كِتاب ميلاد يَسُوع المَسيح وَلَد دَاوُد، وَلَد إِبْرَاهِيم. إِبْرَاهِيم وِلِد إِسْحَاق، و إِسْحَاق وِلِد يَعْقُوب، و يَعْقُوب وِلِد يَهُوذَا و أخوانو. و يَهُوذَا وِلِد فَارِص و زَارَح مِن ثَامَار. و فَارِص وِلِد حَصْرُون، و حَصْرُون وِلِد أَرَام. و أَرَام وِلِد عَمِّينَادَاب. و عَمِّينَادَاب وِلِد نَحْشُون، و نَحْشُون وِلِد سَلْمُون، و سَلْمُون وِلِد بُوعَز مِن رَاحَاب. و بُوعَز وِلِد عُوبِيد مِن رَاعُوث، و عُوبِيد وِلِد يَسَّى، و يَسَّى وِلِد دَاوُد المَلِك. و دَاوُد وِلِد سُلَيْمَان مِن مَرَة أُورِيَّا. و سُلَيْمَان وِلِد رَحَبْعَام، و رَحَبْعَام وِلِد أَبِيَّا، و أَبِيَّا وِلِد آسَا. و آسَا وِلِد يَهُوشَافَاط، و يَهُوشَافَاط وِلِد يُورَام، و يُورَام وِلِد عُزِّيَّا. و عُزِّيَّا وِلِد يُوثَام، و يُوثَام وِلِد آحَاز، و آحَاز وِلِد حِزْقِيَّا. و حِزْقِيَّا وِلِد مَنَسَّى، و مَنَسَّى وِلِد آمُون، و آمُون وِلِد يُوشِيَّا. و يُوشِيَّا وِلِد يَكُنْيَا و أخوانو، وَكِت ما شالوهو لِبابِل. و بَعَد ما شالوهو لِبابِل، يَكُنْيَا وِلِد شَأَلْتِئِيل، و شَأَلْتِئِيل وِلِد زَرُبَّابِل، و زَرُبَّابِل وِلِد أَبِيهُود، و أَبِيهُود وِلِد أَلِيَاقِيم، و أَلِيَاقِيم وِلِد عَازُور. و عَازُور وِلِد صَادُوق، و صَادُوق وِلِد أَخِيم، و أَخِيم وِلِد أَلِيُود. و أَلِيُود وِلِد أَلِيعَازَر، و أَلِيعَازَر وِلِد مَتَّان، و مَتَّان وِلِد يَعْقُوب. و يَعْقُوب وِلِد يُوسِف، راجِل مَرْيَم، المِنَّها كان مَولود يَسُوع الإسمو المَسيح. عَلى كِدا، كُل الأقسام مِن إِبْرَاهِيم لِدَاوُد كانو أربَعتاشَر قِسم، و مِن دَاوُد لِغايَة الوَكِت الشّالوهو لِبابِل، أربَعتاشَر قِسم، و مِن الوَكِت الشّالوهو لِبابِل لِغايَة ما جا المَسيح، أربَعتاشَر قِسم. و ميلاد يَسُوع المَسيح كان زي دا: لَمّا يُوسِف كان عَمَل التَّرتيب عَشان يِتزَوَّج مَرْيَم، قُبّال ما إتلَمّو، هي بِقَت حامِل مِن الرّوح القُدُس. و راجِلا يُوسِف الكان عَديل، و ما رَضيان أن يَعمِلا خَجلانَه، كان عاوِز يَخَلّيها بِالسِّر. لَكِن وَكِت ما كان يَفَكِّر في دا، شوف! مَلاك الرَّب جا ليهو في حِلِم و قال: ”يا يُوسِف إبن دَاوُد، ما تَخاف تاخُد مَرَتَك مَرْيَم، عَلَشان الهي حِملَت بيهو، هو مِن الرّوح القُدُس. و هي بِتَلِد وَلَد و إنتَ بِتسَمّيهو يَسُوع، عَلَشان هو بِخَلِّص النّاس بِتاعو مِن خَطاياهم.“ و كُلّو دا كان عَلَشان يَتِم الكَلام الرَّب قال بِالنَّبي: ”شوفو! البِت الما عِرفَت راجِل بِتَحمَل و بِتَلِد وَلَد، و يَكون إسمو عِمَّانُوئِيل،“ دا يَعني: ”الله مَعانا.“ و لَمّا يُوسِف قام مِن النّوم، عَمَل زي ما مَلاك الرَّب أمَرو، و أخَد مَرَتو. و هو ما عِرِفا زي زوجَتو لِغايَة ما مَرْيَم وِلدَت وَلَدا. و هو سَمّاهو يَسُوع. و لَمّا يَسُوع كان مَولود في بيت لَحَم الفي يَهُودِيَّه، في أيام هِيرُودُس المَلِك، شوف! مَجوس مِن الشَّرق جو لِأُورُشَلِيم و قالو: ”وين هو المَولود مَلِك اليَهود؟ عَشان شُفنا النَّجمَه بِتاعتو في الشَّرق و جينا عَشان نَعبُدو.“ لَمّا المَلِك هِيرُودُس سِمِع دا، فَكَّر كَتير فيهو، و كُلّو ناس أُورُشَلِيم مَعاهو. و جَمَع كُل القُسُس الكُبار و مُعَلِّمين القانون، و سألُم: ”المَسيح بِكون مَولود وين؟“ و قالو ليهو: ”في بيت لَحَم الفي يَهُودِيَّه، فِشان دا القالو النَّبي: و إنتي، يا بيت لَحَم، بَلَد يَهُوذَا، ما الأصغَر بين مُديرين يَهُوذَا. عَلَشان مِنِّك يَجي مُدير يَحكُم عَلى النّاس بِتاع إِسْرَائِيل.“ بَعَد دا، هِيرُودُس نادى المَجوس بِالسِّر، و إتعَلَّم مِنَّهُم وَكِت النَّجمَه طَلَعَت. و رَسَّلُم لِبيت لَحَم و قال: ”أمشو و فَتِّشو بِأي طَريق عَلى الوَلَد. و لَمّا تَلقوهو، جيبو لَي الخَبَر، عَلَشان أنا كَمان بَجي و أعبُدو.“ و لَمّا هُم سِمِعو مِن المَلِك، مَشو. و شوف، النَّجمَه الهُم شافوها في الشَّرق مَشَت قِدّامُم لِغايَة ما جات، و وَقَفَت فوق المَحَل الكان فيهو الوَلَد. و لَمّا شافو النَّجمَه، كانو مَبسوطين شَديد جِدّاً. و دَخَلو البيت و شافو الوَلَد مَعَ أُمّو مَرْيَم. و رَكَعو و عَبَدوهو. بَعَد دا، فَتَحو حاجاتُم الغاليَه و قَدَّمو ليهو هَدايا: دَهَب و لُبان و بَخور. و الله كَلَّمُم عَن الخَطَر في حِلِم عَشان ما يَرجَعو لِهِيرُودُس. و هُم مَشو بِسِكَّه تانيَه لِبَلَدُم. و بَعَد ما مَشو، شوف، مَلاك الرَّب جا لِيُوسِف في حِلِم و قال: ”قوم، أُخُد الوَلَد و أُمّو و أمشي قَوام لِمَصر، و أقعُد هِناك لِغايَة ما أقول ليك، عَلَشان هِيرُودُس عاوِز يَفَتِّش عَلى الوَلَد عَشان يَكتُلو.“ و هو قام و أخَد الوَلَد و أُمّو بِاللّيل و مَشى لِمَصر. و هو قَعَد هِناك لِغايَة ما مات هِيرُودُس، عَشان يَتِم الكَلام الرَّب قال بِالنَّبي: ”مِن مَصر ناديت وَلَدي.“ بَعدين، لَمّا هِيرُودُس شاف أن المَجوس ما إحتَرَموهو، كان زَعلان جِدّاً جِدّاً، و رَسَّل و كَتَل كُل الأولاد الكانو في بيت لَحَم، و في كُلّو مَحَل القَريب مِنّو، الأولاد العُمر بِتاعُم كان سَنَتين و أقَل مِن دا، زي الوَكِت الكان عِندو خَبَر مِن المَجوس. في الوَكِت دا، تَمَّ الكَلام القالو إِرْمِيَا النَّبي: ”سِمِعو صوت في الرَّامَه، الحُزن و البِكى كَتير. رَاحِيل تَبكي لِأولادا و أبَت تَكون مَبسوطَه، عَلَشان هُم ما في.“ و لَكِن لَمّا هِيرُودُس مات، شوف، مَلاك الرَّب جا في حِلِم لِيُوسِف في مَصر و قال: ”قوم و أُخُد الوَلَد و أُمّو و أمشي لِبَلَد إِسْرَائِيل، عَشان الكانو يَفَتِّشو عَلى نَفس الوَلَد ماتو.“ و قام و أخَد الوَلَد و أُمّو، و جا لِبَلَد إِسْرَائِيل. و لَكِن لَمّا هو سِمِع أن أَرْخِيلاوُس كان يَحكُم عَلى اليَهُودِيَّه بَدَل أبوهو هِيرُودُس، خاف يَمشي هِناك. و عَشان الله كَلَّمو عَن الخَطَر في حِلِم، مَشى لِقِسم الجَّليل. و جا و قَعَد في المَدينَه الإسِما النَّاصِرَه، عَشان يَتِم القالو الأنبياء: ”بِسَمّوهو ناصِري.“ و في الأيام ديلاك، يُوحَنَّا المَعمَدان جا يَبَشِّر في خَلا اليَهُودِيَّه و يَقول: ”توبو، فِشان مَلَكوت السَّما قَريب.“ فِشان دا هو الكَلام النَّبي إِشَعْيَاء قال بِخُصوصو: ”صوت البِكورِك في الخَلا: حَضِّرو طَريق الرَّب، أعمِلو السِّكَك بِتاعتو دُغري.“ و يُوحَنَّا كان لابِس توب مِن شَعر الجَّمَل، و في وَسطو حِزام مِن جِلِد. و الأكل بِتاعو كان جَراد و عَسَل مِن الغابَه. في الوَكِت دا، ناس أُورُشَلِيم و ناس مِن كُل اليَهُودِيَّه و مِن كُلّو مَحَل قَريب مِن بَحَر الأُرْدُنّ مَرَقو و إتعَمَّدو مِنّو في الأُرْدُنّ. و كانو يَخَبِّرو بِخَطاياهم. و لَمّا شاف كَتير مِن الفَرِّيسِيِّين و الصَّدّوقيين قاعِدين يَجو لِلمَعموديَّه، يُوحَنَّا قال ليهُم: ”يا أولاد الدَّبايب، مِنو خَبَّركُم بِالخَطَر عَشان تَجرو مِن الزَّعل الجّاي؟ أعمِلو الحاجات البِوَرّو النّاس إنتو تُبتو. و ما بِتَفتَكِرو تَقولو في نُفوسكُم: أبونا هو إِبْرَاهِيم. عَشان أقول ليكُم: الله يَقدَر يَطَلِّع أولاد لِإِبْرَاهِيم مِن الحُجار ديل. و هَسَّع دي خَتّو الفاس عَلى عِرق الشَّجَر. كُلّو شَجَرَه الما تَجيب ثِمار سَمِح، بِقطَعوها و بِرموها في النّار. أنا بَعَمِّدكُم بِمويَه لِلتّوبَه. و لَكِن هو البِجي بَعَدي قَوّي مِنّي. و أنا ما كوَيس حَتّى أشيل جِزَمو. هو بِعَمِّدكُم بِالرّوح القُدُس و النّار. مُضراياتو في إيدو، و هو بِنَضِّف أرضو، و بِلِم دُرَتو في المَخزَن، و لَكِن القِشر مِن الدُّرَه بِحرِقو بِالنّار الما بِتموت.“ بَعَد دا، يَسُوع جا مِن الجَّليل لِلأُرْدُنّ لِيُوحَنَّا عَشان يِتعَمَّد مِنّو. و لَكِن يُوحَنَّا مَنَعو و قال: ”أنا لازِم أتعَمَّد مِنَّك إنتَ، و إنتَ تَجي لَي؟“ لَكِن يَسُوع رَدَّ و قال ليهو: ”خَليهو يَكون كِدا هَسَّع، عَشان دا موافِق أن نَتِم كُلّو بِر.“ بَعَد دا هو أدّاهو إذِن. و لَمّا يُوحَنَّا عَمَّد يَسُوع، هو طَلَع طَوّالي مِن المويَه. و شوف، السَّما إنفَتَحَت، و هو شاف روح الله نازِل زي حَمامَه، و جاي فوقو. و شوف، جا صوت مِن السَّما و قال: ”دا هو إبني الحَبيب، و أنا مَبسوط بيهو.“ بَعدين الرّوح ساق يَسُوع لِلخَلا عَلَشان إبْلِيس يَجَرِّبو. و بَعَد ما صام أربَعين يوم و أربَعين ليلَه، هو كان جَعان. و المُجَرِّب قَرَّب ليهو و قال: ”إذا إنتَ إبن الله، أَدِّي أمر لِلحُجار ديل أن يَبقو عيش.“ لَكِن هو رَدَّ و قال ليهو: ”مَكتوب في الكِتاب: الإنسان ما يَعيش بِالعيش بَس، لَكِن بِكُلّو كِلمَه البِتَطلَع مِن خَشم الله.“ بَعدين إبْلِيس اَخَدو لِلمَدينَه المُقَدَّسَه، و خَتّاهو فوق مَحَل عالي في الهيكَل. و قال ليهو: ”إذا إنتَ إبن الله، أرمي نَفسَك لِتِحِت، عَلَشان مَكتوب: يأمُر مَلائكَتو بِخُصوصَك، و مَكتوب، هُم بِرفَعوك عَلى إيدينُم، عَشان رِجلَك ما تَدُق حَجَر.“ يَسُوع قال ليهو: ”مَكتوب كَمان: ما تَجَرِّب الرَّب إلَهَك.“ مَرَّه تانيَه إبْلِيس اَخَدو لِجَبَل عالي جِدّاً و وَرّاهو مَمالِك الدُّنيا كُلَّها و المَجد بِتاعتا. و قال ليهو: ”بَدّيك كُلّو دا إذا بِتَركَع و بِتَعبُدني.“ بَعدين يَسُوع قال ليهو: ”أمشي، يا شيطان، عَشان مَكتوب: أعبُد الرَّب إلَهَك، و إشتَغِل ليهو بَس.“ بَعدين إبْلِيس سابو. و شوف، مَلائكَه جو و ساعَدوهو. و لَمّا يَسُوع سِمِع أن يُوحَنَّا كان مَحبوس، مَشى مِنَّهُم لِلجَّليل. و خَلّى النّاصِرَه، و مَشى و قَعَد في كَفْرَنَاحُوم الجَّمب البَحَر في طَرف زَبولون و نَفتالي، عَشان يَتِم الكَلام القالو النَّبي إِشَعْيَاء: ”أرض زَبولون و أرض نَفتالي، طَريق البَحَر، الطَّرف التّاني مِن الأُرْدُنّ، جَليل ناس الدُّنيا. النّاس الكانو قاعِدين في الضَّلام شافو نور كَبير، و لِلقَاعِدين في مَحَل الموت و ضُلّو، النّور إتنَوَّر.“ مِن الوَكِت داك يَسُوع إبتَدا يَبَشِّر، و يَقول: ”توبو، علشان مَلَكوت السَّما قَريب.“ و وَكِت ما يَسُوع كان ماشي عِند بَحَر الجَّليل، شاف أخوين، سِمْعَان الإسمو بُطْرُس، و أنْدَرَاوُس أخوهو. كانو يَرمو شَبَكَه في البَحَر، فِشان كانو صَيادين. و هو قال ليهُم: ”تَعالو وَراي و أنا بَعمِلكُم صَيادين النّاس.“ طَوّالي خَلّو شَبَكاتُم و تِبِعوهو. و مَشى مِن هِناك و شاف أخوين تانيين، يَعْقُوب إبن زَبَدي و يُوحَنَّا أخوهو، في المُركَب مَعَ زَبَدي أبوهُم. كانو قاعِدين بِصَلِّحو شَبَكاتُم. و هو ناداهُم. طَوّالي خَلّو مُركَبُم و أبوهُم، و تِبِعوهو. و يَسُوع كان ماشي في كُل الجَّليل، و بِعَلِّم في بِيوت الرَّب، و بِبَشِّر بِشارات المَلَكوت، و يَشيل كُلّو عَيى مِنَّهُم و كُلّو ضُعف في وَسط النّاس. و الخَبَر عَنّو مَشى لِكُلّو سُورِيَّه. و جابو ليهو كُل العَيّانين، و العِندَهُم أمراض مِن كُلّو نوع، و أوجاع، و الفيهُم شياطين، و النّاس العِندَهُم العَيى البِرميهُم، و المَفلوجين. و عَمَلُم طَيبين. و ناس كَتيرين تِبِعوهو مِن الجَّليل و العَشَرَه مُدُن، و أُورُشَلِيم و اليَهُودِيَّه و مِن فوق الأُرْدُنّ. و لَمّا شاف الجَّمَع، طَلَع فوق الجَّبَل. و لَمّا قَعَد، تَلاميذو قَرَّبو ليهو. و هو فَتَح خَشمو و إبتَدا يَعَلِّمُم و يَقول: ”مُبارَكين المَساكين بِالرّوح، عَشان ليهُم مَلَكوت السَّما. مُبارَكين الحَزنانين، عَشانُم بِكونو مَبسوطين. مُبارَكين الوُدَعاء عَشان هُم بِيورَثو الدُّنيا. مُبارَكين الجَّعانين و العَطشانين لِلبِر عَشانُم بِكونو شَبعانين. مُبارَكين اليَرحَمو التّانيين، عَشان هُم يَلقو الرَّحمَه. مُبارَكين النُّضاف القَلب، عَشانُم بِشوفو الله. مُبارَكين اليَعمِلو السَّلام، عَشان بِسَمّوهُم أولاد الله. مُبارَكين المَطرودين عَلَشان البِر، عَشان ليهُم مَلَكوت السَّما. مُبارَكين إنتو لَمّا يَشتِموكُم و يَطرُدوكُم و يَقولو كُلّو كِلمَه بَطّالَه عَليكُم عَشانّي بِالكِضِب. أفرَحو و كونو مَبسوطين، عَشان أُجرَتكُم كَبيرَه في السَّما. عَشان النّاس كِدا طَرَدو الأنبياء الكانو قُبّالكُم. إنتو مِلِح الدُّنيا. و لَكِن إذا المِلِح بِقى مَسيخ، كيف بِكون مالِح تاني؟ ما في فايدَه مِنّو لِأي شي إلّا يَرموهو بَرَّه و النّاس يَدوسوهو. إنتو نور الدُّنيا. ما مُمكِن يَدِسّو مَدينَه مَوجودَه فوق جَبَل، ولّا يَوَلِّعو لَمبَه و يَخُتّا تِحِت القُفَّه، لَكِن بِخُتّوها فوق طَرَبيزَة اللَّمبَه، و هي تَنَوِّر لِكُلّو واحِد في البيت. خَلّو نُوركُم يَنَوِّر كِدا قِدّام النّاس، عَشان يَشوفو أعمالكُم الكوَيسَه، و يَدّو مَجد لِأبوكُم الفي السَّما. ما تَفتَكِرو أنا جيت عَشان أخرَب القانون، ولّا الأنبياء. ما جيت عَشان أخرَبُم، لَكِن عَشان أتِمُّم. بِالحَق أنا أقول ليكُم، لِغايَة ما تَفوت السَّما و الأرض، ما يَفوت حَرف واحِد ولّا نُقطَه واحدَه مِن القانون لِغايَة ما الكُل بِتِم. البِخرَب واحِد مِن أصغَر القَوانين ديل و يَعَلِّم النّاس كِدا، بِيَحسِبوهو أصغَر واحِد في مَلَكوت السَّما. و لَكِن اليَعمِل و يَعَلِّمُم، بِيَحسِبوهو كَبير في مَلَكوت السَّما. عَشان أقول ليكُم، لِغايَة ما بِرَّكُم بِفوت بِر مُعَلِّمين القانون و بِر الفَرِّيسِيِّين، ما تَدخُلو مَلَكوت السَّما أبَداً. سِمِعتو هُم قالو لِلنّاس الكانو مِن زَمان: ما تَكتُل. و البِكتُل، هو قَرَّب لِلحُكم. و لَكِن أنا أقول ليكُم، كُل اليَزعَل عَلى أخوهو، هو قَرَّب لِلحُكم. و اليَقَول لِأخوهو: يا بَليد، هو قَرَّب لِلمَجِلس. و اليَقول: يا غَشيم، هو قَرَّب لِنار جَهَنَّم. عَلَشان دا، إذا إنتَ بِتجيب هَديتَك لِمَحَل الضَّبيحَه، و إنتَ هِناك تِتزَكَّر أخوك عِندو كَلام مَعاك، خَلّي هَديتَك هِناك قِدّام مَحَل الضَّبيحَه. في الأوَّل، أمشي و صالِح مَعَ أخوك، و بَعدين تَعال و قَدِّم هَديتَك. إتَّفَق قَوام مَعَ العَدو بِتاعَك و إنتَ مَعاهو في السِّكَّه، عَلَشان العَدو بِتاعَك ما يَسَلِّمَك لِلقاضي، و القاضي يَسَلِّمَك لِلظّابِط و يَرموك في السِّجِن. بِالحَق أقول ليك، إنتَ ما بِتَمرُق مِن هِناك أبَداً لِغايَة ما تَدفَع آخِر مِليم. سِمِعتو هُم قالو: ما تَعمِل الزِّنا. و لَكِن أنا أقول ليكُم، كُل اليَعاين لِمَرَه بِفِكر بَطّال عَمَل زِنا مَعاها خَلاص في قَلبو. كان عينَك اليَمين تَكون سَبَب خَطيَّه ليك، طَلِّعا و أرميها مِنَّك، عَشان أحسَن ليك أن واحِد عُضو مِن جِسمَك يِتوَدَّر، و هُم ما يَرمو جِسمَك كُلّو في جَهَنَّم. و إذا إيدَك اليَمين تَكون سَبَب خَطيَّه ليك، أقطَعا و أرميها مِنَّك، عَشان أحسَن ليك أن واحِد عُضو مِن جِسمَك يِتوَدَّر، و جِسمَك كُلّو ما بِكون في جَهَنَّم. قالو كَمان: البِطَلِّق مَرَتو، خَليهو يَدّيها شَهادَة الطّلاق. و لَكِن أنا أقول ليكُم، كُلّو واحِد بِطَلِّق مَرَتو إلّا بِسَبَب الزِّنا، يَعمِلا تَسَوّي الزِّنا، و البِتزَوَّج المَرَه المَطَلَّقَه يَعمِل الزِّنا. كَمان سِمِعتو هُم قالو لِلنّاس الكانو مِن زَمان: ما تَحلِف بِالكِضِب، لَكِن أعمِل لِلرَّب زي ما إنتَ حَلَفتَ. و لَكِن أنا أقول ليكُم، ما تَحلِفو أبَداً، ما بِالسَّما عَشان هي كُرسي الله، ولّا بِالأرض عَشان هي بَمبَر كُراعو، ولّا بِأُورُشَلِيم عَشان هي مَدينَة المَلِك الكَبير. و ما تَحلِف بِراسَك، عَشان إنتَ ما تَقدَر تَعمِل شَعرَه واحدَه بيضَة ولّا سودَه. خَلّي كَلامكُم بِكون أيوَه ولّا لا بَس. و الأكتَر مِن داك، هو مِن الشَّرّير. سِمِعتو هُم قالو: عين بِعين و سِن بِسِن. و لَكِن أنا أقول ليكُم، ما تَشاكِلو زول بَطّال. و لَكِن إذا أي واحِد يَضرُبَك في وَشَّك اليَمين، أقلِب ليهو التّاني كَمان. و كان أي واحِد عاوِز يَرفَع قَضيَّه عَليك و ياخُد قَميصَك، أَدِّي ليهو التّوب كَمان. و إذا أي واحِد عَاوِزَك تَمشي مَعاهو واحِد ميل بِقُوَّه، أمشي مَعاهو إتنين. اليَطلُب مِنَّك، أدّيهو، و العاوِز يَستَلِف مِنَّك، ما تابا. سِمِعتو هُم قالو: تَحِب القَريب ليك و تَكرَه العَدو بِتاعَك. و لَكِن أنا أقول ليكُم، حِبّو عُدوانكُم و صَلّو عَشان اليَطرُدوكُم، عَشان تَكونو أولاد أبوكُم الفي السَّما. عَلَشان هو يَعمِل شَمسو تَطلَع عَلى البَطّالين و الكوَيسين، و يَرَسِّل المَطَر عَلى البارين و الشَّرّيرين. فِشان إذا إنتو بِتحِبّو البِحِبّوكُم، الأُجرَه بِتاعَتكُم شِنو؟ النّاس البِلِمّو الطُلبَه ما يَعمِلو زي دا كَمان؟ و إن كان تَسَلِّمو عَلى أخوانكُم بَس، كيف تَعمِلو أحسَن مِن التّانيين؟ ناس الدُّنيا ما يَعمِلو زي دا كَمان؟ عَلَشان كِدا، كونو كامِلين زي ما أبوكُم الفي السَّما هو كامِل. خَلّو بالكُم عَشان ما تَعمِلو الشُّغل الكَويس قِدّام النّاس عَشان بِشوفوكُم، عَشان كان تَعمِلو كِدا، ما بِتكون عِندَكُم أُجرَه مِن أبوكُم الفي السَّما. و كِدا، لَمّا تَدّي لِلمَساكين، ما تَضرُب قِدَّامَك بِالبوق زي ما يَعمِلو المُنافِقين في بِيوت الرَّب و في السِّكَك، عَشان النّاس بِشكُروكُم. بِالحَق أقول ليكُم، هُم اَخَدو الأُجرَه بِتاعَتُم. و لَكِن إنتَ لَمّا تَدّي حاجَه لِلمَساكين، ما تَخَلّي شِمالَك تَعرِف الشُّغل اليَمينَك بِتَعمِل، عَلَشان الأنتَ تَدّيهو يَكون بِالسِّر. و أبوك اليَشوف في السِّر بِرَجِّع ليك كوَيس. و لَمّا تَصَلّو، ما تَكونو زي المُنافِقين، عَلَشان هُم بِحِبّو يَصَلّو واقفين في بِيوت الرَّب و في مَحَل فاضي جَمب السِّكَك عَشان النّاس يَشوفوهُم. بِالحَق أقول ليكُم، هُم اَخَدو الأُجرَه بِتاعَتُم. و لَكِن إنتَ لَمّا تَصَلّي، أدخُل بيتَك، و أقفِل بابَك، و صَلّي لِأبوك الفي السِّر. و أبوك اليَشوف في السِّر بِرَجِّع ليك كوَيس. و في صَلَواتكُم، ما تِتكَلَّمو كَلام كَتير ساكِت زي ما يَعمِلو ناس الدُّنيا، عَلَشان يَفتَكِرو الله يَسمَعُم بِكَلامُم الكَتير. ما تَكونو زيَهُم، عَشان أبوكُم يَعرِف التَحتاجو ليهو قُبّال ما تَطلُبوهو. عَشان كِدا صَلّو زي دا: أبونا الفي السَّما، خَلّي إسمَك يَكون قُدّوس. خَلّي مَلَكوتَك بِجي. خَلّي إرادَتَك تَكون في الدُّنيا زي ما تَكون إرادَتَك في السَّما. النَّهار دا أدّينا العيش اليومي بِتاعنا. و أغفِر لينا خَطايانا زي ما نِحنا كَمان غَفَرنا لِليَخطو لينا. و ما تَدَخِّلنا في تَجرِبَه، و لَكِن خَلِّصنا مِن الشَّرّير. عَلَشان إذا تَغفِرو لِلنّاس خَطاياهم، أبوكُم الفي السَّما بِغفِر ليكُم كَمان. و لَكِن إذا ما تَغفِرو لِلنّاس خَطاياهم، أبوكُم كَمان ما بِغفِر ليكُم خَطاياكُم. و لَمّا تَصومو، ما تَوَرّو نُفوسكُم زي ناس تَعبانين، زي ما يَعمِلو المُنافِقين، عَشانُم بِغَيِّرو وَشُّم عَشان النّاس بِشوفو إنَّهُم يَصومو. بِالحَق أقول ليكُم، عِندَهُم أُجرَتُم. و لَكِن لَمّا إنتَ تَصوم، أمسَح راسَك و غَسِّل وَشَّك، عَشان النّاس ما بِشوفو إنتَ تَصوم، و لَكِن أبوك الفي السِّر بِشوف. و أبوك البِشوف في السِّر بِدّيك أُجرَه. ما تَخزِنو لِنُفوسكُم حاجات غاليَه عَلى الأرض، المَكان الفيهو السّوس و الصَّدا ياكلوها، و الحَراميَه يدخُلو بِالقُوَّه و يَسرِقو. و لَكِن أخزِنو لِنُفوسكُم حاجات غاليَه في السَّما، المَكان الفيهو السّوس و الصَّدا ما ياكلوها، و الحَراميَه ما يدخُلو بِالقُوَّه و يَسرِقو. عَشان المَكان الفيهو حاجاتكُم الغاليَه، هِناك قَلبَك بِكون في كَمان. لَمبَت الجِّسم، هي العين. عَشان كِدا إذا كان عينَك بَسيطَه، جِسمَك كُلّو يَكون مَليان نور. و لَكِن إذا كان عينَك ما بَسيطَه، جِسمَك كُلّو يَكون مَليان ضَلام. و كِدا، إذا كان النّور العِندَك بِكون ضَلام، كَم بِكون الضَّلام. واحِد ما يَقدَر يَخدِم سَيِّدين، عَشان يا بِكرَه الواحِد و بِحِب التّاني، ولّا بِمسِك الواحِد و بيابا التّاني. ما تَقدَرو تَخدِمو الله و المال. عَلَشان كِدا أقول ليكُم، ما تَفَكِّرو كَتير لِحَياتكُم، بِتاكلو شِنو و بِتَشرَبو شِنو، ولّا لِأجسامكُم، بِتَلبَسو شِنو. الحَياة مُش أحسَن مِن الأكل؟ و الجِّسم مُش أحسَن مِن الهِدوم؟ شوفو طُيور السَّما، هُم ما بِزرَعو و ما بِقطَعو الدُّرَه، و ما بِلِمّو في المَخازِن، و لَكِن أبوكُم الفي السَّما يَدّيهو أكِل. إنتو ما أحسَن مِنَّهُم بِكَتير؟ و مِنو مِنَّكُم إذا بِفَكِّر كَتير يَقدَر يَزيد طول حَياتو بِدَقيقَه واحدَه؟ و لِشِنو تَفَكِّرو كَتير في الهِدوم؟ شوفو زُهور الخَلا كيف بِقومو. ما بِتعَبو و ما يَخَيِّطو. و لَكِن أقول ليكُم، سُلَيْمَان نَفسو في كُلّو مَجدو ما كان يَلبَس هِدوم زي واحدَه مِن ديل. و لَكِن إذا كان الله يَلَبِّس زي دا قَش الخَلا، اليَكون في النَّهار دا و بُكرَه بِرموهو في الفُرن، كيف ما داير أكتَر أن يَلَبِّسكُم إنتو، يا قَليلين الإيمان؟ عَلَشان كِدا، ما تَفَكِّرو كَتير و تَقولو: ناكُل شِنو؟ ولّا: نَشرِب شِنو؟ ولّا: نَلبَس شِنو؟ عَلَشان ناس الدُّنيا يَفَتِّشو عَلى كُل الحاجات ديل. و أبوكُم الفي السَّما بِيَعرِف إنتو تَحتاجو لِديل كُلّو. لَكِن في الأوَّل، أطلُبو مَلَكوت الله و بِرّو، و كُل الحاجات ديل بِجوكُم زِيادَه. عَلَشان كِدا ما تَفَكِّرو كَتير بِبُكرَه، عَشان بُكرَه بِتِتفَكَّر بِنَفسا. خَلّي هُموم اليوم تَكون كِفايَه لِليوم. ما تَحكُمو عَلى ناس تانيين، عَشان هُم كَمان ما يَحكُمو عَليكُم. عَلَشان بِزات الحُكم الإنتو تَحكُمو عَلى التّانيين، هُم كَمان بِيَحكُمو عَليكُم. و الكيلَه الإنتو تَدّوها، بِتكون الكيلَه الهُم بِدّوكُم. لِشِنو بِتشوف الحِتَّه الصَّغَيرَه الفي عين أخوك، و لَكِن ما بِتشوف الخَشَبَه الكَبيرَه الفي عينَك؟ ولّا، كيف تَقول لِأخوك: خَلّيني أطَلِّع الحِتَّه الصَّغَيرَه مِن عينَك، لَمّا تَكون في الخَشَبَه الكَبيرَه في عينَك؟ يا مُنافَق، في الأوَّل طَلِّع الخَشَبَه الكَبيرَه مِن عينَك، و بَعدين بِتشوف كوَيس كيف تَطَلِّع الحِتَّه الصَّغَيرَه مِن عين أخوك. ما تَدّو لِلكِلاب الحاجَه المُقَدَّسَه، و ما تَرمو لوّليكُم قِدّام الكَدروك، عَشان ما يَدوسوها بِأقدامُم و يِتلَفَتو و يَشَرِّطكُم. أسألو و هو بِدّيكُم. أطلُبو و بِتَلقو. دُقّو و هو بِفتَح الباب ليكُم. عَشان كُل البِسأل بياخُد، و البِطلُب بِلقى، و البِدُق هو بِفتَح ليهو. ولّا، ياتو فيكُم إذا وَلَدو يَطلُب مِنّو عيش، يَدّيهو حَجَر؟ ولّا إذا بِطلُب مِنّو سَمَك، بِدّيهو دَبيبَه؟ كِدا إذا إنتو البَطّالين تَعرِفو كيف تَدّو أولادكُم هَدايا كوَيسَه، كَم يَكون أبوكُم الفي السَّما أحسَن، اليَدّي هَدايا كَتيرَه ليكُم اليَسألوهو؟ عَشان كِدا، كُل الإنتو عاوِزين النّاس بيَعمِلو ليكُم، أعمِلو إنتو زي دا ليهُم، عَشان دا هو القانون و كَلام الأنبياء. أدخُلو مِن الباب الضَّيِّق، عَشان الباب وَصِف، و السِّكَّه ما صَعبَه البِسوقو لِلخَراب، و هُم البِدخُلو مِنّو كَتيرين. عَشان الباب ضَيِّق و السِّكَّه صَعبَه البِسوقو لِلحَياة، و هُم البِلقوها قَليلين. خَلّو بالكُم مِن الأنبياء الكَضّابين، البِجوكُم بِهِدوم الخِرفان، و لَكِنَّهُم مِن جُوَّه مَرافعين جَعانين جِدّاً. مِن ثَمَرُم بِتَعرِفوهُم. النّاس يَلِمّو العِنَب مِن شَجَر الشّوك؟ ولّا يَلِمّو التّين مِن شَجَر الغابَه؟ كِدا، كُلّو شَجَرَه كوَيسَه تَجيب ثِمار كوَيس، و لَكِن الشَّجَرَه البَطّالَه تَجيب ثِمار بَطّال. شَجَرَه كوَيسَه ما تَقدَر تَجيب ثِمار بَطّال، و شَجَرَه بَطّالَه ما تَقدَر تَجيب ثِمار كوَيس. كُلّو شَجَرَه ما تَجيب ثِمار كوَيس يَقطَعوها و يَرموها في النّار. و كِدا، بِتَعرِفوهُم مِن الثَّمار بِتاعُم. مُش كُلّو واحِد البقول لَي: يا رَب، يا رَب، بِدخُل مَلَكوت السَّما، لَكِن بَس هو البيَعمِل زي ما عاوِز أبوي الفي السَّما. في اليوم داك، ناس كَتيرين بِقولو لَي: يا رَب، يا رَب، ما بَشَّرنا بِإسمَك؟ و ما طَلَّعنا شياطين بِإسمَك؟ و ما عَمَلنا أعمال كَتيرَه بِقُدرَه بِإسمَك؟ و بَعدين بَكَلِّمُم: ما عِرِفتَكُم أبَداً. أمشو مِنّي، إنتو البِتَعمِلو الخَطيَّه. كُل البِسمَع كَلامي دا و بيَعمِل بيها، بِكون زي راجِل شاطِر بَنى بيتو عَلى الحَجَر. و المَطَر نَزَل و مَلا الواطَه. و الهَبوب هَبَّت و ضَرَبَت البيت داك. و لَكِن البيت ما وَقَع، عَشان كان أساسو عَلى الحَجَر. و كُل البِسمَع كَلامي دا و ما بيَعمِل بيها، بِكون زي زول بَليد بَنى بيتو عَلى الرَّملَه. و المَطَر نَزَل و مَلا الواطَه. و الهَبوب حَبَّت و ضَرَبَت البيت داك، و البيت وَقَع، و الوقوع كان كَبير.“ و لَمّا يَسُوع خَلَّص الكَلام دا، النّاس إستَغرَبو مِن تَعليمو، عَشانّو كان بِعَلِّمُم زي الكان عِندو سُلطَه، و ما زي مُعَلِّمين القانون. و لَمّا نَزَل مِن الجَّبَل، ناس كَتيرين تِبِعوهو. و شوف! واحِد عِندو الجِّزام قَرَّب ليهو و رَكَع قِدّامو و قال: ”يا رَب، إذا عاوِز، تَقدَر تَنَضِّفني.“ و يَسُوع مَدَّ إيدو و لَمَسو و قال: ”أنا عاوِز. كون نَضيف.“ و طَوّالي بِقى نَضيف مِن جِزامو. و يَسُوع قال ليهو: ”شوف ما تَقول حاجَه لِأي واحِد. و لَكِن أمشي، وَرّي نَفسَك لِلقَسّيس، و قَدِّم الهَدِيَّه الأمَر بيها مُوسَى زي شَهادَه ليهُم.“ و لَمّا دَخَل كَفْرَنَاحُوم، رَئيس الجّيش قَرَّب ليهو و طَلَب مِنّو و قال: ”يا رَب، خَدّامي راقِد في البيت و هو مَفلوج، و عِندو وَجَع شَديد.“ و يَسُوع قال ليهو: ”أنا بَجي و بَشفيهو.“ و لَكِن رَئيس الجّيش رَدَّ عَليهو و قال: ”يا رَب، أنا ما عِندي شَرَف كِفايَه عَشان إنتَ تَدخُل تِحِت راس بيتي. لَكِن قول كِلمَه بَس، و خَدّامي بِكون طَيب. عَشان أنا كَمان راجِل تِحِت السُّلطَه، و عِندي عَساكِر تِحِت سُلطَتي. أقول لِدا: أمشي، و هو يَمشي، و لِتاني: تَعال، و هو يَجي، و لِخَدّامي: أعمِل دا، و هو يَعمِلو.“ و لَمّا يَسُوع سِمِعو، إستَغرَب، و قال لِلنّاس الكانو يَتبَعوهو: ”الحَق أقول ليكُم، أنا ما لِقيت و لا واحِد في إِسْرَائِيل عِندو إيمان زي دا. و أقول ليكُم، ناس كُتار بِجو مِن الشَّرق و مِن الغَرب و بِيَقعُدو مَعَ إِبْرَاهِيم و إِسْحَاق و يَعْقُوب في مَلَكوت السَّما. و لَكِن أولاد المَلَكوت، بِرموهُم بَرَّه في الضُّلُمَّه. هِناك بِيَبكو و بِعَضّو الأسنان.“ بَعدين يَسُوع قال لِرَئيس الجّيش: ”أمشي. بِكون ليك زي ما صَدَّقتَ.“ و الخَدّام بِقى طَيب في نَفس الوَكِت دا. و لَمّا يَسُوع جا لِبيت بُطْرُس، شاف أُم المَرَه بِتاعَت بُطْرُس راقدَه في السَّرير و عِندَها حُمَّه. و لَمَس إيدا، و الحُمَّه خَلَّتا. و هي قامَت و بِقَت تَخدِمو. و في المِسا جابو ليهو كَتيرين كانو بيهُم شياطين. و هو طَلَّع الشّياطين بِكِلمَه، و شَفى كُل العَيّانين، عَشان يَتِم الكَلام القالو النَّبي إِشَعْيَاء: ”هو أخَد كُلّو حاجَه البِتخَلّينا ضَعيفين، و شال العَيى بِتاعَتنا.“ و لَمّا يَسُوع شاف ناس كُتار حَولو، أمَرُم يَمشو لِطَرف البَحَر بِجاي. و مُعَلِّم القانون قَرَّب ليهو و قال: ”يا مُعَلِّم، أنا بَتبَعَك لِأي مَحَل الأنتَ تَمشي ليهو.“ و يَسُوع قال ليهو: ”التَّعالِب عِندَهُم مَحَلّات النّوم، و طُيور السَّما عِندَهُم مَحَلّات كَمان، لَكِن إبن الإنسان ما عِندو مَحَل يَخُت رَاسو فيهو.“ و زول تاني مِن تَلاميذو قال ليهو: ”يا رَب، خَلّيني أمشي في الأوَّل و أدفِن أبوي.“ و لَكِن يَسُوع قال ليهو: ”أتبَعني، و خَلّي المَيِّتين يَدفِنو مَيِّتينُم.“ بَعدين دَخَل المُركَب، و تَلاميذو تِبِعوهو. و شوف! جات هَبوب شَديدَه في البَحَر لِغايَة ما المويَه مَشَت فوق المُركَب. لَكِن يَسُوع كان نايِم. و التَّلاميذ قَرَّبو ليهو و قَوَّمو مِن النّوم و قالو: ”خَلِّصنا، يا رَب. نِحنا ماشين نَموت!“ و هو قال ليهُم: ”يا ناس الإيمانكُم ناقِص، إنتو خايفين لِشِنو؟“ بَعدين قام و أمَر الهَبوب و البَحَر بِشِدَّه، و هُم سَكَتو بِالتَّمام. و النّاس إستَغرَبو و قالو: ”مِنو الإنسان دا؟! لِغايَة الهَبوب و البَحَر يَسمَعو لِكَلامو!“ و لَمّا وِصِل لِلطَّرف التّاني في بَلَد الجَدَريّين، راجلين الكانو فيهُم شياطين قابَلوهو، و هُم جايين مِن القُبور. و كانو مِتوَحِّشين خالِص. عَلَشان كِدا، ما في واحِد كان بِقدَر بِفوت بِالسِّكَّه ديك. و شوف! كورَكو و قالو: ”إنتَ عاوِز شِنو مَعانا، يا إبن الله؟ جيت هِنا عَشان تَتَعِّبنا قُبّال الوَكِت؟“ و كان بَعيد مِنَّهُم مُراح كَداريك كَتيرَه بياكُل. و الشّياطين طَلَبو مِن يَسُوع و قالو: ”إذا كان تَطرُدنا، رَسِّلنا لِمُراح الكَداريك.“ و قال ليهُم: ”أمشو!“ عَشان كِدا، طَلَعو و دَخَلو في الكَداريك. و شوف! المُراح كُلّو وَقَع مِن الطَّرف لِلبَحَر، و مات في المويَه. لَكِن الرُّعاه هَرَبو، و مَشو لِلمَدينَه و خَبَّرو بِكُلّو شي، و بِكُلّو شي الحَصَل لِلرُّجال الكانو فيهُم الشّياطين. و شوف! كُلّو ناس البَلَد مَرَقو عَشان يَقابِلو يَسُوع. و لَمّا شافوهو، طَلَبو مِنّو يَسيب بَلَدُم. و يَسُوع دَخَل مُركَب و قَطَع البَحَر و جا لِمَدينَتو. و شوف! جابو ليهو زول مَفلوج، و هو راقِد في بِرِش. و لَمّا يَسُوع شاف إيمانُم، قال لِلمَفلوج: ”شِد حيلَك، يا وَلَدي، خَطاياك مَغفورَه ليك.“ و شوف! بَعَض مِن مُعَلِّمين القانون قالو في نُفوسُم: ”الرّاجِل دا يَقول كَلام بَطّال و ما يَحتَرِم الله.“ لَكِن يَسُوع عِرِف أفكارُم و قال: ”لِشِنو تِتفَكَّرو فِكر بَطّال في قُلوبكُم؟ ياتو هَين، أن يَقول: خَطاياك مَغفورَه ليك؟ ولّا يَقول: قوم، و أمشي؟ و لَكِن حَتّى بِتَعرِفو إبن الإنسان عِندو سُلطَه عَلى الأرض أن يَغفِر الخَطايا“... بَعدين قال لِلمَفلوج: ”قوم، شيل بِرشَك، و أمشي لِبيتَك.“ و الرّاجِل قام و مَشى لِبيتو. و لَمّا النّاس شافو دا، إستَغرَبو و مَجَّدو الله الأدّا لِلنّاس سُلطَه زي دي. و وَكِت ما يَسُوع كان يَمشي مِن هِناك، شاف راجِل إسمو مَتَّى، و هو قاعِد في المَكان البِلِم فيهو الضَّريبَه. و قال ليهو: ”أتبَعني.“ و هو قام و تِبعو. و وَكِت ما كان قاعِد في الطَّرَبيزَه في البيت، شوف! ناس بِلِمّو الضَّريبَه و خاطيين كُتار جو و قَعَدو مَعَ يَسُوع و مَعَ تَلاميذو. و لَمّا الفَرّيسيّين شافو دا، قالو لِتَلاميذو: ”لِشِنو مُعَلِّمكُم ياكُل مَعَ النّاس البِلِمّو الضَّريبَه و الخاطيين؟“ و لَكِن لَمّا يَسُوع سِمِع، قال ليهُم: ”الشُّداد ما يَحتاجو لِحَكيم، لَكِن العَيّانين. أمشو و إتعَلَّمو المَعنى دا: أنا داير رَحمَه، ما ضَبيحَه. عَشانّي ما جيت عَشان أنادي الكوَيسين لَكِن الخاطيين.“ بَعدين تَلاميذ يُوحَنَّا جو ليهو و قالو: ”لِشِنو نِحنا و الفَرّيسيّين نَصوم و لَكِن تَلاميذَك ما بِصومو؟“ يَسُوع قال ليهُم: ”ناس العِرِس بِقدَرو يَبكو وَكِت ما العَريس مَعاهُم؟ الأيام بِتَجي لَمّا يَشيلو العَريس مِنَّهُم. في الوَكِت داك بِصومو. ما في زول بِخُت حِتَّت قُماش جَديد عَلى توب قَديم، فِشان الرُقعَه تاخُد مِن التّوب، و الشَّرط بِكون أكبَر. و كَمان ما بِخُتّو خَمرَه جَديدَه في قِربَه قَديمَه. إذا يَعمِلو كِدا، القِربَه تِتشَرَّط، و الخَمرَه تِتدَفَّق و القِربَه تَخسَر. لَكِن بِخُتّو خَمرَه جَديدَه في قِربَه جَديدَه، و كِدا كُلَّها بِتكون مَحفوظَه.“ و وَكِت ما كان يَكَلِّمُم بِدا، شوف! واحِد رَئيس قَرَّب ليهو و رَكَع قِدّامو و قال: ”بِتّي ماتَت هَسَّع دي. لَكِن تَعال و خُت إيدَك عَليها و هي بِتَحيى.“ و يَسُوع قام و تِبعو، هو و تَلاميذو. و شوف! مَرَه، الدَّم كان بِنزِل مِنَّها لِمُدَّة إتناشَر سَنَه و هي كانَت تَعبانَه، جات لِيَسُوع مِن وَراهو و لِمسَت طَرَف توبو. عَشان قالَت في نَفسَها: ”إذا بَلمَس توبو بَس، أبقى شَديدَه.“ يَسُوع إتلَفَت و شافا و قال: ”شِدّي حيلِك، يا بِتّي، بِقيتي طَيبَه عَشان إيمانِك.“ و المَرَه بِقَت شَديدَه مِن السّاعَه ديك. و لَمّا يَسُوع جا لِبيت الرَئيس و شاف المِزَمِّرين و كوراك الجَّماعَه، قال ليهُم: ”أمشو، عَشان البِت ما مَيِّتَه لَكِن نايمَه.“ و هُم ضِحِكو عَليهو. لَكِن لَمّا مَرَّقو الجَّماعَه، يَسُوع دَخَل و أخَدا بِإيدا، و البِت قامَت. و الخَبَر دا شَتَّت في الأرض ديك كُلَّها. و وَكِت ما يَسُوع كان ماشي مِن هِناك، عَميانين تِبِعوهو يَكورِكو و يَقولو: ”وَرّينا رَحمَتَك، يا إبن دَاوُد.“ و لَمّا دَخَل البيت، العَميانين قَرَّبو ليهو. و يَسُوع قال ليهُم: ”تَصَدِّقو أنا بَقدَر أعمِل دا؟“ قالو ليهو: ”أيوَه، يا رَب.“ بَعدين لِمِس عُيونُم و قال: ”زي إيمانكُم يَكون ليكُم.“ و عُيونُم إنفَتَحو. و يَسُوع كَلَّمُم بِقُوَّه و قال: ”شوفو، ما تَخَلّو واحِد بِعرِف دا.“ لَكِن هُم مَرَقو و خَبَّرو بيهو في كُل الأرض دي. و وَكِت ما كانو ماشين، شوف! زول ما بِقدَر يتكَلَّم و كان فيهو شيطان، جابوهو لِيَسُوع. و بَعَد ما طَلَّع الشّيطان، الأبكَم إتكَلَّم. و النّاس إستَغرَبو و قالو: ”حاجَه زي دي ما شافوها أبَداً في إِسْرَائِيل.“ لَكِن الفَرِّيسِيِّين قالو: ”هو بِطَلِّع الشّياطين بِرَئيس الشّياطين.“ و يَسُوع كان بِمشي في كُل المُدُن و البِلاد، و يَعَلِّم في بِيوت الرَّب و يَبَشِّر بِبِشارات المَلَكوت، و يَشفي كُلّو عَيى و كُلّو مَرَض في النّاس. و لَمّا شاف الجُّموع، كان عِندو رَحمَه ليهُم في قَلبو، عَشان كانو تَعبانين و كانو بِدون مُساعَدَه زي خِرفان بِدون راعي. بَعدين قال لِتَلاميذو: ”في دُرَه كَتير في الزِّراعَه جاهزَه، لَكِن الشَغّالين قَليلين. و عَلى كِدا، أطلُبو مِن رَب الزِّراعَه عَشان يَرَسِّل شَغّالين لِحَصادو.“ و نادى تَلاميذو الإتناشَر و أدّاهُم سُلطَه عَشان يَطَلِّعو الأرواح النَّجسَه و يَشفو كُلّو مَرَض و كُلّو عَيى. أهُم ديل أسامي الإتناشَر رَسول: الأوَّل، سِمْعَان السَّمّوهو بُطْرُس، و أنْدَرَاوُس أخوهو. و يَعْقُوب، إبن زَبَدي، و يُوحَنَّا أخوهو. فِيلُبُّس و بَرْثُلْمَاوُس. تُومَا، و مَتَّى الكان بِلِم الضَّريبَه. يَعْقُوب إبن حَلْفَى، و تَدَّاوُس. سِمْعَان الْقَانَوِي، و يَهُوذَا الإِسْخَرْيُوطِي السَّلَّمو لِعُدوانو. الإتناشَر ديل، يَسُوع رَسَّلُم و أمَرُم و قال: ”ما تَمشو لِناس الدُّنيا، و لا تَدخُلو أي بَلَد بِتاعَة السّامِريّين. و لَكِن بِدالو، أمشو لِلخِرفان الإتوَدَّرو مِن بيت إِسْرَائِيل. و وَكِت ما إنتو ماشين، بَشِّرو و قولو: مَلَكوت السَّما قَرَّب. أشفو العَيّانين، قَوِّمو المَيِّتين، نَضِّفو العِندَهُم الجِّزام، طَلِّعو الشّياطين. أخَدتو مَجّاناً، أدّو مَجّاناً. ما تاخُدو دَهَب ولّا فِضَّه ولّا نَحاس مَعاكُم، ولّا كيس لِلسَّفَر، ولّا توبين، ولّا جِزَم، ولّا عَصايَه. عَشان الشَّغال مُستَحِق أكلو. و أي مَدينَه ولّا حِلَّه دَخَلتوها فَتِّشو عَلى زول مُستَحِق، و أقعُدو في بيتو لِغايَة ما تَمرُقو. و لَمّا تَدخُلو البيت، سَلِّمو عَليهو. و إذا أهل البيت مُستَحِقّين، خَلّي سَلامكُم يَستَنّى عَليهو. و لَكِن إذا ما مُستَحِقّين، خَلّي سَلامكُم يَرجَع ليكُم. و إن كان أي زول ما يَقبَلكُم، ولّا يَسمَع كَلامكُم، أطلَعو بَرَّه مِن البيت دا ولّا مِن المَدينَه ديك و هِزّو التُّراب مِن رِجلينكُم. بِالحَق أقول ليكُم، في يوم الحُكم، حالَة سَدوم و عَمورَه بِتكون أحسَن مِن حالَة المَدينَه ديك. شوف! أرَسِّلكُم زي خِرفان في وَسط مَرفَعين. عَشان كِدا، كونو شاطرين زي الدَّبايب و لَكِن بُسَطاء زي الحَمام. لَكِن خَلّو بالكُم مِن النّاس، عَشانُم بِسَلِّموكُم لِلمَجالِس، و بِجلِدوكُم في بِيوت الرَّب بِتوعُم، و بِسوقوكُم قِدّام مُديرين و مُلوك فِشانّي أنا، عَشان تَشهَدو قِدّامُم و قِدّام ناس الدُّنيا. و لَمّا يَسَلِّموكُم، ما تَفَكِّرو كَتير كيف تِتكَلَّمو ولّا بِتقولو شِنو. عَشان في السّاعَه ديك، بِدّي ليكُم البِتكَلَّمو بيهو. عَشان ما إنتو البِتكَلَّمو، لَكِن روح أبوكُم، هو البِتكَلَّم فيكُم. الأخو بِسَلِّم أخوهو لِلموت، و الأبو، وَلَدو. و الأولاد بِقومو عَلى والِدينُم و يَكتُلوهُم. و كُل النّاس بِكرَهوكُم عَشان إسمي. لَكِن البِشِد حيلو لِلآخِر، هو بِخلَص. و لَمّا يَطرُدوكُم مِن المَدينَه دي، أجرو لِلتّانيَه. الحَق أقول ليكُم، إنتو ما بِتَمشو لِكُلّو بِلاد إِسْرَائِيل قُبّال ما يَجي إبن الإنسان. التِّلميذ ما أحسَن مِن المُعَلِّم، ولّا الخَدّام أحسَن مِن سيدو. كِفايَه لِلتِّلميذ أن يَكون زي مُعَلِّمو، و الخَدّام زي سيدو. إذا كان سَمّو رَب البيت بَعلَزَبول، كيف بِالأكتَر ناس بيتو. كِدا، ما تَخافوهُم. ما في حاجَه مَقفولَه الما بِتكون مَفتوحَه، و لا مَدسوسَه الما بِتكون مَعروفَه. البَقول ليكُم في الضُّلُمَّه، قُولوهو في النّور. و التَسمَعوهو في الأضان، نادو بيهو فوق البِيوت. و ما تَخافو مِن اليَكتُلو الجِّسِم و لَكِن ما يَقدَرو يَكتُلو النَفس. لَكِن خافو مِن اليَقدَر يَكتُل النَّفس و الجِّسِم، هُم الإتنين، في جَهَنَّم. ما بِبيعو طيرين صُغار بِمِليم؟ و لا واحِد مِنَّهُم بِقَع عَلى الأرض بِدون مَعرِفَة أبوكُم. و لَكِن إنتو، عَدَد شَعرات رُسيكُم كُلَّها مَعروف. عَلى كِدا، ما تَخافو. إنتو أحسَن مِن طُيور كَتيرَه. كِدا، كُل البِشهَد بي قِدّام النّاس، أنا كَمان بَشهَد بيهو قِدّام أبوي الفي السَّما. لَكِن البِنكِرني قِدّام النّاس، أنا كَمان بَنكِرو قِدّام أبوي الفي السَّما. ما تَفتَكِرو أنا جيت عَشان أجيب سَلام عَلى الأرض. ما جيت عَشان أجيب سَلام، لَكِن سيف. فِشان أنا جيت عَشان أفَرِّق الإنسان مِن أبوهو، و البِت مِن أُمَّها، و مَرَة الوَلَد مِن نَسيبَتا. و عُدوان الإنسان بِكون أهل بيتو. البِحِب أبوهو ولّا أُمّو أكتَر مِنّي ما مُستَحِقّني. و البِحِب وَلَدو ولّا بِتو أكتَر مِنّي ما مُستَحِقّني. و الما بياخُد صَليبو و يَتبَعني ما مُستَحِقّني. البِحفَظ نَفسو بِوَدِّرا، و البِوَدِّر نَفسو عَشانّي بِحفَظا. البِقبَلكُم بِقبَلني، و البِقبَلني بِقبَل الرَّسَّلني. البِقبَل نَبي بِإسم نَبي، بِقبَل أُجرَة نَبي. و البِقبَل الزّول البار بِإسم زول بار، بِقبَل أُجرَة زول بار. و أي واحِد البِدّي لِواحِد مِن الصُّغار ديل كُبّايَة مويَه باردَه بَس، بِإسم تِلميذ، الحَق أقول ليكُم، هو ما يَوَدِّر أُجرَتو أبَداً.“ و لَمّا يَسُوع خِلِص تَعليمو لِتَلاميذو الإتناشَر، مَرَق مِن هِناك عَشان يَعَلِّم و يَبَشِّر في بِلادُم. و يُوحَنَّا كان في السِّجِن. و لَمّا سِمِع بِأعمال المَسيح رَسَّل ليهو تَلاميذو يَقولو ليهو: ”إنتَ هو الجّاي، ولّا نَنتَظِر واحِد تاني؟“ و رَدَّ يَسُوع و قال ليهُم: ”أمشو و خَبِّرو يُوحَنَّا بِالحاجات البِتَسمَعوها و بِتشوفوها: العَميانين بِشوفو، و النّاس العُرُج بِمشو، و النّاس العِندَهُم عَيى الجِّزام بِقو نُضاف، و ناس طُرُش بِسمَعو، و المَيِّتين بِقومو، و المَساكين بِسمَعو الخَبَر الكَويس. و مُبارَك الما يَقَع عَشانّي.“ و وَكِت ما كانو ماشين، يَسُوع بِقى يَكَلِّم النّاس الكَتير عَن يُوحَنَّا: ”مَرَقتو في الخَلا تَشوفو شِنو؟ قَش بِتهَزّو الهَبوب؟ لَكِن مَرَقتو تَشوفو شِنو؟ زول لابِس هِدوم سَمِح؟ شوفو! اللابسين هِدوم سَمِح، هُم في بُيوت المُلوك. و لَكِن لِشِنو مَرَقتو؟ عَشان تَشوفو نَبي؟ أيوَه، أقول ليكُم، و أحسَن مِن نَبي. دا هو المَكتوب عَنّو: شوف! أنا بَرَسِّل مُرسالي قِدَّامَك، البِحَضِّر ليك طَريقَك قِدَّامَك. الحَق أقول ليكُم، ما في بين المَولودين مِن النِّسوان زول أكبَر مِن يُوحَنَّا المَعمَدان. و لَكِن الأصغَر في مَلَكوت السَّما أكبَر مِنّو. و مِن أيام يُوحَنَّا المَعمَدان لِغايَة هَسَّع، مَلَكوت السَّما بِتقَدَّم بِقُوَّه. و النّاس الشُّداد يَمسِكوهو بِقُوَّه. عَشان كُل الأنبياء و كُتُب القانون إتنَبّو لِغايَة يُوحَنَّا. و إذا عاوزين تَقبَلوهو، دا هو إِيلِيَّا الماشي يَجي. العِندو إضنين، خَليهو يَسمَع. و لَكِن ناس الزَّمَن دا، هُم زي شِنو؟ هُم زي أولاد قاعِدين في السّوق، و بِنادو الأولاد التّانيين، و بِقولو: ضَرَبنا ليكُم و ما رَقَصتو. و بَكينا ليكُم و ما بَكيتو. عَشان يُوحَنَّا جا ما ياكُل و لا يَشرَب، و هُم بِقولو: عِندو شيطان. و إبن الإنسان جا ياكُل و يَشرَب، و هُم بِقولو: دا راجِل طَمّاع و مَرّاسي، و بِحِب البِلِمّو الضَّريبَه و الخاطيين. و العِندو فَهم، أعمالو بِوَرّيهو.“ بَعدين بِقى يَوَبِّخ المُدُن الهو عَمَل فيهُم أكتَر قُوّاتو، عَشانُم ما تابو. ”حُزن ليكي، يا كُورَزِين، حُزن ليكي، يا بيت صَيدا. عَشان إذا كان القُوّات العَمَلوها فيكُم، عَمَلوها في صُور و صَيدا، كانو تابو مِن زَمان و لَبَسو الشَّوال، و خَتّو الرَّماد فوق راسُم. و لَكِن أقول ليكُم، في يوم الحُكم، حالَة صُور و صَيدا بِتكون أحسَن مِن الحالَه البِتكون ليكُم. و إنتي، يا كَفْرَنَاحُوم، بِرفَعوكي لِلسَّما؟ بِنَزِّلوكي تِحِت لِلهاويَه. عَشان إذا كان الأعمال القَوّيَّه الكانو عَمَلوها فيكي، عَمَلوها في سَدوم، سَدوم كانَت قَعَدت لِغايَة اليوم دا. و لَكِن أقول ليكُم، في يوم الحُكم حالَة أرض سَدوم بِتكون أحسَن مِن الحالَه البِتكون ليكي.“ في الوَكِت داك يَسُوع قال: ”أشكُرَك، يا أبو، رَب السَّما و الأرض، عَشانَ إنتَ دَسيت الحاجات دي مِن الفاهمين و المِتعَلِّمين، و وَرّيتا لِلاطفال. أيوَه، يا أبو، عَشان دا طَيب قِدَّامَك. كُلّو شي مُسَلَّم لَي مِن أبوي. ما في واحِد يَعرِف الإبن إلّا الأبو. و لا واحِد يَعرِف الأبو إلّا الإبن، و أي واحِد الإبن عاوِز يَوَرّيهو ليهو. تَعالو لَي، يا كُل التَّعبانين و البِشيلو حاجات تَقيلَه، و أنا بَدّيكُم راحَه. شيلو نيرِي عَليكُم، و إتعَلَّمو مِنّي، عَشان انا لَيِّن، و قَلبي مِتواضَع، و بِتَلقو راحَه لِنُفوسكُم. عَشان نيرِي ما صَعب، و حِملي خَفيف.“ في الوَكِت داك، يَسُوع فات في السَّبِت في وَسط الزِّراعَه. و كانو تَلاميذو جَعانين و بِقو يَقطَعو العيش الريف و ياكلوها. و لَكِن لَمّا الفَرّيسيّين شافو داك، قالو ليهو: ”شوف! تَلاميذَك يَعمِلو شي ما بِالقانون في يوم السَّبِت.“ و يَسُوع رَدَّ و قال ليهُم: ”إنتو ما قَريتو العَمَلو دَاوُد لَمّا كان جَعان، هو و الكانو مَعاهو؟ هو دَخَل بيت الله، و هُم أكَلو الرَغِفان المُقَدَّسَه الما بِالقانون أن ياكلوهو، هو ولّا المَعاهو كَمان، لَكِن القُسُس بَس. ولّا، ما قَريتو في القانون كيف القُسُس في السَّبِت في الهيكَل يَنَجِّسو السَّبِت و هُم بِدون خَطيَّه؟ أقول ليكُم، في واحِد هِنا أكبَر مِن الهيكَل. و إذا عِرِفتو المَعنى دا: أنا داير رَحمَه، ما ضَبيحَه، ما كُنتو حَكَمتو عَلى النّاس البِدون خَطيَّه. عَلَشان إبن الإنسان هو رَب السَّبِت.“ و مَرَق مِن هِناك و دَخَل بيت الرَّب بِتاعُم. و شوف! كان في زول إيدو يابسَه. و سألوهو و قالو: ”هو بِالقانون يَشفي زول في يوم السَّبِت؟“ قالو كِدا عَشان يَشتَكوهو. قال ليهُم: ”ياتو زول فيكُم يَكون عِندو خَروف واحِد، و هو وَقَع في حُفرَه في يوم السَّبِت، و ما يَمسِكو و يَرفَعو؟ و الزّول، كيف هو أحسَن مِن الخَروف! كِدا، هو بِالقانون أن يَعمِل حاجَه كوَيسَه في يوم السَّبِت.“ بَعدين قال لِلزّول: ”مِد إيدَك.“ و الزّول مَدّاها، و إيدو بِقَت كوَيسَه زي التّانيَه. و لَكِن الفَرِّيسِيِّين مَرَقو و إتكَلَّمو مَعَ بَعض عَليهو كيف يَكتُلوهو. يَسُوع عِرِف دا و مَرَق مِن هِناك. و ناس كُتار تِبِعوهو. و هو شَفى كُلَّهُم، و أمَرُم عَشان ما يَكَلِّمو النّاس هو مِنو. و دا عَشان يَتِم الكَلام القالو النَّبي إِشَعْيَاء: ”شوف! خَدّامي الأنا إختِرتو، حَبيبي الأنا مَبسوط بيهو. بَخُت روحي عَليهو، و هو بِخَبِّر ناس الدُّنيا بِالعدل. هو ما بِشاكِل و لا بِكورِك، و لا واحِد بِسمَع صوتو في السِّكَك. هو ما بِقطَع القَش المَكسور، و لا بِبَطِل نور اللَّمبَه الضَعيف، لِغايَة ما يَجيب العَدل لِلغَلَبَه. و في إسمو ناس الدُّنيا يَصَدِّقو.“ بَعدين جابو ليهو زول كان فيهو شيطان، و هو عَميان و أبكَم. و يَسُوع شَفاهو حَتّى هو قِدِر يتكَلَّم و يَشوف. و كُل النّاس إستَغرَبو و قالو: ”يِمكِن دا إبن دَاوُد؟“ و لَكِن الفَرِّيسِيِّين، لَمّا سِمِعو، قالو: ”الرّاجِل دا ما يَطَلِّع الشّياطين إلّا بِبَعلَزَبول، رَئيس الشّياطين.“ و يَسُوع عِرِف أفكارُم و قال ليهُم: ”كُلّو مَملَكَه مِنقَسمَه عَلى نَفسا بِتَخسَر. و كُلّو مَدينَه ولّا بيت مِنقَسِم عَلى نَفسو ما بِكون ثابِت. و إذا كان الشّيطان يَطَلِّع الشّيطان، هو إنقَسَم عَلى نَفسو. كِدا، كيف مَملَكتو بِتَثبُت؟ و إذا أنا بَطَلِّع الشّياطين بِبَعلَزَبول، أولادكُم بِطَلِّعوهُم بِمِنو؟ عَلَشان كِدا، هُم بِيَحكُمو عَليكُم. و لَكِن إذا أنا بِروح الله بَطَلِّع الشّياطين، دا يَعني مَلَكوت الله جا ليكُم. ولّا كيف واحِد بِقدَر يَدخُل بيت راجِل قَوّي و بِشيل مالو، إلّا هو بِربُط الرّاجِل القَوّي في الأوَّل؟ بَعدين بِشيل مالو. الما مَعاي هو عَدو لَي، و الما بِجمَع مَعاي هو بِفَرتِك. عَلَشان كِدا، أقول ليكُم، كُلّو خَطيَّه و كَلام بَطّال عَلى الرَّب بِتكون مَغفورَه لِلنّاس. و لَكِن الكَلام البَطّال عَلى الرّوح ما بِكون مَغفور. و اليَقَول كِلمَه بَطّالَه ضِد إبن الإنسان، بِكون مَغفور ليهو. و لَكِن اليَقول ضِد الرّوح القُدُس ما بِكون مَغفور ليهو، ما في الزَّمَن دا ولّا في الزَّمَن الجّاي. أعمِل الشَّجَرَه كوَيسَه، و بِكون عِندَها ثِمار كوَيس. ولّا أعمِل الشَّجَرَه بَطّالَه، و بِكون عِندَها ثِمار بَطّال. عَشان الشَّجَرَه مَعروفَه مِن ثَمَرا. يا أولاد الدَّبايب، كيف تَقدَرو تِتكَلَّمو كِلمات كوَيسَه و إنتو ناس بَطّالين؟ عَشان الخَشم بِتكَلَّم بِحاجات البيها القَلب يَكون مَليان. الزّول الطَّيب، بِطَلِّع حاجات طَيبَه مِن قَلبو الطَّيب. و الزّول البَطّال، بِطَلِّع حاجات بَطّالَه مِن قَلبو البَطّال. أقول ليكُم، في يوم الحُكم، النّاس بِدّو حِساب عَن كُلّو كِلمَه بَطّالَه الهُم إتكَلَّمو بيها. عَشان بِكَلامَك الله بِفِكَّك و بِكَلامَك الله بِيَحكُم عَليك.“ بَعدين بَعض مِن مُعَلِّمين القانون و الفَرّيسيّين قالو ليهو: ”يا مُعَلِّم، عاوِزين نَشوف عَلامَه مِنَّك.“ لَكِن رَدَّ و قال ليهُم: ”ناس الزَّمَن دا البَطّالين و اليَعمِلو الزِّنا يَطلُبو عَلامَه. و لَكِن الله ما بِدّيهُم عَلامَه إلّا عَلامَة يونان النَّبي. عَشان زي ما كان يونان في بَطن السَّمَك الكَبيرَه تَلاتَة أيام و تلاتَه لِيال، كِدا يَكون إبن الإنسان في جُوَّه الأرض تَلاتَة أيام و تلاتَه لِيال. رُجال نِينَوَى بِقومو يوم الحُكم مَعَ ناس الزَّمَن دا، و يَحكُمو عَليهُم. عَشان هُم تابو لَمّا يونان خَبَّرُم. و شوف! واحِد أكبَر مِن يونان في هِنا. مَلِكَة الجَّنوب بِتقوم يوم الحُكم مَعَ ناس الزَّمَن دا و تَحكُم عَليهُم، عَشان هي جات مِن آخِر الدُّنيا عَشان تَسمَع فَهم سُلَيْمَان. و شوف! واحِد أكبَر مِن سُلَيْمَان في هِنا! الرّوح النَّجِس بَعَد ما يَطلَع مِن الزّول، يَفوت في المَحَلّات الما فيها مويَه، و بِفَتِّش عَلى راحَه. و لَكِن ما بِلقاها. بَعدين بِقول: أنا بَرجَع لِبيتي المَرَقتَ مِنّو. و لَمّا يَجي، يَلقاهو فاضي، نَضيف، و جاهِز. و بَعدين هو يَمشي يَجيب مَعاهو سَبعَه أرواح تانيين أكعَب مِنّو. و يدخُلو و يَسكُنو هِناك. و حالَة الزّول دا الأخيرَه بِتكون أكعَب مِن اوَّل. و بِكون كِدا لِناس الزَّمَن دا البَطّالين.“ وَكِت ما كان لِسَّع بِكَلِّم النّاس، شوف، أُمّو و أخوانو وَقَفو بَرَّه، عاوِزين يِتكَلَّمو مَعاهو. و واحِد قال ليهو: ”أُمَّك و أخوانَك واقفين بَرَّه عاوزين يِتكَلَّمو مَعاك.“ لَكِن رَدَّ عَليهو و قال: ”مِنو هي أُمّي، و مِنو هُم أخواني؟“ و مَدَّ إيدو لِتَلاميذو و قال: ”أهُم ديل أُمّي و أخواني! عَشان البيَعمِل إرادَة أبوي الفي السَّما، هو أخوّي، و أُختي، و أُمّي.“ في نَفس اليوم، يَسُوع مَرَق مِن البيت و قَعَد جَمب البَحَر. و ناس كَتيرين إتلَمّو حَولو، حَتّى دَخَل مُركَب و قَعَد فيهو. و النّاس كُلّو كانو واقفين عَلى الطَّرف. و كَلَّمُم كَتير بِأمثال و قال: ”شوفو! المُزارِع مَرَق عَشان يَزرَع تيرابو. و وَكِت ما هو يَزرَع، وَقَع شوَيَة تيراب عَلى الطَّرِيق. و الطُّيور جو و أكَلوهو. و تيراب تاني وَقَع عَلى المَحَلّات الفيها حُجار، و ما كان ليهو تُراب كَتير. و قام طَوّالي عَشان التُّراب ما كان غَريق. و لَكِن الشَّمِش لَمّا طَلَعَت حَرَقَت النَّبات. و بِقى يابِس، عَشان ما كان عِندو عِرق. و تيراب تاني وَقَع في وَسط الشّوك. و الشّوك طَلَع و خَنَقو. و تيراب تاني وَقَع عَلى التُّراب السَّمِح، و جاب ثِمار. واحِد مِنّو مِيَّه. و التّاني سِتّين. و التّاني تَلاتين. العِندو إضنين، خَليهو يَسمَع.“ بَعدين التَّلاميذ قَرَّبو ليهو و قالو ليهو: ”لِشِنو تَكَلِّمُم بِأمثال؟“ و رَدَّ و قال ليهُم: ”الله أدّا ليكُم تَعرِفو سِر مَلَكوت السَّما. و لَكِن ما أدّا ليهُم. عَشان العِندو، بِدّيهو زِيادَه، و بِكون عِندو كَتير. لَكِن الما عِندو، الحاجَه العِندو بياخُدوها مِنّو. دا السَّبَب الأنا بَكَلِّمُم بِأمثال، عَشان يَعاينو و ما يَشوفو، و يَسمَعو و ما يَسمَعو ولّا يَفهَمو. و تَمَّ فيهُم الكَلام القالو النَّبي إِشَعْيَاء: بِتَسمَعو سَمَع لَكِن ما بِتَفهَمو، و بِتعايِنو بِعُيونكُم لَكِن ما بِتشوفو. عَشان قَلب النّاس ديل بِقى تَقيل، و إضنينُم تُقال عَن السَّمَع، و عُيونُم قَفَلوها، عَشان ما بِشوفو بِعُيونُم، و لا يَسمَعو بِإضنينُم، و لا يَفهَمو بِقُلوبُم، و لا يَرجَعو عَشان أشفيهُم. لَكِن إنتو، مُبارَكَه عُيونكُم، عَشانُم يَشوفو، و إضنينكُم عَشانُم يَسمَعو. الحَق، أقول ليكُم، أنبياء كُتار و الطَّيبين كانو عاوزين يَشوفو الحاجات الإنتو تَشوفوها، و ما شافوها. و كانو عاوزين يَسمَعو الإنتو تَسمَعوها، و ما سِمِعوهو. أسمَعو إنتو، مَثَل المُزارِع. لَمّا أي واحِد يَسمَع كِلمَة المَلَكوت و ما يَفهَما، الشَّرّير يَجي و يَمسِك المَزروع في قَلبو. دا الكان مَزروع عَلى الطَّرِيق. و المَزروع عَلى المَحَلّات الفيها حُجار، دا هو البِسمَع الكِلمَه و طَوّالي بِقبَلا بِفَرَح. لَكِن ما ليهو عِرق في نَفسو، لَكِن يِستَنّى مُدَّه قَليلَه. و لَمّا التَّعب ولّا المُصيبَه حَصَلَت عَشان الكِلمَه، طَوّالي بِقَع. و الكان مَزروع في وَسط الشّوك، دا هو البِسمَع الكِلمَه، و لَكِن مَشغوليّات الدُّنيا و مَحَبَّة المال تَكون كَتيرَه حَتّى يَمنَعو الكِلمَه، و تَكون بِدون ثِمار. و الكان مَزروع في التُّراب السَّمِح، هو البِسمَع الكِلمَه و بِفهَما. هو بِجيب ثِمار، الواحِد مِيَّه، و التّاني سِتّين، و التّاني تَلاتين.“ و عَلَّمُم مَثَل تاني و قال: ”مَلَكوت السَّما زي زول زَرَع تيراب سَمِح في زِراعتو. و لَكِن وَكِت ما النّاس نايمين، عَدوهو جا و زَرَع قَش في وَسط الدُّرَه، و مَشى. و لَمّا الدُّرَه طَلَعَت و جابَت رؤوس، ظَهَر القَش كَمان. و خَدّامين سيد البيت جو و قالو ليهو: يا سَيِّد، ما زَرَعتَ تيراب سَمِح في زِراعتَك؟ كِدا، القَش جا مِن وين؟ قال ليهُم: عَدو عَمَل دا. الخَدّامين قالو ليهو: عاوِزنا نَمشي نَجمَعو؟ قال ليهُم: لا! عَشان وَكِت ما تَطَلِّعو القَش، يِمكِن تَطَلِّعو الدُّرَه كَمان. خَلّوهُم الإتنين يَكبَرو سَوا لِغايَة ما تَمَّ الوَكِت عَشان يَلِم الدُّرَه. و لَمّا وَكِت الحَصاد تَمَّ، أقول لِليَلِمّو الدُّرَه، لِمّو القَش في الأوَّل، و أربُطوهو عَشان يَحرَقوهو. و لَكِن الدُّرَه، لِمّوهو لِمَخزَني.“ و عَلَّمُم مَثَل تاني و قال: ”مَلَكوت السَّما زي تيراب الخَردَل، و زول اَخَدو و زَرَعو في زِراعتو. و هو أصغَر التّيراب كُلّو. لَكِن لَمّا يَكبَر، هو أكبَر النَباتات و تَبقى شَجَرَه، حَتّى طُيور السَّما تَجي و تَقَنِّب في فُروعا.“ و كَلَّمُم بِمَثَل تاني كَمان و قال: ”مَلَكوت السَّما زي خَميرَه أخَدَتا مَرَه و دَسَّتا في تلاتَه كيلات دَقيق لِغايَة ما إتخَمَّر كُلّو.“ يَسُوع قال كُلّو دا لِلجَماعات بِأمثال. و بِدون مَثَل ما كان بِكَلِّمُم حاجَه. دا لِيَتِم القالو النَّبي: ”بَفتَح خَشمي بِأمثال. أقول الدَّسّوهو مِن وَكِت الله خَلَق الدُّنيا.“ بَعدين خَلّى الجَّمَع و مَشى لِلبيت. و تَلاميذو قَرَّبو ليهو و قالو: ”وَرّينا مَعنى مَثَل القَش الفي الزِّراعَه.“ و رَدَّ عَليهُم و قال: ”البِزرَع التّيراب الكَويس هو إبن الإنسان. و الزِّراعَه هي الدُّنيا، و التّيراب الكَويس يَعني أولاد المَلَكوت. و القَش هُم أولاد الشَّرّير. و العَدو الزَّرَعو، هو إبْلِيس. و وَكِت البِلِمّو الدُّرَه، هو آخِر الزَّمَن. و ديل البِلِمّوها، هُم المَلائكَه. زي ما القَش يِتلَمّا و يِنحَرِق، بِكون كِدا في آخِر الزَّمَن. إبن الإنسان بِرَسِّل مَلائكَتو، و هُم بِلِمّو مِن مَلَكوتو كُلّو شي البِكون السَّبَب لِخَطيَّه و كُل اليَعمِلو حاجات بَطّالَه، و بِرموهُم في فُرن النّار. هِناك بِكون البِكى و عَض السِّنون. في الوَكِت داك العادِلين بِنَوِّرو زي الشَّمِش في مَلَكوت أبوهُم. العِندو إضنين، خَليهو يَسمَع. مَلَكوت السَّما زي حاجَه غاليَه الدَسّوها في زِراعَه، و زول لِقاها و دَسّاها. و مِن فَرَحو، يَمشي و يَبيع كُل العِندو و يَشتَري الزِّراعَه دي. و كَمان، مَلَكوت السَّما زي تاجِر بِفَتِّش عَلى لولي جَميل. و لَمّا لِقى لولي غالي جِدّاً، مَشى و باع كُل العِندو و إشتَراهو. كَمان، مَلَكوت السَّما زي شَبَكَه رَموها في البَحَر، و هي جَمَعَت سَمَك مِن كُلّو نوع. و لَمّا كانَت مَليانَه، الصَّيادين جَروها لِلطَّرَف، و قَعَدو و لَمّو السَّمَك الكَويس في قُفَف، لَكِن البَطّال رَموهو بَرَّه. بِكون زي دا في آخِر الزَّمَن. المَلائكَه بِمشو و بِفَرِّقو البَطّالين مِن بين الكوَيسين، و بِرموهُم في فُرن النّار. هِناك بِكون البِكى و عَض السِّنون. فِهِمتو كُلّو دا؟“ قالو ليهو: ”أيوَه.“ و قال ليهُم: ”عَلى كِدا، كُلّو مُعَلِّم القانون البِقي تِلميذ في مَلَكوت السَّما، هو زي زول، سيد بيت، بِطَلِّع مِن المَخزَن بِتاعو حاجات غاليَه، جَديدَه و قَديمَه كَمان.“ و لَمّا يَسُوع خَلَّص الأمثال ديل، مَرَق مِن هِناك. و جا لِوَطَنو و بِقى يَعَلِّمُم في بيت الرَّب حَتّى النّاس إستَغرَبو و قالو: ”الإنسان دا لِقى الحِكمَه دي و القُوّات مِن وين؟ دا ما إبن النَّجّار؟ و ما إسِم أُمّو مَرْيَم؟ و ما أخوانو يَعْقُوب، و يُوسِف و سِمْعَان و يَهُوذَا؟ و مُش كُلّو أخواتو مَعانا؟ و مِن وين الإنسان دا عِندو كُلّو دي؟“ و كانو زَعلانين مِنّو. لَكِن يَسُوع قال ليهُم: ”ما في نَبي مُحتِرَم في وَطَنو و في بيتو، لَكِن بَرَّه مِن بيتو بَس.“ و يَسُوع ما عَمَل قُوّات كَتيرَه هِناك، عَشان هُم ما عِندَهُم إيمان. في الوَكِت داك، هِيرُودُس، رَئيس مُديرِيَّه، سِمِع بِخَبَر يَسُوع. و قال لِخَدّامينو: ”دا هو يُوحَنَّا المَعمَدان. هو قام مِن بين المَيِّتين! دا السَّبَب هو عِندو قُوَّه أن يَعمِل القُوّات دي.“ عَشان هِيرُودُس مَسَك يُوحَنَّا و رَبَطو و خَتّاهو في السِّجِن فِشان هِيرُودِيَا، مَرَة أخوهو فِيلُبُّس. عَشان يُوحَنَّا كان يَقول ليهو: ”ما بِالقانون تاخُدا ليك.“ و لَمّا كان عاوِز يَكتُلو، خاف مِن النّاس، عَشان هُم كانو يَقولو هو نَبي. و لَمّا جا عيد ميلاد هِيرُودُس، بِت هِيرُودِيَا رَقَصَت قِدّام النّاس، و هِيرُودُس كان مَبسوط مِنَّها. عَشان دا، هو وَعَد بِحَلَف يَدّيها أي شي الهي بِتَطلُب مِنّو. و هي، بَعَد ما أُمَّها كَلَّمَتا، قالَت: ”أدّيني هِنا في صينيَّه راس يُوحَنَّا المَعمَدان.“ و المَلِك كان حَزين عَلى دا. لَكِن عَشان الحَلَف بِتاعو و ضُيوفو، أمَر أن يَدُّوهو ليها. و رَسَّل و قَطَع راس يُوحَنَّا في السِّجِن. و جابو رَاسو في صَحَن و أدّوهو لِلبِت. و هي شالَتو لِأُمَّها. و تَلاميذ يُوحَنَّا جو و اَخَدو جِسمو و دَفَنوهو. بَعدين مَشو و خَبَّرو يَسُوع. و لَمّا يَسُوع سِمِع دا، مَرَق مِن هِناك في مُركَب لِلخَلا بَراهو. و لَكِن لَمّا النّاس سِمِعوهو، تِبِعوهو عَلى كُراعُم مِن البِلاد. و لَمّا يَسُوع وِصِل لِلطَّرَف، شاف ناس كُتار. و كان عِندو رَحمَه في قَلبو، و شَفى الكانو عَيّانين. و لَمّا بِقى المِسا، التَّلاميذ قَرَّبو ليهو و قالو: ”المَحَل دا خَلا، و الوَكِت فات. خَلّي النّاس يَمرُقو عَلَشان يَمشو لِلبِلاد و يَشتَرو أكِل لِنُفوسُم.“ لَكِن يَسُوع قال ليهُم: ”ما ضَروري هُم يَمشو. إنتو أدّوهُم أكل.“ و قالو ليهو: ”عِندَنا هِنا خَمسَه رَغِفان بَس و سَمَكتين.“ و قال: ”جيبُم هِنا لَي.“ و أمَر النّاس يَقعُدو عَلى القَش. بَعدين أخَد الخَمسَه رَغِفان و السَّمَكتين، و عايَن لِلسَّما و بارَك، و كَسَّر الرَّغِفان و أدّاها لِلتَّلاميذ، و التَّلاميذ أدّوها لِلنّاس. و كُلَّهُم أكَلو و كانو شَبعانين. و رَفَعو الباقي مِن الكِسرَه، إتناشَر قُفَّه مَليانَه. و النّاس الأكَلو كانو خَمسَة آلاف راجِل تَقريباً، و كَمان نِسوان و أولاد. و طَوّالي أمَر التَّلاميذ عَشان يدخُلو المُركَب، و يَمشو قِدّامو لِلجَّمب التّاني، وَكِت ما يَرَسِّل النّاس. و بَعَد ما رَسَّل النّاس، طَلَع لِلجَّبَل بَراهو عَشان يَصَلّي. و لَمّا بِقى المِسا، كان هِناك بَراهو. لَكِن المُركَب كانَت مَسافَه بَعيدَه مِن الطَرَف، و موج المويَه كانَت تَضرُب عَليها، عَشان الهَبوب كانَت ضِد المُركَب. و بين السّاعَه تلاتَه و السّاعَه سِتَّه في الصَّباح، يَسُوع جا ليهُم ماشي عَلى البَحَر. و لَمّا التَّلاميذ شافوهو ماشي عَلى البَحَر، كانو بِخافو خوف شَديد و قالو: ”هو روح!“ و كورَكو مِن الخوف. لَكِن طَوّالي يَسُوع كَلَّمُم و قال: ”شِدّو حيلكُم. أنا هو. ما تَخافو.“ و بُطْرُس رَدَّ عَليهو و قال: ”يا رَب، إذا دا إنتَ، آمُرني أن أجي ليك عَلى المويَه.“ و يَسُوع قال: ”تَعال.“ و بُطْرُس نَزَل مِن المُركَب و مَشى عَلى المويَه، و جا لِيَسُوع. لَكِن لَمّا شاف الهَبوب الشَّديدَه، خاف، و بَدا يَنزِل تِحِت في المويَه. و كورَك و قال: ”يا رَب، خَلِّصني.“ و طَوّالي، يَسُوع مَدَّ إيدو و مَسَك بيهو، و قال ليهو: ”يا قَليل الإيمان، لِشِنو ما صَدَّقتَ؟“ و لَمّا دَخَلو المُركَب، الهَبوب سَكَتَت. و الكانو في المُركَب عَبَدوهو و قالو: ”بِالحَق، إنتَ إبن الله.“ و لَمّا قَطَعو البَحَر، جو لِأرض جَنِّيسَارَت. و لَمّا ناس المَكان دا عِرفوهو، رَسَّلو الخَبَر لِكُل المَحَل داك و جابو ليهو كُل العَيّانين، و طَلَبو ليهو يَخَلّي العَيّانين يَلمَسو طَرف توبو بَس. و كُل اللَمَسوهو بِقو طَيبين. بَعدين، فَرّيسيِّين و مُعَلِّمين القانون جو لِيَسُوع مِن أُورُشَلِيم، و قالو: ”تَلاميذَك بِكَسِّرو حَديث الشُّيوخ لِشِنو؟ عَشان ما بِغَسِّلو إيدينُم قُبّال ما ياكلو.“ يَسُوع رَدَّ و قال ليهُم: ”و إنتو، لِشِنو تَكَسِّرو أمر الله فِشان حَديثكُم؟ عَشان الله قال: إحتَرِم أبوك و أُمَّك، و كَمان: أي واحِد البقول لَعنَه عَلى أبوهو ولّا أُمّو، لازِم يَكتُلوهو. لَكِن إنتو تَقولو واحِد ما لازِم يَحتَرِم أبوهو إذا يَقول لِأبوهو ولّا أُمّو: المَساعَدَه الأنا كُنتَ ساعَدتَكُم بيها، هي هَدِيَّه لِلَّه. و كِدا، تَبَطِّلو كَلام الله عَلَشان حَديثكُم. يا مُنافِقين، إِشَعْيَاء إتنَبّأ تَمام عَنكُم لَمّا قال: النّاس ديل بِحتَرِموني بِخَشمُم، و لَكِن قُلوبُم بَعيدَه جِدّاً مِنّي. يَحمَدوني ساكِت و بِعَلِّمو أوامِر بِتاع النّاس بَس.“ و نادى النّاس و قال ليهُم: ”أسمَعو و أفهَمو: البِدخُل الخَشم ما بِنَجِّس الزّول، لَكِن البِطلَع مِن الخَشم، دا بِنَجِّس الزّول.“ بَعدين التَّلاميذ قَرَّبو ليهو و قالو ليهو: ”بِتَعرِف الفَرِّيسِيِّين كانو زَعلانين لَمّا سِمِعو الكَلام دا؟“ و رَدَّ يَسُوع و قال: ”كُلّو نَبات، إذا أبوي الفي السَّما ما زَرَعَه، بِطَلِّعوها. خَلّوهُم. هُم ناس عَميانين بِسوقو عَميانين. و إذا عَميان بِسوق عَميان، هُم الإتنين يَقَعو في حُفرَه.“ و لَكِن بُطْرُس قال ليهو، ”وَرّينا مَعنى المَثَل.“ و يَسُوع قال: ”إنتو كَمان لِسَّع بِدون فَهم؟ ما تَفهَمو كُل البِدخُل الخَشم بِمشي لِلبَطُن، و بَعدين بِمرُق مِنّو؟ و لَكِن البِمرُق مِن الخَشم يَجي مِن القَلب، و دا بِنَجِّس الزّول. عَشان مِن القَلب يَجو الأفكار البَطّالَه، و الكَتل، و الزِّنا، و الأخلاق البَطّالَه، و السِّرقَه، و الشَّهادَه الكَضّابَه، و الشَّتيمَه. دي هي الحاجات البِنَجِّسو الزّول. و لَكِن البياكُل بِدون ما بِغَسِّل إيدينو دا ما يَنَجِّس الزّول.“ و يَسُوع مَرَق مِن هِناك و مَشى بَراهو لِقِسم صُور و صَيدا. و شوف! مَرَه كَنعانيَه مِن المَحَل داك، طَلَعَت و كُورَكَت: ”يا سَيِّد، إبن دَاوُد، كون رَحيم لَي. شيطان بِعَذِّب بِتّي شَديد جِدّاً.“ لَكِن ما رَدَّ عَليها بِكِلمَه. و تَلاميذو قَرَّبو ليهو و طَلَبو ليهو و قالو: ”خَلِيها تَمشي، عَشان هي بِتكورِك وَرانا.“ و رَدَّ عَليها و قال: ”أنا مَرَسَّل بَس لِلخِرفان المَوَدَّرين مِن بيت إِسْرَائِيل.“ لَكِن هي جات و رَكَعَت قِدّامو و قالَت: ”يا سَيِّد، ساعِدني.“ رَدَّ عَليها و قال: ”ما كوَيس ياخُد عيش الأولاد و يَرميهو لِلكِلاب الصُّغار.“ قالَت ليهو: ”أيوَه، يا سَيِّد، لَكِن الكِلاب الصُّغار بياكلو مِن الباقي البِقَع مِن طَرَبيزَة سَيِّدُم.“ بَعدين يَسُوع رَدَّ عَليها و قال: ”يا سِت، إيمانِك عَظيم. خَليهو بِكون ليكي زي ما إنتي عاوزَه.“ و بِتّا بِقَت تَمام مِن السّاعَه ديك. و يَسُوع مَرَق مِن هِناك، و مَشى عَلى طَرف بَحَر الجَّليل. و طَلَع لِلجَّبَل و قَعَد هِناك. و ناس كُتار قَرَّبو ليهو، و جابو مَعاهُم العُرُج، و النّاس اليَمشو بِعَصايَه، و العَميانين، و الما بِقدَرو يِتكَلَّمو، و تانيين كُتار. و سَلَّموهُم ليهو. و هو شَفاهُم، حَتّى النّاس إستَغرَبو لَمّا شافو النّاس الما بِتكَلَّمو، و النّاس الكانو بِيَمشو بِعَصايَه بِقو طَيبين، و العُرُج بِمشو، و العَميانين بِشوفو. و هُم مَجَّدو الله بِتاع إِسْرَائِيل. بَعدين يَسُوع نادى تَلاميذو و قال ليهُم: ”أنا عِندي رَحمَه عَلى النّاس، عَشانُم مَعاي تلاتَه أيام هَسَّع، و ما عِندَهُم أكل. و أنا ما عاوِز أرَسِّلُم جَعانين، عَشان يِمكِن يَقَعو في السِّكَّه.“ و التَّلاميذ قالو ليهو: ”مِن وين نَلقى في الخَلا عيش كِفايَه لِلنّاس ديل؟“ و يَسُوع قال ليهُم: ”عِندَكُم كَم رَغيف؟“ قالو: ”سَبعَه، و شوَيَه مِن سَمَك صَغَيِر.“ و يَسُوع أمَر النّاس يَقعُدو عَلى الأرض، و أخَد السَّبعَه رَغِفان و السَّمَك. و بَعَد ما شَكَر الله، كَسَّرَه، و أدّاها لِلتَّلاميذ. و التَّلاميذ أدّوهُم لِلنّاس. و كُلَّهُم أكَلو و شَبَعو. و رَفَعو مِن باقي الكِسرَه، سَبعَه قُفَف مَليانَه. النّاس الأكَلو كانو أربَعَة آلاف راجِل، و كَمان نِسوان و أولاد. و بَعَد ما رَسَّل النّاس، رِكِب المُركَب و مَشى لِمَحَل مَجدان. و الفَرّيسيّين و الصَّدّوقيين قَرَّبو ليهو و جّرَّبوهو. و سألوهو عَشان يَوَرّيهُم عَلامَه مِن السَّما. و رَدَّ عَليهُم و قال: ”لَمّا يَبقى المِسا تَقولو، الطَّقس بِكون كوَيس، عَشان السَّما حَمرَه. و في الصَّباح تَقولو: هَبوب بِتَجي، عَشان السَّما حَمرَه و الواطَه ضُلُمَّه. إنتو تَعرِفو كيف تَفهَمو وَش السَّما، لَكِن ما بِتَقدَرو تَفهَمو عَلامات الزَّمَن. ناس زَمَن بَطّال و البيَعمِلو الزِّنا بِطلُبو عَلامَه. و لَكِن ما بِدّوهُم عَلامَه إلّا عَلامَة يونان.“ و هو سابُم و مَشى. و لَمّا التَّلاميذ وِصلو لِلجَّمب التّاني، كانو نِسو ياخُدو عيش. و يَسُوع قال ليهُم: ”خَلّو بالكُم و أحرِسو مِن خَميرَة الفَرِّيسِيِّين.“ و إتكَلَّمو عَن دا بين نُفوسُم و قالو: ”عَشان ما أخَدنا عيش.“ و لَكِن يَسُوع عِرِف كَلامُم و قال: ”يا قَليلين الإيمان، لِشِنو بِتِتكَلَّمو بين نُفوسكُم، و بِتقولو ما عِندَكُم عيش؟ إنتو لِسَّع ما فاهمين؟ ما بِتِتزَكَّرو الخَمسَه رَغِفان لِلخَمسَة آلاف، و كَم قُفَّه إنتو رَفَعتو؟ ولّا السَّبعَه رَغِفان لِلأربَعَة آلاف، و كَم قُفَّه إنتو رَفَعتو؟ كيف ما تَفهَمو أنا ما كَلَّمتَكُم في خُصوص العيش؟ لَكِن خَلّو بالكُم مِن خَميرَة الفَرِّيسِيِّين و الصَّدّوقيين.“ في الوَكِت داك، فِهمو إنّو ما قال ليهُم يَخَلّو بالُم مِن خَميرَة العيش، لَكِن مِن تَعليم الفَرِّيسِيِّين و الصَّدّوقيين. و لَمّا يَسُوع جا لِقِسم قَيْصَرِيَّه فِيلِبُّس، سأل تَلاميذو و قال: ”النّاس بِقولو إبن الإنسان مِنو؟“ و قالو: ”بَعض مِن النّاس بِقولو يُوحَنَّا المَعمَدان، و تانيين يَقولو إِيلِيَّا، و تانيين يَقولو إِرْمِيَا ولّا واحِد مِن الأنبياء.“ و قال ليهُم: ”لَكِن إنتو بِتقولو أنا مِنو؟“ سِمْعَان بُطْرُس رَدَّ عَليهو و قال: ”إنتَ المَسيح، إبن الله الحَي!“ و يَسُوع قال ليهو: ”مُبارَك إنتَ، يا سِمْعَان إبن يُونَا. عَشان ناس ما وَرّوهو ليك، لَكِن أبوي الفي السَّما. و أنا أقول ليك، إنتَ بُطْرُس، و أنا بَبني كَنيسَتي عَلى الحَجَر دا، و قُدرَة الموت ما بِتَغلِبوها. و بَدّيك مَفاتيح مَلَكوت السَّما. و كُل الأنتَ بِتَربُطو عَلى الأرض، بِكون الكان مَربوط في السَّما. و كُل الأنتَ بِتفِك عَلى الأرض، بِكون الفَكّوهو في السَّما.“ بَعدين أمَر تَلاميذو ما يَقولو لِأي واحِد هو المَسيح. مِن الوَكِت دا، يَسُوع المَسيح بَدا يَوَرّي تَلاميذو هو لازِم يَمشي لِأُورُشَلِيم و بِتعَب كَتير مِن الشُّيوخ و القُسُس الكُبار و مُعَلِّمين القانون، و بِيَكتُلوهو، و في اليوم التّالِت بِقوم. و بُطْرُس أخَد يَسُوع ليهو و بَدا يَكَلِّمو شَديد و قال: ”ما مُمكِن، يا رَب! دا ما بِكون ليك أبَداً!“ و لَكِن إتلَفَت و قال لِبُطْرُس: ”أمشي مِنّي، يا شيطان! إنتَ سَبَب وقوع لَي، عَشان إنتَ ما بِتفَكِّر في حاجات الله لَكِن في حاجات النّاس.“ بَعدين يَسُوع قال لِتَلاميذو: ”إذا كان أي زول داير يَجي وَراي، خَليهو يَنكِر نَفسو، و يَشيل صَليبو، و يَتبَعني. عَشان كُل الدّايِر يَخَلِّص نَفسو، بِوَدِّرا. و كُل البِوَدِّر نَفسو عَشانّي، بِلقاها. عَشان شِنو الفايدَه لِلزّول إذا بِلقى فايدَة الدُّنيا كُلَّها، و لَكِن يَوَدِّر نَفسو! ولّا الزّول بِبَدِّل شِنو بِنَفسو؟ عَشان إبن الإنسان بِجي مَعَ مَلائكَتو في مَجد أبوهو. و بَعدين بِدّي ماهيَّه لِكُلّو زول زي أعمالو. الحَق أقول ليكُم، بَعَد مِن النّاس الواقفين هِنا ما بِموتو لِغايَة ما بِشوفو إبن الإنسان يَجي في مَلَكوتو.“ و بَعَد سِتَة أيام، يَسُوع أخَد مَعاهو بُطْرُس و يَعْقُوب و يُوحَنَّا أخوهو. و قادُم لِجَبَل عالي بَراهُم. و شَكلو كان مَغَيَّر، و وَشّو إتنَوَّر زي الشَّمِش، و هِدومو بِقى أبيَض زي النّور. و شوف! مُوسَى و إِيلِيَّا ظَهَرو ليهُم يِتكَلَّمو مَعاهو. و بُطْرُس رَدَّ و قال لِيَسُوع: ”يا رَب، كوَيس لينا نَكون هِنا. إذا إنتَ داير، بَعمِل تلاتَه خيام هِنا، واحدَه ليك، و واحدَه لِمُوسَى، و واحدَه لِإِيلِيَّا.“ و وَكِت ما كان لِسَّع يتكَلَّم، شوف! سَحابَه لامعَه عَمَلَت ضُل عَليهُم. و صوت مِن السَّحابَه قال: ”دا هو إبني الحَبيب، و أنا مَبسوط مِنّو. أسمَعو ليهو.“ لَمّا التَّلاميذ سِمِعو دا، وَقَعو عَلى وُشوشُم، و خافو جِدّاً. لَكِن يَسُوع جا و لِمِسُم و قال: ”قُومو، و ما تَخافو.“ و لَمّا رَفَعو عُيونُم، ما شافو واحِد إلّا يَسُوع بَس. و وَكِت ما هُم نازِلين مِن الجَّبَل، يَسُوع أمَرُم و قال: ”ما تَكَلِّمو أي واحِد عَن الرّؤيَه، لِغايَة ما إبن الإنسان يَقوم مِن بين المَيِّتين.“ و التَّلاميذ سألوهو و قالو: ”إذا كِدا، لِشِنو مُعَلِّمين القانون يَقولو إِيلِيَّا لازِم بِجي في الأوَّل؟“ رَدَّ عَليهُم و قال: ”إِيلِيَّا جاي و بِرَجِّع كُلّو شي. لَكِن أقول ليكُم، إِيلِيَّا جا هَسَّع، و ما عِرفوهو، لَكِن عَمَلو ليهو كُل الهُم دايرينو. زي دا، إبن الإنسان كَمان بِتعَذَّب مِنَّهُم.“ في الوَكِت داك، التَّلاميذ فِهمو هو قال ليهُم عَن يُوحَنَّا المَعمَدان. و لَمّا جو لِلجَّماعَه، زول قَرَّب ليهو و رَكَع قِدّامو و قال: ”يا رَب، كون رَحيم لِوَلَدي، عَشان هو عِندو العَيى البِتَرميهو تِحِت، و بِتعَذَّب جِدّاً. عَشان مَرّات كَتيرَه يَقَع في النّار، و مَرّات كَتيرَه يَقَع في المويَه. و جِبتو لِتَلاميذَك، و ما قِدرو يَشفوهو.“ و يَسُوع رَدَّ و قال: ”يا أولاد الزَّمَن دا، البِدون إيمان و رُسيكُم قَوّيَّه، لِمِتين بَكون مَعاكُم؟ لِمِتين أنا بَتحَمَّلكُم؟ جيبو لَي هِنا.“ و يَسُوع كَلَّمو شَديد، و الشّيطان طَلَع مِنّو. و الوَلَد بِقى طَيب طَوّالي. بَعدين التَّلاميذ جو لِيَسُوع بَراهُم، و قالو: ”لِشِنو نِحنا ما قِدِرنا نَطَلِّعو؟“ و قال ليهُم: ”عَلَشان إيمانكُم قَليل. عَشان بِالحَق أقول ليكُم، إذا كان ليكُم إيمان زي تيراب خَردَل، بِتقولو لِلجَّبَل دا: إتحَرَّك مِن هِنا لِلمَحَل هِناك، و هو يِتحَرَّك. و ما في حاجَه بِتكون ما مُمكِن ليكُم. و لَكِن النوع دا ما بِطلَع إلّا بِالصَّلاه و الصّوم.“ و وَكِت ما يَمشو في الجَّليل، يَسُوع قال ليهُم: ”إبن الإنسان بِتسَلَّم لِإيدين النّاس. و هُم بِيَكتُلوهو، و هو بِقوم في اليوم التّالِت.“ و هُم كانو حَزنانين جِدّاً. و لَمّا جو لِكَفْرَنَاحُوم، النّاس البِلِمّو الرّيال قَرَّبو لِبُطْرُس و قالو ليهو: ”مُعِلِّمَك ما يَدفَع الضَّريبَه؟“ قال: ”أيوَه.“ و لَمّا دَخَل البيت، يَسُوع إتكَلَّم في الأوَّل و قال: ”تَفتَكِر شِنو، يا سِمْعَان؟ مِن مِنو ياخُدو مُلوك الدُّنيا رُسوم الجُّمرُك ولّا الضَّريبَه؟ مِن أولادُم ولّا مِن الغَريبين؟“ بُطْرُس قال: ”مِن الغَريبين.“ يَسُوع قال ليهُم: ”عَلى كِدا الأولاد حُرّين. لَكِن عَشان ما نَزَعِّلُم، أمشي لِلبَحَر و أرمي جَبادَه. أُخُد أوَّل سَمَك البِتَطلَع. و لَمّا تَفتَح خَشما، بِتَلقى ريال. أُخدو، و أدّيهو ليهُم فِشانّي و فِشانَك.“ في الوَكِت داك، التَّلاميذ قَرَّبو لِيَسُوع و قالو: ”مِنو هو الأكبَر في مَلَكوت السَّما؟“ و نادى ليهو وَلَد، و وَقَّفو في وَسطُم و قال: ”الحَق أقول ليكُم، إذا ما بِتَرجَعو و تَكونو زي الأولاد، ما بِتَدخُلو مَلَكوت السَّما أبَداً. اليَخُت نَفسو تِحِت زي الوَلَد دا، هو الأكبَر في مَلَكوت السَّما. و البِقبَل وَلَد واحِد زي دا بِإسمي، بِقبَلني أنا. و لَكِن اليَكون سَبَب الخَطيَّه لِواحِد مِن الأولاد الصُّغار ديل البِصَدِّقو بي، أحسَن ليهو إذا يَربُطو حَجَرَه مُرحاكَه كَبيرَه في رَقَبتو و بِرموهو في البَحَر، و بِغرَق فيهو. حُزن لِناس الدُّنيا عَشان الحاجات البيها النّاس بِكونو مَجَرَّبين لِلخَطيَّه. لازِم الحاجات دي بِتَجي، لَكِن حُزن لِلزّول البِخَلّي الحاجات تَجي بيهو. و إذا كان إيدَك ولّا كُراعَك هي سَبَب خَطيَّتَك، أقطَعا و أرميها مِنَّك. أحسَن ليك تَدخُل الحَياة بِكُراع واحدَه ولّا إيد واحدَه مِن ما يَرموك في النّار الأبَديَّه و عِندَك إيدين ولّا كِرعين. و إذا كان عينَك هي سَبَب خَطيَّتَك، طَلِّعا و أرميها مِنَّك. أحسَن ليك تَدخُل الحَياة بِعين واحدَه مِن ما يَرموك في جَهَنَّم النّار و عِندَك عُيون. شوفو، ما تابو تَحتَرِمو واحِد مِن الصُّغار ديل. عَشان أقول ليكُم، في السَّما مَلائكَتُم دايماً بِشوفو وَش أبوي الفي السَّما. عَشان إبن الإنسان جا عَشان يَخَلِّص النّاس المَوَدَّرين. تَفتَكِرو شِنو؟ إذا كان زول عِندو مِيَّة خَروف، و ضَلّا واحِد مِنَّهُم، هو ما يَخَلّي التِّسعَه و التِّسعين عَلى الجِّبال و يَمرُق يَفَتِّش عَلى الواحِد الضال؟ و إذا يَلقاهو، الحَق أقول ليكُم، هو يَفرَح بيهو أكتَر مِن التِّسعَه و التِّسعين الما ضَلّو. كِدا، أبوكُم الفي السَّما ما عاوِز واحِد مِن الصُّغار ديل يِتوَدَّر. إذا كان أخوك يَعمِل خَطيَّه ليك، أمشي و كَلِّمو غَلَطو بينَك و بينو و إنتو بَراكُم. كان بِسمَع ليك، إنتَ حَصَّلتَ عَلى شَرِكَه مَعَ أخوك. لَكِن إن ما بِسمَع ليك، أُخُد مَعاك واحِد ولّا إتنين تانيين حَتّى كُلّو كِلمَه تَكون ثابِتَه بِخَشم إتنين ولّا تلاتَه شاهِدين. إذا يابا يَسمَع ليهُم، كَلَّم الكَنيسَه. و إذا يابا يَسمَع لِلكَنيسَه، خَليهو يَكون ليكُم زي واحِد مِن ناس الدُّنيا و البِلِمّو الضَّريبَه. الحَق أقول ليكُم، كُل الإنتو تَربُطوهو عَلى الأرض بِكون الكان مَربوط في السَّما. و كُل التَّفِكّوهو عَلى الأرض بِكون الكان مَفكوك في السَّما. الحَق أقول ليكُم تاني إذا إتنين مِنَّكُم يَتَّفِقو عَلى الأرض في أي شي بِطلُبوهو، بِكون ليهُم مِن أبوي الفي السَّما. عَشان في المَحَل الإتلَمّو فيهو إتنين ولّا تلاتَه بِإسمي، أنا بَكون هِناك في وَسِطُم.“ بَعدين، بُطْرُس قَرَّب ليهو و قال: ”يا رَب، كَم مَرَّه بَغفِر لِأخوّي و هو يَعمِل خَطيَّه لَي؟ لِسَبعَه مَرّات؟“ يَسُوع رَدَّ عَليهو و قال: ”أقول ليك، ما سَبعَه مَرّات، لَكِن سَبعين مَرَّه سَبعَه مَرّات. عَلَشان كِدا، مَلَكوت السَّما زي مَلِك كان داير يَعمِل حِساب مَعَ خَدّامينو. و لَمّا إبتَدا الحِساب، جابو ليهو واحِد كان عِندو دين أكتَر مِن مِليون جِنيه. و لَمّا ما كان يَقدَر يَدفَع، سيدو أمَرُم يَبيعوهو، هو و مَرَتو و أولادو و كُلّو مالو، عَشان يَدفَع الدّين. و الخَدّام وَقَع قِدّامو و طَلَب مِنّو و قال: يا سَيِّد، أدّيني وَكِت، و أنا بَدفَع كُل المال بِتاعَك. و مِن رَحمَتو، سيد الخَدّام داك فَكّاهو و غَفَر ليهو الدين. و لَكِن الخَدّام داك، وَكِت ما كان يَمرُق، لِقى واحِد مِن الخَدّامين الإشتَغَل مَعاهو، و هو كان عِندو دين بِمِيَّة دينار. و هو مَسَكو و بِقى يَزنَقو و قال ليهو: أدفَع لَي الدين. و الخَدّام وَقَع قِدّامو، و طَلَب مِنّو و قال: أدّيني وَكِت، و أنا بَدفَع ليك. لَكِن هو أبى، و مَرَق و خَتّاهو في السِّجِن حَتّى بِدفَع الدّين. و لَمّا الخَدّامين التّانيين شافو العَمَلوهو، كانو حَزنانين جِدّاً، و مَشو و خَبَّرو سيدُم بِكُل الحِكايَه. بَعدين سيدو ناداهو و قال ليهو: يا الخَدّام الشَّرّير، غَفَرتَ ليك كُل الدّين داك عَشان إنتَ طَلَبتَ مِنّي. و إنتَ كَمان، ما كان لازِم عِندَك رَحمَه عَلى الخَدّام البِشتَغِل مَعاك زي ما أنا رَحَمتَك؟ و سيدو كان زَعلان جِدّاً و سَلَّمو لِلسَّجّانين لِغايَة ما بِدفَع كُلّو دينو. و كَمان أبوي بيَعمِل زي دا لِكُلّو واحِد مِنَّكُم إذا ما يَغفِر لِأخوهو مِن قَلبو.“ و لَمّا يَسُوع كَمَّل الكَلام دا، مَرَق مِن الجَّليل و مَشى لِمَحَل اليَهُودِيَّه، غادي الأُرْدُنّ. و ناس كَتيرين تِبِعوهو، و هو شَفاهُم هِناك. و الفَرّيسيّين قَرَّبو ليهو عَشان يَجَرِّبوهو، و قالو: ”القانون بِخَلّي راجِل يَطَلِّق مَرَتو لِكُلّو سَبَب؟“ رَدَّ عَليهُم و قال: ”ما قَريتو هو الخَلَقُم مِن البِدايَه خَلَقُم راجِل و مَرَه؟ و قال: عَشان كِدا، الرّاجِل بِسيب أبوهو و أُمّو و يَكون واحِد مَعَ مَرَتو، و الأتنين يَبقو جِسِم واحِد. كِدا، هُم ما إتنين بَعَد دا، لَكِن جِسم واحِد. عَلَشان كِدا، الجَّمَعو الله، ما تَخَلّو إنسان يَفَرِّقو.“ قالو ليهو: ”لِشِنو مُوسَى أمَر لِلرّاجِل يَدّي شَهادَة طَلاق و يَخَلّيها؟“ قال ليهُم: ”مُوسَى أدّاكُم إذن تَطَلِّقو نِسوانكُم عَشان قُلوبكُم بِقو قَوّيين. و لَكِن مِن الأوَّل ما كان زي دا. و أقول ليكُم، البِطَلِّق مَرَتو إلّا لَمّا عَمَلَت الزِّنا، و بِتزَوَّج مَرَه تانيَه، هو بيَعمِل الزِّنا.“ و التَّلاميذ قالو ليهو: ”إذا كان الحالَه بين الرّاجِل و مَرَتو زي دي، أحسَن ما يِتزَوَّج.“ و قال ليهُم: ”مُش كُل النّاس يَقدَرو يَقبَلو الكَلام دا، لَكِن هُم الأدّوهو ليهُم بَس. عَشان في خِصيان مَولودين زي دا مِن بُطون أُمَّهاتُم. و في خِصيان خَصوهُم النّاس. و في خِصيان خَصو نُفوسُم فِشان مَلَكوت السَّما. اليَقدَر يَقبَل دا، خَليهو يَقبَلو.“ بَعدين قَدَّمو ليهو أولاد عَشان يَخُت إيدينو عَليهُم و يَصَلّي. لَكِن التَّلاميذ كَلَّموهُم شَديد. لَكِن يَسُوع قال: ”خَلّو الأولاد يَجو لَي، و ما تَمنَعوهُم، عَشان مَلَكوت السَّما لِأولاد زي ديل.“ و خَتَّ إيدينو فوقُم و مَرَق مِن هِناك. و شوف! واحِد قَرَّب ليهو و قال: ”يا مُعَلِّم، شِنو الحاجَه الكوَيسَه اللازِم أعمِلا عَشان بِكون عِندي الحَياة الأبَديَّه؟“ و يَسُوع قال ليهو: ”لِشِنو تسألني عَن الحاجات الكوَيسَه؟ الكَويس هو واحِد بَس. و إذا عاوِز تَدخُل الحَياة، أحفَظ الأوامِر.“ قال ليهو: ”ياتو في الأوامِر؟“ و يَسُوع قال: ”ما تَكتُل، ما تَزني، ما تَسرِق، ما تَشهَد بِالكِضِب. إحتَرِم أبوك و أُمَّك، و، حِب جيرانَك زي ما تَحِب نَفسَك.“ و الشّاب قال ليهو: ”حَفَظتو كُلّو دي. شِنو ناقِص لَي بَعَد دا؟“ و يَسُوع قال ليهو: ”إذا كان عاوِز تَكون تَمام، أمشي، و بيع مالَك، و أَدِّي القُروش مِنّو لِلمَساكين، و بِكون عِندَك كَنز في السَّما. و تَعال أتبَعني.“ و لَمّا الشّاب سِمِع الكَلام دا، مَرَق حَزين، عَشان كان عِندو مال كَتير. و يَسُوع قال لِتَلاميذو: ”الحَق أنا بَقول ليكُم: صَعَب لِزول غَني أن يَدخُل مَلَكوت السَّما. و أنا بَقول ليكُم كَمان، بِكون أسهَل لِجَمَل يَدخُل في عين إبرَه مِن أن غَني يَدخُل مَلَكوت الله.“ و لَمّا التَّلاميذ سِمِعو الكَلام دا، إستَغرَبو كَتير و قالو: ”كان كِدا، مِنو يَقدَر يَخلَص؟“ يَسُوع عايَن ليهُم و قال ليهُم: ”دا ما مُمكِن عِند النّاس، و لَكِن عِند الله كُلّو شي مُمّكِن.“ بَعدين بُطْرُس رَدَّ عَليهو و قال: ”شوف! خَلّينا كُلّو شي و تِبِعناك. بِكون لينا شِنو؟“ يَسُوع قال ليهُم: ”الحَق أنا بَقول ليكُم: في الزَّمَن الجَّديد، لَمّا إبن الإنسان يَقعُد عَلى كُرسي المَلِك في مَجدو، إنتو كَمان التَّبَعتوني بِتَقعُدو عَلى إتناشَر كُرسي، و تَحكُمو عَلى قَبايل إِسْرَائِيل الإتناشَر. و كُلّو واحِد الخَلّى بُيوت ولّا أخوان ولّا أخوات ولّا أبو ولّا أُم ولّا أولاد ولّا زِراعات فِشان إسمي، هو بياخُد مِيَّة مَرَّه، و بِتكون ليهو الحَياة الأبَديَّه. و لَكِن كَتيرين مِن النّاس الفي الأوَّل بِكونو في الآخِر، و كَتيرين مِن النّاس الفي الآخِر بِكونو في الأوَّل. عَشان مَلَكوت السَّما زي سيد بيت. و هو مَرَق بَدري في الصَّباح عَشان يَأجِّر شَغّالين عَشان يَشتَغِلو في الجِّنينَه بِتاعَت العِنَب. و إتَّفَق مَعَ الشَّغّالين عَشان بِدفَع دينار في اليوم، و رَسَّلُم لِجِنينتو. و السّاعَه تِسعَه تَقريباً، مَرَق، و شاف ناس تانيين واقفين ساكِت في السّوق. و قال ليهُم: أمشو إنتو كَمان لِجِنينتي، و أنا بَدّيكُم أُجرَه تَمام. و هُم مَشو. و مَرَق مَرَّه تانيَه السّاعَه إتناشَر و كَمان السّاعَه تلاتَه و عَمَل نَفس العَمَل. و مَرَق السّاعَه خَمسَه تَقريباً و لِقى تانيين واقفين. و قال ليهُم: لِشِنو إنتو واقفين هِنا ساكِت طول النَّهار؟ و قالو ليهو: عَشان ما في واحِد أجَّرنا. قال ليهُم: أمشو إنتو كَمان لِجِنينتي. و في المِسا، سيد الجِّنينَه قال لِوَكيلّو: نادي الشَّغّالين و أدفَع الأُجرَه. و إبتَدي مِن النّاس الفي الآخِر لِغايَة النّاس الفي الأوَّل. و الشَّغّالين الكانو مَأجَّرين السّاعَه خَمسَه جو و اَخَدو دينار دينار. و لَمّا المَأجَّرين الفي الأوَّل جو، إفتَكَرو بياخُدو أكتَر. لَكِن هُم كَمان اَخَدو دينار دينار. و وَكِت ما كانو ياخدوهو، بِقو يَشتَكو عَلى سيد البيت، و قالو: النّاس الفي الآخِر ديل إشتَغَلو ساعَه واحدَه بَس، و إنتَ عَمَلتَهُم سَوا مَعانا نِحنا التِّعِبنا تَعب الشُّغل و في حَرارَة النَّهار. و رَدَّ عَلى واحِد مِنَّهُم و قال ليهو: يا صاحِب، أنا ما عَمَلتَ ليك شي ما عَديل. ما إتَّفَقتَ مَعاي تِشتَغِلو لِدينار؟ أُخُد مالَك و أمشي. أنا عاوِز أَدِّي لِلزّول الآخِر دا زي ما أدّيتَك. ما بِالقانون أن أعمِل زي ما أنا عاوِز بِمالي؟ ولّا إنتَ عِندَك قَلب بَطّال عَشان أنا راجِل كَريم؟ كِدا، النّاس الفي الآخِر بِكونو في الأوَّل، و النّاس الفي الأوَّل بِكونو في الآخِر.“ و وَكِت ما يَسُوع كان بِطلَع لِأُورُشَلِيم، أخَد الإتناشَر تِلميذ بَراهُم، و في السِّكَّه قال ليهُم، ”شوفو! نِحنا نَطلَع لِأُورُشَلِيم. و إبن الإنسان، بِسَلِّموهو لِلقُسُس الكُبار و مُعَلِّمين القانون، و هُم بِحكُمو عَليهو بِالموت، و يَسَلِّموهو لِناس الدُّنيا عَشان يَضحَكو عَليهو، و يَجلِدوهو، و يَصلُبوهو. و هو بِقوم في اليوم التّالِت.“ بَعدين أُم أولاد زَبَدي قَرَّبَت ليهو مَعَ أولادا، و رَكَعَت قِدّامو و طَلَبَت مِنّو حاجَه. و قال ليها: ”إنتي عاوزَه شِنو؟“ قالَت ليهو: ”أَدِّي أمر عَن أولادي الأتنين ديل عَشان يَقعُدو، الواحِد عَلى يَمينَك، و التّاني عَلى شِمالَك في مَلَكوتَك.“ و لَكِن يَسُوع رَدَّ و قال: ”إنتو ما تَعرِفو الإنتو تَطلُبو. إنتو بِتَقدَرو تَتعَبو زي ما أنا بَتعَب؟“ قالو ليهو: ”بِنَقدَر.“ و قال ليهُم: ”صَحيح، بِتَشرَبو مِن كُبّاياتي بِتاعَت التَّعب، و لَكِن القُعاد عَلى يَميني و عَلى شِمالي، ما لَي عَشان أدّيهو. المَحَلّات ديل فِشان النّاس الأبوي جَهَّز ليهُم مِن زَمان.“ و لَمّا العَشَرَه تَلاميذ سِمِعو دا، كانو زَعلانين مِن الأخوان الإتنين. و يَسُوع ناداهُم ليهو و قال: ”إنتو عارفين رؤساء ناس الدُّنيا يَعمِلو زي السَّيد عَليهُم، و الكُبار ياخُدو سُلطَه عَليهُم. و لَكِن ما بِكون زي دا بينكُم. لَكِن العاوِز يَكون كَبير بينكُم لازِم يَكون خَدّامكُم. و العاوِز يَكون الأوَّل بينكُم لازِم يَكون ليكُم عَبد. زي ما إبن الإنسان ما جا عَشان النّاس يَخدِموهو، لَكِن عَشان يَخدِم النّاس، و عَشان يَدّي نَفسو فِداء لِناس كُتار.“ و وَكِت ما مَشو مِن أَرِيحَا، جَمَع كَبير تِبِعوهو. و شوف! راجلين عاميانين كانو قاعِدين جَمب السِّكَّه. و لَمّا سِمِعو يَسُوع يَمُر بِالسِّكَّه، كورَكو و قالو: ”يا رَب، يا إبن دَاوُد، أرحَمنا!“ و النّاس كَلَّموهُم شَديد عَشان يَسكُتو. و لَكِن كورَكو أكتَر و قالو: ”يا رَب، يا إبن دَاوُد، أرحَمنا.“ و يَسُوع وَقَف و ناداهُم و قال: ”عاوِزينّي أعمِل ليكُم شِنو؟“ قالو ليهو: ”يا رَب، أفتَح عُيونّا.“ و يَسُوع بِرَحمَه لِمِس عُيونُم، و طَوّالي قِدرو يَشوفو، و تِبِعوهو. و لَمّا قَرَّبو لِأُورُشَلِيم و وِصِل بيت فاجي، في جَبَل الزّيتون، يَسُوع رَسَّل إتنين مِن تَلاميذو و قال ليهُم: ”أمشو لِلحِلَّه القِدّامكُم، و طَوّالي بِتَلقو حُمارَه مَربوطَه، و جَنى مَعاها. فِكّوهُم و جيبوهُم لَي. إذا أي واحِد بِقول ليكُم حاجَه، كَلِّموهو: الرَّب مُحتاج ليهُم، و هو بِرَسِّلُم طَوّالي.“ و دا عَشان يَتِم الكَلام القالو النَّبي: ”قولو لِبِت صِهيون: شوفي، المَلِك بِتاعِك بِجي ليك وَديع، و راكِب عَلى حُمارَه. و عَلى دَحَش، جَنى حُمارَه.“ و التَّلاميذ مَشو و عَمَلو زي ما يَسُوع أمَرُم. و جابو الحُمارَه و الدَّحَش، و خَتّو هِدُومُم عَليهُم و يَسُوع قَعَد فوقُم. و الجَّمَع الكَبير فَرَشو هِدُومُم في السِّكَّه، و ناس تانيين قَطَعو فُروع مِن الشَّجَر و فَرَشوها في السِّكَّه. و النّاس المَشو قِدّامو و النّاس المَشو وَراهو كورَكو: ”أُوصَنّا لِإبن دَاوُد! مُبارَك الجّاي بِإسم الرَّب! أُوصَنّا في العالي.“ و لَمّا يَسُوع دَخَل أُورُشَلِيم، كُل المَدينَه إتحَرَّك. و سَألو و قالو: ”دا مِنو؟“ و النّاس رَدّو و قالو: ”دا يَسُوع، النَّبي مِن نَاصِرَه الجَّليل.“ و يَسُوع دَخَل مَحَل الهيكَل و طَرَد كُل النّاس الكانو بِبيعو و بِشتَرو في الهيكَل. و قَلَب طَرَبيزات النّاس الكانو بِبَدِّل القُروش و كَراسي النّاس الكانو بِبيعو الحَمام. و قال ليهُم: ”مَكتوب: بِسَمّو بيتي بيت لِلصَّلاه. لَكِن إنتو عامِلينو بيت لِحَراميَّه.“ و العَميانين و النّاس العُرُج قَرَّبو ليهو في مَحَل الهيكَل، و هو شَفاهُم. و لَكِن لَمّا القُسُس الكُبار و مُعَلِّمين القانون شافو الحاجات العَجيبَه الهو عَمَلا، و شافو الأولاد بِكورِكو في مَحَل الهيكَل: ”أُوصَنّا لِإبن دَاوُد،“ كانو زَعلانين. و قالو ليهو: ”بِتَسمَع الكَلام الأولاد ديل بِقولو؟“ و يَسُوع قال: ”أيوَه. ما قَريتو: مِن خُشوم أولاد و أطفال جَهَّزتَ الحَمد؟“ و خَلّاهُم و مَرَق مِن المَدينَه دي لِبيت عَنيا، و نام هِناك. و في الصَّباح، وَكِت ما كان في السِّكَّه راجِع لِلمَدينَه، كان جَعان. و لَمّا شاف شَجَرَة تين جَمب السِّكَّه، قَرَّب ليها، و لَكِن ما لِقى حاجَه فيها إلّا وَرَق بَس. و قال ليها: ”ما بِكون ثِمار مِنَّك تاني مَرَّه لِلأبَد.“ و طَوّالي الشَّجَرَه يِبسَت. لَمّا التَّلاميذ شافو دا، إستَغرَبو و قالو: ”كيف الشَّجَرَه يِبسَت طَوّالي؟“ يَسُوع رَدَّ و قال ليهُم: ”أقول ليكُم الحَق، إذا عِندَكُم إيمان، و ما تَشِكّو في قُلوبكُم، إنتو ما بِتَعمِلو بَس الأنا عَمَلتو لِلشَّجَرَه، لَكِن إذا بِتقولو لِلجَّبَل دا: أمشي، أرمي نَفسَك في البَحَر، بِكون كِدا. و إذا بِتصَدِّقو، كُل الإنتو بِتَطلُبو ليهو في الصَّلاه، بِتَقبَلوهو.“ و لَمّا دَخَل مَحَل الهيكَل، القُسُس الكُبار و شُيوخ النّاس قَرَّبو ليهو وَكِت ما هو كان بِعَلِّم النّاس. و قالو ليهو: ”بِتَعمِل الحاجات دي بِياتا سُلطَه؟ و مِنو أدّاك السُّلطَه دي؟“ يَسُوع رَدَّ عَليهُم و قال: ”و أنا كَمان بَسألكُم سؤَال واحِد. إذا إنتو بِترُدّو عَلي، أنا كَمان بَكَلِّمكُم بِياتا سُلطَه أعمِل الحاجات دي. مَعموديَّة يُوحَنَّا كانَت مِن وين؟ مِن السَّما؟ ولّا مِن النّاس؟“ و فَكَّرو في نُفوسُم و قالو: ”إذا نَقول، مِن السَّما، هو بِقول: لِشِنو ما صَدَّقتو بيهو؟ و لَكِن إذا نَقول: مِن النّاس، نِحنا خايفين مِن النّاس، عَشان كُلُّهُم بِقولو يُوحَنَّا نَبي.“ عَشان دا، هُم رَدّو عَلى يَسُوع و قالو: ”ما بِنَعرِف.“ و هو كَمان قال ليهُم: ”و لا أنا بَقول ليكُم بِياتا سُلطَه بَعمِل الحاجات دي. تَفتَكِرو شِنو؟ كان في راجِل عِندو وَلَدين. و هو مَشى لِلأوَّل و قال ليهو: يا وَلَدي، أمشي النَّهار دا و إشتَغِل في الجِّنينَه بِتاعَت العِنَب. هو رَدَّ عَليهو و قال: أنا ما بَمشي. لَكِن بَعدين تاب و مَشى. بَعدين أبوهو مَشى لِلتاني و قال نَفس الكَلام. و رَدَّ عَليهو و قال: أنا بَمشي، يا سَيِّد. لَكِن هو ما مَشى. ياتو مِن الإتنين عَمَل إرادَة الأبو؟“ قالو: ”الأوَّل.“ يَسُوع قال ليهُم: ”أقول ليكُم الحَق. النّاس البِلِمّو الضَّريبَه و النِّسوان البَطّالات بِدخُلو مَلَكوت الله قُبّالكُم. عَلَشان يُوحَنَّا جا ليكُم ماشي في سِكَّة البِر، و إنتو ما صَدَّقتو بيهو. لَكِن النّاس البِلِمّو الضَّريبَه و النِّسوان البَطّالات صَدَّقو بيهو. و إنتو، لَمّا شُفتو الحاجات ديل، ما تُبتو و ما صَدَّقتو بيهو. أسمَع مَثَل تاني. كان في سيد بيت، و هو زَرَع جِنينة العِنَب. و خَتَّ زَريبَه حَولا. و حَفَر عَصارَه لِلعِنَب، و بَنى بيت حَرس. و بَعدين أجَّرا لِمُزَارِعين و سافَر. و لَمّا وَكِت الثَّمار قَرَّب، رَسَّل خَدّامينو لِلمُزارعين عَشان ياخُدو ثَمَرو. و المُزارعين مَسَكو خَدّامينو، و ضربو الواحِد دا، و كَتَلو داك، و رَمو حُجار عَلى تاني. و بَعدين، هو رَسَّل ليهُم خَدّامين تانيين، أكتَر مِن الوَكِت الأوَّل. و المُزارعين عَمَلو ليهُم زي ما عَمَلو في الأوَّل. في الآخِر، رَسَّل ليهُم وَلَدو و قال: هُم بِحتَرِمو إبني. و لَكِن لَمّا المُزارعين شافو الإبن، قالو بَعضَهُم لِبَعض: دا هو البِقبَل المال مِن أبوهو. تَعالو، نَكتُلو و ناخُد كُلّو مالو. و أخَدوهو و رَموهو بَرَّه مِن الجِّنينَه و كَتَلوهو. عَلى كِدا، لَمّا صاحِب جِنينة العِنَب بِجي، بيَعمِل شِنو لِلمُزارعين؟“ قالو ليهو: ”هو بِكتُل النّاس البَطّالين ديلاك كَتل بَطّال، و يَأجِّر جِنينة العِنَب لِمُزَارِعين تانيين بِدّوهو الثَّمار بِتاعو في وَكتو.“ يَسُوع قال ليهُم: ”ما قَريتو أبَداً في الكِتاب؟ الحَجَر البَنّايين أبو، هو بِقى راس الرُّكن. الرَّب عَمَل دا، و هو عَجيب قِدّامنا. عَشان دا أقول ليكُم، بياخُد مَلَكوت الله مِنَّكُم و بِدّيهو لِناس تانيين يَجيبو ثَمَرو.“ و الزّول اليَقَع عَلى الحَجَر دا، بِتكَسَّر. و لَكِن لَمّا الحَجَر داك يَقَع عَلى أي زول، بِكَسِّرو حِتَّه حِتَّه. و لَمّا القُسُس الكُبار و الفَرّيسيّين سِمِعو أمثال يَسُوع، عِرِفو هو كان بِتكَلَّم عَنُّم. و لَمّا جَرَّبو يَمسِكوهو، خافو مِن الجُّموع، عَشان النّاس قالو هو نَبي. و يَسُوع كَلَّمُم مَرَّه تانيَه بِأمثال و قال: ”مَلَكوت السَّما زي مَلِك جَهَّز عَزومَة عِرس لِوَلَدو. و رَسَّل خَدّامينو يَنادو المَعزومين لِلعَزومَه. و لَكِن هُم أبو يَجو. و هو رَسَّل خَدّامين تانيين و قال ليهُم: قولو لِلمَعزومين: شوفو، أنا جَهَّزتَ الغَدا. ضَبَحتَ تيراني و البَقَر السَّمين، و كُلّو شي جاهِز. تَعالو لِلعِرس. و لَكِن ما خَلّو بالُم مِن الكَلام، و مَشو، واحِد لِزِراعَتو، و تاني لِشُغلو. و الباقين مَسَكو خَدّامينو و شَتَموهُم و كَتَلوهُم. و المَلِك بِقى زَعلان جِدّاً، و رَسَّل جيشو و كَتَل النّاس ديلاك الكَتَلو خَدّامينو، و حَرَق مَدينَتُم. بَعدين قال لِخَدّامينو: ’عَزومَة العِرس جاهِزَه، و لَكِن المَعزومين ما مُستَحِقّين. عَشان كِدا، أمشو لِلسِّكَك الكَبيرَه، و كُل البِتَلقوهُم هِناك، نادوهُم.‘ و الخَدّامين ديلاك مَرَقو لِلسِّكَك، و لَمّو كُل النّاس اللِقوهُم، البَطّالين و الكوَيسين. و مَحَل العِرس كان مَليان بِالضُّيوف. و لَكِن لَمّا المَلِك دَخَل عَشان يَشوف الضُّيوف، شاف زول هِناك ما كان لابِس هِدوم العِرس. و قال ليهو: ’يا صاحِب، كيف دَخَلتَ هِنا بِدون ما تَلبَس هِدوم العِرس؟‘ و هو سَكَت. بَعدين المَلِك قال لِلخَدّامين: أربُطو إيدينو و كِرعينو، و أرموهو بَرَّه في الضُّلُمَّه. هِناك بِيَبكو و بِعَضّو الأسنان. عَشان هو يَنادي ناس كُتار، لَكِن يَختار ناس قَليلين.“ بَعدين الفَرِّيسِيِّين مَشو و إتكَلَّمو مَعَ بَعض كيف يَمسِكوهو بِكَلامو. و هُم رَسَّلو ليهو تَلاميذُم مَعَ الهيروديسين. و هُم قالو: ”يا مُعَلِّم، نِحنا عارفين إنتَ تَقول الحَق، و تَعَلِّم سِكَّة الله بِالحَق. و إنتَ ما تَغَيِّر كَلامَك عَشان فِكر النّاس، عَلَشانَك ما تَعمِل فارِق بين النّاس. عَشان دا، كَلِّمنا. تَفتَكِر شِنو؟ هو بِالقانون أن نَدفَع الضَّريبَه لِقَيصَر ولّا لا؟“ لَكِن يَسُوع عِرِف فِكرُم البَطّال، و قال: ”يا مُنافِقين، لِشِنو تَجَرِّبوني؟ وَرّوني قِرِش الضَّريبَه.“ جابو ليهو قِرِش. و سألُم و قال: ”صورَة مِنو عَليهو؟ و كِتابَة مِنو؟“ قالو ليهو: ”بِتاعَت قَيصَر.“ بَعدين قال ليهُم: ”أدّو لِقَيصَر حاجات قَيصَر، و أدّو لِلَّه حاجات الله.“ و لَمّا سِمِعو دا، إستَغرَبو. و خَلّوهو و مَرَقو. في نَفس اليوم، الصَدّوقيين قَرَّبو ليهو، هُم البِقولو ما في قيامَه. و سألوهو و قالو: ”يا مُعَلِّم، مُوسَى قال: إذا زول بِموت و ما عِندو أولاد، أخوهو لازِم يِتزَوَّج مَرَتو و يَجيب أولاد لِأخوهو. و كانو في سَبعَه أخوان بينَنا. و الأوَّل إتزَوَّج و مات، و ما كان عِندو أولاد. عَشان كِدا، أخوهو أخَدا. و زي ما حَصَل لِلأخو الأوَّل، كِدا حَصَل لِلتاني و التّالِت، لِغايَة السّابِع. و بَعَد ما كُلَّهُم ماتو، المَرَه ماتَت كَمان. و في القيامَه، هي بِتكون مَرَة مِنو مِن السَّبعَه؟ عَشان كُلَّهُم إتزَوَّجو بيها.“ و يَسُوع رَدَّ عَليهُم و قال: ”إنتو غَلطانين عَشان ما عارفين الكُتُب و لا قُوَّة الله. عَشان في القيامَه، النّاس ما بِزَوِّجو و لا بِتزَوَّجو، لَكِن بِكونو زي مَلائكَه في السَّما. و في خُصوص القيامَه مِن بين المَيِّتين، ما قَريتو الكَلام القالو ليكُم الله؟ أنا إلَه إِبْرَاهِيم، و إلَه إِسْحَاق، و إلَه يَعْقُوب. هو ما إلَه ناس مَيِّتين لَكِن إلَه ناس حَيين.“ و لَمّا النّاس الكُتار سِمِعوهو، إستَغرَبو مِن تَعليمو. و لَكِن لَمّا الفَرّيسيّين سِمِعو إنّو سَكَّت الصَدّوقيين، إتلَمّو سَوا. و واحِد مِنَّهُم، و هو قاضي القانون، سَألو عَشان يَجَرِّبو. و قال ليهو: ”يا مُعَلِّم، ياتو أمر هو الأكبَر في القانون؟“ و قال ليهو: ”حِب الرَّب إلَهَك بِكُلّو قَلبَك، و بِكُلّو نَفسَك، و بِكُلّو فِكرَك. دا الأمر الأكبَر و الأوَّل. و الأمر التّاني زيهو، حِب جارَك زي ما بِتحِب نَفسَك. بِالأوامِر ديل، كُل القانون و الأنبياء بِعَلِّقو.“ و وَكِت ما الفَرِّيسِيِّين إتلَمّو، يَسُوع سألُم و قال: ”تَفتَكِرو شِنو في المَسيح؟ هو إبن مِنو؟“ قالو ليهو: ”هو إبن دَاوُد.“ قال ليهُم: ”عَلى كِدا، كيف دَاوُد بِالرّوح بِسَميهو رَب؟ و يَقول: الرَّب قال لِرَبّي، أقعُد عَلى يَميني، لِغايَة ما أخُت عُدوانَك تِحِت كِرعينَك. إذا دَاوُد يَسَمّيهو رَب، كيف هو يَكون إبنو؟“ و ما في واحِد قِدِر يَرُد عَليهو كِلمَه واحدَه. و مِن اليوم داك ما في واحِد قِدِر يَسألو سؤَال تاني. بَعدين يَسُوع قال لِلجُّموع و لِتَلاميذو، ”مُعَلِّمين القانون و الفَرّيسيّين قاعِدين عَلى كُرسي مُوسَى. عَلَشان دا، لازِم تَعمِلو كُلّو شي الهُم بِقولو ليكُم، و أحفَظوها. و لَكِن ما تَعمِلو زي ما هُم يَعمِلو، عَشان هُم يَقولو و ما يَعمِلو. هُم يَربُطو أحمال تَقيلَه و يَخُتّوها عَلى أكتاف النّاس. لَكِن هُم ما عاوِزين يَحَرِّكُم بِإيدُم. كُلّو شي اليَعمِلوهو، يَعمِلوهو عَشان النّاس يَشوفوهُم. و يَلبَسو عَلامَه عَريضَه في راسُم مَكتوبَه فوقا كِلمات الله. و يَعمِلو طَرَف عَريض عَلى هِدُومُم. و بِحِبّو المَحَل الشَّريف في العَزومَه، و الكَراسي الشَّريفَه في بُيوت الرَّب، و يَحِبّو السَّلامات في الأسواق، و يَحِبّو النّاس يَسَمّوكُم سَيِّد. لَكِن ما تَخَلّو النّاس يَسَمّوكُم سَيِّد، عَلَشان مُعَلِّمكُم واحِد بَس، و كُلَّكُم أخوان. و ما تَسَمّو أي واحِد أبو عَلى الأرض، عَشان أبوكُم واحِد بَس، و هو في السَّما. و كَمان ما تَخَلّو النّاس يَسَمّوكُم رَئيس، فِشان رَئيسكُم واحِد بَس، و هو المَسيح. و الزّول الأكبَر بينكُم هو بِكون خَدّامكُم. الزّول اليَرفَع نَفسو، بِخُتّوهو تِحِت. و اليَخُت نَفسو تِحِت، بِكون مَرفوع. و لَكِن حُزن ليكُم، يا مُعَلِّمين القانون و الفَرّيسيّين، يا مُنافِقين! عَلَشان إنتو بِتَقفِلو مَلَكوت السَّما قِدّام النّاس. عَشان إنتو نُفوسكُم ما تَدخُلو، و لا تَخَلّو النّاس الدّاخِلين يدخُلو. حُزن ليكُم، يا مُعَلِّمين القانون و الفَرّيسيّين، المُنافِقين، عَشان إنتو تاكلو بُيوت النِّسوان الرُّجالُم ماتو، و تَصَلّو صَلاه طَويلَه بِالغِش. عَلَشان كِدا، بِتَقبَلو حُكم أكبَر. حُزن ليكُم، يا مُعَلِّمين القانون و الفَرّيسيّين، المُنافِقين! عَشان تَقطَعو البَحَر و الأرض عَشان تَرَجِّعو زول واحِد لِلَّه. و لَمّا يَرجَع، تَعمِلوهو وَلَد لِجَهَنَّم أكتَر مِنَّكُم مَرَّتين. حُزن ليكُم، يا ناس العَميانين البِقودو النّاس. إنتو بِتقولو: إذا كان واحِد يَحلِف بِالمَحَل القُدّوس، دا ما حاجَه. و لَكِن إذا يَحلِف بِدَهَب المَحَل القُدّوس، لازِم يَعمِل زي ما حَلَفو. يا غُشام و العَميانين، ياتو أكبَر؟ الدَّهَب، ولّا المَحَل القُدّوس اليَعمِل الدَّهَب مُقَدَّس؟ و بِتقولو: اليَحلِف بِمَحَل الضَّبيحَه، دا ما حاجَه. لَكِن اليَحلِف بِالهَدِيَّه الفوق مَحَل الضَّبيحَه، لازِم يَعمِل زي ما حَلَفو. يا عَميانين! ياتو أكبَر؟ الهَدِيَّه، ولّا مَحَل الضَّبيحَه اليَقَدِّس الهَدِيَّه؟ عَلى كِدا، اليَحلِف بِمَحَل الضَّبيحَه يَحلِف بيهو و بِكُلّو شي عَليهو. و اليَحلِف بِالمَحَل القُدّوس، يَحلِف بيهو و بِالسّاكِن فيهو. و اليَحلِف بِالسَّما، يَحلِف بِكُرسي الله و بِالقاعِد عَليهو. حُزن ليكُم، يا مُعَلِّمين القانون و الفَرّيسيّين، المُنافِقين! عَشان إنتو تَدّو الواحِد في عَشَرَه مِن بُهاراتكُم، النَّعناع و الشِّبِت و الكَمّون، و لَكِن تَخَلّو الحاجات الأهَمّا مِن ديل في القانون، يَعني العَدل و الرَّحمَه و الإيمان. لازِم تَعمِلو دي، و ما تَخَلّو ديك. يا ناس العَميانين البِقودو النّاس! إنتو بِتغَربَلو البَعوضَه و بِتَبلَعو الجَّمَل! حُزن ليكُم، يا مُعَلِّمين القانون و الفَرّيسيّين، المُنافِقين! إنتو بِتنَضِّفو الفِنجان و الصَّحَن مِن بَرَّه، و لَكِن مِن جُوَّه هُم مَليانين طَمَع و مَحَبَّة النَّفس. يا فرِّيسي العَميان، نَضِّف الفِنجان و الصَّحَن مِن جُوَّه في الأوَّل، عَشان بَعدين هُم بِكونو نُضاف مِن بَرَّه كَمان. حُزن ليكُم، يا مُعَلِّمين القانون و الفَرّيسيّين، المُنافِقين! عَشان إنتو زي قُبور مُبِيَّضين. تَبَيِّن جَمِيلَه مِن بَرَّه، لَكِن هي مِن جُوَّه مَليانَه عِضام النّاس الماتو و كُلّو وَساخَه. زي دا، إنتو كَمان مِن بَرَّه بِتبَيِّنو زي البارين لِلنّاس، و لَكِنَّكُم مِن جُوَّه مَليانين مِن نِفاق، و عَمَل بَطّال. حُزن ليكُم، يا مُعَلِّمين القانون، المُنافِقين! عَشان إنتو تَبنو قُبور الأنبياء و تَزَيِّنو المَحَلّات اليَدفِنو فيهو البارين. و تَقولو: إذا نِحنا كُنّا عِشنا في أيام أبَهاتنا، نِحنا ما كُنّا شارَكنا مَعاهُم في الدَّم الجَّرى مِن الأنبياء. كِدا، إنتو تَشهَدو عَلى نُفوسكُم إنَّكُم أولاد النّاس الكَتَلو الأنبياء. كِدا، أملو إنتو قِياس ذَنب أبَهاتكُم. يا دَبايب، يا أولاد الحَيّات، كيف بِتَهرَبو مِن حُكم جَهَنَّم؟ عَلَشان دا، أرَسِّل ليكُم أنبياء و ناس فاهمين و مُعَلِّمين القانون. و بَعَد مِنَّهُم إنتو بِتَكتُلوهُم و بِتَصلُبوهُم، و بَعَد مِنَّهُم بِتَجلِدوهُم في بِيوت الرَّب و بِتَطرُدوهُم مِن بَلَد لِبَلَد. و كِدا، كُلّو دَم البارين الجَّرى عَلى الأرض بِجي عَليكُم، مِن دَم هابيل البار لِدَم زَكَرِيَّا إبن بَرَخِيّا الإنتو كَتَلتوهو بين المَحَل القُدّوس و مَحَل الضَّبيحَه. أقول ليكُم الحَق، كُلّو دا بِجي عَلى ناس الزَّمَن دا. يا أُورُشَلِيم، يا أُورُشَلِيم، البِتَكتُل الأنبياء و البِتَرمي حِجارَه فوق النّاس المُرَسَّلين ليكُم. كَم مَرَّه كُنتَ عاوِز ألِم أولادِك، زي ما الجِّدادَه تَلِم الجَّنى بِتِاعا تِحِت جِنحيها. و لَكِن إنتو أبيتو. شوفو! بيتكُم بِكون خَربان. أقول ليكُم، إنتو ما بِتشوفوني تاني لِغايَة ما تَقولو: مُبارَك هو البِجي بِإسم الرَّب.“ و يَسُوع مَرَق و كان ماشي مِن الهيكَل. و تَلاميذو قَرَّبو ليهو عَشان يَوَرّوهو بُنا الهيكَل. و رَدَّ عَليهُم و قال: ”بِتشوفو كُلّو ديل مُش كِدا؟ أقول ليكُم الحَق، ما بِخَلّو هِنا حَجَر عَلى حَجَر الما بِرموهو.“ و وَكِت كان قاعِد عَلى جَبَل الزّيتون، تَلاميذو قَرَّبو ليهو بَراهُم و قالو: ”كَلِّمنا، الحاجَه دي بِتكون مِتين؟ و شِنو العَلامَه التَّوَرّينا إنتَ بِتَجي و الزَّمَن دا بِخلَص؟“ و يَسُوع رَدَّ و قال ليهُم: ”خَلّو بالكُم عَشان واحِد ما بِغِشّكُم. عَشان ناس كُتار بِجو بِإسمي و يَقولو: أنا هو المَسيح، و يَغِشّو ناس كُتار. بِتَسمَعو بِحُروب و خَبَر حُروب. شوفو عَشان ما تَكونو خايفين. لازِم الحاجات دي تَحصَل. و لَكِن آخِر الدُّنيا لِسَّع ما جا. عَشان بَلَد تَقوم عَلى بَلَد، و مَملَكَه عَلى مَملَكَه. و بِكونو في جوع و زَلازِل في بَعَض المَحَلّات. و لَكِن كُلّو دا بِدايَة الأوجاع. بَعدين هُم بِسَلِّموكُم لِلضّيق و بِكتُلوكُم. و كُلّو ناس الدُّنيا بِيَكرَهوكُم عَشان إسمي. في الوَكِت دا، ناس كُتار بِخَلّو سِكَّة الرَّب، و بِسَلِّمو بَعضَهُم بَعض لِلعَدو، و بِكرَهو التّانيين. و أنبياء كَضّابين كَتيرين بِقومو و يَغِشّو كَتيرين. و عَشان الشَّر بِزيد، مَحَبَّة الكَتيرين بِتكون باردَه. و لَكِن هو البِتحَمَّل لِغايَة آخِر الدُّنيا، هو بِخلَص. و بِبَشِّرو بِبِشارات المَلَكوت دي في الدُّنيا كُلَّها، عَشان شَهادَه لِكُلّو ناس الدُّنيا. و بَعدين آخِر الدُّنيا بِجي. عَلى كِدا، بِتشوفو الحاجَه المَكروهَه التَّخرَب، واقفَه في المَحَل المُقَدَّس. النَّبي دانيال إتكَلَّم عَنّو. (خَلّي الزّول اليَقرا الكَلام دا يَفهَم!) في الوَكِت دا خَلّوهُم الفي يَهُودِيَّه يَهرُبو لِلجِّبال. و الزّول البِكون بَرَّه مِن البيت، ما يَدخُل عَشان يَشيل أي حاجَه مِن بيتو. و الفي الزِّراعَه، ما يَرجَع لِوَرا عَشان ياخُد هِدومو. و حُزن لِلحَملانين و اليَرَضِّعو أطفالُم في الأيام ديك. و صَلّو عَشان هُروبكُم ما بِكون في الخَريف، و لا في السَّبِت. عَشان الضّيق بِكون شَديد خالِص. ما كان في ضيق زي دا مِن وَكِت الله خَلَق الدُّنيا لِغايَة هَسَّع. و ما بِكون في تاني مَرَّه أبَداً. إذا هو ما قَصَّر الأيام ديك ما في واحِد يَكون مُخَلَّص. و لَكِن عَشان المُختارين، الأيام ديك بِتكون قِصَيرَه. في الوَكِت داك، إذا أي واحِد بِقول ليكُم: شوفو! أهو دا المَسيح! ولّا، هو هِناك! ما تَصَدِّقوهو. عَشان مُسَحَه كَضّابين و أنبياء كَضّابين بِقومو و يَعمِلو عَلامات عَظيمَه و عَجايِب، فِشان يَغِشّو حَتّى النّاس المُختارين، إذا دا كان مُمكِن. شوفو! قُلتَ ليكُم قُبّال ما حَصَل. عَشان دا، إذا هُم بِقولو ليكُم: هو في الخَلا، ما تَمرُقو. ولّا: أهو دا، في جُوَّه البيت دا، ما تَصَدِّقو. عَشان زي ما البَرق يَجي مِن الشَّرق و يَلمَع لِلغَرب، إبن الإنسان بِجي زي دا كَمان. في المَحَل الفيهو جِسم مَيِّت، الصُّقور بِلِمّو. طَوّالي بَعَد ضيق الأيام ديك، الشَّمِش بِتكون ضُلُمَّه، و القَمَر ما بِدّي نورو. النِّجوم بِقَعو مِن السَّما، و قُوّات السَّما بِتهِزّو. و في الوَكِت داك، عَلامَة إبن الإنسان بِتَظهَر في السَّما، و كُلّو قَبايل الدُّنيا بِبكو. و بِشوفو إبن الإنسان جاي عَلى سَحاب السَّما، بِقُوَّه و مَجد عَظيم. و هو بِرَسِّل مَلائكَتو بِبوق عِندو صوت عالي. و هُم بِلِمّو مُختارينو مِن الأربَعَه أركان، مِن الشَّرق لِلغَرب. إتعَلَّمو المَثَل مِن شَجَرَة التّين. لَمّا فُروعا تَبتَدي تَكون خَضرَه و وَرَقا تَطلَع، إنتو عارفين الخَريف قَريب. زي دا إنتو كَمان، لَمّا تَشوفو دا كُلّو، بِتَعرِفو هو قَريب، عَلى الباب. أقول ليكُم الحَق، الزَّمَن دا ما بِفوت لِغايَة ما تَكون كُلّو دي. السَّما و الأرض بِفوتو، و لَكِن كَلامي ما بِفوت أبَداً. و لَكِن اليوم داك و السّاعَه ديك ما في واحِد يَعرِفو. و لا مَلائِكَة السَّما، و لا الإبن، لَكِن الأبو بَس. و زي ما كانَت في أيام نُوح، بِكون كِدا في الأيام لَمّا إبن الإنسان بِجي. عَشان في الأيام قُبّال المويَه غَطَّت الدُّنيا، كانو ياكلو و يَشرَبو، يِتزَوَّجو و يَزَوِّجو، لِغايَة اليوم الفيهو نُوح دَخَل المُركَب. و ما عِرفو حاجَه لِغايَة المويَه غَطَّت الدُّنيا و أخَد كُلُّهُم. بِكون زي دا لَمّا إبن الإنسان بِجي. في الوَكِت دا، راجلين بِكونو في الزِّراعَه. بياخُدو الواحِد و بِخَلّو التّاني. مَرَتين يَطحَنو عَلى المُرحاكَه. بياخُدو الواحدَه و بِخَلّو التّانيَه. عَلَشان كِدا، خَلّو بالكُم، عَشان إنتو ما عارفين اليوم الرَّب بِتاعكُم بِجي. لَكِن أعرِفو دا. إذا سيد البيت كان عِرِف السّاعَه الحَرامي كان بِجي فيها، هو كان خَلّى بالو و ما خَلّاهو يَدخُل بيتو بِالقُوَّه. عَلَشان كِدا، كونو إنتو كَمان جاهِزين. عَشان إبن الإنسان بِجي في ساعَه إنتو ما تَفتَكِرو. كِدا، مِنو هو الخَدّام الأمين الشّاطِر، إذا سيدو عَمَلو وَكيل عَلى خَدّامينو عَشان بِدّيهُم الأكِل بِتاعُم في الوَكِت المَظبوط؟ مُبارَك الخَدّام داك، إذا سيدو بِلقاهو يَعمِل كِدا لَمّا بِجي. أقول ليكُم الحَق، هو بيَعمِلو وَكيل عَلى كُلّو مالو. و لَكِن إذا الخَدّام داك بَطّال، هو يَقول في قَلبو: سيدي يِتأخَّر. و يَبتَدي يَضرُب الخَدّامين البِشتَغِلو مَعاهو، و ياكُل و يَشرَب مَعَ السَّكرانين. و سيد البيت بِجي في يوم هو ما يَنتَظِرو، و في ساعَه هو ما يَعرِفا. و هو يَجلِدو شَديد، و يَخُتّو مَعَ المُنافِقين. هِناك بِكون البِكى و عَض السِّنون. في الوَكِت دا، مَلَكوت السَّما بِكون زي عَشَرَه بَنات اَخَدو لَمباتُم، و مَشو يَقابِلو العَريس. خَمسَه مِنَّهُم بَليدات، و خَمسَه مِنَّهُم شاطرات. كِدا، لَمّا البَليدات اَخَدو لَمباتُم، ما اَخَدو زيت مَعاهُم. و لَكِن الشّاطرات اَخَدو زيت في عِلبَه مَعَ لَمباتُم. و العَريس إتأخَّر، و كُلَّهُم بِقو تَعبانات و نامو. و في نُص اللّيل، كان في كوراك: أهو دا العَريس! تَعالو قابِلوهو. بَعدين كُل البَنات قامو و جَهَّزو لَمباتُم. البَليدات قالو لِلشّاطرات: أدّو لينا مِن جازكُم، عَشان لَمباتنا بِموتو. و لَكِن الشّاطرات قالو ليهُم: لا، يِمكِن ما بِكون كِفايَه لينا و ليكُم كَمان. و لَكِن أمشو لِلتُّجّار، و إشتَرو لِنُفوسكُم. و وَكِت ما مَشو يَشتَرو، العَريس وِصِل. و البَنات الجّاهِزات، دَخَلو مَعاهو لِلعِرِس. و الباب كان مَقفول. بَعدين التّانيات جو كَمان، و قالو: يا سَيِّد، يا سَيِّد، أفتَح لينا! و لَكِن هو رَدَّ عَليهُم و قال: أقول ليكُم الحَق، أنا ما عارِفكُم. عَشان دا، خَلّو بالكُم، عَشان إنتو ما عارفين اليوم ولّا السّاعَه. عَشان بِكون زي راجِل مَسافِر. و نادى خَدّامينو و سَلّم ليهُم أموالو. و أدّا لِواحِد خُمسُمِيَّة جِنيه، و لِتاني ميتين جِنيه، و لِتاني مِيَّة جِنيه، زي ما كُلّو واحِد عِندو قُدرَه. بَعدين هو سافَر. و هو القِبِل الخُمسُمِيَّة جِنيه مَشى طَوّالي و إشتَرى و تاجَر بيهو، و زادو بِخُمسُمِيَّة جِنيه تاني. و كِدا، الأخَد الميتين جِنيه زادو بِميتين تاني. و لَكِن الأخَد المِيَّة جِنيه، مَشى و حَفَر في الأرض و دَسَّ فِضَّة سيدو. و بَعَد وَكِت طَويل، سيد الخَدّامين ديلاك رَجَع و عَمَل الحِساب مَعاهُم. و الأخَد الخُمسُمِيَّة جِنيه قَرَّب ليهو و جاب خُمسُميَّه تانيَه و قال: يا سَيِّد، سَلَّمتَ لَي خُمسُمِيَّة جِنيه. و أهي دي خُمسُميَّه تانيَه الأنا زِدتا فوقا. و سيدو قال ليهو: عَمَلتَ كوَيس، يا الخَدّام الطَّيب الأمين. كُنتَ أمين في القَليل. كِدا بَعمِلَك مَسؤول عَلى الكَتير. أدخُل لِفَرَح سيدَك. بَعدين الأخَد المِيَّتين جِنيه قَرَّب ليهو و قال: يا سَيِّد، سَلَّمتَ لَي ميتين جِنيه. أهي دي ميتين تانيَه الأنا زِدتَ فوقا. و سيدو قال ليهو: عَمَلتَ كوَيس، يا الخَدّام الطَّيب الأمين. كُنتَ أمين في القَليل. كِدا بَعمِلَك مَسؤول عَلى الكَتير. أدخُل لِفَرَح سيدَك. بَعدين القِبِل المِيَّة جِنيه قَرَّب ليهو كَمان و قال: يا سَيِّد، عِرِفتَ إنتَ راجِل شَديد، و تَقطَع في المَحَل الأنتَ ما زَرَعتَ فيهو، و تَلِم في المَحَل الأنتَ ما رَميت فيهو التّيراب. كِدا، أنا كُنتَ خايِف، و مَشيت و دَسيت المِيَّة جِنيه في الأرض. شوف، أهو دا حَقَّك. و سيدو رَدَّ عَليهو و قال: يا الخَدّام الشَّرّير الكَسلان! عِرِفتَ أنا بَقطَع في المَحَل الأنا ما زَرَعتَ فيهو، و بَلِم في المَحَل الأنا ما رَميت فيهو التّيراب؟ عَشان دا، كان لازِم إنتَ تَسَلِّم فِضَّتي لِلبَنك، عَشان لَمّا أنا جيت، كُنتَ قِبِلتَها مَعَ رِبِح. أُخدو مِنّو المِيَّة جِنيه، و أدّيهو لِلعِندو الألف جِنيه. عَشان لِكُلّو واحِد العِندو يَدُّوهو، و بِكون ليهو كَتير. و لَكِن الما عِندو بياخُدو مِنّو العِندو. و لَكِن الخَدّام البَطّال، أرموهو لِلضُّلُمَّه الفي بَرَّه. هِناك بِكون البِكى و عَض السِّنون. لَمّا إبن الإنسان بِجي في مَجدو، و كُل المَلائكَه مَعاهو، في الوَكِت داك بِيَقعُد عَلى كُرسي مَجدو. و كُلّو ناس الدُّنيا بِتلِمّو قِدّامو. و هو بِفَرِّقُم واحِد مِن التّاني، زي ما الرّاعي يَفَرِّق الخِرفان مِن الغَنَم. و بِخُت الخِرفان عَن يَمينو، و الغَنَم عَن الشِّمال. بَعدين المَلِك بِقول لِلنّاس الفي يَمينو: تَعالو، يا مُبارَكين مِن أبوي. أُخُد المَلَكوت المَجَهَّز ليكُم مِن بِدايَة الدُّنيا. عَشان أنا كُنتَ جَعان، و إنتو أدّيتوني أكل. كُنتَ عَطشان، و أدّيتوني شَراب. كُنتَ غَريب، و عَزَمتوني لِبِيوتكُم. ما كان عِندي هِدوم، و إنتو لَبَّستوني. كُنتَ عَيّان، و إنتو زُرتوني. كُنتَ في السِّجِن، و إنتو جيتو لَي. بَعدين البارين بِقولو ليهو: يا رَب، مِتين شُفناك جَعان و أدّيناك أكل؟ ولّا مِتين كُنتَ عَطشان و أدّيناك شَراب؟ و مِتين شُفناك غَريب، و عَزَمناك؟ و مِتين شُفناك بِدون هِدوم و أدّيناك هِدوم؟ و مِتين شُفناك عَيّان ولّا في السِّجِن و جينا ليك؟ و المَلِك بِرُد و بِقول ليهُم: أقول ليكُم الحَق، زي ما إنتو عَمَلتوهو لِواحِد مِن أخواني ديل الأصغَر، عَمَلتوهو لَي. بَعدين هو بِقول لِلنّاس في شِمالو: أمشو مِنّي، يا مَلعونين، لِلنّار الأبَديَّه المَجَهَّزَه لِإبْلِيس و مَلائكَتو. عَشانّي كُنتَ جَعان، و إنتو ما أدّيتوني أكل. كُنتَ عَطشان، و ما أدّيتوني شَراب. كُنتَ غَريب، و إنتو ما عَزَمتوني. كُنتَ عَريان، و ما لَبَّستوني. كُنتَ عَيّان و في السِّجِن و ما جيتو تَزوروني. و بَعدين هُم كَمان بِرُدّو و بِقولو ليهو: يا رَب، مِتين شُفناك جَعان ولّا عَطشان؟ ولّا مِتين كُنتَ غَريب، ولّا عَريان، ولّا عَيّان، ولّا في السِّجِن و ما ساعَدناك؟ و بَعدين هو بِقول ليهُم: أقول ليكُم الحَق، زي ما إنتو ما عَمَلتوهو لِواحِد مِن الأصغَر ديل، ما عَمَلتوهو لَي. بَعدين ديل بِمشو لِلجِّزا الأبَديَّه، و لَكِن البارين بِمشو لِلحَياة الأبَديَّه.“ بَعَد ما يَسُوع كَمَّل كُل الكَلام دا، قال لِتَلاميذو، ”إنتو عارفين عيد الفِصَح يَكون بَعَد يومين، و بِسَلِّمو إبن الإنسان عَشان يَصلُبوهو.“ بَعدين القُسُس الكُبار و شُيوخ النّاس إتلَمّو في بيت رَئيس القُسُس اليَسَمّوهو قَيَافا. و إتكَلَّمو مَعَ بَعض عَشان يَقبُض عَلى يَسُوع بِالسِّر و يَكتُلوهو. و لَكِن قالو: ”مُش في وَكِت العيد، عَشان يِمكِن تَكون في فِتنَه بين النّاس.“ و لَمّا يَسُوع كان في بيت عَنيا في بيت سِمْعَان العِندو الجِّزام، مَرَه قَرَّبَت ليهو عِندَها قِزازَه مِن رُخام، فيها ريحَه غاليَه جِدّاً. و كَبَّتا عَلى رَاسو وَكِت ما كان قاعِد في الطَّرَبيزَه. و لَكِن لَمّا التَّلاميذ شافو دا، بِقو زَعلانين و قالو: ”لِشِنو هي تَوَدِّر الرّيحَه دي؟ عَشان كان مُمكِن يَبيعو الرِّيحَه دي بِقُروش كَتير و يَدُّوها لِلمَساكين.“ و لَكِن يَسُوع عِرِف، و قال ليهُم: ”لِشِنو تَتَعِّبو المَرَه؟ عَشان هي عَمَلَت لَي عَمَل جَميل. عَشان المَساكين مَعاكُم في كُلّو وَكِت، و لَكِن أنا ما بَكون مَعاكُم في كُلّو وَكِت. لَمّا هي كَبَّت الرّيحَه دي عَلى جِسمي، عَمَلتا عَشان تَجَهِّزني عَشان يَدفِنوني. أقول ليكُم الحَق، في كُلّو مَحَل اليَبَشِّرو بِالإنجيل دا في الدُّنيا كُلّو، بِخَبِّرو كَمان بِالهي عَمَلَت عَشان يِتذَكَّروها.“ بَعدين، واحِد مِن الإتناشَر، اليَسَمّوهو يَهُوذَا إِسْخَرْيُوطِي، مَشى لِلقُسُس الكُبار، و قال ليهُم: ”إنتو رَضيانين تَدّوني شِنو، و أنا بَسَلِّمو ليكُم؟“ و هُم حَسبو ليهو تَلاتين حِتَّت فِضَّه. و مِن الوَكِت داك، هو كان بِفَتِّش عَلى فُرصَه عَشان يَسَلِّمو. و في اليوم الأوَّل مِن عيد الفَطير، التَّلاميذ قَرَّبو لِيَسُوع و قالو: ”وين إنتَ عاوِزنا نَجَهِّز ليك عَشان إنتَ بِتاكُل فيهو الفِصَح؟“ و قال ليهُم: ”أمشو لِلمَدينَه لِفُلان، و قولو ليهو، المُعَلِّم يَقول: وَكتي قَريب. بَسَوّي عيد الفِصَح مَعَ تَلاميذي في بيتَك.“ و التَّلاميذ عَمَلو زي ما يَسُوع أمَرُم، و جَهَّز الفِصَح. و في المِسا، يَسُوع كان قاعِد في الطَّرَبيزَه مَعَ الإتناشَر تَلميذ. و وَكِت ما كانو ياكلو، هو قال: ”أقول ليكُم الحَق. واحِد مِنَّكُم بِسَلِّمني.“ و هُم بِقو حَزنانين جِدّاً. و كُلّو واحِد إبتَدا يَقول ليهو: ”ما أنا، مُش كِدا، يا رَب؟“ و رَدَّ و قال ليهُم: ”الزّول الدَّخَل إيدو في الصَّحَن مَعاي، هو بِسَلِّمني. صَحيح، إبن الإنسان ماشي زي ما مَكتوب عَنّو. لَكِن حُزن لِلزّول داك اليَسَلِّم إبن الإنسان. كان أحسَن لِلزّول داك إذا ما كان مَولود.“ يَهُوذَا السَّلَّمو قال ليهو: ”ما أنا، مُش كِدا، يا رَب؟“ قال ليهو: ”إنتَ قُلتَ.“ و وَكِت ما كانو ياكلو، يَسُوع أخَد عيش و بارَك و كَسَّرو و أدّاهو لِلتَّلاميذ و قال: ”أُخدو، أُكلو، دا هو جِسمي.“ و أخَد كُبّايَه. و بَعَد ما شَكَر الله، أدّاها ليهُم و قال: ”أشرَبو مِنَّها كُلَّكُم. عَشان دا هو دَمّي لِلإتِّفاق الجَّديد، اليِتدَفَّق لِناس كَتيرين عَشان يَغفِر الخَطايا. و أقول ليكُم، مِن هَسَّع أنا ما بَشرَب تاني مِن مويَة العِنَب دي، لِغايَة اليوم داك الأنا بَشرَبا مَعاكُم جَديد في مَلَكوت أبوي.“ و بَعَد ما رَتَّلو تَرتيلَه، مَرَقو لِجَبَل الزّيتون. بَعدين يَسُوع قال ليهُم: ”كُلُّكُم بِتَقَعو اللّيلَه دي عَشانّي. عَشان مَكتوب: أنا بَضرُب الرّاعي، و خِرفان المُراح يِتشَتَّتو. و لَكِن بَعَد ما بَقوم، بَمشي قِدّامكُم لِلجَّليل.“ و بُطْرُس رَدَّ و قال ليهو: ”إذا كُلَّهُم يَقَعو عَشانَك، أنا ما بَقَع أبَداً.“ يَسُوع قال ليهو: ”أقول ليك الحَق، في اللّيلَه دي، قَبل ما الدّيك يَكورِك، إنتَ بِتَنكِرني تلاتَه مَرّات.“ و بُطْرُس قال ليهو: ”إذا أنا لازِم أموت مَعاك، أنا ما بَنكِرَك.“ و كُل التَّلاميذ قالو كِدا كَمان. بَعدين، يَسُوع جا مَعاهُم لِمَحَل يَسَمّوهو جَثْسَيْمَانِي. و قال لِلتَّلاميذ: ”أقعُدو هِنا و أنا بَمشي هِناك و بَصَلّي.“ و أخَد مَعاهو بُطْرُس و وَلَدين زَبَدي، و إبتَدا يَكون حَزين و يَفَكِّر كَتير. بَعدين قال ليهو: ”نَفسي حَزينَه جِدّاً حَتّى الموت. إستَنّو هِنا و أحرِسو مَعاي.“ و بَعدين مَشى قِدّام شوَيَه، و وَقَع عَلى وَشّو و صَلّى و قال: ”يا أبوي، إذا مُمكِن، خَلّي الشّي التَّقيل دا البِجي لَي يَفوت مِنّي. و لَكِن ما زي ما أنا عاوِز، لَكِن زي ما إنتَ عاوِز.“ و جا لِلتَّلاميذ و لِقاهُم نايمين. و قال لِبُطْرُس: ”كِدا، ما كُنتو تَقدَرو تَحرَسو مَعاي ساعَه واحدَه؟ أحرِسو و صَلّو، عَشان ما تَدخُلو في تَجرِبَه. بِالحَق الرّوح رَضيان، لَكِن الجِّسم ضَعيف.“ و مَشى مَرَّه تانيَه و صَلّى و قال: ”يا أبوي، إذا ما في طَرِيقَه تانيَه، إلّا أقبَل الشّي التَّقيل دا، أنا رَضيان بِالإنتَ عاوِز تَجيب عَلي.“ و جا تاني و لِقاهُم نايمين، عَشان عُيونُم كانَت تَقيلَه. و خَلّاهُم مَرَّه تانيَه، و مَشى و صَلّى تالِت مَرَّه و قال نَفس الكَلام. بَعدين جا لِلتَّلاميذ و قال ليهُم: ”إنتو لِسَّع نايمين و تِستَريحو؟ شوفو، السّاعَه قَريبَه الفيها يَسَلِّمو إبن الإنسان لِإيدين الخاطيين. قُومو، نَمشي. شوفو، هو اليِسِلِّمني قَرَّب.“ و وَكِت ما هو لِسَّع يتكَلَّم، يَهُوذَا، واحِد مِن الإتناشَر، وِصِل. و جَماعَه كَتيرَه كانو مَعاهو شايلين سُيوف و عَصايات، مُرَسَّلين مِن القُسُس الكُبار و شُيوخ النّاس. و هو السَّلّم يَسُوع كان أدّاهُم عَلامَه، و قال: ”الأنا بَسَلِّم عَليهو سَلام شَديد، دا هو. أمسِكوهو.“ و هو طَوّالي قَرَّب لِيَسُوع، و قال: ”السَّلام، يا سَيِّدي.“ و سَلّم عَليهو سَلام شَديد. و يَسُوع قال ليهو: ”يا صَحبي، إنتَ جيت هِنا لِشِنو؟“ بَعدين هُم قَرَّبو ليهو و خَتّو إيدينُم عَلى يَسُوع و مَسَكوهو. و شوف، واحِد مِن ديل الكانو مَعَ يَسُوع مَدَّ إيدو، و سَلّى سيفو، و ضَرَب عَبد رَئيس القُسُس، و قَطَع أضانو. بَعدين يَسُوع قال ليهو: ”رَجِّع سيفَك في مَحَلّو. عَشان كُل البياخُدو السّيف بِموتو بِالسّيف. تَفتَكِر أنا ما بَقدَر أطلُب مِن أبوي، و هو طَوّالي بِرَسِّل لَي أكتَر مِن إتناشَر فِرقَه مِن المَلائكَه؟ لَكِن كيف بِتِم المَكتوب في الكُتُب البِقولو إنّو لازِم بِكون كِدا؟“ في السّاعَه ديك، يَسُوع قال لِلجُّموع: ”جيتو بِسُيوف و عَصايات عَشان تَقبُضو عَلي زي ما أنا حَرامي؟ كُلّو يوم كُنتَ قاعِد في الهيكَل بَعِلِّم النّاس، و إنتو ما مَسَكتوني. و لَكِن كُلّو دا حَصَل عَشان بِتَكمَل كُتُب الأنبياء.“ بَعدين كُل التَّلاميذ خَلّوهو و هَرَبو. بَعدين هُم القَبَضو عَلى يَسُوع قادوهو لِقَيَافَا رَئيس القُسُس، في المَحَل الإتلَمّو فيهو مُعَلِّمين القانون و الشُّيوخ. و لَكِن بُطْرُس تِبعو مِن بَعيد، لِغايَة حوش رَئيس القُسُس. و دَخَل جُوَّه و قَعَد بين الحُرّاس عَشان يَشوف الآخِر. و القُسُس الكُبار و المَجِلس كُلّو، كانو يَطلُبو شَهادَه كَضّابَه عَلى يَسُوع عَشان يَكتُلوهو. لَكِن ما لِقوها، مَعَ إنّو شاهِدين كَضّابين كَتيرين قَرَّبو ليهو. لَكِن في الآخِر، إتنين قَرَّبو ليهو و قالو: ”الزّول دا قال: أنا بَقدَر أخرَب هيكَل الله، و أبنيهو في تَلاتَة أيام.“ و رَئيس القُسُس قام و قال: ”ما تَرُد عَليهُم حاجَه؟ شِنو دا النّاس ديل يَشهَدو عَليك؟“ و لَكِن يَسُوع سَكَت. و رَئيس القُسُس قال ليهو: ”آمُرَك أن تَحلِف بِالله الحَي، قول لينا إذا إنتَ المَسيح، إبن الله.“ يَسُوع قال ليهو: ”إنتَ قُلتَ. و كَمان، أقول ليكُم، بَعدين بِتشوفو إبن الإنسان قاعِد عَن يَمين القُدرَه، و جاي عَلى سَحاب السَّما.“ بَعدين رَئيس القُسُس شَرَّط هِدومو و قال: ”هو قال كَلام بَطّال عَلى الرَّب. نِحنا عاوِزين شُهود تانيين لِشِنو؟ شوفو! إنتو سِمِعتو كَلامو البَطّال عَلى الرَّب. فِكرَكُم شِنو؟“ هُم رَدّو و قالو ليهو: ”هو يِستَحِق الموت.“ بَعدين بَزَقو في وَشّو و ضَرَبوهو شَديد. و بَعض مِنَّهُم دَقّوهو بِإيدُم، و قالو: ”إتنَبّأ، يا المَسيح، مِنو دا الضَّرَبَك؟“ و بُطْرُس كان قاعِد بَرَّه في الحوش. و خَدّامَه قَرَّبَت ليهو وَقالَت: ”إنتَ كَمان كُنتَ مَعَ يَسُوع الجَّليلي.“ و لَكِن هو نَكَر قِدّام كُلَّهُم و قال: ”ما بَعرِف الإنتي تَقولي.“ و لَمّا مَشى بَرَّه قَريب مِن الباب، خَدّامَه تانيَه شافَتو، و قالَت لِلكانو هِناك: ”الزّول دا كان مَعَ يَسُوع النّاصِري.“ و كَمان نَكَر بِحَلَف: ”أنا ما عارِف الرّاجِل!“ و بَعَد شوَيَه الواقفين هِناك قَرَّبو و قالو لِبُطْرُس: ”بِالحَق، إنتَ كَمان واحِد مِنَّهُم، عَشان كَلامَك يَوَرّيهو.“ بَعدين بِقى يَلعَن و يَحلِف: ”أنا ما عارِف الرّاجِل!“ و طَوّالي الدّيك كورَك. و بُطْرُس إتزَكَّر الكَلام القالو ليهو يَسُوع: ”قُبّال الدّيك يَكورِك، بِتَنكِرني تلاتَه مَرّات.“ و مَرَق بَرَّه و بَكى بِكى مُر. و في الصَّباح، كُل القُسُس الكُبار و شُيوخ النّاس إتكَلَّمو مَعَ بَعض ضِد يَسُوع عَشان يَكتُلوهو. و رَبَطوهو و ساقوهو و سَلَّموهو لِبِيلاطُس المُدير. و لَمّا يَهُوذَا، هو السَّلَّمو، شاف إنَّهُم حَكَمو عَليهو، إتأسَّف، و رَجَّع التَّلاتين حِتَّه مِن الفِضَّه لِلقُسُس الكُبار و الشُّيوخ. و قال: ”عَمَلتَ خَطيَّه عَشان سَلَّمتَ راجِل بِدون غَلَط.“ قالو: ”مالكُم و مالنا؟ إنتَ المَسؤول.“ و رَمى الفِضَّه في الهيكَل، و مَرَق و شَنَق نَفسو. و لَكِن القُسُس الكُبار اَخَدو الفِضَّه و قالو: ”ما بِالقانون نَخُتّا في الخَزينَه، عَشان هي تَمَن دَم.“ عَشان دا، إتكَلَّمو مَعَ بَعض، و إشتَرو بيهو زِراعَه دَقّاق البُرام، عَشان يَدفِن فيهو الغَريبين. عَشان دا، يَسَمّو الزِّراعَه دي: ”زِراعَة الدَّم“ لِغايَة اليوم دا. في الوَكِت داك، تَمَّ كَلام النَّبي إِرْمِيَا لَمّا قال: ”و اَخَدو التَّلاتين حِتَّه مِن الفِضَّه. دا التَّمَن النّاس إِسْرَائِيل خَتّو عَليهو. و أدّوها لِزِراعَة دَقّاق البُرام، زي ما الرَّب أمَرني.“ و يَسُوع قام قِدّام المُدير. و المُدير سَألو و قال: ”إنتَ مَلِك اليَهود؟“ و يَسُوع قال: ”إنتَ تَقول.“ و لَكِن لَمّا القُسُس الكُبار و الشُّيوخ كانو يَشتَكو عَليهو، ما رَدَّ عَليهُم حاجَه. بَعدين بِيلاطُس قال ليهو: ”ما بِتَسمَع كَم حاجَه يَشهَدو عَليك؟“ لَكِن هو ما رَدَّ عَليهو و لا عَن كِلمَه واحدَه. و المُدير إستَغرَب جِدّاً. و كان في تَرتيب في العيد. المُدير كان بِفِك واحِد مَحبوس. و النّاس إختارو الهُم دايِرينو. و في الوَكِت داك، كان عِندَهُم واحِد مَحبوس مَعروف لِكُل النّاس. و إسمو بَراباس. عَلَشان كِدا، لَمّا النّاس إتلَمّو، بِيلاطُس قال ليهُم: ”إنتو عاوِزينّي أفِك ليكُم مِنو؟ بَراباس، ولّا يَسُوع اليَسَمّوهو المَسيح؟“ عَشان عِرِف إنَّهُم سَلَّموهو مِن الحَسَد. و كَمان، وَكِت ما كان قاعِد عَلى كُرسي الحُكم، مَرَتو رَسَّلَت ليهو و قالَت: ”ما تَعمِل أي حاجَه لِلرّاجِل البار دا. عَشان عَذَّبتَ كَتير في حِلم النَّهار دا فِشانّو.“ و القُسُس الكُبار و الشُّيوخ إتكَلَّمو مَعَ النّاس لِغايَة ما إتَّفَقو يَطلُبو بَراباس و يَكتُلو يَسُوع. و المُدير قال ليهُم تاني مَرَّه: ”ياتو مِن الإتنين عاوِزينّي أفِك ليكُم؟“ و قالو: ”بَراباس.“ بِيلاطُس قال ليهُم: ”عَلى كِدا، بَعمِل شِنو بِيَسُوع اليَسَمّوهو المَسيح؟“ و كُلَّهُم قالو: ”أصلُبوهو.“ و هو قال: ”لِشِنو؟ خَطِيَّتو شِنو؟“ لَكِن كورَكو أكتَر و قالو: ”أصلُبوهو.“ و لَمّا بِيلاطُس شاف كَلامو ما عَمَل حاجَه، و لَكِن دَوشَه كانَت تَبتَدي، أخَد مويَه و غَسَّل إيدينو قِدّام الجَّمَع و قال: ”أنا ما مَسؤول مِن دَم الرّاجِل دا. شوفو إنتو بَراكُم.“ و كُل النّاس قالو: ”دَمّو عَلينا و عَلى أولادنا!“ بَعدين هو فَكَّ بَراباس، و جَلَد يَسُوع، و سَلَّمو عَشان يَصلُبوهو. بَعدين عَساكِر المُدير اَخَدو يَسُوع لِبيت المُدير، و لَمّو كُل العَساكِر قِدّامو. و شالو مِنّو هِدومو و لَبَّسوهو جَلّابيَّه حَمرَه، و عَمَلو تاج مِن شوك و خَتّوهو عَلى رَاسو، و خَتّو عَصايَه في إيدو اليَمين. و رَكَعو قِدّامو و ضِحِكو عَليهو و قالو: ”السَّلام، يا مَلِك اليَهود!“ و بَزَقو عَليهو، و اَخَدو العَصايَه و ضَرَبوهو عَلى رَاسو. و بَعَد ما ضِحِكو عَليهو، شالو مِنّو الجَلّابيَّه، و لَبَّسوهو هِدومو، و قادوهو بَرَّه عَشان يَصلُبوهو. و وَكِت ما كانو ماشين، لِقو زول قِرَواني، إسمو سِمْعَان. و أخَدوهو بِقُوَّه عَشان يَشيل صَليبو. و لَمّا جو لِمَحَل يَسَمّوهو جُلجُتَه، يَعني، مَحَل جُمجُمَه أدّوهو خَمرَه عَشان يَشرَبا، مَلَخبَتَه بِحاجَه مُرَّه. و لَكِن لَمّا ضاقا، أبى يَشرَبا. و بَعَد ما صَلَبوهو، قَسَمو هِدومو بِينُم بِالقُرَع. بَعدين قَعَدو و حَرَسوهو هِناك. و خَتّو شَكواهو فوق رَاسو المَكتوبَه عَليها: ”دا هو يَسُوع، مَلِك اليَهود.“ و إتنين حَراميَّه إنصَلَبو مَعاهو، واحِد عَن اليَمين و واحِد عَن الشِّمال. و المارين بِالسِّكَّه شَتَموهو، و هَزّو روسينُم، و قالو: ”إنتَ البِتَخرَب الهيكَل و بِتَبنيهو في تَلاتَة أيام، خَلِّص نَفسَك. إذا إنتَ إبن الله، أنزِل مِن الصَّليب.“ و كِدا كَمان، القُسُس الكُبار ضِحِكو عَليهو، هُم و مُعَلِّمين القانون و الشُّيوخ. و قالو: ”هو خَلَّص ناس تانيين، و لَكِن هو ما يَقدَر يَخَلِّص نَفسو. هو مَلِك إِسْرَائِيل! خَليهو يَنزِل هَسَّع دي مِن الصَّليب، و نِحنا نَصَدِّق بيهو. هو صَدَّق بِالله. خَلّي الله يَخَلِّصو هَسَّع إذا هو يَحِبّو، عَشان هو قال: أنا إبن الله.“ و الحَراميَه الكانو مَصلوبين مَعاهو شَتَموهو زي دا كَمان. و مِن السّاعَه إتناشَر، كانَت في ضُلُمَّه في كُل الأرض لِغايَة السّاعَه تلاتَه. و السّاعَه تلاتَه تَقريباً، يَسُوع كورَك بِصوت عالي، وقال: ”إيلي، إيلي، لَما شَبَقتَني؟“ يَعني: ”إلَهي، إلَهي، لِشِنو خَلّيتني؟“ و بَعض مِن النّاس الكانو واقفين هِناك، لَمّا سِمِعوهو، قالو: ”الرّاجِل دا يَنادي إِيلِيَّا.“ و طَوّالي واحِد مِنَّهُم جَرى و أخَد سِفِنجَه و مَلاها بِخَل، و خَتّاها عَلى عَصايَه طَويلَه، و أدّاها ليهو عَشان يَشرَب. و لَكِن التّانيين قالو: ”خَليهو، نَشوف إذا إِيلِيَّا بِجي يَخَلِّصو.“ و يَسُوع كورَك تاني مَرَّه بِصوت عالي، و سَلّم روحو. و شوف! سِتارَة الهيكَل إتشَرَّط لِإتنين، مِن فوق لِتِحِت. و الأرض إتهَزَّت، و الحُجار إتكَسَّرو. و القُبور كَمان إنفَتَحو، و كَتير مِن أجسام القِدِّسين الكانو نايمين قامو، و مَرَقو مِن القُبور بَعَد ما يَسُوع قام، و دَخَلو المَدينَه المُقَدَّسَه، و ظَهَرو لِناس كَتير. و لَمّا رَئيس الجّيش و المَعاهو الكانو يَحرَسو يَسُوع شافو الزَّلزَلَه و الحَصَل، كانو خايفين جِدّاً، و قالو: ”بِالحَق، دا كان إبن الله!“ و نِسوان كُتار كانو في كَمان، يَعاينو مِن بَعيد. و هُم تِبعو يَسُوع مِن الجَّليل عَشان يَخدِموهو. و بِينُم مَرْيَم المَجْدَلِيَّه، و مَرْيَم أُم يَعْقُوب و يُوسِي، و أُم أولاد زَبَدي. و في المِسا، راجِل غَني جا مِن الرَّامَه إسمو يُوسِف. و هو كَمان كان تِلميذ لِيَسُوع. و هو مَشى لِبِيلاطُس و طَلَب جِسم يَسُوع. و في الوَكِت دا، بِيلاطُس أمَرُم يَدُّوهو ليهو. و يُوسِف أخَد الجِّسم و لَفّاهو في قُماش تيل نَضيف، و خَتّاهو في قَبرو الجَّديد الهو قَطَع في الحَجَر. و لَزَّ حَجَر كَبير عَلى خَشم القَبر، و مَشى. و مَرْيَم المَجْدَلِيَّه و مَرْيَم التّانيَه كانو هِناك، قاعِدات في الجَّمب التّاني قَريب مِن القَبر. و اليوم التّاني، يَعني، بَعَد يوم الإستَعداد، القُسُس الكُبار و الفَرّيسيّين إتلَمّو قِدّام بِيلاطُس و قالو: ”يا سَيِّد، نِتزاكَّر الغَشّاش دا وَكِت ما هو لِسَّع حَي قال: بَعَد تَلاتَة أيام، بَقوم. عَشان كِدا، آمُر أن يَحرَسو القَبر لِغايَة تالِت يوم، عَشان تَلاميذو ما يَمشو و يَسرِقو جِسمو، و يَقولو لِلنّاس، هو قام مِن بين المَيِّتين، و الغِش الآخِر بِكون أكعَب مِن الأوَّل.“ و بِيلاطُس قال ليهُم: ”عِندَكُم عَساكِر. أمشو و أحرَسوهو زي ما تَقدَرو.“ عَلى كِدا، مَشو و حَرَسو القَبر تَمام. و خَتّو الخِتِم عَلى الحَجَر و خَتّو الحُرّاس هِناك. و بَعَد السَّبِت، بَدري في الصَّباح في اليوم الأوَّل مِن الأسبوع، مَرْيَم المَجْدَلِيَّه و مَرْيَم التّانيَه مَشو يَشوفو القَبر. و شوف! كانَت في زَلزَلَه كَبيرَه. عَلَشان مَلاك الرَّب نَزَل مِن السَّما، و جا و لَزَّ الحَجَر مِن خَشم القَبر، و قَعَد فوقو. و شَكلو زي البَرق، و هِدومو أبيَض زي تَلج. و الحُرّاس كانو خايفين جِدّاً مِنّو، و رَجَفو، و بِقو زي المَيِّتين. و لَكِن المَلاك قال لِلنِّسوان: ”ما تَخافو. أنا عارِف إنتو تَفَتِّشو عَلى يَسُوع المَصلوب. هو ما في هِنا، عَشان قام زي ما هو قال. تَعالو، شوفو المَحَل الهو كان راقِد فيهو. بَعدين، أمشو بِسُرعَه، و قولو لِتَلاميذو إنّو قام مِن بين المَيِّتين. و شوفو هو يَمشي قُبّالكُم لِلجَّليل. بِتشوفو هِناك. شوف! أنا قُلتَ ليكُم.“ عَلى كِدا هُم مَشو بِسُرعَه مِن القَبر بِخوف، و كانو فَرحانات جِدّاً. و جَرو عَشان يَخَبِّرو تَلاميذو. و شوف! يَسُوع قابِلُم و قال ليهُم: ”سَلام ليكُم.“ و قَرَّبو ليهو و مَسَكو كِرعينو و عَبَدوهو. بَعدين يَسُوع قال ليهُم: ”ما تَخافو. أمشو و قولو لِأخواني إنَّهُم يَمشو لِلجَّليل. و هِناك بِشوفوني.“ و وَكِت ما مَشو، شوف، بَعَض مِن الحُرّاس جو لِلمَدينَه و خَبَّرو القُسُس الكُبار بِكُلّو شي الحَصَل. و لَمّا إتلَمّو مَعَ الشُّيوخ و إتكَلَّمو مَعَ بَعَض، أدّو قُروش كَتير لِلعَساكِر. و قالو: ”قولو لِلنّاس: تَلاميذو جو بِاللّيل و سَرَقوهو و نِحنا نايمين. و إذا المُدير بِسمَع الخَبَر، نِحنا نَشوفو و نَحفَظكُم مِن التَّعب.“ و العَساكِر اَخَدو القُروش، و عَمَلو زي ما كَلَّموهُم. و لَكِن الحِداشَر تِلميذ مَشو لِلجَّليل، لِلجَّبَل الأمَرُم يَسُوع أن يَمشو ليهو. و لَمّا شافوهو، عَبَدوهو. و لَكِن بَعض مِنَّهُم شَكّو. و يَسُوع قَرَّب ليهُم و قال: ”الله أدّا لَي كُلّو سُلطَه في السَّما و عَلى الأرض. عَشان كِدا، أمشو و أعمِلو تَلاميذ مِن كُلّو ناس الدُّنيا. و عَمِّدوهُم بِإسم الأبو، و الإبن، و الرّوح القُدُس. و عَلِّموهُم أن يَحفَظو كُل الأمَرتَكُم بيهو. و شوفو! أنا مَعاكُم كُل الأيام، لِغايَة آخِر الدُّنيا.“ بِدايَة إنجيل يَسُوع المَسيح إبن الله. زي ما مَكتوب في كِتاب النَّبي إِشَعْيَاء: ”شوف، أنا بَرَسِّل مُرسال قِدَّامَك، البِحَضِّر طَريقَك. صوت بِكورِك في الخَلا، و يَقول: حَضِّرو طَريق الرَّب، و أعمِلو السِّكَّه بِتاعتو عَديلَه.“ يُوحَنَّا المَعمَدان ظَهَر في الخَلا، و كان يَبَشِّر بِمَعموديَّة التّوبَه لِغُفران الخَطايا. و كُل النّاس مِن بِلاد اليَهُودِيَّه مَرَقو ليهو، و كُلّو ناس أُورُشَلِيم. و كانو يِتعَمَّدو مِنّو في بَحَر الأُرْدُنّ، و كانو يَطَلِّعو خَطاياهم. و يُوحَنَّا كان يَلبَس هِدوم مِن شَعر الجَّمَل، و يَربُط حِزام مِن جِلد في وَسطو، و ياكُل جِراد و عَسَل الخَلا. و كان بِبَشِّر و بِقول: ”بِجي واحِد بَعَدي قَوّي مِنّي، و أنا ما مُستَحِق أدَنقِر و أفِك رَباط جِزَمو. أنا عَمَّدتَكُم بِالمويَه، لَكِن هو ماشي يَعَمِّدكُم بِالرّوح القُدُس.“ و في الأيام ديل، يَسُوع جا مِن نَاصِرَه الفي الجَّليل، و يُوحَنَّا عَمَّدو في الأُرْدُنّ. و يَسُوع، لَمّا طَلَع مِن المويَه، طَوّالي شاف السَّما مَفتوحَه، و الرّوح نازِل زي حَمامَه فوقو. و صوت جا مِن السَّما و قال ليهو: ”إنتَ إبني الحَبيب، و أنا مَبسوط مِنَّك.“ و طَوّالي، الرّوح قادو لِلخَلا. و هو قَعَد في الخَلا أربَعين يوم، و الشّيطان كان بِجَرِّبو. و كان مَعَ حَيوانات الخَلا، و المَلائكَه كانَت تَخدِمو. و بَعَد ما يُوحَنَّا كان مَحبوس، يَسُوع جا لِلجَّليل، و بَشَّر بِإنجيل الله. و قال: ”الوَكِت كِمِل، و مَلَكوت الله قَرَّب. توبو، و صَدِّقو بِالإنجيل.“ و وَكِت ما يَسُوع كان ماشي جَمب بَحَر الجَّليل، هو شاف سِمْعَان و أنْدَرَاوُس أخو سِمْعَان يَرمو الشَّبَكَه في البَحَر، فِشان هُم كانو صَيادين. و يَسُوع قال ليهُم: ”تَعالو وَراي، و أنا بَعمِلكُم صَيادين النّاس.“ و طَوّالي خَلّو شَبَكاتُم و مَشو وَراهو. و هو مَشى قِدّام شوَيَه، و شاف يَعْقُوب وَلَد زَبَدي و يُوحَنَّا أخوهو، و هُم كانو في مُركَبُم بِصَلِّحو شَبَكاتُم. و طَوّالي هو ناداهُم. و هُم سابو أبوهُم زَبَدي في المُركَب مَعَ الشَّغّالين، و مَشو وَراهو. و مَشو لِكَفْرَنَاحُوم. و طَوّالي في يوم السَّبِت دَخَل بيت الرَّب و بِقى يَعَلِّم. و إستَغرَبو مِن تَعليمو، عَلَشان هو كان يَعَلِّمُم زي واحِد عِندو سُلطَه، و ما زي مُعَلِّمين القانون. و طَوّالي كان في بيت الرَّب راجِل ليهو روح نَجِس. و هو كورَك، و قال: ”مالنا و مالَك، يا يَسُوع النّاصِري؟ إنتَ جيت عَشان تَخرِبنا؟ أنا عارِف مِنو إنتَ. إنتَ قُدّوس الله.“ و لَكِن يَسُوع قال بِقُوَّه: ”أسكُت، و اطلَع مِنّو!“ و روح النَّجِس هَزّو شَديد، و كورَك بِصوت عالي، و طَلَع مِنّو. و كُل النّاس إستَغرَبو جِدّاً جِدّاً، و إتكَلَّمو مَعَ بَعض و قالو: ”دا شِنو؟ تَعليم جَديد! بِسُلطَه هو يأمُر الأرواح النَّجسَه و هُم بِسمَعوهو.“ و طَوّالي الخَبَر عَنّو مَشى لِكُلّو بِلاد الجَّليل. و طَوّالي مَرَقو مِن بيت الرَّب، و مَشو لِبيت سِمْعَان و أنْدَرَاوُس، مَعَ يَعْقُوب و يُوحَنَّا. و كانَت أُم مَرَة سِمْعَان راقدَه، عَيّانَه بِحُمَّه. و طَوّالي كَلَّموهو عَنّا. و هو جا و مَسَكا بِإيدا و رَفَعا. و الحُمَّه فاتَت مِنَّها. و هي بِقَت تَخدِمُم. و في المِسا، بَعَد المَغرِب، النّاس جابو ليهو كُل العَيّانين و كُل الفيهُم شياطين. و ناس البَلَد كُلُّهُم إتلَمّو عِند الباب. و هو شَفى ناس كُتار كانو عَيّانين بِأمراض مُختَلِفَه، و مَرَّق شياطين كَتيرَه. و ما خَلّى الشّياطين يِتكَلَّمو، فِشان هُم عِرفو هو مِنو. و يَسُوع قام بَدري في الصَّباح، و الواطَه لِسَّع ضُلُمَّه، و مَرَق و مَشى لِلخَلا. و صَلّى هِناك. و سِمْعَان و الكانو مَعاهو مَشو يَفَتِّشو عَليهو. و لَمّا لِقوهو، قالو ليهو: ”كُل النّاس يَفَتِّشو عَليك!“ و هو قال ليهُم: ”خَلّينا نَمشي لِمَحَل تاني، لِلبِلاد القَريبَه، عَشان أبَشِّر هِناك كَمان. فِشان دا أنا جيت.“ و مَشى في الجَّليل كُلَّها، و كان يَبَشِّر في بُيوت الرَّب و يَمَرِّق الشّياطين. و واحِد عِندو جِزام قَرَّب ليهو و طَلَب مِنّو، و رَكَع و قال ليهو: ”إذا إنتَ عاوِز، إنتَ تَقدَر تَنَضِّفني.“ و يَسُوع حَنَّه عَليهو، و مَدَّ إيدو و لِمسو، و قال ليهو: ”أنا عاوِز. كون نَضيف!“ و طَوّالي الجِّزام فات مِنّو، و هو بِقى نَضيف. و أمَرو بِشِدَّه و صَرَفو طَوّالي، و قال ليهو: ”شوف ما تَكَلِّم أي حاجَه لِأي زول أبَداً. لَكِن أمشي، و وَرّي نَفسَك لِلقَسّيس، و قَدِّم الضَّبيحَه عَلَشانَك بِقيت نَضيف، زي ما أمَر مُوسَى، عَشان شَهادَه لِلنّاس.“ و لَكِن هو مَرَق و بِقى يَكَلِّم حاجات كَتيرَه عَنّو قِدّام النّاس، و يَخَبِّرُم. و كِدا يَسُوع ما كان بِقدَر يَدخُل مَدينَه، لَكِن قَعَد في الخَلا. و النّاس جو ليهو مِن كُلّو مَحَل. و بَعَد أيام قَليلَه، رَجَع لِكَفْرَنَاحُوم، و النّاس سِمِعو هو في البيت. و ناس كَتيرين إتلَمّو، و كِدا ما فِضِل أي مَحَل، و لا حَول الباب. و كان يَبَشِّرُم بِالكِلمَه. و ناس جو جايبين ليهو زول مَفلوج، و أربَعَه رُجال يَشيلوهو. و لَمّا ما قِدِرو يَقَرِّبوهو لِيَسُوع عَلَشان كَترَت النّاس، فَتَحو راس البيت فوق المَحَل الكان فيهو يَسُوع. و لَمّا فَتَحوهو، نَزَّلو البِرِش الكان راقِد فوقو المَفلوج. و لَمّا يَسُوع شاف إيمانُم، هو قال لِلمَفلوج: ”يا وَلَدي، خَطاياك مَغفورَه ليك.“ و بَعَد مِن مُعَلِّمين القانون كانو قاعِدين هِناك يَفَكِّرو في قُلوبُم، ”الرّاجِل دا بِكَلِّم كِدا لِشِنو؟ هو يَجَدِّف! مِنو يَقدَر يَغفِر الخَطايا إلّا الله بَس؟“ و طَوّالي يَسُوع، و هو عِرِف في روحو إنَّهُم فَكَّرو كِدا في نُفوسُم، قال ليهُم: ”لِشِنو تَفَكِّرو كِدا في قُلوبكُم؟ ياتو أسهَل؟ بَقول لِلمَفلوج: خَطاياك مَغفورَه ليك؟ ولّا بَقول: قوم، شيل بِرِشَك و أمشي؟ و لَكِن عَشان تَفهَمو إنّو إبن الإنسان عِندو سُلطَه في الدُّنيا لِيَغفِر الخَطايا،“ قال لِلمَفلوج: ”أقول ليك، قوم، شيل بِرِشَك و أمشي لِبيتَك.“ و هو قام و طَوّالي شال بِرِشو و مَرَق قِدّام كُلُّهُم. و كُل النّاس إستَغرَبو جِدّاً، و مَجَّدو الله، و قالو: ”ما شُفنا حاجَه زي دي أبَداً!“ و مَرَق مَرَّه تانيَه لِجَمب البَحَر. و كُل النّاس جو ليهو، و هو كان يَعَلِّمُم. و وَكِت هو كان ماشي، شاف لَاوِي وَلَد حَلْفَى قاعِد في مَكتَب الضَّريبَه. و قال ليهو: ”أتبَعني.“ و هو قام و تَبَعو. و لَمّا هو كان قاعِد ياكُل في الطَّرَبيزَه في بيت لَاوِي، كَتير مِن النّاس البِلِمّو الضَّريبَه و الخاطيين كانو قاعِدين مَعَ يَسُوع و تَلاميذو. عَلَشان النّاس التَّبَعوهو كانو كُتار. و لَمّا مُعَلِّمين القانون مِن الفَرِّيسِيِّين شافو هو كان ياكُل مَعَ الخاطيين و البِلِمّو الضَّريبَه، قالو لِتَلاميذو: ”لِشِنو هو ياكُل و يَشرَب مَعَ البِلِمّو الضَّريبَه و الخاطيين؟“ و لَمّا يَسُوع سِمِع، قال ليهُم: ”النّاس الشُّداد ما يَحتاجو لِلحَكيم، لَكِن العَيّانين. أنا ما جيت عَشان أنادي البارين، لَكِن الخاطيين.“ و تَلاميذ يُوحَنَّا و الفَرّيسيّين كانو صايمين. و النّاس جو و قالو ليهو: ”لِشِنو تَلاميذ يُوحَنَّا و تَلاميذ الفَرِّيسِيِّين بِصومو، و لَكِن تَلاميذَك ما بِصومو؟“ و يَسُوع قال ليهُم: ”مُمكِن ناس العِرِس يَصومو و العَريس مَعاهُم؟ وَكِت ما العَريس مَعاهُم، ما مُمكِن يَصومو. و لَكِن الأيام بِجو لَمّا ياخُدو العَريس مِنَّهُم. في اليوم داك بِصومو. ما في زول يَخَيِّط حِتَّه مِن قُماش جَديد عَلى قُماش قَديم. إذا يَعمِل كِدا، حِتَّت القُماش الجَّديد تَشرُط القَديم، و الشَّرط بِكون أكعَب. و ما في زول يَكُب خَمرَه جَديدَه في قِربَه قَديمَه. إذا يَعمِل كِدا، الخَمرَه تَشرُط القِربَه القَديمَه، و الخَمرَه و القِربَه بِخرَبو. لَكِن الخَمرَه الجَديدَه يَخُتّوها في قِربَه جَديدَه.“ و في يوم السَّبِت، كان ماشي في وَسط الزُّروع. و وَكِت ما هُم ماشين، تَلاميذو بِقو يَقطَعو روسين الدُّرَه. و الفَرّيسيّين قالو ليهو: ”شوف، لِشِنو يَعمِلو الما بِالقانون أن يَعمِلو في يوم السَّبِت؟“ و قال ليهُم: ”ما قَريتو أبَداً العَمَلو دَاوُد لَمّا كان جَعان و كان في إحتِياج، هو و الكانو مَعاهو؟ كيف دَخَل بيت الله في أيام أَبِيأَثَار، رَئيس القُسُس، و أكَل عيش التَّقدِمَه المَمنوع لِلنّاس أن ياكلوهو، لَكِن القُسُس بَس ياكلوهو؟ و أدّاهو لِلكانو مَعاهو كَمان؟“ و قال ليهُم: ”يوم السَّبِت كان مَعمول فِشان بَني آدَم، و ما بَني آدَم فِشان السَّبِت. و كِدا، إبن الإنسان هو رَب السَّبِت.“ و دَخَل بيت الرَّب مَرَّه تانيَه. و كان في راجِل هِناك إيدو يابسَه. و عايَنو ليهو عَشان يَشوفو إذا كان يَشفيهو في السَّبِت، فِشان كانو عاوِزين يَشتَكوهو. و يَسُوع قال لِلرّاجِل الإِيدو يابسَه: ”قوم في الوَسط.“ و قال ليهُم: ”بِالقانون بيَعمِل الكَويس في السَّبِت ولّا بيَعمِل البَطّال؟ يَخَلِّص النَّفس ولّا يَكتُلو؟“ لَكِن هُم سَكَتو. و عايَن ليهُم و حَوَليهو بِزَعل، و كان حَزين عَلَشان قُلوبُم قَوّيَّه. و قال لِلرّاجِل: ”مِد إيدَك.“ و هو مَدّاها، و إيدو بِقَت طَيبَه. و الفَرّيسيّين مَرَقو، و طَوّالي إتكَلَّمو عَليهو مَعَ الهِيرُودُسين كيف يَكتُلوهو. يَسُوع مَرَق مَعَ تَلاميذو لِلبَحَر. و ناس كُتار مِن الجَّليل تَبَعوهو. و كَمان مِن اليَهُودِيَّه، و أُورُشَلِيم، و أدومِيَّه، و مِن فوق الأُردُن، و مِن حَول صُور و صَيدا، ناس كُتار جِدّاً سِمِعو كُل الهو عَمَل، و جو ليهو. و هو كَلَّم تَلاميذو عَشان يَحَضِّرو مُركَب صَغَيرَه بِسَبَب النّاس عَشان ما يَقَرِّبو ليهو. عَلَشان هو شَفى ناس كُتار، حَتّى كُل العِندَهُم أمراض إتلَمّو قَريب مِنّو لِيَلمَسوهو. و الأرواح النَّجسَه كُلّو وَكِت لَمّا شافوهو، وَقَعو قِدّامو و كورَكو و قالو: ”إنتَ إبن الله.“ و يَسُوع أمَرُم شَديد أن ما يَقولو هو مِنو. و طَلَع لِلجَّبَل، و نادى ليهو النّاس الهو دايِرُم. و هُم جو ليهو. و هو إختار مِنَّهُم إتناشَر عَشان يَكونو مَعاهو، و عَشان يَرَسِّلُم لِيَبَشِّرو و يَكون ليهُم سُلطَه عَشان يَمَرِّقو الشّياطين. و أهُم ديل الإتناشَر الهو إختارُم: سِمْعَان، الأدّاهو الإسم بُطْرُس، و يَعْقُوب إبن زَبَدي و يُوحَنَّا أخو يَعْقُوب، الهو أدّاهُم الإسم بُوَانَرْجِس، يَعني أولاد صوت البَرق. و أنْدَرَاوُس، و فِيلُبُّس، و بَرْثُلَمَاوُس، و مَتَّى، و تُومَا، و يَعْقُوب إبن حَلْفَى، و وَتَدَّاوُس، و سِمْعَان القَانَوِي، و يَهُوذَا الإِسْخَرْيُوطِي السَّلَّمو. بَعدين دَخَلو البيت. و النّاس إتلَمّو مَرَّه تانيَه، حَتّى ما كان مُمكِن ياكُلو. و لَمّا أهلو سِمِعو عَن دا، مَرَقو لِيَمسِكوهو، فِشان قالو: ”هو مَجنون.“ و مُعَلِّمين القانون النَّزَلو مِن أُورُشَلِيم قالو: ”بَعلَزَبول فيهو. بِرَئيس الشّياطين هو يَمَرِّق الشّياطين.“ و هو ناداهُم و كَلَّمُم بِأمثال: ”كيف الشّيطان يَقدَر يَمَرِّق الشّيطان؟ إذا مَملَكَه مِنقَسِمَه عَلى نَفسا، المَملَكَه دي ما بِتَقدَر تَثبُت. و إذا كان بيت إنقَسَم عَلى نَفسو، البيت داك ما بِقدَر يَثبُت. و إذا الشّيطان قام عَلى نَفسو و إنقَسَم، هو ما بِقدَر يَثبُت، لَكِن نِهايَتو جايَه. ما مُمكِن واحِد يَدخُل بيت راجِل قَوّي و يَشيل مالو، إلّا هو بِيَربُط الرّاجِل القَوّي. بَعدين هو بِقدَر يَشيل مالو. الحَق أقول ليكُم، كُل الخَطايا بِتكون مَغفورَه لِأولاد النّاس، و الشَّتايِم اليَشتِمو بيها. و لَكِن اليَجَدِّف عَلى الرّوح القُدُس ما بِكون مَغفور ليهو أبَداً. خَطِيَّتو فوق رَقَبتو لِلأبَد.“ عَشان هُم قالو: ”فيهو روح نَجِس.“ و أُمّو و أخوانو جو، و كانو واقفين بَرَّه. و رَسَّلو واحِد عَشان يَناديهو. و ناس كُتار كانو قاعِدين حَولو، و قالو ليهو: ”أُمَّك و أخوانَك في بَرَّه يَطلُبوك.“ و رَدَّ عَليهُم و قال: ”مِنو أُمّي و أخواني؟“ و إتلَفَت لِلنّاس الكانو قاعِدين حَولو و قال: ”أهُم ديل أُمّي و أخواني! هو البيَعمِل إرادَة الله، هو أخوّي، و أُختي، و أُمّي.“ وَكِت تاني يَسُوع بِقى يَعَلِّم بِجَمب البَحَر. و ناس كُتار خالِص إتلَمّو ليهو، حَتّى دَخَل مُركَب و قَعَد فيها عَلى البَحَر. و النّاس كُلّو كانو قاعِدين بِجَمب البَحَر عَلى الطَّرف. و عَلَّمُم حاجات كَتيرَه بِأمثال. و في تَعليمو قال ليهُم، ”أسمَعو! المُزارِع مَرَق لِيَزرَع تيرابو. و وَكِت ما يَزرَع، بَعض مِن التّيراب وَقَع في السِّكَّه، و الطُّيور جو و أكَلوهو. و بَعض مِنّو وَقَع عَلى أرض فيها حُجار، و ما كان في تُراب كَتير. و طَوّالي قام، عَشان التُّراب كان خَفيف. و لَمّا الشَّمِس طَلَعَت، إنحَرَق و بِقى يابِس، فِشان ما كان عِندو عِرق. و تيراب تاني وَقَع بين الشّوك، و الشّوك طَلَع و خَنَقو. و ما جاب ثِمار. و تيراب تاني وَقَع عَلى الأرض الكوَيسَه، و قام و كِبِر و جاب دُرَه، بِتَلاتين، و بِسِتّين، و بِمِيَّه.“ و قال: ”العِندو إضنين لِلسَّمَع، خَليهو يَسمَع.“ و لَمّا كان بَراهو، النّاس الكانو حَولو مَعَ الإتناشَر سَألو عَن الأمثال. و قال ليهُم: ”أدّو ليكُم تَعرِفو سِر مَلَكوت الله، و لَكِن ليهُم الفي بَرَّه، كُلّو شي بِأمثال، عَشان، بِعاينو بِعُيونُم و لَكِن ما بِشوفو، و بِسمَعو سَمَع و لَكِن ما بِفهَمو، عَشان ما يَرجَعو و هو يَغفِر ليهُم.“ و قال ليهُم: ”ما تَفهَمو المَثَل دا؟ و كيف بِتَفهَمو كُل الأمثال؟ المُزارِع يَزرَع الكِلمَه. و ديل هُم العَلى السِّكَّه، المَحَل الفيهو يَزرَعو الكِلمَه. لَمّا يَسمَعو الكِلمَه، طَوّالي الشّيطان بِجي و ياخُد الكِلمَه الكان مَزروعَه فيهُم. و زي دا، ديل هُم المَزروعين عَلى الأرض الفيها حُجار. لَمّا يَسمَعو الكِلمَه، طَوّالي يَقبَلوها بِفَرَح. و ما ليهُم عِرق في نُفوسُم، لَكِن يِستَنّو وَكِت قَليل. بَعدين، لَمّا الضّيق ولّا الطَّرد يَحصَل عَشان الكِلمَه، طَوّالي يَقَعو. و تانيين، هُم المَزروعين بين الشّوك. ديل هُم اليَسمَعو الكِلمَه، و لَكِن هُموم الدُّنيا، و غِش الغِنى، و مَحَبَّة حاجات تانيَه تَدخُل و تَخنُق الكِلمَه، و هي بِتكون بِدون ثِمار. و لَكِن ديل المَزروعين عَلى الأرض الكوَيسَه، هُم اليَسمَعو الكِلمَه و يَقبَلوها و يَجيبو ثِمار، بِتَلاتين، و بِسِتّين، و بِمِيَّه.“ و قال ليهُم: ”يَجيبو لَمبَه عَشان يَخُتّوها تِحِت قُفَّه؟ ولّا تِحِت العَنقَرِيب؟ و ما يَخُتّوها عَلى الطَّرَبيزَه؟ عَشان ما في حاجَه مَدسوسَه إلّا عَشان بِتكون باينَه. و ما في شي مُغَطّى إلّا عَشان بِتكون مَعروف. إذا واحِد عِندو إضنين لِيَسمَع، خَليهو يَسمَع.“ و قال ليهُم: ”خَلّو بالكُم لِلإنتو تَسمَعو. الكيلَه الإنتو تَدّوها، بِتكون الكيلَه الهُم بِدّوكُم إنتو، و زِيادَه. عَشان العِندو، بِدّوهو أكتَر. و الما عِندو، حَتّى الحاجَه العِندو بِشيلوها مِنّو.“ و قال: ”مَلَكوت الله زي زول يَزرَع تيراب عَلى الأرض. و يَنوم و يَقوم ليل و نَهار. و التّيراب يَطلَع و يَكبَر، و هو ما يَعرِف كيف. الأرض مِن نَفسَها تَجيب الدُّرَه، في الأوَّل القَش، بَعدين راس الدُّرَه، و بَعدين راس مَليان دُرَه. و لَكِن لَمّا الدُّرَه جاهِزَه، طَوّالي يَخُت فيهو المَنجَل، فِشان وَكِت يَلِمّو الدُّرَه جا.“ و قال: ”بِنقول مَلَكوت الله زي شِنو؟ ولّا بِياتو مَثَل نَمَثِّلو؟ هو زي حَبَّة خَردَل. لَمّا تَكون مَزروعَه في الأرض، هي أصغَر كُل التّيراب العَلى الأرض. و لَكِن لَمّا كانَت مَزروعَه، تَكبَر و تَبقى أكبَر كُل النَباتات. و تَعمِل فُروع كَبيرَه حَتّى طُيور السَّما يَقدَرو يَقَنِّبو في ضُلّا.“ بِأمثال كَتيرَه زي دي، هو قال ليهُم الكِلمَه، زي ما هُم كانو يَقدَرو يَفهَمو. يَسُوع ما كَلَّمُم بِدون مَثَل، لَكِن هو وَرّا مَعنى كُلّو شي لِتَلاميذو لَمّا كانو بَراهُم. اليوم داك في المِسا، قال ليهُم: ”نَمشي لِلطَّرف التّاني.“ و هُم خَلّو الجَّماعَه و اَخَدو يَسُوع مَعاهُم زي ما هو كان، في المُركَب. و مَراكِب تانيَه كانَت مَعاهو. و نَزَلَت هَبوب شَديدَه، و المويَه ضَرَبَت و دَخَلَت في المُركَب حَتّى المُركَب قَرَّبَت تَبقى مَليانَه. لَكِن هو كان في مؤخِّر المُركَب، نايِم فوق المَخَدَّه. و قَوَّموهو مِن النّوم و قالو ليهو: ”يا مُعَلِّم، ما مُهِم ليك إذا نَموت؟“ و قام مِن النّوم، و وَبَّخ الهَبوب، و قال لِلبَحَر: ”أسكُت ساكِت.“ و الهَبوب سَكَتَت، و كان في سُكوت كَبير. و قال ليهُم: ”إنتو خايفين كِدا لِشِنو؟ كيف ما عِندَكُم إيمان؟“ و خافو خوف شَديد و قالو بَعضَهُم لِبَعض: ”مِنو دا؟ عَشان الهَبوب و البَحَر يَطيعوهو!“ و وِصلو لِلجَّمب التّاني مِن البَحَر، لِبَلَد الجَدَريّين. و لَمّا طَلَع مِن المُركَب، طَوّالي راجِل ليهو روح نَجِس جا مِن القُبور و قابَلو. و هو كان قَعَد في القُبور. و ما كان في واحِد يَقدَر يَربُطو، و لا بِجَنزير. مَرّات كَتيرَه كان مَربوط بِجَنازِير لِرِجلينو و سَلاسِل، و لَكِن قَطَّع الجَّنازِير و كَسَّر السَّلاسِل. و ما في واحِد عِندو قُوَّه يَغلِبو. و كُلّو يوم ليل و نَهار كان بِكورِك في القُبور و في الجِّبال، و كان يَقطَع نَفسو بِحُجار. و لَمّا شاف يَسُوع مِن بَعيد، جَرى و عَبَدو. و كورَك بِصوت عالي و قال: ”مالي و مالَك، يا يَسُوع، إبن الله العالي؟ أطلُب مِنَّك بِالله، ما تَتَعِّبني.“ عَلَشان يَسُوع قال ليهو: ”اطلَع مِن الزّول، يا روح نَجِس!“ و يَسُوع سَألو و قال: ”إسمَك شِنو؟“ قال: ”إسمي لِجِيون، فِشان نِحنا كَتيرين.“ و طَلَب كَتير مِن يَسُوع ما يَطرُدُم بَرَّه مِن البَلَد. و كان في هِناك عِند الجَّبَل مُراح كَبير مِن الكَداريك بياكُل. و طَلَبو ليهو و قالو: ”رَسِّلنا لِلكَداريك عَشان نَدخُل فيهُم.“ و يَسُوع أدّاهُم إذن. و الأرواح النَّجسَه مَرَقو مِنّو، و دَخَلو في الكَداريك. و المُراح جَرى مِن الطَّرف لِلبَحَر و غِرِق في البَحَر. و كان في إتنين ألف كَدروك تَقريباً. و الرُعاه هَرَبو، و خَبَّروهو في المَدينَه و بَرَّه مِن المَدينَه كَمان. و النّاس جو عَشان يَشوفو الشّي الحَصَل. و جو لِيَسُوع، و شافو الزّول، الكان فيهو شياطين، قاعِد، و لابِس هِدوم، و عاقِل. و هو الكان ليهو أرواح كَتيرَه. و النّاس كانو خايفين. و النّاس الشّافوهو كَلَّمو عَن الشّي الحَصَل لِلزّول الكانَت فيهو شياطين و عَن الكَداريك. و بِقو يَطلُبو مِن يَسُوع يَسيب بَلَدُم. و وَكِت كان يَدخُل المُركَب، الزّول الفيهو شياطين طَلَب مِنّو يَكون مَعاهو. و لَكِن ما خَلّاهو، و قال ليهو: ”أمشي لِبيتَك، و لِأهلَك، و خَبِّرُم بِالحاجَه العَمَلا بيك الرَّب، و كيف وَرّا ليك رَحمَتو.“ و مَرَق و بِقى يَنادي في المُدُن العَشَرَه الحاجات العَمَل يَسُوع بيهو. و كُل النّاس إستَغرَبو. و لَمّا يَسُوع مَرَّه تانيَه قَطَع البَحَر في المُركَب لِلجَّمب التّاني، ناس كُتار إتلَمّو ليهو. و هو كان في طَرف البَحَر. بَعدين واحِد مِن رؤساء بيت الرَّب جا، إسمو يَايِرُس. و لَمّا شاف يَسُوع، وَقَع قِدّام كِرعينو، و قال: ”بِتّي الصَّغَيرَه قَريبَه مِن الموت. تَعال مِن فَضلَك، و خُت إيدَك عَليها عَشان تَكون طَيبَه، و تَحيى.“ و مَشى مَعاهو. و ناس كُتار تَبَعوهو و قَرَّبو ليهو. و كانَت في مَرَه، الدَّم نَزَل مِنَّها لِمُدَّة إتناشَر سَنَه. و هي تِعِبَت كَتير مِن حُكَما كَتيرين. و صَرَفَت كُل القُروش العِندَها. و هي ما بِقَت طَيبَه، لَكِن العَيى زادَت. و لَمّا سِمِعَت بِالخَبَر عَن يَسُوع، جات مِن وَراهو في وَسط الجَّماعَه و لَمَسَت هِدومو. فِشان قالَت: ”إذا ألمَس هِدومو بَس، بَكون طَيبَه.“ و طَوّالي نُزول دَمّا وَقَف. و هي عِرِفَت في جِسِما إنَّها بِقَت طَيبَه. و يَسُوع عِرِف في نَفسو القُوَّه طَلَعَت مِنّو. و طَوّالي إتلَفَت في وَسط الجَّماعَه و قال: ”مِنو لَمَس هِدُومي؟“ و تَلاميذو قالو ليهو: ”إنتَ تَشوف النّاس يَلِزّوك، و تَقول: مِنو لَمَسني؟“ و كان يَعايِن حَولو عَشان يَشوف الواحدَه العَمَلَت دا. و المَرَه عِرِفَت الشّي الحَصَل ليها، و كانَت خايفَه و رَجَعَت، و جات و وَقَعَت قِدّامو، و كَلَّمَتو بِالحَق كُلّو. و قال ليها: ”يا بِتّي، إيمانِك شَفاكي. أمشي بِالسَّلام. كوني طَيبَه مِن العَيى.“ و وَكِت ما يَسُوع يتكَلَّم لِسَّع، ناس جو مِن رَئيس بيت الرَّب، و قالو: ”بِتَّك ماتَت. لِشِنو إنتَ لِسَّع تَتَعِّب المُعَلِّم؟“ و يَسُوع سِمِع الكَلام الهُم قالو: و قال لِرَئيس بيت الرَّب: ”ما تَخاف. صَدِّق بَس.“ و هو ما خَلّى أي واحِد يَتبَعو إلّا بُطْرُس، و يَعْقُوب، و يُوحَنَّا أخو يَعْقُوب. و لَمّا وِصلو لِبيت رَئيس بيت الرَّب، يَسُوع شاف الدَوشَه، و النّاس يَبكو و يَكورِكو كَتير جِدّاً. و لَمّا دَخَل، هو قال ليهُم: ”لِشِنو تَعمِلو دَوشَه و تَبكو؟ البِت ما مَيِّتَه لَكِن نايمَه.“ و ضِحِكو عَليهو. لَكِن هو مَرَّق كُلَّهُم بَرَّه، و أخَد أبو البِت و أُمَّها و الكانو مَعاهو، و مَشى لِلمَحَل الكانَت فيهو البِت. و مَسَك البِت بِإيدا، و قال ليها: ”طَلِيثَا قوم.“ يَعني: ”يا بِت، أقول ليكي: قومي.“ و طَوّالي البِت قامَت و مَشَت، عَشان عُمُرا كان إتناشَر سَنَه. و طَوّالي إستَغرَبو جِدّاً. و هو أمَرُم شَديد ما يَخَلّو واحِد يَعرِف بِدا. و كَلَّمُم يَدُّوها عَشان تَاكُل. و مَرَق مِن هِناك و جا لِوَطَنو. و تَلاميذو تَبَعوهو. و لَمّا كان يوم السَّبِت، إبتَدا يَعَلِّم في بيت الرَّب. و ناس كُتار لَمّا سِمِعوهو، إستَغرَبو و قالو: ”الرّاجِل دا إتعَلَّم كُلّو دا مِن وين؟ شِنو الحِكمَه الأدّوها ليهو؟ حَتّى يَقدَر يَعمِل الأعمال القَوّيَّه دي بِإيدو! دا ما هو النَّجّار؟ وَلَد مَرْيَم، و أخو يَعْقُوب، و يُوسِي، و يَهُوذَا، و سِمْعَان؟ و أخواتو ما هِنا مَعانا؟“ و بِقو زَعلانين مِنّو. و يَسُوع قال ليهُم: ”ما في نَبي بِدون إحتِرام إلّا في وَطَنو و بين أقارِبو و في بيتو.“ و هو ما قِدِر يَعمِل عَمَل بِقُوَّه و لا واحِد هِناك، إلّا هو خَتَّ إيدينو عَلى ناس عَيّانين قَليلين و شَفاهُم. و هو إستَغرَب عَشان هُم كانو بِدون إيمان. و مَشى مِن حِلَّه لِحِلَّه و عَلَّم النّاس. و نادى الإتناشَر و بِقى يَرَسِّلُم إتنين إتنين. و أدّاهُم سُلطَه عَلى الأرواح النَّجسَه. و أمَرُم ما يَشيلو حاجَه لِلسَّفَر إلّا عَصايَه بَس، لا عيش، و لا كيس، و لا قُروش في حِزامُم. لَكِن أمَرُم يَلبَسو جِزَم، و ما يَلبَسو قَميصين. و قال ليهُم: ”البيت الإنتو تَدخُلوهو، أقعُدو فيهو لِغايَة ما تَمرُقو مِن المَحَل دا. و إذا أي مَحَل ما يَقبَلكُم، و النّاس يابو يَسمَعو ليكُم، هِزّو التُّراب مِن رِجلينكُم لَمّا تَمرُقو، عَشان شَهادَه عَليهُم.“ و مَرَقو، و بِشَّرو أن النّاس لازِم يَتوبو. و طَلَّعو شياطين كَتيرَه، و دَهَنو بِزيت ناس عَيّانين كُتار، و شَفوهُم. و المَلِك هِيرُودُس سِمِع بيهو، عَلَشان إسم يَسُوع بِقى مَعروف. بَعَض مِن النّاس قالو: ”يُوحَنَّا المَعمَدان قام مِن بين المَيِّتين. و عَلَشان كِدا، القُوّات دي بِشتَغِلو فيهو.“ و لَكِن ناس تانيين قالو: ”هو إِيلِيَّا.“ و بَعض مِنَّهُم قالو: ”هو نَبي، زي واحِد مِن الأنبياء.“ لَكِن لَمّا هِيرُودُس سِمِع دا، هو قال: ”يُوحَنَّا الأنا قَطَعتَ رَاسو، هو قام مِن بين المَيِّتين.“ عَشان هِيرُودُس نَفسو كان رَسَّل و قَبَض عَلى يُوحَنَّا، و رَبَطو في السِّجِن فِشان هِيرُودِيَا، مَرَة فِيلُبُّس أخوهو. عَلَشان هو كان إتزَوَّجا. فِشان يُوحَنَّا كان قال لِهِيرُودُس: ”ما بِالقانون بِتاخُد مَرَة أخوك.“ كِدا، هِيرُودِيَا كانَت زَعلانَه شَديد في قَلبَها مِن يُوحَنَّا، و كانَت عاوزَه تَكتُلو. و لَكِن ما كانَت تَقدَر. عَشان هِيرُودُس كان خايِف مِن يُوحَنَّا، و عِرِف هو راجِل بار و قُدّوس، و حَرَسو. و لَمّا سِمِع يُوحَنَّا، إتحَيَّر جِدّاً، و لَكِن سِمِعو بِفَرَح. و حَصَلَت فُرصَه في يوم ميلاد هِيرُودُس، و هو عَمَل عَزومَه لِلمُحتَرِمين، و رؤساء الجُّيوش و ناس الجَّليل الكُبار. و لَمّا بِت هِيرُودُس دَخَلَت و رَقَصَت، هِيرُودُس و ضُيوفو كانو مَبسوطين جِدّاً. و المَلِك قال لِلبِت: ”أطلُبي مِنّي زي ما عاوزَه، و أنا بَدّيها ليكي.“ و حَلَف و قال: ”بَدّيكي الإنتي بِتَطلُبي مِنّي لِغايَة نُص مَملَكتي.“ و مَرَقَت، و قالَت لِأُمَّها: ”بَطلُب شِنو؟“ و هي قالَت: ”راس يُوحَنَّا المَعمَدان.“ و طَوّالي دَخَلَت بِسُرعَه لِلمَلِك، و طَلَبَت و قالَت: ”أنا عاوِزاك تَدّيني طَوّالي راس يُوحَنَّا المَعمَدان عَلى صَحَن.“ و المَلِك كان حَزنان جِدّاً. و لَكِن عَلَشان حَلَفو و ضُيوفو، ما داير يَرفُضو. و طَوّالي المَلِك رَسَّل عَسكَري مِن الحُرّاس، و أمَرو يَجيب راس يُوحَنَّا. و مَشى و قَطَع رَاسو في السِّجِن، و جاب رَاسو عَلى صَحَن، و أدّاهو لِلبِت. و البِت أدَّتو لِأُمَّها. و لَمّا التَّلاميذ سِمِعو، جو و اَخَدو جِسمو، و خَتّوهو في قَبر. و الرُّسُل رَجَعو لِيَسُوع، و خَبَّروهو بِكُلّو شي، كُل العَمَلوهو و كُل العَلَّموهو. و قال ليهُم: ”تَعالو إنتو بَراكُم لِمَحَل الخَلا، و إستَريحو شوَيَه.“ فِشان الجّايين و الماشين كانو كَتيرين، و ما عِندَهُم فُرصَه عَشان ياكلو. و مَشو في المُركَب لِمَحَل الخَلا بَراهُم. و ناس كُتار شافوهُم ماشين، و عِرِفوهُم. و جَرو هِناك بِكِرعينُم مِن كُل المُدُن. و وِصلو قُبّال ما هُم وِصلو. و لَمّا يَسُوع طَلَع، هو شاف ناس كُتار، و حَنَّه عَليهُم، فِشان هُم زي خِرفان بِدون راعي. و بِقى يَعَلِّمُم حاجات كَتيرَه. و بَعَد ساعات كَتيرَه، تَلاميذو قَرَّبو ليهو و قالو: ”المَحَل دا خَلا، و الوَكِت فات. كَلَّم النّاس أن يَمشو لِلمَحَلّات حَولينا و الحِلَل و يَشتَرو أكِل لِنُفوسُم.“ و لَكِن قال ليهُم: ”إنتو أدّوهُم عَشان ياكُلو.“ و قالو ليهو: ”نَمشي نَشتَري عيش بِمِيَّتين ريال؟ و نَدّيهُم عَشان ياكُلو؟“ و قال ليهُم: ”عِندَكُم كَم رَغيف؟ أمشو و شوفو.“ و لَمّا عِرِفو، قالو: ”خَمسَه، و سَمَكتين.“ بَعدين أمَر كُلُّهُم يَقعُدو جَماعات جَماعات عَلى القَش الأخدَر. و كِدا قَعَدو في جَماعات مِيَّه مِيَّه، و خَمسين خَمسين. و أخَد الخَمسَه رَغِفان و السَّمَكتين، و عايَن لِلسَّما و بارَك و كَسَّر الرَّغِفان، و أدّاها لِلتَّلاميذ عَشان يَقَدِّموها لِلنّاس. و قَسَّم السَّمَكتين بين كُلَّهُم. و كُلُّهُم أكَلو، و كانو شَبعانين. و لَمّو إتناشَر قُفَّه مَليانَه مِن حِتَت الرَغيف و السَّمَك. و ديل الأكَلو الرَغِفان كانو خَمسَة آلاف راجِل. و طَوّالي يَسُوع دَخَّل تَلاميذو في المُركَب، عَشان يَمشو قُبَّالو لِلطَّرف التّاني لِبيت صَيدا، و هو صَرَف النّاس. و بَعَد ما خَلّاهُم، مَشى لِلجِّبال عَشان يَصَلّي. و لَمّا بِقى المِسا، المُركَب كانَت في وَسط البَحَر، و هو كان بَراهو عَلى الواطَه. و شافُم تَعبانين عَشان كانو بِسوقو المُركَب، عَشان الهَبوب كانَت ضِد المُركَب. و بين السّاعَه تلاتَه و السّاعَه سِتَّه في الصَّباح، يَسُوع قَرَّب ليهُم ماشي عَلى البَحَر. و كان عاوِز يَفوتُم. و لَكِن لَمّا شافوهو ماشي عَلى البَحَر، إفتَكَرو كان روح، و كورَكو. عَلَشان كُلُّهُم شافوهو و كانو خايفين جِدّاً. لَكِن طَوّالي كَلَّمُم و قال ليهُم: ”شِدّو حيلكُم. أنا هو. ما تَخافو.“ و طَلَع ليهُم جُوَّه المُركَب، و الهَبوب سَكَتَت. و هُم إستَغرَبو كَتير خَلاص. عَلَشان هُم ما فِهمو عَن الرَّغِفان، لَكِن قُلوبُم كانَت تَقيلَه. و لَمّا قَطَعو البَحَر، جو لِأرض جَنِّيسَارَت، و رَبَطو المُركَب عِند الطَّرف. و لَمّا مَرَقو مِن المُركَب، طَوّالي النّاس عِرِفوهو، و جَرو في كُل المَكان دا، و بِقو يَشيلو ناس عَيّانين عَلى بُروشُم لِكُلّو مَحَل الهُم سِمِعو يَسُوع كان في هِناك. و في كُلّو مَحَل الهو جا ليهو، إذا حِلَّه، ولّا مَدينَه، ولّا مَحَلّات بَرَّه المُدُن، خَتّو العَيّانين في السّوق، و طَلَبو مِنّو يَخَلّيهُم يَلمَسو طَرف هِدومو بَس. و كُل اللِّمسوهو بِقو شُداد. و الفَرّيسيّين إتلَمّو ليهو، هُم و بَعض مِن مُعَلِّمين القانون الجّو مِن أُورُشَلِيم. و شافو بَعض مِن تَلاميذو ياكُلو عيش بِإيد وَسخانَه، يَعني بِدون ما يَغَسِّلو إيدينُم. عَلَشان الفَرِّيسِيِّين و كُل اليَهود ما ياكُلو إلّا يَغَسِّلو إيدينُم حَتّى الكوعين، عَشان يَحفَظو عادَة الشُّيوخ. و لَمّا بِجو مِن السّوق، ما ياكُلو إذا ما يِتغَسَّلو في الأوَّل. و يَحفَظو عَوايِد تانيَه كَتيرَه: زي غَسيل الكُبايات، و البُرام، و حِلَل النَّحاس. و الفَرّيسيّين و مُعَلِّمين القانون سألوهو و قالو: ”لِشِنو تَلاميذَك ما بِعيشو بِعادَة الشُّيوخ؟ و لَكِن بَدَل مِن دا ياكلو عيش بِإيد وَسخانَه؟“ و قال ليهُم: ”نُبُوَّة إِشَعْيَاء كانَت مَظبوطَه لَمّا إتنَبّأ عَنكُم، إنتو المُنافِقين، زي ما مَكتوب: النّاس ديل يَحتَرِموني بِخُشومُم، و لَكِن قُلوبُم بَعيدين مِنّي. يَعبُدوني بِدون فايدَه، و يَعَلِّمو تَعاليم أوامِر النّاس. إنتو تَخَلّو أمر الله، و تَحفَظو عادَة النّاس.“ و قال ليهُم: ”عِندَكُم تَرتيب كوَيس أن تَرفُضو أمر الله عَلَشان تَحفَظو عادَتكُم! عَشان مُوسَى قال: إحتَرِم أبوك و أُمَّك، و، اليَشتِم أبوهو ولّا أُمّو، خَليهو يَموت الموت. لَكِن إنتو تَقولو: إذا واحِد يَقول لِأبوهو ولّا أُمّو، الفايدَه الكان عِندَك مِنّي، هي تَقدِمَه، يَعني هَدِيَّه لِلَّه، إنتو ما تَخَلّوهو يَعمِل حاجَه لِأبوهو او أُمّو بَعَد دا. و إنتو تَبَطِّلو كَلام الله بِعادَتكُم الإنتو خَبَّرتو النّاس بيهو. و إنتو تَعمِلو حاجات كَتيرَه زي دي.“ و نادى ليهو النّاس مَرَّه تانيَه، و قال ليهُم: ”أسمَعو لَي كُلُّكُم، و أفهَمو. ما في حاجَه بَرَّه مِن الإنسان إذا تَدخُل فيهو تَقدَر تَنَجِّسو. لَكِن الحاجات التَّمرُق مِن الإنسان، هي تَنَجِّسو. إذا واحِد عِندو إضنين لِلسَّمَع، خَليهو يَسمَع.“ و لَمّا يَسُوع خَلّى النّاس و دَخَل البيت، تَلاميذو سألوهو عَن المَثَل. و قال ليهُم: ”إنتو كَمان ما فاهمين؟ ما تَفهَمو اليَدخُل الإنسان مِن بَرَّه ما بِقدَر يَنَجِّسو؟ عَشان ما يَدخُل قَلبو، لَكِن بَطنو، و يَطلَع مِن جِسمو.“ و بِالكَلام دا، خَبَّر النّاس إنّو كُل الأكِل نَضيف. و قال: ”اليَمرُق مِن الإنسان، هو اليَنَجِّس الإنسان. عَشان مِن جُوَّه، مِن قُلوب النّاس، بِتَمرُق الأفكار الشَّرّيرَه، و الفُجور، و السِّرقَه، و الكَتل، و الزِّنا، و الطَّمَع، و الشَّر، و الغِش، و السَّفاهَه، و العين الشَّرّيرَه، و الكِضِب عَلى زول، و الكِبِر، و العَمَل البَليد. كُل الحاجات الشَّرّيرَه دي تَمرُق مِن جُوَّه الزّول، و تَنَجِّسو.“ و يَسُوع قام مِن هِناك، و مَشى لِمَحَل صُور و صَيدا. و دَخَل في بيت، و ما كان عاوِز أي واحِد يَعرِف. لَكِن ما قِدِر يَكون مَدسوس مِنَّهُم. لَكِن طَوّالي، مَرَه سِمِعَت عَنّو، و ليها بِت صَغَيرَه فيها روح نَجِس. و المَرَه جات و وَقَعَت قِدّام كِرعينو. و هي كانَت مَرَه مِن ناس إغريقيين، جِنسا فينيقِيَّه سُورِيَّه. و طَلَبَت مِنّو يَطَلِّع الشّيطان مِن بِتّا. و قال ليها: ”خَلّي الأولاد بِيَشبَعو في الأوَّل، عَشان ما كوَيس ياخُد عيش الأولاد و يَرميهو لِلكِلاب الصُّغار.“ لَكِن هي رَدَّت و قالَت ليهو: ”أيوَه، يا رَب، لَكِن الكِلاب تِحِت الطَّرَبيزَه ياكلو مِن فَتافيت الأولاد.“ و قال ليها: ”عَشان الكِلمَه دي، أمشي. الشّيطان طَلَع مِن بِتِّك.“ و مَشَت لِبيتا و لِقَت البِت راقدَه فوق العَنقَرِيب، و الشّيطان كان مَرَق. بَعَد شوَيَه، يَسُوع مَرَق مِن مَحَل صُور، و مَشى بِدَرِب صَيدا لِبَحَر الجَّليل، في وَسط مَحَل المُدُن العَشَرَه. و جابو ليهو راجِل أطرَش، و صَعب ليهو يتكَلَّم. و طَلَبو مِنّو يَخُت إيدو عَليهو. و اَخَدو مِن الجَّماعَه بَراهو، و خَتَّ أصابِعو في إضنينو، و بَزَق، و لَمَس لِسانو. و عايَن لِلسَّما، و إتنَفَّس، و قال ليهو: ”افَّاتَا،“ يَعني: ”كون مَفتوح.“ و إضنينو بِقو مَفتوحَه، و لِسانو إتفَكَّ، و هو بِقى يتكَلَّم مَظبوط. و أمَرُم ما يَكَلِّمو واحِد. لَكِن بِقَدُر ما أمَرُم، هُم كانو يَخَبِّرو النّاس زِيادَه بِكَتير. و النّاس كانو بِستَغرَبو جِدّاً جِدّاً، و قالو: ”هو عَمَل كُلّو شي تَمام. هو يَعمِل الطُّرُش يَسمَعو و البُكُم يِتكَلَّمو!“ و في الأيام ديلاك، ناس كُتار إتلَمّو، و ما كان عِندَهُم أكِل. و يَسُوع نادى تَلاميذو و قال ليهُم، ”أحِن عَلى النّاس، عَشان هُم قاعِدين مَعاي تلاتَه أيام هَسَّع، و ما عِندَهُم أكِل. و إذا أرَسِّلُم لِبُيوتُم و هُم جَعانين، بِقَعو في السِّكَّه. و بَعَض مِنَّهُم جو مِن بَعيد.“ و تَلاميذو قالو ليهو: ”كيف واحِد يَلقا عيش كِفايَه لِلنّاس ديل عَشان بِكونو شَبعانين هِنا في الخَلا؟“ و سألُم و قال: ”عِندَكُم كَم رَغيف؟“ و قالو: ”سَبعَه.“ و أمَر النّاس يَقعُدو في الواطَه. و أخَد السَّبعَه رَغِفان. و بَعَد ما شَكَر، كَسَّرُم، و أدّاهُم لِتَلاميذو فِشان يَقَدِّمو لِلنّاس. و كان عِندَهُم شوَيَه مِن سَمَك صَغَيِر. و بَعَد ما بارَكُم، أمَر أن يَقَدِّمو السَّمَك كَمان. و أكَلوها، و كانو شَبعانين. و رَفَعو مِن فَضلَت الأكِل سَبعَه قُفَف مَليانَه. و النّاس الأكَلو كانو أربَعَة آلاف تَقريباً. و بَعدين صَرَفُم. و طَوّالي دَخَل مُركَب مَعَ تَلاميذو، و مَشى لِقِسم دَلمَنوتَه. و الفَرّيسيّين جو و إبتَدو يَسألوهو، و طَلَبو مِنّو عَلامَه مِن السَّما، عَشان يَجَرِّبوهو. و يَسُوع إتنَفَّس شَديد في نَفسو، و قال: ”ناس الزَّمَن دا يَطلُب عَلامَه لِشِنو؟ أقول ليكُم الحَق، ما يَدّو عَلامَه لِناس الزَّمَن دا.“ و خَلّاهُم، و دَخَل المُركَب مَرَّه تانيَه، و مَشى لِلطَّرف التّاني. و التَّلاميذ نِسو ياخُدو العيش. و ما كان عِندَهُم في المُركَب إلّا رَغيف واحِد. و هو حَزَّرُم و قال: ”خَلّو بالكُم، و أحرِسو مِن خَميرَة الفَرِّيسِيِّين و خَميرَة هِيرُودُس.“ و إتكَلَّمو بَعضَهُم لِبَعض و قالو: ”ما عِندَنا عيش.“ و يَسُوع عِرِف كَلامُم و قال ليهُم: ”لِشِنو تِتكَلَّمو عَلَشان ما عِندَكُم عيش؟ إنتو لِسَّع ما تَشوفو ولّا تَفهَمو؟ قُلوبكُم قَوّيين؟ ليكُم عُيون و ما تَشوفو؟ و عِندَكُم إضنين و ما تَسمَعو؟ و ما تِتزَكَّرو؟ لَمّا كَسَّرتَ الخَمسَه رَغِفان لِلخَمسَة آلاف، رَفَعتو كَم قُفَّه مَليانَه مِن حِتَت الأكِل؟“ قالو ليهو: ”إتناشَر.“ ”و لَمّا كَسَّرتَ السَّبعَه رَغِفان لِلأربَعَة آلاف، رَفَعتو كَم قُفَّه مَليانَه مِن باقي الأكِل؟“ و قالو ليهو: ”سَبعَه.“ قال ليهُم: ”لِسَّع ما تَفهَمو؟“ و جو لِبيت صَيدا. و جابو ليهو واحِد عَميان، و طَلَبو مِنّو يَلمَسو. و أخَد العَميان بِإيدو، و قادو بَرَّه مِن الحِلَّه. و بَعَد ما بَزَق في عينو، و خَتَّ إيدينو عَليهو، سَألو و قال: ”إنتَ تَشوف حاجَه؟“ و عايَن لِفوق، و قال: ”أشوف النّاس، لَكِن زي الشَّجَر ماشين.“ بَعدين خَتَّ إيدينو عَلى عُيونو مَرَّه تانيَه. و هو عايَن شَديد، و نَظَرو رَجَع، و هو شاف كُلّو شي تَمام. و رَسَّلو لِبيتو، و قال: ”ما تَدخُل الحِلَّه أبَداً.“ و يَسُوع مَرَق، هو و تَلاميذو، لِحِلَل قَيْصَرِيَّه فِيلِبُّس. و وَكِت ما كانو في السِّكَّه، سأل تَلاميذو و قال: ”النّاس بِقولو أنا مِنو؟“ و قالو ليهو: ”بِقولو يُوحَنَّا المَعمَدان، و تانيين بِقولو، إِيلِيَّا، و تانيين بِقولو، واحِد مِن الأنبياء.“ و سألُم: ”و إنتو بِتقولو أنا مِنو؟“ و بُطْرُس رَدَّ عَليهو و قال: ”إنتَ المَسيح.“ و يَسُوع حَزَّرُم أن ما يَكَلِّمو أي زول عَنّو. و هو إبتَدا يَعَلِّمُم أن إبن الإنسان لازِم يِتعَذَب كَتير، و الشُّيوخ، و القُسُس الكُبار، و مُعَلِّمين القانون بِيَرفُضوهو، و يَكتُلوهو. و بَعَد تلاتَه أيام هو بِقوم. و كان يَقول دا بِكَلام باين. و بُطْرُس اَخَدو ليهو، و إبتَدا يَوَبِّخو. و يَسُوع إتلَفَت و عايَن لِتَلاميذو، و وَبَّخ بُطْرُس و قال: ”أمشي بَعيد مِنّي، يا الشّيطان! عَشان إنتَ ما تَهتَم بِحاجات الله، لَكِن بِحاجات النّاس.“ و نادى ليهو النّاس مَعَ تَلاميذو، و قال ليهُم: ”إذا أي واحِد عاوِز يَجي وَراي، خَليهو يَنكِر نَفسو، و يَشيل صَليبو، و يَتبَعني. عَشان هو الدّاير يَخَلِّص نَفسو، بِضَيِّعا. و هو اليَضَيِّع نَفسو فِشانّي أنا، و فِشان الإنجيل، بِخَلِّصا. عَشان الفايدَه شِنو لِزول إذا يَحَصِّل عَلى الدُّنيا كُلَّها، و يَخَسِّر نَفسو؟ و الزّول بِقدَر يَدّي شِنو فِداء عَن نَفسو؟ الزّول البِكون خَجلان مِنّي، و مِن كَلامي بين ناس الزَّمَن الزّاني الخاطي دا، إبن الإنسان بِكون خَجلان مِنّو كَمان، لَمّا بِجي في مَجد أبوهو مَعَ المَلائكَه المُقَدَّسين.“ و قال ليهُم: ”أقول ليكُم الحَق، بَعَض مِن النّاس الواقفين هِنا ما بِضوقو الموت لِغايَة ما بِشوفو مَلَكوت الله جاي بِقُوَّه.“ و بَعَد سِتَة أيام، يَسُوع أخَد مَعاهو بُطْرُس و يَعْقُوب و يُوحَنَّا. و طَلَع بيهُم لِجَبَل عالي بَراهُم. و شَكلو إتغَيَّر قِدّامُم. و هِدومو بِقى أبيَض، لامِع جِدّاً، ما في واحِد في الدُّنيا يَقدَر يَعمِلو أبيَض زي دا! و ظَهَر ليهُم إِيلِيَّا و مُوسَى، و كانو يِتكَلَّمو مَعَ يَسُوع. و بُطْرُس رَدَّ و قال لِيَسُوع: ”يا سَيِّد، كوَيس لينا نَكون هِنا. خَلّونا نَصنَع تلاتَه خيام، واحدَه ليك، و واحدَه لِمُوسَى، و واحدَه لِإِيلِيَّا.“ عَشان هو ما عِرِف يَقول شِنو، عَلَشان هُم كانو خايفين جِدّاً. و سَحابَه غَطَّتُم، و صوت جا مِن السَّحابَه و قال: ”دا هو إبني الحَبيب. أسمَعو ليهو.“ و عَلى غَفلَه لَمّا عايَنو حَواليهُم، هُم ما شافو أي واحِد مَعاهُم بَعَد دا إلّا يَسُوع بَس. و وَكِت ما كانو نازِلين مِن الجَّبَل، أمَرُم ما يَخَبِّرو أي واحِد بِالهُم شافوهو، لِغايَة ما إبن الإنسان قام مِن بين المَيِّتين. عَشان كِدا، حَفَظو الكَلام لِنُفوسُم، و كانو يَسألو بَعضَهُم لِبَعض مَعنى القيامَه مِن بين المَيِّتين. و سألوهو: ”لِشِنو مُعَلِّمين القانون بِقولو إِيلِيَّا لازِم بِجي في الأوَّل؟“ و قال ليهُم: ”صَحيح، إِيلِيَّا يَجي في الأوَّل و بِرَجِّع كُلّو شي. و كيف مَكتوب عَن إبن الإنسان، إنّو يِتعَذَب كَتير، و يَكون مَرفوض؟ لَكِن أقول ليكُم، إِيلِيَّا جا بِالحَق، و النّاس عَمَلو بيهو زي ما دايرين، زي ما مَكتوب عَنّو.“ و لَمّا هُم جو لِلتَّلاميذ التّانيين، شافو ناس كُتار حَواليهُم، و مُعَلِّمين القانون يِتكَلَّمو مَعاهُم. و طَوّالي كُل النّاس لَمّا شافوهو، إستَغرَبو، و جَرو ليهو و سَلَّمو عَليهو. و هو سألُم و قال: ”تِتكَلَّمو مَعاهُم عَن شِنو؟“ و واحِد مِن النّاس رَدَّ عَليهو و قال: ”يا مُعَلِّم، جِبتَ ليك وَلَدي، عَشان عِندو روح أبكَم. و في كُلّو مَحَل الرّوح يَمسِكو، يَرميهو لِلأرض. و هو يَزَبِّد، و يَعُض أسنانو، و يَبقى يابِس. و طَلَبتَ لِتَلاميذَك أن يَطَلِّعوهو، لَكِن ما قِدرو.“ و رَدَّ عَليهُم و قال: ”يا ناس الزَّمَن البِدون إيمان، بَكون مَعاكُم لِمِتين؟ بَصبُر عَليكُم لِمِتين؟ جيبوهو لَي.“ و قَدَّمو ليهو الوَلَد. و لَمّا الرّوح شاف يَسُوع، طَوّالي رَمى الوَلَد، و هو وَقَع عَلى الأرض، و إدَّردَق، و إتزَبَّد. و يَسُوع سأل أبوهو و قال: ”مِن مِتين هو كان كِدا؟“ و قال: ”مِن الوَكِت الهو كان صَغَيِر. و مَرّات كَتيرَه رَماهو في النّار و في المويَه عَشان يَخرِبو. لَكِن إذا تَقدَر تَعمِل حاجَه، أرحَمنا و ساعِدنا.“ و يَسُوع قال ليهو: ”تَقول: إذا تَقدَر! كُلّو شي مُمكِن لِلزّول البِصَدِّق.“ و طَوّالي أبو الوَلَد كورَك و قال: ”أنا بَصَدِّق. ساعِدني في ضُعف إيماني.“ و لَمّا يَسُوع شاف النّاس يَجو جاريين سَوا، وَبَّخ الرّوح النَّجِس، و قال ليهو: ”يا الرّوح الأبكَم الأطرَش، أنا بَدّيك أمر اطلَع مِنّو، و لا تَدخُلو مَرَّه تانيَه أبَداً.“ و كورَك، و رَماهو بِشِدَّه، و طَلَع مِنّو. و الوَلَد كان زي المَيِّت، و عَلَشان كِدا، كَتير مِن النّاس قالو: ”هو مات.“ و لَكِن يَسُوع مَسَكو بِإيدو، و رَفَعو، و هو قام. و لَمّا دَخَل البيت، تَلاميذو سَألو و هُم بَراهُم، و قالو: ”نِحنا ما قِدِرنا نَطَلِّعو لِشِنو؟“ و قال ليهُم: ”ما مُمكِن يَطَلِّعو النّوع دا إلّا بِالصَّلاه و الصّوم.“ و مَرَقو مِن هِناك و مَرّو بِالجَّليل. و هو ما كان داير واحِد يَعرِف هو وين، عَشان كان يَعَلِّم تَلاميذو و يَقول ليهُم: ”إبن الإنسان يَسَلِّموهو لِإيدين النّاس. و هُم بِيَكتُلوهو. و لَمّا يَكتُلوهو، بِقوم بَعَد تَلاتَة أيام.“ و لَكِن ما فِهمو كَلامو، و خافو يَسألوهو. و جو لِكَفْرَنَاحُوم. و لَمّا يَسُوع كان في البيت، سألُم و قال: ”كُنتو تِتكَلَّمو مَعَ بَعض في السِّكَّه عَن شِنو؟“ و سَكَتو، عَشان كانو يِتكَلَّمو في السِّكَّه بَعضَهُم مَعَ بَعض، في مِنو هو الأكبَر مِنَّهُم. و هو قَنَّب، و نادى الإتناشَر، و قال ليهُم: ”إذا واحِد عاوِز يَبقى الأوَّلاني، لازِم يَبقى آخِر الكُل و خَدّام لِلكُل.“ بَعدين أخَد وَلَد، و وَقَّفو في وَسِطُم. و حَضَنو، و قال ليهُم، ”اليَقبَل واحِد مِن الأولاد زي دا فِشان إسمي، يَقبِلني. و اليَقبِلني، ما يَقبِلني، لَكِن هو الرَّسَّلني.“ يُوحَنَّا قال ليهو: ”يا مُعَلِّم، شُفنا واحِد يَطَلِّع شياطين بِإسمَك، و مَنَعناهو، عَشان ما يَتبَعنا.“ لَكِن يَسُوع قال: ”ما تَمنَعوهو. ما في واحِد يَعمِل بِقُوَّه بِإسمي و طَوّالي يَقدَر يَقول عَلي الشَّر. عَشان الما عَلينا، هو مَعانا. أقول ليكُم الحَق، البِدّيكُم كُبّايَه مويَه بِإسمي عَشان إنتو بِتوع المَسيح، هو ما يَوَدِّر أُجرَتو. و اليَكون سَبَب الخَطيَّه لِواحِد مِن الصُّغار ديل البِصَدِّقو بي، أحسَن ليهو إذا رَبَطو مُرحاكَه في رَقَبتو و رَموهو في البَحَر. و إذا إيدَك سَبَب خَطيَّتَك، أقطَعا. أحسَن ليك تَدخُل الحَياة بِإيد واحدَه مِن أن تَمشي لِجَهَنَّم لِلنّار الما بِتموت، و عِندَك إيدين. و إذا كُراعَك سَبَب خَطيَّتَك، أقطَعا. أحسَن ليك تَدخُل الحَياة أعرَج مِن أن يَرموك في الجَهَنَّم و عِندَك كِرعين. و إذا عينَك سَبَب خَطيَّتَك، طَلِّعا. أحسَن تَدخُل مَلَكوت الله بِعين واحدَه مِن أن يَرموك في جَهَنَّم و عِندَك عُيون، في المَكان الفيهو دودُم ما بِموت، و النّار ما بِتموت. عَشان كُلّو واحِد بِتمَلَّح بِالنّار. المِلِح كوَيس. لَكِن إذا المِلِح يَبقى مَسيخ، كيف تَرَجِّعو ليهو ضوقو؟ خَلّي يَكون ليكُم مِلِح في نُفوسكُم، و يَكون في سَلام بينكُم.“ و يَسُوع مَرَق، و مَشى لِمَحَل اليَهُودِيَّه و غادي الأُرْدُنّ. و ناس كُتار إتلَمّو ليهو، و كان يَعَلِّمُم كَمان زي عادَتو. و الفَرّيسيّين قَرَّبو ليهو عَشان يَجَرِّبوهو و سألوهو: ”بِالقانون لِلرّاجِل يَطَلِّق مَرَتو؟“ رَدَّ عَليهُم و قال: ”مُوسَى أمَركُم بِشِنو؟“ قالو: ”مُوسَى أدّا إذن لِلرّاجِل أن يَكتِب شَهادَة الطّلاق، و يَرَسِّلا مِنّو.“ و يَسُوع قال ليهُم: ”مُوسَى كَتَب الأمر دا عَلَشان قُلوبكُم قَوّيين. لَكِن مِن بِدايَة خَليقَة الدُّنيا، الله خَلَقُم راجِل و مَرَه. و فِشان دا، الرّاجِل بِسيب أبوهو و أُمّو، و يَلحَق مَرَتو. و الأتنين يَبقو جِسم واحِد. كِدا، هُم ما إتنين بَعَد دا، لَكِن جِسم واحِد. عَلَشان كِدا، الجَّمَعو الله، ما تَخَلّي زول يَفَرِّقو.“ و في البيت، تَلاميذو سَألو كَمان عَن دا. و قال ليهُم: ”اليَطَلِّق مَرَتو و بِتزَوَّج مَرَه تانيَه، يَعمِل زِنا عَليها. و إذا هي تَطَلِّق راجِلا و تَزَوِّج راجِل تاني، هي تَعمِل الزِّنا.“ و كانو يَقَدِّمو ليهو أولاد عَشان يَلمَسُم. و لَكِن التَّلاميذ كانو يَوَبِّخو النّاس القَدَّموهُم. و لَكِن لَمّا يَسُوع شافُم، زِعِل شَديد، و قال ليهُم: ”خَلّو الأولاد بِجو لَي، و ما تَمنَعوهُم. عَشان مَلَكوت الله ليهُم اليَكونو زي الأولاد ديل. أقول ليكُم الحَق، الما يَقبَل مَلَكوت الله زي وَلَد، ما بِدخُلو أبَداً.“ و أخَدُم في ضِرعاتو و كان يَبارِكُم، و هو يَخُت إيدينو عَليهُم. و وَكِت ما كان ماشي في السِّكَّه، واحِد جَرى و رَكَع قِدّامو و سَألو و قال ليهو: ”يا المُعَلِّم الصّالِح، أسَوّي شِنو عَشان أُورَث الحَياة الأبَديَّه؟“ و يَسُوع قال ليهو: ”لِشِنو تَسَمّيني صالِح؟ ما في زول واحِد صالِح إلّا واحِد، و هو الله. إنتَ تَعرِف الأوامِر: ما تَكتُل، ما تَعمِل الزِّنا، ما تَسرِق، ما تَشهَدو بِالكِضِب، ما تَغِش، إحتَرِم أبوك و أُمَّك.“ و قال ليهو، ”يا مُعَلِّم، حَفَظتو دي كُلَّها مِن الزَّمَن الأنا كُنتَ شاب.“ و يَسُوع عايَن ليهو، و حَبّاهو، و قال: ”ناقصَه ليك حاجَه واحدَه. أمشي، بيع كُلّو مالَك، و أدّيهو لِلمَساكين، و بِكون عِندَك كَنز في السَّما. و تَعال، و أتبَعني.“ و هو بِقى ما مَبسوط مِن الكِلمَه دي، و هو مَرَق حَزنان، عَشان كان عِندو أموال كَتيرَه. و يَسُوع عايَن حَوَليهو و قال لِتَلاميذو: ”كيف بِكون صَعب لِلغَنيين أن يدخُلو مَلَكوت الله!“ و التَّلاميذ إستَغرَبو مِن كَلامو. لَكِن يَسُوع قال ليهُم كَمان: ”يا أولادي، دُخول مَلَكوت الله صَعب جِدّاً! أسهَل لِجَمَل أن يَدخُل في عين إبرَه مِن أن راجِل غَني يَدخُل مَلَكوت الله.“ و إتعَجَّبو خَلاص، و قالو ليهو: ”كان كِدا، مِنو يَقدَر يَخلَص؟“ يَسُوع عايَن ليهُم و قال: ”دا ما مُمكِن لِلنّاس، لَكِن مُمكِن لِلَّه. عَشان كُلّو شي مُمكِن لِلَّه.“ و بُطْرُس إبتَدا يَقول ليهو: ”شوف، نِحنا خَلّينا كُلّو شي و تَبَعناك.“ يَسُوع قال: ”أقول ليكُم الحَق، ما في واحِد خَلّى بيت، ولّا أخوان، ولّا أخوات، ولّا أُم، ولّا أبو، ولّا أولاد، ولّا زِراعات فِشانّي و فِشان الإنجيل، إلّا يَقبَل مِيَّة مَرَّه هَسَّع في الزَّمَن دا: بُيوت، و أخوان، و أخوات، و أُمَّهات، و أولاد، و زِراعات مَعَ طَرد، و في الزَّمَن الجّاي الحَياة الأبَديَّه. و لَكِن كَتير مِن النّاس الفي الأوَّل بِكونو في الآخِر، و الفي الآخِر بِكونو في الأوَّل.“ و كانو في السِّكَّه، و يَطلَعو لِأُورُشَلِيم. و يَسُوع كان ماشي قِدّامُم. و كانو يِستَغرَبو، و هُم التَّبَعوهو كانو خايفين. و يَسُوع أخَد الإتناشَر مَرَّه تانيَه، و إبتَدا يَقول ليهُم عَن البِحصَل ليهو. و قال: ”شوفو، نِحنا نَطلَع لِأُورُشَلِيم. و بِسَلِّمو إبن الإنسان لِلقُسُس الكُبار و مُعَلِّمين القانون. و بِحكُمو عَليهو بِالموت، و بِسَلِّموهو لِلأُمَم. و بِضحَكو عَليهو، و يَبزَقو عَليهو، و يَجلِدوهو، و يَكتُلوهو. و بَعَد تَلاتَة أيام بِقوم.“ و يَعْقُوب و يُوحَنَّا أولاد زَبَدي قَرَّبو ليهو و قالو ليهو: ”يا مُعَلِّم، نِحنا دايِرينَك بِتَعمِل لينا كُلّو ما نَطلُب مِنَّك.“ و قال ليهُم: ”دايِرينّي أعمِل ليكُم شِنو؟“ قالو ليهو: ”أَدِّي لينا نَقَنِّب واحِد عَن يَمينَك، و واحِد عَن شِمالَك في مَجدَك.“ لَكِن يَسُوع قال ليهُم: ”إنتو ما تَعرِفو الإنتو تَطلُبو. إنتو تَقدَرو تَشرَبو مِن كُبّايَة الوَجَع الأنا بَشرَب مِنَّها؟ و تِتعَمَّدو بِالمَعموديَّه الأنا أتعَمَّد بيها؟“ و قالو ليهو: ”بِنَقدَر.“ و يَسُوع قال ليهُم: ”الكُبّايَه الأنا بَشرَب مِنَّها، إنتو بِتَشرَبو مِنَّها. و المَعموديَّه الأنا بَتعَمَّد بيها، بِتعَمَّدو إنتو. و لَكِن القُعاد عَن يَميني ولّا عَن شِمالي ما لَي أن أدّيكُم. لَكِن هو لِلحَضَّر ليهُم الله.“ و لَمّا العَشَرَه سِمِعو، إبتَدو يَزعَلو مِن يَعْقُوب و يُوحَنَّا. و يَسُوع ناداهُم ليهو و قال ليهُم: ”إنتو عارفين أن ديل المَعروفين يَكونو حُكّام الأُمَم، هُم يَعمِلو زي السَّيد عَليهُم. و الكُبار يَشتَغِلو بِسُلطَه عَليهُم. و لَكِن ما يَكون بينكُم زي دا. لَكِن العاوِز يَبقى كَبير بينكُم، لازِم يَكون خَدّام ليكُم. و العاوِز يَبقى الأوَّل بينكُم، لازِم يَكون عَبد لِلكُل. عَلَشان إبن الإنسان ما جا عَشان النّاس يَخدِموهو، لَكِن عَشان يَخدِم النّاس، و عَشان يَدّي نَفسو فِداء عَن ناس كُتار.“ و جو لِأَرِيحَا. و وَكِت ما كان يَمرُق مِن أَرِيحَا مَعَ تَلاميذو و ناس كُتار كَمان، بَارْتِيمَاوُس، يَعني وَلَد تِيمَاوُس، و هو مِسكين و عَميان، كان قاعِد في السِّكَّه يَسأل صَدَقَه. و لَمّا هو سِمِع إنّو كان يَسُوع النّاصِري، إبتَدا يَكورِك و يَقول: ”يا يَسُوع، إبن دَاوُد، أرحَمني!“ و ناس كُتار كانو يَوَبِّخوهو، و يَكَلِّموهو عَشان يَسكُت. و لَكِن هو كان يَكورِك زِيادَه: ”يا يَسُوع، إبن دَاوُد، أرحَمني.“ و يَسُوع وَقَف و قال: ”نادوهو.“ و نادو العَميان و قالو ليهو: ”شِد حيلَك. قوم، هو بِناديك.“ و رَمى توبو و نَطَّ، و جا لِيَسُوع. و يَسُوع قال ليهو: ”دايِرني أعمِل ليك شِنو؟“ و العَميان قال ليهو: ”يا سَيِّد، داير أشوف مَرَّه تانيَه.“ و قال ليهو: ”أمشي، إيمانَك شَفاك.“ و طَوّالي قِدِر يَشوف، و تَبَع يَسُوع في الدَرِب. و لَمّا قَرَّبو مِن أُورُشَلِيم و وِصلو بيت فاجي و بيت عَنيا عِند جَبَل الزّيتون، رَسَّل إتنين مِن تَلاميذو، و قال ليهُم: ”أمشو لِلحِلَّه القِدّامكُم، و طَوّالي لَمّا تَدخُلو فيها، بِتَلقو جَنى حُمارَه مَربوط، ما في واحِد رِكبو أبَداً. فِكُوهو، و جيبوهو. و إذا واحِد بِقول ليكُم: لِشِنو تَعمِلو كِدا؟ قولو: الرَّب مُحتاج ليهو، و يَرَجِّعو هِنا طَوّالي.“ و مَرَقو، و لِقو جَنى حُمارَه مَربوط عِند الباب بَرَّه مِن السِّكَّه. و فَكّوهو. و بَعض مِن النّاس الكانو واقفين هِناك قالو ليهُم: ”بِتَعمِلو شِنو، و إنتو تَفِكّو جَنى الحُمارَه؟“ و قالو ليهُم زي ما قال يَسُوع. و النّاس خَلّوهُم ياخدوهو. و جابو جَنى الحُمارَه لِيَسُوع، و رَمو هِدُومُم عَليهو. و يَسُوع قَعَد فوقو. و ناس كُتار فَرَشو هِدُومُم في السِّكَّه، و تانيين فَرَشو وَرَق مِن الشَّجَر الهُم قَطَعو مِن الزِّراعات. و هُم الإتقَدَّموهو و هُم التَّبَعوهو كانو يَكورِكو، و قالو: ”أُوصَنّا! مُبارَك هو الجّاي بِإسم الرَّب! مُبارَكَه مَملَكَة أبونا دَاوُد الجّايَه! أُوصَنّا في العالي!“ و دَخَل لِأُورُشَلِيم و مَشى لِلهيكَل. و لَمّا عايَن حَولو لِكُلّو شي، مَرَق لِبيت عَنيا مَعَ الإتناشَر، عَشان بِقى وَكِت المِسا. و في الصَّباح، لَمّا مَرَقو مِن بيت عَنيا، يَسُوع كان جَعان. و شاف مِن بَعيد شَجَرَة تين، العِندَها وَرَق. و مَشى يَشوف إذا يِمكِن يَلقا فيها حاجَه. و لَمّا وِصِل ليها، ما لِقى حاجَه إلّا وَرَق، عَلَشان ما كان الوَكِت لِلتّين. و قال ليها: ”ما في واحِد بياكُل مِنِّك ثِمار تاني مَرَّه أبَداً.“ و تَلاميذو سِمِعوهو. و جو لِأُورُشَلِيم، و دَخَل الهيكَل و إبتَدا يَطرُد النّاس الكانو بِبيعو و بِشتَرو في الهيكَل. و قَلَب طَرَبيزات الصَّرّافين و كَراسي النّاس الكانو بِبيعو الحَمام. و ما خَلّى أي واحِد يَشيل بُضاعَه في وَسط الهيكَل. و كان يَعَلِّم و قال: ”ما مَكتوب: يَسَمّو بيتي بيت الصَّلاه لِكُل الأُمَم؟ لَكِن إنتو سَوّيتوهو مَحَل حَراميَّه.“ و القُسُس الكُبار و مُعَلِّمين القانون سِمِعو، و بِقو يَكوسو طَريق عَشان يَكتُلوهو. عَلَشان هُم كانو خايفين مِنّو، عَشان كُل النّاس إتعَجَّبو مِن تَعليمو. و لَمّا بِقى المِسا، مَرَقو مِن المَدينَه. و في الصَّباح وَكِت ما كانو ماشين، شافو شَجَرَة التّين يِبسَت لِغايَة عُروقا. و بُطْرُس إتزَكَّر و قال ليهو: ”يا سَيِّد، شوف! شَجَرَة التّين الأنتَ لَعَنتَها يِبسَت.“ و يَسُوع رَدَّ عَليهُم و قال: ”خَلّي يَكون ليكُم إيمان بِالله. أقول ليكُم الحَق، أي زول اليَقول لِلجَّبَل دا: أمرُق، و أرمي نَفسَك في البَحَر، و هو ما بِشِك في قَلبو، لَكِن يَصَدِّق الهو يَقولو يَحصُل، دا بِكون عِندو. عَلَشان كِدا، أقول ليكُم، كُل الإنتو تَطلُبوهو في الصَّلاه، صَدِّقو إنَّكُم بِتَقبَلوهو، و يَكون ليكُم. و لَمّا تَقيفو و تَصَلّو، أغفِرو إذا عِندَكُم أي شي عَلى زول، عَشان أبوكُم كَمان الفي السَّما يَغفِر ليكُم خَطاياكُم. و إذا إنتو ما تَغفِرو، أبوكُم الفي السَّما ما يَغفِر خَطاياكُم.“ و جو لِأُورُشَلِيم مَرَّه تانيَه. و وَكِت ما هو كان ماشي في الهيكَل، القُسُس الكُبار و مُعَلِّمين القانون و الشُّيوخ جو ليهو، القالو ليهو: ”بِياتا سُلطَه بِتَعمِل الأعمال دي؟ و مِنو أدّاك السُّلطَه دي عَشان تَعمِل الحاجات دي؟“ يَسُوع قال ليهُم: ”و أنا كَمان بَسألكُم سؤَال واحِد. رُدّو عَلي، و أنا أقول ليكُم بِياتا سُلطَه بَسَوّي الحاجات دي. مَعموديَّة يُوحَنَّا كانَت مِن السَّما ولّا مِن النّاس؟ رُدّو عَلي.“ و إتكَلَّمو مَعَ بَعض، و قالو: ”إذا نَقول: مِن السَّما، هو بِقول: لِشِنو ما صَدَّقتوهو؟ و لَكِن إذا نَقول: مِن النّاس، ...“ و هُم كانو خايفين مِن النّاس، عَشان كُل النّاس حَسبو إنّو يُوحَنَّا نَبي حَقيقي. عَشان دا، رَدّو عَلى يَسُوع و قالو: ”ما بِنَعرِف.“ و يَسُوع قال ليهُم: ”و لا أنا بَقول ليكُم بِياتا سُلطَه بَسَوّي الحاجات دي.“ و إبتَدا يَقول ليهُم بِأمثال. ”كان في زول زَرَع جِنينَة العِنَب، و خَتَّ زَريبَه حَواليها و حَفَر حُفرَه لِعَصارَة العِنَب، و بَنى بُرج. و بَعدين أجَّرو لِمُزَارِعين، و سافَر لِبَلَد تانيَه. و لَمّا وَكِت الثَّمار جا، رَسَّل لِلمُزارعين خَدّام، عَشان ياخُد مِنَّهُم بَعَض مِن ثِمار الجِّنينَه. و أخَدوهو و ضَرَبوهو شَديد، و رَسَّلَوهو فاضي. و بَعدين رَسَّل ليهُم خَدّام تاني. و جَرَحو رَاسو، و شَتَموهو. و بَعدين رَسَّل واحِد تاني، و كَتَلوهو. و كِدا آخِرين، ضربو بَعض مِنَّهُم، و كَتَلو بَعض مِنَّهُم. و كان لِسَّع عِندو إبن واحِد مَحبوب. و في الآخِر، رَسَّلو ليهُم كَمان، و قال: هُم بِحتَرِمو إبني. و لَكِن المُزَارِعين ديلاك قالو بَعضَهُم لِبَعض: دا هو الوارِث. تَعالو، خَلّونا نَكتُلو، و الميراث بِكون لينا. و أخَدوهو، و كَتَلوهو، و رَموهو بَرَّه مِن الجِّنينَه. سيد الجِّنينَه بيَعمِل شِنو؟ هو بِجي و يَخرَب المُزَارِعين، و بِدّي الجِّنينَه لِناس تانيين. إنتو ما قَريتو المَكتوب دا؟ الحَجَر الرَّفَضوهو البَنّايين بِقى راس الرُّكُن. دا كان مِن الرَّب، و هو عَجيب في عُيونّا.“ و جَرَّبو يَقبَضو عَليهو، و لَكِن خافو مِن النّاس. عَلَشان هُم فِهمو إنّو قال المَثَل عَليهُم. و كِدا، خَلّوهو و مَرَقو. و رَسَّلو ليهو بَعَض مِن الفَرِّيسِيِّين و بَعض مِن الهِيرُودُسين عَشان يَقبُضوهو في الكَلام. و جو ليهو و قالو: ”يا مُعَلِّم، بِنَعرِف إنتَ تَقول الحَق، و ما تَغَيِّر كَلامَك عَشان فِكر النّاس. عَلَشان إنتَ ما تَعمِل فارِق بين النّاس، و لَكِن تَعَلِّم طَريق الله بِالحَق. واجِب عَلينا نَدّي الطُّلبَه لِقَيصَر، ولّا لا؟ نَدّيها ولّا ما نَدّيها؟“ و لَكِن يَسُوع عِرِف نِفاقُم، و قال ليهُم: ”لِشِنو تَجَرِّبوني؟ جيبو لَي دينار عَشان أشوفو.“ و جابوهو ليهو. و قال ليهُم: ”الصّورَه دي صورَة مِنو؟ و الكِتابَه كِتابَة مِنو؟“ قالو ليهو: ”بِتاعَت قَيصَر.“ و يَسُوع قال ليهُم: ”أدفَعو لِقَيصَر حاجات قَيصَر، و لِلَّه حاجات الله.“ و كانو بِستَغرَبو مِنّو. و الصَّدّوقيين جو ليهو، اليَقولو ما في قيامَه. و كانو يَسألوهو، و يَقولو: ”يا مُعَلِّم، مُوسَى كَتَب لينا، إذا أخو زول يَموت و يَسيب مَرَتو، و لَكِن ما عِندو وَلَد، لازِم أخوهو بياخُد مَرَتو و بِجيب لِأخوهو أولاد. و كانو في سَبعَه أخوان. و الأوَّل أخَد مَرَه، و مات، و ما عِندو وَلَد. و التّاني أخَدا، و مات، و ما عِندو وَلَد. و التّالِت كَمان عَمَل زي دا. و السَّبعَه أخوان ما عِندَهُم أولاد. و بَعَد كُلُّهُم، المَرَه ماتَت كَمان. و في القيامَه لَمّا بِقومو، هي بِتكون زوجَة مِنو؟ عَشان السَّبعَه أخَدوها تَكون ليهُم زوجَه.“ و يَسُوع قال ليهُم: ”عَلَشان كِدا إنتو ما غَلطانين؟ عَشان ما تَفهَمو الكُتُب، و لا قُوَّة الله؟ عَشان لَمّا يَقومو مِن بين المَيِّتين، ما يِتزَوَّجو ولّا يَزَوِّجو، لَكِن يَكونو زي المَلائكَه الفي السَّما. و لَكِن عَن المَيِّتين البِقومو، ما قَريتو في كِتاب مُوسَى عَن الشَّجَرَه الصَّغَيرَه؟ كيف الله قال ليهو: أنا إلَه إِبْرَاهِيم، و إلَه إِسْحَاق، و إلَه يَعْقُوب؟ هو ما إلَه المَيِّتين، لَكِن إلَه الحَيين. إنتو غَلطانين جِدّاً.“ و واحِد مِن مُعَلِّمين القانون قَرَّب ليهو و سِمِعُم يِتكَلَّمو مَعَ بَعض. و لَمّا شاف إنّو رَدَّ عَليهُم تَمام، سَألو: ”ياتو أمر المُهِم مِن الكُل؟“ يَسُوع رَدَّ عَليهو و قال: ”الأمر الأوَّل، هو: أسمَع، يا إِسْرَائِيل. الرَّب إلَهنا هو رَب واحِد. و تَحِب الرَّب إلَهَك بِكُلّو قَلبَك، و كُلّو نَفسَك، و كُلّو فِكرَك، و كُلّو قُوَّتَك. و دا هو التّاني: تَحِب قَريبَك زي نَفسَك. ما في أمر أكبَر مِن ديل.“ و مُعَلِّم القانون قال ليهو: ”سَمِح، يا مُعَلِّم. بِالحَق قُلتَ الله واحِد، و ما في تاني إلّا هو. و مَحَبَّتو بِكُل القَلب، و بِكُل الفَهم، و بِكُل القُوَّه، و مَحَبَّة القَريب زي نَفسَك، دا أهَمّا مِن كُل الضَّبايح المَحروقَه و الضَّبايح التّانيَه.“ و لَمّا يَسُوع شاف هو رَدَّ عَليهو بِحِكمَه، قال ليهو: ”إنتَ ما بَعيد مِن مَلَكوت الله.“ و بَعَد دا، كُلّو واحِد كان خايِف يَسألو سؤَال تاني. و وَكِت ما يَسُوع كان يَعَلِّم في الهيكَل، قال: ”كيف يَقولو مُعَلِّمين القانون أن المَسيح هو إبن دَاوُد؟ دَاوُد نَفسو قال بِالرّوح القُدُس: الرَّب قال لِرَبّي: أقعُد عَن يَميني لِغايَة ما بَخُت عُدوانَك تِحِت كِرعينَك. دَاوُد نَفسو يَناديهو رَب. كيف هو يَكون إبنو؟“ و الجَّمَع الكَبير كانو يَسمَعوهو بِفَرَح. و في تَعليمو قال: ”خَلّو بالكُم مِن مُعَلِّمين القانون. هُم بِحِبّو المَشي بِتيبان طَويلَه، و السَّلامات في الأسواق، و الكَراسي الأوّلانيّن في بُيوت الرَّب، و مَحَلّات المُحتَرِمَه في العَزومات. هُم بِياكُلو بُيوت الأرامِل، و يَصَلّو صَلَوات وَكِت طَويلَه بِالكِضِب. ديل بِيَقبَلو حُكم أكبَر.“ و يَسُوع قَعَد جَنب الخَزنَه. و كان يَعايِن كيف النّاس كانو يَرمو الفِلوس في الخَزنَه. و ناس غَنيين كَتيرين كانو يَرمو فِلوس كَتير. و أرمَلَه مِسكينَه جات و رَمَت مِلّيمين، و دا أقَل مِن تَعريفَه. و يَسُوع نادى ليهو تَلاميذو، و قال ليهُم: ”أقول ليكُم الحَق. الأرمَلَه المِسكينَه دي رَمَت أكتَر مِن كُل النّاس اليَرمو في الخَزنَه. عَلَشان كُلَّهُم رَمو مِن كَترَت مالُم، و لَكِن دي مِن إحتياجا رَمَت كُل العِندَها، كُل البِتعيش بيهو.“ و وَكِت ما هو كان يَمرُق مِن الهيكَل، واحِد مِن تَلاميذو قال ليهو: ”يا مُعَلِّم، شوف الحُجار الكُبار ديل! و البِنايات الجَّميلَه دي.“ و يَسُوع قال ليهو: ”تَشوف البِنايات العَظيمَه دي؟ ما بِخَلّو هِنا حَجَر عَلى حَجَر أبَداً الما يَرموها تِحِت.“ و وَكِت ما يَسُوع كان قاعِد عَلى جَبَل الزّيتون مِقابِل الهيكَل، بُطْرُس و يَعْقُوب و يُوحَنَّا و أنْدَرَاوُس سألوهو و هُم بَراهُم، و قالو: ”كَلِّمنا، الحاجَه دي بِتكون مِتين؟ و شِنو العَلامَه لَمّا كُل الحاجات دي قَرَّبَت تَتِم؟“ و يَسُوع إبتَدا يَقول ليهُم: ”خَلّو بالكُم عَشان واحِد ما بِغِشّكُم. ناس كُتار بِجو بِإسمي و بِقولو: أنا هو! و هُم بِغِشّو ناس كَتيرين. و لَمّا تَسمَعو عَن حُروب و خَبَر حُروب، ما تَخافو. لازِم الحاجات دي تَحصَل. لَكِن لِسَّع ما تَكون النِّهايَه. عَشان أُمَّه بِتقوم عَلى أُمَّه و مَملَكَه عَلى مَملَكَه. و بِتكون في زَلازِل في مَحَلّات مُختَلِفَه. و بِكون جوع. دي بِدايَة الأوجاع. لَكِن إنتو، خَلّو بالكُم لِنُفوسكُم، عَشان هُم بِسَلِّموكُم لِلمَحاكِم، و يَضرُبوكُم في بُيوت الرَّب. و بِتقومو قِدّام مُديرين و مُلوك فِشانّي أنا، عَشان تَكونو شَهادَه ليهُم. و في الأوَّل لازِم بِبَشِّرو بِالإنجيل لِكُل الأُمَم. و لَمّا بِسوقوكُم لِلقَضيَّه، و يَسَلِّموكُم، ما تَفَكِّرو كَتير قُبّال الوَكِت عَن الإنتو بِتقولوها. لَكِن إتكَلَّمو زي ما الله بِدّي ليكُم في السّاعَه ديك، عَشان ما إنتو المِتكَلِّمين، لَكِن الرّوح القُدُس. و الأخو بِسَلِّم أخوهو لِلموت، و الأبو وَلَدو. و الأولاد بِقومو عَلى والِدينُم و بِكونو السَّبَب عَشان يَكتُلوهُم. و النّاس كُلّو بِكرَهوكُم عَشان خاطِر إسمي. لَكِن اليِتحَمَّل لِغايَة الآخِر بِيَخلَص. و لَمّا تَشوفو الشّي النَّجِس اليَخرَب، واقِف في المَحَل الما لازِم يَكون في، (خَلّي اليَقرا يَفهَم)، في الوَكِت دا، خَلّوهُم الفي يَهُودِيَّه يَهرُبو لِلجِّبال، و هو الفي بَرَّه مِن بيتو ما يَرجَع و يَدخُل بيتو عَشان يَشيل حاجَه. و هو الفي الزِّراعَه ما يَرجَع عَشان ياخُد توبو. و حُزن لِلحامِلين و اليَرَضِّعو أولادُم في الأيام ديك! و صَلّو إنّو ما يَحصُل في الخَريف. عَلَشان الأيام ديك بِتكون أيام الضّيق. و ما كان في ضيق زي دا مِن وَكِت ما الله خَلَق الدُّنيا لِغايَة هَسَّع، و ما بِكون ضيق زي دا أبَداً. و إذا الرَّب ما كان قَصَّر الأيام، ما في واحِد كان يَخلَص. و لَكِن فِشان المُختارين الإختارُم، هو قَصَّر الأيام. و في الوَكِت داك، إذا واحِد بِقول ليكُم: شوفو! أهو دا المَسيح! ولّا: شوفو! هو هِناك! ما تَصَدِّقوهو. عَشان مُسَحَه كَضّابين و أنبياء كَضّابين بِقومو، و بيَعمِلو عَلامات و عَجايِب حَتّى يَغِشّو المُختارين (إذا مُمكِن). و لَكِن خَلّو بالكُم، أنا خَبَّرتَكُم بِكُلّو شي مِن قُبّال. و لَكِن في الأيام ديلاك، بَعَد الضّيق داك، الشَّمِش بِتكون ضُلُمَّه، و القَمَر ما بِدّي نورو. و النُّجوم بِيَقَعو مِن السَّما، و القُوّات الفي السَّما بِتهَزّو. في الوَكِت داك، بِشوفو إبن الإنسان جاي في سَحاب بِقُوَّه كَبيرَه و بِمَجد. و في الوَكِت داك بِرَسِّل المَلائكَه، و بِلِم المُختارين مِن المَحَلّات التَّجو مِنَّها الأربَعَه أرياح، و مِن آخِر الدُّنيا لِآخِر السَّما. مِن شَجَرَة التّين، إتعَلَّمو المَثَل. أوَّل ما الفَرَع يَبقى لَيِّن، و الوَرَق يَطلَع، إنتو بِتَعرِفو الخَريف قَريب. و كِدا كَمان، لَمّا تَشوفو الحاجات دي تَحصُل، بِتَعرِفو هو قَريب، عَلى الباب. أقول ليكُم الحَق، ناس الزَّمَن دا ما بِفوتو لِغايَة ما يَحصُل كُلّو دا. السَّما و الأرض بِفوتو، و لَكِن كَلامي ما بِفوت. لَكِن بِخُصوص اليوم داك و السّاعَه ديك، ما في واحِد يَعرِف عَنّو، و لا المَلائكَه الفي السَّما، و لا الإبن، إلّا الأبو. خَلّو بالكُم، و أحرِسو، و صَلّو. عَشان إنتو ما بِتَعرِفو الوَكِت. هو زي زول مِسافِر. لَمّا يَسيب بيتو، يَدّي لِخَدّامينو السُّلطَه، لِكُلّو واحِد في شُغلو. و يأمُر البَوّاب أن يَحرَس. عَلَشان دا، أحرِسو، عَشان إنتو ما بِتَعرِفو الوَكِت البِجي فيهو رَب البيت، إذا في المِسا، ولّا في نُص اللّيل، ولّا وَكِت كوراك الدّيك، ولّا في الصَّباح. إذا بِجي بِدون خَبَر، ما تَخَلّوهو يَلقاكُم نايمين. و الأنا بَقولو ليكُم، بَقولو لِلكُل: أحرِسو.“ و كان عيد الفِصَح و عيد الفَطير بَعَد يومين. و القُسُس الكُبار و مُعَلِّمين القانون كانو يَكوسو طَريق عَشان يَقبُضو عَلى يَسُوع بِمَكَر، و يَكتُلوهو. عَشان كانو يَقولو: ما نَمسِكو وَكِت العيد، عَشان يِمكِن بِتكون في دَوشَه بين النّاس. و وَكِت ما كان في بيت عَنيا، كان قاعِد في الطَّرَبيزَه في بيت سِمْعَان العِندو جِزام. و مَرَه جات ليهو و عِندَها قِزازَه مِن رُخام، فيها ريحَه نارِدين صافي غاليَه جِدّاً. و كَسَّرَت القِزازَه و كَبَّت الرّيحَه عَلى رَاسو. و بَعض النّاس كانو زَعلانين في نُفوسُم، و قالو: ”لِشِنو هي وَدَّرَت الرّيحَه كِدا؟ عَشان كان مُمكِن يَبيعوها لِماهِيَّة شَغّال لِسَنَه واحدَه، و يَدُّوها لِلمَساكين.“ و كانو يَوَبِّخوها بِشِدَّه. و لَكِن يَسُوع قال: ”خَلّوها. لِشِنو تَتَعِّبوها؟ هي عَمَلَت لَي حاجَه جَمِيلَه. المَساكين مَعاكُم دايماً، و في أي وَكِت الإنتو عاوِزين، تَقدَرو تَعمِلو ليهو الخير. و لَكِن أنا ما بَكون مَعاكُم دايماً. هي عَمَلَت زي ما قِدرَت. مَسَحَت جِسمي عَشان تَجَهِّزني قُبّال ما يَدفِنوني. و أقول ليكُم الحَق، في كُلّو مَحَل اليَبَشِّرو بِالإنجيل في الدُّنيا كُلّو، بِخَبِّرو بِعَمَلا كَمان، عَشان يِتذَكَّروها.“ بَعدين، يَهُوذَا إِسْخَرْيُوطِي، واحِد مِن الإتناشَر، مَشى لِلقُسُس الكُبار عَشان يَسَلِّمو ليهُم. و لَمّا سِمِعوهو، كانو مَبسوطين، و وَعَدو يَدُّوهو فِضَّه. و هو كان يَفَتِّش عَلى فُرصَه عَشان يَسَلِّمو ليهُم. و أوَّل يوم مِن عيد الفَطير، لَمّا كان عادَتُم أن يَضبَحو خَروف الفِصَح، تَلاميذو قالو ليهو: ”إنتَ عاوِزنا نَمشي وين عَشان نَحَضِّر ليك عَشان تَاكُل الفِصَح؟“ و رَسَّل إتنين مِن تَلاميذو، و قال ليهُم: ”أمشو لِلمَدينَه، و زول شايل بُرمَة مويَه بِقابِلكُم. أتبَعوهو. و في البيت الهو يدخُلو، قولو لِسيد البيت: المُعَلِّم يَقول: وين أوضَة الضُّيوف الأنا باكُل فيها الفِصَح، أنا و تَلاميذي؟ و هو بِوَرّيكُم أوضَه كَبيرَه في فوق، مُفَرَّشَه و جاهِزَه. حَضِّرو لينا هِناك.“ و التَّلاميذ مَشو لِلمَدينَه، و لِقوهو زي ما قال ليهُم. و حَضَّرو الفِصَح. و في المِسا، يَسُوع جا مَعَ الإتناشَر. و وَكِت ما كانو قاعِدين ياكلو، يَسُوع قال: ”أقول ليكُم الحَق، واحِد مِنَّكُم بِسَلِّمني، و هو ياكُل مَعاي.“ و إبتَدو يَكونو حَزنانين و يَقولو ليهو واحِد وَرا واحِد: ”أنا هو؟“ قال ليهُم: ”هو واحِد مِن الإتناشَر، اليَدَخِّل إيدو مَعاي في الصَّحَن. عَشان إبن الإنسان يَمشي، زي ما مَكتوب عَنّو. و لَكِن مُصيبَه لِلزّول داك اليَسَلِّم إبن الإنسان. كان أحسَن لِلرّاجِل داك إذا ما كان مَولود.“ و وَكِت ما كانو ياكلو، أخَد عيش، و بارَك، و كَسَّر، و أدّاهُم، و قال: ”أُخدو، دا هو جِسمي.“ بَعدين، أخَد كُبّايَه، و شَكَر، و أدّاهُم. و كُلَّهُم شِرِبو مِنَّها. و قال ليهُم. ”دا هو دَمّي لِلإتِّفاق الجَّديد، الإتكَبّى فِشان ناس كُتار. أقول ليكُم الحَق، أنا ما بَشرَب تاني مِن مويَة العِنَب أبَداً، لِغايَة اليوم داك الأنا بَشرَبا جَديد في مَلَكوت الله.“ و بَعَد ما رَتَّلو تَرتيلَه، مَرَقو لِجَبَل الزّيتون. و يَسُوع قال ليهُم: ”كُلَّكُم ماشين تَرَجِّعو عَنّي، عَشان مَكتوب: أنا بَضرُب الرّاعي، و الخِرفان بِتفَرتَكو. و لَكِن بَعَد قيامَتي بَمشي قِدّامكُم لِلجَّليل.“ و بُطْرُس قال ليهو: ”إذا كُلَّهُم بِرَجِعو عَنَّك، أنا ما بَرَجِّع عَنَّك أبَداً.“ و يَسُوع قال ليهو: ”أقول ليك الحَق، اليوم دا في اللّيل، قُبّال ما الدّيك يَكورِك مَرَّتين، إنتَ بِتَنكُرني تلاتَه مَرّات.“ و لَكِن قال بِشِدَّه: ”إذا لازِم أموت مَعاك، أنا ما بَنكُرَك أبَداً.“ و كُلَّهُم قالو كِدا. و مَرَقو لِمَحَل إسِما جَثْسَيْمَانِي. و قال لِتَلاميذو: ”أقعُدو هِنا لِغايَة ما أنا أصَلّي.“ و أخَد مَعاهو بُطْرُس و يَعْقُوب و يُوحَنَّا، و إبتَدا يِستَغرَب شَديد خَلاص، و بِقى ليهو ضيق شَديد. و قال ليهُم: ”نَفسي حَزينَه جِدّاً، حَتّى الموت. إستَنّو هِنا، و أحرِسو.“ و مَشى قِدّام شوَيَه، و كان يَقَع عَلى الأرض، و كان يَصَلّي عَشان السّاعَه تَفوت مِنّو إذا مُمكِن. و قال: ”أبّا، يا أبوي، كُلّو شي مُمكِن ليك. شيل مِني كُبّايَة الضّيق. لَكِن مُش زي ما أنا داير، لَكِن زي ما إنتَ داير.“ و جا و لِقاهُم نايمين، و قال لِبُطْرُس: ”سِمْعَان، إنتَ نايِم؟ ما قِدِرتَ تَحرَس و لا ساعَه واحدَه؟ أحرِسو، و صَلّو، عَشان ما تَدخُلو في تَجرِبَه. الرّوح رَضيان، لَكِن الجِّسم ضَعيف.“ و مَشى مَرَّه تانيَه و صَلّى، و قال نَفس الكَلام. و جا تاني مَرَّه، و لِقاهُم نايمين، عَشان عُيونُم كانَت تَقيلَه. و ما عِرِفو كيف يَرُدّو عَليهو. و رَجَع تالِت مَرَّه، و قال ليهُم: ”إنتو لِسَّع نايمين و تِستَريحو؟ كِفايَه، السّاعَه جات. يَسَلِّمو إبن الإنسان لِإيدين الخاطيين. قُومو، نَمشي. شوفو، هو البِسَلِّمني قَرَّب.“ و طَوّالي، وَكِت ما كان لِسَّع يتكَلَّم، يَهُوذَا جا، و هو واحِد مِن الإتناشَر، و مَعاهو ناس كُتار بِسُيوف و عَصايات. و هُم جو مِن القُسُس الكُبار، و مُعَلِّمين القانون، و الشُّيوخ. و المُسَلِّم كان أدّاهُم عَلامَه، و قال: ”الأنا بَسَلِّم عَليهو شَديد بِبوسَه، هو هو. أمسِكوهو و قودوهو بِحُرّاس.“ و جا، و طَوّالي قَرَّب لِيَسُوع و قال: ”يا سَيِّد!“ و سَلّم عَليهو شَديد بِبوسَه. و هُم خَتّو إيدينُم عَليهو و قَبَضوهو. و واحِد مِن الواقفين سَلّا سيفو، و ضَرَب عَبد رَئيس القُسُس، و قَطَع أضانو. و يَسُوع رَدَّ و قال ليهو: ”جيتو بِسُيوف و عَصايات زي عَلى حَرامي عَشان تَمسِكوني؟ كُنتَ مَعاكُم كُلّو يوم بَعِلِّم في الهيكَل، و إنتو ما مَسَكتوني. و لَكِن لازِم الكُتُب تَتِم.“ و كُلَّهُم خَلّوهو، و هَرَبو. و واحِد شاب كان يَتبَعو لابِس قُماش تيل عَلى جِسمو. و مَسَكوهو. و لَكِن خَلّى القُماش و هَرَب عَريان. و قادو يَسُوع لِرَئيس القُسُس. و كُل القُسُس الكُبار و الشُّيوخ و مُعَلِّمين القانون إتلَمّو. و بُطْرُس تِبعو مِن بَعيد لِغايَة حوش رَئيس القُسُس. و كان قاعِد مَعَ الحُرّاس، و يِدَّفّى عِند النّار. و القُسُس الكُبار و المَجِلس كُلّو كانو يَطلُبو شَهادَه عَلى يَسُوع فِشان يَكتُلوهو. و لَكِن ما لِقوها. عَشان ناس كُتار كانو يَشهَدو عَليهو شَهادَه كاضَبَه، و شَهاداتُم ما إتَّفَقَت. و بَعض مِنَّهُم وَقَفو، و كانو يَشهَدو عَليهو شَهادَه كاضَبَه، و قالو: ”نِحنا سِمِعناهو يَقول: أنا بَخرَب الهيكَل دا المَصنوع بِالإيد، و بَعَد تَلاتَة أيام أبني واحِد تاني، ما مَصنوع بِالإيد.“ و في دا كَمان شَهادَتُم ما إتَّفَقَت. و رَئيس القُسُس وَقَف في الوَسط، و كان يَسأل يَسُوع و يَقول: ”إنتَ ما تَرُد عَلي بِحاجَه؟ دا شِنو النّاس يَشهَدو عَليك؟“ لَكِن هو كان يَسكُت، و ما رَدَّ عَليهو بِحاجَه. و رَئيس القُسُس سَألو مَرَّه تانيَه و قال ليهو: ”إنتَ المَسيح، إبن المُبارَك؟“ و يَسُوع قال: ”أنا هو. و إنتو بِتشوفو إبن الإنسان قاعِد عَن يَمين القُدرَه و جاي في سَحاب السَّما.“ و رَئيس القُسُس شَرَّط هِدومو و قال: ”لِشِنو نَحتاج بَعَد دا لِشاهِدين زِيادَه. سِمِعتو التَّجديف. فِكرَكُم شِنو؟“ و كُلَّهُم حَكَمو عَليهو إنّو مُستَحِق الموت. و بَعض مِنَّهُم بِقو يَبزُقو عَليهو، و يَغَطّو وَشّو، و يَضرُبوهو، و يَقولو ليهو: ”إتنَبّأ!“ و الحُرّاس أخَدوهو و ضَرَبوهو. و وَكِت ما بُطْرُس كان تِحِت في الحوش، واحدَه مِن خَدّامات رَئيس القُسُس جات. و لَمّا شافَت بُطْرُس يِدَّفّى، عايَنَت ليهو و قالَت: ”إنتَ كَمان كُنتَ مَعَ يَسُوع النّاصِري.“ و لَكِن نَكَر و قال: ”أنا ما بَعرِف الإنتي تَقولي، و لا بَفهَمو.“ و مَرَق لِلحوش البَرّاني. و الخَدّامَه شافَتو مَرَّه تانيَه، و إبتَدَت تَقول لِلنّاس الكانو واقِفين هِناك: ”الزّول دا واحِد مِنَّهُم.“ و كان يَنكُر تاني مَرَّه. و بَعَد شوَيَه، الكانو واقفين كانو يَقولو لِبُطْرُس: ”بِالحَق، إنتَ مِنَّهُم، عَشان إنتَ مِن الجَّليل.“ و بِقى يَلعَن نَفسو و يَحلِف و يَقول: ”أنا ما بَعرِف الرّاجِل دا الإنتو تِتكَلَّمو عَنّو.“ و طَوّالي الدّيك كورَك تاني مَرَّه. و بُطْرُس إتزَكَّر الكَلام القالو ليهو يَسُوع: ”قُبّال ما الدّيك يَكورِك مَرَّتين، بِتَنكُرني تلاتَه مَرّات.“ و لَمّا فَكَّر فيهو، إبتَدا يَبكي. و طَوّالي في الصَّباح، القُسُس الكُبار، مَعَ الشُّيوخ و مُعَلِّمين القانون، و كُل المَجلِس إتكَلَّمو مَعَ بَعض. و رَبَطو يَسُوع، و قادوهو، و سَلَّموهو لِبِيلاطُس. و بِيلاطُس سَألو و قال: ”إنتَ مَلِك اليَهود؟“ و رَدَّ عَليهو و قال: ”إنتَ تَقول.“ و القُسُس الكُبار كانو يَشتَكو عَليهو بِحاجات كَتيرَه. و بِيلاطُس سَألو مَرَّه تانيَه و قال: ”ما تَرُد عَليهُم بِحاجَه؟ شوف كَم حاجَه يَشتَكو عَليك.“ و لَكِن يَسُوع لِسَّع ما رَدَّ عَليهو بِحاجَه. و بِيلاطُس إستَغرَب. و في العيد، كانَت العادَه يَفِك مَحبوس واحِد الطَّلَبو النّاس. و كان في راجِل إسمو بَراباس. و كان في السِّجِن مَعَ ناس الفِتنَه الكانو عَمَلو كَتل في الفِتنَه. و النّاس طَلَعو، و إبتَدو يَطلُبو مِن أن يَعمِل زي ما كان يَعمِلو كُلّو عيد. و رَدَّ عَليهُم و قال: ”عاوِزينّي أفِك ليكُم مَلِك اليَهود؟“ عَشان هو كان يَعرِف القُسُس الكُبار سَلَّموهو مِن الحَسَد. لَكِن القُسُس الكُبار حَرَّكو النّاس عَشان يَطلُبو مِن بِيلاطُس يَفِك ليهُم بَراباس بِدالو. و مَرَّه تانيَه بِيلاطُس رَدَّ عَليهُم و قال: ”و كِدا، بَعمِل شِنو لِلزّول الإنتو تَسَمّوهو مَلِك اليَهود؟“ و كورَكو و قالو: ”أصلُبو!“ و بِيلاطُس قال ليهُم: ”لِشِنو؟ خَطِيَّتو شِنو؟“ و لَكِن كورَكو زِيادَه: ”أصلُبو.“ و بِيلاطُس كان داير يَبسِط النّاس. و عَشان دا، فَكَّ ليهُم بَراباس. و بَعَد ما جَلَد يَسُوع، سَلَّمو عَشان يَصلُبوهو. و العَساكِر قادوهو في جُوَّه الحوش، يَعني بيت المُدير، و لَمّو كُل الجّيش. و لَبَّسوهو جَلّابيَّه حَمرَه، و عَمَل تاج مِن شوك، و خَتّوهو عَليهو. و إبتَدو يَسَلِّمو عَليهو و يَقولو: ”السَّلام، يا مَلِك اليَهود.“ و كانو يَضرُبو رَاسو بِعَصايَه، و يَبزُقو عَليهو، و يَركَعو قِدّامو عَشان يَعبُدوهو. و بَعَد ما ضِحِكو عَليهو، قَلَعو مِنّو الجَلّابيَّه الحَمرَه، و لَبَّسوهو هِدومو، و قادوهو بَرَّه عَشان يَصلُبوهو. و واحِد إسمو سِمْعَان القِرَواني، أبو ألِسكَندَر و روفُس، كان بِفوت، و هو جاي مِن الزِّراعَه. و أخَدوهو بِقُوَّه عَشان يَشيل صَليبو. و قادوهو لِلمَحَل اليَسَمّوهو جُلجُتَه، يَعني مَحَل جُمجُمَه. و قَدَّمو ليهو خَمرَه، مَلَخبَتَه بِحاجَه مُرَّه. لَكِن أبى ياخُدا. و صَلَبوهو، و قَسَمو هِدومو بِينُم و رَمو القُرَع عَليهو، عَشان يَشوفو كُلّو واحِد ياخُد شِنو. و كانَت السّاعَه تِسعَه في الصَّباح لَمّا صَلَبوهو. و الشَّكوى العَليهو الكان مَكتوب قال: ”مَلِك اليَهود.“ و صَلَبو مَعاهو إتنين حَراميَّه، واحِد عَن يَمينو و التّاني عَن شِمالو. و الكِتاب كِمِل اليَقول: ”حَسَبوهو مَعَ اليَكَسِّر القانون.“ و النّاس الكانو بِفوتو شَتَموهو، و هُم يَهِزّو روسينُم و يَقولو: ”هيي، إنتَ البِتَخرَب الهيكَل و تَبنيهو في تَلاتَة أيام، خَلِّص نَفسَك، و أنزِل مِن الصَّليب!“ و كِدا كَمان، القُسُس الكُبار كانو يَضحَكو عَليهو بَعضَهُم بَعض مَعَ مُعَلِّمين القانون، و يَقولو: ”هو خَلَّص ناس تانيين، لَكِن هو ما يَقدَر يَخَلِّص نَفسو. خَلّي المَسيح دا، مَلِك إِسْرَائِيل، يَنزِل مِن الصَّليب هَسَّع دي عَشان نَشوف و نَصَدِّق.“ و كانو المَصلوبين مَعاهو يَشتِموهو كَمان. و السّاعَه إتناشَر، كانَت في ضُلُمَّه عَلى الأرض كُلَّها لِغايَة السّاعَه تلاتَه. و السّاعَه تلاتَه، يَسُوع كورَك بِصوت عالي، و قال: ”إلوي، إلوي، لَما شَبَقتَني؟“ يَعني: ”إلَهي، إلَهي، لِشِنو سيبتَني؟“ و بَعَض مِن الواقفين هِناك سِمِعو و قالو: ”أسمَعو، هو يَنادي إِيلِيَّا.“ و واحِد مِنَّهُم جَرى، و مَلا سِفِنجَه بِخَل، و خَتّاها عَلى عَصايَه طَويلَه، و أدّاهو ليهو عَشان يَشرَبو، و قال: ”إستَنّى، نَشوف إذا إِيلِيَّا بِجي يَنَزِّلو.“ و يَسُوع كورَك بِصوت عالي، و سَلّم روحو. و القُماش الكَبير الفي الهيكَل إتشَرَّط لِإتنين، مِن فوق لِتِحِت. و رَئيس الجّيش كان واقِف قِدّام يَسُوع. و لَمّا شاف إنّو كورَك و سَلّم روحو كِدا، قال: ”بِالحَق الإنسان دا كان إبن الله.“ و كانو في نِسوان كَمان يَعاينو مِن بَعيد. و بِينُم كانو مَرْيَم المَجْدَلِيَّه، و مَرْيَم أُم يَعْقُوب الصَّغَير و يُوسِي، و سَلومَه. و لَمّا يَسُوع كان في الجَّليل، النِّسوان ديل كانو تَبَعوهو و خَدَموهو. و كَمان نِسوان تانيات كَتيرات الجّو مَعاهو لِأُورُشَلِيم كانو هِناك. و كان يوم الإستِعداد، يَعني، اليوم قُبّال السَّبِت. و لَمّا بِقى المِسا، يُوسِف مِن الرَّامَه جا. و هو عُضو مُحتِرَم في المَجِلس، و كان يَنتَظِر مَلَكوت الله. و شَدّا حيلو، و مَشى لِبِيلاطُس، و طَلَب مِنّو جِسِم يَسُوع. و بِيلاطُس إستَغرَب لَمّا سِمِع هو مات طَوّالي كِدا. و نادى رَئيس الجّيش، و سَألو إذا مات مِن مُدَّه. و لَمّا عِرِف دا مِن رَئيس الجّيش، أدّا الجِّسم لِيُوسِف. و يُوسِف إشتَرى قُماش تيل، و نَزَّل جِسم يَسُوع، و لَفّاهو بِالتّيل، و خَتّاهو في قَبر مَقطوع مِن حَجَر. و دَردَق حَجَر كَبير عَلى دُخول القَبر. و مَرْيَم المَجْدَلِيَّه و مَرْيَم أُم يُوسِي شافو المَكان الخَتّوهو فيهو. و بَعَد ما يوم السَّبِت فات، مَرْيَم المَجْدَلِيَّه و مَرْيَم أُم يَعْقُوب و سَلومَه إشتَرو ريحَه عَشان يَمشو يَمسَحوها. و بَدري جِدّاً في أوَّل يوم مِن الأسبوع، مَشو لِلقَبر بَعَد طُلوع الشَّمِش. و كانو يَقولو مَعَ بَعض: ”مِنو بِدَردِق لينا الحَجَر مِن خَشم القَبر؟“ و لَمّا عايَنو لِفوق، شافو الحَجَر كان إدَّردَق مِن القَبر، عَشان كان كَبير خالِص. و دَخَلو القَبر، و شافو شاب قاعِد عَلى اليَمين، و لابِس توب أبيَض. و خافو جِدّاً. و هو قال ليهُم: ”ما تَخافو. إنتو تَطلُبو يَسُوع النّاصِري الكان مَصلوب. هو قام. هو ما هِنا. أهو دا المَحَل الخَتّوهو فيهو. لَكِن أمشو، و قولو لِتَلاميذو و لِبُطْرُس، هو ماشي قُبّالكُم لِلجَّليل. هِناك بِتشوفو، زي ما قال ليكُم.“ و مَرَقو و هَرَبو مِن القَبر، عَشان كانو يَرجِفو و يِستَغرَبو. و ما قالو حاجَه لِأي واحِد، عَشان كانو يَخافو. و بَعَد ما يَسُوع قام بَدري في أوَّل يوم مِن الأسبوع، ظَهَر في الأوَّل لِمَرْيَم المَجْدَلِيَّه. و قُبّال دا، يَسُوع كان مَرَّق مِنَّها سَبعَه شياطين. و هي مَشَت، و خَبَّرَت الكانو مَعاهو قُبّال و هُم كانو يَنوحو و يَبكو. و لَمّا سِمِعو يَسُوع حَي، و هي شافَتو، هُم ما صَدَّقو. و بَعَد دا، ظَهَر في شَكَل تاني لِإتنين مِنَّهُم، وَكِت ما كانو ماشين بَرَّه مِن المَدينَه. و ديل رَجَعو، و خَبَّرو التّانيين. و ديل كَمان ما صَدَّقو. بَعدين، ظَهَر لِلحِداشَر زاتُم و هُم قاعِدين ياكلو. و وَبَّخُم عَشان ما كان عِندَهُم إيمان، و فِشان قُلوبُم كانَت قَوّيَّه، عَشان هُم ما صَدَّقوهُم الشّافوهو بَعَد ما قام. و قال ليهُم: ”أمشو لِكُل الدُّنيا، و بَشِّرو بِالإنجيل لِكُلّو ناس الدُّنيا. هو اليَصَدِّق و يِتعَمَّد بِخلَص، و الما يَصَدِّق بِحكُمو عَليهو. و العَلامات دي تَمشي مَعَ المِصَدِّقين. بِإسمي، يَمَرِّقو شياطين، و يِتكَلَّمو بِلُغات جَديدَه، و يَرفَعو دَبايب بِإيديهُم، و إذا يَشرَبو أي شي البِكتُل، ما بِجيب ليهُم عَوَجَه أبَداً. و بِخُتّو إيدينُم عَلى العَيّانين، و بِكونو شُداد.“ و بَعَد ما الرَّب يَسُوع كَلَّمُم، إتَّخَد لِلسَّما، و قَعَد عَلى يَمين الله. و لَكِن هُم مَرَقو، و بِشَّرو في كُلّو مَكان. و الرَّب كان يَشتَغِل مَعاهُم و يَثَبِّت الكِلمَه بِالعَلامات الكانَت تَمشي مَعاها. ناس كُتار اَخَدو عَلى نُفوسُم أن يَكتِبو عَن الحاجات التَّمَّت بينَنا. و النّاس الشّافوها بِعُيونُم مِن الأوَّل و كانو خَدّامين الكِلمَه سَلَّموها لينا. و بَعَد ما فَتَّشتَ عَلى كُلّو شي مِن الأوَّل، حاجَه بِحاجَه، إفتَكَرتَ إنّو كوَيس أن أكتِب ليك بِتَرتيب، يا ثَاوُفِيلُس العَزيز، عَشان تَعرِف بِالتَّمام حَقيقَة الحاجات الخَبَّروك بيها بِالكَلام. في زَمَن هِيرُودُس، مَلِك اليَهُودِيَّه، كان في قَسّيس إسمو زَكَرِيَّا مِن قِسم أَبِيَّا، و مَرَتو مِن بَنات هَارُون إسِما أَلِيصَابَات. و هُم الإتنين كانو عادِلين قِدّام الله، ماشين حَسَب أوامِر الرَّب كُلَّها و في كُلّو قَوانينو بِدون لوم. و ما كان عِندَهُم وَلَد، عَشان أَلِيصَابَات كانَت عاقِر، و كانو هُم الإتنين كُبار في السِّن. و لَمّا زَكَرِيَّا كان يَخدِم زي قَسّيس قِدّام الله في دور قِسمو، زي عادَة خِدمَة القَسِّيس، جا دورو عَشان يَدخُل هيكَل الرَّب و يَحرِق البَخور. و النّاس كُلُّهُم كانو بِصَلّو بَرَّه ساعَة البَخور. و ظَهَر ليهو مَلاك الرَّب واقِف عَلى يَمين مَضبَح البَخور. و لَمّا زَكَرِيَّا شافو، إتعَجَّب و خاف. و المَلاك قال ليهو: ”ما تَخاف، يا زَكَرِيَّا، عَشان الرَّب سِمِع الصَّلاه بِتاعَك، و مَرَتَك أَلِيصَابَات بِتَلِد ليك وَلَد، و بِتسَمّيهو يُوحَنَّا. و إنتَ بِتكون مَبسوط و فَرحان، و ناس كُتار بِكونو مَبسوطين بِوِلادتو. عَشان هو بِكون عَظيم قِدّام الرَّب، و ما بِشرَب خَمُر ولّا مَريسَه أبَداً، و بِكون مَليان بِالرّوح القُدُس و هو لِسَّع في بَطن أُمّو. و بِرَجِّع كُتار مِن بَني إِسْرَائِيل لِلرَّب إلَهُم. و بِمشي قِدّامو بِروح إِيلِيَّا و بِقُدرَتو، عَشان يَرَجِّع قُلوب الوالِدين لِلأولاد، و النّاس الما بِطيعُو لِحِكمَة البارين، عَشان يَحَضِّر لِلرَّب ناس جاهِزين.“ و زَكَرِيَّا قال لِلمَلاك: ”كيف بَعرِف دا؟ و أنا راجِل عَجوز و مَرَتي كَبيرَه في السِّن.“ و المَلاك رَدَّ و قال ليهو: ”أنا جِبْرَائِيل الواقِف قِدّام الله، و أنا مُرسَل عَشان أكَلِّمَك و أبَشِّرَك بِدا. و شوف، إنتَ بِتكون أبكَم و ما تَقدَر تِتكَلَّم لِغايَة اليوم اليَحصَل فيهو الحاجَه دي، عَشانَك ما صَدَّقتَ كَلامي البِتِم في وَكتو.“ و النّاس كانو مُنتَظِرين زَكَرِيَّا، و مِتعَجِّبين عَشان إتأخَّر في الهيكَل. و لَمّا مَرَق، ما قِدِر يَكَلِّمُم، و هُم فِهمو إنّو شاف رؤيا في الهيكَل. و كان يَعمِل عَلامَه ليهُم و إستَنّى أبكَم. و بَعَد ما تَمَّت أيام خِدمَتو، رَجَع لِبيتو. و بَعَد الأيام ديلاك، أَلِيصَابَات مَرَتو حِملَت، و دَسَّت نَفسا خَمسَه شُهور، و قالَت، ”الرَّب عَمَل لَي كِدا في الوَكِت دا لَمّا عايَن لَي، عَشان يَشيل عيبي مِن بين النّاس.“ و بَعَد سِتَّه شُهور الله رَسَّل جِبْرَائِيل المَلاك لِمَدينَه في الجَّليل إسِما نَاصِرَه، لِعَذراء مَخطوبَه لِراجِل مِن بيت دَاوُد إسمو يُوسِف. و إسم العَذرَاء مَرْيَم. و المَلاك دَخَل ليها و قال: ”سَلام ليكي، إنتي مُبارَكَه. الرَّب مَعاكي!“ و هي إتحَيَّرَت جِدّاً مِن كَلامو، و فَكَرَت في مَعنى السَّلام دا. و المَلاك قال ليها: ”ما تَخافي، يا مَرْيَم، عَشان لِقيتي نِعمَه مَعَ الله. و شوفي! إنتي بِتَحمَلي و بِتَلِدي وَلَد، و بِتسَمّيهو يَسُوع. و هو بِكون عَظيم، و بِسَمّوهو إبن الله. و الرَّب الإلَه يَدّيهو كُرسي دَاوُد أبوهو. و بِملِك عَلى بيت يَعْقُوب لِلأبَد. و مُلكو ما بِخلَص.“ و مَرْيَم قالَت لِلمَلاك: ”كيف يَكون دا، و أنا ما عارفَه راجِل؟“ و المَلاك رَدَّ و قال ليها: ”الرّوح القُدُس بِجي عَليكي، و قُدرَة العالي تَضَلِّلِك. و عَشان كِدا القُدّوس المَولود مِنِّك بِسَمّوهو إبن الله. و شوف! أَلِيصَابَات نَسيبتِك! هي كَمان حِملَت بِوَلَد. و هي كَبيرَه في السِّن. و هَسَّع سِتَّه شُهور لِديك السَّمّوها عاقِر. عَشان ما في شي ما مُمكِن عِند الله.“ و قالَت مَرْيَم: ”شوف! أنا خَدّامَة الرَّب. الله يَتِم لَي زي كَلامَك.“ و بَعدين المَلاك مَرَق مِن عِندَها. و قامَت مَرْيَم في الأيام ديلاك و مَشَت قَوام لِأرض الجِبال لِمَدينَه في يَهُوذَا. و دَخَلَت بيت زَكَرِيَّا و سَلَّمَت عَلى أَلِيصَابَات. و وَكِت أَلِيصَابَات سِمِعَت سَلام مَرْيَم، الجَّنى إتحَرَّك في بَطنا، و أَلِيصَابَات إتمَلَت بِالرّوح القُدُس. و كُورَكَت بِصوت عالي و قالَت: ”مُبارَكَه إنتي في النِّسوان، و مُبارَك هو الجَّنى. و كيف أُم رَبّي تَجي لَي؟ و وَكِت ما سِمِعتَ صوت سَلامِك، الجَّنى إتحَرَّك في بَطني مِن الفَرَح. و مُبارَكَه الصَّدَّقَت، عَلَشان الكَلام القالو ليها الرَّب بِتِم.“ و مَرْيَم قالَت: ”بِنَفسي أحمَد الرَّب. و روحي مَبسوطَه بِالله مُخَلِّصي. عَشان عايَن لِخَدّامتو المِسكينَه. و شوف، مِن هَسَّع النّاس كُلُّهُم بِسَمّوني المُبارَكَه. عَشان هو العِندو قُدرَه سَوّا لَي حاجات كَبيرَه، و إسمو قُدّوس. و رَحمَتو مِن جيل لِجيل لِلنّاس البِخافوهو. و هو وَرّا قُدرَتو بِإيدو القَوّيَّه، و شَتَّت فِكر المَتكَبِّرين. و نَزَّل السَّلاطين مِن كَراسيهُم، و رَفَع المَساكين. و شَبَّع الجَّعانين بِحاجات كوَيسَه، و رَجَّع الغَنيين بِدون حاجَه. و ساعَد خَدّامو إِسْرَائِيل عَشان يِتذَكَّر رَحمَتو. زي ما كَلَّم أبَهاتنا، لِإِبْرَاهِيم و أولادو لِلأبَد.“ و مَرْيَم إستَنَّت مَعَ أَلِيصَابَات تلاتَه شُهور تَقريباً، و بَعَد كِدا رَجَعَت لِبيتا. و مُدَّة أَلِيصَابَات تَمَّت عَشان تَلِد، و وِلدَت وَلَد. و جيرانا و أقارِبا سِمِعو إنّو الرَّب وَرّاها رَحمَتو الكَبيرَه، و كانو مَبسوطين مَعاها. و بَعَد تَمانيَة أيام جو عَشان يَطَهِّرو الوَلَد. و دارو يَسَمّوهو بِإسم أبوهو زَكَرِيَّا. و أُمّو رَدَّت و قالَت: ”لا، لَكِن يَسَمّوهو يُوحَنَّا.“ و قالو ليها: ”ما في زول مِن أقارِبِك السَّمّوهو بِالإسم دا.“ و عَمَلو عَلامَه لِأبوهو يَطلُبو يَسَمّيهو شِنو. و هو طَلَب لوح الكِتابَه و كَتَب: ”إسمو يُوحَنَّا.“ و كُلَّهُم إتعَجَّبو. و طَوّالي خَشمو إنفَتَح و لِسانو إتفَكَّ، و إتكَلَّم و بارَك الله. و خوف وَقَع عَلى جيرانُم كُلَّهُم، و الخَبَر عَن الحاجات دي مَشى في كُلّو جِبال اليَهُودِيَّه. و كُل السِّمِعو، حَفَظو الكَلام دا في قُلوبُم و قالو: ”الوَلَد دا بِكون شِنو؟“ و إيد الرَّب كانَت مَعاهو. و زَكَرِيَّا أبوهو إتمَلا بِالرّوح القُدُس، و إتنَبّأ و قال: ”مُبارَك الرَّب إلَه إِسْرَائِيل عَشان زار شَعبو و عَمَل ليهُم فِداء. و قَوَّم لينا قَرن الخَلاص في بيت دَاوُد خَدّامو. زي ما إتكَلَّم بِخَشُم أنبياهو القِدِّسين الكانو مِن زَمان: خَلاص مِن عُدوانّا و مِن إيدين كُل البِكرَهونا. عَشان يَعمِل رَحمَه مَعَ أبَهاتنا، و إتزَكَّر إتِّفاقو المُقَدَّس. الحَلَف الحَلَف لِإِبْرَاهِيم أبونا إنّو يَخَلِّصنا مِن إيدين عُدوانّا عَشان نَخدِمو بِدون خوف، بِقَداسَه و بِر قِدّامو كُلّو أيام حَياتنا. و إنتَ، يا وَلَد، بِسَمّوك نَبي العالي، عَشان تِتقَدَّم قِدّام الرَّب و يَحَضِّر طُرُقو. و تَدّي ناسو مَعرِفَة الخَلاص بِغُفران خَطاياهم، بِواسِطَة رَحمَة الله البيها تَطلَع لينا الشَّمِش مِن السَّما عَشان يَنَوِّر عَلى القَاعِدين في الضَّلام و في ضُل الموت، عَشان يَسوق كِرعينّا في طَريق السَّلام.“ و الوَلَد كِبِر، و بِقى قَوّي في الرّوح. و كان في الخَلا لِغايَة يوم ظُهورو لِإِسْرَائِيل. و في الأيام ديلاك، طَلَع أمر مِن أُغُسْطُس قَيصَر عَشان يَسَجِّلو كُلّو سُكّان الأرض. و دا أوَّل كِتابَه حَصَلَت لَمّا كِيرِينِيُوس كان حاكِم سُورِيَّه. و كُلّو واحِد مَشى عَشان يَكتِب إسمو في مَدينَتو. و يُوسِف كَمان طَلَع مِن الجَّليل مِن مَدينَة النَّاصِرَه لِليَهُودِيَّه لِمَدينَة دَاوُد الإسِما بيت لَحَم، عَشان هو مِن بيت دَاوُد و مِن أهلو. هو مَشى عَشان يَكتِب إسمو، و مَعاهو مَرْيَم المَخطوبَه ليهو، و هي حامِل. و وَكِت كانو هِناك، تَمَّت أياما عَشان تَلِد. و وِلدَت وَلَدا البِكر، و لَفَّتو بِالقُماش و نَوَّمَتو في المِذوَد، عَشان ما كان ليهُم مَكان في اللّوكَندا. و في البَلَد دي، رُعاه كانو يَحرَسو غَنَمُم بِاللّيل في الخَلا. و طَوّالي، مَلاك الرَّب وَقَف جَمبُم، و مَجد الرَّب نَوَّر حَواليهُم، و خافو خوف شَديد. و المَلاك قال ليهُم: ”ما تَخافو! شوفو! أبَشِّركُم بِفَرَح عَظيم يَكون لِكُل النّاس. إتوَلَد ليكُم النَّهار دا في مَدينَة دَاوُد مُخَلِّص، و هو الرَّب المَسيح. و دي ليكُم العَلامَه. بِتَلقو طِفل مَلفوف بِقُماش، و هو راقِد في مِذوَد.“ و طَوّالي ظَهَر مَعَ مَلاك الرَّب كُتار مِن جيش السَّما، كانو يَحمَدو الله و يَقولو: ”المَجد لِلَّه في السَّما، و عَلى الأرض السَّلام بين النّاس الهو مَبسوط مِنَّهُم.“ و لَمّا المَلائكَه رَجَعو مِن عِندَهُم لِلسَّما، الرُّعاه قالو بَعضَهُم لِبَعض: ”خَلّينا نَمشي هَسَّع لِبيت لَحَم و نَشوف الحاجَه الحَصَلَت الخَبَّرنا بيها الرَّب.“ و جو بِسُرعَه و لِقو مَرْيَم و يُوسِف، و الطِّفل راقِد في المِذوَد. و لَمّا شافوهو، خَبَّرو بِالكَلام القالو ليهُم بِخُصوص الوَلَد دا. و كُل السِّمِعو، إتعَجَّبو مِن الكَلام القالوهو ليهُم الرُّعاه. و مَرْيَم كانَت تَحفَظ الكَلام دا كُلّو، و تَفَكِّر فيهو في قَلبَها. و الرُعاه رَجَعو و هُم يَمَجِّدو الله و يَحمَدوهو عَلى الشّافوهو و السِّمِعوهو زي ما قالو ليهُم. و لَمّا تَمَّت تَمانيَة أيام عَشان يَطَهِّروهو، سَمّوهو يَسُوع، زي ما سَمّاهو المَلاك قُبّال ما حِملَت بيهو أُمّو في بَطنَها. و بَعَد ما تَمَّت أيام نَضافَتُم زي قانون مُوسَى، جابوهو لِأُورُشَلِيم عَشان يَقَدِّموهو لِلرَّب. (زي ما هو مَكتوب في قانون الرَّب: ”كُلّو بِكر اليَفتَح البَطُن يَسَمّوهو مُقَدَّس لِلرَّب.“) و عَشان يَقَدِّمو ضَبيحَه زي ما مَكتوب في قانون الرَّب: ”جوز قُمريَّه ولّا جوز حَمام.“ و كان في أُورُشَلِيم راجِل إسمو سِمْعَان. و الرّاجِل دا كان بار و بِخاف الله، مُنتَظِر راحَة إِسْرَائِيل. و الرّوح القُدُس كان عَليهو. و كان جا ليهو رؤيا مِن الرّوح القُدُس إنّو ما يَشوف الموت قُبّال ما يَشوف مَسيح الرَّب. و دَخَل الهيكَل، و هو في الرّوح. و وَكِت ما والِدين يَسُوع دَخَلو مَعَ الطِّفل عَشان يَسَوّو ليهو زي عادَة القانون، سِمْعَان رَفَعو بِإيدينو و بارَك الرَّب و قال: ”هَسَّع، يا رَب، خَلّي خَدّامَك يَروح بِالسَّلام، زي كَلامَك. عَشان عُيوني شافو خَلاصَك الحَضَّرتو قِدّام كُل النّاس. النّور اليَنَوِّر لِلأُمَم، و هو مَجد شَعب إِسْرَائِيل.“ و أبوهو و أُمّو إتعَجَّبو مِن الحاجات سِمْعَان قال عَنّو. و سِمْعَان بارَكُم و قال لِمَرْيَم أُمّو: ”شوفي! الطِّفل دا مَعَيَّن لِوقوع و قيام ناس كُتار في إِسْرَائِيل، و العَلامَه يتكَلَّم ضَدّا. و إنتي كَمان يَطعَنِك سيف في نَفسِك، عَشان يَوَرّي أفكار قُلوب ناس كُتار.“ و كانَت نَبيَّه إسِما حَنَّه، بِت فَنُوئِيل مِن قَبيلَة أَشِير. و هي كَبيرَه في السِّن. و سَكَنَت مَعَ زوجَها سَبعَه سِنين بَعَد ما إتزَوَّجَت. و هي أرمَلَه عُمُرا أربَعَه و تَمانين سَنَه. و ما كانَت بِتخَلّي الهيكَل، بِتَخدِم بِصوم و صَلاه ليل و نَهار. و جات في السّاعَه ديك و شَكَرَت الرَّب، و إتكَلَّمَت عَنّو لِكُل المُنتَظِرين فِداء أُورُشَلِيم. و لَمّا تَمَّمو كُلّو شي، زي قانون الرَّب، رَجَعو لِمَدينَتُم النَّاصِرَه في الجَّليل. و الوَلَد كِبِر و إتقَوّى، و إتمَلا بِحِكمَه. و نِعمَة الله كانَت عَليهو. و كانو وَالِدينو بِمشو كُلّو سَنَه لِأُورُشَلِيم في عيد الفِصَح. و لَمّا عُمرو بِقى إتناشَر سَنَه، طَلَعو لِأُورُشَلِيم زي عادَة العيد. و بَعَد العيد و هُم راجِعين، الوَلَد يَسُوع فِضِل في أُورُشَلِيم بِدون ما عِرفو الوالِدين. و فِكرَهُم إنّو مَعَ الجَّماعَه. و مَشو مَسافَة يوم، و فَتَّشو عَليهو بين أقارِبو و النّاس البيَعرِفوهو. و لَمّا ما لِقوهو، رَجَعو لِأُورُشَلِيم يَفَتِّشو عَليهو. و بَعَد تَلاتَة أيام لِقوهو في الهيكَل قاعِد في وَسط المُعَلِّمين يَسمَعُم و يَسأَلُم. و كُل السِمِعوهو إتعَجَّبو مِن فَهمو و رَدّو. و لَمّا شافوهو الوالِدين، إتعَجَّبو. و أُمّو قالَت ليهو: ”يا وَلَدي، لِشِنو عَمَلتَ لينا كِدا؟ شوف! أبوك و أنا كُنّا بِنفَتِّش عَليك بِالتَّعب.“ و قال ليهُم: ”كُنتو بِتفَتِّشو عَلي لِشِنو؟ ما كُنتو بِتَعرِفو أنا لازِم أكون في بيت أبوي؟“ و هُم ما فِهمو كَلامو القالو ليهُم. و بَعدين نَزَل مَعاهُم و جا لِلنّاصِرَه، و كان يَطيعُم. و أُمّو كانَت تَحفَظ كُل الكَلام دا في قَلبا. و يَسُوع زاد في الحِكمَه و في طولو، و في النِّعمَه عِند الله و النّاس. و في سَنَة خَمَستاشَر مِن حُكم طِيبَارِيُوس قَيصَر، لَمّا كان بِيلاطُس البُنْطي مُدير عَلى اليَهُودِيَّه، و هِيرُودُس رَئيس مُديرِيَّه في الجَّليل، و أخوهو فِيلُبُّس رَئيس رُبُع عَلى إِيطُورِيَّه و تَرَاخُونِيتِس، و لِيسَانِيُوس رَئيس رُبُع عَلى الأبِلِيَّه، في أيام رؤساء القُسُس حَنَّان و قَيَافا، جا كَلام الله لِيُوحَنَّا إبن زَكَرِيَّا في الخَلا. و هو جا لِكُل الحِلَل الحَول الأُرْدُنّ يَبَشِّر بِمَعموديَّة التّوبَه لِغُفران الخَطايا، مِثِل ما مَكتوب في كِتاب إِشَعْيَاء النَّبي: ”صوت بِنادي في الخَلا: حَضِّرو طَريق الرَّب. أعمِلو السِّكَك بِتاعتو دُغري. كُلّو خور بِكون مَرفوع، و كُلّو جَبَل كَبير و صَغَيِر بِكون مِتساوي، و المَعَوَّج يَبقى عَديل، و الدَرِب الدَقداق يَبقى ساهِل، و كُلّو إنسان بِشوف خَلاص الله.“ و عَلَشان كِدا قال لِكُل النّاس المَرَقو عَشان يِتعَمَّدو مِنّو: ”يا أولاد الدَّبايب، مِنو كَلَّمكُم تَهرَبو مِن الغَضَب الجّاي؟ جيبو ثِمار مُستَحِق التّوبَه، و ما تَبتَدو تَقولو في نُفوسكُم: أبونا هو إِبْرَاهِيم. عَلَشان كِدا أقول ليكُم، الله يَقدَر يَقَوِّم أولاد لِإِبْرَاهِيم مِن الحُجار ديل. و هَسَّع الفاس عَلى عِرق الشَّجَر. و كُلّو شَجَرَه الما تَجيب ثِمار سَمِح، يَقطَعوها و يَرموها في النّار.“ و النّاس سألوهو و قالو: ”عَلى كِدا بِنَعمِل شِنو؟“ و رَدَّ عَليهُم و قال: ”العِندو توبين خَليهو يَقسِم مَعَ الما عِندو، و العِندو أكِل خَليهو يَعمِل كِدا كَمان.“ و جو كَمان مُحَصِّلين الضَّريبَه عَشان يِتعَمَّدو، و قالو ليهو: ”يا مُعَلِّم، نِحنا لازِم نَعمِل شِنو؟“ و قال ليهُم: ”ما تَحَصِّلو عَلى زِيادَه مِن الحاجَه الأمَروكُم بيهو.“ و كَمان العَساكِر سألوهو و قالو: ”و نِحنا نَعمِل شِنو؟“ و قال ليهُم: ”ما تَظلِمو زول و لا تَشتَكو عَلى زول بِالغِش، و كونو مَبسوطين مِن ماهيَّتكُم.“ و لَمّا النّاس كانو مُنتَظِرين و كُلُّهُم مِفَكِّرين في قُلوبُم عَن يُوحَنَّا إذا كان هو المَسيح ولّا لا، رَدَّ عَليهُم يُوحَنَّا: ”صَحيح، أنا بَعَمِّدكُم بِالمويَه، لَكِن بِجي واحِد قَوّي مِنّي. و أنا ما مُستَحِق أفِك جِزَمو. و هو بِعَمِّدكُم بِالرّوح القُدُس و النّار. و في إيدو مُضراياتو، و هو يَنَضِّف بيها مَحَلّو، عَشان يَلِم الدُّرَه في مَخزَنو، و القِشر مِن الدُّرَه يَحرِقا بِالنّار الما بِتموت.“ و كان بِبَشِّر النّاس و بِسَاعِدُم بِنَصايح كَتيرَه. و هِيرُودُس رَئيس مُديرِيَّه، بَعَد ما يُوحَنَّا وَبَّخو بِخُصوص هِيرُودِيَا مَرَة فِيلُبُّس أخوهو و بِخُصوص كُل الأعمال البَطّالَه الهِيرُودُس عَمَلا، زاد كَمان عَلى كُلّو دا، عَشان حَبَس يُوحَنَّا في السِّجِن. و لَمّا كُل النّاس إتعَمَّدو، و بَعَد ما يَسُوع كَمان إتعَمَّد، و وَكِت ما كان بِصَلّي، السَّما إنفَتَحَت. و الرّوح القُدُس نَزَل عَليهو في شَكِل جِسم زي حَمامَه. و جا صوت مِن السَّما يَقول: ”إنتَ إبني الحَبيب، و أنا مَبسوط مِنَّك.“ و يَسُوع نَفسو، لَمّا بِقى يَعَلِّم، كان عُمرو تَلاتين سَنَه تَقريباً، و هو، زي فِكر النّاس فيهو، إبن يُوسِف، إبن هَالي، إبن مَتْثَات، إبن لَاوِي، إبن مَلْكِي، إبن يَنَّا، إبن يُوسِف، إبن مَتَّاثِيَا، إبن عَامُوص، إبن نَاحُوم، إبن حَسْلِي، إبن نَجَّاي، إبن مَآث، إبن مَتَّاثِيَا، إبن شِمْعِي، إبن يُوسِف، إبن يَهُوذَا، إبن يُوحَنَّا، إبن رِيسَا، إبن زَرُبَّابِل، إبن شَأَلْتِئِيل، إبن نيرِي، إبن مَلْكِي، إبن أَدِّي، إبن قُصَم، إبن أَلْمُودَام، إبن عِير، إبن يُوسِي، إبن أَلِيعَازَر، إبن يُورِيم، إبن مَتْثَات، إبن لَاوِي، إبن شِمْعُون، إبن يَهُوذَا، إبن يُوسِف، إبن يونان، إبن أَلِيَاقِيم، إبن مَلَيَا، إبن مَيْنَان، إبن مَتْثَات، إبن نَاثَان، إبن دَاوُد، إبن يَسَّى، إبن عُوبِيد، إبن بُوعَز، إبن سَلْمُون، إبن نَحْشُون، إبن عَمِّينَادَاب، إبن أَرَام، إبن حَصْرُون، إبن فَارِص، إبن يَهُوذَا، إبن يَعْقُوب، إبن إِسْحَاق، إبن إِبْرَاهِيم، إبن تَارَح، إبن نَاحُور، إبن سَرُوج، إبن رَعُو، إبن فَالَج، إبن عَابِر، إبن شَالَح، إبن قِينَان، إبن أَرْفَكْشَاد، إبن سَام، إبن نُوح، إبن لامَك، إبن مَتُوشَالَح، إبن أَخْنُوخ، إبن يَارِد، إبن مَهْلَلْئِيل، إبن قِينَان، إبن أَنُوش، إبن شِيث، إبن آدَم، إبن الله. و رَجَع يَسُوع مِن الأُرْدُنّ مَليان بِالرّوح القُدُس. و كان الرّوح يَقودو في الخَلا أربَعين يوم. و إبْلِيس كان يَجَرِّبو. و ما أكَل حاجَه في الأيام ديك. و لَمّا تَمَّت المُدَّه، جَاع. و إبْلِيس قال ليهو: ”إذا إنتَ إبن الله، قول لِلحَجَر دا عَشان يَبقى عيش.“ و يَسُوع رَدَّ عَليهو: ”مَكتوب إنّو الإنسان ما يَعيش بِالعيش بَس.“ و بَعدين إبْلِيس طَلَعو لِمَحَل عالي، و وَرّاهو مَمالِك الدُّنيا كُلَّها في دَقيقَه واحدَه. و قال ليهو: ”بَدّيك السُّلطَه دي كُلَّها و مَجد المَمالِك، عَشان كان مُسَلَّم لَي، و أدِيها لِلأنا عاوِز. و عَلى كِدا إن كُنتَ تَعبُدني، كُلّو شي يَكون بِتاعَك.“ و يَسُوع رَدَّ و قال ليهو: ”مَكتوب: لازِم تَعبُد الرَّب إلَهَك، و تَخدِمو واحدو.“ و جابو لِأُورُشَلِيم و وَقَّفو فوق طَرف الهيكَل و قال ليهو: ”إذا إنتَ إبن الله، أرمي نَفسَك مِن هِنا لِتِحِت. عَشان مَكتوب: بِيأمُر مَلائكَتو بيك عَشان يَحفَظُوك. و، بِشيلوك عَلى إيدينُم عَشان رِجلَك ما تَدُق حَجَر.“ و يَسُوع رَدَّ و قال ليهو: ”مَكتوب: ما تَجَرِّب الرَّب إلَهَك.“ و لَمّا تَمَّ إبْلِيس كُلّو تَجرِبَه، خَلّاهو لِمُدَّه. و رَجَع يَسُوع بِقُدرَة الرّوح لِلجَّليل، و الخَبَر عَنّو مَشى في كُل المَحَلّات الجَّمبو. و كان يَعَلِّم في بِيوت الرَّب. و كُل النّاس كانو يَمَجِّدوهو. و جا لِلنّاصِرَه الإترَبى فيها. و زي عادَتو دَخَل بيت الرَّب يوم السَّبِت. و قام عَشان يَقرا. و قَدَّمو ليهو كِتاب إِشَعْيَاء النَّبي. و فَتَح الكِتاب، و لِقى المَحَل الكان مَكتوب فيهو: ”روح الله عَلي، عَلَشانو مَسَحني فِشان أبَشِّر المَساكين. و رَسَّلني عَشان أنادي لِلمَحبوسين بِالحُرّيَّه، و لِلعَميانين عَشان يَشوفو، و بِالحُرّيَّه لِلقُلوبُم مَكسورَه و عَشان بَبَشِّر بِسَنَة الرَّب المَقبولَه.“ و قَفَل الكِتاب، و أدّاهو لِلخَدّام، و قَعَد. و كُل النّاس الكانو في بيت الرَّب كانو يَعاينو ليهو. و إبتَدا يَقول ليهُم: ”النَّهار دا، تَمَّ المَكتوب زي ما سِمِعتو بِإضنينكُم.“ و كُلُّهُم كانو يَشهَدو ليهو، و يِتعَجَّبو مِن كَلام النِّعمَه الطَّلَع مِن خَشمو. و قالو: ”ما هو وَلَد يُوسِف؟“ و قال ليهُم: ”عَلى كُلّو حال تَقولو لَي المَثَل دا: يا حَكيم، أشفي نَفسَك. سِمِعنا كَتير عَن الحَصَل في كَفْرَنَاحُوم. أعمِلا هِنا كَمان في بَلَدَك.“ و قال: ”الحَق أقول ليكُم، ما في نَبي مَقبول في بَلَدو. و الحَق أقول ليكُم، كانو في أرامِل كُتار في إِسْرَائِيل في أيام إِيلِيَّا لَمّا ما كان في مَطَر مُدَّة تلاتَه سِنين و سِتَّه شُهور. و كان حَصَل جوع شَديد في الأرض كُلَّها. لَكِن الله ما رَسَّل إِيلِيَّا لِواحدَه مِنَّهُم إلّا لِمَرَه كانَت أرمَلَه في صَرفَه في بَلَد صَيدا. و كانو مُجَزَّمين كُتار في إِسْرَائِيل في زَمَن أَلِيشَع النَّبي. و لا واحِد بِقى نَضيف إلّا نِعْمَان السّوري.“ و كُل الكانو في بيت الرَّب لَمّا سِمِعو دا إتمَلو بِالزَّعل. و قامو و طَرَدوهو مِن المَدينَه، و أخَدوهو لِطَرف الجَّبَل، الكانَت مَدينَتُم مَبنيَه عَليهو، عَشان يَرموهو لِتِحِت. لَكِن هو مَرَّ في وَسِطُم و فات. و نَزَل في كَفْرَنَاحُوم، مَدينَه في الجَّليل. و كان يَعَلِّمُم كُلّو يوم السَّبِت. و إتعَجَّبو مِن تَعليمو، عَشان كَلامو كان بِسُلطَه. و كان في بيت الرَّب راجِل فيهو روح نَجِس. و كورَك بِصوت عالي، ”آه! مالنا و مالَك، يا يَسُوع النّاصِري؟ إنتَ جيت عَشان تَخرِبنا؟ أنا عارفَك مِنو إنتَ. إنتَ قُدّوس الله.“ و يَسُوع وَبَّخو و قال: ”أسكُت، و أمرُق مِنّو!“ و بَعَد ما الشّيطان رَماهو في الوَسِط، طَلَع مِنّو بِدون ما يَجرَحو. و كُلَّهُم إتعَجَّبو، و إتكَلَّمو بَعضَهُم لِبَعض و قالو: ”الكَلام دا شِنو؟ عَشان بِسُلطَه و قُدرَه يأمُر الأرواح النَّجسَه، و هُم يَمرُقو.“ و الخَبَر عَنّو مَشى في كُلّو مَكان قَريب. و قام مِن بيت الرَّب، و دَخَل بيت سِمْعَان. و كانَت أُم مَرَة سِمْعَان عِندَها حُمَّه شَديدَه. و سألوهو فِشانّا. و وَقَف قِدّاما و وَبَّخ الحُمَّه، و الحُمَّه فاتَت مِنَّها. و طَوّالي هي قامَت و إشتَغَلَت. و في وَكِت المَغرِب، كُل الكانو مَرضانين بِأمراض مُختَلِفَه جابوهُم ليهو. و خَتَّ إيدينو عَلى كُلّو واحِد مِنَّهُم و شَفاهُم. و كَمان شياطين مَرَقو مِن كُتار مِنَّهُم و كورَكو و قالو: ”إنتَ إبن الله.“ و وَبَّخُم و ما خَلّاهُم يِتكَلَمو، عَشان عِرفوهو هو المَسيح. و لَمّا جا النَّهار، مَرَق و مَشى لِلخَلا. و النّاس كانو يَفَتِّشو عَليهو. و جو ليهو، و مَسَكوهو عَشان ما يَفوت مِنَّهُم. و قال ليهُم: ”أنا لازِم أبَشِّر بِمَلَكوت الله لِلمُدُن التّانيَه كَمان، عَشان كِدا الله رَسَّلني.“ و كان بِبَشِّر في بِيوت الرَّب في اليَهُودِيَّه. و وَكِت ما النّاس إتلَمّو ليهو و سِمِعو كِلمَة الله، هو كان واقِف عِند بَحَر جَنِّيسَارَت. و شاف مُركَبين واقفين عِند البَحَر، و لَكِن الصَّيادين كانو طَلَعو مِنَّها و كانو يَغَسِّلو شَبَكاتُم. و دَخَل في واحدَه مِن المُركَبين الكانَت لِسِمْعَان. و قال ليهو: ”خَلّينا نَطلَع شوَيَه مِن الطَّرف.“ و قَعَد و إبتَدا يَعَلِّم النّاس مِن المُركَب. و لَمّا كَمَّل الكَلام، قال لِسِمْعَان: ”أمشو لِمَحَل غَريق، و نَزِّلو شَبَكاتكُم لِلصّيد!“ و سِمْعَان رَدَّ و قال: ”يا مُعَلِّم، تِعِبنا طول اللّيل و ما لِقينا حاجَه. لَكِن عَلى كَلامَك، بَنَزِّل الشَّبَكات.“ و لَمّا عَمَلو كِدا، مَسَكو سَمَك كَتير خالِص، و شَبَكاتُم بَدو تِتقَطَّعو. و نادو بِإيدينُم لِشُرَكاهُم الفي المُركَب التّانيَه عَشان يَجو و يَساعِدوهُم. و جو و مَلو المُركَبين لِغايَة ما إبتَدو يدخُلو تِحِت في المويَه. و سِمْعَان بُطْرُس لَمّا شاف كِدا، رَكَع عِند رُكبَتين يَسُوع و قال: ”أمشي، يا رَب، عَشان أنا راجِل خاطي.“ عَشان هو إستَغرَب، و كُل الكانو مَعاهو، بِسَبَب السَّمَك الأخَدوهو. و كَمان حَصَل كِدا لِيَعْقُوب و يُوحَنَّا، أولاد زَبَدي، الكانو شُرَكاء سِمْعَان. و يَسُوع قال لِسِمْعَان: ”ما تَخاف! مِن هَسَّع بَتَبقى صَياد النّاس.“ و لَمّا جو بِالمُركَبين لِلطَّرف، خَلّو كُلّو شي و تِبِعوهو. و في الوَكِت لَمّا هو كان في بَلَد مِن البِلاد، راجِل جِسمو مَليان بِالجِّزام جا. و لَمّا شاف يَسُوع، وَقَع عَلى وَشّو و طَلَب مِنّو و قال: ”يا سَيِّد، إذا إنتَ داير، تَقدَر تَنَضِّفني.“ و مَدَّ إيدو و لِمِسو و قال: ”أنا داير. كون نَضيف!“ و طَوّالي الجِّزام مَرَق مِنّو. و أمَرو: ”ما تَقول لِزول. لَكِن أمشي و وَرّي نَفسَك لِلقَسّيس، و قَدِّم عَشان نَضافتَك زي ما أمَر مُوسَى شَهادَه ليهُم.“ و لَكِن الخَبَر عَنّو طَلَع أكتَر. و جُموع كَتيرَه أجتَمَعو ليهو عَشان يَسمَعو، و عَشانو يَشفيهُم مِن أمراضُم. و لَكِن هو كان يَمشي بَراهو في الخَلا و يَصَلّي. و في يوم مِن الأيام كان يَعَلِّم. و كانو فَرّيسيِّين و مُعَلِّمين القانون قاعِدين، و هُم جو مِن كُلّو حِلَّه مِن الجَّليل و اليَهُودِيَّه و أُورُشَلِيم. و قُدرَة الرَّب كانَت مَعاهو عَشان يَشفيهُم. و شوف! جو رُجال شايلين عَلى فَرشَتو زول كان مَفلوج. و جَرَّبو يَدَخِّلوهو و يَخُتّوهو قِدّامو. و لَمّا ما لِقو طَريق يدخُلو بيهو بِسَبَب النّاس، طَلَعو فوق البيت و نَزَّلوهو بِفَرشَتو مِن بين الطوب لِلوَسط قِدّام يَسُوع. و لَمّا شاف إيمانُم، قال لِلرّاجِل: ”يا زول، خَطاياك مَغفورَه ليك.“ و مُعَلِّمين القانون و الفَرّيسيّين بِقو يَفَكِّرو و يَقولو: ”مِنو دا البِتكَلَّم بِشَتيمَه؟ مِنو يَقدَر يَغفِر الخَطايا إلّا الله واحدو؟“ و يَسُوع، لَمّا عِرِف أفكارُم، رَدَّ و قال ليهُم: ”لِشِنو بِتفَكَّرو بِدا في قُلوبكُم؟ ياتو أسهَل، بَقول ليهو: خَطاياك مَغفورَه ليك؟ ولّا بَقول ليهو: قوم و أمشي؟ و لَكِن عَشان تَعرِفو إبن الإنسان عِندو قُدرَه عَلى الأرض أن يَغفِر الخَطايا،“ قال لِلمَفلوج: ”أقول ليك، قوم، و شيل فَرشَتَك، و أمشي لِبيتَك!“ و طَوّالي، قام قِدّامو، و شال الشّي الكان راقِد عَليهو. و مَشى لِبيتو و هو يَحمِد الله. و كُلَّهُم إتعَجَّبو و حَمَدو الله، و كانو خايفين جِدّاً و قالو: ”شُفنا حاجات عَجيبَه النَّهار دا.“ و بَعَد دا، مَرَق و شاف واحِد بِلِم الضَّريبَه، إسمو لَاوِي، قاعِد في مَكانو. و قال ليهو: ”أتبَعني.“ و هو خَلّى كُلّو شي، و قام و تِبعو. و لَاوِي سَوّا ليهو عَزومَه كَبيرَه في بيتو. و جَماعَه كَتيرَه مِن البِلِمّو الضَّريبَه و غيرُم كانو قاعِدين مَعاهو. و الفَرّيسيّين و مُعَلِّمين القانون نَقنَقو عَلى تَلاميذو و قالو: ”لِشِنو بِتاكلو و بِتَشرَبو مَعَ البِلِمّو الضَّريبَه و الخاطيين؟“ و رَدَّ يَسُوع و قال ليهُم: ”الشُّداد ما يَحتاجو الحَكيم، لَكِن العَيّانين. أنا ما جيت عَشان أنادي الطَّيبين لِلتّوبَه، لَكِن الخاطيين.“ و قالو ليهو: ”تَلاميذ يُوحَنَّا بِصومو كَتير و بِصَلّو. و كِدا كَمان تَلاميذ الفَرِّيسِيِّين. و لَكِن تَلاميذَك بياكلو و بِشرَبو.“ و يَسُوع قال ليهُم: ”تَقدَرو تَعمِلو ناس العِرِس يَصومو ما دام العَريس مَعاهُم؟ و لَكِن الأيام بِتَجي لَمّا ياخُدو العَريس مِنَّهُم. في الأيام ديك بِصومو.“ و كَمان عَلَّمُم مَثَل. ”ما في زول بِخُت حِتَّه مِن توب جَديد عَلى توب قَديم. و إلّا الجَديد يِتشَرَّط و الحِتَّه القَديمَه و الجَديدَه ما بِمشو سَوا. و ما في زول بِخُت خَمرَه جَديدَه في بُرمَه قَديمَه، عَشان الخَمرَه الجَديدَه تَكسِر البُرمَه و تِتدَفَّق، و البُرمَه تَخسَر. لَكِن الخَمرَه الجَديدَه لازِم يَخُتّوها في البُرمَه الجَديدَه. و ما في زول إذا شِرِب القَديمَه بِدور الجَديدَه، عَشان هو يَقول: القَديمَه أحسَن.“ و حَصَل في سَبِت تاني إنّو فات في وَسط الزِّراعَه. و كانو تَلاميذو يَقطَعو راس الدُّرَه و يَفرُكوها بِإيديهُم، و ياكلوها. و بَعَد الفَرِّيسِيِّين قالو ليهُم: ”لِشِنو بِتَعمِلو الشّي الما بِالقانون في يوم السَّبِت؟“ و رَدَّ يَسُوع و قال ليهُم: ”ما قَريتو العَمَلو دَاوُد لَمّا كان جَعان، هو و الكانو مَعاهو؟ هو دَخَل بيت الله و أخَد و أكَل الرَّغِفان المُقَدَّسَه، و أدّا لِلمَعاهو كَمان. هو أكَل الما بِالقانون أن ياكلو إلّا لِلقُسُس بَس.“ و قال ليهُم: ”إبن الإنسان هو رَب السَّبِت.“ و حَصَل في سَبِت تاني، دَخَل بيت الرَّب و كان يَعَلِّم. و كان في زول هِناك إيدو اليَمين يابسَه. و كانو مُعَلِّمين القانون و الفَرّيسيّين يَعاينو ليهو عَشان يَشوفو إذا هو يَشفي في السَّبِت، عَشان يَلقو كيف يَشتَكوهو. لَكِن هو عِرِف أفكارُم، و قال لِلرّاجِل الإِيدو يابسَه: ”قوم و قيف في الوَسِط.“ و هو قام و وَقَف. و يَسُوع قال ليهُم: ”أسألكُم شي. بِالقانون يَعمِل عَمَل كوَيس في يوم السَّبِت ولّا عَمَل بَطّال؟ يَخَلِّص النَّفس ولّا يَكتُلو؟“ و عايَن ليهُم كُلَّهُم، و قال لِلرّاجِل: ”مِد إيدَك!“ و عَمَل كِدا. و إيدو بِقَت طَيبَه زي التّانيَه. لَكِن هُم كانو زَعلانين جِدّاً، و إتكَلَّمو بَعضَهُم لِبَعض بيَعمِلو شِنو بِيَسُوع. و حَصَل في الأيام ديل إنّو مَرَق في الجَّبَل عَشان يَصَلّي. و صَلّى طول اللّيل لِلَّه. و لَمّا كان النَّهار، نادى تَلاميذو و إختار مِنَّهُم إتناشَر السَّمّاهُم كَمان رُسُل. سِمْعَان السَّمَّاهو كَمان بُطْرُس، و أنْدَرَاوُس أخوهو، و يَعْقُوب و يُوحَنَّا، و فِيلُبُّس، و بَرْثُلَمَاوُس، و مَتَّى، و تُومَا، و يَعْقُوب إبن حَلْفَى، و سِمْعَان البِسَمّوهو الغَيُور، و يَهُوذَا إبن يَعْقُوب، و يَهُوذَا الإِسْخَرْيُوطِي البِقي خاين. و نَزَل مَعاهُم و وَقَف في مَكان وَصِف. و كانو مَعاهو جَمَع كَتير مِن تَلاميذو و ناس كُتار مِن كُل اليَهُودِيَّه و أُورُشَلِيم و جَمب صُور و صَيدا. و هُم جو عَشان يَسمَعوهو و عَشانو يَشفيهُم مِن أمراضُم. و التَّعبانين مِن الشياطين، هو شَفاهُم. و كُل النّاس جَرَّبو يَلمَسوهو، عَشان قُدرَه كانَت بِتَمرُق مِنّو و كان يَشفيهُم كُلَّهُم. و رَفَع عُيونو لِتَلاميذو و قال: ”مُبارَكين، يا مَساكين، عَشان ليكُم مَلَكوت الله. مُبارَكين، يا جَعانين هَسَّع، عَشان بِتَشبَعو. مُبارَكين، يا البِتَبكو هَسَّع، عَشان بِتَضحَكو. مُبارَكين لَمّا النّاس بِكرَهوكُم، و ما بِقعُدو مَعاكُم و بِشتِموكُم، و بِطَلِّعو عَليكُم إسم بَطّال عَشان إبن الإنسان. كونو فَرحانين في اليوم داك، و نُطّو مِن السُرور. شوف! أُجرَتكُم كَبير في السَّما. عَشان أبَهاتُم عَمَلو كِدا بِالأنبياء. و لَكِن، مُصيبَه ليكُم، يا غَنيين، عَشان أخَدتو راحَتكُم. مُصيبَه ليكُم، يا الشَبعانين هَسَّع، عَشان تَبقو جَعانين. مُصيبَه ليكُم، إنتو البِتَضحَكو هَسَّع، عَشان بِتَحزَنو و تَبكو. مُصيبَه ليكُم، إذا كُل النّاس يَقولو فيكُم كَلام كوَيس، عَشان أبَهاتُم عَمَلو كِدا بِالأنبياء الكَضّابين. لَكِن أقول ليكُم، يا ناس السامِعين. حِبّو عُدوانكُم. و أعمِلو كوَيس لِلنّاس البِكرَهوكُم. و بارِكو البِقولو عَليكُم لَعنَه. و صَلّو عَشان اليَعمِلو حاجَه بَطّالَه ليكُم. اليَضرُبَك عَلى جَمب واحِد مِن وَشَّك، أقلِب ليهو التّاني كَمان. و الياخُد بَدَلَك، ما تابا تَدّيهو قَميصَك كَمان. و كُلّو واحِد اليَطلُب مِنَّك، أدّيهو. و الياخُد مالَك، ما تَطلُبو مِنّو تاني. و زي ما إنتو عاوِزين النّاس يَعمِلو بيكُم، أعمِلو إنتو بيهُم كِدا. و إذا بِتحِبّو النّاس البِحِبّوكُم، الفايدَه ليكُم شِنو؟ عَشان الخاطيين كَمان بِحِبّو النّاس البِحِبّوهُم. و إذا تَعمِلو الخير لِلبيَعمِلو ليكُم الخير، الفايدَه ليكُم شِنو؟ عَشان الخاطيين كَمان بيَعمِلو زي دا. و إذا تَدّو سُلفَه عَلَشان تاخدو مِنَّهُم مَرَّه تانيَه، الفايدَه ليكُم شِنو؟ عَشان الخاطيين بِدّو سُلفَه لِلخاطيين، عَشان ياخدو مِنَّهُم زيهو. لَكِن حِبّو عُدوانكُم، و أعمِلو الخير ليهُم و أدّو سُلفَه، و ما تَنتَظِرو حاجَه. و أُجرَتكُم تَكون كَبيرَه، و إنتو تَكونو أولاد الله العالي. عَشان هو عِندو نِعمَه لِلما يَشكُروهو و الشَّرّيرين. كونو مَليانين رَحمَه زي ما أبوكُم كَمان رَحيم. و ما تَحكُمو عَلى زول، عَشان إنتو ما بِتكونو مَحكومين. ما تَلَوِّمو، عَشان ما بِتكونو مَلَوِّمين. أغفِرو، و يِتغَفَر ليكُم. أدّو، و بِدّوكُم. كيله كوَيسَه، مَوَزَّنَه تَمام، مَحظوظَه، مَليانَه، يَدُّوكُم في إيدينكُم. عَشان الكيلَه الإنتو تَدّوها، بِتكون الكيلَه الهُم بِدّوكُم.“ و عَلَّمُم بِمَثَل. ”العَميان يَقدَر يَقود عَميان زيهو؟ هُم الإتنين ما بِيَقَعو في حُفرَه؟ التِّلميذ ما أحسَن مِن مُعَلِّمو. و لَكِن كُل اليَبقى كامِل يَكون زي مُعَلِّمو. لِشِنو بِتعاين لِلحاجَه الصَّغَيرَه الفي عين أخوك، و ما بِتشوف الحاجَه الكَبيرَه الفي عينَك؟ و كيف تَقدَر تَقول لِأخوك: يا أخي، خَلّيني أطَلِّع الشّي الصَّغَير الفي عينَك، و إنتَ ما بِتشوف الشّي الكَبير الفي عينَك؟ يا مُنافَق! في الأوَّل طَلِّع الشّي الكَبير مِن عينَك، و بَعدين تَقدَر تَشوف كوَيس عَشان تَطَلِّع الشّي الصَّغَير مِن عين أخوك. عَشان ما في شَجَرَه سَمحَه بِتَلِد ثِمار بَطّال، و لا في شَجَرَه بَطّالَه بِتَلِد ثِمار سَمِح. عَشان كُلّو شَجَرَه مَعروفَه بِالثَّمار بِتِاعا. و النّاس ما يَلِمّو تين مِن شَجَر الشّوك، ولّا يَلِمّو عِنَب مِن شَجَر الغابَه. الزّول الصّالِح مِن كَنز قَلبو الصّالِح يَطَلِّع حاجات صالحَه. و الزّول الشَّرّير مِن كَنز قَلبو الشَرِّير يَطَلِّع حاجات شَرّيرَه. عَشان مِن الكِترَت الفي قَلبو، خَشمو بِتكَلَّم. و لِشِنو بِتسَمّوني: ’يا رَب، يا رَب‘ و ما بِتَعمِلو البَقولو. كُل البِجيني و بِسمَع كَلامي و بيَعمِل بيهو، أوَرِّيكُم هو زي مِنو. هو مِثِل زول بِبني بيت، و بِحفِر تِحِت و بِخُت الأساس عَلى الحَجَر. و لَمّا المويَه مَلَت الأرض، و المويَه ضَرَبَت عَلى البيت داك، ما قِدِر تَهِزّو، عَشان كان أساسو عَلى الحَجَر. و لَكِن البِسمَع و ما بيَعمِل، هو زي زول بَنى بيتو عَلى الأرض بِدون أساس. و المويَه ضَرَبَت عَلى البيت، و طَوّالي البيت وَقَع. و كان خَراب البيت داك كَبير.“ و لَمّا كَمَّل كُلّو كَلامو لِلنّاس القاعِدين يَسمَعوهو، دَخَل كَفْرَنَاحُوم. و رَئيس الجّيش كان عِندو خَدّام مَحبوب ليهو. و كان عَيّان قَريب لِلموت. و لَمّا سِمِع عَن يَسُوع، رَسَّل شُيوخ اليَهود، و طَلَبو مِنّو يَجي يَشفي خَدّامو. و لَمّا جو لِيَسُوع، سألوهو كَتير و قالو: ”هو بِستَحِق تَعمِل ليهو دا. عَشان بِحِب الشَّعب بِتاعنا، و هو زاتو بَنى لينا بيت الرَّب.“ و يَسُوع مَشى مَعاهُم. و لَمّا ما كان بَعيد مِن البيت، رَئيس الجّيش رَسَّل ليهو أصحابو يَقول ليهو: ”يا رَب، ما تَتَعِّب نَفسَك، عَشان أنا ما بَستَحِق إنتَ تَدخُل بيتي. و عَشان كِدا، ما حَسبتَ نَفسي مُستَحِق أجي ليك. و لَكِن قول كِلمَه و خَدّامي يَكون طَيب. عَشان أنا كَمان راجِل تِحِت السُّلطَه، و عِندي عَساكِر تِحِت إيدي. أقول لِدا: أمشي، و يَمشي. و لِتاني: تَعال، و يَجي. و لِخَدّامي: أعمِل دا، و يَعمِلو.“ و لَمّا يَسُوع سِمِع الكِلمات دي، إتعَجَّب مِنّو و إتلَفَت لِلنّاس التِبِعوهو و قال: ”أقول ليكُم، أنا ما لِقيت و لا في إِسْرَائِيل إيمان قَدُر دا.“ و وَكِت ما رَجَعو المُرَسَّلين لِلبيت، لِقو الخَدّام بِقى طَيب. و حَصَل بَعَد اليوم دا إنّو مَشى لِمَدينَه إسِما نَايِين. و تَلاميذو و ناس كُتار مَشو مَعاهو. و لَمّا قَرَّب لِباب البَلَد، شوف، كان في ناس شايلين زول مَيِّت، و هو وَلَد وَحيد عِند أُمّو. و هي أرمَلَه. و مَعاها ناس كُتار مِن البَلَد. و لَمّا شافا، الرَّب كان عِندو رَحمَه ليها و قال ليها: ”ما تَبكي.“ و قَرَّب و لَمَس العَنقَرِيب، و الشايلينو وَقَفو. و يَسُوع قال: ”يا شاب، أقول ليك، قوم!“ و الكان مَيِّت قَنَّب و إبتَدا يتكَلَّم، و يَسُوع سَلَّمو لِأُمّو. و الخوف مَسَك كُلَّهُم، و هُم مَجَّدو الله و قالو: ”نَبي عَظيم قام في وَسِطنا!“ و ”الله جا عَشان يَساعِد شَعبو.“ و الخَبَر دا مَشى في كُل اليَهُودِيَّه و في كُل البِلاد القَريبَه مِنّو. و تَلاميذ يُوحَنَّا كَلَّموهو عَن الحاجات دي كُلَّها. و يُوحَنَّا نادى إتنين مِن تَلاميذو، و رَسَّلُم لِيَسُوع و قال: ”إنتَ هو الجّاي؟ ولّا نَنتَظِر واحِد غيرَك؟“ و لَمّا جو ليهو الراجلين، قالو: ”يُوحَنَّا المَعمَدان رَسَّلنا ليك عَشان يَسأل: ’إنتَ هو الجّاي ولّا نَنتَظِر واحِد غيرَك؟“ و في السّاعَه ديك شَفى ناس كُتار مِن أمراضُم، و عَياهُم، و مِن أرواح شَرّيرَه. و فَتَح عُيون عَميانين كُتار. و رَدَّ و قال ليهُم: ”أمشو و خَبِّرو يُوحَنَّا بِالحاجات الشُّفتوها و سِمِعتوها. العَميانين بِشوفو، و العُرُج بِمشو، و المُجَزَّمين بِتنَضَّفو، و الطُرُش بِسمَعو، و المَيِّتين بِقومو، و المَساكين بِبَشِّرو ليهُم. و مُبارَك الما يَقَع عَلَشانّي.“ و بَعَد ما مَراسيل يُوحَنَّا مَشو، هو بِقى يَقول لِلنّاس عَن يُوحَنَّا: ”طَلَعتو في الخَلا تَعاينو في شِنو؟ قَش بِتهِزّو الهَبوب؟ ولّا طَلَعتو تَشوفو شِنو؟ زول لابِس هِدوم سَمِح؟ شوف! اللابسين الهِدوم الجَّميل و البِعيشو زي الغَنيين، هُم في سَرايات المُلوك. و لَكِن طَلَعتو تَشوفو شِنو؟ نَبي؟ أيوَه، أقول ليكُم، و أحسَن مِن نَبي. دا هو المَكتوب عَنّو، شوف! أرَسِّل مَراسيل قِدَّامَك، اليَحَضِّر ليك طَريقَك قِدَّامَك. و أقول ليكُم إنّو ما في زول مِن المَولودين مِن النِّسوان أكبَر مِن يُوحَنَّا. و لَكِن الأصغَر في مَلَكوت الله أكبَر مِنّو.“ و النّاس كُلُّهُم و البِلِمّو الضَّريبَه، لَمّا سِمِعو، شِهِدو لِعَدل الله. و هُم كانو مِتعَمِّدين بِمَعموديَّة يُوحَنَّا. و لَكِن الفَرِّيسِيِّين و مُعَلِّمين القانون رَفَضو إرادَة الله فِشانُم، و يُوحَنَّا ما عَمَّدُم. ”ناس الزَّمَن هُم زي شِنو؟ و يَشبَهو مِنو؟ هُم زي أولاد قاعِدين في السّوق و بِنادو بَعضَهُم لِبَعض و يَقولو: غَنّينا ليكُم و ما رَقَصتو، و بَكينا ليكُم و ما بَكيتو. عَشان يُوحَنَّا المَعمَدان جا ما ياكُل عيش و لا يَشرَب خَمر. و إنتو بِتقولو: عِندو شيطان. إبن الإنسان جا ياكُل و يَشرَب، و إنتو بِتقولو: شوف! دا راجِل بياكُل كَتير و شَرّاب خَمر، و بِحِب البِلِمّو الضَّريبَه و الخاطيين. و الحِكمَه تَوَرّي عَديله بِكُلّو أولادا.“ و طَلَب مِنّو واحِد مِن الفَرِّيسِيِّين عَشان ياكُل مَعاهو. و دَخَل بيت الفرِّيسي، و قَعَد ياكُل. و شوف، مَرَه كانَت في البَلَد، و هي خَاطيَه. و لَمّا عِرفَت إنّو قاعِد في بيت الفرِّيسي، جابَت قِزازَه فيها ريحَه. و وَقَفَت وَراهو عِند كِرعينو تَبكي. و بِقَت تَغَسِّل كِرعينو بِالدِّموع. و كانَت تَمسَحُم بِشَعَر راسا، و تَقَبِّل كِرعينو و تَدهِنُم بِالرِّيحَه. و لَمّا شاف كِدا، الفرِّيسي الناداهو قال في نَفسو: ”الرّاجِل دا إذا نَبي كان عِرِف مِنو المَرَه دي، و مِنو هي البِتَلمَسو إنَّها خَاطيَه.“ و رَدَّ يَسُوع و قال ليهو: ”يا سِمْعَان، عِندي حاجَه أقولا ليك.“ و قال: ”قول، يا مُعَلِّم.“ ”كان في زول، مَديونين ليهو راجلين، واحِد عَليهو خُمسُميَّه جِنيه، و التّاني خَمسين. و لَمّا ما كان يَقدَرو يَدفَعوها، غَفَر ليهُم الإتنين. و عَلى كِدا، مِنو فيهُم بِحِبّو أكتَر؟“ و رَدَّ سِمْعَان و قال: ”أظِن الغَفَر ليهو أكتَر.“ و قال ليهو: ”حَكَمتَ بِالحَق.“ و إتلَفَت لِلمَرَه و قال لِسِمْعَان: ”شايف المَرَه دي؟ أنا دَخَلتَ بيتَك، و إنتَ ما أدّيتني مويَه لِكِرعيني، لَكِن هي بِدِموعا، غَسَّلَت كِرعيني، و مَسَحَتُم بِشَعَر راسا. و إنتَ ما سَلَّمتَ عَلي، لَكِن هي مِن وَكِت ما دَخَلَت، ما بَطَلَت تَقَبِّل كِرعيني. و إنتَ ما مَسَحتَ رَاسي بِالزِيت، لَكِن هي مَسَحَت كِرعيني بِالرِّيحَه. و عَلى كِدا، أقول ليك، إتغَفَرَت ليها خَطاياها الكَتيرَه، عَشان حَبَّت كَتير. و اليِتغَفَر ليهو قَليل، يَحِب قَليل.“ و قال ليها: ”إتغَفَرَت ليكي خَطاياكي.“ و المَعزومين مَعاهو إبتَدو يَقولو في نُفوسُم: ”مِنو دا البِغفِر الخَطايا كَمان؟“ و يَسُوع قال لِلمَرَه: ”إيمانِك خَلَّصِك. أمشي بِالسَّلام.“ و بَعَد شوَيَه، كان بِمُر عَلى كُلّو مَدينَه و حِلَّه يَنادي و يَبَشِّر بِمَلَكوت الله. و الإتناشَر كانو مَعاهو، و كَمان بَعض مِن النِّسوان الهو شَفاهُم مِن أرواح شَرّيرَه و أمراض. مَرْيَم البِسَمّوها المَجْدَلِيَّه، الطَلَّع مِنَّها سَبعَه شياطين، و يُوانّا مَرَة خوزا وَكيل هِيرُودُس، و سوزانّا، و تانيين كُتار كانو يَخدِموهو بِمالُم. و لَمّا جَمَع كَبير إتلَمّى، و ناس جو ليهو مِن كُلّو بَلَد، هو عَلَّمُم بِمَثَل. ”المُزارِع طَلَع عَشان يَزرَع تيرابو. و وَكِت هو يَزرَع، شوَيَه وَقَع في الطَّرِيق، و النّاس دَاسوهو، و طُيور السَّما أكَلتو. و تاني وَقَع عَلى الحَجَر. و بَعَد ما قام، يبِس، عَشان ما كان عِندو مويَه، و تاني وَقَع في وَسِط الشّوك. و الشّوك قام مَعاهو و خَنَقو. و تاني وَقَع عَلى الأرض الكوَيسَه. و لَمّا قام، جاب ثِمار بِمِيَّة مَرَّه.“ و وَكِت كان بِتكَلَّم كِدا، نادى و قال: ”العِندو إضنين لِلسَّمَع، خَليهو يَسمَع.“ و سألوهو تَلاميذو، و قالو: ”مَعنى المَثَل دا شِنو؟“ و قال: ”الله أدّا ليكُم تَعرِفو أسرار مَلَكوت الله، لَكِن لِلتّانيين بِأمثال، عَشان يَعاينو و ما يَشوفو، و يَسمَعو و ما يَفهَمو. و دا هو المَثَل. التّيراب، هو كِلمَة الله. و ديلاك العَلى الطَّرِيق، هُم السِّمِعو. و بَعدين إبْلِيس يَجي و يَشيل الكِلمَه مِن قُلوبُم، عَشان ما يآمِنو و يَخلَصو. و ديلاك العَلى الحَجَر، هُم البَعَد ما سِمِعو، يَقبَلو الكِلمَه بِفَرَح. و ديل ما عِندَهُم عُروق، اليأَمِنو لِمُدَّه، و وَكِت التَجرِبَه، يَرجَعو. و التّيراب الوَقَع وَسِط الشّوك يَعني ديل اليَسمَعو. لَكِن لَمّا هُم بِمشو في طَرِيقُم، أفكار في حاجات الدُّنيا و أموالا و سُرورا يَمسِكو بيهُم، و ما يَقدَرو يَجيبو ثِمار. و الفي الأرض الكوَيسَه، هُم البِقَلِب كوَيس و صالِح، بَعَد ما سِمِعو الكِلمَه، يَحفَظوها، و يَجيبو ثِمار بِالصَّبر. و ما في زول بِوَلِّع لَمبَه و يَغَتّيها بِقُفَّه. و لا يَخُتّا تِحِت العَنقَرِيب، لَكِن يَخُتّا عَلى طَرَبيزَه، عَشان الدّاخِلين يَشوفو النّور. و ما في شي مَدسوس الما بِكون باين، و لا في شي سِرّي الما بِكون مَعروف و ما بِظهَر. عَلى كِدا، خَلّو بالكُم بِتَسمَعو كيف. عَشان العِندو يَدُّوهو. و الما عِندو، حَتّى البِفتَكِر هو عِندو، يَاخُدوهو مِنّو.“ و جو لِيهو أُمّو و أخوانو، و ما قِدرو يَجو قَريب مِنّو بِسَبَب النّاس الكُتار. و قالو ليهو: ”أُمَّك و أخوانَك واقفين بَرَّه دايرين يَشوفوك.“ و رَدَّ و قال ليهُم: ”أُمّي و أخواني هُم البِسمَعو كِلمَة الله و يَعمِلو بيها.“ و في يوم مِن الأيام، دَخَل المُركَب، هو و تَلاميذو، و قال ليهُم: ”خَلّونا نَمشي لِلجَّمب الآخِر مِن البَحَر.“ و سافَرو. و وَكِت ما كانو مِسافِرِين، هو نام. و هَبوب شَديدَه نَزَلَت في البَحَر، و المُركَب إتمَلَت بِمويَه. و كانو في الخَطَر. و جو ليهو و قَوَّموهو مِن النّوم و قالو: ”يا مُعَلِّم، يا مُعَلِّم، نِحنا ماشين نَموت!“ و قام مِن النّوم و وَبَّخ الهَبوب و أمواج البَحَر. و الهَبوب سَكَتَت، و كان في سُكوت. و قال ليهُم: ”إيمانكُم وين؟“ و خافو و إتعَجَّبو، و قالو بَعضَهُم لِبَعض: ”دا هو مِنو اليأمُر الهَبوب و المويَه حَتّى يَطيعوهو؟“ و سافَرو لِبَلَد الجَدَريّين الهي قِدّام الجَّليل. و لَمّا مَرَق لِلأرض، قابَلو راجِل مِن البَلَد كان فيهو شياطين. و مِن مُدَّه طَويلَه، هو ما كان لِبِس هِدوم ولّا قَنَّب في البيت، لَكِن في القُبور. و لَمّا شاف يَسُوع، كورَك و وَقَع قِدّامو، و قال بِصوت عالي: ”مالي و مالَك، يا يَسُوع إبن الله العالي؟ أطلُب مِنَّك ما تَعَزِّبني.“ عَشان هو أمَر الرّوح النَّجِس يَطلَع مِن الرّاجِل. عَشان مَرّات كَتيرَه كان يَمسِكو. و النّاس كانو يَحفَظوهو، و هو مَربوط بِجَنازِير. و لَكِن كان يَقطَع الرُّباط، و الشّيطان كان يَسوقو لِلخَلا. و يَسُوع سَألو: ”إسمَك شِنو؟“ و قال: ”لَجِيُون،“ عَشان شياطين كَتيرين كانو دَخَلو فيهو. و طَلَبو مِنّو عَشان ما يأمُرُم يَمشو لِلحُفرَه الغَريقَه. و كان هِناك مُراح كَداريك كَتيرَه ياكُل في الجَّبَل. و الشّياطين طَلَبو مِنّو إذن عَشان يدخُلو فيهُم. و أدّاهُم إذن. و الشّياطين طَلَعو مِن الرّاجِل، و دَخَلو في الكَداريك. و الكَداريك وَقَعو مِن مَحَل فوق لِلبَحَر و ماتو. و لَمّا الرُعاه شافو الحَصَل، هَرَبو، و خَبَّرو في المَدينَه و في الحِلَل. و النّاس مَرَقو عَشان يَشوفو الحَصَل، و جو لِيَسُوع. و لِقو الرّاجِل المَرَقو مِنّو الشّياطين قاعِد عِند كِرعين يَسُوع. و هو كان لابِس هِدوم و عَقلو كوَيس. و هُم خافو. و الشّافوهو خَبَّروهُم كيف العِندو الشّيطان بِقى طَيب. و كُلّو أهل بَلَد الجَدَريّين و السّاكنين جَمبُم طَلَبو مِنّو أن يَمرُق، عَشان خوف شَديد مَسَكُم. و دَخَل المُركَب و رَجَع. لَكِن الرّاجِل الطَلَعت مِنّو الشّياطين طَلَب مِنّو عَشان يَكون مَعاهو. لَكِن يَسُوع رَسَّلو و قال: ”أرجَع لِبيتَك و خَبِّر بِالحاجَه السَّوَّاها ليك الله.“ و مَشى يَنادي في البَلَد كُلَّها بِكَم سَوَّاهو ليهو يَسُوع. و وَكِت ما يَسُوع رَجَع، النّاس قِبلوهو عَشان كُلُّهُم كانو يَنتَظِروهو. و شوف! راجِل إسمو يَايِرُس جا. و هو رَئيس بيت الرَّب. و وَقَع قِدّام يَسُوع و طَلَب مِنّو يَدخُل بيتو. عَشان كانَت عِندو بِت وَحيدَه عُمُرا إتناشَر سَنَه تَقريباً، و كانَت قَريبَه مِن الموت. و وَكِت ما هو ماشي، ناس كُتار لَزُّوهو مِن كُلّو جَمب. و كانَت في مَرَه الدَّم نَزَل مِنَّها مُدَّة إتناشَر سَنَه، و ما في واحِد قِدِر يَشفيها. هي جات مِن وَراهو و لِمسَت طَرَف توبو. و طَوّالي دَمّا وَقَف. و يَسُوع قال: ”مِنو لِمِسني؟“ و لَمّا كُلُّهُم نَكَرو، بُطْرُس و الكانو مَعاهو قالو: ”يا مُعَلِّم، النّاس يَقَرِّبو مِنَّك يَضايقوك، و إنتَ بِتقول: ’مِنو اللِمِسني؟“ لَكِن يَسُوع قال: ”زول لِمِسني، عَشان عِرِفتَ إنّو في قُدرَه طَلَعَت مِنّي.“ و لَمّا المَرَه شافَت إنَّها ما إندَسَّت، جات تِتهَزَّ. و وَقَعَت قِدّامو، و كَلَّمَتو قِدّام كُل النّاس عَشان شِنو لِمسَتو، و كيف بِقَت طَيبَه طَوّالي. و قال ليها: ”يا بِتّي، إيمانِك شَفاكي. أمشي بِالسَّلام.“ و وَكِت ما كان بِتكَلَّم، واحِد جا مِن بيت رَئيس بيت الرَّب، و قال ليهو: ”بِتَّك ماتَت. ما تَتَعِّب المُعَلِّم بَعَد دا.“ و يَسُوع سِمِع و قال ليهو: ”ما تَخاف، آمِن بَس، و هي بِتكون كوَيسَه!“ و لَمّا وِصِل لِلبيت، ما خَلّى زول يَدخُل مَعاهو إلّا بُطْرُس و يُوحَنَّا و يَعْقُوب، و أبو البِت و أُمَّها. و لَكِن كُل النّاس كانو يَبكو عَليها و يَكورِكو فِشانا. لَكِن يَسُوع قال: ”ما تَبكو! هي ما ماتَت لَكِن نايمَه.“ و ضِحِكو عَليهو، عَشان كانو عارِفين هي ماتَت. لَكِن هو مَسَك إيدا و نادى و قال: ”يا بِت، قومي!“ و رَجَعَت روحا، و قامَت طَوّالي. و أمَرُم يَدُّوها عَشان تَاكُل. و والِديها إستَغرَبو، و يَسُوع أمَرُم عَشان ما يَكَلِّمو زول بِالحَصَل. و نادى تَلاميذو الإتناشَر و أدّاهُم قُدرَه و سُلطَه عَلى الشّياطين و عَشان يَشفو المَرضانين. و رَسَّلُم يَبَشِّرو بِمَلَكوت الله و يَشفو المَرضانين. و قال ليهُم: ”ما تَشيلو حاجَه لِلسَّفَر، لا عَصايَه و لا كيس و لا عيش و لا فِلوس و لا توبين. و أي بيت دَخَلتوهو، أقعُدو هِناك، لِغايَة ما تَسيبو البَلَد ديك. و كُل الما يَقبَلوكُم، لَمّا تَمرُقو مِن البَلَد ديك، هِزّو التُّراب مِن عَلى رِجلينكُم عَشان شَهادَه عَليهُم.“ و هُم طَلَعو، و كانو يَفوتو عَلى كُلّو حِلَّه يَبَشِّرو و يَشفو في كُلّو مَحَل. و هِيرُودُس رَئيس المُديرِيَّه سِمِع بِكُل الحَصَل، و كان مِتحَيّر عَشان بَعضُم قالو إنّو يُوحَنَّا قام مِن بين المَيِّتين. و بَعضُم قالو إنّو إِيلِيَّا ظَهَر، و غيرُم إنّو نَبي مِن زَمان قام. و هِيرُودُس قال: ”أنا قَطَعتَ راس يُوحَنَّا، لَكِن مِنو دا البَسمَع عَنّو حاجات زي دي؟“ و كان داير يَشوفو. و لَمّا الرُّسُل رَجَعو، خَبَّروهو بِكُل العَمَلوهو. و أخَدُم، و هُم مَشو بَراهُم لِبَلَد إسِما بيت صَيدا. و النّاس، وَكِت ما عِرفو، تِبِعوهو. و هو قِبِلُم و كَلَّمُم عَن مَلَكوت الله، و شَفى المُحتاجين لِلشِّفا. و لَمّا قَرَّب المِسا، الإتناشَر جو و قالو ليهو: ”رَسِّل النّاس عَشان يَمشو لِلحِلَل و البِلاد القَريبَه، و يَنومو هِناك و يَلقو أكِل. عَشان نِحنا هِنا في مَكان خَلا.“ لَكِن هو قال ليهُم: ”إنتو أدّوهُم عَشان ياكلو.“ و قالو: ”ما عِندَنا حاجَه أكتَر مِن خَمسَه رَغِفان و سَمَكتين، إلّا إذا نَمشي و نَشتَري أكِل لِلنّاس ديل كُلَّهُم.“ عَشان كانو خَمسَة آلاف راجِل تَقريباً. و قال لِتَلاميذو: ”خَلّوهُم يَقعُدو جَماعَه خَمسين خَمسين تَقريباً.“ و عَمَلو كِدا، و كُلَّهُم قَنَّبو. و أخَد الخَمسَه رَغِفان و السَّمَكتين، و عايَن لِلسَّما، و بارَكُم، و كَسَّر، و أدّا لِلتَّلاميذ عَشان يَقَدِّمو لِلنّاس. و كُلُّهُم أكَلو و شِبِعو. و رَفَعو الفَضلَه مِن الكِسرَه إتناشَر قُفَّه. و حَصَل، لَمّا هو كان يَصَلّي، و التَّلاميذ كانو مَعاهو، هو سألُم و قال: ”النّاس بِقولو أنا مِنو؟“ و رَدّو و قالو: ”يُوحَنَّا المَعمَدان. و تانيين بِقولو إِيلِيَّا. و تانيين، نَبي مِن زَمان قام.“ و قال ليهُم: ”و إنتو تَقولو أنا مِنو؟“ و بُطْرُس رَدَّ و قال: ”إنتَ مَسيح الله.“ و حَزَّرُم و أمَرُم ما يَقولو دا لِأي زول. و قال: ”إبن الإنسان لازِم يِتعَذَب كَتير. و الشُّيوخ، و القُسُس الكُبار، و مُعَلِّمين القانون بِرفُضوهو و بِكتُلوهو. و في اليوم التّالِت هو بِقوم.“ و قال لِلكُل: ”إذا كان زول داير يَجي وَراي، خَليهو يَنكِر نَفسو و يَشيل صَليبو كُلّو يوم و يَتبَعني. عَشان كُل الدّايِر يَخَلِّص نَفسو يَوَدِّرو، و كُل اليَوَدِّر نَفسو عَشانّي يَخَلِّصو. و الفايدَه شِنو إذا الزّول لِقى الدُّنيا كُلَّها و وَدَّر نَفسو ولّا خِسِرا؟ عَشان إذا واحِد يَكون خَجلان مِنّي و مِن كَلامي، إبن الإنسان بِكون خَجلان مِنّو وَكِت ما يَجي في مَجدو و في مَجد الأبو و المَلائكَه المُقَدَّسين. بَكَلِّمكُم بِالحَق، في جَماعَه مِن الواقفين هِنا، ما بِموتو لِغايَة ما بِشوفو مَلَكوت الله.“ و بَعَد الكَلام دا بِتَمانيَة أيام تَقريباً، يَسُوع أخَد بُطْرُس و يُوحَنَّا و يَعْقُوب، و طَلَع عَلى الجَّبَل عَشان يَصَلّي. و وَكِت كان يَصَلّي، وَشّو إتغَيَّر، و هِدومو بِقى أبيَض و لامِع. و شوف! راجلين إتكَلَّمو مَعاهو، و هُم مُوسَى و إِيلِيَّا. و هُم ظَهَرو في مَجد، و كانو يِتكَلَّمو عَن موتو، الكان يَقَرِّب يَتِمّو في أُورُشَلِيم. و لَكِن بُطْرُس و المَعاهو كانو غَرقانين في النوم. و لَمّا قامو مِن النّوم، شافو مَجدو و الراجلين الواقِفين مَعاهو. و حَصَل لَمّا الراجلين كانو يَمشو مِن يَسُوع، بُطْرُس قال لِيَسُوع: ”يا مُعَلِّم، كوَيس نَكون هِنا. خَلّينا نَعمِل تلاتَه خيام، واحدَه ليك و واحدَه لِمُوسَى و واحدَه لِإِيلِيَّا.“ و هو ما عارِف البِقولو. و وَكِت كان بِكَلِّم، جا سَحاب و غَطّاهُم. و خافو لَمّا دَخَلو في السَّحاب. و جا صوت مِن السَّحاب يَقول: ”دا هو إبني المُختار. أسمَعو ليهو.“ و بَعَد الصّوت دا، يَسُوع إتلَقى بَراهو. و سَكَتو و ما كَلَّمو أي زول في الأيام ديك بِأي شي الهُم شافوهو. و في اليوم التّاني لَمّا نَزَلو مِن الجَّبَل، جَمَع كَبير قابَلوهو. و شوف! راجِل مِن الجَّمَع كورَك و قال: ”يا مُعَلِّم! أطلُب مِنَّك عايِن لِوَلَدي، عَشان هو وَلَدي الوَحَيد. و شوف! روح بيَمسِكو، و طَوّالي هو بِكورِك و بِتحَرَّك كَتير لِغايَة ما يَزَبِّد. و هو يَخَلِيهو بِصُعوبَه، و يَخَسِّر جِسمو. و طَلَبتَ مِن تَلاميذَك يَطَلِّعوهو، و ما قِدرو.“ و يَسُوع رَدَّ و قال: ”يا أولاد الزَّمَن الما مِصَدِّقين و راسُم قَوّي، لِمِتين أكون مَعاكُم و أصبُر عَليكُم؟ جيب وَلَدَك هِنا!“ و وَكِت هو جاي، الشّيطان رَماهو و جِسمو كان بِهِز. لَكِن يَسُوع وَبَّخ الرّوح النَّجِس و شَفى الوَلَد، و سَلَّمو لِأبوهو. و إستَغرَبو كُلُّهُم مِن مَجد الله. و لَمّا النّاس كُلُّهُم كانو يِتعَجَّبو عَلى كُل الهُوَ عَمَل، قال لِتَلاميذو، ”خَلّو الكَلام دا يَكون في إضنينكُم! عَشان إبن الإنسان يِتسَلَّم لِإيدين النّاس.“ و لَكِن هُم ما فِهمو الكَلام دا، و كان مَدسوس مِنَّهُم، عَشان ما يَفهَموهو. و كانو خايفين يَسألوهو عَن الكَلام دا. و قام بِينُم سؤَال عَن ياتو فيهُم بِكون أكبَر. لَكِن يَسُوع، لَمّا عِرِف فِكِر قُلوبُم، أخَد وَلَد و وَقَّفو جَمبو. و قال ليهُم: ”البِقبَل الوَلَد دا بِإسمي، بِقبَلني. و البِقبَلني، بِقبَل الرَّسَّلني. عَلى كِدا، الأصغَر فيكُم، دا هو الكَبير.“ و يُوحَنَّا رَدَّ و قال: ”يا مُعَلِّم! شُفنا زول يَطَلِّع شياطين بِإسمَك، و مَنَعناهو، عَشان ما يَتبَع مَعانا.“ يَسُوع قال ليهو: ”ما تَمنَعوهو، عَشان الما عَليكُم، هو مَعاكُم.“ و لَمّا تَمَّت الأيام لِرَفعو لِلسَّما، خَلّى كُلّو بالو، عَشان يَمشي لِأُورُشَلِيم. و رَسَّل مَراسيل قِدّامو. و مَشو و دَخَلو حِلَّه مِن حِلَل السّامِريّين، عَشان يَجَهِّزو ليهو. و ما قِبلوهو عَشان كان ماشي لِأُورُشَلِيم. و لَمّا شافو دا، يَعْقُوب و يُوحَنَّا تَلاميذو قالو: ”يا رَب! إنتَ دايرنا نَقول أن نار تَنزِل مِن السَّما و تَحَرِقُم، زي ما عَمَل إِيلِيَّا كَمان؟“ و إتلَفَت و وَبَّخُم، و قال: ”إنتو ما تَعرِفو مِن ياتو روح إنتو بِتِتكَلَّمو. عَشان إبن الإنسان ما جا عَشان يَخَرِّب حَياة النّاس، لَكِن عَشان يَخَلِّص.“ و مَشو لِحِلَّه تانيَه. و لَمّا كانو ماشين في الطَّرِيق، زول قال ليهو: ”أنا بَتبَعَك في أي مَحَل تَمشي ليهو.“ و يَسُوع قال ليهو: ”التَّعالِب عِندَهُم مَحَلّات النّوم، و طُيور السَّما عِندَهُم عِشاش. لَكِن إبن الإنسان ما عِندو مَكان عَشان يَخُت رَاسو فوقو.“ و قال لِزول تاني: ”أتبَعني.“ و قال ليهو: ”يا سَيِّد، أدّيني إذن أمشي في الأوَّل و أدفِن أبوي.“ و يَسُوع قال ليهو: ”خَلّي المَيِّتين يَدفِنو مَيِّتينُم. لَكِن إنتَ، أمشي و بَشِّر بِمَلَكوت الله.“ و زول تاني قال: ”بَتبَعَك، يا رَب. بَس أدّيني إذن في الأوَّل أقول مَعَ السَّلامَه لِأهل بيتي.“ لَكِن يَسُوع قال ليهو: ”ما في زول البِخُت إيدو عَلى المِحرات و يَعايِن لِوَرا، عِندو فايدَه في مَلَكوت الله.“ و بَعَد كِدا، الرَّب إختار سَبعين تانيين و رَسَّلُم إتنين إتنين قِدّامو لِكُلّو بَلَد و مَحَل هو عاوِز يَمشي ليهو. و قال ليهُم: ”دُرَه كَتيرَه جاهزَه، لَكِن الشَغّالين قَليلين. عَلَشان كِدا، أطلُب مِن رَب الحَصاد عَشان يَرَسِّل شَغّالين لِزِراعتو. أمشو! شوفو! أنا أرَسِّلكُم زي خِرفان في وَسط مَرفَعين. ما تَشيلو كيس و لا جُزلان و لا جِزَم. و ما تَسَلِّمو عَلى زول في السِّكَّه. و أي بيت تَدخُلوهو، قولو في الأوَّل: سَلام لِلبيت دا. و إذا كان هِناك إنسان السَّلام، سَلامكُم بِكون عَليهو. و إذا ما في، سَلامكُم بِرجَع ليكُم. و أقعُدو في زات البيت، و أُكلو و أشرَبو اليَدّوهو ليكُم، عَشان الشَّغال مُستَحِق أُجرَتو. و ما تَمشو مِن بيت لِبيت. و أي مَدينَه تَدخُلوها و هُم يَقبَلوكُم، أُكلو مِن اليَقَدِّموهو ليكُم. و أشفو المَرضانين الفي البيت، و قولو ليهُم: مَلَكوت الله قَرَّب مِنَّكُم. و أي مَدينَه تَدخُلوها و هُم ما يَقبَلوكُم، أطلَعو في شَوارِعا و قولو: حَتّى تُراب بَلَدكُم اللِّصِق في رِجلينّا نَهِزّو عَليكُم. و لَكِن أعرِفو إنّو مَلَكوت الله قَرَّب. أقول ليكُم، حالَة سَدوم بِتكون أحسَن في اليوم داك مِن الحالَه البِتكون لِلبَلَد ديك. مُصيبَه ليكي، يا كُورَزِين! مُصيبَه ليكي، يا بيت صَيدا! إذا كان القُوّات العَمَلوها في صُور و صَيدا عَمَلوها فيكُم، كانو تابو زَمان لابسين الشَوال و يَخُتّو الرَّماد فوق راسُم. لَكِن في يوم الحُكم، حالَة صُور و صَيدا بِتكون أحسَن مِن الحالَه البِتكون ليكُم. و إنتي، يا كَفْرَنَاحُوم، بِتكوني مَرفوع لِلسَّما؟ بِتَنزِلي إنتي لِلهاويَه. اليَسمَعكُم يَسمَعني، و اليَرفُضكُم يَرفُضني، و اليَرفُضني يَرفُض الرَّسَّلني.“ و السَّبعين رَجَعو بِفَرَح و قالو: ”حَتّى الشّياطين يَطيعونا بِإسمَك.“ و قال ليهُم: ”أنا كُنتَ أشوف الشّيطان يَقَع مِثِل البَرق مِن السَّما. شوف! أنا أدّيتكُم السُّلطَه تَدوسو الدَّبايب و العَقارِب، و عَلى كُلّو قُدرَة العَدو. و ما في شي يَجرَحكُم. و لَكِن ما تَفرَحو عَشان الأرواح يَسمَعو ليكُم، لَكِن أفرَحو عَشان أساميكُم مَكتوبَه في السَّما.“ و في السّاعَه دي، هو فِرِح كَتير بِالرّوح القُدُس و قال: ”أحمَدَك، يا أبوي، يا رَب السَّما و الأرض، عَشان دَسيت الحاجات دي مِن المِتعَلِّمين و الفاهمين، و وَرّيتا لِلأولاد الصُّغار. أيوَه، يا أبوي، عَشان كان مِن إرادَتَك أن يَكون كِدا. أبوي أدّاني كُلّو شي. و ما في زول يَعرِف الإبن هو مِنو، إلّا الأبو، و الأبو هو مِنو إلّا الإبن، و كُل الإبن عاوِز يَوَرّي نَفسو ليهو.“ و إتلَفَت لِتَلاميذو و قال ليهُم بَراهُم: ”مُبارَكين العُيون البِشوفو الإنتو بِتشوفو. عَشان أقول ليكُم، أنبياء كُتار و مُلوك دارو يَشوفو الحاجات الإنتو بِتشوفوها، و ما شافوها. و دارو يَسمَعو الإنتو بِتَسمَعوهو، و ما سِمِعوهو.“ و شوف! راجِل عِرِف القانون قام يَجَرِّبو و قال: ”يا مُعَلِّم، أعمِل شِنو عَشان ألقى الحَياة الأبَديَّه؟“ و قال ليهو: ”شِنو المَكتوب في القانون؟ بِتَقراهو كيف؟“ و رَدَّ و قال: ”تَحِب الرَّب إلَهَك مِن كُلّو قَلبَك و مِن كُلّو نَفسَك و مِن كُلّو قُدرَتَك و مِن كُلّو عَقلَك، و كَمان جارَك زي نَفسَك.“ و قال ليهو: ”جاوَبتَ بِالحَق. أعمِل كِدا و تَحيى.“ لَكِن هو كان عاوِز يَبَرِّر نَفسو، و قال لِيَسُوع: ”و مِنو هو جاري؟“ و يَسُوع رَدَّ و قال: ”كان في راجِل نازِل مِن أُورُشَلِيم لِأَرِيحَا، و وَقَع في وَسِط الحَراميَّه. و قَلَعو مِنّو هِدومو، و جَرَحوهو، و مَشو. و خَلّوهو بين حَي و مَيِّت. و بِالصُّدفَه، قَسّيس نَزَل بِالطَّرِيق داك. و لَمّا شافو، فات مِن الجَّمب التّاني. و واحِد لَاوِي كَمان زيهو، لَمّا وِصِل المَحَل و شافو، فات مِن الجَّمب التّاني. و لَكِن واحِد سامِري مِسافِر جا ليهو. و لَمّا شافو، رَحَمو. و قَرَّب مِنّو و رَبَط جُروحو، و كَبَّ عَليها زيت و خَمَر، و رَكَّبو عَلى حُمارو، و جابو لِلوكَندا، و شافو كوَيس. و اليوم البَعدو، طَلَّع دينارين و أدّاهُم لِسيد اللّوكَندا و قال ليهو: شوفو كوَيس، و كُل التَّصرُفو زِيادَه، لَمّا أرجَع، بَدفَعو ليك. فِكرَك شِنو، ياتو مِن التّلاتَه ديل بِقى جار لِلوَقَع في وَسِط الحَراميَّه؟“ و قال: ”هو العَمَل ليهو الرَّحمَه.“ و يَسُوع قال ليهو: ”أمشي إنتَ كَمان و أعمِل كِدا.“ و وَكِت هُم ماشين، هو دَخَل حِلَّه. و مَرَه إسِما مَرْثَا قِبلَتو في بيتا. و كانَت ليها أُخُت إسِما مَرْيَم، الكَمان قَعَدت عِند قَدَمين يَسُوع و كانَت تَسمَع كَلامو. و لَكِن مَرْثَا كانَت مَشغولَه في خِدمَه كَتيرَه. و جات ليهو و قالَت: ”يا رَب، ما بِهِمَّك إنّو أُختي خَلَّتني أشتَغِل بَراي؟ قول ليها أن تَساعِدني.“ و الرَّب رَدَّ و قال ليها: ”يا مَرْثَا، يا مَرْثَا، إنتي مَشغولَه و بِتفَكِري في حاجات كَتيرَه. لَكِن الضَّروري، حاجَه واحدَه. و مَرْيَم إختارَت الجُّزو السَّمِح الما يَاخُدوهو مِنَّها.“ و يَسُوع كان بِصَلّي في مَحَل. و لَمّا خِلِص، واحِد مِن تَلاميذو قال ليهو: ”يا رَب، عَلِّمنا نَصَلّي زي ما يُوحَنَّا كَمان عَلَّم تَلاميذو.“ و قال ليهُم: ”لَمّا تَصَلّو قولو، يا أبونا [الفي السَّما،] خَلّي إسمَك يِتقَدَّس. خَلّي مَلَكوتَك يَجي. [تَكون إرادَتَك زي ما في السَّما، كِدا كَمان عَلى الأرض.] أدّينا أكِلنا يوم بِيوم. و أغفِر لينا خَطايانا، عَشان نِحنا كَمان نَغفِر لِكُل اليَخطو لينا. و ما تَدَخِّلنا في تَجرِبَه. [لَكِن نَجّينا مِن الشَّرّير.“] و قال ليهُم: ”مِنو مِنَّكُم يَكون ليهو صاحِب، و يَمشي ليهو في نُص اللّيل و يَقول ليهو: يا صَحبي، سَلِّفني تلاتَه رَغِفان، عَشان واحِد مِن أصحابي جا مِن السَّفَر، و ما عِندي حاجَه أقَدِّما ليهو. و هو مِن جُوَّه يَرُد و يَقول: ما تَتَعِّبني هَسَّع. الباب مَقفول، و أولادي مَعاي في الفَرشَه، و ما أقدَر أقوم و أدّيك. أقول ليكُم، إذا ما يَقوم و يَدّيهو عَشان هو صاحبو، هو يَقوم و يَدّيهو عَشان يِستَمِر في طَلَبو. و يَدّيهو قَدُر ما يَدور. و أنا أقول ليكُم، أسألو بِدّيكُم، أطلُبو بِتَلقو، دُقّو هو بِفتَح ليكُم. عَشان كُل البِسأل بياخُد، و البِطلُب بِلقى، و البِدُق بِفتَح ليهو. و ياتو مِنَّكُم و هو أبو، لَمّا وَلَدو يَطلُب مِنّو رَغيف، يَدّيهو حَجَر؟ ولّا لَمّا يَطلُب سَمَك، يَدّيهو دَبيب بِدال السَّمَك؟ ولّا إذا يَطلُب مِنّو بيضَة جِداد يَدّيهو عَقرَب؟ و إذا إنتو البَطّالين تَعرِفو تَدّو أولادكُم هَدايا سَمحَه، كَم بِالأكتَر الأبو السَّمَاوي يَدّي الرّوح القُدُس لِليَسألوهو؟“ و يَسُوع كان يَطَلِّع شيطان أبكَم. و حَصَل لَمّا الشّيطان طَلَع، الأبكَم إتكَلَّم. و النّاس إتعَجَّبو. لَكِن بَعض مِنَّهُم قالو: ”بِبَعلَزَبول، رَئيس الشّياطين يَطَلِّع الشّياطين.“ و غيرُم كانو دايرين يَجَرِّبوهو، و طَلَبو مِنّو عَلامَه مِن السَّما. لَكِن هو عِرِف أفكارُم و قال ليهُم: ”كُلّو مَملَكَه مِنقَسمَه عَلى نَفسا بِتَخَرَّب، و بيت مِنقَسِم عَلى بيت بِقَع. و إذا كان الشّيطان كَمان مِنقَسِم عَلى نَفسو، كيف تَثبَت مَملَكتو؟ عَشان إنتو تَقولو أنا بَطَلِّع الشّياطين بِبَعلَزَبول. و إذا أنا بَطَلِّع الشّياطين بِبَعلَزَبول، أولادكُم بِطَلِّعوهُم بِمِنو؟ و عَشان كِدا، هُم يَكونو قُضاتكُم. و لَكِن إذا أنا بِإيد الله أطَلِّع الشّياطين، عَلى كِدا مَلَكوت الله جا ليكُم. و لَمّا القَوّي العِندو سِلاح يَحرُس بيتو، العَفَش بِتاعو يَكون مَحفوظ. و لَكِن لَمّا يَجي واحِد قَوّي مِنّو، و يَغلِبو، هو ياخُد سِلاحو الكامِل الكان عِندو إيمان فيهو، و يَقَسِّم حاجاتو. الما مَعاي، هو عَلي. و الما يَجمَع مَعاي، يَفَرتِق. الرّوح النَّجِس بَعَد ما يَطلَع مِن الزّول، يَفوت في المَحَلّات الما فيها مويَه يَفَتِّش عَلى راحَه. و لَمّا ما يَلقاها، يَقول: بَرجَع لِبيتي الطَلَعتَ مِنّو. و وَكِت ما يَرجَع، يَلقاهو مَقشوش و مَرَتَّب. و يَمشي و يَجيب سَبعَه أرواح آخِرين أكعَب مِنّو، و يدخُلو و يَسكُنو هِناك. و حَياة الزّول الأخيرَه تَبقى أكعَب مِن اوَّل.“ و وَكِت كان يتكَلَّم كِدا، مَرَه مِن الجَّماعَه رَفَعت صوتا و قالَت ليهو: ”مُبارَك البَطُن الحِملَت بيك، و الصَدُر الأنتَ رَضَعتَ.“ و هو قال: ”و لَكِن مُبارَكين بِالأكتَر البِسمَعو كَلام الله و بِحفَظوهو.“ و لَمّا النّاس كانو يَلِزّوهو، هو إبتَدا يَقول: ”الجّيل دا جيل شَرّير، و يَطلُب عَلامَه. و ما يَدُّوهو عَلامَه غير عَلامَة يونان النَّبي. عَشان زي ما يونان كان عَلامَه لِأهل نِينَوَى، كِدا يَكون إبن الإنسان لِلجيل دا. مَلِكَة الجَّنوب بِتقوم في يوم الحُكم مَعَ رُجال الجّيل دا، و تَحكُم عَليهُم. عَشان هي جات مِن آخِر الدُّنيا عَشان تَسمَع حِكمَة سُلَيْمَان. و شوف! هِنا إنسان أكبَر مِن سُلَيْمَان. رُجال نِينَوَى بِقومو في يوم الحُكم مَعَ الجّيل دا، و يَحكُمو عَليهو. عَشان تابو بِتَعليم يونان. و شوف. هِنا إنسان أكبَر مِن يونان. ما في زول، وَكِت ما يَوَلِّع فانوس، يَخُتّو في مَخزَن ولّا تِحِت القُفَّه، لَكِن يَخُتّو فوق طَرَبيزَه، عَشان الدّاخِلين يَشوفو النّور. عينَك هي لَمبَت الجِّسم. و لَمّا عينَك تَكون كوَيسَه، جِسمَك كُلّو يَكون مَنَوَّر. و لَمّا هي بَطّالَه، جِسمَك كَمان يَكون في ضُلُمَّه. عَلى كِدا، خَلّي بالَك عَشان النّور الفيك ما يَكون ضُلُمَّه. و إذا كان جِسمَك كُلّو مَنَوَّر و ما فيهو ضُلُمَّه، جِسمَك يَبقى مَنَوَّر كُلّو، زي ما الفانوس بِوَلِّع ليك.“ و وَكِت ما كان يتكَلَّم، فرِّيسي عَزَمو لِلغَدا مَعاهو. و دَخَل و أكَل. و الفرِّيسي، لَمّا شاف كِدا، إتعَجَّب عَشان ما غَسَّل في الأوَّل قُبّال الغَدا. و الرَّب قال ليهو: ”إنتو، يا فَرّيسيِّين، بِتنَضِّفو الفِنجان و الصَّحَن مِن بَرَّه. و لَكِن مِن جُوَّه، إنتو ناس طَمّاعين و شَرّيرين. يا بَليدين! هو العَمَل البَرَّه، ما عَمَل الجّوَّه كَمان؟ لَكِن أدّو مِن قُلوبكُم لِلمَساكين. و شوفو! كُلّو شي يَبقى نَضيف ليكُم. لَكِن مُصيبَه ليكُم، يا فَرّيسيِّين، عَشان إنتو تَطَلِّعو عُشور النَّعناع، و السَّزاب، و كُلّو نَبات، و تَسيبو الحَق و مَحَبَّة الله. كان لازِم تَعمِلو دي و ما تَخَلّو ديك. مُصيبَه ليكُم، يا فَرّيسيِّين. عَشان تَحِبّو المَحَلّات الأحسَن في بِيوت الرَّب، و السَّلام في السّوق. مُصيبَه ليكُم! عَشان إنتو زي القُبور الما بَايِنَه، و النّاس اليَمشو عَليها ما بِيَعرِفوها.“ و رَدَّ واحِد مِتعَلِّم في القانون و قال: ”يا مُعَلِّم، و إنتَ بِتقول كِدا بِتَشتِمنا كَمان.“ و قال: ”يا مُصيبَه ليكُم، إنتو كَمان، يا مِتعَلِّمين في القانون. عَشان بِتخَلّو النّاس يَشيلو حاجات تَقيلَه، و إنتو زاتكُم ما تَلمَسو الحاجات التَّقيلَه بِواحِد مِن أصابِعكُم. يا مُصيبَتكُم! عَشان بِتَبنو قُبور الأنبياء، و أبَهاتكُم كَتَلوهُم. إنتو تَشهَدو و تَتَّفِقو بِأعمال أبَهاتكُم. عَشان هُم كَتَلوهُم، و إنتو تَبنو قُبورُم. عَشان كِدا، حِكمَة الله قالَت: بَرَسِّل ليهُم أنبياء و رُسُل، و يَكتُلو و يَطرودو بَعض مِنَّهُم. و عَلى كِدا ناس الزَّمَن دا بِكونو مَسؤلين لِدَم كُل الأنبياء المَدَفَّق مِن أوَّل الدُّنيا. دا بِكون مِن دَم هابيل لِغايَة دَم زَكَرِيَّا الكان مَكتول بين مَحَل الضَّبيحَه و مَحَل المُقَدَّس. أيوَه، أقول ليكُم ناس الزَّمَن بِكونو مَسؤلين. مُصيبَه ليكُم، يا مِتعَلِّمين في قانون. عَشان شِلتو مُفتاح المَعرِفَه. إنتو زاتكُم ما دَخَلتو، و مَنَعتو النّاس الدّاخِلين.“ و بَعَد ما طَلَع مِن هِناك، مُعَلِّمين القانون و الفَرّيسيّين بِقو يَقاوِموهو بِشِدَّه، و يَسألوهو عَن حاجات كَتيرَه. و كانو مُنتَظِرينو عَشان يَقبُضوهو فِشان أي كَلام البِطلَع مِن خَشمو. و وَكِت ما آلاف مِن النّاس إتلَمّو لِغايَة ما كانو يَدوسو بَعضَهُم عَلى بَعض، إبتَدا يَكَلِّم تَلاميذو في الأوَّل: ”خَلّو بالكُم مِن خَميرَة الفَرِّيسِيِّين الهو النِفاق. عَشان ما في شي مُغَطّى الما بِكون مَفتوح، و لا مَدسوس الما بِكون مَعروف. و عَشان كِدا، كُل الكَلَّمتو في ضُلُمَّه بِسمَعوهو في النّور. و البِتِتكَلَّمو في الأضنين في السِّر بِنادو بيهو مِن فوق البِيوت. و أقول ليكُم، يا أصحابي، ما تَخافو مِن البِكتُلو الجِسم، و بَعَد كِدا ما عِندَهُم حاجَه زِيادَه يَقدَرو يَعمِلو. لَكِن بَوَرّيكُم مِن مِنو إنتو لازِم تَخافو. خافو مِن هو البَعَد ما يَكتُل، عِندو قُدرَه يَرمي في جَهَنَّم. أيوَه، أقول ليكُم، خافو مِنّو. ما بِبيعو خَمسَه عَصافير بِقِرشين؟ و الله ما بِنسى و لا واحِد مِنَّهُم. لِغايَة كُلّو شَعر رُسينكُم كَمان مَعدود. ما تَخافو. إنتو أحسَن مِن عَصافير كَتيرَه. و أقول ليكُم، البِعتَرِف بي قِدّام النّاس، أنا كَمان بَعتَرِف بيهو قِدّام مَلائِكَة الله. و البِنكِرني قِدّام النّاس، أنا كَمان بَنكِرو قِدّام مَلائِكَة الله. و كُل البقول كِلمَه ضِد إبن الإنسان، بِتكون مَغفورَه ليهو. لَكِن البِجَدِّف عَلى الرّوح القُدُس، ما بِكون مَغفورَه ليهو. و لَمّا يَجيبوكُم لِبِيوت الرَّب و الرّؤساء و السَّلاطين، ما تَفَكِّرو كيف ولّا بِشِنو بِترُدّو عَليهُم ولّا بِشِنو بِتِتكَلَّمو. عَشان الرّوح القُدُس بِعَلِّمكُم في نَفس السّاعَه الكَلام اللازِم تِتكَلَّمو بيهو.“ و واحِد مِن الجَّمَع قال ليهو: ”يا مُعَلِّم، كَلَّم أخوّي عَشان يَقَسِّم الميراث بينَنا.“ و قال ليهو: ”يا راجِل، مِنو عَمَلني قاضي عَليكُم عَشان أقَسِّم ليكُم؟“ و قال ليهُم: ”شوفو و أحرِسو نُفوسكُم مِن كُلّو طَمَع. عَشان حَياة الزّول ما بِتَجي مِن كَترَت الحاجات العِندو.“ و كَلَّمُم بِمَثَل و قال: ”كان في زول غَني زِراعتو جابَت دُرَه كَتيرَه. و فَكَّر في نَفسو و قال: أعمِل شِنو؟ عَشان ما عِندي مَحَل ألِم فيهو الدُّرَه حَقَّتي. و قال: أنا بَعمِل كِدا. أنا بَخَرِّب مَخازِني و بَبني أكبَر مِنَّها، و هِناك بَلِم دُرَتي و أموالي. و أقول لِنَفسي، يا نَفسي، عِندِك حاجات كوَيسَه كَتيرَه مَحفوظَه لِسِنين كَتيرَه. إستَريحي، و أُكلي و أشرَبي و كوني مَبسوطَه. و لَكِن الله قال ليهو: يا غَشيم، اللّيلَه دي بِطلُب مِنَّك نَفسَك، و الجَهَّزتو دا يَكون لِمِنو؟ و بِكون كِدا ليهو البِلِم كَنز لِنَفسو، و ما عِندو غِنى لِلَّه.“ و هو قال لِتَلاميذو: ”عَشان كِدا أنا بَقول ليكُم: ما تَفَكِّرو كَتير لِحَياتكُم بِتاكلو شِنو، و لا في جِسِمكُم بِتَلبَسو شِنو. عَشان الحَياة أحسَن مِن الأكِل، و الجِّسِم أحسَن مِن الهِدوم. فَكِّرو في الطُّيور، الما بِزرَعو و لا بِجمَعو الدُّرَه، و ما عِندَهُم بيت و لا مَخزَن، و الله بِدّيهُم أكِل. و إنتو أحسَن مِن الطُيور بِكَتير! و مِنو مِنَّكُم إذا كان بِفَكِّر كَتير يَقدَر يَزيد عَلى طولو ضُراع واحِد؟ و عَلى كِدا، إذا ما بِتَقدَرو عَلى الشّي الأصغَر، لِشِنو تَفَكِّرو في الحاجات التّانيَه؟ فَكِّرو في الزُهور، كيف بِيَكبِرو. و ما يَتعَبو و ما يَخَيِّطو. و لَكِن أقول ليكُم، و لا سُلَيْمَان في كُلّو مَجدو كان بِلبَس زي واحدَه مِنَّها. و إذا كان الله يَلَبِّس كِدا القَش الفي الزِّراعَه النَّهار دا، و بُكرَه بِرموهو في الفُرن، كَم بِالأكتَر يَلَبِّسكُم، يا قَليلين الإيمان. و ما تَطلُبو بِتاكلو شِنو و بِتَشرَبو شِنو. و ما تِتحَيَّرو. عَشان الحاجات دي، كُلّو أُمَم الدُّنيا يَطلُبوها، و لَكِن أبوكُم بِيَعرِف إنتو تَحتاجو ليها. لَكِن أطلُبو مَلَكوت الله، و الحاجات دي كُلُّها بِزيدو ليكُم. ما تَخافو، يا المُراح الصَّغير، عَشان أبوكُم رَضيان يَدّيكُم المَلَكوت. بيعو الحاجات العِندَكُم، و أدّو لِلمَساكين. و أعمِلو ليكُم أكياس الما بِتشَرَّطو، و كَنز في السَّما الما بِتَخلَص، و الحَرامي ما يَقدَر يَقَرِّبو ليهو، و السوس ما ياكلو. عَشان المَكان الفيهو كَنزَكُم، هِناك كَمان قَلبَكُم بِكون في. أربُطو حِزامكُم و خَلّو لَمباتكُم بِتكون مَوَلَّعَه. و كونو زي ناس مُنتَظِرين سيدُم لَمّا يَرجَع مِن العِرِس، عَلَشان لَمّا يَجي و يَدُق الباب، يَفتَحو ليهو طَوّالي. مُبارَكين الخَدّامين ديل إذا سيدُم يَجي و يَلقاهُم حارِسين. بِالحَق أقول ليكُم، هو بِربُط حِزامو، و يَقَعِدُم في الطَّرَبيزَه و يَقَدِّم ليهُم أكِل. و إن كان هو جا في نُص اللّيل ولّا بَعدو بِشوَيَه و لِقاهُم حارِسين، بَرَكَه لِلخَدّامين ديل. و لَكِن أفهَمو، إذا سيد البيت عِرِف السّاعَه اليَجي فيها الحَرامي، ما كان خَلّى الحَرامي يَسرِق بيتو. عَلى كِدا خَلّيكُم جاهِزين، عَشان في السّاعَه الما مُنتَظِرينو، فيها إبن الإنسان يَجي.“ و بُطْرُس قال: ”يا رَب، بِتقول لينا المَثَل دا ولّا لِكُل النّاس كَمان؟“ و يَسُوع قال ليهو: ”مِنو هو الوَكيل الأمين و العاقِل، السيدو بيَعمِلو مَسؤول عَن خَدّامينو؟ و هو المَسؤول عَشان يَدّيهو الأكل في وَكتو. مُبارَك الخَدّام دا، إذا سيدو يَجي، يِلقاهو يَعمِل كِدا. بِالحَق أقول ليكُم، سيدو يَعمِلو مَسؤول عَن كُلّو أموالو. لَكِن إذا الخَدّام دا قال في قَلبو: سيدي ما بِجي قَريب، و بَعدين إبتَدا يَضرُب الخَدّامين و الخَدّامات، و ياكُل و يَشرَب و يَكون سَكران، بَعدين سيد الخَدّام دا بِجي في يوم ما يَنتَظِرو، و في ساعَه ما يَعرِفا. و يَجلِدو شَديد و يَخُتّو مَعَ الما مِصَدِّقين. و الخَدّام العِرف إرادَة سيدو، و ما جَهَّز نَفسو، و ما عَمَل إرادَة سيدو، بِجلِدو كَتير. و الما عِرِف و عَمَل حاجات تِستَحِق الجَلدَه، بِجلِدوهو شوَيَه. و كُل الأدّوهو كَتير يَطلُبو مِنّو كَتير، و العِندو سُلطَه كَتير يَطلُبو مِنّو أكتَر. أنا جيت عَشان أرمي نار عَلى الأرض. و هَسَّع أنا عاوِز النّار بِتكون مَوَلَّعَه. عِندي مَعموديَّه أتعَمَّد بيها. الدُّنيا ضَيقَه قِدامي لِغايَة ما تَتِم. فِكرَكُم أنا جيت عَشان أَدِّي سَلام عَلى الأرض؟ أقول ليكُم، لا. لَكِن جيت عَشان أقَسِّم. عَشان مِن هَسَّع بِكونو خَمسَه في بيت واحِد، مِنقَسمين تلاتَه عَلى إتنين ولّا إتنين عَلى تلاتَه. يِنقَسِم الأبو عَلى الوَلَد، و الوَلَد عَلى الأبو، و الأم عَلى البِت، و البِت عَلى الأم، و النَسيبَه عَلى مَرَة وَلَدا، و مَرَة وَلَدا عَلى نَسيبَتا.“ و قال لِلجَّمَع كَمان: ”وَكِت شُفتو سَحاب طالِع مِن الغَرب، طَوّالي تَقولو: المَطَر بِجي. و بِكون كِدا. و إذا شُفتو هَبوب تَجي مِن الجَّنوب، تَقولو: الواطَه بِتكون حارَّه. و بِتكون كِدا. يا مُنافِقين، إنتو تَقدَرو تَعرِفو كُلّو عَن الأرض و السَّما، و تَقولو شِنو البِحصَل، و كيف ما تَعرِفو مَعنى الزَّمَن دا؟ و لِشِنو إنتو نُفوسكُم ما بِتَقدَرو تَحكُمو بِالحَق؟ وَكِت إنتَ ماشي مَعَ عَدوَّك لِلقاضي، جَرِّب كَتير تَعمِل السَّلام مَعاهو لَمّا إنتو في السِّكَّه، عَشان ما يَجُرَّك لِلقاضي، و القاضي يَسَلِّمَك لِلضابِط، و الضابِط يَرميك في السِّجِن. أقول ليك، ما بِتَطلَع لِغايَة ما تَدفَع آخِر مِليم.“ و في الوَكِت دا، بَعض النّاس الكانو في، خَبَّرو يَسُوع عَن الجَّليليّين البِيلاطُس كَتَلُم وَكِت ما قَدَّمو ضَبايحُم. و رَدَّ و قال ليهُم: ”تَفتَكِرو الجَّليليّين ديل كانو خاطيين أكتَر مِن كُل الجَّليليّين التّانيين عَشان تِعِبو كِدا؟ أقول ليكُم، لا. و إلّا إنتو تَتوبو، كُلُّكُم بِتموتو زيَهُم. ولّا التَّمَنطاشَر ديل الوَقَع عَليهُم البِنَا العالي في سِلْوَام و كَتَلُم. تَفتَكِرو هُم كانو خاطيين أكتَر مِن كُل النّاس القاعِدين في أُورُشَلِيم؟ أقول ليكُم، لا. و إلّا تَتوبو، كُلُّكُم بِتموتو زيَهُم.“ و عَلَّمُم بِالمَثَل دا و قال: ”زول كان عِندو شَجَرَة تين مَزروعَه في جِنينتو، و جا بِفَتِّش ثِمار في الشَّجَرَه دي. و ما لِقى شي. و قال لِلرّاجِل البِشتَغِل في الجِّنينَه: شوف! التّلاتَه سِنين دي أجي أفَتِّش ثِمار في الشَّجَرَه دي، و ما لِقيت شي. أقطَعا. لِشِنو بِتاخُد مَحَل في الأرض؟ و رَدَّ و قال ليهو: يا سيدي، خَلِيها السَّنَه دي كَمان لِغايَة ما أحفَر حَواليها و أخُت زِبالَه. إذا كان تَجيب ثِمار السَّنَه الجّايَه، كوَيس. إذا ما تَجيب ثِمار، تَقطَعا.“ و كان بِعَلِّم في واحِد مِن بِيوت الرَّب في السَّبِت. و شوف! مَرَه كانَت عِندَها روح عَمَلا ضَعيفَه جِدّاً مُدَّة تَمَنطاشَر سَنَه. ضَهَرا مَعووج و ما كانَت تَقدَر تِقيف عَديل أبَداً. و لَمّا يَسُوع شافا، ناداها و قال ليها: ”يا سِت، إنتي مَفكوكَه مِن مَرَضِك.“ و هو خَتَّ إيدينو عَليها، و طَوّالي وَقَفَت عَديل و مَجَّدَت الله. و رَئيس بيت الرَّب رَدَّ، و هو زَعلان عَشان يَسُوع شَفاها في السَّبِت. و قال لِلنّاس: ”في سِتَة أيام النّاس لازِم يَشتَغِلو فيهُم. و عَلى كِدا، تَعالو فيهُم لِلشِّفا، و مُش في يوم السَّبِت.“ لَكِن الرَّب رَدَّ عَليهو و قال: ”يا مُنافِقين، ما كُلّو واحِد مِنَّكُم في السَّبِت بِفِك تورو ولّا حُمارو مِن الزَّريبَه، و يَسوقو لِلمويَه عَشان يَشرَب؟ و المَرَه، هي بِت إِبْرَاهِيم، و الشّيطان رَبَطا تَمَنطاشَر سَنَه. هي ما لازِم تَكون مَفكوكَه مِن الرُّباط دا في يوم السَّبِت؟“ و لَمّا قال كِدا، كُل عُدوانو بِقو خَجلانين. و كُل النّاس كانو مَبسوطين مِن كُل الأعمال العَظيمَه الهو عَمَلا. بَعَد دا، يَسُوع قال: ”مَلَكوت الله زي شِنو؟ و بِشِنو أشِبِّهو؟ هو زي تيراب خَردَل، زول أخَدا و رَماها في زِراعتو. و طَلَع، و بِقى شَجَرَه. و طير السَّما قَعَد في فُروعا.“ و قال كَمان: ”مَلَكوت الله زي شِنو؟ هو زي خَميرَه أخَدَتا مَرَه، و دَسَّتا في تلاتَه كيلات دَقيق، لِغايَة ما إتخَمَّرو كُلّو.“ و كان بِمُر في بِلاد و حِلَل يَعَلِّم، و هو ماشي لِأُورُشَلِيم. و واحِد قال ليهو: ”يا رَب، هُم البِيَخلَصو قَليلين؟“ و قال ليهُم: ”إشتَغِلو شَديد، عَشان تَدخُلو مِن الباب الضَّيِّق. عَشان أقول ليكُم، ناس كُتار دايرين يدخُلو، و لَكِن ما يَقدَرو. و لَمّا سيد البيت يَقوم و يَقفِل الباب، إنتو بِتقيفو بَرَّه و بِتدُقّو الباب و بِتقولو: يا رَب، أفتَح لينا. و بِرُد و بِقول ليكُم: ما بَعرِفكُم، إنتو جيتو مِن وين؟ بَعدين بِتقولو: أكَلنا و شِرِبنا مَعاك، و إنتَ عَلَّمتَ في بَلَدنا. و هو بِقول ليكُم: ما بَعرِفكُم جيتو مِن وين. أمشو بَعيد مِنّي، كُلُّكُم العامِلين الخَطيَّه. هِناك بِكون البِكى و عَض السِّنون، لَمّا تَشوفو إِبْرَاهِيم و إِسْحَاق و يَعْقُوب و كُل الأنبياء في مَلَكوت الله، و إنتو مَطرودين بَرَّه. و ناس بِجو مِن الشَّرق و مِن الغَرب، و مِن الشِّمال و مِن الجَّنوب، و يَقعُدو عَشان ياكلو في مَلَكوت الله. و شوف، في آخِرين البِكونو اوَّلين، و في اوَّلين البِكونو آخِرين.“ و في الوَكِت داك، بَعَد الفَرِّيسِيِّين جو لِيَسُوع و قالو ليهو: ”أمرُق، و أمشي مِن هِنا، عَشان هِيرُودُس عاوِز يَكتُلَك.“ و قال ليهُم: ”أمشو و قولو لِلتَّعلَب دا: شوف، بَطَلِّع الشّياطين، و أشفي النّاس اللّيلَه و بُكرَه، و اليوم التّالِت بَكَمِّل شُغلي. و لَكِن لازِم أمشي اللّيلَه و بُكرَه و بَعَد بُكرَه، عَشان ما مُمكِن النَّبي يَموت بَرَّه مِن أُورُشَلِيم. يا أُورُشَلِيم، يا أُورُشَلِيم، البِتَكتُل الأنبياء و بِتَضرُب بِحُجار المَرَسَّلين ليكي. كَم مَرَّه كُنتَ عاوِز ألِم أولادِك، زي ما الجِّدادَه تَلِم الكَتاكيت تِحِت جِنحيها، و إنتي ما عاوزَه. شوفو بيتكُم يَبقى ليكُم خَربان. بِالحَق إنتو ما بِتشوفوني تاني مَرَّه لِغايَة ما تَقولو: مُبارَك الجّاي بِإسم الرَّب.“ و لَمّا يَسُوع دَخَل بيت واحِد مِن رؤساء الفَرِّيسِيِّين في يوم السَّبِت عَشان ياكُل، كانو يَعاينو ليهو شَديد. و شوف! كان قِدّامو راجِل عَيّان، و جِسمو كُلّو وَرَم. و يَسُوع قال لِمُعَلِّمين القانون و الفَرّيسيّين: ”الشِّفا في يوم السَّبِت بِالقانون ولّا لا؟“ و سَكَتو. و يَسُوع مَسَكو و شَفاهو و خَلّاهو يَمشي. و قال ليهُم: ”مِنو مِنَّكُم إذا كان حُمارو ولّا تورو وَقَع في البير، ما بِطَلِّعو طَوّالي في يوم السَّبِت؟“ و ما قِدرو يَرُدّو كِلمَه عَن دا. و عَلَّم المَعزومين بِمَثَل لَمّا شاف كيف كانو يَختارو المَحَلّات الأوّلانيّن، و قال ليهُم، ”إذا كان زول عَزَمَك لِعَزومَة العِرِس، ما تَقعُد في الكُرسي الأوّلاني، عَشان يِمكِن زول أكبَر كان مَعزوم. و العَزَمَك بِجي و يَقول ليك: خَلّي مَحَلَّك لِلرّاجِل دا. و بَعدين بِتكون خَجلان لَمّا تَمشي تاخُد المَحَل الأخير. لَكِن لَمّا إنتَ مَعزوم، أمشي أقعُد في المَحَل الأخير، عَشان لَمّا العَزَمَك بِجي، يَقول ليك: يا صَحبي، إتفَضَّل قِدّام. و عَلى كِدا القاعِدين مَعاك في الطَّرَبيزَه بِحتَرِموك. عَشان كُل البِرفَع نَفسو، بِنَزِّلوهو تِحِت. و البِنّزِّل نَفسو تِحِت، بِرفَعوهو فوق.“ و يَسُوع قال لِسيد البيت: ”إذا كان عَمَلتَ غَدا ولّا عَشا، ما تَنادي أصحابَك، و لا أخوانَك، و لا النّاس القَريبين مِنَّك، و لا جيرانَك الغَنيين، عَشان يِمكِن هُم كَمان بِعزَموك و بِتكون عِندَك أُجرَه مِنَّهُم. لَكِن لَمّا تَعمِل عَزومَه، أعزِم المَساكين، و النّاس المَكَسَّرين، و العُرُج، و العَميانين. و بِتكون مُبارَك، عَشان ما عِندَهُم البِرَجِّعوهو ليك، و إنتَ بِتاخُد أُجرَتَك يوم قيامَة البارين.“ واحِد مِن الكان قاعِد مَعاهو في الطَّرَبيزَه، لَمّا سِمِع كِدا، قال ليهو: ”يا مُبارَك الياكُل عيش في مَلَكوت الله.“ و قال ليهو: ”كان في راجِل عَمَل عَشا كَبير و عَزَم ناس كُتار. و رَسَّل خَدّامو في ساعَة العَشا، عَشان يَقول لِلنّاس المَعزومين: تَعالو، عَشان كُلّو شي جاهِز. و كُلُّهُم إبتَدو بِفِكر واحِد أن يَوَرّو سَبَب عَشان ما يَمشو. و الأوَّلاني قال: أنا أشتَريت زِراعَه، و لازِم أمشي أشوفا. بَطلُب مِنَّك تَخَلّيني. و تاني قال: أشتَريت عَشَرَه تيران، و أمشي بَجَرِّبُم. بَطلُب مِنَّك تَخَلّيني و تاني قال: أنا إتزَوَّجتَ مَرَه، و عَشان كِدا ما بَقدَر أجي. و الخَدّام جا و خَبَّر سيدو بِالحَصَل. بَعدين سيد البيت زِعِل و قال لِخَدّامو: أمرُق بِسُرعَه في سِكَك المَدينَه، و جيب المَساكين و المَكَسَّرين و العَميانين و العُرُج. و قال الخَدّام: يا سَيِّدي، عَمَلتَ زي ما أمَرتَ، و لِسَّع في مَحَل. و السيد قال لِلخَدّام: أمرُق في السِّكَك و الدُروب، و أعمِلُم بِلِغاية يدخُلو، لِغايَة بيتي بِكون مَليان. عَشان أقول ليكُم، و لا واحِد مِن النّاس العَزَمتَهُم بِضوق العَشا بِتاعي.“ و ناس كُتار مَشو مَعَ يَسُوع. و هو إتلَفَت، و قال ليهُم، ”إذا كان زول جا لَي، و ما يَكرَه أبوهو و أُمّو و مَرَتو و أولادو و أخوانو و أخواتو و لِغايَة نَفسو كَمان، هو ما بِقدَر يَكون تِلميذ. و أي واحِد الما بِشيل صَليبو و يَتبَعني، ما بِقدَر يَكون تِلميذ. إذا واحِد مِنَّكُم عاوِز يَبني بيت عالي، هو ما بِقعُد في الأوَّل و بِحسِب تَمَنو، عَشان يَشوف إذا كان عِندو كِفايَه عَشان يَكَمِّلو؟ عَشان إذا ما يَعمِل كِدا، بَعَد ما يَخُت الأساس و ما بِقدَر يَكَمِّلو، كُل البِشوفوهو يَبتَدو يَضحَكو عَليهو، و يَقولو: الرّاجِل دا إبتَدا يَبني بيت عالي و ما قِدِر يَكَمِّلو. شِنو إذا مَلِك يَمشي يَحارِب مَلِك تاني؟ هو ما بِقعُد في الأوَّل، و بِشاوِر إذا كان بِقدَر بِعَشَرَة آلاف راجِل يَقابِل البِجي ضِدّو بِعِشرين ألف؟ و إذا ما بِقدَر، لَمّا داك لِسَّع بَعيد، بِرَسِّل مُراسَلين عَشان يَعمِلو سَلام. و عَلى كِدا، أي زول مِنَّكُم الما بِخَلّي كُل العِندو، ما بِقدَر يَكون تِلميذ. عَلى كِدا، المِلِح كوَيس، و لَكِن إذا كان المِلِح يَبقى مَسيخ، كيف تَرَجِّع ليهو ضوقو؟ ما في فايدَه مِنّو، ما لِلأرض و لا لِلزِّبالَه. لَكِن بِرموهو بَرَّه. العِندو إضنين خَليهو يَسمَع.“ و كُل البِلِمّو الضَّريبَه و الخاطيين كانو يَقَرِّبو مِنّو عَشان يَسمَعوهو. و الفَرّيسيّين و مُعَلِّمين القانون إشتَكو و قالو: ”الرّاجِل دا بِقبَل الخاطيين و بياكُل مَعاهُم.“ و كَلَّمُم بِالمَثَل دا و قال: ”خَلّونا نَقول إنّو زول مِنَّكُم عِندو مِيَّة خَروف، و وَدَّر واحِد مِنَّهُم. هو ما بِخَلّي التِّسعَه و التِّسعين في الخَلا، و يَمشي يَكوس عَلى الخَروف المَوَدَّر لِغايَة ما يَلقاهو؟ و لَمّا يَلقاهو، يَخُتّو عَلى كَتفو، و هو مَبسوط. و وَكِت يَجي لِبيتو، بِنادي أصحابو و جيرانو، و يَقول ليهُم: كونو مَبسوطين مَعاي، عَشان لِقيت خَروف المَوَدَّر مِنّي. أقول ليكُم، بِكون فَرَح زي دا في السَّما عَلى خاطي واحِد يَتوب، أكتَر مِن تِسعَه و تِسعين عَديلين ما بِحتاجو لِلتّوبَه. ولّا خَلّونا نَقول إنّو مَرَه عِندَها عَشَرَه حِتَت فِضَّه. و إذا وَدَّرَت واحدَه مِنَّها، ما تَوَلِّع اللَّمبَه، و تَقُش البيت، و تَفَتِّش لِغايَة ما تَلقاها؟ و وَكِت تَلقاها، تَنادي أصحابا و جيرانا و تَقول: كونو مَبسوطين مَعاي، عَشان لِقيت الحِتَّه الوَدَّرتا. و أقول ليكُم، بِكون فَرَح زي دا قِدّام مَلائِكَة الله، بِخاطي واحِد يَتوب.“ و قال: ”كان في راجِل عِندو وَلَدين. و الأصغَر فيهُم قال لِأبوهو: يا أبوي، أدّيني القِسِم حَقّي مِن المال. و قَسَم ليهُم مالو. و بَعَد أيام قَليلَه، الوَلَد الصَّغَير جَمَع كُلّو حاجَه و سافَر لِبَلَد بَعيدَه. و هِناك وَدَّر مالو في حَياة بَطّالَه. و بَعَد ما وَدَّر كُلّو شي، كان في جوع شَديد في البَلَد دي، و بِقى مُحتاج. و مَشى و لَزَق نَفسو بِزول مِن أهل البَلَد دي. و هو رَسَّلو لِزِراعتو عَشان يَرعى كَداريك. و كان عاوِز يَملى بَطنو بِالخَرنوب البياكلو الكَداريك. و ما في زول أدّا ليهو حاجَه. و لَمّا رَجَع لِنَفسو، قال: كَم مِن النّاس الأبوي بِأجِّرُم عِندَهُم أكِل زِيادَه خالِص، و أنا هِنا بَموت مِن الجوع. أقوم و أمشي لِأبوي، و أقول ليهو، يا أبوي، أنا عَمَلتَ خَطيَّه ضِد السَّما و قِدَّامَك. و ما مُستَحِق بَعَد دا يَسَمّوني وَلَدَك. أعمِلني زي واحِد مِن المِتأجِّرين عِندَك. و قام و جا لِأبوهو. و لَكِن لَمّا لِسَّع كان بَعيد، أبوهو شافو و رَحَمو، و جَرى و وَقَع عَلى رَقَبتو و سَلّم عَليهو. و الوَلَد قال ليهو: يا أبوي، عَمَلتَ خَطيَّه ضِد السَّما و قِدَّامَك. و ما مُستَحِق بَعَد دا يَسَمّوني وَلَدَك. و قام الأبو و قال لِخَدّامينو: جيبو بِالسُّرعَه أحسَن هِدوم، و لَبِّسوهو، و خُتّو خاتِم في إيدو و جِزَم في كِرعينو. و جيبو العِجِل السَّمين و أضبَحوهو، و خَلّونا ناكُل و نَفرَح. عَشان وَلَدي دا كان مَيِّت و بِقى حَي تاني. و كان ضايِع و إتلَقى. و بَدو يَفرَحو. و وَلَدو الكَبير كان في الزِّراعَه. و لَمّا جا و قَرَّب مِن البيت، سِمِع الغُنا و الرَقَص. و نادى واحِد مِن الخَدّامين و سَألو، شِنو كُلّو دا؟ و الخَدّام قال ليهو: أخوك جا، و أبوك ضَبَح العِجِل السَّمين، عَشان هو رَجَع بِالسَّلامَه. لَكِن هو زِعِل شَديد، و ما كان رَضيان يَدخُل. و أبوهو مَرَق و طَلَب مِنّو يَدخُل. لَكِن هو رَدَّ و قال لِأبوهو: شوف! أنا إشتَغَلتَ ليك السِنين دي كُلَّها، و ما كَسَرتَ أوَامِرَك أبَداً. و إنتَ ما أدّيتني غَنَمايَه صَغَيرَه عَشان أفرَح مَعَ أصحابي. و لَكِن لَمّا جا وَلَدَك دا، الوَدَّر مالَك مَعَ النِّسوان البَطّالات، ضَبَحتَ ليهو العِجِل السَّمين. و قال ليهو: يا وَلَدي، إنتَ دايماً مَعاي، و كُلّو حَقّي حَقَّك. لَكِن واجِب عَلينا نَفرَح و نَكون مَبسوطين، عَشان أخوك دا كان مَيِّت و حِيى تاني، و كان ضايِع و إتلَقى.“ و يَسُوع قال لِتَلاميذو كَمان: ”كان في راجِل غَني عِندو وَكيل. و واحِد إشتَكاهو إنّو بِوَدِّر أموال سيدو. و ناداهو و قال ليهو: دا شِنو البَسمَع عَنَّك؟ قَدِّم حِساب شُغلَك، عَشان إنتَ ما تَقدَر تَكون وَكيل بَعَد كِدا. و الوَكيل قال لِنَفسو: أنا بَعمِل شِنو؟ عَشان سيدي بياخُد مِنّي شُغلي. ما بَقدَر عَلى شُغل الزِّراعَه، و أنا خَجلان أسأل حاجات مِن النّاس. أنا عارِف الأنا بَسَوّي، عَلَشان لَمّا يَطرُدني مِن الشُّغل، بِقبَلوني في بِيوتُم. و هو نادى كُلّو واحِد العِندو دين لِسيدو، و قال لِلأوَّل: دينَك لِسيدي كَم؟ قال: مِيَّة بَرميل زيت. و قال ليهو: أُخُد حِسابَك و أقعُد بِسُرعَه و أكتِب خَمسين. و بَعدين قال لِلتاني: و إنتَ كَم عَليك؟ و قال ليهو: مِيَّة أردَب دُرَه. و قال ليهو: أُخُد حِسابَك و أكتِب تَمانين. و السَّيد حَمَد الوَكيل الظّالِم عَشان عَمَل بِالعَقل. عَشان أولاد الدُّنيا في وَكتُم، شاطرين مِن أولاد النّور. و أقول ليكُم، سَوّو ليكُم أصحاب بِمال الظُّلم، عَلَشان إذا ما نَجَحتو، يَقبَلوكُم في الخيام الأبَديَّه. الأمين في القَليل، هو أمين في الكَتير كَمان. و الما أمين في القَليل، هو ما أمين في الكَتير كَمان. إذا ما كُنتو صادقين بِمال الظُّلم، مِنو بِيَعمِلكُم مَسؤلين في الغِنى الحَقيقي؟ إذا إنتو ما كُنتو صادقين في مال ناس تانيين، مِنو بِدّيكُم حَقّكُم؟ ما في خَدّام يَقدَر يَخدِم سَيِّدين، عَشان بِكرَه الواحِد و بِحِب التّاني، ولّا بِمسِك الواحِد و بيابا التّاني. ما تَقدَرو تَخدِمو الله و المال.“ و الفَرّيسيّين سِمِعو دا كُلّو، و هُم كانو بِحِبّو المال، و ضِحِكو عَليهو. و قال ليهُم: ”إنتو تَبَرِّرو نُفوسكُم قِدّام النّاس. لَكِن الله عارِف قُلوبكُم. عَشان البِكون مَرفوع قِدّام النّاس، الله بِيَكرَهو. القانون و الأنبياء كانو لِغايَة وَكِت يُوحَنَّا. و مِن الوَكِت داك بِبَشِّرو بِمَلَكوت الله. و كُلّو واحِد البِدخُل فيهو، بِدخُل بِقُوَّه. و أسهَل لِلسَّما و الأرض أن يَفوتو، مِن أن تَقَع نُقطَه واحدَه مِن القانون. كُلّو واحِد البِطَلِّق مَرَتو و يِتزَوَّج تانيَه يَزني، و كُلّو واحِد البِتزَوَّج بِواحدَه مُطَلَّقَه مِن راجِلا، هو يَزني. كان في راجِل غَني، و كان بِلبَس حَرير و تيل. و كان بياكُل أكِل كوَيس جِدّاً كُلّو يوم. و كان في راجِل مِسكين إسمو لَعَازَر، مَختوت عِند بَابو. و جِسمو مَليان دَبَر. و هو عاوِز يَكون شَبعان مِن الفَتافيت الوَقَعو مِن طَرَبيزَة الغَني. و مَعَ كُلّو دا، الكِلاب جو و لَحَسو دَبَرو. و بَعدين المِسكين مات، و المَلائكَه شالوهو، و خَتّوهو قَريب لِإِبْرَاهِيم. و الغَني كَمان مات، و دَفَنوهو. و في الهاويَه و هو في العَذاب، رَفَع عُيونو و شاف إِبْرَاهِيم مِن بَعيد، و لَعَازَر قَريب ليهو. و كورَك و قال: يا أبوي إِبْرَاهِيم، أرحَمني، و رَسِّل لَعَازَر عَشان يَخُت أصبَعو في مويَه و يَبَرِّد لِساني، عَشان أنا تَعبان جِدّاً في النّار دي. لَكِن إِبْرَاهِيم قال: يا وَلَدي، إتزَكَّر إنتَ في حَياتَك أخَدتَ حاجات كوَيسَه، و كِدا كَمان لَعَازَر حاجات بَطّالَه. و لَكِن هَسَّع هو هِنا مُرتاح، و إنتَ مِعَذَب. و مَعَ كُلّو دا، في حُفرَه كَبيرَه مَثَبَّتَه بينَنا و بينكُم. عَلَشان كِدا، العاوزين يَمشو مِن هِنا ليكُم ما بِقدَرو، و ما في واحِد يَقدَر يَمشي مِن هِناك لينا. و هو قال: عَشان كِدا بَطلُب مِنَّك، يا أبوي، تَرَسِّل لَعَازَر لِبيت أبوي. عَشان عِندي خَمسَة أخوان. خَليهو يَشهَد ليهُم، عَلَشانُم ما بِجو كَمان لِمَحَل العَذاب دا. لَكِن إِبْرَاهِيم قال ليهو: عِندَهُم مُوسَى و الأنبياء. خَليهُم يَسمَعو ليهُم. و هو قال ليهو: لا، يا أبوي إِبْرَاهِيم، إذا كان واحِد مِن المَيِّتين مَشى ليهُم، هُم بِتوبو. و هو قال ليهو: إذا ما يَسمَعو مِن مُوسَى و الأنبياء، ما بِصَدِّقو إذا واحِد قام مِن بين المَيِّتين.“ و قال لِتَلاميذو: ”الحاجات البِتكون سَبَب الخَطيَّه لِلنّاس لازِم تَجي، و لَكِن مُصيبَه لِلزّول البِجيب الحاجات دي. أحسَن ليهو إذا كان رَبَطو مُرحاكَه كَبيرَه في رَقَبتو و بِرموهو في البَحَر، مِن أن يَكون سَبَب الخَطيَّه لِواحِد مِن الصُّغار ديل. خَلّو بالكُم لِنُفوسكُم. و إذا كان أخوك يَعمِل خَطيَّه ليك، كَلِّمو غَلَطو. و إذا تاب، أغفِر ليهو. و إذا يَعمِل خَطيَّه ليك سَبعَه مَرّات في اليوم و يَقول: أنا بَتوب، أغفِر ليهو.“ و الرُّسُل قالو لِلرَّب: ”زيد أيمانّا.“ و الرَّب قال: ”إذا عِندَكُم إيمان زي تيراب خَردَل، كُنتو بِتقولو لِلشَّجَرَه دي: أمرُقي مِن الأرض، و كوني مَزروعَه في البَحَر. و بِكون كِدا. خَلّونا نَقول واحِد مِنَّكُم عِندو خَدّام بِشتَغِل في الزِّراعَه، ولّا بِحرَس الخِرفان. هو بِقول ليهو وَكِت ما جا مِن الزِّراعَه: تَعال طَوّالي و أقعُد و أُكُل؟ لا! لَكِن يَقول ليهو: جَهِّز لَي العَشا، و أخدِمني لِغايَة ما باكُل و بَشرَب. و بَعَد دا، إنتَ بِتاكُل و بِتَشرَب. هو بِشكُر الخَدّام دا عَشان عَمَل زي ما أمَرو؟ و كِدا إنتو كَمان بَعَد ما عَمَلتو كُلّو شي الله أمَركُم بيهو، قولو: نِحنا خَدّامين ما عِندَنا فايدَه. عَمَلنا بَس اللازِم نَعمِلو.“ و في سَفَرو لِأُورُشَلِيم، يَسُوع مَشى بين السَّامِرَه و الجَّليل. و لَمّا كان يَدخُل الحِلَّه، قابَلوهو عَشَرَه رُجال عِندَهُم جِزام. و وَقَفو مِن بَعيد، و كورَكو و قالو: ”يا يَسُوع، يا سَيِّد، أرحَمنا!“ و لَمّا شافُم، قال ليهُم: ”أمشو و وَرّو نُفوسكُم لِلقُسُس.“ و لَمّا كانو ماشين، بِقو نُضاف. و واحِد مِنَّهُم لَمّا شاف إنّو بِقى طَيب، رَجَع يَحمِد الله بِصوت عالي. و وَقَع عَلى وَشّو قِدّام يَسُوع يَشكُرو. و هو كان سامِري. و يَسُوع رَدَّ و قال: ”ما كانو عَشَرَه البِقو طَيبين؟ وين التِّسعَه؟ ما في زول رَجَع يَحمِد الله إلّا الغَريب دا؟“ و قال ليهو: ”قوم و أمشي. إيمانَك شَفاك.“ و فَرّيسيِّين سألوهو و قالو: ”مَلَكوت الله بِجي مِتين؟“ و هو رَدَّ عَليهُم و قال: ”مَلَكوت الله ما بِجي بِالطَّرِيق البِشوفوهو بِالعُيون. و ما بِقولو، أهو هِنا، ولّا، أهو هِناك. عَشان مَلَكوت الله في وَسِطكُم.“ و قال لِتَلاميذو: ”أيام بِتَجي لَمّا تَحِبّو تَشوفو يوم واحِد مِن أيام إبن الإنسان، و ما بِتشوفو. و بِقولو ليكُم: هو هِنا! هو هِناك! ما تَمشو و تَتبَعوهو. عَشان زي البَرق يَنَوِّر السَّما مِن جِهَه واحدَه لِلتّانيَه، في يوم إبن الإنسان بِكون كِدا كَمان. و لَكِن في الأوَّل، هو لازِم يِتعَذَب كَتير، و ناس الزَّمَن دا بِرفُضوهو. و زي ما كان في أيام نُوح، بِكون كِدا كَمان في أيام إبن الإنسان. كانو ياكُلو و يَشرَبو و يَزَوِّجو و يِتزَوَّجو لِغايَة اليوم لَمّا نُوح دَخَل المُركَب. و المويَه جات و غَطَّت كُلّو حاجَه و خَرَبُم كُلُّهُم. و كان زي دا في أيام لوط، كانو ياكلو و يَشرَبو و يَشتَرو و يَبيعو و يَزرَعو و يَبنو. لَكِن في اليوم لَمّا لوط طَلَع مِن سَدوم، نار و كِبريت نَزَلو مِن السَّما، و كُلُّهُم ماتو. و بِكون كِدا كَمان في اليوم الفيهو إبن الإنسان يَظهَر. و الزّول البِكون بَرَّه مِن البيت، ما يَدخُل عَشان يَشيل عَفَشو. و الفي زِراعتو، ما يَرجَع لِبيتو. إتزَكَّرو مَرَة لوط. كُل الدّايِر يَحفَظ نَفسو، يَوَدِّرو. و كُل اليَوَدِّر نَفسو، يَحفَظو. بَقول ليكُم: في اللّيلَه ديك، إتنين بِكونو فوق عَنقَرِيب واحِد، بياخُدو واحِد مِنَّهُم و بِخَلّو التّاني. و إتنين نِسوان يَطحَنو سَوا. بياخُدو الواحدَه، و بِخَلّو التّانيَه. و إتنين بِكونو في الزِّراعَه، بياخُدو الواحِد، و بِخَلّو التّاني.“ و رَدّو و قالو ليهو: ”وين، يا رَب؟“ و قال ليهُم: ”المَحَل البِكون فيهو الجِّسم المَيِّت، هِناك الصُّقور بِلِمّو.“ و قال ليهُم مَثَل إنّو لازِم يَصَلّو دايماً و يِستَمِرّو. و قال: ”كان في قاضي في مَدينَه واحدَه، ما بِخاف الله و ما بِحتَرِم زول. و كانَت في أرمَلَه في المَدينَه ديك، و كانَت بِتَجي ليهو مَرّات و بِتقول: ’أحفَظني مِن عَدوي.‘ و أبى لِمُدَّه قَليلَه، لَكِن بَعدين قال لِنَفسو: ’و لَو ما بَخاف الله و لا أحتَرِم النّاس، لَكِن عَشان الأرمَلَه دي تَحَيّرني، أنا بَحفَظا مِن عَدوا، عَشان ما تَجي و تَتَعِّبني دايماً.“ و الرَّب قال: ”أسمَعو كَلام القاضي الما عَديل. و الله ما يَحفَظ مُختارينو مِن عَدوهُم؟ و هُم بِكورِكو ليهو ليل و نَهار؟ و لَو هو بِخَلّيهُم لِمُدَّه طَويلَه؟ و أنا بَقول ليكُم: هو بِدّي جِزا لِعُدوانُم بِسُرعَه. و لَكِن لَمّا إبن الإنسان بِجي، هو بِلقى الإيمان عَلى الأرض؟“ و قال المَثَل دا لِلنّاس المِتأكِّدين إنَّهُم بارين، و يَكرَهو النّاس التّانيين. ”إتنين رُجال مَشو لِلهيكَل عَشان يَصَلّو، واحِد فرِّيسي و التّاني واحِد مِن البِلِم الضَّريبَه. و الفرِّيسي وَقَف يَصَلّي في نَفسو كِدا: يا الله، أشكُرَك عَشان أنا ما زي باقي النّاس، الحَراميَّه، و الظّالِمين، و الزانين، و لا زي الرّاجِل دا، البِلِم الضَّريبَه. بَصوم مَرَّتين في الأُسبوع، و بَدّي واحِد في عَشَرَه مِن كُلّو مالي. و لَكِن البِلِم الضَّريبَه وَقَف مِن بَعيد، و ما كان داير يَرفَع عُيونو لِلسَّما، و ضَرَب صَدرو و قال: يا الله، أرحَمني. أنا الخاطي. بَقول ليكُم: الزّول دا مَشى لِبيتو مَبَرَّر عَن التّاني، عَشان كُلّو واحِد اليَرفَع نَفسو يَخُتّوهو تِحِت، و اليَخُت نَفسو تِحِت يَرفَعوهو.“ و قَدَّمو ليهو كَمان أولاد صُغار عَشان يَلمَسُم. و وَكِت تَلاميذو شافو كِدا، وَقَّفوهُم. لَكِن يَسُوع ناداهُم و قال ليهُم: ”خَلّو الأولاد يَجو لَي، و ما تَمنَعوهُم. عَشان مَلَكوت الله لِأولاد زي ديل. الحَق أقول ليكُم، أي واحِد الما بِقبَل مَلَكوت الله زي وَلَد صَغَيِر، ما بِدخُلو أبَداً.“ و رَئيس سَألو و قال: ”يا المُعَلِّم الطَّيب، أعمِل شِنو عَشان ألقى الحَياة الأبَديَّه؟“ و يَسُوع قال ليهو: ”لِشِنو تَقول لَي طَيب؟ ما في واحِد طَيب إلّا الله بَس. إنتَ بِتَعرِف الأوامِر، ما تَزني، ما تَكتُل، ما تَسرِق، ما تَشهَد بِالكِضِب، إحتَرِم أبوك و أُمَّك.“ و قال: ”كُلّو دا حَفَظتو مِن ما كُنتَ وَلَد.“ و لَمّا يَسُوع سِمِع دا، قال ليهو: ”لِسَّع ناقِص ليك حاجَه واحدَه. بيع كُل العِندَك، و قَسِّمو بين المَساكين، و بِكون عِندَك كَنز في السَّما. و تَعال، أتبَعني.“ و لَمّا هو سِمِع دا، بِقى حَزنان، عَشان كان غَني جِدّاً. و لَمّا يَسُوع شاف إنّو بِقى حَزنان، قال: ”كيف يَكون صَعب لِغَنيين أن يدخُلو مَلَكوت الله. بِكون أسهَل لِجَمَل يَدخُل في عين إبرَه، مِن راجِل غَني يَدخُل مَلَكوت الله.“ و النّاس السِّمِعو دا قالو: ”مِنو يَقدَر يَخلَص؟“ لَكِن هو قال: ”الما مُمكِن لِلنّاس، مُمكِن لِلَّه.“ و بُطْرُس قال: ”شوف! خَلّينا كُلّو شي و تِبِعناك.“ و قال ليهُم: ”الحَق أقول ليكُم، ما في زول الخَلّى بيت ولّا مَرَه ولّا أخوان ولّا والِدين ولّا أولاد فِشان مَلَكوت الله، الما ياخُد أكتَر بِكَتير هَسَّع دي، و في الزَّمَن الجّاي، الحَياة الأبَديَّه.“ و أخَد الإتناشَر و قال ليهُم: ”شوفو، نِحنا ماشين لِأُورُشَلِيم، و كُل المَكتوب بِالأنبياء عَن إبن الإنسان بِتِم. عَشان يَسَلِّموهو لِلأُمَم، و يَضحَكو عَليهو، و يَشتِموهو، و يَبزَقو عَليهو. و يَجلِدوهو و يَكتُلوهو، و في اليوم التّالِت بِقوم.“ لَكِن هُم ما فِهمو أي شي مِن دا. الكَلام دا كان مَدسوس مِنَّهُم، و هُم ما فِهمو القالو ليهُم. و لَمّا يَسُوع قَرَّب لِأَرِيحَا، واحِد عَميان كان قاعِد جَمب السِّكَّه بِطلُب حاجَه. و لَمّا سِمِع الجَّماعَه ماشين جَمبو، سألُم: ”دا يَعني شِنو؟“ و قالو ليهو: ”يَسُوع النّاصِري بِفوت.“ و هو كورَك و قال: ”يا يَسُوع، إبن دَاوُد، أرحَمني.“ و الكانو ماشين قِدّام، كَلَّموهو شَديد عَشان يَسكُت. لَكِن هو كورَك أكتَر و أكتَر: ”يا إبن دَاوُد، أرحَمني.“ و يَسُوع وَقَف و أمَرُم يَجيبوهو ليهو. و لَمّا قَرَّب، يَسُوع سَألو، ”إنتَ عاوِزني أعمِل ليك شِنو؟“ و هو قال: ”يا رَب، خَلّيني أشوف مَرَّه تانيَه.“ و يَسُوع قال ليهو: ”شوف! إيمانَك شَفاك.“ و طَوّالي عُيونو إنفَتَحو، و هو تِبعو، و كان يَحمِد الله. و كُل النّاس لَمّا شافو كِدا، حَمَدو الله. يَسُوع دَخَل أَرِيحَا، و كان بِفوت مِنَّها. و كان في راجِل إسمو زَكَّا، و هو رَئيس النّاس البِلِمّو الضَّريبَه. و كان غَني. و هو طَلَب يَشوف يَسُوع هو مِنو، لَكِن كان قِصَير و ما قِدِر عَشان النّاس. و جَرى لِقِدّام و طِلِع شَجَرَة جِمّيزَه عَشان يَشوفو، عَشان يَسُوع قَرَّب يَفوت مِن هِناك. و لَمّا يَسُوع جا لِلمَحَل دا، عايَن لِفوق و قال ليهو: ”يا زَكَّا، أنزِل قَوّام، عَشان أنا لازِم أستَنّى في بيتَك النَّهار دا.“ و هو نَزَل بِسُرعَه، و قِبلو بِفَرَح. و لَمّا كُل النّاس شافو دا، نَقنَقو و قالو: ”هو زي ضيف دَخَل عِند راجِل خاطي.“ و زَكَّا وَقَف و قال لِلرَّب: ”شوف، يا رَب، بَدّي نُص أموالي لِلمَساكين. و إذا كان ظَلَمتَ زول، بَرَجِّع ليهو أربَعَه مَرّات.“ و يَسُوع قال ليهو: ”اللّيلَه، خَلاص جا لِلبيت دا، عَشان هو كَمان مِن أولاد إِبْرَاهِيم. عَشان إبن الإنسان جا يَطلُب و يَخَلِّص المَوَدَّر.“ و وَكِت هُم كانو يَسمَعو، يَسُوع إستَمَرَّ و قال ليهُم مَثَل، عَشان هو كان قَريب مِن أُورُشَلِيم، و هُم كانو يَفتَكِرو إنّو مَلَكوت الله بِظهَر طَوّالي. و هو قال: ”زول مَعروف سافَر لِبَلَد بَعيدَه عَشان يَكون مَلِك، و بَعدين يَرجَع. و نادى عَشَرَه مِن خَدّامينو، و أدّاهُم عَشَرَه جِنيه، و قال ليهُم: ’تاجِرو بِدا لِغايَة ما بَرجَع.‘ و لَكِن أهل بَلَدو ما كانو عاوزينو، و رَسَّلو وَراهو و قالو: نِحنا ما عاوزين الرّاجِل دا يَكون مَلِك عَلينا. و لَمّا هو رَجَع بَعَد ما بِقى مَلِك، أمَر يَنادو الخَدّامين ديل الأدّاهُم القُروش، عَشان يَعرِف كُلّو واحِد زاد قُروشو بِكَم. و الأوَّل جا و قال: يا سَيِّد، جِنيهَك رِبِح عَشَرَه جِنيه. و قال ليهو: عَمَلتَ كوَيس، يا الخَدّام الطَّيب. عَشان كُنتَ أمين في القَليل، تَكون مَسؤول عَلى عَشَرَه مُدُن. و التّاني جا و قال: يا سَيِّد، جِنيهَك عَمَل خَمسَه جِنيه. و سيدو قال ليهو: خَلّيك عَلى خَمسَه مُدُن. و تاني جا و قال: أهو دا جِنيهَك، أنا رَبَطتو في مَنديل. عَشان كُنتَ خايِف مِنَّك، عَشان إنتَ زول شَديد. عَشان بِتاخُد الما كان حَقَّك، و تَلِم الما زَرَعتو. و هو قال ليهو: مِن خَشمَك أحكُم عَليك، يا الخَدّام البَطّال. عِرِفتَ أنا زول شَديد، باخُد الما حَقّي، و بَلِم الما زَرَعتو. لِشِنو ما خَتّيت قُروشي في البَنك، و لَمّا رَجَعتَ، كُنتَ باخُدا بِرِبِح؟ و قال لِلواقفين: شيلو مِنّو الجِّنيه، و أدّوهو لِسيد العَشَرَه جِنيه. و قالو ليهو: يا سَيِّد، عِندو عَشَرَه جِنيه. بَقول ليكُم: كُلّو واحِد العِندو، يَدُّوهو أكتَر، و الما عِندو، ياخدو مِنّو حَتّى العِندو. لَكِن عُدواني ديل، الما عاوزين أنا أحكُم عَليهُم، جيبوهُم هِنا و أكتُلوهُم قِدامي.“ و بَعَد ما إتكَلَّم كِدا، مَشى قِدّامُم و طَلَع لِأُورُشَلِيم. و لَمّا قَرَّب لِبيت فاجي و بيت عَنيا في جَبَل إسمو جَبَل الزّيتون، رَسَّل إتنين مِن تَلاميذو. و قال ليهُم: ”أمشو لِلحِلَّه القِدّامكُم. و لَمّا تَدخُلوها، بِتَلقو دَحَش مَربوط، و زول ما رِكبو أبَداً. فِكُوهو و جيبوهو هِنا. و إذا أي واحِد سألكُم: لِشِنو تَفِكّوهو؟ قولو ليهو: الرَّب مُحتاج ليهو.“ و المُرَسَّلين مَشو، و لِقو زي ما هو قال ليهُم. و لَمّا كانو بِفِكّو الدَّحَش، أسيادو قالو ليهُم: ”تَفِكّو جَنى الحُمارَه لِشِنو؟“ و قالو: ”الرَّب مُحتاج ليهو.“ و جابوهو لِيَسُوع، و رَمو هِدُومُم فوق الدَّحَش، و خَتّو يَسُوع فوقو. و لَمّا كان ماشي، فَرَّشو هِدُومُم في السِّكَّه. و وَكِت هو قَرَّب يَنزِل مِن جَبَل الزّيتون، كُل الجَّمَع مِن التَّلاميذ إبتَدو يَفرَحو، و يَحمَدو الله بِصوت عالي، عَشان القُوّات الشّافوها. و قالو: ”مُبارَك المَلِك الجّاي بِإسم الرَّب. سَلام في السَّما و مَجد في المَحَل العالي.“ و بَعَد الفَرِّيسِيِّين مِن الجَّمَع قالو ليهو: ”يا مُعَلِّم، وَبِّخ تَلاميذَك.“ و هو رَدَّ و قال: ”بَقول ليكُم: إذا ديل سَكَتو، الحُجار بِكورِكو.“ و لَمّا هو قَرَّب، و شاف أُورُشَلِيم، بَكى عَليها. و قال: ”إذا إنتو كَمان عِرِفتو النَّهار دا الحاجات البِتجيب ليكُم سَلام. لَكِن هَسَّع، دي مَدسوسَه مِن عُيونكُم. عَشان الأيام بِجو عَليكُم، لَمّا عُدوانكُم بِبنو زَريبَه حَواليكُم و يَهَجِمو عَليكُم مِن كُلّو جِهَه. و بِرموكُم لِلأرض، إنتو و أولادكُم مَعاكُم، و ما بِخَلّو حَجَر عَلى حَجَر، عَشان ما عِرِفتو وَكِت زِيارَتكُم.“ و دَخَل الهيكَل، و إبتَدا يَطرُد النّاس الكانو بِبيعو. و قال ليهُم: ”مَكتوب في الكِتاب: بيتي بِكون بيت لِلصَّلاه، لَكِن إنتو عَمَلتوهو مَحَل لِلحَراميَه.“ و كان بِعَلِّم كُلّو يوم في الهيكَل. لَكِن القُسُس الكُبار و مُعَلِّمين القانون و رؤساء النّاس كانو عاوزين يَكتُلوهو. لَكِن ما لِقو طَريق عَشان يَعمِلو دا، عَشان كُل النّاس كانو يَخَلّو بالُم لِكَلامو. و في يوم مِن الأيام، لَمّا يَسُوع كان بِعَلِّم النّاس في الهيكَل و بِبَشِّر، القُسُس الكُبار و مُعَلِّمين القانون مَعَ الشُّيوخ جو ليهو. و قالو ليهو: ”قول لينا بِياتا سُلطَه إنتَ بِتَعمِل الحاجات دي، ولّا مِنو الأدّاك السُّلطَه دي؟“ و رَدَّ و قال ليهو: ”أنا كَمان بَسألكُم سؤَال، و إنتو تَرُدّو عَلي. مَعموديَّة يُوحَنَّا كانَت مِن السَّما ولّا مِن النّاس؟“ و إتكَلَّمو بَعَضُهُم مَعَ بَعض و قالو: ”إذا قُلنا مِن السَّما، هو بِقول: لِشِنو ما صَدَّقتو بيهو؟ لَكِن إذا قُلنا: مِن النّاس، كُل النّاس بِرمونا بِحُجار، عَشان هُم مِتأكِّدين إنّو يُوحَنَّا نَبي.“ و هُم رَدّو عَليهو و قالو: ”ما بِنَعرِف مِن وين.“ و يَسُوع قال ليهُم: ”أنا كَمان ما بَقول ليكُم بِياتا سُلطَه بَعمِل الحاجات دي.“ و إبتَدا يَكَلِّم النّاس بِالمَثَل دا: ”زول زَرَع جِنينَة عِنَب، و أجَّرا لِمُزَارِعين، و سافَر لِمُدَّه طَويلَه. و في وَكِت البِلِمّو الثَّمار، رَسَّل خَدّام لِلمُزارعين عَشان يَدُّوهو ثِمار الجِّنينَه. لَكِن المُزَارِعين جَلَدوهو و رَسَّلَوهو فاضي. و كَمان رَسَّل خَدّام تاني. و جَلَدو دا كَمان، و شَتَموهو و رَسَّلَوهو فاضي. و كَمان رَسَّل تالِت زول، و دا جَرَحوهو و طَرَدوهو. و سيد الجِّنينَه قال: بَعمِل شِنو؟ أنا بَرَسِّل وَلَدي الحَبيب، يِمكِن بِحتَرِموهو. و لَكِن لَمّا المُزَارِعين شافوهو، قالو بَعضَهُم مَعَ بَعض: دا هو البِيورث مال أبوهو. خَلّونا نَكتُلو، عَشان ناخُد المال. و طَرَدوهو مِن جِنينَة العِنَب، و كَتَلوهو. و عَلى كِدا، سيد الجِّنينَه بيَعمِل ليهُم شِنو؟ هو بِجي و بِكتُل المُزَارِعين ديل، و بِدّي الجِّنينَه لِتانيين.“ و لَمّا سِمِعو كِدا قالو: ”أبَداً!“ و عايَن ليهُم و قال: ”دا شِنو المَكتوب؟ الحَجَر الخَلّوهو البَنّايين بِقى راس الرُّكن. كُلّو واحِد اليَقَع عَلى الحَجَر دا، بِتكَسَّر. و لَكِن كُل الهو يَقَع عَليهو، بِتكَسَّر حِتَّه حِتَّه.“ و مُعَلِّمين القانون و القُسُس الكُبار طَلَبو أن يَقبُضو عَليهو في زات السّاعَه، و لَكِن خافو مِن النّاس. عَشان فِهمو إنّو قال المَثَل دا عَليهُم. و كانو بِحرَسو عَليهو، و رَسَّلو ليهو ناس بِسِر، البِوَرّو نُفوسُم زي ناس صادقين، عَشان يَمسِكوهو بِكِلمَه، لِغايَة ما يَسَلِّموهو لِحُكم المُدير و سُلطتو. و هُم سألوهو و قالو: ”يا مُعَلِّم، نِحنا بِنَعرِف إنتَ تِتكَلَّم و تَعَلِّم بِالعَدل، و ما تَعمِل فارِق بين النّاس. لَكِن بِالحَق تَعَلِّم طَريق الله. الحَق مَعانا أن نَدفَع ضَرايب لِقَيصَر ولّا لا؟“ لَكِن هو عِرِف الغِش بِتاعُم و قال ليهُم، ”وَرّوني قِرِش. صورَة مِنو عَليهو، و كِتابَة مِنو؟“ و هُم قالو ليهو: ”بِتاع قَيصَر.“ و قال ليهُم: ”عَلى كِدا حاجات قَيصَر أدّوها لِقَيصَر، و حاجات الله أدّوها لِلَّه.“ و ما قِدرو يَمسِكوهو بِكِلمَه قِدّام النّاس. و إتعَجَّبو مِن جَوابو، و سَكَتو. و جو ليهو جَماعَه مِن الصَدّوقيين البِقولو ما في قيامَه مِن الموت. و سألوهو و قالو: ”يا مُعَلِّم، مُوسَى كَتَب لينا، إذا أخو زول مات و عِندو مَرَه و ما عِندو أولاد، أخوهو لازِم ياخُد مَرَتو و بِجيب أولاد لِأخوهو. و كانو في سَبعَه أخوان. الأوَّل أخَد مَرَه و مات بِدون وَلَد. و التّاني، و التّالِت أخَد المَرَه دي، و كِدا كَمان السَّبعَه. و هُم ماتو و ما خَلّو أولاد. و في الآخِر، المَرَه ماتَت كَمان. و عَلى كِدا، في القيامَه، هي تَكون مَرَة مِنو مِنَّهُم؟ عَشان هي كانَت مَرَه لِلسَّبعَه.“ و رَدَّ يَسُوع و قال ليهُم: ”أولاد الزَّمَن دا بِزَوِّجو و بِتزَوَّجو. و لَكِن ديل اليَحسِبوهُم مُستَحِقّين لِلزَّمَن الجّاي، و القيامَه مِن المَيِّتين، ما بِزَوِّجو ولّا بِتزَوَّجو. و ما بِقدَرو يَموتو تاني، عَشان هُم زي المَلائكَه، و هُم أولاد الله، ما دام هُم أولاد القيامَه. لَكِن إنّو المَيِّتين بِقومو، مُوسَى بِيَّن في كِتابو في حِكايَة الشَّجَرَه. و هو قال: الرَّب هو إلَه إِبْرَاهِيم، و إلَه إِسْحَاق، و إلَه يَعْقُوب. و هو مُش إلَه المَيِّتين، لَكِن إلَه الحَيين. عَشان الكُل بِعِيش ليهو.“ و بَعَض مِن مُعَلِّمين القانون رَدّو و قالو: ”يا مُعَلِّم، إتكَلَّمتَ كوَيس.“ و بَعَد دا هُم خافو يَسألوهو أي سؤَال. و قال ليهُم: ”كيف يَقولو المَسيح وَلَد دَاوُد؟ و دَاوُد نَفسو يَقول في كِتاب المَزامير: الرَّب قال لِرَبّي: أقعُد عَلى يَميني. لِغايَة ما أخُت عَدوانَك تِحِت كِرعينَك. إذا كان دَاوُد يَسَمّيهو رَب، هو بِكون إبنو كيف؟“ و لَمّا كُل النّاس كانو يَسمَعو، يَسُوع قال لِتَلاميذو، ”خَلّو بالكُم مِن مُعَلِّمين القانون البِحِبّو يَمشو لابسين جَلّابيَّه، و عاوزين السَّلامات في السّوق، و مَحَلّات الإحتِرام في بُيوت الرَّب، و مَحَلّات الإحتِرام في العَزومَه. و بِشيلو بِيوت الأرامِل بِالقُوَّه، و بِالكِضِب يَصَلّو صَلَوات طَويلَه. ديل بياخُدو حُكم شَديد جِدّاً.“ و يَسُوع رَفَع عُيونو، و شاف الغَنيين يَخُتّو الهَدايا في الخَزنَه. و شاف كَمان أرمَلَه مِسكينَه خَتَّت هِناك مِلّيمين. و قال: ”بِالحَق أقول ليكُم، الأرمَلَه المِسكينَه دي خَتَّت أكتَر مِن الكُل. عَشان كُل النّاس ديل أدّو مِن غِناهُم، لَكِن هي أدَّت كُل العِندَها البِتعيش بيهو.“ و بَعَض مِنَّهُم كانو يِتكَلَّمو عَن الهيكَل كيف كان جَميل، و مَبني بِحُجار غاليَه و مِن الهَدايا. لَكِن يَسُوع قال: ”بِخُصوص الحاجات دي الإنتو تَشوفوها، الوَكِت بِجي لَمّا ما بِخَلّو حَجَر فوق حَجَر الما بِرموهو تِحِت.“ و سألوهو و قالو: ”يا مُعَلِّم، الحاجات دي بِتكون مِتين؟ و شِنو العَلامَه لَمّا الحاجات دي قَرَّبَت تَحصَل؟“ و هو قال ليهو: ”خَلّو بالكُم عَشان واحِد ما بِغِشّكُم. عَشان ناس كُتار بِجو بِإسمي و بِقولو: أنا هو، و: الوَكِت قَرَّب. ما تَمشو وَراهُم. و لَمّا تَسمَعو بِحُروب و دَوشَه، ما تَخافو. الحاجات دي لازِم بِتَجي في الأوَّل، لَكِن آخِر الدُّنيا لِسَّع ما قَريب.“ و بَعدين هو قال ليهُم: ”أُمَّه بِتقوم عَلى أُمَّه، و مَملَكَه عَلى مَملَكَه. و بِتكون زَلازِل كَبيرَه، و مِن مَحَل لِمَحَل بِكون جوع و أمراض بَطّالَه. و بِتكون حاجات البِتخَلّي النّاس يَخافو، و عَلامات عَظيمَه مِن السَّما. لَكِن قُبّال دا كُلّو، بِمسِكوكُم و يَطرُدوكُم، و بِسَلِّموكُم لِبِيوت الرَّب و السُّجون. و بِسوقوكُم قِدّام المُلوك و المُديرين فِشان إسمي. و دا بِكون فُرصَه ليكُم عَشان تَشهَدو لَي. خُتّو في قُلوبكُم، ما تَفَكِّرو كَتير قُبّال دا كيف تَرُدّو لَمّا يَشتَكوكُم. عَشان أنا بَدّيكُم كَلام و حِكمَه، و عُدوانكُم ما بِقدَرو يَغلِبو كَلامكُم ولّا يَعاكِسوهو. و الوالِدين و الأخوان و القَريبين و الأصحاب بِسَلِّموكُم. و بِكتُلو بَعض مِنَّكُم. و كُل النّاس بِكرَهوكُم فِشان إسمي. لَكِن و لا شَعرَه واحدَه مِن رؤسكُم تَخسَر. إذا تَكونو ثابِتين، تَخَلِّصو حَياتكُم. و وَكِت ما تَشوفو الجُّيوش بِلِفّو حَول أُورُشَلِيم، بِتَعرِفو خَرابا قَرَّبَت. في الوَكِت دا، خَلّو الفي اليَهُودِيَّه يَهرُبو لِلجِّبال. و ديل، الفي جُوَّه المَدينَه، يَمرُقو. و الفي بَرَّه مِن المَدينَه ما يدخُلوها. دا وَكِت الإنتِقام، عَشان كُل المَكتوب يَتِم. بِكون صَعب جِدّاً لِلحامِلين و البِرَضِّعو في الأيام ديل، عَشان بِكون تَعب شَديد عَلى الأرض، و غَضَب عَلى الأُمَّه دي. و يَقَعو بِالسّيف، و يَكونو مَسجونين لِكُل الأُمَم. و الأُمَم يَدوسو أُورُشَلِيم تِحِت كِرعينُم، لِغايَة ما وَكِت الأُمَم بِتِم. و عَلامات بِكونو في الشَّمِس و القَمَر و النُّجوم. و عَلى الأرض، الأُمَم بِتعَبو، و بِتحَيَّرو مِن دَوشَت البَحَر و الأمواج. و النّاس بِقَعو مِن الخوف لَمّا يَنتَظِرو الحاجات البِجو عَلى الدُّنيا. عَشان قُوّات السَّمَوات بِتهِزّو. و في الوَكِت دا، بِشوفو إبن الإنسان جاي في السَّحابَه بِقُدرَه و بِمَجد عَظيم. و لَمّا الحاجات ديل يَبتَدو يَحصَلو، خَلّو بالكُم، و أرفَعو رُسينكُم. خَلاصكُم قَرَّب.“ و كَلَّمُم بِمَثَل: ”عاينو لِشَجَرَة التّين و كُل الشَّجَر. لَمّا تَطَلِّع الوَرَق، تَشوفو و تَفهَمو مِن نُفوسكُم إنّو السّيف قَرَّب. و كِدا كَمان، لَمّا تَشوفو الحاجات ديل يَحصَلو، تَعرِفو مَلَكوت الله قَرَّب. بِالحَق أقول ليكُم، الجّيل دا ما بِفوت لِغايَة ما كُلّو دا يَتِم. السَّما و الأرض بِفوتو، لَكِن كَلامي ما بِفوت أبَداً. لَكِن خَلّو بالكُم لِنُفوسكُم، عَشان ما بِتكونو حَزنانين في قُلوبكُم بِحاجات فاضيَه و سَكَر و هُموم الحَياة دي، و اليوم داك بِجي ليكُم زي الفَخ. عَشان بِجي عَلى كُل السّاكنين عَلى كُل الأرض. لَكِن أحرِسو و صَلّو في كُلّو وَكِت، عَشان تَقدَرو تَهرَبو مِن كُل الحاجات دي البِتَحصُل، و تَقيفو قِدّام إبن الإنسان.“ و يَسُوع كان بِعَلِّم في النَّهار في الهيكَل. و في اللّيل كان بِطلَع و بِنوم في جَبَل إسمو جَبَل الزّيتون. و بَدري في الصَّباح كُل النّاس جو ليهو في الهيكَل عَشان يَسمَعوهو. و لَمّا قَرَّب عيد الفَطير، يَعني عيد الفِصَح، القُسُس الكُبار و مُعَلِّمين القانون كانو بِفَتِّشو كيف يَكتُلوهو. عَشان هُم كانو خايفين مِن النّاس. و الشّيطان دَخَل في يَهُوذَا الإسمو الإسْخَريُوتي، واحِد مِن الإتناشَر. و يَهُوذَا مَشى و إتكَلَّم مَعَ القُسُس الكُبار و الضُّبّاط كيف يَسَلِّمو ليهُم. و كانو مَبسوطين، و إتَّفَقو يَدُّوهو قُروش. و هو كان رَضيان، و فَتَّش عَلى فُرصَه يَسَلِّمو ليهُم لَمّا الجَمَع ما كان في. و جا يوم عيد الفَطير، اليوم الكان لازِم يَضبَحو فيهو خَروف الضَّبيحَه دي. و يَسُوع رَسَّل بُطْرُس و يُوحَنَّا و قال ليهُم: ”أمشو و حَضِّرو لينا عيد الفَطير عَشان ناكُل.“ و هُم قالو ليهو: ”إنتَ عاوِزنا نَحَضِّر وين؟“ و قال ليهُم: ”شوفو، أوَّل ما إنتو تَدخُلو في المَدينَه، راجِل بِشيل بُرمَة مويَه يَقابِلكُم. أمشو وَراهو لِلبيت الهو بِدخُلو. و قولو لِسيد البيت: ’المُعَلِّم يَقول ليك، وين أوضَة الضّيفان الأنا باكُل فيها عيد الفِصَح مَعَ تَلاميذي؟‘ و هو بِوَرّيكُم أوضَه كَبيرَه في سَرايا فوق، مَجَهَزَه. حَضِّرو لينا هِناك.“ و مَشو و لِقو زي ما هو قال ليهُم. و حَضَّرو الفِصَح. و لَمّا السّاعَه جات، هو قَعَد في الطَّرَبيزَه، و الإتناشَر رَسول مَعاهو. و هو قال ليهُم: ”أنا بِكُلّو قُدرَتي كُنتَ بَدور آكُل عيد الفِصَح دا مَعاكُم قُبّال ما أتعَب. عَشان أقول ليكُم، أنا ما باكُل مِنّو تاني مَرَّه، لِغايَة ما بِتِم في مَلَكوت الله.“ و أخَد كُبّايَه، و لَمّا شَكَر، هو قال: ”أُخدو الكُبّايَه دي، و قَسِّموها بينكُم. عَشان أنا بَقول ليكُم: مِن هَسَّع لِغايَة ما مَلَكوت الله بِجي، أنا ما بَشرَب مِن مويَة العِنَب.“ و أخَد عيش، و شَكَر و كَسَّر و أدّا ليهُم، و قال: ”دا جِسمي الأنا أدّيتو فِشانكُم. أعمِلو دا عَشان تِتزَكَّروني.“ و كِدا كَمان أخَد الكُبّايَه بَعَد العَشا و قال: ”الكُبّايَه دي، هي الإتِّفاق الجَّديد بِدَمّي الإدَّفَّق فِشانكُم. لَكِن شوفو، البِسَلِّمني، إيدو مَعاي في الطَّرَبيزَه. و إبن الإنسان ماشي زي ما مَكتوب عَنّو. و لَكِن مُصيبَه لِلزّول البِسَلِّمني.“ و هُم إبتَدو يَسألو بَعضَهُم لِبَعض، ياتو مِنَّهُم بيَعمِل العَمَل دا. و كَمان شَكَل قام بِينُم ياتو مِنَّهُم يَكون أكبَر. و هو قال ليهُم: ”مُلوك الأُمَم يَعمِلو زي السَّيد فوقُم. و ديل البِحكُمو عَليهُم، بِسَمّوهُم ناس يَعمِلو الخير. لَكِن إنتو ما تَكونو كِدا. لَكِن الأكبَر فيكُم، خَليهو يَبقى زي الأصغَر، و الرَّئيس زي الخَدّام. مِنو هو أكبَر، القاعِد في الطَّرَبيزَه ولّا البِخدِم؟ ما هو القاعِد في الطَّرَبيزَه؟ لَكِن أنا في وَسِطكُم زي البِخدِم. لَكِن إنتو إستَنّيتو مَعاي في تَجارِبي. و لَكِن أنا كَمان جَهَّزتَ ليكُم مَلَكوت، زي ما أبوي جَهَّز لَي مَلَكوت. عَشان تَاكُلو و تَشرَبو في طَرَبيزَتي في مَلَكوتي، و تَقعُدو عَلى كَراسي و تَحكُمو عَلى قَبايل إِسْرَائِيل الإتناشَر. يا سِمْعَان، يا سِمْعَان! شوف، الشّيطان كان عاوِز كُلَّكُم عَشان يَغَربِلكُم زي الدُّرَه. لَكِن أنا صَلّيت فِشانَك عَشان ما تَوَدِّر إيمانَك. و إنتَ، لَمّا تَرجَع تاني، ثَبِّت أخوانَك.“ و هو قال ليهو: ”يا رَب، أنا مُستَعِد أمشي مَعاك حَتّى لِلسِّجِن و لِلموت.“ و يَسُوع قال: ”يا بُطْرُس، أقول ليك، قَبل ما الدّيك يَكورِك اللّيلَه، إنتَ بِتَنكِرني تلاتَه مَرّات، و تَقول إنتَ ما تَعرِفني.“ و هو قال ليهُم: ”لَمّا رَسَّلتَكُم بِدون جُزلان و لا كيس و لا جِزَم، كُنتو تَحتاجو لِحاجَه؟“ و قالو: ”و لا حاجَه.“ و هو قال ليهُم: ”لَكِن هَسَّع، العِندو جُزلان خَليهو يَشيلو، و كيس كَمان. و الما عِندو سيف، خَليهو يَبيع قَميصو و يَشتَري واحِد. عَشان أنا بَقول ليكُم: المَكتوب دا لازِم يَتِم فيني اليَقول: حَسَبوهو مَعَ الما يَحفَظو القانون. أيوَه، المَكتوب عَنّي بِتِم.“ و هُم قالو: ”يا رَب، شوف، في هِنا سيفين.“ و هو قال ليهُم: ”كِفايَه.“ و هو مَشى زي عادَتو لِجَبَل الزّيتون، و تَلاميذو كَمان تِبِعوهو. و لَمّا وِصلو في المَحَل، قال ليهُم: ”صَلّو، عَشان ما تَدخُلو في تَجرِبَه.“ و هو مَرَق مِنَّهُم مَسافَه تَقريباً زي ما تَرمي حَجَر. و رَكَع عَلى رُكَبو و صَلّى. و قال: ”يا أبوي، إذا إنتَ رَضيان، شيل كُبّايَة الضّيق دي مِنّي. لَكِن ما إرادَتي، لَكِن إرادَتَك تَتِم.“ و مَلاك مِن السَّما ظَهَر ليهو يَقَوّيهو. و هو كان في ضيق، و كان بِصَلّي شَديد. و المويَه مِن جِسمو نَقَّط زي الدَّم عَلى الأرض. و لَمّا قام مِن الصَّلاه، جا لِتَلاميذو و لِقاهُم نايمين مِن الحُزن. و هو قال ليهُم: ”إنتو نايمين لِشِنو؟ قُومو و صَلّو، عَشان ما تَدخُلو في تَجرِبَه.“ و وَكِت ما كان يتكَلَّم، جو ناس كُتار. و مَعاهُم راجِل إسمو يَهُوذَا، واحِد مِن الإتناشَر، ماشي قِدّامُم. هو قَرَّب لِيَسُوع عَشان يَسَلِّم عَليهو بِبوسَه. و يَسُوع قال ليهو: ”يا يَهُوذَا، إنتَ بِتسَلِّم إبن الإنسان بِبوسَه؟“ و لَمّا الكانو حَوَليهو شافو الماشي يَحصُل، هُم قالو: ”يا رَب، نَضرُب بِالسّيف؟“ و واحِد مِنَّهُم ضَرَب عَبد رَئيس القُسُس، و قَطَع أضانو اليَمين. لَكِن يَسُوع رَدَّ و قال: ”خَلّوهُم لِغايَة دا.“ و لَمَس أضانو و شَفاها. و يَسُوع قال لِلقُسُس الكُبار و ضُبّاط عَساكِر الهيكَل و الشُّيوخ الجّو عَليهو: ”طَلَعتو بِسُيوف و عَصايات زي عَلى حَرامي؟ وَكِت ما أنا كُنتَ مَعاكُم كُلّو يوم في الهيكَل، ما قَبَضتو عَلي. لَكِن دي ساعَتكُم و قُوَّة الضُّلُمَّه.“ و أخَدوهو و ساقوهو و دَخَّلوهو في بيت رَئيس القُسُس. و لَكِن بُطْرُس تِبعو مِن بَعيد. و لَمّا وَلَّعو النّار في وَسط الحوش و قَعَدو سَوا، بُطْرُس قَعَد بِينُم. و خَدّامَه شافَتو قاعِد جَمب النّار. و عايَنَت ليهو شَديد و قالَت: ”الرّاجِل دا كان مَعاهو كَمان.“ لَكِن هو نَكَر و قال: ”يا مَرَه، أنا ما بَعرِفو.“ و بَعَد شوَيَه، زول تاني شافو و قال: ”إنتَ كَمان واحِد مِنَّهُم.“ و بُطْرُس قال: ”يا زول، مُش أنا!“ و بَعَد ما فاتَت ساعَه واحدَه تَقريباً، واحِد تاني إتأكَّد و قال: ”بِالحَق، دا كان مَعاهو كَمان، عَشان هو كَمان مِن الجَّليل.“ و بُطْرُس قال: ”يا زول، أنا ما بَعرِف بِتقول شِنو.“ و طَوّالي لَمّا هو لِسَّع يتكَلَّم، الدّيك كورَك. و الرَّب إتلَفَت و عايَن لِبُطْرُس. و بُطْرُس إتزَكَّر كَلام الرَّب الكان قال ليهو: ”قُبّال ما الدّيك يَكورِك اللّيلَه، بِتَنكِرني تلاتَه مَرّات.“ و بُطْرُس مَرَق بَرَّه و بَكى بِكى مُر. و الرُّجال الكانو يَحرَسو يَسُوع، كانو يَشتِموهو و يَجلِدوهو. و هُم غَطّو وَشّو و سألوهو و قالو ليهو: ”إتنَبّأ! مِنو ضَرَبَك؟“ و هُم كانو يَقولو حاجات تانيَه كَتيرَه عَليهو و يَجَدِّفو. و في الصَّباح بَدري، مَجلِس الشُّيوخ مِن القُسُس الكُبار و مُعَلِّمين القانون إتلَمّو، و جابوهو قِدّامُم. و هُم قالو: ”إذا إنتَ المَسيح، قول لينا.“ و قال ليهُم: ”إذا قُلتَ ليكُم، ما بِتصَدِّقو. و إذا سَألتَكُم، ما بِترُدّو عَلي. لَكِن مِن هَسَّع إبن الإنسان بِقعُد عَلى يَمين قُدرَة الله.“ و كُلُّهُم قالو: ”إنتَ إبن الله؟“ و قال ليهُم: ”إنتو بِتقولو أنا هو.“ و هُم قالو: ”نَحتاج لِشَهادَه تانيَه لِشِنو؟ عَشان سِمِعنا مِن خَشمو.“ و كُل الجَّمَع قامو و جابوهو لِبِيلاطُس. و إبتَدو يَشتَكو عَليهو و يَقولو: ”لِقينا الرّاجِل دا يَخَرِّب الأُمَّه بِتاعَتنا، و يَمنَع أن يَدّي الضَّريبَه لِقَيصَر، و يَقول هو المَسيح و مَلِك.“ و بِيلاطُس سَألو و قال: ”إنتَ مَلِك اليَهود؟“ و هو رَدَّ عَليهو: ”إنتَ بِتقول.“ و بِيلاطُس قال لِلقُسُس الكُبار و النّاس: ”أنا ما لِقيت ذَنب في الإنسان دا.“ و لَكِن هُم كانو يَزيدو و يَقولو: ”دا يَحَرِّك النّاس، و بِعَلِّم في كُل اليَهُودِيَّه. و إبتَدا مِن الجَّليل و جا لِغايَة هِنا.“ و لَمّا بِيلاطُس سِمِع دا، سأل إذا كان الرّاجِل دا مِن الجَّليل. و لَمّا عِرِف إنّو مِن سُلطَة هِيرُودُس، رَسَّلو لِهِيرُودُس الكان في أُورُشَلِيم في الوَكِت دا. و هِيرُودُس، لَمّا شاف يَسُوع، كان مَبسوط جِدّاً، عَشان مِن زَمَن طَويل كان عاوِز يَشوفو، عَشان هو سِمِع عَنّو، و كان عِندو رَجاء يَشوفو يَعمِل عَلامَه. و سَألو بِكَلام كَتير، لَكِن هو ما رَدَّ عَليهو كِلمَه. و القُسُس الكُبار و مُعَلِّمين القانون وَقَفو، و إشتَكو عَليهو شَديد. و هِيرُودُس مَعَ العَساكِر بِتاعو ضِحِكو عَليهو، و شَتَموهو. و لَبَّسوهو هِدوم جَميل، و رَجَّعوهو لِبِيلاطُس. و هِيرُودُس و بِيلاطُس بِقو أصحاب مَعَ بَعض في اليوم داك. عَشان قُبّال دا هُم الإتنين كانو عُدوان. و بِيلاطُس نادى القُسُس الكُبار و السَّلاطين و النّاس. و قال ليهُم: ”جِبتو لَي الرّاجِل دا زي واحِد البِخَرِّب النّاس. شوفو! أنا جَرَّبتو قِدّامكُم، و ما لِقيت في الرّاجِل دا الغَلَط الإنتو بِتِشتَكو بيها عَليهو. و لا هِيرُودُس كَمان، عَشان هو رَسَّلو لينا. و شوفو، هو ما عَمَل شي يِستَحِق الموت. و عَلَشان كِدا أنا بَأدِّبو و بَفِكّو.“ و كان زي العادَه يَفِك ليهُم واحِد مَحبوس كُلّو عيد. و كُلَّهُم كورَكو سَوا بِصوت واحِد و قالو: ”أمسِك الرّاجِل دا، و فِك لينا بَراباس.“ و الزّول دا كان إترَمى في السِّجِن عَشان هو عَمَل فِتنَه في المَدينَه، و كَتَل ناس. و بِيلاطُس كَلَّمُم تاني مَرَّه، عَشان كان عاوِز يَفِك يَسُوع. و لَكِن كورَكو و قالو: ”أصلُبو، أصلُبو!“ و هو قال ليهُم مَرَّه تالتَه: ”لِشِنو؟ ياتو شَر عَمَلو الزّول دا؟ أنا ما لِقيت فيهو ذَنب يِستَحِق الموت. عَلَشان كِدا، أنا بَأدِّبو و بَفِكّو.“ و لَكِن كانو يِستَمِرّو يَكورِكو بِأصوات عاليَه، و يَطلُبو أن يَصلُبوهو. و صوتُم غَلَب. و بِيلاطُس حَكَم زي ما النّاس طَلَبو. و فَكَّ ليهُم الزّول الكان إترَمى في السِّجِن بِسَبَب فِتنَه و كَتل، الهُم طَلَبو مِنّو يَفِكّو. و لَكِن سَلّم يَسُوع لِإرادَتُم. و وَكِت ما ساقوهو، واحِد إسمو سِمْعَان مِن قيرَوان، كان جاي مِن الزِّراعَه. و خَتّو عَليهو الصَّليب عَشان يَشيلو وَرا يَسُوع. و جَمَع كَبير مِن النّاس مَشو وَراهو، و مَعاهُم النِّسوان الكانو يَبكو عَليهو مِن الحُزن. و يَسُوع إتلَفَت ليهُم و قال: ”يا بَنات أُورُشَلِيم، ما تَبكو فِشانّي، لَكِن أبكو فِشان نُفوسكُم و أولادكُم. عَشان شوفو، أيام جايَه بِتقولو فيها: مُبارَك العَواقِر، و البُطون الما وِلدَت، و الشُّطور الما رَضَّعَت. في الوَكِت دا، بِبتَدو يَقولو لِلجِّبال: أقَعو عَلينا، و لِلحُجار: غَطّينا. و إذا عَمَلو كِدا لِلشَّجَرَه الخَضرَه، شِنو بِيَحصُل لِلشَّجَرَه اليابسَه؟“ و ساقو كَمان إتنين مُذنِبين تانيين عَشان يَكتُلوهُم مَعاهو. و لَمّا جو لِلمَحَل الإسمو جُمجُمَه، صَلَبوهو هِناك و الأتنين مُذنِبين، واحِد عَلى يَمينو و التّاني عَلى شِمالو. و يَسُوع قال: ”يا أبوي، أغفِر ليهُم، عَشان هُم ما عارِفين شِنو العَمَلوهو.“ و وَكِت هُم قَسَمو هِدومو، رَمو عَليهو القُرعَه. و النّاس كانو واقفين و يَعاينو فيهو. و الرّؤساء كَمان كانو بِضحَكو عَليهو و قالو: ”هو خَلَّص تانيين، خَليهو يَخَلِّص نَفسو إذا هو المَسيح، مُختار الله.“ و العَساكِر كَمان ضِحِكو عَليهو، و جو و قَدَّمو ليهو خَل. و قالو: ”إذا إنتَ مَلِك اليَهود، خَلِّص نَفسَك.“ و كان مَكتوب فوق رَاسو: ”دا هو مَلِك اليَهود.“ و واحِد مِن المُذنِبين المَعَلَّقين، شَتَمو و قال: ”إنتَ مُش المَسيح؟ خَلِّص نَفسَك و خَلِّصنا كَمان.“ لَكِن التّاني رَدَّ عَليهو و وَبَّخو و قال: ”إنتَ ما تَخاف الله؟ و إنتَ نَفسَك تِحِت زات الحُكم؟ و حَكَمو عَلينا بِالحَق، عَشان دي أُجرَة أعمالنا. لَكِن الرّاجِل دا ما عِندو غَلَط.“ و هو قال: ”يا يَسُوع، إتزَكَّرني لَمّا تَجي لِمَلَكوتَك.“ و قال ليهو: ”بِالحَق أقول ليك، النَّهار دا بِتكون مَعاي في جَنَّه.“ و الوَكِت كان السّاعَه إتناشَر تَقريباً. و كانَت في ضُلُمَّه عَلى كُل الأرض لِغايَة السّاعَه تلاتَه. و الشَّمِس ضَلَّمَت، و سِتارَة الهيكَل إتشَرَّطَت في نُص. و يَسُوع كورَك بِصوت عالي و قال: ”يا أبوي، في إيدينَك أدّيت روحي.“ و لَمّا قال كِدا سَلّم روحو. و رَئيس الجّيش لَمّا شاف الحَصَل، مَجَّد الله و قال: ”بِالحَق الإنسان دا كان بار.“ و كُل النّاس، الكانو إتلَمو عَشان يَشوفو دا، لَمّا شافو الكان حَصَل، رَجَعو و كانو يَضرُبو صُدورُم. و كُل الكانو بيَعرِفوهو و النِّسوان المَشو مَعاهو مِن الجَّليل، كانو واقفين مِن بَعيد يَشوفو دا كُلّو. و شوف، كان في راجِل إسمو يُوسِف. و هو كان واحِد مِن المَجلِس، و راجِل طَيب و بار. و هو ما كان يَتَّفِق مَعَ نِظامُم و لا عَمَلُم. و هو كان مِن الرَّامَه، و هي مَدينَة اليَهود. و كان يِستَنّى مَلَكوت الله. و هو مَشى لِبِيلاطُس، و طَلَب مِنّو جِسم يَسُوع. و نَزَّلو و لَفّاهو بِقُماش تيل، و خَتّو في قَبر مَقطوع مِن حَجَر، و ما كانو خَتّو زول فيهو أبَداً. و اليوم دا كان يوم الإستِعداد، و السَّبِت قَرَّب. و النِّسوان الجّو مَعاهو مِن الجَّليل تِبِعوهو، و شافو القَبر و كيف خَتّو جِسمو. و هُم رَجَعو و جَهَّزو بُهارات و ريحَه. و في يوم السَّبِت إستَراحو زي الأمر. لَكِن في أوَّل يوم الأسبوع بَدري جِدّاً، النِّسوان جو شايلين البُهارات الجَهَّزوها. و لِقو الحَجَر مَدَردَق مِن القَبر. و دَخَلو و ما لِقو جِسم الرَّب يَسُوع. و وَكِت ما كانو يِتحَيَّرو في الحَصَل، شوف، راجلين وَقَفو جَمبُم بِهِدوم لامِع. و لَمّا كانو خايفين، و دَنقَرو لِلأرض بِوَشُّم، الرّاجلين قالو ليهُم: ”لِشِنو تَفَتِّشو عَلى الحَي بين المَيِّتين؟ هو ما هِنا، لَكِن هو قام. إتزَكَّرو كيف كَلَّمكُم قُبّال و هو كان مَعاكُم في الجَّليل. و قال إنّو إبن الإنسان لازِم يِتسَلَّم لِإيدين ناس خاطيين، و يَصلُبوهو، و في اليوم التّالِت بِقوم.“ و إتزَكَّرو كَلامو. و رَجَعو مِن القَبر و خَبَّرو الحِداشَر و التّانيين بِكُل الحاجات دي. و هُم كانو مَرْيَم المَجْدَلِيَّه، و يُوَنّا، و مَرْيَم أُم يَعْقُوب، و التانيات مَعاهُم، القالو دا لِلرُّسُل. و كَلامُم ظَهَر ليهُم زي كَلام فاضي، و ما صَدَّقو النِّسوان. و بُطْرُس قام و جَرى لِلقَبر. و دَنقَر و عايَن جُوَّه، و شاف قُماش التّيل بَراهو. و مَشى مِتعَجِّب في نَفسو عَلى الشّي الحَصَل. و في زات اليوم، إتنين مِنَّهُم كانو ماشين لِحِلَّه إسِما عِمَواس، مَسافَة سَبعَه ميل مِن أُورُشَلِيم. و كانو يِتكَلَّمو بَعضَهُم بَعض عَن كُل الحاجات دي الحَصَلَت. و لَمّا كانو يِتكَلَّمو بَعضَهُم بَعض عَن الحاجات دي، يَسُوع نَفسو قَرَّب ليهُم و إبتَدا يَمشي مَعاهُم. لَكِن حاجَه كانَت تَمسِك عُيونُم عَشان ما يَعرِفوهو. و هو قال ليهُم: ”الكَلام دا شِنو الإنتو تِتكَلَّمو بيهو مَعَ بَعض و إنتو ماشين؟“ و هُم وَقَفو حَزنانين. و واحِد مِنَّهُم إسمو كَلْيُوبَاس رَدَّ عَليهو و قال: ”إنتَ ضيف بَراك في أُورُشَلِيم و ما بِتَعرِف الحاجات الحَصَلَت فيها في الأيام دي؟“ و قال ليهُم: ”الحاجات شِنو؟“ و هُم قالو ليهو: ”البِخُص يَسُوع النّاصِري الكان نَبي عِندو قُدرَه في العَمَل و الكَلام قِدّام الله و كُل النّاس. و كيف القُسُس الكُبار و السَّلاطين بِتوعنا سَلَّموهو لِحُكم الموت، و صَلَبوهو. و لَكِن نِحنا كان عِندَنا رَجاء إنّو هو يَجيب الفِداء لِإِسْرَائِيل. لَكِن، مَعَ دا كُلّو، هَسَّع هو تالِت يوم مِن ما حَصَل دا. و كَمان، بَعَض مِن النِّسوان مِنَّنا خَلّونا نِستَغرَب، عَشان مَشو بَدري لِلقَبر. و لَمّا ما لِقو جِسمو، رَجَعو و قالو: شُفنا رؤيا مَلائكَه القالو هو حَي. و بَعَض مِن النّاس الكانو مَعانا مَشو لِلقَبر، و لِقو كِدا تَمام زي ما النِّسوان قالو. و لَكِن ما شافو يَسُوع نَفسو.“ و هو قال ليهُم: ”يا بَليدين و قُلوبكُم تَقيلَه عَشان تَصَدِّقو كُل القالوهو الأنبياء. المَسيح ما كان لازِم يِتوَجَّع بِالحاجات دي و يَدخُل مَجدو؟“ و إبتَدا مِن كِتاب مُوسَى و مِن كُل الأنبياء يَفَسِّر ليهُم الكان مَكتوب عَنّو في كُل الكُتُب. و قَرَّبو لِلحِلَّه الكانو ماشين ليها. و هو خَلّاهُم يَفتَكِرو هو بِستَمِر في المَشي. و هُم كَلَّمو شَديد و قالو: ”أقعُد مَعانا، عَشان المِسا قَرَّب، و النَّهار فات.“ و دَخَل عَشان يَقعُد مَعاهُم. و لَمّا قَعَد مَعاهُم في الطَّرَبيزَه، أخَد الرَغيف و بارَك، و كَسَّر، و أدّاهو ليهُم. و عُيونُم إنفَتَحَت، و عِرفوهو. و هو بِقى مَدسوس مِنَّهُم. و قالو بَعضَهُم لِبَعض: ”قَلِبنا ما كانَت مَوَلَّع فينا وَكِت ما كان يتكَلَّم مَعانا في السِّكَّه، و وَكِت ما كان يَفَسِّر لينا الكُتُب؟“ و هُم قامو في زات السّاعَه، و رَجَعو لِأُورُشَلِيم. و لِقو الحِداشَر أجتَمَعو مَعَ الكانو مَعاهُم. و قالو: ”الرَّب قام بِالحَق و ظَهَر لِسِمْعَان!“ و هُم الإتنين خَبَّرو بِالحَصَل في السِّكَّه، و كيف عِرفوهو لَمّا كَسَّر الرَغيف. و وَكِت ما كانو يِتكَلَّمو بِالحاجات دي، يَسُوع وَقَف في وَسِطُم و قال ليهُم: ”سَلام ليكُم.“ و إستَغرَبو و خافو خوف شَديد، و إفتَكَرو إنَّهُم شافو روح. و هو قال ليهُم: ”مالكُم مِتحَيّرين، و لِشِنو أفكار تَجي في قُلوبكُم؟ شوفو إيديني و رِجليني، أنا هو. ألمَسوني و شوفو، عَشان الرّوح ما عِندو لَحَم و عِضام مِثِل ما إنتو شايفينّي.“ و بَعَد ما قال كِدا، وَرّاهُم يديهو و كِرعينو. و لَمّا لِسَّع ما كانو مِصَدِّقين مِن الفَرَح و مِتعَجِّبين، هو قال ليهُم: ”عِندَكُم أكِل هِنا؟“ و أدّوهو حِتَت سَمَك مَحَمَّر. و اَخَدو و أكَلو قِدّامُم. بَعدين هو قال ليهُم: ”شوفو! دا الكَلام الكَلَّمتَكُم بيهو وَكِت أنا كُنتَ مَعاكُم، إنّو كُل المَكتوب عَنّي في قانون مُوسَى و الأنبياء و المَزامير لازِم يَتِم.“ و في الوَكِت دا هو فَتَح عَقلُم عَشان يَفهَمو الكُتُب. و هو قال ليهُم: ”مَكتوب كِدا إنّو المَسيح لازِم يِتوَجَّع و يَقوم مِن بين المَيِّتين في اليوم التّالِت. و يَبَشِّرو بِالتّوبَه و غُفران الخَطايا بِإسمو لِكُل الأُمَم، و يَبتَدو مِن أُورُشَلِيم. و إنتو شاهِدين لِلحاجات دي. و شوفو، بَرَسِّل ليكُم وَعد أبوي. إستَنّو في أُورُشَلِيم لِغايَة ما تَلبَسو قُوَّه مِن فوق.“ و هو قادُم بَرَّه لِغايَة بيت عَنيا. و رَفَع إيدينو و بارَكُم و وَكِت ما كان يَبارِكُم، مَرَق مِنَّهُم، و إترَفَع لِلسَّما. و عَبَدوهو، و رَجَعو لِأُورُشَلِيم بِفَرَح عَظيم و إستَمَرّو دايماً في الهيكَل يَبارِكو الله. في البِدايَه كان الكِلمَه، و الكِلمَه كان عِند الله، و الكِلمَه كان الله. هو كان في البِدايَه عِند الله. كُلّو شي كان مَعمول بيهو، و بِدونو ما في شي كان مَعمول. الحَياة كانَت فيهو، و الحَياة كانَت نور النّاس. و النّور كان بِنَوِّر في الضَّلام، و الضَّلام ما قِدِر يَغلِبو. كان في إنسان مَرَسَّل مِن الله إسمو يُوحَنَّا. هو جا لِلشَّهادَه عَشان يَشهَد لِلنّور، عَشان كُل النّاس بِآمِنو بِواسطَتو. هو نَفسو ما كان النّور، لَكِن جا عَشان يَشهَد لِلنّور. النّور الحَقيقي البِنَوِّر كُلّو إنسان كان جاي لِلدُّنيا. هو كان في الدُّنيا، و الدُّنيا كانَت مَعمولَه بيهو، و الدُّنيا ما عِرفَتو. هو جا لِشَعبو، و شَعبو ما قِبلو. و لَكِن القِبلوهو، هو أدّاهُم سُلطَه عَشان يَبقو أولاد الله، يَعني النّاس البِآمِنو بِإسمو. ديل هُم النّاس الكانو مَولودين، مُش بِدَم، و لا بِإرادَة جِسم، و لا مِن إرادَة راجِل، لَكِن مِن الله. و الكِلمَه بِقى جِسم، و سَكَن في وَسِطنا. و شُفنا مَجدو زي مَجد الإبن الوَحيد مِن الأبو، مَليان بِنِعمَه و حَق. يُوحَنَّا شِهِد ليهو، و كورَك و قال: ”دا هو الرّاجِل الكَلَّمتَ عَنّو. هو البِجي بَعَدي، جا قِدامي، عَشان هو كان قُبّالي.“ و نِحنا كُلُّنا أخَدنا مِن خيرو الكَتير، نِعمَه فوق نِعمَه. عَشان الله أدّا القانون بِمُوسَى، لَكِن النِّعمَه و الحَق جو بِيَسُوع المَسيح. ما في زول شاف الله كُلّو كُلّو. الإبن الوَحيد الهو في قَلب الأبو، هو خَبَّر عَنّو. و دي شَهادَة يُوحَنَّا، لَمّا اليَهود مِن أُورُشَلِيم رَسَّلو ليهو قُسُس و لاويين عَشان يَسألوهو: ”إنتَ مِنو؟“ يُوحَنَّا إعتَرَف و ما نَكَر، و شِهِد: ”أنا مُش المَسيح.“ و قالو ليهو: ”عَلى كِدا، إنتَ مِنو؟ إنتَ إِيلِيَّا؟“ قال ليهُم: ”لا، مُش أنا.“ و هُم قالو: ”إنتَ النَّبي؟“ هو رَدَّ عَليهُم: ”لا.“ عَلَشان كِدا قالو ليهو: ”قول لينا إنتَ مِنو، عَشان نَرُد عَلى النّاس الرَّسَّلونا. إنتَ تَقول شِنو عَن نَفسَك؟“ يُوحَنَّا قال: ”أنا صوت بِكورِك في الخَلا، حَضِّرو سِكَّة الرَّب، زي ما قال النَّبي إِشَعْيَاء.“ و النّاس المَرَسَّلين كانو مِن الفَرِّيسِيِّين. بَعدين سألوهو: ”طَيب، لِشِنو بِتعَمِّد إذا إنتَ ما المَسيح، و لا إِيلِيَّا، و لا النَّبي؟“ يُوحَنَّا قال ليهُم: ”أنا بَعَمِّد بِالمويَه، لَكِن واحِد واقِف بينكُم إنتو ما بِتَعرِفوهو. هو البِجي بَعَدي، و أنا ما مُستَحِق أفِك جِزَمو.“ و دا كان في بيت عَنيا جَمب بَحَر الأُرْدُنّ، المَحَل الكان يُوحَنَّا بِعَمِّد فيهو. في اليوم التّاني، يُوحَنَّا شاف يَسُوع جاي ليهو. و قال: ”شوفو حَمَل الله البِشيل خَطيّة الدُّنيا. دا هو الأنا قُلتَ عَنّو: جاي بَعَدي إنسان كان قِدامي، عَشان هو كان قُبّالي. و أنا ما كُنتَ عارِفو. لَكِن عَشان هو يَظهَر لِإِسْرَائِيل، أنا جيت أعَمِّد بِالمويَه.“ و يُوحَنَّا شِهِد و قال: ”أنا شُفتَ الرّوح نازِل زي حَمامَه مِن السَّما، و قَعَد عَليهو. و أنا ما كُنتَ عارِفو، لَكِن الرَّسَّلني عَشان أعَمِّد بِالمويَه، هو قال لَي: البِتشوف الرّوح نازِل و يِستَنّى عَليهو، دا هو البِعَمِّد بِالرّوح القُدُس. و أنا شُفتَ و شِهِدتَ، دا هو إبن الله.“ و في اليوم التّاني، يُوحَنَّا كان واقِف مَعَ إتنين مِن تَلاميذو. و شاف يَسُوع ماشي، و قال: ”شوفو حَمَل الله.“ بَعدين التَّلاميذ الإتنين سِمِعوهو يتكَلَّم، و قامو و تِبعو يَسُوع. و يَسُوع إتلَفَت و شافُم يَتبَعوهو. و قال ليهو: ”إنتو عاوزين شِنو؟“ و قالو: ”رَبّي، يَعني يا مُعَلِّم، إنتَ ساكِن وين؟“ و قال ليهُم: ”تَعالو و شوفو.“ بَعدين مَشو و شافو المَحَل الهو كان ساكِن فيهو. و قَعَدو هِناك اليوم داك. و كان السّاعَه أربَعَه تَقريباً. و أنْدَرَاوُس أخو سِمْعَان بُطْرُس كان واحِد مِن الإتنين السِّمِعو يُوحَنَّا و تِبعو يَسُوع. و أنْدَرَاوُس لِقى أخوهو سِمْعَان في الأوَّل، و قال ليهو: ”لِقينا مَسيّا، يَعني المَسيح.“ و جابو لِيَسُوع. و يَسُوع عايَن ليهو و قال: ”إنتَ سِمْعَان وَلَد يُوحَنَّا. إنتَ إسمَك صَفا،“ يَعني بُطْرُس. و في اليوم التّاني، يَسُوع قَرَّر يَمشي لِلجَّليل. بَعدين لِقى فِيلُبُّس، و قال ليهو: ”أتبَعني.“ و فِيلُبُّس كان مِن بيت صَيدا، مَدينَة أنْدَرَاوُس و بُطْرُس. و فِيلُبُّس لِقى نَثَنَائِيل و قال ليهو: ”لِقينا الكَتَب عَنّو مُوسَى في القانون و الأنبياء، يَسُوع إبن يُوسِف المِن النَّاصِرَه.“ و نَثَنَائِيل قال ليهو: ”مُمكِن بِطلَع مِن النَّاصِرَه حاجَه طَيبَه؟“ فِيلُبُّس قال ليهو: ”تَعال و شوف.“ و يَسُوع شاف نَثَنَائِيل جاي ليهو، و قال عَنّو: ”شوف إِسْرَائِيلي بِالحَق، ما فيهو غِش.“ نَثَنَائِيل قال ليهو: ”إنتَ بِتَعرِفني مِن وين؟“ رَدَّ يَسُوع و قال: ”قُبّال ما فِيلُبُّس ناداك، أنا شُفتَك تِحِت شَجَرَة التّين.“ نَثَنَائِيل رَدَّ و قال ليهو: ”يا مُعَلِّم، إنتَ إبن الله. إنتَ مَلِك إِسْرَائِيل.“ و يَسُوع رَدَّ و قال ليهو: ”إنتَ آمَنتَ عَشان قُلتَ ليك أنا شُفتَك تِحِت شَجَرَة التّين؟ إنتَ بِتشوف حاجات أكبَر مِن دي.“ و قال ليهو: ”الحَق الحَق أقول ليكُم، بِتشوفو السَّما مَفتوحَه، و مَلائِكَة الله بِطلَعو و بِنزِلو عَلى إبن الإنسان.“ و في اليوم التّالِت، كان في عِرس في قانا الجَّليل. و أُم يَسُوع كانَت هِناك. و يَسُوع و تَلاميذو كانو مَعزومين كَمان لِلعِرس. و لَمّا الخَمر كان خَلاص، أُم يَسُوع قالَت ليهو: ”ما عِندَهُم خَمر.“ يَسُوع قال ليها: ”مالِك و مالي، يا سِت؟ ساعتي لِسَّع ما جات.“ و أُمّو قالَت لِلخَدّامين: ”البِقولو ليكُم، أعمِلوهو.“ و كان في سِتَّه زيار مِن حُجار مَوجودَه هِناك عَشان عادَة الغَسيل، زي ما اليَهود يَسَوّو دايماً. كُلّو واحِد مِنَّها يَشيل خَمسَه سِتَّه صَفايح. يَسُوع قال ليهُم: ”أملو الزّيار مويَه.“ و مَلوها تَمام. و بَعدين قال ليهُم: ”كُبّو مِنّو شوَيَه، و قَدِّموهو لِرَئيس العَزومَه.“ و قَدَّمو ليهو. و لَمّا رَئيس العَزومَه شِرِب المويَه اليَسُوع غَيَّرا لِخَمر، هو ما عِرِف مِن وين جابوها، لَكِن الخَدّامين الكَبّو المويَه عِرِفو. و بَعَد دا، رَئيس العَزومَه نادى العَريس. و قال ليهو: ”كُلّو زول بِقَدِّم الخَمر الكوَيسَه في الأوَّل، و لَمّا النّاس شِرِبو كَتير، بَعدين يَقَدِّم الما كوَيسَه. لَكِن إنتَ عَمَلتَ بِالعَكس. خَلّيت الخَمر الكوَيسَه لِغايَة هَسَّع.“ و دي كانَت أوَّل العَلامات العَمَلا يَسُوع في قانا الجَّليل. و بِيَّن مَجدو. و تَلاميذو آمَنو بيهو. و بَعَد كِدا، نَزَل لِكَفْرَنَاحُوم، هو، و أُمّو، و أخوانو، و تَلاميذو. و قَعَدو هِناك أيام قَليلَه. و عيد الفِصَح بِتاع اليَهود كان قَريب. و يَسُوع طَلَع لِأُورُشَلِيم. و لِقى في الهيكَل، ناس قاعِدين، هُم الكانو بِبيعو بَقَر و غَنَم و حَمام، و البِغَيِّرو القُروش. و عَمَل صوت مِن حَبل، و طَرَد الكُل، يَعني الغَنَم و البَقَر مِن الهيكَل. و كَبَّ القُروش بِتاعَت البِغَيِّرو القُروش. و قَلَب الطَّرَبيزات بِتاعَتُم. و قال لِلنّاس البِبيعو الحَمام: ”شيلو ديل مِن هِنا. ما تَخَلّو بيت أبوي يَبقى بيت تِجارَه.“ و تَلاميذو إتزَكَّرو إنّو مَكتوب: ”مَحَبَّه حارَّه لِبيتَك أكَلَتني.“ و اليَهود قالو ليهو: ”العَلامَه شِنو التَّوَرّينا إنتَ عِندَك سُلطَه عَشان تَسَوّي كِدا؟“ يَسُوع رَدَّ و قال ليهُم: ”كَسِّرو الهيكَل دا، و أنا أبنيهو في تَلاتَة أيام.“ و اليَهود قالو: ”الهيكَل دا كان مَبني في سِتَّه و أربَعين سَنَه، و إنتَ بِتَبنيهو في تَلاتَة أيام؟“ لَكِن هو كان بِتكَلَّم عَن هيكَل جِسمو. و عَشان كِدا، لَمّا يَسُوع قام مِن بين المَيِّتين، تَلاميذو إتزَكَّرو إنّو قال ليهُم كِدا. و آمَنو بِالكِتاب و بِالكَلام القالو ليهُم يَسُوع. و لَمّا كان في أُورُشَلِيم في عيد الفِصَح، ناس كُتار آمَنو بيهو لَمّا شافو العَلامات العَمَلا. لَكِن يَسُوع ما سَلّم نَفسو ليهُم، عَشان هو كان بِيَعرِف كُل النّاس، و عَشان هو ما كان مُحتاج لِأي زول يَشهَد عَنّو. عَشان هو نَفسو عِرِف الجّوَّه الإنسان. كان في راجِل مِن الفَرِّيسِيِّين إسمو نِقُدِموس، رَئيس لِليَهود. هو جا لِيَسُوع في اللّيل، و قال ليهو: ”نِحنا عارفين إنَّك جيت مُعَلِّم مِن الله. عَشان ما في واحِد يَقدَر يَعمِل العَلامات الأنتَ بِتَعمِلا، إذا الله ما مَعاهو.“ يَسُوع رَدَّ و قال ليهو: ”الحَق الحَق أقول ليك، إن كان واحِد ما يِتوَلَد مِن فوق، هو ما بِقدَر يَشوف مَلَكوت الله.“ نِقُدِموس قال ليهو: ”كيف الإنسان يَقدَر يِتوَلَد و هو راجِل عَجوز؟ هو بِقدَر يَدخُل بَطن أُمّو مَرَّه تانيَه و يِتوَلَد؟“ يَسُوع قال ليهو: ”الحَق الحَق أقول ليك، إذا كان واحِد ما بِتوَلَد مِن المويَه و الرّوح، هو ما بِقدَر يَدخُل مَلَكوت الله. المَولود مِن الجِّسم، هو جِسم. و المَولود مِن الرّوح، هو روح. ما تِستَغرَبو عَشان قُلتَ ليك: ’لازِم تِتوَلَد مِن فوق.‘ الريح تَحِب لِلمَكان العاوِزا، و تَسمَع صوتا. لَكِنَّك ما بِتَعرِف مِن وين بِتَجي، ولّا لِوين بِتَمشي. و البِتوَلَد مِن الرّوح، هو كِدا.“ نِقُدِموس رَدَّ و قال ليهو: ”كيف دا يَقدَر يَكون كِدا؟“ يَسُوع رَدَّ و قال ليهو: ”إنتَ مُعَلِّم إِسْرَائِيل، و ما بِتَعرِف دا؟ الحَق الحَق أقول ليك، نِحنا بِنِتكَلَّم بِالشّي النَعرِفو، و نَشهَد بِالشّي النَشوفو. و إنتو ما بِتَقبَلو شَهادَتنا. إذا كان قُلتَ ليكُم الحاجات بِتاعَت الأرض و ما بِتآمِنو، كيفِن تَآمِنو إذا أقول ليكُم الحاجات بِتاعَت السَّما؟ ما في واحِد طَلَع لِلسَّما إلّا هو النَّزَل مِن السَّما، يَعني إبن الإنسان الفي السَّما. و زي ما مُوسَى رَفَع الدَّبيب في الخَلا، كَمان لازِم يَرفَعو إبن الإنسان. عَشان كُل البِآمِن بيهو ما يَهلِك، لَكِن تَكون ليهو الحَياة الأبَديَّه. عَشان الله حَبَّه الدُّنيا، حَتّى أدّا إبنو الوَحَيد، عَشان كُلّو واحِد البِآمِن بيهو ما يَهلِك، لَكِن تَكون ليهو الحَياة الأبَديَّه. عَشان الله ما رَسَّل إبنو لِلدُّنيا عَشان يَدين الدُّنيا، لَكِن رَسَّلو عَشان يَخَلِّص الدُّنيا بيهو. الإنسان البِآمِن بيهو، الله ما يَدينو. و الإنسان الما بِآمِنو بيهو، هو مَديون عَليهو مِن قُبّال، عَشان هو ما آمَن بِإسم إبن الله. و دي هي الدّينونَه: إن النّور جا لِلدُّنيا، و النّاس حَبّو الضُّلُمَّه أكتَر مِن النّور، عَشان أعمالُم كانَت شَرّيرَه. عَشان كُلّو واحِد البيَعمِل الحاجات الشَّرّيرَه، يَكرَه النّور، و ما يَجي لِلنّور، عَشان أعمالو ما يِتوَبَّخو. لَكِن البِسَوّي الحَق يَجي لِلنّور، عَشان أعمالو يَظهَرو إنَّها مَعمولَه بِالله.“ و بَعدين يَسُوع و تَلاميذو جو لِأرض اليَهُودِيَّه. و قَعَد مَعاهُم هِناك، و كان بِعَمِّد. و يُوحَنَّا كَمان كان بِعَمِّد في عينوم قَريب مِن ساليم، عَشان مويَه كَتيرَه كانَت هِناك. و ناس كانو يَجو و يِتعَمَّدو. عَشان لِسَّع ما كانو خَتّو يُوحَنَّا في السِّجِن في الوَكِت دا. و كان في سؤَال بين تَلاميذ يُوحَنَّا و واحِد يَهودي، عَن الغَسيل. و هُم جو لِيُوحَنَّا و قالو ليهو: ”يا مُعَلِّم، الرّاجِل الكان مَعاك في غادي الأُرْدُنّ الأنتَ شِهِدتَ ليهو، هو كَمان بِعَمِّد، و كُل النّاس بِمشو ليهو.“ يُوحَنَّا رَدَّ و قال ليهُم: ”ما في إنسان ياخُد حاجَه، إذا الله ما أدّاها ليهو مِن السَّما. إنتو زاتكُم تَشهَدو لَي، إنّي قُلتَ ليكُم: أنا ما المَسيح، لَكِن أنا مَرَسَّل قِدّامو. و العِندو العَروسَه، هو العَريس. لَكِن صاحِب العَريس الواقِف و يَسمَع صوت العَريس، هو بِكون مَبسوط، عَشان بِسمَع صوت العَريس. عَشان كِدا، فَرَحي دا هَسَّع بِقى كامِل. هو لازِم يَكون أكبَر، و أنا لازِم أكون أصغَر.“ البِجي مِن فوق، هو فوق الكُل. و المِن الأرض، هو بِتاع الأرض، و مِن الأرض بِتكَلَّم. و الجّاي مِن السَّما، هو فوق الكُل. و هو يَشهَد بِالشّافو و السِّمِعو. و ما في زول بِقبَل شَهادَتو. و اليَقبَل شَهادَتو خَتَّ خِتمو إن الله أمين. و الرَّسَّلو الله، دا هو اليتكَلَّم بِكَلام الله. عَشان الله ما بِدّي الرّوح بالميزان. الأبو بِحِب الإبن. و خَتَّ كُلّو شي تِحِت سُلطتو. هو البِآمِنو بِالإبن، ليهو الحَياة الأبَديَّه. و هو الما بِآمِنو بِالإبن، ما بِشوف الحَياة، لَكِن غَضَب الله يَبقى عَليهو. و لَمّا الرَّب عِرِف الفَرِّيسِيِّين سِمِعو أن يَسُوع بِسَوّي و بِعَمِّد تَلاميذ أكتَر مِن يُوحَنَّا، مَعَ إنّو يَسُوع نَفسو ما كان بِعَمِّد، لَكِن تَلاميذو، هو خَلّى اليَهُودِيَّه، و مَشى كَمان لِلجَّليل. و كان لازِم يَدخُل في السَّامِرَه. و وَصَل لِمَدينَه مِن السَّامِرَه إسِما سوخار، جَمب الزِّراعَه الأدّاها يَعْقُوب لِوَلَدو يُوسِف. و بير يَعْقُوب كانَت هِناك. و لَمّا يَسُوع كان تَعبان مِن السَّفَر، قَعَد جَمب البير. و كان السّاعَه إتناشَر تَقريباً. و مَرَه مِن السَّامِرَه جات عَشان تَشيل مويَه. و يَسُوع قال ليها: ”أدّيني مويَه عَشان أشرَب.“ عَشان التَّلاميذ كانو مَشو لِلمَدينَه يَشتَرو أكِل. و المَرَه السّامِريَّه قالَت ليهو: ”كيف تَطلُب مِنّي عَشان تَشرَب، و إنتَ يَهودي و أنا مَرَه سامِريَّه؟“ عَشان اليَهود ما كانو يَجتَمِعو مَعَ السّامِرِيّين. يَسُوع قال ليها: ”إنتي إذا كُنتي تَعرِفي هَديَّة الله، و مِنو هو البقول ليكي: أدّيني عَشان أشرَب، كُنتي طَلَبتي مِنّو، و هو كان أدّاك مويَه حَيَّه.“ و المَرَه قالَت ليهو: ”يا سَيِّد، ما عِندَك جَردَل، و البير غَريقَه. مِن وين عِندَك المويَه الحَيَّه؟ إنتَ أكبَر مِن أبونا يَعْقُوب الأدّانا البير دي، و شِرِب مِنَّها، هو و أولادو، و البَهايِم بِتاعتو؟“ يَسُوع رَدَّ و قال ليها: ”كُل البِشرَب مِن المويَه دي بِيَعطَش تاني. لَكِن البِشرَب مِن المويَه الأنا أدِيها ليهو، ما بِيَعطَش تاني أبَداً. عَشان المويَه الأنا بَدّيها ليهو، بَتَبقى فيهو عين مويَه يَطلَع لِلحَياة الأبَديَّه.“ المَرَه قالَت ليهو: ”يا سَيِّد، أدّيني المويَه دي، عَشان ما بَعطَش، و ما بَجي بَشيل مويَه مِن هِنا.“ يَسُوع قال ليها: ”أمشي و نادي راجلِك، و تَعالي هِنا.“ المَرَه قالَت ليهو: ”ما عِندي راجِل.“ يَسُوع قال ليها: ”بِالحَق، قُلتي، ما عِندي راجِل. عَشان كان عِندِك خَمسَه رُجال، و الرّاجِل المَعاكي هَسَّع، ما راجلِك. في دا قُلتي الحَق.“ المَرَه قالَت ليهو: ”يا سَيِّد، أنا شايِفَه إنَّك نَبي. أبَهاتنا عَبَدو في الجَّبَل دا، و إنتو تَقولو إنّو في أُورُشَلِيم المَحَل اللازِم يَعبُدو فيهو.“ يَسُوع قال ليها: ”يا سِت، صَدِقيني، تَجي السّاعَه، الما في الجَّبَل دا ولّا في أُورُشَلِيم يَعبُدو الأبو. إنتو بِتَعبُدو الما بِتَعرِفوهو. نِحنا نَعبُد البِنَعرِفو، عَشان الخَلاص مِن اليَهود. لَكِن السّاعَه تَجي و هي هَسَّع، لَمّا العابِدين بِالحَق يَعبُدو الأبو بِالرّوح و الحَق. عَشان الأبو بِطلُب زي ديل عَشان يَعبُدوهو. الله هو روح، و اليَعبُدوهو لازِم يَعبُدوهو بِالرّوح و الحَق.“ المَرَه قالَت ليهو: ”أنا عارفَه إنّو مَسيّا جاي، هو البِسَمّوهو المَسيح. و لَمّا بِجي، بِوَرّينا كُلّو شي.“ يَسُوع قال ليها: ”أنا البَتكَلَّم مَعاكي هو.“ و في الوَكِت دا، تَلاميذو جو. و كانو بِستَغرَبو إنّو بِتكَلَّم مَعَ مَرَه. لَكِن ولّا واحِد مِنَّهُم قال: ”إنتَ داير شِنو؟“ ولّا: ”لِشِنو إنتَ تِتكَلَّم مَعَ المَرَه دي؟“ و مَرَه خَلَّت بُرمَة المويَه حَقَّتا، و مَشَت لِلمَدينَه، و قالَت لِلنّاس، ”تَعالو، شوفو زول قال لَي كُل العَمَلتو مُدَّة حَياتي. يِمكِن دا يَكون المَسيح؟“ و طَلَعو مِن المَدينَه، و جو ليهو. و في الوَكِت دا، التَّلاميذ قالو ليهو: ”يا مُعَلِّم، قوم، أُكُل.“ و قال ليهُم: ”أنا عِندي أكل عَشان آكلو، و إنتو ما بِتَعرِفوهو.“ و التَّلاميذ قالو بَعضَهُم لِبَعض: ”يِمكِن زول جاب ليهو شي عَشان ياكلو.“ يَسُوع قال ليهُم: ”الأكل بِتاعي هو أن أعمِل إرادَة الرَّسَّلني، و أكَمِّل عَمَلو. إنتو تَقولو: بَعَد أربَعَه شُهور، الحَصاد يَجي. لَكِن أنا بَقول ليكُم: أرفَعو عُيونكُم، و شوفو الزِّراعات جاهزَه عَشان يَلِمّوها. و البِلِم الدُّرَه ياخُد أُجرَتو، و يَلِم دُرَه لِلحَياة الأبَديَّه. عَشان كِدا، المُزارِع و البِلِم الدُّرَه يَفرَحو سَوا. عَشان كِدا، الكَلام البقول: واحِد يَزرَع، و تاني يَلِم، هو الحَق. أنا رَسَّلتَكُم عَشان تَلِمّو الما تِعِبتو فيهو. ناس تانيين تِعِبو، و إنتو دَخَلتو في تَعبُم.“ و سامِرِيّين كَتيرين مِن المَدينَه دي آمَنو بيهو بِسَبَب كَلام المَرَه الكانَت بِتَشهَد: ”هو قال لَي كُل العَمَلتو.“ و ناس السَّامِرَه، لَمّا جو ليهو، سألوهو عَشان يَقعُد مَعاهُم. و قَعَد هِناك يومين. و ناس كُتار خالِص آمَنو بيهو بِسَبَب كَلامو. و قالو لِلمَرَه: ”بَعَد دا نِحنا ما آمَنّا عَلَشان الكَلام بِتاعِك بَس، لَكِن عَشان نِحنا بِزاتنا سِمِعنا، و عِرِفنا إنّو دا هو بِالحَقيقَه المَسيح، مُخَلِّص الدُّنيا.“ و بَعَد اليومين، مَرَق مِن هِناك، و مَشى لِلجَّليل. عَشان يَسُوع نَفسو شِهِد إنّو نَبي ما عِندو إحتِرام في وَطَنو. و لَمّا وِصِل لِلجَّليل، ناس الجَّليل قِبلوهو، عَشان هُم كانو شافو كُل العَمَلو في أُورُشَلِيم في العيد. عَشان هُم كَمان مَشو لِلعيد. عَشان كِدا، يَسُوع جا مَرَّه تانيَه لِقانا الجَّليل، المَكان الغَيَّر فيهو المويَه لِلخَمر. و كان في موَظَّف المَلِك، في كَفْرَنَاحُوم. و وَلَدو كان عَيّان. و لَمّا سِمِع يَسُوع جا مِن اليَهُودِيَّه لِلجَّليل، هو مَشى ليهو، و سَألو أن يَنزِل و يَشفي وَلَدو الكان قَريب مِن الموت. و يَسُوع قال ليهو: ”إنتو ما بِتآمِنو أبَداً إذا ما تَشوفو عَلامات و عَجايِب.“ و موَظَّف المَلِك قال ليهو: ”يا سَيِّد، أنزِل قُبّال ما وَلَدي يَموت.“ يَسُوع قال ليهو: ”أمشي. وَلَدَك حَي.“ و الرّاجِل آمَن بِالكِلمَه القالا ليهو يَسُوع، و مَشى. و لَمّا كان نازِل، خَدّامينو قابَلوهو و كَلَّموهو: ”وَلَدَك حَي.“ و سألُم عَن السّاعَه الوَلَد إبتَدا يَكون أحسَن. و قالو ليهو: ”أُمبارِح في السّاعَه واحدَه، الحُمَّه خَلَّتو.“ و الأبو عِرِف دا حَصَل في نَفس السّاعَه الفيها يَسُوع قال ليهو: ”وَلَدَك حَي.“ و هو آمَن، و كُلّو أهل بيتو. و دي كَمان العَلامَه التّانيَه العَمَلا يَسُوع، لَمّا جا مِن اليَهُودِيَّه لِلجَّليل. و بَعَد كِدا، كان في عيد اليَهود، و يَسُوع طَلَع لِأُورُشَلِيم. و كانَت في أُورُشَلِيم جَمب باب الخِرفان، بِركَة مويَه إسِما بِلُغَة اليَهود، بيت حَسدا، ليها خَمسَه بَراندات. و عَيّانين كُتار كانو راقِدين فيها، مِنَّهُم عَميانين و عُرج و مَفلوجين، كُلَّهُم مُنتَظِرين المويَه تِتحَرَّك. و كان في هِناك راجِل عَيّان مُدَّة تَمانيَه و تَلاتين سَنَه. و لَمّا يَسُوع شافو، و عِرِف إنّو راقِد هِناك مُدَّه طَويلَه، قال ليهو: ”إنتَ عاوِز الشِّفا؟“ الرّاجِل العَيّان رَدَّ و قال ليهو: ”يا سَيِّد، ما عِندي زول يَنَزِّلني في البِركَه لَمّا المويَه تِتحَرَّك. و لَمّا أجَرِّب أدخُل، واحِد تاني يَنزِل قُبّالي.“ يَسُوع قال ليهو: ”قوم، شيل بِرشَك، و أمشي.“ و طَوّالي، الرّاجِل بِقى طَيب، و شال بِرشو، و مَشى. و كان اليوم داك يوم السَّبِت. عَشان كِدا، اليَهود قالو لِلزّول البِقي طَيب: ”اليوم هو السَّبِت، و ما بِالقانون ليك تَشيل بِرشَك.“ و قال ليهُم: ”الرّاجِل الشَّفاني، هو قال لَي: شيل بِرشَك و أمشي.“ و سألوهو: ”مِنو هو القال ليك: شيل بِرشَك و أمشي؟“ لَكِن الرّاجِل البِقي طَيب ما كان بِيَعرِف هو مِنو، عَشان يَسُوع دَسَّ نَفسو عَشان كان في جَمَع في المَحَل دا. و بَعَد كِدا، يَسُوع لِقاهو في الهيكَل. و قال ليهو: ”شوف، إنتَ بِقيت طَيب. ما تَعمِل خَطيَّه تاني مَرَّه، عَشان شي أكعَب ما يَحصَل ليك.“ و الرّاجِل مَرَق و قال لِليَهود إنّو يَسُوع هو الشَّفاهو. عَشان كِدا، اليَهود كانو بِطرُدو يَسُوع، و عاوِزين يَكتُلوهو، عَشان هو عَمَل كِدا في السَّبِت. لَكِن يَسُوع رَدَّ و قال ليهُم: ”أبوي دايماً بيَعمِل، و أنا بَعمِل كَمان.“ عَلَشان كِدا، اليَهود كانو دايرين يَكتُلوهو بِأي طَرِيقَه، مُش بَس عَشان هو خالَف السَّبِت، و لَكِن عَشان هو قال كَمان إن الله أبوهو. و كِدا عَمَل نَفسو واحِد مَعَ الله. و يَسُوع قال ليهُم: ”الحَق الحَق أقول ليكُم، الإبن ما بِقدَر يَعمِل حاجَه مِن نَفسو، لَكِن بَس الهو بِشوف الأبو بيَعمِل. عَشان أي شي الأبو بيَعمِل، الإبن بيَعمِلو كَمان. عَشان الأبو بِحِب الإبن، و يَوَرّيهو كُلّو شي الهو يَعمِلو. و ماشي يَوَرّيهو عَجايِب أكبَر مِن دي، عَشان إنتو تِستَغرَبو. زي ما الأبو يَقَوِّم المَيِّتين و يَدّيهو الحَياة، كَمان الإبن يَدّي ليهُم الحَياة زي ما هو عاوِز. عَشان الأبو ما بِحكُم أي واحِد لَكِن أدّا كُل الحُكم لِلإبن، عَشان كُل النّاس يَحتَرِمو الإبن، زي ما هُم يَحتَرِمو الأبو. الما يَحتَرِم الإبن، ما يَحتَرِم الأبو الرَّسَّلو. الحَق الحَق أقول ليكُم، البِسمَع كَلامي و بِآمِن بِالرَّسَّلني، تَكون ليهو الحَياة الأبَديَّه، و ما بِجي لِلحُكم، عَشان هو مَرَق مِن الموت لِلحَياة. الحَق الحَق أقول ليكُم، السّاعَه بِتَجي، و هي هَسَّع، لَمّا المَيِّتين بِسمَعو صوت إبن الله، و البِسمَعو يَعِيشو. عَشان زي ما الأبو عِندو حَياة في نَفسو، هو كَمان أدّا لِلإبن عَشان تَكون ليهو الحَياة في نَفسو. و أدّاهو سُلطَه أن يَحكُم كَمان، عَشان هو إبن الإنسان. ما تِستَغرَبو مِن دا، عَشان ساعَه بِتَجي لَمّا كُل النّاس الفي القُبور بِيَسمَعو صوتو، و يَطلَعو، العَمَلو حاجات كوَيسَه لِقيامَة الحَياة، و العَمَلو حاجات بَطّالَه لِقيامَة الدّينونَه. أنا ما بَقدَر أعمِل شي مِن نَفسي. زي ما أسمَع، أنا أحكُم. و حُكمي عَديل، عَشان أنا ما بَطلُب إرادَتي، لَكِن إرادَة الرَّسَّلني. إذا بَشهَد لِنَفسي، شَهادَتي مُش الحَق. في واحِد تاني يَشهَد لَي. و أنا عارِف شَهادَتو الهو بِشهَدا لَي هي حَق. إنتو رَسَّلتو لِيُوحَنَّا، و هو شِهِد لِلحَق. و أنا ما بَقبَل شَهادَه مِن إنسان، و لَكِن أقول كِدا عَشان إنتو تَخلَصو. يُوحَنَّا كان اللَّمبَه المِوَلِّعَه البِتَدّي نور. و إنتو كُنتو رَضيانين تَفرَحو بِنورو لِوَكِت قَليل. لَكِن أنا عِندي شَهادَه أكبَر مِن شَهادَة يُوحَنَّا. عَشان الأعمال الأبو أدّاها لَي عَشان أتِمّا، الأعمال دي زاتا الأنا بَعمِل، هي تَوَرّي إنّو الأبو رَسَّلني. و الأبو نَفسو الرَّسَّلني يَشهَد لَي، و إنتو ما سِمِعتو صوتو أبَداً، و ما شُفتو شَكلو. و كلمَتو ما ساكنَه فيكُم، عَشان إنتو ما بِتآمِنو بيهو الرَّسَّلو. إنتو تَفَتِّشو الكُتُب، عَشان إنتو تَفتَكِرو عِندَكُم فيهُم الحَياة الأبَديَّه. و هُم البِشهَدو لَي. و إنتو ما عاوِزين تَجو لَي عَشان تَكون ليكُم الحَياة. أنا ما بَقبَل مَجد مِن النّاس. لَكِن أنا عِرِفتَ إنتو ما عِندَكُم مَحَبَّة الله في قُلوبكُم. أنا جيت بِإسم أبوي، و إنتو ما بِتَقبَلوني. إذا واحِد تاني يَجيكُم بِإسم نَفسو، بِتَقبَلوهو. كيف تَقدَرو تَآمِنو و إنتو تَقبَلو مَجد، واحِد مِن التّاني، و لَكِن ما بِتفَتِّشو عَلى المَجد المِن الله الوَحيد. ما تَفتَكِرو أنا بَشتَكي عَليكُم للأبو. في واحِد البِشتَكي عَليكُم، و هو مُوسَى، الفيهو رَجاكُم. عَشان إذا كُنتو بِتصَدِّقو مُوسَى، كُنتو تَصَدِّقوني، عَشان هو كَتَب عَنّي. لَكِن إذا كُنتو ما بِتصَدِّقو كُتُب مُوسَى، كيف تَصَدِّقو كَلامي؟“ بَعَد كِدا، يَسُوع مَشى لِلجَّمب التّاني لِبَحَر الجَّليل، الهو بَحَر تَبَريَّه. و ناس كُتار تِبِعوهو، عَشان شافو عَلامات الكان بيَعمِلا لِلعَيّانين. و يَسُوع طَلَع فوق الجَّبَل، و قَعَد هِناك مَعَ تَلاميذو. و في الوَكِت داك، عيد اليَهود الإسمو الفِصَح كان قَريب. و يَسُوع رَفَع عُيونو، و شاف ناس كُتار جايين ليهو. و قال لِفِيلُبُّس: ”مِن وين نَشتَري أكِل عَشان النّاس ديل ياكلو؟“ هو قال كِدا عَشان يَجَرِّب فِيلُبُّس، عَشان يَسُوع عِرِف الماشي يَسَوّيهو. فِيلُبُّس قال ليهو، ”إن جِبنا عيش بِميتين جِنيه، ما بِكون كِفايَه عَشان كُلّو واحِد ياخُد حِتَّه صَغَيرَه.“ واحِد مِن تَلاميذو، و هو أنْدَرَاوُس، أخو سِمْعَان بُطْرُس، قال ليهو، ”هِنا في وَلَد عِندو خَمسَه رَغِفان شَعير، و سَمَكتين. لَكِن دا شِنو لِناس قَدُر كِدا؟“ يَسُوع قال ليهُم: ”خَلّو النّاس يَقعُدو.“ و كان في المَكان قَش كَتير، و الرُّجال قَعَدو. و عَدَدُم خَمسَة آلاف تَقريباً. و يَسُوع أخَد العيش، و شَكَر، و قَسَّم عَلى التَّلاميذ. و التَّلاميذ أدّو لِلقَاعِدين، و كَمان السَّمَكتين، زي ما كانو دايرين. و لَمّا شِبِعو، يَسُوع قال لِتَلاميذو: ”أجمَعو الحِتَت الفاضلَه عَشان ما نَضَيِّع شي.“ و عَلَشان كِدا لَمّو و مَلو إتناشَر قُفَّه مِن الكِسرَه الباقي مِن الخَمسَه رَغِفان شَعير بَعَد ما النّاس أكَلو. و لَمّا النّاس شافو العَلامَه العَمَلا يَسُوع، هُم قالو: ”صَحيح، دا هو النَّبي الجّاي لِلدُّنيا.“ لَكِن يَسُوع، عَلَشان عِرِف إنَّهُم دايرين يَجو يَمسِكوهو و يَعمِلوهو مَلِك، رَجَع تاني لِلجَّبَل بَراهو. و لَمّا كان المِسا، تَلاميذو نَزَلو لِلبَحَر. و دَخَلو المُركَب، و كانو ماشين يَقطَعو البَحَر لِكَفْرَنَاحُوم. و الواطَه بِقَت اللّيل، و يَسُوع لِسَّع ما كان جا ليهُم. و البَحَر إتحَرَّك مِن هَبوب شَديدَه. و لَمّا هُم ساقو المُركَب زي تلاتَه ولّا أربَعَه ميل، شافو يَسُوع ماشي عَلى البَحَر، و جاي قَريب لِلمُركَب. و خافو. و يَسُوع قال ليهُم: ”ما تَخافو، أنا هو.“ و كانو رَضيانين إنّو يَكون مَعاهُم في المُركَب. و طَوّالي المُركَب وِصلَت المَحَل الهُم كانو ماشين ليهو. و في اليوم التّاني، النّاس الكانو واقفين هِناك في الجَّمب التّاني لِلبَحَر، شافو إنّو مُركَب واحدَه بَس كانَت هِناك. هُم عِرفو هو ما دَخَل المُركَب مَعَ تَلاميذو، و لَكِن التَّلاميذ مَشو بَراهُم. بَعدين جو مَراكِب تانيَه مِن تَبَريَّه قَريب لِلمَكان الأكَلو فيهو الأكِل بَعَد ما الرَّب شَكَر. و لَمّا النّاس شافو إنّو يَسُوع ما في هِناك، ولّا تَلاميذو، هُم كَمان دَخَلو المَراكِب و جو لِكَفْرَنَاحُوم يَفَتِّشو عَلى يَسُوع. و لَمّا لِقوهو في الجَّمب التّاني لِلبَحَر، قالو ليهو: ”يا مُعَلِّم، إنتَ جيت هِنا مِتين؟“ يَسُوع رَدَّ عَليهُم و قال: ”الحَق الحَق أقول ليكُم، إنتو بِتَطلُبوني، ما عَشان العَلامات الشُّفتوها، لَكِن عَشان إنتو أكَلتو مِن الرَّغِفان و شَبِعتو. ما تَشتَغِلو لِلأكل البِخسَر، لَكِن لِلأكِل البِستَمِر لِلحَياة الأبَديَّه. و إبن الإنسان بِدّي ليكُم، عَشان الله الأبو ثَبَّتو.“ و قالو ليهو: ”نَسَوّي شِنو عَشان نَعمِل أعمال الله؟“ يَسُوع رَدَّ عَليهُم و قال: ”دا هو عَمَل الله، أن تَآمِنو بيهو الهو رَسَّلو.“ و قالو ليهو: ”ياتا عَلامَه تَعمِل عَشان نَشوف و نآمِن بيك؟ إنتَ بِتَعمِل شِنو؟ أبَهاتنا أكَلو مَنّا في الخَلا. زي ما هو مَكتوب: هو أدّاهُم أكل مِن السَّما، عَشان ياكلو.“ يَسُوع رَدَّ و قال ليهُم: ”الحَق الحَق أقول ليكُم، مُش مُوسَى الأدّاكُم المَنّا مِن السَّما، لَكِن أبوي يَدّيكُم العيش الحَقيقي مِن السَّما. عَشان عيش الله، هو اليَنزِل مِن السَّما، و يَدّي حَياة لِلدُّنيا.“ و قالو ليهو: ”يا سَيِّد، أدّينا العيش دا دايماً.“ و يَسُوع قال ليهُم: ”أنا هو عيش الحَياة. البِجي لَي ما بِكون جَعان، و البِآمِنو بي ما يَعطَش أبَداً. و لَكِن أنا قُلتَ ليكُم إنَّكُم شُفتوني، و لِسَّع ما بِتآمِنو. كُل الأبو يَدّيني، يَجي لَي. و البِجي لَي، ما بَطرُدو بَرَّه أبَداً. عَشان أنا نَزَلتا مِن السَّما، مُش عَشان أعمِل إرادَتي، لَكِن إرادَة الرَّسَّلني. و دي إرادَة الرَّسَّلني، إنّو كُل الأدّاني، ما أوَدِّر مِنّو شي، لَكِن بَقَوِّمو في اليوم الأخير. عَشان دي إرادَة أبوي، كُل البِشوف الإبن و بِآمِنو بيهو، تَكون ليهو الحَياة الأبَديَّه. و أنا بَقَوِّمو في اليوم الأخير.“ و اليَهود نَقنَقو عَليهو، عَشان هو قال: ”أنا هو العيش النَزَل مِن السَّما.“ و قالو: ”دا ما يَسُوع إبن يُوسِف؟ و نِحنا عارِفين أبوهو و أُمّو؟ و هَسَّع كيف يَقول: أنا نَزَلتا مِن السَّما؟“ و يَسُوع رَدَّ عَلِّهُم و قال: ”ما تَنَقنِقو في بينكُم. ما في واحِد يَقدَر يَجي لَي إلّا الأبو الرَّسَّلني يَجيبو لَي. و أنا بَقَوِّمو في اليوم الأخير. عَشان مَكتوب في الأنبياء: و الكُل بِكونو مِتعَلِّمين مِن الله. و كُل السِّمِع و إتعَلَّم مِن الأبو يَجي لَي. ما في واحِد شاف الأبو إلّا هو المِن الله. هو بَس شاف الأبو. الحَق الحَق أقول ليكُم، البِآمِن بي، تَكون ليهو الحَياة الأبَديَّه. أنا هو عيش الحَياة. أبَهاتكُم أكَلو المَنّا في الخَلا، و ماتو. و لَكِن العيش البِنزِل مِن السَّما، الإنسان ياكُل مِنّو و ما يَموت. أنا هو العيش الحَي النَزَل مِن السَّما. إذا واحِد أكَل مِن العيش دا، هو بِعِيش لِلأبَد. و العيش الأنا بَدّيهو، هو جِسمي البَدّيهو لِحَياة الدُّنيا.“ و اليَهود إتشاكَلو مَعَ بَعض، و قالو: ”كيف الرّاجِل دا يَقدَر يَدينا جِسمو عَشان ناكلو؟“ يَسُوع قال ليهُم: ”الحَق، الحَق أقول ليكُم، كان ما تاكلو جِسم إبن الإنسان، و تَشرَبو دَمّو، ما بِتكون فيكُم حَياة. كُل الياكُل جِسمي و يَشرَب دَمّي، تَكون ليهو الحَياة الأبَديَّه. و أنا بَقَوِّمو في اليوم الأخير. عَشان جِسمي أكل حَقيقي، و دَمّي شَراب حَقيقي. الياكُل جِسمي و يَشرَب دَمّي يَسكُن فِيني، و أنا فيهو. زي ما الأبو الحَي رَسَّلني، و أنا حَي بِالأبو، كُلّو واحِد الياكُلني يَعيش بي. دا هو العيش النَزَل مِن السَّما. الأبَهات أكَلو المَنّا في الخَلا و ماتو. لَكِن الياكُل مِن العيش دا، يَعيش لِلأبَد.“ يَسُوع قال الكَلام دا و هو بِعَلِّم في بيت الرَّب في كَفْرَنَاحُوم. و كَتير مِن تَلاميذو، لَمّا سِمِعو الكَلام دا قالو: ”الكَلام دا صَعب. مِنو يَقدَر يَسمَعو؟“ لَكِن يَسُوع عِرِف في نَفسو إنّو تَلاميذو بِنَقنِقو عَن دا، و قال ليهُم: ”الكَلام دا بِخَلّيكُم تَقَعو؟ كيف بِكون إذا تَشوفو إبن الإنسان يَطلَع لِلمَكان الكان فيهو في الأوَّل؟ الرّوح هو البِدّي حَياة، لَكِن الجِّسم ما فيهو فايدَه. الكَلام البَقولو ليكُم هَسَّع، هو روح و حَياة. لَكِن بَعض مِنَّكُم ما بِآمِنو أبَداً.“ عَشان هو عِرِف مِن الأوَّل مِنو هُم البِآمِنو، و مِنو الماشي يَنكِرو. و هو قال: ”عَشان كِدا، أنا قُلتَ ليكُم: ما في واحِد يَقدَر يَجي لَي إلّا إذا أبوي أدّاهو.“ بَعَد كِدا، كُتار مِن تَلاميذو خَلّوهو، و ما تِبِعوهو تاني. يَسُوع قال لِلإتناشَر: ”إنتو كَمان عاوِزين تَخَلّوني؟“ سِمْعَان بُطْرُس رَدَّ و قال ليهو: ”يا سَيِّد، نِحنا نَمشي لِمِنو؟ إنتَ عِندَك كَلام الحَياة الأبَديَّه. و نِحنا آمَنّا، و إتأكَّدنا إنتَ قُدّوس الله.“ يَسُوع قال ليهُم: ”أنا ما إختِرتَكُم الإتناشَر؟ و واحِد مِنَّكُم شيطان.“ و هو كان بِتكَلَّم عَن يَهُوذَا إبن سِمْعَان الإِسْخَرْيُوطِي، عَشان هو كان واحِد مِن الإتناشَر، و كان ماشي يَسَلِّمو. بَعَد كِدا، يَسُوع كان يَمشي في الجَّليل. عَشان هو ما كان داير يَمشي في اليَهُودِيَّه، عَشان اليَهود كانو عاوزين يَكتُلوهو. و عيد الخيام بِتاع اليَهود كان قَريب. عَشان كِدا، أخوانو قالو ليهو: ”خَلّي المَحَل دا و أمشي لِليَهُودِيَّه عَشان تَلاميذَك يَشوفو أعمالَك البِتَعمِلا. عَشان ما في زول يَعمِل حاجَه في السِّر، و هو عاوِز يَبَيِّن شُغلو. إن كُنتَ تَعمِل الحاجات دي، وَرّي نَفسَك لِلدُّنيا.“ عَشان أخوانو كَمان ما كانو بِآمِنو بيهو. يَسُوع قال ليهُم: ”وَكتي لِسَّع ما جا، لَكِن الوَكِت بِتاعكُم دايماً حاضِر. ناس الدُّنيا ما بِقدَرو يَكرَهوكُم، لَكِن يَكرَهوني أنا، عَشان أنا بَشهَد عَليهُم إنّو أعمالُم بَطّالَه. أمشو إنتو لِلعيد. أنا ما ماشي لِلعيد دا، عَشان وَكتي لِسَّع ما جا بِالتَّمام.“ و لَمّا قال كِدا، هو قَعَد في الجَّليل. لَكِن بَعَد ما أخوانو طَلَعو لِلعيد، هو كَمان طَلَع، لَكِن ما قِدّام النّاس لَكِن زي في السِّر. و اليَهود كانو بِفَتِّشو عَليهو في العيد، و يَقولو: ”هو وين؟“ و كان في كَلام كَتير مِن النّاس مِن جِهَتو. بَعَض مِنَّهُم قالو: ”هو راجِل صالِح،“ و ناس تانيين قالو: ”لا، هو بِغِش النّاس.“ لَكِن، ما في واحِد كان بِتكَلَّم عَنّو قِدّام النّاس بِسَبَب الخوف مِن اليَهود. و في وَسط العيد، يَسُوع طَلَع لِلهيكَل و بَدا يَعَلِّم. و اليَهود كانو بِستَغرَبو مِنّو، و قالو: ”مِن وين يَعرِف الكُتُب و هو ما إتعَلَّم؟“ يَسُوع قال ليهُم: ”التَّعليم بِتاعي ما حَقّي، لَكِن حَق الرَّسَّلني. إذا واحِد رَضيان يَعمِل إرادَة الله، هو ماشي يَعرِف التَّعليم دا، إذا هو مِن الله، ولّا أنا بَتكَلَّم بيهو مِن نَفسي. البِتكَلَّم مِن نَفسو بِطلُب مَجد نَفسو. لَكِن البِطلُب المَجد حَق الرَّسَّلو، هو أمين، و ما فيهو غِش. مُوسَى ما أدّاكُم القانون؟ و ما في واحِد مِنَّكُم يَحفَظ القانون. لِشِنو عاوِزين تَكتُلوني؟“ النّاس رَدّو عَليهو: ”إنتَ عِندَك شيطان. مِنو عاوِز يَكتُلَك؟“ يَسُوع قال ليهُم: ”أنا عَمَلتَ عَمَل واحِد، و كُلُّكُم بِتِستَغرَبو. عَلَشان دا، مُوسَى أدّاكُم الطَّهور، و دا ما مِن مُوسَى، لَكِن مِن الأبَهات. و في السَّبِت إنتو تَطَهِّرو إنسان. إذا زول يَقبَل الطَّهور في يوم السَّبِت عَشان قانون مُوسَى ما بِتكَسَّر، لِشِنو إنتو زَعلانين مِنّي عَشان أنا شَفيت الزّول كُلّو في السَّبِت؟ ما تَحكُمو زي ما تَشوفو مِن بَرَّه، لَكِن أحكُمو حُكم عادِل.“ بَعدين، بَعض النّاس مِن أُورُشَلِيم قالو: ”دا ما هو الهُم عاوِزين يَكتُلوهو؟ و شوفو هو بِتكَلَّم قِدّام النّاس، و ما في واحِد يَقول ليهو شي. السَّلاطين عِرفو تَمام إنّو دا هو المَسيح نَفسو؟ الرّاجِل دا، نِحنا عارِفينو مِن وين. لَكِن المَسيح لَمّا يَجي، ما في زول بِيَعرِف هو يَجي مِن وين.“ لَمّا يَسُوع كان قاعِد بِعَلِّم في الهيكَل، هو نادى و قال: ”إنتو كُلُّكُم تَعرِفوني، و تَعرِفو مِن وين أنا جيت. أنا ما جيت مِن نَفسي. لَكِن الرَّسَّلني هو حَق، و إنتو ما بِتَعرِفوهو. أنا بَعرِفو، عَشان أنا جيت مِنّو، و هو رَسَّلني.“ عَشان كِدا، هُم جَرَّبو يَقبُضو عَليهو، لَكِن ما في زول قِدِر يَخُت إيدو عَليهو، عَشان ساعتو لِسَّع ما جات. عَلى كِدا، كَتير مِن النّاس آمَنو بيهو، و قالو: ”لَمّا المَسيح يَجي، هو ماشي يَعمِل أعمال أكتَر مِن الأعمال الرّاجِل دا عَمَلا؟“ و الفَرّيسيّين سِمِعو أن النّاس يِتكَلَّمو عَنّو، و القُسُس الكُبار و الفَرّيسيّين رَسَّلو حُرّاس عَشان يَمسِكوهو. و يَسُوع قال ليهُم: ”أنا مَعاكُم مُدَّه قِصَيرَه، و بَعدين أمشي ليهو الرَّسَّلني. إنتو بِتفَتِّشو عَلي، و ما ماشين تَلقوني. و لِلمَحَل الأنا أكون فيهو، إنتو ما بِتَقدَرو تَجو.“ اليَهود قالو الواحِد لِلتاني: ”الرّاجِل دا عاوِز يَمشي وين حَتّى نِحنا ما ماشين نَلقاهو؟ هو عاوِز يَمشي لِشَعبنا السّاكنين في اليونان و يَعَلِّم اليونانيين؟ و مَعنى الكَلام دا شِنو؟ القالو: إنتو ماشين تَفَتِّشو عَلي، و ما بِتَلقوني، و: لِلمَحَل الأنا بَكون فيهو، إنتو ما بِتَقدَرو تَجو.“ و في اليوم الأخير الكَبير مِن العيد، يَسُوع وَقَف و نادى و قال: ”إذا أي واحِد عَطَش، خَليهو يَجي لَي و يَشرَب. البِآمِن بي زي ما قال الكِتاب، بَحَر مويَه حَيَّه يَجري مِن بَطنو،“ و هو قال دا عَن الرّوح، لِديل الآمَنو بيهو و الماشين يَقبَلوهو. عَشان الرّوح لِسَّع ما جا، عَشان يَسُوع لِسَّع ما كان إتمَجَّد. لَمّا بَعض مِن النّاس سِمِعو الكَلام دا، قالو: ”دا بِالحَقيقَه هو النَّبي.“ تانيين قالو: ”دا هو المَسيح.“ لَكِن تانيين قالو: ”المَسيح بِجي مِن الجَّليل؟ الكِتاب ما قال إنّو المَسيح بِجي مِن أولاد دَاوُد؟ و بِجي مِن بيت لَحَم، المَكان السَّكَن فيهو دَاوُد؟“ عَشان كِدا، حَصَل إنقِسام في النّاس بِخُصوص يَسُوع. بَعض مِنَّهُم كانو دايرين يَمسِكوهو، لَكِن ما في واحِد خَتَّ إيدينو عَليهو. بَعدين الحُرّاس رَجَعو لِلقُسُس الكُبار و الفَرّيسيّين. و هُم سألوهُم: ”لِشِنو ما جِبتوهو؟“ الحُرّاس رَدّو عَليهُم و قالو: ”ما في واحِد إتكَلَّم زي الرّاجِل دا أبَداً.“ و الفَرّيسيّين رَدّو عَليهُم و قالو: ”و هو غَشّاكُم كَمان؟ في واحِد مِن الرّؤساء ولّا مِن الفَرِّيسِيِّين آمَن بيهو؟ لَكِن الجَّماعَه ديل الما بِيَعرِفو القانون مَلعونين.“ نِقُدِموس، الرّاجِل الجّا لِيَسُوع قُبّال، و كان واحِد مِنَّهُم، قال ليهُم، ”قانونّا يَحكُم عَلى زول قُبّال ما يَسمَع مِنّو في الأوَّل؟ و بِيَعرِف هو عَمَل شِنو؟“ و رَدّو و قالو ليهو: ”إنتَ مِن الجَّليل؟ فَتِّش، و شوف إنّو نَبي ما قام مِن الجَّليل.“ و بَعدين كُلّو واحِد مَشى لِبيتو. لَكِن يَسُوع مَشى لِجَبَل الزّيتون. و في الصَّباح بَدري، رَجَع تاني لِلهيكَل. و النّاس كُلَّهُم جو ليهو. و قَعَد و إبتَدا يَعَلِّمُم. و مُعَلِّمين القانون و الفَرّيسيّين قَدَّمو ليهو مَرَه مَسَكوها في زِنا. و لَمّا وَقَّفوها في الوَسِط، قالو ليهو: ”يا مُعَلِّم، المَرَه دي مَسَكوها و هي بِتَعمِل الزِّنا. و في القانون، مُوسَى أمَرنا نَرمي حُجار عَلى واحدَه زي دي. و إنتَ تَقول شِنو؟“ هُم قالو كِدا عَشان يَجَرِّبوهو، عَشان يَكون عِندَهُم سَبَب بِشتَكوهو بيهو. لَكِن يَسُوع دَنقَر، و كَتَب بِأصبَعو في الأرض. و لَمّا إستَمَرّو يَسألوهو، قام و قال ليهُم: ”هو الما عِندو خَطيَّه بينكُم خَليهو يَرميها بِحَجَر في الأوَّل.“ و دَنقَر تاني مَرَّه، و كَتَب بِأصبَعو في الأرض. لَكِن لَمّا سِمِعوهو، مَرَقو واحِد وَرا واحِد، و إبتَدو مِن الكُبار لِلصُّغار، لِغايَة ما خَلّو يَسُوع بَراهو، و المَرَه واقفَه قِدّامو. و لَمّا يَسُوع وَقَف، هو قال ليها: ”يا سِت، وين النّاس المُشتَكين عَليكي؟ ما في واحِد حَكَم عَليكي؟“ هي قالَت ليهو: ”ما في واحِد، يا سَيِّد.“ و يَسُوع قال ليها: ”و لا أنا بَحكُم عَليكي. أمشي، و ما تَعمِللي خَطيَّه تاني مَرَّه.“ مَرَّه تانيَه، يَسُوع إتكَلَّم مَعاهُم و قال: ”أنا هو نور الدُّنيا. البِتبَعني ما يَمشي في الضُّلُمَّه أبَداً، لَكِن يَكون ليهو نور الحَياة.“ بَعدين الفَرِّيسِيِّين قالو ليهو: ”إنتَ تَشهَد لِنَفسَك، و عَشان كِدا، الشَّهادَه بِتاعتَك ما صَحيح.“ يَسُوع رَدَّ و قال ليهُم: ”حَتّى إذا كان أنا أشهَد لِنَفسي، شَهادَتي حَق، عَشان أنا عارِف مِن وين أنا جيت، و لِوين أنا ماشي. لَكِن إنتو ما عارفين مِن وين أنا جاي، ولّا لِوين أنا ماشي. إنتو بِتَحكُمو حَسَب الجِّسم، لَكِن أنا ما بَحكُم أي واحِد. حَتّى إذا حَكَمتَ، الحُكم بِتاعي صَحيح، عَشان أنا ما أحكُم بَراي، لَكِن أنا و الأبو الرَّسَّلني. كَمان مَكتوب في القانون بِتاعكُم: ’شَهادَة إتنين رُجال، هي حَق.‘ أنا أشهَد لِنَفسي، و الأبو الرَّسَّلني يَشهَد لَي.“ و بَعدين قالو ليهو: ”وين أبوك؟“ يَسُوع قال ليهُم: ”إنتو ما بِتَعرِفوني، و ما بِتَعرِفو أبوي. إذا عِرِفتوني، كُنتو عِرِفتو أبوي كَمان.“ يَسُوع قال ليهُم الكَلام دا جَمب الخَزنَه، لَمّا كان بِعَلِّم في الهيكَل. و ما في واحِد قَبَضو، عَشان وَكتو لِسَّع ما كان جا. يَسُوع قال ليهُم تاني: ”أنا بَمشي، و إنتو بِتفَتِّشو عَلي، و تَموتو في خَطِيَّتكُم. و المَحَل الأنا ماشي ليهو، إنتو ما بِتَقدَرو تَجو ليهو.“ بَعدين اليَهود قالو: ”هو بِكتُل نَفسو؟ عَشان يَقول: المَحَل الأنا ماشي ليهو، إنتو ما بِتَقدَرو تَجو ليهو.“ قال ليهُم: ”إنتو مِن تِحِت، و أنا مِن فوق. إنتو مِن الدُّنيا دي، لَكِن أنا ما مِن الدُّنيا دي. أنا قُلتَ ليكُم إنتو ماشين تَموتو في خَطاياكُم. عَشان إنتو ما بِتآمِنو إنّي أنا هو، إنتو ماشين تَموتو في خَطاياكُم.“ قالو ليهو: ”إنتَ مِنو؟“ و يَسُوع قال ليهُم: ”أنا هو الكَلَّمتَكُم بيهو مِن الأوَّل. أنا عِندي حاجات كَتيرَه أقولا ليكُم، و أحكُم عَليكُم. لَكِن الرَّسَّلني، هو حَق، و السِّمِعتو مِنّو، دا بَقولو لِلدُّنيا.“ لَكِن هُم ما فِهمو إنّو كان بِكَلِّمُم عَن الأبو. و يَسُوع قال ليهُم: ”لَمّا تَرفَعو إبن الإنسان، في الوَكِت دا بِتَعرِفو إنّي أنا هو، و أنا ما بَعمِل حاجَه بِنَفسي. لَكِن زي ما عَلَّمني أبوي، أنا بَقول الحاجات دي. و الرَّسَّلني، هو مَعاي. هو ما بِخَلّيني بَراي، عَشان أنا دايماً بَعمِل الحاجات الهو بِكون مَبسوط مِنَّها.“ لَمّا كان بِتكَلَّم بِالكَلام دا، ناس كُتار آمَنو بيهو. و بَعدين يَسُوع قال لِليَهود الآمَنو بيهو: ”كان إنتو ثابِتين في كَلامي، بِالحَق تَكونو تَلاميذي. و بِتَعرِفو الحَق، و الحَق بِدّيكُم الحُرّيَّه.“ رَدّو و قالو ليهو: ”نِحنا أولاد إِبْرَاهِيم، و ما في زول يَعمِلنا عَبيد أبَداً. كيف إنتَ تَقول: نِحنا بِنكون حُرّين؟“ يَسُوع رَدَّ و قال ليهُم: ”الحَق الحَق أقول ليكُم، كُلّو واحِد اليَعمِل الخَطيَّه، هو عَبد لِلخَطيَّه. و العَبد ما بِستَمِر في البيت لِلأبَد. لَكِن الإبن، هو البِيَقعُد في البيت لِلأبَد. إذا الإبن أدّاكُم الحُرّيَّه، بِالحَق بِتكونو حُرّين. أنا عارِف إنتو أولاد إِبْرَاهِيم. لَكِن إنتو عاوزين تَكتُلوني، عَشان كَلامي ما عِندو مَحَل فيكُم. أنا بَتكَلَّم الشُّفتو مَعَ أبوي، و إنتو بِتَعمِلو السِّمِعتوها مِن أبوكُم.“ رَدّو و قالو ليهو: ”إِبْرَاهِيم هو أبونا.“ يَسُوع قال ليهُم: ”كان إنتو أولاد إِبْرَاهِيم، كُنتو تَعمِلو أعمال إِبْرَاهِيم. لَكِن إنتو هَسَّع دايرين تَكتُلوني، و أنا هو القال ليكُم الحَق السِّمِعتو مِن الله. و إِبْرَاهِيم ما عَمَل حاجَه زي دي. إنتو تَعمِلو أعمال أبوكُم.“ قالو ليهو: ”نِحنا ما كُنّا مَولودين مِن زِنا. عِندَنا أبو واحِد، و هو الله.“ يَسُوع قال ليهُم: ”إذا كان الله أبوكُم، كُنتو تَحِبّوني، عَشان أنا مَرَقتَ و جيت مِن الله. أنا ما جيت مِن نَفسي، لَكِن هو رَسَّلني. لِشِنو إنتو ما بِتَفهَمو كَلامي؟ عَشان إنتو ما تَقدَرو تَسمَعو كَلامي. إنتو مِن أبوكُم هو إبْلِيس، و إنتو بِتَعمِلو زي ما أبوكُم عاوِز. هو كان كَتّال النّاس مِن الأوَّل، و ما ثَبَت في الحَق، عَشان ما فيهو حَق. و لَمّا يتكَلَّم بِالكِضِب، هو بِتكَلَّم مِن عِندو، عَشان هو كَضّاب، و أبو الكِضِب. لَكِن عَلَشان أنا بَقول الحَق، إنتو ما بِتآمِنو بي. مِنو مِنَّكُم يَوَبِّخني عَلى خَطيَّه؟ و عَلَشان أقول الحَق، لِشِنو إنتو ما بِتآمِنو بي؟ هو المِن الله يَسمَع كَلام الله. عَشان كِدا، إنتو ما بِتَسمَعو، عَشان إنتو ما مِن الله.“ اليَهود رَدّو و قالو ليهو: ”نِحنا ما قُلنا الحَق لَمّا قُلنا إنتَ سامِري، و عِندَك شيطان؟“ يَسُوع رَدَّ و قال ليهُم: ”أنا ما عِندي شيطان، لَكِن أنا أحتَرِم أبوي، و إنتو ما تَحتَرِموني. أنا ما بَطلُب مَجد لِنَفسي. في واحِد البِطلُبو، و هو بِكون القاضي. الحَق الحَق أقول ليكُم، إذا كان واحِد بِحفَظ كَلامي، هو ما بِشوف الموت أبَداً.“ و اليَهود قالو ليهو: ”هَسَّع عِرِفنا عِندَك شيطان. إِبْرَاهِيم مات و الأنبياء، و إنتَ تَقول: كان واحِد يَحفَظ كَلامي، ما بِشوف الموت أبَداً. إنتَ أكبَر مِن إِبْرَاهِيم أبونا المات؟ و الأنبياء الماتو؟ إنتَ تَعمِل نَفسَك تَكون مِنو؟“ يَسُوع رَدَّ و قال ليهُم: ”إذا بَمَجِّد نَفسي، مَجدي ما ليهو فايدَه. أبوي هو البِمَجِّدني، الإنتو تَقولو هو إلَهكُم. و إنتو ما بِتَعرِفوهو، لَكِن أنا بَعرِفو. و إذا كان قُلتَ ما بَعرِفو، أكون كَضّاب زيَكُم. لَكِنّي أعرِفو و أحفَظ كلمَتو. أبوكُم إِبْرَاهِيم إنبَسَط عَشان يَشوف يومي. و هو شافو و فِرِح.“ اليَهود قالو ليهو: ”إنتَ عُمرَك لِسَّع ما خَمسين سَنَه. كيف شُفتَ إِبْرَاهِيم؟“ يَسُوع قال ليهُم: ”الحَق الحَق أقول ليكُم، قُبّال ما إِبْرَاهِيم كان في، أنا مَوجود.“ و هُم رَفَعو حُجار عَشان يَرموهو بيها. لَكِن يَسُوع دَسَّ نَفسو، و مَشى مِن الهيكَل. و لَمّا كان يَمشي، شاف راجِل عَميان مِن وِلادتو. و تَلاميذو سألوهو و قالو: ”يا مُعَلِّم، مِنو عَمَل خَطيَّه، الرّاجِل دا؟ ولّا والِديهو؟ عَلَشان هو كان مَولود عَميان.“ يَسُوع رَدَّ و قال ليهُم: ”الرّاجِل دا ما عِندو خَطيَّه، ولّا والِديهو، لَكِن عَشان أعمال الله بِظهَرو فيهو. لازِم نَعمِل أعمال الرَّسَّلني ما دام النَّهار. عَشان بِجي ليل لَمّا واحِد ما يَقدَر يَشتَغِل. و لَمّا أنا في الدُّنيا، أنا نور الدُّنيا.“ و لَمّا قال كِدا، بَزَق عَلى الأرض، و عَمَل طين مِن البُزاق، و خَتَّ الطّين فوق عُيون العَميان. و قال ليهو: ”أمشي غَسِّل في بِركَة سِلوام، المَعناها مَرَسَّل.“ بَعدين مَشى و غَسَّل، و جا، و قِدِر يَشوف. و الجّيران و النّاس الكانو بِشوفوهو مِن زَمان لَمّا هو كان عَميان، قالو: ”مُش دا الرّاجِل الكان بِيَقعُد و يَسأل حاجَه مِن النّاس؟“ و بَعض مِن النّاس قالو: ”دا هو،“ و لَكِن تانيين قالو: ”دا زيهو.“ و هو قال: ”أنا هو.“ و قالو ليهو: ”كيف عُيونَك إنفَتَحَت؟“ هو رَدَّ و قال ليهُم: ”إنسان إسمو يَسُوع عَمَل طين و مَسَح عُيوني و قال لَي: أمشي لِبِركَة سِلوام و غَسِّل. و مَشيت و غَسَّلتَ و عُيوني إنفَتَحَت.“ هُم قالو ليهو: ”هو وين؟“ قال ليهُم: ”أنا ما بَعرِف.“ و جابو لِلفَرّيسيّين الرّاجِل القُبّال كان عَميان. و كان يوم السَّبِت لَمّا يَسُوع عَمَل الطّين و فَتَح عُيون العَميان. الفَرِّيسِيِّين سألوهو كَمان: ”كيف عُيونَك إنفَتَحَت؟“ و قال ليهُم: ”هو خَتَّ طين عَلى عُيوني، و أنا غَسَّلتَ، و هَسَّع بَشوف.“ و بَعض الفَرِّيسِيِّين قالو: ”الرّاجِل دا مُش مِن الله، عَشان هو ما بِحفَظ السَّبِت.“ تانيين قالو: ”كيف راجِل خاطي يَقدَر يَعمِل زي العَلامات دي؟“ و بِقو مِنقَسِمين. قالو لِلعَميان مَرَّه تانيَه: ”و إنتَ تَقول عَنّو شِنو، عَشان فَتَح عُيونَك؟“ و قال: ”هو نَبي.“ و اليَهود ما صَدَّقو هو كان عَميان و عُيونو إنفَتَحَت، لِغايَة ما نادو والِديهو. و قالو ليهُم: ”دا هو وَلَدكُم القُلتو إنّو إتوَلَد عَميان؟ كيف هو بِشوف هَسَّع؟“ والِديهو رَدّو و قالو ليهُم: ”نِحنا عارفين دا وَلَدنا، و هو إتوَلَد عَميان. لَكِن كيف هو بِشوف هَسَّع، نِحنا ما بِنَعرِف، ولّا مِنو فَتَح عُيونو نِحنا ما بِنَعرِف. هو بِقى راجِل. أسألوهو، و هو يتكَلَّم عَن نَفسو.“ و والِديهو قالو كِدا عَشان هُم كانو خايفين مِن اليَهود، عَشان اليَهود إتَّفَقو، إنّو إذا واحِد إعتَرَف هو المَسيح، يَطرُدوهو مِن بيت الرَّب. عَشان كِدا، والِديهو قالو: ”هو بِقى راجِل. أسألوهو.“ و مَرَّه تانيَه نادو الرّاجِل الكان عَميان، و قالو ليهو: ”أَدِّي المَجد لِلَّه. نِحنا بِنَعرِف الرّاجِل دا خاطي.“ هو رَدَّ و قال ليهُم: ”إذا هو خاطي أنا ما بَعرِف، لَكِن أنا أعرِف شي واحِد. أنا كُنتَ عَميان، و هَسَّع أنا بَشوف.“ و عَلَشان كِدا قالو ليهو: ”هو عَمَل ليك شِنو؟ كيف فَتَح عُيونَك؟“ رَدَّ عَليهُم و قال: ”أنا قُلتَ ليكُم و إنتو ما سِمِعتو. لِشِنو عاوزين تَسمَعو تاني؟ إنتو دايرين تَكونو تَلاميذ ليهو؟“ و شَتَموهو و قالو: ”إنتَ تِلميذ الرّاجِل داك، لَكِن نِحنا تَلاميذ مُوسَى. نِحنا بِنَعرِف الله كَلَّم مُوسَى، لَكِن الزّول دا، نِحنا ما عارفين هو مِن وين.“ الرّاجِل رَدَّ عَليهُم و قال: ”دا عَجيب! إنتو ما عارفين هو مِن وين، و هو فَتَح عُيوني! نِحنا بِنَعرِف الله ما بِسمَع لِلخاطيين، لَكِن كان واحِد يَخاف الله و يَعمِل إرَادَتو، الله يَسمَع ليهو. مِن ما الله خَلَق الأرض، ما سِمِعنا واحِد فَتَح عُيون زول مَولود عَميان. إذا الرّاجِل دا ما كان مِن الله، ما كان قِدِر يَعمِل شي.“ رَدّو و قالو ليهو: ”إنتَ كُنتَ مَولود في الخَطايا تَمام، و إنتَ تَعَلِّمنا؟“ و طَرَدوهو بَرَّه. و يَسُوع سِمِع هُم طَرَدوهو بَرَّه. و لِقاهو و قال ليهو: ”إنتَ بِتآمِن بِإبن الله؟“ رَدَّ و قال ليهو: ”مِنو هو، يا سَيِّد، عَشان أآمِن بيهو؟“ يَسُوع قال ليهو: ”إنتَ شُفتو، و البِتكَلَّم مَعاك دا هو.“ و قال: ”بآمِن، يا سَيِّد.“ و عَبَدو. و يَسُوع قال ليهو: ”أنا جيت لِلدُّنيا دي عَشان أحكُم، حَتّى النّاس الما بِشوفو بِشوفو، و البِشوفو بِكونو عَميانين.“ و بَعض مِن الفَرِّيسِيِّين الكانو مَعاهو، سِمِعو و قالو ليهو: ”نِحنا كَمان عَميانين؟“ يَسُوع قال ليهُم: ”إذا كُنتو عَميانين، ما كانَت عِندَكُم خَطيَّه. لَكِن هَسَّع بِتقولو: نِحنا بِنشوف. خَطِيَّتكُم قاعدَه. الحَق الحَق أقول ليكُم، هو الما بِدخُل مِن الباب لِزَريبَة الخِرفان، لَكِن يَطلَع بِطَريق تاني، الإنسان دا حَرامي و سَرّاق. لَكِن الإنسان البِدخُل بِالباب، هو راعي الخِرفان. الغَفير يَفتَح ليهو الباب. و الخِرفان يَسمَعو صوتو، و هو يَنادي الخِرفان بِتوعو بِالأسامي، و يَقودُم بَرَّه. و لَمّا يَمَرِّق الخِرفان لِبَرَّه، يَمشي قِدّامُم، و الخِرفان يَتبَعوهو، عَشان هُم بِيَعرِفو صوتو. لَكِن هُم ما يَتبَعو الغَريب أبَداً، لَكِن يَهرُبو مِنّو، عَشان هُم ما بِيَعرِفو صوت الغَريبين.“ و يَسُوع قال ليهُم المَثَل دا، لَكِن هُم ما فِهمو الشّي الكان بِقولو ليهُم. عَلَشان دا، يَسُوع قال ليهُم كَمان: ”الحَق الحَق أقول ليكُم، أنا هو باب الخِرفان. كُل الجّو قُبّالي، هُم حَراميَّه و سَرّاقين. لَكِن الخِرفان ما سِمِعو ليهُم. أنا هو الباب. إن كان واحِد يَدخُل بي، هو بِكون مُخَلَّص، و بِدخُل و بِطلَع و يَلقا أكل. الحَرامي ما بِجي إلّا عَشان يَسرِق و يَكتُل و يَخرَب. لَكِن أنا جيت عَشان هُم يَلقو الحَياة، و يَلقوها بِالكامِل. أنا هو الرّاعي الصّالِح. و الرّاعي الصّالِح يَدّي حَياتو فِشان الخِرفان. و لَكِن المِأجِّر، الهو مُش الرّاعي، و الخِرفان مُش بِتوعو، لَمّا يَشوف المَرفَعين جاي، هو يَسيب الخِرفان و يَهرَب. و المَرفَعين يَمسِك الخِرفان و يَفَرتِكُم. و المِأجِّر يَهرَب، عَشان هو مِأجِّر، و ما بِخَلّي بالو للخِرفان. أنا هو الرّاعي الصّالِح. أنا بَعرِف خِرفاني، و خِرفاني بِيِعرِفوني. زي ما الأبو بِيَعرِفني، أنا بَعرِف الأبو. و أنا بَدّي حَياتي عَشان الخِرفان. و أنا عِندي خِرفان تانيين، و هُم ما مِن الزَّريبَه دي. ديل كَمان لازِم أجيبُم. و هُم بِسمَعو صوتي. و بَعدين يَكون مُراح واحِد و راعي واحِد. و عَلَشان كِدا الأبو بِحِبّني، عَشان أنا بَدّي حَياتي، و باخُدا مَرَّه تانيَه. ما في واحِد ياخُدا مِنّي، لَكِن أنا بَدّيها مِن نَفسي. عِندي سُلطَه لِأدِيها، و عِندي سُلطَه باخُدا كَمان. أنا قِبِلتَ الأمر دا مِن أبوي.“ و اليَهود إنقَسَمو تاني مَرَّه، بِسَبَب الكَلام دا. و كُتار مِنَّهُم قالو: ”هو عِندو شيطان، و هو مَجنون. عَشان شِنو بِتَسمَعو ليهو؟“ تانيين قالو: ”دا ما كَلام إنسان عِندو شيطان. الشّيطان يَقدَر يَفتَح عُيون العَميان؟“ و كان عيد التَجديد في أُورُشَلِيم. و كان الوَكِت شِتا. و يَسُوع كان بِمشي في الهيكَل في بَراندات سُلَيْمَان. و بَعدين، اليَهود إتلَمّو حَوَليهو و قالو ليهو: ”تَخَلّينا نِستَنّا لِمِتين؟ إذا إنتَ المَسيح، قول لينا بِكَلام مَفهوم.“ يَسُوع رَدَّ و قال ليهُم: ”أنا قُلتَ ليكُم و إنتو ما بِتآمِنو. الأعمال الأنا بَعمِلا بِإسم أبوي هُم يَشهَدو لَي. لَكِن إنتو ما بِتآمِنو، عَشان إنتو ما مِن خِرفاني، زي ما قُلتَ ليكُم. خِرفاني بِسمَعو صوتي، و أنا بَعرِفُم. و هُم يَتبَعوني. و أنا بَدّيهُم حَياة أبَديَّه، و هُم ما بِموتو أبَداً، و ما في واحِد يَقدَر يَشيلُم مِن إيدي. أبوي الأدّاهُم لَي، هو أكبَر مِن كُلَّهُم. و ما في واحِد يَقدَر يَشيلُم مِن إيد أبوي. أنا و الأبو واحِد.“ اليَهود رَفَعو حُجار كَمان عَشان يَكتُلوهو بيها. يَسُوع رَدَّ عَليهُم و قال: ”أنا وَرّيتكُم أعمال طَيبَه كَتيرَه مِن الأبو. عَشان ياتو مِن الأعمال ديل تَضرُبوني بِالحُجار؟“ اليَهود رَدّو و قالو ليهو: ”نِحنا ما بِنَضرُبَك بِحُجار عَشان عَمَل طَيب، لَكِن عَشان التَجديف، عَشان إنتَ إنسان بِتَعمِل نَفسَك تَكون الله.“ يَسُوع رَدَّ عَليهُم و قال: ”ما مَكتوب في قانونكُم: أنا قُلتَ إنتو آلِهَه؟ كِلمَة الله جات ليهُم و الله سَمّاهُم آلِهَه. و ما مُمكِن يَكسِر المَكتوب في الكِتاب. عَلَشان دا، إنتو تَقولو عَلى القَدَّسو الأبو، و رَسَّلو لِلدُّنيا: إنتَ تَجَدِّف؟ عَشان أنا قُلتَ أنا إبن الله؟ إذا أنا ما بَعمِل أعمال أبوي، ما تَآمِنو بي. لَكِن إن كُنتَ أنا بَعمِلا، و إنتو ما بِتآمِنو بي، آمِنو بِالأعمال، عَشان تَعرِفو و تَفهَمو الأبو فِيني و أنا في الأبو.“ عَشان كِدا، جَرَّبو تاني مَرَّه أن يَقبُضو عَليهو، لَكِن هو فات مِن بين إيدينُم. و رَجَع كَمان لِلطَّرف التّاني لِلأُرْدُنّ، لِلمَكان اليُوحَنَّا كان بِعَمِّد فيهو في الأوَّل، و قَعَد هِناك. و ناس كُتار جو ليهو و قالو: ”يُوحَنَّا ما عَمَل و لا عَلامَه واحدَه. و لَكِن كُل الكَلام القالو يُوحَنَّا عَن الرّاجِل دا كان الحَق.“ و ناس كُتار آمَنو بيهو هِناك. كان في إنسان عَيّان، و هو لَعَازَر مِن بيت عَنيا، حِلَّة مَرْيَم و مَرْثَا أُخُتا. و كانَت مَرْيَم هي الدَهَنَت الرَّب بِريحَه، و مَسَحَت رِجلينو بِشَعَرا. و أخوها لَعَازَر كان عَيّان. عَشان كِدا، أخوات لَعَازَر رَسَّلو لِيَسُوع و قالو ليهو: ”يا سَيِّد، شوف، هو الإنتَ بِتحِبّو عَيّان.“ و لَمّا يَسُوع سِمِع، هو قال: ”العَيى دي مُش لِلموت، لَكِن عَشان مَجد الله، عَشان إبن الله يِتمَجَّد بيهو.“ و يَسُوع كان بِحِب مَرْثَا و أُخُتا و لَعَازَر. و لَمّا سِمِع إنّو عَيّان، قَعَد في المَكان الهو كان فيهو يومين تاني. و بَعَد كِدا، هو قال لِتَلاميذو: ”تَعالو، نَمشي تاني لِليَهُودِيَّه.“ التَّلاميذ قالو ليهو: ”يا مُعَلِّم، هَسَّع اليَهود كانو دايرين يَضرُبوك بِالحُجار. و إنتَ داير تَمشي لِهِناك تاني؟“ يَسُوع رَدَّ عَليهُم وقال: ”مُش إتناشَر ساعَه في اليوم؟ إذا واحِد بِمشي في النَّهار، هو ما بِقَع، عَشان هو بِشوف نور الدُّنيا دي. لَكِن إذا يَمشي في اللّيل، هو بِقَع، عَشان النّور ما في.“ و بَعَد ما إتكَلَّم بِدا، قال ليهُم: ”لَعَازَر صاحِبنا نام. لَكِن أنا ماشي أقَوِّمو مِن النّوم.“ و التَّلاميذ قالو ليهو: ”يا سَيِّد، إذا كان نام، هو ماشي يَكون طَيب.“ و يَسُوع كان يتكَلَّم عَن موتو، و هُم فَكَّرو إنّو كان بِتكَلَّم عَن النّوم. بَعدين يَسُوع قال ليهُم بِكَلام مَفهوم: ”لَعَازَر مات. و أنا فَرحان فِشانكُم إنّي ما كُنتَ هِناك، عَلَشان إنتو تَآمِنو. لَكِن خَلّينا نَمشي ليهو.“ و تُومَا الإسمو التّيمان قال لِلتَّلاميذ المَعاهو: ”تَعالو نَمشي، نَموت مَعاهو كَمان.“ و لَمّا يَسُوع وَصَل، لِقاهو كان في القَبر أربَعَة أيام. و بيت عَنيا كانَت قَريبَه مِن أُورُشَلِيم، مَسافَة ميلين تَقريباً. و ناس كُتار مِن اليَهود جو عَشان يَعَزّو مَرْيَم و مَرْثَا عَن أخوهُم. و لَمّا مَرْثَا سِمِعَت يَسُوع كان جاي، مَشَت و قابَلَتو. لَكِن مَرْيَم قَعَدت في البيت. مَرْثَا قالَت لِيَسُوع: ”يا سَيِّد، إذا إنتَ كُنتَ هِنا، أخوّي ما كان مات. لَكِن أنا عارفَه كُل البِتَطلُبو مِن الله، الله بِدّيهو ليك.“ يَسُوع قال ليها: ”أخوكي بِقوم تاني.“ مَرْثَا قالَت ليهو: ”أنا عارفَه هو بِقوم في القيامَه، في اليوم الأخير.“ يَسُوع قال ليها: ”أنا هو القيامَه و الحَياة. و البِآمِنو بي، و لَو مات بِكون حَي. و كُلّو واحِد الكان حَي و آمَن بي، ما يَموت لِلأبَد. إنتي بِنآمِني بِدا؟“ قالَت ليهو: ”أيوَه، يا سَيِّد، أنا آمَنتَ إنتَ إبن الله الحَي الجّاي لِلدُّنيا.“ و لَمّا قالَت كِدا، مَشَت و نادَت أُخُتا مَرْيَم بِالسِّر، و قالَت ليها: ”المُعَلِّم جا، و هو بِناديكي.“ و هي لَمّا سِمِعَت، قامَت قَوّام و جات ليهو. و يَسُوع لِسَّع ما كان وَصَل الحِلَّه، لَكِن هو كان في المَكان المَرْثَا قابَلَتو فيهو. عَلَشان كِدا اليَهود الكانو في البيت يَعَزّوها، لَمّا شافو مَرْيَم قامَت قَوّام و مَرَقَت، هُم تِبِعوها و إفتَكَرو هي ماشيَه لِلقَبر عَشان تَبكي هِناك. و لَمّا مَرْيَم جات لِلمَكان اليَسُوع كان فيهو، و شافَتو، هي وَقَعَت في رِجلينو و قالَت ليهو: ”يا سَيِّد، إذا إنتَ كُنتَ هِنا، أخوّي ما كان مات.“ و لَمّا يَسُوع شافا تَبكي، و اليَهود الجّو مَعاها يَبكو كَمان، روحو كان حَزين و إضطَرَب. و قال ليهُم: ”خَتّيتو جِسمو وين؟“ قالو ليهو: ”يا سَيِّد، تَعال و شوف.“ يَسُوع بَكى. و اليَهود قالو: ”شوفو كيف كان بِحِبّو.“ لَكِن بَعض مِنَّهُم قالو: ”هو الفَتَح عُيون العَميان، ما كان يَقدَر يَخَلّي الرّاجِل دا ما يَموت؟“ و مَرَّه تانيَه يَسُوع إضطَرَب بِحُزن في روحو، و جا لِلقَبر. و كانَت مَغارَه، و حَجَر كان مَختوت عَليها. يَسُوع قال: ”أرفَعو الحَجَر.“ مَرْثَا، أُخُت الرّاجِل المَيِّت، قالَت ليهو: ”يا سَيِّد، دا عَفَن، عَشان هو مَيِّت مِن مُدَّة أربَعَة أيام.“ يَسُوع قال ليها: ”أنا ما قُلتَ ليكي، كان آمَنتي، تَشوفي مَجد الله؟“ و رَفَعو الحَجَر، و يَسُوع رَفَع عُيونو لِلسَّما و قال: ”يا أبوي، أشكُرَك عَشان سِمِعتَ لَي. و أنا عِرِفتَ إنتَ دايماً بِتَسمَع لَي. لَكِن عَشان النّاس ديل الواقفين هِنا، أنا قُلتَ دا، عَشان هُم يآمِنو إنتَ رَسَّلتَني.“ و لَمّا قال دا، كورَك بِصوت عالي: ”لَعَازَر، أمرُق بَرَّه!“ و المَيِّت مَرَق، و إيدينو و رِجلينو مَربوطين بِرُباط، و وَشّو مَلفوف بِقُماش. و يَسُوع قال ليهُم: ”فِكُوهو، و خَلّوهو يَمشي.“ و عَلَشان كِدا، كُتار مِن اليَهود الجّو لِمَرْيَم و شافو العَمَلو يَسُوع، آمَنو بيهو. لَكِن بَعض مِنَّهُم مَرَقو لِلفَرّيسيّين، و قالو ليهُم عَن العَمَلو يَسُوع. عَشان كِدا، القُسُس الكُبار و الفَرّيسيّين جَمَعو المَجِلس و قالو: ”بِنَعمِل شِنو؟ عَلَشان الرّاجِل دا قاعِد يَعمِل عَلامات كَتيرَه. إذا كان نَخَلّيهو يَعمِل كِدا، كُل النّاس بِآمِنو بيهو. و بَعدين الرّومان بِجو و يَخرِبو المَكان بِتاعنا و أُمَّتنا.“ و واحِد مِنَّهُم إسمو قَيَافا الكان رَئيس القُسُس في السَّنَه ديك، قال ليهُم: ”إنتو ما بِتَعرِفو حاجَه. إنتو ما بِتفَكِّرو إنّو أحسَن ليكُم إنسان واحِد يَموت عَن الشَّعب، و النّاس كُلّو ما يَموتو.“ لَكِن هو ما قال الكَلام دا مِن نَفسو، لَكِن عَشان هو كان رَئيس القُسُس في السَّنَه ديك، و إتنَبّأ أن يَسُوع ماشي يَموت لِلشَّعب. و ما عَشان الأُمَّه بَس، لَكِن عَشان يَجمَع أولاد الله المَفَرّقين لِواحِد. و مِن اليوم داك، هُم كانو يِتكَلَّمو مَعَ بَعض كيف يَكتُلوهو. و عَلَشان كِدا، يَسُوع ما كان بِمشي و يَبَيِّن نَفسو لِليَهود، لَكِنّو مَرَق مِن هِناك لِمَكان قَريب مِن الخَلا، لِمَدينَه إسِما أَفْرَايِم. و قَعَد هِناك مَعَ تَلاميذو. و كان عيد الفِصَح بِتاع اليَهود قَريب. و كَتيرين طَلَعو مِن الحِلَل لِأُورُشَلِيم عَشان يَغَسِّلو نُفوسُم زي عادَة اليَهود. و كانو يَفَتِّشو عَلى يَسُوع، و الواقفين في الهيكَل قالو واحِد لِلتاني: ”تَفتَكِرو شِنو؟ هو ما بِجي لِلعيد؟“ و القُسُس الكُبار و الفَرّيسيّين أدّو أمر، إذا أي واحِد عِرِف هو وين، لازِم يَخَبِّرُم عَشان يَمسِكوهو. بَعَد سِتَة أيام قُبّال عيد الفِصَح، يَسُوع جا لِبيت عَنيا، و دا المَكان لَعَازَر كان يَسكُن فيهو. و يَسُوع كان قَوَّم لَعَازَر مِن بين المَيِّتين. و هُم عَمَلو ليهو عَشا هِناك. و مَرْثَا كانَت بِتَخدِم، و لَعَازَر كان واحِد مِن القاعدين مَعاهو في الطَّرَبيزَه. و مَرْيَم شالَت قِزازَة دِهان صافي و غالي، و دَهَنَت رِجلين يَسُوع، و مَسَحَت رِجلينو بِشَعَرا، و البيت إتمَلا بِريحَة الدِّهان. و واحِد مِن تَلاميذو، و هو يَهُوذَا سِمْعَان الإِسْخَرْيُوطِي، البَعدين ماشي يَسَلِّمو، قال: ”عَشان شِنو ما يَبيعو الدِّهان دا بِتُلتُميَّة جِنيه، و يَدُّوها لِلمَساكين؟“ هو قال كِدا، ما عَشان كان بِفَكِّر في المَساكين، لَكِن عَشان هو كان حَرامي، و عَشان صَندوق القُروش كان مَعاهو، و كان بِشيل البِخُتّوها فيهو. يَسُوع قال: ”خَلّوها، هي حَفَظَت الدِّهان دا لِليوم الفيهو يَدفَنوني. عَشان المَساكين مَعاكُم في كُلّو وَكِت، لَكِن أنا ما مَعاكُم في كُلّو وَكِت.“ و لَمّا ناس كُتار مِن اليَهود عِرفو يَسُوع كان هِناك، هُم جو، مُش عَشان يَسُوع بَس، لَكِن كَمان عَشان يَشوفو لَعَازَر، القَوَّمو مِن بين المَيِّتين. عَشان كِدا، القُسُس الكُبار إتشاوَرو كيف يَكتُلو لَعَازَر كَمان. عَشان بِسَبَبو، كُتار مِن اليَهود كانو بِمشو لِيَسُوع و يآمِنو بيهو. و تاني يوم، الجَّمَع الكَبير الجّو لِلعيد، سِمِعو يَسُوع جاي لِأُورُشَلِيم. و هُم اَخَدو فُروع النَّخَل، و مَرَقو عَشان يَقابِلوهو. و كانو بِكورِكو: ”أُوصَنّا! مُبارَك الجّاي بِإسم الرَّب، مَلِك إِسْرَائِيل.“ و يَسُوع لِقى دَحَش و قَعَد عَليهو، زي ما مَكتوب: ”ما تَخافي، يا بِت صِهيون. شوفي، المَلِك بِتاعِك جاي، و هو قاعِد عَلى دَحَش، جَنى حُمارَه.“ و التَّلاميذ ما فِهِمو الحاجات دي في الأوَّل، لَكِن لَمّا يَسُوع إتمَجَّد، في الوَكِت دا هُم إتزَكَّرو الحاجات دي كانَت مَكتوبَه عَنّو، و كيف عَمَلو كِدا ليهو. و النّاس الكانو مَعاهو لَمّا يَسُوع نادى لَعَازَر مِن القَبر، و قَوَّمو مِن بين المَيِّتين، النّاس ديل كانو يَشهَدو عَن دا. عَلَشان كِدا، ناس كُتار قابَلوهو عَشان سِمِعو هو عَمَل العَلامَه دي. و الفَرّيسيّين قالو بَعضَهُم لِبَعض: ”شوفو، إنتو ما بِتَقدَرو تَعمِلو أي شي. الدُّنيا كُلّو ماشيَه وَراهو.“ و بين النّاس الطَّلَعو عَشان يَعبُدو في العيد، بَعض مِنَّهُم كانو ناس إغريقيين. النّاس ديل جو لِفِيلُبُّس المِن بيت صَيدا في الجَّليل، و قالو ليهو: ”يا سَيِّد، نِحنا عاوزين نَشوف يَسُوع.“ فِيلُبُّس جا و قال دا لِأنْدَرَاوُس. و أنْدَرَاوُس مَشى مَعَ فِيلُبُّس، و هُم كَلَّمو يَسُوع. لَكِن يَسُوع قال ليهُم: ”السّاعَه جات عَشان إبن الإنسان يِتمَجَّد. الحَق الحَق أقول ليكُم، إلّا تيراب الدُّرَه يَقَع في الأرض و يَموت، يَبقى بَراهو. لَكِن إذا مات، يَجيب ثِمار كَتير. البِحِب نَفسو، بِوَدِّرا. و البِكرَه نَفسو في الدُّنيا دي، بِحفَظا لِلحَياة الأبَديَّه. إن كان واحِد يَخدِمني، لازِم يَتبَعني. و المَحَل الأنا أكون فيهو، هِناك يَكون خَدّامي كَمان. و إذا كان واحِد يَخدِمني، الأبو بِحتَرِمو. هَسَّع نَفسي إضطَرَبِت، و أنا بَقول شِنو؟ يا أبوي، خَلِّصني مِن السّاعَه دي؟ لا، لَكِن فِشان دا أنا جيت لِلسّاعَه دي. يا أبوي، مَجِّد إسمَك.“ بَعدين جا صوت مِن السَّما و قال: ”مَجَّدتو، و بَمَجِّدو كَمان.“ و النّاس الكانو واقفين، سِمِعو و قالو صوت البَرق جا. و ناس تانيين قالو: ”مَلاك كَلَّمو.“ يَسُوع رَدَّ و قال ليهُم: ”الصّوت دا جا عَشانكُم، ما عَشانّي. هَسَّع، دينونَة الدُّنيا دي. هَسَّع بِرمو رَئيس الدُّنيا بَرَّه. و أنا إذا بَكون مَرفوع مِن الأرض، بَجيب كُل النّاس لَي.“ هو قال كِدا عَشان يَوَرّي ياتو موت هو كان ماشي يَموت. و النّاس رَدّو عَليهو: ”نِحنا سِمِعنا مِن القانون، المَسيح يِستَمِر لِلأبَد. كيف إنتَ تَقول لازِم يَرفَعو إبن الإنسان؟ مِنو هو إبن الإنسان دا؟“ و يَسُوع قال ليهُم: ”لِسَّع النّور مَعاكُم لِمُدَّه قِصَيرَه. أمشو ما دام ليكُم نور، قُبّال ما الضُّلُمَّه تَجي عَليكُم. و البِمشي في الضُّلُمَّه ما بِيَعرِف هو ماشي وين. آمِنو بِالنّور ما دام عِندَكُم نور، عَشان تَكونو أولاد النّور.“ و بَعَد ما يَسُوع إتكَلَّم، مَشى و دَسَّ نَفسو مِنَّهُم. و مَعَ إنّو يَسُوع عَمَل عَلامات كَتيرَه زي دي قِدّامُم، هُم لِسَّع ما آمَنو بيهو. عَشان يَتِم المَكتوب في إِشَعْيَاء النَّبي القال ”يا رَب، مِنو صَدَّق خَبَرنا، و لِمِنو الرَّب وَرّا قُوَّتو؟“ عَشان كِدا، ما قِدرو يآمِنو، عَشان إِشَعْيَاء قال كَمان: ”و هو قَفَل عُيونُم و خَلّى قُلوبُم زي حَجَر، عَشان ما بِشوفو بِعُيونُم ولّا بِفهَمو بِقُلوبُم، و يَرجَعو و أشفيهُم.“ إِشَعْيَاء قال كِدا عَلَشان شاف مَجدو، و إتكَلَّم عَنّو. لَكِن مَعَ داك، كُتار مِن الرّؤساء آمَنو بيهو كَمان. لَكِن لِسَبَب الفَرِّيسِيِّين، ما إعتَرَفو بيهو. هُم خايفين بِكونو مَطرودين مِن بيت الرَّب. عَشان هُم حَبّو مَجد النّاس أكتَر مِن مَجد الله. و يَسُوع نادى و قال: ”البِآمِن بي، ما بِآمِنو بي بَس، لَكِن بيهو الرَّسَّلني. و البِشوفني بِشوف الرَّسَّلني. أنا جيت عَشان أكون نور لِلدُّنيا، عَشان كُل البِآمِن بي ما بِستَنّى في الضُّلُمَّه. إذا واحِد يَسمَع كَلامي و ما يَعمِل بيهو، أنا ما بَحكُم. عَشان أنا ما جيت أحكُم عَلى الدُّنيا، لَكِن عَشان أخَلِّص الدُّنيا. البِرفُضني و ما يَقبَل كَلامي، عِندو واحِد بِدينو. الكَلام الأنا إتكَلَّمتا، بِدينو في اليوم الأخير. عَشان أنا ما إتكَلَّمتَ مِن نَفسي، لَكِن الأبو الرَّسَّلني هو أدّاني أمر أقول شِنو و أتكَلَّم شِنو. و أنا أعرِف الأمر بِتاعو هو حَياة أبَديَّه. و البَتكَلَّم بيهو، أنا بَتكَلَّم كِدا زي الأبو قال لَي.“ قُبّال عيد الفِصَح، لَمّا يَسُوع عِرِف ساعتو جات عَشان يَسيب الدُّنيا دي، و يَمشي لِلأبو، هو حَبَّ النّاس بِتاعو الكانو في الدُّنيا، و حَبّاهُم لِلآخِر. و كان وَكِت العَشا، و إبْلِيس خَتَّ في قَلِب يَهُوذَا عَشان يَسَلِّمو ليهُم. يَسُوع عِرِف إن الأبو أدّا ليهو كُلّو شي في إيدينو، و إنّو جا مِن عِند الله، و يَرجَع لِلَّه. عَلَشان كِدا، هو قام مِن العَشا، و قَلَع هِدومو البَرّاني، و رَبَط وَسطو بِفوطَه. و بَعدين خَتَّ مويَه في طَشت، و إبتَدا يَغَسِّل رِجلين التَّلاميذ، و يَمسَحا بِالفوطَه الكانَت مَربوطَه في وَسطو. و جا لِسِمْعَان بُطْرُس. و بُطْرُس قال ليهو: ”يا سَيِّد، إنتَ تَغَسِّل رِجليني؟“ يَسُوع رَدَّ عَليهو و قال: ”إنتَ ما بِتَعرِف هَسَّع أنا بَعمِل شِنو، لَكِن إنتَ ماشي تَفهَم بَعدين.“ بُطْرُس قال ليهو: ”إنتَ ما تَغَسِّل رِجليني أبَداً.“ يَسُوع قال ليهو: ”إن كُنتَ ما بَغَسِّلَك، ما عِندَك جُزو مَعاي.“ سِمْعَان بُطْرُس قال ليهو: ”يا سَيِّد، مُش رِجليني بَس، لَكِن إيديني و رَاسي كَمان.“ يَسُوع قال ليهو: ”الإتغَسَّل ما عاوِز إلّا غَسل رِجلينو بَس، عَشان جِسمو كُلّو نَضيف. و إنتو نُضاف، لَكِن مُش كُلُّكُم.“ و هو عِرِف مِنو داير يَسَلِّمو. عَشان كِدا قال: ”ما كُلُّكُم نُضاف.“ و بَعَد ما غَسَّل رِجلينُم، و أخَد هِدومو و قَعَد في مَحَلّو تاني مَرَّه، قال ليهُم: ”إنتو بِتَعرِفو أنا عَمَلتَ ليكُم شِنو؟ إنتو بِتنادوني يا مُعَلِّم و يا سَيِّد، و إنتو قُلتو الحَق، عَشان أنا كِدا. و أنا السَّيد و المُعَلِّم. أنا غَسَّلتَ رِجلينكُم. و إنتو كَمان لازِم تَغَسِّلو رِجلين بَعضَكُم بَعض. أنا أدّيتكُم مَثَل، عَشان إنتو كَمان تَعمِلو زي ما أنا عَمَلتَ ليكُم. الحَق الحَق أقول ليكُم، إنّو ما في عَبد أكبَر مِن سَيِدو، و لا رَسول أكبَر مِن الرَّسَّلو. إذا عِرِفتو الحاجات دي، بِتكونو مُبارَكين إذا تَعمِلوهُم. أنا ما بَتكَلَّم عَن كُلَّكُم. أنا عارِف النّاس الإختَرتُم. لَكِن دا عَشان يَتِم المَكتوب في الكِتاب: البياكُل مَعاي العيش، رَفَع عَلي كُراعو. أقول ليكُم هَسَّع قُبّال ما يَحصَل، عَشان لَمّا يَحصَل، تَآمِنو أنا هو. الحَق الحَق أقول ليكُم، البِقبَل الزّول البَرَسِّلو، بِقبَلني. و البِقبَلني، بِقبَل الرَّسَّلني.“ لَمّا يَسُوع قال كِدا، إضطَرَب بِالرّوح، و شِهِد و قال: ”الحَق أقول ليكُم، واحِد مِنَّكُم ماشي يِسِلِّمني.“ و التَّلاميذ كانو يَعاينو لِبَعض، عَشان ما عِرِفو هو بِكَلِّم عَن مِنو. و واحِد مِن تَلاميذو كان يِنتَكِل عَلى صَدر يَسُوع، و يَسُوع كان بِحِبّو. سِمْعَان بُطْرُس أشَّر ليهو و قال: ”وَرّينا هو بِكَلِّم عَن مِنو.“ و التِّلميذ داك إنتَكَل عَلى صَدر يَسُوع و قال ليهو: ”يا سَيِّد، هو مِنو؟“ يَسُوع رَدَّ عَليهو و قال: ”الزّول البَدّيهو حِتَّت العيش لَمّا دَخَّلتو في المُلاح، دا هو.“ بَعدين يَسُوع دَخَّل العيش في المُلاح و أدّاهو لِيَهُوذَا إبن سِمْعَان الإِسْخَرْيُوطِي. و بَعَد ما أخَد العيش، الشّيطان دَخَل فيهو. و يَسُوع قال ليهو: ”الدّايِر تَعمِلو، أعمِلو قَوام.“ و ما في واحِد مِن القاعدين في الطَّرَبيزَه فِهِم عَشان شِنو هو قال كِدا. عَلَشان يَهُوذَا كان عِندو الصَّندوق، بَعض مِنَّهُم فَكَّرو إنّو يَسُوع قال ليهو يَشتَري الحاجات الهُم عاوزين لِلعيد، ولّا يَدّي شي لِلمَساكين. عَشان كِدا، لَمّا يَهُوذَا أخَد العيش، مَرَق طَوّالي. و الدُّنيا كانَت ليل. و لَمّا يَهُوذَا مَرَق بَرَّه، يَسُوع قال: ”هَسَّع دي، إبن الإنسان إتمَجَّد، و الله إتمَجَّد فيهو. إن كان الله إتمَجَّد فيهو، الله بِمَجِّد الإبن في نَفسو، و يَمَجِّدو بِسُرعَه. يا أولادي، أنا مَعاكُم مُدَّه قِصَيرَه بَعَد دا. إنتو بِتفَتِّشو عَلي. و زي ما أنا قُلتَ لِليَهود، بَقول ليكُم: المَحَل الأنا ماشي ليهو، إنتو ما بِتَقدَرو تَجو. أنا بَدّيكُم أمر جَديد، عَشان تَحِبّو بَعضَكُم بَعض. زي ما أنا حَبّيتكُم، إنتو كَمان تَحِبّو بَعضَكُم بَعض. بِكِدا، النّاس بِيَعرِفو إنتو تَلاميذي، إذا كان عِندَكُم مَحَبَّه بَعضَكُم بَعض.“ سِمْعَان بُطْرُس قال ليهو: ”يا سَيِّد، إنتَ ماشي وين؟“ يَسُوع رَدَّ عَليهو و قال: ”المَحَل الأنا ماشي ليهو، إنتَ ما تَقدَر تَمشي ليهو هَسَّع، و لَكِن إنتَ بِتَتبَعني في الآخِر.“ بُطْرُس قال ليهو: ”يا سَيِّد، عَشان شِنو ما بَقدَر أتبَعَك هَسَّع؟ أنا بَدّي حَياتي فِشانَك.“ يَسُوع رَدَّ و قال ليهو: ”إنتَ تَدّي حَياتَك فِشانّي؟ الحَق الحَق أقول ليك، قُبّال ما الدّيك يَكورِك، إنتَ ماشي تَنكِرني تلاتَه مَرّات. ما تَضطَرِبو في قُلوبكُم. إنتو بِتآمِنو بِالله، آمِنو بي. في بيت أبوي مَساكِن كَتيرَه. و كان مُش كِدا، كُنتَ قُلتَ ليكُم. أنا ماشي عَشان أجَهِّز ليكُم مَكان. و لَمّا أمشي و أجَهِّز ليكُم مَكان، بَجي تاني و باخُدكُم لِنَفسي. و المَحَل الأنا بَكون فيهو، إنتو تَكونو فيهو كَمان. و إنتو تَعرِفو الطَّرِيق لِلمَحَل الأنا ماشي ليهو.“ تُومَا قال ليهو: ”يا سَيِّد، نِحنا ما بِنَعرِف إنتَ ماشي وين. كيف نَقدَر نَعرِف الطَّريق؟“ يَسُوع قال ليهو: ”أنا هو الطَّرِيق و الحَق و الحَياة. ما في واحِد يَجي لِلأبو إلّا بي. إذا إنتو عِرِفتوني، كُنتو عِرِفتو أبوي كَمان. و مِن هَسَّع تَعرِفوهو و شُفتوهو كَمان.“ فِيلُبُّس قال ليهو: ”يا سَيِّد، وَرّينا الأبو و بِكون كِفايَه لينا.“ يَسُوع قال ليهو: ”أنا مَعاكُم مُدَّه طَويلَه زي دي، و لِغايَة هَسَّع ما تَعرِفني، يا فِيلُبُّس؟ الشّافني شاف أبوي. كيف إنتَ تَقول: وَرّينا الأبو؟ إنتَ ما بِتآمِن أنا في الأبو و الأبو فِيني؟ الكَلام الأنا بَقولو ليكُم، ما بَتكَلَّم بيهو مِن نَفسي. لَكِن الأبو القاعِد فِيني، هو بيَعمِل أعمالو. صَدِّقوني أنا في الأبو و الأبو فِيني. ولّا صَدِّقوني بِسَبَب الأعمال نَفسا. الحَق الحَق أقول ليكُم، البِآمِن بي، الأعمال الأنا بَعمِلا، هو كَمان يَعمِلا. و يَعمِل أكبَر مِنَّها، عَشان أنا ماشي لِلأبو. و أي شي سألتو بِإسمي، أنا بَعمِلو، عَشان الإبن يَجيب مَجد لِلأبو. و إذا سألتو أي حاجَه بِإسمي، أنا بَعمِلا. إذا تَحِبّوني، إنتو ماشين تَحفَظو أوامِري. و أنا أطلُب مِن الأبو عَشان يَدّيكُم مُساعِد تاني، عَشان يَكون مَعاكُم لِلأبَد، يَعني روح الحَق. ناس الدُّنيا ما بِقدَرو يَقبَلوهو، عَشان هُم ما يَشوفوهو و لا يَعرِفوهو. لَكِن إنتو بِتَعرِفوهو، عَشان هو قاعِد مَعاكُم و بِكون فيكُم. أنا ما بَخَلّيكُم زي أولاد بِدون والِدين. أنا بَجيكُم تاني. بَعَد شوَيَه الدُّنيا ما ماشيَه تَشوفني تاني مَرَّه، لَكِن إنتو بِتشوفوني. عَلَشان أنا حَي، إنتو كَمان بِتَحيو. في اليوم داك، إنتو ماشين تَعرِفو أنا في الأبو، و إنتو فِيني، و أنا فيكُم. العِندو أوامِري و يَحفَظا، دا هو البِحِبّني. و الزّول البِحِبّني، أبوي بِحِبّو. و أنا بَحِبّو، و بَوَرّي نَفسي ليهو.“ يَهُوذَا، المُش الإِسْخَرْيُوطِي، قال ليهو: ”يا رَب، كيف تَوَرّي نَفسَك لينا و مُش لِلدُّنيا؟“ يَسُوع رَدَّ عَليهو: ”إذا واحِد بِحِبّني، هو بِحفَظ كَلامي. و أبوي بِحِبّو. و نِحنا بِنَجي ليهو و نَعمِل بيتنا مَعاهو. الما بِحِبّني ما بِحفَظ كَلامي. والكلام الإنتو بِتسمَعوهو ما بِتاعي، لَكِن بِتاع الأبو الرَّسَّلني. أنا كَلَّمتَكُم بِالحاجات دي و أنا مَعاكُم. و لَكِن المُساعِد، الهو الرّوح القُدُس، الأبو بِرَسِّلو بِإسمي، هو بِعَلِّمكُم كُلّو حاجَه، و يَزَكِّركُم بِكُل القُلتو ليكُم. أنا بَخَلّي سَلام مَعاكُم. بَدّيكُم سَلامي. أنا ما بَدّيكُم زي ما الدُّنيا بِتَدّي. ما تَضطَرِبو في قُلوبكُم، و ما تَخافو. إنتو سِمِعتو إنّي قُلتَ ليكُم: أنا ماشي و بَجي ليكُم تاني. و إذا إنتو بِتحِبّوني، كُنتو تَفرَحو، عَشان أنا ماشي لِلأبو. عَلَشان الأبو أكبَر مِنّي. و أنا قُلتَ ليكُم هَسَّع قُبّال ما يَحصَل، عَشان لَمّا يَحصَل، تَآمِنو. أنا ما بَتكَلَّم مَعاكُم كَتير بَعَد دا، عَشان رَئيس الدُّنيا دي جاي، و هو ما عِندو قُدرَه عَلي. لَكِن عَشان الدُّنيا تَفهَم إنّي أحِب الأبو، و أنا أعمِل زي ما الأبو أمَرني. قُومو، نَمشي مِن هِنا. أنا هو شَجَرَة العِنَب الحَقيقي، و أبوي هو الجِّنايني بِتاع العِنَب. كُلّو فَرَع فِيني الما بِجيب ثِمار، هو بِقطَعو، و الفَرَع البِجيب ثِمار، هو بِنَضِّفو عَشان بِجيب ثِمار أكتَر. إنتو هَسَّع نُضاف بِسَبَب الكَلام الكَلَّمتَكُم بيهو. أسكُنو فِيني و أنا فيكُم. الفَرَع ما يَقدَر يَجيب ثِمار بِنَفسو إلّا يَسكُن في شَجَرَة العِنَب. و إنتو كَمان ما تَقدَرو تَجِيبو ثِمار إلّا تَسكُنو فِيني. أنا شَجَرَة العِنَب و إنتو الفُروع. البِسكُن فِيني، و أنا فيهو، هو البِجيب ثِمار كَتير. عَشان إنتو بِدوني ما تَقدَرو تَعمِلو حاجَه. إذا واحِد ما يَسكُن فِيني، يَرموهو بَرَّه زي الفَرَع اليَنشَف. و يَلِمّو الفُروع و يَرموهو في النّار و يَحرِقوها. إذا تَسكُن فِيني و كَلامي يَسكُن فيكُم، إنتو بِتَطلُبو الدّايِرينو، و يَكون ليكُم. بِدا، أبوي يِتمَجَّد إذا تَجِيبو ثِمار كَتير، و كِدا بِتكونو تَلاميذي. زي ما الأبو حَبّاني، أنا كَمان حَبّيتكُم. أسكُنو في مَحَبَّتي. إذا حَفَظتو أوامِري، بِتَسكُنو في مَحَبَّتي، زي ما أنا حَفَظتَ أوامِر أبوي، و أسكُن في مَحَبَّتو. أنا كَلَّمتَكُم بِدا، عَشان فَرَحي يَسكُن فيكُم، و فَرَحكُم يَتِم. دا أمري، تَحِبّو بَعضَكُم بَعض زي أنا حَبّيتكُم. ما في إنسان عِندو مَحَبَّه أعظَم مِن كِدا، أن واحِد بِدّي نَفسو فِشان المَحبوبين. إنتو مَحبوبين لَي إذا تَعمِلو زي ما بأمُركُم. بَعَد دا ما بَسَمّيكُم خَدّامين، عَشان الخَدّام ما بِيَعرِف البيَعمِل سَيِدو. لَكِن أنا سَمّيتكُم مَحبوبين، عَشان أنا كَلَّمتَكُم بِكُل السِّمِعتو مِن أبوي. إنتو ما إختِرتوني، لَكِن أنا إختِرتَكُم و عَيَّنتَكُم عَشان تَمشو و تَجِيبو ثِمار، و ثَمَركُم بِستَمِر. عَشان الأبو بِدّيكُم كُل البِتَطلُبوهو بِإسمي. دا أمري، أن تَحِبّو بَعضَكُم بَعض. إذا ناس الدُّنيا بِكرَهوكُم، أعرِفو هُم كِرِهوني قُبّالكُم. إذا كُنتو مِن الدُّنيا، ناس الدُّنيا كانو بِحِبّوكُم. و إنتو مُش مِن الدُّنيا، لَكِن أنا إختِرتَكُم مِن الدُّنيا. عَلَشان كِدا، ناس الدُّنيا بِكرَهوكُم. إتزَكَّرو الكَلام القُلتو ليكُم: الخَدّام ما أكبَر مِن سيدو. إذا طَرَدوني، هُم ماشين بِطرُدوكُم. و إذا كانو حَفَظو كَلامي، هُم بِحفَظو كَلامكُم. لَكِن هُم بيَعمِلو كُلّو دا ليكُم فِشان إسمي، عَشان هُم ما عارفين الرَّسَّلني. إذا أنا ما جيت و كَلَّمتَهُم، ما كانَت عِندَهُم خَطيَّه. لَكِن هَسَّع ما عِندَهُم أي عُذر في خَطِيَّتُم. البِكرَهني بِكرَه أبوي كَمان. أنا عَمَلتَ بِينُم أعمال زول تاني ما عَمَلا. عَلَشان كِدا عِندَهُم خَطيَّه. لَكِن هَسَّع هُم شافو و كِرهوني أنا و أبوي. لَكِن عَشان تَتِم الكِلمَه المَكتوبَه في قانونُم: هُم كِرهوني بِدون سَبَب. و لَمّا المُساعِد يَجي، الأنا بَرَسِّلو ليكُم مِن الأبو، يَعني روح الحَق البِجي مِن الأبو، هو بِشهَد لَي. و إنتو كَمان تَشهَدو لَي، عَشان إنتو مَعاي مِن البِدايَه. أنا قُلتَ ليكُم كُلّو دا عَشان ما تَقَعو. هُم بِطرُدوكُم مِن بُيوت الرَّب. لَكِن ساعَه بِتَجي، فيها أي واحِد البِكتُلكُم يَفتَكِر هو بِخدِم الله. و بيَعمِلو بيكُم كِدا فِشان هُم ما عِرفو الأبو ولّا عِرفوني. أنا كَلَّمتَكُم بِدا هَسَّع، عَشان لَمّا ساعَتُم تَجي، تِتزَكَّرو أنا قُلتَ ليكُم دا كُلّو. أنا ما كَلَّمتَكُم بِدا في الأوَّل، عَلَشانّي كُنتَ مَعاكُم. لَكِن هَسَّع أنا ماشي لِلرَّسَّلني. و ما في واحِد مِنَّكُم يسألني: إنتَ ماشي وين؟ لَكِن عَشان أنا قُلتَ ليكُم دا، قُلوبكُم إتمَلَت بِالحُزن. لَكِن أقول ليكُم الحَق، أحسَن ليكُم أنا أمشي. عَشان إذا أنا ما مَشيت، المُساعِد ما بِجيكُم. لَكِن إذا مَشيت، بَرَسِّلو ليكُم. و لَمّا داك يَجي، بِوَبِّخ الدُّنيا عَلى الخَطيَّه و عَلى البِر و عَلى الدّينونَه. هو يَوَبِّخ الدُّنيا عَلى خَطيَّه عَشان ما بِآمِنو بي. و عَلى البِر عَشان أنا ماشي لِأبوي، و إنتو ما بِتشوفوني تاني. و عَلى الدّينونَه عَشان رَئيس الدُّنيا دي كان مَحكوم عَليهو. أنا عِندي حاجات كَتيرَه أقولا ليكُم، لَكِن إنتو ما بِتَقدَرو تَفهَموها هَسَّع. لَكِن لَمّا روح الحَق يَجي، هو بِوَرّيكُم كُل الحَق. عَشان هو ما بِتكَلَّم مِن نَفسو، لَكِن كُل البِسمَع، هو بِتكَلَّم بيهو. و بِوَرّيكُم الحاجات الجّايَه. هو بِمَجِّدني، عَشان هو بياخُد مِن العِندي و بِكَلِّمكُم. كُلّو شي بِتاع الأبو، هو بِتاعي. عَشان كِدا، قُلتَ الرّوح بياخُد مِن العِندي، و بِوَرّيهو ليكُم. بَعَد شوَيَه إنتو ما بِتشوفوني. و كَمان بَعَد شوَيَه إنتو بِتشوفوني.“ بَعض مِن تَلاميذو قالو بَعضَهُم لِبَعض: ”دا شِنو هو بِقول لينا، بَعَد شوَيَه ما بِتشوفوني، و كَمان بَعَد شوَيَه بِتشوفوني، و: عَشان أنا ماشي لِلأبو؟“ و قالو: ”مَعنى الكَلام دا شِنو الهو بِقول، بَعَد شوَيَه؟ نِحنا ما نَعرِف هو بِقول شِنو.“ يَسُوع عِرِف هُم عاوزين يَسألوهو. و عَشان كِدا قال ليهُم: ”إنتو بِتَسألو بينكُم عَن دا؟ عَشان أنا قُلتَ: بَعَد شوَيَه ما بِتشوفوني، و بَعَد شوَيَه كَمان بِتشوفوني؟ الحَق الحَق أقول ليكُم، إنتو بِتَبكو و بِتكورِكو، و الدُّنيا تَفرَح. إنتو بِتَحزَنو، لَكِن حُزنَكُم بِتغَيَّر لِفَرَح. المَرَه لَمّا تَلِد بِتَحزَن، عَشان ساعَتا جات. لَكِن بَعَد ما وِلدَت الطِّفل، ما بِتِزَكَّر الوَجَع الكانَت عِندَها. هي تَكون مَبسوطَه عَشان إنسان إتوَلَد في الدُّنيا. و عَشان كِدا، إنتو عِندَكُم حُزن هَسَّع. لَكِن أنا بَشوفكُم مَرَّه تانيَه، و قُلوبكُم بِكونو مَبسوطين. و ما في زول يَشيل الفَرَح بِتاعكُم مِنَّكُم. و في اليوم داك، ما بِتَسألوني أي شي. الحَق الحَق أقول ليكُم، كُل البِتَطلُبوهو مِن الأبو بِإسمي، بِدّيهو ليكُم. لِغايَة هَسَّع، إنتو ما طَلَبتو حاجَه بِإسمي. أطلُبو، تَقبَلو، عَلَشان فَرَحكُم يَكون كامِل. أنا قُلتَ دا ليكُم هَسَّع بِأمثال. لَكِن ساعَه بِتَجي لَمّا ما بَكَلِّمكُم بِأمثال بَعَد دا. في الوَكِت دا بَكَلِّمكُم عَن الأبو بِدون سِر. و في اليوم داك، إنتو بِتَطلُبو بِإسمي. و ما بَقول ليكُم أنا بَسأل الأبو فِشانكُم. عَشان الأبو نَفسو بِحِبّكُم، عَشانكُم حَبّيتوني، و آمَنتو أنا جيت مِن الله. أنا جيت مِن عِند الأبو، و دَخَلتَ الدُّنيا. و أنا كَمان بَسيب الدُّنيا و بَمشي لِلأبو.“ تَلاميذو قالو ليهو: ”هَسَّع إنتَ بِتِتكَلَّم كَلام مَفهوم، و ما تَقول مَثَل واحِد. هَسَّع دي بِنَعرِف إنتَ بِتَعرِف كُلّو شي. و ما تَحتاج لِزول يَسألَك. عَشان كِدا بِنآمِن إنتَ جيت مِن الله.“ يَسُوع قال ليهُم: ”هَسَّع إنتو بِتآمِنو؟ ساعَه بِتَجي، و السّاعَه دي هَسَّع، فيها كُلّو واحِد بِتفَرَّق لِبيتو. و يَخَلّوني بَراي، لَكِن أنا ما بَراي، عَشان الأبو مَعاي. كَلَّمتَكُم كِدا عَشان يَكون ليهُم سَلام فِيني. في الدُّنيا يَكون عِندَكُم تَعب. و لَكِن شِدّو حيلكُم، أنا غَلَبتَ الدُّنيا.“ و لَمّا يَسُوع إتكَلَّم الكَلام دا، رَفَع عُيونو لِلسَّما و قال: ”يا أبوي، السّاعَه جات. مَجِّد إبنَك عَشان إبنَك يَمَجِّدَك كَمان. عَشان إنتَ أدّيت ليهو سُلطَه عَلى كُلّو زول، عَشان يَدّي الحَياة الأبَديَّه لِكُل الأدّيتُم ليهو. و دي هي الحَياة الأبَديَّه، أن يَعرِفوك إنتَ الإلَه الحَقيقي وَحدَك، و يَسُوع المَسيح الرَسَّلتو. أنا مَجَّدتَك عَلى الأرض، و أنا تَميت العَمَل الأدّيتو لَي عَشان أعمِلو. و هَسَّع دي، يا أبوي، مَجِّدني بِنَفسَك، بِالمَجد الكان عِندي مَعاك قُبّال بِدايَة الدُّنيا. أنا وَرّيت إسمَك لِلنّاس الأدّيتُم لَي مِن الدُّنيا. هُم كانو ليك، و إنتَ أدّيتُم لَي، و هُم حَفَظو كَلامَك. و هَسَّع، هُم عِرِفو إن كُل الأدّيتو لَي، هو جاي مِنَّك. عَشان الكَلام الأنتَ أدّيتو لَي، أنا أدّيتو ليهُم. و هُم قِبِلو و عِرِفو تَمام أنا جيت مِنَّك، و آمَنو إنتَ رَسَّلتَني. أنا بَصَلّي فِشانُم. و أنا ما بَصَلّي فِشان خاطِر الدُّنيا. لَكِن بَصَلّي فِشان ديل الأدّيتُم لَي مِن الدُّنيا، عَشان هُم ليك. و كُل العِندي، هو ليك. و كُل العِندَك، هو لَي. و أنا عِندي مَجد فِشانُم. أنا ما بَكون في الدُّنيا بَعَد دا، لَكِن هُم في الدُّنيا. و أنا جاي ليك. يا أبوي القُدّوس، أحفَظُم في إسمَك، الأدّيتُم لَي، عَشان يَكونو واحِد زي ما نِحنا واحِد. لَمّا كُنتَ مَعاهُم في الدُّنيا، كُنتَ أحفَظُم في إسمَك. الأدّيتُم لَي حَفَظتُم. و ما إتوَدَّر مِنَّهُم و لا واحِد، إلّا إبن الخَراب، عَشان يَتِم الكِتاب. لَكِن هَسَّع أنا جاي ليك. و أنا بَتكَلَّم بِالحاجات دي في الدُّنيا، عَشان يَكون عِندَهُم في نُفوسُم فَرَح كامِل مِنّي. أنا أدّيتُم كَلامَك. و ناس الدُّنيا كِرهوهُم، عَشان هُم ما مِن الدُّنيا، زي ما أنا ما مِن الدُّنيا. أنا ما بَسأل عَشان تاخُدُم مِن الدُّنيا، لَكِن عَشان تَحفَظُم مِن الشَّر. هُم مُش مِن الدُّنيا، زي ما أنا مُش مِن الدُّنيا. قَدِّسُم في حَقَّك. كَلامَك هو الحَق. زي ما رَسَّلتَني لِلدُّنيا، أنا رَسَّلتَهُم لِلدُّنيا كَمان. و أنا بَقَدِّس نَفسي عَشانُم، فِشان هُم يَكونو مُقَدَّسين في الحَق كَمان. أنا ما بَصَلّي عَشان ديل بَس، لَكِن كَمان عَشان البِآمِنو بي بِكَلامُم. أنا بَصَلّي عَشان كُلُّهُم بِكونو واحِد، زي ما إنتَ فِيني يا أبوي، و أنا فيك. و بَصَلّي كَمان عَشان هُم بِكونو فينا، فِشان ناس الدُّنيا بِآمِنو إنتَ رَسَّلتَني. و أنا أدّيتُم المَجد الأنتَ أدّيتو لَي، عَشان يَكونو واحِد زي ما نِحنا واحِد. أنا فيهُم و إنتَ فِيني، عَشان يَكونو مَكَمَّلين لِواحِد. بِدا، خَلّي ناس الدُّنيا يَعرِفو إنتَ رَسَّلتَني، و حَبّيتُم زي ما حَبّيتني. يا أبوي، أنا عاوِز ديل الأدّيتُم لَي يَكونو مَعاي في المَحَل الأنا بَكون فيهو. أنا عاوِزُم يَشوفو المَجد بِتاعي الأنتَ أدّيتو لَي، عَشان إنتَ حَبّيتني قُبّال خَليقَة الدُّنيا. يا الأبو البار، ناس الدُّنيا ما عِرفوك، لَكِن أنا عِرِفتَك. و ديل عِرفو إنتَ رَسَّلتَني. و أنا وَرّيت ليهُم إسمَك، و أنا بَوَرّيهُم. و أنا بَسَوّي دا عَشان المَحَبَّه الأنتَ حَبّيتني بيهو بِكون فيهُم، و أنا أكون فيهُم.“ و لَمّا يَسُوع قال الكَلام دا، مَرَق مَعَ تَلاميذو لِلجَّمب التّاني لِوادي قِدرون. هِناك كانَت في جِنينَه، و يَسُوع و تَلاميذو دَخَلوها. و يَهُوذَا، البِسَلِّمني، كان يَعرِف المَكان، عَشان يَسُوع كان بِجتَمِع هِناك مَرّات كَتيرَه مَعَ تَلاميذو. عَلَشان كِدا، يَهُوذَا أخَد جَماعَه مِن العَساكِر، و خَدّامين مِن القُسُس الكُبار و الفَرّيسيّين. و هُم جو لِهِناك شايلين لَمبات و سِلاح. بَعدين يَسُوع، و هو عارِف كُل الحاجات البِجو عَليهو، مَرَق ليهُم. و قال: ”إنتو دايرين مِنو؟“ قالو ليهو: ”يَسُوع النّاصِري.“ يَسُوع قال ليهُم: ”أنا هو.“ و يَهُوذَا البِسَلِّمني كان واقِف مَعاهُم. و لَمّا قال: ”أنا هو،“ هُم رَجَعو لِوَرا، و وَقَعو عَلى الأرض. و سألُم تاني: ”إنتو دايرين مِنو؟“ قالو: ”يَسُوع النّاصِري.“ يَسُوع رَدَّ عَليهُم و قال: ”أنا قُلتَ ليكُم أنا هو. كان إنتو دايِرينّي، خَلّو ديل يَمرُقو.“ دا حَصَل عَشان يَتِم الكَلام القالو: ”الأدّيتُم لَي، ما إتوَدَّر مِنَّهُم و لا واحِد.“ و سِمْعَان بُطْرُس كان عِندو سيف. و شالو و ضَرَب عَبد رَئيس القُسُس، و قَطَع أضانو اليَمين. و إسم العَبد كان مَلخُص. و يَسُوع قال لِبُطْرُس: ”خُت السّيف في مَحَلّو. كُبّايَة الوَجَع الأبو أدّاني، ما بَشرَبا؟“ و بَعدين العَساكِر و الضابِط بِتاعُم و خَدّامين اليَهود، قَبَضو عَلى يَسُوع و رَبَطوهو. و جابوهو في الأوَّل لِحَنَّان، عَشان هو كان نَسيب قَيَافَا الكان رَئيس القُسُس في السَّنَه ديك. و كان قَيَافَا القال لِليَهود: ”أخير زول واحِد يَموت فِشان النّاس.“ و سِمْعَان بُطْرُس و تِلميذ تاني كانو يَتبَعو يَسُوع. و التِّلميذ داك كان مَعروف عِند رَئيس القُسُس. و كِدا هو دَخَل مَعَ يَسُوع لِحوش رَئيس القُسُس. لَكِن بُطْرُس كان واقِف عِند الباب بَرَّه. و التِّلميذ التّاني، الكان مَعروف عِند رَئيس القُسُس، طَلَع بَرَّه، و كَلَّم الخَدّامَه البِتَحرَس الباب. و خَلّى بُطْرُس يَدخُل. و الخَدّامَه البِتَحرَس الباب قالَت لِبُطْرُس: ”إنتَ كَمان مُش واحِد مِن تَلاميذ الإنسان دا؟“ و بُطْرُس قال ليها: ”لا، مُش أنا.“ و الخَدّامين و الضُّبّاط كانو واقفين، و هُم وَلَّعو النّار. و عَشان كان بارِد، كانو بِدَفّو. و بُطْرُس كان واقِف مَعاهُم يَدَفّي نَفسو. و بَعَد دا، رَئيس القُسُس سأل يَسُوع عَن تَلاميذو و عَن تَعليمو. و يَسُوع قال ليهو: ”أنا إتكَلَّمتَ قِدّام النّاس. و أنا عَلَّمتَ كُلّو وَكِت في بُيوت الرَّب و في الهيكَل، المَكان البِلِمّو فيهو كُل اليَهود. و ما إتكَلَّمتَ أي شي بِالسِّر. عَشان شِنو بِتَسألني أنا؟ أسأل النّاس السِّمِعو كَلامي. شوفو! ديل يَعرِفو أنا قُلتَ شِنو.“ و لَمّا يَسُوع قال كِدا، واحِد مِن الخَدّامين كان واقِف قَريب، و هو ضَرَب يَسُوع بِإيدو. و قال ليهو: ”كِدا تَرُد عَلى رَئيس القُسُس؟“ يَسُوع رَدَّ عَليهو و قال: ”إذا إتكَلَّمتَ بِغَلَط، وَرّيني الغَلَط. و إذا إتكَلَّمتَ كوَيس، عَشان شِنو بِتَضرُبني؟“ بَعدين حَنَّان رَسَّلو مَربوط لِقَيَافَا رَئيس القُسُس. و سِمْعَان بُطْرُس كان واقِف يَدَفّي نَفسو. و قالو ليهو: ”إنتَ ما واحِد مِن تَلاميذو كَمان؟“ و هو نَكَر و قال: ”مُش أنا.“ واحِد مِن عَبيد رَئيس القُسُس، كان في. و هو نَسيب الرّاجِل البُطْرُس قَطَع أضانو. الرّاجِل دا قال ليهو: ”أنا ما شُفتَك مَعاهو في الجِّنينَه؟“ و بُطْرُس نَكَر مَرَّه تانيَه. و طَوّالي الدّيك كورَك. و بَعدين جابو يَسُوع مِن قَيَافَا لِبيت المُدير. و كان الصَّباح. و هُم ما دَخَلو لِبيت المُدير، عَشان ما يَنَجِّسو نُفوسُم و لَكِن يَقدَرو ياكلو الفِصَح. و بِيلاطُس طَلَع ليهُم بَرَّه و قال: ”إنتو تَشتَكو بِشِنو عَلى الرّاجِل دا؟“ هُم رَدّو و قالو ليهو: ”إذا ما كان عامِل حاجات بَطّالَه، ما كُنّا سَلَّمناهو ليك.“ بِيلاطُس قال ليهُم: ”شيلوهو إنتو، و أحكُمو عَليهو بِحَسَب القانون بِتاعكُم.“ و اليَهود قالو ليهو: ”ما عِندَنا سُلطَه نَكتُل زول.“ عَشان يَتِم كَلام يَسُوع، القالو عَشان يَوَرّي بيهو ياتو موت كان ماشي يَموت. و بَعدين بِيلاطُس دَخَل بيت المُدير، و نادى يَسُوع، و قال ليهو: ”إنتَ مَلِك اليَهود؟“ يَسُوع رَدَّ عَليهو و قال: ”إنتَ بِتقول الكَلام دا مِن نَفسَك؟ ولّا ناس تانيين قالو ليك كِدا عَنّي؟“ بِيلاطُس رَدَّ عَليهو و قال: ”أنا يَهودي؟ شَعبَك و القُسُس الكُبار سَلَّموك لَي. إنتَ عَمَلتَ شِنو؟“ يَسُوع قال ليهو: ”مَلَكوتي ما مِن الدُّنيا دي. إذا مَلَكوتي مِن الدُّنيا دي، خَدّاميني بِحارِبو، عَشان ما بَتسَلَّم لِليَهود. لَكِن هَسَّع مَلَكوتي ما مِن الدُّنيا.“ و بِيلاطُس قال ليهو: ”عَلى كِدا إنتَ مَلِك؟“ يَسُوع قال ليهو: ”إنتَ بِتقول أنا مَلِك. عَشان كِدا أنا إتوَلَدتَ، و عَشان كِدا أنا جيت لِلدُّنيا، عَشان أشهَد لِلحَق. كُلّو واحِد اليَحِب الحَق يَسمَع صوتي.“ بِيلاطُس قال ليهو: ”الحَق شِنو؟“ و لَمّا قال كِدا، مَرَق تاني لِليَهود، و قال ليهُم: ”أنا ما لِقيت ذَنب فيهو. و عِندَكُم عادَه أفِك ليكُم واحِد في الفِصَح. إنتو دايِرينّي أفِك ليكُم مَلِك اليَهود؟“ و كورَكو تاني مَرَّه و قالو: ”لا، ما الرّاجِل دا، لَكِن بَراباس.“ و بَراباس كان حَرامي. بَعدين بِيلاطُس أخَد يَسُوع و جَلَدو. و العَساكِر عَمَلو تاج شوك، و خَتّوهو عَلى رَاسو، و لَبَّسوهو جَلّابيَّه حَمرَه. و كانو يَمشو ليهو و بِقولو: ”السَّلام، يا مَلِك اليَهود!“ و كانو يَضرُبوهو بِإيديهُم. و بِيلاطُس مَرَق بَرَّه مَرَّه تانيَه، و قال ليهُم: ”شوفو، أنا بَطَلِّعو ليكُم بَرَّه عَشان تَعرِفو أنا ما لِقيت فيهو ذَنب واحِد.“ و يَسُوع طَلَع بَرَّه، و هو لابِس تاج الشّوك فوق رَاسو و الجَلّابيَّه الحَمرَه. و بِيلاطُس قال ليهُم: ”أهو دا الإنسان.“ و لَمّا القُسُس الكُبار و الخَدّامين شافوهو، كورَكو، و قالو: ”أصلُبو، أصلُبو!“ بِيلاطُس قال ليهُم: ”أُخدوهو إنتو، و أصلُبوهو، عَشان أنا ما لِقيت ذَنب فيهو.“ اليَهود قالو ليهو: ”عِندَنا قانون، و حَسَب قانونّا، هو لازِم يَموت، عَشان هو عَمَل نَفسو إبن الله.“ و لَمّا بِيلاطُس سِمِع الكَلام دا، خاف شَديد. و دَخَل بيت المُدير تاني مَرَّه و قال لِيَسُوع: ”مِن وين إنتَ؟“ لَكِن يَسُوع ما رَدَّ عَليهو. و بِيلاطُس قال ليهو: ”إنتَ ما داير تَرُد عَلي؟ إنتَ ما عارِف عِندي سُلطَه عَشان أفِكَّك؟ و سُلطَه عَشان أصلُبَك؟“ يَسُوع رَدَّ عَليهو و قال: ”إنتَ ما عِندَك سُلطَه عَلي أبَداً إذا ما كان ليك سُلطَه مِن فوق. عَشان كِدا، الواحِد السَّلَّمني ليك، عِندو خَطيَّه أكبَر.“ مِن الوَكِت داك بِيلاطُس، كان عاوِز يَفِكّو، لَكِن اليَهود كانو يَكورِكو، و يَقولو: ”كان إنتَ فَكّيت الزّول دا، ما تَكون صاحِب لِقَيصَر. كُل البِسَوّي نَفسو مَلِك، هو ضِد قَيصَر.“ و لَمّا بِيلاطُس سِمِع الكَلام دا، هو جاب يَسُوع بَرَّه، و قَعَد عَلى كُرسي الحُكم في مَكان إسمو بِالعِبرانيَّه، جَبَّاثَا، يَعني، البَلاط. و دا كان يوم الإستِعداد لِعيد الفِصَح. الوَكِت كان السّاعَه إتناشَر تَقريباً. بَعدين بِيلاطُس قال لِليَهود: ”شوفو مَلِكُم.“ لَكِن كورَكو: ”أُخدو! أُخدو و أصلُبو!“ بِيلاطُس قال ليهُم: ”أصلُب المَلِك بِتاعكُم؟“ القُسُس الكُبار رَدّو عَليهو و قالو: ”ما عِندَنا مَلِك إلّا قَيصَر!“ بَعَد كِدا، سَلَّمو ليهُم عَشان يَصلُبوهو. و اَخَدو يَسُوع، و هو شايل صَليبو، لِلمَكان البِقولو عَنّو مَكان الجُّمجُمَه، و إسمو بِالعِبرانيَّه، جُلجُثَه. و هِناك صَلَبوهو، و صَلَبو إتنين تانيين مَعاهو، واحِد مِن هِنا و واحِد مِن هِناك، و يَسُوع في الوَسِط. و بِيلاطُس كَتَب كِتابَه و خَتَّ عَلى الصَّليب. و كان مَكتوب: ”يَسُوع النّاصِري، مَلِك اليَهود.“ و كَتير مِن اليَهود قَرو الكِتابَه دي، عَشان المَحَل الهو كان إنصَلَب فيهو كان قَريب مِن المَدينَه. و كان مَكتوب بِاللُّغات العِبرانيَّه و الإغريقي و اللّاتينيَّه. و القُسُس الكُبار قالو لِبِيلَاطُس: ”ما تَكتِب: مَلِك اليَهود، لَكِن: هو قال: أنا مَلِك اليَهود.“ بِيلاطُس رَدَّ و قال ليهُم: ”الكَتَبتو خَلاص، كَتَبتو.“ بَعدين العَساكِر، لَمّا كانو بِصلُبو يَسُوع، اَخَدو هِدومو. و قَسَموهو أربَعَة أقسام، لِكُلّو عَسكَري قِسِم. و اَخَدو القَميص كَمان. و القَميص كان بِدون خياطَه، مَعمول حِتَّه واحدَه مِن فوق لِتِحِت. و قالو بَعضَهُم لِبَعض: ”ما نَشرُطو، لَكِن نَرمي قُرعَه و نَشوف القُرعَه يَقَع لِمِنو.“ عَلَشان يَتِم المَكتوب في الكِتاب: ”قَسَّمو هِدُومي بِينُم، و عَلى قَميصي رَمو قُرعَه.“ عَشان كِدا العَساكِر عَمَلو دا. و أُم يَسُوع، و أُخُت أُمّو، مَرْيَم مَرَة كُلوبا، و مَرْيَم المَجْدَلِيَّه وَقَفو قَريب لِصَليب يَسُوع. و لَمّا يَسُوع شاف أُمّو، و التِّلميذ الكان بِحِبّو واقِف قَريب، قال لِأُمّو: ”يا سِت، شوفي إبنَك.“ و قال لِلتِّلميذ: ”شوف أُمَّك.“ و مِن السّاعَه ديك، التِّلميذ دا أخَد أُمّو لِبيتو. بَعَد كِدا، يَسُوع شاف كُلّو شي كان خَلاص. و عَشان يَتِم المَكتوب في الكِتاب هو قال: ”أنا عَطشان.“ و حَلَّه كانَت مَختوتَه مَليانَه بِخَل. و مَلو سِفِنجَه مِن الخَل، و خَتّوها عَلى عَصايَه طَويلَه، و رَفَعوها لِخَشمو. و لَمّا يَسُوع أخَد الخَل، قال: ”بِالحَق كِمِل.“ و دَنقَر رَاسو و سَلّم الرّوح. و دا كان يوم الإستِعداد. و عَشان اليوم البَعدو كان سَبِت مَخصوص، اليَهود سَألو بِيلاطُس عَشان يَكسِرو رِجلينُم و يَنَزِّلوهُم. هُم ما كانو عاوِزينُم يَخَلّو الأجسام عَلى الصَّليب في السَّبِت. و العَساكِر جو و كَسَرو رِجلين الأوَّل و التّاني مِن المَصلوبين مَعاهو. و لَمّا جو لِيَسُوع، ما كَسَرو رِجلينو، عَشان شافوهو مات. لَكِن واحِد مِن العَساكِر طَعَن جَنبو بِحَربَه، و طَوّالي دَم و مويَه طَلَعو مِن جَنبو. و هو الشّاف كِدا، شِهِد، و شَهادَتو حَق. و هو يَعرِف إنّو بِقول الحَق، عَشان إنتو تَآمِنو كَمان. و الحاجات دي حَصَلَت، عَشان يَتِم المَكتوب في الكِتاب: ”و لا واحِد مِن عِضامو بِكون مَكسور.“ و كَمان في مَحَل تاني في الكِتاب: ”هُم بِشوفو الطَّعَنوهو.“ بَعَد دا، يُوسِف المِن الرَّامَه سأل بِيلاطُس عَشان ياخُد جِسم يَسُوع. و هو كان تِلميذ لِيَسُوع، و لَكِن في السِّر عَشان الخوف مِن اليَهود. و بِيلاطُس أدّاهو الإذن. عَشان كِدا، جا و أخَد جِسم يَسُوع. و نِقُدِموس كَمان جا. و أوَّل مَرَّه لَمّا هو مَشى لِيَسُوع، كان في اللّيل. هو جاب مَعاهو بُهارات مَلَخبَتَه، مِيَّة رَطل تَقريباً. و أخَد جِسم يَسُوع، و لَفّوهو في قُماش تيل مَعَ البُهارات، زي تَرتيب اليَهود لِلدَفَن. و كانَت في جِنينَه في المَكان الصَّلَبو فيهو يَسُوع. و في الجِّنينَه دي كان في قَبُر جَديد ما خَتّو فيهو زول قَبل كِدا. و خَتّو يَسُوع هِناك، عَلَشان كان يوم الإستِعداد بِتاع اليَهود، و عَشان القَبُر كان قَريب. و في أوَّل يوم الأسبوع، مَرْيَم المَجْدَلِيَّه جات لِلقَبُر بَدري، و الدُّنيا لِسَّع ضُلُمَّه. و شافَت الحَجَر مَرفوع عَن القَبُر. و جَرَت لِسِمْعَان بُطْرُس و لِلتِّلميذ التّاني اليَسُوع كان بِحِبّو. و قالَت ليهُم: ”هُم اَخَدو السَّيد مِن القَبُر، و ما بِنَعرِف خَتّوهو وين.“ و بُطْرُس و التِّلميذ التّاني مَرَقو، و مَشو لِلقَبُر. الإتنين جَرو سَوا، لَكِن التِّلميذ التّاني فات بُطْرُس و وِصِل القَبُر في الأوَّل. و دَنقَر، و شاف القُماش مَختوت، لَكِن هو ما دَخَل. و بَعدين بُطْرُس وِصِل وَراهو، و دَخَل القَبُر. و شاف القُماش مَختوت. و المَنديل الكان مَختوت عَلى رَاسو، ما كان مَوجود مَعَ التّيل. المَنديل دا كان مَلفوف و مَختوت في مَكان بَراهو. بَعدين، التِّلميذ التّاني الجّا في الأوَّل، دَخَل، و شاف و آمَن. و هُم لِسَّع ما كانو عارفين المَكتوب في الكِتاب إنّو لازِم يَقوم مِن بين المَيِّتين. بَعَد كِدا، التِّلميذين رَجَعو لِبُيوتُم. لَكِن مَرْيَم وَقَفَت تَبكي عِند القَبُر بَرَّه. و لَمّا كانَت بِتَبكي، دَنقَرَت عَشان تَشوف جُوَّه القَبُر. و شافَت إتنين مَلائكَه في هِدوم أبيَض، قاعدين في المَكان الجِّسم كان مَختوت فيهو، واحِد في مَحَل الرّاس، و التّاني في مَحَل الكِرعين. و قالو ليها: ”يا سِت، لِشِنو بِتَبكي؟“ قالَت ليهُم: ”اَخَدو سَيِّدي، و ما عارفَه خَتّوهو وين.“ و لَمّا قالَت كِدا، عايَنَت وَراها، و شافَت يَسُوع واقِف، و ما عِرفَت هو يَسُوع. يَسُوع قال ليها: ”يا سِت، مالِك بِتَبكي؟ إنتي دايِرَه مِنو؟“ و هي إفتَكَرَت هو كان الجِّنايني. و قالَت ليهو: ”يا سَيِّد، إذا إنتَ شِلتو، قول لَي وين خَتّيتو، و أنا بَشيلو.“ يَسُوع قال ليها: ”يا مَرْيَم.“ و هي عايَنَت وَراها، و قالَت ليهو بِلُغَة اليَهود: ”رَبّوني!“ يَعني: ”يا مُعَلِّم.“ يَسُوع قال ليها: ”ما تَلمِسيني، عَشان أنا لِسَّع ما رَجَعتَ لِلأبو. لَكِن أمشي لِأخواني، و قولي ليهُم، أنا بَرجَع لِأبوي و أبوكُم، و إلَهي و إلَهكُم.“ و مَرْيَم المَجْدَلِيَّه جات، و خَبَّرَت التَّلاميذ إنَّها شافَت الرَّب، و هو قال ليها كِدا. و كان المِسا في اليوم الأوَّل في الأُسبوع. و بِسَبَب الخوف مِن اليَهود، الأبواب كانَت مَقفولَه مَكان التَّلاميذ كانو مِتلَمين فيهو. و يَسُوع جا و وَقَف في الوَسِط، و قال ليهُم: ”سَلام ليكُم.“ و لَمّا قال كِدا، وَرّاهُم إيدينو و جَنبو. و التَّلاميذ فَرَحو لَمّا شافو الرَّب. و يَسُوع قال ليهُم مَرَّه تانيَه: ”سَلام ليكُم. زي ما الأبو رَسَّلني، أنا بَرَسِّلكُم.“ و لَمّا قال كِدا، إتنَفَّس عَليهُم و قال: ”أقبَلو الرّوح القُدُس. إذا تَغفِرو لِأي زول خَطاياهو، تَكون مَغفورَه. و إذا ما تَغفِرو لِأي زول خَطاياهو، ما تَكون مَغفورَه.“ لَكِن تُومَا، واحِد مِن الإتناشَر، الإسمو التّيمان، ما كان مَعاهُم لَمّا يَسُوع جا. و التَّلاميذ التّانيين قالو ليهو: ”نِحنا شُفنا الرَّب.“ لَكِن هو قال ليهُم: ”إذا ما بَشوف مَحَل المَسامير في إيدينو، و بَخُت أصبَعي في مَحَل المَسامير، و بَخُت إيدي في جَنبو، أنا ما بآمِن.“ و بَعَد تَمانيَة أيام، التَّلاميذ كانو في البيت تاني مَرَّه، و تُومَا كان مَعاهُم. و الأبواب كانَت مَقفولَه. لَكِن يَسُوع جا و وَقَف في وَسِطُم و قال: ”سَلام ليكُم.“ بَعدين هو قال لِتُومَا: ”خُت أصبَعَك هِنا، و شوف إيديني، و مِد إيدَك، و خُتّا في جَنبي. و ما تَكون بِدون إيمان، لَكِن آمِن.“ تُومَا رَدَّ و قال ليهو: ”رَبّي و إلَهي!“ يَسُوع قال ليهو: ”عَشان إنتَ شُفتَني، يا تُومَا، آمَنتَ؟ مُبارَكين النّاس الآمَنو و ما شافو.“ و يَسُوع عَمَل عَلامات كَتيرَه تانيَه قِدّام تَلاميذو، الما مَكتوبَه في الكِتاب دا. لَكِن دي مَكتوبَه عَشان تَآمِنو إن يَسُوع هو المَسيح إبن الله. و لَمّا تَآمِنو، تَكون ليكُم حَياة بِإسمو. بَعَد كِدا، يَسُوع بِيَّن نَفسو تاني مَرَّه لِلتَّلاميذ عِند بَحَر تَبَريَّه. و هو بِيَّن نَفسو بِالطَّرِيقَه دي. سِمْعَان بُطْرُس، و تُومَا الإسمو التّيمان، و وَنَثَنَائِيل المِن قانا الجَّليل، و أولاد زَبَدي الأتنين، و إتنين تانيين مِن تَلاميذو، كانو كُلُّهُم سَوا. و سِمْعَان بُطْرُس قال ليهُم: ”أنا ماشي أصيّد.“ قالو ليهو: ”نِحنا كَمان نَمشي مَعاك.“ و مَرَقو و رِكبو المُركَب. لَكِن في اللّيلَه دي، ما مَسَكو حاجَه. و لَمّا كان الصَّباح، يَسُوع وَقَف عَلى الطَّرف. لَكِن التَّلاميذ ما كانو عارفين دا يَسُوع. و يَسُوع قال ليهُم: ”يا أولاد، عِندَكُم سَمَك؟“ رَدّو عَليهو: ”لا.“ قال ليهُم: ”أرمو الشَّبَكَه عَلى يَمين المُركَب، و إنتو بِتَلقو السَّمَك.“ و عَلى كِدا، رَمو الشَّبَكَه تاني مَرَّه، و ما قِدرو يَجُرّوها مِن كَترَت السَّمَك. و التِّلميذ داك اليَسُوع كان بِحِبّو، قال لِبُطْرُس: ”دا هو الرَّب.“ و لَمّا سِمْعَان بُطْرُس سِمِع دا هو الرَّب، لِبِس هِدومو، عَشانو كان عَريان. و رَمى نَفسو في البَحَر. لَكِن التَّلاميذ التّانيين جو في المُركَب، و هُم بِجُرّو الشَّبَكَه مَليانَه مِن السَّمَك. عَشان هُم ما كانو بَعيد مِن الأرض بِمِيَّة مِتِر تَقريباً. و لَمّا مَرَقو لِلأرض، شافو حَجَر مَختوت فوقو نار مِن الفَحَم، و فوقا سَمَك و عيش. يَسُوع قال ليهُم: ”قَدِّمو مِن السَّمَك المَسَكتوهو هَسَّع.“ و بُطْرُس مَشى لِلمُركَب، و جَر الشَّبَكَه فوق الأرض، مَليانَه مِن السَّمَك الكَبير، مِيَّه و تلاتَه و خَمسين سَمَك. و مَعَ الكَتَرَه دي، الشَّبَكَه ما إتشَرَّطَت. يَسُوع قال ليهُم: ”تَعالو، أُكلو.“ و ما في واحِد مِن التَّلاميذ قِدِر يَسألو: ”إنتَ مِنو؟“ عَشان كانو عارفين تَمام هو الرَّب. و بَعدين، يَسُوع جا و أخَد العيش، و أدّاهُم، و كِدا كَمان أدّاهُم السَّمَك. و دي هَسَّع تالِت مَرَّه يَسُوع ظَهَر فيها لِتَلاميذو، بَعَد ما قام مِن بين المَيِّتين. و لَمّا هُم فَتَرو، يَسُوع قال لِسِمْعَان بُطْرُس: ”يا سِمْعَان، إبن يُوحَنَّا، إنتَ بِتحِبّني أكتَر مِن ديل؟“ قال ليهو: ”أيوَه، يا رَب، إنتَ بِتَعرِف أنا بَحِبَّك.“ يَسُوع قال ليهو: ”أَدِّي أكِل لِخِرفاني الصُّغار.“ يَسُوع قال ليهو مَرَّه تانيَه: ”يا سِمْعَان إبن يُوحَنَّا، إنتَ بِتحِبّني؟“ قال ليهو: ”أيوَه، يا رَب. إنتَ بِتَعرِف أنا بَحِبَّك.“ قال ليهو: ”أحرِس خِرفاني.“ يَسُوع قال ليهو مَرَّه تالتَه: ”يا سِمْعَان إبن يُوحَنَّا، إنتَ بِتحِبّني؟“ و بُطْرُس كان حَزنان عَشان يَسُوع قال ليهو تالِت مَرَّه: ”إنتَ بِتحِبّني؟“ و قال ليهو: ”يا رَب، إنتَ بِتَعرِف كُلّو حاجَه. إنتَ بِتَعرِف أنا بَحِبَّك.“ و يَسُوع قال ليهو: ”أحرِس خِرفاني. الحَق الحَق أقول ليك، لَمّا كُنتَ صَغَيِر، لِبِستَ هِدومَك و مَشيت لِلمَحَل الأنتَ دايِرو. لَكِن لَمّا بِقيت عَجوز، إنتَ ماشي تَمِد إيدينَك، و واحِد بِلَبِّسَك و بِشيلَك لِلمَحَل الأنتَ ما عاوِز تَمشي ليهو.“ يَسُوع قال كِدا عَشان يَوَرّي ياتو موت كان ماشي بِمَجِّد بيهو الله. و بَعَد كِدا، قال ليهو: ”أتبَعني.“ و بُطْرُس إتلَفَت، و شاف التِّلميذ اليَسُوع بِحِبّو كان يَتبَعو. و هو زاتو الإنتَكَل عَلى صَدُر يَسُوع وَكِت العَشا و قال: ”يا سَيِّد، مِنو دا البِسَلِّمَك؟“ و لَمّا بُطْرُس شاف دا، قال لِيَسُوع: ”يا رَب، و هو، مالو؟“ يَسُوع قال ليهو: ”إذا إرادَتي إنّو يَعيش لِغايَة ما بَجي، دا شِنو ليك؟ إنتَ تَعال وَراي.“ و الكَلام دا بِقى مَعروف بين الأخوان، إنّو التِّلميذ داك ما بِموت. لَكِن يَسُوع ما قال ليهو إنّو ما بِموت، لَكِن ”إذا إرادَتي إنّو يَعيش لِغايَة ما بَجي، دا شِنو ليك؟“ دا هو التِّلميذ البِشهَد بِالحاجات دي، و الكَتَب الحاجات دي. و بِنَعرِف شَهادَتو حَق. و يَسُوع عَمَل حاجات تانيَه كَتيرَه كَمان. إذا كانَت مَكتوبَه واحدَه واحدَه، أفتَكِر الدُّنيا نَفسا ما بِتشيل الكُتُب المَكتوبَه. في الكِتاب الأوَّل، يا ثَاوُفِيلُس، كَتَبتَ عَن كُل الإبتَدا يَسُوع يَسَوّيهو و يَعَلِّم بيهو، لِغايَة اليوم الأخَدوهو لِلسَّما. و قُبّال ما أخَدوهو لِلسَّما، هو أمَر بِالرّوح القُدُس الرُّسُل الهو إختارُم. و بَعَد تَعبو، هو وَرّا نَفسو ليهُم و أدّا ليهُم بينات كَتيرَه الوَرّاهُم هو حَي. و هو كان بِبَيِّن نَفسو ليهُم مُدَّة أربَعين يوم، و بِكَلِّمُم عَن حاجات مَلَكوت الله. و وَكِت ما هو كان يَجتَمِعو مَعاهُم، أدّا ليهُم الأمر دا: ”ما تَمرُقو مِن أُورُشَلِيم، لَكِن تِستَنّو وَعَد الأبو السِّمِعتوها مِنّي. عَشان يُوحَنَّا عَمَّد بِالمويَه، و لَكِن إنتو بِتِتعَمَّدو بِالرّوح بَعَد أيام قَليلَه.“ عَلَشان كِدا، لَمَّن إتلَمّو سَوا، سألوهو و قالو: ”يا رَب، في الوَكِت دا، إنتَ بِترَجِّع المَملَكَه لِإِسْرَائِيل؟“ هو قال ليهُم: ”ما مُهِم ليكُم عَشان تَعرِفو الزَّمَن و الوَكِت الأبو ثَبَّتو بِسُلطَة نَفسو. لَكِن إنتو بِتَقبَلو قُوَّه لَمّا الرّوح القُدُس بِجي عَليكُم. و بِتكونو شاهِدين لَي في أُورُشَلِيم و في كُل اليَهُودِيَّه و السَّامِرَه لِغايَة آخِر الدُّنيا.“ و بَعَد ما قال كِدا، إترَفَع لِفوق و وَكِت هُم قاعِدين يَشوفو، سَحابَه أخَدَتو مِن عُيونُم. و وَكِت ما هُم كانو بِعاينو لِلسَّما و هو ماشي فوق، شوف! راجلين وَقَفو قَريب مِنَّهُم لابسين أبيَض. و قالو: ”يا رُجال الجَّليل، مالكُم واقفين بِتعايِنو لِلسَّما؟ يَسُوع دا نَفسو الإترَفَع مِنَّكُم لِلسَّما، هو بِرجَع زي ما شُفتوهو ماشي لِلسَّما.“ بَعَد دا، هُم رَجَعو لِأُورُشَلِيم مِن الجَّبَل الإسمو جَبَل الزّيتون، قَريب مِن أُورُشَلِيم، زي المَسافَه الزّول بِمشي يوم السَّبِت. و لَمّا دَخَلو المَدينَه، طَلَعو لِلأوضَه الفي فوق، الكانو بِقعُدو فيها. و هُم بُطْرُس و يُوحَنَّا و يَعْقُوب و أنْدَرَاوُس و فِيلُبُّس و تُومَا و بَرْثُلْمَاوُس و مَتَّى و يَعْقُوب وَلَد حَلْفَى و سِمْعَان الغَيُور و يَهُوذَا وَلَد يَعْقُوب. و ديل كُلُّهُم كانو بِستَمِرّو في الصَّلاه بِفِكر واحِد مَعَ النِّسوان و مَرْيَم أُم يَسُوع و مَعَ أخوانو. و في الأيام ديلاك قام بُطْرُس في وَسِط الأخوان. و العَدَد بِتاعُم كُلُّهُم كان مِيَّه و عِشرين زول تَقريباً. و هو قال ليهُم: ”يا أخوان، كان لازِم يَتِم المَكتوب مِن زَمان بِالرّوح القُدُس بِخَشم دَاوُد عَن يَهُوذَا القاد النّاس ديل المَسَكو يَسُوع. عَشان هو كان واحِد مِنَّنا، و كان عِندو شَرِكَه في الخِدمَه دي.“ الرّاجِل دا إشتَرى حِتَّت أرض مِن أُجرَة خَطِيَّتو، و هِناك وَقَع عَلى رَاسو و جِسمو إتشَقَّق مِن الوَسِط و بَطَنو كُلّو إدَّفَق. و داك بِقى مَعروف عِند كُل النّاس القاعِدين في أُورُشَلِيم. عَلَشان كِدا المَحَل داك نادوهو بِلُغَتُم: ”حَقَل دَما“، يَعني زِراعَة الدَّم. عَشان مَكتوب في كِتاب المَزامير: خَلّي بيتو يَكون خَربان، و ما تَخَلّي واحِد يَسكُن فيهو. و: خَلّي تاني ياخُد مَحَلّو. ”عَلَشان كِدا، مُهِم لينا نَختار واحِد مِن الرُّجال الكانو مَعانا كُل الوَكِت لَمّا الرَّب يَسُوع دَخَل و مَرَق في وَسِطنا، مِن مَعموديَّة يُوحَنَّا لِليوم الفيهو أخَدوهو مِنَّنا. عَلَشان واحِد مِنَّهُم لازِم بِكون شاهِد مَعانا بِقِيامتو.“ و قَدَّمو ليهُم إتنين: يوسُف الإسمو بَارْسَابَا يُسْتُس، و مَتِيّاس. و صَلّو و قالو: ”يا رَب البِعرِف قُلوب النّاس كُلّو، وَرّينا ياتو مِن الإتنين ديل الأنتَ إختِرتو عَلَشان ياخُد المَكان في الخِدمَه دي و شُغل الرِّسّالَه، اليَهُوذَا خَلّاها و مَشى لِلمَحَل بِتاعو.“ و في الوَكِت دا، رَمو القُرعَه بِينُم و وَقَعَت القُرعَه عَلى مَتِيّاس. عَلَشان كِدا، حَسَبوهو مَعَ الحِداشَر رَسول. و لَمّا جا يوم الخَمسين، كُلُّهُم كانو سَوا في مَكان واحِد. و طَوّالي، جا صوت مِن السَّما زي هَبوب شَديدَه، و مَلا كُل البيت الهُم كانو قاعِدين فيهو. و ظَهَرَت ليهُم لِسانات مُنقَسِمَه، زي مِن نار، و قَعَدت عَلى كُلّو واحِد مِنَّهُم. و كُلُّهُم كانو مَليانين مِن الرّوح القُدُس، و بَدو يِتكَلَّمو بِلُغات مُختَلِفَه زي ما أدّاهُم الرّوح القُوَّه عَشان يِتكَلَّمو. و كانو قاعِدين في أُورُشَلِيم رُجال بِخافو الله مِن اليَهود مِن كُلّو بَلَد الدُّنيا. و لَمّا سِمِعو الصّوت دا، ناس كُتار إتلَمّو و إتحَيَّرو، عَشان كُلّو واحِد مِنَّهُم كان بِسمَعُم يِتكَلَّمو بِلُغَتو. و إستَغرَبو و إتعَجَّبو و قالو: ”الرُّجال ديل البِتكَلَّمو، ما كُلُّهُم ناس الجَّليل؟ و كيف كُلّو واحِد مِنَّنا بِسمَعُم يِتكَلَّمو بِّاللُغَه بِتاعتو نَفسو. نِحنا ناس فَرتيَّه و ناس ماديَّه و ناس عِلاميَّه و ناس السّاكنين في العِراق و في اليَهُودِيَّه و في كَبَّدوكيَّه و في بُنتُس و في آسيا. و في فَرِيجِيَّه و في بَمْفِيلِيَّه و في مَصِر و أقسام لِيبِيَّا القَريبَه لِقيرَوان و ضُيوف مِن رُومِيَه، يَهود و مِصَدِّقين دين اليَهود. ناس كَريت و ناس العَرَب، بِنَسمَعُم يِتكَلَّمو بِلُغاتنا عَن الأعمال الكَبيرَه بِتاعَت الله.“ و كُلُّهُم كانو بِستَغرَبو و بِتحَيَّرو و يَقولو بَعضَهُم مَعَ بَعض: ”مَعني الكلام دا شِنو؟“ و تانيين كانو بِضحَكو عَليهُم و بِقولو: ”الرُّجال ديل سَكرانين.“ في الوَكِت دا، بُطْرُس وَقَف مَعَ الحِداشَر، و رَفَع صوتو و قال ليهُم: ”يا رُجال اليَهود، و القَاعِدين في أُورُشَلِيم كُلُّكُم، أسمَعو كَلامي، و خَلّيني أوَرّي ليكُم مَعنى الكَلام دا. عَشان النّاس ديل ما سَكرانين زي ما إنتو تَفتَكِرو. هَسَّع السّاعَه تِسعَه في الصَّباح بَس! لَكِن دا هو القالو النَّبي يوئيل: الله بِقول، في الأيام الأخيرَه، أنا بَكُب روحي عَلى كُل النّاس. و أولادكُم و بَناتكُم بِتنَبّو، و شَبابكُم بِشوفو رؤيا، و شُيوخكُم بِيَحلَمو. و في الأيام ديلاك أنا بَكُب روحي عَلى خَدّاميني، رُجال و نِسوان، و هُم بِتنَبّو. و أنا بَوَرّي عَجايِب في السَّما فوق و عَلامات عَلى الأرض تِحِت، دَم و نار و دُخان. الشَّمِش بِتِتغَيَّر لِلضُّلُمَّه، و القَمَر بِبقى زي دَم قُبّال ما بِجي يوم الرَّب، اليوم الكَبير و المَعروف. و كُلّو واحِد الِبِنادي بِإسم الرَّب بِكون مُخَلَّص. يا رُجال إِسْرَائِيل، أسمَعو الكِلمات دي: يَسُوع النّاصِري، هو راجِل، مَقبول عِند الله. و بيهو الله عَمَل قُوّات و عَجايِب و عَلامات بينكُم زي ما إنتو بِتَعرِفو. يَسُوع دا كان مُسَلَّم ليكُم بِتَرتيب الله الثّابِت و مَعرِفتو مِن قُبّال. و إنتو صَلَبتوهو و كَتَلتوهو بِإيدين النّاس البَطّالين. لَكِن الله قَوَّمو مِن بين المَيِّتين و فَكَّ ليهو أوجاع الموت، عَلَشان ما كان مُمكِن لِلموت أن يَمسِكو. عَشان دَاوُد قال بِخُصوصو: كُنتَ بَشوف الرَّب قِدامي دايماً، و عَلَشان هو عَلى يَميني، أنا ما بَتحَرَّك. عَلَشان كِدا، قَلبي فَرحان و لِساني مَبسوط. و جِسمي كَمان بِعِيش عَلى الرَّجاء. عَلَشان إنتَ ما بِتخَلّي نَفسي في الهاويَه، ولّا تَخَلّي قُدّوسَك يَرجَع لِلتُّراب. إنتَ وَرّيتني سِكَك الحَياة، و بِتَملاني فَرَح مَعاك. يا أخوان، خَلّيني أقول ليكُم بِسُلطَه عَن أبونا الكَبير دَاوُد. هو مات، و دَفَنوهو. و قَبرو في هِنا لِغايَة اليوم دا. لَكِن هو كان نَبي، و عِرِف الله قال ليهو بِحَلَف إنّو بِخُت عَلى كُرسيهو واحِد مِن أولادو. دَاوُد شاف الماشي يَسَوّيهو الله، و عَلَشان كِدا، هو إتكَلَّم عَن قيامَة المَسيح إنّو ما خَلّاهو في الهاويَه، و جِسمو ما رَجَع لِلتُّراب. و الله قَوَّم يَسُوع دا، و نِحنا كُلُّنا شاهِدين بِالحَقيقَه دي. عَلَشان كِدا، هو كان مَرفوع بِيَمين الله، و أخَد مِن الأبو الرّوح القُدُس الوَعَد بيهو، و كَبَّ دا، الهَسَّع بِتشوفو و بِتسمَعوهو. عَشان دَاوُد ما طَلَع فوق لِلسَّما، و لَكِن هو نَفسو قال: الرَّب قال لِرَبّي، أقعُد عَن يَميني، حَتّى أعمِل عُدوانَك بَمبَر لِرِجلينَك. عَلَشان كِدا، خَلّي كُلّو أهل بيت إِسْرَائِيل يَعرِف بِالحَق أن الله عَمَل يَسُوع دا، الإنتو صَلَبتوهو، رَب و مَسيح.“ و لَمَّن النّاس سِمِعو دا، إتحَيَّرو في قُلوبُم كَتير خَلاص، و قالو لِبُطْرُس و لِلرُّسُل التّانيين: ”بِنَعمِل شِنو، يا أخوان؟“ و بُطْرُس قال ليهُم: ”توبو و إتعَمَّدو كُلّو واحِد مِنَّكُم بِإسم يَسُوع المَسيح لِغُفران خَطاياكُم، و بِتاخُدو هَديَّة الرّوح القُدُس. عَشان ليكُم الوَعَد، و لِأولادكُم و لِكُل النّاس البَعيدين، لِكُلُّهُم البِناديهُم الرَّب إلَهنا.“ و بِكِلمات تانيَه كَتيرَه، بُطْرُس كان بِهَظِّرُم و بِبَشِّرُم و قال: ”أخلَصو مِن ناس الزَّمَن دا البَطّالين.“ و القِبلو كَلامو إتعَمَّدو، و إتلَمّو عَليهُم في اليوم داك تَلاتَة آلاف نَفَر تَقريباً. و كانو بِستَمِرّو في تَعليم الرُّسُل و الشَّرِكَه و كَسر العيش و الصَّلاه. و الخوف وَقَع عَلى كُلّو نَفس، و الرُّسُل عَمَلو عَجايِب و عَلامات كَتيرَه. و كُل المؤمِنين كانو سَوا، و كانو عِندَهُم كُل الحاجات بِتاعَتُم في مَحَل واحِد. و كانو بِبيعو حاجاتُم و بُضاعَتُم و بِقسِموهُم بين كُلُّهُم، لِأي واحِد زي ما هو كان مُحتاج. و كُلّو يوم كانو بِستَمِرّو يِتلَمّو في الهيكَل و بِكَسِّرو العيش في البُيوت، و بياكلو مَعَ بَعض بِفَرَح و قُلوب مُخلِصين. و كانو يَحمَدو الله و يَلقو نِعمَه قِدّام كُل النّاس. و الرَّب جَمَع لِلكَنيسَه كُلّو يوم الكانو بِخلَصو. و بُطْرُس و يُوحَنَّا كانو يَطلَعو لِلهيكَل لِصَلاه السّاعَه تلاتَه بَعَد الضُّهر. و ناس كانو يَشيلو راجِل أعرَج مِن بَطُن أُمّو. و كُلّو يوم كانو بِخُتّوهو عِند باب الهيكَل الإسمو الجَّميل، عَلَشان يَسأل صَدَقَه مِن الداخلين الهيكَل. و لَمّا شاف بُطْرُس و يُوحَنَّا دايرين يدخُلو الهيكَل، هو طَلَب مِنَّهُم صَدَقَه. و بُطْرُس و يُوحَنَّا عايَنو ليهو، و بُطْرُس قال ليهو: ”عايِن لينا.“ و الرّاجِل خَتَّ بالو ليهُم و إفتَكَر بياخُد مِنَّهُم حاجَه. و بُطْرُس قال: ”ما عِندي فِضَّه ولّا دَهَب، لَكِن العِندي بَدّيهو ليك. بِإسم يَسُوع النّاصِري، قوم و أمشي.“ و مَسَكو بِإيدو اليَمين، و رَفَعو. و طَوّالي رِجلينو و كَعبينو إتشَدَّدو. و هو نَطَّ و قام و بَدا يَمشي، و دَخَل مَعاهُم لِلهيكَل، و هو يَمشي و يَنوط و يَحمِد الله. و كُل النّاس شافوهو و هو ماشي و يَحمِد الله. و عِرفوهو زات الرّاجِل دا الكان بِقعُد في الباب الجَّميل بِتاعَت الهيكَل، و بِطلُب الصَّدَقَه. و هُم إستَغرَبو و إتعَجَّبو عَلَشان الحاجَه الحَصَلَت ليهو. وَكِت هو كان بِمسِك بُطْرُس و يُوحَنَّا، كُل النّاس جَرو ليهُم لِلبَراندَه الإسِما بَراندات سُلَيْمَان، و هُم مُستَغرِبين. و لَمّا بُطْرُس شاف دا، قال لِلنّاس: ”يا رُجال إِسْرَائِيل، مالكُم تِستَغرَبو مِن دا؟ و لِشِنو تَعاينو لينا زي نِحنا عَمَلنا الرّاجِل دا يَمشي بِقُوَّتنا ولّا عَشان نِحنا قِدِّيسين؟ عَشان إله إِبْرَاهِيم و إِسْحَاق و يَعْقُوب، إله أبَهاتنا مَجَّد إبنو يَسُوع. إنتو سَلَّمتوهو و نَكَرتوهو قِدّام بِيلاطُس لَمّا هو كان داير يَفِكّو. و لَكِن إنتو نَكَرتو القُدّوس البار، و طَلَبتو مِن بِيلاطُس أن يَدّيكُم راجِل كاتِل النّاس. و كَتَلتو رَئيس الحَياة القَوَّمو الله مِن بين المَيِّتين. و نِحنا شاهِدين لِداك. و الرّاجِل دا بِقى شَديد بِالإيمان بِإسم يَسُوع. و إنتو بِتشوفو و بِتَعرِفوهو. و الإيمان بِيَسُوع أدّا الرّاجِل دا العافيَه التّامَّه قِدّام كُلُّكُم. و هَسَّع، يا أخوان، أنا بَعرِف إنتو عَمَلتو دا بِدون فَهم زي رؤساكُم سَوّو كَمان. و كِدا الله عَمَل الهو كَلَّمنا بيهو مِن قُبّال بِخَشم كُل الأنبياء إنّو مَسيحو لازِم يَتعَب. عَلَشان كِدا، توبو و أرجَعو لِلَّه، فِشان الله يَشيل خَطاياكُم مِنَّكُم، و عَلَشان وَكِت الرّاحَه بِجي مِن قِدّام الرَّب. و هو يَرَسِّل المَسيح يَسُوع المُعَيَّن ليكُم مِن قُبّال. و هو لازِم يِستَنّى في السَّما لِغايَة الوَكِت بِجي، لَمّا الله يَرَجِّع كُلّو شي. و هو إتكَلَّم عَن دا بِخَشم كُلّو أنبياهو مِن زَمان. عَشان مُوسَى قال: الله رَبّكُم بِقَوِّم ليكُم مِن أخوانكُم نَبي مِتلي. لازِم تَسمَعو ليهو في كُل البِكَلِّمكُم بيهو. و كُلّو واحِد ما يَسمَع لِلنَّبي داك، يَكتُلوهو. و كِدا كُل الأنبياء مِن صَمُوئِيل و النّاس الإتكَلَّمو بَعدو، إتنَبّو بِالأيام دي. و إنتو أولاد الأنبياء و أولاد الإتِّفاق. و الله أدّى أبَهاتنا الإتِّفاق دا. هو قال لِإِبْرَاهِيم: بِأولادَك كُلّو قَبايل الأرض بِكونو مُبارَكين. عَشان الله بَعَد ما قَوَّم خَدّامو، رَسَّلو ليكُم في الأوَّل، فِشان يَبارِكُم و يَرَجِّع كُلّو واحِد مِنَّكُم مِن خَطاياهو.“ و وَكِت ما بُطْرُس و يُوحَنَّا كانو بِتكَلَّمو مَعَ النّاس، قَرَّبو ليهُم القُسُس و رَئيس الهيكَل و الصَّدّوقيين. هُم كانو زَعلانين مِن الرُّسُل، عَلَشان كانو بِعَلِّمو النّاس و بِنادوهُم في يَسُوع بِالقيامَه مِن بين المَيِّتين. و قَبَضوهُم و خَتّوهُم في السِّجِن لِليوم التّاني، عَلَشان بِقى المِسا. و كَتيرين مِن النّاس السِّمِعو الكِلمَه، آمَنو، و عَدَد الرُّجال بِقى خَمسَة آلاف تَقريباً. و في اليوم التّاني، رؤساهُم و شُيوخُم و مُعَلِّمين القانون إتلَمّو في أُورُشَلِيم، مَعَ حَنَّان، رَئيس القُسُس، و قَيَافا و يُوحَنَّا و الإِسْكَنْدَر و كُل الكانو مِن أهل بيت رَئيس القُسُس. و لَمّا جابوهُم و خَتّوهُم في الوَسِط، سألوهُم: ”بِأي قُوَّه و بِأي إسم عَمَلتو دا؟“ في الوَكِت دا، بُطْرُس و هو كان مَليان مِن الرّوح القُدُس، قال ليهُم: ”يا رؤساء النّاس و شُيوخ إِسْرَائِيل، إن كان في سؤَال اللّيلَه بِسَبَب العَمَل الكَويس العَمَلنا لِلرّاجِل الأعرَج دا بِشِنو هو بِقى كوَيس، خَلّي دا يَكون مَعروف لِكُلُّكُم و كُلّو ناس إِسْرَائِيل. بِإسم يَسُوع المَسيح النّاصِري، الإنتو صَلَبتوهو، لَكِن الله قَوَّمو مِن بين المَيِّتين، بيهو الرّاجِل دا واقِف قِدّامكُم بِعافيَه تَمام. دا هو الحَجَر الإنتو أبيتوهو، يا بَنّاين، البِقي راس الرُّكن. و ما في خَلاص بِأي واحِد تاني. عَشان في كُل الدُّنيا الله ما أدّا لِلنّاس إسِم تاني البيهو لازِم نَلقى الخَلاص.“ و لَمّا شافو شُجاعَة بُطْرُس و يُوحَنَّا، و لِقوهُم رُجال ما مِتعَلِّمين و زي أي زول تاني، هُم إتعَجَّبو. و عِرفوهُم كانو مَعَ يَسُوع. لَكِن ما دام شافو الزّول البِقي كوَيس واقِف مَعاهُم، ما قِدرو يَقولو أي شي. عَلَشان كِدا أمَروهُم يَمرُقو مِن المَجلِس، و إتكَلَّمو بِسِر مَعَ بَعض. و قالو: ”بِنَعمِل شِنو بِالراجلين ديل؟ كُل القَاعِدين في أُورُشَلِيم بِيَعرِفو هُم عَمَلو عَلامَه مَعروفَه، و ما بِنَقدَر نَنكِرا. و لَكِن عَشان ما يِتفَرتَك زِيادَه بين النّاس، خَلّونا نَهَدِّدهُم ما يِتكَلَّمو مَعَ أي واحِد مِن النّاس بَعَد دا، بِالإسِم دا.“ بَعدين نادوهُم و أمَروهُم ما يِتكَلَّمو أبَداً بِإسم يَسُوع ولّا يَعَلِّمو بيهو. و بُطْرُس و يُوحَنَّا رَدّو و قالو ليهُم: ”أحكُمو إنتو، دا هو الحَق قِدّام الله أن نَسمَع ليكُم أكتَر مِن الله؟ عَشان ما نَقدَر نَبَطِّل كَلامنا عَن الشّوفناهو و سِمِعناهو.“ و بَعَد ما هَدَّدوهُم زِيادَه، فَكّوهُم. و هُم ما قِدرو يَلقو كيف يَعمِلو ليهُم حاجَه بَطّالَه بِسَبَب النّاس. عَلَشان كُل النّاس كانو بِمَجِّدو الله عَلى الحَصَل. عَشان الرّاجِل البِقي كوَيس بِسَبَب العَلامَه دي، كان عُمرو أكتَر مِن أربَعين سَنَه. و لَمّا فَكّوهُم، بُطْرُس و يُوحَنَّا مَشو لِلنّاس بِتوعُم و خَبَّروهُم بِكُل القالو ليهُم القُسُس الكُبار و الشُّيوخ. و لَمّا سِمِعو دا، رَفَعو أصواتُم لِلَّه بِصوت واحِد و قالو: ”يا سَيِّد، إنتَ العَمَلتَ السَّما و الأرض و البَحَر و كُل الفيها. و إنتَ القُلتَ بِالرّوح القُدُس بِخَشم أبونا دَاوُد وَلَدَك: لِشِنو الأُمَم زِعِلو، و النّاس فَكَّرو بِالما ليهو فايدَه؟ مُلوك الأرض قامو، و الرّؤساء إتلَمّو سَوا ضِد الرَّب و ضِد مَسيحو. بِالحَق هِيرُودُس و بِيلاطُس البُنْطي إتلَمّو مَعَ الأُمَم و ناس إِسْرَائِيل في المَدينَه دي، ضِد خَدّامَك القُدّوس يَسُوع الأنتَ مَسَحتو، عَشان يَعمِلو كُل القُدرَتَك و إرادَتَك جَهَّزو مِن قُبّال عَلَشان يَحصَل. و هَسَّع، يا رَب، شوف تَهديدُم و أَدِّي خَدّامينَك أن يِتكَلَّمو بِكِلمَتَك بِشَجاعَه كَتيرَه. مِد إيدَك عَشان تَسَبِّب الشِّفا و العَلامات و العَجايِب بِإسم إبنَك القُدّوس يَسُوع.“ و لَمّا صَلّو، المَحَل الهُم كانو بِتلَمّو فيهو إتهَزَّ. و كُلُّهُم إتمَلو مِن الرّوح القُدُس. و كانو بِيِتكَلَّمو بِكَلام الله بِشَجاعَه. و كُل المؤمِنين كانو عِندَهُم قَلب واحِد و فِكر واحِد. و لا واحِد قال حاجَه مِن أموالو كانَت ليهو بَس، لَكِن كانو عِندَهُم كُلّو شي مَعَ بَعض. و الرُّسُل كانو بِقُوَّه عَظيمَه بِشهَدو بِقيامَة الرَّب يَسُوع، و نِعمَه عَظيمَه كانَت عَلى كُلُّهُم. و واحِد فيهُم ما كان مُحتاج، عَشان كُل الكانو عِندَهُم زِراعَه ولّا بُيوت كانو بِبيعوها و بِجيبو القُروش مِن الحاجات الباعوها، و يَخُتّوها في رِجلين الرُّسُل. و هُم قَسَمو لِكُلّو واحِد زي ما كان مُحتاج. و يُوسِف كان لَاوِي مِن قُبرُص. و الرُّسُل سَمّوهو بَرْنَابَا، يَعني إبن الشَّجاعَه. و كان عِندو زِراعَه. و باعَها و جاب القُروش و خَتّاهو في رِجلين الرُّسُل. و راجِل إسمو حَنانيّا و مَرَتو سَفّيرَه باعو جُزو مِن أموالُم. و هو أخَد جُزو مِن التَّمَن لِنَفسو، و مَرَتو عِرفَت داك. لَكِن هو جاب الباقي، و خَتّاهو في رِجلين الرُّسُل. و بُطْرُس قال: ”يا حَنانيّا، لِشِنو الشّيطان مَلا قَلبَك حَتّى تَكَضِّب عَلى الرّوح القُدُس، و تاخُد جُزو مِن تَمَن الزِّراعَه لِنَفسَك؟ قُبّال ما بِعتا، ما كان حَقَّتَك؟ و بَعَد ما بِعتا، القُروش ما كانَت حَقَّتَك؟ مالَك فَكَّرتَ في قَلبَك تَسَوّي حاجَه زي دي؟ إنتَ ما كَضَّبتَ عَلى النّاس لَكِن عَلى الله.“ و وَكِت حَنانيّا سِمِع الكَلام دا، وَقَع و مات. و خوف عَظيم وَقَع عَلى كُل السِّمِعو بِداك. و الشَّباب قامو و لَفّو جِسمو و شالوهو بَرَّه و دَفَنوهو. و بَعَد دا بِتلاتَه ساعات تَقريباً، مَرَتو دَخَلَت، و هي ما كانَت بِتَعرِف الحَصَل. و بُطْرُس قال ليها: ”قولي لَي، إنتي و راجلِك بِعتو الزِّراعَه بِالتَّمَن دا؟“ هي قالَت: ”أيوَه، بِالتَّمَن دا.“ و بُطْرُس قال ليها: ”مالكُم؟ كيف إتَّفَقتو عَلى تَجرِبَة روح الرَّب؟ شوفي! الرُّجال الدَّفَنو راجلِك عَلى الباب، و هُم بِشيلوكي بَرَّه.“ و طَوّالي وَقَعَت في رِجلينو و ماتَت. و وَكِت الشَّباب دَخَلو، لِقوها مَيِّتَه، و شالوها بَرَّه و دَفَنوها جَمب راجِلا. و خوف عَظيم وَقَع عَلى كُل الكَنيسَه و عَلى كُل السِّمِعو بِداك. و الرُّسُل عَمَلو عَلامات و عَجايِب كَتيرَه بين النّاس. و كُلُّهُم كانو بِنَفس واحدَه في بَراندات سُلَيْمَان. و ما في واحِد مِن التّانيين عِندو شَجاعَه حَتّى يوصَل بيهُم. لَكِن النّاس كانو بِحتَرِموهُم. لَكِن المؤمِنين كانو بِتلَمّو لِلرَّب أكتَر و أكتَر، عَدَد كَبير مِن الرُّجال و النِّسوان. و النّاس كانو بِجيبو العَيّانين لِلسِّكَك، و بِخُتّوهُم عَلى عَناقريب و بُروش، عَلَشان إذا مُمكِن ضُل بُطْرُس يَقَع عَلى بَعض مِنَّهُم. و عَدَد كَبير مِن النّاس أجتَمَعو في أُورُشَلِيم مِن كُل البِلاد الجَّمبو، و هُم يَشيلو العَيّانين و النّاس التَّعبانين عَشان فيهُم الشّياطين. و كُلُّهُم كانو بِلقو العافيَه. و قامو رَئيس القُسُس و كُل المَعاهو، و هُم حِزب الصَدّوقيين، و إتمَلو مِن الحَسَد. و قَبَضو عَلى الرُّسُل، و خَتّوهُم في السِّجِن البِكون لِكُل النّاس. لَكِن مَلاك الرَّب فَتَح أبواب السِّجِن في اللّيل، و مَرَّقُم، و قال ليهُم، ”أمشو، و أقيفو في الهيكَل، و كَلِّمو النّاس بِكُلّو كِلمات الحَياة دي.“ و لَمّا سِمِعو دا، دَخَلو الهيكَل في الصَّباح بَدري و إبتَدو يَعَلِّمو. و لَمّا رَئيس القُسُس و المَعاهو جو، جَمَعو المَجِلس و كُلّو شُيوخ إِسْرَائِيل. و رَسَّلو لِلسِّجِن عَشان يَجيبو الرُّسُل. و لَكِن لَمّا الضُّبّاط جو، ما لِقوهُم في السِّجِن. و عَلَشان كِدا، رَجَعو و خَبَّرو. و قالو: ”لِقينا السِّجِن مَقفول شَديد و الحارِسين واقفين قِدّام الأبواب، و لَكِن لَمّا فَتَحناها، ما لِقينا واحِد جُوَّه.“ و وَكِت رَئيس الهيكَل و القُسُس الكُبار سِمِعو الكَلام دا، كانو بِتحَيَّرو عَن البِيَحصَل بَعَد دا. في الوَكِت داك، واحِد جا و خَبَّرُم و قال: ”شوفو! الرُّجال الإنتو خَتّيتوهُم في السِّجِن، هُم واقفين في الهيكَل يَعَلِّمو النّاس.“ عَلَشان كِدا، الرَئيس مَرَق مَعَ الضُّبّاط و جاب الرُّسُل بِدون شِدَّه، عَشان كانو بِخافو مِن النّاس يِمكِن يَضرُبوهُم بِحُجار. و لَمّا جابوهُم، وَقَّفوهُم قِدّام المَجلِس و رَئيس القُسُس سألُم. و قال: ”أدّيناكُم أمر ما تَعَلِّمو بِالإسم دا. لَكِن شوفو، إنتو مَليتو أُورُشَلِيم بِتَعليمكُم، و عاوزين تَخُتّو عَلينا دَم الإنسان دا.“ و بُطْرُس و الرُّسُل التّانيين رَدّو و قالو ليهُم: ”نِحنا لازِم نَسمَع الله أكتَر مِن النّاس. إله أبَهاتنا قَوَّم يَسُوع مِن بين المَيِّتين، الإنتو كَتَلتوهو لَمّا عَلَّقتوهو عَلى الخَشَب. و الله رَفَعو بِيَمينو يَكون رَئيس و مُخَلِّص، عَشان يَدّي لِإِسْرَائِيل التّوبَه و غُفران الخَطايا. و نِحنا شاهِدين ليهو بِالحاجات دي، و نِحنا و الرّوح القُدُس الأدّاهو الله لِلبِطيعوهو.“ و لَمّا سِمِعو دا، زِعِلو شَديد، و دارو يَكتُلوهُم. لَكِن كان في راجِل فرِّيسي، إسمو غَمَالَائِيل. و هو مُعَلِّم لِلقانون، و مُحتِرَم قِدّام كُل النّاس. و قام و أمَرُم ياخدو الرُّجال بَرَّه لِوَكِت قَليل. في الوَكِت دا قال ليهُم: ”يا رُجال إِسْرَائِيل، خَلّو بالكُم بِالإنتو دايرين تَعمِلو بِالرُّجال ديل. عَشان قُبّال الأيام دي، قام توداس، القال عَن نَفسو، هو كَبير. و بَعض مِن الرُّجال إتلَمّو ليهو أُربُعمِيَّه تَقريباً. لَكِن هو كان مَكتول، و كُل المَشو وَراهو أتفَرتَقو، و كُلّو بِقو كَلام فاضي. و بَعَد دا قام يَهُوذَا، الجَّليلي، في أيام كِتابَة الأسامي، و جَرَّ بَعض النّاس وَراهو. هو كَمان كان مَكتول و كُل المَشو وَراهو إتشَتَّتو. و هَسَّع، بَقول ليكُم: كونو بَعيد مِن الرُّجال ديل و خَلّوهُم! عَشان إذا كان الفِكر دا ولّا العَمَل دا مِن النّاس، هو بِبقى و لا حاجَه. و إذا هو مِن الله، ما بِتَقدَرو تَوَقِّفو الرُّجال ديل، لَكِن بِتحارِبو الله كَمان!“ و هُم إتَّفَقو مَعاهو و نادو الرُّسُل و جَلَدوهُم. و أمَرُم ما يِتكَلَّمو بِإسم يَسُوع. و بَعَد دا خَلّوهُم يَمشو. و عَلَشان كِدا، هُم مَشو مِن المَجلِس مَبسوطين عَلَشان حَسَبوهُم مُستَحِقّين أن يَكونو ما مُحتَرمين عَشان إسمو. و كانو كُلّو يوم في الهيكَل و في البُيوت، و ما بَطَّلو أبَداً بِعَلِّمو و بِبَشِّرو بِيَسُوع المَسيح. و في الأيام ديلاك لَمَّن التَّلاميذ زادو، اليَهود البِتكَلَّمو اللُغَه الأغريقيَّه إشتَكو عَلى اليَهود الوَطَنيين عَلَشان ما كانو يِتذَكَّرو أرَامِلُم في التَّعيين كُلّو يوم. عَلَشان كِدا، الإتناشَر رُسُل نادو كُل التَّلاميذ و قالو: ”ما مُناسِب لينا نَخَلّي كِلمَة الله و نَخدِم في الطَّرَبيزات. كِدا، يا أخوان، إختارو سَبعَه رُجال مِنَّكُم المَعروفين، مَليانين بِالرّوح و الحِكمَه، و بِنَدّيهُم السُّلطَه عَلى الحاجات دي. و لَكِن نِحنا نِستَمِر في الصَّلاه و خِدمَة الكِلمَه.“ و كُل التَّلاميذ كانو مَبسوطين مِن الكَلام دا. و إختارو اسْتِفَانُوس، راجِل مَليان بِالإيمان و الرّوح القُدُس، و فِيلُبُّس و بُرُوخُورُس و نِيكَانُور و تِيمُون و بَرْمِينَاس و نِيقُولاوُس الصَّدَّق بِالدّين اليَهودي مِن أنطاكيّا. و قَدَّموهُم لِلرُّسُل، و صَلّو و خَتّو عَليهُم الإيدين. و كِلمَة الله كانَت تَكبَر، و نِمرَت التَّلاميذ بِقَت كَتيرَه جِدّاً في أُورُشَلِيم. و نِمرَه كَتيرَه مِن القُسُس كانو بِطيعُو الإيمان. و اسْتِفَانُوس كان مَليان نِعمَه و قُوَّه، و كان بِسَوّي عَجايِب و عَلامات كَبيرَه بين النّاس. و قامو جُزو مِن النّاس الكانو في نوع الدّين اليَهودي البِسَمّوهو بيت الرَّب بِتاع الحُرّين، و القَيْرَوَانِيِّين و الإسكَندَريين و المِن كِيلِيكِيَّا و آسيا، و هُم كانو يَقاوِمو اسْتِفَانُوس. و ما قِدرو يَقولو أي شي ضِد حِكمَة اسْتِفَانُوس ولّا الرّوح الكان بِتكَلَّم بيهو. و هُم أدّو هَدِيَّه بِالسِّر لِرُجال عَشان يَقولو: ”نِحنا سِمِعناهو يتكَلَّم بِكَلام بَطّال ضِد مُوسَى و ضِد الله.“ و حَرَّكو النّاس و الشُّيوخ و مُعَلِّمين القانون. و قامو و قَبَضو عَليهو، و جابوهو لِلمَجِلس. و جابو شاهِدين كِضِب البِقولو: ”الرّاجِل دا ما بِوَقِّف أبَداً يتكَلَّم كِلمات بَطّالَه ضِد المَحَل المُقَدَّس دا و ضِد القانون. عَشان سِمِعناهو يَقول يَسُوع النّاصِري دا بِخَرِّب المَحَل دا و بِغَيِّر العادات السَّلَّما لينا مُوسَى.“ و كُل القَاعِدين في المَجِلس عايَنو ليهو، و شافو وَشّو كان زي وَش مَلاك. و رَئيس القُسُس قال: ”كَلام المُشتَكين هو الحَق؟“ و قال: ”يا أخوان و أبَهات، أسمَعو! إلَه المَجد ظَهَر لِأبونا إِبْرَاهِيم، و هو في عِراق قُبّال ما سَكَن في حاران. و قال ليهو: أمرُق مِن بَلَدَك و مِن أهلَك، و أمشي لِلبَلَد الأنا بَوَرّيك. و كِدا، مَرَق مِن بَلَد الكَلدانيين و سَكَن في حاران. و مِن هِناك بَعَد موت أبوهو، الله رَسَّلو لِلبَلَد دي الإنتو هَسَّع ساكنين فيها. و ما أدّاهو فيها ميراث ولّا حِتَّت أرض عَشان يَخُت رِجلو فوقا. لَكِن الله قال بِالحَق هو يَدّيهو مُلك ليهو و لِأولادو بَعدو. و في الوَكِت داك إِبْرَاهِيم ما كان عِندو وَلَد. و الله إتكَلَّم كِدا و قال: أولادَك بِكونو زي ناس مِن بَلَد تانيَه في بَلَد غَريبَه، و هِناك بِكونو عَبيد و بِظلِموهُم أُربُعمِيَّة سَنَه. و أنا بَحكُم عَلى الأُمَّه البِتَعمِلُم عَبيد، يَقول الرَّب. و بَعَد دا، بِيَمرُقو و بيَعبُدوني في المَحَل دا. و هو أدّا إِبْرَاهِيم إتِّفاق الطَّهور. و كِدا إِبْرَاهِيم وِلِد إِسْحَاق، و طَهَّرو اليوم التّامِن. و إِسْحَاق وِلِد يَعْقُوب و يَعْقُوب وِلِد رؤساء الأبَهات الإتناشَر. و رؤساء الأبَهات حَسَدو يُوسِف و باعوهو لِمَصِر. و لَكِن الله كان مَعاهو، و خَلَّصو مِن كُلّو أتعابو، و أدّاهو نِعمَه و حِكمَه قِدّام فِرعون مَلِك مَصِر. و فِرعون عَمَلو رَئيس عَلى مَصِر و عَلى كُلّو أهل بيتو. بَعدين جا جوع في كُلّو مَصِر و كَنعان، و تَعب شَديد. و أبَهاتنا ما قِدرو يَلقو أكِل. و لَمّا يَعْقُوب سِمِع في دُرَه في مَصِر، هو رَسَّل أبَهاتنا أوَّل مَرَّه. و في المَرَّه التّانيَه، يُوسِف كَلَّم أخوانو عَن نَفسو هو مِنو. و يُوسِف وَرّا أهلو لِفِرعون. و بَعَد دا يُوسِف رَسَّل و نادى يَعْقُوب أبوهو و كُلّو أهلو، خَمسَه و سَبعين زول عَشان يَجو ليهو. و يَعْقُوب نَزَل لِمَصِر و مات هِناك، هو و أبَهاتنا. و شالوهو لِشَكيم، و دَفَنوهُم في القَبُر الإِبْرَاهِيم إشتَراهو بِتَمَن فِضَّه مِن أولاد حَمور في بَلَد شَكيم. و لَمّا الوَكِت قَرَّب عَشان الله يَتِم كَلامو لِإِبْرَاهِيم، عَدَد النّاس كان بِزيد، و هُم بِقو كَتيرين جِدّاً في مَصِر، لِغايَة ما قام مَلِك تاني الما عِرِف يُوسِف. المَلِك دا غَشّا جِنسَنا، و ظَلَم أبَهاتنا، حَتّى رَمو أطفالُم بَرَّه عَلَشان يَموتو. و في الوَكِت داك، مُوسَى إتوَلَد، و كان جَميل جِدّاً، و حَفَظوهو تلاتَه شُهور في بيت أبوهو. و لَمّا خَلّوهو، بِت فِرعون مَلِك مَصِر أخَدَتو، و رَبَّتو لِنَفسا زي وَلَدا. و مُوسَى إتعَلَّم كُلّو حِكمَة المَصريين، و كان عِندو قُدرَه في كَلامو و أعمالو. و وَكِت عُمر مُوسَى بِقى أربَعين سَنَه، دَخَل في قَلبو يَزور أخوانو بَني إِسْرَائِيل. و شاف واحِد مِنَّهُم كان مَظلوم، و قام ساعَدو و إنتَقَم لِلمَظلوم، و ضَرَب المَصري. و مُوسَى إفتَكَر أخوانو بِيَفهَمو أن الله بِدّيهُم الخَلاص بِإيدو. لَكِن هُم ما فِهمو. و في اليوم التّاني جا ليهُم، و هُم يَشاكلو بَعضَهُم مَعَ بَعض. و جَرَّب يَوَرّيهُم طَريق السَّلام و قال: يا رُجال، إنتو أخوان، لِشِنو تَشاكلو بَعضَكُم مَعَ بَعض؟ لَكِن الكان بِشاكِل جارو لَزَّ مُوسَى و قال: مِنو سَوّاك رَئيس و قاضي عَلينا؟ إنتَ عاوِز تَكتُلني مِثِل ما كَتَلتَ المَصري أُمبارِح؟ و مُوسَى هَرَب بِسَبَب الكَلام دا، و بِقى زول غَريب في بَلَد مَديان. و هِناك وِلِد وَلَدين. و لَمّا تَمَّت ليهو أربَعين سَنَه، مَلاك الرَّب ظَهَر لِمُوسَى في خَلا جَبَل سينا في نار في شَجَرَه. و لَمّا مُوسَى شاف دا، إتعَجَّب مِن المَنظَر. و وَكِت ما هو قَرَّب عَشان يَعايِن فيها، جا ليهو صوت الرَّب: أنا إلَه أبَهاتَك، إلَه إِبْرَاهِيم و إِسْحَاق و يَعْقُوب. و مُوسَى رَجَف و خاف يَعايِن. و الرَّب قال ليهو: أقلَع جِزَمَك مِن رِجلينَك، عَشان المَحَل الأنتَ واقِف فوقو، دي أرض مُقَدَّسَه. أنا بِالحَق شُفتَ ظُلم النّاس بِتاعي في مَصِر، و سِمِعتَ صوت الشَّكوى، و نَزَلتا عَشان أخَلِّصُم. تَعال هَسَّع. أنا بَرَسِّلَك لِمَصِر. دا مُوسَى الهُم كانو نَكَروهو لَمّا قالو: مِنو عَمَلَك رَئيس و قاضي لينا؟ هو الإنسان الرَّسَّلو الله عَشان يَكون رَئيس و مُخَلِّص بِمُساعدَة المَلاك الظَّهَر ليهو في الشَّجَرَه. هو طَلَّعُم مِن مَصِر، و عَمَل عَجايِب و عَلامات في بَلَد مَصِر، و في البَحَر الأحمَر، و في الخَلا مُدَّة أربَعين سَنَه. دا مُوسَى القال لِبَني إِسْرَائِيل: الله بِقَوِّم ليكُم نَبي زَيي مِن أخوانكُم. و دا هو الكان مَعَ الكَنيسَه في الخَلا، و مَعَ المَلاك الكَلَّمو في جَبَل سينا، و مَعَ أبَهاتنا. و أخَد كِلمات حَيَّه عَشان يَدّيها لينا. لَكِن أبَهاتنا أبو يَسمَعوهو و رَفَضوهو نَفسو، و إبتَدو يَفَكِّرو في الحاجات الفي مَصِر. و قالو لِهَارُون: أعمِل لينا أصنام البِمشو قِدّامنا. و مُوسَى دا الطَّلَّعنا مِن بَلَد مَصِر، ما بِنَعرِف حَصَل ليهو شِنو! و هُم عَمَلو عِجِل في الأيام ديلاك، و قَدَّمو ضَبيحَه لِلصَّنَم، و كانو مَبسوطين بِأعمال إيدينُم. لَكِن الله دَوَّر مِنَّهُم و خَلّاهُم يَعبُدو نُجوم السَّما، زي ما هو مَكتوب في كِتاب الأنبياء: إنتو قَدَّمتو لَي ضَبايح و تَقدِمات أربَعين سَنَه في الخَلا، يا بيت إِسْرَائِيل؟ لا، لَكِن شِلتو خيمَة مُولُوك، و نَجمَة الصَّنَم بِتاعكُم رَمفان، الأصنام السَّوّيتوها عَشان تَعبُدوها. عَلَشان كِدا، بَرَسِّلكُم بَعيد لِغادي بَلَد بابِل. و أبَهاتنا كانو عِندَهُم خيمَة الشَّهادَه في الخَلا. و زي ما الله أدّا أمر لِمُوسَى، هو عَمَلو زي الوَرّاهو الله. و بَعدين أبَهاتنا لَمّا اَخَدو الخيمَه، جابوها مَعاهُم لَمّا دَخَلو الأرض مَعَ يَشُوع. و اَخَدو الأرض مِن الأُمَم، و الله طَرَدُم قِدّامُم. و الخيمَه إستَنَّت هِناك لِغايَة أيام دَاوُد، اللِقى نِعمَه قِدّام الله، و طَلَب إذِن عَشان يَلقا بيت لِإلَه يَعْقُوب. لَكِن سُلَيْمَان بَنى ليهو بيت. لَكِن الله العالي ما بِسكُن في هياكِل السَّوَّتا الإيدين. زي ما يَقول النَّبي: السَّما كُرسي لَي، و الأرض بَمبَر لِرِجليني. نوع البيت البِتَبنو لَي بِكون شِنو؟ يَقول الرَّب، و مَحَل راحَتي بِكون وين؟ إيدي ما عَمَلَت الحاجات دي كُلّو؟ يا ناس رؤسكُم قَوّيين و قُلوبكُم بَطّالين و إضنينكُم ما بِسمَعو كَلام الحَق! إنتو بِتقاوِمو الرّوح القُدُس دايماً. زي ما أبَهاتكُم كانو بيَعمِلو، إنتو كَمان بِتَعمِلو. ياتو نَبي مِن الأنبياء، أبَهاتكُم ما طَرَدوهو؟ و هُم كَتَلو النّاس الإتنَبّو مِن قُبّال بِالبار الجّاي. و هَسَّع إنتو نَكَرتوهو و كَتَلتوهو. إنتو الأخَدتو القانون بِإيد المَلائكَه و ما حَفَظتوهو.“ و لَمّا سِمِعو دا، كانو زَعلانين كَتير خَلاص، و عَضو بِسِنونُم عَليهو. لَكِن اسْتِفَانُوس كان مَليان بِالرّوح القُدُس، و عايَن لِلسَّما، و شاف مَجد الله و يَسُوع واقِف عَن يَمين الله. و قال: ”شوفو، أنا بَشوف السَّما مَفتوحَه، و إبن الإنسان واقِف عَن يَمين الله.“ و هُم كورَكو بِصوت عالي، و قَفَلو إضنينُم، و هَجَمو عَليهو بِفِكر واحِد. و رَموهو بَرَّه مِن المَدينَه و إبتَدو يَرموهو بِحُجار. و الشّاهِدين خَتّو هِدُومُم في رِجلين شاب إسمو شَاوُل. و وَكِت ما كانو بِرمو اسْتِفَانُوس بِحُجار، هو كان بِصَلّي و يَقول: ”يا رَب يَسُوع، أقبَل روحي.“ و بَعَد دا، وَقَع عَلى رُكبَتيهو و كورَك بِصوت عالي: ”يا رَب، ما تَخُت الخَطيَّه دي لِحِسابُم.“ و لَمّا قال كِدا، هو نام. و شَاوُل كان رَضيان بِكَتَلو. و حَصَل في اليوم داك تَعب كَتير عَلى الكَنيسَه الفي أُورُشَلِيم. و كُلُّهُم إلّا الرُّسُل إتشَتَّتو في بِلاد اليَهُودِيَّه و السَّامِرَه. و رُجال بِخافو الله دَفَنو اسْتِفَانُوس، و بَكو ليهو بِكى شَديد. و لَكِن شَاوُل كان بِخَسِّر الكَنيسَه، و بِدخُل البِيوت، و بِجُر الرُّجال و النِّسوان، و بِخُتُّم في السِّجِن. عَلَشان كِدا، هُم الإتشَتَّتو، كانو بِبَشِّرو بِالكِلمَه في كُلّو مَكان الهُم سافَرو ليهو. و فِيلُبُّس نَزَل لِمَدينَه مِن السَّامِرَه، و كان بِبَشِّرُم بِالمَسيح. و النّاس الكَتيرين كانو بِخَلّو بالُم بِقَلِب واحِد لِلبِقولو فِيلُبُّس لَمّا سِمِعوهو و شافو العَجايِب الهو عَمَلا. و أرواح نَجِسَه طَلَعو مِن ناس كُتار، و كورَكو كوراك شَديد. و كَتير مِن المَفلوجين و العُرُج لِقو العافيَه. و النّاس الفي المَدينَه دي بِقو مَبسوطين جِدّاً. و لَكِن كان في راجِل في المَدينَه إسمو سيمون الكان بيَعمِل عَمَل السِّحر قُبّال دا، و ناس السَّامِرَه إستَغرَبو مِنّو. و هو قال إنّو زول كَبير. و كُل النّاس مِن الصَّغَير لِلكَبير خَلّو بالُم ليهو، و كانو بِقولو: ”الرّاجِل دا، هو قُوَّة الله المُسَمّى العَظيمَه.“ و كانو يَخُتّو بالُم ليهو عَشانو كان يَعَجِّبُم بِسِحرو مِن زَمَن طَويل. و لَكِن لَمّا صَدَّقو فِيلُبُّس، و هو بِبَشِّرُم بِمَلَكوت الله و بِإسم يَسُوع المَسيح، هُم إتعَمَّدو، رُجال و نِسوان. و سيمون نَفسو آمَن. و بَعَد ما إتعَمَّد، كان بِستَمِر مَعَ فِيلُبُّس دايماً. و إستَغرَب لَمّا شاف العَلامات الكَبيرَه و العَجايِب. و وَكِت ما الرُّسُل الفي أُورُشَلِيم سِمِعو ناس السَّامِرَه قِبلو كِلمَة الله، هُم رَسَّلو ليهُم بُطْرُس و يُوحَنَّا. و هُم نَزَلو و صَلّو فِشانُم عَلَشان يَقبَلو الرّوح القُدُس. عَلَشان الرّوح القُدُس لِسَّع ما جا عَلى واحِد مِنَّهُم. هُم كانو إتعَمَّدو بَس بِإسم الرَّب يَسُوع. و بَعَد دا، بُطْرُس و يُوحَنَّا خَتّو إيدينُم عَليهُم، و هُم قِبلو الرّوح القُدُس. و وَكِت ما سيمون شاف أن الرّوح جا ليهُم لَمّا الرسُل خَتّو إيدينُم عَليهُم، هو قَدَّم ليهُم قُروش. و قال: ”أدّيني أنا كَمان السُّلطَه دي، عَشان كُلّو واحِد البَخُت إيديني عَليهو بِقبَل الرّوح القُدُس.“ و بُطْرُس قال ليهو: ”خَلّي قُروشَك تَخسَر مَعاك، عَلَشانَك إفتَكَرتَ تَقدَر تَشتَري هَديَّة الله بِقُروش. إنتَ ما عِندَك قِسم ولّا جُزو في الحاجَه دي، عَلَشان قَلبَك ما صَحيح قِدّام الله. عَلَشان كِدا، توب مِن خَطيَّتَك دي، و صَلّي لِلرَّب. يِمكِن هو بِغفِر ليك فِكر قَلبَك. عَشان أنا بَشوفَك عِندَك قَلب مُر، و مَربوط بِالخَطيَّه.“ و رَدَّ سيمون و قال: ”صَلّو إنتو لِلرَّب فِشانّي، عَلَشان ما بِيَحصَل لَي أي شي زي ما قُلتَ لَي.“ بَعدين لَمّا أدّو الشَّهادَه لِكِلمَة الرَّب، و خَبَّرو بيها، بُطْرُس و يُوحَنَّا رَجَعو لِأُورُشَلِيم. و وَكِت ما هُم في السِّكَّه، كانو بِبَشِّرو بِالإنجيل في حِلَل كَتيرَه مِن السّامِريّين. و مَلاك الرَّب كَلَّم فِيلُبُّس و قال: ”قوم و أمشي لِلجَّنوب، لِلسِّكَّه البِتَنزِل مِن أُورُشَلِيم لِغَزَّه، و هي في الخَلا.“ و هو قام و مَشى. و شوف! راجِل حَبَشي خِصي، و وَزير لِكَنداكَه، مَلِكَة الحَبَشَه قابَلو. و هو كان مَسؤول عَلى كُلّو أموالا، و كان جا لِأُورُشَلِيم عَشان يَعبُد الله. و كان بِرجَع، و قاعِد في عَرَبيتو، و هو يَقرا في إِشَعْيَاء النَّبي. و الرّوح قال لِفِيلُبُّس: ”قَرِّب و أمشي مَعَ العَرَبيَه دي.“ و فِيلُبُّس جَرى ليهو، و سِمِعو يَقرا في إِشَعْيَاء النَّبي. و قال: ”بِتَفهَم البِتَقراهو؟“ و قال: ”كيف بَقدَر أفهَم إن كان واحِد ما بِعَلِّمني؟“ و طَلَب لِفِيلُبُّس أن يَطلَع و يَقعُد مَعاهو. و دا هو فَصِل الكِتاب الكان بِقراهو: ”زي ما يَسوقو الخَروف لِلضَّبيحَه، و زي حَمَل يَسكُت قِدّام البِقطَع شَعرو، كِدا ما فَتَح خَشمو. و هو خَتَّ نَفسو تِحِت، و هُم شالو مِنّو العَدل. و مِنو بِقدَر يتكَلَّم عَن جِيلو؟ عَشان حَياتو أخَدوها مِن الأرض.“ و رَدَّ الخِصي و قال لِفِيلُبُّس: ”قول لَي، مِن فَضلَك، النَّبي دا يتكَلَّم عَن مِنو؟ عَن نَفسو ولّا عَن راجِل تاني؟“ و فِيلُبُّس فَتَح خَشمو، و إبتَدا مِن الفَصِل دا، و بِشَّرو بِيَسُوع. و وَكِت ما هُم ماشين في السِّكَّه، جو لِمَحَل فيهو مويَه. و الخِصي قال: ”شوف! في مويَه! ما مُمكِن أتعَمَّد؟“ و فِيلُبُّس قال: ”كان بِتآمِن بِكُلّو قَلبَك، مُمكِن ليك.“ و الخِصي رَدَّ و قال ليهو: ”أنا بآمِن أن يَسُوع المَسيح هو إبن الله.“ و أمَرُم يَوَقِّفو العَرَبيَه. و هُم الإتنين، فِيلُبُّس و الخِصي، نَزَلو لِلمويَه، و دَخَلو فيها و فِيلُبُّس عَمَّد الخِصي. و لَمّا طَلَعو مِن المويَه، طَوّالي روح الرَّب أخَد فِيلُبُّس مِن المَحَل دا، و الخِصي ما شافو بَعَد دا. و مَشى في سِكّتو مَبسوط جِدّاً. لَكِن فِيلُبُّس كان مَوجود في بَلَد أَشْدُود و مَشى بِكُل البِلاد، و كان بِبَشِّر لِغايَة ما وِصِل لِقَيْصَرِيَّه. لَكِن شَاوُل كان لِسَّع يتكَلَّم تَهديد، و كَلام كَتَل ضِد تَلاميذ الرَّب. و هو مَشى لِرَئيس القُسُس. و طَلَب مِنّو جَوابات لِبِيوت الرَّب بِتاعَت اليَهود في دِمَشق، عَشان إذا لِقى ناس الطَّريق، رُجال و نِسوان، بِسوقُم مَربوطين لِأُورُشَلِيم. و في سَفَرو، لَمّا قَرَّب مِن دِمَشق، طَوّالي إتنَوَّر قِدّامو نور مِن السَّما. و وَقَع عَلى الأرض، و سِمِع صوت يَقول ليهو: ”يا شَاوُل، يا شَاوُل، لِشِنو بِتَطرُدني؟“ و شَاوُل قال: ”إنتَ مِنو، يا سَيِّد؟“ و قال: ”أنا يَسُوع الأنتَ بِتَطرُدو. قوم و أدخُل المَدينَه، و بِقولو ليك اللازِم تَعمِلو.“ و الرُّجال المِسافِرِين مَعاهو وَقَفو ساكِتين، عَشان سِمِعو الصّوت، لَكِن ما شافو زول. و شَاوُل قام مِن الأرض، و لَمَّن فَتَح عُيونو، ما قِدِر يَشوف حاجَه. و قادوهو بِإيدو، و جابوهو لِدِمَشق. و قَعَد تلاتَه أيام و ما شاف، و ما أكَل، و ما شِرِب. و كان في دِمَشق تِلميذ إسمو حَنانيّا. و الرَّب قال ليهو في رؤيا: ”يا حَنانيّا!“ و هو قال: ”أهو أنا، يا رَب!“ و الرَّب قال ليهو: ”قوم و أمشي لِشارِع إسمو الدُّغري، و أسأل في بيت يَهُوذَا عَن راجِل مِن طَرْسُوس إسمو شَاوُل. و شوف! هو قاعِد بِصَلّي. و شاف في رؤيا راجِل إسمو حَنانيّا بِدخُل و بِخُت إيدينو فوقو، عَشان يَفتَح عُيونو، عَشان يَشوف.“ و لَكِن حَنانيّا رَدَّ و قال: ”يا رَب، سِمِعتَ مِن كَتيرين عَن الرّاجِل دا، بِكُل الحاجات البَطّالَه الهو عَمَل لِقِدِّسينَك في أُورُشَلِيم. و كَمان عِندو إذِن مِن القُسُس الكُبار عَشان يَجي هِنا و يَقبُض كُل البِنادو بِإسمَك.“ لَكِن الرَّب قال ليهو: ”أمشي، عَشان هو بُرمَه مُختارَه لِيَشيل إسمي قِدّام الأُمَم و المُلوك و بَني إِسْرَائِيل. و أنا بَوَرّيهو كَم لازِم يِتوَجَّع عَشان إسمي.“ و حَنانيّا مَرَق و دَخَل البيت، و خَتَّ إيدينو فوقو و قال: ”يا أخي شَاوُل، الرَّب يَسُوع الظَّهَر ليك في السِّكَّه في الوَكِت الأنتَ جاي هِنا، هو رَسَّلني عَشان عُيونَك بِتكون مَفتوحَه، و إنتَ بِتكون مَليان بِالرّوح.“ و في الوَكِت دا، وَقَع مِن عُيونو حاجَه زي قِشِر، و قِدِر يَشوف مَرَّه تانيَه. و قام و إتعَمَّد. و أكَل و بِقى شَديد. و قَعَد مَعَ التَّلاميذ الفي دِمَشق أيام قَليلَه. و طَوّالي إبتَدا يَبَشِّر في بِيوت الرَّب بِيَسُوع إنّو إبن الله. و كُل السِّمِعوهو إتعَجَّبو و قالو: ”دا هو الكان بِكتُل في أُورُشَلِيم البِنادو بِالإسِم دا؟ و هو جا هِنا عَشان يَسوقُم مَربوطين لِلقُسُس الكُبار.“ لَكِن شَاوُل كان بِزيد في قُوَّه، و يَحَيّير اليَهود السّاكنين في دِمَشق، و يَثَبِّت إنّو دا هو المَسيح. و لَمّا تَمَّت أيام كَتيرَه، اليَهود إتَّفَقو بِالسِّر عَلَشان يَكتُلوهو. و لَكِن شَاوُل عِرِف السِّر بِتاعُم. و هُم كانو بِحرُسو الأبواب ليل و نَهار عَشان يَكتُلوهو. و تَلاميذو أخَدوهو في اللّيل و نَزَّلوهو مِن الحيطَه في قُفَّه. و لَمّا جا لِأُورُشَلِيم، جَرَّب يَجتَمِعو مَعَ التَّلاميذ. لَكِن كُلُّهُم كانو بِخافو مِنّو، و ما صَدَّقو هو تِلميذ. لَكِن بَرْنَابَا اَخَدو و جابو لِلرُّسُل، و حَكى ليهُم كيف شَاوُل شاف الرَّب في السِّكَّه، و إنّو الرَّب كَلَّمو، و كيف بَشَّر بِإسم يَسُوع في دِمَشق بِدون خوف. و شَاوُل كان بِدخُل و بِمرُق مَعاهُم في أُورُشَلِيم، و بِبَشِّر بِإسم الرَّب بِدون خوف. و كان بِتكَلَّم و بِتفاكَر اليَهود الكانو مِن ناس إغريقيين، لَكِن هُم جَرَّبو يَكتُلوهو. و لَمّا الأخوان عِرفو دا، جابوهو لِقَيْصَرِيَّه، و رَسَّلَوهو لِطَرْسُوس. و كِدا، ناس الكَنيسَه في كُل اليَهُودِيَّه و الجَّليل و السَّامِرَه كان عِندَهُم سَلام و بِقو شُداد. و كانو يَخافو الرَّب، و عِندَهُم تَعزيَه في الرّوح القُدُس، و كانو يَزيدو في العَدَد. و لَمّا بُطْرُس كان بِسافِر في البِلاد دي كُلّو، هو مَشى كَمان لِلقِدِّسين السّاكنين في لُدَّه. و لِقى هِناك راجِل مَفلوج إسمو إينياس، كان راقِد عَلى عَنقَرِيبو مِن مُدَّة تَمانيَه سِنين. و بُطْرُس قال ليهو: ”يا إينياس، يَسُوع المَسيح يَشفيك. قوم، و فَرِّش عَنقَرِيبَك.“ و هو قام طَوّالي. و كُل السّاكنين في لُدَّه و ساروون شافوهو و رَجَعو لِلرَّب. و كانَت في يَافَا تِلمِيذَه إسِما طابيثا، و مَعناهو غَزالَه. و هي كانَت مَليانَه بِالأعمال الطَّيبَه، و كانَت بِتساعِد المَساكين. و حَصَل في الأيام ديلاك، هي بِقَت عَيّانَه و ماتَت. و غَسَّلوها و خَتّوها في أوضَه في فوق. و لُدَّه كانَت قَريبَه مِن يَافَا. و التَّلاميذ سِمِعو بُطْرُس كان في لُدَّه. و هُم رَسَّلو ليهو راجلين و سألوهو كَتير و قالو: ”مِن فَضلَك، تَعال قَوام.“ و بُطْرُس قام و مَشى مَعاهُم. و لَمّا وِصِل، طَلَعو بيهو لِلأوضَه الفي فوق. و كُل الأرامِل وَقَفو يَبكو، و يَوَرّوهو التّيبان و الهِدوم طابيثا كانَت بِتَعمِلا و هي مَعاهُم. و بُطْرُس مَرَّق كُلُّهُم بَرَّه و رَكَع عَلى رُكبَتيهو و صَلّى. و بَعَد دا، إتلَفَت لِلجِّسِم و قال: ”يا طابيثا، قومي.“ و هي فَتَحَت عُيونا، و لَمّا شافَت بُطْرُس، قَعَدت. و هو أخَدا بِإيدا و رَفَعا، و نادى القِدِّسين و الأرامِل، و قَدَّما ليهُم حَيَّه. و الخَبَر مَشى في كُلّو يَافَا، و كَتيرين آمَنو بِالرَّب. و بُطْرُس قَعَد في يَافَا أيام كَتيرَه مَعَ راجِل بِشتَغِل في الجُّلود، إسمو سِمْعَان. و كان في قَيْصَرِيَّه راجِل إسمو كَرْنِيلِيُوس، رَئيس الجّيش مِن القِسم الإسمو الإيطاليَّه. و هو كان راجِل صالِح، و هو و كُلّو بيتو كانو بِخافو الله، و هو كان بِدّي صَدَقَات كَتيرَه لِلنّاس، و بِصَلّي في كُلّو وَكِت. و يوم مِن الأيام السّاعَه تلاتَه بَعَد الضُّهر تَقريباً، هو شاف، في رؤيا بَايِنَه، مَلاك الله يَدخُل ليهو و يَقول ليهو: ”يا كَرْنِيلِيُوس!“ و كَرْنِيلِيُوس عايَن ليهو، و خاف شَديد، و قال: ”داير شِنو، يا سَيِّد؟“ و المَلاك قال ليهو: ”صَلَواتَك و صَدَقَاتَك طَلَعَت تَذكار قِدّام الله. و هَسَّع، رَسِّل رُجال لِيَافَا، و جيب راجِل إسمو سِمْعَان اليَسَمّوهو بُطْرُس. و هو قاعِد مَعَ سِمْعَان الشَّغال في الجُّلود، و بيتو عِند البَحَر.“ و بَعَد ما المَلاك الإتكَلَّم مَعاهو مَرَق، كَرْنِيلِيُوس نادى إتنين مِن خَدّامينو و عَسكَري طَيب مِن الكانو يَخدِموهو دايماً. و خَبَّرُم بِكُلّو حاجَه، و رَسَّلُم لِيَافَا. و في اليوم البَعدو، لَمّا هُم كانو في السِّكَّه، و قَرَّبو مِن المَدينَه، بُطْرُس طَلَع لِلسَّقِف عَشان يَصَلّي السّاعَه إتناشَر تَقريباً. و هو بِقى جَعان و كان عاوِز ياكُل. و لَمّا كانو يَحَضِّرو ليهو الأكِل، هو شاف رؤيا. و شاف السَّما مَفتوحَه، و حاجَه زي مِلايَه كَبيرَه تَنزِل لِلأرض، مَربوطَه بِأربَعَه أركان. و كان فيها مِن كُل الحَيوانات العِندَهُم أربَعَه أقدام و دَبايب الأرض و طُيور السَّما. و شوف صوت قال ليهو: ”قوم، يا بُطْرُس، اَضبَح و أُكُل.“ لَكِن بُطْرُس قال: ”أبَداً، يا رَب، أنا ما أكَلتَ شي نَجِس ولّا ما نَضيف بِالمَرَّه.“ و الصّوت جا ليهو تاني مَرَّه: ”الشّي النَّضَّفو الله، ما تَقول هو نَجِس.“ و حَصَل كِدا تلاتَه مَرّات، و بَعَد دا طَوّالي رَفَعوها لِلسَّما. و وَكِت ما بُطْرُس كان بِفَكِّر في نَفسو عَن مَعنى الرؤيَه دي الشّافا، أهو! الرُّجال الكرنيليوس رَسَّلُم وِصلو. و هُم سَألو عَن بيت سِمْعَان، و وَقَفو قِدّام الباب. و نادو و سَألو إذا كان سِمْعَان الإسمو بُطْرُس قاعِد هِناك. و لَمَّن بُطْرُس كان بِفَكِّر في الرّؤيَه، الرّوح قال ليهو: ”شوف، تلاتَه رُجال يَفَتِّشو عَليك. عَلَشان كِدا قوم، و أنزِل، و أمشي مَعاهُم، و ما تَشِك، عَشان أنا رَسَّلتَهُم.“ و بُطْرُس نَزَل لِلرُّجال و قال: ”شوفو! أنا هو الإنتو تَطلُبوهو. جيتو لِشِنو؟“ و الرُّجال قالو: ”جينا مِن كَرْنِيلِيُوس، رَئيس الجّيش. هو راجِل صالِح و يَخاف الله. و كُل اليَهود بِشهَدو ليهو. و مَلاك مُقَدَّس جا ليهو، و حَزَّرو أن يَناديك عَشان تَجي لِبيتو، و هو يَسمَع كَلام مِنَّك.“ و عَلَشان كِدا، بُطْرُس عَزَمُم يدخُلو البيت و يَكونو ضُيوفو. و في الصَّباح بُطْرُس قام و مَرَق مَعاهُم، و بَعض مِن الأخوان مِن يَافَا كَمان مَشو مَعاهو. و في اليوم البَعدو، دَخَلو قَيْصَرِيَّه. و كان كَرْنِيلِيُوس بِنتَظِرُم، و نادى أقاريبو و أصحابو المَخصوصين. و لَمّا بُطْرُس دَخَل، كَرْنِيلِيُوس قابَلو، و رَكَع في رِجلينو، و عَبَدو. لَكِن بُطْرُس رَفَعو و قال: ”قوم، أنا كَمان إنسان.“ و بَعَد دا دَخَل، و هو يتكَلَّم مَعاهو، و لِقى ناس كُتار مِتلَمين. و بُطْرُس قال ليهُم: ”إنتو بِتَعرِفو كيف ما في إذِن لِراجِل يَهودي يَشتَرِك مَعَ ناس مِن بَلَد تانيَه، ولّا يَقَرِّب مِنّو. لَكِن الله وَرّاني أن ما أقول عَن أي زول هو نَجِس ولّا ما نَضيف. عَلَشان كِدا، لَمّا رَسَّلتَ لَي، جيت، و ما عِندي مانِع. عَلَشان كِدا، بَسألَك لِشِنو رَسَّلتَ لَي؟“ و كَرْنِيلِيُوس قال: ”مِن مُدَّة أربَعَة أيام زي السّاعَه دي، كُنتَ بَصَلّي السّاعَه تلاتَه بَعَد الضُّهر في بيتي. و شوف! راجِل في هِدوم لامِع وَقَف قِدامي. و قال لَي: يا كَرْنِيلِيُوس، الله سِمِع صَلَواتَك و إتزَكَّر صَدَقَاتَك لِلمَساكين. عَلَشان كِدا، رَسِّل لِيَافَا و نادي سِمْعَان الإسمو بُطْرُس، و هو قاعِد في بيت سِمْعَان الشَّغال في الجُّلود جَمب البَحَر. و طَوّالي رَسَّلتَ ليك، و إنتَ عَمَلتَ كوَيس عَشان جيت. و هَسَّع نِحنا كُلُّنا مِتلَمين هِنا قِدّام الله، عَشان نَسمَع مِنَّك كُل الأمَرَك بيهو الله.“ و بُطْرُس فَتَح خَشمو و قال: ”بِالحَق بَشوف أن الله ما يَقبَل الوشوش. لَكِن في كُلّو أُمَّه، الزّول البِخاف مِنّو و بيَعمِل البِر، هو مَقبول عِندو. و دي الكِلمَه الله رَسَّلا لِناس إِسْرَائِيل، و بَشَّر بِالسَّلام بِيَسُوع المَسيح. و هو رَب الكُل. و إنتو بِتَعرِفو الحَصَل في كُل اليَهُودِيَّه. و دا إبتَدا في الجَّليل بَعَد ما يُوحَنَّا بَشَّر بِالمَعموديَّه، كيف الله مَسَح يَسُوع المِن النَّاصِرَه بِالرّوح القُدُس و القُوَّه. و هو كان بِمشي في كُلّو مَحَل و بيَعمِل الخير، و بِشفي كُلُّهُم الكانو تِحِت سُلطَة إبْلِيس. عَشان الله كان مَعاهو. و نِحنا شاهِدين بِكُل العَمَلو في بِلاد اليَهُودِيَّه و في أُورُشَلِيم. و لَكِن هُم كَتَلوهو و عَلَّقوهو عَلى الشَّجَرَه. لَكِن الله قَوَّمو مِن بين المَيِّتين في اليوم التّالِت، و وَرّاهو لِلنّاس. و مُش كُل النّاس شافوهو، لَكِن الشاهِدين المُختارين مِن قُبّال، نِحنا الأكَلنا و شِرِبنا مَعاهو بَعَد قيامَتو مِن بين المَيِّتين. و هو أمَرنا نَبَشِّر النّاس، و نَشهَد إنّو الله إختارو يَكون قاضي لِلحَيين و المَيِّتين. و كُل الأنبياء يَشهَدو ليهو أن كُلّو واحِد البِآمِن بيهو بِقبَل بِإسمو غُفران الخَطايا.“ و وَكِت بُطْرُس كان لِسَّع يتكَلَّم بِالكِلمات دي، الرّوح القُدُس جا عَلى كُل السِّمِعو الكِلمَه. و كُل المؤمِنين المُطَهَّرين الجّو مَعَ بُطْرُس، إستَغرَبو عَشان الله أدّا لِلنّاس الما كانو يَهود هَديَّة الرّوح القُدُس كَمان. عَلَشان هُم كانو يَسمَعوهُم يِتكَلَّمو بِلُغات، و يَمَجِّدو الله. في الوَكِت دا، بُطْرُس قال ليهُم: ”في واحِد البِقدَر يَمنَع النّاس ديل مِن المَعموديَّه بِالمويَه؟ عَشان هُم قِبلو الرّوح القُدُس زيَنا.“ و بَعَد دا، أمَر أن يِتعَمَّدو بِإسم يَسُوع المَسيح. بَعدين هُم سَألو بُطْرُس يِستَنّى مَعاهُم أيام قَليلَه. و الرُّسُل و الأخوان الكانو في اليَهُودِيَّه سِمِعو أن الأُمَم كَمان قِبلو كِلمَة الله. و لَمّا بُطْرُس طَلَع لِأُورُشَلِيم، النّاس المُطَهَّرين شاكَلوهو. و قالو: ”إنتَ دَخَلتَ لِرُجال ما مُطَهَّرين و أكَلتَ مَعاهُم.“ عَشان كِدا، بُطْرُس إبتَدا يَكَلِّمُم بِكُل الحَصَل بِتَرتيب و قال: ”كُنتَ بَصَلّي في مَدينَة يَافَا، و شُفتَ في رؤيا حاجَه تَنزِل مِن السَّما زي مِلايَه كَبيرَه مَربوطَه بِأركانا الأربَعَه، و جات لَي. و عايَنتَ فيها شَديد، و شُفتَ حَيوانات الأرض العِندَهُم أربَعَه أقدام، و الوحوش، و الدَّبايب، و طُيور السَّما. و بَعَد دا، سِمِعتَ صوت يَقول لَي: قوم، يا بُطْرُس، اَضبَح و أُكُل. و قُلتَ: أبَداً، يا رَب، عَلَشان ما دَخَل في خَشمي شي نَجِس ولّا ما نَضيف بِالمَرَّه. و الصّوت إتكَلَّم تاني مَرَّه مِن السَّما: الشّي النَّضَّفو الله ما تَقول هو نَجِس. و حَصَل كِدا تلاتَه مَرّات. و بَعَد دا كُلّو، رَفَعوها لِلسَّما. و شوف! في نَفس الوَكِت، تلاتَه رُجال وَقَفو قِدّام البيت الأنا كُنتَ فيهو، و هُم مُرَسَّلين لَي مِن قَيْصَرِيَّه. و الرّوح قال لَي، أمشي مَعاهُم بِدون ما تَشِك. و السِّتَّه أخوان ديل مَشو مَعاي، و دَخَلنا بيت الرّاجِل. و هو خَبَّرنا كيف شاف المَلاك واقِف في بيتو و يَقول ليهو: رَسِّل لِيَافَا و نادي سِمْعَان الإسمو بُطْرُس. و هو بِكَلِّمَك كَلام بِتَخلَص بيهو، إنتَ و كُلّو بيتَك. و لَمّا إبتَديت أتكَلَّم، الرّوح القُدُس نَزَل عَليهُم زي ما نَزَل عَلينا في البِدايَه. و إتزَكَّرتَ كَلام الرَّب لَمّا قال: يُوحَنَّا عَمَّد بِالمويَه، لَكِن إنتو بِتعَمَّدو بِالرّوح القُدُس. إذا كان الله أدّاهُم زات الهَدِيَّه الأدّانا لَمّا آمَنّا بالرَب يَسُوع المَسيح، أنا مِنو حَتّى أقدَر أوَقِّف الله؟“ و لَمّا سِمِعو دا، سَكَتو و مَجَّدو الله و قالو: ”عَلَشان كِدا الله أدّا لِلأُمَم كَمان التّوبَه لِلحَياة.“ و الإتشَتَّتو بِواسطَة التَّعب الحَصَل بِسَبَب اسْتِفَانُوس، سافَرو لِفِينِيقِيَه و قُبرُص و أَنْطَاكِيَه. و هُم ما بِكَلِّمو أي واحِد بِالكِلمَه إلّا اليَهود بَس. و لَكِن بَعض مِنَّهُم مِن قُبرُص و القَيْرَوَان، لَمّا دَخَلو أَنْطَاكِيَه، كانو بِكَلِّمو ناس إغريقيين كَمان، و بِبَشِّروهُم بالرَب يَسُوع. و إيد الرَّب كانَت مَعاهُم. و عَدَد كَبير مِن النّاس آمَنو و رَجَعو لِلرَّب. و لَمّا الخَبَر دا جا في أضان الكَنيسَه الفي أُورُشَلِيم، هُم رَسَّلو بَرْنَابَا لِأَنْطَاكِيَه. و لَمّا وِصِل و شاف نِعمَة الله، هو كان فَرحان، و بَشَّر كُلُّهُم عَشان يَكونو ثابتين في الرَّب بِكُلّو قُلوبُم. عَشان هو كان راجِل صالِح، مَليان بِالرّوح القُدُس و بِالإيمان. و عَدَد كَبير مِن النّاس إتلَمّو لِلرَّب. عَلَشان كِدا، بَرْنَابَا مَشى لِطَرْسُوس عَشان يَطلُب شَاوُل. و لَمّا لِقاهو، جابو لِأَنْطَاكِيَه. و بَرْنَابَا و شَاوُل أجتَمَعو مَعَ الكَنيسَه سَنَه واحدَه، و عَلَّمو ناس كُتار. و سَمّو التَّلاميذ مَسيحيين أوَّل مَرَّه في أَنْطَاكِيَه. و في الأيام ديلاك، أنبياء نَزَلو مِن أُورُشَلِيم لِأَنْطَاكِيَه. و قام واحِد مِنَّهُم إسمو أغابوس، و إتنَبّأ بِالرّوح عَن جوع شَديد البِكون في كُل الدُّنيا. و داك حَصَل في أيام كُلُودِيُوس. و التَّلاميذ، كُلّو واحِد مِنَّهُم حَسَب قُدرَتو، جَهَّزو عَشان يَرَسِّلو حاجَه مُساعَدَه لِلأخوان السّاكنين في اليَهُودِيَّه. و عَمَلو كِدا، و رَسَّلَوهو لِلشُّيوخ بِإيدين بَرْنَابَا و شَاوُل. و في الوَكِت دا، هِيرُودُس المَلِك قَبَض عَلى بَعض النّاس مِن الكَنيسَه عَشان يَطرُدُم. و كَتَل يَعْقُوب أخو يُوحَنَّا بِالسّيف. و لَمّا شاف دا بَسَط اليَهود، هو رَجَع و قَبَض عَلى بُطْرُس كَمان. و دا حَصَل في أيام عيد الفَطير. و بَعَد ما قَبَض عَليهو، خَتّاهو في السِّجِن، و سَلَّمو لِأربَعَه أقسام مِن العَساكِر عَشان يَحرِسوهو. و هِيرُودُس كان عاوِز يَجيبو لِلنّاس بَعَد عيد الفِصَح. و بُطْرُس كان مَحروس في السِّجِن. لَكِن ناس الكَنيسَه كانو بِصَلّو بِقُلوب حارَّه لِلَّه فِشانو. و لَمّا هِيرُودُس قَرَّب يَجيبو لِلمَحكَمَه، بُطْرُس في اللّيلَه ديك كان نايِم بين إتنين عَساكِر، مَربوط بِجَنزيرين. و الحُرّاس كانو قِدّام الباب بِحرَسو السِّجِن. و شوف! مَلاك الرَّب وَقَف جَنبو، و نور نَوَّر في المَحَل. و هو ضَرَب جَنب بُطْرُس، و قَوَّمو مِن النّوم و قال: ”قوم بِالسُّرعَه!“ و الجَّنزيرين وَقَعو مِن إيدينو. و المَلاك قال ليهو: ”ألبَس هِدومَك و جِزَمَك.“ و بُطْرُس عَمَل كِدا. و المَلاك قال ليهو: ”ألبَس كَبوتَك و أتبَعني.“ و بُطْرُس تِبعو و مَرَق. و ما عِرِف السَّوَّاهو المَلاك كان الحَق لَكِن إفتَكَر هو شاف رؤيا. و فاتو بِالغَفير الأوَّل و التّاني، و جو لِباب الحَديد البِسوق لِلمَدينَه. و إنفَتَح ليهُم بَراهو، و هُم مَرَقو. و لَمّا فاتو شارِع واحِد، طَوّالي المَلاك مَشى مِنّو. و بُطْرُس رَجَع لِنَفسو و قال: ”هَسَّع عِرِفتَ بِتأكيد، الرَّب رَسَّل ملاكو و خَلَّصني مِن إيد هِيرُودُس و مِن كُلّو شي اليَهود كانو يِستَنّو عَشان يَعمِلو.“ و لَمّا فِهِم دا، جا لِبيت مَرْيَم، أُم يُوحَنَّا الإسمو مَرْقُس، الفيهو كَتيرين كانو مِتلَمين و هُم يَصَلّو. و لَمّا بُطْرُس دَقَّ الباب البَرّاني، خَدّامَه إسِما رَودا جات عَشان تَسمَع. و لَمّا عِرفَت صوت بُطْرُس، ما فَتَحَت الباب مِن الفَرَح، لَكِن جَرَت لِجُوَّه، و خَبَّرَتُم بُطْرُس واقِف قِدّام الباب. و لَكِن قالو ليها: ”إنتي مَجنونَه!“ لَكِن هي كانَت تَأكِّد دا كان الحَق. عَلَشان كِدا قالو: ”دا ملاكو.“ لَكِن بُطْرُس قاعِد يَدُق. و لَمّا فَتَحو، شافوهو و إستَغرَبو. و عَمَل عَلامَه بِإيدو عَشان يَسكُتو. و كَلَّمُم كيف الرَّب مَرَّقو مِن السِّجِن. و قال: ”خَبِّرو يَعْقُوب و الأخوان بِالحاجات دي.“ و بَعدين مَرَق و مَشى لِمَحَل تاني. و لَمّا بِقى النَّهار، كان في دَوشَه كَبيرَه جِدّاً بين العَساكِر و هُم قالو: ”شِنو حَصَل لِبُطْرُس؟“ و بَعَد ما هِيرُودُس فَتَّش عَليهو و ما لِقاهو، هو إمتَحَن الحُرّاس و أمَر أن يَكتُلوهُم. و بَعَد دا، هِيرُودُس نَزَل مِن اليَهُودِيَّه لِقَيْصَرِيَّه و قَعَد هِناك. هِيرُودُس زِعِل مِن ناس صُور و صَيدا. و هُم جو ليهو بِفِكرَه واحدَه بَعَد ما عَمَلو الصَّداقَه مَعَ بِلاستُس، رَئيس سَرايَة المَلِك. و طَلَبو مِنّو السَّلام عَلَشان بَلَدُم كانَت تاخُد الأكِل مِن بَلَد المَلِك. و في اليوم المُجَهَّز، هِيرُودُس لِبِس هِدوم المَلِك، و قَعَد عَلى كُرسي المَلِك و كَلَّمُم. و النّاس كورَكو: ”الصّوت دا صوت إلَه، ما صوت زول!“ و طَوّالي مَلاك الرَّب ضربو، عَلَشانو ما أدّا المَجد لِلَّه. و الدّود أكَلو، و هو مات. و كِلمَة الله كانَت تَكبَر و تَزيد. بَرْنَابَا و شَاوُل رَجَعو مِن أُورُشَلِيم لَمّا تَمَّمو الخِدمَه. و اَخَدو مَعاهُم يُوحَنَّا الإسمو مَرْقُس. و في الكَنيسَه الفي أَنْطَاكِيَه أنبياء و مُعَلِّمين، و هُم بَرْنَابَا، و سِمْعَان الإسمو نِيجَر، و لوكيوس القَيْرَوَانِي، و مَناين الكان أخو لِهِيرُودُس رَئيس المُديرِيَّه، و شَاوُل. و وَكِت ما هُم بِخدِمو الرَب و بِصومو، الرّوح القُدُس قال: ”جَهِّزو لَي بَرْنَابَا و شَاوُل لِلعَمَل الناديتُم ليهو.“ و بَعَد ما صامو و صَلّو، خَتّو إيدينُم فوقُم و رَسَّلُم. و الأتنين ديل، مُرَسَّلين بِالرّوح القُدُس، نَزَلو لِسَلوكيَه. و مِن هِناك، سافَرو في البَحَر لِقُبرُص. و لَمّا وِصلو لِسَلاميس، هُم خَبَّرو بِكِلمَة الله في بُيوت الرَّب بِتاعَت اليَهود. و يُوحَنَّا كان مَعاهُم مُساعِد ليهُم. و لَمّا سافَرو في الجَّزيرَه كُلَّها لِغايَة بافوس، لِقو راجِل يَهودي ساحِر و نَبي كَضّاب، إسمو باريَشوع. هو كان مَعَ المُدير سَرْجِيُوس بُولُس، و هو راجِل شاطِر. و المُدير نادى بَرْنَابَا و شَاوُل و طَلَب أن يَسمَع كِلمَة الله. لَكِن عَليم السّاحِر، و دا مَعنى إسمو، قاوَمُم و جَرَّب يَمنَع المُدير عَشان ما يآمِن. لَكِن شَاوُل، الإسمو بُولُس كَمان، و هو مَليان بِالرّوح القُدُس، عايَن لِعَليم و قال: ”يا مَليان كُلّو غِش و كُلّو كِضِب! يا وَلَد إبْلِيس، يا عَدو كُلّو بِر! ما تَوَقِّف أبَداً تَغَيِّر طُرُق الله العَديلَه؟ هَسَّع شوف! إيد الرَّب عَليك، و إنتَ تَكون عَميان و ما تَشوف الشَّمِش لِوَكِت.“ و طَوّالي وَقَع عَليهو غَمام و ضُلُمَّه، و كان ماشي هِنا و هِناك، و يَطلُب واحِد عَشان يَقودو بِإيدو. و لَمّا المُدير شاف الحَصَل، هو آمَن، و كان مُستَغرَب مِن تَعليم الرَّب. و بُولُس و المَعاهو سافَرو بِمُركَب مِن بافوس، و جو لِبَرجَه في بَمفِليَه. لَكِن يُوحَنَّا خَلّاهُم و رَجَع لِأُورُشَلِيم. لَكِن هُم مَشو مِن بَرجَه و جو لِأَنْطَاكِيَه في بِيسِيدِيَه. و دَخَلو بيت الرَّب يوم السَّبِت و قَعَدو. و بَعَد قِرايَة القانون و الأنبياء، رؤساء بيت الرَّب رَسَّلو ليهُم يَقولو: ”يا أخوان، إذا كان عِندَكُم كِلمَة الشَّجاعَه لِلنّاس، قُولوهو.“ و بُولُس قام و عَمَل عَلامَه بِإيدو و قال: ”يا رُجال إِسْرَائِيل و البِخافو الله مِن الأُمَم، أسمَعو! إلَه شَعب إِسْرَائِيل دا إختار أبَهاتنا، و عَمَل الشَّعب أُمَّه عَظيمَه لَمَّن كانو غَريبين في بَلَد مَصر. و طَلَّعُم مِنَّها بِقُوَّه عَظيمَه. و كان عِندو صَبر عَلى المَشي بِتاعُم مُدَّة أربَعين سَنَه في الخَلا. و خَرَب سَبعَه أُمَم في بَلَد كَنعان، و أدّا ليهُم أرضُم عَشان تَكون ميراث. و كُلّو دا حَصَل في مُدَّة أُربُعمِيَّه و خَمسين سَنَه. و بَعَد داك، الله أدّاهُم قُضاة لِغايَة وَكِت صَمُوئِيل النَّبي. و بَعَد دا، هُم طَلَبو مَلِك، و الله أدّاهُم شَاوُل لِمُدَّة أربَعين سَنَه، و هو وَلَد قيس، راجِل مِن قَبيلَة بنْيَامِين. و لَمّا الله شال مِنَّهُم شَاوُل، رَفَع دَاوُد مَلِك ليهُم، و شِهِد ليهو و قال: لِقيت دَاوُد وَلَد يَسَّى، راجِل حَسَب قَلبي، و هو بيَعمِل كُلّو إرادَتي. و مِن أولاد الرّاجِل دا، الله جاب لِإِسْرَائِيل! حَسَب الوَعَد، يَسُوع المُخَلِّص. و قُبّال ما يَسُوع جا، يُوحَنَّا بَشَّر بِمَعموديَّة التّوبَه لِكُلّو ناس إِسْرَائِيل. و لَمّا يُوحَنَّا قَرَّب يَتِم خِدمَتو، هو قال: إنتو تَفتَكِرو أنا مِنو؟ أنا ما هو. لَكِن شوف! واحِد بِجي بَعَدي، الأنا ما بَستَحِق أفِك جِزَمو. يا أخوان، أولاد إِبْرَاهِيم و البِخافو الله بينكُم، الله رَسَّل لينا نِحنا كِلمات الخَلاص دا. و السّاكنين في أُورُشَلِيم و رؤساهُم ما عِرفو يَسُوع. لَكِن لَمّا حَكَمو عَليهو، تَمَّمو كِلمات الأنبياء البيَقروها كُلّو سَبِت. و لَمّا ما لِقو عَليهو سَبَب لِلموت، طَلَبو مِن بِيلاطُس أن يَكتُلو. و لَمّا تَمَّمو كُل الكان مَكتوب عَنّو، نَزَّلوهو مِن الصَّليب و خَتّوهو في قَبر. و لَكِن الله قَوَّمو مِن بين المَيِّتين. و هو ظَهَر أيام كَتيرَه لِلمَشو مَعاهو مِن الجَّليل لِأُورُشَلِيم. و هَسَّع هُم شاهِدينو لِلنّاس. و نِحنا نَبَشِّركُم بِالوَعد الوَعَدو الله لِأبَهاتنا. هو تَمَّم دا لينا، نِحنا أولادُم، لَمّا قَوَّم يَسُوع مِن بين المَيِّتين. زي ما هو مَكتوب كَمان في المَزمور التّاني: إنتَ إبني. أنا اليوم وَلَدتَك. و بِخُصوص الحَق أن الله قَوَّمو مِن بين المَيِّتين، و هو ما بِرجَع لِلتُّراب، هو قال: أنا بَدّيكُم البَرَكات الأمينَه المُقَدَّسَه بِتاعَت دَاوُد. و كِدا يَقول كَمان في مَزمور آخِر: إنتَ ما بِتخَلّي قُدّوسَك يَرجَع لِلتُّراب. و عشان دَاوُد، بَعَد ما خَدَم الله في جِيلو بِتَرتيب الله، نام و إتلَمّى لِأبَهاتو، و جِسمو رَجَع لِلتُّراب. لَكِن القَوَّمو الله مِن بين المَيِّتين ما رَجَع لِلتُّراب. خَليهو يَكون مَعروف ليكُم، يا أخوان، نِحنا نَبَشِّر بِيَسُوع غُفران الخَطايا. و بيهو كُلّو واحِد البِآمِن، يِتبَرَّر مِن كُلّو شي قانون مُوسَى ما قِدِر يَعمِلو بار. أحرِسو، عَشان القالو في الأنبياء ما بِجي ليكُم: شوفو، إنتو البِشتِمو، و إستَغرَبو، و موتو. عَشان أنا أعمِل عَمَل في أيامكُم، و العَمَل دا إنتو ما بِتصَدِقوهو إن واحِد خَبَّركُم بيهو.“ و وَكِت بُولُس و بَرْنَابَا كانو يَمرُقو، النّاس سألوهُم أن يَكَلِّموهُم بِالكَلام دا السَّبِت الجّاي. و بَعَد ما الناس مَشو مِن بيت الرَّب، كَتيرين مِن اليَهود و النّاس البِخافو، القِبلو الدّين اليَهودي، تِبعو بُولُس و بَرْنَابَا. و هُم كَلَّموهُم و بَشَّروهُم عَشان يِستَمِرّو في نِعمَة الله. و السَّبِت البَعدو، كُل المَدينَه تَقريباً إتلَمّو عَشان يَسمَعو كِلمَة الله. و لَمّا اليَهود شافو ناس كُتار، إتمَلو حَسَد، إبتَدو يَقاوِمو القالو بُولُس، و يَجَدِّفو. و بُولُس و بَرْنَابَا رَدّو عَليهُم بِشَجاعَه و قالو: ”كان لازِم نَكَلِّمكُم بِكِلمَة الله في الأوَّل. و لَكِن عَلَشان إنتو أبيتوها، و حَكَمتو عَلى نُفوسكُم أنَّكُم ما مُستَحِقّين لِلحَياة الأبَديَّه، شوفو! نَدَوِّر لِلأُمَم. عَشان الرَّب أمَرنا كِدا و قال: عَمَلتَك نور لِلأُمَم، عَشان تَجيب خَلاص لِآخِر الدُّنيا.“ و لَمّا الأُمَم سِمِعو دا، فِرحو و مَجَّدو كِلمَة الرَّب. و كُل الهو إختارُم لِلحَياة الأبَديَّه، آمَنو. و كِلمَة الرَّب مَشَت في كُل البِلاد. و لَكِن اليَهود حَرَّكو النِّسوان البِخافو و المُحتَرَمات و رؤساء المَدينَه. و هُم حَرَّكو ضيق عَلى بُولُس و بَرْنَابَا و طَرَدوهُم مِن بَلَدُم. و لَكِن هُم هَزّو التُّراب مِن كِرعينُم، و جو لِإِيْقُونِيَه. و التَّلاميذ كانو مَليانين بِالفَرَح و الرّوح القُدُس. و في إِيْقُونِيَه، بُولُس و بَرْنَابَا دَخَلو سَوا لِبيت الرَّب اليَهودي. و إتكَلَّمو بِالقُوَّه حَتّى عَدَد كَبير مِن اليَهود و ناس إغريقيين آمَنو. لَكِن الما آمَنو مِن اليَهود حَرَّكو نُفوس الأُمَم، و حَيَّرو أفكارُم عَشان يَكونو ضِد الأخوان. و بُولُس و بَرْنَابَا قَعَدو وَكِت طَويل، يِتكَلَّمو بِدون خوف عَن الرَّب. و الرَّب كان بِشهَد لِكِلمَة نِعمَتو، و بِدّيهُم قُوَّه لِيَعمِلو عَلامات و عَجايِب. و ناس المَدينَه إنقَسَمو. و بَعضُم كانو مَعَ اليَهود و بَعضُم مَعَ الرَّسولين. و لَمّا الأُمَم و اليَهود مَعَ رؤساهُم كانو عاوزين يَشتِموهُم و يَرموهُم بِالحُجار، هُم سِمِعو بيهو، و هَرَبو لِمُدُن لِسترَه و دَربَه في لِكأونيَّه، و لِلبِلاد القَريبَه. و كانو هِناك بِبَشِّرو. و في لِسترَه، راجِل كان بِقعُد، و هو مَكَسَّح في رِجلينو، أعرَج مِن بَطن أُمّو، و ما مَشى أبَداً. و هو سِمِع بُولُس يتكَلَّم. و بُولُس عايَن ليهو، و شاف إنّو عِندو إيمان لِلشِّفا. و قال بِصوت عالي: ”قوم عَلى كِرعينَك!“ و الرّاجِل نَطَّ و إبتَدا يَمشي. و لَمّا ناس كُتار شافو العَمَلو بُولُس، رَفَعو أصواتُم بِلُغَه لِكأونيَّه و قالو: ”الآلِهَه في شَكِل النّاس نَزَلو لينا.“ و هُم سَمّو بَرْنَابَا زَفس و بُولُس هَرمَس، عَشانو كان البِقود في الكَلام. و قَسّيس زَفس، الكان بيتو بَرَّه شوَيَه مِن المَدينَه، جاب تيران و تيجان لِلأبواب، و كان عاوِز يَقَدِّم ضَبيحَه مَعَ النّاس الكُتار. لَكِن لَمّا الرَّسولين، بَرْنَابَا و بُولُس سِمِعو بِدا، شَرَّطو هِدُومُم و جَرو في وَش النّاس الكُتار و كورَكو، ”يا رُجال، بِتسَوّو دا لِشِنو؟ نِحنا كَمان ناس، عِندَنا نَفس الطَّبيعَه زيَكُم. و نَبَشِّركُم عَشان تَرجَعو مِن الحاجات البِدون فايدَه دي لِلَّه الحَي، الخَلَق السَّما و الأرض و البَحَر و كُل الفيها. و في الزَّمَن الفات، هو خَلّى كُل الأُمَم يَمشو في طُرُقُم. و لَكِن هو ما ساب نَفسو بِدون شاهِد. و هو بيَعمِل الخير، و بِدّيكُم مَطَر مِن السَّما و دُرَه في وَكتو، و يَملى قُلوبكُم بِأكل و فَرَح.“ و بِالكِلمات دي، بِالتَّعب هُم وَقَّفو النّاس عَلَشان ما يَضبَحو ليهُم. لَكِن يَهود مِن أَنْطَاكِيَه و إِيْقُونِيَه جو و حَرَّكوهُم حَتّى رَمو الحُجار عَلى بُولُس. و جَرّوهو بَرَّه المَدينَه، و هُم يَفتَكِرو هو مات. و لَكِن لَمّا التَّلاميذ وَقَفو حَواليهو، هو قام و دَخَل المَدينَه. و اليوم البَعدو، هو مَرَق مَعَ بَرْنَابَا لِدَربَه. و بَعَد ما بِشَّرو في المَدينَه ديك، ناس كُتار بِقو تَلاميذ. و بَعدين رَجَعو لِلِسترَه و إِيْقُونِيَه و أَنْطَاكِيَه، يَساعِدو نُفوس التَّلاميذ و يَشَجِّعوهُم أن يَكونو ثابِتين في الإيمان، و يَقولو: ”لازِم نَصبُر عَلى أتعاب كَتيرَه عَشان نَدخُل مَلَكوت الله.“ و بُولُس و بَرْنَابَا إختارو ليهُم شُيوخ في كُلّو كَنيسَه، و بِالصَّلاه و الصّوم قَدَّموهُم لِلرَّب الآمَنو بيهو. و بَعَد ما مَرّو بِبِيسِيدِيَه، جو لِبَمفِليَه. و لَمّا بِشَّرو بِالكِلمَه في بَرجَه، نَزَلو لِأتّاليَه. و مِن هِناك سافَرو في البَحَر لِأَنْطَاكِيَه، المَحَل الفيهو الكَنيسَه كانَت قَدَّمَتُم في الأوَّل لِنِعمَة الله لِلعَمَل الهَسَّع كَمَلوهو. و لَمَّن وِصلو، جَمَعو الكَنيسَه، و خَبَّرو بِكُلّو حاجَه الله عَمَل مَعاهُم، و كيف فَتَح لِلأُمَم باب الإيمان. و هُم قَعَدو مَعَ التَّلاميذ مُدَّه طَويلَه. و بَعض مِن الرُّجال نَزَلو مِن اليَهُودِيَّه لِأَنْطَاكِيَه، و كانو بِعَلِّمو الأخوان و يَقولو: ”إن كان ما تَكونو مُطَهَّرين حَسَب عادَة مُوسَى، ما بِتَقدَرو تَخلَصو.“ و حَصَل لِبُولُس و بَرْنَابَا مُشاكَلَه و كَلام كَتير مَعاهُم. عَلَشان كِدا، إختارو بُولُس و بَرْنَابَا و ناس تانيين مِنَّهُم يَمشو لِأُورُشَلِيم لِلرُّسُل و الشُّيوخ فِشان السّؤَال دا. و بَعَد ما الكَنيسَه رَسَّلُم، هُم سافَرو لِفِينِيقِيَه و السَّامِرَه، و كانو بِخَبِّرُم بِرُجوع الأُمَم. و كُل الأخوان فِرحو فَرَح عَظيم. و لَمَّن وِصلو لِأُورُشَلِيم، الكَنيسَه و الرُّسُل و الشُّيوخ قابَلَتُم. و خَبَّروهُم بِكُل العَمَلو الله مَعاهُم. لَكِن بَعض مِن المؤمِنين مِن حِزب الفَرِّيسِيِّين قامو و قالو: ”الأُمَم لازِم يَكونو مُطَهَّرين. و نَدّيهُم أمر أن يَحفَظو قانون مُوسَى.“ و الرُّسُل و الشُّيوخ إتلَمّو عَشان يَشوفو الحاجَه دي. و بَعَد ما إتكَلَّمو كَتير، قام بُطْرُس و قال ليهُم: ”يا أخوان، إنتو بِتَعرِفو مِن زَمان، الله إختارني مِن بينكُم، عَشان الأُمَم يَسمَعو مِن خَشمي كِلمَة الإنجيل و يآمِنو. و الله البِعرِف القُلوب، شِهِد ليهُم لَمَّن أدّاهُم الرّوح القُدُس زي ما أدّانا كَمان. و هو ما عَمَل فارِق بينَنا و بِينُم، عَشان نَضَّف قُلوبُم بِالإيمان. عَلَشان كِدا، لِشِنو تَجَرِّبو الله، و تَخُتّو نير عَلى رَقَبات التَّلاميذ؟ و النّير دا مُش أبَهاتنا و لا نِحنا قِدِرنا نَشيلو. لَكِنّا بِنِعمَة الرَّب يَسُوع المَسيح نآمِن عَشان نَخَلَص، زي ما هُم يَخلَصو كَمان.“ و كُل النّاس سَكَتو، و كانو يَسمَعو لِبَرْنَابَا و بُولُس و هُم يَقولو ليهُم كُل العَمَلو الله بِإيديهُم مِن العَلامات و العَجايِب. و بَعَد ما خَلَّصو كَلامُم، يَعْقُوب إتكَلَّم و قال: ”يا أخوان، أسمَعو لَي. سِمْعَان خَبَّرنا كيف الله زار الأُمَم في الأوَّل، عَشان تاخُد مِنَّهُم ناس لِنَفسو. و كِلمات الأنبياء تَتَّفِق مَعَ دا، زي ما هو مَكتوب: بَرجَع بَعَد دا، و أبني خيمَة دَاوُد الوَقَعَت. و بَبني كَمان خَراباتو، و بَعمِلا جَديدَه مَرَّه تانيَه. عَلَشان باقي النّاس التّانيين و كُل الأُمَم الاَخَدو إسمي عَليهُم، يَطلُبو الرَّب العامِل الحاجات دي، يَقول الرَّب. و دي مَعروفَه قِدّامو مِن زَمان. عَلَشان كِدا، فِكري أنا، ما نَخُت حِمِل تَقيل عَلى البِرجَعو لِلَّه مِن الأُمَم. لَكِن نَكتِب ليهُم عَشان يَرفُضو الضَّبَحوها لِلأصنام، و الزِّنا، و ما ياكلو اللَّحَم المِن بَهايِم مَخنوق، ولّا الدَّم. عَشان مِن الزَّمَن القَديم، بِبَشِّرو بِمُوسَى في كُلّو مَدينَه، و بِقروهو في بُيوت الرَّب كُلّو سَبِت.“ في الوَكِت دا، الرُّسُل و الشُّيوخ مَعَ كُل الكَنيسَه شافو إنّو كوَيس يَختارو مِنَّهُم راجلين، و يَرَسِّلوهُم لِأَنْطَاكِيَه مَعَ بُولُس و بَرْنَابَا. و إختارو يَهُوذَا الإسمو بَرسابا، و سِيلَا، راجلين مَعروفين بين الأخوان. و كَتَبو الجَّواب، و رَسَّلَوهو مَعاهُم. و الجَّواب قال: ”مِن الأخوان، الرُّسُل و الشُّيوخ لِلأخوان مِن الأُمَم في أَنْطَاكِيَه و سُورِيَّه و كِيلِيكِيَّا. نَسَلِّم عَليكُم. سِمِعنا بَعض النّاس مَرَقو مِنَّنا و حَرَّكوكُم و حَيَّرو نُفوسكُم بِكلماتُم. و نِحنا ما أمَرناهُم يَسَوّو كِدا. و كُلُّنا إتَّفَقنا نَختار راجلين، و نَرَسِّلوهُم ليكُم مَعَ حَبِيبنا بَرْنَابَا و بُولُس. و هُم راجلين خاطَرو بِحَياتُم فِشان إسِم رَبَّنا يَسُوع المَسيح. و فِشان كِدا، رَسَّلنا ليكُم يَهُوذَا و سِيلَا. و هُم بِخَبِّروكُم بِالحاجات دي بِكَلام الخَشم. و كان كوَيس لِلرّوح القُدُس و لينا، أن ما نَخُت عَليكُم حِمِل فوق الحاجات الجّايَه دي: و هي أن تَرفُضو الضَّبَحو لِلأصنام، و الدَّم، و اللَّحَم المِن بَهايِم مَخنوق، و الزِّنا. و إذا مَنَعتو نُفوسكُم مِن ديل، بِتَعمِلو كوَيس. مَعَ السَّلامَه.“ و لَمّا رَسَّلوهُم، ديل مَرَقو لِأَنْطَاكِيَه و لَمّو النّاس، و سَلَّمو ليهُم الجَّواب. و لَمّا النّاس قَروهو، هُم فِرحو بِالتَّعزيَه دي. و يَهُوذَا و سِيلَا، و هُم كَمان كانو أنبياء، بِشَّرو الأخوان بِكَلام كَتير، و شَدَّدوهُم. و بَعَد ما إستَنّو هِناك وَكِت، الأخوان خَلّوهُم يَمشو بِسَلام لِلنّاس الرَّسَّلوهُم. و لَكِن سِيلَا إختار يِستَنّى هِناك. لَكِن بُولُس و بَرْنَابَا قَعَدو في أَنْطَاكِيَه بِعَلِّمو و بِبَشِّرو بِكِلمَة الرَّب مَعَ تانيين كَتيرين كَمان. و بَعَد وَكِت، بُولُس قال لِبَرْنَابَا: ”خَلّونا نَرجَع و نَزور الأخوان في كُلّو مَدينَه البَشَّرنا فيها بِكِلمَة الرَّب، و نَشوف كيف هُم بيَعمِلو.“ و بَرْنَابَا كان عاوِز ياخُد مَعاهُم كَمان يُوحَنَّا الإسمو مَرْقُس. لَكِن بُولُس إفتَكَر ما كوَيس ياخُد مَعاهُم الخَلّاهُم في بَمفِليَه و ما مَشى مَعاهُم لِلعَمَل. و حَصَلَت بِينُم شَكلَه كَبيرَه، حَتّى مَشى واحِد عَن التّاني. و بَرْنَابَا أخَد مَرْقُس و سافَر بِمُركَب لِقُبرُص. لَكِن بُولُس إختار سِيلَا، و مَرَق بَعَد ما الأخوان قَدَّموهو لِنِعمَة الله. و مَرَّه بِسُورِيَّه و كِيلِيكِيَّا يَشَدِّد الكَنايس. و بُولُس جا لِدَربَه و لِسترَه. و كان هِناك تِلميذ إسمو تِيمُوثَاوُس، وَلَد مَرَه يَهُودِيَّه، مِآمِنَه، و لَكِن أبوهو كان إغريقي. و الأخوان الفي لِسترَه و إِيْقُونِيَه كانو يَقولو تِيمُوثَاوُس شاب طَيب. و بُولُس كان داير ياخُدو مَعاهو في السَّفَر. و فِشان كِدا، طَهَّرو عَلَشان اليَهود الفي المَحَلّات ديك، عَشان كُلُّهُم كانو بِعرِفو أبوهو إغريقي. و هُم كانو بِسافِرو مِن بَلَد لِبَلَد. و كانو بِسَلِّموهُم الأوامِر الجَهَّزوها الرُّسُل و الشُّيوخ الفي أُورُشَلِيم عَشان يَحفَظوها. و الكَنايس كانو بِشَدِّدو في الإيمان، و بِزيدو في العَدَد كُلّو يوم. و بَعَد ما مَرّو بِفِرِيجِيَّه و مَحَلّات غَلَاطِيَّه، الرّوح القُدُس ما خَلّاهُم يِتكَلَّمو بِالكِلمَه في آسيا. و لَمّا جو لِميسيّا، جَرَّبو يَمشو لِبِثِنيَّه. و الرّوح ما خَلّاهُم. عَلَشان كِدا، فاتو عَلى ميسيّا، و نَزَلو لِتَرُوَاس. و في اللّيل، ظَهَرَت لِبُولُس رؤيا. كان في راجِل مِن مَكِدونيَّه واقِف، يَطلُب ليهو و يَقول: ”تَعال لِمَكِدونيَّه و ساعِدنا.“ و طَوّالي لَمّا بُولُس شاف الرّؤيَه، طَلَبنا نَمشي لِمَكِدونيَّه عَشان إتأكَّدنا أن الرَّب نادانا لِنَبَشِّرُم. و سافَرنا في البَحَر مِن تَرُوَاس، و مَشينا في سِكَّه عَديلَه لِسَامُوثْرَاكِي، و اليوم البَعدو لِنِيَابُولِيس. و مِن هِناك لِفيلِبّي، و هي أوَّل مَدينَه في مُديريَّة مَكِدونيَّه و كولونيَّه رومانيَّه. و إستَنّينا في المَدينَه دي أيام قَليلَه. و في يوم السَّبِت، مَرَقنا بَرَّه مِن باب المَدينَه لِلبَحَر، لِمَكان إفتَكَرنا فيهو مَحَل لِلصَّلاه. و قَعَدنا و كَلَّمنا النِّسوان الإتلَمّو هِناك. و كانَت في مَرَه بِتَسمَعنا إسِما لِيدِيَّه البِتبيع قُماش بَنَفسَجي، مِن مَدينَه ثَيَاتِيرَا، و بِتخاف الله. و الرَّب فَتَح قَلبا عَشان تَخَلّي بالا لِلبِقولو بُولُس. و لَمّا إتعَمَّدَت، هي و ناس بيتا، سألَتنا و قالَت: ”إذا حَكَمتو أنا مِآمِنَه بِالرَّب، أدخُلو بيتي و أقعُدو فيهو.“ و سألَتنا كَتير، و قَعَدنا مَعاها. و حَصَل وَكِت ما نِحنا كُنّا ماشين لِمَكان الصَّلاه، قابَلتنا خَدّامَه بِتَعمِل حاجات بِالسِّحِر. و كانَت بِتجيب لِأسيادا قُروش كَتيرَه بِالسِّحِر بِتِاعا. و هي مَشَت وَرا بُولُس و الكانو مَعاهو، و كُورَكَت و قالَت: ”الرُّجال ديل، هُم خَدّامين الله العالي، و يَبَشِّروكُم بِطَريق الخَلاص.“ و هي عَمَلَت كِدا أيام كَتيرَه، حَتّى بُولُس تِعِب كَتير مِن دا، و إتلَفَت و قال لِلرّوح: ”أنا آمُرَك بِإسم يَسُوع المَسيح، أمرُق مِنَّها.“ و مَرَق في الدَّقيقَه ديك. و وَكِت أسيادا شافو ما قِدرو يَكسِبو قُروش مِنَّها بَعَد دا، قَبَضو عَلى بُولُس و سِيلَا، و جَرّوهُم لِلسّوق قِدّام الحُكّام. و جابوهُم لِلقُضاة و قالو: ”الرّاجلين ديل مِن ناس اليَهود. و هُم يَلَخبِتو بَلَدنا. و يَعَلِّمو بِعادات ما بِالقانون عَشان نَقبَلا و نَعمِلا، عَشان نِحنا ناس رومانيين.“ و النّاس قامو عَليهُم. و القُضاة أمَرو عَشان يَقلَعو مِنَّهُم هِدُومُم، و يَضرُبوهُم بِالعَصايات. و لَمّا ضَرَبوهُم ضَرَبات كَتيرَه، رَموهُم في السِّجِن. و أمَرو السَّجّان يَحرِسُم بِالتَّمام. و هو، عَشان قِبِل أمر زي دا، خَتّاهُم في السِّجِن الفي جُوَّه، و رَبَط كِرعينُم بِخَشَب مَقدود. و في نُص اللّيل تَقريباً، بُولُس و سِيلَا كانو يَصَلّو و يَرَتِّلو لِلَّه، و المَحبوسين يَسمَعوهُم. و حَصَلَت عَلى غَفلَه زَلزَلَه شَديدَه، حَتّى أساسات السِّجِن هَزّو. و طَوّالي كُلّو أبواب السِّجِن إنفَتَحو، و جَنازِير كُلُّهُم إتفَكّو. و لَمّا السَّجّان قام مِن النّوم، و شاف أبواب السِّجِن مَفتوحَه، هو طَلَّع سيفو و كان عاوِز يَكتُل نَفسو، فِشان إفتَكَر كُل المَحبوسين هَرَبو. لَكِن بُولُس ناداهو بِصوت عالي و قال: ”ما تَعمِل لِنَفسَك حاجَه بَطّالَه. كُلُّنا في هِنا.“ و طَلَب فانوس، و جَرى لِجُوَّه، و وَقَع قِدّام بُولُس و سِيلَا و هو يَرجِف مِن الخوف. و بَعَد دا، مَرَّقُم و قال: ”يا أسيادي، أسَوّي شِنو عَشان أكون مُخَلَّص؟“ و قالو: ”آمِن بِالرَّب يَسُوع، و بِتَخلَص، إنتَ و أهل بيتَك.“ و كَلَّموهو و كُل الفي بيتو بِكِلمَة الرَّب. و أخَدُم في السّاعَه ديك مِن اللّيل، و غَسَّل جُروحُم. و إتعَمَّد طَوّالي، هو و كُلّو أهل بيتو. و أخَدُم لِبيتو و جاب ليهُم أكل. و إنبَسَط مَعَ كُلّو أهل بيتو عَشان كانو آمَنو بِالله. و لَمَّن جا النَّهار، القُضاة رَسَّلو الضُّبّاط يَقولو لِلسَّجّان: ”فِك الرّاجلين ديل.“ و السَّجّان خَبَّر بُولُس بِالكَلام دا: ”القُضاة رَسَّلو عَشان يَفِكّوكُم. هَسَّع أمرُقو و أمشو بِسَلام.“ و بُولُس قال ليهُم: ”ضَرَبونا قِدّام النّاس بِدون مُحاكَمَه، و نِحنا راجلين رومانيين. و رَمونا في السِّجِن. و هَسَّع يَفِكّونا بِالسِّر؟ لا! لَكِن خَلّوهُم نُفوسُم يَجو و ياخُدونا بَرَّه.“ و الضُّبّاط خَبَّرو القُضاة بِالكَلام دا. و هُم خافو لَمّا سِمِعو هُم ناس رومانيين. و جو ليهُم و قالو: ”نِحنا مِتأسِّفين.“ و جابوهُم بَرَّه مِن السِّجِن، و سألوهُم يَمرُقو مِن المَدينَه. و لَمّا مَرَقو مِن السِّجِن، مَشو لِبيت لِيدِيَّه. و شافو الأخوان و شَجَّعوهُم. و بَعَد دا مَرَقو. و بَعَد ما مَرّو بِأَمْفِيبُولِيس و أَبُولُونِيَّه، جو لِتَسَالُونِيكِي. و كان فيها بيت الرَّب اليَهودي. و بُولُس دَخَل بيت الرَّب حَسَب عادَتو، و كان بِتكَلَّم مَعاهُم بِبيِّنات مِن الكُتُب تلاتَه سُبوت. و يَوَرّيهُم، و يَثَبِّت إنّو المَسيح كان لازِم يِتوَجَّع، و يَقوم مِن بين المَيِّتين. و قال: ”يَسُوع دا، الأنا بَبَشِّركُم بيهو، هو المَسيح.“ و بَعَض مِنَّهُم قِبِلو الكِلمَه، و جَمَعو لِبُولُس و سِيلَا. و كَمان ناس كُتار عَمَلو زي دا مِن ناس إغريقيين البِخافو، و العَدَد ما كان صَغَيِر مِن النِّسوان كَمان. و اليَهود حَسَدو، و اَخَدو رُجال بَطّالين مِن ناس السّوق، و لَمّو ناس كُتار، و عَمَلو دَوشَه في المَدينَه. و جَرو لِبيت ياسون، و طَلَبو يَطَلِّعوهُم لِلنّاس. و لَمّا ما لِقوهُم، جَرّو ياسون و بَعَض الأخوان لِسَلاطين المَدينَه، و هُم يَكورِكو: ”ديل القَلَبو الدُّنيا، جو هِنا كَمان. و ياسون قِبِلُم في بيتو. و ديل كُلُّهُم يَعمِلو الشّي اليَقاوِم قَوانين قَيصَر، عَشان يَقولو في مَلِك تاني، هو يَسُوع.“ و حَصَلَت دَوشَه في النّاس و سَلاطين المَدينَه لَمّا سِمِعو الكَلام دا. و لَمّا اَخَدو ضَمانَه مِن ياسون و مِن التّانيين، خَلّوهُم يَمشو. و طَوّالي، الأخوان رَسَّلو بُولُس و سِيلَا بِاللّيل لِبيريَّه. و هُم، لَمّا وِصلو، دَخَلو بيت الرَّب اليَهودي. و ديل كانو أفضَل مِن الفي تَسَالُونِيكِي، عَشان قِبلو الكِلمَه بِكُلّو نَشاط. و كانو كُلّو يوم بِفَتِّشو الكُتُب عَشان يَشوفو إذا الحاجات دي صَحَيحَه. و كَتيرين مِنَّهُم آمَنو، و كَمان عَدَد ما قَليل مِن ناس إغريقيين، مِن النِّسوان المُحتَرَمات و مِن الرُّجال. و لَمّا اليَهود الفي تَسَالُونِيكِي عِرفو بُولُس بَشَّر بِكِلمَة الله في بيريَّه كَمان، هُم جو لِهِناك يَحَرِّكو النّاس و يَلَخبِتوهُم. و بِسُرعَه، الأخوان رَسَّلو بُولُس عَشان يَمشي لِطَرَف البَحَر. لَكِن سِيلَا و تِيمُوثَاوُس قَعَدو في بيريَّه. و الرُّجال المَشو مَعَ بُولُس، جابوهو لِأَثِينَا. و هُم مَشو بَعَد ما اَخَدو أمر مِنّو لِسِيلَا و تِيمُوثَاوُس عَشان يَجو ليهو أوَّل ما مُمكِن. و وَكِت ما بُولُس كان يِستَنّى ليهُم في أَثِينَا، زِعِل في روحو لَمّا شاف المَدينَه مَليانَه بِأصنام. و كان بِخَبِّر اليَهود و النّاس البِخافو، في بيت الرَّب، و النّاس الهو قابِلُم في السّوق كُلّو يوم. و بَعض مِن النّاس مِن المِتعَلِّمين قابَلوهو، الأَبِيكُورِيِّين و الرِّوَاقِيِّين. و بَعض مِنَّهُم قالو: ”الغَلَباوي دا عاوِز يَقول شِنو؟“ و تانيين قالو: ”يَظهَر إنّو يَنادي بِآلِهَه غَريبَه.“ و قالو كِدا عَلَشانو كان بِبَشِّر بِيَسُوع و القيامَه. و أخَدوهو و جابوهو لِأريوس باغوس و قالو: ”مُمكِن نَعرِف التَّعليم الجَّديد دا شِنو، الأنتَ تِتكَلَّم بيهو؟ إنتَ تَجيب لِإضنينّا أفكار غَريبَه، و عاوزين نَعرِف مَعناها شِنو.“ و كانو ناس أَثِينَا كُلُّهُم و الغَريبين السّاكنين بِينُم بِصرُفو كُلّو وَكتُم في حاجَه واحدَه بَس، و دي عَشان يِتكَلَّمو ولّا يَسمَعو شي جَديد. و بُولُس وَقَف في وَسط الأريوس باغوس و قال: ”يا رُجال أَثِينَا، بَشوف في كُلّو حاجَه إنتو ناس شُداد في دينكُم. و وَكِت ما كُنتَ بَطوف و بَشوف مَحَلّات الضَّبيحَه بِتاعَتكُم، لِقيت كَمان مَضبَح مَكتوب فوقو: لِإلَه ما مَعروف. و داك البِتَعبُدوهو بِدون مَعرِفَه، أنا هَسَّع بَبَشِّركُم بيهو. الله الخَلَق الدُّنيا و كُل الفيها، هو رَب السَّما و الأرض. و هو ما يَسكُن في هياكِل مَعمولَه بِالإيدين. و إيدين الزّول ما بِتَخدِمو زي ما هو مُحتاج لِحاجَه، عَلَشان هو البِدّي لِكُل النّاس حَياة و نَفس و كُلّو شي. و هو عَمَل مِن إنسان واحِد كُلّو أُمَّه مِن النّاس، عَشان يَسكُنو فوق كُل الأرض. هو إختار الزَّمَن المَجَهَّز ليهُم، و أطراف مَحَلّاتُم عَشان يَسكُنو فيها. و الله عَمَل دا عَلَشانُم يَطلُبوهو، و يِمكِن يَمِدّو ليهو إيدينُم و يَلقوهو. و لَو هو ما بَعيد مِن كُلّو واحِد مِنَّنا. و نِحنا بيهو نَعيش، و نِتحَرَّك، و نَكون مَوجودين. زي ما بَعض مِن غَنّاينكُم قالو: نِحنا نَسلو. و عَلَشان نِحنا نَسل الله، ما نَفتَكِر طَبيعَة الله زي الدَّهَب ولّا الفِضَّه ولّا الحَجَر المَنقوش بِصورَة شُغل الزّول و شَطارتو. و الله، في الزَّمَن الفات، مَرَّه عَليهُم، عَشان ما في مَعرِفَه. لَكِن هَسَّع هو يأمُر كُل النّاس في كُلّو مَحَل أن يَتوبو. عَشانو إختار يوم فيهو بِيَحكُم عَلى الدُّنيا بِالعَدل بِالإنسان الجَّهَّزو. و أدّا لِلكُل بيّنَه، لَمّا قَوَّمو مِن بين المَيِّتين.“ و لَمّا سِمِعو عَن القيامَه مِن بين المَيِّتين، بَعض مِنَّهُم ضِحِكو عَليهو. و تانيين قالو: ”بِنَسمَع مِنَّك عَن دا مَرَّه تانيَه.“ و كِدا، بُولُس مَرَّق مِن بِينُم. و لَكِن بَعض مِن النّاس إستَنّو مَعاهو و آمَنو، مِنَّهُم دِيُونِيسِيُوس مِن الأَرْيُوبَاغُوس، و مَرَه إسِما دَامَرِس، و تانيين مَعاهُم. و بَعَد دا، بُولُس مَشى مِن أَثِينَا و جا لِكُورِنْثُوس. و لِقى يَهودي إسمو أَكِيلَا، بُنْطي الجِّنس. و هو كان جا في وَكِت قَريب مِن إِيطَالِيَه مَعَ بِرِيسْكِلا، مَرَتو. عَلَشان كُلُودِيُوس كان أمَر كُل اليَهود يَمشو مِن رُومِيَه. و بُولُس جا ليهُم. و فِشان كان مِن نَفس الشُّغل زيَهُم، قَعَد مَعاهُم يَشتَغِل مَعاهُم. و هُم كانو بيَعمِلو خيام. و هو كان بِتكَلَّم في بيت الرَّب كُلّو سَبِت، و يَرَضّي اليَهود و ناس إغريقيين. و لَمّا سِيلَا و تِيمُوثَاوُس جو مِن مَكِدونيَّه، بُولُس أدّا نَفسو عَشان يَبَشِّر بَس، و يَشهَد لِليَهود يَسُوع هو المَسيح. لَكِن لَمّا اليَهود كانو بِقاوِمو و بِشتِموهو، بُولُس هَز هِدومو و قال ليهُم: ”دَمّكُم عَلى روسينكُم! أنا بِدون ذَنب. و مِن هَسَّع بَمشي لِلأُمَم.“ و مَرَق مِن بيت الرَّب، و جا لِبيت راجِل بِخاف الله، إسمو تِيطُس يُسْتُس. و بيتو كان جَنب بيت الرَّب. و كِرِيسْبُس، رَئيس بيت الرَّب، آمَن بالرَب مَعَ كُلّو ناس بيتو. و كَتيرين مِن الكُورِنْثُوس السِّمِعو، آمَنو و إتعَمَّدو. و الرَّب قال لِبُولُس في الرّؤيَه في اللّيل: ”ما تَخاف، لَكِن إتكَلَّم و ما تَسكُت. عَشان أنا مَعاك، و واحِد ما بِخُت إيدو عَليك عَشان يَضُرَّك. عَلَشان أنا عِندي ناس كُتار في المَدينَه دي.“ و بُولُس قَعَد سَنَه و سِتَّه شُهور بِعَلِّم كِلمَة الله بِينُم. و لَمّا كان غَالِيُون مُدير أَخَائِيَه، اليَهود قامو بِنَفس واحدَه عَلى بُولُس، و جابوهو لِلمَحكَمَه. و قالو: ”الرّاجِل دا يِترَجّى النّاس حَتّى يَعبُدو الله بِعَكس القانون.“ و لَمّا بُولُس كان داير يَفتَح خَشمو، غَالِيُون قال لِليَهود: ”لَو كان في الشّي دا ظُلم ولّا ذَنب بَطّال، كُنتَ بِالحَق إتحَمَّلكُم، يا يَهود. و لَكِن إذا كان سؤَال عَن كِلمات و أسامي و عَن قانونكُم، شوفوها إنتو. أنا ما داير أكون قاضي في الحاجات دي.“ و كِدا طَرَدُم مِن المَحكَمَه. و كُلُّهُم مَسَكو سُوسْتَانِيس، رَئيس بيت الرَّب، و ضَرَبوهو قِدّام المَحكَمَه. و غَالِيُون ما خَلّى بالو لِداك كُلّو كُلّو. و بُولُس قَعَد هِناك أيام كَتيرَه. و بَعَد دا، قال ليهُم مَعَ السَّلامَه، و سافَر بِمُركَب لِسُورِيَّه، و أخَد مَعاهو بِرِيسْكِلَّا و أَكِيلَا. و بُولُس كان حَلَق رَاسو في كَنْخِرِيَا، عَلَشان كان عَليهو وَعَد. و وِصلو لِأفَسُس، و بُولُس خَلّاهُم الإتنين هِناك، و دَخَل بيت الرَّب و عَلَّم اليَهود. و لَمّا طَلَبو مِنّو يَقعُد وَكِت زِيادَه، ما كان داير. لَكِن لَمّا خَلّاهُم، هو قال: ”بَرجَع ليكُم إن شاء الله.“ و بَعَد دا، سافَر بِمُركَب مِن أفَسُس. و لَمّا نَزَل في قَيْصَرِيَّه، طَلَع و سَلّم عَلى الكَنيسَه. و بَعَد دا نَزَل لِأَنْطَاكِيَه. و بَعَد ما إستَنّى مُدَّه في أَنْطَاكِيَه، مَرَق و مَرَّه بِالتَّرتيب بِمَحَلّات غَلَاطِيَّه و فَرِيجِيَّه يَشَدِّد كُل التَّلاميذ. و في الزَّمَن دا، يَهودي إسمو أَبُلُّوس مِن ناس الإسكَندَريَّه جا لِأفَسُس. و هو راجِل عِندو قُدرَه في الكَلام و في الكُتُب. و هو كان مِتعَلِّم في طَريق الرَّب. و عَلَشانو حار في الرّوح، كان بِتكَلَّم و بِعَلِّم بِالظَّبط الحاجات عَن يَسُوع. و هو ما يَعرِف إلّا مَعموديَّة يُوحَنَّا. و إبتَدا يتكَلَّم بِدون خوف في بيت الرَّب. و لَمّا بِرِيسْكِلَّا و أَكِيلَا سِمِعوهو، أخَدوهو ليهُم، و وَرّوهو طَريق الله تَمام. و لَمّا كان عاوِز يَمشي لِأَخَائِيَه، الأخوان شَجَّعوهو عَلى دا، و كَتَبو لِلتَّلاميذ هِناك عَشان يَقبَلوهو. و لَمّا وِصِل، ساعَد كَتير ديل البِالنِّعمَه كانو آمَنو. و بِقُوَّه كان بِغلِب اليَهود قِدّام النّاس، و يَبَيِّن بِالكُتُب يَسُوع هو المَسيح. و حَصَل لَمّا أَبُلُّوس كان في كُورِنْثُوس، بُولُس فات بِالمَحَلّات العاليَه و جا لِأفَسُس. و هِناك لِقى بَعض مِن التَّلاميذ. و قال ليهُم: ”قِبِلتو الرّوح القُدُس لَمّا آمَنتو؟“ و قالو ليهو: ”و لا سِمِعنا في الرّوح القُدُس.“ و بُولُس قال: ”إتعَمَّدتو بِشِنو؟“ هُم قالو: ”بِمَعموديَّة يُوحَنَّا.“ و بُولُس قال: ”يُوحَنَّا عَمَّد بِمَعموديَّة التّوبَه، و كَلَّم النّاس عَشان يآمِنو بِالبِجي بَعدو، يَعني بِيَسُوع.“ و لَمّا سِمِعو، إتعَمَّدو بِإسم الرَّب يَسُوع. و لَمّا بُولُس خَتَّ إيدينو فوقُم، الرّوح القُدُس جا عَليهُم، و إتكَلَّمو بِلُغات و إتنَبّو. و كُلُّهُم كانو إتناشَر راجِل تَقريباً. و بُولُس دَخَل بيت الرَّب. و كان بِتكَلَّم بِدون خوف مُدَّة تلاتَه شُهور، يِتفاكَر و يَرَضّي عَن حاجات مَلَكوت الله. و بَعض مِنَّهُم، روسينُم بِقو قَوّيين و أبو يآمِنو، و شَتَمو الطَّرِيق قِدّام النّاس. عَلَشان كِدا، بُولُس خَلّاهُم و أخَد التَّلاميذ مَعاهو. و كان بِتكَلَّم مَعاهُم كُلّو يوم في مَدرَسَة تِيرَانُّوس. و إستَمَرَّ كِدا لِمُدَّة سَنَتين، لِغايَة كُل السّاكنين في آسيا مِن يَهود و ناس إغريقيين سِمِعو كِلمَة الرَّب. و الله عَمَل بِإيدين بُولُس عَجايِب مَخصوص، حَتّى كانو ياخُدو لِلعَيّانين مَناديل و مَريَلات مِن جِسمو. و هُم بِقو طَيبين مِن أمراضُم، و الأرواح الشَّرّيرَه مَرَقو مِنَّهُم. و بَعض مِن اليَهود، السّافَرو مِن مَكان لِمَكان يَطرودو أرواح شَرّيرَه، جَرَّبو يَنادو بِإسِم الرَّب يَسُوع عَلى العِندَهُم أرواح شَرّيرَه. و كانو بِقولو: ”آمُركُم بِيَسُوع البِبَشِّر بيهو بُولُس، أطلَعو.“ و سَبعَه أولاد لِيَهودي، رَئيس قُسُس، إسمو سَكَاوَا، كانو بيَعمِلو داك. و الرّوح الشَّرّير رَدَّ عَليهُم و قال: ”أنا بَعرِف يَسُوع و بَعرِف بُولُس، لَكِن إنتو، مِنو إنتو؟“ و بَعَد دا، الرّاجِل الكان عِندو الرّوح الشَّرّير، نَطَّ عَليهُم، و غَلَبُم، و ضَرَبُم لِغايَة ما جَرو مِن البيت دا عَريانين و مَجروحين. و دا بِقى مَعروف لِكُل اليَهود و ناس إغريقيين السّاكنين في أفَسُس. و كُلُّهُم خافو، و مَجَّدو إسم الرَّب يَسُوع. و كَتيرين مِن الآمَنو كانو بِجو، و يَعتَرِفو و يَخَبِّرو بِأعمالُم. و كَتيرين مِن الإشتَغَلو بِالسِّحِر، جَمَعو الكُتُب و حَرَقوها قِدّام النّاس. و لَمّا حَسبو التَّمَن، لِقو الجُّملَه خَمسين ألف حِتَّت مِن الفِضَّه. و كِدا كِلمَة الرَّب كانَت تَزيد و تَشَدِّد جِدّاً. و لَمّا الحاجات دي تَمَّت، بُولُس قَرَّر بِروحو أن يَمشي لِأُورُشَلِيم بَعَد ما مَرَّ بِمَكِدونيَّه و أَخَائِيَه. و قال: ”بَعَد ما أمشي هِناك، لازِم أشوف رُومِيَه كَمان.“ و رَسَّل لِمَكِدونيَّه إتنين مِن الكانو بِخدِموهو، تِيمُوثَاوُس و أَرَسْطُوس. و هو إستَنّى وَكِت زِيادَه في آسيا. و حَصَل في الوَكِت داك، دَوشَه كَبيرَه عَن الطَّريق. عَشان كان في راجِل إسمو دِيمِتْرِيُوس، صايِغ البِسَوّي بُيوت صُغار مِن فِضَّه لِأَرْطَامِيس، و جاب شُغل كَتير لِلصّانعين. و هو لَمّاهُم مَعَ الشَّغّالين في عَمَل زي دا، و قال: ”يا رُجال، إنتو بِتَعرِفو نِحنا عِندَنا غِنى مِن الصِّنعَه دي. و إنتو تَشوفو و تَسمَعو في أفَسُس و كُلّو آسيا تَقريباً، بُولُس دا عَلَّم ناس كُتار حَتّى ضَلّو. و يَقول المَعمولَه بِالإيدين ما آلِهَه أبَداً. و في خَطَر لِصِنعَتنا تَكون عِندَها إسم بَطّال. و كَمان بيت أَرْطَامِيس الإلَه العَظيمَه في خَطَر يَحسِبوها و لا حاجَه. و هي بِتَقَع مِن مَجدا، و النّاس بِيَعبُدوها في آسيا و كُل الدُّنيا.“ و لَمّا سِمِعو دا، بِقو مَليانين بِالزَّعل، و إبتَدو يَكورِكو و يَقولو: ”عَظيمَه هي أَرْطَامِيس بِتاعَت أفَسُس.“ و المَدينَه إتمَلَت دَوشَه. و كُلُّهُم جَرو مَعَ بَعض لِمَحَل اللِعب، و قَبَضو غَايُوس و وَأَرِسْتَرْخُس مِن مَكِدونيَّه، صاحِبين بُولُس في السَّفَر. و لَمّا بُولُس كان عاوِز يَدخُل بين النّاس، الأخوان ما خَلّوهو يَدخُل. و بَعض أصحابو مِن المَعروفين في آسيا، رَسَّلو ليهو يَطلُبو ليهو ما يَخاطِر بِنَفسو بِدُخول المَلعَب. و كان البَعض يَكورِكو بِشي، و البَعض التّاني بِشي. عَلَشان الإجتِماع كان مَلَخبَط. أكتَر النّاس ما عِرفو لِشِنو إتلَمّو. و بَعض مِن النّاس أشَّر لِإِسْكَنْدَر عَشان يتكَلَّم، و اليَهود دَفَعوهو لِقِدّام. و إِسْكَنْدَر أشَّر بِإيدو هو داير يتكَلَّم عَشان نَفسو قِدّام النّاس. و لَمّا عِرفو هو يَهودي، كُلُّهُم كورَكو بِصوت واحِد ساعتين تَقريباً: ”عَظيمَه هي أَرْطَامِيس بِتاعَت أفَسُس!“ و لكِن كاتِب المَدينَه سَكَّت النّاس و قال: ”يا رُجال أفَسُس، كُل الدُّنيا ما بِتَعرِف مَدينَة ناس أفَسُس، هي بِتَحرَس بيت أَرْطَامِيس العَظيمَه؟ و بِتَحرَس الصَّنَم النَزَل مِن السَّما. و ما في زول يَقدَر يَنكُر الحَقيقَه دي. عَلَشان كِدا، لازِم تَسكُتو، و ما تَعمِلو شي بِدون فِكر. عَشان إنتو جِبتو الراجلين ديل، و هُم ما سَرقو بُيوت الآلِهَه، و لا يَجَدِّفو عَلى آلِهَتنا. إذا دِيمِتْرِيُوس و الصّانعين المَعاهو عِندَهُم شَكوى عَلى واحِد، المَحكَمات مَفتوحَه، و في سَلاطين. خَلّوهُم يَشتَكو بَعضَهُم عَلى بَعض. و إذا تَطلُبو حاجَه تانيَه، لازِم يَعمِلوهو في مَجلِس قانوني. عَشان نِحنا في خَطَر بِشتَكونا بِفِتنَه فِشان الحَصَل اللّيلَه. و ما في سَبَب بيهو نَقدَر نَدّي حِساب عَن الدَوشَه دي.“ و لَمّا قال كِدا، هو خَلّى ناس الإجتِماع يَمشو. و بَعَد ما الدَوشَه تَمَّت، بُولُس نادى التَّلاميذ و شَجَّعُم و قال ليهُم: ”مَعَ السَّلامَه،“ و مَرَق عَشان يَمشي لِمَكِدونيَّه. و لَمّا سافَر في المَحَلّات ديك و بَشَّرُم كَتير عَشان يَدّيهو شَجاعَه، هو جا لِبَلَد ناس إغريقيين. و قَعَد هِناك تلاتَه شُهور. و لَمّا قَرَّب يَسافِر في البَحَر لِسُورِيَّه، اليَهود عَمَلو تَرتيب ضِدّو بِالسِّر. عَلَشان كِدا، هو إختار يَرجَع بِسِكَّة مَكِدونيَّه. و مَشو مَعاهو لِآسيا. سُوبَاتَرُس إبن بِرُّس مِن بيريَّه، و وَأَرِسْتَرْخُس، و وَسَكُونْدُس مِن ناس تَسَالُونِيكِي، و غَايُوس مِن دَربَه، و تِيمُوثَاوُس. و وَتِيخِيكُس، و وَتُرُوفِيمُس مِن ناس آسيا. و ديل مَشو قِدّامنا و إستَنّونا في تَرُوَاس. و لَكِن نِحنا سافَرنا بِمُركَب مِن فيلِبّي بَعَد أيام عيد الفَطير. و جينا ليهُم في خَمسَة أيام في تَرُوَاس، و قَعَدنا هِناك أُسبوع. و في أوَّل الأسبوع، إتلَمّينا سَوا عَشان نَكَسِّر العيش. و بُولُس إتكَلَّم مَعاهُم، و هو داير يَمشي في اليوم التّاني. و إستَمَر في الكَلام لِنُص اللّيل. و كانَت في فَوانيس كَتيرَه في الأوضَه الفي فوق، الكُنّا مِتلَمين فيها. و كان شاب إسمو أفتيخوس قاعِد في الشُّبّاك. و هو بِقى نَعسان و نام نوم تَقيل. و لَمّا بُولُس إستَمَرَّ في الكَلام، النّوم غَلَب عَليهو، و هو وَقَع مِن الدّور التّالِت لِتِحِت، و شالوهو مَيِّت. و بُولُس نَزَل، و رَمى نَفسو فوق الشّاب، و خَتَّ ضِراعاتو حَوَليهو و قال: ”ما تَتعَبو، هو حَي!“ و طَلَع و كَسَّر العيش و أكَل، و إتكَلَّم كَتير لِغايَة الصَّباح. و بَعَد دا مَرَق. و جابو الشّاب حَي، و إتعَزّو كَتير خَلاص. لَكِن نِحنا مَشينا قِدّامو لِلمُركَب، و سافَرنا بِمُركَب لِأسّوس. و كُنّا عاوزين ناخُد بُولُس مِن هِناك، عَشان بُولُس كان عَمَل التَّرتيب دا، عَلَشانو عاوِز يَمشي عَلى كِراعو. و لَمّا هو قابَلنا في أسّوس، أخَدناهو لِمِيتِيلِينِي. و لَمّا سافَرنا بِمُركَب مِن هِناك، وِصِلنا في اليوم التّاني قَريب مِن خِيوس. و في اليوم البَعدو، وِصِلنا لِساموس، و في اليوم التّاني جينا لِمِيلِيتُس. و بُولُس كان إختار يَفوت أفَسُس، عَشان ما لازِم يَضَيِّع وَكِت في آسيا. هو كان مِستَعجِل لِيَكون في أُورُشَلِيم في يوم الخَمسين إذا كان مُمكِن. و مِن مِيلِيتُس بُولُس رَسَّل، و نادى شُيوخ الكَنيسَه. و لَمّا جو ليهو، قال ليهُم: ”إنتو بِتَعرِفو كيف كُنتَ بَعيش مَعاكُم كُل الوَكِت مِن أوَّل يوم دَخَلتَ في آسيا. خَدَمتَ الرَّب بِتَواضُع كَتير، و دِموع كَتيرَه، و بِتَجَارِب حَصَلَت لَي مِن تَرتيب اليَهود الفي السِّر. و بِتَعرِفو أنا ما أبيت أبَشِّركُم بِأي حاجَه الفيها فايدَه ليكُم، لَكِن عَلَّمتَكُم قِدّام النّاس و في كُلّو بيت. أنا شاهِد لِليَهود و لِناس إغريقيين بِالتّوبَه لِلَّه، و الإيمان بِرَبَّنا يَسُوع المَسيح. و هَسَّع شوفو، بَمشي لِأُورُشَلِيم مَربوط بِالرّوح، و ما بَعرِف البِيَحصَل لَي هِناك، إلّا الرّوح القُدُس يَشهَد لَي في كُلّو مَدينَه، و يَقول جَنازِير و أتعاب يِستَنّوني. لَكِنّي ما أحسِب حَياتي غالي لِنَفسي أبَداً، إذا كان بَس أكَمِّل شُغلي و الخِدمَه القِبِلتا مِن الرَّب يَسُوع عَشان أشهَد بِإنجيل نِعمَة الله. و هَسَّع شوفو، أنا بَعرِف إنتو ما بِتشوفو وَشّي تاني مَرَّه، إنتو، يا كُل الأنا مَشيت بِينُم بَبَشِّر بِالمَلَكوت. عَلَشان كِدا، أشهَد ليكُم أنا نَضيف مِن دَم كُلُّكُم. عَشانّي ما إتوَقَّفتَ أخَبِّركُم بِكُلّو إرادَة الله. أحرِسو نُفوسكُم و كُل المُراح، العَمَلكُم الرّوح القُدُس فيهو وكَلاء، عَشان تَكونو رُعاه كَنيسَة الله الإشتَراها بِدَمّو. و أنا بَعرِف بَعَد ما مَشيت، دياب مِتوَحِّشين بِدخُلو، و ما بِرحَمو عَلى المُراح. و مِنَّكُم نُفوسكُم، بِقومو رُجال يِتكَلَّمو بِحاجات مَعَوَّجَه، عَشان يَجُرّو التَّلاميذ وَراهُم. عَلَشان كِدا، أحرِسو و إتزَكَّرو أنا مُدَّة تلاتَه سِنين ما وَقَّفتَ ليل و نَهار أهَظِّر كُلّو واحِد مِنَّكُم بِالدِّموع. و هَسَّع بَدّيكُم لِلَّه، و لِكِلمَة نِعمَتو، البِتَقدَر تَبنيكُم و تَدّي ليكُم الميراث مَعَ كُل القِدِّسين. أنا ما طَمَعتَ مِن زول فِضَّه ولّا دَهَب ولّا هِدوم. إنتو نُفوسكُم بِتَعرِفو الإيدين ديل كانَت تَخدِم إحتِياجاتي، و إحتِياجات الكانو مَعاي. و وَرّيتكُم في كُلّو حاجَه كيف لازِم نَتعَب لِنَساعِد الضَّعيفين، و نِزَكَّر كِلمات الرَّب يَسُوع القال: ’هو البِدّي بِكون مُبارَك أكتَر مِن البِقبَل.“ و لَمّا قال دا، رَكَع عَلى رُكبَتيهو مَعَ كُلُّهُم و صَلّى. و كُلُّهُم بَكو بِكى شَديد، و وَقَعو عَلى رَقَبَة بُولُس، و سَلَّمو عَليهو. و بِقو حَزنانين زِيادَه عَلى الكِلمَه القالا ليهُم: ”إنتو ما بِتشوفو وَشّي مَرَّه تانيَه.“ و بَعَد دا، مَشو مَعاهو لِلمُركَب. و لَمّا خَليناهُم و سافَرنا بِمُركَب، مَشينا في سِكَّه طَوّالي لِكوس، و في اليوم التّاني لِرودُس، و مِن هِناك لِباتَرا. و عَلَشان لِقينا مُركَب تَقطَع البَحَر لِفِينِيقِيَه، رِكِبناها و سافَرنا. و لَمّا قِدِرنا نَشوف قُبرُص، خَلّيناها عَلى شِمالنا، و سافَرنا لِسُورِيَّه. و وِصِلنا لِصُور، عَشان هِناك المُركَب كانَت تَنَزِّل بُضاعَتا. و عَلَشان لِقينا التَّلاميذ، قَعَدنا مَعاهُم أُسبوع. و هُم كانو بِقولو لِبُولُس بِالرّوح عَشان ما يَطلَع لِأُورُشَلِيم. و لَكِن لَمّا الوَكِت فات، مَرَقنا و مَشينا. و كُلُّهُم مَشو مَعانا مَعَ النِّسوان و الأولاد لِبَرَّه المَدينَه. و رَكَعنا عَلى رُكبَتينا عَلى الرَّملَه و صَلينا. و بَعَد ما قُلنا مَعَ السَّلامَه بَعَضَنا لِبَعض، رِكِبنا المُركَب، و لَكِن هُم رَجَعو لِبُيوتُم. و لَمّا خَلَّصنا السَّفَر مِن صُور، وِصِلنا لِبُتُولِمَايِس و سَلَّمنا عَلى الأخوان. و قَعَدنا مَعاهُم يوم واحِد. و في اليوم التّاني، مَرَقنا و جينا لِقَيْصَرِيَّه. و دَخَلنا بيت فِيلُبُّس المُبَشِّر، الهو واحِد مِن السَّبعَه، و قَعَدنا مَعاهو. و كان عِندو أربَعَه بَنات عَذارى الإتنَبّو. و بَعَد ما قَعَدنا أيام زِيادَه، نَبي إسمو أغابوس نَزَل مِن اليَهُودِيَّه. و جا لينا و أخَد حِزام بُولُس، و رَبَط بيهو إيدينو و رِجلينو و قال: الرّوح القُدُس يَقول: ”كِدا، اليَهود في أُورُشَلِيم ماشين يَربُطو الرّاجِل، سيد الحِزام دا، و بِسَلِّموهو لِإيدين الأُمَم.“ و وَكِت سِمِعنا داك، نِحنا و أهَل المَحَل طَلَبنا مِنّو ما يَطلَع لِأُورُشَلِيم. لَكِن بُولُس رَدَّ و قال: ”مالكُم بِتَبكو و تَكسِرو قَلبي؟ أنا جاهِز مُش أكون مَربوط بَس، لَكِن أموت كَمان في أُورُشَلِيم فِشان خاطِر إسِم الرَّب يَسُوع.“ و لَمّا أبى يَسمَعنا، سَكَتنا و قُلنا: ”خَلّي إرادَة الرَّب تَكون.“ و بَعَد الأيام ديلاك، جَهَّزنا و طَلَعنا لِأُورُشَلِيم. و بَعض مِن التَّلاميذ مِن قَيْصَرِيَّه مَشو مَعانا، و جابونا لِبيت مَناسون عَشان نَقعُد مَعاهو. و هو راجِل مِن قُبرُص و كان تِلميذ مِن بَدري. و لَمّا وِصِلنا لِأُورُشَلِيم، الأخوان قِبِلنا بِفَرَح. و اليوم التّاني، بُولُس دَخَل مَعانا لِيَعْقُوب. و كُل الشُّيوخ كانو في. و بَعَد ما سَلّم عَليهُم، بُولُس كَلَّمُم مِن اول، لِآخِر، بِكُلّو حاجَه الله عَمَلا بين الأُمَم بِخِدمَتو. و لَمّا سِمِعو، مَجَّدو الله. و قالو ليهو: ”إنتَ تَشوف، يا أخي، كَم ألف مِن اليَهود آمَنو، و كُلُّهُم عِندَهُم غيرَه لِلقانون. و ناس خَبَّروهُم كيف إنتَ بِتعَلِّم كُل اليَهود السّاكنين بين الأُمَم عَشان يَسيبو مُوسَى، و بِتقول ليهُم أن ما يَطَهِّرو أولادُم، و ما يَمشو حَسَب العادات. و كِدا بِنَعمِل شِنو؟ ما في شَك النّاس بِتلَمّو، عَلَشان هُم بِسمَعو إنتَ جيت. عَلَشان كِدا، سَوّي الحاجَه البِنقول ليك. عِندَنا أربَعَه رُجال عَليهُم وَعَد. أُخُد ديل، و نَضِّف نَفسَك مَعاهُم، و أدفَع القُروش ليهُم عَشان هُم يَحلِقو روسينُم. و كِدا، كُلُّهُم بِيَعرِفو الخَبَّروهُم بيك مُش الحَق، لَكِن إنتَ نَفسَك بِتَحفَظ القانون. و بِخُصوص الآمَنو بين الأُمَم، كَتَبنا ليهُم و حَكَمنا هُم لازِم يَرفُضو الضَّبَحوها لِلأصنام، و الدَّم، و اللَّحَم مِن بَهايِم مَخنوق، و الزِّنا.“ و في اليوم التّاني، بُولُس أخَد الرُّجال، و إتنَضَّف مَعاهُم. و دَخَل الهيكَل عَشان يَبَيِّن تَمام أيام النَّضافَه لِغايَة ما يَقَدِّمو تَقدِمَه عَن كُلّو واحِد مِنَّهُم. و لَمّا السَّبَعَة أيام قَرَّبو يَفوتو، اليَهود المِن آسيا شافو بُولُس في الهيكَل. و حَرَّكو كُل النّاس و قَبَضوهو. و كورَكو: ”يا رُجال إِسْرَائِيل، ساعِدونا! دا هو الرّاجِل البِعَلِّم كُل النّاس في كُلّو مَكان ضِد الشَّعب و القانون و المَحَل دا. و هو كَمان جاب ناس إغريقيين لِلهيكَل، و نَجَّس المَحَل المُقَدَّس دا.“ عَلَشانُم كانو شافو وَتُرُوفِيمُس مِن أفَسُس مَعاهو في المَدينَه، و إفتَكَرو بُولُس جابو لِلهيكَل. و كُل المَدينَه إتحَرَّكَت، و النّاس جَرو سَوّا. و قَبَضو بُولُس، و جَرّوهو بَرَّه مِن الهيكَل. و طَوّالي قَفَلو الأبواب. و وَكِت هُم كانو يَطلُبو يَكتُلوهو، الخَبَر وِصِل لِرَئيس جُيوش رُومِيَه إنّو المَدينَه كُلَّها إتحَرَّكَت. و هو حالاً أخَد عَساكِر و ضُبّاط، و جَرى ليهُم. و لَمّا هُم شافو الرَّئيس و العَساكِر، وَقَّفو يَضرُبو بُولُس. في الوَكِت دا، رَئيس الجُّيوش قَرَّب ليهو، و قَبَض عَليهو، و أمَرُم يَربُطوهو بِجَنزيرين. و سأل عَنّو مِنو هو، و عَمَل شِنو. و بَعض مِن النّاس كانو يَكورِكو بِشي، و البَعض بِشي تاني. و لَمّا ما قِدِر يَعرِف الحَق عَن دا بِسَبَب الدَوشَه، هو أمَرُم ياخُدو بُولُس جُوَّه مَنطِقَة العَساكِر. و لَمّا بُولُس وِصِل لِلسَّلالِم، العَساكِر كان لازِم يَشيلوهو بِسَبَب شِدَّة النّاس الكُتار، علشان كَترَت النّاس الكانو يَمشو وَراهو و يَكورِكو: ”أكتُلو!“ و وَكِت العَساكِر قَرَّبو ياخُدو بُولُس لِمَنطِقَة العَساكِر، هو قال لِلرَّئيس: ”مِن فَضلَك، مُمكِن أقول ليك حاجَه؟“ و قال ليهو: ”إنتَ بِتَعرِف لُغَة ناس إغريقيين؟ ما إنتَ المَصري القام بِفِتنَه قُبّال الأيام دي؟ و مَرَق لِلخَلا مَعَ أربَعَة آلاف راجِل مِن الكاتِلين؟“ و بُولُس قال: ”أنا راجِل يَهودي مِن طَرْسُوس، مِن ناس مَدينَه مَعروفَه في كِيلِيكِيَّا. مِن فَضلَك، خَلّيني أكَلِّم النّاس.“ و لَمَّن أدّاهو إذِن، بُولُس وَقَف عَلى السَّلالِم، و أشَّر بِإيدو لِلنّاس. و لَمّا كُلُّهُم سَكَتو، هو كَلَّمُم بِّاللُغَه العِبرانيَّه و قال: ”يا أخوان و أبَهات، أسمَعو و أنا بَدّي حِساب حَياتي هَسَّع قِدّامكُم.“ و لَمّا سِمِعوهو يَكَلِّمُم بِّاللُغَه العِبرانيَّه، سَكَتو زِيادَه. و بُولُس قال: ”أنا راجِل يَهودي، إتوَلَدتَ في طَرْسُوس بِتاعَت كِيلِيكِيَّا. لَكِن أنا كِبِرتَ في المَدينَه دي، و كُنتَ تِلميذ تِحِت غَمَالَائِيل. هو عَلَّمني قانون أبَهاتنا بِالتَّمام، و كانَت عِندي غيرَه لِلَّه زي كُلُّكُم اليوم. و طَرَدتَ الطَّريق دا حَتّى الموت، و قَبَضتَ عَلى رُجال و نِسوان، و رَميتُم في السِّجِن. و رَئيس القُسُس و كُلّو مَجلِس الشُّيوخ يَقدَرو يَشهَدو لَي بِداك. و أخَدتَ مِنَّهُم جَوابات لِلأخوان في دِمَشق. و مَشيت لِدِمَشق عَشان أجيب النّاس ديل بِجَنازِير لِأُورُشَلِيم عَشان يَعاقِبوهُم. و وَكِت ما كُنتَ ماشي و قَرَّبتَ لِدِمَشق، حَصَل في الضُّهُر تَقريباً، إنّو نور عَظيم نَوَّر حَواليهم طَوّالي. و وَقَعتَ عَلى الأرض، و سِمِعتَ صوت يَقول لَي: يا شَاوُل، يا شَاوُل، لِشِنو بِتَطرُدني؟ و رَدّيت عَليهو: إنتَ مِنو، يا سَيِّدي؟ و قال لَي: أنا يَسُوع النّاصِري، الأنتَ بِتَطرُدو. و النّاس الكانو مَعاي شافو النّور، و لَكِن ما سِمِعو الصّوت الكَلَّمني. و قُلتَ: بَعمِل شِنو، يا رَب؟ و الرَّب قال لَي: قوم و أمشي لِدِمَشق، و هِناك بِقولو ليك عَن كُل المَجَهَّز ليك تَعمِل. و عَلَشان ما قِدِرتَ أشوف مِن النّور المِنَوِّر داك، النّاس مَعاي قادوني بِإيدي، و جيت لِدِمَشق. و حَنانيّا، راجِل طَيب حَسَب القانون، و مُحتِرَم مِن اليَهود السّاكنين هِناك، جا لَي و وَقَف قِدامي، و قال لَي: ’يا أخي شَاوُل، عايِن لِفوق.‘ و في السّاعَه ديك قِدِرتَ أعاين ليهو. و هو قال: ’إلَه أبَهاتنا إختارَك عَشان تَعرِف إرادتو و تَشوف البار و تَسمَعو يتكَلَّم بِصوتو. عَشانَ إنت بِتكون شاهِد ليهو لِكُل النّاس بِالشُّفتو و السِّمِعتو. و هَسَّع لِشِنو تِستَنّى؟ قوم و إتعَمَّد، و أغسِل خَطاياك، و نادي بِإسم الرَّب.‘ و حَصَل لَي لَمّا رَجَعتَ لِأُورُشَلِيم و كُنتَ بَصَلّي في الهيكَل، شُفتَ رؤيا. و شُفتَ الرَّب يَقول لَي: ’أسرِع و أمرُق قَوام مِن أُورُشَلِيم، عَشانُم ما بِقبَلو شَهادَتَك لَي.‘ و قُلتَ: ’يا رَب، هُم بِيَعرِفو أنا كُنتَ بَخُت في السِّجِن البِآمِنو بيك، و بَضرُبُم في كُلّو بيت الرَّب. و وَكِت هُم كَبّو دَم اسْتِفَانُوس، شَهيدَك، أنا كَمان كُنتَ واقِف رَضيان، و حارِس لِهِدوم النّاس الكَتَلوهو.‘ و الرَّب قال لَي: ’أمشي، عَشان أنا بَرَسِّلَك بَعيد لِلأُمَم.“ و النّاس سِمِعوهو حَتّى الكِلمَه دي. و بَعَد دا، رَفَعو أصواتُم و قالو: ”أُخُد راجِل زي دا مِن الأرض! هو ما يِستَحِق يَعيش.“ و لَمّا هُم كانو يَكورِكو و يَقلَعو هِدُومُم، و يَرمو التُّراب في الهَوا، رَئيس الجُّيوش أمَرُم ياخُدو بُولُس جُوَّه مَنطِقَة العَساكِر. و قال إنّو يَمتَحِن بِضَرَبات، عَشان يَعرِف لِشِنو النّاس كانو يَكورِكو عَليهو كِدا. و لَمّا رَبَطوهو عَشان يَجلِدوهو، بُولُس قال لِرَئيس المِيَّه الواقِف هِناك: ”دا بِالقانون ليكُم تَجلِدو إنسان روماني الما حَكَمو عَليهو؟“ و لَمّا رَئيس العَساكِر سِمِع، هو مَشى لِرَئيس الجُّيوش و خَبَّرو و قال: ”إنتَ بِتسَوّي شِنو؟ الرّاجِل دا روماني.“ و رَئيس الجُّيوش مَشى لِبُولُس و قال ليهو: ”قول لَي، إنتَ روماني؟“ و قال: ”أيوَه.“ و رَدَّ رَئيس الجُّيوش: ”أنا بِتَمَن كَبير أشتَريت الحُقوق الرّوماني دي.“ و بُولُس قال ليهو: ”لَكِن أنا إتوَلَدتَ فيها.“ و طَوّالي الكانو عاوزين يَمتَحِنو، رَجَّعو عَنّو. و رَئيس الجُّيوش خاف لَمّا عِرِف إنّو روماني و كان رَبَطو. و في اليوم التّاني، فَكّاهو عَلَشان كان عاوِز يَعرِف الحَق عَن البِشتَكو بيهو اليَهود. و أمَر القُسُس الكُبار و كُلّو مَجلِسُم أن يِتلَمّو. و جاب بُولُس و خَتّاهو قِدّامُم. بُولُس عايَن لِلمَجِلس و قال: ”يا رُجال و أخوان، أنا عِشتَ قِدّام الله بِضَمير فيهو سَلام حَتّى اليوم دا.“ و حَنانيّا، رَئيس القُسُس أمَر الواقفين قَريب مِن بُولُس يَضرُبوهو عَلى خَشمو. و بُولُس قال ليهو: ”الله بِضرُبَك، يا حيطَه مُبيَّضَه! إنتَ قاعِد تَحكُم عَلي بِحَسَب القانون، و إنتَ تأمر بِضَربي بِعَكس لِلقانون؟“ و الواقفين قالو: ”إنتَ تَشتِم رَئيس القُسُس بِتاع الله؟“ و بُولُس قال: ”يا أخوان، ما عِرِفتَ هو رَئيس القُسُس، عَشان مَكتوب، ما تَقول كِلمَه بَطّالَه عَن رَئيس شَعبَك.“ و عَلَشان بُولُس عِرِف جُزو مِنَّهُم صَدّوقيين و الجُّزو التّاني فَرّيسيِّين، كورَك في المَجِلس: ”يا رُجال و أخوان، أنا فرِّيسي، إبن فرِّيسي. و بِسَبَب رَجاء قيامَة المَيِّتين يَحكُمو عَلي.“ و لَمّا قال دا، حَصَل شَكلَه بين الفَرِّيسِيِّين و الصَّدّوقيين. و الإجتِماع إنقَسَم. عَشان الصَدّوقيين بِقولو ما في قيامَه، و لا مَلاك، و لا روح. و لَكِن الفَرِّيسِيِّين بِعتَرِفو بِكُلّو داك. و كان في كوراك شَديد. و قامو بَعض مِن مُعَلِّمين القانون، قِسِم الفَرِّيسِيِّين، و إتشاكَلو شَديد، و قالو: ”ما بِنَلقى في الإنسان دا شَر. و إذا روح ولّا مَلاك كَلَّمو، دا شِنو لينا؟“ و لَمّا الشَّكلَه شَدَّدَت، رَئيس الجُّيوش خاف إنَّهُم يَقطَعو بُولُس حِتَّه حِتَّه. و أمَر الجُّيوش يَنزِلو و يَقبُضوهو مِن وَسطُم و يَجيبوهو لِمَنطِقَة العَساكِر. و في اللّيل البَعدو، الرَّب وَقَف جَمبو و قال ليهو: ”شِد حيلَك، زي ما شِهِدتَ لَي في أُورُشَلِيم، كِدا، لازِم تَشهَد في رُومِيَه كَمان.“ و في الصَّباح، اليَهود عَمَلو تَرتيب بِالسِّر، و حَلَفو بِلَعنَه. و قالو: ”ما ناكُل ولّا نَشرِب حَتّى نَكتُل بُولُس.“ و العَمَلو الحَلَف دا كانو أكتَر مِن أربَعين راجِل. و هُم مَشو لِلقُسُس الكُبار و الشُّيوخ و قالو: ”حَلَفنا بِلَعنَه ما ناكُل حاجَه حَتّى نَكتُل بُولُس. عَلَشان كِدا، إنتو، مَعَ المَجِلس، رَسِّلو لِرَئيس الجُّيوش عَشان يَجيبوهو ليكُم، زي ما عاوزين تَمتَحِنو قَضيَّتو بِالتَّمام. و نِحنا نَكون جاهِزين نَكتُلوهو قُبّال ما يَقَرِّب مِن هِنا.“ و لَكِن وَلَد أُخُت بُولُس سِمِع بِالتَّرتيب السِّرّي دا، و دَخَل مَنطِقَة العَساكِر و خَبَّر بُولُس. و بُولُس نادى واحِد مِن رؤساء العَساكِر و قال: ”أُخُد الشّاب دا لِرَئيس الجُّيوش، عَلَشان هو عِندو شي يَخَبِّرو بيهو.“ و اَخَدو و جابو لِرَئيس الجُّيوش و قال: ”المَحبوس بُولُس ناداني، و سألني يَجيب الشّاب دا ليك، عَلَشان عِندو شي يَقولو ليك.“ و رَئيس الجُّيوش اَخَدو بِإيدو، و مَشى مَعاهو بِجَنب بَراهو و سَألو: ”عِندَك شِنو تَقولو لَي؟“ و قال: ”اليَهود إتَّفَقو يَطلُبو مِنَّك تَجيب بُولُس لِلمَجِلس بُكرَه، زي ما عاوزين يَسألو عَن قَضيَّتو بِالتَّمام. ما تَسمَع ليهُم، عَشان في أكتَر مِن أربَعين راجِل بِندَسّو و بِستَنّوهو. و هُم حَلَفو عَشان ما ياكلو و لا يَشرَبو حَتّى يَكتُلوهو. و هَسَّع، هُم جاهِزين و بِستَنّو مِنَّك وَعَد.“ و رَئيس الجُّيوش خَلّى الشّاب يَمشي، و قال ليهو: ”ما تَقول لِأي واحِد الخَبَّرتَني بيهو.“ و نادى إتنين مِن رؤساء العَساكِر و قال: ”جَهِّزو ميتين عَسكَري عَشان يَمشو لِقَيْصَرِيَّه السّاعَه تِسعَه بِاللّيل. و جَهِّز كَمان سَبعين عَسكَري راكبين حَصين، و ميتين عَسكَري شايلين حُراب. و جَهِّزو حُصان لِبُولُس عَشان يَركَب. و كِدا يَجيبوهو بِالسَّلامَه لِفِيلِكْس المُدير.“ و هو كَتَب جَواب زي الجّاي: ”مِن كُلُودِيُوس لِيسِيَاس لِلحَبيب فِيلِكْس المُدير، سَلام. اليَهود قَبَضو عَلى الرّاجِل دا، و قَرَّبو يَكتُلوهو. لَكِن جيت مَعَ الجُّيوش و خَلَّصتو، عَشان عِرِفتَ إنّو روماني. و لَمّا كُنتَ داير أعرِف الشِّكايَه البِشتَكوهو بيها، جِبتو لِمَجلِسُم. و لِقيتُم إشتَكوهو بِأسئلَه بِخُصوص قانونُم. لَكِن ما إشتَكوهو بِشي يِستَحِق الموت ولّا الجَّنازِير. و لَمّا خَبَّروني بِتَرتيب سِرّي ضِد الرّاجِل، رَسَّلتو ليك طَوّالي. و أمَرتَ المُشتَكين يَقولو ليك العِندَهُم عَليهو.“ و العَساكِر اَخَدو بُولُس زي ما أمَروهُم، و جابوهو بِاللّيل لِغايَة أَنْتِيبَاتْرِيس. و اليوم التّاني، خَلّو العَسكَري الرّاكبين حَصين يَمشو مَعَ بُولُس، و هُم رَجَعو لِمَنطِقَة العَساكِر. و ديل دَخَلو قَيْصَرِيَّه، و أدّو الجَّواب لِلمُدير، و سَلَّمو بُولُس ليهو. و لَمّا المُدير قَرا الجَّواب، سأل عَنّو، هو مِن ياتا مُديرِيَّه. و لِقاهو مِن كِيلِيكِيَّا. و قال: ”بَسمَع مِنَّك لَمّا المُشتَكين عَليك بِجو كَمان.“ و أمَرُم يَحرَسو بُولُس في سَرايَة هِيرُودُس. و بَعَد خَمسَة أيام، رَئيس القُسُس نَزَل مَعَ بَعض مِن الشُّيوخ و مِتكَلِّم إسمو تَرْتُلُّس. و هُم جابو قِدّام المُدير شَكاويهُم ضِد بُولُس. و لَمّا نادوهو، تَرْتُلُّس إبتَدا يَشتَكي عَليهو، و قال: ”عَلَشان نِحنا حَصَّلنا بيك عَلى سَلام كَتير، و تَرتيبَك جاب لِلأُمَّه دي حاجات كوَيسَه، نِحنا نَقبَل داك، يا فِيلِكْس، في كُلّو شي و في كُلّو مَحَل بِكُلّو شُكر. لَكِن عَلَشان ما نَتَعِّبَك زِيادَه، نَطلُب مِنَّك تَسمَعنا شوَيَه بِرَحمَتَك. عَشان لِقينا الرّاجِل دا كان بِخرَب و بِحَرِّك دَوشَه بين كُل اليَهود الفي الدُّنيا، و هو رَئيس جَماعَة النّاصِريين. و هو جَرَّب يَنَجِّس الهيكَل كَمان. عَلَشان كِدا، قَبَضنا عَليهو. و كُنّا عاوزين نَحكُم عَليهو حَسَب قانونّا، لَكِن لِيسِيَاس رَئيس الجُّيوش جا، و اَخَدو مِن إيدينّا بِشِدَّه كَتيرَه. و أمَر المُشتَكين عَليهو يَجو ليك. و لَمّا تَمتَحِنو، إنتَ بِتَقدَر تَعرِف مِنّو، كُل الشَّكاوي النَّشتَكيهو بيهو.“ و اليَهود إتَّفَقو مَعاهو في الشِّكايَه و قالو: ”الحاجات دي بِالحَق كِدا.“ و بُولُس رَدَّ عَليهُم لَمّا المُدير أشَّر ليهو بِإيدو عَشان يتكَلَّم، و قال: ”عَلَشان بَعرِف إنتَ قاضي لِلأُمَّه دي مِن مُدَّة سِنين كَتيرَه، أنا بَتكَلَّم فِشان نَفسي بِفَرَح. و إنتَ تَقدَر تَعرِف ما كان زِيادَه مِن إتناشَر يوم مِن الوَكِت الأنا مَشيت لِأُورُشَلِيم عَشان أعبُد الله. و هُم ما لِقوني في الهيكَل أشاكِل أي واحِد، ولّا أحَرِّك زَحمَة النّاس، ما في بُيوت الرَّب و لا في المَدينَه. و هُم ما بِقدَرو يَثَبِّتو الشَّكاوي البِشتَكوني بيها هَسَّع. و لَكِن بَعتَرِف ليكُم بِدا، أنا بِحَسَب الطَّريق البِسَمّوهو حِزب، أعبُد إلَه أبَهاتنا. و بآمِن بِكُل المَكتوب في القانون و الأنبياء. و عِندي رَجاء بِالله، زي ما هُم كَمان عِندَهُم رَجاء. و بَنتَظِر إنّو بِتكون في قيامَه مِن بين المَيِّتين لِلبارين و الخاطيين. كِدا بَعِلِّم نَفسي عَشان يَكون لَي دايماً ضَمير بِدون لوم قِدّام الله و النّاس. و بَعَد سِنين كَتيرَه، جيت عَشان أجيب هَدايا لِأُمَّتي و أقَدِّم تَقدِمات. و لَمّا كُنتَ بَسَوّي دا، لِقوني نَضيف حَسَب القانون في الهيكَل. و ما في زَحمَة النّاس مَعاي ولّا دَوشَه. لَكِن كانو في بَعض مِن اليَهود مِن آسيا. و ديلاك لازِم يَجو قِدَّامَك، و يَشتَكو إذا عِندَهُم عَلي شي. و خَلّو ديل، الفي هِنا، نُفوسُم يَقولو شِنو اللِقو فِيني مِن ذَنب، وَكِت ما كُنتَ واقِف قِدّام المَجلِس. إلّا الكِلمَه الوَحيدَه دي، الكورَكتَ بيها و أنا واقِف بِينُم: ’فِشان القيامَه مِن بين المَيِّتين يَحكُمو عَلي اليوم.“ لَكِن فِيلِكْس، عَلَشان كان بِيَعرِف بِالظَّبط عَن الطَّريق دا، صَرَفُم و قال: ”لَمّا لِيسِيَاس، رَئيس الجُّيوش بِجي، أنا بَمتَحِن الحاجات بِتاعتَك.“ و أمَر رَئيس العَساكِر يَحرَس بُولُس، لَكِن يَدّيهو شوَيَة حُرّيَّه، و ما يَمنَع أي واحِد مِن أصحابو يَخدِمو. و بَعَد أيام قَليلَه، فِيلِكْس جا مَعَ دُرُوسِلا، مَرَتو، و هي يَهُودِيَّه. و هو رَسَّل و جاب بُولُس، و سِمِع مِنّو عَن الإيمان بِيَسُوع المَسيح. و وَكِت ما كان بِتكَلَّم عَن البِر و مَسِك النَّفس و الحُكم الجّاي، فِيلِكْس خاف و قال: ”هَسَّع كِفايَه، أمشي. و لَمَّن ألقى فُرصَه، بَناديك.“ و كَمان كان عِندو رَجاء مِن بُولُس إنّو يَدّيهو قُروش. و عَلَشان كِدا، كان بِجيبو مَرّات كَتيرَه و يتكَلَّم مَعاهو. و لَمّا سَنَتين فاتو، بُورْكِيُوس فَسْتُوس أخَد مَكان فِيلِكْس. و عَلَشان فِيلِكْس كان عاوِز يَبسِط اليَهود، هو ساب بُولُس في السِّجِن. و لَمّا فَسْتُوس وِصِل لِلمُديرِيَّه، طَلَع بَعَد تَلاتَة أيام مِن قَيْصَرِيَّه لِأُورُشَلِيم. و القُسُس الكُبار و رؤساء اليَهود خَبَّروهو بِشَكاويهُم عَلى بُولُس، و سألوهو كَتير. و طَلَبو مِنّو يَعمِل مَعروف، و يَرَسِّل بُولُس لِأُورُشَلِيم، عَلَشان هُم قَطَعو الدَرِب عَشان يَكتُلوهو. و فَسْتُوس رَدَّ عَليهُم: ”بُولُس مَحروس في السِّجِن في قَيْصَرِيَّه، و أنا عاوِز أمشي لِهِناك بَعَد شوَيَه. خَلّو المَعروفين مِنَّكُم يَجو مَعاي، عَشان يَشتَكو عَلى الرّاجِل دا إذا فيهو ذَنب.“ و بَعَد ما إستَنّى مَعاهُم تَمانيَه ولّا عَشَرَة أيام، نَزَل لِقَيْصَرِيَّه. و اليوم التّاني قَعَد عَلى كُرسي المَحكَمَه، و أمَرُم يَجيبو بُولُس. و لَمّا بُولُس جا، اليَهود النَّزَلو مِن أُورُشَلِيم وَقَفو حَواليهو، و قَدَّمو عَليهو شَكاوي كَتيرَه و صَعبَه. و ما قِدرو يَثَبِّتوها. و بُولُس قال في رَدّو: ”أنا ما عَمَلتَ خَطيَّه ضِد قانون اليَهود ولّا ضِد الهيكَل ولّا ضِد قَيصَر.“ لَكِن فَسْتُوس كان عاوِز يَبسِط اليَهود، و قال لِبُولُس: ”إنتَ داير تَطلَع لِأُورُشَلِيم و تَحاكِم هِناك قِدامي، في الحاجات دي؟“ و بُولُس قال: ”أنا واقِف قِدّام كُرسي مَحكَمَة قَيصَر، المَحَل اللازِم أحاكِم فيهو. ما ظَلَمتَ اليَهود في شي، و إنتَ بِتَعرِف دا بِالتَّمام. لَكِن، إذا أنا عِندي ذَنب، ولّا عَمَلتَ شي يِستَحِق الموت، ما آبى أموت. و لَكِن إذا الشَّكاوي اليَهود ديل يَشتَكوني بيها مُش الحَق، و لا واحِد يَقدَر يِسِلِّمني ليهُم. أنا بَرفَع طَلَبي لِقَيصَر.“ و بَعَد ما فَسْتُوس إتكَلَّم مَعَ مَجلِسو، رَدَّ عَليهو: ”لِقَيصَر رَفَعتَ طَلَبَك، لِقَيصَر بِتَمشي!“ و بَعَد ما فاتَت شوَيَة أيام، أَغْرِيبَاس المَلِك و بَرْنِيكِي وِصلو لِقَيْصَرِيَّه، عَشان يَسَلِّمو عَلى فَسْتُوس. و ما دام قَعَدو هِناك أيام كَتيرَه، فَسْتُوس إتكَلَّم مَعَ المَلِك عَن قَضيَّة بُولُس، و قال: ”فِيلِكْس خَلّى راجِل هِنا في السِّجِن. و لَمّا كُنتَ في أُورُشَلِيم، القُسُس الكُبار و شُيوخ اليَهود قَدَّمو لَي شَكاوي، و طَلَبو الحُكم عَليهو. و رَدّيت عَليهُم، دي ما عادَة ناس رومانيين أن يَسَلِّمو واحِد قُبّال ما هو، المُشتَكي عَليهو، يَقابِل وَش لِوَش المُشتَكين. و كِدا يَدُّوهو فُرصَه يَحرَس نَفسو مِن الشَّكوى. و لَمّا جو هِنا مَعاي، قَعَدتَ في اليوم البَعدو عَلى كُرسي المَحكَمَه بِسُرعَه، و أمَرتُم يَجيبو الرّاجِل. و لَمّا المُشتَكين عَليهو وَقَفو، ما جابو عَليهو ذَنب واحِد، زي ما كُنتَ بَفتَكِر. و لَكِن كانو عِندَهُم عَليهو أسئلَه بِخُصوص الدّين بِتاعُم، و عَن إنسان إسمو يَسُوع، المات، و بُولُس كان بِقول هو حَي. و عَلَشان ما عِرِفتَ كيف أمتَحِن الحاجات دي، سألتو، إنتَ داير تَمشي لِأُورُشَلِيم و تَحاكِم هِناك عَلى الحاجات دي؟ و لَكِن لَمّا بُولُس رَفَع طَلَبو عَلَشان يَكون مَحفوظ لِحُكم مَلِك قَيصَر، أمَرتُم يَحرِسوهو لِغايَة ما أرَسِّلو لِقَيصَر.“ و أَغْرِيبَاس قال لِفَسْتُوس: ”أنا عاوِز أسمَع الرّاجِل دا.“ و هو قال: ”بُكرَه بِتَسمَع ليهو.“ و اليوم التّاني أَغْرِيبَاس و بَرْنِيكِي جو بِكِبِر عَظيم، و دَخَلو مَحَل المَحكَمَه مَعَ رؤساء الجُّيوش و كُبار المَدينَه. و فَسْتُوس أمَرُم، و هُم جابو بُولُس. و فَسْتُوس قال: ”يا مَلِك أَغْرِيبَاس و كُل الرُّجال الحاضرين مَعانا، إنتو تَشوفو الرّاجِل دا! كُلّو زَحمَة اليَهود قَدَّمو لَي طَلَب بِخُصوصو في أُورُشَلِيم و هِنا. و كورَكو إنّو ما لازِم يَعيش بَعَد دا. و لَكِن أنا لِقيتو ما عَمَل حاجَه تِستَحِق الموت. لَكِن عَلَشانو رَفَع طَلَبو لِلمَلِك قَيصَر، قَرَّرتَ أرَسِّلو لِرُومِيَه. و لَكِن ما عِندي شي بِتأكيد بِخُصوصو عَشان أكتِب عَنّو لِلسَّيد. عَلَشان كِدا جِبتو قِدّامكُم، و خُصوصاً قِدَّامَك، يا مَلِك أَغْرِيبَاس، فِشان يَكون لَي بَعَد الإمتِحان دا، حاجَه عَشان أكتِب عَنّو. عَلَشان بَفتَكِر إنّو ما مَعقول أرَسِّل مَحبوس و ما بَوَرّي الشَّكاوي العَليهو.“ و أَغْرِيبَاس قال لِبُولُس: ”عِندَك إذِن تِتكَلَّم فِشان خاطِر نَفسَك.“ و كِدا بُولُس مَدَّ إيدو وإبتَدا يتكَلَّم: ”أنا أحسِب نَفسي مَبسوط، يا مَلِك أَغْرِيبَاس، عَلَشان انا ماشي أتكَلَّم فِشان نَفسي اللّيلَه دي قِدَّامَك عَن كُل البِشتَكوني بيهو اليَهود. و خُصوصاً فِشان إنتَ بِتَعرِف كُل العادات و القَضايا بين اليَهود. عَلَشان كِدا، بَطلُب ليك تَسمَعني بِالصَّبر. كُل اليَهود بِيَعرِفو المَشي بِتاعي مِن وَكِت كُنتَ وَلَد. و كيف مِن بِدايَة حَياتي، كُنتَ بَعيش بين أُمَّتي و في أُورُشَلِيم. و بِيِعرِفوني مِن وَكِت طَويل، و إذا هُم رَضيانين، يَقدَرو يَشهَدو لَي، أنا عِشتَ فرِّيسي بِحَسَب حِزب الدّين بِتاعنا الأشَد. و هَسَّع أنا واقِف أحاكِم عَلى رَجاء الوَعَد بيهو الله أبَهاتنا. و دا الوَعَد، الإتناشَر قَبيلَه بِتاعنا يَنتَظِرو عَشان يَتِم ليهُم. و هُم بِخدِمو الله بِالتَّعب، ليل و نَهار. فِشان الرَّجاء دا، اليَهود إشتَكو عَلي، يا مَلِك. لِشِنو واحِد مِنَّكُم يَفتَكِر ما مُمكِن يَصَدِّق أن الله بِقَوِّم المَيِّتين؟ و أنا كَمان كُنتَ بَفتَكِر في نَفسي لازِم أسَوّي حاجات كَتيرَه ضِد إسِم يَسُوع النّاصِري. و سَوّيت كِدا في أُورُشَلِيم. و أنا نَفسي خَتّيت في سِجِن كَتيرين مِن القِدِّسين، بَعَد ما أخَدتَ سُلطَه مِن القُسُس الكُبار. و لَمّا كانو يَكتُلوهُم، أنا كُنتَ بَدّي صوتي ضِدُّم. و مَرّات كَتيرَه كُنتَ بَعاقِبُم في كُلّو بُيوت الرَّب، و جَرَّبتَ أعمِلُم يَجَدِّفو الله. و عَشان زِعِلتَ مِنَّهُم شَديد، كُنتَ بَطرُدُم حَتّى لِلبِلاد الفي بَرَّه. و لَمّا كُنتَ ماشي لِدِمَشق بِسُلطَه و أمر مِن القُسُس الكُبار، كُنتَ في الطَّرِيق، يا مَلِك، و شُفتَ في نُص النَّهار نور مِن السَّما. و النّور دا كان يَفوت عَلى نور الشَّمِش و يَنَوِّر حَواليهم، و حَول النّاس الماشين مَعاي. و لَمّا كُلُّنا وَقَعنا عَلى الأرض، سِمِعتَ صوت يَقول لَي بِّاللُغَه العِبرانيَّه: شَاوُل، شَاوُل، لِشِنو تَطرُدني؟ صَعب عَليك بِتقاوِمني. و أنا قُلتَ: مِنو إنتَ، يا سَيِّدي؟ و الرَّب قال: أنا يَسُوع الأنتَ بِتَطرُدو. و لَكِن، قوم و أقيف عَلى رِجلينَك. عَشان أنا ظَهَرتَ ليك لِدا، عَشان أختارَك تَكون خَدّام و شاهِد بِالحاجات الشُّفتو فِيني، و بِالماشي أوَرّيهو ليك. و أنا بَخَلِّصَك مِن الشَّعب و مِن الأُمَم. و هَسَّع بَرَسِّلَك ليهُم عَشان تَفتَح عُيونُم، عَشان يَرجَعو مِن الضُّلُمَّه لِلنّور، و مِن سُلطَة الشّيطان لِلَّه. و بِدا يَقبَلو بِإيمان بي غُفران الخَطايا و مَحَل مَعَ القِدِّسين. عَلَشان كِدا، يا مَلِك أَغْرِيبَاس، ما أبيت أعمِل زي ما الرَّب قال لَي في الرّؤيَه السَّماويَّه. لَكِن خَبَّرتَ في الأوَّل النّاس الفي دِمَشق، و بَعدين، ديل الفي أُورُشَلِيم و كُلّو مَحَلّات اليَهُودِيَّه، و بَعدين الأُمَم كَمان. و خَبَّرتُم أن يَتوبو و يَرجَعو لِلَّه، و يَعمِلو أعمال تِستَحِق التّوبَه. بِالسَّبَب دا، اليَهود قَبَضوني في الهيكَل و جَرَّبو يَكتُلوني. و لَكِن فِشان كانَت عِندي مُساعَدَه مِن الله، قَعَدتَ لِليوم دا، شاهِد لِلصَّغير و الكَبير. أنا ما بَقول حاجَه إلّا القالو الأنبياء و مُوسَى إنّو بِكون. يَعني، المَسيح بِتوَجَّع و بِكون هو أوَّل واحِد البِقوم مِن بين المَيِّتين، و يَخَبِّر بِالنّور لِلشَّعب و لِلأُمَم.“ و وَكِت بُولُس كان بِتكَلَّم فِشان نَفسو، فَسْتُوس قال بِصوت عالي: ”إنتَ مَجنون، يا بُولُس! مَعرِفتَك العَظيمَه عَمَلَتَك تَكون مَجنون.“ و بُولُس قال: ”أنا ما مَجنون، يا أَغْرِيبَاس المُحتِرَم، لَكِن بَتكَلَّم كِلمات الحَق و المَعقول. و المَلِك بِيَعرِف بِالحاجات دي، و أنا بَقدَر أتكَلَّم قِدّامو بِالحُرّيَّه. و ما بَصَدِّق أي حاجَه مِن داك مَدسوسَه مِنّو، عَلَشان دا ما حَصَل في رُكن. إنتَ بِتآمِن بِالأنبياء، يا مَلِك أَغْرِيبَاس؟ أنا بَعرِف إنتَ بِتآمِن.“ و أَغْرِيبَاس قال لِبُولُس: ”إنتَ بِقَليل داير تَعمِلني مَسيحي؟“ و بُولُس قال: ”كُنتَ بَصَلّي لِلَّه بِقَليل ولّا بِكَتير، ما إنتَ بَس، لَكِن كُل البِسمَعوني اللّيلَه كَمان، يَبقو كِدا زي ما أنا، إلّا الجَّنازِير ديل.“ و قام المَلِك و المُدير و بَرْنِيكِي و القَاعِدين مَعاهُم. و وَكِت ما هُم يَمرُقو، كانو بِقولو بَعضَهُم لِبَعض: ”الإنسان دا ما عَمَل شي يِستَحِق الموت ولّا الجَّنازِير.“ و أَغْرِيبَاس قال لِفَسْتُوس: ”كان مُمكِن نَفِك الإنسان دا، إذا ما كان رَفَع طَلَبو لِقَيصَر.“ و لَمّا كانو دايرين نَسافِر بِمُركَب لِإِيطَالِيَه، سَلَّمو بُولُس و مَسجونين تانيين لِرَئيس العَساكِر، إسمو يُولِيُوس مِن قِسم أُغُسْطُس. و رِكِبنا مُركَب مِن أَدْرَامِيت قَرَّبَت تَسافِر لِلمَحَلّات عَلى الطَّرف، الفي آسيا. و أرَستَرخُس، راجِل مِكِدوني مِن تَسَالُونِيكِي، كان مَعانا. و في اليوم التّاني، وِصِلنا لِصَيدا. و يُولِيُوس عَمَل مَعروف لِبُولُس و أدّاهو إذِن يَمشي لِأصحابو، عَشان يَدُّوهو المُحتاج ليهو. و لَمّا سافَرنا في البَحَر مِن هِناك، مَشينا مِن تِحِت قُبرُص، عَشان الهَبوب كانَت ضِدَّنا. و بَعَد ما قَطَعنا البَحَر البِجانِب كِيلِيكِيَّا و بَمفِليَه، جينا لِميرا في لِيكِيَّه. و هِناك رَئيس العَساكِر لِقى مُركَب مِن الإسكَندَريَّه تَسافِر لِإيطاليَا، و هو دَخَّلنا فيها. و مَشينا بِشيش أيام كَتيرَه، و بِالتَّعب وِصِلنا قَريب مِن كِنيدُس. و لَمّا الرّيح ما خَلَّتنا نِستَمِر في سِكَّتنا، مَشينا مِن تِحِت كَريت قَريب مِن سَلموني. و مَرينا بِالطَّرف بِالتَّعب، و جينا لِمَحَل إسمو المَواني الطَّيبَه، قَريب مِن مَدينَة لَسَائِيَه. و وَكِت طَويل فات، و السَّفَر في البَحَر كان فيهو خَطَر، عَشان الصّوم، عيد اليَهود، كان فات. عَلَشان كِدا بُولُس حَزَّرُم و قال ليهُم، ”يا رُجال، بَشوف السَّفَر دا بِكون بِضَرَر و خَسارَه كَتيرَه، ما لِلبُضاعَه و المُركَب بَس، لَكِن عَلى نُفوسنا كَمان.“ و لَكِن رَئيس العَساكِر سِمِع لِرَئيس المُركَب و السيد بِتاعو أكتَر مِن القالو ليهُم بُولُس. و ما دام مَحَل المَراكِب ما كوَيس لِلقُعاد في الشِّتا، الأكتَر مِنَّهُم كانو عاوزين يَسافِرو مِن هِناك. و إفتَكَرو يِمكِن يَقدَرو يَجو لِفينِكس، و يَقعُدو هِناك وَكِت الشِّتا. و هي مَحَل المَراكِب في كَريت مَفتوح لِريح الجَّنوب الغَربي، و لِريح الشِّمال الغَربي. و لَمّا هَبَّت ريح الجَّنوب بِالرّاحَه، إفتَكَرو هُم حَصَّلو عَلى الكانو دايرين، و رَفَعو المِرساة، و مَشو حَول كَريت قَريب مِن الطَّرف. و لَكِن بَعَد شوَيَه ريح هَبوب شَديدَه مِن الجَّزيرَه، إسِما أُورُوكْلِيدُون، ضَرَبَتُم. و لَمّا الهَبوب قَبَضَت المُركَب و ما كان مُمكِن تَقابِل الريح، سَلَّمنا ليها و كُنّا مَطرودين. و مَشينا تِحِت جَزيرَه صَغَيرَه إسِما كُودَا. و بِالتَّعب قِدِرنا نَمسِك المُركَب الصَّغَيرَه. و لَمّا رَفَعوها، هُم رَبَطو المُركَب بِحِبال زي حِزام. و عَلَشان كانو خايفين يَقَعو عَلى رَملَه السّيرتِس، نَزَّلو المِرساة و خَلّو المُركَب تَكون مَطرودَه. و اليوم التّاني، عَلَشان الهَبوب شَدَّت عَلينا، إبتَدو يَرمو البُضاعَه بَرَّه. و في اليوم التّالِت رَمو بِإيدينُم عِدَة المُركَب. و لَمّا ما قِدِرنا نَشوف الشَّمِش ولّا النُّجوم أيام كَتيرَه، و الهَبوب شَدَّدَت عَلينا، في الآخِر، ما كان عِندَنا رَجاء في خَلاصنا كُلّو كُلّو. و بَعَد ما صامو وَكِت طَويل، قام بُولُس في وَسطُم و قال: ”يا رُجال، كان لازِم تَسمَعو لَي و ما تَسافِرو مِن كَريت، و ما تَجِيبو لِنُفوسكُم الضَّرَر دا و الخَسارَه. و هَسَّع بَطلُب مِنَّكُم تَشِدّو حيلكُم، عَلَشان ما بِتكون خَسارَة زول واحِد مِنَّكُم إلّا المُركَب. عَشان في اللّيلَه دي، مَلاك الإلَه، الأنا حَقّو و أنا بَخدِمو، وَقَف جَمبي. و قال: ما تَخاف، يا بُولُس، إنتَ لازِم تِقيف قِدّام قَيصَر. و شوف! الله أدّاك كُل النّاس المِسافرين مَعاك. و كِدا، شِدّو حيلكُم، يا رُجال، عَشان أنا بآمِن بِالله إنّو بِكون زي ما هو قال لَي. و لَكِن لازِم نِترَمي عَلى جَزيرَه.“ و بَعَد أربَعتاشَر ليلَه، و نِحنا لِسَّع كُنّا مَطرودين في بَحَر أدريَا، في نُص اللّيل تَقريباً، البَحّارَه إفتَكَرو نِحنا قَرَّبنا مِن الطَّرف، و قاسو المويَه، و لِقوها مِيَّه و عِشرين قَدَم. و لَمّا إتقَدَّمو شوَيَه و قاسو مَرَّه تانيَه، لِقوها تِسعين قَدَم. و عَلَشان كُنّا نَخاف نَقَع عَلى مَحَلّات حَجَريَّه، هُم رَمو مِن مؤَخِّرة المُركَب أربَعَه مَراسي، و كانو يَطلُبو أن يَكون النَّهار. و البَحّارَه جَرَّبو يَهرُبو مِن المُركَب، و نَزَّلو المُركَب الصَّغَيرَه لِلبَحَر، زي ما هُم عاوزين يَرمو مَراسي مِن مُقَدِّمة المُركَب. و بُولُس قال لِرَئيس العَساكِر و لِلعَساكِر: ”إذا ديل ما بِستَنّو في المُركَب، إنتو ما بِتَقدَرو تَخلَصو.“ و في الوَكِت دا، العَساكِر قَطَعو حِبال المُركَب الصَّغَيرَه، و خَلّوها تَقَع. و لَمّا النَّهار قَرَّب يَجي، بُولُس كان بِطلُب لِكُلُّهُم عَشان ياكُلو و قال: ”لِمُدَّة أربَعتاشَر يوم، إنتو مُنتَظِرين و تِستَمِرّو تَصومو، و ما أكَلتو شي. عَلَشان كِدا، بَطلُب مِنَّكُم تَقبَلو أكِل، عَشان في فايدَه مِن دا لِحَياتكُم. و شَعرَه ما بِتَقَع مِن راس واحِد مِنَّكُم.“ و لَمّا قال دا، أخَد عيش، و شَكَر الله قِدّام كُلُّهُم، و كَسَّر، و إبتَدا ياكُل. و كُلُّهُم بِقو مَبسوطين، و هُم كَمان أكَلو. و كُلُّنا في المُركَب كُنّا ميتين و سِتَّه و سَبعين زول. و لَمّا شَبَعو مِن الأكِل، إبتَدو يَعمِلو المُركَب خَفيفَه، و رَمو الدُّرَه في البَحَر. و لَمّا بِقى النَّهار، ما عِرفو الأرض، لَكِن شافو مَحَل في طَرف البَحَر الفيهو رَملَه. و كانو عاوزين يَدفَعو ليهو المُركَب إذا كان مُمكِن. و قَطَعو المَراسي و خَلّوها في البَحَر، و فَكّو حِبال الدَّفَّه. و بَعَد دا رَفَعو القُماش القِصَير لِلهَبوب، و إتقَدَّمو لِلطَّرف. لَكِن وَقَعو عَلى مَكان بين بَحرين، و دَفَعو المُركَب لِلطَّرف. و المُقَدِّمة دَخَل في الرَّملَه و ما إتحَرَّك، و المؤَخِّرة إتكَسَّر مِن شِدَّة أمواج المويَه. و كان فِكر العَساكِر يَكتُلو المَسجونين عَلَشان واحِد مِنَّهُم ما يَعوم و يَهرَب. لَكِن رَئيس العَساكِر، عَلَشان كان عاوِز يَخَلِّص بُولُس، وَقَّفُم مِن فِكرُم. و أمَر البِقدَرو يَعومو يَرمو نُفوسُم في الأوَّل و يَمشو لِلطَّرف. و التّانيين يَمشو بَعضَهُم عَلى خَشَب، و بَعضَهُم عَلى حِتَت مِن المُركَب. و كِدا، كُلُّهُم وِصلو بِسَلامَه لِلطَّرف. و لَمّا وِصِلنا بِسَلامَه، لِقينا الجَّزيرَه إسِما مَالِطَه. و ناس الجَّزيرَه عَمَلو لينا مَعروف فوق العادَه، عَشان هُم وَلَّعو نار و قِبلو كُلُّنا، عَشان الدُّنيا كانَت مَطَرَه و كان في بَرد. و بُولُس جَمَع شوَيَة خَشَب، و خَتّاها عَلى النّار. و دَبيب مَرَق بِسَبَب الحَر، و مَسَكو بِإيدو. و لَمّا ناس الجَّزيرَه شافو الدَّبيب مَسَك بِإيدو، قالو بَعضَهُم لِبَعض: ”ما في شَك الزّول دا كاتِل النّاس، و لَو هو مُخَلَّص مِن البَحَر، العَدِل ما خَلّاهو يَعيش.“ لَكِن بُولُس هَزَّ الدَّبيب لِلنّار و ما كان في عَوَجَه. لَكِن النّاس كانو يَنتَظِرو إنّو بِكون عِندو وَرَم، ولّا طَوّالي يَقَع و يَموت. لَكِن بَعَد ما هُم إستَنّو مُدَّه طَويلَه، و شافو ما في عَوَجَه، غَيَّرو فِكرُم و قالو هو إلَه. و كانَت في قَريبَه مِن المَحَل داك الأراضي بِتاعَت رَئيس الجَّزيرَه إسمو بُوبْلِيُوس. و هو قِبِلنا و عامَلنا ضيفانو بِلُطف تلاتَه أيام. و كان أبو بُوبْلِيُوس راقِد في عَنقَرِيبو، عِندو حُمَّه و عَيّان بِدُسُنتاريَا. و بُولُس دَخَل ليهو، و صَلّى، و خَتَّ إيدينو عَليهو، و شَفاهو. و لَمّا دا كان حَصَل، كُل العَيّانين في الجَّزيرَه كانو بِجو و بِقو طَيبين. و إحتَرمونا بِإحتِرام عَظيم. و لَمّا سافَرنا، قَدَّمو لينا الحاجات المُحتاجين ليها. و بَعَد تلاتَه شُهور، سافَرنا في مُركَب مِن الإسكَندَريَّه، فوقا عَلامَة التّيمان. و المُركَب دي كانَت في هِناك كُل الشِّتا. و نَزَلنا في سِرَكوسا و قَعَدنا تَلاتَة أيام. و مِن هِناك، دَوَّرنا و سافَرنا في البَحَر لِرِيغِيُون. و بَعَد يوم واحِد، ريح الجَّنوب هَبَّت. و في اليوم التّاني، وِصِلنا لِبُوطِيُولِي. و هِناك لِقينا أخوان، و هُم إترَجّونا نَقعُد مَعاهُم سَبعَة أيام. و كِدا جينا لِرُومِيَه. و لَمّا الأخوان هِناك سِمِعو بِخَبَرنا، هُم مَرَقو عَشان يَقابِلونا، و مَشو لِسوق أَبِيُّوس و اللّوكَندات التّلاتَه. و وَكِت بُولُس شافُم، شَكَر الله و شَدّا حيلو. و لَمّا دَخَلنا رُومِيَه، أدّو إذِن لِبُولُس يَقعُد بَراهو مَعَ العَسكَري الكان بِحرَسو. و بَعَد تَلاتَة أيام، بُولُس نادى كُبار اليَهود. و لَمّا إتلَمّو، قال ليهُم: ”يا رُجال و أخوان، أنا ما سَوّيت شي ضِد الشَّعب، و لا ضِد عادات أبَهاتنا. لَكِن خَتّوني في السِّجِن في أُورُشَلِيم، و سَلَّموني لِإيدين ناس رومانيين. و ديل بَعَد ما إمتَحَنوني، كانو عاوزين يَفِكّوني، عَلَشان ما لِقو فِيني ذَنب واحِد لِلموت. و لَكِن لَمّا اليَهود قاوَمو دا، أنا عِرِفتَ لازِم أرفَع طَلَبي لِقَيصَر، و لَو ما عِندي شي أشتَكي بيهو أُمَّتي. و بِالسَّبَب دا، ناديتكُم عَشان أشوفكُم و أكَلِّمكُم. عَلَشان خاطِر رَجاء إِسْرَائِيل أنا مَربوط بِالجَّنزير دا.“ و قالو ليهو: ”ما قِبِلنا مِن اليَهُودِيَّه جَوابات عَنَّك، و ما في واحِد مِن الأخوان جا و خَبَّرنا عَنَّك حاجَه بَطّالَه. لَكِن نِحنا عاوزين نَسمَع فِكرَك، فِشان بِنَعرِف النّاس في كُلّو مَحَل بِقاوِمو الحِزب دا.“ و إختارو ليهو يوم، و كَتيرين جو ليهو لِبيتو. و إبتَدا يَشهَد بِمَلَكوت الله، و يَكَلِّمُم كَتير بِالبِخُص يَسُوع مِن قانون مُوسَى و مِن الأنبياء، مِن الصَّباح لِغايَة المِسا. و بَعض مِنَّهُم قِبلو الكَلام الهو قال ليهُم، و لَكِن بَعض مِنَّهُم ما آمَنو. و ما إتَّفَقو بَعضَهُم مَعَ بَعض، و إبتَدو يَمرُقو، بَعَد ما بُولُس قال كِلمَه واحدَه: ”الرّوح القُدُس كَلَّم أبَهاتكُم كوَيس بِإِشَعْيَاء النَّبي، القال: أمشي لِلشَّعب دا و قول ليهُم: بِتَسمَعو سَمَع لَكِن ما بِتَفهَمو أبَداً، و بِتعاينو بِعُيونكُم لَكِن ما بِتشوفو أبَداً. عَلَشان قَلب الشَّعب دا بِقى قَوّي، و إضنينُم تُقال عَشان يَسمَعو، و قَفَلو عُيونُم عَشان ما يَشوفو بِعُيونُم، و لا يَسمَعو بِإضنينُم، و لا يَفهَمو بِقُلوبُم، و لا يَرجَعو و بَشفيهُم. فِشان كِدا، أنا دَايِركُم تَعرِفو خَلاص الله دا كان مُرسَل لِلأُمَم، و هُم بِيَسمَعو.“ و لَمّا قال دا، اليَهود مَرَقو، و هُم إتكَلَّمو كَتير مَعَ بَعض. و بُولُس قَعَد سَنَتين كُلّو في بيت هو أجَّرو لِنَفسو. و كان بِقبَل كُل البِدخُلو ليهو. و كان بِبَشِّر بِمَلَكوت الله، و بِعَلِّم البِخُص بِالرَّب يَسُوع المَسيح بِدون خوف، و ما في واحِد يَمنَعو. الجَّواب دا مِن بُولُس. أنا خَدّام يَسُوع المَسيح، و الله إختارني عَشان أبَشِّر بِإنجيلو. و الله وَعَد بِالإنجيل مِن قُبّال بِواسطَة أنبياهو في الكُتُب المُقَدَّسَه. و الإنجيل يَكَلِّمنا عَن إبنو، رَبَّنا يَسُوع المَسيح و هو كان مَولود مِن أهل بيت دَاوُد حَسَب الجِّسِم. و الرّوح القُدُس خَبَّر بِقُوَّه إنّو يَسُوع المَسيح هو إبن الله لَمّا قَوَّمو مِن بين المَيِّتين. و بِالمَسيح قِبِلنا نِعمَه و بِقينا رُسُل. و هَسَّع الله يَرَسِّلنا عَشان نَبَشِّر كُل الأُمَم فِشان هُم كَمان بِطيعوهو و بِآمِنو بيهو. و إنتو كَمان المُختارين مِن بين الأُمَم عَشان تَكونو لِيَسُوع المَسيح. أنا بَكتِب لِكُلُّكُم الفي مَدينَة رُومِيَه. الله بِحِبّكُم و إختاركُم عَشان تَكونو قِدِّيسين. نِعمَه ليكُم و سَلام مِن الله أبونا و مِن الرَّب يَسُوع المَسيح. في الأوَّل أشكُر إلَهي بِيَسُوع المَسيح فِشان كُلُّكُم، عَلَشان يَخَبِّرو بِإيمانكُم في كُل الدُّنيا. عَشان الله، البَخدِمو بِروحي في إنجيل إبنو، بِشهَد لَي كيف أتذَكَّركُم في كُلّو وَكِت في صَلَواتي. و بَصَلّي لِلَّه هَسَّع في الآخِر بِإرَادَتو إنّو يفتَح الطَّريق لَي عَشان أجيكُم. أنا داير أشوفكُم كَتير عَشان بَدّيكُم بَعض مِن الهَدايا البِكون مِن الرّوح عَشان تَبقو قَوّيين. يَعني بِتكون عِندَنا شَجاعَه مَعَ بَعض بِالإيمان الفي كُلُّنا، إيمانكُم و إيماني. أنا ما عاوِزكُم تَكونو بِدون مَعرِفَه، يا أخوان، مَرّات كَتيرَه قَرَّرتَ أجي ليكُم فِشان ألقى ثِمار مِنَّكُم كَمان، زي في الأُمَم التّانيين. و لَكِن مَنَعوني لِغايَة هَسَّع. أنا عِندي دين لِناس إغريقيين و الما إغريقيين، لِلفاهمين و الغُشام. و بِالسَّبَب دا، أنا جاهِز بِكُلّو قَلبي، أبَشِّركُم بِالإنجيل، ليكُم كَمان، الفي رُومِيَه. أنا ما خَجلان مِن الإنجيل، عَشان هو قُوَّة الله عَشان يَخَلِّص كُل البِآمِنو، لِليَهود في الأوَّل، و بَعدين لِناس إغريقيين. الإنجيل يَكَلِّمنا إنّو الله عَمَلنا بارين قِدّامو بِإيمان فيهو. عَلَشان كِدا، بِالإيمان بِنعيش الحَياة الجَديدَه بِواسطَتو. و الكُتُب المُقَدَّسَه بِقولو: ”الإنسان البار بِعِيش بِالإيمان.“ عَشان الله بِبَيِّن غَضَبو مِن السَّما ضِد كُلّو شَر النّاس، و ذَنبُم، النّاس اليَمنَعو الحَق بِالذَّنب. عَلَشان اليَقدَرو يَعرِفو عَن الله باين ليهُم، عَلَشان الله وَرّاهو ليهُم. النّاس ما بِقدَرو يَقولو هُم ما عارِفين عَن الله. مِن خَليقَة الدُّنيا النّاس قِدرو يَشوفو الله مِثِل شِنو مِن الحاجات الهو خَلَقا. دا يَوَرّي قُدرَتو البِتِستَمِر لِلأبَد. و دا يَوَرّي هو الله. و مَعَ إنَّهُم عِرفو الله، هُم ما مَجَّدوهو زي الله و ما شَكَروهو. لَكِن أفكارُم بِقو بِدون فايدَه، و قُلوبُم الغَشيمَه بِقو فيهُم ضُلُمَّه. و وَكِت ما هُم يَفتَكِرو نُفوسُم فاهمين، بِقو غُشام. و غَيَّرو مَجد الله الأبَدي بِشَكل صورَة الإنسان البِموت، و طُيور، و حَيوانات، و دَبايب. عَلَشان كِدا، الله سَلَّمُم في شَهوات قُلوبُم لِلوَساخَه، لِشَتيمَة أجسامُم بين نُفوسُم. عَشانُم غَيَّرو حَق الله بِالكِضِب، و عَبَدو و خَدَمو المَخلوق بِدال الخالِق، الهو مُبارَك لِلأبَد. عَشان كِدا، الله سَلَّمُم لِشَهوات فيها عيب، حَتّى نَسوانُم غَيَّرو الفايدَه الطَّبيعيَه بِشي ضِد الطَّبيعَه. و كِدا كَمان، الرُّجال خَلّو الفايدَه الطَّبيعيَه مَعَ النِّسوان، و إنحَرَقو بِشَهوَتُم بَعضَهُم لِبَعض. رُجال بِرُجال عَمَلو الفَضيحَه، و قِبلو في نُفوسُم جِزا الحَق لِغَلَطُم. و عَشانُم ما إفتَكَرو في فايدَه مِن مَعرِفَة الله، الله سَلَّمُم لِخَراب الفَهم عَشان يَعمِلو المَمنوع. هُم بِقو مَليانين بِكُلّو ذَنب، و شَر، و طَمَع، و حاجَه بَطّالَه. هُم مَليانين حَسَد، و كَتَل، و شَكلَه، و غِش، و فِكر بَطّال. هُم يَوَسوِسو، و يَشتِمو، و يَكرَهو الله، و يَرفَعو مَناخيرُم، و يَشكُرو نُفوسُم. و هُم نَفّاخين، مِفَكِّرين في طُرُق جَديدَه عَشان يَعمِلو الشَّر، ما يَطيعو والِدينُم، ما عِندَهُم فَهم، ما يَحفَظو إتِّفاق، بِدون قَلِب ولّا رَحمَه. هُم يَعرِفو حُكم الله إنّو البِعمِلو الحاجات زي دي يِستَحِقّو الموت. لَكِن يِستَمِرّو يَعمِلوها و يَقبَلو النّاس اليَعمِلوها. عَلَشان كِدا، إنتَ بِدون عُذر، يا الزّول البِتَحكُم عَلى واحِد تاني. عَشان وَكِت ما تَحكُم عَلى التّاني، تَحكُم عَلى نَفسَك. عَلَشان إنتَ البِتَحكُم، بِتَعمِل الحاجات دي زاتا. و بِنَعرِف دينونَه الله عَلى ديل البيَعمِلو زي الحاجات دي. و دينونَتو حَسَب الحَق. لَكِن إنتَ، يا زول، تَعمِل زات الحاجات، و تَحكُم عَلى البيَعمِل زَيَك! تَفتَكِر إنتَ بِتَقدَر تَجري مِن دينونَة الله؟ ولّا تَشتِم غِنى لُطفو و إحتِمالو و صَبرو الطَّويل؟ و ما بِتَعرِف الله يَوَرّي لُطفو عَشان يَقودَك لِلتّوبَه؟ لَكِن بِسَبَب قَلبَك القَوّي و الما بِتوب، بِتَخزِن لِنَفسَك غَضَب في يوم الغَضَب، لَمّا دينونَة الله العادِل بِظهَر. و هو بِدّي لِكُلّو واحِد زي أعمالو. و اليِستَمِرّو في العَمَل الطَّيب و يَطلُبو المَجد و الإحتِرام و الما بِموت، هو بِدّيهُم الحَياة الأبَديَّه. و ليهُم البِحِبّو نُفوسُم، و ما بِطيعُو الحَق لَكِن بِطيعُو الشَّر، بِكون في زَعل و غَضَب. التَّعب و الضّيق عَلى كُلّو إنسان بِعمِل الشَّر، عَلى اليَهودي في الأوَّل، و بَعدين عَلى الإغريقي. و المَجد و الإحتِرام و السَّلام لِكُلّو واحِد بِسَوّي الخير، لِليَهودي في الأوَّل، و بَعدين لِلإغريقي. عَشان الله ما بِشوف الوشوش. عَشان كُل البيَعمِلو خَطيَّه بِدون القانون، بِدون القانون بِموتو. و كُل البيَعمِلو خَطيَّه بِالقانون، بِالقانون بِحكُموهُم. عَشان مُش ديل البِسمَعو القانون هُم بارين قِدّام الله، لَكِن ديل البِعمِلو بِالقانون، هُم يَكونو بارين. لَمّا الأُمَم الما عِندَهُم قانون يَعمِلو بِالطَّبيعَه الواجِب في القانون، هُم قانون لِنُفوسُم، و لَو ما عِندَهُم قانون. و هُم بِوَرّو إنّو عَمَل القانون مَكتوب في قُلوبُم. و ضَميرُم كَمان يَشهَد، و أفكارُم يَشتَكو ولّا يِمكِن يَعمِلو عُذر لِنُفوسُم. في اليوم داك، الله يَدين عَلى أسرار النّاس بِحَسَب إنجيلي بِيَسُوع المَسيح. و شوف إنتَ بِتسَمّي نَفسَك يَهودي، و مِتَّكِل عَلى القانون و إنتَ بِقيت مِتكَبِّر و تَقول إنتَ تَعرِف الله. و إنتَ بِتَعرِف إرَادَتو و تَفَرِّق الأحسَن، عَشانَك إتعَلَّمتَ القانون. و إنتَ مِتأكِّد إنتَ تَقود العَميانين، و إنتَ نور لِلنّاس الفي الضَّلام، و مُدَرِّس الغُشام، و مُعَلِّم لِلصُّغار، عَشان عِندَك في القانون صورَة المَعرِفَه و الحَق. بَعدين إنتَ البِتعَلِّم التّاني، ما بِتعَلِّم نَفسَك؟ إنتَ البِتعَلِّم النّاس عَشان ما يَسرِقو، إنتَ تَسرِق؟ إنتَ البِتقول واحِد ما لازِم يَعمِل زِنا، إنتَ تَعمِل زِنا؟ إنتَ البِتَكرَه الأصنام، تَسرِق مِن الهياكِل؟ إنتَ البِتمَجِّد القانون، إنتَ تَشتِم الله لَمّا تَكسِّر القانون؟ زي ما مَكتوب: ”بِجَدِّفو إسم الله بين الأُمَم بِسَبَبكُم.“ الطَّهور عِندو فايدَه إذا حَفَظتو القانون. و لَكِن إن كَسَّرتَ القانون، طَهورَك بِقى ما طَهور. إذا كان الما مُطَهَّر بِحفَظ القانون، و لَو هو ما مُطَهَّر، ما يَحسِبو ليهو زي الطَّهور؟ و الما مُطَهَّر دا بِطَبيعَه، لَمّا يَحفَظ القانون، بِيَحكُم عَليك. و إنتَ عِندَك القانون المَكتوب و الطَّهور، لَكِن تَكسِّر القانون. عَشان اليَهودي في الظّاهِر، مُش يَهودي بِالحَق، و لا الطَّهور الفي الظّاهِر في الجِّسم طَهور بِالحَق. لَكِن اليَهودي في جُوَّه، هو اليَهودي الحَقيقي. و طَهور القَلِب، هو الطَّهور الحَقيقي و دا بِالرّوح، مُش بِالكِتاب. و حَمدو ما مِن النّاس، لَكِن مِن الله. عَلَشان دا، شِنو الخير فِشان إنتَ يَهودي؟ ولّا شِنو الفايدَه في الطَّهور؟ كَتير مِن كُلّو طَريق. في الأوَّل، الله أدّاهُم كلمتو. شِنو إذا كان بَعض مِنَّهُم ما كان عِندَهُم إيمان؟ عَلَشان هُم ما عِندَهُم إيمان، الله ما بِكون أمين؟ أبَداً! خَلّي الله يَكون أمين و كُلّو إنسان كَضّاب. زي المَكتوب: ”عَلَشان تِتبَرَّر، في كَلامَك، و تَغلِب لَمّا يَحكُمو عَليك.“ و لَكِن إذا ذَنبَنا يَوَرّي بِر الله، بِنقول شِنو؟ الله مُظلِم لَمّا يَجيب زَعلو عَلينا؟ بَتكَلَّم زي ما بِقولو النّاس. أبَداً! إذا داك الحَق، كيف الله يَقدَر يَدين الدُّنيا؟ و لَكِن إذا بِكِضِبي حَق الله يَزيد لِمَجدو، لِشِنو بَعَد دا أنا أكون مَحكوم زي خاطي؟ لِشِنو ما نَقول: ”خَلّونا نَعمِل الشَّر عَشان الخير بِجي؟“ و بَعَد النّاس يَكَضِّبو عَلينا، و يَقولو أن نِحنا نَقول كِدا. دينونَة النّاس ديل عادِل. بَعدين شِنو؟ نِحنا اليَهود أحسَن؟ مُش مُمكِن أبَداً! عَشانّا وَرينا أن اليَهود و ناس إغريقيين كُلَّهُم تِحِت الخَطيَّه. زي ما هو مَكتوب: ”ما في إنسان بار و لا واحِد. ما في واحِد يَفهَم، ما في واحِد يَطلُب الله. كُلُّهُم إتلَفَتو مِن الله، و كُلّو واحِد مِنَّهُم بِقى بِدون فايدَه. ما في واحِد يَعمِل كوَيس، ما في، و لا واحِد. خَشمُم قَبر مَفتوح، و بِغِشّو بِلِساناتُم. سِم دَبايب تِحِت شَفاهُم. و خَشمُم مَليان لَعنَه مُرَّه. كِرعينُم يَمشو قَوّام عَشان يَكتُل. خَراب و مُصيبَه في سِكّتُم. و ما بِعرِفو سِكَّة السَّلام. و ما في خوف الله قِدّام عُيونُم.“ و نِحنا بِنَعرِف، كُل البِقولو القانون يَقولو ليهُم التِحِت القانون، عَشان يَقفِل كُلّو خَشم، و كُل الدُّنيا يَبقى تِحِت دينونَة الله. عَلَشان كِدا، و لا زول يِتبَرَّر قِدّام الله بِأعمال القانون، عَشان بِالقانون يَجي مَعرِفَة الخَطيَّه. لَكِن هَسَّع بِر الله ظَهَر بِدون القانون، و القانون و الأنبياء يَشهَدو ليهو. و بِر الله دا بِالإيمان بِيَسُوع المَسيح، لِكُل البِآمِنو. عَشان ما في فارِق، عَشان كُل النّاس عَمَلو خَطيَّه و إحتاجو لِمَجد الله. و يِتبَرَّرو مَجّاناً، بِنِعمَتو، بِالفِداء الجّا بِيَسُوع المَسيح. الله قَدَّم يَسُوع ضَبيحَه عَلَشان يَصالِحنا بِالإيمان بِدَمّو عَشان يَوَرّي بِرّو. في الزَّمَن الفات بِسَبَب صَبرو الطَّويل، هو مَرَّه بِخَطاياهم. هو عَمَل دا عَشان يَوَرّي بِرّو هَسَّع عَشان هو نَفسو بار و يَبَرِّر البِآمِن بِيَسُوع. و كِدا، وين الكِبِر؟ ما في مَكان ليهو. و السَّبَب شِنو؟ عَشان نِحنا بِنطيع القانون؟ أبَداً! لَكِن عَشان بِنآمِن. عَشان نِحنا نَحسِب أن الزّول يِتبَرَّر بِالإيمان بِدون أعمال القانون. الله لِليَهود بَس؟ هو ما لِلأُمَم كَمان؟ أيوَه، لِلأُمَم كَمان. عَلَشان الله واحِد. و هو يَبَرِّر المُطَهَّر بِالإيمان و الما مُطَهَّر بِالإيمان. و كِدا نَبَطِّل القانون بِالإيمان؟ أبَداً! لَكِن نَثَبِّت القانون. بَعدين نَقول شِنو عَن أبونا إِبْرَاهِيم؟ هو لِقى شِنو حَسَب الجِّسم؟ عَشان إذا كان إِبْرَاهِيم إتبَرَّر بِالأعمال، كان عِندو كِبِر، و لَكِن ما قِدّام الله. الكِتاب بِقول شِنو؟ ”إِبْرَاهِيم آمَن بِالله، و حَسبو ليهو بِر.“ و الزّول البِسَوّي، ما يَحسِبو ليهو أُجرَتو زي هَدِيَّه، لَكِن زي دين. و الزّول الما بيَعمِل لَكِن بِآمِن بِالله اليَبَرِّر الخاطي، إيمانو إتحَسَب ليهو بِر. و دَاوُد كَمان يَقول نَفس الحاجَه إنّو الإنسان الإتحَسَب ليهو بِر بِدون أعمال، هو مُبارَك. هو يَقول: ”مُبارَكين هُم الخَطاياهم مَغفورَه ليهُم، و ذُنوبُم مُغَطّى. مُبارَك الرّاجِل، الرَّب ما بِحسِب ليهو خَطِيَّتو.“ البَرَكَه دي لِلمُطَهَّر بَس، ولّا لِلما مُطَهَّر كَمان؟ إِبْرَاهِيم آمَن بِالله، و دا سَوَّاهو بار قِدّام الله. الله سَوّا دا ليهو مِتين؟ دا كان قُبّال طَهورو ولّا بَعدو؟ ما كان بَعدو، لَكِن قُبّال طَهورو! و أخَد عَلامَة الطَّهور زي خِتِم لِلبِر الكان عِندو بِإيمان لَمّا هو لِسَّع ما كان مُطَهَّر. و بِدا بِقى أبو لِكُل البِآمِنو و هُم لِسَّع ما مُطَهَّرين، عَلَشان يَحسِبو ليهُم البِر كَمان. و هو كَمان أبو المُطَهَّرين، مُش بِسَبَب طَهورُم بَس، لَكِن عَلَشان هُم آمَنو زي ما أبونا إِبْرَاهِيم آمَن لَمّا هو ما كان مُطَهَّر. الله وَعَد لِإِبْرَاهِيم و أولادو، إنّو يَكون وارِث الدُّنيا. و دا ما عَشان إِبْرَاهِيم طاع القانون، لَكِن عَشان آمَن بِالله. عَشان إذا كان البِعيشو بِالقانون هُم وُرّاث، الإيمان بِدون فايدَه، و الوَعَد ما عِندو سُلطَه. فِشان القانون يَجيب الغَضَب. و المَكان الما فيهو قانون، ما فيهو ذَنب. عَلَشان كِدا، الوَعَد بِجي بِالإيمان، عَشان يَكون بِنِعمَه، و يَكون بِتأكيد، لِكُل الأولاد، مُش ليهُم البِطيعُو القانون بَس، لَكِن ليهُم المِن إيمان إِبْرَاهِيم كَمان. و هو أبو لِكُلُّنا. زي ما مَكتوب: ”عَمَلتَك أبو لِأُمَم كَتيرَه.“ هو أبونا قِدّام الله الهو آمَن بيهو. و الله بِدّي حَياة لِلمَيِّتين، و هو يتكَلَّم و يَخلُق حاجَه مِن الما كانَت مَوجودَه. و في الرَّجاء إِبْرَاهِيم آمَن، لَمَّن ما كان في رَجاء عَلَشان يَبقى أبو لِأُمَم كَتيرَه. زي ما الكِتاب يَقول: ”أولادَك بِكون أُمَم كَتيرَه.“ و هو ما كان ضَعيف في الإيمان لَمّا فَكَّر في جِسمو، الكان قَريب لِلموت. عَلَشان كان ليهو مِيَّة سَنَه تَقريباً. و إيمانو ما كان ضَعيف لَمّا فَكَّر في رَحِم سَارَه المَيِّت. و إِبْرَاهِيم لِسَّع ما شَكَّ بِوَعَد الله، لَكِن بِقى شَديد في الإيمان، و أدّا المَجد لِلَّه. و إتأكَّد تَمام أن الله قادِر يَعمِل زي ما وَعَد بيهو. عَلَشان كِدا، سَوَّاهو بار. الكِلمات: ”سَوَّاهو بار،“ ما كانَت مَكتوبَه فِشانو وَحدو، لَكِن فِشان نِحنا كَمان. عَشان الله يَسَوّينا بارين، نِحنا البِنآمِن بيهو القَوَّم رَبَّنا يَسُوع مِن بين المَيِّتين. هُم سَلَّموهو لِلموت عَشان خَطايانا. و الله قَوَّمو عَشان نِتبَرَّر. هَسَّع عَلَشان إتبَرَّرنا بِالإيمان، عِندَنا سَلام مَعَ الله بِرَبَّنا يَسُوع المَسيح. و بيهو قِبِلنا الدُّخول بِالإيمان لِلنِّعمَه دي، و نِحنا نَعيش بيهو. و نَفرَح في رَجاء مَجد الله. و فوق دا، نَفرَح كَمان في أتعاب، عَشان بِنَعرِف التَّعب يَجيب الصَّبر. و الصَّبر يَعمِلنا مَقبولين. و عَشان كِدا عِندَنا رَجاء. و عَلَشان عِندَنا رَجاء، نِحنا ما خَجلانين، عَشان الله كَبَّ مَحَبَّتو في قُلوبنا بِالرّوح القُدُس الهو أدّانا. عَشان لَمّا كُنّا لِسَّع ضَعيفين، المَسيح مات في الوَكِت المُختار فِشان الخاطيين. عَشان دي حاجَه فوق العادَه، إذا واحِد يَموت عَشان راجِل بار. يِمكِن عَشان راجِل صالِح، واحِد يَكون عِندو شَجاعَه حَتّى يَموت. و لَكِن الله وَرّا مَحَبَّتو لينا، عَشان لَمّا نِحنا لِسَّع كُنّا خاطيين، المَسيح مات فِشانّا. عَشان إتبَرَّرنا هَسَّع بِدَمّو، كيف بِالأكتَر جِدّاً بِنَخلَص بيهو مِن الغَضَب! و وَكِت ما نِحنا كُنّا عُدوان الله، هو عَمَل سَلام مَعانا بِموت إبنو. و هَسَّع عَلَشان بِقينا مُصالِحين، كيف بِالأكتَر جِدّاً نِحنا بِنَخلَص بِحَياتو. و ما دا بَس، لَكِن نَفرَح بِالله بِرَبَّنا يَسُوع المَسيح، و هَسَّع بيهو بِقينا مُصالِحين. بِزول واحِد الخَطيَّه دَخَلَت لِلدُّنيا، و الخَطيَّه جابَت الموت. و كِدا، الموت جا لِكُل النّاس، عَشان كُل النّاس عَمَلو خَطيَّه. الخَطيَّه كانَت في الدُّنيا قُبّال ما القانون جا، لَكِن ما يَحسِبوهو خَطيَّه لَإنا ما في قانون. و لَكِن الموت حَكَم مِن آدَم لِمُوسَى و داك عَلى ديل الما عَمَلو خَطيَّه زي ما آدَم عَمَل خَطيَّه، لَمّا كَسَّر أمر الله. آدَم كان عَلامَه ليهو الماشي يَجي. و هَديَّة الله مَجّاناً و مُش زي خَطيّة آدَم. و ناس كُتار ماتو بِسَبَب خَطيّة الإنسان الواحِد، يَعني آدَم. لَكِن نِعمَة الله أكبَر بِكَتير، و النِّعمَه دي جات لِناس كُتار كَمان. و كِدا كَمان الهَدِيَّه المَجّاناً جات بِإنسان واحِد، يَعني يَسُوع المَسيح. و في فارِق بين هَديَّة الله و خَطيّة إنسان واحِد. بَعَد الخَطيَّه الواحدَه، جا الحُكم: ”إنتَ مُذنِب،“ لَكِن بَعَد خَطايا كَتيرَه، جا الهَدِيَّه: ”إنتَ ما مُذنِب.“ بِالحَق، بِخَطيّة إنسان واحِد، الموت كان عِندو قُوَّه عَلى كُل النّاس. لَكِن في ناس البِقبَلو نِعمَتو الكَتير و هَديَّة البِر. و بِتكون عِندَهُم قُوَّه زي المُلوك في الحَياة بِالواحِد يَسُوع. عَلَشان كِدا، بِخَطيَّه واحدَه الدّينونَه كانَت عَلى كُل النّاس. و كِدا بِبِر واحِد، كُل النّاس يَبقو بارين، و البِر دا يَجيب ليهُم الحَياة. عَلَشان الإنسان الواحِد خالَف، الكَتيرين بِقو خاطيين. و كِدا عَلَشان الإنسان الواحِد طاع، الكَتيرين بِقو بارين. القانون دَخَل عَشان الخَطيَّه تَزيد. لَكِن لَمّا الخَطيَّه زادَت، نِعمَة الله زادَت كَتير جِدّاً. و زي ما الخَطيَّه مَلَكَت لِلموت، كِدا النِّعمَه بِتَملِك بِالبِر لِلحَياة الأبَديَّه بِرَبَّنا يَسُوع المَسيح. بَعدين بِنقول شِنو؟ نِستَمِر نَعيش في الخَطيَّه عَلَشان النِّعمَه تَزيد؟ أبَداً! نِحنا مُتنا لِلخَطيَّه، كيف نَعيش فيها بَعَد دا؟ ما بِتَعرِفو كُلُّنا الإتعَمَّدنا بِالمَسيح يَسُوع، إتعَمَّدنا لِموتو؟ و كُنّا مَدفونين مَعاهو بِالمَعموديَّه لِلموت، عَلَشان زي ما المَسيح قام مِن بين المَيِّتين بِمَجد الأبو، نِحنا كَمان نَعيش حَياة جَديدَه. إن بِقينا واحِد مَعاهو في موتو نِحنا كَمان بِنكون واحِد مَعاهو في قيامَتو. عَشانّا بِنَعرِف دا، نَفسَنا القَديمَه إنصَلَبَت مَعاهو، عَلَشان يَوَقِّف قُوَّة جِسم الخَطيَّه، عَشان ما بِنكون خَدّامين لِلخَطيَّه بَعَد دا. عَلَشان لَمّا واحِد يَموت، هو يَكون حُر مِن الخَطيَّه. إذا مُتنا مَعَ المَسيح، نآمِن نِحنا بِنعيش كَمان مَعاهو. بِنَعرِف المَسيح قام مِن بين المَيِّتين، و هو ما بِموت مَرَّه تانيَه أبَداً. الموت ما عِندو سُلطَه فوقو بَعَد دا. الموت الهو مات، هو مات لِلخَطيَّه مَرَّه واحدَه، و الحَياة الهو يَعيشا، هو يَعيشا لِلَّه. و كِدا كَمان، أحسِبو نُفوسكُم مَيِّتين لِلخَطيَّه، و لَكِن حَيين لِلَّه بِالمَسيح يَسُوع رَبَّنا. عَلَشان كِدا، ما تَخَلّو الخَطيَّه تَملِك في جِسِمكُم البِموت فِشان تَطيعو شَهوَتو. و ما تَدّو أعضاء جِسِمكُم لِلخَطيَّه عَشان تَعمِلو الشَّر، لَكِن أدّو نُفوسكُم لِلَّه زي ناس حَيين بَعَد ما كُنتو مَيِّتين. و أدّو أعضاء جِسِمكُم عَشان تَعمِلو بِر الله. الخَطيَّه ما بِتكون سَيِدكُم، عَلَشانكُم ما تَعيشو تِحِت القانون، لَكِن تِحِت النِّعمَه. بَعدين شِنو؟ بِنَعمِل خَطيَّه عَلَشان ما نَعيش تِحِت القانون، لَكِن تِحِت النِّعمَه؟ أبَداً! ما بِتَعرِفو لَمّا تَدّو نُفوسكُم زي خَدّامين عَشان تَطيعو واحِد، إنتو بِالحَق خَدّامين ليهو التَطيعوهو؟ يا لِلخَطيَّه البِسوق لِلموت ولّا لِلطّاعَه البِسوق لِلبِر. لَكِن شُكراً لِلَّه! إنتو الكُنتو خَدّامين لِلخَطيَّه قُبّال دا، طِعتو بِقُلوبكُم حَق التَّعليم القِبِلتوها. عِندَكُم حُريّاتكُم مِن الخَطيَّه، و بِقيتو خَدّامين لِلبِر. بَتكَلَّم بِكِلمات الزّول، عَلَشان، الضُّعف الفي جِسِمكُم. كُنتو تَدّو أعضاءكُم خَدّامين لِلنَّجاسَه و الشَّر الكَتير. كِدا كَمان هَسَّع أدّو أعضاءكُم خَدّامين لِلبِر و لِلقَداسَه. لَمّا كُنتو خَدّامين لِلخَطيَّه، كُنتو حُرّين مِن البِر. ياتا فايدَه كانَت عِندَكُم في الوَكِت داك مِن الحاجات الإنتو تَكونو خَجلانين مِنَّها هَسَّع؟ عَشان نِهايَة الحاجات دي، هي الموت. لَكِن هَسَّع بِقيتو حُرّين مِن الخَطيَّه، و بِقيتو خَدّامين لِلَّه. و عِندَكُم فايدَه في القَداسَه، و النِّهايَه، حَياة أبَديَّه. عَشان أُجرَة الخَطيَّه هي الموت، و لَكِن هَديَّة الله هي الحَياة الأبَديَّه بِالمَسيح يَسُوع رَبَّنا. يا أخوان، أنا بَكَلِّم النّاس البِعرِفو القانون. ما بِتَعرِفو، القانون عِندو سُلطَه فوق الزّول و هو حَي؟ عَشان المَرَه المِتزَوِّجَه مَربوطَه بِالقانون لِراجِلا و هو حَي. و لَكِن إذا راجِلا مات، هي حُرَّه مِن قانون العِرِس. عَلَشان كِدا، إذا بِقَت لِراجِل تاني و راجِلا لِسَّع حَي، يَسَموها زانيَه. و لَكِن إذا راجِلا مات، هي حُرَّه مِن القانون، و ما تَكون زانيَه إذا إتزَوَّجَت راجِل تاني. كِدا يا أخوان، إنتو كَمان مُتّو لِلقانون بِجِسِم المَسيح عَلَشان تَبقو لِتاني، ليهو القام مِن بين المَيِّتين، فِشان نَجيب ثِمار لِلَّه. لَمّا كُنّا في الجِّسِم، القانون حَرَّك شَهوات الخَطيَّه الكانَت تَشتَغِل في أعضاء أجسامنا عَلَشان نَجيب ثِمار لِلموت. لَكِن هَسَّع، نِحنا حُرّين مِن القانون، عَلَشان مُتنا لِلشّي الكان يَربُطنا. و فِشان دا، نَخدِم بِالطَّرِيق الجَّديد بِتاع الرّوح، ما بِالطَّرِيق القَديم بِتاع القانون المَكتوب. بِنقول شِنو؟ القانون خَطيَّه؟ ما مُمكِن! لَكِنّي ما عِرِفتَ الخَطيَّه شِنو، إلّا بِالقانون. ما كُنتَ عِرِفتَ الطَّمَع، إذا القانون ما كان قال: ”ما تَطمَع.“ لَكِن الخَطيَّه آخَدَت فُرصَه بِالأمر، و عَمَلَت فِيني كُلّو نوع الشَّهوَه. عَشان الخَطيَّه بِدون القانون مَيِّتَه. كُنتَ حَي مِن قُبّال، بِدون القانون. لَكِن، لَمّا الأمر جا، الخَطيَّه قامَت و أنا مُتَّ. و الأمر، الكان لِلحَياة، هو جاب لَي الموت. عَشان الخَطيَّه آخَدَت فُرصَه بِالأمر، و غَشّاني، و بيهو كَتَلني. عَلَشان كِدا، القانون مُقَدَّس، و الأمر مُقَدَّس، و عادِل، و طَيب. الطَّيب بِقى لَي موت؟ أبَداً! لَكِن الخَطيَّه آخَدَت الطَّيب، و جابَت لَي موت، عَلَشان تَوَرّي هي خَطيَّه. و كِدا بِالأمر، الخَطيَّه تَبقى خَاطيَه جِدّاً. بِنَعرِف القانون روحي، و لَكِن أنا ما روحي، و باعوني تِحِت الخَطيَّه. أنا ما بَفهَم الأنا بَعمِلو. عَشان أنا ما بَعمِل البَدورو، لَكِن البَكرَهو، داك أنا أعمِلو. لَمّا بَسَوّي الما بَدورو، بَتَّفِق أن القانون طَيب. عَلَشان كِدا، ما أنا بَعدو البَسَوّي كِدا، لَكِن الخَطيَّه السّاكنَه فِيني. بَعرِف ما في حاجَه طَيبَه تَعيش فِيني، يَعني في جِسمي. عَشان عِندي الإرادَه أسَوّي الطَّيب، لَكِن ما بَقدَر أسَوّيهو. أنا ما بَعمِل الخير البَدور أعمِلو، لَكِن بَعمِل الشَّر، الما بَدور أعمِلو. و إذا كان بَعمِل الما عاوِز أعمِلو، بَعَد دا، مُش أنا البَعمِلو، لَكِن الخَطيَّه السّاكنَه فِيني. كِدا، ألقى القانون دا، في نَفسي، لَمّا عاوِز أعمِل الخير، الشَّر في قِدامي. عَشان بَكون مَبسوط بِقانون الله في جُوَّه نَفسي، لَكِنّي أشوف قانون تاني في أعضائي. و هو يَحارِب قانون فِكري، و يَحبُسني لِقانون الخَطيَّه البِشتَغِل في أعضائي. يا مُصيبتي! أنا الزّول المِسكين! مِنو بِخَلِّصني مِن الجِّسِم البِسوقني لِلموت دا؟ شُكراً لِلَّه بِرَبَّنا يَسُوع المَسيح! عَلَشان كِدا، مِن نَفسي أخدِم قانون الله بِعَقلي، و لَكِن بِالجِّسِم، أخدِم قانون الخَطيَّه. عَلَشان كِدا، ما في دينونَه هَسَّع عَلى ديل الفي المَسيح يَسُوع. فِشان قانون روح الحَياة في المَسيح يَسُوع أدّاني حُرّيَّه مِن قانون الخَطيَّه و الموت. الله عَمَل الما قِدِر يَعمِلو القانون، عَلَشان القانون كان ضَعيف بِسَبَب الجِّسِم. هو دان الخَطيَّه في الجِّسِم لَمّا رَسَّل إبنو في صورَة جِسِم الخَطيَّه فِشان الخَطيَّه. الله عَمَل دا عَلَشان تَتِم فينا الواجِبات الطَّيبَه بِتاعَت القانون، نِحنا الما ماشين بِحَسَب الجِّسِم، لَكِن بِحَسَب الرّوح. البِعيشو حَسَب الجِّسِم، هُم بِخَلّو بالُم بِحاجات الجِّسِم. و البِعيشو حَسَب الرّوح، بِخَلّو بالُم بِحاجات الرّوح. فِكر الجِّسِم هو موت، لَكِن فِكر الرّوح هو حَياة و سَلام. عَشان فِكر الجِّسِم يَحارِب الله. هو ما بِطيع قانون الله عَلَشانو ما بِقدَر يَطيعو. و هُم الفي الجِّسِم ما بِقدَرو يَبسِطو الله. لَكِن إنتو ما في الجِّسِم لَكِن في الرّوح، إذا روح الله ساكِن فيكُم. و إذا واحِد ما عِندو روح المَسيح، هو ما لِلمَسيح. و لَكِن إذا كان المَسيح فيكُم، و لَو الجِّسِم مَيِّت بِسَبَب الخَطيَّه، الرّوح حَي بِسَبَب البِر. و إذا كان الرّوح، القَوَّم يَسُوع مِن بين المَيِّتين، ساكِن فيكُم، القَوَّم المَسيح مِن بين المَيِّتين بِدّي حَياة لِأجسامكُم البِموتو، بِروحو السّاكِن فيكُم. عَلَشان كِدا، يا أخوان، نِحنا ما مَديونين لِلجِّسِم عَشان نَعيش حَسَب الجِّسِم. عَشان إذا تَعيشو حَسَب الجِّسِم، بِتموتو. و لَكِن إذا بِالرّوح تَكتُلو أعمال الجِّسِم، بِتعيشو. كُلُّهُم روح الله بِقودُم، هُم أولاد الله. عَشانكُم ما قِبِلتو روح البِيَعمِلكُم خَدّامين لِلخوف، لَكِن قِبِلتو الرّوح البِيَعمِلكُم أولاد. و بيهو نَكورِك: ”أبّا، يَعني يا أبو.“ الرّوح نَفسو يَشهَد لِأرواحنا نِحنا أولاد الله. كِدا إذا نِحنا أولاد، بَعَد دا نِحنا وُرّاث كَمان، وُرّاث الله و وُرّاث مَعَ المَسيح. إذا كان نَتعَب مَعاهو، نِحنا بِنِتمَجَّد كَمان مَعاهو. أفتَكِر ما بَقدَر أقيس أتعاب الزَّمَن الحاضِر بِالمَجد الماشي يَظهَر لينا. عَشان الخَليقَه تِستَنّى بِرَجاء شَديد لِغايَة أولاد الله يَظهَرو. عَشان الخَليقَه كانَت تِحِت سُلطتو، عَشان تَبقى بِدون فايدَه. و دا مُش بِإرادَة الخَليقَه، لَكِن بِسَبَب الله الخَتّاها تِحِت سُلطتو في الرَّجاء. عَشان الخَليقَه نَفسا بِتكون عِندَها حُرّيَّه مِن عُبوديَّة الخَراب لِحُرِّيَّة مَجد أولاد الله. نِحنا بِنَعرِف الخَليقَه كُلَّها تَكورِك مَعانا زي مِن الوَجَع الشَّديد بِتاعَت الحامِل لِغايَة هَسَّع. و مُش دا بَس، لَكِن نِحنا كَمان، العِندَنا أوَّل ثِمار الرّوح، نِحنا نَبكي في نُفوسنا مُنتَظِرين لِلَّه اليَعمِلنا أولادو، يَعني فِداء أجسامنا. عَشانّا بِالرَّجاء خَلَّصنا. لَكِن الرَّجاء النَقدَر نَشوفو، مُش رَجاء حَقيقي. مِنو يَنتَظِر لِلشّي الشّافو مِن قُبّال؟ لَكِن إذا عِندَنا رَجاء لِلما بِنشوفو لِسَّع، بِالصَّبر نِستَنّاهو. و كِدا كَمان، الرّوح يَساعِد ضُعفنا. عَشانّا ما بِنَعرِف كيف نَصَلّي زي ما لازِم نَصَلّي. و لَكِن الرّوح نَفسو يَطلُب فِشانّا بِصوت بِفوت الكَلام. و البِفَتِّش القُلوب بِيَعرِف فِكر الرّوح هو شِنو، عَلَشان الرّوح يَطلُب فِشان القِدِّسين بِحَسَب إرادَة الله. نِحنا بِنَعرِف الله يَساعِد في كُلّو حاجَه لِخير النّاس البِحِبّوهو، الهو ناداهُم حَسَب تَرتيبو. عَشان ديل الإختارُم الله مِن قُبّال، هو عَيَّنُم كَمان عَشان يَبقو زي إبنو، عَلَشان إبنو يَكون الأوَّل بين أخوان كَتيرين. و ديل الإختارُم مِن قُبّال، هو ناداهُم كَمان، و ديل الناداهُم، هو بَرَّرُم كَمان، و البَرَّرُم ديل، هو مَجَّدُم كَمان. بِنقول شِنو في دا؟ إذا كان الله مَعانا، مِنو يَكون ضِدَّنا؟ هو الما رَحَم عَلى إبنو المَخصوص، لَكِن أدّاهو فِشان كُلُّنا، كيف ما يَدينا مَعاهو كُلّو حاجَه؟ مِنو البِشتَكي عَلى مُختارين الله؟ الله هو اليَبَرِّر. مِنو البِحكُم عَليهُم؟ المَسيح يَسُوع يَطلُب فِشانّا، و هو المات، لَكِن بِالأكتَر قام مِن بين المَيِّتين، و هو عَن يَمين الله. مِنو بِقطَعنا عَن مَحَبَّة المَسيح؟ تَعب، ولّا ضيق، ولّا طَرد، ولّا جوع، ولّا عَشان نِحنا عَريانين، ولّا خَطَر، ولّا سيف؟ زي ما مَكتوب: ”نِحنا فِشانَك في خَطَر مِن الموت كُل النَّهار، و حَسبونا زي خِرفان لِلضَّبيحَه.“ لا، في كُل الحاجات دي نَغلِب غَلب كَبير بيهو الحَبّانا. عَشانّي مِتأكِّد، لا موت، ولّا حَياة، ولّا مَلائكَه، ولّا سُلطات، ولّا قُوّات، ولّا حاجات في هَسَّع ولّا جايَه، ولّا طول، ولّا غُرق، ولّا خَليقَه تانيَه، بِتَقدَر تَقطَعنا عَن مَحَبَّة الله الفي المَسيح يَسُوع رَبَّنا. أقول الحَق في المَسيح. ما بَكَضِّب. و ضَميري شاهِد لَي بِالرّوح القُدُس. أنا عِندي حُزن شَديد في قَلبي و عِندي وَجَع ما بِقيف. عَشان انا كُنتَ بَدور أكون أنا نَفسي مَلعون و مَقطوع عَن المَسيح عَشان خاطِر أخواني، جِنسي حَسَب الجِّسِم، الهُم ناس إِسْرَائِيل. هو عَمَلُم أولادو، و ليهُم المَجد و الإتِّفاقات. و هو أدّاهُم القانون و الخِدمَه و الوُعود. و ليهُم الأبَهات، و مِنَّهُم المَسيح بِحَسَب الجِّسِم، الهو فوق الكُل. الله مُبارَك لِلأبَد. آمين. أنا ما بَقول الله ما عَمَل زي ما هو قال. عَلَشان مُش كُلُّهُم المِن إِسْرَائِيل هُم ناس إِسْرَائِيل بِالحَق. مُش كُلُّهُم أولاد بِالحَق عَشان هُم مِن أهل بيت إِبْرَاهِيم. لَكِن، زي ما مَكتوب: ”بِإِسْحَاق أولادَك بِجو.“ يَعني مُش أولاد الجِّسِم هُم أولاد الله، لَكِن أولاد الوَعَد يَحسِبوهُم أولاد. عَشان دي هي كِلمَة الوَعَد: ”أنا بَجي زي الوَكِت دا، و سَارَه تَجيب وَلَد.“ و مُش دا بَس، لَكِن رِفقَه كَمان حِملَت مِن واحِد، و هو إِسْحَاق، أبونا. قُبّال ما الوَلَدين إتوَلَدو و لِسَّع ما عَمَلو كوَيس ولّا بَطّال قالو ليها: ”الكَبير ماشي يَخدِم الصَّغَير.“ عَلَشان تَرتيب الله بِحَسَب الإختِيار يَكون ثابِت، ما مِن الأعمال، لَكِن مِن الِبِنادي. زي ما مَكتوب: ”حَبيت يَعْقُوب و كِرِهتَ عِيسُو.“ عَلَشان كِدا بِنقول شِنو؟ يِمكِن الله ما عادِل؟ أبَداً! عَشانو يَقول لِمُوسَى: ”بَرحَم البَدور أرحَم، و بَشفِق عَلى البَدور أشفِق.“ عَلَشان كِدا هو ما سؤَال عَن إرادَة إنسان ولّا عَن تَعبو، لَكِن عَن رَحمَة الله. عَشان الكِتاب يَقول لِفِرعون: ”أنا عَمَلتَك مَلِك بِالسَّبَب دا زاتو، عَلَشان أوَرّي قوَّتي فيك، و عَلَشان بِنادو بِإسمي في كُل الأرض.“ عَلَشان كِدا، الله يَرحَم الزّول الهو بِدور يَرحَمو، و يَقَوّي راس الزّول الهو بِدور يَقَوّيهو. فِشان كِدا، واحِد بِقول لَي: ”لِشِنو الله يَقول عِندَنا غَلَط بَعَد دا؟ عَشان مِنو يَقدَر يَعاكِس إرَادَتو؟“ و لَكِن مِنو إنتَ، يا زول، حَتّى تَرُد عَلى الله كِدا؟ البُرمَه بِتقول ليهو العَمَلا: ”لِشِنو عَمَلتَني كِدا؟“ دَقّاق البُرام ما عِندو سُلطَه عَلى الطّين عَشان يَعمِل مِن حِتَّت طين حاجَه واحدَه لِلإحتِرام و تانيَه لِفايدَه يوميَّه؟ و كِدا كَمان بِالشّي العَمَلو الله. الله كان داير يَوَرّي زَعلو و يَبَيِّن قُوَّتو. و كِدا، هو إتحَمَّل بِصَبر كَتير بُرام غَضَبو جاهِزَه لِلخَراب. و عَمَل دا عَلَشان يَوَرّي غِنى مَجدو عَلى بُرام رَحمَه جَهَّزا مِن قُبّال لِلمَجد، و عَلينا نِحنا الهو نادانا، مُش مِن اليَهود بَس، لَكِن مِن الأُمَم كَمان. زي ما يَقول في هُوشَع: ”بَسَمّيهُم شَعبي الما كان شَعبي، و بَسَمّيها مَحبوبَه الما كانَت مَحبوبَه.“ و: ”في المَكان القالو ليهُم فيهو: إنتو ما شَعبي، هُم هِناك بِسَمّوهُم أولاد الله الحَي.“ و إِشَعْيَاء يَنادي بِخُصوص إِسْرَائِيل: ”إذا كان عَدَد أولاد إِسْرَائِيل زي رَمل البَحَر، ما بِخلَص مِنَّهُم إلّا جُزو صَغَيِر. عَشان الرَّب بِكَمِّل بِالتَّمام و بِسُرعَه حُكمو عَلى الأرض.“ زي ما إِشَعْيَاء مِن قُبّال قال: ”إذا كان الرَّب، القادِر عَلى كُلّو شي، ما خَلّى لينا أولاد، كُنّا بِقينا زي سَدوم و زي عَمورَه.“ عَلَشان كِدا بِنقول شِنو؟ الأُمَم الما يَطلُبو البِر، هُم حَصَّلو عَلى البِر، يَعني البِر البِإيمان. لَكِن إِسْرَائِيل و هُم طَلَبو البِر بِحَسَب القانون ما حَصَّلو عَليهو. و لِشِنو؟ عَشانُم ما طَلَبو داك بِالإيمان، لَكِن زي ما كان بِالأعمال. و وَقَعو عَلى حَجَر العَترَه. مِثِل ما مَكتوب: ”شوف! أنا بَخُت في صِهيون حَجَر وقوع و صَخرَه نُزول، و البِآمِنو بيهو ما بِكون خَجلان.“ يا أخوان، مَحَبَّة قَلبي و صَلاتي لِلَّه فِشان ناس إِسْرَائِيل، هي عَلَشان هُم يَخلَصو. عَشانّي أشهَد ليهُم عِندَهُم غيرَه لِلَّه، لَكِن ما حَسَب المَعرِفَه. و عَلَشانُم ما عِرفو بِر الله و طَلَبو أن يَثَبِّتو بِر نُفوسُم، هُم ما طاعو بِر الله. عَشان المَسيح نِهايَة القانون، عَلَشان يَكون في بِر لِكُلّو واحِد البِآمِن. و مُوسَى يَكتِب عَن البِر المِن القانون: ”الزّول البيَعمِلو يَعيش بيهو.“ لَكِن البِر المِن الإيمان يَقول كِدا: ”ما تَقول في قَلبَك، مِنو يَطلَع لِلسَّما؟ يَعني عَلَشان يَنَزِّل المَسيح.“ ولّا: ”مِنو يَنَزِّل لِلهاويَه؟ يَعني عَلَشان يَطَلِّع المَسيح مِن بين المَيِّتين؟“ لَكِن يَقول شِنو؟ ”الكِلمَه قَريبَه مِنَّك، في خَشمَك و في قَلبَك.“ يَعني كِلمَة الإيمان النَّبَشِّر بيها. عَلَشان إذا إعتَرَفتَ بِخَشمَك بِالرَّب يَسُوع و آمَنتَ بِقَلبَك أن الله قَوَّمو مِن بين المَيِّتين، إنتَ بِتَخلَص. عَشان الإنسان بِآمِنو بِالقَلب لِلبِر، و بِعتَرِف بِالخَشم عَشان يَخلَص. زي ما الكِتاب يَقول: ”كُلّو واحِد بِآمِنو بيهو، ما بِكون خَجلان.“ عَشان ما في فارِق بين اليَهودي و الإغريقي، عَشان في رَب واحِد لِلكُل، و هو غَني لِكُل البِنادو ليهو. فِشان: ”كُلّو واحِد الِبِنادي لِإسم الرَّب بِخلَص.“ و لَكِن كيف بِنادو لِلما آمَنو بيهو؟ و كيف بِآمِنو بِالما سِمِعوهو؟ و كيف بِسمَعو بِدون مُبَشِّر؟ و كيف بِبَشِّرو إذا ما يَرَسِّلوهُم؟ زي ما مَكتوب: ”شوف كيف جَميل كِرعين المُبَشِّرين بِحاجات كوَيسَه!“ و لَكِن مُش كُلُّهُم قِبلو الإنجيل. عَشان إِشَعْيَاء يَقول: ”يا رَب، مِنو صَدَّق خَبَرنا؟“ عَلَشان كِدا، الإيمان يَجي مِن الخَبَر، و الخَبَر بِكِلمَة المَسيح. لَكِن أقول: يِمكِن ما سِمِعو؟ طَبَعاً سِمِعو! ”صوتُم مَرَق في كُل الأرض، و كلماتُم لِآخِر الدُّنيا.“ و أقول مَرَّه تانيَه، يِمكِن إِسْرَائِيل ما فِهمو؟ في الأوَّل مُوسَى يَقول: ”بَحَرِّكُّم لِلحَسَد مِن النّاس الهُم مُش أُمَّه، و بَزَعِّلكُم مِن أُمَّه ما فاهمَه.“ و كِدا إِشَعْيَاء يَقول بِدون خوف: ”الما طَلَبوني لِقوني، و وَرّيت نَفسي لِلنّاس الما سَألو عَنّي.“ لَكِن بِخُصوص إِسْرَائِيل، هو يَقول: ”النَّهار كُلّو مَدّيت إيديني لِشَعب مِخالِف و راسُم قَوّي.“ فِشان كِدا أقول: ”يِمكِن الله أبى شَعبو؟“ أبَداً! عَشان أنا كَمان إِسْرَائِيلي مِن أولاد إِبْرَاهِيم مِن قَبيلَة بنْيَامِين. الله ما أبى شَعبو العِرفو مِن قُبّال. ما بِتَعرِفو اليَقَول الكِتاب عَن إِيلِيَّا؟ كيف هو سأل الله كَتير ضِد إِسْرَائِيل و قال: ”يا رَب، كَتَلو أنبياك، و خَرَبو مَحَلّاتَك لِلضَّبيحَه. و بِقيت أنا وَحدي، و هُم يَطلُبو نَفسي عَشان يَكتُلوني.“ و الله رَدَّ عَليهو شِنو؟ ”حَفَظتو لِنَفسي سَبعَة آلاف راجِل ما رَكَعو لِبَعَل.“ و كِدا كَمان هَسَّع في بَعض مِن النّاس مُختارين حَسَب النِّعمَه. و إذا كان بِالنِّعمَه، بَعَد دا ما بِالأعمال. عَشان إذا كان بِأعمال، نِعمَتو ما بِتكون نِعمَه صَحَيحَه. و بَعَد دا شِنو؟ الطَّلَبو إِسْرَائِيل، ما أخَدوهو، لَكِن المُختارين أخَدوهو. و التّانيين روسينُم بِقو قَوّيَّه. زي ما مَكتوب: ”الله أدّاهُم روح بَليد، و عُيون ما بِشوفو، و أضان ما بِسمَعو لِليوم دا.“ و دَاوُد يَقول: ”خَلّي تَرَبيظَتُم تَكون زي فَخ و شَبَكَه، و وقوع في خَطيَّه و أُجرَه ليهُم. خَلّي عُيونُم يَكونو في ضُلُمَّه عَلَشان ما يَشوفو، و خَلّي ضُهورُم تَكون مَعَوَّجَه دايماً.“ مَرَّه تانيَه أقول: ”هُم قَرَّبو يَقَعو عَلَشان يَقَعو بِالتَّمام؟ ما مُمكِن!“ لَكِن بِذَنبُم، الخَلاص جا لِلأُمَم عَشان يَحَرِّك ناس إِسْرَائِيل لِلحَسَد. لَكِن إذا ذَنبُم كان غِنى لِلدُّنيا، و خَسارَتُم غِنى لِلأُمَم، كيف بِالأكتَر لَمّا يَكونو كامِلين! هَسَّع بَكَلِّمكُم، يا أُمَم، عَلَشان أنا رَسول لِلأُمَم، أنا بَمَجِّد خِدمَتي. يِمكِن أحَرِّك شَعبي لِلحَسَد و بَخَلِّص بَعض مِنَّهُم. عَشان بِالرَّفَض بِتاعُم، النّاس في الدُّنيا بِقو مُصالِحين مَعَ الله. عَلى كِدا، قُبولُم بِكون شِنو إلّا حَياة مِن بين المَيِّتين؟ إذا بَعَد العَجين البِقَدِّمو زي أوَّل ثِمار هو مُقَدَّس، العَجين كُلّو مُقَدَّس. و إن كان عِرق الشَّجَرَه مُقَدَّس، الفُروع كَمان مُقَدَّسَه. و هُم قَطَعو بَعَض الفُروع مِن شَجَرَة الزّيتون، و جَمَعو ليها فَرَع مِن شَجَرَة زيتون الخَلا. إنتو الأُمَم زي شَجَرَة زيتون الخَلا، و هَسَّع عِندَكُم قِسِم في عِرق شَجَرَة الزّيتون، يَعني اليَهود، و قُوَّة حَياتا. ما تَكون مِتكَبِّر عَلى الفُروع ديلاك. إن شَكَرتَ نَفسَك، فَكِّر في دا: إنتَ ما تَشيل العِرق، لَكِن العِرق يَشيلَك. إنتَ بِتقول: ”قَطَعو الفُروع عَلَشان يَجمَعوني أنا.“ طَيب. لَكِن قَطَعوهُم عَلَشان ما كانو عِندَهُم إيمان، و إنتَ بِالإيمان تَقوم. ما تَكون مِتكَبِّر لَكِن خاف. عَشان إذا كان الله ما خَلّى الفُروع الطَّبيعيَه تِستَمِر في الشَّجَرَه، هو ما بِخَلّيك تِستَمِر في الشَّجَرَه كَمان. عَلَشان كِدا، شوف لُطف الله و شِدَّتو. الشِّدَّه عَلى الوَقَعو، لَكِن ليك لُطف الله إذا تِستَمِر في لُطفو، و إلّا بِقطَعوك كَمان. و هُم إذا ما بِستَمِرّو بِدون إيمان، بِلِمّوهُم. عَشان الله قادِر يَلِمُّم مَرَّه تانيَه. إنتو الأُمَم، زي فَرَع مِن شَجَرَة زيتون الخَلا، كان مَقطوع. و بَعدين، بِالعَكس لِلطَّبيعَه، الفَرَع كان مَجموع لِشَجَرَة الزّيتون الطَّيبَه. اليَهود زي شَجَرَة الزّيتون الطَّيبَه دي. و كِدا كيف ساهِل لِلَّه يَلِم الفُروع الطَّبيعيَه لِشَجَرَتُم المَخصوص. عَشان أنا عاوِزكُم، يا أخوان، تَكونو فاهمين بِالسِّر دا، عَلَشان ما تَكونو شاطرين قِدّام نُفوسكُم. و قِسم مِن إِسْرَائِيل، روسينُم بِقو قَوّيَّه لِغايَة ما يَدخُل عَدَد كامِل مِن الأُمَم. و كِدا، كُلّو إِسْرَائِيل بِخلَص، مِثِل ما مَكتوب: ”المُخَلِّص بِجي مِن صِهيون، و هو بِشيل الذَّنب مِن يَعْقُوب. و دا هو إتِفاقي مَعاهُم لَمّا بَشيل مِنَّهُم خَطاياهم.“ بِخُصوص الإنجيل، هُم عُدوان فِشانكُم. لَكِن بِخُصوص الإختِيار، هُم مَحبوبين فِشان الأبَهات. عَشان هَدايا الله و إختياراتو هي بِدون توبَه. إنتو الأُمَم كُنتو في الوَكِت الفات ما تَطيعو الله، لَكِن هَسَّع قِبِلتو الرَّحمَه بِسَبَب مُخالَفَتُم. و اليَهود ما بِطيعُو هَسَّع. لَكِن في الوَكِت الجّاي هُم بِشتَرِكو في رَحمَة الله عَليكُم. عَشان الله رَبَط كُل النّاس في سِجِن المُخالَفَه، عَلَشان يَرحَم كُلُّهُم. يا عَظَمَة غِنى الله! كيف غَريق حِكمَتو و مَعرِفتو! مِنو يَقدَر يَفَسِّر أحكامو؟ مِنو يَقدَر يَفهَم طُرُقو؟ ”و مِنو عِرِف فِكر الرَّب؟ ولّا مِنو يَقدَر يَدّيهو نَصيحَه؟ مِنو يَقدَر يَدّي أي حاجَه لِلَّه، عَشان الله يَدفَع ليهو مَرَّه تانيَه؟“ عَشان كُل الحاجات، مِنّو، و بيهو، و ليهو. ليهو المَجد لِلأبَد! آمين. عَلَشان كِدا، أطلُب ليكُم، يا أخوان، بِمَراحِم الله، تَقَدِّمو أجسامكُم ضَبيحَه حَيَّه، مُقَدَّسَه، مَقبولَه قِدّام الله. و دي خِدمَتكُم المَعقولَه. و ما تَكونو زي الزَّمَن دا، لَكِن إتغَيَّرو مِن جُوَّه بِأفكار جَديدَه. فِشان تَمتَحِنو إرادَة الله، إرَادَتو الكوَيسَه، و المَقبولَه، و الكاملَه. بِسَبَب النِّعمَه الأدّاها لَي الله، بَقول لِكُلّو واحِد فيكُم، ما يَفتَكِر عَن نَفسو فوق ما لازِم يَفتَكِر. لَكِن يَفتَكِر عَن نَفسو بِحُكم عَديل، بِحَسَب قِياس الإيمان الأدّاهو ليهو الله. نِحنا عِندَنا في جِسِم واحِد أعضاء كَتيرَه، و كُل الأعضاء ما عِندَهُم شُغل واحِد. كِدا كَمان نِحنا الكَتيرين جِسِم واحِد في المَسيح، و أعضاء بَعَضَنا لِبَعض، كُلّو واحِد لِلتاني. لَكِن عِندَنا هَدايا مُختَلِفَه، بِحَسَب النِّعمَه الأدّاها لينا. العِندو هَديَّة النُّبوَّه، خَليهو يَشتَغِل بيهو بِحَسَب إيمانو. إذا هَديَّاتو الخِدمَه، خَليهو يَخدِم، ولّا التَعليم، خَليهو يَعَلِّم. إذا هَديَّاتو كَلام الشَّجاعَه، خَليهو يَشَجِّع. البِدّي، خَليهو يَدّي و يَكون كَريم. العِندو سُلطَه، خَليهو يَشتَغِل شَديد. العِندو رَحمَه، خَليهو يَرحَم بِفَرَح. خَلّي المَحَبَّه تَكون مُخلِصَه. أكرَهو البَطّال، أمسِكو بِالكوَيس. حِبّو بَعضَكُم بَعض بِمَحَبَّه زي أخوان. إحتَرِمو بَعضَكُم بَعض. ما تَكونو كَسلانين في الشُّغل. كونو حارّين في الرّوح. أخدِمو الرَّب. كونو فَرحانين في الرَّجاء، أصبُرو في التَّعب، إستَمِرّو في الصَّلاه. شارِكو مَعَ المُحتاجين بين القِدِّسين. أفتَحو بُيوتكُم لِلغَريبين. بارِكو البِطرُدوكُم. بارِكو و ما تَلعَنو. أفرَحو مَعَ الفَرحانين، و أبكو مَعَ الحَزنانين. خَلّي تَكون عِندَكُم فِكرَه واحدَه بَعضَكُم بَعض. ما تَكونو مِتكَبِّرين، لَكِن أقبَلو النّاس المِتواضِعين. ما تَكونو شاطرين قِدّام نُفوسكُم. ما تَدفَعو لِأي واحِد عَلى الشَّر بِالشَّر. فَكِّرو في الطَّيب قِدّام كُل النّاس. إنتو نُفوسكُم أعمِلو كُل البِتَقدَرو عَلَشان تَعيشو بِسَلام مَعَ كُل النّاس. ما تَنتَقِمو لِنُفوسكُم، يا أخوان، لَكِن أدّو مَكان لِزَعل الله، عَلَشان مَكتوب: ”الإنتِقام لَي. أنا بَدفَع، يَقول الرَّب.“ لَكِن إذا عَدوَّك جَاع، أدّيهو أكل. و إذا عَطَش، أدّيهو مويَه. عَشان إذا كان عَمَلتَ كِدا، هو بِكون خَجلان مِن عَمَلو. ما تَخَلّي الشَّر يَغلِبَك، لَكِن أغلِب الشَّر بِالخير. خَلّي كُلّو واحِد يَطيع السَّلاطين البِحكُمو، عَلَشان ما في سُلطَه، إلّا مِن الله. عَشان الله ثَبَّت السَّلاطين المَوجودين. عَلَشان كِدا، البِخالِف السُّلطان، يَخالِف تَرتيب الله. و النّاس البِعمِلو كِدا بِجيبو دينونَه لِنُفوسُم. عَشان الخوف مِن السَّلاطين ما يَكون بِسَبَب العَمَل الكَويس، لَكِن بِالعَمَل البَطّال. إنتَ داير تَكون ما خايِف مِن السُّلطان؟ أعمِل الخير و هو بِشكُرَك. عَشان هو خَدّام الله البيَعمِل الخير ليك. لَكِن إذا عَمَلتَ الشَّر، خاف، عَلَشانو ما يَشيل السّيف ساكِت. هو خَدّام الله، وَكيل العَدل، البِجيب غَضَب عَلى البيَعمِلو الشَّر. عَلَشان كِدا، لازِم تَطيع السَّلاطين، مُش بِسَبَب الغَضَب، لَكِن كَمان بِسَبَب الضَّمير. عَشان بِالسَّبَب دا، إنتو تَدفَعو الضَّرايب كَمان، فِشان هُم خَدّامين الله البِدّو وَكتُم كُلّو لِلشُّغل داك بِزاتو. أدفَعو لِكُلُّهُم الإنتو مَديونين ليهُم. أدفَعو الضَّرايب، و المَحصول. و إحتَرِمو و شَرِّفو كُلُّهُم. ما تَكونو مَديونين لِواحِد بِحاجَه إلّا يَحِب بَعضَكُم بَعض. عَشان البِحِب قَرِيبو، هو كَمَّل القانون. الأوامِر: ”ما تَزني، ما تَكتُل، ما تَسرِق، ما تَطمَع،“ و إن كان في أمر تاني، هُم إتلَمّو في الكِلمَه دي: ”حِب قَريبَك زي نَفسَك.“ المَحَبَّه ما تَعمِل شَر لِلقَريب. عَشان كِدا، المَحَبَّه تَكَمِّل القانون. و أعمِلو دا، و أفهَمو الوَكِت الحاضِر. السّاعَه جات عَشان تَقومو مِن النّوم. فِشان خَلاصنا هَسَّع قَريب مِن ما كان لَمّا آمَنّا في الأوَّل. اللّيل قَرَّب يَفوت، و النَّهار قَرَّب يَجي. عَشان كِدا، خَلّونا نَسيب أعمال الضُّلُمَّه، و نَلبَس سِلاح النّور. خَلّونا نَعيش بِالإحتِرام زي في النَّهار، ما بِالحَفلات البَطّالَه و السُّكر، ولّا بِالفَضيحَه و الخَراب، ولّا بِالمُشاكَلَه و الحَسَد. لَكِن ألبَسو الرَّب يَسُوع المَسيح، و ما تَفَكِّرو في الجِّسِم عَشان تَكَمِّل شَهوَتو. و هو الضَّعيف في الإيمان، أقبَلوهو، و ما تَحكُمو الأفكار. إيمان واحِد يَخَلِيهو ياكُل كُلّو حاجَه، لَكِن الضَّعيف بياكُل خُضارات بَس. الزّول البياكُل كُلّو حاجَه ما يَحتَقِر الما بياكُل. و الزّول الما بياكُل كُلّو حاجَه ما يَحكُم عَلى البياكُل، عَشان الله قِبلو. مِنو إنتَ حَتّى تَحكُم عَلى خَدّام واحِد تاني؟ عَشانو لِسيدو يَقيف ولّا يَقَع. و هو بِقيف، عَشان الرَّب قادِر يَثَبِّتو. واحِد زول يَفتَكِر يوم واحِد أحسَن مِن التّاني، و زول تاني يَفتَكِر كُل الأيام سَوا. خَلّي كُلّو واحِد يَكون مِتأكِّد في فِكرو. البِفتَكِر في يوم مَخصوص، يَعمِلو كِدا لِلرَّب. و البياكُل، لِلرَّب بياكُل، عَشان هو يَشكُر الله. و الما بياكُل، لِلرَّب ما بياكُل، و يَشكُر الله. ما في واحِد مِنَّنا البِعِيش لِنَفسو بَراهو، و ما في واحِد اليَموت لِنَفسو بَراهو. إذا نَعيش، لِلرَّب نَعيش. و إذا نَموت، لِلرَّب نَموت. كِدا، إذا نَعيش ولّا نَموت، لِلرَّب نِحنا. و بِالسَّبَب دا، المَسيح مات و رَجَع لِلحَياة، عَشان يَكون الرَّب عَلى المَيِّتين و الحَيين. لَكِن إنتَ، لِشِنو تَحكُم عَلى أخوك؟ و إنتَ كَمان، لِشِنو تَحتَقِر أخوك؟ عَشان كُلُّنا بِنقيف قِدّام كُرسي الله. عَشان مَكتوب: ”و أنا حَي، يَقول الرَّب، كُلّو رُكبَه بِتَركَع لَي، و كُلّو لِسان بِتَشهَد لِلرَّب.“ عَلَشان كِدا، كُلّو واحِد مِنَّنا بِدّي حِساب لِلَّه عَن نَفسو. فِشان كِدا، بَعَد دا، ما نَحكُم بَعَضَنا بَعض، و لَكِن أحكُمو بِدا، ما تَخُتّو لِلأخو حَجَر وقوع ولّا أي حاجَه التَّوَقِّفو في سِكّتو. أنا عارِف و مِتأكِّد في رَب يَسُوع، ما في شي نَجِس بِنَفسو. لَكِن إذا واحِد يَحسِب أي شي نَجِس، بَعَد دا، هو نَجِس ليهو. إن كان أخوك يِتحَيَّر بِسَبَب أكل إنتَ تاكلو، إنتَ ما تَمشي بَعَد دا في المَحَبَّه. ما تَكَسِّر بِأكلَك داك، الزّول المات المَسيح فِشانو. ما تَخَلّو النّاس يِتكَلَّمو البَطّال عَلى الإنتو تَفتَكِروهو كوَيس. عَشان مَلَكوت الله ما أكل ولّا شُرُب، لَكِن هو بِر و سَلام و فَرَح في الرّوح القُدُس. عَشان البِخدِم المَسيح كِدا، هو يَبسِط الله و يَكون مَقبول بِالنّاس. عَلَشان كِدا، خَلّونا نَتبَع الحاجات التَّعمِل السَّلام و الحاجات التَّشَدِّدنا بَعَضَنا بَعض. ما تَكَسِّر عَمَل الله عَلَشان الأكل. كُلّو شي نَضيف، لَكِن هو شَر لِلزّول الياكُل و يَكون سَبَب وقوع في خَطيَّه لِلتّانيين. أحسَن ما تَاكُل لَحَم ولّا تَشرَب خَمرَه ولّا تَعمِل أي شي اليَعمِل أخوك يَقَع. الإيمان العِندَك في خُصوص الحاجات دي، خَليهو يَكون بين نَفسَك و بين الله. مُبارَك الزّول الما بِحكُم عَلى نَفسو في الفِكر الهو بِصَدِّق عَليهو. لَكِن البِشِك في البياكُل، مَحكوم عَليهو، عَلَشان هو ما بياكُل بِالإيمان. و كُلّو شي المُش مِن الإيمان، هو خَطيَّه. نِحنا، القَوّيين، لازِم نَشيل ضُعف الضَّعيفين، و ما نَبسِط نُفوسنا. خَلّي كُلّو واحِد مِنَّنا يَبسِط قَرِيبو لِخيرو عَشان يَشَدِّدو. عَشان المَسيح ما عَجَب نَفسو، لَكِن زي ما هو مَكتوب: ”شَتِيمَة الشَّتَموك وَقَعَت عَلي.“ كُل الكان مَكتوب مِن قُبّال مَكتوب لِتَعليمنا، عَلَشان يَكون عِندَنا الرَّجاء بِالصَّبر و تَعزيات الكُتُب. و إلَه الصَّبر و التَّعزيَه يَدّيكُم فِكرَه واحدَه بينكُم بِحَسَب المَسيح يَسُوع. عَلَشان إنتو بِنَفس واحدَه و خَشم واحِد تَمَجِّدو الله أبو رَبَّنا يَسُوع المَسيح. عَلَشان كِدا، أقبَلو بَعضَكُم بَعض، زي ما المَسيح قِبِلنا لِمَجد الله. عَشان أقول ليكُم، المَسيح بِقى خَدّام الطَّهور فِشان حَق الله، حَتّى يَثَبِّت وُعود الله لِلأبَهات. عَشان الأُمَم يَمَجِّدو الله فِشان رَحمَتو، زي ما هو مَكتوب: ”بِالسَّبَب دا بَمَجِّدَك في الأُمَم، و بَرَتِّل لِإسمَك.“ و يَقول كَمان: ”أفرَحو، يا أُمَم، مَعَ شَعبو.“ و كَمان: ”أحمَدو الرَّب، يا كُل الأُمَم، و أحمَدوهو، يا كُل الشُّعوب.“ و إِشَعْيَاء يَقول كَمان: ”عِرق يَسَّى بِجي، الواحِد البِقوم عَلَشان يَملِك عَلى الأُمَم. هو بِكون رَجاء الأُمَم.“ و إلَه الرَّجاء يَملاكُم كُلّو فَرَح و سَلام في الإيمان، عَلَشان تَزيدو في الرَّجاء بِقوَّة الرّوح القُدُس. أنا نَفسي، يا أخواني، مِتأكِّد إنتو نُفوسكُم مَليانين كُلّو حاجَه طَيبَه، كاملين في كُلّو مَعرِفَه، قادرين يَعَلِّم بَعضَكُم بَعض. و لَكِن كَتَبتَ ليكُم بِأكتَر شَجاعَه في بَعض مِن الأسئلَه، عَشان أذَكِّركُم بيها بِسَبَب النِّعمَه الأدّاني ليها الله. و عَشان أكون خَدّام لِلمَسيح يَسُوع فِشان الأُمَم. و أبَشِّر خِدمَة الإنجيل زي قَسّيس، عَلَشان الأُمَم تَبقى هَدِيَّه مَقبولَه، مُقَدَّسَه بِالرّوح القُدُس. عَلَشان كِدا، عِندي فَخر في المَسيح يَسُوع بِخِدمَتي لِلَّه. أنا بَخاف أتكَلَّم بِحاجَه إلّا العَمَلو المَسيح بي عَلَشان الأُمَم يَطيعو الله، بِالكِلمَه و العَمَل، بِقوَّة العَلامات و العَجايِب، بِقوَّة الرّوح القُدُس. كِدا بَشَّرتَ بِالتَّمام بِإنجيل المَسيح مِن أُورُشَلِيم و الحَواليها لِإِلِّيرِيكُون. لَكِن تَرتيبي دايماً كان دا: عَشان أبَشِّر بِالإنجيل في المَحَل الفيهو إسِم المَسيح ما كان مَعروف. عَلَشان ما أبني عَلى أساس واحِد تاني. لَكِن زي ما هو مَكتوب: ”الما خَبَّروهُم بيهو، بِشوفو، و الما سِمِعو، بِفهَمو.“ و دا هو السَّبَب الوَقَّفني مَرّات كَتيرَه مِن الجّاي ليكُم. لَكِن هَسَّع ما عِندي مَكان بَعَد دا في البِلاد دي، و عِندي مَحَبَّه مِن سِنين كَتيرَه عَشان أشوفكُم. و لَمّا أمشي لِأسبانيا، عِندي رَجاء أشوفكُم وَكِت ما بَمُر في طَرِيقي. و تَساعِدوني في سَفَري لِهِناك، بَعَد ما فِرِحتَ بِزِيارَتكُم وَكِت قَليل. لَكِن هَسَّع أنا ماشي لِأُورُشَلِيم عَشان أخدِم القِدِّسين هِناك. عَشان كان كوَيس في عُيون ناس مَكِدونيَّه و أَخَائِيَه تَلِمّو هَدِيَّه لِلمَساكين القِدِّسين الفي أُورُشَلِيم. كان كوَيس في عُيونُم يَعمِلوهو. و بِالحَق كانو مَديونين ليهُم. الأُمَم إشتَرَكو في حاجاتُم الرّوحيَّه. عَلَشان كِدا، الأُمَم لازِم يَخدِموهُم بِالحاجات الجِّسميَّه. و بَعَد ما تَمَّمتَ داك و سَلَّمتَ ليهُم المُساعَدَه، بَمشي لِأسبانيا و بَزوركُم في السِّكَّه. أنا بَعرِف لَمّا أجي ليكُم، بَجي ليكُم بِبَرَكَه كاملَه مِن المَسيح. أطلُب ليكُم، يا أخوان، بِرَبَّنا يَسُوع المَسيح و بِمَحَبَّة الرّوح، أن تَتعَبو مَعاي في الصَّلَوات لِلَّه فِشانّي. صَلّو عَشان أخلَص مِن الما مؤمِنين في اليَهُودِيَّه، و عَشان خِدمَتي لِأُورُشَلِيم تَكون مَقبولَه لِلقِدِّسين هِناك. عَلَشان كِدا، بَجي ليكُم بِفَرَح بِإرادَة الله، و بِتكون لَي راحَه مَعاكُم. إلَه السَّلام مَعاكُم كُلُّكُم. آمين. بَحمَد ليكُم فيبي، أُخُتنا، خَدّامَة الكَنيسَه الفي كَنْخِرِيَا، عَلَشان تَقبَلوها في الرَّب زي ما يِستَحِق لِلقِدِّسين. و تَساعِدوها في أي شي تَحتاج ليهو مِنَّكُم. عَشان هي ساعَدَت كَتيرين و ساعَدَتني أنا كَمان. سَلِّمو عَلى بِرِيسْكِلا و أَكِيلَا المِشتَغِلين مَعاي في المَسيح يَسُوع، الخاطَرو بِحَياتُم عَشانّي. و مُش أنا وَحدي بَشكُرُم، لَكِن كُلّو كَنايس الأُمَم كَمان. سَلِّمو كَمان عَلى الكَنيسَه الفي بيتُم. سَلِّمو عَلى أَبَيْنِتُوس حَبيبي الهُوَ أوَّل ثِمار آسيا لِلمَسيح. سَلِّمو عَلى مَرْيَم التِّعِبَت كَتير فِشانكُم. سَلِّمو عَلى أَنْدَرُونِيكُوس و وَيُونِيَاس مِن أهل بيتي، المَحبوسين مَعاي. هُم مَعروفين بين الرُّسُل، و هُم كانو في المَسيح قُبّالي. سَلِّمو عَلى أَمْبِلْيَاس، حَبيبي في الرَّب. سَلِّمو عَلى أُورْبَانُوس، المِشتَغِل مَعانا في المَسيح و عَلى إستاخيس، حَبيبي. سَلِّمو عَلى أَبُلِّس، المَقبول في المَسيح. سَلِّمو عَليهُم المِن أهل أَرِسْتُوبُولُوس. سَلِّمو عَلى هِيرُودِيُون، واحِد مِن أهل بيتي. سَلِّمو عَليهُم المِن أهل نَرْكِيسُوس الهُم في الرَّب. سَلِّمو عَلى تَرِيفَيْنَا و وَتَرِيفُوسَا التِّعِبو في الرَّب. سَلِّمو عَلى بَرْسِيس المَحبوبَه التِّعِبَت كَتير في الرَّب. سَلِّمو عَلى روفُس المُختار في الرَّب، و عَلى أُمّو و هي أُمّي كَمان. سَلِّمو عَلى أَسِينْكِرِيتُس، وَفِلِيغُون، وَهَرْمِس، وَبَتْرُوبَاس و وَهَرْمَاس و عَلى الأخوان المَعاهُم. سَلِّمو عَلى فِيلُولُوغُوس و وَجُولِيَا و وَنِيرِيُوس و أُختو و وَأُولُمْبَاس و عَلى كُل القِدِّسين المَعاهُم. سَلِّمو بَعضَكُم عَلى بَعض بِسَلام مُقَدَّس. كُلّو كَنايس المَسيح يَسَلِّمو عَليكُم. أطلُب ليكُم، يا أخوان، تَخُتّو بالكُم لِليَعمِلو إنقِسامات و البِخُتّو في سِكَّتكُم مُخالِف التَّعليم الإتعَلَّمتوهو. خَلّوهُم. عَشان ناس زي ديل ما بِخدِمو رَبَّنا المَسيح لَكِن بُطونُم. و بِالكِلمات الحِلوَه و كَلام الحَمد يَغِشّو قُلوب المُخلِصين. عَشان كُل النّاس سِمِعو بِطاعَتكُم. و عَلَشان كِدا أنا مَبسوط بيكُم. و لَكِنّي دَايِركُم تَكونو فاهمين لِلخير و بُسَطاء لِلشَّر. و إلَه السَّلام بِدُق الشّيطان تِحِت كِرعينكُم بَعَد شوَيَه. نِعمَة رَبَّنا يَسُوع المَسيح مَعاكُم. يَسَلِّمو عَليكُم تِيمُوثَاوُس المِشتَغِل مَعاي، و لوكيوس و ياسون و سُسِبَترُس مِن أهل بيتي. أنا تَرْتِيُوس، كاتِب الجَّواب دا، بَسَلِّم عَليكُم في الرَّب. يَسَلِّم عَليكُم غَايُوس، الفَتَح بيتو لَي و لِلكَنيسَه كُلُّها. يَسَلِّم عَليكُم أَرَاسْتُس، المَسؤول عَلى خَزنَة المَدينَه و كُوَارْتُس الأخو. نِعمَة رَبَّنا يَسُوع المَسيح مَعَ كُلُّكُم. آمين. و لِلقادِر يَثَبِّتكُم حَسَب إنجيلي الأنا أبَشِّر بِيَسُوع المَسيح، و حَسَب السِّر الكان مَدسوس في الزَّمَن الأبَديَّه. و لَكِن ظَهَر هَسَّع و خَبَّرو بيهو كُل الأُمَم بِالكُتُب النَّبَويَّه بِحَسَب الإلَه الأبَدي، عَشانُم يآمِنو و يَطيعوهو. لِلَّه الفَهيم وَحدو، ليهو المَجد بِيَسُوع المَسيح لِلأبَد. آمين. مِن بُولُس، المُختار عَشان يَكون رَسول لِيَسُوع المَسيح بِإرادَة الله، و مِن سُوسْتَانِيس الأخو. لِكَنيسَة الله الفي كُورِنْثُوس، المُقَدَّسين في المَسيح يَسُوع، المُختارين عَشان يَكونو قِدِّيسين مَعَ كُل البِنادو لِإسم رَبَّنا يَسُوع المَسيح في كُلّو مَحَل، رَبُّم و رَبَّنا. نِعمَه و سَلام ليكُم مِن الله أبونا و الرَّب يَسُوع المَسيح. أشكُر الله في كُلّو وَكِت فِشانكُم، عَشان الله أدّاكُم النِّعمَه الفي يَسُوع المَسيح، عَشان إنتو بِقيتو غَنيين فيهو، في كُلّو شي و في كُلّو كَلام و كُلّو مَعرِفَه. و كِدا شَهادَتنا عَن المَسيح إتأكَّدَت فيكُم. و عَشان كِدا إنتو ما ناقصين في أي هَدِيَّه مِن الرّوح، و إنتو مُستَنّين ظُهور رَبَّنا يَسُوع المَسيح. هو بِشَدِّدكُم لِلآخِر بِدون لوم في يوم رَبَّنا يَسُوع المَسيح. الله أمين، هو النّاداكُم لِشَرِكَة إبنو يَسُوع المَسيح رَبَّنا. لَكِنّي أطلُب ليكُم، يا أخوان، بِإسم رَبَّنا يَسُوع المَسيح، كُلُّكُم تَقولو كَلام واحِد. و ما يَكون بينكُم أقسام، لَكِن تَفتَكِرو فِكِر واحِد بِعَقل واحِد. عَشان أهل خُلُوِي خَبَّروني، يا أخواني، عَن الشَّكلات الفي بينكُم. يَعني كُلّو واحِد مِنَّكُم يَقول: ”أنا لِبُولُس،“ ولّا: ”أنا لِأَبُلُّوس،“ ولّا: ”أنا لِبُطْرُس،“ ولّا: ”أنا لِلمَسيح.“ المَسيح إنقَسَم؟ بُولُس إنصَلَب عَشانكُم؟ بِإسم بُولُس إتعَمَّدتو؟ أشكُر الله أنا ما عَمَّدتَ واحِد مِنَّكُم إلّا كِرِيسْبُس و غَايُوس، عَشان واحِد ما يَقول هو إتعَمَّد بِإسمي. و كَمان عَمَّدتَ أهل بيت اسْتِفَانُوس. و فوق دا ما أتزَكَّر أنا عَمَّدتَ أي زول تاني. عَشان المَسيح ما رَسَّلني لِأعَمِّد، لَكِن لِأبَشِّر بِالإنجيل، مُش بِكَلام شاطِر، عَشان صَليب المَسيح ما يَبقى بِدون فايدَه. عَلَشان كِلمَة الصَّليب عِند البِموتو كَلام فاضي، لَكِن عِندَنا المُخَلَّصين هي قُوَّة الله. عَشان مَكتوب: ”أنا بَخَسِّر حِكمَة العاقِلين، و أرفُض فَهم الفاهمين.“ وين الفَهيم؟ وين الكاتِب؟ وين المِشاكِل بِتاع الزَّمَن دا؟ الله ما عَمَل حِكمَة الدُّنيا دي تَبقى بَليدَه؟ عَشان إذا كان الدُّنيا، في حِكمَة الله، ما عِرِفَت الله بِالحِكمَه، إنبَسَط الله أن يَخَلِّص المؤمِنين بِبَلادَة البِشارَه. عَلَشان اليَهود يَسألو عَلامات، و ناس إغريقيين يَطلُبو حِكمَه. و لَكِن نِحنا نَبَشِّر بِالمَسيح المَصلوب، لِليَهود عَترَه و لِناس إغريقيين حاجَه بَليدَه. لَكِن لِلمُختارين، يَهود و ناس إغريقيين، المَسيح هو قُوَّة الله و حِكمَة الله. عَشان الشّي البَليد بِتاع الله عِندو حِكمَه أكتَر مِن حِكمَة النّاس، و ضُعف الله قَوّي مِن النّاس. فَكِّرو في إختياركُم، يا أخوان، ما في كَتيرين مِنَّكُم الكُنتو فاهمين بِحَسَب الجِّسِم. ما في كَتيرين شَديدين، ما في كَتيرين مُحتَرمين. لَكِن الله إختار الحاجات البَليدَه في الدُّنيا عَشان يَخَجِّل الفاهمين. و الله إختار الضَّعيفين في الدُّنيا عَشان يَخَجِّل الشَّديدين. و الله إختار المِتواضِعين و المُحتَقرين في الدُّنيا، و الحاجات الما مَوجودَه، عَشان يَوَقِّف الحاجات المَوجودَه. عَلَشان واحِد ما يَقدَر يَشكُر نَفسو قِدّام الله. لَكِن إنتو عِندَكُم مِن الله حَياة في المَسيح. و هو بِقى لينا حِكمَه مِن الله، و بِر، و قَداسَه، و فِداء. عَشان كِدا زي ما مَكتوب: ”العاوِز يَمَجِّد، خَليهو يَمَجِّد الرَّب.“ و أنا، لَمّا جيت ليكُم، يا أخوان، ما جيت أبَشِّر بِشَهادَة الله بِكَلام عالي ولّا حِكمَه عَظيمَه. عَشان ما كانَت إرادَتي أن أعرِف أي حاجَه بينكُم إلّا يَسُوع المَسيح و هو مَصلوب. و أنا كُنتَ مَعاكُم في ضُعف و خوف و هَز كَتير. و كَلامي و بِشارَتي ما كانو بِكَلام حَسَب حِكمَة الإنسان الفَهيم، لَكِن بِبيّنَة الرّوح و القُوَّه، عَشان إيمانكُم ما بِكون بِحِكمَة النّاس، لَكِن بِقوَّة الله. لَكِن نِتكَلَّم بِحِكمَه بين الكامِلين، و الحِكمَه دي ما مِن الزَّمَن دا، ولّا مِن مُديرين الزَّمَن دا، البِكونو بِدون فايدَه. لَكِن نِتكَلَّم بِحِكمَة الله في السِّر، الحِكمَه المَدسوسَه الجَّهَّزا الله مِن قَبل الأزمان لِمَجدنا. و لا واحِد مِن مُديرين الزَّمَن دا فِهِم دي. إذا كانو فِهموها، ما كانو صَلَبو رَب المَجد. لَكِن زي ما هو مَكتوب: ”العين ما شافَتو، و الأضان ما سِمِعَت بيهو، و ما دَخَل فِكِر زول عَن كُل الجَّهَّزو الله لِلبِحِبّوهو.“ و الله وَرّاهو لينا بِروحو. عَشان الرّوح يَفَتِّش كُلّو حاجَه حَتّى حاجات الله الغَريقَه. عَشان مِنو مِن النّاس، اليَعرِف أفكار الزّول إلّا روح الزّول الفيهو؟ و كِدا كَمان، و لا واحِد يَعرِف أفكار الله إلّا روح الله. و نِحنا ما أخَدنا روح الدُّنيا، لَكِن الرّوح المِن الله، عَشان نَعرِف الحاجات الأدّاهُم لينا الله. و نِتكَلَّم بيها كَمان، مُش بِكِلمات إتعَلَّمنا مِن حِكمَة الزّول، لَكِن بِالكِلمات الرّوح القُدُس يَعَلِّم. و نَتَرجِم الحاجات المِن الرّوح بِالكِلمات المِن الرّوح. و لَكِن الزّول الما عِندو الرّوح ما يَقبَل حاجات روح الله، عَشان دي عِندو حاجَه بَليدَه. و هو ما بِقدَر يَعرِفا، عَشان الحاجات دي مَفهومَه بِالرّوح. الإنسان الرّوحي يَحكُم في كُلّو حاجَه، لَكِن النّاس ما بِقدَرو يَفهَموهو. مِنو بِيَعرِف فِكِر الرَّب عَشان يَعَلِّمو؟ لَكِن نِحنا عِندَنا فِكِر المَسيح. و أنا، يا أخوان، ما قِدِرتَ أكَلِّمكُم زي ناس روحيين، لَكِن زي ناس جِسميين، زي أطفال صُغار في المَسيح. أدّيتكُم لَبَن عَشان تَشرَبو، مُش أكل. عَشان لِسَّع ما قِدِرتو تاكلوهو. و هَسَّع كَمان ما بِتَقدَرو. عَشانكُم لِسَّع ناس جِسميين، عَشان إذا كان فيكُم حَسَد و شَكلَه، إنتو ما ناس جِسميين و ماشين حَسَب ناس الدُّنيا؟ لَمّا واحِد يَقول: ”أنا لِبُولُس،“ و التّاني: ”أنا لِأَبُلُّوس،“ إنتو ما ناس جِسميين؟ عَلَشان مِنو أَبُلُّوس، و مِنو بُولُس؟ هُم خَدّامين، و إنتو آمَنتو بِواسِطَتُم زي ما الرَّب أدّا لِكُلّو واحِد. أنا زَرَعتَ، و أَبُلُّوس أدّاها مويَه، لَكِن الله، هو الكان بِزيدو. عَشان كِدا، المُزارِع ما حاجَه ولّا البِدّيها مويَه، لَكِن الله البِزيدو. و المُزارِع و البِدّيها مويَه هُم واحِد، و كُلّو واحِد بياخُد أُجرَتو بِحَسَب شُغلو. عَشان نِحنا عامِلين مَعَ الله، و إنتو زِراعَة الله، بُنا الله. أنا، بِحَسَب النِّعمَه الأدّاني الله، زي بَناء شاطِر، خَتّيت أساس، و تاني يَبني عَليهو. خَلّي كُلّو واحِد يَشوف كيف يَبني عَليهو. عَشان واحِد ما بِقدَر يَخُت أساس تاني إلّا المَختوت، و هو يَسُوع المَسيح. لَكِن إن كان واحِد يَبني عَلى الأساس دا دَهَب، ولّا فِضَّه، ولّا حَجَر غالي، ولّا خَشَب، ولّا دِريس، ولّا قَش، عَمَل كُلّو واحِد بِبقى بايِن. عَشان اليوم بِوَرّيهو، و هو يَبَيِّن بِالنّار. و النّار بِتَمتَحِن عَمَل كُلّو واحِد هو مِن ياتو نوع. إذا كان عَمَل أي زول البَناهو عَلى الأساس بِقعُد، هو بياخُد أُجرَه. إذا كان النّار أكَلَت عَمَل واحِد، دا بِكون ليهو خَسارَه، لَكِن هو يَخلَص، و لَكِن زي مِن النّار. ما بِتَعرِفو إنتو هيكَل الله، و روح الله يَسكُن فيكُم؟ كان واحِد يَخرَب هيكَل الله، الله بِخرَبو، عَشان هيكَل الله مُقَدَّس، و إنتو الهيكَل داك. ما تَخَلّي واحِد يَغِش نَفسو. إذا أي واحِد فيكُم يَفتَكِر هو عِندو حِكمَه في الزَّمَن دا، خَليهو يَبقى بَليد، عَشان يَكون عِندو حِكمَه. عَشان حِكمَة الدُّنيا دي، هي حاجَه بَليدَه قِدّام الله. عَشان مَكتوب: ”هو ياخُد الشّاطرين بِغِشُّم.“ و كَمان: ”الرَّب يَعرِف أفكار الفاهمين بِدون فايدَه.“ عَلى كِدا، ما تَخَلّي و لا واحِد يَفخَر بِالنّاس، عَشان عِندَكُم كُلّو شي. إذا كان بُولُس ولّا أَبُلُّوس ولّا بُطْرُس ولّا الدُّنيا ولّا الحَياة ولّا الموت ولّا الوَكِت القَريب ولّا الجّاي، عِندَكُم كُلّو حاجَه. و إنتو لِلمَسيح، و المَسيح لِلَّه. خَلّي الزّول يَحسِبنا زي خَدّامين المَسيح و وُكَلا أسرار الله. و كَمان الوَكيل لازِم يَكون أمين. لَكِن دي حاجَه صَغَيرَه مَعاي إذا إنتو تَحكُمو فِيني ولّا مَحكَمَة النّاس تَحكُم فِيني. أنا ما أحكُم في نَفسي كَمان. ما بَعرِف حاجَه عَلى نَفسي، لَكِن عَشان كِدا أنا ما بِدون ذَنب، لَكِن اليَحكُم فِيني هو الرَّب. فِشان كِدا، ما تَحكُمو في حاجَه قُبّال الوَكِت، قُبّال ما الرَّب يَجي. هو بِجيب لِلنّور الحاجات الهَسَّع مَدسوسَه في الضَّلام، و بِوَرّي أفكار القُلوب. في الوَكِت داك، كُلّو واحِد بِقبَل حَمدو مِن الله. عَشان خاطِركُم يا أخوان، خَتّيت دا كُلّو عَلى نَفسي و عَلى أَبُلُّوس، زي مَثَل عَشان تِتعَلَّمو مِنَّنا أن ما تَفَكِّرو في النّاس فوق ما الكِتاب يَقول. و كِدا إنتو ما بِتكونو مِتكَبِّرين الواحِد فوق التّاني. عَشان مِنو عَمَل فارِق بينكُم؟ و عِندَك شِنو الما قِبِلتو؟ إذا قِبِلتو، لِشِنو تَشكُر نَفسَك زي إنتَ ما قِبِلتو؟ مِن قُبّال شَبِعتو، مِن قُبّال بِقيتو غَنيين، بِدونَنا بِقيتو مُلوك. و أنا بَكون مَبسوط إذا كان كِدا و إنتو مَلَكتو، عَشان نَملِك مَعاكُم كَمان. عَشان أفتَكِر الله أدّانا المَحَل الفي الآخِر زي المَحكوم عَلينا بِالموت. عَشانّا بِقينا مَنظَر لِلدُّنيا و لِلمَلائكَه و لِلنّاس. نِحنا بَليدين فِشان المَسيح، لَكِن إنتو فاهمين في المَسيح. نِحنا ضَعيفين لَكِن إنتو قَوّيين، إنتو مُحتَرمين لَكِن نِحنا بِدون إحتِرام. لِغايَة هَسَّع نَجوع و نَعطَش، و نَلبَس هِدوم قَديم، و يَضرُبونا، و ما عِندَنا بيت. و نَتعَب مِشتَغِلين بِإيدينا. هُم يَشتِمونا، و نِحنا نَبارِك. يَطرُدونا، و نِحنا نِتحَمَّل. لَمّا يَكَضِّبو عَلينا، نَرُد بِكَلام لَطيف. بِقينا زي الحاجات الخَربانَه بِتاعَت الدُّنيا و وَساخَه كُلّو حاجَه لِغايَة هَسَّع. ما بَكتِب دا عَشان أخَجِّلكُم، لَكِن أحَزِّركُم مِثِل أولادي المَحبوبين. عَشان إن كان عِندَكُم عَشَرَة آلاف مِن المُعَلِّمين في المَسيح، ما عِندَكُم أبَهات كَتيرين. عَشان أنا بِقيت أبوكُم في المَسيح يَسُوع بِالإنجيل. و أطلُب ليكُم تَعمِلو زي ما أنا بَعمِل. عَشان كِدا رَسَّلتَ ليكُم تِيمُوثَاوُس، إبني الحَبيب و الأمين في الرَّب. و هو بِذَكِّركُم بِطُرُقي في المَسيح زي ما بَعِلِّم في كُلّو مَحَل في كُلّو كَنيسَه. بَعض مِنَّكُم بِقيتو مِتكَبِّرين و تَفتَكِرو أنا ما بَجيكُم. لَكِنّي بَجيكُم قَوام إن شاء الرَّب، و بَعرِف مُش كَلام المَتكَبِّرين، لَكِن قُوَتُم. عَلَشان مَلَكوت الله مُش بِالكَلام، لَكِن بِالقُوَّه. إنتو دايرين شِنو؟ بَجي ليكُم بِعَصايَه؟ ولّا بِالمَحَبَّه و روح لَطيف؟ بِالحَق يَخَبِّرونا في بينكُم زِنا، و زِنا مِن النوع الما بِكون في بين الأُمَم، لِغايَة ما الزّول عِندو مَرَة أبوهو. و إنتو لِسَّع مِتكَبِّرين. لِشِنو ما تَكونو حَزنانين و تَشيلو مِن وَسِطكُم الرّاجِل العَمَل دا؟ أنا ما مَعاكُم في الجِّسم، لَكِن أنا مَعاكُم في الرّوح. مِن قُبّال أنا حَكَمتَ عَلى الرّاجِل العَمَل العَمَل دا، زي ما أنا في. و لَمّا إنتو و روحي مِتلَمين بِإسم رَبَّنا يَسُوع، مَعَ قُوَّة رَبَّنا يَسُوع، إنتو تَسَلِّمو الرّاجِل دا لِلشّيطان لِخَراب الجِّسم، عَشان روحو تَخَلَص في يوم الرَّب يَسُوع. كِبِركُم ما كوَيس. ما بِتَعرِفو خَميرَه صَغَيرَه تَخَمِّر العَجين كُلّو؟ أُخدو مِنَّكُم الخَميرَه القَديمَه عَلَشان تَكونو عَجين جَديد، زي ما إنتو بِالحَق عيش بِدون خَميرَه. عَشان المَسيح، الحَمَل بِتاع عيد الفِصَح، إنضَبَح فِشانّا. عَشان كِدا خَلّونا نَعَيِّد مُش بِخَميرَه قَديمَه، يَعني خَميرَة الذَّنب و الشَّر. لَكِن نَعَيِّد بِالعيش البِدون خَميرَه، يَعني عيش الإخلاص و الحَق. كَتَبتَ ليكُم في جَوابي أن ما تِتلَمّو مَعَ النّاس البيَعمِلو الزِّنا. أنا ما كُنتَ بَتكَلَّم عَن زانيين الدُّنيا دي، ولّا الطَّمّاعين ولّا الحَراميَه، ولّا اليَعبُدو الأصنام. عَشان إذا كان عَمَلتو كِدا، لازِم تَمرُقو مِن الدُّنيا. لَكِن هَسَّع بَكتِب ليكُم، ما تِتلَمّو مَعَ واحِد البِسَمّوهو أخو، إذا هو بيَعمِل زِنا ولّا هو طَمّاع، ولّا يَعبُد الأصنام، ولّا شَتَّم، ولّا مَرّاسي، ولّا حَرامي. و ما تاكلو مَعَ واحِد زي دا. عَشان دا شُغلي أحكُم عَليهُم المِن بَرَّه؟ ديل المِن جُوَّه، إنتو ما بِتَحكُمو عَليهُم؟ الله هو اليَحكُم عَليهُم المِن بَرَّه. أطرُدو الزّول الشَّرّير مِن بينكُم. لَمَّن واحِد فيكُم عِندو شَكوى عَلى أخو، ما يَخاف يَرفَع قَضيَّه قِدّام الظّالِمين بَدَل أن يَرفَعا قِدّام القِدِّسين؟ ما بِتَعرِفو القِدِّسين بِحكُمو عَلى الدُّنيا؟ و إن كان إنتو بِتَحكُمو عَلى الدُّنيا، ما بِتَقدَرو تَحكُمو عَلى القَضايا الصَّغَيرَه؟ ما بِتَعرِفو بِنَحكُم مَلائكَه؟ و بِالأكتَر حاجات الحَياة دي. إذا عِندَكُم قَضايا في حاجات الحَياة دي، لِشِنو تَختارو قُضاة مِن الما مُحتَرمين في الكَنيسَه؟ أقول دا عَشان بِتكونو خَجلانين. صَحيح ما في راجِل فَهيم و لا واحِد بينكُم، البِقدَر يَحكُم بين أخوانو؟ لَكِن الأخو يَرفَع قَضيَّه عَلى الأخو، و داك قِدّام الما مؤمِنين. هَسَّع بِالحَق فيكُم عيب عَشان عِندَكُم قَضايا بَعضَكُم مَعَ بَعض. لَكِن لِشِنو ما تَكونو مَظلومين، لِشِنو ما تَخَلّوهُم يَغِشّوكُم؟ بِالعَكس إنتو تَظلِمو و تَغِشّو، و داك لِلأخوان. ما بِتَعرِفو الظّالمين ما بِيورَثو مَلَكوت الله؟ ما تَغِشّو نُفوسكُم. لا أخلاقُم بَطّالَه، ولّا اليَعبُدو أصنام، ولّا البيَعمِلو زِنا، ولّا المَخَنَّس ولّا اللّوطي، ولّا الحَراميَه، ولّا الطَّمّاعين، ولّا السَّكرانين، ولّا الشَّتَّامين، ولّا السَّرّاقين بِيورَثو مَلَكوت الله. و بَعض مِنَّكُم كانو زي داك. لَكِن كُنتو مَغسولين، إتقَدَّستو، إتبَرَّرتو بِإسم الرَّب يَسُوع المَسيح و بِروح إلَهنا. ”أنا عِندي إذِن لِكُل الحاجات،“ لَكِن كُل الحاجات ما مُساعَدَه. ”عِندي إذِن لِكُل الحاجات،“ لَكِن ما بَبقي خَدّام لِأي حاجَه. ”الأكل لِلبَطُن و البَطُن لِلأكل،“ و الله بِخرَبُم الإتنين. الجِّسم مُش لِلزِّنا لَكِن لِلرَّب، و الرَّب لِلجِّسم. الله قَوَّم الرَّب مِن بين المَيِّتين، و بِقَوِّمنا كَمان بِقُوَّتو. ما بِتَعرِفو أجسامكُم هُم أعضاء المَسيح؟ عَلَشان كِدا باخُد أعضاء المَسيح و أعمِلُم أعضاء زانيَه؟ أبَداً! ما بِتَعرِفو اليَجمَع نَفسو لِزانيَه هو جِسِم واحِد مَعاها؟ عَشان مَكتوب: ”يَكونو الأتنين جِسِم واحِد.“ و لَكِن اليَجمَع نَفسو لِلرَّب، هو روح واحِد مَعاهو. أجرو مِن الزِّنا. كُلّو خَطيَّه اليَعمِلا الإنسان، هي بَرَّه مِن الجِّسِم. لَكِن اليَعمِل زِنا، يَعمِل خَطيَّه ضِد جِسمو. ما بِتَعرِفو جِسِمكُم هو هيكَل الرّوح القُدُس الفيكُم، القِبِلتوهو مِن الله؟ و إنتو مُش لِنُفوسكُم. كُنتو مُشتَرين بِتَمَن. عَلَشان كِدا، مَجِّدو الله في جِسِمكُم. هَسَّع عَن الحاجات الإنتو كَتَبتو لَي. طَيب لِلرّاجِل ما يِتزَوَّج. لَكِن بِسَبَب الزِّنا، خَلّي كُلّو واحِد تَكون عِندو مَرَتو، و لِكُلّو واحدَه راجِلا. الرّاجِل لازِم يَدّي لِلمَرَه حَقّا بِتاع العِرِس، و كِدا كَمان المَرَه لِراجِلا. المَرَه ما عِندَها سُلطَه عَلى جِسِما لَكِن الرّاجِل عِندو. و كِدا كَمان الرّاجِل ما عِندو سُلطَه عَلى جِسمو لَكِن المَرَه عِندَها. ما تابا واحِد فيكُم التّاني، إلّا يَكون بِإتِّفاق لِوَكِت، عَشان تَدّو نُفوسكُم لِلصَّلاه. و بَعدين تِتلَمّو سَوا مَرَّه تانيَه، عَشان الشّيطان ما يَجَرِّبكُم، لَمّا ما عِندَكُم قُوَّه عَلى نُفوسكُم. و لَكِن أقول دا عَشان أدّيكُم إذِن، ما عَشان أدّيكُم أمر. أنا داير كُل النّاس يَكونو زي ما أنا. لَكِن كُلّو واحِد عِندو هَديتو المَخصوص مِن الله. الواحِد كِدا و التّاني كِدا. و لَكِن أقول لِلما مِتزَوِّجين و الأرامِل، كوَيس ليهُم إذا يِستَمِرّو يَعِيشو زي ما أنا كَمان. و لَكِن إذا كان ما يَقدَرو يَمسِكو نُفوسُم، خَلّوهُم يِتزَوَّجو، عَشان العِرِس أحسَن مِن أن يَحرَقو بِالشَّهوَه. لَكِن لِلمِتزَوِّجين عِندي أمر، مُش أنا، لَكِن الرَّب: المَرَه ما تَخَلّي راجِلا. و إن مَشَت مِنّو، خَلِيها تِستَنّى ما مِتزَوِّجَه، ولّا خَلِيها تَصالِح راجِلا. و الرّاجِل ما يَطَلِّق مَرَتو. لَكِن التّانيين أقول ليهُم، أنا، مُش الرَّب، إذا كان أخو عِندو مَرَه ما مِآمِنَه، و هي عاوزَه تَعيش مَعاهو، هو ما يَطَلِّقا. و المَرَه العِندَها راجِل ما مؤمِن، و هو عاوِز يَسكُن مَعاها، هي ما تَطَلِّقو. عَشان الرّاجِل الما مؤمِن مُقَدَّس في المَرَه، و المَرَه الما مِآمِنَه مُقَدَّسَه في الرّاجِل. و كان ما كِدا، أولادكُم نَجِسين. لَكِن هَسَّع هُم مُقَدَّسين. و لَكِن إذا الما مؤمِن مَشى، خَليهو يَمشي. الأخو ولّا الأُخُت ما مَربوط في حاجَه زي دي. عَشان الله نادانا لِلسَّلام. كيف بِتَعرِفي، يا مَرَه، إذا كان تَخَلِّصي راجِلِك. ولّا كيف بِتَعرِف، يا راجِل، إن كان تَخَلِّص مَرَتَك؟ عَلى كُلّو حال، خَلّي كُلّو واحِد يَمشي زي ما الله قَسَم لِكُلّو واحِد، زي ما الرَّب نادى كُلّو واحِد. دا أمري في كُل الكَنايس. أي واحِد في وَكِت الله ناداهو كان مُطَهَّر؟ هو ما يَبقى ما مُطَهَّر. أي واحِد في وَكِت الله ناداهو ما كان مُطَهَّر؟ هو ما يَبقى مُطَهَّر. الطَّهور ما شي و البِدون الطَّهور ما شي، لَكِن حِفظ أمر الله، دا مُهِم. خَلّي كُلّو واحِد يِستَنّى زي ما هو كان لَمّا الله ناداهو. إنتَ كُنتَ عَبد لَمّا الله ناداك؟ مَعليش. لَكِن إن قِدِرتَ تَبقى حُر، أمسِك الفُرصَه. عَشان الناداهو الرَّب و هو عَبد، هو بِقى حُر في الرَّب. و كِدا كَمان الكان حُر لَمّا الرَّب ناداهو، هو عَبد لِلمَسيح. كُنتو مُشتَرين بِتَمَن. ما تَبقو عَبيد لِلنّاس. يا أخوان، خَلّي كُلّو واحِد يِستَنّى مَعَ الله في زات الحال الكان فيهو لَمّا الله ناداهو. هَسَّع عَن العَذارى، ما عِندي أمر مِن الرَّب فيهُم، و لَكِن أَدِّي فِكري زي واحِد، بِرَحمَة الرَّب، أمين. أفتَكِر لِسَبَب التَّعب الفي هَسَّع، كوَيس لِلزّول يِستَنّى زي ما هو. إنتَ مَربوط بِمَرَه؟ ما تَطلُب تَطَلِّقا. إنتَ ما مِتزَوِّج؟ ما تَطلُب مَرَه. لَكِن إن كان تِتزَوَّج، إنتَ ما تَعمِل خَطيَّه، و إن كان العَذرَاء إتزَوَّجَت، هي ما تَعمِل خَطيَّه. لَكِن المِتزَوِّجين يَكون ليهُم تَعب في الجِّسِم. و أنا عاوِز أحفَظكُم مِن تَعب زي دا. يَعني، الوَكِت بِقى قِصَير، يا أخوان. مِن هَسَّع، خَلّو العِندَهُم نِسوان يَكونو زي الما عِندَهُم، و هُم اليَبكو، زي الما يَبكو، و هُم اليَفرَحو، زي الما يَفرَحو، و هُم اليَشتَرو، زي الما يَمسِكو البُضاعَه. و خَلّوهُم البِشتَغِلو بِحاجات الدُّنيا دي، زي الما بِشتَغِلو بيها كَتير. عَشان شَكِل الدُّنيا الحاضِرَه دي يَفوت. عاوِزكُم تَكونو بِدون مَشغوليَّه. الما مِتزَوِّج يَخَلّي بالو لِحاجات الرَّب، كيف يَبسِط الرَّب. لَكِن المِتزَوِّج يَخَلّي بالو في حاجات الدُّنيا، كيف يَبسِط مَرَتو. و هو إنقَسَم في اليَخُصّو. و الما مِتزَوِّجَه ولّا العَذراء تَخَلّي بالا لِحاجات الرَّب، عَشان تَكون مُقَدَّسَه بِالجِّسِم و بِالرّوح. لَكِن المِتزَوِّجَه تَخَلّي بالا لِحاجات الدُّنيا، كيف تَبسِط راجِلا. أقول دا لِفايدَتكُم، ما عَشان أمنَعكُم مِن العِرِس، لَكِن عاوِزكُم تَعمِلو الحاجَه المَوافِقَه و تَخُتّو بالكُم لِلرَّب بِدون لَخبَطَه. و لَكِن يِمكِن واحِد يَفتَكِر هو ما يَعمِل المَوافِق عَشان عَزراءو. و إذا هي كِبرَت، و هو لازِم يِتزَوَّج، خَلّوهُم يِتزَوَّجو، زي ما هو داير. هو ما يَعمِل خَطيَّه. و لَكِن يِمكِن واحِد يَكون ثابِت في قَلبو و ما في لُزوم، و عِندو قُوَّه عَلى إرَادَتو. و كان عاوِز دا مِن قَلبو أن يَحفَظ عَزراءو، هو بيَعمِل طَيب. و كِدا، اليَزَوِج عَزراءو يَعمِل كوَيس، و الما يَزَوِج يَعمِل أحسَن. المَرَه مَربوطَه بِالقانون ما دام راجِلا حَي. و لَكِن إذا راجِلا مات، هي حُرَّه عَشان تِتزَوَّج بِواحِد زي ما هي دايِرَه، لَكِن في الرَّب بَس. و لَكِن هي بِتكون مَبسوطَه أكتَر إذا تِستَنّى زي ما هي، بِحَسَب فِكري. و أفتَكِر عِندي كَمان روح الله. هَسَّع عَن الأكل اليَضبَحوهو لِلأصنام. بِنَعرِف كُلُّنا عِندَنا مَعرِفَه. المَعرِفَه تَعمِل الزّول مِتكَبِّر، لَكِن المَحَبَّه تَبني. و إذا كان واحِد يَفتَكِر هو يَعرِف حاجَه، هو لِسَّع ما يَعرِف حاجَه زي ما لازِم يَعرِف. و لَكِن إذا كان واحِد يَحِب الله، دا مَعروف عِند الله. عَلى كِدا عَن الأكل اليَضبَحوهو لِلأصنام، بِنَعرِف الصَّنَم ما شي في الدُّنيا، و ما في إلَه تاني إلّا واحِد. إذا كان في اليَسَموها آلِهَه في السَّما ولّا عَلى الأرض، زي ما آلِهَه كَتيرين و أسياد كَتيرين في. لَكِن لينا إلَه واحِد بَس، الأبو، المِنّو كُل الحاجات و نِحنا نَعيش ليهو، و رَب واحِد، يَسُوع المَسيح، البيهو كُل الحاجات و نِحنا نَعيش بيهو. و لَكِن كُل النّاس ما عِندَهُم المَعرِفَه دي. لَكِن بَعض مِنَّهُم، عَشان بيَعمِلو زي العادَه لِلصَّنَم لِغايَة هَسَّع، ياكلو الأكل زي الضَّبَحوهو لِلصَّنَم. و ضَميرُم الضَّعيف يَبقى نَجِس. لَكِن الأكل ما بِقَرِّبنا لِلَّه. إذا ما أكَلنا ما نَكون ناقصين، و إذا أكَلنا ما نَزيد حاجَه. لَكِن شوفو عَشان سُلطَتكُم دي ما تَكون سَبَب خَطيَّه لِلضَّعيفين. يِمكِن واحِد زول العِندو ضَمير ضَعيف يَشوفَك ياكُل في بيت صَنَم. إنتَ عِندَك مَعرِفَه عَن الحاجَه دي. إنتَ ما تَشَجِّعو حَتّى هو ياكُل الضَّبَحوها لِلصَّنَم؟ و كِدا بِسَبَب مَعرِفتَك، الأخو الضَّعيف يَموت. إتزَكَّر المَسيح مات فِشانو. و كِدا إنتو، لَمّا تَخطو ضِد الأخوان و تَجرَحو ضَميرُم الضَّعيف، إنتو تَخطو ضِد المَسيح. عَشان كِدا، إذا كان أكل يَكون سَبَب وقوع في الخَطيَّه لِأخوّي، أنا ما باكُل لَحَم أبَداً، عَشان ما بَكون سَبَب وقوع لِأخوّي. أنا ما حُر؟ أنا ما رَسول؟ ما شُفتَ يَسُوع رَبَّنا؟ إنتو ما عَمَلي في الرَّب؟ إذا أنا ما رَسول لِلتّانيين، عَلى الأقَل أنا رَسول ليكُم. عَشانكُم إنتو خِتِم رِسالتي في الرَّب. دا هو رَدّي قِدّام اليَمتَحِنوني. ما عِندَنا سُلطَه عَشان ناكُل و نَشرِب؟ ما عِندَنا سُلطَه أن ناخُد مَعانا مَرَه مِآمِنَه؟ زي باقي الرُّسُل و أخوان الرَّب و بُطْرُس؟ ولّا أنا و بَرْنَابَا بَس ما عِندَنا سُلطَه عَشان ما نَشتَغِل؟ مِنو يَدخُل الخِدمَه العَسكَريَّه بِالمَصاريف حَقّو؟ مِنو يَزرَع جِنينة العِنَب و ما ياكُل مِن ثَمَرو؟ ولّا مِنو يَحرَس غَنَم و ما ياكُل مِن لَبَن الغَنَم؟ بَتكَلَّم بِدا زي زول؟ القانون ما يَقول دا كَمان؟ عَشان مَكتوب في قانون مُوسَى: ”ما تَربُط خَشم التّور و هو يدوس الدُّرَه.“ الله يَهتَم بِالتّيران؟ هو ما يَقول بِالتَّمام فِشانّا؟ أيوَه، عَشان خاطِرنا هو مَكتوب. المُزارِع لازِم يَحفَر عَلى رَجاء، و اليدوس الدُّرَه عَلى رَجاء عَشان يَكون شَريك في الثَّمار. إذا نِحنا زَرَعنا ليكُم حاجات الرّوح، تَكون حاجَه كَبيرَه إذا نَلِم مِنَّكُم حاجات الجِّسِم؟ إذا كان تانيين شُرَكا في السُّلطَه عَليكُم، مُش نِحنا في الأوَّل؟ لَكِن ما نَشتَغِل بِالسُّلطَه دي، لَكِن عِندَنا صَبر عَلى كُلّو شي عَشان ما نَخُت مانِع لِإنجيل المَسيح. ما بِتَعرِفو اليَخدِمو في الهيكَل ياكلو مِن الهيكَل؟ و ديل اليَخدِمو في مَحَل الضَّبيحَه يَشتَرِكو في ضَبايح المَضبَح؟ و كِدا كَمان، الرَّب أمَر أن ديل اليَنادو بِالإنجيل يَعِيشو مِن الإنجيل. و لَكِن أنا ما إشتَغَلتَ بِشي مِن دا. و ما بَكتِب دا عَشان آخُد لَي زي دا. عَلَشان أحسَن لَي أموت مِن أن واحِد ياخُد مِنّي سَبَب فَخري. عَشان إذا كان أبَشِّر، ما لَي فَخر، عَشان أنا لازِم أبَشِّر. يا مُصيبتي إذا كان ما أبَشِّر! إذا أعمِل دا مِن إرادَتي، عِندي أُجرَه. و لَكِن إذا دا ما مِن إرادَتي، الله حَسبني وَكيل أمين. عَلَشان كِدا أُجرَتي شِنو؟ وَكِت ما أبَشِّر، بَدّي إنجيل المَسيح مَجّاناً، و ما بَشتَغِل بِسُلطَتي في الإنجيل. و لَو أنا حُر مِن كُل النّاس، عَمَلتَ نَفسي خَدّام لِكُل النّاس، عَشان أربَح ناس أكتَر. بِقيت لِليَهود زي يَهودي عَشان أربَح اليَهود. و ليهُم التِحِت القانون، زي ما أنا تِحِت القانون، مَعَ إنّي أنا مُش تِحِت القانون، عَشان أربَح ديل التِحِت القانون. و لِلنّاس البِدون قانون بِقيت زي ما أنا بِدون قانون. لَكِن أنا مُش بِدون قانون لِلَّه، لَكِن أنا تِحِت قانون لِلمَسيح عَشان أربَح ديل البِدون قانون. لِلضَّعيفين بِقيت ضَعيف، عَشان أربَح الضَّعيفين. بِقيت لِكُل النّاس كُلّو حاجَه، عَشان أخَلِّص بِكُلّو طَرِيقَه بَعض مِن النّاس. و أنا أعمِل كُلّو دا عَلَشان الإنجيل، عَشان بَكون شَريك فيهو. ما بِتَعرِفو؟ اليَجرو في السَّبَق كُلَّهُم يَجرو، لَكِن واحِد ياخُد الأُجرَه؟ و كِدا، أجرو عَشان تَحَصِّلو عَليها. و كُل اليَتعَب، يَمسِك نَفسو في كُلّو حاجَه. ديلاك عَشان ياخُدو تاج بِخسَر، و لَكِن نِحنا لِتاج ما بِخسَر. عَشان كِدا، أنا ما بَجري زي واحِد البِجري بِدون تأكيد، و ما بَضرُب زي البِضرُب الهَوا. أنا بأدِّب جِسمي و أغلِبو. عَشان أخاف، بَعَد ما بَشَّرتَ التّانيين، أنا بَبقي مَرفوض. و أنا، يا أخوان، ما عاوِزكُم تَكونو بِدون مَعرِفَه، أبَهاتنا كُلَّهُم كانو تِحِت السَّحابَه. و كُلَّهُم مَرّو بِالبَحَر المالِح. و كُلُّهُم إتعَمَّدو لِمُوسَى في السَّحابَه و في البَحَر المالِح. و كُلَّهُم أكَلو الأكل الرّوحي نَفسو. و كُلَّهُم شِربو الشَّراب الرّوحي نَفسو. عَشانُم كانو يَشرَبو مِن الحَجَر الرّوحي الكان يَتبَعُم. و الحَجَر كان المَسيح. لَكِن الله ما كان مَبسوط بِأكتَرُم، عَشان أتفَرتَقو في الخَلا. و الحاجات دي بِقو مَثَل لينا، عَشان ما نَدور الحاجات البَطّالَه زي ما هُم كانو عاوزين. ما تَكونو خَدّامين لِلأصنام زي ما كانو بَعض مِنَّهُم. زي ما مَكتوب: ”النّاس قَعَدو عَشان ياكلو و يَشرَبو. بَعدين قامو عَشان يَرقُصو.“ و ما نَعمِل الزِّنا زي بَعض مِنَّهُم، و وَقَعو تلاتَه و عِشرين ألف في يوم واحِد. ما نَجَرِّب الرَّب، زي بَعض مِنَّهُم جّرَّبوهو، و الدَّبايب كَتَلوهُم. و ما نَنَقنِق زي ما بَعض مِنَّهُم نَقنَقو، و مَلاك الموت كَتَلُم. و كُل الحاجات دي حَصَلَت ليهُم زي مَثَل، لَكِن كانَت مَكتوبَه عَشان يَحَذِّرونا. عَشان نِحنا بِنعيش في الوَكِت لَمّا آخِر الزَّمَن قَرَّب. عَلَشان كِدا، اليَفتَكِر هو يَقوم، لازِم يَخَلّي بالو عَشان ما يَقَع. ما في تَجرِبَه حَصَلَت ليكُم إلّا زي ما تَجي لِكُل النّاس. لَكِن الله أمين. هو ما يَخَلّيكُم تَكونو مُجَرَّبين فوق ما تَقدَرو. لَكِن لَمّا تَكونو مَجَرَّبين، هو بيَعمِل طَرِيقَة الهُروب عَشان تَقدَرو تِتحَمَّلوها. عَشان كِدا، يا مَحبوبين، أهرُبو مِن عِبادَة الأصنام. أقول ليكُم زي ما أقول لِلفاهمين. أحكُمو إنتو في الأقول. كُبّايَة البَرَكَه البيها نَبارِك، ما هي شَرِكَة دَم المَسيح؟ العيش النَّكَسِّرو، ما هو شَرِكَة جِسِم المَسيح؟ عَلَشان في عيش واحِد، نِحنا، الكَتيرين، جِسم واحِد، عَشان كُلُّنا نَشتَرِك في العيش الواحِد. شوفو إِسْرَائِيل حَسَب الجِّسِم. ما هُم الياكلو الضَّبايح شُرَكاء مَحَل الضَّبيحَه؟ كِدا المَعنى شِنو؟ اليَضبَحوهو لِلصَّنَم حاجَه؟ ولّا الصَّنَم حاجَه؟ لا، لَكِن ديل اليَضبَحو ضَبايح لِلأصنام، يَضبَحوها لِلشّياطين، مُش لِلَّه. ما بَدوركُم تَكونو شُرَكاء الشّياطين. ما تَقدَرو تَشرَبو مِن كُبّايَة الرَّب و مِن كُبّايَة الشّياطين. ما تَقدَرو تَشتَرِكو في طَرَبيزَة الرَّب و في طَرَبيزَة شياطين. بِنحَرِّك الرَّب لِلغيرَه؟ نِحنا أشَدّا مِنّو؟ ”عِندَنا إذِن لِكُلّو شي،“ لَكِن كُلّو شي ما مُساعَدَه. ”عِندَنا إذِن لِكُلّو شي،“ لَكِن كُلّو شي ما يَبني. ما تَخَلّي واحِد يَطلُب البِساعِد نَفسو، لَكِن البِساعِد التّاني. أُكلو كُل اليَبيعوهو في سوق اللَّحَم، و ما تَسألو عَن حاجَه فِشان الضَّمير. عَلَشان: ”لِلرَّب الأرض، و كُل الفيها.“ و إن كان واحِد الما بِآمِنو ناداكُم عَشان تاكلو و إنتو دايرين تَمشو، أُكلو مِن كُل الهو يَقَدِّم ليكُم. و ما تَسألوهو عَن حاجَه فِشان الضَّمير. لَكِن إن واحِد قال ليكُم: ”دا مَضبوح لِصَنَم،“ ما تاكلو، فِشان الزّول الخَبَّركُم و عَلَشان الضَّمير. يَعني ضَمير الزّول التّاني، ما ضَميرَك إنتَ. عَلَشان لِشِنو يِتحَكَم عَلى حُرّيتي بِضَمير الزّول التّاني؟ إذا أقول شُكراً لِلَّه عَشان أكلي، لِشِنو يَشتِموني لِلحاجَه الأقول شُكراً ليها. كِدا، إذا تاكلو ولّا تَشرَبو ولّا تَعمِلو أي حاجَه، أعمِلو كُلّو حاجَه لِمَجد الله. ما تَكونو سَبَب لِخَطيَّه لِليَهود ولّا لِناس إغريقيين ولّا لِكَنيسَة الله، زي ما أنا كَمان أبسِط كُل النّاس في كُلّو شي. و ما بَطلُب البِكون لِفايدَة نَفسي، لَكِن البِكون لِفايدَة كَتيرين عَشان يَخلَصو. أتبَعوني زي ما أنا بَتبَع المَسيح. أحمَدكُم عَشانكُم تِتزَكَّروني في كُلّو شي، و تَحفَظو التَّعاليم زي ما سَلَّمتَها ليكُم. لَكِن عاوِزكُم تَعرِفو، راس كُلّو راجِل هو المَسيح، و راس المَرَه هو الرّاجِل، و راس المَسيح هو الله. كُلّو راجِل يَصَلّي ولّا يِتنَبّا و رَاسو مُغَطّى يَشتِم رَاسو. لَكِن كُلّو مَرَه تَصَلّي ولّا تِتنِبّى و راسا ما مُغَطّى تَشتِم راسا، و ما في فارِق بينا هي و بين المَرَه الحَلَقَت شَعرا. عَشان إن كان المَرَه ما تَغَطّي راسا، خَلِيها تَقُص شَعرا. و إذا كان دا عيب لِلمَرَه تَقُص ولّا تَحلِق شَعرا، خَلِيها تَغَطّي راسا. و ما تَخَلّي الرّاجِل يَغَطّي رَاسو عَشان هو صورَة الله و مَجدو. لَكِن المَرَه هي مَجد الرّاجِل. عَشان الرّاجِل ما مِن المَرَه، لَكِن المَرَه مِن الرّاجِل. عَشان الله ما خَلَق الرّاجِل عَلَشان المَرَه، لَكِن المَرَه عَلَشان الرّاجِل. بِالسَّبَب دا، المَرَه لازِم تَكون ليها عَلامَة سُلطَه عَلى راسا فِشان المَلائكَه. لَكِن المَرَه ما بِدون الرّاجِل، و الرّاجِل ما بِدون المَرَه في الرَّب. لَكِن زي ما المَرَه كانَت مَصنوعَه مِن الرّاجِل، كِدا الرّاجِل كَمان هو هَسَّع مَولود مِن المَرَه. و كُل الحاجات مِن الله. أحكُمو إنتو في نُفوسكُم. هو موافِق لِلمَرَه تَصَلّي لِلَّه و هي ما مُغَطّى؟ الطَّبيعَه نَفسا ما تَعَلِّمكُم؟ إذا كان الرّاجِل عِندو شَعر طَويل، دا عيب ليهو. لَكِن إذا كان المَرَه عِندَها شَعر طَويل، دا مَجد ليها، عَشان الشَّعر ليها بَدَل مِن غَطا. إذا كان واحِد يَحِب المُشاكلَه، ما عِندَنا عادَه تانيَه، ولّا كَنايس الله ما عِندَهُم. لَكِن في التَّعاليم البَعدو، أنا ما أحمَدكُم، عَشان لَمّا تِتلَمّو، دا مُش لِلأحسَن لَكِن لِلأكعَب. في الأوَّل، لَمَّن تِتلَمّو في الكَنيسَه، أسمَع إنّو في بينكُم إنقِسامات، و أصَدِّق بَعض مِن دا. عَشان لازِم يَكون في بينكُم إنقِسامات حَتّى ديل الحَق مَعاهُم، بِكونو بيّنين بينكُم. لَمّا تِتلَمّو سَوا، إنتو ما تِتلَمّو عَشان تاكلو عَشا الرَّب. عَشان لَمّا تاكلو، كُلّو واحِد يَمشي قِدّام و ياكُل العَشا بِتاعو. و الواحِد يَجوع و التّاني يَكون سَكران! دا شِنو؟ ما عِندَكُم بُيوت عَشان تاكلو و تَشرَبو فيها؟ و تَحتَقِرو كَنيسَة الله؟ و تَخَجِّلو الما عِندَهُم أكل؟ أقول ليكُم شِنو؟ بَحمَدكُم عَلى دا؟ لا، ما بَحمَدكُم. عَشان القِبِلتَ مِن الرَّب، كَمان سَلَّمتو ليكُم. يَعني، الرَّب يَسُوع، في اللّيلَه لَمَّن خانوهو، أخَد عيش. و شَكَر و كَسَّرو و قال: ”دا هو جِسمي المَكسور فِشانكُم. أعمِلو دا عَشان تِتذَكَّروني.“ و زي داك كَمان أخَد الكُبّايَه بَعَد العَشا، و قال: ”الكُبّايَه دي، هي الإتِّفاق الجَّديد بِدَمّي. أعمِلو دا كُلّو مَرَّه وَكِت ما تَشرَبو، عَشان تِتذَكَّروني.“ عَشان كُلّو مَرَّه وَكِت ما تاكلو العيش دا و تَشرَبو مِن الكُبّايَه دي، تَخَبِّرو بِموت الرَّب لِغايَة ما يَجي. إذا كان أي واحِد ياكُل عيش الرَّب دا، ولّا يَشرَب مِن كُبّايَتو بِطَرِيقَه ما مُستَحِقَّه، يَكون عِندو ذَنب في جِسِم الرَّب و دَمّو. لَكِن خَلّي الزّول يَمتَحِن نَفسو، و كِدا ياكُل مِن العيش و يَشرَب مِن الكُبّايَه. عَشان الياكُل و يَشرَب بِدون ما يَفهَم مَعنى جِسِم الرَّب، ياكُل و يَشرَب حُكم لِنَفسو. بِالسَّبَب دا، كَتيرين فيكُم ضَعيفين و عَيّانين، و بَعض مِنَّكُم ماتو. عَلَشان إذا كُنّا نَحكُم عَلى نُفوسنا، ما كانو حَكَمو عَلينا. لَكِن إذا كان الرَّب يَحكُم عَلينا و يأدِّبنا، دا عَلَشان ما نَكون مَحكومين مَعَ الدُّنيا. عَشان كِدا، يا أخواني، لَمّا تِتلَمّو عَشان تاكلو، إستَنّو بَعضَكُم لِبَعض. إذا كان واحِد يَجوع، خَليهو ياكُل في البيت، عَشان ما تَجتَمِعو لِلحُكم. و عَن الحاجات التّانيَه، لَمّا أجي، بَدّيكُم تَعاليم. هَسَّع عَن الهَدايا الرّوحيَّه، يا أخوان، ما بَدوركُم تَكونو بِدون مَعرِفَه. إنتو بِتَعرِفو لَمّا كُنتو مِن الأُمَم، كانو يَحَرِّكوكُم و يَقودوكُم لِلأصنام الما يِتكَلَّمو. عَشان كِدا أخَبِّركُم، واحِد ما بِقول: ”لَعنَه لِيَسُوع!“ و هو يتكَلَّم بِروح الله. و واحِد ما بِقدَر يَقول: ”يَسُوع الرَّب،“ إلّا بِالرّوح القُدُس. و في أنواع هَدايا، و لَكِن الرّوح واحِد. و في أنواع خِدمَه، و لَكِن الرَّب واحِد. و في أنواع أعمال، لَكِن الله واحِد البيَعمِل كُلّو شي في كُل النّاس. و لَكِن لِكُلّو واحِد الله يَدّي بيّنَة الرّوح لِلفايدَه. عَلَشان الله يَدّي كَلام حِكمَه بِالرّوح لِواحِد، و كَلام مَعرِفَه لِتاني بِحَسَب نَفس الرّوح. و لِتاني، إيمان بِنَفس الرّوح، و لِتاني، هَدايا الشِّفا بِالرّوح الواحِد. و لِتاني، عَجايِب، و لِتاني، نُبوَّه، و لِتاني، قُدرَه عَشان يَفهَم الفارِق بين الأرواح، و لِتاني، قُدرَه عَشان يتكَلَّم بِأنواع اللُّغات، و لِتاني، تَرجَمَة لُغات. لَكِن الرّوح الواحِد نَفسو يَعمِل كُلّو دا، و يَدّي كُلّو واحِد بَراهو زي ما هو داير. عَشان زي ما الجِّسِم هو واحِد و عِندو أعضاء كَتيرَه، و كُلّو أعضاء الجِّسِم كَتيرَه، لَكِن لِسَّع جِسِم واحِد، كِدا المَسيح زي داك كَمان. عَشان كُلُّنا بِروح واحِد إتعَمَّدنا لِجِسِم واحِد، إذا كُنّا يَهود ولّا ناس إغريقيين، خَدّامين ولّا العِندَهُم حُرّيَّه. و هو أدّانا كُلُّنا روح واحِد عَشان نَشرِبو. عَشان الجِّسِم كَمان مُش عُضو واحِد لَكِن أعضاء كَتيرَه. إذا قالَت الكُراع: ”عَشان أنا ما إيد، أنا ما مِن الجِّسِم،“ داك يَعمِلا تَكون مُش مِن الجِّسِم؟ و إذا قالَت الأضان: ”عَشان أنا ما عين، أنا ما مِن الجِّسِم،“ داك يَعمِلا تَكون مُش مِن الجِّسِم؟ إذا كان كُل الجِّسِم عين، وين السَّمَع؟ و إن كان كُلّو سَمَع، وين الشَّم؟ لَكِن الله خَتَّ الأعضاء كُلّو واحِد مِنَّها في الجِّسِم زي ما كان عاوِز. و لَكِن إذا كان كُلَّهُم عُضو واحِد، وين الجِّسِم؟ و كِدا، في أعضاء كَتيرَه، و لَكِن جِسِم واحِد. العين ما بِتَقدَر تَقول لِلإيد: ”ما عِندي إحتِياج ليكي،“ ولّا الراس كَمان لِلكِرعين: ”ما عِندي إحتِياج ليكُم.“ بِالعَكس، أعضاء الجِّسِم النَّفتَكِر هُم ضَعيفين، هُم مُهِمّين. و أعضاء الجِّسِم البِنَحسِبا أقَل إحتِرام، نَدّيها إحتِرام أكتَر. و الأعضاء الما جَمِيلَه فينا، نَدّيها جَمال أكبَر. و الجَّمِيلَه فينا ما عِندَها إحتِياج لِداك. لَكِن الله خَتَّ الأعضاء في الجِّسِم بِالطَّرِيقَه البِتَدّي لِلنّاقِص إحتِرام أكتَر! عَلَشان ما بِكون إنقِسام في الجِّسِم، لَكِن عَشان الأعضاء يَكونو عِندَهُم فِكرَه واحدَه بَعضَهُم لِبَعض. و إذا كان واحِد عُضو يَتعَب، كُل الأعضاء يَتعَبو مَعاهو. و إذا كان يَحتَرِمو واحِد عُضو، كُل الأعضاء بِفرَحو مَعاهو. و إنتو جِسِم المَسيح، و كُلّو واحِد مِنَّكُم بَراهو أعضاءو. و الله خَتَّ في الكَنيسَه، الأوَّل رُسُل، التّاني أنبياء، التّالِت مُعَلِّمين، بَعدين عامِلين عَجايِب، بَعَد دا هَدايا الشِّفا، مُساعَدات، تَرتيبات، و أنواع اللُّغات. الكُلّو رُسُل؟ الكُلّو أنبياء؟ الكُلّو مُعَلِّمين؟ الكُلّو عِندَهُم قُوَّه عَشان يَعمِلو عَجايِب؟ الكُلّو عِندَهُم هَدايا الشِّفا؟ الكُلّو يِتكَلَّمو بِلُغات؟ الكُلّو يَتَرجِمو؟ لَكِن حِبّو شَديد الهَدايا الأحسَن. و كَمان بَوَرّيكُم طَريق أحسَن بِكَتير. إذا كان بَتكَلَّم بِلُغات النّاس و المَلائكَه، و لَكِن ما عِندي مَحَبَّه، بِقيت زي جَرَس لَمّا واحِد يَدُقّو، ولّا نَحاس لَمّا الزّول يَضرُبو. و إذا كان عِندي هَديَّة النُّبوَّه، و بَعرِف كُل الأسرار، و كُلّو مَعرِفَه، و إذا كان عِندي كُل الإيمان لِغايَة ما أحَرِّك الجِبال، و لَكِن ما عِندي مَحَبَّه، أنا ما حاجَه. و إذا أَدِّي كُل العِندي لِلمَساكين، و سَلَّمتَ جِسمي عَشان يَحرَقوهو، و لَكِن ما عِندي مَحَبَّه، ما في فايدَه لَي. المَحَبَّه عِندَها صَبر طَويل، و تَشفُق. المَحَبَّه ما عِندَها حَسَد. المَحَبَّه ما تَحمَد نَفسا و ما مِتكَبِّره. و المَحَبَّه عِندَها أدَب، و ما تَطلُب حاجَه لِنَفسا، و ما تَزعَل قَوام، و ما تَفَكِّر في الشَّر. المَحَبَّه ما تَفرَح بِالذَّنب، لَكِن تَفرَح بالحَق. و تِتحَمَّل كُلّو حاجَه، و تَصَدِّق كُلّو حاجَه، و عِندَها رَجاء لِكُلّو حاجَه، و تَصبُر عَلى كُلّو حاجَه. المَحَبَّه ما تَقَع أبَداً. إذا كان في نُبوات، هُم بِتَخلَصو، و اللُّغات عِندَهُم نِهايَه، و المَعرِفَه بِتَخلَص. عَشانّا بِنَعرِف بَعض مِن المَعرِفَه و نِتنَبّأ بَعض مِن النُّبوَّه. و لَكِن لَمّا الكامِل بِجي، في الوَكِت داك المُش كامِل بِوَقِّف. لَمّا كُنتَ وَلَد، كُنتَ بَتكَلَّم زي وَلَد، و كُنتَ بَفتَكِر زي وَلَد، و كُنتَ بَحسِب زي وَلَد. و لَكِن لَمّا بِقيت راجِل، وَقَّفتَ حاجات الوَلَد. عَشان نِحنا بِنشوف هَسَّع في مِرايا في الضُّلُمَّه، لَكِن في الوَكِت داك وَش لِوَش. هَسَّع بَعرِف بَعض المَعرِفَه، لَكِن في الوَكِت داك بَعرِف بِالتَّمام زي ما هُم عِرفوني بِالتَّمام. و هَسَّع يِستَمِرّو الإيمان و الرَّجاء و المَحَبَّه، التّلاتَه ديل. و لَكِن الأكبَر فيهُم المَحَبَّه. أتبَعو المَحَبَّه، و لَكِن حِبّو شَديد الهَدايا الرّوحيَّه، خُصوصاً عَشان تِتنَبّو. عَشان البِتكَلَّم بِلُغَه غَريبَه ما بِكَلِّم النّاس لَكِن الله. عَشان ما في واحِد يَفهَمو. و لَكِن هو بِالرّوح يتكَلَّم بِأسرار. لَكِن البِتنَبّا، يَكَلِم النّاس عَشان مُساعَدَتُم، و البِشارَه، و التَّعزيَه. البِتكَلَّم بِلُغَه يَساعِد نَفسو. و لَكِن البِتنَبّا، يَساعِد الكَنيسَه. أنا داير كُلُّكُم تِتكَلَّمو بِلُغات، و لَكِن فوق كُلّو حاجَه دَايِركُم تِتنَبّو. عَشان البِتنَبّا أكبَر مِن البِتكَلَّم بِلُغات إلّا إذا واحِد يَتَرجِم، عَشان يَساعِد الكَنيسَه. و هَسَّع، يا أخوان، إذا أجيكُم و أتكَلَّم بِلُغات، الفايدَه ليكُم شِنو إذا ما أكَلِّمكُم بِرؤيا ولّا بِمَعرِفَه ولّا بِنُبوَّه ولّا بِتَعليم؟ الحاجات الما عِندَهُم حَياة البِدّو صوت زي زِمبارَه ولّا رَبابَه، إذا ما يَعمِلو فارِق بين الأصوات، كيف واحِد يَعرِف البِضرُب بيهو؟ عَشان إذا البوق يَدّي صوت ما بايِن، مِنو بِجَهِّز لِلحَرب؟ و كِدا إنتو كَمان، إذا ما تِتكَلَّمو بِّاللُغَه كَلام مَفهوم، كيف واحِد يَعرِف البِتقولوها؟ إنتو بِتِتكَلَّمو في الهَوا. بِدون شَك في أنواع لُغات كَتيرَه في الدُّنيا، لَكِن و لا واحدَه مِنَّها بِدون مَعنى. كِدا، إذا كان ما بَعرِف مَعنى اللُّغَه، أنا بَكون لِلزّول البِتكَلَّم بيها غَريب، و البِتكَلَّم بيها بِكون لَي غَريب. و كِدا إنتو كَمان. إذا إنتو غَيورين لِلهَدايا المِن الرّوح، أطلُبو عَشان تَزيدو فيها عَشان تَساعِدو الكَنيسَه. بِالسَّبَب دا، الزّول البِتكَلَّم بِلُغَه، خَليهو يَصَلّي عَشان يَتَرجِمو. عَلَشان إن كان أصَلّي بِلُغَه، روحي يَصَلّي لَكِن فِكري بِدون ثِمار. عَلَشان كِدا بَعمِل شِنو؟ بَصَلّي بِالرّوح و بَصَلّي بِالفِكر كَمان. بَرَتِّل بِالرّوح و بَرَتِّل بِالفِكر كَمان. كان ما كِدا، إذا إنتَ تَبارِك بِالرّوح، كيف الما عِندو الهَدايا الرّوحيَّه يَقدَر يَقول ”آمين“ لَمّا إنتَ تَشكُر؟ عَشان هو ما بِعرِف إنتَ تَقول شِنو. بِالحَق إنتَ تَشكُر كوَيس، لَكِن إنتَ ما بِتساعِد التّاني. أشكُر الله أنا أتكَلَّم بِاللُّغات زِيادَه مِن كُلُّكُم. و لَكِن في الكَنيسَه، أنا داير أتكَلَّم خَمسَه كِلمات بِفَهمي، عَشان أعَلِّم بيها التّانيين، مِن أن أتكَلَّم أكتَر مِن عَشَرَة آلاف كِلمَه بِلُغَه غَريبَه. يا أخوان، ما تَكونو أولاد في أفكاركُم. كونو أولاد صُغار في الشَّر، لَكِن في أفكاركُم كونو كامِلين. و هو مَكتوب في القانون: ”بِالنّاس البِتكَلَّمو لُغات تانيَه، و بِخَشم ناس تانيين بَكَلِّم الشَّعب دا. لَكِن لِسَّع ما بِسمَعو لَي.“ يَقول الرَّب. كِدا اللُّغات عَلامَه، مُش لِلمؤمِنين لَكِن لِلما مؤمِنين. لَكِن النُّبوَّه مُش لِلما مؤمِنين لَكِن لِلمؤمِنين. عَلَشان كِدا، إذا الكَنيسَه كُلَّها أتلَمَّت، و إذا كُلُّهُم يِتكَلَّمو بِلُغات، و الما بِفهَمو ولّا الما مؤمِنين يدخُلو، هُم ما بِقولو إنتو مَجنونين؟ و لَكِن إذا كُلّو يِتنَبّو و واحِد ما مؤمِن ولّا ما بِفهَم يَدخُل، كُلّو بِوَبِّخوهو، و كُلّو بِحكُمو عَليهو. و كِدا أسرار قَلبو بِكونو بيّنين. و كِدا بِقَع و يَعبُد الله و يَقول: ”الله بِالحَق بينكُم!“ و كِدا نَقول شِنو، يا أخوان؟ لَمّا تِتلَمّو، كُلّو واحِد مِنَّكُم عِندو مَزمور، ولّا عِندو تَعليم، ولّا عِندو رؤيا، ولّا عِندو لُغَه، ولّا عِندو تَرجَمَه. خَلّي كُلّو حاجَه تَكون لِلمُساعَدَه. إن كان واحِد يتكَلَّم بِلُغَه، خَليهو يَكون إتنين إتنين ولّا بِالأكتَر تلاتَه تلاتَه و واحِد وَرا التّاني، و خَلّي واحِد يَتَرجِم. و لَكِن إن ما في مِتَرجِم، خَليهو يَسكُت في الكَنيسَه و يَكَلِّم مَعَ نَفسو و مَعَ الله. خَلّي إتنين ولّا تلاتَه أنبياء يِتكَلَّمو، و خَلّي الآخَرين يَحكُمو. و لَكِن إذا واحِد و هو قاعِد، يَقبَل رؤيا، خَلّي الإتكَلَّم في الأوَّل يَسكُت. عَشان كُلُّكُم تَقدَرو تِتنَبّو واحِد واحِد، عَشان كُلّو يِتعَلَّمو و كُلّو يِتعَزّو. و أرواح الأنبياء يَطيعو الأنبياء. عَشان الله مُش إلَه لَخبَطَه، لَكِن إلَه سَلام. زي في كُلّو كَنايس القِدِّسين، خَلّو نِسوانكُم يَسكُتو في الكَنايس، عَشان ما عِندَهُم إذِن يِتكَلَّمو، لَكِن يَطيعو زي القانون يَقول كَمان. و لَكِن إذا النِّسوان عاوزين يِتعَلَّمو شي، خَلّوهُم يَسألو رُجالُم في البيت. عَشان دا عيب لِلمَرَه تِتكَلَّم في الكَنيسَه. كِلمَة الله مَرَقَت مِنَّكُم؟ ولّا هي وَصَلَت ليكُم بَس؟ إن واحِد يَحسِب نَفسو نَبي ولّا روحي، خَليهو يَعرِف الأنا أكتِبو ليكُم هو أمر الرَّب. لَكِن إن واحِد ما يَخَلّي بالو لِدا، ما تَخَلّو بالكُم ليهو. عَشان كِدا، يا أخواني، حِبّو شَديد أن تِتنَبّو، و ما تَمنَعو البِكَلِّم بِلُغات. لَكِن كُلّو شي لازِم يَكون بِطَرِيقَه مُناسِبَه و بِتَرتيب. و أخَبِّركُم، يا أخوان، بِالإنجيل البَشَّرتَكُم بيهو. و إنتو قِبِلتوهو و تَقومو فيهو. و بِالإنجيل دا تَخلَصو إذا كُنتو تَمسِكو بِالكَلام البَشَّرتَكُم بيهو، إذا ما آمَنتو بِدون فايدَه. عَشان سَلَّمتَ ليكُم في الأوَّل القِبِلتو أنا كَمان، إنّو المَسيح مات فِشان خَطايانا بِحَسَب الكُتُب. و دَفَنوهو، و قام في اليوم التّالِت حَسَب الكُتُب. و ظَهَر لِبُطْرُس، و بَعدين لِلإتناشَر رَسول. و بَعَد داك، ظَهَر مَرَّه واحدَه لِزِيادَه مِن خُمسُمِيَّة أخو. أكتَرُم لِسَّع يَعِيشو لِغايَة هَسَّع، و لَكِن بَعض مِنَّهُم نامو. و بَعَد داك، ظَهَر لِيَعْقُوب، و بَعدين لِكُل الرُسُل. و آخِر الكُل، ظَهَر لَي أنا كَمان، زي المَولود قَبِل الوَكِت المَظبوط. عَشان أنا صَغَيِر مِن الرُّسُل، أنا الما بَستَحِق يَسَمّوني رَسول، عَشانّي طَرَدتَ كَنيسَة الله. لَكِن بِنِعمَة الله أنا زي ما أنا، و نِعمَتو الأدّاها لَي ما كانَت بِدون فايدَه. لَكِن أنا تِعِبتَ أكتَر مِنَّهُم كُلُّهُم. و لَكِن مُش أنا، لَكِن نِعمَة الله المَعاي. و كِدا إذا كان أنا ولّا هُم، كِدا نَبَشِّر، و كِدا إنتو آمَنتو. و لَكِن إذا نَبَشِّر بِالمَسيح، إنّو قام مِن بين المَيِّتين، كيف بَعض مِنَّكُم يَقولو ما في قيامَة المَيِّتين؟ لَكِن إذا ما في قيامَة المَيِّتين، كِدا المَسيح ما قام. و إذا المَسيح ما قام، بِشارَتنا بِدون فايدَه، و إيمانكُم كَمان بِدون فايدَه. و يَلقونا كَمان شاهِدين كَضّابين لِلَّه، عَشان شِهِدنا بِالله، هو قَوَّم المَسيح. لَكِن هو ما قَوَّمو إذا كان المَيِّتين ما بِقومو. عَشان إذا المَيِّتين ما بِقومو، المَسيح كَمان ما قام. و إذا المَسيح ما قام، إيمانكُم بِدون فايدَه و إنتو لِسَّع في خَطاياكُم. عَلَشان كِدا، الرَّقَدو في المَسيح كَمان هَلَكو. إذا كان عِندَنا رَجاء في المَسيح في الحَياة دي بَس، نِحنا مَساكين مِن كُل النّاس. و لَكِن المَسيح بِالحَق قام مِن بين المَيِّتين، و بِقى الأوَّل القام مِن بين الراقِدين. عَشان ما دام الموت جا بِإنسان، بِإنسان كَمان جا قيامَة المَيِّتين. عَلَشان زي ما كُلّو بِموتو في آدَم، كِدا كَمان، كُلّو بِكونو حَيين في المَسيح. لَكِن كُلّو واحِد في دورو. المَسيح الأوَّل القام. بَعدين لَمّا المَسيح بِجي، هُم بِتوع المَسيح بِكونو حَيين. بَعَد داك النِّهايَه بِجي، لَمّا هو يَسَلِّم المَملَكَه لِلَّه الأبو، بَعَد ما خَرَب كُلّو حُكم و كُلّو سُلطَه و كُلّو قُوَّه. عَشانّو لازِم يَملِك لِغايَة ما الله يَخُت كُل العُدوان تِحِت كِرعينو. آخِر عَدو الهو يَخرِبو، هو الموت. ”عَشان الله خَتَّ كُلّو حاجَه تِحِت كِرعينو.“ و لَكِن لَمَّن يَقول هو خَتَّ كُلّو حاجَه تِحتو، يَبَيِّن دا ما يَعني الله نَفسو، هو الخَتَّ كُلّو حاجَه تِحِت المَسيح. لَمّا هو بِخُت كُلّو حاجَه تِحتو، في الوَكِت داك، الإبن يَكون تِحِت الله. و الله خَتَّ كُلّو شي تِحتو، عَشان يَكون الله كُلّو في كُلّو. كان ما كِدا، البِتعَمَّدو فِشان المَيِّتين بِعمِلو شِنو؟ إذا المَيِّتين ما بِقومو كُلّو كُلّو، لِشِنو يِتعَمَّدو فِشان المَيِّتين؟ و لِشِنو نِحنا في الخَطَر كُلّو ساعَه؟ أخَبِّركُم، يا أخوان، بِالفَخر العِندي فيكُم في يَسُوع المَسيح رَبَّنا، بَموت كُلّو يوم. زي ما النّاس بِفتَكِرو، الفايدَه شِنو لَي إذا حارَبتَ وحوش في أفَسُس؟ إذا كان المَيِّتين ما يَقومو: ”خَلّونا ناكُل و نَشرِب، عَشان بُكرَه بِنموت.“ ما تَخَلّوهُم يَغِشّوكُم: ”الأصحاب بَطّالين يَخَسِّر الطَّبيعَه الطَّيبَه.“ أرجَعو لِنُفوسكُم زي الواجِب، و ما تَعمِلو خَطيَّه. عَشان بَعض مِن النّاس ما عِندَهُم مَعرِفَه بِالله. بَقول داك عَشان أخَجِّلكُم. لَكِن واحِد يَقول: ”المَيِّتين بِقومو كيف؟ و بِياتو جِسِم بِجو؟“ يا غَشيم! البِتَزرَعو ما يَقوم إذا ما يَموت. لَمّا تَزرَع تيراب، ما بِتَزرَع الجِّسِم البِكون، لَكِن تيراب بَس، يِمكِن مِن دُرَه ولّا نوع تاني مِن التّيراب. لَكِن الله يَدّيها جِسِم زي ما هو كان داير. و لِكُلّو واحِد مِن التّيراب يَدّيهو جِسمو المَخصوص. ما كُلّو جِسِم، جِسِم واحِد. لَكِن لِلنّاس جِسِم واحِد، و لِلبَهايِم جِسِم تاني، و لِلطّير جِسِم تاني، و لِلسَّمَك جِسِم تاني. في أجسام مِن السَّما و أجسام مِن الأرض. لَكِن مَجد الأجسام المِن السَّما حاجَه، و مَجد الأجسام المِن الأرض حاجَه تانيَه. مَجد الشَّمِش شي واحِد، و مَجد القَمَر شي تاني، و مَجد النُّجوم شي تاني. عَشان في فارِق بين نَجمَه و نَجمَه في المَجد. و كِدا كَمان قيامَة المَيِّتين. يَزرَعوها جِسِم بِموت، و يَقوم جِسِم ما بِموت أبَداً. يَزرَعوها بِدون إحتِرام، و يَقوم في مَجد. يَزرَعوها في ضُعف، و يَقوم في قُوَّه. يَزرَعوها جِسِم طَبيعي، و يَقوم جِسِم روحي. إذا في جِسِم طَبيعي، في جِسِم روحي كَمان. كِدا كَمان مَكتوب: ”آدَم الإنسان الأوَّل بِقى نَفس حَيَّه.“ و آدَم الأخير بِقى روح بِدّي حَياة. لَكِن الرّوحي ما جا في الأوَّل لَكِن الطَّبيعي، و بَعَد داك الرّوحي. الإنسان الأوَّل كان مِن الأرض، تُرابي. الإنسان التّاني مِن السَّما. زي الإنسان الأوَّل كان تُرابي، كِدا كَمان هُم المِن التُّراب. و زي الإنسان المِن السَّما، كِدا كَمان هُم المِن السَّما. زي ما لِبِسنا صورَة الإنسان التُّرابي، بِنَلبَس كَمان صورَة الإنسان السَّماوي. أقول دا، يا أخوان، أجسامنا المَصنوع مِن لَحَم و دَم ما بِقدَرو يورَثو مَلَكوت الله، و البِموت ما بِقدَر يورَث الما بِموت أبَداً. شوفو! أقول ليكُم سِر. مُش كُلَّنا بِنَرقُد، و لَكِن كُلَّنا بِنِتغَيَّر. في دَقيقَه، في قَفل عين، في البوق الأخير. عَشان بِضرُب البوق، و المَيِّتين بِقومو بِأجسام ما بِموتو، و نِحنا بِنِتغَيَّر. عَشان أجسامنا المَصنوعَه مِن تُراب لازِم يِتغَيَّرو لِلأجسام الما يَهلِكو. و أجسامنا البِموتو لازِم يِتغَيَّرو لِلأجسام الما بِموتو أبَداً. و لَمّا دا البِقدَر يَهلِك إتغَيَّر لِلما بِقدَر يَهلِك، و لَمّا دا البِموت إتغَيَّر لِلما بِقدَر يَموت أبَداً، في الوَكِت داك بِتِم الكِلمَه المَكتوبَه: ” الغَلَبَه بَلَعَت الموت. وين غَلَبتَك، يا موت؟ وين وَجعَك، يا موت؟“ وَجَع الموت هي الخَطيَّه، و الخَطيَّه عِندَها قُوَّه عَلى ديل التِحِت القانون. لَكِن شُكراً لِلَّه البِدّينا الغَلَبَه بِرَبَّنا يَسُوع المَسيح. عَلَشان كِدا، يا أخوان المَحبوبين، كونو ثابِتين، ما مُحَرَّكين. و زيدو في عَمَل الرَّب دايماً، عَشان إنتو بِتَعرِفو تَعبكُم ما بِدون فايدَه في الرَّب. و عَن لَمَّة القُروش فِشان القِدِّسين. زي ما أمَرتَ كَنايس غَلَاطِيَّه، كِدا أعمِلو إنتو كَمان. في اليوم الأوَّل مِن كُلّو أُسبوع، خَلّي كُلّو واحِد مِنَّكُم يَخُت عِندو و يَحفَظو زي ما رِبِح، عَشان لَمّا بَجي ما لازِم تَكون في لَمَّه. و لَمَّن أجي ليكُم، بَرَسِّل النّاس الإنتو إختَرتوهُم بِجَوابات عَشان يَشيلو هَديَّتكُم لِأُورُشَلِيم. و إذا تَفتَكِرو أحسَن أنا أمشي كَمان، بِنَمشي سَوا. بَجي ليكُم بَعَد ما مَريت بِمَكِدونيَّه، عَشان بَمُر بِمَكِدونيَّه. يِمكِن بَقعُد مَعاكُم ولّا بَصرُف الشِّتا كَمان، عَلَشان تَساعِدوني في سَفَري لِلمَكان البَمشي ليهو. هَسَّع ما عاوِز أشوفكُم و أنا ماري بِطَريق، عَشان عِندي رَجاء أستَنّى مَعاكُم مُدَّه، بِإذِن الرَّب. و لَكِنّي بَقعُد في أفَسُس لِغايَة يوم الخَمسين. عَشان إنفَتَح لَي باب عَظيم لِلعَمَل النّاجِح. و في عُدوان كَتيرين. إذا تِيمُوثَاوُس يَجي، شوف أنّو يَكون بِدون خوف مَعاكُم. عَشان هو يَعمِل عَمَل الرَّب زي ما أنا أعمِل. واحِد ما يَحتَقِرو، لَكِن ساعِدوهو في سَفَرو بِسَلام، عَلَشان يَجي لَي. عَشان بَستَنّاهو مَعَ الأخوان. هَسَّع عَن أَبُلُّوس أخونا، طَلَبتَ ليهو كَتير عَشان يَجيكُم مَعَ الأخوان. و ما كان رَضيان أبَداً يَجي هَسَّع. و لَكِن هو بِجي لَمَّن عِندو فُرصَه. أحرِسو، كونو ثابِتين في الإيمان، كونو رُجال و إتشَدَّدو. أعمِلو كُلّو حاجَه بِمَحَبَّه. إنتو بِتَعرِفو ناس بيت اسْتِفَانَاس أوَّل ثِمار أَخَائِيَه، و كيف هُم أدّو نُفوسُم لِخِدمَة القِدِّسين. أطلُبو ليكُم، يا أخوان، تَطيعو ناس زي ديل و كُل البِعمِلو مَعاهُم و بِتعَبو. أنا مَبسوط عَشان اسْتِفَانَاس و وَفُرْتُونَاتُوس و وَأَخَائِيكُوس جو، عَشانُم مَلو النّاقِص مِنَّكُم. عَشان هُم أدّو راحَه لِروحي و روحكُم. إحتَرِمو رُجال زيَهُم. كَنايس آسيا يَسَلِّمو عَليكُم. و أَكِيلَا و بِرِيسْكِلَّا مَعَ الكَنيسَه الفي بيتُم يَسَلِّمو عَليكُم كَتير في الرَّب. يَسَلِّمو عَليكُم كُل الأخوان. سَلِّمو بَعضَكُم عَلى بَعض بِسَلام مُقَدَّس. أنا، بُولُس، أكتِب السَّلام دا بِإيدي. إذا كان واحِد ما بِحِب الرَّب، خَليهو يَكون مَلعون. تَعال، يا رَبَّنا! نِعمَة الرَّب يَسُوع مَعاكُم. مَحَبَّتي مَعَ كُلُّكُم في المَسيح يَسُوع. مِن بُولُس رَسول المَسيح يَسُوع بِإرادَة الله، و مِن تِيمُوثَاوُس الأخو، لِكَنيسَة الله الفي كُورِنْثُوس، مَعَ كُل النّاس المُقَدَّسين في كُلّو أَخَائِيَه. نِعمَه و سَلام ليكُم مِن الله أبونا و الرَّب يَسُوع المَسيح. مُبارَك الله أبو رَبَّنا يَسُوع المَسيح، أبو كُلّو رَحمَه و إلَه كُلّو تَعزيَه. هو بِدّينا تَعزيَه في كُلّو تَعب، عَلَشان نِحنا نَقدَر نَدّي تَعزيَه ليهُم في كُلّو تَعب، بِالتَّعزيَه القِبِلنا مِن الله. عَشان زي ما أوجاع المَسيح يَزيدو فينا، كِدا كَمان تَعزيَتنا تَزيد بِالمَسيح. و إذا كُنّا في التَّعب، دا عَلَشان تَعزيَتكُم و خَلاصكُم. و إذا نِتعَزّى، دا عَشان تَعزيَتكُم. و يَدّيكُم قُوَّه عَشان تَكونو عِندَكُم صَبر في زات الأوجاع، زي ما نِحنا نِتوَجَّع كَمان. و رَجاءنا فيكُم ثابِت، عَلَشان بِنَعرِف زي ما تَشتَرِكو في أوجاعنا، كِدا كَمان تَشتَرِكو في التَّعزيَه. و نِحنا عاوِزين نَزَكِّركُم، يا أخوان، عَن التَّعب الكان عِندَنا في آسيا. و الأحمال الهُم خَتّو عَلينا كانَت كَبيرَه و تَقيلَه حَتّى إفتَكَرنا ماشين نَموت. بِالحَق، شِلنا في نُفوسنا حُكم الموت. و دا حَصَل لينا عَلَشان ما نَتَّكِل عَلى نُفوسنا، لَكِن عَلى الله البِقَوِّم المَيِّتين. و هو خَلَّصنا مِن موت زي دا و بِخَلِّصنا. و خَتّينا فيهو رَجاءنا إنّو بِخَلِّصنا مَرَّه تانيَه. و إنتو كَمان بِتساعِدونا بِالصَّلاه بِتاعَتكُم عَلَشانّا. و عَشان كِدا، ناس كَتيرين بِدّو الشُّكر عَلَشان الهَدِيَّه الأدّاها لينا بِسَبَب صَلَوات كَتيرين. عَشان دا فَخرَنا: ضَميرنا يَشهَد لينا، نِحنا مَشينا في الدُّنيا في القَداسَه و الإخلاص المِن الله و خُصوصاً مِن جِهَتكُم. و ما عَمَلنا كِدا بِحِكمَة الإنسان، لَكِن بِنِعمَة الله. عَشان ما نَكتِب ليكُم إلّا البِتَقدَرو تَقرو و تَفهَمو. و عِندي رَجاء إنتو بِتَفهَمو بِالتَّمام. و إنتو فِهِمتونا كَمان بَعض مِن الفَهم، و فِهِمتو أن نِحنا فَخرَكُم زي ما إنتو فَخرَنا في يوم رَبَّنا يَسُوع. و بِالتّأكيد دا، كُنتَ عاوِز أجي ليكُم مِن قُبّال، عَشان بِكون ليكُم نِعمَه مَرَّتين. و كُنتَ عاوِز أمُر بيكُم في طَرِيقي لِمَكِدونيَّه، و بَرجَع ليكُم مِن مَكِدونيَّه كَمان. و بَعدين إنتو بِترَسِّلوني لِليَهُودِيَّه. أنا عَمَلتَ دا بِدون فِكر لَمّا غَيَّرتَ التَّرتيب بِتاعي؟ ولّا أنا بَعمِل تَرتيباتي زي ناس الدُّنيا بيَعمِلو، و بَقول ”أيوَه، أيوَه“ و ”لا لا“ في نَفس الوَكِت؟ لَكِن زي ما الله أمين، كَلامنا ليكُم كَمان مُش ”أيوَه“ و ”لا.“ عَشان أنا و سِلْوَانُس و تِيمُوثَاوُس بَشَّرنا بينكُم بِإبن الله، يَسُوع المَسيح، و ما كان فيهو ”أيوَه“ و ”لا.“ لَكِن دايماً فيهو ”أيوَه.“ عَشان فيهو ”الأيوَه“ لِكُلّو وُعود الله. و عَلَشان كِدا بِنقول فيهو ”آمين“ لِمَجد الله. لَكِن الله هو البِيَعمِلنا ثابِتين مَعاكُم في المَسيح. و هو مَسَحنا، و خَتَّ الخِتِم عَلينا، و خَتَّ الرّوح بِتاعو في قُلوبنا زي عَربون. لَكِن بَنادي الله زي شاهِد لَي، السَّبَب الأنا ما رَجَعتَ لِكُورِنْثُوس، هو عَلَشان رَحَمتَكُم. نِحنا ما عِندَنا سُلطَه عَلى إيمانكُم. لَكِن بِنَشتَغِل مَعاكُم عَشان تَكونو مَبسوطين، عَلَشان إنتو ثابِتين في إيمانكُم. أنا قَرَّرتَ في نَفسي ما بَجي ليكُم مَرَّه تانيَه بِحُزن. عَشان إذا عَمَلتَكُم حَزنانين، مِنو هو اليَعمِلني مَبسوط إلّا الزّول الأنا عَمَلتو حَزنان؟ و كَتَبتَ ليكُم نَفس الحاجَه، عَلَشان أنا ما كُنتَ عاوِز أجي ليكُم و بَكون حَزنان مِن النّاس اللازِم أكون مَبسوط مِنَّهُم. عَشان أنا مِتأكِّد إذا أنا مَبسوط، كِدا كُلُّكُم كَمان بِتكونو مَبسوطين. كَتَبتَ ليكُم بِحُزن شَديد و وَجَع في قَلبي و بِدِموع كَتيرَه، ما عَشان أعمِلكُم حَزنانين، لَكِن عَشان أخَلّيكُم تَعرِفو مَحَبَّتي الشَّديدَه العِندي ليكُم. لَكِن إذا أي واحِد عَمَل واحِد تاني حَزنان، هو ما عَمَل دا لَي بَس، لَكِن في بَعَض الشّي لِكُلُّكُم. و أنا ما داير أكون صَعب عَليكُم. و كِفايَه لِلزّول دا، عَلَشان كَتيرين مِنَّكُم أدّوهو جِزا. لَكِن هَسَّع لازِم تَغفِرو ليهو و تَشَجِّعوهو عَلَشان الحُزن الشَّديد ما يَبلَعو. أنا بَطلُب مِنَّكُم تَخَلّوهو يَعرِف إنتو بِتحِبّوهو بِالحَق. بِالسَّبَب دا كَتَبتَ ليكُم، عَشان أمتَحِنكُم و أشوف إذا إنتو تَطيعو في كُلّو حاجَه. إذا إنتو بِتَغفِرو شي لِأي واحِد، أنا كَمان بَغفِر ليهو. و الغَفَرتَ ليهو، إذا كان أنا غَفَرتَ ليهو أي شي، عَلَشانكُم غَفَرتَ ليهو قِدّام المَسيح. و عَمَلتَ دا عَلَشان الشّيطان ما بِغلِب عَلينا. عَشان نِحنا بِنَعرِف تَرتيباتو. و لَمّا مَشيت لِتَرُوَاس عَشان أبَشِّر بِإنجيل المَسيح، أنا لِقيت إنّو الرَّب كان فَتَح باب لَي. و لَكِن ما كانَت عِندي راحَه في روحي عَشان أنا ما لِقيت تِيطُس أخوّي. و قُلتَ ليهُم مَعَ السَّلامَه، و مَشيت لِمَكِدونيَّه. لَكِن شُكراً لِلَّه عَشان هو دايماً بِقودنا في الغَلَبَه في المَسيح، و بِوَرّي بينَنا ريحَة مَعرِفتو في كُلّو مَحَل. عَشان نِحنا لِلَّه زي الرّيحَه الحِلوَه بِتاعَت المَسيح بين البِخلَصو و البِهلِكو. و نِحنا لِلواحِد البِهلِك زي شَم الموت و الخَراب، و لِلتاني البِخلَص زي ريحَة الحَياة الأبَديَّه. و مِنو بِقدَر لِلحاجات دي؟ و نِحنا ما زي الكَتيرين البِتاجِرو بِكِلمَة الله. و لَكِن نِتكَلَّم قِدّام الله بِإخلاص في المَسيح، زي ناس مُرَسَّلين مِن الله. نِحنا نَبتَدي نَحمِد نُفوسنا تاني مَرَّه؟ ولّا زي بَعض النّاس نَحتاج لِجَوابات الحَمد ليكُم ولّا مِنَّكُم؟ إنتو نُفوسكُم جَواباتنا مَكتوبَه في قُلوبنا. و كُل النّاس بِيَعرِفوها و بِقروها. إنتو بِتوَرّو إنَّكُم جَواب مِن المَسيح مُرسَل مِنَّنا، ما مَكتوبَه بِحِبِر، لَكِن بِروح الله الحَي. و مُش مَكتوبَه في ألواح مِن حَجَر، لَكِن في ألواح، و هُم قُلوب النّاس. و عِندَنا تأكيد زي دا بِالمَسيح قِدّام الله. نِحنا مُش كِفايَه مِن نُفوسنا عَشان نَفتَكِر أي شي مِن نُفوسنا. لَكِن عِندَنا قُدرَه مِن الله. و هو أدّانا قُوَّه عَشان نَكون خَدّامين إتِّفاق جَديد. و دا مُش بِالقانون المَكتوب، لَكِن بِالرّوح. عَشان القانون المَكتوب بِجيب الموت، لَكِن الرّوح بِدّي حَياة. الخِدمَه البِتجيب الموت كانَت مَكتوبَه بِحُروف في حَجَر، و جات بِمَجد حَتّى ناس إِسْرَائِيل ما قِدرو يَعاينو في وَش مُوسَى عَشان المَجد دا. و المَجد دا كان بِفوت. كيف بِالأكتَر خِدمَة الرّوح ما بِزيد في المَجد؟ إذا كان الخِدمَه البِتَحكُم عَلى النّاس جات بِمَجد، الخِدمَه البِتجيب البِر بِتكون ليها مَجد زِيادَه بِكَتير. عَشان الخِدمَه الجّات بِمَجد، ما عِندَها مَجد هَسَّع لَمّا نَفتَكِّر في المَجد البِكون فوق الكُل. و إذا كان البِفوت دا جا بِمَجد، البِستَمِر عِندو مَجد أكبَر بِكَتير. و إذا عِندَنا رَجاء زي دا، عِندَنا شَجاعَه كَتيرَه. و نِحنا مُش زي مُوسَى الكان بِغَطّي وَشّو عَلَشان ناس إِسْرَائِيل ما يَعاينو لِآخِر المَجد البِفوت. لَكِن أفكارُم بِقو مَقفولين، عَلَشان زات الغَطا بِغَطّي وُشوشُم لِغايَة اليوم دا، لَمّا بِيَقرو الإتِّفاق القَديم. و ما شالوهو مِنَّهُم عَشان في المَسيح يَشيلوهو. لَكِن لِغايَة اليوم دا، لَمّا بِيَقرو مِن كِتاب مُوسَى، الغَطا بِغَطّي قُلوبُم. لَكِن لَمّا أي واحِد يَرجَع لِلرَّب، يَشيلو مِنّو الغَطا. و الرَّب هو الرّوح، و المَحَل الفيهو روح الرَّب، هِناك في الحُرّيَّه. و نِحنا كُلُّنا بِوَش بِدون غَطا، بِنشوف مَجد الرَّب، زي في المِرايا. و نِتغَيَر لِصورَتو مِن مَجد لِمَجد. و المَجد دا هو عَمَل مِن الرَّب الرّوح. و عَلَشان الله أدّانا الخِدمَه دي بِرَحمَتو، ما نَقول ما في فايدَه. لَكِن نِحنا أبينا نَعمِل أي حاجَه بِالسِّر ولّا الفيهو عيب. ما نَغِش ولّا نَغَيِر كِلمَة الله. بِالعَكس نِبَيِّن الحَق، و نَحمِد نُفوسنا قِدّام ضَمير النّاس و قِدّام الله. و إذا إنجيلنا مَغَطّى، هو مَغَطّى لِلبِهلِكو. و إلَه الزَّمَن دا عَمَل أفكار الما مؤمِنين عَميانين، عَلَشان ما بِقدَرو يَشوفو نور إنجيل مَجد المَسيح الهو صورَة الله. عَشان ما نَبَشِّر بِنُفوسنا، لَكِن بِيَسُوع المَسيح الرَّب. و نِحنا خَدّامين ليكُم عَشان خاطِر يَسُوع. عَشان الله قال: ”خَلّي نور يَنَوِّر مِن الضُّلُمَّه.“ و هو نَوَّر في قُلوبنا نور مَعرِفَة مَجد الله في وَش يَسُوع المَسيح. لَكِن عِندَنا الكَنز دا في بُرمَه مَعمولَه مِن طين، عَلَشان يَوَرّي القُوَّه العَظيمَه جِدّاً دي مِن الله، مُش مِنَّنا. الدُّنيا ضايقَه قِدّامنا مِن كُلّو جَمب، لَكِن دا ما يَوَقِّفنا. ما بِنَعرِف نَعمِل شِنو، لَكِن نِحنا مُش بِدون رَجاء. يَطرُدونا، لَكِن ما يَسيبونا بَرانا. يَوَقِّعونا، لَكِن ما نَموت. و بِنشيل دايماً في الجِّسم، موت يَسُوع، عَلَشان نَوَرّي حَياة يَسُوع كَمان في جِسِمنا. عَشان نِحنا الحَيين، يَسَلِّمونا كُلّو وَكِت لِلموت عَشان خاطِر يَسُوع، عَشان يَشوفو حَياة يَسُوع كَمان في جِسِمنا البِموت. عَلَشان كِدا الموت بِشتَغِل فينا، لَكِن الحَياة فيكُم. و عِندَنا روح الإيمان زاتو زي ما مَكتوب: ”آمَنتَ، عَلَشان كِدا إتكَلَّمتَ.“ و نِحنا كَمان بِنآمِن، و عَلَشان كِدا بِنِتكَلَّم. و بِنَعرِف هو القَوَّم الرَّب يَسُوع مِن بين المَيِّتين، بِقَوِّمنا نِحنا كَمان مَعَ يَسُوع، و بِجيبنا قِدّامو مَعاكُم. و دا كُلّو عَشان فايدَتكُم، حَتّى النِّعمَه بِتزيد أكتَر و أكتَر لِكَتيرين، و الشُّكر بِزيد لِمَجد الله. عَلَشان كِدا ما نَقول ما في فايدَه. لَكِن إذا كان جِسِمنا يَبقى ضَعيف، نَفسَنا الفي جُوَّه بَتَبقى جَديدَه يوم بِيوم. عَشان الضّيق الخَفيف بِتاع الوَكِت دا، يَعمِل لينا مَجد أبَديَّه بِزيد أكتَر و أكتَر في الوَزِن. عَلَشان كِدا ما نَعاين لِلحاجات النَقدَر نَشوفا، لَكِن لِلما نَشوفا. عَلَشان الحاجات البِنشوفا، لِهَسَّع بَس. لَكِن الحاجات الما بِنشوفا، لِلأبَد. عَشان بِنَعرِف إذا بيت خيمَتنا المِن الأرض يَخسَر، عِندَنا بُنا مِن الله، بيت أبَدي في السَّما، ما مَعمول بِإيد. و هَسَّع نِحنا حَزنانين، و نَحِب نَلبَس فوقنا بيتنا المِن السَّما. و إذا لِبِسناهو، ما يَلقونا عَريانين. و وَكِت ما نِحنا في الخيمَه دي، نِتنَفَّس زي ما نَشيل حِمِل تَقيل. عَلَشان ما عاوزين نَقلَع أجسامنا، لَكِن نَلبَس فوقا، عَلَشان أجسامنا البِموتو يِتغَيَّرو لِأجسام ما بِموتو أبَداً. و العَمَلنا لِلحاجَه دي زاتا، هو الله، الأدّانا كَمان عَربون الرّوح. عَلَشان كِدا نِحنا دايماً مَليانين بِشَجاعَه، و بِنَعرِف ما دام نِحنا في بيتنا في الجِّسم هِنا، نِحنا بَعيدين مِن بيت الرَّب الفي السَّما. عَشان بِنعيش بِالإيمان، مُش بِالنَشوفو بِالعُيون. عَلَشان كِدا عِندَنا شَجاعَه كُلّو وَكِت، و نَفتَكِر أحسَن نَسيب بيتنا في الجِّسم و نَمشي نَكون مَعَ الرَّب في بيتو. عَلَشان كِدا فوق كُلّو شي، نِحنا عاوزين نَبسِطو إذا نِستَنّا في بيتنا هِنا ولّا نَمشي نَكون مَع الرَب. عَشان كُلُّنا لازِم نَظهَر قِدّام كُرسي المَسيح، عَشان كُلّو واحِد يَقبَل زي ما هو عَمَل بِالجِّسم، إذا كان كوَيس ولّا بَطّال. و ما دام بِنَعرِف خوف الرَّب، نَجَرِّب أن نَربَح النّاس. و نِحنا بَايِنين لِلَّه، و عِندي رَجاء بِقينا بَايِنين في ضَميركُم كَمان. عَشان ما نَحمِد نُفوسنا قِدّامكُم، لَكِن نَدّيكُم فُرصَه عَشان تَشكُرو نُفوسنا، عَشان يَكون عِندَكُم جَواب لِلنّاس البِشكُرو حالَة الإنسان و مُش قَلبو. و إذا نِحنا مَجنونين، دا لِلَّه. و إذا فاهمين، دا ليكُم. عَشان مَحَبَّة المَسيح عِندَها قُوَّه فوقنا حَتّى بِنَحسِب دا، إنّو واحِد مات عَن كُل النّاس. و عَلَشان كِدا كُلُّهُم ماتو. و هو مات عَن كُل النّاس، عَشان الحَيين ما بِعيشو بَعَد دا لِنُفوسُم، لَكِن ليهو المات عَنُّم و قام. عَشان كِدا، مِن هَسَّع ما بِنَعرِف واحِد بِحَسَب الجِّسم. و إذا عِرِفنا المَسيح حَسَب الجِّسم، هَسَّع ما بِنَعرِفو كِدا. عَلَشان كِدا، إذا واحِد في المَسيح، هو خَليقَه جَديدَه. و الحاجات القَديمَه فاتَت. و شوف! الكُل بِقى جَديد. و كُلّو دا مِن الله الصّالَحنا لِنَفسو بِالمَسيح، و أدّانا خِدمَة المُصالَحَه. يَعني الله كان يَصالِح الدُّنيا لِنَفسو في المَسيح. و ما يَحسِب ليهُم خَطاياهم. و خَتَّ فينا كِلمَة المُصالَحَه. عَلَشان كِدا نِحنا سُفَراء المَسيح زي ما الله يَطلُب بينا، نِحنا نَطلُب مِنَّكُم فِشان المَسيح، أعمِلو سَلام مَعَ الله. المَسيح ما عَمَل الخَطيَّه، لَكِن الله خَتَّ خَطايانا عَليهو. و عَلَشان كِدا نِحنا نَبقى بارين قِدّام الله في المَسيح. و نِحنا نَشتَغِل مَعاهو، و نَطلُب مِنَّكُم أن ما تَقبَلو نِعمَة الله بِدون فايدَه. عَشان هو بِقول: ”أنا سِمِعتَك في وَكِت مَقبول، و ساعَدتَك في يوم الخَلاص.“ شوف! هَسَّع وَكِت مَقبول، و شوف! هَسَّع يوم الخَلاص. و نِحنا ما نَخُت سَبَب خَطيَّه قِدّام أي واحِد، عَلَشان شُغُلنا بِكون بِدون لوم. لَكِن في كُلّو شي نَبيين نُفوسنا زي خَدّامين الله: في صَبر كَتير، في أتعاب، في إحتِياجات، في ضيقات. في ضَرَبات، و في سُجون، و في دَوشَه، و في تَعب شَديد، و في ليالي بِدون نوم، و في جوع. بِقَلب نَضيف، و مَعرِفَه، و صَبر طَويل، و رَحمَه، بِالرّوح القُدُس، بِمَحَبَّه مُخلِصَه. بِكَلام الحَق، بِقوَّة الله، بِأسلِحَة البِر عَن اليَمين و عَن الشِّمال. بِمَجد و بِدون إحتِرام، بِخَبَر كوَيس و خَبَر بَطّال، يَقولو نِحنا كَضّابين، لَكِن نِتكَلَّم الحَق. و نِحنا زي الما مَعروفين، لَكِن مَعروفين، زي ديل البِموتو، و أهو! نَعيش، و زي ديل اليَجازوهُم، و ما يَكتُلونا. نِحنا زي حَزنانين، لَكِن دايماً مَبسوطين، زي المَساكين، لَكِن نَعمِل ناس كُتار غَنيين، نِحنا زي الما عِندَهُم شي، لَكِن كُلّو شي حَقَّنا. يا ناس كُورِنْثُوس، خَشُمنا مَفتوح ليكُم، و قَلِبنا بِقى وَصِف ليكُم. نِحنا ما قَفَلنا قُلوبنا ليكُم، لَكِن إنتو قَفَلتو قُلوبكُم لينا. و زي أُجرَه لِداك، إنتو كَمان، أفتَحو قُلوبكُم وَصِف. بَكَلِّمكُم زي أولادي. ما تَشتَرِكو مَعَ الما مؤمِنين تِحِت نير واحِد. عَشان الشَّرِكَه شِنو بين البِر و الخَطيَّه؟ و الشَّرِكَه شِنو بين النّور و الضَّلام؟ و الإتِّفاق شِنو بين المَسيح و بين بَليعال؟ و الجُّزو شِنو المؤمِن عِندو مَعَ الما مؤمِن؟ و الإتِّفاق شِنو بين هيكَل الله و الأصنام؟ عَشان نِحنا هيكَل الله الحَي، زي ما الله قال: ”أنا بَسكُن فيهُم و أمشي في وَسِطُم، و بَكون ليهُم إلَه، و هُم بِكونو لَي ناس. عَلَشان كِدا أمرُقو مِن بِينُم، و فَرِّقو مِنَّهُم، يَقول الرَّب. و ما تَلمَسو حاجَه نَجِسَه. و أنا بَقبَلكُم. و بَكون ليكُم أبو، و إنتو بِتكونو لَي أولاد و بَنات، يَقول الرَّب القادِر عَلى كُلّو شي.“ و عَشان عِندَنا الوُعود ديل، يا مَحبوبين، خَلّونا نَنَضِّف نُفوسنا مِن كُلّو نَجاسَة الجِّسم و الرّوح، و نَكَمِّل القَداسَه في خوف الله. أقبَلونا. نِحنا ما ظَلَمنا أي واحِد، ما خَرَّبنا أي واحِد، ما طَمَعنا في أي واحِد. و ما بَقول دا عَشان أحكُم عَليكُم. عَشان زي ما قُلتَ قُبّال دا، إنتو في قُلوبنا، عَشان نَموت مَعاكُم و نَعيش مَعاكُم. أنا مِتَّكِل عَليكُم كَتير، و عِندي فَخر عَظيم فيكُم. أنا مَليان تَعزيَه. و فَرَحي يَزيد كَتير خَلاص في كُلّو أتعابنا. بِالحَق لَمّا جينا لِمَكِدونيَّه، جِسِمنا ما كان عِندو راحَه كُلّو كُلّو. لَكِن كُنّا في التَّعب مِن كُلّو جِهَه. مِن بَرَّه، شَكلات، و مِن جُوَّه، خوف. لَكِن الله البِدّي راحَه لِلمِتواضِعين، أدّا راحَه لينا لَمّا تِيطُس جا. و ما عَشان هو جا بَس، لَكِن كَمان بِالرّاحَه الإنتو أدّيتو ليهو. و هو خَبَّرنا بِمَحَبَّتكُم و الحُزن بِتاعكُم و غيرَتكُم فِشانّي، حَتّى فَرَحي زاد أكتَر بِكَتير. و إذا عَمَلتَكُم حَزنانين بِجَوابي، ما بَتأسَّف. و لَو إتأسَّفتَ، بَشوف انّو جَوابي عَمَلكُم حَزنانين، لَكِن لِوَكِت قَليل بَس. و هَسَّع أنا مَبسوط، مُش عَلَشان إنتو بِقيتو حَزنانين، لَكِن عَلَشان حُزنَكُم كان لِلتّوبَه حَسَب إرادَة الله. و كِدا ما قِبِلتو مِنَّنا خَسارَه في أي حاجَه. عَشان الحُزن بِحَسَب إرادَة الله بِجيب توبَه لِخَلاص ما نِتأسَّف عَليها، لَكِن حُزن الدُّنيا بِجيب موت. و شوفو كيف الحُزن دا زاتو، المِن الله، إشتَغَل فيكُم. و كان عِندَكُم إهتِمام عَشان تَكونو بِدون لوم. و كان عِندَكُم زَعل و خوف و مَحَبَّه و غيرَه و إنتِقام. و وَرّيتو نُفوسكُم بِدون غَلَط في الحاجَه دي كُلُّها. و لَو كَتَبتَ ليكُم، دا ما كان عَشان الزّول العَمَل الخَطيَّه ولّا عَلَشان المَظلوم، لَكِن عَلَشان أوَرِّيكُم قِدّام الله إهتِمامكُم فِشانّا. عَلَشان كِدا عِندَنا تَعزيَه. و فوق دا، كُنّا مَبسوطين أكتَر جِدّاً بِسَبَب فَرَح تِيطُس، عَشان روحو إستَراح بِمُساعَدَة كُلُّكُم. أنا حَمَدتَكُم شوَيَه قِدّامو، و ما بِقيت خَجلان. لَكِن زي ما كَلَّمناكُم بِكُلّو حاجَه بِالحَق، كِدا كَمان حَمدَنا فيكُم لِتِيطُس كان الحَق. و قَلبو يَبقى مَليان بِرَحمَه ليكُم لَمّا يِتذَكَّر كيف إنتو سِمِعتو ليهو، و كيف قِبِلتوهو بِخوف و هَزَّه. أنا مَبسوط عَشان مِتَّكِل عَليكُم في كُلّو حاجَه. و هَسَّع نَخَبِّركُم، يا أخوان، بِنِعمَة الله الهو أدّاها لِكَنايس مَكِدونيَّه. هُم كانو مُجَرَّبين بِتَعب شَديد، لَكِن بِقو مَبسوطين جِدّاً حَتّى أدّو هَدايا كَريمَه جِدّاً، و لَو هُم كانو مَساكين خالِص. و بَشهَد إنَّهُم أدّو زي ما قِدرو، و لَكِن فوق ما قِدرو، و دا مِن نُفوسُم بَراهُم. و طَلَبو مِنَّنا مَرّات كَتيرَه عَشان نَقبَل مِنَّهُم النِّعمَه و الشَّرِكَه في الخِدمَه دي لِلقِدِّسين. و هُم ما عَمَلو زي ما إنتَظَرنا، لَكِن أدّو نُفوسُم لِلرَّب في الأوَّل، و لينا بِإرادَة الله. عَشان كِدا طَلَبنا لِتِيطُس يَكَمِّل بينكُم النِّعمَه دي، زي ما هو إبتَدا يَعمِل مِن قُبّال. لَكِن زي ما إنتو تَزيدو في كُلّو حاجَه، في الإيمان، في الكَلام، و المَعرِفَه، و كُلّو إهتِمام، و مَحَبَّتكُم لينا، عاوزينكُم تَزيدو في النِّعمَه دي كَمان. أنا ما بِدّيكُم أمر، لَكِن لَمّا أوَرِّيكُم إهتِمام التّانيين، أمتَحِن مَحَبَّتكُم إذا حَقيقي ولّا لا. عَشان إنتو بِتَعرِفو نِعمَة رَبَّنا يَسُوع المَسيح، إنّو هو غَني لَكِن بِقى مِسكين فِشانّا، عَلَشان نِحنا نَبقى غَنيين عَشان هو كان مِسكين. و بَدّيكُم فِكري عَن دا، عَشان في فايدَه ليكُم. إنتو إبتَديتو مِن قُبّال مِن السَّنَه الفاتَت، مُش عَشان تَعمِلو دا بَس، لَكِن تَحِبّو تَعمِلو كِدا. هَسَّع كَمِّلو العَمَل كَمان. و كِدا، زي ما كانَت عِندَكُم الغيرَه عَشان تَعمِلوهو، كَمان تَكَمِّل عَلى قَدُر ما عِندَكُم. و إذا الغيرَه في، الله يَقبَل الهَدِيَّه زي الزّول عِندو، و مُش زي الما عِندو. و دا ما عَشان التّانيين يَكون عِندَهُم راحَه و إنتو في التَّعب، لَكِن عَشان كُلّو حاجَه بِتكون سَوا. عَشان في الوَكِت دا الكَترَه العِندَكُم بِتكون لِإحتياجُم. و الكَترَه العِندَهُم بِتكون لِإحتياجكُم. و كِدا كُلّو حاجَه بِتكون سَوا. زي ما مَكتوب: ”الجَّمَع كَتير ما كان عِندو باقي، و الجَّمَع شوَيَه ما كان ناقِص ليهو.“ و لَكِن شُكراً لِلَّه الخَتَّ نَفس الإهتِمام فِشانكُم في قَلب تِيطُس. عَشان هو قِبِل الطَلَبنا مِنّو. و بِنَشاط كَتير، مَشى ليكُم بِإرادَة نَفسو. و رَسَّلنا مَعاهو الأخو الحَمَدو كُل الكَنايس عَلى خِدمَتو في الإنجيل. و مُش دا بَس، لَكِن هو كان مُختار بِالكَنايس عَشان يَسافِر مَعانا فِشان النِّعمَه دي، النَخدِما لِمَجد الرَّب نَفسو. و بِدا نَوَرّيهُم نِحنا عاوِزين نَساعِد. و نِحنا نحرِس عَلَشان واحِد ما يَقول حاجَه بَطّالَه عَن الهَدِيَّه الكَريمَه النَخدِما. و نَفتَكِّر مِن قُبّال عَشان نَعمِل الحاجَه الكوَيسَه، مُش قِدّام الله بَس لَكِن قِدّام النّاس كَمان. و رَسَّلنا مَعاهُم أخونا البِيَّن لينا إهتِمامو مَرّات كَتيرَه و في حاجات كَتيرَه. و لَكِن هَسَّع إهتِمامو زاد عَلَشان هو عِندو تأكيد كَتير فيكُم. و عَن تِيطُس، هو شَريك لَي و شَغّال مَعاي فِشانكُم. و عَن أخوانّا، هُم رُسُل الكَنايس و مَجد المَسيح. عَلَشان كِدا، وَرو الرُّجال ديل بيّنَة مَحَبَّتكُم و فَخرَنا فيكُم، قِدّام كُل الكَنايس. و بِخُصوص الخِدمَه لِلقِدِّسين، ما في إحتِياج أكتِب ليكُم. عَشان أنا بَعرِف غيرَتكُم، و أنا شَكَّرتَ نُفوسكُم لِناس مَكِدونيَّه و قُلتَ ليهُم: ”ناس أَخَائِيَه كانو جاهِزين مِن السَّنَه الفاتَت.“ و غيرَتكُم حَرَّكَت الأكتَر مِنَّهُم. و رَسَّلتَ الأخوان عَلَشان فَخرَنا فيكُم ما بِكون بِدون فايدَه، و عَشان إنتو بِتكونو جاهِزين زي ما قُلتَ عَنكُم. عَلَشان إذا ناس مِن مَكِدونيَّه جو مَعاي و لِقوكُم ما جاهِزين، نِحنا بِنكون خَجلانين عَلَشان التأكيد دا. و أنا ما بَقول إنتو كَمان بِتكونو خَجلانين. عَلَشان كِدا، إفتَكَرتَ مِن المُهِم أطلُب مِن الأخوان عَشان يَمشو قِدّامنا، و يَعمِلو التَّرتيب مِن قُبّال. و كِدا هَديَّتكُم، القُلتو بِالحَق إنتو تَدّوها، بِتكون جاهزَه زي بَرَكَه، و مُش مِن الطَّمَع. لَكِن بَقول دا، البِزرَع قَليل، بِلِم قَليل. و البِزرَع بِالبَرَكات، بِلِم بِالبَرَكات كَمان. و خَلّي كُلّو واحِد يَدّي زي ما إختار في قَلبو، مُش بِحُزن ولّا عَشان هو لازِم يَدّي، عَشان الله بِحِب البِدّي بِفَرَح. و الله بِقدَر يَزيد ليكُم كُلّو نِعمَه، لِغايَة ما يَكون ليكُم كِفايَه في كُلّو حاجَه و في كُلّو وَكِت، عَلَشان تَزيدو في كُلّو عَمَل طَيب. زي ما مَكتوب: ”هو فَرتَك، و أدّا لِلمَساكين. و بِرّو يِستَنّى لِلأبَد.“ و البِقَدِّم تيراب لِلمُزارِع و عيش لِلأكِل، هو بِقَدِّم و بِكَتِّر تيرابكُم و بِزيد ثِمار بِرَّكُم. و بِتكونو غَنيين في كُلّو حاجَه عَلَشان تَقدَرو تَدّو هَدايا كَريمَه. و دا يَعمِل بِواسطَتنا الشُّكر لِلَّه. و عَمَل الخِدمَه دي ما يَملى إحتِياج القِدِّسين بَس، لَكِن يَزيد في شُكر كَتير لِلَّه. و عَلَشان إنتو بِيَّنتو نُفوسكُم بِالخِدمَه دي، ناس كُتار بِشكُرو الله عَلَشان طاعَتكُم و شَهادَتكُم لِإنجيل المَسيح، و عَلَشان الهَدِيَّه الكَبيرَه القَسَّمتوها ليهُم و لِلكُل. و هُم بِحِبّوكُم لَمّا يَصَلّو فِشانكُم، عَلَشان الله أدّاكُم النِّعمَه دي العَظيمَه جِدّاً. و شُكراً لِلَّه عَلى هَديَّاتو الما نَقدَر نِتكَلَّم عَنّا. و بَطلُب ليكُم بِوَداعَة المَسيح و صَبرو، أنا نَفسي، بُولُس، البَخُت نَفسي تِحِت لَمّا أكون مَعاكُم لَكِن عِندي شَجاعَه لَمّا أكون بَعيد. و لَكِن أطلُب ليكُم، لَمّا أجي، ما لازِم تَكون عِندي شَجاعَه عَلى بَعض مِن النّاس البِفتَكِرو نِحنا نَعيش زي الجِّسم. عَشان إذا نَعيش في الجِّسم، ما نَحارِب حَسَب الجِّسم. عَشان أسلِحَة حَربنا مُش مِن الجِّسم لَكِن قَوّيَّه بِالله عَشان يَكَسِّر البِنايات الشَّديدَه. نَخَرِّب صُوَر الأفكار و كُلّو حاجَه عاليَه البِتكون مَرفوع ضِد الله. و نَقبُض عَلى كُلّو فِكر عَشان نَسَويهو يَطيع المَسيح. نِحنا جاهِزين عَشان نَنتَقِم عَلى كُلّو فِتنَه لَمّا تَكَمِّل طاعَتكُم. إنتو تَعاينو لِلحاجَه القِدّامكُم. إذا واحِد يَتَّكِل عَلى نَفسو هو لِلمَسيح، خَليهو يَفتَكِر كَمان في نَفسو، نِحنا كَمان لِلمَسيح زي ما هو لِلمَسيح. عَشان إذا أشكُر نَفسي زِيادَه شوَيَه بِالسُّلطَه الأدّانا الله عَشان أبنيكُم و ما عَلَشان أخَرِّبكُم، أنا ما خَجلان. عَلَشان أنا ما عاوِزكُم تَكونو خايفين مِن جَواباتي. عَشان بَعض مِن النّاس بِقولو: ”جَواباتو تَقيلَه و قَوّيَّه، لَكِن لَمّا هو مَعانا في الجِّسم، هو ضَعيف و كَلامو بِدون فايدَه.“ خَلّو النّاس زي ديل يَحسِبو إنّو زي ما نِحنا نَكون في الكَلام و في الجَوابات لَمّا نِحنا ما في، بِنكون كِدا كَمان بِالعَمَل لَمّا نَكون في مَعاكُم. و نَخاف نَشَبِّه نُفوسنا بِبَعض مِن النّاس البِحمَدو نُفوسُم و نَخاف نَحسِب نُفوسنا مَعاهُم. و لَكِن هُم يَقيسو نُفوسُم بِنُفوسُم، و يَشَبِّهو نُفوسُم بِنُفوسُم، و ما يَفهَمو. لَكِن ما نَشكُر نُفوسنا بِدون قِياس، لَكِن حَسَب الخِدمَه القَسَما لينا الله. و الخِدمَه دي تَجِيبنا ليكُم كَمان. نِحنا ما نَمشي بَعيد حَتّى ما نوصَل ليكُم. لَكِن جينا و وِصِلنا ليكُم بِإنجيل المَسيح. عَلَشانّا ما نَشكُر نُفوسنا بِدون قِياس بِأشغال ناس تانيين. لَكِن عِندَنا رَجاء إنّو زي ما إيمانكُم يِستَمِر يَزيد، كَمان شُغُلنا بينكُم بِزيد حَسَب قِياس خِدمَتنا. عَلَشان نَبَشِّر بِالإنجيل في مَحَلّات بَعيدَه مِنَّكُم. و ما عاوزين نَحمِد عَمَل واحِد تاني العَمَلو مِن قُبّال في مَحَلّو. لَكِن: ”الزّول العاوِز يَحمِد، خَليهو يَحمِد الرَّب.“ عَشان الزول الحَمَد نَفسو ما بِكون مَقبول، لَكِن لَمّا الرَّب يَحمِد الزّول، هو بِكون مَقبول. أنا عاوِزكُم تاخدو مِنّي بِالصَّبر، شوَيَه مِن حاجَه غَشيمَه. أيوَه، أُخدو مِنّي زي دا. عَشان أنا غَيور عَليكُم بِغيرَة الله. عَشان أنا وَعَدتَكُم لِراجِل واحِد عَشان أقَدِّم عَذراء نَضيفَه لِلمَسيح. لَكِن أنا بَخاف زي ما الدَّبيب غَشّا حَوا بِغِشّو، كَمان إنتو تَضِلّو في أفكاركُم عَن الإخلاص و القَلِب النَّضيف الفي المَسيح. عَشان إذا واحِد جا ليكُم و بِبَشِّر بِيَسُوع تاني، غير البَشَّرناكُم بيهو، إنتو تِتحَمَّلو دا كوَيس. ولّا إذا إنتو تَقبَلو روح تاني مِن الرّوح القِبِلتوهو، ولّا إنجيل مُختَلِف مِن القِبِلتوهو، إنتو تِتحَمَّلو دا كوَيس. و أنا أحسِب نَفسي ما ناقِص في شي لِلرُّسُل الأكبَر ديل. و لَو أنا ما شاطِر في الكَلام، أنا عِندي مَعرِفَه. و نِحنا وَرّيناكُم دا في كُلّو طَرِيقَه و في كُلّو حاجَه. و يِمكِن كانَت خَطيَّه لَي عَشان نَزَّلتَ نَفسي عَلَشان أرفَعكُم لَمّا بَشَّرتَكُم بِإنجيل الله مَجّاناً؟ أنا سَرَقتَ مِن كَنايس تانيين و كُنتَ باخُد أُجرَه مِنَّهُم فِشان أخدِمكُم. و لَمّا كُنتَ مَعاكُم و كان عِندي إحتِياج، ما بِقيت حِمِل لِأي واحِد، عَلَشان الأخوان الجّو مِن مَكِدونيَّه أدّو لِإحتياجي. حَفَظتو نَفسي عَشان ما بَكون حِمِل ليكُم في أي حاجَه، و بَستَمِر كِدا. و زي حَق المَسيح فِيني، و لا واحِد في مَحَلّات أَخَائِيَه بِوَقِّف فَخري. لِشِنو؟ عَلَشان ما بَحِبّكُم؟ الله بِيَعرِف أنا بَحِبّكُم! و لَكِن الحاجَه البَعمِلا، بَعمِلا عَشان أوَقِّف ديل البِشكُرو نُفوسُم و بِقولو هُم بِشتَغِلو زي ما نِحنا نَشتَغِل. عَشان رُجال زي ديل رُسُل كَضّابين، شَغّالين البِغِشّو، و يَغَيِّرو شَكلهُم لِشَكَل رُسُل المَسيح. ما تِستَغرَبو! عَشان الشّيطان نَفسو بِغَيِّر نَفسو لِمَلاك نور. و كِدا، ما حاجَه كَبيرَه إذا خَدّامينو كَمان يَغَيِّرو شَكلهُم زي خَدّامين لِلبِر. و آخِر بِكون حَسَب أعمالُم. و تاني مَرَّه بَقول، ما تَخَلّي واحِد يَفتَكِر أنا غَشيم. و إلّا، أقبَلوني زي زول غَشيم عَشان أنا كَمان أشكُر نَفسي شوَيَه. لَمّا أتكَلَّم و أشكُر نَفسي، ما بَتكَلَّم زي الرَّب لَكِن زي الغَشيم. عَلَشان ناس كُتار بِشكُرو نُفوسُم زي ما ناس الدُّنيا بِسَوو، أنا كَمان بَشكُر نَفسي. عَشانكُم تِتحَمَّلو البَليدين بِفَرَح، عَلَشان إنتو ناس فاهمين. عَشانكُم تاخُدوهو بِالصَّبر مِن الزّول اليَعمِلكُم عَبيد، و مِن الزّول الياكُلكُم و يَسرِق مِنَّكُم، و مِن الزّول اليِتكَبَّر عَليكُم، و مِن الزّول اليَضرُبكُم عَلى وشوشكُم. و بَقول دا بِخَجَل، زي ما كُنّا ضَعيفين. لَكِن إذا أي واحِد عِندو شَجاعَه عَشان يَشكُر نَفسو، أنا كَمان عِندي شَجاعَه، عَشان أشكُر نَفسي. و تاني مَرَّه أنا بَتكَلَّم زي الغَشيم. هُم ناس عِبرانيين؟ أنا كَمان. هُم أولاد إِسْرَائِيل؟ أنا كَمان. هُم أولاد إِبْرَاهِيم؟ أنا كَمان. هُم خَدّامين المَسيح؟ أنا أحسَن. بَتكَلَّم زي المَجنون. أنا تِعِبتَ زِيادَه كَتير، جَلَدوني أكتَر، كُنتَ في السِّجِن مَرّات أكتَر، و في خَطَر الموت مَرّات كَتيرَه. قِبِلتَ مِن اليَهود خَمسَه مَرّات أربَعين جَلِد إلّا واحِد. ضَرَبوني بِالعَصايات تلاتَه مَرّات، رَمو الحُجار عَلي مَرَّه، المُركَب إنكَسَرَت و أنا فيها تلاتَه مَرّات، كُنتَ ليل و نَهار فوق البَحَر. سافَرتَ مَرّات كَتيرَه. كُنتَ في خَطَر مِن البَحَر، في خَطَر مِن حَراميَّه، في خَطَر مِن ناس بَلَدي، في خَطَر مِن الأُمَم، في خَطَر في المَدينَه، في خَطَر في الخَلا، في خَطَر في البَحَر، في خَطَر مِن أخوان كَضّابين. في شُغل و تَعب، كُنتَ بِدون نوم مَرّات كَتيرَه، في جوع و عَطَش، صُمتَ مَرّات كَتيرَه، كُنتَ بَردان و عَريان. و فوق كُلّو دا، الحاجات المِن بَرَّه، كُلّو يوم أنا تِحِت حِمِل الإهتِمام بِكُل الكَنايس. مِنو بِكون ضَعيف و أنا ما ضَعيف؟ مِنو يَقَع في الخَطيَّه و أنا ما أحرَق في جُوَّه نَفسي؟ إذا لازِم أشكُر نَفسي، أنا بَشكُر نَفسي عَن الحاجات البِتوَرّي كيف أنا ضَعيف. الله أبو الرَّب يَسُوع، المُبارَك لِلأبَد، يَعرِف أنا ما بَكَضِّب. في دِمَشق، المُدير بِتاع مَلِك الحارت كان يَحرَس مَدينَة دِمَشق عَشان يَقبُض عَلي. لَكِن نَزَّلوني مِن شُبّاك مِن الحيطَه في قُفَّه كَبيرَه، و خَلَصتَ مِنّو. أنا لازِم أشكُر نَفسي و لَو ما في فايدَه فيهو. أنا بَجي لِرؤيا و أخبار مِن الرَّب. بَعرِف راجِل في المَسيح قُبّال أربعتاشر سَنَه، مَسَكوهو و أخَدوهو لِلسَّما التّالتَه. إذا هو كان في الجِّسم ولّا بَرَّه مِن الجِّسم، أنا ما بَعرِف، الله بِيَعرِف. و بَعرِف أن الرّاجِل دا، أخَدوهو لِلجَّنَّه. إذا هو كان في الجِّسم ولّا بَرَّه مِن الجِّسم، ما بَعرِف. الله يَعرِف دا. و هو سِمِع كِلمات الما نَقدَر نِتكَلَّم بيها، و الزّول ما عِندو إذِن يتكَلَّم بيها. و بَشكُر نَفس الرّاجِل زي دا، لَكِن ما بَشكُر نَفسي إلّا عَشان أوَرّي نَفسي ضَعيف. عَشان إذا عاوِز أشكُر نَفسي، ما بَكون غَشيم، عَلَشان بَقول الحَق. لَكِن أبيت أسَوّي كِدا، عَلَشان واحِد ما يَفتَكِر فِيني فوق ما هو بِشوف فِيني و بِسمَع مِنّي. و عَلَشان ما بَفتَكِر عَن نَفسي أنا زول كَبير بِسَبَب الرّؤيَه دي العَظيمَه جِدّاً، أدّاني شوك في جِسمي. و الشّوك دا كان مُرسَل مِن الشّيطان عَشان يَعَذِّبني فِشان ما أرفَع نَفسي كَتير. و أنا طَلَبتَ مِن الرَّب تلاتَه مَرّات عَشان ياخُدو مِنّي. لَكِن هو قال لَي: ”نِعمَتي كِفايَه ليك، عَشان قوَّتي بِتكون كاملَه في الضُّعف.“ عَلَشان كِدا، بِفَرَح كَتير بَحمَد ضَعفي، عَلَشان قُوَّة المَسيح تَغَطّيني. عَلَشان كِدا، بَكون مَبسوط مِن الضَّعفات و الشَّتايِم و الأتعاب و الطُّرود و الصُّعوبات فِشان المَسيح. عَشان كُلّو وَكِت لَمّا أكون ضَعيف، في الوَكِت دا، أنا قَوّي. أنا بِقيت غَشيم. لَكِن إنتو جَبَرتوني لِدا و إنتو لازِم تَحمِدوني. و لَو أنا مُش حاجَه، أنا ما ناقِص في أي شي لِلرُّسُل الأكبَر. بِالحَق أنا عَمَلتَ في وَسِطكُم عَلامات الرَّسول بِكُلّو صَبر، العَلامات، و العَجايِب، و القُوّات. و في أي شي كُنتو ناقصين عَن الكَنايس التّانيين إلّا عَشان أنا ما كُنتَ حِمِل ليكُم؟ أغفِرو لَي الخَطيَّه دي. شوفو، أنا مُستَعِد أزوركُم لِتالِت مَرَّه. و ما بَكون حِمِل ليكُم، عَلَشان أنا ما عاوِز حاجاتكُم، لَكِن عاوِزكُم. عَشان الأولاد ما لازِم يَجَهِّزو لِوالِدينُم، لَكِن الوالِدين لِأولادُم. و أنا بِكُلّو فَرَح أصرُف قُروشي و نَفسي فِشان نُفوسكُم. إذا حَبّيتكُم أكتَر، إنتو تَحِبّوني أقَل؟ خَلّي دا يَكون كِدا، أنا ما كُنتَ حِمِل ليكُم. و لَكِن كُنتَ بَشتَغِل بِالغِش و مَسَكَتَكُم بِالغِش! أنا طَمَعتَ فيكُم بِأي واحِد مِن الرُّجال الرَسَّلتَ ليكُم؟ أنا طَلَبتَ لِتِيطُس يَمشي ليكُم، و رَسَّلتَ مَعاهو الأخو تِيطُس. تِيطُس طَمَع فيكُم؟ نِحنا ما مَشينا بِروح واحِد؟ و تِبِعنا طَريق واحِد؟ و تَفتَكِرو كُل الوَكِت دا نِحنا بِنَعمِل نُفوسنا بارين قِدّامكُم؟ نِحنا نِتكَلَّم قِدّام الله في المَسيح، لَكِن، يا مَحبوبين، بِنَعمِل كُلّو حاجَه، عَشان نَقَويكُم. أنا بَخاف لَمّا بَجي ليكُم ما بَلقاكُم زي ما أنا عاوِز، و إنتو ما تَلقوني زي ما إنتو عاوزين. أنا بَخاف إنّو بِتكون بينكُم شَكلات و حَسَد و زَعل و إنقِسامات و شَتايِم و وَسوَسَه و كِبِر و دَوشَه. و أنا بَخاف لَمّا بَجي ليكُم تاني مَرَّه، إلَهي بِنَزِّلني قِدّامكُم. و بَكون حَزنان عَلى ناس كُتار العَمَلو خَطيَّه قُبّال دا، و ما تابو عَن الحاجات العَمَلوها مِن النَّجاسَه و الزِّنا و السَّفاهَه. دي المَرَّه التّالتَه أجي ليكُم. كُلّو كِلمَه بِخَشم شاهِدين ولّا تلاتَه تَكون ثابِتَه. أنا قُبّال دا حَذَّرتَ ديل الكانو بيَعمِلو خَطيَّه لَمّا كُنتَ مَعاكُم. و تاني مَرَّه و أنا مُش مَعاكُم بَحَذِّركُم و بَحَذِّر كُل التّانيين كَمان. و لَمّا بَرجَع ليكُم، أنا ما بَرحَم ديل البيَعمِلو خَطيَّه. عَشان إنتو تَطلُبو بيّنَه إنّو المَسيح بِتكَلَّم فِيني. و هو ما ضَعيف في عَمَلو مَعاكُم، لَكِن هو قَوّي فيكُم. و بِالحَق هو إنصَلَب في ضُعف، لَكِن هو بِعِيش بِقوَّة الله. و نِحنا كَمان ضَعيفين فيهو، و لَكِن نِحنا بِنعيش مَعاهو بِقُدرَة الله عَشان نَخدِمكُم. أعمِلو إمتِحان لِنُفوسكُم. إنتو عِندَكُم إيمان؟ جَرِّبو نُفوسكُم. ما بِتَعرِفو يَسُوع المَسيح فيكُم؟ إلّا إذا وَقَعتو في الإمتِحان. أنا عِندي رَجاء إنتو بِتَعرِفو نِحنا ما وَقَعنا في الإمتِحان. و نِحنا نَصَلّي لِلَّه عَشان إنتو ما تَعمِلو حاجَه بَطّالَه. و دا ما عَشان النّاس بِشوفو نِحنا مَرّينا بِالإمتِحان. لَكِن دا عَشانكُم تَعمِلو كوَيس، و لَو نِحنا بِقينا زي الوَقَعو في الإمتِحان. عَشان نِحنا ما نَقدَر نَعمِل حاجَه ضِد الحَق، لَكِن فِشان الحَق. عَشان نِحنا مَبسوطين كُلو وَكِت لأنِنا نَكون ضَعيفين و إنتو تَكونو قَوّيين. و نَصَلّي كَمان عَشان إنتو تَكونو كامِلين. عَلَشان كِدا بَكتِب دا و أنا ما مَعاكُم، عَشان لَمّا بَجي، ما لازِم أكون شَديد بِحَسَب السُّلطَه الأدّاها لَي الرَّب. و هو أدّاني السُّلطَه دي عَشان أبنيكُم، مُش عَشان أخَرِّبكُم. و في الأخير، يا أخوان، كونو مَبسوطين. كونو كامِلين، كونو شُجعان، فَكِّرو فِكرَه واحدَه، عيشو في السَّلام. و إلَه المَحَبَّه و السَّلام يَكون مَعاكُم. سَلِّمو بَعضَكُم لِبَعض بِسَلام مُقَدَّس. كُل القِدِّسين يَسَلِّمو عَليكُم. نِعمَة رَبَّنا يَسُوع المَسيح و مَحَبَّة الله و شَرِكَة الرّوح القُدُس يَكون مَعَ كُلُّكُم. مِن بُولُس، هو رَسول، مُش مِن النّاس، و لا بِزول، لَكِن بِيَسُوع المَسيح و الله الأبو القَوَّمو مِن بين المَيِّتين. و مِن كُل الأخوان المَعاي، لِكَنايس غَلَاطِيَّه. نِعمَه ليكُم و سَلام مِن الله الأبو و رَبَّنا يَسُوع المَسيح. هو أدّا نَفسو فِشان خَطايانا، عَشان يَفدينا مِن الزَّمَن الحاضِر البَطّال، بِحَسَب إرادَة إلَهنا و أبونا. ليهو المَجد لِلأبَد. آمين. أنا بَستَغرَب عَشان إنتو بِسُرعَه كِدا تَهرَبو مِن النّاداكُم بِنِعمَة المَسيح لِإنجيل تاني. بِالحَق ما في إنجيل تاني. لَكِن بَعض مِن النّاس يَلَخبِتكُم، و بِدورو يَغَيِّرو إنجيل المَسيح. لَكِن، إذا نِحنا، ولّا مَلاك مِن السَّما بَشَّرناكُم بِإنجيل تاني، الما بَشَّرناكُم بيهو، خَليهو يَكون مَلعون. زي ما قُلتَ ليكُم قُبّال، هَسَّع بَقول تاني مَرَّه، إذا واحِد يَبَشِّركُم بِإنجيل تاني الما قِبِلتوهو، خَليهو يَكون مَلعون. هَسَّع بَطلُب أكون مَقبول قِدّام النّاس، ولّا قِدّام الله؟ ولّا بَطلُب أن أبسِط النّاس؟ إذا أنا لِسَّع أبسِط النّاس، ما بَكون خَدّام لِلمَسيح. أخَبِّركُم، يا أخوان، الإنجيل البَشَّرتَكُم بيهو، مُش مِن زول. أنا ما قِبِلتو مِن زول، ولّا إتعَلَّمتو مِن زول، لَكِن قِبِلتو بِرؤيا يَسُوع المَسيح. عَشانكُم سِمِعتو بِطَريق حَياتي قُبّال في الدّين اليَهودي، كيف كُنتَ بَطرُد كَنيسَة الله بِشِدَّه، و جَرَّبتَ أخَرِّبا. و كُنتَ بَتقَدَّم في دين اليَهودي فوق كَتيرين مِن أصحابي في أُمَّتي، و كُنتَ أشَد مِنَّهُم في الغيرَه في عادات أبَهاتي. لَكِن الله، الإختارني مِن بَطُن أُمّي، و ناداني بِنِعمَتو، كان مَبسوط يَوَرّي إبنو فِيني، عَشان أبَشِّر بيهو بين الأُمَم. و في الوَكِت داك أنا ما سألتَ أي زول يَدّيني نَصيحَه. و ما طَلَعتَ لِأُورُشَلِيم لِلرُّسُل، الهُم كانو رُسُل مِن قَبلي. لَكِن طَوّالي مَشيت لِبِلاد العَرَب. و بَعَد دا رَجَعتَ لِدِمَشق. و بَعَد تلاتَه سِنين، طَلَعتَ لِأُورُشَلِيم عَشان أزور بُطْرُس، و قَعَدتَ مَعاهو خَمَستاشَر يوم. و ما شُفتَ أي واحِد مِن الرُّسُل إلّا يَعْقُوب، أخو الرَّب. و البَكتِب ليكُم هو قِدّام الله، و ما بَكَضِّب فيهو. و بَعَد دا، جيت لِبِلاد سُورِيَّه و كِيلِيكِيَّا. و ما كُنتَ مَعروف بِالوَش قِدّام كَنايس اليَهُودِيَّه الفي المَسيح. هُم كانو بِسمَعو بَس البقول: ”الكان بِطرُدنا مِن قُبّال، هَسَّع بِبَشِّر بِالإيمان الكان بِخَرِّبو قُبّال.“ و كانو بِمَجِّدو الله فِيني. و بَعَد أربَعتاشَر سَنَه، طَلَعتَ مَرَّه تانيَه لِأُورُشَلِيم مَعَ بَرْنَابَا، و أخَدتَ مَعاي تِيطُس كَمان. مَشيت عَلَشان الله وَرّاني بِرؤيا. و عَلَّمتَهُم الإنجيل البَبَشِّر بيهو بين الأُمَم. لَكِن عَمَلتَ دا بَراي قِدّام المُحتَرمين، مِن خوف يِمكِن أنا بَجري، ولّا كُنتَ جَريت بِدون فايدَه. لَكِن تِيطُس، الكان مَعاي، و هو إغريقي، ما جَبَروهو يَكون مُطَهَّر. و لَكِن كانو في أخوان كَضّابين دَخَلو بينَنا بِالسِّر. و هُم إندَسو عَشان يَحرَسو بِالسِّر حُرّيَتنا العِندَنا في المَسيح يَسُوع، عَشان يَعمِلونا عَبيد. و ما سِمِعنا ليهُم و لا ساعَه، عَشان نَحفَظ ليكُم حَق الإنجيل. و لَكِن المُحتَرمين ما زادو و لا شي لِبِشارتي. و المُحتَرمين كانو شِنو ما بِهِمّني، عَشان الله ما بِشوف الوشوش. بِالعَكس، هُم شافو الله أدّاني خِدمَة بِشارات الإنجيل لِلما مُطَهَّر، زي ما هو أدّا بُطْرُس خِدمَة بِشارات الإنجيل لِلمُطَهَّر. عَشان هو، العَمَل في بُطْرُس عَشان يَكون رَسول لِلمُطَهَّر، عَمَل فِيني كَمان عَشان أكون رَسول لِلأُمَم. و يَعْقُوب و بُطْرُس و يُوحَنَّا، و هُم المُحتَرمين زي عِمدان، أدّاني أنا و بَرْنَابَا يَمين الشَّرِكَه، لَمّا عِرفو النِّعمَه الأدّاني الله. هُم إتَّفَقو نِحنا نَمشي لِلأُمَم و هُم لِلمُطَهَّر. هُم طَلَبو مِنَّنا بَس نِزَكَّر المَساكين. و دا بِزاتو كُنتَ مُستَعِد أسَوّيهو. لَكِن لَمّا بُطْرُس جا لِأَنْطَاكِيَه، أنا عاكَستو لِوَشّو، عَشان الحَق كان عَليهو. عَشان قُبّال ما بَعض مِن الرُّجال جو مِن يَعْقُوب، هو كان ياكُل مَعَ الأُمَم. لَكِن لَمّا هُم وِصلو، كان يَمرُق مِنَّهُم و يَفَرِّق نَفسو، عَشان خاف مِنَّهُم المُطَهَّرين. و باقي اليَهود إشتَرَكو مَعاهو في النِّفاق، حَتّى ساقو بَرْنَابَا لِنِفاقُم. و لَمّا شُفتُم ما ماشين دُغري بِحَسَب حَق الإنجيل، قُلتَ لِبُطْرُس قِدّام كُلَّهُم: ”إنتَ يَهودي و تَعيش زي الأُمَم، و ما زي اليَهود. لِشِنو تَجبُر الأُمَم يَعِيشو زي اليَهود؟“ نِحنا بِالوِلادَه يَهود، و نِحنا ما مِن الأُمَم خاطيين. و بِنَعرِف الزّول ما يِتبَرَّر بِأعمال القانون، لَكِن بِالإيمان بِيَسُوع المَسيح. نِحنا كَمان آمَنّا بِيَسُوع المَسيح عَشان نِتبَرَّر بِالإيمان بِالمَسيح، مُش بِأعمال القانون. عَلَشان و لا واحِد يِتبَرَّر بِأعمال القانون. و لَكِن إذا نِحنا نَطلُب نِتبَرَّر في المَسيح و يَلقونا نِحنا كَمان خاطيين، دا يَعني المَسيح يَخدِم الخَطيَّه؟ مُش مُمكِن! و إذا كان أبني مَرَّه تانيَه الخَرَبتو، أوَرّي نَفسي مُخالِف القانون. عَشان بِالقانون أنا مُتَّ لِلقانون، عَشان أعيش لِلَّه. إنصَلَبتَ مَعَ المَسيح. و أنا ما بَعيش تاني، لَكِن المَسيح، هو بِعِيش فِيني. و الحَياة البَعيشا هَسَّع في الجِّسِم، بَعيشا في الإيمان بِإبن الله الحَبّاني، و أدّا نَفسو فِشانّي. أنا ما بَرفُض نِعمَة الله، عَشان إذا البِر بِالقانون، المَسيح مات بِدون فايدَه. يا ناس غَلَاطِيَّه البَليدين! مِنو سَحَركُم؟ إنتو القِدّام عُيونكُم يَسُوع المَسيح كان مُصَوَر بينكُم مَصلوب. بَدور أتعَلَّم مِنَّكُم دا بَس. قِبِلتو الرّوح بِأعمال القانون؟ ولّا بِخَبَر الإيمان؟ كِدا إنتو بَليدين قَدُر دا؟ بَعَد ما إبتَديتو بِالرّوح، هَسَّع بِتكَمَّلو بِالجِّسِم؟ تِعِبتو قَدُر دا بِدون فايدَه؟ إذا بِالحَق يَكون بِدون فايدَه. البِدّيكُم روحو و بيَعمِل عَجايِب بينكُم، هو بيَعمِلو عَلَشان إنتو تَحفَظو القانون ولّا عَشان بِتآمِنو السِّمِعتوها؟ و كِدا: ”إِبْرَاهِيم آمَن بِالله، و داك إتحَسَب ليهو بِر.“ عَلَشان كِدا، أفهَمو، ديل البِآمِنو، هُم أولاد إِبْرَاهِيم. الكِتاب إتقَدَّم و شاف أن الله يَبَرِّر الأُمَم بِالإيمان. و بَشَّر إِبْرَاهِيم مِن قُبّال و قال: ”كُل الأُمَم يَكونو مُبارَكين فيك.“ عَلَشان كِدا، هُم العِندَهُم إيمان، يِتبارَكو مَعَ إِبْرَاهِيم المؤمِن. كُل البِتَّكِلو عَلى أعمال القانون، هُم تِحِت لَعنَه. عَشان مَكتوب: ”مَلعون كُلّو واحِد ما يِستَمِر في كُل المَكتوب في كِتاب القانون عَشان يَعمِل بيهو.“ و هَسَّع باين و لا واحِد يِتبَرَّر قِدّام الله بِالقانون. عَشان: ”البار بِعِيش بِالإيمان.“ القانون مُش مِن الإيمان. بِالعَكس: ”الزّول البِعمِل الحاجات دي، بِعِيش بيها.“ المَسيح فَدانا مِن لَعنَة القانون، عَلَشان هو بِقى لَعنَه فِشانّا. عَلَشان مَكتوب: ”مَلعون كُلّو واحِد إتعَلَّق عَلى شَجَرَه.“ هو فَدانا عَشان بَرَكَة إِبْرَاهِيم تَكون لِلأُمَم في المَسيح يَسُوع، عَشان نَقبَل وَعَد الرّوح بِالإيمان. يا أخوان، بَقول ليكُم مَثَل مِن حَياة الزّول. ما في إنسان يَقدَر يَوَقِّف ولّا يَزيد عَلى إتِّفاق الزّول الكان مَثَبَّت. الله وَعَد إِبْرَاهِيم و وَلَدو. و الكِتاب ما بِقول: ”و لِلأولاد،“ يَعني لِناس كَتيرين، لَكِن: ”و لِوَلَدَك،“ يَعني لِواحِد، الهو المَسيح. و بَقول دا: الله مِن قُبّال عَمَل إتِّفاق و وَعَد يَحفَظو. القانون الجّا بَعَد أُربُعمِيَّه و تَلاتين سَنَه، ما بِقدَر يَبَطِّل الإتِّفاق داك، و كِدا يَسَوي الوَعَد بِدون فايدَه. عَشان إذا كان الميراث بِالقانون، ما بِتكون بَعَد دا بِالوَعَد. لَكِن الله أدّاها لِإِبْرَاهِيم بِالوَعَد. عَلَشان كِدا لِشِنو القانون؟ الله زادو بِسَبَب الذُّنوب، لِغايَة ما الوَلَد الهو وَعَد بيهو يَجي. القانون جا بِتَرتيب مَلائكَه عَلى إيد وَسيط. و ما في إحتِياج لِوَسيط، لَمّا يَكون في زول واحِد. و الله واحِد. عَلَشان كِدا، القانون ضِد وُعود الله؟ أبَداً! إذا الله كان أدّا قانون قِدِر يَدّي حَياة، بِالحَق البِر كان جا بِالقانون. و لَكِن الكِتاب حَبَس كُل الدُّنيا تِحِت قُوَّة الخَطيَّه. و كان كِدا عَشان يَدّي الحاجَه الهو وَعَد بيها بِإيمان بِيَسُوع المَسيح، لِلمؤمِنين. و لَكِن قُبّال ما الإيمان جا، نِحنا كُنّا مَحفوظين تِحِت القانون، و مَقفول عَلينا حَتّى الإيمان الجّاي يَظهَر. و كِدا القانون كان مُعَلِّمنا البِقودنا لِلمَسيح، عَشان نِتبَرَّر بِالإيمان. و لَكِن بَعَد ما جا الإيمان، نِحنا بَعَد دا مُش تِحِت مُعَلِّم القانون. عَشان كُلُّكُم أولاد الله بِالإيمان بِالمَسيح يَسُوع. عَشان كُلُّكُم الإتعَمَّدتو لِلمَسيح، لِبِستو المَسيح. و كِدا، ما في يَهودي ولّا إغريقي. ما في عَبد ولّا حُر. ما في راجِل ولّا مَرَه. عَشان كُلُّكُم واحِد في المَسيح يَسُوع. إذا كان إنتو لِلمَسيح، كِدا إنتو أولاد إِبْرَاهِيم، و وُرّاث بِحَسَب الوَعَد. و بَقول كَمان، ما دام الوَلَد البِقبَل مال أبوهو لِسَّع صَغَيِر، ما في فارِق بينو و بين العَبد، مع إنّو هو سيد كُلّو حاجَه. و لَكِن هو تِحِت إيدين الحارِسين و الوكَلاء لِلوَكِت أبوهو إختار ليهو. و كِدا نِحنا كَمان، لَمّا كُنّا أولاد صُغار، عَمَلونا عَبيد لِقَوانين الدُّنيا. لَكِن لَمَّن الوَكِت كان مَليان، الله رَسَّل إبنو مَولود مِن مَرَه، مَولود تِحِت القانون. عَشان يَفدي ديل التِحِت القانون عَشان نَبقى أولاد. عَلَشان إنتو أولاد، الله رَسَّل روح إبنو لِقُلوبنا، البِكورِك: ”أبّا، يَعني يا أبوي.“ عَشان كِدا، إنتَ بَعَد دا مُش عَبد، لَكِن إبن. و إذا كان إبن، إنتَ كَمان وارِث بِالله. مِن قَبِل، لَمّا ما كُنتو تَعرِفو الله، كُنتو عَبيد لِآلِهَه بِطَبيعَه مُش آلِهَه. لَكِن هَسَّع إنتو تَعرِفو الله، ولّا بِالأكتَر، الله يَعرِفكُم. كيف تَرجَعو لِلقَوانين الضَّعيفَه و المِسكينَه؟ بِتدورو تَكونو عَبيد ليها مَرَّه تانيَه؟ إنتو بِتَحفَظو الأيام و الشُّهور و الوَكِت و السِّنين. بَخاف أنا تِعِبتَ فيكُم بِدون فايدَه. أطلُب مِنَّكُم، يا أخوان، كونو زَيي، عَشان أنا كَمان بِقيت زيَكُم. إنتو ما ظَلَمتوني في شي. زي ما تَعرِفو، بِسَبَب عَيى في الجِّسِم، أنا بَشَّرتَكُم بِالإنجيل في الأوَّل. و ما إنّو مَرَضي كان تَجرِبَه ليكُم، ما كُنتو مِتكَبِّرين عَلي ولّا كِرِهتوني، لَكِن قِبِلتوني زي مَلاك مِن الله، زي المَسيح يَسُوع نَفسو. كُنتو مَبسوطين كَتير! مالكُم؟ أشهَد ليكُم، لَو قِدِرتو، كُنتو طَلَّعتو عُيونكُم و أدّيتوها لَي. هَسَّع بِقيت عَدو ليكُم عَشان كَلَّمتَكُم الحَق؟ النّاس ديل غَيورين عَليكُم، و الغيرَه دي ما كوَيسَه. هُم دايرين يَفَرِّقوكُم عَنّا نِحنا، عَشان إنتو تَكونو غَيورين عَليهُم. الغيرَه دايماً كوَيس لَمّا الفِكر مِنّو كوَيس، و مُش في الوَكِت البَكون مَعاكُم بَس. يا أولادي، زي الأُم لَمّا تَلِد، أنا أتعَب نَفس الوَجَع حَتّى المَسيح يِتصَوَر فيكُم. كُنتَ بَدور أكون مَعاكُم هَسَّع و أغَير صوتي، عَشانّي مِتحَيّر فيكُم. قولو لَي، إنتو العاوزين تَكونو تِحِت القانون. ما بِتَسمَعو القانون بِقول شِنو؟ عَشان مَكتوب، إِبْرَاهِيم كان عِندو وَلَدين، واحِد مِن الخَدّامَه، و التّاني مِن الحُرَّه. و لَكِن وَلَدو المِن الخَدّامَه إتوَلَد بِحَسَب الجِّسِم، و وَلَدو المِن الحُرَّه إتوَلَد بِحَسَب الوَعَد. و كُلّو داك مَثَل، عَشان الإتنين نِسوان ديل، هُم إتِّفاقين. الواحِد مِن جَبَل سينا، و يَلِد لِلعُبوديَه، و هو هاجَر. هاجَر يَعني جَبَل سينا في بِلاد العَرَب. و هو زي أُورُشَلِيم الفي هَسَّع. عَلَشان هي و أولادا، هُم عَبيد. لَكِن أُورُشَلِيم الفي فوق، هي حُرَّه، و هي أُم كُلُّنا. عَشان مَكتوب: ”أفرَحي، يا عاقِر، الما بِتَلِد. إنتي، الما تِعِبتي في الوِلادَه، كورِكي مِن الفَرَح. عَشان الخَلّوها بَراها عِندَها أولاد أكتَر مِن أولاد الإتزَوَّجَت.“ هَسَّع إنتو، يا أخوان، زي إِسْحَاق، أولاد الوَعَد. لَكِن زي ما كان في الوَكِت داك، الإتوَلَد حَسَب الجِّسِم قاوَم الإتوَلَد حَسَب الرّوح. و هَسَّع بِكون كِدا كَمان. لَكِن الكِتاب بِقول شِنو؟ ”أطرُد الخَدّامَه و وَلَدا، عَشان وَلَد الخَدّامَه ما بياخُد شي مَعَ وَلَد الحُرَّه.“ عَلَشان كِدا، يا أخوان، نِحنا مُش أولاد الخَدّامَه، لَكِن أولاد الحُرَّه. عَشان المَسيح حَرَّرنا بِالحُرّيَّه دي، كونو ثابِتين فيها، و ما تَرجَعو تَطيعو لِنير العُبوديَه. شوفو! أنا بُولُس بَقول ليكُم: إن طَهَّروكُم، المَسيح ما عِندو فايدَه ليكُم. و أشهَد كَمان لِكُلّو زول مُطَهَّر، هو لازِم يَطيع القانون كُلّو. إنتو العاوزين تِتبَرَّرو بِالقانون، قَطَعوكُم مِن المَسيح، و وَقَعتو مِن النِّعمَه. عَشان نِحنا بِالرّوح، بِالإيمان، نِستَنّا رَجاء البِر. عَشان في المَسيح يَسُوع، الطَّهور ما ليهو فايدَه، ولّا الما مُطَهَّر، لَكِن الإيمان البِشتَغِل بِالمَحَبَّه. كُنتو بِتَجرو كوَيس. مِنو وَقَّفكُم حَتّى ما تَطيعو الحَق؟ العَمَل دا مُش مِن البِناديكُم. خَميرَه صَغَيرَه تَشتَغِل في كُل العَجين. أنا مِتَّكِل عَليكُم في الرَّب، إنتو ما بِتَفتَكِرو حاجَه تانيَه. أي زول اليَلَخبِتكُم، ماشي يِتحَمَّل الحُكم. لَكِن أنا، يا أخوان، إذا كان لِسَّع بَنادي بِالطَّهور، لِشِنو لِسَّع بِطرُدوني؟ في الحالَه ديك، عَترَة الصَّليب فاتَت. أنا عاوِز اليَطَهِّروكُم، يَقطَعو نُفوسُم كَمان! يا أخوان، الله ناداكُم لِلحُرّيَّه. لَكِن ما تَسَوو الحُرّيَّه فُرصَه لِلجِّسِم، لَكِن أخدِمو بَعضَكُم بَعض بِالمَحَبَّه. عَشان كُل القانون يَتِم في كِلمَه واحدَه: ”حِب قَريبَك زي نَفسَك.“ و إذا تَعُضّو و تَبلَعو بَعضَكُم بَعض، شوفو عَشان ما تَخَرِّبو بَعضَكُم بَعض. عَشان كِدا بَقول، أمشو بِالرّوح، و كِدا ما بِتكَمِّلو شَهوات الجِّسِم. عَشان شَهوات الجِّسِم تَعاكِس الرّوح، و الرّوح يَعاكِس الجِّسِم. الإتنين ديل يَعاكِسو، واحِد مِنَّهُم عَلى التّاني، حَتّى ما تَعمِلو العاوزينو. لَكِن إذا كان الرّوح يَقودكُم، إنتو ما تِحِت القانون. و أعمال الجِّسِم بيّنَه، و هي الزِّنا، و النَّجاسَه، و السَّفاهَه، و عِبادَة الأصنام، و السَّحِر، و العَداوَه، و الخُصومَه، و الحَسَد، و الغَضَب، و مَحَبَّة النَّفس، و الشَّكلات، و الأقسام، و الطَّمَع، و السُّكر، و الحَفلات البَطّالَه، و حاجات زي دي. أحَزِّركُم مِنَّها كَمان، زي ما حَزَّرتَكُم قُبّال دا. البِعمِلو حاجات زي دي، ما بِيورَثو مَلَكوت الله. لَكِن ثِمار الرّوح، هو المَحَبَّه، و الفَرَح و السَّلام، و الصَّبر، و الرَّحمَه، و الصَّلاح، و الأمانَه، و الوَداعَه، و مَسِك النَّفس. و ما في قانون ضِد حاجات زي دي. لَكِن النّاس، بِتوع المَسيح يَسُوع، صَلَبو الجِّسِم مَعَ الحُب و الشَّهوات. إذا نَعيش بِالرّوح، خَلّونا نَمشي كَمان بِحَسَب الرّوح. واجِب عَلينا أن ما نَشكُر نُفوسنا، ولّا نَزَعِّل بَعَضَنا بَعض، ولّا نَحسُد بَعَضَنا بَعض. يا أخوان، إذا الذَّنب مَسَك بِواحِد، النّاس الرّوحيين بينكُم يَرَجِعوهو بِروح الوَداعَه. لَكِن شوف نَفسَك. يِمكِن إنتَ كَمان تَكون مُجَرَّب. شيلو الأحمال بَعضَكُم بَعض، و كِدا تَكَمِّل قانون المَسيح. و إذا واحِد يَفتَكِر نَفسو حاجَه، و هو ما حاجَه، هو بِغِش نَفسو. لَكِن خَلّي كُلّو واحِد يَمتَحِن العَمَل بِتاعو. و بَعَد دا بِقدَر يَشكُر نَفسو بَس، و مُش واحِد تاني. عَشان كُلّو واحِد بِشيل الحِمِل بِتاعو. خَلّي أي واحِد البِتعَلَّم الكِلمَه يَدّي جُزو لِمُعَلِّمو مِن كُل الحاجات الكوَيسَه. ما تَغِشّو نُفوسكُم. واحِد ما بِقدَر يَضحَك عَلى الله. الشّي البِزرَعو الزّول، هو بِلِمّو كَمان. عَشان البِزرَع لِجِسمو، هو مِن جِسمو بِلِم الخَراب. و البِزرَع لِلرّوح بِلِم الحَياة الأبَديَّه. و ما نَكون تَعبانين في عَمَل الخير، عَشان بِنلِم في وَكِت الحَصاد إذا ما نَكون بِدون رَجاء. عَلَشان كِدا، نَعمِل الخير لِكُل النّاس، زي ما عِندَنا فُرصَه، و فوق كُلّو شي، لِأهل الإيمان. شوفو بِأي حُروف كَبيرَه بَكتِب ليكُم بِإيدي! كُل البِدور يَعمِلو مَنظَر سَمِح في الجِّسِم يَجبُروكُم تَكونو مُطَهَّرين، حَتّى النّاس ما يَطرُدوهُم فِشان صَليب المَسيح. عَشان المُطَهَّرين، هُم نُفوسُم، ما بِحفَظو القانون. لَكِن هُم عاوزينكُم تَكونو مُطَهَّرين عَشان يَمَجِّدو جِسِمكُم. خَليهو يَكون بَعيد مِنّي أن أفخُر بِحاجَه، إلّا بِصَليب رَبَّنا يَسُوع المَسيح البيهو الدُّنيا إنصَلَب لَي، و أنا لِلدُّنيا. عَشان في المَسيح يَسُوع الطَّهور ما ليهو فايدَه، ولّا الما مُطَهَّر، لَكِن الخَليقَه الجَديدَه. السَّلام و الرَّحمَه عَلى كُل النّاس البِمشو بِحَسَب القانون دا، و عَلى إِسْرَائِيل الله. مِن الوَكِت دا، واحِد ما يَتَعِّبني أكتَر، عَشانّي شايل في جِسمي عَلامات الرَّب يَسُوع. نِعمَة رَبَّنا يَسُوع المَسيح مَعَ روحكُم، يا أخوان! آمين. مِن بُولُس رَسول يَسُوع المَسيح بِإرادَة الله، لِلقِدِّسين الفي أفَسُس و المؤمِنين بِالمَسيح يَسُوع. نِعمَه ليكُم و سَلام مِن الله أبونا و الرَّب يَسُوع المَسيح. مُبارَك الله أبو رَبَّنا يَسُوع المَسيح البارَكنا بِكُلّو بَرَكَه روحيَّه في المَحَلّات الفي السَّما في المَسيح. عَشان هو إختارنا مِن قُبّال خَليقَة الدُّنيا عَشان نَكون قِدِّيسين و بِدون لوم قِدّامو. و في المَحَبَّه، إختارنا مِن قُبّال عَشان يَعمِلنا أولاد لِنَفسو بِيَسُوع المَسيح، حَسَب فَرَحو و إرَادَتو. عَشان نَحمِد مَجد نِعمَتو، الأدّاها لينا مَجّاناً في المَحبوب. و فيهو عِندَنا الفِداء بِدَمّو، غُفران الخَطايا، بِحَسَب غِنى نِعمَتو. و هو كَتَّر لينا نِعمَتو بِكُلّو حِكمَه و فَهم. و هو فَهَّمنا سِر إرَادَتو حَسَب فَرَحو الجَّهَّزو في المَسيح. و الله بِكَمِّل تَرتيبو لَمّا الزَّمَن يَكون تَمام، عَشان يَلِم كُلّو شي الفي السَّما و العَلى الأرض عَشان يَكون واحِد في المَسيح. و فيهو عِندَنا ميراث و هو إختارنا فيهو مِن قُبّال حَسَب تَرتيبو، هو اليَعمِل كُلّو شي زي فِكر إرَادَتو. عَلَشان نِحنا الفي الأوَّل خَتّينا رَجاءنا في المَسيح، نَكون لِحَمد مَجدو. و إنتو كَمان إتَّكَلتو عَلى المَسيح لَمّا سِمِعتو كِلمَة الحَق، إنجيل خَلاصكُم. و لَمّا آمَنتو بيهو، الله خَتَّ عَليكُم خِتِم، الرّوح القُدُس، الوَعَد بيهو. و هو عَربون ميراثنا لِفِداء مُلكو، لِحَمد مَجدو. عَلَشان كِدا، أنا كَمان لَمّا سِمِعتَ بِإيمانكُم بِالرَّب يَسُوع، و مَحَبَّتكُم لِكُل القِدِّسين، ما بَطَّلتَ أَدِّي الشُّكر فِشانكُم و أتذَكَّركُم في صَلَواتي. عَشان إلَه رَبَّنا يَسُوع المَسيح، أبو المَجد، يَدّيكُم روح الحِكمَه و رؤيا عَشان تَعرِفو مَعرِفَه كاملَه. و بَصَلّي عَشان أفكاركُم بِكونو مَفتوحين لِنورو، عَلَشان تَعرِفو الرَّجاء الهو إختاركُم ليهو، و تَعرِفو غِنى مَجد ميراثو في القِدِّسين. و بَصَلّي عَشانكُم تَعرِفو قُوَّتو الكَبيرَه لينا. و القُوَّه دي فوق كُلّو شي و بِتساعِدنا المؤمِنين. و دي نَفس القُوَّه الهو عَمَل في المَسيح لَمّا هو قَوَّمو مِن بين المَيِّتين، و أدّاهو الكُرسي عَن يَمينو في المَحَلّات الفي السَّما. و هو فوق كُلّو رياسَه و سُلطَه و قُوَّه و مَملَكَه و كُلّو إسم البِدّوهو لِلنّاس، مُش في الزَّمَن دا بَس، لَكِن في الجّاي كَمان. و الله خَتَّ كُلّو شي تِحِت كِرعينو، و عَمَلو راس فوق كُلّو شي لِلكَنيسَه. و الكَنيسَه جِسمو الإتمَلا بيهو، و هو اليَملى كُلّو شي في كُلّو مَكان. و إنتو كُنتو مَيِّتين بِالذُّنوب و الخَطايا. و إنتو مَشيتو فيها مِن قُبّال، حَسَب طُرُق الدُّنيا دي، حَسَب رَئيس سُلطَة الهَوا، الرّوح البِشتَغِل هَسَّع في النّاس الما بِطيعُو. و كُلُّنا عِشنا بِينُم في الزَّمَن الفات في شَهوات جِسِمنا. و كُنّا بِنَعمِل إرادَة الجِّسم و الأفكار. و كُنّا بِالطَّبيعَه أولاد الغَضَب زي النّاس التّانيين كَمان. لَكِن الله، عَلَشان هو حَبّانا بِمَحَبَّه عَظيمَه و هو غَني في الرَّحمَه، عَمَلنا حَيين مَعَ المَسيح لَمّا كُنّا مَيِّتين بِالخَطايا. عَشان بِالنِّعمَه إنتو مُخَلَّصين. و الله قَوَّمنا مَعَ المَسيح، و عَمَلنا نَقعُد مَعاهو في المَحَلّات الفي السَّما في المَسيح يَسُوع. هو عَمَل دا عَشان يَوَرّي في الزَّمَن الجّاي، غِنى نِعمَتو الأكبَر بِرَحمَتو عَلينا في المَسيح يَسُوع. عَلَشان بِالنِّعمَه إنتو مُخَلَّصين بِالإيمان. و داك مُش مِنَّكُم. هو هَديَّة الله، مُش مِن أعمال، عَشان واحِد ما يَشكُر نَفسو. عَلَشان نِحنا شُغل الله، و هو خَلَقنا في المَسيح يَسُوع عَشان نَعمِل أعمال كوَيسَه، الجَّهَّزا الله مِن قُبّال عَشان نَعمِلا. عَلَشان كِدا، إتزَكَّرو إنتو كُنتو مِن قُبّال مِن الأُمَم حَسَب الجِّسِم. و اليَسَمّوهُم مُطَهَّرين بِدا المَعمول في الجِّسِم بِالإيدين، هُم يَسَمّوكُم ما مُطَهَّرين. عَشان إنتو كُنتو في الوَكِت داك بِدون المَسيح، غَريبين عَن أهل إِسْرَائِيل، غَريبين عَن إتِّفاقات الوَعَد، بِدون رَجاء و بِدون الله في الدُّنيا. لَكِن هَسَّع في المَسيح، إنتو الكُنتو بَعيدين بِقيتو قَرِيبين بِدَم المَسيح. عَشان هو سَلَامنا، و هو عَمَل اليَهود و الأُمَم واحِد. و كَسَّر الحيطَه الفي وَسِط. الكانَت تَقَسِّم بينَنا. و في جِسمو بَطَّل العَداوَه، الكان في القانون مَعَ أوامِرو و تَرتيباتو. و هو عَمَل دا عَلَشان يَخلُق في نَفسو، مِن الإتنين واحِد إنسان جَديد، و كِدا بيَعمِل سَلام. عَلَشان يَعمِل الإتنين أصحاب مَعَ الله في جِسِم واحِد بِالصَّليب. و بِالصَّليب، هو كَتَل العَداوَه بِينُم. و هو جا و بَشَّركُم بِسَلام، ليكُم البَعيدين و القَريبين. و بيهو، نِحنا الأتنين عِندَنا قُبول لِلأبو بِروح واحِد. و عَلَشان كِدا، بَعَد دا إنتو مُش غَريبين و ناس مِن بَرَّه، لَكِن مُراح واحِد مَعَ القِدِّسين و أعضاء أهل بيت الله. و هو بَناكُم عَلى أساس الرُّسُل و الأنبياء، و يَسُوع المَسيح نَفسو، الحَجَر، الهو راس الرُّكن. و فيهو كُل البُنا يَبني سَوا، و يَكبَر عَشان يَكون بيت مُقَدَّس في الرَّب. و إنتو كَمان، هو يَبنيكُم سَوا فيهو عَشان تَكونو مَسكَن الله في الرّوح. و بِالسَّبَب دا، أنا، بُولُس، مَحبوس المَسيح يَسُوع فِشانكُم، يا أُمَم. إذا سِمِعتو بِالحَق عَن تَرتيب نِعمَة الله، الهو أدّاهو لَي فِشانكُم. كيف هو خَبَّرني بِرؤيا عَن السِّر، زي ما كَتَبتَ قُبّال دا بِكِلمات قَليلَه. و لَمّا إنتو تَقرو دا، بِتَقدَرو تَفهَمو مَعرِفَتي في سِر المَسيح. و ما خَبَّر بيهو لِلنّاس في زَمَن تاني زي ما وَرّاهو هَسَّع لِرُسُلو القِدِّسين و أنبياهو بِالرّوح. و دا هو السِّر، إنّو الأُمَم يَشتَرِكو سَوا في الميراث، و هُم أعضاء سَوا في جِسِم واحِد. و يَشتَرِكو سَوا في الوَعَد في المَسيح يَسُوع بِالإنجيل. أنا بِقيت خَدّام لِلإنجيل دا بِهَديَّة النِّعمَه الأدّاها لَي الله حَسَب عَمَل قُوَّتو. و هو أدّا النِّعمَه دي لَي، و أنا أصغَر كُل القِدِّسين، عَشان أبَشِّر بين الأُمَم بِغِنى المَسيح الما نَقدَر نَفَسِّر بِالتَّمام. و أوَرّي كُل النّاس شِنو تَرتيب السِّر دا، الكان مَدسوس مِن زَمان في الله، الخَلَق كُلّو شي. عَلَشان حِكمَة الله المُختَلِفَه جِدّاً هَسَّع تَكون مَعروفَه لِلرّؤساء و السَّلاطين في المَحَلّات الفي السَّما. و الله بيَعمِل دا بِالكَنيسَه. و دا كان حَسَب التَّرتيب الأبَدي، الهو جَهَّزو في المَسيح يَسُوع رَبَّنا. و بيهو نَقدَر نَقَرِّب لِلَّه بِدون خوف و بِشَجاعَه بِإيمان فيهو. عَلَشان كِدا بَطلُب مِنَّكُم ما تَكونو بِدون شَجاعَه بِسَبَب أتعابي فِشانكُم، عَشان دا لِمَجدكُم. بِالسَّبَب دا، أنا بَركَع عَلى رُكبتيني قِدّام الأبو، المِنّو كُلّو أهل في السَّما و عَلى الأرض ياخُد إسمو. أنا بَصَلّي عَشان هو بِدّيكُم حَسَب غِنى مَجدو عَلَشان تِتشَدَّدو بِالقُوَّه بِروحو جُوَّه نُفوسكُم، عَشان المَسيح يَسكُن في قُلوبكُم بِالإيمان، عَلَشان عُروقكُم و أساسكُم بِكونو في المَحَبَّه، حَتّى إنتو تَقدَرو تَفهَمو مَعَ كُل القِدِّسين كيف مَحَبَّة المَسيح واسِعَه و طَويلَه و عاليَه و غَريقَه. و تَعرِفو مَحَبَّة المَسيح، الفوق المَعرِفَه، عَلَشان تَكونو مَليانين تَمام بِالله نَفسو. و لِلبِقدَر يَعمِل فوق كُلّو حاجَه زِيادَه جِدّاً مِن كُلّو شي النَطلُب ولّا نَفتَكِر، بِحَسَب القُوَّه التَّشتَغِل فينا، ليهو المَجد في الكَنيسَه و في يَسُوع المَسيح لِلأبَد و لِلزَّمَن بِدون نِهايَه! آمين. عَلَشان كِدا، أنا، المَحبوس في الرَّب، بَطلُب ليكُم تَعيشو زي ما يِستَحِق الإختِيار الهو إختاركُم ليهو. كونو مِتواضِعين و لُطَفاء، و أصبُرو بَعضَكُم بَعض في المَحَبَّه. و جَرِّبو تَكونو واحِد في الرّوح دايماً، مَربوطين سَوا بِرِباط السَّلام. في جِسِم واحِد و روح واحِد، زي ما هو إختاركُم في رَجاء إختياركُم الواحِد. في رَب واحِد، و إيمان واحِد، و مَعموديَّه واحدَه، إلَه واحِد و أبو لِلكُل، و هو فوق الكُل، و يَشتَغِل في الكُل، و يَعيش في كُلُّنا. و لَكِن هو أدّا لِكُلّو واحِد مِنَّنا النِّعمَه حَسَب قِياس هَديَّة المَسيح. عَلَشان كِدا هو يَقول: ”لَمّا طَلَع لِفوق، هو أخَد مَعاهو مَحبوسين، و أدّا هَدايا لِلنّاس.“ ”هو طَلَع لِفوق،“ يَعني شِنو إلّا إنّو نَزَل كَمان لِمَحَلّات الأرض الفي تِحِت؟ الواحِد النَزَل، هو نَفس الواحِد الطَّلَع كَمان لِفوق السَّما كُلّو، عَشان يَملى الكُل. و هو أدّا البَعض يَكونو رُسُل، و البَعض، أنبياء، و البَعض، مُبَشِّرين، و البَعض، رُعاه و مُعَلِّمين. و هو عَمَل دا عَلَشان القِدِّسين يَكونو كاملين في شُغل الخِدمَه، عَشان يَبنو جِسِم المَسيح. و هو بيَعمِل كِدا لِغايَة ما كُلُّنا بِنَجي لِوَحدَة الإيمان و مَعرِفَة إبن الله، لِإنسان كامِل، لِقِياس مَليان بِتاع كَمال المَسيح. عَشان ما نَكون بَعَد دا أطفال. عَشان كُلّو هَبوب بِتَرمي الاطفال و بِتشيلُم هِنا و هِناك. و الهَبوب يَعني التَّعليم بِتاع النّاس الشّاطرين البِغِشّو بِمَكَرُم الغَلطان. لَكِن نِتكَلَّم الحَق في المَحَبَّه عَشان نَكبَر في كُلّو حاجَه لِلرّاس، هو المَسيح. و مِنّو كُل الجِّسِم بِكون مَربوط سَوا بِمُساعدَة كُلّو رُباط. و الجِّسِم يَكبَر و يَبني نَفسو في المَحَبَّه لَمّا كُلّو عُضو يَعمِل شُغلو. و بَقول دا و أشهَد في الرَّب، ما تَعيشو بَعَد دا زي الأُمَم كَمان بِأفكار بِدون فايدَه. و الفِكر بِتاعُم ضُلُمَّه، و هُم ما عِندَهُم جُزو في حَياة الله، عَلَشان ما عِندَهُم مَعرِفَه، بِسَبَب قُلوبُم القَوّيَّه. هُم ما يَهتَمّو بِالخير و الشَّر، و سَلَّمو نُفوسُم لِلسَّفاهَه عَشان يَعمِلو كُلّو نَجاسَه في الطَّمَع. لَكِن إنتو ما إتعَلَّمتو كِدا عَن المَسيح، إذا بِالحَق سِمِعتوها و إتعَلَّمتو مِنّو حَسَب الحَق الفي يَسُوع. و بِخُصوص طَريق حَياتكُم المِن قُبّال، إنتو إتعَلَّمتو أن تَقلَعو مِنَّكُم النَّفس القَديمَه، الفيها خَراب بِسَبَب الشَّهوات البِغِشّو. و تَكونو جُداد في روح عَقِلكُم. و تَلبَسو النَفس الجَديدَه، الخَلَقا الله عَشان تَكون زيهو في البِر و القَداسَه المِن الحَق. عَلَشان كِدا، أرمو مِنَّكُم الكِضِب، و إتكَلَّمو الحَق كُلّو واحِد مَعَ جارو، عَلَشان نِحنا أعضاء بَعَضَنا مَعَ بَعض. أزعَلو و ما تَعمِلو خَطيَّه. ما تَخَلّو زَعلكُم يِستَنّى بَعَد المَغرِب. و ما تَدّو إبْلِيس فُرصَه. ما تَخَلّي الكان بِسرِق يَسرِق تاني مَرَّه. لَكِن خَليهو يَشتَغِل بِإيدينو حاجَه طَيبَه، عَشان بِكون عِندو حاجَه عَشان يَدّي لِلزّول العِندو إحتِياج. ما تَخَلّو كَلام بَطّال يَمرُق مِن خُشومكُم، لَكِن كَلام كوَيس البِساعِد، عَشان يَدّي نِعمَه لِلنّاس اليَسمَعو. ما تَعمِلو روح الله القُدّوس حَزنان، عَشان بيهو الله خَتَّ عَليكُم الخِتِم لِغايَة يوم الفِداء. و شيلو مِنَّكُم كُلّو قَلب مُر، و زَعل، و غَضَب، و كوراك شَديد، و كُلّو مَكَر. كونو شَفوقين بَعضَكُم بَعض، بِقَلِب رَحيم. و أغفِرو بَعضَكُم بَعض، زي ما الله فِشان المَسيح غَفَر ليكُم. أعمِلو زي ما الله بيَعمِل، زي أولاد مَحبوبين. و عيشو في المَحَبَّه، زي المَسيح حَبّانا و أدّا نَفسو عَشان خاطِرنا، تَقدِمَه و ضَبيحَه لِلَّه زي ريحَه كوَيسَه. و ما تِتكَلَّمو أبَداً مَعَ بَعض عَن الزِّنا و كُلّو نَجاسَه و الطَّمَع، زي ما يَوافِق القِدِّسين. و كِدا ما تِتكَلَّمو كَلام وَسخان ولّا بَليد ولّا كَلام خَفيف الما يَوافِق. لَكِن أدّو الشُّكر لِلَّه. عَشان إنتو بِتَعرِفو دا، كُل البيَعمِلو الزِّنا ولّا بِكونو نَجِسين، ولّا طَمّاعين، و اليَعبُدو الأصنام، ديل ما عِندَهُم ميراث في مَلَكوت المَسيح و الله. ما تَخَلّو أي زول يَغِشّكُم بِكِلمات بِدون فايدَه، عَلَشان بِسَبَب الحاجات دي، زَعل الله يَجي عَلى النّاس الما بِطيعُو. عَشان كِدا ما تَشتَرِكو مَعاهُم. عَلَشان إنتو كُنتو ضُلُمَّه مِن قُبّال، لَكِن هَسَّع إنتو نور في الرَّب. عيشو زي أولاد نور. عَلَشان ثِمار الرّوح هو في كُلّو حاجَه طَيبَه و في بِر و في حَق. جَرِّبو أن تَعرِفو الحاجَه التَّبسِط الرَّب. و ما تَكون ليكُم شَرِكَه مَعَ أعمال الضُّلُمَّه الما عِندَهُم ثِمار، لَكِن وَبِّخوها. عَشان دا عيب لَمّا نِتكَلَّم عَن الحاجات ديل الهُم بيَعمِلو بِالسِّر. لَكِن كُل الحاجات اليَوَبِّخوها، يَظهَر بِالنّور. و كُلّو شي البِكون باين، يَبقى نور. عَلَشان كِدا هو بِقول: ”أفتَح عُيونَك، إنتَ البِتنوم، و قوم مِن بين المَيِّتين، و المَسيح بِدّيك نور.“ شوفو بِالظَّبط كيف إنتو تَعيشو، مُش زي البَليدين لَكِن زي الفاهمين. أعمِلو الأحسَن بِكُلّو فُرصَه، عَلَشان الأيام شَرّيرَه. عَلَشان كِدا ما تَكونو بِدون حِكمَه، لَكِن أفهَمو شِنو إرادَة الله. ما تَكونو سَكرانين بِالخَمر، البِقود لِلخَراب، لَكِن كونو مَليانين بِالرّوح. و تِتكَلَّمو بَعضَكُم بَعض بِمَزامير و حَمد و تَرتيلات روحيَّه و تَرَتِّلو و تَعمِلو مُزيكا في قُلوبكُم لِلرَّب. و تَشكُرو كُلّو وَكِت لِكُلّو حاجَه لِلَّه الأبو، في إسم رَبَّنا يَسُوع المَسيح. و تَطيعو بَعضَكُم لِبَعض في خوف الرَّب. يا نِسوان، طيعو رُجالكُم زي لِلرَّب. عَشان الرّاجِل هو راس المَرَه، زي ما المَسيح كَمان راس الكَنيسَه، و هو مُخَلِّص الجِّسِم. عَلَشان كِدا، زي الكَنيسَه تَطيع المَسيح، كِدا النِّسوان يَطيعو رُجالُم في كُلّو شي. يا رُجال، حِبّو نِسوانكُم، زي المَسيح كَمان حَبَّ الكَنيسَه و أدّا نَفسو فِشانّا، عَشان يَقَدِّسا و يَنَضِّفا بِغَسيل المويَه بِالكِلمَه. عَشان يَقَدِّما لِنَفسو كَنيسَه مَجيدَه، ما فيها نُقطَه ولّا كَرمَش ولّا أي شي زي دا، و لَكِن تَكون مُقَدَّسَه و بِدون عيب. و كِدا، الرُّجال لازِم يَحِبّو نَسوانُم زي أجسامُم. البِحِب مَرَتو بِحِب نَفسو. عَشان ما في واحِد كِرِه جِسمو أبَداً، لَكِن يَدّيهو أكل و يَهتَم بيهو، زي المَسيح بيَعمِل فِشان الكَنيسَه. عَلَشان نِحنا أعضاء جِسمو. بِالسَّبَب دا، الرّاجِل يَسيب بيت أبوهو و أُمّو و يَلَزِّق بِمَرَتو، و هُم الإتنين بِكونو جِسم واحِد. دا سِر كَبير، لَكِن أنا بَتكَلَّم بِخُصوص المَسيح و الكَنيسَه. و لَكِن خَلّي كُلّو واحِد مِنَّكُم يَحِب مَرَتو زي نَفسو، و خَلّي المَرَه تَحتَرِم راجِلا. يا أولاد، طيعو والِديكُم في الرَّب، عَشان دا صَحيح. ”أحتَرِم أبوك و أُمَّك،“ الهو أوَّل أمر مَعَ وَعَد. ”عَلَشان بِكون كوَيس مَعاك، و تَعيش مُدَّه طَويلَه عَلى الأرض.“ و إنتو، يا أبَهات، ما تَزَعِّلو أولادكُم، لَكِن رَبّوهُم في تأديب و تَعليم الرَّب. يا خَدّامين، طيعو أسيادكُم حَسَب الجِّسِم بِإحتِرام و خوف، و إخلاص القَلِب، زي لِلمَسيح. ما تَخدِموهُم لَمّا هُم يَعاينو ليكُم بَس عَشان تَعمِلوهُم مَبسوطين مِنَّكُم. لَكِن زي خَدّامين المَسيح، أعمِلو إرادَة الله مِن القَلب. أخدِمو مِن قَلب طَيب زي لِلرَّب و مُش لِلنّاس، عَلَشان إنتو بِتَعرِفو كُلّو واحِد اليَعمِل حاجَه طَيبَه، هو بِقبَل زيهو مِن الرَّب، إذا هو عَبد ولّا حُر. و إنتو، يا أسياد، أعمِلو ليهُم زات الحاجات، و خَلّو التَّهديد، عَشان إنتو تَعرِفو إنّو سَيِّدُم و سَيِدكُم هو في السَّما. و هو ما بِقبَل الوشوش. و في الآخِر، يا أخواني، كونو قَوّيين في الرَّب و في شِدَّة قُوَّتو. ألبَسو سِلاح الله عَشان بِتَقدَرو تَقيفو و تَقاوِمو كُلّو غِش بِتاع إبْلِيس. عَشان ما نَحارِب دَم و لَحَم، لَكِن الحُكّام و السَّلاطين و رؤساء ضَلام الدُّنيا دي، و جُيوش روحيَّه بِتاعَت الشَّر في مَحَلّات عاليَه. عَلَشان كِدا، شيلو سِلاح الله الكامِل، عَشان تَقدَرو تَكونو ثابِتين في اليوم الشَّرّير. و بَعَد ما تَكَمِّل كُلّو شي، تَقيفو. قُومو و كونو ثابِتين، صُلبكُم مَربوط بِحِزام الحَق، و لابِسين دِرِع البِر. و زي جِزَم لِكِرعينكُم، جَهِّزو عَشان تَبَشِّرو بِإنجيل السَّلام. و فوق كُلّو شي، شيلو دَرَقَة الإيمان البيهو بِتَقدَرو تَكتُلو كُلّو نِشّابات النّار بِتاعَت الشَّرّير. و أُخدو بَرنيطَة الخَلاص، و سيف الرّوح الهو كِلمَة الله. صَلّو دايماً بِكُلّو صَلاه و طَلَب في الرّوح. و خَلّو بالكُم لِدا و أحرِسو و صَلّو كُلّو وَكِت بِطَلَب عَشان كُل القِدِّسين. و صَلّو فِشانّي لَمّا أفتَح خَشمي عَشان أتكَلَّم، يَدّيني كَلام عَلَشان أوَرّي سِر الإنجيل بِدون خوف. و أنا سَفير في جَنازِير فِشان الإنجيل. و صَلّو عَلَشان أتكَلَّم بِشَجاعَه زي أنا لازِم أتكَلَّم. تِيخِيكُس، الأخو المَحبوب، و الخَدّام الأمين في الرَّب، بِكَلِّمكُم بِكُلّو شي عَشان بِتَعرِفو كيف أنا و أنا بَعمِل شِنو. أنا رَسَّلتو ليكُم بِالسَّبَب دا عَشان تَعرِفو كيف نِحنا، و عَشانو يَدّيكُم شَجاعَه. سَلام لِلأخوان، و مَحَبَّه بِإيمان مِن الله الأبو و الرَّب يَسُوع المَسيح. النِّعمَه مَعَ كُل البِحِبّو رَبَّنا يَسُوع المَسيح بِمَحَبَّه ما بِتموت. بُولُس، و تِيمُوثَاوُس، خَدّامين المَسيح يَسُوع، لِكُل المُقَدَّسين في المَسيح يَسُوع الفي فيلِبّي، مَعَ المُلاحِظين و خَدّامين الكَنيسَه. نِعمَه ليكُم و سَلام مِن الله أبونا و الرَّب يَسُوع المَسيح. أشكُر إلَهي كُلّو مَرَّه لَمّا أنا أتذَكَّركُم. كُلّو وَكِت في كُلّو صَلاتي لِكُلُّكُم، أنا بَطلُب دايماً بِفَرَح. و بَشكُر الله عَشان شَرِكَتكُم في الإنجيل مِن اليوم الأوَّل لِغايَة هَسَّع. و أنا مِتأكِّد في الحاجَه دي، إن هو الإبتَدا عَمَل كوَيس فيكُم، بِكَمِّلو لِغايَة يوم المَسيح يَسُوع. و دا تَمام لَي أن أفتَكِر كِدا عَن كُلُّكُم، عَلَشان أحفَظكُم كُلُّكُم في قَلبي. فِشان كُلُّكُم تَشارِكوني في نِعمَة الله، إذا أنا في جَنازِير ولّا أحرِس الإنجيل و أوَرّي إنّو هو الحَق. عَشان الله شاهِد لَي كيف أنا عاوِز أشوف كُلُّكُم بِمَحَبَّة يَسُوع المَسيح. و أهي دي الصَّلاه بِتاعي: أن مَحَبَّتكُم تَزيد أكتَر و أكتَر في المَعرِفَه و في كُلّو فَهم، عَشان تَفهَمو الأحسَن في الحاجات، و تَكونو نُضاف و بِدون لوم لِغايَة يوم المَسيح. مَليانين مِن ثِمار البِر البِجي بِيَسُوع المَسيح لِمَجد الله و حَمدو. و عاوِزكُم تَعرِفو، يا أخوان، الحَصَل لَي، هو السَّبَب الإنجيل إتقَدَّم. عَلَشان دا، بِقى مَفهوم لِكُلّو حُرّاس الحَكومَه و لِكُلّو ناس تانيين إنّي مَحبوس فِشان المَسيح. و أكتَر الأخوان بِقو مِتأكِّدين في الرَّب بِسَبَب جَنازِيري. و عِندَهُم شَجاعَه أكتَر عَشان يِتكَلَّمو بِكِلمَة الله بِدون خوف. صَحيح، ناس تانيين يَبَشِّرو بِالمَسيح مِن حَسَد و شَكَل، و لَكِن تانيين يَبَشِّرو مِن سُرور. هُم يَعمِلوهو مِن مَحَبَّه، عَشان هُم عارفين الله خَتّاني هِنا عَشان أحرِس الإنجيل. التّانيين يَبَشِّرو بِالمَسيح مِن شَكَل، مُش بِإخلاص. و هُم يَفتَكِرو يَزيدو الوَجَع بِتاعي وَكِت أنا مَحبوس. مَعليش. الشّي المُهِم هو أن يَبَشِّرو بِالمَسيح، إذا بِسَبَب كاضِب ولّا بِسَبَب حَقيقي. و بِدا، أنا فَرحان. أيوَه، و أنا بَفرَح كَمان. عَلَشان أنا عارِف نِهايَة الحَصَل لَي بِكون لِخَلاصي، عَلَشان صَلاتكُم و مُساعَدَة روح يَسُوع المَسيح. أنتَظِر و عِندي رَجاء إنّي ما بَكون خَجلان أبَداً، و لَكِن بِكون عِندي شَجاعَه حَتّى المَسيح بِكون مُحتِرَم في جِسمي هَسَّع، زي في كُلّو وَكِت، إذا بِالحَياة ولّا بِالموت. عَشان الحَياة لَي هي المَسيح، و الموت هو رِبِح. و لَكِن إذا الحَياة في الجِّسم تَجيب ثِمار مِن عَمَلي، أنا ما عارِف أختار شِنو. أنا مَربوط بين الإتنين. أنا داير أمرُق و بَكون مَعَ المَسيح، عَشان دا أحسَن بِكَتير. و لَكِن ضَروري جِدّاً بَقعُد في الجِّسم عَشانكُم. و عَلَشان أنا مِتأكِّد في دا، أنا عارِف إنّي بَقعُد و أستَمِر مَعَ كُلُّكُم، عَشان تِتقَدَّمو و تَفرَحو في الإيمان. و عَشان يَزيد فَخرَكُم في المَسيح يَسُوع بِواسطَتي لَمّا أجي ليكُم تاني. عَلى كِدا، عيشو بِطَرِيقَه مُستَحِقَّه إنجيل المَسيح. كِدا، إذا بَجي أشوفكُم ولّا إذا أنا ما في، بَسمَع عَنكُم إنَّكُم ثابِتين في روح واحِد، و إنَّكُم تَتعَبو بِنَفس واحدَه لِإيمان الإنجيل، و ما خايفين في أي شي مِن عُدوانكُم. دي شَهادَه ليهُم عَلى الخَراب، و لَكِن ليكُم عَلى الخَلاص. و داك مِن الله. عَشان كِدا، الله، فِشان المَسيح، أدّا ليكُم مُش أن تَآمِنو فيهو بَس، لَكِن أن تِتوَجَّعو عَشان خاطِرو كَمان، و ليكُم نَفس التَّعب الإنتو شُفتوني فيهو، و هَسَّع تَسمَعو إنّي فيهو. كِدا، إذا عِندَكُم كَلام شَجاعَه في المَسيح، إذا أي تَعزيَه بِمَحَبَّتو، إذا أي شَرِكَه في الرّوح، إذا أي مَحَبَّه و رَحمَه، كَمِّلو فَرَحي و تَفتَكِرو نَفس الفِكر. كونو ليكُم مَحَبَّه واحدَه، و نَفس واحدَه، و فِكر واحِد. ما تَعمِلو أي شي بِمَحَبَّة النَّفس، ولّا بِكِبر. و لَكِن خُتّو نُفوسكُم تِحِت، و أحسِبو التّانيين أحسَن مِن نُفوسكُم. كُلّو واحِد مِنَّكُم ما يَخُت بالو لِحاجات نَفسو بَس، لَكِن لِحاجات ناس تانيين كَمان. خَلّي الفِكر دا بِكون فيكُم، الفِكر الفي المَسيح يَسُوع: هو كان الله في نَفسو، و لَكِن ما إفتَكَر هو لازِم يِستَمِر يَمسِك سُلطتو يَكون واحِد مَعَ الله. لَكِن خَلّى نَفسو، و أخَد صورَة عَبد، و كان مَولود في شَبه بَني آدَم. و كان زي إنسان في المَنظَر، و خَتَّ نَفسو تِحِت، و طاع الله لِغايَة الموت، موت الصَّليب! عَلَشان دا، الله رَفَّعو، و أدّاهو الإسم الفوق كُلّو إسم تاني، عَشان بِإسم يَسُوع، كُلّو رُكبَه بِتَركَع في السَّما، و عَلى الأرض، و تِحِت الأرض. و كُلّو لِسان يَعتَرِف أن يَسُوع المَسيح هو رَب، لِمَجد الله الأبو. عَلى كِدا، يا أصحابي المَحبوبين، زي ما سِمِعتو كَلامي كُلّو وَكِت، كَمِّلو خَلاصكُم بِخوف و رَجف، مُش لَمّا أنا في مَعاكُم بَس، لَكِن أكتَر بِكَتير هَسَّع، وَكِت أنا ما في. فِشان الله هو العامِل فيكُم الإرادَه و العَمَل عَشان تَعمِلو الحاجات التَّدّيهو فَرَح. أعمِلو كُلّو شي بِدون النَّقنَقَه و الكَلام الكَتير. عَشان بِتكونو بِدون لوم و نُضاف، أولاد الله بِدون غَلَط في وَسِط جيل مَعَوَّج و مِتمَرِّد. و إنتو تَنَوِّرو بِينُم زي نِجوم في الدُّنيا، مِقَدِّمين كِلمَة الحَياة. إذا تَعمِلو كِدا، أنا بَقدَر بَفخَر في يوم المَسيح، فِشان ما جَريت ساكِت و لا تِعِبتَ بِدون فايدَه. و إذا يَكُبّوني زي تَقديم عَلى ضَبيحَة إيمانكُم و خِدمَتو، أنا مَبسوط و أفرَح مَعَ كُلُّكُم. و إنتو كَمان، كونو مَبسوطين و أفرَحو مَعاي. أنا عِندي رَجاء في الرَّب يَسُوع بَرَسِّل ليكُم تِيمُوثَاوُس بَعَد شوَيَه، عَشان أنا كَمان بَكون فَرحان لَمّا أسمَع خَبَر عَنكُم. ما عِندي واحِد زيهو، اليَهتَم بِحالكُم بِإخلاص. عَشان كُلّو واحِد مِنَّهُم يَهتَمّو بِأحوال نُفوسُم، و مُش لِحال يَسُوع المَسيح. و لَكِن إنتو عارفين كيف هو وَرّا فايدَتو، و هو خَدَم مَعاي في الإنجيل، زي وَلَد مَعَ أبوهو. فِشان كِدا، أنا عِندي رَجاء أرَسِّلو ليكُم أوَّل ما أشوف كيف بِكون حالي. و لَكِن أنا مِتأكِّد بِالرَّب، إنّي أنا كَمان بَجي قَريب. و لَكِن شُفتَ لازِم أرَسِّل ليكُم وأبفروديتس، أخوّي، و العامِل مَعاي، و العَسكَري مَعاي، و رَسولكُم، و الخَدَمني في إحتياجي. عَلَشان هو عاوِز يَشوفكُم كُلُّكُم كَتير خالِص، و هو حَزين جِدّاً فِشان إنتو سِمِعتو هو كان عَيّان. صَحيح، هو كان عَيّان، و قَرَّب لِلموت. و لَكِن الله رَحَمو، و ما رَحَمو هو بَس، لَكِن أنا كَمان، عَشان ما بِكون لَي حُزن عَلى حُزن. عَلى كِدا، رَسَّلتو طَوّالي، عَشان إنتو بِتَفرَحو لَمّا بِتشوفو مَرَّه تانيَه، و حُزني بِكون أقَل. كِدا، أقبَلوهو في الرَّب بِكُلّو فَرَح. و إحتَرِمو ناس زيهو. عَلَشان هو كان قَريب مِن الموت فِشان عَمَل المَسيح، و خاطَر بِحَياتو عَشان يَكَمِّل خِدمَتكُم النّاقصَه لَي. في الآخِر، يا أخوان، أفرَحو في الرَّب. كِتابَة الحاجات دي ما صَعبَه عَلي، لَكِن عَشان تَحفَظكُم. خَلّو بالكُم مِن الكِلاب. خَلّو بالكُم مِن اليَعمِلو الشَّر. خَلّو بالكُم مِن اليَقطَعو الجِسم. عَشان نِحنا المُطَهَّرين النَّعبُد الله بِروح. و عِندَنا كِبِر في المَسيح يَسُوع، و ما نَتَّكِل عَلى الجِّسِم. مَعَ إنّو لَي سَبَب عَشان أتَّكِل عَلى الجِّسِم كَمان. إذا واحِد تاني يَفتَكِر هو عِندو سَبَب عَشان يَتَّكِل عَلى الجِسم، أنا عِندي زِيادَه مِنّو: أنا كُنتَ مُطَهَّر في اليوم التّامِن، مِن جِنس إِسْرَائِيل، مِن قَبيلَة بنْيَامِين، عِبراني مِن العِبرانيين. في خُصوص القانون، فرِّيسي. في خُصوص الغيرَه، طارِد الكَنيسَه. في خُصوص البِر الفي القانون، بِدون لوم. و لَكِن كُل الكان رِبِح لَي، حَسبتو خَسارَه فِشان المَسيح. بِالأكتَر، أحسِب كُلّو شي خَسارَه عَلَشان المَعرِفَه البِتفوت عَن كُلّو شي، يَعني مَعرِفَة المَسيح يَسُوع رَبّي. و فِشانّو، أنا خَسَرتَ كُل الحاجات و أحسِبا زي حاجَه خَربانَه عَشان آخُد المَسيح، و عَشان هو يَلقاني فيهو، مُش بِبِرّي المِن القانون، و لَكِن بِالبِر البِالإيمان بِالمَسيح، البِر المِن الله بِالإيمان. عَشان أعرِفو و قُوَّة قيامَتو، و شَرِكَة أتعابو، و بَكون زيهو في موتو. عَشان إذا مُمكِن، أحَصِّل عَلى القيامَه مِن بين المَيِّتين. أنا ما أخَدتَ دي مِن قَبل، ولّا بِقيت كامِل. و لَكِن أجري طَوّالي عَشان أمسِك دا، الكان السَّبَب المَسيح يَسُوع مَسَكني. يا أخوان، أنا لِسَّع ما أحسِب إنّي مَسَكتَ بيهو. و لَكِن أعمِل حاجَه واحدَه بَس: أنسى الحاجات الفي وَرا، و أتقَدَّم بِكُلّو قوَّتي لِلحاجات الفي قِدّام. و اجري طَوّالي لِلقَصِد عَشان أقبَل الأُجرَه الهو بِالمَسيح يَسُوع ناداني ليها نَحو فوق. كُلُّنا الكامِلين، خَلّينا نَفتَكِر كِدا. و إذا عِندَكُم فِكر تاني في أي شي، الله يَوَرّيكُم داك كَمان. لَكِن خَلّينا نَعيش بِالحَق لِلشّي الوِصِلنا ليهو. يا أخوان، عيشو مَعَ بَعض زي ما أنا بَعيش، و شوفو تَمام هُم البِعيشو بِالمَثَل النِحنا أدّيناهو ليكُم. عَلَشان، زي ما كَلَّمتَكُم مَرّات كَتيرَه قُبّال، و أقول تاني و أنا أبكي، ناس كُتار يَعِيشو زي عُدوان صَليب المَسيح. نِهايَتُم هي الخَراب، و إلَهُم هو بُطونُم، و مَجدُم هو خَجَلُم، و فِكرُم في حاجات الدُّنيا. و لَكِن وَطَنّا في السَّما. و نَستَنّا مُخَلِّص مِن هِناك، الرَّب يَسُوع المَسيح. هو بِغَيِّر جِسِمنا المِتواضَع، عَشان بِكون زي جِسمو المَجيد. و هو بيَعمِل دا بِنَفس القُوَّه البيها هو بِقدَر يَخُت كُلّو شي تِحِت سُلطتو. عَلَشان دا، يا أخواني، إنتو الأنا بَحِبّكُم و عاوِز بِشِدَّه أشوفكُم، يا فَرَحي و تاجي، ثَبِّتو كِدا في الرَّب، يا مَحبوبين. بَطلُب مِن أَفُودِيَة، و بَطلُب مِن سِنْتِيخِي أن تَفتَكِرو فِكر واحِد في الرَّب. و أسألَك إنتَ كَمان، يا شَريكي المُخلِص، ساعِد النِّسوان ديل، عَلَشان هُم إشتَغَلو سَوا مَعاي في الإنجيل مَعَ أَكْلِيمَنْدُس و باقي العامِلين مَعاي. و أساميهُم في كِتاب الحَياة. أفرَحو في الرَّب كُلّو وَكِت. و بَقول مَرَّه تانيَه، أفرَحو. خَلّو كُل النّاس يَعرِفو صَبِركُم. الرَّب قَريب! ما تِتحَيَّرو في أي شي. لَكِن في كُلّو شي، خَلّي طَلَباتكُم بِتكون مَعروفَه لِلَّه، بِصَلاه و طَلَب مَعَ شُكر. و سَلام الله، الفوق كُلّو فَهم، بِحفَظ قُلوبكُم و أفكاركُم في المَسيح يَسُوع. و في الآخِر، يا أخوان، كُل الهو حَقيقي، و كُل الهو مُحتَرِم، و كُل الهو عادِل، و كُل الهو نَضيف، و كُل الهو مَحبوب، و كُل الهو خَبَرو كوَيس، إذا فيهو الخير، و مُستَحِق الحَمد، فَكِّرو في الحاجات دي. الإنتو إتعَلَّمتو، و قِبِلتو، و سِمِعتو مِنّي، و شُفتو فِيني، أعمِلو بِدا. و إلَه السَّلام بِكون مَعاكُم. أنا أفرَح بِالرَّب فَرَح عَظيم، عَشان إنتو مَرَّه تانيَه خَلّيتو بالكُم لَي هَسَّع بَعَد وَكِت طَويل. صَحيح كُنتو تَخَلّو بالكُم لَي لَكِن ما كان عِندَكُم فُرصَه تَوَرّو دا. و أنا ما بَقول دا بِسَبَب إحتياجي. عَشان إتعَلَّمتَ بَكون رَضيان في أي حال الأنا فيهو. أنا عارِف الإحتِياج، و أنا عارِف أعيش في كَترَه. في كُلّو شي و في كُلّو حال، إتعَلَّمتَ سِر الرّاحَه، إذا أنا شَبعان ولّا جَعان، إذا عِندي مال كَتير ولّا عِندي إحتِياج. أنا بَقدَر أعمِل كُلّو شي في المَسيح البِشَدِّدني. لَكِن عَمَلتو حاجَه جَمِيلَه لَمّا شارَكتوني في تَعبي. و إنتو، يا ناس فيلِبّي، عارفين في بِدايَة الإنجيل، لَمّا مَرَقتَ مِن مَكِدونيَّه، ما في كَنيسَه واحدَه شارَكَت مَعاي تَدّيني و تاخُد مِنّي، إلّا إنتو بَس. و لَمّا كُنتَ في تَسَالُونِيكِي كَمان، رَسَّلتو لَي مَرَّه و مَرَّتين لِإحتياجي. أنا ما بَطلُب الهَديَه، لَكِن بَطلُب الثَّمار اليَزيد لِحِسابكُم. قِبِلتَ كُلّو شي، و أنا في راحَه. أنا بِقيت مَليان مِن وَكت أخَدتَ مِن وأبفروديتس هَداياكُم الإنتو رَسَّلتوها. هي هَديَه ريحَتا طَيبَه، و ضَبيحَه مَقبولَه، اليَبسِط الله. و إلَهي بيَملا كُلّو إحتياجكُم بِحَسَب غِناهو في المَجد في المَسيح يَسُوع. و لِإلَهنا و أبونا، المَجد لِلأبَد. آمين. سَلِّمو عَلى كُل القِدِّسين في المَسيح يَسُوع. الأخوان المَعاي، يَسَلِّمو عَليهُم. كُل القِدِّسين يَسَلِّمو عَليهُم، خُصوصاً هُم المِن بيت قَيصَر. نِعمَة الرَّب يَسُوع المَسيح مَعَ روحكُم. مِن بُولُس رَسول المَسيح يَسُوع بِإرادَة الله، و تِيمُوثَاوُس الأخو. لِلأخوان القِدِّسين، المؤمِنين في المَسيح في كُولُوسِّي. نِعمَه ليكُم و سَلام مِن الله أبونا و الرَّب يَسُوع المَسيح. نَشكُر الله، أبو رَبَّنا يَسُوع المَسيح، كُلّو وَكِت لَمّا نَصَلّي فِشانكُم. عَلَشان نِحنا سِمِعنا بِإيمانكُم في المَسيح يَسُوع و مَحَبَّتكُم لِكُل القِدِّسين. فِشان الرَّجاء المَحفوظ ليكُم في السَّما، الإنتو سِمِعتو بيهو قُبّال دا في كِلمَة حَق الإنجيل، الجّا ليكُم زي في كُل الدُّنيا كَمان. و الإنجيل دا بِجيب ثِمار و بِكبَر، زي ما كان بيَعمِل بينكُم مِن اليوم لَمّا إنتو سِمِعتو و عِرِفتو نِعمَة الله بِالحَق. زي ما إتعَلَّمتو مِن أَبَفْرَاس، المَحبوب، و هو خَدّام مَعانا، و خَدّام أمين لِلمَسيح فِشانكُم. و هو خَبَّرنا بِمَحَبَّتكُم في الرّوح. بِالسَّبَب دا، نِحنا مِن اليوم لَمّا سِمِعنا عَنكُم، ما وَقَفنا نَصَلّي فِشانكُم. و نَسأل عَشان إنتو تَكونو مَليانين بِمَعرِفَة إرادَة الله في كُلّو حِكمَه و فَهم روحي. و نَصَلّي لِدا، عَلَشان تَعيشو زي ما يِستَحِق لِلرَّب، و في كُلّو حاجَه تَفَرِّحوهو، و تَجِيبو ثِمار في كُلّو عَمَل كوَيس، و تَكبَرو في مَعرِفَة الله. و تِتشَدَّدو بِكُلّو قُوَّه حَسَب قُدرَة مَجدو، عَشان تَقدَرو تَشيلو كُلّو حاجَه بِصَبر و روح طَويلَه و بِفَرَح. و تَشكُرو الأبو، العَمَلنا مُستَحِقّين عَشان نَشتَرِك في ميراث القِدِّسين في النّور. عَشان هو شالنا مِن سُلطَة الضُّلُمَّه، و جابنا لِمَلَكوت إبن مَحَبَّتو، و لينا فيهو الفِداء بِدَمّو، غُفران الخَطايا. المَسيح صورَة الله، الما بِنشوفو بِعُيونّا، و بِكر كُل الخَليقَه. عَشان الله خَلَق فيهو كُلّو حاجَه، الحاجات الفي السَّما و عَلى الأرض، النَقدَر نَشوفو و الما نَقدَر نَشوفو، إذا كان كَراسي المُلوك، ولّا قُوّات ولّا مُديرين، ولّا سَلاطين. الله خَلَق كُل الحاجات بيهو و ليهو. و هو قُبّال كُلّو حاجَه، و فيهو كُلّو حاجَه تَثبُت. و هو راس الجِّسِم، الكَنيسَه. هو البِدايَه و البِكر مِن بين المَيِّتين، عَشان هو يَكون مِتقَدِّم في كُلّو حاجَه. عَشان الله كان مَبسوط يَخَلّي كُلّو كَمالو يَعيش في الإبن، و يَصالِح بيهو كُل الحاجات لِنَفسو، إذا حاجات عَلى الأرض ولّا في السَّما. عَلَشان كِدا الله عَمَل السَّلام بِدَم صَليبو. و إنتو قُبّال دا كُنتو غَريبين عَن الله، و عُدوان ليهو في الفِكر، و بِالأعمال البَطّالَه. لَكِن هَسَّع هو صالَحكُم بِجِسمو الإنساني بِالموت. و هو عَمَل دا عَلَشان يَجيبكُم قِدّامو قِدِّيسين و بِدون عيب ولّا لوم. و هو بيَعمِل ليكُم دا إذا تِستَمِرّو في الإيمان، ثابِتين و قَوّيين و ما تَحَرِّكو مِن رَجاء الإنجيل. و إنتو سِمِعتو الإنجيل دا، الكان مُبَشَّر بيهو لِكُلّو خَليقَه تِحِت السَّما، و أنا، بُولُس، بِقيت خَدّام ليهو. و هَسَّع أنا مَبسوط بِأتعابي فِشانكُم. و أنا بَكَمِّل في جِسمي الحاجات النّاقصَه مِن ضيقات المَسيح. و بَعمِل دا فِشان جِسمو، الهو الكَنيسَه. و أنا بِقيت خَدّام حَسَب المُسؤليَه الأدّاني الله فِشانكُم. و عِندي المُسؤليَه دي عَشان أدّيكُم مَعرِفَه كاملَه في كِلمَة الله، السِّر الكان مَدسوس مِن زَمَن طَويل و مِن الأجيال، لَكِن هَسَّع بِيَّنو لِقِدِّسِينو. و الله إختار يَخَبِّر قِدِّسِينو بين الأُمَم بِغِنى مَجد السِّر دا. و هو المَسيح فيكُم، رَجاء المَجد. و نِحنا نَبَشِّر بيهو، و نَحَذِّر كُلّو زول و نَعَلِّم كُلّو زول بِكُلّو حِكمَه. و نَسَوّي دا عَلَشان نَقَدِّم كُلّو زول كامِل في المَسيح. و أنا أتعَب لِدا كَمان، و بَشتَغِل شَديد حَسَب قُدرَتو التَّشتَغِل فِيني بِقُوَّه. أنا عاوِزكُم تَعرِفو كيف أنا بَشتَغِل شَديد خَلاص عَلَشانكُم، و عَلَشان ديل الفي لاوُدِكِيَّة، و كُل الما شافو وَشّي في الجِّسِم. أنا بَعمِل دا عَلَشان قُلوبُم يِتعَزّو و بِكونو واحِد في المَحَبَّه، و بِكونو عِندَهُم كُلّو غِنى بِتاع تأكيد الفَهم. و عَلَشان كِدا يَعرِفو سِر الله، و هو المَسيح. و كُلّو كُنوز الحِكمَه و المَعرِفَه مَدسوسَه فيهو. بَقول دا ليكُم عَشان واحِد ما بِغِشّكُم بِكَلام شاطِر. و لَو أنا مُش مَعاكُم في الجِّسِم، أنا مَعاكُم بِالرّوح، و مَبسوط عَشان أشوف تَرتيبكُم و كيف إيمانكُم ثابِت في المَسيح. عَلَشان كِدا، زي ما قِبِلتو المَسيح يَسُوع الرَّب، عيشو فيهو، و خَلّو عُروقكُم يَكونو فيهو، و أبنو نُفوسكُم فيهو. و كونو ثابِتين في الإيمان، زي ما عَلَّموكُم، و زيدو في الشُّكر. خَلّو بالكُم عَلَشان أي واحِد ما يَغِشّكُم بِتَعليم حِكمَة الإنسان و الغِش الفاضي حَسَب تَرتيب النّاس، حَسَب التَّعليم الأساسي بِتاع الدُّنيا، و مُش حَسَب المَسيح. عَشان في المَسيح كُلّو كَمال الله يَعيش في شَكل الجِّسِم. و إنتو بِقيتو مَليانين فيهو. و هو راس كُلّو رياسَه و سُلطَه. و فيهو طَهَّروكُم بِطَهور مُش مَعمول بِإيد النّاس. بِطَهور المَسيح، بِقيتو حُرّين مِن طَبيعَة الخَطيَّه بِتاعَتكُم. دَفَنوكُم مَعاهو في المَعموديَّه، و قَوَّموكُم مَعاهو كَمان بِالإيمان بِعَمَل الله القَوَّمو مِن بين المَيِّتين. لَمّا كُنتو مَيِّتين في الخَطايا و جِسِمكُم ما كان مُطَهَّر، الله عَمَلكُم حَيين مَعاهو. هو غَفَر لينا كُلّو خَطايانا. و هو بَطَّل الدّين المَكتوب عَلينا في القَوانين الضِّدَّنا. و هو رَفَعو مِن الوَسِط و سَمَّرو عَلى الصَّليب. و هو خَرَّب القُوّات و السَّلاطين، و عَمَلُم مَثَل قِدّام كُل النّاس، و غَلَب عَليهُم في الصَّليب. عَلَشان كِدا، ما تَخَلّو أي واحِد يَحكُم عَليكُم في الأكِل ولّا الشُّرُب، ولّا عَن عيد ولّا شَهَر جَديد ولّا سَبِت. ديل ضُل الحاجات الجّايَه، لَكِن الحَق، هو المَسيح. ما تَخَلّو واحِد يَحكُم عَليكُم عَشان هو مَبسوط مِن التَّواضُع و الحَمد لِلمَلائكَه. الزّول زي دا يتكَلَّم كَتير عَن الحاجات الهو شافا. و عَقلو المُش روحي يَحمِد نَفسو بِأفكار بِدون فايدَه. و هو ما ماسِك بِالمَسيح الرّاس. و كُل الجِّسِم مَربوط سَوا في المَسيح بِرُباطو و مَفاصِلو. و الجِّسِم يَكبَر زي ما الله يَعمِلو يَكبَر. إذا كُنتو مُتّو مَعَ المَسيح عَن التَّعليم الأساسي بِتاع الدُّنيا، لِشِنو تَطيعو قَوانينو زي البِعيشو في الدُّنيا؟ ”ما تَلمَس! ما تَاكُل! ما تَمسِك!“ و كُل الحاجات ديل بِخسَرو لَمّا يَشتَغِلو بيهُم حَسَب أوامِر و تَعاليم النّاس. و الحاجات ديل عِندَهُم مَنظَر الحِكمَه في العِبادَه بِقوَّة النَّفس و التَّواضُع و شِدَّه لِلجِّسِم، لَكِن ما في فايدَه مِنَّهُم أبَداً عَشان يَمنَعو شَهوات الجِّسِم. عَلَشان كِدا، إذا إنتو قُمتو مَعَ المَسيح، أطلُبو الحاجات الفي فوق، المَكان الفيهو المَسيح قاعِد عَن يَمين الله. خُتّو بالكُم في الحاجات الفي فوق، و مُش عَلى الحاجات بِتاعَت الأرض. عَشان إنتو مُتّو، و حَياتكُم مَدسوسَه مَعَ المَسيح في الله. لَمّا المَسيح حَياتنا يَظهَر، في الوَكِت دا إنتو كَمان تَظهَرو مَعاهو في المَجد. عَلَشان كِدا، أكتُلو كُلّو حاجَه فيكُم البِتكون مِن الأرض: الزِّنا، و النَّجاسَه، و الشَّهوَه الشَّديدَه، و الشَّهوات البَطّالَه، و الطَّمَع، يَعني عِبادَة الأصنام. و عَلَشان الحاجات ديل، زَعل الله بِجي عَلى النّاس الما بِطيعُو. و إنتو كُنتو بِتَمشو قُبّال دا في الطُّرُق دي لَمّا كُنتو بِتعيشو فيها. لَكِن هَسَّع، أرمو مِنَّكُم كَمان كُلّو ديل: الزَّعل، و الغَضَب، و قَلب مُر، و التَّجديف، و الكَلام الوَسخان مِن خُشومكُم. و ما تَكَضِّبو بَعضَكُم عَلى بَعض، عَلَشانكُم قَلَعتو الإنسان القَديم مَعَ أعمالو. و لِبِستو الإنسان الجَّديد، المِتجَدِّد في المَعرِفَه عَلى صورَة الله الخَلَقو. هِنا ما في إغريقي ولّا يَهودي، ولّا طَهور ولّا ما طَهور، ولّا غَريب ولّا سِكِّيثِي، ولّا عَبد ولّا حُر. لَكِن المَسيح هو الكُل و هو في الكُل. عَلَشان كِدا، زي النّاس الإختارُم الله، القِدِّسين، المَحبوبين، لَبِّسو القَلِب الرَّحيم و اللُطف و التَّواضُع و الوَداعَه و الصَّبر الطَّويل. أصبُرو بَعضَكُم بَعض، و أغفِرو بَعضَكُم بَعض إذا كان واحِد عِندو شَكوى عَلى تاني. أغفِرو زي ما الرَّب غَفَر ليكُم. و فوق دا كُلّو، لَبِّسو المَحَبَّه، الهي رُباط الكَمال. و خَلّو سَلام المَسيح يَملِك في قُلوبكُم، عَلَشان هو ناداكُم لِدا في جِسِم واحِد. و كونو شاكِرين. خَلّو كِلمَة المَسيح تَعيش فيكُم بِكَترَه، و إنتو تَعَلِّمو و تَهَظِّرو بَعضَكُم بَعض بِكُلّو حِكمَه. و تَرَتِّلو بِمَزامير و تَرتيلات و حَمد روحي، و تَشكُرو الله في قُلوبكُم. و كُل البِتَعمِلو، إذا بِكِلمَه ولّا عَمَل، أعمِلو الكُل بِإسم الرَّب يَسُوع، شاكِرين الله الأبو بيهو. يا نِسوان، طيعو رُجالكُم، زي ما يِستَحِق في الرَّب. يا رُجال، حِبّو نِسوانكُم، و ما تَكونو شُداد مَعاهُم. يا أولاد، طيعو والِديكُم في كُلّو حاجَه، عَشان دا يَبسِط الرَّب. يا أبَهات، ما تَعمِلو أولادكُم مَليانين زَعل، عَلَشان يِمكِن هُم بِكونو بِدون شَجاعَه. يا خَدّامين، طيعو أسيادكُم حَسَب الجِّسِم في كُلّو حاجَه. و أعمِلو كِدا مُش لَمّا هُم يَعاينو ليكُم بَس عَشان تَبسِطوهُم. لَكِن إشتَغِلو بِإخلاص القَلِب و مِن خوف لِلرَّب. و كُل البِتَعمِلو، أعمِلوهو مِن القَلِب زي لِلرَّب، مُش لِلنّاس. عَلَشان إنتو تَعرِفو أنَّكُم بِتاخدو ميراث مِن الرَّب زي أُجرَه، عَشان إنتو بِتَخدِمو الرَّب المَسيح. و أي واحِد العَمَل الذَّنب، هو بِرَجِّع ليهو زي ما هو عَمَل. و ما في فارِق بين النّاس. يا أسياد، أدّو لِلخَدّامين الشّي العَديل، و ما تَعمِلو فارِق بِينُم، عَشان إنتو بِتَعرِفو عِندَكُم سَيِّد في السَّما كَمان. إستَمِرّو في الصَّلاه، و أحرِسو فيها بِالشُّكر. و صَلّو سَوا فِشانّا كَمان، عَشان الله يَفتَح لينا باب لِلكِلمَه، عَشان نِتكَلَّم بِسِر المَسيح. و بِالسَّبَب دا أنا مَربوط بِجَنازِير. صَلّو عَشان أبَشِّر بِكَلام باين زي ما لازِم أتكَلَّم. عيشو بِحكمَه مِن جِهَة النّاس المِن بَرَّه، و إشتَغِلو كوَيس بِكُلّو فُرصَه. خَلّو كَلامكُم دايماً يَكون بِنِعمَه، زي الأكل الفيهو مِلِح، عَلَشان تَعرِفو كيف تَرُدّو كوَيس عَلى كُلّو واحِد. تِيخِيكُس بِخَبِّركُم عَن أحوالي كُلَّها. هو أخو مَحبوب و خَدّام أمين و خَدّام مَعانا في الرَّب. و أنا رَسَّلتو ليكُم لِلسَّبَب دا نَفسو، عَشان إنتو بِتَعرِفو عَن أحوالنا و عَشان هو يَعَزي قُلوبكُم. و هو بِجي مَعَ أُونِسِيمُوس، الأخو الأمين، المَحبوب، و هو واحِد مِنَّكُم. و هُم بِخَبِّروكُم بِكُل الحَصَل هِنا. وَأَرِسْتَرْخُس، المَحبوس مَعاي، يَسَلِّم عَليكُم، و مَرْقُس كَمان و هو إبن أُخُت بَرْنَابَا. و إنتو قِبِلتو أوامِر عَنّو، و إذا جا ليكُم، أقبَلوهو. و يَسُوع، الإسمو يُستُس، يَسَلِّم عَليكُم. و مِن المُطَهَّرين، ديل بَس بِشتَغِلو مَعاي لِمَلَكوت الله. و هُم بِقو تَعزيَه لَي. و أَبَفْرَاس يَسَلِّم عَليكُم، و هو مِنَّكُم، و خَدّام يَسُوع المَسيح. هو دايماً بِصَلّي بِكُلّو قُوَّتو فِشانكُم، عَلَشان تَثبُتو كامِلين و بِتأكيد تَمام في كُلّو إرادَة الله. و أنا أشهَد ليهو إنّو يَتعَب كَتير فِشانكُم و فِشان النّاس الفي لاوُدِكِيَّةَ و النّاس الفي هِيرَابُولِيس. لُوقَا، الحَكيم المَحبوب، يَسَلِّم عَليكُم، و ديماس كَمان. سَلِّمو عَلى الأخوان الفي لاوُدِكِيَّةَ، و عَلى نِمفا و عَلى الكَنيسَه في بيتا. و لَمّا هُم قَرو ليكُم الجَّواب دا، شوفو إنَّهُم يَقروهو في كَنيسَة ناس لاوُدِكِيَّةَ كَمان. و إنتو كَمان أقرو الجَّواب مِن لاوُدِكِيَّةَ. و قولو لِلأَرْخِبُّس: ”شوف الخِدمَه الأنتَ قِبِلتا مِن الرَّب، عَشان تَكَمِّلا.“ أنا، بُولُس، أكتِب السَّلام دا بِإيدي. إتزَكَّرو جَنازِيري. النِّعمَه مَعاكُم. مِن بُولُس و سِلْوَانُس و تِيمُوثَاوُس لِكَنيسَة أهل تَسَالُونِيكِي في الله الأبو، و الرَّب يَسُوع المَسيح. نِعمَه ليكُم و سَلام. نَشكُر الله كُلّو وَكِت لِكُلُّكُم، لَمّا نِتكَلَّم عَنكُم في صَلَواتنا، و دايماً نِزَكَّر عَمَل إيمانكُم و تَعب مَحَبَّتكُم و صَبر رَجاءكُم في رَبَّنا يَسُوع المَسيح قِدّام الله أبونا. يا أخوان المَحبوبين مِن الله، بِنَعرِف إن الله إختاركُم. عَشان إنجيلنا ما جا ليكُم بِالكَلام بَس، و لَكِن بِالقُوَّه كَمان، و بِالرّوح القُدُس و بِتأكيد شَديد. بِتَعرِفو كيف مَشينا بينكُم فِشانكُم. و إنتو عَمَلتو زيَنا و زي الرَّب، عَشان قِبِلتو الكِلمَه في ضيق كَتير، بِفَرَح الرّوح القُدُس. عَشان كِدا بِقيتو مَثَل لِكُل المؤمِنين في مَكِدونيَّه و في أَخَائِيَه. عَلَشان إنتو خَبَّرتو بِكِلمَة الرَّب، مُش في مَكِدونيَّه و أَخَائِيَه بَس، و لَكِن إيمانكُم بِالله مَشى لِكُلّو مَكان. عَشان كِدا ما ضَروري نَقول أي شي. عَلَشان هُم نُفوسُم يَخَبِّرو كيف قِبِلتونا، و كيف رَجَعتو لِلَّه مِن الأصنام عَشان تَخدِمو الله الحَي الحَقيقي. و يَخَبِّرو كيف إنتو تِستَنّو إبنو مِن السَّما، هو القَوَّمو الله مِن الموت، يَسُوع اليَخَلِّصنا مِن الغَضَب الجّاي. عَشان إنتو نُفوسكُم بِتَعرِفو، يا أخوان، أن زيارَتنا ما كانَت بِدون فايدَه. و تِعِبنا قَبل كِدا، و شَتَمونا في فيلِبّي، زي ما إنتو عارفين. لَكِن شَجَّعنا في إلَهنا أن نَكَلِّمكُم بِإنجيل الله، و لَو هُم قاوَمونا شَديد. أدّيناكُم الشَّجاعَه، و دا ما جا مِن غَلَط، ولّا مِن فِكر وَسخان، ولّا بِغِش. و لَكِن زي ما الله كان مَبسوط مِنَّنا، و أدانا مسؤليَة الإنجيل، كِدا نِتكَلَّم. و بِنَعمِل دا، ما عَشان نَبسِط النّاس، لَكِن عَشان نَبسِط الله اليَجَرِّب قُلوبنا. و زي ما تَعرِفو، ما شَكَرناكُم بِالكَضب أبَداً، ولّا بِالكَلام اليَدِس الطَّمَع. الله شاهِد. و لَمّا كان مُمكِن لينا ناخُد سُلطَة رُسُل المَسيح، ما طَلَبنا شُكر مِن النّاس، ولّا مِنَّكُم ولّا مِن التّانيين. و لَكِن كُنّا لُطاف في وَسِطكُم زي أُم تَرَبّي أولادا. كِدا، عَشان مَحَبَّتنا ليكُم، كُنّا رَضيانين نَدّيكُم مُش إنجيل الله بَس، و لَكِن نُفوسنا كَمان، عَشانكُم بِقيتو مَحبوبين لينا. و إنتو تِتزَكَّرو، يا أخوان، الشُّغل بِتاعنا و التَّعب. إشتَغَلنا بِاللّيل و بِالنَّهار عَشان ما نَكون حِمِل عَلى أي واحِد مِنَّكُم وَكِت ما بَشَّرنا بِإنجيل الله. إنتو شاهِدين و الله كَمان، كيف مَشينا بِقَداسَه و بِبِر و بِدون لوم بينكُم إنتو المؤمِنين. عَشان تَعرِفو كيف كُنّا نَعَزّي كُلّو واحِد مِنَّكُم، زي أبو لِأولادو، و كُنّا نَشَجِّعكُم، و كُنّا نَوَرّيكُم كيف تَعيشو الحَياة المُستَحِقَّه لِلَّه، و هو اليَناديكُم لِمَلَكوتو و مَجدو. و نِحنا كَمان نَشكُر الله دايماً لِلسَّبَب دا. لَمّا أخَدتو كِلمَة الله السِّمِعتو مِنَّنا، قِبِلتوها مُش زي كِلمَة النّاس، لَكِن زي ما هي بِالحَقيقَه، كِلمَة الله. و الكِلمَه دي تَشتَغِل فيكُم، إنتو المؤمِنين كَمان. عَلَشان إنتو، يا أخوان، بِقيتو زي كَنايس الله الفي اليَهُودِيَّه الفي المَسيح يَسُوع. عَشان إتحَمَّلتو نَفس الحاجات مِن ناس بَلَدكُم زي ما هُم إتحَمَّلو مِن اليَهود. الكَتَلو الرَّب يَسُوع و الأنبياء كَمان، و طَرَدونا نِحنا. و هُم ما يَبسِطو الله، و يَقاوِمو كُل النّاس. و يَمنَع نَكَلِّم الأُمَم عَشان بِكونو مُخَلَّصين، عَشان يَكَمِّلو خَطاياهم كُلّو وَكِت. و لَكِن غَضَب الله جا عَليهُم بِدون نِهايَه. و لَكِن يا أخوان، لَمّا كُنّا بَعيدين مِنَّكُم لِوَكِت قِصَير، بِالوَش، مُش بِالقَلب، جَرَّبنا أكتَر بِمَحَبَّه كَتيرَه أن نَشوفكُم وَش لِوَش. عَشان كُنّا عاوزين نَجي ليكُم — أنا، بُولُس، مَرَّه و مَرَّه تانيَه — و لَكِن الشّيطان مَنَعنا. و رَجاءنا شِنو و فَرَحنا و تاج فَخرِنا قِدّام رَبَّنا يَسُوع لَمّا يَجي؟ مُش إنتو؟ عَشان إنتو نُفوسكُم مَجدنا و فَرَحنا. عَلَشان كِدا، لَمّا ما قِدِرنا عَليهو وَكِت زِيادَه، كُنّا رَضيانين نِستَنّا في أَثِينَا بَرانا. و رَسَّلنا تِيمُوثَاوُس، أخونا و خَدّام الله مَعانا في إنجيل المَسيح، عَشان يَشَدِّدكُم في إيمانكُم و يَشَجِّعكُم، عَشان واحِد ما يَرجَع بِسَبَب الضّيقات دي. إنتو نُفوسكُم تَعرِفو نِحنا مُختارين لِدا. عَشان لَمّا كُنّا مَعاكُم، قُلنا ليكُم مِن قُبّال هُم ماشين يَطرُدونا. و حَصَل كِدا زي ما تَعرِفو. عَلَشان كِدا، لَمّا ما قِدِرتَ عَليهو، رَسَّلتَ فِشان أعرِف إيمانكُم. أنا كُنتَ خايِف أن المُجَرِّب كان جَرَّبكُم بِأي طَريق و شُغُلنا بِكون بِدون فايدَه. و لَكِن هَسَّع تِيمُوثَاوُس جا لينا مِنَّكُم، و بَشَّرنا بِإيمانكُم و مَحَبَّتكُم. و هو خَبَّرنا كيف إنتو دايماً تِتذَكَّرونا بِلُطف، و عاوِزين بِشِدَّه تَشوفونا. و نِحنا كَمان عاوِزين بِشِدَّه نَشوفكُم. عَلَشان كِدا، عِندَنا راحَه في قُلوبنا، يا أخوان، في خُصوصكُم، في كُلّو ضيقنا و تَعبنا بِسَبَب إيمانكُم. عَشان هَسَّع نَعيش، إذا تِستَمِرّو شَديدين في الرَّب. كيف نَقدَر نَشكُر الله كِفايَه عَشانكُم لِكُل الفَرَح النَّفرَح بيهو عَشانكُم قِدّام إلَهنا. نَصَلّي بِاللّيل و بِالنَّهار بِشِدَّه أن نَشوف وشوشكُم و نَكَمِّل التَحتاجو ليهو في إيمانكُم. و إلَهنا نَفسو، أبونا، و رَبَّنا يَسُوع المَسيح يَقودنا في الطَّرِيق ليكُم. و الرَّب يَزيدكُم زِيادَه و زِيادَه في المَحَبَّه بَعضَكُم مَعَ بَعض و لِكُل النّاس، زي ما نِحنا نَحِبّكُم كَمان. عَشان يَشَدِّد قُلوبكُم بِدون لوم في القَداسَه قِدّام الله أبونا لَمّا رَبَّنا يَسُوع المَسيح بِجي مَعَ كُلّو قِدِّسِينو. في الآخِر، يا أخوان، إتعَلَّمتو مِنَّنا كيف إنتو لازِم تَعيشو و تَبسِطو الله. و زي ما كُنتو تَعيشو كِدا، هَسَّع نَطلُب ليكُم و نَشَدّشدكُم في الرَّب يَسُوع تَعمِلو زِيادَه و زِيادَه. عَشانكُم بِتَعرِفو الأوامِر الأدّيناكُم بِالرَّب يَسُوع. عَشان إرادَة الله هي قَداسَتكم أن تَكونو بَعيدين مِن الزِّنا. عَشان كُلّو واحِد مِنَّكُم لازِم يَعرِف كيف يَحفَظ زوجَتو بِالقَداسَه و الإحتِرام، و ما في شَهوَه شَرّيرَه زي الأُمَم الما يَعرِفو؛ الله. عَشان واحِد ما يَظلِم و يَغِش أخوهو في الحاجَه دي. عَشان الرَّب، هو اليَنتَقِم لِكُل اليَعمِلو دا، زي ما قُلنا ليكُم مِن قَبِل و حَزَّرناكُم. عَشان الله ما نادانا لِلنَّجاسَه، لَكِن في القَداسَه. عَلَشان كِدا، اليَرفُض دا ما يَرفُض النّاس لَكِن الله، الأدّانا روحو القُدّوس كَمان. لَكِن بِخُصوص المَحَبَّه لِلأخوان، إنتو ما مُحتاجين أن أكتِب ليكُم عَن دي. عَشان نُفوسكُم مِتعَلِّمين مِن الله أن تَحِبّو بَعضَكُم بَعض. إنتو بِتَعمِلو كِدا كَمان لِكُل الأخوان الفي كُلّو مَكِدونيَّه. و أطلُب ليكُم، يا أخوان، تَزيدو في دا أكتَر و أكتَر. خَلّو قَصِدكُم يَكون أن تَعيشو بِالسَّلام، و تَخَلّو بالكُم لِحاجاتكُم المَخصوص، و تَشتَغِلو بِإيديكُم، زي ما أمَرناكُم مِن قَبِل. عَشان تَعيشو بِتَرتيب مِن جِهَة المِن بَرَّه، و ما يَكون ليكُم إحتِياج لِأي شي. لَكِن ما عاوِزينكُم تَكونو بِدون مَعرِفَه، يا أخوان، عَن الراقِدين، عَلَشان ما تَحزَنو زي التّانيين الما عِندَهُم رَجاء. عَشان إذا نِآمِن أن يَسُوع مات و قام، كِدا نآمِن أن الله بِجيب الراقِدين بِيَسُوع مَعاهو كَمان. و نَقول دا ليكُم بِكِلمَة الرَّب. نِحنا الحَيين، القاعِدين لِغايَة ما الرَّب بِجي، ما نِتقَدَّم عَلى النايمين. عَشان الرَّب نَفسو بِنزِل مِن السَّما، و عِندو كِلمَة الأمر، و صوت رَئيس مَلائكَه، و بوق الله. و المَيِّتين في المَسيح بِقومو في الأوَّل. بَعَد داك نِحنا الحَيين القاعِدين بياخُدونا مَعاهُم في السَّحاب عَشان نَقابِل الرَّب في الهَوا. و كِدا بِنكون مَعَ الرَّب دايماً. عَشان كِدا عَزّو بَعضَكُم بَعض بِالكَلام دا. و لَكِن عَن الوَكِت و الفُصول، يا أخوان، إنتو ما مُحتاجين أن أكتِب ليكُم. عَشانكُم إنتو تَعرِفو بِالتّأكيد إنّو يوم الرَّب بِجي زي الحَرامي بِاللّيل. لَمّا النّاس يَقولو: ”في سَلام و ما في خَطَر،“ في الوَكِت داك خَراب بِجيكُم عَلى غَفلَه زي الوَجَع الشَّديد لِلحامِل. و هُم ما بِقدَرو يَهرُبو. لَكِن إنتو، يا أخوان، ما في الضُّلُمَّه، و اليوم داك ما بِجي عَليكُم زي الحَرامي. فِشان كُلُّكُم أولاد النّور و أولاد النَّهار. نِحنا مُش مِن اللّيل ولّا الضُّلُمَّه. عَلَشان كِدا، ما نَنوم زي التّانيين، لَكِن خَلّونا نحرِس و نَكون عاقِلين. عَشان البِنومو، بِاللّيل بِنومو، و البِكونو سَكرانين، بِاللّيل بِكونو سَكرانين. لَكِن عَشان نِحنا مِن النَّهار، خَلّونا نَكون عاقِلين، و نَلبَس دِرِع الإيمان و المَحَبَّه، و بَرنيطَة، الهي رَجاء الخَلاص. عَشان الله ما إختارنا لِلغَضَب، لَكِن عَشان نَحَصِّل عَلى الخَلاص بِرَبَّنا يَسُوع المَسيح. هو مات فِشانّا عَشان إذا نحرِس ولّا نَنوم، نَقدَر نَعيش مَعاهو. عَشان كِدا، عَزّو بَعضَكُم بَعض، و ساعِدو كُلّو واحِد التّاني، زي ما بِتَعمِلو كَمان. لَكِن نَطلُب ليكُم، يا أخوان، أن تَعرِفو اليَتعَبو بينكُم، و يَقودوكُم في الرَّب، و يَحَزِّروكُم. و نَسألكُم أن تَحتَرِموهم كَتير خَلاص في المَحَبَّه عَلَشان عَمَلُم. عيشو بِالسَّلام بَعضَكُم بَعض. و نَطلُب ليكُم، يا أخوان، حَزِّرو النّاس الكَسلانين، و شَدِّدو الخايفين، ساعِدو الضَّعيفين، و أصبُرو عَلى الكُل. شوفو عَشان واحِد ما يَرَجِّع لِلتاني الشَّر بِالشَّر. لَكِن كُلّو وَكِت أتبَعو الخير بَعضَكُم مَعَ بَعض و مَعَ الكُل. أفرَحو كُلّو وَكِت. صَلّو و ما تَقيفو. أشكُرو في كُلّو شي، عَلَشان دي إرادَة الله فِشانكُم في المَسيح يَسُوع. ما تَوَقِّفو عَمَل الرّوح. ما تَقولو النُّبوات ما مُهِمَّه. إمتَحِنو كُلّو حاجَه. و أمسِكو بِالكوَيس. كونو بَعيدين مِن كُلّو نوع الشَّر. و إلَه السَّلام نَفسو يَقَدِّسكُم بِالتَّمام، و يَحفَظ روحكُم و نَفسَكُم و جِسِمكُم كَامِلَه و بِدون لوم لَمّا رَبَّنا يَسُوع المَسيح بِجي. البِناديكُم، هو أمين، و هو بيَعمِل دا كَمان. يا أخوان، صَلّو عَشانّا. سَلِّمو عَلى كُل الأخوان بِسَلام مُقَدَّسَه. آمُركُم بِالرَّب يَسُوع المَسيح أن تَقرو الجَّواب دا لِكُل الأخوان. نِعمَة رَبَّنا يَسُوع المَسيح مَعاكُم. آمين. مِن بُولُس و سِلْوَانُس و تِيمُوثَاوُس لِكَنيسَة أهل تَسَالُونِيكِي في الله الأبو و الرَّب يَسُوع المَسيح. نِعمَه ليكُم و سَلام مِن الله الأبو و الرَّب يَسُوع المَسيح. لازِم نَشكُر الله كُلّو وَكِت فِشانكُم، يا أخوان، زي ما يِستَحِق لينا، عَلَشان إيمانكُم بِيَكبَر كَتير جِدّاً، و مَحَبَّة كُلّو واحِد مِنَّكُم بَعضَكُم لِبَعض تَزيد. عَلَشان كِدا، نِحنا نُفوسنا نَفخِّر بيكُم في كَنايس الله فِشان صَبرَكُم و إيمانكُم في كُلّو طُرودكُم و أتعابكُم الإنتو تِتحَمَّلوها. عَشان دا يَبَيِّن حُكم الله العَديل. و عَشان كِدا، يَعمِلكُم مُستَحِقّين لِمَلَكوت الله، الإنتو بِتَتعَبو فِشانو كَمان. عَشان الله عَديل، و هو بِجيب التَّعب عَلى النّاس البِجيبو ليكُم تَعب. و ليكُم البِتَتعَبو، هو بِدّيكُم راحَه مَعانا في ظُهور الرَّب يَسُوع مِن السَّما في نار مَوَلَّعَه مَعَ مَلائكَتو القَوّيَّه. هو يَدّي جِزا لِلنّاس الما بِيَعرِفو الله، و ما بِطيعُو إنجيل رَبَّنا يَسُوع. و الجِّزا بِتاعُم هو خَراب أبَدي، و يَفَرِّقوهُم مِن وَش الرَّب و مِن مَجد قُوَّتو، لَمّا هو بِجي عَشان يَقبَل المَجد مِن قِدِّسِينو. و في اليوم داك، المؤمِنين بِدّوهو إحتِرام بِفَرَح. و إنتو كَمان بِتكونو مَعاهُم، عَلَشان إنتو صَدَّقتو شَهادَتنا ليكُم. عَلَشان كِدا، نِحنا دايماً نَصَلّي فِشانكُم، عَشان الله يَعمِلكُم مُستَحِقّين لِإختياراتو، و يَتِم بِقُوَّتو كُلّو فِكرَه كوَيسَه و عَمَل الإيمان. و نَصَلّي كَمان عَشان إسم رَبَّنا يَسُوع بِقبَل مِنَّكُم المَجد، و إنتو بِتَقبَلو مَجد مِنّو، حَسَب نِعمَة إلَهنا و الرَّب يَسُوع المَسيح. و عَشان رَبَّنا يَسُوع المَسيح بِجي و نِحنا نَجتَمِع ليهو، نَسألكُم، يا أخوان، ما تَخَلّو فِكرَكُم بِتغَيَّر و لا تِتحَيَّرو مِن ديل البِقولو يوم الرَّب جا خَلاص. حَتّى إذا الخَبَر دا كان مِن روح ولّا مِن كَلام، ولّا مِن جَواب هُم بِقولو هو جا مِنَّنا. ما تَخَلّو أي واحِد يَغِشّكُم بِأي طَرِيقَه. اليوم داك ما بِجي إلّا النّاس يَرجَعو عَن الإيمان في الأوَّل و إنسان الخَطيَّه، إبن الخَراب يَظهَر. هو يَقاوِم و يَرفَع نَفسو فوق كُلّو حاجَه اليَسَموها إلَه ولّا يَعبُدوها، حَتّى هو يَقعُد في هيكَل الله و يَوَرّي نَفسو زي ما هو إلَه. ما تِتزَكَّرو، و أنا لِسَّع كُنتَ مَعاكُم، كُنتَ بَقول ليكُم الحاجات دي؟ و إنتو بِتَعرِفو الحاجَه البِتَمنَعو هَسَّع حَتّى يَظهَر في وَكتو. عَشان سِر الخَطيَّه بِشتَغِل هَسَّع، حَتّى اليَمنَع ظُهور إبن الخَراب، يَروح مِن الوَسط. و بَعَد دا، يَظهَر إنسان الخَطيَّه. و الرَّب يَسُوع بِغلِبو بِنَفَس خَشمو، و بِخَرِّبو بِمَجدو لَمّا بِجي. و إنسان الخَطيَّه بِجي بِعَمَل الشّيطان و بِكُلّو قُوَّه، و عَلامات و عَجايِب كَضب، و بِكُلّو غِش الشَّر لِلبِهلِكو. عَلَشان هُم ما قِبلو مَحَبَّة الحَق عَشان يَخلَصو. و عَلَشان كِدا، الله يَرَسِّل ليهُم عَمَل الكِضِب، حَتّى يَصَدِّق، الكِضِب، و عَلَشان كُل الما صَدَّقو الحَق لَكِن فِرحو بِالخَطيَّه، يِتحَكَمو. و لَكِن نِحنا لازِم نَشكُر الله دايماً فِشانكُم، يا أخوان المَحبوبين مِن الرَّب. و نَشكُر الله عَشان هو إختاركُم مِن البِدايَه عَشان تَخلَصو بِالقَداسَه المِن الرّوح و بِالإيمان بِالحَق. و هو ناداكُم لِدا بِإنجيلنا، عَشان تَقبَلو مَجد رَبَّنا يَسُوع المَسيح. عَلَشان كِدا، يا أخوان، كونو ثابِتين و أمسِكو التَّعاليم الإتعَلَّمتوها، إذا بِكَلامنا ولّا بِجَوابنا. و رَبَّنا يَسُوع المَسيح نَفسو، و الله أبونا، الحَبّانا و أدّانا بِنِعمَتو شَجاعَه أبَديَّه و رَجاء كوَيس، يَشَجِّع قُلوبكُم و يَثَبِّتكُم في كُلّو عَمَل و كَلام كوَيس. في الآخِر، يا أخوان، صَلّو فِشانّا، عَلَشان كِلمَة الرَّب تَجري و تِتمَجَّد زي ما عَمَلَت مَعاكُم كَمان. و صَلّو عَشان الله بِخَلِّصنا مِن النّاس البَطّالين و روسينُم قَوّيين. عَلَشان مُش كُل النّاس عِندَهُم الإيمان. لَكِن الرَّب أمين، و هو بِثَبِّتكُم و بِحفَظكُم مِن الشَّرّير. و عِندَنا تأكيد في الرَّب إنَّكُم بِتَعمِلو زي ما نَدّيكُم أمر و إنتو تِستَمِرّو تَعمِلوهو كَمان. و الرَّب يَقود قُلوبكُم لِمَحَبَّة الله و لِصَبر المَسيح. و نَدّيكُم أمر، يا أخوان، بِإسم رَبَّنا يَسُوع المَسيح، كونو بَعيدين مِن كُلّو أخو البِكون كَسلان و الما بِعِيش حَسَب التَّعليم القِبِلتوهو مِنَّنا. عَشان إنتو نُفوسكُم بِتَعرِفو كيف لازِم تَعمِلو زي ما نِحنا نَعمِل. عَشان نِحنا ما كُنّا كَسلانين لَمّا كُنّا مَعاكُم، و ما أكَلنا عيش واحِد زول مَجّاناً. لَكِن كُنّا نَشتَغِل بِتَعب شَديد ليل و نَهار، عَلَشان ما نَكون حِمِل لِأي واحِد مِنَّكُم. و عَمَلنا كِدا، مُش عَشان ما عِندَنا سُلطَه، لَكِن عَشان نَعمِل نُفوسنا مَثَل ليكُم عَشان تَعمِلو زيَنا. عَلَشان لَمّا كُنّا مَعاكُم، أمَرناكُم بِدا: ”إذا كان أي واحِد ما عاوِز يَشتَغِل، هو ما بياكُل.“ عَشان نَسمَع في ناس بينكُم كَسلانين و ما بِشتَغِلو أبَداً، لَكِن بِكونو مَشغولين بِالما بِخُصُّم. و نَدّي أمر لِلنّاس زي ديل بِإسم الرَّب يَسُوع المَسيح. و نَطلُب مِنَّهُم يَشتَغِلو بِسَلام و ياكُلو العيش بِتاعُم. و إنتو، يا أخوان، ما تَكونو تَعبانين مِن عَمَل الخير. إذا كان أي واحِد ما بِطيع كَلامنا في الجَّواب دا، خَلّو بالكُم مِنّو. ما تَقعُدو مَعاهو، عَشان هو بِكون خَجلان. لَكِن ما تَحسِبوهو زي عَدو، لَكِن حَذِّروهو زي أخو. و رَب السَّلام نَفسو يَدّيكُم السَّلام كُلّو وَكِت و بِكُلّو طَرِيقَه. الرَّب يَكون مَعَ كُلُّكُم. أنا، بُولُس، بَكتِب السَّلام دا بِإيدي. و دي العَلامَه في كُلّو جَواباتي. كِدا أنا بَكتِب. نِعمَة رَبَّنا يَسُوع المَسيح مَعَ كُلُّكُم. مِن بُولُس، رَسول المَسيح يَسُوع بِحَسَب أمر الله مُخَلِّصنا و المَسيح يَسُوع رَجاءنا، لِتِيمُوثَاوُس وَلَدي بِالحَق في الإيمان: نِعمَه و رَحمَه و سَلام مِن الله الأبو و المَسيح يَسُوع رَبَّنا. إستَنّى في أفَسُس زي ما طَلَبتَ ليك لَمّا كُنتَ ماشي لِمَكِدونيَّه. أنا عَاوِزَك تأمر بَعَض مِن النّاس أن ما يَعَلِّمو تَعليم تاني، ولّا يَخَلّو بالُم لِحِكايات ولّا يَفَتِّشو عَلى الأجيال بِدون نِهايَه. الحاجات ديل يَجيبو الأسئلَه بَدَل مِن تَرتيب الله بِالإيمان. و نِهايَة الأمر مَحَبَّه مِن قَلِب نَضيف و ضَمير كوَيس و إيمان مُخلِص. و بَعَض مِن النّاس وَدَّرو مِن الحاجات دي و إتلَفَتو لِكَلام بِدون مَعنى. و هُم عاوزين يَكونو مُعَلِّمين القانون، و ما يَفهَمو الحاجَه البِقولو ولّا اليَشهَدو ليهو. و بِنَعرِف القانون طَيب، إذا أي واحِد يِستَعمَلو زي الواجِب. و بِنَعرِف دا، القانون ما مَعمول لِلبارين، لَكِن لِلخاطيين و الما بِطيعُو، لِلبَطّالين و المُذنِبين، و لِلبِدون قَداسَه و البِدون دين، لِكاتِلين الأبَهات و الأُمَّهات، و كاتِلين النّاس. القانون لِليَعمِلو الزِّنا و المِخَنِّسين، و لِلبِسرِقو النّاس، لِلكَضّابين، و البِحلِفو بِالكِضِب. و القانون لِأي شي تاني البِقاوِم التَّعليم الصَّحيح، البِكون حَسَب إنجيل مَجد الله المُبارَك، الهو أدّاني زي أمانَه. و أنا أشكُر المَسيح يَسُوع رَبَّنا الأدّاني قُوَّه، عَشان هو حَسبني أمين و إختارني لِخِدمَتو. مَعَ إنّي كُنتَ بَجَدِّف و بَطرُد و بَشتِم مِن قُبّال. و لَكِن لِقيت رَحمَه عَلَشان أنا عَمَلتَ داك لَمّا كُنتَ بِدون مَعرِفَه و ما عِندي إيمان. و نِعمَة رَبَّنا زادَت كَتير خَلاص مَعَ الإيمان و المَحَبَّه الفي المَسيح يَسُوع. و الكِلمَه دي أمينَه و مُستَحِقَّه لِكُلّو قُبول، إنّو المَسيح يَسُوع جا لِلدُّنيا عَشان يَخَلِّص الخاطيين. و أنا أوَّل واحِد فيهُم. لَكِن بِالسَّبَب دا قِبِلتَ رَحمَه، عَشان فِيني، أنا الأوَّل، يَسُوع المَسيح يَوَرّي كُلّو صَبرو زي مَثَل لِلبِآمِنو بيهو لِلحَياة الأبَديَّه. و لِلمَلِك الأبَدي، الما بِموت، الما نَقدَر نَشوفو، الإلَه الوَحيد، ليهو الإحتِرام و المَجد لِلأبَد. آمين. و دا الأمر الأنا بَدّيك، يا وَلَدي تِيمُوثَاوُس. و هو حَسَب النُّبوات الإتكَلَّمَت عَنَّك مِن قُبّال. عَلَشان كِدا بِمُساعَدَتُم، تَحارِب الحَرب الكَويس، و تَمسِك بِالإيمان و الضَّمير الطَّيب. بَعض مِن النّاس رَفَضو ديل، و مُركَب إيمانُم إنكَسَرَت. و مِنَّهُم هِمِنَايُوس و الإِسْكَنْدَر الأنا سَلَّمتَهُم لِلشّيطان عَشان يِتعَلَّمو أن ما يَجَدِّفو. و بَطلُب قَبل كُلّو حاجَه، تَقَدِّمو طَلَبات و صَلَوات و وَساطَه و شُكر فِشان كُل النّاس، عَشان المُلوك و كُل العِندَهُم سُلطَه عَلَشان نَعيش حَياة بِسَلام و سُكوت في كُلّو خوف الله و قَداسَه. عَشان دا كوَيس و مَقبول قِدّام الله مُخَلِّصنا. و هو عاوِز كُل النّاس يَكونو مُخَلَّصين و يَجو لِمَعرِفَة الحَق. عَشان في الله واحِد و وَسيط واحِد بين الله و النّاس، و هو الإنسان المَسيح يَسُوع، الأدّا نَفسو فِداء عَن كُل النّاس، و دي الشِّهادَه في وَكتو الموافِق. و لِلقَصِد دا كُنتَ مُختار أكون مُبَشِّر و رَسول. (أنا بَقول الحَق و ما بَكَضِّب.) و أنا مُعَلِّم لِلأُمَم في الإيمان و الحَق. عَلَشان كِدا، أنا بَدور الرُّجال في كُلّو مَحَل يَصَلّو و يَرفَعو إيدينُم القُدُّوس، بِدون زَعل ولّا شَكَل. و زي دا بَدور النِّسوان يَلبَسو بِتَرتيب موافِق، بِأدَب و عَقل، مُش بِشَعر مُضَفَّر و الدَّهَب ولّا لولي ولّا هِدوم غالي. لَكِن يَلبَسو الأعمال الكوَيسَه زي ما يِستَحِق لِلنِّسوان البِقولو هُم يَخافو الله. خَلّي المَرَه تِتعَلَّم في سُكوت بِكُلّو تَواضُع. و أنا ما بَدّي إذِن لِلمَرَه تَعَلِّم ولّا تَكون رَئيس عَلى الرّاجِل، لَكِن هي لازِم تَسكُت. عَشان الله خَلَق آدَم في الأوَّل، بَعدين حَوا. آدَم ما كان مَغشوش، لَكِن المَرَه كانَت مَغشوشَه، و بِقَت خَاطيَه. لَكِن هي بِتَخلَص بِوِلادَة الأولاد إذا تِستَمِر في الإيمان و المَحَبَّه و القَداسَه مَعَ مَسِك النَّفس. الكِلمَه دي أمينَه: إذا أي واحِد يَطلُب يَكون مُلاحِظ، هو عاوِز عَمَل كوَيس. و المُلاحِظ لازِم يَكون بِدون عيب، راجِل عِندو مَرَه واحدَه، ماسِك نَفسو، عاقِل، مُحتِرَم، بِفتَح بيتو لِلغَريبين، بِقدَر يَعَلِّم. هو ما بِكون سَكران، ما بِضرُب لَكِن بِكون لَطيف، مُش شاكال ولّا يَحِب القُروش. هو لازِم يَرَتِّب بيتو كوَيس، و يَعمِل أولادو يَطيعوهو بِكُلّو إحتِرام. عَلَشان إذا واحِد ما بِيَعرِف كيف يَرَتِّب بيتو كيف بِقدَر يَهتَم بِكَنيسَة الله؟ و لَكِن هو ما لازِم يَكون جَديد في الإيمان، عَشان يِمكِن يَشكُر نَفسو و يَقَع في حُكم إبْلِيس. و كَمان هو يَكون عِندو شَهادَه كوَيسَه مِن النّاس الفي بَرَّه، عَلَشان ما يَقَع في لوم و فَخ إبْلِيس. و زي دا كَمان، خَدّامين الكَنيسَه لازِم يَكونو رُجال مُحتَرمين، بِدون كِضِب في كَلامُم، ما بِكونو سَكرانين، ما طَمّاعين في قُروش وَسخانَه. و هُم قاعِدين يَمسِكو سِر الإيمان بِضَمير نَضيف. و لازِم يَجَرِّبوهُم في الأوَّل. و بَعَد دا، يَخَلّوهُم يَخدِمو إذا لِقوهُم بِدون لوم. و زي دا كَمان، خَلّي نَسوانُم يَكونو مُحتَرمات، ما بِشتِمو، يَمسِكو نُفوسُم، و أمينات في كُلّو حاجَه. خَدّام الكَنيسَه لازِم يَكون راجِل عِندو مَرَه واحدَه، و بِقدَر يَرَتِّب أولادو و بيتو كوَيس. عَشان خَدّامين الكَنيسَه اليَخدِمو كوَيس، ياخدو لِنُفوسُم مَحَل طَيب و تأكيد كَتير في الإيمان في المَسيح يَسُوع. أنا بَكتِب ليك الحاجات دي، و لَو عِندي رَجاء بَجي ليك بَعَد شوَيَه. لَكِن إذا إتأخَّرتَ، إنتَ بِتَعرِف كيف النّاس لازِم يَعِيشو بين أهل بيت الله، الهو كَنيسَة الله الحَي، عَمود و أساس الحَق. و نَشهَد أن سِر الدّين بِتاعنا مُهِم: هو ظَهَر في الجِّسم، و إتبَرَّر في الرّوح، و المَلائكَه شافوهو، و بِشَّرو بيهو بين الأُمَم، و آمَنو بيهو في الدُّنيا، و رَفَعوهو في المَجد. و الرّوح يَقول بِكِلمات بَايِنَه، بَعض مِن النّاس بِخَلّو الإيمان في الزَّمَن الأخير، و يَمشو وَرا أرواح بِغِشّو و تَعاليم شياطين. تَعليم زي دا بِجي مِن ناس كَضّابين البِغِشّو، و ضَمايرُم مَحروقين زي بِمَكوَه سُخنَه. هُم يَمنَعو النّاس مِن العِرِس. و يأمُروم ما ياكلو بَعَض الأكِل. لَكِن الله خَلَقو عَشان المؤمِنين و اليَعرِفو الحَق يَقبَلوهو بِالشُّكر. عَشان كُل الخَلَقو الله كوَيس، و ما لازِم نابا أي شي إذا ناخُدو بِالشُّكر. عَلَشان يَكون مُقَدَّس بِكِلمَة الله و الصَّلاه. إذا تَزَكِّر الأخوان بِالحاجات دي، بِتكون خَدّام طَيب لِلمَسيح يَسُوع، و تَدّي أكِل لِنَفسَك بِكَلام الإيمان و بِالتَعليم الكَويس الأنتَ تِبِعتو. كون بَعيد مِن حِكايات الكُبار في السِّن بِتاع السّوق، و عَلِّم نَفسَك خوف الله. عَشان رياضَة الجِّسم عِندَها فايدَه قَليلَه، لَكِن خوف الله عِندو فايدَه لِكُلّو حاجَه. عَشان عِندو وَعد لِلحَياة الفي هَسَّع و الجّايَه. و الكِلمَه دي أمينَه و تِستَحِق كُلّو قُبول. و عَشان دا نَتعَب و نَشتَغِل شَديد، عَلَشان خَتّينا رَجاءنا في الله الحَي، مُخَلِّص كُل النّاس، خُصوصاً المؤمِنين. آمُر و عَلِّم الحاجات دي. ما تَخَلّي أي واحِد يَكون مِتكَبِّر عَليك عَشان إنتَ شاب. لَكِن كون مَثَل لِلمؤمِنين في الكَلام، و في الحَياة و المَحَبَّه و الإيمان و قَلِب نَضيف. لِغايَة ما بَجي، خَلّي بالَك لِلقِرايَه، و بَشِّر و عَلِّم. ما تَكون كَسلان بِهَديتَك الأدّوها ليك بِالنُّبوَّه لَمّا الشُّيوخ خَتّو إيدينُم عَليك. خُت بالَك في الحاجات دي، و أَدِّي نَفسَك ليها، عَشان كُلّو واحِد بِشوف كيف إنتَ تِتقَدَّم. شوف نَفسَك كوَيس و التَعليم. إستَمِر في الحاجات ديل، عَلَشان إذا عَمَلتَ كِدا، بِتَخلَص نَفسَك و البِسمَعو ليك كَمان. ما تَوَبِّخ الشّيخ لَكِن أدّيهو نَصيحَه زي أبو، الشَّباب زي أخوان، النِّسوان الكُبار في السِّن زي أُمَّهات و الأصغَر زي أخوات، بِكُلّو قَلِب نَضيف. إحتَرِم الأرامِل الهُم أرامِل بِالحَق. لَكِن إذا أرمَلَه عِندَها أولاد ولّا أولاد أولادا، خَليهُم يِتعَلَّمو في الأوَّل أن يَحتَرِمو أهل بيتُم و يَرَجِّعو خير والِدينُم ليهُم. عَلَشان دا مَقبول قِدّام الله. لَكِن الأرمَلَه، الهي أرمَلَه بِالحَق، البِقَت بَراها، تَخُت رَجاها في الله. و هي تِستَمِر تَصَلّي و تَسأل ليل و نَهار. لَكِن الأرمَلَه التَّعيش بَس عَشان تَكون مَبسوطَه، هي مَيِّتَه ما دام عِندَها حَياة. و آمُر بِالحاجات ديل عَلَشان هُم بِكونو بِدون لوم. و إذا أي واحِد ما يَهتَم بِأقاريبو و خُصوصاً لِأهل بيتو، هو نَكَر الإيمان، و هو أكعَب مِن الما مؤمِن. ما تَكتِب إسِم أرمَلَه إلّا عُمُرا زِيادَه مِن سِتّين سَنَه، و كانَت عِندَها راجِل واحِد. و النّاس يَعرِفوها بِأعمالا الكوَيسَه. هي كانَت رَبَّت الأولاد، و فَتَحَت بيتا لِلغَريبين، و غَسَّلَت كِرعين القِدِّسين، و ساعَدَت المَظلومين، و أدَّت نَفسَها لِكُلّو عَمَل كوَيس. لَكِن الأرامِل الصُّغار، آباهُم، عَلَشان لَمّا شَهوَاتُم يَعمِلوهُم يَدورو العِرِس، هُم يَرَجِّعو عَن المَسيح. و كِدا يَجيبو حُكم عَلى نُفوسُم، عَلَشان هُم كَسَّرو الإتِّفاق الأوَّل. و في نَفس الوَكِت، هُم يِتعَلَّمو يَكونو كَسلانات، و يَمشو مِن بيت لِبيت. و هُم ما يَبقو كَسلانات بَس، لَكِن يَقولو حِكايات بِدون فايدَه، و يدخُلو في الما يَخُصُّم، و يِتكَلَّمو عَن الحاجات المَمنوعَه. عَلَشان كِدا، أنا عاوِز الأرامِل الصُّغار يِتزَوَّجو و يَجيبو الأولاد، و يَرَتِّبو البُيوت، و ما يَدّو العَدو فُرصَه لِلشَّتيمَه. عَشان بَعض مِنَّهُم مِن قُبّال رَجَعو لِيَمشو وَرا الشّيطان. إذا كان أي واحدَه البِتآمِن عِندَها أرامِل في أهل بيتا، خَلِيها تَساعِدُم، عَلَشان دا ما بِكون حِمِل لِلكَنيسَه. و عَلَشان كِدا، الكَنيسَه تَقدَر تَساعِد ديل البِالحَق عِندَهُم إحتِياج. الشُّيوخ البِقودو كوَيس أحسِبوهُم مُستَحِقّين لِإحتِرام مَرَّتين، و بِالأكتَر البِتعَبو في الكِلمَه و التَعليم. عَشان كِتاب يَقول: ”ما تَربُط خَشُم التّور و هو يدوس الدُّرَه،“ و: ”الشَّغال مُستَحِق أُجرَتو.“ ما تَقبَل شَكوى عَلى الشيخ إلّا بِشَهادَة إتنين ولّا تلاتَه مِن النّاس. و وَبِّخ البيَعمِلو الخَطيَّه قِدّام كُل النّاس، عَلَشان التّانيين بِخافو. أنا بَدّيك أمر قِدّام الله و المَسيح يَسُوع و قِدّام المَلائكَه المُختارين أن تَحفَظ الحاجات دي بِدون ما تَحكُم قُبّال ما تَعرِف الحَق. و ما تَشوفو الوشوش في شُغلَك. ما تَخُت إيدينَك عَلى أي واحِد بِالسُّرعَه. و ما تَشتَرِك في خَطايا التّانيين. أحفَظ نَفسَك بِقَلِب نَضيف. ما تِستَمِر تَشرَب المويَه بَس، لَكِن تاخُد شوَيَة خَمر فِشان بَطنَك و أمراضَك الكَتيرَه. خَطايا بَعض مِن النّاس بَايِنَه، و يَمشو قِدّامُم لِلحُكم. و خَطايا التّانيين يَمشو وَراهُم. و كِدا كَمان الأعمال الكوَيسَه بَايِنَه. و الما بَايِنَه ما مُمكِن يَدِسّوها. خَلّو كُل الخَدّامين التِحِت النّير يَحسِبو أسيادُم مُستَحِقّين كُلّو إحتِرام، عَلَشان هُم ما يَشتِمو إسم الله و التَعليم. و العِندَهُم أسياد البِآمِنو، ما لازِم يَدّوهُم أقَل إحتِرام عَلَشان هُم أخوان. لَكِن خَلّوهُم بِخدِموهُم خِدمَه أحسَن عَشان العِندَهُم فايدَه مِن خِدمَتُم مؤمِنين و مَحبوبين. عَلِّم الحاجات دي و أدّيهُم نَصيحَه كِدا. إذا أي واحِد يَعَلِّم تَعليم تاني و ما يَتَّفِق لِلكَلام الصَّحيح، كَلام رَبَّنا يَسُوع المَسيح، و لِلتَعليم الهو حَسَب خوف الله، هو مِتكَبِّر و ما بِفهَم حاجَه. و عِندو فِكرَه عَيّانَه عَن أصِلا و يَحارِب بِالكِلمات البِجيبو الحَسَد، و الشَّكلَه، و الشَّتيمَه، و الفِكِر البَطّال. و يَجيب الشَّكلات المُستَمِرَّه بين رُجال عَقلُم خَربان، الاَخَدو مِنَّهُم الحَق. و هُم يَفتَكِرو خوف الله طَريق عَشان يَبقى غَني. لَكِن خوف الله، إذا الزّول فَرحان، دا غِنى عَظيم. عَشان نِحنا ما جِبنا أي شي لِلدُّنيا، و ما نَقدَر نَشيل مِنَّها أي شي. لَكِن إذا عِندَنا الأكِل و الهِدوم، خَلّونا نَكون مَبسوطين بيهُم. لَكِن النّاس العاوزين يَكونو غَنيين يَقَعو في التَجرِبَه و الفَخ، و في شَهوات كَتيرَه، بَليدَه و مُضِرَّه، البِجُرّو النّاس لِلخَراب و الهَلاك. عَشان مَحَبَّة القُروش عِرق كُل الحاجات البَطّالَه. و بَعض مِن النّاس الطَّلَبوهو، ضَلّو عَن الإيمان و طَعنو نُفوسُم بِوَجَع كَتير. و إنتَ، يا راجِل الله، أهرَب مِن دا. و أتبَع البِر، و خوف الله، و الإيمان، و المَحَبَّه، و الصَّبر، و الوَداعَه. حارِب حَرب الإيمان الكَويس. و أمسِك بِالحَياة الأبَديَّه. عَشان الله ناداك لِدا، و إنتَ شِهِدتَ الشَّهادَه الكوَيسَه قِدّام شاهِدين كُتار. أنا بَدّيك أمر قِدّام الله البِدّي حَياة لِلكُل، و قِدّام المَسيح يَسُوع الشِّهِد قِدّام بِيلاطُس البُنْطي الشَّهادَه الكوَيسَه. عَشان تَحفَظ الأمر، نَضيف و بِدون لوم لِظُهور رَبَّنا يَسُوع المَسيح. و الله بِبَيِّنو في وَكتو، الله، المُبارَك، الحاكِم الوَحيد. هو مَلِك المُلوك و رَب الأرباب. و هو بَس ما بِموت، و بِسكُن في نور الما نَقدَر نَقَرِّب مِنّو. ما في زول شافو ولّا بِقدَر يَشوفو. ليهو الإحتِرام و القُوَّه الأبَديَّه! آمين. آمُر الغَنيين في الدُّنيا الحاضِرَه دي أن ما يَكونو مِتكَبِّرين ولّا يَتَّكِلو عَلى الغِنى الما يِستَمِر. لَكِن خَليهُم يَتَّكِلو عَلى الله الحَي، البِدّينا كُلّو حاجَه بِغِنى عَشان نَفرَح بيها. و أدّيهُم أمر عَشان يَعمِلو الخير و يَكونو غَنيين في الأعمال الطَّيبَه، جاهِزين عَشان يَدّو و رَضيانين عَشان يَشارِكو. و يَخُتّو لِنُفوسُم زي كَنز، أساس كوَيس لِلوَكِت الجّاي حَتّى يَمسِكو بِالحَياة الحَقيقيَه. يا تِيمُوثَاوُس، أحفَظ الحاجَه السَّلَّموها ليك. كون بَعيد مِن الكَلام الفاضي و الوَسخان و مِن البِعاكِس، البِسَمّوها ”المَعرِفَه“ بِالكِضِب. و بَعض مِن النّاس بِقولو هُم عِندَهُم المَعرِفَه دي و ضَلّو عَن الإيمان. النِّعمَه مَعاكُم. مِن بُولُس رَسول المَسيح يَسُوع بِإرادَة الله حَسَب الوَعد بِالحَياة الفي المَسيح يَسُوع، لِتِيمُوثَاوُس، وَلَدي المَحبوب: نِعمَه و رَحمَه و سَلام مِن الله الأبو و المَسيح يَسُوع رَبّانا. أنا أشكُر الله البَخدِمو بِضَمير نَضيف، زي ما أبَهاتي خَدَموهو، لَمّا أتزَكَّرَك دايماً في صَلَواتي ليل و نَهار. و لَمّا أتزَكَّر دِموعَك، بَحِب أشوفَك، عَشان بَكون مَليان بِفَرَح. و أتزَكَّر إيمانَك المُخلِص، السَّكَن في الأوَّل في حَبوبتَك لُوئِيس و أُمَّك أَفْنِيكِي و أنا مِتأكِّد بِسكُن فيك كَمان. و لِلسَّبَب دا أزَكِّرَك أن تَحَرِّك هَديَّة الله الفيك عَلَشان أنا خَتّيت إيديني عَليك. عَشان الله ما أدّانا روح الخوف، لَكِن روح القُوَّه و المَحَبَّه و مَسِك النَّفس. عَشان كِدا، ما تَخجَل بِشَهادَة رَبَّنا، ولّا بي، أنا مَحبوس و. لَكِن أشتَرِك في الأتعاب فِشان الإنجيل بِحَسَب قُوَّة الله. هو خَلَّصنا و إختارنا إختِيار مُقَدَّس، مُش بِحَسَب أعمالنا، لَكِن بِفِكرو و نِعمَتو. و هو أدّانا النِّعمَه دي في المَسيح يَسُوع مِن قُبّال الوَكِت الأبَدي، لَكِن هَسَّع بِقَت بَايِنَه بِظُهور مُخَلِّصنا، المَسيح يَسُوع. هو بَطَّل الموت و وَرّانا الحَياة الما بِتموت بِواسطَة الإنجيل. و لِلإنجيل دا، الله عَمَلني مُبَشِّر و رَسول و مُعَلِّم. و لِلسَّبَب دا كَمان أتحَمَّل الحاجات دي. و لَكِن أنا ما بَخجَل، عَلَشان انا بَعرِف الآمَنتَ بيهو، و أنا مِتأكِّد هو بِقدَر يَحفَظ السَّلَّمتو ليهو لِغايَة اليوم داك. و أمسِك بِصورَة الكَلام الصَّحيح السِّمِعتو مِنّي، مَعَ الإيمان و المَحَبَّه الفي المَسيح يَسُوع. أحفَظ الحاجَه الطَّيبَه السَّلَّموها ليك بِالرّوح القُدُس السّاكِن فينا. إنتَ بِتَعرِف دا إنّو كُل النّاس الفي آسيا رَجَّعو عَنّي. و مِنَّهُم فيجَلُّس و هَرْمُوجَانِس. و الرَّب يَدّي رَحمَه لِبيت أُونِيسِيفُورُس عَلَشانّو مَرّات كَتيرَه أدّاني راحَه، و ما خَجَل مِن جَنازِيري. لَكِن لَمّا هو كان في رُومِيَه، هو فَتَّش عَلي لِغايَة ما لِقاني. و الرَّب يَدّي ليهو أن يَلقا رَحمَه مِن الرَّب في اليوم داك! و إنتَ بِتَعرِف كوَيس كيف هو خَدَّمني بِحاجات كَتيرَه في أفَسُس. عَلَشان كِدا، يا وَلَدي، إتشَدَّد في النِّعمَه الفي يَسُوع المَسيح. و الحاجات السِّمِعتَ مِنّي قِدّام شاهِدين كُتار، سَلِّما لِرُجال أُمَنا البِقدَرو يَعَلِّمو التّانيين كَمان. أشتَرِك في حِمِل التَّعب زي عَسكَري كوَيس لِلمَسيح يَسُوع. ما في واحِد اليَحارِب البِكون مَربوط لِحاجات الحَياة دي. هو عاوِز يَبسِط الدّخَّلو لِلخِدمَه العَسكَريَّه. و كِدا كَمان، أي واحِد اليَجري في سَبَق، ما ياخُد التّاج إذا ما يَجري حَسَب القانون. المُزارِع البِتعَب لازِم يَكون الأوَّل لِياخُد جُزو في الثَّمار. فَكِّر في البِقولو، و الرَّب يَدّيك فَهم في كُلّو حاجَه. إتزَكَّر يَسُوع المَسيح القام مِن بين المَيِّتين، مِن أهل دَاوُد، حَسَب إنجيلي. و فِشانّو أنا بَتحَمَّل التَّعب حَتّى الجَّنازِير زي مُذنِب. لَكِن كِلمَة الله ما مَربوطَه. عَلَشان كِدا، أنا أصبُر عَلى كُلّو حاجَه فِشان المُختارين، عَشان هُم كَمان يِلقو الخَلاص الفي المَسيح يَسُوع مَعَ المَجد الأبَدي. الكِلمَه دي أمينَه: ”إذا مُتنا مَعاهو، بِنعيش مَعاهو كَمان. إذا نَصبُر، بِنَملِك مَعاهو كَمان. و إذا نَنكُرو، هو بِيَنكُرنا كَمان. و إذا نِحنا مُش أُمَنا، هو يِستَمِر أمين، عَلَشان هو ما بِقدَر يَنكُر نَفسو.“ زَكِّرُم بِالحاجات دي، و حَزِّرُم قِدّام الرَّب أن ما تَشاكِلو عَن كِلمات الما فيها فايدَه. عَلَشان دا يَخَرِّب ديل البِسمَعو. أعمِل الأحسَن عَشان تَقَدِّم نَفسَك مَقبول لِلَّه، شَغّال الما لازِم يَخجَل، و البِعَلِّم كِلمَة الحَق بِطَريق تَمام. لَكِن كون بَعيد مِن الكَلامات الفاضيَه الوَسخانَه، عَشان النّاس البِتكَلَّمو كِدا بِزيدو أكتَر في الشَّر. و تَعليمُم بِفَرتِك زي الحاجَه البِتاكُل قَوام. و بِينُم هِمِنَايُوس و وَفِيلِيتُوس. و هُم ضَلّو عَن الحَق. هُم بِقولو القيامَه فاتَت مِن قُبّال. و هُم يَقلِبو إيمان بَعض مِن النّاس. و لَكِن أساس الله الثّابِت يَقوم، و فوقو الخِتِم دا: ”الرَّب بِيَعرِف النّاس بِتاعو،“ و: ”كُلّو واحِد البِعتَرِف بِإسم الرَّب لازِم يَكون بَعيد مِن الخَطيَّه.“ و في بيت كَبير، البُرام ما بِكونو مِن دَهَب و فِضَّه بَس، لَكِن خَشَب و طين كَمان. و بَعَض مِنَّهُم بِكونو لِلإحتِرام و بَعض مِنَّهُم بِكونو بِدون إحتِرام. و إذا أي واحِد يَنَضِّف نَفسو مِن دي، هو بِكون بُرمَه لِلإحتِرام، مُقَدَّس، و فيهو فايدَه لِلسَّيد، و جاهِز لِكُلّو عَمَل طَيب. أجري مِن الشَّهوات بِتاعَت الشَّباب، و أمشي وَرا البِر و الإيمان و المَحَبَّه و السَّلام مَعَ النّاس البِنادو بِالرَّب مِن قَلِب نَضيف. أرفُض الأسئلَه الغَشيمَه و البَليدَه، عَشان إنتَ بِتَعرِف هُم بِجيبو الشَّكلات. و خَدّام الرَّب ما لازِم يَشاكِل، لَكِن يَكون لَطيف مَعَ كُلّو زول، و بِقدَر يَعَلِّم بِالصَّبر. و البِعاكِسوهو، يَعَلِّمُم بِطَريق لَطيف عَشان يِمكِن الله بِدّيهُم التّوبَه لِمَعرِفَة الحَق. و هُم بِرجَعو لِنُفوسُم و يَهرُبو مِن فَخ إبْلِيس، القَبَض عَليهُم لِيَعمِلو إرَادَتو. و أعرِف دا، في الأيام الأخيرَه، زَمَن صَعب بِجي. عَشان النّاس بِحِبّو نُفوسُم و بِحِبّو المال، بِحمَدو نُفوسُم، بِكونو مِتكَبِّرين، بِشتِمو، ما بِطيعُو والِدينُم، ما بِشكُرو، بِكونو وَسخانين، و هُم بِدون مَحَبَّه، ما بِغفِرو، شَتَّامين، بِدون مَسِك النَّفس، قاسيين، بِكرَهو الكوَيس. و هُم خايِنين، جَرّايين، مُحِبّين نُفوسُم، بِحِبّو السُّرور لَكِن ما بِحِبّو الله. عِندَهُم صورَة خوف الله لَكِن هُم بِنكُرو قُوَّتو. كون بَعيد مِن ديل. عَشان هُم مِن النّاس البِدِسّو في البُيوت و يَقبُضو عَلى نِسوان بَليدات، البِشيلو حِمِل خَطايا كَتيرَه، و شَهوات مُختَلِفَه بِقودوهُم. هُم بِتعَلَّمو دايماً، و ما بِقدَرو يَجو لِمَعرِفَة الحَق أبَداً. و زي ما يَنّيس و وَيَمْبِرِيس عاكَسو مُوسَى، ديل كَمان بِعاكِسو الحَق، و هُم رُجال عِندَهُم أفكار خَربانَه و بِخُصوص الإيمان، هُم مَرفوضين. لَكِن هُم ما بِتقَدَّمو بَعَد دا، عَلَشان بَلادَتُم تَكون بَايِنَه لِكُل النّاس، زي ما بَلادَة ديلاك كانَت بَايِنَه كَمان. و لَكِن إنتَ تِبِعتَ تَعليمي، و مَشيَتي، و قَصدي، و إيماني و صَبري، و مَحَبَّتي، و إحتِمالي، و طُرودي، و أتعابي الحَصَلَت لَي في أنطاكيّا و وَإِيقُونِيَّةَ و لِسترَه، الطُّرود الأنا إتحَمَّلتا. لَكِن الرَّب خَلَّصني مِن كُلّو دا. و بِالحَق بِطرُدو كُل العاوزين يَعِيشو في خوف الله في المَسيح يَسُوع. لَكِن النّاس البَطّالين و البِغِشّو بِزيدو في الشَّر، و هُم بِغِشّو و بِكونو مَغشوشين. و لَكِن إنتَ، إستَمِر في الحاجات الإتعَلَّمتا و بِقيت مِتأكِّد مِنَّها، عَلَشان إنتَ بِتَعرِف مِن مِنو إتعَلَّمتَها. و مِن وَكِت إنتَ طِفل، كُنتَ تَعرِف الكُتُب المُقَدَّسَه البِتَقدَر تَديك فَهم لِلخَلاص بِالإيمان الفي المَسيح يَسُوع. عَشان الكِتاب كُلّو إتنَفَّس بِالله، و عِندو فايدَه لِلتَعليم، و عَشان يَوَبِّخ، و يَصَلِّح، و يَعَلِّم الحَياة الفي البِر، عَشان راجِل الله يَكون كامِل، جاهِز لِكُلّو عَمَل كوَيس. و بَدّيك الأمر دا قِدّام الله و قِدّام المَسيح يَسُوع البِحكُم عَلى الحَيين و المَيِّتين بِظُهورو و مَلَكوتو. بَشِّر بِالكِلمَه، و كون جاهِز في وَكتو و مُش في وَكتو، صَلِّح، و وَبِّخ، و شَجِّع بِكُلّو صَبر و تَعليم. عَشان الوَكِت بِجي لَمّا النّاس ما يِتحَمَّلَو التَعليم الصَّحيح. لَكِن حَسَب الشَّهوات بِتاعتُم بِلِمّو لِنُفوسُم مُعَلِّمين عَشان يَقولو الهُم عاوزين بِشِدَّه أن يَسمَعو. و هُم يَدَوِّرو إضنينُم مِن الحَق، و يَرَجِّعو عَنّو لِحِكايات النّاس. لَكِن إنتَ، كون عاقِل في كُلّو شي، و إتحَمَّل التَّعب بِالصَّبر، و أعمِل عَمَل المُبَشِّر، وكَمِّل خِدمَتَك. عَشان هَسَّع بِقَدِّموني زي ضَبيحَه، و الوَكِت جا عَشان أمشي. أنا حارَبتَ الحَرب الكَويس، و تَميت سَبَقي، و حَفَظتو الإيمان. و مِن هَسَّع مَحفوظ لَي تاج البِر. و الرَّب، القاضي العادِل، بِدّيهو لَي في اليوم داك، و مُش لَي بَس، لَكِن لِكُلُّهُم البِحِبّو ظُهورو كَمان. أعمِل الأحسَن عَشان تَجي لَي بِسُرعَه. عَلَشان دِيمَاس خَلّاني، عَشان هو حَبَّ الدُّنيا الحاضِرَه، و مَشى لِتَسَالُونِيكِي. كِرِيسْكِيس مَشى لِغَلَاطِيَّه، و تِيطُس لِ دَلْمَاطِيَّه. لُوقَا بَس مَعاي. أُخُد مَرْقُس و جيبو مَعاك، عَشان هو عِندو فايدَه لَي في خِدمَتي. و أنا رَسَّلتَ تِيخِيكُس لِأفَسُس. و لَمّا تَجي، جيب التّوب الأنا خَلّيتو في تَرُوَاس مَعَ كَارْبُس، و الكُتُب، و خُصوصاً المَكتوبَه في الجِّلِد زي الوَرَق. عَشان إِسْكَنْدَر النَّحّاس سَوّا لَي حاجات بَطّالَه كَتيرَه. و الرَّب بِدفَع ليهو تاني لِكُلّو أعمالو. و إنتَ كَمان تَحرَس مِنّو، عَشان هو عاكَس كلماتنا كَتير. أوَّل مَرَّه في قَضيَّتي، و لا واحِد وَقَف مَعاي، لَكِن كُلُّهُم خَلّوني. الله ما يَحسِب دا عَليهُم! و لَكِن الرَّب وَقَف مَعاي و شَدَّدني عَلَشان أبَشِّر بِالإنجيل، و كُل الأُمَم بِسمَعو. و هو خَلَّصني مِن خَشم الأسَد. و الرَّب بِحفَظني مِن كُلّو عَمَل شَرّير، و بِخَلِّصني لِمَلَكوتو الفي السَّما. و ليهو المَجد لِلأبَد. آمين. سَلِّم عَلى بِرِسكا و أَكِيلَا و عَلى أهل بيت أُونِيسِيفُورُس. أَرَاسْتُس إستَنّى في كُورِنْثُوس، لَكِن أنا خَلّيت تُرُوفِيمُس في مِيلِيتُس عَيّان. أعمِل الأحسَن عَشان تَجي قُبّال الشِّتا. أَفْبُولُس يَسَلِّم عَليك و بُودِيس كَمان و لِينُوس و كَلُودِيَا و كُل الأخوان. الرَّب يَسُوع المَسيح مَعَ روحَك. النِّعمَه مَعاكُم. مِن بُولُس، خَدّام الله و رَسول يَسُوع المَسيح، حَسَب إيمان مُختارين الله و مَعرِفَة الحَق البِقود لِخوف الله. و في رَجاء الحَياة الأبَديَّه، الوَعَد بيها الله قُبّال زَمَن أبَدي. و الله ما بِقدَر يَكَضِّب. لَكِن هو وَرّا كلمَتو في وَكتا. و هو إتَّكَل عَلي أن أبَشِّر بِحَسَب أمر مُخَلِّصنا الله. لِتِيطُس، وَلَدي الحَقيقي في الإيمان العِندَنا سَوا. نِعمَه و سَلام مِن الله الأبو و المَسيح يَسُوع مُخَلِّصنا. أنا سيبتَك في كَريت لِلسَّبَب دا، عَلَشان تَرَتِّب الحاجات النّاقصَه، و تَختار شُيوخ في كُلّو مَدينَه زي ما أمَرتَك. الشّيخ لازِم يَكون بِدون لوم، راجِل عِندو مَرَه واحدَه، و أولادو مؤمِنين و ما يَشتَكو مِنَّهُم بيَعمِلو الدَوشَه ولّا ما بِطيعُو. و المُلاحِظ يَكون بِدون لوم عَلَشان هو وَكيل الله. و هو ما لازِم بِكون مِتكَبِّر و ما بِزعَل قَوام، و ما بِسكَر، و ما بِضرُب، و ما طَمّاع في قُروش وَسخان. لَكِن هو بِفتَح بيتو لِلغَريبين، و بِحِب الخير، و يَكون عاقِل، و عَديل، و مُقَدَّس، و بِقدَر يَمسِك نَفسو. و هو ماسِك بِالكَلام الأمين حَسَب التَّعليم، عَلَشان هو يَقدَر يَدّي الشَّجاعَه بِالتَعليم الحَقيقي و يَوَبِّخ البِقاوِمو. عَشان في ناس كَتيرين الما بِطيعُو، البِتكَلَّمو بِدون فايدَه و بِغِشّو، و خُصوصاً مِن النّاس المُطَهَّرين. و لازِم يَبَطِّلو كَلامُم، عَلَشان هُم يَقلِبو كُلّو أهل البُيوت بِالتَّمام بِتَعليمُم الما بِالقانون فِشان قُروش وَسخان. و واحِد مِنَّهُم، و هو النَّبي بِتاعُم، قال: ”ناس كَريت دايماً كَضّابين، وحوش بَطّالين، بُطونيين كَسلانين.“ و الشَّهادَه دي الحَق. عَلَشان كِدا وَبِّخُم شَديد عَشان إيمانُم بِكون صَحيح. و عَشان هُم ما بِخَلّو بالُم لِحِكايات اليَهود و أوامِر النّاس البِرَجِعو عَن الحَق. لِلنّاس قُلوبُم نَضيفَه، كُلّو حاجَه نَضيفَه ليهُم. لَكِن لِلنَّجِسين و الما مؤمِنين، ما في حاجَه نَضيفَه ليهُم. لَكِن أفكارُم و ضَميرُم خَربانين. هُم بِقولو إنَّهُم بِيَعرِفو الله، و لَكِن هُم بِنكُروهو بِأعمالُم. و هُم مَكروهين، و ما بِطيعُو، و ما عِندَهُم فايدَه لِأي عَمَل كوَيس. لَكِن إنتَ، إتكَلَّم بِاليِستَحِق التَّعليم الصَّحيح. عَلِّم الرُّجال الكُبار في السِّن أن يَكونو عاقِلين، و مُستَحِقّين الإحتِرام، و عِندَهُم مَسِك النَّفس، و صادقين في الإيمان و المَحَبَّه و الصَّبر. و كِدا كَمان عَلِّم النِّسوان الكُبار في السِّن أن يَعِيشو في خوف الله، ما بِشتِمو و ما بِدّو نُفوسُم لِلخَمر، لَكِن بِعَلِّمو حاجات كوَيسَه. عَلَشانُم يَقدَرو يَعَلِّمو النِّسوان الصُّغار أن يَحِبّو رُجالُم و أولادُم، و بِكونو فَهمات، و عِندَهُم قَلِب نَضيف. و يَعَلِّمُم يَشتَغِلو في بُيوتُم، و عِندَهُم رَحمَه، و بِطيعُو رُجالُم، عَشان النّاس ما يَشتِمو كِلمَة الله. و كِدا كَمان أَدِّي نَصيحَه لِلشَّباب أن يَمسِكو النَفس. و أعمِل نَفسَك مَثَل في كُلّو حاجَه لِلأعمال الكوَيسَه. في تَعليمَك، كون مُخلِص و عاقِل. و كَلامَك بِكون صَحيح و بِدون لوم، عَلَشان العَدو بِخجَل و ما بِقدَر يَقول عَلينا حاجَه بَطّالَه. آمُر الخَدّامين يَطيعو أسيادُم و يَبسِطوهُم في كُلّو حاجَه، و ما يَعاكِسُم في الكَلام. و ما يَسرِقو مِنَّهُم لَكِن يَوَرّو إنَّهُم يَقدَرو يتَّكَلو عَليهُم بِالتَّمام. و كِدا في كُلّو شي، تَعليم الله مُخَلِّصنا بِكون مَحبوب ليهُم. عَشان نِعمَة الله، البِتجيب خَلاص ظَهَرَت لِكُل النّاس. و تَعَلِّمنا أن نَنكُر الأفكار الضِّد الله و الشَّهوات المِن الدُّنيا، و نَعيش في الدُّنيا الحاضِرَه بِالفَهم و البِر و خوف الله. و نِحنا نَنتَظِر الرَّجاء المُبارَك و ظُهور مَجد إلَهنا العَظيم و مُخَلِّصنا يَسُوع المَسيح. هو أدّا نَفسو فِشانّا عَشان يَفدينا مِن كُلّو ذَنب، و يَنَضِّف لِنَفسو ناس يَكونو مُلكو، و عِندَهُم غيرَه لِكُل الأعمال الكوَيسَه. و قول ليهُم الحاجات دي. و إترَجّى و وَبِّخ بِكُلّو سُلطَه. و ما تَخَلّي أي واحِد يَحتَقِرَك. زَكِّرُم يَكونو تِحِت سُلطَة الرّؤساء و السَّلاطين، و يَطيعو و يَكونو جاهِزين لِكُلّو عَمَل طَيب. و ما يَقولو حاجَه بَطّالَه عَن أي واحِد، و ما يَشاكلو لَكِن يَكونو عِندَهُم صَبر، و يَوَرّو كُلّو وَداعَه لِكُل النّاس. عَشان نِحنا كَمان كُنّا مِن قُبّال بَليدين، و ما طيعنا، و غَشّونا، و خَدَمنا شَهوات مُختَلِفَه و السُّرور. و كُنّا نَعيش في الفِكر البَطّال و الحَسَد، مَكروهين و كارِهين بَعَضَنا بَعض. و لَكِن لَمّا لُطف الله مُخَلِّصنا و مَحَبَّتو ظَهَرو لِلنّاس، هو خَلَّصنا، مُش بِأعمال البِر النِحنا عَمَلناها، لَكِن بِرَحمَتو. هو خَلَّصنا بِغَسيل الوِلادَه التّانيَه، و بِالرّوح القُدُس العَمَلنا ناس جُداد. و الله كَبَّ الرّوح القُدُس عَلينا بِغِني بِيَسُوع المَسيح. حَتّى عَشان إتبَرَّرنا بِنِعمَتو، نَبقى وُرّاث حَسَب رَجاء الحَياة الأبَديَّه. الكِلمَه دي أمينَه. و أنا عاوزَك تَشهَد بِتأكيد لِلحاجات دي، عَلَشان ديل، الآمَنو بِالله، بِهتَمّو عَشان يَعمِلو أعمال كوَيسَه. و الحاجات دي طَيبَه و عِندَها فايدَه لِلنّاس. لَكِن كون بَعيد مِن الأسئلَه البَليدَه، و حِسابات الأجيال، و الحَرب بِالكَلام، و الشَّكلات عَن القانون، عَلَشان ديل باطِلَه و بِدون فايدَه. و الرّاجِل البِحِب يَقَسِّم النّاس، حَزِّرو مَرَّه و مَرَّتين. و بَعَد دا، كون بَعيد مِنّو. و إنتَ بِتَعرِف راجِل زي دا خَربان و هو يَعمِل الخَطيَّه، و يَحكُم عَلى نَفسو. و وَكِت ما بَرَسِّل ليك أرتيماس ولّا تِيخِيكُس، أعمِل الأحسَن أن تَجي لَي لِنِيكُوبُولِيس، عَلَشان أنا قَرَّرتَ أقعُد هِناك في الشِّتا. أعمِل زي ما بِتَقدَر عَشان تَجَهِّز زيناس، المِتعَلِّم في القانون، و أَبُلُّوس لِلسَّفَر حَتّى ما بِحتاجو لِحاجَه. و خَلّي أهَلنا يِتعَلَّمو أن يَدّو نُفوسُم لِلأعمال الكوَيسَه لِلإحتِياجات الضَّروريَه. و كِدا هُم ما بِعيشو حَياة بِدون فايدَه. كُل النّاس المَعاي يَسَلِّمو عَليك. سَلِّم عَلى البِحِبّونا في الإيمان. النِّعمَه مَعَ كُلُّكُم. مِن بُولُس مَحبوس المَسيح يَسُوع و مِن تِيمُوثَاوُس الأخو لِفِلِيمُون حَبيبنا و العامِل مَعانا. و لِأَبْفِيَّه الأُخُت و أَرْخِبُّس العَسكَري مَعانا و لِلكَنيسَه الفي بيتَك. نِعمَه ليكُم و سَلام مِن الله أبونا و الرَّب يَسُوع المَسيح. بَشكُر إلَهي دايماً و بَتزَكَّرَك في صَلَواتي. عَشان بَسمَع بِمَحَبَّتَك و إيمانَك نَحو الرَّب يَسُوع و لِكُل القِدِّسين. بَصَلّي أن شَرِكَة إيمانَك بِتساعِدكُم عَشان تَعرِفو كُل الخير الفينا بِالمَسيح. عَشان عِندَنا فَرَح كَتير و تَعزيَه مِن مَحَبَّتَك. عَلَشانَك، يا أخوّي، أدّيت راحَه لِقُلوب القِدِّسين. عَلَشان كِدا، عِندي في المَسيح شَجاعَه كَتيرَه أن آمُرَك تَعمِل زي المُستَحِق. لَكِن فِشان المَحَبَّه، بَطلُب بِالأكتَر، أنا، بُولُس الشّيخ و هَسَّع مَحبوس المَسيح كَمان. أطلُب ليك فِشان وَلَدي أُونِسِيمُوس الوَلَدتو في الجَّنازِير. و قُبّال دا، هو ما كان عِندو فايدَه ليك، و لَكِن هَسَّع عِندو فايدَه ليك و لَي. أنا بَرَجِّعو ليك، و دا زي ما بَرَسِّل ليك قَلبي زاتو. و كُنتَ داير أحفَظو مَعاي، عَلَشان يَخدِمني بَدَلَك في جَنازِير الإنجيل. لَكِن أنا ما عاوِز أسَوّي شي بِدون فِكرَك، فِشان خِيرَك ما بِكون مِن اللازِم تَعمِلو، لَكِن عَشان إنتَ إختِرتو. يِمكِن هو مَشى مِنَّك لِوَكِت قَليل عَلَشان يَكون ليك لِلأبَد. و بَعَد دا ما تَفتَكِر هو زي عَبد لَكِن أحسَن مِن عَبد. هو زي أخو مَحبوب، خُصوصاً لَي، و كَم بِالأكتَر ليك، في الجِّسِم و في الرَّب. و إذا تَحسِبني شَريك، أقبَلو زي نَفسي. و إذا كان ظَلَمَك في شي، ولّا هو مَديون ليك، أحسِب داك عَلي. أنا بُولُس بَكتِب دا بِإيدي. أنا بَدفَع. و ما بَقول ليك إنتَ مَديون لَي حَتّى بِنَفسَك كَمان. أيوَه، يا أخوّي، أنا عاوِز فايدَه مِنَّك في الرَّب. أدّيني راحَه لِقَلبي في المَسيح. و عَلَشان عِندي تأكيد إنَّك تَطيع، بَكتِب ليك و بَعرِفَك تَعمِل أكتَر مِن البَطلُب. و مَعَ دا، جَهِّز لَي أوضَة الضّيف، فِشان عِندي رَجاء بَرجَع ليكُم بِصَلَواتكُم. أَبَفْرَاس المَحبوس مَعاي في المَسيح يَسُوع يَسَلِّم عَليك. و كَمان مَرْقُس و أَرِسْتَرْخُس و دِيمَاس و لُوقَا العامِلين مَعاي. نِعمَة الرَّب يَسُوع المَسيح مَعَ روحكُم. آمين. الله، بَعَد ما كَلَّم الأبَهات بِالأنبياء في الزَّمَن الفات مَرّات كَتيرَه و بِطُرُق كَتيرَه، كَلَّمنا في الأيام الأخيرَه دي في الإبن. و هو عَمَلو وارِث لِكُلّو حاجَه، و بيهو كَمان هو عَمَل الخَليقَه كُلَّها. و الإبن هو النّور بِتاع مَجد الله، و هو صورَة طَبيعَتو، و شايل كُل الحاجات بِكِلمَة قُدرَتو. و بَعَد ما هو عَمَل نَضافَه لِلخَطايا، هو قَعَد عَن يَمين الله العَظيم في السَّما. و هو بِقى أحسَن بِكَتير مِن المَلائكَه بِحَسَب ما وِرِث إسم أحسَن مِنَّهُم. عَشان الله لِمِنو مِن المَلائكَه في أي وَكِت قال: ”إنتَ إبني؛ أنا وَلَدتَك اليوم دا.“ و كَمان: ”أنا بَكون ليهو أبو، و هو بِكون لَي إبن؟“ و كَمان، لَمّا يَجيب البِكر لِلدُّنيا، هو يَقول: ”خَلّي كُلّو مَلائِكَة الله يَعبُدوهو.“ و عَن المَلائكَه هو يَقول: ”هو يَعمِل مَلائكَتو أرياح، و خَدّامينو لَهيب نار.“ لَكِن عَن الإبن هو يَقول: ”كُرسيَك، يا الله، لِلأبَد، و البِر بِكون عَصايَة مَلَكوتَك. إنتَ حَبيت البِر و كِرِهتَ الشَّر. عَلَشان كِدا، الله، إلَهَك، مَسَحَك بِزيت الفَرَح أكتَر مِن شُرَكاءَك.“ و هو يَقول كَمان: ”إنتَ، يا رَب، في البِدايَه خَتّيت أساسات الأرض و السَّما شُغل إيدينَك. هُم بيَهلِكو، لَكِن إنتَ تِستَمِر. و كُلُّها بَتَبقى قَديمَه زي الهِدوم. و تَلِفّا زي التّوب، و زي التّوب يَغَيِّروها. لَكِن إنتَ إنتَ دايماً، و سَنينَك ما ليها نِهايَه.“ و الله لِمِنو مِن المَلائكَه في أي وَكِت قال: ”أقعُد عَن يَميني لِغايَة ما أعمِل عُدوانَك بَمبَر لِكِرعينَك؟“ مُش كُلُّهُم أرواح البِخدِمو، مَرَسَّلين لِلخِدمَه فِشانُم الماشين يورَثو الخَلاص؟ عَلَشان كِدا، لازِم نَخَلّي بالنا أكتَر لِلحاجات السِّمِعناها، عَشان ما نَخَلّيها تَمرُق مِنَّنا. عَشان إذا الكِلمَه الإتكَلَّمو بيها المَلائكَه كانَت ثابتَه، و كُلّو خَطيَّه و فِتنَه قِبلو جِزا عَديل، كيف نِحنا بِنَهرُب إذا ما نَخَلّي بالنا لِخَلاص عَظيم زي دا؟ و الرَّب إتكَلَّم عَنّو في الأوَّل، و ديل السِمِعوهو ثَبَّتوهو لينا. و الله كَمان شِهِد بيهو مَعاهُم بِالعَلامات و العَجايِب و القُوّات المُختَلِفَه و هَدايات الرّوح القُدُس، الهو قَسَّمُم حَسَب إرَادَتو. عَشان هو ما خَتَّ الدُّنيا الجّايَه تِحِت المَلائكَه، الدُّنيا النِحنا نِتكَلَّم عَنّا. لَكِن واحِد شِهِد في مَحَل و قال: ”الإنسان شِنو حَتّى تِتزَكَّرو؟ ولّا وَلَد الإنسان حَتّى تَهتَم بيهو؟ إنتَ عَمَلتو تِحِت شوَيَه مِن المَلائكَه، و خَتّيت تاج المَجد و الإحتِرام عَلى رَاسو، و خَتّيتو عَلى أعمال إيدينَك؛ و خَتّيت كُل الحاجات تِحِت كِرعينو.“ عَشان لَمّا خَتَّ كُل الحاجات تِحتو، الله ما خَلّى أي شي الما بِطيعُو. لَكِن هَسَّع نِحنا لِسَّع ما بِنشوف كُل الحاجات تِحتو. لَكِن نِحنا نَشوف يَسُوع! لِوَكِت قَليل هو كان مَعمول تِحِت مِن المَلائكَه، عَلَشان بِنِعمَة الله هو يَموت فِشان كُلّو واحِد. و هَسَّع نَشوف تاج المَجد و الإحتِرام عَلى رَاسو عَلَشان هو تِعِب تَعب الموت. و كان كُلّو شي عَشان خاطِر الله، و بيهو كان كُلّو شي. و كِدا، كان مُستَحِق ليهو، لَمّا يَجيب أولاد كَتيرين لِلمَجد، يَعمِل رَئيس خَلاصُم كامِل بِالأتعاب. عَشان هو البِقَدِّس و هُم البِكونو مُقَدَّسين، كُلَّهُم مِن واحِد. و بِالسَّبَب دا، هو ما بِخجَل يَسَمّوهُم أخوان. و هو بِقول: ”أنا بَخَبِّر أخواني بِإسمَك، و بَحمَدَك في وَسط الكَنيسَه.“ و كَمان: ”أنا مِتَّكِل عَليهو.“ و كَمان: ”شوف، أنا و الأولاد الأدّاني الله.“ عَلَشان الأولاد عِندَهُم دَم و لَحَم، هو كَمان إشتَرَك فيها، عَلَشان بِموتو هو يَخرَب العِندو سُلطَة الموت، يَعني إبْلِيس. و يَدّي حُرّيَّه ليهُم، الكانو كُلّو حَياتُم تِحِت العُبوديَه بِسَبَب خوفُم مِن الموت. عَشان بِالحَق، هو ما بِساعِد المَلائكَه، لَكِن بِساعِد أولاد إِبْرَاهِيم. و عَلَشان كِدا، هو كان لازِم يَكون زي أخوانو في كُلّو حاجَه، عَلَشان يَكون رَئيس قُسُس رَحيم و أمين في حاجات الله. و عَشان يَدفَع عَن خَطايا النّاس. و فِشان هو تِعِب لَمّا كان مُجَرَّب، هو بِقدَر يَساعِد ديل البِكونو مُجَرَّبين. عَلَشان كِدا، يا الأخوان القِدِّسين، شُرَكا الإختِيار المِن السَّما، إفتَكِرو في الرَّسول و رَئيس القُسُس بِتاع شَهادَتنا، يَسُوع. هو كان أمين لِلواحِد الإختارو، زي ما مُوسَى كان أمين كَمان في كُلّو بيت الله. عَشان هو إتحَسَب يَكون مُستَحِق مَجد أحسَن مِن مُوسَى، زي ما بَناء البيت عِندو إحتِرام أحسَن مِن البيت. عَشان كُلّو بيت عِندو بَناء، لَكِن الله هو بَناء كُلّو حاجَه. و بِالحَق، مُوسَى كان أمين في كُلّو بيت الله زي خَدّام، عَشان يَشهَد لِلحاجات البِقولوها في الوَكِت الجّاي. و لَكِن المَسيح كان أمين زي إبن عَلى بيت الله. و نِحنا بيتو إذا بِنَمسِك بِتأكيدنا و فَخرَنا في الرَّجاء، ثابِتين لِلآخِر. عَلَشان كِدا، زي الرّوح القُدُس بِقول: ”النَّهار دا، إذا تَسمَعو صوتو، ما تَخَلّو روسينكُم يَكونو قَوّيين زي في الفِتنَه، زي في يوم التَجرِبَه في الخَلا. هِناك أبَهاتكُم جَرَّبوني و إمتَحَنوني، و شافو أعمالي مُدَّة أربَعين سَنَه. عَلَشان كِدا كُنتَ زَعلان مِن الجّيل داك، و قُلتَ، هُم دايماً بيَعمِلو الغَلطَه في قُلوبُم، و هُم ما عِرِفو طُرُقي. عَلَشان كِدا، حَلَفتَ في غَضَبي، هُم ما بِدخُلو في راحَتي أبَداً!“ شوفو، يا أخوان، عَشان ما بِكون في أي واحِد مِنَّكُم قَلِب بَطّال و بِدون إيمان، البِرَجِّع عَن الله الحَي. لَكِن حَزِّرو بَعضَكُم بَعض كُلّو يوم ما دام يَسَمّو الوَكِت النَّهار دا، عَلَشان راس واحِد مِنَّكُم ما بِكون قَوّي مِن غِش الخَطيَّه. و نِحنا بِقينا شُرَكا في المَسيح إذا بِنَمسِك لِلآخِر بِالتّأكيد الثّابِت الكُنّا عِندَنا في الأوَّل. ما دام يَقولو: ”النَّهار دا إذا تَسمَعو صوتو، ما تَخَلّو روسينكُم يَكونو قَوّيين زي في الفِتنَه.“ و مِنو هُم السِّمِعو و ما طاعو؟ مُش كُلُّهُم المَرَقو مِن مَصِر بِواسطَة مُوسَى؟ و هو كان زَعلان مِن مِنو لِمُدَّة أربَعين سَنَه؟ مُش مِنَّهُم العَمَلو خَطيَّه؟ و أجسامُم وَقَعو مَيِّتين في الخَلا؟ و هو حَلَف لِمِنو إنَّهُم ما بِدخُلو راحَتو أبَداً، إلّا ليهُم الما طاعو؟ و كِدا نَشوف هُم ما قِدِرو يدخُلو عَشان ما كانو عِندَهُم إيمان. الله ساب لينا وَعد عَشان نَدخُل في راحَتو. عَلَشان كِدا، خَلّونا نَخاف عَشان ما نَلقى أي واحِد مِنَّكُم الما قِدِر يَدخُل. و هُم بَشَّرونا بِالإنجيل زي ما بِشَّرو ديل، لَكِن الكِلمَه الهُم سِمِعوهو ما كانَت عِندَها فايدَه ليهُم. و دا عَلَشان ديل السِّمِعوهو ما لَخبَطوها بِالإيمان. عَشان نِحنا الآمَنّا نَدخُل الرّاحَه، زي ما هو قال: ”عَلَشان كِدا، حَلَفتَ في غَضَبي، هُم ما بِدخُلو راحَتي أبَداً!“ و لَكِن هو كَمَّل الأعمال مِن خَليقَة الدُّنيا. عَشان هو قال في مَحَل تاني عَن اليوم السّابِع: ”الله إستَراح في اليوم السّابِع مِن كُلّو أعمالو.“ و في المَحَل دا تاني مَرَّه هو قال؛ ”هُم ما بِدخُلو راحَتي أبَداً!“ و هُم، البَشَّرو ليهُم في الأوَّل، ما دَخَلو عَلَشان هُم ما طاعو. و لَكِن لِسَّع في بَعض مِن النّاس البِدخُلو في الرّاحَه ديك. عَلَشان كِدا، الله جَهَّز كَمان يوم إسمو النَّهار دا. و هو إتكَلَّم بِدَاوُد بَعَد مُدَّه طَويلَه، زي ما إتكَلَّم مِن قُبّال: ”النَّهار دا إذا تَسمَعو صوتو، ما تَخَلّو روسينكُم يَكونو قَوّيين.“ عَشان إذا يَشُوع كان أدّا راحَه ليهُم، الله ما كان إتكَلَّم بَعَد دا عَن يوم تاني. عَلَشان كِدا، راحَة سَبِت تِستَمِر لِشَعب الله. عَشان أي واحِد البِدخُل راحَتو، هو كَمان إستَراح مِن أعمالو زي ما الله إستَراح مِن أعمالو. عَلَشان كِدا، خَلّونا نَتعَب عَشان نَدخُل في الرّاحَه ديك. و نَخاف يِمكِن واحِد يَعمِل زي ما هُم عَمَلو لَمّا ما طاعو. عَشان كِلمَة الله حَيَه و نَشيطَه، و سنينا مِن كُلّو سيف العِندو طَرفين. و هي تَقطَع حَتّى تَقَسِّم النَّفس و الرّوح، و المَفاصِل و المُخ، و تَحكُم في أفكار القَلِب و إرَادَتو. ما في أي حاجَه مَدسوسَه مِن الله، لَكِن كُلّو حاجَه عَريانَه و مَفتوحَه قِدّام عُيون الله. و نِحنا لازِم نَدّيهو حِساب. عَلَشان كِدا، ما دام عِندَنا رَئيس قُسُس عَظيم، المَشى لِجُوَّه السَّما، يَسُوع إبن الله، خَلّونا نَمسِك بِشَهادَة أيمانّا. عَشان ما عِندَنا رَئيس قُسُس الما بِقدَر يَفهَم و يَرحَم ضعفاتنا. لَكِن عِندَنا واحِد الكان مُجَرَّب في كُلّو حاجَه زيَنا، لَكِن ما عَمَل خَطيَّه. عَلَشان كِدا، خَلّونا نَقَرِّب بِتأكيد لِكُرسي النِّعمَه، عَشان نَقبَل رَحمَه و نَلقى نِعمَه لِلمُساعِدَه في وَكِت الإحتِياج. و هُم ياخُدو كُلّو رَئيس قُسُس مِن بين النّاس. و يَختاروهو فِشان النّاس في حاجات الله، عَشان يَقَدِّم هَدايا و ضَبايح عَن الخَطايا. و هو بِقدَر يَرحَم ديل الما عِندَهُم مَعرِفَه و البِضَيعو السِّكَّه، عَلَشان هو نَفسو عِندو الضُّعف حَوَليهو. و بِالسَّبَب دا، هو لازِم يَقَدِّم ضَبايح عَن الخَطايا لِنَفسو، زي ما يَقَدِّم لِلنّاس. و ما في واحِد ياخُد الإحتِرام دا لِنَفسو، إلّا إذا الله يَناديهو، زي ما هو نادى هارون كَمان. و كِدا كَمان، المَسيح ما أخَد المَجد لِنَفسو عَشان يَبقى رَئيس قُسُس. لَكِن الله قال ليهو: ”إنتَ إبني، أنا وَلَدتَك اليوم دا.“ زي ما يَقول في مَحَل تاني: ”إنتَ قَسّيس لِلأبَد، زي التَّرتيب بِتاع مَلكِصادَق.“ و في أيام حَياتو عَلى الأرض، يَسُوع قَدَّم صَلَوات و طَلَبات بِكوراك شَديد و دِموع لِلَّه، القِدِر يَخَلِّصو مِن الموت. و الله سِمِع ليهو، عَلَشان هو كان بِخاف الله. و مَعَ إنّو إبن، هو إتعَلَّم أن يَطيع بِالحاجات الهو تِعِب فيها. و لَمّا كَمَّل شُغلو، هو بِقى سَبَب خَلاص أبَدي لِكُل البِطيعوهو. و الله سَمّاهو رَئيس قُسُس زي التَّرتيب بِتاع مَلكِصادَق. و عِندَنا كَلام كَتير عَن دا، و صَعب عَشان يَتَرجِم، عَلَشانكُم بِقيتو تُقال في السَّمَع. و بِالحَق، الوَكِت جا لَمّا إنتو لازِم تَكونو مُعَلِّمين. لَكِن إنتو تَحتاجو لِواحِد يَعَلِّمكُم مِن جَديد بِدايَة تَعاليم كِلمَة الله. إنتو تَحتاجو لِللَّبَن، مُش لِلأكِل القَوّي. عَشان كُلّو واحِد البِشرَب اللَّبَن، ما عِندو إختِبار في كَلام البِر، عَلَشان هو طِفل. لَكِن الأكِل القَوّي هو ليهُم البِقو كامِلين و دايماً إستَعمَلو عَقلُم عَشان يَحكُمو بين الكَويس و البَطّال. عَلَشان كِدا، خَلّونا نَسيب التَّعاليم الفي البِدايَه عَن المَسيح، و نِتقَدَّم لِلكَمال. و ما نَخُت مَرَّه تانيَه أساس التّوبَه مِن الأعمال المَيِّتَه و الإيمان بِالله، و التَعليم عَن المَعموديات، و خَتَّ الإيدين، و قيامَة المَيِّتين، و الدّينونَه الأبَديَه. و بِنَعمِل دا، بِإذِن الله. و في ناس الكانو عِندَهُم النّور مِن قُبّال، و ضاقو الهَدِيَّه المِن السَّما، و بِقو شُرَكا في الرّوح القُدُس. و هُم ضاقو كِلمَة الله الطَّيبَه، و قُوّات الزَّمَن الجّاي. و بَعَد دا وَقَعو! ما مُمكِن نَجيبُم مَرَّه تانيَه لِلتّوبَه، عَشانُم نُفوسُم يَصلُبو إبن الله تاني مَرَّه، و يَعمِلوهو خَجلان قِدّام النّاس. عَشان الأرض البِتَشرَب المَطَر البِيَنزِل عَليها مَرّات كَتيرَه، و تَجيب نَباتات كوَيسَه ليهُم الزَّرَعوها، الأرض دي بِتَقبَل البَرَكَه مِن الله. لَكِن الأرض البِتجيب شوك و شَجَر الخَلا، هي ما عِندَها فايدَه، و قَريبَه مِن اللَّعنَه. و في الآخِر، بِحرُقوها. و لَو نِحنا نِتكَلَّم كِدا، يا مَحبوبين، نِحنا عِندَنا تأكيد فيكُم لِحاجات أحسَن و حاجات البِتَمشي مَعَ الخَلاص. عَشان الله ما ظالِم، و هو ما بيَنسى عَمَلكُم و المَحَبَّه الإنتو وَرّيتوها فِشان إسمو لَمّا خَدَمتو القِدِّسين، و لِسَّع بِتَخدِموهُم. و نِحنا عاوِزين كُلّو واحِد مِنَّكُم يَوَرّي نَفس النَّشاط لِلنِّهايَه عَشان يَعرِف كَمال الرَّجاء. و نِحنا ما عاوِزينكُم تَكونو كَسلانين، لَكِن تَعمِلو زي ديل البِالإيمان و الصَّبر الطَّويل يورَثو الوُعود. لَمّا الله وَعَد إِبْرَاهِيم، هو حَلَف بِنَفسو، عَلَشان ما في واحِد أكبَر مِنّو عَشان يَحلِف بيهو. و هو قال: ”أنا بِالحَق بَدّيك بَرَكَه، و أكَتِّر أولادَك كَتير.“ و كِدا، بَعَد ما إستَنّى بِالصَّبر، إِبْرَاهِيم قِبِل الوَعَد ليهو. عَشان النّاس يَحلفو بِواحِد أكبَر مِنَّهُم، و الحَلَف يَثَبِّت الكَلام و يَوَقِّف كُلّو شَكلَه بِينُم. و لَمّا الله كان داير يَبَيِّن كوَيس لِلنّاس الماشين يَقبَلو الوَعد إنّو ما بِغَيِّر فِكرو أبَداً، هو ثَبَّت دا بِحَلَف. و الله عَمَل دا عَلَشان في حاجَتين الما بِتغَيَّرو، و ما مُمكِن هو يَكَضِّب فيهُم. عَلَشان كِدا، نِحنا الهَربنا ليهو عَشان نَمسِك بِالرَّجاء المَختوت قِدّامنا، عِندَنا شَجاعَه شَديدَه. و عِندَنا الرَّجاء دا زي مِرساة لِلنَفس، أمينَه و ثابِتَه. و الرَّجاء دا يَدخُل لِداك، الفي وَرا السِّتارَه. و يَسُوع دَخَل هِناك قِدّامنا و فِشانّا. هو بِقى رَئيس قُسُس لِلأبَد، زي التَّرتيب بِتاع مَلكِصادَق. و مَلكِصادَق دا كان مَلِك ساليم و قَسّيس الله العالي. هو قابَل إِبْرَاهِيم لَمّا كان يَرجَع مِن كَتَل المُلوك، و بارَكو. و إِبْرَاهِيم أدّا ليهو العُشُر مِن كُلّو حاجَه. و مَعنى إسمو في الأوَّل: ”مَلِك البِر،“ و بَعدين كَمان: ”مَلِك ساليم،“ يَعني: ”مَلِك السَّلام.“ و هو بِدون أبو ولّا أُم و بِدون حِساب الجّيل و ما عِندو بِدايَة أيام ولّا نِهايَة حَياة. لَكِن هو زي إبن الله و بِستَنّى قَسّيس لِلأبَد. و شوفو كيف الرّاجِل دا كان أكبَر، عَشان إِبْرَاهِيم، رَئيس الأبَهات، أدّاهو عُشُر مِن النِّهاب. و بِالحَق، مِن أولاد لَاوِي، البِقو قُسُس، هُم عِندَهُم أمر حَسَب القانون أن ياخُدو العُشُر مِن النّاس، يَعني، مِن أخوانُم، مَعَ إنَّهُم إتوَلَدو مِن إِبْرَاهِيم. و لَكِن الرّاجِل دا ما مِن أولاد لَاوِي، و هو أخَد العُشُر مِن إِبْرَاهِيم، و بارَك الكان عِندو الوُعود. و بِدون شَك الأصغَر ياخُد البَرَكَه مِن الأكبَر. و هِنا، رُجال بِموتو ياخُدو العُشُر. و لَكِن هِناك، هو البِشهَدو ليهو إنّو حَي يَاخُدوهو. و يِمكِن يَقولو: لَاوِي نَفسو، الأخَد العُشُر، هو أدّا العُشُر في إِبْرَاهِيم. عَلَشان لَاوِي كان لِسَّع في صُلب أبوهو إِبْرَاهِيم لَمّا مَلكِصادَق قابَل إِبْرَاهِيم. الله أدّا القانون لِلنّاس عَلى أساس تَرتيب قُسُس لَاوِي. و إذا شُغل قُسُس لَاوِي كان كامِل، لِشِنو كان في إحتِياج لِقَسّيس يَقوم مِن تَرتيب مَلكِصادَق، و مُش مِن تَرتيب هارون؟ عَشان إذا يَغَيِّرو تَرتيب القُسُس، لازِم يَغَيِّرو القانون كَمان. و هو، الإتكَلَّم كِدا عَنّو، كان مِن قَبيلَه تانيَه. و ما في واحِد مِن القَبيلَه دي العَمَل خِدمَة المَضبَح. و دا باين إنّو رَبَّنا طَلَع مِن قَبيلَة يَهُوذَا، و مُوسَى ما قال أي حاجَه القَبيلَه دي بِخُصوص القُسُس. و الحاجَه دي تَبَيِّن أكتَر بِكَتير إذا قَسّيس تاني زي مَلكِصادَق يَقوم. و هو بِقى قَسّيس، مُش عَلى أساس قانون و أمر جِسمي، عَلى أساس قُوَّة حَياة ما عِندَها نِهايَه. عَشان الكِتاب شهَد ليهو: ”إنتَ قَسّيس لِلأبَد، زي التَّرتيب بِتاع مَلكِصادَق.“ و كِدا، وَقَّفو الأمر الكان مِن قُبّال، عَشان كان ضَعيف و ما عِندو فايدَه. عَشان القانون ما عَمَل أي شي كامِل. لَكِن رَجاء أحسَن جا، و بيهو نَقَرِّب لِلَّه. و دا ما كان بِدون حَلَف. و التّانيين ديل بِقو قُسُس بِدون حَلَف، لَكِن هو بِقى قَسّيس بِحَلَف لَمّا الله قال ليهو: ”الرَّب حَلَف و ما بِغَيِّر فِكرو، إنتَ قَسّيس لِلأبَد.“ و بِقَدُر دا، يَسُوع بِقى مَسؤول عَشان يَكَمِّل إتِّفاق أحسَن. و بِالحَق، القُسُس ديل كانو كَتيرين، عَشان هُم ماتو و ما قِدِرو يِستَمِرّو في الخِدمَه. لَكِن عَلَشان يَسُوع يَعيش لِلأبَد، هو عِندو تَرتيب قَسّيس الما يَدّيهو لِتاني. عَلَشان كِدا، هو بِقدَر يَخَلِّص بِالتَّمام ديل اليَقَرِّبو بيهو لِلَّه، عَلَشان هو دايماً يَعيش عَشان يِتوَسَّط ليهُم. عَشان رَئيس قُسُس زي دا موافِق لينا. هو قُدّوس و بِدون لوم و نَضيف و مَفَرَّق مِن الخاطيين و مَرفوع أعلى مِن السَّماوات. و مُش زي رؤساء القُسُس ديل، هو ما عِندو إحتِياج أن يَقَدِّم كُلّو يوم ضَبايح عَن خَطاياهو في الأوَّل، و بَعدين عَن خَطايا النّاس. هو عَمَل دا مَرَّه واحدَه لَمّا قَدَّم نَفسو. عَشان القانون يَختار رُجال ضَعيفين يَكونو رؤساء القُسُس. و لَكِن كِلمَة الحَلَف، الجّا بَعَد القانون، إختار إبن، و هو بِقى كامِل لِلأبَد. و راس الكَلام، دا هو: نِحنا عِندَنا رَئيس قُسُس زي دا، و هو قَنَّب عَن يَمين كُرسي الله العَظيم في السَّما. و هو بِخدِم في الحاجات المُقَدَّسَه و الخيمَه الحَقيقيَه القَوَّمو الرَّب، مُش زول. عَشان كُلّو رَئيس قُسُس مُختار عَشان يَقَدِّم تَقدِمات و ضَبايح. و عَلَشان كِدا، كان ضَروري ليهو كَمان يَكون عِندو حاجَه عَشان يَقَدِّما. و إذا هو كان عَلى الأرض، هو ما كان بِكون قَسّيس، عَشان في رُجال البِقَدِّمو التَّقدِمات حَسَب القانون. و هُم بِخدِمو صورَه و ضُل الحاجات الفي السَّما. و زي دا، هو حَزَّر مُوسَى لَمّا هو قَرَّب يَعمِل الخيمَه و قال: ”شوف عَشان تَسَوّي كُلّو حاجَه زي الصّورَه الوَرّيتا ليك في الجَّبَل.“ و لَكِن هَسَّع المَسيح حَصَّل عَلى خِدمَه أحسَن بِكَتير عَشان بِالحَق، هو وَسيط لِإتِّفاق أحسَن و أساسو عَلى وُعود أحسَن. عَشان إذا الإتِّفاق الأوَّل كان بِدون غَلَط، ما كانو فَتَّشو عَلى تاني. لَكِن الله لِقى غَلَط فيهُم و قال: ”شوف! الأيام جايَه، يَقول الرَّب، لَمّا أنا بَعمِل إتِّفاق جَديد مَعَ أهل بيت إِسْرَائِيل و مَعَ أهل بيت يَهُوذَا. مُش زي الإتِّفاق العَمَلتَ مَعَ أبَهاتُم لَمّا مَسَكتُم بِإيدُم عَشان أمَرِّقُم مِن أرض مَصر. عَلَشان هُم ما إستَمَرّو في إتِفاقي، و أنا ما خَلّيت بالي ليهُم، يَقول الرَّب. أهو دا الإتِّفاق الأنا بَتَّفِق مَعَ أهل بيت إِسْرَائِيل بَعَد الأيام ديلاك، يَقول الرَّب. أنا بَخُت قَوانيني في عُقولُم، و بَكتِبا عَلى قُلوبُم. و بَكون ليهُم الله، و هُم بِكونو لَي شَعب. و هُم ما بِعَلِّمو كُلّو واحِد جارو ولّا كُلّو واحِد أخوهو، و بِقولو: أعرِف الرَّب، عَشان كُلُّهُم بِيِعرِفوني، مِن الصُّغار لِلكُبار. أنا بَكون رَحيم عَلى ذُنوبُم و أنا أبَداً ما بَتزَكَّر خَطاياهم بَعَد دا.“ و لَمّا يَقول: إتِّفاق جَديد، هو عَمَل الأوَّل قَديم. و الحاجَه البِقَت قَديمَه و عِندَها مُدَّه طَويلَه، بَعَد شوَيَه بِتفوت. و الإتِّفاق الأوَّل كان عِندو قَوانين العِبادَه و المَحَل المُقَدَّس بِتاع الدُّنيا. و هُم جَهَّزو الخيمَه، الغُرفَه البَرَّه إسِما، المَحَل القُدّوس. و كان فيهو طَرَبيزَة اللَّمبَه و طَرَبيزَه فوقا عيش التَّقدِمَه. و بِوَرا السِّتارَه في غُرفَه تانيَه إسِما، قُدُس الأقداس، و فيهو مَضبَح البَخور مِن دَهَب و تابوت الإتِّفاق، المُغَطّى مِن كُلّو جَمب بِالدَّهَب. و فيهو حَلَّه مِن الدَّهَب، فيها المَنّا، و عَصايَه هارون الجّابَت أوراق، و لوح الإتِّفاق. و مِن فوق التّابوت، كَروبيم المَجد يَضَلِّلو كُرسي الرَّحمَه. و هَسَّع ما نَقدَر نِتكَلَّم عَن الحاجات دي مِن اوَّلا لِآخِرا. و لَمّا جَهَّزو كُلّو حاجَه زي دا، القُسُس كانو بِدخُلو لِلخيمَه الفي بَرَّه دايماً عَشان يَعمِلو الخِدمَه. لَكِن رَئيس القُسُس بَس كان بِدخُل المَحَل التّاني، مَرَّه واحدَه في السَّنَه. و هو ما دَخَل بِدون دَم، الهو قَدَّمو عَن نَفسو و عَن خَطايا النّاس العَمَلوها بِدون مَعرِفَه. و كِدا، الرّوح القُدُس كان بِوَرّي إنّو الطَّرِيق لِقُدُس الأقداس ما كان مَفتوح، ما دام الخيمَه الفي بَرَّه لِسَّع واقِفَه. و دا مَثَل لِلوَكِت الحاضِر، البِوَرّي إنّو الهَدايا و الضَّبايح الهُم قَدَّموها ما قِدِرو يَعمِلو ضَمير الزّول اليَخدِم كامِل. و هُم قَوانين جِسميَّه بَس عَن أكِل و شُرُب و غَسيل مُختَلِف، و يَشتَغِلو بيهُم لِغايَة وَكِت التَّرتيب الجَّديد. لَكِن المَسيح جا رَئيس قُسُس لِلحاجات الكوَيسَه الفي هَسَّع، بِالخيمَه الأكبَر و الأكمَل. و الخيمَه دي ما مَعمولَه بِإيد زول، يَعني مُش مِن الخَليقَه دي. هو ما دَخَل بِدَم غَنَم و عُجول، لَكِن بِدَم نَفسو مَرَّه واحدَه لِقُدُس الأقداس، و جاب لينا فِداء أبَدي. و يَرُشّو دَم غَنَم و تيران و رَماد عِجلَه عَلى البِقو وَسخانين عَلَشان يَقَدِّسُم لِنَضافَة الجِّسِم. و عَلَشان دا الحَق، كَم بِالأكتَر دَم المَسيح عَمَل لينا! هو قَدَّم نَفسو لِلَّه بِالرّوح الأبَدي بِدون عيب. و دَمّو بِنَضِّف ضَمايرنا مِن الأعمال المَيِّتَه عَشان نَخدِم الله الحَي. و عَلَشان كِدا، المَسيح وَسيط إتِّفاق جَديد، عَشان هُم، المُختارين بِقبَلو الميراث الأبَدي المَوعود. و دا بِكون كِدا عَلَشان هو مات لِفِداء الخَطايا العَمَلوها تِحِت الإتِّفاق الأوَّل. و لَمّا تَكون في وَصيَه، لازِم يَثَبِّتوها بِموت الواحِد العَمَلا. عَشان الوَصيَه عِندَها قُوَّه بَس إذا واحِد يَموت، و ما بِكون عِندَها قُوَّه أبَداً وَكِت ما الواحِد العَمَلا بِعِيش. عَلَشان كِدا، الإتِّفاق الأوَّل ما بِقى ثابِت بِدون دَم. في الأوَّل مُوسَى كَلَّم كُل النّاس بِكُلّو أمر في القانون. و بَعَد دا هو أخَد دَم العُجول و الغَنَم، مَعَ مويَه و صوف أحمَر و زوفا. و رَشّاها عَلى الكِتاب زاتو و عَلى كُل النّاس. و هو قال: ”دا هو دَم الإتِّفاق الأمَركُم بيهو الله.“ و زي دا، هو رَشَّ الدَّم عَلى الخيمَه و عَلى كُلّو حاجات الخِدمَه. و بِحَسَب القانون يَنَضِّفو كُل الحاجات تَقريباً بِالدَّم. و إذا ما يَكُبّو الدَّم، ما بِكون في غُفران. عَلَشان كِدا، كان لازِم يَنَضِّفو صُوَر الحاجات الفي السَّما بِالضَّبايح ديل. و لَكِن يَنَضِّفو الحاجات الفي السَّما زاتا بِضَبايح أحسَن مِن ديل. عَشان المَسيح ما دَخَل لِقُدُس الأقداس المَعمول بِالنّاس، و دا صورَة الحاجات الحَقيقيَه. لَكِن هو دَخَل لِلسَّما عَشان يَظهَر قِدّام وَش الله فِشانّا. و ما عَشان هو يَقَدِّم نَفسو مَرّات كَتيرَه زي ما رَئيس القُسُس بِدخُل قُدُس الأقداس كُلّو سَنَه بِدَم مُش حَقّو. عَشان إذا كِدا، المَسيح كان لازِم يَتعَب مَرّات كَتيرَه مِن خَليقَة الدُّنيا. لَكِن هَسَّع هو ظَهَر مَرَّه واحدَه في نِهايَة الزَّمَن عَشان يَوَقِّف الخَطيَّه بِضَبيحَة نَفسو. و مُعَيَّن لِلنّاس أن يَموتو مَرَّه واحدَه. و بَعَد دا يَكون الحُكم. و زي دا كَمان، المَسيح كان مَقَدَّم مَرَّه واحدَه عَشان يَشيل خَطايا ناس كُتار. و هو بِظهَر مَرَّه تانيَه، مُش عَلَشان يَشيل الخَطيَّه، لَكِن عَشان يَخَلِّصُم البِستَنّوهو. و القانون عِندو ضُل الحاجات الكوَيسَه الجّايَه، و ما صورَة الحاجات بِزاتا. و هُم كانو بِقَدِّمو الضَّبايح ديل دايماً كُلّو سَنَه. و لَكِن ما مُمكِن أبَداً يَعمِلُم كامِلين، هُم البِقَرِّبو عَشان يَعبُدو. و إذا دا كان مُمكِن، ما كانو وَقَفو يَقَدِّموها؟ و عَلَشان البِيَعبُدو بِقو نُضاف مَرَّه واحدَه، هُم بَعَد دا ما بِكونو عِندَهُم ضَمير عَن خَطايا. لَكِن في الضَّبايح ديل، يِتذَكَّرو الخَطايا كُلّو سَنَه. عَشان مُش مُمكِن أن دَم التّيران و الغَنَم يَشيلو الخَطايا. عَلَشان كِدا لَمّا المَسيح جا لِلدُّنيا، هو قال: ”إنتَ ما كُنتَ عاوِز ضَبيحَه و تَقدِمَه، لَكِن جَهَّزتَ لَي جِسم. إنتَ ما كُنتَ مَبسوط مِن ضَبايح مَحروقَه و مِن ضَبايح الخَطيَّه. في الوَكِت دا، أنا قُلتَ: ’شوف! أنا جيت زي ما مَكتوب عَنّي في الكِتاب عَشان أعمِل إرادَتَك، يا الله.“ في الأوَّل هو قال: ”إنتَ ما كُنتَ عاوِز ضَبايح و تَقدِمات، و ضَبايح مَحروقَه و ضَبايح لِلخَطيَّه، و إنتَ ما كُنتَ مَبسوط مِنَّها.“ و هو قال كِدا مَعَ أنَّ هُم يَقَدِّموها حَسَب القانون. و بَعَد دا هو قال: ”شوف! أنا جيت عَشان أعمِل إرادَتَك.“ هو يَشيل الأوَّل عَشان يَثَبِّت التّاني. و بِالإرادَه دي، نِحنا بِقينا مُقَدَّسين بِتَقدِمَة جِسم يَسُوع المَسيح مَرَّه واحدَه. و كُلّو قَسّيس بِقيف كُلّو يوم و بِخدِم. و بِقَدِّم مَرّات كَتيرَه الضَّبايح ديل زاتا. لَكِن الضَّبايح ديل ما بِقدَرو يَشيلو الخَطايا أبَداً. لَكِن القَسِّيس دا، بَعَد ما قَدَّم عَن الخَطايا ضَبيحَه واحدَه لِلأبَد، هو قَنَّب عَن يَمين الله. و مِن الوَكِت دا، هو بِنتَظِر لِغايَة ما الله يَعمِل عُدوانو بَمبَر لِكِرعينو. عَشان بِتَقدِمَه واحدَه هو عَمَلُم كامِلين لِلأبَد، ديل الهو قاعِد يَقَدِّسُم. و الرّوح القُدُس يَشهَد لينا بِدا كَمان، بَعَد ما هو قال: ”أهو دا الإتِّفاق الأنا بَعمِل مَعاهُم بَعَد الأيام ديل، يَقول الرَّب. أنا بَخُت قَوانيني في قُلوبُم، و بَكتِبا في عُقولُم.“ ”و أنا أبَداً ما بَتزَكَّر خَطاياهم و ذُنوبُم بَعَد دا.“ و لَمّا الخَطايا كانَت مَغفورَه، ما بِتكون في تَقدِمَه عَن الخَطيَّه بَعَد دا. عَلَشان كِدا، يا أخوان، عِندَنا تأكيد عَشان نَدخُل لِقُدُس الأقداس بِدَم يَسُوع. هو فَتَح لينا طَريق حَي و جَديد بِالسِّتارَه، يَعني، جِسمو. و عِندَنا قَسّيس كَبير عَلى أهل بيت الله. عَلَشان كِدا، خَلّونا نَقَرِّب بِقَلِب أمين و في كُلّو تأكيد الإيمان، و قُلوبنا مَرشوشَه عَشان يَنَضِّفنا مِن ضَمير بَطّال و أجسامنا مَغسولين بِمويَه نَضيفَه. و خَلّونا نَمسِك بِشَهادَة الرَّجاء ثابِتين، عَشان هو الوَعَدنا أمين. و خَلّونا نَفتَكِّر بَعَضَنا في بَعض عَشان نَحَرِّك لِلمَحَبَّه و الأعمال الطَّيبَه، و ما نَسيب إجتِماعنا سَوا زي ما بَعض مِن النّاس عِندَهُم عادَه. لَكِن خَلّونا نَشَجِّع بَعَضَنا بَعض و بِالزِّيادَه بِقَدُر ما تَشوفو اليوم يَقَرِّب. عَشان إذا نَعمِل الخَطيَّه بِإرَادَتنا بَعَد ما قِبِلنا مَعرِفَة الحَق، بَعَد دا ما في ضَبيحَه عَن الخَطايا. لَكِن نِستَنّا بِخوف شَديد لِلحُكم، و زَعل نار بِتاكُل عُدوان الله. أي واحِد الأبى قانون مُوسَى مات بِدون رَحمَه عَلى شَهادَة إتنين ولّا تلاتَه ناس. و شِنو بِكون لِلزّول الدّاس إبن الله تِحِت رِجلينو، و إفتَكَر الإتِّفاق القَدَّسو حاجَه وَسخانَه، و شَتَم روح النِّعمَه؟ فَكِّرو كيف هو يِستَحِق جِزا أشَدّا! عَشان نِحنا نَعرِفو القال: ”لَي الإنتِقام، أنا بَدفَع.“ و كَمان: ”الرَّب بِيَحكُم شَعبو.“ الوقوع في إيدين الله حاجَه مُخيفَه. لَكِن إتزَكَّرو الأيام الفاتَت. في الوَكِت داك بَعَد ما قِبِلتو النّور، كان عِندَكُم صَبر عَلى حَرب صَعب مَعَ أتعاب. مَرَّه شَتَموكُم قِدّام النّاس و طَرَدوكُم، و تاني مَرَّه بِقيتو شُرَكا ديل الكانو مَطرودين زي دا. و إنتو تِعِبتو سَوا مَعَ المَحبوسين، و لَمّا مَسَكو بُضاعَتكُم بِقُوَّه، إنتو قِبِلتو دا بِفَرَح، عَلَشان إنتو نُفوسكُم عِرِفتو عِندَكُم مال أحسَن البِستَمِر. و عَلَشان كِدا، ما تَرمو عَنكُم تأكيدكُم العِندو أُجرَه كَبيرَه. إنتو تَحتاجو لِلصَّبر، حَتّى إذا عَمَلتو إرادَة الله، بِتَقبَلو الوَعد. ”عَشان بَعَد شوَيَه، هو الجّاي بِجي، و ما بِتأخَّر. لَكِن الإنسان البار، بِعِيش بِالإيمان. و إذا هو رَجَع لِوَرا، نَفسي ما بِكون مَبسوط مِنّو.“ و لَكِن نِحنا ما مِن النّاس اليَرجَعو لِوَرا لِلخَراب، لَكِن نِحنا مِن النّاس البِآمِنو لِخَلاص النَّفس. و الإيمان هو التّأكيد بِالحاجات العِندَنا رَجاء ليهُم، و بيّنَة الحاجات الما شُفناهُم. عَشان في دا الله شِهِد لِلأبَهات. بِالإيمان بِنَفهَم أن الدُّنيا كانَت مَخلوقَه بِكِلمَة الله. و عَلَشان كِدا، الحاجات النَّشوفا ما كانَت مَعمولَه بِالحاجات اليَظهَرو. بِالإيمان هابيل قَدَّم لِلَّه ضَبيحَه أحسَن مِن قايين. بِالإيمان كان مَشهود ليهو إنَّهو راجِل بار، عَشان الله شِهِد لِتَقدِمَتو. و بيهو كَمان هو لِسَّع يتكَلَّم و لَو هو مات. بِالإيمان أَخْنُوخ ما شاف الموت، عَشان شالوهو لِلسَّما. و ما قِدِرو يَلقوهو، عَلَشان الله شالو. عَشان قُبّال ما شالوهو، كانَت عِندو الشَّهادَه إنّو بَسَط الله. و بِدون إيمان ما مُمكِن نَبسِط الله. عَشان أي زول اليَقَرِّب لِلَّه لازِم يآمِن هو مَوجود و هو بِدّي أُجرَه ليهُم اليَطلُبوهو. بِالإيمان نُوح، لَمّا الله حَزَّرو عَن الحاجات الهو لِسَّع ما شافُم، خاف و بَنى المُركَب الكَبيرَه لِخَلاص أهلو. و بيهو هو حَكَم عَلى الدُّنيا و بِقى وارِث لِلبِر البِالإيمان. بِالإيمان إِبْرَاهِيم، لَمّا الله ناداهو، طاع عَشان يَمرُق لِلمَحَل الهو ماشي ياخُدو ميراث. و هو مَرَق و ما عارِف هو ماشي وين. بِالإيمان هو سَكَن في أرض الوَعد، زي ما هو غَريب. هو سَكَن في خيام مَعَ إِسْحَاق و يَعْقُوب، الوُرّاث مَعاهو لِنَفس الوَعد. عَشان هو إنتَظَر المَدينَه العِندَها الأساسات، و الله عَمَلا و بَناها. بِالإيمان سَارَه نَفسا كَمان قِبِلَت قُوَّه عَشان تَحمَل وَلَد بَعَد ما بِقَت عَجوزَه عَلَشان هي حَسبَتو أمين، هو الوَعد بِدا. و عَلَشان كِدا، مِن واحِد، و هو زي المَيِّت، إتوَلَد أولاد كَتيرين زي نِجوم السَّما و زي الرَّملَه عَلى طَرَف البَحَر الما نَقدَر نَعِدّا. و ديل كُلُّهُم ماتو في الإيمان. و هُم ما قِبِلو الوُعود، لَكِن شافوها و سَلَّمو عَليها مِن بَعيد. و إعتَرَفو بِأنَّ هُم غَريبين و ضُيوف ساكِنين عَلى الأرض. و النّاس البِقولو حاجات زي دي يَبَيِّنو هُم يَطلُبو وَطَن. و إذا إتزَكَّرو الوَطَن الهُم مَرَقو مِنّو، كانَت عِندَهُم فُرصَه لِلرُّجوع. لَكِن هَسَّع هُم بِدورو وَطَن أحسَن، يَعني الفي السَّما. و عَلَشان كِدا، الله ما يَكون خَجلان لَمّا هُم يَسَمّوهو إلَهُم، عَشان هو جَهَّز ليهُم مَدينَه. بِالإيمان إِبْرَاهِيم، لَمّا الله إمتَحَنو، قَدَّم إِسْحَاق. هو، القِبِل الوُعود، بَدا يَقَدِّم وَلَدو الوَحَيد، مَعَ إنّو الله قال ليهو: ”بِإِسْحَاق أولادَك بِجو.“ إِبْرَاهِيم حَسَب أن الله عِندو قُدرَه يَقَوِّمو مِن بين المَيِّتين. و بِالحَق، هو في صورَه قِبِل إِسْحَاق مِن بين المَيِّتين. بِالإيمان كَمان إِسْحَاق بارَك يَعْقُوب و عِيسُو عَن الحاجات الجّايَه. بِالإيمان يَعْقُوب، لَمّا كان بِموت، بارَك كُلّو واحِد مِن وَلَدين يُوسِف. و هو إنتَكَل عَلى راس عَصاهو و صَلّى. بِالإيمان يُوسِف، لَمّا قَرَّب لِلموت، زَكَّر كيف بَني إِسْرَائِيل بِيَطلَعو، و أدّا أمر عَن عِضامو. بِالإيمان والِدين مُوسَى دَسّوهو تلاتَه شُهور بَعَد ما إتوَلَد، عَلَشانُم شافو إنّو وَلَد جَميل. و هُم ما خافو مِن أمر المَلِك. بِالإيمان مُوسَى، لَمّا كِبِر، أبى يَخَلّي النّاس يَقولو هو وَلَد بِت فِرعون. هو إختار يَكون مَظلوم مَعَ شَعب الله بَدَل أن يَكون مَبسوط لِوَكِت بِسُرور الخَطيَّه. و هو حَسَب لوم المَسيح غِنى أكبَر مِن كُنوز مَصر، عَلَشانو كان يِستَنّى لِلأُجرَه. بِالإيمان مُوسَى ساب مَصر، و ما كان خايِف مِن زَعل المَلِك. عَلَشان هو إتحَمَّل زي البِشوفو الما مُمكِن يَشوفو. بِالإيمان هو عَمَل الفِصَح و رَشَّ الدَّم، عَلَشان البِخرَب ما يَلمَس المَولودين في الأوَّل. بِالإيمان النّاس مَرّو بِالبَحَر الأحمَر زي في أرض يابِسَه. لَكِن، لَمّا ناس مَصر جَرَّبو يَعمِلو كِدا، هُم ماتو في المويَه. بِالإيمان حيطات أَرِيحَا وَقَعو بَعَد ما مَشو حَواليهُم سَبعَة أيام. بِالإيمان رَاحَاب الزّانيَه ما ماتَت مَعاهُم الما طاعو، عَلَشان هي قِبلو بِسَلام الرُّجال الجّو بِالسِّر عَشان يَشوفو البَلَد. و بَقول شِنو زِيادَه؟ عَشان أنا ما عِندي وَكِت كِفايَه أكَلِّمكُم عَن جِدعون و باراك و شَمْشُون و يَفتاح و دَاوُد و صَمُوئِيل و الأنبياء. بِالإيمان هُم غَلَبو مَمالِك، عَمَلو البِر، و قِبلو الوُعود. هُم قَفَلو خُشوم الأُسود، و بَطَّلو قُوَّة النّار، و هَرَبو مِن الموت بِالسّيف. و هُم كانو ضَعيفين و بِقو شُداد، و بِقو أشَد في الحَرب، و غَلَبو جُيوش الغَريبين. و رَجَّعو لِنِسوان أهلم الماتو و قامو مِن بين المَيِّتين. و تانيين إتعَذَّبو و ما قِبلو الفِداء، عَشان يَحَصِّلو عَلى قيامَه أحسَن. و جَرَّبو تانيين بِالشَّتايِم و الجَّلد، حَتّى الجَّنازِير و السِّجِن كَمان. و رَموهُم بِالحُجار، و جَرَّبوهُم، و قَطَعوهُم في الوَسِط، و كَتَلوهُم بِالسّيف. هُم مَشو هِنا و هِناك في جُلود الخِرفان و الغَنَم، و كانو مُحتاجين و مَطرودين و مَظلومين. و الدُّنيا ما كانَت مُستَحِقَّه ليهُم. هُم أتفَرتَقو في المَحَلّات الفي بَرَّه و الجِّبال، و المَغاوير و الحُفَر الفي الأرض. و ديل كُلَّهُم كانو عِندَهُم شَهادَه بِالإيمان، لَكِن ما قِبلو الوُعود. عَشان الله جَهَّز لينا حاجَه أحسَن، عَلَشان هُم ما بِكونو كامِلين بِدونَنا. و عَلَشان في حَوَلينا سِحابَه كَبيرَه زي دي مِن الشّاهِدين، خَلّونا نَرمي مِنَّنا كُلّو حِمِل و الخَطيَّه البِتضَيقنا بِالسُّرعَه. و خَلّونا نَجري بِالصَّبر السَّبَق المَختوت قِدّامنا. خَلّونا نَعاين لِيَسُوع، رَئيس الإيمان و البِكَمِّلو. هو فِشان الفَرَح المَختوت قِدّامو، إتحَمَّل الصَّليب و إحتَقَر الخَجَل، و قَنَّب عَن يَمين كُرسي الله. و فَكِّرو فيهو الإتحَمَّل عَداوَه زي دي لِنَفسو مِن الخاطيين، عَلَشان ما تَبقو تَعبانين في نُفوسكُم و تَقولو ما في فايدَه. عَشان في الحَرب بِتاعكُم ضِد الخَطيَّه، إنتو لِسَّع ما قاوَمتو حَتّى الدَّم. نِسيتو كِلمَة الشَّجاعَه اليتكَلَّم مَعاكُم زي أولاد: ”يا وَلَدي، ما تَحتَقِر تأديب الرَّب، و ما تَكونو ضَعيفين في الرَّجاء لَمّا يَوَبِّخَك. عَشان الرَّب يأدِّب البِحِبّو، و يَجلِد كُلّو وَلَد الهو يَقبَلو.“ إتحَمَّلو التّأديب عَشان الله يَعامِلكُم زي أولاد. عَشان في أي وَلَد أبوهو ما يأدِّبو؟ لَكِن إذا إنتو بِدون تأديب، و الكُل يَشتَرِكو فيهو، إنتو أولاد زِنا و مُش أولاد بِالحَق. و كَمان كُنّا عِندَنا أبَهات حَسَب الجِّسِم اليأدِّبونا، و إحتَرَمناهُم. و كَم بِالأكتَر لازِم نَطيع أبو الأرواح و نَعيش؟ و بِالحق أبَهاتنا أدَّبونا أيام قَليلَه زي ما هُم إفتَكَرو كوَيس. لَكِن الله يأدِّبنا لِفايدَتنا، عَلَشان نَشتَرِك في قَداسَتو. و بِالحَق، في الوَكِت الحاضِر نَفتَكِر كُلّو تأديب ما لِلفَرَح، لَكِن لِلحُزن. لَكِن بَعدين هو بِجيب ثِمار البِر و السَّلام لِديل الإتعَلَّمو مِنّو. عَلَشان كِدا، شَدِّدو الإيدين التَّعبانَه و الرَّكَبين الضَّعيفَه. أعمِلو لِكِرعينكُم سِكَك عَديلَه، عَشان الأعرَج ما يَدَوِّر مِن السِّكَّه، لَكِن بَدَل مِن دا، هو يَشفي. أتبَعو السَّلام مَعَ كُل النّاس و القَداسَه، عَلَشان ما في واحِد بِشوف الله بِدون القَداسَه. شوفو كوَيس عَشان واحِد ما يَقَع مِن نِعمَة الله، و عَشان عِرق مِن قَلِب مُر ما يَقوم و يَكون سَبَب التَّعب، و ناس كُتار يِتوَسَّخو. و شوفو عَشان واحِد ما يَكون زاني ولّا يَكون عِندو أفكار ضِد الله، زي عِيسُو الباع حَق البِكر بِتاعو لِأكلا واحدَه. عَشان إنتو بِتَعرِفو كيف بَعَد دا، لَمّا كان عاوِز يورَث البَرَكَه، هو كان مَرفوض. و هو ما لِقى طَريق لِلتّوبَه، مَعَ إنّو طَلَبا بِالدِّموع. عَشان إنتو ما قَرَّبتو لِجَبَل ما مُمكِن يَلمَسو، ولّا لِنار مَوَلَّعَه، ولّا لِغَمام، و ضُلُمَّه، و هَبوب، ولّا لِصوت بوق، ولّا لِصوت كِلمات. و النّاس السِمِعوهو إترَجّوهو أن ما يَزيدو ليهُم كِلمَه واحدَه، عَلَشانُم ما قِدرو يِتحَمَّلَو الأمر الهو أدّاهُم: ”إذا حَيوان يَلمَس الجَّبَل، لازِم يَرموهو بِحُجار.“ و المَنظَر كان مَخَوِّف حَتّى مُوسَى قال: ”أنا خايِف خوف شَديد خَلاص و بَرجِف.“ لَكِن إنتو قَرَبتو لِجَبَل صِهيون، لِمَدينَة الله الحَي، أُورُشَلِيم السَّماويَّه، و لِجَماعات عَشَرَة آلاف مِن المَلائكَه، و لِإجتِماع، و لِكَنيسَة المَولودين في الأوَّل، أساميهُم مَكتوبَه في السَّما. و إنتو قَرَّبتو لِلَّه، قاضي كُل النّاس، و لِأرواح البارين البِقو كامِلين، و لِيَسُوع وَسيط الإتِّفاق الجَّديد، و لِرَش الدَّم اليتكَلَّم حاجَه أحسَن مِن دَم هابيل. و شوفو كوَيس عَشان ما تَرفُضو البِتكَلَّم. عَشان هُم ما قِدرو يَهرُبو لَمّا رَفَضوهو، الحَزَّرُم عَلى الأرض. و كَم بِالأكتَر نِحنا ما نَقدَر نَهرَب إذا نَرَجِّع عَنّو اليَحَزِّرنا مِن السَّما؟ و في الوَكِت داك صوتو هَز الأرض، لَكِن هَسَّع هو وَعَد و قال: ”مَرَّه تانيَه ما بَهِز الأرض بَس، لَكِن السَّما كَمان.“ و الكِلمات دي: ”مَرَّه تانيَه،“ يَعني يَشيل المُمكِن يَهِزّوها، زي الحاجات المَعمولَه، عَلَشان الما مُمكِن يَهِزّوها تِستَمِر. عَلَشان كِدا، إذا نَقبَل مَلَكوت ما مُمكِن يَهِزّوها، خَلّونا نَشكُر الله. و خَلّونا نَقَدِّم لِلَّه خِدمَه مَقبولَه بِإحتِرام و خوف. عَشان إلَهنا هو نار بِتاكُل. خَلّو مَحَبَّة الأخوان تِستَمِر. و ما تَنسو تَقبَلو الغَريبين زي ضُيوف. عَلَشان بَعض مِن النّاس لَمّا عَمَلو كِدا، قِبلو مَلائكَه زي ضُيوف و هُم ما عِرفو. إتزَكَّروهُم المَحبوسين، زي ما إنتو مَحبوسين مَعاهُم، و ديل المَظلومين زي ما إنتو كَمان مَظلومين. خَلّي الزَّواج يَكون مُحتِرَم بِكُل النّاس. و الرّاجِل و المَرَه لازِم يَكونو أُمَنا. عَلَشان الله بِيَحكُم عَلى النّاس البيَعمِلو الزِّنا و الفُجّار. أحفَظو حَياتكُم مِن مَحَبَّة القُروش، و كونو مَبسوطين مِن العِندَكُم. عَلَشان الله قال: ”أنا أبَداً ما بَسيبَك، و ما بَخَلّيك وَحدَك أبَداً.“ و عَلَشان كِدا، نَقدَر نَقول بِتأكيد: ”الرَّب مِساعِدي و أنا ما بَخاف. الزّول بِقدَر يَعمِل شِنو لَي؟“ إتزَكَّرو رؤساكُم الكَلَّموكُم بِكِلمَة الله. فَكِّرو في ثِمار حَياتُم، و خَلّو إيمانكُم يَكون زي إيمانُم. يَسُوع المَسيح هو هو أُمبارِح، و النَّهار دا، و لِلأبَد. ما تَخَلّو تَعاليم مُختَلِفَه و غَريبَه تَسوقكُم مِن الحَق. عَشان دا كوَيس إذا القَلِب يَكون ثابِت بِالنِّعمَه، مُش بِأكِل مَخصوص. و النّاس الأكَلوهو ما لِقو مِنّو فايدَه. نِحنا عِندَنا مَضبَح، و البِخدِمو في الخيمَه ما عِندَهُم سُلطَه ياكُلو مِنّو. و رَئيس القُسُس يَشيل دَم البَهايِم لِقُدُس الأقداس عَشان ضَبيحَه لِلخَطيَّه. لَكِن هُم حَرَقو الأجسام بَرَّه مِن مَحَل الخيام. و عَلَشان كِدا، يَسُوع كَمان إتوَجَّع بَرَّه مِن باب المَدينَه، عَشان يَقَدِّس النّاس بِدَمّو. كِدا، خَلّونا نَمرُق بَرَّه مِن مَحَل الخيام، حامِلين لومو. عَشان ما عِندَنا هِنا مَدينَه مُستَمِرَّه، لَكِن نَطلُب المَدينَه الجّايَه. عَلَشان كِدا، خَلّونا نَقَدِّم بِيَسُوع ضَبيحَة الحَمد لِلَّه في كُلّو وَكِت، يَعني ثِمار خُشومنا البِعتَرِفو بِإسمو. لَكِن ما تَنسو تَعمِلو الخير، و تَشتَرِكو مَعَ التّانيين، عَشان ضَبايح زي دي تَبسِط الله. طيعو رؤساكُم و كونو تِحِت سُلطَتُم. عَلَشانُم يَحرَسو عَلى نُفوسكُم زي ديل البِدّو حِساب. طيعوهُم عَلَشان شُغلُم بِكون بِفَرَح، مُش بِحُزن. عَشان إذا بِحُزن، ما في فايدَه ليكُم. صَلّو فِشانّا. بِنَعرِف بِالحَق نِحنا عِندَنا ضَمير طَيب، و نِحنا عاوِزين نَعيش حَياة أمينَه في كُلّو حاجَه. و بَطلُب ليكُم بِالأكتَر أن تَعمِلو دا، عَلَشان يَرَجِّعوني ليكُم بِالسُّرعَه. و إلَه السَّلام قَوَّم مِن بين المَيِّتين رَبَّنا يَسُوع، راعي الخِرفان، العَظيم، بِدَم الإتِّفاق الأبَدي. الله يَعمِلكُم كامِلين في كُلّو عَمَل طَيب عَشان تَعمِلو إرَادَتو. و هو يَشتَغِل فيكُم الحاجَه التَّبسِطو كَتير، بِيَسُوع المَسيح. و لِلمَسيح المَجد لِلأبَد. آمين. بَسألكُم، يا أخوان، تِتحَمَّلو كِلمَة الشَّجاعَه، عَلَشان كَتَبتَ ليكُم جَواب صَغَيِر. و أنا عاوِزكُم تَعرِفو، أخونا تِيمُوثَاوُس إتفَكّا مِن السِّجِن، و بِنشوفكُم سَوا إذا هو بِجي في وَكِت قَريب. سَلِّمو عَلى كُلّو رؤساكُم و عَلى كُل القِدِّسين. و هُم المِن إيطاليَا يَسَلِّمو عَليكُم. النِّعمَه مَعَ كُلُّكُم. مِن يَعْقُوب خَدّام الله و الرَّب يَسُوع المَسيح، لِلإتناشَر قَبيلَه الإتَشَتَّتو بين الأُمَم. السَّلام. أحسِبوهو كُلّو فَرَح، يا أخواني، وَكِت ما تَلقو تَجَارِب مُختَلِفَه. عارِفين إمتِحان إيمانكُم يَجيب الصَّبر. خَلّي يَكون لِلصَّبر عَمَل كامِل، عَلَشان تَكونو كاملين و تامين، ما ناقصين في حاجَه. و إن كان واحِد يَحتاج لِحِكمَه، خَليهو يَسأل الله البِدّي لِكُل النّاس بِالكَرامَه. و الله ما يَلوم، و هو بِدّيهو. لَكِن لازِم يَسأل بِإيمان، و ما بِشِك كُلّو كُلّو. أي واحِد البِشِك، هو زي موج البَحَر الريح تَهِبّو لِهِنا و لِهِناك و تَرميهو. ما تَخَلّي الزّول داك يَفتِكِر هو بِقبَل حاجَه مِن الرَّب. الرّاجِل العِندو فِكرَتين، هو ما ثابِت في كُلّو طُرُقو. خَلّي الأخو المِسكين يَفرَح بِمَحَلّو العالي. لَكِن خَلّي الغَني يَفرَح بِمَحَلّو الواطي، عَشان زي زَهرَة القَش هو بِفوت. عَشان الشَّمِش تَطلَع بِحَرّا، و القَش يبَس، و زَهرَتو تَقَع، و جَمال مَنظَرا يَخسَر. و زي دا كَمان الغَني يَخسَر في وَسِط شُغلو. مُبارَك الرّاجِل البِتحَمَّل التَجرِبَه. عَشان إذا مَرَّه بِالإمتِحان، هو بِقبَل تاج الحَياة الوَعَد بيهو الرَّب لِلنّاس البِحِبّوهو. المُجَرَّب ما لازِم يَقول: ”الله يَجَرِّبني.“ عَشان الله ما يَقدَر يَكون مُجَرَّب بِالشَّر، و هو ما يَجَرِّب أي واحِد. لَكِن كُلّو واحِد يِتجَرَّب إذا شَهوَتو تَجُرّو و تَغِشّو. بَعدين الشَّهوَه إذا حِملَت تَجيب خَطيَّه. و الخَطيَّه لَمّا تَكبَر تَجيب الموت. ما تَكونو مَغشوشين، يا أخواني المَحبوبين. كُلّو هَدِيَّه طَيبَه، و كُلّو هَدِيَّه كاملَه، هي مِن فوق، و نازلَه مِن أبو الأنوار الما فيهو فَرَق ولّا ضُل مِن تَغيير. مِن إرادَة نَفسو هو وَلَدنا بِكِلمَة الحَق عَشان نَكون أوَّل ثِمار مِن كُل الخَلَقو. أعرِفو دا، يا أخواني المَحبوبين. خَلّي كُلّو زول يَكون قَوّام في السَمَع، بِشيش في الكَلام، بِشيش في الزَّعَل. عَشان زَعَل الإنسان ما بيَعمِل بِر الله. عَشان كِدا، أرمو مِنَّكُم كُلّو نَجاسَه و كَترَت شَر، و أقبَلو بِوَداعَه الكِلمَه المَزروعَه البِتَقدَر تَخَلِّص نُفوسكُم. و لَكِن كونو عامِلين بِالكِلمَه، ما سامعين ليها بَس، و كِدا تَغِشّو نُفوسكُم. إن كان واحِد بِسمَع لِلكِلمَه و ما بيَعمِل بيها، هو زي راجِل يَشوف وَشّو الطَّبيعي في مِرايا. و هو يَشوف نَفسو و يَمشي، و بِسُرعَه يَنسى كيف هو كان. لَكِن البِشوف في القانون الكامِل، قانون الحُرّيَّه، و بيَعمِلو و يِستَمِر فيهو، هو بِكون مُبارَك في عَمَلو، مُش هو البِسمَع و بَعدين بِنسى. إذا واحِد يَفتَكِر نَفسو ديني، و هو ما عِندو سُلطَه عَلى لِسانو، هو يَغِش نَفسو. دين الزّول دا بِدون فايدَه. الدّين النَّضيف و البِدون عيب قِدّام الله الأبو، هو زيارَة اليَتامى و الأرامِل في تَعبُم، و حِفظ الإنسان نَفسو بِدون نَجاسَه مِن الدُّنيا. يا أخواني، ما تَشوفو وشوش النّاس و إنتو ماسكين بِإيمان رَبَّنا يَسُوع المَسيح، رَب المَجد. خَلّونا نَقول راجِل يَدخُل إجتِماعكُم عِندو خاتِم مِن دَهَب و في هِدوم جَميل. و يَدخُل كَمان راجِل مِسكين في هِدوم وَسخان. و إنتو تَخَلّو بالكُم لِلعِندو الهِدوم الجَّميل و تَقولو ليهو: ”أقعُد هِنا في كُرسي سَمِح.“ و تَقولو لِلمِسكين: ”قوم هِناك،“ ولّا: ”أقعُد هِنا تِحِت بَمبَر كِرعينّا،“ إنتو ما عَمَلتو فارِق بين نُفوسكُم، و بِقيتو قُضاة بِأفكار شَرّيرَه؟ أسمَعو، يا أخواني المَحبوبين، الله ما إختار مَساكين الدُّنيا دي عَشان يَكونو غَنيين في الإيمان و وُرّاث المَلَكوت الوَعَد بيهو لِلبِحِبّوهو؟ لَكِن إنتو شَتَمتو المِسكين. الغَنيين ما يَظلُموكُم و يَجُروكُم لِلمَحكَمَه؟ ما هُم البِجَدِّفو عَلى الإسِم المُحتِرَم البِسَمّوكُم بيهو؟ إذا تَتِمّو القانون المَلوكيَه، بِحَسَب الكِتاب: ”تَحِب قَريبَك زي نَفسَك،“ تَعمِلو طَيب. لَكِن إذا تَشوفو الوشوش، إنتو تَخطو، و القانون يَحكُم عَليكُم زي مُخالِفين. و الزّول البِحفَظ كُل القانون و يَكَسِّر أمر واحِد، هو بِقى مُذنِب في الكُل. عَشان القال: ”ما تَزني،“ قال كَمان: ”ما تَكتُل.“ إذا ما تَزني و لَكِن تَكتُل، إنتَ بِقيت مُخالِف القانون. إتكَلَّمو و أعمِلو زي الماشين يِتحَكَمو بِقانون الحُرّيَّه. عَشان الحُكم بِدون رَحمَه هو عَلى الما يَعمِل رَحمَه. الرَّحمَه تَغلِب عَلى الحُكم. شِنو الفايدَه، يا أخواني، إذا واحِد يَقول إنّو عِندو إيمان و لَكِن ما عِندو أعمال؟ الإيمان داك يَقدَر يَخَلِّصو؟ خَلّونا نَقول أخو ولّا أُخُت عَريانين و مُحتاجين لِلأكِل اليومي. و واحِد مِنَّكُم يَقول ليهُم: ”أمشو بِالسَّلام، إدَّفّو و أشبَعو.“ لَكِن هو ما بِدّيهُم البِحتاجو ليهُم لِلجِّسِم، الفايدَه شِنو؟ و كِدا كَمان الإيمان، إذا ما عِندو أعمال، هو مَيِّت في نَفسو. لَكِن واحِد بِقول: ”إنتَ عِندَك إيمان و أنا عِندي أعمال. وَرّيني إيمانَك بِدون أعمال، و أنا بَوَرّيك إيماني بِأعمالي.“ إنتَ تآمِن أن الله واحِد، إنتَ تَعمِل كوَيس. و الشّياطين يآمِنو كَمان، و يَرجِفو. لَكِن يا الإنسان الغَشيم، إنتَ داير تَعرِف، أن الإيمان بِدون الأعمال ما ليهو فايدَه؟ إِبْرَاهِيم أبونا ما إتبَرَّر بِالأعمال لَمّا قَدَّم إِسْحَاق إبنو عَلى المَضبَح؟ إنتَ تَشوف أن الإيمان كان بِشتَغِل مَعَ أعمالو، و الإيمان بِقى كامِل بِأعمالو. و تَمَّ الكِتاب البقول: ”إِبْرَاهِيم آمَن بِالله، و دا حَسَب ليهو بِر.“ و سَمّوهو مَحبوب الله. إنتو تَشوفو أن الزّول يِتبَرَّر بِالأعمال، مُش بِالإيمان بَس. و كِدا كَمان، رَاحَاب الزّانيَه ما كانَت إتبَرَّرَت بِالأعمال لَمّا قِبلَت المَراسيل و رَسَّلَتُم بِطَريق تاني؟ زي ما الجِّسِم بِدون روح هو ميت، كِدا كَمان الإيمان بِدون أعمال هو مَيِّت. يا أخواني، ما تَكونو مُعَلِّمين كَتيرين، عَشان تَعرِفو نِحنا البِعَلِّمو ناخُد حُكم أعظَم. عَشان كُلُّنا نَقَع في حاجات كَتيرَه. و إذا كان واحِد ما ليهو غَلطَه في الكَلام، هو راجِل كامِل، و يَقدَر يَغلِب عَلى كُل الجِّسِم كَمان. لَمّا نَخُت حَديد اللِّجام في خُشوم الحَصين عَشان يَطيعونا، بِدا نَقدَر نَدَوِّر كُل أجسامُم. شوفو! الهَبوب تَسوق المَراكِب الكَبيرَه جِدّاً. لَكِن دَفَّه صَغَيرَه جِدّاً تَحَوِّلا لِلمَحَل الرَئيس داير يَمشي ليهو. كِدا كَمان اللِّسان، هو عُضو صَغَيِر، لَكِن يتكَلَّم بِكِبِر عَن حاجات عَظيمَه. شوفو كيف شوَيَة نار تَوَلِّع غابَه كَبيرَه. و اللِّسان كَمان نار. هو دُنيا شَرّيرَه مَختوتَه بين أعضانا. اللِّسان يَنَجِّس الجِّسِم كُلّو، و يَوَلِّع طَريق حَياتنا كُلّو بِالنّار البِتَجي ليهو مِن جَهَنَّم. عَشان كُلّو أنواع الوحوش، و الطُّيور، و الزَّحافات، و حَيوانات البَحَر، النّاس بِوالِفوهُم و كانو بِوالِفوهُم. لَكِن واحِد ما بِقدَر يَوالِف اللِّسان. هو شَر، ما ليهو راحَه، مَليان بِالسِّم اليَكتُل. بِاللِّسان نَبارِك الله الأبو، و بيهو نَلعَن النّاس الإتسَوّو عَلى شَبَه الله. مِن الخَشُم الواحِد، تَمرُق البَرَكَه و اللَّعنَه. يا أخواني، دا ما لازِم يَكون كِدا. مُمكِن مويَه حِلوَه و مُرَّه تَجري مِن بير واحدَه؟ يا أخواني، شَجَرَة تين تَقدَر تَجيب زيتون، ولّا كَرمَة عِنَب تَجيب تين؟ و كِدا كَمان البير المالحَه ما تَجيب مويَه حِلوَه. مِنو حَكيم و فاهِم بينكُم؟ خَليهو يَوَرّي مِن حَياتو الطَّيبَه، أعمالو في الوَداعَه بِتاعَت الحِكمَه. و لَكِن إذا عِندَكُم حَسَد مُر وَ حُب الرّياسَه في قُلوبكُم، ما تَفَكِّرو و ما تَكَضِّبو عَلى الحَق. الحِكمَه دي ما بِتَنزِل مِن فوق، لَكِن هي أرضيَه، جِسميَّه، شيطانيَه. عَشان المَحَل الفيهو حَسَد و حُب الرّياسَه، هِناك في لَخبَطَه و كُلّو نوع الشَّر. لَكِن الحِكمَه المِن فوق، هي في الأوَّل نَضيفَه، بَعدين مُحِب السَّلام، عِندَها صَبر. الحِكمَه دي مُطيعَه، مَليانَه رَحمَه و ثِمار كوَيس، ما فيها فارِق، و مُخلِصَه. البيَعمِلو السَّلام بِزرَعو تيراب السَّلام، و هُم بِلِمّو ثِمار البِر. مِن وين الهُروب و الشَّكلات بينكُم؟ ما مِن شَهوَه البِحارِبو في عُدوانكُم؟ تَدورو و ما بِتحَصِّلو عَليهو. تَكتُلو و تَطمَعو فيهو و لَكِن ما بِتَقدَرو تَحَصِّلو عَليهو. تَشاكِلو و تَحارِبو. و ما تَحَصِّلو عَليهو عَشان ما تَطلُبو. لَمّا تَطلُبو ما تاخدو، عَشانكُم تَطلُبو بِغَلطَه، عَشان تَصرُفوهو عَلى سُروركُم. يا زانين، ما بِتَعرِفو حُب الدُّنيا عَداوَه لِلَّه؟ أي واحِد عاوِز يَكون صاحِب لِلدُّنيا يَبقى عَدو لِلَّه. ولّا تَفتَكِرو الكِتاب يَقول بِدون سَبَب: ”الرّوح العَمَّلو يَسكُن فينا يَحِب لِلحَسَد؟“ لَكِن هُوَ يَدّي نِعمَه زِيادَه. عَشان كِدا، الكِتاب يَقول: ”الله يَقاوِم المَتكَبِّرين، و لَكِن يَدّي نِعمَه لِلمِتواضِعين.“ طيعو الله. قاوِمو إبْلِيس و هو بِهرُب مِنَّكُم. قَرِّبو لِلَّه و هو بِقَرِّب ليكُم. غَسِّلو إيدينكُم، يا خاطيين، و نَضِّفو قُلوبكُم، إنتو العِندَكُم فِكرين. أحزِنو كورِكو و أبكو. غَيِرو ضِحِكُّم لِبِكى، و فَرَحكُم لِحُزن. كونو مِتواضِعين قِدّام الرَّب، و هو بِرفَعكُم. يا أخوان، ما تِتكَلَّمو الشَّر بَعضَكُم بَعض. البِتكَلَّم الشَّر عَلى أخوهو ولّا يَحكُم عَلى أخوهو، يتكَلَّم ضِد القانون، و يَحكُم عَلي القانون. و إذا تَحكُم عَلى القانون، إنتَ ما عامِل بِالقانون، لَكِن إنتَ قاضي ليهو. البِدّي القانون و القاضي واحِد بَس، هو البِقدَر يَخَلِّص و يَهلِك. مِنو إنتَ، يا البِحكُم عَلى قَريبَك؟ هَسَّع أسمَعو، يا البِقولو: ”نَمشي اللّيلَه دي ولّا بُكرَه لِلمَدينَه دي ولّا ديك، و هِناك نَقعُد سَنَه و نَتاجِر و نَربَح.“ و إنتو ما بِتَعرِفو الماشي يَحصَل بُكرَه. حَياتكُم شِنو؟ إنتو دُخان يَظهَر لِوَكِت قَليل و يَفوت. بَدَل مِن دا، لازِم تَقولو: ”إن شاء الرَّب، بِنعيش و بِنَعمِل دا ولّا داك.“ لَكِن هَسَّع بِتَشكُرو و بِتَرفَعو نُفوسكُم. كُلّو كِبِر زي دا شَرّير. البِيَعرِف يَعمِل الخير و ما بيَعمِلو، داك خَطيَّه ليهو. هَسَّع أسمَعو، يا غَنيين، أبكو و كورِكو عَلى مُصيباتكُم الجّايَه. غِناكُم خَربان و هِدومكُم أكَلَتا العِتَّه. دَهَبكُم و فِضَّتكُم صَدّو، و صَداهُم بِشهَد عَليكُم و بياكُل لَحَمكُم زي نار. حَفَظتو كَنز في الأيام الأخيرَه. شوفو! ماهيَة الشّغّالين الإشتَغَلو في زِراعاتكُم، الإنتو ما دَفَعتو ليهُم، تَكورِك! و كوراك البِلِمّو الدُّرَه دَخَل إضنين رَب الجُّيوش. حَياتكُم في الأرض كانَت مَليانَه حاجات طَيبَه و سُرور. شَبَعتو قُلوبكُم في يوم الضَّبيحَه. حَكَمتو عَلى البار و كَتَلتوهو. و هو ما يَعاكِسكُم. عَلَشان كِدا، أصبُرو، يا أخوان، لِغايَة ما الرَّب بِجي. شوفو كيف المُزارِع بِستَنّى ثِمار الأرض الغالي، و يَصبُر عَليهو حَتّى هو ياخُد المَطَر البِجي بَدري و البِتأخَّر. إنتو كَمان أصبُرو. كونو ثابتين في قُلوبكُم، فِشان الرَّب بِجي قَريب. ما تَشتَكو بَعضَكُم عَلى بَعض، يا أخوان، عَلَشان ما يَحكُمو عَليكُم. أهو دا القاضي واقِف قِدّام الباب! يا أخوان، أُخدو الأنبياء الإتكَلَّمو بِإسم الرَّب زي مَثَل لِإحتِمال الضّيق و الصَّبر. شوفو! نَفتَكِر العِندَهُم صَبر مُبارَكين. سِمِعتو بِصَبر أيوب، و شُفتو العَمَل ليهو الرَّب في الآخِر. الرَّب عِندو رَحمَه و مَحَنَّه كَتيرَه. فوق كُلّو شي، يا أخوان، ما تَحلِفو، ما بِالسَّما و لا بِالأرض و لا بِحَلَف تاني. لَكِن خَلّي أيوَه حَقَتكُم يَكون أيوَه، و لا حَقَتكُم يَكون لا، عَشان ما تَقَعو تِحِت الحُكم. أي واحِد بينكُم مَظلوم؟ خَليهو يَصَلّي. أي واحِد مَبسوط؟ خَليهو يَرَتِّل مَزامير الحَمد. أي واحِد بينكُم عَيّان؟ خَليهو يَنادي شُيوخ الكَنيسَه عَشان يَصَلّو ليهو، و يَمسَحوهو بِزيت بِإسم الرَّب. و صَلاة الإيمان بِتَشفي الزّول العَيّان، و الرَّب بِرفَعو، و إذا عَمَل خَطيَّه، الله بِغفِر ليهو. فِشان كِدا، إعتَرِفو بَعضَكُم لِبَعض بِغَلطاتكُم، و صَلّو بَعضَكُم عَشان خاطِر بَعض، عَشان الله يَشفيكُم. طَلَب البار عِندو قُوَّه كَتيرَه في عَمَلو. إِيلِيَّا كان زول تِحِت الضّيق زيَنا، و صَلّى بِشِدَّه عَشان المَطَر ما يَنزِل. و ما نَزَل عَلى الأرض مُدَّة تلاتَه سِنين و سِتَّه شُهور. بَعدين صَلّى مَرَّه تانيَه و المَطَر نَزَل مِن السَّما، و الأرض جابَت ثَمَرا. يا أخواني، إذا واحِد مِنَّكُم يَضِل عَن الحَق، و آخَر يَرَجِّعو، خَليهو يَعرِف الرَّجَّع خاطي مِن غَلطَة سِكّتو، بِخَلِّص نَفسو مِن الموت و يَغَطّي خَطايا كَتيرَه. مِن بُطْرُس رَسول يَسُوع المَسيح، لِلغَريبين المَشَتَّتين في بُنتُس و غَلَاطِيَّه و كَبَّدوكيَّه و آسيا و بِثينيَه، المُختارين بِحَسَب مَعرِفَة الله الأبو الكانَت مِن قَبِل، و المُقَدَّسين بِالرّوح عَشان يَطيعو يَسُوع المَسيح و يَكونو مَرشوشين بِدَمّو. نِعمَه و سَلام يَكَتِّر ليكُم. مُبارَك الله أبو رَبَّنا يَسُوع المَسيح! حَسَب رَحمَتو الكَتيرَه هو أدّانا وِلادَه تانيَه لِرَجاء حَي بِقيامَة يَسُوع المَسيح مِن بين المَيِّتين. لِميراث الما تَهلِك ولّا تَخسَر ولّا تَفوت، و مَحفوظَه ليكُم في السَّما. إنتو البِقُوَّة الله مَحروسين بِالإيمان لِلخَلاص الجّاهِز هَسَّع، و البِظهَر في الزَّمَن الأخير. بِدا تَفرَحو، و لَو هَسَّع لازِم تَحزِنو لِوَكِت قَليل بِسَبَب تَجَارِب مِن كُلّو نوع. و داك يَكون لِبيّنَة إيمانكُم. الدَّهَب، البِخسَر، يَمتَحِن بِالنّار. و كِدا إيمانكُم، الغالي مِن الدَّهَب، لازِم يَمتَحِن كَمان عَلَشان يَكون لِلحَمد و المَجد و الإحتِرام عِند ظُهور يَسُوع المَسيح. بِتحِبّو المَسيح، و لَو ما شُفتوهو. بِتآمِنو بيهو، و لَو ما بِتشوفو هَسَّع. و كِدا بِتَفرَحو بِفَرَح عَظيم و مَجيد، البِفوت الكَلام عَنّو. و تَقبَلو نِهايَة إيمانكُم، هو خَلاص نُفوسكُم. الأنبياء، الإتنَبّو عَن النِّعمَه البِتَجي ليكُم، هُم فَتَّشو بِفِكرَه عَن الخَلاص داك. و فَتَّشو بِكُلّو قُدرَتُم عَن الوَكِت، هو بِجي مِتين و كيف بِجي. دا الوَكِت روح المَسيح الفيهُم كان يَوَرّيهو، لَمّا شِهِد مِن قَبِل بِأوجاع المَسيح و المَجد البِجي بَعدو. الله وَرّاهُم إنّو شُغلُم كان لِفايدَتكُم و ما لِفايدَة نُفوسُم. و هُم الخَبَروكُم عَن الحاجات السِّمِعتو هَسَّع مِن البَشَّروكُم بِالإنجيل بِالرّوح القُدُس المُرسَل مِن السَّما. المَلائكَه كَمان عاوِزين بِشِدَّه يَعرِفو عَن الحاجات ديل. عَلَشان كِدا، جَهِّز عُقولكُم لِلعَمَل، أمسِكو نُفوسكُم، و خُتّو رَجاكُم بِالتَّمام في النِّعمَه البِجيبوها ليكُم عِند ظُهور يَسُوع المَسيح. و مِثِل الأولاد البِطيعُو، ما تَخَلّو الشَّهوات القَديمَه يَسوقوكُم زي في الوَكِت لَمّا كُنتو بِدون مَعرِفَه. لَكِن زي ما النّاداكُم هو قُدّوس، كونو إنتو كَمان قِدِّيسين في حَياتكُم كُلّها. عَشان مَكتوب: ”كونو قِدِّيسين عَشان أنا قُدّوس.“ إن كان تَنادو الأبو البِحكُم عَلى أعمال كُلّو واحِد، و ما بِشوف الوشوش، عيشو بِخوف زي غَريبين في الدُّنيا. عَشان تَعرِفو أن الله فَداكُم مِن طَرِيقَة حَياتكُم الما ليها فايدَه الأخَدتوها مِن أبَهاتكُم. و دا ما كان بِحاجات تَخسَر مِثِل الفِضَّه و الدَّهَب، لَكِن بِدَم كَريم زي مِن حَمَل بِدون عيب ولّا أي شي ناقِص، هو دَم المَسيح. دا كان مَعروف عَنّو مِن قُبّال، مِن قَبِل خَليقَة الدُّنيا، لَكِن ظَهَر في الأزمان الأخيرَه عَشان خاطِركُم. إنتو البيهو بِتآمِنو بِالله القَوَّمو مِن بين المَيِّتين و أدّاهو المَجد، و عَشان كِدا إيمانكُم و رَجاكُم هُم في الله. هَسَّع عَشان نَضَّفتو نُفوسكُم بِطاعَة الحَق لِمَحَبَّه مُخلِصَه لِلأخوان، حِبّو بَعضَكُم بَعض مَحَبَّه حارَّه مِن كُلّو قُلوبكُم. عَشان إتوَلَدتو مَرَّه تانيَه، ما مِن تيراب يَخسَر، لَكِن مِن الما يَخسَر، بِكِلمَة الله الحَيَّه و المُستَمِرَّه. عَشان: ”كُلّو جِسِم زي قَش و كُلّو مَجد إنسان زي زَهرَة قَش. القَش يبَس، و الزَّهرَه تَقَع، لَكِن كِلمَة الرَّب تِستَمِر لِلأبَد.“ و دي هي الكِلمَه البَشَّرناكُم بيها. عَشان كِدا، أرمو مِنَّكُم كُلّو شَماتَه و كُلّو غِش و النِّفاق و الحَسَد و كُلّو شَتيمَه. زي أطفال إتوَلَدو هَسَّع، دورو اللَّبَن الرّوحي الما فيهو غِش، عَشان تَكبَرو بيهو لِلخَلاص، ما دام ضُقتو أن الرَّب طَيب. قَرِّبو ليهو، لِلحَجَر الحَي، المَرفوض مِن النّاس، و لَكِن المُختار مِن الله و مُحتِرَم ليهو. و إنتو كَمان مِثِل حُجار حَيَّه، تِنبَنو بيت روحي و قُسُس مُقَدَّسين، عَشان تَقَدِّمو ضَبايح روحيَّه مَقبولَه عِند الله بِيَسُوع المَسيح. عَشان كِدا يَزكُر في الكِتاب: ”شوفو، أنا بَخُت في صِهيون حَجَر الرُّكُن مُختار و مُحتِرَم. و البِآمِنو بيهو ما بِخجَل.“ ليكُم البِتآمِنو، هو المُحتِرَم. لَكِن لِلما بِآمِنو: ”الحَجَر الرَّفَضوهو البَنّايين، هو بِقى راس الرُّكُن.“ و: ”حَجَر عَترَه و صَخرَة وقوع.“ يَقَعو عَلَشانُم ما بِطيعُو الكِلمَه، و كِدا كانو مُعَينين لِدا. و لَكِن إنتو جِنس مُختار، و قُسُس مُلوكي، و أُمَّه مُقَدَّسَه، و شَعب مَخصوص لِلَّه، عَشان تَخَبِّرو بِحَمد النّاداكُم مِن الضَّلام لِنورو العَجيب. إنتو الما كُنتو مِن قَبِل شَعب، لَكِن هَسَّع إنتو شَعب الله. و ما كُنتو قِبِلتو الرَّحمَه، و لَكِن هَسَّع قِبِلتو الرَّحمَه. يا مَحبوبين، أطلُب ليكُم زي غَريبين و مِسافِرِين تَرفُضو الشَّهوات الجِّسميَّه البِتحارِب النَّفس. عيشو حَياة طَيبَه بين الأُمَم، عَشان إذا يَشكوكُم زي عامِلين الشَّر، يَشوفو أعمالكُم الطَّيبَه، و يَمَجِّدو الله في يوم زيارتو. طيعو كُلّو تَرتيب النّاس عَشان خاطِر الرَّب، إذا لِلمَلِك زي العِندو السُّلطَه العاليَه، ولّا لِلحُكّام، المُرَسَّلين مِنّو لِلإنتِقام مِن عامِلين الشَّر، و عَشان حَمد لِعامِلين الخير. عَشان إرادَة الله هي أن تَسَكِّتو جَهَل النّاس الغُشّام بِأعمالكُم الطَّيبَه. عيشو زي ناس حُرّين، لَكِن ما تِستَعمِلو حُريّاتكُم زي غَطا لِلشَّر. لَكِن عيشو زي خَدّامين الله. إحتَرِمو كُل النّاس. حِبّو الأخوان. خافو الله. إحتَرِمو المَلِك. يا خَدّامين، طيعو أسيادكُم بِكُلّو إحتِرام، ما لِلكوَيسين و اللُّطَفاء بَس، لَكِن لِلظالِمين كَمان. عَشان دا مَقبول إذا واحِد يِتحَمَّل الضّيق و يِتوَجَّع بِظُلم فِشان الضَّمير عَشان يَطيع الله. لَكِن كيف بِكون حَمد ليكُم إذا يَضرُبوكُم و إنتو عامِلين الشَّر، و تَصبُرو؟ و لَكِن إذا تِتوَجَّعو و إنتو عامِلين الخير، و تَصبُرو، دا مَقبول قِدّام الله. الله ناداكُم لِدا، عَشان المَسيح كَمان إتوَجَّع عَشان خاطِركُم، و خَلّى ليكُم مَثَل، عَشان تَتبَعو دَربو. و هو ما عَمَل خَطيَّه، و ما كان مَوجود في خَشمو غِش. لَمّا شَتَموهو، هو ما رَدَّ الشَّتيمَه، و لَمّا إتوَجَّع، ما هَدَّد، لَكِن إتَّكَل عَلى البِحكُم بِالعَدِل. هو نَفسو حَمَل خَطايانا في جِسمو عَلى الصَّليب، عَشان نِحنا نَموت عَن الخَطيَّه و نَعيش لِلبِر. و بِجُروحو، هو شَفاكُم. عَشانكُم كُنتو زي خِرفان ضايِع، لَكِن رَجَعتو هَسَّع لِراعي نُفوسكُم و مُلاحِظكُم. يا زوجات، كِدا إنتو طيعو رُجالكُم، و إذا كان بَعضُم ما بِطيعُو الكِلمَه، تَربَحوهُم بِدون كِلمَه بِمَشيكُم لَمّا يَشوفو كيف مَشيكُم هو نَضيف و مُحتِرَم. و جَمالكُم ما لازِم يَجي مِن بَرَّه زي تَرتيب الشَّعَر، و لِبِس الدَّهَب، و هِدوم غاليَه، لَكِن خَليهو يَكون مِن إنسان القَلِب المَدسوس، الرّوح المِتواضَع و اللَّطيف، الما يَخسَر. و داك عِندو تَمَن كَتير قِدّام الله. و في الزَّمَن الفات، النِّسوان القِدّيسات الإتَّكَلو عَلى الله كانو يَسَوّو نُفوسُم جَميلات كِدا و طاعو رُجالُم، مِثِل ما سَارَه كانَت تَطيع إِبْرَاهِيم و تَسَمّيهو سَيِدا. و هَسَّع إنتو بِقيتو بَنات ليها إذا تَعمِلو الخير و ما تَخافو مِن أي حاجَه أبَداً. و كِدا، يا رُجال، إنتو كَمان، عيشو مَعَ زوجاتكُم بِمَعرِفَه، زي ما هُم الجِّنس الأضعَف، و شَرِّفوهُم زي الوارِثات مَعاكُم لِنِعمَة الحَياة، عَشان ما بِتكون في حاجَه تَوَقِّف صَلَواتكُم. في الآخِر، كُلُّكُم كونو مُتَّفقين في فِكر، حَنينين بَعضَكُم بَعض، حِبّو زي أخوان، كونو رُحَما و مِتواضِعين. ما تَرَجِّعو شَر بِشَر، ولّا شَتيمَه بِشَتيمَه. لَكِن بِالعَكس بارِكو، عَشان الله ناداكُم لِدا، لِتورَسو البَرَكَه. عَشان: ”الدّايِر يَحِب الحَياة و يَشوف أيام طَيبَه، خَليهو يَحفَظ لِسانو مِن الشَّر و خَشمو مِن كَلام الغِش. خَليهو يَعاكِس الشَّر و يَعمِل الخير، و يَطلُب السَّلام و يَتبَعو. عَشان عُيون الرَّب عَلى البارين، و إضنينو لِطَلَبُم. و لَكِن وَش الرَّب ضِد البِسَوو الشَّر.“ مِنو بِضُرّكُم إذا عِندَكُم حَسَد في الخير؟ و لَكِن إذا تِتوَجَّعو عَشان خاطِر البِر، إنتو مُبارَكين. ما تَخافوهُم، و ما تَضطَرِبو. لَكِن قَدِّسو الرَّب المَسيح في قُلوبكُم. و كونو جاهِزين دايماً عَشان تَرُدّو عَلى كُلّو واحِد البِسألكُم عَن سَبَب الرَّجاء الفيكُم. و لَكِن أعمِلوهو بِوَداعَه و إحتِرام. خَلّي ضَميركُم يَكون طَيب، عَشان البِشتِمو مَشيكُم الطَّيب في المَسيح يَخجَلو مِن شَتايِمُم. عَشان أحسَن ليكُم إذا تِتوَجَّعو و إنتو عامِلين الخير، إذا كان دي إرادَة الله، مِن أن تِتوَجَّعو و إنتو عامِلين الشَّر. عَشان المَسيح كَمان مات مَرَّه واحدَه فِشان الخَطايا، مات البار عَن المُذنِب عَشان يَقَرِّبنا لِلَّه. كَتَلوهو في الجِّسم، لَكِن عَمَلوهو حَي في الرّوح. و بيهو مَشى و بَشَّر الأرواح الفي السِّجِن. ديلاك خالَفو الله مِن زَمان في أيام نُوح. و الله كان بِستَنّى بِالصَّبر وَكِت ما نُوح كان يَبني المُركَب الكَبيرَه. و فيها قَليلين، يَعني تَمانيَه نُفوس كانو مُخَلَّصين بِالمويَه. و المويَه دي تَشَبِّه المَعموديَّه، مُش غَسيل الوَساخَه مِن الجِّسِم، لَكِن طَلَب ضَمير طَيب لِلَّه. و دي تَخَلِّصكُم هَسَّع بِقيامَة يَسُوع المَسيح. و هو دَخَل السَّما، و هو في يَمين الله، و المَلائكَه و السُّلطات و القُوّات يَطيعوهو. كِدا، عَلَشان المَسيح إتوَجَّع في جِسمو، كونو إنتو كَمان مَسَلَّحين بِنَفس الفِكِر دا. عَشان الإتوَجَّع في الجِّسِم، وَقَف مِن الخَطيَّه. عَشان ما يَعيش الوَكِت الباقي في الجِّسِم لِشَهوات النّاس، لَكِن لِإرادَة الله. إنتو صَرَفتو وَكِت كِفايَه عامِلين إرادَة الأُمَم، ماشين في الفَضيحَه، و الشَّهوات، و السُّكر، و حَفلات لِشُرُب الخَمر، و السَّفاهَه، و عِبادَة الأصنام المَكروهَه. هُم يِستَغرَبو أنَّكُم ما بِتَجرو مَعاهُم لِزيادَة السَّفاهَه زاتا. و يَشتِموكُم. لَكِن هُم بِدّو حِساب ليهو، الهو جاهِز أن يَحكُم عَلى الحَيين و المَيِّتين. بِالسَّبَب دا، بِشَّرو المَيِّتين هَسَّع كَمان بِالإنجيل. و دا عَشان يَحكُمو عَليهُم حَسَب النّاس في الجِّسِم، عَشان يَعِيشو الحَياة الحَسَب الله بِالرّوح. نِهايَة كُلّو حاجَه قَرَّبَت. عَلَشان كِدا، كونو عاقلين و أحرِسو لِلصَّلَوات. فوق كُلّو شي، حِبّو بَعضَكُم بَعض بِمَحَبَّه شَديدَه، عَشان المَحَبَّه تَغَطّي خَطايا كَتيرَه. أفتَحو بُيوتكُم بَعضَكُم بَعض بِدون ما تَنَقنِقو. خَلّي كُلّو واحِد مِنَّكُم يَخدِم التّانيين بِالهَدِيَّه القِبِلا، مِثِل وُكَلا طَيبين لِنِعمَة الله المُختَلِفَه. و إذا كان أي واحِد يتكَلَّم، خَليهو يَعمِلو زي اليتكَلَّم بِكِلمات الله. إذا كان أي واحِد يَخدِم، خَليهو يَخدِم بِالقُوَّه الأدّاها ليهو الله، عَشان يَمَجِّدو الله في كُلّو حاجَه بِيَسُوع المَسيح. ليهو المَجد و السُّلطان لِلأبَد. آمين. يا مَحبوبين، ما تِتعَجَّبو مِن التَجرِبَه النّاريَه الحَصَلَت ليكُم لِإمتِحانكُم، زي الحَصَلَت ليكُم هي حاجَه غَريبَه. لَكِن أفرَحو، عَشان تَشتَرِكو في أتعاب المَسيح، حَتّى تَفرَحو في ظُهور مَجدو. إن شَتَموكُم عَشان خاطِر إسم المَسيح، إنتو مُبارَكين، عَشان روح المَجد، روح الله، قاعِد عَليكُم. لَكِن ما تَخَلّو واحِد يِتوَجَّع زي كاتِل، ولّا حَرامي، ولّا عامِل الشَّر، ولّا البِدخُل في حاجات التّانيين بِدون حَق. و لَكِن إذا إتوَجَّعتَ زي مَسيحي، ما تَخجَل، لَكِن أحمَد الله عَشان خاطِر الإسم دا. عَشان الوَكِت جا فِشان الحُكم يَبتَدي بأهل الله. و إن كان يَبتَدي بينَنا، كيف بِكون نِهايَة الما بِطيعُو إنجيل الله؟ و: ”إن كان البار يَخلَص بِالتَّعب، الما بِخاف الله و الخاطي نِهايَتُم بِتكون شِنو؟“ عَلَشان كِدا، البِتوَجَّعو بِحَسَب إرادَة الله، خَلّوهُم يَدّو نُفوسُم لِلخالِق الأمين، و يَعمِلو الخير. أنا بَطلُب لِلشُّيوخ البينكُم، أنا شيخ زيَكُم. و شاهِد لِأتعاب المَسيح و شَريك كَمان في المَجد الماشي يَظهَر. كونو رُعاه مُراح الله الهو أدّاكُم، مُش مِن الواجِب، لَكِن بِإختِيار، بِحَسَب إرادَة الله، و ما لِرِبِح وَسخان لَكِن بِنَشاط. و ما زي أسياد عَلى النّاس الهُم مَسؤوليتكُم، لَكِن كونو مَثَل لِلمُراح. و لَمّا يَظهَر رَئيس الرُّعاه، بِتاخدو تاج المَجد الما بِفوت. يا شَباب، إنتو كَمان زي دا، طيعو الشُّيوخ. و كُلُّكُم، طيعو بَعضَكُم لِبَعض و ألبَسو توب التَّواضُع، عَشان: ”الله يَقاوِم المَتكَبِّرين، و لَكِن يَدّي المِتواضِعين نِعمَه.“ خُتّو نُفوسكُم تِحِت إيد الله القَوّيَّه، عَشان يَرفَعكُم في وَكتو الكوَيس. و خُتّو عَليهو كُلّو هُمومكُم، عَشان هو بِهتَم بيكُم. أمسِكو بِنُفوسكُم و أحرِسو عَشان إبْلِيس عَدوكُم زي أسَد بِكورِك، يَدَوِّر و يَفَتِّش عَن واحِد عَشان يَبلَعو. قاوموهو، كونو ثابِتين في الإيمان، عارِفين أخوانكُم الفي الدُّنيا يِتحَمَّلَو زات الأتعاب دي. و إلَه كُلّو نِعمَه ناداكُم لِمَجدو الأبَدي في المَسيح. و بَعَد ما إتوَجَّعتو وَكِت قَليل، هو نَفسو بِكَمِّلكُم و بِثَبِّتكُم، و بِشَدِّدكُم و بِيَعمِلكُم أُمَنا. ليهو السُّلطَه لِلأبَد. آمين. كَتَبتَ ليكُم بِكِلمات قَليلَه بِإيد سِلْوَانُس، الحَسبتو أخو أمين. أنا عاوِز أشَجِّعكُم و أشهَد ليكُم إنّو بِالحَق، دي نِعمَة الله. إستَمِرّو فيها. المُختارَه مَعاكُم، الفي بابِل، تَسَلِّم عَليكُم، و مَرْقُس وَلَدي كَمان. سَلِّمو بَعضَكُم لِبَعض بِسَلام المَحَبَّه. السَّلام لِكُلُّكُم، إنتو الفي المَسيح. مِن سِمْعَان بُطْرُس خَدّام يَسُوع المَسيح و رَسولو، ليهُم القِبلو إيمان غالي زي إيمانَنا بِبِر إلَهنا و مُخَلِّصنا يَسُوع المَسيح. النِّعمَه و السَّلام يَزيدو ليكُم بِمَعرِفَة الله و يَسُوع رَبَّنا. عَشان قُدرَة الله نَفسو أدّانا كُلّو حاجَه النَّحتاج ليها لِلحَياة و لِخوف الله. و لَمّا نَعرِفو، نِتعَلَّم إنّو نادانا لِمَجد نَفسو و خيرو. و كِدا هو أدّانا الوُعود الغاليَه و العَظيمَه جِدّاً، عَلَشان بِالوُعود تَبقو شُرَكا الطَّبيعَه بِتاعَت الله. و تَنجو مِن الخَراب الفي الدُّنيا بِسَبَب الشَّهوَه. و بِالسَّبَب دا زاتو، أعمِلو الأحسَن عَشان تَزيدو لِإيمانكُم خير، و تَزيدو لِلخير مَعرِفَه. و تَزيدو لِلمَعرِفَه مَسِك النَّفس، و لِمَسك النَّفس الصَّبر، و لِلصَّبر خوف الله، و لِخوف الله حُب الأخوان، و لِحُب الأخوان المَحَبَّه. عَشان إذا عِندَكُم الحاجات دي فيكُم بِالكَترَه، يَعمِلوكُم مُش كَسلانين ولّا بِدون ثِمار في مَعرِفَة رَبَّنا يَسُوع المَسيح. و أي زول الما عِندو الحاجات دي، هو عَميان و نَظَرو ضَعيف. و هو نِسى إنّو مَغَسَّل مِن خَطاياهو الفاتَت. و عَلَشان كِدا، يا أخوان، جَرِّبو زِيادَه أن تَثَبِّتو إختياركُم و إنتِخابكُم المِن الله. عَشان إذا بِتَعمِلو الحاجات دي، إنتو ما تَقَعو أبَداً. و كِدا بِكون مُجَهَّز ليكُم دُخول بِغِنى لِمَلَكوت رَبَّنا و مُخَلِّصنا يَسُوع المَسيح الأبَدي. عَلَشان كِدا أنا بَكون جاهِز دايماً عَشان أذَكِّركُم بِالحاجات دي، مَعَ أنَّكُم بِتَعرِفوها و إنتو ثابِتين في الحَق العِندَكُم. و ما دام أنا في خيمَة الجِّسِم دا، أحسِب دا صَحيح أحَرِّكُّم عَشان تِتزَكَّروها. و بَعرِف بَعَد شوَيَه أنا بَقلَع خيمَة جِسمي زي ما رَبَّنا يَسُوع المَسيح وَرّاهو لَي. و أنا بَشوف كوَيس كيف أذَكِّركُم عَشان بِتَقدَرو تِتزَكَّرو دايماً الحاجات دي بَعَد موتي. عَشان نِحنا ما تَبَعنا حِكايات شاطرَه لَمّا عَلَّمناكُم عَن قُدرَة رَبَّنا يَسُوع المَسيح و كيف هو بِجي. لَكِن نِحنا بِعُيونَنا شُفنا مَجدو. عَشان هو أخَد مِن الله الأبو الإحتِرام و المَجد لَمّا الصّوت جا ليهو مِن المَجد العَظيم، القال: ”دا هو إبني الحَبيب، و أنا مَبسوط بيهو.“ و نِحنا سِمِعنا الصّوت دا جاي مِن السَّما لَمّا كُنّا مَعاهو في الجَّبَل المُقَدَّس. و عِندَنا كِلمَة النُّبوَّه المِتأكِّدَه أكتَر. و إنتو تَعمِلو كوَيس إذا تَخَلّو بالكُم ليها. كلمَتُم زي فانوس بِنَوِّر في مَحَل الضُّلُمَّه لِغايَة ما النَّهار بِظهَر و نَجمَة الصَّباح تَطلَع في قُلوبكُم. و قَبل كُلّو شي، أعرِفو ما في أي نُبوَّه في الكِتاب جات بِتَرجَمَة النَّبي بِنَفسو. عَلَشان ما في نُبوَّه أبَداً جات مِن إرادَة زول، لَكِن رُجال إتكَلَّمو مِن الله، زي الرّوح القُدُس كان بِقودُم. و كانو بين النّاس أنبياء كاضِبين كَمان، زي ما بِكونو بينكُم مُعَلِّمين كاضِبين كَمان. و هُم بِجيبو بِالسِّر أفكار خَرابيَه، حَتّى يَنكُرو الرَّب الإشتَراهُم. و يَجيبو عَلى نُفوسُم خَراب سَريع. و كَتيرين ماشين يَتبَعو طُرُقُم البِخَرِّبو. و بِالسَّبَب دا النّاس يَجَدِّفو عَلى طَريق الحَق. و في طَمَعُم المُعَلِّمين ديل بِياخدو رِبِح مِنَّكُم بِكلماتُم الكاضَبَه. و الحُكم بِتاعُم ما يِتأخَّر، و خَرَابُم ما نايِم. عَشان الله ما رَحَم عَلى المَلائكَه العَمَلو خَطيَّه، لَكِن رَماهُم في جَهَنَّم. و هو سَلَّمُم لِسُجون الضُّلُمَّه عَشان يَحفَظُم لِلدّينونَه. و الله ما رَحَم عَلى الدُّنيا القَديمَه لَمّا هو جاب الطَّوَفان عَلى ناس الدُّنيا الما خافو الله. لَكِن الله حَفَظ نُوح، مُبَشِّر لِلبِر، و سَبعَه تانيين. و الله حَكَم بِالخَراب عَلى المَدينَتين، سَدوم و عَمورَه. و حَرَقُم حَتّى بِقو رَماد، و عَمَلُم مَثَل لِلنّاس البِعيشو حَياة بِدون ما يَخافو الله. و هو خَلَّص لوط البار، الإتحَيَّر مِن الحَياة الوَسخانَه بِتاعَت النّاس البِدون قانون. عَشان الرّاجِل البار داك كان ساكِن بِينُم يوم بَعَد يوم. و كان تَعبان في نَفسو البار مِن الحَياة الشَّرّيرَه الهو شافا و سِمِع بيها. و كِدا الرَّب بِيَعرِف كيف يَخَلِّص البِخافوهو مِن التَجرِبَه، و يَحفَظ الشَّرّيرين لِيوم الدّينونَه عَشان يَعاقِبُم. و بِكون كِدا خُصوصاً لِديل اليَمشو في شَهوَه وَسخانَه بِتاعَت الجِّسِم، و يَحتَقِرو السُّلطَه. النّاس ديل بِدون خوف و مِتكَبِّرين، و ما بِخافو يَجَدِّفو عَلى العِندَهُم مَجد. حَتّى المَلائكَه و هُم عِندَهُم قُوَّه و قُدرَه أكتَر، ما يَحكُمو عَليهُم قِدّام الرَّب بِحُكم فيهو شَتيمَه. لَكِن النّاس ديل يَجَدِّفو عَلى حاجات ما يَفهَموها. هُم زي الحَيوانات الما عِندَهُم عَقل، اليَمشو بِالطَّبيعَه، مَولودين عَشان يَمسِكوهُم و يَكتُلوهُم، و زي الحَيوانات، كَمان بِيَخرَبوهُم في الخَراب بِتاعُم. و بِدفَعو ليهُم تَعب زي أُجرَة التَّعب الهُم عَمَلوهو. هُم يَحسِبوهو سُرور أن يَعِيشو حَياة ناعِمَه بِالنَّهار. و هُم نُقَط وَسخانَه و عُيوب، و عِندَهُم فَرَح شَديد في غِشُّم لَمّا ياكُلو في العَزومَه مَعاكُم. و هُم بِعاينو لِلزّانيين، و ما بِكونو تَعبانين مِن الخَطيَّه أبَداً، و يَغِشّو النّاس الما ثابِتين. و هُم بِقو شاطرين في الطَّمَع، أولاد اللَّعنَه! النّاس ديل سابو الطَّرِيق العَديل و ضَلّو، عَشان يَمشو وَرا طَريق بَلعام وَلَد بَعُور الحَبَّ أُجرَة الخَطيَّه. لَكِنّو كان مَوَبَّخ عَلى خَطِيَّتو لَمّا حُمار ما عِندو صوت إتكَلَّم بِصوت إنسان و مَنَع بَلادَة النَّبي. النّاس ديل أبيار بِدون مويَه، غَمام تَسوقو الهَبوب. و الضُّلُمَّه الغَريقَه مَحفوظَه ليهُم. عَشان هُم يِتكَلَّمو بِكِلمات مِتكَبِّرَه و فاضيَه. و يَغِشّو بِشَهوات الجِّسِم و الخَراب، النّاس القَرَّبو يَنجو مِن ديل البِعيشو في الغَلطَه. هُم يَدّوهُم وَعد الحُرّيَّه، و هُم نُفوسُم عَبيد الخَراب. عَشان الزّول يَكون عَبد لِلحاجَه الغَلَبَتو. عَشان إذا هُم نَجو مِن خَرابات الدُّنيا بِمَعرِفَة الرَّب و المُخَلِّص يَسُوع المَسيح، و بَعَد دا رَجَعو و إتغَلَبو، حالُم في الآخِر بِكون أكعَب مِن الأوَّل. عَشان كان أحسَن ليهُم إذا ما عِرِفو طَريق البِر، مِن ما بَعَد ما عِرِفوهو يَرَجِّعو عَن الأمر المُقَدَّس الكان مَسَلَّم ليهُم. و حَصَل ليهُم زي المَثَل الحَقيقي: ”الكَلِب يَرجَع لِقَضفو و الكَدروك المَغسول يَرجَع و يَدَردِق في الطّين.“ يا أخواني المَحبوبين، هَسَّع دا هو الجَّواب التّاني بَكتِبو ليكُم. و فيهُم الإتنين بَزَكِّركُم عَشان أحَرِّك عُقولكُم المُخلِصَه. أنا عاوِزكُم تِتزَكَّرو كِلمات الأنبياء القِدِّسين الإتكَلَّمو بيها مِن قُبّال، و أمر الرَّب و المُخَلِّص الجّا ليكُم بِرُسُلكُم. و في الأوَّل أعرِفو إنّو في الأيام الأخيرَه بِجو ناس البِضحَكو عَلى الحَق، و بِعيشو حَسَب شَهوات نُفوسُم. هُم بِقولو: ”هو وَعَد ليكُم إنّو بِجي. هو وين؟ مِن وَكِت أبَهاتنا نامو، كُلّو شي يِستَمِر زي ما هو كان مِن بِدايَة الخَليقَه.“ و بِإختيارُم، هُم يَنسو إنّو بِكِلمَة الله السَّما كانَت في مِن زَمَن قَديم، و الأرض كانَت مَصنوعَه مِن المويَه و بِالمويَه. و المويَه غَطَّت الدُّنيا بِتاعَت الزَّمَن دا و خَرَّبَتا. و لَكِن السَّماوات و الأرض المَوجودَه هَسَّع، بِالكِلمَه ديك زاتا، مَخزونَه لِلنّار. و بِتكون مَحفوظَه لِيوم الحُكم و خَراب النّاس الما بِخافو الله. لَكِن ما تَنسو الحاجَه الواحدَه دي، يا مَحبوبين، يوم واحِد مَعَ الرَّب زي ألف سَنَه، و ألف سَنَه زي يوم واحِد. و الرَّب ما مِتأخِّر بِوَعدو زي ما بَعض مِن النّاس يَفتَكِرو. لَكِن هو عِندو صَبر عَليكُم، و ما عاوِز واحِد يَموت، لَكِن عاوِز الكُل يَجو لِلتّوبَه. و لَكِن يوم الرَّب بِجي زي الحَرامي. و في اليوم داك، السَّماوات بِفوتو بِصوت عالي، و النُّجوم بيَهلِكو مِن الحَر، و الأرض و الأشغال الفيها بِنحَرِقو. و ما دام كُل الحاجات دي بِتَهلِكو كِدا، ياتو نوع مِن النّاس لازِم تَكونو في مَشي مُقَدَّس و في خوف الله؟ و إنتو مُنتَظِرين و مِستَعجِلين يوم الله البِجي. عَلَشان اليوم داك بِجيب خَراب السَّماوات بِالنّار، و الحَر الشَّديد بِخرَب النُّجوم. لَكِن حَسَب وَعدو نَنتَظِر سَماوات جَديدَه و أرض جَديدَه، البِسكُن فيها البِر. عَلَشان كِدا، يا مَحبوبين، و إنتو مِستَنّين الحاجات دي، إشتَغِلو شَديد عَشان تَكونو نُضاف و بِدون عيب و عَشان يَكون عِندَكُم سَلام مَعاهو. و أحسِبو إنّو صَبر رَبَّنا فُرصَه لِلخَلاص. زي ما أخونا الحَبيب بُولُس كَمان كَتَب ليكُم بِحَسَب الحِكمَه الأدّاهو الله. زي ما هو بِكتِب في كُلّو جَواباتو، و يتكَلَّم عَن الحاجات دي. و بَعض مِن الحاجات دي بِكونو صَعبَه لِلفَهم. و النّاس الما عِندَهُم مَعرِفَه و ما ثابِتين، يَتَرجِموها بِالكِضِب. و هُم يَعمِلو زي دا بِالكُتُب التّانيَه. و كِدا يَجيبو الخَراب عَلى نُفوسُم. و عَلَشان كِدا، إنتو، يا مَحبوبين، عارِفين دا مِن قُبّال، أحرِسو عَشان غَلَط النّاس الما يَحفَظو القانون ما يَقودكُم و إنتو تَقَعو مِن مَحَلّكُم الثّابِت. و لَكِن أكبَرو في النِّعمَه و في مَعرِفَة رَبَّنا و مُخَلِّصنا يَسُوع المَسيح. ليهو المَجد هَسَّع و لِلأبَد! آمين. نَخَبِّركُم بِكِلمَة الحَياة. و الكِلمَه كان مِن البِدايَه. و نِحنا سِمِعناهو و شُفناهو بِعُيونّا، و عايَنّا ليهو و إيدينّا لِمسَتو. و الحَياة ظَهَرَت، و شُفناها، و نَشهَد ليها. و نَخَبِّركُم بِالحَياة الأبَديَّه الكانَت مَعَ الأبو و ظَهَرَت لينا. و نَخَبِّركُم بِالشُّفناهو و سِمِعناهو، عَلَشان تَكون ليكُم كَمان شَرِكَه مَعانا. و شَرِكَتنا هي مَعَ الأبو و مَعَ إبنو يَسُوع المَسيح. و نَكتِب ليكُم دا عَشان فَرَحنا يَكون كامِل. و دا هو الخَبَر السِّمِعناهو مِنّو و نَخَبِّركُم بيهو، أن الله نور، و ما فيهو ضُلُمَّه أبَداً. إذا نَقول: ”عِندَنا شَرِكَه مَعاهو،“ و نَمشي في الضُّلُمَّه، نَكَضِّب، و ما بِنَعمِل الحَق. و لَكِن إذا نَمشي في النّور زي ما هو في النّور، عِندَنا شَرِكَه بَعَضَنا مَعَ بَعض. و دَم يَسُوع إبنو يَنَضِّفنا مِن كُلّو خَطيَّه. إذا نَقول: ”ما عِندَنا خَطيَّه،“ نَغِش نُفوسنا، و الحَق ما فينا. إذا نَعتَرِف بِخَطايانا، هو أمين و عادِل، و يَغفِر لينا خَطايانا و يَنَضِّفنا مِن كُلّو شَر. و إذا نَقول: ”ما عَمَلنا خَطيَّه،“ نَعمِلو كَضّاب، و كلمَتو ما فينا. يا أولادي، أكتِب ليكُم دا عَشان ما تَعمِلو خَطيَّه. و لَكِن إذا واحِد يَعمِل خَطيَّه، عِندَنا وَسيط مَعَ الأبو، يَسُوع المَسيح البار. و هو دَفَع عَن خَطايانا بِضَبيحَة نَفسو عَشان يَصالِحنا مَعَ الله. و هو دَفَع عَن خَطايا كُل الدُّنيا كَمان و مُش عَن خَطايانا بَس. و بِدا بِنَعرِف بِالحَق نِحنا بِنَعرِفو، إذا نَحفَظ أوامِرو. البقول: ”أنا بَعَرفو،“ و هو ما بِحفَظ أوامِرو، هو كَضّاب، و الحَق ما فيهو. لَكِن البِحفَظ كلمَتو، بِالحَق مَحَبَّة الله كَمَلَت فيهو. بِدا بِنَعرِف نِحنا فيهو. البقول هو بِسكُن فيهو، لازِم يَمشي زي ما هو مَشى كَمان. يا مَحبوبين، ما بَكتِب ليكُم أمر جَديد، لَكِن أمر قَديم كان عِندَكُم مِن البِدايَه. الأمر القَديم، هو الكِلمَه السِّمِعتوها. و مَعَ داك، أمر جَديد أكتِب ليكُم. و هو الحَق فيهو و فيكُم، عَلَشان الضُّلُمَّه ماشيَه، و النّور الحَقيقي هَسَّع بِنَوِّر. البقول هو في النّور و يَكرَه أخوهو، هو لِسَّع في الضُّلُمَّه. البِحِب أخوهو بِسكُن في النّور، و ما فيهو سَبَب وقوع. و لَكِن البِكرَه أخوهو، هو في الضُّلُمَّه، و بِمشي في الضُّلُمَّه، و ما بِيَعرِف ماشي وين، عَشان الضُّلُمَّه عِمَّت عُيونو. أكتِب ليكُم، يا أولاد، عَشان خَطاياكُم مَغفورَه ليكُم عَشان خاطِر إسمو. أكتِب ليكُم، يا أبَهات، عَشانكُم تَعرِفو هو الكان مِن البِدايَه. أكتِب ليكُم، يا شَباب، عَشانكُم غَلَبتو الشَرِّير. كَتَبتَ ليكُم، يا أولاد، عَشانكُم تَعرِفو الأبو. كَتَبتَ ليكُم، يا أبَهات، عَشانكُم تَعرِفو هو الكان مِن البِدايَه. كَتَبتَ ليكُم، يا شَباب، عَشانكُم شَديدين، و عَشان كِلمَة الله تَسكُن فيكُم، و إنتو غَلَبتو الشَرِّير. ما تَحِبّو الدُّنيا ولّا الحاجات الفي الدُّنيا. إذا واحِد بِحِب الدُّنيا، مَحَبَّة الأبو ما فيهو. عَلَشان كُل الفي الدُّنيا، شَهوَة الجِّسِم، و شَهوَة العُيون، و كِبِر الحَياة، ما مِن الأبو، لَكِن مِن الدُّنيا. و الدُّنيا تَفوت، و شَهوَتو، و لَكِن البِسَوّي إرادَة الله يَعيش لِلأبَد. يا أولاد، دي السّاعَه الأخيرَه. و زي ما سِمِعتو ضِد المَسيح جاي، كِدا، هَسَّع جو كَتيرين مِن أضداد لِلمَسيح. بِدا بِنَعرِف دي السّاعَه الأخيرَه. هُم مَرَقو مِنَّنا، لَكِن ما كانو مِنَّنا. عَشان إذا كانو مِنَّنا، كانو إستَنّو مَعانا. لَكِن مَرَقو عَشان يَوَرّو إنّو ما كُلَّهُم مِنَّنا. و لَكِن إنتو عِندَكُم مَسحَه مِن القُدّوس، و بِتَعرِفو كُلّو شي. ما بَكتِب ليكُم عَشان ما بِتَعرِفو الحَق، لَكِن عَشان بِتَعرِفوهو، و عَشان تَعرِفو كُلّو كِضِب ما مِن الحَق. مِنو الكَضّاب؟ هو البِنكُر إنّو يَسُوع هو المَسيح. دا هو ضِد المَسيح، البِنكُر الأبو و الإبن. كُل البِنكُر الإبن، ما عِندو الأبو كَمان. و البِعتَرِف بِالإبن، عِندو الأبو كَمان. خَلّو السِّمِعتوهو مِن البِدايَه يِستَمِر يَعيش فيكُم. إذا كان السِّمِعتوهو مِن البِدايَه يَسكُن فيكُم، إنتو كَمان بِتَسكُنو في الإبن و في الأبو. دا هو الوَعد الهو وَعَدنا بيهو، الحَياة الأبَديَّه. أكتِب دا ليكُم عَن البِغِشّوكُم. لَكِن المَسحَه القِبِلتوها مِنّو تَسكُن فيكُم، و ما في إحتِياج لِأي واحِد يَعَلِّمكُم. لَكِن المَسحَه دي تَعَلِّمكُم عَن كُلّو حاجَه، و هي حَق و ما كِضِب. و زي المَسحَه دي عَلَّمَتكُم، أسكُنو في الإبن. و هَسَّع، يا أولاد، أسكُنو فيهو، عَشان إذا يَظهَر، يَكون عِندَنا تأكيد، و ما نَخجَل مِنّو لَمّا يَجي. إذا كان بِتَعرِفو هو بار، بِتَعرِفو كُلّو واحِد البِعمِل البِر مَولود مِنّو. شوفو نوع المَحَبَّه الأدّانا الأبو لِغايَة ما يَسَمّونا أولاد الله. و نِحنا كِدا. عَلَشان كِدا، الدُّنيا ما بِتَعرِفنا عَشان الدُّنيا ما عِرفَتو. يا مَحبوبين، هَسَّع نِحنا أولاد الله. و لِسَّع ما ظَهَر نِحنا بِنكون شِنو. و لَكِن بِنَعرِف إذا هو ظَهَر، بِنكون زيهو، عَشان بِنشوفو زي ما هو. و كُلّو واحِد العِندو الرَّجاء دا فيهو، يَنَضِّف نَفسو زي ما هو نَضيف. و كُلّو واحِد بيَعمِل خَطيَّه، يَكَسِّر القانون. و الخَطيَّه هي كَسر القانون. و بِتَعرِفو هو ظَهَر عَشان يَشيل عَنّا خَطايانا، و ما فيهو خَطيَّه. كُل البِسكُن فيهو، ما بيَعمِل الخَطيَّه. كُلّو واحِد البيَعمِل الخَطيَّه ما شافو و ما عِرفو. يا أولاد، ما تَخَلّو واحِد يَغِشّكُم. البيَعمِل البِر، هو بار مِثِل ما هو بار. البيَعمِل الخَطيَّه، هو مِن إبْلِيس، عَشان إبْلِيس مِن البِدايَه كان يَخطى. إبن الله ظَهَر لِلسَّبَب دا، عَشان يَخرَب أعمال إبْلِيس. كُلّو واحِد المَولود مِن الله ما بيَعمِل خَطيَّه، عَشان حَياة الله تِستَمِر فيهو، و ما بِقدَر يَخطى، عَشان هو مَولود مِن الله. بِدا، أولاد الله مَعروفين و أولاد إبْلِيس مَعروفين. كُل الما بيَعمِل البِر ما مِن الله، و كِدا الما بِحِب أخوهو كَمان. عَشان دا هو الخَبَر السِّمِعتوهو مِن البِدايَه، أن نَحِب بَعضَنا بَعض، و ما نَكون مِثِل قايين الكان مِن الشَّرّير و كَتَل أخوهو. و لِشِنو كَتَلو؟ عَشان أعمالو كانَت شَرّيرَه و لَكِن أعمال أخوهو بارَّه. ما تِستَغرَبو، يا أخواني، إذا الدُّنيا تَكرَهكُم. بِنَعرِف نِحنا مَرَقنا مِن الموت لِلحَياة، بِسَبَب مَحَبَّتنا لِلأخوان. الما بِحِب أخوهو يِستَنّى في الموت. كُل البِكرَه أخوهو، هو كاتِل. و إنتو بِتَعرِفو كُلّو كاتِل ما عِندو حَياة أبَديَّه فيهو. بِدا، بِنَعرِف المَحَبَّه، أن يَسُوع المَسيح أدّا نَفسو عَشان خاطِرنا. و واجِب عَلينا أن نَدّي نُفوسنا عَشان خاطِر الأخوان. و لَكِن العِندو بُضاعَة الدُّنيا و يَشوف أخوهو مُحتاج و يَقفِل قَلبو مِنّو، كيف تَكون مَحَبَّة الله فيهو؟ يا أولادي، خَلّونا نَحِب، ما بِالكَلام، و لا بِاللِّسان، لَكِن بِالعَمَل و الحَق. بِدا بِنَعرِف نِحنا مِن الحَق و نأكِّد قُلوبنا قِدّامو. عَشان إذا قُلوبنا تَلومنا، الله أكبَر مِن قُلوبنا و بِيَعرِف كُلّو حاجَه. يا مَحبوبين، إذا قُلوبنا ما تَلومنا، عِندَنا تأكيد قِدّام الله. و كُل النَّطلُب نَقبَل مِنّو، عَشانّا نَحفَظ أوامِرو و نَعمِل الحاجات التَّبسِطو. و دا هو أمرو أن نآمِن بِإسم إبنو يَسُوع المَسيح و نَحِب بَعَضَنا بَعض، زي ما أدّانا أمر. و كُل البِحفَظو أوامِرو يَسكُنو فيهو و هو فيهُم. و بِدا بِنَعرِف هو يَسكُن فينا، بِالرّوح الأدّاهو لينا. يا مَحبوبين، ما تَصَدِّقو كُلّو روح، لَكِن إمتَحِنو الأرواح، هُم مِن الله ولّا لا. عَشان أنبياء كاضِبين كَتيرين مَرَقو لِلدُّنيا. بِدا، بِتَعرِفو روح الله. كُلّو روح يَعتَرِف بِيَسُوع المَسيح إنّو جا في الجِّسم، هو مِن الله. و كُلّو روح ما بِعتَرِف بِيَسُوع، ما مِن الله. و دا هو روح ضِد المَسيح السِّمِعتو بِجي، و هَسَّع هو في الدُّنيا. إنتو مِن الله، يا أولاد، و غَلَبتوهُم. عَشان هو الفيكُم أكبَر مِن الفي الدُّنيا. هُم مِن دُنيا. و عَلَشان كِدا، هُم يِتكَلَّمو عَن حاجات الدُّنيا، و الدُّنيا تَسمَع ليهُم. نِحنا مِن الله. و البِعرِف الله يَسمَع لينا، و الما مِن الله ما بِسمَع لينا. بِدا بِنَعرِف روح الحَق و روح الكِضِب. يا مَحبوبين، خَلّونا نَحِب بَعَضَنا بَعض، عَشان المَحَبَّه هي مِن الله، و كُلّو واحِد البِحِب، هو مَولود مِن الله و بِعرِف الله. و الما بِحِب، ما بِعرِف الله، عَشان الله مَحَبَّه. بِدا، ظَهَرَت مَحَبَّة الله فينا. الله رَسَّل إبنو الوَحَيد لِلدُّنيا عَشان نَحياى بيهو. و دي هي المَحَبَّه: مُش نِحنا الحَبّينا الله، لَكِنّو هو الحَبّانا و رَسَّل إبنو عَشان يَكون ضَبيحَة دَفع عَن خَطايانا. يا مَحبوبين، إن كان الله حَبّانا كِدا، نِحنا كَمان واجِب عَلينا نَحِب بَعَضَنا بَعض. ما في واحِد شاف الله أبَداً. إذا نَحِب بَعَضَنا بَعض، الله يَسكُن فينا و مَحَبَّتو تَبقى كاملَه فينا. بِدا بِنَعرِف نِحنا نَعيش فيهو و هو فينا، عَشان هو أدّانا مِن روحو. و نِحنا شُفنا و نَشهَد أن الأبو رَسَّل الإبن عَشان يَكون مُخَلِّص الدُّنيا. البِعتَرِف بِيَسُوع هو إبن الله، الله بِسكُن فيهو و هو في الله. و نِحنا عِرِفنا و صَدَّقنا مَحَبَّة الله الهو عِندو لينا. الله مَحَبَّه، و البِسكُن في المَحَبَّه بِسكُن في الله و الله فيهو. بِدا، المَحَبَّه تَبقى كاملَه فينا، عَشان بِكون عِندَنا تأكيد في يوم الحُكم. عَلَشان زي ما هو، نِحنا كَمان كِدا في الدُّنيا دي. ما في خوف في المَحَبَّه، لَكِن المَحَبَّه الكاملَه تَطرُد الخوف. عَلَشان النّاس عِندَهُم خوف لَمّا يَخافو مِن الجِّزا. و البِخاف ما بِبقى كاملَه في المَحَبَّه. نِحنا بِنحِب، عَشان هو حَبّانا في الأوَّل. إذا واحِد يَقول: ”أنا بَحِب الله،“ و بِكرَه أخوهو، هو كَضّاب. عَلَشان الما بِحِب أخوهو الشّافو، ما بِقدَر يَحِب الله الهو ما شافو. و عِندَنا الأمر دا مِنّو أن البِحِب الله يَحِب أخوهو كَمان. كُلّو واحِد بِآمِن بِيَسُوع هو المَسيح، هو مَولود مِن الله. و كُلّو واحِد بِحِب الأبو بِحِب المَولود مِنّو كَمان. بِدا بِنَعرِف نِحنا بِنحِب أولاد الله، إذا بِنحِب الله و بِنَحفَظ أوامِرو. دي هي مَحَبَّه لِلَّه، أن نَحفَظ أوامِرو. و أوامِرو ما تَقيلَه. عَشان كُلُّ واحِد مَولود مِن الله يَغلِب الدُّنيا. و دي هي الغَلَبَه التَّغلِب الدُّنيا، أيمانّا. مِنو هو البِغلِب الدُّنيا؟ بَس البِآمِن أن يَسُوع هو إبن الله. دا هو الجّا بِمويَه و دَم، يَسُوع المَسيح. ما بِالمويَه بَس، لَكِن بِالمويَه و الدَّم. و الرّوح، هو البِشهَد، عَشان الرّوح هو الحَق. و اليَشهَدو، هُم تلاتَه. الرّوح، و المويَه، و الدَّم. و التّلاتَه ديل، هُم في الواحِد. إذا نَقبَل شَهادَة النّاس، شَهادَة الله أعظَم، عَشان دي شَهادَة الله الشِّهِد بيها عَن إبنو. البِآمِن بِإبن الله، عِندو الشَّهادَه في نَفسو. الما بِآمِنو بِالله سَوَّاهو كَضّاب، عَلَشان ما آمَن بِالشَّهادَه الشِّهِد بيها الله عَن إبنو. و دي الشَّهادَه، الله أدّانا حَياة أبَديَّه، و الحَياة دي في إبنو. العِندو الإبن، عِندو الحَياة. و الما عِندو الإبن، ما عِندو الحَياة. كَتَبتَ دا ليكُم، إنتو المؤمِنين بِإسم إبن الله، عَلَشان تَعرِفو عِندَكُم حَياة أبَديَّه. و دا التأكيد العِندَنا فيهو، إذا نَطلُب أي شي بِحَسَب إرَادَتو، هو بِسمَع لينا. و إذا نَعرِف هو يَسمَع لينا في كُلّو شي النَطلُب مِنّو، بِنَعرِف نِحنا عِندَنا الطَّلَبات الطَّلَبناهو مِنّو. إذا واحِد يَشوف أخوهو يَعمِل خَطيَّه ما لِلموت، هو يَسأل، و الله بِدّيهو حَياة يَعني لِلما بِختو لِلموت. في خَطيَّه تَقود لِلموت، و أنا ما بَقول إنّو يَطلُب عَن دي. كُلّو ذَنب هو خَطيَّه، و في خَطيَّه ما تَقود لِلموت. بِنَعرِف أن كُلّو واحِد مَولود مِن الله ما بِختى، لَكِن المَولود مِن الله يَحفَظ نَفسو، و الشَرِّير ما يَلمَسو. بِنَعرِف نِحنا مِن الله، و الدُّنيا كُلَّها تِحِت سُلطَة الشَّرّير. و بِنَعرِف إبن الله جا و أدّانا فَهم عَشان نَعرِف هو الحَق. و نِحنا في الحَق، يَعني في إبنو يَسُوع المَسيح. دا هو الإلَه الحَقيقي و الحَياة الأبَديَّه. يا أولاد، أحفَظو نُفوسكُم مِن الأصنام. مِن الشّيخ لِلسَّيِّدَه المُختارَه و لِأولادا الأنا بَحِبُّم في الحَق، و ما أنا بَس، لَكِن كُل البِعرِفو الحَق كَمان. عَشان خاطِر الحَق البِسكُن فينا و بِكون مَعانا لِلأبَد. نِعمَه و رَحمَه و سَلام مِن الله الأبو و مِن يَسُوع المَسيح، إبن الأبو، بِتكون مَعانا في الحَق و المَحَبَّه. فِرِحتَ جِدّاً عَشان لِقيت بَعَض مِن أولادِك ماشين في الحَق مِثِل ما الأبو أمَرنا. و هَسَّع، يا سَيِّدَه، أنا ما كاتِب ليكي أمر جَديد، لَكِن الكان عِندَنا مِن البِدايَه. بَسأل أن نَحِب بَعَضَنا بَعض. و دي هي المَحَبَّه، أن نَمشي بِحَسَب أوامِرو. زي ما سِمِعتو مِن البِدايَه، دا هو الأمر، أن تَمشو في المَحَبَّه. عَشان ناس كُتار البِغِشّو مَرَقو لِلدُّنيا. و هُم ما بِعتَرِفو بِيَسُوع المَسيح إنّو جا في الجِّسِم. دا هو البِغِش و هو ضِد المَسيح. شوفو نُفوسكُم عَشان ما تَوَدِّرو الإشتَغَلنا ليهو، لَكِن تَقبَلو أُجرَه تَمام. و الما بِستَمِر في تَعليم المَسيح و يَجري قِدّامو، ما عِندو الله. و البِستَمِر في تَعليم المَسيح، هو عِندو الأبو و الإبن، هُم الإتنين. إذا واحِد يَجيكُم و ما يَجيب التَّعليم دا، ما تَقبَلوهو في البيت و ما تَقولو ليهو ”سَلام.“ عَشان البِسَلِّم عَليهو يَشتَرِك في أعمالو الشَّرّيرَه. عِندي حاجات كَتيرَه عَشان أكتِب ليكُم، لَكِن أنا ما داير أعمِلو بِوَرَق و حِبِر. بَدَل مِن دا أنتَظِر أن أجيكُم و أتكَلَّم وَش لِوَش، عَشان فَرَحنا بِكون كامِل. أولاد أُختِك المُختارَه يَسَلِّمو عَليكي. مِن الشّيخ لِغَايُوس الحَبيب، البَحِبّو في الحَق. يا حَبيبي، أصَلّي عَشانَك تَكون ناجِح في كُلّو شي، و تَكون بِعافيَه، زي ما نَفسَك ناجِحَه. فِرِحتَ جِدّاً لَمّا بَعض مِن الأخوان جو و شِهِدو لِلحَق الفيك، و كيف إنتَ تَمشي بِالحَق. ما عِندي فَرَح أعظَم مِن دا، يَعني أسمَع أن أولادي يَمشو في الحَق. يا حَبيبي، إنتَ أمين بِالحاجَه التَّعمِلا لِلأخوان، و خُصوصاً لِلغَريبين. و هُم شِهِدو بِمَحَبَّتَك قِدّام الكَنيسَه. و إنتَ تَعمِل كوَيس إذا تَرَسِلُم لِلسَّفَر زي ما يِستَحِق لِلَّه. و عَشان خاطِر الإسِم هُم مَرَقو، و ما ياخُدو حاجَه مِن الأُمَم. عَلَشان كِدا، لازِم نَقبَل ناس مِثِل ديل، عَلَشان نَكون عامِلين مَعاهُم لِلحَق. كَتَبتَ لِلكَنيسَه. و لَكِن دِيُوتْرِيفُوس، البِحِب يَكون الأوَّل بِينُم، ما يَقبَلنا. عَشان كِدا، إذا بَجي، بَزَكِّرو بِأعمالو البِعمِلو، و الكَلام الشَّرّير البقول عَنّا. لَكِن دا ما كِفايَه ليهو، هو ما بِقبَل الأخوان كَمان، و يَمنَع البِدورو يَقبَلوهُم، و هو يَطرُدُم مِن الكَنيسَه. يا حَبيبي، ما تَتبَع الشَّر، لَكِن الخير. البِعمِل الخير هو مِن الله، و البِعمِل الشَّر هو ما شاف الله. كُل النّاس بِشهَدو لِدِيمِتْرِيُوس، و الحَق نَفسو يَشهَد ليهو. و نِحنا كَمان نَشهَد ليهو، و إنتو بِتَعرِفو شَهادَتنا هي حَقيقيَه. كانَت عِندي حاجات كَتيرَه عَشان أكتِبا ليك، لَكِن أنا ما بَدور أكتِب ليك بِحِبِر و قَلَم. لَكِن عِندي رَجاء أن أشوفَك بَعَد شوَيَه، و بِنِتكَلَّم وَش لِوَش. السَّلام ليك. المَحبوبين يَسَلِّمو عَليك. سَلِّم عَلى المَحبوبين بِأساميهُم. مِن يَهُوذَا خَدّام يَسُوع المَسيح و أخو يَعْقُوب، لِلمُختارين و المَحبوبين في الله الأبو و المَحفوظين لِيَسُوع المَسيح. الرَّحمَه و السَّلام و المَحَبَّه يَكَتِّرو ليكُم. يا مَحبوبين، كُنتَ بَجَرِّب بِكُلّو نَشاط أن أكتِب ليكُم بِخُصوص خَلاصنا العِندَنا سَوا. لَكِن شُفتَ لازِم أكتِب ليكُم عَشان أطلُب مِنَّكُم تَحارِبو عَشان خاطِر الإيمان المُسَلَّم مَرَّه واحدَه لِلقِدِّسين. عَشان بَعض مِن النّاس دَخَلو بينكُم بِالسِّر، و هُم ما بِخافو الله. و هُم يَغَيِّرو نِعمَة إلَهنا لِلفَضيحَه و بِنكُرو سَيِدنا و رَبَّنا الوَحيد، يَسُوع المَسيح. و مِن وَكِت طَويل دينونَتُم كانَت مَكتوبَه. أنا عاوِز أذَكِّركُم، و لَو عِرِفتو كُلّو شي مَرَّه واحدَه، أن الرَّب خَلَّص الشَّعب مِن بَلَد مَصر، لَكِن بَعَد دا خَرَب النّاس الما آمَنو. و المَلائكَه الما حِفظو سُلطَتُم لَكِن سابو بيتُم المَخصوص، ديل مَحفوظين بِجَنازِير أبَديَّه لِدينونَة اليوم العَظيم في الضَّلام. و كِدا كَمان سَدوم و عَمورَه و البِلاد الحَواليهُم سَلَّمو نُفوسُم لِلزِّنا و مَشو وَرا شَهوَه ما زي طَبيعَة النّاس. و هُم بِقو مَثَل البِتحَمَّلو جِزا نار أبَديَّه. و كِدا كَمان، ديل، البِحلَمو، بيَعمِلو حاجات يَنَجِّسو أجسامُم، و يَرفُضو السُّلطَه و يَشتِمو الكُبار الفي السَّما. و لَكِن مِخائيل، رَئيس المَلائكَه، لَمّا شاكَل إبْلِيس عَن جِسِم مُوسَى، خاف يَجيب حُكم بِشَتيمَه، لَكِن قال: ”الرَّب يَوَبِّخَك!“ لَكِن ديل يَجَدِّفو عَلى الما يَفهَمو. و هُم يَسَوّو زي الحَيوانات الما عِندَهُم عَقل اليَمشو بِطَبيعَتُم. و بِالطَّرِيقَه دي يَخرِبو نُفوسُم. يا مُصِيبَتُم! عَلَشانُم مَشو في سِكَّة قايين، و سَلَّمو نُفوسُم لِغَلطَة بَلعام لِلرِّبِح. و هُم ماتو في فِتنَة قُورَح. و ديل حُجار مَدسوسَه في عَزوماتكُم المَحَبّيَه، عامِلين عَزومات مَعاكُم بِدون خوف، و يَهتَمّو بِنُفوسُم بَس. هُم سَحاب بِدون مويَه، تَشيل الأرياح، شَجَر الخَريف بِدون ثِمار، مات مَرَّتين و ما طَلَّع. أمواج بَحَر مُحَرَّكَه مَزَبِّدَه بِخَجَلُم، نُجوم ضالَّه، مَحفوظَه لِضَلام أسوَد جِدّاً لِلأبَد. و أَخْنُوخ، السّابِع مِن آدَم، إتنَبّأ عَن ديل و قال: ”شوفو! جا الرَّب مَعَ آلاف كَتيرَه مِن قِدِّسِينو. و هو جا عَشان يَحكُم عَلى الكُل، و يَوَبِّخ كُل الشَّرّيرين لِكُلّو أعمالُم الشَّرّيرَه العَمَلوها بِالشَّر. و هو يَوَبِّخُم لِكُل الكِلمات الصَّعبَه الإتكَلَّمو بيها الخاطيين الشَّرّيرين.“ و ديل يَشتَكو و يَنَقنِقو، و هُم يَمشو حَسَب شَهوَاتُم. و خُشومُم يِتكَلَّمو بِكِلمات كِبِر، و يَشوفو الوشوش فِشان الفايدَه. و لَكِن إنتو، يا مَحبوبين، إتزَكَّرو الكَلام القالوهو رُسُل رَبَّنا يَسُوع المَسيح مِن قُبّال. عَشانُم كانو بِقولو ليكُم: ”بِكونو في زَمَن الأخير ناس يِضحَكو عَلى الله، ماشين حَسَب شَهوَاتُم الشَّرّيرَه.“ ديل، هُم البِسَوو أقسام بينكُم، و أفكارُم في حاجات الدُّنيا، و ما عِندَهُم الرّوح. لَكِن إنتو، يا مَحبوبين، أبنو نُفوسكُم في إيمانكُم القُدّوس، و صَلّو في الرّوح القُدُس. و أحفَظو نُفوسكُم في مَحَبَّة الله، مُنتَظِرين رَحمَة رَبَّنا يَسُوع المَسيح لِلحَياة الأبَديَّه. أرحَمو بَعض مِن النّاس البِشِكّو. و طَلِّعو البَعض مِن النّار و خَلِّصوهُم. لَكِن أرحَمو التّانيين بِخوف كارِهين الهِدوم البِقي نَجِس مِن شَهوات الجِّسِم. و لِلقادِر يَحفَظكُم مِن الوقوع، و يَجيبكُم قِدّام مَجدو بِدون عيب بِفَرَح عَظيم، لِلَّه الوَحيد، مُخَلِّصنا، بِيَسُوع المَسيح رَبَّنا، المَجد و العَظَمَه و القُدرَه و السُّلطَه قُبّال كُلّو زَمَن و هَسَّع و لِلأبَد. آمين. رؤيا يَسُوع المَسيح الأدّاهو ليهو الله عَشان يَوَرّي لِخَدّامينو الحاجات اللازِم تَحصُل بَعَد شوَيَه. و هو رَسَّل و بِيَّنو بِمَلاكو لِخَدّامو يُوحَنَّا. و هو شِهِد بِكِلمَة الله و بِشَهادَة يَسُوع المَسيح بِكُلّو شي الهو شافو. مُبارَك هو البِقرا و هُم البِسمَعو كِلمات النُّبوَّه دي، و يَحفَظو الحاجات المَكتوبَه فيها. عَشان الوَكِت قَريب. مِن يُوحَنَّا لِلسَّبعَه كَنايس الفي آسيا: النِّعمَه ليكُم و السَّلام مِنّو المَوجود و الكان مَوجود و الماشي يَجي، و مِن السَّبعَه أرواح الفي قِدّام كُرسيهو. و مِن يَسُوع المَسيح الشّاهِد الأمين و البِكر مِن بين المَيِّتين و رَئيس مُلوك الأرض. ليهو البِحِبّنا و أدّانا الحُرّيَّه مِن خَطايانا بِدَمّو. وَ عَمَلنا مَلَكوت و قُسُس لِلَّه أبوهو، ليهو المَجد و السُّلطَه لِلأبَد! آمين. شوفو! هو جاي مَعَ السَّحاب. و كُلّو عين بِتشوفو، حَتّى ديل الطّعَنوهو. و كُلّو قَبايل الأرض بيبكو عَليهو. أيوَه، خَليهو يَكون كِدا. ”أنا البِدايَه و النِّهايَه،“ يَقول الله الرَّب، المَوجود و الكان مَوجود و الماشي يَجي، القادِر عَلى كُلّو شي. أنا، يُوحَنَّا، أخوكُم و شَريككُم في التَّعب و في المَلَكوت و الصَّبر في يَسوع، كُنتَ في الجَّزيرَه الإسِما بَطمُس عَشان خاطِر كِلمَة الله و شَهادة يَسوع. و كُنتَ في الرّوح في يوم الرَّب، و سِمِعتَ وَراي صوت عالي زي صوت بوق. و الصّوت قال: ”أكتِب الحاجَه التَّشوفا في كِتاب، و رَسِّلو لِلسَّبعَه كَنايس، لِأفَسُس و لِسِمِيرْنَا و لِبَرْغَامُس و لِثَيَاتِيرَا و لِسَارْدِس و لِفِيلَادَلْفِيَا و لِلاوُدِكِيَّه.“ و إتلَفَتَّ عَشان أشوف الصّوت الإتكَلَّم مَعاي. و لَمّا إتلَفَتَّ، شُفتَ سَبعَه مَناوِر مِن دَهَب. و في وَسِط السَّبعَه مَناوِر، واحِد زي إبن إنسان، كان لابِس توب يَمشي تِحِت لِكِرعينو، و مَربوط حَول صَدرو بِحِزام مِن دَهَب. و رَاسو و شَعرو زي الصّوف الأبيَض و زي التَّلِج. وَ عُيونو زي نار مَوَلَّعَه. و كِرعينو زي النَّحاس الأصفَر مَوَلَّع في فُرن، و صوتو زي صوت مويَه كَتيرَه. و في إيدو اليَمين عِندو سَبعَه نُجوم و ماشي مِن خَشمو سيف سَنين، عِندو طَرَفين. و وَشّو يَنَوِّر زي الشَّمِش في قوَتو. و لَمّا شُفتو، وَقَعتَ عِند كِرعينو زي الزّول المَيِّت. و هو خَتَّ إيدو اليَمين عَلي و قال: ”ما تَخاف. أنا هو الأوَّل و الآخِر. أنا هو الحَي. و كُنتَ مَيِّت، و شوف، أنا حَي لِلأبَد! و أنا عِندي مَفاتيح الموت و الهاويَه. عَلَشان كِدا، أكتِب الحاجات الشُّفتَها، و الحاجات المَوجودَه، و الحاجات البِتَحصُل بَعَد دا. سِر السَّبعَه نُجوم الأنتَ شُفتَها في يَميني و السَّبعَه مَناوِر مِن دَهَب، دا هو: السَّبعَه نُجوم، هُم مَلائِكَة السَّبعَه كَنايس، و السَّبعَه مَناوِر، هُم السَّبعَه كَنايس. أكتِب لِمَلاك الكَنيسَه الفي أفَسُس: هو اليَمسِك السَّبعَه نُجوم بِيَمينو، و الماشي في وَسِط السَّبعَه مَناوِر مِن دَهَب، بِقول الحاجات دي. أنا بَعرِف أعمالَك و تَعبَك و صَبرَك، و إنتَ ما تَقدَر تِتحَمَّل الشَّرّيرين. و إنتَ جَرَّبتُم البِسَمّو نُفوسُم رُسُل، لَكِن هُم مُش رُسُل، و لِقيتُم كاضِبين. و عِندَك صَبر و إتحَمَّلتا التَّعب عَشان خاطِر إسمي و ما بِقيت تَعبان. لَكِن أنا عِندي حاجَه عَليك، إنتَ خَلّيت مَحَبَّتَك الكانَت عِندَك في الأوَّل. عَلَشان كِدا إتزَكَّر مِن وين وَقَعتَ، و توب، و أعمِل الأعمال زي في الأوَّل. و إلّا، أنا بَجيك و بَشيل مَنارتَك مِن مَحَلّها إذا ما تَتوب. و لَكِن إنتَ عِندَك الحاجَه الكوَيسَه دي، إنتَ بِتَكرَه أعمال ناس نُقُلاوي و أنا كَمان بَكرَها. العِندو أضان، خَليهو يَسمَع البِقولو الرّوح لِلكَنايس. ليهو اليَغلِب، أنا بَدّيهو أن ياكُل مِن شَجَرَة الحَياة الفي جَنَّة الله. و أكتِب كَمان لِمَلاك الكَنيسَه الفي سِميرنا: ديل الحاجات البِقولو الأوَّل و الآخِر، هو الكان مَيِّت و رَجَع لِحَياة تاني. أنا بَعرِف تَعبَك و إحتياجَك، لَكِن إنتَ غَني. و بَعرِف تَجديف ديل البِقولو هُم يَهود و هُم مُش يَهود، لَكِن هُم مَجمَع الشّيطان. ما تَخاف مِن الحاجات الأنتَ ماشي تِتوَجَّع بيها. شوف، الشّيطان قَرَّب يَرمي بَعض مِنَّكُم في السِّجِن عَشان يِمتَحِنكُم. و بِكون عِندَكُم ضيق عَشَرَة أيام. كون أمين لِغايَة الموت، و أنا بَدّيك تاج الحَياة. العِندو أضان، خَليهو يَسمَع البِقولو الرّوح لِلكَنايس. و هو البِغلِب، الموت التّاني ما بِضُرّو. و أكتِب كَمان لِمَلاك الكَنيسَه الفي بَرْغَامُس: ديل الحاجات البِقولو العِندو السّيف السَّنين العِندو طَرَفين. أنا بَعرِف المَحَل الأنتَ ساكِن فيهو، و كُرسي الشّيطان في المَحَل دا. لَكِن إنتَ ماسِك بِإسمي. و إنتَ ما نَكَرتَ الإيمان بي، حَتّى في أيام أَنْتِيبَاس، شاهِدي الأمين. و هو كان مَكتول بينكُم، في المَحَل الشّيطان بِسكُن فيهو. و لَكِن أنا عِندي حاجات قَليلَه عَليك. إنتَ عِندَك هِناك ناس ماسكين بِتَعليم بَلعام الكان بِعَلِّم بالاق أن يَكون سَبَب لِلخَطيَّه لِبَني إِسْرَائِيل. هو عَلَّمُم أن ياكلو مِن الأكل الكان مَضبوح لِلأصنام و يَعمِلو الزِّنا. و إنتَ كَمان عِندَك ناس ماسكين بِتَعليم النُّقُلاويين. عَلَشان كِدا، توب، و إلّا أنا بَجيك قَوام و بَحارِبُم بِسيف خَشمي. العِندو أضان، خَليهو يَسمَع البِقولو الرّوح لِلكَنايس. ليهو اليَغلِب، أنا بَدّيهو مِن المَنّا المَدسوس. و بَدّيهو حَجَر أبيَض، مَكتوب عَليهو إسم جَديد، ما في واحِد يَعرِفو إلّا البِقبَلو. و أكتِب كَمان لِمَلاك الكَنيسَه الفي ثِيَاتِيرَا: ديل الحاجات البِقولو إبن الله العِندو عُيون زي لَهيب نار، و كِرعينو زي النَّحاس الأصفَر اللَّامَع. أنا بَعرِف أعمالَك و مَحَبَّتَك و إيمانَك و خِدمَتَك و صَبرَك. و بَعرِف أعمالَك الأخيرَه أكتَر مِن الفي الأوَّل. لَكِن أنا عِندي حاجَه عَليك. إنتَ تَدّي إذن لِلمَرَه إيزابَل البِتقول هي نَبيَّه. و هي تَعَلِّم و تَغِش خَدّاميني حَتّى يَعمِلو الزِّنا و ياكلو مِن الأكل الكان مَضبوح لِلأصنام. و أنا أدّيت ليها وَكِت عَشان تَتوب، و لَكِن هي ما عاوزَه تَتوب مِن زِناها. شوف، أنا بَرميها في عَنقَرِيب الوَجَع، و اليَزنو مَعاها في تَعب شَديد إذا ما يَتوبو مِن أعمالا. و بَكتُل أولادا بِالموت. و كُل الكَنايس بِيَعرِفو أنا هو البَمتَحِن الأفكار و القُلوب، و بَدفَع لِكُلّو واحِد مِنَّكُم حَسَب أعمالو. و لَكِن بَقول دا ليكُم، التّانيين في ثِيَاتِيرَا، كُل الما مَسَكتو بِالتَعليم دا. و إنتو ما بِتَعرِفو الحاجات الغَريقَه بِتاعَت الشّيطان زي ما بِقولو. أنا ما بَخُت عَليكُم حِمِل تاني. لَكِن تَمسِكو بِالحاجَه العِندَكُم لِغايَة ما بَجي. و ليهو البِغلِب و بِحفَظ أعمالي حَتّى النِّهايَه، أنا بَدّيهو سُلطَه عَلى الأُمَم. و هو يَملِك عَليهُم بِعَصايَه مِن حَديد، زي ما يَكسَرو بُرَم مِن طين، مِثِل ما أبوي أدّاني سُلطَه. و بَدّيهو كَمان نَجمَة الصَّباح. العِندو أضان، خَليهو يَسمَع البِقولو الرّوح لِلكَنايس. و أكتِب كَمان لِمَلاك الكَنيسَه الفي ساردِس: ديل الحاجات البِقولو العِندو السَّبعَه أرواح الله و السَّبعَه نُجوم. أنا بَعرِف أعمالَك، و عِندَك إسم زي كَنيسَه حَيَّه، لَكِن إنتَ مَيِّت. أحرِس و شَدِّد الحاجات البِستَنّو القَرَّبو يَموتو، عَشان أنا ما لِقيت أعمالَك كَامِلَه قِدّام إلَهي. عَلَشان كِدا، إتزَكَّر كيف إنتَ قِبِلتَ و سِمِعتَ، و أحفَظ و توب. و إذا ما تحرِس، بَجي ليك زي الحَرامي، و إنتَ ما بِتَعرِف ساعَه كَم أنا بَجيك. لَكِن عِندَك في ساردِس ناس قَليلين و هُم ما نَجَّسو هِدُومُم. و هُم بِيَمشو مَعاي في هِدوم أبيَض، عَشان هُم مُستَحِقّين. و كِدا، الزّول البِغلِب، هو بِلبَس هِدوم أبيَض، و أنا أبَداً ما بَشيل إسمو مِن كِتاب الحَياة. لَكِن أنا بَعتَرِف بِإسمو قِدّام أبوي و قِدّام مَلائكَتو. العِندو أضان، خَليهو يَسمَع البِقولو الرّوح لِلكَنايس. و أكتِب كَمان لِمَلاك الكَنيسَه الفي فِيلَادَلْفِيَا: ديل الحاجات البِقولو القُدّوس الحَقيقي، العِندو مُفتاح دَاوُد. و هو يَفتَح و ما في واحِد يَقفِل، و يَقفِل و ما في واحِد يَفتَح. أنا بَعرِف أعمالَك. و شوف، أنا خَتّيت قِدَّامَك باب مَفتوح، و ما في واحِد يَقدَر يَقفِلو. بَعرِف إنتَ عِندَك شوَيَة قُوَّه، و حَفَظتو كلمَتي و ما نَكَرتَ إسمي. شوف، في بَعض مِن النّاس مِن مَجمَع الشّيطان، البِقولو هُم يَهود، و هُم مُش يَهود، لَكِن يَكَضِّبو. شوف، أنا بَعمِلُم يَجو و يَركَعو عِند كِرعينَك، و هُم بِيَعرِفو أنا حَبّيتَك. و عَلَشان إنتَ حَفَظتَ أمري بِالصَّبر، أنا كَمان بَحفَظَك مِن ساعَة التَجرِبَه القَرَّبَت تَجي عَلى كُل الدُّنيا. و السّاعَه دي بِتَجي عَشان تَجَرِّب السّاكنين عَلى الأرض. أنا جاي قَوام، أمسِك بِالحاجَه العِندَك، عَشان واحِد ما بِشيل تاجَك. الزّول البِغلِب، أنا بَعمِلو عَمود في هيكَل إلَهي. و هو أبَداً ما بِمرُق مِنّو مَرَّه تانيَه. و بَكتِب عَليهو إسم إلَهي و إسم مَدينَة إلَهي، أُورُشَلِيم الجَديدَه، النّازلَه مِن السَّما مِن إلَهي، و إسمي الجَّديد. العِندو أضان، خَليهو يَسمَع البِقولو الرّوح لِلكَنايس. و أكتِب كَمان لِمَلاك الكَنيسَه الفي لاوُدِكِيَّةَ: ديل الحاجات البِقولو الآمين، الشّاهِد الأمين الحَقيقي، بِدايَة خَليقَة الله. أنا بَعرِف أعمالَك، إنتَ مُش بارِد و مُش حار. أنا عَاوِزَك تَكون بارِد ولّا حار! و كِدا، عَلَشان إنتَ بين الإتنين، مُش حار و مُش بارِد، قَرَّبتَ أبزُقَك مِن خَشمي. عَلَشان إنتَ تَقول: ’أنا غَني، و إتحَصَّلتَ عَلى الغِنى، و ما عِندي إحتِياج لِأي شي.‘ و ما بِتَعرِف إنتَ مَعَذَّب جِدّاً و شَفوق و مِسكين و عَميان و عَريان. أنا بَدّيك نَصيحَه أن تَشتَري مِنّي دَهَب مُجَرَّب بِالنّار، عَلَشان تَبقى غَني. و تَشتَري هِدوم أبيَض عَشان تَلبَس و تَغَطّي خَجلَك عَشان إنتَ عَريان. و تَشتَري مَسَحَه عَشان تَمسَح عُيونَك بيهو عَلَشان تَشوف. كُلُّهُم الأنا بَحِبُّم بَوَبِّخُم و بأدِّبُم. عَلَشان كِدا، كون حار و توب. شوف! أنا واقِف عَلى الباب و بَدُق. إذا أي واحِد يَسمَع صوتي و يَفتَح الباب، بَدخُل ليهو و باكُل مَعاهو و هو مَعاي. البِغلِب، أنا بَدّيهو أن يَقعُد مَعاي عَلى كُرسي، زي ما أنا غَلَبتَ كَمان و قَعَدتَ مَعَ أبوي عَلى كُرسيو. العِندو أضان، خَليهو يَسمَع البِقولو الرّوح لِلكَنايس.“ و بَعَد دا عايَنتَ. و شوف! كان في باب مَفتوح في السَّما. و الصّوت الأوَّل، السِّمِعتو يَكَلِّمني زي صوت بوق، قال: ”اطلَع هِنا، و أنا بَوَرّيك حاجات لازِم تَحصَل بَعَد دا.“ و طَوّالي كُنتَ في الرّوح. و أهو دا! كان في كُرسي مَختوت في السَّما، و واحِد قاعِد عَلى الكُرسي. و مَنظَر هو القاعِد كان زي حَجَر غالي إسمو اليَشَب الأخدَر و حَجَر ساردِس الأحمَر. و حَول الكُرسي كان في قوس سَحاب يَشبَه حَجَر زُّمُرُّد الأخدَر. و كانو في حَول الكُرسي أربَعَه و عِشرين كُرسي. و شُفتَ عَلى الكَراسي أربَعَه و عِشرين شيخ لابسين هِدوم أبيَض، و عَلى روسينُم تيجان مِن دَهَب. و مِن الكُرسي مَرَقو بُروق و أصوات و رُعود. و قِدّام الكُرسي سَبعَه لَمبات نار مَوَلَّعَه. و هُم السَّبعَه أرواح الله. و قِدّام الكُرسي كَمان زي بَحَر مِن قِزاز، يَشبَه بَلّور. و في وَسِط الكُرسي و حَول الكُرسي، أربَعَه و عِشرين حَيوانات مُغَطّين بِعُيون مِن قِدّام و مِن وَرا. و الحَيوان الأوَّل كان زي الأسَد، و الحَيوان التّاني زي العِجل، و الحَيوان التّالِت عِندو وَش زي وَش الإنسان، و الحَيوان الرّابِع زي النَّسر البِطير. و كُلّو واحِد مِن الأربَعَه حَيوانات كان عِندو سِتَّه جِنحين، مَليان عُيون مِن حَولو و مِن جواهو. و هُم ما بِوَقِّفو ليل و نَهار يَقولو: ”قُدّوس، قُدّوس، قُدّوس، الرَّب الإلَه القادِر عَلى كُلّو شي، و هو كان مَوجود و هو مَوجود و ماشي يَجي.“ و الحَيوانات يَدّو مَجد و إحتِرام و شُكر لِلقاعِد عَلى الكُرسي، و ليهو الحَي لِلأبَد. و لَمّا بيَعمِلو كِدا، الأربَعَه و عِشرين شيخ يَقَعو قِدّام القاعِد عَلى الكُرسي. و هُم يَعبُدو اليَعيش لِلأبَد. و يَرمو تيجانُم قِدّام الكُرسي و يَقولو: ”إنتَ مُستَحِق، يا رَب إلَهنا أن تَقبَل المَجد و الإحتِرام و القُدرَه. عَلَشان إنتَ خَلَقتَ كُل الحاجات، و بِإرادَتَك كانو مَوجودين و مَخلوقين.“ و شُفتَ بِيَمين القاعِد عَلى الكُرسي، كِتاب مَكتوب مِن جُوَّه و مِن بَرَّه، مَقفول بِسَبعَه أختام. و شُفتَ مَلاك قَوّي يَنادي بِصوت عالي: ”مِنو يَكون مُستَحِق يَفتَح الكِتاب و يَفِك أختامو؟“ و ما في واحِد في السَّما ولّا عَلى الأرض ولّا تِحِت الأرض القِدِر يَفتَح الكِتاب ولّا يَعايِن فيهو. و بَكيت بِكى كَتير عَلَشان هُم ما لِقو واحِد يِستَحِق يَفتَح الكِتاب ولّا يَعايِن فيهو. و واحِد مِن الشُّيوخ قال لَي: ”ما تَبكي! شوف، الأسَد المِن قَبيلَة يَهُوذَا، عِرق دَاوُد، هو غَلَب عَشان يَفتَح الكِتاب و أختامو السَّبعَه.“ و شُفتَ حَمَل واقِف بين الكُرسي و الأربَعَه حَيوانات و في وَسِط الشُّيوخ. و مَنظَر الحَمَل كان زي ما هو مَكتول. و هو كان عِندو سَبعَه قُرون و سَبعَه عُيون، و هُم السَّبعَه أرواح الله المُرَسَّلين لِكُل الأرض. و هو جا و أخَد الكِتاب مِن يَمين القاعِد عَلى الكُرسي. و لَمّا أخَد الكِتاب، الأربَعَه حَيوانات وَقَعو قِدّام الحَمَل، و كِدا الأربَعَه و عِشرين شيخ كَمان. و كُلّو واحِد مِنَّهُم كانَت عِندو رَبابَه و حَلَّه مِن دَهَب، مَليانَه بَخور، و هو صَلَوات القِدِّسين. و هُم يَرَتِّلو تَرتيلَه جَديدَه، و بِقولو: ”إنتَ مُستَحِق تاخُد الكِتاب و تَفِك أختامو، عَلَشان كُنتَ مَكتول، و بِدَمَّك أشتَريت لِلَّه مِن كُلّو قَبيلَه و لُغَه و شَعب و أُمَّه. و إنتَ عَمَلتُم مَلَكوت و قُسُس لِإلَهنا، و هُم بِيَملِكو عَلى الأرض.“ و شُفتَ و سِمِعتَ صوت مَلائكَه كَتيرين حَول الكُرسي و الحَيوانات و الشُّيوخ. و كان عَدَدُم عَشَرَة آلاف في عَشَرَة آلاف و آلاف آلاف. و يَقولو بِصوت عالي: ”الحَمَل الكان مَكتول مُستَحِق يَقبَل القُدرَه و الغِنى و الحِكمَه و القُوَّه و الإحتِرام و المَجد و البَرَكَه!“ و كُلّو خَليقَه الفي السَّما و عَلى الأرض و تِحِت الأرض و الفي البَحَر و كُل الفيها سِمِعتُم يَقولو: ”ليهو القاعِد عَلى الكُرسي و لِلحَمَل البَرَكَه و الإحتِرام و المَجد و القُدرَه لِلأبَد!“ و الأربَعَه حَيوانات قالو: ”آمين!“ و الشُّيوخ وَقَعو و عَبَدو. و شُفتَ لَمّا الحَمَل فَتَح واحِد مِن السَّبعَه أختام. و سِمِعتَ واحِد مِن الأربَعَه حَيوانات يَقول بِصوت زي صوت الرَّعد: ”تَعال!“ و عايَنتَ، و أهو دا! حُصان أبيَض، و الرّاكِب فوقو كان عِندو قوس، و أدّوهو تاج. و هو مَرَق غالِب و عَشان يَغلِب. و لَمّا فَتَح الخِتِم التّاني، سِمِعتَ الحَيوان التّاني يَقول: ”تَعال!“ و حُصان تاني أحمَر مَرَق. و أدّو لِلرّاكِب فوقو قُوَّه أن ياخُد السَّلام مِن الأرض، و يَعمِل النّاس يَكتُلو بَعضَهُم بَعض. و أدّو ليهو سيف كَبير. و لَمّا فَتَح الخِتِم التّالِت، سِمِعتَ الحَيوان التّالِت يَقول: ”تَعال!“ و عايَنتَ، و أهو! حُصان أسوَد و الرّاكِب فوقو كان عِندو ميزان في إيدو. و سِمِعتَ زي صوت في وَسِط الأربَعَه حَيوانات يَقول: ”كيلة دُرَه بِأُجرَة يوميَّه و تلاتَه كيلات شَعير بِأُجرَة يوميَّه. و ما تَضُر الزّيت و الخَمر.“ و لَمّا فَتَح الخِتِم الرّابِع، سِمِعتَ صوت الحَيوان الرّابِع يَقول: ”تَعال!“ و عايَنتَ، و أهو دا! حُصان أصفَر، و الرّاكِب فوقو إسمو الموت، و الهاويَه مَشى وَراهو. و أدّوهُم سُلطَه عَلى رُبُع الأرض، عَشان يَكتُلو بِالسّيف و الجّوع و الموت و بِوحوش الأرض. و لَمّا فَتَح الخِتِم الخامِس، شُفتَ تِحِت المَضبَح، نُفوس النّاس الكانو مَكتولين عَشان خاطِر كِلمَة الله، و فِشان الشَّهادَه الكانَت عِندَهُم. و هُم كورَكو بِصوت عالي و قالو: ”يا سَيِّد، القُدّوس و الحَقيقي، لِغايَة مِتين ما تَحكُم و ما تَنتَقِم لِدَمّنا مِن السّاكنين عَلى الأرض؟“ و أدّو لِكُلّو واحِد مِنَّهُم توب أبيَض. و قالو ليهُم أن يستَريحو مُدَّه قَليلَه، لِغايَة ما يَتِم عَدَد الخَدّامين شُرَكاهُم و أخوانُم البِكونو مَكتولين زيَهُم. و شُفتَ لَمّا فَتَح الخِتِم السّادِس. و كانَت في زَلزَلَه كَبيرَه. الشَّمِش بِقَت سودَه زي شَوال أسوَد، و القَمَر كُلّو بِقى زي الدَّم. و نُجوم السَّما وَقَعو لِلأرض زي ما شَجَرَة التّين تَرمي التّين الما نَجيض لَمّا الهَبوب الشَّديدَه تَهِزّا. و السَّما فاتَت زي ما يَلِفّو وَرَقا طَويلَه، و كُلّو جَبَل و كُلّو جَزيرَه إتنَقَلو مِن مَحَلّا. و مُلوك الأرض و الكُبار و رؤساء الجُّيوش و الغَنيين و الشُّداد و كُلّو عَبد و كُلّو حُر إندَسو في المَغاوير و بين حُجار الجِبال. و هُم يَقولو لِلجِّبال و الحُجار: ”أقَعو عَلينا، و دِسّونا مِن وَش القاعِد عَلى الكُرسي، و مِن غَضَب الحَمَل. عَلَشان جا يوم غَضَبُم العَظيم. و مِنو هو اليَقدَر يَقيف؟“ و بَعَد دا، شُفتَ أربَعَه مَلائكَه واقفين عَلى الأربَعَه أركان بِتاعَت الأرض ماسكين الأربَعَه أرياح بِتاعَت الأرض. عَلَشان الريح ما تَهِب عَلى الأرض، ولّا عَلى البَحَر، ولّا عَلى أي شَجَرَه. و شُفتَ مَلاك تاني يَطلَع مِن طُلوع الشَّمِش، و مَعاهو خِتِم الله الحَي. و هو نادى بِصوت عالي لِلأربَعَه مَلائكَه. و الله أدّاهُم القُوَّه عَشان يَضُرّو الأرض و البَحَر. و قالو: ”ما تَضُرّو الأرض ولّا البَحَر ولّا الشَّجَر، حَتّى نَخُت الخِتِم عَلى جَبهات خَدّامين إلَهنا.“ و سِمِعتَ عَدَد الخَتّو الخِتِم عَليهُم، مِيَّه و أربَعَه و أربَعين ألف مَختومين مِن كُلّو قَبايل بَني إِسْرَائِيل. و مِن قَبيلَة يَهُوذَا إتناشَر ألف مَختوم، و مِن قَبيلَة رأوبين إتناشَر ألف، و مِن قَبيلَة جاد إتناشَر ألف، و مِن قَبيلَة أَشِير إتناشَر ألف، و مِن قَبيلَة نَفتالي إتناشَر ألف، و مِن قَبيلَة مَنَسَّى إتناشَر ألف، و مِن قَبيلَة شِمْعُون إتناشَر ألف، و مِن قَبيلَة لَاوِي إتناشَر ألف، و مِن قَبيلَة يَسَّكَر إتناشَر ألف، و مِن قَبيلَة زَبولون إتناشَر ألف، و مِن قَبيلَة يُوسِف إتناشَر ألف، و مِن قَبيلَة بنْيَامِين إتناشَر ألف مَختوم. و بَعَد دا عايَنتَ، و شوف! كانو في ناس كُتار، و واحِد ما يَقدَر يَحسِبُم. و هُم كانو مِن كُل الأُمَم و القَبايل و الشُّعوب و اللُّغات. و كانو واقفين قِدّام الكُرسي و قِدّام الحَمَل. و هُم لابسين تيبان بيضَة و في إيدينُم فُروع النَّخَل. و هُم يَكورِكو بِصوت عالي و يَقولو: ”الخَلاص لِإلَهنا القاعِد عَلى الكُرسي، و لِلحَمَل!“ و كُل المَلائكَه كانو واقفين حَول الكُرسي و حَول الشُّيوخ و الأربَعَه حَيوانات. و هُم وَقَعو عَلى وُشوشُم قِدّام الكُرسي، و عَبَدو الله. و قالو: ”آمين! الحَمد و المَجد و الحِكمَه و الشُّكر و الإحتِرام و القُدرَه و القُوَّه لِإلَهنا لِلأبَد! آمين.“ و واحِد مِن الشُّيوخ إتكَلَّم و قال لَي: ”مِنو ديل اللابسين التّيبان البيضَة، و هُم جو مِن وين؟“ و قُلتَ: ”إنتَ بِتَعرِف، يا سيدي.“ و هو قال لَي: ”ديل هُم الجّو مِن الضّيق الكَبير، و غَسَّلو تيبانُم و عَمَلوها بيضَة في دَم الحَمَل. عَلَشان كِدا هُم قِدّام كُرسي الله و يَخدِموهو ليل و نَهار في هَيكَلو. و القاعِد عَلى الكُرسي بِفَرِّش خيمَتو فوقُم. و هُم ما بِجوعو بَعَد دا، ولّا بِيَعطَشو بَعَد دا. و الشَّمِس و الحَر ما بِتَضرُبُم، أبَداً. عَلَشان الحَمَل الفي وَسِط الكُرسي بِكون الرّاعي بِتاعُم. هو بِقودُم لِأبيار المويَه الحَيَّه. و الله بِيَمسَح كُلّو دَمعَه مِن عُيونُم.“ و لَمّا هو فَتَح الخِتِم السّابِع، كان في سُكوت في السَّما مُدَّة نُص السّاعَه تَقريباً. و شُفتَ السَّبعَه مَلائكَه البِقيفو قِدّام الله، و أدّو ليهُم سَبعَه أبواق. بَعدين، تاني مَلاك جا و وَقَف عِند المَضبَح، و كان عِندو حَلَّه مِن دَهَب. و أدّو ليهو بَخور كَتير عَشان يَقَدِّمو مَعَ كُلّو صَلَوات القِدِّسين عَلى المَضبَح الدَّهَبي قِدّام الكُرسي. و دُخان البَخور مَعَ صَلَوات القِدِّسين طَلَع قِدّام الله مِن إيد المَلاك. و المَلاك أخَد الحَلَّه و مَلأ مِن نار المَضبَح و رَماها عَلى الأرض. و كانو في رُعود و أصوات و بُروق و زَلزَلَه. بَعدين السَّبعَه مَلائكَه العِندَهُم السَّبعَه أبواق جَهَّزو عَشان يَضرُبو بيها. و المَلاك الأوَّل ضَرَب بِالبوق، و جا بَرَد و نار مَلَخبَتَه بِدَم، و رَموهُم عَلى الأرض. و تِلت مِن الأرض كُلَّها إنحَرَق، و تِلت الشَّجَر إنحَرَق، و كُلّو قَش أخدَر إنحَرَق. و المَلاك التّاني ضَرَب بِالبوق، و حاجَه زي جَبَل كَبير مَوَلَّع بِالنّار إترَمَت في البَحَر. و تِلت البَحَر بِقى دَم. و تِلت المَخلوقات الفي البَحَر ماتو، و خَرَبو تِلت المَراكِب. و المَلاك التّالِت ضَرَب بِالبوق، و نَجمَه كَبيرَه وَقَعَت مِن السَّما، مَوَلَّعَه زي فانوس. و وَقَعَت عَلى تِلت البِحار و عَلى عُيون المويَه. و إسم النَّجمَه مَرارَه. و تِلت المويَه كُلَّها بِقَت مُرَّه، و ناس كُتار ماتو مِن المويَه عَلَشان بِقَت مُرَّه. و المَلاك الرّابِع ضَرَب بِالبوق، و تِلت الشَّمِش إنضَرَب، و تِلت القَمَر، و تِلت النُّجوم كَمان. و عَلَشان كِدا، تِلت مِنَّهُم بِقى مَضَلِّم. و تِلت مِن النَّهار كان بِدون نور، و تِلت مِن اللّيل كَمان. و بَعدين شُفتَ، و سِمِعتَ نَسر يَطير في وَسِط السَّما. و هو قال بِصوت عالي: ”مُصيبَه! مُصيبَه! مُصيبَه لِلسّاكِنين عَلى الأرض، بِسَبَب الأصوات التّانيَه مِن أبواق التّلاتَه مَلائكَه الهُم قَرَّبو يَضرُبوها.“ و المَلاك الخامِس ضَرَب بِالبوق، و شُفتَ نَجمَه كانَت وَقَعَت مِن السَّما لِلأرض. و أدّو ليها مُفتاح الحُفرَه الغَريقَه خَلاص. و هو فَتَح الحُفرَه الغَريقَه، و دُخان طَلَع مِن الحُفرَه زي دُخان مِن فُرن كَبير. و الشَّمِس و الهَوا بِقَت مَضَلِّمَه مِن دُخان الحُفرَه. و مِن الدُّخان جا جَراد عَلى الأرض، و أدّو ليهُم قُوَّه زي قُوَّة عَقارِب الأرض. و قالو ليهُم أن ما يَضُرّو قَش الأرض ولّا أي شي أخدَر ولّا أي شَجَرَه، إلّا النّاس الما عِندَهُم خِتِم الله عَلى جَبهاتُم. و ما أدّوهُم قُوَّه عَشان يَكتُلوهُم، لَكِن يَعَذِّبوهُم خَمسَه شُهور بَس. و عَذابُم كان زي عَذاب عَقرَب لَمّا يَعُض زول. و في الأيام ديلاك النّاس بِفَتِّشو عَلى الموت، لَكِن ما يَلقوهو. هُم بِدورو يَموتو، لَكِن الموت بِهرُب مِنَّهُم. و شَكل الجَّراد كان زي حَصين جاهِزين لِلحَرب. و عَلى رُسينُم حاجَه زي تيجان مِن دَهَب، و وُشوشُم زي وشوش النّاس. و كان عِندَهُم شَعر زي شَعر النِّسوان، و سِنونُم زي سِنون الأُسود. و كانو عِندَهُم دُروع مِن حَديد، و صوت جِنحينُم زي صوت عَرَبيَات حَصين كَتيرَه يَجرو لِلحَرب. و عِندَهُم أضناب زي عَقارِب و شوك، و في أضنابُم القُوَّه عَشان يَضُرّو النّاس مُدَّة خَمسَه شُهور. و عِندَهُم مَلِك فوقُم، و هو مَلاك الحُفرَه الغَريقَه. و إسمو بِّاللُغَه العِبرانيَّه، أبَدّون، و بِّاللُغَه الأغريقيَّه، أبولّيون. و المُصيبَه الفي الأوَّل فاتَت. و شوف، بِجو بَعَد دا مُصِيبَتين. و بَعدين المَلاك السّادِس ضَرَب بِالبوق، و سِمِعتَ صوت جاي مِن الأربَعَه قُرون بِتوع المَضبَح الدَّهَبي القِدّام الله. و هو قال لِلمَلاك السّادِس العِندو البوق: ”فِك الأربَعَه مَلائكَه المَربوطين عِند الفُرات، البَحَر الكَبير.“ و فَكّو الأربَعَه مَلائكَه. و هُم كانو مَجَهَّزين لِلسّاعَه و اليوم و الشَّهَر و السَّنَه عَلَشان يَكتُلو تِلت النّاس. و عَدَد الجُّيوش الرّاكبين حَصين كان مِيَّتين مِليون. أنا سِمِعتَ عَدَدُم. و كِدا في الرّؤيَه شُفتَ الحَصين و الرّاكبين فوقُم: ديل كانو عِندَهُم دُروع، و لون الدُّروع زي النّار و أزرَق غامِق و أصفَر زي الكِبريت. و روسين الحَصين كانو زي روسين الأُسود، و مَرَقو مِن خُشومُم نار و دُخان و كِبريت. و تِلت النّاس كانو مَكتولين بِالتّلاتَه ضَرَبات دي، النّار و الدُّخان و الكِبريت الجّو مِن خُشومُم. عَشان قُوَّة الحَصين في خُشومُم و في أضنابُم. عَشان أضنابُم زي الدَّبايب، و بِروسينُم بِضُرّو. و باقي النّاس الما كانو مَكتولين بِالضَّرَبات دي لِسَّع ما تابو مِن أعمال إيدينُم. و هُم إستَمَرّو يَعبُدو الشّياطين و الأصنام الدَّهَبي و الفِضَّه و النَّحاس الأصفَر و الحَجَر و الخَشَب. و الأصنام ديل ما بِقدَرو يَشوفو ولّا يَسمَعو ولّا يَمشو. و هُم ما تابو عَشان كَتَلو النّاس ولّا مِن سِحِرُم ولّا مِن زِناهُم ولّا مِن سِرقَتُم. و بَعدين شُفتَ مَلاك تاني قَوّي نازِل مِن السَّما. هو كان مَلفوف بِسَحابَه، و عَلى رَاسو قوس سَحاب. و وَشّو زي الشَّمِش، و كِرعينو زي عَمودين مِن نار. و في إيدو كِتاب صَغَيِر مَفتوح. و هو خَتَّ كِراعو اليَمين عَلى البَحَر، و الشِّمال عَلى الأرض. و كورَك بِصوت عالي زي صوت الأسَد. و لَمّا هو كورَك، السَّبعَه رُعود إتكَلَّمو بِأصواتُم. و لَمّا السَّبعَه رُعود إتكَلَّمو، أنا قَرَّبتَ أكتِب. لَكِن سِمِعتَ صوت مِن السَّما يَقول: ”خُت خِتِم عَلى الحاجات السَّبعَه رُعود إتكَلَّمو بيها، و ما تَكتِبا.“ و المَلاك الأنا شُفتو واقِف عَلى البَحَر و عَلى الأرض رَفَع إيدو اليَمين لِلسَّما. و هو حَلَف بيهو البِعِيش لِلأبَد، الخَلَق السَّما و كُل الفيها، و الأرض و كُل الفيها، و البَحَر و كُل الفيهو. و قال: ”ما بِكون في زَمَن بَعَد دا! لَكِن في الأيام لَمّا المَلاك السّابِع يَقَرِّب يَضرُب بِالبوق، في الوَكِت دا، سِر الله بِتِم، زي ما هو بَشَّر بيهو خَدّامينو الأنبياء.“ بَعدين الصّوت الكُنتَ سِمِعتو مِن السَّما كَلَّمني مَرَّه تانيَه و قال: ”أمشي و أُخُد الكِتاب المَفتوح في إيد المَلاك الواقِف عَلى البَحَر و عَلى الأرض.“ و مَشيت لِلمَلاك، و سألتو أن يَدّيني الكِتاب الصَّغَير. و هو قال لَي: ”أُخدو و أُكلو، و هو بيَعمِل بَطنَك مُر، لَكِن في خَشمَك بِكون حِلو زي العَسَل.“ و أخَدتَ الكِتاب الصَّغَير مِن إيد المَلاك و أكَلتو. و في خَشمي كان حِلو زي العَسَل، و بَعَد ما أكَلتو، بِقى مُر في بَطني. و بَعَد دا قال لَي: ”واجِب عَليك تِتنِبّى تاني مَرَّه عَن شُعوب و أُمَم و لُغات و مُلوك كُتار.“ و أدّوني قَصَب زي عَصايَة القِياس، و قالو لَي: ”قوم و قيس هيكَل الله و المَضبَح و النّاس اليَعبُدو فيهو. و سيب الحوش البَرَّه مِن الهيكَل، و ما تَقيسو. عَلَشان أدّوهو لِلأُمَم، و هُم بِدوسو المَدينَه المُقَدَّسَه تِحِت كِرعينُم لِإتنين و أربَعين شَهَر. و أنا بَدّي لِشاهِديني قُوَّه، و هُم بِتنَبّو مُدَّة ألف و ميتين و سِتّين يوم و هُم لابسين شَوال.“ و ديل هُم شَجَرتين الزّيتون و المَنارتين البِقومو قِدّام رَب الأرض. و إذا واحِد عاوِز يَضُرّم، نار بِتَمرُق مِن خُشومُم و بِتاكُل عُدوانُم. و أي واحِد العاوِز يَضُرّم، كِدا لازِم يَموت. و الراجلين ديل عِندَهُم سُلطَه يَقفِل السَّما، عَشان المَطَر ما بِنزِل في الأيام لَمّا يِتنَبّو فيها. و عِندَهُم سُلطَه فوق المويَه عَشان يَغَيِّروها لِدَم، و عَشان يَضرُبو الأرض بِكُلّو ضَربَه مَرّات كَتيرَه زي ما بِدورو. و لَمّا كَمَّلو شَهادَتُم، الوَحَش البِطلَع مِن الحُفرَه الغَريقَه خَلاص بِحارِبُم و بِيَغلِبُم و يَكتُلُم. و أجسامُم المَيِّتين بِكونو عَلى شارِع المَدينَه العَظيمَه، إسِما الرّوحيَّه، سَدوم و مَصر، في المَحَل الفيهو رَبُّم إنصَلَب. و ناس مِن الشُّعوب و القَبايل و اللُّغات و الأُمَم بِعاينو لِأجسامُم المَيِّتين مُدَّة تلاتَه أيام و نُص. و هُم بِيابو يَدفِنوهُم في قَبر. و السّاكنين عَلى الأرض بِيَفرَحو و يَحتَفِلو و يَرَسِّلو هَدايا بَعضَهُم لِبَعض عَلَشان النَّبيين ديل عَذَّبو السّاكنين عَلى الأرض. و بَعَد تَلاتَة أيام و نُص، روح حَياة مِن الله دَخَل فيهُم. و هُم وَقَفو عَلى كِرعينُم. و النّاس الشَّفوهُم خافو خوف شَديد. و بَعدين سِمِعو صوت عالي مِن السَّما يَقول ليهُم: ”أطلَعو لِهِنا!“ و طَلَعو لِلسَّما في سَحابَه و عُدوانُم عايَنو ليهُم. و في السّاعَه ديك كانَت في زَلزَلَه كَبيرَه، و عُشر المَدينَه وَقَع. و سَبعَة آلاف مِن النّاس كانو مَكتولين بِالزَّلزَلَه. و باقي النّاس خافو شَديد خالِص و مَجَّدو إلَه السَّما. المُصيبَه التّانيَه فاتَت، و شوف! التّالتَه تَجي قَوام. و المَلاك السّابِع نَفَخ في البوق، و كان في أصوات عاليَه في السَّما يَقولو: ”مَملَكَة الدُّنيا بِقَت مَملَكَه لِرَبَّنا و لِمَسيحو. و هو بِيَحكُم لِلأبَد!“ و الأربَعَه و عِشرين شيخ، الكانو قاعِدين عَلى كَراسيهُم قِدّام الله، وَقَعو عَلى وُشوشُم و عَبَدو الله. و قالو: ”نَشكُرَك، يا رَب، الإلَه القادِر، المَوجود و الكان مَوجود، عَلَشان إنتَ أخَدتَ قُدرَتَك العَظيمَه و إبتَديت تَملِك. الأُمَم بِقو زَعلانين، و غَضَبَك جا. و الزَّمَن جا عَشان تَحكُم عَلى المَيِّتين، و تَدّي الأُجرَه لِخَدّامينَك الأنبياء و القِدِّسين البِخافو إسمَك، الصُّغار و الكُبار. و عَشان تَخرَب ديل البِخرَبو الأرض.“ و هيكَل الله الفي السَّما إنفَتَح، و تابوت الإتِّفاق ظَهَر في هيكَل الله. و حَصَل بُروق و أصوات و رُعود و زَلزَلَه و بَرَد تَقيل. و عَلامَه عَظيمَه ظَهَرَت في السَّما: مَرَه هِدوما الشَّمِش، و تِحِت كِرعينا القَمَر، و تاج مِن إتناشَر نَجمَه عَلى راسا. و هي كانَت حامِل و تَكورِك و تِتوَجَّع عَشان قَرَّبَت تَلِد. و عَلامَه تانيَه ظَهَرَت في السَّما: و شوف! تنين أحمَر كَبير، و عِندو سَبعَه روسين و عَشَرَه قُرون، و عَلى روسينو سَبعَه تيجان. و ضَنَبو يَجُر تِلت مِن نُجوم السَّما، و رَماهُم لِلأرض. و التّنين وَقَف قِدّام المَرَه القَرَّبَت تَلِد، عَشان يَبلَع وَلَدا لَمّا وِلدَت. و وِلدَت إبن، وَلَد، و هو ماشي يَملِك عَلى كُل الأُمَم بِعَصايَه مِن حَديد. و وَلَدا إتمَسَك و إتَّخَد لِلَّه و لِكُرسيهو. و المَرَه هَرَبَت لِلخَلا لِلمَحَل الله جَهَّزو ليها عَشان يَهتَمّو بيها هِناك مُدَّة ألف و ميتين و سِتّين يوم. و كان في حَرب في السَّما. مِخائيل و مَلائكَتو حارَبو التّنين. و التّنين و مَلائكَتو حارَبو كَمان. و لَكِن هُم ما غَلَبوهُم. و بَعَد دا ما كان في مَحَل ليهُم في السَّما. و التّنين الكَبير كان مَطرود، هو الدَّبيب القَديم، إسمو إبْلِيس و الشّيطان، البِغِش السّاكنين عَلى الأرض كُلّها. هو و مَلائكَتو مَعاهو إترَمو لِلأرض. و سِمِعتَ صوت عالي في السَّما يَقول: ”هَسَّع جا الخَلاص و القُدرَه و مَلَكوت إلَهنا و سُلطَة مَسيحو. عَلَشان المُشتَكي عَلى أخوانّا إترَمى، هو البِشتَكي عَليهُم نَهار و ليل قِدّام إلَهنا. و هُم غَلَبوهو بِدَم الحَمَل و بِكِلمَة شَهادَتُم. و ما حَبّو حَياتُم كَتير و ما أبو يَموتو. عَلَشان كِدا أفرَحو، يا سَمَوات و إنتو السّاكِنين فيها! و مُصيبَه لِلأرض و لِلبَحَر، عَشان إبْلِيس نَزَل ليكُم. و غَضَبو عَظيم، عَلَشانو بِيَعرِف عِندو وَكِت قِصَير!“ و لَمّا التّنين شاف إنّو إترَمى لِلأرض، هو جَرى وَرا المَرَه الوِلدَت الإبن، الوَلَد. و أدّو لِلمَرَه جِنحين النَّسر الكَبير عَلَشان تَطير لِلخَلا لِمَحَلّا. و هِناك بِهتَمّو بيها زَمَن و زَمنين و نُص زَمَن، بَعيد مِن وَش الدَّبيب. و الدَّبيب رَمى مِن خَشمو مويَه زي البَحَر وَرا المَرَه، عَلَشان البَحَر يَشيلا بَعيد. و الأرض ساعَدَت المَرَه، و فَتَحَت خَشما، و بَلَعَت البَحَر التّنين رَمى مِن خَشمو. و التّنين غَضَب عَلى المَرَه. و مَشى عَشان يَحارِب باقي أولادا، البِحفَظو أوامِر الله و يَمسِكو بِشَهادَة يَسُوع. و التّنين وَقَف عَلى رَمل البَحَر. و شُفتَ وَحَش طالِع مِن البَحَر، عِندو عَشَرَه قُرون و سَبعَه روسين. و عِندو عَلى قرونو عَشَرَه تيجان، و عَلى روسينو إسم تَجديف. و الوَحَش الشُّفتو كان زي النِّمر، لَكِن أقدامو زي أقدام الدُّب، و خَشمو زي خَشُم الأسَد. و التّنين أدّا لِلوَحَش قُوَّتو و كُرسيهو، و سُلطَه عَظيمَه. و واحِد مِن روسينو ظَهَر إنّو كان مَجروح لِلموت، لَكِن جَرَحو الكان لِلموت، بِقى طَيب. و كُلّو ناس الأرض مَشو وَرا الوَحَش و إتعَجَّبو. و النّاس عَبَدو التّنين، عَلَشانو أدّا الوَحَش سُلطتو. و هُم عَبَدو الوَحَش و قالو: ”مِنو يَشبَه الوَحَش؟ و مِنو يَقدَر يَحارِبو؟“ و أدّوهو خَشُم يتكَلَّم بِكِلمات مِتكَبِّرَه و بِتَجديف. و أدّو ليهو سُلطَه عَشان يِستَمِر إتنين و أربَعين شَهَر. و هو فَتَح خَشمو بِالتَّجديف عَلى الله و عَلى إسمو و عَلى مَسكَنو، يَعني عَلى السّاكِنين في السَّما. و أدّو ليهو أن يَحارِب القِدِّسين و يَغلِبُم. و أدّو ليهو سُلطَه عَلى كُلّو قَبيلَه و شَعب و لُغَه و أُمَّه. و كُلّو سُكّان الأرض بِيَعبُدو الوَحَش، يَعني كُلّو واحِد إسمو ما كان مَكتوب مِن خَليقَة الدُّنيا في كِتاب الحَياة بِتاع الحَمَل الكان مَكتول. العِندو أضان، خَليهو يَسمَع. إذا أي واحِد بِكون لِلقَبَض، لِلقَبَض يَمشي. و إذا أي واحِد بِكتُل بِالسّيف، بِالسّيف يَكتُلوهو. و في دا القِدِّسين بِحتاجو لِلصَّبر و الإيمان. بَعدين شُفتَ وَحَش تاني طالِع مِن الأرض. و هو كان عِندو قَرنين زي حَمَل و يتكَلَّم زي تنين. و هو يَشتَغِل قِدّامو بِكُلّو سُلطات الوَحَش الأوَّل، و يَعمِل الأرض و السّاكِنين فيها يَعبُدو الوَحَش الأوَّل البِقي طَيب مِن جَرَحو الكان لِلموت. و هو يَعمِل عَلامات عَظيمَه، حَتّى يَنَزِّل نار مِن السَّما لِلأرض قِدّام النّاس. و يَغِش سُكّان الأرض بِالعَلامات الأدّو ليهو أن يَعمِل قِدّام الوَحَش. و يأمُر سُكّان الأرض أن يَصنَعو صَنَم لِلوَحَش الكان عِندو جَرَح السّيف و حِيى. و أدّو ليهو أن يَدّي روح لِصَنَم الوَحَش عَشان يتكَلَّم، و يَعمِل كُل النّاس الما بِيَعبُدو صَنَم الوَحَش يَكونو مَكتولين. و هو كَمان يَعمِل كُل النّاس أن يَقبَلو عَلامَه في إيدُم اليَمين ولّا في جَبهاتُم. أدّوها لِلصُّغار و الكُبار، الغَنيين و المَساكين، الحُرّين و العَبيد. و عَلَشان كِدا، ما في واحِد بِقدَر يَشتَري ولّا يَبيع إلّا إذا كانَت عِندو العَلامَه، و هي إسم الوَحَش ولّا عَدَد إسمو. و هِنا في حِكمَه. هو العِندو فَهم، خَليهو يَحسِب عَدَد الوَحَش، عَشان هو عَدَد زول. و عَدَدو سُتُّميَه و سِتَّه و سِتّين. و بَعدين عايَنتَ، و شوف! الحَمَل واقِف عَلى جَبَل صِهيون، و مَعاهو مِيَّه و أربَعَه و أربَعين ألف. و هُم كانو عِندَهُم إسمو و إسم أبوهو مَكتوبين عَلى جَبهاتُم. و سِمِعتَ صوت مِن السَّما زي صوت مويَه كَتيرَه و زي صوت رَعد عَظيم. و الصّوت السِّمِعتو كان زي صوت البِضرُبو عَلى الرَّباب. و هُم رَتَّلو تَرتيلَه جَديدَه قِدّام الكُرسي و قِدّام الأربَعَه حَيوانات و الشُّيوخ. و ما في واحِد قِدِر يِتعَلَّم التَّرتيلَه إلّا المِيَّه و الأربَعَه و الأربَعين ألف الكانو مُشتَرين مِن الأرض. ديل هُم الما نَجَّسو نُفوسُم مَعَ النِّسوان، عَشان هُم نُضاف. و هُم يَتبَعو الحَمَل لِأي مَحَل الهو يَمشي ليهو. و كانو مُشتَرين مِن بين النّاس، أوَّل ثِمار لِلَّه و لِلحَمَل. و ما لِقو كِضِب في خُشومُم، و هُم بِدون عيب. و شُفتَ مَلاك تاني يَطير في وَسِط السَّما، و مَعاهو الإنجيل الأبَدي عَشان يَبَشِّر بيهو السّاكنين عَلى الأرض مِن كُلّو أُمَّه و قَبيلَه و لُغَه و شَعب. و يَقول بِصوت عالي: ”خافو الله و مَجِّدوهو، عَلَشان ساعَة حُكمو جات. أعبُدو خالِق السَّما و الأرض و البَحَر و عُيون المويَه.“ و مَلاك تاني تَبَعو و يَقول: ”وَقَعَت! وَقَعَت بابِل المَدينَه الكَبيرَه، العَمَلَت كُل الأُمَم يَشرَبو مِن خَمر غَضَب زِناها.“ و مَلاك آخِر، التّالِت، تَبَعُم و يَقول بِصوت عالي: ”إذا أي واحِد يَعبُد الوَحَش و صَنَمو و يَقبَل عَلامتو عَلى جَبهَتو ولّا عَلى إيدو، هو كَمان بِشرَب مِن خَمر غَضَب الله، الإتكَبّى بِدون لَخبَطَه في فِنجان غَضَبو. و بِتعَذَّب بِالنّار و الكِبريت قِدّام المَلائكَه القِدِّسين و قِدّام الحَمَل. و دُخان عَذابُم يَمشي فوق لِلأبَد. و ما عِندَهُم راحَه نَهار ولّا ليل، ديل البِيَعبُدو الوَحَش و صَنَمو، و كُلّو واحِد اليَقبَل عَلامَة إسمو.“ و في دا يَظهَر صَبر القِدِّسين، ديل البِحفَظو أوامِر الله و إيمان بِيَسُوع. و سِمِعتَ صوت مِن السَّما يَقول: ”أكتِب: مُبارَكين المَيِّتين، البِموتو في الرَّب مِن هَسَّع!“ ”أيوَه،“ يَقول الرّوح: ”عَلَشانُم بِستَريحو مِن أتعابُم، عَشان أعمالُم بِيَتبَعوهُم.“ و بَعدين عايَنتَ و شُفتَ سَحابَه بيضَة. و هو القَنَّب عَلى السَّحابَه كان زي إبن إنسان، و عَلى رَاسو تاج مِن الدَّهَب، و في إيدو مَنجَل سَنين. و مَلاك تاني مَرَق مِن الهيكَل يَكورِك بِصوت عالي لِلقاعِد عَلى السَّحابَه: ”أرمي مَنجَلَك و أحصُد، عَشان ساعَة الحَصاد جات، عَشان حَصاد الأرض يبِس.“ و القاعِد عَلى السَّحابَه رَمى مَنجَلو فوق الأرض، و حَصاد الأرض كان مَحصود. و مَلاك تاني مَرَق مِن الهيكَل الفي السَّما، و هو كَمان عِندو مَنجَل سَنين. بَعدين مَلاك تاني مَرَق مِن المَضبَح. و هو كان عِندو سُلطَه عَلى النّار. و نادى المَلاك العِندو المَنجَل السَّنين بِصوت عالي يَقول: ”أرمي مَنجَلَك السَّنين، و لِم عَناقيد العِنَب مِن كَرم الأرض، عَشان عِنَبا بِقى نَجيض.“ و المَلاك رَمى مَنجَلو عَلى الأرض، و جَمَع عِنَبا، و رَماها في العَصارَه الكَبيرَه بِتاعَت غَضَب الله. و داسو العِنَب في العَصارَه بَرَّه مِن المَدينَه. و دَم مَرَق مِن العَصارَه و مَلا الواطَه لِغايَة ما وَصَل لِحَديد اللِّجام بِتاع الحُصان لِمَسافَة ميتين ميل تَقريباً. و شُفتَ في السَّما عَلامَه تانيَه عَظيمَه و عَجيبَه: سَبعَه مَلائكَه و مَعاهُم السَّبعَه ضَرَبات الأخيرَه. و غَضَب الله تَمَّ بيها. و شُفتَ حاجَه زي بَحَر مِن قِزاز مَلَخبَط بِالنّار. و شُفتَ ديل، الغَلَبو الوَحَش و صَنَمو و عَدَد إسمو، واقفين عَلى بَحَر مِن قِزاز، و عِندَهُم رَباب الله. و هُم يَرَتِّلو تَرتيلَة مُوسَى، خَدّام الله، و تَرتيلَة الحَمَل، و يَقولو: ”أعمالَك عَظيمَه و عَجيبَه، يا رَب، الإلَه القادِر عَلى كُلّو شي! طُرُقَك عَدل و حَق، يا مَلِك الأُمَم! مِنو الما بِخاف إسمَك، يا رَب، و ما بِمَجِّدو؟ عَلَشان إنتَ بَس قُدّوس. و كُل الأُمَم بِجو و يَعبُدو قِدَّامَك، عَشان أحكامَك العادِلَه ظَهَرو.“ و بَعَد دا، عايَنتَ، و هيكَل خيمَة الشَّهادَه إنفَتَحَت في السَّما. و السَّبعَه مَلائكَه العِندَهُم السَّبعَه ضَرَبات مَرَقو مِن الهيكَل. و هُم كانو لابسين تيل نَضيف و لامِع، و مَربوطين حَول صُدورُم بِحُزُم مِن دَهَب. و واحِد مِن الأربَعَه حَيوانات أدّا لِلسَّبعَه مَلائكَه سَبعَه حِلَل مِن دَهَب مَليانَه مِن غَضَب الله، البِعِيش لِلأبَد. و الهيكَل إتمَلا مِن دُخان مَجد الله و مِن قُدرَتو. و واحِد ما قِدِر يَدخُل الهيكَل لِغايَة ما كِمِل السَّبعَه ضَرَبات بِتاعَت السَّبعَه مَلائكَه. و سِمِعتَ صوت عالي مِن الهيكَل يَقول لِلسَّبعَه مَلائكَه: ”أمشو و كُبّو السَّبعَه حِلَل بِتاعَت غَضَب الله عَلى الأرض.“ و المَلاك الأوَّل مَشى و كَبَّ حَلَّتو عَلى الأرض. و النّاس العِندَهُم عَلامَة الوَحَش و البِيَعبُدو صَنَمو كانو مَضروبين بِدَبَر بَطّال، و فيهو وَجَع. و المَلاك التّاني كَبَّ حَلَّتو عَلى البَحَر، و البَحَر بِقى دَم زي دَم المَيِّت. و كُلّو حاجَه حَيَّه مات في البَحَر. و المَلاك التّالِت كَبَّ حَلَّتو عَلى البِحار و عَلى عُيون المويَه، و بِقو دَم. و سِمِعتَ مَلاك المويَه يَقول: ”إنتَ عادِل في أحكامَك ديل، يا المَوجود و الكان مَوجود، يا قُدّوس. عَلَشان هُم كَبّو دَم القِدِّسين و الأنبياء، و إنتَ أدّيتُم دَم عَشان يَشرَبو، عَلَشان هُم مُستَحِقّين!“ و سِمِعتَ صوت مِن المَضبَح يَقول: ”أيوَه، يا رَب الإلَه القادِر عَلى كُلّو شي، أحكامَك حَق و عادِلَه!“ و المَلاك الرّابِع كَبَّ حَلَّتو عَلى الشَّمِس، و أدّو لِلشَّمِس أن تَحرَق النّاس بِالنّار. و النّاس إنحَرَقو بِحَر شَديد و جَدَّفو عَلى إسم الله العِندو سُلطَه عَلى الضَّرَبات دي. و هُم ما تابو عَشان يَمَجِّدوهو. و المَلاك الخامِس كَبَّ حَلَّتو عَلى كُرسي الوَحَش. و مَملَكتو بِقَت ضُلُمَّه. و النّاس عَضو عَلى لِساناتُم مِن الوَجَع. و هُم جَدَّفو عَلى إلَه السَّما بِسَبَب أوجاعُم و مِن دَبَرُم. و ما تابو مِن أعمالُم. و المَلاك السّادِس كَبَّ حَلَّتو عَلى البَحَر الكَبير، الفُرات. و البَحَر بِقى يابِس، عَشان يَجَهِّز سِكَّه لِلمُلوك البِجو مِن الشَّرق. و شُفتَ تلاتَه أرواح نَجِسَه مَنظَرُم زي قَعونجَه. و هُم طَلَعو مِن خَشم التّنين و مِن خَشم الوَحَش و مِن خَشم النَّبي الكَضّاب. عَشان هُم أرواح شياطين بيَعمِلو عَلامات. و يَمرُقو لِمُلوك الدُّنيا كُلَّها عَشان يَلِمّوهُم لِكِتال اليوم الكَبير، يوم الله القادِر عَلى كُلّو شي. ”شوف! أنا بَجي زي الحَرامي! مُبارَك هو البِحرَس و بِحفَظ هِدومو عَلَشان ما يَمشي عَريان و يَوَرّي عيبو.“ و لَمّوهُم لِلمَكان الإسمو بِالعِبرانيَّه، هَرْمَجِدُّون. و المَلاك السّابِع كَبَّ حَلَّتو عَلى الهَوا، و جا صوت عالي مِن الهيكَل، مِن الكُرسي، يَقول: ”هو خَلاص!“ و بَعدين حَصَلَت بُروق و أصوات و رُعود و زَلزَلَه كَبيرَه. و ما حَصَلَت زيَها أبَداً مِن وَكِت النّاس كانو عَلى الأرض، زَلزَلَه شَديدَه زي دي. و المَدينَه العَظيمَه إنقَسَمَت لِتلاتَه أقسام، و مُدُن الأُمَم وَقَعو. و الله إتزَكَّر بابِل العَظيمَه عَشان يَدّيها فِنجان خَمر بِتاع شِدَّة غَضَبو. و كُلّو جَزيرَه هَرَبَت، و الجِّبال ما كانو مَوجودين. و بَرَد كَبير مِن السَّما نَزَل عَلى النّاس، وَزِن كُلّو حَجَر كان مِيَّة رَطل تَقريباً. و النّاس جَدَّفو عَلى الله بِسَبَب ضَربَة البَرَد، عَلَشان الضَّربَه كانَت مِخَوِفَه جِدّاً. و واحِد مِن السَّبعَه مَلائكَه العِندَهُم السَّبعَه حِلَل جا و كَلَّمني و قال: ”تَعال و بَوَرّيك دينونَة الزّانيَه الكَبيرَه البِتَقعُد عَلى مويَه كَتيرَه. و مُلوك الأرض عَمَلو زِنا مَعاها، و السّاكنين عَلى الأرض سَكَرو مِن خَمر زِناها.“ و المَلاك شَالني بِالرّوح لِلخَلا. و شُفتَ مَرَه قاعِدَه عَلى وَحَش أحمَر. و الوَحَش كان مَليان أسامي تَجديف، و عِندو سَبعَه رؤوس و عَشَرَه قُرون. و المَرَه كانَت لابِسَه بَنَفسَجي و أحمَر، و مَزيَنَه بِالدَّهَب و الحُجار الغاليَه و اللّولي. و عِندَها فِنجان مِن دَهَب في إيدا، مَليان مِن الحاجات الشَّرّيرَه و النَّجسَه بِتاعَت زِناها. و مَكتوب عَلى جَبهَتا إسم سِرّي: ”بابِل العَظيمَه، أُم الزّانين و الحاجات المَكروهَه في الأرض.“ و شُفتَ المَرَه كانَت سَكرانَه مِن دَم القِدِّسين و مِن دَم شاهِدين يَسُوع. و لَمّا شُفتَها، كُنتَ مُستَغرَب جِدّاً. و المَلاك قال لَي: ”تِستَغرَب لِشِنو؟ أنا بَخَبِّرَك بِسِر المَرَه و الوَحَش البِشيلا، العِندو السَّبعَه رؤوس و العَشَرَه قُرون. و الوَحَش الأنتَ شُفتو، هو كان مَوجود و هَسَّع ما مَوجود. و هو ماشي يَطلَع مِن الحُفرَه الغَريقَه جِدّاً و يَمشي لِلخَراب. و السّاكنين عَلى الأرض بِستَغرَبو، ديل الأساميهُم ما مَكتوبين في كِتاب الحَياة مِن خَليقَة الدُّنيا. هُم بِستَغرَبو لَمّا يَشوفو الوَحَش، عَلَشان هو كان مَوجود و هَسَّع ما مَوجود و بِجي. و دا عاوِز الفَهم مَعَ الحِكمَه. السَّبعَه رؤوس، هُم سَبعَه جِبال الفوقُم المَرَه بِتَقعُد. و هُم كَمان سَبعَه مُلوك. خَمسَه مِنَّهُم وَقَعو، و واحِد مَوجود، و التّاني لِسَّع ما جا. و لَمّا بِجي، لازِم يِستَنّى وَكِت قَليل. و الوَحَش الكان مَوجود و ما مَوجود هَسَّع، هو تامِن مَلِك. و هو مِن السَّبعَه، و يَمشي لِلخَراب. و السَّبعَه قُرون الأنتَ شُفتُم، هُم عَشَرَه مُلوك، اللِّسَّع ما قِبِلو مَملَكَه. لَكِن بِياخدو سُلطَه زي المُلوك لِساعَه واحدَه مَعَ الوَحَش. و ديل عِندَهُم فِكِر واحِد و يَدّو لِلوَحَش قُدرَتُم و سُلطَتُم. و ديل بِحارِبو الحَمَل. و الحَمَل بِغلِبُم، عَلَشان هو رَب الأرباب و مَلِك المُلوك. و ديل الناداهُم، مُختارين و أُمَنا، بِكونو مَعاهو.“ و المَلاك قال لَي: ”المويَه الأنتَ شُفتَها، المَحَل الزّانيَه بِتَقعُد فوقو، هي شُعوب و جَماعات و أُمَم و لُغات. و العَشَرَه قُرون الأنتَ شُفتَها، و الوَحَش، هُم بِيَكرَهو الزّانيَه. و هُم بِخرَبوها و يَخَلّوها عَريانَه، و بِياكُلو لَحَما و يَحرِقوها بِالنّار. عَشان الله خَتَّ في قُلوبُم أن يَكَمِّلو فِكرو. و هُم يَتَّفِقو أن يَدّو لِلوَحَش سُلطَة مَملَكَتُم لِغايَة ما كِلمَة الله تَتِم. و المَرَه الإنتَ شُفتَها، هي المَدينَه العَظيمَه و هي بِتَحكُّم عَلى مُلوك الأرض.“ و بَعَد دا أنا شُفتَ مَلاك تاني نازِل مِن السَّما. هو كانَت عِندو سُلطَه عَظيمَه. و الأرض إتنَوَّرَت مِن مَجدو. و هو كورَك بِصوت عالي و قال: ”وَقَعَت! وَقَعَت بابِل العَظيمَه! هي بِقَت بيت لِلشّياطين، و سِجِن لِكُلّو روح نَجِس، و سِجِن لِكُلّو طير نَجِس و مَكروه، عَشان كُل الأُمَم شِرِبو مِن خَمر غَضَب زِناها. و مُلوك الأرض زَنو مَعاها، و تُجّار الأرض بِقو غَنيين مِن قُوَّة حاجاتا النّاعِمَه.“ و سِمِعتَ صوت تاني مِن السَّما يَقول: ”أمرُقو مِنَّها، يا شَعبي، عَلَشان ما تَشتَرِكو في خَطاياها، و عَلَشان ما بِتَقبَلو مِن ضَرَباتا. عَشان خَطاياها وِصلَت لِلسَّما، و الله إتزَكَّر ذُنوبا. رَجِّعو ليها زي ما هي أدَّت، و رَجِّعو ليها مَرَّتين لِكُل العَمَلَتو. لَخبَط ليها مَرَّتين في الفِنجان الهي لَخبَطَتو. بِقَدُر ما هي مَجَّدَت نَفسا و عاشَت حَياة ناعِمَه، أدّوها عَذاب و حُزن. عَلَشان في قَلبا هي تَقول: أنا قاعِدَه مَلِكَه، أنا مُش أرمَلَه، و أنا ما بَبكي أبَداً. عَلَشان كِدا، في يوم واحِد بِتَجي ليها ضَرَباتا، الموت و البِكى و الجّوع. و بِحرَقوها بِالنّار. عَشان الرَّب الإلَه اليَدينا هو قَوّي.“ و مُلوك الأرض الزَّنو و عاشو حَياة ناعِمَه مَعاها، لَمّا يَشوفو دُخان حَريقَتا، هُم بِيَبكو و بِكونو حَزنانين. و بِقيفو بَعيد، خايفين مِن عَذابا و يَقولو: ”يا مُصيبَه! يا مُصيبَه! يا المَدينَه العَظيمَه! بابِل المَدينَه القَوّيَّه! عَشان دينونتِك جات في ساعَه واحدَه!“ و تُجّار الأرض بِيَبكو و بِكونو حَزنانين عَليها، عَلَشان ما في واحِد يَشتَري بُضاعَتُم بَعَد دا. ما في واحِد يَشتَري بُضاعَتُم مِن الدَّهَب و الفِضَّه و الحُجار الغاليَه و اللّولي، و التّيل و قُماش بَنَفسَجي و الحَرير و قُماش أحمَر و كُلّو نوع خَشَب طَيب الرّيحَه، و كُلّو حاجات مَصنوعَه مِن سِن الفيل، و مِن خَشَب غالي و النِّحاس الأصفَر، و الحَديد و الرِّخام، بُضاعَه مِن القِرفَه، و البُهارات، و البَخور، و اللُّبان، و الخَمر، و الزِيت، و الدَّقيق النّاعِم و القَمِح، و البَهايِم و الخِرفان، و الحَصين و العَرَبيَات، و عَبيد و نُفوس النّاس. ”و ثِمار شَهوَة نَفسِك الإنتي كُنتي عاوِزاها مَشى مِنِّك. و كُلّو غِناكي و مَجدِك بِقى خَسارَه ليكي، و النّاس ما يَلقوها أبَداً بَعَد دا.“ و التُّجّار الباعو الحاجات دي و بِقو غَنيين مِنَّها بِقيفو بَعيد خايفين مِن عَذابا. هُم بِيَبكو و بِكونو حَزنانين، و يَقولو: ”يا مُصيبَه! يا مُصيبَه لِلمَدينَه العَظيمَه. هي كانَت تَلبَس التّيل و القُماش البَنَفسَجي و الأحمَر، و المَزيَنَه بِالدَّهَب و الحُجار الغاليَه و اللّولي! و في ساعَه واحدَه، الغِنى العَظيم دا بِقى خَراب!“ و كُلّو رَئيس مُركَب و كُلّو واحِد البِسافِر في مُركَب، البَحَّرَه و كُلّو شَغّالين البَحَر وَقَفو مِن بَعيد. و لَمّا هُم شافو دُخان حَريقَتا، كورَكو و قالو: ”وين المَدينَه زي المَدينَه دي؟“ و رَمو التُّراب عَلى روسينُم، و إبتَدو يَكورِكو و يَبكو و يَقولو: ”يا مُصيبَه! يا مُصيبَه لِلمَدينَه العَظيمَه! عَشان كُل العِندَهُم مَراكِب في البَحَر بِقو غَنيين مِن غِناها. عَشان خَرابا جا في ساعَه واحدَه! أفرَحي بيها، يا سَما! أفرَحو، يا قِدِّيسين و رُسُل و أنبياء! عَشان الله حَكَم عَليها فِشان خاطِركُم.“ و بَعدين مَلاك قَوّي رَفَع حَجَر زي مُرحاكَه كَبيرَه، و رَماهو في البَحَر، و قال: ”كِدا بِشِدَّه بابِل المَدينَه العَظيمَه مَرميَه، و ما بِلقوها بَعَد دا أبَداً. و أصوات النّاس البِضرُبو الرَّبابَه، و البِرَتِّلو، و البِضرُبو الزُّمبارَه و البوق، ما بِسمَعوها فيكي بَعَد دا أبَداً. و شَغّالين مِن أي صُنعا ما بِلقوهُم فيكي بَعَد دا أبَداً. و صوت المِرحَكَه ما بِسمَعوهو فيكي بَعَد دا أبَداً. و نور الفانوس ما بِنَوِّر فيكي بَعَد دا أبَداً. و صوت العَريس و العَروسَه ما بِسمَعوهو فيكي بَعَد دا أبَداً. عَشان تُجّارِك كانو الكُبار في الأرض، و بِسِحرك كُل الأُمَم ضَلّو. و إتلَقى فيها دَم الأنبياء و القِدِّسين، و دَم كُل المَكتولين عَلى الأرض.“ و بَعَد الحاجات دي، سِمِعتَ زي صوت عالي مِن ناس كُتار في السَّما يَقولو: ”هَلِّلويا! الخَلاص و المَجد و القُدرَه لِإلَهنا، عَشان أحكامو حَق و عادِلَه. هو دان الزّانيَه العَظيمَه، الخَرَبَت الأرض بِزِناها، و إنتَقَم لِدَم خَدّامينو مِن إيدا.“ و قالو تاني مَرَّه: ”هَلِّلويا! دُخانا يَطلَع لِلأبَد.“ و الأربَعَه و عِشرين شيخ و الأربَعَه حَيوانات وَقَعو و عَبَدو الله القاعِد عَلى الكُرسي و قالو: ”آمين، هَلِّلويا!“ و صوت مَرَق مِن الكُرسي اليَقول: ”أحمَدو إلَهنا، يا كُلّو خَدّامينو، إنتو البِخافوهو، الصُّغار و الكُبار.“ و بَعدين سِمِعتَ زي صوت ناس كُتار، و زي صوت مويَه كَتيرَه و زي صوت رُعود شَديدَه، البِقولو: ”هَلِّلويا! عَشان الرَّب إلَهنا القادِر عَلى كُلّو شي يَمحَق. خَلّونا نَفرَح و نَكون مَبسوطين خَلاص و نَمَجِّدو! عَشان عِرِس الحَمَل جا، و عَروستو جَهَّزَت نَفسا. و أدّوها أن تَلبَس تيل لامِع و نَضيف.“ عَشان التّيل هو أعمال البِر بِتاعَت القِدِّسين. و هو قال لَي: ”أكتِب: مُبارَكين ديل النّادوهُم لِعَشا عِرِس الحَمَل.“ و قال لَي كَمان: ”دي كِلمات الله الصَّحَيحَه.“ و وَقَعتَ عِند كِرعينو عَشان أعبُدو. لَكِن هو قال لَي: ”ما تَعمِل دا أبَداً! عَشان أنا خَدّام مَعاك و مَعَ أخوانَك البِحفَظو شَهادَة يَسُوع. أعبُد الله! عَشان شَهادَة يَسُوع، هي روح النُّبوَّه.“ و بَعدين شُفتَ السَّما مَفتوحَه. و شوف! حُصان أبيَض، و الرّاكِب فوقو إسمو، الأمين و الصّادِق. و هو يَحكُم و يَحارِب بِالعَدل. و عُيونو زي لَهيب نار، و عَلى رَاسو تيجان كَتيرَه. و عِندو إسِم مَكتوب فوقو، ما في واحِد يَعرِفو إلّا هو. و هو لابِس توب مَغَطَّس بِالدَّم، و إسمو، كِلمَة الله. و جُيوش السَّما تَبَعو، راكبين حَصين بُيُض، لابسين تيل أبيَض و نَضيف. و سيف سَنين يَمرُق مِن خَشمو عَشان يَضرُب بيهو الأُمَم. و هو بِيَحكُم عَليهُم بِعَصايَه مِن حَديد. و هو بِدوس عَصارَة العِنَب بِتاعَت شِدَّة خَمر غَضَب الله القادِر عَلى كُلّو شي. و مَكتوب عَلى توبو و فَخدو الإسِم، مَلِك المُلوك و رَب الأرباب. و شُفتَ مَلاك واقِف في الشَّمِس. و هو كورَك بِصوت عالي، و قال لِكُل الطُيور البِطير في وَسِط السَّما: ”تَعالو، إتلَمّو لِعَشا الله العَظيم. عَشان تاكلو لَحَم المُلوك و لَحَم رؤساء الجُّيوش و لَحَم الرُّجال القَوّيين، و لَحَم الحَصين و النّاس البِركَبو فوقُم، و لَحَم كُل النّاس، حُرّين و عَبيد، صُغار و كُبار.“ و شُفتَ الوَحَش و مُلوك الأرض و جُيوشُم إتلَمّو عَشان يَحارِبو الرّاكِب فوق الحُصان و جُيوشو. و الوَحَش كان مَقبوض، و مَعاهو النَّبي الكَضّاب الصَنَع العَلامات قِدّامو. و بِالعَلامات دي هو غَشّا ديل، القِبِلو عَلامَة الوَحَش و عَبَدو صَنَمو. و هُم الإتنين إترَمو و هُم حَيين في بِركَة النّار، المَوَلَّعَه بِالكِبريت. و باقي النّاس كانو مَكتولين بِسيف الرّاكِب فوق الحُصان. و السّيف دا كان بِمرُق مِن خَشمو. و كُل الطُّيور شَبَعو مِن اللَّحَم بِتاعُم. و شُفتَ مَلاك نازِل مِن السَّما، و مَعاهو مُفتاح الحُفرَه الغَريقَه جِدّاً، و في إيدو جَنزير كَبير. و هو قَبَض عَلى التّنين، الدَّبيب القَديم، الهو إبْلِيس و الشّيطان، و رَبَطو لِألف سَنَه. و هو رَماهو في الحُفرَه الغَريقَه جِدّاً، و قَفَل عَليهو و خَتَّ خِتِم عَلى الحُفرَه. و هو عَمَل دا عَشان هو ما بِغِش الأُمَم بَعَد دا حَتّى الألف سَنَه تَخَلَص. و بَعَد دا، لازِم يَفِكّوهو لِوَكِت قَليل. و بَعدين شُفتَ كَراسي و ديل القاعِدين فوقُم، و أدّاهُم السُّلطَه عَشان يَحكُمو. و شُفتَ كَمان نُفوس النّاس الرّوسينُم كانو مَقطوعين فِشان شَهادَة يَسُوع و فِشان كِلمَة الله. و هُم ما عَبَدو الوَحَش ولّا صَنَمو، و ما قِبِلو عَلامتو عَلى جَبهاتُم ولّا عَلى إيدينُم. و هُم عاشو تاني مَرَّه و مَلَكو مَعَ المَسيح ألف سَنَه. و باقي المَيِّتين ما عاشو تاني مَرَّه لِغايَة ما الألف سَنَه تَخَلَص. دي هي القيامَه الأولي. مُبارَك و مُقَدَّس العِندو جُزو في القيامَه الأولي. و الموت التّاني ما عِندو سُلطَه عَليهُم، لَكِن هُم بِكونو قُسُس لِلَّه و لِلمَسيح، و بِملِكو مَعاهو ألف سَنَه. و لَمّا الألف سَنَه تَخَلَص، بِفِكّو الشّيطان مِن سِجِنو. و هو بِمرُق عَشان يَغِش الأُمَم في أقسام الأرض الأربَعَه، يَعني جوج و ماجوج، و عَلَشان يَلِمُّم لِلحَرب. و عَدَدُم مِثِل رَمل البَحَر. و هُم مَشو فوق عُرض الأرض، و لَفّو حَول مُعَسكَر القِدِّسين، و المَدينَه المَحبوبَه. و لَكِن نار نَزَلَت مِن السَّما و أكَلَتُم. و إبْلِيس، الكان بِغِشُّم، إترَمى في بِركَة النّار و الكِبريت لِلمَكان الفيهو كَمان الوَحَش و النَّبي الكَضّاب. و ماشين يَعَذِّبوهُم نَهار و ليل لِلأبَد. و بَعدين شُفتَ كُرسي كَبير و أبيَض، و شُفتَ القاعِد فوقو. و السَّما و الأرض هَرَبَت مِن وَشّو، و ما لِقو مَحَل. و شُفتَ المَيِّتين، الكُبار و الصُّغار، واقِفين قِدّام الكُرسي. و فَتَحو الكُتُب. و فَتَحو كِتاب تاني، و هو كِتاب الحَياة. و هو دان المَيِّتين بِحَسَب المَكتوب في الكُتُب، حَسَب أعمالُم. و البَحَر سَلّم المَيِّتين الكانو فيهو، و الموت و الهاويَه سَلَّمو المَيِّتين الكانو فيهُم. و هو دان كُلّو واحِد حَسَب أعمالو. و الموت و الهاويَه إترَمو في بِركَة النّار. و بِركَة النّار، هي الموت التّاني. و إذا لِقو إسِم أي واحِد ما مَكتوب في كِتاب الحَياة، هو إترَمى في بِركَة النّار. و بَعدين شُفتَ سَما جَديدَه و أرض جَديدَه. عَشان السَّما الأولي و الأرض الأولي فاتو، و ما كان في بَحَر بَعَد دا. و شُفتَ المَدينَه المُقَدَّسَه، أُورُشَلِيم الجَديدَه، نازِلَه مِن السَّما مِن الله. و هي كانَت مَجَهَّزَه زي عَروسَه مَزيَنَه لِعَريس. و سِمِعتَ صوت عالي مِن الكُرسي يَقول: ”شوف! مَسكَن الله مَعَ النّاس، و هو بِسكُن مَعاهُم. و هُم بِكونو شَعب ليهو، و الله نَفسو بِكون مَعاهُم، و بِكون إلَه ليهُم. و الله بِمسَح كُلّو دَمعَه مِن عُيونُم. و ما بِكون في موت بَعَد دا ولّا حُزن ولّا بِكى ولّا وَجَع، عَشان الحاجات المِن الأوَّل فاتو.“ و القاعِد عَلى الكُرسي قال: ”شوف! أنا بَسَوّي كُلّو شي جَديد.“ و قال لَي كَمان: ”أكتِب، عَشان الكِلمات دي صادِقَه و أمينَه.“ و هو قال لَي كَمان: ”هو كِمِل. أنا الألِف و الياء، البِدايَه و النِّهايَه. أنا بَدّي لِلعَطشان مِن عين مويَة الحَياة مَجّاناً. الزّول البِغلِب، هو يورَث الحاجات دي، و أنا بَكون ليهو إلَه و هو بِكون لَي وَلَد. لَكِن الخَوافين و الما مؤمِنين و المَكروهين و الكاتِلين و الزّانيين و البيَعمِلو السِّحِر و البِيَعبُدو الأصنام و كُل الكَضّابين، مَحَلُّم بِكون في البِركَه المَوَلَّعَه بِالنّار و الكِبريت. و دا هو الموت التّاني.“ و جا واحِد مِن السَّبعَه مَلائكَه الكانو عِندَهُم السَّبعَه حِلَل مَليانَه مِن السَّبعَه ضَرَبات الأخيرَه، و قال لَي: ”تَعال، بَوَرّيك العَروسَه، مَرَة الحَمَل.“ و هو شَالني في الرّوح لِجَبَل كَبير و عالي. و هو وَرّاني المَدينَه المُقَدَّسَه، أُورُشَلِيم، نازِلَه مِن السَّما مِن الله. و عِندَها مَجد الله، و نورا كان زي لَمعان حَجَر غالي جِدّاً، زي حَجَر يَشَب صافي، زي قِزاز بَلّور. و عِندَها حيطَه كَبيرَه و عاليَه و إتناشَر باب، و عِند الأبواب إتناشَر مَلاك. و أسامي الإتناشَر قَبيلَة بَني إِسْرَائِيل كانو مَكتوبين عَلى الأبواب. و لِلشَّرق كانو في تلاتَه أبواب، و لِلشِّمال تلاتَه أبواب، و لِلجَّنوب تلاتَه أبواب، و لِلغَرب تلاتَه أبواب. و حيطَة المَدينَه عِندَها إتناشَر أساس، و عَليهُم أسامي رُسُل الحَمَل الإتناشَر. و المَلاك البِكَلِّمني كانَت عِندو عَصايَة القِياس مِن دَهَب عَشان يَقيس المَدينَه و أبوابا و الحيطَه. و المَدينَه كانَت مَرَبَّعَه، طولا بِقَدُر العُرض. و هو قاس المَدينَه بِالعَصايَه، و كانَت خَمَستاشَر ألف ميل في الطّول. و طولا و عُرضا و إرتِفاعا واحِد. و هو قاس الحيطَه كَمان، و كانَت ميتين و سِطّاشَر قَدَم حَسَب قِياس الزّول، القِياس العَمَل بيهو المَلاك. و الحيطَه كانَت مَصنوعَه مِن حَجَر اليَشَب، و المَدينَه مِن دَهَب نَضيف زي القِزاز الصّافي. و أساسات حيطَة المَدينَه كانَت مَزيَنَه بِكُلّو حَجَر غالي و لامِع. الأساس الأوَّل كان حَجَر يَشَب أخدَر، و التّاني حَجَر لامِع لونو أزرَق، و التّالِت حَجَر أخدَر، و الرّابِع أخدَر لامِع، و الخامِس أحمَر و أبيَض، و السّادِس أحمَر، و السّابِع أصفَر، و التّامِن أخدَر فَاتح، و التّاسِع أصفَر، و العاشِر أخدَر فَاتح، و الحِداشَراوي بُرتُقاني، و الأتناشَراوي بَنَفسَجي. و الإتناشَر باب كانو إتناشَر لولي، كُلّو باب كان لولي واحِد. و شارِع المَدينَه كان مِن الدَّهَب النَّضيف زي القِزاز الصّافي. و ما شُفتَ هيكَل فيها، عَشان الرَّب الله القادِر عَلى كُلّو شي و الحَمَل، هُم هَيكَله. و المَدينَه ما مُحتاجَه لِلشَّمِس ولّا لِلقَمَر عَشان يَنَوِّرو فيها. عَلَشان مَجد الله بِدّيها نور، و الحَمَل فانوسا. و الأُمَم بِمشو بِنورا، و مُلوك الأرض بِجيبو مَجدُم ليها. و أبوابا ما بِتكون مَقفولَه بِالنَّهار. و ما بِكون في ليل هِناك. و الأُمَم بِجيبو مَجدُم و شَرَفُم ليها. و ما في شي نَجِس بِدخُل فيها أبَداً، ولّا أي واحِد اليَعمِل الحاجَه البِتَخجَل ولّا الكِضِب. لَكِن بَس النّاس الأساميهُم مَكتوبين في كِتاب الحَياة بِتاع الحَمَل يدخُلو. و بَعدين المَلاك وَرّاني بَحَر مويَة الحَياة صافي زي القِزاز إسمو البَلّور. و البَحَر جا مِن كُرسي الله و الحَمَل، و بِجري في وَسِط الشّارِع الكَبير بِتاع المَدينَه. و عَلى البَحَر بِالجَّنب دا و داك، كانَت في شَجَرَة الحَياة. و الشَّجَرَه دي جابَت إتناشَر نوع مِن الثَّمار، و تَجيب ثَمَرا كُلّو شَهَر. و أوراق الشَّجَرَه عَشان شِفا الأُمَم. و بَعَد دا ما بِكون في لَعنَه. و كُرسي الله و الحَمَل بِكون فيها. و خَدّامينو بِيَخِموهو. و هُم بِشوفو وَشّو، و إسمو بِكون عَلى جَبهاتُم. و ما بِكون في ليل بَعَد دا. و هُم ما بِحتاجو لِنور فانوس ولّا لِنور الشَّمِش، عَشان الرَّب الإلَه بِنَوِّر عَليهُم. و هُم بِملِكو لِلأبَد. و المَلاك قال لَي: ”الكِلمات دي صادِقَه و أمينَه. و الرَّب، إلَه أرواح الأنبياء، رَسَّل ملاكو عَشان يَوَرّي خَدّامينو الحاجات اللازِم تَحصَل بَعَد شوَيَه. شوف! أنا جاي قَريب! مُبارَك البِحفَظ كِلمات نُبُوَّة الكِتاب دا.“ و أنا يُوحَنَّا، السِّمِعتَ و شُفتَ الحاجات دي. و لَمّا سِمِعتَ و شُفتَ، وَقَعتَ عَشان أعبُد قِدّام كِرعين المَلاك الكان يَوَرّيني دا. لَكِن هو قال لَي: ”ما تَعمِل دا أبَداً! عَشان أنا خَدّام مَعاك و مَعَ أخوانَك الأنبياء و مَعَ ديل البِحفَظو كِلمات الكِتاب دا. أعبُد الله!“ و هو قال لَي: ”ما تَخُت خِتِم عَلى كِلمات نُبُوَّة الكِتاب دا، عَلَشان الوَكِت قَريب. خَليهو اليَعمِل الشَّر يِستَمِر يَعمِل الشَّر. و خَليهو اليَكون نَجِس يِستَمِر يَكون نَجِس. و خَليهو اليَكون بار يِستَمِر يَعمِل البِر. و خَليهو اليَكون مُقَدَّس يِستَمِر يَكون مُقَدَّس.“ ”شوف! أنا جاي قَريب! و أُجرَتي مَعاي عَشان أَدِّي لِكُلّو واحِد حَسَب أعمالو. أنا الألِف و الياء، الأوَّل و الآخِر، البِدايَه و النِّهايَه. مُبارَكين البِغَسِّلو هِدُومُم عَلَشان تَكون عِندَهُم سُلطَه عَلى شَجَرَة الحَياة و يدخُلو المَدينَه مِن الأبواب. عَشان بَرَّه في الكِلاب و البيَعمِلو السِّحِر و الزّانيين و الكاتِلين و البِيَعبُدو الأصنام، و كُلّو واحِد البِحِب الكِضِب و بِشتَغِل بيهو. أنا يَسُوع رَسَّلتَ ملاكي عَشان يَشهَد ليكُم بِالحاجات دي في الكَنايس. أنا عِرق دَاوُد و مِن أولادو، و أنا نَجمَه الصَّباح اللّامعَه.“ و الرّوح و العَروسَه يَقولو: ”تَعال!“ و هو اليَسمَع، خَليهو يَقول: ”تَعال!“ و اليَعطَش، خَليهو يَجي. و العاوِز، خَليهو ياخُد مويَة الحَياة مَجّاناً. أنا بِحَذِّر كُلّو واحِد اليَسمَع كِلمات نُبُوَّة الكِتاب دا. إذا أي واحِد يَزيد حاجَه عَليها، الله بِزيد عَليهو الضَّرَبات المَكتوبَه في الكِتاب دا. و إذا أي واحِد يَشيل مِن كِلمات كِتاب النُّبوَّه دي، الله بِشيل جُزو مِن شَجَرَة الحَياة و مِن المَدينَه المُقَدَّسَه، و مِن الحاجات المَكتوبَه في الكِتاب دا. الشّاهِد بِالحاجات دي يَقول: ”أيوَه، أنا جاي قَريب.“ آمين! تَعال، يا رَب يَسُوع! نِعمَة الرَّب يَسُوع مَعَ كُل القِدِّسين. آمين.