كتاب الجدود د يَسوع المسيح بن داود بن إبراهيم. إبراهيم ولَد إسْحاق. وْإسْحاق ولَد يَعْقوب. وْيَعْقوب كان الوالِد ديال يَهودا وْخوتو. وْيَهودا ولَد فارِص وْزارَح من ثامار. وْفارِص ولَد حَصْرون. وْحَصْرون ولَد أَرام. وْأَرام ولَد عَمّيناداب. وْعَمّيناداب ولَد نَحْشون. وْنَحْشون ولَد سَلْمون. وْسَلْمون ولَد بوعَز من راحاب. وْبوعَز ولَد عوبيد من راعوث. وْعوبيد ولَد يَسّى. وْيَسّى ولَد داود المَلِك. وْداود المَلِك ولَد سُليمان من المراة الّي كانت مجوّجة بأُوريّا. وْسُليمان ولَد رَحَبْعام. وْرَحَبْعام ولَد أَبيّا. وْأَبيّا ولَد آسا. وْآسا ولَد يَهوشافاط. وْيَهوشافاط ولَد يورام. وْيورام ولَد عُزّيّا. وْعُزّيّا ولَد يوثام. وْيوثام ولَد أَحاز. وْأَحاز ولَد حِزْقيّا. وْحِزْقيّا ولَد مَنَسّى. وْمَنَسّى ولَد آمون. وْآمون ولَد يوشيّا. وْيوشيّا ولَد يَكُنْيا والخوت ديالو في الوقت الّي ڭازو في بابل. وْمن بعد الوقت الّي كانو في بابل، يَكُنْيا ولَد شَأَلْتِئيل. وْشَأَلْتِئيل ولَد زَرُبّابل. وْزَرُبّابل ولَد أَبيهود. وْأَبيهود ولَد أَلياقيم. وْأَلياقيم ولَد عازور. وْعازور ولَد صادوق. وْصادوق ولَد أَخيم. وْأَخيم ولَد أَليود. وْأَليود ولَد أَليعازَر. وْأَليعازَر ولَد مَتّان. وْمَتّان ولَد يَعْقوب. وْيَعْقوب ولَد يوسف، الرَّجل د مَرْيَم الّي ولدَتْ يَسوع، الّي مسمّي المسيح. إدَن، الأجْيال كاملين من إبراهيم نْداود أربعطاشر جيل، وْمن داود نالوقت د المنْفى نْبابل أربعطاشر جيل، وْمن الوقت د المنْفى نْبابل حتّى نالمسيح أربعطاشر جيل. والميلاد د يَسوع المسيح كان هَيدا: ملّي كانت مَرْيَم يمّاه مخطوبة نيوسف، من قبل ما ينعسو مع بعطوم، جبروها حُبلى بالقُدرة د الروح القُدُس. وْيوسف رَجلاْ، حيت كان متّاقي اللّٰه وْما بغى شي يفضحاْ، نوى يطلّقاْ في السرّ. وَلكن ملّي كان كيخمّم في هَد الأُمور، ظهَر لو واحد الملاك من الرَّبّ في واحد الحلامة كيقول لو: "آ يوسف بن داود، ما تخاف شي تدّي مَرْيَم مراتك. حيت هَداك الّي هي حُبلى بِه، هُوَ من الروح القُدُس. وْغادي تولد واحد الولد وْخصّك تسمّيه يَسوع، حيت هَدا غادي ينجّي القوم ديالو من الدنوب ديالوم." وْهَد الشي كامل كان باش يتحقّق ديك الشي الّي قال الرَّبّ بواسطة النَّبي: "العزْبة غادي تحبل وْتولد واحد الولد وْغادي يسمّيواه عِمّانوئيل،" الّي التفْسير ديالو هُوَ "اللّٰه معنا." وْملّي فاق يوسف من النعاس، عمل كيفْما وصّاه الملاك من الرَّبّ وْجاب مَرْيَم مراتو نالدار. وْما نعَس شي معها حتّى ولدَتْ ولداْ، وْسمّاه يَسوع. وْملّي خلَق يَسوع في بيت لَحم د اليَهوديّة في الأيّام د المَلِك هيرودُس، شي حُكَماء من الشرق جاو نْأُورُشَليم، كيقولو: "فاين هُوَ المَلِك د اليهود الّي خلَق؟ حيت شفْنا النجْمة ديالو في الشرق، وْجينا باش نسجدو لو." وْملّي سمَع هيرودُس المَلِك، تعجّب، هُوَ وْأُورُشَليم كاملة معاه. وْجمَع رُؤَساء المسؤولين في بيت المَقْدس كاملين والمُعلّمين د الشريعة د الشعب وْسقصاهُم فاين غادي يخلَق المسيح؟ وْقالو لو: "في بيت لَحم د اليَهوديّة. حيت هَيدا مكتوب على يد النَّبي: «وانتينا، آ بيت لَحم، أرض يَهودا، أنتينا ماشي الصغيرة بين الكبارين د يَهودا. حيت منّك غادي يخرج واحد الحاكم الّي يرعا شعبي إسْرائيل.»" ديك الساعة عَيّط هيرودُس على الحُكَماء في السرّ وْتحقّق مِنّوم على الوقت الّي ظهرَتْ فيه النجْمة. وْصيفطوم نْبيت لَحم وْقالّوم: "مْشيو تبقّشو بالتحقيق على الصبي، وْملّي تجبروه، خبروني باش نجي حتّى أنا وْنسجد لو." وْملّي سمعو المَلِك، مشاو والنجْمة الّي شافوها في الشرق سبقَتْ قدّاموم حتّى جات وْوقفَتْ فوق الموطَع فاين كان الصبي. وْملّي شافو النجْمة، فرحو فرْحة كبيرة بزّاف. وْدخلو نالدار وْشافو الصبي مع يمّاه مَرْيَم، وْركعو وْسجدو لو. وْفتحو الصنادق د التجارة ديالوم وْجابو لو هَديّات د الدهب والعنْبر والمسك الحُرّ. وْحيت نبّهوم اللّٰه في واحد الحلامة بلّي ما خصّوم شي يرجعو نْعند هيرودُس، مشاو نالبلاد ديالوم على طريق يَخرى. وْمن بعدما مشاو الحُكَماء، واحد الملاك من الرَّبّ ظهَر نْيوسف في واحد الحلامة، كيقول: "نوض وادّي الصبي وْيمّاه وْهرَب نْمصر وْبقا تمّاك حتّى نقول لك. حيت هيرودُس غادي يفتّش على الصبي باش يقتلوْ." وْناض يوسف وادّى الصبي وْيمّاه في الليل وْمشى نْمصر. وْبقا تمّاك حتّى الموت د هيرودُس، باش يتحقّق ديك الشي الّي قال الرَّبّ بواسطة النَّبي، كيقول: "من مصر عيّطْتْ على ابني." ديك الساعة، ملّي شاف هيرودُس بلّي الحُكَماء ضحكو عليه، غضب بزّاف. وْصيفط باش يقتلو الصبيان كاملين الّي كانو في بيت لَحم والمواطع كاملة الّي قريبة منّاْ، الّي عندوم عامَين نْتحت على حساب الوقت الّي تأكّد عليه من عند الحُكَماء. ديك الساعة تحقّق ديك الشي الّي قال النَّبي إرْميا: "واحد الصوت اتّسمع في الرّامة، بزّاف د البكا والغوات. راحيل كتبكي على الولاد ديالاْ وْما بغات شي تتعزّى، حيت ما بقاو شي مجودين." وْملّي مات هيرودُس، واحد الملاك من الرَّبّ ظهَر نْيوسف في مصر في واحد الحلامة، كيقول لو: "نوض وادّي الصبي وْيمّاه وْرجَع نْأرض إسْرائيل، حيت ماتو الّي بغاو يقتلوه." وْناض يوسف وادّى الصبي وْيمّاه وْرجَع نْأرض إسْرائيل. وَلكن ملّي سمَع بلّي أرْخيلاوس كيحكم على اليَهوديّة في الموطَع د هيرودُس باباه، خاف يمشي نْتمّاك. وْحيت نبّهوْ اللّٰه في واحد الحلامة، مشى نْجِهة الجَليل. وْمشى وْسكَن في واحد المدينة كيقولو لاْ الناصِرة، باش يتحقّق ديك الشي الّي قالو الأَنْبياء: "غادي يتسمّى ناصِري." وْفي ديك الأيّام، جا يوحَنّا المَعْمَدان كيبشّر في الخلا د اليَهوديّة، كيقول: "توبو، حيت قرّب مُلك السماوات." حيت هَدا هُوَ الّي قال عليه النَّبي إشَعْيا: "الصوت د شي واحد الّي كيبرّح في الخلا: «وجّدو طريق الرَّبّ، ردّو الطرْقان ديالو مسْتَقيمة.»" وْكانو الحوايج ديال يوحَنّا من الشعر د الجمولة وْعلى النُّص ديالو حزام من الجلد. وْكانت الماكلة ديالو الجراد والعسل د الخلا. في ديك الساعة خرجَتْ نْعندو أُورُشَليم واليَهوديّة كاملة والناس من البلاد كاملة الدايرة بالأُرْدُن وْتغطّسو في الما على يَدّو في واد الأُرْدُن، كيعْتَرفو بالدنوب ديالوم. ملّي شاف يوحَنّا بزّاف من الفرّيسيّين والصدّوقيّين كيجيو باش يغطّسوم، قالّوم: "آ وْلاد الحياي! شكون نبّهكُم باش تهربو من الغضب الّي ماجي؟ إدَن، جيبو الغلّة الّي كتبيّن التوبة، وْما تقولو شي نْراسكُم: «إبراهيم هُوَ بابانا.» حيت كنقول لكُم بلّي اللّٰه قادر باش يعمل من هَد الحجار الولاد نإبراهيم. وْدابا راه الشاقور منزّل على العروق د الشجار. وْكُل شجرة الّي ما كتجيب شي غلّة مزيانة غادي تْتقطّع وْتْتسيّب في العافية. أمّا أنا كنغطّسكُم بالما باش تتوبو، وَلكن هَداك الّي ماجي من بعد منّي هُوَ قوي منّي. ما كَنْسْتاهل شي نحيّد حتّى الصبّاط ديالو. هُوَ غادي يغطّسكُم بالروح القُدُس والعافية. المدْرى في يَدّو وْغادي ينقّي النوادر ديالو ويجمَع الزرَع ديالو في الخزين. أمّا التبن غادي يحرقوْ بالعافية الّي ما عُمراْ غادي تطفى." في ديك الوقت مشى يَسوع من الجَليل نالأُرْدُن نْعند يوحَنّا باش يتغطّس على يَدّو. وَلكن يوحَنّا حصروْ وْقال لو: "أنا محْتاج نتغطّس على يَدّك وانتينا كتجي نْعندي؟" ردّ عليه يَسوع وْقال لو: "خلّيه يكون هَيدا دابا، حيت هَيدا مزيان نّا باش نكمّلو كُل التقوى." ديك الساعة خلّاه. وْملّي تغطّس يَسوع، طلَع في الحين من الما. والسما تْفتحَتْ لو وْشاف روح اللّٰه كيهبَط، فحال واحد الحمامة، وْنزل عليه. وْجا واحد الصوت من السما كيقول: "هَدا هُوَ اِبني العزيز الّي كنفرح بِه." في ديك الساعة الروح القُدُس رشد يَسوع نالخلا باش يجرّبوْ إبْليس. وْمن بعدما صام أربعين يوم وأربعين ليلة، جاه الجّوع. وْجا نْعندو المُجرّب وْقال لو: "إدا كُنْتِ ابن اللّٰه، آمر باش يرجعو هَد الحجار خبز." ردّ عليه يَسوع وْقال: "مكتوب: «ماشي بالخبز بوحدو كيعيش الإنسان وَلكن بْكُل كلمة الّي كتخرج من الدقوم د اللّٰه.»" من بعد ادّاه إبْليس نالمدينة المقدّسة وْوقّفوْ على الصمْعة د بيت المَقْدس. وْقال لو: "إدا كُنْتِ ابن اللّٰه، سيّب راسك نْتحت، حيت مكتوب: «غادي يوصّي الملائكة ديالو عليك، وْغادي يرفدوك على اليَدّين ديالوم باش ما تضرب حتّى حجْرة بْرِجلك.»" قال لو يَسوع: "في جهة يَخرى مكتوب: «ما تجرّب شي الرَّبّ إلَهك.»" ادّاه عاود إبْليس نواحد الجّبل عالي بزّاف، وْورّاه مَمْلكات الدنيا كاملين والعظمة ديالوم. وْقال لو: "أنا غادي نعطيك هَد الشي كامل إدا ركعْتِ وْسجدْتِ لي." ديك الساعة قال لو يَسوع: "مْشي فحالك، آ الشيطان، حيت مكتوب: «سْجد نالرَّبّ إلَهك، وْهُوَ بوحدو تعبدوْ.»" ديك الساعة خلّاه إبْليس، وْجاو الملائكة وْكانو كيخدموه. ملّي سمَع يَسوع بلّي قبطو يوحَنّا في الحبس، مشى نالجَليل. وْخلّى الناصِرة وْمشى وْسكن في كَفْرِناحوم، الّي هي حدا البحَر في حدود زَبولون وْنَفْتالي، باش يتحقّق ديك الشي الّي قال النَّبي إشَعْيا: "أرض زَبولون وأرض نَفْتالي على طريق البحَر لْهيه من الأُرْدُن، بلاد الأُمَم، الناس الّي ݣالسين في الظلام شافو واحد الضَّو كبير، والّي ݣالسين في بلاد الموت والظلّ ديالاْ، شرق عليهُم الضَّو." من ديك الوقت بدا يَسوع كيبشّر وْكيقول: "توبو، حيت قرّب مُلك السماوات." ملّي كان يَسوع ماشّي حدا البحَر د الجَليل، شاف جوج د الخوت، سِمْعان، الّي كيقولو لو بُطْرُس، وأَنْدَراوس خاه. كانو كيسيّبو واحد الشبكة في البحَر، حيت كانو صيّادة. وْقالّوم: "تبعوني وانا غادي نرجّعكُم صيّادين د الناس." وْفي الحين خلّاو الشبكات وْتبعوه. ݣاز من تمّاك وْشاف جوج د الخوت يَخرين، يَعْقوب بن زَبَدي وْخاه يوحَنّا، في واحد الفلوكة مع زَبَدي باباهُم، كيصلّحو الشبكات ديالوم، وْعَيّط لوم يَسوع. وْفي الحين خلّاو الفلوكة وْباباهُم وْتبعوه. وْكان يَسوع كيدور في الجَليل كامل كيعلّم في بيوت العبادة ديالوم وْكيبشّر بالإنجيل د مُلك اللّٰه وْكيشافي كُل مرض وْكُل ضعف في الناس. وْتشاع الخبر ديالو في سوريّة كاملة. وْجابو لو المراطين كاملين الّي فيهُم الأمْراض والحريق على كُل شكل والمسْكونين والمرياحين والمكْحوشين، وْشافاهُم. وْتبعوه بزّاف د الناس من الجَليل وْعشر المُدُن وأُورُشَليم واليَهوديّة وْمن الأُرْدُن لْهيه. ملّي شاف يَسوع بزّاف د الناس، طلَع نالجّبل. وْملّي ݣلس، جاو نْعندو التلامد ديالو. وْفتَح دُقمو وْعلّموم، كيقول: "مبْروكين المساكن في الروح، حيت مُلك السماوات ديالوم. مبروكين الّي كينوحو، حيت هُمَ غادي يتعزّاو. مبروكين المتواضعين، حيت هُمَ غادي يوَرتو الأرض. مبروكين الجيعانين والعطْشانين على التقوى، حيت هُمَ غادي يشبعو. مبروكين الّي كيرحمو، حيت هُمَ غادي يتّرحمو. مبروكين الّي عندوم القلب نقي، حيت غادي يشوفو اللّٰه. مبروكين الّي كيصالحو بين الناس، حيت غادي يتسمّاو أُوْلاد اللّٰه. مبروكين المضْطَهدين بْسباب التقوى، حيت مُلك السماوات ديالوم. مبروكين أنتُمَ ملّي كيعايروكُم وْكيمرْمدوكُم وْكيزبّلو فيكُم بْكُل كلمة قبيحة بالكدوب بْسبابي. فرحو وْنشطو، حيت الأجر ديالكُم كبير في السما، حيت هَيداك مرْمدو الأَنْبياء الّي كانو قبل منكُم. "أنتُمَ الملاح د الأرض. وَلكن إدا فسد الملاح، باش غادي يتملّح عاود؟ ما بقا كيصلح نْحتّى شي حاجة، غير يتسيّب على برّا ويعفسو عليه الناس. أنتُمَ ضَو الدنيا. ما تقدر شي تخبّع واحد المدينة مبْنيّة على الجّبل. ما كيشعلو شي اللامْبة باش ينزّلوها تحت السطل، وَلكن كيعملوها على المرْفع وْكتضوّي على الناس كاملين الّي في الدار. خلّيو الضَّو ديالكُم يضوّي هَيدا قدّام الناس باش يشوفو الحسنات ديالكُم ويمجّدو باباكُم الّي في السما. "ما تظنّو شي بلّي أنا جيت باش نحيّد الشريعة أَوْلا التعْليم د الأَنْبياء. ما جيت شي باش نحيّدوم، وَلكن باش نكمّلوم. حيت كنقول لكُم الحقّ، حتّى تتحيّد السما والأرض، ما غادي شي يتحيّد حرف واحد ولا نُقْطة واحدة من الشريعة حتّى يتحقّق كُل شي. إدَن، أَي واحد الّي كيبطّل واحد الوَصيّة سْتيتوة من هَد الوَصايا، وْكيعلّم الناس هَيدا، غادي يتسمّى الصغير في مُلك السماوات. أمّا كُل واحد الّي كيعمل وْكيعلّم بِهُم، هَدا غادي يتسمّى كبير في مُلك السماوات. حيت كنقول لكُم، إدا ما كتزيد شي التقوى ديالكُم على التقوى د المُعلّمين د الشريعة والفرّيسيين، ما عُمركُم غَد تدخلو نْمُلك السماوات. "سمعْتو بلّي تقال نالناس د زمان: «ما تقتل شي،» «والّي قتل، واجب عليه الحُكم.» أمّا أنا كنقول لكُم بلّي كُل واحد الّي كيغضب على خاه، واجب عليه الحُكم. والّي كَيْسبّ خاه، لازم عليه يوقف في المحْكمة. والّي كيقول: «آ الحماق» كيسْتاهل النار د جهنّم. إدَن، إدا جيبْتِ الهديّة ديالك نالمَدْبح وْتمّاك تفكّرْتِ بلّي خاك عندو شي حاجة عليك، خلّي تمّاك الهديّة ديالك قدّام المَدْبح، وْمْشي في الُوّل وْتصالح مع خاك، وْديك الساعة آجي وْقدّم الهديّة ديالك. اتَّفق مع صاحب الدعْوة ديالك دغيا وانتينا باقي معاه في الطريق. عندَك يدّيك صاحب الدعْوة ديالك نالقاضي ويدفعك القاضي نالمخزني وْتتسيّب في الحبس. كنقول لك الحقّ، ما غادي شي تخرج من تمّاك حتّى تخلّص الدرهم الاخّري. "سمعْتو بلّي تقال نالناس د زمان: «ما تزني شي.» أمّا أنا كنقول لكُم بلّي كُل واحد الّي كيشوف في شي مراة وْكيشهاها، راه زنى بِها في قلبو. وِادا كانت عينك د الّيمين كتعتّرك، قلّعاْ وْسيّباْ عليك. حيت حْسَن لك يتّهلك واحد الطرف من الجسد ديالك وْما يتسيّب شي الجسد ديالك كامل في جهنّم. وِادا كانت يَدّك د الّيمين كتعتّرك، قطّعاْ وْسيّباْ عليك. حيت حْسَن لك يتّهلك واحد الطرف منّك وْما يدخل شي الجسد ديالك كامل في جهنّم. "تقال: «الّي بغى يطلّق مراتو، لازم يعطيها الكاغط د الطلاق.» أمّا أنا كنقول لكُم بلّي الّي كيطلّق المراة ديالو على شي سبّة من غير الزِّنا، كيدفعاْ تزني. والّي كَيْجوِج بالمطلّقة، راه كيزني. "عاود سمعْتو بلّي تقال نالناس د زمان: «ما تحلف شي باطل،» «وَلكن كمّل نالرَّبّ حلوفك.» أمّا أنا كنقول لكُم، ما تحلفو شي بالمرّة، لا بالسما حيت هي عرش اللّٰه، ولا بالأرض حيت هي الموطَع د رِجلو، ولا بأُورُشَليم حيت هي مدينة المَلِك العظيم. ما تحلف شي بْراسك، حيت ما تقدر شي تبدّل شعْرة واحدة بيطة أَوْلا كحْلة. وَلكن يكون الكلام ديالكُم إيّاه إيّاه، لا لا. والّي زِدْتِ على ديك الشي راه هُوَ من الشرّير. "سمعْتو بلّي تقال: «العينينة بالعينينة والسنّة بالسنّة.» أمّا أنا كنقول لكُم، ما تقاومو شي الّي تقبّح عليكُم، وَلكن الّي عْطاك طرْشة على خدّك د الّيمين، دوّر لو يَخرى حتّى هِيَ. والّي بغى يدعيك ويدّي لك الجلّابة ديالك، خلّيه يدّي حتّى السلْهام. والّي فرَض عليك تمشي معاه كيلومتر واحد، مشي معاه جوج د الكيلومترات. الّي طلب منّك، عْطي لو. وْما تعطي شي الطهر نلّي بغى يتسلّف منّك. "سمعْتو بلّي تقال: «عزّ جارك وْكرَه العدو ديالك.» أمّا أنا كنقول لكُم، عزّو العدْيان ديالكُم. وْدْعيو من جهة الناس الّي كيمرْمدوكُم باش تكونو أُوْلاد باباكُم الّي في السما. حيت هُوَ كيآمر الشمس تشرق على القباحين وْعلى المزيانين وْكيعطي الشتا نالمتّاقيين وْنالظالمين. حيت إدا كتعزّو غير هَدوك الّي كيعزّوكُم، شْمِن أجر عندكُم؟ واش ما كيعملو شي ديك الشي حتّى القبّاطة د الضرائب؟ وِادا سلّمتو على الخوت ديالكُم وْكان، شنّو كتعملو كتَر من يَخرين؟ واش ما كيعملو شي هَيداك حتّى الوَتَنيّين؟ كونو أنتُمَ كاملين فحال باباكُم الّي في السما هُوَ كامل. "ردّو بالكُم باش ما تعملو شي الخير قدّام الناس باش يشوفوكُم. وَإلّا ما غادي شي يكون عندكُم أجر عند باباكُم الّي في السما. ملّي كتعطي شي صدقة، ما تنفخ شي في البوق قدّام الناس كيفما كيعملو المنافقين في بيوت العبادة وْفي الزنايق بَياش يمجّدوهُم الناس. كنقول لكُم الحقّ بلّي هُمَ ادّاو الأجر ديالوم. أمّا أنتينا، ملّي كتعطي شي صدقة، ما تخبر شي اليَد د الشمال شنّو كتعمل اليَد د الّيمين، باش تكون الصدقة ديالك في السرّ. وْباباك الّي كيشوف في السرّ، هُوَ غادي يجازيك. "وْملّي كتصلّي، ما تكون شي فحال المنافقين. حيت هُمَ كيبغيو يصلّيو واقفين في بيوت العبادة وْفي القنوت د الزنايق باش يظهرو نالناس. كنقول لكُم الحقّ بلّي هُمَ ادّاو الأجر ديالوم. أمّا أنتينا، ملّي كتصلّي، دْخُل نالبيت ديالك وْشدّ الباب عليك، وْصلّي نْباباك الّي في السرّ. وْباباك الّي كيشوف في السرّ غادي يجازيك. وْملّي كتصلّيو، ما تعاودو شي الكلام الخاوي فحال ما كيعملو الوَتَنيّين، حيت هُمَ كيظنّو بلّي بْكتْرة الكلام غادي يسْتَجب لوم. إدَن، ما تكونو شي فحالوم، حيت باباكُم كيعرف الّي كتحْتاجوه قبل ما تطلبوه. "على ديك الشي صلّيو أنتُمَ هَيدا: آ بابانا الّي في السما، يتقدّس اِسمك. يجي المُلك ديالك. تْتّعمل الإرادة ديالك، فحال ما في السما، هَيدا على الأرض حتّى هِيَ. عْطينا الخبز ديالنا اليومي. وْسْمح نّا في الزِلّات ديالنا فحال ما كنسمحو حتّى حنايَ نِلّي كيتعدّاو علينا. وْما تدخّلنا شي في المِحْنة، وَلكن نجّينا من الشرّير. "حيت إدا كتسمحو نالناس في الزِلّات ديالوم، غادي يسمح لكُم باباكُم السماوي حتّى هُوَ. وِادا ما كتسمحو شي نالناس في الزِلّات ديالوم، ما غادي شي يسمح لكُم باباكُم حتّى هُوَ في الزِلّات ديالكُم. "ملّي كتصومو، ما تكونو شي معبّسين فحال المنافقين، حيت هُمَ كيبدّلو الوجوه ديالوم باش يظهرو نالناس صايمين. كنقول لكُم الحقّ بلّي هُمَ ادّاو الأجر ديالوم. أمّا أنتينا، ملّي كتصوم، دْهن راسك وْغْسل وَجهك، باش ما تظهَر شي نالناس صايم، وَلكن نْباباك الّي في السرّ. وْباباك الّي كيشوف في السرّ غادي يجازيك. "ما تجمعو شي نْراسكُم الكنوز في الدنيا فاين كتفسّداْ التُّنية والدري وْفاين كيتقّبو السرّاق وْكيسرقو. وَلكن خبّعو نْراسكُم الكنوز في السما فاين ما كَتْفسّداْ لا تُنية ولا دري وْفاين ما كَيْتقّبو شي السرّاق وْما كيسرقو شي. حيت فاين كاين الكنز ديالك، تمّاك كيكون القلب ديالك حتّى هُوَ. الضَّو د الجسم هُوَ العينينة. على ديك الشي، إدا كانت العينينة ديالك صحيحة، الجسم ديالك كامل كيكون معمّر بالضَّو. وَلكن، إدا كانت العينينة ديالك قبيحة، الجسم ديالك كامل كيكون مسلّس. إدَن، إدا كان الضَّو الّي فيك ظلام، قدّاش يكون ديك الظلام! "ما يقدر حتّى واحد يخدم جوج د الأسْياد، حيت إمّا غادي يكرَه واحد ويعزّ يَخُر، وَإمّا غادي يلصَق في واحد ويحڭر يَخُر. ما تقدرو شي تخدمو اللّٰه والمال بْجوج. على ديك الشي كنقول لكُم، ما ترفدو شي الهمّ من جهة الحياة ديالكُم شنّو تاكلو أولا شنّو تشربو، وَلا من جهة الجسم ديالكُم شنّو تلبسو. واش ماشي الحياة كتَر من الماكلة والجسم كتَر من اللباس؟ شوفو الطيور د السما، ما كيزرعو شي وْما كيحصدو شي وْما كيجمعو شي في الخزاين، وْباباكُم السماوي كيوكّلوم. واش ما كتسواو شي كتَر مِنّوم بزّاف؟ شكون منكُم بالهموم يقدر يزيد على الطول ديالو غير دراع واحد؟ علاش كترفدو الهمّ من جهة اللباس؟ ركّزو في السوسان في الفدّان كيفاش كيكبر. ما كيتعب شي وْما كيغزل شي، وَلكن كنقول لكُم بلّي حتّى سُليمان في العزّ ديالو كامل ما كان شي كيلبس فحال واحدة من هَدوك. وِادا كان اللّٰه كيلبّس هَيداك الربيع في الفدّان، الّي كاين اليوما وْكيتسيّب غدّا في الفرّان، كيفاش ما يلبّسكُم شي حتّى أنتُمَ، آ قلالين الإيمان؟ على ديك الشي ما ترفدو شي الهمّ وْتقولو: «شنّو غادي ناكلو أَولا شنّو غادي نشربو أَولا شنّو غادي نلبسو؟» حيت على هَد الأُمور كاملين كيفتّشو الوَتَنيّين. حيت باباكُم السماوي كيعرف بلّي أنتُمَ محْتاجين نْهَد الشي كامل. وَلكن فتّشو في الُوّل على مُلك اللّٰه والتقوى ديالو، وْهَد الحاجات كاملة غادي تْتزاد لكُم. ما ترفدو شي الهمّ نْغدّا. حيت غدّا غادي يهْتَمّ بْراسو. كُل النهار والهموم ديالو. "ما تحاكمو شي باش ما يحاكموكُم شي. حيت بالحُكم الّي بِه كتحكمو، غادي يتّحكم عليكُم، وْبْالعبار باش كتعبرو غادي يتّعبر لكُم. وْعلاش كتشوف الخشوشة الّي في العينينة د خاك، وَلكن الخشبة الّي في عينك ما كتفطن شي بِها؟ كيفاش غادي تقول نْخاك: «خلّيني نخرّج الخشوشة من عينك،» وْها الخشبة باقّة في عينك؟ آ المنافق، خرّج في الُوّل الخشبة من عينك، وْعاد غادي تشوف مزيان باش تخرّج الخشوشة من العينينة د خاك. "ما تعطيو شي الّي مقدّس نالجّرا. وْما تسيّبو شي الجوهر ديالكُم قدّام الحلالف. عندَك يسطمو عليه بْرِجلوم ويدورو ويفرسوكُم. "طلبو، وْغادي يتّعطى لكُم. فتّشو، وْغَد تجبرو. دقّو، وْغادي يفتحو لكُم. حيت كُل واحد الّي كيطلب كيقبط، والّي كيفتّش كيجبر، والّي كيدقّ كيتّفتح لو. وْشكون هَد الرَّجل فيكُم، إدا طلَب لو بنو خبزة، غادي يعطي لو حجْرة؟ أَوْلا إدا طلَب لو حوتة، واش غادي يعطي لو حيّة؟ إيوا، إدا كُنْتو كتعرفو تعطيو نالولاد ديالكُم الهديّات المزيانة، واخّا أنتُمَ قباحين، كيفاش باباكُم الّي في السما ما يعطي شي الخيرات نِلّي كيطلبو لو؟ إدَن، فحال ما بغيتو الناس يعاملوكُم، عاملوهُم هَيداك، حيت هَدي هي الشريعة والأَنْبياء بالاخْتصار. "دخلو من الباب الضيّقة، حيت الباب واسعة والطريق عريضة الّي كتدّي نالهلاك، وْبزّاف هُمَ الّي كيدخلو مِنّاْ. حيت الباب ضيّقة والطريق مزيّرة الّي كتدّي نالحياة، وْقلالين هُمَ الّي كيجبروها. "ردّو بالكُم من الأَنْبياء الكدّابـين الّي كيجيو نْعندكُم في اللباس د الغنم، وَلكن من الداخل هُمَ دياب خطّافة. من الغلّة ديالوم غَد تعرفوهُم. واش كيجنيو العنب من الشوك أَوْلا الكرْموس من العُلّيق؟ هَيدا كُل شجرة مزيانة كتجيب غلّة مزيانة، وَلكن الشجرة الخايبة كتجيب غلّة خايبة. ما تقدر شي واحد الشجرة مزيانة تجيب غلّة خايبة ولا شجرة خايبة تجيب غلّة مزيانة. كُل شجرة الّي ما كتجيب شي غلّة مزيانة كَتْـتقطّع وْكَتْـتسيّب في العافية. هَيدا من الغلّة ديالوم غَد تعرفوهُم. "ماشي كُل واحد الّي كيقول لي «يا رَبّي، يا رَبّي» غادي يدخل نْمُلك السماوات، وَلكن الّي كيعمل الإرادة د بابا الّي في السما. بزّاف غادي يقولو لي في ديك النهار: «يا رَبّي، يا رَبّي، واش ماشي بِاسمك تنبّأنا وْبِاسمك خرّجْنا الشياطين وْبِاسمك عملْنا بزّاف د العجايب؟» ديك الساعة غادي نقولّوم: «عُمري ما عرفْتْكُم. بعّدو منّي، آ فاعلين الشَّرّ.» "على ديك الشي كُل واحد الّي كيسمع هَد الكلام ديالي وْكيعمل بِه، غادي نشبّهوْ بواحد الرَّجل بْعقلو الّي بنى الدار ديالو على الصخر. طاحت الشتا وْحملو الويدان وْساط الريح وْدفع ديك الدار، وْما طاحت شي، حيت كانت مأسّسة على الصخر. وْبالعكس، كُل واحد الّي كيسمع هَد الكلام ديالي وْما كيعمل شي بِه، غادي نشبّهوْ بواحد الرَّجل حماق الّي بنى الدار ديالو على الرمل. وْطاحت الشتا وْحملو الويدان وْساط الريح وْدفع ديك الدار، وْطاحت. وْكانت الطيحة ديالاْ كبيرة!" وْملّي كمّل يَسوع هَد الكلام، تعجّبو الناس من التعْليم ديالو، حيت كان كيعلّموم فحال شي واحد الّي عندو السلْطة، وْماشي فحال المُعلّمين د الشريعة. ملّي هوّد يَسوع من الجّبل، تبعوه بزّايف د الناس. وْقرّب مِنّو واحد الرَّجل فيه البرص وْسجد لو، كيقول: "آ سيدي، إدا بغيتِ، تقدر تصفّيني." يَسوع مدّ يَدّو وْحاداه وْقال: "أنا بغيتْ، كون صافي." وْفي هزيزة تصفّى البرص مِنّو. ديك الساعة قال لو يَسوع: "شوف، ما تقول هَد الشي نْحتّى واحد، وَلكن مْشي تورّي راسك نالمسؤول في بيت العبادة وْعْطي العطيّة الّي آمر بِها موسى شهادة لِلوم." ملّي دخل يَسوع نْكَفْرِناحوم، جا نْعندو واحد القايد د المية كيرغبوْ وْكيقول: "آ سيدي، عبدي طايح في الدار مكْحوش وْمعدّب بزّاف." وْقال لو يَسوع: "أنا غادي نمشي وْنشافيه." ردّ عليه قايد المية وْقال: "آ سيدي، أنا ما كنسْتاهل شي باش تدخل تحت السقَف ديالي. وَلكن غير قول واحد الكلمة والعبد ديالي غادي يتشافى. حيت حتّى أنا واحد الرَّجل تحت السلْطة، وْعندي العسْكر تحت الأمر ديالي، وْكنقول نْهَدا «مْشي» وْكيمشي، وْنيَخُر «آجي» وْكيجي، وْنالعبد ديالي «عمل هَد الشي» وْكيعملوْ." ملّي سمَع يَسوع، تعجّب وْقال نِلّي تابعينو: "كنقول لكُم الحقّ، ما جبرْتْ حتّى واحد عندو الإيمان قدّ هَد الشي حتّى في إسْرائيل. وْكنقول لكُم بلّي بزّاف د الناس غادي يجيو من الشرق والغرب ويݣلسو مع إبراهيم وإسحاق ويَعْقوب في مُلك السماوات. أمّا أُوْلاد المُلك غادي يتسيّبو في الظلام على برّا. تمّاك غادي يكون البكا وْتغْزيز السّنان." ديك الساعة قال يَسوع نْقايد المية: "مْشي، وْفحال ما آمنْتِ، يكون لِلِك." وْبرا العبد ديالو في ديك الساعة. ملّي جا يَسوع نالدار د بُطْرُس، شاف النسيبة ديالو ممْدودة وْمريطة بالسخانة، وْحادى يَدّاْ وْخرجَتْ مِنّاْ السخانة، وْناضتْ وْبداتْ كَتْـتسخّر عليهُم. وْملّي جات العشيّة، جابو لو بزّاف د الناس الّي فيهُم الشياطين، وْخرّج الجنون بالكلام ديالو والمراطين كاملين شافاهُم، باش يتحقّق ديك الشي الّي قال النَّبي إشَعْيا: "هو ادّى العلّات ديالنا وْرفد الأمْراض ديالنا." ملّي شاف يَسوع بزّاف د الناس دايرين بِه، آمر التلامد ديالو باش يمشيو نالجّهة يَخرى د البحَر. وْجا واحد المُعلّم د الشريعة وْقال لو: "آ المُعلّم، نتَبْعِك فاين ما مشيتِ." وْقال لو يَسوع: "التعالب عندوم الغيران والطيور د السما عندوم الأعْشاش، أمّا ابن الإنسان ما عندو فاين ينزّل راسو." قال لو واحد يَخُر من التلامد ديالو: "آ سيدي، خلّيني نمشي في الُوّل وْندفن بابا." وْقال لو يَسوع: "تْبعني وْخلّي الميّتين يدفنو الميّتين ديالوم." وْملّي دخل نالفلوكة، تَبعوه التلامد ديالو، وْواحد العاصفة قويّة وقعَتْ في البحَر حتّى تغطّات الفلوكة بالمواج، وْكان يَسوع ناعس. جاو التلامد ديالو وْفيّقوه، كيقولو: "يا رَبّي، نجّينا، حنايَ غادي نموتو!" قالّوم: "مالْكُم خوفانين، آ قلالين الإيمان." ديك الساعة ناض وْنهَط في الرّيح والبحَر، وْوقعَتْ واحد الهدنة عظيمة. وْتعجّبو الرجال، كيقولو: "شكون هُوَ هَدا؟ حيت حتّى الرّيح والبحَر كيطيعوه!" ملّي وصَل يَسوع نالجّهة يَخرى نْبلاد الجَدَريّين، تلاقاواه جوج د المسْكونين خارجين من المقابر، هايجين بزّاف، حتّى ما قدر حتّى واحد يݣوز من ديك الطريق. وْهُمَ غوّتو، كيقولو: "شنّو بينّا وْبينك، آ ابن اللّٰه؟ واش جيتِ نْهنايَ باش تعدّبنا من قبل الوقت؟" كان بعيد مِنّوم واحد القَطيع كبير د الحلالف كَيرعا. والشياطين رغبوه، كيقولو: "إدا خرّجْتِنا، خلّينا ندخلو في القَطيع د الحلالف." قالّوم: "مْشيو." وْخرجو وْدخلو فيهُم. والحلالف كاملين جراو بالجُّهد من الحدورة نالبحَر وْماتو في الما. والّي كانو سارحينوم هربو وْمشاو نالمدينة وْخبرو بْكُل ما جرى والّي وقَع نالمسْكونين. ديك الساعة خرجَت المدينة كاملة باش تتلاقى مع يَسوع. وْملّي شافوه، طلبو منّو يمشي فحالو من البلاد ديالوم. ديك الساعة دخل نالفلوكة وْقطع البحَر وْمشى نالمدينة ديالو. وْجابو لو واحد الرَّجل مكْحوش ممْدود في الفراش. وْملّي شاف يَسوع الإيمان ديالوم، قال نْهَداك الّي مكْحوش: "كون هاني، آ بني، مغْفورين لك الدنوب ديالك." والبعض من المُعلّمين د الشريعة قالو في نَفسوم: "هَدا كيكفر." وْعرف يَسوع الأفْكار ديالوم، وْقال: "علاش كتخمّمو قبيح في قلبكُم؟ حيت شنّو الّي ساهل، نقول: «مغْفورين لك الدنوب ديالك،» أَوْلا نقول: «نوض وْمْشي»؟ وَلكن باش تعرفو بلّي اِبن الإنسان عندو السلْطة على الأرض باش يغفر الدنوب،" ديك الساعة قال نالمكْحوش: "نوض، رفد فراشك وْمْشي نالدار ديالك." وْناض وْمشى نالدار ديالو. وْملّي شافو الزحام، خافو وْمجّدو اللّٰه الّي عْطى نالبشر السلْطة فحال هَدي. ملّي كان يَسوع ݣايز من تمّاك، شاف واحد الرَّجل ݣالس في الموطَع د الضرائب، هُوَ مسمّي مَتّى، وْقال لو: "تْبَعني،" وْناض وْتبعوْ. وْملّي كان ݣالس في الدار كياكل، جاو بزّاف د القبّاطة د الضرائب والمُدْنبـين وْݣلسو مع يَسوع والتلامد ديالو. ملّي شافو الفرّيسيّين ديك الشي، قالو نالتلامد ديالو: "علاش كياكل المُعلّم ديالكُم مع القبّاطة والمُدْنبـين؟" ملّي سمَع يَسوع، قالّوم: "الّي هُمَ صحاحين ما محْتاجين شي نالطبيب، وَلكن المراطين هُمَ الّي محْتاجين. إيوا، مْشيو وْتعلّمو المعنى د هَد الشي: «أنا كَنْبغي الرحْمة وْماشي الدبـيحة.» حيت أنا ما جيت شي باش نعيّط على المتّاقيين، وَلكن على المُدْنبـين باش يتوبو." وْفي ديك الساعة جاو نْعندو التلامد د يوحَنّا كيقولو: "علاش كنصومو بزّاف حنايَ والفرّيسيّين، أمّا التلامد ديالك ما كيصومو شي؟" وْقالّوم يَسوع: "واش يقدرو الناس د العُرس يبكيو والعروس باقي معهُم؟ وَلكن غادي تجي الأيّام الّي غادي يتحيّد عليهُم العروس. عاد ديك الساعة غادي يصومو. حتّى واحد ما كيرقّع واحد اللباس بالي بْطرف ديال التوب الجديد، حيت الرقْعة الجديدة غادي تجبد من اللباس وْغادي ترجع التقْطيعة قبَح من الّي كانت. وْما كيعملو شي الناس خمر جديد في شي جلود باليين باش ما يتقطّعو شي الجلود والخمر يتهرّق والجلود يفسدو. بالعكس، الناس كيعملو الخمر الجديد في الجلود الجدادين وْكيبقاو مزيانين بْجوج بِهُم." ملّي كان كيتكلّم معهُم بْهَد الشي، واحد الحاكم جا وْسجد لو، كيقول: "بنْتي دابا عاد ماتت، وَلكن آجي تعمل يَدّك عليها باش تحيا." ناض يَسوع وْتبعوْ، هُوَ والتلامد ديالو. ديك الساعة واحد المراة مريطة بالنزيف د الدم مُدّة طناشر عام جات من موراه وْحادات الجلايل د الجلّابة ديالو، حيت قالت في نفساْ: "إدا حاديتْ غير الجلّابة ديالو، غادي نتشافى." دار يَسوع وْشافاْ وْقال: "كون هانية آ بنْتي، إيمانك شافاك." وْبرات المراة في الحين. ملّي وصَل يَسوع نالدار د الحاكم وْشاف الّي كيعزفو على الناي والناس كينوّحو بالجُّهد، قالّوم: "بعّدو، حيت البنيتة ماشي ميّتة، وَلكن غير ناعسة،" وْضحكو عليه. وْملّي خرّج الناس، دخل وْشبّراْ من يَدّاْ، وْرجعَت البنيتة بالروح. وْتشاع هَد الخبر في ديك الأرض كاملة. ملّي كان يَسوع ݣايز من تمّا، تبعوه جوج د العُميان كيغوّتو وْكيقولو: "رْحمنا، آ بن داود." وْملّي دخل نالدار، جاو نْعندو العُميان، وْقالّوم يَسوع: "واش كتآمنو بلّي نقدر نعمل هَد الشي؟" قالو لو: "إيّاه، يا رَبّي." ديك الساعة حادى العينين ديالوم وْقال: "على قدّ إيمانكُم يكون لكُم." وْتّفتحو العينين ديالوم، وْوصّاهُم يَسوع وأكّد عليهُم، كيقول: "شوفو ما تخبرو حتّى واحد!" وَلكن هُمَ خرجو وْخبرو بِه في ديك الأرض كاملة. ملّي كانو خارجين، جابو لو واحد الزيزون مسْكون، وْملّي خرّج الجنّ منّو، تكلّم الزيزون، وْتعجّبو الناس كيقولو: "عُمرو ما ظهَر فحال هَد الشي في إسْرائيل!" أمّا الفرّيسيّين قالو: "بْسُلْطان الجّنون كيخرّج الجّنون." كان يَسوع كيدور في المُدُن كاملين والدشورة كيعلّم في بيوت العبادة ديالوم، وْكيبشّر بالإنجيل د مُلك اللّٰه، وْكيشافي كُل مرض وْكُل ضُعف في الناس. وْملّي شاف الزحام، حنّ عليهُم حيت كانو حيرانين وْمشتّتين فحال الغنم بلا راعي. ديك الساعة قال نالتلامد ديالو: "الحصاد كتير وَلكن الخدّامة قلالين. إدَن، طلبو من رَبّ الحصاد باش يصيفط الخدّامة نالحصاد ديالو." ديك الساعة عَيّط نالتلامد ديالو بْطناش وْعْطاهُم السلْطة باش يخرّجو الجّنون المنْݣوسين ويشافيو كُل مرض وْكُل ضُعف. الأسْماء د الرُّسُل الطناش هُمَ هَدو: الُوّل سِمْعان الّي كيقولو لو بُطْرُس وأَنْدَراوس خاه، ويَعْقوب بن زَبَدي وْيوحَنّا خاه، وْفيلِبُّس وْبَرْثولَماوس، وْتوما، وْمتّى القبّاط د الضرائب، ويَعْقوب بن حَلْفى، وْتَدّاوس، وْسِمْعان القانَوي ويَهودا الإسْخَريوطي، الّي خان المسيح. هَد الطناش صيفطوم يَسوع وْوصّاهُم وْقالّوم: "ما تمشيو شي في طريق الوَتَنيّين وْما تدخلو شي نْشي مدينة د السامريّين. وَلكن مْشيو نالغنم د الدار د إسْرائيل الّي متْلوفة. وْملّي تكونو ماشّين، بشّرو وْقولو: «قرّب مُلك السماوات.» شافيو المراطين، ردّو الميّتين بالروح، صفّيو المبْراصين، خرّجو الشياطين. بلا شي قبطْتو وْبلا شي غَد تعطيو. ما تعملو لا دهَب ولا نُقْرة ولا نحاس في الحزومة ديالكُم، ولا شكارة نالطريق ولا جوج د الجلالب ولا صبّاط ولا عُكّاز. حيت الخدّام كيسْتاهل الماكلة ديالو. "كُل مدينة أَوْلا قرية الّي غادي تدخلوها، فتّشو على المسْتاهل فيها، وْبقاو تمّاك حتّى تخرجو. وْملّي تدخلو نالدار، سلّمو عليها. وِادا كانت الدار كَتْسْتاهل السلام، غادي يجي السلام ديالكُم عليها، وَلكن إدا ما كانت شي كتسْتاهل، غادي يرجع لِلكُم سلامكُم. وأَي واحد الّي ما كيرحّب شي بِكُم وْما كيسمع شي الكلام ديالكُم، خرجو من ديك الدار، أَوْلا من ديك المدينة، وْنفطو الغبْرة من الرِّجلين ديالكُم. كنقول لكُم الحقّ، الحالة د أرض سَدوم وْعَمورة غادي تكون ساهلة في يوم الدين من الحالة د ديك المدينة. "ها انا كنصيفطكُم فحال الغنم فوسط الدياب. كونو بْعقلكُم فحال الحياي وْبلا ضرر فحال الحمام. وْردّو بالكُم من الناس، حيت غادي يدفعوكُم نالمحْكمات ويعصّيوكُم في بيوت العبادة ديالوم، ويدّيوكُم نْقدّام الحُكّام والملوك على سبابي باش تعطيو الشهادة لِلوم وْنالوَتَنيّين. ملّي يدّيوكُم، ما تخمّمو شي كيفاش أولا بَياش غَد تتكلّمو، حيت غادي يتّعطى لِلكُم في ديك الساعة بَياش تتكلّمو. حيت ماشي أنتُمَ الّي كتـتكلّمو، وَلكن روح باباكُم الّي كيتكلّم فيكُم. والأخ غادي يدفع خاه نالموت والوالِد ولدو. وْغادي ينوضو الولاد ضدّ والِديهم ويقتلوهُم، وْغَد تكونو مكْروهين عند الناس كاملين بْسباب اِسمي. وَلكن الّي كيصبر حتّى نالنهاية، هَداك غادي ينجا. ملّي يعدّبوكُم في شي مدينة، هربو نواحدة يَخرى، حيت كنقول لكُم الحقّ، ما غادي شي توصلو نْمُدُن إسْرائيل كاملة حتّى يجي ابن الإنسان. "التلْميد ماشي كتَر من المُعلّم ديالو، ولا العبد كتَر من سيّدو. بركة على التلْميد إدا كان فحال المُعلّم ديالو، والعبد فحال سيّدو. إدا قالو على مول الدار «أنتينا بَعْلَزَبول،» شنّو غادي يقولو على أهل دارو؟ إدَن، ما تخافو شي مِنّوم، حيت كُل حاجة مسْتورة غادي تظهر وْكُل شي مخبّع غادي يتّعرف. الّي كنقول لكُم في أسلّاس، قولوه في الضَّو. والّي كتسمعوه في الودْنينة، برّحو بِه على السطوحة. وْما تخافو شي مِن الّي كيقتلو الجسم، أمّا النفس ما يقدرو شي يقتلوها. وَلكن خافو من الّي يقدر يهلك النفس والجسد بْجوج بِهُم في جهنّم. واش ما كَيْتّباعو شي جوج د الطيور بواحد الدرْهم؟ وْحتّى واحد مِنّوم ما كيطيح نالأرض بلا ما يسمح باباكُم. أمّا أنتُمَ حتّى الشعر د راسكُم راه كامل محْسوب. إدَن، ما تخافو شي. أنتُمَ حسَن من بزّاف د الطيور. على ديك الشي كُل واحد الّي كيعْتَرف بيَّ قدّام الناس، غادي نعْتَرف بِه حتّى أنا قدّام بابا الّي في السما. وَلكن كُل واحد الّي كينكرني قدّام الناس، غادي نْنكروْ حتّى أنا قدّام بابا الّي في السما. "ما تظنّو شي بلّي جيت باش نجيب السلام نالدنيا. ما جيت شي باش نجيب السلام، وَلكن السيف. حيت أنا جيت باش نفرق الرَّجل على باباه، والبنْت على يمّاها، والعروسة على العݣوزة ديالاْ. والعدْيان د الإنسان هُمَ الّي في الدار ديالو. كُل واحد الّي كيعزّ باباه أَوْلا يمّاه كتَر منّي ما كيسْتاهلني شي، والّي كيعزّ بنو أَوْلا بِنْتو كتَر منّي، ما كيسْتاهلني شي. والّي ما كيرفد شي الصليب ديالو وْكَيْتبعْني، ما كيسْتاهلني شي. الّي كيجبر نفسو، غادي يخسراْ، والّي كيخسر نفسو بْسبابي، غادي يجبراْ. الّي كيرحّب بِكُم، كيرحّب بيَّ، والّي كيرحّب بيَّ، كيرحّب بْهَداك الّي صيفطني. الّي كيرحّب بواحد النَّبي، حيت هُوَ نَبي، غادي يدّي الأجر د واحد النَّبي، والّي كيرحّب بواحد المتّاقي، حيت هُوَ متّاقي، غادي يدّي الأجر د واحد المتّاقي. والّي كيشرّب واحد من هَد السْتيتوين غير كاس د الما بارد، حيت هُوَ التلْميد ديالي، كنقول لكُم الحقّ، ما غادي شي يضيع لو الأجر ديالو." ملّي كمّل يَسوع الوَصايا ديالو نالتلامد ديالو الطناش، مشى من تمّاك باش يعلّم ويبشّر في المُدُن ديالوم. وْيوحَنّا، ملّي سمَع وْهُوَ في الحبس بأعْمال المسيح، صيفط لو التلامد ديالو باش يسقصيواه: "واش أنتينا هُوَ الّي ماجي أَوْلا نتسنّاو واحد يَخُر؟" ردّ عليهُم يَسوع وْقالّوم: "مْشيو وْخبرو يوحَنّا بْهَد الشي الّي كتسمعوه وْكتشوفوه. العُميان رجعو كيشوفو والعُرَج كيمشيو والمبْراصين كيتصفّاو والصمكين كيسمعو والميّتين كيرجعو بالروح والمساكن كيتبشّرو بْخبَر الخير. وْمبروك الّي ما كَيعتَر شي بْسبابي." ملّي مشاو التلامد د يوحَنّا، يَسوع بدا كيهدَر مع ديك الجماعة على يوحَنّا: "شنّو خرجْتو تشوفو في الخلا؟ شي قصبة كيحرّكاْ الريح؟ وَلكن شنّو خرجْتو تشوفو؟ شي رَجل لابس جلّابة رفيعة؟ راه الّي لابسين الجلالب الرفيعة هُمَ في الديور د الملوك. وَلكن شنّو خرجْتو تشوفو؟ شي نَبي؟ إيّاه، كنقول لكُم وْحسَن من واحد النَّبي. هَدا هُوَ الّي كَتبو عليه: «ها انا كنصيفط المرسول ديالي قدّامك، الّي غادي يوجّد الطريق ديالك قدّامك.» كنقول لكُم الحقّ، ما كاين حتّى واحد من بين الّي اتّولدو من شي مراة كبَر من يوحَنّا المَعْمَدان، وَلكن الصغير في مُلك السماوات، هُوَ كبَر منّو. من أيّام يوحَنّا المَعْمَدان حتّى نْدابا، الناس كيهجمو على مُلك السماوات والعنافين كيحاولو يخطفوه بالدراع. حيت الأَنْبياء كاملين والشريعة تنبّأو حتّى نْيوحَنّا. وِادا بغيتو تقبلوه، راه هَدا هُوَ إيليّا الّي كان غادي يجي. الّي عندو الودْنين باش يسمع، لازم يسمع. لِمّن نشبّه هَد الجيل؟ كيشبه نْشي عيال ݣالسين في الأسواق كيعيّطو نْصحابوم، كيقولو: «غيّطْنا لكُم وْما شطحْتو شي، نوّحْنا لكُم وْما حزنْتو شي.» حيت جا يوحَنّا ما كياكل شي وْما كيشرب شي، وْكيقولو: «فيه شي جنّ.» جا اِبن الإنسان كياكل وْكيشرب، وْكيقولو: «راه هَدا واحد الرَّجل وكّال وْسكايري، مصاحب مع القبّاطة د الضرائب والمُدْنبـين.» والحكْمة كتبرّراْ الأعْمال ديالاْ." ديك الساعة بدا يَسوع كيوبّخ المُدُن الّي عمل فيهُم الأغْلبيّة د المُعْجزات ديالو الّي، واخّا هَيداك، ما تابو شي. "الويل لِلِك، آ كورَزين! الويل لِلِك، آ بيت صَيدا! حيت كَكانو تعملو في صور وْصَيدا المُعْجزات الّي تعملو فيكُم، كَكانو تابو شحال هَدي في الخيش والرماد. وَلكن كنقول لكُم بلّي الحالة د صور وْصَيدا غادي تكون في يوم الدين ساهلة من الحالة ديالكُم. وانتينا، آ كَفْرِناحوم، واش ما غادي شي تتعلّى نالسما؟ لا، غادي تهوّد نالهاوية. حيت كَكانو تعملو في سَدوم المُعْجزات الّي تعملو فيك، كَكانت بقات حتّى ناليوما. وَلكن كنقول لكُم بلّي الحالة د أرض سَدوم غادي تكون في يوم الدين ساهلة من الحالة ديالكُم." في ديك الساعة جاوب يَسوع وْقال: "كنحمدك، آ بابا، ربّ السما والأرض، حيت خبّعْتِ هَد الأُمور على الحُكَماء والعُلَماء وْبيّنْتِها نالعيال الستيتْوين. نعم، آ بابا، حيت عجبك يكون هَيداك. بابا سلّم لي كُل شي. وْما كاين حتّى واحد الّي كيعرف الِابن من غير الآب، وْما كاين حتّى واحد الّي كيعرف الآب من غير الِابن، وهَداك الّي بغى الِابن يورّيه لو. آجيو نْعندي، أنتُمَ الّي تعْبانين وْعليكُم بزّاف د التقال، وانا غادي نعطيكُم الراحة. رفدو النير ديالي عليكُم وْتعلّمو منّي. راه أنا طيّب وْمتواضع القلب، وْغَد تجبرو الراحة نْراسكُم. حيت النير ديالي ساهل والحمل ديالي خفيف." في ديك الساعة مشى يَسوع في نهار السبت من بين الفدادن د الزرَع، وْكانو التلامد ديالو فيهُم الجّوع وْبداو كيقطّعو السبولة وْكياكلو. وْملّي شافوهُم الفرّيسيّين، قالو لو: "شوف! التلامد ديالك كيعملو ديك الشي الّي ماشي حلال يتّعمل في نهار السبت." قالّوم: "واش ما قريتو شي شنّو عمل داود ملّي جاه الجّوع، هُوَ وْهَدوك الّي كانو معاه؟ دخَل نْبيت اللّٰه وْكلا خبز القُرْبان الّي ماشي حلال عليه ياكلوْ ولا على الّي كانو معاه، وَلكن على المسؤولين على بيت اللّٰه بوحدوم. واش ما قريتو شي في التوراة بلّي المسؤولين في نهار السبت في بيت المَقْدس كيخرقو السبت وْهُمَ ما عليهُم حتّى دنب؟ وَلكن كنقول لكُم، كاين هنايَ شي واحد عظيم من بيت المَقْدس. وْكَكُنْتو عرفْتو شنّو هُوَ هَد الشي: «أنا كنبغي الرحْمة وْماشي الدبـيحة،» كون ما حكمْتو شي على الأَبْرياء، حيت اِبن الإنسان هُوَ الرَّبّ على نهار السبت." مشى يَسوع من تمّاك وْدخل نْبيت العبادة ديالوم. وْكان تمّاك واحد الرَّجل يَدّو مشْلولة، وْسقصاواه باش يتَّهموه: "واش حلال العِلاج في نهار السبت؟" قالّوم: "واش كاين شي إنسان بيناتكُم الّي عندو واحد الخروف، وِادا طاح لو نهار السبت في الحفْرة، واش ما يشبّروْ شي ويطلّعوْ؟ الإنسان حسَن بزّاف من الخروف. على ديك الشي حلال يتّعمل الخير في نهار السبت." ديك الساعة قال نالرَّجل: "مدّ يَدّك،" وْمدّاْ وْرجعَتْ صحيحة فحال يَخرى. وْملّي خرجو الفرّيسيّين، تشاورو عليه باش يقتلوه. عرف يَسوع هَد الشي وْمشى من تمّا، وْتَبعوه بزّاف د الناس وْشافاهُم كاملين. وْوصّاهُم ما يشهّرو شي بِه، باش يتحقّق ديك الشي الّي قال النَّبي إشَعْيا: "ها هُوَ عبدي الّي اخْتارْتوْ، العزيز ديالي الّي فرحَتْ بِه نفسي، غادي نْنزّل روحي عليه وْغادي يعلّم الأُمَم بالعدالة. ما غادي شي يدابز وْما غادي شي يغوّت وْما غادي يسمع حتّى واحد الصوت ديالو في الزنايق. واحد القصْبة مشْقوقة ما غادي شي يقسماْ، وْفتيلة مدخّنة ما غادي شي يطفيها، حتّى يخرّج العدالة نالانتصار. وْفي اسمو غادي يكون الرجا د الأُمَم." في ديك الوقت جابو لو واحد المسْكون، عمى وْزيزون، وْشافاه حتّى تكلّم الزيزون وْشاف. وْدهشو الناس كاملين وْقالو: "واش ماشي هَدا هُوَ بن داود المُنْتَظر؟" أمّا الفرّيسيّين ملّي سمعو، قالو: "هَدا كيخرّج الشياطين بْبَعْلَزَبول، رئيس الشياطين." عرف يَسوع التخْميم ديالوم وْقالّوم: "كُل مَمْلكة الّي مقْسومة على نفساْ كَتْـتخرّب. وْكُل مدينة أَوْلا عائلة الّي مدابزة مع بعطاْ ما غادي شي تبقا. وِادا كان الشيطان كيخرّج الشيطان، هُوَ قايم على نفسو. وْكيفاش غادي تتبت المَمْلكة ديالو؟ وِادا كُنْتْ أنا كنخرّج الشياطين بْبَعْلَزَبول، بَياش كيخرّجوهُم الولاد ديالكُم؟ على هَد الشي هُمَ غادي يحكمو عليكُم. وَلكن إدا كُنْتْ أنا بْروح اللّٰه كنخرّج الشياطين، يعني جا نْعندكُم مُلك اللّٰه. وْكيفاش يقدر شي واحد يدخل نالدار د الرَّجل القوي ويدّي لو المتاع ديالو إدا ما كتّف شي الرَّجل القوي في الُوّل، وْعاد ديك الساعة يخْوي لو الدار ديالو؟ الّي هُوَ ماشي معيَ، راه ضدّي، والّي ما كيجمع شي معيَ، راه كيشتّت. على ديك الشي كنقول لكُم، الدنوب كاملة والكُفر يقدر يتّغفر نالناس. أمّا الكفر بالروح القُدُس ما غادي شي يتّغفر نالناس. أَي واحد الّي كينطق بْشي كلمة ضدّ اِبن الإنسان غادي يتّغفر لو. أمّا الّي كيهدَر ضدّ الروح القُدُس ما غادي شي يتّغفر لو، لا في هَد الدنيا ولا في الدنيا الماجّة. عملو الشجرة مزيانة والغلّة ديالاْ غادي تكون مزيانة، أَولا عملو الشجرة خايبة والغلّة ديالاْ غادي تكون خايبة. حيت من الغلّة غَد تعرفو الشجرة. آ وْلاد الحياي، كيفاش غادي تتكلّمو بْكلام مزيان وانتُمَ قباحين؟ حيت من الشياطة د القلب كيهدَر الدقوم. الرَّجل الصالح من الكنز الصالح الّي في قلبو كيخرّج الحاجات الصالحة، والرَّجل الشرّير من الخزين الشرّير كيخرّج الحاجات القبيحة. وْكنقول لكُم بلّي كُل كلمة خاوية الّي كيتكلّمو بِها الناس غادي يتحاسبو عليها في يوم الدين. حيت بْكلامك غادي تـتبرّى أَوْلا بْكلامك غادي تتعاقب." في ديك الساعة ردّو عليه شي ناس من المُعلّمين د الشريعة والفرّيسيّين وْقالو: "آ المُعلّم، بغينا نشوفو منّك واحد العلامة." رّد يَسوع وْقالّوم: "واحد الجيل قبيح وْفاسِد كيفتّش على شي علامة وْما غادي تتّعطى لو حتّى شي علامة، غير العلامة د النَّبي يونان. حيت فحال ما كان يونان في جوف الحوت تلت أيّام وْتلت ليالي، هَيدا غادي يكون اِبن الإنسان في قلب الأرض تلت أيّام وْتلت ليالي. الرجال د نينَوى غادي يوقفو في يوم الدين مع هَد الجيل ويحكمو عليه، حيت هُمَ تابو ملّي سمعو التبْشير د يونان. وْها هُوَ شي واحد عظيم من يونان هنايَ. المَلِكة د الجنوب غادي توقف في يوم الدين مع هَد الجيل وْتحكم عليه، حيت هي جات من حدّ الدنيا باش تسمع الحكْمة د سُلَيمان. وْها هُوَ شي واحد عظيم من سُليمان هنايَ. "ملّي كيخرج الجنّ المنْݣوس من الإنسان، كيݣوز على المواطع الّي ما فيهُم شي الما، كيفتّش على الراحة وْما كيجبراْ شي. ديك الساعة كيقول: «غادي نرجع نالدار ديالي الّي خرجْتْ مِنّاْ.» وْكيجي وْكيجبراْ خاوية وْمشطّبة وْمرتّبة. ديك الساعة كيمشي وْكيدّي معاه سبعة د الجّنون يَخرين قْبَح منّو وْكيدخلو وْكيسكنو تمّاك. والحالة الاخّريّة د ديك الإنسان كترجع قبَح من الحالة ديالو الُولى. هَيدا غادي يكون حتّى نْهَد الجيل القبيح." ملّي كان باقي كيتكلّم مع الناس، يمّاه والخوت ديالو وَقفو على برّا، باغيين يهدرو معاه. وْقال لو شي واحد: "ها يمّاك وْخوتك واقفين على برّا باغيين يهدرو معك." ردّ يَسوع على الّي تكلّم معاه وْقال لو: "شكون هي يمّا وْشكون هُمَ خوتي؟" وْمدّ يَدّو نْجهة التلامد ديالو وْقال: "ها هي يمّا وْخوتي، حيت كُل واحد الّي كيعمل الإرادة د بابا الّي في السما، هُوَ خاي وْختي ويمّا ديالي." في ديك النهار، خرج يَسوع من الدار وْݣلس حدا البحَر. وْتّجمعو عليه بزّاف د الناس حتّى دخل نالفلوكة وْݣلس. والناس كاملين وَقفو على الحاشية د البحَر. وْتكلّم معهُم بزّاف بالأمْتال وْقال: "راه الفلّاح خرج باش يزرع، وْملّي كان كيزرع، طاح شويا د الزرع حدا الطريق، وْجاو الطيور وْكلاواه. طاح يَخُر على المواطع المحجّرين فاين ما كان شي بزّاف د التراب، وْنبت دغيا، حيت ما كان شي الغُرق في التراب. وَلكن ملّي شرقَت الشمس، اتّحرق، وْحيت ما عندو شي العروق، يبس. وْطاح يَخُر فوسط الشوك، وْطلع الشوك وْخنقوْ. طاح يَخُر في الأرض المزيانة، وْجاب الزرّيعة، وْعْطات البعض منّاْ مية مرّة والبعض ستّين والبعض تلاتين. الّي عندو الودْنين باش يسمع، لازم يسمع." ديك الساعة جاو التلامد وْقالو لو: "علاش كَتْـتكلّم معهُم بالأمْتال؟" وْردّ عليهُم وْقالّوم: "حيت اتّعطى لكُم باش تعرفو الأسْرار د مُلك السماوات، أمّا نْهَدوك ما اتّعطى لوم شي. حيت الّي عندو، غادي يتّعطى لو ويتكتّر لو. أمّا الّي ما عندو شي، ديك الشي الّي عندو غادي يتزوّل لو. على ديك الشي كنتكلّم معهُم بالأمْتال، حيت هُمَ شايفين وْما كيشوفو شي، وْسامعين وْما كيسمعو شي وْما كيفهمو شي. تحقّقَتْ فيهُم النبوءة د إشَعْيا الّي كتقول: «واخّا كتسمعو، ما غادي شي تفهمو، وْواخّا كتشوفو، ما غادي شي تميّزو. حيت القلب د هَد الشعب قاصح، والودْنين ديالوم تقالو نالسمع. وْغمّضو العينين ديالوم باش ما يشوفو شي، ولا يسمعو بالودْنين ديالوم ويفهمو بْقلبوم ويتوبو وانا نشافيهم.» وَلكن مبْروكين العينين ديالكُم حيت كيشوفو، والودْنين ديالكُم حيت كيسمعو. حيت كنقول لكُم الحقّ، بزّاف د الأَنْبياء والمتّاقيين بغاو يشوفو هَد الشي الّي كتشوفوه أنتُمَ وْما شافوه شي، ويسمعو الّي كتسمعو وْما سمعوه شي. "إيوا، سمعو أنتُمَ المتال د الفلّاح. ملّي شي واحد كيسمع كلام المُلك وْما كيفهم شي، كيجي القبيح وْكيخطف الّي اتّزرع في قلبو. هَدا هُوَ الّي مزْروع على الطريق. والمزْروع على المواطع المحجّرين، هُوَ الّي كيسمع الكلام وْفي الحين كيقبلوْ فرْحان، وَلكن ما عندو شي العروق في نفسو وْكيصبر غير شي مُدّة، وْملّي كيوقع شي ضيق أَوْلا تعدّي بْسباب الكلام، دغيا كيعتر. المزْروع بين الشوك هُوَ الّي كيسمع الكلام، وَلكن الهموم د الدنيا وْمحبّة المال كيجيّفو الكلام وْكيرجع بلا غلّة. أمّا المزْروع على الأرض المزيانة، هَدا هُوَ الّي كيسمع الكلام وْكيفهم، وْكيجيب الغلّة. واحدة كتعطي مية مرّة وْواحدة ستّين مرّة وْواحدة تلاتين مرّة." عْطاهُم متال يَخُر وْقال: "كيشبه مُلك السماوات نواحد الإنسان الّي زرَع زرّيعة مزيانة في الفدّان ديالو. وْملّي كانو الناس ناعسين، جا العدو ديالو وْزرَع الزوان فوسط الزرع وْمشى فحالو. وْملّي كبر النبات وْعمل الزرّيعة، في ديك الساعة ظهَر الزوان حتّى هُوَ. جاو عبيد مول الدار وْقالو لو: «آ سيدي، واش ما زرعْتِ شي زرّيعة مزيانة في الفدّان ديالك؟ وْماين جا هَد الزوان؟» قالّوم: «شي رَجل عدو عمل هَد الشي.» وْقالو لو العبيد: «واش بغيتِنا نمشيو وْنجمعوه؟» قال: «لا، عندَك تقلّعو الزرع مع الزوان. خلّيوهُم يكبرو بْجوج مع بعطوم حتّى نالحصاد. وْفي وقت الحصاد غادي نقول نالحصّادين، جمعو في الُوّل الزوان وْحزموه في الحزمات باش يتّحرق، أمّا الزرع جمعوه في الخزين ديالي.»" عْطاهُم متال يَخُر وْقال: "كيشبه مُلك السماوات نالحُبّة د الخرْدل الّي ادّاها واحد الرَّجل وْزَرعاْ في الفدّان ديالو. هي الصغيرة في الحبوب كاملين. وَلكن ملّي كتكبر، هي الكبيرة في القطاني، وْكترجع شجرة حتّى كيجيو الطيور د السما وْكيعشّشو في الأغْصان ديالاْ." قالّوم متال يَخُر: "كيشبه مُلك السماوات نْشي خميرة الّي شبّرَتاْ واحد المراة وْخلّطَتاْ في تلاتة د العبرات د الدقيق حتّى خمّرَت العجينة كاملة." هَد الشي كامل تكلّم بِه يَسوع مع الجماعة بالأمْتال، وْبلا متال ما كان شي كيهدَر معهُم، باش يتحقّق ديك الشي الّي قال النَّبي: "غادي نفتَح دُقمي بالأمْتال وْغادي نعلّم بأمور مكتومة من خلق الدنيا." في ديك الوقت يَسوع خلّى الناس وْدخل نالدار. وْجاو نْعندو التلامد ديالو كيقولو: "شرح نّا متال الزوان د الفدّان." ردّ عليهُم وْقالّوم: "الرَّجل الّي كيزرع الزرّيعة المزيانة، هُوَ اِبن الإنسان. الفدّان هي الدنيا، والزرّيعة المزيانة هي أُوْلاد المُلك، والزوان هُوَ أُوْلاد الشرّير. العدو الّي زرعوْ هُوَ إبْليس، والحصاد هُوَ النهاية د الدنيا، والحصّادين هُمَ الملائكة. إيوا، فحال ما كيتّجمع الزوان وْكيتّحرق في العافية، هَيدا غادي يكون في آخر الدنيا. اِبن الإنسان غادي يصيفط الملائكة ديالو وْغادي يجمعو من المُلك ديالو الناس كاملين الّي هُمَ فاسدين والّي كيعملو الشَّرّ. وْغادي يسيّبوهُم في الفرّان د العافية. تمّاك غادي يكون البكا وْتغْزيز السّنان. في ديك الوقت غادي يضوّيو المتّاقيين فحال الشمس في مُلك باباهُم. الّي عندو الودْنين باش يسمع، لازم يسمع. "كيشبه مُلك السماوات نواحد الكنز مخبّع في شي فدّان، الّي جبروْ واحد الرَّجل وْخبّعوْ عاود، وْمن الفرْحة ديالو مشى وْباع كُل شي الّي عندو وْشرى ديك الفدّان. عاود كيشبه مُلك السماوات نواحد الرَّجل تاجر كيفتّش على الجواهر المزيانة. وْملّي جبر واحد الجوهرة، الت‍من ديالاْ كبير، مشى وْباع كُل شي الّي عندو وْشراها. عاود كيشبه مُلك السماوات نواحد الشبكة مسيّبة في البحَر الّي جمعَتْ كُل شكل د الحوت. وْملّي تعمّرَتْ، طلّعوها على الحاشية د البحَر وْݣلسو وْجمعو المزيانين في القفاف، أمّا القباحين سيّبوهُم على برّا. هَيدا غادي يكون في آخر الدنيا، غادي يخرجو الملائكة ويفرّقو القباحين من بين المتّاقيين، وْغادي يسيّبوهُم في الفرّان د العافية. تمّاك غادي يكون البكا وْتغْزيز السّنان." قالّوم يَسوع: "واش فهمْتو هَد الشي كامل؟" وْقالو: "إيّاه، يا رَبّي." قالّوم: "على ديك الشي كُل مُعلّم د الشريعة الّي رجَع تلميد في مُلك السماوات كيشبه نواحد الرَّجل مول شي دار، كيخرّج من التجارة ديالو حاجات جدادين وْقدامين." ملّي كمّل يَسوع هَد الأمْتال، مشى من تمّاك. وْملّي وصَل نالبلاد ديالو، كان كيعلّموم في بيوت العبادة ديالوم حتّى دهشو وْقالو: "ماين جا نْهَد الرَّجل هَد العِلم والمُعْجزات؟ واش ماشي هَدا هُوَ ولد النجّار؟ واش ماشي يمّاه مسمّية مَرْيَم والخوت ديالو يَعْقوب وْيوسف وْسِمْعان ويَهودا؟ وْخواتاتو واش ماشي هُمَ كاملين معنا؟ وْماين جا نْهَد الرَّجل هَد الشي كامل؟" وْكانو كيعترو فيه. أمّا يَسوع قالّوم: "ما كاين حتّى شي نَبي بلا تَوْقير، من غير في البلاد ديالو وْفي الدار ديالو." وْما عمل شي تمّاك بزّاف د المُعْجزات بْسباب قلّة الإيمان ديالوم. في ديك الوقت سمَع هيرودُس القايد بْخبر يَسوع. وْقال نالخدّامة ديالو: "هَدا هُوَ يوحَنّا المَعْمَدان. قام من بين الميّتين وْعلى ديك الشي كيعمل المُعْجزات." حيت هيرودُس كان شبّر يوحَنّا وْكتّفوْ وْسيّبوْ في الحبس بْسباب هيروديّا، المراة د فيلِبُّس خاه. حيت يوحَنّا كان كيقول لو: "ماشي حلال عليك تدّيها." وْواخّا كان باغي يقتلوْ، خاف من الناس، حيت كان عندوم فحال واحد النَّبي. وَلكن ملّي جا عيد الميلاد د هيرودُس، شطحَتْ بنْت هيروديّا في الوسط وْعجبَتْ هيرودُس. على ديك الشي عاهد وْحلف باش يعطيها كُل ما طلبَتْ. وْحيت قرّاتاْ يمّاها، قالت: "عْطيني هنايَ على واحد الصينيّة الراس د يوحَنّا المَعْمَدان." وْحزن المَلِك، وَلكن بْسباب الحلف والناس الّي ݣالسين معاه، آمر باش يعطيواه لاْ. وْصيفط وْقطّعو الراس د يوحَنّا في الحبس. وْجابو راسو في واحد الصينيّة وْعْطاواه نالبنْت، وْجابتوْ نيمّاها. ديك الساعة جاو التلامد ديالو وْرفدو الجُتّة ديالو وْدفنوه، وْمشاو وْخبرو يَسوع. ملّي سمَع يَسوع بْديك الشي، مشى من تمّا في الفلوكة نواحد الموطَع خالي بوحدو. وْساقو الناس الخبَر وْتَبعوه على رِجلوم من المُدُن. وْملّي خرج يَسوع، شاف الزحام وْحنّ عليهُم وْشافى المراطين ديالوم. ملّي جات العشيّة، جاو نْعندو التلامد ديالو كيقولو: "الموطَع خالي والوقت مشى. صيفط الناس باش يمشيو نالدشورة باش يشريو نْراسوم الماكلة." قالّوم يَسوع: "ما خصّوم شي يمشيو. عْطيوهُم أنتُمَ ما ياكلو." وْقالو لو: "هنايَ عندنا غير خمسة د الخُبزات وْجوج د الحوتات." قال: "جيبوهُم لي نْهنايَ." ديك الساعة آمر الجماعة يݣلسو على الربيع، وْشبّر الخمسة د الخُبزات والجوج د الحوتات وْعلّى عينو نالسما وْبارك وْقطّعوم، وْعْطى الخُبزات نالتلامد والتلامد عْطاو نالجماعة. وْكلاو كاملين وْشبعو. وْجمعو الّي شاط من الكسور طناشر قُفّة معمّرة. والّي كلاو كانو تقْريبًا خمس آلاف رَجل، زايد النسا والعيال. في الحين فرض يَسوع على التلامد ديالو يدخلو نالفلوكة ويسبقوه نالجّهة يَخرى حتّى يصيفط الناس فحالوم. وْمن بعدما صيفط الناس، طلَع نالجّبل بوحدو باش يصلّي، وْملّي جا الليل، كان تمّاك بوحدو. أمّا الفلوكة كانت فوسط البحَر كتضرباْ المواج، حيت الريح كان ضدّاْ. وْفي نصاصة الليل قريب الصباح، لحَق عليهُم يَسوع ماشّي على رِجلو فوق البحَر. وْملّي شافوه التلامد ماشّي فوق البحَر، دهشو وْقالو بلّي هُوَ شي شبح، وْغوّتو من الخوف. وْفي الحين هدَر معهُم يَسوع وْقال: "كونو هانيين، أنا هُوَ. ما تخافو شي." ديك الساعة ردّ عليه بُطْرُس وْقال: "يا رَبّي، إدا كُنْتِ أنتينا هُوَ، آمرني نجي نْعندك فوق الما." وْقال: "آجي." وْنزل بُطْرُس من الفلوكة وْمشى على الما باش يمشي نْعند يَسوع. وَلكن ملّي شاف الريح القوي، خاف، وْحيت بدا كيغرق، غوّت كيقول: "يا رَبّي، نجّيني!" في هزيزة مدّ يَسوع يَدّو وْشبّروْ وْقال لو: "آ قليل الإيمان، علاش شكّيتِ؟" وْملّي دخل نالفلوكة، تهدّن الريح. ديك الساعة الّي كانو في الفلوكة سجدو لو، كيقولو: "د بالصّحّ أنتينا هُوَ اِبن اللّٰه!" وْملّي قطعو البحَر، وَصلو نأرض جَنّيسارَت. ملّي عرفوه الرجال في ديك الموطَع، نشرو الخبر في ديك المنْطَقة كاملة وْجابو لو المراطين كاملين. وْكانو كيرغبوه باش يحاديو غير الجلايل د الجّلّابة ديالو. والناس كاملين الّي حاداواه، تشافاو. في ديك الساعة جاو نْعند يَسوع المُعلّمين د الشريعة والفرّيسيّين من أُورُشَليم، كيقولو: "علاش التلامد ديالك كيخالفو التقاليد د الشيوخ؟ حيت ما كيغسلو شي اليَدّين ديالوم ملّي كياكلو الخبز." ردّ عليهُم يَسوع وْقالّوم: "وْحتّى أنتُمَ علاش كتخالفو وَصيّة اللّٰه بْسباب التقاليد ديالكُم؟ حيت اللّٰه وصّى كيقول: «وَقّر باباك ويمّاك، والّي كيزبّل في باباه أَوْلا يمّاه، لازم يموت.» أمّا أنتُمَ كتقولو: «أَي واحد الّي عندو باش يعاون باباه أَوْلا يمّاه، إدا قالّوم: "كُل شي الّي عندي باش نعاونكُم، هُوَ هدية ناللّٰه،" ديك الساعة ما خصّوْ شي يكرّم الوالِدين ديالو.» وْهَيداك بطّلْتو وَصيّة اللّٰه بالتقاليد ديالكُم. آ المنافقين، راه الّي تنبّأ عليكُم إشَعْيا كان صحيح ملّي قال: «هَد القوم كيكرّموني بالشفايف ديالوم، أمّا القلب ديالوم بعيد عليَّ. باطل كيعبدوني وْكيعلّمو بالتعْليم الّي هُوَ من الوَصايا د الناس.»" وْعَيّط يَسوع نالناس وْقالّوم: "سمعو وْفهمو. ديك الشي الّي كيدخل نالدقوم ما كيوسّخ شي الإنسان. بالعكس، الّي كيخرج من الدقوم، هُوَ الّي كيوسّخوْ." ديك الساعة جاو التلامد ديالو وْقالو لو: "واش كتعرف بلّي الفرّيسيّين تعصّبو ملّي سمعو هَد الكلام؟" ردّ عليهُم يَسوع وْقال: "كُل غرس الّي ما غرسوْ شي بابا السماوي غادي يتقلّع. خلّيوهُم. هُمَ عُميان مݣوّدين العُميان. وِادا كان العمى كيݣوّد العمى، غادي يطيحو بْجوج بِهُم في شي حفرة." جاوب بُطْرُس وْقال لو: "فسّر نّا هَد المتال." قال يَسوع: "واش حتّى أنتُمَ باقي ما فهمْتو شي؟ واش ما كتفهمو شي بلّي كُل شي الّي كيدخل نالدقوم كيݣوز نالمعِدة وْكيخرج من الجسم؟ أمّا الّي كيخرج من الدقوم، كيجي من القلب، وْديك الشي كيوسّخ الإنسان. حيت من القلب كيخرجو الأفْكار القباحين، القتل، الزنا، الفساد، السرْقة، شهادة الزور، الكُفر. هَد الشي هُوَ الّي كيوسّخ الإنسان، أمّا باش ياكل باليَدّين بلا غسيل، هَد الشي ما كيوسّخ شي الإنسان." خرج يَسوع من تمّاك وْمشى نالمنْطَقة د صور وْصَيدا. وْواحد المراة كَنْعانيّة ماجّة من ديك الجّهة عيّطَتْ لو، كتقول: "رْحمْني، يا رَبّي، آ بن داود! بنْتي مسكونة بواحد الجنّ الّي كيعدّباْ بزّاف." أمّا يَسوع ما ردّ عليها حتّى بْكلمة. وْجاو التلامد ديالو وْطلبو لو وْقالو: "صيفطاْ فحالاْ، حيت هي كتغوّت من مورانا." ردّ عليهُم وْقال: "أنا مصيفط غير نالغنم المتْلوفة د الدار د إسْرائيل." وَلكن جات المراة وْسجدَتْ لو، كتقول: "يا رَبّي، عاونْني!" ردّ عليها وْقال: "ماشي مزيان نشبّر الخبز د الولاد وْنسيّبوْ نالجرا." وْقالت: "كاينة، يا رَبّي، وَلكن حتّى الجرا كياكلو من الفتاوت الّي كتطيح من الطيفور د مواليهُم." ديك الساعة جاوب يَسوع وْقالّاْ: "آ المراة، الإيمان ديالك كبير. غادي يكون عندك كيفما بغيتِ." وْتشافات البنيتة ديالاْ في ديك الساعة. خرج يَسوع من تمّاك وْمشى نْجهة البحَر د الجَليل. وْطلَع نالجّبل وْݣلس تمّاك، وْجاو نْعندو بزّاف د الناس وْمعهُم العُرَج والعُميان والمكْحوشين والزيازن ويَخرين بزّاف، وْنزّلوهُم عند الرِّجلين د يَسوع وْشافاهُم. تعجّبو الناس ملّي شافو الزيازن كيتكلّمو، والمكْحوشين صحاحو، والعُرَج كيمشيو، والعُميان كيشوفو. وْمجّدو الإلَه د إسْرائيل. وْعَيّط يَسوع نالتلامد ديالو وْقال: "كيعزّو عليَّ الناس، حيت هَدي تلت أيّام وْهُمَ ݣالسين معيَ وْما عندوم ما ياكلو. وْما بغيتْ شي نصيفطوم صايمين، وَقيلا يقدرو يسخفو في الطريق." ديك الساعة قالو لو التلامد ديالو: "ماين غادي يجينا في الخلا هَد المقْدار د الخبز حتّى يشبعو هَد الكتْرة د البشر؟" قالّوم يَسوع: "شحال د الخُبزات عندكُم؟" قالو: "سبعة، وْشي حويتات قلالين." وآمر الناس يݣلسو في الرحْبة، وْشبّر السبعة د الخُبزات والحوت وْشكر وْقطّع وْعْطى نالتلامد ديالو، والتلامد عْطاو نالناس. وْكلاو كاملين وْشبعو. وْجمعو الّي شاط من الكسور سبعة د السلال معمّرين. وْهَدوك الّي كلاو كانو أربع آلاف رَجل، زايد النسا والعيال. ديك الساعة صيفط الناس فحالوم وْدخل نالفلوكة وْمشى نالمنْطَقة د مَجَدَن. وْجاو نْعندو الفرّيسيّين والصدّوقيّين باش يجرّبوه، وْطلبو لو يورّي لوم شي علامة من السما. ردّ يَسوع وْقالّوم: "ملّي كتكون العشيّة، كتقولو: «غادي يكون الجَّو مزيّون، حيت السما حمرة.» وْفي الصباح: «غادي تطيح الشتا اليوما، حيت السما حمرة وْمعبّسة.» واش كتعرفو تميّزو الحالة د الجَّو، أمّا علامات الزمان ما كتقدرو شي تميّزوها؟ واحد الجيل قبيح وْفاسِد كيفتّش على شي علامة، وْما غادي تتّعطى لو حتّى علامة، من غير العلامة د النَّبي يونان." وْخلّاهُم وْمشى. ملّي وصلو التلامد ديالو نالجّهة يَخرى، كانو نساو يدّيو معهُم الخبز. وْقالّوم يَسوع: "شوفو وْردّو بالكُم من الخميرة د الفرّيسيّين والصدّوقيّين." وْتناقشو مع بعطوم، كيقولو: "حيت ما جيبْنا شي الخبز." وْعرف يَسوع وْقالّوم: "آ قلالين الإيمان، علاش كَتْـتناقشو مع بعطكُم، حيت ما عندكُم شي الخبز؟ واش باقي ما فهمْتو ولا عقلْتو على الخمسة د الخُبزات نالخمس آلاف د الناس وْشحال من قُفّة جمعْتو؟ أَوْلا السبعة د الخُبزات نالأربع آلاف وْشحال من سلّة جمعْتو؟ واش ما كتفهمو شي بلّي أنا ما تكلّمتْ شي معكُم على الخبز؟، وَلكن باش تردّو بالكُم من الخميرة د الفرّيسيّين والصدّوقيّين." ديك الساعة فهمو بلّي ما قال شي يردّو بالوم من الخميرة د الخبز، وَلكن من تعاليم الفرّيسيّين والصدّوقيّين. ملّي جا يَسوع نالمنْطَقة د قَيصَريّة د فيلِبُّس، سقصى التلامد ديالو كيقول: "شنّو كيقولو الناس على اِبن الإنسان، شكون أنا؟" قالو: "البعض كيقولو يوحَنّا المَعْمَدان، ويَخرين إيليّا، ويَخرين إرْميا أَوْلا واحد من الأَنْبياء." قالّوم: "وانتُمَ، شنّو كتقولو عليَّ؟ شكون أنا؟" ردّ سِمْعان بُطْرُس وْقال: "أنتينا هُوَ المسيح اِبن اللّٰه الحيّ." وْردّ يَسوع وْقال لو: "مبروك أنتينا، آ سِمْعان بن يونا، حيت اللحم والدم ما ورّاو لِك شي هَد الشي، وَلكن بابا الّي في السما هُوَ الّي ورّاه لك. وانا كنقول لك، أنتينا بُطْرُس وْعلى هَد الصخْرة غادي نبني الكنيسة ديالي والبيبان د الهاوية ما غادي شي يغلبو عليها. وْغادي نعطيك المفاتح د مُلك السماوات، وْكُل ما كَتْربطوْ على الأرض غادي يكون مرْبوط في السما، وْكُل ما تحلّوْ على الأرض غادي يكون محْلول في السما." في ديك الوقت وصّى التلامد ديالو باش ما يقولو نْحتّى واحد بلّي هُوَ المسيح. من ديك الساعة بدا يَسوع كَيْـبيّن نالتلامد ديالو بلّي لازم عليه يمشي نأُورُشَليم ويتعدّب بزّاف على يد الشيوخ وْرُؤَساء المسؤولين في بيت المَقْدس والمُعلّمين د الشريعة، ويقتلوه، وْفي اليوم التالت يرجع بالروح. وادّاه بُطْرُس بوحدو وْبدا كيوبّخوْ، كيقول: "حاشاك، يا رَبّي، ما يكون لك شي هَد الشي." دار يَسوع وْقال نْبُطْرُس: "بعّد عليَّ، آ الشيطان. أنتينا رجعْتِ عترة لِلي، حيت ما كتفكّر شي في أمور اللّٰه، وَلكن في أمور الناس." ديك الساعة قال يَسوع نالتلامد ديالو: "إدا بغى شي واحد يجي من مورايَ، لازم ينكر نفسو ويرفد الصليب ديالو ويتبَعني. حيت الّي بغى ينجّي نفسو، غادي يخسراْ، والّي كيخسر نفسو بْسبابي، غادي يجبراْ. حيت شنّو غادي ينفع الإنسان إدا ربح الدنيا كاملة وْخسر نفسو؟ أَوْلا شنّو يقدر يعطي الإنسان فْعوط نفسو؟ حيت اِبن الإنسان غادي يجي في مجد باباه مع الملائكة ديالو، وْديك الساعة غادي يجازي كُل واحد حسب الأعْمال ديالو. كنقول لكُم الحقّ، البعض من الّي واقفين هنايَ ما غادي شي يدوقو الموت حتّى يشوفو اِبن الإنسان ماجي في المُلك ديالو." من بعد ستّ أيّام، طلَع يَسوع نواحد الجّبل عالي وادّى معاه بُطْرُس ويَعْقوب وْيوحَنّا خاه بوحدوم. وْتبدّلَت الصِّفة ديالو قدّاموم وْضوّى وَجهو فحال الشمس وْرجعَت الجلّابة ديالو بيطة فحال الضَّو. وْظهَر لوم موسى وإيليّا، كيتهاودو مع يَسوع. ديك الساعة هدَر بُطْرُس وْقال نيَسوع: "يا رَبّي، مزيان نكونو هنايَ. وِادا بغيتِ، نعدّلو هنايَ تلاتة د القياطن، لِلِك واحد وْنْموسى واحد وْنإيليّا واحد." ملّي كان باقي كيتكلّم بُطْرُس، واحد السحابة ضاوية ظلّلَتْ عليهُم وْواحد الصوت من السحابة قال: "هَدا هُوَ اِبني العزيز الّي بِه كنفرح. سمعو لو." ملّي سمعو هَد الشي، طاحو التلامد على الوجوه ديالوم وْخافو بزّاف. وْجا يَسوع وْحاداهُم وْقال: "وَقفو وْما تخافو شي." وْعلّاو العينين ديالوم وْما شافو حتّى واحد، غير يَسوع بوحدو. وْملّي كانو هابطين من الجّبل، وصّاهُم يَسوع وْقالّوم: "ما تخبرو حتّى واحد بْهَد الشي الّي شفْتو حتّى يقوم اِبن الإنسان من بين الميّتين." وْسقصاواه التلامد ديالو وْقالو: "وْعلاش كيقولو المُعلّمين د الشريعة بلّي لازم يجي إيليّا في الُوّل؟" ردّ يَسوع وْقالّوم: "د بالصّحّ غادي يجي إيليّا في الُوّل ويصلح كُل شي، وَلكن كنقول لكُم بلّي إيليّا راه جا وْما عرفوه شي، وَلكن عملو فيه كُل ما بغاو. وْهَيدا اِبن الإنسان حتّى هُوَ غادي يتعدّب على يَدّوم." ديك الساعة فهمو التلامد بلّي هدَر معهُم على يوحَنّا المَعْمَدان. ملّي رجعو نْعند الجماعة د الناس، جا نْعندو واحد الرَّجل وْسجد لو، وْقال: "يا رَبّي، رْحم بني، حيت هُوَ كيتّصرع وْكيتعدّب بزّاف، وْكيطيح بزّاف في العافية وْفي الما. وْجيبْتو نالتلامد ديالك، وْما قدرو شي يشافيواه." ردّ يَسوع وْقال: "آ الجيل بلا إيمان والشرّير! حتّى لاين غادي نكون معكُم؟ حتّى لاين غادي نتحمّلكُم؟ جيبوه لي نْهنايَ." وْنهَط فيه يَسوع وْخرج منّو الجنّ وْتشافى العايل في ديك الساعة. وْجاو التلامد نْعند يَسوع بوحدوم وْقالو: "علاش حنايَ ما قدرْنا شي نخرّجوه؟" قالّوم يَسوع: "من قلّة إيمانكُم. كنقول لكُم الحقّ، كَكان عندكُم الإيمان قدّ واحد الحُبّة د الخرْدل، كَقُلْتو نْهَد الجّبل «حيّد من هنايَ نْتمّاك،» وْغادي يتحوّل، وْحتّى حاجة ما غادي تكون مستحيلة عندكُم. [ أمّا هَد الشكل من الشياطين ما كيخرج غير بالصلاة والصيام.]" ملّي كانو مجْموعين في الجَليل، قالّوم يَسوع: "غادي يدفعو اِبن الإنسان ناليَدّين د الناس، وْغادي يقتلوه، وْفي النهار التالت غادي يتّبعت حيّ." والتلامد حزنو بزّاف. ملّي وَصلو نْكَفْرِناحوم، جاو هَدوك الّي كيجمعو الضريبة د جوج دراهم نْعند بُطْرُس وْقالو: "واش ما كيخلّص شي المُعلّم ديالكُم الضريبة؟" قال: "إيّاه." وْملّي دخل نالدار، سبقوْ يَسوع، كيقول: "شنّو ظهَر لك، آ سِمْعان؟ من عند مَن كيشبّرو ملوك الأرض العشور أَوْلا الضريبة؟ واش من أُوْلادوم أَوْلا من البرّانيّين؟" قال لو بُطْرُس: "من البرّانيّين." قال لو يَسوع: "وعلى ديك الشي الولاد محرّرين. وَلكن باش ما نحرجوهُم شي، مْشي نالبحَر وْسيّب الصنّارة والحوتة الُولى الّي كتطلع، شبّراْ. وْملّي تفتح الدقوم ديالاْ، غادي تجبر شي فلوس، ادّيها وْعْطيها لِلوم عليَّ وْعليك." في ديك الوقت جاو التلامد نْعند يَسوع، كيقولو: "شكون هُوَ الكبير في مُلك السماوات؟" وْعَيّط يَسوع على واحد العايل وْوقّفوْ فوسطوم وْقال: "كنقول لكُم الحقّ، إدا ما رجَعْتو شي وْتكونو فحال العيال الستيتْوين، ما غادي شي تدخلو نْمُلك السماوات. الّي كيحني راسو فحال هَد العايل، هُوَ الكبير في مُلك السماوات. والّي كيرحّب بواحد العايل فحال هَدا بِاسمي، هُوَ كيرحّب بيَّ. وَلكن كُل واحد الّي كيعتّر واحد من هَد الستيتْوين الّي كيآمنو بيَّ، راه حسَن لِلو كَكان علّق في عنقو واحد الحجْرة د الرحى وْغرق في قاع البحَر. الويل نالدنيا بْسباب العترات، حيت بلا شكّ غادي يجيو العترات، وَلكن الويل نْديك الإنسان الّي كيجيو على يَدّو! وِادا عتّرَتك يَدّك أَوْلا رِجلك، قطّعوم وْسيّبوم عليك. حْسَن لك تدخل نالحياة أعرج أَوْلا مشْلول فْعوط ما تتسيّب في النار الدايمة وْباقي عندك جوج د اليَدّين أَوْلا جوج د الرِّجلين. وِادا عتّرَتك عينك، قلّعاْ وْسيّباْ عليك. حْسَن لك تدخل نالحياة عوار فْعوط ما تتسيّب في النار د جهنّم وْباقي عندك جوج د العينين. كونو على بال، ما تحڭرو حتّى واحد من هَد الستيتْوين، حيت أنا كنقول لكُم بلّي الملائكة ديالوم في السما دائمًا كيشوفو الوجَه د بابا الّي في السما. حيت اِبن الإنسان جا باش ينجّي أَي واحد الّي كان متْلوف. شنّو ظهَر لكُم؟ إدا كانت عند واحد الرَّجل مية د الغنم وْضاعت واحدة مِنّاْ، واش ما غادي شي يخلّي التسعود وْتسعين ويمشي نالجّبولة ويفتّش على الّي متْلوفة؟ وِادا جبراْ، كنقول لكُم الحقّ، غادي يفرح بِها كتَر من التسعود وْتسعين الّي ما ضاعو شي. هَيدا باباكُم الّي في السما ما بغى شي يتّهلك شي واحد من هَد الستيتْوين. "إدا تعدّى عليك خاك، مْشي وْوبّخوْ بينك وْبينو بوحدكُم. إدا سمَع منّك، راه ربحْتِ خاك. وَلكن إدا ما سمَع شي، ادّي معك عاود واحد أَوْلا جوج د الشهود باش تـتبّت كُل كلمة على الدقوم د جوج أَوْلا تلاتة د الناس. وِادا ما سمَع شي مِنّوم، قولاْ نالكنيسة. وِادا ما سمَع شي من الكنيسة، عملوه فحال شي وَتَني أَوْلا قبّاط الضرائب. كنقول لكُم الحقّ، كُل ما كَتْربطوه على الأرض غادي يكون مرْبوط في السما، وْكُل ما كتحلّوه على الأرض غادي يكون محْلول في السما. كنقول لكُم عاود، إدا اتَّفقو جوج منكُم في الأرض على الحاجة الّي كيطلبوها، راه بابا الّي في السما غادي يعملاْ لِلوم. حيت فاين ما اتّجمعو جوج أَوْلا تلاتة بِاسمي، تمّاك كنكون أنا فوسطوم." في ديك الساعة جا نْعندو بُطْرُس وْقال لو: "يا رَبّي، شحال د المرّات كيتعدّى عليَّ خاي وانا خصْني نسمح لو؟ واش حتّى نْسبعة د المرّات؟" قال لو يَسوع: "ما كنقول لك شي حتّى نْسبعة د المرّات، وَلكن حتّى نْسبعين مرّة على سبعة د المرّات. على ديك الشي كيشبه مُلك السماوات نواحد المَلِك الّي بغى يحاسب العبيد ديالو، وْملّي بدا كيحاسبوم، جابو لو واحد الّي كيسال لو ملايين د الدراهم. وْحيت ما كان شي عندو باش يخلّص، وصّى سيّدو يـبيعوه، هُوَ وْمراتو وْولادو وْكُل ما عندو، ويخلّص الدين. ديك الساعة ركع العبد وْسجد لو، كيقول: «آ سيدي، صبر عليَّ وْنخلّصك في كُل شي.» السيّد د ديك العبد حنّ عليه وْطلقوْ وْسمح لو في الدين. ملّي خرج ديك العبد، جبر واحد من العبيد صحابو الّي كان كيسال لو عشر آلاف درهم. وْشبّر فيه وْشنق عليه، كيقول: «خلّصني في الّي كنسال لك.» ديك الساعة ركع العبد قدّام صاحبو وْرغبوْ، كيقول: «صبر عليَّ وْنخلّصك في كُل شي.» وْما بغى شي. بالعكس، مشى وْسيّبوْ في الحبس حتّى يخلّص الدين. ملّي شافو العبيد صحابو الّي وقَع، حزنو بزّاف وْجاو وْعاودو نْسيّدوم كُل ما وقَع. ديك الساعة عَيّط عليه سيّدو وْقال لو: «آ العبد القبيح، ديك الدين كامل سمحْتْ لك فيه حيت رغبْتِني. واش ما كان شي واجب عليك حتّى أنتينا ترحم العبد خاك فحال ما رحمْتك أنا؟» ديك الساعة تعصّب سيّدو وْدفعوْ نِلّي كيعدّبو حتّى يخلّص كُل شي الّي كان كيسال لو. وْهَيدا بابا السماوي غادي يعمل معكُم إدا ما سمح شي من قلبو كُل واحد نْخاه." ملّي كمّل يَسوع هَد الكلام، مشى من الجَليل وْوصَل نْجِهة اليَهوديّة من الأُرْدُن لْهيه، وْتبعوه بزّاف د الناس وْشافاهُم تمّاك. ديك الساعة جاو نْعندو الفرّيسيّين باش يجرّبوه، كيقولو لو: "واش حلال على الرَّجل يطلّق المراة ديالو على أي سبّة؟" ردّ عليهُم وْقالّوم: "واش ما قريتو شي بلّي الّي خَلقوم من البداية خَلقوم دكَر وْلانْتى؟ وْقال: «على ديك الشي خصّ الرَّجل يخلّي باباه وْيمّاه ويلصق في مراتو، ويكونو بْجوج جسد واحد.» هَيدا ما كيبقاو شي جوج، وَلكن جسد واحد. إدَن، الّي جمعوْ اللّٰه، ما يفرقوْ شي البشر." قالو لو: "إدَن، علاش وصّى موسى باش يعطيها واحد الكاغط د الطلاق ويطلّقاْ؟" قالّوم: "بْسباب القصوحيّة د القلب ديالكُم، سمَح لكُم موسى تطلّقو النسا ديالكُم، وَلكن من البداية ما كان شي هَيدا. وْكنقول لكُم بلّي كُل واحد الّي كيطلّق المراة ديالو على شي سبّة من غير الزِّنا، وْكَيْجوِج بواحدة يَخرى، كيزني. والّي كَيْجوِج بالمطلّقة، راه كيزني." قالو لو التلامد ديالو: "إدا كانت القضية د الرَّجل مع المراة هَيداك، من الاحسن ما يتجوّج شي." وْقالّوم: "ماشي الناس كاملين الّي يقدرو يقبلو هَد الكلام، وَلكن الّي اتّعطى لوم. حيت كاينين المهْروزين الّي خلقو هَيدا من الكرش د يمّاهُم، وْكاينين المهْروزين الّي جعلوهُم هَيدا الناس، وْكاينين الّي ما كيتجوّجو شي، حيت سبّلو نَفسوم نْمُلك السماوات. الّي يقدر يقبل هَد الشي، خلّيه يقبلوْ." من بعد ديك الشي، جابو لو شي د العيال ستيتْوين باش يعمل اليَدّين ديالو عليهُم ويصلّي. أمّا التلامد نهطو فيهُم. ديك الساعة قالّوم يَسوع: "خلّيو العيال الستيتْوين يجيو نْعندي وْما تمنعوهُم شي، حيت مُلك السماوات هُوَ ديال هَدوك الّي فحالوم." وْمن بعدما عمل يَدّو عليهُم، مشى من تمّاك. وْديك الساعة جا نْعندو شي واحد وْقال لو: "آ المُعلّم، شْمِن هي الحاجة الصالحة الّي نقدر نعملاْ باش تكون لي الحياة الأبديّة؟" قال لو: "علاش كتسقصيني على الّي صالح؟ ما كاين حتّى واحد صالح من غير اللّٰه. وَلكن إدا بغيتِ تدخل نالحياة، عمل بالوَصايا." قال لو: "شْمِن وَصايا؟" قال لو يَسوع: "ما تقتل شي، ما تزني شي، ما تسرق شي، ما تشهد شي بالزور، وَقّر باباك ويمّاك، وْعزّ جارك فحال نفسك." وْقال لو الشابّ: "هَد الشي كامل عملْتوْ. شنّو باقي خصْني؟" قال لو يَسوع: "إدا بغيتِ تكون كامل، مْشي وْبيع كُل ما عندك وْعْطيه نالمساكن وْغادي يكون لك الكنز في السما، وآجي وْتبَعني." ملّي سمَع الشابّ ديك الكلام، مشى مغبّن، حيت كان عندو بزّاف د الفلوس. ديك الساعة قال يَسوع نالتلامد ديالو: "كنقول لكُم الحقّ، صعيب باش يدخل واحد الغني نْمُلك السماوات. كنقول لكُم عاود، واحد الجمل ساهل عليه يݣوز من العين د اليِبْرة من واحد الغني يدخل نْمُلك اللّٰه." ملّي سمعوه التلامد، تعجّبو بزّاف وْقالو: "إيوا، شكون يقدر ينجا؟" ديك الساعة شاف فيهُم يَسوع وْقالّوم: "هَد الشي مستحيل عند الناس، وَلكن عند اللّٰه كُل شي يقدر يكون." ديك الساعة جاوب بُطْرُس وْقال لو: "ها حنايَ سمحْنا في كُل شي وْتبَعْناك. شنّو غادي يكون لِنا؟" وْقالّوم يَسوع: "كنقول لكُم الحقّ، أنتُمَ الّي تبعْتوني، ملّي يݣلس اِبن الإنسان على العرش د مجدو في التجديد، غَد تݣلسو حتّى أنتُمَ على طناشر عرش، وْغَد تحكمو على الطناشر قبيلة د إسْرائيل. وْكُل واحد الّي كيسمَح في الديور أَولا في الخوت أَولا في الخواتات أَولا في باباه أَولا في يمّاه أَولا في الولاد أَولا في الفدادن بْسباب اِسمي، غادي يقبط مية مرّة كتَر، ويورت الحياة الأبديّة. وَلكن بزّاف د الُوّلين، غادي يكونو هُمَ الاخّريّين، والاخّريّين غادي يكونو هُمَ الُوّلين. "حيت مُلك السماوات كيشبه نواحد الرَّجل مول الدار الّي خرج في الصباح بكري باش يكري الخدّامة نالجّنان ديالو. واتَّفق مع الخدّامة بْدينار في النهار وْصيفطوم نالجّنان ديالو. خرج تقْريبًا مع تسعود د الصباح، وْشاف يَخرين واقفين في السوق بطّالين، وْقالّوم: «مْشيو حتّى أنتُمَ نالجّنان وْنعطيكُم الحقّ ديالكُم.» وْمشاو. وْخرج تقْريبًا مع الطناش د الصباح والتلاتة د العشية، وْعمل هَيداك عاود. وْتقْريبًا مع الخمسة، خرج عاود، وْجبر يَخرين واقفين بطّالين، وْقالّوم: «علاش أنتُمَ واقفين هنايَ النهار كامل بطّالين؟» قالو لو: «حيت ما كرانا حتّى واحد.» قالّوم: «مْشيو حتّى أنتُمَ نالجّنان.» ملّي جات العشيّة، قال مول الجّنان نالنائب ديالو: «عَيّط على الخدّامة وْعْطيهُم الأُجرة ديالوم، وْبدا من الاخّريّين حتّى نالُوّلين.» وْجاو الّي وَصلو مع الخمسة وْشبّر كُل واحد دينار. ملّي جاو الُوّلين، ظنّو بلّي غادي يشبّرو كتَر، وْشبّرو حتّى هُمَ كُل واحد دينار. وْملّي شبّروه، تشكّاو على مول الدار، وْقالو: «هَد الاخّريّين خدمو غير ساعة واحدة وْساويتِهُم معنا حنايَ الّي رفدْنا التقال د النهار وْقيّلنا في القايلة كنخدمو.» ردّ على واحد مِنّوم وْقال: «آ صاحبي، ما ظلمْتك شي. واش ما اتَّفقْتِ شي معيَ بْدينار؟ شبّر الّي هُوَ ديالك وْمْشي فحالك. أنا بغيتْ نعطي نْهَد الاخّري قدّك. واش ماشي حلال عليَّ نعمل الّي بغيتْ بْديالي؟ أَوْلا عينك قبيحة حيت أنا مزيان؟ هَيدا غادي يكونو الاخّريّين الُوّلين، والُوّلين الاخّريّين.»" ملّي كان يَسوع طالع نأُورُشَليم، ادّى معاه الطناش د التلامد بوحدوم في الطريق وْقالّوم: "ها حنايَ طالعين نأُورُشَليم وْغادي يدفعو اِبن الإنسان نْرُؤَساء المسؤولين في بيت المَقْدس والمُعلّمين د الشريعة وْغادي يحكمو عليه بالموت، ويسلّموه نالوَتَنيّين باش يـبهْدلو بِه ويعصّيواه ويصلّبوه، وْفي النهار التالت غادي يرجع بالروح." في ديك الساعة جات نْعندو يمّاهُم د أُوْلاد زَبَدي مع أُوْلاداْ وْسجدَتْ وْطلبَتْ منّو واحد الحاجة. قالّاْ يَسوع: "شنّو بغيتِ؟" قات لو: "آمر باش يݣلسو هَد الجوج د أُوْلادي واحد على الّيمين ديالك ويَخُر على الشمال في المُلك ديالك." وْردّ يَسوع وْقال: "ما كتعرفو شي شنّو كتطلبو. واش تقدرو تشربو الكاس الّي غادي نشربوْ أنا؟" قالو لو: "نقدرو." قالّوم: "الكاس ديالي غَد تشربوه د بالصّحّ. أمّا الݣلسة على الّيمين ديالي وْعلى الشمال ديالي، ماشي بْـيَدّي باش نعطيها، غير نِلّي وَجّداْ لوم بابا." ملّي سمعو العشرة د التلامد، غضبو على الجوج د الخوت. ديك الساعة عَيّط لوم يَسوع وْقال: "أنتُمَ كتعرفو بلّي حُكّام الأُمَم كيتسلّطو عليهُم، والكبارين كيسيطرو عليهُم، وَلكن ما خصّوْ شي يكون هَيدا بيناتكُم. بالعكس، الّي بغى يكون الكبير فيكُم، لازم يكون الخدّام ديالكُم، والّي بغى يكون الُوّل فيكُم، خصّوْ يكون العبد ديالكُم، فحال اِبن الإنسان الّي ما جا شي باش يخدموه، وَلكن باش يخدموم وْباش يفدي بزّاف د الناس بْحياتو." ملّي كانو خارجين من أَريحا، تبعوه بزّاف د الناس. وْجوج د العُميان ݣالسين في جنب الطريق، ملّي سمعو بلّي يَسوع ݣايز، غوّتو كيقولو: "رْحمنا، يا رَبّي، آ بن داود." وْنَهطو فيهُم الناس باش يسكتو. أمّا هُمَ زادو كيغوّتو وْكيقولو: "رْحمنا، يا رَبّي، آ بن داود!" وْوقَف يَسوع وْعَيّط لوم وْقال: "شنّو بغيتوني نعمل لكُم؟" قالو لو: "يا رَبّي، بغينا يتّفتحو العينين ديالنا." وْحنّ عليهُم يَسوع وْحادى العينين ديالوم، وْفي هزيزة رجعو كيشوفو، وْتبعوه. ملّي قرّبو نأُورُشَليم وْوَصلو نْبيت فاجي عند جبل الزيتون، في ديك الوقت صيفط يَسوع جوج د التلامد، كيقولّوم: "مْشيو نالقرية الّي قدّامكُم وْفي الحين غَد تجبرو واحد الحمارة مرْبوطة والدحش معها. طلقوهُم وْجيبوهُم لي. وِادا قال لكُم شي واحد شي حاجة، قولو لو: «الرَّبّ كيحْتاجوم وْفي الحين غادي يصيفطوم.»" كان هَد الشي كامل باش يتحقّق ديك الشي الّي قال النَّبي: "قولو نْبنْت صِهْيون: راه المَلِك ديالك ماجي نْعندك متواضع وْراكب على حمارة وْدحش، ولد الحمارة." وْمشاو التلامد وْعملو فحال ما وصّاهُم يَسوع. وْجابو الحمارة والدحش وْنزّلو الحوايج ديالوم عليهُم وْݣلس يَسوع عليهُم. وْواحد الجماعة كبيرة د الناس فرّشو الحوايج ديالوم في الطريق، ويَخرين قطّعو الأغْصان من الشجار وْفرّشوهُم في الطريق. والناس الّي سبقو والّي تبعو كانو كيغوّتو وْكيقولو: "أُوصَنّا نْبِن داود! مبْروك هُوَ الّي ماجي بِاسم الرَّبّ، أُوصَنّا في العلو." ملّي دخل نأُورُشَليم، تفتـنَت المدينة كاملة، كتقول: "شكون هُوَ هَدا؟" وْقالو الناس: "هَدا يَسوع، النَّبي الّي من الناصِرة د الجَليل." وْدخل يَسوع نْبيت المَقْدس د اللّٰه وْجرّى على الناس كاملين الّي كانو كَيْبيعو وْكيشريو في بيت المَقْدس وْقْلب الطيافر د الصرارفيّة والكراسة د البيّاعين د الحمام، وْقالّوم: "مكتوب، «الدار ديالي غادي تْتسمّى بيت الصلاة،» وانتُمَ ردّيتوها مغارة د السرّاق!" وْجاو نْعندو العُميان والعُرَج في بيت المَقْدس وْشافاهُم. ملّي شافو رُؤَساء المسؤولين والمُعلّمين د الشريعة المُعْجزات الّي عمل، والعيال كيغوّتو في بيت المَقْدس وْكيقولو: "أُوصَنّا نْبِن داود،" تعصّبو، وْقالو لو: "واش كتسمع الّي كيقولو هَدو؟" وْقالّوم يَسوع: "إيّاه، واش عُمركُم ما قريتو الآية: «من دقوم الصُّبْيان والّي كيرطعو كمّلْتِ التهليل؟»" وْخلّاهُم وْخرج على برّا من المدينة نْبيت عَنْيا وْبات تمّاك. في الصباح، ملّي كان راجع نالمدينة، جاه الجّوع. وْشاف واحد الشجرة د الكرْموس حدا الطريق وْقرّب لِلاْ وْما جبر فيها حتّى شي حاجة من غير الوراق، وْقالّاْ: "من دابا نْفوق ما تكون فيك حتّى شي فاكهة." وْيبسَت الكرْموسة في هزيزة. ملّي شافو التلامد ديك الشي، تعجّبو وْقالو: "كيفاش يبسَت الكرْموسة في هزيزة؟" ردّ يَسوع وْقالّوم: "كنقول لكُم الحقّ، إدا كان عندكُم إيمان وْما تشكّو شي، ما غادي شي تعملو الّي وقَع نالكرْموسة وْكان، وَلكن إدا قُلْتو نْهَد الجّبل يتحيّد ويتسيّب في البحَر، غادي يكون ديك الشي. وْكُل ما كتطلبو في الدعاء بالإيمان غَد تقبطوه." ملّي جا نْبيت المَقْدس، جاو نْعندو رُؤَساء المسؤولين والشيوخ د الشعب وْهُوَ كيعلّم وْقالو لو: "بْشْمِن سُلطة كتعمل هَد الشي؟ وْشكون الّي عْطاك هَد السلْطة؟" ردّ عليهُم يَسوع وْقال: "وحتّى أنا غادي نسقصيكُم على واحد القضية، وِادا قُلْتوها لي، غادي نقول لكُم حتّى أنا بْشْمِن سُلطة كنعمل هَد الشي. المعموديّة د يوحَنّا، ماين كانت؟ من السما أَوْلا من البشر؟" تشاورو مع بعطوم، كيقولو: "إدا قُلْنا من السما، غادي يقول نّا: «وْعلاش ما تيّقْتوه شي؟» وِادا قُلْنا من البشر، كنخافو من الشعب، حيت يوحَنّا عندوم كاملين فحال واحد النَّبي." وْردّو على يَسوع وْقالو: "ما كنعرفو شي." وْقالّوم يَسوع: "حتّى أنا ما غادي شي نقول لكُم بْشْمِن سُلطة كنعمل هَد الشي." وْقالّوم: "شنّو ظهَر لكُم؟ كان واحد الرَّجل عندو جوج د الولاد وْجا نْعند الُوّل وْقال لو: «آ بني، مْشي تخدم اليوما في الجّنان ديالي.» وْردّ وْقال: «ما بغيتْ شي.» وَلكن في الاخّر ندم وْمشى. وْجا نْعند التاني وْقال لو فحال نالُوّل. وْردّ وْقال: «واخّا، آ سيدي.» وْما مشى شي. شكون من هَد الجّوج الّي عمل الإرادة د باباه؟" قالو لو: "الُوّل." قالّوم يَسوع: "كنقول لكُم الحقّ بلّي القبّاطة د الضرائب والفاسدات غادي يسبقوكُم نْمُلك اللّٰه. حيت يوحَنّا جاكُم في طريق التقوى وْما آمنْتو شي بِه، أمّا القبّاطة والفاسدات آمنو بِه. وانتُمَ، ملّي شفْتو، ما ندمْتو شي من بعد باش تآمنو بِه. "سمعو متال يَخُر: كان واحد الرَّجل مول الدار غرس واحد الجّنان د العنب وْدوّر بِه الزرب، وْحفر فيه واحد المعْصرة د الخمر وْبنى واحد البُرْج وْكراه نْشي ربّاعة، وْسافر. وْملّي قرّب وقت الغلّة، صيفط عبيدو نالربّاعة باش يجمعو حقّو من الغلّة. وَلكن الربّاعة شبّرو العبيد ديالو، وْواحد ضربوه، وْواحد يَخُر قتلوه، وْواحد يَخُر رجموه. صيفط عاود عبيد يَخرين كتَر من الُوّلين، وْعملو لوم فحال الّي عملو بالُوّلين. في الآخر صيفط لوم بنو وْقال: «غادي يوقّرو بني.» أمّا الربّاعة، ملّي شافو الولد، قالو مع بعطوم: «هَدا هُوَ الوارت. آجيو نقتلوه وْندّيو الورت ديالو.» وْشبّروه وْخرّجوه على برّا من الجّنان وْقتلوه. ملّي غادي يجي مول الجّنان، شنّو غادي يعمل نْديك الربّاعة؟" قالو لو: "غادي يقضي على ديك الأشْرار بلا رحْمة، ويدفع الجّنان نْشي ربّاعة يَخرين الّي غادي يعطيو الغلّة في الوقت ديالاْ." قالّوم يَسوع: "واش عُمركُم ما قريتو في الكتوبة: «الحجْرة الّي رفضوها البنّاية، هي رجعَتْ راس القنت. الرَّبّ هُوَ الّي عمل هَد الشي، وْهُوَ عجوبة في العينين ديالنا؟» على ديك الشي كنقول لكُم بلّي مُلك اللّٰه غادي يتزوّل لكُم وْغادي يتّعطى نواحد القوم الّي غادي يجيبو الغلّة ديالاْ. وْكُل واحد الّي كيطيح على هَد الحجْرة غادي يتهرّس، والّي هَد الحجْرة كتطيح عليه غادي تسَحقوْ." وْملّي سمعو رُؤَساء المسؤولين والفرّيسيّين الأمْتال ديالو، عرفو بلّي تكلّم عليهُم. وْملّي كانو كيفتّشو على الطريقة باش يقبطوه، خافو من الناس، حيت كان عندوم فحال واحد النَّبي. ديك الساعة ردّ يَسوع وْتكلّم معهُم عاود بالأمْتال كيقول: "كيشبه مُلك السماوات نواحد المَلِك الّي عمل العرس نولدو. وْصيفط العبيد ديالو باش يعيّطو على المعْروطين نالعرس، وْما بغاو شي يجيو. عاود صيفط عبيد يَخرين وْوصّاهُم: «قولو نالمعْروطين: "ها انا وجّدْتْ العراطة ديالي، وْدبحْت التيران والعجولة ديالي السمانين وْكُل شي موجّد. آجيو نالعُرس."» وَلكن هُمَ حڭروه، وْفيهُم الّي مشى نالفدّان ديالو، ويَخُر نالتجارة ديالو، والباقي شبّرو في العبيد وْزبّلو فيهُم وْقتلوهُم. ملّي سمَع المَلِك هَد الشي، تعصّب وْصيفط العسْكر ديالو وْهلك ديك القتّالين وْحرق المدينة ديالوم. ديك الساعة قال نالعبيد ديالو: «العُرس موجّد، أمّا المعْروطين ما كانو شي كيسْتاهلو. مْشيو نْمفارق الطُرُق وْكُل واحد الّي جبرْتوه، عيّطو عليه نالعُرس.» وْخرجو ديك العبيد نالطرْقان وْجمعو الناس كاملين الّي جبروهُم، قباحين وْمزيانين، وْتعمّر العُرس بالضياف. وْملّي دخل المَلِك باش يشوف الضياف، شاف تمّاك واحد الرَّجل ما لابس شي الحوايج د العُرس. وْقال لو: «آ صاحبي، كيفاش دخلْتِ نْهنايَ وْما عندك شي الحوايج د العُرس؟» وْبقا ساكت. ديك الساعة قال المَلِك نالعبيد: «ربطو الرِّجلين واليَدّين ديالو، وادّيواه وْسيّبوه في الظلام على برّا.» تمّاك غادي يكون البكا وْتغْزيز السّنان. حيت كاينين بزّاف د المعْروطين، وَلكن المخْتورين قلالين." في ديك الساعة مشاو الفرّيسيّين وْتشاورو باش يحصّلو يَسوع في الكلام ديالو. وْصيفطو نْعندو التلامد ديالوم مع الهيرودُسيّين، كيقولو: "آ المُعلّم، كنعرفو بلّي أنتينا صادق وْكتعلّم بالحقّ طريق اللّٰه، وْما كتعمل شي الوجْهيّات، حيت ما كتشوف شي المظاهر د الناس. قول نّا، شنّو كيظهَر لك؟ واش حلال نعطيو الجزية نالقَيصَر أَوْلا لا؟" فطن يَسوع بالخديعة ديالوم وْقال: "علاش كتجرّبوني، آ المنافقين؟ ورّيوني فلوس الجزية." وْجابو لو واحد الدينار. قالّوم: "دمّن هَد التصْويرة والكتابة الّي على الدينار؟" وْردّو عليه: "ديال قَيصَر." وْقالّوم: "عْطيو الّي هُوَ ديال القَيصَر نالقَيصَر والّي هُوَ د اللّٰه ناللّٰه." ملّي سمعو هَد الكلام، تعجّبو وْخلّاواه وْمشاو. في ديك النهار، جاو نْعندو الصدّوقيّين، الّي كيقولو بلّي ما كاينة شي القيامة د الميّتين، وْسقصاواه، كيقولو: "آ المُعلّم، قال موسى: «إدا مات شي رَجل وْما عندو شي الولاد، لازم على خاه يتجوّج بالمراة ديالو ويعمل الدرّيّة نْخاه.» كانو عندنا سبعة د الخوت وْتجوّج الُوّل وْمات. وْحيت ما كانت شي عندو الدرّيّة، خلّى مراتو نْخاه. وْهَيدا التاني والتالت حتّى نالسابع. وْمن بعدوم كاملين، ماتت المراة حتّى هي. إدَن، في القيامة، من هَد السبعة، دمّن غادي تكون المراة؟ حيت كانت ديالوم كاملين." ديك الساعة ردّ يَسوع وْقالّوم: "أنتُمَ متْلوفين، حيت ما كتعرفو شي الكتوبة المقدّسة ولا قُدرة اللّٰه. حيت في القيامة ما غادي شي يجوّجو وْما غادي شي يتجوّجو، وَلكن غادي يكونو فحال ملائكة اللّٰه في السما. أمّا من جهة القيامة د الميّتين، واش ما قريتو شي الّي قال لكُم اللّٰه؟ قال: «أنا إلَه إبراهيم وإلَه إسْحاق وإلَه يَعْقوب.» اللّٰه ماشي الإلَه د الميّتين، وَلكن الإلَه د الحيّين." ملّي سمعو الجماعة د الناس، تعجّبو من التعْليم ديالو. أمّا الفرّيسيّين، ملّي سمعو بلّي سكّت الصدّوقيّين، اتّجمعو مع بعطوم. وْسقصاه واحد مِنّوم باش يجرّب يَسوع، وْهُوَ واحد العالِم د الشريعة، وْقال: "آ المُعلّم، شْمِن وَصيّة هي الكبيرة في الشريعة؟" قال لو يَسوع: "«حبّ الرَّبّ إلَهك بْكُل قلبك وْبْكُل نفسك وْبْكُل عقلك.» هَدي هي الوَصيّة الُولى والكبيرة. والتانية فحالاْ، «عزّ جارك فحال نفسك.» بْهَد الجوج د الوَصايا كَتْـتعلّق الشريعة كاملة والتعاليم د الأَنْبياء." وْملّي كانو الفرّيسيّين مجموعين، سقصاهُم يَسوع وْقال: "شنّو كيظهَر لكُم في المسيح؟ ولد مَن هو؟" قالو لو: "ولد داود." قالّوم: "وْكيفاش داود كيعيّط لو بالروح «رَبّي،» كيقول: «قال الرَّبّ نْرَبّي: "ݣلس على الّيمين ديالي حتّى نردّ عدْيانك تحت رِجلك؟"» إدا كان داود كيعيّط لو «رَبّ،» كيفاش يقدر يكون بنو؟" وْما قدر حتّى واحد يجاوبوْ حتّى بْكلمة. وْمن ديك النهار نْفوق، ما زعم حتّى واحد يسقصيه عاود. في ديك الساعة تكلّم يَسوع مع الجماعة د الناس والتلامد ديالو وْقال: "المُعلّمين د الشريعة والفرّيسيّين ݣالسين على الكرسي د موسى، وْكُل ما كيقولو لكُم، قبلوه وْعملوه. وَلكن ما تعملو شي فحال الأعْمال ديالوم، حيت هُمَ كيقولو وْما كيعملو شي. حيت كيربطو أحْمال تقالين وْصعابـين باش يتّرفدو، وْكينزّلوهُم على كتاف الناس وْهُمَ ما بغاو شي يحرّكوهُم حتّى بْصبعوم. الأعْمال ديالوم كاملين كيعملوهُم باش يشوفوهُم الناس. وْكيوسّعو العصايب ديالوم وْكيكبّرو الجلايل د الحوايج ديالوم. وْكيبغيو مواطع الشرف في الحفْلات والصفّ الُوّل في بيوت العبادة، والتحيّات في الأسْواق، وْباش يعيّطو لوم الناس: «آ الفقيه» أمّا أنتُمَ ما تخلّيو شي الناس يعيّطو لكُم «الفقيه،» حيت المُعلّم ديالكُم هُوَ واحد، وانتُمَ كاملين خوت. وْما تعيّطو نْحتّى واحد "بابا" في الأرض، حيت باباكُم هُوَ واحد الّي في السما. ما تسمّيو شي راسكُم "رُؤَساء،" حيت الرئيس ديالكُم واحد، وْهُوَ المسيح. الكبير فيكُم غادي يكون الخدّام ديالكُم. كُل واحد الّي كيعلّي راسو غادي يتّحنى، والّي كيحني راسو غادي يتعلّى. "وَلكن الويل لِلكُم، آ المُعلّمين د الشريعة والفرّيسيّين المنافقين، حيت كتشدّو مُلك السماوات على الناس، حيت ما كتدخلو شي فيه أنتُمَ، وْما كتخلّيو شي الّي هُمَ داخلين يدخلو. [ الويل لِلكُم، آ المُعلّمين د الشريعة والفرّيسيّين المنافقين، حيت كتاكلو رزق الهجّالات وْكتطوّلو في الصلاوات باش تظهرو. على هَد الشي غادي تزاد لكُم العقوبة كتَر.] الويل لِلكُم، آ المُعلّمين د الشريعة والفرّيسيّين المنافقين، حيت كتدورو على البحَر والبَرّ باش تربحو واحد في الدين ديالكُم، وْملّي كيرجع واحد منكُم، كتردّوه ولد جهنّم جوج د المرّات كتَر منكُم. الويل لِلكُم، آ ݣوّادين العُميان، الّي كتقولو: «الّي حلف بْبيت المَقْدس، شي باس ما كاين، وَلكن الّي حلف بالدهب د بيت المَقْدس، لازم يكمّل.» آ الجاهلين والعُميان! شنّو أعظم، الدهب أَوْلا بيت المَقْدس الّي كيقدّس الدهب؟ كتقولو: «الّي حلف بالمَدْبح، شي باس ما كاين، وَلكن الّي حلف بالقُرْبان عليه، لازم يكمّل.» آ الجاهلين والعُميان! شنّو أعظم، القُرْبان أَوْلا المَدْبح الّي كيقدّس القُرْبان؟ على ديك الشي الّي حلف بالمَدْبح، راه حلف بِه وْبْكُل ما عليه. والّي حلف بْبيت المَقْدس، راه حلف بِه وْبْديك الشي الّي فيه. والّي حلف بالسما، راه حلف بْعرش اللّٰه وْبْهَداك الّي ݣالس عليه. "الويل لِلكُم، آ المُعلّمين د الشريعة والفرّيسيّين المنافقين، حيت أنتُمَ كتعطيو العشور د النعْنع وْحُبّة الحلاوى والكامون، وْهملْتو الأُمور المُهمّة د الشريعة: العدل والرحْمة والإيمان. كان واجب عليكُم تعملو هَد الأُمور، بلا ما تهملو يَخرين. آ ݣوّادين العُميان، الّي كتصفّيو الناموسة من الما وْكَتْبلعو الجّمل. الويل لِلكُم، آ المُعلّمين د الشريعة والفرّيسيّين المنافقين، حيت أنتُمَ كتغسلو الكاس والطبْسيل من برّا، أمّا أنتُمَ من الداخل معمّرين بالطمع والأنانية. آ الفرّيسي العمى، غْسل في الُوّل الكاس والطبْسيل من الداخل باش يكونو نقيّين حتّى من برّا. "الويل لِلكُم، آ المُعلّمين د الشريعة والفرّيسيّين المنافقين، حيت أنتُمَ كتشبهو نالقبورة المبيّطين الّي كيظهرو مزيونين من برّا، أمّا من الداخل هُمَ معمّرين بالعطام د الميّتين وْكُل فساد. هَيداك حتّى أنتُمَ من برّا كتظهرو نالناس متّاقيين، وْفي الحقيقة من الداخل ها أنتُمَ معمّرين بالنفاق والشَّرّ. الويل لِلكُم، آ المُعلّمين د الشريعة والفرّيسيّين المنافقين، حيت كَتْبنيو القبورة د الأَنْبياء وْكَتْزيّنو المدافن د المتّاقيين. كتقولو: «كَكُنّا في أيّام جدودنا، كَراه ما اشْتَركْنا شي معهُم في سفك الدم د الأَنْبياء.» هَيداك كتشهدو على راسكُم بلّي أنتُمَ أُوْلاد هَدوك الّي قتلو الأَنْبياء. كمّلو أنتُمَ ديك الشي الّي بداو بِه الجدود ديالكُم. آ الحياي أُوْلاد اللفاع، كيفاش غَد تهربو من العقوبة في جهنّم؟ على ديك الشي ها انا كنصيفط لكُم الأَنْبياء والحُكَماء والمُعلّمين د الشريعة، والبعض مِنّوم غَد تقتلوهُم وْغَد تصلّبوهُم، والبعض غَد تجلدوهُم في بيوت العبادة ديالكُم، وْغَد تطردوهُم من مدينة نْمدينة، باش ينزل عليكُم العقاب على السفك ديالكُم د كُل دم بريء الّي سال على الأرض، من دم هابيل المتّاقي حتّى نالدم د زَكَريّا بن بَرَخيّا الّي قتلْتوه بين بيت المَقْدس والمَدْبح. كنقول لكُم الحقّ بلّي هَد الشي كامل غادي ينزل على هَد الجيل. "آ أُورُشَليم، آ أُورُشَليم، يا الّي كتقتل الأَنْبياء وْكترجم المرْسولين لِلك! شحال من مرّة بغيتْ نجمع أُوْلادك فحال ما كتجمع الجّدادة الفلالس ديالاْ تحت الجنْحين ديالاْ، وْما بغيتِ شي. ها الدار ديالكُم غادي تبقا لكُم خاوية. حيت أنا كنقول لكُم بلّي ما غادي شي تشوفوني من دابا نْفوق حتّى تقولو: «مبروك هُوَ الّي ماجي بِاسم الرَّبّ.»" خرج يَسوع وْمشى من بيت المَقْدس، وْجاو التلامد ديالو باش يورّيواه البناية د بيت المَقْدس. قالّوم يَسوع: "واش كتشوفو هَد الشي كامل؟ كنقول لكُم الحقّ، ما غادي شي تبقا هنايَ حجْرة على حجْرة الّي ما غادي شي تتهدّم." وْملّي كان هُوَ ݣالس في جبل الزيتون، جاو نْعندو التلامد بوحدوم وْقالو: "قول نّا فوياخ غادي يكون هَد الشي وْشنّي هي العلامة د المجي ديالك وآخر الدنيا؟" ردّ يَسوع وْقالّوم: "ردّو بالكُم باش ما يتلّفكُم حتّى شي واحد. حيت غادي يجيو بزّاف بِاسمي ويقولو: «أنا هُوَ المسيح،» وْغادي يتلّفو بزّاف د الناس. وْغَد تسمعو بالحروب وْخبار الحروب. شوفو ما تخافو شي، حيت لازم يوقع هَد الشي، وَلكن باقي ما وصلَتْ شي النهاية. حيت غادي تنوض أُمّة على أُمّة وْممْلكة على ممْلكة وْغادي يكون الجّوع والوَباء والزنازل في مواطع مخْتَلفة. وَلكن هَد الشي كامل هُوَ البداية د الوجاع. في ديك الساعة غادي يدفعوكُم نالعداب ويقتلوكُم وْتكونو مكْروهين عند الناس كاملين بْسباب اِسمي. وْغادي يعترو بزّاف د الناس في ديك الوقت ويـبيعو بعضيّاتوم ويكرهو بعضيّاتوم. وْغادي ينوضو بزّاف د الأَنْبياء الكدّابـين ويتلّفو بزّاف د الناس. وْمن كترة الشَّرّ، غادي تبرد المحبّة د بزّاف. وَلكن الّي كيصبر حتّى نالنهاية، هَداك هُوَ الّي غادي ينجا. وْغادي يبشّرو بْهَد الإنجيل د المُلك في الدنيا كاملة شهادة نالأُمَم كاملين، وْعاد غادي تجي النهاية. "على ديك الشي، ملّي تشوفو «نجاسة الخراب،» الّي هدَر عليها النَّبي دانيال، واقفة في الموطَع المقدّس، (الّي كيقرا خصّوْ يفهم)، ديك الساعة الناس الّي في اليَهوديّة لازم يهربو نالجّبولة. وْما يهبط شي الّي فوق السطَح باش يدّي من الدار ديالو شي حاجة. والّي كان في الفدّان ما يرجع شي باش يدّي الحوايج ديالو. الويل نالحُبلات والّي كيرطّعو في ديك الأيّام. دعيو باش ما يكون شي الهروب ديالكُم في فصل الشتا ولا في السبت. حيت غادي يكون في ديك الوقت واحد الضيق كبير، الّي ما كان شي فحالو من البداية د الدنيا حتّى نْدابا، وْما غادي شي يكون فحالو من بعد. وْكَكانت ديك الأيّام ما قصرَتْ شي، حتّى واحد ما ينجا. وَلكن بْسباب المخْتورين غادي يقصرو ديك الأيّام. في ديك الساعة إدا قال لكُم شي واحد: «ها المسيح هنايَ أَوْلا تمّاك،» ما تـتيّقوه شي، حيت غادي يظهرو مُسَحاء وأَنْبياء كدّابـين، وْغادي يعملو علامات وْعجايب كبيرة باش يتلّفو حتّى المخْتورين، إدا قدرو. ها انا سبقْتْ وْقُلْتاْ لكُم. على ديك الشي إدا قالو لكُم: «ها هُوَ في الخلا،» ما تخرجو شي. أَوْلا «ها هُوَ في البيوت نْداخل،» ما تتيّقوهُم شي. حيت فحال ما كيخرج البرق من الشرق وْكيظهَر في الغرب، فحال هَيدا غادي يكون المجي د اِبن الإنسان. حيت فاين ما كاينة الجيفة، تمّاك كيتّجمعو النسورة. "من مورا الضيق د ديك الأيّام، الشمس غادي تظلام والقمر ما غادي شي يعطي الضَّو ديالو، والنجوم غادي يطيحو من السما والقوّات د السما غادي يتزعْزعو. وْديك الساعة غادي تظهَر العلامة د اِبن الإنسان في السما، وْغادي ينوّحو قبايل الأرض كاملين، وْغادي يشوفو اِبن الإنسان ماجي في سحاب السما بْقوّة وْبْمجد عظيم. وْغادي يصيفط الملائكة ديالو بواحد البوق بْصوت قوي، وْغادي يجمعو المخْتورين ديالو من الجّهات الأربعة د الرّيح، من طرف السما حتّى نالطرف الاخّري. "تعلّمو من الشجرة د الكرْموس هَد المتال: ملّي كيرجَع الغصن ديالاْ رطب وْكتخرّج الوراق ديالاْ، كتعرفو بلّي الصيف قريب. بْنفس الشكل، ملّي تشوفو هَد الشي كامل كيوقَع، عرفو بلّي الوقت قريب، راه على البيـبان. كنقول لكُم الحقّ، ما غادي شي يݣوز هَد الجّيل حتّى يوقع هَد الشي كامل. السما والأرض غادي يتحيّدو، وَلكن الكلام ديالي ما عُمرو غادي يتحيّد. وَلكن ديك النهار وْديك الساعة، ما كيعرفوم حتّى واحد، لا الملائكة الّي في السما، ولا الاِبن، غير الآب بوحدو. المجي د اِبن الإنسان غادي يكون فحال ما كان في أيّام نوح. حيت فحال في الأيّام من قبل الطوفان، كانو كياكلو وْكيشربو وْكيجوّجو وْكيتجوّجو حتّى النهار الّي دخل نوح نالفُلك، وْما عرفو شي شنّو غادي يوقع حتّى جا الطوفان وادّاهُم كاملين. هَيدا غادي يكون في المجي د اِبن الإنسان. ديك الساعة غادي يكونو جوج د الرجال في الفدّان، وْغادي يتّرفد واحد ويـبقا يَخُر. غادي يكونو جوج د النسا كيطحنو في الرحى، وْغادي تْتّرفد واحدة وْتبقا يَخرى. على ديك الشي بقاو أنتُمَ فايقين، حيت ما كتعرفو شي فاش من نهار غادي يجي الرَّبّ ديالكُم. وَلكن عرفو هَد الشي، كَكان عارف مول الدار فاش من وقت في الليل غادي يجي السارق، كَكان بقا فايق وْما خلّاه شي يتسلّل نالدار ديالو. على ديك الشي كونو حتّى أنتُمَ مستَعدّين، حيت اِبن الإنسان غادي يجي في الساعة الّي ما كتظنّوها شي. "شكون هُوَ العبد الأمين والحكيم الّي كلّفو السيّد ديالو باش يعطي الماكلة نالخدّامة في وقتاْ؟ مبروك ديك العبد الّي، ملّي يجي سيّدو، كيجبروْ كيعمل هَيدا. كنقول لكُم الحقّ بلّي غادي يوكّلوْ على المتاع ديالو كامل. وَلكن إدا قال ديك العبد القبيح في نفسو: «السيّد ديالي كيتعطّل في الرجوع ديالو،» وْبدا كيضرب العبيد خوتو وْكياكل وْكيشرب مع السكايريّة، غادي يرجع السيّد د ديك العبد في النهار الّي ما كيتسنّاه شي فيه، وْفي الساعة الّي ما كيعرفاْ شي، وْغادي يعاقبوْ بزّاف ويجعل المصير ديالو مع المنافقين. تمّاك غادي يكون البكا وْتغْزيز السّنان. "مُلك السماوات كيشبه نْعشرة د العزبات الّي ادّاو اللامْبات ديالوم وْخرجو باش يتلاقاو مع العروس. كانو خمسة مِنّوم معقّلات وْخمسة مِنّوم جاهلات. الجاهلات ادّاو اللامْبات ديالوم وْما ادّاو شي معهُم الزيت، أمّا المعقّلات ادّاو الزيت في الرّدايم مع اللامْبات ديالوم. وْملّي تعطّل العروس، غلبوم النعاس كاملين وْنعسو. وْفي النُّص د الليل، تْسمع الغوات: «ها العروس ماجي! خرجو تْتلاقاو معاه!» ديك الساعة فاقو ديك العزبات كاملين وْوجّدو اللامْبات ديالوم. وْقالو الجاهلات نالمعقّلات: «عْطيونا من الزيت ديالكُم، حيت اللامْبات ديالنا كيطفاو.» جاوبوهُم المعقّلات: «لا، ما غادي شي يكفينا لِنّا وْلِلكُم بْجوج بِنا. إيوا، مشيو نْعند الناس الّي كيبيعو الزيت وْشريو نْراسكُم.» ملّي كانو ماشّين باش يشريو، جا العروس والناس الّي كانو موجّدين دخلو معاه نالعُرس وْتشدَّت الباب. من بعد ديك الشي، جاو العزبات يَخرين وْقالو: «آ سيدي، آ سيدي، فْتح نّا الباب!» ردّ وْقال: «كنقول لكُم الحقّ، أنا ما كنعرفكُم شي.» على ديك الشي، خصْكُم تبقاو فايقين، حيت ما كتعرفو شي لا النهار ولا الساعة. "مُلك السماوات فحال واحد الرَّجل مسافر الّي عَيّط على العبيد ديالو وْدفَع لوم المال ديالو. عْطى نواحد خمسة د الوزنات د الفلوس، وْنيَخُر جوج د الوزنات، وْنيَخُر وزنة واحدة، نْكُل واحد على قدّ المهارة ديالو، وْسافر. وْمشى الّي شبّر خمسة د الوزنات وْباع وْشرى بِهُم وْربَح خمسة د الوزنات يَخرين. وْعمل هَيدا حتّى الّي شبّر جوج، وْربَح جوج يَخرين. أمّا الّي شبّر واحدة، مشى وْحفر في الأرض وْخبّع المال د سيّدو. من بعد واحد المُدّة طويلة، رجَع السيّد د ديك العبيد وْحاسبوم. وْجا الّي شبّر خمسة د الوزنات، وْجاب خمسة د الوزنات يَخرين وْقال: «آ سيدي، دفعْتِ لي خمسة د الوزنات، ها خمسة د الوزنات يَخرين ربحْتوم.» قال لو سيّدو: «مزيان، آ العبد المزيان والأمين. كُنْتِ أمين على القليل، ها انا غادي نوكّلك على كتَر. دْخل نالفرْحة د سيّدك.» جا التاني، الّي شبّر جوج د الوزنات، وْقال: «آ سيدي، دفعْتِ لي جوج د الوزنات، وْها جوج د الوزنات يَخرين ربحْتوم.» قال لو سيّدو: «مزيان، آ العبد المزيان والأمين. كُنْتِ أمين على القليل، ها انا غادي نوكّلك على كتَر. دْخل نالفرْحة د سيّدك.» ديك الساعة جا العبد الّي شبّر وزنة واحدة وْقال: «آ سيدي، عرفْتْ بلّي أنتينا رَجل واعر، كتحصد في الموطَع الّي ما زرعْتِه شي، وْكتجمع في الموطَع الّي ما سيّبْتِ شي فيه الزرّيعة. وْخفْتْ وْمشيتْ وْخبّعْت المال ديالك في الأرض. ها هُوَ الرزق ديالك.» وَلكن ردّ عليه سيّدو وْقال لو: «آ العبد القبيح والمعْݣاز! عرفْتِني كنحصد في الموطَع الّي ما زرعْتوْ شي، وْكنجمع في الموطَع الّي ما سيّبْتْ شي فيه الزرّيعة. إدَن، كان واجب عليك تدخّل المال ديالي في البنك، وْفي الرجوع ديالي نكون شبّرْت المال ديالي بالطالع. حيّدو لو الوزنة وْعْطيوها نِلّي عندو عشرة د الوزنات.» حيت كُل واحد الّي عندو، يتّعطى لو ويتكتّر لو، والّي ما عندو شي، حتّى الّي عندو يتزوّل لو. والعبد الّي ما فيه شي النفع، سيّبوه في الظلام على برّا. تمّاك غادي يكون البكا وْتغْزيز السّنان. "ملّي يجي ابن الإنسان في المجد ديالو والملائكة القدّيسين كاملين معاه، ديك الساعة غادي يݣلس على العرش د المجد ديالو. وْغادي يتّجمعو قدّامو الشعوب كاملين، وْهُوَ غادي يفرّق بعطوم من البعض فحال ما كيفرّق واحد السارح الغنم من المعاز. وْغادي يعمل الغنم على الّيمين ديالو والمعاز على الشمال. في ديك الساعة غادي يقول المَلِك نِلّي هُمَ على الّيمين ديالو: «آجيو، أنتُمَ المبْروكين د بابا. وَرتو المُلك الّي موجّد لكُم من بداية الدنيا، حيت أنا جعْتْ وْوكّلتوني، عطشْتْ وْشرّبْتوني، كُنْتْ برّاني واسْتَقبلْتوني، عريان وْكسيتوني، مريط وْطلّلْتو عليَّ، حبّاس وْجيتو نْعندي.» ديك الساعة المتّاقيين غادي يجاوبوه: «يا رَبّي، فوياخ شفْناك بالجّوع وْوكّلناك؟ أَوْلا عطْشان وْشرّبْناك؟ وْفوياخ شفْناك برّاني واسْتَقبلْناك؟ أَوْلا عرْيان وْكسيناك؟ وْفوياخ شفْناك مريط أَوْلا حبّاس وْزُرْناك؟» وْغادي يردّ المَلِك: «كنقول لكُم الحقّ، حيت كُل شي الّي عملْتو نواحد من هَد الخوت ديالي الصغارين، عملْتوه لِلي.» "في ديك الساعة غادي يقول نِلّي هُمَ على الشمال: «آ الملْعونين، مشيو عليَّ نالنار الدايمة الّي موجّدة نإبْليس والملائكة ديالو! حيت أنا جُعْتْ وْما وكّلْتوني شي، وْعطشْتْ وْما شرّبْتوني شي، كُنْتْ برّاني وْما اسْتَقبلْتوني شي، وْعرْيان وْما كسيتوني شي، وْمريط وْحبّاس وْما زُرْتوني شي.» ديك الساعة هُمَ غادي يجاوبوه: «يا رَبّي، فوياخ شفْناك بالجّوع أَو عطْشان أَو برّاني أَو عرْيان أَو مريط أَو حبّاس وْما تهلّينا شي فيك؟» وْغادي يردّ عليهُم: «كنقول لكُم الحقّ، حيت ما عملْتو شي هَد الشي نواحد من هَد الصغارين، إدَن، راه ما عملْتوه شي لِلي.» وْغادي يمشيو هَدو نالعداب الدايم، والمتّاقيين نالحياة الأبديّة." ملّي كمّل يَسوع هَد الكلام كامل، قال نالتلامد ديالو: "كتعرفو بلّي من بعد يومَين غادي يكون عيد الفِصح، وِابن الإنسان غادي يتسلّم باش يتّصلب." في ديك الوقت اتّجمعو رُؤَساء المسؤولين وْشيوخ الشعب، في الدار د رئيس المسؤولين، الّي مسمّي قَيافا. وْتشاورو باش يقبطو يَسوع بْشي حيلة ويقتلوه. وَلكن قالو: "ماشي في العيد باش ما تكون شي الفوضى بين الشعب." وْملّي كان يَسوع في بيت عَنْيا في دار سِمْعان المبْراص، جات نْعندو واحد المراة رافدة معها واحد الردومة د العطر غالي بزّاف، وْكبَّتوْ على راسو وْهُوَ ݣالس كياكل. ملّي شافو التلامد ديالو ديك الشي، تعصّبو وْقالو: "علاش هَد الخسارة؟ حيت كان يقدر هَد العطر يتّباع بْتمن كبير ويتّعطى نالمساكن." وْعرف يَسوع وْقالّوم: "علاش كَتْشطنو المراة؟ حيت راها عملَتْ فيَّ شي حاجة مزيانة. حيت المساكن هُمَ دائمًا معكُم، أمّا أنا ما غادي شي نبقا معكُم دائمًا. ملّي كبَّتْ هَد العطر على الجسم ديالي، عملَتْ ديك الشي باش توجّدوْ نالدفين. كنقول لكُم الحقّ، فاين ما كيبشّرو بْهَد الإنجيل في العالم كامل، غادي يتكلّمو عاود على هَد العمل ديالاْ دِكرى لِلاْ." في ديك الساعة مشى واحد من الطناش، الّي مسمّي يَهودا الإسْخَريوطي، نْعند رُؤَساء المسؤولين، وْقال: "شنّو غَد تعطيوني باش نسلّم لكُم يَسوع؟" واتَّفقو على تلاتين قطْعة د النقْرة. وْمن ديك الساعة كان كيفتّش على الفُرْصة باش يسلّموْ. في النهار الُوّل د عيد الفطير، جاو التلامد نْعند يَسوع وْقالو لو: "فاين بغيتِنا نوجّدو لك باش تاكل العشا د الفِصح؟" وْقال: "مْشيو نالمدينة نْعند فلان وْقولو لو: «المُعلّم كيقول، الوقت ديالي قريب، غادي نحْتَفل بالفِصح عندك مع التلامد ديالي.»" وْعملو التلامد فحال ما وصّاهُم يَسوع وْوجّدو الفِصح. وْملّي جات العشيّة، ݣلس يَسوع مع الطناش. وْملّي كانو كياكلو، قال: "كنقول لكُم الحقّ، واحد منكُم غادي يخونْني." وْحسّو بالحزن بزّاف وْبدا كُل واحد مِنّوم كيقول لو: "ماشي أنا، ياك آ ربّي؟" وْردّ وْقال: "الّي كيغمّس معيَ بْيَدّو في الطبْسيل، هُوَ الّي غادي يسلّمني. في الحقيقة اِبن الإنسان غادي يمشي كيفْما هُوَ مكتوب عليه. وَلكن الويل نْديك الرَّجل الّي كيخون اِبن الإنسان. كان حسَن نْديك الرَّجل كَكان ما خلق شي." ديك الساعة ردّ يَهودا الّي باعوْ وْقال: "ماشي أنا، ياك آ المُعلّم؟" قال لو: "أنتينا قُلْتِ الّي كاين." وْملّي كانو كياكلو، شبّر يَسوع الخُبز وْبارك، وْقطّعوْ وْعْطاه نالتلامد وْقال: "شبّرو تاكلو، هَدا هُوَ الجسد ديالي." وْشبّر الكاس وْشكر وْعْطاهُم وْقال: "شربو منّو كاملين، حيت هَدا هُوَ الدم ديالي د العهد الجديد الّي غادي يتسيّل بْسباب بزّاف د الناس نْغُفْران الدنوب. وَلكن كنقول لكُم، أنا ما غادي شي نشرب من هَد الغلّة د الدالية من دابا حتّى نْديك النهار ملّي نشرباْ من جديد معكُم في مُلك بابا." وْمن بعدما رنّمو واحد الترْنيمة، خرجو نْجبل الزيتون. في ديك الساعة قالّوم يَسوع: "أنتُمَ كاملين غَد تسمحو فيَّ هَد الليلة، حيت مكتوب: «أنا غادي نضرب الراعي وْغادي تْتشتّت الغنم د القطعة.» وَلكن من بعدما نتّبعت من الموت، غادي نسبقكُم نالجَليل." جاوب بُطْرُس وْقال لو: "إدا سمحو فيك الناس كاملين، أنا ما عُمري غادي نسمح فيك." قال لو يَسوع: "كنقول لك الحقّ، هَد الليلة من قبل ما يصيّح الفرّوج، غادي تنكرني تلاتة د المرّات." قال لو بُطْرُس: "واخّا خصْني نموت معك، ما عُمري نْنكرك!" هَيداك قالو التلامد كاملين حتّى هُمَ. مورا ديك الشي، وصَل يَسوع مع التلامد ديالو نواحد الموطَع مسمّي جَتْسيماني، وْقالّوم: "ݣلسو هنايَ حتّى نمشي نْتمّاك وْنصلّي." وادّى معاه بُطْرُس وْجوج د الولاد د زَبَدي، وْبدا كيحزن وْكيتغبّن بزّاف. ديك الساعة قالّوم: "نفسي حزْنانة بزّاف حتّى نالدرجة د الموت. ݣلسو هنايَ وْسهرو معيَ." زاد شويا نالقدّام وْطاح على وَجهو وْصلّى وْقال: "يا بابا، إدا كان مُمكن، آمر يتحيّد عليَّ هَد الكاس. وَلكن ماشي كيفْما بغيتْ أنا، وَلكن كيفْما بغيتِ أنتينا." ديك الساعة رجَع نْعند التلامد وْجبروم ناعسين. وْقال نْبُطْرُس: "واش ما قدرْتو شي تسهرو معيَ حتّى ساعة واحدة؟ بقاو فايقين وْصلّيو باش ما تدخلو شي في المِحْنة. الروح باغية، أمّا الجسد هُوَ ضعيف." مشى عاود وْصلّى مرّة تانية، كيقول: "يا بابا، إدا ما يمكن شي يتحيّد عليَّ هَد الكاس غير إدا شربْتوْ، تتكمّل الإرادة ديالك." ملّي رجَع، جبروم ناعسين عاود، حيت كانو العينين ديالوم تقالين بالنعاس. وْخلّاهُم وْعاود مشى يصلّي مرّة تالتة وْقال نفس الكلام. وْملّي رجَع نْعند التلامد ديالو، قالّوم: "واش باقين ناعسين وْمرْتاحين؟ ها الساعة قرّبَتْ وِابن الإنسان غادي يتسلّم ناليَدّين د المُدْنبـين. نوضو، نمشيو. راه ماجي هَداك الّي غادي يخونْني." ملّي كان باقي كيهدَر يَسوع، وصَل يَهودا، واحد من التلامد الطناش، وْمعاه واحد العصابة كبيرة مسلّحة بالسيوف والدبابز، مصيفطة من عند رُؤَساء المسؤولين وْشيوخ الشعب. وْهَداك الّي خانوْ عْطاهُم واحد العلامة وْقال: "الرَّجل الّي غادي نبوسوْ، راه هُوَ هَداك. شبّروه." وْفي الحين جا نْعند يَسوع وْقال: "السلام عليك، آ المُعلّم." وْباسوْ. وْقال لو يَسوع: "آ صاحبي، علاش جيتِ؟" ديك الساعة قرّبو الرجال نْعند يَسوع وْعملو يَدّوم عليه وْقبطوه. واحد من الّي كانو مع يَسوع مدّ يَدّو وْسلّ السيف ديالو وْضرب العبد د رئيس المسؤولين وْقطّع لو الودْنينة ديالو. ديك الساعة قال لو يَسوع: "ردّ السيف ديالك نْموطَعو، حيت الّي كيرفدو السيف، بالسيف غادي يموتو. واش كتظنّ بلّي أنا ما نقدر شي دابا نطلب بابا ويعطيني في هزيزة كتَر من طناشر جيش د الملائكة؟ إيوا، كيفاش غادي يتحقّقو الكتوبة الّي كيقولو بلّي هَيدا لازم يكون؟" ديك الساعة قال يَسوع نالعصابة: "واش جيتو بالسيوف والدبابز باش تقبطوني فحال شي سارق؟ كُل نهار كُنْتْ ݣالس كنعلّم في بيت المَقْدس وْما قبطْتوني شي. وَلكن هَد الشي كامل وقَع باش تتكمّل الكتوبة د الأَنْبياء." ديك الساعة خلّاواه التلامد كاملين وْهربو. هَدوك الّي قبطو يَسوع ادّاواه نْعند قَيافا، رئيس المسؤولين، فاين كانو مجْموعين المُعلّمين د الشريعة والشيوخ. أمّا بُطْرُس تبعوْ من بعيد نالدار د رئيس المسؤولين وْدخل وْݣلس مع الحُرّاس باش يشوف النهاية. وْكانو رُؤَساء المسؤولين والمَجْلس كاملين كيفتّشو على شهادة الزور على يَسوع باش يحكمو عليه بالموت، وْما جبروها شي، واخّا جاو بزّاف د شهود الزور. وَلكن في الآخر جاو جوج د شهود الزور وْقالو: "هَد الرَّجل قال: «أنا نقدر نطيّح بيت المَقْدس د اللّٰه وْفي تلت أيّام نبنيه من جديد.»" ديك الساعة ناض رئيس المسؤولين وْقال لو: "واش ما غادي شي تردّ بْحتّى شي حاجة؟ شنّو هُوَ هَد الشي الّي كيشهدو بِه عليك؟" وَلكن يَسوع بقا ساكِت. وْقال لو رئيس المسؤولين: "دخّلْتْ عليك باللّٰه الحيّ، إدا ما تقول نّا واش أنتينا المسيح اِبن اللّٰه." قال لو يَسوع: "أنتينا قُلْتِ الّي كاين. واخّا هَيداك، كنقول لكُم بلّي من دابا غَد تشوفو اِبن الإنسان ݣالس على الّيمين د اللّٰه القدير وْماجي على سحاب السما." ديك الساعة شرّݣ رئيس المسؤولين الحوايج ديالو وْقال: "كفَر! واش حنايَ باقين محْتاجين نالشهود؟ ها أنتُمَ عاد سمعْتو الكُفر ديالو. شنّو ظهَر لكُم؟" ردّو وْقالو: "كَيسْتحقّ يموت!" ديك الساعة بزقو في وَجهو وْضربوه بالبونْيا، ويَخرين طرشوه وْقالو: "تنبّأ نّا، آ المسيح، شكون ضربك؟" إيوا، كان بُطْرُس ݣالس على برّا في ساحة الدار. وْجات نْعندو واحد الخدّامة وْقات لو: "حتّى أنتينا كُنْتِ مع يَسوع الجَليلي." وْهُوَ نكر قدّاموم كاملين وْقال: "ما عرفْتْ شي شنّو كتقول لي." ملّي خرج نالباب، شافتوْ واحدة يَخرى وْقات نِلّي هُمَ تمّاك: "هَد الرَّجل كان مع يَسوع الناصري." نكر عاود وْحلف: "أنا ما كنعرف شي هَد الرَّجل." من بعد شويا، جاو الّي كانو حاضرين وْقالو نْبُطْرُس: "د بالصّحّ أنتينا واحد مِنّوم، حيت اللهْجة ديالك كتبيّن هَد الشي." ديك الساعة بدا بُطْرُس كيلعن وْكيحلف: "أنا ما كنعرف شي هَد الرَّجل!" وْفي هزيزة صيّح الفرّوج، وْتفكّر بُطْرُس كلام يَسوع الّي قال لو: "من قبل ما يصيّح الفرّوج غادي تنكرني تلاتة د المرّات." وْخرج بُطْرُس على برّا وْبكى بْمرارة. ملّي طلَع الصباح، تشاورو رُؤَساء المسؤولين كاملين وْشيوخ الشعب على يَسوع باش يقتلوه. وْكتّفوه وادّاواه وْسلّموه نالحاكم بيلاطُس البُنْطي. ديك الساعة، ملّي شاف يَهودا الّي سلّمو بلّي اتّحكم، ندم وْردّ التلاتين قطْعة د النقْرة نْرُؤَساء المسؤولين والشيوخ. قال: "خطيتْ ملّي بِعْت الدم د المتّاقي." قالو لو: "واش شغلنا حنايَ؟ دبّر راسك." وْسيّب يَهودا النقْرة في بيت المَقْدس وْخرج، وْمشى وْعلّق راسو. شبّرو رُؤَساء المسؤولين النقْرة وْقالو: "ماشي حلال نعملوها في صنْدوق القرابين، حيت هي تمن الدم." واتَّفقو باش يشريو بِها فدّان الفخّار ويعملوه مقابر نالبرّانيّين. على ديك الشي تسمّى الفدّان "حقل الدم" حتّى نْهَد النهار. ديك الساعة تحقّق ديك الشي الّي قال النَّبي إرْميا: "وْشبّرو التلاتين قطْعة د النقْرة، التمن الّي اتَّفقو عليه بَني إسْرائيل وْعْطاوها على فدّان الفخّار، فحال ما آمرني الرَّبّ." وقَف يَسوع قدّام الحاكم، الّي سقصاه: "واش أنتينا مَلِك اليهود؟" قال لو يَسوع: "أنتينا قُلْتِ الّي كاين." وْملّي كانو رُؤَساء المسؤولين والشيوخ كيتَّهموه، ما ردّ شي عليهُم. ديك الساعة قال لو بيلاطُس: "واش ما كتسمع شي شحال من حاجة شهدو بِها عليك؟" أمّا يَسوع ما ردّ عليه بْحتّى شي كلمة، حتّى تعجّب الحاكم بزّاف. كانت عند الحاكم العادة في العيد باش يطلق السراح د واحد الحبّاس الّي بغاواه الناس. وْكان عندوم في ديك الوقت واحد الحبّاس مشْهور، مسمّي باراباس. ملّي كانو مجْموعين، قالّوم بيلاطُس: "شكون الّي بغيتوني نطلقوْ لكُم، باراباس أَوْلا يَسوع، الّي مسمّي المسيح؟" حيت عرف بلّي هُمَ سلّموه بْسباب الحسد. وْملّي كان ݣالس على الكرسي د الحُكم، صيفطَتْ لو المراة ديالو وْقالت: "ردّ بالك على ديك الرَّجل المتّاقي، حيت أنا تعدّبْت اليوما بزّاف بْسبابو في واحد المنامة." وَلكن رُؤَساء المسؤولين والشيوخ حرّشو الناس باش يطلبو باراباس ويقتلو يَسوع. وْملّي تكلّم الحاكم، سقصاهُم: "شكون من هَد الجوج بغيتوني نطلق لكُم؟" قالو: "باراباس." قالّوم بيلاطُس: "شنّو غادي نعمل بيَسوع، الّي مسمّي المسيح؟" قالو لو كاملين: "يتّصْلب!" وْقالّوم الحاكم: "علاش؟ شْمِن شرّ عمل؟" وَلكن هُمَ زادو كيغوّتو وْكيقولو: "يتّصْلب!" ملّي شاف بيلاطُس بلّي ما اسْتَفد والو، وَلكن تزادَت الفوضى، شبّر الما وْغسل اليَدّين ديالو قدّام الجماعة وْقال: "أنا باري من الدم د هَد الرَّجل المتّاقي، على راسكُم أنتُمَ." وْردّو عليه الناس كاملين وْقالو: "يكون الدم ديالو علينا وْعلى الولاد ديالنا." ديك الساعة طلق لوم باراباس، أمّا يَسوع جلدوْ وْدفعوْ باش يتّصْلب. في ديك الساعة العسْكر د الحاكم ادّاو يَسوع نْدار الحكومة وْجمعو عليه الفرقة العسْكرية كاملة. وْعرّاواه وْلبّسو لو لباس حمَر. وْضفرو واحد التاج د الشوك وْعملوه على راسو وْعملو واحد القصبة في يَدّو د الّيمين، وْكانو كيسجدو قدّامو وْكيبهْدلو بِه، كيقولو: "السلام عليك، آ مَلِك اليهود." وْبزقو عليه وْشبّرو القصبة وْضربوه على راسو. من بعدما ضحكو عليه، حيّدو لو اللباس وْلبّسو لو الحوايج ديالو وادّاواه باش يصلّبوه. ملّي كانو خارجين، جبرو واحد الرَّجل قَيرَواني، مسمّي سِمْعان، وْفَرضو عليه يرفد الصليب ديالو. وْملّي جاو نواحد الموطَع كيقولو لو "ݣُلْݣُثة،" الّي كيعني الموطَع د الجُمْجُمة، عْطاواه الخمر مخلّط بالمرارة باش يشرب، وْملّي داقوْ يَسوع، ما بغا شي يشرب. ملّي صلّبوه، قسمو الحوايج ديالو وْقمّرو عليهُم. وْݣلسو عسّاسين عليه تمّاك. وْعلّقو فوق راسو التُّهمة الموجّهة ضدّو: "هَدا هُوَ يَسوع مَلِك اليهود." في ديك الساعة صلّبو معاه جوج د السرّاق، واحد على الّيمين وْواحد على الشمال. وْكانو الناس الّي ݣايزين كيزبّلو فيه وْهُمَ كيهزّو راسوم، وْكيقولو: "أنتينا الّي غادي تهدّم بيت المَقْدس وْتـبْنيه في تلت أيّام، نجّي نفسك. إدا كُنْتِ ابن اللّٰه، نْزل من الصليب." بْنفس الطريقة، حتّى رُؤَساء المسؤولين كانو كَيْبهْدلو بِه، مع المُعلّمين د الشريعة والشيوخ، وْقالو: "نجّى يَخرين، وْما قدر شي يعتق راسو. إدا كان هُوَ مَلِك إسْرائيل، خلّيه ينزل دابا من الصليب وْنآمنو بِه. هُوَ تكّل على اللّٰه، خلّيه يعتقوْ دابا إدا هُوَ عزّوْ، حيت هُوَ قال: «أنا اِبن اللّٰه.»" بْنفس الكلام كانو كيزبّلو فيه السرّاق الّي تصلّبو معاه. وْفوسط النهار، طاح الظلام على الأرض كاملة حتّى نالتلاتة د العشيّة. ملّي قرّبَت التلاتة د العشيّة، غوّت يَسوع بْصوت عالي، كيقول: "إيلي، إيلي، لِما شبقْتَني؟" يعني: "إلَهي، إلَهي، علاش سمحْتِ فيَّ؟" البعض من الّي كانو واقفين تمّاك، ملّي سمعوه، قالو: "هَدا كيعيّط على النَّبي إيليّا." وْفي الحين جرى واحد مِنّوم وْشبّر واحد السبونْخة وْعمّراْ بالخلّ، وْعملاْ على واحد القصبة وْعْطاه يشرب. أمّا الباقين قالو: "خلّيه! نشوفو واش غادي يجي إيليّا وينجّيه." غوّت يَسوع عاود بْصوت عالي وْسلّم الروح. ديك الساعة تشرّݣ الحجاب د بيت المَقْدس على جوج، من فوق حتّى نْتحت، والأرض تزنْزلَتْ، والصخور تهرّسو، القبورة تفتحو، وْتّبعتو بزّاف من أجْساد القدّيسين الّي كانو ميّتين، وْخرجو من القبورة من بعد القيامة ديالو، وْدخلو نالمدينة المقدّسة وْظهرو نْبزّاف د الناس. قايد المية والعسْكر الّي كيحضيو يَسوع معاه، ملّي شافو الزنْزال والّي وقَع، خافو بزّاف وْقالو: "د بالصّحّ كان هَدا اِبن اللّٰه." وْتمّاك كانو كيشوفو من بعيد بزّاف د النسا الّي تبعو يَسوع من الجَليل وْكانو كيخدموه: فيهُم مَرْيَم المَجْدَليّة، وْمَرْيَم يمّاهُم د يَعْقوب وْيوسف، ويمّاهُم د أُوْلاد زَبَدي. ملّي جات العشيّة، جا واحد الرَّجل لا باس عليه من الرامة، مسمّي يوسف، وْحتّى هُوَ كان تلْميد يَسوع. هَد الرَّجل مشى نْعند بيلاطُس وْطلب الجُتّة د يَسوع. ديك الساعة آمر بيلاطُس باش يعطيو لو الجتّة. وادّى يوسف الجسد وْكفّنوْ في كتّان نقي. وْنزّلوْ في القبَر ديالو الجديد الّي كان حفروْ في الصخرة وْدرْدب واحد الحجْرة كبيرة على الدخلة د القبَر، وْمشى. وْكانت تمّاك مَرْيَم المَجْدَليّة وْمَرْيَم يَخرى ݣالسين بْغرط القبَر. ولا غدّا، النهار الّي من بعد نهار التوْجاد، اتّجمعو رُؤَساء المسؤولين والفرّيسيّين عند بيلاطُس. قالو لو: "آ سيدي، تفكّرْنا بلّي ديك الخدّاع قال، وْهُوَ باقي بالروح: «من بعد تلت أيّام، أنا غادي نتّبعت حيّ.» على ديك الشي، آمر بالعسّة على القبَر حتّى ناليوم التالت، عندَك يجيو التلامد ديالو في الليل ويسرقوه ويقولو نالناس بلّي قام من بين الميّتين. غادي تكون الخديعة التانية قبَح من الُولى." وْقالّوم بيلاطُس: "ها العسّة عندكُم. مْشيو تحضيواه فحال ما كتعرفو." ديك الساعة مشاو وْحضاو القبَر بالعسّة وْطبعو الحجْرة. من بعد السبت عند الفجر د نهار الحد، جات مَرْيَم المَجْدَليّة وْمَرْيَم يَخرى باش يشوفو القبَر. وقعَتْ واحد الزنْزلة كبيرة، حيت واحد الملاك د الرَّبّ هوّد من السما وْجا وْدرْدب الحجْرة من الدخلة وْݣلس عليها. كانت الصِّفة ديالو فحال البرق والحوايج ديالو بُيَط فحال التلج. وْتّرعدو العسّاسة من الخوف وْرجعو فحال الميّتين. ردّ الملاك وْقال نالنسا: "ما تخافو شي أنتُمَ، حيت أنا كنعرف بلّي كتفتّشو على يَسوع الّي تصْلب. هُوَ ماشي هنايَ، حيت اتّبعت حيّ، فحال ما قال. آجيو تشوفو الموطَع الّي كان الرَّبّ منزّل فيه. مْشيو دغيا وْقولو نالتلامد ديالو بلّي قام من بين الميّتين. ها هُوَ غادي يسبقكُم نالجَليل، وْتمّاك غَد تشوفوه. ها انا قُلْتْ لكُم." ديك الساعة خرجو دغيا من القبَر بالخوف وْفرْحة كبيرة كيجريو باش يخبرو التلامد ديالو. وْملّي كانو ماشّين باش يخبرو التلامد ديالو، تلاقاهُم يَسوع وْقال: "سلام عليكُم." وْجاو وْشبّرو في رِجلو وْسجدو لو. وْقالّوم يَسوع: "ما تخافو شي. مْشيو وْقولو نالخوت ديالي يسافرو نالجَليل وْتمّاك غادي يشوفوني." ملّي كانو ماشّين، شي من العسّاسة مشاو نالمدينة وْخبرو رُؤَساء المسؤولين بْكُل ما وقَع. ملّي اتّجمعو مع الشيوخ وْتشاورو، عْطاو نالعسْكر بزّاف د الفلوس. قالو لوم: "قولو بلّي التلامد ديالو جاو بالليل وْسرقوه ملّي كُنّا ناعسين. وِادا سمَع الحاكم بْديك الشي، حنايَ غادي نقنّعوه وْنحضيوكُم." وْشبّرو الفلوس وْعملو فحال ما قرّاوهُم. وْتشاع هَد الكلام عند اليهود حتّى نْهَد النهار. أمّا الحضاشر تلميد مشاو نالجَليل في الجّبل الّي آمروم يَسوع. وْملّي شافوه، سجدو لو، وَلكن البعض مِنّوم شكّو. وْجا يَسوع وْقالّوم: "تْدفعَتْ لي كُل قُدرة في السما وْعلى الأرض. على هَد الشي مْشيو وْعملو تلامد من الأُمَم كاملين وْغطّسوهُم بِاسم الآب والِابن والروح القُدُس، وْعلّموهُم يعملو كُل ما وصّيتْكُم بِه، وْها انا معكُم الأيّام كاملة حتّى نآخر الدنيا." بداية الإنجيل د يَسوع المسيح، اِبن اللّٰه، فحال ما هُوَ مكتوب عند النَّبي إشَعيا: "ها انا كنصيفط المرْسول ديالي قدّامك الّي غادي يوجّد لك الطريق. الصوت د شي واحد الّي كيبرّح في الخلا: «وجّدو طريق الرَّبّ، ردّو الطرْقان ديالو مسْتَقيمة.»" يوحَنّا كان كيغطّس الناس في الخلا وْكيبشّر بالمَعْموديّة د التوبة نْغُفْران الدنوب. وْخرجو نْعندو من كُل البلاد اليَهوديّة وأهل أُورُشَليم وْتغطّسو كاملين في الما على يَدّو في واد الأُرْدُن، كيعْتَرفو بالدنوب ديالوم. وْكان يوحَنّا لابس من الشعر د الجمولة وْمحزّم بْحزام الجلد على النُّص ديالو وْكياكل الجراد والعسل د الخلا. وْكان كيبشّر وْكيقول: "غادي يجي من بعد منّي شي واحد الّي هُوَ قوي منّي، الّي ما كَنْسْتاهل شي نحني وْنفسخ الخيوط د الصبّاط ديالو. أنا غطّسْتْكُم بالما، أمّا هُوَ غادي يغطّسكُم بالروح القُدُس." في ديك الأيّام، جا يَسوع من الناصِرة د الجَليل وْتغطّس على يد يوحَنّا في واد الأُرْدُن. وْملّي طلَع من الما، في الحين شاف السما كَتْـتفتح والروح القُدُس نازل عليه فحال واحد الحمامة. وْجا واحد الصوت من السما الّي قال: "أنتينا اِبني العزيز الّي كنفرح بِه." وْمن بعد الروح القُدُس خرّج يَسوع نالخلا. وْيَسوع بقا تمّاك أربعين يوم والشيطان كيجرّبوْ. وْكان مع الوحوش، وْكانو الملائكة كيخدموه. من بعدما قبطو يوحَنّا في الحبس، مشى يَسوع نالجَليل كيبشّر بالإنجيل د اللّٰه، كيقول: "تكمّل الوقت وْقرّب مُلك اللّٰه. توبو وآمنو بْخبار الخير." ملّي كان كيتمشّى حدا البحَر د الجَليل، شاف سِمْعان وْخاه أَنْدَراوس كيسيّبو واحد الشبكة في البحَر، حيت كانو صيّادة. وْقالّوم يَسوع: "تبعوني وانا غادي نرجّعكُم صيّادين د الناس." وْفي الحين خلّاو الشبكات وْتبعوه. ݣاز من تمّاك شويا، وْشاف يَعْقوب بن زَبَدي وْخاه يوحَنّا، وْكانو حتّى هُمَ في واحد الفلوكة كيصلّحو الشبكات ديالوم. وْعَيّط لوم في الحين، وْخلّاو باباهُم زَبَدي في الفلوكة مع الخدّامة وْتبعو يَسوع. وْدخلو نْكَفْرِناحوم، وْفي نهار السبت مشى يَسوع نْبيت العبادة وْبدا كيعلّم. وْتعجّبو من التعْليم ديالو، حيت كان كيعلّموم فحال شي واحد الّي عندو السلْطة وْماشي فحال المُعلّمين د الشريعة. في ديك اللحظة غوّت واحد الرَّجل مسْكون الّي كان في بيت العبادة، كيقول: "شنّو بينّا وْبينك، آ يَسوع الناصِري؟ واش جيتِ باش تهلكنا؟ أمّا أنا كنعرفك شكون أنتينا: القدّوس د اللّٰه." وْنهَط فيه يَسوع وْقال: "سْكت وْخْرج مِنّو!" وْزعْزعوْ الجنّ الشرّير بْعنف وْغوّت بْصوت عالي وْخرج من الرَّجل. وْتعجّبو كاملين حتّى تناقشو بيناتوم: "شنّو هَد الشي؟ شنّو هَد التعْليم الجديد؟ حيت بالسلْطة كيآمر حتّى الجّنون المنْݣوسين وْكيطيعو لو!" وْدغيا انْتَشر الخبر ديالو في كُل منْطَقة الجَليل. ملّي خرجو من بيت العبادة، مشاو مباشرة نْعند سِمْعان وأَنْدَراوس، مع يَعْقوب وْيوحَنّا. وْكانت النسيبة د سِمْعان ممْدودة بالسخانة. وْدغيا خبرو يَسوع بِها. قرّب مِنّاْ وْشبّراْ من اليَد ديالاْ وْوقّفاْ. وْخرجَتْ مِنّاْ السخانة وْبدات كَتْـتسخّر عليهُم. وْفي العشيّة، ملّي غربَت الشمس، جابو لو المراطين كاملين والمسْكونين. وْكانو الناس د المدينة كاملة مجْموعين على الباب. وْشافى بزّاف من هَدوك الّي كانو مراطين بأمْراض مخْتَلفة وْخرّج بزّاف د الشياطين وْما خلّى شي الشياطين يهدرو، حيت عرفوه. في الصباح بكري بزّاف، باقي أسلّاس، ناض يَسوع وْخرج وْمشى نواحد الموطَع خالي وْكان كيصلّي تمّاك. وْبقّش عليه سِمْعان وْهَدوك الّي كانو معاه. وْملّي جبروه، قالو لو: "كُل شي كيفتّش عليك." قالّوم: "ن‍مشيو نالدشورة القرابـين باش نبشّر حتّى نْتمّاك، حيت على هَد الشي جيت." وْكان كيبشّر في بيوت العبادة ديالوم في الجَليل كامل وْكيجرّي على الشياطين. جا نْعند يَسوع واحد الرَّجل فيه البرص وْسجد قدّامو كيطلب لو: "إدا بغيتِ، تقدر تصفّيني." وْحنّ عليه يَسوع وْمدّ يَدّو وْحاداه وْقال لو: "أنا بغيتْ، كون صافي." وْفي ديك اللحظة، وْهُوَ باقي كيتكلّم، مشى مِنّو البرص وْصفى. ديك الساعة وصّاه وْصيفطوْ فحالو في الحين، وْقال لو: "شوف، ما تقول والو نْحتّى واحد، وَلكن مْشي وْورّي راسك نالمسؤول في بيت العبادة، وْقدّم على التطْهير ديالك ديك الشي الّي آمر بِه موسى شهادة لِلوم." أمّا هُوَ خرج وْبدا كيخبر بِه وْكيشهّر بِه. وْعلى هَد الشي ما قدر شي يَسوع يدخل نالمدينة ظاهر، وَلكن بقا على برّا في المواطع الخاليين، وْكانو كيجيو نْعندو من كُل جهة. رجَع عاود يَسوع نْكَفْرِناحوم من بعد شي أيّام، وْسمعو بلّي هُوَ في الدار. اتّجمعو بزّاف د الناس حتّى ما بقا شي التيساع قدّام الباب. وْملّي كان يَسوع كيعلّموم بالكلام، جاو نْعندو أربعة د الرجال رافدين واحد المكْحوش. وْحيت ما قدرو شي يقرّبوه لو بْسباب الزحام، حيّدو السقَف فاين كان يَسوع، وْمن بعدما فتحو فيه التقْبة، نزّلو المكْحوش وْهُوَ ممْدود على الفراش. ملّي شاف يَسوع الإيمان ديالوم، قال نالمكْحوش: "آ بني، مغْفورين لك الدنوب ديالك." كانو شي واحدين من المُعلّمين د الشريعة ݣالسين تمّاك كيخمّمو في نَفسوم: "علاش كيهدَر هَد الرَّجل بْهَد الطريقة؟ هُوَ كيكفر. شكون يقدر يغفر الدنوب من غير اللّٰه بوحدو؟" وْفي الحين عرف يَسوع في الروح ديالو بلّي كيخمّمو هَيدا في نَفسوم، وْقالّوم: "علاش كتخمّمو هَيدا في قلبكُم؟ شنّو الّي ساهل فيهُم، يتّقال نالمكْحوش: «مغْفورين لك الدنوب ديالك،» أَوْلا يتّقال لو: «نوض وْرْفد الفراش ديالك وْمْشي»؟ وَلكن باش تعرفو بلّي ابن الإنسان عندو السلْطة على الأرض باش يغفر الدنوب،" قال نالمكْحوش: "كنقول لك نوض، رفد فراشك وْمْشي نالدار ديالك." في هزيزة ناض المكْحوش وْرفد الفراش ديالو وْخرج قدّام الناس كاملين، وْتعجّبو كاملين وْمجّدو اللّٰه، كيقولو: "عُمرنا ما شفْنا فحال هَد الشي." وْخرج يَسوع عاود نالبحَر، وْجاو نْعندو بزّاف د الناس وْبدا كيعلّموم. وْملّي كان ݣايز، شاف لاوي بن حَلْفى ݣالس في الموطَع د الضرائب، وْقال لو: "تبَعني،" وْناض وْتبعوْ. ملّي كان يَسوع ݣالس كياكل في الدار د لاوي، كانو بزّاف د القبّاطة د الضرائب ݣالسين مع يَسوع والتلامد ديالو، حيت كانو بزّاف الّي تبعوه. وْملّي المُعلّمين د الشريعة والفرّيسيّين شافو يَسوع كياكل مع المُدْنبـين والقبّاطة، قالو نالتلامد ديالو: "علاش كياكل مع القبّاطة د الضرائب والمُدْنبـين؟" ملّي سمَع يَسوع، ردّ عليهُم: "الّي هُمَ صحاحين ما محْتاجين شي نالطبيب، وَلكن المراطين هُمَ الّي محْتاجين. ما جيتْ شي باش نعيّط على المتّاقيين، وَلكن على المُدْنبـين." كانو التلامد د يوحَنّا والفرّيسيّين كيصومو، وْجاو نْعند يَسوع وْقالو لو: "علاش التلامد د يوحَنّا والفرّيسيّين كيصومو، أمّا التلامد ديالك ما كيصومو شي؟" وْقالّوم يَسوع: "واش يقدرو الناس د العرس يصومو والعروس باقي معهُم؟ ملّي كيكون العروس معهُم، ما كيقدرو شي يصومو. وَلكن غادي تجي الأيّام الّي غادي يتحيّد عليهُم العروس. عاد غادي يصومو في ديك النهار. حتّى واحد ما يصلّح واحد اللباس بالي بْطرف ديال التوب الجديد. حيت الرقْعة الجديدة غادي تجبد من اللباس البالي وْغادي ترجع التقْطيعة قبَح من الّي كانت. وْحتّى واحد ما كيعمل خمر جديد في شي جلود باليين. وَإلّا، الخمر الجديد غادي يطرْطق الجلود الباليين، والخمر والجلود غادي يخسرو بْجوج بِهُم. بالعكس، الناس كيعملو الخمر الجديد في الجلود الجدادين." في واحد السبت، ݣاز يَسوع من بين الفدادن د الزرَع، وْبداو التلامد ديالو كيقطّعو السبولة وْهُمَ ماشّين. قالو لو الفرّيسيّين: "شوف! علاش كيعملو في نهار السبت ديك الشي الّي ماشي حلال؟" قالّوم: "واش ما عُمركُم قريتو الّي عمل داود ملّي كان محْتاج وْجاه الجّوع، هُوَ وْهَدوك الّي كانو معاه؟ دخل نْبيت اللّٰه في أيّام أَبياتار، رئيس المسؤولين، وْكلا خبز القُرْبان الّي هُوَ حلال ياكلوه غير المسؤولين على بيت الله، وْعْطى حتّى نِلّي كانو معاه." قالّوم: "اللّٰه جعل نهار السبت نالإنسان، وْما جعل شي الإنسان نْنهار السبت. على ديك الشي ابن الإنسان هُوَ الرَّبّ حتّى على نهار السبت." مرّة يَخرى دخل يَسوع نْبيت العبادة، وْكان تمّاك واحد الرَّجل يَدّو مبْطولة. البعض مِنّوم كانو كيفتّشو على شي سبّة باش يتَّهمو يَسوع، وْكانو كيراقبوه، واش غادي يشافيه في نهار السبت. قال يَسوع نالرَّجل الّي يَدّو مبْطولة: "نوض فوسطوم." وْقالّوم: "واش حلال في نهار السبت يتّعمل الخير أَوْلا الشَّرّ؟ تنجّي النفس أَوْلا تقَـتلاْ؟" وْسكتو. ديك الساعة شاف في الناس الّي دايرين بِه، وْهُوَ غضْبان وْحزْنان على القصوحيّة د قلبوم، وْقال نالرَّجل: "مدّ يَدّك." وْمدّاْ وْرجعَتْ يَدّو صحيحة. وْخرجو دغيا الفرّيسيّين، وْتشاورو عليه مع الهيرودُسيّين باش يقتلوه. أمّا يَسوع مشى مع التلامد ديالو نالبحَر وْتبعوه بزّاف د الناس من الجَليل واليَهوديّة. ملّي سمعو ديك الشي الّي عمل يَسوع، جاو نْعندو بزّاف د الناس من اليَهوديّة وأُورُشَليم وأَدوميّة وْمن الجّهة يَخرى د واد الأُرْدُن، وْجوايه صور وْصيدا. وْوصّى التلامد ديالو باش يوجّدو لو شي فلوكة باش ما يتزاحمو شي عليه الناس. حيت كان شافى بزّاف د الناس، المراطين كاملين تزاحمو عليه باش يحاديواه. وْملّي شافوه الشياطين، كانو كيسجدو لو وْكيغوّتو وْكيقولو: "أنتينا هُوَ اِبن اللّٰه!" وَلكن أمروم بالجُهد باش ما يشهّرو شي بِه. من بعد طلَع يَسوع نالجّبل وْعَيّط على الّي بغى هُوَ، وْجاو نْعندو. واخْتار طناش باش يكونو معاه ويصيفطوم باش يبشّرو، وْتكون عندوم السلْطة باش يشافيو الأمْراض ويطردو الشياطين. والطناش الّي اخْتاروم، هُمَ سِمْعان، الّي سمّاه يَسوع بُطْرُس، وْيَعْقوب بن زَبَدي وْيوحَنّا خاه د يَعْقوب، الّي سمّاهُم بُوانَرْجِس، يعني "أُوْلاد الرعد،" وأَنْدَراوس وْفيلِبُّس وْبَرْتولَماوس وْمَتّى وْتوما ويَعْقوب بن حَلْفى وْتَدّاوُس وْسِمْعان الوطني الغيور، وْيَهودا الإسْخَريوطي الّي خانوْ. ديك الساعة دخلو نالدار، وْعاود اتّجمعو بزّاف د الناس حتّى ما قدرو شي ياكلو الخُبز. ملّي سمعو الحباب ديالو، خرجو باش يدّيواه، حيت قالو بلّي خرج لو عقلو. أمّا المُعلّمين د الشريعة الّي جاو من أُورُشَليم قالو: "فيه بَعْلَزَبول، وْبْرَئيس الشياطين كيخرّج الشياطين." وْيَسوع عَيّط لوم وْقالّوم بالأمْتال: "كيفاش يقدر الشيطان يخرّج الشيطان؟ إدا واحد الممْلكة تقسّمَتْ على نفساْ، ما تقدر شي تبقا ديك الممْلكة. وِادا واحد الدار تقسّمَتْ على نفساْ، ما تقدر شي تبقا ديك الدار. وِادا رجَع الشيطان ضدّ راسو وْتقسم، ما يقدر شي يتبت، وَلكن غادي يتّهلك. ما يقدر حتّى واحد يدخل نالدار د الرَّجل القوي ويدّي لو المتاع ديالو إدا ما كتّف شي الرَّجل القوي في الُوّل، وْعاد ديك الساعة يخْوي لو الدار ديالو. كنقول لكُم الحقّ بلّي الدنوب كاملة والكُفر يقدر يتّغفر نالناس. أمّا الّي كيكفر بالروح القُدُس ما عُمرو غادي يكون عندو الغُفْران، حيت هَد الدنب كيبقا عليه إلى الأبد." قال هَد الشي حيت هُمَ قالو بلّي فيه واحد الروح شرّيرة. ديك الساعة جات يمّاه والخوت ديالو وْوَقفو على برّا وْصيفطو شي واحد باش يعيّط لو. والجماعة د الناس الّي كانو ݣالسين دايرين بِه قالو لو: "ها يمّاك وْخوتك على برّا كيفتّشو عليك." جاوبوم: "شكون هي يمّا وْشكون هُمَ خوتي؟" وْشاف في هَدوك الّي ݣالسين دايرين بِه وْقال: "ها هي يمّا وْخوتي. حيت كُل واحد الّي كيعمل إرادة اللّٰه، هُوَ خاي وْختي ويمّا ديالي." بدا يَسوع عاود كيعلّم حدا البحَر. وْتّجمعو عليه جماعة كبيرة د الناس حتّى دخل نالفلوكة وْݣلس فيها على البحَر، والناس كاملين كانو في البرّ حدا البحَر. وْكان كيعلّموم بزّاف بالأمْتال، وْقالّوم في التعْليم ديالو: "سمعو! راه الفلّاح خرج باش يزرع. وْملّي كان كيزرع، طاح شويا د الزرع حدا الطريق، وْجاو الطيور د السما وْكلاواه. طاح يَخُر على الموطَع د الحجار فاين ما كان شي بزّاف د التراب، وْنبت دغيا، حيت ما كان شي الغُرق في التراب. وَلكن ملّي شرقَت الشمس، اتّحرق، وْحيت ما عندو شي العروق، يبس. طاح يَخُر فوسط الشوك، وْطلَع الشوك وْجيّفوْ وْما جاب شي الغلّة. طاح يَخُر في الأرض المزيانة، وْملّي نبت وْكبر، جاب الزرّيعة، وْعْطات واحدة تلاتين مرّة ويَخرى ستّين مرّة ويَخرى مية مرّة." ديك الساعة قالّوم: "الّي عندو الودْنين باش يسمع، لازم يسمع." ملّي كان بوحدو، سقصاواه الّي دايرين بِه مع الطناش على المتال. وْقالّوم: "أنتُمَ اتّعطى لكُم باش تعرفو سِرّ مُلك اللّٰه، أمّا الّي هُمَ على برّا كُل شي يتّقالّوم بالأمْتال. حيت واخّا هُمَ شايفين، غادي يشوفو وْما غادي شي يفطنو، وْواخّا هُمَ سامعين، غادي يسمعو وْما غادي شي يفهمو، باش ما يتوبو شي والدنوب ديالوم يتّغفرو لوم." وْقالّوم: "واش ما عرفْتو شي هَد المتال؟ وْكيفاش، إدَن، غَد تفهمو الأمْتال يَخرين؟ الفلّاح كيزرع الكلام. وْبعض الناس هُمَ فحال الزرّيعة الّي طاحتْ على الطريق الّي فيهُم اتّزرع الكلام، وْملّي كيسمعو، كيجي الشيطان في الحين وْكيحيّد الكلام الّي كان مزْروع في قلبوم. وْبعض الناس هُمَ فحال الزرّيعة الّي اتّزرعَتْ على المواطع المحجّرين. هُمَ الّي كيسمعو الكلام وْفي الحين كيقبلوه فرْحانين. وَلكن ما عندوم شي العروق في نَفسوم وْكيصبرو غير شي مُدّة. وْمن بعد، ملّي كيوقع شي ضيق أَوْلا تعدّي بْسباب الكلام، دغيا كيعترو. وْبعض الناس فحال الزرّيعة الّي اتّزرعَتْ بين الشوك. هُمَ هَدو الّي كيسمعو الكلام، وَلكن الهموم د الدنيا وْمحبّة المال والشهَوات د أمور يَخرين كيدخلو وْكيجيّفو الكلام وْكيرجع بلا غلّة. والبعض يَخُر هُمَ الّي اتّزرعو على الأرض المزيانة، الّي كيسمعو الكلام وْكيقبلوه وْكيجيبو الغلّة. واحدة كتعطي تلاتين مرّة ويَخرى ستّين مرّة ويَخرى مية مرّة." وْقالّوم: "واش كاين شي واحد الّي كيجيب اللامْبة وْكيعملاْ تحت السطل أَوْلا تحت الفراش؟ واش ما كيعملاْ شي على المرْفع؟ حيت ما كاين حتّى حاجة مخبّعة الّي ما غادي شي تظهر، وْما كاينة حتّى حاجة سِرّيّة الّي ما غادي شي تْتّشهر. الّي عندو الودْنين باش يسمع، لازم يسمع." قالّوم: "ردّو بالكُم شنّو كتسمعو. بالعبار باش كَتْعبرو، غادي يتّعبر لكُم ويتّزاد لكُم. حيت الّي عندو غادي يتّعطى لو كتَر، أمّا الّي ما عندو شي، حتّى ديك الشي الّي عندو، غادي يتحيّد لو." وْقال: "مُلك اللّٰه كيشبه نواحد الرَّجل الّي كيسيّب الزرّيعة في الأرض. وْكينعس في الليل وْكينوض في النهار والزرّيعة كَتْنبت وْكتكبر، وْهُوَ ما كيعرف شي كيفاش. حيت الأرض من نفساْ كتجيب الغلّة: في الُوّل النبات، عاد السبولة، وْمن بعد الزرَع معمّر في السبولة. وْملّي كينضج الزرَع، في الحين كيرفع المنْجل، حيت جا وقت الحصاد." قال يَسوع عاود: "بَيّاش نشبّهو مُلك اللّٰه أَوْلا بْشْمن متال ن‍متّلوه؟ هُوَ فحال واحد الحُبّة د الخرْدل ملّي اتّزرعَتْ في الأرض، راها السْتيتوة في الحبوب كاملين الّي في التراب. وَلكن من بعدما اتّزرعَتْ، كتطلع وْكترجع كبَر من القطاني كاملين وْكتعمل أغْصان كبيرة حتّى الطيور د السما يقدرو يعشّشو تحت الظلّ ديالاْ." كان يَسوع كيعلّموم بأمْتال كتَر فحال هَدو على حسب الفهم ديالوم. وْبلا متال ما كان شي كيهدَر معهُم. أمّا ملّي كان بوحدو مع التلامد ديالو، كان كيفسّر لوم كُل شي. في ديك النهار، ملّي وصلَت العشية، قالّوم: "آجيو نقطعو نالجّهة يَخرى د البحَر." وْخلّاو الناس وْمشاو مع يَسوع في الفلوكة الّي هُوَ كان فيها، وْكانو فلايك يَخرين معاه. وْوقعَتْ واحد العاصفة قويّة د الريح وْكانو المواج كيضربو الفلوكة حتّى قرّبَتْ تعمر. وْكان يَسوع في اللَور د الفلوكة ناعس على واحد المخدّة. وْفيّقوه وْقالو لو: "آ المُعلّم، واش ما كيهمّك شي بلّي غادي نموتو؟" وْفاق وْنهَط في الرّيح وْقال نالبحَر: "سْكت! تهدّن!" وْوقَف الريح وْرجعَتْ واحد الهدْنة عظيمة. وْقالّوم: "مالْكُم خوفانين هَيداك؟ واش باقي ما عندكُم شي الإيمان؟" خافو خوف كبير وْقالو مع بعطوم: "شكون هُوَ هَدا؟ حيت حتّى الرّيح والبحَر كيطيعوه!" مشاو نالجّهة يَخرى د البحَر نْبلاد الجَراسيّين. وْملّي خرج يَسوع من الفلوكة، في الحين تلاقاه واحد الرَّجل خارج من المقابر، الّي فيه واحد الجنّ منْݣوس. كان ساكن في المقابر وْما قدر حتّى واحد يربطوْ حتّى بالسناسل والو. حيت ربطوه بزّاف د المرّات بالقيود والسناسل، وْقطّعوم وْهرّس القيود. وْما قدر حتّى واحد يطوّعوْ. وْكان دائمًا ليل وْنهار في الجّبولة وْفي المقابر كيغوّت وْكيجرح نفسو بالحجار. ملّي هَد الرَّجل شاف يَسوع من بعيد، جرى وْسجد لو، وْغوّت بْصوت عالي، وْقال: "شنّو بيني وْبينك، آ يَسوع اِبن اللّٰه العالي؟ دخّلْتْ عليك باللّٰه ما تعدّبني شي." حيت كان قال لو يَسوع: "خْرج من الرَّجل، آ الجنّ المنْݣوس." وْسقصاه: "شنّو مسمّي أنتينا؟" جاوب وْقال: "اِسمي جيش، حيت حنايَ بزّاف." وْرغبوْ بزّاف باش ما يطردوم شي من ديك البلاد. كان تمّاك على الجّبل واحد القَطيع كبير د الحلالف كيرعا. وْطلبوه الجنون كيقولو: "صيفطنا باش ندخلو في الحلالف." وْخلّاهُم يَسوع. وْخرجو الجنون المنْݣوسين وْدخلو في الحلالف. وْجرى القَطيع بالجُّهد من الحدورة نالبحَر وْغرق تمّاك. وْكانو تقْريبًا ألفَين حلّوف. أمّا السُّرّاح د الحلالف هربو وْخبرو الّي في المدينة وْفي الفدادن. وْخرجو الناس باش يشوفو ديك الشي الّي وقَع. جاو نْعند يَسوع وْملّي شافو الرَّجل الّي كان مسْكون بالجيش د الجنون ݣالس وْلابس وْبْعقلو، خافو. وْهَدوك الّي شافو هَد الشي الّي وقَع، عاودو نالناس شنّو وقَع نالمسْكون وْنالحلالف. وْبداو كيطلبو من يَسوع يمشي فحالو من البلاد ديالوم. ملّي يَسوع كان كيطلع في الفلوكة، رغبوْ الرَّجل الّي كان مسْكون باش يخلّيه يمشي معاه. وَلكن يَسوع ما خلّاه شي، وْقال لو: "مْشي نالدار ديالك وْعند أهْلِك وْخبروم بْهَد الشي الّي عمل معك الرَّبّ وْكيفاش رحمك." وْمشى وْبدا كيخبر في عشر المُدُن بْكُل شي الّي عمل يَسوع معاه. وْتعجّبو الناس كاملين. ملّي ݣاز يَسوع في الفلوكة نالجّهة يَخرى، اتّجمعو عليه بزّاف د الناس، وْكان حدا البحَر. وْجا واحد الرئيس د بيت العبادة، الّي مسمّي يايرُس، وْملّي شاف يَسوع، طاح عند رِجلو. وْرغبوْ بزّاف، كيقول: "بِنْتي في حالة الموت. آجي تعمل يَدّك عليها باش تتشافى وْتعيش." مشى يَسوع معاه وْتبعوه بزّاف د الناس وْكانو كيتزاحمو عليه. وْواحد المراة الّي كان فيها نزيف د الدم مُدّة طناشر عام، (كانت تعدّبَتْ بزّاف على اليَد د الأطِبّاء، وْصرفَتْ كُل ما عنداْ وْما اسْتَفدَتْ والو. بالعكس، رجعَت الحالة ديالاْ قبَح من الّي كانت)، ملّي سمعَتْ بيَسوع، جات فوسط الناس من موراه وْحادات الجلّابة ديالو. حيت قالت في نفساْ: "إدا حاديت، واخّا غير الحوايج ديالو، نتشافى." وْفي ديك اللحظة، وقَف النزيف د الدم ديالاْ وْحسّاتْ في الجسم ديالاْ بلّي براتْ من المرض. في الحين فطن يَسوع في نفسو بالقوّة الّي خرجَتْ منّو وْدار في الناس وْقال: "شكون الّي حادى الحوايج ديالي؟" قالو لو التلامد ديالو: "أنتينا كتشوف الناس كيتزاحمو عليك وْكتقول: «شكون حاداني؟»!" وَلكن يَسوع بقا كيشوف من كُل جهة باش يشوف المراة الّي عملَتْ هَد الشي. أمّا المراة، عارفة الّي وقَع لاْ، قرّبَتْ نيَسوع خوفانة وْكَتْـتّرْعد وْسجدَتْ لو، واعْتَرفَت بالحقيقة كاملة. وْقالّاْ يَسوع: "آ بِنْتي، الإيمان ديالك شافاك. مْشي بْسلام وْكون بارية من المرض ديالك." وْملّي كان باقي كيهدَر، جاو شي ناس من الدار د رئيس بيت العبادة كيقولو: "بِنْتك ماتتْ، علاش باقي كتشطن المُعلّم؟" أمّا يَسوع سمَع الكلام الّي قالو، وْقال نْرَئيس بيت العبادة: "ما تخاف شي. غير آمن." وْما خلّى حتّى واحد يتبعوْ، غير بُطْرُس وْيَعْقوب وْيوحَنّا خاه د يَعْقوب. وْمشاو نالدار د رئيس بيت العبادة وْشاف يَسوع الفوضى، والناس كيبكيو وْكينوّحو بزّاف. وْدخل وْقالّوم: "علاش كتعملو الصداع وْكتبكيو؟ البنيتة ماشي ميّتة، وَلكن غير ناعسة." وْضحكو عليه. أمّا هُوَ خرّجوم كاملين وادّى باباها د البنيتة ويمّاها والّي كانو معاه، وْدخل فاين كانت البنيتة ممْدودة. وْشبّر البنيتة من يَدّاْ وْقالّاْ: "طَليثا قومي،" يعني، "آ البنيتة، كنقول لك نوض." وْفي الحين ناضَتْ البنيتة كتمشي، حيت كان في عُمراْ طناشر عام. وْفي الحين تعجّبو بزّاف كاملين بِهُم. وَلكن يَسوع وصّاهُم بالجُهد باش ما يعرف حتّى واحد هَد الشي. وآمروم باش يعطيو لاْ الماكلة. خرج يَسوع من تمّاك وْمشى نالقرية ديالو، وْتبعوه التلامد ديالو. وْملّي جا السبت، بدا كيعلّم في بيت العبادة. وْبزّاف د الناس الّي سمعوه تعجّبو وْقالو: "ماين جا نْهَد الرَّجل هَد الشي؟ وْشنّي هي هَد الحكْمة الّي اتّعطات لو حتّى كيتّعملو المُعْجزات على يَدّو؟ واش ماشي هَدا هُوَ النجّار بن مَرْيَم، وْخوتو هُمَ يَعْقوب وْيوسف وْيَهودا وْسِمْعان؟ واش ما كاينين شي خواتاتو هنايَ معنا؟" وْكانو كيعترو فيه. ديك الساعة قالّوم يَسوع: "ما كاين حتّى شي نَبي بلا تَوْقير، من غير في البلاد ديالو وْبين حبابو وْفي الدار ديالو." وْيَسوع ما قدر شي يعمل تمّا حتّى شي مُعْجزة، غير عمل يَدّو على شي مراطين قلالين وْشافاهُم. وْتعجّب من قلّة الإيمان ديالوم. وْمشى كيدور في الدشورة الّي دايرين بِها كيعلّم. وْجمَع يَسوع الطناش د التلامد، وْبدا كيصيفطوم جوج بْجوج. وْعْطاهُم السلْطة على الجّنون المنْݣوسين. وْوصّاهُم باش ما يدّيو حتّى حاجة في الطريق، غير واحد العُكّاز وْصافي، لا شكارة ولا خُبز ولا فلوس في الحزام. وَلكن يلبسو الصبابط، وْما يلبسو شي جوج د الجلالب. وْقالّوم: "ملّي تدخلو نْشي دار، بقاو فيها حتّى تخرجو من تمّاك. وِادا ما رحّبو شي بِكُم وْما سمعو لكُم شي، خرجو من تمّاك وْنفطو الغبْرة الّي تحت رِجلكُم شهادة ضدّوم." وْخرجو التلامد وْبداو كيبشّرو الناس باش يتوبو. وْطردو بزّاف د الشياطين وْدهنو بزّاف د المراطين بالزيت وْشافاوهُم. سمَع هيرودُس المَلِك هَد الشي، حيت اِسم يَسوع رجَع مشهور. وْكانو شي د الناس كيقولو بلّي يوحَنّا المَعْمَدان قام من بين الميّتين وْعلى ديك الشي عندو القُدْرة باش يعمل المُعْجزات. ويَخرين قالو: "هَدا إيليّا." ويَخرين بلّي هُوَ شي نَبي فحال واحد من الأَنْبياء. وَلكن ملّي سمَع هيرودُس، قال: "هَدا هُوَ يوحَنّا الّي قطّعْتْ لو راسو. راه اتّبعت حيّ." حيت هيرودُس بْنفسو كان صيفط وْشبّر يوحَنّا وْكتّفوْ في الحبس، بْسباب هيروديّا، المراة د فيلِبُّس خاه، حيت كان تجوّج بِها. حيت يوحَنّا كان كيقول نْهيرودُس: "ماشي حلال عليك تدّي المراة د خاك." وْكانت هيروديّا حاقدة عليه وْبغات تقتلوْ، وَلكن ما قدرَتْ شي، حيت هيرودُس كان كيخاف من يوحَنّا وْكيحميه، حيت عارف بلّي هُوَ رَجل متّاقي وْقدّيس. هيرودُس كان كيعجبوْ يسمعوْ، واخّا كيبقا حيران. أَخيرًا جات الفُرْصة نْهيروديّا، حيت هيرودُس عمل في عيد الميلاد ديالو واحد الحفلة نالرؤساء والقُيّاد والناس المهمّين د الجَليل. وْدخلَتْ البنت د هيروديّا وْشطحَتْ قدّاموم، وْعجبَتْ هيرودُس والمعْروطين، وْقال نالبنت: "ديك الشي الّي بغيتِ طَلبوْ منّي وْنعطيه لك." وْحلف لاْ: "الحاجة الّي طلبْتِ منّي غادي نعطيها لك حتّى النُّص د الممْلكة ديالي." خرجَتْ وْقالت نيمّاها: "شنّو نطلب؟" وْقات لاْ: "الراس د يوحَنّا المَعْمَدان." وْدخلَتْ في الحين بالجري نْعند المَلِك وْطلبَتْ: "بغيتك تعطيني دابا الراس د يوحَنّا المَعْمَدان على واحد الصينيّة." والمَلِك حزن بزّاف. وَلكن بْسباب الحلف ديالو قدّام المعْروطين، ما بغى شي يرفض الطلب ديالاْ. وْدغيا صيفط المَلِك واحد العسْكري وآمروْ يجيب الراس د يوحَنّا. مشى العسْكري وْقطّع لو راسو في الحبس، وْجاب راسو في واحد الصينيّة وْعْطاه نالبنت وْهِيَ عطاتوْ نيمّاها. ملّي سمعو التلامد ديالو بْديك الشي، مشاو وْرفدو الجُتّة ديالو وْعملوها في القبَر. اتّجمعو الرُّسُل نْعند يَسوع وْخبروه بْكُل شي الّي عملو وْكُل شي الّي علّمو. قالّوم: "آجيو أنتُمَ بوحدكُم نْشي موطَع خالي وارْتاحو شويا،" حيت كانو بزّاف الماجّين والماشّين وْما كان شي عندوم الوقت باش ياكلو. وْمشاو في الفلوكة نواحد الموطَع خالي بوحدوم. وْشي د الناس شافوهُم ماشّين. عرفوهُم وْجراو على رِجلوم من المُدُن كاملين وْسبقوهُم نْتمّاك. وْملّي خرج يَسوع، شاف الزحام وْحنّ عليهُم، حيت كانو فحال الغنم بلا راعي، وْبدا كيعلّموم بزّاف د الحاجات. ملّي مشى الحال، جاو نْعندو التلامد ديالو كيقولو لو: "الموطَع خالي، وْمشى الوقت. صيفط الناس باش يمشيو نالعزايب والدشورة القريبة يشريو منّاْ ما ياكلو." قالّوم يَسوع: "عْطيوهُم أنتُمَ ما ياكلو." قالو لو: "واش بغيتِنا نمشيو وْنشريو الخُبز بْميتَين دينار وْنعطيوهُم ما ياكلو؟" سقصاهُم: "شحال د الخبزات عندكُم؟ مْشيو تشوفو." وْملّي عرفو، قالو خمسة د الخبزات وْجوج د الحوتات. وْوصّاهُم يݣلّسو الناس كاملين في مجْموعات على الربيع الخضَر. وْݣلسو مجموعة مجموعة، مية مية وْخمسين خمسين. وْشبّر يَسوع الخمسة د الخبزات والجوج د الحوتات وْعلّى عينو نالسما وْبارك وْقطّع الخبزات، وْعْطى نالتلامد ديالو باش ينزّلوها قدّاموم. وْقسم الجوج د الحوتات على كُل شي. وْكلاو كاملين وْشبعو. وْجمعو طناشر قفّة معمّرة بالكسور والحوت. والّي كلاو من الخبزات كانو تقْريبًا خمس آلاف رَجل. في الحين فرض يَسوع على التلامد ديالو يدخلو نالفلوكة ويسبقوه نالجّهة يَخرى نْبيت صيدا حتّى يصيفط الناس فحالوم. وْمن بعدما ودّعوم، مشى نالجّبل باش يصلّي. وْملّي جا الليل، كانت الفلوكة فوسط البحَر وْهُوَ بوحدو على البَرّ. وْشافوم معدّبـين في التقْديف، حيت الريح كان ضدّوم. وْفي نصاصة الليل قريب الصباح، لحق عليهُم ماشّي على رِجلو فوق البحَر، وْبغى يفوتوم. وْملّي شافوه ماشّي فوق البحَر، ظنّو بلّي هُوَ شي شبح وْغوّتو. حيت كاملين شافوه وْخافو. وْفي الحين هدَر معهُم يَسوع وْقالّوم: "كونو هانيين! أنا هُوَ، ما تخافو شي." وْطلَع نْعندوم نالفلوكة وْتهدّن الريح. وْدهشو بزّاف، مخْلوعين بلا قياس. حيت ما فهمو شي المعْنى د المُعْجزة د الخبزات، حيت كانت القلوبة ديالوم قاصحة. وْملّي قطعو البحَر وَصلو نأرض جَنّيسارَت، فاين ربطو الفلوكة. وْملّي خرجو من الفلوكة، في الحين الناس عرفو يَسوع. وْدارو في ديك المنْطَقة كاملة وْبداو كيجيبو لو المراطين على الفروشة نالموطَع الّي سمعو بِه بلّي هُوَ تمّاك. وْفاين ما دخل نالدشورة أَوْلا نالمُدُن أَوْلا نالجّنانات، نزّلو المراطين في الساحات وْكانو كيرغبوه باش يحاديو غير الجلايل د الجلّابة ديالو. والناس كاملين الّي حاداواه تشافاو. اتّجمعو على يَسوع الفرّيسيّين وْبعض المُعلّمين د الشريعة الّي جاو من أُورُشَليم، وْملّي شافو بعض التلامد ديالو كياكلو الخُبز باليَدّين ديالوم موسّخين، يعني ماشي مغْسولين، لاموهُم. حيت الفرّيسيّين واليهود كاملين، إدا ما يغسلو شي يَدّوم في العادة ديالوم، ما كياكلو شي، تابعين التقاليد د الشيوخ ديالوم. وْملّي كيجيو من السوق، إدا ما غسلو شي، ما كياكلو شي. وْكانو تابعين بزّاف د التقاليد يَخرين، فحال غسيل الكيسان والبرارد والقشوع د النحاس والمطارب. سقصاواه الفرّيسيّين والمُعلّمين د الشريعة: "علاش ما كيتمشّاو شي التلامد ديالك على حسب التقاليد د الشيوخ، وَلكن كياكلو الخبز باليَدّين ماشي مغْسولين؟" ردّ عليهُم يَسوع: "راه الّي تنبّأ عليكُم إشَعْيا كان صحيح، آ المنافقين، فحال ما هُوَ مكتوب: «هَد القوم كيكرّموني بالشفايف ديالوم، أمّا القلب ديالوم بعيد عليَّ. باطل كيعبدوني وْكيعلّمو بالتعْليم الّي هُوَ من الوَصايا د الناس.» حيت أنتُمَ خلّيتو وَصيّة اللّٰه وْقبطْتو في تقاليد الناس." زاد وْقالّوم: "د بالصّحّ خلّيتو وَصيّة اللّٰه باش تشبّرو في التقاليد ديالكُم، حيت موسى قال: «وَقّر باباك ويمّاك، والّي كيزبّل في باباه أَوْلا يمّاه لازم يموت.» أمّا أنتُمَ كتقولو: إدا كان شي واحد عندو باش يعاون باباه أَوْلا يمّاه، وْقالّوم: «قُرْبان،» يعني «هديّة ناللّٰه،» ما كتخلّيواه شي يعمل حتّى شي حاجة نالخير نْباباه أَوْلا نيمّاه. هَيداك كتبطّلو كلام اللّٰه بالتقاليد ديالكُم الّي كَتْوَرتوها، وْبزّاف د الحاجات فحال هَدو كتعملوهُم." وْعَيّط يَسوع عاود نالناس وْقالّوم: "سمعو منّي كاملين وْفهمو. ما كاين حتّى حاجة خارج الإنسان الّي كتدخل فيه وْكتوسّخوْ. بالعكس، الّي كيخرج مِنّو، هُوَ الّي كيوسّخوْ. [ إدا شي واحد عندو الودْنين باش يسمع، لازم يسمع.]" ملّي خلّى الناس، دخل نالدار. سقصاواه التلامد ديالو على المعنى د المتال. قالّوم: "واش حتّى أنتُمَ هَيدا بلا فهامة؟ واش ما كتفهمو شي بلّي حتّى شي حاجة خارج الإنسان الّي كتدخل فيه تقدر توسّخوْ؟ حيت ما كتدخل شي نالقلب ديالو، وَلكن نالمَعدة وْكتخرج من الجسم." وْبْهَد الشي يَسوع طهّر كُل ماكلة. وْقال: "ديك الشي الّي كيخرج من الإنسان، هُوَ الّي كيوسّخوْ، حيت من داخل القلوبة د الناس كيخرجو الأفْكار القباحين، الزنا، السرْقة، القتل، الفسق، الطمع، الخبت، الغشّ، الفساد، الغيرة، النميمة، الكبرياء، والحماقة. هَد الأُمور القباحين كاملين كيخرجو من داخل الإنسان وْكيوسّخوه." خرج يَسوع من تمّاك وْمشى نْجوايه صور وْصَيدا، وْدخل نواحد الدار، وْيَسوع ما بغى شي يعيق بِه حتّى واحد، وَلكن ما قدر شي يتخبّع. وْسمعَتْ بِه واحد المراة الّي البنيتة ديالاْ فيها واحد الجنّ منْݣوس، وْجات وْطاحتْ عند الرِّجلين ديالو. ما كانت شي المراة يهودية، وَلكن فينيقيّة سوريّة، طلبَتوْ باش يخرّج الجنّ من بِنتاْ. أمّا يَسوع قالّاْ: "لازم يشبعو الولاد في الُوّل، حيت ماشي مزيان نشبّر الخُبز د الولاد وْنسيّبوْ نالجرا." ردَّتْ عليه: "كاينة، يا رَبّي، وَلكن حتّى الجرا كياكلو تحت الطيفور من الفتاوت د الولاد." ديك الساعة قالّاْ: "على هَد الكلمة، مْشي. الجنّ راه خرج من بنتك." وْمشات نالدار ديالاْ وْجبرَت البنيتة ممْدودة على الفراش والجنّ كان خرج منّاْ. خرج عاود يَسوع من جوايه صور وْݣاز بْصيدا وْوصَل نالبحَر د الجَليل في جوايه عشر المُدُن. وْجابو نْعندو واحد الصمك وْزيزون وْطلبو منّو يعمل يَدّو عليه. وْبعّدوْ يَسوع من الناس وْحشى الصبْعين ديالو في الودْنين د الرَّجل وْبزَق وْحادى اللسان ديالو. وْعلّى عينو نالسما وْتنهّد وْقال لو: "إفّاتاح،" يعني "تْفْتَح." وْتّفتحو الودْنين ديالو وْتحلَّت العقْدة د اللسان ديالو وْهدَر مسرّح. وْوصّاهُم يَسوع باش ما يخبرو حتّى واحد. وَلكن كُل ما وصّاهُم كتَر، كُل ما نشرو كتَر الخبار. وْتعجّبو بزّاف وْقالو: "كيعمل كُل شي مزيان! رجّع الصمكين كيسمعو والزيازن كيهدرو." في ديك الأيّام، ملّي اتّجمعو عاود بزّاف د الناس وْما كان شي عندوم ما ياكلو، عَيّط يَسوع نالتلامد ديالو وْقالّوم: "كيعزّو عليَّ الناس حيت هَدي تلت أيّام وْهُمَ ݣالسين معيَ وْما عندوم ما ياكلو. وِادا صيفطْتوم نالديور ديالوم صايمين، غادي يسخفو في الطريق، حيت بزّاف مِنّوم جاو من بعيد." جاوبوه التلامد ديالو: "ماين يقدر الواحد يشبّع هَد الناس بالخُبز هنايَ في الخلا؟" سقصاهُم يَسوع: "شحال د الخبزات عندكُم؟" قالو: "سبعة." وآمر الناس يݣلسو في الرحْبة، وْشبّر السبعة د الخبزات وْشكر وْقطّع وْعْطى نالتلامد ديالو باش يفرّقوها، وْفرّقوها بين الناس. كان عندوم شي شويا د الحوتات سْتيتْوين. وْباركوم وْطلب مِنّوم يفرّقوهُم حتّى هُمَ. كلاو وْشبعو، وْرفدو الّي شاط من الكسور سبعة د السلال. الناس الّي كلاو كانو تقْريبًا أربع آلاف، وْصيفطوم فحالوم. وْفي الحين دخل نالفلوكة مع التلامد ديالو وْمشى نْجوايه دَلْمانوثة. خرجو الفرّيسيّين وْبداو كيتجادلو مع يَسوع، كيطلبو مِنّو شي علامة من السما باش يجرّبوه. وْتنهّد في نفسو وْقال: "علاش كيفتّش هَد الجيل على شي علامة؟ كنقول لكُم الحقّ، هَد الجيل ما غادي يشوف حتّى شي علامة." وْخلّاهُم، وْدخل عاود نالفلوكة وْمشى نالجّهة يَخرى. وْنساو التلامد يدّيو الخُبز وْكانت عندوم غير خُبْزة واحدة في الفلوكة. وْوصّاهُم وْقال: "ردّو بالكُم وْحضيو راسكُم من الخميرة د الفرّيسيّين والخميرة د هيرودُس." وْتناقشو بيناتوم: "قال هَد الشي حيت ما جيبْنا شي الخُبز." وْفطن يَسوع وْقالّوم: "علاش كَتْـتناقشو حيت ما عندكُم شي الخُبز؟ واش ما كتفطنو شي وْما كتفهمو شي؟ واش القلوبة ديالكُم قاصحة حتّى نْهَد الدرجة؟ واش عندكُم العينين وْما كتشوفو شي وْعندكُم الودْنين وْما كتسمعو شي وْما كتعقلو شي؟ ملّي قطّعْتْ خمسة د الخبزات نْخمس آلاف، شحال من قُفّة معمّرة بالكسور جمعْتو؟" قالو لو: "طناش." "وْملّي قطّعْتْ سبعة د الخبزات نأربع آلاف، شحال من سلّة معمّرة بالكسور جمعْتو؟" قالو: "سبعة." وْقالّوم: "وْباقي ما فهمْتو شي؟" من بعد وصَل نْبيت صيدا. وْجابو لو واحد العمى وْطلبو لو يحاديه. ديك الساعة شبّر يَسوع العمى بْيَدّو وْخرّجوْ على برّا من القرية وْبزَق في العينين ديالو وْعمل يَدّو عليه، وْسقصاه إدا شاف شي حاجة. علّى الرَّجل العينين ديالو وْقال: "كنشوف الناس فحال الشجار كيمشيو." وْعاود عمل يَدّو على العينين ديالو وْتشافى وْرجَع كيشوف كُل شي واضح. وْصيفطوْ نالدار ديالو وْقال لو: "ما تدخل شي نالقرية." خرج يَسوع والتلامد ديالو نالدشورة د قَيصَريّة فيلِبُّس. وْفي الطريق سقصى التلامد ديالو: "شنّو كيقولو الناس عليَّ، شكون أنا؟" ردّو عليه: "يوحَنّا المَعْمَدان، ويَخرين إيليّا، ويَخرين واحد من الأَنْبياء." وْسقصاهُم: "وانتُمَ، شنّو كتقولو عليَّ، شكون أنا؟" ردّ عليه بُطْرُس وْقال لو: "أنتينا هُوَ المسيح." وَلكن حدّروم يَسوع باش ما يخبرو حتّى واحد عليه. وْبدا يَسوع كيعلّموم بلّي ابن الإنسان لا بدّ يتعدّب بزّاف ويرفضوه الشيوخ وْرُؤَساء المسؤولين في بيت المَقْدس والمُعلّمين د الشريعة ويقتلوه، وْمن بعد تلت أيّام غادي يتّبعت حيّ. قال هَد الشي واضح. وْبُطْرُس ادّى يَسوع بوحدو وْبدا كيوبّخوْ. وَلكن يَسوع دار وْشاف في التلامد ديالو وْوبّخ بُطْرُس وْقال لو: "بعّد عليَّ، آ الشيطان! حيت ما كتفكّر شي في أمور اللّٰه، وَلكن في أمور الناس." وْعَيّط على الناس والتلامد ديالو وْقالّوم: "إدا بغى شي واحد يتبَعني، لازم عليه ينكر نفسو ويرفد الصليب ديالو ويتبَعني. حيت الّي بغى ينجّي نفسو، غادي يخسراْ. والّي كيخسر نفسو بْسبابي وْبْسباب الإنجيل، هُوَ غادي ينجّيها. حيت شنّو غادي ينفع الإنسان إدا ربح الدنيا كاملة وْخسر نفسو؟ وشنّو يقدر يعطي الإنسان فْعوط نفسو؟ حيت الّي كيتحشّم بْسبابي وْبالكلام ديالي في هَد الجيل الفاسد والشرّير، اِبن الإنسان غادي يتحشّم بِه ملّي يجي بْمجد الآب ديالو مع الملائكة القدّيسين." قالّوم يَسوع: "كنقول لكُم الحقّ، البعض من الّي واقفين هنايَ ما غادي شي يدوقو الموت حتّى يشوفو مُلك اللّٰه حاضر بالقُدرة." من بعد ستّ أيّام، طلَع يَسوع نواحد الجّبل عالي وادّى معاه بُطْرُس ويَعْقوب وْيوحَنّا بوحدوم. وْتبدّلَت الصِّفة ديالو قدّاموم، وْرجعَت الجلّابة ديالو كتبرق بـيطة بزّاف، وْما كاين حتّى شي واحد في الدنيا الّي يقدر يردّاْ بـيطة فحال ديك الشكل. وْظهَر لوم إيليا مع موسى وْكانو كيتهاودو مع يَسوع. ديك الساعة هدَر بُطْرُس وْقال نيَسوع: "آ المُعلّم، مزيان نكونو هنايَ. نعدّلو تلاتة د القياطن، لِلِك واحد وْنْموسى واحد وْنإيليّا واحد." حيت ما عرف بُطْرُس ما يقول، حيت كانو خوفانين بزّاف. ديك الساعة جات واحد السحابة وْظلّلَتْ عليهُم. وْجا واحد الصوت من السحابة، كيقول: "هَدا هُوَ اِبني العزيز، سمعو لو." وْفي هزيزة، ملّي دارو من كُل جهة، ما شافو حتّى واحد معهُم، غير يَسوع بوحدو. وْملّي كانو هابطين من الجّبل، وصّاهُم يَسوع ما يخبرو حتّى واحد بْديك الشي الّي شافو، حتّى يقوم اِبن الإنسان من بين الميّتين. وْحافظو على الأمر، وَلكن بداو كيتناقشو مع بعطوم على المعْنى د القيامة من بين الميّتين. وْسقصاواه: "علاش كيقولو المُعلّمين د الشريعة بلّي لازم يجي إيليّا في الُوّل؟" ردّ عليهُم: "د بالصّحّ كيجي إيليّا في الُوّل وْكيصلح كُل شي. وَلكن كيفاش هُوَ مكتوب على اِبن الإنسان بلّي غادي يتعدّب بزّاف ويتّرفض؟ وَلكن كنقول لكُم بلّي إيليّا راه جا، وْعملو فيه كُل ما بغاو، فحال ما هُوَ مكتوب عليه." ملّي رجعو فاين كانو التلامد ديالو يَخرين، شافو بزّاف د الناس دايرين بِهُم والمُعلّمين د الشريعة كيتجادلو معهُم. وْملّي الناس شافو يَسوع، تعجّبو وْجراو باش يسلّمو عليه. سقصاهُم: "علاش كَتْـتجادلو معهُم؟" وْردّ عليه واحد من الناس وْقال: "آ المُعلّم، جيبْتْ لك بني الّي فيه واحد الجنّ شرّير زيزون، فاين ما شبّروْ كيطيّحوْ. وْكيخرجو الكشاكش من دُقمو وْكيغزّز السنان ديالو وْكيبقا جامد. وْطلبْتْ من التلامد ديالك باش يخرّجو الجنّ، وْما قدرو شي." وْردّ عليهُم وْقال: "آ الجيل بلا إيمان، حتّى لاين غادي نكون معكُم؟ حتّى لاين نصبر معكُم؟ جيبوه نْعندي." وْجابوه نْعندو. وْملّي الجنّ الشرّير شاف يَسوع، زعْزع العايل، الّي طاح في الرحْبة وْهُوَ كيتمرّغ وْكيخرّج الكشاكش. يَسوع سقصى باباه: "شحال دابا وْهو كيوقع لو هَد الشي؟" وْقال: "من صُغرو، وْبزّاف د المرّات طيّحوْ في العافية وْفي الما باش يقتلوْ. وَلكن إدا قدرْتِ تعمل شي حاجة، حنّ علينا وْعاونْنا." قال لو يَسوع: "«إدا قدرْتِ؟!» كُل شي يقدر يكون نِلّي كيآمن." وْفي الحين غوّت باباه د العايل وْقال: "كنآمن، يا رَبّي، عاونْني في قلّة إيماني!" وْملّي شاف يَسوع بلّي الناس كيتّجمعو، نهَط في الجنّ المنْݣوس وْقال لو: "آ الجنّ د الزيازن والصُمَك، أنا كنآمرك تخرج منّو وْما تعاود شي تدخل فيه." غوّت الجنّ الشرّير وْزعْزعوْ بالجُّهد وْخرج. وْرجَع العايل فحال الميّت، حتّى قالو الأغلبيّة د الناس: "راه مات." وَلكن شبّروْ يَسوع من يَدّو وْوقّفوْ، وْناض. ملّي دخل نالدار، سقصاواه التلامد ديالو بوحدوم: "علاش حنايَ ما قدرْنا شي نخرّجوه؟" وْقالّوم: "هَد النوع ما يمكن شي يخرج من غير بالصلاة." خرجو من تمّا وْݣازو على الجَليل، وْما بغى شي يَسوع يفطن بِه حتّى واحد. حيت كان كيعلّم التلامد ديالو وْكيقولّوم: "اِبن الإنسان غادي يتسلّم ناليَدّين د الناس ويقتلوه، وْمن بعدما يتّقتل، في النهار التالت غادي يتّبعت حيّ." أمّا هُمَ ما فهمو شي هَد الكلام وْخافو يسقصيواه. وْجا نْكَفْرِناحوم، وْملّي كان في الدار، سقصاهُم: "على شْمِن موضوع كُنْتو كتهاودو في الطريق؟" وْسكتو، حيت تجادلو في الطريق بيناتوم على شكون هُوَ الكبير فيهُم. ديك الساعة ݣلس وْعَيّط على الطناش وْقالّوم: "إدا بغى شي واحد يكون هُوَ الُوّل، هَداك خصّوْ يكون الاخّري فيكُم كاملين والخدّام ديالكُم." وْشبّر يَسوع واحد العايل وْوقّفوْ فوسطوم وْدرّعوْ وْقالّوم: "الّي كيرحّب بواحد من العيال فحال هَدا بِاسمي، كيرحّب بيَّ، والّي كيرحّب بيَّ، ما كيرحّب شي بيَّ غير أنا، وَلكن كيرحّب حتّى بْهَداك الّي صيفطني." ردّ عليه يوحَنّا وْقال: "آ المُعلّم، شفْنا واحد الرَّجل كيخرّج الجنون بالِاسم ديالك وْمنَعْناه، حيت ما كيتبعنا شي." قال يَسوع: "ما تمنعوه شي، حيت ما كاين حتّى واحد الّي يعمل شي مُعْجزة بِاسمي وْبْسُرْعة يهدَر عليَّ خايب. حيت أَي واحد الّي هُوَ ماشي ضدّنا، هُوَ معنا. حيت أَي واحد الّي كيشرّبكُم واحد الكاس د الما بِاسمي، حيت أنتُمَ ديال المسيح، كنقول لكُم الحقّ، ما غادي شي يضيع لو الأجر ديالو. كُل واحد الّي كيعتّر واحد من الستيتْوين الّي كيآمنو بيَّ، راه حسَن لِلو كَكان علّق واحد الحجْرة د الرحى في عنقو ويتسيّب في البحَر. وِادا كانت يَدّك كتعتّرك، قطّعاْ. حسَن لك تدخل نالحياة بْيَدّك مقْطوعة، فْعوط ما يكون عندك جوج د اليَدّين وْتمشي نْجهنّم فاين النار ما كَتْتطفى شي. [ فاين الدود ديالوم ما كيموتو شي والعافية ما كَتْتطفى شي.] وِادا كانت رِجلك كتعتّرك، قطّعاْ. حْسَن لك تدخل نالحياة أعْرج، فْعوط ما يكون عندك جوج د الرِّجلين وْتتسيّب في جهنّم. [ فاين الدود ديالوم ما كيموتو شي والعافية ما كَتْتطفى شي.] وِادا كانت عينك كتعتّرك، قلّعاْ. حْسَن لك تدخل نْمُلك اللّٰه عوار، فْعوط ما يكون عندك جوج د العينين وْتتسيّب في جهنّم فاين الدود ديالوم ما كيموتو شي والنار ما كَتْـتطفى شي. حيت الملاح الّي غادي يتملّحو بِه الناس كاملين، هُوَ العافية. الملاح مزيان. وَلكن إدا خسر الملوحية، كيفاش غَد تردّو لو الملوحية ديالو؟ يكون فيكُم الملاح، وْعيشو بْسلام مع بعضيّاتكُم." خرج يَسوع من تمّاك وْمشى نْجِهة اليَهوديّة من الأُرْدُن لْهيه. وْتّجمعو عاود الناس بزّاف وْكان كيعلّموم فحال العادة. وْجاو الفرّيسيّين وْسقصاواه باش يجرّبوه: "واش حلال على الرَّجل يطلّق المراة ديالو؟" ردّ عليهُم يَسوع: "باش وصّاكُم موسى؟" قالو: "موسى عْطى الإدن نالرَّجل باش يكتب واحد الكاغط د الطلاق ويطلّقاْ." وْجاوب يَسوع: "بْسباب القصوحيّة د القلب ديالكُم كتب لكُم موسى هَد الوَصيّة. وَلكن من البداية د الخليقة، خَلقوم اللّٰه دكَر وْلانْتى. «على ديك الشي خصّ الرَّجل يخلّي باباه وْيمّاه ويلصق في مراتو، ويكونو بْجوج جسد واحد.» هَيدا ما كيبقاو شي جوج، وَلكن جسد واحد. إدَن، الّي جمعوْ اللّٰه، ما يفرقوْ شي البشر." في الدار عاود سقصاواه التلامد ديالو على ديك الشي. وْقالّوم: "الّي كيطلّق المراة ديالو وْكَيْجوِج بواحدة يَخرى، كيزني عليها. وِادا طلّقَت المراة الرَّجل ديالاْ وْتجوّجَتْ بواحد يَخُر، كتزني." وْجابو لو الناس شي د العيال ستيتْوين باش يعمل يَسوع يَدّو عليهُم. أمّا التلامد نهطو فيهُم. ملّي شاف يَسوع ديك الشي، غضب وْقالّوم: "خلّيو العيال الستيتْوين يجيو نْعندي وْما تمنعوهُم شي، حيت مُلك اللّٰه هُوَ ديال هَدوك الّي فحالوم. كنقول لكُم الحقّ، الّي ما كيقبل شي مُلك اللّٰه فحال واحد العايل سْتيتو، ڭاع ما غادي شي يدخل لو." وْدرّعوم وْعمل يَدّو عليهُم وْباركوم. ملّي كان غادي يخرج نالطريق، واحد الرَّجل جرى نْعندو وْسجد لو وْسقصاه: "آ المُعلّم الصالح، شنّو نعمل باش نورت الحياة الأبديّة؟" قال لو يَسوع: "علاش كتعيّط لي الصالح؟ ما كاين حتّى واحد صالح من غير اللّٰه بوحدو. أنتينا كتعرف الوَصايا: ما تقتل شي، ما تزني شي، ما تسرق شي، ما تشهد شي بالزور، ما تظلم شي، وَقّر باباك ويمّاك." وْقال لو: "آ المُعلّم، هَد الشي كامل حافظْتْ عليه من صُغري." شاف فيه يَسوع وْعَزّ عليه، وْقال لو: "حاجة واحدة كَتْنَقصِك. مْشي وْبيع كُل ما عندك وْعْطيه نالمساكن وْغادي يكون لك الكنز في السما، وآجي وْتبَعني." حزن الرَّجل من هَد الكلام وْمشى مغبّن، حيت كان عندو بزّاف د الفلوس. دار يَسوع وْقال نالتلامد ديالو: "شحال صعيب يدخلو الأَغْنياء نْمُلك اللّٰه." تعجّبو التلامد من الكلام ديالو. ردّ عليهُم يَسوع عاود وْقالّوم: "آ وْلادي، شحال صعيب يدخلو نْمُلك اللّٰه. واحد الجمل ساهل عليه يݣوز من العين د اليِبْرة من واحد الغني يدخل نْمُلك اللّٰه." وْزادو التلامد تعجّبو، كيقولو مع بعطوم: "إيوا، شكون يقدر ينجا؟" شاف فيهُم يَسوع وْقال: "عند الناس هَد الشي مستحيل، وَلكن ماشي عند اللّٰه، حيت اللّٰه قادر على كُل شي." بدا بُطْرُس كيقول لو: "ها حنايَ سمحْنا في كُل شي وْتبَعْناك." ردّ عليه يَسوع: "كنقول لكُم الحقّ، ما كاين حتّى شي واحد الّي كيسمَح في الدار ديالو أَولا في الخوت أَولا في الخواتات أَولا في باباه أَولا في يمّاه أَولا في مراتو أَولا في الولاد أَولا في الفدادن بْسبابي وْبْسباب الإنجيل إلّا وْغادي يقبط على مية مرّة كتَر، دابا في هَد الدنيا: الديور والخوت والخواتات والأُمّهات والولاد والفدادن، مع التمرْميدات، وْفي الدنيا الماجّة الحياة الأبديّة. وَلكن بزّاف د الُوّلين غادي يكونو هُمَ الاخّريّين، والاخّريّين غادي يكونو هُمَ الُوّلين." كانو في الطريق طالعين نأُورُشَليم وْيَسوع كيسبق قدّاموم. وْكانو حيرانين وْكيتبعوه وْهُمَ خوفانين. وْجمع الطناش عاود وْبدا كيقولّوم الّي غادي يوقع لو: "ها حنايَ طالعين نأُورُشَليم وْغادي يدفعو اِبن الإنسان نْرُؤَساء المسؤولين في بيت المَقْدس والمُعلّمين د الشريعة وْغادي يحكمو عليه بالموت ويسلّموه نالوَتَنيّين. وْهُمَ غادي يبهْدلو بِه ويـبزقو عليه ويجلدوه ويقتلوه، وْفي النهار التالت غادي يتّبعت حيّ." قرّبو نْعند يَسوع يَعْقوب وْيوحَنّا، أُوْلاد زَبَدي، وْقالو لو: "آ المُعلّم، بغيناك تعطينا الّي غادي نطلبوه." قالّوم: "شنّو بغيتوني نعمل لكُم؟" قالو لو: "عْطينا نݣلسو في مجدك واحد على الّيمين ديالك ويَخُر على الشمال ديالك." قالّوم يَسوع: "ما كتعرفو شي شنّو كتطلبو. واش تقدرو تشربو الكاس الّي غادي نشربوْ أنا، وْتقدرو تݣوزو من المِحْنة د المعموديّة الّي غادي نتغطّس بِها أنا؟" قالو لو: "نقدرو." قالّوم يَسوع: "الكاس الّي غادي نشربوْ أنا، غَد تشربوه، وْبالمعموديّة الّي غادي نتغطّس بِها أنا، غَد تتغطّسو بِها حتّى أنتُمَ. أمّا الݣلسة على الّيمين أَوْلا على الشمال ديالي، ماشي بْـيَدّي باش نعطيها، وَلكن نِلّي موجّدة لِلوم." ملّي سمعو العشرة د التلامد، غضبو على يَعْقوب وْيوحَنّا. عَيّط لوم يَسوع وْقالّوم: "أنتُمَ كتعرفو بلّي الّي كيعْتَبرو راسوم الحُكّام على الأُمَم كيتسلّطو عليهُم، والكبارين كيسيطرو عليهُم. وَلكن ما خصّوْ شي يكون هَيدا بيناتكُم. بالعكس، الّي بغى يكون الكبير فيكُم، خصّوْ يكون الخدّام ديالكُم. والّي بغى يكون الُوّل فيكُم، خصّوْ يكون العبد ديالكُم كاملين. حيت حتّى اِبن الإنسان ما جا شي باش يخدموه، وَلكن باش يخدموم وْباش يفدي بزّاف د الناس بْحياتو." ديك الساعة وَصلو نأريحا، وْملّي كان يَسوع خارج من أَريحا مع التلامد ديالو وْمجْموعة كبيرة د الناس، كان بارْتيماوس العمى، ولد تيماوس، ݣالس في جنب الطريق كيسعا. وْملّي سمَع بلّي يَسوع الناصِري ݣايز، بدا كيغوّت: "يا يَسوع بن داود، رْحَمني!" وْنَهطو فيه بزّاف د الناس باش يسكت. أمّا هُوَ زاد كيغوّت كتَر: "آ بن داود، رْحَمني!" ديك الساعة وقَف يَسوع وآمر باش يعيّطو لو. وْعيّطو على العمى وْقالو لو: "تشجّع وْنوض. ها هُوَ كيعيّط لك." سيّب العمى السلْهام ديالو وْناض وْجا نْعند يَسوع. قال لو يَسوع: "شنّو بغيتِ نعمل لك؟" قال لو العمى: "آ المُعلّم، بغيتْ نشوف." وْقال لو يَسوع: "مْشي، الإيمان ديالك شافاك." وْفي هزيزة رجَع كيشوف وْتبَع يَسوع في الطريق. ملّي قرّبو نأُورُشَليم وْوَصلو نْبيت فاجي وْبيت عَنْيا، عند جبل الزيتون، صيفط يَسوع جوج من التلامد ديالو وْقالّوم: "مْشيو نالقرية الّي قدّامكُم، وْملّي تدخلو لاْ، غَد تجبرو واحد الدحش مرْبوط الّي عُمرو ما ركب عليه حتّى واحد. طلقوه وْجيبوه نْهنايَ. وِادا قال لكُم شي واحد: «علاش كتعملو هَد الشي؟» قولو: «الرَّبّ محْتاج لِلو، وْدغيا غادي يردّوْ نْهنايَ.»" مشاو وْجبرو الدحش مرْبوط عند الباب على برّا في الطريق، وْطلقوه. والبعض الّي كانو تمّاك سقصاوهُم: "علاش كتطلقو الدحش؟" قالو لوم فحال ما وصّاهُم يَسوع، وْخلّاوهُم. وْجابو الدحش نيَسوع. وْنزّلو الحوايج ديالوم عليه وْركب عليه يَسوع. وْبزّاف فرّشو الحوايج ديالوم على الطريق، ويَخرين قطّعو أغْصان من الفدادن. والناس الّي سبقو والّي تبعو كانو كيغوّتو: "أُوصَنّا! مبروك هُوَ الّي ماجي بِاسم الرَّبّ! مباركة هي الممْلكة د بابانا داود الّي ماجّة! أُوصَنّا في العلو!" وْدخل يَسوع نأُورُشَليم وْمشى نْبيت المَقْدس. وْمن بعدما شاف كُل شي من كُل جهة، خرج نْبيت عَنْيا مع الطناش، حيتاش كانتْ جات العشيّة. ولا غدّا، ملّي خرجو من بيت عَنْيا، حسّ يَسوع بالجّوع. وْشاف من بعيد واحد الشجرة د الكرْموس فيها الوراق وْقرّب لِلاْ، وَقيلا يجبر فيها شي حاجة. وْملّي وصَل لاْ، ما جبر حتّى شي حاجة، من غير الوراق، حيت ما كان شي الوقت د الكرْموس. ديك الساعة قالّاْ يَسوع: "حتّى واحد ما يعاود ياكل منّك حتّى شي غلّة أبدًا." وْكانو التلامد ديالو كيسمعو. جاو نأُورُشَليم، وْملّي دخل يَسوع نْبيت المَقْدس، بدا كيجرّي على الّي كانو كَيْبيعو وْكيشريو فيه. وْقْلب الطيافر د الصرارفيّة والكراسة د البيّاعين د الحمام. وْما خلّى حتّى واحد يݣوز في بيت المَقْدس هازّ شي سلْعة. وْكان كيعلّم بْهَد الكلام: "واش ماشي مكتوب بلّي «الدار ديالي غادي تْتسمّى بيت الصلاة نالأُمَم كاملين»؟ وانتُمَ ردّيتوها مغارة د السرّاق!" وْسمعو رُؤَساء المسؤولين في بيت المَقْدس والمُعلّمين د الشريعة هَد الكلام، وْبداو كيفتّشو على شي طريقة باش يقتلوه، حيت خافو منّو، حيت الناس كاملين دهشو من التعْليم ديالو. وْملّي جات العشيّة، خرج يَسوع والتلامد على برّا من المدينة. وْفي الصباح، ملّي كانو ݣايزين، شافو الشجرة د الكرْموس يبسَتْ من الجدر. وْتفكّر بُطْرُس وْقال نيَسوع: "آ المُعلّم، شوف. الكرْموسة الّي لعنْتِها يبسَتْ." ردّ يَسوع وْقالّوم: "آمنو باللّٰه. كنقول لكُم الحقّ بلّي أَي واحد الّي كيقول نْهَد الجّبل: «حيّد من هنايَ وْتسيّب في البحَر،» وْما كيشكّ شي في القلب ديالو، وَلكن كيآمن بلّي هَد الشي الّي قال غادي يوقع، كُل شي الّي قال غادي يكون لو. على ديك الشي كنقول لكُم، كُل ما كتطلبو في الدعاء، آمنو بلّي قبطْتوه وْغادي يكون لكُم. وْملّي كتصلّيو، سمحو إدا كانتْ عندكُم شي حاجة على شي واحد، باش يغفر لكُم باباكُم الّي في السما الدنوب ديالكُم حتّى أنتُمَ. إدا ما كتسمحو شي أنتُمَ، ما غادي شي يغفر لكُم باباكُم الّي في السما الدنوب ديالكُم." رجعو عاود نأُورُشَليم، وْملّي كان كيتمشّى في بيت المَقْدس، قرّبو منّو رُؤَساء المسؤولين والمُعلّمين د الشريعة والشيوخ، وْقالو لو: "بْشْمِن سُلْطة كتعمل هَد الشي؟ وْشكون الّي عْطاك هَد السلْطة باش تعملاْ؟" وْقالّوم يَسوع: "حتّى أنا غادي نسقصيكُم على واحد القضية. جاوبوني أنتُمَ وْديك الساعة غادي نقول لكُم بْشْمِن سُلْطة كنعمل هَد الشي. واش كانت المعموديّة د يوحَنّا من السما أَوْلا من البشر؟ جاوبوني." تشاورو مع بعطوم، كيقولو: "إدا قُلْنا من السما، هُوَ غادي يقول نّا: «وْعلاش ما تيّقْتوه شي؟» وِادا قُلْنا من البشر...،" حيت خافو من الشعب، حيت الشعب كامل كان كيعْتَبر بلّي يوحَنّا كان واحد النَّبي د بالصّحّ. جاوبو وْقالو نيَسوع: "ما كنعرفو شي." ديك الساعة قالّوم يَسوع: "حتّى أنا ما غادي شي نقول لكُم بْشْمِن سُلْطة كنعمل هَد الشي." ديك الساعة بدا يَسوع كيهدَر معهُم بالأمْتال: "واحد الرَّجل غرس واحد الجّنان د العنب وْدوّر بِه الزرب وْحفر فيه واحد المعْصرة وْبنى واحد البُرْج وْكراه نْشي ربّاعة، وْسافر. وْفي الوقت د الجني، صيفط واحد العبد عند الربّاعة باش يشبّر مِنّوم حقّو في الغلّة د الجّنان. وَلكن شبّروه وْضربوه وْصيفطوه باليَدّين خاويين. وْصيفط لوم عاود واحد العبد يَخُر، وَلكن حتّى هَداك رجموه وْجرحوه في راسو وْبهْدلو بِه. صيفط عاود واحد يَخُر، وْقتلوه. وْهَيداك مع يَخرين بزّاف، والبعض ضربوهُم والبعض قتلوهُم. بقا عندو غير ولدو العزيز، وْصيفطوْ حتّى هُوَ لِلوم في الآخر، وْقال: «غادي يوقّرو بني.» وَلكن ديك الربّاعة قالو بيناتوم: «هَدا هُوَ الوارت. آجيو نقتلوه ويكون الورت ديالنا.» وْشبّروه وْقتلوه وْسيّبوه على برّا من الجّنان. إدَن، شنّو غادي يعمل مول الجّنان؟ غادي يجي ويقتل الربّاعة ويعطي الجّنان نيَخرين. واش ما قريتو شي هَد الآية؟: «الحجْرة الّي رفضوها البنّاية، هي رجعَتْ راس القنت. الرَّبّ هُوَ الّي عمل هَد الشي، وْهو عجوبة في العينين ديالنا.»" وْفتّشو على الطريقة باش يقبطوه، حيت عرفو بلّي قال المتال عليهُم، وَلكن خافو من الناس. وْخلّاواه وْمشاو. وْصيفطو لو شي ناس من الفرّيسيّين والهيرودُسيّين باش ينصبو لو مصيدة في الكلام ديالو. ملّي جاو، قالو لو: "آ المُعلّم، كنعرفو بلّي أنتينا صادق وْما كتعمل شي الوجهيّات، حيت ما كتشوف شي المظاهر د الناس، وَلكن كتعلّم طريق اللّٰه بالحق. واش حلال نعطيو الجزية نالقَيصَر أَوْلا لا؟ واش لازم نعطيوها أَوْلا ما خصْنا شي؟" عرف يَسوع على النفاق ديالوم وْقالّوم: "علاش كتجرّبوني؟ جيبو لي واحد الدينار باش نشوفوْ." جابو لو واحد الدينار. وْقالّوم يَسوع: "دمّن هَد التصْويرة والكتابة الّي على الدينار؟" قالو لو: "ديال قَيصَر." ردّ عليهُم يَسوع: "عْطيو الّي هُوَ د القَيصَر نالقَيصَر، والّي هُوَ د اللّٰه ناللّٰه." وْتعجّبو منّو. قرّبو نْعندو شي ناس من الصدّوقيّين، الّي كيقولو بلّي ما كاينة شي القيامة د الميّتين، وْسقصاواه: "آ المُعلّم، موسى كتب نّا بلّي إدا مات نْشي واحد خاه، وْخلّى المراة ديالو، وَلكن ما عندو شي الولاد، لازم على خاه يتجوّج بالمراة ديالو ويعمل الدرّيّة نْخاه. كانو سبعة د الخوت. تجوّج الُوّل بواحد المراة وْمات، وْما خلّى شي الدرّيّة. وادّاها التاني وْمات، وْحتّى هُوَ ما خلّى شي الدرّيّة. وْهَيدا التالت. وادّاوها السبعة وْما خلّاو شي الدرّيّة. وْمن بعدوم كاملين ماتت المراة حتّى هِيَ. في القيامة ملّي يتّبَعتو، دمّن غادي تكون المراة؟ حيت كانت المراة ديالوم بْسبعة بِهُم." ردّ عليهُم يَسوع: "واش ماشي على ديك الشي أنتُمَ متْلوفين، حيت ما كتعرفو شي الكتوبة المقدّسة ولا قُدْرة اللّٰه؟ حيت ملّي غادي يتّبَعتو الميّتين، ما غادي شي يجوّجو وْما غادي شي يتجوّجو، وَلكن غادي يكونو فحال الملائكة في السما. أمّا بالنسبة نالقيامة د الميّتين، واش ما قريتو شي في كتاب موسى، في النصّ على العلّيقة، كيفْما تكلّم اللّٰه وْقال لو: «أنا إلَه إبراهيم وإلَه إسْحاق وإلَه يَعْقوب»؟ الله ماشي الإلَه د الميّتين، وَلكن الإلَه د الحيّين. أنتُمَ تلفْتو بزّاف." جا واحد من المُعلّمين د الشريعة وْسمعوم كيتجادلو. وْملّي شاف بلّي يَسوع جاوبوم مزيان، سقصاه: "شْمِن وَصيّة هي الُولى بين الوَصايا كاملين؟" ردّ عليه يَسوع: "الوَصيّة المُهمّة هي هَدي: «سْمع، آ إسْرائيل، الرَّبّ إلَهنا هُوَ رَبّ واحد. حبّ الرَّبّ إلَهك بْكُل قلبك وْبْكُل نفسك وْبْكُل عقلك وْبْكُل قوّتك.» والوَصيّة التانية هي: «عزّ جارك فحال نفسك.» ما كاينة حتّى شي وَصيّة يَخرى أهمّ من هَد الجوج." ديك الساعة قال لو المُعلّم د الشريعة: "مزيان، آ المُعلّم، قُلْتِ الحقّ ملّي قُلْتِ بلّي اللّٰه واحد وْما كاين حتّى واحد من غيرو هُوَ. إدا شي واحد كيحبّ اللّٰه بْقلبو كامل وْبْعقلو كامل وْبْقوّتو كاملة وْكيعزّ جارو فحال نفسو، هَد الشي مُهمّ من المحْروقات والدبايح كاملين." ملّي شافوْ يَسوع بلّي جاوب بالفهامة، قال لو: "أنتينا ماشي بعيد من مُلك اللّٰه." وْمن بعد هَد الشي، ما زعَم حتّى واحد يسقصيه عاود. ملّي كان يَسوع كيعلّم في بيت المَقْدس، قالّوم: "كيفاش كيقولو المُعلّمين د الشريعة بلّي المسيح هُوَ بن داود؟ حيت داود بْنفسو تكلّم بالروح القُدُس وْقال: «قال الرَّبّ نْرَبّي، ݣلس على الّيمين ديالي حتّى نردّ عدْيانك تحت رِجلك.» إدا داود بْنفسو كيسمّيه «رَبّ،» كيفاش يقدر يكون بنو؟" وْكانت واحد الجماعة كبيرة د الناس كيسمعو لو فرْحانين. وْمن بين الأُمور الّي علّموم، قالّوم: "ردّو بالكُم من المُعلّمين د الشريعة الّي كيبغيو يتساراو بالجلالب الطوالين وْكيبغيو التحيّات في الأسْواق، ويݣلسو في الصفّ الُوّل في بيوت العبادة وْمواطع الشرف في الحفلات. هَدو كياكلو رزق الهجّالات، وْباش يتظاهرو، كيطوّلو الصلاوات. هَدو راهُم غادي يتعاقبو كتَر من يَخرين." ݣلس يَسوع قدّام بيت الخزينة وْلاحظ كيفاش الناس كينزّلو الفلوس في الصنْدوق د بيت المَقْدس. وْبزّاف د الأَغْنياء نزّلو بزّاف د الفلوس. وْجات واحد الهجّالة مسْكينة وْنزّلَتْ جوج د الدراهم، والقيمة ديالوم قليلة. ديك الساعة عَيّط على التلامد ديالو وْقالّوم: "كنقول لكُم الحقّ بلّي هَد الهجّالة المسْكينة نزّلَتْ في الصنْدوق كتَر منّوم كاملين. حيت هَدوك كاملين عْطاو من الّي شاط عليهُم، أمّا هي من الفقر ديالاْ نزّلَتْ كُل ما عنداْ، المعيشة ديالاْ كاملة." ملّي يَسوع كان خارج من بيت المَقْدس، قال لو واحد من التلامد ديالو: "آ المُعلّم، شوف شحال عجيب هَد الحجار وْهَد البناية!" ردّ عليه يَسوع وْقال لو: "واش كتشوف هَد البناية الكبيرة؟ ما غادي تبقا هنايَ حتّى حجْرة على حجْرة الّي ما غادي شي تتهدّم." وْمن بعد كان ݣالس يَسوع في جبل الزيتون قدّام بيت المَقْدس، وْسقصاه بُطْرُس ويَعْقوب وْيوحَنّا وأَنْدَراوس بوحدوم: "قول نّا فوياخ غادي يكون هَد الشي؟ وْشنّي هي العلامة بلّي غادي يتحقّق هَد الشي كامل؟" بدا يَسوع كينبّهوم: "ردّو بالكُم باش ما يتلّفكُم حتّى شي واحد. حيت غادي يجيو بزّاف بِاسمي ويقولو: «أنا هُوَ،» وْغادي يتلّفو بزّاف د الناس. ملّي تسمعو على الحروب وْخبار الحروب، ما تخافو شي، حيت لازم يوقع هَد الشي، وَلكن هَدي ماشي النهاية. حيت غادي تنوض أمّة على أمّة وْممْلكة على ممْلكة. وْغادي يكونو الزنازل في مواطع مخْتَلفة وْغادي يكون الجّوع. هَد الشي هُوَ البداية د الوجاع. ردّو بالكُم نْنفسكُم، حيت غادي يدفعوكُم نالمحْكمات وْغادي يجلدوكُم في بيوت العبادة. وْغَد توقفو على سبابي قدّام الحُكّام والملوك باش تعطيو الشهادة لِلوم. وْفي الُوّل لازم يوصل التبْشير بالإنجيل نالأُمَم كاملين. ملّي يقبطوكُم ويدفعوكُم نالحُكم، ما تْتخلعو شي وْما تخمّمو شي في شنّو خصْكُم تقولو، وَلكن قولو غير الّي اتّعطى لكُم في ديك الساعة، حيت ماشي أنتُمَ الّي غَد تتكلّمو، وَلكن الروح القُدُس. والأخ غادي يدفع خاه نالموت، والوالِد ولدو. وْغادي ينوضو الولاد ضدّ والِديهُم ويقتلوهُم. وْغَد تكونو مكْروهين عند الناس كاملين بْسباب اِسمي. وَلكن الّي كيصبر حتّى نالنهاية، هَداك هُوَ الّي غادي ينجا. ملّي تشوفو «نجاسة الخراب،» الّي هدَر عليها النَّبي دانيال، واقفة فاين ما خَصّاْ شي تكون (الّي كيقرا خصّوْ يفهم)، ديك الساعة الناس الّي في اليَهوديّة لازم يهربو نالجّبولة. والّي هُوَ على السطَح، ما يهوّد شي وْما يدخل شي نالدار باش يدّي معاه شي حاجة. والّي كان في الفدّان ما يرجع شي باش يدّي الحوايج ديالو. الويل نالحُبْلات والّي كيرطّعو في ديك الأيّام. دعيو باش ما يكون شي هَد الشي في فصل الشتا. حيت غادي يكون في ديك الأيّام الضيق الّي ما كان شي فحالو من البداية د الدنيا ملّي خلقاْ اللّٰه حتّى نْدابا، وْما غادي شي يكون. وْكَكان ما يقصّر شي الرَّبّ ديك الأيّام، حتّى واحد ما ينجا. وَلكن بْسباب المخْتورين ديالو، قصّر الأيّام. في ديك الساعة إدا قال لكُم شي واحد: «ها المسيح هنايَ أَوْلا راه تمّاك،» ما تـتيّقوه شي. حيت غادي يظهرو مُسَحاء وأَنْبياء كدّابـين وْغادي يعملو علامات وْعجايب باش يتلّفو المخْتورين، إدا قدرو. ردّو بالكُم أنتُمَ. ها انا سبقْتْ وْنبّهْتْكُم على كُل شي. "أمّا في ديك الأيّام، من بعد هَد الضيق، الشمس غادي تظلام والقمر ما غادي شي يعطي الضَّو ديالو. والنجوم غادي يطيحو من السما، والقوّات الّي في السما غادي يتزعْزعو. في ديك الساعة الناس غادي يشوفو اِبن الإنسان ماجي في السحاب بْقوّة عظيمة وْبْمجد، وْديك الساعة غادي يصيفط الملائكة ديالو باش يجمعو المخْتورين ديالو من الجهات الأربعة د الرّيح، من طرف الأرض نْطرف السما. "تعلّمو من الشجرة د الكرْموس هَد المتال: ملّي كيرجَع الغصن ديالاْ رطب وْكتخرّج الوراق ديالاْ، كتعرفو بلّي الصيف قريب. بْنفس الشكل، ملّي تشوفو هَد الشي كامل كيوقَع، عرفو بلّي الوقت قريب، راه على البيبان. كنقول لكُم الحقّ، ما غادي شي يݣوز هَد الجيل حتّى يوقع هَد الشي كامل. السما والأرض غادي يتحيّدو، وَلكن الكلام ديالي ما عُمرو غادي يتحيّد. وَلكن ديك النهار وْديك الساعة، ما كيعرفوم حتّى واحد، لا الملائكة الّي في السما ولا الاِبن، غير الآب بوحدو. ردّو بالكُم! بقاو فايقين! حيت ما كتعرفو شي فوياخ غادي يكون الوقت. فحال واحد الرَّجل الّي سافر وْخلّى الدار ديالو وْعْطى نالعبيد ديالو المسؤولية، وْكُل واحد في شغلو، وْوصّى الحارس يبقا فايق. على ديك الشي بقاو أنتُمَ فايقين، حيت ما كتعرفو شي فوياخ غادي يجي مول الدار، في العشيّة أَو في وسط الليل أَو في الفجر أَو في الصباح. عندَك يجي على غفلة ويجبركُم ناعسين. والّي كنقول لكُم، كنقولوْ نالناس كاملين: بقاو فايقين!" من قبل عيد الفِصح والفطير بيومَين، كانو رُؤَساء المسؤولين في بيت المَقْدس والمُعلّمين د الشريعة كيفتّشو على شي حيلة باش يقبطوه ويقتلوه. وَلكن قالو: "ماشي في العيد باش ما تكون شي الفوضى بين الشعب." كان يَسوع في بيت عَنْيا في دار سِمْعان المبْراص، وْملّي كان ݣالس، جات نْعندو واحد المراة رافدة معها واحد الردومة د الرخام معمّرة بْعطر الناردين الحُرّ، الغالي بزّاف، وْهرّسَت الردومة وْكبَّت العطر على راسو. وْغضبو الناس الحاضرين وْقالو بيناتوم: "علاش الخسارة د هَد العطر؟ حيت كان يقدر يتّباع بْتلت مية دينار ويتّعطى نالمساكن." وْكانو كيتشكّاو على المراة بْكلام قاصح. أمّا يَسوع قال: "خلّيوها. علاش كَتْـشطنوها؟ راها عملَتْ لي شي حاجة مزيانة. حيت المساكن هُمَ دائمًا معكُم، وْتقدرو تعاونوهُم فوياخ ما بغيتو. أمّا أنا ما غادي شي نبقا معكُم دائمًا. هي عملَت الّي قدرَتْ عليه، سبقَتْ وْدهنَت الجسم ديالي بالعطر وْوجّدَتوْ نالدفين. كنقول لكُم الحقّ، فاين ما كيبشّرو بْهَد الإنجيل في العالم كامل، غادي يتكلّمو عاود على هَد العمل ديالاْ دِكْرى لِلاْ." ويَهودا الإسْخَريوطي، وْهُوَ واحد من الطناش، مشى نْعند رُؤَساء المسؤولين باش يسلّم لوم يَسوع. ملّي سمعو هَد الشي، فرحو وْوعدوه يعطيواه شي فلوس، وْبدا كيفتّش على الفُرْصة المناسبة باش يسلّموْ لِلوم. في النهار الُوّل د عيد الفطير، في وقت الدبيحة د خروف الفِصح، التلامد سقصاو يَسوع: "فاين بغيتِنا نمشيو وْنوجّدو لك باش تاكل العشا د الفِصح؟" وْصيفط جوج من التلامد ديالو وْقالّوم: "مْشيو نالمدينة وْغادي يتلاقاكُم واحد الرَّجل رافد واحد البرّادة د الما. تبعوه، وْفاين ما دخل هو، قولو نْمول الدار: «المُعلّم كيسقصي: "فاين هُوَ البيت الّي غادي ناكل فيه العشا د الفِصح مع التلامد ديالي؟"» وْهُوَ غادي يورّيكُم في الفوقي واحد البيت كبير مفرّش وْموجّد. تمّاك وجّدو نّا العشا." خرجو التلامد وْمشاو نالمدينة وْجبرو كيفْما قالّوم، وْوجّدو الفِصح. وْملّي جات العشيّة، وصَل يَسوع مع الطناش. وْملّي كانو ݣالسين كياكلو، قال يَسوع: "كنقول لكُم الحقّ بلّي واحد منكُم الّي كياكل معيَ غادي يخونْني." ديك الساعة حسّو بالحزن وْبداو كيسقصيواه واحد مور واحد: "ماشي أنا، ياك؟" ردّ عليهُم: "هو واحد من الطناش وْهُوَ الّي كيغمّس معيَ في الطبْسيل. في الحقيقة اِبن الإنسان غادي يمشي كيفْما هُوَ مكتوب عليه. وَلكن الويل نْديك الرَّجل الّي كيخون اِبن الإنسان. كان حسَن نْديك الرَّجل كَكان ما خلق شي." وْملّي كانو كياكلو، شبّر يَسوع الخُبز، وْبارك، وْقطّعوْ وْعْطاه لوم وْقال: "شبّرو. هَدا هُوَ الجسد ديالي." وْشبّر الكاس وْشكر وْعْطاهُم، وْشربو منّو كاملين. وْقالّوم: "هَدا هُوَ الدم ديالي د العهد، الّي غادي يتسيّل بْسباب بزّاف د الناس. كنقول لكُم الحقّ، أنا ما غادي شي نعاود نشرب من الغلّة د الدالية حتّى نْديك النهار ملّي نشرباْ من جديد في مُلك اللّٰه." وْمن بعدما رنّمو واحد الترْنيمة، خرجو نْجبل الزيتون. قالّوم يَسوع: "أنتُمَ كاملين غَد تسمحو فيَّ، حيت مكتوب: «أنا غادي نضرب الراعي وْغادي تْتشتّت الغنم.» وَلكن من بعدما نتّبعت من الموت، غادي نسبقكُم نالجَليل." وْقال لو بُطْرُس: "واخّا يسمحو فيك الناس كاملين، أنا ما نسمح شي فيك." جاوبوْ يَسوع: "كنقول لك الحقّ، اليوما في هَد الليلة، من قبل ما يصيّح الفرّوج جوج د المرّات، غادي تنكرني تلاتة د المرّات." قال بُطْرُس بالتأكيد: "واخّا خصْني نموت معك، ما عُمري نْنكرك!" هَيداك قالو التلامد كاملين حتّى هُمَ. مشاو نواحد الموطَع مسمّي جَتْسيماني وْقال يَسوع نالتلامد ديالو: "ݣلسو هنايَ وانا غادي نصلّي." وادّى معاه بُطْرُس ويَعْقوب وْيوحَنّا، وْبدا كيحسّ بالهمّ والغمّ، وْقالّوم: "نفسي حزْنانة بزّاف حتّى نالدرجة د الموت. ݣلسو هنايَ وْسهرو." زاد نالقدّام واحد الشويا وْطاح على الرحْبة وْكان كيدعي باش، إدا كان مُمْكن، يتحيّد عليه هَد الوقت د العداب. وْقال: "يا بابا الآب، أنتينا قادر على كُل شي. بعّد عليَّ هَد الكاس. وَلكن يكون الّي بغيتِ أنتينا، وْماشي الّي بغيتْ أنا." ديك الساعة رجَع نْعند التلامد وْجبروم ناعسين، وْقال نْبُطْرُس: "آ سِمْعان، واش أنتينا ناعس؟ واش ما قدرْتِ شي تسهر غير ساعة واحدة؟ بقاو فايقين وْصلّيو باش ما تدخلو شي في المِحْنة. الروح باغية، أمّا الجسد هُوَ ضعيف." مشى عاود وْصلّى مرّة يَخرى وْكرّر نفس الكلام. ملّي رجَع، جبروم ناعسين عاود، حيت كانو العينين ديالوم تقالين، وْما جبرو شي بيّاش يجاوبوه. وْرجَع المرّة التالتة وْقالّوم: "واش باقّين ناعسين وْمرْتاحين؟ باركة! جات الساعة. راه اِبن الإنسان غادي يتسلّم ناليَدّين د المُدْنبـين. نوضو نمشيو! راه ماجي هَداك الّي غادي يخونْني." ملّي كان باقي كيهدَر، في الحين وصَل يَهودا، واحد من التلامد الطناش، وْمعاه واحد العصابة مسلّحة بالسيوف والدبابز، مصيفطة من عند رُؤَساء المسؤولين في بيت المَقْدس والمُعلّمين د الشريعة والشيوخ. وْهَداك الّي خانوْ عْطاهُم واحد العلامة وْقال: "الرَّجل الّي غادي نبوسوْ، راه هُوَ هَداك. شبّروه وادّيواه تحت حراسة شديدة." وْمشى يَهودا في الحين وْجا نْعند يَسوع وْقال: "آ المُعلّم،" وْباسوْ. ديك الساعة عملو اليَدّين على يَسوع وْقبطوه. وَلكن واحد من الّي حاضرين سلّ السيف وْضرب العبد د رئيس المسؤولين وْقطّع لو الودْنينة ديالو. وْقالّوم يَسوع: "واش جيتو بالسيوف والدبابز باش تقبطوني فحال شي سارق؟ كُل نهار كُنْتْ معكُم كنعلّم في بيت المَقْدس وْما قبطْتوني شي. وَلكن وقَع هَد الشي باش تتكمّل الكتوبة المقدّسة." ديك الساعة خلّاواه التلامد كاملين وْهربو. وَلكن تبعوْ واحد الشابّ، لابس غير اللحاف على جسمو، وْشبّرو فيه. وْخلّى اللحاف وْهرب عريان. ادّاو يَسوع نْعند رئيس المسؤولين وْتّجمعو رُؤَساء المسؤولين والشيوخ والمُعلّمين د الشريعة كاملين. وْكان بُطْرُس تابعوْ من بعيد حتّى نْفوسط الساحة د الدار د رئيس المسؤولين، وْݣلس تمّاك مع الحُرّاس، كيسخن حدا العافية. وْكانو رُؤَساء المسؤولين والمَجْلس كاملين كيفتّشو على شي شهادة ضدّ يَسوع باش يحكمو عليه بالموت، وْما جبروها شي. حيت بزّاف شهدو عليه بالزور، وَلكن الشهادة ديالوم فيها التناقضات. ديك الساعة ناضو البعض مِنّوم وْشهدو ضدّو بالزور وْقالو: "حنايَ سمعْناه كيقول: «أنا غادي نطيّح هَد المَعْبد الّي بناواه الناس وْفي تلت أيّام نبني واحد يَخُر ماشي مبْني على يد الناس.»" وَلكن ما اتَّفقو شي حتّى على هَد الشهادة ديالوم. ديك الساعة ناض رئيس المسؤولين فوسط المَجْلس وْسقصى يَسوع: "واش ما غادي شي تردّ بْحتّى شي حاجة؟ شنّو هُوَ هَد الشي الّي كيشهدو بِه عليك؟" وَلكن يَسوع بقا ساكِت وْما جاوب شي. وْسقصاه رئيس المسؤولين عاود: "واش أنتينا هُوَ المسيح اِبن المبارك؟" وْقال يَسوع: "أنا هُوَ، وْغَد تشوفو اِبن الإنسان ݣالس على الّيمين د اللّٰه القدير، وْماجي على سحاب السما!" ديك الساعة شرّݣ رئيس المسؤولين الحوايج ديالو وْقال: "واش حنايَ باقّين محْتاجين نالشهود؟ أنتُمَ سمعْتو الكُفر ديالو! شنّو ظهَر لكُم؟" وْحَكمو عليه كاملين بلّي هُوَ كيستحقّ الموت. والبعض مِنّوم بزقو عليه، وْغطّاو وَجهو وْضربوه وْهُمَ كيقولو لو: "تنبّأ!" وْكانو الحُرّاس كيطرشوه. ملّي كان بُطْرُس نْتحت في الساحة د الدار، جات واحدة من الخدّامة د رئيس المسؤولين. وْملّي شافتْ بُطْرُس كيسخّن راسو، شافتْ فيه وْقات لو: "حتّى أنتينا كُنْتِ مع يَسوع الناصِري." وَلكن نكر وْقال: "ما كنعرفوْ شي، وْما فهمْتْ شي شنّو كتقول." وْخرج نالمَدْخل د الدار، وْصيّح الفرّوج. وْشافتوْ الخدّامة تمّاك وْبدات كتقول عاود نالحاضرين: "هَدا واحد مِنّوم." وَلكن بُطْرُس نكر مرّة يَخرى. وْمن بعد شويا، عاود قالو لو الحاضرين: "د بالصّحّ أنتينا واحد مِنّوم، حيت أنتينا جَليلي." ديك الساعة بدا كيلعن وْكيحلف: "أنا ما كنعرف شي هَد الرَّجل الّي كتهدرو عليه!" وْفي هزيزة صيّح الفرّوج المرّة التانية، وْتفكّر بُطْرُس الكلام الّي قال لو يَسوع: "قبل ما يصيّح الفرّوج جوج د المرّات، غادي تنكرني تلاتة د المرّات." وْبدا كيبكي. ملّي طلَع الصباح، تشاورو رُؤَساء المسؤولين في بيت المَقْدس مع الشيوخ والمُعلّمين د الشريعة والمَجْلس كامل، وْكتّفو يَسوع في الحين وادّاواه وْسلّموه نْبيلاطُس. سقصاه بيلاطُس: "واش أنتينا مَلِك اليهود؟" ردّ عليه: "أنتينا قُلْتِ الّي كاين." واتَّهموه رُؤَساء المسؤولين بْبزّاف د الحاجات. سقصاه بيلاطُس مرّة يَخرى: "واش ما كتجاوب شي؟ شوف شحال د التُهَم قدّموها ضدّك." أمّا يَسوع ما بقا شي كيردّ عليه، حتّى تعجّب بيلاطُس. كانت عند بيلاطُس العادة في العيد باش يطلق السراح د واحد الحبّاس الّي بغاواه الناس. كان واحد الرَّجل الّي مسمّي باراباس وْهُوَ حبّاس مع صحاب الفتْنة الّي وقَع فيها القتل. وْمشاو الناس عند بيلاطُس وْطلبو لو يعمل فحال العادة. ردّ عليهُم بيلاطُس: "واش بغيتوني نطلق لكُم مَلِك اليهود؟" حيت عرف بلّي رُؤَساء المسؤولين سلّمو لو يَسوع بْسباب الحسد. وَلكن رُؤَساء المسؤولين حرّشو الشعب باش بيلاطُس يطلق لوم باراباس فْعوط يَسوع. وْعاود بيلاطُس، سقصاهُم: "إدَن، شنّو غادي نعمل مع الّي كتسمّيواه مَلِك اليهود؟" وْغوّتو: "صلّبوْ!" وْقالّوم بيلاطُس: "علاش؟ شْمِن شرّ عمل؟" وْزادو في الغوات ديالوم: "صلّبوْ!" وْحيت بيلاطُس بغى يرضي الشعب، طلق لوم باراباس، أمّا يَسوع جلدوْ وْدفعوْ باش يتّصْلب. ديك الساعة ادّاو العسْكر يَسوع نْفوسط القصَر، يعني دار الحكومة، وْجمعو الفرْقة العسْكرية كاملة. وْلبّسو لو لباس ملوكيّ صَبري وْضفرو واحد التاج د الشوك وْعملوه على راسو. بداو كيسلّمو عليه، كيقولو: "السلام عليك، آ مَلِك اليهود!" وْكانو كيضربوه على راسو بواحد القصبة وْكيبزقو عليه وْكيركعو على الركابي ديالوم وْكيسجدو لو. من بعدما ضحكو عليه، حيّدو لو الحوايج الصَبْريّة وْلبّسو لو الحوايج ديالو، وْخرّجوه باش يصلّبوه. وْفَرضو على واحد الرَّجل مسمّي سِمْعان القَيرَواني (باباهُم د إسْكَنْدَر وْروفُس)، ملّي كان ݣايز، راجع من الفدّان، باش يرفد الصليب د يَسوع. وادّاواه نواحد الموطَع مسمّي "ݣُلْݣُثة،" يعني الموطَع د الجُمْجُمة. وْعْطاواه الخمر مخلّط بالمرّ باش يشرب، وْرفض يشربوْ. ملّي صلّبو يَسوع، قسمو الحوايج وْقمّرو عليهُم باش يشوفو شنّو غادي يشبّر كُل واحد مِنّوم. كانت التسْعود د الصباح ملّي صلّبوه. وْعلّقو واحد العلامة مكتوبة عليها التُّهْمة الموجّهة ضدّو: "هُوَ مَلِك اليهود." وْصلّبو معاه جوج د السرّاق، واحد على الّيمين ديالو ويَخُر على الشمال. [ وْتكمّل كلام الكتاب الّي كيقول: "وتّحسب مع المُجْرمـين."] وْكانو الناس الّي ݣايزين كيزبّلو فيه وْهُمَ كيهزّو راسوم وْكيقولو: "أنتينا الّي غادي تهدّم بيت المَقْدس وْتـبْنيه في تلت أيّام، نجّي نفسك وْنزل من الصليب!" بْنفس الطريقة، حتّى رُؤَساء المسؤولين كانو كَيْبهْدلو بِه مع المُعلّمين د الشريعة، كيقولو بيناتوم: "نجّى يَخرين وْما قدر شي يعتق راسو. خلّي هَد المسيح، المَلِك د إسْرائيل، ينزل دابا من الصليب باش نشوفو وْنآمنو." وْهَدوك الّي كانو مصْلوبـين معاه كانو حتّى هُمَ كيزبّلو فيه. ملّي وصَل الظهر، طاح الظلام على الأرض كاملة حتّى نالتلاتة د العشيّة. وْفي هَد الساعة، غوّت يَسوع بْصوت عالي: "إلوهي، إلوهي، لِما شبقْتَني؟" وْبالترْجمة: "إلَهي، إلَهي، علاش سمحْتِ فيَّ؟" والبعض من الّي حاضرين تمّاك، ملّي سمعوه، قالو: "راه كيعيّط على النَّبي إيليّا." وْجرى واحد منّوم وْعمّر واحد السبونْخة بالخلّ وْعملاْ على واحد القصبة وْعْطاها نيَسوع باش يشرب، كيقول: "خلّيواه باش نشوفو واش غادي يجي إيليّا باش يهبّطوْ." ديك الساعة غوّت يَسوع بْصوت عالي وْدفَع الروح ديالو. ديك الساعة تشرّݣ الحجاب د بيت المَقْدس على جوج من فوق حتّى نْتحت. وْملّي شاف قايد المية الّي كان واقف قدّامو كيفاش غوّت وْدفَع الروح ديالو، قال: "د بالصّحّ كان هَد الرَّجل اِبن اللّٰه." وْكانو بعض النسا كيشوفو من بعيد، فيهُم مَرْيَم المَجْدَليّة، وْمَرْيَم يمّاهُم د يَعْقوب الصغير وْيوسف، وْسالومة، الّي تبعوه وْكانو كيخدموه ملّي كان يَسوع في الجَليل. وْكانو بزّاف د النسا يَخرين الّي طلعو معاه نأُورُشَليم. ملّي جا الليل، حيت كان النهار د التوْجاد، يعني النهار من قبل السبت، جا يوسف الّي من الرامة، وْهُوَ عضو مُهِمّ في المَجْلس، الّي كان حتّى هُوَ كيتسنّى مُلك اللّٰه، وْزعَم يدخل نْعند بيلاطُس ويطلب الجُتّة د يَسوع. واسْتَغرب بيلاطُس حيت كان يَسوع ميّت، وْعَيّط على قايد المية وْسقصاه واش هُوَ ميّت دابا. ملّي تحقّق من قايد المية، عْطى الجُتّة نيوسف. وْيوسف شرى التوب د الكتّان وْهبّطوْ وْكفّنوْ وْنزّلوْ في واحد القبَر محْفور في الصخْرة، وْدرْدب واحد الحجْرة على الدخْلة د القبَر. وْكانت مَرْيَم المَجْدَليّة وْمَرْيَم يمّاه د يوسف كيشوفو الموطَع فاين نزّلوه. ملّي ݣاز نهار السبت، شرات مَرْيَم المَجْدَليّة وْمَرْيَم يمّاه د يَعْقوب وْسالومة الحنوط باش يدهنو الدات د يَسوع. وْنهار الحَد في الصباح بكري، مشاو نالقبَر ملّي طلعَت الشمس. كانو كيقولو بيناتوم: "شكون غادي يدرْدب نّا الحجْرة من الدخْلة د القبَر؟" ملّي طلّلو، شافو بلّي الحجْرة تدرْدبَتْ، واخّا كانتْ كبيرة بزّاف. وْملّي دخلو نالقبَر، شافو واحد الشابّ ݣالس على الّيمين، لابس عليه حوايج بُيَط، وْخافو. وَلكن قالّوم: "ما تخافو شي، أنتُمَ كتفتّشو على يَسوع الناصِري الّي تصْلب، راه اتّبعت حيّ! هُوَ ماشي هنايَ. شوفو، هَدا هُوَ الموطَع فاين نزّلوه. وَلكن مْشيو وْقولو نالتلامد ديالو وْنْبُطْرُس بلّي راه غادي يسبقكُم نالجَليل، وْتمّاك غَد تشوفوه كيفْما قال لكُم." وْخرجو النسا من القبَر هرْبانين، حيت كانو خوفانين وْمخْلوعين وْما خبرو حتّى واحد حيتاش كانو خوفانين. [ من بعدما اتّبعت يَسوع في الصباح د نهار الحَد، ظهَر في الُوّل نْمَرْيَم المَجْدَليّة الّي كان خرّج مِنّاْ سبعة د الجّنون. مشات وْخبرَتْ الّي كانو معاه وْهُمَ كانو حزْنانين وْكيبكيو. ملّي سمعو بلّي راه حيّ وْبلّي هي شافتوْ، ما تيّقوها شي. من بعد ديك الشي، ظهَر يَسوع في صِفة يَخرى نْجوج مِنّوم وْهُمَ ماشّين نالفدّان. ديك الساعة مشاو وْخبرو يَخرين، وْما تيّقوهُم شي حتّى هُمَ. من بعد ظهَر يَسوع نالحضاش ملّي كانو ݣالسين كياكلو، وْوبّخوم على قلّة الإيمان ديالوم والقصوحيّة د قلبوم، حيت ما تيّقو شي هَدوك الّي شافوه، بلّي هُوَ راه رجَع بالروح. وْقالّوم: "مْشيو نالعالم كامل وْبشّرو بالإنجيل نْكُل الناس د الخليقة. كُل واحد الّي آمن وْتغطّس غادي ينجا، وْأَي واحد الّي ما آمن شي، غادي يتّهلك. وْهَدوك الّي آمنو غادي يعملو هَد الأمارات: غادي يخرّجو الشياطين بِاسمي، ويهدرو بْلُغات جديدة، ويشبّرو الحياي بْيَدّوم. وِادا شربو السِمّ، ما غادي شي يضرّوم، وْملّي يعملو اليَدّين ديالوم على المراطين، غادي يتشافاو." وْمن بعدما تكلّم معهُم الرَّبّ يَسوع، اتّرفع نالسما وْݣلس على الّيمين د اللّٰه. أمّا هُمَ خرجو وْبشّرو في كُل موطَع، والرَّبّ كان كيخدم معهُم وْكيتبّت الكلمة بالأمارات الّي كَتْـتبعاْ. آمين.] حيت بزّاف حاولو يكتبو واحد القصّة د الأُمور الحقيقيّة الّي جرات عندنا، فحال ما خبرونا الشهود الّي كانو من الُوّل كيشوفو بالعينين ديالوم وْكيخدمو الكلمة د الله، حتّى أنا، آ صاحب السمو ثاوْفيلُس، قرّرْتْ نكتب لك بالترتيب، من بعدما بحتْتْ بالتدقيق كُل شي من البداية، باش تكون متأكّد من الأُمور الّي علّموها لك بلّي هي حقيقيّة. كان في أيّام هيرودُس مَلِك اليَهوديّة واحد المسؤول في بيت العبادة مسمّي زَكَريّا، عضو من فرقة أبيّا، والمراة ديالو من الترّيكة د هارون، مسمّية أَليصابات. وْكانو بْجوج متّاقيين قدّام اللّٰه، طايعينوْ في الوَصايا والفرائض ديالو كاملين بلا عيب. وْما كان عندوم حتّى ولد حيت أَليصابات كانت عاݣرة، وْكانو بْجوج كبارين في العمر ديالوم. واحد النهار، ملّي كان زَكَريّا كيقوم بالخدمة ديالو قدّام اللّٰه، في النوبة د الفرقة ديالو، جات فيه القرعة، فحال ما كانت العادة عند المسؤولين، باش يدخل نْبيت المَقْدس د الرَّبّ ويبخّر. الجمهور د الشعب كامل كان كيصلّي على برّا في وقت البخور. وْظهَر لو واحد الملاك من عند الرَّبّ واقف على الّيمين د المَدْبح د البخور. وْملّي شافوْ زَكَريّا، دهش وْخاف بزّاف. وْقال لو الملاك: "آ زَكَريّا، ما تخاف شي، حيت الصلاة ديالك تسمعَتْ، والمراة ديالك أَليصابات غادي تولد لك واحد الولد، وانتينا غادي تسمّيه يوحَنّا. وْغادي تكون عندك الفرْحة والسرور وْبزّاف د الناس غادي يفرحو بالولادة ديالو. حيت غادي يكون كبير عند الرَّبّ وْما غادي شي يشرب الخمر ولا يسكر، وْغادي يتعمّر بالروح القُدُس وْهُوَ باقي في الكرش د يمّاه، وْغادي يردّ بزّاف من بَني إسْرائيل نالرَّبّ الإلَه ديالوم. وْغادي يتقدّم قدّام الرَّبّ بْروح إيليا والقوّة ديالو، باش يردّ القلوبة د الوالِدين نالولاد ديالوم والعاصيين نالحكمة د المتّاقيين. وْهَيدا غادي يوجّد نالرَّبّ واحد الشعب مستعدّ باش يسْتَقبل الرَّبّ." قال زَكَريّا نالملاك: "كيفاش نكون متأكّد من هَد الشي، حيت أنا عڭوز وْمراتي كبيرة في السن؟" جاوب الملاك وْقال لو: "أنا جِبْرائيل، الواقف قدّام اللّٰه. أنا مرسول باش نهدَر معك وْنبشّرك بْهَد الشي. وْها أنتينا غادي تبقا زيزون وْما غادي شي تقدر تهدَر حتّى نالنهار الّي توقع فيه هَد الأُمور، حيت ما تيّقْتِ شي الكلام ديالي الّي غادي يتكمّل في الوقت ديالو." وْكان الشعب كيتسنّى زَكَريّا وْتعجّبو من التعْطيلة ديالو في بيت المَقْدس. وْملّي خرج، ما قدر شي يهدَر معهُم، وْفهمو بلّي شاف شي رؤيا في بيت المَقْدس. وْكان كينعت لوم بالإشارة وْبقا زيزون. وْملّي تكمّلَتْ أيّام الخدمة ديالو، رجع نالدار. من بعد ديك الأيّام، حبلَتْ أَليصابات مراتو وْتخبّعَتْ خمس شهور وْكانت كتقول: "رَبّي عمل بيَّ هَيدا في الأيّام فاش حنّ عليَّ وْحيّد من عليَّ العار من بين الناس." في الشهر السادس صيفط اللّٰه الملاك جِبْرائيل نواحد المدينة في الجَليل مسمّية الناصِرة عند واحد العزبة مخطوبة نواحد الرَّجل من أهل داود، مسمّي يوسف، وِاسم العزبة مَرْيَم. دخل نْعنداْ الملاك وْقالّاْ: "السلام عليك، آ الّي قبلْتِ نعْمة اللّٰه، الرَّبّ معك. مبروكة أنتينا من بين النسا." ملّي شافتوْ، دهشَتْ من كلام الملاك وْسقصات نفساْ على المعنى د هَد التحيّة. قالّاْ الملاك: "ما تخاف شي، آ مَرْيَم، حيت اللّٰه راضي عليك. وْغادي تحبل وْتولد واحد الولد وْغادي تسمّيه يَسوع. هُوَ غادي يكون عظيم ويتسمّى اِبن العالي، والرَّبّ الإلَه غادي يعطي لو العرش ديال داود باباه. وْغادي يملك على شعب يَعْقوب على الدوام، والمُلك ديالو ما عُمرو غادي يتسالى." قالت مَرْيَم نالملاك: "كيفاش يقدر يكون هَد الشي، حيت أنا عزبة؟" جاوب الملاك: "الروح القُدُس غادي ينزل عليك وْقوّة العالي تظلّل عليك، وْعلى ديك الشي القدّوس الّي غادي تولد يتسمّى اِبن اللّٰه. وْها هي أَليصابات، الّي هي من أهلك، حتّى هي حُبلى بواحد الولد، واخّا هي كبيرة في السن. وْهَدا هُوَ الشّهَر السادس نْهَديك الّي كانو كيقولو لاْ عاݣرة. حيت ما كاين حتّى حاجة مستحيلة عند اللّٰه." قالت مَرْيَم: "ها انا الخدّامة د الرَّبّ، يكون لي فحال ما قُلْتِ." وْمشى من عنداْ الملاك. من بعد ديك الأيّام، مشات مَرْيَم دغيا نواحد المدينة في الجّبولة د قبيلة يَهودا. وْتمّاك دخلَتْ نالدار د زَكَريّا وْسلّمَتْ على أَليصابات. ملّي سمعَتْ أَليصابات السلام ديال مَرْيَم، تحرّك المخْلوق في كرشاْ. وْتعمّرَتْ أَليصابات بالروح القُدُس. وْقالت بْصوت عالي: "مبروكة أنتينا من بين النسا وْمبروك الجنين الّي في كرشك. وَلكن كيفاش غادي تجي تطلّل عليَّ يمّاه د رَبّي؟ ملّي دخل صوت السلام ديالك في الودنينة ديالي، تحرّك المخْلوق في كرشي من الفرْحة. مبروكة أنتينا الّي آمنْتِ، حيت غادي يتكمّل الّي قال لك الرَّبّ." قالت مَرْيَم: "نفسي كتعظّم الرَّبّ والروح ديالي كتفرح بزّاف باللّٰه المُنجّي ديالي. حيت شاف فيَّ أنا الخدّامة المتواضعة ديالو. وْمن دابا نْفوق كُل جيل غادي يسمّيني مبروكة، حيت القدير عمل لي أُمور عظيمة. الِاسم ديالو قدّوس، والرحْمة ديالو كتكون من جيل نْجيل على الّي كيخافو منّو. بالدراع ديالو عمل أعْمال عظيمة. شتّت المتكبّرين في الأفْكار د قلبوم. حيّد الحُكّام من العرش ديالوم وْرفَع المتواضعين. شبّع بالخير الّي فيهُم الجّوع وْصيفط الأَغْنياء فارغين. عاون عبدو إسْرائيل وْعقل على رحمتو. فحال ما قال نالجدود ديالنا، رحَم إبراهيم والترّيكة ديالو على الدوام." وْبقات مَرْيَم عند أَليصابات شي تلت شهور وْمن بعد رجعَتْ نالدار ديالاْ. ملّي جا الوقت باش تولد، أَليصابات ولدَتْ ولد. سمعو الجيران والقرابـين ديالاْ بلّي الرَّبّ عمّراْ بالرحْمة ديالو، وْفرحو معها. في النهار التامن، جاو باش يطهّرو الصبي، وْبغاو يسمّيواه زَكَريّا على اِسم باباه. ويمّاه ما بغات شي وْقالت: "لا، خصّوْ يتسمّى يوحَنّا." قالو لاْ: "ما كاين حتّى واحد من القرابـين ديالك الّي مسمّي بْهَد الِاسم." وْشيّرو نْباباه باش يعرفو شنّو بغى يسمّيه. وْطلب واحد اللوحة وْكتب فيها: "الِاسم ديالو يوحَنّا." وْتعجّبو كاملين. في الحين تفتح الدقوم د زَكَريّا وْتطلق اللسان ديالو، وْتكلّم وْسبّح اللّٰه. وْنزل الخوف على الجيران ديالوم كاملين، وْكانو الناس كيهدرو على هَد الأُمور في الجّبولة د اليَهوديّة كاملة. وْكُل واحد الّي سمع بْهَد الشي كيسقصي راسو: "شنّو غادي يكون هَد الصبي؟" حيت يد الرَّبّ كانت معاه. وْتعمّر زَكَريّا باباه بالروح القُدُس وْتنبّأ وْقال: "مبارك الرَّبّ إلَه إسْرائيل، حيت جا باش يفدي الشعب ديالو. وْرفَع بيناتنا مُنجّي قدير في الدار د داود، العبد ديالو، فحال ما قال على اللسان د الأَنْبياء ديالو القدّيسين الّي كانو من قديم، باش ينجّينا من العدْيان ديالنا وْمن اليَدّين د هَدوك الّي كيكرهونا، باش يبيّن الرحْمة ديالو نالجدود ديالنا ويتفكّر العهد المقدّس ديالو. هَيدا حلف اللّٰه نْإبراهيم بابانا، بلّي غادي ينجّينا من العدْيان ديالنا وْنخدموه بلا خوف بالقداسة والتقوى قدّامو كُل أيّام حياتنا. وانتينا، آ بني، غادي تْتسمّى «نَبي العالي»، حيت غادي تمشي قدّام الرَّبّ باش توجّد لو الطرقان ديالو. غادي تعلّم الشعب ديالو بلّي النجا هُوَ بْمغفرة الدنوب ديالوم بْفضل الحنان والرحْمة د إلَهنا، الّي بِها جعل الضَّو يشرق علينا من السما، باش يضوّي على الّي كيعيشو في الظلام وْفي ظلّ الموت، باش يݣوّد الخطوات ديالنا في طريق السلام." وْكان العايل كيكبر وْكيتقوّى بالروح وْبقا في الخلا حتّى نالنهار الّي ظهَر فيه نْبَني إسْرائيل. في ديك الأيّام آمر القَيصَر أُغُسْطُس بإحصاء سكّان الإمبراطوريّة كاملين. كان هَدا هُوَ الإحصاء الُوّل الّي تعمل ملّي كان كيرينيوس حاكم على سوريا. وْمشى كُل واحد نالقرية ديالو باش يتسجّل تمّاك. وْحتّى يوسف طلَع من الجَليل، من مدينة الناصِرة، ناليَهوديّة نْمدينة داود الّي مسمّية بيت لَحم، حيت كان من دار داود وْمن العائلة ديالو، باش يتسجّل تمّاك مع مَرْيَم مراتو الّي كانت مخطوبة لو وْهِيَ حُبلى. وْملّي كانو تمّاك، جا الوقت باش تولد. وْولدَت الِابن ديالاْ البكر، وْقمّطَتوْ وْنعّسَتوْ في العلّافة، حيت ما كان شي عندوم موطَع في بيت الضيافة. كانو في ديك المنْطَقة السرّاح الّي كيباتو في الفدّان، وْكيعسّو على القطعان ديالوم في الليل. على غفلة، ظهَر لوم واحد الملاك من عند الرَّبّ والنور د مجد الرَّبّ دار بِهُم من كُل جهة وْخافو بزّاف. وَلكن قالّوم الملاك: "ما تخافو شي، حيت أنا كنبشّركُم بْخبر الخير الّي غادي يفرّح الشعب كامل. حيت اليوما اتّولد لكُم واحد المُنجّي في مدينة داود الّي هُوَ المسيح الرَّبّ. وْهَدي هي العلامة باش تعرفوه: غَد تجبرو الصبي مقمّط وْممدود في واحد العلّافة." وْفي هزيزة ظهَر مع الملاك جمهور د الملائكة من السما كيسبّحو ناللّٰه وْكيقولو: "المجد ناللّٰه في السما، والسلام في الأرض نالناس الّي رضى عليهُم اللّٰه." ملّي رجعَت الملائكة نالسما، قالو السرّاح مع بعطوم: "نمشيو نْبيت لَحم وْنشوفو هَد الشي الّي وقَع والّي خبرنا بِه الرَّبّ." وْمشاو بالزربة وْجبرو مَرْيَم وْيوسف والصبي ممدود في العلّافة. ملّي شافو الصبي، خبرو بالكلام الّي تقالّوم على هَد الصبي. والناس كاملين الّي سمعو تعجّبو من هَد الشي الّي قالو السرّاح. أمّا مَرْيَم كانت كتحفظ كُل هَد الأُمور وْكتخمّم فيها في القلب ديالاْ. وْرجعو السرّاح كيمجّدو اللّٰه وْكيسبّحو لِلو على كُل شي الّي سمعو وْشافو، الّي وقَع فحال ما تقالّوم. ملّي تكمّلَتْ تمن أيّام، في الوقت د الطهارة ديالو، تسمّى الصبي يَسوع، الِاسم الّي عْطاه الملاك من قبل ما تحبل بِه مَرْيَم. ملّي تكمّلَت الأيّام د التطهير ديالوم على حسب شريعة موسى، يوسف وْمَرْيَم ادّاو الصبي نأُورُشَليم باش يقدّموه ناللّٰه، (فحال ما هُوَ مكتوب في شريعة الرَّبّ: "كُل دكر الّي يفتح الرحم يتسمّى قدّوس نالرَّبّ")، وْباش يقدّمو الدبيحة فحال ما تقال في شريعة الرَّبّ: "جوج د اليَمام أَوْلا جوج د الفروخة د الحمام." كان في أُورُشَليم واحد الرَّجل الّي مسمّي سِمْعان، وْهُوَ كان متّاقي وْصالح وْكان كيتسنّى التّعْزيّة د إسْرائيل، وْكان الروح القُدُس عليه، الّي ورّى لو بلّي ما غادي شي يموت من قبل ما يشوف المسيح د الرَّبّ. مشى نْبيت المَقْدس مݣوّد بالروح، وْملّي جابو الوالِدين الصبي يَسوع نْبيت المَقْدس باش يكمّلو العادة على حسب الشريعة، شبّروْ سِمْعان في الدراع ديالو وْبارك اللّٰه وْقال: "يا رَبّي، دابا ودّع العبد ديالك بْسلام فحال ما وعدْتِ، حيت بالعينين ديالي شفْتْ النجا ديالك الّي وجّدْتِه قدّام الشعوب كاملين، نور التبْيين نالأُمَم والمجد د شعبك إسْرائيل." وْكان باباه ويمّاه كيتعجّبو من الكلام الّي قال على الصبي. وْبارك فيهُم سِمْعان وْقال نْمَرْيَم يمّاه: "راه هَد الولد غادي يكون سبب السقوط والقيام د بزّاف في إسْرائيل وْغادي يكون علامة الّي كيقاوموها، باش يكتَشف التخميم د بزّاف د القلوبة. وانتينا، واحد السيف غادي يدخل في النفس ديالك." وْكانت تمّاك واحد النَّبيّة، هي حَنّة، بنت فَنوئيل من قبيلة أَشير. وْهِيَ كبيرة في السن، وْمن بعد الجواج ديالاْ، عاشَتْ مع رَجلاْ سبع سنين، وْمن ديك الوقت بقات هجّالة وْفي العمر ديالاْ أربعة وْتمانين سنة. وْكانت كتقيّل دائمًا في بيت المَقْدس، وْهِيَ كتعبد اللّٰه ليل وْنهار بالصيام والصلاوات. في ديك اللحظة تقدّمَتْ وْشكرَت اللّٰه وْبداتْ كتـتكلّم على الصبي مع الناس كاملين الّي كانو كيتسنّاو الفِداء ديال أُورُشَليم. ملّي كمّلو كُل ما كَتْفَرضوْ شريعة الرَّبّ، يوسف وْمَرْيَم رجعو نالجَليل، نالقرية ديالوم الناصِرة. وْكان العايل كيكبر وْكيتقوّى معمّر بالحكمة، وْكانت نعْمة اللّٰه عليه. كانو الوالِدين ديالو كيمشيو كُل العام نأُورُشَليم في عيد الفِصح. وْملّي كمّل طناشر عام، طلعو نأُورُشَليم فحال العادة في العيد. وْملّي كمّلو أيام العيد تمّاك، رجعو. وَلكن بقا العايل يَسوع في أُورُشَليم والوالِدين ديالو ما فطنو شي بِه، حيت فكّرو بلّي كان مع الجماعة د المسافرين، وْمشاو نهار د الطريق حتّى بداو كيبقّشو عليه بين القرابـين والمعارف. وْملّي ما جبروه شي، رجعو نأُورُشَليم كيفتّشو عليه. وْمن بعد تلت أيّام، زدَق كاين في بيت المَقْدس ݣالس فوسط العُلَماء كيسمع مِنّوم وْكيسقصيهُم. الناس كاملين الّي كيسمعوه تعجّبو من الدكاء والأجوبة ديالو. وْملّي شافوه الوالِدين ديالو، تعجّبو، وْقات لو يمّاه: "آ بني، علاش عملْتِ بِنا هَيداك؟ ها انا وْباباك كُنّا كنفتّشو عليك معدّبـين." وْقالّوم: "علاش فتّشْتو عليَّ؟ واش ما عرفْتو شي بلّي خصْني نكون في الدار د بابا؟" وْهُمَ ما فهمو والو من هَد الشي الّي قالّوم. وْرجع معهُم يَسوع نالناصِرة وْكان طايع لوم. وْكانت يمّاه كتحفظ كُل هَد الأُمور في القلب ديالاْ. وْيَسوع زاد كيكبر في الحِكمة والطول وْفي رضى اللّٰه والناس عليه. وْفي العام الخمسطاش من الحُكم د القَيصَر طيباريوس، ملّي كان بيلاطُس البُنطي حاكم على منْطَقة اليَهوديّة، وْهيرودُس حاكم على الجَليل وْفيلِبُّس خاه حاكم على منْطَقة إيطورية وْتراخونيتُس، وْليسانياس حاكم على الأَبِليّة، وْكانو حَنّان وْقَيافا رُؤَساء المسؤولين، جا كلام اللّٰه نيوحَنّا وْهُوَ في الخلا. مشى يوحَنّا نالمنْطَقة كاملة د الأُرْدُن كيبشّر بالمعموديّة د التوبة نْغُفْران الدنوب. فحال ما هُوَ مكتوب في الكتاب د النَّبي إشَعْيا: "الصوت د شي واحد الّي كيبرّح في الخلا: «وجّدو طريق الرَّبّ، ردّو الطرقان ديالو مستقيمة. يتعمّر كُل واد ويتواطى كُل جبل وْكُدية. خصّ الطرقان المعوّجة يتعوّطو والطرقان الصعابـين يرجعو مواطيين. وْكُل البشر غادي يشوف النجا د اللّٰه.»" وْبزّاف د الناس كانو كيمشيو نْعند يوحَنّا باش يتغطّسو على يَدّو وْكيقولّوم: "آ وْلاد الحياي! شكون نبّهكُم باش تهربو من الغضب الّي ماجي؟ إدَن، جيبو الغلّة الّي كتبيّن التوبة، وْما تقولو شي نْراسكُم: «إبراهيم هُوَ بابانا.» حيت كنقول لكُم بلّي اللّٰه قادر باش يعمل من هَد الحجار الولاد نإبراهيم. وْدابا راه الشاقور منزّل على العروق د الشجار، وْكُل شجرة الّي ما كتجيب شي غلّة مزيانة غادي تْتقطّع وْتْتسيّب في العافية." سقصاواه الناس: "شنّو خصْنا نعملو؟" وْردّ عليهُم وْقالّوم: "الّي عندو جوج د الجلالب، يعطي واحدة نِلّي ما عندو شي، والّي عندو الماكلة، خصّوْ يعمل نفس الحاجة." وْجاو القبّاطة د الضرائب باش يتغطّسو وْسقصاواه: "آ المُعلّم، شنّو خصْنا نعملو؟" قالّوم: "ما تقبطو شي كتَر من الّي واجب عليكُم." وْسقصاواه شي بعض من العسْكر: "وْحنايَ، شنّو خصْنا نعملو؟" وْقالّوم: "ما تظلمو حتّى واحد وْما تطيّحو شي الباطل على حتّى شي واحد وْقنعو بالخُلصة ديالكُم." كانو الناس كيترجّاو وْكيسقصيو نَفسوم على يوحَنّا واش هُوَ المسيح. ردّ يوحَنّا عليهُم كاملين: "أنا كنغطّسكُم بالما، وَلكن غادي يجي واحد الّي هُوَ قوي منّي، الّي ما كَنْسْتاهل شي نفسخ الخيوط د الصبّاط ديالو. هُوَ غادي يغطّسكُم بالروح القُدُس والعافية. المدْرى في يَدّو باش ينقّي النوادر ديالو ويجمَع الزرَع في الخزين. أمّا التبن غادي يحرقوْ بالعافية الّي ما عُمراْ غادي تطفى." وْبْبزّاف د الأقوال يَخرين كان يوحَنّا كيقدّم النصائح نالشعب وْكيبشّروم بالإنجيل. أمّا هيرودُس القايد، يوحَنّا وَبّخوْ بْسباب هيروديا، المراة د فيلِبُّس خاه، وْبْسباب الفعايل القباحين كاملين الّي عملوم. وْهيرودُس زايد على هَد الشي كامل قبط يوحَنّا في الحبس. ملّي يوحَنّا كان كيغطّس الشعب كامل، حتّى يَسوع تغطّس. وْملّي كان كيصلّي، تْفتحَت السما وْنزل عليه الروح القُدُس في الصِّفة د واحد الحمامة، وْجا واحد الصوت من السما الّي قال: "أنتينا اِبني العزيز الّي كنفرح بِه." ملّي بدا يَسوع خدمة اللّٰه، كان في عمرو تلاتين عام تقْريبًا. وْكانو كيظنّو بلّي هُوَ الولد د يوسف، بن هالي، بن مَتْثات، بن لاوي، بن مَلْكي، بن يَنّا، بن يوسف، بن مَتّاثيا، بن عاموص، بن ناحوم، بن حَسْلي، بن نَجّاي، بن مَآث، بن مَتّاثيا، بن شِمْعي، بن يوسف، بن يَهودا، بن يوحَنّا، بن ريسا، بن زَرُبّابِل، بن شَأَلْتِئيل، بن نيري، بن مَلْكي، بن أَدّي، بن قُصَم، بن أَلْمودام، بن عير، بن يَشوع، بن أليعازَر، بن يوريم، بن متْثات، بن لاوي، بن شِمْعون، بن يَهودا، بن يوسف، بن يونان، بن أَلياقيم، بن مَلَيا، بن مَينان، بن مَتّاثا، بن ناثان، بن داود، بن يَسّى، بن عوبيد، بن بوعَز، بن سَلمون، بن نَحْشون، بن عَمّيناداب، بن أَدْمين، بن عَرني، بن حَصْرون، بن فارِص، بن يَهودا، بن يَعْقوب، بن إسْحاق، بن إبراهيم، بن تارَح، بن ناحور، بن سَروج، بن رَعو، بن فالَج، بن عابِر، بن شالَح، بن قينان، بن أرْفَكْشاد، بن سام، بن نوح، بن لامَك، بن مَتوشالَح، بن أخْنوخ بن يارِد، بن مَهْلَلْئيل، بن قينان، بن أنوش، بن شيت، بن آدم، اِبن اللّٰه. رجع يَسوع من الأُرْدُن معمّر بالروح القُدُس، وݣوّدوْ الروح نالخلا. تمّاك جرّبوْ الشيطان أربعين يوم. وْما كلا حتّى حاجة طول ديك الأيّام، وْملّي ڭازَتْ، جاه الجّوع. قال لو الشيطان: "إدا كُنْتِ ابن اللّٰه، قول نْهَد الحجْرة ترجع خبز." ردّ عليه يَسوع: "مكتوب: «ماشي بالخبز بوحدو كيعيش الإنسان.»" وْطلّعوْ الشيطان نواحد الموطَع عالي وْورّاه مَمْلكات الدنيا كاملين في رمشة عين. وْقال لو الشيطان: "أنا غادي نعطيك السلْطة على هَد المملكات كاملة والعظمة ديالاْ، حيت اتّعطات لي وانا كنعطيها لِمّن ما بغيتْ. إدَن، إدا سجدْتِ لي، كُل شي غادي يكون ديالك." ردّ عليه يَسوع وْقال: "مكتوب: «سْجد نالرَّبّ إلَهك، وْهُوَ بوحدو تعبدوْ.»" الشيطان ادّى يَسوع نأُورُشَليم، وْوقّفوْ على الصُمعة د بيت المَقْدس وْقال لو: "إدا كُنْتِ ابن اللّٰه، سيّب راسك من هنايَ نْتحت، حيت مكتوب: «غادي يوصّي الملائكة ديالو عليك باش يحفظوك، وْغادي يرفدوك على اليَدّين ديالوم باش ما تضرب حتّى حجْرة بْرِجلك.»" وْردّ عليه يَسوع وْقال: "كيقول الكتاب: «ما تجرّب شي الرَّبّ إلَهك.»" ملّي كمّل الشيطان من كُل التجارب، خلّاه حتّى تجي فُرْصة يَخرى. رجَع يَسوع بْقوّة الروح نالجَليل، وانْتَشر الخبَر عليه في ديك المنْطَقة كاملة. وْكان كيعلّم في بيوت العبادة والناس كاملين كيشكروه. مشى نالناصِرة فاين كان تربّى وْفي نهار السبت دخل نْبيت العبادة فحال العادة، وْناض باش يقرا. قدّمو لو كتاب النَّبي إشَعْيا. وْملّي فتحوْ، جبر الموطَع فاين كان مكتوب فيه: "روح الرَّبّ عليَّ، حيت دهَنّي باش نبشّر المساكن بْخبَر الخير، صيفطني باش نعيّط نالحبّاسة بالحريّة، وْنالعُميان بالبصر، وْباش نطلق المظلومين أحرار، وْنخبر بالسَّنَة المقبولة عند الرَّبّ." من بعدما طوى الكتاب، ردّوْ نالخدّام وْݣلس. والناس كاملين الّي كانو في بيت العبادة بقاو كيشوفو فيه بْترْكيز. يَسوع بدا كيقولّوم: "اليوما تحقّق الكلام في الحضور ديالكُم." وْكانو كاملين كيشهدو لو، وْتعجّبو من كلام النعْمة الّي خرج من دُقمو وْقالو: "واش ماشي هَدا هُوَ بن يوسف؟" يَسوع قالّوم: "بلا شكّ غَد تقولو لي هَد المتال: «آ الطبيب، شافي نفسك. عمل هنايَ في البلاد ديالك كُل ما سمعْنا بلّي عملْتِه في كَفْرِناحوم.» كنقول لكُم الحقّ، ما كاين حتّى شي نَبي مقبول في البلاد ديالو. وْفي الحقيقة في الوقت د إيليّا، ملّي السما تشدَّتْ مدّة تلت سنين وْنُص، وقعَتْ مجاعة كبيرة في البلاد كاملة. وْكانو في إسْرائيل في ديك الوقت بزّاف د الهجّالات. وَلكن إيليّا ما اتّصيفط نْحتّى واحدة مِنّوم، وَلكن اتّصيفط نواحد الهجّالة في صِرْفة ديال صَيدا. وْفي وقت النَّبي أَليشَع كان في إسْرائيل بزّاف د المبْراصين، وْما شافى حتّى واحد مِنّوم، من غير نُعْمان السوري تشافى." ملّي سمعو هَد الكلام، الّي كانو في بيت العبادة غضبو بزّاف. وْناضو وْطردوه من المدينة وادّاواه نالحافة د الجّبل، فاين كانت المدينة ديالوم مبنيّة عليه، باش يسيّبوه نْتحت. وَلكن هُوَ ݣاز فوسطوم وْمشى فحالو. هوّد يَسوع نْكَفْرِناحوم، وْهِيَ واحد المدينة في الجَليل، وْكان كيعلّم الناس نهار السبت. وْتعجّبو من التعْليم ديالو، حيت كلامو فيه السلْطة. كان في بيت العبادة واحد الرَّجل فيه واحد الجنّ شرّير، غوّت بْصوت عالي وْقال: "خلّينا! شنّو بينّا وْبينك، آ يَسوع الناصِري؟ واش جيتِ باش تهلكنا؟ أمّا أنا كنعرفك شكون أنتينا، القدّوس د اللّٰه!" وْنهَط فيه يَسوع وْقال: "سْكت وْخْرج مِنّو!" وْديك الساعة طيّحوْ الجنّ فوسط الناس وْخرج مِنّو وْما ضرّوْ شي. دهشو كاملين وْقالو مع بعطوم: "شنّو هَد الكلام؟ بالسلْطة والقوّة كيآمر الجنون المنْݣوسين وْكيخرجو!" والشهرة ديالو انْتَشرَتْ في كُل موطَع في ديك المنْطَقة. ناض وْخرج من بيت العبادة، وْدخل نالدار د سِمْعان. وْكانَت النسيبة د سِمْعان مريطة بالسخانة القويّة وْطلبوه من جهتاْ. قرّب مِنّاْ وْنهَط في السخانة وْخرجَتْ مِنّاْ، وْفي ديك اللحظة ناضت وْبداتْ كَتْـتسخّر عليهُم. ملّي غربَت الشمس، الناس جابو نيَسوع المراطين كاملين بأمْراض مخْتَلفة وْنزّل اليَدّين ديالو على كُل واحد مِنّوم وْشافاهُم. وْزايد على هَد الشي، خرجو الشياطين من بزّاف د الناس وْهُمَ كيغوّتو: "أنتينا هُوَ ابن اللّٰه!" وْنهَط فيهُم وْما خلّاهُم شي يهدرو، حيت عرفوه بلّي هُوَ المسيح. خرج يَسوع في الصباح وْمشى نواحد الموطَع خالي، وْفتّشو عليه الناس، وْملّي جبروه، حصروه باش ما يمشي شي من عندوم. وَلكن قالّوم يَسوع: "واجب عليَّ نبشّر بْمُلك اللّٰه في مُدُن يَخرين حتّى هُمَ، حيت على هَد الشي اتّصيفطْتْ." وْكان كيبشّر في بيوت العبادة د اليَهوديّة. كان يَسوع حدا البُحَيرة د جَنّيسارَت، والناس كانو كيتزاحمو عليه باش يسمعو كلام اللّٰه. وْشاف جوج د الفلايك، كانو الصيّادة خلّاوهُم حدا البحيرة، وْهُمَ كيغسلو الشبكات ديالوم. يَسوع طلع نواحدة مِنّوم الّي كانت ديال سِمْعان، وْطلَب لو يبعّداْ شويا من البرّ. وْݣلس في الفلوكة وْبدا كيعلّم الناس. ملّي كمّل الكلام ديالو، قال نْسِمْعان: "ادّي الفلوكة حتّى نْشي موطَع غارق وْسيّبو الشبكات نالصيد." ردّ عليه سِمْعان: "آ المُعلّم، الليلة كاملة وْحنايَ كَنْتَعبو وْما صيّدْنا والو، وَلكن على الكلام ديالك غادي نسيّب الشبكة." وْعملو ديك الشي وْجمعو بزّاف د الحوت حتّى بدات الشبكة كتـتقطّع. في ديك الساعة شيّرو نْصحابوم الّي في الفلوكة يَخرى باش يجيو ويعاونوهُم. وْجاو وْعمّرو جوج د الفلايك حتّى بداو كيغرقو. ملّي شاف سِمْعان بُطْرُس هَد الشي، طاح على الركابي ديالو قدّام يَسوع وْقال لو: "بعّد منّي، يا رَبّي، حيت أنا مُدْنب!" حيت دهش بزّاف هُوَ وْصحابو من كترة الحوت الّي صادو. وْدهشو حتّى يَعْقوب وْيوحَنّا أُوْلاد زَبَدي، الّي كانو الشُّرَكاء د سِمْعان. وْقال يَسوع نْسِمْعان: "ما تخاف شي. من دابا نْفوق غادي تكون صيّاد د الناس." ملّي رجعو بالفلايك نالبرّ، خلّاو كُل شي وْتَـبعو يَسوع. مرّة يَخرى، ملّي يَسوع كان في واحد القرية، كان تمّا واحد الرَّجل معمّر بالبرص، وْملّي شاف يَسوع، طاح على وَجهو وْرغبوْ كيقول: "آ سيدي، إدا بغيتِ، تقدر تصفّيني." يَسوع مدّ يَدّو وْحاداه وْقال لو: "أنا بغيتْ، كون صافي." وْفي هزيزة مشى منّو البرص. وْوصّاه يَسوع ما يقول هَد الشي نْحتّى واحد، وْقال لو: "مْشي وْورّي راسك نالمسؤول في بيت العبادة وْقدّم التقْدمة على التطهير ديالك فحال ما آمر موسى شهادة لِلوم." زادت انْتَشرَت الشهرة د يَسوع، وْجاو نْعندو بزّاف د الناس باش يسمعوه وْباش يشافيهُم من الأمْراض ديالوم. وأمّا هُوَ كان كيمشي بوحدو نالخلا وْكيصلّي. واحد النهار ملّي كان كيعلّم، كانو ݣالسين تمّاك بعض من الفرّيسيّين والمُعلّمين د الشريعة الّي جاو من كُل قرية من الجَليل واليَهوديّة وْحتّى من أُورُشَليم، وْكانت قدرة الرَّبّ معاه باش يشافي المراطين. ديك الساعة جاو شي رجال، رافدين واحد الرَّجل ممدود في الفراش وْهُوَ مكْحوش، وْكانو كيحاولو يدخّلوه وينزّلوه قدّام يَسوع. وْملّي ما قدرو شي يدخّلوه بْسباب الزحام، طلعو نالسطح، فاين حيّدو شي د القرامد وْهبّطوه في الفراش فوسط الناس قدّام يَسوع. ملّي شاف يَسوع الإيمان ديالوم، قال نالمكْحوش: "آ الرَّجل، مغفورين لك الدنوب ديالك." بداو الفرّيسيّين والمُعلّمين د الشريعة كيخمّمو: "شكون هُوَ هَدا الّي كيهدَر بالكفر؟ شكون يقدر يغفر الدنوب من غير اللّٰه بوحدو؟" فطَن يَسوع بالتخميم ديالوم وْردّ عليهُم: "علاش كتخمّمو هَيدا في قلبكُم؟ شنّو الّي ساهل، نقول: «مغفورين لك الدنوب ديالك،» أَوْلا نقول: «نوض وْمْشي؟» وَلكن باش تعرفو بلّي ابن الإنسان عندو السلْطة على الأرض باش يغفر الدنوب،" قال نالمكْحوش، "كنقول لك، نوض، رْفد الفراش ديالك وْمْشي نالدار ديالك." في الحين ناض قدّاموم وْرفد الفراش ديالو وْمشى نالدار وْهُوَ كيمجّد اللّٰه. وْتعجّبو كاملين وْمجّدو اللّٰه وْخافو بزّاف، وْقالو: "اليوما شفْنا العجايب." وْمن بعد هَد الشي خرج يَسوع وْشاف واحد القبّاط د الضرائب مسمّي لاوي ݣالس في الموطَع د الضرائب، وْقال لو يَسوع: "تبَعني،" وْناض وْخلّى كُل شي وْتبعوْ. وْلاوي عمل نيَسوع واحد الوليمة كبيرة في الدار ديالو، وْحضر تمّاك عدد كبير د القبّاطة د الضرائب وْناس يَخرين الّي كانو ݣالسين معهُم. وْتشكّاو الفرّيسيّين والمُعلّمين د الشريعة من التلامد د يَسوع بْهَد الكلام: "علاش كَتاكلو وْكتشربو مع القبّاطة د الضرائب والمُدْنبـين؟" ردّ عليهُم يَسوع: "الّي هُمَ صحاحين ما محْتاجين شي نالطبيب، وَلكن المراطين هُمَ الّي محْتاجين. أنا ما جيتْ شي باش نعيّط على المتّاقيين، وَلكن على المُدْنبـين باش يتوبو." البعض منّوم قالو نيَسوع: "التلامد د يوحَنّا كيصومو وْكيصلّيو بْشكل مستَمر وْحتّى التلامد د الفرّيسيّين، أمّا التلامد ديالك كيقيّلو ياكلو ويشربو." وْقالّوم يَسوع: "واش تقدرو تفرضو على المعْروطين نالعرس يصومو والعروس باقي معهُم؟ وَلكن غادي تجي الأيّام فيّاش يتحيّد عليهُم العروس. في ديك الأيّام غادي يصومو." قالّوم هَد المتال: "حتّى واحد ما كيحيّد واحد الطرف من شي لباس جديد باش يصلّح شي لباس بالي. إدا عمل هَد الشي، غادي يقطّع اللباس الجديد والرقعة منّو ما غادي شي توالم اللباس البالي. وْحتّى واحد ما كيعمل خمر جديد في شي جلود باليين. وَإلّا، الخمر الجديد غادي يطرْطق الجلود وْغادي يتهرّق الخمر والجلود غادي يخسرو. بالعكس، الخمر الجديد خصّوْ يتّعمل في الجلود الجدادين. وْحتّى واحد، من بعدما شرب خمر قديم، كيبغي الجديد، حيت غادي يقول: «القديم حسَن.»" في واحد السبت، ملّي يَسوع ݣاز من بين الفدادن د الزرَع، بداو التلامد ديالو كيقطّعو السبولة وْكيفرّكوهُم باش ياكلو. قالو لوم البعض من الفرّيسيّين: "علاش كتعملو في نهار السبت ديك الشي الّي ماشي حلال؟" ردّ عليهُم يَسوع: "واش ما قريتو شي ديك الشي الّي عمل داود ملّي جاه الجّوع، هُوَ وْهَدوك الّي كانو معاه؟ دخل نْبيت اللّٰه وْشبّر وْكلا خبز القُرْبان، الّي هُوَ حلال ياكلوه غير المسؤولين على بيت الله بوحدوم، وْعْطى حتّى نِلّي كانو معاه." وْقالّوم: "اِبن الإنسان هُوَ الرَّبّ على نهار السبت." في سبت يَخُر دخل يَسوع نْبيت العبادة وْبدا كيعلّم. وْكان تمّاك واحد الرَّجل اليَد ديالو د الّيمين مبطولة. كانو المُعلّمين د الشريعة والفرّيسيّين كيفتّشو على شي سبّة باش يشكيو ضدّ يَسوع، وْكانو كيراقبوه، واش غادي يشافي شي واحد في نهار السبت. وَلكن يَسوع عرف ديك الشي الّي كانو كيفكّرو فيه، وْقال نالرَّجل الّي يَدّو مبطولة: "نوض وْوقَف قدّاموم كاملين." والرَّجل ناض وْوقَف قدّاموم. قالّوم يَسوع: "أنا غادي نسقصيكُم، شنّو حلال يتّعمل في نهار السبت، الخير أَوْلا الشَّرّ، تنجّي الحياة أَوْلا تهلكاْ؟" وْشاف في الناس الّي دايرين بِه كاملين وْقال نالرَّجل: "مدّ يَدّك." وْمدّاْ وْرجعَتْ يَدّو صحيحة. غضبو بزّاف وْبداو كيتشاورو بيناتوم شنّو يعملو ضدّ يَسوع. في ديك الأيّام، مشى يَسوع نالجّبل باش يصلّي. وْݣوّز الليل كامل كيصلّي ناللّٰه. ملّي طلع النهار، عَيّط نالتلامد ديالو واختار مِنّوم طناش الّي سمّاهُم رُسُل، وْهُمَ: سِمْعان، الّي سمّاه بُطْرُس، وأَنْدَراوس خاه، يَعْقوب وْيوحَنّا، فيلِبُّس وْبَرْثولَماوس، مَتّى وْتوما، يَعْقوب بن حَلْفى وْسِمْعان، الّي مسمّي الغيور، يَهودا بن يَعْقوب، وْيَهودا الإسْخَريوطي، الّي رجع خاين. وْهوّد معهُم وْوقَف في الوطى، وْكان تمّاك جمهور كبير من التلامد ديالو وْعدد كبير د الناس من اليَهوديّة كاملة وأُورُشَليم والساحل د صور وْصَيدا، جاو باش يسمعوه وْباش يشافيهُم من الأمْراض ديالوم. والّي كانو معدّبـين بالجنون الشرّيرة رجعو حُرّين. والناس كاملين كانو كيحاولو يحاديواه، حيت القوّة كانت كتخرج منّو وْكتشافيهُم كاملين. وْعلّى يَسوع عينو في التلامد ديالو وْقال: "مبروكين أنتُمَ، آ المساكن، حيت مُلك اللّٰه ديالكُم. مبروكين أنتُمَ الّي كتجوعو دابا، حيت غادي تشبعو. مبروكين أنتُمَ الّي كتبكيو دابا، حيت غادي تضحكو. مبروكين أنتُمَ ملّي كيكرهوكُم الناس وْملّي كيرفضوكُم وْكيزبّلو فيكُم وْكيخلّيو الِاسم ديالكُم فحال شي اسم قبيح بْسباب اِبن الإنسان. فرحو في ديك النهار وْنَشطو، حيت الأجر ديالكُم كبير في السما، حيت هَيداك عملو الجدود ديالوم نالأَنِبياء. وَلكن الويل لِلكُم، أنتُمَ الّي لا باس عليكُم، حيت توصّلْتو بالتعْزية ديالكُم. الويل لِلكُم، أنتُمَ الّي شبعانين دابا، حيت غادي يكون فيكُم الجّوع. الويل لِلكُم، أنتُمَ الّي كتضحكو دابا، حيت غَد تحزنو وْتبكيو. الويل لِلكُم ملّي الناس كاملين كيهدرو عليكُم مزيان، حيت هَيداك عملو الجدود ديالوم نالأَنِبياء الكدّابـين. "وَلكن كنقول لكُم، آ السامعين، عزّو العدْيان ديالكُم، وْعملو الخير مع الّي كيكرهوكُم، وْباركو في الناس الّي كيلعنوكُم، وْدْعيو من جهة الّي كيتقبّحو عليكُم. إدا شي واحد ضَربك على خدّك، عْطيه الخدّ يَخرى. والّي كيحيّد لك السلْهام ديالك، ما تمنع شي عليه يدّي لك حتّى الجلّابة ديالك. كُل واحد الّي طلب منّك، عْطي لو، والّي كيدّي لك شي حاجة ديالك، ما تطلباْ شي منّو. فحال ما بغيتو الناس يعاملوكُم، عاملوهُم هَيداك. إدا كتعزّو غير الناس الّي كيعزّوكُم، شْمِن أجر عندكُم؟ حيت حتّى المُدْنبـين كيعزّو الناس الّي كيعزّوهُم. حيت إدا عملْتو الخير مع الّي كيعملو معكُم الخير، شْمِن أجر عندكُم؟ حتّى المُدْنبـين كيعملو هَيداك. إدا سلّفْتو نِلّي كتعرفو بلّي غادي يردّو لكُم، شْمِن أجر عندكُم؟ حيت المُدْنبـين كيسلّفو نْبعضيّاتوم باش الآخرين يردّوه لوم. وَلكن أنتُمَ، بالعكس، عزّو العدْيان ديالكُم وْعملو معهُم الخير وْسلّفو لوم بلا ما تْتسنّاو المقابل، وْغادي يكون الأجر ديالكُم كبير وْتكونو أُوْلاد العالي، حيت هُوَ كريم مع الّي ما كيشكروه شي وْحتّى مع القباحين. كونو رُحَماء فحال ما باباكُم هُوَ رحيم. "ما تحاكمو شي وْما غادي شي يحاكموكُم. ما تحكمو على حتّى واحد وْما غادي شي يحكمو عليكُم. سمحو وْغادي يتّسمح لكُم. عْطيو وْيتّعطى لكُم عبار عامر، مدكوك، مهزوز وْفايض. حيت بالعبار باش كتعبرو، غادي يتّعبر لكُم." وْقالّوم عاود هَد المتال: "واش يقدر العمى يݣوّد العمى؟ واش ما غادي شي يطيحو بْجوج بِهُم في شي حفرة؟ التلْميد ماشي كتَر من المُعلّم ديالو. وَلكن كُل واحد الّي كمّل التعْليم ديالو، راه غادي يكون فحال المُعلّم ديالو. وْعلاش كتشوف الخشوشة الّي في العينينة د خاك، وَلكن الخشبة الّي في عينك ما كتفطن شي بِها؟ كيفاش تقدر تقول نْخاك: «آ خاي، خلّيني نخرّج الخشوشة الّي في عينك،» وانتينا ما كتشوف شي الخشبة الّي في عينك؟ آ المنافق، خرّج في الُوّل الخشبة من عينك وْعاد غادي تشوف مزيان باش تخرّج الخشوشة الّي في العينينة د خاك! "الشجرة المزيانة ما كتعطي شي غلّة خايبة. وْبالعكس، الشجرة الخايبة ما كتعطي شي غلّة مزيانة. حيت كُل شجرة كَتْـتّعرف من الغلّة ديالاْ. ما كتجني شي الكرْموس من الشوك ولا العنب من العلّيق. الرَّجل الصالح من الكنز الصالح الّي في قلبو كيخرّج الخير. والرَّجل الشرّير من الخزين الشرّير كيخرّج الشَّرّ، حيت من الشياطة د القلب كيهدَر دُقمو. علاش كتعيّطو لي «يا رَبّي، يا رَبّي» وْما كتعملو شي الّي كنقول لكُم؟ كُل واحد الّي كيجي نْعندي وْكيسمع الكلام ديالي وْكيعمل بِه، نورّيكُم لِمّن كيشبه. كيشبه نواحد الرَّجل الّي بنى واحد الدار. حفر وْغرّق وْنزّل اللساس على الصخرة. وْملّي جا الفيضان، فاض الواد على ديك الدار، وْما قدر شي يزعْزعاْ، حيت كانت مبنية كِما يَنْبَغي. أمّا الّي كيسمع الكلام ديالي وْما كيعمل شي بِه، كيشبه نواحد الرَّجل الّي بنى الدار ديالو على الأرض بلا لساس، وْفاض الواد عليها وْطاحت والخراب ديالاْ كان كبير." ملّي كمّل يَسوع الكلام ديالو مع الشعب، دخل نْكَفْرِناحوم. وْكان تمّاك واحد القايد د المية الّي عندو العبد ديالو مريط قريب يموت، وْكان عندو عزيز بزّاف. ملّي سمع بيَسوع، صيفط لو شيوخ اليهود، كيطلب مِنّو يجي ويشافي العبد ديالو. ملّي جاو نْعند يَسوع، رغبوه بزّاف وْلحّو عليه وْقالو لو: "هَد الرَّجل كيسْتاهل تعمل لو الّي طلب لك، حيت كيعزّ الشعب ديالنا، وْهُوَ الّي بنى نّا بيت العبادة." مشى يَسوع معهُم، وْملّي قرّب نالدار، صيفط لو قايد المية صحابو كيقول لو: "آ سيدي، ما تعدّب شي راسك، حيت ما كنسْتاهل شي تدخل تحت السقَف ديالي. على هَد الشي أنا ما حسبْتْ شي نفسي نسْتاهل نجي نْعندك. وَلكن غير قول واحد الكلمة، والعبد ديالي غادي يتشافى. حيت حتّى أنا واحد الرَّجل تحت السلْطة، وْعندي العسْكر تحت الأمر ديالي، وْكنقول نْهَدا «مْشي» وْكيمشي، وْنيَخُر «آجي» وْكيجي، وْنالعبد ديالي «عمل هَد الشي» وْكيعملوْ." ملّي سمع يَسوع هَد الكلام، تعجّب منّو، وْدار وْقال نالناس الّي كانو كيتبعوه: "كنقول لكُم بلّي ما جبرْتْ شي الإيمان قدّ هَد الشي حتّى في إسْرائيل." وْملّي المرسولين رجعو نالدار، جبرو العبد تشافى. من بعد هَد الشي مشى يَسوع نواحد المدينة مسمّية نايين، كان كيرافقوه التلامد ديالو وْجمهور كبير. ملّي قرّب نالباب د المدينة، شاف واحد الميّت خارجين بِه، وْهُوَ الولد الوحيد د يمّاه وْهِيَ هجّالة. كانو مرافقيناْ بزّاف د الناس من المدينة. ملّي شافاْ الرَّبّ، حنّ عليها وْقالّاْ: "ما تبكي شي." ديك الساعة قرّب وْحادى المحمل، وْوَقفو الّي رافدينوْ. وْيَسوع قال: "آ الشابّ، كنآمرك، نوض." وْݣلس الميّت وْبدا كيتكلّم وْيَسوع عْطاه نيمّاه. وْكاملين خافو بزّاف وْمجّدو اللّٰه وْقالو: "ظهَر بيناتنا واحد النَّبي عظيم وْطلّل اللّٰه على الشعب ديالو." انْتَشر هَد الخبر عليه في اليَهوديّة كاملة والمناطق الّي قريبة مِنّاْ. التلامد د يوحَنّا عاودو لو على هَد الشي كامل. وْعَيّط يوحَنّا على جوج مِنّوم وْصيفطوم نْعند يَسوع باش يسقصيواه: "واش أنتينا هُوَ الّي ماجي أَوْلا نتسنّاو واحد يَخُر؟" ملّي قرّبو نْعند يَسوع، قالو لو: "يوحَنّا المَعْمَدان صيفطنا باش نسقصيواك: «واش أنتينا هُوَ الّي ماجي أَوْلا نتسنّاو واحد يَخُر؟»" في ديك الوقت يَسوع شافى بزّاف د الناس من الأمْراض وْمن الوجاع وْمن الجنون الشرّيرة وْردّ بزّاف د العُميان كيشوفو. ديك الساعة يَسوع ردّ على المرسولين: "مْشيو وْخبرو يوحَنّا بْديك الشي الّي شفْتوه وْسمعْتوه: العُميان رجعو كيشوفو والعُرَج كيمشيو والمبْراصين كيتصفّاو والصمكين كيسمعو والميّتين كيرجعو بالروح والمساكن كيتبشّرو بْخبَر الخير. وْمبروك الّي ما كَيعتَر شي بْسبابي." ملّي مشاو المرسولين، يَسوع بدا كيهدَر مع الجماعة على يوحَنّا: "شنّو خرجْتو تشوفو في الخلا؟ شي قصبة كيحرّكاْ الريح؟ وَلكن شنّو خرجْتو تشوفو؟ شي رَجل لابس حوايج رفيعة؟ طبعًا لا، حيت الناس الّي لابسين الجلالب الزوينين والّي منعّمين، هُمَ في القصور د الملوك. وَلكن شنّو خرجْتو تشوفو؟ شي نَبي؟ إيّاه، كنقول لكُم وْحسَن من واحد النَّبي. هَدا هُوَ الّي كتبو عليه: «ها انا كنصيفط المرسول ديالي قدّامك، الّي غادي يوجّد الطريق ديالك قدّامك.» كنقول لكُم، ما ولدو النسا حتّى شي واحد كبَر من يوحَنّا، وَلكن الصغير في مُلك اللّٰه، هُوَ كبَر منّو." الناس كاملين الّي سمعو هَد الشي، حتّى القبّاطة د الضرائب، عرفو بلّي اللّٰه عادل، حيت تغطّسو بْمعموديّة يوحَنّا. أمّا الفرّيسيّين والعُلماء د الشريعة رفضو إرادة اللّٰه لِلوم وْما تغطّسو شي على يَدّو. وْقال يَسوع: "لِمّن نشبّه الناس د هَد الجيل؟ نْلمّن كيشبهو؟ كيشبهو نْشي عيال ݣالسين في السوق وْكيغوّتو مع بعطوم، وْكيقولو: «غيّطْنا لكُم وْما شطحْتو شي، نوّحْنا لكُم وْما بكيتو شي.» حيت جا يوحَنّا المَعْمَدان ما كان شي كياكل الخبز وْما كيشرب شي الخمر، وْكتقولو بلّي فيه شي جنّ. جا اِبن الإنسان كياكل وْكيشرب وْكتقولو: «راه هَدا واحد الرَّجل وكّال وْسكايري، مصاحب مع القبّاطة د الضرائب والمُدْنبـين.» وَلكن الحِكمة كتبرّر بولاداْ كاملين." واحد من الفرّيسيّين عرط على يَسوع باش ياكل عندو، وْدخَل نالدار د الفرّيسي وْݣلس ياكل. كانت في المدينة واحد المراة معروفة مُدْنبة، وْملّي عرفَتْ بلّي يَسوع كياكل في دار الفرّيسي، جات وْمعها ردومة د الرخام معمّرة بالعطر. مشات نْعند الرِّجلين د يَسوع وْهِيَ كتبكي، وْفزّݣَتْ الرِّجلين ديالو بالدموع ديالاْ، وْمسحَتوم بْشعراْ، وْباستوم، وْدهنَتوم بالعطر. وْملّي شاف الفرّيسي الّي عرط عليه هَد الشي، قال في نفسو: "كَكان هَد الرَّجل نَبي، كَكان عرف السمعة الخايبة د هَد المراة الّي كتحاديه، حيت هي مُدْنبة." ردّ عليه يَسوع: "آ سِمْعان، عندي ما نقول لك." وْقال: "قول لي، آ المُعلّم." "كانو جوج د الناس مدْيونين نواحد الرَّجل. واحد كيسال لو خمس مية دينار ويَخُر خمسين دينار. وْحيت ما كان شي عندوم باش يخلّصو الدين، سمَح لوم بْجوج بِهُم. وْدابا شكون مِنّوم غادي يعزّوْ كتَر؟" ردّ عليه سِمْعان: "كنظنّ الّي سمَح لو في المبلغ الكبير." قال لو يَسوع: "حكمْتِ بالصَواب." دار يَسوع وْشاف في المراة، وْقال نْسِمْعان: "واش كتشوف هَد المراة؟ ملّي دخلْتْ نالدار ديالك، ما عْطيتِني شي الما باش نغسل رِجلي، وَلكن هي بالدموع ديالاْ غسلَتْ لي رِجلي وْمسحَتوم بالشعر ديالاْ. أنتينا ما بوسْتِني شي، أمّا هي، من الوقت الّي دخلْتْ نْهنايَ، ما وقفَتْ شي البوسان على رِجلي. أنتينا ما دهنْتِ لي شي الراس ديالي بالزيت، أمّا هي دهنَتْ لي رِجلي بالعطر. على ديك الشي كنقول لك بلّي هي عزَّتْ بزّاف، حيت الدنوب ديالاْ، الّي هُمَ بزّايف، اتّغفرو لاْ. وَلكن الّي مغْفور لو قليل، كيعزّ قليل." قالّاْ يَسوع: "مغفورين لك دنوبك." وْهَدو الّي معْروطين بداو كيقولو بيناتوم: "شكون هُوَ هَدا حتّى يغفر الدنوب؟" قال يَسوع نالمراة: "الإيمان ديالك نجّاك. مْشي بْسلام." من بعد ديك الشي، كان يَسوع كيدور في كُل مدينة وْكُل دشر وْكيبشّر بالإنجيل د مُلك اللّٰه، وْكانو معاه الطناش، وْمعهُم بعض النسا الّي تشافاو من الجنون الشرّيرة والأمْراض: مَرْيَم الّي كيعيّطو لاْ المَجْدَليّة، الّي خرجو مِنّاْ سبعة د الجنون، ويُوَنّا المراة د خوزي الوَكيل د هيرودُس، وْسوسَنّة ويَخرين بزّاف الّي كانو كيعاونوهُم بالمال ديالوم. ملّي اتّجمعو نْعند يَسوع بزّاف د الناس الّي جاو من كُل مدينة، تكلّم معهُم بْهَد المتال: "واحد الفلّاح خرج باش يزرع. وْملّي كان كيزرع، طاح شويا د الزرع حدا الطريق وْسطمو عليه الناس، والطيور د السما كلاواه. وْشي حبّات طاحت على الحجار، وْملّي نبتَتْ، يَبسَتْ، حيت ما عنداْ شي الرطوبة. وْشي حبّات طاحت فوسط الشوك، وْطلع معها الشوك وْجيّفاْ. وْشي حبّات طاحت في الأرض المزيانة، وْملّي نبتَتْ، عْطات الغلّة على مية مرّة." قال هَد الشي وْعَيّط: "الّي عندو الودْنين باش يسمع، لازم يسمع." سقصاواه التلامد ديالو على المعنى د هَد المتال، وْقالّوم يَسوع: "أنتُمَ اتّعطى لكُم باش تعرفو الأسْرار د مُلك اللّٰه، أمّا يَخرين بالأمْتال، باش واخّا يشوفو ما كيشوفو شي، وْواخّا يسمعو ما كيفهمو شي. هَدا هُوَ المعنى د المتال: الزرّيعة هي كلام اللّٰه. الحبّات الّي طاحت على الطريق، هُمَ الناس الّي كيسمعو كلام اللّٰه، وْمن بعد كيجي الشيطان وْكيحيّد الكلام من قلبوم باش ما يآمنو شي باش ينجاو. الحبّات الّي طاحت على الحجار، هُمَ الّي كيقبلو كلام اللّٰه فرحانين ملّي كيسمعوه، وَلكن ما عندوم شي العروق. هُمَ كيآمنو بعض الوقت، وَلكن ملّي كتجي المِحْنة، كيرجعو ناللَور. الّي طاحت بين الشوك، هُمَ هَدو الّي كيسمعو كلام اللّٰه، وَلكن مع المدّة كتجيّفوم الهموم د الدنيا والمال والشهوات ديالاْ، وْهُمَ ما كينضجو شي. الّي طاحت في الأرض المزيانة، هُمَ الّي كيسمعو كلام اللّٰه بْقلب طيّب وْمزيان وْكيحافظو عليه، وْكيعطيو الغلّة بالصبر. "حتّى واحد ما كيشعل شي لامْبة وْكيغطّيها بْشي قشعة أَوْلا كينزّلاْ تحت الفراش، وَلكن كينزّلاْ على المرفع باش الّي هُمَ داخلين يشوفو الضَّو. حيت كُل حاجة مخبّعة غادي تظهَر، وْكُل سرّ غادي يرجع معروف ويبان واضح. وْعلى هَد الشي ردّو بالكُم كيفاش كتسمعو، حيت الّي عندو غادي يتّعطى لو كتَر، والّي ما عندو شي، حتّى ديك الشي الّي كيظنّ بلّي عندو غادي يتحيّد لو." جات نْعندو يمّاه والخوت ديالو، وْما قدرو شي يوصلو نْعندو بْسباب الزحام. وْخبروه: "يمّاك وْخوتك واقفين على برّا وْبغاو يشوفوك." ردّ عليهُم: "يمّا وْخوتي هُمَ الّي كيسمعو كلام اللّٰه وْكيعملو بِه." واحد النهار طلع يَسوع نواحد الفلوكة مع التلامد ديالو، وْقالّوم: "آجيو نقطعو نالجّهة يَخرى د البُحَيرة." وْمشاو. ملّي كانو ماشّين، هُوَ نعَس. وْݣاز واحد الريح قوي على البحيرة، والفلوكة بدات كتعمّر بالما وْكانو في الخطر. التلامد مشاو وْفيّقوه كيقولو: "آ المُعلّم، آ المُعلّم، حنايَ غادي نموتو!" وْيَسوع ناض وْنهَط في الرّيح والمواج، والعاصفة وقفَتْ وْكُل شي تهدّن. قالّوم يَسوع: "فاين هُوَ الإيمان ديالكُم؟" خافو وْدهشو وْقالو مع بعطوم: "شكون هُوَ هَدا؟ حيت حتّى الرّيح والما كيآمروم وْكيطيعوه!" وْوَصلو نْبلاد الجَراسيّين الّي بْغرط الجَليل. وْملّي نزل يَسوع نالبرّ، جا نْعندو من المدينة واحد الرَّجل مسكون بالجنون. وْما كان شي كيلبس الحوايج ديالو مدّة طويلة، وْما كيسكن شي في الدار، وَلكن في المقابر. ملّي شاف يَسوع، غوّت وْطاح عند الرِّجلين ديالو وْغوّت بْصوت عالي: "شنّو بيني وْبينك، آ يَسوع اِبن اللّٰه العالي؟ كنرغبك باش ما تعدّبني شي!" قال هَد الشي حيت يَسوع آمر الجنّ المنْݣوس باش يخرج من الرَّجل. حيت بزّاف د المرّات الجنّ كان كيسَيطر عليه والناس كانو كيربطوه بالسناسل والقيود وْكيحضيواه، وَلكن هُوَ كان كيقطّع الرباطي والجنّ كيجرّوْ نالخلا. وْسقصاه يَسوع: "شنّو مسمّي أنتينا؟" وْردّ عليه: "جيش،" حيت بزّاف د الجنون كانو دخلو فيه. وْرَغبو يَسوع باش ما يآمروم شي يمشيو نالهاوية. كان تمّاك واحد القَطيع كبير د الحلالف كيرعا في الجّبل. وْطلبو الجنون نيَسوع يعطيهُم الإدن باش يدخلو فيهُم، وْخلّاهُم. خرجو الشياطين من الرَّجل وْدخلو في الحلالف، وْجرى القَطيع في الحدورة نالبُحَيرة وْغرق فيها. ملّي شافو السرّاح ديك الشي الّي وقَع، هربو وْخبرو الناس الّي في المدينة وْفي الفدادن. وْخرجو الناس باش يشوفو هَد الشي الّي وقَع، وْجاو نْعند يَسوع، وْجبرو الرَّجل الّي خرجو منّو الشياطين ݣالس قدّام الرِّجلين د يَسوع، لابس وْبْعقلو، وْخافو. وْهَدوك الّي شافو هَد الشي الّي وقَع، خبرو الناس كيفاش تشافى الرَّجل المسكون. والناس كاملين د بلاد الجَراسيّين طلبو من يَسوع يمشي فحالو من عندوم، حيت خافو بزّاف. وْدخل في الفلوكة وْرجَع. الرَّجل الّي خرجو منّو الجنون رغبوْ باش يخلّيه يمشي معاه، وَلكن يَسوع ودّعوْ وْقال لو: "رجَع نالدار ديالك وْعاود لوم هَد الشي الّي عمل معك اللّٰه." وْمشى وْعاود في المدينة كاملة كُل شي الّي عمل يَسوع معاه. ملّي رجَع يَسوع، رحّبو بِه الناس، حيت كاملين كانو كيتسنّاواه. في ديك الساعة جا واحد الرَّجل الّي مسمّي يايرُس، الّي كان رئيس في بيت العبادة، وْطاح عند الرِّجلين د يَسوع وْرغبوْ باش يدخل نالدار ديالو، حيت البنيتة الوحيدة ديالو، الّي في عُمراْ طناشر عام قرّبَتْ تموت. وْملّي كان ماشّي، تزاحمو عليه الناس. وْواحد المراة الّي كان فيها نزيف د الدم مدّة طناشر عام، (كانت صرفَتْ المال ديالاْ كامل على الأَطِبّاء وْما قدر حتّى واحد يشافيها)، قرّبَتْ من موراه وْحادات الجلايل د الجلّابة ديالو. وْفي هزيزة وقَف النزيف د الدم ديالاْ. سقصى يَسوع: "شكون الّي حاداني؟" وْنكرو كاملين، وْبُطْرُس قال: "آ مُعلّم، الناس كيتزاحمو وْكيضيّقو عليك وانتينا كتقول: «شكون الّي حاداني؟»" قال يَسوع: "شي واحد حاداني، حيت أنا عرفْتْ بلّي شي قوّة خرجَتْ منّي." وْملّي شافت المراة بلّي الأمر ديالاْ تفضح، جات كَتْـتّرْعد وْسجدَتْ لو وْخبرَتوْ قدّام الناس كاملين علاش حاداتوْ وْكيفاش تشافات في لحظة. وْقالّاْ يَسوع: "آ بنْتي، الإيمان ديالك شافاك. مْشي بْسلام." وْملّي كان باقي كيهدَر يَسوع، جا واحد من الدار د يايرُس رئيس بيت العبادة وْقال لو: "بِنْتك ماتت، ما تزيد شي تشطن المُعلّم." ملّي سمَع هَد الشي يَسوع، قال نيايرُس: "ما تخاف شي. غير آمن، وْهِيَ غادي تشافى." ملّي وصَل نالدار د يايرُس، ما خلّى حتّى واحد يدخل معاه، من غير بُطْرُس وْيَعْقوب وْيوحَنّا وْباباها ويمّاها د البنيتة. وْكانو كاملين كيبكيو عليها وْكيندبو. قالّوم يَسوع: "ما تبكيو شي، حيت هي ماشي ميّتة، وَلكن غير ناعسة." وْضحكو عليه، حيت كانو عارفين بلّي ماتت. شبّراْ يَسوع من يَدّاْ وْقالّاْ: "آ البنيتة، نوض." وْرجعَت الروح ديالاْ في هزيزة وْناضَتْ. وآمروم يعطيوها تاكل. تعجّبو الوالِدين ديالاْ، وْنبّهوم ما يحكيو نْحتّى واحد هَد الشي الّي وقَع. وْجمَع يَسوع الطناش د التلامد، وْعْطاهُم القوّة والسلْطة على الشياطين كاملين وْباش يشافيو الأمْراض. وْصيفطوم باش يبشّرو بْمُلك اللّٰه ويشافيو المراطين. قالّوم: "ما تدّيو حتّى حاجة نالطريق، لا عُكّاز، ولا شكارة، ولا خبز، ولا فلوس، ولا جوج د الجلالب. وأَي دار دخلْتو لاْ، بقاو تمّاك حتّى تخرجو من ديك الموطَع. وِادا ما رحّبو شي بِكُم، ملّي تخرجو من ديك المدينة، نفطو الغبرة من الرِّجلين ديالكُم فحال شهادة ضدّوم." إيوا، خرجو وْمشاو من قرية نْقرية كيبشّرو بالإنجيل وْكيشافيو الناس في كُل موطَع. ملّي سمَع القايد هيرودُس بْكُل ما جرى، حار حيت بعض الناس كانو كيقولو بلّي يوحَنّا قام من بين الميّتين، والبعض كيقول بلّي إيليّا ظهَر، ويَخرين بلّي شي واحد من الأَنْبياء القدامين اتّبعت. وَلكن هيرودُس قال: "يوحَنّا أنا قطّعْتْ لو راسو. وْشكون هُوَ هَدا الّي كنسمع عليه هَد الأُمور؟" وْكان باغي يشوفوْ. ملّي رجعو الرُّسُل، عاودو نيَسوع كُل شي الّي عملو. ديك الساعة ادّاهُم يَسوع وْمشاو بوحدوم نواحد القرية مسمّية بيت صَيدا. وَلكن عرفو الناس وْتبعوه، وْيَسوع رحّب بِهُم وْتكلّم معهُم على مُلك اللّٰه، وْشافى الّي كانو محْتاجين. ملّي قرّب الليل، جاو الطناش وْقالو لو: "صيفط الناس فحالوم باش يمشيو نالدشورة وْنالفدادن الّي قريبة باش يفتّشو على فاين يباتو وْما ياكلو، حيت حنايَ هنايَ في واحد الموطَع خالي." قالّوم يَسوع: "عْطيوهُم أنتُمَ ما ياكلو." وْقالو: "ما عندنا شي كتَر من خمسة د الخبزات وْجوج د الحوتات، غير إدا مشينا وْشرينا الماكلة نْهَد الناس كاملين." حيت كانو تمّا تقْريبًا خمس آلاف رَجل. وْقال نالتلامد ديالو: "ݣلّسوهُم خمسين في كُل ݣلسة." عملو هَيدا التلامد وݣلّسوهُم كاملين. وْشبّر يَسوع الخمسة د الخبزات والجوج د الحوتات وْعلّى عينو نالسما وْبارك فيهُم. وْقطّعوم وْعْطى نالتلامد ديالو باش يفرّقوهُم على الناس. وْكلاو كاملين وْشبعو، وْمن هَد الشي الّي شاط عليهُم جمعو طناشر قفّة د الكسور. واحد النهار كان يَسوع كيصلّي بوحدو وْكانو التلامد ديالو معاه، وْسقصاهُم: "شنّو كيقولو الناس عليَّ، شكون أنا؟" جاوبوه: "البعض كيقولو يوحَنّا المَعْمَدان، ويَخرين إيليّا، ويَخرين بلّي اتّبعت شي واحد من الأَنْبياء القدامين." وْقالّوم: "وانتُمَ، شنّو كتقولو عليَّ، شكون أنا؟" ردّ عليه بُطْرُس: "المسيح د اللّٰه." وَلكن حدّروم يَسوع وآمروم باش ما يقولو هَد الشي نْحتّى واحد. وْقالّوم: "اِبن الإنسان لا بدّ يتعدّب بزّاف ويرفضوه الشيوخ وْرُؤَساء المسؤولين في بيت المَقْدس والمُعلّمين د الشريعة، ويقتلوه وْفي اليوم التالت يرجع بالروح." وْقال نالناس كاملين: "إدا بغى شي واحد يجي من مورايَ، لازم عليه ينكر نفسو ويرفد الصليب ديالو كُل نهار ويـتبَعني. حيت الّي بغى ينجّي نفسو غادي يخسراْ، والّي كيخسر نفسو بْسبابي غادي ينجّيها. حيت شنّو غادي ينفع الإنسان إدا ربح الدنيا كاملة وْخسر نفسو أَوْلا هلكاْ؟ حيت الّي كيتحشّم بْسبابي وْبالكلام ديالي، اِبن الإنسان غادي يتحشّم بِه ملّي يجي في المجد ديالو وْمجد الآب والملائكة القدّيسين. كنقول لكُم الحقّ، البعض من الّي واقفين هنايَ ما غادي شي يدوقو الموت حتّى يشوفو مُلك اللّٰه." من بعد هَد الكلام بْشي تمن أيّام، يَسوع ادّى بُطْرُس وْيوحَنّا وْيَعْقوب وْطلَع نالجّبل باش يصلّي. وْملّي كان كيصلّي، تبدّل لو الوجَه والجلّابة ديالو رجعَتْ بَيطة وْكَتْبرق. وْظهرو جوج د الرجال كيتهاودو مع يَسوع، وْهُمَ موسى وإيليّا، الّي بانو في المجد وْتكلّمو على الرحيل ديالو الّي خصّوْ يكمّلوْ في أُورُشَليم. غلب النعاس على بُطْرُس وْصحابو، وْملّي فاقو، شافو المجد د يَسوع والجوج د الرجال الّي كانو واقفين معاه. وْملّي تفارقو مع يَسوع، بُطْرُس، بلا ما يعرف شنّو قال، اقتَرح على يَسوع: "آ المُعلّم، مزيان نكونو هنايَ. نعدّلو تلاتة د القياطن، لِلِك واحد وْنْموسى واحد وْنإيليّا واحد،" حيت ما جبر ما يقول. وْملّي بُطْرُس كان كيهدر، جات واحد السحابة وْظلّلَتْ عليهُم. وْخافو التلامد بزّاف ملّي دخلو في السحابة. وْجا واحد الصوت من السحابة وْقال: "هَدا هُوَ الِابن ديالي المخْتور. سمعو لو." من بعدما تكلّم ديك الصوت، يَسوع بقا بوحدو. والتلامد حافظو على هَد السرّ وْما خبرو حتّى واحد في ديك الأيّام بْهَد الشي الّي شافو. وْلّا غدّا ملّي هوّدو من الجّبل، تلاقاواه بزّاف د الناس. وْواحد الرَّجل من الجماعة غوّت: "آ المُعلّم، كنرغبك تشوف في بني، هُوَ الوحيد الّي عندي. واحد الجنّ كيقبطوْ وْعلى غفلة اِبني كيغوّت، والجنّ كيزعْزعوْ عاود حتّى كيخرّج الكشاكش، وْملّي كيدڭْدڭوْ، بالصعوبة كيخلّيه. وْطلبْتْ من التلامد ديالك باش يخرّجو الجنّ، وْما قدرو شي." ردّ يَسوع وْقال: "آ الجيل بلا إيمان والشرّير! حتّى لاين غادي نكون معكُم وْنتحمّلكُم؟ جيب اِبنك نْهنايَ." ملّي العايل قرّب من يَسوع، الشيطان طيّحوْ وْخبطوْ، وَلكن يَسوع نهَط في الجنّ المنْݣوس وْشافى العايل وْردّوْ نْباباه. وْتعجّبو كاملين من عظمة اللّٰه. ملّي كانو الناس كاملين كيتعجّبو في كُل ما عمل يَسوع، قال نالتلامد ديالو: "ردّو بالكُم نْهَد الشي الّي غادي نقول لكُم: اِبن الإنسان غادي يتسلّم ناليَدّين د الناس." وَلكن التلامد ما فهمو شي هَد الكلام، حيت كان مخفي عليهُم باش ما يفهمو شي المعنى ديالو. وْخافو يسقصيواه. والتلامد بداو كيتناقشو بيناتوم على شكون هُوَ الكبير فيهُم. وْحيت عرف يَسوع الأفْكار ديالوم، شبّر واحد العايل وْوقّفوْ حداه، وْقالّوم: "الّي كيرحّب بْهَد العايل بِاسمي كيرحّب بيَّ، والّي كيرحّب بيَّ كيرحّب بْهَداك الّي صيفطني، حيت الصغير فيكُم كاملين، هُوَ الكبير." ردّ عليه يوحَنّا وْقال: "آ المُعلّم، شفْنا واحد الرَّجل كيخرّج الجنون بالِاسم ديالك وْمنَعْناه، حيت ما كيتـبعك شي معنا." قال لو يَسوع: "ما تمنعوه شي، حيت أَي واحد الّي هُوَ ماشي ضدّكُم هُوَ معكُم." ملّي قرّب الوقت الّي غادي يتّرفع فيه نالسما، قرّر يَسوع يمشي نأُورُشَليم. وْصيفط الرُّسُل قدّامو، وْمشاو وْدخلو نواحد القرية د السامريّين باش يوجّدو لو الّي كيخصّو. وَلكن الناس تمّاك ما رحّبو شي بِه، حيت كان قاصد يمشي نأُورُشَليم. ملّي شافو هَد الشي التلامد، يعني يَعْقوب وْيوحَنّا، سقصاواه: "يا رَبّ، واش بغيتِنا نآمرو العافية تنزل من السما وْتهلكوم فحال ما عمل إيليّا؟" دار يَسوع وْوبّخوم. وْمشاو نْواحد القرية يَخرى. ملّي كانو ماشّين في الطريق، قال لو شي واحد: "آ سيدي، نـتَبْعك فاين ما مشيتِ." وْقال لو يَسوع: "التعالب عندوم الغيران والطيور د السما عندوم الأعشاش، أمّا اِبن الإنسان ما عندو فاين ينزّل راسو." قال نْواحد يَخُر: "تْبعني." وْقال لو: "آ سيدي، خلّيني نمشي في الُوّل وْندفن بابا." وْقال لو يَسوع: "خلّي الميّتين يدفنو الميّتين ديالوم، أمّا أنتينا مْشي وْبشّر بْمُلك اللّٰه." قال لو شي واحد يَخُر: "يا رَبّي، نـتـبعك، وَلكن خلّيني نمشي في الُوّل وْنودّع العائلة ديالي." وْقال لو يَسوع: "أي واحد الّي عمل يَدّو على المِحْرات وْكيشوف ناللَور ما كيصلح شي نْمُلك اللّٰه." من بعد هَد الشي، اختار الرَّبّ اتنَين وْسبعين يَخرين، وْصيفطوم جوج جوج قدّامو كيسبقوه نْكُل مدينة وْنْكُل موطَع فاين قرّر يمشي. قالّوم: "الحصاد كتير وَلكن الخدّامة قلالين. إدَن، طلبو من رَبّ الحصاد باش يصيفط الخدّامة نالحصاد ديالو. مْشيو أنتُمَ. ها انا كنصيفطكُم فحال الخرفان فوسط الدياب. ما تدّيو لا بزطام، ولا شكارة، ولا صبّاط، وْما تسلّمو على حتّى واحد في الطريق. وأَي دار دخلْتو لاْ، قولو في الُوّل: «السلام على هَد الدار،» وِادا كاين تمّاك رَجل السلام، السلام ديالكُم غادي ينزل عليه، وِادا ما كاين شي، غادي يرجع لِلكُم. وْبقاو في ديك الدار تاكلو وْتشربو من ديك الشي الّي غادي يقدّموه لكُم، حيت الخدّام كيسْتاهل الخُلصة ديالو. ما تنقلو شي من دار نْدار. وأَي مدينة الّي تدخلو لاْ ويرحّبو بِكُم، كولو من ديك الشي الّي كينزّلو لكُم. وْشافيو المراطين الّي فيها، وْقولو لوم: «مُلك اللّٰه قرّب منكُم.» وَلكن أي مدينة الّي كتدخلو لاْ وْما كيرحّبو شي بِكُم، خرجو نالزنايق ديالاْ وْقولو: «حتّى الغبرة د المدينة ديالكُم الّي لصقَتْ في الرِّجلين ديالنا كَنْنَفطوها فحال شهادة ضدْكُم. وَلكن عرفو بلّي مُلك اللّٰه قرّب منكُم.» كنقول لكُم بلّي الحالة د سَدوم غادي تكون في ديك النهار ساهلة من الحالة د ديك المدينة. "الويل لِلِك، آ كورَزين! الويل لِلِك، آ بيت صَيدا! حيت كَكانو تعملو في صور وْصَيدا المُعْجزات الّي تعملو فيكُم، كَكانو تابو شحال هَدي وْݣلسو في الخيش والرماد. وَلكن في يوم الدين الحالة د صور وْصَيدا غادي تكون ساهلة من الحالة ديالكُم. وانتينا، آ كَفْرِناحوم، واش ما غادي شي تتعلّى نالسما؟ لا، غادي تهوّد نالهاوية. "كُل واحد الّي كيسمع لكُم كيسمعني، والّي كيرفضكُم، كيرفضني. والّي كيرفضني، كيرفض الّي صيفطني." ملّي رجعو الاتْنَين والسبعين فرحانين، قالو: "يا رَبّ، حتّى الشياطين كيطيعونا بِاسمك." قالّوم: "شفْتْ الشيطان طايح من السما فحال البرق. ها انا كنعطيكُم السلْطة باش تسطمو على الحياي والعقارب وْتغلبو على القوّة كاملة د العدو، وْما غادي تضرّكُم حتّى حاجة. وَلكن ما تفرحو شي بلّي الشياطين كيطيعوكُم، وَلكن فرحو بلّي الأسْماء ديالكُم مزمّمين في السما." ديك الساعة فرح يَسوع بزّاف بالروح القُدُس وْقال: "أنا كنحمدك، آ بابا، ربّ السما والأرض، حيت خبّعْتِ هَد الأُمور على الحُكَماء والعُلَماء وْبيّنْتِها نالعيال الستيتْوين. نعم، آ بابا، حيت عجبك يكون هَيداك. بابا سلّم لي كُل شي. وْحتّى واحد ما كيعرف شكون هُوَ الِابن من غير الآب، وْحتّى واحد ما كيعرف شكون هُوَ الآب من غير الِابن، وْهَداك الّي بغى الِابن يورّيه لو." وْدار نالتلامد ديالو وْقالّوم بوحدوم: "مبروكين العينين الّي كيشوفو هَد الشي الّي كتشوفوه أنتُمَ. حيت كنقول لكُم، بزّاف د الأَنْبياء والملوك بغاو يشوفو هَد الشي الّي كتشوفوه أنتُمَ وْما شافوه شي، ويسمعو الّي كتسمعو وْما سمعوه شي." وقَف واحد العالِم د الشريعة باش يجرّب يَسوع وْسقصاه: "آ المُعلّم، شنّو خصْني نعمل باش نورت الحياة الأبديّة؟" قال لو يَسوع: "شنّو مكتوب في الشريعة؟ كيفاش كتفسّروْ أنتينا؟" وْديك الرَّجل ردّ عليه: "حبّ الرَّبّ إلَهك بْكُل قلبك وْبْكُل نفسك وْبْكُل قوّتك وْبْكُل عقلك،" "وْعزّ جارك فحال نفسك." قال لو يَسوع: "جاوبْتِ صحيح، عمل هَد الشي وْتحيا." وَلكن حيت هُوَ بغى يبرّر نفسو، سقصى يَسوع: "وْشكون هُوَ الجّار ديالي؟" ردّ عليه يَسوع: "كان واحد الرَّجل هوّاد من أُورُشَليم نأَريحا وْطاح في اليَدّين د السرّاق، وْحيّدو لو الحوايج وْضربوه وْمشاو فحالوم وْخلّاواه ما هُوَ حيّ ما هُوَ ميّت. وْزدَق بلّي واحد المسؤول في بيت المَقْدس كان هوّاد في نفس الطريق، وْملّي شافوْ، ݣاز من الجّهة يَخرى. وْعاود كان واحد اللاوي وصَل نْديك الموطَع، وْملّي شافوْ، ݣاز من الجّهة يَخرى. وَلكن واحد السامِري الّي كان مسافر وصَل نْديك الموطَع فاين كان الرَّجل، وْملّي شافوْ، حنّ عليه، وْقرّب نْعندو وْكبّ الزيت والخمر على الجراح ديالو وْربطوم وْركّبوْ على البهيمة ديالو وادّاه نْواحد الفندق وْتهلّا فيه. ولا غدّا، ملّي كان خارج، جبد جوج د الدنانير وْعْطاهُم نْمول الفندق وْقال لو: «تهلّا فيه وِادا صرفْتِ عليه كتَر، ملّي نرجع، أنا نخلّصك.» شكون من هَد التلاتة كيظهَر لك رجع جار نِلّي طاح في اليَدّين د السرّاق؟" ردّ عليه العالِم د الشريعة: "الرَّجل الّي حنّ عليه." قال لو يَسوع: "مْشي أنتينا وْعمل فحالو." ملّي كان يَسوع ماشّي مع التلامد ديالو، دخل نْواحد القرية، وْواحد المراة مسمّية مَرْتا ضيّفَتوْ في الدار ديالاْ. وْكانت عنداْ أختاْ مسمّية مَرْيَم، الّي كانت ݣالسة عند الرِّجلين د يَسوع كتسمع الكلام ديالو. أمّا مَرْتا كانت مشطونة بْبزّاف د الشغل، قرّبَتْ نْعند يَسوع وْقات لو: "يا رَبّي، واش ما كيهمّك شي بلّي أختي خلّاتْني كنخدم بوحدي؟ قولّاْ تعاونْني." ردّ عليها يَسوع: "مَرْتا، مَرْتا، أنتينا مقلّقة وْمشغولة بْبزّاف د الحاجات، وَلكن كيخصّ غير حاجة واحدة، وْمَرْيَم اختارَت الّي حسَن، وْحتّى واحد ما غادي يحيّداْ مِنّاْ." واحد النهار كان يَسوع كيصلّي في واحد الموطَع. ملّي كمّل، قال لو واحد من التلامد ديالو: "يا رَبّي، علّمنا نصلّيو فحال ما علّم يوحَنّا التلامد ديالو." قالّوم يَسوع: "ملّي تصلّيو قولو: «آ بابانا الّي في السما، يتقدّس اِسمك، يجي المُلك ديالك. عْطينا الخبز ديالنا كُل نهار. وْسْمح نّا الدنوب ديالنا، حيت حتّى حنايَ كنسمحو نْكُل واحد الّي كيخطأ فينا. وْما تدخّلنا شي في المِحنة.»" قالّوم عاود: "نفرضو شي واحد منكُم الّي عندو صاحبو وْكيمشي نْعندو في نصّ الليل وْكيقول لو: «آ صاحبي، سلّف لي تلاتة د الخبزات، حيت واحد صاحبي جاني من السفر وْما عندي ما ننزّل لو.» غادي يجاوب هَداك من الداخل ويقول: «ما تصدّعني شي. الباب مشدودة وانا وْولادي في الفراش. ما نقدر شي ننوض وْنعطيك شي حاجة.» كنقول لكُم، واخّا ما غادي شي ينوض ويعطيه حيت هُوَ صاحبو، في الحقيقة بْسباب الإلحاح ديالو غادي ينوض وْغادي يعطيه ديك الشي الّي احْتاج لو. أنا كنقول لكُم، طلبو، وْغادي يتّعطى لكُم. فتّشو، وْغَد تجبرو. دقّو، وْغادي يفتحو لكُم. حيت كُل واحد الّي كيطلب كيقبط، والّي كيفتّش كيجبر، والّي كيدقّ كيتّفتح لو. وْشكون منكُم وْهُوَ أب، إدا طلَب لو بنو حوتة، غادي يعطي لو حيّة فْعوط الحوتة؟ أَوْلا إدا طلب بيطة، واش غادي يعطي لو عقْرب؟ إيوا، إدا كُنْتو كتعرفو تعطيو نالولاد ديالكُم الهديّات المزيانة، واخّا أنتُمَ قباحين، راه الآب السماوي غادي يعطي كتَر الروح القُدُس نْكُل واحد الّي كيطلبوْ مِنّو!" مرّة يَخرى كان يَسوع كيخرّج من واحد الرَّجل واحد الجنّ زيزون. وْملّي خرج الجنّ، تكلّم الرَّجل الزيزون، وْتعجّبو الناس. وَلكن البعض مِنّوم قالو: "هَدا كيخرّج الشياطين بْبَعْلَزَبول، رئيس الشياطين." ويَخرين طلبو لو واحد العلامة من السما باش يجرّبوه. وْيَسوع عرف الأفْكار ديالوم وْقالّوم: "كُل ممْلكة الّي مقسومة على نفساْ كَتْـتخرّب، والعائلة الّي مقسومة على نفساْ غادي تطيح. وْعلى هَد الشي إدا تقسم الشيطان على نفسو، كيفاش غادي تـتبت الممْلكة ديالو؟ كنسقصي حيت أنتُمَ كتقولو بلّي أنا كنخرّج الشياطين بْبَعْلَزَبول. وِادا كُنْتْ أنا كنخرّج الشياطين بْبَعْلَزَبول، بَياش كيخرّجوهُم الولاد ديالكُم؟ على هَد الشي هُمَ غادي يحكمو عليكُم. وَلكن إدا كُنْتْ أنا كنخرّج الشياطين بْقوّة اللّٰه، يعني جا نْعندكُم مُلك اللّٰه. ملّي واحد الرَّجل قوي وْمسلّح كيحرس الدار ديالو، كُل ما كيملك كيكون في الأمان. وَلكن إدا هجَم عليه شي رَجل يَخُر قوي عليه وْغلبوْ، غادي يحيّد لو السناح ديالو الّي كان كيتيق فيه وغادي يوزّع الغنيمة. الّي هُوَ ماشي معيَ راه ضدّي، والّي ما كيجمع شي معيَ، راه كيشتّت. ملّي كيخرج الجنّ المنْݣوس من الإنسان، كيݣوز على المواطع الّي ما فيهُم شي الما، كيفتّش على الراحة. وْملّي ما كيجبراْ شي، ديك الساعة كيقول: «غادي نرجع نالدار ديالي الّي خرجْتْ مِنّاْ.» وْكيجي وْكيجبراْ مشطّبة وْمرتّبة، ديك الساعة كيمشي وْكيدّي معاه سبعة د الجّنون يَخرين قْبَح منّو وْكيدخلو وْكيسكنو تمّاك. والحالة الاخّريّة د ديك الإنسان كترجع قبَح من الحالة ديالو الُولى." ملّي يَسوع كان كيقول هَد الشي، واحد المراة بين الجمهور علّات الصوت ديالاْ وْقات لو: "مبروك الكرش د المراة الّي حملَتك والصدر الّي رطّعك." أمّا يَسوع قال: "بالعكس، مبروكين الّي كيسمعو الكلام د اللّٰه وْكيعملو بِه." ملّي كانو الناس كيتزاحمو عليه، بدا يَسوع كيقولّوم: "هَد الجيل شرّير، كيفتّش على شي علامة وْما غادي تتّعطى لو حتّى شي علامة من غير العلامة د يونان. حيت فحال ما كان يونان علامة نْسكّان نينَوى، اِبن الإنسان حتّى هُوَ غادي يكون علامة نْهَد الجيل. المَلِكة د الجنوب غادي توقف في يوم الدين مع الناس د هَد الجيل وْتحكم عليهُم، حيت هي جات من حدّ الدنيا باش تسمع الحِكمة د سُلَيمان. وْها هُوَ شي واحد عظيم من سُليمان هنايَ. الرجال د نينَوى غادي يوقفو في يوم الدين مع هَد الجيل ويحكمو عليه، حيت هُمَ تابو ملّي سمعو التبْشير د يونان، وْها هُوَ شي واحد عظيم من يونان هنايَ. "حتّى واحد ما كيشعل شي لامْبة وْكينزّلاْ في واحد الموطَع مخبّع، ولا تحت السطل، وَلكن على المرفع باش الّي هُمَ داخلين يشوفو الضَّو. الضَّو د الجسم هُوَ العينينة ديالك. ملّي كتكون العينينة ديالك صحيحة، الجسم ديالك كامل كيكون معمّر بالضَّو. وَلكن إدا كانت شرّيرة، الجسم ديالك كامل كيكون مسلّس. على ديك الشي تأكّد باش ما يكون شي الضَّو الّي فيك ظلام. وِادا كان الجسم ديالك معمّر بالضَو، وْما فيه حتّى عُضو مسلّس، أنتينا غادي تكون ضاوي كامل، فحال ملّي واحد اللامْبة كتضوّيك بالضَّو ديالاْ." ملّي يَسوع كمّل الهدرة ديالو، عرط عليه واحد الفرّيسي باش ياكل عندو. وْدخل وْݣلس على الطَيفور. أمّا الفرّيسي تعجّب ملّي شاف يَسوع ما تبَع شي العادة د غسيل اليَدّين من قبل الماكلة. وْقال لو الرَّبّ: "أنتُمَ الفرّيسيّين كتغسلو الكاس والطبْسيل من برّا، أمّا أنتُمَ من الداخل معمّرين بالطمع والشَّرّ. آ الجاهلين! واش هَداك الّي عمل الّي من برّا ما عمل شي الّي من داخل حتّى هُوَ؟ وَلكن عْطيو الصدقة من الّي عندكُم نْداخل، وْكُل شي غادي يكون عندكُم نقي. وَلكن الويل لِلكُم، آ الفرّيسيّين! حيت أنتُمَ كتعطيو العشور د النعْنع والصحْتر والقطنيات كاملة، وْكتهملو العدل وْمحبّة اللّٰه. كان واجب عليكُم تعملو هَد الأُمور، بلا ما تهملو يَخرين. الويل لِلكُم، آ الفرّيسيّين! حيت كتبغيو الصفّ الُوّل في بيوت العبادة والتحيّات في الأسْواق. الويل لِلكُم، حيت أنتُمَ فحال القبورة المجهولة والناس الّي كيمشيو فوق منّاْ ما كيفطنو شي بِها." وْردّ عليه واحد من العُلَماء د الشريعة: "آ المُعلّم، ملّي كتقول هَد الشي، كتزبّل فينا حتّى حنايَ." قال يَسوع: "الويل لِلكُم حتّى أنتُمَ، آ العُلَماء د الشريعة! حيت كَتْـتقّلو على الناس بالحمال التقيلة، وانتُمَ بْنَفسكُم ما كتلمسو شي الحمال حتّى بْصبعكُم! الويل لِلكُم! حيت أنتُمَ كَتْـبنيو القبورة د الأَنْبياء، وْجدودكُم هُمَ الّي قتلوهُم! بْهَد الشي أنتُمَ كتشهدو وْكتوافقو الّي عملو الجدود ديالكُم، حيت هُمَ قتلوهُم وانتُمَ كَتْـبنيو القبورة ديالوم. وْعلى ديك الشي بالضبط قالت حِكمة اللّٰه: «أنا غادي نصيفط لوم الأَنْبياء والرُّسُل، والبعض غادي يقتلوهُم والبعض يمرْمدوهُم، باش نحاسب هَد الجيل على دم الأَنْبياء كاملين الّي مسفوك من بداية الدنيا، من دم هابيل نْدم زَكَريّا الّي تْقتل بين المَدْبح وْبيت اللّٰه. إيّاه، كنقول لكُم بلّي غادي نحاسب هَد الجيل على هَد الشي كامل!» الويل لِلكُم، آ عُلَماء الشريعة! حيت سيطَرْتو على مفتاح المَعْرفة. أنتُمَ بْنَفسكُم ما دخلْتو شي، والناس الّي بغاو يدخلو منعْتوهُم." ملّي كان خارج يَسوع من تمّا، المُعلّمين د الشريعة والفرّيسيّين بداو كيهجمو عليه وْسقصاواه على بزّاف د الأُمور. وْكانو كيراقبوه باش يحصلوه في شي كلمة ويتّهموه بِها. ملّي اتّجمعو أُلوفات د الناس حتّى رجعو كيسطمو على بعطوم، يَسوع بدا كيهدَر في الُوّل مع التلامد ديالو: "ردّو بالكُم من الخميرة د الفرّيسيّين، يعني النفاق. حيت ما كاين حتّى حاجة مسْتورة الّي ما غادي شي تظهر ولا مخبّعة الّي ما غادي شي تْتّعرف. على ديك الشي كُل شي الّي قُلْتو في أسلّاس، غادي يتّسمع في الضَّو، والّي وَسْوسْتو بِه في الودنينة مورا البيبان مشدودين، غادي يبرّحو بِه على السطوحة. كنقول لكُم أنتُمَ، آ صحابي، ما تخافو شي مِن الّي كيقتلو الجسم وْما يقدرو شي يعملو كتَر من هَد الشي. وَلكن نورّيكُم م‍مّن خصْكُم تخافو: خافو من هَداك الّي بعدما يقتل، عندو السلْطة باش يسيّبكُم في جهنّم. إيّاه! كنقول لكُم، هَداك خافو منّو. واش ما كَيْتّباعو شي خمسة د الطيور بْجوج د الدراهم؟ وَلكن اللّٰه ما كينسا حتّى واحد مِنّوم. وْفوق هَد الشي، حتّى الشعر د راسكُم راه كامل محسوب. ما تخافو شي، أنتُمَ حسَن من بزّاف د الطيور. كنقول لكُم بلّي أي واحد الّي كيعْتَرف بيَّ قدّام الناس، غادي يعْتَرف بِه اِبن الإنسان قدّام ملائكة اللّٰه. وَلكن الّي كينكرني قدّام الناس، يتّنكر قدّام ملائكة اللّٰه. وْكُل واحد الّي كينطق بْشي كلمة ضدّ اِبن الإنسان غادي يتّغفر لو. أمّا الّي كيكفر بالروح القُدُس ما غادي شي يتّغفر لو. ملّي يدّيوكُم نْبيوت العبادة وْنْعند الحُكّام وْصحاب السلْطة، ما يهمّكُم شي كيفاش تدافعو على راسكُم أَوْلا بَياش تجاوبو، حيت في ديك الساعة الروح القُدُس غادي يعلّمكُم الّي واجب تقولوه." قال لو واحد من الجماعة: "آ المُعلّم، قول نْخاي يعطيني الحقّ ديالي من الورت." قال لو يَسوع: "آ الرَّجل، شكون عملني عليكُم قاضي أَوْلا حاكم؟" وْقالّوم: "ردّو بالكُم من كُل أنواع الطمع، حيت حياة الإنسان ما كَتْـتعلّق شي بالحاجات الّي عندو، واخّا بزّايّف." في ديك الساعة عاود لوم واحد المتال: "الأرض د واحد الرَّجل لا باس عليه جابت لو بزّاف د المحْصول. وْبدا كيخمّم في راسو: «شنّو غادي نعمل؟ ما عندي شي فاين نخزّن المحصول ديالي.» وْقال: «أنا عارف شنّو غادي نعمل: نهدّم الخزاين ديالي وْنبني يَخرين كبَر مِنّاْ فاين نخزّن كُل الزرَع والخَير ديالي، وْغادي نقول نْراسي: "عندك الخير بزّاف مخْزون نْبزّاف د السنين! ارْتاح وْكول وْشرب وْتمتّع بالحياة."» وَلكن اللّٰه قال لو: «آ الجاهل، هَد الليلة ماجّين باش يطلبو منّك نفسك، وْهَد الشي الّي وجّدْتِه، لِمِّن غادي يكون؟» هَيدا كيكون المصير د كُل واحد الّي كيخزن التجارة نْنفسو، وْما كيكون شي غني في اللّٰه." قال يَسوع نالتلامد ديالو: "على ديك الشي كنقول لكُم، ما ترفدو شي الهمّ من جهة الحياة ديالكُم شنّو تاكلو، وَلا من جهة الجسم ديالكُم شنّو تلبسو. حيت الحياة كتَر من الماكلة والجسم كتَر من اللباس. شوفو الغربان، ما كيزرعو شي وْما كيحصدو شي، وْما عندوم لا هري ولا خزين، واللّٰه كيوكّلوم. وانتُمَ كَتْسواو كتَر بزّاف من الطيور! شكون منكُم بالهموم يقدر يزيد على الطول ديالو غير واحد الدراع؟ وِادا ما قدرْتو شي تعملو الحاجة الساهلة، علاش كتخمّمو في الّي باقي؟ شوفو السوسان كيفاش كيكبر. ما كيتعب شي وْما كيغزل شي، وَلكن كنقول لكُم بلّي حتّى سُليمان في العزّ ديالو كامل ما كان شي كيلبس فحال واحدة من هَدوك. وِادا كان اللّٰه كيلبّس هَيداك الربيع في الفدّان، الّي كاين اليوما وْكيتسيّب غدّا في الفرّان، كيفاش ما يلبّسكُم شي حتّى أنتُمَ، آ قلالين الإيمان؟ ما تخمّمو شي لا في شنّو غَد تاكلو وَلا في شنّو غَد تشربو، وْما تقلّقو شي. حيت على هَد الأُمور كاملين كيفتّشو الناس د الدنيا، وَلكن باباكُم كيعرف بلّي أنتُمَ محْتاجين نْهَد الشي. أمّا أنتُمَ فتّشو على مُلك اللّٰه وْهَد الحاجات غادي تْتزاد لكُم. "ما تخافو شي، آ القَطيع الصغير، حيت الإرادة المزيانة د باباكُم هي باش يعطيكُم المُلك. بيعو الّي عندكُم وْصدّقوه على المساكن، وْوجّدو نْراسكُم أكْياس الّي ما كتبلا شي، واحد الكنز الّي ما كيتقاضى شي في السما، فاين ما كاين لا سارق الّي يسرق ولا سوسة الّي تفسّدوْ. حيت فاين كاين الكنز ديالكُم، تمّاك كيكون القلب ديالكُم حتّى هُوَ. "كونو مستعدّين دائمًا، محزّمين والضَّو ديالكُم مشعول، فحال الرجال الّي كيتسنّاو السيّد ديالوم يرجع من وليمة العرس، باش في أي وقت وصَل وْدقّ الباب، يفتحو لو دغيا. مبروكين ديك العبيد الّي، ملّي يجي السيّد ديالوم، يجبروم سهرانين. كنقول لكُم الحقّ، غادي يحزّم نفسو ويݣلّسوم على الطَيفور وْهُوَ بْنفسو غادي يجي يخدموم. مبروكين ديك العبيد الّي، ملّي يجي السيّد ديالوم، يجبروم مستعدّين، واخّا يوصل في النُّص د الليل أَوْلا من قبل الفجر. وَلكن عرفو هَد الشي: كَكان عارف مول الدار شْمن ساعة غادي يجي السارق، كَكان بقا رادّ البال وْما خلّاه شي يتسلّل نالدار ديالو. هَيدا كونو حتّى أنتُمَ مستَعدّين، حيت اِبن الإنسان غادي يجي في الساعة الّي ما كتظنّوها شي." في ديك الساعة سقصاه بُطْرُس: "يا رَبّي، كتقول هَد المتال لِنّا حنايَ أَوْلا نالناس كاملين؟" ردّ عليه الرَّبّ: "شكون هُوَ الوكيل الأمين والحكيم الّي غادي يكلّفوْ السيّد ديالو باش يعطي الماكلة نالخدّامة في وقتاْ؟ مبروك ديك العبد الّي، ملّي يجي سيّدو، كيجبروْ كيعمل هَيدا. كنقول لكُم الحقّ بلّي غادي يوكّلوْ على المتاع ديالو كامل. وَلكن إدا قال ديك العبد في نفسو: «السيّد ديالي كيتعطّل في الرجوع ديالو،» وْبدا كيضرب العبيد، رجال وْنسا، وْكياكل وْكيشرب وْكيسكر، غادي يرجع السيّد د ديك العبد في النهار الّي ما كيتسنّاه شي وْفي الساعة الّي ما كيعرفاْ شي، وْغادي يعاقبوْ بزّاف ويجعل المصير ديالو مع الكفّار. العبد الّي عارف الإرادة د سيّدو، وْما وجّد شي راسو وْما عمل شي بِها، غادي يتعصّى بزّاف. وَلكن الّي ما عارف شي الإرادة د سيّدو، وْعمل شي حاجة الّي كيسْتاهل عليها العصا، غادي يتعصّى، وَلكن غير شويّش. وْكُل واحد الّي اتّعطى لو بزّاف، غادي يتّطلب منّو بزّاف، والّي توكّلوْ كتير، غادي يتّطلب منّو كتَر. "أنا جيت باش نسيّب العافية على الأرض، وْشحال بغيتاْ تكون مشعولة دابا! وَلكن خصْني نݣوز بواحد المِحنة د المعمودية، وْشحال كنحسّ بالضيق حتّى تتكمّل! واش كتظنّو بلّي جيت باش نجيب السلام نالدنيا؟ كنقول لكُم، لا، وَلكن المدابزة بين الناس. من دابا نْفوق خمسة في عائلة واحدة غادي يكونو مقسّمين على بعطوم، تلاتة ضدّ جوج وْجوج ضدّ تلاتة. غادي يكون الوالِد ضدّ بنو، والولد ضدّ باباه، والأمّ ضدّ بنتاْ، والبنت ضدّ يمّاها، والعݣوزة ضدّ العروسة، والعروسة ضدّ العݣوزة ديالاْ." قال نالجمهور عاود: "ملّي كتشوفو السحابة طالعة من الغرب، في ديك الساعة كتقولو: «الشتا غادي تطيح،» وْفِعلاً كتطيح الشتا. وْملّي كيسوط الريح من الجنوب، كتقولو: «غادي تكون الحرارة،» وْكتكون. آ المنافقين، كتعرفو تميّزو الحالة د الجَّو من الأرض والسما، وْكيفاش ما كتعرفو شي تميّزو الزمان الّي كتعيشو فيه؟ وْعلاش ما كتحكمو شي بْراسكُم الّي هُوَ عادل؟ إدا مشيتِ مع صاحب الدعْوة ديالك نالمحْكمة، عمل جُهدك باش تصالح معاه في الطريق. عندَك يدّيك نالقاضي، ويدفعك القاضي نالمخزني ويسيّبك المخزني في الحبس. كنقول لك، ما غادي شي تخرج من تمّاك حتّى تخلّص الفلس الاخّري." في ديك الوقت جاو بعض الناس وْخبرو يَسوع كيفاش بيلاطُس سفك الدم د بعض الجَليليّين ملّي كانو كيقدّمو الدبايح ديالوم. وْجاوب يَسوع: "واش كتظنّو بلّي ديك الجَليليّين حيت تعدّبو هَيداك كانو مُدْنبـين كتَر من يَخرين كاملين؟ كنقول لكُم، لا! إدا ما تُبْتو شي، غَد تْتّهلكو أنتُمَ كاملين فحالوم. وْديك التمنطاش الّي طاح عليهُم البُرْج في سِلْوام وْقتلوم، واش كتظنّو بلّي كانو قباحين كتَر من السكّان كاملين د أُورُشَليم؟ كنقول لكُم، لا. إدا ما تُبْتو شي، غَد تْتّهلكو أنتُمَ كاملين فحالوم." وْقال هَد المتال: "كانت عند واحد الرَّجل شجرة د الكرْموس مغروسة في الجّنان ديالو. وْملّي جا كيفتّش على الغلّة، ما جبر والو. وْقال نالربّاع: «شوف، هَدي تلت سنين وانا كنجي وْكنفتّش على الغلّة في هَد الشجرة د الكرْموس، وْما كنجبر والو. قطّعاْ. علاش كتعطّل الأرض؟» ردّ عليه وْقال لو: «آ سيدي، خلّيها هَد العام عاود حتّى نحفر التراب الّي داير بِها وْنغبّراْ، وِادا جابت شي غلّة، مزيان، وِادا ما جابت شي، عاد ديك الساعة قطّعاْ.»" واحد السبت كان يَسوع كيعلّم في واحد البيت د العبادة. وْكانت تمّاك واحد المراة الّي فيها جنّ شرّير الّي مرّطاْ مدّة تمنطاشر عام، وْكانت مقوّسة وْما كتقدر شي تتمشّى معوّطة. ملّي شافاْ يَسوع، عَيّط لاْ نْعندو وْقالّاْ: "آ المراة، أنتينا مطلوقة من المرض ديالك." يَسوع عمل اليَدّين ديالو عليها، وْفي هزيزة تعوّطَتْ وْبدات كتسبّح اللّٰه. رئيس بيت العبادة غضب حيت يَسوع شافى في نهار السبت، وْقال نالناس: "كاينين ستّ أيّام الّي نقدرو نخدمو فيها، هَيدا آجيو في ديك الأيّام باش تشافاو، وْماشي نهار السبت!" ردّ عليه الرَّبّ: "آ المنافقين، واش ماشي كُل واحد منكُم كيفسخ في نهار السبت التور أَوْلا الحمار ديالو من العلّافة ويدّيه باش يورّدوْ؟ وْهَد المراة، وْهِيَ بنت إبراهيم، الّي ربطاْ الشيطان مدّة ديال تمنطاشر عام، واش ما كان شي واجب تْتّطلق من هَد الرباط في نهار السبت؟" ملّي قال هَد الشي، حشمو المعارضين ديالو كاملين، وَلكن الناس فرحو بالعجايب الّي عملوم يَسوع. وْقال يَسوع: "لِمّن كيشبه مُلك اللّٰه وْباش نشبّهوْ؟ كيشبه نواحد الحبّة د الخرْدل الّي زرَع واحد الرَّجل في الجّنان ديالو، وْكبرَتْ حتّى رجعَتْ شجرة وْكتعشّش الطيور د السما في الأغْصان ديالاْ." وْقال عاود: "بَياش نقارن مُلك اللّٰه؟ كيشبه نْشي خميرة الّي شبّرَتاْ واحد المراة وْخلّطَتاْ في تلاتة د العبرات د الدقيق حتّى خمّرَت العجينة كاملة." في السفر ديال يَسوع نأُورُشَليم، كان كيعلّم الناس في المُدُن والدشورة الّي في الطريق ديالو. وْسقصاه شي واحد: "آ سيدي، واش قلالين هُمَ الّي غادي ينجاو؟" قالّوم يَسوع: "عملو جُهدكُم باش تدخلو من الباب الضيّقة، حيت كنقول لكُم بلّي بزّاف غادي يحاولو يدخلو وْما غادي شي يقدرو. من بعدما ناض مول الدار وْشدّ الباب، أنتُمَ غَد تدقّو على برّا على الباب وْتقولو: «يا رَبّي، يا رَبّي، فْتح نّا،» وَلكن هُوَ غادي يجاوبكُم: «أنا ما كنعرف شي ماين أنتُمَ!» في ديك الساعة غَد تقولو: «كلينا وْشربْنا معك وْعلّمْتِ في الساحات ديالنا.» وَلكن هُوَ غادي يردّ عليكُم: «نعاود لكُم بلّي أنا ما كنعرف شي ماين أنتُمَ! بعّدو منّي كاملين، أنتُمَ الّي كتظلمو!» تمّاك غادي يكون البكا وْتغْزيز السّنان ملّي تشوفو إبراهيم وإسْحاق ويَعْقوب والأَنْبياء كاملين في مُلك اللّٰه وانتُمَ مسيّبـين على برّا. وْغادي يجيو الناس من الشرق والغرب وْمن الشمال والجَنوب، ويݣلسو في الوليمة د مُلك اللّٰه. وْفعلاً، كاينين الاخّريّين الّي غادي يرجعو الُوّلين، والُوّلين الّي غادي يرجعو الاخّريّين." في ديك الوقت قرّبو بعض الفرّيسيّين نْعند يَسوع وْقالو لو: "خْرج من هنايَ وْمْشي نْموطَع يَخُر، حيت هيرودُس باغي يقتلك." وْقالّوم يَسوع: "مْشيو وْقولو نْهَد التعْلب، اليوما وْغدّا أنا غادي نزيد نطرد الشياطين وْنشافي الناس، وْفي النهار التالت غادي نكمّل الّي واجب عليَّ نعملوْ. وَلكن خصْني نكمّل الطريق ديالي اليوما وْغدّا وْبعد غدّا، حيت ما يمكن شي يموت شي نَبي برّا من أُورُشَليم. آ أُورُشَليم، آ أُورُشَليم! يا الّي كتقتل الأَنْبياء وْكترجم المرسولين لِلك! شحال من مرّة بغيتْ نجمع أُوْلادك فحال ما كتجمع الجدادة الفلالس ديالاْ تحت الجنحين ديالاْ، وْما بغيتِ شي. ها الدار ديالكُم غادي تبقا لكُم خالية. وْكنقول لكُم بلّي ما غادي شي تشوفوني عاود حتّى يجي الوقت فاش كتقولو: «مبروك هُوَ الّي ماجي بِاسم الرَّبّ.»" واحد السبت مشى يَسوع نالدار د واحد من القُيّاد د الفرّيسيّين باش ياكل، وْكانو كيراقبوه باش يحصلوه. وْكان قدّامو واحد الرَّجل مريط بالنفخ د الما. وْيَسوع سقصى العُلماء د الشريعة والفرّيسيّين: "واش حلال الشفاء نهار السبت، أَوْلا لا؟" وَلكن هُمَ بقاو ساكتين. وْشبّر يَسوع الرَّجل وْشافاه وْودّعوْ. وْقالّوم عاود: "شكون منكُم إدا طاح بنو أَوْلا التور ديالو في البير، واش ما يخرّجوْ شي دغيا، واخّا يكون نهار السبت؟" وْما قدرو شي يجاوبوه على هَد الشي بأَي حاجة. ملّي لاحظ يَسوع كيفاش المعْروطين اختارو المواطع المتفضّلين باش يݣلسو، قالّوم هَد المتال: "ملّي شي واحد كيعرط عليك نْشي حفلة د العرس، ما تݣلس شي في الموطَع المتفضّل، ومُمكن يكون شي معْروط أهمّ منّك. حيت غادي يجي الّي عَرط عليكُم بْجوج ويقول لك: «عْطي الموطَع نْهَد الرَّجل.» وْديك الساعة غادي تݣلس حشمان في الموطَع الاخّري ݣاع. وَلكن ملّي تكون معْروط، ݣلس في الموطَع الاخّري باش، ملّي يجي الّي عَرط عليك، يقول لك: «آ صاحبي، ݣوز نالقدّام نْشي موطَع حسَن.» ديك الساعة غادي تكون مكرّم قدّام المعْروطين كاملين. حيت كُل واحد الّي كيعلّي راسو غادي يتّحنى، والّي كيحني راسو غادي يتعلّى." وْزاد يَسوع وْقال نِلّي عرط عليه: "ملّي كتعمل شي غدا أَوْلا شي عشا، ما تعرط لا على صحابك ولا على خوتك ولا على أَهْلِك ولا على الجيران ديالك الّي لا باس عليهُم، باش ما يعرطوك شي ويردّوها لك. وَلكن ملّي كتعمل شي وليمة، عرط على المساكن والمكْحوشين والعُرَج والعُميان. وْتكون مبروك حيت هُمَ ما يقدرو شي يردّوها لك، وَلكن اللّٰه غادي يخلف عليك في القيامة د المتّاقيين." ملّي سمَع هَد الشي واحد من الّي كانو ݣالسين مع يَسوع، قال لو: "مبروك الّي غادي ياكل في الوليمة د مُلك اللّٰه!" ردّ عليه يَسوع: "واحد الرَّجل عمل شي وليمة كبيرة وْعَرط على بزّاف د الناس. ملّي وصلَت الساعة د الوليمة، صيفط العبد ديالو، كيقول نالمعْروطين: «آجيو، كُل شي موجّد دابا.» وَلكن كاملين بداو كيعتَدرو واحد واحد. قال لو الُوّل: «عاد شريتْ واحد الفدّان ولا بدّ نمشي وْنشوفوْ. كنطلبك تسمح لي.» وْقال واحد يَخُر: «عاد شريتْ عشرة د التيران جوج جوج وانا ماشّي باش نجرّبوم. كنطلبك تسمح لي.» وْقال واحد يَخُر: «عاد تجوّجْتْ وْعلى هَد الشي ما نقدر شي نجي.» وْرجَع العبد وْخبر سيّدو بْهَد الشي. ديك الساعة غضب مول الدار وْقال نالعبد: «خرج دغيا نْساحات المدينة وْنالزنايق وْجيب نْهنايَ المساكن والمكْحوشين والعُرَج والعُميان.» وْقال العبد: «آ سيدي، أنا عملْتْ الّي آمرْتِ بِه وْباقي التيساع.» ردّ عليه السيّد: «خرج نالطرقان وْنالدروبة وْدخّلوم بزّز حتّى تعمّر الدار ديالي. حيت كنقول لكُم بلّي حتّى واحد من ديك المعْروطين ما غادي يدوق الوليمة ديالي.»" كانت جماعة كبيرة تابعة يَسوع، وْهُوَ دار نْعندوم وْقالّوم: "إدا جا نْعندي شي واحد وْما عزّْني شي كتَر من باباه ويمّاه وْمراتو وْولادو وْخوتو وْخواتاتو وْحتّى نفسو، ما يقدر شي يكون التلْميد ديالي. والّي ما كيرفد شي الصليب ديالو وْكَيْتبعْني، ما يقدر شي يكون التلْميد ديالي. نفرضو إدا شي واحد منكُم بغى يبني شي بُرْج، واش ما يݣلس شي في الُوّل ويحسب المصاريف باش يشوف إدا كان عندو الفلوس الكافيين باش يكمّلوْ؟ وإلّا، ملّي يكون عمل اللساس، إدا ما قدر شي يكمّلوْ، والناس كاملين الّي كيشوفوه غادي يبداو يضحكو عليه وْغادي يقولو: «هَد الرَّجل بدا كيبني وْما قدر شي يكمّل.» نفرضو واحد المَلِك قريب يمشي نالحرب ضدّ مَلِك يَخُر، واش ما يݣلس شي في الُوّل ويحسب إدا يقدر يواجه بْعشر آلاف هَداك الّي يجي ضدّو بْعشرين ألف؟ إدا ما قدر شي، غادي يصيفط واحد الوفد ملّي يكون يَخُر باقي بعيد باش يطلب لو شروط الصُّلح. وْبْنفس الطريقة، أَي واحد منكُم الّي ما كيتخلّى شي على المتاع ديالو كامل، ما يقدر شي يكون التلْميد ديالي. إدَن، الملاح مزيان، وَلكن إدا خسر الملوحية ديالو، كيفاش غَد تردّو لو المداق؟ ما كيصلح لا نالأرض ولا نالغبار، وَلكن غادي يتسيّب على برّا. الّي عندو الودْنين باش يسمع، لازم يسمع." كانو القبّاطة د الضرائب والمُدْنبـين كاملين كيقرّبو نْعند يَسوع باش يسمعوه. والفرّيسيّين والمُعلّمين د الشريعة كيتشكّاو: "هَد الرَّجل كيرحّب بالمُدْنبـين وْكياكل معهُم." وْيَسوع تكلّم معهُم بْهَد المتال: "نفرضو واحد منكُم عندو مية د الغنم وْتلف لو واحد الخروف مِنّاْ. واش ما غادي شي يخلّي التسعود وْتسعين في الخلا ويمشي من مورا الّي تلف حتّى يجبروْ؟ وْملّي كيجبروْ، كيرفدوْ فرحان على كتافو، وْكيرجع نالدار ديالو. ملّي كيوصل، كيجمع صحابو والجيران ديالو وْكيقولّوم: «فرحو معيَ حيت جبرْتْ الخروف الّي كان متلوف.» كنقول لكُم، هَيدا كتكون الفرْحة في السما على واحد المُدْنب الّي كيتوب كتَر من الّي كاين على التسعود وْتسعين متّاقي الّي ما كيحْتاجو شي نالتوبة. "نفرضو واحد المراة الّي عنداْ عشرة د الدراهم د النقْرة. إدا تلف لاْ واحد الدرهم، واش ما غادي شي تشعل الضَّو وْتشطّب الدار وْتفتّش مزيان حتّى تجبروْ؟ وْملّي كتجبروْ، كتجمع صحاباتاْ والجارات ديالاْ وْكتقولّوم: «فرحو معيَ، حيت جبرْتْ الدرهم الّي تلف لي.» كنقول لكُم، هَيداك كاينة الفرْحة عند ملائكة اللّٰه بواحد المُدْنب الّي كيتوب." قال يَسوع: "واحد الرَّجل كان عندو جوج د الولاد، قال الصغير فيهُم نْباباه: «آ بابا، عْطيني حقّي من الوَرت.» وْقسم كُل ما كيملك بيناتوم. من بعد شي أيّام قليلة، الولد الصغير جمَع كُل شي الّي عندو وْسافر نْبلاد بعيدة وْتمّاك خسَر المال ديالو بالعيشة الفاسدة. وْملّي خسَر كُل شي، وقعَتْ واحد المجاعة كبيرة في ديك البلاد وْرجَع محْتاج. مشى وْدبّر الخدمة مع واحد الرَّجل من ديك البلاد وْهُوَ صيفطوْ نالفدادن ديالو باش يوكّل الحلالف. وْكان فيه الجّوع وْكان كيتمنّى يعمّر الكرش ديالو بالخرّوب الّي كانو كياكلوه الحلالف، وْحتّى واحد ما عْطاه. وْفي الآخر رجَع نْعقلو وْقال مع نفسو: «شحال د الخدّامة عند بابا كتشيط عليهُم الماكلة وانا هنايَ كنموت بالجّوع. غادي ننوض وْنمشي نْعند بابا وْنقول لو: "آ بابا، دنبْتْ مع الّي في السما وْمعك، وْمن دابا نْفوق ما كنسْتاهل شي نتسمّى بنِك. عاملني فحال واحد من الخدّامة ديالك."» وْناض وْرجَع نْعند باباه. وْملّي كان باقي بعيد، شافوْ باباه وْحنّ عليه وْخرج نْعندو بالجّري وْدرّعوْ وْباسوْ. وْقال لو بنو: «آ بابا، أنا دنبْتْ مع الّي في السما وْمعك وْمن دابا نْفوق ما كنسْتاهل شي نتسمّى بنِك.» وَلكن قال الأب نالخدّامة ديالو: «جيبو دغيا أحْسن الحوايج وْلبّسوها لو، وْعملو لو الخاتم في صَبعو والصبّاط في رِجلو، وْجيبو العجل السمين وْدبحوه وْناكلو وْنفرحو، حيت بني هَدا كان ميّت وْرجَع نالحياة وْكان متْلوف وْجبرْناه.» وْبداو كيحْتَفلو. "وْكان ولدو الكبير في الفدّان، وْملّي كان ماجي وْقرّب نالدار، سمَع الصوت د الأغاني والشطيح. عَيّط نْواحد الخدّام وْسقصاه: «شنّو واقع؟» قال لو: «خاك رجَع وْباباك دبح العجل السمين، حيت وصَل سالم وْعلى خَير.» وْغضَب وْما بغى شي يدخل. خرج باباه وْرَغبوْ يدخل. قال نْباباه: «شوف شحال من سنين خدمْتْ معك وْعُمري ما عصيتْ الأمر ديالك، وانتينا عُمرك ما عْطيتِني حتّى جدي باش نحْتَفل مع صحابي. وَلكن ملّي رجَع بنِك هَدا، حتّى كلا الفلوس ديالك مع الفاسدات، دبحْتِ لو العجل السمين!» قال لو باباه: «آ بني، أنتينا معيَ دائمًا، وْكُل شي الّي عندي ديالك. وَلكن كان واجب علينا نفرحو وْننشطو، حيت خاك هَدا كان ميّت وْرجَع نالحياة وْكان متْلوف وْجبرْناه.»" قال يَسوع نالتلامد ديالو: "كان واحد الرَّجل لا باس عليه، كان عندو واحد الوكيل وْشكاو لو بِه بلّي كيبدّر لو المتاع ديالو. عَيّط لو وْقال لو: «شنّو هَد الشي الّي كنسمع عليك؟ عْطيني الحساب د الوكالة ديالك، حيت من دابا نْفوق ما تقدر شي تكون الوكيل ديالي.» قال الوكيل في نفسو: «شنّو غادي نعمل؟ حيت سيدي غادي يحيّد لي الوكالة. ما نقدر شي نحفر وْكنحشم نسعا. عرفْتْ شنّو غادي نعمل، باش، ملّي تتحيّد لي الوكالة، الناس غادي يرحّبو بيَّ في الديور ديالوم.» عَيّط على كُل واحد الّي كيسال نْسيّدو وْقال نالُوّل: «شحال كيتّسال لك سيّدي؟» وْقال: «مية عبار د الزيت.» والوكيل قال لو: «شبّر الفاتورة ديالك وْݣلس دغيا وْكْتب فيها خمسين.» وْقال نيَخُر: «وانتينا، شحال كيتّسال لك؟» وْقال: «مية عبار د الزرَع.» والوكيل قال لو: «شبّر الفاتورة ديالك وْكْتب فيها تمانين.» والسيّد شكر الوكيل الخاين، حيت عمل هَد الشي بالحيلة. حيت الناس د هَد الدنيا في المعاملة مع بعضيّاتوم عندوم حكمة كتَر من أُوْلاد الضَّو. على هَد الشي كنقول لكُم، رَبحو صحابكُم بالمال الباطل باش، ملّي يتقاضى لكُم هَد الشي، يرحّبو بِكُم في الديور الدايمة. الّي هُوَ أمين على القليل، هُوَ أمين حتّى على الكتير، والّي هُوَ خاين في القليل، هُوَ خاين حتّى في الكتير. حيت إدا ما كُنْتو شي صادقين على المال الباطل، شكون يأمّنكُم على التروة الحقيقيّة؟ وِادا ما كُنْتو شي صادقين على الّي ماشي ديالكُم، شكون يعطيكُم الّي هُوَ ديالكُم؟ حتّى شي خدّام ما يقدر يخدم جوج د الأسْياد، حيت إمّا غادي يكرَه واحد ويعزّ يَخُر، وَإمّا غادي يلصَق في واحد ويحڭر يَخُر. ما تقدرو شي تخدمو اللّٰه والمال بْجوج." كانو الفرّيسيّين كيسمعو هَد الشي كامل وْكيضحكو على يَسوع، حيت كانو كيبغيو الفلوس بزّاف. وْقالّوم: "أنتُمَ كتبغيو تبانو صالحين قدّام الناس، وَلكن اللّٰه كيعرف قلبكُم، حيت ديك الشي الّي كيعْتَبروه الناس معظّم، هُوَ مكروه في نظر اللّٰه. "الشريعة والأَنْبياء بقاو حتّى جا يوحَنّا، وْمن ديك الوقت كيبشّرو بْمُلك اللّٰه والناس كاملين كيجْتَهدو باش يدخلو فيه. وَلكن التزْويل د السما والأرض سهل من السقوط د نقطة واحدة من الشريعة. كُل واحد الّي كيطلّق المراة ديالو وْكَيْجوِج بواحدة يَخرى، كيزني. والّي كَيْجوِج بالمطلّقة، راه كيزني. "كان واحد الرَّجل لا باس عليه كيلبس الحوايج الصَبريّة وْدْ الكتّان وْكيعيش في الفخامة كُل نهار. وْكان واحد الرَّجل مسكين مسمّي لِعازَر الّي كان ممدود في الباب ديالو معمّر بالدمامل. وْكيتشهّى يعمّر كرشوْ من الفتاوت الّي كيطيحو من الطبلة د الرَّجل الغني، والجّرا كيجيو وْكيلحسو الدمامل. مات الرَّجل المسكين وادّاواه الملائكة باش يكون مع إبراهيم. وْمات الرَّجل الغني حتّى هُوَ وْدفنوه، وْهُوَ في الهاوية كيتعدّب، هزّ العينين ديالو وْشاف من بعيد إبراهيم وْلِعازَر معاه. علّى الصوت ديالو وْعَيّط: «آ بابا إبراهيم، رْحَمني وْصيفط لِعازَر باش يفزّݣ الطرف د صبعو بالما ويبرّد لساني، حيت أنا معدّب بزّاف في هَد النار.» وَلكن قال لو إبراهيم: «آ بني، تفكّر بلّي أنتينا في الحياة ديالك توصّلْتِ بْخيراتك، وْلِعازَر تعدّب، وَلكن دابا هُوَ كيتعزّى وانتينا كَتْـتعدّب. وْزيادة على هَد الشي، كاين مفتوح بينّا وْبينكُم واحد الخوا كبير حتّى إدا بغاو يݣوزو من هنايَ نْعندكُم، ما يقدرو شي، وْهَدوك الّي تمَّاك ما يقدرو شي يقطعو نْعندنا.» قال: «آ بابا، كنطلبك تصيفط لِعازَر نالدار د بابا باش ينبّه خمسة د الخوت الّي عندي باش ما يجيو شي حتّى هُمَ نْهَد الموطَع د العداب.» وَلكن إبراهيم قال لو: «عندوم موسى والأَنْبياء. خصّوم يسمعو لوم.» ردّ عليه الغني: «لا، آ بابا إبراهيم، وَلكن إدا مشى نْعندوم شي واحد من الميّتين، غادي يتوبو.» وْقال لو إبراهيم: «إدا ما كيسمعو شي نْموسى وْنالأَنْبياء، ما غادي شي يقْتَنعو واخّا يتّبعت شي واحد من الميّتين.»" من بعد قال يَسوع نالتلامد ديالو: "بلا شكّ غادي يجيو العترات، وَلكن الويل نِلّي كيجيو على يَدّو! حسَن لو كَكان تْتعلّق في عنقو واحد الحجْرة د الرحى ويتسيّب في البحَر، على أَنّو يعتّر واحد من هَد الستيتْوين. ردّو بالكُم! إدا دنب خاك، وَبّخوْ. وِادا تاب، سمَح لو. وِادا دنب في حقّك سبعة د المرّات في النهار، وْرجَع نْعندك سبعة د المرّات كيقول: «أنا ندمْتْ،» سمَح لو." قالو الرُّسُل نالرَّبّ: "زيد في الإيمان ديالنا." وْردّ عليهُم الرَّبّ: "كَكان عندكُم الإيمان قدّ واحد الحُبّة د الخرْدل، كَقُلْتو نْهَد الشجرة د التوت: «تقلّع وْتّغرس في البحَر،» وْطاعتْكُم. "شكون منكُم الّي عندو خدّام كيحرت الأرض أَوْلا كيسرح الغنم، ملّي كيرجع من الفدّان، كيقول لو: «ݣلس دغيا باش تاكُل.» بالعكس، غادي يقول لو: «وجّد لي باش نتعشّى وْتحزّم وْخدَمني حتّى ناكل وْنشرب، وْمن بعد تاكل وْتشرب أنتينا.» واش كيشكر السيّد ديك الخدّام، حيت عمل الّي آمروْ بِه؟ ما كنظنّ شي. هَيداك حتّى أنتُمَ، من بعدما عملْتو كُل شي الّي آمركُم بِه الله، قولو: «حنايَ عبيد الّي ما كنصلحو شي، حيت عملْنا غير ديك الشي الّي كان واجب علينا نعملوه.»" واحد النهار، ملّي كان يَسوع ماشّي نأُورُشَليم، ݣاز على السامِرة والجَليل. ملّي كان غادي يدخل نواحد القرية، تلاقاواه عشرة د الرجال مبْراصين وْوَقفو من بعيد، وْغوّتو: "آ يَسوع، آ المُعلّم، رْحَمنا!" وْملّي شافوم، قالّوم: "مْشيو نْعند المسؤولين وْورّيوهُم راسكُم." ملّي كانو ماشّين في الطريق، براو. واحد مِنّوم، ملّي شاف بلّي برا، رجَع وْهُوَ كيمجّد اللّٰه بْصوت عالي، وْطاح على وَجهو عند الرِّجلين د يَسوع كيشكروْ، واخّا كان هُوَ سامِري. سقصى يَسوع: "واش ماشي عشرة الّي براو؟ فاين هُمَ التسعود يَخرين؟ واش حتّى واحد ما رجَع باش يمجّد اللّٰه من غير هَد الأجْنبي؟" وْقال نالرَّجل: "نوض وْمْشي، الإيمان ديالك شافاك." الفرّيسيّين سقصاو يَسوع فوياخ غادي يجي مُلك اللّٰه، وْهُوَ ردّ عليهُم: "مُلك اللّٰه ما كيجي شي بْشي حاجة الّي غَد تشوفوها. وْما غادي شي يقولو: «ها هُوَ هنايَ، أَوْلا تمَّاك!» حيت مُلك اللّٰه فوسطكُم." قال نالتلامد ديالو: "غادي يجي الوقت الّي تتمنّاو فيه تشوفو واحد النهار من أيّام اِبن الإنسان وْما غادي شي تشوفوه. وْغادي يقولو لكُم: «شوفو هنايَ، أَوْلا شوفو تمَّاك.» ما تمشيو شي وْما تـتبعوهُم شي. حيت في النهار ديالو، اِبن الإنسان غادي يكون فحال البرق الّي كيضوّي من واحد الجّهة د السما حتّى نالجّهة يَخرى. وَلكن من قبل هَد الشي، واجب عليه يتعدّب بزّاف ويتّرفض من هَد الجيل. فحال ما وقَع في أيّام نوح، هَيدا غادي يكون عاود ملّي يجي اِبن الإنسان. كانو كياكلو وْكيشربو، وْكيجوّجو وْكيتجوّجو، حتّى النهار الّي دخل نوح نالفُلك، وْفي ديك الساعة جا الطوفان وْهلكوم كاملين. وْفحال هَد الشي وقَع في أيّام لوط. كانو كياكلو وْكيشربو، وْكيبيعو وْكيشريو، وْكيغرسو وْكيـبنيو. وَلكن النهار الّي خرج لوط من سَدوم، طاحت من السما العافية والكبريت وْقضاو عليهُم كاملين. هَيدا غادي يكون النهار الّي كيظهَر فيه اِبن الإنسان. في ديك النهار، هَداك الّي كان فوق السطَح، وْعندو الحوايج ديالو في الدار، ما يهبط شي باش يدّيهُم. والّي كان في الفدّان ما يرجع شي ناللَّور. تفكّرو المراة د لوط. كُل واحد الّي حاول يحافظ على نفسو غادي يخسراْ، والّي خسر نفسو غادي ينجّيها. كنقول لكُم بلّي في ديك الليلة غادي يكونو جوج في فراش واحد، وْغادي يتّرفد واحد ويبقا يَخُر. غادي يكونو جوج د النسا كيطحنو مع بعطوم، وْغادي تْتّرفد واحدة، وْتبقا يَخرى. [ غادي يكونو جوج في الفدّان، ويتّرفد واحد، ويبقا يَخُر.]" وْسقصاو التلامد: "فاين، يا رَبّ؟" وْردّ عليهُم: "فاين ما كتكون الجتّة، تمّاك كيتّجمعو النسورة." قال يسوع نالتلامد ديالو واحد المتال باش يورّي لوم بلّي واجب عليهُم يصلّيو دائمًا وْما يعياو شي: "كان في واحد المدينة واحد القاضي الّي ما كان شي كيخاف اللّٰه وْما كيوقّر حتّى واحد. وْكانت في نفس المدينة واحد الهجّالة، وْكانت كتجي نْعندو بْشكل مستَمر وْكتقول لو: «رجّع لي حقّي من الّي تعدّى عليَّ.» وْفي واحد المدّة، كان كيرفض الطلب ديالاْ، وَلكن من بعد قال في نفسو: «واخّا ما كنخاف شي اللّٰه وْما كنوقّر حتّى واحد، وَلكن من حيت هَد الهجّالة كتصدّعني، غادي نرجّع لاْ الحقّ ديالاْ باش ما تبقا شي كتجي دائمًا وْتقضي على الصبَر ديالي.»" وْقال الرَّبّ: "سمعو الّي قال القاضي الظالم. واش اللّٰه ما غادي شي يرجّع الحقّ نالمخْتورين ديالو الّي كيعيّطو لو نهار وْليل؟ واش غادي يتعطّل باش يجاوبوم؟ كنقول لكُم بلّي غادي يرجّع لوم الحقّ دغيا. وَلكن ملّي يجي ابن الإنسان، واش غادي يجبر إيمان على الأرض؟" قال هَد المتال نْشي ناس الّي كانو كيتيقو بْنَفسوم بلّي هُمَ متّاقيين وْكيحڭرو يَخرين: "جوج د الرجال طلعو نْبيت المَقْدس باش يصلّيو، واحد كان فرّيسي ويَخُر قبّاط الضرائب. الفرّيسي وقَف كيصلّي في نفسو هَيدا: «يا اللّٰه، كنشكرك حيت أنا ماشي فحال الناس يَخرين، سرّاق وْمُجْرمين وْزانيين، ولا فحال هَد الرَّجل قبّاط الضرائب. كنصوم جوج د المرّات في كُل سبع أيّام وْكنعشّر على الربح ديالي كامل.» أمّا قبّاط الضرائب وقَف من بعيد وْما زعَم شي حتّى باش يعلّي عينو نالسما، وَلكن ضرب على صدرو كيقول: «يا اللّٰه، رْحَمني، أنا مُدْنب!» كنقول لكُم، هَد الرَّجل، وْماشي الفرّيسي، هوّد نالدار ديالو بريء قدّام اللّٰه، حيت كُل واحد الّي كيعلّي راسو غادي يتّحنى، والّي كيحني راسو غادي يتعلّى." شي ناس جابو الصبْيان نيَسوع باش ينزّل يَدّو عليهُم. أمّا التلامد، ملّي شافو هَد الشي، نهطو فيهُم. أمّا يَسوع عَيّط عليهُم وْقال: "خلّيو العيال الستيتْوين يجيو نْعندي وْما تمنعوهُم شي، حيت مُلك اللّٰه هُوَ ديال هَدوك الّي فحالوم. كنقول لكُم الحقّ بلّي الّي ما كيقبل شي مُلك اللّٰه فحال واحد العايل ستيتو ڭاع ما غادي شي يدخل لو." سقصاه واحد الرئيس، كيقول: "آ المُعلّم الصالح، شنّو خصْني نعمل باش نورت الحياة الأبديّة؟" جاوبوْ يَسوع: "علاش كتعيّط لي الصالح؟ ما كاين حتّى واحد صالح من غير اللّٰه بوحدو. أنتينا كتعرف الوَصايا: ما تزني شي، ما تقتل شي، ما تسرق شي، ما تشهد شي بالزور، وَقّر باباك ويمّاك." قال الرَّجل: "هَد الشي كامل حافظْتْ عليه من صُغري." وْملّي سمَع يَسوع ديك الشي، زاد وْقال لو: "باقي كَتْنَقصِك واحد الحاجة: بيع كُل ما عندك وْفرّقوْ على المساكن وْغادي يكون لك الكنز في السما، وآجي وْتبَعني." ملّي الرَّجل سمَع هَد الشي، حزن بزّاف، حيت كان غني بزّاف. وْملّي شافوْ يَسوع حزنان، قال: "شحال صعيب يدخلو الأَغْنياء نْمُلك اللّٰه. حيت واحد الجمل ساهل عليه يݣوز من العين د اليِبْرة من واحد الغني يدخل نْمُلك اللّٰه." وْقالو الّي سمعو: "إيوا، شكون يقدر ينجا؟" وْجاوب يَسوع: "كُل شي الّي مستحيل عند الناس، اللّٰه قادر عليه." ديك الساعة قال بُطْرُس: "شوف، حنايَ سمحْنا في الّي كان عندنا وْتبَعْناك." وْقالّوم يَسوع: "كنقول لكُم الحقّ، ما كاين حتّى شي واحد الّي كيسمَح في الدار ديالو أَولا في مراتو أَولا في الخوت أَولا في الوالِدين أَولا في الولاد بْسباب مُلك اللّٰه، إلّا وْغادي يقبط كتَر بزّاف في هَد الدنيا، وْفي الدنيا الماجّة الحياة الأبديّة." ادّى يَسوع الطناش بوحدوم وْقالّوم: "دابا حنايَ طالعين نأُورُشَليم، فاين غادي يتحقّق كُل شي الّي كتبو الأَنْبياء على اِبن الإنسان، حيت غادي يدفعوه نالوَتَنيّين ويـبهْدلو بِه ويزبّلو فيه ويـبزقو عليه. وْغادي يجلدوه ويقتلوه، وْفي النهار التالت غادي يتّبعت حيّ." وَلكن التلامد ما فهمو والو من هَد الشي. كان هَد الكلام مخفي عليهُم وْما عَرفو شي المعنى ديالو. ملّي قرّب يَسوع نأَريحا، كان واحد الرَّجل عمى ݣالس في جنب الطريق كيسعا. وْملّي سمَع الناس ݣايزين، سقصى: "شنّو هُوَ هَد الشي؟" وْخبروه بلّي يَسوع الناصِري ݣايز. ديك الساعة غوّت العمى: "يا يَسوع، بن داود، رْحَمني!" والناس الّي كانو في القدّام نهطو فيه باش يسكت. أمّا هُوَ زاد كيغوّت كتَر وْكتَر: "آ بن داود، رْحَمني!" وقَف يَسوع وآمروم يجيبوه لو. وْملّي قرّب العمى، سقصاه: "شنّو بغيتِ نعمل لك؟" وْقال: "يا رَبّي، بغيتْ نشوف." قال لو يَسوع: "رْجَع كتشوف. الإيمان ديالك شافاك." وْفي هزيزة رجَع كيشوف وْتبَع يَسوع وْهُوَ كيمجّد اللّٰه. والناس كاملين الّي شافو هَد الشي سبّحو اللّٰه. دخل يَسوع وْݣاز في أَريحا. وْكان تمّاك واحد الرَّجل مسمّي زَكّا، وْهُوَ رئيس القبّاطة د الضرائب وْهُوَ غني بزّاف، وْبغى يشوف يَسوع وْما قدر شي بْسباب الزحام، حيت كان قصير في الطول. وْعلى هَد الشي زاد نالقدّام كيجري وْطلَع في واحد الشجرة د التوت باش يشوفوْ، حيت يَسوع كان غادي يݣوز من تمّاك. ملّي وصَل يَسوع نْديك الموطَع، شاف نالفوق وْقال لو: "آ زَكّا، هوّد دغيا، حيت لازم نبقا اليوما في الدار ديالك." ديك الساعة هوّد بالزرْبة واسْتَقبلوْ في الدار ديالو فرحان. ملّي الناس شافو هَد الشي، بداو كيتشكّاو كاملين، كيقولو: "دخل يبات عند واحد الرَّجل مُدْنب." وقَف زَكّا وْقال نالرَّبّ: "شوف، يا رَبّي، ها انا غادي نعطي نالمساكن النُّص د الأمْلاك ديالي، وِادا ظلمْتْ شي واحد، غادي نردّ لو أربعة د المرّات كتَر." قال لو يَسوع: "اليوما جا النجا نْهَد الدار، حيت حتّى هُوَ ابن إبراهيم. حيت اِبن الإنسان جا باش يفتّش على الّي متْلوف وينجّيه." ملّي الناس كانو كيسمعو هَد الشي، قالّوم يَسوع واحد المتال، حيت كان قريب من أُورُشَليم، وْكانو كيظنّو بلّي مُلك اللّٰه غادي يظهَر دغيا. قال: "واحد الرَّجل محْتَرم مشى نواحد البلاد بعيدة باش يسلّمو لو واحد الممْلكة ويرجَع. وْعَيّط على عشرة د الخدّامة ديالو وْعْطى نْكُل واحد مِنّوم مبلغ كبير د الفلوس وْقالّوم: «بيعو وْشريو بِهُم حتّى نجي.» كان أهل المدينة ديالو كيكرهوه، وْصيفطو من موراه وَفد باش يقولو: «ما بغينا شي هَد الرَّجل يكون مَلِك علينا.» ملّي رجَع نالبلاد ديالو من بعدما رجَع مَلِك، آمر باش يعيّطو على ديك الخدّامة الّي عْطاهُم الفلوس باش يعرف شحال ربحو بالتجارة. جا الُوّل وْقال لو: «آ سيدي، ربحو الفلوس ديالك عشرة د المرّات كتَر.» قال لو: «ما عندي ما نسال لِك، آ الخدّام المزيان. حيت كُنْتِ أمين على القليل، غادي تكون والي على عشرة د المُدُن.» جا التاني وْقال: «آ سيدي، ربحو الفلوس ديالك خمسة د المرّات كتَر.» وْقال لو: «أنا غادي نعملك والي على خمسة د المُدُن.» جا واحد الخدّام يَخُر وْقال: «آ سيدي، ها هُمَ الفلوس ديالك. خبّعْتوم في واحد السبنية، حيت خفْتْ منّك. أنتينا واحد الرَّجل واعر، كترفد الّي ما نزّلْتِه شي وْكتحصد الّي ما زرعْتِه شي.» ديك الساعة قال لو المَلِك: «آ الخدّام القبيح، بالكلام ديالك غادي نحكم عليك. أنتينا عارف بلّي أنا رَجل واعر، كنرفد الّي ما نزّلْتوْ شي وْكنحصد الّي ما زرعْتوْ شي. علاش ما دخّلْتِ شي المال ديالي في البَنك، باش ملّي نرجَع، نشبّروْ بالطالع؟» وْقال نالحاضرين: «حيّدو لو الفلوس وْعْطيوهُم نِلّي عندو عشرة د المرّات كتَر.» قالو لو: «آ سيدي، هُوَ عندو عشرة د المرّات كتَر!» وْردّ عليهُم: «كنقول لكُم بلّي كُل واحد الّي عندو غادي يتّعطى لو كتَر، أمّا الّي ما عندو شي، غادي يتحيّد لو حتّى الّي عندو. أمّا ديك العدْيان ديالي الّي ما بغاوني شي نكون مَلِك عليهُم، جيبوهُم نْهنايَ وْقتلوهُم قدّامي.»" من بعدما قال هَد الشي، زاد نالقدّام طالع نأُورُشَليم. وْملّي قرّب نْبيت فاجي وْبيت عَنْيا عند الجّبل الّي مسمّي جبل الزيتون، صيفط جوج من التلامد، وْقالّوم: "مْشيو نالقرية الّي قدّامكُم وْملّي تدخلو لاْ، غَد تجبرو واحد الدحش مربوط الّي عُمرو ما ركب عليه حتّى واحد. طلقوه وْجيبوه نْهنايَ. وِادا سقصاكُم شي واحد علاش طلقْتوه، قولو لو هَيدا: «الرَّبّ محْتاج لِلو.»" مشاو وْجبروه فحال ما قالّوم يَسوع. وْملّي كانو كيطلقو الدحش، سقصاوهُم مواليه: "علاش كتطلقو الدحش؟" ردّو عليهُم: "الرَّبّ محْتاج لِلو." وْجابو الدحش نيَسوع، وْنزّلو الحوايج ديالوم على الدحش وْركّبو يَسوع عليه. وْملّي كان ماشّي، فرّشو الناس الحوايج ديالوم في الطريق. ملّي قرّب يَسوع نالحدورة د جبل الزيتون، بدا الجمهور د التلامد كاملين كيسبّحو اللّٰه بْصوت عالي فرحانين على كُل المُعْجزات الّي شافوها، قالو: "مبروك المَلِك الّي ماجي بِاسم الرَّبّ! السلام في السما والمجد في العلو!" أمّا البعض من الفرّيسيّين الّي كانو فوسط الناس قالو لو: "آ المُعلّم، وَبّخ التلامد ديالك." جاوب يَسوع: "كنقول لكُم، إدا هَدو سكتو، غادي يغوّتو الحجار!" ملّي قرّب نأُورُشَليم، يَسوع شاف المدينة وْبكى عليها، وْقال: "يا ريت كُنْتِ عرفْتِ اليوما مَصْدر السلام! وَلكن دابا هَد الشي محْجوب على عينك. حيت غادي يجيو الأيّام فاش العدْيان ديالك غادي يضوّرو عليك الأسْوار وْغادي يطوّقوك ويضيّقو عليك من كُل جهة، وْغادي يهدّموك أنتينا وْولادك الّي داخل السور ديالك. وْما غادي يخلّيو شي فيك حجْرة على حجْرة، حيت ما عرفْتِ شي الوقت فاش جا اللّٰه باش يزورك." وْدخل يَسوع نْبيت المَقْدس، وْبدا كيجرّي على الّي كانو كَيْـبـيعو فيه، وْقالّوم: "مكتوب: «الدار ديالي خصّاْ تكون بيت الصلاة،» وَلكن أنتُمَ ردّيتوها «واحد المغارة د السرّاق!»" وْكان كُل نهار كيعلّم الناس في بيت المَقْدس. وْكانو رُؤَساء المسؤولين والمُعلّمين د الشريعة والرؤساء د الشعب كيفتّشو باش يقتلوه. وْما جبرو شي كيفاش يعملو هَد الشي، حيت الشعب كامل كان كيتصنّت لو بِاهتمام. واحد النهار ملّي يَسوع كان كيعلّم الشعب في بيت المَقْدس وْكيبشّر بالإنجيل، حضرو رُؤَساء المسؤولين والمُعلّمين د الشريعة مع الشيوخ وْقالو لو: "قول نّا بْشْمِن سُلطة كتعمل هَد الشي؟ وْشكون الّي عْطاك هَد السلْطة؟" ردّ عليهُم يَسوع: "حتّى أنا غادي نطرح عليكُم واحد السؤال. قولو لي، واش كانت المعموديّة د يوحَنّا من السما أَوْلا من البشر؟" تشاورو مع بعطوم، كيقولو: "إدا قُلْنا من السما، هُوَ غادي يقول نّا: «وْعلاش ما تيّقْتوه شي؟» وِادا قُلْنا من البشر، الشعب كامل غادي يرجمنا، حيت هُمَ كيتيقو بلّي يوحَنّا نَبي." وْعلى هَد الشي جاوبوه بلّي ما عرفو شي ماين هي. ديك الساعة قالّوم يَسوع: "حتّى أنا ما غادي شي نقول لكُم بْشْمِن سُلْطة كنعمل هَد الشي." بدا كيقول نالناس هَد المتال: "واحد الرَّجل غرس واحد الجّنان د العنب وْكراه نْشي ربّاعة، وْسافر مدّة طويلة. وْفي الوقت د الجني، صيفط واحد العبد نالربّاعة باش يعطيواه الحقّ ديالو من الغلّة. وَلكن الربّاعة ضربوه وْصيفطوه باليَدّين خاويين. عاود صيفط واحد العبد يَخُر، وْضربوه حتّى هُوَ وْبهْدلو بِه وْصيفطوه باليَدّين خاويين. عاود صيفط واحد العبد تالت، وْجرحوه وْسيّبوه على برّا. ديك الساعة فكّر مول الجّنان: «شنّو غادي نعمل؟ غادي نصيفط اِبني العزيز، يمكن ملّي يشوفوه غادي يوقّروه.» وَلكن ملّي شافوه الربّاعة، تشاورو بيناتوم وْقالو: «هَدا هُوَ الوارت. آجيو نقتلوه باش يرجَع الورت ديالنا.» وْخرّجوه على برّا من الجّنان وْقتلوه. إدَن، شنّو غادي يعمل لوم مول الجّنان؟ غادي يجي ويقتل ديك الربّاعة ويعطي الجّنان نيَخرين." وْملّي سمعو هَد الشي، قالو الناس: "اللّٰه يحفظ!" شاف فيهُم يَسوع وْقال: "شنّو هُوَ المعنى د هَد الشي الّي مكتوب: «الحجْرة الّي رفضوها البنّاية، هي رجعَتْ راس القنت.» كُل واحد الّي كيطيح على هَد الحجْرة غادي يتهرّس، والّي هَد الحجْرة كتطيح عليه غادي تسَحقوْ." رُؤَساء المسؤولين والمُعلّمين د الشريعة، ملّي فطنو بلّي قال هَد المتال عليهُم، في ديك اللحظة بداو كيفتّشو على الطريقة باش يقبطوه، وَلكن خافو من الشعب. وْبداو كيراقبوه، وْصيفطو لو جواسيس الّي كيعملو راسوم فحال شي ناس متّاقيين، باش يحصلوه في الكلام ديالو وْيسلّموه نيَد الحاكم والسلْطة ديالو. والجواسيس سقصاواه: "آ المُعلّم، كنعرفو بلّي أنتينا كَتْـتكلّم وْكتعلّم بالصدق، وْما كتعمل شي الوجهيّات، وَلكن كتعلّم طريق اللّٰه د بالصّحّ. واش حلال علينا نخلّصو الضرائب نالقَيصَر أَوْلا لا؟" أمّا يَسوع فطن بالخديعة ديالوم وْقالّوم: "علاش كتجرّبوني؟ ورّيوني واحد الدينار. دمّن هَد التصْويرة والكتابة الّي على الدينار؟" وْقالو: "ديال قَيصَر." ديك الساعة قالّوم: "عْطيو الّي هُوَ د القَيصَر نالقَيصَر والّي هُوَ د اللّٰه ناللّٰه." وْما قدرو شي يحصّلوه في حتّى كلمة الّي قال قدّام الناس، وْتعجّبو من الجواب ديالو وْسكتو. من بعد جاو نْعند يَسوع شي بعض من الصَّدّوقيّين، وْهُمَ الّي كينكرو القيامة د الميّتين، وْسقصاواه: "آ المُعلّم، موسى كتب نّا: «إدا مات نْشي واحد خاه وْخلّى المراة بلا أُوْلاد، لازم على خاه يتجوّج بالمراة ديالو ويعمل الدرّيّة نْخاه.» إيوا، كانو سبعة د الخوت، تجوّج الُوّل وْمات وْما خلّى شي الولاد. وادّاوها التاني والتالت، وْهَيدا حتّى السابع، وْماتو وْما خلّاو شي الدرّيّة. في الآخر ماتت المراة حتّى هي. إدَن، في القيامة دمّن غادي تكون المراة؟ حيت كانت المراة ديالوم بْسبعة بِهُم." وْردّ عليهُم يَسوع: "الناس د هَد الدنيا كيجوّجو وْكيتجوّجو. وَلكن الّي كيسْتاهلو الحياة الّي ماجّة والقيامة من بين الميّتين، هَدو ما غادي شي يجوّجو وْما غادي شي يتجوّجو. وْهُمَ ما عُمروم يقدرو يموتو، حيت غادي يكونو فحال الملائكة. هُمَ أُوْلاد اللّٰه، حيت راهُم أُولاد القيامة. أمّا بالنسبة نالقيامة، حتّى موسى بْنفسو وَضّح نّا بلّي الميّتين كيتّبعتو، في المَقطَع على العلّيقة، ملّي سمّى الرَّبّ «إلَه إبراهيم وإلَه إسْحاق وإلَه يَعْقوب.» إدَن، اللّٰه ماشي الإلَه د الميّتين، وَلكن الإلَه د الحيّين، حيت هُمَ كاملين حيّين عندو." جاوبو بعض من المُعلّمين د الشريعة وْقالو: "آ المُعلّم، هَد الكلام الّي قُلْتِ صحيح." وْما زعمو شي عاود يسقصيواه شي حاجة يَخرى. ديك الساعة قالّوم: "كيفاش كيقولو بلّي المسيح هُوَ بن داود؟ حيت داود بْنفسو كيقول في كتاب المزامير: «قال الرَّبّ نْرَبّي: "ݣلس على الّيمين ديالي حتّى نردّ عدْيانك تحت رِجلك."» إدا داود بْنفسو كيعيّط لو «رَبّ،» كيفاش يقدر يكون بنو؟" وْقال نالتلامد ديالو والشعب كامل كيسمع: "ردّو بالكُم من المُعلّمين د الشريعة، الّي كيبغيو يتساراو بالجلالب الطوالين وْكيبغيو التحيّات في الأسواق ويݣلسو في الصفّ الُوّل في بيوت العبادة وْمواطع الشرف في الحفلات. هَدو كياكلو رزق الهجّالات، وْباش يتظاهرو، كيطوّلو الصلاوات. هَدو راهُم غادي يتعاقبو كتَر من يَخرين." يَسوع لاحظ وْشاف كيفاش الناس الّي لا باس عليهُم كينزّلو الصدقات ديالوم في الصندوق د بيت المَقْدس. وْشاف واحد الهجّالة مسكينة بزّاف، نزّلَتْ فيه جوج د الدراهم. وْقال: "كنقول لكُم الحقّ بلّي هَد الهجّالة نزّلَتْ كتَر منّوم كاملين. حيت هَدوك كاملين عْطاو الصدقات من الّي شاط عليهُم. أمّا هي من الفقر ديالاْ نزّلَتْ المعيشة ديالاْ كاملة." والبعض مِنّوم كانو كيهدرو على بيت المَقْدس، كيفاش مزوّق بالحجار المزيونين والعطايا ناللّٰه. وْقال يَسوع: "بالنسبة نْهَد الشي الّي كتشوفوه دابا، غادي يجي الوقت الّي ما غادي شي تبقا فيه حجْرة على حجْرة. كُل شي غادي يتهدّم." وْسقصاواه: "آ المُعلّم، فوياخ غادي يوقع هَد الشي وْشنّي هي العلامة بلّي هَد الشي قريب يوقع؟" قال يَسوع: "ردّو بالكُم باش ما يتلّفكُم حتّى شي واحد. حيت غادي يجيو بزّاف بِاسمي ويقولو: «أنا هُوَ المسيح والوقت قريب.» ما تـتبعوهُم شي. وْملّي تسمعو على الحروب والفِتنات، ما تدهشو شي، حيت لازم يوقع هَد الشي في الُوّل. وَلكن النهاية ما غادي شي تكون في الحين." زاد وْقالّوم: "غادي تنوض أمّة على أمّة، وْممْلكة على ممْلكة. وْغادي يكونو الزنازل القويّين في مواطع مخْتَلفة، وْغادي يكون الجّوع والوَباء، وْغادي يكون الرعب وْشي علامات كبيرة في السما. أمّا قبل من هَد الشي كامل، غادي يقبطوكُم ويمرْمدوكُم ويسلّموكُم نْبيوت العبادة وْنالحباسات، ويدّيوكُم قدّام الملوك والحُكّام بْسباب اِسمي، وْغادي تكون هَدي فُرْصة لِلكُم باش تعطيو الشهادة قدّاموم. نْويو في قلبكُم باش ما تخمّمو شي من قبل في الّي غَد تجاوبو في الدفاع ديالكُم. حيت أنا غادي نعطيكُم الكلمات والحكْمة الّي ما يقدر حتّى واحد من العدْيان ديالكُم يعارضاْ أَوْلا ينكراْ. وْغادي يخونوكُم الوالِدين والخوت والقراب والصحاب ديالكُم، وْغادي يقتلو البعض منكُم، وْتكونو مكروهين عند الناس كاملين بْسباب اِسمي. وَلكن حتّى شعرة من الراس ديالكُم ما غادي شي تضيع. وِادا بقيتو تابتين، غَد تنجّيو حياتكُم. "وْملّي تشوفو أُورُشَليم محاصرة بالجيوش، عرفو بلّي قرّب الخراب ديالاْ. في ديك الوقت الناس الّي في اليَهوديّة لازم يهربو نالجّبولة، والّي هُمَ في المدينة، يخرجو مِنّاْ، والّي هُمَ في الفدّان، ما يدخلو شي لِلاْ. حيت هَدا غادي يكون الوقت د الانتِـقام الّي غادي يتكمّل فيه كُل ما هُوَ مكتوب. الويل نالحُبلات والّي كيرطّعو في ديك الأيّام، حيت غادي يكون واحد الضيق شديد في الأرض والسخط على هَد الشعب. وْغادي يطيحو بْضرب السيف، وْغادي يدّيوهُم أَسرى عند الأُمَم كاملين، وْتكون أُورُشَليم تحت الرِّجلين د الوَتَنيّين حتّى تتكمّل الأوقات ديالوم. "في ديك الساعة غادي يكونو علامات في الشمس والقمر والنجوم، وْفي الأرض الأُمَم غادي يكونو مضيّقين وْحَيرانين من صوت البحَر والمواج الهايجة. والناس غادي يسخفو من الخوف وْمن الّي غادي يوقع في الأرض، حيت القوّات د السما غادي يتزعْزعو. وْفي ديك الوقت غادي يشوفو اِبن الإنسان ماجي في السحاب بْقوّة وْبْمجد عظيم. وْملّي يبدا يوقع هَد الشي، تشجّعو وْرفعو راسكُم حيت الفدية ديالكُم قريبة." يَسوع قالّوم واحد المتال: "شوفو الكرْموسة والشجار يَخرين. ملّي كيطلعو الوراق ديالوم، كتشوفو وْكتعرفو بْراسكُم بلّي الصيف قريب. بْنفس الشكل، ملّي تشوفو هَد الشي كامل كيوقَع، عرفو بلّي مُلك اللّٰه قريب. كنقول لكُم الحقّ، ما غادي شي يݣوز هَد الجيل حتّى يوقع هَد الشي كامل. السما والأرض غادي يتحيّدو، وَلكن الكلام ديالي ما عُمرو غادي يتحيّد. ردّو بالكُم ما يتشغّل شي القلب ديالكُم بالملدّات والسكرة وْهُموم الدنيا، ويجيكُم ديك النهار على غفلة. حيت غادي يجي فحال واحد المصيدة على سكّان الأرض كاملين. على هَد الشي بقاو فايقين وْصلّيو في كُل وقت باش تقدرو تهربو من كُل هَد الأُمور الّي غادي توقع، وْتوَقفو قدّام اِبن الإنسان." وْكان يَسوع كيعلّم في النهار في بيت المَقْدس، وْفي الليل كان كيخرج وْكيبات في الجّبل الّي مسمّي جبل الزيتون. وْكانو الناس كاملين كيمشيو نْعندو في الصباح بكري نْبيت المَقْدس باش يسمعوه. وْقرّب عيد الفطير، الّي مسمّي الفِصح. وْكانو رُؤَساء المسؤولين والمُعلّمين د الشريعة كيفتّشو على شي طريقة باش يقتلو يَسوع، حيت كانو كيخافو من الشعب. وْدخل الشيطان في يَهودا، الّي مسمّي الإسْخَريوطي، وْهُوَ واحد من الطناش. وْمشى وْهدَر مع رُؤَساء المسؤولين والقُيّاد د بيت المَقْدس كيفاش يسلّم لوم يَسوع. هُمَ فرحو واتَّفقو باش يعطيواه شي فلوس. وْهُوَ اتَّفق وْبدا كيفتّش على الفُرْصة المناسبة باش يسلّموْ لِلوم ملّي ما يكونو شي الناس. وصَل النهار د عيد الفطير الّي كان واجب عليهُم يدبحو فيه خروف الفِصح. وْيَسوع صيفط بُطْرُس وْيوحَنّا وْقالّوم: "مْشيو وْوجّدو نّا العشا د الفِصح باش ناكلوه." سقصاواه: "فاين بغيتِنا نوجّدوه لك؟" قالّوم: "ملّي تدخلو نالمدينة، غادي يتلاقاكُم واحد الرَّجل رافد واحد البرّادة د الما. تبعوه نالدار الّي يدخل لِلاْ، وْقولو نْمول الدار: «قال لك المُعلّم: "فاين هُوَ البيت الّي غادي ناكل فيه العشا د الفِصح مع التلامد ديالي؟"» هَداك غادي يورّيكُم في الفوقي واحد البيت كبير وْمفرّش. تمّاك وجّدو العشا." مشاو وْجبرو كُل شي فحال ما قالّوم يَسوع، وْوجّدو الفِصح. ملّي جات الساعة، يَسوع والرُّسُل ديالو ݣلسو ياكلو. وْقالّوم: "تشهّيتْ بزّاف ناكل معكُم هَد العشا د الفِصح قبل ما نتعدّب. حيت كنقول لكُم، ما نعاود شي ناكلوْ مرّة يَخرى حتّى يتكمّل في مُلك اللّٰه." وْرفد الكاس وْشكر وْقال: "شبّرو هَدا وْشاركوه بيناتكُم. حيت كنقول لكُم، ما غادي شي نشرب من الغلّة د الدالية من دابا نْفوق حتّى يجي مُلك اللّٰه." وْشبّر يَسوع الخُبز وْشكر اللّٰه وْقطّع وْعْطاهُم وْقال: "هَدا هُوَ الجسد ديالي الّي اتّعطى على مسبّتكُم. عملو هَد الشي باش تْتفكّروني." وْهَيداك عاود، شبّر الكاس من بعد العشا وْقال: "هَد الكاس هُوَ العهد الجديد بالدم ديالي الّي غادي يسيل بْسبابكُم. وَلكن اليَد د هَداك الّي غادي يسلّمني، ها هي معيَ على الطيفور. في الحقيقة اِبن الإنسان غادي يمشي كيفْما هُوَ مكتوب عليه، وَلكن الويل نْديك الرَّجل الّي كيخونوْ." بداو كيسقصيو بيناتوم شكون مِنّوم الّي غادي يعمل هَد الشي. وْكانت بيناتوم واحد المدابزة على شكون غادي يكون الكبير فيهُم. أمّا يَسوع قالّوم: "الملوك د الأُمَم كيسيطرو عليهُم، وْصحاب السلْطة كيسمّيو نَفسوم مُحْسِنين. أمّا أنتُمَ ما تكونو شي فحالوم. وَلكن الكبير فيكُم لازم يكون فحال الصغير، والرئيس يكون فحال الخدّام. حيت شكون هُوَ الكبير، الّي ݣالس على الطَيفور أَوْلا الّي كيخدم؟ واش ماشي الّي ݣالس على الطَيفور؟ وَلكن أنا معكُم فحال شي واحد الّي كيخدم. أنتُمَ هُمَ الّي بقيتو معيَ دائمًا في المحاين ديالي، وْعلى هَد الشي أنا كنعطيكُم واحد الممْلكة، فحال ما عْطاها لي بابا، باش تاكلو وْتشربو على الطبلة ديالي في المُلك ديالي، وْتݣلسو على العروش باش تحكمو على الطناشر قبيلة د إسْرائيل." وْقال الرَّبّ: "سِمْعان، سِمْعان، ها هُوَ الشيطان طلب باش يغَرْبلكُم فحال الزرَع! وَلكن أنا طلبْتْ من جهتك باش الإيمان ديالك ما يفشل شي. وانتينا ملّي ترجَع نْعندي، تبّت خوتك." ردّ عليه بُطْرُس: "يا رَبّي، أنا مستعدّ نمشي معك ماشي غير نالحبس، وَلكن حتّى نالموت!" قال يَسوع: "كنقول لك، آ بُطْرُس، من قبل ما يصيّح الفرّوج، اليوما غادي تنكر تلاتة د المرّات بلّي كتعرفني." وْقالّوم يَسوع: "ملّي صيفطْتْكُم بلا بزْطام وْبلا كيس وْبلا صبّاط، واش نقصَتْكُم شي حاجة؟" قالو: "والو." وْقالّوم: "وَلكن دابا الّي عندو شي بزْطام يدّيه معاه، وْحتّى الكيس. والّي ما عندو شي السيف يبيع الحوايج ديالو ويشري واحد. حيت كنقول لكُم بلّي هَد الشي الّي مكتوب عليَّ لازم يتكمّل فيَّ: «وتّحسب مع المُجْرمين،» حيت الّي مكتوب عليَّ غادي يتكمّل." قالو: "يا رَبّ، راه هنايَ جوج د السيوف." وْقالّوم: "بركة." يَسوع خرج من المدينة وْمشى نْجبل الزيتون، فحال العادة، وْتبعوه التلامد ديالو. ملّي وصَل نالموطَع، قالّوم: "صلّيو باش ما تدخلو شي في المِحنة." وْبعّد عليهُم مسافة رمية د الحجْرة وْطاح على الركابي ديالو وْبدا كيدعي: "آ بابا، إدا بغيتِ، بعّد عليَّ هَد الكاس، وَلكن تكون الإرادة ديالك، ماشي الإرادة ديالي." وْظهَر لو واحد الملاك من السما كيقوّيه، وْحيت كان مضيّق بزّاف، جهد نفسو في الدعاء، وْكان العرق ديالو فحال النقاطي د الدم كيطيحو في الرحبة. ملّي ناض من الصلاة وْجا نْعند التلامد ديالو، جبروم ناعسين بْسباب الحزن. وْقالّوم: "علاش أنتُمَ ناعسين؟ نوضو وْصلّيو باش ما تدخلو شي في المِحنة." ملّي كان باقي كيهدَر، ظهرَتْ واحد العصابة وْهَداك الّي مسمّي يَهودا، واحد من التلامد الطناش، كان قدّاموم، وْقرّب نْعند يَسوع باش يبوسوْ. وْقال لو يَسوع: "آ يَهودا، واش بواحد البوسة كتسلّم اِبن الإنسان؟" ملّي شافو التلامد ديالو الّي كانو دايرين بِه شنّو غادي يوقع، قالو: "يا رَبّ، واش نضربو بالسيف؟" وْواحد مِنّوم ضرب العبد د رئيس المسؤولين وْقطّع لو الودْنينة ديالو د الّيمين. ردّ عليهُم يَسوع وْقال: "صافي، بركة من هَد الشي!" وْحادى الودنينة ديالو وْشافاه. ديك الساعة قال يَسوع نْرُؤَساء المسؤولين وْنالقُيّاد د بيت المَقْدس وْنالشيوخ الّي جاو باش يشبّروه: "واش جيتو بالسيوف والدبابز باش تقبطوني فحال شي سارق؟ كُل نهار كُنْتْ بيناتكُم في بيت المَقْدس، وْما زعمْتو شي تمدّو اليَدّين ديالكُم عليَّ. وَلكن هَدي هي الساعة ديالكُم والسلْطة د الظلام." وْقبطو يَسوع وادّاواه نالدار د رئيس المسؤولين، وْبُطْرُس تبعوْ من بعيد. وْملّي شعلو العافية فوسط الدار وْݣلسو دايرين بِها، ݣلس بُطْرُس فوسطوم. وَلكن واحد الخدّامة شافتوْ ݣالس حدا العافية وْشافتْ فيه وْقالت: "هَدا كان معاه." وْنكر بُطْرُس وْقال: "آ المراة، ما كنعرفوْ شي." وْمن بعد شويا، شافوْ واحد يَخُر وْقال: "حتّى أنتينا واحد مِنّوم." وْقال بُطْرُس: "لا، آ الرَّجل، ماشي أنا!" ملّي ݣازت ساعة تقْريبًا، واحد يَخُر مِنّوم أكّد لوم وْقال: "د بالصّحّ هَدا كان معاه، حيت حتّى هُوَ جَليلي." وْقال بُطْرُس: "آ الرَّجل، ما كنعرف شي شنّو كتقول!" وْفي هزيزة وْهُوَ باقي كيهدَر، صيّح الفرّوج. ديك الساعة دار الرَّبّ وْشاف في بُطْرُس، وْتفكّر بُطْرُس كلام الرَّبّ الّي قال لو: "من قبل ما يصيّح الفرّوج، اليوما غادي تنكرني تلاتة د المرّات." وْخرج بُطْرُس على برّا وْبكى بْمرارة. والناس الّي كانو كيحرسو يَسوع كانو كيبهْدلو بِه وْكيضربوه. وْغطّاو وَجهو وْكانو كيسقصيواه: "تنبّأ! شكون هُوَ الّي ضَربك؟" وْزادو على هَد الشي الكلام بزّاف وْزبّلو فيه. ملّي طلَع النهار، اتّجمعو شيوخ الشعب وْرُؤَساء المسؤولين والمُعلّمين د الشريعة وادّاو يَسوع نالمَجْلس ديالوم. وْقالو: "إدا كُنْتِ أنتينا المسيح، قولاْ نّا." وْردّ عليهُم يَسوع: "إدا قُلْتْ لكُم، ما غادي شي تتيّقوني، وِادا سقصيتْكُم، ما غادي شي تجاوبوني وْما غادي شي تطلقوني. من دابا نْفوق اِبن الإنسان غادي يكون ݣالس على الّيمين د اللّٰه القدير." قالو كاملين: "إدَن، واش أنتينا اِبن اللّٰه؟" وْقالّوم: "أنتُمَ كتقولو الّي كاين." ديك الساعة قالو: "واش حنايَ باقين محْتاجين نْشي شهادة يَخرى؟ حيت حنايَ بْيَدْنا سمعْنا كلامو من دُقمو!" ناضت المجموعة كاملة وادّات يَسوع نْعند بيلاطُس، وْبداو كيشكيو بِه وْقالو: "جبرْنا هَد الرَّجل كيفسّد الأمّة ديالنا وْكيمنع الضرائب نالقَيصَر وْكيقول بلّي هُوَ المسيح، واحد المَلِك." سقصاه بيلاطُس وْقال: "واش أنتينا هُوَ مَلِك اليهود؟" وْقال لو يَسوع: "أنتينا كتقول الّي كاين." وْقال بيلاطُس نْرُؤَساء المسؤولين وْنالجمهور: "أنا ما كنجبر حتّى شي لَوم في هَد الرَّجل." وَلكن هُمَ كانو كيلحّو وْكيقولو: "هَدا كيهيّج الناس وْكيعلّم في اليَهوديّة كاملة، وْبدا من الجَليل حتّى نْهنايَ." ملّي سمَع بيلاطُس هَد الشي، سقصى إدا كان هَد الرَّجل جَليلي. وْملّي عرف بلّي هُوَ من منْطَقة هيرودُس، صيفطوْ نْعند هيرودُس، الّي كان حتّى هُوَ في أُورُشَليم في ديك الأيّام. ملّي هيرودُس شاف يَسوع، فرَح بزّاف حيت من شحال هَدي كان باغي يشوفوْ حيت سمَع عليه، وْكان كيتمنّى يشوفوْ كيعمل شي مُعْجزة قدّامو. وْسقصاه على بزّاف د الحاجات، وَلكن يَسوع ما جاوب على حتّى حاجة. وْكانو رُؤَساء المسؤولين والمُعلّمين د الشريعة كيشكيو بِه بالجهد. وْمن بعدما هيرودُس والعسْكر ديالو هانوه وْبهْدلو بِه، لبّسو لو واحد اللباس غالي وْردّوه نْبيلاطُس. وْمن ديك النهار رجعو بيلاطُس وْهيرودُس صُحاب، حيت كانت بيناتوم العداوة من قبل. جمَع بيلاطُس رُؤَساء المسؤولين والقُيّاد والشعب. وْقالّوم: "أنتُمَ جيبْتو لي هَد الرَّجل وْقُلتو لي بلّي كيحرّط الشعب، وَلكن أنا بحَتّوْ قدّامكُم وْما جبرْتْ فيه حتّى شي لَوم من هَد الشي الّي كتشكيو بِه. وْحتّى هيرودُس ما جبر والو، حيت هُوَ ردّوْ نّا. كيفْما كتشوفو، ما عمل حتّى شي جريمة الّي يسْتاهل عليها الموت. على هَد الشي غادي نطلقوْ من بعدما نعاقبوْ." وَلكن في العيد كان واجب على بيلاطُس يطلق لوم واحد الحبّاس. وْغوّتو كاملين بْصوت واحد: "قتل هَد الرَّجل وْطلق نّا بَراباس." وْبَراباس كان دخل نالحبس بْسباب شي فِتنة الّي وقعَتْ في المدينة والقتل. وَلكن بيلاطُس كان باغي يطلق يَسوع وْهدَر مع الشعب مرّة يَخرى. وَلكن هُمَ بقاو كيغوّتو: "صلّبوْ! صلّبوْ!" وْقالّوم مرّة تالتة: "شْمِن شرّ عمل هَد الرَّجل؟ أنا ما جبرْتْ فيه حتّى حاجة الّي يسْتاهل عليها الموت. على هَد الشي غادي نطلقوْ من بعدما نعاقبوْ." وَلكن الشعب زاد بأصْوات عالية كيطلب منّو باش يصلّبوْ. والأصْوات ديالوم غلبَتْ. وْفي الآخر بيلاطُس قرّر يقبل الطلب ديالوم. وْطلق الرَّجل الّي طلبوه، الّي كان دخل نالحبس بْسباب الفِتنة والقتل، وْسلّم لوم يَسوع باش يعملو بِه ما بغاو. وْملّي ادّاو يَسوع، شبّرو سِمْعان القَيرَواني وْهُوَ راجع من الفدّان، وْنزّلو عليه الصليب باش يرفدوْ من مورا يَسوع. وْتبعو يَسوع بزّاف د الناس من الشعب، بيناتوم النسا الّي كيضربو صدروم وْكينوّحو عليه. أمّا يَسوع دار نْعندوم وْقالّوم: "آ بنات أُورُشَليم، ما تبكيو شي عليَّ. حسَن تبكيو على راسكُم وْعلى الولاد ديالكُم. حيت غادي يجي الوقت الّي غادي يقولو فيه الناس: «مبروكين العاݣرات الّي عُمروم ما ولدو وْما رطّعو.» في ديك الوقت غادي يبداو كيقولو نالجّبولة: «طيحو علينا!» وْنالكداوي «غطّيونا!» حيت إدا كيعملو هَد الشي في الشجرة الخضرة، شنّو غادي يوقع ملّي تكون يابسة؟" وادّاو مع يَسوع جوج يَخرين الّي كانو مُجْرمين باش يقتلوهُم. وْملّي وَصلو نالموطَع الّي مسمّي الجُمْجُمة، صلّبوه تمّاك مع المُجْرمين، واحد على الّيمين ديالو ويَخُر على الشمال. وْقال يَسوع: "آ بابا، غفر لوم، حيت ما كيعرفو شي شنّو كيعملو." وْقسمو بيناتوم الحوايج ديالو بالقرعة، وْكان الشعب واقف كيشوف، وْحتّى القُيّاد كَيْبهْدلو بِه، كيقولو: "نجّى يَخرين، خلّيه يعتق راسو إدا كان هُوَ المسيح مخْتور اللّٰه!" حتّى العسْكر قرّبو نْعندو باش يبهْدلو بِه، ويقدّمو لو الخلّ وْقالو: "إدا كُنْتِ أنتينا مَلِك اليهود، نجّي نفسك." كانت فوق منّو واحد العلامة مكتوب عليها بْحروف يونانيّة وْرومانيّة وْعبرانيّة: "هَدا هُوَ مَلِك اليهود." وْكان واحد من المُجْرمين الّي معلّقين معاه كيزبّل فيه، كيقول: "واش ماشي أنتينا هُوَ المسيح؟ إيوا، عتق راسك وْعتقنا حتّى حنايَ!" وْوبّخوْ المُجْرم التاني وْقال: "واش ما كتخاف شي اللّٰه وانتينا في نفس العقوبة؟ بالنسبة لِنّا، العقاب ديالنا عادل، حيت كَنْتـعدّبو على حسب الفعايل ديالنا. أمّا هَدا ما عمل حتّى شي دنب." وْقال نيَسوع: "تفكّرني ملّي تجي في مُلْكك." قال لو يَسوع: "كنقول لك الحقّ، اليوما غادي تكون معيَ في الفِرْدَوس." كان تقْريبًا فوسط النهار، وْطاح الظلام على الأرض كاملة حتّى نالتلاتة د العشيّة. ظلمَت الشمس والحجاب د بيت المَقْدس تشرّݣ على جوج. ديك الساعة غوّت يَسوع بْصوت عالي وْقال: "آ بابا، كنسلّم روحي في يَدّك!" وْملّي قال هَد الشي، دفَع الروح ديالو. ملّي شاف قايد المية الّي وقَع، مجّد اللّٰه وْقال: "هَد الرَّجل كان متّاقي د بالصّحّ." والناس كاملين الّي اتّجمعو باش يشوفو هَد الشي، ملّي شافو الّي وقَع، رجعو فحالوم كيضربو على الصدور ديالوم. والمعارف د يَسوع كاملين والنسا الّي رافقوه من الجَليل بقاو واقفين من بعيد كيشوفو هَد الشي. وْكان تمّا واحد الرَّجل صالح وْمتّاقي، مسمّي يوسف، وْهُوَ عضو في مَجْلس اليهود. هُوَ ما كان شي متَّفق مع القرار والفعايل ديالوم. كان من الرامة، واحد المدينة يهوديّة، وْكان كيتسنّى مُلك اللّٰه. هَد الرَّجل مشى نْعند بيلاطُس وْطلب لو الجتّة د يَسوع. وْهبّطوْ وْكفّنوْ بالتوب د الكتّان وْنزّلوْ في واحد القبَر محفور في الصخرة، الّي عُمرو ما تدفن فيه حتّى واحد. كان ديك النهار نهار التوجاد وْكان علاين يبدا السبت. والنسا الّي رافقو يَسوع من الجَليل تبعو يوسف باش يشوفو القبَر وْكيفاش نزّلو الجسد. وْمن بعد رجعو وْوجّدو الحنوط والعطر. وْنهار السبت ارتاحو فحال ما كاين في الوَصيّة. نهار الحد بكري عند الفجر، مشاو النسا نالقبَر رافدين الحنوط الّي وجّدوه وْمعهُم بعض النسا يَخرين. وْجبرو الحجْرة الّي مغطّية القبَر تحيّدَتْ. وْملّي دخلو، ما جبرو شي الجسد د الرَّبّ يَسوع. ملّي كانو حَيرانين في هَد الشي، وَقفو حداهُم جوج د الرجال بْلباس كيبرق. النسا كانو خوفانين وْحانيين الوجوه ديالوم نالأرض، وْقالو لوم الرجال: "علاش كتفتّشو على الحيّ بين الميّتين؟ هُوَ ماشي هنايَ، وَلكن اتّبعت حيّ! تفكّرو الّي قال لكُم ملّي كان باقي معكُم في الجَليل، ملّي قال: «اِبن الإنسان واجب يتسلّم ناليَدّين د المُدْنبـين ويتصْلب وْفي اليوم التالت غادي يرجَع بالروح.»" ديك الساعة تفكّرو الكلام د يَسوع، وْرجعو من القبَر وْخبرو بْهَد الأُمور كاملة نالحضاش ويَخرين كاملين. ديك النسا هُمَ مَرْيَم المَجْدَليّة وْحَنّة وْمَرْيَم يمّاه د يَعْقوب، ويَخرين معهُم، الّي قالو هَد الشي نالرُّسُل. وْهُمَ ما تيّقو شي الكلام د النسا، حيت ظهَر لوم فحال هدرة خاوية. وَلكن ناض بُطْرُس وْخرج بالجري نالقبَر، وْطلّل وْشاف الكفن منزّل بوحدو. وْمن بعد مشى نالدار ديالو معجّب في هَد الشي الّي وقَع. وْفي نفس النهار جوج من التلامد كانو ماشّين نواحد القرية مسمّية عِمْواس، بعيدة من أُورُشَليم علاين حضاش د الكيلومترات. وْكانو كيتهاودو بيناتوم على هَد الأُمور كاملة الّي وقعَتْ. ملّي كانو كيتهاودو وْكيتناقشو مع بعطوم، قرّب نْعندوم يَسوع بْنفسو وْبدا كيتمشّى معهُم. وَلكن العينين ديالوم كانو مغطّيين ما قادرين شي يميّزوه. وْسقصاهُم يَسوع: "شنّو هُوَ هَد الكلام الّي كَتْـتناقشو فيه مع بعطكُم وانتُمَ ماشّين في الطريق؟" وْهُمَ وَقفو حزنانين. واحد مِنّوم مسمّي كليوباس ردّ عليه وْقال لو: "واش أنتينا البرّاني الوحيد الّي ما عرف شي الأُمور الّي وقعَتْ في أُورُشَليم في هَد الأيّام؟" وْسقصاهُم يَسوع: "شنّو وقَع؟" وْقالو لو: "على يَسوع الناصِري الّي كان واحد النَّبي قدير في الكلام والأعْمال قدّام اللّٰه والشعب كامل، وْرُؤَساء المسؤولين والحُكّام ديالنا سلّموه باش يحكمو عليه بالموت وْصلّبوه. وَلكن حنايَ كُنّا كنتمنّاو بلّي هَدا هُوَ الّي كان غادي يفدي إسْرائيل. وْفوق هَد الشي، اليوما النهار التالت باش وقَع هَد الشي. وْبعض النسا منّا دهّشونا، حيت في هَد الصباح بكري مشاو نالقبَر، وْما جبرو شي الجسد ديالو. وْملّي رجعو قالو نّا بلّي ظهرو لوم شي ملائكة الّي خبروهُم بلّي راه حيّ! وْشي بعض منّا مشاو نالقبَر وْجبرو هَيداك فحال ما قالو النسا، أمّا هُوَ ما شافوه شي." ديك الساعة قالّوم يَسوع: "آ الجاهلين الّي القلب ديالكُم كيتعطّل باش تآمنو بْكُل شي الّي قالو الأَنْبياء! واش ما كان شي واجب على المسيح يتعدّب بْهَد الأُمور ويدخل في المجد ديالو؟" ديك الساعة شرح لوم الّي تكتب عليه في الأسْفار المقدّسة كاملة، وْبدا من موسى حتّى نالأَنْبياء كاملين. وْقرّبو نالقرية الّي كانو ماشّين لِلاْ وْهُوَ عمل فحال إدا كان غادي يفوتاْ. أمّا هُمَ حصروه وْقالو لو: "بقا معنا، حيت جات العشيّة وْقرّب الليل." وْدخَل باش يبقا معهُم. ملّي كان ݣالس معهُم باش ياكلو، شبّر يَسوع الخبز وْباركوْ وْقطّعوْ وْعْطاهُم. في هزيزة تفتحو العينين ديالوم وْعرفوه، وَلكن هُوَ اتّخفى عليهُم. وْقالو مع بعطوم: "واش ما كان شي قلبنا كيتحرق ملّي كان كيهدَر معنا في الطريق وْكيشرح نّا الكتوبة؟" وْناضو في ديك الساعة وْرجعو نأُورُشَليم وْجبرو الحضاش مجموعين، والّي كانو معهُم، كيقولو: "د بالصّحّ الرَّبّ اتّبعت حيّ وْظهَر نْسِمْعان." وْحتّى هُمَ بْجوج عاودو الّي وقَع لوم في الطريق وْكيفاش عرفوه ملّي قطّع الخبز. ملّي كانو باقين كيتكلّمو على هَد الشي، يَسوع بْنفسو وقَف فوسطوم وْقالّوم: "سلام عليكُم." اتّرعبو وْخافو، وْظنّو بلّي شافو شي شبح. وَلكن هُوَ قالّوم: "علاش أنتُمَ كتخافو بزّاف وْعلاش كيدخل الشكّ في قلبكُم؟ شوفو اليَدّين والرِّجلين ديالي، أنا هُوَ. حاديوني وْشوفو، حيت الشبح ما عندو لا لحم ولا عطام فحال ما كتشوفو عندي." وْملّي قال هَد الشي، ورّاهُم اليَدّين والرِّجلين ديالو. وَلكن هُمَ ڭاع ما تيّقوه بْسباب الفرْحة والدهشة، وْقالّوم يَسوع: "واش عندكُم هنايَ شي ماكلة؟" عْطاو لو طريف د الحوت المشوي. وْشبّروْ وْكلاه قدّاموم. وْقالّوم: "ملّي كُنْتْ معكُم، قُلْتْ لكُم هَد الكلام، بلّي كان لازم يتكمّل كُل شي الّي مكتوب عليَّ في الشريعة د موسى والأسْفار د الأَنْبياء والمزامير." ديك الساعة فتَح لوم العقل باش يفهمو الكتوبة المقدّسة، وْشرح لوم: "هَيدا كان مكتوب، بلّي المسيح كان غادي يتعدّب وْفي اليوم التالت يرجَع بالروح. وْبالِاسم ديالو غادي يبشّرو بالتوبة وْغُفران الدنوب نالأُمَم كاملين، ويبداو من أُورُشَليم. وانتُمَ شهود نْهَد الشي. ها أنا غادي نصيفط لكُم ديك الشي الّي وَعد بِه بابا. وَلكن بقاو في مدينة أُورُشَليم حتّى تـتلبّسو بالقُدْرة من السما." وْمن بعد ادّاهُم يَسوع نْبيت عَنْيا، وْتمّاك رفَع اليَدّين ديالو وْبارك فيهُم. وْملّي كان كيبارك فيهُم، تفارق عليهُم وْتّرفع نالسما. ديك الساعة سجدو لو وْرجعو نأُورُشَليم بْفرْحة عظيمة. وْكانو في بيت المَقْدس بْشكل مستَمر كيسبّحو ناللّٰه وْكيباركوه. آمين. في البداية كان الكلمة والكلمة كان عند اللّٰه وْكان الكلمة هُوَ اللّٰه. هَدا كان في البداية عند اللّٰه. كُل شي كان بِه وْبلا بِه ما كانت حتّى شي حاجة من الّي كان. فيه كانت الحياة والحياة كانت الضَّو د الناس. والضَّو كيبرق في الظلام والظلام ما قدَر شي عليه. جا واحد الرَّجل مرسول من عند اللّٰه مسمّي يوحَنّا. اللّٰه صيفطوْ فحال شهادة باش يشهد نالضَّو ويآمنو بِه الناس كاملين على يَدّو. ما كان شي هُوَ الضَّو، وَلكن جا باش يشهد نالضَّو. ديك الضَّو الحقيقي، الّي كيضوّي على كُل إنسان، كان ماجي نْهَد الدنيا. كان في الدنيا وْتكوّنَت الدنيا بِه، وَلكن الدنيا ما عرفَتوْ شي. جا نالأهل ديالو وْهُمَ ما رحّبو شي بِه. أمّا كُل واحد الّي قبلوْ، يعني هَدوك الّي كيآمنو بِاسمو، عْطاهُم القدرة باش يكونو أُوْلاد اللّٰه. هَدوك ما اتّولدو شي من الدم ولا من إرادة الجسد ولا من إرادة الرَّجل، وَلكن من اللّٰه. والكلمة رجَع جسد وْسكن بيناتنا وْشفْنا المجد ديالو، المجد فحال د الاِبن الوحيد من الآب، معمّر بالنعْمة والحقّ. يوحَنّا شهد لو وْغوّت، كيقول: "هَدا هُوَ الّي قُلْتْ عليه: «هَداك الّي ماجي من بعد منّي هُوَ عظيم منّي، حيت كان قبل منّي.»" حيت مِن التعْمير ديالو توصّلْنا كاملين بْنعْمة فوق نعْمة، حيت الشريعة اتّعطات على يد موسى، وَلكن النعْمة والحقّ جاو على يد يَسوع المسيح. حتّى واحد عُمرو ما شاف اللّٰه. الِابن الوحيد الّي هُوَ في حضن الآب، هُوَ الّي عرّفنا بِه. هَدي هي الشهادة د يوحَنّا ملّي اليهود من أُورُشَليم صيفطو شي واحدين من المسؤولين على بيت المَقْدِس وْلاويّين باش يسقصيواه: "شكون أنتينا؟" وْما نكر شي واعْتَرف بْصراحة: "أنا ماشي المسيح." وْسقصاواه: "إدَن، واش أنتينا إيليّا؟" وْقال: "ماشي أنا هُوَ." "واش أنتينا النَّبي؟" وْجاوب: "لا." وْقالو لو: "شكون أنتينا؟ باش نعطيو الجواب نِلّي صيفطونا، شنّو كتقول على نفسك؟" قال: "أنا «واحد الصوت الّي كيبرّح في الخلا: عوّطو طريق الرَّبّ،» كيفْما قال النَّبي إشَعْيا." كانو المرْسولين من الفرّيسيّين، وْسقصاواه وْقالو لو: "علاش كتغطّس إدا أنتينا ماشي المسيح ولا إيليّا ولا النَّبي؟" وْيوحَنّا ردّ عليهُم وْقال: "أنا كنغطّس بالما، وَلكن فوسطكُم واحد الّي ما كتعرفوه شي أنتُمَ. هُوَ الّي ماجي من بعد منّي، وانا ما كَنْسْتاهل شي نفسخ لو الخيوط د الصبّاط ديالو." هَد الشي كامل وقَع في بيت عَنْيا، في جهة يَخرى د واد الأُرْدُن، فاين كان يوحَنّا كيغطّس. ولّا غدّا يوحَنّا شاف يَسوع ماجي نْعندو وْقال: "ها هُوَ الخروف د اللّٰه الّي كيحيّد الدنوب د الدنيا! هَدا هُوَ الّي قُلْتْ عليه: «غادي يجي من بعد منّي واحد الرَّجل الّي هُوَ عظيم منّي، حيت كان قبل منّي.» وانا ما كنعرفوْ شي، وَلكن باش يظهَر هُوَ نْشعب إسْرائيل جيتْ أنا كنغطّس بالما." وْشهد يوحَنّا وْقال: "أنا شفْتْ الروح القُدُس نازل من السما فحال واحد الحمامة وْبقا عليه. أنا ما كنعرفوْ شي، وَلكن هَداك الّي صيفطني باش نغطّس بالما قال لي: «الرَّجل الّي غادي تشوف الروح كينزل وْكيبقا عليه، هَداك هُوَ الّي كيغطّس بالروح القُدُس.» أنا شفْتوْ وْشهدْتْ بلّي هَدا هُوَ اِبن اللّٰه." ولّا غدّا عاود كان يوحَنّا واقف مع جوج من التلامد ديالو. وْشاف يَسوع ماشي وْقال: "ها هُوَ الخروف د اللّٰه." ملّي سمعو التلامد هَد الشي، تبعو يَسوع. وْدار يَسوع وْشافوم كيتبعوه وْسقصاهُم: "شنّو خصْكُم؟" وْقالو لو: "رابّي (الّي التفسير ديالو: «آ المُعلّم»)، فاين أنتينا نازل؟" ردّ عليهُم: "آجيو تشوفو." وْجاو وْشافو فاين كان نازل، وْبقاو معاه ديك النهار. كانت الساعة تقْريبًا الأربعة د العشيّة. كان أَنْدَراوس خاه د سِمْعان بُطْرُس، واحد من الجوج الّي سمعو يوحَنّا وْتبعوه. هَدا جبر في الُوّل خاه سِمْعان وْقال لو: "جبرْنا «هَمَّشيَح»، يعني المَسيح." وْمن بعد ادّاه عند يَسوع، وْشاف فيه يَسوع وْقال لو: "أنتينا سِمْعان بن يونا. أنتينا غادي تتسمّى صَفا،" يعني "بُطْرُس." ولّا غدّا بغى يَسوع يخرج نالجَليل، وْجبر فيلِبُّس وْقال لو: "تْبعني." كان فيلِبُّس من بيت صَيدا، مدينة أَنْدَراوس وْبُطْرُس. فيلِبُّس جبر نَثَنائيل وْقال لو: "جبرْنا الّي كتب عليه موسى في الشريعة والّي كتبو عليه الأَنْبياء، يَسوع بن يوسف الّي من الناصِرة." وْقال لو نَثَنائيل: "واش من الناصِرة يمكن تخرج شي حاجة مزيانة؟" قال لو فيلِبُّس: "آجي وْشوف." ملّي يَسوع شاف نَثَنائيل ماجي نْعندو، قال عليه: "هَدا واحد الإسْرائيلي د بالصّحّ، الّي ما فيه شي الغشّ." قال لو نَثَنائيل: "ماين كتعرفني؟" جاوب يَسوع وْقال لو: "من قبل ما يعيّط لك فيلِبُّس، وانتينا تحت الشجرة د الكرْموس، شفْتك." جاوب نَثَنائيل وْقال لو: "آ المُعلّم، أنتينا اِبن اللّٰه، أنتينا المَلِك د إسْرائيل." ردّ يَسوع وْقال لو: "حيت قُلْتْ لك «أنا شفْتك تحت الكرْموسة،» واش آمنْتِ؟ غادي تشوف حاجات عظيمة على هَد الشي." وْقال لو: "كنقول لكُم الحقّ، من دابا نْفوق غَد تشوفو السما مفْتوحة والملائكة د اللّٰه كيطلعو وْكينزلو على اِبن الإنسان." في النهار التالت، كان واحد العرس في قانا د الجَليل وْكانت يمّاه د يَسوع تمّاك. وْتعرطو يَسوع والتلامد ديالو نالعرس حتّى هُمَ. ملّي تقاضى الخمر، يمّاه د يَسوع قات لو: "ما عندوم شي الخمر." قالّاْ يَسوع: "شنّو بيني وْبينك، آ المراة؟ الساعة ديالي باقّة ما جات." قالت يمّاه نالخدّامة: "عملو كُل شي الّي كيقول لكُم." كانو ستّة د الطَّنّات د الحجَر منزّلين تمَّاك، الّي كيسْتَعملوهُم اليهود نالتغْسيل حسب العادة ديالوم، كترفد كُل واحدة مية د الليترو تقْريبًا. قالّوم يَسوع: "عمّرو ديك الطَّنَن بالما." وْعمّروهُم حتّى نْفوق. وْقالّوم: "سقيو دابا وادّيواه نالمقدّم د العرس." وادّاواه نْعندو. ملّي قيّس المقدّم د العرس الما الّي رجَع خمر، بلا ما يعرف ماين جا، وَلكن الخدّامة الّي كانو كيسقيو الما عارفين، عَيّط المقدّم نالعروس، وْقال لو: "الناس كاملين كينزّلو الخمر المخيّر في الُوّل، وْملّي كيشربو حتّى يدوخو، عاد ديك الساعة كينزّلو الخمر الّي ماشي مزيان. أمّا أنتينا خلّيتِ الخمر المخيّر حتّى نالدابا." هَدي كانت هي العلامة الُولى الّي عملاْ يَسوع في قانا د الجَليل، وْبيّن المجد ديالو والتلامد ديالو آمنو بِه. من بعد هَد الشي، هوّدو نْكَفْرِناحوم هُوَ ويمّاه وْخوتو والتلامد ديالو، وْبقاو تمّاك شي أيّام قليلة. وْكان عيد الفِصح د اليهود قريب، وْطلَع يَسوع نأُورُشَليم. وْجبَر في بيت المَقْدس الناس الّي كانو كَيْبيعو البقر والغنم والحمام، والصرارفيّة تمّاك ݣالسين. وْعدّل واحد السوط من الحبل وْجرّى عليهُم كاملين من بيت المَقْدس، مع الغنم والبقر ديالوم وْسيّب الفلوس د الصرارفيّة وْقْلب الطيافر ديالوم. وْقال نالناس الّي كيبيعو الحمام: "حيّدو هَد الشي من هنايَ وْما تعملو شي الدار د بابا دار البيع والشرا." وْتفكّرو التلامد ديالو بلّي مكتوب: "الغيرة على الدار ديالك غادي تاكلني." جاوبو اليهود وْقالو لو: "شنّي هي العلامة الّي غادي تورّينا، حيت أنتينا كتعمل هَد الشي؟" جاوب يَسوع وْقالّوم: "هدّمو هَد المَعْبد وْفي تلت أيّام أنا غادي نرفعوْ من جديد." قالو اليهود: "بيت المَقْدس هَدا اتّبنى في ستّة وأربعين عام، وانتينا واش في تلت أيّام غادي ترفعوْ؟" أمّا هُوَ كان كيهدَر على الجسد ديالو فحال واحد المَعْبد. وْعلى هَد الشي ملّي يَسوع اتّبعت من بين الميّتين، التلامد ديالو تفكّرو بلّي قال هَد الشي وآمنو بالكتاب والكلام الّي قال. ملّي كان يَسوع في أُورُشَليم في عيد الفِصح، آمنو بزّاف د الناس بِاسمو ملّي شافو العلامات الّي كان كيعملاْ. أمّا يَسوع ما تاق شي بِهُم، حيت كان كيعرفوم كاملين، حيت يَسوع ما كان شي محْتاج باش شي واحد يشهد لو على البشر، حيت كان كيعرف شنّو كاين في داخل الإنسان. كان واحد الرَّجل من الفرّيسيّين، هُوَ قايد د اليهود، مسمّي نيقوديموس. هَد الرَّجل مشى نْعند يَسوع في الليل وْقال لو: "آ المُعلّم، كنعرفو بلّي أنتينا جيتِ من عند اللّٰه مُعلّم، حيت حتّى واحد ما يقدر يعمل العلامات الّي كتعملاْ أنتينا إدا ما كان شي اللّٰه معاه." ردّ عليه يَسوع وْقال لو: "كنقول لك الحقّ، إدا شي واحد ما اتّولد شي من جديد، ما يقدر شي يشوف مُلك اللّٰه." سقصى نيقوديموس: "كيفاش يقدر شي واحد يخلق من جديد وْهُوَ عڭوز؟ واش يقدر يدخل مرّة تانية في الكرش د يمّاه ويتّولد عاود؟" جاوب يَسوع: "كنقول لك الحقّ، بلّي الّي ما كيتّولد شي من الما والروح، ما يقدر شي يدخل نْمُلك اللّٰه. الّي مولود من الجسد هُوَ جسد، والّي مولود من الروح هُوَ روح. ما تْتعجّب شي حيت قُلْتْ لك: «خصْكُم تْتّولدو من جديد.» الريح كيصوط فاين ما بغى وْكتسمع الصوت ديالو، واخّا ما كتعرف شي لا ماين ماجي وَلا فاين ماشّي. هَيدا كيكون كُل واحد الّي مولود من الروح." جاوب نيقوديموس وْقال لو: "كيفاش يقدر يكون هَد الشي؟" ردّ عليه يَسوع وْقال لو: "واش أنتينا مُعلّم في إسْرائيل وْما كتعرف شي هَد الشي؟ كنقول لك الحقّ، حنايَ كنتكلّمو بْديك الشي الّي كنعرفوه وْكنشهدو بْديك الشي الّي شفْناه، وانتُمَ ما كتقبلو شي الشهادة ديالنا. إدا هدرْتْ معكُم على الأُمور الأرضيّة وْما آمنْتو شي، كيفاش غَد تآمنو إدا هدرْتْ معكُم على الأُمور السماويّة؟ حتّى واحد ما طلَع نالسما، من غير هَداك الّي نزل من السما، يعني، اِبن الإنسان. "كيفْما رفَع موسى الحيّة في الصحرا، هَيداك خصّوْ يتّرفع اِبن الإنسان باش كُل واحد الّي كيآمن بِه تكون عندو الحياة الدايمة. حيت حتّى نْهَد الدرجة حبّ اللّٰه الدنيا حتّى عْطى اِبْنو الوحيد باش ما يتّهلك حتّى واحد الّي كيآمن بِه، وَلكن تكون عندو الحياة الأبديّة. اللّٰه ما صيفط شي اِبنو نالدنيا باش يحكم عليها، وَلكن باش ينجّي الدنيا بواسطتو. الّي كيآمن بِه ما كيتّحكم شي، والّي ما كيآمن شي، هُوَ محكوم عليه دابا، حيت ما آمن شي بِاسم اِبن اللّٰه الوحيد. وْهَدا هُوَ سبب الحُكم: بلّي الضَّو جا نالدنيا، وَلكن الناس بغاو الظلام كتَر من الضَّو، حيت الفعايل ديالوم كانو قباحين. حيت كُل واحد الّي كيعمل الشّرّ كيكره الضَّو وْما كيجي شي نالضَّو باش الفعايل ديالو ما يظهرو شي. أمّا الّي كيعمل الحقّ كيجي نالضَّو باش تظهَر الأعْمال ديالو الّي معْمولة من عند اللّٰه." من بعد هَد الشي، جا يَسوع مع التلامد ديالو نْمنْطَقة اليَهوديّة، وْبقا معهُم تمّاك وْكان كيغطّس الناس. وْكان يوحَنّا حتّى هُوَ كيغطّس الناس في عين نون قريب من ساليم، حيت كان تمّاك بزّاف د الما. وْكانو كيجيو الناس وْكيتغطّسو، حيت يوحَنّا كان باقي ما دخل شي نالحبس. وْوقعَتْ واحد المدابزة بين التلامد د يوحَنّا مع اليهود على التطْهير. وْجاو عند يوحَنّا وْقالو لو: "آ المُعلّم، هَداك الّي كان معك في الجّهة يَخرى د الأُرْدُن الّي شهدْتِ لو أنتينا، راه كيغطّس والناس كاملين كيمشيو نْعندو." جاوب يوحَنّا وْقال: "ما يقدر حتّى شي إنسان يقبط شي حاجة إدا ما اتّعطات لو شي من السما. أنتُمَ كتشهدو بلّي قُلْتْ: «ماشي أنا المسيح، وَلكن أنا مرْسول قدّامو.» الّي عندو العروسة هُوَ العروس، أمّا صاحب العروس، الّي حداه وْكيسمع لو، كيتعمّر بالفرْحة ملّي كيسمع صوت العروس. هَدي هي الفرْحة الّي أنا تعمّرْتْ بِها. لازم هُوَ يزيد وأمّا أنا نْنقص. الّي كيجي من فوق، هُوَ كيكون فوق الناس كاملين، والّي هُوَ من الأرض هُوَ كيكون أرضي وْكيهدَر على الأُمور الأرضيّة. الّي كيجي من السما هُوَ فوق الناس كاملين وْكيشهد بْديك الشي الّي شاف وْسمَع، وَلكن حتّى واحد ما كيقبل الشهادة ديالو. والّي كيقبل الشهادة ديالو، هُوَ كيأكّد بلّي اللّٰه صادق. هَداك الّي صيفطوْ اللّٰه كيتكلّم بالكلام د اللّٰه، حيت اللّٰه كيعطي الروح ديالو بلا قياس. الآب كيعزّ الِابن وْدفع كُل شي في يَدّو. المؤمن بالِابن عندو الحياة الأبديّة، والّي ما كيآمن شي بالِابن ما غادي شي يشوف هَد الحياة، وَلكن كيبقا تحت غضب اللّٰه." ملّي عرف الرَّبّ يَسوع بلّي الفرّيسيّين سمعو بلّي هُوَ كيجمع التلامد كتَر من يوحَنّا وْكيغطّسوم (واخّا يَسوع ما كان شي كيغطّس، وَلكن التلامد ديالو، هُمَ الّي كيغطّسوهُم)، على هَد الشي خلّى اليَهوديّة وْرجَع عاود نالجَليل. وْكان لازم عليه يݣوز من السامِرة، وْوصَل نواحد المدينة سامِريّة مسمّية سوخار، قريبة نالأرض الّي عْطاها يَعْقوب نيوسف ولدو. تمّا كان البير د يَعْقوب، وْملّي يَسوع عيا من السفر، ݣلس حدا البير. كان تقْريبًا في وسط النهار. وْجات واحد المراة من السامِرة باش تسقي الما. قالّاْ يَسوع: "عْطيني نشرَب،" حيت التلامد ديالو مشاو نالمدينة باش يشريو الماكلة. قات لو المراة السامِريّة: "كيفاش كتطلب منّي نعطيك الما وانتينا يهودي وانا سامِريّة؟" (حيت اليهود ما كيتعاملو شي مع السامريّين.) ردّ عليها يَسوع وْقالّاْ: "كَكُنْتِ عرفْتِ عطية اللّٰه وْشكون هُوَ الّي كيقول لك «عْطيني نشرَب،» كَكُنْتِ أنتينا طلبْتِ منّو يعطيك الما الحيّ." قات لو المراة: "آ سيدي، ما عندك حتّى حاجة باش تسقي الما والبير غارق. وْماين غادي تخرّج هَد الما الحيّ؟ واش أنتينا عظيم من بابانا يَعْقوب الّي عْطانا هَد البير وْشرَب منّو، هُوَ وْولادو والكسيبة ديالو؟" ردّ عليها يَسوع وْقالّاْ: "كُل واحد الّي كيشرب من هَد الما غادي يعطش عاود، وَلكن الّي كيشرب من هَد الما الّي كنعطيه أنا، ما عُمرو غادي يعطش عاود، حيت الما الّي غادي نعطي لو أنا غادي يكون فيه واحد العين د الما الّي كَيْفيض نالحياة الأبديّة." قات لو المراة: "آ سيدي، عْطيني من هَد الما باش ما نعاود شي نعطش ولا نجي نْهنايَ باش نسقي." قالّاْ يَسوع: "مْشي وْعيّط على رَجلك وْرجَع نْهنايَ." جاوبَت المراة وْقالت: "ما عندي شي الرَّجل." قالّاْ يَسوع: "مزيان قُلْتِ «ما عندي شي الرَّجل،» حيت كانو عندك خمسة د الرجال والّي عندك دابا، هُوَ ماشي رَجلك. قُلْتِ الحقّ." قات لو المراة: "آ سيدي، كنفطن بلّي أنتينا واحد النَّبي. جدودنا عَبدو في هَد الجّبل، وانتُمَ اليهود كتقولو بلّي الموطَع فاين لازم علينا نعبدو هُوَ أُورُشَليم." قالّاْ يَسوع: "آ المراة، تيّقني، غادي تجي واحد الساعة الّي فيها، لا في هَد الجّبل ولا في أُورُشَليم، أنتُمَ غَد تعبدو الآب. أنتُمَ كتعبدو الّي ما كتعرفوه شي، أمّا حنايَ كنعبدو الّي كنعرفوه، حيت النجا كيجي من عند اليهود. وَلكن غادي تجي الساعة، الّي هي دابا، ملّي العبّاد الحقيقيّين غادي يعبدو الآب بالروح وْبالحقّ، حيت الآب كيـبقّش على العبّاد فحال هَدو باش يعبدوه. اللّٰه هُوَ روح، والّي كيعبدوه لازم يعبدوه بالروح وْبالحقّ." قات لو المراة: "أنا كنعرف بلّي غادي يجي "هَمَّشيَح"، الّي مسمّي المسيح، وْملّي غادي يجي هَداك، هُوَ غادي يخبرنا بْكُل شي." قالّاْ يَسوع: "أنا هُوَ الّي كنهدَر معك." ديك الساعة رجعو التلامد ديالو وْكانو كيتعجّبو بلّي كيهدَر مع واحد المراة، وَلكن حتّى واحد ما قال لو: "شنّو بغيتِ منّاْ؟" أَوْلا "علاش كتهدَر معها؟" وْنزّلَت المراة الردومة ديالاْ وْمشات نالمدينة وْقالت نالناس: "آجيو تشوفو واحد الرَّجل الّي قال لي كُل شي الّي عملْتْ. واش ما يكون شي هُوَ المسيح؟" وْخرجو من المدينة وْمشاو نْعندو. في نفس الوقت، التلامد ديالو قالو لو: "آ المُعلّم، كول شي حاجة." قالّوم يَسوع: "أنا عندي شي ماكلة باش ناكل الّي أنتُمَ ما كتعرفوها شي." وْقالو التلامد بيناتوم: "يكون شي واحد جاب لو الماكلة؟" قالّوم يَسوع: "الماكلة ديالي هي نعمل الإرادة د هَداك الّي صيفطني وْنكمّل العمل ديالو. واش ما كتقولو شي أنتُمَ: «باقي أربع شهور باش يجي الحصاد؟» ها انا كنقول لكُم، هزّو العينين ديالكُم وْشوفو الفدادن. راها دابا رجعَتْ بَيطة نالحصاد. والحصّاد كيشبّر الخُلصة ديالو وْكيجمع الغلّة نالحياة الدايمة باش يفرحو الّي كيزرع والّي كيحصد بْجوج. حيت هَد الكلام حقيقي ملّي كيقولو: «واحد كيزرع ويَخُر كيحصد.» أنا صيفطْتْكُم باش تحصدو ديك الشي الّي ما تعبْتو شي فيه. يَخرين تَعبو من الخدمة وانتُمَ حصدْتو ديك الشي الّي ما تعبْتو شي فيه." وآمنو بِه من ديك المدينة بزّاف من السامِريّين بْسباب الشهادة د ديك المراة حيت قالت: "هو قال لي كُل شي الّي عملْتْ." وْملّي جاو نْعندو السامِريّين، طلبو منّو يبقا عندوم، وْبقا يَسوع معهُم يومَين. وْبزّاف منّوم آمنو بِه ملّي سمعو الكلام الّي كيقول. وْقالو نالمراة: "حنايَ دابا ما كنآمنو شي بْسباب الكلام ديالك. دابا سمعْنا بْيَدْنا وْعارفين بلّي د بالصَّحّ هَدا هُوَ المُنجّي د الدنيا." من بعد ديك اليومَين، خرج يَسوع من تمّاك وْمشى نالجَليل. (حيت كيفْما شهد يَسوع بْيَدّو: "حتّى شي نَبي ما عندو التَّوقير في البلاد ديالو.") ملّي جا نالجَليل، اسْتَقبلوه الجَليليّين، حيت كانو شافو كُل ما عمل في أُورُشَليم في العيد، حيت حتّى هُمَ حضرو في العيد. وْرجَع عاود يَسوع نْقانا د الجَليل فاين رجّع الما خمر. كان تمّا واحد الخدّام د المَلِك، عندو بنو مريط في كَفْرِناحوم. ملّي هَد الرَّجل سمَع بلّي يَسوع وصَل من اليَهوديّة نالجَليل، مشى نْعندو وْرَغبوْ يهوّد باش يشافي ولدو الّي كان علاين يموت. قال لو يَسوع: "إدا ما شفْتو شي العلامات والمعْجزات، ما غادي شي تآمنو." الخدّام د المَلِك قال لو: "آ سيدي، هْبط من قبل ما يموت بني." قال لو يَسوع: "رْجَع نالدار ديالك، راه ولدك حيّ." وآمن الرَّجل بالكلام الّي قال لو يَسوع وْمشى فحالو. ملّي كان هوّاد، تلاقاواه العبيد ديالو وْخبروه: "ولدك راه حيّ." ديك الساعة سقصاهُم على الساعة الّي بدا كيتحسّن فيها ولدو، وْقالو لو: "البارح في الوحدة د العشية مشات لو السخانة." حاس باباه بلّي في ديك الساعة يَسوع قال لو: "ولدك راه حيّ،" وآمن هُوَ والعائلة ديالو كاملة معاه. هَدي كانت العلامة التانية الّي عملاْ يَسوع ملّي رجَع من اليَهوديّة نالجَليل. من بعد هَد الشي، كان واحد العيد د اليهود، وْطلَع يَسوع نأُورُشَليم. كان تمّاك حدا باب الغنم واحد الصهْريج، مسمّي بالعبرانيّة بيت حِسْدا، عندو خمسة د الأقْواس. في هَد الموطَع كانو ممدودين بزّاف د المراطين، البُصْرا، العُرج والمكْحوشين. [كانو كيتسنّاو التحْريك د الما، حيت واحد الملاك كان كينزل مرّة مرّة نالصهْريج وْكيحرّك الما، والّي كيهوّد هُوَ الُوّل من بعد تحْريك الما، كيبرا من المرض الّي كان فيه.] كان بيناتوم واحد الرَّجل مريط مدّة تمنية وْتلاتين عام. ملّي شافوْ يَسوع تمّاك ممدود وْعرف بلّي مدّة طويلة وْهُوَ هَيداك، قال لو: "واش بغيتِ تبرا؟" جاوبوْ المريط: "آ سيدي، ما عندي حتّى واحد الّي يدخّلني في الصهْريج ملّي كيتحرّك الما، وْملّي بغيتْ ندخل، كيجي يَخُر وْكيدخل قبل منّي." وْقال لو يَسوع: "نوض، رفد الفراش ديالك وْمْشي." وْفي هزيزة برا الرَّجل وْرفد الفراش ديالو وْمشى. وَلكن كان ديك النهار السبت. وْقالو اليهود نِلّي برا: "اليوما هُوَ السبت، ممنوع عليك ترفد الفراش ديالك!" ردّ عليهُم الّي برا: "الرَّجل الّي شافاني قال لي: «رْفد الفراش ديالك وْمْشي.»" سقصاواه: "شكون هُوَ الرَّجل الّي قال لك: «رْفد الفراش ديالك وْمْشي؟»" أمّا الّي برا ما عرف شي شكون هُوَ، حيت يَسوع بعّد من الناس الّي كانو في ديك الموطَع. من بعد ديك الشي، يَسوع جبروْ في بيت المَقْدس وْقال لو: "ها أنتينا بريتِ. ما تعاود شي تعمل الدنوب، عندَك يوقع لك الّي قبَح من ديك الشي." مشى الرَّجل عند اليهود وْخبروم بلّي يَسوع هُوَ الّي شافاه. على هَد الشي اليهود كانو كيمرْمدو يَسوع وْكيفكّرو باش يقتلوه، حيت كان كيعمل هَد الأُمور في نهار السبت. جاوبوم يَسوع: "بابا اليوما باقي خدّام، وْحتّى أنا خدّام." على هَد الشي اليهود كانو كيفتّشو كتَر باش يقتلوه، حيت ما كان شي غير ما كيحْتَرم شي نهار السبت، وَلكن قال بلّي اللّٰه باباه، وْكيحسب راسو فحالو فحال اللّٰه. ردّ عليهُم يَسوع: "كنقول لكُم الحقّ، الِابن ما يقدر يعمل حتّى شي حاجة من نفسو، من غير ديك الشي الّي كيشوف باباه كيعمل. حيت كُل شي الّي كيعمل الآب كيعملوْ الِابن فحالو. حيت الآب كيعزّ الِابن وْكيورّي لو كُل شي الّي كيعملوْ، وْغادي يورّي لو أعْمال كبارين من هَدو باش تتعجّبو أنتُمَ. حيت فحال ما الآب كيردّ الميّتين بالروح وْكيحييهُم، هَيداك الِابن حتّى هُوَ كيحيي الّي بغى. حيت الآب ما كيحكم على حتّى واحد، وَلكن عْطى الحُكم كامل نالِابن باش الناس كاملين يوقّرو الِابن، فحال ما كيوقّرو الآب. والّي ما كيوقّر شي الِابن، ما كيوقّر شي الآب الّي صيفطوْ. "كنقول لكُم الحقّ، الّي كيسمع الكلام ديالي وْكيآمن بْهَداك الّي صيفطني، عندو الحياة الأبديّة، وْما غادي شي يدخل نالحُكم، وَلكن ݣاز من الموت نالحياة. كنقول لكُم الحقّ، غادي تجي الساعة وْهِيَ دابا، ملّي الميّتين غادي يسمعو الصوت د ابن اللّٰه، والّي كيسمعوه غادي يحياو. حيت كيف الآب عندو الحياة في نفسو، عْطى حتّى نالِابن باش تكون عندو الحياة في نفسو، وْعْطاه السلْطة باش يحكم، حيت هُوَ اِبن الإنسان. ما تتعجّبو شي من هَد الشي، حيت غادي تجي الساعة ملّي الناس كاملين الّي في المقابر غادي يسمعو صوتو، والّي عملو الخير غادي يخرجو نالقيامة د الحياة، والّي مارسو الشَّرّ غادي يخرجو نالقيامة د العقاب. أنا ما نقدر شي نعمل حتّى شي حاجة من نفسي. على حسب الّي كنسمع بِه كنحكم، والحُكم ديالي حقيقي، حيت ما كنفتّش شي على الإرادة ديالي، وَلكن على الإرادة د هَداك الّي صيفطني. "إدا كُنْتْ شهدْتْ نْنفسي، الشهادة ديالي ماشي حقيقيّة. كاين واحد يَخُر الّي كيشهد لي، وانا كنعرف بلّي الشهادة ديالو هي حقيقيّة. أنتُمَ صيفطْتو نيوحَنّا شي د الناس وْهُوَ شهد بالحقّ. واخّا أنا ما كَنْعتَمد شي على الشهادة د البشر، وَلكن كنقول هَد الشي باش تنجاو أنتُمَ. يوحَنّا كان هُوَ اللامْبة المشعولة والمضوّية، وانتُمَ بغيتو تنشطو شويا د الوقت بالضَّو ديالو. "أمّا أنا عندي شهادة عظيمة من يوحَنّا، حيت الأعْمال الّي عْطاني الآب باش نكمّلوم، هَد الأعْمال الّي كنعملوم، هُمَ بْيَدّوم كيشهدو لي بلّي الآب صيفطني. والآب الّي صيفطني، حتّى هُوَ كيشهد لي. عُمركُم ما سمعْتو الصوت ديالو ولا شفْتو الصِّفة ديالو، وْما عندكُم شي الكلام ديالو ساكن فيكُم، حيت ما كتآمنو شي بْهَداك الّي صيفطوْ. كَتْدرسو الكتوبة المقدّسة، حيت كتظنّو بلّي عندكُم فيها الحياة الأبديّة، وْهِيَ الّي كتشهد لِلي. وْما بغيتو شي تجيو نْعندي باش تكون لكُم الحياة. "أنا ما كنقبل شي المجد من الناس. أمّا أنا كنعرفكُم بلّي ما عندكُم شي المحبّة د اللّٰه فيكُم. أنا جيت بِاسم بابا وْما رحّبْتو شي بيَّ. وَلكن إدا جا شي واحد يَخُر بِاسم نفسو، هَداك غَد ترحّبو بِه. كيفاش تقدرو تآمنو وانتُمَ كتقبلو المجد من بعضيّاتكُم، والمجد الّي كيجي من الإلَه الوحيد ما كتفتّشو شي عليه؟ ما تظنّو شي بلّي أنا غادي نشكي بِكُم قدّام الآب. كاين الّي كيشكي بِكُم، وْهُوَ موسى، الّي عملْتو فيه الرجا. حيت كَكان تيّقْتو موسى، كَكان تيّقْتوني حتّى أنا، حيت هُوَ كتب عليَّ. وَلكن إدا ما تيّقْتو شي الكتوبة ديالو، كيفاش غَد تتيّقو الكلام ديالي؟" من بعد هَد الشي، مشى يَسوع نْجهة يَخرى من البحَر د الجَليل، الّي هي البُحَيرة د طَبَريّة. وْتبعوه بزّاف د الناس حيت شافو العلامات الّي كان كيعملاْ في المراطين. في ديك الساعة طلَع يَسوع نواحد الجّبل وْݣلس تمّاك مع التلامد ديالو. كان عيد الفِصح د اليهود قريب. ملّي علّى يَسوع عينو وْشاف بزّاف د الناس ماجّين نْعندو، قال نْفيلِبُّس: "ماين غادي نشريو الخبز باش ياكلو هَدو؟" قال هَد الشي باش يجرّبوْ، حيت هُوَ عارف شنّو غادي يعمل. جاوبوْ فيلِبُّس: "ما غادي شي تكفيهُم ميتَين دينار د الخبز باش كُل واحد مِنّوم يشبّر شويِّش." قال لو واحد من التلامد ديالو، وْهُوَ أَنْدَراوس خاه د سِمْعان بُطْرُس: "كاين هنايَ معنا واحد العايل الّي عندو خمسة د الخبزات د الشعير وْجوج د الحوتات ستيتْوين، وَلكن شنّو غادي يقدّ نْهَد الناس؟" قال يَسوع: "ݣلّسو الناس." وْكان في ديك الموطَع بزّاف د الربيع، وْݣلسو الرجال، وْكان العدد ديالوم تقْريبًا خمس آلاف. ديك الساعة شبّر يَسوع الخبزات وْشكر وْفرّقوم على الّي هُمَ ݣالسين، وْهَيداك عاود مِن الحوتات قدّ ما بغاو. وْملّي شبعو، قال يَسوع نالتلامد ديالو: "جمعو الكسور الّي شاطو باش ما يضيع والو." جمعوهُم وْعمّرو طناشر قفّة د الكسور من الخمسة د الخبزات د الشعير الّي شاطو على الناس الّي كلاو. ملّي شافو الناس العلامة الّي عملاْ يَسوع، قالو: "هَدا هُوَ في الحقيقة النَّبي الّي كان غادي يجي نالدنيا." أمّا يَسوع ملّي عرف بلّي هُمَ مقرّرين باش يجيو ويدّيواه بالدراع ويعملوه مَلِك، مشى من جديد نالجّبل بوحدو. ملّي جات العشيّة، هوّدو التلامد ديالو نالبحَر، وْركبو في واحد الفلوكة وْكانو قاطعين البحَر نْكَفْرِناحوم. كان طاح أَسلّاس وْيَسوع باقي ما جا نْعندوم، هاج البحَر بْسباب واحد الريح قوي الّي كان كيسوط. ملّي قدّفو تقْريبًا خمسة أَوْلا ستّة د الكيلومترات، شافو يَسوع ماجي على رِجلو فوق البحَر وْكيقرّب نالفلوكة وْخافو. وْقالّوم: "أنا هُوَ، ما تخافو شي." بغاو يركّبو يَسوع في الفلوكة، وْوَصلَت الفلوكة دغيا نالبلاد فاين كانو ماشّين لِلاْ. ولّا غدّا الناس الّي كانو واقفين في جهة يَخرى د البحَر، شافو بلّي التلامد مشاو بوحدوم، حيت كانت تمّا غير فلوكة واحدة، وْيَسوع ما ركب شي فيها معهُم. وَلكن جاو شي فلايك يَخرين من طَبَريّة نالموطَع الّي كلاو فيه الخبز من بعدما شكر الرَّبّ، وْحيت شافو الناس بلّي يَسوع ما كاين شي تمّاك، ولا التلامد ديالو، ركبو في الفلايك وْجاو نْكَفْرِناحوم كيفتّشو على يَسوع. ملّي جبرو يَسوع في جهة يَخرى د البحَر، قالو لو: "آ المُعلّم، فوياخ جيتِ نْهنايَ؟" ردّ عليهُم يَسوع: "كنقول لكُم الحقّ، أنتُمَ كتفتّشو عليَّ ماشي حيت شفْتو العلامات، وَلكن حيت كليتو من الخبز وْشبعْتو. خدمو، وَلكن ماشي على الماكلة الّي كَتْفنا، وَلكن على الماكلة الّي غادي تبقا نالحياة الدايمة، الّي غادي يعطيكُم اِبن الإنسان، حيت اللّٰه الآب عمل عليه الطابع ديالو." قالو لو: "شنّو غادي نعملو باش نطبّقو أعْمال اللّٰه؟" ردّ يَسوع وْقالّوم: "العمل د اللّٰه هُوَ باش تآمنو بْهَداك الّي صيفطوْ." قالو لو: "شنّي هي العلامة الّي غادي تورّيها نّا باش نشوفوها وْنآمنو بك؟ شنّو غادي تعمل؟ جدودنا كلاو المَنَّ في الخلا فحال ما هُوَ مكتوب: «عْطاهُم خبز من السما باش ياكلو.»" قالّوم يَسوع: "كنقول لكُم الحقّ، ماشي موسى الّي عْطاكُم خبز من السما، وَلكن بابا الّي كيعطيكُم الخبز الحقيقي من السما. حيت خبز اللّٰه هُوَ الّي كينزل من السما وْكيعطي الحياة نالدنيا." قالو لو: "آ سيدي، عْطينا هَد الخبز دائمًا." قالّوم يَسوع: "أنا هُوَ خبز الحياة. أَي واحد الّي كيجي نْعندي ما غادي شي يجوع، والّي كيآمن بيَّ ما عُمرو غادي يعطش. "وَلكن أنا قُلْتْ لكُم بلّي واخّا شفْتوني، ما آمنْتو شي بيَّ. الناس كاملين الّي كيعطيهُم لي الآب غادي يجيو نْعندي، والّي كيجي نْعندي، ما غادي شي ندحيه. حيت أنا نزلْتْ من السما، ماشي باش نعمل الإرادة ديالي، وَلكن باش نعمل الإرادة د هَداك الّي صيفطني. وْهَدي هي الإرادة د الآب الّي صيفطني، بلّي كُل ما عْطاني ما يتلف لي مِنّو والو، وَلكن نردّوْ بالروح في النهار الأخير. حيت هَدي هي الإرادة د بابا، بلّي كُل واحد الّي كيشوف الِابن وْكيآمن بِه غادي تكون لو الحياة الأبديّة، وانا غادي نردّوْ بالروح في النهار الأخير." ديك الساعة بداو اليهود كيتشكّاو عليه حيت قال: "أنا هُوَ الخبز الّي نزل من السما." وْقالو: "واش ماشي هَدا هُوَ يَسوع بن يوسف الّي كنعرفو باباه ويمّاه؟ وْكيفاش كيقول دابا: «أنا نزلْتْ من السما؟»" ردّ عليهُم يَسوع: "ما تتشكّاو شي بيناتكُم، حتّى واحد ما يقدر يجي نْعندي غير إدا جبدوْ الآب الّي صيفطني، وانا غادي نردّوْ بالروح في النهار الأخير. مكتوب في الأَنْبياء: «غادي يكونو كاملين كيتعلّمو من اللّٰه.» حيت كُل واحد الّي كيسمع من الآب، وْكيتعلّم مِنّو، كيجي نْعندي. ما كيعني شي بلّي شي واحد شاف الآب، إلّا هَداك الّي ماجي من عند اللّٰه. هُوَ الّي شاف الآب. كنقول لكُم الحقّ، الّي كيآمن بيَّ عندو الحياة الأبديّة. أنا هُوَ خبز الحياة. جدودكُم كلاو المَنَّ في الخلا وْماتو. هَدا هُوَ الخبز الّي كينزل من السما باش ياكل مِنّو الإنسان وْما يموت شي. أنا هُوَ الخبز الحيّ الّي نازل من السما. إدا كلا شي واحد من هَد الخبز، غادي يعيش على الدوام. الخبز الّي غادي نعطيه أنا، هُوَ الجسد ديالي باش تحيا الدنيا." ديك الساعة تْدابزو اليهود بيناتوم، كيقولو: "كيفاش يقدر يعطينا هَد الرَّجل الجسد ديالو باش ناكلو؟" إدَن، قالّوم يَسوع: "كنقول لكُم الحقّ، إدا ما كليتو شي الجسد د اِبن الإنسان، وْشربْتو دمّو، ما غادي شي تكون فيكُم الحياة. الّي كياكل جسدي وْكيشرب دمّي عندو الحياة الأبديّة وانا غادي نردّوْ بالروح في النهار الأخير. حيت جسدي هُوَ ماكلة حقيقيّة وْدمّي هُوَ شراب حقيقي. الّي كياكل جسدي وْكيشرب دمّي كيتبت فيَّ وانا فيه. كيفْما صيفطني الآب الحيّ، وانا حيّ بالآب، هَيداك كُل واحد الّي كياكلني، هُوَ غادي يحيا بيَّ. هَدا هُوَ الخبز الّي نزل من السما، ماشي كيفْما كلاو جدودكُم المَنَّ وْماتو، وَلكن الّي كياكل هَد الخبز هُوَ غادي يعيش على الدوام." يَسوع قال هَد الشي كامل في بيت العبادة ملّي كان كيعلّم في كَفْرِناحوم. بزّاف من التلامد ديالو، ملّي سمعو هَد الشي، قالو: "هَد الكلام صعيب. شكون يقدر يسمعوْ؟" عرف يَسوع في نفسو بلّي التلامد ديالو كانو كيتشكّاو على هَد الشي وْقالّوم: "واش كيقلّقكُم هَد الشي؟ وْكيفاش إدا شفْتو اِبن الإنسان طالع نالموطَع فاين كان من قبل؟ الروح هُوَ الّي كيحيي، أمّا الجسد ما فيه حتّى نفَع. الكلام الّي كَنْتكلّم معكُم بِه هُوَ روح وْحياة، وَلكن كاينين البعض منكُم الّي ما كيآمنو شي." حيت يَسوع عرف من البداية شكون هُمَ الّي ما كيآمنو شي وْشكون هُوَ الّي غادي يسلّموْ. وْقال يَسوع: "على هَد الشي قُلْتْ لكُم بلّي حتّى واحد ما يقدر يجي نْعندي إدا ما اتّعطى لو شي من عند بابا." من ديك الوقت رجعو بزّاف من التلامد ديالو ناللَوري وْما بقاو شي كيمشيو معاه. قال يَسوع نالطناش: "واش حتّى أنتُمَ بغيتو تمشيو فحالكُم؟" ردّ عليه سِمْعان بُطْرُس: "يا رَبّي، نْعند مَن غادي نمشيو؟ عندك كلام الحياة الأبديّة. وْحنايَ آمنّا وْعرفْنا بلّي أنتينا هُوَ القدّوس د اللّٰه." ردّ عليهُم يَسوع: "واش ماشي أنا الّي اختارْتْكُم بالطناش بِكُم؟ واخّا هَيداك، واحد منكُم شيطان." قال هَد الشي على يَهودا بن سِمْعان الإسْخَريوطي، حيت هَدا هُوَ الّي غادي يسلّموْ وْهُوَ واحد من الطناش. من بعد هَد الشي كان يَسوع كيتمشّى في الجَليل، حيت ما بغى شي يمشي ناليَهوديّة، فاين اليهود كانو كيفتّشو كيفاش يقتلوه. كان عيد اليهود، عيد النُّوّالة قريب. وْقالو لو خوتو: "مْشي من هنايَ ناليَهوديّة باش يشوفو التلامد ديالك الأعْمال الّي كتعملاْ، حيت حتّى واحد ما كيعمل حتّى شي حاجة مخبّعة إدا بغى يشهّر بْراسو. إدا كُنْتِ كتعمل ديك الأُمور، ورّي نفسك نالدنيا." حيت حتّى الخوت ديالو ما كانو شي كيآمنو بِه. قالّوم يَسوع: "الوقت ديالي باقي ما جا شي، وَلكن الوقت ديالكُم دائمًا موجود. ما تقدر شي الدنيا تكْرَهكُم، وَلكن كتكرهني أنا، حيت كنشهد عليها بلّي الأعْمال ديالاْ قبيحة. طلعو أنتُمَ نالعيد. أنا باقي ما غادي شي نطلع، حيت الوقت ديالي باقي ما جا شي." قالّوم هَد الشي وْبقا في الجَليل. وَلكن ملّي كانو خوتو طالعين، حتّى هُوَ مشى نالعيد، ماشي ظاهر، وَلكن مخبّع. وْكانو اليهود كيفتّشو عليه في العيد وْكيقولو: "فاين هُوَ هَداك؟" وْكانت بين الناس واحد النميمة كبيرة عليه، البعض مِنّوم كيقولو بلّي هُوَ واحد الرَّجل مزيان، وْشي بعضين كيقولو: "لا، هُوَ كيتلّف الناس." وَلكن ما كان حتّى واحد كيهدَر عليه بالطايطاي بْسباب الخوف من اليهود. تسنّى يَسوع حتّى ݣاز النُّص د العيد، وْطلَع نْبيت المَقْدس وْكان كيعلّم. وْتعجّبو اليهود وْقالو: "كيفاش هَدا كيعرف الكتوبة وْهُوَ ماشي قاري؟" ردّ عليهُم يَسوع وْقال: "التعْليم ديالي ماشي منّي، وَلكن من هَداك الّي صيفطني. أَي واحد الّي بغى يعمل بإرادة اللّٰه غادي يعرف إدا كان التعْليم ديالي هُوَ من اللّٰه أَوْلا كنهدَر من نفسي. الشخض الّي كيهدَر من نفسو كيفتّش على المجد ديالو، أمّا الّي كيفتّش على المجد د هَداك الّي صيفطوْ، هُوَ صادق وْما فيه شي الظلم. "واش ما عْطاكُم شي موسى الشريعة؟ وْحتّى واحد منكُم ما كيعمل بِها. علاش كتفتّشو تقتلوني؟" ردّو عليه الناس وْقالو: "أنتينا مسْكون! شكون كيفتّش يقتلك؟" ردّ يَسوع وْقالّوم: "عملْتْ واحد المعْجزة وْتعجّبْتو كاملين. على هَد الشي عْطاكُم موسى الطهارة (واخّا هَدي ماشي من موسى، وَلكن من الجدود)، وانتُمَ في نهار السبت كتطهّرو الدكورة. وِادا كان الإنسان كيتطهّر في نهار السبت باش ما تْتبطّل شي الشريعة د موسى، علاش كتغضبو عليَّ حيت شافيت واحد الإنسان كامل في نهار السبت؟ ما تحكمو شي على المظْهر، وَلكن حكمو بالعدل." البعض من سكّان أُورُشَليم قالو: "واش ماشي هَدا هُوَ الّي كيفتّشو يقتلوه؟ راه هُوَ كيتكلّم قدّام الناس وْما كيقولو لو والو. واش الحكّام اقْتَنعو د بالصّحّ بلّي هَدا هُوَ المسيح؟ وَلكن هَدا كنعرفوه ماين خرج. أمّا ملّي غادي يجي المسيح، حتّى واحد ما غادي يعرفوْ ماين هُوَ." ملّي كان يَسوع كيعلّم في بيت المَقْدس، غوّت وْقال: "أنتُمَ كتعرفوني وْكتعرفو ماين أنا جيت! ما جيتْ شي من نفسي، وَلكن الّي صيفطني هُوَ حقيقي، الّي ما كتعرفوه شي أنتُمَ. أنا كنعرفوْ، حيت جيتْ من عندو وْهُوَ الّي صيفطني." ديك الساعة حاولو يشبّروه، وَلكن ما نزّل حتّى واحد يَدّو عليه، حيت الساعة ديالو باقّة ما وصلَتْ. وآمنو بِه بزّاف د الناس وْقالو: "ملّي يجي المسيح، واش غادي يعمل العلامات كتَر من الّي كيعمل هَد الرَّجل؟" سمعو الفرّيسيّين بلّي الناس كينمّمو عليه بْهَد الشي، وْصيفطو الفرّيسيّين والرؤساء د بيت المَقْدس شي د الحُرّاس باش يشبّروه. قالّوم يَسوع: "باقي غادي نكون معكُم شويا د الوقت، وْمن بعد غادي نمشي عند الّي صيفطني. غَد تفتّشو عليَّ، وَلكن ما غادي شي تجبروني، حيت فاين غادي نكون أنا، أنتُمَ ما تقدرو شي تجيو." قالو اليهود مع بعطوم: "فاين عوّال هَدا يمشي بَياش حنايَ ما نجبروه شي؟ واش عوّل يمشي عند المشتّتين بين اليونانيّين ويعلّم اليونانيّين؟ شنّو كيعني بْهَد الكلام: «غَد تفتّشو عليَّ، وَلكن ما غادي شي تجبروني، حيت فاين غادي نكون أنا، أنتُمَ ما تقدرو شي تجيو؟»" في النهار الأخير والكبير د العيد، يَسوع وقَف وْغوّت: "إدا عطش شي واحد، يجي نْعندي ويشرب. الّي كيآمن بيَّ، كيفْما قال الكتاب، غادي تجري من الداخل ديالو الويدان د الما الحيّ." وْقصَد بْكلامو الروح القُدُس الّي غادي يدّيواه هَدوك الّي كيآمنو بِه. حيت الروح كان باقي ما اتّعطى شي، وْحيت يَسوع كان باقي ما تمجّد شي. ملّي الزحام سمعو هَد الكلام، البعض مِنّوم قالو: "في الحقيقة هَدا هُوَ النَّبي." يَخرين قالو: "هَدا هُوَ المسيح." ويَخرين قالو: "ياك ما غادي شي يجي المسيح من الجَليل؟ واش ما قال شي الكتاب بلّي غادي يجي المسيح من الترّيكة د المَلِك داود وْمن بيت لَحم، القرية الّي جا منّاْ داود؟" وْبْسباب يَسوع تفرقو الناس. البعض مِنّوم بغاو يشبّروه، وَلكن ما نزّل حتّى واحد يَدّو عليه. رجعو الحُرّاس نْعند الرؤساء د بيت المَقْدس والفرّيسيّين، وْقالو لوم هَدو: "علاش ما جيبْتوه شي؟" ردّو الحرّاس: "عُمرو شي واحد ما تكلّم فحال هَد الإنسان." جاوبوهُم الفرّيسيّين: "واش حتّى أنتُمَ تلفْتو؟ ياك ما آمن بِه حتّى شي واحد من الحُكّام أَوْلا من الفرّيسيّين؟ بالعكس، هَد الناس الّي ما كيفهمو شي الشريعة، هُمَ ملْعونين." قالّوم نيقوديموس، واحد من الفرّيسيّين الّي مشى نْعند يَسوع من قبل: "واش الشريعة ديالنا كتحكم على واحد الإنسان من قبل ما نسمعو مِنّو وْنعرفو شنّو عمل؟" ردّو عليه وْقالو: "واش حتّى أنتينا من الجَليل؟ فتّش وْغادي تجبَر بلّي ما كاين حتّى شي نَبي الّي كيخرج من الجَليل." [وْمشى كُل واحد نالدار ديالو. وْمشى يَسوع نْجبل الزيتون. وْفي الصباح بكري، رجَع عاود نْبيت المَقْدس وْجاو نْعندو الشعب كامل وْݣلس كيعلّموم. جابو لو المُعلّمين د الشريعة والفرّيسيّين واحد المراة اتّقبطَتْ في الزنا، وْوقّفوها في الوسط، وْقالو نيَسوع: "آ المُعلّم، هَد المراة اتّقبطَتْ في اللحظة د الزنا. وْموسى وصّانا في الشريعة نرجمو النسا الّي فحال هَدي. وانتينا، شنّو كتقول؟" قالو هَد الشي باش يجرّبوه وْتكون عندوم شي سبّة باش يشكيو بِه. أمّا يَسوع قرّد وْبدا كيكتب بالصبَع ديالو في الرحبة. وْحيت بقاو كيسقصيواه، يَسوع وقَف وْقالّوم: "الّي بلا دنوب فيكُم يسبق ويسيّب عليها شي حجْرة." وْقرّد عاود وْزاد كيكتب في الرحبة. أمّا هُمَ، ملّي سمعو هَد الشي، خرجو واحد مورا واحد، الكبارين هُمَ في الُوّل. وْبقا يَسوع بوحدو والمراة واقفة في الوسط. وقَف يَسوع وْقالّاْ: "آ المراة، فاين هَدوك؟ واش ما حكم عليك حتّى واحد؟" قالت: "حتّى واحد، آ سيدي." قالّاْ يَسوع: "حتّى أنا ما كنحكم شي عليك. مشي وْما تعاود شي تدنب."] هدَر يَسوع معهُم عاود، وْقال: "أنا هُوَ ضَو الدنيا. أَي واحد الّي كيتبعني ما غادي شي يمشي في الظلام، وَلكن غادي يكون عندو ضَو الحياة." قالو لو الفرّيسيّين: "أنتينا كتشهد نْراسك، الشهادة ديالك ماشي حقيقيّة." ردّ يَسوع وْقالّوم: "إدا كُنْتْ كنشهد نْراسي، الشهادة ديالي حقيقيّة، حيت أنا كنعرف ماين جيتْ وْفاين ماشّي. أمّا أنتُمَ ما كتعرفو شي ماين جيتْ ولا فاين غادي نمشي. أنتُمَ كتحكمو على حسب الجسد، أمّا أنا ما كنحكم على حتّى واحد. وِادا كُنْتْ أنا كنحكم، الحُكم ديالي حقيقي، حيت أنا ماشي بوحدي، وَلكن أنا مع الآب، الّي صيفطني. وْمكتوب في الشريعة ديالكُم بلّي الشهادة د جوج د الناس هي حقيقيّة. أنا كنشهد نْراسي وْكيشهد لي الآب الّي صيفطني." قالو لو: "فاين هُوَ باباك؟" ردّ يَسوع: "أنتُمَ ما كتعرفوني، لا أنا ولا بابا. كون عرفْتوني، كون عرفْتو بابا حتّى هُوَ." هَد الكلام قالوْ يَسوع في الموطَع فاين كانو كينزّلو التبرّعات وْهُوَ كيعلّم في بيت المَقْدس. وْما شبّروْ حتّى واحد، حيت الساعة ديالو باقّة ما جات. عاود قالّوم يَسوع: "أنا غادي نمشي وانتُمَ غَد تفتّشو عليَّ، وَلكن غَد تموتو في دنوبكُم. فاين ماشّي أنا، أنتُمَ ما تقدرو شي تجيو." قالو اليهود: "واش كيفكّر ينْتَحر؟ حيت كيقول: «فاين غادي نمشي أنا، أنتُمَ ما تقدرو شي تجيو؟»" يَسوع قالّوم: "أنتُمَ من تحت، أمّا أنا من فوق. أنتُمَ من هَد الدنيا، أمّا أنا ماشي من هَد الدنيا. على ديك الشي قُلْتْ لكُم بلّي أنتُمَ غَد تموتو في دنوبكُم، حيت إدا ما آمنْتو شي بلّي أنا هُوَ، غَد تموتو في دنوبكُم." قالو لو: "شكون أنتينا؟" قالّوم يَسوع: "الّي قُلْتْ لكُم من البداية. عندي بزّاف د الأُمور الّي كنقولاْ وْكنحكم بِها عليكُم، وَلكن الّي صيفطني هُوَ حقيقي، وْديك الشي الّي سمعْتوْ مِنّو كنقولوْ نالدنيا." وَلكن ما فهمو شي بلّي كان كيهدَر على الآب. إدَن، قالّوم يَسوع: "ملّي ترفعو اِبن الإنسان، ديك الساعة غَد تفهمو بلّي أنا هُوَ وْما كنعمل حتّى حاجة من نفسي. وَلكن فحال ما علّمني بابا، بْديك الشي كنتكلّم. وْهَداك الّي صيفطني هُوَ معيَ، وْما خلّاني شي الآب بوحدي، حيت أنا دائمًا كنعمل الّي كيعجبوْ." ملّي هُوَ كان كيتكلّم بْهَد الشي، آمنو بِه بزّاف د الناس. قال يَسوع ناليهود الّي آمنو بِه: "إدا أنتُمَ تبتّو في كلامي، غَد تكونو التلامد ديالي د بالصّحّ، وْغَد تعرفو الحقّ والحقّ غادي يحرّركُم." ردّو عليه: "حنايَ درّيّة إبراهيم وْعُمرنا ما كُنّا عبيد نْحتّى واحد. كيفاش كتقول أنتينا: «أنتُمَ غَد تتحرّرو»؟" ردّ يَسوع: "كنقول لكُم الحقّ بلّي كُل واحد الّي كيعمل الدنوب هُوَ عبد الدنوب. العبد ما كيبقا شي في الدار على الدوام، أمّا الِابن هُوَ الّي كيبقا على الدوام. إدا حرّركُم الِابن، غَد تكونو د بالصّحّ أحْرار. "أنا عارف بلّي أنتُمَ الدرّيّة د إبراهيم، وَلكن كتفتّشو تقتلوني، حيت كلامي ما عندو شي موطَع فيكُم. أنا كنهدَر بْديك الشي الّي شفْتْ عند بابا. وانتُمَ في جهتكُم كتعملو ديك الشي الّي سمعْتوه من باباكُم." ردّو وْقالو لو: "بابانا هُوَ إبراهيم." قالّوم يَسوع: "كَكُنْتو أُوْلاد إبراهيم، كون عملْتو الأعْمال د إبراهيم. وَلكن دابا كتحاولو تقتلوني وانا واحد الإنسان الّي قال لكُم الحقّ، الّي سمعوْ من اللّٰه. هَد الشي ما عملوْ شي إبراهيم. أنتُمَ كتعملو الأعْمال د باباكُم." ديك الساعة قالو لو: "حنايَ ما خلقْنا شي من الزنا. عندنا بابا واحد وْهُوَ اللّٰه." قالّوم يَسوع: "كَكان اللّٰه باباكُم، كَكُنْتو تعزّوني، حيت أنا خرجْتْ من عند اللّٰه وْجيتْ، حيت ما جيتْ شي من نفسي، وَلكن هُوَ الّي صيفطني. علاش ما كتفهمو شي كلامي؟ حيت ما كتقدرو شي تسمعو كلامي. أنتُمَ من باباكُم إبْليس، وْبغيتو تعملو على حسب الشهوات د باباكُم. هُوَ كان قتّال من الُوّل وْما تبت شي في الحقّ، حيت ما فيه شي الحقّ. ملّي كيهدَر بالكدوب، كيهدَر حسب الطبيعة ديالو، حيت هُوَ كدّاب وْباباهُم د الكدوب. أمّا أنا، حيت كنقول لكُم الحقّ، ما كتآمنو شي بيَّ. شكون منكُم يقدر يتبّت عليَّ شي دنب؟ إدا كنقول الحقّ، علاش ما كتآمنو شي بيَّ؟ الّي هُوَ من اللّٰه كيسمع كلام اللّٰه. على ديك الشي أنتُمَ ما كتسمعو شي، حيت أنتُمَ ماشي من اللّٰه." ردّو عليه اليهود وْقالو لو: "واش ما عندنا شي الحقّ ملّي كنقولو بلّي أنتينا سامِري وْفيك واحد الجنّ شرّير؟" ردّ يَسوع: "أنا ما فيَّ شي جنّ شرّير، وَلكن كنوقّر بابا وانتُمَ كتحݣروني. أنا ما كنفتّش شي على المجد لِلي. كاين شي واحد الّي كيفتّش عليه وْكيحكم. كنقول لكُم الحقّ، الّي كيعمل بالكلام ديالي ما عُمرو غادي يشوف الموت." ديك الساعة قالو لو اليهود: "دابا عرفْنا بلّي فيك واحد الجنّ شرّير. مات إبراهيم والأَنْبياء، وانتينا كتقول: «الّي كيعمل بالكلام ديالي ما عُمرو غادي يدوق الموت.» واش أنتينا عظيم من بابانا إبراهيم الّي مات؟ والأَنْبياء ماتو. شنّو كتحسب راسك؟" ردّ يَسوع: "إدا كُنْتْ كنمجّد نفسي، المجد ديالي ما غادي يسْوا والو. بابا هُوَ الّي كيمجّدني، الّي كتقولو أنتُمَ بلّي هُوَ إلَهْكُم. وانتُمَ ما كتعرفوه شي، أمّا أنا كنعرفوْ. إدا قُلْتْ بلّي ما كنعرفوْ شي، غادي نكون كدّاب فحالكُم. وَلكن كنعرفوْ وْكنعمل بالكلام ديالو. باباكُم إبراهيم كان كيتسنّى فرحان باش يشوف النهار ديالي، وْفعلاً شافوْ وْفرح." قالو لو اليهود: "باقي ما عندك حتّى خمسين عام وانتينا واش شفْتِ إبراهيم؟" قالّوم يَسوع: "كنقول لكُم الحقّ، من قبل ما يكون إبراهيم، أنا كاين." ديك الساعة رفدو الحجار باش يرجموه، وَلكن يَسوع تخبّع وْخرج من بيت المَقْدس. ملّي كان ݣايز يَسوع، شاف واحد الرَّجل عمى، ملّي خلق وْهُوَ هَيداك. سقصاواه التلامد ديالو: "آ المُعلّم، شكون دنب، هَدا أَوْلا الوالِدين ديالو حتّى خلق عمى؟" جاوب يَسوع: "ما دنب لا هَدا ولا الوالِدين ديالو، وَلكن باش يظهرو أعْمال اللّٰه فيه. خصْنا نعملو الأعْمال د الّي صيفطني ملّي يكون باقي النهار. غادي يجي الليل فوياخ ما يقدر حتّى واحد يخدم. على بَيدْمن أنا في الدنيا، أنا الضَّو د الدنيا." قال هَد الشي وْبزق في الرحبة وْعمل من البزق الغيس وْطلى العينين د العمى بالغيس، وْقال لو: "مْشي تغسل في صهْريج سِلْوام" (الّي كيعني "مرسول"). وْمشى وْغسل وْرجع كيشوف. ديك الساعة الجيران ديالو والناس الّي كانو كيشوفوه من قبل ملّي كان كيسعا قالو: "واش ماشي هَدا هُوَ الّي كان كيݣلس كيسعا؟" البعض قالو: "هَدا هُوَ." ويَخرين قالو: "لا، غير كيشبه لو." أمّا هُوَ قال: "أنا هُوَ." قالو لو: "كيفاش تفتحو لك العينين ديالك؟" ردّ هُوَ وْقال: "ديك الرَّجل الّي مسمّي يَسوع عمل الغيس وْطلى بِه العينين ديالي وْقال لي: «مْشي نْصهْريج سِلْوام وْغسل.» وْمشيتْ وْغسلْتْ وْرجعْتْ كنشوف." قالو لو: "فاين هو؟" قال: "ما نعرف." جابو الرَّجل الّي كان عمى من قبل نْعند الفرّيسيّين. وْكان نهار السبت ملّي عمل يَسوع الغيس وْفتَح لو العينين ديالو. سقصاواه الفرّيسيّين من جديد كيفاش رجَع كيشوف. وْقالّوم: "عمل الغيس على العينين ديالي وْغسلْتْ وْدابا كنشوف." ديك الساعة قالو البعض من الفرّيسيّين: "هَد الرَّجل ماشي مِن اللّٰه، حيت ما كيوقّر شي نهار السبت." يَخرين قالو: "كيفاش يقدر واحد الرَّجل مُدْنب يعمل ديك العلامات؟" وْكانت بيناتوم واحد المدابزة. سقصاو عاود العمى: "وانتينا، شنّو ظهَر لك فيه، حيت فتَح لك عينِك؟" قال: "هو نَبي." إيوا، ما تيّقو شي اليهود بلّي هُوَ كان عمى وْرجَع كيشوف حتّى عيّطو على الوالِدين ديالو، وْسقصاوهُم وْقالو: "واش هَدا هُوَ ولدكُم الّي كتقولو خلق عمى؟ إدَن، كيفاش كيشوف دابا؟" ردّو الوالِدين ديالو وْقالو: "كنعرفو بلّي هَدا هُوَ الولد ديالنا وْبلّي خلق عمى، وَلكن كيفاش كيشوف دابا، ما كنعرفو شي، أَوْلا شكون الّي فتَح لو العينين ديالو ما كنعرفو شي. هُوَ كبير في السنّ، سقصيواه وْهُوَ غادي يهدَر بْنفسو." قالو الوالِدين هَد الشي حيت خافو من اليهود، حيت اليهود كانو اتَّفقو باش، إدا شي واحد اعْتَرف بلّي هَدا هُوَ المسيح، يتّرفض من بيت العبادة. على هَد الشي قالو الوالِدين: "هو كبير في السنّ، سقصيواه." ديك الساعة عيّطو عاود على الرَّجل الّي كان عمى، وْقالو لو: "عْطي المجد ناللّٰه! حنايَ كنعرفو بلّي هَد الرَّجل مُدْنب." وْهَداك جاوب: "ما كنعرف شي واش هُوَ مُدْنب أَوْلا لا، وَلكن حاجة واحدة كنعرفاْ، أنا كُنْتْ عمى وْدابا كنشوف." وْقالو لو: "شنّو عمل لك؟ كيفاش فتَح لك العينين ديالك؟" ردّ عليهُم: "عاد دابا قُلْتْ لكُم وْما سمعْتوني شي. علاش بغيتو تسمعو عاود؟ واش بغيتو حتّى أنتُمَ ترجعو التلامد ديالو؟" ديك الساعة زبّلو فيه وْقالو: "أنتينا تلْميد ديالو! أمّا حنايَ التلامد ديال موسى! كنعرفو بلّي اللّٰه تكلّم مع موسى، أمّا هَدا ما كنعرفو شي ماين هُوَ." جاوب الرَّجل وْقالّوم: "العجب! أنتُمَ ما كتعرفو شي ماين هُوَ وْهُوَ فتَح لي العينين ديالي! كنعرفو بلّي اللّٰه ما كيسمع شي نالمُدْنبـين. وَلكن، إدا كان شي واحد كيخاف اللّٰه وْكيعمل بالإرادة ديالو، كيسمع لو. عُمرنا ما سمعْنا بلّي شي واحد فتَح العينين د شي واحد الّي خلق عمى. إدا ما كان شي هَداك من عند اللّٰه، ما يقدر يعمل حتّى شي حاجة." جاوبو وْقالو لو: "أنتينا كامل خلقْتِ في الدنوب، وْدابا كتعلّمنا؟" وْجرّاو عليه. سمَع يَسوع بلّي طردو ديك الرَّجل، وْملّي جبروْ، سقصاه: "واش كتآمن بِابن الإنسان؟" ردّ هَدا وْقال: "شكون هو، آ سيدي، باش نآمن بِه؟" قال لو يَسوع: "أنتينا شفْتِه والّي كيهدَر معك، هُوَ هَداك." قال: "كنآمن، يا رَبّي." وْسجد لو. وْقال يَسوع: "على الحُكم جيتْ نْهَد الدنيا باش الّي ما كيشوفو شي يشوفو، والّي كيشوفو يرجعو عُميان." سمعو هَد الشي البعض من الفرّيسيّين الّي كانو معاه وْقالو لو: "واش حتّى حنايَ بُصْرا؟" قالّوم يَسوع: "كَكُنْتو بُصْرا، كون ما عندكُم شي الدنوب، وَلكن حيت دابا كتقولو: «حنايَ كنشوفو،» أنتُمَ باقّين في دنوبكُم." "كنقول لكُم الحقّ، الّي ما كيدخل شي من الباب د الزريبة د الغنم، وَلكن كيطلع من موطَع يَخُر، هُوَ سارق وْشفّار. وَلكن الّي كيدخل من الباب، هُوَ الراعي د الغنم. الحارس د الباب كيفتح لو والغنم كتسمع صوتو وْكيعيّط نالغنم ديالو بالِاسم ديالاْ وْكيخرّجاْ. وْملّي كيخرّج الغنم ديالو كاملة، كيسبق قدّاماْ والغنم كَتْـتبعوْ حيت كتعرف الصوت ديالو. أمّا البرّاني، ما غادي شي تـتبعوْ، وَلكن كتهرب مِنّو، حيت ما كتعرف شي الصوت د البرّانيّين." قالّوم يَسوع هَد المتال، وَلكن هَدوك ما فهمو شي شنّو كيقصد بِه. وْزاد وْقالّوم يَسوع: "كنقول لكُم الحقّ، أنا هُوَ الباب د الغنم. هَدوك كاملين الّي جاو قبل منّي كانو سرّاق وْشفّارة، وَلكن الغنم ما سمعَتْ شي لِلوم. أنا هُوَ الباب. إدا دخل شي واحد بيَّ، غادي ينجا ويدخل ويخرج ويجبر فاين يرعا. السارق كيجي غير باش يسرق ويدبح ويهلك، أمّا أنا جيت باش تكون عندوم الحياة، وْتكون هَد الحياة فضيلة! "أنا هُوَ الراعي المزيان، والراعي المزيان كيعطي نفسو من جهة الغنم. أمّا الّي هُوَ مكْري وْهُوَ ماشي الراعي، يعني الغنم ماشي ديالو، ملّي كيشوف الديب ماجي، كيخلّي الغنم وْكيهرب، والديب كيخطف الغنم وْكيشتّـتاْ. المكْري كيهرب حيت هُوَ مكْري وْما كيتهلّا شي في الغنم. أمّا أنا هُوَ الراعي المزيان. كنعرف الغنم ديالي والغنم ديالي كتعرفني، فحال الآب كيعرفني، هَيداك انا كنعرف الآب، وْكنعطي نفسي على الغنم. وْعندي غنم يَخرى الّي هي ماشي من هَد الزريبة. خصْني نجيباْ حتّى هي وْغادي تسمع صوتي، وْتكون قطعة واحدة والراعي ديالوم واحد. على ديك الشي كيعزّْني الآب، حيت كنسلّم نفسي باش نرفداْ من جديد. حتّى واحد ما كيزوّلاْ لي، وَلكن كنعطيها أنا بْخاطري. عندي القدرة باش نعطيها، وْعندي القدرة باش نرفداْ عاود. بابا هُوَ الّي عْطاني هَد الوَصيّة." عاود كانت المدابزة بين اليهود بْسباب هَد الكلام د يَسوع. قالو بزّاف مِنّوم: "فيه واحد الجنّ شرّير وْهُوَ ماشي بْعقلو. علاش كَتْـتصنّتو لو؟" يَخرين قالو: "هَد الكلام ماشي ديال واحد الحماق. واش يقدر واحد الجنّ يفتَح العينين د العُميان؟" كان عيد التجديد في أُورُشَليم وْكان فصل الشتا. وْكان يَسوع كيتمشّى في بيت المَقْدس في قوس سُليمان. دارو بِه اليهود وْقالو لو: "حتّى لاين غادي تخلّينا حَيرانين عليك؟ إدا أنتينا هُوَ المسيح، قولاْ نّا بوُضوح." ردّ عليهُم يَسوع: "أنا قُلْتْ لكُم وْما كتآمنو شي. الأعْمال الّي كنعملاْ بِاسم بابا، هي كتشهد لي. وَلكن أنتُمَ ما كتآمنو شي، حيت أنتُمَ ماشي من الغنم ديالي فحال ما قُلْتْ لكُم. الغنم ديالي كتسمع صوتي وانا كنعرفاْ وْهِيَ كَتْـتبعني. وانا كنعطيها الحياة الأبديّة وْما عُمراْ غادي تْتّهلك، ولا يخطفاْ حتّى واحد من يَدّي. بابا الّي عْطاها لي، هُوَ العظيم على كُل شي وْحتّى واحد ما يقدر يخطفاْ من يد بابا. أنا وْبابا واحد." عاود رفدو اليهود الحجار باش يرجمو يَسوع. وَلكن يَسوع قالّوم: "بزّاف د الأعْمال المزيانة ورّيتاْ لكُم من عند بابا. علاش من هَد الأعْمال غَد ترجموني؟" جاوبو اليهود: "ما كنرجموك شي على شي عمل مزيان، وَلكن على الكُفر، حيت أنتينا إنسان وْكتعمل نفسك اللّٰه." ردّ عليهُم يَسوع: "واش ماشي مكتوب في الشريعة ديالكُم: «أنا قُلْتْ بلّي أنتُمَ آلِهة»؟ إدا هَدوك الّي جا لوم الكلام من عند اللّٰه سمّاهُم اللّٰه آلِهة، (وما يقدر شي يتبطّل الكتاب المقدّس) علاش كتقولو نْهَداك الّي قدّسوْ الآب وْصيفطوْ نالدنيا: «أنتينا كتكفر حيت قُلْتِ: "أنا اِبن اللّٰه"»؟ إدا ما كنعمل شي الأعْمال د بابا، ما تآمنو شي بيَّ. وَلكن إدا كُنْتْ كنعملاْ، واخّا ما كتآمنو شي بيَّ، آمنو بالأعْمال باش تعرفو وْتآمنو بلّي الآب فيَّ وانا فيه." حاولو عاود يشبّروه، وَلكن فلت من يَدّوم. وْرجَع نْجهة يَخرى د الأُرْدُن نالموطَع فاين كان يوحَنّا كيغطّس في الُوّل، وْبقا تمَّاك. وْبزّاف د الناس الّي مشاو نْعند يَسوع قالو: "يوحَنّا ما عمل حتّى علامة، وَلكن كُل ما قال يوحَنّا على هَد الرَّجل كان حقيقي." وْبزّاف آمنو بِه في ديك الموطَع. كان واحد الرَّجل مريط، وْهُوَ لِعازَر من بيت عَنْيا، من قرية مَرْيَم وْمَرْثا أختاْ. (مَرْيَم، الّي كان خاها لِعازَر مريط، هي هَديك الّي دهنَت الرَّبّ بالعطر وْمسحَتْ رِجلو بْشعراْ.) صيفطو الخواتات باش يقولو نيَسوع: "يا رَبّي، الّي أنتينا كتعزّوْ، راه هُوَ مريط." ملّي سمَع يَسوع، قال: "هَد المرض ماشي نالموت، وَلكن نْمجد اللّٰه باش يتمجّد بِه اِبن اللّٰه." وْكانو مَرْثا واختاْ وْلِعازَر عزازين على يسوع. ملّي سمَع بلّي هُوَ مريط، بقا يومَين في الموطَع الّي كان فيه. من بعد ديك الشي قال نالتلامد ديالو: "آجيو نرجعو ناليَهوديّة." قالو لو التلامد: "آ المُعلّم، عاد دابا كانو اليهود كيفتّشو عليك باش يرجموك، وْبغيتِ تمشي عاود نْتمَّاك؟" ردّ يَسوع: "واش ما كاين شي طناشر ساعة في النهار؟ إدا كان شي واحد كيمشي بالنهار، ما كيعتر شي، حيت كيشوف الضَّو د هَد الدنيا، وَلكن الّي كيمشي بالليل كيعتر، حيت ما فيه شي الضَّو." قال هَد الشي، عاد قالّوم: "لِعازَر صاحبنا ناعس، وَلكن أنا غادي نمشي نفيّقوْ." قالو التلامد ديالو: "يا رَبّي، إدا نعَس، راه غادي يبرا." كان يَسوع كيهدَر على الموت د لِعازَر، وْهُمَ ظنّو بلّي هدَر على الراحة د النعاس. ديك الساعة قالّوم يَسوع بْصراحة: "لِعازَر مات، وانا فرحان لِلكُم، حيت ما كُنْتْ شي تمّاك ملّي مات، باش أنتُمَ تآمنو. وَلكن نمشيو نْعندو." وْتوما، الّي كيعيّطو لو التوام، قال نالتلامد خوتو: "نمشيو حتّى حنايَ باش نموتو معاه." ملّي وصَل يَسوع، جبروه كان في القبَر أربع أيّام. كانَتْ بيت عَنْيا قريبة من أُورُشَليم، تقْريبًا بْتلاتة د الكلومترات. جاو بزّاف د اليهود نْعند مَرْثا وْمَرْيَم باش يعزّيوهُم في خاهُم. ملّي سمعَتْ مَرْثا بلّي يَسوع ماجي، تعرّطَتْ لو، أمّا مَرْيَم بقات في الدار. قالت مَرْثا نيَسوع: "يا رَبّي، كَكُنْتِ هنايَ، كون ما مات شي خاي. وَلكن كنعرف بلّي حتّى نْدابا كُل شي الّي كتطلب من عند اللّٰه غادي يعطيه لك." قالّاْ يَسوع: "خاك غادي يرجع بالروح." قات لو مَرْثا: "أنا كنعرف بلّي غادي يرجع بالروح في القيامة في النهار الأخير." قالّاْ يَسوع: "أنا هُوَ القيامة والحياة، الّي آمن بيَّ، واخّا يموت، غادي يحيا. وْكُل واحد الّي هُوَ حيّ وْمآمن بيَّ ما عُمرو غادي يموت. واش كتآمن بْهَد الشي؟" قات لو: "إيّاه، يا رَبّي، أنا كنآمن بلّي أنتينا هُوَ المسيح اِبن اللّٰه الّي كان غادي يجي نالدنيا." ملّي قالت هَد الشي، مشات وْعيّطَتْ نْمَرْيَم أختاْ بالسرّ وْقات لاْ: "المُعلّم راه جا وْهُوَ كيعيّط لك." وْهِيَ، ملّي سمعَتْ، ناضت دغيا وْمشات نْعندو. وْكان يَسوع باقي ما دخل شي نالقرية، وَلكن كان في الموطَع فاين تعرّطَتْ لو مَرْثا. اليهود الّي كانو معها في الدار كيعزّيوها، ملّي شافو مَرْيَم ناضتْ دغيا وْخرجَتْ، تبعوها كيظنّو: "هي ماشّة نالقبَر باش تبكي تمّاك." مَرْيَم، ملّي جات نالموطَع فاين كان يَسوع وْشافتوْ، طاحتْ عند رِجلو وْقات لو: "يا رَبّي، كَكُنْتِ هنايَ، كون ما مات شي خاي." وْملّي شافاْ يَسوع كتبكي واليهود الّي جاو معها كيـبكيو، تنهّد وْتشوّش في نفسو وْقال: "فاين عملْتوه؟" قالو لو: "يا رَبّي، آجي تشوف." وْبكى يَسوع. قالو اليهود: "شوفو شحال عزّوْ." وْقالو البعض مِنّوم: "واش ما قدر شي هَدا الّي فتَح العينين د العمى يمنَع الموت ديالو؟" تنهّد عاود يَسوع في نفسو وْجا نالقبَر، الّي كان واحد الكهف مغطّي بواحد الحجْرة. قال يَسوع: "حيّدو الحجْرة." قات لو مَرْثا، أخت الميّت: "يا رَبّي، راه خنز، حيت هَدي أربع أيّام وْهُوَ تمّا." قالّاْ يَسوع: "واش ما قُلْتْ لك شي بلّي، إدا آمنْتِ، غادي تشوف مجد اللّٰه؟" حيّدو الحجْرة، وْعلّى يَسوع عينو نْفوق، وْقال: "آ بابا، كنشكرك حيت سمعْتِ لي. وانا عرفْتك كتسمعني دائمًا، وَلكن قُلْتْ هَد الشي بْسباب ديك الناس الّي حاضرين باش يآمنو بلّي أنتينا صيفطْتِني." ملّي قال هَد الشي، عَيّط بْصوت عالي: "آ لِعازَر، خْرج برّا!" وْخرج الّي كان ميّت، يَدّو وْرِجلو مربوطين بالكفن وْوَجهو ملوّي بواحد المنْديل. وْقالّوم يَسوع: "حلّوه وْخلّيواه يمشي." بزّاف من اليهود الّي جاو نْعند مَرْيَم شافو هَد الشي الّي عمل يَسوع وآمنو بِه. أمّا البعض مِنّوم مشاو نْعند الفرّيسيّين وْخبروهُم بْديك الشي الّي عمل يَسوع. ديك الساعة جمعو رُؤَساء المسؤولين والفرّيسيّين المَجْلس وْقالو لوم: "شنّو غادي نعملو؟ حيت هَد الرَّجل كيعمل بزّاف د العلامات. إدا خلّيناه هَيداك، غادي يآمنو بِه الناس كاملين وْغادي يجيو الرومانيّين ويزوّلو نّا هَد الموطَع والأُمّة ديالنا." واحد مِنّوم، وْهُوَ قَيافا، الّي كان رئيس المسؤولين في ديك العام، قالّوم: "أنتُمَ ما كتعرفو والو، وْما كتفكّرو شي بلّي حسَن لِنّا يموت رَجل واحد على مسبّة الشعب، وْما تْتّهلك شي الأُمّة كاملة." وْما قال شي هَد الشي من عندو، وَلكن حيت كان رئيس المسؤولين في ديك العام تنبّأ على يَسوع بلّي كان غادي يموت على الأُمّة، وْماشي على الأُمّة وْكان، وَلكن باش يجمع في أُمّة واحدة أُوْلاد اللّٰه الّي هُمَ مشتّتين. من ديك النهار اتَّفقو باش يقتلوه. على ديك الشي ما بقا شي يَسوع كيظهَر بين اليهود وَلكن بعّد نْواحد المنْطَقة قريبة من الخلا، واحد المدينة مسمّية أَفْرايم، وْبقا تمّاك مع التلامد ديالو. كان عيد الفِصح د اليهود قريب، وْطلعو بزّاف د الناس من ديك المنْطَقة نأُورُشَليم من قبل الفِصح باش يتنقّاو. وْكانو كيفتّشو على يَسوع وْهُمَ واقفين في بيت المَقْدس، قالو بيناتوم: "شنّو ظهَر لكُم، واش هُوَ ما غادي شي يجي نالعيد؟" وْكانو عْطاو رُؤَساء المسؤولين والفرّيسيّين الأمر باش، إدا عرف شي واحد فاين هو، يخبروم باش يشبّروه. من قبل عيد الفِصح بْستّ أيّام، جا يَسوع نْبيت عَنْيا فاين كان لِعازَر الّي كان مات وْبعتوْ من بين الميّتين، وْعملو لو تمَّاك واحد العشا، وْكانتْ مَرْثا خدّامة وْلِعازَر كان واحد من الّي ݣالسين معاه. شبّرَتْ مَرْيَم نُص كيلو د عطر الناردين الحُرّ، الغالي بزّاف، وْدهنَتْ الرِّجلين د يَسوع وْمسحَتوم بْشعراْ، وْتعمّرَت الدار بالريحة الطيّبة. قال يَهودا الإسْخَريوطي، واحد من التلامد ديالو الّي كان غادي يخونوْ: "علاش ما تبيع شي هَد العطر بْتلت مية دينار وْتعطيها نالمساكن؟" قال هَد الشي ماشي حيت كانو كيهمّوه المساكن، وَلكن حيت كان سارق وْكان عندو الصنْدوق وْهُوَ كيرفد الّي تسيّب فيه. ديك الساعة قال يَسوع: "خلّيوها. هي كتحافظ على هَد الشي نالنهار د الدفين ديالي، حيت المساكن غادي يكونو دائمًا معكُم، أمّا أنا ما غادي شي نبقا معكُم دائمًا." بزّاف د الناس من اليهود عرفوه تمَّاك، وْجاو ماشي بْسباب يَسوع وْكان، وَلكن باش يشوفو لِعازَر حتّى هُوَ، الّي بعتوْ يَسوع من بين الميّتين. وَلكن خطّطو رُؤَساء المسؤولين باش يقتلو لِعازَر حتّى هُوَ، حيت بزّاف د اليهود كانو كيمشيو وكيآمنو بيَسوع بْسبابو. ولّا غدّا الناس كاملين الّي جاو نالعيد سمعو بلّي يَسوع ماجي نأُورُشَليم، وْشبّرو الجريد د النخل وْخرجو يتعرّطو لو وْكانو كيعيّطو: "أُوصَنّا! مبروك هُوَ الّي ماجي بِاسم الرَّبّ، مَلِك إسْرائيل!" جبر يَسوع واحد الدحش وْركب عليه فحال ما هُوَ مكتوب: "ما تخاف شي، آ بنت صِهْيون. راه المَلِك ديالك ماجي راكب على دحش الحمارة." في الُوّل، التلامد ديالو ما فهمو شي الّي وقَع، وَلكن ملّي تمجّد يَسوع، في ديك الوقت تفكّرو بلّي هَد الحاجات مكتوبة عليه وْهُوَ قالاْ لوم. الناس الّي كانو مع يَسوع ملّي عَيّط على لِعازَر من القبَر وْبعتوْ من بين الميّتين، شهدو لو. على هَد الشي تعرّطو لو الناس، حيت سمعو بلّي عمل هَد العلامة. قالو الفرّيسيّين بيناتوم: "أنتُمَ ما كتصلحو نْوالو، شوفو كيفاش الدنيا كاملة كَتْـتبعوْ!" كانو شي د اليونانيّين بين الّي طلعو يعبدو في العيد. في ديك الوقت قرّبو هَدو نْعند فيلِبُّس، الّي هُوَ من بيت صَيدا د الجَليل، وْرغبوه كيقولو: "آ سيدي، بغينا نشوفو يَسوع." وْمشى فيلِبُّس وْقالاْ نأَنْدَراوس، وأَنْدَراوس وْفيلِبُّس خبرو يَسوع. ديك الساعة ردّ عليهُم يَسوع وْقال: "جات الساعة باش يتمجّد اِبن الإنسان. كنقول لكُم الحقّ، إدا ما طاحتْ شي الحبّة د الزرع في الأرض وْماتتْ، هي كتبقا بوحداْ، وَلكن إدا ماتتْ، كتجيب بزّاف د الغلّة. الّي كيعزّ نفسو غادي يخسراْ، والّي كيكره نفسو في هَد الدنيا، كيحفظاْ نالحياة الأبديّة. كُل واحد الّي بغى يخدمني خصّوْ يتبعني، وْفاين ما نكون أنا، تمّاك غادي يكون عبدي. وِادا شي واحد كيخدمني، الآب غادي يكرّموْ. "دابا نفسي مشوّشة. شنّو غادي نقول؟: آ بابا، نجّيني من هَد الساعة؟ وَلكن بْسباب هَد الشي جيتْ نْهَد الساعة! آ بابا، مجّد اِسمك!" ديك الساعة جا واحد الصوت من السما وْقال: "مجّدْتوْ وْغادي نمجّدوْ عاود." الناس الّي كانو واقفين وْسمعو الصوت قالو: "هَدا صوت الرعد،" ويَخرين قالو: "هدَر معاه شي ملاك." ردّ يَسوع وْقال: "ماشي بْسبابي جا هَد الصوت، وَلكن بْسبابكُم. الحُكم د هَد الدنيا وصَل دابا والرئيس د هَد الدنيا غادي يتّطرد برّا. إدا أنا اتّرفعْتْ من الأرض، غادي نجبد الناس كاملين نْعندي." قال هَد الشي باش يورّي كيفاش غادي يكون الموت ديالو. جاوبو الناس: "حنايَ سمعْنا من الشريعة بلّي المسيح غادي يبقا على الدوام، وْكيفاش أنتينا كتقول بلّي اِبن الإنسان خصّوْ يتّرفع؟ شكون هُوَ هَدا اِبن الإنسان؟" قالّوم يَسوع: "الضَّو باقي معكُم مُدّة قليلة. تمشّاو ملّي باقي عندكُم الضَّو باش ما ينزل شي عليكُم الظلام، حيت الّي كيمشي في الظلام ما كيعرف شي فاين ماشّي. ما دام عندكُم الضَّو، آمنو بالضَّو باش تكونو أُوْلاد الضَّو." تكلّم يَسوع بْهَد الشي وْمشى وْتخبّع عليهُم. وَلكن واخّا يَسوع عمل بزّاف د العلامات قدّاموم، ما آمنو شي بِه، باش يتكمّل ديك الشي الّي قال النَّبي إشَعْيا: "يا رَبّي، شكون تيّق الخبار ديالنا، وْلمّن ظهَر دراع الرَّبّ؟" على ديك الشي ما قدرو شي يآمنو، حيت قال إشَعْيا عاود: "هُوَ عمى لوم العينين وْردّ القلوبة ديالوم قاصحة باش ما يشوفو شي بْعينوم ويفطنو بْقلبوم ويرجعو، وانا نشافيهُم." قال إشَعْيا هَد الشي ملّي شاف مجدو وْتكلّم عليه. واخّا هَيداك، آمنو بيَسوع بزّاف من الحُكّام حتّى هُمَ، وَلكن بْسباب الفرّيسيّين ما اعْتَرفو شي بِه باش ما يطردوهُم شي من بيت العبادة. حيت بغاو الرضا د الناس كتَر من الرضا د اللّٰه. غوّت يَسوع بْصوت عالي وْقال: "الّي كيآمن بيَّ ما كيآمن شي بيَّ، وَلكن كيآمن بْهَداك الّي صيفطني، والّي كيشوفني، كيشوف الّي صيفطني. أنا هُوَ الضَّو الّي جيتْ نْهَد الدنيا باش كُل واحد الّي كيآمن بيَّ ما يبقا شي في الظلام. وِادا شي واحد كيسمع كلامي، وْما كيطيعوْ شي، أنا ما غادي شي نحكم عليه، حيت ما جيتْ شي باش نحكم على الدنيا، وَلكن باش ننجّي الدنيا. أَي واحد الّي كيرفضني وْما كيقبل شي كلامي، كاين الّي كيحكم عليه. الكلام الّي تكلّمْتْ بِه غادي يحكم عليه في النهار الأخير، حيت أنا ما تكلّمْتْ شي من عندي، وَلكن الآب الّي صيفطني، هُوَ الّي عْطاني الوَصيّة شنّو نقول وْباش نتكلّم. وانا كنعرف بلّي الوَصيّة ديالو هي الحياة الدايمة، والّي كنهدَر بِه، فحال ما قال لي الآب، هَيداك كنهدَر." قبل من عيد الفِصح كان يَسوع عارف بلّي الساعة ديالو جات باش يمشي من هَد الدنيا نْعند الآب. كان كيعزّ الناس ديالو الّي كانو في الدنيا، وْعزّوم بلا قياس. ملّي كانو كيتعشّاو، كان الشيطان كَيْوسْوس من قبل في القلب د يَهودا الإسْخَريوطي بن سِمْعان باش يخونوْ، وْعارف يَسوع بلّي الآب كان دفَع كُل شي في يَدّو، وْبلّي من عند اللّٰه خرج وْنْعند اللّٰه غادي يمشي. ناض من العشا وْحيّد الحوايج ديالو وْشبّر واحد الفوطة وْتحزّم بِها. وْمن بعد كبّ الما في السطال وْبدا كيغسل الرِّجلين د التلامد وْكيمسحوم بالفوطة الّي كان محزّم بِها. ملّي وصَل نْعند سِمْعان بُطْرُس، هَدا قال لو: "يا رَبّي، واش أنتينا غادي تغسل لي رِجلي؟" ردّ عليه يَسوع وْقال: "أنتينا ما كتفهم شي دابا هَد الشي الّي كنعمل، وَلكن من بعد غادي تفهم." قال لو بُطْرُس: "ما عُمرك غادي تغسل لي رِجلي." جاوبوْ يَسوع: "إدا ما غسلْتْ لِك شي، ما غادي شي يكون عندك نصيب معيَ." قال لو سِمْعان بُطْرُس: "يا رَبّي، ماشي رِجلي وْكان، وَلكن حتّى يَدّي وْراسي!" قال لو يَسوع: "الّي هُوَ مغسول، خصّوْ يغسل غير رِجلو، وْهُوَ طاهر كامل. وانتُمَ طاهرين، وَلكن ماشي كاملين بِكُم." حيت عرف يَسوع شكون غادي يخونوْ، وْعلى ديك الشي قال: "ماشي أنتُمَ كاملين طاهرين." من بعدما غسل لوم رِجلوم، لبس الحوايج ديالو وْݣلس عاود، وْقالّوم: "واش فهمْتو شنّو عملْتْ لكُم؟ أنتُمَ كتعيّطو لي المُعلّم والرَّبّ، وْكتقولو مزيان، حيت هَيداك أنا. وِادا أنا الرَّبّ والمُعلّم غسلْتْ لكُم الرِّجلين ديالكُم، خصْكُم أنتُمَ تغسلو الرِّجلين د بعضيّاتكُم، حيت عْطيتْكُم المتال باش تعملو حتّى أنتُمَ فحال ما عملْتْ لكُم أنا. كنقول لكُم الحقّ، العبد ماشي حسَن من سيّدو، ولا المرسول حسَن من الّي صيفطوْ. إدا عرفْتو هَد الشي، ها أنتُمَ مبروكين إدا عملْتوه. "ما كنهدَر شي عليكُم كاملين. أنا كنعرف الّي اختارْتوم، وَلكن باش يتحقّق الكتاب: «الّي كياكل معيَ الخبز رجَع ضدّي.» كنقول لكُم هَد الشي دابا من قبل ما يوقَع، باش ملّي يوقع، تآمنو بلّي أنا هُوَ. كنقول لكُم الحقّ، كُل واحد الّي كيقبل الّي صيفطني، كيقبلني أنا، والّي كيقبلني أنا، كيقبل الّي صيفطني." ملّي قال يَسوع هَد الشي، تشوّش في الروح ديالو وْشهد وْقال: "كنقول لكُم الحقّ، واحد منكُم غادي يخونْني." كانو التلامد كيشوفو في بعطوم حَيرانين على مَن كيهدَر. وْكان واحد من التلامد الّي كان يَسوع كيعزّوْ ݣالس قريب منّو. ديك الساعة شيّر لو سِمْعان بُطْرُس باش يسقصيه شكون هُوَ هَدا الّي كيتكلّم عليه. اتّكّا هَدا على الصدَر د يَسوع وْقال لو: "يا رَبّي، شكون هو؟" ردّ يَسوع: "هو هَداك الّي كنغمّس لو طريّف د الخبز وْكنعطيه لو." وْغمّس طريّف د الخبز وْعْطاه نِيَهودا الإسْخَريوطي بن سِمْعان. وْمن بعدما شبّر يَهودا ديك الطريّف، دخل فيه الشيطان. وْقال لو يَسوع: "الّي غادي تعملوْ، عملوْ دغيا." وَلكن ما فهم حتّى واحد من الّي ݣالسين علاش هدَر معاه هَيدا. وْحيت يَهودا كان مكلّف بالصنْدوق، البعض فكّرو بلّي يَسوع قال لو يشري الّي محْتاج نالعيد، أَوْلا يعطي شي حاجة نالمساكن. ملّي شبّر يَهودا الطريّف د الخبز كان الليل، وْخرج دغيا من تمّاك. وْملّي خرج يَهودا، قال يَسوع: "دابا عاد تمجّد اِبن الإنسان وْتمجّد اللّٰه فيه. إدا كان اللّٰه تمجّد فيه، غادي يمجّدوْ في نفسو، وْغادي يمجّدوْ دغيا. آ وْلادي، أنا باقي معكُم شويا د الوقت. غَد تفتّشو عليَّ، وَلكن كنقول لكُم دابا فحال الّي قُلْتْ ناليهود: «فاين غادي نمشي أنا، ما تقدرو شي تجيو أنتُمَ.» كنعطي لكُم واحد الوَصيّة جديدة: عزّو بعضيّاتكُم. فحال ما كَنْعزّْكُم أنا، خصْكُم حتّى أنتُمَ تعزّو بعضيّاتكُم. هَيداك غادي يعرفو الناس كاملين بلّي أنتُمَ التلامد ديالي، إدا عندكُم محبّة بيناتكُم." قال لو سِمْعان بُطْرُس: "يا رَبّي، فاين ماشّي؟" ردّ يَسوع: "فاين غادي نمشي أنا، ما تقدر شي تـتبعني دابا، وَلكن غادي تـتبعني من بعد." قال لو بُطْرُس: "يا رَبّي، علاش ما نقدر شي نـتبعك دابا؟ أنا مستعدّ نضَحّي بْنفسي عليك." ردّ عليه يَسوع: "واش تقدر تضَحّي بْنفسك عليَّ؟ كنقول لك الحقّ، من قبل ما يصيّح الفرّوج، غادي تنكرني تلاتة د المرّات. "ما يتشوّش شي قلبكُم. أنتُمَ كتآمنو باللّٰه، آمنو بيَّ حتّى أنا. في الدار د بابا كاينين بزّاف د البيوت. إدا ما كان شي هَيدا، كَكُنْتْ قُلْتاْ لكُم. أنا ماشّي باش نوجّد لكُم واحد الموطَع. وِادا مشيتْ وْوجّدْتْ لكُم الموطَع، غادي نجي مرّة تانية وْندّيكُم نْعندي باش تكونو حتّى أنتُمَ في الموطَع فاين غادي نكون أنا. وانتُمَ كتعرفو الطريق نالموطَع فاين غادي نمشي أنا." قال لو توما: "يا رَبّي، ما كنعرفو شي فاين غادي تمشي أنتينا، وْكيفاش نقدرو نعرفو الطريق؟" قال لو يَسوع: "أنا هُوَ الطريق والحقّ والحياة، حتّى واحد ما يقدر يجي نْعند الآب من غير بيَّ. كون عرفْتوني، كون عرفْتو بابا حتّى هُوَ. وْمن دابا راه عرفْتوه وْشفْتوه." قال لو فيلِبُّس: "يا رَبّي، ورّي نّا الآب وْبركة علينا." قال لو يَسوع: "شحال د الوقت وانا معكُم وْما عرفْتِني شي، آ فيلِبُّس؟ الّي شافني أنا شاف الآب، وْكيفاش كتقول أنتينا: «ورّي نّا الآب؟» واش ما كتآمن شي بلّي أنا في الآب والآب فيَّ؟ الكلام الّي كنهدَر معكُم بِه، ما كنهدَر شي بِه من راسي، وَلكن الآب الّي ساكن فيَّ هُوَ الّي كيعمل الأعْمال. تيّقوني بلّي أنا في الآب والآب فيَّ، أَوْلا تيّقوني على الأعْمال بْنفساْ. "كنقول لكُم الحقّ، الّي كيآمن بيَّ، الأعْمال الّي كنعملاْ أنا، غادي يعملاْ حتّى هُوَ وْغادي يعمل كبَر منّاْ، حيت أنا راجع نْعند الآب. وْكُل شي الّي طلبْتو بِاسمي غادي نعملوْ باش يتمجّد الآب في الِابن. أَي حاجة الّي طلبْتوها منّي بِاسمي، أنا غادي نعملاْ. "إدا كتعزّوني، عملو بالوَصايا ديالي. وانا غادي نطلب الآب وْهُوَ غادي يعطيكُم واحد المُعَزّي يَخُر باش يرافقكُم دائمًا، روح الحقّ، الّي ما تقدر شي الدنيا تقبلوْ، حيت ما كتشوفوْ شي ولا كتعرفوْ. وأمّا أنتُمَ كتعرفوه، حيت هُوَ ساكن معكُم وْغادي يكون فيكُم. ما غادي شي نخلّيكُم يتامى. أنا غادي نجي نْعندكُم. من دابا شويا الدنيا ما غادي شي تشوفني، أمّا أنتُمَ غَد تشوفوني. حيت أنا حيّ، حتّى أنتُمَ غَد تحياو. في ديك النهار غَد تعرفو بلّي أنا في بابا وانتُمَ فيَّ وانا فيكُم. كُل واحد الّي عندو الوَصايا ديالي وْكيعمل بِها، هُوَ الّي كيعزّْني، والّي كيعزّْني غادي يعزّوْ بابا وانا غادي نعزّوْ وْغادي نظهّر لو راسي." قال لو يَهودا، ماشي الإسْخَريوطي: "يا رَبّي، علاش غادي تظهّر نفسك لِنّا وْما تظهّراْ شي نالدنيا؟" ردّ يَسوع وْقال لو: "إدا عزّْني شي واحد، غادي يعمل بْكلامي، وْغادي يعزّوْ بابا، وْغادي نجيو نْعندو حنايَ وْنسكنو معاه. كُل واحد الّي ما كيعزّْني شي ما كيعمل شي بالكلام ديالي. والكلام الّي كتسمعوه ماشي ديالي، وَلكن د الآب الّي صيفطني. قُلْتْ لكُم هَد الشي وانا معكُم، أمّا المُعَزّي، الروح القُدُس، الّي غادي يصيفطوْ الآب بِاسمي، هُوَ غادي يعلّمكُم كُل شي وْغادي يفكّركُم بْكُل ما قُلْتْ لكُم. "كنخلّي لكُم الهنا، وْسلامي كنعطيه لكُم. ماشي فحال ما كتعطي الدنيا كنعطيكُم أنا. ما يتشوّش شي القلب ديالكُم وْما يخاف شي. سمعْتو بلّي قُلْتْ لكُم: «أنا ماشّي فحالي وْغادي نرجع نْعندكُم.» إدا كُنْتو كتعزّوني، خصْكُم تفرحو، حيت قُلْتْ لكُم بلّي أنا ماشّي نْعند الآب، حيت الآب عظيم منّي. وْقُلْتْ لكُم هَد الشي دابا قبل ما يوقَع باش، ملّي يوقَع، تآمنو. ما غادي شي نزيد نهدَر معكُم بزّاف، حيت الرئيس د هَد الدنيا ماجي وْما عندو حتّى شي حاجة عليَّ. وَلكن باش تفهم الدنيا بلّي أنا كنعزّ الآب، وْكيفْما وصّاني الآب، هَيداك كنعمل. نوضو، نمشيو من هنايَ! "أنا هُوَ الدالية الحقيقيّة وْبابا هُوَ الربّاع. الربّاع كيحيّد كُل غصن فيَّ الّي ما كيجيب شي الغلّة. وْكُل غصن الّي كيجيب الغلّة، كينقّيه باش يجيب الغلّة كتَر. أنتُمَ دابا نقيّـين بْسباب الكلام الّي تكلّمْتْ معكُم بِه. تبتو فيَّ وانا فيكم. فحال الغصن ما يقدر شي يجيب الغلّة من نفسو إدا ما تبت شي في الدالية، حتّى أنتُمَ، إدا ما تبتّو شي فيَّ، ما تقدرو شي تجيبو الغلّة. أنا هُوَ الدالية وانتُمَ الأغْصان. كُل واحد الّي كيتبت فيَّ، وانا فيه، غادي يجيب بزّاف د الغلّة، حيت بلا بيَّ ما تقدرو شي تعملو والو. أَي واحد الّي ما كيتبت شي فيَّ غادي يتسيّب على برّا، وْغادي يْـيـبس فحال شي غصن، وْغادي يجمعوه ويسيّبوه في العافية ويتّحرق. إدا تبتّو فيَّ وْتبت الكلام ديالي فيكُم، طلبو الّي بغيتو ويكون لكُم. في هَد الشي غادي يتمجّد بابا: ملّي تجيبو بزّاف د الغلّة، وْتكونو التلامد ديالي. "كيفْما عزّْني الآب، هَيداك كنعزّْكُم حتّى أنا. تبتو في المحبّة ديالي. إدا عملْتو بالوَصايا ديالي، غَد تْتبتو في المحبّة ديالي، فحال ما عملْتْ أنا بالوَصايا د بابا وْكَنْتبت في المحبّة ديالو. هدَرْتْ معكُم بْهَد الأُمور باش الفرْحة ديالي تـتبت فيكُم وْتـتكمّل الفرْحة ديالكُم. "هَدي هي الوَصيّة ديالي، بلّي تعزّو بعضيّاتكُم كيفْما كنعزّْكُم أنا. حتّى واحد ما عندو محبّة كبَر من هَدي، باش يضحّي بْنفسو من جهة صحابو. أنتُمَ صحابي إدا عملْتو الّي وصّيتْكُم بِه. ما نعاود شي نسمّيكُم عبيد، حيت العبد ما كيعرف شي شنّو كيعمل سيّدو. وَلكن أنا سمّيتْكُم صحاب، حيت خبرْتْكُم بْكُل شي الّي سمعْتْ من عند بابا. أنتُمَ ما اختارْتوني شي، وَلكن أنا اختارْتْكُم، وْكلّفْتْكُم باش تمشيو وْتجيبو الغلّة، وْتبقا الغلّة ديالكُم باش كُل شي الّي كتطلبوه من عند الآب بِاسمي، يعطيه لكُم. بْهَد الشي كنآمركُم، باش تعزّو بعضيّاتكُم. "إدا كانت الدنيا كتكرَهكُم، عَرفو بلّي هي كرهَتْني من قبل ما كرهَتْكُم. كَكُنْتو من الدنيا، كَكانت الدنيا عزّتْ الّي هُمَ ديالاْ. وَلكن حيت أنتُمَ ماشي من الدنيا، وْبالعكس، أنا اختارْتْكُم مِنّاْ، على ديك الشي كَتْكرَهكُم الدنيا. تفكّرو الكلام الّي قُلْتْ لكُم: «العبد ماشي حسَن من سيّدو.» إدا تعدّاو عليَّ، غادي يتعدّاو عليكُم حتّى أنتُمَ. أَوْلا إدا عملو بْكلامي، غادي يعملو حتّى بْكلامكُم. وَلكن هَد الشي كامل غادي يعملوه بِكُم بْسباب اِسمي، حيت ما كيعرفو شي الّي صيفطني. كون ما كُنْتْ شي جيت وْتكلّمْتْ معهُم، كون ما كان شي عندوم شي دنب. وَلكن دابا ما عندوم شي عدر على الدنوب ديالوم. الّي كيكرَهني أنا، كيكرَه بابا حتّى هُوَ. كون ما عملْتْ شي فوسط منّوم الأعْمال الّي ما عملاْ حتّى شي واحد من غيري، كون ما كان شي عندوم شي دنب. وَلكن دابا شافو وْكرهوني، أنا وْبابا. وَلكن كان هَد الشي باش يتحقّق الكلام الّي مكتوب في الشريعة ديالوم: «كرهوني بلا سبب.» "ملّي يجي المُعَزّي الّي غادي نصيفطوْ لكُم من عند الآب، روح الحقّ الّي ماجي من عند الآب، هُوَ غادي يشهد لي، وْغَد تشهدو حتّى أنتُمَ، حيت كُنْتو معيَ من البداية. "تكلّمْتْ معكُم بْهَد الأُمور باش ما تطيحو شي. غادي يطردوكُم من بيوت العبادة، وْماجّة الساعة الّي فيها كيظنّ هَداك الّي كيقتلكُم بلّي كيقدّم شي خدمة ناللّٰه. وْغادي يعملو بِكُم هَد الشي، حيت ما عرفو شي الآب وْما عرفوني شي. وَلكن كنتكلّم معكُم بْهَد الشي باش، ملّي تجي الساعة، تفكّرو بلّي أنا قُلْتوْ لكُم. وْما قُلْتْ لكُم شي هَد الشي في البداية، حيت كُنْتْ معكُم. وَلكن دابا أنا ماشّي نْعند الّي صيفطني وْحتّى واحد منكُم ما كيسقصيني: «فاين غادي تمشي؟» وْحيت قُلْتْ لكُم هَد الشي، الغبينة عمّرَتْ قلبكُم. وَلكن كنقول لكُم الحقّ، خير لكُم نمشي، حيت إدا ما مشيتْ شي، ما غادي شي يجي نْعندكُم المُعَزّي. وَلكن إدا مشيتْ، غادي نصيفطوْ لكُم. وْملّي يجي هُوَ، غادي يوبّخ الدنيا على الدنوب وْعلى التقوى وْعلى الحُكم. على الدنوب، حيت ما كيآمنو شي بيَّ، وْعلى التقوى، حيت أنا ماشّي نْعند الآب وْما غادي شي تشوفوني. وْعلى الحُكم، حيت اتّحكم على الرئيس د هَد الدنيا. "باقي عندي بزّاف ما نقول لكُم، وَلكن ما تقدرو شي تـتحمّلوه دابا. وَلكن ملّي يجي روح الحقّ، هُوَ غادي يرشدكُم نالحقّ كامل، حيت ما غادي شي يتكلّم من نفسو، وَلكن كُل حاجة غادي يسمعاْ غادي يهدَر بِها، ويخبركُم بالحاجات الّي ماجّة. هَداك غادي يمجّدني، حيت غادي يسمع من عندي ويخبركُم بِه. كُل شي الّي عند الآب، هُوَ ديالي. على ديك الشي قُلْتْ لكُم: «غادي يسمع من عندي ويخبركُم بِه.» "من دابا شويّش ما غادي شي تشوفوني، وْمن بعد شويّش عاود غَد تشوفوني." ديك الساعة البعض من التلامد ديالو قالو مع بعطوم: "شنّو هَد الشي الّي كيقول نّا؟: «من دابا شويّش ما غادي شي تشوفوني وْمن بعد شويّش عاود غَد تشوفوني،» حيت «أنا ماشّي نْعند الآب.»" قالو: "شنّو بغى يقصد بْهَد الشويّش. ما كنعرفو شي شنّو كيقول." عرف يَسوع بلّي بغاو يسقصيواه، وْقالّوم: "واش كتسقصيو بيناتكُم حيت قُلْتْ: «من دابا شويّش ما غادي شي تشوفوني وْمن بعد شويّش عاود غَد تشوفوني؟» كنقول لكُم الحقّ، أنتُمَ غَد تبكيو وْتنوّحو، أمّا الدنيا غادي تفرح. أنتُمَ غَد تحزنو، وَلكن الحزن ديالكُم غادي يرجع فرْحة. المراة ملّي كتولد، عنداْ الوجَع، حيت الساعة ديالاْ جات. وَلكن من بعدما كيخلق الصبي، ما كَتْـتفكّر شي عاود الوجَع بْسباب الفرْحة، حيت تزاد واحد الإنسان في الدنيا. وْحتّى أنتُمَ فحالاْ، دابا عندكُم الحزن، وَلكن ملّي نشوفكُم عاود، غادي يفرح قلبكُم، وْحتّى واحد ما غادي يزوّل مِنْكُم هَد الفرْحة. وْفي ديك النهار ما غادي شي تسقصيوني على حتّى حاجة. كنقول لكُم الحقّ، كُل شي الّي كتطلبوه من عند الآب بِاسمي، غادي يعطيه لكُم. حتّى نْدابا ما طلبْتو والو بِاسمي. طلبو وْغَد تدّيو، باش تكون الفرْحة ديالكُم كاملة. "تكلّمْتْ معكُم على هَد الشي كامل بالأمْتال، وَلكن غادي تجي الساعة الّي ما غادي شي نهدَر معكُم فيها مرّة يَخرى بالأمْتال، وَلكن غادي نخبركُم على الآب بالطايطاي. في ديك النهار غَد تطلبو بِاسمي، وْما كنقول لكُم شي بلّي أنا غادي نطلب الآب من جهتكُم، حيت الآب بْنفسو كيعزّْكُم، حيت كتعزّوني وآمنْتو بلّي أنا خرجْتْ من عند اللّٰه. خرجْتْ من عند الآب وْجيتْ نالدنيا، وْغادي نخلّي الدنيا من جديد وْنرجع نْعند الآب." قالو لو التلامد ديالو: "ها أنتينا دابا كتهدَر واضح وْما كتقول حتّى متال. دابا كنعرفو بلّي أنتينا عارف كُل شي وْما كتحْتاج شي يسقصيك حتّى واحد. على ديك الشي كنآمنو بلّي أنتينا خرجْتِ من عند اللّٰه." ردّ عليهُم يَسوع: "واش دابا كتآمنو؟ راها الساعة ماجّة وْجات دابا وْفيها غَد تْـتشتّـتو كُل واحد في جهتو وْتخلّيوني بوحدي. وَلكن بالحقّ أنا ماشي بوحدي، الآب معيَ. تكلّمْتْ معكُم بْهَد الشي باش يكون عندكُم فيَّ سَلام. في الدنيا غادي يكون عندكُم ضيق، وَلكن تشجّعو، أنا غلبْتْ الدنيا." تكلّم يَسوع بْهَد الشي وْعلّى عينو نالسما وْقال: "آ بابا، جات الساعة. مجّد اِبنك باش اِبنك يمجّدك، فحال ما عْطيتِ لو السلْطة على البشر كاملين باش يعطي الحياة الأبديّة نْهَدوك الّي عْطيتِهُم لو. وْهَدي هي الحياة الدايمة، بلّي يعرفوك أنتينا الإلَه الحقيقي الوحيد وْيَسوع المسيح الّي صيفطْتِه. أنا مجّدْتك على الارض، والعمل الّي عْطيتِني باش نعملوْ، كمّلْتوْ. وْدابا، آ بابا، مجّدني عندك بالمجد الّي كان عندي ملّي كُنْتْ معك من قبل ما تكون هَد الدنيا. "أنا بيّنْتْ اِسمك نالناس الّي عْطيتِني من الدنيا. كانو ديالك وْعْطيتِهُم لي، وْهُمَ عملو بالكلام ديالك. دابا عرفو بلّي كُل ما عْطيتِني ماجي من عندك، حيت الكلام الّي عْطيتِني عْطيتوْ لِلوم، وْهُمَ قبلوه وْعرفو بلّي أنا د بالصّحّ خرجْتْ من عندك، وآمنو بلّي أنتينا صيفطْتِني. "أنا كنطلب على مسبّتوم. ما كنطلب شي على الدنيا، وَلكن على هَدو الّي عْطيتِني، حيت هُمَ ديالك. كُل شي الّي ديالي ديالك، والّي ديالك ديالي، وانا تمجّدْتْ بِهُم. أنا ما غادي شي نبقا في الدنيا، أمّا هَدو باقين في الدنيا وانا ماجي نْعندك. آ الآب القدّوس، هَدو الّي عْطيتِني حافظ عليهُم في الِاسم ديالك باش يكونو واحد فحال ما حنايَ واحد. "ملّي كُنْتْ باقي معهُم، حافظْتْ بْقوّة الاِسم ديالك على هَدو الّي عْطيتِني. حضيتوم، وْما اتّهلك مِنّوم حتّى واحد، من غير اِبن الهلاك، باش يتكمّل الكتاب. أمّا دابا، أنا ماجي نْعندك، وْكنـتكلّم بْهَد الشي وانا باقي في الدنيا باش تكون عندوم الفرْحة ديالي كاملة فيهُم. أنا عْطيتوم الكلام ديالك والدنيا كرهَتوم، حيت هُمَ ماشي من الدنيا، فحالي أنا ماشي من الدنيا. ما كنطلب شي منّك باش تحيّدوم من الدنيا، وَلكن باش تحضيهُم من الشَّرّ. هُمَ ماشي من الدنيا، فحالي أنا ماشي من الدنيا. قدّسوم في الحقّ: الكلام ديالك هُوَ حقّ. فحال ما صيفطتِني نالدنيا، هَيداك حتّى أنا صيفطْتوم نالدنيا، وْبْسبابوم كنقدّس نفسي باش يكونو حتّى هُمَ مقدّسين في الحقّ. "ما كنطلب شي على مسبّة هَدو وْكان، وَلكن حتّى على الّي غادي يآمنو بيَّ بالكلام ديالوم، باش يكونو كاملين واحد، كيفْما أنتينا فيَّ، يا بابا، وانا فيك، باش يكونو واحد فينا حتّى هُمَ، باش تآمن الدنيا بلّي أنتينا صيفطْتِني. أنا عْطيتوم المجد الّي عْطيتِني باش يكونو واحد، فحال ما حنايَ واحد. أنا فيهُم وانتينا فيَّ باش يكونو مكمّلين في الوحدانيّة، باش تعرف الدنيا بلّي أنتينا صيفطْتِني، وْكتعزّوم كيفْما كتعزّْني أنا. "آ بابا، بغيتْ هَدو الّي عْطيتِني يكونو معيَ فاين ما نكون أنا، باش يشوفو المجد الّي عْطيتِني، حيت أنتينا كُنْتِ كتعزّْني قبل ما تْـتّخلق الدنيا. آ بابا العادل، الدنيا ما عرفَتك شي، وَلكن أنا عرفْتك، وْهَدو عرفو بلّي أنتينا صيفطْتِني. وْعرّفْتوم اِسمك، وْغادي نعرّفوم بِه، باش تكون فيهُم المحبّة الّي حبّيتِني بِها، وْنكون أنا فيهُم." من بعدما قال يَسوع هَد الكلام، خرج مع التلامد ديالو وْقطَع وادي قَدْرون، فاين كان واحد الجّنان، وْدخل لو مع التلامد ديالو. كان يَهودا الّي خانوْ كيعرف الموطَع، حيت يَسوع اتّجمع تمّاك بزّاف د المرّات مع التلامد ديالو. ادّى يَهودا واحد المجموعة د العسْكر والحُرّاس من عند رُؤَساء المسؤولين والفرّيسيّين، وْمشى نْتمّاك بالمشاعل واللامْبات والسناح. واخّا يَسوع عارف بْكُل ديك الشي الّي غادي يوقَع لو، خرج نْعندوم وْقالّوم: "على مَن كتفتّشو؟" جاوبوه: "على يَسوع الناصِري." قالّوم يَسوع: "أنا هُوَ." وْكان يَهودا الّي سلّموْ حتّى هُوَ واقف معهُم. ملّي يَسوع قالّوم: "أنا هُوَ،" رجعو ناللَوري وْطاحو في الرحبة. عاود سقصاهُم: "على مَن كتفتّشو؟" وْقالو: "على يَسوع الناصِري." جاوب يَسوع: "أنا قُلْتْ لكُم بلّي أنا هُوَ. وِادا كتفتّشو عليَّ أنا، خلّيو هَدو يمشيو فحالوم،" باش يتكمّل القول الّي قال يَسوع: "الّي عطيتِني ما اتّهلك مِنّوم حتّى واحد." سِمْعان بُطْرُس، الّي كان عندو واحد السيف، سلّوْ وْضرَب بِه العبد د رئيس المسؤولين وْقطّع لو الودْنينة ديالو د الّيمين، وْكان اِسم العبد مَلْخُس. ديك الساعة قال يَسوع نْبُطْرُس: "ردّ السيف ديالك نْجواه. الكاس الّي عْطاني الآب، واش ما نشربوْ شي؟" ديك الساعة المجموعة د العسْكر والقايد والحُرّاس د اليهود قبطو يَسوع وْكتّفوه، وادّاواه نْعند حَنّان في الُوّل، حيت كان نسيب قَيافا، الّي كان رئيس المسؤولين في ديك العام. كان قَيافا هُوَ الّي نصَح اليهود بلّي حسَن يموت رَجل واحد على مسبّة الشعب. كان سِمْعان بُطْرُس وْواحد التلْميد يَخُر كيتبعو يَسوع، وْحيت كان ديك التلْميد معروف عند رئيس المسؤولين، دخل مع يَسوع نالساحة د الدار ديال رئيس المسؤولين. أمّا بُطْرُس كان واقف في الباب على برّا. وْخرج التلْميد يَخُر الّي كان معروف عند رئيس المسؤولين، وْهدَر مع العسّاسين د الباب وْدخّل بُطْرُس. قالت واحد الخدّامة عسّاسة نْبُطْرُس: "واش ماشي حتّى أنتينا من التلامد د هَد الرَّجل؟" قال هو: "لا، ماشي أنا." وْكانو العبيد والحُرّاس واقفين حدا الفحم الّي شعلو، حيت كان البرد وْكانو كيسخنو. وْبُطْرُس حتّى هُوَ كان واقف معهُم كيسخن. ديك الساعة سقصى رئيس المسؤولين يَسوع على التلامد وْعلى التعْليم ديالو. ردّ عليه يَسوع: "أنا تكلّمْتْ مع الدنيا بْصراحة. علّمْتْ في كُل وقت في بيت العبادة وْفي بيت المَقْدس فاين كيتّجمعو اليهود كاملين، وْما قُلْتْ حتّى حاجة في السِّرّ. علاش كتسقصيني أنا؟ سقصي هَدوك الّي سمعو الكلام ديالي، خصّوم يعرفو شنّو قُلْتْ!" وْملّي قال يَسوع هَد الشي، طرشوْ واحد من الحُرّاس الّي كان واقف وْقال لو: "واش هَيدا كتجاوب رئيس المسؤولين؟" ردّ عليه يَسوع: "إدا تكلّمْتْ بالغلط، ورّيني الغلط ديالي. وِادا تكلّمْتْ كلام صحيح، علاش كتضربني؟" ديك الساعة صيفطوْ حَنّان مربوط نْعند قَيافا رئيس المسؤولين. إيوا، سِمْعان بُطْرُس كان واقف كيسخن، وْقالو لو: "واش ماشي حتّى أنتينا من التلامد ديالو؟" وْنكر وْقال: "لا، ماشي أنا." قال واحد من العبيد د رئيس المسؤولين، وْهُوَ من العائلة د الرَّجل الّي قطّع لو بُطْرُس الودنينة: "واش ما شفْتك شي معاه في الجّنان؟" نكر بُطْرُس عاود، وْفي هزيزة صيّح الفرّوج. من بعد، ادّاو يَسوع من عند قَيافا نْدار المخْزن، وْحيت كان الفجر، ما دخلو شي نْدار المخْزن باش ما يتنجّسو شي وْباش يقدرو ياكلو خروف الفِصح. ديك الساعة خرج بيلاطُس نْعندوم وْقال: "شْمن شكاية كتقدّمو على هَد الرَّجل؟" جاوبو وْقالو لو: "إدا ما كان شي كيعمل الشَّرّ، راه ما كُنّا شي نجيبوه لك." ديك الساعة قالّوم بيلاطُس: "ادّيواه أنتُمَ وْحكمو عليه بالشريعة ديالكُم." وْقالو لو اليهود: "حنايَ ما عندنا شي السلْطة باش نقتلو حتّى واحد." وقَع ديك الشي باش يتكمّل القول د يَسوع ملّي وصَف الموت ديالو كيفاش غادي يكون. دخل بيلاطُس عاود نْدار المخْزن وْعَيّط نيَسوع وْقال لو: "واش أنتينا هُوَ مَلِك اليهود؟" ردّ عليه يَسوع: "واش كتقول هَد الشي من عندك أَوْلا يَخرين قالو لك عليَّ؟" ردّ عليه بيلاطُس: "واش أنا يهودي؟ شعبك وْرُؤَساء المسؤولين هُمَ الّي سلّموك لِلي. شنّو عملْتِ؟" ردّ يَسوع: "المَمْلكة ديالي ماشي من هَد الدنيا. كَكانت مَمْلكتي من هَد الدنيا، كَكانو الخدّامة ديالي حاربو باش يمنعو اليهود يسلّموني. وَلكن المَمْلكة ديالي ماشي من هنايَ." ديك الساعة قال لو بيلاطُس: "إدَن، واش أنتينا مَلِك؟" ردّ يَسوع: "أنتينا كتقول بلّي أنا مَلِك. على هَد الشي اتّولدْتْ وْعلى هَد الشي جيتْ نالدنيا باش نشهد بالحقّ. كُل واحد الّي هُوَ من الحقّ كيسمع الصوت ديالي." قال لو بيلاطُس: "شنّو هُوَ الحقّ؟" وْملّي قال هَد الشي، خرج عاود نْعند اليهود وْقالّوم: "أنا ما جبرْتْ فيه حتّى شي عيب. وَلكن حيت عندكُم العادة باش نطلق لكُم شي واحد في عيد الفِصح، واش بغيتوني نطلق لكُم مَلِك اليهود؟" وْغوّتو كاملين وْقالو: "ما تطلق شي هَدا، وَلكن طلق باراباس!" وْكان باراباس واحد السارق. ديك الساعة شبّر بيلاطُس يَسوع وْآمر باش يجلدوه. العسْكر ضفرو واحد التاج د الشوك وْعملوه فوق راسو وْلبّسو لو لباس ملوكيّ صَبري، وْكانو كيقرّبو لو وْكيقولو: "السلام عليك، آ مَلِك اليهود." وْكانو كيطرشوه. خرج بيلاطُس عاود وْقالّوم: "ها انا غادي نخرّجوْ لكُم باش تعرفو بلّي أنا ما جبرْتْ فيه حتّى شي عيب." ديك الساعة خرج يَسوع لابس التاج د الشوك واللباس الصَّبري، وْقالّوم بيلاطُس: "ها هُوَ الرَّجل." وْملّي شافوه رُؤَساء المسؤولين والحُرّاس، غوّتو وْقالو: "صلّبوْ، صلّبوْ!" قالّوم بيلاطُس: "ادّيواه أنتُمَ وْصلّبوه، حيت أنا ما جبرْتْ فيه حتّى شي عيب." ردّو عليه اليهود: "عندنا واحد الشريعة وْبِها لازم يموت، حيت عمل راسو اِبن اللّٰه." ملّي سمَع بيلاطُس هَد الكلام، زاد الخوف ديالو. وْدخل عاود نْدار المخْزن وْقال نيَسوع: "ماين أنتينا؟" أمّا يَسوع ما جاوبوْ شي. إدَن، قال لو بيلاطُس: "واش ما غادي شي تهدَر معيَ؟ واش ما كتعرف شي بلّي عندي السلْطة باش نصلّبك والسلْطة باش نطلقك؟" ردّ يَسوع: "ما عندك حتّى شي سُلْطة عليَّ إدا ما كانت شي اتّعطات لك من فوق. على ديك الشي هَداك الّي سلّمني لِلِك عندو الدنب العظيم." من ديك الوقت كان بيلاطُس كيحاول يطلقوْ، وَلكن اليهود غوّتو، كيقولو: "إدا طلقْتِ هَدا، إدَن أنتينا ماشي صاحب قَيصَر. كُل واحد الّي كيعمل راسو مَلِك، هُوَ ضدّ قَيصَر." ملّي سمَع بيلاطُس هَد الكلام، خرّج يَسوع على برّا، وْݣلس على الكرسي د الحُكم في واحد الموطَع مسمّي "الرصيف" وْبالعبرانيّة "ڭَبّاثا." كان النهار د التوْجاد د الفِصح، وْكان تقْريبًا الظُّهر، وْقال ناليهود: "ها هُوَ المَلِك ديالكُم." وْهَدو غوّتو: "ادّيه، ادّيه، صلّبوْ." قالّوم بيلاطُس: "واش نصلّب المَلِك ديالكُم؟" جاوبو رُؤَساء المسؤولين: "ما عندنا حتّى مَلِك، من غير قَيصَر." ديك الساعة بيلاطُس دفعوْ لوم باش يصلّبوه، وادّاواه. وْخرج يَسوع وْهُوَ رافد الصليب ديالو نالموطَع الّي مسمّي موطَع الجُمْجُمة، وْبالعبرانيّة كيقولو لو "ݣُلْݣُثة،" وْصلّبوه تمّاك. وْصلّبو معاه جوج يَخرين، واحد على الّيمين ويَخُر على الشمال وْيَسوع في الوسط. ديك الساعة كتب بيلاطُس في واحد اللوحة وْعلّقوها على الصليب، مكتوب فيها: "يَسوع الناصِري مَلِك اليهود." بزّاف د اليهود قراو هَد الكتابة، حيت الموطَع فاين تصْلب يَسوع كان قريب من المدينة، وْكانت مكتوبة بالعبرانيّة واللاتينيّة واليونانيّة. قالو رُؤَساء المسؤولين د اليهود نْبيلاطُس: "ما تكتب شي «مَلِك اليهود،» وَلكن «هو قال: أنا مَلِك اليهود.»" ردّ بيلاطُس: "الّي كتبْتْ، راني كتبْتوْ." إيوا، ملّي العسْكر صلّبو يَسوع، شبّرو الحوايج ديالو وْقسّموها على أربعة د القسمات، واحدة القسمة نْكُل عسْكري. وْشبّرو القميص ديالو وْكان هَد القميص بلا خياطة، توب واحد من فوق حتّى نْتحت. ديك الساعة قالو مع بعطوم: "ما نقسموه شي، وَلكن نعملو عليه القُرْعة باش نعرفو لِمّن غادي يكون." هَد الشي كان باش يتكمّل الكتاب الّي كيقول: "قسّمو الحوايج ديالي بيناتوم وْعلى اللباس ديالي سيّبو القُرْعة." والعسْكر عملو هَد الشي. كانت حدا الصليب د يَسوع يمّاه، واخْتاْ د يمّاه، وْمَرْيَم المراة د كِلوبا، وْمَرْيَم المَجْدَليّة. ملّي شاف يَسوع يمّاه وْحداها التلْميد الّي كان كيعزّوْ، قال نيمّاه: "آ المراة، هَدا هُوَ اِبنك." وْقال نالتلْميد: "هَدي هي يمّاك." وْمن ديك الساعة ادّاها التلْميد نالدار ديالو. من بعد هَد الشي، عرف يَسوع بلّي كُل شي تكمّل، وْباش يتكمّل الكتاب، قال: "فيَّ العطش." كانت تمّا واحد الردومة معمّرة بالخلّ، فزّݣو واحد السبونْخة بالخلّ وْعملوها على واحد القصبة وْقرّبوها نْدُقمو. ملّي يَسوع قبل الخلّ، قال: "كُل شي تكمّل." وْحنى راسو وْسلّم الروح ديالو. كان النهار د التوجاد د الفِصح واليهود ما بغاو شي الجُتّات يبقاو على الصليب في نهار السبت، حيت هَد النهار كان السبت الكبير عندوم، وْطلبو من بيلاطُس باش يتهرّسو الرِّجلين د المصْلوبـين ويتحيّدو من تمّاك. جاو العسْكر وْهرّسو الرِّجلين د الُوّل وْدْ التاني الّي تصلبو مع يَسوع. ملّي قرّبو نْعند يَسوع وْشافوه بلّي كان ميّت، ما هرّسو لو شي الرِّجلين ديالو. وَلكن واحد من العسْكر طعنوْ في جنبو بواحد الحرْبة وْفي ديك اللحظة خرج الدم والما. والّي شاف هَد الشي شهد والشهادة ديالو هي حقيقيّة، وْهُوَ كيعرف بلّي كيقول الحقّ باش تآمنو حتّى أنتُمَ. حيت هَد الشي وقَع باش يتكمّل الكتاب: "حتّى شي عطم منّو ما تهرّس." وْكيفْما كيقول واحد النصّ يَخُر: "غادي يشوفو في هَداك الّي طعنوه." من بعد هَد الشي كامل، يوسف الّي من الرامة، الّي كان واحد التلْميد سرّي د يَسوع بْسباب الخوف من اليهود، طلب من بيلاطُس الإدن باش يدّي الجُتّة د يَسوع. واتَّفق بيلاطُس، وْمشى يوسف وادّى الجسد. جا نيقوديموس حتّى هُوَ، الرَّجل الّي مشى من قبل نْعند يَسوع في الليل، وْجاب معاه واحد الخليط د المسك الحرّ والعود، تقْريبًا تلاتين كيلو. ديك الساعة ادّاو الجُتّة د يَسوع وْكفّنوه بالكفن وْعملو لو العطر، فحال ما هي العادة د اليهود في الدفين. كان في الموطَع الّي تصْلب فيه يَسوع واحد الجّنان وْفي الجّنان واحد القبَر جديد الّي عُمرو ما تدفن فيه حتّى واحد. وْتمّاك نزّلو يَسوع بْسباب التوجاد د الفِصح د اليهود، حيت القبَر كان قريب. النهار الحد في الصباح بكري، جات مَرْيَم المَجْدَليّة نالقبَر في أسلّاس، وْشافت الحجْرة محيّدة من القبَر. ديك الساعة جرّات وْجات نْعند سِمْعان بُطْرُس وْنْعند التلْميد يَخُر الّي كان يَسوع كيعزّوْ، وْقات لوم: "ادّاو الرَّبّ من القبَر وْما عرفْنا شي فاين عملوه." ديك الساعة خرج بُطْرُس والتلْميد يَخُر وْمشاو نالقبَر، وْكانو كيجريو مع بعطوم. وْسبق التلْميد يَخُر بُطْرُس وْوصَل هُوَ الُوّل نالقبَر. حنى وْشاف الكفن منزّل، وَلكن ما دخل شي. جا سِمْعان بُطْرُس موراه وْدخل نالقبَر وْشاف الكفن منزّل، والمنْديل الّي كان على راسو ماشي منزّل مع الكفن، وَلكن مطْوي في موطَع يَخُر بوحدو. ديك الساعة دخل التلْميد يَخُر حتّى هُوَ، يعني، الّي جا هُوَ الُوّل نالقبَر، وْشاف وآمن. حيت باقي ما فهمو شي الكتاب الّي كيقول بلّي كان لازم يتّبعت من بين الميّتين. من بعد، رجعو التلامد فحالوم. أمّا مَرْيَم كانت على برّا حدا القبَر كتبكي. وْملّي كانت كتبكي، حنات باش تشوف فوسط القبَر. وْشافت جوج د الملائكة بالحوايج البُيَط ݣالسين واحد عند الراس ويَخُر عند الرِّجلين فاين كان الجسد د يَسوع منزّل. وْقالو لاْ: "آ المراة، علاش كتبكي؟" قات لوم: "حيت ادّاو رَبّي وْما كنعرف شي فاين عملوه." ملّي قالت هَد الشي، دارتْ ناللَوري وْشافتْ يَسوع واقف تمّاك، وْما عرفَتوْ شي بلّي هُوَ يَسوع. قالّاْ يَسوع: "آ المراة، علاش كتبكي؟ على مَن كتفتّش؟" هي ظنَّتْ بلّي هُوَ الربّاع، وْقات لو: "آ سيدي، إدا كُنْتِ أنتينا الّي ادّيتِه، قول لي فاين عملْتِه وانا غادي نمشي موراه." قالّاْ يَسوع: "آ مَرْيَم." وْدارتْ هي وْقات لو بالآراميّة: "رَبّوني!" الّي كيعني "آ المُعلّم." قالّاْ يَسوع: "ما تحاديني شي، حيت أنا باقي ما طلعْتْ شي نْعند بابا. وَلكن مْشي نْعند خوتي وْقولّوم بلّي أنا طالع نْعند بابا ديالي وْباباكُم وإلَهي وإلَهْكُم." مشاتْ مَرْيَم المَجْدَليّة وْخبرَت التلامد بلّي شافت الرَّبّ وْبلّي قالّاْ هَد الشي. ملّي وصَل الليل د النهار الُوّل في السيمانة، كانو التلامد مجموعين والبيبان مشدودين بْسباب الخوف من اليهود، وْجا يَسوع وْوقَف في الوسط وْقالّوم: "سلام عليكُم." وْملّي قال هَد الشي، ورّاهُم اليَدّين والجنب ديالو، وْفرحو التلامد ملّي شافو الرَّبّ. ديك الساعة قالّوم يَسوع عاود: "سلام عليكُم. كيفْما صيفطني الآب، هَيداك غادي نصيفطكُم أنا." وْملّي قال هَد الشي، نفَخ وْقالّوم: "اسْتَقبلو الروح القُدُس. الناس الّي غفرْتو لوم الدنوب ديالوم، غادي يتّغفرو، والّي حصرْتوهُم في الدنوب ديالوم، غادي يبقاو محْصورين." وَلكن توما، واحد من الطناش، الّي مسمّي "التوام،" ما كان شي معهُم ملّي جا يَسوع. قالو لو التلامد يَخرين: "شفْنا الرَّبّ." وْقالّوم: "إدا ما شفْتْ شي الأتر د المسامر في اليَدّين ديالو، وْعملْتْ الصبَع ديالي في الأتر د المسامر، وْعملْتْ يَدّي في جنبو، ما غادي شي نآمن." من بعد تمن أيّام، كانو التلامد ديالو عاود في الدار، وْكان توما معهُم. ديك الساعة جا يَسوع، واخّا البيبان كانو مشدودين، وْوقَف في الوسط وْقالّوم: "سلام عليكُم." من بعد قال نْتوما: "مدّ الصبَع ديالك نْهنايَ وْشوف اليَدّين ديالي. قرّب يَدّك وْعملاْ في الجنب ديالي، وْما تشكّ شي وَلكن آمن." ردّ توما وْقال لو: "رَبّي وإلَهي." قال لو يَسوع: "حيت شفْتِني عاد آمنْتِ؟ مبْروكين الّي ما شافو شي وْكيآمنو." يَسوع عمل بزّاف د العلامات يَخرين قدّام التلامد ديالو الّي ماشي مكتوبة في هَد الكتاب، أمّا هَدو الّي مكتوبـين تْكتبو باش تآمنو بلّي يَسوع هُوَ المسيح اِبن اللّٰه، وْباش، ملّي تآمنو، تكون عندكُم الحياة بالِاسم ديالو. من بعد هَد الشي، ظهّر نفسو عاود نالتلامد ديالو حدا البُحَيرة د طَبَريّة. ها كيفاش وقَع: كان سِمْعان بُطْرُس وْتوما، الّي مسمّي "التوام،" وْنَثَنائيل، الّي هُوَ من قانا د الجَليل، وْولاد زَبَدي، وْجوج يَخرين من التلامد ديالو مع بعطوم. قالّوم سِمْعان بُطْرُس: "أنا غادي نمشي نصيّد الحوت." قالو لو: "حتّى حنايَ غادي نمشيو معك." خرجو من تمّاك وْدخلو نالفلوكة، وَلكن في ديك الليلة ما صيّدو والو. وْملّي طلَع النهار، ظهَر يَسوع على الحاشية د البحَر، وَلكن التلامد ديالو ما عرفو شي بلّي هُوَ يَسوع. ديك الساعة سقصاهُم يَسوع: "آ وْلادي، واش عندكُم ما تاكلو؟" جاوبوه: "لا." قالّوم: "سيّبو الشبكة على الّيمين د الفلوكة وْغَد تجبرو." وسيّبوها وْما قدرو شي يجبدوها من الكتْرة د الحوت. ديك الساعة التلْميد الّي كان يَسوع كيعزّوْ قال نْبُطْرُس: "هُوَ الرَّبّ!" ملّي سِمْعان بُطْرُس سمَع بلّي هُوَ الرَّبّ، لبس الحوايج ديالو، حيت كان عريان، وْسيّب راسو في البحَر. والتلامد يَخرين جاو بالفلوكة كيجرّو الشبكة د الحوت، حيت ما كانو شي بعادين من البرّ، غير ميتَين دراع تقْريبًا. ملّي خرجو نالبرّ، شافو تمَّا الجمر مشعول والحوت منزّل عليه والخبز. قالّوم يَسوع: "جيبو من الحوت الّي عاد صيّدْتو." طلَع سِمْعان بُطْرُس وْخرّج الشبكة نالبرّ معمّرة بالحوت الكبيرة، كانو مية وْتلاتة وْخمسين حوتة. واخّا كان بزّاف د الحوت، الشبكة ما تقطّعَتْ شي. قالّوم يَسوع: "آجيو تفطرو." وْحتّى واحد من التلامد ما زعَم يسقصيه: شكون أنتينا؟، حيت عرفوه بلّي هُوَ الرَّبّ. جا يَسوع وْشبّر الخبز وْعْطاها لوم، والحوت حتّى هُوَ. هَدي كانت المرّة التالتة الّي ظهَر فيها يَسوع نالتلامد ديالو من بعدما اتّبعت من الميّتين. من بعدما فطرو، قال يَسوع نْسِمْعان بُطْرُس: "آ سِمْعان بن يونا، واش أنا عزيز عليك كتَر من هَدو؟" قال لو: "إيّاه، يا رَبّي، أنتينا كتعرف بلّي أنا كنعزّك." قال لو يَسوع: "وكّل الخرفان ديالي." عاود سقصاه مرّة تانية: "آ سِمْعان بن يونا، واش أنا عزيز عليك؟" وْقال لو: "إيّاه، يا رَبّي، أنتينا كتعرف بلّي أنا كنعزّك." قال لو: "رعا الغنم ديالي." وْسقصاه مرّة تالتة: "آ سِمْعان بن يونا، واش أنا عزيز عليك؟" وْحزن بُطْرُس ملّي قال لو نالمرّة التالتة "واش أنا عزيز عليك؟" وْقال لو: "يا رَبّي، أنتينا كتعرف كُل شي. كتعرف بلّي أنا كنعزّك." قال لو يَسوع: "وكّل الغنم ديالي. كنقول لك الحقّ، ملّي كُنْتِ صغير، كُنْتِ كتحزّم نُصِّك وْكُنْتِ كتمشي فاين ما بغيتِ. وَلكن ملّي غادي تكون عڭوز، غادي تمدّ يَدّك نواحد يَخُر وْغادي يحزّم لك ويدّيك نْشي موطَع الّي ما بغيتِه شي." قال يَسوع هَد الشي وْهُوَ كيعني كيفاش غادي يكون الموت الّي بِها بُطْرُس غادي يمجّد اللّٰه. وْملّي قال هَد الشي، قال لو: "تبَعني." ملّي دار بُطْرُس، شاف التلْميد الّي كان يَسوع كيعزّوْ تابعوم، وْهُوَ بْنفسو الّي في العشا اتّكّا على صدرو وْقال لو: "يا رَبّي، شكون هُوَ الّي غادي يخونك؟" ملّي شافوْ بُطْرُس، قال نيَسوع: "يا رَبّي، وْهَدا، شنّو غادي يوقع لو؟" قال لو يَسوع: "إدا أنا بغيتوْ يبقا حتّى نجي، واش شغلك؟ تبَعْني أنتينا." وْعلى هَد الشي تشاع هَد الكلام بين الخوت بلّي ديك التلْميد ما غادي شي يموت. وَلكن يَسوع ما قال لو شي بلّي ما غادي شي يموت، وَلكن قال: "إدا أنا بغيتوْ يبقا حتّى نجي، واش شغلك؟" هَدا هُوَ التلْميد الّي كيشهد بْهَد الشي وْكتبوْ. وْكنعرفو بلّي الشهادة ديالو هي حقيقيّة. وْبزّاف د الحاجات يَخرين الّي عملاْ يَسوع، إدا كتبوهُم كاملين واحدة واحدة، كنظنّ بلّي هَد الكتوبة ما يتّسَعو شي في العالم. الكلام الُوّل كتبْتوْ، يا ثاوْفيلُس، على كُل حاجة الّي يَسوع بدا كيعملاْ وْكيعلّم بِها، حتّى نالنهار الّي اتّرفع فيه من بعدما وصّى بالروح القُدُس الرُّسُل الّي اختاروم. وْيَسوع وَرّاهُم نفسو عاود بْبزّاف د الحُجَح الحقيقيّين من بعدما تعدّب وْهُوَ كيظهَر لوم أربعين يوم وْكيتكلّم على مُلك اللّٰه. وْملّي كان مجمّع معهُم، وصّاهُم ما ي‍مشيو شي من أُورُشَليم، وَلكن يتسنّاو ديك الشي الّي وَعد بِه الآب الّي "سمعْتوه مِنّي، حيت يوحَنّا غطّس بالما، أمّا أنتُمَ غَد تْتغطّسو بالروح القُدُس من دابا شي أيّام قليلة." في ديك الساعة هَدوك الّي كانو مجمّعين معاه سقصاواه وْقالو: "يا رَبّ، واش في هَد الوقت غادي تجدّد المُلك نإسْرائيل؟" وْقالّوم: "ما عندكُم شي الحقّ تعرفو الأزمنة والأوْقات الّي عملوم الآب بالسلْطة ديالو، وَلكن أنتُمَ غَد تقبطو القوّة ملّي ينزل عليكُم الروح القُدُس وْغَد تكونو شهود لِلي في أُورُشَليم وْفي كُل اليَهوديّة والسامِرة وْحتّى نالطرف الاخّر د الدنيا." وْملّي قال هَد الشي وْهُمَ كيشوفوه، اتّرفع نالعلو حتّى غطّاتوْ واحد السحابة من قدّام العينين ديالوم. وْملّي كانو هازّين العينين ديالوم في السما وْهُوَ كيبعّد، قرّبو جوج د الرجال وْوَقفو حداهُم بالحوايج بُيَط وْقالو لوم: "آ الرجال الجَليليّين، مالكُم واقفين كتشوفو في السما؟ هَدا يَسوع، الّي اتّرفع قدّامكُم نالسما، غادي يرجَع هَيدا كيفْما شفْتوه طالع نالسما." ديك الساعة رجعو نأُورُشَليم من الجّبل الّي مسمّي جبل الزيتون، الّي هُوَ قريب نأُورُشَليم مسيرة سبت. وْملّي وَصلو، طلعو نالبيت في الفوقي الّي كانو كينزلو فيه. تمّاك كان بُطْرُس ويَعْقوب وْيوحَنّا وأَنْدَراوس وْفيلِبُّس وْتوما وْبَرْثولُماوس وْمتّى ويَعْقوب بن حَلْفى وْسِمْعان الغيور ويَهودا بن يَعْقوب. هَدو كاملين بْقلب واحد كانو كيداومو على الصلاة مع النسا وْمَرْيَم يمّاه د يَسوع وْمع الخوت ديالو. وْفي ديك الأيّام ناض بُطْرُس فوسط الخوت، وْكانو الّي حاضرين تقْريبًا مية وْعشرين واحد، وْقال: "آ الرجال الخوت، كان لازم يتكمّلو الكتوبة الّي تكلّم بِها الروح القُدُس من قبل بْدقوم داود على يَهودا، الّي ݣوّد نْهَدوك الّي شبّرو يَسوع، وْكان محسوب معنا وْكان حقّو في هَد الخدمة. (هَدا شرى واحد الفدّان بالأُجرة د الظلم، وْطاح وْهُوَ كيشوف قدّامو وانشقّ من الوسط وْتهرّقو المصارن ديالو كاملين. وْرجع ديك الشي معروف عند سكّان أُورُشَليم كاملين حتّى تسمّى ديك الفدّان باللُغة ديالوم "حقل دَما" يعني فدّان الدم.) حيت مكتوب في كتاب المزامير: «ترجَع الدار ديالو خربة وْما يسكن فيها حتّى واحد والخدْمة ديالو يشبّراْ واحد يَخُر.» على هَد الشي واجب يرجَع شي واحد شاهد معنا بالقيامة، وْخصّوْ يكون من ديك الرجال الّي ترافقو معنا الوقت كامل ملّي كان الرَّبّ يَسوع كيمشي وْكيجي فوسطنا، من المعموديّة د يوحَنّا حتّى نالنهار فاش اتّرفع علينا." واقتَرحو جوج د الرجال: يوسف الّي مسمّي بارسابا، الّي كيقولو لو يوسْتُس، وْمَتِّياس. وْصلّاو هَيداك: "يا رَبّ، أنتينا كتعرف القلوبة د الناس كاملين، ورّي نّا شكون من هَد الجوج الّي اختارْتِ باش يقبط حقّو في هَد الخدمة ويكون رَسول فْعوط يَهودا، الّي مشى نالموطَع ديالو." من بعد ضربو العود وْجا العود في مَتِّياس وْتّحسب مع الحضاش د الرُّسُل. ملّي وصَل يوم الخمسين، كانو كاملين مجموعين في نفس الموطَع. وْعلى غفلة جا واحد الصوت من السما فحال شي ريح قوي كيسوط، وْعمّر البيت كامل فاين كانو ڭالسين. وْظهرو لوم لسونة مقسومين فحال العافية وْنزلو على كُل واحد مِنّوم. وْتعمّرو كاملين بالروح القُدُس وْبداو كيهدرو بْلُغات مخْتَلفة فحال ما عْطاهُم الروح باش يهدرو. كانو شي يهود، رجال متّاقيين، الّي جاو من كُل أمّة تحت السما ساكنين في أُورُشَليم. وْملّي سمعو هَد الصوت اتّجمعو وْبقاو مبهوطين حيت سمعو كُل واحد كيتكلّم باللُّغة ديالو. وْدهشو كاملين وْتعجّبو وْقالو بيناتوم: "هَدو الّي كيتكلّمو، واش ماشي هُمَ كاملين جَليليّين؟ وْكيفاش كُل واحد منّا كيسمعوم كيهدرو باللُّغة ديالو الّي تربّى عليها؟ فَرْتيّين وْماديّين وْعيلاميّين وْسكّان البلاد ما بين النهرَين واليَهوديّة وْكَبَّدوكيّة وْبُنْتُس وآسيا وْفَريجيّة وْبَمْفيليّة وْمصر وْجِهات ليبيا الّي حدا القَيرَوان والرومانيّين البرّانيّين، يَهود وْمُتهَوّدين، كريتيّين وْعرب، كنسمعوهُم كيهدرو باللُّغات ديالنا على عجايب اللّٰه العظيمة." وْتعجّبو وْبقاو حَيرانين كاملين وْقالو نْبعضيّاتوم: "شنّو هُوَ هَد الشي؟" وْكانو يَخرين كيتملّغو وْكيقولو: "هَدوك سكْرانين بْخمر حلو." وْديك الساعة وقَف بُطْرُس مع الحضاش وْقالّوم بْصوت عالي: "آ الرجال اليهود والسكّان كاملين الّي في أُورُشَليم، خلّيوني نشرح لكُم الّي وقَع، وْتصنّتو على الكلام ديالي. هَدوك ماشي سكْرانين فحال ما كتظنّو أنتُمَ، حيت هَدي غير التسعود د الصباح، وَلكن في الحقيقة هَد الشي الّي وقَع هُوَ الّي خبر بِه النَّبي يوئيل: كيقول اللّٰه: «وْغادي يكون في الأيّام الاخّرية بلّي غادي نكبّ روحي على كُل البشر، ويتنبّأو أُوْلادكُم وْبناتكُم، ويشوفو شبّانكُم الرؤيات ويحلمو شيوخكُم أحلام. وْفي ديك الأيّام غادي نكبّ روحي على العبيد ديالي، رجال وْنسا، وْغادي يتنبّأو. وْنظهّر العجايب نْفوق في السما والعلامات نْتحت في الأرض: الدم والعافية والبُخار د الدُّخّان. غادي ترجَع الشمس ظلام والقمر دم قبل ما يجي النهار د الرَّبّ العظيم والمشْهور. وْكُل واحد الّي كيدعي بِاسم الرَّبّ غادي ينجا.» "آ الرجال الإسْرائيليّين، سمعو هَد الكلام. يَسوع الناصري كان رَجل أَيّدوْ اللّٰه قدّامكُم بالمُعْجزات والعلامات والعجايب، الّي عملوم اللّٰه على يَدّو فوسطكُم، فحال ما كتعرفو أنتُمَ. هَدا الّي سلّموه لكُم حسب خطّة اللّٰه والعِلم ديالو السابق، أنتُمَ شبّرْتوه وْقتلْتوه بْيَدّ المُدْنبـين وْصلّبْتوه. وَلكن اللّٰه ردّوْ بالروح وْحرّروْ من وجاع الموت، حيت كان مستحيل على الموت يسيطر عليه. حيت داود كيقول فيه: «كُنْتْ كنشوف الرَّبّ قدّامي دائمًا، حيت هُوَ على الّي‍مين ديالي باش ما نتزَعْزع شي. على ديك الشي فرح قلبي بزّاف وْغنّى لساني وْحتّى الجسد ديالي غادي يرتاح في الرجا. حيت أنتينا ما غادي شي تخلّي نفسي في الهاوية وْما غادي شي تخلّي القُدّوس ديالك يتعفّن في القبَر. عرّفْتِني طُرْقان الحياة وْكَتْعمّرني بالفرْحة في وَجهك.» "آ الخوت، خلّيوني نتكلّم معكُم واضح على بابانا داود، الّي مات وْتدفن والقبَر ديالو عندنا حتّى ناليوما. كان نَبي وْعرف بلّي اللّٰه حلف لو بواحد القسم بلّي غادي يرفَع شي واحد من الدرّيّة ديالو باش يݣلس على العرش ديالو. شاف هَد الشي من قبل وْتكلّم على القيامة د المسيح بلّي ما بقات شي نفسو في الهاوية وْما تعفّن شي الجسد ديالو في القبَر. هَدا يَسوع، ردّوْ اللّٰه بالروح، وْحنايَ كاملين شهود على ديك الشي. وْملّي رفعوْ اللّٰه على الّي‍مين ديالو نالسما، ادّى من عند الآب الروح القُدُس الّي كان وَعدوْ بِه، وْكبّ علينا هَد الشي الّي أنتُمَ كتشوفوه دابا وْكتسمعوه. حيت داود ما طلَع شي نالسما، وَلكن هُوَ بْنفسو كيقول: «قال الرَّبّ نْرَبّي: "ݣلس على الّي‍مين ديالي حتّى نردّ عدْيانك تحت رِجلك."» وْعلى هَد الشي لازم يعرف بَني إسْرائيل كاملين بلّي هَدا يَسوع الّي صلبْتوه أنتُمَ، جعلوْ اللّٰه ربّ وْمسيح." وْملّي سمعو هَد الشي، طعنوم في قلبوم وْقالو نْبُطْرُس وْنالرُّسُل يَخرين: "آ الخوت، شنّو خصْنا نعملو؟" قالّوم بُطْرُس: "توبو ويتغطّس كُل واحد منكُم بِاسم يَسوع المسيح باش تْتّغفر لكُم الدنوب، وْتقبطو عطية الروح القُدُس. حيت الوعد لِلكُم وْنولادكُم وْنالبرّانيّين كاملين، يعني نْكُل واحد الّي كيعيّط لو الرَّبّ إلَهنا." وْبْكلام يَخُر بزّاف كان كيشهد لوم وْكيوصّيهُم، كيقول: "نجّيو راسكُم من هَد الجيل المعوّج." قبلو الكلام ديالو فرحانين وْتغطّسو، وْتزادو في ديك النهار تقْريبًا تلت آلاف نفس. وْكانو كيداومو على تعْليم الرُّسُل والعِشْرة مع بعطوم وْتكسير الخبز والدعاء. وْجا الخوف نْكُل نفس، وْكانو الرُّسُل كيعملو بزّاف د العجايب والعلامات. الناس كاملين الّي آمنو كانو مع بعطوم وْكان عندوم كُل شي مشْتَرك. وْكانو كَيْبيعو الأملاك والمتاع ديالوم وْكيقسموهُم بيناتوم على حسب الاحْتياج د كُل واحد. وْكانو كيداومو في بيت المَقْدس كُل نهار بْقلب واحد، وْكيقطّعو الخبز في الديور ديالوم وْكياكلو مع بعطوم فرحانين وْبْقلب واحد، وْكيسبّحو ناللّٰه وْعندوم القبول عند الشعب كامل. وْكان الرَّبّ كيزيد كُل نهار في الكنيسة الناس الّي كانو كينجاو. طلع بُطْرُس وْيوحَنّا مع بعطوم نْبيت المَقْدس في التلاتة د العشيّة، وْهِيَ الساعة د الصلاة. كان واحد الرَّجل عرج من الكرش د يمّاه، وْكانو كيرفدوه وْكينزّلوه كُل نهار عند باب بيت المَقْدس، الّي مسمّي "الباب الجميل،" باش يسعا نالناس الّي داخلين نْبيت المَقْدس. وْهَدا، ملّي شاف بُطْرُس وْيوحَنّا غادي يدخلو نْبيت المَقْدس، طلب منّوم الصدقة. شاف فيه بُطْرُس مع يوحَنّا وْقال لو: "شوف فينا." وْشاف فيهُم الرَّجل كيتسنّى يقبط مِنّوم شي حاجة. أمّا بُطْرُس قال: "ما عندي لا نُقرة ولا دهَب، وَلكن الّي عندي غادي نعطيه لك. بِاسم يَسوع المسيح الناصِري، نوض وْمْشي." وْشبّروْ بْيَدّو د الّيمين وْوقّفوْ، وْفي هزيزة صحاحو الرِّجلين والكعاب ديالو وْنقّز وْوقَف وْبدا كيمشي وْدخل معهُم نْبيت المَقْدس، ماشي وْكينقّز وْكيسبّح ناللّٰه. وْشافوه الناس كاملين وْهُوَ كيمشي وْكيسبّح ناللّٰه. وْعرفوه بلّي هُوَ الرَّجل الّي كان كيݣلس وْكيسعا عند "الباب الجميل" د بيت المَقْدس وْدهشو بزّاف وْتعجّبو من هَد الشي الّي وقَع لو. كان الرَّجل الّي تشافى مشبّر في بُطْرُس وْيوحَنّا، وْجرى نْعندوم الشعب كامل نالقوس الّي مسمّي "قوس سُليمان" وْهُمَ معجّبـين. وْملّي شاف بُطْرُس ديك الشي، قالّوم: "آ الرجال الإسْرائيليّين، مالكُم كتـتعجّبو من هَد الشي؟ وْعلاش كتبلّطو فينا فحال إدا كُنّا حنايَ بالقدرة أَوْلا بالتقوى ديالنا رجّعْنا هَدا كيمشي؟ إلَه إبراهيم وإلَه إسْحاق وإلَه يَعْقوب، إلَه جدودنا عظّم الخدّام ديالو يَسوع، الّي سلّمْتوه أنتُمَ وْنكرْتوه قدّام بيلاطُس ملّي كان معوّل يطلقوْ. وَلكن أنتُمَ نكرْتو القدّوس والمتّاقي وْطلبْتو يتّطْلق لكُم واحد الرَّجل قتّال، وْقتلْتو مَنْبَع الحياة الّي بَعتوْ اللّٰه من بين الميّتين، وْحنايَ شهود على ديك الشي. وْبالإيمان بِاسم يَسوع، الِاسم ديالو قوّى هَد الرَّجل الّي كتشوفوه وْكتعرفوه، والإيمان بْيَسوع شافاه تمامًا قدّامكُم كاملين. "أمّا دابا، آ الخوت، كنعرف بلّي بالجهل ديالكُم عملْتو ديك الشي فحال ما عملوه الحُكّام ديالكُم حتّى هُمَ. وَلكن اللّٰه كمّل ديك الشي الّي خبر بِه من قبل على الدقوم د الأَنْبياء ديالو كاملين بلّي المسيح كان غادي يتعدّب. على هَد الشي خصْكُم تتوبو وْترجعو باش يمحي اللّٰه الدنوب ديالكُم، باش تجي أوقات الراحة من عند الرَّبّ، وْباش يصيفط لكُم المسيح الّي اختاروْ لكُم من قبل، والّي هُوَ يَسوع، الّي واجب يسكن في السما حتّى نالوقت د التجديد د كُل شي، الّي تكلّم عليه اللّٰه على الدقوم د الأَنْبياء القدّيسين ديالو كاملين من زمان. حيت موسى قال: «الرَّبّ غادي يجيب واحد النَّبي فحالي من بين الخوت ديالكُم. سمعو لو في كُل ما يتكلّم بِه معكُم، وْكُل نفس الّي ما كتسمَع شي نْديك النَّبي غادي تْتقلّع من بين الشعب.» وْهَيدا الأَنْبياء كاملين، من صَموئيل وْحتّى هَدوك الّي جاو من بعدو، تكلّمو على هَد الأيّام. أنتُمَ هُمَ الورتة د الأَنْبياء وْد العهد الّي عاهد بِه اللّٰه جدودنا، ملّي قال نإبراهيم: «غادي يكونو قبايل الأرض كاملين مبْروكين بالدرّيّة ديالك.» ملّي اللّٰه ردّ اِبنو يَسوع بالروح، صيفطوْ لكُم أنتُمَ في الُوّل باش يبارككُم ويردّ كُل واحد منكُم من الشَّرّ ديالو." ملّي كان كيتكلّم بُطْرُس وْيوحَنّا مع الناس، جاو عندوم المسؤولين وْقايد الحرس د بيت المَقْدس والصدّوقيّين وْهُمَ مقلّقين حيت الرُّسُل كانو كيعلّمو الشعب وْكيبشّرو بالقيامة من بين الميّتين بْيَسوع. وْمدّو اليَدّين ديالوم عليهُم وْدخّلوهُم نالحبس حتّى نالنهار التاني حيت كانت جات العشيّة. وْكانو آمنو بزّاف د الناس الّي سمعو الكلام، والعدد د الرجال كان تقْريبًا خمس آلاف واحد. ولّا غدّا اتّجمعو في أُورُشَليم الحكّام والشيوخ والمُعلّمين د الشريعة وْحَنّان، رئيس المسؤولين في بيت المَقْدس، وْقَيافا وْيوحَنّا والإسْكَنْدَر وْكُل الرجال الّي كانو من أهل رُؤَساء المسؤولين. وْمن بعدما وقّفو بُطْرُس وْيوحَنّا في الوسط، بداو كيسقصيوهُم: "بْشْمِن سُلْطة أَوْلا بْشْمِن اِسم عملْتو أنتُمَ هَد الشي؟" ديك الساعة تعمّر بُطْرُس بالروح القُدُس وْقالّوم: "آ حُكّام الشعب وْشيوخ إسْرائيل، إدا اليوما كتستَدْعيونا على واحد الخَير الّي عملْنا نواحد الرَّجل مريط والطريقة بَيّاش تشافى، خصْكُم تعرفو، أنتُمَ والشعب د إسْرائيل كامل، بلّي بِاسم يَسوع المسيح الناصِري، الّي صلّبْتوه، والّي بَعتوْ اللّٰه من بين الميّتين، بِه كيوقف هَد الرَّجل صحيح قدّامكُم. يَسوع هُوَ هَد الحجْرة الّي رفضْتوها أنتُمَ البنّاية، وْرجعَتْ هي راس القنت. وْفعلاً، ما كاين شي النجا بواحد يَخُر من غيرو هُوَ، حيت ما كاين حتّى شي اسم يَخُر تحت السما، الّي اتّعطى نالناس، الّي بِه حنايَ خصْنا ننجاو." وْملّي شافو الحُكّام الزعامة في الكلام د بُطْرُس وْيوحَنّا، عارفين بلّي هُمَ ماشي قاريين وْبلّي هُمَ من الشعب، تعجّبو وْعرفوهُم بلّي كانو مع يَسوع. وْملّي شافو الرَّجل الّي كان تشافى واقف معهُم، ما جبرو ما يقولو. وآمروهُم يخرجو على برّا من المَجْلس، وْتشاورو بيناتوم، كيقولو: "شنّو غادي نعملو نْهَد الرجال؟ حيت سكّان أُورُشَليم كاملين كيعرفو بلّي واحد العلامة مشهورة وقعَتْ على يَدّوم وْحنايَ ما نقدرو شي نْنكرو هَد الشي. وَلكن باش ما ينْتَشر شي الخبر بين الشعب، نهدّدوهُم باش ما يتكلّمو شي عاود مع حتّى واحد بْهَد الِاسم." وْعيّطو لوم وْوصّاوهُم ما يتكلّمو شي وْما يعلّمو شي بالمرّة بِاسم يَسوع. جاوب بُطْرُس وْيوحَنّا وْقالو: "حكمو أنتُمَ إدا كان حقّ قدّام اللّٰه نطيعوكُم فعوط ما نطيعو اللّٰه، حيت ما نقدرو شي نبقاو ساكتين وْما نهدرو شي بْديك الشي الّي شفْنا وْسمعْنا." من بعدما هدّدوهُم عاود، طلقوهُم. وْبْسباب الشعب ما جبرو شي كيفاش يعاقبوهُم، حيت الناس كاملين كانو كيمجّدو اللّٰه على ديك الشي الّي وقَع، حيت الرَّجل الّي وقعَتْ فيه هَد المُعْجزة د الشفاء كان في عُمرو كتَر من أربعين عام. وْملّي طلقوهُم، بُطْرُس وْيوحَنّا مشاو نْعند الصحاب ديالوم وْخبروهُم بْكُل ما قالو لوم رُؤَساء المسؤولين والشيوخ. وْملّي سمعو هَد الشي، علّاو الصوت ديالوم ناللّٰه بْنفس واحدة وْقالو: "يا رَبّ السلْطة، أنتينا هُوَ الإلَه الّي خلقْتِ السّما والأرض والبحَر وْكُل ما فيهُم. أنتينا، بواسطة الروح القُدُس، قُلْتِ على الدقوم د داود العبد ديالك: «علاش هاجَت الأُمَم، وْخمّمو الشُّعوب في الباطل؟ وَقفو مُلوك الأرض وْتّجمعو الرُّؤَساء مع بعطوم ضدّ الرَّبّ وْضدّ المسيح ديالو.» حيت في الحقيقة هيرودُس وْبيلاطُس البُنطي اتّجمعو مع الوَتَنيّين وْشعب إسْرائيل في هَد المدينة ضدّ اِبنك القُدّوس، يَسوع الّي دهنْتِه، باش يعملو كُل ما قدّرْتِ من قبل بالإرادة والقدرة ديالك باش يوقع. وْدابا، يا رَبّنا، شوف التهديدات ديالوم وْعْطي نالعبيد ديالك باش يتكلّمو بْكلامك بْكُل شجاعة. على بَيدمن كتمدّ يَدّك باش تشافي وْتظهر العلامات والعجايب بِاسم يَسوع الخدّام القدّوس ديالك." وْملّي كمّلو الصلاة ديالوم، تزعْزع الموطَع فاين كانو مجموعين وْتعمّرو كاملين بالروح القُدُس وْبداو كيتكلّمو بْكلام اللّٰه بالزعامة. والمؤمنين كاملين كان عندوم قلب واحد وْنفس واحدة. حتّى واحد ما كان كيعْتَبر نفسو مالِك نِلّي عندو، وَلكن كانو كيشْتَركو في كُل شي الّي عندوم. وْبْقدرة عظيمة كانو الرُّسُل كيشهدو بْقيامة الرَّبّ يَسوع، وْنعْمة عظيمة كانت فايطة عليهُم كاملين، حيت ما كان حتّى واحد فيهُم محْتاج، والخوت الّي كانو عندوم الفدادن والديور كانو كيبيعوهُم وْكيجيبو الفلوس د ديك الشي الّي باعو وْكينزّلوها قدّام الرِّجلين د الرُّسُل، وْكانو كيقسموها على حسب الاحْتياج د كُل واحد. وْيوسف، واحد اللّاوي من أهل قُبْرُص، الّي سمّاواه الرُّسُل بَرنابا (الّي الترجمة ديالو "اِبن التشجيع")، كان عندو واحد الفدّان وْباعوْ وْجاب الفلوس وْنزّلاْ قدّام الرِّجلين د الرُّسُل. واحد الرَّجل مسمّي حَنانيّا، مع مراتو سَفيرة، باع واحد المِلك وْخبّع من التمن واحد المبلغ د الفلوس، والمراة ديالو عارفة كُل شي، وْنزّل الّي بقا لو من الفلوس قدّام الرِّجلين د الرُّسُل. وْقال لو بُطْرُس: "آ حَنانيّا، كيفاش عمّر الشيطان قلبك باش تكدب على الروح القُدُس وْتخبّع الفلوس الّي بِعْتِ بِها المِلك ديالك؟ واش ما كان شي ديالك من قبل ما تبيعوْ؟ وْمن بعدما بِعْتِه، واش ما كانت شي الفلوس في يَدّك؟ كيفاش فكّرْتِ في قلبك تعمل هَد الشي؟ أنتينا ما كدبْتِ شي على الناس، وَلكن كدبْتِ على اللّٰه." ملّي سمع حَنانيّا هَد الكلام، طاح ميّت، والناس كاملين الّي سمعو بْديك الشي، نزل عليهُم خوف عظيم. وْناضو الشبّان وْكفّنوه وْخرّجوه وْدفنوه. وْمن بعد تلاتة د السوايع تقْريبًا، دخلَت المراة ديالو وْما عنداْ شي الخبَر بْشنّو وقَع. سقصاها بُطْرُس وْقالّاْ: "قول لي، واش بْهَد التمن بِعْتو المِلك؟" قالت: "إيّاه، بْهَد التمن." وْقالّاْ بُطْرُس: "مالكُم اتَّفقْتو باش تجرّبو روح الرَّبّ؟ شوف، ها هُمَ الّي دفنو رَجلك عاد رجعو، وْغادي يدّيواك حتّى أنتينا." وْفي هزيزة طاحت ميّتة عند الرِّجلين د بُطْرُس. ديك الساعة دخلو الشبّان وْجبروها ميّتة وْخرّجوها وْدفنوها حدا رَجلاْ. وْنزل خوف عظيم على الكنيسة كاملة والناس كاملين الّي سمعو بْهَد الشي الّي وقَع. وْوقعو بزّاف د العلامات والعجايب في الناس على اليَدّين د الرُّسُل، وْكانو المؤمنين كاملين كيتّجمعو بْقلب واحد في قوس سُليمان. وْمن الشعب ما زعَم حتّى واحد يتّجمع معهُم، وَلكن كانو كيحْتَرموهُم. والناس الّي كانو كيآمنو بالرَّبّ كيتّزادو بالكترة، عدد كبير من الرجال والنسا. وأتّرو في الناس حتّى كانو كيخرّجو المراطين ديالوم نالزنايق وْكينزّلوهُم على الفروشة والحصاير، باش، ملّي يݣوز بُطْرُس، على الأقلّ الظل ديالو يطيح على شي واحد مِنّوم. وْحتّى من المُدُن الّي قرابـين من أُورُشَليم كانو كيجيو بزّاف رافدين المراطين والمعدّبـين بالجنون الشرّيرة، وْكانو كيبراو كاملين. في ديك الساعة رئيس المسؤولين في بيت المَقْدس والرجال كاملين الّي كانو معاه، الّي هُمَ من المَدْهب د الصدّوقيّين، غارو مِنّوم بزّاف، وْشبّرو الرُّسُل وْعملوهُم في واحد الحبس عمومي. وَلكن في الليل واحد الملاك من الرَّبّ فتح البيبان د الحبس وْخرّجوم وْقال: "مْشيو وْوَقفو وْتكلّمو مع الشعب في بيت المَقْدس بالكلام كامل د هَد الحياة." وْملّي سمعو ديك الشي، دخلو نْبيت المَقْدس مع الفجر وْبداو كيعلّمو. وْجا رئيس المسؤولين والّي كانو معاه كاملين، وْجمعو الحُكّام وْكُل الشيوخ د بَني إسْرائيل، وْصيفطو يجيبو الرُّسُل من الحبس. وَلكن ملّي وَصلو الحرّاس نالحبس، ما جبروهُم شي تمّاك. ديك الساعة رجعو وْخبروهُم بْديك الشي، وْقالو: "جبرْنا الحبس مشدود والعسّاسة د الحبس واقفين على برّا قدّام البيبان، وَلكن ملّي فتحْنا، ما جبرْنا حتّى واحد نْداخل." وْملّي سمع رئيس المسْؤولين وْقايد بيت المَقْدس والرؤساء ديالوم هَد الكلام، حارو وْفكّرو كيفاش غادي تنتَهي هَد القضية. وَلكن جا شي واحد كيخبروم وْقال: "الرجال الّي دخّلْتوهُم نالحبس راهُم في بيت المَقْدس واقفين كيعلّمو الناس." ديك الساعة مشى القايد د الحرّاس والحرّاس معاه وْجابوم بلا عنف، حيت كانو كيخافو من الشعب يرجموهُم. وْملّي حضّروهُم وْوَقّفوهُم في المجلس، بَحتوم رئيس المسؤولين، وْقال: "وصّيناكُم ما تعلّمو شي بْهَد الِاسم، وْها أنتُمَ عمّرْتو أُورُشَليم بالتعْليم ديالكُم وْبغيتو تسيّبو علينا الدم د هَد الرَّجل." وْجاوب بُطْرُس والرُّسُل وْقالو: "واجب نطيعو اللّٰه قبل من الناس. إلَه جدودنا ردّ يَسوع بالروح الّي قتلْتوه أنتُمَ معلّق على واحد الخشبة. هَدا هُوَ الّي رفعوْ اللّٰه على الّيمين ديالو باش يكون أمير وْمُنجّي، باش يعطي نإسْرائيل التوبة والغُفْران د الدنوب. وْحنايَ الشهود بْهَد الأُمور، وْحتّى الروح القُدُس شاهد، الّي عْطاه اللّٰه نْكُل واحد الّي كيطيعوْ." وْملّي هُمَ سمعو ديك الشي، طلَع لوم الدم نالراس وْبغاو يقتلوهُم. وَلكن وقَف فوسط المجلس واحد الرَّجل فرّيسي، مسمّي غَمالائيل، مُعلّم د الشريعة، موقّر عند الشعب كامل، وآمر باش يخرّجو الرُّسُل واحد شويا. وْقالّوم: "آ الرجال الإسْرائيليّين، ردّو بالكُم من ديك الشي الّي باغيين تعملو مع هَد الرجال. حيت قبل من هَد الأيّام، قام ثوداس وْشكر راسو، قال بلّي هُوَ شي شخصيّة مهمّة. وْتبعوه تقْريبًا أربع مية واحد، وَلكن هُوَ تْقتل وْهَدو كاملين الّي طاعوه تشتّـتو وْرجعو لا شيء. من مورا هَداك، قام يَهودا الجَليلي في أيّام التزميم، وادّى موراه بزّاف د الناس. وْهَداك اتّهلك حتّى هُوَ وْكاملين الّي طاعوه تشتّـتو. وْدابا كنقول لكُم وْكَنْنصحكُم باش تطلقو هَد الرجال وْتخلّيوهُم بْسلام، حيت إدا هَد الشي الّي قصدوه جا من عند الناس، غادي يفشل. وَلكن إدا كان من عند اللّٰه، ما تقدرو شي تهلكوهُم، وانتُمَ غَد تكونو كتحاربو اللّٰه." واقْتَنعو بالكلام د غَمالائيل، وْعيّطو على الرُّسُل وْعصّاوهُم وْوصّاوهُم باش ما يزيدو شي يتكلّمو بِاسم يَسوع، وْمن بعد طلقوهُم. وْخرجو الرُّسُل من المجلس فرحانين، حيت تْحسبو مسْتاهلين يتعدّبو بْسباب الِاسم ديالو. وْكُل نهار في بيت المَقْدس وْفي الديور ما وَقفو شي من التعْليم وْمن التبْشير بيَسوع المسيح. وْفي ديك الأيّام، ملّي كبر العدد د التلامد، شكاو اليهود اليونانيّين من اليهود العبرانيّين، حيت كانو كيفرّطو في الهجّالات ديالوم في المعاونة اليوميّة. ديك الساعة جمعو الطناش د الرُّسُل الجماعة د التلامد وْقالو: "ماشي مزيان لِنّا نخلّيو كلام اللّٰه وْنتسخّرو على الطيافر. آ الخوت، اختارو سبعة د الرجال من بيناتكُم موقّرين وْمعمّرين بالروح القُدُس وْبالحكمة باش تكلّفوهُم بْهَد الشغل. وْحنايَ نداومو على الصلاة وْنهْتَمّو بْكلام اللّٰه." وْهَد الاقتراح عجب الجماعة كاملة، واختارو إسْتِفانوس، واحد الرَّجل معمّر بالإيمان والروح القُدُس، وْفيلِبُّس وْبُروخورُس، وْنيكانور وْتيمون، وْبَرْميناس وْنيقولاوس واحد المتهَوّد من أَنْطاكيّا. هَدوك وقّفوهُم قدّام الرُّسُل، الّي صلّاو من جهتوم وْعملو يَدّوم عليهُم. وْكان كلام اللّٰه كينْتَشر والعدد د التلامد كيكتر بزّاف في أُورُشَليم، وْحتّى بزّاف من المسؤولين في بيت المَقْدس طاعو الإيمان. وإسْتِفانوس، معمّر بالإيمان والقدرة، كان كيعمل العجايب والعلامات الكبارين بين الشعب. وْناضو شي ناس من المجمع الّي مسمّي "مجمع المحرّرين،" وْهُمَ القَيروانيّين والإسْكَنْدَريّين وْشي منّوم من كيليكيّا وآسيا، وْتجادلو مع إسْتِفانوس. وْما قدرو شي يعارضو الحكمة والروح بَيّاش كان كيتكلّم. ديك الساعة رشاو شي د الناس، الّي قالو بلّي سمعوه كيهدَر بْكلام الكفر على موسى وْعلى اللّٰه. وْحرّشو الشعب والشيوخ والمُعلّمين د الشريعة، وْخطفو إسْتِفانوس وادّاواه قدّام المجلس وْحضّرو شهود الزور الّي قالو: "هَد الرَّجل ما كيوقف شي على كلام الكفر ضدّ هَد الموطَع المقدّس وْعلى الشريعة، حيت سمعْناه كيقول بلّي يَسوع الناصِري غادي يهدّم هَد الموطَع ويبدّل التقاليد الّي خلّاهُم نّا موسى." ديك الساعة بلّطو في إسْتِفانوس الناس كاملين الّي كانو ݣالسين في المجلس، وْشافو وَجهو فحال الوجَه د شي ملاك. وْقال رئيس المسؤولين في بيت المَقْدس: "واش هَد الأُمور د بالصّحّ؟" وْقال إسْتِفانوس: "آ الرجال الخوت والوالِدين، سمعوني. اللّٰه المجيد ظهَر نإبراهيم ملّي كان باقي في مَسوبوطَميا قبل ما يسكن في حاران، وْقال لو اللّٰه: «خرج من بلادك وْمن عند أهلك وآجي نالبلاد الّي غادي نورّيها لك.» ديك الساعة خرج من بلاد الكَلْدانيّين وْسكن في حاران، وْمن بعدما مات باباه، رحّلوْ اللّٰه من تمّا نْهَد البلاد فاين أنتُمَ ساكنين دابا. وْما عْطاه فيها حتّى شي وَرت، واخّا غير سطمة، وَلكن وَعدوْ باش يعطيها لو مِلك لِلو وْنالدرّيّة ديالو من موراه، ملّي باقي ما كان عندو حتّى شي ولد. وْقال اللّٰه هَيدا: «الدرّيّة ديالك غادي تكون برّانيّة في واحد البلاد غريبة ويردّوهُم عبيد ويعدّبوهُم أربع مية عام. والأُمّة الّي غادي تسْتَعبدوم، غادي نحاسباْ أنا، وْمن بعد ديك الشي غادي يخرجو من ديك البلاد.» وْقال اللّٰه: «ديك الساعة غادي يعبدوني في هَد الموطَع،» وْعْطاه عهد الطهارة. وْهَيدا إبراهيم ولد إسحاق وْطهّروْ في النهار التامن، وإسحاق ولد يَعْقوب ويَعْقوب ولد الجدود الطناش. "إيوا، الجدود حسدو خاهُم يوسف وْباعوه نْشي ناس الّي ادّاواه نْمصر. وْكان اللّٰه معاه، وْحرّروْ من المشاكل ديالو كاملة وْعْطاه النعْمة والحِكمة قدّام فِرْعون مَلِك مصر، وْهُوَ ردّوْ حاكم على مصر وْعلى الدار ديالو كاملة. "في ديك الوقت جا واحد الجّوع كبير على البلاد د مصر كاملة وْكَنْعان وْكان الضيق كبير، والجدود ديالنا ما جبرو ما ياكلو. وْملّي سمَع يَعْقوب بلّي كاين الزرع في مصر، صيفط جدودنا المرّة الُولى. وْفي المرّة التانية، يوسف ظهّر راسو نالخوت ديالو، وْفِرْعون عرف الأصل د يوسف. وْصيفط يوسف باش يجيبو يَعْقوب باباه وْكُل الأهل ديالو، الّي كانو خمسة وْسبعين واحد. وْهوّد يَعْقوب نْمصر وْمات تمّاك هُوَ وْجدودنا، وْرحلو نْشَكيم وْدفنوهُم في القبَر الّي شراه إبراهيم بواحد التمن مقبول من بَني حَمور في شَكيم. وْملّي قرّب وقت الوعد الّي حلف اللّٰه بِه نإبراهيم، كان الشعب كيزيد وْكيكتَر في مصر، حتّى جا واحد المَلِك يَخُر في مصر الّي ما عرف شي يوسف، وْغدر هَدا بالشعب ديالنا وْلزّم عليهُم يسمحو في الصبيان ديالوم باش يموتو. "وْفي ديك الوقت، خلق موسى وْكان مرْضي عند اللّٰه، وْتربّى تلت شهور في الدار د باباه. وْملّي سمحو فيه، ربّاتوْ بنْت فِرْعون وْكان فحال ابْناْ. وْتعلّم موسى الحِكمة كاملة د المصريّين وْكان قوي في الكلام والفعل. وْملّي كمّل أربعين عام، بغى يزور خوتو، بَني إسْرائيل. وْملّي شاف واحد المصري كيظلم واحد مِنّوم، حامى عليه وانْتَقم نالمغْلوب وْقتل المصري. وْظنّ موسى بلّي خوتو غادي يفهمو بلّي اللّٰه غادي يحرّروم على يَدّو، وَلكن هُمَ ما فهمو شي هَيداك. ولّا غدّا موسى فاجأ جوج د الإسرائليّين الّي كانو كيتدابزو، وْبغى يصالحوم، وْقالّوم: «آ الرجال، أنتُمَ خوت. علاش كتظلمو بعضيّاتكُم؟» والرَّجل الّي كان كيظلم يَخُر دفَع موسى وْقال لو: «شكون عملك حاكم وْقاضي علينا؟ واش بغيتِ تقتلني فحال ما قتلْتِ المصري البارح؟» وْملّي سمَع هَد الكلام، هرب موسى نْأرض مِدْيان وْكان برّاني فيها، وْتمّاك ولد جوج د الولاد. "وْملّي ݣازَتْ أربعين عام، ظهَر لو ملاك الرَّبّ في الصحرا قريب من جبل سيناء، في اللهبة د العافية في واحد العلّيقة. وْملّي شاف موسى ديك الشي، تعجّب. وْملّي كان كيقرّب باش يشوفوْ مزيان، جا عندو صوت الرَّبّ: «أنا إلَه جدودك، إلَه إبراهيم وإلَه إسْحاق وإلَه يَعْقوب.» وْتّرْعد موسى من الخوف وْما زعَم شي يشوف. وْقال لو الرَّبّ: «حيّد الصبّاط من رِجلك حيت الموطَع فاين أنتينا واقف هُوَ أرض مقدّسة. أنا شفْتْ بالتحقيق عداب الشعب ديالي في مصر وْسمعْت الشكاوي ديالوم وْنزلْتْ باش نحرّروم. آجي دابا باش نصيفطك نْمصر.» "هَدا موسى الّي رفضوه وْقالو لو: «شكون عملك حاكم وْقاضي علينا؟» هَدا هُوَ الّي صيفطوْ اللّٰه حاكم وْمُنجّي على يد الملاك الّي ظهَر لو في العلّيقة. هَدا خرّجوم من مصر وْهُوَ كيعمل العجايب والعلامات في أرض مصر وْفي البحَر الأحمر وْفي الصحرا أربعين عام. "هَدا هُوَ موسى الّي قال نْبَني إسْرائيل: «اللّٰه غادي يجيب واحد النَّبي فحالي من بين الخوت ديالكُم.» وْموسى بْنفسو كان في المجْمع في الصحرا، مع الملاك الّي كان كيتكلّم معاه في جبل سيناء وْمع جدودنا، وْهُوَ الّي قبل الكلمات الحيّة باش يعطيها نّا. وَلكن جدودنا ما بغاو شي يطيعوه وْرفضوه، حيت رجعو نْمصر في قلبوم. وْقالو نْخاه هارون: «عمل نّا الآلِهة الّي تسبقنا، حيت هَدا موسى الّي خرّجنا من أرض مصْر ما كَنْعرفو شي شنّو وقَع لو.» ديك الساعة عدّلو واحد العجل وْقدّمو لو الدبايح، وْفرحو بالأعْمال د يَدّوم. وْسمَح فيهُم اللّٰه، وْدفعوم باش يعبدو النجوم د السما، فحال ما هُوَ مكتوب في كتاب الأَنْبياء: «آ دار إسْرائيل، واش لِلي أنا دبحْتو الدبايح والقرابـين مدّة أربعين عام في الصحرا؟ رفدْتو معكُم الخيمة ديال "مولوك" حتّى هو، والنجمة د الإلَه ديالكُم "رَمْفان،" والأصْنام الّي عدّلْتوها باش تعبدوها. على ديك الشي أنا غادي نْنفيكُم من بابل لْهيه.» "وْكانت مع جدودنا في الصحرا خيمة الشهادة الّي صنعاْ موسى كيفْما آمر اللّٰه على حسب الشكل الّي شافوْ. وْجدودنا، ملّي قبطو الخيمة، دخّلوها بْقيادة يشوع، ملّي ملكو البلاد من الأُمَم الّي طردوم اللّٰه من قدّام وَجهوم، وْبقات تمّا حتّى نالأيّام د داود. وْداود جبر النعْمة قدّام اللّٰه وْطلب باش يوجّد بيت العبادة نالإلَه د يَعْقوب، وَلكن سُليمان هُوَ الّي بنى لو الدار. واخّا الإلَه العالي ما كيسكن شي في الديور الّي مصنوعين باليَدّين، فحال ما كيقول النَّبي: «السّما هُوَ العرش ديالي والأرض هي الموطَع د رِجلي. شنّي هي الدار الّي غَد تبنيو لي؟ كيقول الرَّبّ، وْشنّو هُوَ الموطَع د راحتي؟ واش ماشي يَدّي الّي صنعَتْ هَد الأُمور كاملة؟» "آ قاصحين الأعْناق، ناس بالقلوبة والودْنين بلا طهارة! أنتُمَ كتعملو فحال جدودكُم، وْدائمًا كتعارضو الروح القُدُس. شكون هَدا من الأَنْبياء الّي ما تعدّاو شي عليه الجدود ديالكُم؟ هُمَ قتلو الّي سبقو وْخبرو بالمجي د المتّاقي، الّي أنتُمَ دابا سلّمْتوه وْقتلْتوه، أنتُمَ الّي قبطْتو الشريعة على يد الملائكة وْما عملْتو شي بِها." ملّي سمعو هَد الشي، طار لوم بزّاف وْغزّزو السنان ديالوم عليه. أمّا إسْتِفانوس شاف في السما وْهُوَ معمّر بالروح القُدُس، وْشاف مجد اللّٰه وْيَسوع واقف على الّيمين د اللّٰه، وْقال: "ها انا كنشوف السما مفتوحة وِابن الإنسان واقف على الّيمين د اللّٰه!" ديك الساعة غوّتو بْصوت عالي وْشدّو الودْنين ديالوم وْهجمو عليه مجموعين، وْخرّجوه على برّا من المدينة وْرجموه. والشهود عملو الحوايج ديالوم حدا الرِّجلين د واحد الشاب مسمّي شاول. وْملّي كانو كيرجمو إسْتِفانوس، هُوَ دعى وْقال: "يا رَبّي يَسوع، قبل الروح ديالي!" وْطاح على الركابي ديالو وْغوّت بْصوت عالي: "يا رَبّي، ما تحسب شي عليهُم هَد الدنب!" وْملّي قال هَد الشي مات. وْكان شاول متَّفق مع الإعدام د إسْتِفانوس. وْفي ديك النهار بالضبط وقعَتْ واحد التمرميدة كبيرة على الكنيسة الّي كانت في أُورُشَليم، والمؤمنين كاملين تشتّتو في بلاد اليَهوديّة والسامِرة، من غير الرُّسُل. وْرفدو إسْتِفانوس شي رجال متّاقيين وْدفنوه، وْعملو لو واحد الݣنازة كبيرة. أمّا شاول كان كيخرّب الكنيسة وْكيدخل نالديور وْكيجرّ الرجال والنسا وْكيدخّلوم نالحبس. وْهَدوك الّي تشتّتو كانو كيبشّرو بْكلام اللّٰه فاين ما مشاو. ديك الساعة هوّد فيلِبُّس نْمدينة السامِرة، وْكان كيخبروم بالمسيح. وْكانو الناس كيتصنّتو بْرأي واحد نْديك الشي الّي قالوْ فيلِبُّس ملّي سمعوه وْشافو العلامات الّي عملاْ، حيت كانو الجنون الشرّيرة كيخرجو من بزّاف د الناس وْكانو كيغوّتو بْصوت عالي، وْبزّاف د الناس الّي كانو مكْحوشين وْعُرَج تشافاو. وْكانت فرْحة كبيرة في ديك المدينة. وْكان في ديك المدينة واحد الرَّجل، مسمّي سِمْعان، الّي كان من قبل كيسحر نْشعب السامِرة وْكيدهّش الناس وْكيقول بلّي هُوَ شي شخصية مهمّة. وْكانو كاملين كيسمعو لو من الصغير حتّى نالكبير، كيقولو بلّي هَدا هُوَ قوّة اللّٰه العظيمة. كانو كيتبعوه حيت كان كيدهّشوم بالسحر ديالو مدّة طويلة. وَلكن ملّي تيّقو فيلِبُّس وْهُوَ كيبشّر بالإنجيل د مُلك اللّٰه وْبِاسم يَسوع المسيح، تغطّسو الرجال والنسا بْجوج. وْحتّى سِمْعان بْنفسو آمن. وْملّي تغطّس، تبع فيلِبُّس في كُل موطَع مدهّش بالعجايب والعلامات الكبارين الّي عملوم. وْملّي سمعو الرُّسُل الّي في أُورُشَليم بلّي السامِرة قبلَتْ كلام اللّٰه، صيفطو نْعندوم بُطْرُس وْيوحَنّا. وْملّي وَصلو، صلّاو من جهتوم باش ينزل عليهُم الروح القُدُس. حيت الروح كان باقي ما نزل على حتّى واحد مِنّوم، غير كانو كيتغطّسو بِاسم الرَّبّ يَسوع. في ديك الوقت بُطْرُس وْيوحَنّا عملو يَدّوم عليهُم وْنزل عليهُم الروح القُدُس. ملّي شاف سِمعان بلّي اللّٰه عْطاهُم الروح القُدُس ملّي الرُّسُل كينزّلو اليَدّين عليهُم، عرض عليهُم الفلوس، وْقال: "عْطيوني هَد القدرة حتّى أنا، باش يدّي الروح القُدُس كُل واحد الّي نْنزّل عليه اليَدّين ديالي." وْقال لو بُطْرُس: "فلوسك تفنا معك، حيت حاولْتِ تشري مَوهِبة اللّٰه بالفلوس. ما عندك شي لا نصيب ولا حقّ في هَد الأمر، حيت القلب ديالك ماشي صافي قدّام اللّٰه. إدَن، توب من هَد الشَّرّ ديالك وْطلب اللّٰه، يمكن يغفر ديك الشي الّي كيدور في قلبك. حيت أنا شفْتك معمّر بالمرارة وْمبلي بالشَّرّ." ردّ عليه سِمْعان: "طلبو الرَّبّ من جهتي باش ما يجي عليَّ والو من هَد الشي الّي قُلْتو." وْهُمَ، من بعدما شهدو وْتكلّمو بْكلام الرَّبّ، رجعو نأُورُشَليم. وْملّي كانو ݣايزين، بشّرو بالإنجيل في بزّاف د الدشورة من السامِريّين. وْواحد الملاك من الرَّبّ قال نْفيلِبُّس: "نوض وْمْشي نْجهة الجنوب على الطريق الّي كتهوّد من أُورُشَليم نْغَزّة." كاين الخلا في ديك الموطَع. وْناض فيلِبُّس وْشبّر الطريق ديالو، وْجبر واحد الرَّجل خِصي حبشي، وَزير د كَنْداكة، المَلِكة د الحبشة، الّي كان مكلّف على المال ديالاْ كامل. هَدا كان طلَع نأُورُشَليم باش يعبد. وْملّي كان راجع نالبلاد ديالو، كان ݣالس في المرْكبة وْكيقرا كتاب النَّبي إشَعْيا. وْقال الروح القُدُس نْفيلِبُّس: "قرّب وْرافق هَد المرْكبة." وْجرى فيلِبُّس نْعندو وْسمعوْ كيقرا كتاب النَّبي إشَعْيا، وْقال لو: "واش كتفهم هَد الشي الّي كتقرا؟" وْقال: "كيفاش غادي نفهم إدا حتّى واحد ما كيشرح لي؟" وْطلب نْفيلِبُّس يطلع ويݣلس معاه. والفصل د الكتاب الّي كان كيقرا كان هُوَ هَدا: "فحال واحد النعجة مݣوّدة نالدبيحة، وْفحال واحد الخروف كيزوّلو لو الصوفة ديالو وْهُوَ ساكت، ما فتح شي دُقمو. دلّوه وْما كانو شي عادلين معاه. شكون غادي يخبر بالدرّية ديالو؟ حيت الحياة ديالو تحيّدَتْ من الأرض." وْردّ الخِصي على فيلِبُّس: "كنطلبك تقول لي على مَن كيقول النَّبي هَد الشي، على نفسو أَوْلا على شي واحد يَخُر؟" ديك الساعة فتح فيلِبُّس دُقمو وْبدا من هَد الفصل كيبشّروْ بالإنجيل د يَسوع. وْملّي كانو ماشّين في الطريق، وَصلو نواحد الموطَع فيه الما، وْقال الخِصي: "شوف، هنايَ كاين الما. شنّو الّي يمنعني نتغطّس؟" [قال فيلِبُّس: "إدا أنتينا كتآمن من قلبك كامل، تقدر تعملوْ." وْجاوب وْقال: "أنا كنآمن بلّي يَسوع المسيح هُوَ اِبن اللّٰه."] وآمر الخِصي باش توقف المرْكبة، وْهوّدو بْجوج نالما وْفيلِبُّس غطّس الخِصي. وْملّي طلعو من الما، روح الرَّبّ خطف فيلِبُّس على غفلة وْما بقا شي كيشوفوْ الخِصي، وَلكن مشى في الطريق ديالو فرحان. أمّا فيلِبُّس جبر راسو في أَشْدود. وْملّي كان ݣايز، بشّر المُدُن كاملة بالإنجيل حتّى وصَل نْقَيصَريّة. وْشاول كان باقي كيكرّر التهديدات بالقتل ضدّ التلامد د الرَّبّ. وْمشى نْعند رئيس المسؤولين في بيت المَقْدس، وْطلب منّو رسائل نْبيوت العبادة في دِمَشْق باش، إدا جبر شي ناس من هَد الطريق، رجال أَوْلا نسا، يدّيهم مكتّفين نأُورُشَليم. ملّي كان ماشّي في الطريق وْقرّب نْدِمَشْق، برَق عليه على غفلة واحد الضَّو من السما، وْطاح شاول على الرحبة وْسمَع واحد الصوت كيقول لو: "شاول، شاول، علاش كَتْـتعدّى عليَّ؟" وْسقصى: "شكون أنتينا، آ سيدي؟" وْردّ عليه الصوت: "أنا يَسوع الّي كَتْـتعدّى عليه. وَلكن نوض وْدْخل نالمدينة وْغادي يتّقال لك شنّو خصّك تعمل." والرجال الّي كانو معاه وَقفو مبْهوطين، كيسمعو الصوت بلا ما يشوفو حتّى واحد. وْناض شاول من الرحبة وْملّي فتح العينين ديالو، ما قدر يشوف والو، وْشبّروه من يَدّو وْدخّلوه نْدِمَشْق. وْبقا تلت أيّام تمّاك بلا ما يشوف، وْما كلا وْما شرب والو. وْكان في دِمَشْق واحد التلْميد مسمّي حَنانيّا. وْقال لو الرَّبّ في واحد الرؤيا: "آ حَنانيّا." وْردّ عليه: "ها انا، يا رَبّي." وْقال لو الرَّبّ: "نوض وْمْشي نالشارع الّي كيعيّطو لو المستقيم، وْبقّش في الدار د يَهودا على واحد الرَّجل الّي مسمّي شاول، من طَرْسوس، حيت راه هُوَ كيصلّي، وْهُوَ شاف في رؤيا واحد الرَّجل مسمّي حَنانيّا دخل وْنزّل يَدّو عليه بَيّاش يرجع كيشوف." ديك الساعة جاوب حَنانيّا: "يا رَبّي، أنا سمعْتْ من بزّاف د الناس على هَد الرَّجل وْعلى الشَّرّ الّي عمل في القدّيسين ديالك في أُورُشَليم. وْحتّى هنايَ عندو السلْطة من رُؤَساء المسؤولين باش يقبط المؤمنين كاملين الّي كيعيّطو بِاسمك." وْقال لو الرَّبّ: "مْشي، حيت هَدا هُوَ الّي اختارْتوْ أنا فحال شي وسيلة باش يعرّف بِاسمي قدّام الوَتَنيّين والملوك وْبَني إسْرائيل. حيت أنا غادي نورّي لو شحال خصّوْ يتعدّب بْسباب اِسمي." وْمشى حَنانيّا وْدخل نالدار وْنزّل يَدّو على شاول وْقال لو: "آ خاي شاول، الرَّبّ يَسوع، الّي ظهَر لك في الطريق د المجي، صيفطني باش ترجع كتشوف وْتتعمّر بالروح القُدُس." وْفي هزيزة طاحت من العينين ديالو شي حاجة فحال القشور وْرجَع كيشوف، وْناض وْتغطّس. وْملّي كلا، صحاح. وْبقا شاول مع التلامد الّي كانو في دِمَشْق شي أيّام. وْدغيا بدا كيبشّر في بيوت العبادة وْكيأكّد بلّي يَسوع هُوَ ابن اللّٰه. وْكانو الناس كاملين الّي كيسمعو لو كيتعجّبو وْكيقولو: "واش ماشي هَدا هُوَ الّي كان كيهلك في أُورُشَليم هَدوك الّي كانو كيعيّطو بْهَد الِاسم؟ واش ما جا شي نْهنايَ باش يدّيهُم مكتّفين ويدفعوم عند رُؤَساء المسؤولين؟" وَلكن شاول كان كيتقوّى وْكيحيّر اليهود الّي ساكنين في دِمَشْق، كيأكّد عليهُم بلّي يَسوع هُوَ المسيح. وْملّي ݣازت بزّاف د الأيّام، تشاورو اليهود باش يقتلوه، وَلكن شاول عرف الخطّة ديالوم. كانو كيراقبو البيبان د المدينة بالنهار وْبالليل باش يقتلوه. ديك الساعة ادّاواه التلامد في الليل وْهبّطوه من السور وْدلّاواه في واحد السلّة. وْملّي وصَل شاول نْأُورُشَليم، بغى يتلاقى مع التلامد، وَلكن كانو كاملين كيخافو منّو، حيت ما تاقو شي بلّي هُوَ تلميد. وَلكن ادّاه بَرْنابا وْقدّموْ نالرُّسُل وْحكى لوم كيفاش شاول شاف الرَّبّ، الّي تكلّم معاه في الطريق، وْكيفاش بشّر بْزعامة في دِمَشْق بِاسم يَسوع. وْبقا كيدخل وْكيخرج معهُم في أُورُشَليم وْكيتكلّم بْوضوح بِاسم الرَّبّ. وْكان كيتكلّم وْكيتناقش مع اليهود الّي كيهدرو باللُغة اليونانيّة، وَلكن هُمَ قصدو يقتلوه. وْملّي الخوت عرفو ديك الشي، ادّاواه نْقَيصَريّة وْمن تمّا صيفطوه نْطَرْسوس. ديك الساعة الكنائس في كُل اليَهوديّة والجَليل والسامِرة كانو كيتمتّعو بْسلام وْكيتقوّاو، حيت كانو كيتمشّاو في خوف اللّٰه والتعْزية د الروح القُدُس، وْكانو كيتّزيدو في العدد. وْملّي كان بُطْرُس كيسافر في المنْطَقة كاملة، هوّد باش يطلّل على القدّيسين الّي ساكنين في لُدّة. وْتلاقى تمّاك مع واحد المكْحوش مسمّي إينْياس الّي كان ممدود في الفراش مدّة ت‍من سنين. وْقال لو بُطْرُس: "آ إينْياس، شافاك يَسوع المسيح. وقَف وْجْمع الفراش ديالك." وْوقَف في الحين. وْشافوه الناس كاملين الّي ساكنين في لُدّة وْسارون، وآمنو بالرَّبّ. وْكانت في يافا واحد التلْميدة مسمّية طابيثا، الّي مترْجمة "غزالة." هَدي كانت معمّرة بالأعْمال المزيانة وْكانت كتعمل الحسنات. وْفي ديك الأيّام مرطَتْ وْماتت. وْغسلوها وْنزّلوها في واحد البيت في الفوقي. وْحيت لُدّة قريبة من يافا، عرفو التلامد بلّي بُطْرُس تمّاك، وْصيفطو جوج د الرجال يرغبوه: "آجي دغيا نْعندنا." وقَف بُطْرُس بالزربة وْمشى معهُم. وْملّي وصَل طلّعوه نالبيت، وْوَقفو الهجّالات كاملين وْدارو بِه كيبكيو وْكيورّيواه القمصان والحوايج الّي كانت كتخيّط غزالة ملّي كانت معهُم. ديك الساعة خرّجوم بُطْرُس كاملين على برّا وْطاح على الركابي ديالو وْصلّى وْدار نالجتّة وْقال: "آ طابيثا، رْجع بالروح." وْفتحَت العينين ديالاْ، وْملّي شافت بُطْرُس ݣلسَتْ. وْعْطاها يَدّو وْوقّفاْ، وْعَيّط على القدّيسين والهجّالات وْقدّماْ لوم وْهِيَ حيّة. وانْتَشر هَد الخبر في يافا كاملة، وآمنو بزّاف د الناس بالرَّبّ. وْبقا بُطْرُس في يافا بزّاف د الأيّام عند واحد الرَّجل دبّاغ مسمّي سِمْعان. وْكان في قَيصَريّة واحد الرَّجل مسمّي كُرْنيليوس، قايد المية من الفرقة الّي مسمّية "الفرقة الطليانيّة." وْكان واحد الرَّجل متّاقي، هُوَ والدار ديالو كاملة كيخافو اللّٰه، وْكان كيعطي بزّاف د الصدقات نالشعب وْكيصلّي دائمًا ناللّٰه. وْشاف بالواضح في واحد الرؤيا، تقْريبًا في التلاتة د العشية، واحد الملاك من عند اللّٰه داخل نْعندو وْكيقول لو: "آ كُرْنيليوس." وْشاف فيه وْهُوَ خوفان وْقال: "شنّو بغيتِ، آ سيدي؟" وْقال لو: "الصلاوات والصدقات ديالك طلعو فحال دكرى قدّام اللّٰه. وْدابا صيفط شي رجال نْيافا وْعَيّط على سِمْعان، الّي مسمّي بُطْرُس، وْهُوَ نازل عند سِمْعان، واحد الرَّجل دبّاغ، الّي عندو الدار ديالو حدا البحَر." وْملّي مشى الملاك الّي كان كيهدَر مع كُرْنيليوس، عَيّط على جوج د الخدّامة ديالو، وْواحد العسْكري متّاقي الّي كان مرافق ديالو، وْصيفطوم نْيافا من بعدما خبروم بْكُل شي. ولّا غدّا، ملّي كانو ماشّين في الطريق وْكيقرّبو نالمدينة، طلَع بُطْرُس نالسطَح باش يصلّي، تقْريبًا مع الظهور، وْجاه بزّاف د الجّوع وْبغى ياكل. وْملّي كانو كيوجّدو لو الماكلة، جات لو واحد الغيبوبة. وْشاف السما مفتوحة وْنازل مِنّاْ فحال واحد المنْديل كبير مربوط من أربعة د الطراف، هابط نالأرض. وْكانو فيه من كُل شكل من الدواب والزواحف والطيور د السما. وْجا لو واحد الصوت: "نوض، آ بُطْرُس. دبَح وْكول." أمّا بُطْرُس قال: "لا، يا رَبّي، حيت عُمري ما كليتْ حتّى شي حاجة محرّمة أَوْلا منْݣوسة." رجَع لو الصوت مرّة تانية كيقول: "ديك الشي الّي طهّروْ اللّٰه، ما تقول شي أنتينا بلّي هُوَ حرام." وْوقَع هَد الشي تلاتة د المرّات، وْفي الحين تّرفد ديك المنْديل نالسما. وْملّي كان بُطْرُس حيران في نفسو على المعنى د هَد الرؤيا الّي شافاْ، جاو الرجال الّي تْصيفطو من عند كُرْنيليوس كيسقصيو على الدار د سِمْعان، وْوَقفو قدّام الباب، وْعيّطو كيسقصيو واش سِمْعان الّي مسمّي بُطْرُس نازل تمّاك. وْملّي كان بُطْرُس كيخمّم في الرؤيا، قال لو الروح القُدُس: "شوف، هنايَ تلاتة د الرجال كيفتّشو عليك. إيوا، زْرب وْهْبط وْما تشكّ شي ت‍مشي معهُم، حيت أنا صيفطْتوم." وْهبَط بُطْرُس نْعند الرجال وْقالّوم: "ها انا. أنا هُوَ الّي كتفتّشو عليه. شنّو هُوَ السبب علاش جيتو نْهنايَ؟" ردّو عليه: "جينا من جهة كُرْنيليوس قايد المية، رَجل متّاقي كيخاف اللّٰه وْهُوَ محْتَرم عند شعب اليهود كامل. واحد الملاك مقدّس عْطى إرشادات باش يجيبك نالدار ديالو ويسمع منّك الكلام الّي عندك." ديك الساعة دخّلوم بُطْرُس وْضيّفوم. ولّا غدّا، خرج بُطْرُس معهُم، وْونّسوهُم بعض الخوت من يافا. والنهار يَخُر دخلو نْقَيصَريّة. كُرْنيليوس كان كيتسنّاهُم وْعَيّط على الأهل والصحاب القرابـين لِلو. ملّي كان بُطْرُس داخل، اسْتَقبلوْ كُرْنيليوس وْطاح عند رِجلو وْسجد لو. وَلكن بُطْرُس وقّفوْ وْقال لو: "نوض، حتّى أنا إنسان فحالك." وْدخل بُطْرُس كيتكلّم معاه، وْجبر بزّاف د الناس مجموعين. وْقالّوم: "أنتُمَ كتعرفو بلّي ماشي مسموح نواحد الرَّجل يهودي يتّجمع مع شي واحد أجنبي ولا يزوروْ. وَلكن اللّٰه بيّن لي بلّي ما خصْني شي نسمّي حتّى إنسان محرّم أَوْلا منْݣوس. على ديك الشي، ملّي عيّطْتِ عليَّ، أنا جيتْ بلا ما نخالفكُم. وْدابا كنسقصيكُم على شْمن سبب عيّطْتو لي؟" جاوب كُرْنيليوس: "هَدي أربع أيّام في هَد الساعة، تقْريبًا في التلاتة د العشية، أنا كُنْتْ كنصلّي في الدار ديالي، وْعلى غفلة ظهَر قدّامي واحد الرَّجل بْحوايج كَتْبرَق، وْقال لي: «آ كُرْنيليوس، اتّسمعَتْ الصلاوات ديالك والصدقات ديالك اتّدكرَتْ قدّام اللّٰه. صيفط دابا شي واحد نْيافا باش يجي سِمْعان، الّي مسمّي بُطْرُس، الّي نازل حدا البحَر في الدار د سِمْعان، واحد الرَّجل دبّاغ.» في الحين صيفطْتْ لك شي واحدين، وانتينا عملْتِ مزيان حيت جيتِ. وْدابا حنايَ كاملين مجموعين قدّام اللّٰه باش نسمعو كُل ما آمرك بِه اللّٰه." وْفتَح بُطْرُس دُقمو وْقال: "في الحقيقة، أنا كنعرف بلّي اللّٰه ما عندو شي الوجهيّات، وَلكن في كُل أُمّة اللّٰه كيرحّب بأَي واحد الّي كيخاف منّو وْكيعمل بالتقْوى. اللّٰه صيفط الرسالة ديالو نْبَني إسْرائيل، كيبشّر بإنجيل السلام بواسطة يَسوع المسيح، هَدا هُوَ الرَّبّ د الناس كاملين. أنتُمَ كتعرفو هَد الرسالة الّي انْتَشرَتْ في اليَهوديّة كاملة، الّي بدات من الجَليل من بعد المعموديّة الّي بشّر بِها يوحَنّا، وْكيفاش دهَن اللّٰه يَسوع الناصِري بالروح القُدُس والقوّة، وْكيفاش هَداك كان كيتنقّل وْكيعمل الخَير وْكيشافي المعدّبـين كاملين بإبْليس، حيت اللّٰه كان معاه. وْحنايَ شهود بْكُل ما عمل يَسوع في بلاد اليَهوديّة وْفي أُورُشَليم. وْقتلوه وْعلّقوه على واحد الخشبة. هُوَ هَدا الّي ردّوْ اللّٰه بالروح في اليوم التالت وْخلّاه يظهر، ماشي نالشعب كامل، وَلكن نالشهود الّي اختاروم اللّٰه من قبل، الّي هُمَ حنايَ الّي كلينا وْشربْنا معاه من بعدما قام من بين الميّتين. وْوصّانا باش نبشّرو الشعب وْنشهدو بلّي هُوَ الّي جعلوْ اللّٰه حاكم على الحيّين والميّتين. لِلو كيشهدو الأَنْبياء كاملين بلّي كُل واحد الّي كيآمن بِه غادي يتوصّل بْغُفْران الدنوب بِاسمو." ملّي بُطْرُس كان باقي كيتكلّم بْهَد الأُمور، نزل الروح القُدُس عليهُم كاملين، هَدوك الّي كانو كيسمعو الكلام. وْدهشو المؤمنين الّي هُمَ من أهل الطهارة، الّي جاو مع بُطْرُس، حيت اتّعطى الروح القُدُس حتّى نِلّي ماشي يهود، حيت كانو كيسمعوهُم كيهدرو بْلُغات مخْتَلفة وْكيعظّمو اللّٰه. في ديك الساعة جاوب بُطْرُس: "واش يقدر شي واحد يمنع الما نْهَدوك باش يتغطّسو، الّي توصّلو بالروح القُدُس فحالنا حنايَ؟" وآمروم يتغطّسو بِاسم يَسوع المسيح. ديك الساعة رغبوه يبقا معهُم شي أيّام. وْسمعو الرُّسُل والخوت الّي كانو في اليَهوديّة بلّي كاينين من غير اليهود الّي قبلو كلام اللّٰه. وْملّي طلَع بُطْرُس نأُورُشَليم، تغاننو معاه الناس الّي كيدافعو على الطهارة، وْقالو: "أنتينا دخلْتِ نْعند الناس الّي بلا طهارة وْكليتِ معهُم!" وْبدا بُطْرُس كيشرح لوم الّي وقَع بالترْتيب، كيقول: "أنا كُنْتْ في مدينة يافا كنصلّي وْشفْتْ في الغيبوبة واحد الرؤيا، شي حاجة فحال واحد المنْديل كبير نازل مربوط من أربعة د الطراف، هابط من السما وْجا نْعندي. وْشفْتْ فيه بالعينين ديالي وْتأمّلْتْ، وْشفْت الدواب والوحوش والزواحف والطيور د السما. وْسمعْتْ واحد الصوت الّي قال لي: «نوض آ بُطْرُس. دْبح وْكول.» وْقُلْتْ: «لا، يا رَبّي، حيت عُمراْ ما دخلَتْ شي ماكلة محرّمة أَوْلا منْݣوسة نْدُقمي.» وْردّ عليَّ الصوت من السما مرّة تانية: «ديك الشي الّي طهّروْ اللّٰه، ما تقول شي أنتينا بلّي هُوَ حرام.» وْوقَع هَد الشي تلاتة د المرّات وْتّرفع كُل شي نالسما عاود. وْفي الحين، ها تلاتة د الرجال وَصلو نالدار الّي كُنْتْ ساكن فيها، مصيفطين نْعندي من قَيصَريّة. وْقال لي الروح باش نمشي معهُم بلا ما نشكّ حتّى في شي حاجة. وْجاو معيَ ديك الستّة د الخوت حتّى هُمَ، وْدخلْنا نالدار د واحد الرَّجل، وْهُوَ شرح نّا كيفاش شاف الملاك في الدار ديالو واقف وْكيقول لو: «صيفط نْيافا شي رجال وْعَيّط على سِمْعان، الّي مسمّي بُطْرُس. هُوَ غادي يقدّم لك واحد الرسالة الّي بالواسطة ديالاْ غادي تنجا أنتينا والدار ديالك كاملة.» وْملّي بديتْ كنتكلّم، نزل الروح القُدُس عليهُم حتّى هُمَ، فحال ما نزل علينا في البداية. ديك الساعة تفكّرْتْ الكلام الّي قال الرَّبّ: «يوحَنّا غطّس بالما، أمّا أنتُمَ غَد تْتغطّسو بالروح القُدُس.» إدَن، إدا اللّٰه عْطى لوم المَوْهبة فحال الّي عْطاها نّا حنايَ الّي آمنّا بالرَّبّ يَسوع المسيح، شكون أنا باش نمنع اللّٰه؟" وْملّي سمعو هَد الأُمور، سكتو وْمجّدو اللّٰه، كيقولو: "ها اللّٰه عْطى حتّى نْغير اليهود التوبة نالحياة." وْهَدوك الّي تشتّـتو بْسباب التمرميدة الّي وقعَتْ بْسباب إسْتِفانوس، مشاو نْفينيقيّة وْقُبْرُص وأَنْطاكية، وْهُمَ ما كيتكلّمو شي مع حتّى واحد بالكلام، غير مع اليهود بوحدوم. وَلكن كانو مِنّوم شي رجال من قُبْرُص والقَيرُوان الّي، ملّي دخلو نأَنْطاكية، كانو كيتكلّمو مع اليونانيّين كيخبرو بالإنجيل د الرَّبّ يَسوع. وْكانت يد الرَّبّ معهُم وآمنو بزّاف مِنّوم وْرجعو نالرَّبّ. وصَل الخبَر د هَد الأُمور نالودْنين د الناس د الكنيسة في أُورُشَليم، وْصيفطو بَرنابا باش يمشي نأَنْطاكية. ملّي وصَل وْشاف نعْمة اللّٰه، فرَح وْشجّعوم كاملين باش يتبتو في الرَّبّ مآمنين بْقلب تابت. حيت بَرنابا كان رَجل مزيان وْمعمّر بالروح القُدُس وْبالإيمان. وْعدد كبير من الناس قبلو الرَّبّ. وْخرج بَرنابا نْطَرْسوس باش يفتّش على شاول، وْملّي جبروْ، جابوْ نأَنْطاكية. وْتّجمعو تمّا مع الكنيسة عام كامل وْعلّمو بزّاف د الناس. وْأَنْطاكية كانَتْ الموطَع فاين تسمّاو التلامد مسيحيّين نأوّل مرّة. وْفي ديك الأيّام، هوّدو شي أَنْبياء من أُورُشَليم نأَنْطاكية. وْناض واحد مِنّوم مسمّي أَغابوس وْتنبّأ بواسطة الروح بلّي واحد الجّوع كبير كان غادي يوقع في الدنيا كاملة، الّي وقَع في أيّام كلوديوس قَيصَر. في ديك الوقت، قرّرو التلامد، كُل واحد على قدّ المقدار ديالو، يصيفطو المعاونة نالخوت ديالوم الّي ساكنين في اليَهوديّة. وْعملو ديك الشي، وْصيفطوها نالشيوخ على يد بَرنابا وْشاول. وْفي ديك الوقت المَلِك هيرودُس شبّر البعض من الكنيسة باش يعدّبوم، وْقتل يَعْقوب خاه د يوحَنّا بالسيف. وْملّي شاف بلّي ديك الشي عجب اليهود، شبّر بُطْرُس حتّى هُوَ. وقَع هَد الشي في أيّام عيد الفطير. وْملّي شبّروْ، دخّلوْ نالحبس وْسلّموْ نأربعة د الفرقات د العسْكر، بأربعة د الرجال في كُل فرقة، باش يحضيواه، حيت بغى يخرّجوْ نالشعب مورا عيد الفِصح. وْملّي كان بُطْرُس محضي في الحبس، كانت الكنيسة كتجْتَهد في الصلاة ناللّٰه من جهتو. وْفي الليل قبل النهار فاش كان هيرودُس مقرّر يخرّجوْ ويحكم عليه، كان بُطْرُس ناعس بين جوج د العسْكر وْمربوط بْجوج د السناسل، وْكانو الحرّاس قدّام الباب كيعسّو على الحبس. وْعلى غفلة ظهَر واحد الملاك من الرَّبّ والنور ضوّى في الحبس، والملاك ضرب بُطْرُس في جنبو وْفيّقوْ، وْقال لو: "نوض دغيا!" وْطاحو السناسل من اليَدّين ديالو. وْقال لو الملاك: "تحزّم وْلبس الصبّاط ديالك." وْهُوَ عمل هَيداك. وْقال لو: "لبس السلهام ديالك وْتـبَعني." وْخرج بُطْرُس موراه وْتَـبعوْ، وْما عارف شي بلّي ديك الشي الّي عمل الملاك كان د بالصّحّ، وَلكن ظنّ بلّي شاف شي رؤيا. وْݣازو الحرّاس الُوّل والتاني، وْوَصلو نالباب د الحديد الّي كَتدّي نالمدينة، وْتّفتحَتْ لوم بوحداْ وْخرجو. وْتمشّاو في واحد الزنقة، وْعلى غفلة فارقوْ الملاك. ملّي فطن بُطْرُس بْراسو، قال: "دابا تأكّدْتْ د بالصّحّ بلّي الرَّبّ صيفط الملاك ديالو وْحرّرني من يد هيرودُس وْمن كُل ما كيتسنّى شعب اليهود." وْملّي كان كيخمّم في ديك الشي الّي وقَع، وصَل نالدار د مَرْيَم يمّاه د يوحَنّا، الّي مسمّي مَرْقُس، فاين كانو بزّاف د الناس مجموعين كيصلّيو. دقّ بُطْرُس في الباب د الخارج وْخرجَتْ واحد الخدّامة مسمّية رَودة باش تعرف شكون. وْملّي عرفَتْ الصوت د بُطْرُس، ما فتحَتْ شي الباب من الفرْحة، وَلكن جرات نْداخل وْقالَتْ: "بُطْرُس واقف على الباب!" وْقالو لاْ: "أنتينا حمقة!" أمّا هي كانت كتأكّد عليهُم بلّي هُوَ هَداك، ويَخرين قالو: "هَدا هُوَ الملاك ديالو!" أمّا بُطْرُس بقا كيدقّ، وْملّي فتحو وْشافوه، تعجّبو. وْبُطْرُس شيّر لوم باليَد ديالو باش يسكتو، وْعاود لوم كيفاش خرّجوْ الرَّبّ من الحبس، وْقالّوم: "خبرو بْهَد الشي يَعْقوب والخوت." من بعد خرج وْمشى نْموطَع يَخُر. ملّي طلَع النهار، وقعَتْ واحد الدهشة كبيرة على العسْكر، حيت ما عرفو شي شنّو وقَع نْبُطْرُس. أمّا هيرودُس، ملّي فتّش عليه وْما جبروْ شي، بحت في الحرّاس وآمر يقتلوهُم. من بعد هيرودُس هوّد من اليَهوديّة نْقَيصَريّة وْݣلس تمّاك. كان هيرودُس غضبان بزّاف على الناس د صور وْصَيدا، وْهُمَ اتَّفقو وْوَقفو قدّامو، حيت تصاحبو مع بلاسْتُس، المسؤول على بيت النعاس د المَلِك، وْطلبو الصُّلح حيت بلادوم كَتْـتقوّت من بلاد المَلِك. في واحد النهار محدّد، لبس هيرودُس الحوايج الملوكيّة وْݣلس على العرش ديالو وْبدا كيخاطبوم. وْغوّتو الناس وْقالو: "هَد الصوت د واحد الإلَه! ماشي الصوت د الإنسان!" وْفي ديك اللحظة، ضربوْ واحد الملاك من الرَّبّ، حيت ما عْطى شي المجد ناللّٰه. وْكلاواه الدود وْمات هيرودُس. وَلكن كلام اللّٰه كان كينْتَشر وْكيكتر. وْرجَع بَرنابا وْشاول من أُورُشَليم من بعدما كمّلو الخدمة ديالوم، وادّاو معهُم يوحَنّا، الّي مسمّي مَرْقُس. وْكانو في الكنيسة الّي كانت في أَنْطاكية شي أَنْبياء وْمُعلّمين: بَرنابا وْسِمْعان، الّي مسمّي نيجَر، وْلوكيوس القَيرَواني وْمَناين، الّي تربّى مع الحاكم هيرودُس، وْشاول. وْملّي كانو كيخدمو الرَّبّ وْكيصومو، قال الروح القُدُس: "عزلو لي بَرنابا وْشاول نالخدمة الّي عيّطْتْ لوم عليها." وْمن بعدما صامو وْصلّاو، عملو يَدّوم عليهُم وْصيفطوهُم. وْملّي تصيفط بَرنابا وْشاول بالروح القُدُس، هوّدو نْسَلوكية، وْمن تمّا سافرو نْقُبْرُص. وْملّي وَصلو نْسَلاميس، خبرو بْكلام اللّٰه في مجامع اليهود، وْكان معهُم يوحَنّا كيعاونوم. وْملّي قطعو الجزيرة حتّى نْبافوس، جبرو واحد الرَّجل سحّار، نَبي كدّاب يهودي، مسمّي بار يَشوع، الّي كان مع الخليفة سَرْجيوس بولُس، واحد الرَّجل معقّل. هَدا بغى يسمع كلام اللّٰه وْعَيّط على بَرنابا وْشاول. وَلكن عارضوم عَليم السحّار (هَدا هُوَ المعنى د الِاسم ديالو)، باغي يبعّد الوالي من الإيمان. أمّا شاول، الّي مسمّي بولُس، معمّر بالروح القُدُس، شاف فيه، وْقال: "آ المعمّر بْكُل غشّ وْكُل خُبت، آ ولد إبْليس، آ العدو د كُل تقْوى، واش عُمرك ما غادي توقف من تعواج طرقان اللّٰه المستقيمة؟ دابا ها يد الرَّبّ عليك وْغادي تكون عمى وْما غادي شي تشوف الشمس على واحد المدّة." وْفي هزيزة طاحت عليه الضبابة والظلام وْبدا كيدور كيفتّش على مَن يݣوّدوْ من يَدّو. ملّي شاف الوالي الّي وقَع، آمن، حيت تعجّب من تعْليم الرَّبّ. وْملّي قلّعو من بافوس، بولُس والّي هُمَ معاه وَصلو نْبَرْجة في بَمْفيليّة، أمّا يوحَنّا تفارق عليهُم وْرجَع نأُورُشَليم. وَلكن هُمَ ݣازو من بَرْجة حتّى أَنْطاكية في بيسيديّة. وْنهار السبت دخلو نواحد المجْمع وْݣلسو فيه. وْمور القراية في الشريعة وْفي الأَنْبياء، صيفطو لوم رُؤَساء المجمع وْقالو لوم: "آ الرجال الخوت، إدا عندكُم شي كلمة د التشجيع نالشعب، تكلّمو." ديك الساعة وقَف بولُس وْشيّر بْيَدّو وْقال: "آ الرجال الإسْرائيليّين وْغير اليهود الّي كيخافو اللّٰه، سَمعوني. الإلَه د شعب إسْرائيل، اختار جدودنا وْعظّم الشعب في الوقت الّي كانو فيه برّانيّين في بلاد مصر، وْبْدراع مرْفوعة خرّجوم مِنّاْ، واستَحملوم تقْريبًا مدّة أربعين عام في الصحرا. وْملّي هلك سبعة د الأُمَم في بلاد كَنْعان، عْطى لوم البلاد ديالوم بالوَرت. وْمن بعد عْطاهُم قُضاة، تقْريبًا مدّة أربع مية وْخمسين عام، حتّى نالوَقت د صَموئيل النَّبي. وْفي ديك الوَقت، طلبو يكون عليهُم واحد المَلِك، وْعْطاهُم اللّٰه شاول بن قيس، واحد الرَّجل من قبيلة بِنْيامين، في مدّة أربعين عام. وْملّي تحيّد شاول، عْطاهُم داود باش يكون مَلِك، وْشهد لو وْقال: «جبرْتْ داوُد بن يَسّي رَجل من جهة قلبي، الّي غادي يعمل إرادتي الكاملة.» من الدرّيّة ديالو وْعلى حسب الوعد ديال اللّٰه، عْطى واحد المُنجّي نإسْرائيل، هُوَ يَسوع. وْمن قبل المجي د يَسوع، يوحَنّا كان كيخاطب بْمعموديّة التوبة نالشعب د إسْرائيل كامل. وْملّي كان يوحَنّا كيكمّل المهمّة ديالو، قال: «في النظر ديالكُم، شكون أنا؟ أنا ماشي هُوَ، وَلكن غادي يجي من بعد منّي شي واحد الّي ما كَنْسْتاهل شي نفسخ الخيوط د الصبّاط د رِجلو.» "آ الرجال الخوت، أُوْلاد إبراهيم، وْهَدوك الّي بيناتكُم الّي كيخافو اللّٰه، لِنّا تصيفط هَد الكلام د النجا. حيت سكّان أُورُشَليم والرؤساء ديالاْ ما اعْتَرفو شي بيَسوع، وْملّي حكمو عليه، كمّلو الكلام د الأَنْبياء الّي كيقراواه كُل النهار السبت. وْواخّا ما جبرو فيه حتّى شي سبّة نالموت، طلبو من بلاطُس باش يقتلوْ. وْملّي كمّلو كُل شي الّي مكتوب عليه، هبّطوه من الخشبة وْعملوه في واحد القبَر. أمّا اللّٰه بعتوْ من بين الميّتين، وْظهَر يَسوع بزّاف د الأيّام نْهَدوك الّي طلعو معاه من الجَليل نأُورُشَليم، الّي هُمَ دابا الشهود ديالو عند الشعب. وْحنايَ كنبشّروكُم بالإنجيل د الوعد الّي اتّعطى نالجدود ديالنا، الوعد الّي كمّلوْ اللّٰه لِنّا، حنايَ الولاد ديالوم، ملّي ردّ يَسوع بالروح، كيفْما هُوَ مكتوب في المزمور التاني: «أنتينا بني. أنا اليوما ولدْتك.» اللّٰه بعتوْ من بين الميّتين باش الدات ديالو ما عُمراْ ما تفسد، وْهَيدا تكمّل هَد الكلام: «أنا غادي نعطيكُم البركات المقدّسة والمضْمونة ديال داود.» على ديك الشي كيقول عاود في مزمور يَخُر: «ما غادي شي تخلّي القُدّوس ديالك يتعفّن في القبَر.» حيت بالفعل داود، من بعدما خدم الجيل ديالو على حسب إرادة اللّٰه، نعس وْتّجمع مع الجدود ديالو وْتفسد الجسد ديالو. أمّا هَداك، الّي ردّوْ اللّٰه بالروح، ما شاف شي الفساد. على هَد الشي، آ الرجال الخوت، عرفو بلّي بواسطة يَسوع كنبشّروكُم بْغُفْران الدنوب. أنتُمَ ما تقدرو شي تـتبرّرو بواسطة الشريعة د موسى، وَلكن كُل واحد الّي كيآمن كيكون مبرّر بواسطة يَسوع. وْردّو بالكُم باش ما يوقع شي عليكُم ديك الشي الّي قالو الأَنْبياء: «شوفو، أنتُمَ الّي كتبهْدلو! تعجّبو وْتّهلكو، حيت أنا كنعمل واحد العمل في الأيّام ديالكُم الّي، واخّا شي واحد خبركُم بِه، ما غادي شي تتيّقوه.»" ملّي خرج بولُس وْبَرنابا من المجمع د اليهود، طلبو مِنّوم الناس باش يتكلّمو معهُم بْهَد الأُمور في السبت الماجي. وْملّي تفرّق الاجْتماع، بزّاف من اليهود وْمن المتهوّدين تبعو بولُس وْبَرنابا، الّي تكلّمو معهُم وْقنعوهُم باش يتبتو في نعْمة اللّٰه. وْفي السبت الّي موراه، اتّجمعَت المدينة تقْريبًا كاملة باش تسمع كلام اللّٰه. وَلكن ملّي شافو اليهود الجمْهور، تعمّرو بالغيرة وْبداو كيعارضو الّي قالوْ بولُس وْكيسبّوه. وْردّ عليهُم بولُس وْبَرنابا بالشجاعة: "كان واجب علينا في الُوّل نبشّروكُم أنتُمَ بْكلام اللّٰه، وَلكن حيت رفضْتوه وْما كتحسبو شي راسكُم مسْتاهلين نالحياة الأبديّة، حنايَ غادي نمشيو نْعند غير اليهود. حيت هَيدا وصّانا الرَّبّ: «أنا جعلْتك نور نالأُمَم باش تدّي النجا ديالي حتّى نآخر الدنيا.»" ملّي سمعو غير اليهود هَد الشي، فرحو وْمجّدو كلام الرَّبّ، وآمنو كاملين الّي كانو مخْتورين نالحياة الأبديّة. وانْتَشر كلام الرَّبّ في البلاد كاملة. وَلكن اليهود حرّشو النسا الموقّرين والمحْتَرمات والرجال المقدّمين د المدينة، وْسبّـبو واحد التمرْميدة على بولُس وْبَرنابا وْطردوهُم من الحدود ديالوم. ديك الساعة نفطو الغبرة من الرِّجلين ديالوم فحال شي شهادة ضدّ ديك المدينة، وْمشاو نإيقونيّة. وْتعمّرو التلامد بالفرْحة والروح القُدُس. وْملّي كانو في إيقونيّة، دخلو مع بعطوم نْبيت العبادة د اليهود وْتكلّمو بواحد الطريقة حتّى آمنو بزّاف من اليهود واليونانيّين. وَلكن اليهود الّي ما كانو شي مؤمنين حرّشو الوَتَنيين وْفسّدو قلبوم ضدّ الخوت. وْبقاو مدّة طويلة تمّاك كيخاطبو بْزعامة في الرَّبّ، الّي كان كيشهد بْكلام النعْمة ديالو وْكيعطي باش يعملو على يَدّوم علامات وْعجايب. وْتقسّمو الناس د المدينة، البعض مِنّوم كانو مع اليهود والبعض مع الرُّسُل. وْملّي وقعَتْ واحد المحاولة من جهة الوَتَنيين واليهود، مدعّمين بالرؤساء ديالوم، باش يمرْمدوهُم ويرجموهُم، فطنو بْهَد الشي وْهربو نْلِسْترة وْدَرْبة، مُدُن د ليقونية والبلاد الدايرة بِهُم. وْتمّاك كانو كيبشّرو بالإنجيل. وْكان في لِسْترة واحد الرَّجل ݣالس مكْحوش من رِجلو، الّي تولد هَيدا من الكرش د يمّاه وْعُمرو ما تمشّى. هَدا سمَع بولُس كيتكلّم، وْحقّق فيه بولُس وْشاف بلّي عندو الإيمان باش يتشافى. آمروْ بْصوت عالي: "نوض، وقَف على الرِّجلين ديالك!" والرَّجل نقّز وْبدا كيمشي. وْملّي شافو الناس ديك الشي الّي عمل بولُس، علّاو الصوت ديالوم باللُغة الليقونيّة وْقالو: "الآلِهة تشبّهو بالبشر باش يزورونا!" وْسمّاو بَرنابا زيوس وْبولُس هَرْمَس، حيت غالبًا كان هُوَ الّي كيوجّه لوم الكلام. والكاهن د زيوس، الّي كان المعْبد ديالو قدّام المدينة، جاب التيران والتيجان د النوّار قدّام البيبان، وْبغاو يقدّمو لوم الدبايح مع الجمْهور. وْملّي سمعو الرُّسُل بَرنابا وْبولُس ديك الشي، شرّݣو الحوايج ديالوم وْجراو نْعند الجمهور كيغوّتو وْكيقولو: "آ الرجال، علاش كتعملو هَد الشي؟ حنايَ بشر من نفس الطبيعة الّي عندكُم، وْكنخبروكُم باش ترجعو من هَد الأُمور الباطلة نالإلَه الحيّ، الّي خلَق السّما والأرض والبحَر وْكُل ما فيهُم، الّي في الأجيال الفايتة خلّى كُل الأُمَم يمشيو في الطريق ديالوم. وَلكن ما خلّى شي نفسو بلا شهادة، وْهُوَ كيعمل الخير، حيت كينزّل الشتا من السما وْكيعطي المواسم في وقتاْ وْكيرزقكُم القوت ديالكُم وْكيعمّر قلبكُم بالفرْحة." وْبْهَد الكلام وْبْصعوبة كبيرة قدرو يحصرو الجمهور باش ما يدبحو شي عليهُم الدبايح. في ديك الوقت وَصلو شي يهود من أَنْطاكية وإيقونيّة، وْقنعو الجمْهور يبدّل الفكرة، وْرجمو بولُس وْجرّوه على برّا من المدينة، ظانّين بلّي هُوَ ميّت. وَلكن ملّي دارو بِه التلامد، ناض وْدخل نالمدينة. ولّا غدّا خرج مع بَرنابا نْدَرْبة. وْمن بعدما بشّرو بالإنجيل في ديك المدينة، ربحو التلامد بزّاف وْرجعو نْلِسترة وإيقونيّة وأَنْطاكية، كيقوّيو النفس د التلامد وْكيشجّعوهُم باش يتبتو في الإيمان، وْكيقولو لوم: "خصْنا نݣوزو بْبزّاف د المشاكل باش ندخلو نْمُلك اللّٰه." كانو كيخصّصو لوم شي د الشيوخ في كُل كنيسة، وْبالصلاة والصيام أمّنوهُم عند الرَّبّ الّي آمنو بِه. وْملّي ݣازو في بيسيديّة، جاو نْبَمْفيليّة، وْملّي بشّرو بالكلام د اللّٰه في بَرْجة، هوّدو نأَتّالية. من تمّاك سافرو في البحَر نأَنْطاكية، فاين كانو موكّلين نْنعْمة اللّٰه نالخدمة الّي كمّلوها. ملّي وَصلو، جمعو الكنيسة وْحكاو كُل ما عمل اللّٰه على يَدّوم وْكيفاش فتح البيبان د الإيمان نالوَتَنيين. وْݣلسو تمّاك مدّة طويلة مع التلامد. جاو شي ناس من اليَهوديّة الّي بداو كيعلّمو الخوت بْهَد الطريقة: "إدا ما تطهّرْتو شي على العادة د موسى، ما تقدرو شي تنجاو." وْحيت وقعَتْ نْبولُس وْبَرنابا واحد المدابزة وْمناقشة كبيرة معهُم، قرّرو باش يطلعو بولُس وْبَرنابا نأُورُشَليم نْعند الرُّسُل والشيوخ، وْمعهُم شي ناس يَخرين مِنّوم، باش يصلّحو هَد القضيّة. وْمن بعدما صيفطَتوم الكنيسة، ݣازو في فينيقيّة والسامِرة كيعاودو لوم بالتفاصيل كيفاش آمنو الوَتَنيين. وْبْهَد الخبر تعمّرو الخوت كاملين بْفرْحة كبيرة. وْملّي وَصلو نأُورُشَليم، رحّبَتْ بِهُم الكنيسة والرُّسُل والشيوخ، وْعاودو لوم كُل ما عمل اللّٰه بواسطتوم. وَلكن ناضو شي مؤمنين من المَدْهب د الفرّيسيّين وْقالو: "لازم نطهّرو غير اليهود وْنوصّيوهُم يطيعو الشريعة د موسى." اتّجمعو الرُّسُل والشيوخ باش يبحتو في هَد الأمر. وْمن بعدما تناقشو بزّاف، وقَف بُطْرُس وْقالّوم: "آ الرجال الخوت، أنتُمَ كتعرفو بلّي اللّٰه من البداية اختارني من بيناتكُم باش يسمعو غير اليهود من دُقمي كلام الإنجيل ويآمنو. واللّٰه، الّي كيعرف الّي كاين في القلوبة د الناس، شهد لوم وْعْطى لوم الروح القُدُس فحال ما عْطاه نّا حنايَ، وْما فرّق شي بينّا وْبينوم بْحتّى حاجة، وْطهّر قلبوم بالإيمان. وْدابا علاش كتجرّبو اللّٰه باش تعلّقو واحد النير على عنق التلامد الّي ما قدرو لا جدودنا ولا حنايَ نحملوه؟ حيت كنآمنو فحالوم بلّي حنايَ ناجيين بْنعْمة الرَّبّ يَسوع." ديك الساعة سكتَت الجماعة كاملة، وْكانو كيسمعو نْبَرنابا وْبولُس الّي كانو كيعاودو على البِلعة د العلامات والعجايب الكبارين الّي عمل اللّٰه بين غير اليهود على يَدّوم. وْملّي سكتو، جاوب يَعْقوب وْقال: "آ الرجال الخوت، سَمعوني. سِمْعان عاود لكُم كيفاش زار اللّٰه المرّة الُولى غير اليهود باش يدّي من بيناتوم شعب نالِاسم ديالو. وْمع هَد الشي كيوافق كلام الأَنْبياء، فحال ما هُوَ مكتوب: «من بعد هَد الشي، غادي نرجع وْنعاود نبني الخيمة د داود المطيّحة، وْنصلّح الهدم ديالاْ وْنوقّفاْ مرّة تانية باش يفتّشو على الرَّبّ باقي البشر، وْكُل الأُمَم الّي الِاسم ديالي منطوق عليهُم. هَيدا كيقول الرَّبّ الّي كيعرّف بْهَد الأُمور الّي معروفة من زمان.» على ديك الشي كنظنّ بلّي ما خصْنا شي نـتقّلو على غير اليهود الّي هُمَ راجعين ناللّٰه، وَلكن خصْنا نكتبو لوم باش يـبعّدو من الحاجات المنْݣوسة د الأصْنام والزنا والحيوان المجيّف والدم. حيت موسى من زمان عندو في كُل مدينة الّي كيخاطبو في المجامع، فاين كيقراو كتابو كُل نهار السبت." في ديك الوقت، ظهَر لوم مزيان، نالرُّسُل والشيوخ مع الكنيسة كاملة، باش يختارو البعض مِنّوم ويصيفطوهُم نأَنْطاكية مع بولُس وْبَرنابا: يَهودا، الّي مسمّي بَرسابا، وْسيلا، رجال مشهورين بين الخوت. وْصيفطو معهُم هَد البراة: "الرُّسُل والشيوخ الخوت كنسلّمو على الخوت من بين غير اليهود الّي في أَنْطاكية وْسوريّة وْكيليكيّة. سمعْنا بلّي شي ناس، خارجين من عندنا بلا الإدن ديالنا، شوّشوكُم بالكلام وْكيزعْزعو نفسكُم. وْظهَر نّا مزيان، بْرأي واحد، باش نختارو شي رجال وْنصيفطوهُم نْعندكُم مع بَرنابا وْبولُس العزازين ديالنا، رجال الّي خاطرو بْحياتوم بْسباب اِسم رَبّنا يَسوع المسيح. على هَد الشي كنصيفطو لكُم يَهودا وْسيلا، وْهُمَ غادي يخبروكُم بالكلام الّي كتبْنا لكُم. حيت ظهَر مزيان نالروح القُدُس وْلِنّا حنايَ، ما ننزّلو شي عليكُم التقال كتَر من هَد الأُمور الواجبة: تبعّدو من الدبايح نالأصْنام والدم والحيوان المجيّف والزنا. غَد تعملو مزيان إدا حفظْتو راسكُم من هَد الأُمور. تبقاو على خير." من بعدما ودّعو الخوت، هبطو نأَنْطاكية وْجمعو الجماعة وْسلّمو لاْ الرسالة. وْملّي قراوها الخوت، فرحو بالتّعْزيّة. ويَهودا وْسيلا، حيت حتّى هُمَ كانو أَنْبياء، شجّعو الخوت وْتَـبّتوهُم بْكلام طويل. من بعدما بقاو تمّاك شي وقت، الخوت ودّعوهُم بْسلام باش يرجعو نْعند الّي صيفطوهُم. [ وَلكن سيلا ظهر لو مزيان يبقا تمّاك معهُم.] أمّا بولُس وْبَرنابا بقاو في أَنْطاكية كيعلّمو وْكيبشّرو بْكلام الرَّبّ مع بزّاف يَخرين معهُم. من بعد شي وقت، قال بولُس نْبَرنابا: "نرجعو وْنطلّلو على الخوت ديالنا في كُل المُدُن فاين بشّرْنا بْكلام الرَّبّ باش نشوفو كيفاش هُمَ." وْبغى بَرْنابا يدّيو معهُم يوحَنّا الّي كيعيّطو لو مَرْقُس، أمّا بولُس ما ظهَر لو شي مزيان يدّيواه معهُم، حيت سمح فيهُم في بَمْفيليّة وْما بقا شي معهُم في الخدمة. وْوقعَتْ بيناتوم واحد المدابزة حادّة حتّى تفارقو على بعضيّاتوم، وْبَرْنابا ادّى معاه مَرْقُس وْسافر في البحَر نْقُبْرُص. أمّا بولُس اختار سيلا وْسافر من بعدما سلّموهُم الخوت نْنعْمة الرَّبّ. وْݣاز في سوريّة وْكيليكيّة كيتبّت الكنائس في الإيمان. وصَل بولُس نْدَرْبة وْمن بعد نْلِسْترة، وْكان تمّاك واحد التلْميد مسمّي تيموثاوس، اِبناْ د واحد المراة يهوديّة مؤمنة، وَلكن باباه يوناني. والخوت الّي في لِسترة وإيقونيّة كانو كيشهدو لو بواحد الشهادة مزيانة. وْقرّر بولُس يدّي تيموثاوس معاه. وْطهّروْ بْسباب اليهود الّي ساكنين في ديك المنْطَقة، حيت عرفو كاملين بلّي باباه يوناني. وْملّي كانو كيݣوزو على المُدُن، كيسلّموهُم القواعد الّي صدروهُم الرُّسُل والشيوخ الّي في أُورُشَليم باش يطبّقوهُم. وْكانو الكنائس كيتقوّاو في الإيمان وْكيكبر العدد ديالوم كُل نهار. وْملّي ݣازو في فِريجيّة وْمنْطَقة غَلاطيّة، مَنعوم الروح القُدُس يخبروهُم بالكلام في آسيا. وْملّي قرّبو نْميسيّا، حاولو يݣوزو نْبِثينيّة، وَلكن ما خلّاهُم شي الروح د يَسوع. وݣازو على ميسيّا وْهوّدو نْتَرواس. وْفي الليل ظهرَتْ نْبولُس واحد الرؤيا د واحد الرَّجل مَكْدوني واقف كيرغبوْ وْكيقول لو: "ݣوز نْمَكدونيّة وْعاونْنا!" وْملّي بولُس شاف هَد الرؤيا، دغيا وجّدْنا راسنا باش نمشيو نْمَكدونيّة متيقّنين بلّي اللّٰه عَيّط نّا باش نبشّرو بالإنجيل نالمَكْدونيّين. قلّعْنا في الباركو من تَرواس وْمشينا نيشان نْساموثْراكية، ولّا غدّا نْنيابوليس، وْمن تمّاك مشينا نْفيلِبّي، واحد المدينة مستَعْمرة بالرومان، الّي هي المدينة الكبيرة في ديك الجّهة د مَكدونيّة، وْبقينا فيها شي أيّام. وْنهار السبت خرجْنا على برّا من المدينة وْمشينا حدا الواد فاين ظنّينا بلّي كاين واحد الموطَع د الصلاة. وْݣلسْنا وْكُنّا كنتكلّمو مع النسا الّي اتّجمعو تمّاك. واحدة مِنّوم، الّي مسمّية ليدية، كانت من مدينة ثياتيرا وْهِيَ بيّاعة د التوب الرفيع وْكتعبد اللّٰه. ملّي كانت كتسمع، فتَح الرَّبّ قلباْ باش تركّز على الرسالة د بولُس. وْملّي تغطّسَتْ، هي والعائلة ديالاْ، عرطَتْ علينا هَيدا: "إدا اعْتَبرْتوني بلّي أنا مؤمنة بالرَّبّ، آجيو وْبقاو في الدار ديالي." وْقنعَتْنا. وقَع واحد المرّة، ملّي كُنّا ماشّين نالصلاة، بلّي تلاقاتنا واحد العايلة الّي فيها واحد الجنّ د السحر، الّي كانت كتربّح الأسْياد ديالاْ ربح كبير بالشوفان ديالاْ. هَدي تبعَتْنا، حنايَ وْبولُس، كتغوّت وْكتقول: "هَد الناس هُمَ عبيد اللّٰه العالي الّي كيخبروكُم بْطريق النجا." وْكانت كتعمل هَيدا بزّاف د الأيّام، وْما عجب شي الحال بولُس وْدار في الجنّ الشرّير وْقال لو: "أنا كنآمرك بِاسم يَسوع المسيح باش تخرج مِنّاْ!" وْخرج مِنّاْ في ديك الساعة. وْملّي شافو مواليها بلّي بقاو بلا أمل باش يرَبحو الفلوس، شبّرو بولُس وْسيلا وْجرّوهُم نالساحة د المدينة نْعند الحُكّام. وْقدّموهُم عند القُضاة وْقالو: "هَد الرجال يهود كيعملو الفِتنة في المدينة ديالنا، وْكيعلّمو العادات الّي ماشي حلال علينا لا نقبلوهُم ولا نعملو بِهُم، حيت حنايَ رومانيّين." وْهجم الشعب عليهُم والقُضاة شرّݣو الحوايج من على بولُس وْسيلا، وآمرو باش يعصّيوهُم. وْمن بعدما ضربوهُم بزّاف، سيّبوهُم في الحبس، وآمرو العسّاس د الحبس باش يعسّ عليهُم مزيان. وْهُوَ، ملّي سمَع الأمر بْهَد الشكل، عملوم في الحبس نْداخل وْربط الرِّجلين ديالوم في القالب د الخشب. وْتقْريبًا في نُص الليل، بداو بولُس وْسيلا كيصلّيو وْكيرنّمو ناللّٰه بالتهليل، والحبّاسة كيسمعوهُم. وْعلى غفلة وقَع واحد الزنْزال كبير حتّى تزعْزع اللساس د الحبس، وْفي الحين تفتحَت البيبان كاملة وْتفكّو السناسل د الحبّاسة كاملين. وْملّي فاق الحارس وْشاف البيبان د الحبس مفْتوحين، خرّج السيف ديالو وْكان علاين يقتل راسو، كيظنّ بلّي الحبّاسة هربو. وَلكن بولُس غوّت بْصوت عالي كيقول: "ما تضرّ شي راسك، حيت حنايَ كاملين هنايَ!" طلب الحارس الضَّو وْدخل بالجري كيتّرعد، وْطاح قدّام الرِّجلين د بولُس وْسيلا، وْخرّجوم وْقالّوم: "آ سيادي، شنّو خصْني نعمل باش نْنجا؟" وْقالو لو: "آمن بالرَّبّ يَسوع المسيح وْغادي تنجا، أنتينا والدار ديالك." وْتكلّمو بْكلام الرَّبّ معاه وْمع كُل شي الّي كانو في الدار ديالو. وْفي ديك الساعة د الليل، ادّاهُم وْغسل الجروح ديالوم، وْتغطّس دغيا مع الّي في دارو كاملين. وْملّي طلّعوم نالدار ديالو، نزّل لوم ما ياكلو، وْفرح بزّاف، حيت هُوَ والعائلة ديالو آمنو باللّٰه. وْملّي طلَع النهار، صيفطو القُضاة شي مخازنيّة نْعند الحارس د الحبس كيقولو: "طلَق ديك الرجال." وْخبر الحارس د الحبس بولُس بْهَد الكلام، كيقول: "القُضاة آمروني باش نطلقكُم. دابا خرجو وْمْشيو بْسلام." وْقال بولُس: "كيفاش؟! عصّاونا قدّام الناس بلا ما يحاكمونا، وْحنايَ رجال رومانيّين، وْسيّبونا في الحبس! وْدابا كيخرّجونا مخبّعين؟ لا، ماشي معقول! وَلكن خصّوم يجيو هُمَ بْنَفسوم ويخرّجونا!" وْخبرو المخازنيّة القُضاة بْهَد الكلام. وْملّي سمعو بلّي هُمَ رومانيّين، خافو، وْجاو القُضاة وْملّي خرّجوهُم، رَغبوهُم باش يخرجو من المدينة. وْملّي خرجو بولُس وْسيلا من الحبس، دخلو نالدار د ليدية وْشافو الخوت، وْشجّعوهُم وْمشاو. وْملّي بولُس وْسيلا ݣازو في أَمْفيبوليس وأَبولونيّة، وَصلو نْتَسالونيكي فاين كان واحد المجْمع د اليهود. وْدخل بولُس نْبيت العبادة كيف العادة ديالو، وْكان كيتناقش معهُم بْكلام الكتوبة المقدّسة تلاتة د السبوتة، كيشرح وْكيبيّن بواسطة الكتوبة بلّي كان لازم على المسيح يتعدّب ويتّبعت من بين الميّتين. وْقالّوم: "هَدا يَسوع، الّي أنا كنخبركُم بِه، هُوَ المسيح." وْتاقو البعض من اليهود وْتّجمعو مع بولُس وْسيلا، وْعدد كبير من النسا المفضّلين وْمن اليونانيّين الّي كيعبدو اللّٰه. وَلكن تعمّرو القلوبة د اليهود يَخرين بالغيرة، وادّاو من السوق شي ناس شرّيرين وْتّجمعو وْكوّنو واحد العصابة باش يفتنو المدينة. هجمو على الدار د ياسون، حيت بغاو يسلّمو بولُس وْسيلا نالزحام. وْملّي ما جبروهُم شي، جرّو ياسون وْبعض الخوت قدّام الحُكّام د المدينة وْهُمَ كيغوّتو: "هَدو هُمَ الّي كيعملو الفِتنة في الدنيا كاملة، جاو حتّى نْهنايَ! وْضيّفوم ياسون، وْهُمَ كاملين كيخالفو القانون د قَيصَر، كيقولو بلّي كاين واحد المَلِك يَخُر، الّي مسمّي يَسوع." تهيّجو الناس وْحتّى حُكّام المدينة ملّي سمعو هَد الأُمور. وْشبّرو الكفالة من ياسون ويَخرين وْطلقوهُم. ملّي جا الليل، الخوت صيفطو بولُس وْسيلا دغيا نْبيريّة. وْملّي وَصلو، دخلو نْبيت العبادة د اليهود. وْهَدو كانو نُبَلاء كتَر من هَدوك الّي في تَسالونيكي، حيت قبلو الكلام بْرغبة قويّة وْهُمَ كيفتّشو الكتوبة كُل نهار باش يشوفو واش هَد الأُمور كانت هَيداك د بالصّحّ. وآمنو بزّاف من اليهود وْمن اليونانيّين شي د النسا محْتَرمات، وْعدد معْتَبر من الرجال. وْملّي عرفو اليهود الّي من تَسالونيكي بلّي في بيريّة كان بولُس كيخبر عاود بْكلام اللّٰه، مشاو نْتمّاك بَيّاش يهيّجو ويحرّشو الجمْهور. ديك الساعة صيفطو الخوت بولُس دغيا نْجهة البحَر، أمّا سيلا وْتيموثاوس بقاو تمّاك. وْهَدوك الّي رافقو بولُس وَصّلوه نأَثينا، وْرجعو بالإرشادات باش سيلا وْتيموثاوس يتّجمعو معاه في أَقْرب وقت. ملّي كان بولُس كيتسنّاهُم في أَثينا، حرقَتوْ نفسو ملّي شاف المدينة معمّرة بالأصْنام. وْبدا كيتكلّم في بيت العبادة مع اليهود وْمع اليونانيّين الّي كيعبدو اللّٰه، وْيوميًّا كان كيهدَر مع الّي صادفوه في السوق. وْكانو البعض من الفلاسفة الأَبيقوريّين والرواقيّين كيتناقشو معاه، والبعض مِنّوم قالو: "شنّو بغى يقول هَد الترْتار؟" ويَخرين قالو: "كيظهَر بلّي هُوَ كيخطب بآلِهة غريبة." حيت بولُس كان كيبشّروم بالإنجيل د يَسوع وْبالقيامة. وْشبّروه وْجابوه نالأَريوباغوس كيقولو: "واش نقدرو نعرفو شنّو هَد التعْليم الجديد الّي كتهدَر بِه؟ حيت أنتينا كتجيب نّا شي أمور غريبة على الودنين ديالنا وْبغينا نعرفو المنعى ديالاْ." حيت الأثينيّين كاملين والبرّانيّين الّي ساكنين تمّاك كانو كيقضيو الوقت الخاوي ديالوم غير باش يسمعو ويناقشو الأُمور الجديدة. ديك الساعة وقَف بولُس فوسط الأَريوباغوس وْقال: "آ الرجال الأثينيّين، أنا كنشوفكُم بلّي أنتُمَ ناس ديانيّين بزّاف في كُل شي الّي كتعملو. حيت ملّي كُنْتْ ڭايز، شفْتْ المعابد ديالكُم وْجبرْتْ واحد المَدْبح مكْتوب عليه: «نواحد الإلَه الّي ماشي معروف.» وْهَداك الّي كتعبدوه أنتُمَ بلا ما تعرفوه، هُوَ الّي كنخبركُم بِه أنا. الإلَه الّي خلق الدنيا وْكُل ما فيها، هَدا هُوَ رَبّ السما والأرض، ما كيسكن شي في معابد مبنيّة باليَدّين. ما كتخدموْ شي اليَدّين د الناس، فحال إدا كان محْتاج نْشي حاجة، حيت هُوَ كيعطي نالناس كاملين الحياة والنفس وْكُل شي. وْخلق من واحد الرَّجل الأُمَم كاملين د البشر باش يسكنو على وجه الأرض كاملة. وْحدّد المراحل التاريخيّة والمناطق الّي هُمَ ساكنين فيهُم، باش يفتّشو على اللّٰه، وَقيلا يجبروه باللمْسة. واخّا في الحقيقة هُوَ ماشي بعيد من حتّى واحد منّا، حيت فيه حنايَ كنحياو وْكنتحرّكو وْكنكونو. فحال ما قالو البعض من الشُّعَراء ديالكُم: «حيت حنايَ الدرّيّة ديالو.» على ديك الشي، إدا حنايَ درّيّة اللّٰه، ما خصْنا شي نظنّو بلّي الألوهيّة كتشبه نْشي صنم مصنوع من الدهب أَو النقْرة أَو الحجْرة المنقوشة بالمهارة والعقل د البشر. بِالحقّ اللّٰه ما ادّاها شي في الأوقات د الجاهليّة، وَلكن دابا كيآمر الناس كاملين في كُل موطَع باش يتوبو. حيت خصّص واحد النهار الّي فيه غادي يحكم على الدنيا بالعدل، بواسطة الرَّجل الّي اختاروْ، وْعْطى الدليل نالناس كاملين ملّي بَعتوْ من بين الميّتين." وَلكن ملّي سمعو بالقيامة من بين الميّتين، بداو البعض كيضحكو عليه والبعض كيقولو: "غادي نسمعو منّك هَد الشي مرّة يَخرى." ديك الساعة خرج بولُس من وسطوم. على كُلِّ حال، البعض مِنّوم آمنو، وْمن بيناتوم ديونيسيوس الأَريوباغي، وْواحد المراة مسمّية دامَرِس، ويَخرين معهُم. وْمن بعد هَد الشي، خرج بولُس من أَثينا وْمشى نْكورِنْثوس. وْجبر تمّاك واحد الرَّجل يهودي مسمّي أَكيلا، أَصْلو بُنْطي، الّي كان عاد وصَل من إيطالية مع مراتو بريسْكِلّا، حيت كلوديوس كان آمر باش يطردو اليهود كاملين من رومة. وْمشى نْعندوم بولُس. وْحيت كان كيصنع القياطن فحالوم، بقا تمّاك معهُم باش يخدمو مجموعين. وْكان كُل سبت كيناقش مع اليهود واليونانيّين في بيت العبادة باش يقْتَنعو. وْملّي وَصلو سيلا وْتيموثاوس من مَكدونيّة، كان بولُس كيخطب بالكلام الوقت ديالو كامل وْكيشهد ناليهود متيقن بلّي يَسوع هُوَ المسيح. وَلكن ملّي اليهود عارضوه وْبزقو عليه، بولُس نفط الحوايج ديالو وْقالّوم: "الدم ديالكُم على راسكُم! أنا باري منكُم. من دابا نْفوق غادي نمشي نْعند غير اليهود." وْخرج من تمّاك وْدخل نالدار د واحد الرَّجل مسمّي طيتُس يوسْتُس الّي كان كيعبد اللّٰه وْكان كيسكن حدا المجْمع. وْكريسْبُس، رئيس المجْمع، آمن بالرَّبّ، هُوَ والدار ديالو كاملة. وْبزّاف من الكورِنثيّين حتّى هُمَ آمنو ملّي سمعو كلام بولُس، وْتغطّسو. في ديك الوقت قال الرَّبّ نْبولُس في واحد الرؤيا في الليل: "ما تخاف شي، وَلكن تكلّم وْما تسكت شي، حيت أنا معك وْما غادي يهجم عليك حتّى واحد باش يضرّك. حيت عندي بزّاف د الشعب في هَد المدينة." وْبقا تمّاك عام وْستّ شهور كيعلّم بْكلام اللّٰه فوسط الشعب. وَلكن ملّي كان غاليون الوالي على أَخائية، ناضو اليهود بْرأي واحد ضدّ بولُس وْجابوه نالمحْكمة، تشكّاو بِه وْقالو: "هَد الرَّجل كيقنع الناس باش يعبدو اللّٰه بْطريقة الّي كتخالف الشريعة." وْملّي كان بولُس علاين يهدر، غاليون قال ناليهود: "كَكان هَد الشي ظُلم أَوْلا شي جريمة خطيرة، آ اليهود، كَكُنْتْ سمعَتْكُم بالمعْقول. وَلكن إدا كانت هَد المسألة غير على شي د الكلمات والأسْماء والشريعة ديالكُم، شوفو أنتُمَ، حيت أنا ما بغيتْ شي نكون قاضي في هَد الأُمور." وْطردوم من المحْكمة. واليهود كاملين شبّرو في سوسْتانيس، رئيس المجْمع، وْضربوه قدّام المحْكمة، وْغاليون ما عْطى شي الأهميّة نْديك الشي. وْبولُس بقا تمّاك بزّاف د الأيّام، وْعاد ودّع الخوت وْسافر في البحَر نْسوريّة، وْكانو معاه بريسْكِلّا وأَكيلا. وْبولُس حسّن راسو في كَنْخَريّة، حيت كان عليه واحد العهد. وْوَصلو نأَفَسُس وْتفارق معهُم وْدخل نْبيت العبادة، كيتناقش مع اليهود. وْهَدوك طلبو منّو يبقا معهُم شي مدّة يَخرى، وْهُوَ ما بغى شي. وَلكن ملّي ودّعوم، قالّوم: "غادي نرجع نْعندكُم، إن شاء اللّٰه." وْمشى في البحَر من أَفَسُس. وْملّي نزل في قَيصَريّة، طلَع نأُورُشَليم وْسلّم على الكنيسة، وْمن بعد هوّد نأَنْطاكية. من بعدما بقا شي مدّة تمّاك، خرج بولُس وْڭاز بْطريقة منظّمة من المناطق د غَلاطيّة وْفريجيّة، كيتبّت التلامد كاملين. في ديك الوقت وصَل نأَفَسُس واحد اليهودي مسمّي أَبُلّوس، أَصْلو من الإسْكَنْدَريّة. وْهَد الرَّجل كيهدَر بْفصاحة وْهُوَ قوي في المعْرفة د الكتاب المقدّس. كان هَدا قاري في طريق الرَّبّ، وْبْحماسة الروح كان كيتكلّم وْكيعلّم بْطريقة صحيحة على يَسوع، وَلكن كان كيعرف غير المعموديّة د يوحَنّا بوحداْ. وْملّي بدا كيتكلّم بْزعامة في بيت العبادة، سمعوه أَكيلا وْبريسْكِلّا وادّاواه بوحدو نْعندوم وْشرحو لو بالتدقيق طريق اللّٰه. وْملّي أَبُلّوس كان باغي يݣوز نأَخائيّة، الخوت شجّعوه وْكتبو نالتلامد من تمّاك باش يسْتَقبلوه. وْملّي وصَل نأَخائيّة، عاون بزّاف الخوت الّي كانو آمنو بْفضل النعْمة، حيت كان كيغلب على اليهود قدّام الناس بْحُجَج قويّة، وْكيبيّن لوم من الكتوبة بلّي يَسوع هُوَ المسيح. وْملّي كان أَبُلّوس في كورِنْثوس، وصَل بولُس نأَفَسُس من بعدما ݣاز من المناطق العالية، وْجبر تمّاك شي تلامد وْسقصاهُم: "واش نزل عليكُم الروح القُدُس ملّي آمنْتو؟" قالو لو: "لا، ما سمعْنا شي واش كاين الروح القُدُس." وْقالّوم: "إدَن، شمن التغْطيس قبلْتو؟" وْقالو: "المعموديّة د يوحَنّا." وْشرح لوم بولُس: "يوحَنّا غطّس ب‍التغْطيس د التوبة، كيقول نالناس باش يآمنو بْهَداك الّي غادي يجي من موراه، يعني بْيَسوع." ملّي سمعو هَد الشي، تغطّسو بِاسم الرَّبّ يَسوع. وْملّي عمل بولُس يَدّو عليهُم، نزل الروح القُدُس عليهُم وْبداو كيهدرو بْلسونة وْكيتنبّأو. وْكانو الرجال كاملين فحال شي طناش مِنّوم. وْدخل بولُس نْبيت العبادة وْكان كيتكلّم بْزعامة مدّة تلت شهور، وْكيتناقش على مُلك اللّٰه وْكيحاول يقنعوم. وَلكن البعض مِنّوم قصّحو القلوبة ديالوم وْما بغاو شي يآمنو، وْبداو كيزبّلو في الطريق قدّام الناس. ديك الساعة بعّد عليهُم بولُس وْفرز شي تلامد وْكان كيتناقش معهُم كُل نهار في المدْرسة د واحد الرَّجل الّي مسمّي تيرانُّس. وْبقا كيعمل ديك الشي مدّة عامَين، حتّى الناس كاملين الّي كانو ساكنين في آسيا سمعو كلام الرَّبّ يَسوع، يهود ويونانيّين بْجوج بِهُم. وْكان اللّٰه كيعمل على يد بولُس علامات عجيبة، حتّى كانو كيجيبو نالمراطين السباني أَوْلا الفوطات الّي لمسو الجسم د بولُس، وْكيتشافاو من الأمْراض ديالوم والجنون الشرّيرة كتخرج مِنّوم. إيوا، البعض من اليهود، الّي كانو كيدورو من موطَع نْموطَع وْكيطردو الجنون الشرّيرة، حاولو يدعيو بِاسم الرَّبّ يَسوع، كيقولو: "كنآمروكُم تخرجو بِاسم يَسوع الّي كيخبر بِه بولُس!" هَد الشي كانو كيعملوه سبعة د الولاد د سَكاوا، وْهُوَ واحد من رُؤَساء المسؤولين د اليهود. وْردّ عليهُم الجنّ الشرّير: "أنا كنعرف يَسوع وْكنعرف شكون هُوَ بولُس، أمّا أنتُمَ شكون؟" وْنقّز عليهُم الرَّجل الّي فيه الجنّ الشرّير وْغلبوم وْتقوّى عليهُم حتّى هربو من ديك الدار عُريانين وْمجْروحين. وْسمعو بْهَد الشي اليهود واليونانيّين الّي ساكنين في أَفَسُس بْجوج بِهُم، وْجاهُم الخوف كاملين، وْكان اسم الرَّبّ يَسوع كيتعظّم. وْبزّاف من الّي كانو كيآمنو جاو كيعْتَرفو بالدنوب وْبالفعايل ديالوم قدّام الناس. وْعدد كبير من الّي كانو كيخدمو السحر جمعو الكتوبة ديالوم وْحرقوهُم قدّام الناس. ملّي حسبو التمن ديالوم، جبروه خمسين ألف قطعة د النقْرة! هَيداك كان كلام الرَّبّ كيزيد وْكينْتَشر بْقوّة. من بعدما وقَع هَد الشي، قرّر بولُس في روحو ي‍مشي نأُورُشَليم، وْهُوَ ݣايز على مَكدونيّة وأَخائيّة، وْقال: "من بعد أُورُشَليم، خصْني نشوف رومة حتّى هِيَ." ديك الساعة صيفط نْمَكدونيّة جوج من المساعدين ديالو، تيموثاوس وأَرَسْطوس، وْهُوَ بقا شي مدّة في آسيا. وقعَتْ في ديك الوقت واحد الفِتنة كبيرة بْسباب الطريق، حيت واحد الرَّجل مسمّي دي‍مِتْريوس كان صيّاغ، وْكان كيعدّل بالنقْرة شي معابد صغيورة د الإلَهة أَرْطاميس، والصنّاع كانو كيربحو بزّاف من هَد الشي. وْجمعوم دي‍مِتْريوس، مع شي صنّاع فحالوم، وْقالّوم: "آ الرجال، أنتُمَ كتعرفو بلّي المال ديالنا كيجي من هَد الصناعة، وَلكن كتشوفو وْكتسمعو بلّي بولُس هَدا تلّف بزّاف د الناس، ماشي في أَفَسُس وْكان، وَلكن تقْريبًا في آسيا كاملة، كيقول بلّي آلِهة الّي مصنوعين باليَدّين هُمَ ماشي آلِهة. وْهَد الشي خطار على الصناعة ديالنا الّي غادي ترجع مهانة، وَلكن حتّى المعْبد د الإلَهة أَرْطاميس ما غادي شي تبقا عندو القيمة، وْهَديك الّي كيعبدوها في آسيا والدُّنيا كاملة، غادي ترجع بلا عظمة." وْملّي سمعو هَد الكلام، غضبو بزّاف وْبداو كيغوّتو، كيقولو: "العظمة نأَرْطاميس الإلَهة د الأَفَسُسيّين!" وْتّعمرَت المدينة كاملة بالفوضى، وْجراو في مرّة واحدة نالمَسْرح، وْجرّو معهُم غايوس وأَرِسْتَرْخُس، المكدونيّين الّي كيرافقو بولُس في السفر. وْملّي بغى بولُس يدخل فوسط الناس، ما خلّاواه شي التلامد. وْحتّى البعض من الرؤساء د آسيا، وْهُمَ كانو صحابو، صيفطو لو كيرغبوه باش ما يجي شي نالمَسْرح. وانْتَشرَت الفوضى، وْكانو البعض مِنّوم كيغوّتو بواحد الحاجة ويَخرين بْحاجة يَخرى، وْكانو الناس حَيرانين والأكْتريّة ديالوم ما كيعرفو شي علاش اتّجمعو. وْخرجو اليهود كيدفعو إسْكَنْدَر من بين الجمْهور. وْشيّر إسْكَنْدَر بْيَدّو باش يسكتو ويدافع على راسو. وَلكن عرفوه يهودي، وْغوّتو كاملين بْصوت واحد، تقْريبًا مدّة ساعتَين: "العظمة نأَرْطاميس الإلَهة د الأَفَسُسيّين!" ديك الساعة الكاتب د المدينة هدّن الجمْهور وْقال: "آ الرجال الأَفَسُسيّين، شكون الّي ما كيعرف شي بلّي مدينة الأَفَسُسيّين كتحافظ على المعْبد د أَرْطاميس الإلَهة العظيمة وْعلى الصنم ديالاْ الّي نزل من السما؟ وْحيت حتّى واحد ما يقدر يخالف هَد الشي، لازم عليكُم تْتهدّنو وْما تعملو حتّى حاجة بالزرْبة. وْها أنتُمَ جيبْتو هَد الرجال، وْهُمَ ما وسّخو شي الحرمة د الإلَهة أَرْطاميس وْما جدّفو شي عليها. وِادا كان ديمِتْريوس والصنّاع ديالو عندوم شي شكاية مع شي واحد، كاينة المحْكمة والقُضاة. خلّيوهُم يمشيو نْتمّاك ويشكيو بِهُم. وِادا كُنْتو كتطلبو شي حاجة يَخرى، خصّ ديك الشي يتّحكم في واحد الجلسة قانونيّة. حيت حنايَ في خطر اليوما إدا شكاو بِنا بلّي عملْنا الفِتنة، وْما كاينة حتّى شي سبّة نْهَد الاجْتِماع المروّن." وْملّي قال هَد الشي، ودّع الجماعة. ملّي تسالات الفوضى، عَيّط بولُس على التلامد، وْمن بعدما شجّعوم، وَدّعوم وْخرج باش يمشي نْمَكدونيّة. وْهُوَ ݣايز في ديك المناطق، شجّع المؤمنين بزّاف، وْفي الآخر وصَل ناليونان. بقا تمّاك تلت شهور، وْملّي كانو اليهود كيخمّمو باش يقتلوه، وْهُوَ كان علاين يمشي نْسوريّة على البحَر، قرّر يرجع ݣايز على مَكدونيّة. وْرافقوه حتّى نآسيا سوباتْرُس بن بِرُّس من بيريّة، أَرِسْتَرْخُس وْسُكونْدُس من تَسالونيكي، وْغايوس من دَرْبة، وْتيموثاوس، وْتيخيكُس وْتروفيمُس من آسيا. وْهَدوك سبقونا وْتسنّاونا في تَرْواس. أمّا حنايَ سافرْنا من فيلِبّي في البحَر من بعد عيد الفطير، وْتلاقينا معهُم في تَرْواس من بعد خمس أيّام، فاين بقينا سبع أيّام. وْفي النهار الُوّل د السيمانة (نهار الحَد)، اتّجمعْنا باش نقطّعو الخبز. كان كيخاطب بولُس المؤمنين وْهُوَ كان معوّل ي‍مشي غدّا، طوّل الكلام حتّى نصّ الليل. وْفي البيت فاين كُنّا مجموعين كانو بزّاف د اللامْبات، وْكان واحد العايل مسمّي أَفْتيخوس ݣالس في الطاقة وْبدا كيدّيه النعاس. ملّي بولُس طوّل الكلام ديالو، غلب عليه النعاس وْطاح من الطبقة التالتة نْتحت وْرفدوه ميّت. هوّد بولُس وْطاح عليه وْدرّعوْ كيقول: "ما تشوّشو شي، حيت هُوَ حيّ." من بعدما طلع وْقطّع الخبز وْكلا، هدَر بزّاف حتّى نالفجر، وْفي ديك الساعة خرج. وادّاو العايل حيّ نالدار ديالو، وْتعزّاو كاملين بْتعزيّة كبيرة. ديك الساعة حنايَ مشينا نالباركو وْقلّعْنا في البحَر نأَسّوس، معوّلين نركّبو معنا بولُس من تمّاك، حيت هَيدا طلب منّا. وْهُوَ كان معوّل يمشي على البَرّ. وْملّي اتّجمع معنا في أَسّوس، ركّبْناه وْوصلْنا نْميتيليني، وْسافرْنا من تمّاك في البحَر، والنهار الّي موراه وصلْنا نْخيوس، ولا غدّا قطعْنا نْجهة ساموس. والنهار يَخُر وصلْنا نْميليتُس، حيت بولُس قرّر يݣوز على أَفَسُس، وْما بغى شي يضيّع الوقت في منْطَقة آسيا. كان مزْروب حيت بغى يكون في أُورُشَليم في اليوم الخمسين، إدا كان مُمكن. من ميليتُس صيفط بولُس يعيّط على شيوخ الكنيسة في أَفَسُس. وْملّي جاو نْعندو قالّوم: "أنتُمَ كتعرفو كيفاش تعاملْتْ معكُم في الوقت الّي ڭوّزْتْ بيناتكُم. من النهار الُوّل الّي دخلْتْ فيه نآسيا، كنخدم الرَّبّ بْكُل تواضُع وْبْبزّاف د الدموع وْبالمحاين الّي جاو لي من تخْطيط اليهود، وْكتعرفو بلّي خبرْتْكم بْكُل حاجة فيها فايدة لِلكُم وْعلّمْتْكُم قدّام الناس وْفي الديور. وْكُنْتْ كنشهد ناليَهود وْناليونانيّين باش يتوبو قدّام اللّٰه ويآمنو بْرَبّنا يَسوع المسيح. "وْدابا، ها انا ماشّي نأُورُشَليم مربوط في الروح، وْما كنعرف شي شنّو غادي يوقع لي تمّاك. وَلكن الروح القُدُس كيشهد في كُل المُدُن وْكيقول بلّي كيتسنّاوني السناسل والضيق. وَلكن كنعْتَرف بلّي حياتي بلا قيمة عندي، باش نكمّل المهمّة ديالي والخدمة الّي تكلّفْتْ بِها من عند الرَّبّ يَسوع، باش نشهد بالإنجيل د نعْمة اللّٰه. وْدابا كنعرف بلّي حتّى واحد منكُم، أنتُمَ الّي كُنْتْ كنخبر بيناتكُم بْمُلك اللّٰه، ما غادي يشوف وَجهي مرّة يَخرى. على ديك الشي كنشهّدكُم هَد النهار بلّي أنا باري من الدم ديالكُم كاملين. حيت ما خبّعْتْ عليكُم والو وْبشّرْتْكُم بْقصد اللّٰه كامل. على هَد الشي حضيو راسكُم والرعيّة كاملة، الّي عملكُم الروح القُدُس مُرْشِدين لِلاْ، باش ترعاو كنيسة اللّٰه الّي شراها بْدمّو. حيت كنعرف بلّي من بعد المشي ديالي غادي يدخلو بيناتكُم دياب خطّافين الّي ما غادي شي يرحمو الرعيّة. وْمن بيناتكُم أنتُمَ بْراسكُم غادي ينوضو شي رجال الّي غادي يتكلّمو بأمور معوّجة باش يجرّو التلامد يتَـبعوهُم. وْعلى ديك الشي سَهرو وْتفكّرو بلّي مدّة تلت سنين، ليل وْنهار، أنا ما وقفْتْ شي نوصّيكُم بالدموع كُل واحد بوحدو. وْدابا كنخلّيكُم، آ خوتي، بين اليَدّين د اللّٰه وْفي الكلام د النعْمة ديالو، الّي هُوَ قادر يبنيكُم ويعطيكُم الورت مع المقدّسين كاملين. ما طمعْتْ شي لا في النقْرة ولا في الدهب ولا في الحوايج د شي واحد منكُم. وانتُمَ كتعرفو بلّي كُل شي الّي احْتاجْتْ لو، أنا والّي كانو معيَ، ربحْتوْ أنا باليَدّين ديالي. بالمتال ديالي ورّيتْكُم في كُل شي كيفاش تخدمو وْتعاونو الّي محْتاجين. وْتفكّر كلام الرَّبّ يَسوع الّي قال: «مبروك الّي كيعطي كتَر من الّي كيقبط.»" ملّي قال هَد الكلام، طاح على الركابي ديالو وْدعى معهُم كاملين. ديك الساعة بكاو بزّاف كاملين بِهُم، وْدرّعو بولُس وْباسوه، حزنانين خصوصًا على الكلمة الّي قالّوم بلّي ما غادي شي يشوفو وَجهو مرّة يَخرى. وْرافقوه نالباركو. وْملّي تفارقْنا معهُم، قلّعْنا وْمشينا نيشان نْكوس، ولا غدّا نْرودُس، وْمن تمّاك نْباتَرة، وْملّي جبرْنا واحد الباركو ڭايز نْفينيقيّة، ركبْنا فيه وْقلّعْنا. وْملّي شفْنا قُبْرُص، خلّيناها على الشمال، وْسافرْنا نْسوريّة وْوصلْنا نْصور، حيت كان الباركو خصّوْ ينزّل الحمولة ديالو تمّاك. جبرْنا التلامد وْݣلسْنا معهُم تمّاك سبع أيّام. وْكانو كيقولو نْبولُس بواسطة الروح القُدُس بلّي ما خصّوْ شي يطلع نأُورُشَليم. وَلكن من مورا ديك الأيّام، خرجْنا وْتبعْنا الطريق ديالنا. وْرافقونا التلامد كاملين، مع النسا والعيال، حتّى نْبرّا المدينة، وْتمّاك في الحاشية د البحَر ركعْنا وْدعينا الرَّبّ. وْملّي ودّعْنا بعضيّاتنا، ركبْنا في الباركو وْهُمَ رجعو نالديور ديالوم. ديك الساعة كمّلْنا السفر في البحَر من صور وْوصلْنا نْبُتولِمايس. وْسلّمْنا على الخوت وْݣلسْنا عندوم نهار واحد. ولا غدّا خرجْنا وْوصلْنا نْقيصَريّة، وْتضيّفْنا عند فيلِبُّس المبشّر، وْكان هُوَ واحد من سبعة بِهُم، وْݣلسْنا عندو. وْكان عندو أربعة د البنات عزبات الّي كيتنبّأو. وْملّي بقينا تمّا بعض الأيّام، هوّد من اليَهوديّة واحد النَّبي مسمّي أَغابوس. جا يطلّل علينا، وْشبّر الحزام ديال بولُس وْربط نفسو من يَدّو وْرِجلو وْقال: "هَيدا كيقول الروح القُدُس: «بْهَد الطريقة اليهود د أُورُشَليم غادي يربطو مول هَد الحزام، ويدفعوه ناليَدّين د الوَتَنيّين.»" ملّي سمعْنا هَد الشي حنايَ والّي من ديك الموطَع، رغبْنا بولُس باش ما يطلع شي نأُورُشَليم. وْجاوب بولُس: "علاش كتبكيو وْكتقطّعو لي قلبي؟ حيت أنا مستعدّ، ماشي غير باش نتّربط، وَلكن حتّى باش نموت في أُورُشَليم بْسباب اِسم الرَّبّ يَسوع." وْحيت ما قدرْنا شي نقنعوه، سكتْنا وْقُلْنا: "تكون مشيئة الرَّبّ." وْمورا هَد الشي، وجّدْنا راسنا نالسفر وْطلعْنا نأُورُشَليم. وْبعض من التلامد من قَيصَريّة رافقونا وادّاونا عند مَناسون القُبرُصي، وْهُوَ تلميد قديم، وْتضيّفْنا عندو. وْملّي وصلْنا نأُورُشَليم، اسْتَقبلونا الخوت فرحانين. ولا غدّا دخل بولُس معنا نْعند يَعْقوب، وْكانو الشيوخ كاملين حاضرين. وْمن بعدما سلّم عليهُم بولُس، بدا كيعاود لوم بالتفاصيل كُل شي الّي عمل اللّٰه بين الأُمَم بواسطة الخدمة ديالو. وْملّي سمعو هَد الشي، مجّدو اللّٰه، وْقالو لو: "أنتينا كتشوف، آ خانا، شحال د الآلاف د اليهود آمنو وْهُمَ كاملين كَتْجيهُم الغيرة على الشريعة. وَلكن سمعو بلّي أنتينا كتعلّم اليهود الّي هُمَ فوسط الوَتَنيّين باش يسمحو في موسى، وْكتقولّوم ما يطهّرو شي أُوْلادوم وْما يتبعو شي العادات ديالنا. وْدابا شنّو غادي نعملو؟ هُمَ غادي يعرفو بلّي وصلْتِ نْهنايَ. على هَد الشي حسَن لك تـتبع النصيحة ديالنا. عندنا أربعة د الرجال عليهُم واحد العهد. ادّيهُم معك وْقدّس نفسك معهُم وْخلّص عليهُم باش يحسّنو راسوم، وْغادي يعرفو الناس كاملين بلّي ديك الشي الّي سمعو عليك ماشي صحيح، وَلكن أنتينا كتمشي معاوط، محافظ على الشريعة. وَلكن بالنسبة نالأُمَم الّي آمنو من غير اليهود، حنايَ كتبْنا لوم القرار ديالنا بلّي خصّوم يمتَنعو من الدبايح نالأصْنام والدم والحيوان المجيّف والزنا." ديك الساعة ادّى بولُس الرجال معاه، ولا غدّا قدّس نفسو معهُم وْدخل نْبيت المَقْدس وْخبروم بالوقت الّي غادي تـتقاضى فيه أيّام التطهير باش يقدّم الدبـيحة على كُل واحد مِنّوم. وْملّي كانت علاين تـتكمّل سبع أيّام، اليهود الّي هُمَ من آسيا شافو بولُس في بيت المَقْدس، وْحرّشو الجماعة كاملين وْمدّو عليه يَدّوم، كيغوّتو: "آ الرجال الإسْرائيليّين، عاونونا! هَدا هُوَ الرَّجل الّي كيعلّم الناس كاملين في كُل موطَع ضدّ الشعب ديالنا وْضدّ الشريعة وْضدّ هَد الموطَع. وْزايد على هَد الشي، دخّل بعض اليونانيّين نْبيت المَقْدس وْنجّس هَد الموطَع المقدّس!" حيت كانو شافو تروفيمُس الأَفَسُسي معاه في المدينة وْكانو كيظنّو بلّي بولُس دخّلوْ نْبيت المَقْدس. المدينة كاملة تهيّجَتْ وْجراو الناس مجموعين وْقبطو بولُس وْجرّوه على برّا من بيت المَقْدس، وْشدّو البيبان في الحين. وْملّي كانو كيحاولو يقتلو بولُس، وصَل الخبر نْعند قايد العسْكر الروماني بلّي أُورُشَليم كاملة تروّعَتْ. وْدغيا ادّى معاه البعض من العسْكر والضبّاط وْجرى نْعندوم. وْملّي شافو قايد العسْكر والضبّاط، وقّفو الضرب على بولُس. ديك الساعة قرّب قايد العسْكر نْعند بولُس، شبّروْ وْوصّى باش يربطوه بْجوج د السناسل. وْسقصى: "شكون هُوَ وْشنّو عمل؟" وْبين الجمْهور كانو البعض كيغوّتو بواحد الحاجة ويَخرين بْحاجة يَخرى. وْحيت ما قدر شي يفهم شنّو وقَع بْسباب الغوات، آمر باش يدّيواه نالقشلة. وْملّي وصَل بولُس نالدروج، هزّوه العسْكر بْسباب العنف د الناس. حيت الجمْهور كانو كيتبعوه وْكيغوّتو: "قتلوه!" وْملّي كانو علاين يدخّلو بولُس نالقشلة، قال نْقايد العسْكر: "واش تخلّيني نقول لك شي حاجة؟" وْقال لو: "واش كتهدَر باليونانيّة؟ واش ماشي أنتينا هُوَ المصري الّي هَدي شي أيّام عمل واحد الفِتنة وْخرّج نالخلا أربع آلاف د المقاتلين؟" ردّ عليه بولُس: "لا، أنا واحد الرَّجل يهودي طَرْسوسي، من واحد المدينة معروفة في كيليكيّة. من فضلك، خلّيني نتكلّم مع الشعب." وْملّي عْطى لو الإدن، وقَف بولُس في الدروج وْشيّر بْيَدّو نالجمْهور. وْحيت سكتو كاملين، هدَر معهُم باللُغة العبريّة وْقال: "آ الرجال الخوت والوالِدين، سمعو دابا الدفاع ديالي قدّامكُم." وْملّي سمعوه كيهدَر باللُغة العبريّة، زادو سكتو كتَر. وْقالّوم: "أنا واحد الرَّجل يهودي خلقْتْ في طَرْسوس من كيليكيّة، وَلكن تربّيتْ في هَد المدينة عند الرِّجلين د غَمالائيل بْتعْليم صحيح في الشريعة د جدودنا، وْكانت فيَّ الغيرة على اللّٰه فحالكُم أنتُمَ كاملين اليوما. وْمرْمدْتْ الّي تابعين هَد الطريق حتّى نالموت، كنكتّف الرجال والنسا وْكندخّلوم نالحبس، فحال ما كيشهد لي رئيس المسؤولين والشيوخ كاملين، الّي شبّرْتْ من عندوم الرسائل نالخوت الّي في دِمَشْق. وْمشيتْ نْتمّاك باش نجيب الّي جبرْتوم مكتّفين نأُورُشَليم باش يتعاقبو. وْملّي كُنْتْ قريب من دِمَشْق، تقْريبًا في وقت الظهر، على غفلة وقَع لي بلّي برَق عليَّ واحد الضَّو قوي من السما، وْطِحْتْ على الرحبة وْسمعْتْ واحد الصوت كيقول لي: «شاول، شاول، علاش كَتْـتعدّى عليَّ؟» وْسقصيتْ: «شكون أنتينا، يا رَبّ؟» وْقال لي: «أنا يَسوع الناصِري الّي كَتْـتعدّى عليه أنتينا.» والّي كانو معيَ شافو الضَّو، وَلكن ما فهمو شي الصوت د هَداك الّي كيهدَر معيَ. وْقُلْتْ: «شنّو خصْني نعمل، يا رَبّ؟» وْقال لي الرَّبّ: «نوض وْدْخل نْدِمَشْق، وْتمّا غادي يتّقال لك كُل شي الّي محدّد لك تعمل.» وْحيت ما بقيتْ شي كنشوف بْسباب المجد د ديك الضَّو، هَدوك الّي كانو معيَ ݣوّدوني من يَدّي وْدخلْتْ نْدِمَشْق. "وْجا عندي حَنانيّا، الّي هُوَ واحد الرَّجل متّاقي وْحافظ الشريعة، وْمحْتَرم عند اليهود كاملين الّي ساكنين تمّاك. قرّب نْعندي وْقال لي: «آ خاي شاول، ادّي البصر ديالك من جديد.» ديك الساعة شفْتْ فيه، وْقال لي: «إلَه جدودنا اختارك باش تعرف الإرادة ديالو وْتشوف هَداك الّي هُوَ العادل، وْتسمع الصوت من دُقمو، حيت أنتينا غادي تكون لو شاهد عند الناس كاملين بْكُل شي الّي شفْتِ وْسمعْتِ. وْدابا علاش كَتْـتعطّل؟ نوض تتغطّس، وْغسل الدنوب ديالك واستَغيت بالِاسم ديالو.» "وْملّي رجعْتْ نأُورُشَليم وْكُنْتْ كنصلّي في بيت المَقْدس، جاتْني واحد الغيبوبة، وْشفْتْ الرَّبّ كيقول لي: «خرج دغيا من أُورُشَليم، حيت ما غادي شي يقبلو الشهادة ديالك عليَّ.» وْردّيتْ عليه: «يا رَبّي، هُمَ كيعرفو بلّي أنا كُنْتْ كنسيّب في الحبس وْكنجلد الناس الّي كيآمنو بِك في كُل بيوت العبادة. وْملّي سال الدم د إسْتِفانوس الشهيد ديالك، كُنْتْ حاضر وْمتَّفق وانا كنحضي الحوايج د الناس الّي قتلوه.» وَلكن قال لي الرَّبّ: «مْشي، حيت أنا غادي نصيفطك بعيد نْعند غير اليهود.»" سمعو لو حتّى نْهَد الكلمة، وْديك الساعة علّاو صوتوم وْقالو: "حيّد من الأرض هَد الرَّجل، حيت ما يسْتاهل شي يعيش!" وْملّي كانو كيغوّتو وْكيشرّݣو حوايجوم وْكيسيّبو الغبرة في السما، قايد العسْكر آمر باش يدخّلوه نالقشلة، وْوصّاهُم يبحتو معاه وْيعطيواه الدقّ باش يعرف القايد علاش كانو كيغوّتو عليه هَيداك. وْملّي مدّوه وْربطوه، قال بولُس نالعسْكري الّي كان حداه: "واش عندكُم الحقّ باش تجلدو واحد الرَّجل روماني بلا ما تحاكموه؟" وْملّي سمَع العسْكري هَد الكلام، مشى بالزربة عند قايد العسْكر وْخبروْ: "شنّو غادي تعمل؟ حيت هَد الرَّجل روماني." قرّب قايد العسْكر عند بولُس وْقال لو: "قول لي، واش أنتينا روماني؟" وْقال لو: "إيّاه." وْجاوب قايد العسْكر: "أنا دفعْتْ بزّاف د الفلوس باش نشبّر هَد الجنسيّة." قال لو بولُس: "أمّا أنا خلقْتْ بِها." وْفي الحين تفارقو منّو الّي كانو غادي يجلدوه، وْخاف قايد العسْكر ملّي عرفوْ بلّي هُوَ روماني، حيت كان كتّفوْ. ولا غدّا بغى يتأكّد قايد العسْكر بَيّاش كيتَّهموه اليهود، وْطلقوْ من السناسل وآمر باش يجيو رُؤَساء المسؤولين والمَجْلس كامل، وْخرّج بولُس وْوقّفوْ قدّاموم. وْشاف بولُس في المَجْلس وْقال: "آ الرجال الخوت، أنا عِشْتْ قدّام اللّٰه بْضمير صافي حتّى نْهَد النهار." حَنانيّا، رئيس المسؤولين، آمر الّي واقفين حداه يضربوه على دُقمو. وْقال لو بولُس: "غادي يضربك اللّٰه أنتينا، آ الحيط المبيّط. واش أنتينا ݣالس هنايَ باش تحكم عليَّ بالشريعة وْكتآمروم يضربوني وْهَيدا كتخالف الشريعة؟" قالو الّي حاضرين نْبولُس: "واش كتعاتب رئيس الخدّامة د اللّٰه؟" وْقال بولُس: "آ الخوت، ما كُنْتْ شي عارف بلّي هُوَ رئيس المسؤولين في بيت المَقْدس، حيت مكتوب: «ما تهدَر شي خايب على الرئيس د شعبك.»" وْملّي فطن بولُس بلّي البعض مِنّوم كانو صدّوقيّين ويَخرين فرّيسيّين، رفع الصوت ديالو فوسط المَجْلس وْقال: "آ الرجال الخوت، أنا فرّيسي، ولد فرّيسي. كيتّحْكم عليَّ بْسباب الرجا في القيامة د الميّتين." وْملّي قال هَد الشي، وقعَتْ واحد المدابزة بين الفرّيسيّين والصدّوقيّين وْتقسم المَجْلس على جوج، حيت الصدّوقيّين كيقولو بلّي ما كاينة لا قيامة ولا ملائكة ولا أرْواح. أمّا الفرّيسيّين كيأكّدو بْديك الشي كامل. وْكان الصداع بزّاف، وْناضو المُعلّمين د الشريعة الّي هُمَ فرّيسيّين وْبداو كيحتَجّو بالجُهد، وْكيقولو: "ما جبرْنا حتّى شي دنب في هَد الرَّجل. وِادا كانت شي روح أَوْلا ملاك تكلّم معاه؟" وْحيت وقعَتْ مدابزة كبيرة، خاف قايد العسْكر يمزقو بولُس، وآمر العسْكر يهبطو ويخطفوه من وَسطوم ويدخّلوه نالقشلة. ولا غدّا في الليل، ظهَر لو الرَّبّ وْقال: "تشجّع، آ بولُس، حيت فحال ما شهدْتِ لي في أُورُشَليم، هَيداك لازم تشهد حتّى في رومة." وْملّي طلَع النهار، اتَّفقو البعض من اليهود وْحلفو في نَفسوم باللعنة، كيقولو بلّي ما غادي ياكلو ولا يشربو حتّى يقتلو بولُس. وْهَدوك الّي اتَّفقو على هَد الشي كانو كتَر من أربعين واحد. وْجاو نْعند رئيس المسؤولين والشيوخ وْقالو: "حلفْنا في نفسنا باللعنة بلّي ما ناكلو والو حتّى نقتلو بولُس. وْدابا أنتُمَ، مدعّمين من المَجْلس، طلبو قايد العسْكر باش يجيبوْ غدّا قدّامكُم، فحال إدا أنتُمَ معوّلين تبحتو في الأُمور ديالو بالتدْقيق، وْحنايَ غادي نكونو موجّدين باش نقتلوه من قبل ما يوصل." وَلكن ولد أختو د بولُس سمَع بالمصيدة الّي غادي يعملوها لو، وْمشى وْدخل نالقشلة وْخبر بولُس. وْعَيّط بولُس على واحد الضابط، وْقال لو: "ادّي هَد الشابّ نْعند قايد العسْكر حيت عندو شي حاجة يخبروْ بِها." وادّاه قدّام قايد العسْكر، وْقال: "عَيّط عليَّ بولُس الحبّاس وْطلب منّي نجيب لك هَد الشابّ، حيت عندو شي حاجة يقولاْ لك." وْشبّروْ قايد العسْكر من يَدّو وادّاه بوحدو وْسقصاه: "شنّو بغيتِ تخبرني بِه؟" وْقال: "اليهود اتَّفقو يطلبو منّك باش تهبّط بولُس غدّا قدّام المَجْلس، فحال إدا هُمَ معوّلين يسقصيواه بالتدْقيق. وَلكن ما تْتيق شي بِهُم حيت هُمَ كتَر من أربعين رَجل حالفين على نَفسوم باللعنة بلّي ما غادي ياكلو ولا يشربو حتّى يقتلو بولُس. وْهُمَ دابا موجّدين، كيتسنّاو تعطيهُم الوعد ديالك." ديك الساعة قايد العسْكر ودّع الشابّ وْوصّاه ما يقول نْحتّى شي واحد هَد الشي الّي خبروْ بِه. وْعَيّط على جوج من قُيّاد المية وْقالّوم: "وجّدو ميتَين من العسْكر وْسبعين من الخيّالة، وْميتَين من المسلّحين بالحربة باش ي‍مشيو نْقَيصَريّة في التسعود د هَد الليل. وْوجّدو البهايم باش يركّبو بولُس ويوصّلوه بْخير نْعند فيلِكْس الوالي." وْكتب واحد البراة كيقول فيها: "كلوديوس ليسياس كيبلّغ السلام نْسيادة الوالي فيلِكْس. ملّي اليهود شبّرو هَد الرَّجل وْكانو علاين يقتلوه، وصلْتْ أنا بالعسْكر ديالي وْعتقْتوْ، حيت عرفْتْ بلّي هُوَ روماني. وْحيت كُنْتْ باغي نعرف السبب علاش كانو كيشكيو بِه، ادّيتوْ نْعند مَجْلس اليهود. وْجبرْتْ بلّي شكاو بِه على مسائل الشريعة ديالوم، وَلكن ما كاينة حتّى شي حاجة عليه الّي كيسْتاهل عليها الموت أَوْلا الحبس. وْملّي خبروني بلّي تشاورو اليهود ضدّ هَد الرَّجل، صيفطْتوْ نْعندك دغيا، وْقُلْتْ نِلّي شاكيين بِه يتكلّمو قدّامك بْهَد الشي الّي عندوم عليه. تبقا على خير." والعسْكر، فحال ما وصّاهُم، ادّاو بولُس في الليل نأَنْـتيباتريس. ولا غدّا خلّاو الخيّالة ي‍مشيو معاه، وْهُمَ رجعو نالقشلة. وْملّي دخلو نْقَيصَريّة، قدّمو الرسالة نالوالي وْحضّرو بولُس حتّى هُوَ قدّامو. وْملّي قرا الوالي البراة، سقصى من شْمِن ولاية هُوَ. وْملّي عرف بلّي هُوَ من كيليكيّة، قال لو: "غادي نسمع منّك ملّي يوصلو نْعندي هَدوك الّي كيشكيو بك." وآمر باش يكون محضي في القصر د هيرودُس. وْمن بعد خمس أيّام، هوّد حَنانيّا، رئيس المسؤولين، مع الشيوخ وْواحد الرَّجل الّي كيعرف يتكلّم بالفصاحة، مسمّي تَرْتُلُّس، وْحضرو قدّام الوالي بالتُّهَم ضدّ بولُس. وْملّي عيّطو على بولُس، بدا تَرْتُلُّس كيشكي بِه كيقول: "يا سيادة فيلِكْس، تحت السلْطة ديالك تمتّعْنا بالسلام مدّة طويلة، وْبالوقاية ديالك تحسّنَتْ بلادنا، وْكنعْتَرفو بْهَد الشي بْكُل الشكر في كُل موطَع وْفي كُل وقت. وَلكن باش ما نطوّل شي عليك الكلام، كنطلب منّك تسمع نّا من فضلك في جُلسة مختَصرة. حيت جبرْنا هَد الرَّجل كيسبّب المشاكل، كيعمل الفِتنة بين اليهود كاملين في الدنيا كاملة، وْهُوَ المقدّم على مَدْهب النصارى، وْحاول ينجّس بيت المَقْدس. [ وْجا ليسياس، قايد العسْكر، باش يزوّلوْ نّا بالدراع من بين يَدْنا، وآمر الّي كيشكيو بِه باش يجيو نْعندك.] وانتينا، ملّي تبحت على هَد الشي كامل، غادي تعرف الأُمور الّي شكينا بِها عليه." واليهود حتّى هُمَ اتَّفقو بالشكاية وْأكّدو بلّي هَد الأُمور هَيداك د بالصّحّ. وْملّي شيّر الوالي باش يتكلّم بولُس، قال: "حيت عرفْتك بلّي أنتينا قاضي على هَد الأُمّة سنين طويلة، غادي ندافع على نفسي مرتاح. كيفْما تقدر تْتحقّق بْسهولة، ماشي كتَر من طناشر يوم باش طلعْتْ نأُورُشَليم باش نعبد، وْما جبروني شي كَنْـتغانن مع حتّى واحد وْما كنعمل شي الفِتنة بين الناس، لا في بيت المَقْدس ولا في بيوت العبادة ولا في المدينة. وْما يقدرو شي يتبّتو عليَّ حتّى شي تُهْمة قدّامك دابا. وَلكن كنعْتَرف لك بلّي أنا كنعبد الإلَه د جدودنا، تابع نالطريق الّي هُمَ كيسمّيواه بِدْعة، وْكنآمن بْكُل شي الّي مكتوب في الشريعة وْفي الكتوبة د الأَنْبياء. وْعندي نفس الرجا في اللّٰه الّي كيعْتَرفو بِه ديك الرجال، بلّي غادي تكون القيامة من بين الميّتين، واخّا المتّاقيين واخّا الظالمين. وْعلى ديك الشي أنا كنعمل جُهدي باش يكون عندي ضمير صافي قدّام اللّٰه والناس. وْمن بعد سنين، جيتْ نأُورُشَليم باش ندّي معيَ الصدقات نالشعب ديالي وْباش نقدّم الدبايح. وْفي ديك الوقت، جبروني متقدّس في بيت المَقْدس. ما كانت شي معيَ شي جماعة، وْما دخّلْتْ شي راسي في أي فِتنة. وَلكن كاينين شي د اليهود من آسيا، الّي كان لازم يوقفو قدّامك ويشكيو بيَّ، إدا كانت عندوم شي حاجة ضدّي. وَإلّا، خلّي هَدوك يقولو بْنَفسوم إدا جبرو فيَّ شي دنب ملّي كُنْتْ حاضر قدّام المَجْلس، من غير واحد الجملة، حيت، ملّي كُنْتْ فوسطوم، قُلْتْ بْصوت عالي: «على القيامة من بين الميّتين أنا محْكوم عليَّ اليوما.»" في ديك الساعة، أجّل فيلِكْس الحُكم، حيت كان كيعرف هَد الطريق بالتحْقيق، وْقالّوم: "ملّي يهوّد ليسياس، قايد العسْكر، غادي نقرّر في القضية ديالكُم." وآمر قايد العسْكر باش يحضي بولُس، وَلكن يتّعطى لو شويّش د الحرّية، وْما يمنع حتّى واحد من صحابو يتسخّر عليه أَوْلا يجي نْعندو. وْمن بعد شي أيّام، جا فيلِكْس مع مراتو دروسِلّا، الّي كانت يهوديّة، وْعَيّط على بولُس وْسمَع منّو على الإيمان بالمسيح يَسوع. وْملّي كان كيتكلّم على التقْوى والصبر والحُكم الماجي، تْخلع فيلِكْس وْقال: "مْشي من عندي دابا، وْملّي يكون عندي شي وقت مناسب، غادي نعيّط لك." وَلكن فيلِكْس كان كيتسنّى بولُس يعطي لو الرشوة باش يطلقوْ، وْعلى ديك الشي كان كيعيّط لو بزّاف د المرّات وْكان كيتهاود معاه. وَلكن من بعد عامَين، رجَع بورْكيوس فَسْتوس والي فْعوط فيلِكْس. وْحيت بغى فيلِكْس يرضي اليهود، خلّى بولُس محْبوس. ملّي وصَل فَسْتوس نالولاية، من بعد تلت أيّام، طلَع من قَيصَريّة نأُورُشَليم. وْرُؤَساء المسؤولين والكبارين د اليهود شرحو لو الشكوى ديالوم ضدّ بولُس. لحّو عليه وْطلبو منّو يعمل فيهُم واحد الفابور ويجيب بولُس نأُورُشَليم (حيت هُمَ كانو موجّدين واحد المصيدة باش يقتلوه في الطريق). وْجاوب فَسْتوس: "بولُس محبوس في قَيصَريّة وانا غادي نمشي لاْ دغيا. إيوا، يجيو معيَ بعض الكبارين منكُم وْتمّاك يشكيو ضدّو، إدا كان عامل شي عيب." من بعدما ݣلس فَسْتوس مع اليهود، ماشي كتَر من شي تمن أيّام أَوْلا عشرة، هوّد نْقَيصَريّة. ولا غدّا ڭلس في المَجْلس وآمر باش يجيبو بولُس. ملّي وصَل هَدا، دارو بِه اليهود الّي جاو من أُورُشَليم، وْقدّمو ضدّو بزّاف د الشكاوي الخطيرة الّي ما قدرو شي يتـبّتوها عليه. كان بولُس كيدافع على راسو، كيقول: "أنا ما عملْتْ حتّى عيب ضدّ الشريعة د اليهود ولا ضدّ بيت المَقْدس ولا ضدّ القَيصَر." وْحيت بغى فَسْتوس يرضي اليهود، سقصى بولُس: "واش بغيتِ تطلع نأُورُشَليم وْتْتحكم تمّاك على هَد الأُمور قدّامي؟" وْقال بولُس: "أنا في المَجْلس د القَيصَر فاين خصْني نتحكم. ما ظلمْتْ شي اليهود بْحتّى شي حاجة، وانتينا كتعرف هَد الشي مزيان. حيت إدا أنا كُنْتْ مُدْنب على شي حاجة الّي كنسْتاهل عليها الموت، ما نهرب شي من الموت. وَلكن إدا كانو كيتَّهموني اليهود بْديك الشكاوي باطل، حتّى واحد ما عندو الحقّ يدفعني لِلوم. أنا رافع الدعوة ديالي نالقَيصَر." من بعدما تشاور فَسْتوس مع المَجْلس، قال: "حيت رفعْتِ الدعوة ديالك نالقَيصَر، غادي ت‍مشي نْعند القَيصَر." وْمن بعد شي أيّام، جا أَغْريبّاس المَلِك وْبَرْنيكي نْقَيصَريّة باش يسلّمو على فَسْتوس. وْملّي بقاو تمّا بزّاف د الأيّام، شرح فَسْتوس نالمَلِك القضية د بولُس، وْقال: "كاين واحد الرَّجل خلّاه فيلِكْس محبوس، وْملّي مشيتْ نأُورُشَليم شكاو لي بِه رُؤَساء المسؤولين وْشيوخ اليهود وْطلبو يتّحكم عليه. وْجاوبْتوم بلّي ماشي العادة د الرومانيّين يدفعو شي واحد نالعقاب من قبل ما يكون قدّام الّي كيشكيو بِه باش يقدر يدافع على راسو من الشكاوي الّي ضدّو. وْملّي جاو نْعندي، ما تعطّلْتْ شي في القضية وْݣلسْتْ في المَجْلس لا غدّا، وْوصّيتْ باش يجيبو هَد الرَّجل. وْملّي وَقفو الّي كيتشكّاو عليه، ما قدّمو حتّى شي شكوى الّي كُنْتْ كنتصوّر، وَلكن كانو عندوم ضدّو شي مسائل من جهة الديانة ديالوم وْعلى واحد الرَّجل ميّت، مسمّي يَسوع، وْكان بولُس كيأكّد بلّي هُوَ حيّ. وْحيت ما كُنْتْ شي عارف كيفاش نبحت في هَد الأُمور، سقصيتوْ إدا بغى يمشي نأُورُشَليم ويتّحكم تمّاك. وَلكن ملّي رفَع بولُس الدعوة ديالو نالأمْبراطور باش يحكم في القضية ديالو، آمرْتْ باش يبقا محضي حتّى نصيفطوْ نْعند القَيصَر." وْقال أَغْريبّاس نْفَسْتوس: "حتّى أنا بغيتْ نسمع من هَد الرَّجل." وْردّ عليه فَستوس: "غدّا غادي تسمعوْ." ولا غدّا، ملّي جا أَغْريبّاس وْبَرْنيكي بِاسْتقبال كبير وْدخلو نالقاعة د المحْكمة مع قُيّاد العسْكر والكبارين د المدينة، جابو بولُس بْأمر فَسْتوس. وْقال فَسْتوس: "يا المَلِك أَغْريبّاس والحاضرين كاملين، ها هَد الرَّجل قدّامكُم. الشعب اليهودي كامل قدّم لي الشكاوي عليه في أُورُشَليم وْحتّى هنايَ في قَيصَريّة، كانو كيغوّتو وْطلبو منّي باش ما يبقا شي حيّ. أمّا أنا، ما جبرْتْ حتّى شي حاجة الّي كيسْتاهل عليها يموت. وْحيت هُوَ رفَع الدعوة ديالو نالأمْبراطور، قرّرْتْ نصيفطوْ نْعندو. وَلكن ما عندي حتّى حاجة واضحة باش نكتب نالمَلِك عليه. على ديك الشي جيبْتوْ نْعندكُم، وْخصوصًا قدّامك، آ المَلِك أَغْريبّاس، باش، من بعدما تتحقّق، يكون عندي ما نكتب لو. حيت كيظهَر لي ماشي معقول نصيفط واحد الحبّاس بلا ما نحدّد الدعوة الّي عليه." ديك الساعة قال أَغْريبّاس نْبولُس: "عندك الإدن باش تدافع على راسك." إيوا، شيّر بولُس بْيَدّو وْبدا كيدافع على راسو: "يا المَلِك أَغْريبّاس، أنا عندي إمْتياز نكون قدّامك اليوما باش ندافع على راسي من الشكاوي د اليهود، حيت أنتينا عارف العادات والمسائل كاملين د اليهود. على ديك الشي كنطلب منّك تسمعني بالصبر. إيوا، اليهود كاملين عارفين كيفاش كانت الحياة ديالي من صُغري وْكيفاش كُنْتْ كنعيش من البداية بين الشعب ديالي في أُورُشَليم. وْهُمَ عارفين من شي مدّة بلّي عيشْتْ فرّيسي من الُوّل، تابع نالمَدْهب المتشدّد، إدا بغاو يشهدو على هَد الشي. وْدابا هُمَ كيحكمو عليَّ على الرجا في الوعد الّي عْطاه اللّٰه نالجدود ديالنا، الوعد الّي القبايل ديالنا بالطناشر بِهُم كيتمنّاو يتحقّق، عابدين بْشكل مستَمر ليل وْنهار. وْبْسباب هَد الرجا، أنا كنتحاكم من اليهود، آ المَلِك أَغْريبّاس. علاش كيظهَر لكُم مستحيل بلّي اللّٰه كيردّ الميّتين بالروح؟ "أمّا أنا اقْتَنعْتْ بلّي كان واجب عليَّ نعمل المجهود باش نحارب اِسم يَسوع الناصِري، وْعملْتْ ديك الشي في أُورُشَليم. ملّي قبطْتْ الإدن من عند رُؤَساء المسؤولين، ما كُنْتْ شي كنسيّب القدّيسين في الحبس وْكان، وَلكن، ملّي كانو كيقتلوهُم، كُنْتْ كنصوّت ضدّوم. وْبزّاف د المرّات مشيتْ من مَجْمع نْمجمع كنعاقبوم وْكنبزّز عليهُم باش ينكرو الإيمان ديالوم، وْكُنْتْ كنسخط عليهُم وْكُنْتْ كنمرْمدوم حتّى في المُدُن الّي خارجة على اليَهوديّة. "وْفوسط هَد الشي، ملّي كُنْتْ ماشّي نْدِمَشْق بالإدن والوصاية من عند رُؤَساء المسؤولين، شفْتْ فوسط النهار في الطريق، آ المَلِك، واحد الضَّو من السما كيبرق كتَر من الشمس وْكيضوّي عليَّ وْعلى الّي ماشّين معيَ. وْطِحْنا كاملين على الرحبة، وانا سمعْتْ واحد الصوت كيتكلّم معيَ وْكيقول باللُغة العبريّة: «شاول، شاول، علاش كَتْـتعدّى عليَّ؟ صعيب عليك تركل المناخس.» وانا قُلْتْ: «شكون أنتينا، يا رَبّ؟» وْردّ عليَّ الرَّبّ: «أنا يَسوع، الّي كَتْـتعدّى عليه أنتينا. وَلكن دابا نوض وْوقَف على الرِّجلين ديالك، حيت على هَد الشي ظهرْتْ لك باش نعملك خدّام وْشاهد بْديك الشي الّي شفْتِ منّي وْبالأُمور الّي غادي نظهَر لك فيها. وْغادي نعتقك من الشعب ديالك وْمن الوَتَنيّين الّي أنا كَنْصيفطك لِلوم دابا باش تفتح العينين ديالوم ويرجعو من الظلام نالنور وْمن سُلطة الشيطان ناللّٰه باش، بالإيمان بيَّ، يتوصّلو بْغُفْران الدنوب وْبالورت مع القدّيسين.» "وْعلى ديك الشي، آ المَلِك أَغْريبّاس، ما كُنْتْ شي عاصي نْهَد الرؤيا السماويّة، وَلكن بديتْ كنبشّر الناس في دِمَشْق، وْفي أُورُشَليم، وْفي اليَهوديّة كاملة، وْمن بعد حتّى بين الأُمَم، باش يتوبو ويرجعو ناللّٰه، ويبيّنو بالأعْمال المزيانة التوبة ديالوم. وْبْسباب هَد الشي شبّروني اليهود في بيت المَقْدس وْحاولو يقتلوني. وَلكن اللّٰه عاونْني وْبقيتْ تابت حتّى نْهَد النهار، وْكنشهد نالصغارين والكبارين. ما كنقول والو كتَر من ديك الشي الّي قالو الأَنْبياء وْموسى بْديك الشي الّي غادي يوقع، يعني، بلّي المسيح كان غادي يتعدّب ويكون هُوَ الُوّل الّي غادي يتّبعت من بين الميّتين باش يبشّر شعبو والأُمَم بْجوج بِهُم بالنور." وْملّي كان بولُس كيدافع على راسو بْهَد الكلام، غوّت فَسْتوس بْصوت عالي: "أنتينا حماق، آ بولُس! المعْرفة ديالك الكبيرة كتروّن عقلك!" وْردّ بولُس: "أنا ماشي حماق، آ سيادة فَسْتوس، وَلكن كنتكلّم بْكلام الحقّ والمعقول. حيت المَلِك كيعرف هَد الأُمور وْعلى هَد الشي كنتكلّم قدّامو بْصراحة. أنا متيقّن بلّي ما مخبّع عليه حتّى شي حاجة، حيت هَد الأُمور ما تعملَتْ شي في واحد الركنة. واش كتآمن بالأَنْبياء، آ المَلِك أَغْريبّاس؟ أنا كنعرفك بلّي أنتينا كتآمن." ديك الساعة قال المَلِك أَغْريبّاس نْبولُس: "في شويا د الوقت غادي تقنعني باش نرجع مسيحي." وْقال بولُس: "بالقليل ولا بالكتير، كنطلب اللّٰه بلّي، ماشي غير أنتينا، وَلكن حتّى الّي كيسمعوني كاملين اليوما يرجعو فحالي، وَلكن بلا هَد السناسل!" ديك الساعة وقَف المَلِك والوالي وْبَرْنيكي، والّي كانو ݣالسين معهُم، وْخرجو وْهُمَ كيتهاودو مع بعطوم وْكيقولو: "هَد الرَّجل ما عمل حتّى شي حاجة الّي كيسْتاهل عليها الموت أَوْلا الحبس." وْقال أَغْريبّاس نْفَسْتوس: "كان يمكن يتحرّر هَد الرَّجل، كَكان ما رفَع شي الدعوة ديالو نالقَيصَر." ملّي تقرّر باش نسافرو في البحَر نإيطاليا، دفعو بولُس وْبعض الحبّاسة يَخرين نواحد القايد د المية، الّي مسمّي يوليوس، من فرقة أُوغُسطُس. وْركبْنا في واحد الباركو أَدْراميتيني، الّي كان غادي يقلّع نالمواطع على حاشية المنْطَقة د آسيا. وْرافقنا أرِسْتَرْخُس، واحد الرَّجل مَكدوني من تَسالونيكي. ولا غدّا وصلْنا نْصَيدا، وْتعامل يوليوس مع بولُس بالحنان وْخلّاه يمشي نْعند صحابو باش يتهلّاو فيه. وْملّي قلّعْنا من تمّا، سافرْنا في البحَر مدرّقين مورا قُبْرُص، حيت الريح كان معاكس معنا. وْمن بعدما قطعْنا البحَر الّي حدا الحاشية د كيليكيّة وْبَمْفيليّة، وصلْنا نْميرا، مدينة في ليكيّة. وْتمّاك جبر قايد المية واحد الباركو من إسْكَنْدَريّة مسافر نإيطاليا وْركبْنا فيه. وْسافرْنا بزّاف د الأيّام شويا بْشويا، وْما وصلْنا نْكِنيدُس غير بالدراع. وْمن حيت الريح ما خلّانا شي نزيدو، سافرْنا مدرّقين مورا كريت، قدّام سَلْموني. وْملّي فوتْناها بْصعوبة، جينا نواحد الموطَع مسمّي المواني المزيانة الّي قريبة من مدينة لَساية. ملّي فاتت مدّة طويلة وْرجع السفر في البحَر خطير، حيت كان ڭاز الصيام، كان بولُس كينبّهوم، كيقولّوم: "آ الرجال، أنا كنشوف بلّي هَد السفر غادي يكون فيه ضرر وْخسارة كبيرة، ماشي غير د السلعة د الباركو وْكان، وَلكن حتّى في نفوسنا." وَلكن كان قايد المية كيسمع نْربّان الباركو وْنمولاه كتَر من التنْبيه د بولُس، وْحيت المرسى ما كانت شي مناسبة باش يبقاو فيها في فصل الشتا، الأغلبية اتَّفقو باش يسافرو من تمّا، مصّاب يقدرو يوصلو نْفينِكْس، واحد المرسى في كريت مقابلة الجنوب والشمال د الغرب، باش يقضيو فيها فصل الشتا. ملّي بدا كيسوط واحد الريح خفيف من الجنوب، ظنّو بلّي غادي يوصلو نالغرض ديالوم وْطلّعو المخاطف وْسافرو حدا كريت، قريب من التشالي. وَلكن من بعد مدّة قليلة، ضرَب الباركو واحد الريح قوي، كيقولو لو "أُوراكيلون." وْملّي بقا الباركو مقْبوط بالعاصفة وْما قدر شي يقابل الريح، تسلّمْنا وْخلّينا الريح يدّينا. وْملّي سافرْنا مدرّقين مورا واحد الجزيرة، مسمّية كلودي، قدرْنا نضبّطو الفلوكة د النجا بواحد الصعوبة كبيرة. وْملّي طلّعو الفلوكة، ربطو الباركو بالحبولة وْحزموه، حيت خافو يبقا محبوس في التشالي د سيرْتِس، وْربطو القلوع وْبقا كيدّيهُم الريح. ولا غدّا، حيت بقات العاصفة قويّة، بداو كيخويو الباركو من السلعة، وْفي النهار التالت، سيّبو بْيَدّوم أدَوات الباركو. وْحيت ڭازت بزّاف د الأيّام بلا ما تظهَر الشمس ولا النجوم، والعاصفة بقات كتقوى علينا، في الآخر قطعْنا الأمل في النجا. وْحيت ڭازت مدّة طويلة وْحنايَ بالجّوع، وقَف بولُس فوسطوم وْقال: "آ الرجال، كان واجب عليكُم تسمعوني وْما نقلّعو شي من كريت باش ما نݣوّزو شي من الضرر والخسارة. دابا كَنْنصحكُم، كونو مشجّعين، حيت ما غادي شي تضيع حتّى نفس واحدة منكُم، غير الباركو. حيت ظهَر لي هَد الليلة واحد الملاك من الإلَه الّي أنا ديالو والّي كنخدموْ، كيقول: «آ بولُس، ما تخاف شي. لازم عليك توقف قدّام القَيصَر. وْها هُوَ اللّٰه منح لك الحياة د المسافرين معك كاملين.» على ديك الشي، آ الرجال، كونو مشجّعين، حيت أنا كنآمن باللّٰه بلّي غادي يكون هَيدا، فحال ما قال لي. وَلكن خصْنا نتسيّبو في واحد الجزيرة." وْملّي كانت الليلة أربعطاش وْحنايَ متْلوفين في بحر أَدْريا، تقْريبًا في نصّ الليل، فطنو البحّارة بلّي قرّبو نالبَرّ. عبرو الغرق وْجبرو عشرين دراع، وْملّي زادو واحد المسافة قصيرة، عبرو عاود وْجبرو خمسطاشر دراع. وْحيت خافو يدخلو في شي موطَع الّي فيه الحجار، سيّبو أربعة د المخاطف من اللَّور د الباركو، وْكانو كيتمنّاو يطلع النهار. ديك الساعة حاولو البحّارة يهربو من الباركو، وْنزّلو الفلوكة د النجا في البحَر، فحال إدا كانو باغيين يسيّبو المخاطف من القدّام. وْقال بولُس نْقايد المية والعسْكر: "إدا ما بقاو شي هَدوك في الباركو، حتّى أنتُمَ ما تقدرو شي تنجاو." في ديك الوقت قطّعو العسْكر الحبولة د الفلوكة وْخلّاوها تطيح في الما. وْملّي قرّب يطلع النهار، رغبوم بولُس كاملين باش ياكلو شويا، وْقال: "ݣازت أربعطاشر يوم وانتُمَ كتسهرو وْكتبقاو صايمين، بلا ما تاكلو والو. على ديك الشي كنطلب منكُم باش تاكلو شويا على صحّتكُم، حيت ما غادي تفنا حتّى شعرة من الراس د شي واحد منكُم." وْملّي قال هَد الشي، شبّر الخبز وْشكر اللّٰه قدّاموم كاملين وْقطّع وْبدا كياكل. ديك الساعة تشجّعو كاملين وْكلاو حتّى هُمَ. وْكُنّا حنايَ الّي في الباركو كاملين ميتَين وْستّة وْسبعين نفس. وْملّي شبعو من الماكلة، بداو كيسيّبو الزرع في البحَر باش يتخفّف الباركو. وْملّي طلَع النهار، ما عرفو شي البحّارة الأرض الّي وَصلو لاْ، وَلكن شافو واحد الخليج والحاشية د البحَر ديالو، وْقرّرو يدخّلو الباركو فيه إدا قدرو. قطّعو المخاطف وْخلّاوهُم يطيحو في البحَر، وْفي نفس الوقت، فسخو الحبولة د الضمان وْركّبو الشراع الّي في القدّام، وْتوجّهو نالحاشية د البحَر. وْضرب الباركو في التشالي بين بحَر وْبحَر، والقدّام ديالو ما بقا شي كيتحرّك وْبقا تابت. أمّا اللَّوري د الباركو تهرّس بْقوّة المواج. ديك الساعة قرّرو العسْكر يقتلو الحبّاسة، باش حتّى واحد مِنّوم ما يعوم ويهرب. وَلكن قايد المية بغى ينجّي الحياة د بولُس، وْمنعوم من هَد الفكرة، وآمر الّي قادرين يعومو ينقّزو هُمَ الُوّلين ويخرجو نالبَرّ، والباقين يتبعو، البعض مِنّوم مشبّرين بالخشب أَوْلا بْطراف الباركو. وْهَيدا زدَق بلّي وَصلو كاملين ناجيين نالبَرّ. وْملّي نجينا، عرفْنا بلّي ديك الجزيرة مسمّية مالطة. الناس ديالاْ تعاملو معنا بالصواب بزّاف. اسْتَقبلونا كاملين وْشعلو العافية بْسباب البرد وْقرّبْنا مِنّاْ حيتاش الشتا بدات كتطيح. وقَع بلّي بولُس كان كيجمع الحطب وْكيسيّبوْ في العافية، وْهربَتْ واحد الحيّة مسمومة من العافية وْشبّرَتْ في يَدّو. وْملّي شافو الناس د البلاد الحيّة معلّقة في يَدّو قالو بيناتوم: "بلا شكّ هَد الرَّجل قتّال، حيت، واخّا نجا من البحَر، العدل ما خلّاه شي يعيش." وَلكن بولُس نفط الحيّة في العافية وْما تضرّ شي بِها. أمّا هُمَ كانو كيتسنّاواه يتنفّخ ويطيح ميّت على غفلة. وْملّي بقاو كيتسنّاو واحد الوقت طويل، وْشافو بلّي ما وقَع لو والو، بدّلو الرأي ديالوم، وْقالو: "هَدا واحد الإلَه." وْحدا ديك الموطَع كانو شي فدادن د المقدّم د الجزيرة، الّي مسمّي بوبْليوس. هَدا اسْتَقبلنا بالصواب وْضيّفنا تلت أيّام. وْباباه د بوبْليوس كان ممْدود في الفراش مريط بالسخانة والإسهال. وْدخل نْعندو بولُس وْصلّى وْعمل يَدّو عليه وْشافاه. وْملّي وقَع هَد الشي، جاو نْعندو بزّاف د المراطين في الجزيرة وْشافاهُم. وْكرّمونا بِاحْترام كبير، وْملّي قلّعْنا، عْطاونا كُل ما نحْتاجو لو في السفر ديالنا. وْمن بعد تلت شهور في الجزيرة، قلّعْنا في واحد الباركو إسْكَنْدَري الّي بقا تمّا في فصل الشتا، مرْشوم بالعلامة د جوج د الآلِهة، "التوام." وصلْنا نْسَراكوسا وْبقينا تمّاك تلت أيّام. وْمن تمّا مشينا حدا التشالي د البحَر وْوصلْنا نْريغيون. وْمن مورا ديك النهار، ساط الريح من الجنوب، ولا غدّا وصلْنا نْبوطيولي، فاين جبرْنا بعض الخوت وْعرطو علينا نبقاو عندوم سبعة أيّام. وْفي الآخر وصلْنا نْرومة. وْمن تمّاك، ملّي سمعو الخوت بالخبر ديالنا، خرجو باش يسْتَقبلونا في سوق أَبّيوس وْتلاتة د الفنادق، وْملّي شافوم بولُس، شكر اللّٰه وْتشجّع. وْملّي دخلْنا نْرومة، سمحو نْبولُس يبقا بوحدو مع واحد العسْكري الّي كان كيحضيه. وْمن بعد تلت أيّام، جمَع بولُس الكبارين د اليهود، وْملّي اتّجمعو، قالّوم: "آ الرجال الخوت، واخّا أنا ما عملْتْ والو ضدّ الشعب أَوْلا ضدّ العادة د جدودنا، تسلّمْتْ حبّاس من أُورُشَليم في اليَدّين د الرومانيّين. وْملّي بحتو معيَ، بغاو يطلقوني، حيت ما كانت شي عليَّ حتّى شي حُجّة باش نموت. وَلكن ملّي عارضو ديك الشي اليهود، كان لازم عليَّ نرفع الدعوة ديالي نْعند القَيصَر، وْبْطبيعة الحال، ماشي حيت كانت عندي شي تُهْمة على الوطن ديالي. وْعلى هَد السبب طلبْتْ باش نشوفكُم وْنهدَر معكُم، حيت أنا مكتّف بْهَد السنسلة على الرجا د إسْرائيل." ديك الساعة قالو لو: "حنايَ ما توصّلْنا بْحتّى شي رسائل فيك من اليَهوديّة، وْحتّى واحد من الخوت ما جا باش يخبرنا أَوْلا يتكلّم عليك بْشي حاجة قبيحة. وَلكن بغينا نسمعو منّك شنّي هي الفكرة ديالك، حيت كنعرفو بلّي في كُل موطَع كيعارضو هَد المَدْهب." وْخصّصو واحد النهار وْجاو نْعندو بزّاف د الناس نالدار فاين كان ڭالس، وْشرح لوم وْشهد بْمُلك اللّٰه، وْحاول باش يقنعوم بيَسوع، من الشريعة د موسى وْمن الأَنْبياء، من الصباح حتّى نالعشيّة. والبعض مِنّوم اقْتَنعو بالكلام ديالو والبعض ما آمنو شي. وْحيت ما اتَّفقو شي مع بعطوم، قالّوم بولُس من قبل ما يمشيو من عندو: "مزيان تكلّم الروح القُدُس نْجدودنا بواسطة النَّبي إشَعْيا، كيقول: «مْشي نْعند هَد الشعب وْقولّوم: واخّا كتسمعو، ما غادي شي تفهمو، وْواخّا كتشوفو، ما غادي شي تميّزو. حيت القلب د هَد الشعب قاصح، والودْنين ديالوم تقالو نالسمع. وْغمّضو العينين ديالوم باش ما يشوفو شي، ولا يسمعو بالودْنين ديالوم ويفهمو بْقلبوم ويتوبو وانا نشافيهم.» على هَد الشي بغيتْكُم تعرفو بلّي اللّٰه صيفط النجا ديالو نالأُمَم، وْهُمَ غادي يسمعو لو." [ وْملّي قال هَد الكلام، خرجو اليهود من عندو وْهُمَ مدابزين مع بعطوم.] وْبقا بولُس عامَين في واحد الدار الّي كراها، وْكان كيرحّب بالناس كاملين الّي كيجيو نْعندو، وْكيبشّر بْمُلك اللّٰه وْكيعلّم بالرَّبّ يَسوع المسيح بالزعامة وْبلا مانع. بولُس عبد يَسوع المسيح، عزلوْ اللّٰه باش يكون رسول مخْتور باش يبشّر بالإنجيل د اللّٰه، الّي سبق وْوَعد بِه بواسطة الأَنْبياء ديالو في الكتوبة المقدّسة. هَد الإنجيل هُوَ على ابنو الّي من جهة الجسد جا من الدرّيّة د داود، وْمن جهة روح القداسة ورّى بْقوّة بلّي هُوَ ابن اللّٰه بالقيامة من بين الميّتين. هُوَ يَسوع المسيح رَبّنا، الّي بِه توصّلْنا بالنعْمة والمَوهبة الرسوليّة بْفضل اِسمو باش نقنعو الشعوب كاملين يطيعو الإيمان، الّي بيناتوم حتّى أنتُمَ معْروطين باش تكونو ديال يَسوع المسيح. كنكتب لكُم أنتُمَ كاملين الّي محبوبـين عند اللّٰه في رومة، الّي معْروطين وْقدّيسين. عليكُم النعْمة والسلام من عند اللّٰه الآب ديالنا والرَّبّ يَسوع المسيح. في الُوّل، بيَسوع المسيح كنشكر إلَهي من جهتكُم كاملين، حيت في الدنيا كاملة كيعاودو على الإيمان ديالكُم. اللّٰه، الّي كنخدموْ من القلب في الإنجيل د ابنو، شاهد عليَّ كيفاش كَنْدكركُم في الدُعاء ديالي بْشكل مستَمر. وْكنطلب دائمًا في الدعاء ديالي، إدا كانت الإرادة د اللّٰه، يفتح لي الطريق باش نطلّل عليكُم. حيت توحشْتْ نشوفكُم باش نشارك معكُم شي مَوهبة روحيّة باش تقوّيكُم، يعني باش نشجّعو بَعْضيّاتنا بالإيمان المشْتَرك بيني وْبينكُم. وْبغيتكُم تعرفو، آ الخوت، بلّي بزّاف د المرّات قرّرْتْ في نفسي نجي نْعندكُم باش يكون عندي شي مردود بيناتكُم، فحال الّي كان مع الأُمَم يَخرين، واخّا حتّى نْدابا عندي موانع. عليَّ الدين مع اليونانيّين وْغير اليونانيّين، الحُكَماء والجّاهلين. وْعلى هَد الشي أنا مستَعدّ باش نبشّركُم حتّى أنتُمَ الّي في رومة. حيت ما كنحشم شي من الإنجيل، حيت هُوَ قوّة اللّٰه نالنجا د الناس كاملين الّي كيآمنو، اليهود في الُوّل، والأُمَم حتّى هُمَ، حيت في الإنجيل ظهَر العدل الّي جا من عند اللّٰه، من الإيمان نالإيمان، فحال ما هُوَ مكتوب "المتّاقي غادي يحيا بالإيمان." حيت غضب اللّٰه ظهَر من السما على الناس كاملين الّي كيعيشو بالظلم وْبلا تقوى، وْكيحصرو الحقّ بالشَّرّ ديالوم. حيت معْرفة اللّٰه ظاهرة فيهُم، حيت اللّٰه ورّاها لوم. حيت من خلوق الدنيا الأُمور د اللّٰه الّي ماشي ظاهرة، فحال القُدْرة ديالو الأبديّة والطبيعة ديالو الإلَهيّة، ظهرو واضحين بالحاجات المخْلوقة، وْحتّى واحد ما بقا عندو عُدر. حيت واخّا هُمَ عرفو اللّٰه، ما مجّدوه شي فحال الإلَه وْما شكروه شي، وَلكن تلفو في الأفْكار ديالوم الباطلة، وْتظلّم القلب ديالوم المكلّخ. وْملّي قالو على نَفسوم بلّي هُمَ حُكَماء، رجعو حُمَق، وْبدّلو مجد اللّٰه، الّي ما كَيْفنا شي، بْتماتيل الّي كيشبهو نالإنسان وْنالطيور وْنالبهايم وْنالزّواحف الّي غادي يفناو. على ديك الشي سمح فيهُم اللّٰه نالشهوات الّي في قلبوم ونالفجور الّي كيهينو الأجسام ديالوم بِه. حيت بدّلو حقّ اللّٰه بالكدوب. كرّمو وْعبدو المخْلوق قبل من الخالق، الّي هُوَ مبروك دائمًا، آمين. على ديك الشي سمَح فيهُم اللّٰه نالشهوات القبيحة، حيت حتّى النسا ديالوم بدّلو الطبيعة الجنسيّة بالعادة الّي ضدّاْ. والرجال حتّى هُمَ خلّاو العادة الطبيعيّة مع النسا وْشعلو الشهوات ديالوم مع بعطوم، كيعملو الفاحِشة الدكورة مع الدكورة، وْتوصّلو في نَفسوم بالعقاب على حسب الضلال ديالوم. وْحيت ما بغاو شي يهْتَمّو بْمعْرفة اللّٰه، سمَح فيهُم نْعقلوم الفاسد باش يعملو الأُمور الّي ما خصّوم شي يعملوها. وْتعمّرو بْكُل أنواع الشَّرّ والفساد والطمع والدنوب. وْفاضَتْ نَفسوم بالحسد والقتل والمدابزة والخداع والقباحة والوسْواس. هُمَ نمّامين، عدْيان د اللّٰه، قلالين الحيا، متكبّرين، مفْتَخرين، كيختَلقو الشَّرّ، عاصيين الوالِدين، بلا فهم، بلا وفاء، بلا محنّة، وْبلا رحْمة. وْهُمَ عارفين الحُكم د اللّٰه، بلّي الّي كيمارسو هَد الأُمور كيسْتاهلو الموت، وْواخّا هَيدا، هُمَ ما كيمارسوها شي وْكان، وَلكن كيفرحو حتّى مع الّي كيمارسوها. على ديك الشي أنتينا ما عندك حتّى عدر، آ الرَّجل الّي كتحكم على يَخرين، حيت الّي كتحكم بِه على غيرك، كتحكم بِه على نفسك، حيت كتعمل نفس الأُمور. أمّا حنايَ كنعرفو بلّي اللّٰه كيحكم بالعدالة على الّي كيعملو هَد الأُمور. واش كتظنّ، أنتينا الّي كتحكم على يَخرين الّي كيعملو هَد الأُمور، بلّي غادي تهرب من الحُكم د اللّٰه وانتينا كتعمل فحالوم؟ واش ما فطنْتِ شي بلّي كتحڭر الغِنى د اللطف د اللّٰه والصبر والتحمُّل ديالو؟ حيت كتجاهل بلّي اللطف ديالو بغى يدّيك نالتوبة. وَلكن على القصوحيّة ديالك وْقلبك الّي ماشي تايب كتخزن نْنفسك الغضب نالنهار د الغضب، ملّي اللّٰه غادي يبيّن الحُكم ديالو العادل. اللّٰه غادي يجازي كُل واحد على قدّ الأعْمال ديالو، ويعطي الحياة الأبديّة نِلّي كيصبرو في الأعْمال المزيانة وْكيبقّشو على المجد والكرامة والخلود. وَلكن غادي يجازي بالغضب والسخط ديالو الأنانيّين وْهَدوك الّي ما كيطيعو شي الحقّ، وَلكن كيطيعو الشَّرّ. وْغادي تكون الشدّة والضيق على النفس د كُل إنسان الّي كيعمل الشَّرّ، اليهود في الُوّل، وْغير اليهود حتّى هُمَ. وَلكن غادي يكون المجد والكرامة والسلام نْكُل واحد الّي كيعمل الخير، ناليهود في الُوّل، وْنْغير اليهود حتّى هُمَ، حيت اللّٰه ما عندو شي الوجهيّات. حيت الناس الّي دنبو وْما عرفو شي الشريعة، بلا الشريعة غادي يتّهلكو. والناس الّي دنبو وْكانو كيعرفو الشريعة، غادي يتّحكمو بالشريعة. حيت اللّٰه ما كيحسب شي هَدوك الّي كيسمعو الشريعة عادلين، وَلكن هَدوك الّي كيعملو الّي في الشريعة راه هُمَ العادلين. حيت الوَتَنيّين الّي ما عندوم شي الشريعة، ملّي كيعملو الأُمور بالطبيعة ديالاْ، واخّا ما عندوم شي الشريعة، هُمَ شريعة نْراسوم. هَدوك كيظهّرو بلّي مكتوب في قلبوم ديك الشي الّي كتطلب الشريعة، حيت الضمير ديالوم كيشهد عليهُم، وْحتّى التفكير ديالوم ساعة ساعة كيتّهموم وْساعة ساعة كيعدروم. هَيداك فحال ما كيقول الإنجيل ديالي، غادي يجي واحد النهار الّي فيه غادي يحكم اللّٰه بواسطة يَسوع المسيح على الأسْرار د كُل واحد. ها أنتينا، الّي كَتْـتسمّى يهودي وْمعتَمد على الشريعة وْكتفْتَخر باللّٰه، وْكتعرف الإرادة ديالو وْكتميّز الأُمور المزيانة، حيت أنتينا تعلّمْتِ من الشريعة، وْتايق بلّي أنتينا مُرْشد د العُميان وْواحد الضَو نِلّي هُمَ في الظلام، مُدرّب نالجاهلين وْمُعلّم نالعواول، حيت عندك التعْبير الكامل د المعْرفة والحقّ في الشريعة، وانتينا الّي كتعلّم يَخرين، واش ما غادي شي تقرّي نفسك؟ أنتينا الّي كتخطب ضدّ السرقة، واش كتسرق؟ وانتينا الّي كتقول "ما تزني شي،" واش كتزني؟ وانتينا الّي كَتْكرَه الأصْنام، واش كتوسّخ المقدّسات؟ وانتينا الّي كتفْتَخر بالشريعة، واش كتحڭر اللّٰه بْعصيان الشريعة؟ حيت مكتوب: "بْسبابكُم كيهدرو الوَتَنيّين بالكُفر على اِسم اللّٰه." على ديك الشي، إدا كتعمل بالشريعة، الطهارة ديالك عنداْ القيمة. وَلكن إدا أنتينا كتعصي الشريعة، ها أنتينا رجعْتِ ماشي مطهّر. إدَن، إدا الأُمَم بلا طهارة كيحافظو على الشروط د الشريعة، واش ما غادي شي يكونو محسوبـين فحال المطهّرين؟ والرَّجل الّي بلا طهارة في الجسم ديالو، وَلكن طايع الشريعة، هُوَ غادي يحكم عليك أنتينا، واخّا عندك الوَصيّة المكتوبة والطهارة، وَلكن كتعصي الشريعة. حيت ماشي الّي كيظهَر يهودي هُوَ يهودي، ولا الطهارة الّي كتظهَر في الجسم هي الطهارة. وَلكن اليهودي الحقيقي، هُوَ يهودي من الداخل، والطهارة هي طهارة القلب بالروح القُدُس وْماشي بالوَصيّة المكتوبة. هَدا هُوَ الشخص الّي كيشكروْ اللّٰه وْماشي الناس. إدَن، شنّو هُوَ الفضل د اليهودي؟ أَولا شنّي هي الفايدة من الطهارة؟ من أي نحيّة، راها بزّاف. في الُوّل، حيت اتّعطى لوم كلام اللّٰه باش يحافظو عليه. إيوا، شنّو؟ إدا البعض منّوم ما آمنو شي، واش قلّة إيمانوم كتبطّل أمانة اللّٰه؟ حاشا! كيكون اللّٰه دائمًا صادق، واخّا يكون كُل إنسان كدّاب. فحال ما هُوَ مكتوب: "باش تكون صادق في كلامك وْتغلب ملّي تحكم." وَلكن إدا الظلم ديالنا كيظهّر التقوى د اللّٰه، شنّو غادي نقولو؟ واش اللّٰه ماشي متّاقي ملّي كينزّل علينا الغضب ديالو؟ (أنا كنهدَر فحال الهدرة د الناس.) حاشا! إدا كان هَيداك، كيفاش يقدر اللّٰه يحكم على الدنيا؟ شي واحد يقدر يقول: "إدا الكدوب ديالي كيظهّرو الحقّ د اللّٰه وْكيكبّرو مجدو، علاش أنا باقي محكوم فحال شي مُدْنب؟" واش نقدرو نقولو: "إيوا، نعملو الشَّرّ باش يجيب الخير"؟ الناس الّي كيتّهمونا بْهَد الكلام كيسْتاهلو العقوبة! وْكيفاش؟ واش حنايَ اليهود حسَن مِنّوم؟ لا، أبدًا! حيت حنايَ تـبّتْنا من قبل بلّي اليهود وْغير اليهود هُمَ كاملين تحت القوّة د الدنوب فحال ما هُوَ مكتوب: "ما كاين حتّى واحد متّاقي، حتّى شي واحد. ما كاين حتّى واحد الّي كيفهم. ما كاين حتّى واحد الّي كيفتّش على اللّٰه. كاملين زاغو، وْفسدو مجموعين. ما كاين حتّى واحد الّي كيعمل الخَير، ما كاين حتّى شي واحد. الحنْجُرة ديالوم هي قبَر مفتوح. باللسان كيغشّو. تحت الشفايف ديالوم سمّ اللفعات. دُقْموم معمّر باللعنة والمرورة. رِجلوم خفيفة باش يسيّلو الدم. فاين ما مشاو كيخلّيو الروينة والفقر. وْطريق السلام ما كيعرفوها شي. والخوف د الله ما كاين شي قدّام عينوم." وْحنايَ كنعرفو بلّي كُل شي الّي كتقول الشريعة كتـتكلّم بِه مع الّي تحت الشريعة، باش تشدّ كُل دقوم والدنيا كاملة تبقا تحت حُكم اللّٰه. حيت بالأعْمال د الشريعة حتّى واحد ما كيتبرّر قدّام اللّٰه، وَلكن بالشريعة كنعرفو الدنوب. وَلكن دابا ظهَر العدل د اللّٰه بلا شريعة، كيفْما كتشهد لو الشريعة والأَنْبياء. والعَدل د اللّٰه كيجي بواسطة الإيمان بيَسوع المسيح نالناس كاملين الّي كيآمنو. حيت ما كاين شي الفرق بيناتوم، حيت دنبو الناس كاملين وْما لحقو شي مجد اللّٰه. وَلكن الله برّروم بلا شي، بالنعْمة ديالو، بالمسيح يَسوع الّي فداهُم، الّي قدّموْ اللّٰه باش يكفّر بْدمّو على كُل واحد الّي كيآمن، باش يظهّر التقوى ديالو. حيت الله، بالصبر ديالو، ما ادّاها شي في الدنوب الفايتة، باش يـبـيّن في هَد الوقت الحاضر التقوى ديالو. هَيدا اللّٰه عادل وْهُوَ كيبرّر الّي عندوم الإيمان بيَسوع. إدَن، فاين هي الحيالة؟ ما كاينة شي. من أي شريعة؟ واش بْشريعة الأعْمال؟ لا، وَلكن بْشريعة الإيمان. حنايَ كنعتَقدو بلّي الإنسان كيتبرّر بالإيمان بلا الأعْمال د الشريعة. واش اللّٰه غير إلَه اليهود بوحدوم؟ واش ماشي اللّٰه ديال غير اليهود حتّى هُمَ؟ إيّاه، هُوَ إلَه الأُمَم حتّى هُمَ. حيت اللّٰه هُوَ واحد، وْهُوَ غادي يبرّر بالإيمان هَدوك الّي مطهّرين، وْبْنفس الإيمان غادي يبرّر هَدوك الّي ماشي مطهّرين. واش كنبطّلو الشريعة بالإيمان؟ حاشا! وَلكن كَنْتبّتو الشريعة. إدَن، شنّو غادي نقولو على الّي جبر إبراهيم بابانا من جهة الجسد؟ حيت إدا كان إبراهيم مبرّر بالأعْمال، كان عندو باش يفْتَخر، وَلكن ماشي قدّام اللّٰه. حيت شنّو كيقول الكتاب؟ "آمن إبراهيم باللّٰه وْتّحسب لو تقوى." وَلكن الّي كيخدم، ما اتّحسبَتْ لو شي الأُجرة ديالو على حسب النعْمة، وَلكن على حسب الدين. أمّا الّي ما كيخدم شي، وَلكن كيآمن بْهَداك الّي كيبرّر الشرّير، الإيمان ديالو اتّحسب لو تقوى، فحال ما كيقول داود ملّي كيتكلّم على البركة د الرَّجل الّي كيحسب لو اللّٰه التقوى بلا أعْمال: "مبروكين هَدوك الّي اتّغفرو لوم المعاصي ديالوم وْتغطّاو دنوبوم. مبروك الرَّجل الّي ما غادي شي يحسب لو الرَّبّ الدنوب." واش هَد البركة كتكون غير نِلّي مطهّرين؟ واش ما كتكون شي حتّى نْهَدوك الّي ماشي مطهّرين؟ حيت قُلْنا بلّي إبراهيم اتّحسب لو الإيمان تقوى. وْكيفاش اتّحسب لو؟ واش من قبل أَوْلا من بعد الطهارة ديالو؟ من قبل، ملّي كان باقي بلا طهارة، وْماشي من بعد. إبراهيم قبَل العلامة د الطهارة فحال واحد الطابع د التقوى بالإيمان الّي كان عندو من قبل ما يتطهّر، باش يكون هُوَ الأب د الناس كامين الّي كيآمنو، واخّا ماشي مطهّرين، وْيتّحسب لوم الإيمان ديالوم تقوى. وْهُوَ ماشي الأب د هَدوك الّي مطهّرين وْكان، وَلكن حتّى د هَدوك الّي تابعين الخطوات د بابانا إبراهيم، الّي آمن من قبل ما يتطهّر. فعلًا، إبراهيم والدرّيّة ديالو ما قبطو شي بالشريعة الوعد بلّي هُوَ غادي يكون الوارت د الدنيا كاملة، وَلكن بالإيمان الّي اتّحسب لو تقوى. حيت إدا الّي كيعيشو بالشريعة غادي يكونو الورتة، في ديك الساعة الإيمان غادي يكون باطل والوعد ما غادي يصلح نْحتّى شي حاجة. حيت الشريعة كتسبّب في غضب اللّٰه، وَلكن فاين ما كاينة شي الشريعة، حتّى المعْصيّة ما كاينة شي. على ديك الشي الوعد كيكون بالإيمان باش يكون مضمون بالنعْمة نالدرّيّة كاملة د إبراهيم. هَد الوعد ماشي غير نِلّي هُمَ تحت الشريعة، وَلكن حتّى نالناس الّي كيعيشو بالإيمان فحال إبراهيم، الّي هُوَ بابانا كاملين، فحال ما هُوَ مكتوب: "أنا ردّيتك الوالِد د بزّاف د الأُمَم." هَيدا إبراهيم آمن بالإلَه الّي كيحيي الميّتين وْكيعيّط على الأُمور الّي ما كاينة شي فحال إدا هي كاينة. هُوَ آمن بالرجا، واخّا ما كاين شي الرجا، وْبْهَد الطريقة رجع الوالِد د بزّاف د الأُمَم، فحال ما تقال لو: "هَيداك غادي تكون الدرّيّة ديالك بزّاف بزّاف." الإيمان ديالو ما ضعَف شي، واخّا اعْتَرف بلّي الجسم ديالو كان فحال الّي ميّت، حيت كان عندو تقْريبًا مية عام، والرحم د سارة كان ميّت حتّى هُوَ. وإبراهيم ما شكّ شي في الوعد د اللّٰه، فحال شي كافر، وَلكن تقوّى بالإيمان وْعْطى المجد ناللّٰه. وْكان متيقّن بلّي اللّٰه قادر باش يكمّل الوعد ديالو. على هَد الشي اتّحسب لو الإيمان تقوى. وَلكن هَد الشي الّي "اتّحسب لو" ما تكتب شي غير عليه هُوَ، وَلكن من جهتنا حتّى حنايَ. اللّٰه غادي يحسب نّا الإيمان ديالنا فحال تقوى، حيت آمنّا بلّي يَسوع رَبّنا قام من بين الميّتين. تسلّم نالموت بْسباب دنوبنا وْتّبعت من جهة التبْرية ديالنا. وْعلى ديك الشي، حيت حنايَ مبرّيين بالإيمان، عندنا السلام مع اللّٰه بْرَبّنا يَسوع المسيح، وْعندنا بِه الدخول بواسطة الإيمان نْهَد النعْمة الّي حنايَ تابتين فيها. وْكنفْتَخرو في الرجا د المجد د اللّٰه. وْماشي في هَد الشي وْكان، وَلكن كنفْتَخرو حتّى في العداب ديالنا، حيت كنعرفو بلّي الشدّة كتجيب الصبر، والصبر تجربة، والتجربة رجا، وْهَد الرجا ما كيخيّب شي، حيت محبّة اللّٰه تكبَّتْ في قلبنا بالروح القُدُس الّي اتّعطى نّا. حيت ملّي ما قدرْنا شي ننجّيو نفسنا، مات يَسوع علينا في الوقت المناسب. حيت صعيب يموت شي واحد من جهة واحد الإنسان متّاقي، ويمكن يزعم شي واحد يموت من جهة واحد الإنسان صالح. وَلكن اللّٰه كيبيّن نّا محبّتو حيت، واخّا حنايَ مُدْنبـين، مات المسيح من جهتنا. وْدابا حنايَ الّي مبرّيين بْدمّو، في الحقيقة كتَر من هَد الشي غادي ننجاو بِه من غضب اللّٰه. حيت إدا حنايَ الّي كُنّا العدْيان د اللّٰه تصالحْنا معاه بْموت ابنو، في الحقيقة كتَر من هَد الشي غادي ننجاو بالحياة ديالو وْحنايَ متصالحين معاه. وْماشي هَد الشي وْكان، كنفْتَخرو في اللّٰه بْرَبّنا يَسوع المسيح، حيت بِه توصّلْنا بالمصالحة. على ديك الشي، فحال ما دخلو الدنوب نالدنيا بْرَجل واحد، وْبواسطة الدنوب دخل الموت، هَيداك جا الموت على الناس كاملين، حيت دنبو كاملين. حيت الدنوب كانت في الدنيا من قبل الشريعة، وَلكن ملّي ما كتكون شي الشريعة، الدنوب ما كيتّحسبو شي. أمّا الموت حكَم من آدم حتّى نْموسى، حتّى على الّي ما دنبو شي فحال الطريقة الّي خطأ بِها آدم، الّي هُوَ رَمز د هَداك الّي كان غادي يجي. وَلكن ما تقدر شي تقارن الدنب ديال آدم مع عطيّة اللّٰه. حيت إدا بْسباب المعْصيّة د واحد الرَّجل ماتو بزّاف د الناس، شحال هي عظيمة نعْمة اللّٰه والعطيّة بالنعْمة الّي كتفيض على بزّاف د الناس من رَجل واحد، وْهُوَ يَسوع المسيح. وْما تقدر شي تقارن العطيّة د اللّٰه مع نتيجة الدنب ديال آدم، حيت الحُكم الّي كيدّي نالعقوبة جا بْدنب واحد، وَلكن العطيّة الّي كتبرّر جات من بعد بزّاف د المعاصي. حيت إدا ملَك الموت بالدنب د واحد الرَّجل، كتَر من هَد الشي غادي يملكو في الحياة هَدوك الّي كيقبلو النعْمة والعطيّة د التقوى بالكترة بواسطة واحد الرَّجل وْهُوَ يَسوع المسيح. كيفْما الدنب د غير واحد الرَّجل جاب العقوبة على الناس كاملين، هَيداك التقوى د واحد الرَّجل جابت بِرّ الحياة نالناس كاملين. حيت على المعْصيّة د واحد الرَّجل رجعو بزّاف د الناس مُدْنبـين، بْنفس الطريقة، على الطاعة د واحد الرَّجل غادي يرجعو بزّاف د الناس متّاقيين. الشريعة جات باش يكترو الدنوب، وَلكن فاين ما كيكترو الدنوب، تمّاك كتفيض النعْمة كتَر منّوم. وْهَيداك، كيفْما ملكو الدنوب وْسبّبو الموت، غادي تملك النعْمة بالتقوى وْتجيب الحياة الأبديّة بيَسوع المسيح رَبّنا. إدَن، شنّو غادي نقولو؟ واش غادي نستَمرو في الدنوب باش تتكتّر النعْمة؟ لا، حاشا! حنايَ الّي مُتْنا نالدنوب، كيفاش باقي نعيشو فيها؟ واش ما كتعرفو شي بلّي حنايَ كاملين الّي تغطّسْنا بيَسوع المسيح تغطّسْنا بالموت ديالو؟ حيت تدفنّا معاه بالمعموديّة نالموت، باش، فحال ما قام المسيح من بين الميّتين بالمجد د الآب، هَيداك نتمشّاو حنايَ في الحياة الجديدة، حيت إدا توحّدْنا معاه في الموت ديالو، غادي نتوحّدو معاه بالقيامة ديالو حتّى هي، وْحنايَ عارفين بلّي الطبيعة ديالنا القديمة تصلبَتْ مع المسيح باش يتحيّد الجسد ديالنا المُدْنب وْما نبقاو شي عبيد نالدنوب. حيت الّي مات، راه تبرّر من الدنوب. وِادا مُتْنا مع المسيح، كنآمنو بلّي غادي نعيشو عاود معاه، عارفين بلّي المسيح، حيت اتّبعت من بين الميّتين، ما يقدر شي يموت عاود، يعني الموت ما عندو حتّى شي سُلطة عليه. حيت من جهة الموت ديالو، هُوَ مات على الدنوب مرّة واحدة، وْمن جهة الحياة ديالو عايش ناللّٰه. هَيدا أنتُمَ اعْتَبرو راسكُم ميّتين نالدنوب، وَلكن حيّين ناللّٰه بالمسيح يَسوع رَبّنا. وْعلى ديك الشي ما تخلّيو شي الدنوب يتحكّمو في الجسد ديالكُم الفاني وْما تطيعو شي الشهوات ديالكُم القبيحة. وْما تقدّمو شي الأعْضاء د الجسد ديالكُم فحال شي أدَوات في خدمة الشَّرّ. بالعكس، فحال الناس الّي رجعو نالحياة من بعد الموت ديالوم، قدّمو راسكُم ناللّٰه والأعْضاء ديالكُم فحال شي أدَوات في خدمة التقوى. هَيدا الدنوب ما غادي شي يسيطرو عليكُم، حيت أنتُمَ ماشي تحت الشريعة، وَلكن تحت النعْمة. وْشنّو دابا؟ واش غادي ندنبو حيت حنايَ ماشي تحت الشريعة وَلكن تحت النعْمة؟ لا، حاشا! واش ما كتعرفو شي بلّي إدا كتسلّمو راسكُم نْشي واحد باش تطيعوه، أنتُمَ كترجعو العبيد ديالو؟ إمّا نالدنوب الّي كتدّي نالموت، وإمّا نالطاعة الّي كتدّي نالتقوى. وَلكن الحمدُ للّه، أنتُمَ الّي كُنْتو عبيد نالدنوب دابا طِعْتو من كُل قلبكُم نْهَد النوع د التعْليم الّي تسلّمْتو لِلو. وْفعلًا، تحرّرْتو من الدنوب وْرجعْتو عبيد نالتقوى. أنا كنهدَر معكُم بْكلام عادي حيتاش الجسد ديالكُم ضعيف. فحال ما قدّمْتو الأعْضاء د الجسد ديالكُم من قبل باش تخدمو نالنجاسة الّي كتدّي كتَر وْكتَر نالشَّرّ، دابا قَدّموها باش تخدمو نالتقوى الّي كتدّي نالقداسة، حيت ملّي كُنْتو عبيد نالدنوب كُنْتو محرّرين من التقوى. شنّي هي الغلّة الّي جنيتو في ديك الوقت؟ الأُمور الّي دابا كتحشمو مِنّاْ، في النهاية كتدّي نالموت. وَلكن دابا أنتُمَ تحرّرْتو من الدنوب وْرجعْتو عبيد ناللّٰه، كتجنيو الغلّة د القداسة الّي كتدّي نالحياة الأبديّة. حيت الأُجرة د الدنوب هي الموت، أمّا العطيّة د اللّٰه هي الحياة الأبديّة بالمسيح يَسوع رَبّنا. آ الخوت، كنهدَر مع الّي كيعرفو الشريعة. واش ما كتعرفو شي بلّي الشريعة كتسيطر على الإنسان ملّي هُوَ باقي حيّ؟ حيت متلًا المراة الّي عنداْ الرَّجل هي مربوطة بالشريعة مع رَجلاْ الحيّ. وَلكن إدا مات الرَّجل، هي تحرّرَتْ من الشريعة الّي ربطَتاْ مع رَجلاْ. وْعلى ديك الشي إدا هي تجوّجَتْ مع رَجل يَخُر وْرَجْلاْ حيّ، كَتْـتسمّى زانية. وَلكن إدا مات رَجلاْ، هي محرّرة من الشريعة وْما غادي شي تكون زانية واخّا تتجوّج مع واحد الرَّجل يَخُر. هَيداك حتّى أنتُمَ، آ خوتي، مُتّو نالشريعة بالجسد المصلوب د المسيح باش تكونو ديال هَداك الّي قام من بين الميّتين، وْباش نعطيو غلّة ناللّٰه. حيت ملّي الطبيعة ديالنا المُدْنبة كانت مسيطرة علينا، الشهوات المُدْنبة الّي فيّقَتاْ الشريعة كانت كتخدم في أعْضاء الجسد ديالنا، والغلّة ديالنا كانت نالموت. وَلكن دابا، حيت مُتْنا نِلّي سيطر علينا، حنايَ محرّرين من الشريعة باش نخدمو اللّٰه بالقوّة الجديدة الّي كيعطينا الروح القُدُس، وْماشي بواسطة الوَصيّة القديمة المكتوبة. شنّو غادي نقولو دابا؟ واش الشريعة هي الدنوب؟ لا، حاشا! وَلكن أنا ما كُنْتْ شي كنعرف الدنوب بلا الشريعة. متلًا، ما كُنْتْ شي عارف شنّي هي الشهْوة إدا ما كانت شي الشريعة قالت لي: "ما تْتشهّى شي." وَلكن الدنوب اسْتَفدَتْ من الفُرْصة الّي عْطاتاْ لاْ الوَصيّة وْفيّقَتْ فيَّ كُل نوع من الشهْوة، حيت بلا الشريعة، الدنوب راها ميّتة. وانا كُنْتْ عايش بلا شريعة في وقت يَخُر، وَلكن ملّي جات الوَصيّة، حيات الدنوب وْمُتّْ أنا. وانا جبرْتْ بلّي الوَصيّة الّي كانت خصّاْ تعطيني الحياة، مشات بيَّ نالموت. حيت الدنوب اسْتَفدَتْ من الفُرْصة بالوَصيّة وْغشَّتْني وْبالواسطة ديالاْ، قتلَتْني. وْعلى ديك الشي الشريعة هي مقدّسة، والوَصيّة مقدّسة وْعادلة وْمزيانة. إدَن، واش الحاجة الّي هي مزيانة جابت عليَّ الموت؟ لا، أبدًا! وَلكن الدنوب، باش تظهَر دنوب، جعلَتْ فيَّ الموت بواسطة ديك الشي الّي مزيان، وْهَيدا استَغلَّت الدنوب الوَصيّة وْظهرَتْ شرّيرة بزّاف. حيت كنعرفو بلّي الشريعة هي روحيّة، أمّا أنا غير بشر، مبْيوع فحال عبد نالدنوب. وْما كَنْفهم شي الّي كيوقع لي، حيت ما كنعمل شي الّي كَنْبغيه، وَلكن كنعمل الّي كَنْكرهوْ. وِادا كنعمل الّي ما كنبغيه شي، كَنْـتَّفق مع الشريعة بلّي هي مزيانة. وْماشي أنا الّي كنعمل ديك الشي الّي ما كنبغيه شي، وَلكن الدنوب الّي ساكنة فيَّ. وانا عارف بلّي ما ساكنة شي فيَّ، يعني في الجسد ديالي، حتّى شي حاجة مزيانة، حيت واخّا كنبغي نعمل الّي مزيان، ما كنقدر شي نعملوْ. حيت ما كنعمل شي الخير الّي كنبغيه، وَلكن كنعمل الشَّرّ الّي ما كنبغيه شي. وِادا كنعمل الّي ما كنبغيه شي، ماشي أنا الّي كنعملوْ، وَلكن الدنوب الّي ساكنة فيَّ. وْهَيدا كنجبر هَد القاعدة: ملّي كنبغي نعمل الخير، كنجبر بلّي الشَّرّ كيسكن فيَّ. حيت أنا في الإنسان الباطن كنفرح بالشريعة د اللّٰه. وَلكن كنشوف بلّي في الأعْضاء د جسدي كاينة واحد الشريعة يَخرى د الدنوب الّي كتحارب ضدّ الشريعة د الأفْكار ديالي وْكتخلّيني الأسير ديالاْ. أنا إنسان زُغبي! شكون غادي يحرّرني من هَد الجسد الفاني؟ الحمدُ للّه بيَسوع المسيح رَبّنا! وْهَيداك أنا بالعقل كنخدم شريعة اللّٰه، وَلكن بالجسد كنخدم شريعة الدنوب. وْعلى ديك الشي دابا ما كاينة حتّى شي عقوبة على الّي هُمَ في المسيح يَسوع، حيت الشريعة د روح الحياة في المسيح يَسوع حرّرَتك من شريعة الدنوب والموت. الّي كان مستحيل على الشريعة، حيت كانت ضعيفة في الجسد، عملوْ اللّٰه ملّي صيفط اِبنو في واحد الجسد الّي كيشبه نالجسد المُدْنب باش يعطي نفسو فحال دبيحة على الدنوب. هَيدا اللّٰه حكَم على الدنوب في الطبيعة البشريّة باش التقوى د الشريعة تتكمّل فينا، حنايَ الّي ما كنعيشو شي على حسب الطبيعة المُدْنبة، وَلكن على حسب الروح. حيت الّي كيعيشو على حسب الطبيعة المُدْنبة كيهْتَمّو بالأُمور د هَد الطبيعة، وَلكن الّي كيعيشو على حسب الروح كيهْتَمّو بْأُمور الروح، حيت العقليّة د الطبيعة المُدْنبة هي موت، وَلكن العقليّة الّي كتجي من الروح القُدُس هي حياة وْسلام. حيت العقليّة د الطبيعة المُدْنبة هي العدو د اللّٰه، حيت ما كَتْـتسلّم شي نْشريعة اللّٰه، وْما كتقدر شي تعملوْ. الّي كيعيشو في الطبيعة المُدْنبة ما كيقدرو شي يرضيو اللّٰه. وَلكن أنتُمَ ما كتعيشو شي على حسب الطبيعة المُدْنبة، وَلكن على حسب الروح، إدا روح اللّٰه ساكن فيكم. وِادا شي واحد ما فيه شي روح المسيح، هَداك ماشي من المسيح. وَلكن إدا المسيح فيكُم، الجسد هُوَ ميّت بْسباب الدنوب، والروح الّي ساكنة فيكُم حيّة بْسباب التقوى. وِادا الروح د الله الّي بعت يَسوع من بين الميّتين ساكن فيكُم، هُوَ نفسو الّي بعت المسيح من بين الميّتين غادي يحيي الأجْساد ديالكُم حتّى هي بالروح ديالو الّي ساكن فيكُم. وْعلى ديك الشي، آ الخوت، حنايَ مدْيونين ماشي نالجسد باش نعيشو من جهة الجسد. حيت إدا كتعيشو من جهة الجسد، غَد تموتو، وَلكن إدا كتقتلو الفعايل د الجسد بالروح، غَد تحياو. حيت الناس كاملين الّي هُمَ مݣوّدين بْروح اللّٰه، هُمَ أُوْلاد اللّٰه. حيت ما ادّيتو شي روح العبوديّة باش تكونو عاود تحت الخوف، وَلكن ادّيتو الروح الّي كَيْتبنّاكُم فحال أُولادو وْكيخلّيكُم تعيّطو: "يا بابا، الآب." الروح القُدُس بْنفسو كيشهد مع روحنا بلّي حنايَ أُوْلاد اللّٰه. وِادا حنايَ أُوْلاد اللّٰه، راه حنايَ ورتة، الورتة د اللّٰه، وْمشاركين مع المسيح في الورت. إدا حنايَ دابا كنـتعدّبو معاه، غادي نشاركو معاه حتّى في المجد ديالو. على ديك الشي كنظنّ بلّي العداب د هَد الوقت الحاضر ما كيتقارن شي مع المجد الّي غادي يظهَر فينا. حيت الخليقة كاملة كَتْـتسنّى بْرَغبة عميقة الظهور د أُوْلاد اللّٰه. حيت الخليقة تسلّمَتْ نالفنا، ماشي بْخاطراْ، وَلكن بالخاطر د هَداك الّي خَضّعاْ، في الرجا بلّي الخليقة نفساْ غادي تـتحرّر من العبوديّة د الفساد باش تلحق التحْرير المجيد د أُوْلاد اللّٰه. حيت كنعرفو بلّي الخليقة كاملة كتغوّت وْكَتْـتوجّع مع بعض حتّى نْدابا، وْماشي غير هي، حتّى حنايَ الّي عندنا الغلّة الُولى د الروح، كنـتوجّعو في نفسنا ما دُمْنا كنـتسنّاو التبنّي فحال أُولادو، يعني الفِدية د الجسد ديالنا. حيت حنايَ بْهَد الرجا نجينا. وَلكن الرجا الّي كيتشاف، هُوَ ماشي الرجا، حيت شكون كيترجّى في الحاجة الّي عندو دابا؟ وَلكن إدا كنـتسنّاو الحاجة الّي باقّة ما عندنا شي، غادي نـتسنّاوها بالصبر. وْهَيدا الروح القُدُس حتّى هُوَ كيجي باش يعاونْنا في الضعف ديالنا، حيت ما كنعرفو شي كيفاش خصْنا نصلّيو كيفْما هُوَ مناسب، وَلكن الروح بْنفسو كيشفَع فينا بالتـنْهيدات الّي ما يقدر حتّى واحد ينطق بِهُم بالكلام. واللّٰه، الّي كيفحص القلوبة، كيعرف شنّي هي النيّة د الروح، حيت الروح كيشفع في القدّيسين على حسب إرادة اللّٰه. وْكنعرفو بلّي نْهَدوك الّي كيحبّو اللّٰه، كُل الأُمور كيخدمو لوم مع بعطوم نالخَير، نْهَدوك الّي هُمَ معيّطين على حسب القصد ديالو. حيت الّي عرفوم من قبل، قدّر عليهُم باش يشبهو نالصورة د ابنو، باش يكون هُوَ البِكر بين بزّاف د الخوت. والناس الّي اختاروم اللّٰه، راه عَيّط لوم. والّي عَيّط لوم، راه برّروم. والّي برّروم، راه مجّدوم حتّى هُمَ. شنّو غادي نقولو على هَد الشي؟ إدا كان اللّٰه من جهتنا، شكون يقدر يضادّنا؟ الله ما بخل شي علينا بالِابن ديالو، وَلكن سلّموْ على مسبّتنا كاملين. إيوا، واش ما غادي شي يعطينا كُل شي معاه؟ شكون غادي يشكي بالمخْتورين د اللّٰه؟ واللّٰه هُوَ الّي كيبرّروم. شكون هُوَ الّي يقدر يحكم عليهُم؟ المسيح يَسوع هُوَ الّي مات، وْفوق هَد الشي رجَع بالروح، وْهُوَ على الّيمين د اللّٰه وْكيشفع فينا. شكون غادي يفرّقنا على محبّة المسيح؟ واش الشدّة أَو الضيق أَو التمرْميدة أَو الجّوع أَو العرى أَو الخطر أَو السيف؟ فحال ما هُوَ مكتوب: "حنايَ بْسبابك كَنْـتعرّضو نالموت النهار كامل. اتّحسبْنا فحال الغنم الّي كيدّيوها نالݣرنة." وَلكن حنايَ في هَد الشي كامل كتَر من مُنتَصرين بواسطة هَداك الّي حبّنا. حيت أنا متيقّن بلّي لا موت ولا حياة ولا ملائكة ولا سلطات ولا أُمور حاضرة ولا أُمور ماجّة ولا علو ولا غرق ولا شي خليقة يَخرى ما يقدرو شي يفرّقونا على محبّة اللّٰه الّي هي في المسيح يَسوع رَبّنا. كنقول الحقّ في المسيح، ما كنكدب شي والضمير ديالي كيشهد لي في الروح القُدُس بلّي عندي غبينة كبيرة والحريق في قلبي بْشكل مستَمر حيت كُنْتْ كنبغي نكون ملعون، يعني مفارق على المسيح، بْسباب الخير د الخوت ديالي، الّي هُمَ من لحمي وْدمّي، الّي هُمَ شعب إسْرائيل. الله عملوم أُولادو، وْعندوم المجد والعهود والشريعة والعبادة والوعود، وْمن عندوم الجدود وْمن عندوم جا المسيح في الجسد البشري، الّي هُوَ الإلَه فوق كُل شي، المبروك دائمًا، آمين! وَلكن ما كنقصد شي بلّي الكلام د اللّٰه فشل، حيت ماشي كاملين بَني إسْرائيل هُمَ من شعب إسْرائيل. واخّا هُمَ من ترّيكة إبراهيم، هُمَ ماشي كاملين الأبناء ديالو. بالعكس، قال الله نإبراهيم: "بإسْحاق غادي تكون عندك الدرّيّة." يعني، الّي هُمَ أُوْلاد طبيعيّين، ماشي هُمَ أُوْلاد اللّٰه، وَلكن أُوْلاد الوعد هُمَ الترّيكة ديال إبراهيم. حيت الوعد هُوَ هَدا: "من دابا عام غادي نجي وْفي ديك الوقت سارة غادي تولد ولد." وْماشي هَد الشي وْكان، وَلكن رِفْقة حبلَتْ حتّى هي من رَجل واحد، الّي هُوَ الجدّ ديالنا إسْحاق. حيت باقي ما خلقو شي التوام وْما عملو لا خير ولا شرّ، وْباش يتأكّد القصد د الاختيار الإلَهي، ماشي على الأعْمال، وَلكن على وعد اللّٰه، قالّاْ الله بلّي "الكبير غادي يخدم الصغير،" فحال ما هُوَ مكتوب: "حبّيتْ يَعْقوب وْكرهْتْ عيسو." شنّو غادي نقولو؟ واش اللّٰه ماشي عادل؟ حاشا ناللّٰه! حيت قال نْموسى: "أنا غادي نرحم الّي بغيت نرحم وْغادي نحنّ على الّي بغيت نحنّ عليه." إدَن، ما كيتعلّق شي بالرغبة ولا بالمجهود د الإنسان، وَلكن بْرحْمة اللّٰه. حيت كيقول الكتاب نْفِرْعَون: "رفعْتك نْهَد الشي بالضبط، باش نظهّر فيك القوّة ديالي وْباش يتنادى اسمي في الأرض كاملة." إدَن، اللّٰه كيرحم الّي بغى وْكيقصّح القلب د الّي بغى. وَلكن أنتينا غادي تقول لي: "وْعلاش باقي كيتَّهمنا اللّٰه؟ شكون يقدر يضادّ مع الإرادة ديالو؟" آ بن آدم! شكون أنتينا باش تطلب الحساب ناللّٰه؟ واش غادي تقول الطنْجرة د الطين نِلّي عدّلاْ: "علاش صنعْتِني هَيداك؟" واش ما عندو شي الفخّار الحقّ باش يصنع من نفس الطين بعض القشوع نالكرامة والبعض نالمدلّة؟ وْكيفاش إدا اللّٰه بغى يبيّن الغضب والقوّة ديالو وْتحمّل القشوع د السخط بالصبر بزّاف الّي مقصودين نالهلاك؟ وْكيفاش إدا اللّٰه بغى يبيّن الكترة د المجد ديالو نالقشوع د الرحْمة الّي هُوَ وجّدوم مقصودين نالمجد؟ هَدوك كُنّا حنايَ، الّي عَيّط نّا اللّٰه ماشي غير من اليهود وْكان، وَلكن حتّى من غير اليهود. كيفْما كيقول عاود في الكتاب د هوشَع: "غادي نسمّي شعبي الناس الّي ما كانو شي شعبي، وْغادي نسمّي عزيزتي هَديك الّي ما كانت شي عزيزتي." "وْفي الموطَع بْنفسو فاين تْقال لكُم: «أنتُمَ ماشي شعبي،» تمّاك غادي يسمّيوكُم أُوْلاد اللّٰه الحيّ." وإشَعْيا كيعيّط من جهة إسْرائيل: "واخّا يكون العدد د بَني إسْرائيل فحال الرمل د البحَر، غير البقيّة هي الّي غادي تنجا. حيت الرَّبّ غادي يكمّل كلامو على الأرض بالتقوى وْبلا ما يتعطّل." كيفْما سبق إشَعْيا وْقال: "كَكان رَبّ الجنود ما خلّى نّا شي الدرّيّة، كَكُنّا رجعْنا فحال سَدوم وْتشبّهْنا بْعَمورة." شنّو غادي نقولو دابا؟ كنقولو بلّي الأُمَم الّي ما كانو شي كيفتّشو على التقوى لحقوها، يعني التقوى الّي هي بالإيمان. وَلكن إسْرائيل الّي كانو كيفتّشو على واحد الشريعة د التقوى الّي اتّعطات لوم، ما لحقوها شي. علاش؟ حيت ما فتّشو شي بالإيمان، وَلكن بالأعْمال، حيت هُمَ عترو بالحجْرة د العترة، فحال ما هُوَ مكتوب: "ها انا كننزّل في صِهْيون واحد الحجْرة الّي كيعترو بِها والصخرة الّي كتطيّحوم، وَلكن كُل واحد الّي كيآمن بِه ما غادي شي يتخيّب." آ الخوت، شوق قلبي وْصلاتي ناللّٰه من جهة اليهود هي باش ينجاو. حيت أنا كنشهد لوم بلّي عندوم غيرة على اللّٰه وَلكن ماشي على حسب المَعْرفة، حيت ما كانو شي كيعرفو التقوى د اللّٰه وْحاولو يتبّتو التقوى ديالوم كيفْما بغاو، وْهَيدا ما تسلّمو شي نالتقوى د اللّٰه. حيت المسيح كمّل الشريعة نالتقوى نْكُل واحد الّي كيآمن. حيت موسى كيوصف هَيدا التقوى الّي تابتة بالشريعة: "الإنسان الّي كيعمل بِها غادي يحيا بِها." أمّا التقوى الّي تابتة بالإيمان، كيتكلّم الكتاب عليها هَيدا: "ما تقول شي في قلبك: «شكون غادي يطلع نالسما؟»" يعني باش يهبّط المسيح، أَوْلا "شكون غادي يهوّد نالهاوية؟" يعني باش يطلّع المسيح من بين الميّتين. وَلكن شنّو كيقول؟ "الكلام قريب منّك، وْهُوَ كاين في دُقمك وْفي قلبك." هَدا كلام الإيمان الّي كنبشّرو بِه: إدا اعْتَرفْتِ بْدُقمك بلّي يَسوع هُوَ الرَّبّ، وآمنْتِ بْقلبك بلّي اللّٰه بَعتوْ من بين الميّتين، غادي تنجا. حيت كيآمن الإنسان بالقلب نالتـبْرير، وَلكن كيعْتَرف بالدقوم نالنجا. حيت الكتاب كيقول: "كُل واحد الّي كيآمن بِه ما غادي شي يتخيّب." حيت ما كاين شي الفرق بين اليهودي واليوناني، حيت الرَّبّ بْنفسو، الّي هُوَ الرَّبّ د الناس كاملين، كيبارك في الناس كاملين الّي كيستَعنو بِه. حيت "كُل واحد الّي كيدعي بِاسم الرَّبّ غادي ينجا." وْكيفاش غادي يستَعنو بْهَداك الّي ما آمنو شي بِه؟ وْكيفاش غادي يآمنو بْهَداك الّي ما سمعو شي بِه؟ وْكيفاش غادي يسمعو بلا ما يبشّروم حتّى واحد؟ وْكيفاش غادي يبشّرو إدا ما تصيفطو شي؟ فحال ما هُوَ مكتوب: "شحال مزيّونين الرِّجلين د هَدوك الّي كيبشّرو بالخبار د الخَير!" وَلكن ماشي اليهود كاملين طاعو الإنجيل، حيت إشَعْيا كيقول: "يا رَبّي، شكون تيّق الخبار ديالنا؟" على ديك الشي الإيمان كيجي بالسمع، والسمع بْكلام المسيح. وَلكن أنا كنقول: "واش ما سمعو شي؟" إيّاه، سمعو! "خرج الصوت ديالوم نالأرض كاملة، والكلام ديالوم حتّى نْطراف الدُّنيا." وَلكن أنا كنقول، واش بَني إسْرائيل ما فهمو شي؟ في الُوّل موسى كيقول: "أنا غادي نهيّجكُم باش تغيرو من أُمّة الّي هي ماشي أُمّة. غادي نقهركُم بواحد الأُمّة مكلّخة." من بعد إشَعْيا كيزعَم يقول: "الناس الّي ما فتّشو شي عليَّ جبروني، وْظهرْتْ نِلّي ما سقصاو شي عليَّ." أمّا على إسْرائيل كيقول: "النهار كامل مدّيتْ اليَدّين ديالي نواحد الشعب عاصي وْمتمرّد." وْعلى ديك الشي كنسقصي، واش اللّٰه رفض شعبو؟ لا، أبدًا! حيت أنا بْنفسي إسْرائيلي من درّيّة إبراهيم، من قبيلة بِنْيامين. ما رفض شي اللّٰه شعبو الّي عرفوم من قبل. واش ما عرفْتو شي الّي كيقول الكتاب على إيليّا، كيفاش كيطلب اللّٰه ضدّ إسْرائيل؟ قال: "يا رَبّي، هُمَ قَتلو الأَنْبياء ديالك وْهدّمو المدابح ديالك وْبقيتْ أنا بوحدي وْدابا بغاو يقتلوني حتّى أنا." وْشنّو ردّ عليه الصوت الإلَهي؟: "أنا خلّيتْ نْنفسي سبع ألاف رَجل الّي ما سجدو شي نْبَعْل." وْفي هَد الوقت الحاضر عاود كاينة واحد البقيّة مخْتورة بالنعْمة. وِادا كان بالنعْمة، إدَن ماشي بالأعْمال. وَإلّا النعْمة ما غادي شي تكون نعْمة. إيوا، شنّو من بعد؟ ديك الشي الّي كانو كيطلبوه بَني إسْرائيل ما لحقوه شي، وَلكن لحقوه هَدوك الّي اختاروم الله. ويَخرين الّي بقاو منّوم، القلوبة ديالوم رجعَتْ قاصحة. فحال ما هُوَ مكتوب: "عْطاهُم اللّٰه روح النعاس وْعينين الّي ما كيشوفو شي وْوْدْنين الّي ما كيسمعو شي حتّى نْهَد النهار." وْداود قال: "مصاب يرجع الطَيفور ديالوم شبكة وْمصيدة وْحجْرة العترة وْعقاب لِلوم. مصاب يرجعو العينين ديالوم مظلّمين باش ما يشوفو والو، ويكون الطهَر ديالوم محنّي تحت التقال دائمًا." وْدابا غادي نسقصي: واش عترو إسْرائيل باش يطيحو؟ لا، ماشي هَيدا! وَلكن بْزِلّتوم جا النجا نْغير اليهود باش تجي لوم الغيرة. وَلكن إدا زِلّتوم هي الربح د الدنيا وْسقوطوم هُوَ الربح د الوَتَنيّين، شحال غادي تكون العظمة د التجديد ديالوم! وْدابا كنتكلّم معكُم نِلّي ماشي يهود. حيت أنا الرسول ديالكُم كنكرّم الخدمة ديالي باش نجعل أهلي يغيرو منكُم، وْهَيدا نْنجّي البعض مِنّوم. حيت إدا كان الرفض ديالوم جعل المصالحة بين اللّٰه والدنيا، إدَن، شنّو غادي يكون القبول ديالوم من غير الحياة من بين الميّتين؟ وِادا الغلّة الُولى مقدّسة، حتّى العجينة كاملة مقدّسة. وِادا الجدر مقدّس، حتّى الأغْصان مقدّسين. وَلكن إدا تقَطّعو البعض من الأغْصان، وانتينا زيتونة برّيّة تطعّمْتِ باش تشْتَرك في جدر الزيتونة والقوّة الغنيّة ديالاْ، إدَن ما تفْتَخر شي على الأغْصان. وِادا افْتَخرْتِ، عرف بلّي ماشي أنتينا الّي كتحمل الجدر، وَلكن الجدر هُوَ الّي كيحملك. ويمكن غادي تقول: "تقَطّعو الأغْصان باش نتطعّم أنا." فعلاً، من قلّة الإيمان تقَطّعو، وانتينا بالإيمان كَتْبقا تابت. ما تتكبّر شي، وَلكن كون خوفان. حيت إدا ما حنّ شي اللّٰه على الأغْصان الأصليّة، ما غادي شي يحنّ عليك حتّى أنتينا. إيوا، فكّر في اللطف والشدّة د اللّٰه. الشدّة على الّي طاحو، أمّا اللطف لِلِك أنتينا. وَلكن إدا ما تبتْتِ شي في اللطف ديالو، حتّى أنتينا غادي يقَطّعك. وْحتّى هُمَ، إدا ما بقاو شي في قلّة الإيمان، غادي يتطعّمو، حيت اللّٰه قادر باش يطعّموم عاود. حيت إدا أنتينا كُنْتِ مقطوع من الزيتونة البرّيّة، الّي هي الطبيعة الأصلية ديالك، وْتطعّمْتِ في الزيتونة المزيانة الّي ماشي الأصل ديالك، كيفاش ما غادي شي يتطعّمو الأغْصان الأصليّة في الزيتونة ديالوم من جديد؟ آ الخوت، بغيتْكُم تفهمو هَد السرّ باش ما تحسبو شي راسكُم حُكَماء، بلّي القصوحيّة جات على البعض من إسْرائيل، وْغادي تبقا حتّى يدخل العدد الكامل د الأُمَم. وْمن بعد غادي ينجاو بَني إسْرائيل كاملين، فحال ما هُوَ مكتوب: "غادي يجي من صِهْيون المُنجّي وْغادي يحيّد من يَعْقوب الشَّرّ. وْهَدا غادي يكون العهد ديالي معهُم ملّي نسمح لوم في الدنوب ديالوم." من جهة الإنجيل، اليهود هُمَ العدْيان د اللّٰه بْسبابكُم، وَلكن من جهة الاختيار، هُمَ عزازين عند اللّٰه بْسباب الجدود. حيت اللّٰه ما كيتراجع شي على العطايا والعراطة ديالو. حيت، كيفْما أنتُمَ في وقت يَخُر ما طيعْتو شي اللّٰه، وَلكن دابا، بْسباب المعْصيّة د اليهود، توصّلْتو بالرحْمة من عند اللّٰه، هَيداك هَدوك ما طاعو شي دابا باش يتوصّلو حتّى هُمَ بالرحْمة الّي اتّعطاتْ لكُم أنتُمَ. حيت اللّٰه شدّ على الناس كاملين في حبس المعْصيّة باش يرَحموم كاملين. شحال عميق هُوَ الغِنى والحكمة والمَعْرفة د اللّٰه! الأحْكام ديالو بعيدة بزّاف على البحت فيها والطرقان ديالو على التفتيش! حيت "شكون الّي عرف العقل د الرَّبّ أَوْلا شكون الّي يقدر ينَصحوْ؟" "وْشكون يقدر يسلّف ناللّٰه في الُوّل باش من بعد اللّٰه يردّاْ لو؟" حيت مِنّو وْبِه ولِلو كُل شي. عندو المجد على الدوام. آمين. على ديك الشي، آ الخوت، كنطلبكُم بْسباب الرحْمة د اللّٰه تقدّمو الأجْساد ديالكُم فحال دبيحة حيّة مقدّسة مقبولة عند اللّٰه، وْهَدي هي العبادة المعقولة ديالكُم. وْما تشكّلو شي راسكُم حسب هَد الدنيا، وَلكن تبدّلو بْتَجديد العقول ديالكُم باش تعرفو شنّي هي إرادة اللّٰه المزيانة المرْضيّة الكاملة. حيت أنا كنقول بالنعْمة الّي اتّعطات لِلي نْكُل واحد فيكُم بلّي ما يخمّم شي في نفسو فوق الّي واجب عليه يخمّم، وَلكن يخمّم بالعقل على حسب القياس د الإيمان الّي اللّٰه فرّق على كُل واحد. حيت فحال ما عند كُل واحد منّا جسد واحد بْبزّاف د الأعْضاء، وَلكن ما عندوم شي نفس الدَّور، بْنفس الطريقة، واخّا حنايَ بزّاف بِنا، حنايَ جسد واحد في المسيح وْكاملين أعْضاء د بَعضيّاتنا. وَلكن عندنا مواهب مخْتَلفة على قدّ النعْمة الّي اتّعطات نّا: إدا شي واحد كيتنبّأ، يكون على قدّ الإيمان، أَو إدا كيخدم، يبالي بالخدمة، أَو إدا كيقرّي، يبالي بالتعْليم، أَو إدا كيشجّع، يبالي بالتشجّيع، أَو إدا كيعطي، يعطي بالسخاوة، أَو إدا كيڭوّد، يحكم بالمعقول، أَو إدا كيرحم، يرحم فرحان. المحبّة خصّاْ تكون بالصراحة. كرهو الشَّرّ، تبعو الخَير. تحابّو مع بعضيّاتكُم بْمحبّة الخوت، مفضّلين بعضيّاتكُم بالكرامة. خدمو بالمجهود وْما تكسلو شي. كونو خدّامين الرَّبّ، حارّين في الروح. فرحو بالرجا، صبرو في الضيق، مداومين على الصلاة. اشْتَركو مع القدّيسين في الاحْتياج ديالوم، زيدو ضيّفو البرّانيين. باركو الّي كيمرْمدوكُم، باركو وْما تلعنو شي. فرحو مع الّي كيفرحو وْبكيو مع الّي كيبكيو. كونو في نفس واحدة مع بعطكُم. ما تتكبّرو شي وْتواضعو مع المتواضعين. ما تحسبو شي راسكُم حُكَماء. ما تردّو نْحتّى شي واحد الشَّرّ بالشَّرّ. حاولو تعملو الخَير قدّام الناس كاملين. إدا يمكن، على قد القدر ديالكُم، عيشو في السلام مع الناس كاملين. ما تـنـتَقمو شي بْنَفسكُم، آ الحباب، وَلكن خلّيو العقاب في يد اللّٰه، حيت مكتوب: "ديالي الانتقام، أنا غادي نجازي،" كيقول الرَّبّ. وَلكن "إدا جاع العدو ديالك، وكّلوْ، وِادا عطش، شرّبوْ، حيت إدا عملْتِ هَد الشي كتجمع الجمر د العافية على راسو." ما تخلّي شي الشَّرّ يغلبك. بالعكس، غلب على الشَّرّ بالخَير. يخضع كُل واحد نالحاكمين عليكُم، حيت ما كاينة حتّى سُلْطة الّي ما جات شي من عند اللّٰه، والسلطات الّي كاينة، هي معمولة من عند اللّٰه. على ديك الشي الّي كيضادّ السلْطة كيتور على الّي جعلوْ اللّٰه، والّي كيعملو هَيداك، كيجيـبو على راسوم العقاب. حيت الحكّام ما كيهدّدو شي الناس الّي كيعملو الخَير، وَلكن الّي كيعملو الشَّرّ. واش بغيتِ ما تخاف شي من الحكّام؟ عمل الحاجة المزيانة ويكون لك الرضى من عندوم، حيت هُمَ الخدّامة د اللّٰه نالمصْلحة ديالك. وَلكن إدا كتعمل الشَّرّ، كون خوفان، حيت ما كيرفدو شي السيف باطل، حيت هُمَ الخدّامة د اللّٰه باش يعاقبو الإنسان الّي كيعمل الشَّرّ. على ديك الشي واجب عليكُم تطيعوهُم، ماشي بْسباب الغضب وْكان، وَلكن بْسباب الضمير ديالكُم. حيت على هَد الشي كتخلّصو الضرائب، حيت هُمَ الخدّامة د اللّٰه الّي كيڭابلو هَد الأُمور. عْطيو نْكُل واحد الحق ديالو: الضريبة نِلّي كيجمع الضرائب، والجزية نِلّي كيطلب الجزية، والاحْترام نِلّي كيسْتاهل الاحْترام، والشرف نِلّي كيسْتاهل الشرف. ما تكونو شي مدْيونين نْحتّى شي واحد، غير المحبّة نْبعضيّاتكُم، حيت الّي كيعزّ غيرو هَداك كمّل الشريعة. حيت الوَصايا فحال "ما تزني شي، ما تقتل شي، ما تسرق شي، ما تشهد شي بالزور، ما تْتشهّى شي،" أَوْلا أي وَصيّة يَخرى، ملخّصة في هَد الكلام: "عزّ جارك فحال نفسك." المحبّة ما كتضرّ شي الجار. إدَن، المحبّة كتكمّل الشريعة. هَيدا وانتُمَ كتعرفو الوقت الّي كنعيشو فيه. هَدي هي الساعة باش نفيقو من النعاس، حيت النجا ديالنا دابا قريب من النهار الّي آمنّا فيه. تقاضى الليل وْقرّب النهار. على ديك الشي نحيّدو الفعايل د الظلم وْنلبسو سناح النور. خصْنا نتصرّفو فحال الناس الّي كيمشيو في النهار، ماشي في الفساد والسكرة، وْماشي في الدعارة والفسق، وْماشي في المدابزة والحسد. وَلكن تلبسو الرَّبّ يَسوع المسيح، وْما تشغّلو شي بالجسد باش تشبّعو الشهوات ديالكُم. رحّبو بالضعيف في الإي‍مان، وَلكن ماشي باش تحكمو على الأفْكار. البعض مِنّوم إيمانوم كيخلّيهُم ياكلو من كُل شي، وَلكن الّي إيمانوم ضعيف، كياكلو غير الخُضرة. والّي كياكل من كُل شي، ما خصّوْ شي يحڭر الّي كياكل محدود، والّي ما كياكل شي من كُل شي، ما خصّوْ شي يحكم على الّي ما كيعمل شي فحالو، حيت هُوَ مقبول عند اللّٰه. شكون أنتينا باش تحكم على العبد الّي ماشي ديالك؟ إدا غادي يوقف أَوْلا يطيح، هَداك شغل السيّد ديالو. وَلكن غادي يوقف، حيت اللّٰه قادر باش يتبّتوْ. واحد كيفضّل نهار على نهار، ويَخُر كيحسب كُل النهورة فحال فحال. كُل واحد خصّوْ يكون مقْتَنع في الأفْكار ديالو. الّي كيفضّل واحد النهار، كيفضّلوْ نالرَّبّ، والّي كياكل من كُل شي، كياكل نالرَّبّ، حيت هُوَ كيشكر الرَّبّ. والّي ما كياكل شي، نالرَّبّ ما كياكل شي، وْكيشكر الرَّبّ حتّى هُوَ. حيت حتّى واحد منّا ما كيعيش نْراسو، وْحتّى واحد منّا ما كيموت نْراسو. حيت إدا عِشْنا، نالرَّبّ كنعيشو، وِادا مُتْنا، نالرَّبّ كن‍موتو. حيت إدا عِشْنا أَوْلا مُتْنا، حنايَ ديال الرَّبّ. حيت نْهَد الشي مات المسيح وْرجع بالروح باش يكون هُوَ الرَّبّ د الحيّين والميّتين. وانتينا إدَن، علاش كتحكم على خاك؟ أَو أنتينا علاش كتحڭر خاك؟ حيت حنايَ كاملين غادي نوقفو قدّام عرش اللّٰه، حيت مكتوب: "أنا حيّ، كيقول الرَّبّ، كُل ركبة غادي تسجد لي، وْكُل لسان غادي يعْتَرف باللّٰه." وْهَيدا كُل واحد منّا غادي يعطي على نفسو الحساب ناللّٰه. وْعلى ديك الشي ما نزيدو شي نحكمو على بعضيّاتنا. وَلكن قرّرو ما تعتّرو شي الأخ ولا تطيّحوه. أنا عارف وْمتيقّن في الرَّبّ يَسوع بلّي ما كاينة حتّى شي حاجة منْݣوسة في نفساْ، وَلكن الّي كيفكّر بلّي شي حاجة منْݣوسة، هي منْݣوسة لِلو. وَلكن إدا كتضيّق على خاك بْسباب الماكلة ديالك، ما كَتْـتمشّى شي بالمحبّة. ما تهلك شي على حسب الماكلة الأخ الّي مات المسيح على مسبّتو. ما تخلّيو شي الناس يتكلّمو خايب على الخَير ديالكُم. حيت مُلك اللّٰه ماشي ماكلة وْشراب، وَلكن هي تقوى وْسلام وْفرْحة في الروح القُدُس. حيت الّي كيخدم المسيح بْهَد الطريقة هُوَ مرْضي عند اللّٰه وْهُوَ مقبول عند الناس. على ديك الشي خصْنا نتبعو الأُمور الّي كتدّي نالسلام وْنْبُنْيان بعضيّاتنا. ما تهدّم شي العمل د اللّٰه بْسباب الماكلة. كُل شي حلال، وَلكن ماشي مزيان نالإنسان يعتّر يَخرين بْديك الشي الّي كياكلوْ. حسَن ما تاكل شي اللحم وْما تشرب شي الخمر وْما تعمل والو الّي غادي يعتّر خاك. واش عندك الإي‍مان؟ هَد الإيمان ديالك بينك وْبين اللّٰه. مبروك الشخص الّي ما كيحكم شي على نفسو بْسباب الّي كيرضيه. وَلكن الّي كيشكّ بالحاجة الّي كياكلاْ كيحكم على نفسو، حيت ما عندو شي الإيمان. وْكُل شي الّي ما جا شي من الإيمان راه هُوَ دنوب. حنايَ الّي عندنا الإيمان القوي خصْنا نتحمّلو الضعافين في الضُّعف ديالوم فْعَوط ما نعملو ديك الشي الّي كَيْعجبنا. كُل واحد منّا خصّوْ يرضي جارو نالخَير باش يبني الحياة ديالو. حيت حتّى المسيح ما رضى شي نفسو، وَلكن، فحال ما هُوَ مكتوب: "التزْبيلات د الناس الّي زبّلو فيك طاحو عليَّ." حيت كُل شي الّي تكتب من قبل، تكتب نالتعْليم ديالنا باش يكون عندنا الرجا بالصبر والتّعْزيّة الّي هُمَ من الكتوبة المقدّسة. وْكنطلب الإلَه د الصبر والتّعْزيّة يعطيكُم تفكير واحد بيناتكُم على حسب المسيح يَسوع، باش ت‍مجّدو الإلَه والآب د رَبّنا يَسوع المسيح بْنفس واحدة وْصوت واحد. على ديك الشي قبلو بعضيّاتكُم كيفْما المسيح قبلكُم نالمجد د اللّٰه. حيت كنقول لكُم بلّي يَسوع المسيح رجع الخدّام د اليهود المطهّرين باش يظهّر صدق اللّٰه، يعني، باش يتبّت الوعود الّي اتّعطات نالجدود، وْباش الأُمَم ي‍مجّدو اللّٰه بْسباب الرحْمة ديالو لِلوم، فحال ما هُوَ مكتوب: "على ديك الشي غادي نسبّحك بين الأُمَم وْغادي نرنّم نِاسمك." وْكيقول عاود: "فرحو، آ الأُمَم، مع شعب اللّٰه." وْعاود "سبّحو نالرَّبّ، آ جميع الأُمَم، وْشكروه، آ الشعوب كاملين." وْكيأكّد إشَعْيا: "غادي ينبت الجدر د يَسّى وْغادي يوقف باش يحكم على الأُمَم، فيه غادي يعملو الشعوب الرجا ديالوم." وإلَه الرجا يعمّركُم أنتُمَ الّي كتآمنو بِه بْكُل فرْحة وْسلام باش يفيض منكُم الرجا بْقوّة الروح القُدُس. وانا، آ خوتي، متيقّن من جهتكُم بلّي كيفيض منكُم اللطف، وْبلّي أنتُمَ معمّرين بْكُل المَعْرفة، قادرين باش تنصحو بعضيّاتكُم. وَلكن كتبْتْ لكُم، آ الخوت، بْصراحة على بعض الأُمور باش نفكّركُم بالنعْمة الّي اتّعطات لي من عند اللّٰه باش نكون خدّام د يَسوع المسيح عند الأُمَم. أنا كنخدم الإنجيل د اللّٰه فحال واحد القسّيس باش يكونو الأُمَم واحد الدبيحة مقبولة عند اللّٰه وْمقدّسة بالروح القُدُس. إدَن، كنفْتَخر في المسيح يَسوع في الخدمة ديالي ناللّٰه، حيت ما غادي شي نزعم نهدَر معكُم على شي حاجة من غير ديك الشي الّي عمل المسيح على يَدّي، بالكلام والفعل، باش يطيعوه الوَتَنيّين. عمل علامات وْمُعْجزات عظيمة بْقوّة روح اللّٰه. وْهَيداك كمّلْتْ التبْشير بالإنجيل د المسيح من أُورُشَليم والمناطق القريبة مِنّاْ حتّى نإلّير. حيت الهدف ديالي كان نبشّر بالإنجيل في الموطَع فاين المسيح ما كان شي مدكور فيه من قبل باش ما نبني شي على اللساس د شي واحد يَخُر. وَلكن فحال ما هُوَ مكتوب: "هَدوك الّي ما ساقو شي الخبار عليه، غادي يشوفو، والّي ما سمعو شي بِه، غادي يفهمو." على ديك الشي اتّحصرْتْ بزّاف د المرّات باش نجي نْعندكُم. وَلكن دابا، حيت ما بقا حتّى موطَع في هَد المناطق فاين نخدم، وْهَدي مدّة وانا توحشْتْ نشوفكُم، وانا كَنْتمنّى نشوفكُم ملي نݣوز عليكُم في الطريق ديالي نِاسْبانيا، وْتعاونوني على السفر ديالي، من بعد ما نݣوّز معكُم شي وقت مزيان وْنفرحو بْبعطنا. وَلكن دابا أنا ماشي نأُورُشَليم باش ندّي المساعدة نالقدّيسين. حيت أهل مَكدونيّة وأَخائية بغاو يجمعو واحد المعاونة نالمساكن الّي بين القدّيسين الّي هُمَ في أُورُشَليم. بغاو يعملو هَد الشي بالنيّة المزيانة وْهُمَ المدْيونين ديالوم. حيت إدا كانو شاركو مع الأُمَم في البركات الروحيّة، إدَن، هَدو مدْيونين في دَوروم يخدموهُم في الأُمور المادّيّة. وْملّي نكمّل ديك الشي وْندفع لوم هَد الغلّة في يَدّوم، غادي نطلّل عليكُم في الطريق ديالي نِاسْبانيا. أنا عارف بلّي، ملّي نشوفكُم، غادي نجي معمّر بالبركة د إنجيل المسيح. كنطلب منكُم، آ الخوت، بْرَبّنا يَسوع المسيح وْبْ‍محبّة الروح، تعاونوني بالدُّعاء من جهتي ناللّٰه باش ننجا من الناس الّي ما كيآمنو شي في بلاد اليَهوديّة وْباش تكون الخدمة ديالي مقبولة عند الخوت القدّيسين في أُورُشَليم. هَيداك بإرادة اللّٰه غادي نوصل نْعندكُم فرحان وْغادي نقدر نرتاح معكُم شي وقت. إلَه السلام يكون معكُم كاملين. آمين كنوصّيكُم بالاخْت ديالنا فيبي، الّي هي مُدَبّرة في الكنيسة الّي في كَنْخَريا، باش تسْتَقبلوها بالكرامة في الرَّبّ فحال ما خصْنا نعملو بين القدّيسين، وْتعاونوها في كُل ما تحْتاج هي، حيت عاونَت الناس بزّاف، وْحتّى أنا من بيناتوم. سلّمو على بريسْكِلّا وأَكيلا الّي مرافقين معيَ في الخدمة د المسيح يَسوع، الّي خاطرو بْعُنقوم على مسبّتي. أنا والكنائس كاملين د غير اليهود كنشكروهُم. وْسلّمو على الكنيسة الّي كتجتَمع في الدار ديالوم. سلّمو على عزيزي أَبَـينِتوس الّي هُوَ الباكورة د المسيح في أَخائية. سلّمو على مَرْيَم الّي تعبَتْ عليكُم بزّاف. سلّمو على أنْدَرونِكوس وْيونْيا الّي هُمَ من أهلي وْمرافقين معيَ في الحبس، الّي هُمَ مشهورين بين الرُّسُل وآمنو بالمسيح قبل منّي. سلّمو على أمْبِلياس، خاي العزيز في الرَّبّ. سلّمو على أُورْبانوس، المرافق ديالنا في خدمة المسيح، وْعلى إسْتاخيس، خاي العزيز. سلّمو على أَبَلِّس الناجح في المسيح. سلّمو على الّي من العائلة د أَرِسْتوبولوس. سلّمو على هيروديون الّي هُوَ من أهلي. سلّمو على الّي من العائلة د نَرْكِسّوس الّي هُمَ في الرَّبّ. سلّمو على تَريفينا وْتَريفوسا الّي كيجْتَهدو في الرَّبّ. سلّمو على بَرْسيس، أخْتي العزيزة، الّي تعبَتْ بزّاف في الرَّبّ. سلّمو على روفُس، واحد المؤمن مخْتور في الرَّبّ، وْعلى يمّاه، الّي هي فحال الأُم ديالي. سلّمو على أَسينْكِريتُس، فِليغون، هَرْماس، بَتْروباس وْهَرْميس وْعلى الخوت الّي معهُم. سلّمو على فيلولوغُس وْجوليا وْنيريوس وْاخْتو، وأُولُمْباس وْعلى القدّيسين كاملين الّي معهُم. سلّمو على بعضيّاتكُم بْقُبلة مقدّسة. كنائس المسيح كاملين كيسلّمو عليكُم. وْكنطلب منكُم، آ الخوت، تحضيو راسكُم من الّي كيعملو المدابزات والعترات، وْكيضادّو على التعْليم الّي تعلّمْتوه. بعّدو مِنّوم! حيت الناس فحالوم ما كيخدمو شي نْرَبّنا يَسوع المسيح، وَلكن كيخدمو نْكِرشوم. وْبالكلام المزيان والحلو كيخدعو القلوبة د البساطين. حيت الطاعة ديالكُم رجعَتْ مشهورة عند كُل شي وانا فرحان بِكُم، وْكَنْبغيكُم تكونو حُكَماء من جهة الخَير وأَبْرياء من جهة الشَّرّ. وإلَه السلام غادي يسحق الشيطان تحت الرِّجلين ديالكُم دغيا. النعْمة د رَبّنا يَسوع تكون معكُم. كيسلّمو عليكُم تيموثاوس، مرافقي في الخدمة، وْحتّى لوكيوس وياسون وْسوسيباتْرُس، الّي هُمَ من أهلي. أنا تَرْتيوس، الكاتِب د هَد البراة، كنسلّم عليكُم في الرَّبّ. كيسلّم عليكُم غايُس، الّي ضيّفني في الدار ديالو، أنا والكنيسة كاملة. كيسلّم عليكُم أَراسْتُس، أمين صندوق المدينة، وْكوارْتُس خانا. [ نعْمة رَبّنا يَسوع المسيح تكون معكُم كاملين. آمين.] وْنِلّي هُوَ قادر باش يتبّتكُم على حسب الإنجيل ديالي والتبْشير د يَسوع المسيح على حسب تَبْيين السرّ الّي كان مخبّع في الزمان الأبدي، وَلكن الّي ظهَر دابا بواسطة الكتوبة د الأَنْبياء على حسب الوَصيّة د الإلَه الأبدي، وْتخبرو بِه الأُمَم كاملين باش يطيعو الإيمان، ناللّٰه الحكيم بوحدو، بيَسوع المسيح، يكون لو المجد على الدوام. آمين. من بولُس، الّي كلّفوْ اللّٰه باش يكون واحد الرسول د يَسوع المسيح بالإرادة ديالو، مع الأخ سوسْتانيس، نْكنيسة اللّٰه الّي في كورِنْثوس، الّي مقدّسين في المسيح يَسوع وْمعْروطين باش يكونو قدّيسين مع الناس كاملين الّي كيعيّطو على اِسم رَبّنا يَسوع المسيح في كُل موطَع، رَبّ ديالوم وْديالنا. النعْمة لكُم والسلام من عند اللّٰه بابانا والرَّبّ يَسوع المسيح. دائمًا كنشكر إلَهي من جهتكُم على النعْمة الّي عْطاكُم في يَسوع المسيح. حيت في كُل شي تعمّرْتو فيه بالربح في كُل كلام وْمعْرفة كاملة. هَيدا تبتَتْ فيكُم الشهادة ديالنا على المسيح. وانتُمَ ماشي ناقصين في حتّى شي مَوهبة روحيّة وْكتـتسنّاو الظهور د رَبّنا يَسوع المسيح. هُوَ غادي يتبّتكُم حتّى نالنهاية باش تكونو بلا لَوم في اليوم د رَبّنا يَسوع المسيح. الصادق هُوَ اللّٰه الّي بِه تعرَطْتو نالعِشْرة د اِبنو يَسوع المسيح رَبّنا. كَنْرغبكُم، آ الخوت، بِاسم رَبّنا يَسوع المسيح باش تكونو متَّفقين بْكلام واحد وْما تكون شي بيناتكُم المدابزات، وَلكن بقاو متَّحدين في رأي واحد ويكون لكُم هدف واحد. حيت خبرني عليكُم أهل خُلوي، آ خوتي، بلّي كاينة مدابزات بيناتكُم. يعني كُل واحد منكُم وْشنّو كيقول: "أنا من جهة بولُس،" "وانا من جهة أَبُلّوس،" "وانا من جهة صَفا،" "وانا من جهة المسيح." كيفاش؟! واش تقسم المسيح؟ أَو بولُس تصْلب بْسبابكُم؟ أَو بِاسم بولُس تغطّسْتو؟ كنشكر اللّٰه بلّي ما غطّسْتْ حتّى شي واحد منكُم من غير كريسْبُس وْغايُس، باش ما يقول حتّى واحد بلّي تغطّس بِاسمي. غطّسْتْ الخوت الّي من الدار د إسْتِفانوس حتّى هُمَ. من غير هَدوك، ما كنعقل شي إدا غطّسْتْ شي واحد يَخُر. حيت المسيح ما صيفطني شي باش نغطّس، وَلكن باش نبشّر بالإنجيل، وْماشي بْحكمة الكلام، باش ما يتبطّل شي صليب المسيح. حيت التبْشير بالصليب هُوَ حماقة عند الّي كيتّهلكو، وأمّا عندنا حنايَ الّي كَنْنجاو، هُوَ قوّة اللّٰه. حيت مكتوب: "غادي نهلك الحكمة د الحُكَماء وْغادي نزوّل الفهامة د الفُهَماء." فاين هُوَ الحكيم؟ فاين هُوَ الأديب؟ فاين هُوَ الفيلَسوف د هَد الزمان؟ واش ما ردّ شي اللّٰه الحكمة د هَد الدنيا حماقة؟ في حكمة اللّٰه، الدنيا ما عرفَتْ شي اللّٰه بواسطة الحكمة البشريّة، حيت بغى اللّٰه ينجّي الناس الّي كيآمنو بواسطة الحماقة د التبْشير. حيت اليهود كيطلبو العلامات واليونانيّين كيـبقّشو على الحكمة، وَلكن حنايَ كنبشّرو بالمسيح المصلوب: ناليهود عترة وْناليونانيّين حماقة. وأمّا نالمعْروطين، يهود ويونانيّين، المسيح هُوَ قوّة اللّٰه وْحكمة اللّٰه، حيت الحماق ديال اللّٰه راه حكمة كتَر من الحكمة د البشر، والضعف ديالو راه قوي من القوّة د البشر. شوفو العراطة ديالكُم، آ الخوت، ماشي بزّاف منكُم حُكَماء حسب الجسد، وْماشي بزّاف منكُم قويّين، وْماشي بزّاف منكُم نُبَلاء. وَلكن اختار اللّٰه الحاجات الّي كتحسباْ الدنيا جهالة باش يحشّم الحُكَماء، واختار اللّٰه ضعف الدنيا باش يحشّم القويّين. واختار اللّٰه المكْروه بالدنيا، والّي محڭور، والّي محسوب كيف والو، باش يبطّل ديك الشي الّي كيحسبوه شي حاجة، باش ما يفْتَخر حتّى شي بشر قدّامو. أمّا أنتُمَ بْفضل الله صبحْتو في المسيح يَسوع. اللّٰه جعلوْ نّا الحكمة ديالنا، والتقوى والقداسة والفدية، باش يكون كيفْما هُوَ مكتوب: "الّي كيفْتَخر، خصّو يفْتَخر بالرَّبّ." وانا بْيَدّي، آ الخوت، ملّي جيت باش نخبركُم بْشهادة اللّٰه، ما عملْتْ شي هَد الشي بالكلام العظيم والحكمة. حيت قرّرْتْ، وانا بيناتكُم، ما نعرف حتّى شي حاجة من غير يَسوع المسيح وْهُوَ مصلوب. وْكُنْتْ بيناتكُم بالضعف والخوف والرعدة القويّة. والكلام والتبْشير ديالي ما كانو شي بالكلام المُقنع والحكمة البشريّة، وَلكن بْبُرْهان الروح والقوّة، باش ما يتبت شي الإيمان ديالكُم بالحكمة البشريّة، وَلكن بْقوّة اللّٰه. وَلكن كنتكلّمو بالحكمة بين الناس الّي ناضجين، وْماشي بالحكمة د هَد الدنيا ولا د الحاكمين عليها الّي غادي يفناو، وَلكن كنتكلّمو بْحكمة اللّٰه المخبّعة في السرّ، الّي اللّٰه قدّر عليها نالمجد ديالنا من قبل الوقت الأبدي، الّي ما عرفاْ حتّى شي واحد من الحاكمين على هَد الدنيا، حيت كَكانو كيعرفوها، كَكانو ما صلّبو شي رَبّ المجد. وَلكن كيفْما هُوَ مكتوب: "الأُمور الّي ما شافتاْ شي العينينة وْما سمعَتاْ شي الودنينة وْما تصوّرَتْ شي في العقل د الإنسان، هي الّي وجّداْ اللّٰه نِلّي كيحبّوه." وَلكن اللّٰه بيّن نّا هَد الشي بالروح ديالو، حيت الروح كيـبحت كُل شي حتّى العمق د اللّٰه. حيت شكون كيعرف الأفْكار د الإنسان من غير الروح ديالو الّي فيه؟ هَيداك حتّى الأُمور د الله ما كيعرفاْ حتّى واحد من غير روح اللّٰه. وْحنايَ ما ادّينا شي روح الدنيا، وَلكن ادّينا الروح القُدُس الّي كيجي من عند اللّٰه باش نعرفو الأُمور الّي اتّعطات نّا من عندو بالنعْمة ديالو، الّي كنتكلّمو بِها، ماشي بالكلام الّي كَتْعلّماْ نّا الحكمة البشريّة، وَلكن بْهَديك الّي كيعلّماْ نّا الروح، وْكنعبّرو على أُمور روحيّة نالروحانيّين. وَلكن الإنسان الطبيعي ما كيقبل شي الأُمور الّي ماجّة من روح اللّٰه، حيت بالنسبة لِلو ديك الشي حماقة. وْما يقدر شي يفهماْ، حيت هي كَتْـتميّز بْطريقة روحيّة. أمّا الإنسان الروحي كيحكم على كُل شي، وْهُوَ ما كيحكم عليه حتّى شي واحد، حيت: "شكون الّي عرف العقل د الرَّبّ باش ينَصحوْ؟" أمّا حنايَ عندنا عقل المسيح. أنا، آ الخوت، ما قدرْتْ شي نهدَر معكُم فحال إدا أنتُمَ روحانيّين، وَلكن خصْني نهدَر معكُم فحال إدا أنتُمَ جسديّين، فحال العيال الستيتْوين في المسيح. شرّبْتْكُم الحليب، ماشي الماكلة، حيت ما قدرْتو شي تاكلو الماكلة، وْباقّين نْدابا ما تقدرو شي. حيت أنتُمَ باقّين جسديّين. حيت بيناتكُم الحسد والمدابزات، واش أنتُمَ ماشي جسديّين وْكَتْـتمشّاو فحال البشر؟ حيت ملّي كيقول واحد: "أنا تابع بولُس،" وْواحد يَخُر: "أنا تابع أَبُلّوس،" واش أنتُمَ ماشي جسديّين؟ شكون هُوَ أَبُلّوس؟ وْشكون هُوَ بولُس؟ غير خدّامة الّي بواسطتوم أنتُمَ آمنْتو، وْكُل واحد على حسب ما عْطاه الرَّبّ. أنا زرعْتْ، وأَبُلّوس سقى، وَلكن اللّٰه هُوَ الّي كيعطي النمو. على ديك الشي ماشي مُهمّ شكون كيزرع أَوْلا شكون كيسقي، وَلكن اللّٰه الّي كيعطي النمو. والّي كيزرع والّي كيسقي هُمَ واحد، واخّا كُل واحد غادي يتجزّى على حسب الخدمة ديالو. حنايَ كنشْتَركو مع اللّٰه في الخدمة، وانتُمَ فدّان اللّٰه، أنتُمَ البناية د اللّٰه. على حسب نعْمة اللّٰه الّي اتّعطات لي، أنا، فحال شي مْعلّم ماهر، نزّلْتْ اللساس ويَخُر كيبني عليه. وَلكن كُل واحد خصّوْ يردّ البال كيفاش كيبني عليه. حيت ما يقدر حتّى واحد ينزّل لساس يَخُر من غير الّي منزّل، الّي هُوَ يَسوع المسيح. وِادا شي واحد كيبني على هَد اللساس بالدهب، النقْرة، والحجار الكريمة، أوْلا بالخشب، التبن والقشّ، الخدمة د كُل واحد غادي تظهر، حيت النهار د الحساب غادي يبيّناْ، حيت بالعافية غادي تظهَر والعافية غادي تجرّب نوع الخدمة د كُل واحد. إدا بقات الخدْمة د شي واحد الّي بناها، غادي يتوصّل بالأجر ديالو. وِادا تحرقَتْ الخدمة د شي واحد بالعافية، غادي يخسراْ، وَلكن هُوَ غادي ينجا، فحال الّي ڭاز بالعافية. واش ما كتعرفو شي بلّي أنتُمَ بيت العبادة د اللّٰه وْروح اللّٰه ساكن فيكُم؟ إدا هدّم شي واحد بيت العبادة د اللّٰه، اللّٰه غادي يهلكوْ حتّى هو، حيت الدار د اللّٰه مقدّسة، وانتُمَ هُمَ هَد الدار. حتّى واحد منكُم ما يخدع راسو. إدا شي واحد فيكُم كيظنّ بلّي هُوَ حكيم في هَد الدنيا، خصّوْ يرجع جاهل باش يكون حكيم. حيت الحكْمة د هَد الدنيا هي جهالة في عينين اللّٰه، حيت مكتوب: "هو كيحصّل الحُكَماء بالحيلة ديالوم." وْعاود: "الرَّبّ عارف التخْميم د الحُكَماء بلّي هُوَ باطل." على ديك الشي، ما يفْتَخر حتّى واحد بالبشر. حيت كُل شي ديالكُم: بولُس وأَبُلّوس وْصَفا والدنيا والحياة والموت والأُمور الحاضرة والماجّة، كُل شي ديالكُم. أمّا أنتُمَ ديال المسيح والمسيح ديال اللّٰه. واجب على كُل إنسان يحسبنا الخدّامة د المسيح وْمكلّفين بأسْرار اللّٰه. وْفوق هَد الشي، واجب على المكلّفين يكونو أُمَناء. من جهتي، ما كَندّيها شي في الحُكم ديالكُم أَوْلا د المحْكمة البشريّة، حيت حتّى أنا ما كنحكم شي على راسي. حيت واخّا الضمير ديالي ما كيلومني شي، أنا ماشي مبرّر، حيت الّي كيحكم عليَّ هُوَ الرَّبّ. على ديك الشي ما تحكمو شي في حتّى شي حاجة من قبل الوقت. تسنّاو حتّى يجي الرَّبّ، الّي غادي يضوّي على الحاجات الّي مخبّعة في الظلام وْغادي يظهّر النيّة د القلوبة. في ديك الساعة كُل واحد غادي يتوصّل من عند اللّٰه بالشكر الّي كيستحقّوْ. وْهَد الشي، آ الخوت، طبّقْتوْ عليَّ وْعلى أَبُلّوس نالمصْلحة ديالكُم باش تتعلّمو منّا وْما تزيدو شي على الّي مكتوب. هَيدا حتّى واحد ما غادي يفْتَخر من جهة شي واحد وْضدّ شي واحد يَخُر. حيت شكون الّي كيفرزك؟ شنّي هي الحاجة الّي ما عْطاوها شي لِلِك؟ وِادا توصّلْتِ بِها، علاش كتفْتَخر فحال إدا ما توصّلْتِ شي بِها؟ أنتُمَ شبْعانين! أنتُمَ أَغْنياء! وصلْتو نالمُلك بلا بِنا! وْدابا مصاب تكونو مُلوك حقيقيّين باش نملكو حتّى حنايَ معكُم! حيت أنا كنظنّ بلّي اللّٰه خرّجنا حنايَ الرُّسُل في الموطَع الاخّري فحال إدا كُنّا محْكومين علينا بالموت، حيت حنايَ رجعْنا فراجة نالدنيا، نالملائكة وْنالناس. حنايَ الجاهلين من جهة المسيح وانتُمَ بالمسيح الحُكَماء! حنايَ الضعافين، أنتُمَ القويّين! أنتُمَ المكرّمين، حنايَ المحْتَقرين! حتّى نْهَد الساعة حنايَ بالجّوع وْعطْشانين، عريانين وْمطرشين، وْما عندنا حتّى شي موطَع فاين نسكنو. كَنْتَـعبو خدّامين باليَدّين ديالنا. كيلعنونا وْكَنْباركو فيهُم. حنايَ مضْطَهدين وْصابرين على التعدّي. كيقولو علينا الكدوب وْكنحاولو نصلحو. رجعْنا فحال وسخ الأرض وْزبل الدنيا حتّى نْدابا. كنكتب لكُم هَد الشي ماشي باش نحشّمكُم، وَلكن باش ننبّهكُم فحال أُوْلادي العزازين. حيت واخّا عندكُم أُلوفات د المُعلّمين في المسيح، ما عندكُم شي بزّاف د الوالِدين، حيت أنا ولدْتْكُم في المسيح يَسوع بالإنجيل. على هَد الشي كنطلبكُم تقلّدوني أنا. حيت على هَد السبب صيفطْتْ لكُم تيموثاوس، الّي هُوَ بني العزيز والصادق في الرَّبّ. هُوَ غادي يفكّركُم بالتعامُل ديالي في المسيح كيفْما كنعلّم أنا في كُل موطَع وْفي الكنائس كاملين. أمّا البعض منكُم رجعْتو منفّخين فحال إدا عُمري ما غادي نجي نْعندكُم. وَلكن إدا بغى الرَّبّ، غادي نجي نْعندكُم بلا ما نتعطّل عليكُم، وْغادي نعرف، ماشي غير الكلام د هَدوك الّي كيفْتَخرو وْكان، وَلكن حتّى القوّة ديالوم. حيت مُلك اللّٰه ماشي غير بالكلام، وَلكن بْقوّة. شنّو كتفضّلو؟ نجي نْعندكُم بالعصا أَوْلا بالمحبّة وْروح متواضعة؟ تشاع الخبر بلّي بيناتكُم كاينة واحد القضيّة د الزنا، وْمن ديك الزنا الّي ماشي مقبول حتّى عند الوَتَنيّين. يعني، واحد منكُم عندو المراة د باباه فحال مراتو! وانتُمَ كتفْتَخرو بِه! واش ماشي واجب عليكُم تبكيو وْتطردو من بيناتكُم الرَّجل الّي عمل هَد الفضيحة؟ أنا من جهتي (واخّا ماشي حاضر بيناتكُم، أنا حاضر بالروح)، سبقْتْ وْحكمْتْ على الّي عمل هَد الدنب فحال إدا كُنْتْ حاضر. ملّي غَد تْتّجمعو بِاسم رَبّنا يَسوع المسيح، وْمع القوّة ديالو، وانا معكُم بالروح، دفعو هَد الرَّجل نالشيطان باش يتّهلك الجسد ديالو باش تنجا الروح ديالو في النهار د الرَّبّ. الحيالة ديالكُم ماشي مزيانة. واش ما عرفْتو شي بلّي شويا د الخميرة كتخمّر العجينة كاملة؟ على ديك الشي نقّيو نفسكُم من الخميرة القديمة باش تكونو عجينة جديدة. وانتُمَ خبز بلا خميرة دابا، حيت خروف الفِصح ديالنا تدبح من جهتنا، الّي هُوَ المسيح. هَيداك نعيّدو بالفِصح ديالنا، ماشي بالخميرة القديمة، الّي هي الشَّرّ والفساد، وَلكن بالخبز بلا خميرة، الّي هُوَ الصراحة والحقّ. أنا كتبْتْ لكُم في واحد البراة بلّي ما تخالطو شي مع الزانيين. طبعًا، ما عنيتْ شي على الناس الفاسدين د هَد الدنيا أَو على الطمّاعين أَو السرّاق أَو عُبّاد الأصْنام، وإلّا غادي يخصْكُم تخرجو من هَد الدنيا! أمّا في ديك البراة بغيتْ نوضّح لكُم بلّي ما خصْكُم شي تتخالطو مع حتّى شي واحد الّي تسمّى أخ وْهُوَ فاسد أَو طمّاع أَو عابد الأصْنام أَو شتّام أَو سكايري أَو سارق. مع هَد النوع ما خصْكُم شي حتّى تاكلو معاه. واش عليَّ نحكم على الّي هُمَ برّا الكنيسة؟ واش ماشي أنتُمَ الّي خصْكُم تحكمو على الّي هُمَ فوسط الكنيسة؟ اللّٰه غادي يحكم على الّي هُمَ برّا. أمّا أنتُمَ، "جرّيو على الشرّير الّي بيناتكُم." إدا شي واحد منكُم عندو شي قضيّة مع يَخُر، كيفاش غادي يزعم يقدّم الدعوة ديالو عند الظالمين وْماشي عند القدّيسين؟ واش ما كتعرفو شي بلّي القدّيسين غادي يحكمو على الدنيا؟ إدا أنتُمَ غَد تحكمو على الدنيا، كيفاش ما غادي شي تكونو مسْتاهلين باش تحكمو على الدعاوي الساهلين؟ واش ما كتعرفو شي بلّي حنايَ غادي نحكمو على الملائكة؟ إدَن، واش بزّاف علينا الأُمور د هَد الدنيا؟ على هَد الشي، إدا عندكُم دعاوي في شي أُمور د هَد الحياة، علاش كتختارو القُضاة الّي ما عندوم شي قيمة في الكنيسة؟ كَنْهدَر معكُم بْهَد الشي باش تحشمو. واش ما كاين شي بيناتكُم حتّى شي واحد حكيم باش يحكم على واحد الدعْوة بين الخوت؟ وَلكن الأخ كيدعي خاه حتّى نْعند الّي ماشي مؤمنين؟ إدَن، في الحقيقة هُوَ عيب كبير ملّي كتكون الدعاوي بيناتكُم. واش ماشي حسَن تتحمّلو الظلم؟ واش ماشي حسَن تكونو خاسرين؟ وَلكن بالعكس، أنتُمَ كتغشّو وْكتظلّمو، وْهَد الشي مع الخوت ديالكُم! واش ما كتعرفو شي بلّي الظالمين ما غادي شي يوَرتو مُلك اللّٰه؟ ما تخدعو شي راسكُم! لا الفاسدين ولا عُبّاد الأصْنام ولا الزانيين ولا المخنّتين ولا اللواطة، ولا السُّرّاق ولا الطمّاعين ولا السكَيرية ولا الشتّامين ولا خطّافين الناس ما غادي شي يوَرتو مُلك اللّٰه. وْهَيدا كان البعض منكُم، وَلكن تْغسلْتو، وَلكن تقدّسْتو، وَلكن تبرّرْتو بِاسم الرَّبّ يَسوع المسيح وْبْروح إلَهنا! كُل شي حلال عليَّ، وَلكن ماشي كُل شي نالخير ديالي. كُل شي حلال عليَّ، وَلكن ما غادي نخلّي حتّى شي حاجة تسيطر عليَّ. الماكلة هي نالمعدة والمعدة هي نالماكلة، واللّٰه غادي يهلكوم بْجوج. وَلكن الدات ماشي نالفساد، راها نالرَّبّ، والرَّبّ نالدات. واللّٰه الّي بعَت الرَّبّ يَسوع من الموت، غادي يردّنا بالروح حتّى حنايَ بالقُدرة ديالو. واش ما كتعرفو شي بلّي الأجْساد ديالكُم هُمَ الأعْضاء د المسيح؟ واش غادي نشبّر أعْضاء المسيح باش نلَصقوم بواحد المراة فاسدة؟ حاشا! واش ما كتعرفو شي بلّي الرَّجل الّي كيلصق بالفاسدة هُوَ جسد واحد معها؟ حيت كيقول الكتاب: "غادي يكونو بْجوج جسد واحد." أمّا الّي كيلصق بالرَّبّ، هُوَ كيرجع واحد معاه في الروح. هَربو من الفسق. كُل دنب الّي كيعملوْ الإنسان هُوَ برّا من الجسد، وَلكن الّي كيزني، كيدنب ضدّ الجسد ديالو. وَقيلا ما كتعرفو شي بلّي الجسد ديالكُم هُوَ بيت العبادة د الروح القُدُس الّي ساكن فيكُم، الّي عندكُم من عند اللّٰه، وْبلّي أنتُمَ ماشي ديال ريوسكُم؟ حيت الله شراكُم بْتَمَن. إيوا، مجّدو اللّٰه في الأجْساد ديالكُم. أمّا من جهة الأُمور الّي كتبْتو لي عليهُم: "حسَن نالرَّجل ما يحادي شي المراة." وَلكن بْسباب الفساد، حسَن نْكُل رَجل تكون عندو مراتو، وْكُل مراة يكون عنداْ رَجلاْ. الرَّجل خصّوْ يوفي نالمراة حقّاْ، وْواجب على المراة حتّى هي توفي نالرَّجل حقّو. المراة ما عنداْ شي الحقّ على الجسد ديالاْ، وَلكن نْرَجلاْ، وْحتّى الرَّجل ما عندو شي الحقّ على الجسد ديالو، وَلكن نْمراتو. حتّى واحد من الزوجَين ما يمنع الجسد ديالو على يَخُر، من غير إدا كُنْتو متَّفقين على شي وقت محدّد باش تتفرّغو نالصلاة، وْترجعو من بعد وْتتجمّعو في جسد واحد باش الشيطان ما يجرّبكُم شي بْسباب قلّة العفّة ديالكُم. وَلكن كنقول هَد الشي من جهة الإدن، ماشي من جهة الأمر. حيت كنتمنّى باش الناس كاملين يكونو فحالي، وَلكن كُل واحد عندو المَوهبة ديالو من عند اللّٰه، واحد هَيدا ويَخُر هَيداك. وَلكن كنقول نِلّي ماشي مجوّجين وْنالهجّالات بلّي مزيان لوم إدا يبقاو فحالي. وَلكن إدا ما يقدرو شي يضبطو نَفسوم، يتجوّجو، حيت من الأحسن يتجوّجو وْما يتّحرقو شي بالشهوات ديالوم. وَلكن الّي مجوّجين كنوصّيهُم، ماشي أنا وَلكن الرَّبّ، بلّي ما تْتفارق شي المراة مع رَجلاْ. وِادا تفارقَتْ معاه، ما تجوج شي عاود، وإلّا لازم عليها تتصالح مع رَجلاْ، والرَّجل ما يسمح شي في مراتو. وَلكن نيَخرين كنقولّوم أنا، ماشي الرَّبّ، إدا كانت عند شي أخ مؤمن مراتو الّي ماشي مؤمنة، وْبغات تسكن معاه، ما يسمح شي فيها. والمراة الّي عنداْ رَجل الّي ماشي مؤمن، وْبغى يسكن معها، ما تسمح شي فيه. حيت الرَّجل الّي ماشي مؤمن مقدّس في المراة والمراة الّي ماشي مؤمنة مقدّسة في الأخ المؤمن. وِادا ما كان شي هَيداك، يكونو أُوْلادوم منْݣوسين، وَلكن دابا هُمَ مقدّسين. وَلكن إدا شي واحد الّي ماشي مؤمن قرّر يتفارق، خلّيواه يتفارق، حيت في هَد الظروف الأخ أَوْلا الاخت المؤمنين ماشي مربوطين بالجواج، حيت اللّٰه عَيّط علينا باش نعيشو في سلام. حيت كيفاش عرفْتِ أنتينا، آ المراة، إدا غادي تقدر تنجّي رَجلك؟ أَو كيفاش عرفْتِ أنتينا، آ الرَّجل، إدا غادي تقدر تنجّي مراتك؟ كُل واحد خصّوْ يعيش في الحالة الّي الرَّبّ عْطاها لو، وْفاش من حالة اللّٰه عَيّط لو. وْهَيدا كنآمر في الكنائس كاملين. واش كان شي واحد معيّط لو وْهُوَ مطهّر من قبل؟ خصّو يبقا مطهّر. واش كان شي واحد معيّط لو وْهُوَ بلا طهارة؟ ما يتطهّر شي. الطهارة ما هي حتّى حاجة، وْعدم الطهارة ما هي حتّى حاجة، وَلكن الّي مُهمّ هُوَ تطْبيق الوَصايا د اللّٰه. كُل واحد يبقا في الحالة الّي عَيّط لو بِها اللّٰه. واش كُنْتِ عبد ملّي عَيّط عليك اللّٰه؟ ما تهْتَمّ شي بْهَد الشي. وَلكن إدا عندك الفُرْصة باش تكون حُرّ، اسْتَفد مِنّاْ. حيت الّي كان عبد ملّي عَيّط عليه اللّٰه، هُوَ حُرّ في الرَّبّ، والّي كان حُرّ ملّي عَيّط عليه اللّٰه، هُوَ عبد المسيح. حيت أنتُمَ كُنْتو مشريّين بواحد التَّمَن، ما ترجعو شي العبيد د الناس. آ الخوت، كُل واحد يبقا قدّام اللّٰه في الحالة الّي عَيّط عليه فيها. أمّا من جهة العزبات والعزارى، ما عندي شي وَصيّة من الرَّبّ عليهُم. وَلكن كنعطي الرأي ديالي فحال واحد الّي عندو الرحْمة من الرَّبّ باش يكون صادق. كنظنّ، بْسباب الضيق الحاضر، بلّي مزيان يبقا كُل واحد كيفْما هُوَ دابا. واش أنتينا مجوّج؟ ما تفتّش شي على الطلاق. واش أنتينا عزري؟ ما تفتّش شي على المراة. وِادا تجوّجْتِ، ما دنبْتِ شي. وِادا تجوّجَت العزبة، ما دنبَتْ شي. وَلكن الّي كيتجوّجو غادي يكون عندوم الضيق في الجسد، وانا بغيتْ نبعّدوْ عليكُم. الّي بغيتْ نقول، آ الخوت، بلّي عندنا الوقت قصير، يعني من دابا نْفوق الّي عندوم النسا خصّوم يعيشو فحال إدا ما عندوم شي. والّي كيبكيو فحال إدا ما كيبكيو شي. والّي كيفرحو فحال إدا ما كيفرحو شي. والّي كيشريو فحال إدا ما كيملكو شي. والّي كيتمتّعو بالأُمور د هَد الدنيا فحال إدا ما كيتمتّعو شي بِها، حيت المظاهر د هَد الدنيا كَتْفنا. أنا بغيتْكُم تبقاو بلا هموم. العزري كيهْتَمّ بالأُمور د الرَّبّ وْكيفاش يرضيه. وأمّا الّي مجوّج، كيهْتَمّ بالأُمور د الدنيا وْكيفاش يرضي مراتو، وْهُوَ مقسوم في الرغبة ديالو. المراة الّي ماشي مجوّجة والعزبة كيهْتَمّو بالأُمور د الرَّبّ باش يكونو مقدّسين في الجسد وْفي الروح. وَلكن المراة الّي مجوّجة كتهْتَمّ بالأُمور د الدنيا وْكيفاش ترضي رَجلاْ. كنقول لكُم هَد الشي نالمصْلحة ديالكُم، ماشي باش نقيّدكُم، وَلكن باش تعيشو بالكرامة وْتخدمو الرَّبّ بْتَرْكيز. وَلكن إدا كان شي واحد منكُم كيظنّ بلّي ما كيعمل شي مزيان مع العزبة ديالو، وْهِيَ ناضجة في السنين ديالاْ وْخصّاْ تجوج، يعمل الّي بغى. ما كيدنب شي. خلّيهُم يتجوّجو. وأمّا الّي تابت في قلبو وْعندو اقتناع وْكيسيطر على نفسو وْعوّل في قلبو يخلّيها عزبة، كيعمل مزيان. وْهَيدا الّي كيجوّج العزبة ديالو كيعمل مزيان، والّي ما كيجوّجاْ شي كيعمل حسَن. المراة مربوطة مع رَجلاْ وْهُوَ باقي بالروح، وَلكن إدا مات رَجلاْ، هي حُرّة باش تجوج مع شكون ما بغاتْ، غير يكون في الرَّبّ. وَلكن في الرأي ديالي، هي غادي تكون فرحانة كتَر إدا بقاتْ كيفْما هي، وْكنظنّ بلّي حتّى أنا عندي روح اللّٰه. من جهة الّي مدْبوح نالأصْنام، كنعرفو بلّي كاملين عندنا المعْرفة. المعْرفة كتردّ الإنسان متكبّر، وَلكن المحبّة كتبني. وِادا كان شي واحد كيظنّ بلّي كيعرف شي حاجة، هُوَ باقي ما عرف شي كيفْما خصّوْ يعرف. وَلكن إدا كان شي واحد كيحبّ اللّٰه، هُوَ تعرّف عليه. وْمن جهة الماكلة د شي حاجة الّي مدْبوحة نالأصْنام، كنعرفو بلّي الصنم ما هُوَ والو، وْبلّي ما كاين من غير إلَه واحد، واخّا كاينين الّي كيتسمّاو آلِهة، في السما أَوْلا على الأرض، حيت كاينين بزّاف د الآلِهة والأرْباب. وَلكن لِنّا كاين إلَه واحد، الآب الّي منّو كيجي كُل شي، وْحنايَ لِلو. وْكاين رَبّ واحد، يَسوع المسيح، الّي منّو تخلق كُل شي، وْحنايَ كنحياو بِه. وَلكن ماشي الناس كاملين عندوم هَد المعْرفة. البعض مِنّوم مسْتانس بالأصْنام، وْحتّى نْدابا كياكل فحال إدا الماكلة كانت مدْبوحة نالأصْنام، والضمير ديالو الضعيف كيتنجّس. وَلكن الماكلة ما كتقرّبنا شي من اللّٰه. حنايَ ماشي حْسَن إدا كلينا وْماشي كفِس إدا ما كلينا شي. ردّو البال باش ما تكون شي الحُرّية ديالكُم عترة نِلّي هُمَ ضعافين. حيت إدا شافك شي واحد الّي ضميرو ضعيف، أنتينا الّي عندك هَد المعْرفة، ݣالس كتاكل في المَعْبد د شي صنم، واش ما يتشجّع شي باش ياكل الّي كان مدْبوح نالأصْنام؟ وْهَيداك بْسباب المعْرفة ديالك كيتّهلك خاك الضعيف الّي مات المسيح عليه. وْبْهَد الطريقة، ملّي كتدنبو مع الخوت وْكَتْجرحو الضمير ديالوم الّي هُوَ ضعيف، كتدنبو مع المسيح. على ديك الشي إدا الماكلة كتعتّر خاي، ما عُمري غادي ناكل اللحَم باش ما نعتّر شي خاي. واش أنا ماشي حُرّ؟ واش أنا ماشي رسول؟ واش ما شفْتْ شي يَسوع المسيح رَبّنا؟ واش ماشي أنتُمَ الغلّة د الخدمة ديالي في الرَّبّ؟ إدا أنا ماشي رسول نيَخرين، د بالصّحّ أنا رسول لِلكُم، حيت أنتُمَ هُمَ الطابع د الرسالة ديالي في الرَّبّ. هَدا هُوَ الدفاع ديالي ضدّ الّي كيشكيو بيَّ. واش ما عندنا شي الحقّ باش ناكلو وْنشربو؟ واش ما عندنا شي الحقّ باش نسافرو مع واحد الزوجة مؤمنة فحال الّي كيعملو الرُّسُل يَخرين والخوت د الرَّبّ وْصَفا؟ أَوْلا غير أنا وْبَرْنابا بوحدنا لازم علينا نخدمو باش نعيشو؟ شكون الّي كان عسْكري شي مرّة وْصرَف على راسو؟ وْشكون الّي كيغرس واحد الدالية وْما كياكل شي من العنب؟ أَوْلا شكون الّي كيسرح الكسيبة وْما كيشرب شي من الحليب ديالاْ؟ أنا ما كنهدَر شي حسب التفكير د الناس وْكان. واش الشريعة ما كتقول شي هَد الشي حتّى هي؟ حيت مكتوب في شريعة موسى: "ما تكمّمو شي التور الّي كيدرس." واش اللّٰه كيهْتَمّ بالتيران؟ أَوْلا كيقول هَد الشي خصوصًا علينا؟ إيّاه، تْكتب علينا، حيت واجب على الّي كيحرت، يحرت بالرجا، وْواجب على الّي كيدرس يكون شريك في الغلّة. إدا كُنّا زرعْنا فيكُم الزرّيعة الروحيّة، واش حاجة كبيرة إدا حصدْنا منكُم الأُمور المادّيّة؟ إدا كان هَد الحقّ عند يَخرين من جهتكُم، واش ما يكون شي عندنا هَد الحقّ حنايَ كتَر منّوم؟ وَلكن ما اسْتَعملْنا شي هَد الحقّ وْكنحملو كُل شي باش ما نعَرْقلو شي إنجيل المسيح. واش ما كتعرفو شي بلّي الّي كيخدمو في بيت المَقْدس كياكلو من بيت المَقْدس؟ وْبلّي الّي كيخدمو في المدْبح هُمَ كيشْتَركو في الّي كيتقدّم في المدْبح؟ هَيداك وصّى الرَّبّ بلّي حتّى هَدوك الّي كيبشّرو بالإنجيل يعيشو من الإنجيل. وَلكن ما اسْتَفدْتْ من حتّى شي حقّ من ديك الحقوق. وْما كنكتب شي لِلكُم باش تعملو هَد الشي معيَ، حيت كنفضّل نموت وْما يمنعني حتّى شي واحد من هَد الافْتخار. حيت ملّي كنبشّر بالإنجيل، ما عندي شي علاش نفْتَخر، حيت ملزوم عليَّ نعمل هَد الشي. إيّاه، الويل لِلي إدا ما كُنْتْ شي كنبشّر بالإنجيل. حيت كَكُنْتْ كنعمل هَد الشي متطوّع، كَكانت عندي المُكافأة. وَلكن إدا عملْتوْ بزّز منّي، غير كنعمل الواجبات الّي تكلّفْتْ بِها. شنّو هُوَ الأجر ديالي؟ الأجر ديالي هُوَ ملّي كنبشّر بالإنجيل، كنقدّموْ بلا شي باش نسمح في حقّي في التبْشير بالإنجيل. حيت واخّا أنا حُرّ من الناس كاملين، أنا جعلْتْ راسي عبد نالناس كاملين باش نربح الناس كتَر. رجّعْتْ راسي ناليهود فحال إدا أنا يهودي باش نربح اليهود، وْنِلّي هُمَ تحت الشريعة، رجّعْتْ راسي فحال إدا أنا تحت الشريعة (واخّا أنا ماشي تحت الشريعة) باش نربح الّي هُمَ تحت الشريعة. وْبين الناس الّي هُمَ بلا شريعة، رجعْتْ فحال إدا أنا بلا شريعة باش نربح الّي هُمَ بلا شريعة (واخّا أنا ماشي بلا الشريعة د اللّٰه، وَلكن أنا تحت الشريعة د المسيح). نِلّي هُمَ ضعافين، رجّعْتْ راسي فحال إدا أنا ضعيف باش نربح الّي هُمَ ضعافين. رجّعْتْ راسي كُل شي نْكُل واحد باش ننجّي البعض مِنّوم بأي طريقة. وْكُل شي كنعملوْ من جهة الإنجيل باش نشْتَرك في الغلّة ديالو. واش ما كتعرفو شي بلّي الّي كيجريو في المسابقة كيجريو كاملين، وَلكن كاين غير واحد الّي كيربح الجائزة؟ إيوا، جْريو حتّى أنتُمَ باش تربحوها. الرياضيّين كاملين كيضبطو نَفسوم في كُل شي. هُمَ كيعملو ديك الشي باش يربحو واحد التاج الّي كَيْفنا، وَلكن حنايَ باش نربحو واحد الّي كيبقا على طول. على ديك الشي أنا ما كنجري شي فحال شي واحد الّي ما عندو شي الهدف، وْما كندابز شي فحال شي واحد الّي كيضرب في الهوا. وَلكن كندرّب الجسد ديالي وْكنسيطر عليه، باش ما نكون شي مرفوض من بعدما بشّرْتْ يَخرين بالإنجيل. وْما بغيتْ شي، آ الخوت، تجهلو بلّي جدودنا كانو كاملين تحت السحابة وْكاملين ڭازو فوسط البحَر، وْكاملين تغطّسو على يد موسى في السحابة وْفي البحَر، وْكاملين كلاو نفس الماكلة الروحيّة، وْكاملين شربو شراب روحي، حيت كانو كيشربو من الصخرة الروحيّة الّي رافقَتوم، وْهَد الصخرة كانت هي المسيح. وَلكن اللّٰه ما رضى شي على الأغْلبية مِنّوم، حيت أجْسادوم بقاو ممدودين في الخلا. وْهَد الشي وقَع فحال عِبْرة لِنّا باش ما نطمعو شي في الحاجات القبيحة فحال الّي عملو هُمَ. ما تكونو شي عُبّاد الأصْنام فحال البعض مِنّوم، كيفْما هُوَ مكتوب: "ݣلس الشّعب ياكل ويشرب وْناض يلعب." ما تفسقو شي فحال ما عملو البعض مِنّوم وْماتو في نهار واحد تلاتة وْعشرين ألف. وْما تجرّبو شي الرَّبّ فحال ما جرّبوه البعض مِنّوم وْهلكوهُم الحياي. وْما تتشكّاو شي فحال ما تشكّاو البعض مِنّوم وْهلكوم الملاك الّي كيهلك. وْهَد الشي كامل وقَع فحال عِبْرة وْمكتوب باش ينبّهنا حنايَ الّي جا علينا آخر الزمان. على ديك الشي، أي واحد الّي كيظنّ بلّي هُوَ تابت، يحضي راسو باش ما يطيح شي. ما جاتْكُم حتّى شي تجْربة الّي هي ماشي بشريّة، وَلكن اللّٰه هُوَ صادق وْما غادي شي يخلّيكُم تتجرّبو كتَر من الّي تقدرو تصبرو عليه، وَلكن ملّي تجي التجْربة، هُوَ غادي يعطيكُم باب الخروج باش تقدرو تصبرو. على ديك الشي، آ العزازين، هربو من عبادة الأصْنام. كنهدَر معكُم فحال الحُكَماء. حكمو أنتُمَ في الّي كنقول. الكاس د البركة الّي كنباركو فيه، واش ماشي الشَّرِكة في دم المسيح؟ الخبز الّي كنقطّعوه، واش ماشي الشركة في جسد المسيح؟ الخبز هُوَ واحد، وْحنايَ بزّاف بِنا كنكونو جسد واحد، حيت كنشْتَركو كاملين في نفس الخبز. شوفو إسْرائيل من جهة الجسد. هَدوك الّي كياكلو الدبايح، واش ما كيشْتَركو شي في المَدْبح؟ شنّو بغيتْ نقول بْهَد الشي؟ واش بلّي الصنم شي حاجة أَوْلا بلّي الدبيحة نالصنم شي حاجة؟ لا، وَلكن ملّي الوَتَنيّين كيدبحو، كيدبحو نالشياطين، ماشي ناللّٰه. وْما بغيتْكُم شي تشْتَركو مع الشياطين. ما تقدرو شي تشربو كاس الرَّبّ وْكاس الشياطين. ما تقدرو شي تشْتَركو في الطَيفور ديال الرَّبّ وْفي الطَيفور ديال الشياطين. أَوْلا كَنْدفعو الرَّبّ نالغيرة؟ واش حنايَ قويّين منّو؟ كُل شي حلال عليَّ، وَلكن ماشي كُل شي كيصلح لِلي. كُل شي حلال عليَّ، وَلكن ماشي كُل شي كيبني. حتّى واحد ما خصّوْ يفتّش على المصْلحة ديالو، وَلكن على المصْلحة ديال غيرو. كولو من كُل شي الّي كيتباع عند الݣزّار وْما تسقصيو على والو بْسباب الضمير، حيت "الأرض وْكُل شي الّي فيها ديال الرَّبّ." وِادا عرط عليكُم شي واحد الّي ماشي مؤمن وْبغيتو تمشيو نْعندو، كولو من كُل شي الّي كينزّلوْ لكُم بلا ما تسقصيو والو بْسباب الضمير. وَلكن إدا قال لكُم شي واحد: "هَد اللحَم مدْبوح نالأصْنام،" ما تاكلو شي بْسباب هَداك الّي خبركُم وْبْسباب الضمير. (كنقصد الضمير د شي واحد يَخُر، ماشي الضمير ديالكُم.) حيت علاش الضمير د واحد يَخُر غادي يتحكّم في الحُرّية ديالي؟ وِادا أنا كنشْتَرك في الماكلة بالشكر، علاش غادي يهدرو فيَّ قبيح حيت كناكل شي حاجة الّي كنشكر اللّٰه عليها؟ إدَن، إدا كتاكلو أَوْلا كتشربو أَوْلا كتعملو أي حاجة، عَملو كُل شي نْمجد اللّٰه. ما تكونو شي عترة ناليهود ولا ناليونانيّين ولا نالكنيسة د اللّٰه. عَملو فحالي، حيت كنحاول نرضي الناس كاملين في كُل شي. ما كنفتّش شي على المصْلحة ديالي، وَلكن ديال يَخرين باش ينجاو. قلّدوني أنا فحال ما كنقلّد أنا المسيح. كنشكركُم، آ الخوت، حيت كتعقلو عليَّ في كُل شي وْكتحافظو على التقاليد فحال ما دفعْتوم لِلكُم. وَلكن بغيتْكُم تعرفو بلّي المسيح هُوَ الراس د كُل رَجل، والرَّجل هُوَ الراس د كُل مراة، واللّٰه هُوَ الراس د المسيح. كُل رَجل الّي كيصلّي أَوْلا كيتنبّأ بالراس ديالو مغطّي كيهين راسو الّي هُوَ المسيح. وَلكن كُل مراة الّي كتصلّي أَوْلا كَتْـتنبّأ بالراس ديالاْ عُريان كتهين راساْ، حيت ديك الشي فحال إدا هي حسّنَت الشعر ديالاْ كامل. حيت إدا المراة ما كتغطّي شي راساْ، خصّاْ تقطّع الشعر ديالاْ، وَلكن إدا كانت حشومة على المراة تقطّع الشعر ديالاْ أَوْلا تحسّنوْ، راه حسَن تغطّي راساْ. وَلكن الرَّجل ما خصّوْ شي يغطّي راسو حيت هُوَ صورة اللّٰه وْمجدو، وَلكن المراة هي المجد د الرَّجل. حيت الرَّجل ما جا شي من المراة، وَلكن المراة جات من الرَّجل. حيت اللّٰه ما خلق شي الرَّجل بْسباب المراة، وَلكن خلق المراة بْسباب الرَّجل. على هَد الشي خصّ المراة تكون فوق راساْ العلامة د السلْطة بْسباب الملائكة. كيفْما كان حال، في الرَّبّ ما كاين شي الرَّجل بلا المراة، وْما كاينة شي المراة بلا الرَّجل. حيت فحال المراة كتجي من الرَّجل، الرَّجل كيخلق من المراة، وْكُل شي من عند اللّٰه. حكمو بْراسكُم: واش يصلَح نالمراة تصلّي ناللّٰه وْراساْ عريان؟ واش ما كتعلّمكُم شي الطبيعة بلّي حشومة على الرَّجل يخلّي شعرو يطوال؟ وَلكن بالعكس، المراة إدا خلّات الشعر ديالاْ يطوال، هُوَ العزّ ديالاْ، حيت شعراْ اتّعطى لاْ فحال سبنية. وَلكن إدا بغى شي واحد يتناقش في هَد الموضوع، حنايَ ما عندنا حتّى شي عادة من غير هَدي، ولا في كنائس اللّٰه. وَلكن ملّي كنعطيكُم هَد الإرشادات، ما نقدر شي نشكركُم، حيت ما كتجتَمعو شي نِلّي أحسن، وَلكن نلّي ما كينفع شي. حيت في الُوّل سمعْتْ بلّي كتجتَمعو في الكنيسة وْكاين الانْقسام بيناتكُم، وْكنتيّق شي حاجة من هَد الشي. حيت خصّاْ تكون بيناتكُم شي هرْطقة باش يظهرو المرْضيّين عند اللّٰه. ملّي كتجتَمعو مع بعطكُم، ما كتجتَمعو شي باش تاكلو العشا د الرَّبّ، حيت كُل واحد كيسبق في الماكلة وْكياكل العشا ديالو، وْهَيدا البعض كيبقاو بالجّوع ويَخرين كيسكرو. واش ما عندكُم شي الديور فاين تاكلو وْتشربو؟ أَوْلا كتحڭرو الكنيسة د اللّٰه وْكتحشّمو الّي ما عندوم والو؟ شنّو نقول لكُم؟ واش نشكركُم على هَد الشي؟ لا! في هَد الشي لا. حيت أنا تعلّمْتْ من الرَّبّ ديك الشي بْنفسو الّي علّمْتْكُم، بلّي الرَّبّ يَسوع، ديك الليلة الّي تسلّم فيها، شبّر الخُبز، وْمن بعدما شكر، قطّعوْ وْقال: "هَدا هُوَ الجسد ديالي على مسبّتكُم. عملو هَد الشي باش تْتفكّروني." وْهَيداك عاود، من بعد العشا شبّر الكاس وْقال: "هَد الكاس هُوَ العهد الجديد بالدم ديالي. فوياخ ما شربْتو منّو، عملو هَد الشي باش تْتفكّروني." حيت كُل مرّة الّي كتاكلو من هَد الخبز وْكتشربو من هَد الكاس، كتخبرو بْموت الرَّبّ حتّى يجي. على ديك الشي كُل واحد الّي كياكل الخبز أَوْلا كيشرب الكاس د الرَّبّ بْطريقة غير مناسبة، كيدنب في الجسد والدم د الرَّبّ. وَلكن خصّ كُل واحد يمْتَحن راسو من قبل، وْعاد ديك الساعة ياكل من الخبز ويشرب من الكاس. حيت الّي كياكل وْكيشرب، بلا ما يميّز الجسد، كياكل وْكيشرب الحُكم على راسو. بْسباب هَد الشي، فيكُم بزّاف الّي ضعافين وْمراطين وْبزّاف ماتو. حيت كَكُنّا حكمْنا على راسنا، كَكان ما حكَم شي علينا شي واحد يَخُر. وَلكن إدا حكم علينا الرَّبّ، هُوَ كيأدّبنا باش ما نكونو شي محكومين مع الدنيا. هَيداك، آ الخوت، ملّي كتجتَمعو باش تاكلو، تْسنّاو بعضيّاتكُم. وِادا كان شي واحد منكُم فيه الجّوع، ياكل في الدار ديالو باش ما تجتَمعو شي نالحُكم. الأُمور الّي بقاتْ غادي نعوّطوم ملّي نجي نْعندكُم. أمّا من جهة المواهب الروحيّة، آ الخوت، ما بغيتْكُم شي تكونو جاهلين. أنتُمَ كتعرفو بلّي، ملّي كُنْتو وَتَنيّين، كُنْتو مݣوّدين نالأصْنام الزّيازن كيفْما ڭوّدوكُم. على هَد الشي كَنْنبّهكُم بلّي حتّى واحد الّي كيتكلّم بْروح اللّٰه ما يقدر يقول: "يَسوع ملْعون." وْحتّى واحد ما يقدر يقول: "يَسوع هُوَ الرَّبّ،" من غير بالروح القُدُس. المواهب هي متنوّعة، وَلكن الروح هُوَ واحد، والخدمات متنوّعة، وَلكن الرَّبّ هُوَ هُوَ، الأعْمال متنوّعة، وَلكن اللّٰه نفسو هُوَ الّي كيعمل كُل شي فينا كاملين. وَلكن كُل واحد توصّل بْتظْهير الروح نالمصْلحة العامّة. اللّٰه كيعطي نالبعض كلام الحِكمة بالروح، وْبْنفس الروح نالبعض كيعطي كلام المعْرفة، وْنْشي واحد يَخُر الإيمان بواسطة نفس الروح، وْنالبعض مواهب الشفاء بالروح الوحيد، وْنالبعض أعْمال المُعْجزات، وْنالبعض النبوّة، وْنالبعض تمْييز الارْواح، وْنْشي واحد يَخُر باش يهدَر بأنْواع اللسونة، وْنالبعض تفسير اللسونة. هَد الشي كامل كيعملوْ الروح الوحيد نفسو الّي كيفرّق كيفْما بغى هُوَ على كُل واحد. حيت فحال الجسم هُوَ واحد وْعندو بزّاف د الأعْضاء، والأعْضاء كاملة، واخّا بزّاف، كيكوّنو جسم واحد، راه هَيداك كيعمل المسيح حتّى هُوَ. حيت حنايَ كاملين تغطّسْنا بْروح واحد نْجسد واحد، كُنّا يهود أَوْلا يونانيّين، عبيد أَوْلا أحْرار، وْشربْنا كاملين من الروح الوحيد. حيت الجسد ماشي عضو واحد، وَلكن بزّاف د الأعْضاء. وِادا قالت الرّجِل: "حيت أنا ماشي اليَد، أنا ماشي من الجسم،" واش على ديك الشي ما تكون شي من الجسم؟ وِادا قالت الودنينة: "حيت أنا ماشي العينينة، أنا ماشي من الجسم،" واش على ديك الشي ما تكون شي من الجسم؟ كَكان الجسم كامل عينينة، فاين هُوَ السمع؟ كَكان كُل شي سمع، فاين هُوَ الشمّ؟ وَلكن اللّٰه نزّل كُل عضو في الجسد، واحد واحد، كيفْما بغى هُوَ. إدا كاملين كانو عضو واحد، فاين هُوَ الجسد؟ وْدابا الأعْضاء بزّاف، وَلكن الجسد هُوَ واحد. ما تقدر شي العينينة تقول ناليَد: "أنا ما محْتاجة شي لِلك." أَوْلا الراس يقول نالرِّجلين: "أنا ما محْتاج شي لِلكُم." بالعكس، الأعْضاء د الجسد الّي كيظهرو ضعافين، هُمَ الّي كنحْتاجوهُم كتَر، والأعْضاء د الجسد الّي كنحسبوهُم بْكرامة قليلة، كنلبّسوهُم بْكرامة كتَر، والأعْضاء الّي كنحشمو مِنّوم، كنلبّسوهُم بوقار كتَر، حيت الأعْضاء الّي مكرّمة ما كتحْتاج شي. وَلكن اللّٰه ركّب الأعْضاء في الجسد، وْعْطى الكرامة كتَر نِلّي ناقصين مِنّاْ باش ما يكون شي الانْقسام في الجسد، وَلكن باش الأعْضاء ديالو تهْتَمّ بْبعضيّاتاْ. وِادا كان واحد العضو معدّب، الأعْضاء كاملين معدّبين معاه. وِادا كان واحد العضو مكرّم، الأعْضاء كاملين كيفرحو معاه. أنتُمَ جسد المسيح وْكُل واحد منكُم عضو منّو. وْعمل اللّٰه في الكنيسة الرُّسُل في الُوّل، وْفي التاني الأَنْبياء، وْفي التالت المُعلّمين، وْمن بعد الّي كيعملو المُعْجزات، وْمن بعد الّي عندوم مَوهبة الشفاء، والمساعدين، والمُديرين، والّي كيهدرو بْلسونة مخْتَلفة. واش كاملين رُسُل؟ واش كاملين أَنْبياء؟ واش كاملين مُعلّمين؟ واش كاملين كيعملو المُعْجزات؟ واش عندوم كاملين المَوهبة د الشفاء؟ واش كيهدرو كاملين باللسونة؟ واش كاملين كيتَرْجمو اللسونة؟ وَلكن مزيان تبغيو المواهب العظيمة. دابا غادي نورّيكُم الطريق المخيّرة: إدا كُنْتْ كنتكلّم بْلُغات الناس والملائكة، وْما عندي شي المحبّة، أنا رجعْتْ فحال واحد النحاس كيطنْطن أَوْلا واحد الجرس كيزنْزن. وِادا كانت عندي المَوهِبة د النبوّة وْكنعرف الأسْرار كاملة والمعْرفة كُلّاْ، وِادا كان عندي الإيمان الّي كينقّل الجّبولة، وْما عندي شي المحبّة، أنا كيف والو. وِادا صدّقْتْ كُل شي الّي عندي على الفُقراء، وِادا دفعْتْ الجسم ديالي باش يتّحرق، وْما عندي شي المحبّة، ما غادي نسْتَفد منّو والو. المحبّة هي صابرة وْلطيفة. المحبّة ما كتحسد شي، ما كتفْتَخر شي وْما كَتْـتكبّر شي. وْما كتقبّح شي، ما كتفتّش شي على المصْلحة ديالاْ. ما كَتْـتقلّق شي بْسهولة، وْما كتعقل شي على الشَّرّ. المحبّة ما كتفرح شي بالقباحة، وَلكن كتفرح بالحقيقة. كتحمل كُل شي، كَتْـتيّق كُل شي، كَتْـترجّى في كُل شي وْكتصبر على كُل شي. المحبّة ما عُمراْ كتفشل. أمّا النبوّات غادي يفوتو، واللسونة غادي يتقاضاو، والعِلم غادي يفوت. حيت كنعرفو شي شويّا وْكَنْـتنبّأو بْشي جُزء، وَلكن ملّي كيجي الّي هُوَ كامل، ديك الساعة كيتحيّد الّي هُوَ ناقص. ملّي كُنْتْ صغير، كُنْتْ كنهدَر فحال شي عايل سْتيتو، كنفكّر فحال شي عايل سْتيتو، وْكنخمّم فحال شي عايل سْتيتو. وَلكن ملّي رجعْتْ رَجل، خلّيتْ الأُمور د الطفولة مورايَ. الّي كنشوفو دابا هي الصورة الباهتة في مراية، وَلكن في ديك الوقت غادي نشوفو وجَه نالوجَه. دابا كنعرف غير شويّش، وَلكن في ديك الوقت غادي تكون المعْرفة ديالي كاملة، كيفْما كيعرفني الله. أمّا دابا كتبقا تلاتة د الأُمور: الإيمان والرجا والمحبّة، وَلكن العظيمة فيهُم هِيَ المحبّة. تبعو المحبّة وْطلبو المواهب الروحيّة، وَلكن في الُوّل باش تتنبّأو. حيت الّي كيهدَر بْلسونة، ما كيهدَر شي مع الناس وَلكن مع اللّٰه، وْحتّى واحد ما كيفهم الكلام ديالو، حيت كيقول شي د الأسْرار بالروح. أمّا الّي كيتنبّأ كيهدَر مع الناس نالبُنْيان والتشْجيع والتّعْزيّة. الّي كيهدَر بْلسونة كيبني نفسو، وَلكن الّي كيتنبّأ كيبني الكنيسة. أنا بغيتْكُم كاملين تهدرو بْلسونة، وَلكن حسَن تتنبّأو، حيت الّي كيتنبّأ هُوَ أهمّ من الّي كيهدَر بْلسونة، إلّا إدا فسّر الّي كيقول باش تكبر الكنيسة. وْدابا، آ الخوت، إدا جيتْ نْعندكُم كنهدَر بْلسونة، باش غادي ننفعكُم إدا ما كنهدَر شي معكُم بالتبْيين أَو بالمعْرفة أَو بالنبوّة أَو بالتعْليم؟ حتّى الحاجات بلا نفس، فحال الناي أَوْلا العود، إدا العازف ما كيعطي شي الأصْوات المناسبة، كيفاش غادي نميّزو شنّو هُوَ الّي كيزمّر أَوْلا كيعزف بِه؟ وِادا البوق عْطى النفير ديالو ماشي واضح، شكون الّي غادي يوجّد راسو نالحرب؟ هَيداك معكُم أنتُمَ، إدا ما هدرْتو شي باللسان الّي مفْهوم، كيفاش يتّعرف الّي كتقولو؟ حيت كتكونو فحال إدا كتهدرو في الهوا. شحال د اللُغات موجودين في الدنيا وْهُمَ كاملين عندوم المعْنى ديالوم. وَلكن إدا ما فهمْتْ شي المعْنى د الكلمات، غادي نكون عند الّي كيتكلّم فحال شي أجْنبي وْهَداك الّي كيتكلّم غادي يكون أجْنبي بالنسبة لي. إيوا، هَيداك حتّى أنتُمَ الّي عندكُم الرغبة في المواهب الروحيّة، طلبو الله يزيدكُم منّاْ باش تبنيو الكنيسة. على ديك الشي كُل واحد الّي كيهدَر باللسونة خصّو يطلب في الصلاة المَوهبة باش يفسّراْ. حيت إدا كنصلّي باللسونة، الروح ديالي كتصلّي، وَلكن العقل ديالي ما كيسْتَفد شي. إدَن، شنّو خصْني نعمل؟ خصْني نصلّي بالروح وْبالعقل بْجوج بِهُم، وْغادي نهلّل بالروح وْبالعقل حتّى هُوَ. وْملّي كتحمد اللّٰه بالروح، كيفاش غادي يقول "آمين" هَداك الّي باقي خضَر إدا كيجهل الّي كتشكر بِه؟ حيت ما كيعرف شي شنّو كتقول. حيت أنتينا كتشكر مزيان، وَلكن يَخُر ما كيتّبنى شي. كنشكر إلَهي حيت أنا كنهدَر باللسونة كتَر منكُم كاملين. وَلكن في الكنيسة كنفضّل نقول خمسة د الكلمات بالعقل ديالي باش نعلّم يَخرين، فعوط ما نقول عشر آلاف كلمة باللسونة. آ الخوت، ما تكونو شي عيال ستيتْوين في العقل، وَلكن كونو فحال صُبيان في الشَّرّ، وْكونو ناضجين في العقل. مكتوب في الشريعة: "بواسطة الناس الّي عندوم لُغات غريبة وْبْشفايف الأجانب غادي نهدَر مع هَد الشعب، وَلكن واخّا هَيدا ما غادي شي يسمعوني، كيقول الرَّبّ." وْهَيدا اللسونة ما كتكون شي علامة نالمؤمنين، وَلكن نِلّي هُمَ غير مؤمنين. أمّا النبوّة كتكون علامة نالمؤمنين وْماشي نِلّي هُمَ غير مؤمنين. وِادا اجتَمعَت الكنيسة كاملة وْهدرْتو كاملين باللسونة وْدخلو البعض الّي ما كيفهمو شي، أَوْلا شي ناس غير مؤمنين، واش ما غادي شي يقولو عليكُم بلّي أنتُمَ حُمَق؟ وَلكن إدا كُنْتو كاملين بِكُم كَتْـتنبّأو وْدخل شي واحد الّي ماشي مؤمن، أَوْلا ما قاري شي، غادي يكون موبّخ من عندكُم كاملين وْغادي يتّحكم من عندكُم. والأسْرار د قلبو غادي تظهَر وْغادي يطيح على وَجهو وْغادي يسجد ناللّٰه وْغادي يعْتَرف بلّي اللّٰه هُوَ في الحقيقة فوسطكُم. إدَن، شنّو خصْنا نعملو، آ الخوت؟ ملّي كتجتَمعو، كُل واحد منكُم عندو مزْمور، عندو تعْليم، عندو تَبْيين، عندو لسان، عندو تفسير. لازم عليكُم تعملو كُل شي نالبُنْيان. إدا كيهدَر شي واحد بْشي لسان ماشي مفهوم، يهدرو جوج أَوْلا بالكترة تلاتة وْبالنوبة، وْخلّيو شي واحد يفسّر المعْنى. وِادا ما كاين شكون يفسّر، خصّو يسكت في الكنيسة ويهدَر مع نفسو وْمع اللّٰه. أمّا الأَنْبياء يتكلّمو جوج أَوْلا تلاتة ويَخرين يحكمو. وَلكن إدا شي واحد الّي ݣالس كيجي لو واحد التبْيين من عند اللّٰه، خصّ الُوّل يسكت ويخلّي التاني يهدَر. حيت كاملين تقدرو تتنبّأو واحد بواحد باش يتعلّمو يَخرين كاملين ويتشجّعو. وأرْواح الأَنْبياء هي طايعة نالأَنْبياء، حيت اللّٰه ماشي إلَه التخَربيق، وَلكن إلَه السلام. فحال العادة في كنائس القدّيسين كاملين، خصّ النسا ديالكُم يسكتو في الكنيسة، حيت ما عندوم شي إدن باش يتهاودو، وَلكن خصّوم يخضعو، فحال ما كتقول الشريعة. وَلكن إدا بغاو يتعلّمو شي حاجة، يسقصيو الرجال ديالوم في الدار، حيت حشومة على المراة تتهاود في الكنيسة. واش خرج كلام اللّٰه من عندكُم؟ أَوْلا جا لكُم أنتُمَ بوحدكُم؟ إدا شي واحد كيحسب راسو نَبي أَوْلا إنسان روحيّ، خصّو يعْتَرف بلّي الأُمور الّي كنكتب لكُم هي وَصايا الرَّبّ. وِادا ما اعْتَرف شي بْهَد الشي، حتّى هُوَ ما يكون شي معْتَرف بِه. على هَد الشي، آ الخوت، رغبو في المَوهبة د النبوّة وْما تمنعو شي التكلُّم بْلسونة. وَلكن يتّعمل كُل شي بْطريقة مناسبة وْبالترتيب. وْدابا، آ الخوت، بغيتْ نعرّفكُم بالإنجيل الّي بشّرْتْكُم بِه الّي قبلْتوه وانتُمَ تابتين فيه، وْبِه أنتُمَ ناجيين إدا بقيتو مشبّرين في ديك الكلام الّي بشّرْتْكُم بِه، إدا ما آمنْتو شي باطل. حيت دفعْتْ لكُم في الُوّل ديك الشي الّي توصّلْتْ بِه، بلّي المسيح مات بْسباب الدنوب ديالنا، فحال ما كتقول الكتوبة. وْهُوَ تْدفن وْتّبعت حيّ في النهار التالت، فحال ما كتقول الكتوبة. وْظهَر نْصَفا، وْمن بعد نالطناش د الرُّسُل. وْمن بعد ديك الشي ظهَر في مرّة واحدة نْكتَر من خمس مية د الخوت، الّي الأغْلبيّة منّوم باقّين بالرّوح حتّى نْدابا، وَلكن البعض مِنّوم نَعسو. وْمن بعد ديك الشي ظهَر نيَعْقوب، وْمن بعد نالرُّسُل كاملين، وْفي الآخر ظهَر لِلي أنا فحال إدا واحد الّي تولد ماشي في الوقت ديالو. حيت أنا هُوَ الصغير من بين الرُّسُل، وْما كنسْتاهل شي نتسمّى رَسول، حيت تعدّيتْ على الكنيسة د اللّٰه. وَلكن بْنعْمة اللّٰه أنا هُوَ أنا. والنعْمة الّي هُوَ عْطاها لي ما كانت شي باطلة. بالعكس، أنا تعبْتْ كتَر مِنّوم كاملين. بالحقّ ماشي أنا، وَلكن نعْمة اللّٰه الّي كتخدم فيَّ. إدَن، واخّا أنا أَوْلا هُمَ، راه هَيداك كنبشّرو وْهَيداك آمنْتو. وَلكن إدا كنبشّر بالمسيح بلّي اتّبعت من بين الميّتين، كيفاش كيقولو البعض منكُم بلّي ما كاينة شي القيامة؟ وِادا ما كاينة شي القيامة، حتّى المسيح ما رجَع شي بالروح، وِادا ما اتّبعت شي المسيح، التبْشير ديالنا باطل والإيمان ديالكُم باطل حتّى هُوَ. وْحنايَ غادي نكونو شهود الزور ناللّٰه حيت حنايَ شهدْنا على اللّٰه بلّي ردّ المسيح بالروح، وْهُوَ ما بَعتوْ شي. يعني، هَد الشي إدا كانو الميّتين ما كيرجعو شي بالروح في الحقيقة. حيت إدا ما كيتّبعتو شي الميّتين، حتّى المسيح ما اتّبعت شي. وِادا ما اتّبعت شي المسيح، الإيمان ديالكُم بلا قيمة، وانتُمَ باقّين في الدنوب ديالكُم، وْحتّى هَدوك الّي نَعسو في المسيح اتّهلكو. وِادا كنترجّاو في المسيح غير في هَد الحياة، حنايَ غادي نكونو مزْغوبين كتَر من الناس كاملين. وَلكن في الحقيقة قام المسيح من بين الميّتين، وْهو رجَع البكر د هَدوك الّي ناعسين. حيت الموت جا بإنسان واحد، هَيداك حتّى القيامة د الميّتين جات بإنسان واحد. حيت فحال ما كيموتو الناس كاملين في آدم، هَيداك في المسيح غادي يحياو عاود الناس كاملين. وَلكن كُل واحد في المرْتبة ديالو، المسيح هُوَ البكر وْمن بعد الّي هُمَ ديال المسيح في المجي ديالو. وْمن بعد ديك الشي غادي تجي النهاية، ملّي كيسلّم المسيح المُلك ناللّٰه الآب، وْملّي كيهدّم كُل رياسة وْكُل سُلطة وْكُل قوّة. حيت لازم يحكم المسيح حتّى يعمل العدْيان ديالو كاملين تحت رِجلو. والعدو الاخّري الّي غادي يتّهلك هُوَ الموت، حيت "طوّع اللّٰه كُل شي تحت الرِّجلين ديالو." وَلكن ملّي كيقول بلّي "كُل شي تطوّع لو،" واضح بلّي ما كيقصد شي اللّٰه، حيت هُوَ الّي طوّع كُل شي نالمسيح. وْملّي يتطوّع لو كُل شي، ديك الساعة الِابن بْنفسو غادي يتطوّع حتّى هُوَ نْهَداك الّي طوّع لو كُل شي باش يكون اللّٰه الكُل في الكُل. إدا ما كاينة شي القيامة، شنّو غادي يعملو هَدوك الّي كيتغطّسو على الميّتين؟ إدا ما كيتّبعتو شي الميّتين، علاش كيتغطّسو عليهُم؟ وْعلاش حنايَ في الخطر في كُل وَقت؟ كنأكّد لكُم، آ الخوت، بالفخر الّي كنحسّ فيكُم في يَسوع المسيح رَبّنا، بلّي كُل النهار أنا في خطر الموت. إدا فحال واحد الإنسان حاربْتْ مع الوحوش في أَفَسُس، شنّو غادي نسْتَفد من هَد الشي؟ إدا ما كيتّبعتو شي الميّتين، ناكلو وْنشربو، حيت غدّا غادي نموتو! ما تخلّيوهُم شي يغشّوكُم. المعاشرة القبيحة كتفسّد الأخْلاق المزيانة. رجعو نالعقل ديالكُم وْما تدنبو شي، حيت كاينين البعض منكُم الّي ما عندوم شي المعْرفة د اللّٰه. كنقول هَد الشي نالحشومة ديالكُم. وَلكن شي واحد غادي يقول: "كيفاش كيتّبعتو الميّتين؟ وْبْشْمِن جسد غادي يجيو؟" آ الجاهل، ديك الشي الّي كتزرع أنتينا ما غادي شي يحيا إدا ما مات شي في الُوّل! وْما كتزرع شي النبات الّي غادي يكون، وَلكن الحُبّة المجرّدة، يمكن تكون من الزرع أَوْلا من شي نوع يَخُر، واللّٰه كيعطي لِلاْ واحد الجسد كيفْما بغى هُوَ. وْكُل نوع د الزرّيعة عنداْ الجسد ديالاْ. والحاجات الحيّين ما عندوم شي كاملين نفس النوع د اللحم: كاين اللحم د الإنسان، واللحم د البهايم مخْتَلف، واللحم د الطيور واحد يَخُر، وْديال الحوت يَخُر. وْكاينة أجْساد سماويّة وأجْساد أرضيّة، وَلكن المجد د السماويّة حاجة والمجد د الأرضيّة حاجة يَخرى. كاين المجد د الشمس وْمجد يَخُر د القمر، وْمجد يَخُر د النجوم. وْواحد النجْمة مخْتَلفة على نجْمة يَخرى في المجد ديالاْ. هَيداك كتكون حتّى القيامة د الميّتين. الجسد البشري مزْروع في فساد، وْكيتّبعت بلا فساد. كيتّزرع بلا كرامة وْكيتّبعت في المجد، كيتّزرع في ضعف وْكيتّبعت في القوّة، كيتّزرع واحد الجسد طبيعي وْكيتّبعت واحد الجسد روحي. إدا كاين جسد طبيعي، كاين جسد روحي حتّى هُوَ. هَيداك مكْتوب عاود: "رجَع آدم، الإنسان الُوّل، نَفس حَيّة،" وآدم الاخّري رجَع روح الّي كيحيي. ما جا شي في الُوّل الّي روحي، وَلكن الّي طبيعي، وْمن بعد الّي روحي. الإنسان الُوّل هُوَ كان من تراب الأرض، والإنسان التاني هُوَ من السما. فحال ديك الإنسان الأرضي، هَيداك كيكونو الّي هُمَ من الأرض. وْفحال الإنسان السماوي، هَيداك كيكونو الّي هُمَ من السما. وْفحال ما كنحملو الصورة د الأرضي، غادي نحملو الصورة د السماوي حتّى هِيَ. وْكنقول لكُم، آ الخوت، بلّي اللحم والدم ما يقدرو شي يورتو مُلك اللّٰه، وْما كيورت شي الفساد الّي هُوَ بلا فساد. ها انا كنقول لكُم واحد السرّ: ما غادي شي ننعسو كاملين، وَلكن حنايَ كاملين غادي نتبدّلو في لحظة، في رمْشة عين في وقت البوق الاخّري، حيت صوت البوق غادي يتّسمع وْغادي يتّبعتو الميّتين بلا فساد وْحنايَ غادي نتبدّلو. حيت هَد الجسد الّي كَيْفنا لازم يلبس الجسد الّي ما كَيْفنا شي، وْهَد الجسد الّي كيموت يلبس الجسد الّي ما كيموت شي. وْملّي يلبس هَد الجسد الّي كيتّفسد الجسد الّي ما كيتّفسد شي، وْهَد الجسد الّي كيموت يلبس الجسد الّي ما كيموت شي، ديك الساعة غادي يتكمّل الّي مكتوب: "الموت بلعوْ النصر. فاين الانْتصار ديالك، آ الموت؟ فاين الشوكة ديالك، آ الهاوية؟" شوكة الموت هي الدنوب، والقوّة د الدنوب هي الشريعة. وَلكن الشكر ناللّه الّي كيعطينا الانْتصار بْرَبّنا يَسوع المسيح. على ديك الشي، آ خوتي العزازين، كونو تابتين وْما تْتزعْزعو شي وْزيدو تتكتّرو دائمًا في الخدمة د الرَّبّ، عارفين بلّي التعب ديالكُم في الرَّبّ ماشي باطل. أمّا بالنسبة نالمساعدة نالقدّيسين، عَملو حتّى أنتُمَ كيفْما آمرْتْ الكنائس الّي في غَلاطيّة. في النهار الُوّل د السيمانة، كُل واحد منكُم يوفّر ويخزن على حسب القدرة ديالو باش، ملّي نجي أنا، ما تجمعو شي العطيّات في ديك الوقت. وْملّي نوصل أنا، غادي نصيفط هَدوك الّي اختارْتوهُم أنتُمَ بالرسائل باش يدّيو العطيّات ديالكُم نأُورُشَليم. وِادا كان واجب بلّي نمشي حتّى أنا، غادي نمشيو مجموعين. وانا غادي نجي نْعندكُم ملّي نݣوز على مَكدونيّة، حيت خصْني نݣوز على هَد المنْطَقة، ويمكن غادي نبقا معكُم شي مدّة، أَوْلا نݣلس تمّاك في فصل الشتا كامل، باش أنتُمَ تعاونوني في الطريق ديالي فاين ما نمشي. حيت هَد المرّة ما بغيتْ شي نشوفكُم وانا ݣايز، وَلكن كنتمنّى نبقا شي وقت معكُم، إدا بغى الرَّبّ. وَلكن غادي نبقا في أَفَسُس حتّى نْيوم الخمسين، حيت تْفتحَتْ لي واحد الباب كبيرة نالخدمة المناسبة، واخّا كاينين بزّاف د العدْيان. إدا جا تيموثاوس، رحّبو بِه باش يكون بلا هموم عندكُم، حيت هُوَ كيخدم فحالي في الخدمة د الرَّبّ. على هَد الشي حتّى واحد ما يحڭروْ، وَلكن صيفطوه بْسلام باش يقدر يجي نْعندي حيت كنـتسنّاه مع الخوت. أمّا من جهة الأخ ديالنا أَبُلّوس، أنا شجّعْتوْ بزّاف باش يطلّل عليكُم مع الخوت يَخرين، وَلكن ما بغى شي بالمرّة يمشي دابا، وَلكن غادي يعمل هَد الشي ملّي تجي لو الفُرْصة. سهرو وْتبتو في الإيمان، كونو شجاعين وْتقوّاو. عَملو كُل شي بالمحبّة. وْكنرغبكُم، آ الخوت (وانتُمَ كتعرفو بلّي دار أسْتِفاناس هُمَ الغلّة الُولى د أَخائية وْبلّي عْطاو حياتوم نالخدمة د القدّيسين)، باش تخضعو نِلّي هُمَ فحالوم وْنْكُل واحد الّي كيعاون في الخدمة وْكيتعب. أنا فرحْتْ ملّي وصَل أسْتِفاناس وْفُرْتوناتوس وأَخائيكوس، حيت هُمَ سدّو الاحْتياج في الغياب ديالكُم أنتُمَ. حيت هُمَ ريّحو روحي وْروحكُم. الناس فحالوم كيسْتاهلو الشكر. كتسلّم عليكُم الكنائس في آسيا. كيسلّمو عليكُم بزّاف في الرَّبّ أَكيلا وْبِريسْكِلّا والكنيسة الّي كتجتَمع في الدار ديالوم. كيسلّمو عليكُم الخوت كاملين. سلّمو على بعضيّاتكُم بْقُبلة مقدّسة. أنا بولُس كنكتب هَد السلام بْخطّ يَدّي. إدا شي واحد ما كيحبّ شي الرَّبّ، يكون ملْعون. آجي، يا رَبّي. نعْمة الرَّبّ يَسوع المسيح تكون معكُم. كنعزّْكُم كاملين في المسيح يَسوع. آمين. بولُس رسول يَسوع المسيح بإرادة اللّٰه وْتيموثاوس الأخ ديالنا، نالكنيسة د اللّٰه الّي في كورِنْثوس وْنالقدّيسين كاملين الّي في منْطَقة أَخائية كاملة. النعْمة لكُم والسلام من عند اللّٰه بابانا والرَّبّ يَسوع المسيح. يتبارك اللّٰه باباه د رَبّنا يَسوع المسيح، الآب الرحيم والإلَه د كُل تعزيّة، الّي كيعزّينا في كُل الشدّات ديالنا باش حتّى حنايَ نقدرو نعزّيو هَدوك الّي كيتعدّبو بْنفس التّعْزيّة الّي عْطانا اللّٰه. حيت فحال ما كيكتر نّا العداب بْسباب المسيح، هَيداك كَتْكتر التّعْزيّة ديالنا حتّى هي بالمسيح. إدا تعدّبْنا، هَد الشي باش تكون عندكُم التّعْزيّة والنجا، وِادا تعزّينا، هَد الشي باش تكون عندكُم التّعْزيّة الّي كتعاونكُم تتحمّلو بالصبر نفس العداب الّي كنتعدّبو بِه حنايَ. والرجا ديالنا فيكُم تابت، عارفين بلّي فحال ما أنتُمَ كتشْتَركو في العداب ديالنا، غَد تشْتَركو في التّعْزيّة ديالنا حتّى هي. حيت بغيناكم ما تجاهلو شي، آ الخوت، الشدّات الّي تعدّبْنا بِها في منْطَقة آسيا. كُنّا مظلومين بزّاف فوق الجُّهد ديالنا، حتّى قطعْنا الياس من الحياة. حسّينا بْحُكم الإعدام في نفسنا باش ما نتكّلو شي على نفسنا، وَلكن على اللّٰه الّي كيحيي الميّتين. هُوَ نجّانا وْغادي ينجّينا من هَد الخطر الكبير د الموت. عملْنا الرجا ديالنا فيه، وْهُوَ الّي غادي يزيد يعتَقْنا، ما دُمْتو كتعاونونا أنتُمَ بالدعوات من جهتنا باش بزّاف د الناس يشكرو اللّٰه علينا بْسباب العطيّة الّي قبطْنا بواسطة الطلبات د بزّاف د الناس. إدَن، هَدا هُوَ الافتخار ديالنا: الشهادة د الضمير ديالنا البَريء. حيت التصرُّف ديالنا في الدنيا، وْخصوصًا معكُم، كان بالصراحة والنقاوة الّي ماجّين من عند اللّٰه. التصرُّف ديالنا ما كان شي بالحكمة البشريّة، وَلكن بْنعْمة اللّٰه. حيت حنايَ كنكتبو لكُم غير الأُمور الّي كَتْقراوها وْكتعرفوها وْماشي شي حاجة يَخرى، وْكنتمنّى تفهموها مية في مية، كيفْما فهمْتونا شي شويا، وْنكونو حنايَ الافتخار ديالكُم في النهار د الرَّبّ يَسوع، وانتُمَ الافتخار ديالنا. وْملّي كُنْتْ متأكّد من هَد الشي، في الُوّل قرّرْتْ نمشي نْعندكُم باش تـتباركو بْنعْمة تانية، يعني نݣوز عليكُم ملّي نكون ماشّي نْمَكدونيّة وْنجي عاود من مَكدونيّة نْعندكُم وْهَيدا تعاونوني نتابع السفر ديالي ناليَهوديّة. على هَد الشي ملّي قرّرْتْ، واش قرّرْتْ بالزربة؟ أَوْلا كنعوّل على الخُطّات حسب الغرض ديالي باش نقول "إيّاه، إيّاه،" وْ"لا، لا،" في نفس الوقت؟ وَلكن اللّٰه صادق، وْحتّى الكلام ديالنا لِلكُم ما فيه شي "إيّاه" وْ"لا" في نفس الوقت. حيت اِبن اللّٰه يَسوع المسيح الّي تبشّر بِه بيناتكُم على يدْنا، أنا وْسِلوانُس وْتيموثاوس، ما فيه شي إيّاه وْلا، وَلكن فيه كان دائمًا "إيّاه،" حيت الوعود د اللّٰه كاملين هي "إيّاه" في المسيح. هَيداك بالمسيح كنقولو آمين نالمجد د اللّٰه. اللّٰه هُوَ الّي كيتبّتـنا في المسيح، هُوَ الّي دهنـنا، حنايَ وانتُمَ. وْهو الّي طبعنا وْجعل الضمانة د الروح ديالو في قلبنا. وَلكن كَنْدْعي اللّٰه باش يشهد على نفسي بلّي ما مشيتْ شي نْكورِنْثوس، حيت حنّيتْ عليكُم. ما بغينا شي نسيطرو على الإيمان ديالكُم، وَلكن حنايَ خدّامين معكُم نالفرْحة ديالكُم، حيت بالإيمان أنتُمَ تابتين. وَلكن قرّرْتْ في نفسي ما نعاود شي نجي نْعندكُم بالحزن. حيت إدا كنحزّنكُم، شكون الّي غادي يفرّحني من غير أنتُمَ الّي أنا حزّنْتْكُم؟ كتبْتْ لكُم هَد الشي باش، ملّي نوصل أنا، ما نحزن شي من هَدوك الّي خصّوم يفرّحوني. كانت عندي التيقة بلّي الفرْحة ديالي هي الفرْحة ديالكُم كاملين. كتبْتْ لكُم بْعداب كبير وْبالغبينة د القلب وْبْبزّاف د الدموع، ماشي باش نحزّنكُم، وَلكن باش نورّيكُم المحبّة العميقة الّي عندي فيكُم. وَلكن إدا كان شي واحد السبب د الحزن، ما حزّنْني شي غير أنا، وَلكن حزّنكُم كاملين شي شويا، بلا ما نزيدو فيه. كافي نْديك الإنسان العقوبة الّي فرضَتاْ عليه الأغلبية منكُم. وْدابا أنتُمَ خصْكُم تسمحو لو وْتعزّيواه باش ما يغرق شي في الحزن الكبير. على ديك الشي كنطلب منكُم باش تأكّدو لو المحبّة ديالكُم. حيت نْهَد الهدف كتبْتْ لكُم باش نختَبركُم وْنعرف إدا أنتُمَ طايعين في كُل شي. والّي كتسمحو لو أنتُمَ، حتّى أنا كنسمح لو. على ديك الشي، إدا أنا سامحْتْ في شي حاجة، سامحْتْ بْسبابكُم قدّام المسيح، باش ما يغلب شي علينا الشيطان، حيت ما كنجهلو شي الحيلات ديالو. حيت ملّي وصلْتْ نْتَرْواس باش نبشّر بإنجيل المسيح، واخّا تْفتحَتْ لي واحد الباب من الرَّبّ، ما حسّيتْ شي بلّي أنا مرتاح في النفس ديالي، حيت ما جبرْتْ شي خاي تيطُس، وْودّعْتوم وْخرجْتْ نْمَكدونيّة. وَلكن الحمد للّه الّي كيدّينا دائمًا منتَصرين في المسيح وْكَتْفوح منّا واحد الريحة مزيانة د المعْرفة ديالو في كُل موطَع. حيت حنايَ الريحة الطيّبة د المسيح ناللّٰه نْهَدوك الّي كينجاو وْنِلّي كيتّهلكو: ريحة الموت نالناس الّي في الموت، وْريحة الحياة نالناس الّي عندوم الحياة. وْشكون يقدر على هَد الشي؟ حيت حنايَ ماشي فحال بزّاف د الناس الّي كيتاجرو بْكلام اللّٰه، وَلكن كنتكلّمو بْصراحة، فحال الناس المرسولين في المسيح من عند اللّٰه وْقدّام اللّٰه. واش بدينا عاود كنشكرو راسنا؟ أَوْلا واش كنحْتاجو نقدّمو لكُم رسائل التَّوْصية، أَوْلا نطلبوها منكُم فحال الّي كيعملو البعض؟ أنتُمَ الرسائل ديالنا، الّي مكتوبة في قلبنا. هي معروفة وْكيقراوها الناس كاملين. واضح بلّي أنتُمَ واحد الرسالة د المسيح مكتوبة بْيَدْنا، ماشي بالمداد، وَلكن بْروح اللّٰه الحيّ، ماشي على شي لوحات د الحجَر، وَلكن في اللوحات د القلوبة البشريّة. هَدي هي التيقة الّي عندنا قدّام اللّٰه بواسطة المسيح: ماشي بلّي كنحسبو نفسنا كافيين بوحدنا، وَلكن الكفاية ديالنا ماجّة من عند اللّٰه. هُوَ الّي جعلنا كافيين باش نخدمو واحد العهد جديد، ماشي د الحرف المكتوب، وَلكن د الروح القُدُس. حيت الشريعة الحرفيّة كتقتل، وَلكن الروح كيحيي. إدا كانت الخدمة د الموت المنقوشة بالحروف على الحجَر مجيدة، حتّى نالدرجة بلّي بَني إسْرائيل ما قدرو شي يشوفو في الوجَه د موسى بْسباب المجد الفاني الّي باين في وَجهو، واش ما غادي شي تكون الخدمة د الروح مجيدة كتَر منّاْ بزّاف؟ حيت إدا كانت الخدمة د الحُكم مجيدة، الخدمة د التقوى غادي تكون مجيدة كتَر منّاْ بزّاف. حيت ديك الشي الّي كان مجيد ما بقا شي مجيد، إدا قارنْناه مع هَد المجد الّي عظيم منّو. حيت إدا كان الفاني مجيد، الّي هُوَ تابت مجيد كتَر منّو بزّاف! حيت عندنا واحد الرجا فحال هَدا، كنهدرو بالزعامة. ما كنعملو شي فحال موسى الّي كان كيعمل الحجاب على وَجهو باش ما يشوفو شي بَني إسْرائيل ديك المجد الّي كان كَيْفنا. وَلكن العقول ديالوم تعمّاو حتّى ناليوما وْملّي كيقراو العهد القديم، عندوم ديك الحجاب الّي باقي ما تحيّد شي، حيت المسيح بوحدو كيحيّدوْ. حتّى ناليوما، ملّي كيقراو في الكتوبة ديال موسى، الحجاب دائمًا كيغطّي قلبوم. وَلكن ملّي غادي يدورو نالرَّبّ، غادي يتحيّد الحجاب. أمّا الرَّبّ هُوَ الروح القُدُس، وْفاين ما كيكون روح الرَّبّ، تمّاك كتكون الحُرّية. وْحنايَ كاملين، بالوجَه ديالنا معرّي، كنشوفو مجد الرَّبّ فحال في واحد المراية، وْكنترقّاو من مجد نْمجد نْديك الصورة نفساْ بْفضل الرَّبّ الّي هُوَ الروح. على ديك الشي ما كنفشلو شي، حيت عندنا هَد الخدمة بْرحْمة اللّٰه، وْرفضْنا الأُمور المخبّعة الّي كتجيب الحشومة. وْما كنتعاملو شي بالحيلة وْما كنعوّجو شي كلام اللّٰه. بالعكس، ملّي كنبيّنو الحقّ، كيكبر شانْنا في الضمير د الناس قدّام اللّٰه. وَلكن إدا الإنجيل ديالنا باقي محجوب، هُوَ محجوب على الّي كيتّهلكو. والإلَه د هَد الدنيا، يعني الشيطان، غمّط العقل د هَدوك الّي ما كيآمنو شي باش ما يشوفو شي ضَو الإنجيل المجيد د المسيح، الّي هُوَ صورة اللّٰه. حيت ما كنبشّرو شي بْنفوسنا، وَلكن بالمسيح يَسوع الرَّبّ، وْحنايَ العبيد ديالكُم من جهة يَسوع. حيت اللّٰه، الّي آمر باش يشرق الضَّو من الظلام، هُوَ الّي شرق الضَّو ديالو في قلبنا باش نعرفو مجد اللّٰه في الوجَه د يَسوع المسيح. وَلكن عندنا هَد الكنز في القشوع د الطين باش يكون واضح بلّي هَد القوّة العظيمة ماجّة من عند اللّٰه وْماشي منّا. حنايَ مضيّقين في كُل شي، وَلكن ماشي مسحوقين، حيرانين وَلكن ما قاطعين شي الياس، مضْطَهدين وَلكن ماشي مسيّبين، مطيّحين وَلكن ماشي مهلوكين. كنحملو دائمًا في الجسد ديالنا في كُل موطَع الموت د يَسوع باش تظهَر حياة يَسوع حتّى هي في الجسد ديالنا. حيت ما حَدّنا باقين عايشين، كنكونو دائمًا مستَسلمين نالموت بْسباب يَسوع باش حتّى الحياة د يَسوع تظهَر في الجسد ديالنا الفاني. وْهَيدا الموت كتخدم فينا والحياة كتخدم فيكُم. وْحنايَ عندنا نفس الروح د الإيمان فحال ما هُوَ مكتوب: "آمنْتْ وْعلى ديك الشي تكلّمْتْ،" وْحتّى حنايَ كنآمنو وْعلى ديك الشي كنتكلّمو، عارفين بلّي هَداك الّي ردّ الرَّبّ يَسوع بالروح غادي يردّنا بالروح حتّى حنايَ بيَسوع ويدّينا معكُم مجموعين قدّامو. حيت هَد الشي كامل من جهتكُم باش النعْمة الّي كَتنْتَشر كتَر وْكتَر بين الناس تفيّض الشكر نالمجد د اللّٰه. على ديك الشي ما كنفشلو شي، وَلكن واخّا الإنسان الظاهر ديالنا كيبلا، الإنسان الباطن كيتجدّد نهار على نهار. حيت الضيق ديالنا الخفيف والفايت كيخدم لِنّا واحد المجد عظيم وْدايم الّي هُوَ غالي على العداب ديالنا كامل. وْحنايَ ما كنركّزو شي على الأُمور الّي كَتْـتشاف، وَلكن على هَديك الّي ما كَتْـتشاف شي، حيت الأُمور الّي كَتْـتشاف هي موقّتة، أمّا الّي ما كَتْـتشاف شي هي دايمة. حيت كنعرفو بلّي، إدا الخيمة الأرضيّة فاين كنعيشو تهدّمَتْ، عندنا في السما واحد السكنى الّي بناها اللّٰه، واحد الدار أبديّة الّي ماشي مصنوعة باليَدّين. كنتوجّعو في هَد الدار مشتاقين نكونو لابسين الدار ديالنا السماويّة، حيت إدا كُنّا لابسين، ما غادي شي نكونو عريانين. حيت حنايَ الّي عايشين في هَد الخيمة كنتوجّعو متقّلين، حيت ما بغينا شي نكونو معرّيّـين، وَلكن لابسين، باش هَد الشي الّي غادي يفنا تبلعوْ الحياة. حيت اللّٰه هُوَ الّي وجّدنا نْهَد الشي وْكيعطينا الضمانة د الروح ديالو. إدَن، حنايَ دائمًا متيقّنين، عارفين بلّي ما دُمْنا عايشين في هَد الجسد غادي نكونو بعادين على الرَّبّ. حيت بالإيمان كنتمشّاو، ماشي بالشوف. وَلكن كنتشجّعو وْكنفضّلو نكونو بعادين على الجسد وْحاضرين مع الرَّبّ. على ديك الشي كنحاولو نرضيو اللّٰه، واخّا بعادين أَوْلا حاضرين. حيت لازم نحَضرو كاملين قدّام المحكمة د المسيح باش كُل واحد يدّي الّي كيستحقّ ملّي كان في الجسد على حسب الّي عمل، الخير أَوْلا الشَّرّ. حيت كنعرفو الخوف ديال الرَّبّ، كنحاولو نقنعو الناس. وَلكن حنايَ واضحين قدّام اللّٰه وْكنتمنّى نكونو واضحين قدّام الضمير ديالكُم حتّى هُوَ. ما كنشكرو شي راسنا قدّامكُم، وَلكن كنعطيوكُم الفُرْصة باش تفْتَخرو بِنا باش يكون عندكُم الجواب نْهَدوك الّي كيفْتَخرو بالمظاهر وْماشي بالقلب. وِادا ظهَر لكُم بلّي حنايَ حُمَق، راه هُوَ ناللّٰه. وِادا ظهَر لكُم بلّي حنايَ معقّلين، راه هَد الشي من جهتكُم. حيت محبّة المسيح كتحصرنا، مقْتَنعين بلّي إدا واحد مات على الناس كاملين، راه الناس كاملين ماتو. والمسيح مات على الناس كاملين باش الّي عايشين ما يبقاو شي يعيشو نْراسوم، وَلكن نْهَداك الّي مات على مسبّتوم وْتّبعت حي. على ديك الشي حنايَ من دابا نْفوق ما كنعرفو حتّى واحد على حسب الجسد، واخّا عرفْنا المسيح على حسب الجسد، وَلكن دابا ما كنعرفوه شي هَيداك. حيت إدا كان شي واحد في المسيح، هُوَ خليقة جديدة. الأُمور القديمة فاتت وْكُل شي رجع جديد. وْهَد الشي كامل من عند اللّٰه الّي صالحنا مع نفسو بالمسيح وْعْطانا خدمة المصالحة، زعمة، بلّي اللّٰه كان في المسيح كيصالح الدنيا مع نفسو، وْما كيحسب شي الدنوب ديالوم ضدّوم، وْكلّفنا بْكلمة المصالحة. على ديك الشي حنايَ السُّفَراء د المسيح، فحال إدا اللّٰه كيرغب بالواسطة ديالنا: "بِاسم يَسوع المسيح كنطلبو منكُم تصالحو مع اللّٰه." حيت هَداك الّي ما ارتَكب حتّى شي دنب، جعلوْ اللّٰه دنب بْسبابنا باش نرجعو التقوى د اللّٰه فيه. وْحنايَ، فحال الشُّرَكاء د الله في الخدمة، كنشجّعوكُم ما تقبلو شي نعْمة اللّٰه بلا فايدة. حيت هُوَ كيقول: "في الوقت المناسب سمعْتك، وْفي النهار د النجا عاونْتك." هَدا هُوَ الوقت المناسب وْهَدا هُوَ النهار د النجا. حنايَ ما كنكونو شي سبب العترة نْحتّى شي واحد باش ما يكون شي لَوم في الخدمة ديالنا، وَلكن في كُل شي كنقدّمو راسنا فحال شي خدّامة د اللّٰه بْبزّاف د الصبر في الضيق، في الاحْتياجات، في الشدّات، في الضربات، في السجون، في الفوضى، في التامارة، في السهر، في الصيام، في الصفاوة، في المعْرفة، في طول الصبر، في اللطف، في الروح القُدُس، في المحبّة بلا نِفاق، في كلام الحقّ، في قوّة اللّٰه بالسناح د التقوى على الّيمين وْعلى الشمال، بالكرامة وْبالحݣرة، بْشهرة قبيحة وْشهرة مزيانة، فحال شي خدّاعين وْحنايَ صادقين، فحال شي مجهولين وْحنايَ معروفين، فحال شي ميّتين وْحنايَ حيّين، فحال شي مضروبين وْحنايَ ماشي مقتولين، فحال شي حزنانين وْحنايَ دائمًا فرحانين، فحال شي فُقراء وْحنايَ كنردّو بزّاف د الناس أَغْنياء، فحال إدا ما عندنا والو وْحنايَ كنملكو كُل شي. آ الكورِنثيّـين، الدقوم ديالنا هدَر معكُم بالصراحة والقلب ديالنا مفتوح لكُم مية في المية. حنايَ ما قطعْنا شي الحنان ديالنا عليكُم، وَلكن أنتُمَ كتبخلو علينا بالحنان ديالكُم. أنا كنهدَر معكُم فحال الّي كنهدَر مع أُوْلادي: عاملونا فحال ما كنعاملوكُم، وْفتحو قلبكُم حتّى أنتُمَ. ما تتّجمعو شي في نير واحد مع الّي ماشي مؤمنين، حيت شنّي هي الشركة بين التقوى والشَّرّ؟ وْشنّي هي العلاقة بين الضَّو والظلام؟ وْشنّو هُوَ الاتّفاق بين المسيح والشيطان؟ وْشنّي هي الشركة بين المؤمن مع الّي ماشي مؤمن؟ وْشنّي هي الشبيهة بين بيت العبادة د اللّٰه والأصْنام؟ حيت حنايَ بيت العبادة د اللّٰه الحيّ، كيفْما قال اللّٰه: "أنا غادي نسكن فيهُم وْغادي نتمشّى فوسطوم وْنكون الإلَه ديالوم وْهُمَ يكونو شعبي." على ديك الشي كيقول الرَّبّ: "خرجو من وَسطوم وْبعّدو مِنّوم، وْما تحاديو شي النجاسة وانا غادي نرحّب بِكُم، وْنكون أنا باباكُم وانتُمَ تكونو لي أُوْلاد وْبنات، كيقول الرَّبّ القادر على كُل شي." حيت عندنا هَد الوعود، آ العزازين، خصْنا نطهّرو راسنا من كُل شي الّي كيوسّخ الجسد والروح، باش نكمّلو القداسة في خوف اللّٰه. عملو نّا الموطَع في قلبكُم. ما ظلمْنا حتّى شي واحد، ما فسّدْنا حتّى شي واحد، وْما طمعْنا في حتّى شي واحد. ما كنقول شي هَد الشي باش نحكم عليكُم، حيت عاد قُلْتْ لكُم بلّي أنتُمَ في قلبنا باش نموتو وْنعيشو مع بعض. عندي تيقة كبيرة فيكُم، أنا كنفْتَخر بِكُم بزّاف، أنا معمّر بالتّعْزيّة والفرْحة ديالي فايطة فوسط المشاكل ديالنا. حيت ملّي وصلْنا نْمَكدونيّة، الجسد ديالنا ما ارتاح شي، وَلكن كُنّا مضيّقين من كُل جهة: من برّا المدابزات، من الداخل الخوف. وَلكن اللّٰه، الّي كيعزّي نِلّي قطعو الياس، عزّانا بالمجي د تيطُس، وْماشي بالمجي ديالو وْكان، وَلكن حتّى بالتعْزيّة الّي عْطيتوها لو. تكلّم على الاشْتياق ديالكُم، البكا والاهْتمام العميق الّي عندكُم من جهتي، وْمن هَد الشي كامل تعمّرْتْ بالفرحة كتَر. حيت واخّا حزّنْتْكُم بالبراة ديالي، ما ندمْتْ شي. واخّا في ديك الوقت ندمْتْ، حيت فطنْتْ بلّي البراة ديالي حزّنَتْكُم في شي مدّة. دابا كنفرح، ماشي حيتاش حزنْتو، وَلكن حيت الحزن ديالكُم ادّاكُم نالتوبة، حيت أنتُمَ حزنْتو فحال ما بغى اللّٰه وْحنايَ ما خسّرْناكُم في والو. حيت الحزن الّي ماجي من عند اللّٰه كيدّي نالتوبة الّي كتدّي نالنجا، بلا ندامة، وَلكن الحزن الّي ماجي من الدنيا كيدّي نالموت. شوفو النتيجة د الحزن ديالكُم الّي ماجي من عند اللّٰه، شحال اجْتَهدْتو، شحال اعْتَدَرْتو، شحال سخطْتو، شحال خافْتو، شحال اشتَقْتو، شحال جاهدْتو، شحال تبرّرْتو! في كُل شي بيّنْتو راسكُم أَبْرياء في هَد القضيّة. على ديك الشي، واخّا كتبْتْ لكُم، ما كان شي بْسباب الظالم ولا بْسباب المظلوم، وَلكن باش يظهَر لكُم قدّام اللّٰه الاهتمام ديالكُم من جهتنا. بْسباب هَد الشي تعزّينا، وْفرحْنا بزّاف ملّي شفْنا الفرْحة د تيطُس، حيت روحو ارتاحَتْ بِكُم كاملين. حيت قُلْتْ لو شحال كنفْتَخر بِكُم، وْما حشّمْتوني شي. بالعكس، فحال كُل شي الّي قُلْنا لكُم هُوَ حقيقي، هَيداك حتّى الافتخار بِكُم قدّام تيطُس هُوَ حقيقي. والمحبّة ديالو لِلكُم كتكتر ملّي كيتفكّر الطاعة ديالكُم كاملين وْكيفاش اسْتَقبلْتوه بالخوف والرعدة. وْدابا أنا فرحان، حيت عندي التيقة فيكُم في كُل شي. آ الخوت، بغيتْ نعرّفكُم بْنعْمة اللّٰه الّي اتّعطات نالكنائس د مَكدونيّة. فوسط المحاين الشديدة، فاطَت الفرْحة ديالوم. وْفوسط الفقر ديالوم الشديد، فاطت السخاوة ديالوم الكبيرة. وانا شاهد بلّي هُمَ عْطاو بْسخاوة بْخاطروم على حسب القدرة ديالوم وْكتَر من القدرة ديالوم ڭاع. رغبونا بزّاف باش نمَنحوهُم الامتياز باش يشْتَركو في هَد المساعدة نالقدّيسين. وْعملو كتَر من ديك الشي الّي كُنّا كنتسنّاو، حيت في الُوّل عْطاو نَفسوم نالرَّبّ وْمن بعد لِنّا حسب إرادة اللّٰه. وْعلى ديك الشي رغبْنا تيطُس، فحال ما بدا، يكمّل هَد الخدمة د النعْمة فيكُم. وَلكن، فحال ما كَتْكترو في كُل شي، في الإيمان، في الكلام، في المعْرفة، في كُل الاجتهاد وْفي المحبّة ديالكُم لِنّا، كترو في هَد النعْمة حتّى هِيَ. ما كنآمركُم شي بْهَد الكلام، وَلكن بواسطة الاجتهاد د يَخرين، بغيتْ نجرّب الصراحة د المحبّة ديالكُم. حيت كتعرفو نعْمة رَبّنا يَسوع المسيح بلّي، واخّا كان غني، بْسبابكُم رجع فقير باش بواسطة الفقر ديالو أنتُمَ ترجعو أَغْنياء. وْفي هَد القضيّة غادي نْنصحكُم نالمصْلحة ديالكُم، حيت العام الّي فات أنتُمَ كُنْتو الُوّليين، ماشي غير في العطاء، وَلكن حتّى في الرغبة باش تعملوه. دابا كمّلو هَد العمل، على حسب القدرة ديالكُم، باش يكون الكمال د العمل قدّ الرغبة الّي كانت عندكُم. حيت إدا شي واحد كيعطي بالنيّة الخالصة، هَد الشي الّي كيعطي كيكون مقبول على حسب الّي عندو، ماشي على حسب الّي ما عندو شي. كنقول هَد الشي ماشي باش يَخرين يكونو مرتاحين ما دُمْتو أنتُمَ مضيّقين، وَلكن باش تكون المساواة بيناتكُم. في الوقت الحالي، الكترة ديالكُم غادي تسدّ الاحْتياج ديالوم، وْفي وقت يَخُر، الكترة ديالوم غادي تسدّ الاحْتياج ديالكُم. هَيدا غادي تكون المساواة، فحال ما هُوَ مكتوب: "الّي جمَع بزّاف، ما شاط لو شي، والّي جمَع قليل، ما كان شي محْتاج." الحمد للّه حيت هُوَ جعل في القلب د تيطُس نفس الاهتمام الّي أنا عندي من جهتكُم، حيت هُوَ ما قبل شي طلباتنا وْكان، وَلكن بالاهتمام ديالو مشى نْعندكُم بْخاطرو. وْصيفطْنا معاه الأخ الّي كتشكروْ الكنائس كاملة بْسباب الخدمة ديالو في الإنجيل. وْماشي غير هَد الشي، وَلكن الكنائس اختاروه باش يرافقنا وْندّيو هَد العطيّة الّي حنايَ مكلّفين بِها باش نمجّدو الرَّبّ وْباش النيّة ديالنا تظهر. حيت بغينا نجتَنبو أَي تُهمة د الناس على كيفاش سيّرنا هَد العطيّة الكريمة. حيت كنحاولو نعملو الّي هُوَ صالح، ماشي غير قدّام الرَّبّ، وَلكن حتّى قدّام الناس. وْصيفطْنا معهُم خانا، الّي جرّبْنا الاهتمام ديالو بزّاف د المرّات في بزّاف د الأُمور، وْدابا كتَر بْسباب التيقة الكبيرة الّي عندو فيكُم. وْمن جهة تيطُس، هُوَ الرفيق ديالي والشريك في الخدمة بيناتكُم، وْمن جهة خوتنا، هُمَ المرسولين د الكنائس وْبِهُم كيتمجّد المسيح. على ديك الشي ورّيو لوم قدّام الكنائس الدليل د المحبّة ديالكُم وْد الافتخار ديالنا بِكُم. ما خصْني شي نكتب لكُم على المساعدة نالقدّيسين، حيت أنا كنعرف الاستعداد الّي عندكُم وْكنفْتَخر بِه من جهتكُم قدّام المَكْدونيّين، بلّي في أَخائيّة كانو مستعدّين من العام الّي فات. وْبالنشاط ديالكُم تشجّعو بزّاف مِنّوم. وَلكن صيفطْتْ الخوت باش الافْتخار ديالنا من جهتكُم ما يكون شي باطل في هَد الأُمور باش، كيفْما قُلْتْ لكُم، تكونو مستعدّين. وِادا جاو معيَ بعض المَكْدونيّين وْجبروكُم ماشي مستعدّين، حنايَ غادي نتحشّمو على التيقة ديالنا فيكُم، وْحتّى أنتُمَ غَد تتحشّمو معنا. على ديك الشي كان ضروري نرغب الخوت باش يسبقو نْعندكُم ويوجّدو البركة الكريمة ديالكُم الّي وعَدْتو بِها، باش تكون موجّدة فحال عطيّة كريمة وْماشي فحال إدا كُنْتو بُخَلاء. وْكنقول هَد الشي: الّي كيزرع قليل غادي يحصد قليل، والّي كيزرع بزّاف غادي يحصد بزّاف. خلّي كُل واحد يعطي كيفْما نوى في القلب ديالو، ماشي وْهُوَ نادم ولا بزّز منّو، حيت اللّٰه كيحبّ الّي كيعطي وْهُوَ فرحان. واللّٰه قادر يزيد لكُم كُل نعْمة باش يكون عندكُم في كُل الظروف كُل شي الّي كتحْتاجو، باش تفيطو في كُل عمل صالح، فحال ما هُوَ مكتوب: "فرّق الخير ديالو وْعْطى نالمساكن. التقوى ديالو غادي تبقا دائمًا." واللّٰه، الّي كيعطي الزرّيعة نِلّي كيزرع والخبز نِلّي كياكل، هُوَ غادي يكتّر الزرع ديالكُم ويزيد الغلّة د التقوى ديالكُم، وْغَد ترجعو أغْنياء في كُل شي باش تكونو كُرَماء، وْبالواسطة ديالنا غَد تكونو سبب د الشكر ناللّٰه. حيت هَد المساعدة، الّي هي واحد الخدمة د العبادة، ما كتسدّ شي الاحْتياج د القدّيسين وْكان، وَلكن كيفيط بِها الشكر ناللّٰه من بزّاف د الناس. حيت بْسباب الدليل د هَد الخدمة، غادي يمجّدو اللّٰه على الطاعة ديالكُم نالإنجيل د المسيح الّي كتشهد لِلكُم وْعلى السخاوة د العطيّة ديالكُم لِلوم وْنالناس كاملين. وْبالصلاوات ديالوم من جهتكُم، غادي يتوحّشوكُم بْسباب النعْمة العظيمة د اللّٰه فيكُم. الحمد للّه على الهديّة ديالو الّي فوق كُل وصف. أنا بولُس كنطلب منكُم باللطف والحنان د المسيح (أنا متواضع ملّي كنكون حاضر بيناتكُم، وَلكن شجاع معكُم ملّي كنكون غايب)، كنطلب منكُم، ملّي نجي نْعندكُم، ما تجعلوني شي نكون شجاع معكُم، فحال ما قرّرْتْ نكون بالجرأة مع الّي كيفكّرو بلّي كنعيشو بْحسب الجسد. حيت واخّا كنتمشّاو في الجسد، ما كنحاربو شي على حسب الجسد، حيت السناح د الحرب ديالنا ماشي جسدي، وَلكن قوي باللّٰه على تخريب الحُصون. كنهدّمو الأفْكار الخاوية وْكُل حاجة الّي كَتْـتعلّى ضدّ معْرفة اللّٰه وْكنفرضو على كُل فكرة تكون في الطاعة نالمسيح. وْحنايَ مستعدّين باش نعاقبو على كُل معْصيّة على بَيدمن الطاعة ديالكُم تكون كاملة. كتشوفو الأُمور على حسب المظاهر. إدا شي واحد مقْتَنع بْنفسو بلّي هُوَ ديال المسيح، يتفكّر بلّي، كيفْما هُوَ ديال المسيح، حتّى حنايَ راه ديالو. حيت واخّا كنفْتَخر كتَر بالسلْطة الّي عْطاها نّا الرَّبّ نالبُنْيان ديالكُم، ماشي نالتخريب ديالكُم، ما غادي شي نحشم، باش ما نظهَر شي فحال إدا كنخوّفكُم بالبراوات. حيت البعض كيقولو: "البراوات ديالو قاصحة وْقويّة وأمّا الشخصيّة ديالو ضعيفة والكلام ديالو محڭور." الناس الّي فحال هَدو واجب عليهُم يفهمو بلّي، فحال الكلام ديالنا بالبراوات وْحنايَ غايـبـين، هَيداك الأفعال ديالنا ملّي نكونو حاضرين. حيت ما كَنْـزعمو شي نساويو أَوْلا نقارنو راسنا مع البعض الّي كيشكرو راسوم، حيت ملّي كيقيّمو نفسوم بْنَفسوم وْكيقارنو راسوم مع راسوم، راهُم ما كيفهمو والو. وَلكن حنايَ ما غادي شي نفْتَخرو كتَر من الواجب، وَلكن حسب القياس د القانون الّي قَسموْ نّا اللّٰه، الّي بِه وصَلْنا نْعندكُم. حيت ما بالغْنا شي، فحال إدا ما وصَلْنا شي نْعندكُم. حيت وصَلْنا نْعندكُم حتّى أنتُمَ بالإنجيل د المسيح. ما كنفْتَخرو شي بلا قياس في الخدمة د الناس يَخرين. بالعكس، كنتمنّاو بواسطة التقدُّم د الإيمان ديالكُم بلّي حنايَ غادي نتعظّمو كُل مرّة كتَر بيناتكُم، في داخل الميدان د الخدمة ديالنا، باش نبشّرو بالإنجيل في المناطق ديالكُم لْهيه، بلا ما نفْتَخرو بالخدمة الّي عملوها الناس يَخرين من قبل. وَلكن "الّي كيفْتَخر، خصّو يفْتَخر بالرَّبّ،" حيت ماشي الّي كيشكر راسو هُوَ مقبول، وَلكن الّي كيشكروْ الرَّبّ. مصاب تتحمّلو حُمقي شويّش! نعم، صبرو معيَ. وانا كنغير عليكُم بواحد الغيرة الّي كتجي من عند اللّٰه، حيت خطبْتْكُم نْرَجل واحد، هُوَ المسيح، باش نقدّمكُم لِلو فحال واحد العزبة طاهرة. وَلكن كنخاف بلّي، فحال ما خدعَتْ الحيّة حوّاء بالحيلة ديالاْ، هَيداك غادي يفسد العقل ديالكُم وْتخسرو الصراحة والصفاوة د المسيح. حيت إدا جا شي واحد كيبشّركُم بْشي يَسوع يَخُر من غير الّي بشّرْنا بِه، أَوْلا إدا ادّيتو شي روح يَخرى من غير الروح القُدُس الّي ادّيتوه، أَوْلا شي إنجيل يَخُر من غير هَداك الّي قبطْتوه منّا، راه كتصبرو مزيان. وْكنظنّ بلّي أنا ماشي أقلّ من ديك "الرُّسُل الكبارين" في حتّى حاجة. حيت واخّا أنا ما كنهدَر شي بْفصاحة من جهة الكلام، عندي المعْرفة الّي ظهّرْناها لِلكُم في كُل شي وْفي كُل الظروف. وَقيلا خطيتْ ملّي تواضعْتْ أنا باش نعلّيكُم أنتُمَ، حيت بشّرْتْكُم بالإنجيل د اللّٰه بلا شي؟ نهبْتْ من كنائس يَخرين وْقبطْتْ المال مِنّوم باش نخدمكُم أنتُمَ. حيت ملّي كُنْتْ حاضر فوسطكُم وْكُنْتْ محْتاج، ما تقّلْتْ على حتّى واحد منكُم، حيت الخوت الّي جاو من مَكدونيّة سدّو الاحْتياج ديالي، وْفي كُل شي حضيتْ راسي باش ما نتقّل شي عليكُم، وْباقي غادي نحضي راسي. بْحقّ المسيح الّي فيَّ، حتّى واحد ما غادي يحيّد منّي هَد الافْتخار في المناطق د أَخائيّة. علاش؟ واش حيت ما كنعزّْكُم شي؟ اللّٰه كيعرف. وَلكن ديك الشي الّي كنعملوْ غادي نزيد نعملوْ باش ما نعطي شي الفُرْصة نْهَدوك الّي بغاوها باش يكونو حتّى هُمَ فحالنا في الأُمور الّي كيفْتَخرو بِها. حيت هَدوك رُسُل كدّابين، وْخدّامة خدّاعين الّي كيعملو راسوم فحال إدا كانو الرُّسُل د المسيح. وْماشي عجب، حيت حتّى الشيطان بْنفسو كيبدّل الصِّفة ديالو باش يظهَر فحال واحد الملاك د النور! إدَن، ماشي شي حاجة غريبة إدا الخدّامة ديالو حتّى هُمَ كيبدّلو الصِّفة ديالوم فحال الخدّامة د التقوى، الّي النهاية ديالوم غادي تكون على حسب الفعايل ديالوم. كنقول مرّة يَخرى، ما يظنّ حتّى واحد منكُم بلّي أنا حماق. وإلّا، قبلوني فحال شي حماق، باش حتّى أنا نفْتَخر شويّش. الّي كنقول دابا، أنا ما كنقولوْ شي بْحسب الرَّبّ، وَلكن كنقولوْ فحال شي حماق الّي كيعجبوْ يفْتَخر. حيت بزّاف كيفْتَخرو حسب الجسد، هَيداك غادي نفْتَخر حتّى أنا. حيت أنتُمَ كَتْـتحمّلو الجاهلين وْأنتُمَ فرحانين، حيت أنتُمَ معقّلين. حيت إدا شي واحد ردّكُم عبيد كَتْـتحمّلوه، إدا شي واحد كيستغلّكُم، إدا شي واحد كيدّي لكُم ديالكُم، إدا شي واحد كيعلّي راسو، إدا شي واحد كيضربكُم على وجَهْكُم. على الحشومة ديالي كنعْتَبر بلّي كُنّا ضعافين بزّاف بالمقارنة! إدا كان شي واحد شجاع في شي حاجة، حتّى يانا نزعم نعمل فحالو (كنتكلّم فحال شي إنسان حماق). واش هُمَ عبرانيّين؟ حتّى أنا. واش هُمَ إسرائليين؟ حتّى أنا. واش هُمَ نسل إبراهيم؟ حتّى أنا. واش هُمَ خدّامة د المسيح؟ (كنتكلّم فحال إدا كُنْتْ حماق) أنا كتَر مِنّوم. في التامارة أنا كتَر، في الجلدات بلا عداد، في السجون أنا كتَر، في خطر الموت بزّاف د المرّات. خمسة د المرّات اليهود عطاوني أربعين جلدة من غير واحدة. تلاتة د المرّات الناس عصّاوني، واحد المرّة رجموني، تلاتة د المرّات تهرّس بيَّ الباركو، ݣوّزْتْ ليلة وْنهار في الغُرق د البحَر. سافرْتْ شحال من مرّة. كُنْتْ في الخطر د الواد، في الخطر د السرّاق، في الخطر من الأمّة ديالي، في الخطر من الوَتَنيّـين، في الخطر في المدينة، في الخطر في الخلا، في الخطر في البحَر، في الخطر من الخوت الكدّابين، في الخدمة والتعب، في السهير بزّاف، في الجّوع والعطش، في الصيام بزّاف، في البرد والعرى. وْزيد على هَد الأُمور الّي كيتعرّمو عليَّ كُل نهار، الاهْتمام بالكنائس كاملين. شكون الّي ضعيف وانا ما نضعف شي معاه؟ شكون الّي تعتّر وانا ما نسخط شي؟ إدا كان واجب الحيالة، أنا غادي نفْتَخر بالضُّعف ديالي. اللّٰه، الآب د رَبّنا يَسوع المسيح، الّي هُوَ مبارك إلى الأبد، كيعرف بلّي أنا ما كنكدب شي. في دِمَشْق الوالي الّي تحت السلْطة د المَلِك حارِث كان كيراقب المدينة د الدِمَشْقيّـين باش يشبّرني، وَلكن الخوت نزّلوني في واحد القُفّة من واحد الطاقة في السور وْهربْتْ من اليَدّين ديالو. إدا كان لا بدّ نفْتَخر، واخّا ما نربح والو منّو، غادي نجي نالرؤيات د الرَّبّ والأُمور الّي بيّناْ لي. كنعرف واحد الرَّجل في المسيح الّي اتّخطف نالسما التالتة هَدي أربعطاشر عام، إدا في الجسد، ما كنعرف شي، أَوْلا خارج الجسد، ما كنعرف شي، اللّٰهُ أعلم. وْكنعرف بلّي هَد الرَّجل، إدا في الجسد أَوْلا بلا الجسد، ما كنعرف شي، اللّٰهُ أعلم، اتّخطف نالفِردَوس وْتمّاك سمع شي كلام الّي ما يقدر حتّى شي إنسان ينطق بِه وْممنوع عليه يعبّر بِه. بْهَد الرَّجل غادي نفْتَخر. وَلكن بالنسبة لِلي أنا، ما غادي شي نفْتَخر إلّا بالضُّعف ديالي. وَلكن إدا كُنْتْ باغي نفْتَخر بْراسي، ما غادي شي نكون حماق، حيت كنقول الحقّ. وَلكن ما كنعمل شي هَيداك باش ما يحسبني حتّى واحد فوق ديك الشي الّي كيشوف فيَّ أَولا كيسمع منّي. وْباش ما نتكبّر شي بالعظمة د التبْـيـينات، اتّعطات لي واحد الشوكة في الجسد، فحال شي مرسول من الشيطان، وْكيعدّبني باش ما نتكبّر شي. وْرغبْتْ الرَّبّ تلاتة د المرّات باش يحيّداْ منّي. وْقال لي: "تكفيك النعْمة ديالي، حيت قوّتي كتـتكمّل في الضُّعف." على ديك الشي أنا بْكُل فرح غادي نفْتَخر بْضُعفي باش تسكن فيَّ قوّة المسيح. وْعلى ديك الشي كنفرح بالضعف والتزبـيلات والاحْتياجات والتمرْميدات والمشاكل في سبيل المسيح، حيت ملّي كنكون ضعيف، كنكون قوي. أنا رجعْتْ حماق. أنتُمَ فرضْتوه عليَّ، وْكان واجب عليكُم تشكروني! حيت أنا ماشي أقلّ من هَدوك "الرُّسُل الكبارين،" واخّا أنا ما كنسوى والو. العلامات بلّي أنا الرسول في الحقيقة تْعملَتْ فوسطكُم بالصبر وْبالأمارات والعجايب والمُعْجزات. حيت فشْمِن حاجة تعاملْتْ معكُم أقلّ من الكنائس يَخرين؟ واش غير حيت ما تقّلْتْ شي عليكُم؟ سمحو لي على هَد الظلم! هَدي هي المرّة التالتة وانا موجّد باش نجي نْعندكُم. وْما غادي شي نتقّل عليكُم، حيت ما بغيتْ شي ديك الشي الّي عندكُم، وَلكن بغيتْكُم أنتُمَ! حيت ما خصّ شي الولاد يوفّرو نالوالِدين، وَلكن الوالِدين نالولاد. وانا بْكُل فرح كنعطي كُل ما عندي وْغادي نعطي حتّى نفسي من جهة نفوسكُم. وِادا كُنْتْ كنعزّْكُم بزّاف، واش غَد تعزّوني أقلّ؟ نعم، د بالصّحّ أنا ما تقّلْتْ شي عليكُم. وَلكن وَقيلا أنا مطوّر وْغشّيتْكُم بالحيلة؟ واش طمعْتْ فيكُم على يَد شي واحد من هَدوك الّي صيفطْتوم نْعندكُم؟ رغبْتْ تيطُس باش يمشي نْعندكُم وْصيفطْتْ معاه واحد الأخ. واش طمَع فيكُم تيطُس؟ واش ما تصرّفْنا شي في نفس الروح وْبْنفس الطريقة؟ واش كتظنّو حتّى نْدابا بلّي كنبرّيو راسنا قدّامكُم؟ حنايَ كنتكلّمو قدّام اللّٰه في المسيح، وْهَد الشي كامل، آ العزازين، بْسباب البُنْيان ديالكُم. حيت ملّي نجي، كنخاف ما نجبركُم شي كيفْما بغيتْ وْما تجبروني شي كيفْما بغيتو. وْكنخاف يكون بيناتكُم المدابزات والحسد والسخطات والخلافات والوشايات والنميمات والتزبـيلات والتشويشات. كنخاف، ملّي نطلّل عليكُم مرّة يَخرى، بلّي إلَهي غادي يدلّْني قدّامكُم وْغادي نبكي على بزّاف من هَدوك الّي دنبو شحال هَدي وْباقي ما تابو شي من النجاسة والزنا والفسق الّي عملوه. هَدي هي المرّة التالتة الّي كنزوركُم فيها. "خصْكُم تـتبّتو كُل كلمة على الدقوم د جوج أَوْلا تلاتة د الشهود." ملّي كُنْتْ معكُم المرّة التانية، نبّهْتْكُم، وْدابا أنا ماشي حاضر وْكنعاود لكُم هَد الشي: ملّي نجي نْعندكُم، ما غادي شي يعزّو عليَّ الناس الّي دنبو ولا حتّى شي واحد يَخُر. حيت أنتُمَ كتبقّشو على واحد الدليل بلّي المسيح كيهدَر بيَّ. هُوَ ماشي ضعيف في التعامُل ديالو معكُم، وَلكن هُوَ قوي فيكُم. حيت د بالصّح تصْلب بْضُعف، وَلكن هُوَ دابا حيّ بْقوّة اللّٰه. إدَن، حتّى حنايَ ضعافين فيه، وَلكن بْقوّة اللّٰه من جهتكُم غادي نحياو معاه. جرّبو راسكُم واش أنتُمَ في الإيمان، وامْتَحنو راسكُم. واش ما كتعرفو شي بلّي يَسوع المسيح فيكُم؟ يعني، إدا ما فشلْتو شي في الامتحان! كنتمنّى باش تعرفو بلّي حنايَ ماشي فاشلين. وْكنطلبو اللّٰه ما تعملو حتّى شي حاجة قبيحة، ماشي باش نظهرو ناجحين حنايَ، وَلكن باش تعملو أنتُمَ الخير، واخّا كيظهَر بلّي حنايَ فاشلين. حيت ما نقدرو نعملو والو ضدّ الحقّ، وَلكن كنخدمو من جهة الحقّ. على هَد الشي كنفرحو ملّي كنكونو ضعافين وانتُمَ قويّين. وْهَد الشي كنطلبو: باش اللّٰه يردّكُم كاملين. وْعلى ديك الشي كنكتب لكُم هَد الأُمور، وانا غايب، باش ما نسْتَعمل شي معكُم القصوحيّة ملّي نكون حاضر، على حسب السلْطة الّي عْطاها لي الرَّبّ نالبُنْيان، ماشي نالهلاك. وْفي الآخر، آ الخوت، فرحو، فتّشو على الكمال ديالكُم، عزّيو بعضيّاتكُم، كونو في رأي واحد، وْعيشو في سلام، وإلَه المحبّة والسلام غادي يكون معكُم. سلّمو على بعضيّاتكُم بْقُبلة مقدّسة. كيسلّمو عليكُم القدّيسين كاملين. نعْمة رَبّنا يَسوع المسيح وْمحبّة اللّٰه وْعِشْرة الروح القُدُس يكونو معكُم كاملين. بولُس رسول، الّي ماشي بْغرض الناس وْماشي بالإنسان، وَلكن بيَسوع المسيح واللّٰه الآب الّي بعتوْ من بين الميّتين وْمن الخوت كاملين الّي هُمَ معيَ، نالكنائس د غَلاطيّة، النعْمة لكُم والسلام من عند اللّٰه الآب وْمن الرَّبّ يَسوع المسيح الّي عْطى نفسو من جهة الدنوب ديالنا باش ينجّينا من الدنيا الحاضرة القبيحة على حسب إرادة الإلَه والآب ديالنا الّي عندو المجد على الدوام دائمًا. آمين. أنا كنتعجّب بلّي بعّدْتو دغيا من هَداك الّي عَيّط لكُم بنعْمة المسيح باش تـتبعو واحد الإنجيل مخْتَلف. ماشي حيت كاين إنجيل يَخُر، وَلكن كاينين البعض الّي كيشوّشوكُم وْبغاو يفسّدو الإنجيل د المسيح. وَلكن إدا بشّرْناكُم حتّى حنايَ أَوْلا واحد الملاك من السما بْشي إنجيل يَخُر الّي ما بشّرْناكُم شي بِه، يكون ملْعون. كيفْما سبق وْقُلْنا، هَيدا كنقول دابا عاود، إدا شي واحد كيبشّركُم بْشي إنجيل مخْتَلف من غير هَداك الّي قبلْتوه، يكون ملْعون. واش دابا كنبقّش على الفضل د الناس أَوْلا ديال اللّٰه؟ أَوْلا كنحاول نرضي الناس؟ حيت كَكُنْتْ باقي كنرضي الناس، ما غادي شي نكون عبد المسيح. بغيتْكُم تعرفو، آ الخوت، بلّي الإنجيل الّي بشّرْتْ بِه ماشي من عند البشر، حيت ما قبطْتوْ شي وْما تعلّمْتوْ شي من حتّى شي إنسان، وَلكن يَسوع المسيح ظهّروْ لي. حيت أنتُمَ سمعْتو بالتصرُّف ديالي ملّي كُنْتْ داخل الديانة اليَهوديّة، بلّي كُنْتْ كَنْتعدّى على الكنيسة د اللّٰه بزّاف وْكنحاول نهلكاْ، وْكُنْتْ كَنْتقدّم في الديانة اليَهوديّة كتَر من قراني، وْكانتْ عندي الغيرة كتَر مِنّوم من جهة التقاليد د الجدود. وَلكن اللّٰه، الّي اخْتارني من الكرش د يمّا وْعَيّط عليَّ بالنعْمة ديالو، ملّي ظهَر لو مزيان، بيّن اِبنو فيَّ باش نبشّر بِه بين الوَتَنيّين. في ديك الساعة ما تشاورْتْ مع حتّى شي واحد وْما طلعْتْ شي نالقُدس نْعند الرُّسُل الّي كانو قبل منّي، وَلكن مشيتْ نْبلاد العرب وْعاود رجعْتْ نْدِمَشْق. وْمن بعد تلت سنين، طلعْتْ نالقُدس باش نتلاقى مع بُطْرُس وْبقيتْ معاه خَمْسطاشر يوم. وَلكن ما شفْتْ حتّى شي واحد يَخُر من الرُّسُل، من غير يَعْقوب خاه د الرَّبّ. وْديك الشي الّي كنكتب لكُم، قدّام اللّٰه ما كنكدب شي فيه. وْمن بعد مشيتْ نالمناطق د سوريّة وْكيليكيّة، وْما كُنْتْ شي معروف بالوجَه عند الكنائس د اليَهوديّة الّي في المسيح. غير كانو كيسمعو بلّي هَداك الّي كان في وقت يَخُر كيمرْمدنا، كيبشّر دابا بالإيمان الّي كان كيهلكوْ من قبل، وْكانو كيمجّدو اللّٰه بْسبابي. وْمن بعد أربعطاشر عام، طلعْتْ عاود نالقُدس مع بَرنابا وادّيتْ معيَ حتّى تيطُس. وْطلعْتْ لِلاْ وانا كنطيع نواحد الرؤيا، وْمشيتْ مع الكبارين د المؤمنين بوحدنا، وْشرحْتْ لوم الإنجيل الّي كنبشّر بِه بين الوَتَنيّين باش نتأكّد بلّي ما كنجري شي أَوْلا ما جريتْ شي باطل. وْحتّى تيطُس الّي كان معيَ، والّي هُوَ يوناني، ما تلزّم شي عليه باش يتطهّر. وَلكن بْسباب الخوت الكدّابين الّي تدخّلو بيناتنا مخبّعين باش يتجسّسو على الحُرّية ديالنا الّي عندنا في المسيح ويردّونا نالعبوديّة، ما تسلّمْنا شي لِلوم بالطاعة حتّى ساعة باش يبقا عندكُم الحقّ د الإنجيل. وأمّا هَدوك الّي محْسوبـين بلّي هُمَ شي حاجة (عليَّ ماشي مُهمّ كيفْما كانو، حيت اللّٰه ما كيحكم شي على المظاهر)، ديك الشخصيات ما فرضو عليَّ حتّى شي حاجة. بالعكس، ملّي اعْتَرفو بلّي توصّيتْ بالإنجيل نالناس الّي ماشي مطهّرين، فحال ما توصّى بُطْرُس بالإنجيل ناليهود، (حيت الّي جعل بُطْرُس رسول د اليهود، جعلني أنا رسول نالوَتَنيّين)، وْملّي اعْتَرف يَعْقوب وْصَفا وْيوحَنّا الّي هُمَ محْسوبـين فحال الرّكايز د الكنيسة بالنعْمة الّي اتّعطات لِلي، مدّو نّا، أنا وْبَرنابا، يَدّوم د الّيمين فحال علامة د الشَّرِكة، باش نمشيو حنايَ نْعند الوَتَنيين وْهُمَ نْعند اليهود. غير طلبو منّا نتفكّرو المساكن، وْهَد الشي حاولْتْ نعملوْ بالجُّهد ديالي. وَلكن ملّي جا بُطْرُس نْأَنْطاكية، تعرّضْتْ لو بطّاي طاي حيت كانتْ عليه اللومة، حيت قبل ما يجيو شي ناس من جهة يَعْقوب، كان بُطْرُس كياكل مع الناس الّي ماشي يهود. وَلكن ملّي جاو، بدا كيرجع ناللَّور وْكيبعّد نفسو، حيت خاف من الناس د الطهارة. واليهود يَخرين مشاو مع النفاق د بُطْرُس، وْحتّى بَرنابا مشى مع النفاق ديالوم. وَلكن ملّي أنا شفْتوم بلّي ما كانو شي كيتمشّاو حسب الحقّ د الإنجيل، قُلتْ نْبُطْرُس قدّام الناس كاملين: "إدا أنتينا يهودي كتعيش فحال الّي ماشي يهودي، علاش كتفرض على الناس الّي ماشي يهود يعيشو فحال اليهود؟" حنايَ يهود من الأصل، وْماشي مُدْنبـين من بين الوَتَنيّين. واخّا هَيدا كنعرفو بلّي الإنسان ما كيتبرّر شي بالأعْمال د الشريعة، وَلكن بالإيمان بيَسوع المسيح. حتّى حنايَ آمنّا بيَسوع المسيح باش نتبرّرو بالإيمان بالمسيح، ماشي بالأعْمال د الشريعة، حيت بالأعْمال د الشريعة حتّى واحد ما كيتبرّر. وِادا كنفتّشو على البراءة بالمسيح، وْكنجبرو نفسنا مُدْنبـين، واش هَد الشي المعنى ديالو بلّي المسيح خدّام نالدنوب؟ حاشا! حيت إدا كُنْتْ كَنْبني عاود ديك الشي الّي هدّمْتوْ، غادي نكون أنا متعدّي. حيت أنا بالشريعة مُتّْ نالشريعة باش نحيا ناللّٰه. مع المسيح تصْلبْتْ وْدابا ما كنحيا شي أنا، وَلكن المسيح كيحيا فيَّ، والحياة الّي كنحياها دابا في الجسد كَنْحياها في الإيمان بِابن اللّٰه الّي عزّْني وْسلّم نفسو عليَّ. ما كنبطّل شي نعْمة اللّٰه، حيت إدا بالشريعة تكون التقوى، المسيح مات بلا سبب. آ الغَلاطيّين الجّاهلين، شكون الّي سحّر لكُم باش ما تطيعو شي الحقّ، أنتُمَ الّي قدّام عينكُم ظهَر واضح يَسوع المسيح مصْلوب؟ غير بغيتْ نعرف منكُم: واش ادّيتو الروح بالأعْمال د الشريعة أَوْلا بالإيمان ملّي سمعْتو الرسالة؟ واش أنتُمَ هَيدا تقالين الفهم؟ أنتُمَ الّي بديتو بالروح، واش غَد تكمّلو دابا بالجسد؟ واش تعدّبْتو بلا سبب؟ إدا د بالصّحّ كان باطل. والّي كيعطيكُم الروح وْكيعمل المُعْجزات بيناتكُم، واش كيعملوْ بالأعْمال د الشريعة أَوْلا بالسمع بالإيمان؟ هَيدا كان مع إبراهيم، "آمن إبراهيم باللّٰه وْتّحسب لو تقوى." إدَن، خصْكُم تعرفو بليّ هَدو الّي كيعيشو بالإيمان هُمَ أُوْلاد إبراهيم. وْفعلاً، الكتاب سبق وْشاف بلّي اللّٰه غادي يبرّي الأُمَم بالإيمان، وْسبق وْبشّر إبراهيم كيقول: "فيك غادي يتباركو الأُمَم كاملين." على ديك الشي الّي هُمَ من الإيمان كيتباركو مع إبراهيم، الرَّجل د الإيمان. حيت الناس كاملين الّي كيعيشو بالأعْمال د الشريعة هُمَ تحت اللعْنة حيت مكتوب: "ملْعون كُل واحد الّي ما كيتبت شي في كُل ما هُوَ مكتوب في الكتاب د الشريعة باش يعمل بِه." وْظاهر بلّي ما كاين حتّى واحد الّي كيتبرّر عند اللّٰه بالشريعة، حيت "المتّاقي غادي يحيا بالإيمان." وَلكن الشريعة ماشي مبْنية على الإيمان، حيت "الّي كيعمل بْهَد الأُمور غادي يحيا بِها." المسيح فدانا من اللعْنة د الشريعة حيت تلعن هُوَ بْسبابنا، حيت مكتوب: "ملعون كُل واحد الّي تعلّق على الخشبة." وْعمل المسيح هَد الشي باش توصل البركة د إبراهيم نالأُمَم، باش بالإيمان ندّيو الروح حسب الوعد. آ الخوت، غادي نعطيكُم واحد المتال: واحد العهد، واخّا د البشر، ما كاين حتّى واحد الّي كيبطّلوْ أَوْلا الّي كيزيد عليه، إدا كان تابت. أمّا الوعود اتّعطات نْإبراهيم وْنالدرّيّة ديالو. الكتاب ما كيقول شي "نالدرّيّات،" فحال إدا تكلّم على بزّاف د الناس، وَلكن على واحد: "في الدرّيّة ديالك،" الّي هُوَ المسيح. الّي بغيتْ نقول هُوَ هَد الشي، الشريعة الّي جات أربع مية وْتلاتين عام من بعد، ما تقدر شي تبطّل العهد الّي تبّتوْ اللّٰه باش تجعل الوعد باطل. حيت إدا الورت كيتبت بالشريعة، ما كيتبت شي بالوَعْد، وَلكن اللّٰه عْطاه نْإبراهيم بالوعد. وْشنّو هُوَ القصد من الشريعة؟ هي جاباْ اللّٰه بْسباب المعاصي على بَيدْمن تجي الدرّيّة الّي قبطَتْ الوعد، وْكانت مرتّبة بالملائكة على يد واحد الوسيط. الوسيط ما كيكون شي نْشخص واحد، وَلكن اللّٰه واحد. إدَن، واش الشريعة ضدّ الوعود د اللّٰه؟ حاشا! حيت كَكانت اتّعطات واحد الشريعة الّي قادرة باش تحيي، كَكانتْ في الحقيقة التقوى كَتْـتبت بالشريعة. وَلكن الكتاب حبس كُل شي تحت السلْطة د الدنوب باش بالإيمان بيَسوع المسيح اتّْعطات الوعود نِلّي كيآمنو. وْقبل ما جا الإيمان، كُنّا محْبوسين تحت الشريعة، محْضيّين حتّى يظهَر الإيمان. وْهَيدا كانت الشريعة هي المربّية ديالنا حتّى وصَل المسيح باش نتبرّاو بالإيمان. وَلكن دابا ملّي جا الإيمان، ما بقينا شي تحت الّي يربّينا، حيت أنتُمَ كاملين أُوْلاد اللّٰه بالإيمان بيَسوع المسيح. حيت أنتُمَ الّي تغطّسْتو في المسيح، لبسْتو المسيح. ما كاين لا يهودي ولا يوناني، ما كاين لا عبد ولا حُرّ، ما كاين لا رَجل ولا مراة، حيت أنتُمَ كاملين واحد في المسيح يَسوع. وِادا كُنْتو ديال المسيح، أنتُمَ الدرّيّة د إبراهيم والورتة على حسب الوعد. وْكنقول هَد الشي، ما دام الوارت باقي صغير، ما كاين شي الفرق بينو وْبين العبد، واخّا هُوَ مول كُل شي، وَلكن هُوَ تحت الموصّيّين والمكلّفين عليه حتّى نالوقت المحدّد من عند باباه. هَيدا حتّى حنايَ، ملّي كُنّا صغارين، كُنّا عبيد تحت المبادئ الأساسيّة د الدنيا، وَلكن ملّي وصَل الكمال د الوقت، صيفط اللّٰه اِبنو المولود من واحد المراة، مولود تحت الشريعة، باش يفدي الّي كانو تحت الشريعة، باش حنايَ نقبلو التبنّي. وْحيت أنتُمَ أُوْلادو، صيفط اللّٰه الروح د اِبنو نالقلوبة ديالنا، وْهُوَ كيعيّط: "يا بابا الآب." على ديك الشي ما بقيتِ شي عبد، وَلكن أنتينا اِبن، وِادا كُنْتِ ابن، ديك الساعة أنْتينا وارت بْفضل اللّٰه. وَلكن في الوقت فاش ما كُنْتو شي كتعرفو اللّٰه، كُنْتو عبيد د آلِهة ماشي حقيقيّة. وأمّا دابا حيت كتعرفو اللّٰه (وَلكن في الحقيقة اللّٰه هُوَ الّي كيعرفكُم)، كيفاش بغيتو ترجعو عاود نالمبادئ الأساسيّة الضعيفة الّي بلا قيمة وْبغيتو تكونو العبيد ديالاْ من جديد؟ كتحافظو على الأيّام والشهور والأوْقات والسنين. كنخاف عليكُم نكون تعبْتْ عليكُم بلا فايدة. كنطلب منكُم، آ الخوت، كونو فحالي، حيت حتّى أنا فحالكُم. ما ظلمْتوني في حتّى شي حاجة، حيت أنتُمَ كتعرفو بلّي أَوّل مرّة خبرْتْكُم بالإنجيل، كان بْسباب واحد المرض. والمِحْنة ديالي كانت صعيبة عليكُم وْما حݣرْتوني شي وْما كرهْتوني شي، وَلكن بالعكس، اسْتَقبلْتوني فحال واحد الملاك من عند اللّٰه، فحال المسيح يَسوع. فاين هُوَ التشْجيع ديالكُم؟ حيت كنشهد لكُم، كَكان مُمْكن، كَقلّعتو عينكُم وْعطيتوها لي. واش أنا رجعْت العدو ديالكُم حيت تكلّمْتْ معكُم بالحقّ؟ الغيرة الّي عند هَدوك من جهتكُم ماشي صافية، وَلكن بغاو يفارقوكُم علينا باش الغيرة ديالكُم تكون من جهتوم. الغيرة مزيانة إدا كانتْ بالنيّة الصافية، وْخصّاْ تكون موجودة دائمًا، وْماشي غير ملّي نكون أنا حاضر بيناتكُم. آ وْلادي، أنا كنتوجّع عليكُم مرّة تانية فحال الحريق د الولادة، حتّى يتصوّر المسيح فيكُم. شحال كَنْتمنّى باش نكون عندكُم دابا وْنبدّل صوتي في الهدْرة ديالي حيت أنا حَيران فيكُم. قولو لي أنتُمَ الّي بغيتو تكونو تحت الشريعة، واش ما سمعْتو شي الشريعة؟ حيت مكتوب بلّي إبراهيم كان عندو جوج د الولاد، واحد من المراة العبدة وْيَخُر من الحُرّة. وَلكن الّي من العبدة اتّولد على حسب الجسد، وأمّا الّي من الحُرّة بالوَعد. وْديك الشي هُوَ رمز، حيت هَدو جوج د النسا كيمتّلو جوج د العهود، واحد العهد جا من جبل سيناء الّي كيولد نالعبوديّة، الّي هُوَ هاجر، حيت هاجر هي جبل سيناء في بلاد العرب، الّي كيمتّل مدينة القُدس الحاضرة، حيت هي تحت العبوديّة مع أُوْلاداْ. أمّا القُدس السماويّة، الّي هي الأُم ديالنا حنايَ، هي حُرّة. حيت مكتوب: "فْرح، آ العاݣرة، الّي ما كتولد شي، هْتف وْغوّت، آ الّي ما توجّعْتِ شي، حيت أُوْلاد المراة بلا رَجل كتَر من هَديك الّي عنداْ رَجل." وْحنايَ، آ الخوت، أُوْلاد الوعد فحال إسْحاق. وَلكن كيفْما كان في ديك الوقت، الولد الّي اتّولد حسب الجسد تعدّى على هَداك الّي اتّولد حسب الروح، هَيدا دابا عاود. وَلكن شنّو كيقول الكتاب؟: "جرّي على العبدة وْولداْ من هنايَ، حيت ما كَيْورت شي ولد العبدة مع ولد الحُرّة." هَيدا، آ الخوت، حنايَ ماشي أُوْلاد العبدة، وَلكن أُوْلاد الحُرّة. كونو تابتين في الحُرّيّة الّي حرّرنا بِها المسيح وْما تكونو شي عاود تحت النير د العبوديّة. ها انا بولُس كنقول لكُم: إدا تطهّرْتو، المسيح ما غادي ينْفَعكُم في حتّى شي حاجة. وْكنشهد عاود نْكُل رَجل الّي كيتطهّر بلّي خصّوْ يحافظ على الشريعة كاملة. أنْتُمَ الّي كَتْـتبرّرو بالشريعة تفرّقْتو من المسيح. طِحْتو من النعْمة. حيت حنايَ بالخدْمة د الروح وْبواسطة الإيمان كَنْـتسنّاو التقوى الّي هي الرجا ديالنا. حيت في المسيح يَسوع الطهارة، أَوْلا عدم الطهارة، ما كَتنفَع والو، وَلكن الإيمان الّي كيخدم بالمحبّة. أنتُمَ كُنْتو كتجريو مزيان. شكون الّي حصركُم باش ما تطيعو شي الحقّ؟ هَد القناعة ماشي من عند اللّٰه الّي هُوَ عَيّط لكُم. خميرة قليلة كتخمّر العجينة كاملة. أنا كنتيق فيكُم في الرَّبّ بلّي ما غادي شي تخمّمو بْطريقة يَخرى، وَلكن الّي كيشوّشكُم غادي يرفد العقوبة ديالو، كيفْما يكون هُوَ. وانا، آ الخوت، إدا كُنْتْ باقي كنبشّر بالطهارة، علاش باقي كنتمرْمد؟ في هَد الساعة العتْرة د الصليب ما بقات شي. مصاب الّي كيحيّروكُم يتقطّعو. آ الخوت، أنتُمَ معيّطين نالحُرّيّة، وَلكن ما تسْتَعملو شي الحُرّيّة ديالكُم فحال شي سبّة نالتسْلية د الجسد، وَلكن خدمو بعضيّاتكُم بالمحبّة. حيت الشريعة كاملة كَتْـتكمّل في كلمة واحدة: "عزّ جارك فحال نفسك." وَلكن إدا كُنْتو كتعطّو وْكتاكلو بعضيّاتكُم، ردّو بالكُم باش ما تهدّمو شي بعضيّاتكُم. كنقول لكُم، ت‍مشّاو في الروح وْما غادي شي تكمّلو شهْوة الجسد، حيت الشهْوة د الجسد ضدّ الروح، والرغْبة ديال الروح ضدّ الجسد، وْهَدو الجوج كيتضادّو بيناتوم باش ما تعملو شي الّي كتبغيو. حيت إدا أنتُمَ مڭوّدين بالروح، أنتُمَ ماشي تحت الشريعة. الأعْمال د الجسد معْروفين: الزنا، الفسق، النجاسة، الفجور، عبادة الأصْنام، السحر، الضغينات، العداوات، الغيرة، السخط، المدابزة، الخلافات، الخرْجان، الحسد، القتل، السكرة، الفساد، وأُمور فحال هَدوك. كَنْنبّهكُم دابا، كيفْما عملْتْ من قبل، بلّي الناس الّي كيعملو ديك الأُمور ما غادي شي يورتو مُلك اللّٰه. أمّا الغلّة د الروح هي المحبّة، الفرْحة، السلام، طول الصبر، اللطف، الصلاح، الإيمان، التواضُع، والتعفّف. ما كاين حتّى شي شريعة ضدّ ديك الأُمور. وَلكن الّي هُمَ ديال المسيح صلّبو الجسد مع الرغْبات والشهوات ديالو. إدا كنعيشو في الروح، خصْنا نتمشّاو بالروح. ما نكونو شي متكبّرين باش ما نسخطو شي على بَعْطنا البعض وْما يكون شي الحسد بيناتنا. آ الخوت، إدا طاح شي واحد في شي دنب، أنتُمَ الروحيّين، صلّحوه بْروح التواضُع. حضي نفسك عندَك تڭوز من نفس التجْربة. حمّلو التقال د بعضيّاتكُم وْهَيدا غَد تكمّلو شريعة المسيح. حيت إدا ظنّ شي واحد بلّي هُوَ شي حاجة، وْما هُوَ والو، راه كيغشّ نفسو. وَلكن كُل واحد يمْتَحن السلوك ديالو. في ديك الساعة غادي يكون عندو باش يفْتَخر، وْماشي من شي واحد يَخُر. وْكُل واحد يتحمّل المسؤولية ديالو. الّي كيتعلّم كلام اللّٰه يشارك في كُل خير مع الّي كيعلّموْ. ما تغشّو شي راسكُم، حتّى واحد ما يقدر يضحك على اللّٰه، حيت ديك الشي الّي كيزرع الإنسان، هُوَ الّي كيحصدوْ، حيت الّي كيزرع باش يرضي الجسد ديالو، من الجسد غادي يحصد الفساد. والّي كيزرع باش يرضي الروح، من الروح غادي يحصد الحياة الأبديّة. ما نعياو شي في عمل الخير، حيت غادي نحصدو في الوقت ديالو، إدا ما سخفْنا شي. على ديك الشي دائمًا ملّي تكون عندنا الفُرْصة، نعملو الخير في كُل شي، خصوصًا في العائلة د الإيمان. شوفو شحال كبيرة الحروف الّي كتبْتاْ لكُم بْيَدّي! كاملين الّي بغاو يرضيو الجسد كيبزّزو عليكُم تتطهّرو باش ما يتمرْمدو شي بْسباب صليب المسيح. حتّى هَدو الّي مطهّرين، هُمَ ما كيطيعو شي الشريعة، وَلكن كيبغيوكُم أنتُمَ تتطهّرو باش هُمَ يفْتَخرو بالجسد ديالكُم. وَلكن من جهتي أنا، ما كنفكّر شي نفْتَخر إلّا بْصليب رَبّنا يَسوع المسيح، الّي بِه تصلبَتْ الدنيا لِلي وانا رجعْتْ مصْلوب نالدنيا. حيت في المسيح يَسوع الطهارة ما كَتنفَع والو، ولا عدم الطهارة، وَلكن واحد الخليقة جديدة. السلام والرحْمة على كُل هَدوك الّي كيتمشّاو بْهَد القانون، وْعلى إسْرائيل اللّٰه. من دابا نْفوق ما يشطنْني حتّى شي واحد، حيت أنا عندي في الجسد ديالي العلامات د الرَّبّ يَسوع. نعْمة رَبّنا يَسوع المسيح تكون مع روحكُم، آ الخوت. آمين. بولُس الرسول ديال يَسوع المسيح بإرادة اللّٰه نالقدّيسين الّي كاينين في أَفَسُس والمؤمنين في المسيح يَسوع، النعْمة لكُم والسلام من عند اللّٰه الآب ديالنا والرَّبّ يَسوع المسيح. مبارك اللّٰه الآب د رَبّنا يَسوع المسيح، الّي بارك فينا بْكُل بركة روحيّة في المواطع السماويّة في المسيح، حيت اخْتارنا فيه قبل من التأسيس د الدنيا باش نكونو عندو قدّيسين وْبلا عيب في المحبّة، وْهُوَ خصّصنا من قبل باش نكونو أُوْلادو بالتبنّي بواسطة يَسوع المسيح على حسب الإرادة ديالو المزيانة، نْتهْليل المجد د النعْمة ديالو الّي عْطاها نّا في العزيز ديالو، الّي فيه عندنا الفدا بالدم ديالو، الغُفْران من الدنوب على حسب الغِنى د النعْمة ديالو الّي عْطاها نّا اللّٰه بْكتْرة بْكُل حكْمة وْفهامة، حيت هُوَ عرّفنا السرّ د الإرادة ديالو على حسب الرضى الّي صمّم من قبل في نفسو، باش يكمّلوْ في تعْمير الوقت ويجمع في المسيح كُل شي الّي في السما والّي على الأرض. الّي بِه توصّلْنا بواحد الورت، مخصّصين من قبل على حسب القصد ديالو الّي هُوَ كيعمل كُل شي على حسب الرأي د الإرادة ديالو، باش نكونو نْتهْليل المجد ديالو، حنايَ الّي عملْنا الرجا ديالنا في المسيح. الّي فيه حتّى أنتُمَ، ملّي سمعْتو كلام الحقّ وآمنْتو بالإنجيل الّي جاب لكُم النجا، طبعكُم الروح القُدُس الموْعود بِه، الّي هُوَ الضمانة د الورت ديالنا حتّى يوصل الفدا د الشعب المشري باللّٰه نْتهْليل المجد ديالو. على ديك الشي حتّى أنا، ملّي سمعْتْ بالإيمان ديالكُم بالرَّبّ يَسوع والمحبّة ديالكُم نالقدّيسين كاملين، ما كَنوقَف شي نشكر اللّٰه عليكُم وْكَنْدكرْكُم في طلباتي باش إلَه رَبّنا يَسوع المسيح، الآب د المجد، يعطيكُم روح الحكْمة والتبْيين في المعْرفة ديالو، وْكنطلب منّو باش يضوّي عينين القلوبة ديالكُم باش تعرفو الرجا د العراطة ديالو عليكُم والغِنى د المجد الّي جعلوْ لكُم وَرت بين القدّيسين، وْتعرفو القُدرة ديالو، شحال عظيمة من جهتنا حنايَ المؤمنين. هَد القوّة هي الطاقة العظيمة ديالو الّي عملاْ في المسيح ملّي بعتوْ من بين الميّتين وْڭلّسوْ على الّي‍مين ديالو في المواطع السماويّة، فوق كُل رياسة وْسُلطة وْقوّة وْسيادة وْكُل اِسم الّي كيدكروه، ماشي غير في هَد الدنيا، وَلكن حتّى في الدنيا الّي ماجّة، وْطوّع كُل شي تحت الرِّجلين ديالو وْجعلوْ الراس فوق كُل شي نالكنيسة، الّي هي الجسد ديالو والتعْمير د هَداك الّي كيعمّر الكُل في الكُل. وْكُنْتو أنتُمَ ميّتين في الدنوب والمعاصي ديالكُم، الّي ت‍مشّيتو فيهُم قبل، حسب الطريقة د هَد الدنيا، حسب رئيس القوّة د الهوا، الروح الّي خدّام دابا في أُوْلاد المعْصيّة، الّي فوسطوم حتّى حنايَ كاملين تصرّفْنا قبل في شهوات الجسد ديالنا، عاملين الخاطر د الجسد والأفْكار، وْكُنّا بالطبيعة أُوْلاد السخط فحال يَخرين كاملين. وَلكن اللّٰه، الّي هُوَ غَني في الرحْمة بْسباب محبّتو العظيمة الّي حبّنا بِها، عْطانا الحياة مع المسيح ملّي كُنّا باقين ميّتين في الدنوب. بالنعْمة أنتُمَ ناجيين! وْردّنا بالروح معاه وْڭلّسنا مع المسيح يَسوع في المواطع السماويّة باش يظهّر في الأجْيال الماجّة قدّاش الغِنى د النعْمة ديالو الّي فيّضاْ علينا بْلُطْفو في المسيح يَسوع. حيت بالنعْمة أنتُمَ ناجيين بواسطة الإيمان، وْديك الشي ماشي منكُم حيت هُوَ عطيّة اللّٰه. ماشي بالأعْمال باش ما يفْتَخر حتّى شي واحد. حيت حنايَ الصناعة ديالو، مخْلوقين في المسيح يَسوع باش نعملو الأعْمال الصالحة الّي اللّٰه وجّداْ لِنّا من قبل باش نتمشّاو فيها. على ديك الشي، أنتُمَ الّي وَتَنيّين من الأصل ديالكُم، الّي مسمّيين "بلا طهارة" عند هَدوك الّي كيسمّيو راسوم من الطهارة، الّي كيعملو في الجسد بْيَد الإنسان، تفكّرو بلّي كُنْتو في ديك الوقت بلا المسيح بعادين من الجنْسيّة د إسْرائيل وْغرابين على عهود الوعد، بلا رجا وْبلا اللّٰه في هَد الدنيا. وَلكن دابا أنتُمَ في المسيح يَسوع، وانتُمَ الّي كُنْتو قبل بعادين، رجعْتو قرابـين بْدم المسيح. حيت هُوَ السلام ديالنا، وْجعلنا من جوج د الشعوب شعب واحد وْهدّم الحيط د العداوة الّي فرّقنا. بطّل في الجسد ديالو الشريعة بالوَصايا والفرائض، وْعمل السلام، باش يخلق في نفسو من جوج د الشعوب إنسان واحد جديد، وْصالحوم بْجوج مع اللّٰه في جسد واحد بواسطة الصليب، وْقتل العداوة بِه. "وْجا وْبشّركُم بالسلام، أنتُمَ الّي كُنْتو بعادين وْهَدو الّي كانو قرابـين،" حيت بِه عندنا بْجوج الدخول نْعند الآب في روح واحد. على ديك الشي ما بقيتو شي أجانب وْبرّانيّين، وَلكن أنتُمَ مواطنين مع القدّيسين وْمن العائلة د اللّٰه، وانتُمَ مَبْنيّين على اللساس د الرُّسُل والأَنْبياء، وْيَسوع المسيح بْنفسو هُوَ حجْرة القنت، الّي فيه البناية كاملة مركّبة مع بعطاْ كتطلع حتّى تكون واحد البيت مقدّس في الرَّبّ، الّي فيه حتّى أنتُمَ مبْنيّين مع بعطكُم باش تكونو واحد السُّكنى ناللّٰه في الروح. على ديك الشي، على مسبّتكُم أنتُمَ الّي ماشي يهود، أنا بولُس حبّاس المسيح يَسوع. وَقيلا سمعْتو أنتُمَ بْتدْبير نعْمة اللّٰه الّي اتّعطات لِلي بْسبابكُم، بلّي بالتبْيين عرّفني اللّٰه السرّ، كيف كتبْتْ لكُم من قبل بالاخْتصار. وْملّي تقراواه، غَد تقدرو تفهمو المعْرفة ديالي في سِرّ المسيح. هَد السرّ، الّي في الأجيال يَخرين ما تعرّفو شي بِه أُوْلاد البشر، دابا تبيّن بالروح نالرُّسُل القدّيسين والأَنْبياء د اللّٰه، يعني بلّي الوَتَنيّين هُمَ مشاركين في الورت في نفس الجسد، وْمشْروكين في الوعد في المسيح يَسوع بالإنجيل، الّي بِه رجعْتْ أنا خدّام حسب المَوْهبة الّي عْطاها لي اللّٰه بالنعْمة ديالو على حسب العمل د قوّتو. واخّا أنا صغَر من الصغير في القدّيسين كاملين، توصّلْتْ بْهَد النعْمة باش نبشّر بِها بين الأُمَم بْغنى المسيح الّي فوق التعْبير، وْنوضّح نالناس كاملين تدْبير السرّ الّي كان مخبّع من زمان في اللّٰه الّي خلق كُل شي، باش تتعرّف دابا حكْمة اللّٰه الّي متنوّعة بواسطة الكنيسة عند الرياسات والسلاطين في المواطع السماويّة بْحسب القصد ديالو الأبدي الّي عملوْ في المسيح يَسوع رَبّنا، الّي بِه عندنا الحُرّية والتيقة باش نقرّبو نْعند اللّٰه بواسطة الإيمان بِه. على ديك الشي كنطلب منكُم ما تفشلو شي بالضيقات ديالي بْسبابكُم الّي هُمَ المجد ديالكُم. وْبْسباب هَد الشي كَنْحني ركابي قدّام الآب، الّي منّو تسمّات كُل عائلة الّي في السما والّي على الأرض. كنطلب باش يقوّيكُم، بالقوّة الّي ماجّة من الغِنى د مجدو، في الإنسان الباطن بواسطة الروح، باش يسكن المسيح في القلوبة ديالكُم بالإيمان، وْتكونو تابتين وْمأسّسين في المحبّة، باش تقدرو تفهمو مع القدّيسين كاملين شحال هُوَ العرض والطول والغرق والعلو، وْتعرفو المحبّة د المسيح الّي فايتة المعْرفة كاملة باش تكونو معمّرين بالتعْمير الكامل د اللّٰه. نِلّي قادر باش يعمل فوق كُل شي كتَر من الّي كنتصوّرو أَوْلا كنطلبو، بالقوّة الّي كتخدم فينا، عندو المجد في الكنيسة وْفي المسيح يَسوع نْجميع الأجْيال إلى أَبَد الأبدين. آمين. وْعلى ديك الشي كنطلب منكُم، أنا الحبّاس في الرَّبّ، باش تتمشّاو كيفْما كتسْتاهل الدعْوة الّي تدعيتو لِلاْ، بْكُل تواضُع والحنان وْطول الصبر وْمتحمّلين بعضيّاتكُم في المحبّة، مجْتَهدين باش تحفظو الوحدانيّة د الروح بْرباط السلام. كاين جسد واحد وْروح واحد، فحال ما تدعيتو حتّى أنتُمَ في رجا واحد، ربّ واحد، إيمان واحد، غطسة واحدة، إلَه وآب واحد نالجميع الّي فوق الجميع وْمع الجميع وْفي الجميع. وَلكن نْكُل واحد منّا اتّعطات لو النعْمة على حسب القياس د الهديّة د المسيح. على ديك الشي كيقول: "ملّي طلَع نالعلو، ادّى معاه المَسْبيّين وْعْطى العطايا نالناس." شنّو هُوَ المعنى د هَد الشي بلّي هُوَ طلَع؟ بْمعنى أنَّهُ نزل نأقْسام الأرض السفليّة. الّي نزل، هُوَ هَداك نفسو الّي طلَع فوق السماوات كاملة باش يعمّر كُل شي. وْهُوَ بْيَدّو جعَل البعض رُسُل والبعض أَنْبياء والبعض مبشّرين والبعض رُعاة وْمُعلّمين، باش يكمّل القدّيسين في عمل الخدْمة نْبُنيان جسد المسيح، حتّى نوَصلو كاملين نالوحدانيّة د الإيمان وْمعْرفة اِبن اللّٰه، نواحد الإنسان كامل، نْقياس قامة تعْمير المسيح، باش ما نكونو شي عيال سْتيتْوين مزعْزعين فحال بالمواج وْمحْمولين بْكُل ريح د تعْليم وْبالحيلة د الناس الّي كيغشّو وْكيسْتَعملو وَسائل الخديعة. وَلكن صادقين في المحبّة، نكبرو في كُل شي في هَداك الّي هُوَ الراس، يعني المسيح، الّي منّو الجسد كامل مجْموع مزيان وْمتَّحد بالمفاصل، كيكبر وْكيتبْنى في المحبّة على حسب الخدمة الخاصّة د كُل عضو. وْكنقول هَد الشي وْكنشهد في الرَّبّ بلّي ما تزيدو شي تتمشّاو كتَر بالأفْكار الباطلة الّي كيتمشّاو بِها الوَتَنيّين، حيت هُمَ عندوم التفْكير مسلّس وْهُمَ مبعّدين على الحياة الّي ماجّة من عند اللّٰه بْسباب الجهل الّي سيطر عليهُم وْعلى القصوحيّة د القلوبة ديالوم. هُمَ بقاو بلا حشومة وْسلّمو نَفسوم نالفساد وْما شبعو شي باش يعملو كُل نوع د النجاسة. أمّا أنتُمَ ما تعلّمْتو شي المسيح هَيدا، إدا د بالصّحّ كُنْتو سمعْتوه وْتعلّمْتو في يَسوع حسب الحقّ الّي فيه. بالنسبة نالحياة الّي عيشْتو من قبل، تعلّمْتو تحيّدو الحاجات د الإنسان القديم، الّي هُوَ فاسد بْشهَوات الغش، وْتتجدّدو في الروح د العقل ديالكُم وْتلبسو الإنسان الجديد الّي هُوَ مخْلوق في صورة اللّٰه في التقوى والقداسة د الحقّ. وْعلى ديك الشي حيّدو عليكُم الكدوب وْتكلّمو الصدق كُل واحد مع جارو. حيت حنايَ كاملين أعْضاء د بعضيّاتنا. وِادا غضبْتو، ما تدنبو شي وْما تخلّيو شي الشمس تغرب وانتُمَ باقين غضْبانين، وْما تعطيو شي فُرْصة نْإبْليس. السارق ما يعاود شي يسرق، وَلكن يتعب ويخدم في الّي مزيان باليَدّين ديالو باش يكون قادر على مساعدة المحْتاجين. ما تخلّيو شي شي كلمة قبيحة تخرج من الدقوم ديالكُم، وَلكن كُل كلمة الّي تكون صالحة نالبُنْيان باش تعطيو نعْمة نِلّي كيسمعو. وْما تحزّنو شي روح اللّٰه القُدّوس الّي بِه اتّطبعْتو نالنهار د الفدا. حيّدو عليكُم كُل مرورة وْسخط وْغضب وْغوات وْشتيم مع كُل خُبت. بالعكس، كونو لُطَفاء مع بعضيّاتكُم، حنانين وْمتسامحين فحال ما سامحكُم اللّٰه بْيَدّو في المسيح. إدَن، كونو متمتّلين باللّٰه فحال أُوْلاد عزازين وْت‍مشّاو في المحبّة، فحال ما عزّنا المسيح بْنفسو وْسلّم راسو علينا تقْديمة وْدبيحة ناللّٰه في واحد الريحة طيّبة. أمّا الزنا وْكُل نجاسة أَوْلا طمع ما يتسمّى شي بيناتكُم كيفْما يليق بالقدّيسين، وَلا كلام السفاهة وَلا الحوار الباطل وَلا الملاغة الخايبة، الّي ما يليقو شي، وَلكن فْعوط هَد الشي الشكر. كونو متأكّدين بلّي كُل زاني أَوْلا منْڭوس أَوْلا طمّاع، الّي هُوَ عابد الأصْنام، ما عندو شي ورت في مُلك المسيح واللّٰه. ما يغرّكُم حتّى شي واحد بالكلام الخاوي، حيت بْسباب هَد الأُمور كيجي غضب اللّٰه على أُوْلاد المعْصيّة. ما تكونو شي مشاركين معهُم، حيت كُنْتو من قبل ظلام، وَلكن دابا أنتُمَ ضَو في الرَّبّ. ت‍مشّاو فحال أُوْلاد النور، حيت الغلّة د النور هي في كُل الصلاح والتقوى والحقّ. واخْتَبرو الّي هُوَ مرْضي عند الرَّبّ، وْما تشاركو شي في أعْمال الظلام الّي ما فيها غلّة، وَلكن بالعكس، وَبّخوها، حيت الأُمور الّي كيعملوها في السرّ حتّى الدِّكْر ديالاْ حشومة. وَلكن كُل شي الّي كيتوبّخ، كيظهّروْ النور، حيت الضَّو كيظهّر كُل شي. على ديك الشي كيقولو: "فيق، آ أنتينا الّي ناعس، وْنوض من بين الميّتين وْغادي يضوّي عليك المسيح." هَيدا ردّو بالكُم كيفاش تتمشّاو، ماشي فحال الجاهلين، وَلكن فحال الحُكَماء، واسْتغلّو الوقت مزيان حيت الأيّام قبيحة. على ديك الشي ما تكونو شي بلا عقل، وَلكن كونو فاهمين شِنّي هي الإرادة د الرَّبّ. وْما تسكرو شي بالشراب الّي كيدّي نالفساد، وَلكن تعمّرو بالروح، وْتكلّمو مع بعطكُم بْمزامير وْتسابيح وْترانيم روحيّة، مترنّمين وْمُهلّلين في القلوبة ديالكُم نالرَّبّ، شاكرين اللّٰه والآب في كُل وقت على كُل شي بِاسم رَبّنا يَسوع المسيح، خاضعين نْبعضيّاتكُم في خوف رَبّنا المسيح. آ النسا، خضعو نالرجال ديالكُم فحال نالرَّبّ، حيت الرَّجل هُوَ راس المراة فحال ما المسيح هُوَ راس الكنيسة والمُنجّي ديالاْ الّي هي جسدو. وَلكن فحال ما كتخضع الكنيسة نالمسيح، النسا حتّى هُمَ خصّوم يخضعو نالرجال ديالوم في كُل شي. آ الرجال، حبّو النسا ديالكُم فحال ما عزّ المسيح الكنيسة وْعْطى نفسو عليها باش يقدّساْ ويطهّراْ بالتغْسيل د الما بواسطة الكلام، باش يحضّراْ نْنفسو كنيسة مجيدة، بلا وسخ وْبلا تكْميش وَلا حتّى حاجة فحال ديك الشي، وَلكن تكون مقدّسة وْبلا عيب. وْواجب على الرجال يحبّو النسا ديالوم فحال الأجْساد ديالوم. الّي حبّ مراتو، كيعزّ نفسو. حيت حتّى واحد عُمرو ما كرَه الجسد ديالو، وَلكن كيوكّلوْ وْكيتهلّى فيه، فحال ما كيعمل المسيح في الكنيسة. حيت حنايَ أعْضاء د الجسد ديالو. "على ديك الشي خصّ الرَّجل يخلّي باباه وْيمّاه ويلصق في مراتو، ويكونو بْجوج جسد واحد." سرّ عظيم هَدا، وَلكن أنا كنقول هَد الشي على المسيح والكنيسة. أمّا أنتُمَ، كُل واحد منكُم يحبّ مراتو فحال ما كيعزّ نفسو، والمراة تحْتَرم رَجلاْ. آ الولاد، طيعو الوالِدين ديالكُم في الرَّبّ، حيت هَدا حقّ. هَدي هي الوَصيّة الُولى الّي معها الوعد: "وَقّر باباك ويمّاك باش يكون لك الخير ويكون عُمرك طويل على الأرض." وانتُمَ، آ الآباء، ما تقلّقو شي أُوْلادكُم، وَلكن ربّيوهُم بْتأديب والتعْليم د الرَّبّ. آ العبيد، طيعو أسْيادكُم من جهة الجسد بالخوف والرعْدة بْصفاوة القلوبة ديالكُم، فحال نالمسيح، ماشي غير ملّي كيشوفو فيكُم، فحال إدا بغيتو ترضيو الناس، وَلكن فحال عبيد المسيح، عاملين إرادة اللّٰه من القلب، خدّامين بالنيّة الصافية فحال نالرَّبّ، وْماشي نالناس، عارفين بلّي الخير الّي عمل كُل واحد، هَدا غادي يقبطوْ عاود من الرَّبّ، كان عبد أَوْلا حُرّ. وانتُمَ، آ الأسْياد، عملو لوم هَد الأُمور بْنفساْ وْوقّفو التهْديد، عارفين بلّي سيّدوم هُوَ سيّدكُم الّي هُوَ في السما وْما عندو شي الوجهيّات. وْفي الآخر، تقوّاو في الرَّبّ وْفي شدّة القوّة ديالو. لبسو سناح اللّٰه الكامل باش تقدرو تـتبتو ضدّ الحيلات د إبْليس. حيت ما كَنْتحاربو شي ضدّ الدم واللحَم وَلكن ضدّ الريّاسات، ضدّ السلاطين، ضدّ حُكّام الظلام د هَد الدنيا، وْضدّ الارْواح الشرّيرة في المواطع السماوية. على ديك الشي حملو سناح اللّٰه الكامل باش تقدرو تقاومو في النهار الشرّير، وْمن بعدما تكمّلو كُل شي، تـتبتو. بقاو تابتين محزّمين بْحزام الحقّ، وْلابسين الصدريّة د التقوى، وْلابسين في الرِّجلين ديالكُم الحماس د نشر الإنجيل د السلام، حاملين فوق كُل شي الدرّاقة د الإيمان الّي بِه تقدرو تطفيو كُل السهام المشعولة د الشرّير، وْعملو في راسكُم الكاسك د النجا وادّيو السيف د الروح الّي هُوَ كلام اللّٰه. وْصلّيو في الروح في كُل وقت بْصلاوات وْطلبات، ساهرين نْهَد الشي بْكُل مداومة وْكُل طلب من جهة القدّيسين كاملين، وْمن جهتي أنا باش، ملّي نتكلّم، اللّٰه يعطيني الكلام باش نعرّف بالزعامة السرّ د الإنجيل، الّي بِه أنا سفير مكتّف في السناسل، باش نتكلّم بِه بالشجاعة كيفْما واجب عليَّ نتكلّم. وَلكن بَياش تعرفو حتّى أنتُمَ الحالة ديالي وْشنّو كنعمل، غادي يعرّفكُم بْكُل شي الأخ العزيز والخدّام الصادق في الرَّبّ، تيخيكُس، الّي صيفطْتوْ نْعندكُم بْسباب هَد الشي بَياش تعرفو الحالة ديالنا ويعزّي القلوبة ديالكُم. السلام على الخوت والمحبّة بالإيمان من عند اللّٰه الآب والرَّبّ يَسوع المسيح. النعْمة تكون مع الناس كاملين الّي كيعزّو رَبّنا يَسوع المسيح بالمحبّة الّي ما كَتْفْنا شي. آمين بولُس وْتيموثاوس، عبيد يَسوع المسيح نالقدّيسين كاملين في المسيح يَسوع الّي في فيلِبّي مع المُرْشِدين والمُدبّرين. النعْمة لكُم والسلام من عند اللّٰه الآب ديالنا والرَّبّ يَسوع المسيح. كنشكر إلَهي كُل مرّة ملّي كنفكّر فيكُم، دائمًا في كُل صلاواتي كنطلب من جهتكُم فرحان بْسباب المشاركة ديالكُم في الإنجيل من النهار الُوّل حتّى نْدابا. وانا متيقّن بْهَد الشي، بلّي هَداك الّي بدا فيكُم واحد الخدْمة صالحة غادي يكمّلاْ حتّى ناليوم د يَسوع المسيح. عندي الحقّ نفكّر هَيدا حيت أنتُمَ في قلبي وْشاركْتو كاملين معيَ في النعْمة في القيود ديالي وانا كندافع على الإنجيل وْكَنْـتبّتوْ. واللّٰه هُوَ شاهد لي شحال كنتوحّشكُم أنتُمَ كاملين بالمحبّة الحنينة د يَسوع المسيح. وْهَد الشي كنطلبوْ بالصلاة باش تزيد المحبّة ديالكُم كتَر وْكتَر في المعْرفة وْفي كُل فهامة، باش تميّزو الّي يكون حسَن وْتكونو صافيين وْبلا لَوم حتّى يوم المسيح، معمّرين بْغلّات التقوى الّي هُمَ بواسطة يَسوع المسيح نْمجد اللّٰه والتهْليل ديالو. بغيتْكُم تعرفو، آ الخوت، بلّي الأُمور الّي وقعَتْ لي ساهمَتْ في زيادة الإنجيل، حتّى توضّح عند العسْكر د القصر وْعند الناس يَخرين كاملين بلّي أنا حبّاس بْسباب المسيح. وْبْسباب القيود ديالي، الأغلبيّة د الخوت تاقو في الرَّبّ، وْتشجّعو كتَر باش يتكلّمو بلا خوف بْكلام اللّٰه. البعض من الناس كيبشّرو بالمسيح من الحسد والمدابزة، أمّا يَخرين كيبشّرو بْنيّة صافية. هَدو كيعملو بالمحبّة، حيت عارفين بلّي اللّٰه جعلني باش ندافع على الإنجيل. أمّا هَدوك كيبشّرو بالمسيح بْطموح شخصي، ماشي بْدافع صافي، وْكيظنّو بلّي هَيدا غادي يزيدو كتَر العداب في القيود ديالي. إيوا شنّو؟ على كلِّ حال، إمّا بالنفاق وإمّا بالحقّ، المسيح كيتبشّر بِه، وْبْهَد الشي أنا كنفرح وْباقي غادي نفرح عاود، حيت أنا عارف بلّي بالدعاء ديالكُم والمساعدة د روح يَسوع المسيح، هَد الشي غادي يرجع نالنجا ديالي. الرغبة والرجا ديالي هُوَ باش ما نكون شي محشّم في أي حاجة، وَلكن بْكُل زعامة المسيح يتمجّد في الجسد ديالي، واخّا نحيا أَوْلا نموت، حيت لِلي الحياة هي المسيح، والموت هُوَ ربح. وَلكن إدا كانت الحياة في الجسد، غادي ترجع لي غلّة في الخدْمة. ما كنعرف شي شنّو نخْتار. أنا محصور بين جوج د الحاجات. بغيتْ نكون مع المسيح، ديك الشي أفضل بزّاف، وَلكن بْسبابكُم، ضروري نبقا في الجسد. وانا متيقّن بْهَد الشي، وْعارف بلّي غادي نبقا معكُم نالتقدُّم ديالكُم والفرْحة في الإيمان باش يزيد الفخر ديالكُم في المسيح يَسوع فيَّ بْحضوري مرّة تانية معكُم. فقط عيشو كيفْما يليق بإنجيل المسيح، حتّى إدا جيتْ وْشفْتْكُم أَوْلا كُنْتْ غايب، نسمع بِكُم بلّي أنتُمَ تابتين في روح واحدة، كتجاهدو بْنفس واحدة على الإيمان د الإنجيل. وْما تخافو شي من هَدوك الّي كيقاوموكُم. هَدا دليل على الهلاك ديالوم والنجا ديالكُم، وْهَدا كيجي من اللّٰه. حيت أنتُمَ اتّعطى لكُم على مسبّة المسيح ماشي باش تآمنو بِه وْكان، وَلكن حتّى باش تتعدّبو بْسبابو، حيت عندكُم ديك الجهاد بْنفسو الّي شفْتوه فيَّ وْدابا كتسمعو بلّي باقي فيَّ. إدا كانت شي تعزيّة في المسيح وِادا كانت شي راحة في المحبّة وِادا كانتْ شي عِشْرة في الروح وِادا كانت شي محنّة وْشي رحْمة، كمّلو الفرْحة ديالي وْكونو في رأي واحد وْمحبّة واحدة وْبْنفس واحدة وْفكرة واحدة. ما تعملو حتّى شي حاجة بأنانيّة وْبْحيالة، وَلكن بْتواضُع، وْحسبو يَخرين أفْضل من راسكُم. ما يشوف حتّى واحد غير في المصْلحة ديالو، وَلكن كُل واحد يشوف في المصْلحة د يَخرين حتّى هُمَ. وْخصّوْ يكون فيكُم هَد المَوْقف الّي كان في المسيح يَسوع نفسو، الّي هُوَ بالطبيعة ديالو هُوَ اللّٰه، ما بغى شي يقبط في الحقّ ديالو فحال اللّٰه. بالعكس، خوّى نفسو وادّى طباع العبد وْرجَع كيشبه نالبشر. وْملّي ظهَر فحال إنسان، تواضع وْجعَل نفسو طايع حتّى نالموت، والموت على صليب! على ديك الشي رفعوْ اللّٰه نالأعلى وْعْطاه واحد الِاسم فوق كُل اِسم، باش تركع بِاسم يَسوع كُل رُكْبة الّي في السما والّي على الأرض والّي تحت الأرض، ويعْتَرف كُل لسان بلّي يَسوع المسيح هُوَ الرَّبّ نْمجد اللّٰه الآب. على ديك الشي، آ الحباب، فحال ما طِعتو دائمًا، ماشي في الحضور ديالي وْكان، وَلكن كتَر في الغيبة ديالي، كمّلو النجا ديالكُم بالخوف والرعْدة، حيت اللّٰه هُوَ الّي كيجعل فيكُم الرغْبة والطاقة باش تعملو على مسبّة رِضاه. عملو كُل شي بلا شكْوى وْبلا مدابزة باش تكونو بلا لَوم وْصافيين، أُوْلاد اللّٰه بلا عيب فوسط واحد الجيل معوّج وْفاسد، وْباش تضوّيو فوسطوم فحال النجوم في السما، مشبّرين في كلام الحياة باش أنا نفْتَخر في يوم المسيح بلّي ما جريتْ شي وْما تعبْتْ شي باطل. وْحتّى إدا حياتي كانت مسْفوكة على الدبيحة د الإيمان والخدْمة ديالكُم، كنفرح وْكَنْنشط معكُم كاملين. وْبْهَد الشي فرحو وْشاركو الفرْحة ديالكُم معيَ. كنتمنّى في الرَّبّ يَسوع باش نصيفط نْعندكُم دغيا تيموثاوس باش تفرح نفسي ملّي نعرف الحالة ديالكُم. حيت ما عندي حتّى شي واحد فحالو الّي كيهْتَمّ بالمصْلحة ديالكُم بالنيّة، حيت يَخرين كاملين كيهْتَمّو بالأُمور ديالوم، ماشي بالأُمور د يَسوع المسيح. وَلكن أنتُمَ كتعرفو الاخْتبار ديالو بلّي خدم معيَ فحال الولد مع باباه بْسباب الإنجيل. هَيدا كنتمنّى نصيفطوْ لكُم من بعدما نشوف كيفاش ماشّة الأُمور ديالي. وْكَنْتيق في الرَّبّ بلّي أنا بْنفسي غادي نجي نْعندكُم دغيا. وْشفْتْ بلّي كان لازم نصيفط لكُم أبَفْرودِتُس، خاي الّي خدّام معيَ وْرفيقي في الجهاد، الّي صيفطْتوه باش هُوَ يسدّ بالاحْتياجات ديالي. حيت هُوَ توحّشكُم كاملين بزّاف وْضاق حيت سمعْتو بلّي كان مريط. د بالصّحّ كان مريط حتّى كان علاين يموت، وَلكن اللّٰه رحموْ وْرحمني حتّى أنا باش ما يزيد شي فيَّ حُزن على حُزن. هَد الشي الّي خلّاني نصيفطوْ لكُم بالزرْبة باش، ملّي تشوفوه عاود، تفرحو وانا ما نكون شي مهْموم. رحّبو بِه في الرَّبّ بْكُل فرْحة وْكرّمو الّي هُمَ فحالو، حيت كان علاين يموت بْسباب الخدمة د المسيح، ساخي بْنفسو باش يكمّل الّي كان ناقص في الخدْمة ديالكُم لِلي. وْفي الآخر، آ خوتي، فرحو في الرَّبّ. ماشي تقيل عليَّ نكتب لكُم عاود نفس الأُمور، وْهَد الشي لِلكُم أمان. ردّو بالكُم من الكلاب، ردّو بالكُم من فاعلين الشَّرّ، ردّو بالكُم من الّي كيشوّهو الجسد. حيت حنايَ هُمَ أهل الطهارة، الّي كنعبدو اللّٰه بالروح وْكنفْتَخرو بالمسيح يَسوع وْما كنتكّلو شي على المجْهود د الجسد. أنا بْنفسي عندي سبب باش نتكّل على الجسد، إدا ظنّ شي واحد يَخُر بلّي عندو بَياش يتكّل على الجسد، أنا كتَر مِنّو: أنا مطهّر في النهار التامن، من الشعب د إسْرائيل، من القبيلة د بِنْيامين، عبْراني من العبْرانيّين، من جهة الشريعة فرّيسي، من جهة الغيرة كُنْتْ كنتعدّى على الكنيسة، وْمن جهة التقوى الّي في الشريعة بلا لَوم. وَلكن ديك الشي كامل الّي كان لِلي ربح، حسبْتوْ خسارة بْسباب المسيح. وْكنحسب كُل شي خسارة بْسباب القيمة الأفضل باش نعرف المسيح يَسوع ربّي، الّي بْسبابو خسرْتْ كُل شي، وْراني كنحسب ديك الشي كامل زبل باش نربح المسيح، وْنجبر نفسي فيه، ماشي بالتقوى ديالي الّي هي بالشريعة، وَلكن الّي هي بالإيمان د المسيح، التقوى الّي هي من عند اللّٰه بالإيمان، باش نعرفوْ هُوَ والقوّة د القيامة ديالو والشركة د العداب ديالو وْنكون متشبّه معاه في الموت ديالو، حيت كنتمّنى نلحَق القيامة من بين الميّتين. ماشي حيت لحقْتْ كُل شي دابا، أَوْلا رجعْتْ كامل، وَلكن كنجري باش نلحَق ديك الشي الّي لحقني بِه يَسوع المسيح. آ الخوت، ما كنفكّر شي بلّي لحقْتوْ دابا، وَلكن واحد الحاجة كنعمل، كننسا الّي بقا ناللَّور وْكنجاهد باش نوصل نالقدّام. كنزيد نتقدّم نالغاية باش نربح الجائزة الّي اللّٰه كيعطينا بالدعْوة السماوية في المسيح يَسوع. الّي حنايَ كاملين خصْنا نفكّرو هَيدا، وِادا فكّرْتو في طريقة مخْتَلفة، اللّٰه غادي يبيّن لكُم هَد الشي. أمّا في ديك الشي الّي لحقْناه، خصْنا نعيشو بِه. آ الخوت، كونو متمتّلين بيَّ، ولاحظو هَدوك الّي كيمشيو حسب المتال الّي عْطيناه لكُم. كيفْما قُلْتْ لكُم بزّاف د المرّات، وْدابا نعاود نقول لكُم بالدموع، بلّي كاينين بزّاف الّي كيتمشّاو فحال عدْيان الصليب د المسيح. النهاية ديالوم هي الهلاك، والإلَه ديالوم هُوَ كِرشوم، وْكيفْتَخرو بالحشومة ديالوم، وْكيفكّرو غير في الدنيا. وَلكن حنايَ مواطنين د السما، الّي منّاْ كنتسنّاو الرجوع د المُنجّي الرَّبّ يَسوع المسيح، الّي غادي يبدّل الجسد ديالنا المتواضع باش يكون في الصورة د جسد المجد ديالو على حسب القُدرة الّي بِها يقدر يطوّع كُل شي نْنفسو. على ديك الشي، آ خوتي الحباب الّي كنتوحّشكُم، آ فرْحتي والتاج ديالي، تبتو هَيدا في الرَّبّ، آ الحباب. كنرغب أفودية وْسِنْتيخي باش يكونو متَّحدين في الرَّبّ. كَنْرَغبك أنتينا، آ رفيقي الأمين، عاون هَدوك الّي تَـعبو معيَ في الإنجيل مع أَكْليمَنْدُس ويَخرين الّي خدمو معيَ، الّي اسموم في كتاب الحياة. فرحو في الرَّبّ في كُل وقت، وْنعاود نقول، فرحو. خصّوْ يكون اللطف ديالكُم معروف عند الناس كاملين. الرَّبّ قريب. ما تشوّشو بْحتّى شي حاجة، وَلكن في كُل شي، بالصلاة والدعاء، قدّمو طلباتكُم قدّام اللّٰه وْشكروه، وْسلام اللّٰه، الّي فايت كُل عقل، غادي يحفظ القلوبة والأفْكار ديالكُم في المسيح يَسوع. وْفي الآخر، آ الخوت، كُل ما هُوَ حقّ، كُل ما هُوَ جليل، كُل ما هُوَ عادل، كُل ما هُوَ طاهر، كُل ما هُوَ لطيف، كُل ما عندو سُمعة مزيانة، إدا كانت شي فضيلة وِادا كان شي شُكر، خمّمو في هَد الشي. والّي تعلّمْتوه وْقبلْتوه وْسمعْتوه وْشفْتوه فيَّ، عملوه، وإلَه السلام يكون معكُم. فرحْتْ بزّاف في الرَّبّ حيت في الآخر ادّيتوها فيَّ من جديد، حيت واخّا كُنْتْ في بالكُم، ما جبرْتو شي الفُرْصة. ما كنقول شي هَد الشي حيت أنا محْتاج، حيت أنا تعلّمْتْ نقْتَنع بالحالة الّي أنا فيها. أنا كنعرف نعيش في الضيق، كيفْما كنعرف نعيش في الكترة. أنا متدرّب في كُل شي وْبْكُل شي، وْعرفْتْ نكون شبْعان أَوْلا بالجّوع، نكون في الخير أَوْلا نكون محْتاج. أنا قادر على كُل شي بالمسيح الّي كيقوّيني. وَلكن عملْتو مزيان ملّي شاركْتو معيَ في الضيق ديالي. وانتُمَ بْيَدْكُم كتعرفو، آ الفيلِبّيّين، بلّي في البداية د الإنجيل، ملّي خرجْتْ من مَكدونيّة، ما شاركَتْ معيَ حتّى شي كنيسة في العطاء والقبط، من غير أنتُمَ بوحدكُم، حيت حتّى في تسالونيكي صَيفطْتو لِلي أنتُمَ المساعدة كتَر من مرّة باش نسُدّ الاحْتياج ديالي. كنقول هَد الشي ماشي حيت بغيتْ الهديّة، وَلكن بغيتْ الغلّة تكتر في الحساب ديالكُم. وَلكن قبطْتْ كُل شي وْشاط لي ڭاع. أنا عامر حيت قبطْتْ من أبَفْرودِتُس ديك الشي الّي صيفطْتوه، ريحة طيّبة، دبيحة مقبولة وْمرْضيّة عند اللّٰه. والإلَه ديالي غادي يرزقكُم بْكُل ما خصْكُم على حسب الغِنى في المجد في المسيح يَسوع. والمجد ناللّٰه والآب ديالنا على الدوام دائمًا. آمين. سلّمو على القدّيسين كاملين في المسيح يَسوع. كيسلّمو عليكُم الخوت الّي هُمَ معيَ. السلام من جهة القدّيسين كاملين، خصوصًا الّي هُمَ من الدار د قَيصَر. نعْمة رَبّنا يَسوع المسيح تكون مع روحكُم. آمين. بولُس رسول يَسوع المسيح بإرادة اللّٰه والأخ تيموثاوس، نالخوت القدّيسين والصدّيقين في المسيح الّي في كولوسي، النعْمة لكُم والسلام من عند اللّٰه الآب ديالنا والرَّبّ يَسوع المسيح. كنشكرو اللّٰه الآب ديال رَبّنا يَسوع المسيح دائمًا ملّي كنصلّيو من جهتكُم، حيت سمعْنا بالإيمان ديالكُم بالمسيح يَسوع وْبالمحبّة الّي عندكُم نالقدّيسين كاملين، بْسباب الرجا الّي محفوظ لكُم في السما، الّي سمعْتو بِه من قبل في كلام الحقّ د الإنجيل، الّي وصَل نْعندكُم، فحال ما كيكبر في الدنيا كاملة، وْكيجيب الغلّة فحال ما كيجيباْ فيكُم حتّى أنتُمَ من النهار الّي سمعْتو وْعرفْتو نعْمة اللّٰه د بالصّحّ، كيفْما تعلّمْتو هَد الشي من أبَفْراس، الرفيق العزيز ديالنا في الخدْمة وْخدّام صادق د المسيح نالخير ديالكُم، الّي خبرنا بال‍محبّة ديالكُم في الروح. على ديك الشي حنايَ، من النهار الّي سمعْنا بِه، ما وقفْنا شي من الصلاة، طالبين من جهتكُم باش تتعمّرو بالمعْرفة د الإرادة ديالو في كُل حكْمة وْفهامة روحيّة، باش تتمشّاو فحال ما يليق بالرَّبّ في كُل رِضى، عاطيين الغلّة في كُل عمل صالح وْمكتّرين في معْرفة اللّٰه، متقوّيين بْكُل قوّة على حسب القُدرة د المجد ديالو باش تـتبتو بْكُل صبر في كُل حالة، شاكرين الآب بالفرْحة، الّي جعلكُم قادرين باش تشاركو في الورت د القدّيسين في النور، الّي حرّرنا من القوّة د الظلمة وْنقّلنا نالمُلك د اِبنو المحبوب، الّي فيه عندنا الفدا، الغُفْران من الدنوب. هُوَ صورة اللّٰه الّي ما كيتشاف شي، البِكر على الخليقة كاملة، حيت بِه تخلق كُل شي الّي في السما والّي على الأرض، الّي كيتشاف والّي ما كيتشاف شي، كيفْما كان، عروش أو سيادات أو رياسات أو قوّات، كُل شي بِه وْلِلو تخلق، الّي هُوَ قبل من كُل شي وْبِه كُل شي قايم، وْهُوَ راس الجسد الّي هُوَ الكنيسة، الّي هُوَ البداية والبِكر من الميّتين باش تكون لِلو الأوّليّة في كُل شي. حيت فرح اللّٰه باش يسكن فيه كُل التعْمير، ويصالح بِه كُل شي نْنفسو، الّي على الأرض والّي في السما، ويعمل المصالحة بواسطة الدم د الصليب ديالو. وانتُمَ، الّي من قبل كُنْتو بعادين من اللّٰه وْكُنْتو عدْيان ديالو في العقل ديالكُم، عاملين الحاجات القبيحة، دابا صالحكُم في الجسد البشري د المسيح بالموت باش يحضّركُم قدّيسين، بلا لَوم وْبلا عيب قدّامو، إدا بقيتو على الإيمان مأسّسين وْتابتين وْما كَتْـتزعْزعو شي على الرجا د الإنجيل الّي سمعْتوه والّي مبشّر بِه في كُل خليقة تحت السما، الّي أنا بولُس رجعْتْ واحد الخدّام ديالو. دابا كنفرح في العداب ديالي بْسبابكُم وْكنكمّل في الجسد ديالي الّي باقي من العداب د المسيح بْسباب الجسد ديالو الّي هُوَ الكنيسة، الّي لِلاْ رجعْتْ أنا خدّام على حسب المسؤولية الّي عْطاني اللّٰه بْسبابكُم نْتكْميل كلام اللّٰه، السرّ الّي كان مخبّع من زمان وْمن بزّاف د الأجْيال، وَلكن دابا ظهَر نالقدّيسين ديالو. بغى اللّٰه يعرّفوم بالغِنى د المجد د هَد السرّ بين هَدوك الّي ماشي يَهود، الّي هُوَ المسيح فيكُم، الرجا د المجد، الّي بِه كنبشّرو وْكننبّهو وْكنعلّمو نْكُل إنسان بْكُل حكْمة باش نحضّرو كُل إنسان كامل في المسيح يَسوع. وْعلى ديك الشي كَنْتعب وْكنجاهد على حسب القُدرة ديالو الّي كتخدم فيَّ بْقوّة. إيوا، بغيتْكُم تعرفو شحال كنجاهد من جهتكُم وْمن جهة الّي هُمَ في لاودِكيّة وْمن جهة هَدوك كاملين الّي ما شافو شي وَجهي بْعينوم باش يتعزّاو القلوبة ديالوم بالاتِّحاد د المحبّة حتّى يوصلو نالغِنى الكامل الّي ماجي من اليقين والفهامة، باش يعرفو سرّ اللّٰه، المسيح، الّي مخْزون فيه كُل الكنوز د الحكْمة والعِلم. وْكنقول لكُم هَد الشي باش ما يخدعكُم حتّى واحد بالكلام الّي كيقنع. حيت واخّا غايب في الجسد، أنا معكُم في الروح، وْكنفرح ملّي كنشوفكُم مرتّبين وْتابتين في الإيمان ديالكُم في المسيح. وْفحال ما قبلْتو المسيح يَسوع الرَّبّ، هَيداك تمشّاو فيه، مغْروسين وْمبْنيّين فيه وْقويّين في الإيمان، كيفْما تعلّمْتو، وْمعمّرين بالشكر. ردّو بَالْكُم باش حتّى واحد ما يغشّكُم بالفلْسفة الّي تابعة التقاليد د الإنسان على حسب قواعد الدنيا، ماشي على حسب المسيح. حيت فيه ساكن التعْمير الكامل د الأُلوهيّة في الجسد. وانتُمَ معمّرين فيه الّي هُوَ الراس د كُل رياسة وْقوّة. وانتُمَ فيه كُنْتو مطهّرين بالطهارة الّي ماشي باليَد، وَلكن بْهَديك الّي كتحيّد منكُم الطبيعة المُدْنبة، الطهارة الّي عملاْ المسيح فيكُم، مدْفونين معاه في ديك الغطس الّي بِه قُمْتو عاود معاه بالإيمان بْقُدرة اللّٰه الّي بعتوْ من بين الميّتين. وْمن قبل ما قبلْتو هَد الطهارة، أنتُمَ كُنْتو ميّتين في الدنوب ديالكُم وْعْطاكُم اللّٰه الحياة مع المسيح وْغفر الدنوب ديالنا كاملة. وْبطّل الدين الّي كان علينا بالفرائض الّي كانتْ ضدّنا، وْحيّدوْ وْسمّروْ على الصليب. وْعرّى السيادات والسلاطين وْفَضحوم وْغلب عليهُم في الصليب. على ديك الشي ما يحكم عليكُم حتّى شي واحد في الماكلة أَو الشرب أَو من جهة شي عيد أَو هلال أَو سبت، الّي هُمَ ظلّ الأُمور الماجّة، وَلكن الحقيقة هي في المسيح. ما تخلّيو حتّى واحد يغشّكُم بالتواضُع وْعبادة الملائكة، على لساس الأُمور الّي شافاْ في شي رؤيا، وْكيفْتَخر بالعقل الجسدي، وْما كَيْبقا شي ملصّق بالراس، الّي منّو كيكبر الجسد كامل مقوّي وْمحْزوم بالمفاصل وأوتار العضلات كيفْما بغى اللّٰه. إدا مُتّو مع المسيح على القواعد د هَد الدنيا، علاش أنتُمَ كتعيشو في الدنيا خاضعين نالفرائض فحال هَدو: ما تحادي شي، وْما تدوق شي، وْما تمسّ شي بْيَدّك؟ ديك الوَصايا والتعاليم د الناس غادي يفناو كاملين باسْتعمالوم، الّي هُمَ فيهُم مظاهر د الحكْمة بالعبادة الخاصّة والتواضُع والقهر د الجسد، وَلكن ما فيهُم حتّى شي فايدة باش يحاربو ضدّ شهاوات الجسد. إدا كُنْتو اتّبعَتّو مع المسيح، اهْتَمّو بالأُمور الّي هي من فوق، فاين ݣالس المسيح على الّيمين د اللّٰه. ركّزو على الأُمور الّي هي من فوق، ماشي على الأُمور الّي على الأرض. حيت أنتُمَ مُتّو والحياة ديالكُم مسْتورة مع المسيح في اللّٰه. ملّي يظهَر المسيح، الّي هُوَ حياتكُم، في ديك الساعة غَد تظهرو حتّى أنتُمَ معاه في المجد. على ديك الشي قتلو فيكُم الأُمور الّي هي أرضيّة: الزنا، النجاسة، الهوى، الشهْوة القبيحة، والطمع، الّي هُوَ العبادة د الأصْنام. على هَد الأُمور كينزل غضب اللّٰه على أُوْلاد المعْصيّة، الّي أنتُمَ كُنْتو كتمارسوهُم من قبل ملّي كُنْتو عايشين فيهُم. وَلكن دابا، حيّدو عليكُم هَد الشي كامل: الغضب، السخط، الخبت، الشتيم، والكلام القبيح من الدقوم ديالكُم، وْما تكدبو شي على بعضيّاتكُم، حيت حيّدْتو منكُم الإنسان القديم بالأعْمال ديالو، وْلبسْتو الإنسان الجديد الّي كيتجدّد في المعْرفة حسب الصورة د الخالق ديالو. في الإنسان الجديد ما كاين شي يوناني أَو يهودي، مطهّر أَو غير مطهّر، برْبري أَو أجنبي، عبد أَو حُرّ، وَلكن المسيح هُوَ كُل شي وْفي كُل شي. إدَن أنتُمَ، فحال المخْتورين د اللّٰه قدّيسين وْمحْبوبـين، لبسو الجوف د الرحْمة واللطف والتواضُع والحنان وْطول الصبر باش تتحمّلو بعضيّاتكُم وْتتسامحو، إدا كانتْ نْشي واحد الشكوى على يَخُر. كيفْما سامحكُم المسيح، هَيداك سامحو حتّى أنتُمَ. وْفوق هَد الشي كامل لبسو المحبّة الّي هي الرباط د الكمال وْسلام المسيح يحكم في القلوبة ديالكُم الّي لِلو تعْرَطْتو باش تكونو جسد واحد، وْكونو شاكرين. ويسكن فيكُم كلام المسيح بالغِنى وْعلّمو وْنبّهو بعضيّاتكُم بْكُل حكْمة. هلّلو بالمزامير والتسابيح والترانيم الروحيّة، شاكرين الرَّبّ من القلوبة ديالكُم. وْكُل شي الّي كتعملو بالقول أَوْلا بالفعل، عملوه بِاسم الرَّبّ يَسوع، شاكرين بِه اللّٰه الآب. آ النسا، خضعو نالرجال ديالكُم فحال ما يليق في الرَّبّ. آ الرجال، حبّو النسا ديالكُم وْما تكونو شي قاصحين معهُم. آ الولاد، طيعو الوالِدين ديالكُم في كُل شي، حيت هَد الشي كيرضي الرَّبّ. آ الوالِدين، ما تقلّقو شي أُوْلادكُم باش ما يفشلو شي. آ العبيد، طيعو في كُل شي نالأسْياد ديالكُم من جهة الجسد، ماشي غير ملّي كيشوفو فيكُم، فحال إدا بغيتو ترضيو الناس، وَلكن بْقلب صافي محْتَرمين الرَّبّ. وْكُل شي الّي كتعملو، عملوه من القلب، فحال إدا كُنْتو خدّامين نالرَّبّ وْماشي نالناس، عارفين بلّي من الرَّبّ غَد تقبطو الأجر د الورت، حيت كتخدمو الرَّبّ المسيح. وَلكن الّي كيعمل الظلم غادي يتخلّص على الظلم ديالو، حيت ما كاينة شي الوجهيّات. آ الأسْياد، عملو مع العبيد العدل والمساواة، عارفين بلّي حتّى أنتُمَ عندكُم واحد السيّد في السما. داومو على الدُعاء ساهرين فيه بالحمد، وْطلبو في نفس الوقت من جهتنا حنايَ باش يفتح نّا الرَّبّ واحد الباب د الكلام باش نبشّرو بْسِرّ المسيح الّي على مسبّتو أنا حبّاس، باش نظهّروْ كيفْما واجب عليَّ نتكلّم. تمشّاو بالحكْمة مع هَدوك الّي ما آمنو شي بالمسيح، واسْتغلّو الوقت مزيان. يكون الكلام ديالكُم في كُل وقت بالنعْمة، لطيف وْطيّب باش تعرفو كيف واجب عليكُم تجاوبو كُل واحد. تيخيكُس، الأخ العزيز والخدّام الصادق والعبد معنا في الرَّبّ، غادي يعرّفكُم بالحالة ديالي بالتفْصيل، الّي صيفطْتوْ نْعندكُم بْسباب هَد الشي بَياش تعرفو الحالة ديالنا ويعزّي القلوبة ديالكُم. وْصيفطْتْ معاه أُنِسيمُس، الأخ الصادق العزيز الّي هُوَ واحد منكُم. وْهُمَ غادي يعرّفوكُم بْكُل ما كيوقع هنايَ. كيسلّم عليكُم أرِسْتَرْخُس الحبّاس معيَ، وْمَرْقُس، ولد العمّ ديال بَرْنابا، الّي وصيتْكُم عليه. إدا هُوَ جا نْعندكُم، اسْتَقبلوه مزيان. كيسلّم عليكُم يَسوع الّي مسمّي يُسْطُس. هَدوك بوحدوم من اليهود الّي كيعاونوني في مُلك اللّٰه وْهُمَ عزّاوني. كيسلّم عليكُم أَبَفْراس، عبد المسيح، الّي هُوَ واحد منكُم، وْهُوَ كيجاهد دائمًا من جهتكُم في الدُعاء باش تكونو تابتين، كاملين وْمعمّرين في إرادة اللّٰه في كُل شي. وانا كنشهد لو بلّي تعب بزّاف من جهتكُم وْمن جهة الّي هُمَ في لاودِكيّة وْفي هيرابوليس. كيسلّم عليكُم لوقا الطبيب العزيز وْدي‍ماس. سلّمو على الخوت الّي في لاودِكيّة وْعلى نِمْفاس وْعلى الكنيسة الّي في الدار ديالاْ. وْملّي تكونو قريتو هَد البراة عندكُم، خلّيوهُم يقراوها حتّى في الكنيسة اللاودِكيّة، والبراة ديال لاودِكيّة تقراوها حتّى أنتُمَ. وْقولو نْأَرْخِبُّس: "ردّ بالك باش تكمّل الخدْمة الّي عْطاك الرَّبّ." كنكتب هَد السلام بْخطّ يَدّي، أنا بولُس. تفكّرو بلّي أنا حبّاس. النعْمة معكُم. آمين. بولُس وْسِلْوانُس وْتيموثاوس نالكنيسة د التسالونيكيّين الّي في اللّٰه الآب والرَّبّ يَسوع المسيح، النعْمة لكُم والسلام. كنشكرو اللّٰه دائمًا من جهتكُم كاملين، وْملّي كنصلّيو، كَنْدكروكُم، كنتفكّرو قدّام اللّٰه والآب ديالنا باسْتمرار خدمة إيمانكُم وْتعب محبّتكُم وْصبر الرجا ديالكُم في رَبّنا يَسوع المسيح. آ الخوت المحْبوبين عند اللّٰه، كنعرفو اخْتياركُم. حيت الإنجيل ديالنا جاكُم ماشي غير بالكلام، وَلكن حتّى بْقوّة وْبالروح القُدُس، وْباليَقين الشديد. كيفْما كتعرفو مزيان، كُنّا فوسطكُم على المصْلحة ديالكُم. وانتُمَ رجعْتو كتقلّدونا حنايَ والرَّبّ، حيت قبلْتو الكلام في ضيق كبير بالفرْحة د الروح القُدُس، حتّى رجعْتو متال مزيان نالناس كاملين الّي كيآمنو في مَكدونيّة وأَخائية، حيت من عندكُم انْتَشر كلام الرَّبّ، ماشي غير في مَكدونيّة وأَخائية وْكان، وَلكن في كُل موطَع انْتَشر الإيمان ديالكُم باللّٰه وْما بقينا شي محْتاجين نتكلّمو، حيت هُمَ بْنَفسوم كيخبرونا كيفاش رحّبْتو بِنا وْكيفاش رجعْتو ناللّٰه من الأصْنام باش تعبدو اللّٰه الحيّ الحقيقي وْكَتْـتسنّاو اِبنو من السما الّي بعتوْ من بين الميّتين، يَسوع الّي كينجّينا من الغضب الّي ماجي. حيت أنتُمَ، آ الخوت، كتعرفو بلّي الزيارة ديالنا نْعندكُم ما كانت شي بلا فايدة. وْكتعرفو بلّي، واخّا كُنّا من قبل مضيّقين وْتعدّبنا بالتزْبيل علينا في فيلِبّي، زعمْنا وْتيقْنا في إلَهنا باش نتكلّمو معكُم بإنجيل اللّٰه فوسط بزّاف د الجهاد. حيت التشْجيع ديالنا ما كيجي شي من الغلط وَلا من النيّة الخايبة وَلا بالغشّ. بالعكس، حنايَ كنتكلّمو فحال الرجال الّي امْتَحنوم اللّٰه وْعْطاهُم الإنجيل فحال شي أمانة، كنتكلّمو ماشي باش نرضيو الناس وَلكن اللّٰه الّي كيخْتَبر القلوبة ديالنا. حيت عُمرنا ما كُنّا كنمسحو لكُم الكابّة، كيفْما كتعرفو، وْما كان شي فينا الطمع، واللّٰه شاهد. وْما بقّشْنا شي على المجد د الناس، لا منكُم وَلا من غيركُم، واخّا كُنّا قادرين نتقّلو عليكُم فحال رُسُل المسيح. بالعكس، كُنّا حنانين معكُم فحال الأمّ الّي كترطّع وْكَتْـتهلّى في أُوْلاداْ، شحال كُنّا حنانين معكُم، حيت كُنّا باغيين نسلّموكُم ماشي غير الإنجيل د اللّٰه بوحدو، وَلكن حتّى حياتنا، حيت رجعْتو عزازين عندنا. وانتُمَ كتعقلو، آ الخوت، على الخدْمة والعيا ديالنا، كيفاش كُنّا كنخدمو في الليل وْفي النهار باش ما نكونو شي تقالين عليكُم، وْحنايَ كنبشّروكُم بإنجيل اللّٰه. أنتُمَ شهود، واللّٰه شاهد، كيفاش كُنّا متّاقيين، صدّيقين وْبلا لَوم فوسطكُم أنتُمَ المؤمنين. وْكتعرفو بلّي كُنّا كنتعاملو معكُم فحال الوالِد مع أُوْلادو. وْكُنّا كنشجّعوكُم وْكنعزّيوكُم وْكنوصّيوكُم باش تتمشّاو كيفْما يليق باللّٰه الّي عَيّط عليكُم نالمُلك والمجد ديالو. على ديك الشي حنايَ كنشكرو اللّٰه بلا ما نوقفو، حيت ملّي قبلْتو منّا الكلام د اللّٰه، الّي سمعْتوه منّا، ما قبلْتوه شي فحال الكلام د الناس، وَلكن كيفْما هُوَ في الحقيقة، الكلام د اللّٰه الّي كيخدم فيكُم أنتُمَ المؤمنين. أنتُمَ، آ الخوت، تبعْتو المتال د الكنائس د اللّٰه في اليَهوديّة في المسيح يَسوع حيت تعدّبْتو على يد أهل بلادكُم بْنفس العداب الّي هُمَ تعدّبو بِه على يد اليهود. هَدوك الّي قتلو الرَّبّ يَسوع والأَنْبياء وْجراو علينا حنايَ، ما كيرضيو شي اللّٰه وْهُمَ مخالفين نالناس كاملين، حيت كيحاولو يمنعونا باش ما نبشّرو شي الوَتَنيّين حتّى ينجاو. هَيدا في كُل ما كيعملو كيوصلو حتّى الكمالة د الدنوب ديالوم. وَلكن نزل عليهُم الغضب حتّى نالنهاية. أمّا حنايَ، آ الخوت، مفارقين عليكُم في وقت قليل، من الوجَه وَلكن ماشي من القلب، كنحاولو بالشوق نمشيو نْعندكُم باش نشوفوكُم وجَه نالوجَه. على ديك الشي كُنّا باغيين نمشيو نْعندكُم، خصوصًا أنا بولُس حاولْتْ نمشي نْعندكُم مرّة وْجوج د المرّات، وَلكن منعنا الشيطان. حيت شنّو هُوَ الرجا ديالنا والفرْحة والتاج الّي كنفْتَخرو بِهُم؟ واش ماشي أنتُمَ قدّام رَبّنا يَسوع المسيح في المجي ديالو؟ نعم، أنتُمَ المجد والفرْحة ديالنا. على ديك الشي، ملّي ما قدرْنا شي نصبرو كتَر، اتّفقْنا نبقاو في أَثينا بوحدنا، وْصيفطْنا تيموثاوس الأخ ديالنا والخدّام د اللّٰه معنا في الإنجيل د المسيح باش يتبّتكُم ويشجّعكُم في الإيمان ديالكُم، باش حتّى واحد ما يشوّش عليكُم في ديك المحاين، حيت أنتُمَ كتعرفو بلّي كيوقع نّا هَد الشي، حيت ملّي كُنّا معكُم، سبقْنا وْنبّهْناكُم بلّي غادي نتعدّبو، وْهَيدا وقَع كيفْما كتعرفو. على ديك الشي ملّي ما قدرْتْ شي نصبر كتَر، صيفطْتْ تيموثاوس باش نعرف كيف هُوَ الإيمان ديالكُم باش ما يكون شي المجرّب جرّبكُم وْترجع الخدمة ديالنا بلا فايدة. وَلكن دابا، ملّي تيموثاوس جا نْعندنا من عندكُم، عْطانا خبار مزيانة على الإيمان والمحبّة ديالكُم وْبلّي أنتُمَ مشْتاقين لِنّا دائمًا بالحنان، وانتُمَ كَتْـتوحّشونا فحال ما كنتوحّشوكُم حتّى حنايَ نشوفوكُم. وْعلى ديك الشي، آ الخوت، أنتُمَ شجّعْتونا بإيمانكُم فوسط الضيق والعداب ديالكُم، حيت دابا حنايَ كنعيشو، إدا أنتُمَ تابتين في الرَّبّ. حيت كيفاش نقدرو نشكرو اللّٰه من جهتكُم على الفرْحة كُلّاْ الّي كنفرحو بِها بْسبابكُم قدّام إلَهنا، طالبين ليل وْنهار باش اللّٰه يخلّينا نشوفوكُم عاود وْنكمّلو الّي ناقص في إيمانكُم؟ واللّٰه الآب ديالنا بْنفسو وْرَبّنا يَسوع يهدي طريقنا نْعندكُم. والرَّبّ يجعلكُم تكبرو باش تعزّو بعضيّاتكُم كتَر وْتعزّو الناس كاملين كيفْما حنايَ كنعزّوكُم، باش يتبّت القلوبة ديالكُم بلا لَوم في القداسة قدّام اللّٰه الآب ديالنا في المجي د رَبّنا يَسوع المسيح مع القدّيسين ديالو كاملين. وْدابا، آ الخوت، كَنْرغبوكُم وْكنطلبو منكُم بالرَّبّ يَسوع بلّي، فحال ما تعلّمْتو منّا كيفاش خصْكُم تتمشّاو وْترضيو اللّٰه، هَيدا تزيدو كتَر وْكتَر، كيفْما كتعملو. حيت كتعرفو الوَصايا الّي عْطيناها لكُم بالرَّبّ يَسوع، حيت إرادة اللّٰه هي القداسة ديالكُم باش تبعّدو على الزنا، ويعرف كُل واحد كيفاش يحافظ على الجسد ديالو في القداسة والكرامة، وْماشي في الشهوات القبيحة فحال الوَتَنيّين الّي ما كيعرفو شي اللّٰه. وْما يظلم حتّى واحد خاه وْما يغدروْ شي في هَد الشي، حيت الرَّبّ كيعاقب على هَد الأُمور كاملة، فحال ما قُلْنا لكُم من قبل وْشهدْنا. حيت اللّٰه ما عَيّط شي علينا نالنجاسة وَلكن نالقداسة. على ديك الشي، الّي كيرفض هَد الشي ما كيرفض شي الإنسان، وَلكن كيرفض اللّٰه الّي كيعطيكُم الروح القُدُس ديالو. وَلكن على المحبّة د الخوت، ما محْتاجين شي باش نكتب لكُم حيت أنتُمَ تعلّمْتو بْراسكُم من اللّٰه كيفاش تعزّو بعضيّاتكُم، وانتُمَ هَيدا كتعملو مع الخوت كاملين الّي في مَكدونيّة كاملة، وَلكن كنشجّعوكُم تعزّو كتَر وْكتَر وْتحاولو تعيشو هانيين وْتݣابلو الأُمور د راسكُم وْتخدمو باليَدّين ديالكُم فحال ما وصّيناكُم، باش يحْتَرموكُم الناس الّي ماشي مؤمنين بْسباب المعاملة ديالكُم وْما تحْتاجو نْحتّى شي حاجة. وْما بغينا شي، آ الخوت، تجهلو الّي غادي يوقع مع الّي نعسو، باش ما تحزنو شي فحال يَخرين الّي ما عندوم شي الرجا. إدا كُنّا كنآمنو بلّي المسيح مات وْتّبعت حي، هَيداك اللّٰه غادي يجيب مع المسيح حتّى هَدوك الّي نعسو فيه. حسب الّي قال الرَّبّ، كنأكّدو بلّي حنايَ الحيّين، الّي بقينا حتّى نالمجي د الرَّبّ، ما غادي شي نسبقو الّي ناعسين. حيت الرَّبّ نفسو غادي ينزل من السما بواحد الصوت د السلْطة، بْصوت رئيس الملائكة وْبوق اللّٰه، والميّتين في المسيح غادي يتّبعتو هُمَ الُوّلين. من بعد، حنايَ الّي حيّين وْباقيين غادي نتّخطفو كاملين معهُم في السحاب باش نتلاقاو مع الرَّبّ في الهوا، وْهَيدا غادي نكونو مع الرَّبّ دائمًا. على ديك الشي شجّعو بعضيّاتكُم بْهَد الكلام. وانتُمَ، آ الخوت، ما كتحْتاجو شي نكتب لكُم من جهة الزمان والأوْقات، حيت كتعرفو بالضبط بلّي يوم الرَّبّ غادي يجي فحال السارق في الليل، حيت ملّي كيقولو: "السلام والأمان،" في ديك الساعة على غفْلة غادي ينزل عليهُم الهلاك فحال الوجَع د واحد الحُبْلى، وْما غادي شي يفلتو. وَلكن أنتُمَ، آ الخوت، ما كتعيشو شي في الظلام باش ديك النهار يفاجأكُم فحال شي سارق. أنتُمَ كاملين أُوْلاد النور، أُوْلاد النهار. حنايَ ماشي من الليل ولا من الظلام. على ديك الشي ما خصْنا شي ننعسو فحال يَخرين، وَلكن نسهرو وْنكونو على بال. حيت الّي كينعسو، كينعسو في الليل والّي كيسكرو، كيسكرو في الليل. وَلكن بالعكس، حنايَ الّي من النهار خصْنا نكونو على بال، لابسين الصدرية د الإيمان وْد المحبّة والكاسك د الراس الّي هُوَ الرجا د النجا. حيت اللّٰه ما وجّدنا شي نالغضب، وَلكن نالنجا بواسطة رَبّنا يَسوع المسيح الّي مات على مسبّتنا باش، إدا سهرْنا أَوْلا نعسْنا، نحياو معاه. على ديك الشي شجّعو بعضيّاتكُم وْبنيو بعضيّاتكُم فحال ما كتعملو. وْدابا كنطلبو منكُم، آ الخوت، تحْتَرمو الّي كيخدمو فوسطكُم وْكيڭوّدوكُم في الرَّبّ وْكينبّهوكُم، وْكرّموهُم بزّاف وْعزّوهُم بْسباب الخدمة ديالوم. كونو في السلام مع بعضيّاتكُم. وْكنطلبو منكُم، آ الخوت، توبّخو الّي هُمَ معْݣازين، تشجّعو الّي فاشلين، تعاونو الّي ضعافين، وْتصبرو مع الناس كاملين. ردّو بالكُم باش حتّى واحد ما يجازي يَخُر الشَّرّ بالشَّرّ، وَلكن تبعو دائمًا الخير مع بعضيّاتكُم وْمع الناس كاملين. فرحو دائمًا. داومو على الصلاة. شكرو اللّٰه كيفْما كان الحال، حيت هَدي هي إرادة اللّٰه لكُم في المسيح يَسوع. ما تطفيو شي الروح. ما تحڭرو شي النبوّات. امْتَحنو كُل شي، شبّرو في الّي مزيان. بعّدو على كُل نوع د الشَّرّ. وإلَه السلام نفسو يقدّسكُم بالكمال ويحفظ روحكُم وْنفسكُم وْجسدكُم كاملين بلا لَوم في المجي د رَبّنا يَسوع المسيح. صادق هُوَ الّي كيعيّط لكُم، والّي غادي يكمّلوْ. آ الخوت، صلّيو من جهتنا. سلّمو على الخوت كاملين بْقُبْلة مقدّسة. كنكلّفكُم بالرَّبّ باش تقراو هَد البراة على الخوت القدّيسين كاملين. النعْمة د رَبّنا يَسوع المسيح معكُم. آمين. بولُس وْسِلْوانُس وْتيموثاوس نالكنيسة د التَّسالونيكيّين في اللّٰه الآب ديالنا والرَّبّ يَسوع المسيح. النعْمة لكُم والسلام من عند اللّٰه الآب ديالنا والرَّبّ يَسوع المسيح. خصْنا دائمًا نشكرو اللّٰه من جهتكُم، آ الخوت، كيفْما يليق، حيت الإيمان ديالكُم كيكبر بزّاف والمحبّة د كُل واحد منكُم كَتْـتزاد مع يَخرين. هَيدا كنفْتَخرو بِكُم قدّام الكنائس د اللّٰه بْسباب صبركُم وإيمانكُم في تحمُّل التعدّو والتضْييق. هَد الشي كيبيّن الحُكم العادل د اللّٰه باش تكونو محْسوبـين مسْتاهلين نْمُلك اللّٰه الّي بْسبابو كَتْـتعدّبو. اللّٰه، الّي هُوَ عادل، غادي يجازي بالعداب هَدوك الّي كيضيّقو عليكُم. وانتُمَ الّي مضيّقين غادي يعطيكُم الراحة معنا ملّي غادي يظهَر الرَّبّ يَسوع من السما مع الملائكة د القوّة ديالو، في اللهيب د النار، باش ينْتَقم من الّي ما كيعرفو شي اللّٰه والّي ما كيطيعو شي الإنجيل د رَبّنا يَسوع، الّي هُمَ غادي يتعاقبو بالهلاك الأبدي، مفارقين من وجه الرَّبّ وْمن مجد قوّتو، ملّي يجي في ديك النهار باش يتمجّد في القدّيسين ديالو وْباش يتعجّبو منّو الناس كاملين الّي آمنو بِه، حيت الشهادة ديالنا مصدّقة عندكُم. على هَد الشي كنصلّيو دائمًا من جهتكُم باش الإلَه ديالنا يحسبكُم مسْتاهلين نالعراطة ويكمّل بالقُدرة ديالو كُل الرغبات ديالكُم نالخير وْكُل عمل ديالكُم في الإيمان، باش يتمجّد اِسم رَبّنا يَسوع فيكُم وْتتمجّدو أنتُمَ فيه بالنعْمة د الإلَه ديالنا وْد الرَّبّ يَسوع المسيح. وْدابا كنرغبوكُم، آ الخوت، من جهة المجي د رَبّنا يَسوع المسيح واللقاء ديالنا معاه، باش ما تتزعْزعو شي دغيا في العقل ديالكُم وْما تخلعو شي لا بْروح ولا بْكلام ولا بْرسالة، فحال إدا جات مِنّا، كتدّعي بلّي وصَل نهار الرَّبّ. ما تخلّيو حتّى شي واحد يتلّفكُم حتّى بْشي حاجة، حيت يوم المسيح ما غادي شي يجي غير إدا ما جا من قبل الخروج من الإيمان ويظهَر إنسان الدنوب، ولد الهلاك، الّي كينوض وْكيرفع نفسو ضدّ كُل ما كيتسمّى إلَه أَوْلا الّي كيعبدوه الناس، حتّى يڭلس في المَعْبد د اللّٰه، فحال إدا هُوَ اللّٰه. واش ما كَتْـتفكّرو شي بلّي ملّي كُنْتْ أنا معكُم كُنْتْ كنقول لكُم هَد الشي؟ وانتُمَ دابا كتعرفو شنّو الّي كيحصروْ باش يظهَر في الوقت ديالو. حيت السِرّ د الشَّرّ كيخدم دابا بالقوّة ديالو، وَلكن غادي يتحيّد من الوسط هَداك الّي دابا كيحصروْ. وْفي ديك الساعة غادي يظهَر ديك الظالم الّي غادي يفنيه الرَّبّ بْنفخة من دُقمو ويهلكوْ بالظهور د المجي ديالو. والظالم غادي يجي بالخدْمة د الشيطان بْكُل نوع من المُعْجزات، العلامات والعجايب د الكدوب، وْبْكُل خديعة المعْصيّة في الّي كيتّهلكو، حيت ما قبلو شي المحبّة د الحقّ باش ينجاو. وْعلى هَد الشي اللّٰه كيصيفط لوم واحد القوّة د الضلال باش يصدّقو الكدوب، باش يتعاقبو الناس كاملين الّي ما صدّقو شي الحقّ، وَلكن فرحو بالمعْصيّة. أمّا حنايَ خصْنا دائمًا نشكرو اللّٰه من جهتكُم، آ الخوت العزازين في الرَّبّ، حيت اللّٰه اخْتاركُم من البداية نالنجا بواسطة التقْديس بالروح والإيمان في الحقّ. وْنْهَد الشي عَيّط عليكُم بالإنجيل ديالنا باش تتوصّلو بالمجد د رَبّنا يَسوع المسيح. على ديك الشي، آ الخوت، تبتو وْشبّرو في التعاليم الّي تعلّمْتوها، كان بالكلام أَوْلا بالبراة ديالنا. وْرَبّنا نفسو، يَسوع المسيح، واللّٰه الآب ديالنا الّي حبّنا وْعْطانا التعْزيّة الأبديّة والرجا الصالح بالنعْمة، غادي يعزّي القلوبة ديالكُم ويتبّتكُم في كُل كلام وْعمل صالح. في الآخر، آ الخوت، صلّيو على مسبّتنا باش ينْتَشر كلام الرَّبّ دغيا ويتمجّد كيفْما تمجّد عندكُم. وْصلّيو باش ننجاو من الناس الخايبـين والقباحين، حيت ماشي كاملين عندوم الإيمان. وَلكن الرَّبّ صادق، وْهُوَ غادي يتبّتكُم ويحفظكُم من الشرّير. وْكنتيقو بالرَّبّ من جهتكُم بلّي كتعملو ديك الشي الّي كنوصّيكُم بِه وْغَد تزيدو تعملوه. والرَّبّ يهدي القلوبة ديالكُم نالمحبّة د اللّٰه والصبر د المسيح. وْكنوصّيوكُم، آ الخوت، بِاسم رَبّنا يَسوع المسيح، باش تبعّدو على كُل أخ الّي كيمشي في الطريق المعوّجة وْماشي على حسب التعْليم الّي قبلوْ منّا. حيت أنتُمَ كتعرفو كيفاش واجب تـتبعو المتال ديالنا، حيت حنايَ ما تمشّينا شي في الطريق المعوّجة فوسطكُم وْما كلينا شي الخُبز د حتّى شي واحد باطل، وَلكن كُنّا كنخدمو بالعيا وْبالتمارة ليل وْنهار باش ما نتقّلو شي على حتّى شي واحد منكُم. ماشي حيت ما عندنا شي الحقّ، وَلكن باش نعملو نفوسنا متال لِلكُم باش تكونو متمتّلين بِنا، حيت ملّي كُنّا باقين معكُم، وصّيناكُم بْهَد الشي: "إدا شي واحد ما بغى شي يخدم، ما ياكل شي." حيت سمعْنا بلّي البعض منكُم كيتصرّفو بلا نظام، وْما كيخدمو في والو، وَلكن هُمَ فضوليّين. والّي فحال هَدوك كنوصّيوهُم وْكننبّهوهُم بْرَبّنا يَسوع المسيح باش يخدمو بالسكات وياكلو الخُبز ديالوم. أمّا أنتُمَ، آ الخوت، ما تعياو شي في عمل الخير. وِادا شي واحد ما كيطيع شي الّي كنقولو في هَد البراة، ميّزوه وْما تخَلطوه شي باش يتحشّم. وَلكن ما تحسبوه شي فحال واحد العدو، وَلكن نبّهوه فحال واحد الأخ. وْربّ السلام نفسو يعطيكُم السلام دائمًا في كُل الظروف. الرَّبّ معكُم كاملين. كنكتب هَد السلام بْخطّ يدّي، أنا بولُس، الّي هُوَ العَلامة في كُل براة. هَيدا كنكتب أنا. نعْمة رَبّنا يَسوع المسيح معكُم كاملين. آمين. بولُس رسول يَسوع المسيح بأمر اللّٰه مُنجّينا وْرَبّنا يَسوع المسيح، الرجا ديالنا، نْتيموثاوس بني الحقيقي في الإيمان. النعْمة والرحْمة والسلام من عند اللّٰه الآب ديالنا والمسيح يَسوع رَبّنا. ملّي كُنْتْ ماشي نْمَكدونيّة، كيفْما رغبْتْ منّك باش تبقا في أَفَسُس، باش توصّي البعض من الناس باش ما يعلّمو شي تعْليم مخْتَلف، وْما يتصنّتو شي نالخرايف واللائحات د الجدود الّي ما عندوم شي النهاية الّي كيجيبو المدابزات، فْعوط البُنْيان د اللّٰه الّي في الإيمان. حيت المقصود من هَد الوَصيّة هي المحبّة من قلب صافي وْضمير صالح والإيمان بلا نفاق. من هَد الأُمور تعوّجو البعض مِنّوم وانْحرفو نالكلام الخاوي، كيبغيو يكونو مُعلّمين الشريعة وْهُمَ ما كيفهمو شي شنّو كيقولو وْشنّو كيأكّدو عليه. وَلكن حنايَ كنعرفو بلّي الشريعة مزيانة إدا شي واحد كيطبّقاْ كيفْما واجب. وْكنعرفو بلّي الشريعة ما اتّعطات شي نالصالح، وَلكن نالعاصيين والمتمرّدين، نالفُجّار والمُدْنبـين، نالمنْڭوسين والفاسدين، نِلّي قاتلين الوالد ديالوم وْنِلّي قاتلين الوالِدة ديالوم وْنِلّي قاتلين الناس، نالزانيين، ناللِواطيين، نِلّي كيخطفو الناس، نالكدّابـين، نالحانتين وْنأي حاجة الّي كَتْكون ضدّ التعْليم الصحيح، على حسب الإنجيل المجيد د اللّٰه المبارك الّي تأمّنْتْ أنا عليه. أنا كنشكر يَسوع المسيح رَبّنا الّي قوّاني حيت حسبني صادق وْجعلني في الخدمة ديالو، أنا الّي كُنْتْ من قبل واحد الكافر، وْواحد الّي كيمرْمد وْكُنْتْ واحد الرَّجل عنيف. وَلكن رحمني اللّٰه حيت عملْتْ هَد الشي بالجهل وْكُنْتْ بلا إيمان، والنعْمة د رَبّنا فاضتْ عليَّ بالزيادة مع الإيمان والمحبّة الّي في المسيح يَسوع. صادقة هَد الكلمة وْمسْتاهلة باش تْتّقبل، بلّي المسيح يَسوع جا نالدنيا باش ينجّي المُدْنبـين، الّي أنا الُوّل فيهُم، وَلكن على هَد الشي اتّرحَمْتْ أنا باش يَسوع المسيح يظهّر فيَّ، أنا الُوّل، طول الصبر ديالو متال نْهَدوك الّي غادي يآمنو بِه ويتوصّلو بالحياة الأبديّة. على هَد الشي نالمَلِك الدايم الّي ما كَيْفْنا شي وْما كيتشاف شي، الإلَه الوحيد، عندو الكرامة والمجد على الدوام دائمًا، آمين. هَد الوَصيّة، آ بني تيموثاوس، أنا كنوصّيك، على حسب النبوّات الّي سبقَتْ عليك، باش تحارب بِها المحاربة المزيانة وْتقبط في الإيمان والضمير الصالح، الّي خلّاواه البعض وْتهرّس البارْكو د الإيمان ديالوم، الّي مِنّوم هيمينايُس والإسْكَندَر، الّي سلّمْتوم نالشيطان باش يتعلّمو ما يكفرو شي. كنطلب قبل من كُل شي باش ترفعو الطلبات والصلاوات والرغبات والشكر على الناس كاملين، خصوصًا على الملوك وْعلى الحُكّام كاملين باش نعيشو في سلام هانيين وْفي التقوى والكرامة. حيت هَد الشي مزيان وْمقبول قدّام اللّٰه مُنجّينا، الّي كيبغي الناس كاملين ينجاو ويوصلو نالمعْرفة د الحقّ. حيت كاين إلَه واحد وْوسيط واحد بين اللّٰه وْبين الناس، هُوَ المسيح يَسوع الإنسان، الّي عْطى نفسو فدْية على الناس كاملين. هَد الشهادة، اللّٰه عْطاها في وقتاْ المناسب. نْهَد الشي تخصّصْتْ أنا باش نكون مبشّر وْرَسول، كنقول الحقّ في المسيح وْما كنكدب شي، وْمُعلّم نالوَتَنيّين في الإيمان والحقّ. إدَن، أنا بغيتْ الناس في كُل موطَع يصلّيو، رافدين كفوف مقدّسة بلا غضب ولا جدال. والنسا خصّوم يلبسو الحوايج المحْتَرمة بالحشْمة والتعقُّل، ماشي بالضفاير وَلا الدهب وَلا الجواهر وَلا الحوايج الغالية، وَلكن بالأعْمال الصالحة كيفْما يليق بالنسا الّي معْتَرفين بالتقوى د اللّٰه. وْتتعلّم المراة بالسكات بْكُل طاعة. ما كنخلّي شي المراة تعلّم ولا تتحكّم في الرَّجل، وَلكن تكون ساكتة. حيت آدم تخلق هُوَ الُوّل، وْمن بعدو حَوّاء. وآدم ما تغوى شي، وَلكن المراة تغواتْ وْوقعَتْ في المعْصيّة. واخّا هَيدا، هي غادي تنجا بواسطة الولادة، إدا تبتو في الإيمان والمحبّة والقداسة مع الرزانة. صادقة هي الكلمة، إدا بغى شي واحد يكون مسؤول في الكنيسة، كيتمنّى واحد الخدْمة مزيانة. وْواجب على المُرْشِد يكون بلا لوم، رَجل د واحد المراة، معقّل، رزين، محْتَرم، مِضْياف، صالح نالتعْليم، وْما يكون شي مُدْمِن على الخمر وْما يبغي شي يدابز، وَلكن يكون حنين وْهاني وْما يبغي شي المال، كيسيّر الدار ديالو مزيان، وْعندو أُوْلادو طايعين بْكُل وقار. حيت الّي ما كيعرف شي يسيّر دارو، كيفاش غادي يرعا الكنيسة د اللّٰه؟ ما يكون شي جديد في الإيمان باش ما يتكبّر شي مع نفسو ويطيح في العقوبة د إبْليس. وْواجب يتكلّمو عليه مزيان هَدوك الّي ماشي من الكنيسة باش ما يطيح شي في العار والفخّ د إبْليس. وْبْنفس الطريقة واجب على المدبّرين يكونو موقّرين، ما يكونو شي عندوم جوج د الوجوه، ماشي مولوعين بالخمر بزّاف، وْماشي طمّاعين في الربح القبيح، ويحافظو على السرّ د الإيمان بْضمير صافي. وْحتّى هَدو يتجرّبو في الُوّل وْعاد يكونو مدبّرين إدا هُمَ بلا لَوم. والنسا حتّى هُمَ واجب عليهُم يكونو موقّرين، ماشي نمّامات، وَلكن مرزّنات وْصادقات في كُل شي. خصّ كُل مدبّر يكون مجوّج بْمراة واحدة، والمدبّرين يسيّرو الولاد والديور ديالوم مزيان. حيت الّي كيخدمو مزيان فحال مدبّرين كيربحو موطَع د الكرامة وْتيقة كبيرة في الإيمان الّي في المسيح يَسوع. هَد الشي كَنْكتبوْ لك وْكنتمنّى نجي نْعندك قريب، وَلكن إدا تعطّلْتْ، خصّك تعرف كيفاش تتصرّف في بيت اللّٰه، الّي هُوَ كنيسة اللّٰه الحيّ، الركيزة والقاعدة د الحقّ. ما كاين حتّى شكّ بلّي سرّ التقوى عظيم: "هو ظهَر في الجسد، تبرّى في الروح، شافوه الملائكة، بشّرو بِه بين الأُمَم، آمنو بِه في العالم، وْتّرفع في المجد." وَلكن الروح كيقول واضح بلّي في آخر الزمان غادي يخرجو بعض الناس من الإيمان تابعين الارْواح الّي كيتلّفو، وْتابعين التعاليم د الشياطين. كيكدبو بالنفاق، وْعندوم ضمير معْدوم. هَدو كيمنعو الجواج وْكيحرّمو الماكلة الّي خلقاْ اللّٰه باش ياكلوها بالشكر المؤمنين الّي عرفو الحقّ. حيت كُل شي الّي خلق اللّٰه مزيان وْما يتّرفض شي إدا اتّقبل بالشكر، حيت كيتقدّس بْكلام اللّٰه والصلاة. إدا علّمْتِ الخوت هَد الشي، غادي تكون واحد الخدّام مزيان د يَسوع المسيح، مغدّي بالكلام د الإيمان والتعْليم المزيان الّي تبعْتِه. أمّا الخرايف الباطلة د العڭايز، رفضاْ، وْدرّب نفسك نالتقوى، حيت الرياضة الجسديّة كتنفع قليل، وَلكن التقوى كتنفع نْكُل شي حيت عنداْ الوعد د الحياة الحاضرة والماجّة. صادقة الكلمة هَدي وْكتسْتاهل كُل القبول، حيت على هَد الشي كَنْتعبو وْكنكافحو، حيت كنعملو الرجا ديالنا في اللّٰه الحيّ، الّي هُوَ المُنجّي د الناس كاملين، وْخصوصًا المؤمنين. وَصّي بْهَد الشي وْعلّموْ. ما يحڭر شي شي واحد شبابك، وَلكن كون متال نالمؤمنين في الكلام، في التصرُّف، في المحبّة، في الإيمان، وْفي الصفاوة. حتّى نجي، داوم على القراية والتشْجيع والتعْليم. ما تفرّط شي في المَوهبة الّي فيك، الّي اتّعطات لك بالنبوّة ملّي عملو عليك الشيوخ اليَدّين ديالوم. اهْتَمّ بْهَد الشي وْتبت فيه، باش يكون التقدُّم ديالك ظاهر في كُل شي. ردّ بالك مع نفسك وْمع التعْليم، وْداوم على ديك الشي، حيت إدا عملْتِ هَد الشي، غادي تنجّي نفسك وْهَدوك الّي كيسمعوك بْجوج بِكُم. ما توبّخ شي واحد الرَّجل كبير، وَلكن نصحوْ فحال باباك، والشبّان فحال خوتك، والعڭايز فحال الأُمَّهات ديالك، والشابّات فحال خواتاتك بْكُل صفاوة. كرّم الهجّالات الّي هُمَ د بالصّحّ هجّالات. وَلكن إدا كانت شي هجّالة عنداْ الولاد أَوْلا الحفايد، يتعلّمو التقوى في الُوّل باش يتهلّاو في أهل داروم، ويردّو الّي كيسالو لوم الوالِدين، حيت هَد الشي مزيان وْمقبول عند اللّٰه. والهجّالة د بالصّحّ الّي بقات بوحداْ، هي كَتْـترجّا في اللّٰه وْكتداوم على الطلبات والصلاوات ليل وْنهار. وأمّا الهجّالة الّي كَتْـتمتّع بالشهوات، ها هي ماتت وْهِيَ حيّة. وصّي بْهَد الشي باش يكونو بلا لَوم. وِادا شي واحد ما كيدبّر شي على الأهل ديالو، خصوصًا على دارو، هُوَ ناكر الإيمان وْهُوَ قبَح من الّي ماشي مؤمن. ما تتزمّم شي الهجّالة في اللائحة د الهجّالات إلّا إدا وَصلَتْ نْستّين عام في عُمراْ وْكانت مجوّجة بْرَجل واحد، وْكيشهدو لاْ بالأعْمال الصالحة، إدا هي ربّات الولاد، وْضيّفَت البرّانيين، وْغسلَت الرِّجلين د القدّيسين، وْعاونت المحْتاجين، وْطبّقَتْ كُل عمل صالح. أمّا الهجّالات الشابّات، ما تزمّموم شي، حيت ملّي يكونو مدْفوعين نالشهوات، كيزيغو من المسيح وْكيبغيو يتجوّجو، وْعندوم عقوبة، حيت رفضو الإيمان الُوّل، وْزيادة على هَد الشي، كيتعلّمو يكونو بطّالات، كيدورو من دار نْدار، وْماشي بطّالات وْكان، وَلكن نمّامات في الناس وْفيهُم البلْوى، كيهدرو في الّي ماشي واجب. على ديك الشي بغيتْ الهجّالات الشابّات يتجوّجو ويولدو الولاد ويڭابلو الديور ديالوم وْما يعطيو شي الفُرْصة نالعدو باش يزبّل فيهُم، حيت البعض مِنّوم سبق لوم خرجو باش يتبعو الشيطان. إدا كانت شي مؤمنة عنداْ الهجّالات، خصّاْ تعاونوم وْما يتقّلو شي على الكنيسة باش الكنيسة تعاون الّي هُمَ هجّالات د بالصّحّ. أمّا الشيوخ الّي كيدبّرو مزيان كيسْتاهلو الكرامة جوج د المرّات، خصوصًا الّي كيخدمو في الكلام والتعْليم، حيت الكتاب كيقول: "ما تكمّمو شي التور الّي كيدرس،" وْ"الخدّام كيسْتاهل الخُلصة ديالو." ما تقبل شي الشكْوى ضدّ شي شيخ من غير على الدقوم د جوج د الشهود أَوْلا تلاتة. الّي كيدنبو، وَبّخوم قدّام كُل شي باش يخافو يَخرين حتّى هُمَ. كَنْرغبك قدّام اللّٰه والرَّبّ يَسوع المسيح والملائكة المخْتورين، باش تحافظ على هَد الإرْشادات بلا تفْضيل وْما تعامل شي بالوجهيّات. ما تعمل شي يَدّك على شي واحد بالزرْبة وْما تشارك شي في الدنوب د يَخرين. حافظ على نفسك باش تكون طاهر. من دابا نْفوق، ما تشرب شي غير الما، وَلكن اسْتَعمل شويّا د الخمر على حسب المَعِدة والأمْراض ديالك المتكرّرة. الدنوب د بعض الناس واضحين قبل ما يتّحكم فيهُم، وَلكن يَخرين كيظهرو من بعد. بْنفس الطريقة الأعْمال الصالحة باينة، والّي ماشي صالحة ما يمكن شي تبقا مخبّعة. هَدوك الّي باقين عبيد خصّوم يحسبو أسْيادوم مسْتاهلين الاحْترام باش الناس ما يزبّلو شي في اسم اللّٰه والتعْليم، والّي عندوم أسْيادوم مؤمنين، ما يحْتَقروهُم شي حيت هُمَ خوت. بالعكس، خصّوم يخدموهُم أحسن، حيت الّي كيسْتَفدو من الخدمة ديالوم هُمَ مؤمنين وْخوت محْبوبـين. علّم وْنصَح بْهَد الشي. إدا كان شي واحد كيعلّم شي تعْليم يَخُر، وْما كيوافق شي الكلمات الصحيحة د رَبّنا يَسوع المسيح والتعْليم الّي هُوَ على حسب التقوى، راه متكبّر وْما كَيْفهَم والو. هُوَ مريط بالمناقشات والهدْرة الخاوية الّي كتجيب غير الحسد والمدابزة والسبّان والأفْكار القبيحة والمجادلات د الناس الّي فاسدين في العقل، الّي ما عندوم شي الحقّ، الّي كيظنّو بلّي التقوى هي تجارة. وأمّا التقْوى مع القناعة، هي ربح عظيم، حيت ما جيبْنا شي معنا حتّى شي حاجة نالدنيا، وْما غادي شي نقدرو نخرّجو معنا والو. وْهَيدا إدا عندنا الماكلة والحوايج، نقنعو بِهُم. وَلكن الّي كيبغيو يكونو أغْنياء، هُمَ كيطيحو في التجْربة، وْفي واحد الفخّ، وْكيرجعو عبيد نالشهوات ديالوم الحمقة والمُضرّة الّي كيغرّقو الناس في الخراب والهلاك. حيت محبّة المال هي أصل كُل نوع د الشَّرّ. ملّي بغاواه شي ناس، خرجو على الإيمان وْطعنو نَفسوم بوجاع بزّاف. أمّا أنتينا، يا إنسان اللّٰه، هْرب من هَد الأُمور وْتبَع البِرّ والتقوى والإيمان والمحبّة والصبر والتواضُع. جاهد الجهاد المزيان في الإيمان، وْشبّر في الحياة الأبديّة الّي تعيّطْتِ لِلاْ وْشهدْتِ واحد الشهادة مزيانة قدّام بزّاف د الشهود. كنوصّيك قدّام اللّٰه الّي كيحيي كُل شي، وْقدّام المسيح يَسوع الّي شهد قدّام بيلاطُس البُنطي واحد الشهادة مزيانة، باش تحفظ الوَصيّة بلا نجاسة وْبلا لوم حتّى نالمجي د رَبّنا يَسوع المسيح، الّي غادي يـبيّنوْ اللّٰه في الوقت ديالو: الحاكم الوحيد والمبارك، مَلِك الملوك وْربّ الأرباب، الوحيد الّي عندو الخلود، الساكن في النور الّي ما يقرّب نْعندو حتّى شي واحد، الّي ما شافوْ حتّى شي واحد وْما يقدر شي يشوفوْ، عندو الكرامة والقُدرة الأبديّة. آمين. وَصّي الأغْنياء د هَد الجيل ما يتكبّرو شي وْما يعملو شي الرجا ديالوم في المال، الّي هُوَ فاني، وَلكن في اللّٰه الّي كيعطينا كُل شي بالكتْرة باش نتمتّعو بِه. خصّوم يعملو الخير ويكونو أغْنياء بالأعْمال الصالحة، ويكونو سخيّين في العطاء وْكُرْماء في التوْزيع، وْهَيداك غادي يخبّعو نْنَفسوم واحد اللساس مزيان نالمسْتَقبل باش يشبّرو في الحياة الحقيقيّة. آ تيموثاوس، حْفظ الأمانة الّي اتّعطات لك، وْبعّد على الكلام الخاوي الموسّخ وْعلى المناقشات الّي بالغلط كيسمّيوها "عِلم،" الّي اعْتَرفو بِه شي ناس وْمن بعد تلفو على الإيمان. النعْمة معكُم. بولُس رسول يَسوع المسيح بإرادة اللّٰه على حسب الوعد د الحياة الّي عندنا في يَسوع المسيح، نْتيموثاوس بني العزيز، النعْمة والرحْمة والسلام من عند اللّٰه الآب والمسيح يَسوع رَبّنا. أنا كنشكر اللّٰه، الّي كَنْخدموْ بْضمير صافي كيفْما عملو جدودي، وْكَنْدكرك دائمًا في طلباتي ليل وْنهار. وْملّي كنفكّر في الدموع ديالك، كنشْتاق نشوفك باش نتعمّر بالفرْحة، ملّي كنتفكّر الإيمان الصادق الّي فيك، الّي سكن في الُوّل في الجدّة ديالك لوئيس وْفي يمّاك أَفْنيكي، وانا متأكّد بلّي هُوَ فيك حتّى أنتينا. وْعلى ديك الشي كَنْفكّرك باش تحيي المَوْهبة د اللّٰه الّي فيك بالحطّان د اليَدّين ديالي عليك. حيت اللّٰه ما عْطانا شي الروح د الخوف، وَلكن الروح د القوّة وْديال المحبّة وْديال التحكُّم في النفس. على هَد الشي ما تحشم شي بْشهادة رَبّنا وَلا بيَّ، أنا الحبّاس ديالو، وَلكن اشْتَرك في المشقّات على حسب الإنجيل حسب قوّة اللّٰه، الّي نجّانا وْعَيّط علينا بواحد الدعْوة مقدّسة، ماشي على حسب الأعْمال ديالنا، وَلكن على حسب القصد والنعْمة الّي اتّعطات نّا في المسيح يَسوع قبل من بداية الزمان. وْدابا ظهرَتْ النعْمة بْظهور مُنجّينا يَسوع المسيح الّي هلك الموت وْضوّى الحياة والخلود بواسطة الإنجيل، الّي تخصّصْتْ لو أنا باش نكون مبشّر وْرَسول وْمُعلّم نالوَتَنيّين. على هَد الشي كَنْتعدّب على هَد المشقّات، وَلكن ما كنحشم شي، حيت كنعرف ب‍ْمَن آمنْتْ، وانا متأكّد بلّي هُوَ قادر باش يحفظ الأمانة ديالي حتّى نْديك النهار. قْبط في القدْوة د الكلمات الصحيحة الّي سمعْتِ منّي في الإيمان والمحبّة الّي في المسيح يَسوع. حْفظ الأمانة الصالحة بالروح القُدُس الّي ساكن فينا. أنتينا كتعرف بلّي كاملين الّي في ولاية آسيا سمحو فيَّ، حتّى فيجَلُّس وْهَرْموجانِس. الرَّبّ يرحم الدار د أُنيسيفورُس، حيت شجّعني بزّاف د المرّات وْما حشم شي من السناسل ديالي، وَلكن ملّي كان في رومة، بقّش عليَّ بواحد الجُّهد كبير حتّى جبرني. الرَّبّ يعطيه باش يجبر الرحْمة ديالو في ديك النهار، وانتينا كتعرف مزيان شحال خدم في أَفَسُس. على ديك الشي أنتينا، آ بني، تقوّى بالنعْمة الّي عندنا في المسيح يَسوع، والّي سمعْتِه منّي قدّام بزّاف د الشهود، أمّنوْ عند الناس الصادقين الّي يقدرو يعلّمو يَخرين حتّى هُمَ. وانتينا، اشْتَرك في المشقّات فحال واحد العسْكري صالح د يَسوع المسيح. ما كاين حتّى شي عسْكري الّي كيشغل راسو بأمور هَد الحياة إدا بغى يرضي القايد ديالو. والرَّجل الرّياضي حتّى هُوَ ما كيربح شي التاج د الرابح إدا ما احْتَرم شي القانون د اللعب. الفلاّح الّي كيتعب خصّوْ يشبّر من الغلّات هُوَ الُوّل. فكّر في الّي كنقول لك، والرَّبّ غادي يعطيك الفهامة في كُل شي. تفكّرو يَسوع المسيح الّي من درّيّة داود، الّي قام من بين الميّتين على حسب الإنجيل ديالي، الّي فيه كنتحمّل المشقّات حتّى نالقيود فحال واحد المُجْرم، وَلكن كلام اللّٰه ماشي مرْبوط. على ديك الشي كنصبر على كُل شي بْسباب المخْتورين باش يتوصّلو حتّى هُمَ بالنجا الّي في المسيح يَسوع مع المجد الأبدي. صادقة هَد الكلمة: إدا مُتْنا معاه، غادي نحياو عاود معاه. إدا صبرْنا، غادي نملكو معاه. وِادا نكرْناه، هُوَ غادي ينكرنا. إدا ما كُنّا شي أُمَناء، هُوَ غادي يبقا صادق، حيت هُوَ ما يقدر شي ينكر راسو. فكّروم بْهَد الشي وْنبّهوم قدّام الرَّبّ باش ما يتدابزو شي بالكلام، الّي ما فيه شي فايدة، وَلكن كيهلك الّي كيسمعوه. عمل جُهدك باش تقدّم نفسك مقبول عند اللّٰه، فحال واحد الخدّام الّي ما خصّوْ شي يتحشّم والّي كيسْتَعمل كلام الحقّ بْطريقة مزيانة. وْبعّد من الكلام الخاوي المنْڭوس، حيت كيدّي نالشَّرّ كتَر وْكتَر، والتعْليم ديالو كينْتَشر فحال المرض الّي كياكل الجسد، الّي مِنّوم هيمينايُس وْفيليتُس، الّي خرجو على الحقّ وْكيقولو بلّي القيامة مشات وْڭازت وْكيقلبو الإيمان د البعض. وَلكن لساس اللّٰه القوي تابت وْعندو هَد الطابع: "الرَّبّ كيعرف الّي هُمَ ديالو،" "وْكُل واحد الّي كيعْتَرف بِاسم المسيح خصّو يبعّد من الدنوب." في واحد الدار كبيرة ما كيكون شي فيها غير قشوع د الدهب والنقْرة وْكان، وَلكن حتّى من الخشب والطين، البعض نالكرامة والبعض نالمدلّة. وِادا شي واحد طهّر نفسو من هَد الأُمور، غادي يكون واحد القشْعة نالكرامة، مقدّسة وْكتصلح نالسيّد وْمسْتعدّة نْكُل خدْمة مزيانة. هْرب من الشهوات د الشبّان وْتبَع التقوى والإيمان والمحبّة والسلام مع الّي كيعيّطو على الرَّبّ من قلب صافي. وْبعّد على المناقشات الخاوية والجاهلة، حيت كتعرف بلّي كَيْولدو المدابزات، حيت الخدّام د الرَّبّ ما خصّوْ شي يتغانن، وَلكن يكون لطيف مع كُل شي، ماهر في التعْليم، صبّار في الصعوبات، ويصحّح بالتواضُع نالمعارضين، مصاب اللّٰه يعطيهم التوبة باش يعرفو الحقّ، ويفطنو ويفكّو راسوم من الفخّ د إبْليس الّي فيه محْبوسين باش يعملو لو خاطرو. خصّك تعرف بلّي في الأيّام الاخّرية غادي يجيو أوْقات صعيبة. حيت الناس غادي يعزّو نَفسوم، ويكونو طمّاعين، متعظّمين، متكبّرين، كافرين، ما كيطيعو شي والِديهُم، ما كيشكرو شي، منْڭوسين، بلا حنان، بلا رحْمة، نمّامين، فاسقين، صعابين في المعاملة، كيكرهو الخير، خاينين، صلابين، معمّرين بالكبر، كيبغيو الشهوات كتَر من محبّة اللّٰه، كيظهرو متّاقيين، وَلكن هُمَ كينكرو القوّة ديال التقوى. بعّد من هَدوك. هَيدا كيكونو الّي كيدخلو نالديور وْكيغرّو النسا الضعافين المتقّلين بالدنوب، الّي مجْرورين نالشهوات المخْتَلفة. هَدوك دائمًا كيتعلّمو، وْما عُمروم يقدرو يدركو المعْرفة د الحقّ. وْفحال ما يَنّيس وْيَمْبِريس عارضو موسى، هَدو غادي يعارضو الحقّ حتّى هُمَ، ناس فاسدين في العقل وْماشي مقْبولين من جهة الإيمان. وَلكن هُمَ ما غادي شي يوصلو بعيد حيت الناس كاملين غادي يفهمو الجهالة ديالوم، فحال ما وقَع مع ديك الجوج. أمّا أنتينا، تبعْتِ التعْليم ديالي والسيرة والقصد والإيمان والصبر والمحبّة والتبات والت‍مرْميد والعداب ديالي فحال ما وقَع لي في أَنْطاكية وإيقونيّة وْلِسْترة. وْشحال من الت‍مرْميد ڭوّزْتْ، وْنجّاني الرَّبّ مِنّوم كاملين. وْهَدوك الّي كيبغيو يعيشو بالتقوى في المسيح يَسوع غادي يكونو كاملين مضْطَهدين، وَلكن الناس القباحين والغشّاشين غادي يزيدو بالقباحة كتَر وْكتَر غاشّين وْمغْشوشين. وأمّا أنتينا، تْبت في الّي تعلّمْتِ واقْتَنعْتِ بِه، عارف من عند مَن تعلّمْتِه، وانتينا من صُغرك عرفْتِ الكتوبة المقدّسة الّي قادرة تعطيك الحكْمة نالنجا بالإيمان الّي في المسيح يَسوع. الكتاب كامل وحي من اللّٰه وْكيفيد نالتعْليم ونالتوْبيخ وْنالصلاح وْنالتأديب في التقوى، باش يكون الإنسان د اللّٰه كامل وْموجّد نْكُل عمل صالح. على ديك الشي كَنْرَغبك قدّام اللّٰه والرَّبّ يَسوع المسيح الّي غادي يحكم على الحيّين والميّتين في ظهورو وْمُلكو، بشّر بالكلام، وْركّز على ديك الشي في وقت مناسب وْغير مناسب، وْوبّخ، وْنهي، وْشجّع بْكُل صبر وْبالتعْليم. حيت غادي يجي الوقت الّي ما غادي شي يحملو فيه التعْليم الصحيح، وَلكن مجْرورين نالشهوات ديالوم غادي يجمّعو مُعلّمين الّي كيقولو لوم ديك الشي الّي بغاو يسمعوها مِنّوم، ويبعّدو الودْنين ديالوم على الحقّ وْغادي يرجعو نالخرايف. وانتينا بالعكس، كون على بال في كُل الظروف، حمل المشقّات، عمل الخدْمة د المُبشّر، وْكمّل الخدمة ديالك. حيت أنا موجود باش يسيل الدم ديالي وْدابا قرّب الوقت د المشي ديالي. أنا جاهدْتْ واحد الجهاد مزيان، كمّلْتْ الجّري ديالي وْحفظْتْ الإيمان. وْفي الآخر كيتسنّاني التاج د التقوى الّي غادي يعطيه لي الرَّبّ الحاكم العادل في ديك النهار. وْماشي غير لِلي، وَلكن حتّى نْكُل الناس الّي بغاو الظهور ديالو. حاول تجي نْعندي دغيا، حيت دي‍ماس سمح فيَّ، حيت بغى هَد الدنيا وْمشى نْتَسالونيكي، وْكِريسْكيس مشى نْغَلاطيّة، وْتيطُس مشى نْدَلْماطيّة. لوقا بوحدو معيَ. شبّر مَرْقُس وْجيبوْ معك، حيت كَيْنفعني في الخدْمة. أمّا تيخيكُس صيفطْتوْ نأَفَسُس. ملّي تجي، جيب معك السلْهام الّي خلّيتوْ في تَرْواس، في دار كارْبُس، وْجيب الكتوبة، خصوصًا الكتوبة د الجلد. إسْكَندَر النحّاس عمل لي الشَّرّ بزّاف. الرَّبّ يجازيه على الأعْمال ديالو. حْضي راسك مِنّو حتّى أنتينا، حيت كيعارض بزّاف على الكلام ديالنا. في الدفاع الُوّل ديالي، حتّى واحد ما كان معيَ، وَلكن سمحو فيَّ كاملين. اللّٰه ما يحاسبوم شي فيه. وَلكن الرَّبّ وقَف معيَ وْعْطاني القوّة باش يتكمّل التبْشير بيَ ويسمعو الوَتَنيّين كاملين، وْنجيتْ من دقوم السبع. وْغادي ينجّيني الرَّبّ من كُل عمل قبيح وْغادي يحفظني حتّى يدّيني نْمُلكو السماوي. لِلو المجد على الدوام دائمًا. آمين. سلّم على بِريسْكا وْأَكيلا وْدار أُنيسيفورُس. أراسْتُس بقا في كورِنْثوس وْتروفيمُس خلّيتوْ مريط في ميليتُس. حاول تجي قبل من فصل الشتا. كيسلّم عليك أَفْبولُس وْبوديس وْلينُس وْكلَودية والخوت كاملين. الرَّبّ يَسوع المسيح يكون مع روحك. النعْمة معكُم كاملين. آمين. بولُس عبد اللّٰه وْرَسول يَسوع المسيح على حسب الإيمان د المخْتورين د اللّٰه وْمعْرفة الحقّ الّي هُوَ حسب التقوى على الرجا د الحياة الأبديّة الّي وَعد بِها اللّٰه، الّي ما كيكدب شي، قبل من البداية د الزمان، وْظهّر كلامو في الوقت الخاصّ، بالتبْشير الّي تأمّن عندي على حسب وَصيّة اللّٰه المُنجّي ديالنا، نْتيطُس بني الحقيقي في الإيمان الّي كنشْتَركو فيه، النعْمة والرحْمة والسلام من عند اللّٰه الآب وْيَسوع المسيح المُنجّي ديالنا. على هَد الشي خلّيتك في كِريت باش ترتّب الأُمور الّي باقّة وْتخْتار الشيوخ في كُل مدينة كيفْما وصّيتك. الشيخ خصّوْ يكون بلا لَوم، رَجل د مراة واحدة، عندو الولاد مؤمنين ما عليهُم شي حتّى شي شكاية د الفساد وَلا د العصْيان. حيت واجب على المُرْشِد د الكنيسة يكون بلا لَوم، فحال مسؤول على الخدْمة د اللّٰه، ماشي متكبّر وْماشي غضْبان وْماشي سكَيري، وْماشي عنيف وْماشي طمّاع في الربح د الحرام. بالعكس، خصّوْ يكون يبغي الضيّاف، ويبغي الخير، رزين، عادل، متّاقي، ضابط نفسو، مشبّر في الكلام الصادق حسب التعْليم باش يكون قادر ينبّه بالتعْليم الصحيح وينهي المعارضين. حيت كاينين بزّاف د العاصيين الّي كيتكلّمو بالكلام الخاوي وْكيخدعو، خصوصًا هَدوك الّي من جهة الطهارة، الّي واجب تشدّ الدقوم ديالوم، حيت هُمَ كيقلبو ديور كاملة، كيعلّمو ديك الشي الّي ما خصّوْ شي يتعلّم بالربح د الحرام. قال واحد مِنّوم، وْهُوَ النَّبي ديالوم: "الكِريتيّين دائمًا كدّابين، وحوش قباحين، وْمهيّفين كَسولين." هَد الشهادة صادقة. على ديك الشي وَبّخوم بْطريقة قاصحة باش يكونو صحاحين في الإيمان، ما يدّيوها شي في الخرايف د اليهود وَلا في الوَصايا د الناس الّي بعادين على الحقّ. كُل شي طاهر نالطاهرين، وَلكن نالمنْڭوسين وْنِلّي ما كيآمنو شي حتّى حاجة ما هي طاهرة. بالعكس، العقل والضمير ديالوم فاسدين. كيقولو بلّي كيعرفو اللّٰه، وَلكن بالمعاملة ديالوم كينكروه حيت هُمَ مكْروهين وْعاصيين وْمن جهة كُل عمل صالح مرْفوضين. أمّا أنتينا، تكلّم بْديك الشي الّي كيليق بالتعْليم الصحيح. علّم الشوارف باش يكونو معقّلين، محْتَرمين، وْصحاحين في الإيمان والمحبّة والصبر. وْعلّم العڭوزات باش يكونو موقّرين في المعاملة ديالوم، ماشي نمّامات، ماشي مَبْليين بالشراب بزّاف، مُعلّمات د الخير باش ينصحو الشابّات يحبّو الرجال ديالوم وْولادوم، ويكونو متعقّلين، حُرّات، مڭابلين الديور ديالوم، صالحين، طايعين نالرجال ديالوم باش الناس ما يزبّلو شي في كلام اللّٰه. وْنبّه الشُّبّان باش يكونو رزانين. وْكون أنتينا بْنفسك متال لِلوم في كُل أعْمال صالحة. وْملّي كتعلّم، علّم بالنقاوة والإخْلاص، ويكون الكلام ديالك صحيح وْما فيه حتّى عيب، باش يتحشّم العدو وْما تكون عندو حتّى شي حاجة قبيحة يقولاْ فيكُم. وْنبّه العبيد باش يطيعو نأسْيادوم ويرضيوهُم في كُل شي وْما يخالفوهُم شي، وْما يسرقوهُم شي، وَلكن يبيّنو بلّي هُمَ كيسْتاهلو الأمانة باش يزيّنو تعْليم اللّٰه المُنجّي ديالنا في كُل شي. حيت نعْمة اللّٰه ظهرَتْ نالناس كاملين باش تجيب النجا، وْكَتْعلّمنا نرفضو النجاسة والشهاوات الدُّنْيَويّة وْنعيشو بالتعقُّل والعدل والتقوى في هَد الدنيا، وْحنايَ كنتسنّاو الرجا المبارك والظهور د مجد اللّٰه العظيم والمُنجّي ديالنا يَسوع المسيح، الّي عْطى نفسو من جهتنا باش يفدينا من كُل دنوب ويطهّر نْنفْسو واحد الشعب خاصّ، الّي عندو الغرض باش يعمل الأعْمال المزيانة. تكلّم بْهَد الشي وْنصح وْوبّخ بْكُل سُلطة، وْما يحڭرك حتّى واحد. فكّر المؤمنين باش يطيعو ويكونو خاضعين نالحُكّام وْصحاب السلْطة، ويكونو موجودين نْكُل عمل صالح، وْما يهدرو في حتّى شي واحد، ويبقّشو على السلام، ويكونو محْتَرمين، مظهّرين التواضُع الكامل في المعاملة ديالوم مع الناس كاملين. حيت حتّى حنايَ كُنّا جاهلين من قبل، عاصيين، متْلوفين، عبيد نالشهوات وْنالملدّات المخْتَلفة، عايشين في الشَّرّ والحسد، مكْروهين وْكَنْكرهو بعضيّاتنا. وَلكن ملّي ظهَر اللطف وْمحبّة اللّٰه المُنجّي ديالنا، نجّانا ماشي بأعْمال التقوى الّي عملْناها حنايَ، وَلكن على الرحْمة ديالو، عْطانا الحياة الجديدة بالغسل وْجدّدنا بالروح القُدُس، الّي كبّوْ علينا بالكتْرة بيَسوع المسيح المُنجّي ديالنا، باش حنايَ نكونو مبرّرين بالنعْمة ديالو، وارتين الحياة الأبديّة حسب الرجا. صادقة هَد الكلمة، وْبغيتك تأكّد على هَد الأُمور باش الّي كيآمنو باللّٰه يركّزو على الأعْمال الصالحة. هَد الشي مزيان وْمُفيد نالناس. وْبعّد على المناقشات الخاوية، واللائحات د الجدود، والخلافات، والمدابزات في الشريعة، حيت هَدو باطلين وْماشي نافعين. الرَّجل الّي كيعمل البدْعة، نبّهوْ جوج د المرّات، وْمن بعد رفضوْ. عارف بلّي فحال هَد الرَّجل مُدْنب وْحكم على راسو بْراسو. ملّي نصيفط نْعندك أَرْتيماس أَوْلا تيخيكُس، زْرب تجي نْعندي نْنيكوبوليس حيت قرّرْتْ نڭوّز فصل الشتا تمّاك. عاون بْكُل ما تقدر عليه زيناس، عالم د الشريعة، وأَبُلّوس حتّى هُوَ، باش ما يحْتاجو نْحتّى شي حاجة في السفر ديالوم. الناس ديالنا خصّوم يتعلّمو يركّزو على الأعْمال المزيانة مع الّي هُمَ محْتاجين د بالصّحّ باش ما يكونو شي بلا غلّة. كيسلّمو عليك كاملين الّي هُمَ معيَ. سلّم على الناس الّي كيعزّونا في الإيمان. النعْمة معكُم كاملين. آمين. من بولُس الحبّاس د يَسوع المسيح وْمن الأخ تيموثاوس نْفِليمون العزيز، العامل معنا، وْنالأخت أبْفيّة، وْأَرْخَبُّس الشريك معنا في الخدمة د الرَّبّ، وْنالكنيسة الّي في الدار ديالك، النعْمة لكُم والسلام من عند اللّٰه الآب ديالنا والرَّبّ يَسوع المسيح. كنشكر إلَهي دائمًا وْكندكرك في الدعاء ديالي حيت كنسمع بال‍محبّة والإيمان الّي عندك من جهة الرَّبّ يَسوع وْمن جهة القدّيسين كاملين، باش تكون الشركة د الإيمان ديالك مفيدة في معْرفة كُل الخير الّي فيكُم بالمسيح يَسوع. حيت عندنا فرْحة كبيرة والتّعْزيّة في المحبّة ديالك، آ الأخ ديالنا، حيت القلوبة د القدّيسين ارتاحو بِك. على ديك الشي واخّا عندي حُرّية كبيرة في المسيح باش نوصّيك كيفْما يليق، كنفضّل نرغبك بالمحبّة، أنا بولُس الرَّجل الشيباني، وْدابا عاود الحبّاس د يَسوع المسيح، كَنْرغبك من جهة اِبني أُوْنِسيمُس الّي ولدْتوْ في الحبس، الّي كان قبل بلا نفَع لك وَلكن دابا هُوَ كينفعِك وْكينفَعني، الّي كنردّوْ لك عاود، راه فحال الكبْدة ديالي. كنبغي نجرّوْ عندي باش يخدمني في الموطَع ديالك في القيود د الإنجيل، وَلكن ما بغيتْ نعمل والو بلا الاتّفاق ديالك، باش تعمل الخير بالخاطر ديالك، ماشي بزّز. حيت يمكن أُوْنِسيمُس بعّد عليك واحد المدّة قليلة باش ترحّب بِه عندك دائمًا، ماشي فحال عبد، وَلكن حسَن من عبد، فحال أخ عزيز، خصوصًا لِلي، وَلكن عزيز عليك كتَر، في الجسد وْفي الرَّبّ بْجوج. وِادا أنتينا كتحسبني شريك، اسْتَقبلوْ فحالي أنا. وِادا ظلمِك في شي حاجة أَوْلا مديون لك، عملوْ في حسابي. أنا بولُس كنكتب هَد الشي بْخطّ يدّي، وانا غادي نخلّصك (باش ما نقول لك شي بلّي حتّى أنتينا مديون لِلي بْحياتك). نعم، آ خاي، خلّيني نستافد منّك في الرَّبّ، فرّح قلبي في المسيح. كنكتب لك حيت ما عندي شي شكّ في الطاعة ديالك وْكنعرف بلّي أنتينا غادي تعمل كتَر من الّي كنقول لك. وْفي نفس الوقت وجّد لي واحد البيت فاين نكون، حيت كنـتمنّى، بالصلاوات ديالكُم، نرجع نْعندكُم. كيسلّم عليك أبَفْراس الحبّاس معيَ في المسيح يَسوع، وْمَرْقُس وأرِسْتَرخُس وْدي‍ماس وْلوقا، الخدّامة معيَ. النعْمة د رَبّنا يَسوع المسيح مع روحكُم. آمين. اللّٰه تكلّم في قديم الزمان بزّاف د المرّات وْبْطُرُق مخْتَلفة مع الجدود ديالنا باللسان د الأَنْبياء، وْدابا تكلّم معنا في هَد الأيّام الاخّرية بِابنو الّي جعلوْ وارت د كُل شي، الّي بِه خلق الدنيا. والِابن هُوَ النور د المجد د اللّٰه، والتصْويرة بْنفساْ د اللُّبّ ديالو، والّي رافد كُل شي بالكلمة د القُدرة ديالو. من بعدما طهّر الدنوب ديالنا، ڭلس على الّي‍مين د الجلالة في العلو، وْكان عظيم من الملائكة بْمقْدار أنّو ورَت واحد الِاسم عظيم من اِسموم. حيت لِمّن مِن الملائكة عُمرو قال اللّٰه: "أنتينا بني، أنا اليوما ولدْتك؟" وْعاود قال: "أنا غادي نكون لو باباه وْهُوَ غادي يكون لي بني." وْمرّة يَخرى، ملّي اللّٰه صيفط البكر ديالو نالدنيا، كيقول: "يسجدو لو الملائكة د اللّٰه كاملين." وْبالنسبة نالملائكة كيقول: "اللّٰه كيجعل الملائكة ديالو أرْواح والخدّامة ديالو لهْبة د العافية." وَلكن نالِابن كيقول: "العرش ديالك، يا اللّٰه، هُوَ تابت على الدوام دائمًا. قطيب السلْطة د المُلك ديالك قطيب العدل. حبّيتِ التقوى وْكرهْتِ الشَّرّ. على ديك الشي دهنك اللّٰه إلَهك بالزيت د الفرْحة كتَر من صحابك." وْقال عاود: "أنتينا، يا رَبّي، في البداية أسّسْتِ الأرض، والسَّماوات هُمَ الخدمة د اليَدّين ديالك. هُمَ غادي يفْناو، وَلكن أنتينا كتبقا وْكاملين غادي يبلاو فحال شي توب، وْغادي تطويها فحال شي حوايج، وْهِيَ غادي تـتبدّل، وَلكن أنتينا هُوَ أنتينا، والسنين ديالك ما غادي شي يتقاضاو." وْلمّن من الملائكة عُمرو قال اللّٰه: "ڭلس على الّي‍مين ديالي حتّى نردّ عدْيانك تحت رِجلك؟" واش الملائكة ماشي كاملين أرْواح خدّامة، مرْسولين باش يخدمو من جهة الّي غادي يورتو النجا؟ على ديك الشي خصْنا نردّو بالنا، مركّزين على ديك الشي الّي سمعْنا باش ما نضيّعو شي الطريق. حيت إدا الرسالة الّي كيتكلّمو بِها الملائكة بقاتْ تابتة وْكُل تعدّي وْمعْصيّة تخلّصَتْ بالعقوبة العادلة، كيفاش غادي نفلتو حنايَ إدا سمحْنا في هَد النجا العظيم؟ الرَّبّ خبر بْهَد النجا في الُوّل، وْهَدوك الّي سمعوه تبّتوه نّا. شهد اللّٰه معهُم بالعلامات والعجايب والمُعْجزات المخْتَلفة والمواهب د الروح القُدُس الّي فرّقاْ بْحسب الإرادة ديالو. حيت اللّٰه ما طوّع شي العالم الماجي، الّي كنتكلّمو عليه، تحت السلْطة د الملائكة. وَلكن شي واحد شهد في شي موطَع وْقال: "شكون هُوَ الإنسان باش تفكّر فيه وِابن الإنسان باش تطلّل عليه؟ ردّيتِه أقلّ شويّش من الملائكة، وْعْطيتِه التاج د المجد والكرامة وْجعلْتِه حاكم على الأعْمال د اليَدّين ديالك، وْطوّعْتِ كُل شي تحت الرِّجلين ديالو." وْحيت اللّٰه طوّع لو كُل شي، ما خلّى والو الّي ماشي تحت السلْطة ديالو. وَلكن باقي ما كنشوفو شي كُل شي مطوّع لِلو. وَلكن كنشوفو يَسوع، الّي اتّجعل أقلّ شويّش من الملائكة وْعلى راسو التاج د المجد والكرامة، حيت تعدّب بالموت باش يدوق الموت من جهتنا كاملين بْنعْمة اللّٰه. كان يليق ناللّٰه، الّي خلق كُل شي وْبِه كُل شي كاين، يكمّل هَداك الّي هُوَ القايد د النجا ديالوم بواسطة العداب، حيت بغى يڭوّد بزّاف د الولاد نالمجد ديالو. حيت الّي كيقدّس والمقدّسين كاملين من أصل واحد، وْعلى هَد الشي المسيح ما كيحشم شي يسمّيهُم خوت، وْكيقول: "غادي نخبر خوتي بِاسمك، وْفوسط الجماعة غادي نسبّحك." وْعاود كيقول: "أنا غادي نتيق فيه." وْكيزيد: "ها انا مع الولاد الّي اللّٰه عْطاهُم لي." من حيت الولاد اشْتَركو في اللحم والدم، اشْتَرك حتّى هُوَ معهُم باش يقضي بالموت على هَداك الّي عندو السلْطة د الموت، الّي هُوَ إبْليس، ويحرّر هَدوك الّي كانو طول الحياة ديالوم تحت العُبوديّة، خوفانين من الموت. حيت في الحقيقة المسيح ما جا شي باش يعاون الملائكة، وَلكن باش يعاون الدرّيّة د إبْراهيم. على ديك الشي كان خصّوْ يشبه نالخوت ديالو في كُل شي باش يكون رئيس المسؤولين على بيت العبادة، رحيم وأمين في الأُمور ديال اللّٰه باش يكفّر على دنوب الشعب. حيت هُوَ بْنفسو تعدّب وْتجرّب، هُوَ قادر باش يعاون الّي كيتجرّبو. على ديك الشي، آ الخوت القدّيسين المشْتَركين في نفس الدعوة السماويّة، تأمّلو في الرسول وْرئيس المسؤولين، يَسوع المسيح، الّي كنعْتَرفو بِه، الّي هُوَ أمين نِلّي اختاروْ، كيفْما موسى حتّى هُوَ كان أمين في دار اللّٰه كاملة. وْفي الحقيقة يَسوع المسيح كيستحقّ المجد كتَر من موسى، فحال الّي كيبني الدار عندو الكرامة كتَر من الدار. حيت كُل دار عنداْ البنّاي ديالاْ، وَلكن الّي كيبني كُل شي هُوَ اللّٰه. وْموسى كان أمين في دار اللّٰه كاملة فحال شي عبد، باش يعطي الشهادة نْديك الشي الّي غادي يتقال. أمّا المسيح هُوَ أمين فحال واحد الِابن في الدار د اللّٰه، وْديك الدار هي حنايَ، إدا بقينا تابتين حتّى النهاية في التيقة والفخر د الرجا ديالنا. على ديك الشي، كيفْما كيقول الروح القُدُس: "إدا سمعْتو اليوما صوت اللّٰه، ما تقصّحو شي قلبكُم فحال ما وقَع في النهار د العصيان، في ديك النهار د التجْربة في الصحرا، فاين الجدود ديالكُم جرّبوني وامْتَحنوني، واخّا شافو الأعْمال ديالي أربعين عام. على ديك الشي غضبْتْ على ديك الجيل وْقُلْتْ: «دائمًا قلبوم متْلوف وْما كيعرفو شي الطرْقان ديالي.» وْهَيدا حلفْتْ في الغضب ديالي بلّي ما غادي شي يدخلو في الراحة ديالي." ردّو بالكُم، آ الخوت، باش ما يكون في حتّى واحد فيكُم قلب قبيح وْبلا إيمان الّي كيبعّدكُم على اللّٰه الحيّ. وَلكن نصحو بعضيّاتكُم كُل النهار، على بَيدْمن الوقت باقي مسمّي "اليوما،" باش الدنوب ما تخدع حتّى واحد منكُم وْقلبكُم يرجع قاصح. حيت حنايَ رجعْنا مشْتَركين مع المسيح إدا تبتْنا حتّى النهاية في التيقة الّي كانت عندنا من البداية، حيت تقال: "إدا سمعْتو اليوما صوت اللّٰه، ما تقصّحو شي قلبكُم فحال ما وقَع في النهار د العصيان." وْشكون هُمَ الّي سمعو الصوت ديالو وْعصاو؟ واش ماشي هُمَ كاملين الّي خرجو من مصر على يد موسى؟ وْعلى شكون غضَب اللّٰه أربعين سنة؟ واش ماشي على الّي دنبو وْطاحو ميّتين في الصحرا؟ وْلمّن حلف باش ما يدخلو شي في راحتو؟ واش ماشي نْهَدوك الّي عصاواه؟ وْكنشوفو بلّي ما قدرو شي يدخلو، حيت كانو بلا إي‍مان. على ديك الشي، ما دام كاين الوعد باش ندخلو في الراحة ديالو، نردّو بالنا باش ما يبقا حتّى شي واحد منكُم بلا ما يلحقاْ، حيت حتّى حنايَ تبشّرْنا بْخبار الخير، فحال ما تبشّرو هَدوك بِه. وَلكن الرسالة الّي سمعوها ما نفعَتوم شي، حيت ما قبلوها شي بالإيمان. حيت حنايَ الّي آمنّا كندخلو في الراحة كيفْما قال: "هَيدا حلفْتْ في الغضب ديالي بلّي ما غادي شي يدخلو في الراحة ديالي." واخّا الأعْمال ديالو تكمّلَتْ من تأسيس الدنيا. حيت تقال في كتاب اللّٰه على النهار السابع هَيدا: "ارْتاح اللّٰه في النهار السابع من الأعْمال ديالو كاملة." وْعاود كيقول: "ما غادي شي يدخلو في الراحة ديالي." حيت كاينين الّي باقي خصّوم يدخلو في هَد الراحة، وْحيت الُوّلين الّي تبشّرو بْخبار الخير ما دخلوها شي بْسباب المعْصيّة، اخْتار اللّٰه عاود واحد النهار، الّي هُوَ "اليوما،" وْتكلّم على هَد النهار من بعد مُدّة طويلة بواسطة داود كيفْما سبق وْدكرْنا: "إدا سمعْتو اليوما صوت الله، ما تقصّحو شي قلبكُم." حيت كَكان يَشوع عْطاهُم الراحة، ما كان شي اللّٰه تكلّم على نهار يَخُر. على ديك الشي باقّة كاينة واحد الراحة خاصّة نْشعب اللّٰه. حيت الّي دخل في راحة اللّٰه، هُوَ ارْتاح من الأعْمال ديالو كيفْما اللّٰه ارْتاح من الأعْمال ديالو. على ديك الشي خصْنا نعملو المجهود باش ندخلو في ديك الراحة، باش ما يطيح حتّى واحد في شي معْصيّة فحال هَديك، حيت كلمة اللّٰه هي حيّة وْقويّة وْماضية من أي سيف الّي عندو حدَّين، وْكتدخل حتّى تفرق النفس على الروح والمفاصل والمخاخ د العطام، وْكتميّز التفْكير والنيّة الّي في القلب. وْما كاينة شي شي خليقة الّي ماشي ظاهرة قدّام اللّٰه، وَلكن كُل شي عريان وْباين قدّام العينين د هَداك الّي خصْنا نعطيو لو الحساب. وْحيت عندنا واحد رئيس المسؤولين في بيت العبادة عظيم الّي اتّرفع نالسما، يَسوع اِبن اللّٰه، خصْنا نتشدّدو في الإيمان الّي كنعْتَرفو بِه. حيت ما عندنا شي واحد رئيس المسؤولين الّي ماشي قادر يحنّ على الضُّعف ديالنا، وَلكن واحد الّي كان مجرّب في كُل شي فحالنا وْبلا دنوب. على ديك الشي نتقرّبو بْشجاعة نْعرش النعْمة باش نتوصّلو بالرحْمة وْنجبرو النعْمة الّي غادي تعاونْنا في اللحْظة فَياش نكونو محْتاجين. حيت كُل رئيس المسؤولين هُوَ مخْتور من بين الناس وْمخصّص باش ينوب على الشعب ديالو قدّام اللّٰه ويقدّم العطايا والدبايح على الدنوب، وْهُوَ قادر يصبر مع الجاهلين والّي خارجين على الطريق، حيت هُوَ بْنفسو تحت الضُّعف. وْبْسباب هَد الضعف، كيفْما كيقدّم الدبيحة على الدنوب د الشعب، هَيدا كيعمل على الدنوب ديالو حتّى هُوَ. وْحتّى واحد ما كيتوصّل بْهَد الشرف بْنَفسو، وَلكن كيقبطوْ الّي معيّط عليه اللّٰه، كيفْما وقَع مع هارون. حتّى المسيح ما مجّد شي نفسو بَياش يرجع رئيس المسؤولين، وَلكن الّي قال لو: "أنتينا بني، أنا اليوما ولدْتك." فحال ما قال عاود في شي موطَع يَخُر: "أنتينا قسّيس على الدوام حسب الرتْبة د مَلْكي صادِق." والمسيح، في الأيّام د الجسد ديالو، قدّم الطلبات والرغبات بْصوت عالي وْبالدموع نْهَداك الّي قدر ينجّيه من الموت، واسْتاجب لو اللّٰه على حسب التقوى ديالو. واخّا كان الِابن ديالو، تعلّم الطاعة بْديك الشي الّي تعدّب بِه. وْملّي رجَع كامل، رجَع مصْدر النجا الأبدي نالناس كاملين الّي كيطيعوه. واللّٰه عَيّط لو رئيس المسؤولين حسب الرتْبة د مَلْكي صادِق. على هَد الموضوع عندنا بزّاف د الكلام ما نقولو، وْصعيب باش نشرحوه لكُم، حيت أنتُمَ رجعْتو تقالين في الفهم. وْكان خصْكُم تكونو مُعلّمين من شحال هَدي، وَلكن أنتُمَ باقّين محْتاجين نِلّي يعلّمكُم الأُمور الُولى د كلام اللّٰه، وْرجعْتو محْتاجين نالحليب وْماشي نالماكلة القويّة، حيت الّي كيعيش بالحليب باقي سْتيتو وْما عندو شي الخِبرة في كلام التقوى. وَلكن الماكلة القويّة نِلّي ناضجين، حيت تدرّبو مزيان وْعارفين يميّزو ما بين الخَير والشَّرّ. على ديك الشي نخلّيو ديك التعْليم الأساسي على المسيح، وْنتقدّمو حتّى النضج وْما نعملو شي عاود اللساس: التوبة من الأعْمال الّي كتدّي نالموت، والإيمان باللّٰه، والتعْليم على المعْمودية، وْحطّان اليَدّين، وْقيامة الميّتين، والعقوبة الأبديّة. وْهَد الشي غادي نعملوه، إن شاء اللّٰه. حيت هَدوك الّي شرق عليهُم الضَّو واحد المرّة وْداقو العطيّة السماويّة، وْرجعو مشْتَركين في الروح القُدُس وْداقو كلام اللّٰه الصالح وْقوّات الدنيا الماجّة، إدا هُمَ طاحو، ما يمكن شي يتجدّدو عاود نالتوبة، حيت صلّبو نْنَفسوم اِبن اللّٰه المرّة التانية وْفضحوه. حيت الأرض الّي كتشرب الشتا الّي كتطيح عليها مرّات كتَر، وْكتجيب العشوب الّي كيصلحو نِلّي حرتوها، كَتدّي البركة من اللّٰه. وَلكن إدا جابَتْ الشوك والكبّار، هي أرض ما صالحة شي وْقريبة ناللعْنة والنهاية ديالاْ الحريق. حيت واخّا كنتكلّمو هَيدا، آ حبابنا، بالنسْبة لِلكُم، حنايَ متأكّدين بلّي فيكُم أُمور أفضل وْحاجات الّي كيدّيو نالنجا. حيت اللّٰه ماشي ظالم باش ينسا العمل ديالكُم والتعب د المحبّة الّي ظهّرْتوها بِاسْمو، حيت خدمْتو نالقدّيسين وْحتّى نْدابا كتخدموهُم. وَلكن بغيناكُم كُل واحد منكُم يكون عندو نفس المجْهود، حتّى التيقة الكاملة د هَد الرجا، باش ما تكونو شي عݣزانين، وَلكن بغيناكُم تتمتّلو بْهَدوك الّي بالإيمان والصبر كَيْورتو وُعود اللّٰه. حيت ملّي وعد اللّٰه إبراهيم، حلف بْنفسو، حيت ما كان شي ما هُوَ أعظم من نفسو باش يحلف بِه، وْقال لو: "أنا غادي نبارك فيك وْغادي نكتّرك بلا قياس." وْهَيداك صبر إبراهيم حتّى قبل الوعد. الناس كيحلفو بلّي أعظم مِنّوم والحلوف ديالوم كيأكّدو كلاموم وْكيحدّو المدابزة بيناتوم. وْحيت بغى اللّٰه يبيّن نالوارتين د الوعد بلّي ما كَتْـتبدّل شي الأحْكام ديالو، أكّد كلامو بالحلوف، هَد الجّوج د الأُمور الّي ما كتـتبدّل شي، وْما ي‍مكن شي اللّٰه يكدب فيهُم، وْبِهُم حنايَ اللاجئين كَنْتشجّعو وْكنشبّرو في الرجا الّي منزّل قدّامنا. هَد الرجا علينا فحال واحد المرْساة د النفس، أمينة وْتابتة، الّي كتدخل حتّى نْداخل الحجاب، حتّى الموطَع فاين دخل يَسوع من قبل من جهتنا، وْرجَع رئيس المسؤولين على الدوام حسب الرتْبة د مَلْكي صادِق. حيت مَلْكي صادِق، هَداك الّي كان مَلِك على مدينة ساليم وْقسّيس د اللّٰه العالي، الّي تلاقى إبراهيم ملّي رجَع من بعدما غلب الملوك وْبارك فيه، إبراهيم قسم لو العشور د كُل شي. والِاسم ديالو في الُوّل كيعني "مَلِك التقوى" وْعاود "مَلِك ساليم" يعني "مَلِك السلام." هُوَ بلا باباه وْبلا يمّاه وْبلا درّيّة، ما عندو لا بداية وَلا نهاية في حياتو، وْكيشبه نِابن اللّٰه وْكيبقا قسّيس على الدوام. شوفو شحال هُوَ عظيم بلّي حتّى إبراهيم، وْهُوَ الكبير د الجدود، عْطى لو العشور د الغنايم. حتّى أُوْلاد لاوي، الّي كيصبحو مسؤولين في بيت العبادة، عندوم الوَصيّة باش يشبّرو العشور من الشعب الّي هُمَ خوتوم، واخّا هُمَ من درّيّة إبراهيم. وَلكن مَلْكي صادِق، الّي هُوَ ماشي من أُوْلاد لاوي، شبّر العشور من إبراهيم، الّي كانت عندو الوعود من اللّٰه، وْبارك فيه. وْبلا شكّ، الصغير كيتبارك من الكبير. واللاويّين كيشبّرو العشور وْهُمَ الناس الّي غادي يموتو، وَلكن مَلْكي صادِق شبّر العشور حيت مشْهود لو بلّي هُوَ حيّ. وْنقدرو نقولو بلّي لاوي، الّي كيشبّر دابا العشور، عْطى حتّى هُوَ العشور على يد إبراهيم. حيت لاوي، الّي باقي ما تولد شي، كان حاضر في جدّو إبراهيم ملّي تلاقاه مَلْكي صادِق. إدَن، كَكان الكمال بالخدمة د اللاويّين، علاش كان خصّوْ يكون عندوم قسّيس يَخُر حسب رُتبة مَلْكي صادِق وْماشي على حسب رُتْبة هارون؟ حيت في الوقت ديالوم اتّعطات الشريعة نالشعب، وِادا تبدّلَت الخدمة في بيت العبادة، ضروري حتّى الشريعة تـتبدّل. وْيَسوع، الّي تقال عليه هَد الشي، هُوَ من قبيلة يَخرى الّي حتّى واحد فيها ما خدم في المَدْبح. حيت معروف بلّي رَبّنا تولد في قبيلة يَهودا الّي ما عُمرو موسى ما تكلّم عليها من جهة الخدمة في بيت العبادة. وْديك الشي الّي قُلْنا واضح كتَر، إدا كيرجع قسّيس يَخُر فحال مَلْكي صادِق، الّي رجَع قسّيس، ماشي على حسب الشريعة د واحد الوَصيّة جسديّة، وَلكن على حسب قوّة الحياة الّي ما عنداْ شي نهاية، حيت الكتاب كيشهد لو: "أنتينا قسّيس على الدوام حسب الرتْبة د مَلْكي صادِق." على هَد الشي رجعَت الوَصيّة القديمة باطلة، حيت كانت ضعيفة وْما صالحة شي. حيت الشريعة ما قدرَتْ شي تردّ حتّى حاجة كاملة، وَلكن دخل واحد الرجا الّي عندو قيمة كتَر، الّي بِه كنقرّبو ناللّٰه. وْهَد الشي ما كان شي بلا حلوف، حيت المسؤولين في بيت العبادة يَخرين رجعو مسؤولين بلا حلوف، وَلكن هَدا رجع قسّيس بالحلوف د هَداك الّي قال لو: "الرَّبّ حلف وْما غادي شي يبدّل الرأي ديالو: «أنتينا قسّيس على الدوام.»" على هَد الشي رجَع يَسوع الضمانة د واحد العهد أفضل. وْكانو بزّاف د المسؤولين، حيت كان الموت كيمَنعوم يبقاو في الخدمة ديالوم. وَلكن يَسوع كيبقا على الدوام والخدمة ديالو ما عنداْ شي نهاية. وْعلى ديك الشي يَسوع قادر ينجّي على الدوام الّي كيتقدّمو بِه نْعند اللّٰه، حيت هُوَ حيّ دائمًا باش يشفع فيهُم. حيت كيليق بِنا واحد رئيس المسؤولين الّي هُوَ قُدّوس، بلا عيب، صافي، حياتو بعيدة من حياة المُدْنبـين وْتعلّى نالسما، الّي ما كيحْتاج شي يقدّم الدبايح كُل نهار، حيت هُوَ عمل هَد الشي مرّة واحدة ملّي عْطى نفسو، ماشي فحال رُؤَساء المسؤولين الّي في الُوّل كيقدّمو الدبايح على الدنوب ديالوم وْمن بعد على الدنوب د الشعب. حيت الشريعة كتجعل من الناس الضعافين رُؤَساء مسؤولين، وَلكن كلمة الحلوف الّي جات من بعد الشريعة كتجعل من الِابن قسّيس، الّي هُوَ كامل على الدوام. وْدابا النقْطة الرئيسيّة د الكلام هي بلّي عندنا واحد رئيس المسؤولين في بيت العبادة الّي ݣلس على الّيمين د عرش الجلالة في السما، الّي كيخدم في الموطَع المقدّس، يعني السُّكنى الحقيقيّة، الّي عملاْ الرَّبّ، ماشي البشر. حيت كيتكلّف كُل رئيس المسؤولين بْتقْديم القرابين والدبايح. على ديك الشي خصّوْ تكون عند رئيس المسؤولين ديالنا شي حاجة يقدّماْ حتّى هُوَ. وْكَكان يَسوع على الأرض، ما يكون شي قسّيس، حيت كاينين المسؤولين الّي كيقدّمو القرابين على حسب الشريعة. ديك المسؤولين كيخدمو في الموطَع المقدّس الّي كيشبه نِلّي كاين في السما، فحال ما تبيّن نْموسى ملّي كان غادي يبني خيمة الاجْتماع وْقال لو: "ردّ بالك باش تعمل كُل شي فحال الشكل الّي تورّى لك في الجّبل." وَلكن الخدمة د القسّيس الّي شبّراْ يَسوع هي أفضل من الخدمة ديالوم، حيت هُوَ الوسيط د واحد العهد حسَن، الّي مأسّس على وعود حسَن. حيت كَكان هَد العهد الُوّل كامل، كَكان ما خصّوْ شي يكون عهد تاني، وَلكن اللّٰه كيلوم الناس وْكيقول: "غادي تجي أيّام، كيقول الرَّبّ، الّي فيها غادي نكمّل واحد العهد جديد مع دار إسْرائيل وْمع دار يَهودا. ما غادي شي يكون عهد فحال هَداك الّي عملْتوْ مع جدودوم النهار الّي شبّرْتوم من يَدّوم وْخرّجْتوم من مصر، حيت ما تبتو شي في العهد ديالي وْسمحْتْ فيهُم، كيقول الرَّبّ. وْهَدا هُوَ العهد الّي غادي نعملوْ من بعد ديك الأيّام مع الدار د إسْرائيل، كيقول الرَّبّ. غادي نجعل الشريعة ديالي في عَقلوم وْغادي نكتباْ في قلبوم، وانا غادي نكون الإلَه ديالوم وْهُمَ غادي يكونو الشعب ديالي. وْما غادي يعلّم حتّى واحد الجار ديالو وْحتّى واحد ما غادي يقول نخاه: «عرف الرَّبّ!»، حيت كاملين من الصغير نالكبير غادي يعرفوني. حيت أنا غادي نسمح نالمعاصي ديالوم وْعُمري ما غادي نعقل على الدنوب ديالوم." ملّي قال اللّٰه بلّي هَد العهد "جديد،" ردّ العهد الُوّل قديم، وْكُل شي الّي كيرجع قديم وْبالي، كيكون علاين يغْبر. والعهد الُوّل كان عندو الفرائض د العبادة وْموطَع مقدّس دُنياوي، حيت كان في خيمة الاجْتماع البيت الُوّل، الّي مسمّي الموطَع المقدّس، وْكان فيه المنارة والطيفور والخبز الّي اتّعطى ناللّٰه. وْمورا الحجاب كان البيت التاني، الّي مسمّي قُدس الأقْداس، الّي فيه واحد المَدْبح د البخور من الدهب والتابوت د العهد، مغطّي كامل بالدهب، الّي محْفوظ فيه واحد القشْعة د الدهب وْفيه المَنَّ والعصا ديال هارون الّي نبتَتْ وألْواح العهد. وْفوق من التابوت كانو الكَروبَين د المجد مظلّلين على الغطا الّي مسمّي موطَع التكْفير، وَلكن ماشي دابا الوقت باش نشرحو هَد الشي بالتفْصيل. وْكان مرتّب بْهَد الطريقة، كيدخلو المسؤولين نالبيت الُوّل بْشكل مسْتَمر باش يعملو الخدمة ديالوم. وَلكن الطرف التاني كان كيدخل لو رئيس المسؤولين بوحدو مرّة واحدة في العام، وْدائمًا معاه الدم الّي كيقدّموْ على نفسو وْعلى دنوب الشعب، الّي عملوها بلا ما يفطنو. وْهَيدا بغى الروح القُدُس يـبيّن بلّي الطريق نْقُدس الأقْداس باقّة ما ظهرَتْ شي، حيت كانت خيمة الاجْتماع الولى باقّة موجودة. وْهَد الشي رمز د الوقت الحاضر، الّي كَتْـتقدّم فيه قرابين وْدبايح، الّي ما يقدرو شي ينقّيو الضمير د هَداك الّي كيخدم. وْهَد الشي خاصّ غير نالماكلة والشراب والتطْهير المتنوّع وقواعد نالجسد، الّي مفْروضين حتّى نالوقت د التجْديد. وَلكن ملّي جا المسيح فحال رئيس المسؤولين د الخير الماجي في واحد السُّكنى أعظم وأكمل (الّي ماشي معدّل باليَدّين، يعني ماشي من هَد الدنيا المخْلوقة)، ماشي بْدم العتارس والعجولة، وَلكن بالدم ديالو، دخل مرّة واحدة نْقُدس الأقْداس وْعْطانا الفِدا الدايم. حيت إدا دم التيران والعتارس وْرماد العجلة المرْشوش على المنْݣوسين كيقدّسوم نْتطْهير الجسد ديالوم، شحال كتَر دم المسيح، الّي قدّم نفسو ناللّٰه بالروح الأبدي بلا عيب، غادي ينقّي الضمير ديالنا من الأعْمال الّي كتدّينا نالموت، باش نخدمو اللّٰه الحيّ. وْعلى هَد الشي المسيح هُوَ الوسيط د العهد الجديد، باش المخْتورين يقبطو الورت الدايم الّي وَعدوم بِه اللّٰه، حيت مات باش يحرّروم من الدنوب الّي عملوها في العهد الُوّل. ملّي كاين شي عهد، لازم يكون الموصّي ميّت، حيت العهد كيكون تابت غير على الميّتين، وَلكن إدا كان الموصّي عايش، ما كيتطبّق شي. على ديك الشي العهد الُوّل ما اتّعقد شي بلا دم، حيت موسى، من بعدما تكلّم مع كُل الشعب على الوَصايا كاملة بْحسب الشريعة، شبّر دم العجولة والعتارس مع الما والصوفة الحمرة والزوفا، وْرشّ بِه الكتاب وْمن بعد الشعب كامل، وْكيقول: "هَدا هُوَ دم العهد الّي وصّاكُم بِه اللّٰه." وْرشّ بالدم خيمة الاجْتماع بْنفس الطريقة والقشوع د الخدْمة كاملين. من جهة الشريعة خصّوْ تقْريبًا كُل شي يتطهّر بالدم، وْبلا سفك الدم ما كاين شي الغُفْران. وْكان لازم بلّي الأمْتلة د الأُمور السماويّة كانَتْ كَتْـتطهّر بْهَد الطريقة، وَلكن الأُمور السماويّة خصّاْ دبايح حسَن من هدو. حيت المسيح ما دخل شي نالموطَع المقدّس، الّي معدّل باليَدّين والّي كيشبه نالموطَع الحقيقي، وَلكن دخل نالسما باش يقدّم نفسو قدّام اللّٰه من جهتنا. وْماشي باش يقدّم نفسو بزّاف د المرّات، فحال رئيس المسؤولين الّي كيدخل نالموطَع المقدّس كُل عام بْشي دم الّي ماشي ديالو. كَكان هَيدا، كَكان خصّ المسيح يتعدّب بزّاف د المرّات من تكْوين الدنيا، وَلكن هُوَ ظهَر مرّة واحدة في الوقت المناسب باش يحيّد الدنوب بالتضْحيّة د نفسو. وْكيفْما مكتوب على الناس يموتو مرّة واحدة وْمن بعد غادي يجي يوم الحساب، هَيداك حتّى المسيح قدّم نفسو مرّة واحدة باش يحيّد الدنوب د الناس بزّاف، وْغادي يظهَر مرّة تانية، ماشي باش يحيّد الدنوب، وَلكن باش يجيب النجا نِلّي كيتسنّاوه. حيت الشريعة ظلّ د الخيرات الماجّة، وْماشي التصْويرة بْنفساْ د هَد الأُمور، وْما تقدر شي تردّ الناس مكْمولين الّي كيتقرّبو بِها باش يقدّمو الدبايح بْشكل مستَمر عام مورا عام. كَكانت الدبايح الّي كيقدّموها العُبّاد غادي تطهّروم مرّة واحدة، ما يكونو شي كيقدّموها بْشكل مسْتَمر وْما يكونو شي كيحسّو في الضمير ديالوم بالدنوب. وَلكن هَد الدبايح هُمَ دِكْرى سنويّة د الدنوب. حيت ما يمكن شي نالدّم د التيران والعتارس يمحي الدنوب. على ديك الشي، ملّي دخل يَسوع نالدنيا، قال: "الدبيحة والقُرْبان ما بغيتِهُم شي، وَلكن وجّدْتِ لي واحد الجسد. والمحْروقات على الدنوب ما كتفرح شي بِهُم. على هَد الشي قُلْتْ: «أنا جيت باش نعمل بالإرادة ديالك، يا اللّٰه، كيفْما مكتوب عليَّ في القرْطاس د الكتاب.»" وْقال في الُوّل: "الدبايح والقُرْبان والمحْروقات على الدنوب ما بغيتِهُم شي وْما كتفرحو شي بِهُم،" الّي كيتقدّمو على حسب الشريعة. وْمن بعد قال: "أنا جيت باش نعمل بالإرادة ديالك، يا اللّٰه." هَيداك حيّد الُوّل باش يتبّت التاني. وْبْهَد الإرادة حنايَ مقدّسين بْتَقديم جسد يَسوع المسيح الّي تقدّم مرّة واحدة على الدوام. وْكُل قسّيس كيقدّم كُل النهار نفس الدبايح بزّاف د المرّات، الّي عُمروم ما يقدرو يمحيو الدنوب. وَلكن ديك القسّيس، من بعدما قدّم على الدوام ضحيّة واحدة على الدنوب، ݣلس على الّيمين د اللّٰه، وْكيتسنّى حتّى يتنزّلو العدْيان ديالو تحت الرِّجلين ديالو. حيت بْضحيّة واحدة عْطى الكمال نِلّي كيقدّسوم اللّٰه إلى الأبد. وْحتّى الروح القُدُس كيشهد نّا على هَد الشي، حيت من بعد قال: "هَدا هُوَ العهد الّي غادي نعملوْ معهُم من بعد ديك الأيّام، كيقول الرَّبّ. غادي نجعل الشريعة ديالي في قلبوم وْغادي نكتباْ في عقلوم... وْعُمري ما غادي نعقل على الدنوب والتعدّو ديالوم." وْملّي هُمَ مغْفورين، ما كاين شي الاحْتياج باش تتقدّم تضْحيّة يَخرى على الدنوب. على ديك الشي، آ الخوت، بْدم يَسوع عندنا التيقة الكاملة باش ندخلو نالموطَع د قُدس الأقْداس، بالطريق الجديدة الحيّة الّي فَتحاْ نّا بالحجاب، يعني الجسد ديالو، وْعندنا قسّيس عظيم على العائلة د اللّٰه. وْنقرّبو ناللّٰه بْقلب صادق وْبْتيقة كاملة بالإيمان، مطهّرين قلبنا من ضمير قبيح وْداتنا مغْسولة بالما الصافي. وْنقبطو في الرجا الّي ما كيتزعْزع شي والّي كنعْتَرفو بِه، حيت اللّٰه أمين في الّي وعد بِه. وْنهْتَمّو بَياش نشجّعو بَعضيّاتنا على المحبّة والأعْمال الصالحة، وْما نسمحو شي في اجْتماعنا، فحال ما مستنّسين البعض مِنّوم، وَلكن نشجّعو بَعضيّاتنا، وْكتَر ملّي كنشوفو ديك النهار كيقرّب. حيت من بعدما توصّلْنا بْمعْرفة الحقّ، إدا دنبْنا بالخاطر، ما بقاتْ شي تضْحيّة على الدنوب. وَلكن كتبقا الخلْعة وانْتظار يوم الحساب بالعافية القويّة الّي غادي تاكل العدْيان د اللّٰه. الّي خالف الشريعة د موسى كيموت بلا رحْمة بالشهادة د جوج أَوْلا تلاتة د الشهود. في النظر ديالكُم، شحال كبيرة العقوبة الّي غادي يسْتاهلاْ هَداك الّي كيسطم على اِبن اللّٰه وْكيحسب منْݣوس الدم د العهد الّي تقدّس بِه، وْكيزبّل في روح النعْمة؟ حيت كنعرفو هَداك الّي قال: "ديالي الانْتقام، أنا غادي نجازي،" كيقول الرَّبّ، وْعاود: "الرَّبّ غادي يحكم على الشعب ديالو." شحال كيخوّف يطيح شي واحد في اليَدّين د اللّٰه الحيّ! وْتفكّرو الأيّام الفايتة الّي فيها، من بعدما تنوّرْتو، كافحْتو وْتحمّلْتو بزّاف د العداب. بعض المرّات كُنْتو كتمرّو بالمعْيور وْمعدّبين على الإيمان ديالكُم، وْمن جهة يَخرى كُنْتو مشاركين مع هَدوك الّي تعاملو معهُم هَيداك. وْحنّيتو على الحبّاسة، وْملّي ادّاو منكُم الخيرات ديالكُم، قبلْتو هَد الشي فرْحانين حيت عارفين بلّي عندكُم مال أفضل وْدايم في السما. إدَن، ما تضيّعو شي التيقة ديالكُم الّي عنداْ أجر كبير. خصْكُم تصبرو باش، من بعدما تعملو إرادة اللّٰه، تقبطو الّي وَعدكُم بِه: "حيت باقي غير شويّش والّي كان خصّوْ يجي غادي يجي وْما غادي شي يتعطّل. أمّا المتّاقي ديالي غادي يحيا بالإيمان، وِادا رجَع ناللَور، ما غادي شي تفرح بِه نفسي." وَلكن حنايَ ماشي من هَدوك الّي كيرجعو نالهلاك، وَلكن من هَدوك الّي كيآمنو باش ينجّيو نَفسوم. الإيمان هُوَ الضمانة د الّي كَنْترجّاواه، واليَقين في الّي ما كيتشاف شي. حيت بالإيمان كانو مرْضيّين الجدود. بالإيمان كنفهمو بلّي العالمين تكوّنو بالكلمة د اللّٰه، الحاجات الّي كنشوفوها جات من الّي ما كنشوفوه شي. بالإيمان هابيل قدّم ناللّٰه دبيحة أفضل من ديال قايين، وْبِه اتّشهد لو بلّي هُوَ صالح، حيت شهد اللّٰه على التقْدِمات ديالو، وْبالإيمان باقي كيتكلّم، واخّا هُوَ مات. بالإيمان اتّرفع نالسما أخْنوخ باش ما يشوف شي الموت، وْما جبروه شي، حيت نقلوْ اللّٰه، وْمن قبل ما يتّرفع اتّشهد لو بلّي هُوَ مرْضي عند اللّٰه. وْبلا إيمان مسْتحيل نرضيو اللّٰه، حيت الّي كيقرّب نْعندو خصّوْ يآمن بلّي هُوَ كاين وْبلّي كيجازي نِلّي كيـبقّشو عليه. بالإيمان نوح، ملّي نبّهوْ اللّٰه على الحاجات الّي باقي ما تشافَتْ شي، خاف وْبنى الفُلك باش ينجّي العائلة ديالو، وْبْهَد الإيمان حكم على الدنيا، وْورت التقوى الّي كتجي بالإيمان. بالإيمان إبراهيم، ملّي اللّٰه عَيّط عليه باش يمشي نالموطَع الّي من بعد غادي يوَرتوْ، طاع اللّٰه وْخرج بلا ما يعرف الموطَع فاين ماشي. بالإيمان هجَر نالبلاد الموعودة، فحال في شي أرض غريبة، وْسكن في الخَيمة مع إسْحاق ويَعْقوب الوارتين معاه في نفس الوعد. حيت كان كيتسنّى المدينة الّي مبْنيّة على لساس، الّي المُهنْدس والبنّاي ديالاْ هُوَ اللّٰه. بالإي‍مان سارة بْنفساْ، واخّا فاتاْ الوقت د الولادة وْكانت عاݣرة، تقوّات باش تحبل، حيت اعْتَبرَتْ صادق هَداك الّي وعد بِه. هَيدا من واحد الرَّجل، وْهُوَ فحال واحد الميّت، تولّدو لو أُوْلاد بزّاف فحال النجوم د السما وْفحال الرمل على الحاشية د البحَر الّي ما كيتّحسب شي. بالإيمان ماتو هَدو كاملين بلا ما يتوصّلو بْديك الشي الّي وَعد بِه اللّٰه، وَلكن شافوه من بعيد وْتيّقوه واعْتَرفو بلّي هُمَ غرابين وْبرّانيين على الأرض. وْملّي هُمَ تكلّمو هَيداك، بيّنو بوضوح بلّي كانو كيفتّشو على واحد البلاد. وْكَكانو تفكّرو ديك البلاد الّي خرجو مِنّاْ، كَكانو جبرو الفُرْصة باش يرجعو لِلاْ. وَلكن كانو كيشتاقو نواحد البلاد أفضل، يعني البلاد السماويّة. على ديك الشي ما حشم شي اللّٰه باش يتسمّى الإلَه ديالوم، حيت وجّد لوم واحد المدينة. بالإي‍مان إبراهيم تجرّب وْقدّم إسْحاق، والّي قبل الوعود، قدّم ولدو الوحيد فحال واحد الدبيحة، واخّا قال لو اللّٰه: "بإسْحاق غادي تكون عندك الدرّيّة." وْحسب إبراهيم بلّي اللّٰه قادر باش يبعتوْ من بين الميّتين، وْقبطوْ عاود من الميّتين بْطريقة رمزيّة. بالإيمان إسْحاق بارك في يَعْقوب وْعيسو في الأُمور د المسْتَقبل. بالإيمان يَعْقوب، ملّي كان غادي يموت، بارك في كُل واحد من أُوْلاد يوسف، وْسجد متكّي على راس العصا ديالو. بالإيمان يوسف، ملّي كان في حالة الموت، دكر الخروج د شعب إسْرائيل من مصر، وْوصّاهُم يدّيو معهُم العطام ديالو. بالإيمان موسى، ملّي خلق، خبّعوه الوالِدين ديالو مُدّة تلت شهور، حيت شافوه بلّي كان صبي مزيّون وْما خافو شي من الأمر د المَلِك. بالإيمان موسى، ملّي كبر، رفض يتسمّى ولد بنْت فِرْعون، وْفضّل يكون معدّب مع شعب اللّٰه فْعوط ما يتمتّع باللّدّات الفايتة د الدنوب، وْحسب بلّي عار المسيح كان أعظم ترْوة من التجارة د مصر، حيت كانو العينين ديالو مركّزين على الجائزة. بالإيمان موسى خرج من مصر بلا ما يخاف من الغضب د المَلِك وْبقا تابت فحال إدا كان كيشوف الّي ما كيتشاف شي. بالإيمان عمل العيد د الفِصح وْرشّ الدم باش ملاك الموت ما يحادي حتّى شي بكر د شعب إسرئيل. بالإيمان قطعو البحَر الأحمر فحال إدا ماشّين على الرحْبة اليابسة، وْملّي المصريّين بغاو يقطعوه، غرقو. بالإيمان طاحو أسْوار أريحا من بعدما دار عليها الشعب سبع أيّام. بالإيمان راحاب، المراة الزانية، ما تّهلكَتْ شي مع العاصيّين حيت رحّبَت بالجواسيس بْسلام. وْشنّو غادي نزيد نقول؟ حيت ما يقدْني شي الوقت باش نتكلّم على جِدْعون وْباراق وْشَمْشون وْيَفْتاح وْداود وْصَموئيل والأَنْبياء، الّي بالإيمان غلبو الممْلكات، عملو التقوى، توصّلو بالوعود، شدّو الدقوم د السبوعة، طفاو العافية القويّة، هربو من حدّ السيف، تقوّاو من الضُّعف، كانو شجْعان في الحرب، وْغلبو على الجيوش البرّانيّين. وْبعض النسا ادّاو الميّتين ديالوم من بعدما رجعو من الموت. وَلكن يَخرين تعدّبو وْرفضو يتحرّرو باش يتوصّلو بواحد القيامة أفضل. ويَخرين تعدّبو وْتبَهْدلو وْكلاو العصا وْدخّلوهُم مقيّدين نالحبس. اتّرجمو، اتّنشرو على النص، وْماتو مقْتولين بالسيف. كانو كيتمشّاو هرْبانين من موطَع نْموطَع، مغطّيين بْجلد الغنم والمعَز، محْتاجين، معدّبـين وْمظْلومين. الدنيا ما كانت شي كتسْتاهل ناس فحالوم، متْلوفين في الخلا، الجّبولة، الغيران وْشقايق الأرض. واخّا هَدو كاملين رضاو اللّٰه بالإيمان، حتّى واحد مِنّوم تحقّق لو الوعد، حيت اللّٰه وجّد نّا شي حاجة أفضل باش ما يكونو شي مكْمولين بلا بنا. على ديك الشي حتّى حنايَ عندنا مجْموعة كبيرة د الشهود الّي دايرين بِنا، وْخصْنا نحيّدو كل التقال والدنب الّي كيلسق فينا بالسهولة، وْنجريو بالصبر في السباق الّي قدّامنا، نركّزو على يَسوع الّي هُوَ راس الإي‍مان والّي كيكمّلوْ. هُوَ، بْسباب الفرْحة الّي كَتْـتسنّاه، تحمّل الصليب وْحڭر الحشومة، وْدابا هُوَ ݣالس على الّي‍مين د عرش اللّٰه. وْفكّرو في هَداك الّي بقا تابت ضدّ المُدْنبـين الّي عارضوه، باش ما تعياو شي وْما تفشلو شي في نفسكُم. وْباقي ما قاومْتو شي حتّى يسيل الدم ديالكُم في الحرب ضدّ الدنوب. وْنسيتو الكلام د التشْجيع الّي تقال لكُم فحال أُوْلاد: "آ وليدي، ما تحڭر شي ملّي الرَّبّ كيربّيك وْما تفشل شي ملّي كيوبّخك، حيت الرَّبّ كيربّي الّي كيبغيهُم وْكيعصّي كُل ولد الّي كيقبلوْ." هَد الشي الّي كَتْـتحمّلو هُوَ باش تتعلّمو، حيت الرَّبّ كيتعامل معكُم فحال أُولادو، حيت واش كاين شي ولد الّي باباه ما كيربّيه شي؟ وَلكن إدا بقيتو بلا ترْبيّة، الّي الناس كاملين كيتعاملو بِها، إدَن أنتُمَ أُوْلاد الحرام، ماشي أُوْلاد الحلال. حيت، واخّا الوالِدين ديالنا أدّبونا، احْتَرمْناهُم. إدَن، واش ما خصْنا شي نطيعو كتَر الآب د الروح ديالنا باش نحياو؟ حيت هُمَ ربّاونا مُدّة قليلة كيفْما ظهَر لوم مزيان، وَلكن الرَّبّ كيربّينا نالمصْلحة ديالنا باش نشْتَركو في القداسة ديالو. حتّى واحد ما كيفرح بالتأديب في وقتو وْكيحزن، وَلكن من بعد، الّي كانو مربّيين بِه، كيعطيهُم غلّة السلام والتقوى. على ديك الشي قوّيو اليَدّين المرْخيّين والركابي الفاشلين، وْعملو طرْقان معوّطة نالرِّجلين ديالكُم باش الرِّجل العرجة ما تتعوّج شي، وَلكن تتشافى. تبعو السلام مع الناس كاملين والقداسة، الّي بلا بِها حتّى واحد ما غادي يشوف الرَّبّ. ردّو بالكُم باش حتّى واحد ما يخلّي نعْمة اللّٰه، وْباش ما يطلع شي عرق المرارة ويعمل الصعوبات وينجّس بزّاف منكُم. وْحتّى واحد ما يكون فاسد ولا منْݣوس فحال عيسو الّي على طبْسيل واحد د الماكلة باع الحقوق ديالو د البِكر. وْكيفْما كتعرفو، من بعد ملّي بغى يورت البركة، ترفض وْما كانَتْ شي عندو الفُرْصة باش يندم، واخّا فتّش على البركة بالدموع. حيت ما قرّبْتو شي نواحد الجّبل ملْموس وْمشْعول بالعافية والظلام والضباب والعاصفة، ولا غوات البوق والصوت د الكلام (وْهَدوك الّي سمعوه، طلبو باش ما يزيد شي يتكلّم معهُم)، حيت ما قدرو شي يتحمّلو هَد الأمر: "غادي يتّرجم كُل واحد الّي كيحادي الجّبل، واخّا يكون حيوان." وْشحال كان المنْظر كيخوّف حتّى موسى قال: "أنا كَنتّرعد بالخوف." وَلكن أنتُمَ قرّبْتو نْجبل صِهْيون وْنْمدينة اللّٰه الحيّ، أُورُشَليم السماويّة، وْقرّبْتو نْعشرات الألوف من الملائكة في حفلة العيد، وْنالكنيسة د الأبْكار الّي الأسْماء ديالوم مكتوبة في السما، وْقرّبْتو ناللّٰه الحاكم د الناس كاملين وْنالارْواح د الناس الصالحين الّي اللّٰه كمّلوم. وْقرّبْتو نيَسوع، الوسيط د واحد العهد جديد وْنالدم المرْشوش الّي كيتكلّم حسَن من دم هابيل. ردّو بالكُم باش ما ترفضو شي الّي كيتكلّم، حيت إدا هَدوك الّي رفضوه الّي تكلّم معهُم على الأرض ما فلْتو شي من العقاب، كيفاش حنايَ غادي نفلتو إدا عطيناه بالطهر ديالنا، هَداك الّي كيتكلّم معنا من السما؟ في ديك الساعة الصوت ديالو زعْزع الأرض، وَلكن دابا وَعدنا وْقال: "مرّة يَخرى غادي نزعْزع، ماشي غير الأرض بوحداْ، وَلكن حتّى السما." وْهَد التعْبير ديالو "مرّة يَخرى" كيعني بلّي غادي يتزعْزعو الأُمور المخلوقة، وْغادي يتحيّدو، باش تبقا الّي ما كتزعْزع شي. على ديك الشي، حيت حنايَ قبطْنا واحد الممْلكة الّي ما كَتْـتزعْزع شي، خصْنا نكونو شاكرين وْنخدمو اللّٰه كيفْما هُوَ كيبغي بالخشوع والتقوى، حيت إلَهنا هُوَ عافية مشْعولة. زيدو تتحابّو مع بعضيّاتكُم فحال الخوت. ما تهملو شي الضيافة، حيت بِها البعض ضيّفو الملائكة بلا ما يعرفو. عقلو على الحبّاسة فحال إدا كُنْتو حبّاسة معهُم، وْعلى المعدّبين فحال إدا كُنْتو أنتُمَ بْنَفسكُم الّي كَتْـتعدّبو. احْتَرمو كاملين الجواج، وْما يكون شي الفراش منْڭوس، حيت اللّٰه غادي يعاقب الفاسدين والزانيين. ما تكونو شي طمّاعين وْكونو قانعين بلّي عندكُم، حيت اللّٰه بْيَدّو قال: "عُمري ما غادي نخلّيك وْما غادي شي نسمح فيك." وْعلى هَد الشي يمكن نقولو بْكُل تيقة: "الرَّبّ هُوَ الّي كيعاونْني وْما غادي شي نخاف. شنّو يقدر يعمل لي الإنسان؟" عقلو على المُرْشدين ديالكُم الّي تكلّمو معكُم بْكلام اللّٰه. شوفو نتيجة الحياة ديالوم وْقلّدوهُم في الإي‍مان. يَسوع المسيح هُوَ هو، البارح واليوما وإلى الأبد. ما تتّخدعو شي بالتعاليم المتنوّعة والغريبة، حيت مزيان يتقوّى القلب بالنعْمة، ماشي بالماكلة الّي ما كتنفع نْوالو هَدوك الّي مسْتَنسين بِها. حنايَ عندنا مَدْبح الّي منّو هَدوك الّي كيخدمو في خَيمة الاجْتماع ما عندوم شي الحقّ باش ياكلو. حيت رئيس المسؤولين كيدخّل الدم د الحيوانات الّي كيقدّموْ على الدنوب في الموطَع د قُدس الأقْداس، وَلكن الجتّة ديالوم كَتْـتحرق على برّا من المخيّم. على ديك الشي يَسوع، باش يقدّس الشعب بالدم ديالو، تعدّب حتّى هُوَ على برّا من الباب د المدينة. على ديك الشي نخرجو نْعندو على برّا من المخيّم، رافدين العار ديالو. حيت ما عندنا شي هنايَ مدينة دايمة، وَلكن كنفتّشو على المدينة الماجّة. هَيدا في كُل وقت نقدّمو ناللّٰه بيَسوع دبيحة التهليل، يعني الغلّة د الشفايف الّي كيعْتَرفو بِاسمو. وْما تنساو شي تعملو الخير وْتعاونو بعضيّاتكُم، حيت الدبايح فحال هَدو كيرضيو اللّٰه. طيعو المُرْشدين ديالكُم وْخضعو لوم، حيت هُمَ كيسهرو عليكُم فحال الناس الّي عارفين بلّي غادي يتحاسبو على الخدْمة ديالوم، باش يعملوها فرْحانين وْبلا شكاية، حيت هَد الشي ما كينفعكُم شي. صلّيو من جهتنا، حيت حنايَ مقْتَنعين بلّي عندنا ضمير صالح وْباغيين نتصرّفو مزيان في كُل شي. كَنْرغبكُم تعملو هَد الشي كتَر باش نرجع نْعندكُم في أقرب وقت. وإلَه السلام الّي بعت من بين الميّتين راعي الخرْفان العظيم، الّي هُوَ رَبّنا يَسوع، بْدم العهد الدايم، يجعلكُم موجّدين نْكُل عمل صالح باش تعملو بالإرادة ديالو، ويعمل فينا ديك الشي الّي مرْضي قدّامو بيَسوع المسيح، الّي عندو المجد على الدوام دائمًا. آمين. كنطلب منكُم، آ الخوت، بلّي تقبلو بالصبر كلمات التشْجيع الّي كتبْتْ لكُم بالاخْتصار. وْبغيتْكُم تعرفو بلّي الأخ ديالنا تيموثاوس تطلق سراحو، وِادا جا، دغيا غادي نزوركُم معاه. سلّمو على كُل المُرْشدين والقدّيسين ديالكُم كاملين، وْكيسلّمو عليكُم الّي هُمَ من إيطاليا. النعْمة معكُم كاملين. آمين. يَعْقوب، عبد اللّٰه والرَّبّ يَسوع المسيح، كيبلّغ السلام نالطناشر قبيلة الّي مشتّتين في الدنيا. اعْتَبرو راسكُم فرحانين، آ خوتي، ملّي تكونو في محاين مخْتَلفة، حيت أنتُمَ عارفين بلّي امْتحان إيمانكُم كيجعل فيكُم الصبر. والصبر غادي يكمّل الخدمة ديالو فيكُم مزيان باش تكونو كاملين وْمكمولين وْماشي ناقصين. وِادا كان شي واحد منكُم ناقص من الحكْمة، يطلباْ من اللّٰه وْغادي يعطيها لو، حيت اللّٰه كيعطي بالسخاء وْبلا ما يحڭروْ. وَلكن خصّوْ يطلب بإيمان وْما يشكّ شي، حيت الشكّ كيشبه نالمواج د البحَر الّي الريح كيزعْزعاْ وْكيدفعاْ. أَي واحد الّي كيعمل هَيدا ما يظنّ شي بلّي غادي يقبط شي حاجة من عند الرَّبّ، حيت هُوَ رَجل متردّد وْمزعْزع في الطرقان ديالو كاملين. الأخ المتواضع خصّوْ يفْتَخر بالرتْبة العالية ديالو، والغني يفْتَخر بالرتْبة الحانية ديالو، حيت هُوَ غادي يدبل فحال الورد د العشب. حيت الشمس كتشرق وْبالحرارة ديالاْ كتيبّس الربيع وْكتطيّح الورد وْكَيفْنا الجمال ديالاْ. هَيدا غادي يفنا الّي لا باس عليه فوسط التجارة ديالو. مبروك الرَّجل الّي كيتحمّل المحْنة، حيت، ملّي كينجح في الامْتحان ديالو، غادي يقبط تاج الحياة الّي وعد بِه الرَّبّ نِلّي كيعزّوه. ملّي شي واحد كيكون مجرّب، ما يقول شي بلّي هُوَ مجرّب من عند اللّٰه، حيت اللّٰه ما يقدر شي يتجرّب بالشَّرّ، وْهُوَ ما كيجرّب حتّى شي واحد. وَلكن كُل واحد مجرّب ملّي كيتغرّ وْكيتخدع بالشهوات ديالو. والشهْوة، ملّي كتحبل، كتولد الدنوب، والدنوب، ملّي كينضجو، كيولدو الموت. ما تْتّخدعو شي، آ خوتي العزازين. كُل عطيّة مزيانة وْكُل مَوهبة كاملة هُمَ كينزلو من فوق، من عند الآب د الأنْوار الّي ما فيه شي التغْيير وْما كيتحرّك شي فحال الظلّ. هُوَ ولدْنا بالإرادة ديالو بالكلمة د الحقّ باش نكونو الباكورة في الخليقة ديالو. عرفو هَد الشي، آ خوتي العزازين: كُل إنسان خصّوْ يكون خفيف باش يسمع، وْما يزرب شي في الكلام، وْما يتقلّق شي دغيا. حيت الغضب د الإنسان ما كيعمل شي التقوى د اللّٰه. على ديك الشي طردو كُل نجاسة وْكتْرة الشَّرّ وْقبلو باللطف الكلمة المغْروسة في قلبكُم الّي قادرة تنجّيكُم. وَلكن كونو عاملين بالكلام وْماشي سامعين وْكان، حيت هَيدا كتغشّو راسكُم. حيت الّي كيسمع الكلام وْما كيعمل شي بِه، كيشبه نْواحد الرَّجل الّي كيشوف الوجه ديالو في المراية. كيشوف راسو وْكيمشي وْكينسا دغيا كيفاش كان. وَلكن الّي كيشوف بْترْكيز في الشريعة الكاملة، الشريعة د الحُرّية، وْكيستَمرّ فيها، وْماشي سامع وْناسي، وَلكن عامل بالكلام، هَدا غادي يكون مبروك ملّي كيعمل بِه. إدا شي واحد فيكُم كيظنّ بلّي هُوَ مشبّر في الدين، وَلكن ما كيتحكّم شي في اللسان ديالو وْكيخدع قلبو، الدين ديالو باطل. الدين الصافي والنقي عند اللّٰه الآب هُوَ هَدا: يتهلّا الإنسان في اليتامى والهجّالات في الضيق ديالوم ويحضي راسو من الفساد د الدنيا. آ خوتي، ما يكون شي الإيمان ديالكُم بْرَبّنا يَسوع المسيح، رَبّ المجد، بالوجهيّات. حيت إدا دخل في الاجْتماع ديالكُم واحد الرَّجل عندو الخاتم د الدهب والحوايج الرفيعة، وْدخل واحد الرَّجل مسكين ولابس حوايج موسّخة، وْفضّلْتو هَداك الّي لابس الحوايج الرفيعة وْقُلتو لو: "ݣلس أنتينا هنايَ في الموطَع المزيان،" وْقُلْتو نالمسكين: "وقَف أنتينا تمّاك، أَولا ݣلس هنايَ عند الرِّجلين ديالي،" واش ما كتعملو شي بالوجهيّات بيناتكُم وْرجعْتو حُكّام بالتفْكير القبيح؟ سمعو، آ خوتي العزازين، واش ما اختار شي اللّٰه المساكن في نظر الدنيا باش يكونو أَغْنياء في الإيمان ويورتو المُلك الّي وعد بِه اللّٰه نِلّي كيحبّوه؟ وَلكن أنتُمَ حڭرْتو المسكين. واش ماشي الأَغْنياء هُمَ الّي كيظلموكُم وْكيجرّوكُم نالمحاكم؟ واش ماشي هُمَ الّي كيكفرو بْديك الِاسم الكريم الّي سمّاوكُم عليه؟ وِادا كمّلْتو د بالصّحّ الشريعة المُلوكيّة د الكتاب: "عزّ جارك فحال نفسك،" كتعملو مزيان. وَلكن إدا كتعملو الوجهيّات، كتخطاو وْكتكونو متعدّيّـين والشريعة كتحكم عليكُم. حيت الّي حافظ على الشريعة كاملة وْكيخطأ في واحد النقْطة مِنّاْ، كيرجع مُدْنب في كُل شي. هَداك الّي قال: "ما تزني شي،" قال عاود: "ما تقتل شي." وَلكن إدا قتلْتِ، واخّا ما كَتْزني شي، رجعْتِ عاصي نالشريعة. هَيدا تكلّمو وْعملو فحال إدا غَد تتحاكمو بالشريعة د الحُرّية. حيت الّي ما عمل شي الرحْمة، غادي يتحكم بلا رحْمة، والرحْمة كتغلب على الحُكم. شنّي هي الفايدة، آ خوتي، إدا شي واحد قال بلّي عندو الإيمان، وَلكن ما عندو شي الأعْمال؟ واش الإيمان يقدر ينجّيه؟ إدا كان شي أخ أَوْلا شي أخْت محْتاجين الحوايج والماكلة اليوميّة، وْقالّوم شي واحد منكُم: "مْشيو بْسلامة، سخنو وْشبعو،" وَلكن ما عطيتو لوم شي الّي محْتاجين لِلو نالجسد، شنّي هي الفايدة؟ هَيداك حتّى الإيمان، إدا ما عندو شي الأعْمال، هُوَ ميّت. وَلكن إدا شي واحد قال: "أنتينا عندك الإيمان وانا عندي الأعْمال،" ورّيني الإيمان ديالك بلا الأعْمال، وانا غادي نورّيك الإيمان ديالي بأعْمالي. أنتينا كتآمن بلّي اللّٰه واحد، كتعمل مزيان. حتّى الشياطين كيآمنو بْهَد الشي وْكيتّرعدو. واش بغيتِ تعرف، آ الرَّجل الجاهل، بلّي الإيمان بلا أعْمال هُوَ إيمان ميّت؟ واش ما تبرّى شي بابانا إبراهيم بالأعْمال ديالو ملّي قدّم إسْحاق اِبنو على المَدْبح؟ كتشوف بلّي الإيمان والأعْمال ديالو خدمو مجْموعين، وْبالأعْمال تكمّل الإيمان. وْتكمّل الكتاب الّي كيقول: "آمن إبراهيم باللّٰه وْتّحسب لو تقوى،" وْتسمّى "خليل اللّٰه." كتشوفو أنتُمَ بلّي الإنسان كيتبرّى بالأعْمال وْماشي بالإيمان بوحدو. حتّى راحاب المراة الزانية، واش ما تبرّات شي بالأعْمال ديالاْ ملّي ضيّفَت المرْسولين وْخرّجَتوم نْطريق يَخرى؟ حيت فحال الجسد بلا روح ميّت، هَيداك حتّى الإيمان بلا أعْمال ميّت. ما يرجعو شي بزّاف منكُم مُعلّمين، آ خوتي، عارفين بلّي حنايَ غادي نتحاكمو كتَر من يَخرين. حيت كاملين كَنْعترو بزّاف د المرّات. إدا كان شي واحد ما كيعتر شي في الكلام، هَداك رجل كامل وْقادر يسيطر على الجسد كامل. ملّي كنعملو الشكيمة نالدقوم د الخيل باش يطيعنا، هَيدا نقدرو نڭوّدو الدّات ديالو كاملة. ركّزو على السُّفُن. واخّا كبارين، كَتْدفعوم الرّيح القويّة وْبالدفّة الصغيرة كيسيطر عليهُم كيفْما بغى الرُبّان. هَيداك حتّى اللسان، هُوَ طرف صغير من الجسم وْكيفْتَخر بالحاجات الكبيرة. شوفو شحال العافية القليلة كتحرق غابة كبيرة! واللسان هُوَ عافية، عالم د الإتم. اللّسان موجود في الطراف ديالنا وْكينجّس الجسد كامل وْكيحرق المجْرى د الطبيعة، وْهُوَ مشعول من جهنّم. حيت كل نوع د الوحوش والطيور والزواحف والحوت الكبير، الإنسان عرف كيفاش يتحكّم فيهُم وْيروّضوم. وَلكن اللسان ما يقدر حتّى شي إنسان يروّضوْ. هُوَ شرّ الّي ما كيتحدّ شي، معمّر بالسمّ القاتل. بِه كنباركو في رَبّنا والآب، وْبِه كنلعنو الناس الّي هُمَ مخْلوقين بْصورة اللّٰه. من دقوم واحد، كنباركو وْكنلعنو. آ خوتي، هَد الشي ما خصّوْ شي يكون هَيدا. واش من عين واحدة كيخرج الما الحلو والمرّ بْجوج؟ واش تقدر الشجرة د الكرْموس، آ خوتي، تعطي الزيتون أَوْلا الدالية الكرْموس؟ وْحتّى العين المالحة ما كتعطي شي ما حلو. شكون هُوَ الّي معقّل وْفاهم بيناتكُم؟ يبيّن الأعْمال ديالو بالتصرّف المزيان في اللطف د الحكْمة. وِادا كان القلب ديالكُم عامر بالغيرة المُرّة والمدابزة، ما تفْتَخرو شي وْما تنكرو شي الحقّ. هَد الحكْمة ما جات شي من فوق، وَلكن هي أرضيّة، طبيعيّة وْشيطانيّة. حيت فاين كتكون الغيرة والمدابزة، تمّاك كتكون الفَوضى وْكُل حاجة قبيحة. وَلكن الحكْمة الّي جات من فوق هي قبل كُل شي طاهرة، مسالمة، لطيفة، متفاهمة وْمعمّرة بالرحْمة والغلّات المزيانة، بلا وَجهيّات وْبلا نفاق. والغلّة د التقوى كَتْـتزرع في السلام بْهَدوك الّي كيعملو السلام. ماين كَيْجيو الحروب والمدابزات بيناتكُم؟ واش ماشي من الشهوات الّي كيتحاربو في الأعْضاء ديالكُم؟ كتشهاو وْما عندكُم شي، كتقتلو وْكتحسدو وْما كتلحقو حتّى شي حاجة. كَتدابزو وْكتحاربو، وَلكن ما عندكُم شي، حيت ما كتطلبوه شي. ملّي كتطلبو شي حاجة، ما كتدّيو والو، حيت ما كتطلبو شي بالنيّة الصافية، وَلكن غير باش تخسروها على الشهوات ديالكُم. آ الزانيين! واش ما كتعرفو شي بلّي الصُّحبة د الدنيا هي عداوة مع اللّٰه؟ إدا بغى شي واحد يكون صاحب الدنيا، غادي يرجع العدو د اللّٰه. واش كتظنّو بلّي الكلام د الكتاب باطل ملّي كيقول بلّي الروح الساكن فينا كيغير علينا؟ وَلكن كيعطي النعْمة بْسخاء. على ديك الشي الكتاب كيقول: "اللّٰه كيقاوم المتكبّرين، وَلكن كيعطي النعْمة نالمتواضعين." إدَن، خضعو ناللّه. قاومو إبْليس وْهُوَ غادي يهرب منكُم. قرّبو ناللّه وْهُوَ غادي يقرّب نْعندكُم. نقّيو اليَدّين ديالكُم، آ المُدْنبـين، وْطهّرو قلبكُم، آ المتردّدين. حزنو وْنوّحو وْبكيو. تـتبدّل الضحْكة ديالكُم بالبكا والفرْحة بالحزن. تواضعو قدّام الرَّبّ وْهُوَ غادي يرفعكُم. ما تتكلّمو شي خايب على بعضياتكُم، آ الخوت. الّي كيتكلّم على خاه وْكيحكم عليه، كيتكلّم خايب على الشريعة وْكيحكم عليها. وِادا كُنْتِ كتحكم على الشريعة، يعني أنتينا ما كتعمل شي بِها، وَلكن رجعْتِ حاكم عليها. كاين غير واحد الّي عْطى الشريعة وْهُوَ الّي يقدر ينجّي ويهلك، وَلكن شكون أنتينا باش تحكم على قريبك؟ سمعو دابا، آ أنتُمَ الّي كتقولو: "اليوما أَوْلا غدّا غادي نمشيو نْهَد المدينة أَولا نْديك المدينة وْنݣوّزو تمّاك عام، وْنبيعو وْنشريو وْنربحو." وَلكن أنتُمَ ما كتعرفو شي شنّو غادي يوقع غدّا. شنّي هي الحياة ديالكُم؟ أنتُمَ فحال الضبابة الّي كتظهَر شويّش وْكَتْـتحيّد. بالعكس، كان عليكُم تقولو: "إدا بغى الرَّبّ، غادي نعيشو وْنعملو هَد الشي أَوْلا ديك الشي." وْدابا كتفْتَخرو بالتكبُّر ديالكُم، وْهَد الحيالة كاملة قبيحة. الّي كيعرف يعمل الخير وْما كيعملوْ شي، هُوَ كيدنب. سمعو دابا، آ الأَغْنياء، بكيو وْغوّتو على المصايب الّي غادي تجيكُم. المال ديالكُم فسد والحوايج ديالكُم كلاتوم التُّنية. الدهب والنقْرة ديالكُم تصدّاو، وْهَد الصدا غادي يشهد عليكُم وْغادي ياكل الجسد ديالكُم فحال العافية. جمعْتو الكنوز في الأيّام الاخّرية. سمعو كيفاش كتغوّت عليكُم الأُجْرة د الخدّامة الّي خدمو في الفدادن ديالكُم وْما خلّصْتوهُم شي، والغوات د الحصّادين وصَل حتّى نالودْنين د رَبّ الجنود. أنتُمَ عيشْتو واحد الحياة د الرفاهيّة بلا حدود في هَد الدنيا وْسمّنْتو قلبكُم في النهار د الدبح. حكمْتو على المتّاقي وْقتلْتوه، وْهُوَ ما دافع شي على راسو. على ديك الشي، آ الخوت، صبرو حتّى يجي الرَّبّ. شوفو كيفاش الفلّاح كيتسنّى الغلّة الغالية د الأرض وْكيصبر عليها حتّى تطيح الشتا البكرية والمعطّلة. هَيدا أنتُمَ صبرو وْتبّتو قلبكُم، حيت قرّب المجي د الرَّبّ. ما تشكّاو شي من بعضيّاتكُم، آ الخوت، باش ما تتحاكمو شي. ها الحاكم واقف على الباب. آ الخوت، كونو فحال الأَنْبياء الّي تكلّمو بِاسم الرَّبّ، وْتعدّبو وْصبرو. حنايَ كنباركو في هَدوك الّي صبرو. سمعْتو الصبر د أيّوب وْشفْتو كيفاش جازاه الرَّبّ، حيت الرَّبّ رحيم بزّاف وْحنين. وْقبل كُل شي، آ خوتي، ما تحلفو شي لا بالسما ولا بالأرض ولا بْشي حاجة يَخرى. وَلكن يكون الإيّاه ديالكُم إيّاه، واللّا ديالكُم لا، باش ما تطيحو شي في العقاب. واش فيكُم شي واحد في الضيق؟ يصلّي. واش شي واحد فرحان؟ يهلّل. واش فيكُم شي واحد مريط؟ يعيّط على المسؤولين د الكنيسة ويصلّيو على مسبّتو ويدهنوه بالزيت بِاسم الرَّبّ، والصلاة بالإيمان غادي تشافي المريط والرَّبّ غادي يرفعوْ. وِادا عمل شي دنب، غادي يتّغفر لو. اعْتَرفو مع بعطكُم بالدنوب ديالكُم. وْصلّيو نْبعضيّاتكُم باش تبراو، حيت الصلاة القويّة د المتّاقي فعّالة بزّاف. إيليّا كان واحد الرَّجل ضعيف، فحالنا فحالو، وْصلّى بْحرارة باش ما تطيح شي الشتا، وْما طاحتْ شي الشتا على الأرض مُدّة تلت سنين وْستّ شهور. وْصلّى عاود وْعْطات السما الشتا وْعْطات الأرض الغلّة ديالاْ. آ خوتي، إدا شي واحد خرج من الحقّ وْردّوْ شي واحد يَخُر لِلو، عرفو بلّي هداك الّي ردّ واحد المُدْنب الّي خارج من الطريق غادي ينجّي حياة المُدْنب من الموت وْغادي يغطّي بزّاف د الدنوب. بُطْرُس رسول يَسوع المسيح نالمخْتورين المتغرّبين الّي مشتّتين في بُنْتُس وْغَلاطيّة وْكَبَّدوكيّة وآسيا وْبيثينيّة، المخْتورين على حسب العِلم السابق د اللّٰه الآب، في القداسة د الروح، باش يطيعو يَسوع المسيح ويتطهّرو بْرشّ الدم ديالو. تكتّر لكُم النعْمة والسلام. مبارك اللّٰه والآب د رَبّنا يَسوع المسيح، الّي بْحسب الرحْمة ديالو الكبيرة ولدْنا من جديد نواحد الرجا حيّ، بالقيامة د يَسوع المسيح من بين الميّتين، باش نوَرتو الورت الّي ما كَيفْنا شي وْما كيفسد شي وْما كيتقاضى شي، محفوظ لكُم في السما، أنتُمَ الّي بالإيمان محْفوظين بْقوّة اللّٰه نالنجا الّي غادي يظهَر في الزمان الاخّري. بِه كَتْفرحو بزّاف، واخّا دابا خصْكُم تحزنو في واحد المُدّة بْمحاين مخْتَلفة، باش الإيمان ديالكُم يتجرّب، الّي هُوَ أغلى من الدهب الفاني الّي كيتجرّب بالعافية، باش، ملّي يظهَر يَسوع المسيح، يظهَر الإيمان ديالكُم مقبول، بالمجد والكرامة. أنتُمَ كتعزّوه واخّا ما شفْتوه شي، وْما كتشوفوه شي دابا، وَلكن كتآمنو بِه وْكتفرحو بْفرح عظيم وْمجيد، داركين على الهدف د الإيمان ديالكُم الّي هُوَ النجا د نفوسكُم. الأَنْبياء، الّي خبرو على النعْمة المحفوظة لكُم، بقّشو وْبحتو على هَد النجا، وْحاولو يعرفو الوقت والظروف الّي الروح د المسيح الّي كان فيهُم رشدوم من قبل على عداب المسيح والمجد الّي غادي يجي من بعدو. وْتبيّن لوم بلّي ديك الخدمة ما كانت شي لِلوم، وَلكن لِلكُم، وْدابا خبروكُم بِها الّي جابو لكُم الإنجيل بالروح القُدُس الّي مرسول من السما، وْحتّى الملائكة كيتشهّاو يشوفوها. على ديك الشي تبّتو العقل ديالكُم وْكونو على بال وْعملو تمامًا الرجا ديالكُم في النعْمة الّي غادي تجي لكُم في وقت ظهور يَسوع المسيح. فحال أُوْلاد طايعين، ما ترجعو شي نْشهاواتكُم الّي كانت عندكُم في الجهل ديالكُم، وَلكن كونو قدّيسين في كُل شي الّي كتعملو فحال القدّوس الّي عَيّط لكُم. حيت مكتوب: "كونو قدّيسين حيت أنا قدّوس." وِادا كتعيّطو على الآب الّي كيحكم بلا وَجهيّات العمل د كُل واحد، تصرّفو بالخوف في المُدّة د الغُربة ديالكُم في الدنيا، عارفين بلّي تفْديتو من الحياة ديالكُم الباطلة الّي تعلّمْتوها من جدودكُم، ماشي بالحوايج الفانية فحال النقْرة أَولا الدهب، وَلكن فداكُم بالدم الغالي د المسيح، فحال واحد الخروف صافي وْبلا عيب، الّي اخْتاروْ اللّٰه من قبل تأسيس الدنيا وْظهّروْ في هَد الزمان الاخّري نالمصْلحة ديالكُم، أنتُمَ الّي بِه كتآمنو باللّٰه الّي بعتوْ من بين الميّتين وْعْطاه المجد، باش يكون الإيمان والرجا ديالكُم في اللّٰه. وْدابا من بعدما طهّرْتو نفوسكُم بْطاعة الحقّ وْرجعَتْ عندكُم محبّة صادقة نالخوت، عزّو بعضيّاتكُم د بالصّحّ بْقلب صافي. أنتُمَ خلقْتو من جديد، ماشي من زرّيعة فانية، وَلكن من الّي ما كَتْفنا شي، هي كلمة اللّٰه الحيّة والدايمة. حيت: "كُل جسد هُوَ فحال الربيع، وْكُل مجد الإنسان هُوَ فحال الورد د الربيع. الربيع كَيْـيبس والورد كيدبل، وَلكن الكلام د الرَّبّ كيبقا على الدوام." وْهَدي هي الكلمة الّي تبشّرْتو بِها. على ديك الشي حيّدو عليكُم كُل شرّ وْكُل غشّ وْنفاق وْحسد والهدْرة في الناس، وْفحال أُوْلاد الّي عاد خلقو، تشهّاو الحليب الصافي من الكلام باش تكبرو بِه نالنجا ديالكُم، إدا جرّبْتو بلّي الرَّبّ هُوَ مزيان. ملّي كتقرّبو نْعندو، الحجْرة الحيّة المرْفوضة من الناس، وَلكن مخْتورة وْكريمة من عند اللّٰه، حتّى أنتُمَ، فحال حجَر حيّ، كيبني اللّٰه بِه واحد الدار روحيّة، باش تكونو رِجال الدين مقدّسين وْتقدّمو دبايح روحيّة مقبولة عند اللّٰه بيَسوع المسيح. هَيدا كيقول الكتاب: "أنا كَنْنزّل في صِهْيون الحجْرة الرئيسيّة د القنت، مخْتورة وْكري‍مة، وكُل واحد الّي كيآمن بِه ما عُمرو غادي يتخيّب." هَد الحجْرة هي كريمة لِلكُم، أنتُمَ المؤمنين، وَلكن بالنسبة نِلّي ما كيآمنو شي، "الحجْرة الّي رفضوها البنّاية هي رجعَتْ راس القنت." والمسيح هُوَ "الحجْرة الّي كيعترو بِها والصخْرة الّي كتطيّحوم،" حيت ما كيطيعو شي كلام اللّٰه، وْهَدا هُوَ المصير ديالوم. وَلكن أنْتُمَ دُرّيّة مخْتورة، وْرِجال الدين ملوكيّين، وأُمّة مقدّسة، وْشعب الّي شراه اللّٰه، باش تخبرو بالعجايب د هَداك الّي عَيّط لكُم من الظلام نالنور ديالو العجيب. أنتُمَ الّي من قبل ما كُنْتو شي شعب، وَلكن دابا أنتُمَ شعب اللّٰه. وْما توصّلْتو شي بالرحْمة، وَلكن دابا قبلْتوها. آ الخوت العزازين، كنطلبكُم فحال شي أجانب وْبرّانيّين في هَد الدنيا، تبعّدو على الشهاوات الجسديّة الّي كتحارب ضدّ النفس، باش يكون التصرّف ديالكُم مزيان بين الّي ما كيآمنو شي باللّٰه باش، واخّا كيتَّهموكُم فحال إدا كُنْتو كتعملو الشَّرّ، يمجّدو اللّٰه في النهار فاش غادي يزوروم، ملّي يلاحظو الأعْمال ديالكُم الصالحة. خضعو نْكُل سُلطة بشريّة على مسبّة الرَّبّ، واخّا يكون المَلِك الّي عندو السلْطة العُليا أَوْلا الحُكّام الّي اللّٰه صيفطوم باش يعاقبو الّي كيعملو الشَّرّ وْيشكرو هَدوك الّي كيعملو الخير. حيت هَيدا هي إرادة اللّٰه باش تسكّتو بأعْمال الخير الجهل د الناس المكلّخين. تصرّفو فحال الأحْرار، وَلكن ماشي فحال الّي عندوم الحُرّيّة كيستّرو بِها الشَّرّ، وَلكن فحال عبيد اللّٰه. احْتَرمو الناس كاملين، عزّو الخوت، خافو اللّٰه واحْتَرمو المَلِك. آ الخدّامة، خضعو نالأسْياد ديالكُم باحْترام، ماشي غير نِلّي مزيانين وْحنانين، وَلكن حتّى نِلّي صعابين. حيت هَد التصرّف مقبول ملّي شي واحد كيتعدّب بالظلم بْسباب الضمير ديالو قدّام اللّٰه. حيت شنّو هُوَ الفضل إدا طرشوكُم وْصبرْتو وانتُمَ خاطيين؟ وَلكن إدا كَتْـتعدّبو وانتُمَ عاملين الخير وْكتصبرو، هَدا هُوَ الفضل عند اللّٰه. حيت نْهَد الشي تعيّطْتو، والمسيح تعدّب على مسبّتكُم وْعْطى لكُم متال باش تـتبعو الخطوات ديالو، "الّي ما عمل حتّى شي دنب وْما كان شي الغشّ في دُقمو،" الّي ما ردّ شي باللعنة ملّي لعنوه، وْملّي تعدّب، ما هدّد شي، وَلكن سلّم نفسو نِلّي كيحكم بالعدل، الّي هُوَ بْنفسو هزّ الدنوب ديالنا في جسدو على الخشْبة، باش ن‍موتو نالدنوب وْنحياو نالتقوى، وْبالجروح ديالو حنايَ شفينا. من قبل كُنْتو فحال الغنم المتلوفة، وَلكن دابا رجعْتو نْعند الراعي الّي كيحضي النفس ديالكُم. هَيداك حتّى أنتُمَ، آ النسا، خضعو نالرجال ديالكُم باش، إدا كانو البعض مِنّوم ما كيآمنو شي بالكلام، تربحوهُم بلا ما تهدرو معهُم غير بالملاحظة د التصرّف د النسا ديالوم، ملّي كيشوفو السيرة ديالكُم الصافية والمحْتَرمة. وْما يكون شي الجمال ديالكُم من برّا بالتضْفير د الشعر والتزْيـين بالدهب والحوايج الغاليّـين، وَلكن الزينة خصّاْ تكون من داخل، فوسط القلب. الزواق الّي ما كيفسد شي، هُوَ الروح الطيّبة والهانية، الّي القيمة ديالاْ غالية عند اللّٰه. حيت زمان، هَيدا كانو كيتزوّقو النسا القدّيسات الّي كانو كيترجّاو في اللّٰه، خاضعين نالرجال ديالوم. هَيدا سارة طاعتْ إبراهيم وْعيّطَتْ لو سيدي، وانتُمَ غَد ترجعو البنات ديالاْ إدا عملْتو الخير وْعِشْتو بلا خوف. حتّى أنتُمَ، آ الرجال، كونو متفاهمين في حياتكُم الزوجيّة، وْكُل واحد يتعامل مع المراة ديالو بالاحْترام فحال واحد القشعة ضعيفة، وانتُمَ بْجوج وارتين نعْمة الحياة. هَيدا حتّى شي حاجة ما غادي تعتّر الصلاوات ديالكُم. والمُهِمّ، كونو كاملين بْراي واحد، تحانّو مع بعطكُم، عزّو بعضيّاتكُم فحال الخوت، وْكونو حنانين وْمتواضعين. ما تردّو شي الشَّرّ بالشَّرّ وَلا التزْبيلة بالتزْبيلة. بالعكس، باركو باش تورتو البركة، حيت نْهَد الشي عَيّط لكُم اللّٰه، حيت "الّي بغى يتمتّع بالحياة ويشوف الأيّام المزيانة، خصّوْ يحبس اللسان ديالو من الشَّرّ والشفايف ديالو على الغشّ في الكلام، يـبعّد على الشَّرّ ويعمل الخَير ويفتّش على السلام ويتبعوْ. حيت العينين د الرَّبّ على المتّاقيين والودْنين ديالو مركّزة على الطلبات ديالوم، وَلكن وجَه الرَّبّ ضدّ الناس الّي كيعملو الشَّرّ." وْشكون الّي يقدر يضرّكُم إدا كُنْتو تابعين الخير؟ أنتُمَ مبروكين إدا تعدّبْتو بْسباب التقوى. على هَد الشي ما تخافو شي مِنّوم وْما تقلّقو شي. وَلكن قدّسو المسيح، الّي هُوَ الرَّبّ، في قلبكُم، موجّدين دائ‍مًا باش تجاوبو كُل واحد الّي كيطلب منكُم الدليل على الرجا الّي فيكُم. وَلكن عملو هَد الشي باللطف والاحْترام، محافظين على الضمير ديالكُم الصافي، باش يتحشّمو الّي كيهدرو خايب على التصرّف ديالكُم المزيان في المسيح. حيت إدا اللّٰه بغاكُم تتعدّبو، حسَن تتعدّبو عاملين الخير وماشي الشَّرّ، حيت المسيح تعدّب مرّة واحدة بْسباب الدنوب، الصالح في الموطَع د الظالمين، باش يدّيكُم عند اللّه. مات في الجسد، وَلكن حيا في الروح. وْبِه مشى يبشّر الارْواح الّي محْبوسين، الّي ما طاعو شي في ديك الوقت في أيّام نوح، ملّي اللّٰه كان كيتسنّى بالصبر باش نوح يبني الفُلك، الّي فيه نجاو بالما ناس قلالين، غير تمنية د الأشْخاص، الّي هُوَ رمز د الغطس بالما الّي كينجّيكُم دابا، يعني المعموديّة، ماشي النقاوة د الجسد، وَلكن العهد مع اللّٰه بالضمير الصافي بْقيامة يَسوع المسيح، الّي طلَع نالسما وْهُوَ على الّيمين د اللّٰه، وْخضعَتْ لو الملائكة والسلطات والقوّات الروحيّة. وْحيت تعدّب المسيح في الجسد على سبابنا، تسلّحو أنتُمَ بْنفس الفكْرة، حيت الّي تعدّب في الجسد قضى على الدنوب، باش ما تعيشو شي الوقت الّي باقي في الجسد على حسب شهاوات الناس، وَلكن على حسب إرادة اللّٰه. صافي عليكُم الوقت الّي ضيّعْتوه باش ترضيو الوَتَنيّين، تابعين الفساد والشهاوات والسكرة والعِشْرة القبيحة والحفْلات د السكرة والعبادة د الأصْنام المحرّمة. هُمَ جا لوم غريب بلّي ما كتمشيو شي معهُم في نفس المعيشة الفاسدة الّي ما عنداْ حتّى شي حدود، وْعلى هَد الشي كيزبّلو فيكُم، وَلكن هُمَ غادي يعطيو الحساب نْهَداك الّي هُوَ موجود باش يحكم على الحيّين والميّتين. وْعلى هَد الشي تبشّر الإنجيل حتّى نالميّتين باش، واخّا يتحاكمو في الجسد فحال البشر، يحياو في الروح على حسب إرادة اللّٰه. وَلكن النهاية د كُل شي قرّبَتْ. إدَن، كونو بْعقلكُم وْصلّيو بالمعقول. وْقبل كُل شي خصّاْ تكون بيناتكُم المحبّة القويّة، حيت المحبّة كَتْستَر بزّاف د الدنوب. ضيّفو بعضيّاتكُم بلا ما تْتشكّاو، وْكُل واحد منكُم يخدم يَخرين بْحسب المَوهبة الّي اتّعطات لو، فحال مسؤولين مزيانين بْنعْمة اللّٰه المتنوّعة. إدا تكلّم شي واحد، خصّوْ يتكلّم فحال إدا كان كلام اللّٰه، وِادا خدم شي واحد، خصّوْ يخدم بالقوّة الّي كيعطيها لو اللّٰه، باش يتمجّد اللّٰه بيَسوع المسيح في كُل شي، الّي عندو المجد والقوّة على الدوام دائمًا. آمين. آ الحباب، ما تدهشو شي من العافية د المِحْنة الّي جات لكُم، فحال إدا وْقعَتْ لكُم شي حاجة غريبة. وَلكن فرحو مشْتَركين في العداب د المسيح، باش في الظهور د المجد ديالو تفرحو بالفرْحة الّي ما عنداْ شي القياس. إدا زبّلو فيكُم بِاسم المسيح، أنتُمَ مبروكين حيت الروح د المجد وْد اللّٰه كيسكن فيكُم. ما يتعدّب حتّى واحد فيكُم فحال قاتل أَو سارق أَو فاعل الشَّرّ أَو فضولي الّي كيدخل في الأُمور ديال يَخرين. وَلكن إدا تعدّب شي واحد فيكُم حيت هُوَ مسيحي، ما يحشم شي، وَلكن ي‍مجّد اللّٰه حيت عندو هَد الِاسم. حيت هَدا هُوَ الوقت باش يبدا الحُكم على العائلة د اللّٰه. وِادا بدا بِنا، كيفاش غادي تكون النهاية د هَدوك الّي ما كيطيعو شي الإنجيل د اللّٰه؟ الكتاب كيقول: "إدا الصالح كينجا بالصعوبة، إيوا، شنّو غادي يوقع نالعاصي والمُدْنب؟" على ديك الشي، الّي كيتعدّبو على حسب مشيئة اللّٰه، يسلّمو نَفسوم نالخالق الصادق، ويعملو الخير. كنطلب نالشيوخ الّي بيناتكُم، أنا شيخ فحالوم وْشاهد على العداب د المسيح وْشريك في المجد الّي غادي يظهَر، رعاو رعيّة اللّٰه الّي فوسطكُم وْسهرو عليها، ماشي بزّز، وَلكن بالخاطر، وْماشي بالطمع في الربح، وَلكن بالنيّة الصافية كيفْما بغى اللّٰه، وْماشي مسَيطرين على الّي تحت العناية ديالكُم، وَلكن كونو متال نالرعيّة، وْملّي يظهَر رئيس الرُّعاة، غَد تقبطو التاج د المجد الّي ما كَيْفنا شي. هَيدا، آ الشباب، طيعو الشيوخ وْلبسو كاملين توب التواضُع في المعاملة مع بعضيّاتكُم، حيت: "اللّٰه كيقاوم المتكبّرين، وَلكن كيعطي النعِمة نالمتواضعين." تواضعو تحت اليَد القويّة د اللّٰه باش يرفعكُم في الوقت المناسب. عملو الهموم ديالكُم كاملة عليه، حيت هُوَ كيتهلّا فيكُم. كونو بْعقلكُم وْسهرو، حيت العدو ديالكُم إبْليس كيدور فحال شي سبع هايج كيفتّش على شكون يفْتَرس. قاوموه تابتين في الإيمان، عارفين بلّي الخوت ديالكُم في العالم كامل كيتحمّلو نفس العداب. وْمن بعدما تعدّبْتو في واحد المُدّة قصيرة، ديك الساعة اللّٰه الإلَه د كُل نعْمة الّي عَيّط لكُم نالمجد ديالو الأبدي في المسيح يَسوع، هُوَ بْنفسو غادي يردّكُم كاملين ويتبّتكُم ويقوّيكُم ويأسّسكُم. عندو المجد والقوّة على الدوام دائمًا. آمين. كتبْتْ لكُم هَد البراة الملخّصة بْيَد سِلْوانُس، وْهُوَ أخ أمين في النظر ديالي. كنشجّعكُم بِها وْكنشهد بلّي هَدي هي نعْمة اللّٰه الحقيقيّة. تبتو فيها. كتسلّم عليكُم الكنيسة الّي في بابِل، الّي هي مخْتورة معكُم، وْحتّى مَرْقُس اِبني كيسلّم عليكُم. سلّمو على بعضيّاتكُم بْقُبلة المحبّة الأخويّة. سلام عليكُم كاملين أنتُمَ الّي في المسيح. آمين. سِمْعان بُطْرُس عبد يَسوع المسيح وْرَسول نْهَدوك الّي قبلو الإيمان الغالي فحالنا بْتقوى الإلَه ديالنا والمُنجّي يَسوع المسيح. تزداد لكُم النعْمة والسلام بْمعْرفة اللّٰه وْرَبّنا يَسوع. بالقُدرة الإلَهيّة ديالو عْطانا اللّٰه كُل شي الّي كنحْتاجو باش نعيشو الحياة والتقوى، وْعْطانا المعْرفة د هَداك الّي دعانا نالمجد والفضيلة، الّي بِهُم عْطانا اللّٰه الوعود الغالية والعجيبة باش ترجعو مشْتَركين في الطبيعة الإلَهيّة ملّي تهربو من الفساد الّي كاين في الدنيا بالشهوات القبيحة. على ديك الشي اجْتَهدو باش تزيدو على الإيمان ديالكُم الفضيلة. وْزيدو على الفضيلة ديالكُم المعْرفة، وْعلى المعْرفة التحكُّم في النفس، وْعلى التحكّم في النفس الصبر، وْعلى الصبر التقوى، وْعلى التقوى الحنان بين الخوت، وْعلى الحنان بين الخوت المحبّة. حيت إدا كترَتْ فيكُم هَد الصِّفات المزيانة، ما غادي شي يخلّيوكُم تكونو فاشلين وْبلا نفع في المعْرفة د رَبّنا يَسوع المسيح. والّي ما عندو شي هَد الصِّفات هُوَ عمى، وْقصير البصر، وْنسا بلّي تطهّر من الدنوب ديالو القديمة. على ديك الشي، آ الخوت، اجْتَهدو كتَر باش تْتبّتو الدعْوة د اللّٰه واخْتيارو، حيت إدا عملْتو ديك الشي، ما عُمركُم غَد تطيحو. وْهَيدا غادي يتّفتح لكُم باب واسع بَياش تدخلو نالمُلك الأبدي د رَبّنا وْمُنجّينا يَسوع المسيح. على ديك الشي دائمًا غادي نفكّركُم بْهَد الأُمور، واخّا أنتُمَ كتعرفوهُم وْتابتين في الحقّ الّي عندكُم دابا. وْكنعْتَبر بلّي واجب عليَّ نفكّركُم بْهَد الشي وانا باقي عايش في هَد الجسد، وْعارف بلّي قريب غادي نفارق هَد الجسد، كيفْما ورّاني رَبّنا يَسوع المسيح. وْغادي نعمل جُهدي باش تعقلو أنتُمَ على هَد الأُمور في كُل وقت من بعد الرحيل ديالي. ملّي خبرْناكُم بالمجي د رَبّنا يَسوع المسيح بالقوّة ديالو، ما تبعْنا شي الخرايف الدَّكيّة، وَلكن كُنّا شاهدين بالعظمة ديالو الّي شفْناها بالعينين ديالنا. حيت ملّي هُوَ تقبّل من اللّٰه الآب الكرامة والمجد، جا لو بالمجد العظيم واحد الصوت الّي قال لو: "هَدا هُوَ اِبني العزيز الّي أنا كنفرح بِه." وْحنايَ بْنفسنا سمعْنا هَد الصوت الّي جا من السما ملّي كُنّا معاه في الجّبل المقدّس. وْهَيدا رجعَتْ عندنا الكلمة النبويّة متأكّدة كتَر، وانتُمَ كتعملو مزيان إدا ركّزْتو فيها فحال واحد اللامْبة الّي كتضوّي في موطَع مسلّس، حتّى يطلع النهار وْتظهَر نجْمة الفجر في القلوبة ديالكُم. قبل كُل شي، عرفو بلّي حتّى شي نبوّة د الكتاب ما كتجي بْتفْسير شخصي، حيت النبوّة عُمراْ ما جات بإرادة الإنسان، وَلكن الرجال القدّيسين تكلّمو بْكلام اللّٰه، مڭوّدين بالروح القُدُس. كانو في شعب اللّٰه أَنْبياء كدّابين، وْحتّى أنتُمَ فوسطكُم غادي يكونو مُعلّمين كدّابين الّي غادي يدخّلو بالحيلة التعْليم الّي كيهلك، حتّى ينكرو القدير الّي فداهُم وْغادي يجيبو دغيا الهلاك على راسوم. وْبزّاف غادي يتبعوهُم في الفساد ديالوم وْبْسبابوم غادي يخرجو الناس على الطريق د الحقّ. وْهُمَ بالطمع غادي يتاجرو بِكُم بالكلام المغْشوش. وْمن شحال هَدي العقاب ديالوم موجّد والهالِك ديالوم ما ناعس شي. حيت ما حنّ شي اللّٰه على الملائكة ملّي دنبو، وَلكن سيّبوم في جهنّم وْدفعوم في الحفاري د الظلام حتّى يوم الحساب. وْما حنّ شي اللّٰه على العالم القديم، وَلكن حفظ نوح الّي بشّر بالتقوى، وْسبعة د الأشْخاص معاه، ملّي صيفط الطوفان على العالم د الفاجرين. وْحُكم اللّٰه على مدينة سَدوم وْعَمورة وْردّوم رماد، وْعملوم فحال عبْرة نالفاجرين من بعدوم، وْنجّى لوط الصالح الّي كان معدّب بْسباب الحياة الفاسدة د هَد القباحين، حيت ديك الصالح الّي كان كيسكن بيناتوم وْكيبغي الخير، كان كيتعدّب في نفسو ملّي كيشوف وْكيسمع نهار على نهار الأعْمال ديالوم القبيحة. وْهَد الشي كامل كيبيّن بلّي الرَّبّ كيعرف كيفاش ينجّي الصالحين من المِحْنة ويخلّي القباحين نالعقاب حتّى يوم الحساب، خصوصًا هَدوك الّي كيتبعو الشهوات الفاسدة د الجسد وْكيحݣرو السلْطة. فيهُم الصنطيحة وْهُمَ متكبّرين، ما كيخافو شي يزبّلو في الخلايق السماويّة. واخّا الملائكة كبَر مِنّوم في القوّة والقدْرة، ما كيحݣروهُم شي بْشي كلمة قبيحة قدّام الرَّبّ. وَلكن هَدو، فحال شي حيوانات الّي بلا هدْرة، تابعين غير الغريزة ديالوم وْتّولدو باش يتصيّدو ويتدبّحو، كيزبّلو في ديك الشي الّي ما كيعرفو شي. غادي يتّهلكو في الفساد ديالوم، وْغادي يشبّرو الخُلصة د الشَّرّ ديالوم. كيحسبو الشهْوة في النهار كامل فحال فرْحة كبيرة، هُمَ فحال طبْعة موسّخة ملّي كيعملو الحفلات معكُم وْكيفرحو بالغشّ ديالوم. عندوم العينين معمّرة بالزنا، وْهُمَ ما كيشبعو شي من الدنوب. كيخدعو الناس الّي ماشي تابتين، وْعندوم القلب ديالوم مدرّب على الطمع. هُمَ أُوْلاد ملْعونين. خلّاو الطريق النيشان، وْتلفو تابعين طريق بَلْعام بن بَصور الّي بغى الخُلصة د الشَّرّ، وْتوبّخ على المعْصيّة ديالو ملّي نطق الحمار الّي ما كيهدَر شي بْصوت بشري، وْوقّف الحماقة د النَّبي بَلْعام. هَدو هُمَ فحال العيون بلا ما، والسحاب كيدفعاْ الريح د العاصفة، وْمحْفوظ لِلوم الظلام العميق. حيت كيهدرو بالحيالة الخاوية وْكيخدعو بْشهوات الجسد والفساد هَدوك الّي عاد بداو كيهربو من الناس الّي كيعيشو في الخطأ. كيوعدوهُم بالحرّيّة وْهُمَ بْنَفسوم عبيد الفساد، حيت كُل واحد كيرجع عبد د أي حاجة الّي كتغلبوْ. حيت إدا هربو من الفساد د الدنيا بْ‍معْرفة رَبّنا والمُنجّي يَسوع المسيح، وْمن بعد رجعو عاود مرْبوطين بْهَد الشي وْغَلبوم، رجعَت الحالة الاخّرية ديالوم قبَح من الُولى. حيت كان حسَن لوم كَكانو ما عرفو شي طريق التقوى، فعوط ما يعرفوها وْمن بعد يسمحو في الوَصيّة المقدّسة الّي تسلّمَتْ لوم. وقَع لوم فحال ما كيقول المتال الصحيح: "الكلب كيرجع نالتقيّة ديالو" و "الحلّوفة المغسولة كترجع تتمرّغ في الغيس." هَدي هي البراة التانية الّي كنكتب لكُم، آ الحباب، وْفيهُم بْجوج حاولْتْ نفيّق العقول ديالكُم النقيّة باش تْتفكّرو الكلام الّي تكلّمو بِه الأَنْبياء القدّيسين من قبل، والوَصيّة الّي عْطاها الرَّبّ والمُنجّي بواسطة الرُّسُل ديالنا. قبل كُل شي خصْكُم تعرفو بلّي في الأيّام الاخّرية غادي يجيو الناس المبهْدلين الّي كيتمشّاو على حسب الشهوات ديالوم وْغادي يقولو: "فاين هُوَ الوعد د المجي ديالو؟ حيت من النهار الّي ماتو الجدود ديالنا، كُل شي بقا كيفْما هُوَ من البداية د الخليقة." حيت هُمَ بالعاني كيتجاهلو بلّي السما تكوّنَتْ من زمان، وْتكوّنَت الأرض بْكلمة اللّٰه من الما وْبالما. وْغرقَت الدنيا بِالما في ديك الوقت وْهلكَتْ. وْدابا بْنفس الكلمة السما والأرض غادي تبقا محفوظة نالنار حتّى نيوم الحساب وْهلاك الناس الّي كيعملو الشَّرّ. وَلكن، آ العزازين، ما تنساو شي هَد الشي: نهار واحد عند الرَّبّ فحال ألف سنة، وألف سنة فحال نهار واحد. الرَّبّ ما كيتعطّل شي في الوعد ديالو فحال ما كيفكّرو بعض الناس، وَلكن هُوَ صابر علينا وْما بغى شي يهلك حتّى واحد، وَلكن بغاهُم يجيو نْعندو كاملين تايبين. وَلكن يوم الرَّبّ غادي يجي فحال واحد السارق، الّي فيه غادي تتحيّد السما بْصوت كبير والموادّ غادي يدوبو بالعافية القويّة وْغادي تحرق الأرض وْكُل ما فيها. حيت إدا كُل شي غادي يتّهلك هَيدا، كيفاش أنتُمَ خصْكُم تعيشو؟ خصْكُم تعيشو حياة مقدّسة وْبالتقوى، كَتْـتسنّاو وْكتطلبو المجي د يوم الرَّبّ الّي فيه السما غادي تْتّهلك محْروقة والموادّ غادي يدوبو بالعافية الشديدة. وَلكن حنايَ، على حسب الوعد د اللّٰه، كنـتسنّاو سما جديدة وأرض جديدة الّي كتسكن فيهُم التقوى. على بَيدْمن كَتْـتسنّاو هَد الشي، آ العزازين، اجْتَهدو باش اللّٰه يجبركُم بْسلام وْبلا وسَخ وْبلا عيب قدّامو. اعْتَبرو بلّي الصبر د رَبّنا هُوَ النجا ديالكُم، كيفْما كتب لكُم الأخ ديالنا العزيز بولُس حتّى هُوَ بالحكْمة الّي عْطاها لو اللّٰه. في كُل الرسائل ديالو كيتكلّم على نفس هَد المواضيع، الّي فيها بعض الأُمور الصعيبة باش يتّفهمو، والناس الجاهلين والّي ماشي تابتين كيعوّجوها كيفْما كيعوّجو البقية د الكتوبة المقدّسة، وْكيجيبو الهلاك على راسوم. هَيدا أنتُمَ، آ الحباب، عارفين هَد الشي من قبل، ردّو بالكُم باش ما يجرّوكُم شي الناس الكدّابين نالغلط وْتطيحو من التبات ديالكُم. وَلكن كبرو في النعْمة والمعْرفة د رَبّنا وْمُنجّينا يَسوع المسيح، عندو المجد دابا وْعلى الدوام. آمين. الّي كان من البداية، الّي سمعْناه والّي شفْناه بالعينين ديالنا، الّي لاحظْناه وْحاديناه باليَدّين ديالنا من جهة كلمة الحياة، (حيت الحياة ظهرَتْ وْشفْناها وْكنشهدو بِها، وْكنخبروكُم بالحياة الأبديّة الّي كانت عند الآب وْظهرَتْ نّا). ديك الشي الّي شفْناه وْسمعْناه كنخبروكُم بِه باش حتّى أنتُمَ تكون عندكُم العِشرة معنا. وْفي الحقيقة العِشْرة ديالنا هي مع الآب وْمع اِبنو يَسوع المسيح. وْكَنْكتبو لكُم هَد الشي باش تكون الفرْحة ديالنا كاملة. وْهَدي هي الرسالة الّي سمعْناها منّو وْكنخبروكُم بِها، بلّي اللّٰه هُوَ نور وْما فيه حتّى شي ظلام. إدا كنقولو بلّي عندنا عِشرة معاه وْكنتمشّاو في الظلام، راه كنكدبو وْما كنطبّقو شي الحقّ. وَلكن إدا كنـتمشّاو في النور، كيفْما هُوَ في النور، عندنا العِشْرة مع بَعْطنا، وْدم يَسوع المسيح اِبنو كيطهّرنا من كُل دنب. إدا كنقولو بلّي ما عندنا شي الدنوب، كنخدعو ريوسنا والحقّ ماشي فينا. إدا كَنْعْتَرفو بالدنوب ديالنا، راه اللّٰه صادق وْعادل باش يغفر نّا دنوبنا ويطهّرنا من كُل شرّ. إدا ادّعينا بلّي ما دنبْنا شي، راه كنردّوه كدّاب والكلام ديالو ما كاين شي فينا. آ وْلادي، كنكتب لكُم هَد الشي باش ما تدنبو شي، وَلكن إدا دنب شي واحد، عندنا الّي كيشفع فينا عند الآب، يَسوع المسيح الصالح، وْهُوَ الضحيّة على الدنوب ديالنا، وْماشي على دنوبنا وْكان، وَلكن حتّى على الدنوب د العالم كامل. وْهَدي هي العلامة بلّي كنعرفو اللّٰه، ملّي كنطيعو الوَصايا ديالو. الّي كيقول: "أنا كنعرفوْ،" وْما كيطيع شي الوَصايا د اللّٰه، هُوَ كدّاب والحقّ ما كاين شي فيه. وَلكن الّي كيطيع الكلمة ديالو، محبّة اللّٰه كملَتْ فيه. هَيدا كنعرفو بلّي حنايَ فيه. الّي كيقول بلّي هُوَ تابت فيه، لازم يعيش فحال ما عاش المسيح. آ خوتي العزازين، ما كنكتب شي لِلكُم وَصيّة جديدة، وَلكن وَصيّة قديمة الّي كانت عندكُم من البداية، وْهِيَ الكلمة الّي سمعْتوها من قبل. كنكتب لكُم عاود وَصيّة جديدة الّي هي حقيقيّة في المسيح وْفيكُم، حيت الظلام بدا كيݣوز والنور الحقيقي كيضوّي. الّي كيقول بلّي هُوَ في النور وْكيكره خاه، راه باقي في الظلام. والّي كيعزّ خاه، هُوَ تابت في النور وْما فيه حتّى شي عترة. وَلكن الّي كيكره خاه، هُوَ في الظلام وْكيتمشّى فيه، وْما كيعرف شي فاين ماشي، حيت الظلام أعْمى لو العينين ديالو. كنكتب لكُم، آ الولاد، حيت اللّٰه غفر الدنوب ديالكُم بِاسم المسيح. كنكتب لكُم، آ الآباء، حيت عرفْتو الّي هُوَ من البداية. كنكتب لكُم، آ الشباب، حيت غلبْتو الشرّير. كنكتبت لكُم، آ الولاد، حيت عرفْتو الآب. كتبْتْ لكُم، آ الآباء، حيت عرفْتو الّي هُوَ من البداية. كتبْتْ لكُم، آ الشباب، حيت أنتُمَ قويّين وْكلام اللّٰه تابت فيكُم وْغلبْتو الشرّير. ما تبغيو شي الدنيا ولا حتّى شي حاجة فيها. إدا كيبغي شي واحد الدنيا، راه ما فيه شي محبّة الآب. حيت كُل شي الّي في الدنيا، شهْوة الجسد وْشهْوة العينين والحيالة بالحياة، ما كيجي شي من الآب وَلكن من الدنيا. الدنيا والشهوات ديالاْ كَيْفناو، وَلكن الّي كيعمل إرادة اللّٰه كيتبت إلى الأبد. آ الولاد، هَدي هي الساعة الاخّرية. وْفحال ما سمعْتو بلّي غادي يجي المسيح الدجّال، جاو بزّاف الّي هُمَ ضدّ المسيح، على هَد الشي كنعرفو بلّي هَدي هي الساعة الاخّرية. واخّا خرجو من بيناتنا، ما كانو شي منّا، حيت كَكانو منّا كَكانو بقاو معنا، وَلكن خرجو باش يوضّحو بلّي ما كانو شي كاملين منّا. وَلكن أنتُمَ عندكُم المسحة من القدّوس وْكتعرفو كُل شي. كتبْتْ لكُم ماشي حيت ما كتعرفو شي الحقّ، وَلكن حيت كتعرفوه، وْحيت حتّى شي كدْبة ما كتجي من الحقّ. شكون هُوَ الكدّاب؟ الّي كينكر بلّي يَسوع هُوَ المسيح، هَدا هُوَ المسيح الدجّال، الّي كينكر الآب والِابن. كُل واحد الّي كينكر الِابن ما عندو شي الآب، وَلكن الّي كَيْعْتَرف بالِابن، عندو الآب حتّى هُوَ. ديك الشي الّي سمعْتوه من البداية خصّوْ يتبت فيكُم. إدا هَد الشي الّي سمعْتوه كَيْتبت فيكُم، أنتُمَ غَد تْتبتو في الِابن وْفي الآب بْجوج. وْهَدا هُوَ الوعد الّي وعدنا بِه، يعني الحياة الأبديّة. كتبْتْ لكُم هَد الشي على الّي كيحاولو يتلّفوكُم. وانتُمَ، المسحة الّي عْطاها لكُم تابتة فيكُم، وْما كتحْتاجو شي نْحتّى واحد يعلّمكُم، وَلكن كيفْما هَد المسحة بْنفساْ كتعلّمكُم كُل شي (وْهِيَ حقيقيّة وْماشي كدْبة)، فحال ما علّمَتْكُم، تبتو في هَد الشي. وْدابا، آ الولاد، تبتو في المسيح باش، ملّي يظهر، تكون عندنا التيقة وْما نحشمو شي قدّامو في المجي ديالو. إدا كتعرفو بلّي هُوَ صالح، خصْكُم تعرفو بلّي كُل واحد الّي كيعيش بالتقوى، هُوَ مولود من اللّٰه. شوفو قدّاش المحبّة الّي عْطاها نّا الآب حتّى نتسمّاو أُوْلاد اللّٰه، وْحنايَ في الحقيقة أُولادو. على هَد الشي العالم ما كيعرفنا شي، حيت ما عرفو شي اللّٰه. آ العزازين، دابا حنايَ أُوْلاد اللّٰه وْباقي ما ظهَر شي كيفاش غادي نكونو، وَلكن كنعرفو بلّي، ملّي هُوَ يظهر، غادي نكونو فحالو، حيت حنايَ غادي نشوفوه كيفْما هُوَ. وْكُل واحد الّي عندو هَد الرجا فيه كيطهّر نفسو كيفْما هُوَ طاهر. كُل واحد الّي كيعمل الدنوب كيخالف الشريعة، حيت الدنوب هي ضدّ الشريعة. وْكتعرفو بلّي المسيح ظهَر باش يحيّد دنوبنا وْهُوَ ما فيه شي الدنوب. كُل واحد الّي تابت فيه ما كيدنب شي، وْكُل واحد الّي كيدنب ما شافوْ شي ولا عرفوْ. آ وْلادي، ما يتلّفكُم حتّى شي واحد. الّي كيعمل التقوى هُوَ مْتَّاقي، فحال ما هُوَ مْتَّاقي. والّي كيعمل الدنوب هُوَ من إبْليس، حيت إبْليس كيدنب من البداية. على هَد الشي ظهَر اِبن اللّٰه باش يهدّم الّي عملوْ إبْليس. كُل واحد الّي مولود من اللّٰه ما كيعمل شي الدنوب، حيت الزرّيعة د اللّٰه تابتة فيه، وْما يقدر شي يدنب، حيت هُوَ مولود من اللّٰه. بْهَد الشي كيظهرو أُوْلاد اللّٰه وْولاد إبْليس: كُل واحد الّي ما كيعمل شي التقوى وْما كيعزّ شي خاه، هُوَ ماشي من اللّٰه. هَدي هي الرسالة الّي سمعْتوها من البداية بلّي نعزّو بعضيّاتنا. ماشي فحال قايين الّي كان ديال الشرّير وْقتل خاه. وْعلاش قتلوْ؟ حيت الفعايل ديالو كانو قباحين والأعْمال د خاه متّاقيين. آ خوتي، ما تسْتَغربو شي إدا كرهَتْكُم الدنيا. حنايَ كنعرفو بلّي تحوّلْنا من الموت نالحياة، حيت كنعزّو خوتنا. الّي ما كيعزّ شي خاه، باقي في الموت. كُل واحد الّي كيكره خاه هُوَ قاتل، وانتُمَ كتعرفو بلّي الحياة الأبديّة ما غادي تكون عند حتّى شي قاتل. بْهَد الشي عرفْنا المحبّة، حيت المسيح سلّم نفسو على مسبّتنا، وْحنايَ لازم علينا نسلّمو نفسنا على مسبّة الخوت ديالنا. وَلكن الّي عندو المال في هَد الدنيا وْشاف خاه محْتاج وْبخل عليه، كيفاش تكون محبّة اللّٰه ساكنة فيه؟ آ وْليداتي، ما نعزّو شي بالكلام ولا باللسان، وَلكن بالأعْمال والحقّ. وْبْهَد الشي غادي نعرفو بلّي حنايَ من الحقّ وْغادي يرتاحو القلوبة ديالنا قدّامو، حيت إدا اتّهمَتْنا القلوبة ديالنا، اللّٰه هُوَ عظيم من القلوبة ديالنا وْكيعرف كُل شي. آ العزازين، إدا ما اتّهمَتْنا شي القلوبة ديالنا، راه عندنا الزعامة قدّام اللّٰه، وْأي حاجة الّي طلبْناها منّو غادي نقبطوها، حيت حنايَ كنحافظو على الوَصايا ديالو وْكنعملو الّي كيرضيه. وْهَدي هي الوَصيّة ديالو: بلّي نآمنو بالِاسم د اِبنو يَسوع المسيح، وْنعزّو بعضيّاتنا كيفْما هُوَ وصّانا. والّي كيحافظ على الوصايا ديالو كَيْتبت في اللّٰه واللّٰه فيه. وْبْهَد الشي كنعرفو بلّي هُوَ تابت فينا، من الروح القُدُس الّي عْطاه نّا. آ العزازين، ما تْتيّقو شي كُل روح، وَلكن جرّبو الارْواح باش تعرفو واش هي من عند اللّٰه، حيت خرجو بزّاف د الأَنْبياء الكدّابين نالدنيا. بْهَد الشي عرفو روح اللّٰه: كُل روح الّي كَتعْتَرف بلّي يَسوع المسيح جا في الجسد، هي من اللّٰه. وْكُل روح الّي ما كَتْعْتَرف شي بلّي يَسوع المسيح جا في الجسد، هي ماشي من اللّٰه، وَلكن من عند المسيح الدجّال، الّي سمعْتو بلّي هُوَ ماجي، وْهُوَ في الدنيا دابا. آ وْليداتي، أنتُمَ من اللّٰه، وْغلبْتوهُم، حيت الّي فيكُم عظيم من الّي في الدنيا. هَدوك من الدنيا، على هَد الشي كيتكلّمو بْكلام الدنيا والدنيا كتسمع لوم. حنايَ من اللّٰه، وْكُل واحد الّي كيعرف اللّٰه كيسمع نّا، والّي ماشي من اللّٰه ما كيسمعنا شي. هَيدا كنعرفو روح الحقّ وْروح الضلال. آ العزازين، نعزّو بعضيّاتنا، حيت المحبّة ماجّة من اللّٰه، وْكُل واحد الّي كيعزّ، هُوَ مولود من اللّٰه وْكيعرفوْ. الّي ما كيعزّ شي، ما كيعرف شي اللّٰه، حيت اللّٰه محبّة. هَيدا بيّن اللّٰه المحبّة ديالو فينا، حيت اللّٰه صيفط اِبنو الوحيد نالدنيا باش نحياو بِه. هَدي هي المحبّة، ماشي بلّي حنايَ حبّينا اللّٰه، وَلكن هُوَ الّي حبّنا وْصيفط اِبنو باش يكفّر على دنوبنا. آ العزازين، إدا اللّٰه حبّنا هَيدا، حتّى حنايَ خصْنا نعزّو بعضيّاتنا. حتّى واحد ما عُمرو ما شاف اللّٰه، وَلكن إدا كنعزّو بعضيّاتنا، اللّٰه تابت فينا والمحبّة ديالو كملَتْ فينا. بْهَد الشي كنعرفو بلّي حنايَ تابتين فيه وْهُوَ تابت فينا، حيت عْطانا من الروح ديالو. وْحنايَ شفْنا وْكنشهدو بلّي الآب صيفط اِبنو باش يكون المُنجّي د الدنيا. إدا شي واحد اعْتَرف بلّي يَسوع هُوَ اِبن اللّٰه، اللّٰه تابت فيه وْهُوَ تابت في اللّٰه. وْحنايَ عرفْنا المحبّة الّي اللّٰه كيحبّنا بِها وْآمنّا بِها. اللّٰه محبّة والّي تابت في المحبّة تابت في اللّٰه واللّٰه تابت فيه. هَيدا كَتْـتكمّل المحبّة فينا باش تكون عندنا زعامة في يوم الحساب، حيت كيفْما كيكون المسيح في هَد الدنيا، حتّى حنايَ كنكونو. في المحبّة ما كاين شي الخوف، وَلكن المحبّة الكاملة كتبعّد الخوف، حيت الّي كيخاف كيتسنّى العقاب والمحبّة ما تكمّلَتْ شي فيه. حنايَ كنحبّو اللّٰه حيت هُوَ حبّنا في الُوّل. إدا قال شي واحد: "أنا كنحبّ اللّٰه،" وَلكن كيكره خاه، هُوَ كدّاب، حيت الّي ما كيعزّ شي خاه الّي شافوْ، كيفاش يقدر يحبّ اللّٰه الّي عُمرو ما شافوْ؟ وْهُوَ عْطانا هَد الوَصيّة: "كُل واحد الّي كيحبّ اللّٰه، لازم يعزّ خاه حتّى هُوَ." كُل واحد الّي كيآمن بلّي يَسوع هُوَ المسيح، هُوَ اتّولد من اللّٰه، وْكُل واحد الّي كيعزّ الآب، كيعزّ هَداك الّي مولود منّو حتّى هُوَ. بْهَد الشي كنعرفو بلّي كنعزّو أُوْلاد اللّٰه، ملّي كنحبّو اللّٰه وْكنحافظو على الوَصايا ديالو. وْهَدي هي المحبّة ناللّٰه: ملّي كنطيعو الوَصايا ديالو. والوَصايا ديالو ماشي صعابين نعملو بِهُم. حيت كُل واحد الّي اتّولد من اللّٰه كيغلب الدنيا. والإيمان ديالنا هُوَ الانْتصار ديالنا على الدنيا. شكون هُوَ الّي كيغلب الدنيا؟ غير الّي كيآمن بلّي يَسوع هُوَ اِبن اللّٰه. هَدا هُوَ يَسوع المسيح الّي جا بالما والدم، ماشي بالما بوحدو، وَلكن بالما والدم. والروح هُوَ الّي كيشهد، حيت الروح هُوَ الحقّ. والّي كيشهدو هُمَ تلاتة: الروح والما والدم، وْهَد التلاتة هُمَ في واحد. إدا كنقبلو شهادة الناس، راه شهادة اللّٰه عظيمة منّاْ، حيت هَدي هي شهادة اللّٰه الّي شهد بِها على اِبنو. أَي واحد الّي كيآمن بِابن اللّٰه، عندو هَد الشهادة فيه. وْكُل واحد الّي ما كيآمن شي باللّٰه، رَدّ اللّٰه كدّاب، حيت ما آمن شي بالشهادة الّي شهد بِها اللّٰه على اِبنو. وْهَدي هي الشهادة: اللّٰه عْطانا الحياة الأبديّة وْهَد الحياة هي في اِبنو. الّي عندو اِبن اللّٰه عندو الحياة، والّي ما عندو شي اِبن اللّٰه ما عندو شي الحياة. كتبْتْ لكُم هَد الشي، أنتُمَ الّي كتآمنو بِاسم اِبن اللّٰه، باش تعرفو بلّي عندكُم الحياة الأبديّة. هَدي هي التيقة الّي عندنا في اللّٰه، ملّي كنطلبو شي حاجة حسب الإرادة ديالو، هُوَ كيسمعنا. وِادا كنعرفو بلّي اللّٰه كيسمعنا في كُل ما طلبناه، كنكونو متأكّدين بلّي عندنا كُل ما طلبْنا منّو. إدا شي واحد شاف خاه كيعمل شي دنب الّي ما كيدّي شي نالموت، يصلّي على مسبّتو واللّٰه غادي يعطي لو الحياة. هَد الشي نِلّي كيعملو الدنب الّي ما كيدّي شي نالموت. وَلكن كاين واحد الدنب الّي كيدّي نالموت، وْماشي على هَدا كنقول نصلّيو على مسبّتو. كُل شرّ هُوَ دنب، وَلكن كاين الدنب الّي ما كيدّي شي نالموت. كنعرفو بلّي كُل واحد الّي اتّولد من اللّٰه ما كيتعوّد شي على الدنوب، حيت يَسوع المسيح الّي مولود من اللّٰه كيحفظوْ والشرّير ما كيحاديه شي. كنعرفو بلّي حنايَ ديال اللّٰه، والدنيا كاملة تحت السلْطة د الشرّير. وْكنعرفو بلّي اِبن اللّٰه جا وْعْطانا الفهامة باش نعرفو الإلَه الحقيقي. وْحنايَ في الّي هُوَ حقيقي، في اِبنو يَسوع المسيح، الّي هُوَ الإلَه الحقيقي والحياة الأبديّة. آ وْلادي، حضيو راسكُم من الأصْنام. آمين. يوحَنّا الشيخ نالسيّدة المخْتورة من اللّٰه وْنولاداْ الّي كنعزّوم في الحقّ، وْماشي غير أنا بوحدي، وَلكن حتّى الناس كاملين الّي كيعرفو الحقّ، على حسب الحقّ الّي تابت فينا والّي غادي يكون معنا دائمًا. تكون معنا النعْمة والرحْمة والسلام من عند اللّٰه الآب وْمن الرَّبّ يَسوع المسيح ابن الآب في الحقّ والمحبّة. فرحْتْ بزّاف حيت جبرْتْ شي بعض من أُوْلادك كيتمشّاو في الحقّ، على حسب الوَصيّة الّي عْطانا الآب. وْدابا كنطلب منّك، آ السيّدة، باش نعزّو بعضيّاتنا. وْهَد الشي ماشي فحال إدا كتبْتْ لك وَصيّة جديدة، وَلكن هي وَصيّة كانت عندنا من البداية. وْهَدي هي المحبّة: علينا نطبّقو الوَصايا د اللّٰه. وْهَدي هي الوَصيّة: عليكُم تتمشّاو في المحبّة، فحال ما سمعْتو من البداية. حيت خرجو نالدنيا بزّاف د الخدّاعين الّي ما كيعْتَرفو شي بلّي يَسوع المسيح جا في الجسد. والّي كيعمل هَد الشي هُوَ الكدّاب والمسيح الدجّال. ردّو بالكُم باش ما تضيّعو شي كُل شي الّي عملْنا، باش تشبّرو الاجَر ديالكُم كامل. كُل واحد الّي خرج من الطريق وْما تبت شي في تعْليم المسيح، هَداك ما عندو شي اللّٰه. والّي تبت في تعْليم المسيح، هَدا عندو الآب وْحتّى الِابن. إدا جاكُم شي واحد وْما عندو شي هَد التعْليم، ما تسْتَقبلوه شي في الدار وْما تسلّمو شي عليه. حيت الّي كيسلّم عليه كيشْتَرك معاه في الفعايل ديالو القبيحة. واخّا عندي بزّاف ما نكتب لكُم، ما بغيت شي نكتبوْ بالمداد على الكاغط، حيت كنتمنّى نجي نْعندكُم وْنتكلّم معكُم وجَه نالوجَه باش تكون الفرْحة ديالنا كاملة. كيسلّمو عليك أُوْلاد أختك المخْتورة. آمين. يوحَنّا الشيخ نالأخ العزيز غايُس، الّي كنعزّوْ في الحقّ. آ العزيز، كنتمنّى تكون بْخير في كُل شي، والصحّة ديالك تكون مزيانة فحال ما كَتْـتنبّت الروح ديالك. فرحْتْ بزّاف ملّي جاو نْعندي شي خوت وْشهدو بالحقّ الّي فيك وْكيفاش كتطبّق هَد الحقّ. ما كاينة شي شي فرْحة كتَر من هَدي، ملّي كنسمع على أُوْلادي كيتمشّاو في الحقّ. آ العزيز، كَتْـتصرّف بأمانة في كُل شي الّي كتعمل مع الخوت، واخّا هُمَ برّانيّين. شهدو قدّام الكنيسة على المحبّة ديالك، وْغادي تعمل مزيان إدا عاونْتِهم باش يزيدو في السفر ديالوم كيفْما بغى اللّٰه. حيت هُمَ خرجو بْمحبّة اسم المسيح، وْما قبلو حتّى شي مساعدة من الّي ماشي مؤمنين. على هَد الشي خصْنا حنايَ نضيّفوهُم باش نشْتَركو معهُم في الخدمة د الحقّ. كتبْتْ نالكنيسة، وَلكن ديوتْريفُس الّي كيبغي يكون الُوّل فيهُم، ما كيقبل شي الّي كنقولوه. وْعلى هَد الشي، إدا جيتْ، غادي نفكّركُم في الفعايل ديالو وْكيفاش كيهدَر فينا بالكلام الخايب. وْفوق هَد الشي، ما كيرحّب شي بالخوت البرّانيّين، وْكيمنع هَدوك الّي بغاو يسْتَقبلوهُم وْكيطردوم من الكنيسة. آ العزيز، ما تقلّد شي الشَّرّ، وَلكن قلّد الخير، حيت الّي كيعمل الخير، هُوَ من اللّٰه، والّي كيعمل الشَّرّ، هَداك ما شاف شي اللّٰه. كاملين كيشهدو نْدي‍مِتريوس وْحتّى الحقّ بْنفسو كيشهد لو. وْحتّى حنايَ كنشهدو لو، وانتُمَ كتعرفو بلّي الشهادة ديالنا حقيقيّة. كان عندي بزّاف ما نكتب لك وَلكن ما بغيتْ شي نكتب لك بالمداد والقلم، حيت كنتمنّى نشوفك في وقت قريب وْغادي نتكلّمو وجَه نالوجَه. تبقا على خير. الحباب هنايَ كيسلّمو عليك. سلّم أنتينا على الحباب تمّاك، كُل واحد بِاسمو. يَهودا عبد يَسوع المسيح وْخاه د يَعْقوب، نْهَدوك الّي عَيّط لوم اللّٰه الآب، المحْبوبـين والمحفوظين نيَسوع المسيح، تزداد لكُم الرحْمة والسلام والمحبّة. آ العزازين، ملّي كُنْتْ كنعمل كُل جُهدي باش نكتب لكُم على النجا الّي كنشْتَركو فيه كاملين، جبرْتْ بلّي خصْني نكتب لكُم باش نشجّعكُم على الجهاد في الإيمان الّي تسلّم نالقدّيسين مرّة واحدة. حيت تسلّلو شي ناس مخبّعين فوسطكُم الّي فيهُم الشَّرّ، كيغيّرو نعْمة إلَهنا نالفساد وْكينكرو سيدنا وْرَبّنا الوحيد القدير يَسوع المسيح. العقاب ديالوم مكتوب من زمان. واخّا أنتُمَ عارفين مزيان هَد الشي كامل، بغيتْ نفكّركُم بلّي الرَّبّ، من بعدما نجّى شعبو من بلاد مصر، هلك هَدوك الّي ما آمنو شي بِه. والملائكة الّي ما حافظو شي على المرتبة ديالوم، وَلكن سمحو في السُّكنى ديالوم، عملوم في الظلام العميق، مقيّدين بالسناسل الأبديّة نيوم الحساب العظيم. كيفْما سَدوم وْعَمورة، والمُدُن الّي دايرين بِهُم، تعدّبو فحالوم بالنار الأبديّة ملّي زناو وْتبعو الشهوات الجسديّة الّي ضدّ الطبيعة، رجعو عبْرة نالناس الّي كيتعدّبو بالعقاب د النار الأبديّة. بْنفس الطريقة، هَد الناس حتّى هُمَ كيفسّدو الجسد في الأحلام ديالوم، وْكيرفضو السلْطة، وْكيزبّلو في الخلايق السماويّة. وَلكن ملّي ميخائيل رئيس الملائكة تغانن مع إبْليس وْتْدابزو على الجسد د موسى، ما زعَم شي يحكم عليه باللعنة، وَلكن قال لو: "الرَّبّ ينهَط فيك!" وَلكن هَدو كيزبّلو في ديك الشي الّي ما كيعرفو شي. وْديك الشي الّي كيفهموه بالغريزة، فحال شي حيوانات الّي بلا هدرة. هُوَ الّي كيفسّد نَفسوم. الويل لِلوم! حيت تبعو طريق قايين. وْباش يربحو الفلوس، طاحو في الغلط د بَلْعام وْتّهلكو في التمرُّد د قورَح. هَدو هُمَ طبعة موسّخة في الحفلات ديالكُم، ملّي كيتّجمعو معكُم بلا حشومة، كيفتّشو غير على الفايدة ديالوم. هُمَ سحاب بلا شتا، كيدّيهُم الريح. هُمَ شجار د الخريف بلا غلّة، من الجدر هُمَ ميّتين جوج د المرّات وْمقلّعين. هُمَ مواج هايجين د البحَر، الّي كيسيّبو الرغوة د الوسخ ديالوم. هُمَ نجوم تالفين وْمحفوظ لِلوم الظلام العميق على الدوام. على هَدو تنبّأ حتّى أَخْنوخ، السابع من آدم، وْقال: "شوفو، الرَّبّ جا مع العشرة د الألوف د الملائكة ديالو باش يحاسب الناس كاملين وينهَط في كُل شي على كُل الفعايل الشرّيرة ديالوم وْعلى كُل كلمة قاصحة الّي تكلّمو بِها عليه هَد المُدْنبـين الأشْرار." هَدو هُمَ البرْݣاݣة الّي كيتشكّاو، الّي كيتمشّاو على حسب الشهوات ديالوم وْكيهدرو بالحيالة وْكيمسحو الكابّة نالناس على المصْلحة ديالوم. وَلكن أنتُمَ، آ العزازين، تفكّرو الكلمات الّي تكلّمو بِها من قبل الرُّسُل د رَبّنا يَسوع المسيح، ملّي قالو لكُم: "في الزمان الاخّري غادي يكونو ناس الّي كَيْبهْدلو وْكيمشيو مور الشهوات ديالوم الشرّيرة." هَدو هُمَ الّي بْسبابوم كيوقَع الفراق، والطبيعة القبيحة هي الّي كَتْـتحكّم فيهُم، وْما عندوم شي الروح القُدُس. وَلكن أنتُمَ، آ العزازين، بنيو حياتكُم على الإيمان ديالكُم المقدّس، وْصلّيو في الروح القُدُس. وْحافظو على راسكُم في محبّة اللّٰه وْتسنّاو الرحْمة د رَبّنا يَسوع المسيح الّي كتدّي نالحياة الأبديّة. وْحنّو على هَدوك الّي فيهُم الشكّ. نجّيو يَخرين وْخطفوهُم من النار. حنّو على يَخرين بالخوف، وْكرهو حتّى الحوايج الّي موسّخة في الجسد ديالوم. وْنالقادر باش يحفظكُم من الطيحة، ويوقّفكُم بلا عيب قدّام المجد ديالو فرحانين، نالإلَه الوحيد المُنجّي ديالنا، بـيَسوع المسيح رَبّنا، عندو المجد والجلالة والقدرة والسلْطة، دابا وْعلى الدوام دائ‍مًا! آمين. الرؤيا د يَسوع المسيح الّي عْطى لو اللّٰه باش يظهّر نالخدّامة ديالو الأُمور الّي غادي توقع في وقت قريب. صيفط يَسوع المسيح الملاك ديالو باش يبيّن الرؤيا نالعبد ديالو يوحَنّا، الّي شهد بْكلام اللّٰه وْبْشهادة يَسوع المسيح ملّي قال كُل شي الّي شاف. مبروك كُل واحد الّي كيقرا الكلام د هَد النبوّة، وْمبروكين الّي كيسمعوه وْكيحافظو على الحاجات الّي مكتوبة فيها، حيت الوقت قريب. أنا يوحَنّا كنكتب نالسبعة د الكنائس الّي في آسيا، النعْمة لكُم والسلام من اللّٰه، الّي كاين والّي كان والّي غادي يجي، وْمن الارْواح السبعة الّي قدّام العرش ديالو، وْمن يَسوع المسيح الشاهد الصادق، البِكر من بين الميّتين، الّي هُوَ الرئيس د ملوك الأرض. هُوَ عزّنا وْغسلنا من الدنوب ديالنا بْدمّو، وْجعلنا ملوك وْمسؤولين على العبادة ناللّٰه باباه. عندو المجد والقوّة على الدوام دائمًا، آمين. ها هُوَ ماجي مع السحاب، وْكُل عينينة غادي تشوفوْ وْحتّى هَدوك الّي طعنوه، وْغادي ينوّحو عليه القبايل د الأرض كاملين. نعم، هَيدا غادي يكون! آمين. "أنا هُوَ الألف والياء، البداية والنهاية،" كيقول الرَّبّ الإلَه، "الّي كاين والّي كان والّي غادي يجي، القادر على كُل شي." أنا يوحَنّا الأخ ديالكُم وْشريك معكُم في العداب وْفي المُلك والصبر د يَسوع. كُنْتْ في الجزيرة الّي مسمّية بَطْمُس بْسباب كلام اللّٰه وْشهادة يَسوع. كُنْتْ في روح اللّٰه في نهار الرَّبّ، وْسمعْتْ مورايَ واحد الصوت عظيم فحال واحد البوق، كيقول: "كْتب الّي كتشوف في واحد الكتاب وْصيفطوْ نالكنائس السبعة: أَفَسُس، وْسِميرْنا، وْبَرْغامُس، وْثياتيرا، وْسارْدِس، وْفيلادَلْفيا وْلاودِكيّة." وْدُرْتْ باش نشوف الصوت الّي تكلّم معيَ، وانا مدوّر شفْتْ سبعة د اللامْبات ديال الدهب، وْفوسط اللامْبات كان شي واحد كيشبه نِابن الإنسان لابس واحد الجلّابة طويلة وْمحزّم على صدرو بواحد الحزام د الدهَب. الراس والشعر ديالو بُيَط فحال الصوفة البيطة، وْفحال التلج، والعينين ديالو فحال اللهبة د العافية، والرِّجلين ديالو فحال النحاس الصافي المصْقول بالعافية، وْصوتو قوي فحال الصوت د الما د الشلّال. كان في يَدّو د الّيمين سبعة د النجوم، وْخرج من دُقمو واحد السيف ماضي من جوج د الجهات، والوجه ديالو فحال الشمس ملّي كتضوّي في قوّتاْ. ملّي شفْتوْ، طِحْتْ عند رِجلو فحال الميّت، وَلكن هُوَ نزّل يَدّو د الّيمين عليَّ وْقال لي: "ما تخاف شي. أنا هُوَ الُوّل والاخّري، وانا هُوَ الحي. كُنْتْ ميّت وْدابا أنا حي على الدوام دائمًا، وْعندي المفاتح د الموت والهاوية. كْتب الّي شفْتِه والّي كيوقع دابا والّي غادي يوقع من بعد. السرّ د النجوم السبعة، الّي شفْتِها في الّيمين ديالي واللامْبات السبعة د الدهَب، هُوَ هَدا: النجوم السبعة هُمَ الملائكة د الكنائس السبعة، واللامْبات السبعة الّي شفْتِ، هُمَ الكنائس السبعة. "كْتب نالملاك د الكنيسة في أَفَسُس: هَداك الّي عندو السبعة د النجوم في يَدّو د الّيمين، الّي كيتمشّى فوسط السبعة د اللامْبات د الدهب، كيقول هَد الشي: «أنا كنعرف الأعْمال والتعب والصبر ديالك، وْكنعرف بلّي ما تقدر شي تْتحمّل القباحين، وْجرّبْتِ هَدوك الّي كيقولو بلّي هُمَ رُسُل، وَلكن هُمَ ماشي رُسُل، وْجبرْتِهُم كدّابـين. عندك الصبر وْتعدّبْتِ بْسباب اِسمي وْما عيـيتِ شي. وَلكن عندي عليك بلّي سمحْتِ في المحبّة ديالك الُولى. وْعلى ديك الشي تفكّر ماين طِحْتِ وْتوب، وْرْجع تطبّق الأعْمال الُولى. وِادا ما تُبْتِ شي، غادي نجي نْعندك وْنحيّد اللامْبة ديالك من الموطَع ديالاْ. وَلكن الّي عندك مزيان هُوَ بلّي كَتْكرَه الأعْمال د النِقولاويّـين، الّي حتّى أنا كَنْكرهاْ. كُل واحد الّي عندو الودْنين، خصّوْ يسمع شنّو كيقول الروح نالكنائس. الّي غلب، غادي نعطيه ياكل من شجرة الحياة الّي موجودة في الجنّة د اللّٰه.» "وْكْتب نالملاك د الكنيسة في سِميرْنا: الُوّل والاخّري، الّي كان ميّت وْرجَع نالحياة، كيقول هَد الشي: «أنا كنعرف الضيق والفقر ديالك. وَلكن بالحقّ أنتينا غني! وْكنعرف كيفاش كيزبّلو فيك هَدوك الّي كيدّعيو على نَفسوم بلّي هُمَ يهود، وَلكن بالعكس، هُمَ بيت العبادة د الشيطان. عُمرك ما تخاف من ديك الشي الّي غادي تتعدّب بِه. ها إبْليس غادي يدخّل البعض منكُم نالحبس باش تتجرّبو، وْغادي يكون عندكُم الضيق في عشر أيّام. كون أمين حتّى نالموت وانا غادي نعطيك التاج د الحياة. كُل واحد الّي عندو الودْنين، خصّوْ يسمع شنّو كيقول الروح نالكنائس. الّي غلب، ما غادي شي يآديه الموت التاني.» "وْكْتب نالملاك د الكنيسة في بَرْغامُس: هَداك الّي عندو واحد السيف ماضي من جوج د الجهات كيقول هَد الشي: «أنا كنعرف فاين أنتينا ساكن، في الموطَع فاين كاين العرش د الشيطان! وَلكن أنتينا باقي تابت في اسمي وْما نكرْتِ شي إيمانك بيَّ، حتّى في الأيّام فاش اتّقتل عندكُم أَنْتيباس، الشاهد ديالي الصادق، فاين ساكن الشيطان. وَلكن عندي شويِّش عليك، حيت عندك تمّاك الّي مشبّرين بْتعْليم بَلْعام، الّي علّم بالاق يعتّر بَني إسْرائيل باش ياكلو الّي مدْبوح نالأصْنام ويزنيو. وْعندك عاود الّي مشبّرين بالتعْليم د النِقولاويّين. على ديك الشي توب. وَإلّا، أنا غادي نجي نْعندك دغيا باش نحاربوم بالسيف ديال دُقمي. كُل واحد الّي عندو الودْنين، خصّوْ يسمع شنّو كيقول الروح نالكنائس. الّي غلب، غادي نعطيه ياكل من المَنّ المخبّع، وْغادي نعطي لو واحد الحجْرة بيطة وْمكتوب عليها واحد الِاسم جديد الّي ما كيعرفوْ حتّى شي واحد، من غير هَداك الّي كيقبطاْ.» "وْكْتب نالملاك د الكنيسة في ثياتيرا: اِبن اللّٰه، الّي عندو العينين فحال اللهبة د العافية وْرِجلو فحال النحاس الصافي، كيقول هَد الشي: «أنا كنعرف الأعْمال والمحبّة والإيمان والخدْمة والصبر ديالك، وْكنعرف بلّي الأعْمال ديالك الاخّرية كتَر من الُولى. وَلكن عندي عليك بلّي كَتْـتحمّل ديك المراة إيزابيل، الّي كتقول على نفساْ بلّي هي نَبيّة، وَلكن كتعلّم وْكتغري العبيد ديالي باش يزنيو وياكلو الّي مدْبوح نالأصْنام. وْعْطيتْ لاْ الوقت باش تتوب من الزنا ديالاْ، وْما بغات شي تتوب. ها انا غادي نسيّباْ في الفراش، والّي كيزنيو معها غادي نعدّبوم بْضيق عظيم، إدا ما تابو شي من الفعايل ديالاْ. وْولاداْ غادي نجرحوم حتّى نالموت. وْهَيدا غادي يعرفو الكنائس كاملين بلّي أنا هُوَ الّي كَنْمْتَحن الأفْكار والقلوبة، وْغادي نعطي نْكُل واحد منكُم على حسب الأعْمال ديالو. وَلكن أنتُمَ والباقين الّي في ثياتيرا، وْكاملين الّي ما عندوم شي هَد التعْليم، وْما عرفو شي الّي كيعيّطو لو "أعْماق الشيطان،" كنقول لكُم بلّي ما غادي شي نْنزّل عليكُم شي تقَل يَخُر. وَلكن حافظو على الّي عندكُم حتّى نجي. كُل واحد الّي غلب وْحافظ على الأعْمال ديالي حتّى النهاية، غادي نعطي لو السلْطة على الأُمَم، وْغادي يرعاهُم بالعصا د الحديد، وْغادي يهرّسوم فحال القشوع د الطين، كيفْما عْطاني بابا هَد السلْطة. وْغادي نعطي لو النجْمة د الصباح. كُل واحد الّي عندو الودْنين، خصّوْ يسمع شنّو كيقول الروح نالكنائس.» "وْكْتب نالملاك د الكنيسة في سارْدِس: هَداك الّي عندو السبعة د الارْواح د اللّٰه والسبعة د النجوم كيقول هَد الشي: «أنا كنعرف الأعْمال ديالك. عندك الشهرة د شي واحد "حيّ،" وْفي الحقيقة أنتينا ميّت. ردّ البال وْقوّي ديك الشي الّي باقي ما مات شي، حيت ما جبرْتْ شي الأعْمال ديالك كاملة قدّام إلَهي. على ديك الشي تفكّر ديك الشي الّي قبلْتِه وْسمعْتِه، وْحافظ عليه وْتوب. حيت إدا ما سهرْتِ شي، غادي نجي لك فحال شي سارق، وْما غادي شي تعرف الساعة الّي فيها غادي نجي لك. وَلكن عندك بعض الناس في سارْدِس الّي ما وَسّخو شي الحوايج ديالوم. هَدوك غادي يتمشّاو معيَ بالحوايج البيطة، حيت هُمَ كيسْتاهلو. الّي غلب، هُوَ غادي يلبس الحوايج البيطة وْما غادي شي نمحي الِاسم ديالو من كتاب الحياة، وانا غادي نعْتَرف بِاسمو قدّام بابا وْقدّام الملائكة ديالو. كُل واحد الّي عندو الودْنين، خصّوْ يسمع شنّو كيقول الروح نالكنائس.» "وْكْتب نالملاك د الكنيسة في فيلادَلْفيا: القدّوس، الحقّ، الّي عندو المفْتاح د داوُد، الّي كيفتح وْحتّى واحد ما يقدر يشدّ، وْكيشدّ وْحتّى واحد ما يقدر يفتح، كيقول هَد الشي: «أنا كنعرف الأعْمال ديالك. ها انا فتحْتْ لك واحد الباب وْما يقدر حتّى واحد يشدّاْ، حيت واخّا عندك قوّة قليلة، حافظْتِ على الكلام ديالي وْما نكرْتِ شي اسمي. ها الّي غادي نعمل بْهَدوك الّي من بيت العبادة د الشيطان، الّي كيدّعيو على نَفسوم بلّي هُمَ يهود، وَلكن كيكدبو: ها انا غادي نجعلوم يجيو ويسجدو قدّام رِجلك ويعْتَرفو بلّي أنتينا عزيز عليَّ. حيت حافظْتِ على كلمة الصبر، حتّى أنا غادي نحافظ عليك من ساعة المِحنة الّي غادي تجي على الدنيا كاملة باش يتجرّبو الّي ساكنين على الأرض. ها انا ماجي دغيا. حافظ على الّي عندك باش ما يحيّد لك حتّى واحد التاج ديالك. الّي غلب، غادي نعملوْ ركيزة في بيت المَقْدس د إلَهي، وْما عُمرو غادي يخرج منّو. غادي نكتب عليه الِاسم د إلَهي وِاسم مدينة إلَهي، أُورُشَليم الجديدة النازلة من السما من عند إلَهي، وْغادي نكتب عليه اِسمي الجديد. كُل واحد الّي عندو الودْنين، خصّوْ يسمع شنّو كيقول الروح نالكنائس.» "وْكْتب نالملاك د الكنيسة في لاودِكيّة: الأمين، الشاهد الصادق والحقيقي، البداية د خليقة اللّٰه، كيقول هَد الشي: «أنا كنعرف الأعْمال ديالك، بلّي أنتينا ماشي بارد ولا سخون، وْمصاب تكون بارد أَوْلا سخون! وْحيت أنتينا دافي هَيداك، وْماشي بارد ولا سخون، أنا غادي نتقيّاك من دُقمي. حيت أنتينا كتقول: "أنا لا باس عليَّ وْتّغنيتْ وْما كيخصْني والو،" وْما كتعرف شي بلّي أنتينا زُغبي وْمسكين وْفقير وْعمى وْعريان. على هَد الشي كَنْنصحك تشري منّي الدهب المصفّي بالعافية باش ترجع غني، وْباش تشري الحوايج البيطة باش تلبساْ وْتستر الحشومة د العرا ديالك، وْتشري الدهْنة باش تدهن بِه العينين ديالك وْتشوف. أنا كنوبّخ وْكنعاقب كُل واحد الّي عزيز عليَّ. على ديك الشي كون مجْتَهد وْتوب. ها انا واقف على الباب وْكندقّ. إدا سمَع شي واحد الصوت ديالي وْفتَح الباب، غادي ندخل نْعندو وْغادي نتعشّى معاه وْهُوَ معيَ. الّي غلب، غادي نعطيه الحقّ باش يݣلس معيَ على العرش ديالي، فحال ما غلبْتْ أنا وْݣلسْتْ مع بابا على العرش ديالو. كُل واحد الّي عندو الودْنين، خصّوْ يسمع شنّو كيقول الروح نالكنائس.»" من بعد هَد الشي، شفْتْ في السما واحد الباب مفتوح، والصوت الُوّل الّي سمعْتوْ فحال البوق كيهدَر معيَ، وْقال لي: "طْلع نْهنايَ وْغادي نورّيك ديك الشي الّي لازم يوقع من بعد." في الحين كُنْتْ في روح اللّٰه، وْشفْتْ واحد العرش في السما وْشي واحد ݣالس على العرش. وْهَداك الّي كان ݣالس كيظهَر فحال الحجْرة د اليشب والعقيق، وْكان واحد قَوس قُزح داير بالعرش، كيظهَر فحال الزمرّد. وْكانو دايرين بالعرش أربعة وْعشرين عرش، وْݣالسين على العروش أربعة وْعشرين شيخ، لابسين الحوايج البيطة وْعلى راسوم تاج د الدهب. كيخرج من العرش البرق وْشي د الأصْوات والرعد، وْقدّام العرش كانو سبعة د اللامْبات د العافية مشْعولين، وْهُمَ الارْواح د اللّٰه السبعة. وْقدّام العرش كان فحال واحد البحَر د الجّاج، كيشبه نالبلّار، وْكان فوسط العرش وْدايرين بِه أربعة د المخْلوقات معمّرين بالعينين من القدّام وْمن اللَوري، المخْلوق الُوّل كيشبه نواحد السبَع، والمخْلوق التاني كيشبه نواحد العجل، والمخْلوق التالت عندو الوجَه فحال الوجَه د الإنسان، والمخْلوق الرابع كيشبه نواحد النسر طاير، وْكُل واحد من المخْلوقات عندو ستّة د الجّنْحين معمّرين بالعينين من الداخل وْبرّا. وْما وَقفو شي ليل وْنهار، كيقولو: "قدّوس، قدّوس، قدّوس، الرَّبّ الإلَه القادر على كُل شي، الّي كان والّي كاين والّي غادي يجي." وْملّي المخْلوقات كيعطيو المجد والكرامة والشكر نْهَداك الّي ݣالس على العرش، الحيّ على الدوام دائمًا، كيركعو الأربعة وْعشرين شيخ قدّام الّي ݣالس على العرش وْكيسجدو نالحيّ على الدوام دائمًا، وْكيسيّبو التيجان ديالوم قدّام العرش، وْكيقولو: "رَبّنا وْإلَهنا، أنتينا كتستحقّ باش تدّي كُل المجد والكرامة والقُدرة، حيت أنتينا خلقْتِ كُل شي وْبالإرادة ديالك كُل شي كان وْتّخلق." وْشفْتْ على الّيمين د هَداك الّي ݣالس على العرش واحد الكتاب مكتوب من الداخل وْعلى برّا، مطبوع بْسبعة د الطوابع. وْشفْتْ واحد الملاك قوي كيعيّط بْصوت عظيم: "شكون هُوَ الّي كَيْسْتحقّ باش يفتح الكتاب ويحلّ الطوابع ديالو؟" وْما قدر حتّى واحد في السما ولا على الأرض ولا تحت الأرض يفتح الكتاب ويشوف فيه. وْبكيتْ بزّاف، حيت ما جبرو حتّى واحد الّي مسْتحقّ باش يفتح الكتاب ولا يشوف فيه. وْقال لي واحد من الشيوخ: "ما تبكي شي، حيت السبَع الّي من القبيلة د يَهودا والجدر ديال داود، غلب باش يفتح الكتاب والسبعة د الطوابع ديالو." ديك الساعة، فوسط العرش وْفوسط الأربعة د المخْلوقات وْفوسط الشيوخ، شفْتْ واحد الخروف واقف، كيظهَر فحال إدا مدْبوح، عندو سبعة د القرون وْسبعة د العينين، وْهُمَ الارْواح د اللّٰه السبعة المرْسولين نالأرض كاملة. وْجا وْشبّر الكتاب من يَدّو د الّيمين د هَداك الّي ݣالس على العرش. وْملّي شبّر الكتاب، ركعو الأربعة د المخْلوقات والأربعة وْعشرين شيخ قدّام الخروف، وْكُل واحد عندو واحد الڭيتارة وْشي د الكيسان د الدهب معمّرين بالبخور، الّي هُمَ الصلاوات د القدّيسين. وْكانو كيهلّلو بْواحد الترْنيمة جديدة، كيقولو: "أنتينا مسْتحقّ تشبّر الكتاب وْتحلّ الطوابع ديالو، حيت اتّدبحْتِ وْفديتِ ناللّٰه بْدمّك الناس من كُل قبيلة وْلُغة وْشعب وأُمّة، وْجعلْتِ منّوم واحد الممْلكة وْمسْؤولين على العبادة نالإلَه ديالنا، وْغادي يحكمو على الأرض." وْمن بعد شفْتْ وْسمعْتْ الصوت د بزّاف د الملائكة دايرين بالعرش وْبالمخْلوقات وْبالشيوخ، وْكان العدد ديالوم عشرات الألوفات والملايين، وْهُمَ كيقولو بْصوت عظيم: "الخروف المدْبوح عندو الحقّ باش يدّي القُدرة والغِنى والحكْمة والقوّة والكرامة والمجد والتسْبيح." وْكُل خليقة الّي في السما وْعلى الأرض وْتحت الأرض وْفوق البحَر، وْكُل شي الّي كاين فيهُم، سمعْتوم كيقولو: "التسْبيح والكرامة والمجد والقوّة نِلّي ݣالس على العرش وْنالخروف على الدوام دائمًا." وْقالو المخْلوقات الأربعة: "آمين." والشيوخ ركعو وْسجدو لو. ديك الساعة شفْتْ بلّي الخروف حلّ واحد من الطوابع السبعة، وْسمعْتْ واحد من الأربعة د المخْلوقات كيهدَر وْصوتو فحال الصوت د الرعد: "آجي تشوف." وْشفْتْ وْظهَر واحد الخيل بيَط، وْهَداك الّي راكب عليه عندو واحد القَوس، وْتّعطى لو التاج، وْخرج غالب باش يزيد يغلب. وْملّي حلّ الخروف الطابع التاني، سمعْتْ المخْلوق التاني كيقول: "آجي تشوف." وْخرج واحد الخيل يَخُر حمَر، وْهَداك الّي راكب عليه اتّعطات لو القُدرة باش يزوّل السلام من الأرض وْباش يتقاتلو مع بعطوم، وْتّعطى لو واحد السيف كبير. وْملّي حلّ الخروف الطابع التالت، سمعْتْ المخْلوق التالت كيقول: "آجي تشوف." وْشفْتْ وْظهَر واحد الخيل كحَل، وْهَداك الّي راكب عليه عندو في يَدّو واحد الميزان. وْسمعْتْ واحد الصوت فوسط المخْلوقات الأربعة كيقول: "كيلو د الزرع بْدينار، وْتلاتة د الكيلو د الشعير بْدينار، وَلكن الزيت والخمر ما تآديهُم شي." ملّي حلّ الخروف الطابع الرابع، سمعْتْ المخْلوق الرابع كيقول: "آجي تشوف." وْشفْتْ وْظهَر واحد الخيل خضَر مفتوح، وْهَداك الّي راكب عليه كيتسمّى الموت، وْكانت الهاوية تابعاه، وْتّعطات لو القُدرة على الربَع د الأرض باش يقتل بالسيف وْبالجّوع وْبالموت وْبالوحوش د الأرض. وْملّي حلّ الخروف الطابع الخامس، شفْتْ تحت المَدْبح شي د الناس مدْبوحين بْسباب كلمة اللّٰه، وْبْسباب الشهادة ديالوم. وْغوّتو بْصوت عظيم كيقولو: "آ السيّد القدّوس والحقّ، حتّى لاين ما تحكم شي على الّي ساكنين على الأرض وْتنْتَقم مِنّوم نالدم ديالنا؟" وْتّعطات نْكُل واحد مِنّوم حوايج بيطة، وْتّقالّوم بلّي يرْتاحو شويّا حتّى يتكمّل العدد د العبيد الرُّفَقاء والخوت ديالوم الّي غادي يتعدّبو فحالوم حتّى نالموت. وْشفْتْ ملّي حلّ الخروف الطابع السادس، وْوقَع واحد الزنْزال عظيم، والشمس رجعَتْ كحلة فحال إدا كانت لابسة التوب د النواح، والقمر كامل رجَع فحال الدم، والنجوم د السما طاحو على الأرض، فحال ما كتطيّح الشجرة د الكرْموس الغلّة ديالاْ ملّي كيزعْزعاْ الريح القوي. والسما تحيّدَتْ فحال شي كاغط ملوّي، والجّبولة والجُزُر كاملين تحرّكو من الموطَع ديالوم. وْملوك الأرض والعُظَماء والقُيّاد والأَغْنياء والقويّـين وْكُل عبد وْكُل حُرّ، خبّعو راسوم في الغيران وْفي الصخور د الجّبولة، وْهُمَ كيقولو نالجّبولة والصخور: "طيحو علينا وْخبّعونا من الوجَه د هَداك الّي ݣالس على العرش وْمن الغضب د الخروف، حيت جا النهار د الغضب ديالو العظيم، وْشكون يقدر يبقا واقف؟" وْشفْتْ من بعد هَد الشي أربعة د الملائكة واقفين على أربعة د الركاني د الأرض، محاصرين الرّياح الأربعة د الأرض باش ما يسوط حتّى شي ريح على الأرض ولا على البحَر ولا على الشجار. وْشفْتْ واحد الملاك يَخُر طالع من الشرق وْعندو الطابع د اللّٰه الحيّ، وْعَيّط بْصوت عظيم نالملائكة الأربعة الّي اتّعطات لوم القُدرة باش يضرّو الأرض والبحَر، وْقالّوم: "ما تضرّو شي الأرض ولا البحَر ولا الشجار حتّى نطبعو الخدّامة د إلَهنا على الجبْهة ديالوم." وْسمعْتْ بلّي عدد المطْبوعين هُوَ مية وأربعة وأربعين ألف من كُل القبايل د بَني إسْرائيل. من قبيلة يَهودا طبعو طناشر ألف، وْمن قبيلة رَأُوبين طناشر ألف، وْمن قبيلة جاد طناشر ألف، وْمن قبيلة أَشير طناشر ألف، وْمن قبيلة نَفْتالي طناشر ألف، وْمن قبيلة مَنَسّى طناشر ألف، وْمن قبيلة شِمْعون طناشر ألف، وْمن قبيلة لاوي طناشر ألف، وْمن قبيلة يَسّاكَر طناشر ألف، وْمن قبيلة زَبولون طناشر ألف، وْمن قبيلة يوسف طناشر ألف، وْمن قبيلة بِنْيامين طناشر ألف. وْمن بعد هَد الشي، شفْتْ وْظهَر جمْهور عظيم بلا حساب من الأُمَم والقبايل والشعوب واللُغات كاملين، واقفين قدّام العرش وْقدّام الخروف، لابسين حوايج بيطة وْمشبّرين في يَدّوم الجريد د النخَل، وْهُمَ كيغوّتو بْصوت عظيم، وْكيقولو: "النجا من عند إلَهنا الّي ݣالس على العرش وْمن عند الخروف." والملائكة كاملين كانو واقفين دايرين بالعرش وْبالشيوخ وْبالمخْلوقات الأربعة، وْركعو قدّام العرش على وَجهوم وْسجدو ناللّٰه، كيقولو: "آمين! نالإلَه ديالنا البركة والمجد والحكْمة والشكر والكرامة والقُدرة والقوّة على الدوام دائمًا. آمين!" ديك الساعة سقصاني واحد من الشيوخ: "شكون هُمَ هَدو الّي لابسين الحوايج البيطة، وْماين جاو؟" وْجاوبْتوْ: "أنتينا كتعرف، آ سيدي." وْقال لي: "هَدو هُمَ الّي جاو من الضيق العظيم وْغسلو الحوايج ديالوم وْبيّطوها بْدم الخروف. على ديك الشي هُمَ قدّام عرش اللّٰه وْكيعبدوه ليل وْنهار في بيت المَقْدس ديالو. وْهَداك الّي ݣالس على العرش غادي ينشر الخَيمة ديالو فوق مِنّوم. وْما غادي شي يجوعو ولا يعطشو، وْما غادي شي تضربوم لا شمس ولا سَهد، حيت الخروف الّي فوسط العرش كيرعاهُم وْغادي يݣوّدوم نالعيون د الما الحيّ، واللّٰه غادي يمسح كُل دمْعة من العينين ديالوم." وْملّي حلّ الخروف الطابع السابع، وقَع السكات في السما تقْريبًا نصّ ساعة. وْشفْتْ الملائكة السبعة الّي واقفين قدّام اللّٰه، وْتّعطات لوم سبعة د البواق. وْمن بعد جا واحد الملاك يَخُر عندو مجْمر د الدهب وْوقَف عند المَدْبح، وْتّعطى لو بزّاف د البخور باش يقدّم الصلاوات د القدّيسين كاملين على المَدْبح د الدهب الّي قدّام العرش. وْطلع من يد الملاك الدُّخّان د البخور، مع صلاوات القدّيسين، قدّام اللّٰه. وْمن بعد، شبّر الملاك المجْمر وْعمّروْ بالعافية د المَدْبح وْسيّباْ على الأرض، وْوقَع الرعد والصداع والبرق وْواحد الزنْزال. ديك الساعة الملائكة السبعة، الّي عندوم السبعة د البواق، وجّدو نَفسوم باش ينفخو فيهُم. وْنفَخ الملاك الُوّل في البوق، وْتسيّب على الأرض التبْروري والعافية مخلّطين بالدم، وْتّحرق تُلت الأرض وْتُلت الشجار والربيع الخضَر كامل. وْنفَخ الملاك التاني في البوق، وْتسيّبَتْ في البحَر شي حاجة فحال واحد الجّبل عظيم، مشعول بالعافية، وْرجَع تُلت البحَر دم، وْماتو تُلت المخْلوقات الّي عايشة في البحَر، وْتّهلكو تُلت السُّفُن. وْنفَخ الملاك التالت في البوق، وْطاحت من السما واحد النجمة عظيمة مشْعولة، فحال واحد اللامْبة، وْطاحت على تُلت الويدان وْعلى العيون د الما. النجْمة مسمّية "العَلْقَم،" وْرجَع التُّلت د الما فحال العلْقم، وْماتو بزّاف د الناس بْسباب الما، حيت رجَع مرّ. وْنفَخ الملاك الرابع في البوق، وْتّضرب التُّلت د الشمس وْتُلت القمر وْتُلت النجوم، حتّى تظلّم التُّلت ديالوم. هَيدا بقا مسلّس تُلت النهار وْتُلت الليل. وْشفْتْ وْسمعْتْ واحد النسر طاير فوسط السما، كيقول بْصوت عظيم: "الويل، الويل، الويل نِلّي ساكنين على الأرض ملّي اتّسمع الصوت د البواق، الّي غادي ينفخو فيهُم الملائكة التلاتة الباقين!" وْنفَخ الملاك الخامس في البوق، وْشفْتْ واحد النجْمة الّي طاحت من السما على الأرض، وْتّعطى لو المفْتاح د بير الهاوية، وْفتَح بير الهاوية وْطلَع منّو الدُّخّان فحال الدُّخّان د واحد الفرّان عظيم، وْتسلّسَت الشمس والهوا بْسباب هَد الدُّخّان. وْخرج من الدُّخّان جراد على الأرض، وْتّعطات لوم القُدرة فحال القُدرة ديال العقارب د الأرض. وْتّقالّوم بلّي ما يضرّو شي العشب د الأرض ولا حتّى شي حاجة خضْرة ولا حتّى شي شجرة، من غير الناس الّي ما عندوم شي الطابع د اللّٰه على جبْهاتوم. وْما اتّعطى لوم شي الإدن باش يقتلوهُم، وَلكن غير باش يعدّبوهُم في مُدّة خمس شهور، والعداب ديالوم كان فحال عداب اللسْعة د العقرب. وْفي ديك الأيّام، غادي يبقّشو الناس على الموت وْما غادي شي يجبروها، وْغادي يتشهّاو يموتو، وَلكن الموت غادي تهرب مِنّوم. المظْهر د الجراد كان كيشبه نْشي خيولة موجّدين نالحرب، وْعلى راسوم التيجان من الدهب، وْوُجوهوم فحال وجوه البشر، وْعندوم الشعر فحال شعر النسا، وْسنانوم فحال سنان السبوعة، وْعندوم الصدريّات فحال الصدريّات د الحديد، والصوت د الجنحين ديالوم فحال الصداع د بزّاف د الكرارس د الخيولة كيجرّيو نالحرب. وْعندوم الزنّيطة والشوكة فحال العقارب، وْفي الزنّيطة ديالوم كانت عندوم القُدرة باش يعدّبو الناس في مُدّة خمس شهور، والمَلِك ديالوم هُوَ ملاك الهاوية، الّي مسمّي بالعبرانيّة "أَبَدّون" وْباليونانيّة "أبولّيّون." الويل الُوّل فات، وَلكن باقي ماجّين جوج د الويلات يَخرين. وْنفَخ الملاك السادس في البوق، وْسمعْتْ واحد الصوت من القرون الأربعة د المَدْبح د الدهب الّي قدّام اللّٰه، كيقول نالملاك السادس الّي عندو البوق: "طْلق الملائكة الأربعة المرْبوطين حدا الواد الكبير الفُرات." وْتّطلقو الملائكة الأربعة الّي كانو موجّدين نْديك الساعة والنهار والشهر والعام باش يقتلو تُلت الناس. وْسمعْتْ بلّي العدد د الجيش ديالوم كان ميتَين مليون فارس. هَيدا شفْتْ في الرؤيا الخيولة، وهَدوك الّي راكبين عليهُم عندوم صدريّات باللون حمَر فحال العافية، وْزرَق فحال السفير، وْصفَر فحال الكبْريت، وْكانو الريوس د الخيولة فحال الريوس د السبوعة، وْمن الدقوم ديالوم خارجة العافية والدُّخّان والكبْريت. وْماتو تُلت الناس بْهَد المصايب التلاتة، العافية والدُّخّان والكبْريت الّي خرجو من الدقوم ديالوم. حيت كانت القُدرة د الخيولة في الدقوم والزنّيطة ديالوم، حيت الزنّيطة ديالوم كانت فحال الحياي، وْعنداْ الريوس باش تضرّ بِها. وَلكن الناس الّي ما ماتو شي بْهَد المصايب ما تابو شي من الفعايل د اليَدّين ديالوم، وْبقاو كيعبدو الشياطين والأصْنام د الدهب والنقْرة والنحاس والحجار والخشب، الّي ما كيقدرو شي لا يشوفو ولا يسمعو ولا يمشيو. وْما تابو شي من القتل ولا من السحر ولا من الزنا ولا من السرْقة ديالوم. وْمن بعد شفْتْ واحد الملاك يَخُر قوي نازل من السما، لابس سحابة وْعلى راسو قَوس قُزح، وْوَجهو كان فحال الشمس وْرِجلو فحال السواري د العافية، وْعندو في يَدّو واحد الكتاب صغير مفتوح، وْعمل رِجلو د الّيمين على البحَر وْد الشمال على الأرض، وْغوّت بْصوت عظيم فحال الزئير د السبع، وْملّي غوّت، الرعود السبعة علّاو صوتوم. وْملّي الرعود السبعة علّاو صوتوم، كُنْتْ علاين نكتب، وَلكن سمعْتْ واحد الصوت من السما كيقول لي: "خلّي سِرّي ديك الشي الّي قالو الرعود السبعة وْما تكتبوْ شي." والملاك الّي شفْتْ واقف على البحَر والأرض هزّ يَدّو د الّيمين نالسما، وْحلف بْهَداك الّي حيّ على الدوام دائمًا، الّي خلق السما والأرض والبحَر وْكُل شي الّي فيهُم، وْقال: "الوقت ما غادي شي يبقا كيتأجّل! بالعكس، في أيّام الصوت د الملاك السابع، ملّي غادي ينفخ في البوق، غادي يتكمّل السرّ د اللّٰه فحال ما بشّرو بِه عبيدو الأَنْبياء." والصوت الّي سمعْتوْ من السما هدَر معيَ عاود، وْقال: "مْشي وْشبّر الكتاب الصغير المفتوح في يد الملاك الّي واقف على البحَر وْعلى الأرض." وْمشيتْ نْعند الملاك وْقُلْتْ لو: "عْطيني الكتاب الصغير." وْقال لي: "شبّروْ وْكولوْ. غادي يردّ الجوف ديالك مرّ، وَلكن غادي يكون حلو في دُقمك فحال العسل." وْشبّرْتْ الكتاب الصغير من يد الملاك وْكليتوْ، وْجاني حلو في دُقمي فحال العسل، وَلكن من بعدما كليتوْ، رجَع الجوف ديالي مرّ. وْقالو لي: "خصّك تتنبّأ عاود على بزّاف د الشعوب والأُمَم واللسونة والملوك." وْتّعطات لي واحد القصبة فحال شي عصا د العبار، وْتّقال لي: "نوض وْعبّر بيت المَقْدس د اللّٰه والمَدْبح، وْحْسب شحال كيعبدو فيه. وَلكن الساحة الّي على برّا د بيت المَقْدس، خلّيها وْما تعبّراْ شي، حيت اتّعطات نالأُمَم، وْهُمَ غادي يسطمو على المدينة المقدّسة في مُدّة اتنَين وأربعين شهر. وْغادي نعطي السلْطة نْجوج د الشهود ديالي لابسين توب النواح، وْهُمَ غادي يتنبّأو في مُدّة ألف وْميتَين وْستّين يوم." هَد الشهود هُمَ جوج د الشجار د الزيتون وْجوج د اللامْبات الّي واقفين قدّام رَبّ الأرض. وِادا شي واحد بغى يضرّوم، غادي تخرج العافية من دُقموم وْغادي تاكل العدْيان ديالوم. وْبْهَد الطريقة خصّوْ يموت أَي واحد الّي بغى يضرّوم. هَدو عندوم القُدرة باش يشدّو السما وْما تنزل شي الشتا في أيّام النبوّة ديالوم، وْعندوم القُدرة على الما باش يردّوه دم، وْباش يضربو الأرض بْكُل ضربة شحال ما بغاو. ملّي يكمّلو الشهادة ديالوم، الوحش الّي طالع من الهاوية غادي يحاربوم ويغلبوم وْغادي يقتلوم. وْغادي تبقا الجتّات ديالوم منْشورة في الساحة د المدينة العظيمة، الّي مسمّية بالمعْنى الروحي سَدوم وْمصر، فاين تصْلب رَبّوم بْنفسو. والناس من كُل شعب وْقبيلة وْلُغة وأُمّة غادي يشوفو الجتّات ديالوم في مُدّة تلت أيّام وْنُص، وْما غادي يسمحو نْحتّى شي واحد يدفنوم. وْسكّان الأرض غادي يتشفّاو فيهُم ويحْتَفلو ويتبادلو الهديّات بيناتوم، حيت هد جوج د الأَنْبياء كانو كيعدّبو سُكّان الأرض. من بعد تلت أيّام وْنُصّ، دخلَتْ فيهُم روح الحياة من اللّٰه وْوَقفو على رِجلوم، وْنزل خوف عظيم على الّي كانو كيشوفوهُم. وْسمعو واحد الصوت عظيم من السما الّي قالّوم: "طلعو نْهنايَ." وْطلعو نالسما في السحابة وْشافوهُم العدْيان ديالوم. في ديك الساعة وقَع واحد الزنْزال عظيم، وْتهدّم العُشر د المدينة، وْماتو بالزنْزال سبعة آلاف من الناس، وْخافو الباقين وْعْطاو المجد نالإلَه د السما. الويل التاني فات، وْها الويل التالت ماجي دغيا. وْنفَخ الملاك السابع في البوق، وْكانت شي د الأصْوات عظيمة في السما، كتقول: "رجعَتْ ممْلكة العالم ديال رَبّنا والمسيح ديالو، وْهُوَ غادي يملك على الدوام دائمًا." والأربعة وْعشرين شيخ، الّي ݣالسين قدّام اللّٰه على العروش ديالوم، ركعو على وَجْهوم وْسجدو ناللّٰه، كيقولو: "كنشكروك، يا رَبّ الإلَه القادر على كُل شي، الّي كاين والّي كان، حيت ادّيتِ القوّة العظيمة ديالك وْبديتِ كتملك. وْغضبَت الأُمَم، وَلكن جا الغضب ديالك والوقت باش يتحكّمو الميّتين، ويتجزّاو العبيد ديالك الأَنْبياء والقدّيسين والّي كيخافو اِسمك، صغارين وْكبارين، وْباش يتّهلكو الّي كيهلكو الأرض." وْتّفتح بيت المَقْدس د اللّٰه في السما، وْظهَر التابوت د العهد ديالو في بيت المَقْدس، وْوقَع البرق والصداع والرعد وْواحد الزنْزال، وْطاح تبْروري عظيم. وْظهرَتْ واحد العلامة عجيبة في السما، واحد المراة لابسة الشمس، وْكان القمر تحت رِجلاْ، وْعلى الراس ديالاْ واحد التاج د طناشر نجْمة. كانت حُبلى وْكتغوّت من الحريق د الولادة وْكَتْـتعصّر باش تولد. وْظهرَتْ واحد العلامة يَخرى في السما، واحد التنّين عظيم حمَر، الّي عندو سبعة د الريوس وْعشرة د القرون وْسبعة د التيجان على الريوس. جرّ تُلت النجوم د السما بالزنّيطة ديالو وْسيّباْ على الأرض. وْوقَف التنّين قدّام المراة الّي كانت غادي تولد، باش ياكل ولداْ ملّي تولدوْ. ولدَت المراة واحد الولد دكر، الّي غادي يرعا الأُمَم كاملين بالعصا د الحديد، وْتّخطف ولداْ نْعند اللّٰه وْنالعرش ديالو. وْهربَت المراة نالخلا، نالموطَع الّي وجّدوْ اللّٰه لِلاْ باش يتهلّاو فيها في مُدّة ألف وْميتَين وْستّين يوم. وْوقعَتْ واحد الحرب في السما. ميخائيل والملائكة ديالو حاربو ضدّ التنّين، وْحارب التنّين والملائكة ديالو، وْما قدرو شي يغلبو، وْما جبرو حتّى شي موطَع لِلوم في السما. وْتسيّب على الأرض التنّين العظيم، الحيّة القديمة، الّي مسمّية إبْليس والشيطان، الّي كيغشّ العالم كامل، وْتسيّبو الملائكة ديالو معاه. ديك الساعة سمعْتْ واحد الصوت عظيم في السما، كيقول: "دابا جا النجا والقوّة والمُلك د إلَهنا، والسلْطة د المسيح ديالو، حيت تسيّب هَداك الّي كيشكي بالخوت ديالنا، الّي كان كيشكي بِهُم قدّام إلَهنا ليل وْنهار. وْهُمَ غلبوه بْدم الخروف وْبْكلمة الشهادة ديالوم، وْسخاو بْحياتوم حتّى نالموت. على هَد الشي، فرحو، آ السماوات، والّي ساكنين فيها. الويل نْسُكّان الأرض والبحَر! حيت إبْليس نزل بْغضب عظيم نْعندكُم وْعارف بلّي الوقت ديالو قليل." وْملّي شاف التنّين بلّي تسيّب على الأرض، تعدّى على المراة الّي ولدَت الولد الدكر. وْتّعطاو نالمراة الجنحين د النسر العظيم باش تطير بِهُم نالخلا من وجَه الحيّة، نالموطَع ديالاْ فاين غادي يتهلّاو فيها وقت وْوقتَين وْنُصّ وقت. وْبزقَت الحيّة من الدقوم ديالاْ الما فحال الواد مورا المراة باش يجرّاْ. والأرض عاونَت المراة وْفتحَت الدقوم ديالاْ وْبلعَت الواد الّي سيّبوْ التنّين من دُقمو. وْغضب التنّين على المراة وْمشى كيحارب هَدوك الّي بقاو من الدرّيّة ديالاْ، الّي كيطيعو وَصايا اللّٰه وْكيحافظو على الشهادة د يَسوع. وْوقَف التنّين على الرمل د البحَر. وْشفْتْ واحد الوحش طالع من البحَر، الّي عندو سبعة د الريوس وْعشرة د القرون وْعشرة د التيجان على القرون، وْعلى الريوس ديالو أسْماء د الكُفر. وْهَد الوحش الّي شفْتوْ كان كيشبه نالنمر، وْرِجلو فحال الرِّجلين د الدبّ، وْدُقمو فحال دقوم السبع، وْعْطى لو التنّين القوّة والعرش ديالو وْسُلطة عظيمة. وْكانت في واحد من الريوس د الوحش واحد الجرْحة فحال إدا كانت حتّى نالموت. والجرْحة ديالو برات، وْتعجّبَتْ الدنيا كاملة وْتبعَت الوحش، وْسجدَتْ نالتنّين الّي عْطى القوّة نالوحش، وْسجدَت نالوحش، كيقولو: "شكون كاين فحال الوحش؟ وْشكون الّي يقدر يحارب ضدّو؟" وْتّعطى لو واحد الدقوم الّي كيتكلّم بأُمور عظيمة وْبالكُفر. وْتّعطات لو السلْطة باش يخدم في مُدّة اتنَين وأربعين شهر. وْفتَح الدقوم ديالو باش يكفر باللّٰه وْبِاسمو، وْبالسُّكنى ديالو، وْبْهَدوك الّي ساكنين في السما. وْتّعطى لو الإدن باش يحارب ضدّ القدّيسين ويغلبوم، وْتّعطات لو السلْطة على كُل قبيلة وْشعب وْلُغة وأُمّة. وْغادي يسجدو نالوحش سُكّان الأرض كاملين الّي ماشي مكْتوبين الأسْماء ديالوم في كتاب الحياة د الخروف الّي اتّدبح من بداية العالم. كُل واحد الّي عندو الودْنين، خصّوْ يسمع. "إدا كان شي واحد مكتوب عليه السبي، نالسبي غادي يمشي. وِادا كان شي واحد مكتوب عليه القتل بالسيف، بالسيف غادي يتّقتل." راه هَدا هُوَ الصبر والإيمان د القدّيسين. من بعد شفْتْ واحد الوحش يَخُر طالع من الأرض، الّي عندو جوج د القرون فحال قرون الحَولي، وَلكن كيهدَر فحال التنّين. وْكيخدّم السلْطة كاملة د الوحش الُوّل قدّامو، وْكيعمل باش الأرض كاملة والسكّان ديالاْ يسجدو نالوحش الُوّل، الّي تشافى من الجرْحة ديالو الّي كانت د الموت. وْكيعمل حتّى هُوَ شي د العلامات عظيمة، كيعمل حتّى العافية الّي كتنزل من السما على الأرض قدّام الناس. وْغشّ سكّان الأرض بْهَد العلامات الّي اتّعطات لو باش يعملاْ قدّام الوحش الُوّل. وْكيآمر سُكّان الأرض باش يعملو واحد التمْتال نالوحش، الّي من بعدما تجرح بالسيف، عاش. وْتّعطى لو القُدرة باش ينفخ الروح في التمْتال د الوحش باش يتكلّم ويآمر بالقتل د الناس كاملين الّي ما كيسجدو شي نالتمْتال. وْجعل الناس كاملين، الصغارين والكبارين، الأَغْنياء والفُقراء، الحُرّين والعبيد، يطبعو لوم واحد العلامة في يَدّوم د الّيمين أَوْلا على الجبْهة ديالوم، باش ما يقدر حتّى شي واحد يشري ولا يـبيع، من غير الّي عندو العلامة د الوحش، يعني، الِاسم ديالو أَوْلا الرقم ديال اِسمو. ها هي الحكْمة: كُل واحد الّي عندو العقل خصّوْ يحسب رقم الوحش، حيت هُوَ رقم الإنسان، والرقم ديالو ستّ مية وْستّة وْستّين. من بعد شفْتْ الخروف واقف على جبل صِهْيون، وْمعاه مية وأربعة وأربعين ألف الّي عندوم اِسمو والِاسم د باباه مكتوب على الجبْهة ديالوم. وْسمعْتْ واحد الصوت من السما فحال الصوت د بزّاف د الما، وْفحال الرعد القوي، وْهَد الصوت كيشبه نالصوت د الموسيقيّين الّي كيعزفو على الڭيتارات ديالوم. وْهُمَ كانو كيرنّمو ترْنيمة جديدة قدّام العرش وْقدّام المخْلوقات الأربعة وْقدّام الشيوخ، وْما يقدر حتّى شي واحد يتعلّم الترْنيمة من غير ديك المية وأربعة وأربعين ألف الّي اتّفداو من الأرض. هَدو هُمَ الّي ما توسّخو شي بالنسا، حيت هُمَ عزارة. هَدو هُمَ الّي كيتبعو الخروف فاين ما مشى. هَدو اتّفداو من بين الناس فحال الغلّة الُولى ناللّٰه وْنالخروف، وْما جبرو شي في الدقوم ديالوم حتّى شي كدْبة، حيت هُمَ بلا عيب. من بعد شفْتْ واحد الملاك يَخُر كيطير فوسط السما، الّي عندو الإنجيل الأبدي باش يبشّر بِه سُكّان الأرض وْكُل أُمّة وْقبيلة وْلُغة وْشعب، كيقول بْصوت عظيم: "خافو اللّٰه وْمجّدوه، حيت جات الساعة د الحُكم ديالو، وْسجدو نِلّي خلق السما والأرض والبحَر والعيون د الما." وْتبعوْ واحد الملاك تاني، كيقول: "طاحت! طاحت بابل المدينة العظيمة، حيت شرّبَتْ الأُمَم كاملين من خمر الغضب د الزنا ديالاْ." ديك الساعة تبعوم واحد الملاك تالت، كيقول بْصوت عظيم: "إدا شي واحد سجد نالوحش وْنالتمْتال ديالو، وْقبل الطابع ديالو على الجبْهة ديالو أَوْلا على يَدّو، حتّى هُوَ غادي يشرب من خمر الغضب د اللّٰه المكْبوب بلا تخْليط في كاس الغضب ديالو، وْغادي يتعدّب بالعافية والكبْريت قدّام الملائكة القدّيسين وْقدّام الخروف. وْدُخّان العداب ديالوم كيطلع على الدوام دائمًا. وْهَدوك الّي كيسجدو نالوحش وْنالتمْتال ديالو، والّي كيقبل الطابع د اِسمو، ما عندوم شي الراحة، لا في الليل ولا في النهار." راه هَدا هُوَ الصبر د القدّيسين الّي كيحافظو على وَصايا اللّٰه والإيمان بيَسوع. وْسمعْتْ واحد الصوت من السما كيقول لي: "كْتب: «مبروك الميّتين الّي كيموتو من دابا نْفوق في الرَّبّ.»" "فعلًا" كيقول الروح، "غادي يرْتاحو من التعب ديالوم، حيت الأعْمال ديالوم كَتْـتبعوم." وْشفْتْ وْظهرَتْ لي واحد السحابة بيطة، وْݣالس عليها شي واحد الّي كيشبه نِابن الإنسان، وْعندو على الراس ديالو التاج د الدهب وْفي يَدّو واحد المنْجل ماضي. ديك الساعة خرج واحد الملاك يَخُر من بيت المَقْدس، كيعيّط بْصوت عظيم نِلّي ݣالس على السحابة: "قرّب المنْجل ديالك وْحصد، حيت جات الساعة د الحصاد، وْحصاد الأرض نضج." وْهَداك الّي ݣالس على السحابة مدّ المنْجل ديالو على الأرض وْتّحصدَت الأرض. وْخرج واحد الملاك يَخُر من بيت المَقْدس الّي في السما، وْحتّى هُوَ عندو واحد المنْجل ماضي. وْخرج واحد الملاك يَخُر من المَدْبح، الّي عندو القُدرة على العافية، وْعَيّط بْصوت عظيم نِلّي عندو المنْجل الماضي، كيقول: "قرّب المنْجل ديالك الماضي وْجني عناقد الدالية د الأرض، حيت العنب ديالاْ طايب." وْقرّب الملاك المنْجل ديالو على الأرض وْجنى عناقد الدالية د الأرض، وْسيّب العنب في المعْصرة العظيمة د غضب اللّٰه. وْتّسطمَت المعْصرة على برّا د المدينة، وْخرج من المعْصرة الدم حتّى وصَل نالشكيمة د الخيولة، بْمسافة تلت مية كيلومتر. وْشفْتْ واحد العلامة يَخرى في السما، عظيمة وْعجيبة، سبعة د الملائكة عندوم سبعة د المصايب الاخْرانيّين، حيت بِهُم غادي يتكمّل غضب اللّٰه. وْشفْتْ فحال واحد البحَر من الجّاج مخلّط بالعافية، وْهَدوك الّي غلبو على الوحش وْعلى التمْتال ديالو وْعلى الرقم ديال اِسمو كانو واقفين على البحَر د الجّاج وْعندوم الڭيتارات د اللّٰه. وْكانو كيرنّمو ترْنيمة موسى عبد اللّٰه، وْترْنيمة الخروف، كيقولو: "عظيمة وْعجيبة أعْمالك، يا رَبّ، الإلَه القادر على كُل شي. عادلة وْحقيقيّة هي الطرْقان ديالك، آ المَلِك د الأُمَم. شكون الّي ما غادي شي يخاف منّك، يا رَبّ، وْما غادي شي ي‍مجّد اِسمك؟ حيت أنتينا بوحدك قُدّوس. الأُمَم كاملين غادي يجيو ويسجدو لك، حيت ظهرَت الأحْكام ديالك العادلة." من بعد هَد الشي، شفْتْ في السما وْتّفتح بيت المَقْدس ديال خيمة الشهادة، وْخرجو من بيت المَقْدس الملائكة السبعة الّي عندوم المصايب السبعة، وْهُمَ لابسين كتّان نقي كيبرق وْمحزّمين على صدوروم بالسمْطات د الدهب. وْواحد من المخْلوقات الأربعة عْطى نالملائكة السبعة سبعة د الكيسان من الدهب معمّرة بْغضب اللّٰه الحيّ على الدوام دائمًا. وْتعمّر بيت المَقْدس بالدُّخّان من مجد اللّٰه وْمن القُدرة ديالو، وْما قدر يدخل حتّى شي واحد نْبيت المَقْدس حتّى يتكمّلو المصايب السبعة الّي عند الملائكة السبعة. وْسمعْتْ واحد الصوت عظيم من بيت المَقْدس كيقول نالملائكة السبعة: "مْشيو وْكبّو على الأرض السبعة د الكيسان د غضب اللّٰه." وْمشى الملاك الُوّل وْكبّ الكاس ديالو على الأرض، وْجات واحد القرْحة خايبة وْكريهة على هَدوك الّي عندوم طابع الوحش والّي كيسجدو نالتمْتال ديالو. وْكبّ الملاك التاني الكاس ديالو على البحَر، وْرجَع دم فحال دم الميّت، وْماتت كُل نفس حيّة في البحَر. وْكبّ الملاك التالت الكاس ديالو على الويدان وْعلى العيون د الما، وْرجعو دم. وْسمعْتْ الملاك د الميمان كيقول: "أنتينا عادل، آ القُدّوس، الّي كاين والّي كان، حيت حكمْتِ هَيداك، حيت هُمَ سيّلو الدم د القدّيسين وْد الأَنْبياء، وانتينا عْطيتِهُم الدم باش يشربوه، حيت كيسْتاهلوه." وْسمعْتْ المَدْبح كيقول: "د بالصّحّ، يا رَبّ، الإلَه القادر على كُل شي، الأحْكام ديالك هُمَ حقيقيّـين وْعادلين." وْكبّ الملاك الرابع الكاس ديالو على الشمس، وْتّعطات لاْ القوّة باش تحرق الناس بالعافية. وْحرقَت الناس بْحرارة قويّة. واخّا هَيدا، لعنو اِسم اللّٰه، الّي عندو القُدرة على هَد المصايب، وْما تابو شي باش يمجّدوه. وْكبّ الملاك الخامس الكاس ديالو على عرش الوحش، وْتغطّات الممْلكة ديالو بالظلام، والناس كانو كيعطّو اللسونة ديالوم من الوجاع، وْكفرو بإلَه السما بْسباب الوجاع والقروح ديالوم، وْما تابو شي من الفعايل ديالوم. وْكبّ الملاك السادس الكاس ديالو على واد الفُرات الكبير، وْنشف الما ديالو باش تكون الطريق موجّدة نالملوك الّي ماجّين من الشرق. وْشفْتْ تلاتة د الارْواح منْݣوسين الّي كيشبهو بالڭرانات خارجين من دقوم التنّين وْمن دقوم الوحش وْمن دقوم النَّبي الكدّاب. وْهُمَ الارْواح د الشياطين الّي كيعملو العلامات، وْكيمشيو نْملوك الأرض في العالم كامل باش يجمعوهُم نالقتال نْديك النهار العظيم د اللّٰه القادر على كُل شي. ("ردّو البال، ها انا ماجي فحال السارق! مبروك الّي كيبقا ساهر وْكيحضي الحوايج ديالو باش ما يمشي شي عريان والناس يشوفو الحشومة ديالو.") ديك الساعة أرْواح الشياطين جمعو الملوك في الموطَع الّي مسمّي بالعبرانيّة "هَر مَݣَدّون." وْكبّ الملاك السابع الكاس ديالو في الهوا، وْخرج واحد الصوت عظيم من العرش د بيت المَقْدس، كيقول: "ها هُوَ تكمّل." وْوقَع برق وْصداع والرعد وْواحد الزنْزال عظيم ما عُمرو ما وقَع فحالو من الوقت الّي الإنسان موجود على الأرض. وْتّقسمَت المدينة العظيمة على تلاتة، وْتهدّمو مُدُن الأُمَم. وْعقل اللّٰه على بابل العظيمة باش يشرّباْ من كاس الخمر د الغضب ديالو. وْهربَتْ كُل جزيرة، وْما بقاو شي الجّبولة. وْطاح من السما تبْروري عظيم على الناس، كُل حبّة منّو فيها تقْريبًا أربعين كيلو. وْكفرو الناس باللّٰه على هَد الكارتة ديال التبْروري، حيت كانت الضرْبة ديالاْ قاصحة بزّاف. وْجا واحد من الملائكة السبعة الّي عندوم السبعة د الكيسان وْهدَر معيَ وْقال: "آجي نورّيك العقوبة د الزانية الكبيرة الّي ݣالسة على الميمان الغزيرة، الّي زناو معها ملوك الأرض، وْسكرو سُكّان الأرض بالخمر د الزنا ديالاْ." وادّاني الملاك بالروح نالخلا، وْشفْتْ واحد المراة ݣالسة على واحد الوحش قرْمزي معمّر بأسْماء الكُفر، الّي عندو سبعة د الريوس وْعشرة د القرون. والمراة كانت لابسة الأرْجوان والقرْمزي وْمزيّنة بالدهب والحجار الحرّ والجواهر، وْعنداْ واحد الكاس د الدهب في يَدّاْ معمّر بالوسخ وْنجاسة د الزنا ديالاْ. وْعلى الجبْهة ديالاْ مكتوب واحد الِاسم سِرّي: "بابل العظيمة، يمّاهُم د الزانيات وْوسخ الأرض." وْشفْتْ المراة سكرانة بْدم القدّيسين وْبْدم الشُّهَداء د يَسوع، وْملّي شفْتاْ، تعجّبْتْ بْعجوبة عظيمة. وْقال لي الملاك: "علاش تعجّبْتِ؟ أنا غادي نشرح لك سِرّ المراة والوحش الّي حاملاْ، الّي عندو سبعة د الريوس وْعشرة د القرون. الوحش الّي شفْتِ كان وْما كاين شي، وْهُوَ غادي يطلع من الهاوية وْيمشي نالهلاك. وْسُكّان الأرض، يعني هَدوك الّي اسموم ماشي مكتوب في كتاب الحياة من خلوق الدنيا، غادي يتعجّبو ملّي يشوفو الوحش الّي كان وْما بقا شي، وَلكن غادي يرجَع. ها هُوَ العقل بالحكْمة: السبعة د الريوس هُمَ سبعة د الجّبولة الّي ݣالسة عليهُم المراة، وْهُمَ سبعة د الملوك: خمسة مِنّوم طاحو، وْواحد كاين، وْواحد يَخُر باقي ما جا شي. وْملّي يجي، لازم يبقا شويا د الوقت. والوحش الّي كان وْدابا ما كاين شي، هُوَ المَلِك التامن، وْهُوَ واحد من السبعة، وْغادي يمشي نالهلاك. والعشرة د القرون الّي شفْتِ، هُمَ عشرة د الملوك الّي باقي ما شبّرو شي المُلك، وَلكن غادي يشبّرو السلْطة مع الوحش في واحد الساعة. هَدوك عندوم هدف واحد، وْغادي يعطيو القوّة والسلْطة ديالوم نالوحش. هَدوك غادي يحاربو الخروف، وَلكن الخروف غادي يغلبوم، حيت هُوَ رَبّ الأرْباب وْمَلِك الملوك، والّي معاه هُمَ معْروطين وْمخْتورين وْصادقين." وْقال لي الملاك: "الميمان الّي شفْتِ فاين ݣالسة الزانية، هُمَ شعوب وْجماعات الناس وأُمَم وْلُغات. والعشرة د القرون الّي شفْتِ، وْحتّى الوحش، هُمَ غادي يكرهو الزانية وْغادي يكشّطوها ويعرّيوها وْغادي ياكلو اللحم ديالاْ ويحرقوها بالعافية. حيت اللّٰه جعل في قلبوم باش يعملو القصد ديالو، باش يتَّفقو ويعطيو الممْلكات ديالوم نالوحش، حتّى تتكمّل كلمات اللّٰه. والمراة الّي شفْتِ، هي ديك المدينة العظيمة الّي كتحكم على ملوك الأرض." وْمن بعد هَد الشي، شفْتْ واحد الملاك يَخُر نازل من السما، عندو سُلطة عظيمة، والأرض لمعَتْ بالمجد ديالو. وْغوّت بْصوت قوي وْقال: "طاحت! طاحت بابل المدينة العظيمة، وْرجعَتْ مسْكن الشياطين والدار د كُل جنّ شرّير، والعشّ د كُل طير منْݣوس وْمكْروه، حيت الأُمَم كاملين شربو من خمر الغضب د الزنا ديالاْ، وْملوك الأرض زناو معها، والتجّار د العالم اتّغناو من البلْعة د اللدّات ديالاْ." وْسمعْتْ واحد الصوت يَخُر كيقول من السما: "خرجو مِنّاْ، آ شعبي، باش ما تشْتَركو شي في الدنوب ديالاْ وْباش ما تلحقكُم شي المصايب ديالاْ، حيت الدنوب ديالاْ تعرّمَتْ حتّى نالسما، وْعقَل اللّٰه على المعاصي ديالاْ. جازيوها فحال ما جازاتكُم، وْردّو لاْ على جوج د المرّات حسب الفعايل ديالاْ. في الكاس الّي خلّطَت المشروبة، خلّطوها لاْ على جوج د المرّات. بْمقْدار ما مجّدَتْ راساْ وْتضخّمَتْ، قدّ ديك الشي عْطيو لاْ من عداب وْحزن، حيت كتقول في قلباْ: «أنا ݣالسة فحال شي مَلِكة، وْماشي هجّالة، وْما غادي شي نشوف الحزن.» على ديك الشي، في نهار واحد غادي يجيو المصايب ديالاْ، موت وْحزن وْجوع، غادي تْتحرق بالعافية، حيت اللّٰه، الّي كيحاسباْ، هُوَ الرَّبّ القدير." وْملوك الأرض الّي زناو وْتضخّمو معها، غادي يبكيو وينوّحو عليها ملّي كيشوفو الدُّخّان د العافية ديالاْ، واقفين من بعيد وْخوفانين من العداب ديالاْ، كيقولو: "آ ويلك! آ ويلك، آ بابل المدينة العظيمة، المدينة القويّة، حيت في ساعة واحدة نزل عليك الحُكم." وْغادي يبكيو تُجّار الأرض وينوّحو عليها، حيت حتّى شي واحد ما غادي يشري السلْعة ديالوم، السلْعة د الدهب والنقْرة والحجار الحرّ والجواهر والكتّان وْتوب الأرْجوان والحرير والقرْمزي، وْكُل عود حُرّ، وْكُل حاجة معدّلة من العاج وْمن الخشب الغالي والنحاس والحديد والرخام، وْسلْعة د القرْفة والعطريّة والبخور والمسك والعطور والخمر والزيت والدقيق والزرَع والبهايم والغنم والخيل والكرّوسات والعبيد وْنفوس البشر. وْكيقولو التجّار: "الغلّات الّي تشهّاتوم نفسك مشاو منّك، وْضاعَت كُل حاجة لديدة وْواعرة، والناس ما عُمروم غادي يجبروها عاود." هَد التجّار الّي اتّغناو مِنّاْ غادي يوقفو من بعيد خوفانين بْسباب العقاب ديالاْ، وْغادي يبكيو وينوّحو، ويقولو: "الويل، الويل نالمدينة العظيمة الّي لابسة الكتّان وْتوب الأرْجوان والقرْمزي، وْمزيّنة بالدهب والحجار الحرّ والجواهر، حيت في ساعة واحدة تخرّبَت التجارة ديالك!" وْكُل ربّان د شي بارْكو والمسافرين والبحريّة، وْكاملين الّي كيتاجرو على البحَر وَقفو من بعيد، وْغوّتو ملّي شافو الدُّخّان د العافية: "واش كاين شي مدينة فحال المدينة العظيمة؟" وْسيّبو التراب على راسوم وْهُمَ كيغوّتو وْكيبكيو وْكينوّحو، كيقولو: "آ ويلك، آ ويلك، آ المدينة العظيمة، الّي اتّغناو بالتجارة ديالاْ الناس كاملين الّي عندوم السُّفُن في البحَر، حيت في ساعة واحدة تخرّبَتْ!" "تشفّى، آ السما، وانتُمَ آ القدّيسين، والرُّسُل والأَنْبياء، حيت اللّٰه حكَم عليها من جهتْكُم!" ديك الساعة رفد واحد الملاك قوي واحد الحجْرة كبيرة، فحال الحجْرة د الطحونة، وْسيّباْ في البحَر، كيقول: "هَيدا غادي تكون مهدّمة بالعنف بابل المدينة العظيمة، وْما غادي شي يجبروها عاود. وْما غادي شي يـبقا كيتّسمع فيك الصوت د المغنّيّين والڭيتارات والغيّاطة والبوق، وْما غادي شي يجبرو فيك أي مْعلّم د شي مهْنة، وْما غادي شي يتّسمع فيك عاود الصوت د الرحا. وْما غادي شي يضوّي فيك ضَو اللامْبة، وْما غادي شي يتّسمع فيك الصوت د العروس والعروسة، حيت التجّار ديالك كانو العُظَماء د الدنيا وْخدعْتِ الأُمَم كاملين بالسحر ديالك، وْجبرو فيك دم الأَنْبياء والقدّيسين وْهَدو كاملين الّي تقتلو على الأرض." وْمن بعد هَد الشي، سمعْتْ في السما واحد الصوت عظيم د واحد الجمْهور كبير كيقول: "هلّلويا! النجا والمجد والقوّة نالإلَه ديالنا، حيت الأحْكام ديالو حقيقيّة وْعادلة، وْعاقب الزانية الكبيرة الّي فسّدَت الأرض بالزنا ديالاْ، وانْتَقم مِنّاْ نْدم العبيد ديالو الّي تسيّل على يَدّاْ." وْقالو عاود: "هلّلويا! الدُّخّان ديالاْ كيطلع على الدوام دائمًا." وْركعو الأربعة وْعشرين شيخ والأربعة د المخْلوقات وْسجدو ناللّٰه الّي ݣالس على العرش، وْقالو: "آمين، هلّلويا!" وْخرج من العرش واحد الصوت، كيقول: "سبّحو نالإلَه ديالنا، آ العبيد ديالو كاملين الّي كيخافوه، الصغارين والكبارين." وْسمعْتْ واحد الصوت فحال الصوت د الجمْهور الكبير، وْفحال الصوت د الما الغزير، وْفحال الصوت د الرعد القوي، الّي قال: "هلّلويا، حيت الرَّبّ إلَهنا القادر على كُل شي كيملك. نفرحو وْننشطو وْنمجّدوه، حيت وصَل العُرس د الخروف، والعروسة ديالو وجّدَتْ راساْ. وْتّعطى لاْ تلبس الحرير النقي الّي كيبرق!" حيت الحرير هُوَ الأعْمال الصالحة د القدّيسين. وْقال لي الملاك: "كْتب: «مبروك نالمعْروطين نالعشا د عُرس الخروف.»" وْزاد: "هَدي هي كلمات اللّٰه الحقيقيّة." وْركعْتْ قدّام رِجلو باش نسجد لو، وْقال لي: "لا، عندَك! حتّى أنا واحد العبد فحالك وْفحال خوتك الّي عندوم شهادة يَسوع. سْجد ناللّٰه! حيت الشهادة د يَسوع، هي روح النبوّة." من بعد شفْتْ السما مفْتوحة، وْظهَر واحد الخيل بيَط وْهَداك الّي ݣالس عليه مسمّي "الأمين والصادق." كيحكم وْكيحارب بالعدل. والعينين ديالو فحال اللهْبة د العافية وْعلى راسو بزّاف د التيجان، وْعندو واحد الِاسم مكتوب الّي ما كيعرفوْ حتّى واحد من غيرو هُوَ. وْكان لابس واحد الجلّابة مغمّسة بالدم، وْكيسمّيواه "كلمة اللّٰه." والجيوش السماويّة كيتبعوه، راكبين على الخيولة البيطة وْلابسين كتّان بيَط وْنقي. وْمن دُقمو خارج واحد السيف ماضي باش يضرب بِه الأُمَم. وْهُوَ غادي يرعاهُم بالعصا د الحديد، وْهُوَ بْنفسو غادي يسطم على العنب في المعْصرة د السخط والغضب د اللّٰه القادر على كُل شي. وْفي الحوايج والفخد ديالو مكتوب واحد الِاسم: "مَلِك الملوك وْرَبّ الأرْباب." وْشفْتْ واحد الملاك واقف على الشمس، وْغوّت بْصوت عظيم، كيقول نالطيور كاملة الطايرة فوسط السما: "آجيو وْتّجمعو نالعشا الكبير د اللّٰه، باش تاكلو اللحم د الملوك والرؤساء، واللحم د القويّين واللحم د الخيولة والّي راكبين عليهُم، واللحم د كُل شي، الحرّ والعبد، الصغير والكبير." ديك الساعة شفْتْ الوحش وْملوك الأرض والجيوش ديالوم مجْموعين باش يحاربو ضدّ الّي ݣالس على الخيل والجيش ديالو. وَلكن اتّقبط على الوحش وْمعاه النَّبي الكدّاب، الّي كان كيعمل العلامات قدّام الوحش، والّي تلّف بِها هَدوك الّي قبلو الطابع د الوحش وْسجدو نالتمْتال ديالو. ديك الجوج تسيّبو حيّين في البحَيرة الّي مشْعولة بالنار والكبْريت. والسيف الخارج من الدقوم د هَداك الّي راكب على الخيل قتَل هَدو الّي بقاو، وْشبعو الطيور كاملين من اللحم ديالوم. ديك الساعة شفْتْ واحد الملاك نازل من السما، وْفي يَدّو المفْتاح د الهاوية وْواحد السنْسلة كبيرة. وْشبّر التنّين (هو الحيّة القديمة، الّي هُوَ إبْليس والشيطان)، وْقيّدوْ مُدّة ألف سنة، وْسيّبوْ في الهاوية وْشدّ عليه، وْعمل عليه الطابع ديالو باش ما يتلّف شي عاود الأُمَم حتّى تتكمّل ألف سنة، وْمن بعد ديك الشي، لازم يتّطلق واحد المُدّة قصيرة. وْشفْتْ شي د العروش، وْهَدوك الّي ݣالسين عليهُم ادّاو السلْطة باش يحكمو. وْشفْتْ النفوس د الناس الّي قطّعو لوم الراس بْسباب الشهادة د يَسوع وْكلمة اللّٰه. هُمَ ما سجدو شي نالوحش ولا نالتمْتال ديالو، وْما خلّاو شي يتّعمل لوم الطابع على الجبْهة ديالوم وْعلى يَدّوم، وْرجعو بالروح وْملكو مع المسيح مُدّة ألف سنة، وَلكن الميّتين الّي باقّين، ما غادي شي يرجعو بالروح حتّى تتكمّل ألف سنة. هَدي هي القيامة الُولى. مبْروك وْمقدّس كُل واحد الّي عندو نصيب في القيامة الُولى، حيت الموت التانية ما عنداْ شي السلْطة عليهُم، وَلكن هُمَ غادي يكونو مسؤولين على العبادة ناللّٰه وْنالمسيح، وْغادي يملكو معاه ألف سنة. ملّي تْتكمّل الألف سنة، غادي يتّطلق الشيطان من الحبس ديالو، وْغادي يخرج باش يتلّف الأُمَم الّي هُمَ في الجِهات الأربعة د الأرض، جوج وْماجوج، باش يجمعوم نالحرب. والعدد ديالوم غادي يكون فحال الرمل د البحَر. غادي يطلعو على الطول والعرض د الأرض وْغادي يدورو بْمخيّم القدّيسين وْبالمدينة المحْبوبة، وْغادي تنزل عافية من السما وْغادي تاكلوم. وإبْليس، الّي كان كيتلّفوم، تسيّب في البحَيرة د النار والكبْريت، فاين تسيّب الوحش والنَّبي الكدّاب حتّى هُمَ، وْغادي يتعدّبو ليل وْنهار على الدوام دائمًا. ديك الساعة شفْتْ واحد العرش عظيم بيَط وْشي واحد ݣالس عليه. هربَتْ من وَجهو الأرض والسما وْما تجبر لوم حتّى شي موطَع. وْشفْتْ الميّتين الكبارين والصغارين واقفين قدّام العرش، وْتّفتحو الكتوبة، وْتّفتح واحد الكتاب يَخُر وْهُوَ كتاب الحياة. وْتحاسبو الميّتين بْديك الشي الّي مكتوب في الكتوبة، على حسب الفعايل ديالوم. وْسلّم البحَر الميّتين الّي فيه، وْسلّمَت الموت والهاوية الميّتين الّي فيهُم، وْتّحكم كُل واحد على حسب الفعايل ديالو. وْتسيّبَت الموت والهاوية في البحَيرة د النار. وْهَدي هي الموتة التانية. وِادا شي واحد ما كان شي مزمّم في كتاب الحياة، تسيّب في البحَيرة د النار. من بعد شفْتْ سما جديدة وأرض جديدة، حيت السما الُولى والأرض الُولى فاتو، والبحَر ما بقا شي. وْشفْتْ المدينة المقدّسة، أُورُشَليم الجديدة، نازلة من السما من عند اللّٰه، موجّدة فحال العروسة مزيّنة نالرَّجل ديالاْ. وْسمعْتْ واحد الصوت عظيم من العرش كيقول: "ها هي السُّكنى د اللّٰه بين الناس، هُوَ غادي يسكن معهُم وْهُمَ غادي يكونو شعبو. واللّٰه بْنفسو غادي يكون معهُم ويكون الإلَه ديالوم. غادي يمسح اللّٰه كُل دمْعة من العينين ديالوم، والموت ما غادي شي يبقا، ولا النواح ولا البكا، والوجاع ما بقا شي، حيت الأُمور الُولى فاتت." وْقال هَداك الّي ݣالس على العرش: "ها انا كنعمل كُل شي جديد." وْقال لي: "كْتب، حيت هَد الكلام صادق وْحقيقي." وْقال لي: "صافي، تكمّل. أنا هُوَ الألف والياء، البداية والنهاية. أنا غادي نعطي نالعطْشان من العين د الما د الحياة بلا شي. كُل واحد الّي كيغلب غادي يورت هَد الشي، وْغادي نكون الإلَه ديالو، وْهُوَ غادي يكون اِبني. وَلكن الخوفانين والّي ما كيآمنو شي، والمنْݣوسين والقتّالين، والزانيين والسحّارة، وْعُبّاد الأصْنام والكدّابة كاملين، النصيب ديالوم في البحَيرة المشعولة بالنار والكبْريت. هَدي هي الموت التانية." وْجا نْعندي واحد من الملائكة السبعة الّي عندوم الكيسان السبعة المعمّرين بالمصايب السبعة الأخرانيّين، وْتكلّم معيَ، كيقول: "آجي نورّيك العروسة، المراة د الخروف." وادّاني بالروح نواحد الجّبل عظيم وْعالي، وْورّاني المدينة المقدّسة، أُورُشَليم، نازلة من السما من عند اللّٰه. عنداْ مجد اللّٰه وْكتبرق فحال واحد الحجْرة حُرّة، فحال الحجْرة د اليشب البلّاوري. كان عنداْ واحد السور عظيم وْعالي، وْعنداْ طناشر باب، وْفي البيبان طناشر ملاك. وْكاينين أسْماء مكتوبة وْهِيَ الأسْماء د طناشر قبيلة د بَني إسْرائيل: من الشرق تلاتة د البيبان، وْمن الشمال تلاتة د البيبان، وْمن الجنوب تلاتة د البيبان، وْمن الغرب تلاتة د البيبان. والسور د المدينة كان عندو طناشر لساس، وْعليها الأسْماء د طناشر رُسُل د الخروف. والملاك الّي كان كيتكلّم معيَ كانت عندو واحد القصْبة د الدهب باش يعبر المدينة والبيبان والسور ديالاْ. المدينة كانت مربّعة، طولاْ كيساوي عرضاْ. وْعبَر الملاك المدينة بالقصْبة وْكان عنداْ ألفَين وْمية وْستّين كيلومتر، الطول والعرض والعلو قدّ قدّ. وْعبَر السور ديالاْ، اتنَين وْسبعين متر، حسب القياس د الإنسان الّي اسْتَعملوْ الملاك. كان السور مبْني باليشب، وَلكن المدينة مبْنية بالدهب الصافي، فحال الجّاج النقي. كان اللساس د سور المدينة مزيّن من كُل نوع د الحجار الحرّ: اللساس الُوّل من يشب، التاني من ياقوت زرَق، التالت من عقيق بيَط، الرابع من الزمرّد، الخامس من جَزَع عقيقي، السادس من عقيق حمَر، السابع من زبرْجد، التامن من زمرّد سلقي، التاسع من ياقوت صفَر، العاشر من عقيق خضَر، الحضاش من عقيق زرَق، الطناش من جَمَشْت. كان الطناشر باب هُمَ طناشر جوهرة، وْكُل باب مِنّاْ جوهرة. وْكانت ساحة المدينة دهب صافي فحال الجّاج الشفّاف. وْما شفْتْ في المدينة حتّى شي بيت المَقْدس، حيت الرَّبّ الإلَه القادر على كُل شي، هُوَ بيت المَقْدس ديالاْ، هُوَ والخروف معاه. والمدينة ما كتحْتاج لا نالشمس ولا نالقمر باش يضوّيوها، حيت مجد اللّٰه كيضوّيها والخروف هُوَ اللامْبة ديالاْ. والأُمَم غادي يتمشّاو في الضَّو ديالاْ، وْملوك الأرض غادي يجيبو لاْ المجد ديالوم. البيبان ديالاْ ما غادي شي يتشدّو بالنهار، حيت ما غادي شي يكون الليل تمّاك. والأُمَم غادي يجيبو لاْ المجد والكرامة ديالوم. وْما غادي شي يدخل لاْ حتّى حاجة منْݣوسة ولا حتّى شي واحد الّي كيعمل المُنْكر ولا الكدّاب، وَلكن غير هَدوك الّي مزمّمين في كتاب الحياة د الخروف. من بعد ورّاني الملاك واحد الواد صافي من الما د الحياة، كيبرق فحال البلّار. هَد الواد خارج من عرش اللّٰه والخروف. فوسط الساحة د المدينة وْعلى الحاشيات د الواد بْجوج بِهُم كانت شجرة الحياة الّي كَتْـتمر طناشر غلّة، وْكتعطي كُل شهر الغلّة ديالاْ، والوراق د الشجرة كتشافي الأُمَم. وْما غادي تبقا حتّى شي لعْنة من بعد. والعرش د اللّٰه وْد الخروف غادي يكون في المدينة، والخدّامة ديالو غادي يعبدوه، وْغادي يشوفو الوجَه ديالو، والِاسم ديالو غادي يكون على الجبْهة ديالوم. ما عُمرو غادي يكون الليل تمّاك، وْما غادي يحْتاجو لا نالضَّو د اللامْبة ولا نالشمس، حيت الرَّبّ الإلَه غادي يضوّي عليهُم، وْهُمَ غادي يملكو على الدوام دائمًا. وْقال لي الملاك: "هَد الكلام صادق وْحقيقي، والرَّبّ، إلَه الارْواح د الأَنْبياء، صيفط الملاك ديالو باش يورّي نالعبيد ديالو شنّو خصّوْ يوقع في واحد الوقت قريب. ها انا ماجي دغيا. مبروك الّي كيحافظ على كلام النبوّة د هَد الكتاب." وانا هُوَ يوحَنّا الّي شفْتْ وْسمعْتْ هَد الأُمور. وْملّي سمعْتْ وْشفْتْ، ركعْتْ باش نسجد قدّام الرِّجلين د الملاك الّي كان كيورّيني هَد الشي كامل. وَلكن قال لي: "لا، عندَك! أنا واحد العبد فحالك وْفحال خوتك الأَنْبياء وْفحال الّي كيحافظو على كلام هَد الكتاب. سْجد ناللّٰه بوحدو!" وْقال لي: "ما تطبع شي كلام النبوّة د هَد الكتاب، حيت الوقت قريب. خلّي الّي هُوَ ظالم يبقا في الظلم، والّي هُوَ منْݣوس يبقا في النجاسة، والّي هُوَ صالح يبقا كيعمل الصلاح، والّي هُوَ مقدّس يبقا في القداسة." "ها انا ماجي دغيا والأُجْرة ديالي معيَ باش نجازي كُل واحد حسب العمل ديالو. أنا هُوَ الألف والياء، والُوّل والاخّري، والبداية والنهاية. مبروكين هَدوك الّي كيغسلو الحوايج ديالوم باش يكون عندوم حَقّوم في شجرة الحياة، ويدخلو من البيبان د المدينة. وَلكن الجّرا والسحّارة والزانيين والقتّالة وْعُبّاد الأصْنام وْكُل واحد الّي كيبغي الكدوب وْكيقولوم غادي يبقاو على برّا. "أنا يَسوع صيفطْتْ الملاك ديالي باش نشهد لكُم بْهَد الأُمور في الكنائس. أنا هُوَ الجدر والدرّيّة ديال داود. أنا هُوَ النجْمة د الصباح المضوّية." الروح والعروسة كيقولو: "آجي!" وْخلّي كُل واحد الّي كيسمع يقول: "آجي!" خلّي كُل واحد الّي عطْشان يجي، وْخلّي الّي بغى الما د الحياة يقبلاْ بلا شي. أنا كنشهد نْكُل واحد الّي كيسمع كلام النبوّة د هَد الكتاب: إدا شي واحد كيزيد شي حاجة على هَد الأُمور، غادي يزيد اللّٰه عليه المصايب الّي مكتوبة في هَد الكتاب. وِادا شي واحد كيزوّل شي كلام من الكتاب د هَد النبوّة، غادي يزوّل لو اللّٰه النصيب ديالو من الشجرة د الحياة وْمن المدينة المقدّسة الّي مكْتوبـين في هَد الكتاب. كيقول الشاهد بْهَد الأُمور: "إيّاه! ها انا ماجي دغيا." آمين! آجي، يا رَبّي يَسوع. النعْمة د رَبّنا يَسوع تكون معكُم كاملين. آمين.