hana carita mijil sakeṅ cipta nirmalā, ri tlasira baṭara mojārakna saṅ hyaṅ ḍarmmā riṅ vihāra buḍḍicipta, milu taṅ vatәk ḍevata kabaih, mamujā ri bhaṭara sri virvacanā, liṅnira akrobyah ratusambhavah, atitaba_h, amvagasidḍi lokyahi brajapani, tlas karuhun taṅ vatәk lokapala, lvirnya, indra, yamā, bharuṇa, koverā, beṣravarṇna, ya ta kaṣara kabaih, mamujā ri baṭara sri virvacanā, ri hūvusnira mojārakna saṅ hyaṅ ḍarmmā, ri vatәk ḍevata kabaih, amita sira muliha riṅ svargganira svavaṅsvavaṅ sakala maray ta. hana ta yakṣā si kuñjara karnṇa ṅaranya, ya ta maṅәnakna tapa ri lambhuṅ saṅ hyaṅ mahameru, hiriṅnya lor vetan, ri kaḍiranikambhәknya,

mvaga ta kapalāṅalaṅ riṅ jānmanya, manuśa tan manuśā, ḍevata tan devata, ya ta mitanya pagave tapā, ahyun kahvata jānmanya ri dlahānya, haṅrәṅә pva yā yan bhaṭara sri virvacanā, maṅḍarmmakәn darmma ri vatәk ḍevata kabaih, lumampaha ta ya mamujā ri baṭara sri virvacanā, a hyuṇ ta ya rumәṅәha varah bhaṭarā, yekiṅ maṅke bavanya.

Ø sәg, ñәg, ləs marma tan asuve riṅ avan, datәṅ ta ya riṅ budḍicinta, ri kahyaṅan bhaṭara śri virvacanā, tumuluy ta ya mamujā ri bhaṭarā, ri tlәsnya mamujā, manәmbah ta ya, liṅnya, uḍuh, sajña bhaṭarā, kasihāna ta ranak bhaṭara pvaṅkulun,

varahən ri saṅ hyaṅ ḍaṙmmā, sakalā ri kapalāṅalaṅ riṅ jānma ni ranak bhaṭarā, ṅuniveh pasambhulihira dadi jānmā, apan hana tinvan i ranak bhaṭara, ikaṅ vvaṅ riṅ madyapaḍa, hana hadyan hana hulun, apa dumehnya maṅkana, apan paḍa gavenya bhaṭara ika, mapa ta kaliṅan ikā, ya ta matanyan atakvan i ranak bhaṭara, nḍan varahən i ranak bhaṭara pwaṅkulun, ri kaliṅan ika, ṅuniveh ri kahilāṇa ni rānak bhaṭara, varahənira saṅ hyaṅ ḍaṙmma pvaṅkulun, uḍuh hanāku saṅ kuñjarakaṙṇna, atyanta ḍahat dəbhya niṅ tanayanku, ri hyunta vikana ri saṅ hyaṅ ḍaṙmma, mvaṅ vnaṅ tumakvanakna sambhulih iṅ dadi jāṇma, hāpan hana manuśa tinvan kavruhana ta ya paṅilaṅ klesa saṅ hyaṅ ḍaṙmma, yatapin maṅkanā, yayān tan patakvana juga ya, rasa saṅ hyaṅ ḍaṙmma,

apan śukā ya hiḍəpnya, mapa ta suka ṅaranya, amaṅan iṅinum, mahmas mahulun, manaṇḍaṅ, nḍah ya ta suka ri hiḍəpnya ṅaranya, tan vruh pva hanaku kita tumākonakna saṅ hyaṅ ḍarmmā, kunəṅ mne kvama varahənko ri saṅ hyaṅ ḍarmmā, matanyan enāka paṅavruhāntā, mvaṅ panarawaṅa niṅ panvantā, mvaṅ pasambulih iṅ dadi vvaṅ, matanyan hana haḍyan hana hulun maṅke haneṅ rat, harata rva, kunəṅ koṇta kanyu mariṅ yamāni rumuhun, tumonton ikaṅ papā kabeh , ya tikā kavuhananta rumuhun, yan ḍataṅ ta kamu sakerika, samana ta kanyu varahənku ri saṅ hyaṅ ḍarmma, nḍah laku ta mareṅ lanā, patakvanta riṅ saṅ yamaḍipati, ḍumeh hikaṅ pāpa, yan paṅidəp añcagati saṅśarā, maṅkana pavarahhākna ri kanyu,

Ø uḍuh sajña bhaṭara, nḍan lumāmpaha rānak bhaṭara pvaṅkulun. seg īs, sighih jāti niti yakṣa, suməḷm tā ya ri jālaḍri, maniṅkab ta ya vinḍu jālaḍi, ikaṅ bābahan mareṅ yamalokā kagyat ikaṅ vatək hyaṅ ḍe saṅ kuñjarakarṇna, ya ta mātanyan kumtug tikaṅ lvaṙ kidul kulon mvaṅ vetan sḍaṅ ātḍuh ikaṅ antaralāyā, kumədut ta bhathāri prativi, umāmbəka rasa bubūla, ugah agra saṅ hyaṅ māhameru, agiyəgan tikaṅ gunuṅ, kumucak bañu niṅ sagārā, umiriti karaṅ bhajra, katub ḍeniṅ barat, seḍuṅ halisus, alivran tikaṅ viḍyatih, vaṅkavaṅ, kuvuṅkuvuṅ, togor, tugər, laraplarap bhar, samaṅkana dur bək manikab vidu jāladi, kambah ḍe saṅ kuñjarakarṇna, ya ta matanyan kagiringirin gūmirisin ta saṅ kuñjarakarṇna, turaṅgama rutapavānvagami, aḍrasaṅka ri bhayu, lāmpah iṅ saṅri lamphahnira saṅ kuñjarakarṇna, ḍatəṅ ta ya riṅ catuspata, ri pāsampaṅān iṅ avan, hana ṅalor, hāna ṅidul, vaneh maṅetan maṅulon, ikaṅ maṅetan, mari kahyaṅan bhaṭara isvara, bhaba _ _ risyara ulihan saṅ viku sakti matapa

Ø ikaṅ maṅalvar, mariṅ kahyaṅan bhaṭara visṇūpaḍa, uihan saṅ sureṅ rana ika Ø

Ø ikaṅ maṅulvan mariṅ buḍapaḍa ikā, kahyaṅanira hyaṅ māhāḍeva ikā, ulihanira saṅ sura ḍanā ika, saṅ akratipunya riṅ maḍyapaḍa

Ø ikaṅ maṅidul yā tika māriṅ yāmaloka ikā, kahyaṅan bhaṭara yamāḍipati ika, ulihan ira saṅ āgave hāla ikā

Ø catuspata ikaṅ pāsampaṅan iṅ avan, i rika ta ugvan iṅ saṅ ḍvarakālā, ya ta māṅmit ikaṅ bhabhāhan

mareṅ svargga, lavan mareṅ yamanī ikaṅ ḍvarakalā manuḍuhākn ikā, ya tikā kapaṅgiha ḍeniṅra saṅ kuñjarakarṇna Ø satiṅāl ikaṅ ḍvarakala, ri saṅ kuñjarakarṇna, sinantonya ta yā, liṅnya, ayāyi sapa kita māra ṅke, ikaṅ catuspata, mapa ḍvaṇta mara ṅke maṅka liṅ nikaṅ ḍvarakalā, sumahur ta saṅ kuñjarakarṇna, liṅnya, aku yākṣa si kuñjarakarṇna ṅaran i ṅulun ikaṅ atapa ri lāmbhuṅ saṅ hyaṅ mahameru vetan lvar, kunəṅ mita ni ṅulun mara ṅke, kīnvanira bhaṭara ṣri virvacana, ṅulun kinvan mari yāmanī, nḍan ṅulun atakvan dalan mara ṅke, sumahur ta saṅ dvarakalā, oh maṅkana kupva, uḍuh atən i ṅulun laki, saṅ kuñjarakaRrṇna, siḍḍa bagya ta kita bapa yan

ḍatəṅ, ndānarayyantən i ṅulun kunaṅ pva ikaṅ havān mareṅ yāmani tinakvanakən yantən i ṅulun, ndah yeku ikaṅ avān aṅidul tut deṇta, igaligāl ta kita yāyi, nyapan tahan kita katkāna ptaṅ, apanya ptaṅ pinakabayānya maṅke, ya ta matanyan mava ḍamar saṅ mātivativa ri maḍyapaḍa, pinakasuluh iṅ atmā, yan təkeriṅ ptaṅ, apan rasakna kipəla nikaṅ ptāṅ yan tka,, lavasnya pituṅ vṅi, hilaṅ ptaṅ Ø lavasnya yan tka, uḍuh kakā ni ṅulun saṅ dvarakalā, maṅkana kupva, ndan amīta lumāmpaha ṅulun kaka saṅ dvarakalā, aum yayi, lumāmpah ta saṅ kuñjarakarṇna Ø seg, ləs, mārma tan asuve riṅ avān, datəṅ ta ya riṅ bumipatana, hana ta ya ṣrijāti dumilah sadakalā, lonya sendriya, sendriyā ṅaranya, svalih iṅ mata tumiṅal,

hāna ta bābhahan kapaṅgiha ḍenira saṅ kuñjarakarṇna, inəbnya tambhagā, leregānya salakā, tuvin kucinya mas, tabak lalenya vśi, ikaṅ havan saḍpa sarvah lvanya, inurap rinātaratā ginvamaya riṅ tahi niṅ ləbu kānya, tinānəman ta ya hāndoṅ baṅ, kayu puriṅ, kayu masḍaṅ asinaṅ, vinvaran āsəp ḍupā, mrabūk arum āmbhuṅ nikā, sinavuran kəmbaṅ ura, pinujān kəmbhaṅ pupuṅvan, ya ta matanyan maruhun ruhunān ikaṅ vatəkāṅ papa kabaih vinaliṅnya ḍalan mariṅ svārga ri hidapnya, livat ta ta saṅ kuñjarakarṇna sake rikā Ø seg, ləs, ḍatəṅ ta ya riṅ tgal petrabavāna, sayvajñāna lvanya, maṅaḍəg ta saṅ kuñjarakarṇna, ri tpi nikaṅ tgāl agnikvarava, tinambhak iṅ api təpinya ri tṅah hikaṅ bumipatanā, ya ta ugvan ikaṅ kayu kalpa kandagā,