səkar tajy aṅkuran kṣatriya nāhan de niṅ amet* manis niṅ aṅucap mambə̄ juruh kābunan antuk niṅ maṅalap manis ni kakavin saṅ vr̥ḍdha vr̥ddhîṅ* laṅə̄ ndātan paṅgarit ardha tan rəsəp i buddhi śrī narendrātmajā luṅhā vruh tumuluy sira n kinəḍapan de saṅ Sunandâṅalih śrī Hemāṅgada kāri keraṅan akiṅkiṅ tan vənaṅ sāhasa maṅgâmora makilya-kilyana tumūtê śrī narendrātmajā saṅ hyaṅ Manmatha duṣṭa tan rva təlu pat rovaṅ nirâśâlara* yêkī hetu nirâṅikət rasa vilāpâṅras rasanyê hati

maṅko * pvântənku dentâmbək atiśaya dahat kevalâṅgə̄ṅ* kaputryan buddhintâpyak madêṅ harṣa tan akuṅ iṅ akuṅ saṅsayâpy âvalepa dentâveh rāga tan popama kadi ginave ləṅləṅâku n tumiṅhal māyā muṅgv iṅ crəmin lvirta riṅ apa vənaṅaṅkvâṅisapvê tuvuhta saṅ lvīr arcâṅaraṅ* byakta pan ulaha ni māskv i ṅhulun yan pamaṅkva saṅ lvir devî tulis tan vuruṅa kasarikâku n marê pamrəmanta saṅ lvir vve* niṅ samudrâṅaraṅakən i manahku n surud sihta māsku saṅ tuṅtuṅ ni* rvi niṅ ketaka kari kacarik tvaskv i luṅhānta maṅko

nāhan manis ni paṅikət nira rāgacihna śr̥ṅgāra rāsika pinə̄m atəmah vilāpa muṅgv î daləm hati ginūḍha raras-rarasnya pinrārthanākən ira mətva məne n papaṅgih saṅ lvir hyaṅ iṅ jalada* kāṅinan iṅ basanta ndātan panis-nisi huyaṅ ni manah niṅ onəṅ luṅhā lavan riris i buddhi nirê narendra saṅ nātha kāri tələs i drəs i luh nirâṅdyus byātīta saṅ prabhu narendrasutā vivakṣan dolāyamāna ri turuṅ ni manah nirêsi luṅhâmilih-milih i jalva nirê narendra himpər səkar midər amet bhramarê kuvuṅnya sampun ḍatəṅ sira ri sanmukha saṅ narendra śrī Pāṇḍya harṣa kadi tan rat ira n tumiṅhal runtuh ləbur manah irâsəmu rāgabahni lvir mās hanêṅ muṣa vavaṅ drava de niṅ apvī saṅ Pāṇḍya siṅhapuruṣākr̥ti rāgaśatru śrī putrikâciri vədi n para riṅ paḍə̄man sə̄h buddhi sattva naranātha paḍâvrəg avri keṇḍit manah nira lavan kuṅ irê daləm tvas sampun pətəṅ tvas ira sə̄h turidâṅaveśa aṅhiṅ hiner silih asih naranāthaputrī āpan katon mukha nirâsəmu śītaraśmi yêkī nimitta nira mojar amanva-manva

ṅke siṅhāsana māskv aluṅguha paran karaṇa niṅ aṅadəg baṅun vival rākantâlavas aṅrəṅə̄ ri hayu rakryan ika karaṇa ni ṅhulun ḍatəṅ təkvan śrī naranātha Bhoja maṅutus ḍatəṅa ri səḍəṅ* iṅ svayambara nāhan taṅ karas esi bhāṣa pahulaṅkva ri kita yayi hantusākəna vruh ku n tan paṅənoha kuṅku ri kitâpan ahayu sakadaṅ lavan Ratih tuṅgal rakva rarasta riṅ mukha lavan rəsəp i raras i māsku riṅ pupū rāgaṅkv îbu hanêṅ təṅahta kapipis lara turida kinə̄lva riṅ susu lampūn kaprəma riṅ pasaṅgaman i paṅhapit i vətis i māsku ri ṅhulun

sojar* narādhipati tan palavan manisnya maṅgiṣṭa śiṣṭa mari śiṣṭa sinorakənya lvir tan madhu ṅ madhu tinaṇḍiṅakən yayān sor lambā manis-manis ikaṅ gula tan panaṅkəp śrī putrikā sira mulat ri harəp narendra ndātan kapūhan apa tan hana paṅgaritnya mogâkalis manah irâsəmu tan panaṅgəl kady adva tiṅhal ira kevala tan papiṅrva do-doh i buddhi nira niścaya saṅ Sunandā śrī Pāṇḍya tiṅhal ira kady aṅutus maṅədva ndan saṅ kinon ira bisâṅupacāra śabda mojar tuhun pali-palin ya təkapnya mojar

nāhan śrī naranātha Pāṇḍya sira yogya paṅayatan i māsku riṅ hayu heman rūmta yatan pagəgvan i manis-manis ira n aṅisapv aṅolakən aṅhiṅ sambhava rakvaṅə̄bana huyaṅta saphala parəkənta riṅ tilam siṅ sojar haji yan rahasya rasan iṅ śayana kəmitananta cupvana yadyastun kita māsku n âməṅ-aməṅêṅ tuha rava kalavan nareśvara byaktânaṅśaya cakravāka dadi mānuṣa maṭika-ṭikan mariṅ* ḍarat mvaṅ yan karva narendra māsku mahasêṅ pasisi məgila riṅ vvaṅ iṅ pasir byaktânəṅgaha deva niṅ mithuna-rāśi mətu harəp ahimya-himyana atyantêṅ kalaṅə̄n ləyəp vinulatan patəmu ni ləṅəṅ iṅ pasir vukir ndan dūrâmaḍanê laṅə̄ ni patəmunta matəmu kalavan nareśvara yadyāpin paḍa riṅ laṅə̄ pisaniṅū kadi rarasa ni māskv asaṅgama ṅhiṅ gānyâmaḍanê rarasta raras iṅ Rati Madana n akālihan huləs

nahan ucapan ikâpet-pet manis tan pamandi kadi rəsəpa rasanyê buddhi rakryan suputrī kunaṅ apa tan ikâṅde harṣa riṅ harṣa niṅ len viphala kadi manis niṅ tvak yan iṅ madyasakta narapatitanayâṅlih tan sahur lvir tulis mās rəṅu nira paṅadeśan yan tan aṅgâmituhva kalalu laku nirâṅdoh mūr lavan saṅ Sunandā nr̥pati kavəkas ākuṅ* śīghra māvak vilāpa

rakryan saṅ kəna rāga tībra kaka* rakryan aṅuvatana hayva saṅśaya hrū saṅ hyaṅ Madanê hatinta dahutəṅkva bəbədən i taṅanku həmbana* ṅhiṅ jampyanta karāsikanku n aməkul garəgətən amijət-mijət susu romantâjumən i ṅhulun sadakanaṅkva n anəsəpi laṭinta riṅ tilam kocap māsku vicakṣaṇôṇḍahagi yogya panagara bisâmaṅun lulut ṅke ta dyah mata ni ṅhulun sipatananta pənədən* usapanta riṅ pusuh* yan kālanta pinaṅkvakən vvaya jajaṅku rari siku-sikunta yan cala kuṅta mvaṅ turidaṅku pādvakəna māsku patitisana luh maran rapət

nahan təmahan iṅ prapañca ni manah nr̥pati vahu lipur linaṅvakən hanâmbək ira mantukâmruda tuhun mavaraha rumuhun ri saṅ prabhu katon ujara niṅ mulat ri sira tan pamahayu kadi buddhi niṅ rare ya hetu nira tan vavaṅ mulih aṅantyakən i huvusa niṅ svayambara byatīta ri səḍəṅ nira n mari rimaṅ tucapa sahana niṅ vvaṅ iṅ sabhā manahnya paḍa pakṣapāta ri narendrasuta tan aharəp ri saṅ prabhu paḍâsraṅ aṅucap ry ulih* nr̥pasutā vruh i harəpa nirêri saṅ Haja alap ta vus amah nahan liṅ ikanâṅgətəm asahuran atry aṅadvakən

rāga śrī naranāthaputra masəvə̄ kadi kayu ragas iṅ labuh kapat osik buddhi nirê ḍatəṅ nr̥pasutā vinaliṅ ira təkâkisapvana agyâveha səpah sakê vaja silih suvala guyu panarka niṅ mulat bvat śr̥ṅgāra dahat panāntva nira marma rasa nika rəsəp rinəṅvakən ṅke rakryan pakisapvan onəṅ alavas ṅhulun ibu saṅ apiṇḍa nīrada saṅ saṅhub ni lulutku saṅ patər i kuṅku kilat i pətəṅ i tvas i ṅhulun saṅ rəm niṅ turidâṅalah sih apuput huyaṅ aməkasakən putək hati saṅ truh-truh ni laṅə̄ṅku mukṣa hiniḍəp kinisapu sahajâtəmah riris donkv aṅlitlita roma rakryan anapak-napaka hayu ni māsku riṅ tilam āpan tan hana len pramāṇa ri rarasta n aṅaraṅ aṅisapvakən puḍak māskv induṅ huniṅan ṅhulun ri manis iṅ mata sarasija kābunan madhu suṅsuṅ rāga təṅah purihta kalavan* pipi taḍaha ni luhta pintanən paṅkvankv îbu vətəh turuṅ pinakapaṅrəṅihan iṅ aṅəsah pinaṅkvakən tapvan kāni* ləṅənku de ni kuku niṅ hinari-hari miṅe kinolakən mvaṅ tapvan katəpak jajaṅku kalavan pipi təkap iṅ arəs kinevala ṅhiṅ rakryan karaṇanya n emva ragəta mvaṅ anuluṅa manəmbu-nəmbura

ṅke saṅ apiṇḍa nirātmaka tinəmahakən maṇi rājasutā tan hana ṅūni dəlāha kadi kita sujanma suśīla vagəd saṅ dadi janma sakêṅ taya taya kadi rakryan arūm anulus māsku śaśāṅkavimāna karika kita maṅdadi marma dahat aṅgriṅi* simbali rakryan amarasana mogha təkâṅlarani dyahku nihan tuluṅən ṅhulun uvatana kāraṇa niṅ varasa griṅ kəna rāga laraṅkv aṅinak-inaki məṅgəp atīs apanas māsku mataṅ yan akar pipi guliga təṅah palakun ri kita

nāhan de saṅ Ajâṅucap mətu raras ni kataruṇan irâṅhiḍəp smara mambə̄ turvan i paṅkvan aṅharas i paṅlavad iṅ ahayu riṅ pasaṅgaman kady aṅrəṅva rəṅih lavan paṅəsah iṅ kinisapu rasa niṅ vvaṅ aṅrəṅə̄ śrī devîndumatī pva muṣṭi niṅ akuṅ kapana sira n aṅiṣṭya mintara

ujar saṅ Aja varṇa varṣa tumibânəkarakən asanâṅrəṅə̄ gərəh aśoka ḍinəḍər* savaṅ nr̥pasutā vahu kasiram alūṅ apādapa vavaṅ səkar irânəḍəṅ bhramara tan hana vani mara kevalâtilar apan saṅ Aja rakva tan vuruṅ aṅol aṅarəkana məne n pamaṅkvakən narendratanayâvənəs mulat i rūpa saṅ Aja vavaṅ agriṅ aṅlayuṅ kasambət i manis-manis ni luṅid iṅ mata sarasija keṅgutan halis huvus vruh i manis nira n kasarik iṅ lituhayu subhagêṅ svayəmbara ya kāraṇa nirâharəp marəka paṅkun uvat-uvatanêṅ səpah sarik* savet ni pamanas nikaṅ madanabahni ri hati nira maṅkin aṅlare tinarka nira rājaputra dadi niṅ Smara saṅ Aja marêṅ svayəmbara* muvah saṅ Aja saṅsayânaha-nahā mulat i hayu narendraputrikā Ratih karika sinvayəmbarakən* iṅ Madananagara liṅ nirê hati sipat nr̥pasutā lutur kadi humer i paṅusapa nareśvarātmaja gəluṅ nira baṅun harəp suruyanê jariji nr̥patiputra yan lukar aṅrəs kadi harəp kadəmvanana de saṅ Aja mata nirâṅdadak lumuh paniṅsət i tapih nirâsəmu harəp lukarana ni taṅan* nr̥pātmaja vaja nrəpatiputra kātara rarasnya təka ta mamusuh yan iṅ laṭi alal kətə-kətəg nirêṅ jaja lumiṇḍihana jaja narendraputrikā asaṅgraha nakhâluṅid taṅan irâmirah aharəp adun lavan susu təkêruṅ ira tan pakāla kuməsut səmu-səmu niṅ asəṅhit iṅ pipi

saṅ mambaṅ Kavidoṣa tan sah i narendrasuta marək amaṅku pavvahan lāvan dyah Jayavaspa kāsih ika tan sah i pada naranāthaputrikā ndan rakvênalapan səḍəṅnya n ahañaṅ tinut ika mapasah madum tuhan təmbenya n sapatiṅhalan paḍa lumuh kavəlas-arəp aluṅluṅan taṅis saṅ mambaṅ Kavidoṣa mājar i narendratanaya nəhər aṅhəmū taṅis rakryan honya manəhta tiṅhalana pun marika makaṅaran Madhūdakā pun muṅgv î hiriṅan marək linihaṅan vagəd araras amaṅku pavvahan aṅhiṅ pun juga tan vənaṅ mulat avarṇa lara mata n aṅə̄lakən taṅis yadyastun nr̥paputrikā mara məne humaturakəna rūm nirê kita rakryan tan vənaṅ edihê sira yadin sira tuməṅəta pun Madhūdakā dūra n dhāraka riṅ lara smara manəhta pinasahakən iṅ tuhan-tuhan ṅhiṅ maty âṅaraṅê daganta bapa tan panəmu kahulunan sadā marək mvaṅ yan śrîndumatī tan aptya ri tuhanku muliha sira tan panoliha suṅsut śrī naranātha rakva ri manəhta bapa maṅulanəh turuṅ lipur byaktâṅgəgvana səmpalən bapa manəhta bapa kita tan avəlas maṅaryakən mātîṅ* māti kināladeśa kadi kambaṅ iṅ asana sinəmpal iṅ kapat nāhan liṅnya nəhər tumuṅkul anaṅis tucapa ta panaṅis Madhūdakā hāh rakryan kadi riṅ paṅipyan ahurip takari manə-manəhta tiṅhali nāhan pun Madhusūdanâmvaṅi narendrasuta marək amaṅku pavvahan kəmbəṅ-kəmbəṅ i luh nipun* marahakən sih ipun arabi tan vənaṅ mulih maṅke ry antuk ipun tumūt ri naranāthatanaya baṅun aṅhuvus-huvus tan lot ṅgānya pun aṅhiḍəp turida rāga kadi vuruṅa matya monəṅa yêkā hetu nipun təkâhañutan aṅlalu pəjahana de nareśvara aṅhiṅ luh ni manəhta kahyuna nipun rurubakəna lavan ṅrəs iṅ taṅis ājñā śrī naranātha ṅūni ḍumavuh ri para panəpi riṅ pasir vukir an pun patyana tūt tlasən* haḍaṅən iṅ havan i havan ipun marêṅ musuh maṅke n tan hana patya-patyana sadoṣa nipun i səḍəṅ iṅ svayambara pun ṅgānyêka dumeh pun ahyuna mulat-mulata juga savet ny unəṅ nipun* hāh rakryan siha rakryan iṅ manə-manəh ṅhulun ibu pituhun ṅhulun tuhan nāhan śrī naranāthaputra pakisapvan ibu ri sira hayva tâvihaṅ āpan yan tuna kūṅ i māsku ri sirâpa ta haməṅana ni ṅhulun məne tan vandhyā mati karva pun Madhu manəhta tuhan i huvus iṅ svayambara marmā de Jayavaspa mojar ataṅis təka hirəṅ i narendrakanyakā pantəs-pantəs apolahan marək atakvan i manah ira riṅ nr̥pātmajā siṅ solahnya vagəd hanan pamisusal-misusal api calâṅrəṅih-rəṅih kədv âkon marəkâkisapvana nəhər mulat arəṅu vaśâṅdələ̄ mata

sampun dyah Jayavaspa mojar irikā ta dyah Sunandâṅucap rakryan tiṅhalananta māsku saṅ Ajâtyantêṅ haləp riṅ sabhā putra śrī Raghu potrakê haji Dilīpâṅhiṅ kadaṅtâparək śuddhakṣatriya sūryavaṅśa taruṇâṅhiṅ śakti maṅke n raray vasvāsənta haləp nirâṅdaśaguṇê rūm niṅ tulis mās tatur varṇākāra nirâmarājaya ri varṇākāra niṅ campaka muṅgv î pāda nirâlavan mirah i kəmbaṅ niṅ tavā kedəkan aṅhiṅ ketaka lot pinaṅkvakən ira n lvirnya n vətistâlaris tan sāhêṅ śarapuṣpa kenaka nirâpan lvir Smarâṅiṇḍarat mvaṅ maṅgəgvana puṣpacāpa ri kiva n paṅde* raras niṅ mulat pantəs muṅgva ri citta niṅ rara sujanma n sūkṣma tan pāvaka yogyâmaṅkva ri māskv apan paḍa lavan devī Ratih riṅ hayu nāhan raśmi nikāṅ ujar təka rəsəp ri tvas narendrātmajā sampun vaspada kuṅ nirê saṅ Aja marma dyah Sunandā sukha ndan mogâṅjrum apet prahelika laṅə̄ siṅgih juga n* strī kavi denyâṅjrum rasa guyva-guyvan araras ndātan təke jro* hati

rakryan tan sasivinta māsku sira de ni karakətan irâṅurən laṅə̄ riṅ* tāman sira menduṅ-enduṅan aśoka məkar inarəkan pinaṅkvakən aṅkən māsa kapat mahas-mahas adoh sahaja majamahan karas tanah praṅ-praṅ ciṇḍaga ketakī pracacah akṣara salavas irâsih iṅ ṭikā rakryan maṅsula māsku saṅ ratu kabeh muvah ibu parananta vasvasən piṅ pat piṅ lima vaspadākəna raras nira valuyana hayva saṅśaya yadyastun sira nora kāptya ni manahta muvah uvahana ṅ svayambara ṅkā ta dyah t adulur pahur-hurakənanta sira lamakananta mantuka nāhan denya n amet prahelika laṅə̄ rasa kakavin anambyakən manis ndan simbantən adoha buddhi nira maṅkin arumah apulaṅ lavan smara tan vruh ry ambək irê narendrasuta yan sira vinarahakən marêṅ laṅə̄ tan pendah lara koluran* turida rāga nira ri saṅ Ajâvuvuh laṅə̄ ndān ambək saṅ Ajânahā sira ri buddhya narapatisutā n tan ahyuna āpan tan huniṅê haləp niṅ asəkar-taji vədi mulatêṅ ajoṅ kuniṅ tan hep-hepən anivya riṅ kadi sirâpi puji sinahuran patik haji riṅ siṅhāsana saṅ katiṅgal aṅaraṅ paḍa ləṅəṅ aṅikət pralāpita aṅlampū saṅ Ajânahən turida māry amalar i harəpā suputrikā āpan tan ratu liṅ nirêry avak ira prabhu tuvi sira tan kinahyunan enak riṅ vəkasan manah nira harəp-harəpən amənaṅêṅ svayambara molah bāhu nirê təṅən marahakən ri pamənaṅa nirêṅ svayambara ṅkā n jātismara putrikâtutur i rūpa saṅ Aja ri səḍəṅ nirâpsara riṅ svarga n pakurən lavan sira tuhun kapalaṅ-alaṅ i tan sih iṅ Vidhi maṅke pva n paḍa janma mānuṣa sirâtutur i silih asih nirâlavas vruh meraṅ kadi tan priyâpriya ri kāla nira n atəmu riṅ surālaya kāla śrîndumatī kapāśa təkap iṅ lara turida ḍinaṇḍan iṅ smara rāgâṅaṇḍəhi sāhasâmarəpəki tvas ira rasa kapatya riṅ sabhā yekā hetu nira n harəp marəka riṅ nr̥patanaya palar sirâsiha āpan yogya pakāśrayan saphala paṅgajaha maḍəmana ṅ smarānala ratnânopama candrasūryaja kaluṅ-kaluṅ ira naranāthaputrikā yêka n pavvat irê narendrasuta rāgapahula sumənə̄ marê mukha embuh teja nikā səḍəṅnya kinaluṅ-kaluṅakən ira riṅ nr̥pātmaja* lvir devī Ratih aṅhyasi Smara sira n paṅamər aṅənakən kaluṅ-kaluṅ

nr̥pātmaja mulat ry avak nira sukhâmbək ira n amənaṅ iṅ svayambara paḍâṅrahati cakṣur ādi nira molih i turida narendraputrikā təkê mukha nirâprih olih inusap hariṅət ira tumus təkê jaja ginañjar ira riṅ sərəh vaja nirâsəmu-səmu guyu sabhya riṅ sabhā para prabhu sirâlarâlah arəbut ri turida naranāthaputrikā paḍânəsəl avak nirâlaraṅ anaṇḍaṅ inucap ira duryaśaprabhu gəluṅ nira rusak mure n inalapan makuṭa nira katon paḍâkucəm tiḍəm vaja nirâsamun mari lumə̄ṅ hinilan ira sərəh məṅəs-məṅəs

hənəṅakəna narendra śrī putrī sira caritan mulih aṅalihi ḍampâvās de niṅ mulat i sira paḍa sukha paḍa harṣânəmvākən kaharəp ira patəmu nira vinasvās devī deva piniturun kaka-kaka nira mantən denyâpet vulat amanis akusikan apəgâprih yan lampah paḍa balisah silih usap i mukhâpan rūkṣa glāna hariṅətən vuvuh i hayu nikâṅhiṅ tiṅhalnyârəṅu n ahuyaṅ paḍahi paḍa guməntər muny asraṅ-sraṅan i harəp grəbəg i laku nikaṅ vvaṅ sāmānyâṅiriṅ adulur ri harəp i vuri lumrā sakveh niṅ para pajurit saha curiga karəsrəs maṅrakṣê nr̥patanaya ri təka nira maluṅguh riṅ paryaṅka maṇimaya kaka-kaka para guṇḍik muṅgv î sor paḍa humarəp* kadi talaga patīrthan sakveh niṅ marək apupul nr̥pasuta nr̥paputrī tan pendah kumuda məkar tucapa ta para taṇḍa n tan sthity âkuṭa-kaṭikan pijər aṅarahakən vvaṅ siṅ yogyâṅatər-atəra hana sira viku vr̥ddhācārī motus atavura amilihi śubhasaṅjñā mvaṅ saṅ vruh-vruh atavura səḍəṅ atavur ahosan ginyākən sira huvusa curiṅ amarəṅi ghaṇṭârūm lālitya tan asarag paḍahi niṅ atavur śabdanyâraśmi puja-pujān mahuvusan i huvus niṅ pañcabrahma kinənakən təlas ika ginuvantən śuddha ṅ mūla patavuran śarava kalaśa lāvan śrāntimrət paḍa sumaji ghaṭa kanaka vavan tīrthâtiṅkah marək atatā paḍa hana pinalaṅkan salvir niṅ saji humaḍaṅ huvus asaji pari rvaṅ saṅghârpat* saha pipisan pasikəpan ika tan sah soṅgvan mvaṅ hapit ajajar saṅ Aja sira maluṅguh ṅkāna mvaṅ nr̥paduhitā səmu ni manah irêraṅ yan tuṅkul baṅun aṅurit vidhi nr̥pati paṅajyan devī maṅdyusa ri sira nr̥patanaya lavan śrī devī śuddha manah ira ndan i huvus ira dinyus-dyus pahyas nira kuməñar kadi salaga kalahrvan məmbaṅ vāhu kajavuhan nr̥pavaraduhitâdan siñjaṅ vāhu sinalinan tapih ira katutuṅkul maṅde tuṅkula saṅ Aja dumadak amuharâśrī siṅ dodot nr̥patanaya silih asiha nirâṅhiṅ don iṅ vastra silih asih atha ri huvus irâhyas prāpta mpuṅkv aṅarahakən sira tumuluy adandan sakveh niṅ marək aṅiriṅ i lari nira cumuṇḍuk riṅ devagrəha madulur dvijavara sira masyaṅ tan sāhê hiriṅan ira huvus ajajar aluṅguh tapvan vanva silih asih sinivikaraṇa de saṅ paṇḍya brāhmaṇa matuha saṅ amava kuśapāśâṅgyākən mādəga ri sira kadi məbəda sira n tan sāhâtəmva silih asih ri səḍəṅ ira tinuntun de saṅ brāhmaṇa ri harəp kumuliliṅi bhaṭārâgni mvaṅ kāsih ira tumūt dvijavara paḍa saśrī masraṅ veda nira humuṅ abhinava kadi kumbaṅ molih kəmbaṅ iṅ asana hyaṅ Anala sukha harṣa n ton saṅ rvâṅidəri sira dilah ira paṅadeśan tan suṇḍe malad aṅadəg nr̥pavaraduhitâgyaṅ mogânolih i saṅ Aja səmu ni vulat irâjar yan piṅ sapta sira midər muvah ajajar aluṅguh kālih-kālih ira marək kətər i taṅan ira n vahv âpāṇigraha* rumaras paḍa parəṅ anibākən pūrṇāhūti* saha samit Śiva sakala bhaṭārâgni n sākṣī niṅ avivaha

huvus mamūjā ri bhaṭāra Pāvaka parəṅ sirânəmbah inastvakən jaya lavan savīja n sinivi n jayêṅ raṇa muvah pratiṣṭhênabhivāda śāśvata śinaṅkhapāṇyan sira de mahādvija muvah mahāpaṇḍita śaiva sogata maśaṅkhapāṇî* sira len mahāguru huvus vineh uttamadāna* de haji mijil suputrī kalavan nr̥pātmaja paḍâpatəmvan vulat esi manmatha harəp gumuyva nrəpaputrikâviraṅ tumuṅku-tuṅkul matukup-tukup tutuk marək vruh ī tiṅkah ikaṅ pasaṅgrahan hatəp nikaṅ ḍampa vineh sumiṅhita narendraputrâṅgənəṅî suputrikā parəṅ manuṅgaṅ vəkasan paḍâraras səkar taji śrī naranāthaputrikā tiliṅ kagiṅgaṅ kalavan tutup gəluṅ *narendraputrâmahajəṅ sakê vuri anəmvakən leśya sukhâṅharas pipi alakva-lakvan paripūrṇa riṅ haləp tabaṅ-tabaṅ ramya karəṅv avaṅsulan kiduṅ kinaṅsyan muravanya tan humuṅ lalitya tan karkaśa saṅsayâraras mr̥daṅga sampun suməneha paṅruhun hanâtəkap len sinameni riṅ kiduṅ ṇḍək-əṇḍəkan prāya ni de nikā muni ləṅəṅ karəṅv âsəmu paṅgyat iṅ javuh payuṅ putih rvarva manimbaṅî sira parəṅ lumampah tan adoh paḍâṅadəg pujut lavan jəṅgi rarâmavâhirəṅ baṅun graha rva-rva paḍâṅgayar vulan*

ri huvus ira təkêṅ paprāsan bvat suranagara sahana-hana nikaṅ vvaṅ bhakty âṅañjali ri sira pasaji ri sira hampyal dantâśrī sira n apupul kadi Surapati saṅkêṅ svarga mvaṅ Suramahiṣī tucapa haləp ikaṅ paprāsan dug sira vinaraṅ kadi humarasa vimba hyaṅ candrārka vinulatan təka riṅ alun-alun sə̄h luṅsir baṅ hinatəpakən* paḍa kadi gunuṅ āpuy* muntab de niṅ aṅin adrəs rasa bubula təṅah niṅ rājyâpan paḍa gumərəh para ratu saha gəṇḍiṅ goṅ rojeh tabə-tabəhan apituvi para taṇḍâsraṅsāṅan midər aritan* saha paḍahi guməntər lagy atry âsurak aṅavat para vidu səḍəṅ ayvan saṅ taṅkil hyaṅ acarita paḍa gumuyu kapūhan sakveh niṅ vidu binisa hana kavatək ujarnya n guyv âvarṇa macarita uḍuh uḍuh uḍuh āh āh hā hā hāh bisa dahatən sahana niṅ abañol denyâṅguyvākəna puraci aṅigəl-igəl agəṅ-gə̄ṅan koṇṭol paḍa mətətəṅ* vəlu sakəbəh* agasyak ndan mogâvədi vəkasan kaguyu-guyu kagə̄man yan prāpta ṅ vəlu sabaṭaṅ pirus amirusi* menmen denyâmet pacəh acəməh rabi nika bisa pantəs denyâbhāvaka maṅəyəh laki nika mulat aṅdrəṅ kahyun-hyūn aṅuṅas*-uṅas kadi vəḍus anut añjyan yan təṅhā təka muriṅis ikaṅ amacaṅah olih guyv aprih paḍa sinurak təkap ika nini-niny elik masvāmi vərə-vərəh paḍa bisa ṅ avayaṅ vvaṅ denyâṅguyvakən atarik pacəh ika kaki-kaky akrak ginyat mulih akusa sahana nika pinaṅguṅ tūt padv âbhinava katon paḍa gumuruh avantus sakveh niṅ guyu gumətər bari-bari kapacəh niṅ vvaṅ thāni n gumuyu kəkəl patəmu ni pasurak niṅ vvaṅ kady ampuhan apagut atali-tali kakulvan lornyârəṅgiṅan ajajar rasa ḍavuha təkapnya n lumpat-lumpat* api tibā milu-milu para raṇḍânonton dan* paḍa gigirən paḍa sinurak i lumpatnya n* kālah paḍa kavalik amənuhi nagara ṅ vvaṅ thāny akveh madulu-dulur vinijilakən ikâsiṅ saṇḍaṅ-saṇḍaṅan* ika mās vijah aməli ḍaḍaṅ saṅgiṅ calvan saha kurupuk anak ika sukha de niṅ tumpi mvaṅ gaja-gajahan hana sira viku saṅkêṅ haryāhâləpir acəpuh kasutapan ira maṅde kveh niṅ śiṣya paḍa marək tuhun ulah ira pəñcul siṅ-siṅ bhāva nira kiṭuṅ siṅ ucapan ira baṅsit yêkī śabda nira rəṅə̄n* ra tapa laki kapūhan vahv ânon nagarasabhā abhinava mulat iṅ bhogâtyantâmuhara sukha kaləvi-ləvih ikaṅ kory alvâgə̄ṅ gupura nikā nr̥pati təka salumbuṅ riṅgi ṅgānya tinivikan nahan ucapan ira vvantən têkā titir ataña paḍa karika ṅ ujar kəto mvaṅ kori hayu nipun* kalavan ujar anəṅgah kāri mvaṅ kari liṅ ikā sira sumahur agampil mruh-mruh maṅhavag aṅucap kṣamakəna bapa dentâtakvan yogya tan ahala tumañakən ikanaṅ kori mvaṅ kori paribhaṣa paḍa bapa vənaṅ aṅgon yan tuṅgal taliṅa gajah kalavan ujar adigra mvaṅ tan padriga rahayu nahan ujar ira baṅsit-baṅsit tan ya* cala nira sahana-hana nikaṅ vvaṅ thāny atvaṅ mulati sira tapa-tapa nira pəñcul vvaṅ-vvaṅ sākṣara maṅucap milu-milu ta ya baṅsit ndan tvaṅnyê sira liṅ ikā hənəṅakəna saṅ aṅdon tontonan səḍəṅ aməpəg valuyana caritan* śrī putrī mvaṅ nr̥patanaya ndan i huvus ira pinrasprās mantuk mara ri daləm gərəh ikaṅ arəbut prasprāsan maṅgyat adadakan kunaṅ ikaṅ arəbut penī-penī hana ri ruhur ulih ika paḍa mūlyâpan vastrâhayu saphala binəbədakən ikâkveh len muṅgv iṅ cəṅəl* i gulū hilaṅ i cəṅəl ikê sor mvaṅ dodot nika karəbut nda tucapa para nāthân sampun* kevvan ira kabeh paḍa mamaluyakən mās lāvan vastra pamisalin saha manis iṅ ujar ndan liśya n pavvata pahula mulih i huvus irâmvit duhkhâsəṅhit i saṅ Aja muvah ucapakəna śrī putrī mvaṅ nr̥patanaya saṅ amaraṅ i sira strī-strī vr̥ddhā pitu ṅ abuyut tuvi kadaṅ ira tan len riṅ sajñâhayu* manulus atuha-tuha tinuṅgal sakveh niṅ marək i sira

bvat Kāmeśvara ratna nīla vinaṅun gr̥ha linaraṅan iṅ huvus prabhu lvir padmâsana siṅha rūpa ni sakanya kuməñar abirū paḍâkiris kasraṅ de ni sənə̄ nikaṅ kanaka paṅhatəp apituvi sə̄h madhubrata sākṣāt rātri vinətvan iṅ vulan avā linəṅəṅakən i śabda niṅ cucur ṅkā devī vinaraṅ lavan saṅ Aja mār hati nira rumaras paḍâvənəs ry antuk saṅ mamaraṅ-maraṅ ri sira kāri sira kadi madhubratâsana maṅke pva n tuməmu ṅ prayojana ni rāga nira malavas aṅhiḍəp smara kady âṅipy aṅisapvakən vulan avâmbək ira n aṅisapu nrəpātmajā śrī devîndumatī miṅe tan anumoda ri palaku ṅ asih nr̥pātmaja heman luh nira maṅlətuh-lətuhi soca nira kadi saroja kābunan moghanya pva mayat-mayat halis irârəṅu-rəṅu kaharas vavaṅ tikəl tan pātmā kinisapvakən tvas ira tan pajajamuga rəmək sakê taṅan

ləṅləṅ niṅ lod ləyəp niṅ vukir inayu papaṅgih nirârok piniṇḍa kālaṅkyaṅ mvaṅ rərəb varṇa nira kadi liraṅ kāmukan saṅhub avrā himpər saṅ hyaṅ śaśī kəmbar apupul akəmul truh-truh iṅ kāla sandhyā devī devârdhanārīśvara patəmu nira lvir ṭikâkarva-karvan saṅ kady Ânaṅga māry âtanu mijil atəmah rājaputrâdvitīya marmâpet sih tan imbâməkul aṅamər-amər cumbu-cumbv âṅalap sor sotan ta ṅ vvaṅ riris kāṅinan apənəd arūm paṅhilaṅ rāgabahni pə̄mpə̄man rāsika lvir nira paliḍah iṅ elik miṅe riṅ kisapvan mambə̄ sub niṅ smarâṅde huyaṅ i hati nirâvarsih aprih rasanya sumyuk taṅ rāgavarṣâṅapitu makəcəhan lagy avantə̄ raras tvas atruh-truh harṣacittâmarupuhi turidâvah-vahan sanmatâgə̄ṅ tr̥ṣṇâṅumbaṅ lavan sih manis iṅ ujar arūm saṅsayâdrəs hilīnya

saṅ hyaṅ-hyaṅ ni laṅə̄ku māvak aśarīra mətu ri paṅaveśa niṅ smara lvir devī sakalânurun bəsur i ramya niṅ aməṅ-aməṅ iṅ surālaya lakṣmī niṅ nagarī turuṅ matəmahan karika kita viśāta lālana saṅ sākṣāt pratimâṅaraṅ hulun anugrahana tariman aṅharas pipi ṅūnî kāla nikaṅ svayambara mijil kita kadi vijil iṅ niśākara sakveh saṅ pininaṅ prabhāva nira sə̄h murub aṅabar-abar təkêṅ laṅit rākantânvam alək tathāpi kita harṣa tan aharəp i vīrya saṅ prabhu gə̄ṅ niṅ prihku lavan* sih iṅ hyaṅ aṅiriṅ ri ḍavuh i turidanta ri ṅhulun maṅke muṅgah apə̄m valiṅku ta kataṅgamaṅakəna pamaṅku ni ṅhulun seṅərku n dinələ̄ ndatan tinarimâṅusapi hariṅət i vvit iṅ susu dentâhyun kadi guyva-guyvan iṅ apa n rəsəpa pisaniṅū təkê hati siṅ solahku sinikvakənta tinəpak hana tinama rare pinīḍana nāhan de nr̥paputra harṣa maṅənākən ucapan amanis priyambada aṅluṅlūṅi laṅə̄ hanan pakakavin kakavin aṅarəki nrəpātmajā mogâtə̄n aṅusap jajâṅəluk-əluk ləṅən araras amaṭya-maṭyani pet-pet rāga mamanva-manva maməpər-məpər ataña ri mūlya niṅ tapih

śrîndumatī kakənan viṣa niṅ ujar arūm sumusuk ri hati ndan kadi tan huniṅā pavulatan ira mogha mahâpi hade rvā ṅ katahā n uduhən brituha vilaja hetu nirâpi tulak rāga nirâṅulanəh tuhun avədi kavəs riṅ ulah kavava marma nirâvri lanâkiput avədi kasiṅkaba siñjaṅ ira tan huniṅan tinañan lara ni vətu ni luh nira niṣkaraṇa nora vaneh paran iṅ manah apəga kumə̄l vinisik-visikan ṅhiṅ panamantara ri sru saṅ Aja viniveka nirê tvas ira sāma paran* vənaṅânulaka ri paməkulnya tan eraṅ aməl dāna paran* ta kunaṅ vənaṅ anuculanê paṅagəmnya tapih bheda paran vənaṅanya kumavaśakəna bvat i rāga nira daṇḍa jugênaka liṅ nira nəhər anəpak jaja sāhasika kāla nira n panəpak taṅan ira kadi pādapa molah alon mambət ikaṅ luṅayan kadi lurus iṅ aśoka tinūb niṅ aṅin tiṅhal irârəṅu mogha kadi sarasijê təka niṅ bhramara suṅsut irê nr̥paputra hana kadi gula drava de niṅ əbun

ai koṅ bhrānta kasop i luh niṅ aṅaraṅ kasarik i laṭi niṅ vineh səpah ləṅləṅ denta mulat pilih vinava niṅ turida sinaput iṅ hyaṅ iṅ ṭikā rūm niṅ śabda mameka sambət i gəluṅ kari kita pati jumput-jumputi dentâṅol midər iṅ təṅah kapana yan varasa kadi panumpal iṅ smara siṅgih bhrānta kakanta māsku mapa don iṅ aṅasag inaventa ləṅləṅa tvaskv aprih binəbədta riṅ tali gəluṅ cinucuk i luṅid iṅ matâluru mogâṅde vulaṅun manista rinasan tuhu-tuhu n agəlaṅ-gəlaṅ kuniṅ ṅhiṅ yan rakryan aṅastva riṅ luh uvatanya marasana ri rāga ni ṅhulun pintən māsku vuyuṅta tan hana vaneh pinalar asiha sanmatêṅ akuṅ cəp tênduṅ taha tan taṅis kaharəp i ṅhulun aṅisapu jə̄ṅta sevaka luhtâdrəs humilī pasuṅta karikā taham ibu tan ikā prayojana aṅhiṅ prārthana mogha siddha katəkana silih usapa luh lavan kita intar hayva marək paran karika donta paran iku kinārya niṅ marək tan sih rāga nimitta niṅ taṅis adoh tiki kakənana kapriyambadan lāvan tan sukha hetu niṅ luh aṅasapta ri mata tuvi tan gave-gave luh-luh duhkha luh i ṅhulun taṅi-taṅis prihati karaṇa niṅ lanânaṅis nāhan de nr̥paputrikânulak i sāhasa saṅ Aja saranta riṅ prəman tan paṅde vədi riṅ kədə̄ marək aṅol nəhər aṅarəki de nirâṅucap maṅkin harṣa rinəṅvan aṅlalu kasuṅsutana saṅ Aja saṅsayâvavuh* śrī putrī sira kāpəsan ri panulak nira jaja vəkasan sirânaṅis

adava n panukər saṅ ahayu kadi tuhva nəhər miṅaya anaṅis kadi tan patəmahana lulut pva ri suṅsut ira aṅəsah kadi tan silih asiha məne ri huvus niṅ ulah anulak ri səpah nr̥pasuta kadi tan pamalakva hələm atukup taliṅâvədi katəkana rūm niṅ ujar kinire susu tan vinəḍar-vəḍar avədi kakukva ragət*-ragəta akəmul-kəmul epu ri pəpəsa ni madhya nira n pinəkul asaput mukha kady avədi hilaṅa rūm nira kārəkana nr̥paputra mamaṭyakən i manis ira n gula rāga rinok ratus iṅ madhuparka sira guliga niṅ lara harṣa pinə̄m rinəbut pinakesi ni mata niṅ akuṅ ri daləm nagara papa de nira tan paṅaraṅakəna tan panibākəna luh ləṅəṅ iṅ madhumāsakusuma pinakasvaśarīra nira paḍaṅ iṅ vulan aṅrahinakən alaṅə̄ pinakāmbək ira luməkas pva sirâṅhari-hari* kadi kārttika raśmi nira mətu kady asirat-sirata maṇik ujar nira marma dahat

māskv induṅ mapa ramya niṅ vulatanêṅ mata mamanis tan pavora luh tan paṅrəṅva rəṅih lavan paṅəsah iṅ kinisapu manukər təkê hati mvaṅ tan paṅgilana n paṅol sahurana n paṅucap ubhayanâṅharas pipi byakta n mūra lavan śavaṅkv ibu yadin kita mulata manuṅsuṅêṅ guyu ndin vanyâku təkâṅisapvakəna māsku pinaṅəmulakən təpak jaja epu ṅvaṅ mapa tekiṅ enaka baśâṅarəkana pinamə̄makən vaja rəskv induṅ tuməkākənâmbək i hayunta pinaṅagəmakən nakhâluṅid ṅəs-ṅə̄sən mulatêṅ matâmati-matî ri paṅayat i halista mamraṅa

nāhan vətu ni turida rāga rakryan Aja māvak ucapan amanis an sāhasa sira kahanan vəlas ri panaṅis nr̥pavaraduhitā om yan humənəṅa sakarəṅ maṅantyakəna rāga nira saṅ anukər saṅ hyaṅ Smara ri manah irâṅalah pisaniṅūn vənaṅa pihərana saṅ śrī niṅ ahayu sakaḍatvan osah aṅəlih kavarəgan anukər vahv âlupa taṅan ira riṅ tapih tur ira karva lumay akilusū mvaṅ puṇḍutan ira tumibā lukar tali-talinya paḍa tan inivə̄ aṅlampv anaṅis aṅəsəsan paṅevala narendrasuta tinarima ambək saṅ Aja sukha girahyasən marək añaṅkiraṅi tan inapa riṅ svapna hiḍəp ira ri tan kavādhan i paṅol nira n inənəṅakən* oṅsil taṅan ira tumamêrikaṅ kadi manuk vahu kumapu-kapu mūrchā tvas ira kava-kavân anon kadi tanah suməlap i taliṅa

utpāta nrəpaputra riṅ śayana mogha təka ri papupul nirêṅ jinəm liṇḍū gumrit ikaṅ palaṅka kumətug pakətəb iṅ aṅəsah pinaṅkvakən olah lvir bubula ṅ tilam pakədal iṅ vətis amijilakən larap-larap* vintaṅ sūrya śaśaṅka nāga kagivaṅ-givaṅ i kəlab ikaṅ laṅit-laṅit guntur luh mahavan ri lambuṅ iṅ iruṅ tuməḍun amalapar marê kapə̄ kasrəg katrag ikaṅ payodhara lanâpipit alara kavantus iṅ jaja lambe śīrṇa babak laṭinya hana mātra mirah i tapak iṅ vajânəsəp miṅgut śr̥ṅga nikaṅ halis huvus aparva sana-sini tikəl mayat-mayat

śrîndumatī huvus kavava mār gupe kavənəsan məṅgah avuṅv anoliha paran tikāṅ inusapan siñjaṅ irâmirah karudhiran tinuṅkulan ira kapyuhan aṅligâsidəha heva riṅ nr̥pasuta marma narendraputra mavəlas lanâṅhari-harih liśya nirâṅgaməl susu mahâṅusap luh i jaja ken vinirū-virū lamakan iṅ paṅol* hiḍəp ira cumbu vicakṣaṇâmisiki leśya niṅ maṅarəki śrîndumatī maṅə̄ kadi tulis vineh aṅaraṅa varṇa nirâkucəm kasirəman damar mari lumə̄ṅ kram-kram i pāmbəkan saṅ Aja vahv aghāṣa tumitih hetu nira n vijil kadi tapəl turuṅ tinapihan

dumunuṅ sirêña nira kālih uva nira kapaṅgih iṅ natar muṅgv i patiga niṅ aśoka liman akəmit lavan kaka-kakâmajaṅ vulan tumuluy kataṅgamaṅ anuṅsuṅ iña nira vavaṅ mamaṅkvakən mojar uva nira marək manuluṅ ibu kə̄lakən ṅhiṅ ika de nikâṅlare* vihikan ṅhulun ri lara niṅ gati kavava tinambay iṅ priya sor ibu lara-lara niṅ kavəlad kasahasrabhāga lara niṅ matâpəpəh anulis ṭikā dinudutan puḍak ibu lara niṅ minaṅkana lvir hrəbuk aṅalilipi ṅrəs ikā aṅinaṅ sərəh ləgə paḍanya riṅ pəḍəs i kapiṅ rva niṅ gati vənaṅ rinəṅihakən ikaṅ larâhaṅan yan huvus alavas apə̄m akule alilaṅ laranya kadi mukṣa riṅ tapih tuhan i ṅhulun muliha rakryan alah ibu valuy parêṅ jinəm tolihən alal ira saṅ kavəkas mulat iṅ lavaṅ mapaga rūmta riṅ guyu araras vuvus ny uva nirâṅlipu-lipur i manah nr̥pātmajā mogha vinava nira riṅ kalaṅə̄n lara niṅ hañar kavava riṅ pasaṅgaman sira saṅ kinon maluya tan paṅucap arəṅu heva suṅkava kāṅən-aṅən ulah-ulah saṅ Aja kamatolihən tuhun arəs kapiṅrvana vəkasan hinəmbanakən iṅ kaka-kaka mara riṅ pasaṅgaman garjita saṅ Aja savet niṅ alal mətu kapriyambadan i de nirâṅucap

yak maty âku dələ̄nta māsku palalun makahavana hayunta gəgvana ūrṇā nūpura bhūṣaṇanta katəkāna təmahana ni janma ni ṅhulun mvaṅ rup chattra kaluṅ-kaluṅ saha səkar taji mijila lavan tutup gəluṅ aṅgon denta ri kāla niṅ piniḍuḍuk mapa rasa-rasa niṅ sinanmata tan hephepən abhūṣaṇâpan anukər-nukəri laku pataṅkis iṅ kale prāyâṅrup təka karṇaśūla niyatâmuhara tuna ni de niṅ aṅrəṅə̄ kaṇṭhâṅrəs təkap iṅ kaluṅ-kaluṅ ikaṅ payuṅ aṅadəg-adəg hanêṅ adoh ūrṇā vyartha lavan səkar taji tutup gəluṅ anəvasakən bvat iṅ mulat

nahan ujar ira mambə̄ rāgânūta ri saṅ Aja lukar i tapih irâsove keṅkab hinənəṅakən vahu sumahur anū de maṅke yan tinaña-tañan mari luh ira kuməmbəṅ vahv âveh maṅarəkana* nr̥patanaya kasəṅkvan rāgâmarpəki* sumaput amahavas isi niṅ ken sampun vaspada* kaharas aṅamər-amər amakpak vruh ry ambək niṅ aṅəsaha lvir anadaki kənêṅ hrū marmâṅrehi* tan asarag ri huvus ira* kapiṅrvan saṅ śrī niṅ tulis aṅaraṅ lara nira mahəli prīty âluṅluṅ hyun aṅalaya manah ira vahu tūtūt kālap de nr̥patanaya turida nira kahənti mvaṅ sih niṅ hati kapulut paṅusəṅ ira ri lambe-lambe tan təka ri hati panəpak ira huvus mūr mukṣâṅdohi taṅan ira mari marəṅu tumiṅhal tuṅtuṅ niṅ halis alaris manis i guyu nirâṅdyun vruh giṅgaṅ vahu kasiṅī patəmu nira vinasvās kady anvam yumayi-yayi saṅ ahayu sira molah maṅlah-lah kuməda-kədal saṅ Aja sira sumuṅkəm tan paṅle kumuru-kurub* paḍa kuməsək iṅ ambək tan kevrān avuda-vudā

riṅ krāban kalasā mijil sira sumaṅgraha vali nira pūrṇa tan kuraṅ sampun kevvan* irânaḍah sira pənuh sama-marək i sira vvaṅ uttama ramyâtiṅkah atūt paluṅguh ira saṅ huvus agati vineh akarvana ācārī kalavan karaṇḍan ira mukhya* pinituhu paḍa vruh iṅ krama ṅkānê sor apupul paḍâruhur iṅ ambək aruhu-ruhuran* paḍâṅalih evəh tan kavənaṅ tiniṅkah aputək saṅ amahayu makon atiṅkaha de ni kvehnya vival paḍâvyahata* buddhi nika puji-puji n pakavvaṅan siṅ sor uṅgvan ikânəsəl ri saṅ aniṅkah inucap ika tan vruh iṅ krama

vet-vet niṅ brāhmaṇâtyanta vəkas iṅ aruhur kadvijāṅśan ginə̄ṅnya vet niṅ śaivarṣy aluṅgv î nəhər apuji* kabhasmāṅkuran mūlya denya vet niṅ boddhâdvitīya n ruməja-rəja kabuddhāṅkuran kāraṇanya tan tuṅgal mārga niṅ kādyan asəmu havan iṅ muṅgah iṅ parvatāgra vvaṅ* vruh riṅ lokikācāra səḍəṅ iṅ anaḍah tan kavor-vor manahnya denyâbuddhy âmanis məṅgəp upaśama tinon mevəh olah tiniṅkah aṅdoh tan saṅgrahêṅ uṅgvan aruhur aləməh vorən iṅ tan kaśuddhi maṅgā muṅgvêṅ asor ndan yan apupul atatā sabrayârok sahāryan guṇḍik rvarvâpupul tan vənaṅ apasah adoh de ni gə̄ṅ iṅ pamitran kady âkarvan svarūpanya paḍa-paḍa silih mūla tuṅgal pinālih solah seṅərnya mogâṅinaki ri panunasnyêṅ tuhan sāri-sāri denyâniṅkah ry avaknyâṅruhuri rinuhuran ramya savyāpasavya*

paḍânaḍah akālihan sama kinon marəka sukha linavva-lavvakən savaṅ hudan atə̄b tibêṅ bañu kəcap niṅ apupul amaṅan rinəṅvakən marək sahana niṅ magoṣṭhi humənəṅ rumasa-rasani pathya niṅ rasa tuhun kasərətən jugâṅucap aminta paluṅan atəkəm jajâsəgu larih lumari tan pararyan alaris ri katahapan ika n hanâtulak surâsira-siran rasanya surasârəbu-rəbu suməḍah kinahyunan maṇik pinakajaṅga tan papəgatan kucur ika kadi pañcuran juruh kilaṅ brəm inalap ginanti kadi tīrtha madhu mamulakan sakêṅ gəḍah paḍâlap-alapan tahap sama-marək vija-vijah avərə̄ girahyasən apintiga hanan papiṅpat aṅigəl katəkan urak aganti tan bəsur ikaṅ vvaṅ atərəh manahnya kəna riṅ sayub ahaṅan agasyak iṅ sabhā putus mar atəṅə̄ para mpu bini mogha salah əluk ulah nirâḍake

strī niṅ śaiva tan eraṅ-eraṅ aṅigəl kaguyu-guyu vərə̄-vərə̄* davā tan harṣêṅ svara niṅ mr̥daṅga salukat ṅuni-ṅuni yan i gīta niṅ* vaneh hetunya n paṅiduṅ vijil niṅ ajiyah sahuli-hulih ikâṅrəṅə̄-rəṅə̄ sahtote prathamā kiduṅnya n aṅavat midəm aṅujivat ambahan tayoh ḍaṅ hadyan* tumurun gumanty aṅigəl oṅsil aṅavak akikat rumampayak ṅhiṅ kahyunya kiduṅ buvun* ya kiniduṅnya n aṅalik-alik endah iṅ sabhā ramyârūm sinəlanya gəṇḍiṅ i tutuk kaguyu-guyu ginañjar iṅ larih gih gih puṅ ri kipah ḍuraṅ dinivayūh amamati juga de nikâmbahan endah bhāva nikaṅ vaneh saha kiduṅ midər aṅilagakən vvaṅ iṅ sabhā ndan strī niṅ vidu rakva mogha kavatək savaṅ acarita de nikâṅigəl dhik hah kaśmala nāhan ambahan ikâṅgyat anudiṅi matâṅjəjək ləmah aig ləs liṅnya nəhər mulih matəlasan maṅumik-umik aṅañjalîṅ tavaṅ

samantaji tibā ṅ ḍavuh pitu mulih nr̥pasuta kalavan suputrikā parəṅ maṅadəg iṅ natar sira kabeh tumut aṅiriṅakən marê daləm paḍâmvit atatā vineh maṅinaṅârarəm upaśama sādarâṅucap dvijāṅśa madulur-dulur* maṅabhivāda para viku marək maṅañjali gumanti para vālakâmuhun anəmbah inubhaya sināntva riṅ guyu ikaṅ baṇija lot amaṅkari panambah ika kavagədanya tan hilaṅ paḍâṅucap akon ahosana marêṅ jinəm agavaya paṅhavin laras mulat saṅ Aja ri priyā nira nəhər gumuyu-guyu midəm suputrikā aliṅgih atitih pupū silih usap mukha sira ri huvus nirâdamu prahāsana narendraputra manəcək-nəcəki rahi ri kəmbaṅ iṅ havu* baṅun harəp aminta paṅkvakəna sə̄ṅ ni paṅavaśa ni sih suputrikā paṅavruhana* ken lukar kadi mahâṅiṅin-iṅin i manah nr̥pātmaja

sukhâsaṇḍiṅ-saṇḍiṅ samaṅinakanêṅ citta ginave səlaṅ māain pojar saṅ Aja mavarah ry antuka nira manah devī kagyat-gyat asəkəl ikaṅ tvas kapənətan kuməmbəṅ-kəmbəṅ luh nira mijil aṅertambaṅ asayut sənəṅ yan yogyê jə̄ṅta vavarəṅəhən luhku k anaṅis viraṅrvaṅ de niṅ tan vənaṅ apasah i śrī narapati manəh rakryan ndi n yogya kavəkasa tan tūta ri kita mataṅnya n paṅher ṅke kahuluna kənaṅkvê kita sadā paran kahyunantê haji pisaniṅūn tan katəkana tuhun buddhyantâṅhera pakatuhanən māsiha sivin yadin muṅgvêṅ siṅhāsana pakaratun yan kita harəp katon tan tr̥ṣṇā śrī nr̥pati palakun kaprabhun ira

yogya vuvusta tuhun ṅhulun aharəp aṅuṅsira vīrya guṇa ndātan adoha sakêṅ ibu parəkən apan sira māsih anak gə̄ṅ i kabhaktin iṅ aprabhu maṅipulu ri tvas akon muliha ṅhiṅ kita māsku rumaṅkəpana kahulunankv i narārya Raghu yan muliha prihavak ṅhulun ibu kita kārya ri jə̄ṅ nr̥pati tiṅhali kāsihan iṅ huvus akurən asih mara tambaṅana yan valuyâku muvah ri kita pira-piraṅ tahunən ḍatəṅa ṅhiṅ panaṅisku lavan kita linalu ri dūra nikaṅ palagan mvaṅ yan anuṅgaṅa riṅ ratha ləpasa madoha* sakêṅ nagara brāhmaṇa sogata śaiva r̥ṣi sira ta maṅgala niṅ lumaku sə̄h bala śūra kuraṅ havan* aṅiriṅ arampak aṅambah alas śūnya hiḍəpku yatan hana kita maṅisapvana* minta səpah

priya kahiḍəp ujartârūm kady âmr̥ta kasirat kunəṅ* amuhara kepvan ry ambək ni ṅhulun alavas ya tan asiha kitânaṅsārâpujya tinutakən syapa ta taṅisanaṅkva ṅhiṅ matyânaṅisi tavaṅ ya ta karaṇa niṅ asvī yan rakryan jənəka sivin ivəh iṅ anivi maṅher sih niṅ hyaṅ ya ta tinahā atilara* kita luṅhâtiṅgal vanva n alalisa ṅhiṅ anaṅisana ri śrī Bhoja mvaṅ nr̥pamahiṣī taham ibu taha rakryan marmâsih ṅhulun atuhan saphala pinakadevī tan vvaṅ len kadaṅ aparək sapati sahuripa ṅvaṅ sakvan selvan adulura kita pinakahuripku n sekaprāṇa silih asih manis i vacana rakryan sampun kagraha ri hati pinakapaṅanumānan ry ambəkta n tulus asiha sapara-parana rakryan bhaktyâkv âṅiriṅi kita yadin anadina lampūn matyâśânuku riṅ avak ṅhulun ibu vihikan yan buddhyantâvəlas-asiha ika karaṇa niṅ asvī māsku n rovaṅa muliha nr̥pati Raghu katon gyā-gyā ny ambək nira mulata niyata papagən iṅ strī sāyodhyā n kita ḍatəṅa

sampun māyu vuvus nr̥pātmaja lavan devī nira n maṅkata ṅkānê vvit niṅ aśoka rambay anaḍah prāpta ṅ madaṅgâṅhaḍəp luṅhā ṅ kāla huvus hyaṅ arka sumurup sandhyā masəṅsəṅ mirah mambə̄ kasturi niṅ paturvan araras kady âṅutus mañjiṅa ambək niṅ paḍa harṣa sampun amatəh riṅ rāga solur lulut tr̥ṣṇêṅ saṅgama tan kavarsihan apə̄m māyvan* raras riṅ prəman yan līlā mijil iṅ natar pinanasan de niṅ smarâṅras hati oṅsil* tuṅtuṅ ikaṅ halis jaruman aṅgyākən marā riṅ tilam sampun muṅgah aṅanti riṅ pasamayan saṅ hyaṅ-hyaṅ iṅ pamrəman marmâsih paḍa de nirâṅənahi rāga vruh ri tuṅgal nira arva-rvan manaḍah manis niṅ upadeśâtyanta riṅ rāsika nora ṅ saṅśaya riṅ rahasya vinəḍar kāgəm rasanyê hati saṅ raśmînayu niṅ smarâṅucap-ucap riṅ pamrəman tan bəsur sekaprāṇa sapakṣa tan vənaṅ adoh māsih sadharmâdulur prajñêṅ buddhi silih vikalpa ri rusit niṅ śabda kady âcəṅil paṅliṅganya n anak sinādhya nira masv-asvâmibhāvêṅ tilam

i sampun iṅ ulah kapintiga nikaṅ ghaṭita kavaləsan sirâturū ikaṅ huləs adoh sakê sira lanā kavadal alulunan marêṅ dagan hanan pavuṅu sakṣaṇâləh akaraṅ-hulu taṅan aharip suputrikā tapih nira huvus lukar kasarakat kahurup i basahan nr̥pātmaja huvus kalalu de nirâmrəm asuve paḍa tan umik aṅel asaṅgama ikaṅ manuk anaṅhi riṅ ḍavuh ənəm sukha muni maṅuyūyu riṅ taman cucur taḍahasih svaranya kavəlas-harəp anaṅis i paṅlvaṅ iṅ vulan ikaṅ mrak akakab munîṅ gupura lagy amuṅu ri sira riṅ ḍavuh pitu paḍâsraṅ aṅajîṅ kuləm sahana niṅ manuk anaravatâguṇêriya parañjaṅan aṅanti riṅ gagana pathya tumiru-tiru śabda niṅ pəkiṅ i sornya hana caṅkiluṅ muni laki-stry asəmu mamarahi ry anak nikā syapêka ta kunaṅ paṅajyan ika maṅhuvusakən ika yan bisâṅaji avuṅv ajajar iṅ surambyan arahup nr̥patanaya lavan suputrikā anəṅgah atis aṅharas*-harasakən* susu saṅ ahayu maṅrəṅih*-rəṅih kataṅgamaṅ aṅolakən saṅ Aja marma maṅəmuli nəhər mamaṅkvakən pupū nira kasiṅgahan huləs i polah ira kasuluhan niśākara samaṅkana ni gə̄ṅ i rāga nira kālih aṅisapu lavan mamaṅkvakən tathāpi sinamantaran manis i de nira ṅucap araras prahāsana saṅ adyah api heva-heva tuhun ambək ira tumiliṅ iṅ karāsikan nr̥pātmaja mañumbu-ñumbu mamibik tapih aharəp* i buṅkah iṅ təṅah ri luṅsur i tapih nirârukət ikaṅ luṅayan asəmu luṅgah iṅ gaḍuṅ ikaṅ gəlaṅ ataṅkis iṅ vətis apiṇḍa madhukara marâhyun iṅ puḍak payodhara lanâpipit kadi vədinya kaharasa ri tuṅtuṅ iṅ kuku ikaṅ mukha savaṅ vulan marək i vimba nira səḍəṅ ira n sapamrəman

maṅkin vr̥ddhi vijil ni rāsika nira n parvarvan iṅ pamrəman nidrâcumbana ta pva nitya ginave maṅde sukhê tvas nira sə̄r mambə̄ vaṅi niṅ səkar kadi mahā mañjiṅ mamuṅv î sira tan vruh yan rahinâpaḍaṅ paḍa mijil de niṅ hrəbuk niṅ puḍak

samantaji* mijil hyaṅ arka kadi raktakumuda suməkar sakêṅ bañu vulan mari lumə̄ṅ kagə̄ṅan ahulap sumirəp avədi tan vənaṅ mulat təkêṅ grahagaṇânusup-nusup arəs karahinana humə̄t paḍâkucəm ikaṅ vəṅi huvus paḍəm kadi hilaṅ pinəjahan ira riṅ ḍavuh vvalu* ikaṅ bhuvana kālapan vəṅi baṅun jaladhi karaṅ asat ḍasar nika katon avas ikaṅ gunuṅ kadi* timiṅgila makatihalaṅ paḍâṅjəlag urut saka satal* kuməṇḍəṅ ajajar paḍa-paḍa kadi nāga maṅlayaṅ muni ṅ jalada maṅrəguṅ sagajamīna kasatan aṅuliṅ harəp bañu

ri vvit* niṅ kayu pārijāta hana tīrthâlantaran vvad kucurnya tūsanyânalagâjajar vatu karaṅnyâgroṅ rinoṅ pañcuranya tampyak-tampyakan iṅ vərəh pamarigi lvirnya n patap de nikaṅ ryak vvainyâbhrā kadi sarvavarṇa ri səḍəṅ niṅ puṣpamāyā hanê jro ṅkā devī marahup-rahup sira yathālīlâṅuḍoḍâñavuk vvai tan sah śrī naranāthaputra maṅəmit lvir kumbaṅ aṅrakṣa kəmbaṅ vruh riṅ cāmana pītr̥tarpaṇa satiṅkah-tiṅkah iṅ tīrthayātra mādəg pūrvamukhâjajar parəṅ amūjâṅañjalî saṅ hyaṅ Arka

mantuk śīghra marê daləm humatur i śrī Bhoja riṅ pamrəman akveh strī haji sambhramê təka nirâganty âṅucap garjita marma śrī parameśvarī mulat anuṅsuṅ cumbu-cumbv âṅucap ī ī śrī maṇik i ṅhulun sira ḍatəṅ kālih nihan liṅ nira śrī devîndumatī parəṅ sira manəmbah mvaṅ narāryātmaja riṅ lampit hana siṅhacarma* humaḍaṅ kāna n pratiṣṭhârarəm saṅ nātha vruh i don ira n para vavaṅ śoka drava tvas nira amvit sādara sopacāra saṅ Ajânəmbah ri jə̄ṅ saṅ prabhu

səmbah niṅ aśaraṇa ri jə̄ṅ narendra huniṅan parək i narapati amvīta muliha satatâṅrivəg-rivəgi* tan bəsur amaribini* tan səṅgahən akalis i pāda saṅ prabhu pasaṅ kuhira pinahayu paṅgil vənaṅa dadaha riṅ raṇâṅharəpa śatrukula yan iṅ* ayun om vruh ṅhulun ika mara hetu niṅ kahənəṅan kapəgan aṅucapa māsih ṅhulun iri kita mogha tan vənaṅ asih karaṇa niṅ asəkəl* maṅke n mulat iri kita tan palekan aṅəḍap mulih analahasa vahv âpupul alal alavas təka pva kita sakṣaṇa vavaṅ apasah pintaṅkv i kita bapa sihanta tan kapalaṅâmipila riṅ agati saṅkan raray uvuh-uvuh ūpamānən iṅ ulah kasih-arəp alavas maṅke n marək iri kita sanmatan kaviguṇanya tan ucap-ucapən aṅhiṅ pakadaṅan i bapaṅku tolihən i māsku laki pakatalin nvam ny ambək ika məṅə-məṅə̄ kalotakəna denta kajugulan ikā tan vruhnya riṅ aṅinakanê mulat pipili denta pituturi piṅit saṅkṣepa nika kita vaśa pramāṇa guṇadoṣa nika vavarəṅə̄h yadyastun ivəṅ-ivəṅa riṅ hulun bapa manahnya palu-palu varah atvaṅ saṅ Aja sumahur apraṇamya rumuhun saha manis iṅ ujar ājñā nr̥pati rasa nirâvəkas-vəkas akon silih asiha sadā sampun karəgəp i hati de patik haji minuṣṭi maṅinaki hati ṅhiṅ gānya* n apasaha ri tan sih iṅ Vidhi harəp mulata riṅ alara atyanta həla-həla niṅ aṅrəṅə̄ vacana rakryan aṅinaki hati nirvighna kita bapa təkêṅ sinādhya vənaṅ uṅsirən iṅ aśaraṇa śānti dvijavara ri bapaṅku kesyana tumirva narapati Raghu svasty astu saha tanaya dāra māsku saṅ anəmva jayaphala sadā mvaṅ yan pavuvuha kita ghāra pat lima sujanma vəka-vəka ratu tan doṣa tuməkakəna sāmbək iṅ vənaṅ amukti viṣaya saphala ndan hayva sira ta bapa kāri denta pakamaṅgala niṅ anakbi yogya n kaləvihakəna tan paḍan phala nikâṅurati kahulunan təmbe ṅ śubhadivasa bapaṅku maṅkata kakanta maṅatərakəna jyotīṣa paḍa tinañan i ṅhulun viṅi ri kāla nira paḍa marək avyāhata pavarah irâpadohan atukar paḍa kamasəṅərən* saṅ lekan aṅucap apagəh tuvin binisa kāraṇa niṅ amituhu yêkī muvah ucapakənê * bapaṅku sahajâlupa kamituturən dūmən sahana-hana ni dr̥vya-dr̥vya haji devata təka-təkanən lāvan sahana-hana nikaṅ rare kavula rakryan aṅalapa muvah yadyan jənəka kita bapaṅku pālihən ikaṅ nagara kaliliran nāhan paṅucap-ucap ira lvir amrəta hañar mətu siniratakən maṅdadyakən i sukha narendraputra kalavan nr̥pavaraduhitā kesyan rasa ni manis i de nirâṅucap arūm asəmu gula siṅī bheda mvaṅ ujar amanis iṅ pralāpita namun rəcəpa rasa nikā kañcit paḍa təka madulur sirêṅ pagaḍuhan marək i narapati sakveh* ni kəmitan ika mās maṇik pirak ikā ya tinañakən* ira yêka n pamaca padadaran təlas pva ya samaṅkana vinijalakən kasrah satəṅah i* naranāthaputra kalavan nr̥pavaraduhitā nantən saməgət aniga mukhya sāra ginulaṅ-halu makəmitana mvaṅ dr̥vya pahula* naranātha sojar i narendra paḍa sinuṅakən lāvan muvah anəkakənêry Ayodhyanagarī tumuta ri saṅ Aja āpan vənaṅ akun iṅ ulah prayatna vəka sādhu vəka niṅ aniga dum-dūman ira pira kunaṅ vilaṅnya kadi tan kavənaṅa vilaṅən yadyan banava saha bahitra dūra vənaṅâmvata niyata sarat muṅgv iṅ ratha pira-pira taṅ rathêṅ nagara hənti paḍa hinibəkan vastrādi pinada-pinadāti pādadara tan vuruṅ apan adadar ndātan caritan ulah irânaḍah ri huvus iṅ vvalu* vahu ḍumavuh tan sah uva nira kalavan sirêña nira mukhya niṅ aṅiriṅakən sampun praṇata sira paḍâṅadəg mulih i* pamrəman ira ri daləm sakveh ni hulun ira kinon madandana paḍâgaravalan ataña devī sira maṅutus aniṅka-niṅkah i sadr̥vya nira pinahayu norâhala-hala kalasā tinon kinajaṅan vinalunan ahaləp akveh papiku-pikul irâpupul kavula dāsa kaliliran ira boṇḍan sajuru lavan ikaṅ pujut sajuru jəṅgi sajuru humaḍaṅ vyāpāra sahana-hana niṅ vvaṅ iṅ nagara tan hana maṅinak-inak kady âsavuṅan asipət* olah-olah adamar-damar amalaku duh ceṭī rumara-rara paḍâṅasū vija-vijah dudu taṅ amususi siṅgoh ya* humuṅ asahuran baṅun śakaṭa gumrit amuhara laṅə̄ guṇḍik kaka-kaka maviveka pahyas ikaṅ endaha tan avanəha lagy âminəkəti hayu tuṅgal əmbulana tan hana niṅ amihaṅa ṅhiṅ raṇḍi dadar ika kabeh kahayvakəna don ika pinagəhakən denyâmahayu sipat ināptyakən pinakadarśana tiniru-tiru sampun ghaṭita pitu tibā putih timur ikâvava rahina mijil ābhā ni pavuṅu naranāthaputra karəṅə̄ pilih anuculi ken devī kadi kahənəkan asriṅ ambəkan irâsahuran aṅəsəsan ākāra ni hənəṅ ira meh tigaṅ paṅinaṅâvuṅu mijil adamu devī sira pinahayu hinyasan* pinahavās kadi maluya rarā dūran vənaṅa paṅanumānanê huvus irâpriya luṅayan ira lāvan mata vaja nira tan vənaṅ pinakaliṅga ni pasavi nira ṅhiṅ mājar i huvus ira medəman susu nirê kiva kani* kakuku

sampun sirâhyas asalin hima puṣpavarṣa dodot narendrasuta rakva kilat rinəṅga āsəṅka niṅ mulat i rūpa narendraputrī putrī sakêṅ surapadânəmu rājaputra prāsāda ratnamaya muṅgv i daləm kaḍatvan ḍaṅ hyaṅ purohita sirêniriṅ iṅ pamūjā ghaṇṭâlaṅə̄ dhvani nikā saha pūja-pūjān śaṅkha lvir asyaṅ aṅuhuh* ri narendraputra sampun ḍatəṅ nr̥patiputra lavan suputrī gandhâkṣatādi humaḍaṅ kalavan nivedya mañjiṅ sirê daləm aṅarpaṇakən pamūjā amvīt i vimba haji devata bhakty anəmbah devī sirâməkul i jə̄ṅ nira saṅ hyaṅ arca arnah manah nira sadâṅaku rāma rena glānânaṅis kasih-arəp tvas ira vyamoha sambat nirâmuhara luh paməlas-harəpnya ai rāma rena kita saṅ lumah iṅ kaḍatvan ṅūni n maṇusya kita karva bapêbu liṅku maṅke dadi hyaṅ inaləmbana sārdhadeha hā hāh yayā bapa hajîbu hajîki liṅku ndā t aṅrəṅə̄ bapa hajîbu hajî taṅisku pamvitku tiṅhali sumambah i* pādukanta āḍā vəkasku mulatî kita têki maṅke rakṣan ṅhulun bapa hajîbu hajî parankun nāhan taṅis-taṅis irâlara vāhu mantən milv ânaṅis nr̥patiputra nəhər tumuṅkul lāvan hyaṅ arca pakatonan irêpu* vinvit de niṅ śivāmbha ri mukhâsəmu luh dravâdrəs sampun mijil nr̥patiputra lavan suputrī prāptê narendra mahiṣī tumuluy sirâṅliṅ kəmbəṅ ni luh nira panuṅsuṅ irê suputrī de niṅ səkəl sapaṅucap nira tan sphuṭâsrət māskv îbu hayva kita tan praṇatā subhakti i svāmi rakryan apan uttamarājaputra āsiṅ sakahyun ira tūtakənanta māsku yêkā patibrata ṅaranya pakabratanta mvaṅ hayva māsku paṅayāya karājaputryan lāvan hayunta viphala n pakapaṅhaḍanta* tan kveh ni māsta makapaṅgajahanta* māsku kakṣatriyanta manivîbu pakātmarakṣa lāvan muvah saṅ Aja hayva bapaṅkv atiṅgal i śrī narendraduhitā paḍa vastu māsku riṅ rūpa sampəlah avarṇa səkar pinālih prāṇanta tuṅgalakənanta maran tan imbā tan* ketaka ṅ puḍak adoha ri ṣaṭpadanya tan ṣaṭpada ṅ bhramara sāha sakê puḍaknya tan putrikā sarika yan taya rājaputra tan rājaputra kita yan taya rājaputrī nā liṅ narendramahiṣī n panaṅis sumuṅkəm i śrī narendraduhitā pinəkul siniṅsət akveh mulat kapitaṅis ri narendraputrī āpan vəkas nira katon ri Vidarbharājya embuh taṅis ri pataṅis-taṅisan suputrī de niṅ svavandhu nira sə̄h atuluṅ bvat iṅ* luh prāptâmalandani pirak maṇi vastu mūlya len taṅ sərəh kinajaṅan saha modakādi

śrī nr̥paputra lavan* nr̥paputrī amvit anəmbah i jə̄ṅ mahadevī mary ataṅis-taṅisan paḍa līlā śeṣa ni luh nira mātra kuməmbəṅ marma dahat paṅucap mahadevī om bapa saṅ makapunpunana ṅ* rāt sora samāpta para prabhu denta śrī Raghu māsku tirunta jayêṅ praṅ śrîndumatîbu huripku kitântən mogha katəmva sukhanta dadi strī rovaṅa rakryan Ajâsisihan* sih tuṅgalən apriya riṅ nr̥paputra sampun ira n paṅucap mahadevī śrîndumatī kalavan nr̥paputra mādəg inumbalan iṅ paricārī* maṅkat avarṇa śaśāṅka kameghan kīrṇa tikaṅ pamikul*-pikul akveh* denya lumampah arampak apaṇṭa nora jaruh vihikan ri dulurnya yogya katiṅhalanâpan atiṅkah maṅkana taṅ ratha nora kagiṇḍal mevv-ivu* lampah ikâdədər adrəs dr̥vya narendrasutā vinavanya mās maṇi len rajatādi suvastra salvir ikaṅ paḍahîṅ* nagarâsraṅ ramya təkapnya hanan sinameni len masarag makapaṅhaḍa gə̄ṅnya lvir kətug iṅ ləvu denya guməntər śrîndumatī sivuhən sira luṅhā de ni lulut nira riṅ nr̥padevī lūh ira tan pəgat adrəs avantu śrī nr̥paputra kaṅelan ameri muṅgv irikaṅ kapiṅan sira kālih ramya katonan irâpan avelā lvir kavəlad tvas ikaṅ vvaṅ aniñjo bhakti mamakpak aṅañjali māsih marma nira n mari suksəka rañca rūm saṅ Ajâṅhari-hary aṅalap sor mvaṅ Jayavaspa vicakṣaṇa tan sah māry aputək sira rakva tumon ya strī ri daləm nagarârəja pantəs mātus-atus paḍa marma rarasnya kocap anampikakən səkar aṅjrah milv aṅiriṅ ri nareśvaraputrī kādbhuta lampah iraṅ nr̥paputrī de ni haləp* para guṇḍik atiṅkah vastra nikā paḍa raṇḍi sapaṇṭa lvir kusumânəḍəṅ iṅ pratimāsa śrī naranātha tumūt saha mantrī sə̄h aṅiriṅ paḍa śūra vanîṅ praṅ mevv-ivu lakṣa sahasra kuməṇḍəṅ lvir paṅavak nikaṅ antaka sākṣāt śrī naranāthasutā sira śoka sis* kamatolihən iṅ nr̥padevī vāhu lipur tumuluy sira monaṅ* luh nira lāgi kuməmbəṅ asove sampun ira n ləpas iṅ kuṭa vetan tolih ikaṅ* nagarâsəpi tistis kayvan ikā manirâṅavay asriṅ kady aṅutus maluyê sira kālih ramya nikaṅ kahavan savah alvā maṅdadi bhasma daminya tinunvan ṣaṭpada muṅgv i səkar ni vuruṅnya lvir kavi māsih aghāra daridra ndan sadavā ni hənu nira ramya sontən ikaṅ javuh adrəs asove śīghra pucuk ni təkinya tumūvuh varṇa nikā kadi campaka siṅsal

kīrṇa katon vijil iṅ laru-laru kumukus kadi tan ləvasa harṣa sirêña nira mvaṅ uva nira rivə̄nya* katon aṅəlih mvaṅ para guṇḍik amupv avurahan arəbut paḍa buddhi rare śrîndumatī marək iṅ nr̥pasuta sukha harṣa sirâmavani hyaṅ ravi tumraṅ ikaṅ valaṅ aṅariṅ-ariṅ makamūla ṅ atis cumbv i rabinya marək nəhər aṅəpər uninya karəṅv araras strīnya kumə̄l inaras-haras anarima solah-ulah niṅ akuṅ saṅ rva mulat marən ahyun aṅalapa tumon i vilāsa nikā mogha jənək sira de ni paṅaraman ikaṅ bañu vāhu ḍatəṅ katkat alivran amet valaṅ asira-siran kalavan dadali aṅləṅəṅi tvas irêka ta karaṇa nirâsrət alon lumaku lālana lagy anəpər*-nəpəri səkar arūm kadi mitra kadaṅ lampah irâtut ayun tinutakən iṅ aṅin saha megha rəməṅ lvir makadoṣa* laṅə̄ nira sahasa manəmpal aśoka liman hinrət i kəmbaṅ ikaṅ gaḍuṅ anəḍəṅ analyani buddhi nira riṅ vəkasan dinudut ni karas ira nimitta nira n lumaku lvah laraṅan kahalintaṅan asat apirak-pirakan guməlar vah* kayu mās ri təpinya salak apupul avvah atə̄b anəḍəṅ nista nika n sugih iṅ kaləṅəṅan atəṅə̄ tuvi tan papaḍa vvatnya katiṅgal adoh anəmu maru* hənū pamənər-mənəran piṅgir ikaṅ pagagan harata hara-hara n pamuraṅ-muraṅan luñcip ikaṅ rvi kulampis i pagər ika varṇa tanah kinikir vvah ni saganya baṅun mata hañar asipat pinuyur-puyuran daṅdaṅan aṅgarit iṅ vətis aniru kuriñjəm umuṅgv i pipi sīma* kavaṅśan alas juraṅ anasarakən sinəpər*-səpəran saṅkavilanya mañaṇḍət i rusit i hənūnya lavan vadara məṅgəp arūm araras gaḍuṅ ika katəkan tuha milv amilət buddhi nikā vilut aṅduhuṅakən apituvy aḍaḍap vvaṅ agə̄ṅ

taṅeh yan ucapən kalaṅvan i hənū nira kadi navanāṭya niṅ kavi vimūrcha para guṇḍik aṅrəṅi-rəṅih para kaka-kaka śoka kaṅlihan katuhvan iṅ apa n tan apriha sukunya vahu lumaku-lakv adoh dahat sirêña nira len uvā nira paḍâkəsəl avak ira muṅgu riṅ ratha i tan vənaṅ ikā lumampah avəḍak suku binəbəd ikêṅ kajar-kajar baṅun suravadhū paḍâdarupa kady anapaka gagana n tiniṅhalan tuhun sukha manahnya riṅ vəkasan eṅgal asəmu guyu māri suṅkava ikaṅ magiliṅan kajātaka paḍâmava giliṅan inājña mamvata tigaṅ vəṅi sirâṅinəp nr̥pati mamvit i saṅ Aja lavan nr̥pātmajā i pāntaran ikaṅ vukir hiṅan irâṅatərakən i nareśvarātmajā maluy sira lavan gajâśva ratha tan hana hiḍəp ira vanya vādhakā narendratanayânaṅis nr̥patiputra salahasa tumon kamānuṣan muvah nr̥patiputra maṅkat aṅusī pakuləmana nira vvaṅ iṅ pasir karaṅ-karaṅan endah-endah alaṅə̄ hinaturakən* ikā lavan sayub paḍânrik aṅinum tvak iṅ pasisi saṅ vatək Aja karuhun nr̥pātmaja bhaṭāra Baruṇâṅalih nagara rūpa nira vahu mijil sakêṅ tasik riṅ eñjiṅ i vijil hyaṅ arka sira maṅkat adulur ahavan gunuṅ-gunuṅ huvus təka sirêrikaṅ pəkən agə̄ṅ səḍəṅ aməpəg ikaṅ vvaṅ iṅ pəkən ikaṅ baṇija saṅśayânaha-nahā ri patukara nareśvarātmaja lavan sahana saṅ vatək ratu kabeh ruməbuta ri narendraputrikā mpu rāma humatur marê saṅ Aja sādara təkap ika mojar aprəgi tuhanku bapa sugya tan vruha bapaṅku ri hana nira saṅ vatək ratu ry ulih nira sakêṅ svayəmbara* paḍâpupul amarəki deśa durgama kunaṅ bapa panarka-narka ni manəhta kadi ruməbutê suputrikā putus mara ləbā nikaṅ təgal ayun palapat alas-alas gunuṅ-gunuṅ tathāpi paḍa sə̄h kinuvvan arupək vəkasan asaləsək təkêṅ juraṅ dudū savəṅi saṅsayâvuvuh ikaṅ gaja ratha saha sañjatâsinaṅ mataṅnya bapa yatna-yatna tuhan i ṅhulun apupula hayva vismr̥ti nahan vuvus ikā nr̥pātmaja vavaṅ sumahur asəmu siṅha kātara* mpu rāma tak anāgatâkv iriya yadyan avuvuha muvah samaṅkana muvah yadin ameta daitya saha dānava pakaśaraṇanya riṅ raṇa hade Raghusutâku tak sy Aja ṅaranya yak atakuta riṅ samaṅkana samantaji ḍatəṅ hulun nr̥patiputra sahana nikaṅ aṅruhun-ruhun kanin rujit avaknya maṅhaturakən śirah apan arujit nəhər murud ya tâjar i narendraputra saha cihna rəsəp i hati de nikâṅucap* alap ta vus* amah nahan liṅ ikanaṅ vani-vani karuhun nr̥pātmaja i sampun ira muṅgah iṅ ratha tumūt nr̥pavaraduhitā hanê vuri pasaṅgha ni surak vatək Raghusutâmaji taliṅa nikaṅ vvaṅ aṅrəṅə̄ linūd i kətug iṅ gubar saha garantuṅ uni nika karəṅv aṅalv-alə̄ ikaṅ vvaṅ apəkən-pəkən gumuruh avrəg inavaran i dūta niṅ musuh

tucapa ṅ kahavan paḍa yatna vihikan ri manah para nātha sahasâṅrəbutê nr̥paputrī saṅ Aja prihən iṅ raṇamadhya juru sāmya ḍatəṅ paṅatagnya i samāṅjuru len para duhvan* paḍa sambhrama marma paḍâgya anabəh kukulan makapəṇṭok pamajânvam anaṇḍaṅ agasyak vahu-vahv akurən* paḍa māsih kamənanya lumakva* masaṇḍiṅ hana buddhi nikâmvit akārya juru tuṅgul añumbv i rabinya ibu puñcavali n pəjaha ṅvaṅ pəraṅən ri jajaṅku kitântən mila liṅ ni rabinya tan aṅgā vidu milv* aharəp tumutâpraṅ vədi-vədy aṅabuk pravalanya i hilaṅ ni galahnya salah ṅgvan tinañākən ikê pagaḍaynya saṅ ibu nya paran di galahku hana riṅ paḍaṅan ya hikā ya aṅ usən laku t āsah* iri ṅ lvah mata mah laku he pira dohe ndi vahosku paran di vahosku mbruta pet ndi pametana siṅ sī* syapa ta vruha takvanakən sī ah ah ah sy apəṅiṅ kadi vāni alupâku paran pva katiṅgal ri səḍəṅta silih galah olih kavəkas ni vətis ni lavanta si ḍulîka paṅenak uvanya atutur vəkasan sy aku maṅke pañukilku hapū mah asah ñen mapa yan guruvindakənanta paṅupah* təlu mās aḍug induṅ ndi juluk-julukuṅku dalampat hana riṅ lvah anakta si maṅdyus* a dəlit* ny anak iṅ vani riṅ praṅ baribin pa ya tan tuhu hāh ñvak ndva sərəh ndi ta polihanaṅkva* ndi pupuk ni hucu n kinaṅəṅkva mah alap* haḍug ību taluhnya ndva kamal ḍiḍikan hibu rakryan laku t aṅkat amah bəkəlanta ndva ta sī mapa liṅta malīya ndva ta sī mapa hāh hapi* tan vruh ndva ta sī si putih pisane vus ya tikā paṅucap si jarəmpu aṅadəg ya maṅundurakən vvaṅ gumadā vəsi têki galahnya pinikulnya nəhər mətu aig ləs para sāmya paḍâprəgi maṅkat muni goṅnya lavan paḍahinya saha sañjata sə̄h ri təgalnya papupulnya salakṣa sinākən təka śīghra ri jə̄ṅ nr̥paputra sira muṅgv irikaṅ ratha ratna i katon ira denya madandan humatur saha tuṅgul anəmbah* səmu harṣa sirê para sāmya kadi vanva təkap nira n aṅliṅ ubhayê panunasnya macatva paḍa maṅdaśamāsa* catunya

śīghrâdandan kinon de saṅ Aja marəka lumrā katon sañjatanya āpan prāpta ṅ musuh sāhasa varagaṅ ikā krūra tan paṅgalaṅ tvas sakveh niṅ śūra-śūra ṅ vatək Aja kumutug sə̄ṅ ikaṅ krodhabahni gut-gūtən tan panaṅgəl tr̥ṇa hiḍəp ira riṅ sañjatâkrəp lumaṅkuṅ sakveh niṅ strī makādi nrəpavaraduhitā muṅgu riṅ deśa durga mvaṅ salvir niṅ rathâmvat pahula haji lavan dr̥vya rakryan suputrī līlânon tan tinon śrī nr̥pavaraduhitā de nikaṅ kayva-kayvan təkvan salvā nikaṅ papraṅana kalihatan koṅkulan tan pavighna mojar saṅ mambaṅ iṅ śrī Raghusuta bapa hayvâta tan yatna-yatna hayvêcchâpan musuhtâṅdaśaguṇa ri vilaṅtêṅ mahāpadmasankhya lor kulvan vetan akveh tumut i paṅuliliṅ niṅ gunuṅ sə̄h lumaṅkuṅ vadvāntâṅhiṅ vijilnya n paṅayat-ayat i gə̄ṅ niṅ prabhāvanta riṅ praṅ ndā nahan śrī mahārāja Magadhapati kady ânəṅah riṅ samudra āpan sāmantarājâkəmit i sira lavan rājaputra pravīra ratnâyv-ayvan lavan mās ratha nira kuməñar katraṅan de hyaṅ arka śvetākārâhaləp chattra nira kadi haləp niṅ vulan tan kameghan parnah kulvan saṅ Aṅgādhipati kadi kilat niṅ truh iṅ kāla sandhyā de niṅ sarvāstra muṅgv î hiriṅan ira pətəṅ lvir hudan tan pamegha lāvan mātaṅga mevv-îvu kadi gunuṅ apuy de ni rəṅganya kumram aṅlīlânuṅgaṅ iṅ ratnaratha sira hanê vvit nikaṅ pārijāta nāhan taṅ bāṇa sālas kadi sinalivah iṅ campakâṅjrah səkarnya akveh vīrâṅrərəb ṅkāna saha gaja turaṅgâvakîvv-îvu lakṣa honyê vvit niṅ susantən ratha kanaka rinəṅgan maṇī hīrabajra uṅgvan śry Âvantināthâdbhuta bapa kadi digdāha niṅ kāla sandhyā ndah nāhan śrī Pratīpâṅadəg amava laras riṅ rathâṅdandani hrū akveh vadvā nirâtumpuk avuvuh i* harəp maṅrəgəp sañjatanya lvir priṅ sālas galah niṅ prajurit ira* vahosnyânamar megha məṇḍuṅ maṅde rəs niṅ tumiṅhal raṅin i bala nira n* lvir gəlap tan pavarṣa lamban* lor saṅ Susenā saha bala kadi siṅhâsigâsiṅhanāda salvir niṅ sañjatâlas nira pinakaguhā rūpa niṅ hastirəṅga vyāghrâṅjurv âpupul tiṅkah i bala nira muṅgv î harəp sāra śūra buddhinyâsiṅ musuh kevala dəmakən ikā pavvatanyê narendra nā saṅ Hemāṅgadâḍəm savatək ira kabeh riṅ kəpuh rambay akrəp tan pendah rākṣasa mvaṅ bala nira kadi daityâṅuhuh sāri-sāri solahnya n kādbhutâsañjata baḍama lavan laṇḍəsanya n pamə̄ki agyâmūkêṅ musuh sāsinəsəb ika turuṅ matya laṅgan ya* rahnya parnah vetan valū mvaṅ karamayan aṅurambat marêṅ siṅkṣapâgə̄ṅ saṅ Pāṇḍyâṅhə̄b karəsrəs kagiri-giri baṅun rāja bhūtâtirodra vadvā pekâsəmu preta hana kadi piśācâlapā rah paḍâṅhruk agyā-gyān apraṅâgyâṅrujaka hati nikaṅ śūra sampun pinə̄kan nā liṅ saṅ mambaṅ ojar saṅ Aja mijil ikaṅ buddhi kakṣatriyāṅśan siṅgih kveh niṅ musuh liṅta kadi jaladhi bahny atrigañcâṅgaluntaṅ ndātan vaṅ* mātra vədy âku dan* irika kabeh mon patambəh samāna siṅhâṅantî guhā byūha nika surupi vūk həntyakən hīnaśakti nāhan liṅ saṅ narāryātmaja kadi sinaṅa* tvas nirâsəṅhit aprih tan sah saṅ mambaṅ āpan marək añamarani mvaṅ kavi ḍaṇḍanīti siṅgih yan putra niṅ śakti saṅ Aja katəṅər* krūrasiṅhâvamāna agyâmūkêṅ musuh duṣṭa kamadan ika śīrṇan marapvan panəmbah sākṣāt hyaṅ niṅ dhanurveda saṅ Aja sakala n pāvak iṅ dharmayuddha raktākārâkiris vastra nira kilat i sub niṅ praṅ asriṅ larapnya saṅkêṅ svargânurun cāmara nira kuməlab roma niṅ sarvakadga saṅhub niṅ sañjatâḍəm pinakapayuṅ irântuk niṅ aṅdaṇḍa śatru hyaṅ-hyaṅ niṅ tuṅgaṅan sārathi nira vəka niṅ siddhi sāmbəknya siddha ratnênādyūta de hyaṅ ravi ratha nira tan manda-manda prabhānya śuddhākārâputih roma ni kuda nira pə̄h niṅ prabhā niṅ śaśāṅka rvaṅ lakṣa ṅ sūryabaddhadhvaja nira piturun saṅ hyaṅ āditya sevu akveh sāmantaputrâṅiriṅ i sira paḍâtuṅgalan sargacāpa pantəs lvir hyaṅ-hyaṅ iṅ sañjata təka rumaras mār tvas iṅ śatru denya sevu kvehnyânvam-anvam vruh akuda-kudan iṅ papraṅan vīraputra jihvā niṅ mr̥tyu sākṣāt dhvaja nira dumilah rājasiṅhâmarəmpu vīra prajñā juru dyah nira sama-sama gandharva denyâmavâmbək ilvêlvanyânvam*-anvam saṅaṅ ivu taruṇânaknya mantrī narendra aprih riṅ praṅ sujanmâratha-rathan apupul tan sah iṅ vaṅśa sālas vālārkākāra* sākṣāt lvir ika n aruṇamegha dhvajanya pradīpta sakveh-kveh niṅ rare jro vani hañar anapuk sañjatâgyâmrihêṅ* praṅ rvaṅ lakṣa kvehnya məttâṅuhuh* aṅayam-ayam śatru mvaṅ deva daitya anvam vruh riṅ dhanurveda juru nika huvus kāku siṅhanya riṅ praṅ devāṅgâneka tuṅgulnya saṅaṅ ivu kadîndrādi milvâmukêṅ praṅ ambək niṅ dāsa śūrâpraṅa rumuhun apan kāsatan pva ṅ* hatinya mattā vīryâṅuhuh* gə̄ṅ ni kamanan ika riṅ praṅ murub tan pahīṅan miṅsor məntas mariṅ tuṅgaṅan apan ahuyaṅ kvehnya sevvarvudâḍəm* mātaṅganyâpupul mvaṅ dhvaja nika dumilah citrameghâkilat mās saṅ jurv Âjâbala rvaṅ prayuta pinakasenāpati prāṇa niṅ praṅ kapvâdandan rukuh mās kavaca minaṇikan lvir samudrāgni muntab vadvâṅjurv aprameyâratha sayuta gajahnyâtatā sevu lakṣa lākâneka dhvajanya n pracalita kadi bahnî səḍəṅ niṅ yugānta mantrī rvaṅ lakṣa sampun ginəlar i hiriṅan bāhudaṇḍâṅgakāra len tekaṅ pādarakṣa prakaṭa kadi tasik rvaṅ puluh durga niṅ praṅ arpat muṅgv î təṅah śrī nr̥pasuta mukha niṅ siṅha śārdūla śakti kady Âgastyâṅuyup sāgara vunuhan ikaṅ byūha sampun tiniṅkah

arpat ikaṅ varagaṅ sahasa silih usī paḍa nora vədi siṅ sakasambut ikaṅ pinakagada-gadānya paḍâmurulu umban alivran arok rəmək iṅ avaṅ-avaṅ kapagut kavaluy dukduk ikā kadi sarpa pakan aṅin aneka hanêṅ gagana vvaṅ bahulâtuha milv ajurit alara təṇḍas ikā ginutuk ai putu liṅnya nihan laku valəsi gutuk buru demu pisuh ndi n vənaṅ aṅgutukâṅrahana tan ubhayâku putu prihavak dval putu demu palakvan i katigavəlas təṅahê laku ta brāhmaṇa vany apulih galah apupul aḍəm pinurugnya rəbah* tan vruh aveda kuraṅ-kuraṅ aji makapaṅhaḍa timbul ikā kepvan ikaṅ musuh amraṅa paḍa vədi yan rah ikā mijila ṅhiṅ pamədinya pulut-pulutan ika ta hetu nikā malayū

nya ṅ sogatânvam ajurit kəna tan dva bəntar mojar kutiknya ḍuh uḍuh pukulun laranya yêka n mijil para cəṅəlnya nəhər sinuṇḍaṅ kadyaṅgan iṅ ghaṭa rəmək tika yan panaṇḍəm* śaivâpulih kəna pilis vulaṅun kajuṅkəl mitrânuluṅ mpu mapa teku manahta maṅko eṅət ṅhulun ri kita bhāgya tasim yan eṅət strī ni ṅhulun kita tulakṣaya ko hadêki nā liṅ nira mpu tucapa ṅ prajurit silih praṅ ārok rinok avur-avur paḍa tan vri rātnya teg tog* ḍaḍap nika bubul ginalah tinaṅkis* ḍə̄hak musuhnya sinuḍatnya pəjah kasoran* gəntə̄r i śabda ni gubarnya baṅun silih prəp kady âcakəp dhvani nikaṅ kukulan karəsrəs kaṅsinya lāgi manah ambək iṅ ajrih iṅ praṅ moṅmoṅan aṅgyat* anamar macan asriṅ olih vadvā nr̥pātmaja tumampuhakən gadānya rvaṅ lakṣa tan kuraṅ asəṅhit* asiṅhanāda akveh tikəl-tikəl igā ni lavanya rəmpuh aṅrvaṅ-pulūh ulih* ikā ri patuṅgalanya vīrânapuk* raṅin apiṇḍa sahasra vr̥nda mevv-îvu koṭi pagalahnya parəṅ tumampuh gək ghor rəbah viphala siṅ kinayuhnya runtuh savrənda māti ginalah savaneh pinə̄kan sevvarvudâmana*-manah mvaṅ ikāṅ agaṇḍi tandaṅnya tan dva kinavədyan apan karəsrəs hrūnyânrik iṅ gagana sə̄h kadi megha məṇḍuṅ* sar cəb tibâṅənani* siṅ kəna tan pasāra vadvā narendra malayū savatək-vatəknya peka pravīra kəna tan dva yaya praṅ aṅrok* kombak linūd avalikan kuməlab dhvajanya himpər nadī kinəbur iṅ gaja sevu lakṣa bhātriṅśa lakṣa ṅ apulih kalulun kavaṅsul kālah tibā silih idək sinəsəb pinə̄kan rəmpak* tikəl viphala salvir i sañjatanya lvir kayva-kayvan asipattra rəbah kaliṇḍvan* vadvā nareśvara inatyan* irêṅ kasiṅhan śakti pravīra parapə̄k i musuh yan iṅ praṅ yêkâpulih tan avədî ripubāṇavarṣa vany ânusup təpət amūk makasoṅ ḍaḍapnya kagyat balā nr̥patiputra maluy tinaṅkis akveh an amriha tavan tiki* tan kagə̄man məṅgəp kadi jrih* akikib malayū tan adrəs mundur yayā bala nareśvara durbalâlvaṅ tan jrih bala nrəpati dhairya sahâbhimāna apraṅ karuṅ paḍa tumiṅgalakən ḍaḍapnya de niṅ silih pəḍək arok vəkasan silih prəp bək təg həhəh kahənəkan jrih ikaṅ lumumpat avrâlayū bala narendrasutâvrəg avrin śakti pravīra kapana n kəna pakṣa-pakṣan hamham təkâṅamah-amah bala saṅ narendra apyak təkapnya n aṅucap tuhu siṅha riṅ praṅ ai koṅ vatək Raghusuta prih avakmu maṅko hayvâpraṅ undur athavā paṅalih para* ṅke āpan ya tan hana sihankva ri kāsy-asihmu kāton pəjahmu pususəṅkva ri sañjataṅku nā liṅ nikâmutuṅ aṅəmbuli tan panaṅgəl kvehnyâprameya kadi sāgara tan papiṅgir marmanya vāni sahasâmraṅ amūk tumiṇḍih *dukduk panah kadi hudan ya ta paṅharəpnya aṅvehi sañjata humuṅ gumuruh suraknya aṅrok* atambəh i harəp kumucup dhvajanya akveh pəjah tan avədî pati maṅkin embuh lvir larva-larvan arəbut damar alvaṅ embuh krūrâpulih bala narendrasutâmuk amrih mundur bala nrəpati śīghra muvah tumampuh enak silih galah apan paḍa vāni-vāni sə̄h sāhasâṅuḍik-uḍik praṅ ikā silih sob enak marâpraṅ arukət paḍa nora mundur rvaṅ yojana ṅ pabharatan paḍa sə̄h gajâśva sampun rəbah vukir-anaknya vatunya kabvaṅ akveh juraṅ mari juraṅ vəkasan kahinya* ṅkānê ruhur gunuṅ ikaṅ praṅ arok silih sob apraṅ suməṅka tumurun paḍa rota rodra rəp tan katon hanan avās təkap iṅ himâvrā* ramyâtulis praṅ ika konəṅ-unəṅ tinonton brahmarṣi śeva* sugatādi* ri sor anonton mvaṅ vvaṅ jrih iṅ raṇa huvus katuhan vayahnya kvehnyâtatânudiṅi harṣa nəhər tuməṅhā akrak paḍâtri gumuruh ri paṅadvakənya rīyūk rəbah kidul alah rinəbut sinə̄kan* rīyūk rəbah muvah alah kasəsə̄h* ikaṅ lor rīyūk rəbah muvah ikaṅ kidul alvaṅ akveh rīyūk rəbah pinəgatan vədi və̄k ikaṅ lor āh uh piraṅ juru muvah saka lor tumandaṅ rīyūk rəbah kidul alah binurunya kagyat kady ânutuh kalapa denya mamə̄ki* təṇḍas nā liṅ nikā hana ta len aṅutū kapūhan śīrṇa ṅ samaṇḍala-samaṇḍala konduran syuh avrəg paḍâṅhili* sira mpu təkêṅ kaninyan aprakprakan di ta kaki hyaṅ ujar nini hyaṅ putrī nikā* kaburəṅek-burəṅek tinaṅguṅ sampun təkê ruhur iṅ agra muvah paḍâvrəg vvaṅ vr̥ddha-vr̥ddha guru niny aṅuhuh sakê sor pāran pinavrəgakən ā mapa liṅ kaki hyaṅ vikv âñaruk viṣaya rakva nimitta niṅ vrəg lāvan turun patapan əmbuli hayva mundur ambək ṅvaṅ iṅ kaguru-ninyan alah padandan ṅvaṅ pvâtuhâlah-alah əmpu buyut ta lampah* nā liṅ nini mpu kabalik vədi və̄k kaki mpu vīrâpraṅ iṅ təgal ayun paḍa vāni-vāni kontab maṅontabakən amraṅ* amūk añakra kedər paḍâkuliliṅan gumuluṅ rathanya lvir nāga molih aməbəd gaja matta* sālas enak dahat* praṅ ika kādbhuta riṅ triloka āpan katuhvan atəvək-təvəkan paḍâkris len taṅ silih tujah amatrəm amajra* maṅduk bāhunya runtuh asakit trus aṅəmbak-əmbak sojarnya kātara nəhər marahup-rahup rah hāmah śirah hurupa* jīvamu hayva tâjrih hayvâdva bhoh ndya ta śirah mata mah ndya jīva bvat kapravīran iki tan dadi mithyavāda nā liṅ nikā tucapa śabda ri de nikâpraṅ pyak byur kəpuk kətələbuk* kəḍəpək kətug tog ceṅ has təhap-təhap aḍuh gədəbəg ḍəhak syok carcab ləbik bək aḍu gə̄ṅ guməcik gələmpə̄ṅ nāhan taṅ əlvan asəlur karəṅə̄ karəsrəs maṅde bhayānaka pasaṅgha nikā guməntər len taṅ mahātiśaya rodra paṅalv-alə̄nya vīrâṅgətəm nəhər aṅohan i mehnya matya

śrī Magadhādhipa sāhasa mijil abhimāna nirêṅ palagan nāgamayāstra laras nira səḍəṅ inayat bhramita ṅ pr̥thivī gə̄ṅ svara niṅ tali de ny aṅin ika kumusuh mətu kātatakut hrū nika kādbhuta kātara gunuṅ ahəlar varakadga murub prajvalitāgni cucuknya kagiri-giri dhūma dilahnya murub sek gumuruh paṅavaknya kumisik aməgat jaladêṅ gagana bor kumutug śara bajra saṅ Aja kumətug ləpas aṅdviguṇa teg tumibā ṅ vihagācala mati pinanah makəbət-kəbətan

muntab krodha saṅ Aṅganātha kadi bahni maṅaraman i puñcak iṅ vukir ṅkānê kūvara niṅ rathâmahayu lañciṅan ira pinisit siniṅsətan hrū lāvan laras advitīya sinamādhy amijilakəna sarvasañjata vuntv îkaṅ gaganāntarāla təkap iṅ panah atip atətəl turuṅ tibā devanyâvurahan təkâṅamah-amah harəp amususa riṅ nrəpātmaja lvir meghodaya māghamāsa sumaput pətəṅ alimunan aṅhudan havu saṅ hyaṅ bāyvanala pracaṇḍa pamanah nr̥patanaya dumeh kavaṅsula bək gək tor* cərəcəb tibêṅ bala nareśvara makasulayah kavaṅsulan śaktîṅ praṅ saṅ Avantinātha sira Mr̥tyu sakala yan i madhya niṅ musuh maṅgəh buddhi nirâpulih nəhər aṅakv aməjahana nareśvarātmaja rahasyântya nikaṅ kaśaktin inayat nira mətu ṅ ayudhâgniparvata bor muṅgv iṅ gaganāntarāla paḍa yatna bala saṅ Aja kebəkan panas tan kevran saṅ Ajâpan adbhuta kaśaktin ira tumiru śakti saṅ Raghu rəp mārādhana pañcabāyu mətu kātaratara gumərəh magənturan kabvaṅ taṅ śara parvatâgni kadi handaru sayuta dilahnya riṅ laṅit bhur tog sə̄ṅ prəkətək nahan svara nikâməkasi hurip i madhya niṅ tasik maṅsə̄ sāhasa tan surud saṅ Anupādhipati manah ira n vanîṅ raṇa paṅhrik niṅ kuda len grit iṅ ratha karəṅv asəlur i hiriṅan hanê harəp pakrak niṅ balasaṅgha maṅgyat aṅasut ri bala saṅ Aja vāni kāmbulan teg tok* lvir garuḍâḍahəm kətug ikaṅ gubar asahuran apratidhvani sampunya n luməpas panah saṅ Anupādhipa kadi ruga ṅ aṇḍamaṇḍala pātālastha samāpta nāga ləkər iṅ bhuvana ruməbuti nrəpātmaja porot bor dumilah mara ṅ* viṣa sinəmburakən ika hanâtəmah kukus byur lar ləs paḍa mukṣa de ni kuku saṅ garuḍa vahu minuṣṭi riṅ laras

krodhâmbək saṅ Susenā saha bala sumaput kātarâsiṅhanāda harṣa n ton saṅ narāryātmaja pinakamusuh kevalânuṅga-nuṅgal hrū-hrū śaktîṅ daṅū sə̄h linəpasakən irâtaṅkis akrak karəsrəs āpan pakṣy âhəlar sañjata kadi garuḍâneka sevv arvudâhə̄m sumyaṅ sumyak həlarnya n kinirigakən ikâghāṣa muntab dilahnya sumyuk tan kāvaran drəsnya kadi dinukakən yan tumandaṅ sakêṅ doh kāṇḍəg katrən dinuk de saṅ Aja linud irêṅ cakra puṅgəl gulūnya perat sok rahnya saṅkêṅ* ḍaḍa nika kavutah mrəm tibâdoh guməntər ṅhiṅ saṅ Hemāṅgadâmrih-mrih apulih i luyuk saṅ Susenā katampək sampun kempun sinimpən bala saṅ Aja paḍa krūra kedran kavuṅkus syuh tan sārā sa-Hemāṅgada mati tinəḍak bəntar alvaṅ salakṣa kāry aṅlīlā narendrâmanahakən irikaṅ sāgarâtyanta rodra śīghra rvabnyâṅgaluntaṅ gaganacara ləpas māmpuhan matrigañca ləmboranyâṅlayaṅ* kābhinava kadi gunuṅ sevu mālih marampak sumyūk adrəs tuməmpuh ri saṅ Aja kavaluy de ni gə̄ṅ niṅ kaśaktin mavrəg luṅhâstra de hyaṅ Baruṇasuta karəsnya n hilaṅ tan paśeṣa saṅ Pāṇḍyâmah gunuṅ sāhasa təka rumahab de ni gə̄ṅ niṅ kamānan sākṣāt guntur sakêṅ parvata tumurun atūt lvah juraṅ durgamâjro mātaṅga mvaṅ ratha lvir vatu gumuluṅ apan tan pararyan lakunya krodhâməṇṭaṅ* laras saṅ prabhu mamanahakən bahni saṅkêṅ samudra lumrā riṅ dik vidik teja nika saha panasnyâṅgəsəṅ sarvavr̥kṣa sakveh niṅ megha məṇḍuṅ pinaṅan ika huvus hənti lāvan gəlapnya lvir jihvānya ṅ Mahāmr̥tyu dumilata narendrātmajâtyanta rodra saṅ hyaṅ Kālāgni muṅgv î naraca saṅ Aja marmanya mātîṅ raṇāṅga

saṅ Pāṇḍya sor titih alah malayū tinaṅkis vadvā nirâlara hilaṅ kahalâvrəg alvaṅ āpan silih praṅ arəbut havan ahrit evəh vadvā nr̥pātmaja maluy sakarəṅ mararyan saṅ saptarāja sumahab saha bhr̥tyamantrī sampun sirâṅhabətakən dhvaja śīghra maṅkat sar sə̄k pravīra gumuruh kadi sāgara rvab lvir siṅha sārvuda paḍâkrak asiṅhanāda vīrâtyan iṅ vani hinatyan inəṇḍəm-əṇḍəm* agyâpraṅ aṅgətəm atə̄n maṅusap ləṅənya mvaṅ sarvasañjata nikā milu harṣa riṅ praṅ paṅliṅganâṅiṅis-iṅis kuməñar vajanya hamham təkâmanah añakra bubak sakāmbah rodrâmupak cəṅəl amūk arəbut kasiṅhan len taṅ paḍâpapatihan kuḍuvak paḍâkre saṅhāra kātəkan i rūpa nika n karəsrəs śūrâmərəh* kadi surat təkap* iṅ kaśūran kontanya kādbhuta sahasra kuvuṅ-kuvuṅnya asraṅ kətug ni panutugnya ḍaḍap guməntər himpər prabhāva ni musuhnya pəjah kapə̄kan mundur bala nrəpatiputra tinūt cinakra avrā rinampak inirup pinanah ginaṇḍi ndātan vədîṅ panah atip kadi megha məṇḍuṅ* tahv âhudan-hudan i madhya niṅ astravarṣa vadvā narādhipati sāhasa tan panaṅgəl śārdūla śakti pinakāgramukhêṅ kasiṅhan mañjiṅ marêṅ pakəkəs iṅ vunuhan təkâmraṅ* tan sāra hənti satəṅah rinakut kadi bras kagyat vinūk pinəgatan tinalaṅkup avrəg tiṅgalnya sañjata rathâśva sahasra saṅkhya kedər gajahnya rinubuṅ dinudut śinūla lvir vaṅkay iṅ valaṅ inīrakən iṅ səmut baṅ saṅ saptarāja kadi saptasamudra muntab de niṅ kamānavibhavan pinakasvabhāva maṅsə̄ sahâśva ratha vāhana Meru* tulya apvī sakêṅ panah irôjvala mumbul-umbul *meghodayâmaḍəmi sakṣaṇa tan paśeṣa saṅkê panah nr̥patiputra lavan halisyus mətv âmusus-musus anūb ratharəṅga kabvaṅ lāvan gəlap makasulambər anambər aṅgyat saṅ saptarāja saha bhr̥tya rəbah katampək bəntar vinūk saha gajâśva rathâlah avrəg guntur pravīra kumusuh katəḍun marêṅ lvah himpər gunuṅ pituṅ atus rəbah iṅ samudra saṅ saptarāja kabələt vəkasan sirâdan rəp sy Andakâvak aśarīra liman savr̥nda saṅkê panah nira mijil təkap iṅ kasiddhyan vuntu ṅ nabhastala lavan pr̥thivī kasəṅkə̄ śīghrânurumbunuh amūk ri narendraputra atyadbhutâlimunan iṅ gaganāntarāla məttâṅuliṅ kadi gunuṅ kumukūs umaṇḍəm saṅ saptarāja humuṅ atry asurak guməntər de niṅ maṅadvakən* apiṇḍa təkap niṅ apraṅ* āh āh mati sy Aja mulat muliṅā kaṅelan kedran kavuṅkus i təṅah kalulun kapəṇḍəm nā liṅ nirâṅgətəm atə̄n dan asiṅhanāda kāla nrəpātmaja n inambulan iṅ gajendra eṅət sirâmanahakən śara hastiśikṣā mevv-îvu hənti mati śīghra parəṅ tuməmpək* himpər namuk tinəpak alvaṅ atambəh akveh riṅ sakṣaṇa nrəpatiputra kumə̄l ayoga saṅ hyaṅ Smarāntakaśarāgni mijil sakêṅ hrū śīrṇa ṅ gajah ginəsəṅan paḍa bhasmibhūta lumrā havunya kumutug baṅun andhakāra krodhâṅayat śaravarāgni narendraputra āpan musuh nira sudhīra mahāprabhāva maṅsə̄ paḍâṅləpasakən śara nāgapāśa tapvan təkâpan avilət pinəgat nirêṅ hrū saṅ saptarāja paḍa śakti vidagdha riṅ praṅ vil krūra daitya pamanah nira sevu lakṣa krodhâmupul* səmut amūk ri narendraputra himpər grahâṅhibəki rāt marəbut śaśāṅka siṅhapravīra saṅ Ajâṅayat astra śakti ḍaṅṣṭrā niṅ Antaka minuṣṭi huvus minantran devātmakâmava gadāyudha mətv arampak mavrəg pəjah silih idək para daitya mukṣa an maṅkana praṅ ira tan hana sor avantah maṅsə̄* nr̥pātmaja lavan naranātha maṅsə̄ təmpuh ni sañjata nirâpagut ātirodra himpər gunuṅ madu guməntər inadv atəmpuh liṇḍū bəlah bhramita bhūmi nikaṅ raṇāṅga mvaṅ saptaparvata kadînayun agrah olah pātāla sapta kadudut kagiriṅ kagiṅgaṅ nya ṅ saptasāgara katumpək arok bañunya kveh niṅ pəjah saka salakṣa sahasra vr̥nda len taṅ paḍâməkasi jīva humūṅ aṅohan meh matya maṅrəguṅ ikaṅ gajah asriṅ aṅgro abyūran iṅ rudhirasāgara kombakan ryak mātaṅga len turaga nūsa nikâṅalimbuṅ* sarvāstra kayvan ika śīrṇa marok* dhvajâkrəp ṅkāna ṅ* pravīra marəbut phala niṅ kasiṅhan vetnyâləyə̄ kasidəkuṅ-sidəkuṅ silih praṅ ṅkānê pasir-pasir ikā naranāthaputra apraṅ lavan ratu kavīśvara riṅ palambaṅ hrū muṅgv i karṇa nira piṇḍa tanah kasumpiṅ tapvan varəg praṅ alaṅə̄ lagi kombakan rah Rudrāyudhāgni pinasaṅ naranāthaputra Durgānalâdbhuta* mijil pamanah narendra trus riṅ laṅit dilah ikâsəmu megha bahni lumrâvilət latu-latunya mahāsurâkrak prodbhūta kātara dahat patəmunya kālih maṅkin təkê ruhur aṅambara kaprahāran saṅ hyaṅ Śivārka kasuban pan asor sirâgyaṅ luṅhâhavan kuda lumiṅsir adoh maṅulvan vidyādharī saha vimāna sumaṅgrahâkveh muṅgv î tavaṅ vruh irikaṅ vani-vāni riṅ praṅ dukduk* hayunya sinahāyan iṅ ambək ahyaṅ harṣâmapag ri para vīra pəjah kapə̄kan sāmbək* niṅ onəṅ alavas tinəkan rarasnya kāmīrasâyam-ayamanya səḍəṅ bhinukti tan lot dhumāraṇa panas nikaṅ agnibāṇa luṅhā lavan priya nikā sukha ramya mārga saptarṣi devagaṇa guhyaka siddha-siddha anrik* hanêṅ gagana sārvuda riṅ sapaṇṭa gə̄ṅ niṅ praṅ adbhuta ya hetu nira n panonton milv âsurak nəhər aṅadvakən akrak ahyā luṅhā muvah kapanasan paḍa tan hanâṅher saṅ Nāradâsyaṅ aṅuhuh* ri narendraputra ai putra toh bapa vulat ndak apintakāsih hrūntâgni śakti paḍəmənta sihanta ri hyaṅ mvaṅ paṅrəṅə̄kv* i kita yan pinakāntaśāpa de saṅ Priyambada səḍəṅnya gajendrarūpa kāruṇya māsih amaləs ri valuy nira hyaṅ saṅmohanêkaṅ inajinta kənoh parīkṣan an maṅkanôjar ira śīghra narendraputra mārādhanâmr̥ta sinr̥ṣṭi ri tuṅtuṅ iṅ hrū sumyuk sakêṅ avaṅ-avaṅ kadi riṅ paṅipyan dhvasta ṅ śarânala paḍəm paḍa bhasmibhūta saṅ saptarāja paḍa śakti parəṅ tumandaṅ kapvâṅhudan-hudani sañjata bāyubajra atyanta tan paṅupamê saṅ Ajâpan anvam muṅgv iṅ* rathânudiṅi vākcapalâvalepa ai rājaputra* mapa tâṅən-aṅənmu maṅko āpan huvus vruh aku yan kapalaṅ manahmu tr̥ṣṇan purihmu ri huripmv apan anvam avri nā pādukaṅku pakacāmana sambahəmva* nāhan vuvus nr̥pati senaka ri tvas apyak pāruṣyaśabda mada tan vruh i śakti niṅ len krodha nrəpatmaja sumə̄ṅ i mukha ṅ kamānan sabhyâṅucap sahur irâtəhər aṅdədəl tvas sanvam-nvamaṅkva n aku siṅhakula pravīra tak* nāgatêṅ atuha tiṅhali demu maṅko sakveh ni sañjatamu tan hana paṅgaritnya byakta n* pacuṇḍaṅ i bapaṅku kabeh-kabehmu nā liṅ narendrasuta śakty aṅayat varāstra saṅmohana smr̥ti nirêṅ kṣaṇa n ekacitta nidrâṅaveśa sumaput ri ləpas nikaṅ hrū mrəm saṅ vatək ratu huvus kəna tan pasāra sāmānya* peka rumuhun para taṇḍa mantrī mātaṅga matta turagâṅrəpa tan vri rātnya mūrchâturū kadi tasik vvaṅ ikaṅ* raṇāṅga mombak raṅin gajah aghaṇṭa karaṅ liman ya sampun jayêṅ raṇasabhā naranāthaputra saṅ saptarāja kadi māti parəṅ katurvan təkvan huvus kacuriṅan rah i tuṅtuṅ iṅ hrū yêkā siluṅluṅ ira yan kaparājayêṅ praṅ saṅ hyaṅ sirâjaya-jayêṅ gaganāntarāla mvaṅ puṣpavarṣa tumibā kadi kasturi mrik prīty âdara nrəpatiputra sinādhukāra sampun maṅañjali saharṣa nəhər tuməṅhā

sampun byakta kacakravartyan i nr̥pātmaja ri huvus irâmarājaya nora lvaṅ nira pūrṇa maṅkana sasañjata nira kadi ṅūni dug siṅī sakveh niṅ bala śūrasaṅgha humatur paḍa maṅarahakən lumampaha maṅkat śrîndumatī lavan nr̥patiputra paḍa sukha makālihan ratha tiṅkah-tiṅkah i de nirâpraṅ inucap vinarahakən irê suputrikā mojar śrîndumatī vagus kita kakâpa haməṅan ikanaṅ vatək ratu rakryan yêki panahkv amuṅvakəna tan dadi viphala ləpasnya riṅ musuh saṅhārāstra vimohanākhya paṅalah pinakakajayaśatrun* i ṅhulun nāhan liṅ nr̥paputra rakva tadanantara nr̥pati parəṅ sirâvuṅu mvaṅ mantrī saha bhr̥tya vāhana turaṅga varurutən aṅob ariṅguṅan eraṅ de ni kahīnakāyan ira tuccha kacuriṅan alah sirêṅ raṇa ry antuk saṅ prabhu tan kathākəna kunəṅ nr̥pasuta sira varṇanən muvah sampun mintar adoh laku nr̥patiputra manəmu haraṇān ḍusun-ḍusun piṅgir-piṅgir ikaṅ hənū pakapasan pakalayaran apaṇṭa tan parok* evəh tan satinūtakən rupit ikāṅ aṅiva hana nəṅən paḍâgənət tan tuṅgal kasasar humuṅ silih uhuh* kapasah asahuran silih taña duṅhus niṅ palapat kahundul aruhur kabuyutan alavas kinatvaṅan pañcârnik vinəlaṅ sakanya pinakolul* ika taviṅ ikā hibək parab vvaṅnyâkveh mapupul hanâṅiduṅakən ri gavay ira nareśvarātmaja lantuṅ mambv avaṅînasū nika ginanti saha caru sinaṅgaran hañar ṅkānê sor talagâhəniṅ hana buyut-buyut ivak arəbut valaṅ tibā piṅgirnyênasaban paras havan ikā siniku-siku hinambalan vatu raṅrə̄ kayvan ikā lavan kəpuh agə̄ṅ jaha vijah asəkar lavan vinə̄ṅ akveh səñjaṅ ikâjajar hana kavadvan ana kalanaṅan dinudvakən meh-meh rvaṅ puluhaṅ kuləm lavas irâṅhinəp* i huvus irâpraṅ iṅ hənū prāptêṅ thāni ḍusun kaḍatvan iṅ usāna paravaśa rinampak iṅ musuh piṅgir niṅ talagâvukir-vukir-anak patani nika manumpak aṅlənaṅ ṅkāna śrī naranāthaputra maṅənah kakavin ulih irâṅdadak-dadak

dinələ̄ ku jinarumanan* iṅgut iṅ halis i kāla nika vahu* mijil avuyuṅ miṅay anirirakən susup-susup ikâsana nəhər* ahidu irikâkv aməgati turidaṅku tan vani mulat muvah i mukha nikā sahajâṅhuripakən atukup-tukup ri pavahinku kadi kaluputan

təvəknya n inalap ni rena nika tan tahu katəmu gənəp tigaṅ tahun lipur turida ni ṅhulun mari rimaṅ sinapihan i lavasnya tan katon kathañcana kapaṅgih iṅ yaśa lavan panuluyan iriyâṅdadak lumuh pəpət-pəpət ikā ya ta n pinahaliṅsya* nika ri paṅavenya ri ṅhulun

nāhan vastu ni de nirâṅikət-ikət vinəkasakən irêrikaṅ yaśa prajñā śrîndumatī sirâmaca kapintiga tama tumurun sirâdulur pavvat niṅ para pora tan papəgatan tinəmu nira sumaṅgrahêṅ havan secchecchā hanan aṅhinəp sira hanan lumaku ri vijil iṅ niśākara sampun rakva gənəp salek lavas irêṅ havan asukha-sukhan dudū gave lok niṅ mārga pasir vukir tinutakən lamakan ira macaṅkramâṅləṅəṅ ry Âyodhyānagarī katon hada-hadā ni dilah i gupuranya mās maṇik saṅ hyaṅ sūrya niśākarêṅ udayaparvata paḍa nira kevalâhaləp vr̥tta śrī naranāthaputra katəkê nr̥pati Raghu lavan nareśvarī an sampun sira labdhakārya ri Vidarbhapura mamənaṅ iṅ svayambara mvaṅ ry âlah para nātha riṅ praṅ aharəp ruməbuta naranāthaputrikā harṣa śrī parameśvarī makamukha nrəpati təhər akon anuṅsuṅa vvaṅ ri jro paḍa muṅgah iṅ paṅuṅaṅan ruməṅə-rəṅə hanan silih pəḍək agyā-gyān hana tan tulus sipat ikânahəlay apan alah girahyasən len taṅ strī malajəṅ vagəd-vagəd anaṅga susu nika sinaṇḍuṅ iṅ sakhī akveh mādəg adan tapih mirir inir nika nəhər akaluṅ-kaluṅ sabuk strī ry Âyodhyapurī parəṅ mijil anuṅsuṅ ahayu kadi paṅjrah iṅ səkar ndan buddhinya kaḍaṅhanan raras i denya mulat inuparəṅgan iṅ guyu rūm niṅ strī ri Vidarbharājya kadi pāləman i hayu ni rūpa niṅ rakət aśrī denya mavâmbək abvat atərəh tumiru-tiru manah suputrikā akveh rājasutā ry Ayodhyanagarī mada makapaṅayāya rūm nikā maṅgəh rūpa nira n panampikakənê nr̥pavaraduhitā n pinaṅkvakən maṅke n vruh ri haləp narendratanayā kavədi-vədi ni rūpa niṅ Ratih mrəm tan lə̄ṅ kadi vintaṅ iṅ vəṅi katon akucəm i kəñar iṅ niśākara miṅgut piṇḍa nikaṅ kaḍatvan i səḍəṅ saṅ Aja təka lavan suputrikā āpan kādbhuta siṅ sapolah ira kābhinava ri halivat nirêṅ* ləbuh sakveh-kveh para taṇḍa sə̄h parəṅ anuṅsuṅ i sira paḍa harṣa garjita abyūṅan kumisik garantuṅ ira ramya kadi papagut iṅ ryak iṅ pasir ṅhiṅ devînaləm iṅ mulat syapa ta taṇḍiṅa nira liṅ ikânulus dahat yadyan sevu purī pametana* mamarpatana hajəṅ ira ndatan hana strī sāmantasutā paḍâhyaṅ araras ndan arada kapalaṅ tiniṅhalan byakta śrîndumatī pakaprabhu nirêṅ śayana pisaniṅū katampika nā liṅnya n paṅaləm katuhvan apa tan hana kadi sira ratnakanyakā āpan sarva-səkar sugandha makanāyaka pənəd i raras ni rūm nira lāvan madhya nira pramāṇa ri kəlab ni ləməs ikaṅ aśokapādapa śrī śrī niṅ mukha śuddha pūrṇa gumavaṅ tuhu-tuhu ratu niṅ niśākara sampun śrī naranāthaputra kalavan nr̥pavaraduhitā marê daləm bhakty ânəmbah i jə̄ṅ narendra Raghu karva nr̥patimahiṣī sirâpupul buddhi śrī parameśvarī makamukha nrəpati sukha tumon anak nira prajñā* śāstravit iṅgitajña vani śakti lituhayu dumeh sirâsiha śrī devîndumatī kinon marəka de nr̥pati Raghu kagə̄ṅan iṅ sukha lāvan śrī parameśvarī sira makon marəka nəhər aṅol sirâsəgəh pāman* penan avās marâṅgəh ira de saṅ ahayu paḍa sūryavaṅśaja vet niṅ harṣa lumuh sira n marahakən pakadaṅan ira riṅ nr̥pātmajā səmbah śrī naranātha Bhoja ri narendra Raghu vinaca marma riṅ rasa an devîndumatī kaśuddhyana pakānak-anaka nira nitya kāsy-asih rājasvâdbhuta rājayogya maṇirāja pahula nira muṅgu riṅ ratha kesî səmbah ira pramāṇa guməlar hinaturakən irê nareśvara buddhi śrī parameśvarī sukha lavan nr̥pati Raghu tumon anak nira an polih maṇik iṅ kaḍatvan i Vidarbha saphala sira rājakanyakā təkvan kapvanakan paḍâparək ikaṅ pakadaṅan avilət karaṅkəpan boṅgan rūpa nirâhañar-hañar amantu saparan ira tan kasah tumūt buddhi śrîndumatī rəsəp makabapebv i* sira puji-puji n kināsihan byātītan salavas nira n təka paḍâsukha-sukhan adulur macaṅkrama mary onəṅ ri Vidarbharājya tuvi rāka nira sira marək manuṅgayap ry Âyodhyānagarī jugâṅinaki de ni sih ira ri nareśvarātmaja sakveh niṅ makapuṇya rāga nira riṅ nr̥patisuta paḍâṅhiḍəp smara sampun rakva sinūkṣma riṅ pahula mās maṇi rajata suvastra kasturi aṅkən māsa silib-silib vvaṅ irikaṅ vəṅi pinaran irêṅ paḍaṅ vulan vāvaṅ mātra karəṅvan iṅ taṅis arūm vinisikan ira māsku cəp tuhan mālih tan təka saprahāra ri huvus niṅ ulah aṅalih asriṅ iṅ tilam marmâṅdūmi karāsikan vruh i harəp-harəpan iṅ aharəp haləmbaṅən rakryan saṅ pinakādipūrva niṅ amūrva kataruṇan irêṅ pasaṅgaman kañcit mogha kapaṅgih aṅliga-ligā kinisapu nira sāhasâvuyuṅ

kakâja vinaliṅku tan vruha kitâṅlvaṅa turida ni rāga ni ṅhulun hanânak-anakanku ketaka miṅiṅ sahaja tan inakunta rakva ya putih siki kaduryaśaśruti vavaṅ katalu sagalakanta tak vədi manahku vani tan surud pva ya tat antu kita ya karaṇaṅku tan rara aum* yayi saliṅta māsku n avuyuṅ sapaṅucapan i māsku lampunən ṅhulun yayi turuṅ vənaṅ maṅavayuh rumatakəna vilāpa ni ṅhulun ya hetu ni kakanta tan vənaṅ asih ləvu marika sih i ṅhulun yayi hələm ṅhulun atəmva māsku kalavan kita ratakəna hayva saṅśaya paran tiki dumeh kitâṅucapa maṅkana dali-dalihanta keraṅan katon aṅavatāra denta tan asih pati-pati parihāra* tan padon tahâkv alara denta yan kadi kadaṅ haji para kulaputra kāsy-asih kita pva ta bakal ratu syapa ta tan kapanasana hatinya kinvakən valiṅkv* asisinahva tan vənaṅa mithya kita ri rasa ni* pralāpita apan kita sinambhavâṅadəga ratv aṅalilirana kaprabhun haji ujarta kita tan paṅakva ləpihanta nəhər aśapathâṅdilat laṭi adalka kita tan panampa ri laraṅkv apuji-puji kita n tuhan-tuhan tuhanku yayi ni ṅhulun vruh aku yan kita mujarakəna ṅ salah kəna tuhun palaku ni ṅhulun siha ni māsku tumutakəna buddhi ni ṅhulun rahasyan ibu polah i ṅvaṅ apa tan vuruṅa kahaturê nareśvara huvus kaka huvus nahan vuvus ira n vinuvusan akəcap miṅəl-miṅəl taṅeh yan ucapən paganti saṅ amālihi prəman i narendraputrikā paḍəm pamanas iṅ smarānala ri buddhi nira siniram iṅ karāsikan nr̥pātmaja sirâmrih aṅlih aməkul-məkul aməkasi turvan iṅ tilam mulih sira bisâpi* sādhu kanin iṅ jaja kakuku kinampu-kampuhan*

jāti nikaṅ caritêṅgal aṅucap adavā n hiḍəpən ri hati śrī Raghu vr̥ddha sirâṅlvasi sukha ni pamukti nirêṅ nagara indriya tan vənaṅ iṅ viṣaya ri sira nir pakənanya kabeh kady asalin rasa tan parasa virasa salvir ikaṅ viṣaya hetu nirâsrah i kaprabhun ira ri narāryasutêṅ pasabhān kādbhuta de niṅ aṅastvakən i sira samâhaləpêṅ nagara saṅ ratu nora parāṅmukha sahana nirâvədi sampun anūt śrī Raghu paṇḍita valkaladhara magave patapan riṅ alas yāvat alas bhaya durgama paṅulilan iṅ mr̥ga siṅha baroṅ yan sinusuk patapan təkap ira paramarṣi sabhā vəkasan tonən ikaṅ vana śūnya tinaruka saṅ uttama niṅ karatun lvir suraloka təkânurun iṅ acala ramya katon ahaləp saṅ hulu kəmbaṅ anak vəsi haji sira milv anadin viṣaya tan tuna riṅ paribhāṣa sira dahat aləp nira yan paṅucap āpan inuttama tuvy apatih atiśayâdbhuta* vīrya nira tan hana śeṣa niṅ ambək aruhur i huvus niṅ aḍampa vuluṅ kveh nira saṅ bhavika prakaśita milu vikv anusup riṅ alas bhakti tuvin katəkan tuha masa niṅ avalkala nora hiner gīta lavan kakavin binisa pinakacaṇḍi nirêṅ* nagara māyvan akīrti palambaṅ amanis alaṅə̄ hibək iṅ patani vuṅkuk aṅambəkakən kavi milu kavilaṅ kavi vikv alavas sabhya jitākṣara hāsyakaraṇa pinakādi ni kavruh ikā lumbu valuh hajujə̄ṅ* rasa ni manis i lambaṅ ikā rinasan ṅhiṅ rva tivas dumadak lagi vinaca-vacâṅrahatîṅ* amaca

vikv âpa ta* ṅaran ira saṅ tamuy pili-pilih viku nagara sira akveh marək i sira maliṅ-maliṅ rusi-rusit kinahatakən ira dondonan inucap ira ramya-ramya niṅ aṅəṇḍəki turuṅ inucap yapvan binuru sinulagah* luput liṅ ira sor saphala niṅ alayar* heman vruh aṅaji sira tan palokika sadā marika viku haji prāyâpi lupa kadi lamur sināpa dumadak sira maləs ataña kastryan pva ta marək atəkən-təkən sira nəhər lumaku ginaməlan *de niṅ hyun ira pinakaśaṅkhapāṇya tumuhâpi pikun* api lupa

yeki palambaṅ ira mpu tapa tucapa ramya nikaṅ patapan vāṇḍira sampun agə̄ṅ pinakasabha-sabhā para śiṣya lanā campaka tañjuṅ aśoka pinatiga tinumpyatak iṅ harəpan bvat halu* piṅgir ikaṅ talaga ri harəp iṅ gupurâṅharəpi sampun avās paripūrṇa sahana-hana niṅ vaṅunan hinəduk bapra lumaṅkuṅ ikaṅ patani jamur alaṅv aṅuṅaṅ pasisi tal tirisan pinakādi ni tuvu-tuvuhanya* huvus pinahat saṅ para śiṣya paḍâṅigəl aṅiduṅ i kāla nikaṅ tutuban vet ni lavas naranātha lumaku viku muṅgv irikaṅ patapan mār kumətər sahana ny avayava ni śarīra nirâṅləvasi* rūkṣa samāpta ni təṅran ira paṅanumānan ira n* pəjaha kevalatattva ginəgvan ira pamariśuddha nira n ləpasa

sampun svargastha rājarṣi saṅ Aja vinarah mār gupe tvas nirâṅrəs dadyâṅganyâhaṅan tan sapira lara nira n kantuna śrī sudevī byakta pvâkālihan maṇḍyuṣa sira sahavan mantuk iṅ svargaloka tan pātma śrī narāryâja vinidhi pinəgat sih nirârāma-rena eṅgal mary âlarâpan vihikan i purih iṅ janma riṅ martyaloka an tan sthitya ṅ śarīrânut i hala hayu niṅ karma tan sāh aṅinte śaivarṣy* akveh ḍatəṅ maṅgəsəṅi śava maharṣînutus śrī* narendra byātītan bhasmi rājarṣi inañut* i təṅah niṅ tasik śūnya ramya sampun līlā* manah saṅ prabhu mari sivuhən kevalâṅgə̄ṅ kapūjān mānak tuṅgal prasiddha hyaṅ Atanu maśarīrâtəmah rājaputra anvam prajñā sirâpañji Daśaratha huvus kaprakāśêṅ triloka vahv âṅajy âhiḍəp vruh ri samaya ni rusit niṅ dhanurvedaśāstra

saṅ mambaṅ Kavidoṣa karva Jayavaspa sukha manəmu vīrya de haji sedəmpaty adulur marək silih asih tuməmu phala nikâmalar-malar sojar saṅ prabhu kevalôjar ika* siṅ savacana nika śabda saṅ prabhu vet niṅ sampun anəmvakən kahulunan satirun iṅ amalar tuhan-tuhan ekacchattra narendra saṅ para ratu praṇata paḍa vineh anugraha icchā nora kasaṅśaya prakaśitêṅ tribhuvana sira digvidikjaya* dharma kṣatriyadharma pinrih inivə̄ nira pamahayu dharma saṅ viku mvaṅ tar kevəhan iṅ giṇâmayuṅi rāt sakala tuhu-tuhu Prajāpati śrī devîndumatī lavan saṅ Aja tan bəsur aṭika-ṭikan sirâlavas śr̥ṅgārātmaka rāsikâṅdadi manuṣya sira pinakamaṅgalê daləm hyaṅ niṅ saṅgama pāvak iṅ paṅəsah iṅ śayana sakala janma niṅ rəṅih sih-sih jaṅga vəlas-harəp sah ira* saṅsaya lumuṅ avilət paḍâlaṅə̄

gərəh vruh i masanya ramya sinuluh dulur i raras i gandha niṅ səkar ya hetu nira lālanâməṅ-aməṅ iṅ taman aṅənəs akālihan kəmul* adoh kahiḍəpanya de ni pəluk iṅ havan i siluk ikaṅ latāgr̥ha hanâmbək ira mampirâpan asənət vulat ira muliṅânahā-nahā Smarāśrama təkânurun savaṅ ikaṅ taman aparimitêṅ giṇâlaṅə̄ həbun hana ri campakanya tumitis kadi ləṅa vaṅi rūmnya kāṅinan ləbūnya saḍək iṅ puḍak kahudanan* mrik avaṅi kumukus turuṅ paḍət* tinumpyatak arurva-rurvan iṅ aśoka sinalisir i layvan iṅ vuṅū ikaṅ talaga mesi pahyas iṅ acaṅkrama mahas-ahasâṅañut laṅə̄ susup-susup aśoka kombak i təpinya kasarakat arok lavan vərəh sare ni kalakānya sə̄h salaga niṅ mənur anuru-nurū sakêṅ gəluṅ kasaṅlad i pasir-pasirnya śava niṅ puḍak anak-anakan hibək parab narendramahiṣī lavan saṅ Aja madyus akaramas aśokapādapa paḍêñjuh akase vərəh harəp iṅ endah araras avəḍak-vəḍak lumut silih susu-susū təka ṅ* ryak adulur maṅupuk*-upuk anavva-navvani hilaṅ haləp ikaṅ saroja təkap iṅ mukha kadi śaśivimba riṅ bañu ri sampun ira məntas ahyas asalin jayaphala kadi raṇḍi kābunan rah iṅ ripukulâlah iṅ samara tattva nika sinuji niṅ surāṅganā paḍâyugala rūmnya jāti kadi kasturi vaṅi nika tan gave-gave* amānuṣa haləpnya mūlya sakaḍatvan ulih iṅ amarājayêṅ musuh muvah sira mahas marêṅ upavanānta ri paraṅan arəs gunuṅ-gunuṅ mahantən aṅuṅaṅ kaḍatvan alaṅə̄ dunuṅan ira sinuṅsuṅ iṅ gərəh *səlā ni paṅ i cāmaranya havan iṅ kukus asəmu valantagâṅadəg ləṅəṅ vatu karaṅnya manda tan avās kadi Gaṇapati kāmukan səkar diṅaryan asalah ri kāsih ira tan paṅisapu pinarək pijər maṅə̄ palambaṅ inikət nirê hati rasanya pinakapamavan putək hati linambaṅakən iṅ vilah pupugan esi kakavin alavas huvus ləbur linolya* rinasan manisnya viniveka vinaca-vaca de nareśvarī

rakryan riṅ ləpihan taṅisku k aṅaraṅ vaca ləburən i luhta yan tama rəsku n kavruhana n silih kirim ujar tinəkakən i huvusta medəman maṅke n prāpta muvah suvalta sipi viṣṭi nika katəṅərâmabak puḍak yadyastun ṅvaṅ apaṅgihâvaka palambaṅ ibu kadi vuruṅ hana ṅ bhaya rakryan yan priya rakryan aṅluruga māsku tumuta kita muṅgva riṅ ratha tan vismr̥tya kitêṅ təgal pacaru luh yat atutur i kasiṅhan i ṅhulun pañjiṅkv iṅ kakavin taṅis-taṅisananta ri hati yak araryan iṅ yaśa lambaṅkv îbu vunin rasanya hiḍəpən* ṅhulun aṅisapu maṅruvat prəman

nahan rasa nikaṅ palambaṅ alabuh saṅ ahayu sira mogha kasrəpan prapañca hiḍəpan sirê carita niṅ kakavin inayu rāgavādaka sumaṅśaya ri buddhi saṅ prabhu makolah iṅ ulah ika hetu niṅ vival miṅe musapi luh nirâṅisək-isək tinañan api kapəñcir* iṅ kuku prahāsana narendra rakva vihikan ri karaṇa ni vuyuṅ nareśvarī sumatya* ri laṅə̄ nira n paṅikəta ry avak ira nəhər aṅdilat pupur amaṅkvakən ameri luh tuhu-tuhu n kavi siṅ ulah ira n təkâmanis raras-raras i kapriyambadan irâṅhari-hari saha luh mavor taṅis yayī mapa panəmvanaṅkva kadi māsku hayu saphala rājaputrikā yadin susupanêṅ sahasranagara tribhuvana kapana n* kapaṅgiha hyaṅ iṅ kusuma sūkṣma tan vənaṅ aṅiṇḍarat avədi tumon kitêṅ taman tulis kanaka tan kəḍap kadi kapūhan aṅaraṅ alara n sinorakən təvək niṅ akurən lavan kita kakanta karakətan amaṅkvakən laṅə̄ hirəṅ siṅ ulah iṅ karas kapana yan paṅalapana rarasta riṅ prəman lulutkv i jarijinta riṅ kapana yan kavaśa taruhən* iṅ tanah garuṅ* səkar pisaniṅūn panampikakəna n hana kita ri kisapvan i ṅhulun ṅhulun ratu nirartha* kady usaṅ amak ri papaḍa nika sūryavaṅśaja sih iṅ hyaṅ aṅiriṅ ri sihta riṅ anāśraya pinupu ri layvan iṅ puḍak manahta kapalaṅ tuhun siha ni māsku pamuhun i kakanta tiṅhali unəṅku ri raras-rarasta yayi saṅva niṅ ajar-ajarêṅ vanāśrama ujar saṅ Aja mātra marma rinasan tuna-tuna maməlas-məlas-harəp nimitta ni manah narendramahiṣī vədi kaluputanê* nareśvara hilaṅ taṅis irâtəmah gərəh arūm luh ira suməmu riṅ hudan mulih aminta səpah esi de nira mulat kadi mavarah i hənti niṅ lara

lipur suṅsut saṅ lvir śaśadhara lumiṅsir karərəban parəṅ mantuk hinrət ni pakusikan iṅ cāmara mure i siṅgroṅ-siṅgroṅ niṅ* vatu havan irâlok trəbis arəs silih tuntun ṅkānêṅ juraṅ arupit avvat vvad aləyə̄ guhā lambuṅ tistis kaləṅəṅan ikâvarṇa siluman asəp ri jro lāvan sarasija pamūjā mrik avaṅi kukus lagy amrəg tavvan alivəran iṅ ketaka məkar bañunyânūt rəṅkā ni mukha nika sumyuk manutupi sudevī līlâpiṇḍa vayaṅ adəgan muṅgu ri daləm manah saṅ svāmi prīti* maṅudaṅ-udaṅ santən arupit anāntvâṅlīlâñumbana kinəliran vve kadi jamaṅ kiduṅ lālityârūm havan ira mulih ramya tumurun huvus prāptêṅ kalpadruma pinarigîṅ ratna kinaraṅ turuṅ mampəh sub niṅ hariṅət aṅəbun tūsnya ri jaja aganty aṅdəmvan*-dəmvani mukha tan imbā silih usap gəluṅ mury âtə̄b lāgi pinəpəkakən mvaṅ karatala

an kāmīrasa saṅgamênulahakən narapati kalavan nareśvarī vvantən parvata riṅ pasir təpi kidul hinəmukan* i kukus niṅ ampuhan riṅ Gokarṇa ṅaranya ramya kahujuṅ* saray i suku nikâməgat harus ṅkā n* līlâməṅ-aməṅ bhaṭāra mihat iṅ timi vijah aṅalūṅ* hanêṅ tasik kāla dyah Hariṇī śināpa ri pamighna nika tapa madadya mānuṣa mogâsih vəkasan dvijarṣi Tr̥ṇavindu ri panaṅis ikâmaṅun vəlas ndan rakvânta ni* śāpa saṅ rəṣi səkar sumanasa havananya mantuka ndah yêkī ginave bhaṭāra Paramārtha karaṇa nika don ikêṅ jagat saṅ saptarṣi sulakṣaṇâhaləp aseva satata sira śuśruṣâguru ndān aṅhiṅ rəṣi Nāradâṅgupit inuttama tuvi kavi gīta susvara vinvītan lalitâmanis tinəṅahan* raras inapi tinuṅtuṅan laṅə̄ kālap citta bhaṭāra mūrchita saśoka hati nira kaləsvan aṅrəṅə̄ lvir strī-stry arja kavîṅgitajña para gīta pavulatan i piṇḍa niṅ gupit ṅkānê tuṅgul ikā səkar sumanasênikət asəmu sadak hanêṅ gəluṅ kady ânumpiṅakən tanah ri səḍəṅ iṅ tabəh inənah i tambaṅ iṅ valuh mvaṅ kady âsidəhâṅrəṅih-rəṅih* i pəs* ni ləṅən ika lanā katiṇḍihan sr̥ṣṭi hyaṅ Madanâtikaṅ sumanasa mrik inalap iṅ aṅin huvus ləvas kāry âśâlara piṇḍa niṅ gupit arūm savaṅ anaṅis inambilan səkar akveh ṣaṭpada maṅrubuṅ milu katūt humuṅ alivəran iṅ nabhastala saṅ hyaṅ lek alaṅə̄ lumə̄ṅ səmu nikaṅ sumanasa ḍumavuh sakêṅ tavaṅ harṣa śrîndumatī mulat ri səkar iṅ sumanasa kadi tan pamatyana * āpan de ni laṅə̄nya kāṅinan amet ri sira katəmu riṅ pasaṅgaman ndātan vruh sira yan sinādhya ya ta hetu nira kahənəṅan pijər maṅə̄ ndah yêkī karaṇanya śīghra tumibā ri jaja nira kasuṅsaṅ iṅ susu ndātan vyartha ḍavuhnya māti sira denya tuhu vəkas i śāpa saṅ rəṣi mrəm tan sāra tibê kisapvan i vulat saṅ Aja milu tibā sirâpupul kālih māti sirêṅ tilam tuhun udhāni saṅ Aja vəkasan sirâṅlilir akrak taṅ sakaḍatvan aṅgyat adadak taṅis ika ri pəjah nareśvarī gə̄ṅ niṅ duhkha kabhukti de saṅ Aja tan papaḍa vəkas i tībra niṅ lara kāla śrîndumatînalap ni səkar iṅ sumanasa mulih iṅ surālaya kāry aṅhol śava koṅ* pinakpak inamər tinañan ira təhər pinaṅkvakən rəñcəm tvas nira hetu niṅ luh aṅasapta kalara-lara de nirânaṅis rakryan saṅ lumah iṅ kisapvan ahurip karika kita məne n malih yayi hayvântənkv asuve* pəjah yayi tutur-tutur ibu paṅucap kitê ṅhulun heman* māsku śavanta tiṅgalakənanta səḍəṅ ahayu kāsih i ṅhulun maṅkin rūkṣa tuhanku tan patuluṅan dudut aku ta* dulur-dulur pəjah *prāṇaṅkv Indumatīṅku māsku pavuṅu ndak amalaku sərəh lavan pucaṅ aṅgy-aṅgī saha pastikêbu palakuṅkva muvah i kita hayva tâsuve agyâveha səpah sakê vaja kakanta yayi ri kita māsku paṅlilir* sih-sihkv î kita tan pahīṅan ibu sugyan asəbəla hatinta yan pəjah maṅke n* tan pakakāraṇa ṅ lara patinta pəjah i taṅan i ṅhulun kita t asy-âsih pavarah ri doṣa ni kakanta karaṇa niṅ atiṅgal i ṅhulun paṅher māsku valuy muvah ri śava rakryan apa haməṅanaṅkv inaryakən suṅsuṅ vāhu ḍatəṅ kisapvakən anakta si Daśaratha māsku həmbanən karvânakta karîṅ kaḍatvan aku denta yayi kadi linad tvas i ṅhulun sambatnya n patañê nimitta ni patinta kavəlas-arəp aṅgaməl taṅan yâṅde syuh ni hatiṅku mār kapənətan* humənəṅ apəga tan* vənaṅ mulat aṅhiṅ luhku lavan taṅisku sahur i ṅhulun ibu ri kədə̄ nikâtaña yêkī sambat irânaṅis kasih-arəp kaluputan i pəjah nareśvarī maṅgā matya matêṅ aṅə̄lakəna duhkha paməkas ira saṅ huvus pəjah maṅke n tiṅhal amaspadākən irikaṅ kusuma kasəlaṅan taṅis nira de niṅ krodha lavan putək hati mijil paṅuman-uman irêrikaṅ səkar ai koṅ kəmbaṅ apaṅkva ko kuṭila kevala ḍumavuh amatya-matyani denya n tan rujitəṅkva ko pəjahi tâku saha bala sarājya həntyakən maṅke ko tumibê jajaṅku ri hatiṅkv apa karaṇamu tan pamatyani sākṣāt ko viṣapuṣpa dadyan i manah niṅ aṅupət agave prahelika lāvan deṅkv anahā-nahā ri dadimu n* kusuma təmahan iṅ varāpsarī saṅkêṅ svarga təkânurun harəp anivya ratu huvus akīrti riṅ jagat ndātan harṣa n amarva hetumu n amatyani ri kasi-kasihku putrikā riṅ śūnya n valuyâpsarī marəka tan sah anilihana saṅ huvus pəjah nā de śrī naranātha mojar irikaṅ sumanasa səkar iṅ kadevatan sakveh saṅ rəṣi śaiva sogata kaparcaya haji marək aṅlavad-lavad mvaṅ ḍaṅ hyaṅ karuhun purohita nareśvara paḍa humatur marê daləm nirvighna ṅ ruməṅə̄ pavitra ni taṅis-taṅis ira paḍa vr̥ddhapaṇḍita

səḍəṅ tinaṅisan narendramahiṣī lumay avənəs apan huvus pəjah taṅis nr̥pati rakva mātra rinəṅə̄ nira tuna maməlas-məlas-harəp nimitta nira n aṅlilir tutur irâmuhara vəlas irê nareśvara* aṅiṅkin atalaṅkup amvit i nareśvara pəjaha nəhər maṅañjali prabhuṅku huniṅan taṅisku rasa mamvita pəjaha ri jə̄ṅ nareśvara hilaṅ manə-manəhta tan təmu kabhaktin ika* pahalavə̄ kita prabhu patikta kavəlas-harəp syapa vidhin haji tumuta rumakṣa riṅ* hənu ahā haji valiṅku ramya parəṅâku pəjaha kalavan kita prabhu narendra varahən ṅhulun ri paran iṅ mati tuduhakənanta riṅ hənū ndya taṅ hiḍəpən i ṅhulun karaṇa niṅ maluya silih asih lavan kita apan kasi-kasihta ratnavanitā juga təmahana ni ṅhulun pəjah sahasraśatajanma janma ni patikta huluna pakənaṅkva de haji

tr̥ṣṇāṅkv i nāthaṅku mapôlahaṅkva hilī ni luhtâkilayū hiḍəpku aṅrəs hatiṅku n ruməṅə̄ taṅista ay ay ṅhulun matya tuluṅ laraṅku svāmiṅku nāthaṅku vəkasku maṅke marək* ri paṅkvanta cinumbananta amvīta mūrâku sakê jajanta lalun patiṅku n lumah iṅ kisapvan yadyan kitâṅjanma muvah dəlāha təṅahku tan sāha sakê ləṅənta harṣanta rokən kalavan lulutku iruṅta sotpattya lavan pipiṅku nāhan taṅis śrī naranāthapatnī rasâməlas-harṣa təkap nirâmvit sampun sirâṅañjali satyabhakti pəjah sirâgəgvan i jə̄ṅ narendra nitya prakampâmbət i madhya niṅ strī prabhāva saṅ satya matî* kisapvan truh-truh luh iṅ śoka hañar tinambaṅ kətug kətīg* iṅ vahu-vahv apaṅgih bhakty âtuhan dyah Jayaluh tumuṅkul mulat kapūhan ri pəjah sudevī tan sambhavā matya sirâpan anvam hiḍəpnya ri tvasnya nəhər masambat āḍā tuhankv Indumatīṅku māsku ṅhulun tuhan pun Jayaluh kasihta yêki n humaṇḍəm ri padadvayanta asiṅ sapatyanta tumūta bela līlā tuhan pun Kavidoṣa vinvit maveh tumūtêka pəjahta māsku āpan katon milva nipun dəlāha namaś Śivāya n pəjaha prabhunta patrəm pabelan vulatîbu yêki umigrahâtmā ni manəhta maṅke nāhan vuvusnya trus avaknya* mūrcha pəjah tumūt satya ri jə̄ṅ sudevī vahv aṅlilir śrī naranātha meṅət apan katuhvan lara niṅ kapatyan keṅər mukha śrîndumatī kaləṅgak huvus katon līna yayan tinaṅhi induṅ pavuṅv îbu lihat kakanta ikaṅ turū hayva ginə̄ṅta māsku āḍā pəjah kapva tuhanku maṅke dumeh si tan paṅlilir an tinaṅhi atyanta sihtêry aku tan pahīṅan ujarta matyê kapatiṅku liṅta maṅke kitâniṅgalakən huripku valiṅku tuhv âsiha mithya māsku ṅhiṅ māsku mārgaṅku sukhêṅ kaḍatvan huripku tuṅgal kalavan huripta luṅhā pva jīvanta sakê śavanta hilaṅ pva jīvaṅku sakê hatiṅku nāhan śava dyah Jayavaspa māsku tumūt avās bela təlas mapatrəm svāminya* lāvan tanayanya kāri laranya tuṅgal kalavan laraṅku nā de narendrâṅucap asrət ahrək mavor taṅis luh nira maṅkin adrəs ndan soca devîndumatî tibānya paḍânaṅis rūpa nira n paḍâṅluh sampun śava śrîndumatī pinuṇḍut *sakê kisapvan saṅ Ajâlupâvak mūrchā pəjah sakṣaṇa śīghra meṅət tuhun sira glāna masū masambat induṅku māskv Indumatīṅku paṅher ah ah yayi ndī parananta maṅko āḍâlalis tan panahā laraṅku tuhanku tolih kavəlas-harəpku nāhan taṅis saṅ prabhu mār rasanya* tamuy nira prāpta maharṣi vr̥ddha ndan rakva saṅkêṅ bhagavān Vasiṣṭha narendra masvāgata sārjavâtvaṅ kṣāntabya rānak mapa don maharṣi ḍatəṅ səḍəṅ niṅ lara tan patambān saṅ paṇḍitâtah karaṇanya marya prasiddha śuddhāmr̥ta saṅ munīndra

kṣama yogya de saṅ ahulun mataña ri ḍatəṅ bhujaṅga haji riṅ nagara bhagavān Vasiṣṭha maṅutus marəka tuməkākənôcapan irê nr̥pati haji rakva hayva kalaran dahatən purih iṅ dadi n dadi kalotakəna lara duhkha mogha tumuvuh riṅ avak ya tikā prihən saṅ ahulun paḍəmən suraputrikā kəta saṅ Indumatī subhagêṅ triloka maṅaran Hariṇī śuci rakva janma nira śuddhy anulus sira devatī niṅ araras pinuji ri səḍəṅ dvijarṣi Tr̥ṇavindv atapa hana saṅśayê hyaṅ Amarendra mulat i mahāprabhāva nira riṅ patapan tinahā nirâṅadəha kendran ira irikā ta rakva sira saṅ Hariṇī katuduh mamighnana tapâṅənəsa i ḍataṅ nirêṅ patapan epv aputək bhagavān sirâsəgə-səgəh ya masih suraputrikâṅucapakən hyun ira marək iṅ dvijarṣi səḍəṅ iṅ majapa amahayva kəmbaṅ ira tan kasaha atəhər manaṅhuluha riṅ śayana

mavuyuṅ dvijarṣi vəkasan rumasa-rasani de nirâṅucap tumuluy śināpa nira tan valuya muvah i jə̄ṅ Surādhipa jənəkêṅ manuṣyapada kevala matəmaha janma mānuṣa ujar iṅ viśeṣapuruṣa pratiniyata tətəpnya tan vuruṅ i ḍavuh ni śāpa bhagavān sira kapəgan ikêpu keraṅan anaṅis nəhər marək aminta tinurunan anugrahâṅədə̄ bhagavān mulat ri kavəlas-harəp ira vəkasan sirâvəlas ikaṅ antaśāpa səkar iṅ sumanasa paṅanugrahêrika

irikā n pəjah ta sira riṅ patapan tumuluy prakāśa dadi rājasutā i Vidarbha martyapada rājya nira Krathakeśikendra makavīja sira pira taṅ tahun lavas irêṅ nagara mətu devatī nira n arūm rumara səḍəṅ iṅ svayəmbara kinārya nira naranātha kahyun ira nora muvah matutur sirê səḍəṅ ira n panivi i narendra riṅ surapada n patəmu dumadak pva saṅ prabhu hilaṅ rumuhun *dadi rājaputra sira rājasutā* akurən muvah sukha təkêṅ karatun təka ṅ antaśāpa maṅutus muliha maluyê svajāti nira devasutā tumibā ṅ səkar sumanasâməjahi* kaliṅanya saṅ prabhu hade kalarā- kəna saṅ pəjah mulih iṅ Indrapada apa tan vuruṅ haji matəmva muvah kalavan sirêṅ amaraloka hələm nya vuvus maharṣy apitutur i* haji ahəbaṅ-həbaṅ lara nirâtəlasan umulih maharṣi tumuluy kalaran pitutur nirê saṅ Aja rakva* tumūt

sampun śava śrîndumatī bhinasmi murub siluṅluṅ nira ratnacetya maṅkin prapañca nrəpati vyamoha vvaluṅ tahun kāla nira n katiṅgal

irikā ta saṅ Daśarathâṅadəg anilihi kaprabhun haji buddhi saṅ Aja sukha harṣa mulat i kasiṅha-siṅhan ira digjayêṅ jagat tadanantarêrika ta buddhi saṅ Aja sivuhən sirâlara monəṅ i hayu saṅ aniṅgalakən mulih iṅ surālaya maluy surāpsarī

hana tīrtha nirmala vəkas niṅ anindyaśuci i patəmvan iṅ Suranadī kalavan Sarayū naranātha karva Kavidoṣa pəjah lumabuh mulih iṅ surālayapadântya* pinaṅgih ira Jayaluh dadi hyaṅ aṅaraṅ rumuhun katəmu* tumuluy kataṅgamaṅ anəmbah i jə̄ṅ saṅ Aja anaṅis nəhər mulat i saṅ Kavidoṣa marək umucap lavasnya mapasah mataṅis-taṅisan parameśvarī haji sirâṅdadi devasutā surarājya* Nandanavanākhya katəmvan ira pinəkul pinaṅkvakən aveh pipi vet niṅ unəṅ asalin śarīra paḍa mārdava rūpa nira saṅ apiṇḍa puṣpa tamuyan bhramarâṅarəki kamatəṅgəṅən sira mulat ri papaṅgih ira kadi tan patəmva muvah iṅ* paḍa sūkṣma pəjah madulur taṅis vara-varah nira marma dahat

saṅ sākṣāt hurip i* ṅhulun kavəkas iṅ nagara ri səḍəṅ i ṅhulun pəjah duhkhantê ruhun i ṅhulun mulih iṅ Indrapada karaṇa niṅ lanânaṅis maṅke n prāpta paran təmunta* kaka de ni kavəlas-arəp i ṅhulun maṅə̄ aṅhiṅ luhku panuṅsuṅaṅkva tarimanta kaka vijil i rāga ni ṅhulun induṅ tan sipi kapva gə̄ṅ i lara niṅ huvus atəmu rinuddha niṅ Vidhi saṅsāraṅkv aṅajap tavaṅ karaṇa niṅ ḍatəṅ i kita katalyan iṅ hayu ndan maṅke n təka śūnyahasta yayi kevala ḍatəṅ aṅisapv aṅolakən aṅhiṅ kūṅ ulih i ṅhulun saha taṅiskv asəkəl i hati māsku sanmatan tonton ku n rumuhun pəjah karika hetu niṅ anəmu larônəṅ antya ya tontonən taṅan i ṅhulun ri kita yan panipati nəhər aṅdələ̄ mata mvaṅ tan kram vaja ni ṅhulun kadi humer kita masuṅa səpah sakê vaja milv âkuṅ təṅah i ṅhulun kaka paṅavruhana lagi kaluṅsuran tapih hāh svāmiṅkv alavas dahat kita tan antuk iṅ amarapadâparan* hiner mūrchâprih ṅvaṅ aṅantyakən ri ḍatəṅanta tumutura ri līna ni ṅhulun tr̥ṣṇantê sukha niṅ hanêṅ kabinihajyan amuhara lalista ri ṅhulun deṅkv ânarka ri tan təkanta tumuluy pilih aharəp* i patya ni ṅhulun aṅkən rātri ri tambvaṅ iṅ vulan avā ṅhulun aṅaraṅ anaṅhulun puḍak de ny ûnəṅkv i kitâṅutus taḍahasih tuməkakəna taṅisku riṅ kuləm kālaṅkyaṅ jarumankva* riṅ masa kapat ḍatəṅa ri kita kāla niṅ rəməṅ her-herən ri təkanta kevala kitâtiśaya kadi hinundaṅ iṅ patər lvah* luh vādhaka ni ṅhulun drəs i hilī nika kadi minahâməgat havan vvat goṅgaṅnya gaḍuṅ mure səkar ika mrik avaṅi sinaluṇḍiṅ iṅ puḍak luṅgah niṅ katirah lumuṅ pinakagəgvan i təka niṅ aṅin kadînayun aṅlaṅvākən ululnya puṣpa vinaṅun hinəduk i həlar iṅ madhubrata ṅkâku n ton kakavinta riṅ vəla-vəlah paḍa-paḍa tinatā limaṅ viji vvantən ṣaṭpada kanyakânaṅis i saṇḍiṅ ika karaṇa ni ṅhulun mulat harṣaṅkv ânuculî talinya tumuluy kinisapu hiniḍəp-hiḍəp kita tan pātmâkv amacânaṅis katitisan luh araras ikaṅ akṣarâmanis

saṅ apiṇḍa* madhubrata taruṇa manəhta savaṅ salaga vinaraṅ-varaṅ iṅ masa kapat alaṅə̄ kararas-rarasan irikā ta tuvuhkv asana vavaṅ alum kita kāry anaṅis maluyā sahanêṅ katiga kaka maran ṅvaṅ atəmva muvah kaka yan kita lūha niṅ amaca vilāpa suval piniṅit təmahaṅkva taṅisnya vinuni sinamar-samar iṅ kakavin yan adadyana ketaka kita təmahaṅkva tulisnya ṭikā kaka de ni laraṅkva pinasahakən iṅ Vidhi niṣkaraṇa

vruh kv î tan vənaṅanta dhāraka kumə̄lakəna* lulut unəṅta ri ṅhulun vvat niṅ lvah luh ariṅguṅan havana saṅ prabhu tumutur i līna ni ṅhulun tiṅhaltê lara ni ṅhulun vinaṅun akṣara rasa kakavin* pralāpita byaktâdadyana luh tuturta ri hatinta yak amaca ri lambaṅ i ṅhulun saṅ kārî nagari ndi sihta vinaliṅku tumuta saparanku tan saha ry antuk ni ṅhulun iṅ surālaya təvək niṅ anaṅis apasah lavan kita kālanta n* panulis karas mvaṅ aṅikir tanah i kuku ya konəṅ i ṅhulun kāpan svāmi muvah ṅhulun varahananta kakavin anəhər pinaṅkvakən lāvan pājara ni ṅhulun hana gaḍuṅ lumuṅ avarah i tiṅkah iṅ hənū makveh luṅnya hanan paṅulvan aṅalor hana lumuṅ aṅidul ya tan tutən vvantən luṅgah ikâṅavetan amənər səkar ika kadi kəmbaṅ iṅ laṅit aṅhiṅ tūtakənanta riṅ gagana Nandanavana tinujunya nora len

yayi rasa ni palambaṅtêki mār ṅhulun amaca muvah inənahakənku ry uṅgvanyâlavas alaṅə̄ lumaku-laku tumolih rākantêbu karakətan pavarah ika tinūtkv induṅ maṅke* n təka ri kita tarima yayi paṅolkv î rakryan kuṅkv amarəpəhi syapa parana ni rāgaṅku n harṣaṅku katulaka hənəṅakəna taṅankv âmet-met mogha kajənəkan sapamalaku niṅ onəṅ rakryan hayva pinihəran

rakryan hayva kitâṅhəmū guyu nəhər miṅay amiru-mirū tapih lukar rəñcəm tvasku mulat raras paran ikā ṅaran ika ləṅəṅ aṅligā təṅah ndan mogârəṅu tan tulus vaśa kita n paṅutu taṅan inambilan tapih māskv akras karikā manis-manis i denta lumiriṅ anamar* linurvakən

nāhan paṅucap-ucap irêṅ taman sinəlaṅan prəman uvat iṅ akuṅ sasvarga paḍa sukha tumon i ramya ni papaṅgih ira silih asih ṅūnî səḍəṅ ira ratu cakravarti sukha niṅ ratu tinəmu nira maṅke n sukha riṅ amaraloka maṅdaśaguṇê sukha nira mava* rāt riṅ Nandanavana sira karva raśmi niṅ asaṅgama hinarəp ira riṅ pūrṇama mijil amaḍaṅ vulan sira marêṅ taman aṭika-ṭikan riṅ svapna tuvi sira yayâmanəh-manəhi rāga nira tan avanəh kiṅkiṅ ni hati nira miniśra kāraṇa ni tuṅgal i turida nira riṅ Nandanavana vəkas iṅ kathā Sumanasāntaka riṅ aji Raghu pinrākr̥ta rasa kakavin tinīrthakən i jə̄ṅ nr̥pati rasa laṅə̄ sih kāraṇa nira n anumāna mājara rikaṅ paṅikət amanisa śuddhāmr̥ta varah ira hetu niṅ kadi gaḍuṅ lumuṅ anəmu kapat

sampun kekətan iṅ kathā Sumanasāntaka vinaṅun ahəmbanan laṅə̄ kāla śrîndumatī lavan saṅ Aja mantuk iṅ amarapadâkurən muvah yêki tambay ira mpu Monaguṇa milv aṅikət-ikət amarṇana ṅ kathā ṅhiṅ śrī Varṣajaya prasiddha guru niṅ guru-laghu sira hantusâmuruk dīrghāyuṣya janapriyā saṅ amacâmahiḍəpakəna saṅ harəp vruha nirvighnâstu saṅ aṅrəṅə̄ sakaharəp nira katəkana mogha sanmatan salvir saṅ makapustaka ṅ Sumanasāntaka kasihana de nareśvara siddhi mpuṅkv i garuṅ tirun saṅ anulis katəkana sasinādhya saṅ viku