Saṅ Hyaṅ Hayu

ndaḥ saṅ hyaṅ hayu ikaṅ ajarakna mami riṁ ṅvaṅ kadi kita, kunaṅ deyanta humədapa sarasanikeṅ vuvus mami, hayva kita Umavay rasa carita, mvaṅ kalpa rakva manavas ta, ndya ka ri lvirnikaṅ rasa carita mvaṅ kalpa rakva manavasta, yar kvaliṅanta ri kami, Aum·, nihan ta lvirnya, kadyaṅganiṅ viku maṅucap ta caritanikaṅ hyaṅ devata, kalpa pur va batara batari hana ṅuni, An paka yuga ṅ brahma, visnu, Isvara, mahadeva, mvaṅ kusika, garga, metri, kurusya, patanjala, mvaṅ kagəlarani yaksa, pisaca, prata, buta, pitara, sivah buda; yeka rasa carita ṅarannya, Adva rakva manavas ta ṅaranika, syapa ta ri vənaṅ myaktakna Ika, lena sakeṅ rakva juga Ika, nihan ta vaneḥ anuṅ kalpa rasa carita, vijilmnya saṅkariṅ aji, Ina jarakən saṅ seva sogata, pitu rakva patumpaṅnikaṅ buvana I svar ta mvaṅ i ruhur ta rakva, ndya lvirnya nihan·, prativi ṅaran ikaṁ ṅ buvana kahananta, I svarnikiṅ patala, I svarnikaṅ patala nitala, I svarnikaṅ nitala sutala, I svarnikaṅ sutala talantala, I svarnikaṅ talantala talaniṅtala, I svarnikaṅ talaniṅtala mahatala, I svar mahatala [atyanta] atyanta Arta- patala, nahan lvirnikaṅ sapta patala, I svar ta rakva, kadi taya patapniṅ tapal inələp ri vakul rakva patapnya I svar, (02) maṅkana patumpaṅnikaṅ buvana pitu i ruhur ta rakva, ndya lvirnya nihan·, buhloka ṅaran ikaṅ buvana kahananta, I ruhurnikaṅ muvaḥ buvahloka I ruhurnikaṅ buvahloka suvahloka, I ruhurnikaṅ suvahloka janahloka, I ruhur nikaṅ janahloka tapvaloka, I ruhurnikaṅ tapvaloka satyaloka, I ruhur satyaloka mahaloka, I ruhurnikaṅ mahaloka Atyanya Antaloka, nda nahan lvirnikaṅ buvana pitu, i ruhur ta rakva, kadi taya patumpaṅnyanika tvvan valuḥ lvirnya pagantuṅan i ruhur ta rakva, ya ta mataṅyan ri madyapada ṅaran ikaṅ buvana kahananta maṅke rakva, Apan pi- tu ikaṅ buvana I svar ta mvaṁ ṅi ruhur ta rakva, syapa ta ya sakeṅ i svar, mvaṅ sakeṅ i ruhur anuṅ vruḥ byakta, lena sakeṅ kalpa Ata ya lavan carita maṅkana, yeka Adva rakva manavasta ṅarannya, tiṅga- laknanika denta, hayva pinituhu, vaneḥ hana ta ya I ruhurnikaṅ sapta buvana rakva, pitu ataḥ patapnya rakva, ṅarannya, sunya, Ati sunya, parama sunya, Atyanta sunya, nirmala su nya, suksma sunya, Acintya sunya, I ruhurnikaṅ muvaḥ taya, parama taya, Atyanta taya, nirmala taya, suksma taya, Acintya taya, I ruhurnikaṅ muvaḥ abyantara taya, Abyantara taya ṅaran- nya tar katəkan deniṅ tejaniṅ vintaṁ, vulan·, Aditya, vaṅkavaṁ, kuvuṅ-kuvuṁ, saṅhub, kukus, mega, hudan·, kilat·, gəlap·, gərəḥ, gəntər, rahu, handaru, paramanuḥ, svaraniṅ sarvajanma kabeḥ, yateka tar təka ya ṅkana ra kva, Apa lvirnya Ahvaḥ, Aliṅlaṁ, Ahəniṁ, niravarana, laṅgəṅ nirasraya, i ruhurnikaṅ muvaḥ pañcatanmantra, pañcatanmantra ṅarannya buddi guna pradana, I ruhurnika muvaḥ sunyata nirmala ta ya, sunyata nirmala taya ṅarannya lejñəp vindu pəpət taravaṅ səsiniṅ maṅdadi, tar katəkan deniṅ tutur lupa, Arahanta sarira, sesa Ananta guru moksa ləpas, I ruhurnika muvaḥ kanirasra yan·, kanirasrayan ṅarannya hiṅan iṅ manahnikaṅ lokanya paran-paran·, Ar paṅalvar paṅidul paṅulvan paṅetan·, misvar minduhur makuliliṅan irikaṅ buvana, sinaṅgaḥ Anasti deva katunaniṅ vatək devata kabeḥ rakva, Ika vəkasniṁṅ i ruhur [niṁ ṅi ruhur], ya ta riṅ ahaḥ ṅarannya, sinaṅguḥ kanirasrayan ṅarannya rinahasyanikaṅ viku lokika kabeḥ, mankana tenajaranya, para nanya ləpas həlam yan mati rakva, paranan ikaṅ viku maṅusir arahanta, Ikaṅ tuməkakna ya ṅkana liṅnya, yeka brata tapa samadi, mvaṅ si vruhnya maṅaji lavan kasravakanya, ya ta mataṅyan paru hun-ruhunan ikaṅ saṅ viku kabeḥ mamriḥ maṅaji, mabrata matapa masamadi, majar-ajar ri rəban sampvara, pravakta lavan bramacari, kili ekavasa muna lagna Upavasa, sadyanika kaləpasən kamoktan·, ya palanika An ginavayakəna rakva, An avas ṅaranika kabeḥ, yeka rasa carita madva, tiṅgalakənika hayva pituhu, Ika pavəkasnikaṁṅ i svar mvaṁṅ i ruhur liṅnya, ndaḥ madva tika, hana juga I svaranikaṅ mvaṁṅ i ruhuranikaṁ, kadyaṅganikaṅ lvar An hana lvaranikaṅ sinaṅgaḥ ta lvar, savadi jatinika yadyapin ta saṅ manuduhhan lvar, kidul·, kulvan·, vetan·, kunaṅ kumavruhhana vəkasniṅ lvar, kidul kulvan·, vetan tan hana maṅkana, yadyastun kadi tan iṅ mvaṅ bata Ata hiṅan ikaṅ lvar, kidul·, kulvan·, vetan·, hana taḥ lvar [nura]nika mvaṅ kidulnika, maṅkana tekiṁ ṅi ruhur, ya- dyastun kadi payuṅ vəsi kumurəb ata hiṅannikaṅ sinaṅguḥ vəkasniṁ ṅi ruhur, hana taḥ ruhur anika muvaḥ, kunaṅ apan ri hədapnya juga yan pahiṅan ikaṅ lvar, kidul·, kulvan·, vetan·, I svar i ruhur, ri həda pnya ya para ṅkana hələm yar mati, ri hədapnya yar hana svarga I ruhur, parananiṅ deva pitara huvus byət yaṁ, mvaṅ paran saṅ viku sakti matapa yan mati, tuntunan deniṅ gəlar pujanya yan mati, makasuluha Ajinya, maṅkana liṅnya paṅuha, Anutakən rasaniṅ kalpa carita madva, Adva rakva manavas ta ṅaran ika, tiṅgalakən ika denta hayva pinituhu, ndya pva kaṅ pinituhun mvaṅ gəgə:n ranak saṅ pandita, yata- nyan menaka pagə:ḥ vulat ranak saṅ pandita, Atiṅgalakən ikaṅ madva rakva manavas ta, katəpə-təpətan saṅ hyaṅ darma, yar kvaliṅanta ri kami, Aum hana vak sesa saṅ pandita ṅuni surud ma mi sakeṅ sira, tiga paksa ṅaranya, ndatan kami juga maṅucap tiga, pada sira mpu kabeḥ maṅucap tiga, ndya lvirnikaṅ tiga vinuvusnira, nyaṅ brahmana, visnu, Isvara, tiga Atika liṅ saṅ vaneḥ, nihan taṅ bu ddi, guna, pradana, triyantaḥ karana ṅaranya, tiga Atika liṅ saṅ vaneḥ, nihan taṅ prabu, rama, rəsi, sinaṅgaḥ tritantu, tiga Atika liṅ saṅ vaneḥ, nihan taṅ darma kaya, darma datu, darma tar, tiga Atika liṅ saṅ vaneḥ, nihan taṅ taya, vak·, cipta, tiga Atika liṅ saṅ vaneḥ, nihan taṅ darma, buda, saṅga, tiga Atika liṅ saṅ vaneḥ, nihan taṅ prativi, Akasa, Antara, tiga Atika liṅ saṅ vaneḥ, nihan taṅ mata, taliṅa, tutuk·, tiga Atika liṅ saṅ vaneḥ, nihan taṅ ulaḥ, sabda, Ambek rahayu, ya sinaṅgaḥ trikaya paramarta ṅaranya I saṅ isvara paksa, tri kaya parisuda ṅaranya I saṅ sogata paksa, tiga Atika liṅ saṅ vaneḥ, nihan taṅ pasukniṅ bayu mətunya mvaṅ laṅgəṅnya, tiga Atika liṅ saṅ vaneḥ, nihan taṅ sunyataya paramarta lilaṅ həniṅ niravaranya, tiga Atika liṅ saṅ va neḥ, nihan taṅ səkul·, tok·, Ivak-ivak·, nda nahan paksa tiga ṅaranya, lina kaṅ viku paraloka kabeḥ, taha hade tanikaṅ sinaṅgaḥ paksa tiga ṅaranya liṅ saṅ pandita, tiga Anavasta ṅaran ika kabeḥ, tiṅgalakən denta hayva vinava rəṅə:, (07) vruḥ kari kita Ar seṅ ikaṅ tiga liṅ saṅ pandita, sineṅniṅ kaṅ ajñana, ndatar kami juga maṅucap ajñana, pada si- ra mpu kabeḥ maṅucap ajñana, ndya lvirnikaṅ sinaṅgaḥ nirajñana, nyaṅ guna kvandahagyan·, kacitrakaran·, Anulis, parapusmaṅjahit·, mvaṅ kanipunahastan·, panday sulpika salvirniṅ guna, nguniveḥ taṅ aji vəduk timbul·, siṅlar, pisampar, piciṅcəṁ, sihulap·, Indrajala, sivaḥ sampurna, kaləkavadana, puluṅ pulaṁ, mayastri, tutur dadatu, nahan sinaṅgahnikaṅ viku sabuvana Ajñana, makadi kaṅ aji kanya saṅkya prakarana kalpa purananya ya, viniscaya canda ganita, maka rahayu gəlar puja Aji mantra samaddi, pəta liṅga liṅgir pratimabimba, ya buṅkaḥ Ikaṁ ṅ ajñana ṅaranya, liṅnya, taha hade tanikaṅ sinaṅgaḥ mami ajñana, kajñanan ṅaran ikaṅ kabeḥ, kajñana ṅaranya Ajñana ginavay-gavay, Apan ginavay ikaṅ aji mantra huṅkara padkara, ginavay ta ṅ liṅga liṅgir pratimabimba mvaṅ maha barali, gina- vay taṅ gəlar puja, Aji mantra, veda santi, mvaṅ jampa japya samaddi, Apan dadi ika kabeḥ, Inuvahan ya Ahala lavanya salaḥ, dadi hinilyan yan avuk lavanya hilaṁ, lavan dadi hina- nakən·, dadi inayyarkən·, dadi kinalupan·, dadi pinuca yan aləməḥ ṅvaṁ, ya ta kajñana ṅaranya, tatan maṅkana Iki ajñana liṅ mami, hana Iki tar hinanakən·, dadi iki tan ginavay-gavay, ta- n kavənaṅ vinehakən ri sisya, ya ta sinaṅgaḥ ajñana jati ṅaranya, rovaṅnikiṅ buvana tumuvuḥ, lavan ya pinakahuripnikaṅ rat mvaṅ sarva janma kabeḥ, ndya sakala sabda saṅ pandita ri sisya nihan·, pahe- nak taḥ denta dumələ: sesiniṅ sariranta, Irikaṅ bahiya At maya prakrəti, sinaṅgaḥ desa sarira, ya ta kahanan saṅ hyaṅ ajñana, vulikən pepetən hana ṅkana, gagap ipak kətəgniṅ hantinta, mvaṅ hana niravarananiṅ akasa, samipa lavan saṅ hyaṅ vijñana sagraha, tri yva bavet saha, Aṅhiṅ təlu prakaranya, pinakesiniṅ sariranta, kunaṅ ya ta mataṅyan byakta təpət denta vruḥ ri saṅ hyaṅ ajñana, nihan ta guru vaktranya, ndan tula beda kita sakarəṅ paṅavruhanta I təpətniṅ tiga, kunaṅ deyanta, sumahur ta kita varaḥ rikaṅ satinakvanakən mami ri kita purva, liṅ nira ṅ aṅiṅətakən a- naku, (08) ndya lvirnya, nihan seṅnya de saṅ pandita: nyaṅ a, nyaṅ jña, nyaṅ na, ya sinaṅguḥ tiga təpət basa ṅaranya, ndya kapaṅguhaniṅ tiga təpət liṅ saṅ pandita, kasihana ranak saṅ pandita, I kapaṅgu- hana, nyaṅ a, nyaṅ jña, nyaṅ na, Aum·, mami mavaraḥ ri kita, nihan patula beda mami rumuhun·, paṅavruḥ I təpətniṅ tiga, sumahur saṅ tinakvanan·, Aparan ṅarannya: buṅavari, srigadiṁ, Aṅsva- ka, tuduḥ denta, tuṅgal ika rika, Aum·, Abeda Ika, pvaṅkulun; vuṅavari ata vuṅa[ṅ]vari, srigadiṁ, Ata srigadiṁ, Aṅsvaka Ata [ṅaranya] aṅsvaka, pvaṅkulun·, suguḥ Ika vuvus ta, maṅka- na tekaṅ tiga, panula beda sajarva, saduga-duga, satəpət·, sapratyaksa, (09) apa ta ri ṅaran ikaṅ masuk·, mətu, mahavan ri ruṅ ta lavan ri tutuk ta, Upamana pravesa nəm ṅke ri sariranta, Apa liṅ ta, ba yu ṅaranira pinakausvasa ranak saṅ pandita, ya teka A, ṅaranya liṅ saṅ pandita, muvaḥ nihan takvanakna mami ri kita, Apa kari ṅaran ikaṅ karəṅə: denta ṅke ri buvana lavan rikaṅ sarva janma kabeḥ, karəṅə: juga gunanya, sabda ṅaran ika panaṅguḥ ranak saṅ pandita, ya teka ṅ jña, ṅarannya liṅ saṅ pandita, vaneḥ takvanakna mami ri kita, Apa kari ṅaran ikaṅ tinəkaknanta ri vəkasnikaṅ bu- vana lvar, kidul·, kulvan·, vetan·, ləs luṅha sakədap humalivati tasik·, cipta kamuvaḥ, Apa ṅaran ika liṅ ta, hədap ṅaran ika, Aṅən-aṅən ranak saṅ pandita, ya teka na, ṅarannya liṅ saṅ pandita, (10) mataṅyan kinala karanta ya təluṅ viji, ya sinaṅgaḥ bayu, sabda, hədap·, bayu ṅarannya Ikaṅ [bayu] masuk mətu mahavan ri ruṅ ta pinakasvesanta, sabda ṅarannya Ikaṅ pinakavuvus ta, həda p ṅarannya Ikaṅ [hədap] paṅaṅən-aṅən ta ri madvaḥ maparək·, kita hana ṅke ya haneṅ sabraṁ, maha misvar minduhur, makuliliṅan umidər ikeṅ buvana, tar kevəhan asiṅ sakala rəpnya paranya, tar kasukər deniṅ sukər, juraṁ, ləbak·, gunuṁ, praṅgabala, lvaḥ, tasik·, pətəṅ pəpət; ityevamadi, svaca juga ya Asiṅ saparanya, gagana cara maṅlayaṅ riṅ abyantara manumpaki ri valakaṅniṁ ṅ akasa vənaṁ, Ajalantara maṅlayaṅ riṅ abyantara manumpak ri tasik vənaṁ, Atava yan sumiləm ri pusə:raniṅ jaladri, sumurupan iṅ darsaniṅ sapta patala vənaṁ, tar viceda, tar vikara, tar amələs, svaca juga ya, kita ha- na ṅke ya luṅha haneṅ sabraṁ, ləs luṅha satəp təka, segra kas adrasya ləyə:, takarin maṅkana Aṅən-aṅən ta, yan aṅən-aṅən madvaḥ maparək·, Aum·, maṅkana pvaṅkulun·, ndaḥ yatika sinaṅgah mami ajñana ṅaranya, A ṅaranya Ikaṅ bayu, jña ṅaranya Ikaṅ sabda, na ṅaranya Ikaṅ hədap·, papisan ikaṅ tigaṅ viji, yatika sinaṅgaḥ tiga jñana ṅaranya I saṅ pandita, Adva ta rikeṅ bayu sabda hədap ar ha- na ri kita Anakku, mvaṅ an ikaṅ bayu sabda hədap byakta pinakahuripnikaṅ sarva tumuvuḥ mvaṅ sarva satva, Adva ta rika Anakku, taham tuhu pvaṅkulun·, yatika Ajñana jati tar ginavay-gavay liṅ mami, (11) ndi kari kita nvan aṅrəṅə: agavay bayu sabda hədap·, lena sakeṅ sahaṅga rupa kajñana juga ya, parəṅ mətu lavan sariranya, vruḥ kari kita Ar dadya tapəl lavan vaṅkəy, pagavayakna bayu sabda hədap·, yan apa Ika maṅkana, yan ta vənaṅ ya gavayan·, marapvan vruḥ mvalaḥ masabda mambəkan·, dadya nuṅ ya maṅkana, byaktanya tar kavənaṅ ya gavayan·, pinupuḥ Ikaṅ tapəl·, Avuk ikaṅ vaṅkəy, nahan mataṅyan hana mati ṅarannya rikaṅ sarva janma, Iḥ tar hananiṅ agavay bayu sabda hədap kaliṅanya, hilaṅ sakeṅ sarira, vaṅkəy ta ṅarannya, yapvan turu hana paripuma Ikaṅ bayu sabda hədap rikaṅ sar- va janma, pva saka subada təguḥ sariranikaṅ sarva janma, ya ta mataṅyan hiṅ ikaṅ bayu sabda hədap juga visesa pinakahuripnikaṅ sarva janma, ṅuniveḥ Ikaṅ rat kabeḥ, ndan saṅ pandita juga sira meṅət an bayu sabda hədap pinakahurip ikaṅ rat kabeḥ, kunaṅ ika loka vulaṅun ya tar vruḥ I sinaṅgahnya jñana visesa, nihan upamana ri vulaṅun ika, kadyaṅganikaṁ ṅvaṅ ri desa, Apa dumeh- nya vulaṅun ri hananikaṅ alas an sukət·, ləbak·, gunuṁ, lvaḥ, tasik·, təgal malva, savuk rəma rəp pətaṅ kunaṅ ya ta dumehnya vulaṅun·, sinaṅgahnya tekaṁ ṅ aditya mətu kulvan sumurup vetan·, sakariṅ vulaṅu- nya kaliṅanya, samaṅkana tekaṅ loka-lokan vulaṅun ri jñanavisesa deniṁ ṅ alas an sukət·, lvaḥ, tasik təgal malva, Apa kaharan alas, sukət·, lvaḥ, tasik·, təgal malva, nyaṅ aji kavya saṅkya prakarana, kalpa purananya ya viniscaya canda ganita, mvaṅ brata tapa samadi gəlar puja, nahan rikaṅ alas, sukət kasusupanya, kavilət taṅ ya kapasuk i pañjara, karakətan tar kavənaṅ masigva- i denika samaṅkana kabeḥ, Ikaṅ samaṅkana ya ta sinaṅgahnya jñanavisesa, tatan mulya vaknya huripnya tar visesa liṅnya; araḥ pijir kədə: misesakən madvaḥ, Apa ta karaḥ mulya vi- sesa ri saṅ pandita ṅuni, sədaṅniṅ kratayuga, Aji aksara tapvan vətu, patula tavur tan ginavayakən·, gəlar puja tan hinanakən·, tar vikalpa ri hyaṅ devata, sunya ta ya paramarta, tar vinisesakən·, brata kavikun tar ninadikarakən·, tan inucap makabalaṅ svarga kalpasən·, kevalya mahardika juga, virati masiḥ sambega, numana ri rat·, vruḥ ri katuṅgalan iṅ hurip nira lavan ikaṅ rat kabeḥ, Ikiṅ ba- yu, sabda hədap ata ya visesa pinakahuripnikaṅ rat an hana vaneḥ, (12) vicikətsa valiṅ pva mulya Ikaṅ sinaṅgahnira jñana, bari-bari meman duga liṅ pva mevəḥ, yan kvaliṅanta Ikeṅ ba- yu sabda hədap·, hayva ta kita maṅkana, Apa kari hədap ta ri saṅ pandita, misesakna kapuṅguṅnira təka ri sira, Apa kapuṅguṅnikaṅ loka, svarga kahyaṅan kadevataan·, batara-batari, kamvaktən mvaṅ kalpasən·, yar visesakən maṅkana, rakva saṅ pandita, rahayva ri loka, Ar tan panaṅguha kita vicikətsa, viku hayan basmaran liṅan kami, kavruhniṅ rat pva kaṅ vinarahakən mami ri kita, ndya kavruhnikaṅ lokaniṅ mami, yekiṅ bayu sabda hədap·, siaṅgaḥ tatahnya kəcəs, Apa Upamana Irika, kadyaṅganiṁ ṅvaṅ malapa saṅka rikaṁ ṅelan·, təka ta yeṅ vanva, sinuṅsuṅ ta yeṅ səkul·, tvak·, Ivak·, vvay ma- tis, pinaṅanya ta ya, təlas varəg aku, Atis trəpti manahnya, vəkasan ar panaṅguḥ ta ya vyakəcəs, valiṅ pva menak ar mamaṅan·, Aṅhiṅ varəg juga palanya, tan padvandon·, nahan liṅ- nya huvus varəg, Ikaṁ ṅvaṅ maṅkana, kadi ta ya vənaṅa tumiṅgalakən paṅan inum·, həlam miṅa həlam muvaḥ amaṅan ataḥ, paramartanikaṁ ṅvaṅ maṅkana, baṅga An hale pinaṅannya, maṅkana ta ki- ta sinaṅgaḥ Ikaṅ bayu sabda hədap vyakəcəs, Inakanikaṅ huṅkarakna ya təka ya, Apan bari-bari liṅ ta, pakahuripanta tekaṅ pustaka barali mvaṅ gəlar puja liṅga liṅir pəta pratima bimba, Apan ya jñana- visesa liṅ ta, tatapən yaya pva kaṅ taṅ bayu sabda hədap an hana ri kita, tamolaḥ laṅgəṅ ya pinakahurip ta, paramartanta ndaḥ humile sariranta sumestava hurip ta juga kita, Atavana naṅguḥ vyakcis, irikeṅ bayu sabda hədap·, Ikeṅ panaṅgaḥ ta vyakcəs takarin sabda Ika, ndi ta kita timpalakna ya, nda kaṅ vava Ikaṅ bayu sabda hədap veḥ, Ikvaṅ hana pinakesiniṅ sariranta, mvaṅ duvə- g pinakahurip ta, Atəda set ika, Apanaṅhiṅ ikaṅ bayu sabda hədap juga tuhu-tuhu hana pinakahuripnikaṅ sarat·, ṅuni lavan maṅke, dlaha tovi veḥ Ikaṅ bayu sabda hədap təka hurip nika, tan hana vaneḥ vənaṅa huripanikaṅ sarva janma, lena sakeṅ bayu sabda hədap juga pramana pinakajivaniṅ sarat·, Apan ya tuhu-tuhu, tan alaḥ deniṅ lavas, tan pavuk·, tan brana deniṅ tis, tan pəgat deniṅ kadga, tar gəsəṅ deniṅ apuy, Apa ya mulaniṅ pati huripnikaṅ sarat·, ya mulya vitniṅ mulya visesa, vitniṅ bisa sakti lavan kinatakutan·, Apa byaktanya ya vitniṅ mulya nyaṅ drabya mas manik·, hulun sapivənaṅ-vənaṅ tuhu ika kabeḥ mulya, ndan ri kalanya hana Ikaṅ bayu sabda hədap i sariranya ya, hilaṅan ikaṅ bayu sabda hədap sakeṅ sariranya mne, A- pataḥ mulya kari kaṅ drəbya ta kabeḥ, tar mulya pvaṅkulun asiṁ ṅvaṅ maṅalap·, nihan taṅ prasida mulya sakeṅ mas manik·, Anak ta mvaṅ rabinta, tan aṅga piki, tan pədəkin gamələn rabinta deniṅ laki-laki len·, ndan ri kalanya hana Ikaṅ bayu sabda hədap i sariranya ya, hilaṅa Ikaṅ bayu sabda hədap sakeṅ sariranya mne, ndatan mulya piḥ asiṁ ṅvaṅ magaməl·, tinimpalakən rasmi, pinarəbutakən deniṅ gagak mvaṅ asuviku, nihan ta vakta vəkasniṅ mulya visesa təmən·, yekiṅ iniṅu inut pandita, pinametakən pinaṅan inum sinadaṅ mvaṅ rabinya, sakveḥ Iṅ sadrasa, hiṅanniṅ kina- hanakna kaliṅanya, ndan ri kalanya hana bayu sabda hədap i sariranta ya, hilaṅa Ikaṅ bayu sabda hədap sakeṅ sariranya mne, Apa taḥ tar mulya, tinimpalakən vaṅkəy ta ṅaranya, drava mavuk syuḥ tar pahaməṅan sariranta, nihan taṅ vatək adras bisa sakti vuvusanta, nyaṅ kuda, liman·, kəbo, sapi, siṅha, barvaṁ, moṅ ula magəṅ prasida Ikaṅ madras bisa sakti kabeḥ, ndan ri kalanya hana Ikaṅ bayu sabda hədap i sariranya ya, hilaṅa Ikaṅ bayu sabda hədap·, sakeṅ sariranya mne, tar bisa, tar sakti, sinəmpal dinagiṅ-dagiṅ ya kabeḥ, nihan taṅ manuk prasida magəlis, vənaṅ mərmibər malaṅkaḥ Iṅ gunuṅ lavan tasik·, ndan ri kalanya hana Ikaṅ bayu sabda hədap·, I sariranya ya, hilaṅa Ikaṅ bayu sabda hədap sakeṅ sariranya mne, tar vənaṅ mərmibər maṅgulaṅ-guliṅ ri ləmaḥ, nihan ta va- neḥ, Apa dumeḥ kita hyunan ri rara lavan hulanjar, ri hananikaṅ bayu sabda hədap ati ya, hilaṅa Ikaṅ bayu sabda hədap sakeṅ sariranya mne, Apa taḥ ahyun kari kiteri ya? taha Avədi arəs ṅvaṅ denya, tovi mariris ṅo ri bvanya, ndaḥ ri vruhhanta ri visesanikaṅ bayu sabda hədap·, Ar ya vvitniṅ mulya lavan kinaharəpan·, mvaṅ ar ya vitniṅ bisa lavan sakti, (13) nihan ta vaneḥ deyanta vihikan ri visesanikaṅ bayu sabda hədap·, yar sunyata ya paramarta visesa de saṅ viku vaneḥ, maka paləpas taṅ si puṅguṅ ulug-ugulun para biṅuṁ, ləṅə: ləṅə: ləjñəp·, maka putus rasaniṅ aturu tan paṅipi, she arnikaṅ kuṅ trasni vətu ṁ, tapakan tutul mala Isiniṅ limas-kumurəb, taṅ vəluniṅ puṅlu, valakaṅniṅ hantəlu, vrədiniṅ bayu, Ica byavasaniṅ hurip ika, (14) yapvan ikeṅ aji mantra barali pratisara de saṅ viku vaneḥ, maka paləpas taṅ bajra huṅkara padkara, vrədiniṅ sabda Ica byavasayaniṅ vuvus ika, kaliṅanya tar vənaṅ vi ṅaji maca vaknya, mantra vedasanti mantrakən avaknya, Apa pramana Irika, sabda juga tar hana vaneḥ, Apan riñciniṅ vuvus ta varnaniṅ sabda Ikaṁ ṅaji mantra vedasanti ṅaranya, (15) yapvan ikeṅ batara batari, sivaḥ buda visesa de saṅ viku vaneḥ, makaləpas taṅ yuga samadi, sa- ləmbana nira ləmbana, vrediniṅ hədap ica byavasayaniṅ aṅən-aṅən ika, kaliṅanya hədap inaṅkar hyaṅ devata, cinta ṅ inadakara batara batari, sivaḥ buda Ika, Apan ri hədapnya hana batara, ri hədapnya tan hana batari, savikalpa manon hədap ika, savikalpa hədapniṅ vikalpa hədap·, hədap kevala Ika kabeḥ, vikalpa manadakara saṅsaya pravala, (16) samaṅkana juga karika de saṅ pandita meṅət ri visesanikaṅ bayu sabda hədap rikeṅ buvana lavan i rikeṅ sarva janma, Is taham piḥ anipis ta ṅaran ika, yaya denikaṅ mapuṅguḥ maṅavəruhi ta ṅaran ika, Apan pada vəruḥ pvakaṅ sarat ar bayu sabda hədap pinakesiniṅ sariranya, mvaṅ pinakahuripnya, ndan abasmina ta dik ti yar vəruḥ, vəruḥ vulaṅun tan neṅət ri mulyanya, Apan hana batara batari siva ḥ buda, pinetnya, visesanya, liṅnya, tatan maṅkana saṅ pandita na vəruḥ, vəruḥ ṅ aṅiṅət inəkət sira ri kitarnya ri buvana, lavan ri sarva janma, Apa ta de saṅ pandita meṅət ri drabyanira, nihan arhiṅ təlu praka- ranya, hana seṅnya, hanya Imanya, hana Ivəhnya, seṅnya ṅaranya Ajñana, Imanya ṅaranya bayu, sabda, hədap·, Ivəhnya ṅaranya katuduhanya, kavivekanya, katəmunya, pramananya, vibuhnya, tuṅgəṅ- nya, yavat pvakaṁ ṅvaṅ vəruḥ Irika, tavat sira pandita ṅaranira, (17) nyaṅ bayu varnana ta, Ivəhnya rumuhun keṅətakənta ri kimanya hayva himəṁ, ta tuduhaniṅ bayu ṅara- nya, sri ṅaran dasanama pariyaya, tuṅgal ikaṅ bayu an akveḥ ṅarannya, Iva kadyaṅganikaṅ vidyasari an makveḥ ṅarannya ya vidyasari, ya haṅya-haṅya, ya payana, ya vadu-vadul·, vidyasari katuṅgalanya, Iva maṅkana tekaṅ bayu, An makveḥ ṅarannya, hayva ta kita kepvan·, ya bayu, ya Usvasa, ya Ambəkan·, ya nyava, ya hurip·, ya jiva, ya deva-masiḥ, ya purusa, ya pañca-ba- yu, ya prana, ya Apana, ya samana, ya Udana, ya byana, ya Aṅin·, ya rivut·, ya pavana, ya maruta, ya seduṁ, ya halisus, ya halivavar, ya bayubuta, ya vagyut·, ya prahara[na]kala, ya bayulaṅgəṁ, ya vindunada, ya vindupəpət·, ya vindurahasya, Indra piṅgala, susu məna, sunyata ya paramarta, kaparamarta, jñananta paramarta, Akasa paramarta, ya Aturu tan paṅipi, katəmu rasaniṅ si lupa tar hana ṅ inivəhnya, moksaḥ ləpas, nahan taṅ kveḥ ṅaran ikaṅ bayu, kabeḥ haya vuvusən ṅarannya, hinəta bayu katuṅgalanya, Usvasa, Ambəkan ṅaran ika, mvaṅ ri janma mvaṁ,hana pva ya riṅ abyantara, bayu laṅgəṅ ta ṅarannya, Umirir pva ya Aṅin ta ṅarannya, Adras pva ya rivut ta ṅarannya, Anikəlakən pva ya hayuseduṅ ta ṅaranya, Umidər pva ya mupus ləbu, haliyusus ta ṅaranya, Adulur pva ya hudan·, vagyut ta ṅarannya, Adras pva ya Aduhur ryak hiṅ tasik·, Ampuhan ta ṅaranya, Anub pva ya ser maruta ṅarannya, miriakən pva ya ganda pavana ta ṅaranya, masuk mətu pva yeṅ sarira Ambəkanta ṅaran nya hurip jiva deva masiḥ ṅarannya, yan tan molaḥ tumuṅgu sariranta, visesa pva hurip purusa ta ṅaranya, kapolaḥ pva yeṅ sarira vindu pəpət ṅarannya, murtum bayu saṅ krəti ṅarannya vaneḥ, vindunada ṅaranya, A tri aksara, Uhuḥ sanyu pva ya sakakala, hə:b-hə:b ta ṅarannya, vindurahasya ṅarannya, mavak·, masarira taṅ bayu, Idəra ṅarannya, digəlarniṅ hurip pralina sumiksa sarira ṅarannya,piṅ- gala ta ṅarannya vantahnya ri paramarta ta ya, valik huripniṅ maturu, suba-suba kadi ta ya kunaṅ-kunaṁ, susumna ṅarannya, Ivəḥ saṅ anəmu ya, puñcak pagantuṅan iṅ hurip·, vəlu tuṅkəbniṁ ṅakasa, pakəmpə lniṅ paramanuḥ, hana kadi səkarniṅ sasavi, hana kadi seratniṅ vaja tinunu, pakambaṅan iṅ bidanaga, hana sukla pita kadi kəmbaṅniṅ aṅsana, gumilap umibək kadi kunaṅ-kunaṁ, nahan rahasyaniṅ hurip ṅarannya, I- ka taṅ bayu samaṅkana kvehnya, dudva Ata rakva Ika, taham piḥ bayu hurip katuṅgalan ika kabeḥ, katuduhan iṅ bayu ṅaran ika, (18) kavivekaniṅ bayu ṅarannya, yan pahiṅan ikaṅ lvar, kidul·, kulvan·, vetan·, I svar ri ruhur, Ahiṅan ikaṅ bayu yan maṅkana, kunaṅ apan tar pahiṅan ikaṅ lvar, kidul·, kulvan·, vetan·, I svar ri ruhur, tar pahiṅan ikaṅ bayu yan maṅkana, Apanikaṅ bayu sumusup riṅ akasa, bayu sumusup ri prativi, bayu sumusup ri lvaḥ tasik·, ṅuniveḥ ri sarva tumuvuḥ ri sarva satva, Ahyaṅ tar pahyaṅ kapva juge katərus deniṅ bayu sumusup iriya, makadi te kaṁ ṅabyantara ṅ avaṅ-avaṁ, bayu pinakatyasnya, Apa byakta habət ri ṅiri ikaṁ ṅ abyantara vaṅavaṁ, bat-bat·, Akəndəl mara ya, Atis ikaṅ səkul ri huyan denta, tatan dindinaḥ maṅkana tekaṁ, ndan nahan byaktanikaṅ bayu an hibək ikaṅ buvana denya, kavivekanikaṅ bayu ṅaran ika, (19) katəmuniṅ bayu ṅarannya, siṅ kasparsa, karasa, kasparsa ṅarannya katubnya Avak ta deniṅ aṅin nuṅ mi ra, mvaṅ kvasan kasparsa kaharas, kaprasa ṅarannya pasuk vətunikaṅ bayu ra ruṅ ta, kambuṅniṅ mabva lavan mavaṅi, karasa ṅarannya Akəndəl iṅ haṅin·, kagaməl kasapnya ləmbutnya, kapaṅan·, kenum ṅenaknya lavan tar nenaknya, makadi kahədapniṅ panas tis, lapar varəg, ya ta karasa ṅarannya, katəmuniṅ bayu ṅarannya Ika, (20) pramananiṅ bayu ṅarannya, Una mana pravesa nəm yar hana bayu masuk mətu ri ruṅ ta si hurip ṅarannya,hilaṅ pva bayu sakeṅ sarira,sipati ṅarannya, vəkasannya vaṅkəy ta ṅaran ikeṁ ṅ avak·, pramananiṅ bayu ṅarannya, vibuhniṅ bayu, bayu juga pinakahuripnikaṅ sarat·, tan hana katunan pati lavan huripnikaṅ sarva janma, vibuhniṅ bayu ṅaran ika, (21) tuṅgəṅniṅ bayu ṅarannya, Adəlitan kavənaṅ tinambəhan·, Agəṅ tar kavənaṅ linvaṅan·, haneṅ buvana lavan liman·, haneṅ prativi lavan təṅu, tar lva, tar humpəṅ duvəg juga ya,tuṅgəṅniṅ bayu ṅaran ika, nahan deyantaniṅ vəruḥ ri kahuvusannikaṅ bayu keṅətakna, (22) samaṅkana kojariniṅ sabda nama taḥ beda nya, katuduhanniṅ sabda ṅarannya, siṅ aran dasanamapariyaya, tuṅgal ikaṅ sabda, ndan pariñciniṁ, ṅarannya Akveḥ, kadyaṅganiṅ vuyaḥ an makveḥ, ṅarannya ya vuyaḥ, ya garəm·, ya pirə:, ya lavana, ya səndava, ya sasadvara, vuyaḥ katuṅgalan ika, Iva maṅkana tekaṅ sabda Akveḥ ṅarannya, hayva ta kita kepvan·, ya sabda, ya vuvus, ya vacya, ya Ujar, ya kara, ya Uni, ya liṁ, ya kpara, ya sada, ya gəntər, ya patər, ya kətug, ya kisik·, ya nada, ya pradvani, ya rava, ya gita, ya Akasa, ya lilaṁ, ya həniṁ, ya niravarana, ya nirasraya, ya laṅit·, la ləṅit·, ya nilakəliṁ, ya mahanila, ya Anta, ya tan pahiṅan·, ya vindu, ya ta- ya, ya hana, taya Ikaṅ sabda ya ta həniṁ, hana yan inucapakən·, mataṅyan taya hana ṅarannya, vaneḥ həntə: sabda katuṅgalan ika, Ujar vuvus ṅaran ikiṅ sabda yan haneṅ janma vvaṁ, hana pva yeṅ sarvva satva Uni ta ṅarannya, hana pva ya ri gunuṅ guntur ta ṅarannya,hapa pva ya riṅ akasa gəlap gərəḥ gəntər ta ṅarannya, hana pva ya ri tasik patər ampuhan ta ṅarannya, hana pva ya ri kayu gərit ta ṅarannya, sabda sidda ya tinabəḥ kvani ṅarannya, sabda sidda vaneḥ dilahniṅ apuy ya jala pravaha hiliniṅ vaḥ gunuṅ guntur ṅarannya, tibaniṅ kayu pinəraṅraṅ hudan adras kətug ṅarannya, tibaniṅ handaru, sigvalniṅ vakul kumurəb mvaṅ pinalu, valakaṅniṅ pinrap kisikniṁ ṅarannya, ron tinubniṅ aṅin·, siratniṅ jaladi cañcala, kisikniṅ saṅa-saṅan·, pagasahniṅ simbar, pradvani ṅarannya, pasamvahaniṅ vvaṅ akveḥ yan asakən-sakən·, ravuḥ ṅarannya, samvaha pahyun iṅ balamantri, gita ṅarannya, kiduṅ kanda carita, nahan akveḥ ṅarani sabda, Ikaṅ taṅ sabda samaṅkana kvehnya, sabda juga simpənnika kabeḥ, taṅeḥ yar vuvusən·, katuduhan iṅ sa bda ṅaran ika, (23) kavivekaniṅ sabda ṅarannya, kadyaṅganiṅ bayu an hibəki ikaṅ buvana, lavan sarva janma, maṅkana tekiṅ sabda An hibəki ikaṅ buvana lavan sarva janma, Apan byaktanya tabəḥ Ikaṅ lə- maḥ kayu vvay, ṅuniveḥ hikaṅ kəndaṅ gəndiṁ, pada muni mara ya, nihan taṅ abyantara Avaṅ-avaṁ, habəti ri hada saviji, bat-bat təka ndi-ndi naḥ muni juga ka, nahan byaktanikaṅ sabda An hibəki ikaṅ bu vana lavan sarva janma, kavivekaniṅ sabda ṅaran ika, (24) katəmuniṅ sabda ṅaranya, tuṅgal ika Apan siṅ karəṅə: juga, Apa siṅ karəṅə: kapva sabda ṅaran ika, Aum·, mvaṅ kisikniṅ rondonan·, kətəb niṅ sukuniṅ lumaku, kagulan təmbaṅniṅ sabdanikaṅ kəndaṅ gəndiṅ tinabəḥ, sabdanika kabeḥ juga karəṅə:, Apan karəṅə: kəndaṅ gəndiṅ ləmaḥ kayu satva ṅuniveḥ vvaṁ, sabdanika kabeḥ ataḥ karə ṅə:, mataṅyan siṅ karəṅə: katəmuniṅ sabda katəpətan iṅ vuvus, (25) pramananiṅ sabda ṅaranya, pinakapaṅaranan ta rikaṅ buvana mvaṅ sarva janma, pinakapaṅaranan ta ri ṅ aksara svara vyañjana, pinakapaṅaranan ta sa kvehnikaṁ ṅaji mantra vedasanti, pinakapaṅaranan ta ri sakaton sakarəṅə:, sakarasa sakasparsa, pamastu ta ri hana tan hana, lavan sakala niskala, kapva Ikaṅ matuṅgalan ṅaran ika kabeḥ denikaṅ lo ka, ndan ri hananikaṅ sabda Irikaṅ rat·, ndi kita ya tan hana sabda Irikaṅ rat·, Umulat taya miṅə-miṅəl maṅiṅə-iṅəl ikaṅ sabuvana, pada humənəṅ kadi maratən yar maṅkana, tan pavastu tan paṅarani ya tanikaṅ rat·, kunaṅ ri hananikaṅ sabda rikaṅ loka, nahan mataṅyan pada vijaḥ maṅarani, matuṅgalan tekanaṅ rat kabeḥ ṅarannya vəkasan·, pramananiṅ sabda tekaṅ pamastu paṅaranan·, vibuhniṅ sabda ṅarannya, tan hana katunan sabda rikaṅ rat·, ndan makasabda sabdanya jatinika, vibuhniṅ sabda ṅaran ika, (26) tuṅgəṅniṅ sabda ṅarannya Adəlitan kavənaṅ tinambəhan·, Agəṅ tar kavənaṅ linvaṅan·, haneṅ buvana mvaṅ liman·, haneṅ prativi lavan təṅu, tar luga tar humpaṅ duvəg juga ya, tuṅgəṅniṅ sabda ṅaran ika, nahan ta vuvusan iṅ sabda ṅarannya, (27) maṅkana teki hədap·, nama ta- ḥ pinakevəḥ niki, katuduhan iṅ hədap ṅarannya, si ṅaran dasanamapariyaya, tuṅgal ikaṅ hədap ṅarannya ya makveḥ, kadyaṅganiṅ səkul an makveḥ, ṅarannya ya səkul·, ya me, ya beksa, ya na si, ya kijo, ya pranik·, ya campagi, ya mandur, ya gərul·, səkul katuṅgalan ika, Iva maṅkana tekaṅ hədap an makveḥ ṅarannya, hayva ta kita kepvan·, ya hədap·, ya Aṅən-aṅən·, ya kira- kira, ya Upaya, ya cinta, ya budi, ya manaḥ, ya ksitan·, ya viksatan·, ya pratijña, ya ekagraha, ya viroda, ya vitarka, ya Ananta, ya smita, ya Indriya, ya Anendriya, ya Atma, ya paratma, ya dikatma, ya sukmatma, ya jñana, ya vijñana, ya kavijñanan·, ya jñanendriya, ya malit·, ya Anendriya, ya manonvijñana, ya Astaguna, ya Animan·, ya mahiman·, ya Ahiman·, ya lagiman·, ya prapti, ya prakamyaka, ya vasitva, ya Isitva, ya vijña tabya mumuksuhna, mumuksuḥ Ikaṅ saṅ pandita, vijña tabyam an kavəruhi tekaṅ jñananira, jñananira, ndya kinavəruhanira, Ikaṅ bayu sabda hədap·, nahan kveḥ ṅaran ikaṅ hədap i saṅ viku, (28) manaḥ ṅarannya, sədaṅ manadakara rupa vastu luṅha təka pva ya cinta ṅarannya, kupa pva ya budi ta ṅarannya, Aṅən-aṅən pva ya mamiveki, praya Upaya kira-kira ta ṅarannya, prjanya vicitran pva ya paṅavəruḥ ta ṅarannya, Agalak pva ya kroda həṅkara ta ṅarannya, Ahyun pva ya raga ta ṅarannya, katon pva ya mavak ri paṅipyan atma ta ṅarannya, kepi pva ṅvaṅ len denta ri paṅipyan paratma ta ṅarannya, di katma Apupul taṅ atma, nahan ta kveḥ ṅaran ikaṅ hədap·, taṅeḥ yan vuvusən·, kintu hədap katuṅgalannya hayva Iməṁ, katuduhan iṅ hədap ṅaran ika, (29) kavivekaniṅ hədap ṅarannya, pinakapaṅhiṅhiṅnikaṅ loka lvar, kidul·, kulvan·, vetan·, I svar, ri ruhur, An pahiṅanikaṅ ri hədapnya, tar pahiṅanikaṅ hədap·, kavivekaniṅ hədap ṅaran ika, (30) katəmuniṅ hədap ṅarannya, pinakapanon vijilnya ri mata, pinakapaṅrəṅə: vijilnya ri taliṅa, pinakapaṅambuṅ vijilnya ri ṅ ruṁ, pinakapaṅrasa vijilnya ri lidaḥ, pinakapaṅasparsa vijilnya ri kulit·, pinakapaṅuha pamikalpa panada- kara rupa vastu vijilnya ri buvana, nahan katəmuniṅ hədap ṅarannya, (31) pramananiṅ hədap ṅarannya, yeki pinakavak ta ri paṅipyan·, pinakasariranikaṅ rat kabeḥ ri svapna laksana, sida ya katon mavak masa- rira ri svapna laksana denya, mvaṅ dinadakara hyaṅ devata denya, Inarakənanya batara-batari, ya pahana-hana ya paṅhilaṁ, pramananiṅ hədap ṅaran ika, vibuhniṅ hədap ṅarannya, tan hana katunan hədap ikaṅ rat kabeḥ mvaṅ sarva janma sarva satva, kapva ta kahanan hədap ika kabeḥ, vibuḥ ni(ṅ) hədap ṅaran ika, (32) tuṅgəṅniṅ hədap ṅarannya, Adəlit tar kavənaṅ tinambəhan·, Agəṅ tan kavənaṅ linvaṅan·, haneṅ buvana ri liman·, haneṅ prətivi ri təṅu, tar luga tar humpə duvəg juga ya, tuṅgəṅniṅ hədap ṅaran ika, nahan kavivastunikaṅ bayu sabda hədap liṅ saṅ pandita, (33) ndaḥ yeka pinake- vəhnikaṅ bayu sabda hədap liṅ saṅ pandita, byakta maṅke juga tan iha tar dəlaha, vartamana An hibəki ikaṅ buvana lavan sarva janma, tar rakva-rakva Ikihən·, rakva karikeṅ bayu sabda hədap an hana ri sariranta,ya pinakahurip ta, taham tuhu pvaṅkulun·, ndaḥ teṅət-iṅət ta kirnanya ri rat·, kadyaṅganikaṅ pañcabayu vinuvus seva svagata katika, lima ta rakvak veha niṅ bayu ṅarannya, taha tuṅgal ikaṅ bayu, havananya vijil ri sarira Ata ya lima, ndya lvirnya nihan·, prana ṅaran ikaṅ bayu yan mijil saṅka ri muka, Apana ṅaran ikaṅ bayu yan mijil saṅka ri lə:t lavan pəlat·, samana ṅarannya yan mijil ri hati, byana ṅrannya yan mijil ri puhunvulu, Udana ṅarannya yar mijil ri vunvunan·, nahan lvirnya lima kavijilnya ri sarira, mataṅyan si- naṅguḥ pañcabayu de saṅ viku vaneḥ, kintu tuṅgal ikaṅ bayu ṅarannya, (34) maṅkana tekaṅ sabda An pakaṅaran akasa ri bvat aji tan kaprakarana, ndya lvirnya nihan·, pratyaksa numana pama- non pramananiṅ sabda Iki pramana ṅkana, Ata savak sabda guna krata katon·, Apa sinaṅgaḥ akasa ṅarannya, Ikaṅ sabda, sumahur rikaṅ mapuṅguṁ, nahan ta karikaṅ sabda haneṅ ruhur, yanikaṁ ṅ akasa sinaṅgah- nya sabda, Apa mataṅyannya Akasa ṅaran ikaṅ sabda haneṅ ruhur, Apan laṅit ṅaran ika, apa mataṅyan laṅit ṅaran ika, laṅit ləṅit tan hana kaliṅanya, Aparan pva kaṅ dadi hiṅaniṅ laṅi- t ahirəṅ lvirnya katon denta ya təṅha, avya jñanendrya ṅaran ika, hədap sagraha pinakapanon·, mataṅyan pətəṅ ahirəṅ lvirnya, Apa paṅgahnan ta Irika, vulat i lvar, kidul·, ku- lvan·, vetan·, takarin kadi təpinikaṅl aṅit lvirnya ləṅit·, lvirnya, Ahirəṅ anila-nila katonnya saka ṅke, vetniṅ dohnya kaliṅanya, yadyapin paranaṅ parahvanan layarana mamaṅke juga Ika, maṅkana tekaṁ ṅi ruhur, laṅit ləṅit tar hana kaliṅanya, mataṅyan ahirəṅ lvirnya, katonanya matyana kapənyəkapihantəb tekiṁ ṅvaṅ sabuvana, ya tan hana prətivi, buvana, svarga i ruhur ta, nahan paṅguhnanta mataṅyan laṅit ləṅit ṅaran ika, Apa pva mataṅyan·, Akasa ṅaran ikaṅ sabda, akasa svabava pinavavakna tan katon tar kagaməl·, tuhun hirəṅ ka- rəṅə: kasaṅguhannya hədap·, nahan mataṅyan akasa ṅaran ikaṅ sabda ri bvat aji, (35) maṅkana tekaṅ pañcendriya vinuvus saṅ seva svagata, lima ta rakva kvehan iṁ ṅ indriya, taha tuṅga- l ikaṁ ṅ indriya, Apa kariḥ sinaṅgaḥ Indriya ṅarannya, Ikaṅ hədap·, lima ta rakva kvehanniṅ hədap·, taha tuṅgal ikaṅ hədap·, kavijilannya ri sarira Ata ya lima, ndya lvirnya nihan·, svatahnindriya ṅaran ikaṅ hədap yan mijil ri taliṅa pinakapaṅrəṅə: sabda, granendriya ṅarannya, yan mijil ri ṅ iruṅ pinakapaṅambuṅ ganda, jihvendriya ṅarannya, n vijil ri lidaḥ pinakapaṅrasa ri sadrasa, təvəkindriya ṅarannya, n vijil ri ku- lit pinakapaṅasparsa panas tis, cakvindriya ṅarannya, vijil ri mata pinakapanonira rupavan·, nahan lvimya kavijilan ikaṅ hədap lima rikeṅ sarira, mataṅyan sinaṅguḥ pañce- ndriya de saṅ seva svagata, ndan ikaṅ hədap an padvara lima sakeṅ sarira, Atətəg ya ri visayaniṅ rovaṅnya, byaktanya tar vənaṅ teṅ hədap pinakapanon yar vijil ri taliṅa, Apan paṅrə- ṅə: sabda pakənan ika, tar vənaṅ taṅ hədap pinakapaṅambuṅ ganda yar vijil ri lidaḥ, Apan pinakapaṅrase sadrasa pakənan ika, tar vənaṅ taṅ hədap pinakapaṅrəṅə: yar vijil ri kulit·, Apan paṅasparsa paṅhədap panas tis pakənan kita, taṅeḥ yar vuvuvsən·, Apan kaliṅanya, atətəg juga kahədapi ri visayanya Ar pakadvara lima Aviji rikeṅ sarira, Apa pada nyaṅ bayu mətu mahavan ri tutuk·, tar vənaṅ taṅ bayu panuhun saṅka kala yar mətu mahavan ri ṅ iruṁ, Apan paṅambuṅ ganda pakənan kita, yar mətu mahavan ri tutuk·, Ikaṅ bayu an pakaṅaran hab-hab, ṅarannya, vənaṅ ya panuhun saṅka kala Apan maṅkana pakənan ika, ndan ikaṅ bayu mətu mahavan ri tutuk mvaṅ ri ruṅ ta, tuṅgal ika kunaṅ apan atətəg ya ri visayanya, Apan dvaranya ya malen-lenakənya, maṅkana tekaṅ hədap an pada tətəg ya ri visayanya, tar vənaṅ makavisayaniṅ rovaṅnya, Apan dvaranya ya malen-lenakənnya, Ikaṅ hədap makadvara lima rikeṅ sarira, tuṅgal·, nahan mataṅyan sinaṅguḥ pañcendriya de saṅ seva svagata, kunaṅ ri saṅ meṅət tu- ṅgal ikaṁ ṅ indriya ṅarannya, tuhun kavijilannya ri sarira Ata ya lima viji, kaliṅannya Ikaṅ bayu sabda hədap ya vvitniṁ ṅ aji lavan sastra, lvanya kənyar ya cinəṅil·, tuṅgalnya simpənnya ya tinakva- n de saṅ pravadika siṅhavadi, (36) nahan deyanta meṅət ya tanikaṅ dasanamapariyaya, paramarta ṅarannya, pasukniṅ bayu rikeṁ ṅavak·, kaparamarta ṅarannya, vijilniṅ bayu rikeṁ ṅava- k·, jñanantara paramarta ṅarannya, Antaraniṅ masuk lavan mətu, Aparamarta ṅarannya, Ikaṅ haneṁ ṅ abyantara, Apa pinakavaknya sivaḥ, apa pinakavarnanya paramanuḥ, apa pinakalilaṅnya A- kasa, apa pinakatundu kasipatanya Ikaṅ bayu tan umirir, Ikaṅ umirir aṅin ṅaran ika, Ikaṅ rivut bayubuta ṅaran ika, Ikaṅ seduṅ bayupapa ṅaran ika, hana ta laṅgəṅ tan umirir, Ikaṅ pinakatyas nikaṅ sunyataya, ə:siniṅ limas-kumurəb, tapakniṅ kuntul maṅlayaṁ, hənəṁ ṅ ivak ri tasik·, Ika pinakavalakaṅniṅ hantəlu, vəluniṅ aṅlu, tyəsniṅ pətuṁ, ya ta sinaṅguha paramarta ṅarannya, Akasa paramarta kumva pva ri ruṅnira, ya ta məsat məgil riṅ abyantara, ya ta sinaṅguḥ akasa paramarta, ṅarannya, ya sinaṅguḥ li- na ṅarannya, Umapa lvirniṅ lina ṅarannya, tar palvir, mapa rupanya tar parupa, apa laksananya tar palaksana, apa hədapnya tar pahədap·, iḥ umapəki takariḥ, Iṅət-iṅət rasaniṅ aturu tar paṅipi; i- ṅət-iṅət rasaniṅ aturu tar paṅipi, katəmu rasaniṅ si lupa; pinəḥ pva rasaniṅ si lupa, katəmu ta rasaniṅ vvara hinədapnya, tan suka tan duka, tan grahya tan grahaka, pinəḥ rasanika katəmu taṅ rasa sakəda- p·, sakədep·, ṅarannya, ñəp ikaṅ taṅ ñəp ṅarannya, tatan kinavəruhan lavasnya, saṅkanya, parannya, mvaṅ ləpasnya, pinəḥ rasanika katəmu taṅ moksaḥ, Ikaṅ taṅ moksaḥ, ṅarannya, tatan kinavəruhan leknya, tu- hunya, təkapnya, pinəḥ rasanika katəmu taṅ ləpas, nahan lvirniṅ varaḥ de hinilaṁ, kevalya pamupug ataḥ katəmu taṅ kevalya ṅarannya, sasvami kavaḥ paramaḥ, tan hana mavak·, tan hana pinakavak·, tan hana tut·, tan hana tinutan·, ya ta sinaṅgaḥ parama kevalya, ṅarannya, samipa ta saṅ hyaṅ atma lavan saṅ hyaṅ sivaḥ, (37) animan ṅarannya Alit·, A- himan ṅarannya Agəṁ, mahiman ṅarannya Advaḥ, lagiman ṅarannya segraḥ, prapti ṅarannya təka, prakmya ṅarannya magavay, Isitva ṅarannya basa, vasitva ṅarannya maṅaku, nahan na Artaniṅ astaguna kavəru- hana ṅ saṅ sevaka darma, (38) jñana ṅarannya Ambək tuṅgaṅ ahəniṅ alilaṁ,vijñana ṅarannya Ambək branta magələḥ, kavijñanan ṅarannya Ambək təka yar kroda, mamrərəp mamati, nahan artaniṅ jñana kavijñana- n ṅarannya, kayatnakna, (39) ksitan ṅarannya cinta makambaṅan·, viksitan ṅarannya cinta valu-valuy, pratajña ṅarannya cinta vuruṁ, kagraha ṅarannya jñana tuṅgaṁ, nirvada ṅarannya jña- na kahərət·, vitarka ṅarannya manaḥ tar katut·, ra Ananta ṅarannya manaḥ tar harsa, asmita ṅarannya manaḥ tar lələḥ, (40) anendriya ṅarannya tar katon taṅ panon·, manon vi- jñana ṅarannya panon ta ri madvaḥ ri buvana ləmbana, jñanendriya ṅarannya panon ta ri maparək maṅke pratyaksa [ṅarannya], nahan artaniṅ pariyayaniṅ na kavəruhanta, (41) ganalniṅ bayu ṅarannya siṅ kasparsa, kavənaṅ pi- nasukikən vinijilakən pinəgəṅ ri ruṅ ta kətaṅ bayu ṅarannya, tar pavak tar parupa tar pavarna, tar kagaməl tar kasikəp·, suksmaniṅ bayu ṅarannya tar katon·, Adyatmakaniṅ bayu ṅarannya trusi ikaṁ ṅ a- dvaha parək deniṅ bayu, ganalniṅ sabda ṅarannya siṅ karəṅə:, kavənaṅ vinijilakən·, kavənaṅ pinəgəṁ, litniṅ sabda ṅarannya tar pavak tar parupa tar pavarna, tar kagaməl tar kasikəp·, suksmaniṅ sabda ṅarannya tan ka- ton·, Adyatmakaniṅ sabda ṅarannya trus ikaṅ magəṁ ṅadəmit deniṅ sabda, tan hana katunan sabda, ganalniṅ hədap ṅarannya pinakapanon pinakapaṅrəṅə:, pinakapaṅambuṅ pinakapaṅasparsa pina- ka paṅhədap·, litniṅ hədap ṅarannya tar pavak tar parupa tar pavarna, tar kagaməl tar kasikəp·, suksmaniṅ hədap ṅarannya tar kevəhan saparanya, trus ikaṅ dunuṅ deṅa, ndaḥ tan patapak·, tan pa- vuri, təp cəp luṅha təka meṅgal·, Adyat makaniṅ hədap ṅarannya trus ikaṅ agəṁ ṅadəmit deniṅ hədap·, sapta patala sapta buvana, I svar ri ruhur kapvaka kasuluhan katəkan deniṅ hədap·, nahan ta vivastunikaṅ bayu sabda hədap·, keṅətakna saṅ sevaka darrna, simpənya mvaṅ lvanya, (42) telas ikaṅ bayu sabda hədap inucap ta, yeki kinala karantan ya təluṅ viji, Atambəhan ta kita kala tar- muvaḥ rvaṅ viji, Apa pinakatambəhnya, buvana lavan sarira, Apa ta sinaṅguḥ buvana ṅarannya, prətivi lavan akasa, Apa sinaṅguḥ sarira ṅarannya, sahana riṅ akasa lavan sahana riṅ prətivi, ndya lvirnikaṅ sarira hana riṅ akasa, nyaṅ vintaṁ, vulan·, Aditya, vaṅkavaṁ, kuvuṅ-kuvuṁ, saṅhub, kukus, mega, hudan·, kilat·, gəlap·, gərəḥ, gəntər, patər, rahu handaru, paramanuḥ, lindu, nahan lvirnikaṅ sarira hana riṅ a- kasa, ndya lvirnikaṅ sarira hana ri prətivi, nyaṅ vvay, tasik·, Apuy, vatu, gunuṁ, trəna, taru, lata, gulma, pasu, pasksi, [sarikrami], sarpa, stavara, jaṅga, madi; sesiniṅ lvaḥ lavan tasik·, saṅ rumaṅkaṁ, saṅ kuməlip ri prətivi, makadi ta janma sivvaṁ, nahan sarira hana ri prətivi ṅaran ika kabeḥ, ya ta kaliṅan iṅ paribasa sajña, sajñana kaliṅannya, Apan tuṅgal hurip ta lavan huripnikaṅ rat·, bayu sabda hədap katuṅgalannya kaliṅannya, ya sinəndinikaṅ paribasa sajñana, sajñana sinəndinya kaliṅanya, Apa byaktanya Ajñana sinəndinya, təlu viṅarani buvana lavan sari- ra, təlu viṅarani ajñana, ndya rahinanya, buvana, sarira, Ajñana, Apa ta sineṅnika, nihan avak kəta, yan hilaṅa Ikaṅ bayu sabda hədap saka ṅke, byakta mavuk-syuḥ dravatan pahaməṅan sa- riranta, maṅkana tekaṅ buvana lavan sarva janma, ya tan hana Ikaṅ bayu sabda hədap iriya, byakta ta yan hanti hantu mati tan pasesa Ikaṅ sarva janma, sinar paravasa syuḥ runtuḥ rubuḥ Ikaṅ prətivi lavan akasa, kunaṅ pva ri hananikaṅ bayu sabda hədap irikeṅ rat kabeḥ, nahan mataṅyan pva saka paripurna pagəḥ Ikaṅ rat kabeḥ, maṅkana tekaṅ paribasa kavikun·, maṅiku kətaḥ kaliṅanya, Apa maṅiku ṅarannya, mamet·, Aparan pinet saṅ hyaṅ ajñana, ndi pinet·, ndi iniku, irikaṅ aṅga ro, Aṅga ro ṅarannya buvana lavan sarira, yan nirukti pari- basa bujaṅga, buha ṅga kaliṅan ika, buḥ Ikaṅ prətivi, Aṅga Ikaṅ sarira, buḥ Ikiṅ sarira, Aṅga Aṅga Ikiṅ prətivi, dadi ya samaṅka, ri saṅ vruḥ, Apan pada sarira, pada prətivi kaliṅannya, prə- tivi biparita ṅaran ikaṅ ləmaḥ, prətivi cañcala ṅaran ikaṅ sarira, ngka tan pinet·, ṅka tan iniku, ndaḥ maṅkana ya tan inaku ikaṅ saṅ hyaṅ ajñana, de saṅapa, de saṅ viku, syapa ta saṅ viku ṅaranira, syapa ta syaku ṅaranira, ndya Ika saṅ viku ṅarannya, syaku, ndya Ika syaku ṅarannya, saṅ maṅaku tar kaku, ndi ṅke ri buvana lavan sarira, sira tuṅgal·, sira darma, sira pramana ṅaranika, Iḥ, kapuhan ranak devata saṅhulun·, Apa mataṅyan kapuhan rana devata saṅhu- lun·, Umaṅən-aṅən rasanikaṅ bayu sabda hədap ranak devata saṅhulun·, Ar ya kumusa buvana lavan sarva janma, halimpunya ya juga pinakahuripnikaṅ rat·, ya ta mata- ṅyan tan hana visesa vaneḥ beda sakeṅ bayu sabda hədap ranak devata saṅhulun·, Umijil pva tutuk devata saṅhulun ikaṅ saṅ viku, saṅ maṅaku tar kaku ṅke ri buvana lavan sarira, sira tuṅgal·, sira darma, sira pramana liṅ devata saṅhulun·, ya ta pva sira drabya t makanira kapva Ikaṅ bayu sabda hədap mvaṅ ikeṅ sarira, yar kvaliṅanta ri kami, Aum·, drabya t makasiḥ, kasihana ta ranak devata saṅhulun·, təṅətakna Irikaṅ viku, saṅ maṅaku tar kaku ṅke ri buvana lavan sarira, yar kvaliṅanta ri kami, Aum·, syapa ta ri ṅaranta ṅuni duk rarey, Ikaṅ pinagu- gutikən ta vuyaḥ deniṅ bapa Ibu, nambaṅ hulun syanu ṅaran ranak devata saṅhulun·, deniṅ bapa Ibu, Aum·, yukti ikaṅ pavaraḥ ta ri kami, vənaṅ ta kita, kami tumakvana na va- k mami, sumahur na vak mami, kita hana marəṅ ya humədapa rasanikaṅ vuvus mami, maṅkana krama mami ri saṅ matuha ṅuni, ndaḥ Imanya ta ṅaran iki mavaraḥ syanu, yu anu kumva ta kami, nyaṅ hulun kumva ta kita, Ivəhnya ya tar katakvanakna mami ri kita, Ar sahur kita si nyaṅ hulun·, vruḥ kita Inaranan syanu, Aum·, yeki anakniṅ hulun ikaṅ inaranan syanu, kumva ta ki- ta, hade avakniṅ syanu ṅaran ika, yan bayu sabda hədap ta Ikaṅ inaranan syanu liṅ ta, bayu sabda hədapniṅ syanu, ṅaran ika, ya saṅ yvaga pasamvaha sapaniskaranya vak ta kabeḥ Inarana- n syanu liṅ ta, hade ataḥ saṅ yvaga pasamvaha sapaniskaranya vakniṅ syanu ṅaran ika kabeḥ, Apa byaktanya drabya siṅ syanu ika, inakunya viya, buvana ṅku, sarira ṅku, bayu ṅku, sabda ṅku, hədap ṅku pasamvahanya vak ṅku kabeḥ, maṅkana liṅnya paṅaku, Ikaṅ saṅ maṅaku tar kaku tapvan katuduḥ juga rasika, valiṅ tatan mevəḥ Ikaṅ inaranan syanu, mvaṅ ikaṅ inaku ta bapa Ibu, Apa byaktanya mevəḥ, ndaḥ vi bapa Ibunika syanu, tar vavaha vuniṅ bapa Ibunya ri dihyaṁ, takvanakna gavay puhun i daṅ acarya mvaṅ daṅ upadya karuhun ri bagavanta, yar vruḥ Irikaṅ inaranan syanu, mvaṅnikaṅ ina- kunya bapa Ibu, kunaṅ saṅkariṅ puṅguṅnya, nahan mataṅyan takvanaknanya, maṅakana ta sira mpu, ta raṅga sira magavay, ya vruha Irikaṅ inaku ni syanu, bapa Ibu, kunaṅ saṅka riṅ puṅguṅnira, nahan mataṅyan raṅga gumavay bapa Ibu,nikaṅ syanu, Inavakənira ta ya rvaṅniṅ vaduri, ginavay puspa liṅga, ləmaḥ binimba lavan gaṅsa liniṅir ya ta hədapanira bapa Ibunika syanu, hədapinika saṅ makvan·, sinəmbahnya tekaṅ puspa liṅga, ləmaḥ binimba gaṅsa liniṅir, kaliṅanya, pada pu- ṅguṅ saṅ makvan lavan saṅ kinvan·, Apa padanya, kadyaniṅ vuta manuṅtun atuta tinuṅtun·, kasasar pva ya riṅ alas gəṁ ṅarannya, kapan ata ya pamaṅguhakən mava, maṅkana ta saṅ makvan mvaṅ saṅ kinvan magavay puhun·, kapan ata sira tətəs irikaṅ inaranan sya- nu, Apan pada vulaṅunira, Apa kari hədap ta ri bapa Ibunika syanu, tar vəkasniṅ sinaṅguḥ visesa Ika; ri huvusnya mati, luput mara masarira bapa Ibunika syanu rakva kavənaṁ ṅavehan makavaka ṅ len·, A- hurip pva ya tutur masarira sapvacap lavan anak putu, kvanan ta ya makasarira len·, makavak ikaṅ liṅga liṅir puspa liṅga, ta- r kavənaṅ ata ya tan aṅga makavak ika, ri huvusnya visesa bapa Ibunika syanu kapva, visesaniṅ bayu sabda hədapnya; ri vəkasan vineḥ pva ya madadya-dadyana, kinvan makava- ka Ikaṅ liṅga liṅir pratima puspa liṅga ronniṅ vaduri, haləpas sakeṅ vuru kadaṅ mvaṅ ri vukvan aṅga saṅ viku pamvatan gavay, mataṅyan vehi bapa Ibunika syanu madadya-dadyana, vineḥ makavak tan avaknya, rasaniṅ vuvus saṅ pandita, təka vəkasan sinaṅguḥ rahasya, bapa Ibunika syanu, təka vəkasniṅ sinaṅguḥ darmvatama mahavisesa, Apan vənaṅ sarva karya rikaṅ loka, magavay tar ginavay, ya ta mataṅyan sastra taḥ guru ta- ḥ sva taḥ Ikaṅ syanu, ṅarannya, na sastra taḥ tar kəneṅ inajyan·, tar katəmu deniṅ sastra, na guru taḥ luput tinakvanakən·, tar kəna pinətəṅən deniṅ guru, kaliṅanya, sarat taḥ sva taḥ juga hana tar hinanakən·, ṅarannya, na bayyar na putra na bandu bə:h; sira ta sinaṅguḥ darma tuṅgal makavak ikaṅ buvana lavan sarva janma, na putra taḥ tar panak tar paputu, na bayyar tar parabi, na mata taḥ na patəmpva taḥ, sira ta sva taḥ tar pabapa tar pebu, tar pasaṅka tar paparan·, Avis mrati drəsti, sira ta manon tar katon·, vəruḥ tar kinavəruhan·, pramana tar kapramanan·, manuduḥ tar katu- duḥ, masarira tar sinariran mabayu tar binayvan·, masabda tar sinabdan·, mahədap tar hinədapan·, parəṅ gata juga mətu lavan sariranya, bayu sabda hədapnya, Arsakeṅ garbavasa ṅuni, ndaḥ tapvan paka- ṅarannya sakeṅ daləm vətəṁ, savətunta ri heṅ ata ya, Ianaranan deniṅ bapa Ibu syanu, ya ta mataṅyan saṅ hyaṅ mevəḥ ṅaranika syanu vaneḥ, Apan hana sariranya sinaṅgaḥ syanu, hana bayu sabda hədapnya sinaṅgahnya syanu, hana saṅ yvaga pasamvahanya vaknya kabeḥ, sinaṅgahnya syanu, kaliṅanya pətəṅ pəpət andakara juga ṅvaṅ sabuvana, tar vəruḥ sinaṅgahnya bapa I- bu lavan anak·, syapa ta sira vihikan ri bapa Ibunikaṅ sabuvana, lavan anaknikaṅ loka, saṅ pandita juga tar hana vaneḥ, (43) arti arta puṅguṅnikaṅ loka Irikaṅ inakunya bapa Ibu lavan anak təkap devata saṅhulun·, kunaṅ gati ranak devata saṅhulun tekiṅ tətəsi kəna Inaranan syanu, yar kvaliṅanta ri kami, Aum·, hayva ta kita tar meṅət ri beda niṅ katon·, ṅuniveḥ saṅ manvan·, nihan kəmbaṅniṅ vuṅavari pintonakna mami ri kita, pamratyana pratyananta Irikaṅ inaranan syanu, (44) katon kəmbaṅnikaṅ vuṅavari denta, mambaṅ hulun·, Apa varnanya tinon ta, baṅ pvaṅkulun·, eṅət ri tinonnya ṅaran ika, dvara havan iṅ panonton kembaṅ vuṅavari ri vruḥ kita, taham yeku mata- nta gvala kaliḥ viji, eṅət ri dvaraniṅ panonnya ṅaran kita, panonton kəmbaṅnikaṅ vuṅavari vruḥ kita, taham yeku hədap ta mijil mahavan ri matanta kanan keri, eṅət ri panonnya ṅaran ika, saṅ tumon ikaṅ vuṅavari, syapa ta ya, ranak devata saṅhulun·, ndaḥ təguhi teka denta, yeka Inaranan syanu deniṅ bapa Ibunta, Ikaṅ tumvan kəmbaṅnikaṅ vuṅavari, yeka manon tar katon ar hana ṅke ri sariranya, kaliṅanya tar panon ikaṅ sarira, kəmbaṅnikaṅ mata kaliḥ viji, Apa byaktanya pan panon·, nihan kita, taya tu- ru ri kuləm avasya rikaṅ kala, pijər biparita, nidra ta kita, dinva dvaḥ pva kita deniṅ maliṁ, Asuluḥ apañjutekaṅ maliṅ n alap drabyanta, matanta hana taḥ vulat·, dumələṁ, ndan tan panonnya vinayaṅ-vayṅan taṅan·, tutuk ta tar parəṅə:n dinulaṅan vuyaḥ, tahanan byaktanikaṅ sarira lavan mata, Ananta ya manon·, Ikaṅ syanu piḥ Ikaṅ makakuruṅan ikaṅ sarira tar turu ya tar kəneṅ harip mata, Ica lila juga ya maməṅ-aməṁ ṅke ri svapna laksana, kadi panonnya ṅke panonnya ṅka, Ikiṅ sarira samaṅke, kavəkas ri kalasa, ikaṅ syanu ṅ piḥ manon ata ya ri sva- pna laksana, Ar vaṅsil sakeṅ sarira, maluy pva kaṅ syanu mantuk ri sariranya, malilir ta ya mataṅhi, ṅarannya denikaṅ loka, tinonnya taviṅ umahnya babak·, maraṅraṅ denikaṅ maliṁ, mukanya hibək harəṁ, tutuknya mesi vuyaḥ, drabyanya kabeḥ lilaṁ, tan pasesa katon denya, Avuta ya krak aminta tuluṁ, nahan paṅanumanan ar tanpato- n panon tan parəṅə: ikaṅ sarira samaṅke, byaktanika syanu juga Ar ya manon ri sakala niskala, An ton kəmbaṅnikaṅ vuṅavari, An pakapanon hədapnya, makadora matanya kaliḥ, an pakasadana bayunya, makpamastu sabdanya, An pakapaṅastu sariranya, An pakadvara ri ikaṅ buvana, nahan deyanta Umupata Ikaṅ inaranan syanu, (45) təlas ika, Apa ta Avak ni- ka syanu, hana terika sira tar hana kunaṁ,yan koliṅanta; tan si tan hana, tan antaraniṅ hana lavan tan hana, jati juti kunaṅ tar jati tar juti, tan antaraniṅ jati lavan juti, tuṅgəṅ tar tuṅgəṅ kunaṁ, tar si tuṅgəṅ tar si tar tuṅgəṁ, tar antaraniṅ tuṅgəṅ lavan tar tuṅgəṁ, kaliṅanya; tuṅgəṅ ri kavakanya, tar tuṅgəṅ ri kavakanya, Antara ri kavakanya, syanu ri kavakanya, yadyastun panaṅguhakənta ya lavan hade, hade ata pvaṅkulun·, hade ri kavakanya, ya ri kavakanya, syanu ri kavakanya, kataliṅanya, taṅeḥ yan sədəṅ pasabda juga Ika kabeḥ, ndya sabda; hana sabda tan hana sabda, jati sabda, juti sabda, tuṅgəṅ sabda, tar tuṅgəṅ sabda, ya sabda; hade sabda, Antara sabda, Ikaṅ inaranan syanu tapvan ta sabda ju- ga Ika, An sira madrabya tan pinakadrabya, Apa pva kapaṅguḥ hana nira, saṅ mamaṅguḥ ataḥ tar kapaṅguḥ, ya jayanya kapaṅguha kaharəp ta, Avakniṅ syanu, juga hiṅaniṅ kapaṅguh lavan kasabda, mvaṅ kaviveka, Aṅhiṁ ṅka Ikaṅ sabda Ata hiṅaniṅ mata kapaṅguha siṅ karəṅə:, Avakniṅ syanu ataḥ makahiṅaniṅ siṅ karasa mvaṅ kəna si sabda, kunaṅ bayu sabda hədap- nya, hiṅaniṅ karəṅə:, karasa, kasparsa Ika, lavan kəna vinastvan·, kunəṅ ika saṅ mamaṅguḥ, sira ta mamaṅguḥ tar kapaṅguḥ, yavat kapaṅguḥ tavat drabya, yavat drabya tavat papa hade ika, Apa po katəmvananira, saṅ manəmu ataḥ piḥ tar katəmu, yavat katəmu tavat drabya, yavat drabya tavat papa hade ika, Apa ta kariḥ katəpətananira yar kvaliṅanta, saṅ manəpəti ataḥ tar katəpə- tan·, yavat katəpətan tavat drabya, yavat drabya tavat papa hade ika, Umapa pva kavastonira, saṅ mamaston ataḥ tan kavaston·, yavat kavaston tavat drabya, yavat drabya tavat papa hade ika, Apa pva kahədapanira, yar kvaliṅanta, saṅ maṅhədap ataḥ siḥ tar kahədap·, yavat kahədap tavat drabya, yavat drabya ta- vat papa hade ika, Umapa po katvananira, saṅ manon ataḥ siḥ tar katon·, yavat katon tavat drabya, yavat drabya tavat papa hade ika, Umapa pva teṅət-iṅət- anira, saṅ meṅət-iṅət ata siḥ tar teṅət-iṅət·, yavat teṅət tavat drabya, yavat drabya tavat papa hade ika, Apa deyaniṅ kumavruhana sira kariḥ, yar ko- liṅanta, yavat kəna kinavruhan·, yan emana, yan evəha, yan aganala, yan alita ṅ sukma taḥ kavruhanya kəna kinavruhana, tavat drabya juga Ika kabeḥ de saṅ mano- n·, kaliṅanya syanu juga kumavruhi ika kabeḥ, Apa kariḥ avakanika syanu kaharəp ta, mataṅyan kapaṅguha lavan kəna kinavruhana, kagaməla katoni karika syanu ka- harəp ta, rupa varna sariranya kətaḥ hiṅa katon kagaməl·, makavak iṅ lit ləjñəp·, moksaḥ hiṅaniṅ karasa kasparsa, makavak lilaṅ hənəṅ taravaṅ nirasraya kunəṅ ika syanu kaharə- p ta, maka kapaṅguḥ hana siṅ karəṅə:, hade sabdanika syanu kətaḥ makavak lilaṅ hənəṅ tarvaṅ nirasraya, hiṅaniṅ maka kapaṅguḥ hana siṅ karəṅə:, makavak iṅ sukma dadi hana dadi tan hana, kunaṅ ika sya- nu kaharəp ta, maka katəvaniṅ teṅət-eṅət·, taha hade hədapnya syanu kətaḥ makavakniṅ sukma, dadi hana dadi tar hana, maka katəvan hiṅaniṅ teṅət-eṅət·, kunəṁ ṅka saṅ ma- non ikaṅ inaranan syanu, tar katəmu jugeka, luput sakeṅ rika kabeḥ, tan hana ta vənaṅ tuməke sira, ṅunivəḥ kumavruḥ hana sira, sariranira rakva vənaṅa kumavruḥ hana sira, taha sira kətaḥ kumavruḥ hana sariranira, Apa denira kumavruhi sariranira, tinonira ginaməlnira sariranira, Aku sarira kumva ta rikaṅ sarira, taha tan hana janma maṅkana, kevala Inulahakən kəta, lumaku linakvakən·, gumuliṅ ginuliṅakən·, Apa pva samadanya pakaraṅan sarira, ica byavasaya nu gatanika saṅ manon juga mataṅyan arani, ya sarira, Inakunya ta ya sarira ṅku, bayunira rakva vənaṅa kumavruḥ hananira, taha sira kətaḥ kumavruḥ hana bayunira, Apa denira kumavruhi bayunira, Ina sparsanira pa- suk vətu ri ruṅnira, aku bayu ṅku, kumva karikeṅ bayu, taha tan hana janma maṅkana, kevala masuk pinasukikən·, mətu vinətvakən tuṅgəṅ kinuñci kəta ṅ bayu, Apa pva samada- nya pakaṅaran bayu, ica byavasaya nu gatanika saṅ manon juga mataṅyan arani ya bayu, Inakunya ta ya bayu ṅku, sabdanira vənaṅa kumavruḥ hana sira, taha sita kətaḥ kumavru- hi sabdanira, Apa denira kumavruhi sabdanira, rinəṅə:nira, vinastonikənira, Aku sabdaku, kumva ta rikeṅ sabda, taha tan hana janma maṅkana, Apa po tan pramana sabda yyar vaknya, kevala mijil vinijilakən dadi hinərət pəgəṅ kəta ṅ sabda, Apa pva samadanya pakaṅaran sabda, ica byavasaya nu gatanika saṅ manon juga mataṅyan arani ya sabda, Ina- kunya ta ya sabdaku, hədapnira kari vənaṅa kumavruḥ hana sira, tan hana sira kətaḥ kumavruḥ hana hədapnira, Apa denira kumavruḥ hana hədapnira, meṅətnira hədapnira panonira, paṅrəṅə:nira, ya paṅhəda- pnira, rinakniṅ paṅan inum lavan ta viḥ, Aku hədap ta kva hədap·, kevala maripakvan pinaripakvakən·, kətaṅ hədap·, vicitran midər kinirakirakən·, Apa pva samadanya pakaṅaran hədap lavan aṅə- n-aṅən·, ica byavasaya nu gatanika saṅmanon mataṅyan arani ya hədap·, Inakunya ta ya hədapku, Aṅən-aṅənku, nahan byaktanikaṅ sarira, mvaṅ bayu sabda, hədap·, Ar drabya denikaṅ saṅ manon·, Ar tar vənaṅ ika kabeḥ kumavruha sira, Apan byakta katəṅəra mvaṅ keṅət-eṅət pva hala hayuniṅ budi, ndan katəṅər mvaṅ teṅət-eṅət·, riṅ ulaṅ lavan varna [lavan] sabda, syapa manəṅər, maṅiṅət-iṅət·, saṅ manon ata siḥ, saṅ maṅhədap saṅ masabda saṅ mabayu, ndaḥ sira tika Inaranan iṅ ibunta syanu, samulahakənnikaṅ sarira, sira ta sinaṅguḥ acintya, Adrəsya, Abyapadesa, Advaya, Avijñana, Avimohita, Avarna, Avasta, Avacya, prabuta rəbava, Atyanta rəbava, ( 46) acintya ṅarannya, tan kahədap deniṅ hvdapnya, Adrəsya ṅarannya, tan katon deniṅ panonnya, Abyapadesa ṅanrannya, tar kavastvan kahanannya, Advaya ṅarannya, tar kəna sinaṅguḥ tuṅgal·, Apan ro ṅaran ika yan hana kumavruhan sira tu- ṅgal·, Avijñana ṅarannya, tan kəna kinavruhan deniṅ paṅavruhnya, Avimohita ṅarannya, tar kəna puṅguṅan deniṅ puṅguṅnya, Avarna ṅarannya, tar ilu varna Ikiṅ pakavarna-varnaniṅ sariranya, Ava- sta ṅarannya, tar kəna n inaranan·, Avacya ṅarannya, tar dadi inujar-ujarakən·, nahan kavuvusan saṅ hyaṅ pramana Ikaṅ inaranan iṅ bapa Ibunta syanu, sira Ika saṅ hyaṅ paramana, ṅarannya, liṅ saṅ pandita, valiṅ tatan seṅ karika saṅ hyaṅ darma, vinuvusa ṅ matuha, Apa sineṅniṅ darma pramana, Apa sineṅniṅ pramana rahasya, Apa sineṅniṅ rahasya visesa, apa sineṅniṅ visesa tuṅgal·, Apa sineṅniṅ tuṅgal saṅ manon·, apa sineṅniṅ saṅ manon·, ṅarannya, syanu, Apa sineṅniṅ syanu, tar katəmu inaṅən-aṅən·, ndaḥ syanu taya ṅhiṅ saviji, sira sinaṅguḥ bapa Ibu lavan anak·, Apan ṅka baga vi bapa sira rumiñci avaknira, sira ṅhiṅ saviji makavak makalvar rat kabeḥ, humibəki buvana, kadyaṅganiṅ pañjut saviji, pinasaṅ pva kaṅ vərati satus evu sakvadi, tapva Ikaṅ vərati ka- beḥ kandəlan apuy, denikaṅ pañjut saviji; tar hana svaṅ riṅ panas dilaḥ lavan teja, maṅkana ta saṅ manon·, An kahanan kaṅ sarva janma, tar hana svar tar hana ləviḥ, Araḥ ta pada ba- yu sabda hədap juga pinakahuripnikaṅ sarat tar hana vaneḥ, ndaḥ syanu taya ṅhiṅ saviji, sira ta sinaṅguḥ saṅ hyaṅ pramana, makadrabya buvana lavan sarva sarira, ṅuniveḥ bayu sabda həda- p·, nambaṅ hulun ikaṅ inaranan iṅ bapa Ibuniṅ hulun·, syanu kapva Ikaṅ sira sida saṅ pandita, tar hilaṅaniṅ katuduhan saṅ hyaṅ darma kaliṅan ika, ya ta mataṅyan hinilaṁ ṅaran ika, bapa Ibu deniṅ pinakaanak·, ṅuniveḥ ṅaran saṅ prabu, karuhun ṅaran saṅ pandita, rahasya hila-hila laraṅan katuduhan saṅ hyaṅ darma, kaliṅan ika, patula beda saṅ hyaṅ pramana, kaguru vaktran saṅ sevaka darma, (47) enak mara tərus vruḥnika syanu, Ar ya vruḥ tar kinavruhan·, yar maṅrəṅə: tar karəṅə:, yar maṅhədap tar kahədap·, yar manəmu tar katəmu; ar ya manon tar katon·, Ar hana ṅke ri sariranya, ndaḥ ya ta siṅgauḥ mokta jiva, ṅarannya, mokta tutur iṅ hurip; tar dəlaha po kamoksan təmən·, maṅke juga ya riṅ saṅ meṅət·, kunaṅ ikaṅ saṅ viku maṅucap hələm yar huvus tapa, vanantara ṅidaṅ amajar-ajar rumuhun·, kamənanya paṅguhakən kamoksan·, mvaṅ hələm yar praptiniṅ pati, yatika Ujarniṅ viku hayan basma- ran ṅaran ika, kaliṅanya tar dəlaha kamoksan·, vinuvus, maṅke juga ya ri saṅ pandita, ndaḥ pahapagəḥ tambak ta, ya Inarananniṅ bapa Ibunta syanu, Ikaṅ manon tar kato n ar hana ṅke ri sariranya, Ar katon kəmbaṅnikaṅ vuṅavari, sira ta sva taḥ magavay tar nilu ginavay, sit hana tar hinanakən·, hayva ta linvaṅan hayva tinambəhan·, hayva met vasa na, hayva salaḥ hədap·, (48) təlas karasanika sabda devata saṅhulun·, Atika saṅ manon inarananniṅ bapa Ibuniṅ hulun syanu, Ar sira ṅhiṅ saviji makadrabya buvana lavan sarira, ṅuniveḥ bayu sabda hədap·, sira pramana tan kapramanan irikaṅ rat kabeḥ, liṅ saṅ devata saṅhulun·, Umapa pva kaṅ syanu maṅhədap suka duka, tu- ha lara lavan pati, apan sira pramana, liṅ saṅ devata saṅhulun·, tar kapramananniṅ rikaṅ rat·, kapramanan teka syanu maṅkana, Apaniṅ hədap ya papa, syapa ta mehika maṅhədap·, yar kvaliṅanta ri kami, aum·, tuhu kita, suka duka hinədapanikaṅ sariranya, saṅka yyar vaknya juga kəta tekaṅ suka duka hinədapnya, kadyaṅganiṅ apuy, An sakeṅ enaknya I- kaṅ panasnya dilahnya tejanya, maṅkana ta saṅ manon an sakeṅ vaknya Ikaṅ suka duka hinədapnya, prihati lavan inak ambək·, ya ta mataṅyan papa Ikaṅ syanu pava- k pasarira, Apan ri kalanya rakut·, Ikiṅ sarira ganal rako ikaṅ syanu paṅhədap papa; makasarira ṅ alit sukma maya ri svapna laksana, papa Ata ya maṅhədap suka duka Ata ya ṅke ri paṅi- pyan·, kaliṅanya yavat mavak sarira juga Ika syanu, tavat maṅhədap suka duka, Apa Upamana, kadyaṅganiṅ tata mikul-mikul mabyət·, ri kalanta t pikul ika, kita kədap by- ətnya, sakarəṅ kita t pikul ika, sakareṅ kita kədap byətnya, Asuve kita pikul ika, Asuve kita kədap byətnya, tiniṅgalakən pva kaṅ pinikulta, ndaḥ mara ta kita kədap a- byətnya, Ica lila kita siṅ saran·, kaliṅanya sobavaniṅ mikul-mikul juga humədap byətniṅ pinikulnya, maṅkana tekiṅ syanu rakut ikiṅ sarira samaṅke, sobavanya juga humədapi suka duka, tuha lara lavan pati, ndi kariḥ paranan ikaṅ syanu luput iṅ suka duka, salaha deniṅ tuha lara lavan pati, viku asravaka tyagambara Aləməha yan kənəṅ gavay, anusup aṅidaṅ amajar-ajari rəban sampvara, eka vasa ta ya tuṅgal-tuṅgal·, yaya juga ta kabeḥ tar luput ri suka duka ta lara lapa panas tis tuha pati, kaliṅanya sagvananya lavan salahanya ta juga tinut kinuñci ṅinuki deniṅ papa pañcagati saṅsara, Apa sinaṅguḥ papa pañcagati saṅsara ṅarannya, pañca ṅaran iṅ lima, Agate taṅ maṅhədap·, saṅsara ṅaran iṅ papa, ya ta mataṅyan pañcagati saṅsara ṅarannya lima kətaḥ karananikaṅ syanu paṅhədap papa, lima ṅarannya; nyaṅ buvana, nyaṅ sarira, nyaṅ bayu, nyaṅ sabda, nyaṅ hədap·, nahan lima ṅarannya, Apa sinaṅguḥ papa saṅsara ṅarannya, yeka sarananikaṅ syanu paṅhədap suka duka panas tis lara lapa tuha pati, kadi kahədap ikaṅ papa samaṅkana kabeḥ denikaṅ syanu, ya tan hana Ikaṅ buvana tinapaknya, lavan ikaṅ sarira pinakava- knya, ya pinakapaṅhədapnya papa, Ikaṅ bayu ya pinakasadananya papa, Ikaṅ sabda ya pinakasabdanta papa, Ikaṅ hədap ya pinakapaṅhədapannya papa, Apa mataṅyan pinakapapa Ikaṅ hədap·, ka- hədap ika rikaṅ suka duka, hala hayu lara lapa, panas tis de saṅ manon·, ya tan hana Ikaṅ hədap pinakapaṅhədapnya Iriya, taham piḥ, tan hana maṅkana ṅarannya, nahan drəstanta Iriya, ka- dyaṅganikaṅ kayu magəṅ ri təpiniṅ havan·, rug ika rika yar vulatanən juga, nguniveḥ yar halivatanya, Aṅel ika rika, taham piḥ pəraṅ pva kita ya ri prəkuli tan vaduṁ, rug ni ya tinəka, atava ni ṅel kita denikaṅ prəkuli tan vaduṁ, Aṅel piḥ agəraḥ Ikaṅ sarva sandi, tar dva t maṅkana ta saṅ manon·, Aṅel deniṅ hədapnya, lavan drabyanya, ndya kaṅkən kayu magəṅ; nyaṅ suka vahye salvir katon lavan karəṅə:, Apa kaṅkən prəkul lavan vaduṅ, yekiṅ hədap·, Apan byakta pva ya pinakamarganiṅ lara kiṅkiṅ ikeṅ manaḥ, nahan lvirniṅ hədap·, An pinakapapa, Apa lvir nikaṅ sarira pinakapapa, yateka Uṅgvan ta humədap ikaṅ suka lavan duka, Uṅgvan ta humədap ikaṅ hala hayu, Uṅgvan taḥ umədap ikaṅ lara lapa, panas tis, kiṅkiṅ prihati suṅsut·, ya ta mataṅyan paṅhədapaniṅ ikeṅ sarira, nahan byaktanya Ikiṅ avak ar pinakapapa, Apa mataṅyan pinakaikeṅ hurip·, saṅka ya kum ar sumusuk·, sumiku ikeṅ bayu ri kulit·, ri dagiṁ, ri puhun vulu, kahədap tekaṅ panas tis, bata pita, salesma, rorəm·, ṅəlu hulu, lara hati, Ipa pulaṅ kanikaṅ bayu ṅka riṅ avak·, hetunika, nahan bya- tanikaṅ bayu pinakapapa, (49) apa lvirnikeṅ sabda pinakapapa, yateka Amyaktakən malara lavan maṅel·, Apa lvirnya; anaṅa lara, Anaṅa ṅel·, Anaṅa panas,