यीसू मसी गी पीढी इंया चाली है। अबरहाम ऊं दाऊद अर दाऊद ऊं यीसू। अबरहाम गो बेटो इसहाक अर इसहाक गो बेटो याकूब पैदा होयो। फेर याकूब ऊं यहूदा अर बिंगा भाई पैदा होया। यहूदा गा बेटा फिरिस अर जोरह हा, आंगी मां गो नाम तामार हो। फिरिस गो बेटो हिसरोन हो। हिसरोन ऊं एराम पैदा होयो। एराम अम्मीनादाब गो पिता हो अर अम्मीनादाब ऊं नहसोन अर नहसोन ऊं सलमोन पैदा होयो। सलमोन ऊं बोआज पैदा होयो, बोआज गी मां गो नाम राहाब हो। बोआज अर रूत ऊं ओबेद पैदा होयो। ओबेद ऊं यिसै पैदा होयो। अर यिसै ऊं राजा दाऊद पैदा होयो। अर दाऊद ऊं सुलेमान पैदा होयो, अर झिको बिं लुगाई ऊं पैदा होयो बा पेलां उरियाह गी घराळी ही। सुलेमान ऊं रहबाम पैदा होयो अर रहबाम ऊं अबियाह पैदा होयो अर अबियाह ऊं आसा पैदा होयो। आसा ऊं यहोसाफात पैदा होयो, यहोसाफात ऊं योराम अर योराम ऊं उजियाह गो जन्म होयो। उजियाह ऊं योताम पैदा होयो अर योताम ऊं आहाज अर आहाज ऊं हिजिकिय्याह पैदा होयो। हिजिकिय्याह ऊं मनसेह पैदा होयो अर मनसेह ऊं आमोन पैदा होयो। फेर आमोन ऊं योसे पैदा होयो। फेर इसराएल गै लोगां नै बंदी बणागे बेबिलोण ले जावंता टेम, योसियाह ऊं यकुन्याह अर बिंगै भाईयां गो जन्म होयो। बेबिलोण जाणै गै बाद यकुन्याह सालतिएल गो पिता बण्यो अर फेर सालतिएल ऊं जरुबाबिल गो जन्म होयो। जरुबाबिल ऊं अबिहूद पैदा होयो। अबिहूद ऊं इल्याकिम गो अर इलयाकीम ऊं अजोर गो जन्म होयो। अजोर ऊं सदोक अर सदोक ऊं आखिम अर आखिम ऊं इलिहूद गो जन्म होयो। इलिहूद ऊं इलियाजर अर इलियाजर ऊं मतान अर मतान ऊं याकूब गो जन्म होयो। अर याकूब ऊं युसुफ पैदा होयो झिको मरियम गो घराळो हो अर मरियम ऊं यीसू पैदा होयो झिको मसी कुहायो। ईं तरियां अबरहाम ऊं लेगे दाऊद तांई चौवदा पीढी होगी। अर दाऊद ऊं बेबिलोण बंदी होण तांई चौवदा पीढी अर बंदी होगे बेबिलोण जाण गै टेम ऊं लेगे यीसू मसी तांई चौवदा पीढी होगी। यीसू मसी गो जन्म इंया होयो कै जद मरियम गो रिस्तो यूसफ ऊं होयड़ो हो। ब्या होणूं पेलां ई ठा लागग्यो कै पवितर आत्मा ऊं मरियम पेट ऊं है। पण युसुफ आच्छो आदमी हो अर बो मरियम गै बारै में लोगां नै बतागे बिनै बदनाम कोनी करणो चावै हो। जद बण चुपकै सी रिस्तो तोड़ण गी सोची। जद बो आं बातां नै सोचण ई लागरयो तो सपनै में बिनै सुरगदूत आ'गे केयो, ओ दाऊद गा बेटा युसुफ, मरियम नै बहु बणाण में ना डर। झिको टाबर बिंगै पेट में है बो पवितर आत्मा गो है। जद बो पैदा होवै तो तूं बिंगो नाम यीसू राखी क्यूंकै बो आपगै लोगां नै पापां ऊं मुकती दैयगो। ओ सारो कीं ईंखातर होयो कै प्रभु परमेसर गी बात बताण आळा नै झिको केयो बो पूरो होवै। “एक कुंवारी छोरी एक टाबर नै जन्म देवैगी बिंगो नाम इम्मानुएल राखीज्यैगो,” झिकै गो मतलब है “परमेसर आपणै सागै है।” जद युसुफ जाग्यो तो बिंयाई करयो जिंया सुरगदूत बिनै केयो। बो मरियम नै आपगै घरे ल्यायो। अर जद तांई टाबर गो जन्म ना होयो जद तांई युसुफ बिंगै कनै कोनी गेयो। अर युसुफ आपगै बेटै गो नाम यीसू राख्यो। जद राजा हेरोदेस गै टेम में यहुदियां गै बेतलेहम में यीसू गो जन्म हो'ग्यो तो पूरब दिसा ऊं केई ग्यानी लोग यरुसलेम में आ'गे पूछण लाग्या, “यहुदियां गो राजा झिकै गो जन्म होयो है बो कठै है? म्हे बिंगै तारै गो निसान आकास में देख्यो। म्हे बिनै आराधना करण आया हां।” जद राजा हेरोदेस ओ सुण्यो तो भोत उदास हो'ग्यो अर यरुसलेम गा सारा लोग डरग्या। जद बण यहुदियां गै मुख्य याजकां अर नेम सिखाण आळै लोगां नै भेळा कर'गे पूछयो कै मसी गो जन्म कठै हो'सी? बां केयो, “यहुदियां प्रांत गै बेतलेहेम गाम में है।” क्यूंकै परमेसर गी बात बताण आळै गै द्वारा इंया लिखेड़ो है, “ओ यहूदा गी धरती पर बणेड़ा बेतलेहेम, तूं यहुदां गै अधिकारियां गी रीति में छोटो कोनी क्यूंकै तेरै में एक राजा पैदा होवैगो झिको मेरै लोगां इसराएल नै संभाळैगो।” जद राजा हेरोदेस पूरब गै ग्यानी लोगां नै चुपकै सी बुलाया अर पूछयो कै बो तारो कद उग्यो हो। फेर बण बानै बेतलेहेम भेज दिया अर केयो, “जा'गे टाबर गो पतो लगावो। जद थानै ठा लागज्यै तो मनै बी बताईयो कै मैं बी जा'गे बिंगी आराधना करूं।” फेर बे राजा गी बात सुणगे उड़ग्या झिको तारो बानै आकास में दिख्यो बो आ'गै चालगे बिं जिग्यां रुकग्यो जठै बो टाबर हो। तारै नै देखगे बे भोत राजी होया। फेर बां घर गै मा जा'गे टाबर अर बिंगी मां मरियम नै एक सागै देख्या। अर बां बिं टाबर आ'गै सिर झुकागे प्रणाम करयो अर बिंगी आराधना करी। बां बिंगै आ'गै सोनो, धूप अर सुरम आळी केई किमती चिजां गी भेंट चढाई। पण परमेसर एक सपनै में बानै बता दियो कै थे पाछा राजा हेरोदेस कनै ना जाईयो। जद बे दूसरै रा माखर आपगै देस में पाछा उड़ग्या। जद बे लोग उड़ग्या तो युसुफ नै प्रभु गै एक सुरगदूत सपनै में आ'गे केयो, ईं टाबर अर इंगी मां नै लेगे मिस्र देस में उड़जा। जद तांई मैं ना केऊं बठै रेई क्यूंकै राजा हेरोदेस ईं टाबर नै मारण खातर ढूंडण लागरयो है। जद युसुफ रात नै ई खड़यो होगे बानै लेगे मिस्र देस कानी चाल पड़यो। फेर हेरोदेस गै मरण तांई बठै ई रेओ। ओ ईंखातर होयो कै प्रभु परमेसर गी बात बताण आळै गै द्वारा केयेड़ो बचन पूरो होवै कै, “मैं आपगै बेटै नै मिस्र ऊं बारै आण गो केयो।” हेरोदेस नै जद ठा लागग्यो कै पूरब गै ग्यानियां बिंगै सागै धोखो करयो है तो बिनै भोत तकड़ी रीस आयी। जद बण हुकम दियो कै बेतलेहम अर बिंगै आसैपासै गै गामां गा दो सालां तांई गै सारै टाबरां नै मरवा दिया। इंया यिरमयाह परमेसर गी बात बताण आळै गो केयेड़ो बचन पूरो होयो। “रामाह सैहर में दुख सुण्यो, रोणो अर जोर गो विलाप सुण्यो, राहेल आपगै टाबरां खातर रोण लागरी ही। अर चुप कोनी होणो चावै ही क्यूंकै बे अब कोनी रेया।” फेर हेरोदेस गै मरण ऊं बाद युसुफ नै प्रभु गै सुरगदूत सपनै में आ'गे केयो, “उठ, टाबर अर इंगी मां नै लेगे इसराएल उड़जा। क्यूंकै झिका टाबर नै मारणो चावै हा बे आप सारा मरग्या।” जद बो बानै लेगे इसराएल आ'ग्यो। पण जद युसुफ नै ठा लाग्यो कै हेरोदेस गी जिग्यां बिंगो बेटो अरखिलास यहुदियां में राज करण लागरयो है तो बो डर ग्यो। फेर बो परमेसर ऊं सपनै में हुकम लेगे गलील परदेस में उड़ग्यो। अर बठै नासरत नाम गै गाम में रेण लागग्यो। इंया परमेसर गी बात बताण आळां गो केयेड़ो बचन पूरो होयो कै बो नासरी कुहावैगो। बां दिना में यहुदियां गै बन उजाड़ में यूहना बतिस्मो देण आळो परचार करै हो। बण केयो, “मन बदळो, सुरग गो राज आण आळो है।” ओ यूहना बो ई है झिकै गै बारै में यसयाह परमेसर गी बात बताण आळै केयो: “बन उजाड़ में एक जणो हेलो मारै, प्रभु खातर रा तैयार करो अर बिंगो रा सीधो करो।” यूहना ऊंट गी ऊन गा बणेड़ा गाबा अर आपगी कड़तू में चमडै़ गो साफो बांध राख्यो हो। अर बो सेत अर टीडियां नै खावंतो हो। बिं टेम बिंगै कनै सारा यहुदियां गा अर यरुसलेम गा अर यरदन नदी गै आसैपासै गा सारा लोग बिं कनै आया। अर सारा आपगै पापां नै मानगे यरदन नदी में यूहना कनूं बतिस्मो लियो। जद बण देख्यो कै भोत सारा सदूकी अर फरीसी लोग बिंगै कनै बतिस्मो लेण आया। बण केयो, “हे सांप गा बच्चों, आण आळै न्याय गै दण्ड ऊं थे कदी बी कोनी बच सको।” पण थानै मन बदळगे आच्छो फळ ल्याणो होवैगो। अर थे इयां ना सोचो कै म्हे अबरहाम गी उळाद हां। मैं थानै केऊं कै परमेसर अबरहाम खातर पथरां ऊं उळाद पैदा कर सकै। झिकै दरखत गै आच्छा फळ कोनी लागै बिनै बो बाडगे आग में बाळ देवैगो। मैं तो थानै पाणी ऊं मन बदळण गो बतिस्मो देऊं झिको मेरै बाद आवैगो बो मेरूं म्हान होवैगो। मैं तो बिंगै बूटां गो फितो खोलण गै लायक कोनी हूं। बो थानै पवितर आत्मा अर आग ऊं बतिस्मो दैयगो। बिंगै हात में आपगो छालो होवैगो झिकै ऊं बो दाणा नै उपणगे सारा फूसका न्यारा कर देवैगो अर आपगै खेत गा सारा दाणा बखारी में भेळा करैगो अर फूसका नै आग में बाळ देवैगो। फेर यीसू गलील ऊं आ'गे यरदन नदी पर यूहना कनूं बतिस्मो लेण आयो। पण यूहना ओ केगे बिनै रोकण लागग्यो कै, मनै तो थारूं बतिस्मो लेणो चईयै, मैं थानै किंया दे सकूं। पण यीसू बिनै केयो, “अब इंयाई होण दे। परमेसर किंया चावै बिनै पूरो करण खातर ओ ई ठीक है।” फेर बण बिंगी बात मान ली। जद यीसू बठै बतिस्मो लियो अर जिंयाई पाणी ऊं बारै निकळ्यो तो आकास खुलग्यो। परमेसर गी आत्मा कबूतर गै रूप में यीसू पर उतरी। जद आकास ऊं एक आवाज आई कै, “ओ मेरो लाडलो बेटो है। इंऊं मैं भोत खुस हूं।” फेर पवितर आत्मा यीसू नै बन उजाड़ में लेगी कै सैतान बिंगी परख कर सकै। अर यीसू गो चाळीस दिन अर रात गो बरत राखेड़ो जद बिनै भोत तकड़ी भूख लागी। जद परखण आळो बिंगै कनै आयो अर केयो, “जे तूं परमेसर गो बेटो है तो आं पथरां नै के रोटी बणज्यै।” यीसू केयो, “आदमी रोटी ऊं जींवंतो कोनी रेवै, पण परमेसर गै मूं ऊं निकळेड़ै बचन ऊं जींवंतो रेवै।” फेर सैतान बिनै यरुसलेम गै पवितर नगर में ले जा'गे मिन्दर गै गुमट पर खड़यो कर'गे केयो। “जे तूं परमेसर गो बेटो है तो नीचै छाळ मारज्या।” क्यूंकै पवितर सासतर में इंया लिखेड़ो है, “बो तनै संभाळण खातर सुरगदूतां नै घालैगो कै तेरै पगां गै पथर गी नां लागै अर बे तनै हातो हात चक लेवैगा।” यीसू उतर दियो कै, “पवितर सासतर में इंया बी लिखेड़ो है कै तूं आपगै प्रभु परमेसर गी परख ना करी।” फेर सैतान बिनै ऊंचै प्हाड पर ले जा'गे सारो संसार दिखायो कै देख कितो सुणो अर मोटो है। जे तूं मेरै आ'गै झुकगे मनै प्रणाम करै तो ओ सारो संसार तनै दे देऊंगा। यीसू बोल्यो, “सैतान दूर होज्या मेरूं।” पवितर सासतर केवै, “तूं आपगै प्रभु परमेसर गी सेवा अर आराधना कर।” ओ सुणगे सैतान बठूं उड़ग्यो अर सुरगदूत आगे बिंगी देखभाळ करण लागग्या। यीसू नै जद ठा लागग्यो कै यूहना पकड़िजग्यो तो पाछो गलील परदेस आ'ग्यो। अर बो नासरत छोडगे कफरनहूम में आ'ग्यो। झिको झील गै किनारै जबलून अर नपताली गै देस में है। ओ इंया होयो कै परमेसर गी बात बताण आळै यसयाह गै द्वारा केयेड़ो बो बचन पूरो करयो। “जबुलून अर नपताली गै देस, झील गै रा ऊं यरदन नदी गै पार, गेर यहुदियां गै देस गलील में। झिका लोग अंधेरै में रेंवता हा बां एक म्हान जोती देखी। अर मोत होण आळी जिग्यां में रेण आळा लोगां पर चानणो होयो।” बिं टेम ई यीसू मसी परचार करणो सुरू करयो कै मन बदळो क्यूंकै सुरग गो राज नेडै़ ई है। जद यीसू गलील झील कनूं जाण लागरयो तो बो दो भाईयां समौन झिको पतरस कुहावै अर बिंगै भाई अंद्रियास नै झील में जाळ फेंकता देख्यो। बे मछली पकड़ण आळा हा। यीसू बानै केयो, “मेरै लारै आओ। मैं थानै आदमियां नै किंया भोळा करणा है मैं थानै सिखाऊंगा।” बे हातो हात जाळ छोडगे बिंगै लारै चाल पड़या। फेर बो आ'गै चाल पड़यो अर बण देख्यो कै जबदी गो बेटो याकूब अर बिंगो भाई यूहना आपगै पिता सागै जाळ ठीक करै हा। यीसू बानै बी हेलो मारयो अर बे बिं टेम ई आपगी किस्ती अर आपगै पिता नै छोडगे बिंगै लारै चाल पड़या। यीसू सारै गलील परदेस गै सतसंग घरां में सुब समाचार गो परचार करतो अर बीमार लोगां नै ठीक करतो फिरतो हो। अर सारै सीरिया परदेस में बिंगी बडाई होण लागगी अर लोग सारै बीमार लोगां नै झिका हरेक तरियां गी बीमारी ऊं अर ओपरी आत्मा ऊं दुखी हा अर लकवै गै मारेड़ा अर दोरां गा मरीज हा बानै बिंगै कनै ल्याण लागग्या अर यीसू बानै ठीक कर देवंतो हो। ईंखातर गलील अर दिकापोलिया, यरुसलेम अर यहुदिया अर यरदन नदी गै पार ऊं लोगां गी मोटी भीड़ बिंगै लारै होगी। यीसू जद मोटी भीड़ नै देखगे प्हाड़ पर चडगे बेठग्यो। अर बिनै मानण आळा सारा बिंगै कनै आया। जद यीसू बानै उपदेस दियो। “धन्य है बे झिका मन गा दीन है। सुरग गो राज बां खातर है। धन्य है बे झिका दुख करै। परमेसर बानै होंसलो देवै। धन्य है बे झिका दीन है क्यूंकै बे धरती गा अधिकारी होवैगा। धन्य है बे झिका नीती कानी भूखा अर प्यासा है। परमेसर बानै धपावैगो। धन्य है बे झिका दया करै है क्यूंकै दया बां खातर सुरग ऊं बरसैगी। धन्य है बे झिका मन में खोट कोनी राखै। बे लोग परमेसर नै देखैगा। धन्य है बे झिका मेळ मिलाप कराण आळा है, बे परमेसर गा बेटा कुहासी। धन्य है बे लोग झिका आच्छै कामां खातर सताया जावै क्यूंकै सुरग गो राज बांगो ई है।” “अर धन्य हो थे क्यूंकै मेरै खातर लोग थारी बेजती करै, दुख दैय अर थारै पर झूठो दोस लगावै है। सुरग में थारै खातर एक मोटो फळ है। थे बिं खातर भोत आनंद मनाइयो अर मन में राजी होईयो। क्यूंकै जिंया अब थानै लोग तंग करै है बिंयाई पेलां परमेसर गी बात बताण आळा नै बी तंग करया हा।” “थे सारी मिनख जाति खातर लूण तरियां हो। जे लूण गो स्वाद बिगड़ जावै तो बो कीं काम गो कोनी रेवै अर बिनै बारै फेंकणो पडै़ अर लोग बिंगै उपर पग मेल गे टिपै। थे संसार गो चानणो हो। एक हिस्यो नगर प्हाड़ गी चोटी पर बसेड़ो होवै बो लुकै कोनी। लोग दीयो जगागे बालटी नीचै कोनी मेलै। पण बिनै आळै में राखै झिकै ऊं सारा नै चानणो मिलै। लोगां गै सामै थारो चानणो इंयाई चमकै कै लोग थारै आच्छा कामां नै देखगे थारो पिता परमेसर झिको सुरग में है बिंगी बडाई करै।” “थे ओ ना सोचो कै मैं मूसा गो नेम विधान अर परमेसर गी बात बताण आळां गी लिखेड़ी बातां नै खत्म करण आयो हूं पण मैं तो बांगी बात पूरी करण आयो हूं। मैं थानै साची केऊं जद तांई धरती आसमान खत्म ना हो'ज्यै मूसा गै नेम विधान गी एक एक बात पूरी होण तांई बणी रेवैगी। ईंखातर आ आग्या मू कोई घटागे बधागे सिखावैगो तो बो सुरग में छोटो मानिज्यैगो। पण झिको आं पर चालगे अर दूसरां नै चालण खातर सिखावैगो बो सुरग में सारां ऊं मोटो मानिज्यैगो। मैं थानै साची केऊं कै जद तांई फरीसियां अर नेम विधान सिखाण आळा लोगां गै धरम ऊं आ'गै ना निकळया तो सुरग गै राज में कोनी जा सकोगा।” “थे जाणो हो कै आपणै बडेरां नै बताएड़ो हो कै थे हत्या ना करियो जे थे करोगा तो थानै कचेड़ी में जबाब देणो पड़सी। पण मैं थानै केऊं झिको आपगै भाई पर रीस करै तो परमेसर बिंगो न्याय करसी अर झिको आपगी भाई गी बेजती करसी तो बिनै पंचायत में जबाब देणो पड़सी अर कोई दूसरै नै माड़ो बतासी बिनै नरक में जाणो पड़सी। ईंखातर जद तूं बेदी पर भेंट चढावंतो होवै तो तनै याद आवै कै तेरै भाई खातर मन में कोई पाप है तो पेलां आपगै भाई नै मनाई अर फेर आ'गे भेंट चढाई। जद तेरो दुसमण तनै कचेड़ी में ले जावंतो होवै तो रा में बिनै बेली बणा लेई। कठै इंया ना होवै के बो तनै न्याय करण आळै गै सामै ले जा'गे जेळ में बंद करा दैय। मैं साची केऊं कै तूं जेळ ऊं जद तांई कोनी छूट सकैगो जद तांई बिंगो हिसाब पूरो ना कर दैय।” “थे जाणो हो कै थानै केयेड़ो है बेबीचार ना करो। पण मैं थानै केऊं कै जे कोई आदमी पराई लुगाई नै गळत नजर ऊं देख बी लियो तो बण आपगै मन में बेबीचार कर लियो। ईंखातर तेरी आंख जे तेरूं पाप करवावै तो बिनै काड गे बारै फेंक दे क्यूंकै तेरी आंख गै कारण सारो सरीर नरक में ना जावै। जे तेरो हात गळत काम करवावै तो बिनै बाडगे फेंक दे क्यूंकै तेरै हात गै कारण सारो सरीर नरक में ना जावै।” “नेम विधान में ओ बी केएड़ो है कै जे तूं आपगी लुगाई नै तलाक दैय तो लिखगे देई। पण मैं थानै केऊं जे कोई आपगी लुगाई नै बेबीचार गै बिना कोई ओर बात गै कारण तलाक देवै तो बो बिंऊं बेबीचार करवावै अर जे कोई छोडेड़ी लुगाई ऊं ब्या करावै तो बो बेबीचारी है।” “थे ओ बी सुणयो कै आपणै बडेरां नै केयेड़ो हो, सोगन ना खाई। जे खावै तो बिनै प्रभु खातर पूरी करियो।” पण मैं थानै केऊं, “थे सुरग गी सोगन ना खाईयो क्यूंकै बठै परमेसर गो आसण है। अर धरती गी सोगन ना खाईयो क्यूंकै बिनै परमेसर संभाळै है। अर ना यरुसलेम गी क्यूंकै बो महाराजा गो नगर है। अर ना सिर गी सोगन खाईयो क्यूंकै थे एक बी बाळ काळो अर धोळो कोनी कर सको। जद बी तूं बोलै तो साच्ची बात बोली इंऊं जादा झिको कीं होवै बो सैतान गी ओर ऊं है।” “नेम विधान में केयेड़ो है कै जे कोई आदमी दूसरै गी आंख अर दांत खराब कर दियो तो आप आळो देणो पड़सी। पण मैं थानै केऊं कै जे कोई आदमी थारै सागै बुरो काम करै तो बिंगै खिलाफ थे कीं ना करियो। जे थारै एक गाल पर थपड़ मारै तो दूसरो बी आगै कर दैयो। जे कोई तेरै पर मुकदमो कर'गे कुड़तो लेणो चावै तो बिनै ओडण खातर चादर बी दे दे। जे कोई तनै एक कोस चलावै तो तूं बिंगै सागै दो कोस उड़जा। जे तेरूं कोई कीं मांगै तो बिनै दे दे। अर झिको उधार लेणो चावै बिनै मना ना कर।” “थे नेम विधान गी आ बात सुण चुक्या हो कै पड़ोसी ऊं प्रेम अर दुसमणां ऊं बैर राखो। पण मैं थानै केऊं कै थे थारै दुसमणां ऊं प्रेम करो अर झिका थानै दुख दैय बां खातर पराथना करो। जिंऊं थे थारै पिता परमेसर गी आच्छी उळाद बण सको क्यूंकै बो आच्छै अर माडै़ नै एक बरगो समझै। जे थे आपगै सागै प्रेम करण आळां ऊं प्रेम करो तो थानै के फळ मिलसी इयां तो चुंगी लेण आळा बी करै। जे थे आपगै बेलियां सागै प्रेम करो तो के मोटो काम करो? इंया तो गेर यहुदी लोग बी करै। ईंखातर थे पूरी तरियां आच्छा बणो क्यूंकै थारो पिता परमेसर बी आच्छो है।” “चोकस रेओ। जे थे लोग कोई आच्छा काम दूसरां लोगां नै दिखाण खातर करो तो पिता परमेसर थानै कोई फळ कोनी दैय। जद थे लोगां नै दान दैयो तो बिंगो रोळो ना मचाओ जिंया चलाक लोग सतसंग घरां में अर गळियां में केवंता फिरै। मैं थानै केऊं कै जे ऐ लोग इंया करैगा तो बानै इंगो फळ मिल चुक्यो। पण जद तूं एक हात ऊं दान दैय तो तेरै दूसरै हात नै ठा ना लागणो चईयै। तूं झिको दान गुफ्त में दियो है तो तेरो पिता परमेसर झिको गुफ्त में देखै बो तनै फळ देवैगो। जद तूं पराथना करै तो चलाक लोगां तरियां ना करी क्यूंकै बां लोगां नै सड़का गै मोड़ा पर खड़या होगे पराथना करणी आच्छी लागै। मैं थानै साची केऊं बे लोग आपगो फळ पेलां ई ले चुक्या है। पण जद तूं पराथना करै तो बंद कोठड़ी में करी। जद तेरो पिता झिको दिखै कोनी बो तनै लुकगे देखैगो तो इंगो फळ तनै देवैगो। जद थे पराथना करो तो गेर यहुदी लोगां गी तरियां जादा ना बोलो क्यूंकै बे लोग इंया सोचै है कै म्हारै बोळै बोलण ऊं म्हारी पराथना सुण लेसी। ईंखातर थे बांगै बरगा ना बणो। थारो पिता थारै मांगणूं पेलां ई जाणै है थानै के चईयै? ईंखातर इंया पराथना करे करो, हे पिता परमेसर तूं झिको सुरग में रेवै है थारो नाम पवितर मानिजै। थारो राज आवै जिंया थारी इच्छा सुरग में पूरी होवै बिंया धरती पर बी होवै। आज गै दिन गी रोटी म्हानै दे। अर जिंया म्हे म्हारै दुसमणां नै माफ करां हां बिंया तूं बी म्हानै माफ कर। म्हानै परीक्सा में ना लेई अर बुराई ऊं बचाई। अर झिका थारै पर अपराध करै अर थे बां लोगां नै माफ करोगा तो थारो पिता थानै बी माफ करैगो। जे थे लोगां नै ना माफ करया तो पिता परमेसर थानै बी कोनी माफ करैगो। जद तूं बरत राखै तो चलाक लोगां तरियां मूं लटकागे ना बेठी क्यूंकै बे दूसरै लोगां नै ओ दिखाणो चावै कै म्हारो आज बरत है। मैं थानै साची केऊं कै बानै इंगो फळ पेलां ई मिल चुक्यो है। जद तूं बरत राखै तो देखण आळा नै जिंया तूं रोटी खाण आळै टेम दिखै बिंया दीखणो चईयै। झिकै ऊं लोगां नै ओ ठा ना लागैगो इंगो बरत है। झिको पिता थानै गुप्त देखै बो थानै फळ दैयगो। आप खातर धरती पर धन भेळो ना कर। क्यूंकै अठै इनै कीड़ा अर जंगाळ लागज्यैगो अर चोर बी ले जा सकै। सुरग में धन भेळो कर। बठै ना कोई कीड़ा ना कोई जंगाळ अर ना चोर चोरी कर सकै। अर याद राखो जठै थारो धन हो'सी बठै थारो मन बी लागग्यो रेसी। सरीर गो दीयो तो आंख है। जे तेरी आंख ठीक है तो तेरो सारो सरीर ई चानणै में रेवैगो। जे तेरी आंख बुरी हो'ज्यै तो तेरो सारो सरीर अंधेरै में हो जावैगो। ईंखातर झिको चानणो तेरै मा है बो जे अंधेरो होज्यै तो तूं आप अंधेरै में रेवैगो। कोई आदमी एक सागै दो मालिकां गी सेवा कोनी कर सकै। क्यूंकै बो एक ऊं प्रेम अर दूसरै ऊं बैर राखसी। थे परमेसर अर धन दोनां गी एक सागै सेवा कोनी कर सको। मैं थानै केऊं खाण पीण गी चिंता छोड दैयो। आपगै सरीर खातर कपड़ा गी चिंता छोड दैयो। थारो जीवन रोटी अर सरीर गै कपड़ा ऊं भोत मेंगो है। आं आकास गै उडण आळै पंछियां नै देखो झिका ना तो बीजै अर ना बाडै अर ना भेळो करै। पण फेर ई परमेसर बांगो पेट भरै है। थे तो आऊं भोत जादा किमती हो। थारै मू कोई हिस्यो है कै झिको चिंता कर'गे आपगै जीवन गो एक पल बी बधा सकै। अर थे आपगै गाबा गी क्यामी सोचो। खेतां गै फूलां गै बारै में सोचो, बे किता सुणा होवै। बे ना कोई काम करै अर ना कोई कपड़ा बणावै। मैं थानै केऊं कै आपगै राज पाट में राजा सुलेमान बी बां फूलां बरगो कोनी बण सक्यो। ईंखातर झिका खेतां गा फूल आज है, दिनगै बे आग में बाळिजैगा। परमेसर आं फूलां नै इता सुणा बणावै तो थे झिका कमजोर बिस्वासी हो थानै बो आऊं सुणा गाबा क्यूं कोनी पीरासी? ईंखातर चिंता कर'गे ओ ना केओ के खास्यां अर के पीस्यां अर के पेरस्यां? संसार गा लोग आं चिजां गै लारै भाजै पण सुरग में रेण आळो पिता परमेसर जाणै है थानै आं चिजां गी लोड़ है। थे सारा ऊं पेलां परमेसर गै राज अर बिंगी धारमिकता गी खोज करोगा तो ऐ सारी चिजां थानै मिलज्यैगी। तड़कै गी चिंता ना करो क्यूंकै काल गो दिन आपगी चिंता आप ई कर लेवैगो। हर एक दिन गी आपगी आपणी ब्यादि होवै।” “दूसरां पर दोस लगाण गी आदत ना बणावो। इंया करोगा तो परमेसर थारै पर बी दोस कोनी लगावैगो। क्यूंकै थारो न्याय थारै फेंसलै पर ई होवैगो। अर जे थे दूसरां गै सागै सई न्याय करोगा तो परमेसर थारो बी सई न्याय करसी। जे तूं गळत न्याय करैगो तो तेरै सागै बी इंया हो'सी। तूं आपगै भाई गी आंख में छोटो फूसको क्यामी देखै? पण तूं आपगी आंख में पडे़ड़ो मोटो फूसको देख। जद तेरी खुद गी आंख में मोटो फूसको पड़यो है तो तूं दूसरै भाई नै किंया के सकै कै मैं तेरी आंख ऊं फूसको काड़ दैयूं। हे पाखण्डी, पेलां आपगी आंख मू मोटो फूसको काड, फेर दूसरै गो छोटो फूसको काडी। कुता नै पवितर चीज ना दैयो अर सूरां आ'गै मोती ना रेड़ो। बे आंगो मोल कोनी जाणै। सूर मोतियां नै पगां में रुळा दैय अर कुता तनै'ई फाड़ खावैगा। परमेसर ऊं झिको कीं मांगोगा बो थानै मिलैगो। ढूंडोगा तो लादैगो अर बारनो खड़काओगा तो बो थारै खातर खोलैगो। क्यूंकै झिको कोई मांगै बिनै बो दैय, झिको ढूंडै बिनै बो मिलै अर झिको खड़कावै तो बिं खातर खोलै। थारै मू हिस्यो बाप है झिकै गो बेटो रोटी मांगै अर बो बिनै दगड़ झिला दैय। अर मछी मांगै तो बिनै सांप झिला दैय। इंया कोई बाप आपगै बेटै सागै कोनी करै। थे चाये किता बी माड़ा हो फेर बी आपगी उळाद नै आच्छी चीज देणी चावो तो थारो पिता परमेसर थारै मांगण पर थानै आच्छी चीज क्यूं कोनी देसी? जे थे दूसरै लोगां ऊं आपगै सागै आच्छो बरताव चावो तो थे बी बांगै सागै आच्छो बरताव करो। नेम विधान अर परमेसर गी बात बताण आळा गै द्वारा आ'ई सीख देऐड़ी है। परमेसर गै राज में भीड़ै रा ऊं जाओ। पण चोड़ो रा अर खुलो रा बिनास कानी जावै। भोत सारा लोग ईं पर चालण लागरया है। पण झिको भीड़ो रा है बिमै चालणो ओखो है। बो रा अनन्त जीवन तांई जावै है। बिमै थोड़ा ई लोग जावै है। झूठी बात बताण आळा ऊं बच गे रेओ। बे सुदी भेड़ बरगा है पण बे खाण आळै भेड़ियां बरगा है। थे बानै बांगै करमा ऊं पिछाण ल्योगा। झाड़कां गै कदी अंगूर कोनी लागै, ना कांटा गै दरखत गै कदी अंजीर लागै। इंयाई आच्छै दरखत गै आच्छा अर माड़ै गै माड़ा फळ लागै। एक आच्छो दरखत कदी माड़ो फळ कोनी ल्यावै अर ना'ई माड़ो दरखत कदी आच्छो फळ ल्यावै। बे सारा दरखत झिका आच्छा फळ कोनी ल्यावै बानै बाडगे आग में बाळ देसी। ईं तरियां थे लोग बां झूठी बात बताण आळा नै बांगै कामा ऊं पिछाणोगा। प्रभु प्रभु केण आळा हरेक आदमी सुरग में कोनी जावैगा। पण झिको मेरै पिता गी इच्छा पर चालै बो ई जावैगो। बिं न्याय गै दिन में भोत सारा लोग मेरूं पूछैगा। प्रभु मैं थारै नाम ऊं परमेसर गी बात करी, मैं थारै नाम ऊं ओपरी काडी अर मैं थारै नाम ऊं चमत्कार करया। जद मैं बानै केऊंगा, मैं थानै कोनी जाणूं, बुरा काम करण आळा लोगो मेरै कनूं भाज जाओ। झिको कोई मेरी आं बातां नै सुणगे आं पर चालैगो बो बिं बुद्धिमान आदमी बरगो होवैगो झिकै आपगो घर तकड़ी नींव पर बणायो। मेह बरस्यो, बाढ आई अर आंधी चाली पण बिंगो कीं कोनी बिगड़यो क्यूंकै बिंगी नींव तकड़ी ही। पण झिको मेरी बातां सुणगे बां पर चालै कोनी बो बिं मूरख आदमी बरगो है झिकै आपगो घर रेत गै उपर बणायो है। जद मेह बरस्या, बाढ आयी अर आंधी चालगे घरूं टकराई तो घर पड़गे खत्म हो'ग्यो।” जद यीसू ऐ बातां करण लागरयो तो लोगां नै बिंगी बात पर भोत हेरानी होयी। क्यूंकै बो बानै नेम विधान सिखाण आळां गै तरियां कोनी समझावंतो पण बो बानै एक हकदार गी तरियां समझावंतो। यीसू जद प्हाड़ ऊं उतरगे चाल्यो तो लोगां गी मोटी भीड़ बिंगै लारै चाल पड़ी। बिं भीड़ गै मा एक कोढी बी हो। बो यीसू कनै आ'गे पगां पड़ग्यो अर केण लागग्यो, हे प्रभु, तूं चावै तो मैं ठीक हो सकूं। जद यीसू बिंगै सिर पर हात रखगे केयो, “मैं साची चाऊं, तूं ठीक होज्यै।” अर बो जद ई ठीक हो'ग्यो। फेर बण बिनै केयो, “इंगै बारै में किनैई कीं ना कैई अर जा'गे मिन्दर गै याजक नै दिखाई। अर मूसा गै आदेस ऊं बठै भेंट चढाई झिका ऊं लोगां नै तेरै ठीक होण गो ठा लागज्यै।” फेर यीसू कफरनहूम में गेयो तो बठै एक रोमी सेनापती आयो अर बिंऊं मदद खातर बिनती करी। हे प्रभु मेरो एक दास लकवै ऊं बीमार पड़यो है। बिंगै भोत पीड होण लागरी है। जद यीसू बिनै केयो, “मैं आ'गे बिनै ठीक करूंगा।” सेनापती बोल्यो, “प्रभु मैं ईं लायक कोनी कै थे मेरै घरे आओ। ईंखातर अठुं ई एक बात के'दे तो मेरो दास ठीक होज्यासी। मेरै उपर बी केई अधिकारी है अर मेरै नीचै बी केई सिपाई काम करै है। जद मैं मेरै सिपाई नै आण जाण गो केऊं तो बो बिंयाई करै। अर मैं मेरै दास नै कोई काम केऊं तो बो मेरो केणो मानै।” ओ सुणगे यीसू लोगां गी भीड़ नै केयो, “मैं साची केऊं, मैं इतो मोटो बिस्वास इसराएल में किंगैई मा कोनी देख्यो। मैं थानै केऊं भोत सारा आथूणा ऊं अर आगुणै ऊं आवैगा अर बे सुरग राज गै भोज में अबरहाम, इसहाक अर याकूब सागै बेठैगा। पण इसराएली लोग झिका इंया सोचै है कै म्हानै परमेसर गै राज में जाण गो हक है तो बे बारै अंधेरै में काडी ज्यैगा अर बे बठै चीखता अर दांत पीसता रेवैगा।” जद यीसू सेनापती नै केयो, “जा तेरो जिसो बिस्वास है बिंयाई होवै अर जद बिंगो दास ठीक हो'ग्यो।” यीसू जद पतरस गै घरे गेयो तो बिंगी सासू बुखार में सुती पड़ी देखी। तो यीसू बिंगै हात गै आपगो हात लगायो अर बा ठीक होगी अर बा यीसू गी सेवा करण लागगी। जद आथण होयी तो लोग ओपरी बडे़ड़ा लोगां नै ल्याण लागग्या। बण आपगै हुकम ऊं ओपरियां नै काड़ दी अर बानै ठीक करया। आं चमत्कारां ऊं आ बात साबित होगी झिकी परमेसर गी बात बताण आळै यसयाह गी किताब में लिखेड़ी ही कै “बण आपणै रोगां नै ले लिया अर आपणै दुखां नै ओड लिया।” यीसू जद आपगै च्यारूंमेर लोगां गी भीड़ देखी तो बण आपगै चेलां नै झील गै परलै पासै जाण खातर केयो। जद एक नेम विधान सिखाण आळो आ'गे बोल्यो, “गुरूजी थे जठै बी जाओगा मैं थारै सागै चालूंगा।” जद यीसू बिनै केयो, “लोंबड़ियां गी घुरी होवै अर पंछियां गो आलणो होवै पण मिनख गै बेटै कनै रेण खातर आपगो सिर ढकण नै ई जिग्यां कोनी।” फेर एक चेलै केयो, “प्रभु मेरो बाप गुजरग्यो, पेलां मनै माटी देण गी आग्या दैयो।” यीसू केयो, “तूं मेरै लारै चालतो रे अर मरेड़ा नै आपगा मुरदा दाबण दे।” जद यीसू आपगै चेलां सागै किस्ती पर चड गे बेठग्यो। बिं टेम झील में मोटो तूफान आ'ग्यो अर लेहरां किस्ती गै ऊपराकर जावैई। पण यीसू बिं टेम सुत्यो पड़यो हो। जद चेला आ'गे जगाण लाग्या अर केयो, “प्रभु म्हानै बचा, म्हे मरण लागरया हां।” जद यीसू बानै केयो, “हे कमजोर बिस्वासियों, थे इता डरेड़ा क्यामी हो?” जद यीसू खड़यो होगे तूफान अर लेहरां नै ललकारी अर बे रुकगी। ओ देखगे बे लोग हेरान हो'ग्या अर आपसरी में केण लाग्या, ओ कुण आदमी है झिकै गो केणो तूफान अर समुंदर बी मानै। जद बे झील गै दूसरै पासै गदरेनिया गै देस में पूगग्या तो बानै मूसाणा में दो आदमी दिख्या। बां दोनां में ओपरी बड़ेड़ी। बे इता खतरनाक हा कै बठकर कोई टपतो कोनी। बां किलकारी मारी, “हे परमेसर गा बेटा, तूं म्हारूं के चावै? तूं म्हानै म्हारै टेम ऊं पेलां ई सजा देण आयो है।” सारै ई एक सूरां गो रेवड़ चरै हो। जद ओपरियां बिनती करी तूं म्हानै बारै काड़णो चावै तो बां सूरां में घाल दे। जद यीसू हुकम दियो कै जाओ। बे निकळ गे सूरां में बड़गी अर सूरां गो रेवड़ रूड़तो रूड़तो झील में जा पड़यो अर सारा सूर मरग्या। जद सूरां गै गुआळियां ओ देखगे गाम कानी भाज्या अर सारी घटना अर बां ओपरी बडे़ड़ै आदमियां गो हाल गाम गा लोगां नै बतायो। जद गाम गा लोग यीसू ऊं बात करण आया अर यीसू नै देखगे बिनती करी कै म्हारो इलाको छोडगे उड़जा। फेर यीसू किस्ती पर चडगे आपगै गाम आ'ग्यो। बठै कीं लोग एक लकवै गै रोगी नै मांची पर सुणागे बिंगै कनै ले आया। बण बांगो बिस्वास देखगे बिनै केयो, “हे बेटा हिम्मत राख, तेरा पाप माफ हो'ग्या।” जद केई नेम विधान सिखाण आळा आपस में केण लागग्या, “ओ आदमी परमेसर गी बेजती करै।” जद यीसू जाणग्यो कै ऐ आपगै मन में के सोचै अर बानै केयो, “थे गळत क्यामी सोचो?” सोरो है के ओ केणो तेरा पाप माफ हो'ग्या अर ओ केणो कै खड़यो हो अर अठुं चाल। पण अब थानै ठा लागज्यैगो कै मिनख गै बेटै कनै धरती पर पाप माफ करण गी ताकत है। जद यीसू बिं रोगी नै केयो, “खड़यो हो अर आपगो माचो चकले अर घरे उड़जा। अर बो रोगी खड़यो होगे घरे उड़ग्यो।” जद लोग ओ देखगे भोत हेरान होया अर परमेसर गी बडाई करण लागग्या कै ईं मिनख नै हिस्यो हक दियो है। यीसू जद जाण लागरयो तो रा में चोकी पर बेठयै एक आदमी नै देख्यो झिको कर लेवै हो। बिंगो नाम मत्ती हो। यीसू बिनै केयो, “मेरै लारै आ'ज्या।” जदी बो हातो हात बिंगै लारै चाल पड़यो। फेर यीसू जद मत्ती गै घरे भोत सारा कर लेण आळा अर पापी लोग अर आपगै चेला सागै रोटी जिमै हो। जद फरीसियां ओ देखगे चेला नै पूछयो, “थारो गुरू कर लेण आळा अर पापी लोगां सागै क्यामी जिमै?” ओ सुणगे यीसू बोल्यो, “चंगै भलै आदमी नै डाक्टर गी लोड़ कोनी होवै। बीमार नै लोड़ पडै़।” ईंखातर थे जा'गे सासतर में ईं बचन गो मतलब समझो। मैं बलिदान कोनी दया चावूं। मैं धरमी लोगां नै कोनी, पापी लोगां नै बचाण आयो। फेर बतिस्मो देण आळै यूहना गै चेला आ'गे पूछयो, “म्हे अर फरीसी लोग बरत क्यामी राखां? थारा चेला क्यूं कोनी राखै।” यीसू बानै केयो, “जद तांई बीन बरातियां गै सागै है बे दुख कोनी करै। पण बो दिन आवैगो जद बीन बरातियां कनै कोनी हो'सी जद बे बरत करैगा। नुअ कपडै़ गी कारी कोई पुराणै कपडै़ में कोनी लगावै क्यूंकै बा कारी बिं कपडै़ पर भेळी होगे ओर पाड़ देवै। नुओ दाखरस पुराणै माटला में कोनी घालै क्यूंकै बे माटला फूठज्यै अर दाखरस ढुळज्यै। ईंखातर नुओ दाखरस नुअ माटला में भरिजै जिंऊं बे दोनूं बचया रेवै।” जद बो बाऊं बात करण लागरयो तो जदी एक सतसंग घर गो मुख्य बिं कनै आयो अर झुकगे बिनती करण लागग्यो। मेरी बेटी मरगी। थे चालगे बिंगै सिर पर हात रख दैयो तो बा जींवंती होज्यैगी। जद यीसू आपगै चेलां सागै चाल पड़यो। बिं भीड़ में एक लुगाई ही बिनै बारा सालां ऊं लोइ पड़ण गो रोग हो। बा यीसू कनै आयी अर होळै'सी बिंगी चादर गै पलै गै हात लगायो। बा सोचै ही कै जे मैं इंगै पलै गै हात लगा दैयूं तो ठीक हो जाऊंगी। यीसू मुड़गे देख्यो अर बिनै केयो, “बेटी, हिम्मत राख, तेरै बिस्वास तनै ठीक कर दी,” अर बा बिं टेम ई ठीक होगी। फेर बिं मुख्य गै घरे पूग्यो तो बण देख्यो कै मरेड़ी छोरी खातर सारा लोग दुख करण लागरया है। जद बण लोगां नै केयो, “सारा बारै जाओ, छोरी मरेड़ी कोनी सूती है।” ओ सुणगे लोग बिं पर हांसण लागग्या। फेर बो सारा नै बारै घालगे छोरी गै कमरै में जा'गे बिंगो हात पकड़गे बिनै खड़ी कर दी। ऐ बातां बठै सारै इलाकै में फेलगी। यीसू जद बठूं चाल पड़यो तो दो आंधा आदमी लारै जोर जोर गा हेला मारण लागग्या, “हे दाऊद गा बेटा, म्हारै पर दया कर।” यीसू जद घरे आ'ग्यो तो बे दोनूं बिं कनै आया। यीसू बानै केयो, “थानै मेरो पर भरोसो है, के मैं थानै आंख दे सकूं?” बां केयो, “म्हानै भरोसो है।” जद यीसू बांगी आंख्या पर हात राखगे केयो, “थारै खातर बिंयाई होवै जिंया थारो बिस्वास है।” अर बे ठीक हो'ग्या। जद यीसू बानै केयो कै, “ईं बात गो किनी ठा नई लागणो चईयै।” पण बां बठूं जा'गे आ बात सारा नै बता दी। जद बे दोनूं बठै जाण लागरया तो केई लोग एक गूंगै आदमी नै यीसू कनै ल्याया, बिमै ओपरी बडे़ड़ी ही। जद यीसू बिमू ओपरी काड दी तो बो बोलण लागग्यो। जद लोग हेरान होगे केण लागग्या इसराएल में हिसी बात पेलां कदी कोनी होयी। पण फरीसी केण लागग्या, “ओ ओपरी सैतान गी मदद ऊं काडै।” यीसू सारा गामां अर नगरां में फिरतो रेयो अर बांगै सतसंग घरां में संदेस देवंतो रेयो। सुरग गै राज गो परचार करतो रेयो। अर लोगां गी हर एक दुख बीमारी नै दूर करतो रेयो। जद बण भीड़ नै देखी तो बिनै तरस आयो क्यूंकै बे बां भेड़ां गै बरगा हा झिकां गो कोई रुखाळो कोनी हो अर भटकेड़ी ही। जद यीसू मसी आपगै चेला नै केयो, “खेत पकेड़ा तो भोत है। पण मजदूरिया थोड़ा है।” ईंखातर खेत गै मालिक ऊं बिनती करो कै बो आपगो खेत बाडण खातर मजदूरिया घालै। यीसू आपगै बारा चेलां नै बुला'गे बानै ओपरी काडण गो अधिकार दियो अर लोगां गा दुख दरद दूर करण गो अधिकार दियो। बां बारा खास चेला गा ऐ नाम हा: सारा ऊं पेलां समौन झिको पतरस कुहावै, अर बिंगो भाई अंद्रियास, जब्दी गो बेटो याकूब अर बिंगो भाई यूहना, फिलिप्पुस, बरतुल्मै, थोमा, कर लेण आळो मत्ती, हलफई गो बेटो याकूब अर तदियास, समौन जिलौत अर यहूदा इस्करियोति झिको यीसू नै पकड़ाण आळो हो। आं बारा चेला नै आग्या देगे भेज्या अर केयो, “गेर यहुदियां में ना जाईयो अर सामरिया गै कोई बी नगर में ना जाईयो। पण इसराएल गै परिवार गी गमेड़ी भेड़ा कनै जाईयो। अर चालता चालता परचार करो कै सुरग गो राज नेडै़ आ'ग्यो। मरेड़ा नै जींवंता करो, कोढिया अर बीमारा नै ठीक करो अर ओपरी आळा ऊं ओपरी काडो। थानै मुफ्त में प्रभु गी आसिस अर सकती मिली है। ईंखातर दूसरा नै मुफ्त में बांटो। थे थारा बटुवां में सोनो, चांदी अर ना तांबो राखियो। सफर में सागै झोळो बी ना राखियो अर ना दो कुड़ता राखियो, चप्पल अर लाठी बी ना राखियो क्यूंकै मजदूर नै बिंगी रोटी मिलणी चईयै। थे जद बी कोई गाम में जाओ तो बठै देखो बिस्वास गै लायक कुण है। अर बठै ई रुक्या रेईयो जद तांई बठूं ना जाओ। थे किंगैई घरे जावो तो बानै आसिस देओ अर केओ थानै सांती मिलै। जे घर गै लोगां में कोई धरमी होयो तो थारो आसिरवाद बांगै सागै रेसी नई तो पाछो थारै कनै आज्यासी। जे कोई थारो आदर मान अर थारी बात ना सुणै तो बिं घर अर नगर नै छोड़ दैयो। अर थारै पगां गै लागेड़ी माटी बठै ई झाड़ देईयो। मैं थानै साची केऊं, जद न्याय होवैगो बिं दिन बिं नगर गी दसा ऊं सदोम अर अमोरा नगर गी दसा भोत आच्छी हो'सी। सावधान रेईयो। मैं थानै भेड़ा गी तरियां भेड़ियां गै बिचाळै भेजण लागरयो हूं। सांप गी तरियां चलाक अर कबूतर गी तरियां भोळा बणगे रेईयो। लोगां ऊं चोकस रेईयो क्यूंकै बे थानै पकड़गे यहुदी पंचायत में सोंप दैयगा अर आपगै सतसंग घरां में कोड़ा ऊं कुटवासी। थानै राजा गै सामै पेस करैगा क्यूंकै थे मेरा चेला हो। पण थानै टेम मिलैगो कै थे बांगै अर गेर यहुदियां सामै मेरै बारै में गवाई देईयो। जद थानै पकड़ लेवै तो घबराईओ ना क्यूंकै परमेसर थानै बता दैयगो कै थानै के करणो अर के बोलणो है। पण याद राखीयो, बोलण आळा थे कोनी होस्यो परमेसर गी पवितर आत्मा थारै माऊं बोलैगी। भाई भाई नै अर मां बाप आपगै टाबरां नै अर टाबर आपगै मां बापा नै पकड़वागै मरवा देवैगा। मेरै नाम ऊं लोग थारूं बेर करैगा। पण आखर तांई टिक्या रेवोगा तो जद ई थारी मुकती हो'सी। जद थानै एक नगर गा लोग सतावै तो दूसरै नगर में भाज जाईओ। मैं थानै साची केऊं कै जद मिनख गो बेटो दुसर आज्यैगो जद तांई थे इसराएल गै सारा नगरां में जा कोनी सकोगा। चेलो आपगै गुरू ऊं मोटो कोनी हो सकै अर ना'ई दास आपगै मालिक ऊं। चेलै नै आपगै गुरू गै बराबर अर दास नै आपगै मालिक गै बराबर होण में संतोस राखणो चईयै। जद बे घर गै मालिक नै बालजबूल केवै तो बो घर में रेण आळै लोगां गै सागै भोत माड़ो बरताव करसी। ईंखातर लोगां ऊं ना डरियो झिको कीं लुकेड़ो है सामणै आसी। अर हर एक चीज झिकी लुकेड़ी है एक दिन प्रकट हो'सी। मैं अंधेरै में थानै झिको कीं केण लागरयो हूं, मैं चाऊं कै थे बिनै चानणै में केओ। झिको कीं मैं थारै कान में केऊं मैं चाऊं कै थे बिनै कोठै पर चढगे केओ। बाऊं ना डरो झिका थारै सरीर नै खत्म करैगा। पण बे थारी आत्मा नै कोनी मार सकै। बिं परमेसर ऊं डरो झिको थारै सरीर अर आत्मा दोनां नै नरक में रेड़गे खत्म कर सकै। एक टकै गी दो चिड़ियां मू एक बी बिना परमेसर गी इच्छा बगेर नीचै कोनी पड़ सकै। पण थारै तो सिर गा बाळ तांई गिणेड़ा है। ईंखातर डरो ना। थे बां चिड़ियां ऊं भोत जादा किमती हो। झिको मनै सारां गै सामै मानैगो मैं बी बिनै सुरग में पिता परमेसर गै सामै आपगो मानूंगा। झिको मनै सारां लोगां सामै ना मानैगो मैं बी बिनै सुरग में पिता परमेसर गै सामै कोनी मानूंगा। ओ ना समझो कै मैं धरती पर मिलाप कराण आयो हूं। पण मैं मिलाप कराण कोनी तलवार चलाण आयो हूं। मैं ईंखातर आयो हूं कै मिनख नै बिंगै पिता ऊं अर बेटी नै बिंगी माऊं अर बहु नै बिंगी सासूं ऊं न्यारी कर दैयूं। आदमी गा दुसमण बिंगै घर गा ई लोग होवैगा। झिको आपगै मां बाप नै अर झिको आपगै बेटा बेटी नै मेरूं जादा प्यार करै बो मेरो कोनी बण सकै। मेरै खातर झिको दुख सेण नै तैयार कोनी बो मेरो चेलो कोनी बण सकै। बो आदमी झिको आपगो प्राण बचाणो चावै बो बानै खो देवैगो पण झिको मेरै खातर प्राण खत्म करैगो बो जीवन पावैगो। झिको थारो आदर करै बो मेरो आदर करै अर झिको मेरो आदर करै बो परमेसर गो आदर करै झिकै मनै धरती पर घाल्यो है। झिको परमेसर गी बात बताण आळै नै परमेसर गी बात बताण आळो समझगे आदर करै बिनै बो ई फळ मिलैगो झिको परमेसर गी बात बताण आळै नै मिलै। थे एक भलै आदमी नै आच्छो समझगे बिंगो आदर करो तो थानै बो ई फळ मिलैगो झिको बिं भलै आदमी नै मिलैगो। जे कोई आ छोटा मू मेरो चेलो जाण गे बिनै पाणी पियासी तो मैं थानै साची केऊं बिनै बिंगो फळ जरूर मिलसी।” जद यीसू आपगै बारा चेला नै समझागे बठूं उठग्यो अर गलील परदेस गै नगरां में उपदेस देवंतो फिरयो। जद बतिस्मो देण आळो यूहना जेळ में हो तो बिनै मसी गै कामां गै बारै में ठा लागग्यो। बण आपगै चेला नै भेजगे पूछयो। के तूं बो ई है झिको आण आळो हो या म्हे ओर किंगी उडीक करां। यीसू बानै केयो, “आंधा देखै, लंगड़ा चालै, कोढी ठीक होवै, बेरा सुणै, मरेड़ा जींवंता होवै अर दीन दूखियां खातर सुब समाचार गो परचार होवै। झिको कीं थे सुणण अर देखण लागरया हो जा'गे यूहना नै बता देओ। धन्य है बे झिका मान सकै अर आपगो बिस्वास छोड ना।” जद यूहना गा चेला बठूं जावा तो यीसू लोगां नै यूहना गै बारै में केण लागरयो कै, “थे ईं बन उजाड़ में के देखण आया के कोई सरकणा झिका पून में हालण लागरया है? तो फेर के देखण आया? एक आदमी नै झिको भोत सुणा गाबा पेर गे राखै? देखो, आच्छा गाबा पेरण आळो राजमेलां में रेवै। तो थे के देखण आया हो? कोई परमेसर गी बात बताण आळै नै? पण मैं थानै बताऊं झिकै नै थे देखण आया हो। बो परमेसर गी बात बताण आळै ऊं मोटो है।” सासतर में लिखेड़ो है ओ बो ई यूहना बतिस्मो देण आळो है झिकै गै बारै में केयो, “तेरूं पेली आपगो दूत भेजूं, बो तेरै खातर रा बणावैगो।” मैं थानै केऊं, “झिको मां ऊं पैदा होयो है बामूं बतिस्मो देण आळै यूहना ऊं मोटो कोई आदमी कोनी। सुरग गै राज में झिको सारा ऊं छोटो है बो ई सुरग में सारा ऊं मोटो है। यूहना गै दिनां ऊं लेगे आज तांई सुरग राज में जाण खातर बिस्वासी लोग कोई बी दुख मुसीबत सेवै है अर तकड़ा लोग इनै खोस ल्यै। परमेसर गै राज गै बारै में सारा परमेसर गी बात बताण आळा गै द्वारा अर नेम विधान में भोत पेलां ऊं यूहना गै टेम तांई आ बात बोलेड़ी है। जे थे परमेसर गी बात बताण आळा गी बात मानण खातर तैयार हो तो झिको एलियाह आण आळो बो ओ ई है। झिको सुणनो चावै बो सुणल्यै। आंगी पीढी गी बराबरी किंगै सागै करूं। बे बजार में बेठया टाबरां बरगा है झिका आपसरी में केवै है। म्हे थारै खातर बंसरी बजाई पण थे नाच्या कोनी। म्हे दुख गा गीत गाया पण थे रोया कोनी। बतिस्मो देण आळो यूहना आयो। बो ओरां गी तरियां। ना तो खावै अर ना'ई पीवै हो। पण लोग केवै है इमै ओपरी बडे़ड़ी है। फेर मिनख गो बेटो आयो झिको सारां गी तरियां खावै पीवै पण लोग केवै बो पेटू अर पियाकड़ है। ओ चुंगी लेण आळां अर पापी लोगां गो बेली है। पण परमेसर नै मानण आळां लोगां गो चाल चलण देखगे पतो लागै कै बांगो परमेसर सच्चो है।” फेर यीसू बां नगरां गै लोगां नै ललकारया जठै भोत सारा चमत्कार करया क्यूंकै बठै गा लोग पाप करणो कोनी छोडयो। “हे खुराजीन अर बेतसैदा में रेण आळा लोगो थारै सागै भोत बुरो हो'सी। जिता चमत्कार थारै में करया जे बे सुर अर सेदा में करयां होवंता तो बठै गा लोगां भोत पेलां ई टाट गा सोक गाबा ओढ गे अर आपगै सरीर पर राख लगागे दुख करता अर आपगो मन बदळ लेवंता। पण मैं थानै केऊं न्याय गै दिन सूर अर सेदा गै लोगां ऊं थारी हालत बोळी खराब हो'सी। हे कफरनहूम गा लोगो, थे सोचता होणा, म्हानै सुरग में ले जावोगा पण थे तो नरक में जावोगा क्यूंकै झिका चमत्कार थारै में करया बे सोदोम में करेड़ा होवंता तो बो आज तांई टिक्यो रेवंतो। पण मैं थानै बताऊं कै न्याय गै दिन तेरै लोगां गी हालत ऊं सदोम गी हालत आच्छी हो'सी।” बिं टेम यीसू बोल्यो, “हे पिता थे सुरग अर धरती गा प्रभु हो। मैं थारी बडाई करूं क्यूंकै थे ऐ बातां ग्यानी अर समझदार लोगां ऊं लकोगे राखी अर झिका भोळा भाळा लोग हा बां पर प्रकट करी। हे परम पिता, आ बात इंया कर'गे थानै ठीक लागी। मेरै परम पिता मनै सारो कीं सोंप दियो। परम पिता नै बेटै गै सिवा कोई कोनी जाणै अर ना'ई पिता गै सिवा बेटै नै जाणै। अर बे लोग ई जाणै झिकां पर बेटो परगट करै। हे थकेड़ा अर भार ऊं दबेड़ा लोगो मेरै कनै आओ। मैं थानै आराम देस्यूं। थे पूरी तरियां अपणै आपनै मेरै पर समरपित करो, मैं थानै सिखाऊंगा क्यूंकै मैं मन में दीन हूं अर थे बी आपगै मन में सुख चेन पाओगा। झिको जूओ मैं थानै दैयूं बो सोरो है अर झिको भार मैं थानै दैयूं बो हळको है।” यीसू सब्त गै दिन खेतां माखर आपगै चेलां सागै जाण लागरयो हो। जद चेला नै भूख लागी अर बे कणक गी बालां मरोड़गे खाण लागग्या। फरीसियां बानै देखगे केयो, “देख तेरा चेला के करण लागरया है? ओ सब्त गै दिन करणो ठीक कोनी।” जद यीसू बानै पूछयो, “थानै ठा के कै जद दाऊद अर बिंगै साथियां नै भूख लागी तो बां के करयो? बां परमेसर गै मिन्दर में बड़गे चढायेड़ी पवितर रोटी किंया खाई? बानै इंया करणो नेम विधान गै खिलाफ हो। बां रोटियां नै सिरफ याजक खा सका। नेम विधान गै द्वारा थानै ईं बात गो पतो होणो कै याजक लोग मिन्दर में सब्त गै दिन नेम विधान नै तोडै़, फेर बी बे दोसी कोनी ठेरै। पण मैं थानै केऊं मिन्दर ऊं मोटो आदमी अठै है। सासतर इंया केवै लोगां गै द्वारा करेड़ै बलिदान ऊं आच्छी दया है। थानै ईं बात गो पतो है तो थे बिना दोस गै लोगां नै दोसी कोनी बणावंता। मिनख गै बेटै नै सब्त गै दिन गो बी अधिकार है।” फेर बो बठूं चालगे यहुदियां गै सतसंग घर में उड़ग्यो। बठै एक आदमी हो। बिंगो एक हात सुकेड़ो हो। जद लोगां बिनै पूछयो, “मूसा गै नेम विधान ऊं सब्त गै दिन कोई आदमी नै ठीक करणो सई है या कोनी? क्यूंकै बे लोग यीसू पर दोस लगाणो चावा।” यीसू बानै केयो, “मान्ल्यो थारै में किंगैई कनै एक ई भेड़ है। बा सब्त गै दिन कुअ में पड़ज्यै तो बिनै बारै कोनी काडोगा के? पण आदमी तो फेर ईं भेड़ ऊं भोत जादा किमती है। ईंखातर मूसा गै नेम विधान गै अनुसार सब्त गै दिन भलाई करणी सई है।” जद बण बिं सुकेड़ै हात आळै आदमी नै केयो, “तेरो हात आ'गै कर” अर बिंगो हात बिं टेम ई ठीक कर दियो। फेर फरीसियां बठूं बारै जा'गे बिनै मारण गो तरिको ढूंडण लागग्या। यीसू आ बात समझग्यो अर बठूं उड़ग्यो अर लोगां गी भीड़ बिंगै लारै चाल पड़ी। बण बानै ठीक करया अर केयो। थे मेरै बारै में लोगां नै कीं ना बताईयो। ओ ईंखातर होयो कै यसयाह परमेसर गी बात बताण आळै गै द्वारा केयेड़ो बचन पूरो हो'ज्यै। “ओ मेरो सेवक है झिकै नै मैं चुण्यो है, ओ मेरो लाडलो है, मैं इंऊं खुस हूं। आपगी आत्मा इनै देऊंगा। अर सारै देसां गै सारै लोगां नै न्याय गो समाचार दैयगो। बो कदी लड़ाई कोनी करैगो। लोग इनै कदी गळियां में कोनी सुणैगा अर ओ कदी रोळा कोनी मचावैगो। ओ लटकैड़ सरकणा नै कोनी तोडै़गो, ओ बुजतै दीयै नै बी कोनी भूजावैगो। जद तांई लाग्यो रेवै जद तांई न्याय पर जीत ना हो'ज्यै। अर सारा लोग बिंगै उपर ई आस राखसी।” फेर लोग यीसू कनै हिस्यै आदमी नै लेगे आया झिको आंधो गूंगो अर बिमै ओपरी बी ही। बण बिनै ठीक कर दियो बो देखण अर बोलण लागग्यो। ओ देखगे सारा हेरान हो'ग्या। अर केण लागग्या, “ओ आदमी दाऊद गो बेटो हो सकै।” जद फरीसियां ओ सुणयो तो केण लागग्या, “ओ सैतान गै राजा बेलजबूल गी मदद ऊं ओपरी काडै।” यीसू बांगै मन गी बात जाणग्यो, जद बानै केयो, “झिकै राज में फूट पड़ज्यै तो बो चालै कोनी। जे कोई घर में फूट पड़ज्यै तो बो बी कोनी बण्यो रेवै। इंया जे सैतान अपणै आपनै बारै काडण लागग्यो तो बिंगै आपगै घर में ई फूट पड़गी तो बिंगो राज किंया बण्यो रेसी? जे आ बात साची है कै बेलजबूल गी मदद ऊं ओपरी काडूं तो थारी उळाद किंगी मदद ऊं काडै? इंऊं सारा समझैगा कै थे गळत हो। जे मैं ओपरियां परमेसर गी आत्मा ऊं बारै काडूं तो आ बात सच्च होवै कै परमेसर गो राज थारै कनैई आ'ग्यो। फेर एक तकड़ै आदमी गै घर में बड़गे चोरी किंया कर सकै? जद तांई बिनै बांदयो ना जावै बिंगै घर में चोरी कोनी कर सकै। झिको मेरो साथी कोनी बो मेरो बिरोधी है। अर झिको मेरै सागै भेड़ा गी तरियां लोगां नै भेळा कोनी करावै बो बानै खिण्डाण आळो है। ईंखातर मैं थानै केऊं, आदमी गा सारा पाप अर चुगली माफ करीज्यैगी। पण जे पवितर आत्मा गै खिलाफ बोल्यो तो बिंगी माफी कोनी मिलैगी। जे कोई मिनख गै बेटै गै खिलाफ कीं केवैगो तो बिनै माफी मिलज्यैगी। पण जे कणी पवितर आत्मा गै खिलाफ कीं केयो, बिनै माफ कोनी करिज्यैगो, ना ईं लोक में, ना परलोक में।” “थे लोग जाणो हो कै आच्छा फळ ल्याण खातर आच्छो दरखत होणो चईयै अर माड़ै दरखत ऊं माड़ो फळ ई मिलै क्यूंकै दरखत गी पिछाण बिंगै फळा ऊं होवै। हे सांप गा बच्चों, जद थे आप ई माड़ा हो तो आच्छी बात किंया कर सको? आदमी गा सब्द बिंगै मन में भरेड़ा है, बे बठूं ई निकळै है। एक आच्छै आदमी में झिकी अच्छाई बिंगै मन में भरेड़ी है बिंऊं आच्छी बात ई बारै निकळै। अर बुरै आदमी कनूं बुरी बात निकळै। पण मैं थानै केऊं, न्याय गै दिन हर एक आदमी झिकै गळत बात बोली है बिनै ईं बात गो हिसाब देणो पड़सी। तूं आपगी बाता ऊं गुनहेगार अर साऊकार बणायो जावैगो।” फेर कीं नेम सिखाण आळा अर फरीसियां बिनै केयो, “हे गुरूजी, म्हे थारूं चमत्कारां गो निसान प्रकट करतां देखणो चावां।” यीसू उतर दियो, “थे लोग बुरा काम अर बेबीचार करो अर फेर बी चमत्कार गो निसान देखणो चावो। मैं परमेसर गी बात बताण आळै योना गै निसान गै सिवा ओर कोई दूसरो निसान कोनी देईजै। जिंया योना तीन दिन रात एक समुंदर गी मोटी मछली गै पेट में रेयो बिंयाई मिनख गो बेटो तीन दिन रात धरती गै मा रेवैगो। न्याय गै दिन नीनवे सैहर गा लोग आज गी पीढी गै लोगां गै सागै खड़या होवैगा अर बानै दोसी बणावैगा। क्यूंकै बां योना गो संदेस सुणगे मन बदळ्यो। अब अठै योना ऊं मोटो है। न्याय गै दिन दिखणाद गी राणी ईं पीढी गै लोगां सागै खड़ी हो'सी अर बानै गुनहेगार बणावैगी। क्यूंकै बा धरती गै दूसरै पासै ऊं सुलेमान गो संदेस सुणगे आई। पण अठै तो सुलेमान ऊं मोटो है। जद कोई ओपरी आदमी नै छोडै है तो बा आराम खातर सुखी जिग्यां ढूंढै, पण बिनै लादै कोनी। जद बा सोचै झिकै घर मू आयी बिमै ई पाछी उड़ जाऊं। जद बा पाछी जावै तो बिनै बो घर साफ सुतरो अर सजाईड़ो लादै। अर आवंती आपगै सागै सात ओर ओपरियां नै ल्यावै झिकी बिंऊं खतरनाक होवै। अर फेर बिं आदमी गी हालत ओर बी माड़ी होज्यै। आज गी पीढी गै लोगां गी हालत बी हिसी होवैगी।” जद बो लोगां ऊं बात करण लागरयो तो बिंगा मां अर भाई बारै खड़या अर बे बिंऊं बात करण गी उडीक करा। जद कणैई आ'गे केयो, “तेरी मां अर भाई बात करण खातर अडीकै है।” यीसू बिनै उतर दियो, “कुण है मेरी मां, अर कुण है मेरो भाई?” जद बण आपगै चेला कानी हात कर'गे केयो, “ऐ है मेरी मां अर मेरा भाई। मेरो पिता झिका सुरग में है झिको बिंगी इच्छा पर चालै है बा मेरी मां, मेरो भाई अर मेरी भेन है।” बिं दिन यीसू घर छोडगे झील गै किनारै बेठगे उपदेस देण लागरयो हो। लोग बिंगै च्यारूंमेर भेळा हो'ग्या जद बो एक किस्ती में चडगे बेठग्यो अर सारा लोग किनारै पर खड़या रेया। बण बानै मिसाल ऊं भोत सारी बातां बताई। बण केयो, “एक किसान बीज बीजण गेयो। बीजता टेम केई रा गै किनारै पड़ग्या, बानै जानवरां चुग लिया। केई पक्की जिग्यां पर पड़ग्या। बठै बे ऊग तो गेया। पण सूरज गो तावड़ो लागतांई जड़ डूंगी ना जाण गै कारण बे बळग्या। केई बीज झाड़का में पड़ग्या। जद बे उगग्या बानै झाड़का दबा लिया। पण केई बीज आच्छी जमीन पर पड़ग्या, बे उगगे केई सौ गुणा, केई साठ गुणा अर केई तीस गुणा फळ ल्याया। झिको सुणनो चावै बो सुणल्यै।” फेर बिंगै चेला बिं कनै आ'गे पूछयो, “थे बातां करता टेम मिसाल क्यामी बताओ।” बण उतर दियो, “सुरग गै राज गी भेद भरी बातां जाणण गो हक सिरफ थानै ई देयड़ो है बानै कोनी देईड़ो। मेरी बात सुणन आळा कनै भोत सारो ग्यान ओर आज्यैगो अर झिका मेरी बात कोनी सुणै बे झिको कीं जाणै बो ई भूल ज्यैगा।” ईंखातर मैं बांगै सागै मिसाल ऊं बात करूं, “क्यूंकै बे देखै तो है पण बानै दिखै कोनी। बे सुणै तो है पण बानै कोनी सुणिज्यै अर ना समझ आवै।” यसयाह परमेसर गी बात बताण आळो इंया लिखै, “थे सुणोगा अर सुणता रेवोगा पण थारी समझ में कोनी आवैगो। थे देखता तो होवोगा पण थानै दिखैगो कोनी। क्यूंकै आंगो मन गळत बाता ऊं भरिज्यैगो। आं आपगा कान बंद कर राख्या है अर आंख बी बंद कर राखी है झिकै ऊं बे ना कीं देख सकै अर ना कीं सुण सकै। पण बे आपगै मन ऊं कदी ना समझ सकै। अर बे कदी मेरै कानी मुड़गे आवैगा अर मैं बानै चंगा करूंगा।” पण धन्य है थारी आंख, कै बा देखै अर धन्य है थारा कान झिका सुणन लागरया है। मैं थानै साची केऊं कै भोत सारा परमेसर गी बात बताण आळा अर धरमी लोग झिकी बातां नै देखणी चावा बे थे देखण लागरया हो। पण बे कोनी देख सकया। अर झिकी बातां नै थे सुणण लागरया हो बानै बे सुण कोनी सकया। अब थे बीज बीजण आळै गी मिसाल गो अरथ सुणो। रा में पडे़ड़ा बीज बे है, झिका परमेसर गै राज गी बात सुणी पण बिं पर गोर कोनी करी अर दुस्ट सैतान झिकी बात बण सुणी बिनै समझण गी सोच नै बंद कर दी। पक्की जमीन पर पडे़ड़ा बीज बे लोग हा झिका परमेसर गै राज गी बात सुणी अर बिनै भोत खुसी ऊं मान बी ली। पण इतो जादा बिस्वास कोनी करयो। जद बिंगै जीवन में बचन गै कारण थोड़ी सी मुसकिल आयी तो बो डगमगाग्यो। झाड़का में गिरेड़ा बीज बे लोग है झिका संसार गै लोभ लाळच अर चिंता में पड़गे दबज्यै अर बे बिस्वास ऊं लारै हटज्यै। आच्छी जमीन पर पडे़ड़ा बीज बे लोग है झिका परमेसर गै राज गी बात नै सुणी अर समझ गे बिं पर चाल्या। अर बे बीज सौ गुणा, साठ गुणा अर तीस गुणा फळ ल्याया। फेर यीसू बानै एक ओर मिसाल बताई कै सुरग गो राज बिं आदमी बरगो है झिकै आपगै खेत में आच्छो बीज बिज्यो। जद लोग सूत्या तो बिंगो दुसमण आ'गे बिं खेत गै मा घास गो बीज खिण्डाज्यै। जद कणक मोटी होयी तो बिमै घास बी दिखण लागग्यो। फेर खेत गा माळी आ'गे मालिक नै बतायो कै थे तो आच्छो बीज बिज्यो फेर ओ कठूं आ'ग्यो? जद मालिक बानै केयो ओ दुसमण गो काम है। जद बण केयो थे केओ तो म्हे इमै खोदी करा दैयां। पण मालिक केयो, जे अब थे खोदी करोगा तो सागै कणक बाढ दैयोगा। फसल पाकण तांई इनै सागै ई बधण दैयो। जद कणक बाडण गो टेम आवैगो मैं भंडारा नै केऊंगा पेलां घास गी पुळी बाळण खातर न्यारी बांध ल्यो अर कणक नै खळै में न्यारी भेळी कर ल्यो। यीसू बानै ओर केई मिसाल बताई कै सुरग गो राज राई गै दाणै बरगो है। झिकै नै कणी आपगै खेत में बिज्यो। ओ बीज भोत छोटो होवै पण उगगे मोटो बूंटो बणज्यै अर पंछी आ'गे बिंगै डाळियां पर बेठण लागज्यै। फेर बण केयो सुरग गो राज खमीर बरगो है। झिकै नै एक लुगाई तीन सैर आटै में रळा गे रख दियो। अर होळै होळै सारो खमीर बणग्यो। यीसू ऐ सारी बातां मिसाल ऊं बताई। बो मिसाल बिना कोई बात कोनी करतो। ईंखातर परमेसर गी बात बताण आळै गै द्वारा केयेड़ी बातां पूरी होवै। “मैं मिसाळ गै द्वारा थारूं बात करूंगा अर धरती बणण ऊं पेलां झिकी बातां लुकेड़ी है बानै थारै सामणै ल्यावूंगा।” फेर यीसू बिं भीड़ नै भेजगे घरे आ'ग्यो। जद बिंगै चेलां बिनै पूछयो कै खेत अर घास आळी मिसाल गो मतलब म्हानै बता। यीसू उतर दियो, “झिको आच्छो बीज बिज्यो बो मिनख गो बेटो है। अर खेत ओ संसार है, आच्छो बीज सुरग राज गो वारिस है अर घास बे लोग है झिका सैतान गी उळाद है। अर घास गो बीज बीजण आळो दुसमण सैतान है। बाडण गो टेम ईं संसार गो अंत है अर बाडण आळा सुरगदूत है। बिंयाई जिंया घास भेळी कर'गे आग में बाळ दी बिंयाई संसार गै अंत में होवैगो। मिनख गो बेटो आपगै सुरगदूतां नै घालगे अर बिंगै राज ऊं सारा पापियां अर बां लोगां नै झिका पाप करण खातर तैयार करै। बानै भेळा कर'गे नरक गी आग में बाळ देसी। जठै दांतां गो पीसणो अर रोणो ई रोणो हो'सी। जद धरमी लोग आपगै पिता परमेसर गै राज में सूरज गी तरियां चमकैगा झिको सुणनो चावै बो सुणल्यै।” “सुरग गो राज खेत में दबेड़ै धन बरगो है झिकै कोई आदमी नै लादज्यै तो बो पाछो बिनै दाब ज्यै अर बो इतो राजी होवै कै बण आपगो सारो कीं बेजगे बो खेत मोल ले'ल्यै। सुरग गो राज हिस्यै बोपारी बरगो है झिको आच्छा मोतियां गी खोज में रेवै। जद बिनै आच्छा मोती लादज्यै तो आपगो सारो कीं बेचगे बिं मोती नै खरीदल्यै। सुरग गो राज मछली पकड़ण आळै जाळ बरगो है झिकै में न्यारी न्यारी भांतगी मछली पकड़िज्यै। जद जाळ भरिज्यै तो बिमुं आच्छी आच्छी मछलियां काडगे टोकरियां में घाल ल्यै। अर बेकार मछलियां नै फेंक दैय। संसार गै अंत में इंयाई होवैगो। सुरगदूत आवैगा अर पापी लोगां नै धरमिया ऊं न्यारा करसी अर बानै भड़कती आग में झोंक देसी। बठै रोणो अर दांतां गो पीसणो हो'सी। यीसू चेला नै पूछयो, थारी समझ में कीं आवै है के? बां केयो हां। यीसू आपगै चेला नै केयो, हर एक बिस्वासी झिको नेम विधान अर परमेसर गै राज नै जाणै है बो एक घरेलू मालिक बरगो है झिको आपगै भण्डार ऊं नुई अर पुराणी सारी चिजां बारै काडै।” जद आ मिसाल केगे बठूं चाल पड़यो। अर आपगै गाम में आ'ग्यो। फेर बण यहुदियां गै सतसंग घर में उपदेस देणो सरू करयो। जद सारा हेरान होगे पूछण लागग्या कै इनै हिसी बुद्धी अर ग्यान गी सकती कठूं मिली है। ओ बिं लकड़ी आळै मिस्तरी गो छोरो कोनी के? इंगी मां गो नाम मरियम है। याकूब, युसुफ, समौन अर यहूदा इंगा भाई है। इंगी सारी भेना आपणै अठै ई रेवै है। फेर ओ सारो कीं कठूं सीख्यो है। फेर बां बिनै मान्यो कोनी। यीसू बानै केयो, “कोई परमेसर गी बात बताण आळै गो बिंगै गाम गा अर घर गा आदर कोनी करै।” ईंखातर बांगै कम बिस्वास गै कारण बण बठै जादा चमत्कार कोनी करया। बिं टेम गलील देस गै राजा हेरोदेस यीसू गै बारै में सुण्यो तो आपगै सेवकां नै केयो। ओ बतिस्मो देण आळो यूहना है झिको मरेड़ा ऊं जीग्यो है। ईंखातर ऐ सक्तियां इमै काम करै झिकी ऊं चमत्कार करै है। ओ बो हेरोदि है झिकै यूहना नै सांकळा ऊं बांदगे जेळ में बंद करयो। ओ बण हेरोदियास गै केण ऊं करयो झिकी बिंगै भाई फिलिप्पुस गी घराळी ही। यूहना सदां ई हेरोदेस नै केवंतो कै हेरोदियास सागै ब्या करणो नेम विधान गै खिलाफ है। ईंखातर हेरोदेस बिनै मारणो चावै हो पण लोगां ऊं डरतो हो क्यूंकै लोग यूहना नै परमेसर गी बात बताण आळो मानता। जद हेरोदेस गो जन्म दिन आयो तो हेरोदियास गी बेटी, हेरोदेस अर बिंगै रिस्तेदारां नै नाच'गे राजी कर दिया हा। ईं पर बण सोगन खा'गे बचन दियो कै झिको कीं तूं मांगैगी मैं तनै देऊंगा। जद बण आपगी मां गै केणै पर आ'गे केयो, मनै थाळी में यूहना गो सिर चईयै। राजा भोत दुखी होयो। पण आपगै रिस्तेदारां गै सामै खाएड़ी सोगन नै पूरी करण खातर हुकम दे दियो। बण जेळ में यूहना गो सिर बाडण खातर आदमी भेज दिया। अर सिर बाडगे थाळी में लेगे आया अर बिं छोरी नै दे दियो। अर बा आपगी मां कनै लेगी। जद यूहना नै मानण आळा लोग आया अर बिंगै सरीर नै माटी देगे आ बात आ'गे यीसू नै बताई। जद यीसू आ बात सुणी तो एकलो किस्ती पर चडगे ऐकांत जिग्यां में उड़ग्यो। जद भीड़ नै ठा लागग्यो तो बे लोग पगां ई बिंगै लारै चाल पड़या। जद यीसू उतर गे किनारै पर आयो तो लोगां गी भीड़ देखी। बिनै बां पर दया आयी। जद बण बांगै माऊं बीमार लोगां नै ठीक करया। जद आथण हो'ग्यो तो बिंगै चेला केयो, “आ सुनसाण जिग्यां है। आं लोगां नै जाण दैयो। मोड़ो भोत हो'ग्यो। जा'गे आपगै खाण पीण गो बंदोवस्त करसी।” पण यीसू बानै केयो, “आनै जाण गी लोड़ कोनी। थे ई आनै खाण नै दे दैयो।” बां केयो, “म्हारै कनै तो पांच रोटी अर दो ई मछली है।” यीसू बानै केयो, “बानै मेरै कनै ल्यायो।” फेर बण लोगां नै घास पर बेठण खातर केयो। फेर बण रोटी अर मछली लेगे सुरग कानी देख्यो अर परमेसर गो धन्यवाद करयो अर रोटियां गा टुकड़ा तोड़गे आपगै चेला नै दिया अर बे आ'गै बांटता रेया। सारा पेट भरगे रोटी खाई। बाकी बचेड़ा टुकड़ां गी बारा टोकरी भरली। बठै लुगाईयां अर टाबरां नै छोड़गे बठै सारा पांच हजार आदमी हा। इंगै बाद यीसू आपगै चेला नै किस्ती पर चढाया अर लोगां नै विदा करण ऊं पेलां ई गलील झील गै परली पार जाण खातर केयो। भीड़ नै विदा कर'गे बो एकलो प्हाड़ पर पराथना करण उड़ग्यो। आथण तांई बठै एकलो ई हो। जद तांई किस्ती बोळी दूर उड़गी अर लहरा ऊं डगमगावैई। क्यूंकै हवा सामली ही। दिन उगग्ण आळो हो, यीसू पाणी पर चालगे बांगै सामै आयो। बिंगै चेला बिनै पाणी पर चालता देख्यो अर डरग्या। तो बे आपसरी में केण लागग्या ओ तो कोई भूत है। बे डरगे रोळो मचाण लागग्या। यीसू बानै केयो, डरो ना। हिम्मत राखो, ओ मैं ई हूं। जद पतरस केयो, “प्रभु जे तूं है तो मनै बी पाणी पर चालगे तेरै कनै आण खातर के।” तो यीसू केयो, “आ'ज्या।” जद बो किस्ती पर उतरगे बिंगै कानी चाल पड़यो। जद बण जोर गी हवा देखी तो डर ग्यो। अर बो डूबण लागग्यो जद रोळो मचायो कै प्रभु मनै संभाळ। यीसू दबादब बिंगो हात पकड़ लियो अर केयो, “हे कमजोर बिस्वासी, तूं मन में बेम क्यामी करयो?” बे किस्ती पर चडग्या अर हवा रुकगी। झिका लोग किस्ती पर बेठया बां सारा यीसू नै झुकगे निवण कर'गे केयो कै थे साची परमेसर गा बेटा हो। झील पार कर'गे बे गनेसरत गै किनारै उतरया। जद बठै गा लोगां बिनै पिछाण लियो, बां बिंगै आण गो समाचार सारी जिग्यां भेज दियो कै झिका लोग रोगी है बे सारा बठै आ'ज्यै। अर बे बिंऊं बिनती करण लागग्या कै बो बानै आपगै पलै गै हात लगा लेण दैय जद झिका हात लगावा बे सारा ठीक हो'ग्या। जद केई फरीसी अर नेम सिखाण आळा यरुसलेम ऊं यीसू कनै आया अर पूछण लागग्या। तेरा चेला म्हारै बडेरा गी रीति रिवाज नै क्यूं कोनी मानै। बे रोटी जीमण ऊं पेलां हात कोनी धोवै? यीसू बोल्यो, “थे थारी रीति रिवाज गै कारण परमेसर गी रीति नै क्यामी छोडो?” क्यूंकै परमेसर गो केयेड़ो है, “तूं आपगै माता पिता गो आदर कर। झिको आपगै माता पिता नै माड़ो केवै बिनै मार देणो चईयै।” पण जे कोई आपगै माता पिता नै केवै कै मैं आपगो सारो कीं परमेसर नै दे दियो, अब मैं मदद कोनी कर सकूं। ईंखातर बिनै आपगै माता पिता गो आदर करण गी लोड़ कोनी। इंऊं थे परमेसर गो बचन तोड़ दियो। हे पाखंडियों, थारै बारै में यसयाह ठीक ई लिख्यो है। ऐ लोग होटा ऊं मेरो आदर करै। पण आंगो मन मेरूं दूर है। मेरै खातर आंगी भगती अण होई है। आंगी भगती गा नेम लोगां गा बणाएड़ा है। जद बण भीड़ नै आपगै कनै बुला'गे केयो, “सुणो अर समझो। आदमी गै मूं में झिको कीं जावै बो बिनै अपवितर कोनी करै। पण बिंगै मूं ऊं निकळेड़ी बात बिनै अपवितर करै।” जद चेला यीसू कनै आ'गे केयो कै, “थारी बात गो फरीसियां भोत बुरो मान्यो।” यीसू उतर दियो, “हरेक बूंटो झिको मेरै पिता परमेसर गी ओर ऊं कोनी लागेड़ो बो पटिज्यैगो। बानै छोडो। बे तो आंधा गा आंधा गुरू है। जे एक आंधो दूसरै आंधै नै रा बतावै तो दोनूं दरड़ै में पड़सी।” जद पतरस बिनै केयो, “म्हानै अपवितर होण'गी मिसाळ गो अरथ समझावो।” यीसू बोल्यो, “अजे तांई थे समझैया कोनी के? थे जाणो कोनी कै झिको कीं मूं में जावै बो बिंगै पेट में पड़ै अर मल बणगे बारै आ'ज्यै। झिको आदमी गै मूं ऊं बारै आवै बो बिंगै मन ऊं निकळै। बो ई बिनै अपवितर करै। क्यूंकै बुरा बिचार, हत्या, बेबीचार, पराई लुगाई कनै जाणो, झूठी गवाई, चोरी अर निन्दा मन ऊं निकळै। ऐई बातां है झिकै ऊं आदमी अपवितर होवै। बिना हात धोये रोटी जीमणूं अपवितर कोनी होवै।” फेर बो बिं जिग्यां नै छोडगे सूर अर सेदा कानी चाल पड़यो। बठै एक कनान गी लुगाई आई अर बा रोळा मचाण लागी, “हे प्रभु, दाऊद गा बेटा, मेरै पर दया कर। मेरी बेटी में ओपरी है।” यीसू कीं कोनी बोल्यो। जद बिंगा चेला आ'गे बिनती करण लागग्या, आ आपणै लारै रोळा मचावंती आवै है, इनै दूर करां। यीसू बोल्यो, “मनै इसराएल गी गमेड़ी भेड़ा नै ढूंडण गै अलावा कीं खातर कोनी भेज्यो।” जद बण लुगाई बिंगै सामै झुकगे बिनती करी, “हे प्रभु मेरै पर दया कर।” यीसू उतर दियो, “ओ ठीक कोनी, कै टाबरां गी रोटी घर गै कुत्तां आ'गै रेड़ दैयां।” बा बोली, “ओ ठीक है प्रभु कै आपगै मालिक गी थाळी मू पडे़ड़ा थोड़ा सा टुकड़ा घर गा कुता बी खाल्यै।” जद बण केयो, “तेरो बिस्वास भोत मोटो है। झिको कीं तूं चावै बो पूरो होवै।” जद ई बिंगी बेटी ठीक होगी। फेर यीसू बठूं गलील झील गै किनारै उड़ग्या। बठै एक प्हाड़ पर चडगे बेठग्या। मोटी सारी भीड़ बिमै लंगड़ा, आंधा, हीण, गूंगा, बेरा अर बीमार लोगां नै लेगे बिंगै कनै आया। अर बिंगै पगां कनै सुणा दिया। अर यीसू बानै ठीक करया। लोग बानै ठीक होयड़ा देखगे भोत हेरान होया अर बे इसराएल गै परमेसर गी बडाई करण लागग्या। जद यीसू आपगै चेला नै बुला'गे केयो, “मनै ईं भीड़ पर तरस आवै। क्यूंकै आं लोगां नै तीन दिन हो'ग्या, मेरै सागै रेवंता। आं कनै खाण नै कीं कोनी। मैं आंनै भूखा कोनी जाणदैयूं, कठै रा में भूखा पड़ ना जावै।” जद चेला बोल्या, “ईं बन उजाड़ में इती रोटी कठूं ल्यावां?” यीसू बानै पूछयो, “थारै कनै किती रोटी है? बां केयो सात रोटी अर कीं छोटी मछलियां है।” यीसू लोगां नै नीचै बेठण गो केयो। अर बां सात रोटियां अर मछलियां नै लेगे परमेसर गो धन्यवाद करयो अर रोटी तोड़गे चेला नै दी अर बे बांटता गेया। बे जद तांई बांटता गेया जद तांई बे धाप्या कोनी। फेर बां बचेड़ी रोटियां गी सात टोकरी भरली। लुगाईयां अर टाबरां गी गिणती नै छोडगे चार हजार आदमियां रोटी जिमी। फेर यीसू लोगां नै विदा कर'गे किस्ती पर चडग्या अर मगदन कानी चाल पड़ग्या। फेर फरीसी अर सदूकी यीसू कनै आया। बे बिंगै अधिकार गो पतो लगाणो चावा। ईंखातर बां बिनै चमत्कार करण गो केयो। यीसू उतर दियो, “सूरज छीपज्यै जद थे केवो आज मोसम आच्छो है क्यूंकै आसमान लाल है। अर सूरज उगज्यै जद थे केवो आज आंधी आसी क्यूंकै खंखळ चडरी है। थे मोसम नै देखगे भेद बता सको पण टेमां गै निसान गो भेद क्यूं कोनी बता सको? दुस्ट अर बेबीचारी पीढी गा लोग कोई निसान देखणो चावै। पण आनै योना गै निसान गै सिवा ओर दूसरो निसान कोनी दिखाईज्यै।” फेर बो बानै छोडगे बठूं उड़ग्यो। यीसू गै चेला झील गै परली पार तो आ ग्या पण बे रोटी ल्याणी भूलग्या। जद यीसू बानै केयो, “फरीसियां अर सदूकियां गै खमीर ऊं चोकस रेईयो।” जद बे आपसरी में केण लागग्या, “के आपां रोटी सागै कोनी ल्याया?” झिको कीं चेला बोल्या बानै यीसू जाणग्यो अर बानै केयो, “अरै ओ कमजोर बिस्वासियो, थे रोटी गै बारै में क्यामी सोचो? थे अजे बी कोनी समझया कै पांच हजार लोगां नै पांच रोटियां ऊं धपाया अर फेर बी किती टोकरी बचगी। अर थानै याद कोनी चार हजार लोगां खातर सात रोटी ही, सारा धापग्या फेर बी किती टोकरी बची। थे क्यूं कोनी समझो कै मैं थानै रोटी खातर कोनी केऊं। मैं थानै फरीसियां अर सदूकियां गै खमीर ऊं बचण खातर केऊं।” जद बे समझग्या कै इंगो मतलब फरीसियां अर सदूकियां गी सिक्सा ऊं बचगे रेण खातर केयो। यीसू जद कैसरिया फिलिप्पी गै परदेस में आयो तो बण चेला नै पूछयो कै, “लोग मिनख गै बेटै नै के केवै?” जद चेला केयो, “केई तो यूहना बतिस्मो देण आळो, अर केई केवै एलियाह अर केई केवै यिरमयाह अर केई केवै परमेसर गी बात बताण आळा मू एक।” यीसू बानै पूछयो, “थे मनै के केवो?” पतरस बोल्यो, “तूं मसी है, परमेसर गो बेटो।” यीसू बिनै उतर दियो, “योना गा बेटा, तू धन्य है। तूं आ बात किनैई ना कैई। मेरै सुरगीय पिता आ बात तेरै पर प्रकट करी है। मैं केऊं तूं पतरस है अर तेरो बिस्वास पथर बरगो है। तेरै द्वारा भोत सारा लोग बिस्वास में आवैगा अर आं लोगां गो मोत गी सकती कीं कोनी बिगाड़ सकै। मैं थानै सुरग गै राज गी कुंजी देऊंगा, झिकी ऊं धरती पर तूं कीं बांधै बो परमेसर सुरग में बांधैगो। अर झिको कीं तूं धरती पर खोलै बो परमेसर सुरग ऊं खोल्दैयगो।” फेर बण आपगै चेला नै आग्या दी कै, “आ बात थे किनैई ना बताईयो, कै मैं मसी हूं।” बिं टेम बो आपगै चेला नै बताण लागरयो कै मनै यरुसलेम जाणो जरूरी है। बठै मनै यहुदी नेम सिखाण आळा अर बुडा यहुदी नेता अर महा याजक मनै दुख देगे मरवा दैयगा। फेर बो तीसरै दिन जी उठैगो। जद पतरस बिनै न्यारो ले जा'गे केण लागग्यो कै, “प्रभु परमेसर तेरै पर दया करै। थारै सागै इयां कदी ना होवै।” फेर यीसू बिं कानी मुड़गे बोल्यो, “पतरस मेरै रा ऊं परनै होज्या। सैतान तूं मेरै रा नै रोकणो चावै। तूं परमेसर गी तरियां कोनी सोचै। पण तूं आदमियां गी तरियां सोचै।” फेर बण आपगै चेला नै केयो, “झिको मेरै लारै आणो चावै बो अपणै आपनै भूलज्यै अर आपगो करूस चक'गे मेरै लारै होज्यै।” झिको आपगी जान बचाणी चावै बो बिनै खोवैगो। पण झिको आपगी जान मेरै खातर खोवैगो बो आपगी जान नै बचा ल्यैगो। जे कोई आपगी जान गमागे सारी चिजां भेळी कर ल्यै तो बिनै के फायदो? आपगी जान ऊं कोई चीज मेंगी है के? मिनख गो बेटो सुरगदूतां सागै परम पिता गी मेमा सागै आण आळो है झिको हर एक गै करमां गो फळ दयैगो। मैं थानै साची केऊं, “अठै हिस्या बी है झिका जद तांई कोनी मरैगा जद तांई मिनख गै बेटै नै आवंता ना देखै।” छ दिनां गै बाद यीसू पतरस, याकूब अर यूहना नै लेगे प्हाड़ पर गेयो। बठै बांगै सामै यीसू गो रूप बदळ ग्यो। अर बिंगो मूं सूरज गी तरियां चमकण लागग्यो अर बिंगा गाबा जोती गै समान धोळा हो'ग्या। फेर एकदम मूसा अर एलियाह बठै परगट होया अर यीसू ऊं बातां करण लागग्या। ओ देखगे पतरस यीसू नै बोल्यो, “प्रभु आच्छी बात है कै आपां अठै हां। जे थे चावो तो म्हे अठै तीन तंबु बणा दैयां, थारै तीनां खातर।” पतरस जद ऐ बातां बोलण लागरयो, एक चमकतो बादळ आ'गे बानै घेर लियो अर बादळ मू आकासबाणी होयी कै ओ मेरो लाडलो बेटो है। मैं इंऊं भोत खुस हूं अर थे इंगी सुणो। जद चेला ओ सुण्यो तो भोत डरग्या अर धरती पर मूंदा पड़ग्या। जद यीसू बानै हात लगागे केयो, “डरो ना, खड़या होज्यो।” जद बां उठगे देख्यो तो बठै कोई कोनी एकलो यीसू दिख्यो। जद बे प्हाड़ ऊं उतरया तो बण बानै केयो कै झिको कीं थे देख्यो किनैई बताईयो ना। जद तांई मिनख गो बेटो मरगे पाछो जींवंतो ना होज्यै। जद चेला पूछयो, “फेर यहुदी नेम सिखाण आळा क्यामी केवै कै एलियाह सारा ऊं पेली आसी।” बण उतर दियो कै, “एलियाह आण लागरयो है। बो रा नै सई तरियां तैयार करैगो। पण मैं थानै केऊं एलियाह तो अब तांई आ'ग्यो। पण लोगां बिनै पिछाण्यो कोनी। बिंगै सागै जिंया बां चायो बिंयाई करयो। बिंयाई मिनख गै बेटै नै बी सतावैगा।” जद चेला समझ गया कै बो बतिस्मो देण आळै यूहना गै बारै में केवै। जद यीसू भीड़ में पाछो आयो तो एक आदमी बिं कनै आयो बण बिनै निमस्कार कर'गे केयो, “हे प्रभु मेरै बेटै पर दया कर। बिनै मिरगी आवै। बो भोती ओखो होवै, बो कदी तो पाणी अर कदी आग में पड़ज्यै। मैं बिनै तेरै चेला कनै ल्यायो पण बे बिनै ठीक कोनी कर सक्या।” यीसू बानै उतर दियो, “जिदी अर कमजोर बिस्वास गा लोगों, मैं थारै सागै किता दिन रेऊंगा अर मैं किता दिन थानै सेण करतो रेवूंगा। बिनै मेरै कनै ल्यावो।” फेर यीसू बिं ओपरी नै बारै निकळण गो हुक्म दियो अर बा बारै निकळगी। बो छोरो हातो हात ई ठीक हो'ग्यो। फेर बिंगै चेला बिनै एकलै नै पूछयो, “म्हे ईं ओपरी नै क्यूं बारै कोनी काड़ सक्या?” यीसू बोल्यो, “थारो बिस्वास कमजोर है। मैं थानै साची केऊं, जे थारै में राई गै दाणै जितो बिस्वास होवै तो थे ईं प्हाड़ नै चालगे बठै जाण गो केदैयो। बो थारो केणो मानल्यैगो। थारै खातर कोई बी काम ओखो कोनी हो'सी।” जद यीसू गा चेला बिनै गलील में आ'गे मिल्या तो बण बानै केयो, “मिनख गो बेटो मिनखां गै हात में पकडि़जण आळो है।” बे बिनै मार देवैगा अर बो तीसरै दिन पाछो जींवंतो होज्यैगो। ओ सुणगे चेला भोत दुखी होया। जद यीसू अर बिंगा चेला कफरनहूम में आया तो मिन्दर गो कर लेण आळो पतरस कनै आयो अर बोल्यो, “तेरो गुरू मिन्दर गो कर कोनी दैय के?” बो बोल्यो, “हां देवै। इतो केगे घर में आ'ग्यो।” बिंगै बोलण ऊं पेलां यीसू बोल्यो, “पतरस, तेरो के केणो है। धरती गो राजा किऊं कर लेवै? आपगै लोगां ऊं या दूसरां लोगां ऊं।” पतरस उतर दियो, “दूसरै लोगां ऊं,” जद यीसू केयो, “आपगै लोगां नै छूट होवै। पण आपां बां लोगां नै नाराज कोनी करां। ईंखातर झील पर जा अर कुंडी पाणी में फेंक अर झिकी पेली मछली पकड़िजै, बिंगै मूं में एक रिपियो मिलैगो, बो बानै ल्यागे मेरै अर थारै कर खातर दे दैयो।” जद यीसू गै चेला आ'गे बिनै पूछयो, “सुरग गै राज में सारा ऊं मोटो कुण है।” जद यीसू एक टाबर नै बुला'गे बांगै बिचाळै खड़ागे केयो, “मैं थानै साची केऊं जद तांई थे ईं टाबर गी तरियां अपणै आपनै ना बणाओगा तो सुरग कोनी जा सकोगा। ईंखातर झिको अपणै आपनै ईं टाबर गी तरियां छोटो बणावैगो बो ई सुरग में मोटो मानिज्यैगो। जे कोई हिस्यै टाबर नै मेरै नाम ऊं मानल्यैगो तो बो मनै मानल्यैगो। पण झिको कोई मेरै पर बिस्वास करण आळै माणसां गै रा में अड़ेको लगावै तो बिं खातर इंया होवै कै बिंगै गळ में चकी गो पाट बांदगे समुंदर में फेंक दैयो। संसार में बिस्वास लोग छोडै है। बो इतो खतरनाक है। संसार में इंया होवंतो रेवै। पण बिंगो बुरो होवैगो झिको किंगैई खातर ठोकर गो कारण बणै। ईंखातर जे तेरो हात अर पग तनै ठोकर खुवावै है तो बानै बाडगे फेंक दे। हात पगां गै सागै नरक में जाण ऊं आच्छो है टुण्डो या लंगड़ो बणगे सुरग में जाणो। जे तेरी आंख सुरग में जाण ऊं रोकै है तो बिनै काडगे फेंक दे क्यूंकै तेरै खातर बिना आंख गै सागै सुरग में जाणो आच्छो है।” “तो देखो, मेरै आं भोळै भाळै बिस्वासियां मू किनैई कमजोर ना जाणियो। मैं थानै केऊं कै बानै बचाण आळा सुरगदूत सदां पिता परमेसर गै सागै रेवै। क्यूंकै मिनख गो बेटो भटकेड़ा नै सई रा पर ल्याण खातर आयो है। तूं इंया सोच, किंगैई कनै सौ भेड़ है अर बामूं एक भेड़ गमज्यै तो निन्याणवै भेड़ा नै छोडगे बिं एक नै ढूंडण जावैगो। मैं थानै साची केऊं कै जद बा लादज्यै तो बां निन्याणवै नै छोडगे बिं एक खातर बो भोत राजी होवै। ईं तरियां आं भोळै भाळै बिस्वासियां ऊं पिता परमेसर ओ कोनी चावै कै एक बी नास होवै। जे तेरो भाई तेरै सागै बुरो बरताव करै तो तूं बिनै जा'गे समझा। जे बो तेरी बात मानल्यै तो तूं बिनै जीत लियो। पण जे बो तेरी बात ना सुणै तो ओर लोगां नै तेरै सागै लेज्या जिंऊं झिकी बात तूं केवै बिं बात गी गवाई हो सकै। जे बो बांगी बी ना सुणै तो बिस्वासी मण्डली गै लोगां नै बता। जे बो बांगी बी ना मानै तो तूं बिनै एक गेर यहुदी अर कर लेण आळा बरगो समझ। मैं थानै साची केऊं झिको कीं थे धरती पर बांधोगा बो परमेसर सुरग में बांधैगो झिको थे धरती पर खोलोगा बिनै परमेसर सुरग में खोल दैयगो। मैं थानै केऊं थे दो जणां आपसरी में साम्पत कर'गे कीं मांगोगा तो परमेसर थानै जरूर देवैगो। क्यूंकै जठै मेरै नाम ऊं दो या तीन जणा भेळा होवैगा बठै मैं जरूर होस्यूं।” जद पतरस यीसू कनै आ'गे केयो, “प्रभु मनै मेरै भाई गै गुनाह नै किती बार माफ करणो चईयै। जे मैं सात बारी माफ करूं तो ठीक है के?” यीसू केयो, “सात बार नइ, बो जिती बार बी गुनाह करै तूं बिनै बिती बारी माफ करतो रेयी। ईंखातर सुरग गी बराबरी बिं राजा सागै करीजा सकै झिकै आपगै नोकरां गो हिसाब नकी करणो चायो। जद बो हिसाब करण लागग्यो तो बिंगै सामै एक आदमी आयो, झिकैगो करजो दस हजार टका हो। पण बिं कनै करजो भरण खातर कीं कोनी हो। जद राजा आग्या दी कै इंगै परिवार गै लोगां नै अर झिको कीं ईं कनै है सारा नै बेच गे इंगो करजो पूरो करो।” जद बो नोकर पगां पड़ग्यो अर बिनती करण लागग्यो, “धीरज राखो। ओ करजो मैं होळै होळै भर दैयूंगा।” ओ सुणगे राजा नै बिं पर दया आ'गी। बण बिनै माफ कर दियो अर बिंगो करजो बी माफ कर दियो अर बिनै छोड़ दियो। जद बो बठूं जावै हो तो बिंगो दूसरो नोकर भाई मिल्यो झिकै कनूं बण कीं रिपिया लेणा। अर बिंगो गळबो पकड़गे केयो, “बोल मेरा रिपिया कद देसी।” जद बो नोकर भाई पगां पड़गे बिनती करी कै मैं होळै होळै भर देस्यूं। पण बो मान्यो कोनी। बिनै जेळ में बंद करा दियो जद तांई करजो ना भरदैय। दूसरो नोकर ओ सुणगे भोत दुखी होयो अर आ सारी बात राजा नै जा'गे बता दी। जद बिं राजा नै रीस आ'गी अर केण लागग्यो, “अरै नीच दास, तूं जद बिनती करी तो, मैं तेरो सारो करजो माफ कर दियो। तनै तेरै बेली पर दया कोनी आयी जिंया मैं तनै माफ करयो। जद बण राजा बिनै सजा करवा दी कै, जद तांई ओ करजो ना भरदैय। ईंखातर जद तांई थे थारै भाई बेलियां नै पूरै मन ऊं ना माफ करोगा तो पिता परमेसर बिंयाई थारै सागै करैगो।” ऐ बातां केगे यीसू गलील ऊं यहुदियां में यरदन नदी गै दूसरी पार उड़ग्यो। बठै एक भोत मोटी भीड़ लारै चाल पड़ी झिकी नै बण ठीक करी। बिनै परखण खातर केई बिंगै कनै आया अर केण लागग्या कै, “कोई आदमी कीं कारण ऊं आपगी लुगाई नै तलाक दे दैय के?” यीसू उतर दियो कै, “थे सासतर में इंया कोनी पढयो कै धरती बणाण आळै बानै लुगाई अर आदमी गै रूप में बणाया।” अर ओ केयो, “आपगै मां बाप नै छोडगे आदमी आपगी लुगाई सागै दो होंता बी एक सरीर होगे रेवैगा। ईंखातर बे दो कोनी, एक ई बणज्यै। ईंखातर झिका नै परमेसर जोडै़ है, बानै कोई बी आदमी न्यारा ना करै।” तो फरीसी बोल्या, “तो मूसा इंया क्यामी लिख्यो कै कोई आदमी आपगी लुगाई नै तलाक दे सकै। पण बिनै लिखगे देणो हो'सी।” यीसू बानै उतर दियो, “मूसा ओ नेम विधान थारै कठोर मन गै कारण दियो। पण सरू में आ रीत कोनी।” मैं थानै केऊं, “झिको आदमी आपगी लुगाई नै बेबीचार गै अलावा ओर कोई कारण ऊं तलाक देवै अर दूसरी लुगाई सागै ब्या करै तो बो बेबीचारी है।” ओ सुणगे चेला बोल्या, “जे कोई आदमी लुगाई गै बिचाळै कोई हिसी बात होवै तो ब्या ई नई करणो चईयै।” यीसू बोल्यो, “हर एक आदमी उपदेस नै मानै कोनी। इनै बस बे ई मानै झिका नै ईं बात गी समझ दैएड़ी होवै। कीं लोग मां गै पेट ऊं ई खुसरा जन्मै है अर कीं लोग आदमियां गै द्वारा खुसरा बणा दिया जावै अर कीं लोग सुरग गै राज खातर बांगा बरगा बणज्यै। झिका इनै सुणनो चावै बे सुणल्यै।” फेर लोग केई टाबरां नै यीसू कनै ल्यागे केयो, “आंगै सिर पर हात रखगे आसिरवाद दैयो अर आं खातर पराथना करो।” पण चेला बानै ललकार दिया। ओ देखगे यीसू बोल्यो, “टाबरां नै अठै ई रेण दैयो। आनै रोको ना। मेरै कनै आण दैयो। क्यूंकै सुरग गो राज आं बरगो ई है।” जद बो बानै आसिरवाद देगे बठूं चाल पड़यो। बठै एक आदमी यीसू नै आ'गे केण लागग्यो, “गुरूजी मैं अनन्त जीवन पाण खातर के आच्छो काम करूं?” यीसू उतर दियो, “आच्छो काम के है? इंगै बारै में मनै क्यूं पूछै? क्यूंकै आच्छो काम तो एक ही है तूं अनन्त जीवन लेण खातर आग्या गो पालण कर।” बण पूछयो, “किसी आग्या?” यीसू केयो, “कतल ना करी, बेबीचार ना करी, झूठी गवाई ना देई अर चोरी ना करी। अर आपगै मां बाप गो आदर करी। जिंया तूं आपगै सरीर ऊं प्रेम करै बिंयाई आपगै आसै पासै रेण आळा ऊं प्रेम करी।” जद बण आदमी केयो, “मैं आं सारी बातां नै मानूं। अब मेरै में के कमी है?” यीसू बोल्यो, “जे तूं पूरण बणणो चावै तो तेरो सारो धन माल बेचगे गरीबा नै बांट दे क्यूंकै तनै सुरग में मिलज्यैगो। फेर मेरै लारै होज्या।” ओ सुणगे बो भोत उदास होयो अर बठूं उड़ग्यो क्यूंकै बो भोत अमीर आदमी हो। यीसू आपगै चेला नै केयो, “मैं थानै साची केऊं, एक धनवान आदमी गो सुरग में जाणो भोत ओखो काम है। पण एक ऊंट गो सुई गै नाकै माखर निकळ जाणो सोरो है पण कोई बी धनवान आदमी गो सुरग गै राज में जाणो ओखो है।” चेला ओ सुणगे हेरान हो'ग्या अर पूछयो कै, “फेर किंगो उद्धार हो'सी।” यीसू बानै केयो, “आदमियां खातर तो ओ काम ओखो है पण परमेसर ईं काम नै कर सकै।” पतरस केयो, “देख, म्हे सारो कीं छोडगे तेरै लारै हो'ग्या। म्हानै के मिलसी?” यीसू बोल्यो, “मैं साची केऊं कै एक नुंअ जुग में जद मिनख गो बेटो आपगै न्याय गै सिंघासन पर बेठैगो तो थे झिका बिंगै लारै चालो बारा सिंघासनां पर बेठगे इसराएल गी बारा जातां गो न्याय करोगा। झिकै मेरै खातर आपगै घर परिवार नै छोड़यो है बिनै सौ गुणा फळ मिलैगो। अर सुरग गो अधिकारी बणैगो। पण भोतसा अब झिका आ'गै है बे लारै होज्यैगा अर झिका लारै है बे आ'गै होज्यैगा।” सुरग गो राज एक अंगूरां गै बाग खातर दिनगै टेम मजदूरिया ल्याण गेयै एक जमिन्दार बरगो है बण चांदी गै रिपिया पर मजदूर कर'गे काम करण खातर बाग में घाल दिया। नो बजे जमिन्दार घरूं बारै गेयो तो बण देख्यो कै केई लोग बजार में इनै बिनै इंयाई बेकार में खड़या है। जद बण बानै केयो, “थे मेरै मजदूरी पर चालो। जितो थारो हिसो बणसी, मैं थानै दे दैयूंगा।” जद बे काम पर उड़ग्या, फेर बण दोफारै बारा बजे अर फेर तीन बजे बिंया करयो। फेर बो पांच बजे ओर बजार में गेयो। फेर बण लोगां नै भेळा खड़या देख्या। जद बण पूछयो, “थे बेकार में भेळा क्यामी खड़या हो।” बां केयो, “म्हानै मजदूरी पर कोई कोनी लेग्यो।” जद बण केयो, “मेरै बाग में मजदूरी पर चालो।” जद आथण होयो, तो जमिन्दार आपगै मुनीम नै केयो, “झिका मजदूरिया पेली आळा अर बाद आळा, सारा नै बुला'गे बांगी ध्याड़ी दे दे।” जद बण सारा नै एक एक चांदी गो रिपियो दे दियो। फेर झिका दिनगै लाग्या बां सोच्यो म्हानै कीं जादा मिलसी। पण सारा नै एक एक रिपियो ई मिल्यो। रिपियो तो बां ले लियो पण जमिन्दार सागै ओखा होगे केण लागग्या। झिका म्हारूं बाद में आया, बां एक घंटो ई काम करयो। फेर बी थे सारा नै एकसी मजदूरी दी। म्हे तो सारै दिन तावड़ै में काम करयो। बामूं एक जणै नै जमिन्दार केयो, “मैं थारै सागै कोई भेदभाव कोनी करयो। आपणी पेलां ई एक रिपियै में बात खोलेड़ी है। झिको हक बणै बो लेल्यो अर जाओ। झिका नै बाद में ल्यायो बानै बी एक रिपियो देस्यूं झिको थानै दियो है। मनै मेरो धन कितो कितो बांटणो है, इंगो हक मनै है। मैं आच्छो काम करूं, ईंखातर थे लोग मेरै पर रीस बळो। ईंखातर झिका पेला है बे बाद में होज्यैगा अर झिका बाद में है बे पेला होज्यैगा।” जद यीसू आपगै बारा चेला सागै यरुसलेम जावै हो तो बानै एक पासै ले जा'गे चालता चालता केयो। “सुणो। आपां यरुसलेम पूगण आळा हां। मिनख गै बेटै नै बठै मुख्य याजकां अर नेम सिखाण आळां गै हाता में पकड़ाइज्यैगो। बे बिनै मोत गी सजा दैयगा। फेर बे गेर यहुदियां गै हात में बिनै सोंप दैयगा अर बे बिंगी बेजती करैगा अर कोड़ा मारैगा अर करूस पर चढा दैयगा पण बो तीसरै दिन पाछो जींवंतो होज्यैगो।” फेर जबदी गै बेटै गी मां आपगै बेटा सागै यीसू कनै आयी अर झुकगे प्रणाम करयो अर कीं मांग्यो। यीसू बिनै केयो, “तूं के चावै? बा बोली कै मैं चाऊं मेरा दोनूं बेटा नै तेरै राज में एक थारै सजै पासै एक खबै पासै बिठा लेई।” यीसू बोल्यो, “तूं कोनी जाणै तूं के मांगण लागरी है? मैं झिको दुख सेऊंगा, बो थे सेल्योगा के?” बां केयो, “हां म्हे सेल्यांगा।” यीसू बानै केयो, “थे ओ दुख तो सेल्योगा, पण मेरै दाहिणै अर बाए बिठाण गो मेरै कनै हक कोनी। अठै बेठण गो हक तो बानै है झिका नै मेरो पिता परमेसर बिठासी।” जद बां दूसरा दस चेला ओ सुण्यो तो बां दोनां पर भोत रीस बळया। जद यीसू बानै बुला'गे केयो, “थे जाणो हो कै, गेर यहुदी राजा बां लोगां पर आपगी ताकत दिखाणी चावै। अर बांगा मुख्य नेता लोगां पर आपगो हक जताणो चावै। पण थारै बिचाळै इंया नई होणो चईयै। पण थारै मू झिको मोटो बणणो चावै बिनै दास बणणो पड़ैगो। अर थारै मू झिको प्रधान बणणो चावै बिनै सारा गो दास बणणो पड़ैगो। जिंया मिनख गो बेटो है, बो आपगी सेवा कराण कोनी आयो पण सेवा करण आयो है। अर भोत लोगां खातर आपगा प्राण देगे लोगां नै बचाण खातर आयो है।” जद यरीहो नगर ऊं जाण लागरया तो एक भोत मोटी भीड़ बांगै लारै चाल पड़ी। बठै सड़क गै किनारै दो आंधा आदमी बेठया। जद बानै ठा लागग्यो कै यीसू जावै है। तो बां रोळो मचागे केयो, “हे प्रभु, दाऊद गा बेटा म्हारै पर दया कर।” जद भीड़ में लोगां बानै धमकाया कै चुप रेओ। पण बे ओर जोर ऊं रोळो मचाण लागग्या। प्रभु दाऊद गा बेटा म्हारै पर दया कर। जद यीसू रुकगे केयो, “थे के चावो मैं थारै खातर करूं।” बां केयो, “प्रभु म्हे चावां म्हानै दिखण लागज्यै।” यीसू नै बां पर दया आ'गी। जद बण बांगी आंख्या पर हात लगायो, बिं टेम ई बानै दिखण लागग्यो। अर बे बिंगै लारै चाल पड़या। यीसू अर बिंगा चेला जद यरुसलेम कनै जेतुन प्हाड़ गै बैतफगे पूग्या तो यीसू आपगै दो चेलां नै ओ आदेस देगे भेज दिया कै, ईं सामलै गाम में जाओ। बठै जाण तांई थानै एक गधी बांदेड़ी मिलैगी। बिंगै कनै बिंगो बच्चों होवैगो। बानै मेरै कनै लिआओ। जे कोई थानै कीं केवै तो थे के देईयो प्रभु नै इंगी लोड़ है। बेगो ई पाछा पुगादैयगो। ओ परमेसर गी बात बताण आळा गो बचन पूरो होण खातर इंया होयो कै, यरुसलेम गा लोगों, देखो थारो राजा थारै कनै आण लागरयो है। बो दीन अर एक गधी गै बच्चै पर सवार है। जद चेला जा'गे बिंयाई करयो जिंया यीसू केयो। बे गधी अर बिंगै बच्चै नै ल्याया। अर बिं पर आपगी चादर घाल दी क्यूंकै यीसू नै बिं पर बेठणो है। भीड़ गै लोगां आपगा पोतिया रा पर बिछा दिया अर केई लोगां दरखतां गी डाळियां बाड बाडगे रा में बिछा दी। अर सारा लोग केवा, “प्रभु गी जय जयकार होवै, धन्य है दाऊद गो बेटो झिको प्रभु गै नाम ऊं आवै। प्रभु झिको सुरग में विराजमान है बिंगी जय जयकार होवै।” जद बो यरुसलेम में बड़यो तो सारै नगर में रोळो मचग्यो, ओ कुण है? लोगां इंया जबाब दियो, बो गलील गै नासरत गो परमेसर गी बात बताण आळो यीसू है। जद यीसू मिन्दर गै आंगणै में आयो तो बठै लोगां गी लगाएड़ी दूकाना देखी। जद बण सारै दूकानदारा नै भजा दिया। अर सारा गी दूकाना खिण्डा दी। बो बानै केण लागग्यो, सासतर इंया केवै, “ओ मेरो पराथना गो घर है। पण थे इनै डाकुआं गो अड्डो बणा राख्यो है।” मिन्दर में केई आंधा, लंगड़ा बिं कनै आया बण बानै ठीक कर दिया। जद मुख्य याजकां अर यहुदी नेम सिखाण आळा बिंगै चमत्कार गा काम देख्या अर लोगां गी ऊंची आवाज में सुण्यो कै प्रभु गी जय जयकार होवै। दाऊद गो बेटो धन्य है। जद बानै रीस आ'गी अर बां पूछयो, “तूं सुणै है कै के केण लागरया है?” यीसू बानै केयो, “सुणण लागरयो हूं।” थे सासतर में इंया कोनी पढयो कै, “थे टाबरां अर दूध पीण आळा टाबरा ऊं बडाई करवाई है।” फेर बानै बठै ई छोड़गे यरुसलेम नगर ऊं बारै बेतनियाह उड़ग्यो अर रात नै बठै ई रेयो। अगलै दिन दिनगै दिनगै नगर ऊं पाछो आण लागरयो तो बिनै भूख लागी। रा में बण एक अंजीर गो दरखत देख्यो अर बिंगै कनै गेयो, पण बिंगै एक ई अंजीर कोनी लागेड़ो दिख्यो। जद बण केयो, “तेरै कदी फळ ना लागै। अर बो दरखत जद ई सूक ग्यो।” जद चेला ओ देखगे हेरान हो'ग्या अर पूछयो, “ओ दरखत इतो बेगो किंया सुख ग्यो।” यीसू उतर दियो कै, “मैं थानै साची केऊं कै जे थारै में बिस्वास है अर मन में बेम कोनी राखो तो झिको मैं ईं दरखत सागै करयो है बिंयाई थे जे ईं प्हाड़ नै के दैयो, उठ अर समुंदर में पड़ जा तो बिंया होवैगो। थे पराथना में झिको कीं बिस्वास ऊं मांगो बो थानै मिल ज्यैगो।” जद यीसू मिन्दर में परचार करण लागरयो तो मुख्य याजक अर यहुदी बुडा लोगां बिंगै कनै आ'गे पूछयो, “हिसी बातां तूं किंगै हक ऊं करै। ओ हक तनै कण दियो है।” यीसू बानै उतर दियो, “मैं थानै एक बात पूछूं, जे थे जबाब देओगा तो मैं थानै बताऊंगा कै मनै ओ हक कण दियो है। यूहना गो बतिस्मो कठूं होयो? परमेसर कानूं या मिनखां गै कानूं।” जद बे आपसरी में बात कर'गे केण लागग्या, जे आपां के दियो, परमेसर कानूं होयो तो ओ पूछैगो तो थे बिस्वास क्यूं कोनी करयो? जे के दियो कै मिनखां गै कानूं तो लोग आपां नै मारैगा क्यूंकै बो एक परमेसर गी बात बताण आळो हो। जद बां केयो, “म्हानै ठा कोनी।” जद यीसू केयो, “फेर मैं थानै कोनी बताऊं, मैं ओ काम किंगै अधिकार ऊं करूं।” थे इंगै बारै में के सोचो? एक आदमी गै दो बेटा हा। बण मोटै बेटै नै केयो, “आज अंगूरा गै बाग में जा'गे काम कर।” बेटै केयो, “मैं कोनी जाऊं।” पण बाद में पछताओ कर'गे उड़ग्यो। फेर बण छोटियै बेटै कनै जा'गे बिंयाई केयो। बण केयो, “पिता, मैं जाऊं।” पण बो गेयो कोनी। थे बताओ, आं दोनां मू पिता गो केणो कण मान्यो। बां केयो मोटोड़ै बेटै। यीसू केयो, “मैं थानै साची केऊं, चुंगी लेण आळा अर वेसिया लुगाईयां परमेसर गै राज में थारूं पेली जासी।” मैं ईंखातर केण लागरयो हूं, “क्यूंकै बतिस्मो देण आळै यूहना थानै सई रा बताण आयो, पण थे बिं पर बिस्वास कोनी करयो। पण चुंगी लेण आळा अर वेसिया लुगाईयां बिं पर बिस्वास करयो। थे बानै देखगे मन कोनी बदळ्यो अर ना'ई बिस्वास करयो।” “एक ओर मिसाल सुणो। एक जमिन्दार हो। बण अंगूरां गो बाग लगायो अर बिंगै च्यारूंमेर बाड़ लगा दी अर रस काडण खातर एक कुण्ड बणायो अर ऊंचो डूंचियो रुखाळी खातर बणायो। फेर बाग नै ठेकै पर देगे परदेस उड़ग्यो। जद अंगूर तोडण गो टेम आयो तो बाग गै मालिक आपगै दासा नै बाग ऊं पांती ल्याण घाल्या। पण किसानां बानै कूट मारगे भजा दिया। फेर बण आपगै केई ओर दासा नै घाल्या, पण बांगै सागै बिंयाई करयो। केईयां नै कूटया, किनैई मार दिया अर किनैई पथर मारया। फेर आपगै बेटै नै बाग में भेज्यो। बण सोच्यो, मेरै बेटै गो आदर मान करसी। पण किसानां बेटै नै देखगे आपसरी में केण लागग्या, ओ तो बिंगो वारिस है। आपां इनै मार दैयां तो बाग आपणो होज्यी। जद बे बिनै घीसगे बारै लेग्या अर मार दियो। अब थे बताओ जद बाग गो मालिक आवैगो तो बो किसानां सागै के करैगो?” बां केयो, “बो बां दुस्ट लोगां नै माड़ी मोत मारैगो अर बाग गो ठेको दूसरा नै दे दैयगो झिका इमानदार होवैगा। बे बिनै टेम पर फळ दैयगा।” यीसू केयो, “थे सासतर गो बो बचन कोनी पढयो।” “झिकै पथर नै राज मिस्तिरियां बेकार समझयो बो ई कूंट गो सारा ऊं आच्छो पथर बणग्यो। हिस्यो प्रभु करयो, झिको म्हारी नजरां में आच्छो है।” ईंखातर मैं थानै केऊं कै परमेसर गो राज थारूं ले लियो जावैगो अर बो बानै दियो जावैगो झिका बिनै टेम पर फळ दैयगा। झिको ईं पथर पर पड़ैगो बो टोटा टोटा होज्यैगो। अर जे ओ पथर कीं पर पड़ैगो तो बिनै पीस दैयगो। जद मुख्य याजकां अर फरीसियां आ मिसाल सुणी तो बे जाणग्या कै म्हारै खातर केण लागरयो है। जद बे बिनै पकड़न गी कोसिस करण लागग्या पण बे लोगां ऊं डरा क्यूंकै लोग यीसू नै परमेसर गी बात बताण आळो माना हा। यीसू फेर बानै एक ओर मिसाल केण लागग्यो। “सुरग गो राज बिं राजा बरगो है झिकै आपगै बेटै गो ब्या करयो। राजा आपगै दासा नै भेज्या कै बां लोगां नै बुला ल्यावो झिका नै नूंतो देयड़ो है। पण बां लोगां आणो कोनी चायो। राजा फेर दासा नै केयो बानै जा'गे ल्यावो कै भोजन तैयार है, चालो। नूंतो देऐडि़यां लोगां बिं बात पर ध्यान कोनी दियो। अर कोई खेत में उड़ग्यो अर कोई आपगै काम पर उड़ग्यो। अर झिका बचा रेया, बां दासा नै पकड़गे कूट्या अर केईयां नै मार दिया। जद राजा नै रीस आ'गी, बण आपगै सैनिकां नै घाल्या। बां जा'गे सारा नै मार दिया अर बांगै नगर में आग लगा दी। फेर राजा आपगै दासा नै केयो, भोज तैयार है। पण झिका नै नूतो दियो बे लोग काम गा कोनी निकळ्या। ईंखातर गाम में जाओ अर गळियां में अर कूंटा पर झिको बी थानै मिलै बानै बुला ल्यावो। जद बे गेया अर जिता बी आच्छा माड़ा लोग बानै मिल्या बानै ल्याया अर बिंगो घर मेहमाना ऊं भरिजग्यो। पण जद राजा मेहमाना नै देखण आयो तो बण एक हिस्यो आदमी देख्यो झिकै गै ब्या गा गाबा कोनी पेरेड़ा। राजा बिनै केयो, हे बेली, तूं बिना ब्या गा गाबा गै मा किंया आ'ग्यो? पण बो बोल्यो कोनी। जद राजा आपगै दासा नै केयो, इंगा हात पग बांदगे अंधेरै में फेंक दैयो जठै लोग रोवै अर दांत पिसै। क्यूंकै बुलाएड़ा तो भोत है पण चुणेड़ा थोड़ा है।” फेर फरीसियां जा'गे ईं बात पर बिचार करण लागग्या, यीसू नै किसी बात में फसावां? बां आपगै चेला नै हेरोदेस गै सागै बिंगै कनै भेज्या। बां जा'गे यीसू नै केयो, “गुरूजी म्हे जाणा कै तूं साच्चो है अर सच्च में परमेसर गी रा गी सिक्सा देवै। कोई कीं सोचै तूं बिं बात गी फिकर कोनी करै क्यूंकै तूं आदमियां कानूं कोनी करै, तूं परमेसर कानूं करै।” फरीसियां पूछयो, “थे बताओ कै महाराज कैसर नै कर देणो ठीक है या कोनी?” यीसू बांगै बुरै इरादै नै जाण ग्यो अर केयो, “अरै कपटियो थे मनै क्यूं परखो? मनै एक सिको दिखाओ झिका ऊं थे कर देवो।” जद बां बिनै सिको दियो। बण केयो, “ईं पर किंगी फोटू अर किंगो लेख खुदेड़ो है।” बां केयो, “महाराज कैसर गो।” जद बण केयो, “झिको महाराज कैसर गो है बो कैसर नै दे दैयो अर झिको परमेसर गो है बो परमेसर नै दे दैयो।” ओ सुणगे बे हेरान हो'ग्या अर बठूं उड़ग्या। बिं दिन'ई केई सदूकी झिका दुसर जी उठण नै कोनी मानै हा बे बिं कनै आया अर पूछण लागग्या। “गुरूजी, मूसा गै नेम विधान गै अनुसार जे कोई लुगाई गो आदमी बे उळाद मरज्यै तो बिं लुगाई सागै बिंगो भाई ब्या कर सकै के? कै आपगै भाई खातर उळाद पैदा करै। इंया मानो कै सात भाई है। पेलै गो ब्या होयो अर बे उळाद मरग्यो। फेर दूसरै भाई बिंऊं ब्या कर लियो। जद तांईं सारा मरग्या इतै तांई सारा सागै इंया ई होयो। सारा बे उळाद मरग्या। अर बाद में बा लुगाई बी मर गी। अब थे बताओ दुसर जीण गै बाद बा सातां मू किंगी लुगाई हो'सी क्यूंकै बण सातां सागै ब्या करयो।” यीसू उतर दियो, “थे गळत सोचण लागरयाओ क्यूंकै थे सासतर अर परमेसर गी सकती नै कोनी जाणो। थानै ओ समझणो चईयै कै मरेड़ा ऊं जीवंता होवांगा जद किंगोई ना तो ब्या होवैगो अर ना ब्या करसी। पण बे सुरगदूतां बरगां होवैगा। पण मरेड़ा ऊं जींवता होण गै बारै में थे ओ बचन कोनी पढयो झिको परमेसर थानै दियो। मैं अबरहाम, इसहाक अर याकूब गो परमेसर हूं। मैं मरेड़ा गो कोनी पण जीवंता गो परमेसर हूं।” जद लोग बिंगी बात सुणगे हेरान हो'ग्या। जद फरीसियां सुण्यो कै यीसू आपगी बात ऊं सदूकियां गै मूं गै ताळो जड़दियो तो बे सारा भेळा होया। बामूं एक यहुदी नेम सिखाण आळै बिनै फसाण खातर पूछयो। “गुरूजी, नेम विधान में सारा ऊं मोटो आदेस किस्यो है।” यीसू केयो, “तूं पूरै मन आत्मा अर बुद्धी ऊं आपणै प्रभु परमेसर ऊं प्रेम कर। ओ सारा ऊं पेलो अर मोटो आदेस है।” अर ईं तरियां गी आ दूसरी आग्या है कै तूं आपगै पड़ोसी ऊं आपगै तरियां ई प्रेम करी। सारी नेम विधान अर परमेसर गी बात बताण आळा गी किताबां, आं दो आदेसा पर टिकेड़ी है। जद फरीसी सारा भेळा होया, बिं टेम यीसू बानै एक बात पूछी। “मसी गै बारै में थे के सोचो कै बो किंगो बेटो है?” बां केयो, “दाऊद गो।” बण पूछयो, “फेर आत्मा ऊं भरगे दाऊद बिनै प्रभु क्यामी केवै?” परमेसर मेरै प्रभु नै केयो, “मेरै दाहिणै पासै बेठगे राज कर। जद तांई मैं तेरै दुसमणां नै तेरै बस में ना कर दैयूं।” फेर जद दाऊद बिनै प्रभु केयो तो बिंगो बेटो किंया हो सकै। ईं बात गो कणैई उतर कोनी दियो। अर बिंगै बाद किनैई कोई बात पूछण गी हिम्मत कोनी पड़ी। यीसू फेर आपगै चेलां अर भीड़ गै लोगां नै केयो, “यहुदी नेम सिखाण आळा अर फरीसी मूसा गै नेम विधान नै सिखाण गा अधिकारी है। ईंखातर झिको कीं बे केवै बिं पर चालो अर बिंगो पालण करो। पण झिको कीं बे करै बिंया ना करियो। मैं ओ ईंखातर बताऊं कै बे केवै कीं है अर करै कीं ओर है। बे लोगां गै उपर इतो भार लद दैय कै बांगो चालणो मुसकिल होज्यै। पण बे आं बातां पर कोनी चालै। बे आच्छा काम लोगां नै दिखाण खातर करै। पण बे साची में आपगा तबीत अर चोळा नै मोटा कर'गे पेरे राखै जिंऊं लोग बानै ग्यानी समझै। बे त्यूंहारां में ऊंची जिग्यां बेठणो चावै अर सतसंग में बानै मोटो आसण मिलै। बे चावै लोग म्हानै देखगे निमस्कार करै। अर बे चावै कै लोग म्हानै मोटा गुरूजी केगे बुलावै। पण थे अपणै आपनै मोटा गुरू ना कुहाईयो क्यूंकै थारो साच्चो गुरू तो एक ई है। थे सारा भेन भाई हो। धरती पर किनैई आपगो आध्यात्मिक पिता ना केईयो क्यूंकै थारो पिता तो एक ई है झिको सुरग में है। अर ना किनैई आपगो मालिक केईयो क्यूंकै थारो मालिक तो एक ई है बो मसी है। थारै मू मोटो आदमी बो ई होवैगो झिको थारो सेवक बणैगो। झिको अपणै आपनै ऊंचो करैगो बिनै नीचो करिज्यैगो। अर झिको अपणै आपनै नीचो करैगो बिनै ऊंचो करिज्यैगो। अरै पाखण्डी नेम सिखाण आळो, अर फरीसियो, थारै सागै भोत बुरो होवैगो। थे लोगां खातर सुरग गै राज गो बारनो बंद करण लागरया हो। ना थे आप बिमै जावोगा अर ना दूसरा नै जाण देवोगा झिका कोसिस करै। अरै पाखण्डी नेम सिखाण आळो, अरै फरीसियो, थारै सागै भोत बुरो होवैगो। थे विधवा गा घर खुरड गे खा जावो। अर लोगां नै दिखाण खातर लंबी पराथना करो। ईंखातर थानै भोत मोटी सजा मिलैगी। अर कपटी नेम सिखाण आळो, अर फरीसियो, थारै सागै भोत बुरो होवैगो। थे जद किनैई आपगै सागै रळाओ तो धरती अर समुंदर पार कर जावो। जद बो थारै सागै रळज्यै तो बो थारूं दो गुणा जादा नरक गो भागी बणज्यै। हे आंधा गुरुवों थारै सागै बुरो होवैगो। थे केवो, कै मिन्दर गी सोगन खावां तो कीं कोनी होवै। पण जे मिन्दर गै मा सोनै गी सोगन खावां तो बिंगै सागै बंद जावांगा। अरै ओ मूरखो, मोटो कुण है? मिन्दर या मिन्दर गो सोनो? बो मिन्दर ई सोनै नै पवितर करै है। थे ओ केओ कै जे कोई मिन्दर गी बेदी गी सोगन खावै तो कीं बात कोनी। पण जे बेदी चढाएडै़ चढावै गी सोगन खावै तो बिंगै सागै बंद जावै। अरै ओ आंधो, मोटो कुण है? भेंट या बेदी झिका ऊं भेंट पवितर होवै। ईंखातर जे कोई बेदी गी सोगन खावै तो बेदी पर रखेड़ी चीज गी बी सोगन खावै। झिको मिन्दर गी सोगन खावै बो मिन्दर में रेण आळै गी बी सोगन खावै। अर झिको सुरग गी सोगन खावै बो परमेसर गै सिंहासन अर बिं पर बेठण आळै गी सोगन खावै। हे कपटी फरीसियो अर नेम सिखाण आळो, थारै सागै बुरो हो'सी। थे पोदिनो अर सूंप अर जीरै गो दसमांस देवो। पण थे नेम विधान गी बात जिंया न्याय, दया अर बिस्वास नै छोड दियो है। थानै चईयै कै आनै बी करतां रेवंता अर आनै ना छोड़ता। अरै ओ आंधा गुरुवों, थे लोग पाणी ऊं माछर छाणो जिंया छोटा नेम तो मानो पण ऊंट साबतो खाज्यो जिंया परमेसर गो मोटो नेम विधान कोनी मानो। हे कपटी फरीसियो अर नेम सिखाण आळो, थारै सागै बुरो हो'सी। थे आपगी बाटी अर थाळी बारूं तो मांजल्यो पण माऊं लाळच अर सुआरथ ऊं भरेड़ी है। अरै ओ आंधा फरीसियो, पेलां आपगी बाटी माऊं मांजो झिकै ऊं बा बारूं ऊं साफ दिखै। हे कपटी फरीसियो अर नेम सिखाण आळो, थारै सागै बुरो हो'सी। थे लिपेड़ी कबर बरगा हो झिकी बारूं तो सुणी दिखै। पण माऊं गळेड़ै हाड मांस ऊं भरेड़ी है। इंया थे बारूं तो म्हात्मा दिखो। पण माऊं पाखण्ड ऊं भरया पड़या हो। हे कपटी फरीसियो अर नेम सिखाण आळो, थारै सागै बुरो हो'सी। थे परमेसर गी बात बताण आळा खातर मोटा मोटा घर बणावो अर धरम गुरुवां गी कबरां नै सजावो। जे म्हे म्हारै बडेरां गै टेम में होवंता तो परमेसर गी बात बताण आळा नै मारण खातर सागै कोनी होवंता। इंगो मतलब ओ है कै थे मानो कै म्हे बांगै हत्यारां गी उळाद हां। ईंखातर झिको थारै बडेरा सरू करयो बिनै पूरो करो। अरै ओ सांप गा बच्चों, थे किंया सोचो कै नरक ऊं बच ज्यागां? ईंखातर मैं थानै बतावूं कै मैं थारै कनै परमेसर गी बात बताण आळा, बुद्धिमान अर गुरुवां नै भेजूंगा। थे बामूं भोत सारा नै मार दयोगा अर केईयां नै करूस पर चढा दयोगा अर केईयां नै सतसंग घर में कोड़ा मरवावोगा। अर बांगै लारै एक नगर ऊं दूसरै नगर तांई फिरोगा। थे निरदोस हाबिल ऊं लेगे बिरिकियाह गै बेटै जकरियाह तांई झिकै नै थे मिन्दर अर बेदी गै बिचाळै मरवा दियो, हर एक निरदोस आदमी गी मोत गो दण्ड थारै पर होवैगो। मैं थानै साची केऊं कै पेलां होएड़ा कामां गै द्वारा ईं पीढी गै लोगां नै बी दुख भुगतणो पड़सी।” यरुसलेम गा लोगो, थे परमेसर गी बात बताण आळा नै मारदैयो अर परमेसर गै भेजेड़ा पर पथर मारया। मैं किती बारी चायो जिंया कूकड़ी आपगै बच्चा नै पांख्या निचै भेळा करल्यै बिंया मैं बी थानै भेळा करूं पण थे लोग आ बात समझया कोनी। ईंखातर अब तेरो नगर पूरी तरियां उजड़ जावैगो। अर मैं थानै साची केऊं, “तूं मनै जद तांई कोनी देखैगो जद तांई तूं ओ ना केवैगो, धन्य है बो झिको प्रभु गै नाम ऊं आवै।” जद यीसू मिन्दर मू बारै आयो तो बिंगा चेला बिनै मिन्दर गी बणावट दिखाण कनै ले गया। जद यीसू बानै केयो, “ओ मकान थे सीधो खड़यो देखो। मैं थानै साची केऊं, ईं पर लगाएड़ी एक एक ईंट पटीज्यैगी।” यीसू जद जेतुन प्हाड़ पर बेठयो तो चेला बिंगै कनै आ'गे पूछयो, “म्हानै बता, ऐ बातां कद हो'सी? संसार गो अंत कद हो'सी अर थारै आण गै निसान गो म्हानै किंया ठा लागसी?” यीसू उतर दियो, “सावधान रेईयो, थानै कोई भटका ना दैय। मैं ओ ईंखातर केऊं, हिस्या भोत है झिका मेरै नाम में आ'गे केसी, मैं मसी हूं। बे भोत लोगां नै आ'गे भटकावैगा। जद थे लड़ाईयां गी बातां सुणो तो डरियो ना। इंया तो होवैगो पण ओ अंत कोनी हो'सी। हर एक राज एक दूसरै गै बिरोध में खड़या होज्यैगा अर काळ पड़ैगा अर भुचाळ आवैगा। पण जद लुगाई गै जापै गै टेम झिको बिनै दुख होवै इंयाई दुख सरू होवैगो। बिं टेम बे थानै सजा देण खातर पकड़ावैगा अर मरवावैगा अर सारी जातां गा लोग थारूं बेर करसी क्यूंकै थे मेरा चेला हो। बिं टेम भोत सै लोगां गो बिस्वास टूट ज्यैगो। बे एक दूसरै नै पकड़ावैगा अर एक दूसरै ऊं बेर करैगा। भोत सारा झूठी बात बताण आळा खड़या होज्यैगा अर लोगां नै भटकावैगा। क्यूंकै अधरम बढज्यैगो अर लोगां गो आपसरी गो प्रेम कम होज्यैगो। पण झिको आखिर तांई टिक्यो रेवैगो बिंगो ई उद्धार होवैगो। सुरग गो सुब समाचार सारै संसार में सारी जातियां नै सुणाई ज्यैगो जद अंत होज्यै'गो।” “ईंखातर जद थे खतरनाक बिनास आळी चिज झिकी गै बारै में दानिएल परमेसर गी बात बताण आळै बतायो, थे मिन्दर गी पवितर जिग्यां में खड़यो देखोगा, (झिका पढै बे इनै समझो) जद झिका लोग यहुदियां में है बे प्हाड़ां पर भाज जाईयो। झिको आपगी छत पर होवै बो कीं लेण नीचै ना उतरै। झिको खेतां में काम करण लागरयो है बो आपगा गाबा लेण पाछो ना आवै। अर झिकी लुगाईयां पेट ऊं होवै अर झिकी छोटै टाबरां नै दूध पियांवंती होवै बां खातर भोत दुख भरयो हो'सी। पराथना करो कै थानै पाळै गै टेम अर सब्त गै दिन ना भाजणो पडै़। बिं टेम हिसी बिपती आवैगी जद परमेसर धरती बणाई बिंऊं लेगे आज तांई कदी कोनी आयी अर ना'ई आवैगी। अर जे परमेसर बां दिनां नै घटावंतो ना तो कोई कोनी बचतो। पण बो आपगै चुणेड़ै लोगां खातर दिन कम करैगो। बां दिनां में जे थानै कोई केवै, देखो मसी अठै है या बठै है तो बिंगो बिस्वास ना करियो। क्यूंकै कपटी मसी अर झूठी बात बताण आळा खड़या होज्यैगा कै हिस्या चमत्कार गा काम दिखावैगा अर चुणेड़ा लोगां नै बी भटका देवैगा। ईंखातर थे याद राखियो, मैं थानै सारो कीं बता दियो। जे थानै कोई केवै, बो बिं कमरै में लुकेड़ो है या बन उजाड़ में है बठै ना जाईयो अर ना'ई बां पर बिस्वास करियो। मैं थानै केऊं जिंया बिजळी अगूणूं लेगे आथूण तांई चमकै बिंया ई मिनख गो बेटो परगट होवैगो। जिंया गिरजा नै ठा लागै लोथ बठै पड़ी है बिंयाई थे निसान देखोगा कै मिनख गो बेटो आवै।” बां दिना में झिका दुख पड़सी। “बिंगै बाद हातो हात ई सूरज काळो पड़ज्यैगो अर चांद गी रोसनी कोनी निकळैगी अर आकास गा तारा पड़ज्यैगा अर आकास गी सारी सकतियां हलाइजैगी।” बिं दिन मिनख गै बेटै गै आण गो निसान आकास में परगट हो'सी। जद धरती गा सारा लोग दुख करैगा। अर बे बिनै सकती अर मेमा सागै सुरग ऊं आवंता देखैगा। बो ऊंची आवाज में तुरई बजागे आपगै सुरगदूतां नै घालैगो। बे फेर एक कूंट ऊं दूसरी कूंट तांई आपगै चुणेड़ा लोगां नै भेळा करसी। अंजीर गै दरखत ऊं सीख ल्यो। जिंया बिंगी डाळी पोली होज्यै अर पता फूटण लागज्यै तो थानै ठा लागज्यै कै गरमी आण आळी है। बिंयाई जद थे सारो कीं होवंता देखोगा तो समझ लेईयो बो टेम कनै आ'ग्यो। मैं थानै साची केऊं जद तांई ऐ सारी बातां पूरी ना होज्यै जद तांई ईं पीढी गो अंत कोनी होवैगो। धरती अर आकास टळ सकै पण मेरी बातां कोनी टळ सकै। बिं दिन गै बारै में कोई कोनी जाणै, ना सुरगदूत अर ना खुद बेटो। एकलो परमेसर ई जाणै। जिंया नूह गै दिनां में होयो बिंयाई मिनख गै बेटै गो आणो हो'सी। जिंया जल प्रळय आणूं पेलां नूह जहाज पर चडण गै टेम तांई लोग मोज मस्ती में रेवंता अर आपगा सारा काम काज करता। जद जल प्रळय आयी तो बण सारा नै डबो दिया। मिनख गै बेटै गो बी इंया आणो हो'सी। बिं टेम खेत में काम करता दो आदमियां मू एक नै उठाइज्यैगो अर एक नै बठै छोडिज्यैगो। चकी पीसती दो लुगाईयां मू एक उठाइज्यैगी अर एक बठै छोडिज्यैगी। थे चोकस रेईयो क्यूंकै थे कोनी जाणो थारो प्रभु कद आसी। जे मालिक नै ठा होवै कै चोर कद आसी तो बो जागतो रेवै अर घर में चोरी कोनी होण दैय। ईंखातर थे बी तैयार रेओ, जद थे सोच्यो बी कोनी होवैगो, बिं टेम मिनख गो बेटो आज्यैगो। एक बिस्वास योग्य नोकर बो ई है झिको आपगै मालिक आपगै नोकरां पर अधिकार दियो है कै बानै टेम पर रोटी दैय। जे बो मालिक आगै आपगै नोकर नै काम करतो देखै तो बो बिनै जरूर बिंगो प्रतिफल दैयगो। मैं थानै साची केऊं, बो बिनै आपगी सारी संपती गो अधिकारी बणासी। पण जे बो दुस्ट दास सोचण लागज्यै कै मेरो मालिक अब कोनी आवै। अर आपगै साथी दासां नै कुटण लागज्यै अर पीण आळा गै सागै खाण पीण लागज्यै। बिं दास गो मालिक हिस्यै दिन आवैगो जद बिनै अडीक कोनी होवैगी। अर हिस्यै टेम झिकै नै बो जाणतो ई कोनी हो'सी। जद बो मालिक आ'गे बिं दास नै भोत ललकारैगो अर बिंगो भाग दुस्ट लोगां सागै ठेरावैगो। बठै रोणो अर दांतां गो पीसणो होवैगो। सुरग गो राज बां दस छोरियां बरगो हो'सी झिकियां आपगी लालटेण लेगे बीन सागै बात करण गेयी। बामै पांच समझदार अर पांच मूरख ही। झिकी मूरख ही बां आपगी लालटेण तो ले ली पण सागै तेल गी बोतल कोनी ली। पण झिकी समझदार ही बां लालटेण गै सागै तेल गी बोतल बी ले ली। जद बीन नै आण में देर होवंती दिखी तो बे सोगी। आदी रात नै रोळो मचग्यो कै बीन आ'ग्यो। चालो बिंऊं बात करां। जद बां दसां छोरियां आपगी आपगी लालटेण जगाण लागी। मूरखा समझदारां नै केयो, म्हानै थोड़ो सो तेल दे दैयो क्यूंकै म्हारी लालटेण बुझण लागरी है। पण समझदारां तेल देणूं ना कर दी। बां केयो, “ओ म्हानै आपनै मसाई सरैगो, थे गामूं जा'गे मोल लियाओ।” जद बे तेल ल्याण गयी तो बीन आ'ग्यो अर झिकी तैयार ही बे बिंगै सागै मा उड़गी अर बारनो बंद कर लियो। इंगै बाद बे दूसरी छोरियां बी आ'गी अर केण लागी, “हे प्रभु म्हारै खातर बारनो खोल दैयो।” बण उतर दियो, “मैं थानै साची केऊं कै मैं थानै कोनी जाणूं।” यीसू इंया बोल्यो, “ईंखातर चेतो राखो क्यूंकै थे बी बिं दिन नै कोनी जाणो अर ना बिं घड़ी नै जाणो।” सुरग गो राज बिं आदमी बरगो है झिकै परदेस जावंतै टेम दासा नै आपगी सारी संपती सूंप दी। बामूं एक नै पांच थेली चांदी गै रिपिया गी भरेड़ी दी अर दूसरै नै दो थेली अर तीसरै नै एक थेली ईंखातर दी कै बे आऊं कितो काम कर सकै। अर आनै धन देगे आप परदेस उड़ग्यो। झिकै नै पांच थेली मिली बण बांगो लेण देण करयो अर पांच थेली ओर कमा'ली। इंयाई दूसरै करयो अर बण दो थेली ओर कमा'ली। पण झिकै नै एक मिली बण कीं कोनी करयो अर जा'गे थेली माटी में बूर दी। बण बा एक थेली संभाळगे रख दी। भोत दिनां बाद बो आदमी परदेस ऊं आ'गे बांगै कनूं लेखो मांग्यो। झिकै नै पांच थेली दी बण केयो, “स्वामी थे मनै पांच थेली दी, मैं पांच ओर कमाई है।” बिंगै स्वामी केयो, “धन्य है तूं आच्छा अर इमानदार दास। तूं थोड़ै में इमानदारी दिखाई। मैं तनै भोत सारी चिजां पर अधिकारी बणावूंगा। अर आ'गे मेरै सागै खुसी मना।” अर झिकै नै दो थैली मिली बण ई केयो, “स्वामी थे मनै दो थैली दी। मैं दो ओर कमाई है।” बिंगै स्वामी केयो, “धन्य है तूं आच्छा अर इमानदार दास। तूं थोड़ै में बी भोत बिस्वास लायक रेओ। मैं थानै भोत सारी चिजां पर अधिकारी बणावूंगा। आ'गे मेरै सागै खुसी मना।” पण झिकै नै एक थेली मिली, बण आ'गे केयो, “हे स्वामी, मैं थानै जाणै हो कै तूं भोत करड़ो आदमी है। तूं जठै बीजै कोनी बठूं बाडै अर जठै तूं छिड़कै कोनी बठूं तूं भेळो करै।” ईंखातर मैं डरग्यो अर तेरी थेली नै संभाळगे रख दी। आ देख ले। स्वामी उतर दियो, “बुरा अर आळसी दास, तूं जाणै हो जठै मैं बीजू कोनी बठूं बाडूं अर जठै मैं छिडकूं कोनी बठूं भेळो करूं। फेर तूं इंया कर लेवंतो कै बा थैली बोपारियां नै दे देवंतो बे तनै ब्याज समेत पाछा देवंता।” ईंखातर स्वामी बिं कनूं बा थेली पाछी ले ली अर बिनै दे दी झिकै कनै दस ही। क्यूंकै झिको इमानदारी ऊं काम करसी बिनै ओर दियो जावैगो कै बिंगै कनै ओर बोळो होज्यै। पण झिको कोनी करसी बिंगै कनै झिको है बो ई पाछो लियो जावैगो। बण केयो, “ईं आळसी दास नै बारै अंधेरै में रेड़ दैयो जठै रोणो अर दांतां गो पीसणो है।” जद मिनख गो बेटो आपगी मेमा में आवैगो तो सारा सुरगदूत बिंगै सागै आसी अर बो आपगै मेमा गै सिंहासन पर बेठैगो। अर सारी जातां गा लोग बिंगै सामै भेळा करिज्यैगा अर जिंया गुआळियों भेड़ा ऊं बकरी न्यारी करै बिंयाई लोगां नै एक दूसरा ऊं न्यारा करसी। बो भेड़ा नै आपगै दाहिणै पासै अर बकरियां नै खबै पासै खड़ी करसी। जद राजा आपगै दाहिणै पासै खड़या नै केवैगो, “मेरै पिता कनूं आसिस लेऐड़ा लोगो, मेरै कनै आवो। अर बिं जगत गा अधिकारी बण जाओ झिकी मैं दुनिया गी सरसटी ऊं थारै खातर बणागे राखी। क्यूंकै जद मैं भूखो हो, थे मनै रोटी खुवाई। मैं तीसो हो, थे मनै पाणी प्यायो, मैं परदेसी हो, थे मनै आपगै घरे राख्यो हो। मैं नागो हो थे मनै गाबा दिया। मैं बीमार हो थे मनै दवाई दिराई अर मैं जेळ में हो, थे मनै मिलण आया। जद प्रभु नै मानण आळा लोग उतर देसी, प्रभु म्हे थानै कद खाणो पीणो दियो? अर म्हे कद थानै परदेसी देख्या अर आपगै घर में ठेराया अर कद नागा देख्या अर गाबा पिराया? म्हे कद थानै बीमार अर जेळ में देख्या अर थारूं मिलण आया? जद राजा बानै उतर देसी। मैं थानै साची केऊं, थे मेरै आं छोटा मोटा बिस्वासियां मू किंगैई सागै इंया करयो बो मेरै सागै करयो। फेर बो खबै पासै आळा नै केवैगो, हे सरापित लोगो, मेरै सामूं बिं अनन्त आग में जावो झिकी सैतान अर बिंगै दूतां खातर तैयार करी है। क्यूंकै मैं भूखो हो पण थे मनै रोटी कोनी दी। मैं तीसो हो, थे मनै पाणी कोनी दियो। मैं परदेसी हो, थे मनै आपगै घरे कोनी राख्यो। मैं नागो हो। थे मनै गाबा कोनी दिया। मैं बीमार अर जेळ में हो, थे मनै मिलण कोनी आया। जद बे उतर देसी, म्हे थानै कद भूखो, प्यासो अर परदेसी अर नागो अर बीमार अर जेळ में देख्यो। अर कद थारी सेवा कोनी करी। जद बो बानै उतर देवैगो, मैं थानै साची केऊं कै थे मेरै छोटै मोटै बिस्वासियां ऊं किंगै सागै इंया करयो बो मेरै सागै करयो। अर बे अनन्त सजा भोगसी पण धरमी अनन्त जीवन में जावैगा।” जद यीसू ऐ सारी बातां लोगां नै के दी तो आपगै चेला नै केण लागग्यो। थे जाणो हो कै दो दिन गै बाद फसह गो त्यूंहार है अर मिनख गो बेटो करूस पर चढाण खातर पकड़ायो जावैगो। जद मुख्य याजकां अर बुडा लोग कैफा नाम गै महा याजक गै आंगणै में भेळा होया। बां आपसरी में बात करी कै आपां यीसू नै धोखै ऊं पकड़ागे मरवा दैयां। पण बां केयो, “त्यूंहार गो टेम है, इंया ना करां लोगां में इंयाई रोळो मचैगो।” जद यीसू समौन कोढी गै घरे बेतनियाह गाम हो। तो बठै एक लुगाई पथर गै भांडै में भोत मेंगो सुरम आळो तेल ल्यायी। जद बो रोटी खाण खातर बेठयो तो बिंगै सिर पर ढोळ दियो। ओ देखगे चेलां नै रीस आयी अर केण लागग्या, “तेल खराब क्यामी करयो है।” इंयूं तो आच्छो हो कै इनै बेचगे पीसा गरीबा नै बांट देवंती। ओ सुणगे यीसू केयो, “इनै रोळा ना करो। अण मेरै खातर आच्छो काम करयो है।” गरीब तो थारै सागै सदां ई रेवैगा। पण मैं थारै सागै सदां कोनी रेऊंगा। अर झिको तेल मेरै सरीर पर ढोलै है अण मेरै सरीर नै दफणाण खातर तैयार करयो है। मैं थानै साची केऊं, “सारै संसार में जठै बी सुब समाचार गो परचार करयो जावैगो बठै ईं बात नै याद करी जावैगी।” जद यहूदा इस्करियोति झिको यीसू गो बारा चेला मू एक चेलो हो झिको मुख्य याजक कनै जा'गे केयो। “जे मैं यीसू नै पकाड़ाऊं तो थे मनै के देवोगा।” बां केयो, “तीस चांदी गा सिका।” अर बो बिं दिन ऊं ई यीसू नै पकड़ाण गो मोको ढूंडण लागग्यो। अखमरी रोटी गै त्यूंहार ऊं पेलै दिन चेलां यीसू नै पूछयो, “तूं फसह गी रोटी कठै खाणो चावै।” बण केयो, “नगर में एक आदमी कनै जा'गे केओ कै गुरू केवै है, मेरो टेम कनै आ'ग्यो। मैं आपगै चेलां सागै तेरै सागै त्यूंहार मणाणो है।” चेलां यीसू गी बात मानी अर फसह गी रोटी बठै तैयार करी। जद आथण होई तो बारा चेलां सागै रोटी खाण बेठयो। जद बे रोटी खाण लागग्या तो बण केयो, “मैं थानै साची केऊं कै थारै मू एक जणो मनै पकड़ासी।” ईं पर बे सारा भोत दुखी हो'ग्या अर केण लागग्या कै गुरूजी बो मैं हूं के? बण केयो, “झिकै मेरै सागै थाळी में हात रख राख्यो बो ई मनै पकड़ासी।” पवितर सासतर में इंया लिखेड़ो है, मिनख गो बेटो मारयो जावैगो अर बिनै पकड़ाण आळै गी हालत भोत बुरी है। इंऊं आच्छो हो कै बिंगो जन्म ई ना होवंतो। जद पकड़ाण आळै बिनै केयो, “प्रभु बो मैं हूं। बण केयो, तूं आप ई के दियो।” जद बे खाण गै टेम बेठया तो यीसू रोटी ली अर आसिस मांगगे तोड़ी अर चेलां नै देगे केयो खाओ ओ मेरो सरीर है। फेर बण लोटै में दाखरस लियो अर धन्यवाद करयो अर बानै देगे केयो, थे सारा इमूं पीओ। ओ दाखरस मेरै लोइ गै वायदै नै याद करावै। ओ वायदो परमेसर अर लोगां गै बीच में है। अर झिको भोत सारां गै पापां गी माफी खातर बहायो जावैगो। मैं थानै साची केऊं कै, दाख गो ओ रस बिं दिन तांई कदी कोनी पीऊंगा जद तांई थारै सागै आपगै पिता गै राज में नुओ दाखरस ना पीऊं। जद बे फसह त्यूंहार गा गीत गागे जेतुन प्हाड़ पर उड़ग्या। जद यीसू केयो, “थे सारा आज गी रात मेरै बारै में ठोकर खावोगा क्यूंकै पवितर सासतर में इंया लिखेड़ो है, मैं गुआळिया नै मारूंगा अर भेड़ां गो माल न्यारो न्यारो होज्यासी।” पण मैं आपगै जी उठण गै बाद थारूं पेलां गलील में जाऊंगा। ईं पर पतरस बोल्यो, जे सारा तेरै बारै में ठोकर खावै तो मैं कदी कोनी खाऊंगा। यीसू बिनै केयो, “मैं तनै साची केऊं कै आज गी रात कुकड़ गै बोलण ऊं पेलां तूं मेरो तीन बारी इनकार करैगो।” पतरस केयो, “जे मनै तेरै सागै मरणो बी पडै़ तो बी मैं तेरो कदी इनकार कोनी करूंगा।” इंया सगळा चेला केयो। जद यीसू आपगै चेलां गै सागै गतसमनै नाम गी एक जिग्यां में आयो अर चेला नै केयो, “थे अठै बेठया रेओ। मैं जा'गे पराथना करूं।” बो पतरस अर जबदी गै दोनां बेटा नै सागै लेगे गेयो। अर उदास अर दुखी होण लागग्यो। जद यीसू बानै केयो, “मेरो मन भोत उदास है अर मेरो प्राण निकळण लागरयो है। थे अठै ठेरो अर मेरै सागै जागता रेओ।” फेर बो थोड़ो सो आ'गै चालगे मुंदो पड़ग्यो अर आ पराथना करी, “हे पिता जे हो सकै तो ओ दुख मेरूं टळज्यै। पण फेर बी मेरी नई तेरी इच्छा पूरी होवै।” फेर बो चेला कनै आयो तो बे सूत्या पड़ैया। बण पतरस नै केयो, “थे लोग मेरै सागै थोड़ी देर ई कोनी जाग सक्या। जागता रेओ अर पराथना करता रेओ कै थे परीक्सा में ना पड़ो। आत्मा तो तैयार है पण सरीर कमजोर है।” फेर दुसर जा'गे आ पराथना करी, “हे पिता जे ओ दुख मेरै कनूं कोनी हट सकै तो तेरी इच्छा पूरी होवै।” जद बो पराथना कर'गे आयो तो बे फेर बानै सूत्या देख्या। बानै छोड़गे बो फेर उड़ग्यो अर बिं बात गी तीसर पराथना करी। जद बण चेला कनै आ'गे केयो, “अब सूत्या रेयो अर आराम करो। बा घड़ी आ'गी। माणस गो बेटो पापियां गै हातां में पकड़ाईजण आळो है। उठो, चालो, मनै पकड़ाण आळो कनै आग्यो है।” बो अजे इंया केण ई लागरयो हो। इतै में यहूदा झिको बारा मू एक हो बो आयो। बिंगै सागै मुख्य याजकां अर बुडा लोग अर एक मोटी भीड़ तलवार अर लाठियां लेगे आया। यहूदा बानै हिसारो करयो झिकै गो मैं लाड करूं बो ई है। बिनै थे पकड़ल्यो। बिं टेम यहूदा यीसू कनै आयो अर बोल्यो, “हे रब्बी निमस्कार” अर बिंगा लाड करण लागग्यो। यीसू बिनै केयो, “झिकै काम खातर तूं आयो है बो कर ले।” जद बां कनै आ'गे यीसू नै पकड़ लियो। यीसू गै चेला मू एक जण तलवार काडी अर महा याजक गै दास गो कान बाड दियो। यीसू बिनै केयो, “आपगी तलवार म्यान में राख झिका तलवार चलावै बानै तलवार ऊं नास करया जावैगा। तूं कोनी जाणै कै जे मैं केऊं तो मेरो पिता भोत सारा सुरगदूतां नै मेरी रक्सा खातर भेज दैयगो। क्यूंकै पवितर सासतर गी बातां इंया पूरी होणी जरूरी है।” जद यीसू भीड़ नै केयो, “मैं के कोई डाकूं हूं? झिको थे मनै पकड़ण खातर लाठियां अर तलवारां लेगे आया हो। मैं बो ई हूं झिको हर रोज मिन्दर में उपदेस देऊं जद तो मनै कोनी पकड़यो।” पण ओ सारो कीं जद होयो कै परमेसर गी बात बताण आळा गो केयेड़ो पूरो होवै। जद सारा चेला छोडगे भाजग्या। जद बे लोग यीसू नै पकड़गे कैफा नाम गै महा याजक कनै लेग्या जठै नेम सिखाण आळा अर बुडा लोग भेळा होयड़ा हा। पतरस सगळा ऊं लारै महा याजक गै आंगणै तांई गेयो। अर मा जा'गे आखरी फेंसलै गी बात देखण खातर बां लोगां सागै बेठग्यो। अब मुख्य याजक अर सारी पंचायत गा लोग यीसू नै मारण अर बिंगै बिरोध में झूठी गवाई देण खातर तैयार हा। पण भोतसा लोग बिं पर गवाई कोनी दे सक्या। फेर दो जण आया। बां केयो, “अण केयो है, मैं परमेसर गै मिन्दर नै ढा दैयूंगा अर तीन दिनां में फेर बणा दैयूंगा।” जद महा याजक खड़यो होगे यीसू नै पूछण लागग्यो, “तेरै पर लोग दोस लगाण लागरया है अर तनै कीं उतर देणो है के?” पण यीसू कीं कोनी बोल्यो। जद महा याजक बिनै केयो, “मैं तनै जींवतै परमेसर गी सोगन खुवाऊं, जे तूं परमेसर गो बेटो मसी है तो म्हानै बता दे।” यीसू बिनै केयो, “थे खुद आप ई के दियो अर मैं थानै ओ बी केऊं। अब माणस गै बेटै नै परमेसर गै दाहिणै पासै बेठयो अर आकास गै बादळां पर आवंता देखोगा।” ईं पर महा याजक आपगा गाबा पाड़या अर केयो, “ओ परमेसर गी निंदा करै। अब म्हानै गवा गी जरूरत कोनी, थे सगळा आप बी इंगी बात सुणी है।” बण पंचायत नै पूछयो कै, “थे इंगै बारै में के सोचो?” बां उतर दियो, “बो मारण गै लायक है।” जद बां बिंगै मूं पर थूक्यो अर बिंगै मूका मारया, अर कणैई थपड़ मारया अर केयो, “जे तूं मसी है तो बांगी बात कर'गे बता कै तेरै कण मारी?” जद पतरस आंगणै में बेठयो तो एक दासी आ'गे बिनै केयो, “तूं बी यीसू गलीली गै सागै हो।” पतरस केयो, “मैं कोनी जाणूं, तूं के केवै।” बण सारा गै सामै इनकार कर दियो। जद बो बारै आयो तो दूसरी दासी बिनै देख्यो अर लोगां नै केयो, “ओ यीसू नासरी गै सागै हो।” बण केयो, “मैं सोगन खा'गे केऊं, मैं ईं आदमी नै कोनी जाणूं।” झिका लोग बठै खड़या, बां केयो, “म्हानै तेरी बोली ऊं लागै, तूं बामू एक है।” जद पतरस केयो, “नइ अर सोगन खाण लागग्यो कै मैं बिं आदमी नै कोनी जाणूं।” बिं टेम कुकड़ो बोल्ग्यो। जद पतरस नै बा बात याद आयी कै तूं कुकड़ बोलण ऊं पेलां, मेरो तीन बारी इनकार करैगो। फेर बो बारै जा'गे भोत रोयो। जद दिन उग्यो तो सारा मुख्य याजक अर बुडा लोग यीसू नै मारण गी रे कर ली। बां बिनै बांदगे पिलातुस गै हात में दे दियो। जद यहूदा नै पतो लागग्यो कै बिनै दोसी बणा दियो तो बो पछतायो अर बे तीस चांदी गा सिका मुख्य याजकां अर बुडा लोगां कनै पाछा ल्यायो अर केयो, “मैं एक निरदोस नै पकड़वागे पाप करयो।” बां केयो, “म्हानै के करणो? तूं तेरो काम जाण।” जद बो चांदी गा सिका मिन्दर में फेंक गे उड़ग्यो अर जा'गे अपणै आपनै फांसी लगा ली। मुख्य याजकां केयो, “आं सिका नै गल्लै में राखणो ठीक कोनी। क्यूंकै ओ एक जणै गी मोत गो मोल है।” अर बां सारा रे कर'गे बां सिका ऊं परदेसियां खातर एक मूसाण भूमी गी जिग्यां मोल ली। बो खेत एक कुम्हार गो हो। ईंखातर बिं खेत गो नाम आज बी खून गो खेत केवै। झिको बचन यिरमयाह परमेसर गी बात बताण आळै गै द्वारा केयो गेयो पूरो होयो। बां बे तीस सिका ऊं ठैरायैड़ मोल ऊं बो खेत ले लियो। जिंया मनै प्रभु आग्या दी बिंया मैं बानै कुम्हार गै खेत गो मोल दे दियो। जद यीसू नै पिलातुस गै सामै खड़यो करयो तो बण पूछयो कै, “तूं यहुदियां गो राजा है के?” तो बण केयो कै तूं आप ई केवै है। जद मुख्य याजकां अर बुडा लोगां बिं पर दोस लगायो तो बण कोई उतर कोनी दियो। ईं पर पिलातुस बिनै केयो, “तनै सुणै है के? तेरै बारै में ऐ लोग किती बातां केण लागरया है।” पण यीसू बांगी कोई बात गो जबाब कोनी दियो। ओ देखगे पिलातुस नै भोत अचंभो होयो। पिलातुस कनै अधिकार हो कै बो त्यूंहार में लोगां खातर एक केदी नै छोड़ सकै झिकै नै बो चावै। बिं टेम बठै एक मानिजेड़ो बराबा नाम गो आदमी जेळ में हो। पिलातुस बठै भेळा होएड़ा नै पूछयो, “अब बताओ, दोना मू थारै खातर किनै छोडूं?” पिलातुस आ बात जाणै हो कै बां यीसू नै धोखै ऊं पकड़ायो है। पिलातुस गी घराळी बिनै समाचार घाल्यो जद बो न्याय गी कुरसी पर बेठयो हो अर केयो तूं बिं धरमी यीसू गै मामले में जादा हात ना देई। क्यूंकै मैं रात सपनै में भोत दुखी होयी। मुख्य याजकां अर बुडा लोगां भेळी होएड़ी भीड़ नै सिखा दियो कै आपां बराबा नै छुडा ल्यां अर यीसू नै मरवा दैयां। पिलातुस बानै पूछयो, “थारै खातर किनै छोड़ दैयूं,” बां केयो, “बराबा नै छोड़दैयो।” पिलातुस बानै केयो, “बिंगो के करूं झिको यीसू मसी कुहावै।” सारा केयो, “बिनै करूस पर चढा दे।” पिलातुस केयो, “बण हिस्यो के गळत काम कर दियो?” पण बे सारा जोर जोर ऊं रोळा मचाण लागग्या कै, “बिनै करूस पर चढाओ।” जद पिलातुस देख्यो कै कोई समाधान कोनी होवै अर रोळो बोळो होवै। बण पाणी लेगे सारां गै सामै आपगा हात धोया। अर केयो, “मैं इमै कोई पाप कोनी देख्यो। मैं इंगै बारै में निरदोस हूं। आ थारी जिमेदारी है।” सारै लोगां केयो, “इंगी मोत गा जिमेदार म्हे अर म्हारी उळाद होवै।” बण बराबा नै बांगै केण पर छोड़ दियो अर यीसू गै कोड़ा मरवागे करूस पर चढाण खातर बांगै हात में दे दियो। जद पिलातुस गै सिपाईयां यीसू नै किलै में ले जा'गे सारी भीड़ नै बिंगै च्यारूंमेर भेळी करी। यीसू गा गाबा खुलवागे बिनै चमकिलै लाल रंग गो चोळो पिरायो। कांटा गो मुकुट बिंगै सिर पर रख्यो अर बिंगै दाहिणै हात में सरकण्डो दियो अर बिंगै आगै गोडा टेकगे बिंगी मजाक उड़ाण लागग्या अर केयो, “हे यहुदियां गा राजा निमस्कार।” अर बिं पर थूक्यो, बो सरकण्डो लेगे बिंगै सिर पर मारण लागग्या। जद बां बिंगी मजाक कर ली तो बो चमकिलै लाल रंग गो चोळो खुलवागे बिंगा आपगा गाबा पिरा दिया अर बिनै करूस पर चढाण खातर ले चाल्या। बारै निकळतांई बानै एक समौन नाम गो कुरैनी आदमी मिल्यो। बां बिनै केयो, “इंगो करूस चकले चाल।” बे बिनै गुलगुता झिकै गो मतलब है खोपड़ी गी जिग्यां, बिनै बठै ले गया। बिनै दाखरस में खारो रस रळागे दियो, बण चाख'गे कोनी पीओ। फेर बां बिनै करूस पर चढायो अर परची घालगे गाबा बांट लिया। अर बठै बेठगे बिंगी रुखाळी करण लागग्या। अर दोस पत्र लिखगे बिंगै सिर गै उपर करूस पर लगायो। बिंगै उपर इंया लिखेड़ो, कै “ओ ई यीसू है, यहुदियां गो राजा।” जद बिंगै सागै दो डाकू बी करूस पर चढाया, एक दाहिणै पासै अर एक खबै पासै। आण जाण आळा लोग सिर हिलागे बिंगी मजाक करा। अर बिनै केवा हा, ओ मिन्दर नै ढाण आळा, अर तीन दिन में बणाण आळा। अपणै आपनै बचा। जे तूं परमेसर गो बेटो है तो करूस पर ऊं निचै उतरईआ। इंयाई सारा मुख्य याजक अर नेम सिखाण आळा अर बुडा लोग मजाक कर'गे केवा हा। अण ओरा नै तो बचाया अर अपणै आपनै कोनी बचा सकै। ओ तो इसराएल गो राजा है। जे ओ करूस पर ऊं निचै उतर जावै तो म्हे इंगो बिस्वास करल्यांगा। अण परमेसर पर भरोसो राख्यो है। जे बो चावै तो अब छुड़ाल्यै क्यूंकै अण आप ई केयो मैं परमेसर गो बेटो हूं। इंयाई बिंगै सागै डाकू बी करूस पर चढाएड़ा हा बे बी बिंगी निंदा करा। दोफारै बारा बजे ऊं लेगे तीन बजे तांई सारै देस में अंधेरो छायो रेयो। लगभग तीन बजे यीसू जोर गी आवाज में केयो, “एली एली लमा सबकतानी।” इंगो मतलब, हे मेरा परमेसर थे मनै क्यामी छोड़ दियो? झिका लोग बठै खड़या बां ओ सुणगे केयो, “बो एलियाह नै बुलावै।” बां लोगां मू एक जणो भाजगे लोगड़ लाठी गै आगै बांदगे सिरकै में डबोगे बिंगै मूं में देगे चुसायो। अर लोग इंया केवा अर देखां इनै एलियाह बचाण आवै है के? फेर यीसू जोर गी आवाज में रोळो मचागे प्राण त्याग दिया। अर मिन्दर गो पड़दो उपर ऊं लेगे निचै तांई पाटगे दो भाग हो'ग्यो अर धरती हालगी। अर चटान पाटगी। अर कबरा मू भोत सारा पवितर लोगां गी ल्हासां जी उठी। अर बे जींवता होगे कबरां ऊं बारै निकळगे पवितर नगर में गेया अर भोत सारा लोगां नै दिख्या। जद सुबेदार अर बिंगै सागै यीसू गी रुखाळी करण आळा, भुचाळ अर झिको कीं होयो बिनै देखगे डरग्या। अर केयो, “साची है ओ तो परमेसर गो बेटो हो।” बठै भोत सारी लुगाईयां झिकी गलील ऊं यीसू गी सेवा करती बे बिंगै सागै आयी अर दूर खड़ी देखण लागरी। बामै मरियम मगदलीनी, अर याकूब अर योसेस गी मां मरियम अर जबदी गै बेटै गी मां ही। जद आथण होई तो युसुफ नाम गो अरिमतिया गो एक अमीर आदमी झिको यीसू गो चेलो हो। बो पिलातुस कनै जा'गे यीसू गी ल्हास मांगी तो पिलातुस बिनै ले जाण गी आग्या दे दी। युसुफ यीसू गी ल्हास ले ली अर नुई चादर में लपेट ली। अर बिनै आपगी एक नुई कबर में राखी झिकी बण एक चटान में खुदवाई अर कबर गै मू आ'गै एक मोटो पथर लगा दियो। मरियम मगदलीनी अर मरियम दूसरी बठै कबर गै सामै बेठी। दूसरै दिन झिको सबत गो दिन हो, मुख्य याजक अर फरीसी पिलातुस कनै भेळा होया अर केयो, हे महाराजा, म्हानै याद है कै बो भटकाण आळो जद जींवंतो हो बण केयो मैं तीन दिनां गै बाद जींवंतो हो जाऊंगा। थे आग्या दैयो कै तीन दिनां तांई कबर पर पेरो लगायो जावै। कठै इंया ना होवै कै बिंगा चेला आ'गे ल्हास गी चोरी कर ल्यै अर लोगां नै केवै बो मरेड़ा मू जींवंतो हो'ग्यो। म्हे पेलां ईं बात गो बंदोवस्त करणो चावां। पिलातुस बानै केयो, “थारै कनै आदमी है। थे जा'गे आपगी समझ ऊं बिंगी रुखाळी करो।” अर बे रुखाळी करण आळा नै आपगै सागै लेग्या अर पथर पर निसानी लगागे कबर गी रुखाळी करी। सब्त गै बाद जद दीतवार गै दिन दिनगै दिनगै मरियम मगदलीनी अर दूसरी लुगाई मरियम कबर संभालण आई। जद सुरग ऊं प्रभु गो एक सुरगदूत बठै आयो हो। जद बिं टेम एक मोटो भुचाळ आयो। सुरगदूत आ'गे बो पथर हटागे बिं पर बेठग्यो। बिंगो रूप आकास गी बिजळी तरियां चमकै हो। अर बिंगा कपड़ा दूध गी तरियां धोळा हा। ओ देखगे कबर पर पेरो देण आळा सिपाई डरगे कांपण लागग्या। अर इंया हो'ग्या जिंया बे मरेड़ा होवै। जद सुरगदूत बां लुगाईयां नै केयो, “डरो ना। मनै ठा है थे यीसू नै ढूंडण लागरी हो। झिकै नै करूस पर चढायो। बो अठै कोनी। जिंया बण केयो, बो मरण गै बाद पाछो जींवंतो हो'ग्यो। आज्यो, बिं जिग्यां नै देखो, जठै बिनै सुणायेड़ो हो। अर जाओ। बिंगै चेला नै बताओ, बिनै मरेड़ा मू जींवंतो कर दियो। अर अब बो थारूं पेली गलील नै जाण लागरयो है। थे बिनै बठै ई देखोगी। झिको मैं थानै केयो है, बिनै याद राखियो।” बे लुगाईयां जद ई कबर नै छोड़गे खुसी ऊं भरगी। अर आ बात यीसू गै चेला नै सुणाण भाज पड़ी। एकदम यीसू बानै मिल्यो अर बोल्यो, “थानै सांती मिलती रेवै,” अर बां बिंगै पगां पड़गे बिंगी आराधना करी। जद यीसू बानै केयो, “डरो ना, मेरै संगीया कनै जाओ अर बानै गलील कानी चालण गो के दैयो। बठै ई मनै बे देखैगा।” अजे बे लुगाईया रा में ही कै, पेरेदारां भाजगे सारी घटना मुखिया याजकां नै जा'गे बताई। जद बुढा यहुदी नेतावां सागै रळगे एक योजना बणाई। बां सिपाईयां नै भोत सारो धन देगे केयो, “कै थे लोगां नै केईयो जद म्हे सूत्या हा तो यीसू गा चेला कबर पर आया अर बिंगी ल्हास नै चोर गे लेग्या। जे थारी ऐ बातां राजा तांई पूगैगी तो म्हे आपी संभाळ लेस्यां। थारै पर आंच कोनी आवैगी। जद बां पीसा लेगे बिंयाई करयो, जिंया बां केयो।” अर आ बात अजे तांई यहुदियां में इंयाई फेलेड़ी है। फेर बे ग्यारा चेला गलील गै बिं पहाड़ पर गेया जठै यीसू बानै बुलाया हा। बां यीसू नै देखगे बिंगी आराधना करी। पण केईयां गै मन में अजे तांई बेम हो। फेर यीसू बांगै कनै जा'गे केयो, “धरती अर सुरग गो सारो अधिकार मनै सूंपेड़ो है। ईंखातर जाओ। अर सारै देस गै लोगां नै मेरा चेला बणाओ। ओ काम थे पिता पुत्र अर पवितर आत्मा गै नाम ऊं बतिस्मो देगे करियो। झिका आदेस मैं थानै दिया, बां पर लोगां नै चालणो सिखाओ। अर याद राखियो, जगत गै अंत तांई मैं थारै सागै रेऊंगा।” परमेसर गै बेटै यीसू मसी गो सुब समाचार इयां सरू होवै। जिंया परमेसर गै दास यसयाह परमेसर गी बात बताण आळै लिख्यो कै, “परमेसर यीसू मसी नै केयो देख मैं आपगै दूत नै तेरै आगै भेजूं। झिको तेरै खातर रा तैयार करसी।” बो बन उजाड़ में खड़यो होगे जोर-जोर ऊं हेलो मारगे केण लागरयो है कै, “प्रभु गो रा तैयार करो अर बिंगी सड़का सीदी करो क्यूंकै बो आण आळो है।” परमेसर गी ईं बात गै हिसाब ऊं यूहना बतिस्मो देण आळो आयो झिको लोगां नै आपगै पापां ऊं माफी लेण खातर आपगो मन परमेसर कानी फेर गे बतिस्मो लेण गो परचार करतो। जद सारा यहुदियां गा अर यरुसलेम गा लोग आपगै पापां गी माफी खातर बिंऊं बतिस्मो लिओ। यूहना ऊंट गै ऊन गा बणेड़ा गाबा पेरतो अर आपगी कड़तू गै चामडै़ गी पेटी बांदे राखतो अर टिडी अर सेत खाणतो। अर लोगां नै ओ केणतो कै मेरूं बाद झिको आण आळो है बो मेरूं ई सकतीसाली ताकताळो है। अर मैं बिंगै बुंटा गो फितो खोलण गै ई काबिल कोनी। मैं तो थानै पाणी में बतिस्मो देऊं पण बो थानै पवितर आत्मा ऊं बतिस्मो देसी। फेर एक दिन यीसू गलील परदेस गै नासरत गाम ऊं आ'गे यरदन नदी में यूहना ऊं बतिस्मो लिओ। अर जद यीसू बतिस्मो लेगे पाणी ऊं उपर आया तो बां आकास नै खुलता देख्यो अर पवितर आत्मा नै आपगै उपर कबूतर गी तरियां उतरती देखी। अर आकास ऊं बाणी होयी कै, “तूं मेरो लाडलो बेटो है अर मैं तेरू भोत खुस हूं।” इंगै बाद में पवितर आत्मा यीसू नै गाम ऊं दूर बन उजाड़ में घाल दिओ। अर यीसू चाळीस दिन तांई बठै ई रेया अर सैतान बानै परखतो हो। बठै जंगळी जानवर रेंता अर सुरगदूत आ'गे बांगी सेवा करता। जद यूहना नै राजा हेरोदेस जेळ में बंद कर दिओ बिंगै बाद यीसू गलील परदेस में आ'गे परमेसर गै राज गो सुब समाचार गो परचार करयो। अर आ'गे केण लागग्या कै अब परमेसर गो राज आ'ग्यो है बे अब थारा राजा बणण आळा ई है ईंखातर आपगै पापां नै छोड़गे बांगी बाता पर बिस्वास करो। एकर बाद में यीसू गलील झील गै किनारै-किनारै जाण लागरया जद बां सीमोन अर अनद्रयास नै देख्या। बे मछली पकड़ण आळा हा अर झील में जाळ फेंकण लागरया। यीसू बानै केयो, “मेरै लारै आओ मैं थानै परमेसर खातर आदमी पकड़ण आळा बणाऊंगा।” बे बिं टेम ई जाळ छोड़गे बांगै लारै चाल पड़या। बठू थोड़ी सी दूर जाणै गै बाद में बां जब्दी गै बेटै याकूब अर यूहना नै किस्ती पर जाळ सांवटता देख्या। बां बानै देखतांई बांगै कनै बुलाया अर आपगै पिता नै मजदूरां सागै किस्ती पर छोड़गे बांगै लारै चाल पड़या। जद बे कफरनहूम परदेस में आया अर जद सब्त गो दिन आयो तो यीसू सत्संग घर में जा'गे उपदेस करण लागग्या। बांगो उपदेस सुणन आळा हेरान होण लागरया क्यूंकै बे यहुदी लोगां गै धर्म गुरुआ गी तरियां उपदेस कोनी करा पण बे अधिकार गै सागै बताण लागरया। बिं टेम ई बठै एक आदमी हो झिकै में ओपरी बडे़ड़ी ही। बो एकदम ई चिलागे बोल्यो, “हे नासरत गाम गा यीसू थारो मेरो के मेळ है? क्यू तूं मनै खत्म करण आयो है? मैं जाणू तूं पवितर जण अर परमेसर कानी ऊं आयो है।” यीसू बिनै ललकारयो कै, “चुप होज्या अर इमूं निकळज्या।” जद ओपरी जोर ऊं कूकगे बिनै मरोड़ी देगे निकळगी। ओ देखगे लोग हेरान होगे केण लागग्या कै आ के बात है? ओ तो अधिकार गै सागै सीख दैय। झिकै ऊं ओपरियां बी आंगो केणो मानै। यीसू झिको चमत्कार करयो बिंगी खबर गलील परदेस गै भोत सै गामा में फेलगी। फेर बे सत्संग घर ऊं चालगे सीधा याकूब अर यूहना गै सागै सीमोन अर अन्द्रियास गै घरे गेया। बठै सीमोन गी सासू बुखार में सुती पड़ी। अर घर आळा दबादब बिंगै बारै में यीसू नै बतायो। जद यीसू बिंगै कनै आ'गे बिनै आपगै हात ऊं खड़ी करी अर बिंगो बुखार उतरग्यो अर बा लुगाई बांगी सेवा में लागगी। आथण पेर गी जद सूरज डूबग्यो बिं टेम लोग झिका बीमार हा अर झिका में ओपरियां गी कसर ही बानै यीसू कनै ल्यावण लागग्या। अर बठै गा भोत सारा लोग बारनै कनै भेळा हो'ग्या। अर यीसू भोत जणा नै बीमारियां ऊं ठीक करया झिका न्यारी न्यारी बीमारियां ऊं दुखी हा। अर भोत जणा मू ओपरियां काडी। बां ओपरियां गा मूं ई बंद कर दिया। क्यूंकै बे जाण ही कै यीसू कुण। दूसरै दिन बे दिनगै दिनगै उठगे घर ऊं दूर सुनसान जिग्यां में जा'गे पराथना करण लागग्या। जद सीमोन अर बिंगा साथी बानै ढूंडण गेया। जद बे बानै मिलग्या तो केण लागग्या कै थानै सारा जणा ढूंडण लागरया। जद बां केयो, “आज्यो आपां नेडै़ नेडै़ गी बस्तिया में चालगे परचार करां। ईंखातर ई मैं अठै आयो हूं।” अर बे सारै गलील परदेस गै सतसंग घरां में परचार करण लागग्या अर लोगां मू ओपरियां बी काड़ता रेया। यीसू कनै एक कोढ होयड़ो आदमी आयो अर झुकगे बाऊं बिनती करण लागग्यो कै जे थे चाओ तो मनै ठीक कर सको। यीसू नै बिं पर दया आ'गी अर आपगो हात बिंगै लगागे केयो, “मैं तनै ठीक करणो चाऊं तूं ठीक होज्या।” अर बो हातो हात ई ठीक हो'ग्यो। अर बिनै सखताई ऊं जावंतै टेम केयो, “मैं झिको कीं करयो बिंगै बारै में किंनैई ना बताई अर जा'गे मिन्दर गै याजक नै आप गी जांच कराई झिकै ऊं बिनै आ लागै तूं ठीक हो'ग्यो है।” पण बण जा'गे सारा नै बता दिओ अर बांगी बात सारै फेलगी। ईं कारण ऊं यीसू गाम में कोनी जा सक्या क्यूंकै लोगां गी भीड़ लाग जावंती। ईंखातर बे गाम ऊं दूर सुनसान जिग्यां में रेण लागग्या। फेर ई चारूं पासै गा लोग बांगै कनै आंता रेया। केई दिना गै बाद में यीसू पाछा कफरनहूम परदेस में आया अर लोगां नै लागग्यो कै बे किंगैई घरे आयेड़ा है। फेर इता लोग भेळा हो'ग्या कै बारनै कनै पग रखण नै ई जिग्यां कोनी बची अर यीसू बानै बचन सुणाण लागरया। बिं टेम चार आदमी एक लकवै गै रोगी नै चक'गे बांगै कनै ल्याया। पण जद बे बोळी भीड़ गै कारण बांगै कनै कोनी जा सक्या तो झिकै मकान में यीसू बेठया बिं मकान गी छत नै अधेड़ गे सणै माची बिं आदमी नै बांगै सामै उतार दियो। यीसू बां लोगां गो बिस्वास देख गे बिं लकवै गै रोगी नै केयो, “बेटा तेरा पाप माफ होग्या।” बिं टेम बठै केई सासतरी बेठया हा। बे आप आपगै मन में सोचण लाग्या कै, ओ आदमी इयां क्यामी केण लागरयो है परमेसर गै अलावा दूसरो कोई पाप माफ कर ई कोनी सकै ओ तो परमेसर गी निंदा करण लागरयो है। यीसू जद ई आत्मा में जाणग्या कै ऐ आपगै मन में इंया सोचण लागरया है जद बां बानै केयो, “के थे थारै मन में हिस्यो क्यूं सोचण लागरया हो?” थे जाणो हो कै ईं आदमी ऊं ओ केणो सोरो है कै, “जा तेरा पाप माफ होग्या,” पण ओ केणो सोरो कोनी कै, “उठ, खड़यो हो अर आपगी मांची चक'गे उड़ज्या।” पण अब थे जाणल्यो कै मिनख गै बेटै नै धरती पर पाप माफ करण गो अधिकार है बां बिं लकवै गै रोगी नै केयो कै, मैं तनै केऊं, “तेरी मांची चकले अर आपगै घरे उड़ज्या।” जद बो खड़यो होयो अर सारा गै सामणै आपगी मांची चक'गे घरे उड़ग्यो। ओ देख गे सारा हेरान हो'ग्या अर परमेसर गी बडाई करण लागग्या कै इयां पेलां कदी कोनी देख्यो। एकर यीसू कफरनहूम ऊं चाल गे गलील गै झील गै किनारै पर गेया। बठै लोगां गी भीड़ भेळी होण लागगी अर यीसू बानै बचन सुणाण लागग्या। इंगै बाद में यीसू बठूं जाण लागरया तो बां रा में हलफई गै बेटै लेवी नै चुंगी गी चोकी पर चुंगी लेंतो देख्यो। यीसू बिनै केयो, “मेरै लारै आ'ज्या।” लेवी दबादब उठगे बांगै लारै चाल पड़यो। एक दिन यीसू आपगै चेला गै सागै लेवी गै घरे रोटी जीमण लागरया अर बांगै सागै केई ओर चुंगी लेण आळा रोटी जीमण लागरया झिका नै यहुदी धर्म गा नेता पापी मानता हिस्या केई लोग यीसू गै लारै चालता। बठै फरीसी गुट गा केई लोग हा झिका यहुदी नेम सिखाणता। यीसू नै बांगै सागै रोटी जीमता देख्या झिका नै बे पापी लोग मानता। जद बे यीसू गै चेला नै पूछण लाग्या, “थारो गुरू चुंगी लेण आळा अर पापी लोगां सागै खाणो पीणो क्यामी करै?” यीसू ओ सुण गे बानै समझायो कै, “चंगा भला लोगां नै डाक्टर गी लोड़ कोनी पडै़ पण बीमार लोगां नै पडै़। मैं धरमी लोगां नै कोनी पण पापी लोगां नै सुधारण आयो हूं।” एकर यूहना गै चेला अर फरीसी गुट गै लोगां बरत राख्यो। केई लोग यीसू नै आ'गे पूछयो कै यूहना गा चेला अर फरीसी गुट गा लोग बरत राखै पण थारा चेला क्यूं कोनी राखै? यीसू बानै केयो, “जद तांई बीन बरातीयां गै सागै होवै बे बरत कोनी राख सकै।” पण बो दिन आवैगो जद बीन आऊं न्यारो होज्यै'गो बिं टेम ऐ बरत राखैगा। कोई आदमी पुराणै कपडै़ पर नुअ कपडै़ गी कारी कोनी लगावै। इयां करैगो तो बा कारी भेळी होगे पुराणै कपडै़ नै पाड़ दैयगी। इंयाई कोई आदमी नूंअ दाखरस नै पुराणै चमडै़ गै झोलै में कोनी भरै। क्यूंकै इंया करण ऊं नुओ दाखरस फूल गे चमडै़ गै झोलै नै पाड़ दैयगो। नूंअ दाखरस नै तो नूंअ झोलै में ई भरै। एकर सबत गै दिन यीसू अर बिंगा चेला खेता माखर जाण लागरया तो चालता चालता बे चेला कणक गी बालां नै तोड़गे भोर भोरगे खाण लागग्या। फरीसी गुट गा केई लोग ओ देखगे यीसू नै पूछयो, “तेरा चेला आज गै दिन हिस्यो काम क्यामी करण लागरया?” यीसू बानै केयो, “थे पढयो कोनी कै जद दाऊद अर बिंगा चेला नै भूख लागी तो बां के करयो? बां सारा ऊं मोटै याजक अबियातार गै दिना में परमेसर गै भवन जा'गे चढाएड़ी रोटी खाई झिकी नै याजक गै सिवाय ओर कोई कोनी खा सकै हो। क्यूंकै ओ नेम रखेड़ो हो।” जद यीसू बानै केयो, “परमेसर सबत गो दिन आदमी खातर बणायो है आदमी नै ईं दिन खातर कोनी बणायो।” परमेसर गै कानी ऊं आयेड़ो मिनख गो बेटो ईं दिन गो मालिक है। फेर यीसू एकर सबत गै दिन सत्संग घर में गेया बठै एक आदमी हो झिकै गै हात गै लकवो होयेड़ो। जद केई लोग यीसू पर दोस लगाण गी ताक में बेठया कै देखां आपां ओ आज गै दिन इनै ठीक करै, कै कोनी? यीसू बिं लकवै होयेड़ आदमी नै सारा गै सामै खड़यो होण खातर केयो। जद यीसू बां दोस लगाण आळा आदमिया नै पूछयो कै नेम विधान गै अनुसार सबत गै दिन आच्छो काम करणो चईयै या बुरो? किंगी जान बचाणी चईयै या ना बचाणी चईयै? पण आं बाता गो बां कनै कोई जबाब कोनी हो। जद यीसू च्यारूंमेर खड़यै बां लोगां नै गुसै ऊं देख्या। अर बिं लकवै गै आदमी नै केयो तेरो हात आगै कर अर बण आपगो हात आगै करयो अर बो जदी ठीक हो'ग्यो। जद फरीसी लोग बारै आ'गे यीसू नै मारण गी योजना बणाण लागग्या। इंगै बाद में यीसू आपगै चेला सागै गलील झील गै किनारै उड़ग्या। अर लोगां गी मोटी भीड़ बां कानी चाल पड़ी। झिकी गलील अर यहुदियां प्रांत गै गांवा ऊं, यरुसलेम ऊं, इदूमिया प्रांत गै गांवा ऊं, यरदन नदी गै दूसरी ओर गै गांवा ऊं, सूर अर सेदा प्रांत गै गांवा ऊं आयेड़ी ही। ऐ सारा यीसू गै चमत्कारा नै सुण गे बां कनै आया। भीड़ बोळी होण गै कारण यीसू आपगै चेला नै केयो कै मेरै खातर एक किस्ती तैयार राखो। जिंऊं ऐ लोग मनै दबा ना सकै। क्यूंकै बां भोत सै लोगां नै ठीक करया ईंखातर भोतसा लोग बांगै हात लगाणो चावा झिका रोगी हा। अर झिकै लोगां में ओपरियां गी कसर ही बां लोगां गी ओपरियां यीसू नै देख गे बिंगै आगै लिटण लाग ज्यावंती अर चिलागे केवंती कै तूं परमेसर गो बेटो है। पण यीसू ओपरियां नै खबरदार करी कै बे ना बतावै कै यीसू कुण है। फेर यीसू एक पहाड़ पर चढ'ग्या अर झिका नै बे चावा बानै कनै बुलाया। जद बां बामूं आपगा बारा जणा नै आपगै सागै रेण खातर अर लोगां में परचार करण खातर, अर लोगां मू ओपरी काडण गो अधिकार देगे बानै चुण लिया। झिकै बारा लोगां नै बण चुणया बे ऐ है समौन झिकै नै यीसू पतरस नाम दिओ, जब्दी गो बेटो याकूब, यूहना, अन्द्रियास, फिलिप्पुस, बरतुल्मे, मत्ती, थोमा, हलफई गो बेटो याकूब, तदाई, सीमोन झिको देस भगत हो, अर यहूदा इस्करियोती झिकै यीसू नै दुसमणा गै हात पकड़ायो हो। फेर यीसू एक घर में आया तो बठै लोगां गी भीड़ इती भेळी होगी कै रोटी जीमण नै ई सांस कोनी मिल्यो। जद यीसू गै घराणै नै ओ ठा लागग्यो कै बिनै रोटी जीमण नै ई टेम कोनी मिल्यो तो बां बानै केयो, “इंगो दिमाक खराब हो'ग्यो। अर बे बानै लेण खातर गेया।” बठै यरुसलेम ऊं आयेड़ा यहुदी धर्म गा लोग केण लाग्या, “इंगै मा सैतान गो प्रधान बेलजबूल है अर ओ बिंगी मदद ऊं ओपरिया नै बारै काडै है।” यीसू बानै कनै बुला'गे उधारण ऊं समझाण लाग्या कै, “सैतान गो प्रधान आपगै सैतान नै किंया भजा सकै अर काड सकै। जे एक राजा गै राज में आपस में फूट पड़ज्यै तो बिंगो राज किता दिन चालै। जे एक घर में फूट पड़ज्यै तो बो घर किंया बदंयो रे सकै। अर सैतान जे आपगै भूता नै काडण लागज्यैगो तो बिंगो सारो राज खत्म होज्यै'गो। जे कोई आदमी एक तकड़ै आदमी गै घर नै लूटणो चावै तो पेलां बिं तकड़ै आदमी नै बांधणो पड़ैगो। बिंगै बाद में ई बिंगै घर नै लूट सकैगो। मैं थानै एक पक्की बात बताऊं कै परमेसर हर प्रकार गै पाप अर निंदा नै माफ कर दैयगो। जे कोई पवितर आत्मा गी निंदा करैगो तो बिनै कदी माफ कोनी करैगो। पण बो नरका गो भागी बणैगो। यीसू आ बात ईंखातर कैई कै लोग केवा कै यीसू में ओपरी गो निवास है।” इंगै बाद में बठै यीसू गी मां अर बिंगा भाई आया। अर बां बारूं ई बुलावो भेज्यो। यीसू गै चारूंमेर लोगां गी भीड़ बेठी अर बां यीसू नै आ'गे केयो, “थारी मां अर थारा भाई थानै मिलण खातर बारै खड़या है।” यीसू बानै केयो, “मेरी मां अर मेरा भाई कुण है।” जद बण चारू मेर बेठयै लोगां कानी देखगे केयो, “ऐई मेरी मां अर मेरा भाई है। मेरा बेई भाई, भेन अर मां है झिका परमेसर गी इच्छा पर चालै।” फेर बे एकर झील गै किनारै पर खड़ी लोगां गी भीड़ नै उपदेस देण लागरया अर आप लोगां ऊं थोड़ी दूर झील गै मा किस्ती में बेठया। बां लोगां नै भोत सी बातां मिसाल ऊं समझाई अर उपदेस देवंता केयो कै। “ध्यान ऊं सुणो, एकर एक किसान आपगै खेत में बीज गो छिंटो मारण गेयो। जद बो छिंटो मारण लागरयो तो केई बीज रा पर पड़ग्या अर पंछियां आ'गे बानै चुग लिआ। केई बीज हिसी जिग्यां पड़या जठै जिग्यां पक्की ही पण बे बीज बठै उग्या तो हा। पण तावड़ो बोळो होण गै कारण बे बेगाई सुकग्या क्यूंकै बांगी जड़ जादा डूंगी कोनी बणी। केई बीज झाड़का में पड़गे उगग्या पण झाड़का मोटा बधगे बानै दबा दिआ। पण केई बीज आच्छी भूमी पर पड़या झिका उगगे केई तीस गुणा, केई साठ गुणा अर केई सो गुणा फळ ल्याया।” फेर यीसू बानै केयो, “ईं मिसाल नै आच्छी तरियां जाण गे इंगो मतलब समझो।” जद लोगां गी भीड़ बढगी तो बिंगै बारा चेला अर झिका लोग यीसू गै सागै हा बां ईं मिसाल गो मतलब पूछयो। यीसू बानै केयो, “परमेसर गै राज गै बारै में झिकी बाता गो दूसरा नै ठा कोनी बो थानै बताण लागरयो हूं। दूसरै लोगां नै तो मैं मिसाल ऊं बताऊं। जिंऊं जिस्या ऐ लोग करै बिंया ई देखता तो रेवै पण कदी सच्चाई नै ना जाण सकैगा अर सुणता रेवै पण समझ ना पावै अर आंगा पाप माफ होण खातर मेरै कानी ना मुड़ सकैगा।” फेर यीसू बानै केयो, “जे थे ईं मिसाल गो मतलब ना समझ सको तो दूसरी मिसाल नै समझणो ओखो होवैगो। ईं मिसाल गो मतलब ओ है, कै परमेसर गो बचन सुणाण आळो आदमी, बीज छिड़कणै आळै किसान गी तरियां है। अर रा बे लोग है झिकै पर बीज गिरैया तो हा अर बां बचन सुणयो हो पण सैतान बांगै माऊ दबादब बीज रूपी बचन काड़ ले गयो। अर पक्की भूमी बे लोग है झिका बचन नै आनंद ऊं सुण्यो तो हो। पण पूरी जड़ ना घालण गै कारण थोड़ा दिना गै बाद क्ळेस अर बिरोध गै कारण पाछा हट ज्यै। झाड़का बे लोग है झिका में बीज तो गिरैया यानी बचन सुण्यो पण परिवार गी चिंता में फस गे दबग्यो अर बिना फळ गै रेग्यो। आच्छी भूमी बे लोग है झिका स्वीकार कर'गे तीस गुणा, साठ गुणा अर सो गुणा फळ ल्यावै है।” यीसू बानै केयो, “आदमी दीयो जगा गे बठळ निचै कोनी रखै। दीयो तो हमेसां ऊंची जिग्यां पर रखै। इंयाई झिकी सच्चाईयां परमेसर लोगां ऊं आज तांई लकोगे राखी है बानै बे परगट करैगा। आं बाता नै ध्यान ऊं सुणो अर समझो। मेरी बात नै ध्यान ऊं सुणो अर बिं पर बिचार करो मेरी बाता पर जितो ई थे बिचार करोगा बितो ई थे जादा समझ पावोगा। झिको मेरी बात पर ध्यान देगे समझै बानै परमेसर ओर जादा समझण गी ताकत दैयगो। झिका ध्यान देगे ना समझै, बे जितो कीं जाणै बिनै ई भूल ज्यैगा।” फेर यीसू केयो, “परमेसर गो राज हिस्यो है जिंया एक आदमी बीज गो छिंटो मारै। अर जद बो दिन में आपगै काम में लीन होगे रात नै सोज्यै अर दिन गै उठगे देखै तो बीज आपी उगगे मोटो हो'ज्यै अर किसान नै ठाई कोनी होवै कै ओ किंया हो'ग्यो। धरती अपणै आप अनाज पैदा करै। पेलां बीज फूटै फेर अंकुर बणगे उपर बाल निकळै फेर बाल में दाणा बणै। अर जिंयाई दाणा पकगे तैयार हो'ज्यै तो किसान दांती लेगे बिनै बाडल्यै अर काडगे घरे लियावै।” फेर यीसू केयो, “मैं थानै कीं तरियां गी मिसाल ऊं समझाऊं कै परमेसर गो राज किंगै बरगो है। बो राई गै दाणै गी तरियां होवै झिको सारै बीजा में छोटो होवै। पण जद बिनै बीज दैय तो बिमू एक मोटो बूंटो निकळै अर बिमुं इती मोटी डाळियां निकळै कै आकास गा पंछी बिं पर बसेरो करण लागज्यै।” हिसी हिसी मिसाल देगे जठै तांई हो सक्यो यीसू बानै परमेसर गा बचन समझाया। बिना मिसाल गै बां कीं कोनी समझायो। पण आपगा चेला जद एकला होंता तो सिरफ बानै ई मिसाल गो अरथ बतावंतो। बिं दिन ई जद रात ढळण लागगी तो यीसू आपगै चेला नै केयो, “आज्यो आपां गलील झील गै दूसरै पासै चालां।” जिंयाई यीसू किस्ती पर चढया बिंयाई बानै लोग भीड़ नै दूर करता आप किस्ती पर चढ'ग्या अर बठू चाल पड़या। पण बांगी किस्ती लारै ओर बी किस्ती ही। जद चाणचकै ई तकड़ी आंधी आ'गी अर किस्ती ऊं उपाकर मोटी मोटी लेहरा चढण लागगी। अर किस्ती पाणी ऊं भरीजण लागगी। यीसू किस्ती गै लारलै पासै एक गदी गो सीराणो लगा गे सूत्या पड़या। बांगा चेला बानै जगागे केयो, हे गुरू थानै म्हारो थोड़ो भोत ई फिकर कोनी के? म्हे डूबण लागरया हां। यीसू खड़या होया अर आंधी नै ललकारी कै, “सांत होज्या।” इतो केंता ई आंधी एकदम ई बंद होगी। जद बां आपगै चेला नै केयो, “थे क्यामी घबरा रया हो थानै मेरै पर भरोसो कोनी हो के? कै मैं थानै बचा कोनी सकूं।” सारा चेला घबराग्या अर आपसरी में अचंभो करण लागग्या कै ओ हिस्यो कुण आदमी है झिकै गो केणो आंधी अर लेहरा मानै। यीसू अर बिंगा चेला गलील झील नै पार कर'गे गरासेनिया नगर में पूग्या। जद बे किस्ती ऊं उतरया तो बां कनै एक आदमी मूसाणा मू निकळ गे आयो। बिमै ओपरी बडे़ड़ी। बो मूसाणा में ई रेंतो अर बो सांकला ऊं बांदेड़ो बी किंगैई ताबै कोनी आंतो। क्यूंकै बिनै केई बरीयां सांकला ऊं बांदयो पण बो सांकला नै तोड़ गे टोटा टोटा कर देंतो। अर बो किंगैई ताबै कोनी आंतो। बो रात दिन मूसाणा अर पहाड़ा पर कूकतो। चिलाणतो रेंतो अर अपणै आपनै दगड़ा ऊं घायल कर लेंतो। बण दूर ऊं ई यीसू नै देख्यो अर देखतांई भाज्यो अर आ'गे बानै निमस्कार करी। अर जोर ऊं चिलागे बोल्यो, “हे यीसू परम प्रधान परमेसर गा बेटा तेरो मेरो के मेळ है? मैं तनै परमेसर गी सोगन खुआंऊ कै तूं म्हानै दुख ना दे।” यीसू बिनै केयो, “ऐ बुरी आत्मा इमूं निकळज्या।” यीसू बिनै पूछयो, “तेरो के नाम है?” बण आदमी बानै केयो, “मेरो नाम पळटण है क्यूंकै मैं एक कोनी म्हे भोत सारी हां।” अर बो यीसू ऊं बिनती करण लागग्यो कै, “तूं म्हानै ईं देस ऊं बारै ना काड?” अर बिनती कर'गे केयो, “बठै पहाड़ पर सूरां गो एक मोटो झुण्ड चरण लागरयो है, म्हानै बामै भेज दे कै म्हे बामै बड़ ज्यावां।” सूर दो हजार गै सारै सारै हा। अर बण बांनै आग्या दी बे सारी ओपरी आत्मा कड गे सूरां में बड़गी अर सारा सूर एकदम ई झील में जा पड़या अर डूब गे मरग्या। सूरां गा गुआळिया ओ देख गाम कानी भाज्या अर जा'गे गाम गै लोगां नै सारी होयेड़ी बात बताई। जद लोग देखण आया झिको कीं बठै होयो हो। जद लोग बठै आया तो बां झिकै आदमी में ओपरी ही बिनै गाबा पेरेड़ो आराम ऊं यीसू कनै बेठयो देख्यो तो बे डरग्या। गुआळिया बिं आदमी अर सूरां गै बारै में सारो कीं लोगां नै बतायो। ओ सुण गे सारा लोग बांऊ बिनती करण लाग्या कै म्हारै इलाकै ऊं उड़ ज्याओ। जद यीसू किस्ती पर चढण लाग्या तो बो ओपरी बडे़ड़ो आदमी गिड़गिड़ा गे केण लागग्यो कै मैं थारै सागै चालूंगा। पण यीसू बिनै मना कर दिओ। अर बिनै केयो, “तूं तेरै घरे जा'गे बता कै परमेसर तेरो कितो भलो करयो है।” अर बो आदमी दिकापुलिस प्रांत गै गांवा में जा'गे बताण लागग्यो झिको कीं बिंगै सागै होयो अर सारा सुणन आळा सुणगे हेरान होया। जद यीसू झील गै दूसरै किनारै पूग्या तो बांगै चारूंमेर लोगां गी भीड़ भेळी होगी। जद बठै यहुदियां गै पराथना भवन गो सरदार आयो। बिंगो नाम याईर हो। बो यीसू नै देखतांई पगां पड़ग्यो। अर रो रो गे बिनती करण लागग्यो कै मेरी छोटी बेटी मरण आळी है थे थारो दया गो हात बिं पर रखो जिंऊं बा बच ज्यै। यीसू बिंगै सागै चाल पड़या। लोगां गी भीड़ बांगै उपर पड़ती जावै ही। बिं भीड़ में एक लुगाई ही झिकी गै बारा साला ऊं खून निकळण गो रोग हो। बा केई डाक्टरां ऊं ईलाज करा करा गे तंग आ'गी पण ठीक कोनी होई। बण आपगो सारो धन ईलाज में लगा दिओ पण बा ठीक होण'गी बजाय ओर जादा बीमार होंती रेई। जद बण यीसू गै बारै में सुणयो तो सोच्यो जे मैं यीसू गै पलै गै हात लगा दैयूं तो ठीक हो'ज्यूंगी जद बा भीड़ माखर आ'गे यीसू गै लारूं कपडै़ गै पलै गै हात लगायो। अर हात लगाणता ई खून निकळणो ठीक हो'ग्यो। अर बण मेहसूस करयो कै मैं ठीक होगी। यीसू नै जद ई ठा लागग्यो कै मेरै सरीर मू सामरथ निकळी है जद बा लारै मुड़ गे भीड़ ऊं पूछयो मेरै हात कण लगायो है। यीसू गै चेला केयो, “थे आप ई देखल्यो भीड़ किंया उपर पड़ै है अब किंगो नाम ल्यां कै हात कण लगायो है।” यीसू चारूंमेर देखण लागरया कै, “बांगै कण हात लगायो है।” फेर बा लुगाई यीसू गै कनै आ'गे पगां पड़गे निमस्कार करी। क्यूंकै बा जाण गी कै मैं ठीक होई हूं अर डरती डरती झिको कीं बण करयो सारो बता दिओ। यीसू बिनै केयो, “बेटी तेरै बिस्वास ई तनै ठीक करयो है आराम ऊं जा आ बीमारी तनै दूसर ना होवै।” जद यीसू बिंऊं बात करण लागरया तो याईर प्रधान गै घर ऊं केई लोग आया अर केण लाग्या, “तेरी बेटी गुजर गी। अब गुरूजी नै ना फोड़ा घाल।” यीसू बांगी बात नै अणदेखी कर दी अर याईर नै केयो, “डर ना, बिस्वास राख।” अर बो आपगा चेला पतरस, याकूब अर बिंगो भाई यूहना गै सिवा ओर किनैई आपगै सागै कोनी ल्याया। जद बे याईर गै घरे पूग्या तो बठै लोग रोण लागरया केई सोक करण लागरया। यीसू मा जा'गे बानै केयो, “इयां रोण क्यामी लागरया हो, छोरी मरी थोड़ी है? आ तो सोण लागरी है।” ओ सुणगे लोग बिं पर हांसण लागग्या। पण यीसू सारा नै बारै काड़ दिआ अर छोरी गै मां बाप नै अर तीन चेला नै ले'गे कमरै में गेया। यीसू बिंगो हात पकड़ गे केयो, “बेटी मैं तनै केऊं खड़ी हो।” अर केंता ई बा छोरी खड़ी होगे चालण फिरण लागगी। बा बारा साल गी ही। ओ देखगे सारा हेरान हो'ग्या। यीसू देखण आळा नै चेताया कै, “आ बात किनैई कोनी बताणी है फेर केयो ईं छोरी नै कीं खाण नै दैयो।” फेर बठूं निकळ गे यीसू आपगै गाम आग्या। सबत गै दिन बे आराधना भवन में लोगां नै बचन सिखाण लागग्या। बठै सुणन आळा लोग हेरान होवा कै ईं कनै इतो ग्यान कठूं आयो कै अर कठूं ईं कनै चमत्कार करण गी ताकत आई है। ओ तो बढई है। मरियम गो बेटो तो है अर याकूब, योसे, यहूदा अर सीमोन गो भाई तो है। इंगी भेना नै तो आपां जाणा हां। ईंखातर बानै भोत बुरो लागग्यो अर बां यीसू पर बिस्वास कोनी करयो। यीसू बानै केयो, “परमेसर गी बात बताण आळै पर बिंगो गाम, रिस्तेदार अर बिंगै घर आळा कदी बिस्वास कोनी करै।” बठै बां कोई सामरथ गा काम कोनी करया क्यूंकै लोगां बां पर बिस्वास कोनी करयो। थोड़ै सै बीमार लोगां नै ठीक करया। यीसू हेरान हो'ग्या कै बांगै गाम आळा बां पर बिस्वास कोनी करयो। फेर यीसू परमेसर गो बचन सिखाणता होया गाम गाम में फिरता रेया। बां आपगै बारा चेला नै बुला'गे बानै ओपरियां काडण गो अधिकार देगे अर दो दो कर'गे गामां में भेज्या। यीसू बानै केयो, “थे थारै सागै एक लाठी गै सिवा कीं ना लेईयो, ना तो झोळो, ना'ई रोटी अर ना'ई बटुओ। जूती पेर गे ई जाईयो अर एक ई फालतू कुड़तो सागै ना लेईयो। जद थे किसैई गाम में जाओ तो एक ई घर में रेईयो जद तांई बठू पाछा ना चालो। जद थानै कोई किस्यै गाम गा रेण गी जिग्यां ना देवै अर परमेसर गो बचन कोई ना सुणै तो थे थारै पगां गी धूल बांगै सामै झाड़ गे चाल पड़ियो। ओ करणो ईं बात गी निसानी हो'सी कै परमेसर गी सजा गा जिमेदार बे आप लोग हो'सी।” फेर चेला जा'गे परचार करयो कै आपगो मन बदळ गे परमेसर गै रा पर चालणो सीखो। इंगै अलावा बां लोगां मू ओपरियां काडी अर कीं बीमार लोगां गै सिर पर तेल लगागे बानै ठीक करया। यीसू गी चरचा फेलण गै कारण राजा हेरोदेस बिंगी चरचा सुणी। केई लोग तो केवा कै, “यीसू बतिस्मो देण आळो यूहना है अर दुसर जीवंतो हो'ग्यो। ईंखातर ई यीसू चमत्कार करै है। केई केवा यीसू एलियाह परमेसर गी बात बताण आळो है अर केई केवा ओ तो एलियाह बरगो ई हो झिको भोत पेलां रेंतो हो।” ओ सुण गे राजा हेरोदेस केयो कै, “झिकै यूहना गो सिर कलम करवायो बो पाछो जीग्यो के?” हेरोदेस राजा यूहना नै जेळ में बंद कर दियो हेरोदेस ओ आदेस हेरोदियास गै केण पर दिओ हेरोदेस आपगै भाई फिलिप्पुस गी पत्नी हेरोदियास सागै ब्या करेड़ो हो। क्यूंकै यूहना हेरोदेस नै केणतो कै इयां आपगै भाई गी पत्नी सागै ब्या करणो परमेसर गै नेम गै बिरोध में है। ईंखातर हेरोदियास बिंऊं बेर राखती अर बा चावै ई कै इनै मरवा दैयूं। पण हेरोदेस यूहना नै धरमी आदमी अर पवितर आदमी मानतो अर बिंगी संभाळ करतो। बो बिंगी बाता सुण गे भोत डरतो पण बाता बड़ै आनंद ऊं सुणतो। यूहना ऊं बदलो लेण गो मोको हेरोदियास नै जद मिल्यो जद हेरोदेस आपगै जन्म दिन पर आपगै मोटै अफसरां, सेनापतियां अर जनता में मोटै-मोटै लोगां नै भोज दियो। ईं भोज में हेरोदियास गी बेटी नाच गे हेरोदेस अर भोज में बुलाएड़ा लोगां नै खुस करया ईंखातर राजा लड़की नै केयो झिको कीं तूं आज मांगैगी मैं तनै दैयूंगा। क्यूंकै राजा सोगन खाई कै जे तूं मेरो आदो राज पाट ई मांगै गी तो मैं तनै आज दैयूंगा। जद बण बारै आ'गे आपगी मां हेरोदियास नै पूछयो कै, “मैं के मागूं?” बिंगी मां केयो, “तूं यूहना बतिस्मो देण आळै गो सिर मांग ले।” जद बा दबादब राजा कनै जा'गे केयो, “मनै अबी यूहना गो सिर एक थाळी में ल्यागे दैयो।” ओ सुण गे राजा हेरोदेस नै बड़ो दुख होयो पण भोज में आण आळै मेहमाना गै सामै झिकी सोगन खाई बिंगै कारण बो मना कोनी कर सक्यो। ईंखातर राजा एक सैनिक नै यूहना गो सिर काट गे ल्याण खातर केयो। बो जेळ में जा'गे यूहना गो सिर बाड गे लियायो। बण सिर बिं छोरी नै दियो अर बण छोरी आपगी मां नै दियो। जद यूहना गै चेला नै ठा लागग्यो तो बे आ'गे बिंगै सरीर नै ले जा'गे एक कबर में रख दिओ। यीसू गै खास चेला पाछा आ'गे यीसू कनै बेठगे झिको कीं बां गामां में करयो अर लोगां नै सिखायो बिंगै बारै में बतायो। बठै भोत लोग आंता-जांता रेवा ईंखातर बां चेला नै रोटी खाण नै ईं सांस कोनी मिलतो ईंखातर यीसू बानै केयो थे मेरै सागै न्यारी जिग्यां में जा'गे थोड़ो आराम कर ल्यो। जद बे एक किस्ती पर चढगे सुनसान जिग्यां कानी चाल पड़या। पण केई लोगां बानै किस्ती पर चढता टेम पिछाण लिआ। फेर केई नगर ऊं भेळा होगे भाज्या अर यीसू अर बांगै चेला ऊं पेली किनारै पर जा पूग्या। जिंया यीसू किनारै पर पूग गे किस्ती ऊं उतरया तो बां लोगां गी एक मोटी भीड़ देखी। यीसू नै बिं भीड़ पर बड़ी दया आई क्यूंकै बे बिना गुआळियै गी भेड़ा बरगा लागै हा। ईंखातर बानै बे परमेसर गी बाता बताण लागग्या। जद देर होण लागी तो यीसू गै चेला बानै आ'गे केयो, “आ सुनसान जिग्यां है अर भोत मोड़ो हो'ग्यो है। लोगां नै अब जाण दैयो जिंऊं नेडै़ गाम में जा'गे आपगै खाण-पीण गो बदोबस्त कर सकै।” पण यीसू बानै केयो, “थे ई आनै कीं खाण नै दैयो?” चेला केयो, “आनै खूआण खातर इतै पीसा गी जरूरत पडै़गी जितो एक मजदूर आठ म्हिना काम कर'गे कमा सकै ओ किंया होवैगो?” यीसू बानै केयो, “जा'गे पतो करो थारै कनै किती रोटियां है।” बां जा'गे पतो करयो कै म्हारै कनै पांच रोटी अर दो मछलियां है। यीसू बानै केयो, “सारै लोगां नै घास पर झुण्ड बणा गे बिठा दैयो।” जद लोग सो सो अर पचास गा झुण्ड बणा गे बेठ ग्या। यीसू पांच रोटी अर दो मछलियां लेगे अर आकास कानी कर'गे परमेसर गो धन्यावाद करयो अर रोटियां नै तोड़ गे लोगां नै परोसण खातर चेला नै देण लागग्या। अर बां लोगां नै बांट दी। जद सारा धापग्या तो चेला बचेड़ी रोटियां गी बारा टोकरियां भरली। बिं दिन लुगाईयां अर टाबरा गै अलावा बठै पांच हजार आदमिया भोजन करयो। इंगै तुरंत बाद में यीसू आपगै चेला नै किस्ती पर बिठागे आगै गलील झील गै पार बेतसैदा गाम में भेज दिआ। अर फेर भीड़ पाछी आप आपगै गाम में भेज दी। भीड़ ऊं विदा लेगे यीसू आप पराथना करण खातर एक प्हाड़ी पर उड़ग्या। जद आथण होण लागगी जद तांई किस्ती झील गै बिचाळै पूग गी। अर यीसू पहाड़ी पर एकला ई हा। बां चेला नै बड़ी मेनत ऊं किस्ती चलाणता देख्या। क्यूंकै पून बांगै सामली चालै ही। अर दिन गै पेली यीसू पाणी पर चाल गे बांगै कनै गेया। बे चेला ऊं आ'गै निकळण आळा ही हा। पण चेला यीसू नै पाणी पर चालतां देखगे सोच्यो कै ओ भूत है अर बे चिलाण लागग्या। क्यूंकै जद बां सारा बानै देख्यो तो बे घबरा ग्या। पण यीसू बानै तुरंत केयो, “हिम्मत राखो। मैं ई हूं डरो ना।” फेर यीसू बांगी किस्ती पर चढग्यो अर हवा रुकगी। ओ देखगे चेला हेरान हो'ग्या। पांच रोटियां गै चमत्कार नै देखण गै बाद में ई चेला समझ कोनी पाया कै यीसू कनै किती ताकत है क्यूंकै बे कठोर दिल गा हा। फेर झील पार कर'गे गनेसरत प्रांत कनै पूग्या अर किस्ती नै किनारै पर लगाई जिंयाई यीसू अर बिंगा चेला किस्ती पर ऊं उतरया तो बठै गै लोगां बानै पिछाण लिया। अर लोग भाज भाज गे गामां मू बीमार लोगां नै मांची पर घाल घाल गे ल्याण लागग्या जठै बां सुण्यो कै यीसू बठै है। जठै कठैई यीसू गेया, चायै बो गाम हो, चायै बो सैहर हो बठै लोग बीमार लोगां नै ले जा'गे बजारा में सुणा दिया जठू यीसू नै जाणो हो बठै लोग गिडगिड़ागे केण लागग्या कै थे म्हानै थारै कपडै़ गै पलै गै ई हात लगा लेण दैयो। अर जिताई लोग बांगै हात लगावा सारा ठीक होये आवा। एकर फरीसी अर सासतरी लोग झिका यरुसलेम ऊं आयेड़ा हा बांगै कनै भेळा होया। बां देख्यो कै यीसू गा चेला यहुदी नेम गै अनुसार बिना हात धोये खाणो खाण लागरया। क्यूंकै सारा फरीसी अर यहुदी लोग आपगै बडेरां गी परम्परा गै अनुसार हात आच्छी तरियां धोगे रोटी जीमता। जद बे बजार ऊं घरे आवै तो आपगै बडेरां गी रीत गै अनुसार हात धोगे खाणो खावै। बे लोटा, बाटी अर ताम्बे गै भांडा नै मांजणै गै कामा में आपगै बडेरां गै बतायेडै़ नेम गो पालण करता। फरीसियां अर यहुदियां यीसू नै पूछयो, “थारा चेला नेम गै अनुसार हात धोगे क्यूं खाणो कोनी खावै। बांगी रिवाज पर ऐ क्यूं कोनी चालै।” यीसू बानै केयो, “थारै पाखंडी लोगां गै बारै में तो परमेसर गा बचन सुणाण आळा भोत पेलां साची बात के दी।” ऐ बाता सासतर में ईं तरियां ऊं लिखेड़ी है कै, “ऐ लोग मेरी बाता ऊं ई मनै मोटो मानै पण मेरै पर बिस्वास कोनी करै। ऐ झिका बेकार में मेरी पूजा करै बिंगो कोई फायदो कोनी। बे झिको सिखाण लागरया है बे आदमी गा बणायेड़ा रिवाज है।” थे लोगां परमेसर गै हुकम नै मानणो छोड़ दियो अर आदमी गै बणायेडै़ रिवाज नै सखताई ऊं मानण लागग्या। फेर यीसू बानै केयो, “थे परमेसर गै हुकम नै टाळ गे आपगै रीति रिवाजा नै मानण गो आच्छो ढंग सीख लिओ।” मूसा परमेसर गो ओ नेम सिखायो कै, “थे थारै मां बाप नै आदर करो। अर बां ओ ई सिखायो कै झिको आपगी मां बाप गी बुराई करै बिनै जान ऊं मारदैयो।” पण थे सिखाओ झिको आदमी आपगै मां बाप गी मदद खातर न्यारो धन भेळो करै बो परमेसर खातर रखेड़ो है। फेर आपगै मां बाप नै कीं देण गी लोड़ कोनी? इयां थे थारै रिवाजा ऊं दूसरा नै सिखाओ अर परमेसर गै नेमा ऊं आंख फेर ल्यो हिस्या हिस्या भोत गळत काम करो। फेर यीसू लोगां गी भीड़ बुला गे केयो, “थे ध्यान ऊं सुणगे मेरी बात नै समझो। हिसी कोई चीज बारै कोनी झिकी नै आदमी खा गे असुद्ध होवै पण एक आदमी गै दिल ऊं झिकी बुराईयां निकळै बे ई आदमी नै परमेसर गी नजर में असुद्ध बणा दैय। झिकै गै कान है बो ईं बात नै ध्यान ऊं सुण गे समझ ल्यै।” जद यीसू भीड़ नै छोड गे घर में गेया तो बांगै चेला ईं मिसाल गो मतलब पूछयो। यीसू बानै केयो, “थे इती सोखी बात नै ई कोनी समझ सक्या कै झिको आदमी गै मूं माखर जावै बो आदमी नै असुद्ध कोनी कर सकै। क्यूंकै बो बिंगै मन में कोनी जावै पण पेट में जा'गे सरीर ऊं बारै निकल ज्यै। ओ केगे बानै समझायो कै हर तरियां गै भोजन नै खा सको।” फेर यीसू बानै समझायो कै, “झिको आदमी गी जबान ऊं निकळै बो ई आदमी नै परमेसर गी नजरा में बुरो बणा दैय। क्यूंकै आदमी गै मन ऊं ई बुरी सोच, बेबीचार, चोरी, हत्या, लोभ, बुरा काम, ईरस्या, चुगली, घमण्ड, अर मूरखता निकळै। ऐ सारी बुराईयां आदमी गै माऊं आ'गे बिनै बुरो बणा दैय।” यीसू गलील प्रांत नै छोड गे उतर दिसा गै तुरास प्रांत में उड़ग्या। अर बठै किंगैई घर में उड़ गया अर बे चावा हा कै किनी ठा ना लागै कै मैं अठै हूं। पण लोगां ऊं ओलै कोनी रे सक्या। अर जद ई बठै एक लुगाई आई झिकी गी छोरी में ओपरी बड़ेड़ी ही। अर बा आ'गे बांगै पगां पड़गी। बा सीरिया देस गै फुनीसिया प्रान्त गी युनानी जाती गी ही। बा ओपरी काडण खातर यीसू ऊं गिड़ गिड़ागे पराथना करण लागगी। बिंगै बिस्वास नै परखण खातर यीसू बिनै केयो, “पेलां यहुदी झिका परमेसर गी उळाद है बागी मदद कर लेण दे। टाबरां गी रोटी लेगे कुता नै फेंकणी माड़ी बात है।” बण लुगाई केयो, “पण मालिक, घर गा कुता तो टाबरां कनूं मेज गै नीचै पड़या टुकडा खावै।” ओ सुणगे यीसू केयो, “तूं इतो आच्छो उतर दिओ ईंखातर तूं जा सकै। तेरी बेटी मू ओपरी निकळ गी।” जद बा घरे गेई तो बिंगी छोरी बिस्तर पर सुती पड़ी अर बिमू ओपरी निकळगी ही। फेर यीसू तुरास प्रांत नै छोड़गे सेदा सैहर ऊं होगे गलील झील गै कनै दिकापुलिस प्रांत में आ ग्या। बठै लोग एक आदमी नै यीसू कनै ल्याया। बो आदमी बेरो हो। बो हकड़ी खा'गे बोलतो हो जद लोग यीसू ऊं बिनती करण लागग्या कै थारी दया गो हात ईं पर रखै। जद बे बिं आदमी नै भीड़ ऊं दूर लेग्या अर बिंगै काना में आंगळी घाली अर थुथकारो घाल गे बिंगी जीभ गै हात लगायो। अर आकास कानी देख गे लंबो सांस लियो अर बिं आदमी गी भासा में बोल्या “इफकथा” झिकै गो अरथ होवै खुल ज्याओ। अर बिं आदमी गी जबान अर कान खुलग्या अर बो दूसरै लोगां गी तरियां बोलण लागग्यो। यीसू लोगां नै चेतायो कै ईं चमत्कार गै बारै में किनी ना बताईयो पण फेर ई लोग ईं बात गो जादा परचार करण लागग्या। लोग हेरान होगे केण लाग्या, “यीसू झिको कीं करै बड़िया करै। आंगै केण ऊं बेरा सुणन लागज्यै अर गूंगा बोलण लागज्यै।” बां दिना में एकर ओर भीड़ यीसू गी बाता सुणन खातर भेळी होयी। पण भीड़ कनै खाण नै कीं कोनी हो। ईंखातर यीसू आपगै चेला नै केयो, “मनै ईं भीड़ पर भोत तरस आण लागरयो है। ऐ सारा तीन दिना ऊं मेरै सागै रेण लागरया है। अर खाण खातर आं कनै कीं कोनी बच्यो। जे मैं आनै घरे भेज दिआ तो ऐ रा में ई बेहोस हो'ज्यैगा। कीं लोग तो भोत दूर ऊं आयेड़ा है।” बांगै चेला केयो, “बन उजाड़ में इती रोटी कठूं आसी जिंऊं ऐ धाप ज्यै।” यीसू बानै पूछयो, “थारै कनै किती रोटी है,” बां केयो, “सात।” जद बां सारै लोगां नै बेठण खातर केयो अर बे रोटी लेगे परमेसर गो धन्यावाद कर'गे तोड़ी अर आपगै चेला नै देंता गेया अर बे सारा बांटता गेया। बांगै कनै थोड़ी सी छोटी मछलियां बी ही बां धन्यावाद कर'गे बे बी लोगां नै देण गी आग्या दी। सारा खा'गे धापग्या अर बाकी बचेड़ी रोटियां गा टुकड़ा ऊं चेला सात टोकरा भर लिआ। बे लोग चार हजार गै सारै सारै हा। बाद में बां सारै लोगां नै विदा करया। अर यीसू आपगै चेला सागै किस्ती पर चढगे दलमनूता परदेस में उड़ग्या। बठै कीं फरीसी गुट गा लोग यीसू ऊं आ'गे सुआल पूछण लागग्या। अर बानै परखण खातर कै ओ परमेसर गो बेटो है या कोनी ईंखातर बांऊ कोई निसानी मांगण लागग्या। बां आपगी आत्मा में जाण लिओ अर आह भरगे केयो, ईं जुग गा लोग क्यामी निसान मांगै। पण मैं थानै साची केऊं ईं जुग गै लोगां नै कोई निसान कोनी दियो जावैगो। ओ केगे यीसू आपगै चेला सागै किस्ती पर चढ'गे झील गै दूसरै किनारै पर उड़ग्या। चेला आपगै सागै रोटी ल्याणी भूल ग्या। बां कनै किस्ती में एक ई रोटी ही। यीसू बानै चेताया कै, “देखो फरीसियां अर हेरोदेस गै लोगां ऊं सावधान रेईयो।” चेला समझया कोनी तो आपस में बिचार करण लागग्या कै, “ऐ आ बात ईंखातर केवै कै, के आपणै कनै रोटी कोनी?” यीसू नै बांगी बात गो ठा लागग्यो। अर बां पूछयो, “थे रोटी ना होण'गी बात क्यामी करण लागरया हो। के थारो दिल कठोर होयड़ो है थे देख गे ई कोनी समझो? थे झिकी थारी आंख्या ऊं देखी अर काना ऊं सुणी ही बा बात थानै याद कोनी। कै पांच हजार लोगां नै पांच रोटियां ऊं सलटा दिआ हा जद थे बाकी किती टोकरियां भरी।” बां केयो, “बारा टोकरियां।” फेर यीसू पूछयो, “जद मैं चार हजार लोगां नै सात रोटियां ऊं धपाया तो थे बाकी बचेड़ी रोटियां गा किता टोकरा भरया।” चेला केयो, “सात टोकरा।” यीसू बानै केयो, “फेर ई थे रोटी गी चिंता क्यामी करण लागरया हो?” जद बे बेतसैदा गाम में आया तो बठै लोग एक आंधै आदमी नै यीसू कनै ल्यागे बांऊ बिनती करण लाग्या कै ईं पर दया करो। हात लगाओ। यीसू बिं आंधै आदमी गो हात पकड़ गे गाम ऊं बारै लेग्या अर बिंगी आंख पर थूथकारो घाल गे हात मेल्यो अर बिनै पुछ्यो, “तनै कीं दिख के?” बण आंख चक गे इनै बिनै देख्यो अर केयो, “मनै आदमी भाजतै दरखतां गी तरियां दिखै।” दूसर फेर यीसू बिंगी आंख पर हात रख्यो अर बो आदमी देखण लागग्यो। यीसू बिनै गाम ऊं दूर होगे घरे जाण गो केयो, “झिकै ऊं बो चमत्कार गै बारै में किनैई बता ना सकै।” फेर यीसू अर बिंगा चेला गलील प्रांत ऊं कैसरिया फिलिप्पी सैहर गै आसै पासै गै गामां में गेया। रा में यीसू चेला नै पूछयो, “मनै लोग के केवै?” चेला उतर दियो, “केई लोग तो यूहना बतिस्मो देण आळो केवै अर केई एलियाह अर केई परमेसर गी बात बताण आळो केवै।” बां बानै पूछयो, “थे मनै के केवो,” जद पतरस बोल्यो, “थे मसी हो।” यीसू बानै चेतायो कै, “मेरै बारै में ओ किनैई ना केईयो।” फेर यीसू बानै समझाण लागग्या कै, “मिनख गै बेटै खातर ओ जरूरी है कै बो दुख उठावै। समाज गा मोटा ग्यानी लोग, मुख्य याजक अर धर्म गा नेम सिखाण आळा मनै मसी मानण ऊं इनकार करैगा अर लोग जान ऊं मार दैयगा अर बो तीसरै दिन पाछो जीज्यैगो।” आ बात यीसू आपगै चेला नै खुल गे बताई, ईं पर पतरस यीसू नै न्यारी जिग्यां ले जा'गे फटकार लगाई। पण यीसू मुड़ गे आपगै चेला कानी देख्यो अर फेर पतरस नै फटकार गे केयो, “हे सैतान मेरी नजरा ऊं दूर होज्या। तूं परमेसर गी बाता पर कोनी पण मिनखां गी बात पर मन लगावै।” फेर बां आपगै चेला सागै भीड़ नै बुलाई अर बानै केयो, “जे कोई मेरै लारै आणो चावै तो पेलां अपणै आपगो त्याग करै। फेर मेरै लारै चालै। क्यूंकै झिको आपगै प्राणा नै बचाणो चावैगो बो बिनै खोवैगो। अर झिको मेरै ईं सुब समाचार गै खातर आपगा प्राण खोवैगो बो आपगा प्राण बचावैगो। जे कोई आदमी सारी दुनिया नै आपगी मुठी में कर ल्यै अर अनंत जीवन ना पा सकै तो फेर बिनै के लाभ होयो? मुकती ऊं बढगे कोई किमती चीज कोनी। जे कोई ईं संसार गै बुरा लोगां गै सांमै मेरो चेलो बणन ऊं अर मेरी बाता नै मानण ऊं सरमावैगो तो बिनै मिनख गो बेटो जद बो आपगै पिता परमेसर गी मेमा में सुरगदूतां सागै धरती पर आवैगो तो बिनै बी मानण ऊं सरमावैगो।” फेर यीसू बानै केयो, “थारै मू कीं लोग मरण ऊं पेलां परमेसर गो काम जरूर देखैगा झिको परधान गै रूप में आपगी ऊंची ताकत ऊं करण आळो है।” इंगै छ दिन गै बाद यीसू पतरस याकूब अर यूहना नै सागै लेगे ऊंचै प्हाड़ पर गेयो जठै बे चारूं एकला हा चेला गी आंख्या गै सामणै यीसू गो रूप बदळग्यो। अर बिंगा गाबा चमकण लागग्या अर बोळा धोळा होग्या अर इता धोळा होग्या जिता सारी दुनिया में कोई बी गाबा धोळा कोनी कर सकै है चेला एलियाह अर मूसा नै बी चाणचकै देख्यो अर बे यीसू गै सागै बात करण लागरया हा। पतरस यीसू नै केयो, “म्हारो अठै रेणो आच्छो होवैगो ईंखातर म्हे तीन तंबु बणावां एक थारै खातर एक मूसा खातर अर एक एलियाह खातर।” तीनूं चेला भोत डरग्या हा। पतरस केयो क्यूंकै बिनै ठा कोनी हो कै बिनै के केणो है। फेर एक बादळ उठयो अर बानै घेर लियो बादळ मूं परमेसर गी बोली सुणीजी ओ मेरो बेटो है इंयु मैं प्रेम करूं हूं इंगी बाता नै ध्यान ऊं सुणो अर मानो। जद चाणचकै चेला नै यीसू गै सिवा कोई कोनी दिख्यो। जिंयाई बे प्हाड़ ऊं नीचै उतरा बिं टेम यीसू बानै हुकम देगे केयो, “थे झिको कीं देख्यो है इंगै बारै में परमेसर गी ओर ऊं आयो, माणस गो बेटो मरण गै बाद दुबारै जींवंतो होण तांई किनैई ना बताईयो।” आ बात चेला किनैई कोनी बतायी पण आपस में बाता करण लागरया कै दुसर जींवंतो किंया हो'सी। फेर चेला पूछयो, “यहुदी नेम सिखाण आळा क्यूं केवै है कै मसी गै आण ऊं पेलां एलियाह जरूर आवैगो।” यीसू उतर दियो, “ओ सच्च है कै एलियाह पेलां आवैगो अर लोगां नै परमेसर गी इच्छा गै अनुसार जीणो सिखावैगो। पण ईं बात पर बी ध्यान दैयो कै सासतर में लिखेड़ो है कै परमेसर गी ओर ऊं आएड़ो माणस परमेसर गी मरजी गै अनुसार भोत दुख उठावैगो अर लोग बिनै तुछ जाणैगा।” मैं थानै बताऊ हूं कै, “एलियाह आ'ग्यो है अर जिंया पेलां ई पवितर सासतर में बिंगै बारै में लिख्यो है लोगां आपगी इच्छा गै अनुसार बिनै सतायो।” जद बे नीचै दूसरां चेला कनै आया तो बां देख्यो कै बांगै कानी चारूंमेर एक मोटी भीड़ है अर यहुदी नेम सिखाण आळा बांगै सागै बेंस करण लागरया है। जिंयाई लोगां यीसू नै देख्यो तो बानै अचंभो होयो अर प्रणाम करण खातर बिं कानी भाज पड़या। यीसू पूछयो, “थे कीं बात ऊं चेला गै सागै बेंस करण लागरया हो।” भीड़ मू एक आदमी उतर दियो, “हे गुरू चेला गै कनै मैं आपगो बेटो ल्यायो हूं बिंगै मा एक भूत है बिंगी बजह ऊं बो बोल कोनी सकै। जद बो भूत बिं पर जोर करै है अर हमलो करै है। बो बिनै जमीन पर पटक देवै है बिंगै मूं में झाग आ जावै है। बिंगो सरीर सूकतो जावै है बिंगै भूत नै काडण खातर थारै चेला नै केयो पर बे कोनी काड़ पाया।” यीसू केयो, “थे लोग मेरै उपर बिस्वास करो ही कोनी मैं थारै सागै भोत टेम तांई रे चुक्यो हूं अर भोत टेम ऊं सेण करतो आण लागरयो हूं फेर बी थे बिस्वास कोनी करो।” फेर यीसू छोरै नै आपगै कनै ल्याण खातर केयो। बे छोरै नै यीसू कनै ले आया। जद भूत यीसू नै देख्यो। छोरै नै झटका देण लागग्यो, छोरो नीचै पड़ग्यो अर कूकण लागग्यो। बिंगै मूं में झाग निकळण लागग्या। यीसू छोरै गै बाप नै पूछयो, “इनै कद ऊं आ तकलीफ होयी है?” बाप बतायो, “छोटै थकां गी है।” केई बारी भूत इनै जान ऊं मारण खातर आग अर पाणी में रेड़ दियो। जे थे कीं कर सको हो तो म्हारै उपर दया कर'गे म्हारी मदद करो। यीसू केयो, “मन में बेम क्यामी राखै? जे तूं कीं कर सकै?” झिका बिस्वास करै है बांगै खातर सारो कीं हो सकै है। जद छोरै गै बाप गिड़गिड़ागे केयो, “मैं बिस्वास करूं हूं पूरी तरियां बिस्वास करण खातर मेरी मदद करो।” जद यीसू देख्यो कै भीड़ भोत होण लागरी है, यीसू ओपरी नै फटकार गे केयो, “हे बेरी अर गूंगी आत्मा मैं तनै आग्या देऊ हूं ईं छोरै ऊं बारै आ अर फेर कदी दुसर इंगै मा ना बड़ी।” ओपरी रोळो मचाण लागगी अर छोरै नै बुरी तरियां मरोड़ गे बारै निकळगी अर छोरो बेहोस हो'ग्यो ओ देखगे केई लोग केण लाग्या कै ओ तो मर ग्यो। पण यीसू बिंगो हात पकड़गे उठायो अर बो खड़यो हो'ग्यो। जद यीसू घर गै मा आयो तो बिंगा चेला ऐकांत में बानै पूछयो, “म्हे ओपरी नै क्यूं कोनी काड सक्या।” यीसू उतर दियो, “ईं तरिकै गी ओपरी सिरफ परमेसर ऊं पराथना करण ऊं ई निकळै है।” फेर यीसू अर बिंगा चेला बठूं चालगे गलील प्रान्त ऊं होगे जाण लागरया हा, यीसू चावै हो कै किनैई ठा ना लागै कै बे अठै है। क्यूंकै बे आपगै चेला नै कीं खास बात बताणी चावै हा, बां बानै केयो, “परमेसर कनूं आएड़ै माणस नै कीं लोग बिंगै बिरोध करण आळा गै हवालै कर देवैगा। बे बिनै जान ऊं मार देवैगा। पण तीन दिना गै बाद बो फेर जींवंतो होज्यैगो।” ईं बात गी चेला नै समझ कोनी आई ही पण यीसू नै पूछण ऊं डरै हा। फेर बे कफरनहूम उठग्या। जद बे घर में हा यीसू चेला नै पूछयो, “थे लोग रा में के बात पर बेंस करण लागरया हा?” पण चेला चुप रेया क्यूंकै बां ईं बात पर बेंस करी ही कै आपणै मू मोटो कुण। यीसू बेठग्या अर आपगै चेला नै बुला'गे केयो, “झिको परमेसर गी नजर में सारां ऊं मोटो आदमी बणनो चावै तो बो अपणै आपनै सारां ऊं छोटो समझै अर सारां गी सेवा करै।” फेर बण बांगै सामै एक छोटै टाबर नै खड़यो करयो अर बिनै आपगी गोदी में लेगे केयो, “झिको मेरूं प्रेम करण गै कारण ईं तरियां एक छोटै टाबर गी सेवा करै है बो मानो मेरी सेवा करै है। झिका इयां मेरी सेवा करै है बे मेरी कोनी पण मेरो पिता झिकै मनै भेज्यो है मानो बिंगी सेवा करै है।” यूहना केयो, “गुरू मैं एक आदमी नै देख्यो झिको थारो नाम लेगे ओपरियां नै काडण लागरयो हो। मैं बिनै रोकयो क्यूंकै बो आपणै मू कोनी है।” यीसू बिनै केयो, “बिनै रोको ना। झिको मेरो नाम लेगे चमत्कार गा मोटा काम करै है बो बेगी मेरी बुराई कोनी करै। क्यूंकै झिको आपणै खिलाफ कोनी बो आपणै सागै है। मैं थानै केऊं हूं झिको बी थानै एक गिलास पाणी प्यावै है बो मनै प्यार करै है अर थे मेरै उपर बिस्वास करण आळा हो बिनै परमेसर गी बरकत जरूर मिलैगी।” कीं किमत पर पाप करण ऊं बचो। झिको टाबरा गी तरियां मेरै पर बिस्वास करै है जे बिनै कोई ठोकर मारै है तो परमेसर बिनै भयानक सजा देवैगो। बिंगै गळ में मोटी चक्की गो पथर बांध गे समुंदर में गेर गे भयंकर मोटी सजा देवैगो। जे थारो हात थारै ऊं पाप करवावै अर थे बिनै रोक कोनी सको तो बिनै बाड दैयो। थारै खातर ओ ई आच्छो है कै थे एक हात ऊं अनंन्त जीवन पाणो आच्छो होवैगो। (नरक में किड़ा कदी कोनी मरै अर आग कदी कोनी बुझै)। जे थारो पग थारै ऊं पाप करवावै अर थे बिनै रोक कोनी सको तो बिं पग बाड दैयो। एक पग ऊं अनंन्त जीवन पाणो आच्छो होवैगो। (नरक में किड़ा कदी कोनी मरै अर ना कदी आग बूझै)। जे थारी आंख पाप करवावै तो बिनै बार काड दैयो कै दोनूं आख्या ऊं नरक में जाण ना ऊं काणो होगे परमेसर गै राज में जाणो आच्छो है, अर नरक में आग कदी कोनी बुझै ना कदी बठै किड़ा मरै। ईं दुनिया में हरेक जणै पर दुख तकलीफ आवै ईंखातर परमेसर गी आच्छी उळाद बणण खातर आं चिजा नै सुधार गे अपणै आपनै लायक बणाओ। लूण आच्छो होवै पण जे बिंगो सुआद बिगड़ ज्यै तो बो कीं काम गो कोनी रेवै। इंयाई थे अपणै आप में बो गुण बणाये राखो जिंऊं थे परमेसर गै काम आ सको अर दूसरां सागै मिल जुल गे रेवो। यीसू कफरनहूम ऊं चालगे यहुदियां प्रदेस गी कांकड़ में अर यरदन नदी गी दूसरी पार गेयो। फेर ऊं भीड़ बिंगै कनै भेळी होगी, बो बानै रोज कीं तरियां परमेसर गी बाता सिखाण लागग्यो। फरीसी सभा गा केई आदमी यीसू कनै आ'गे बिनै सवाल पूछण लागग्या कै, “बिमै कोई गळती म्हानै लादै।” बां बिनै पूछयो, “कोई आदमी आपगी घरआळी नै छोड़ सकै है के?” यीसू बानै उतर दियो, “मूसा गै नेम विधान थानै के आग्या दी है?” बां जबाब दियो, “तलाक नामो दे'गे कोई आदमी आपगी घरआळी नै छोड़ सकै।” यीसू बानै केयो, “मूसा आ आग्या थानै ईं कर'गे दी कै थारा मन भोत पथर बरगा है। पण जद परमेसर सरसटी बणाई तो आदमी अर लुगाई नै बी बणाई। ईंखातर आदमी आपगै मां बाप नै छोड़गे आपगी घरआळी गै सागै रेसी। अर अब बे दो कोनी पण एक माणस गी तरियां हो'सी। ईंखातर बानै परमेसर जोड़ दिया तो कोई बी माणस बानै न्यारा न्यारा ना करै।” जद बे घरे हा तो चेला एकर फेर पूछयो, यीसू बानै उतर दियो, जे कोई आपगी घरआळी नै छोड़गे दूसरी लुगाई सागै ब्या करै तो बो परमेसर गी नजर में गळत काम करै। अर जे कोई लुगाई आपगै आदमी नै छोड़गे दूसरै आदमी सागै ब्या करै है तो बा परमेसर गी नजर में बेबीचार करै है। एकर लोग आपगै टाबरां नै यीसू कनै ल्याया। बे चावा हा कै यीसू बांगै सिर पर हात रखगे बानै आसिरवाद देवै। पण यीसू गा चेला बानै रोक दिया। जद यीसू ओ देख्यो तो बिनै भोत रीस आ'गी। बण चेला नै केयो, टाबरां नै मेरै कनै आण दैयो, बानै रोको ना। आं टाबरां गी तरियां परमेसर पर पूरो भरोसो राखण आळा ई परमेसर गी आसिस ले सकै। झिका लोग एक टाबर गी तरियां परमेसर पर भरोसो कर'गे अर पूरी खुसी ऊं बिनै आपगो राजा मानसी बे ई परमेसर कनूं मिलण आळी आसिस ले सकै। फेर यीसू टाबरां नै आपगी गोदी में लेगे बांगै सिर पर हात रखगे बानै आसिरवाद दियो। जिंयाई यीसू यरुसलेम कानी जाण लाग्यो, एक आदमी भाजगे बिंगै कनै आयो अर आपगा गोडा टेक लिया अर बोल्यो, “गुरूजी, थे भोत आच्छा हो। मनै बताओ मैं अनन्त जीवन लेण खातर के करूं?” यीसू बिनै केयो, “तूं मनै क्यूं आच्छो बतावै है, तूं जाणै है कै परमेसर नै छोड़गे कोई बी आच्छो कोनी हो सकै। थे परमेसर गा ऐ नेम जाणो हो कै, किंगी हत्या ना करियो, कोई बी लुगाई गै सागै गळत संबंध ना राखियो, झूठी गवाई ना देईयो, ना पंचायत में ना कचेड़ी में किनैई धोखो ना देईयो अर आपगै मां बाप गो आदर मान करियो।” बण आदमी जबाब दियो, “गुरूजी, ऐ तो मैं छोटो सो हो जद ऊं आं सारा नेमा मानूं हूं।” यीसू बिनै देख्यो अर बिंगो मन प्रेम ऊं भरग्यो। फेर यीसू बिनै केयो, “तूं एक काम कर झिको तूं अजे तांई कोनी करयो तूं इंया कर, जितो तेरै कनै धन माल है सारो बेचगे गरीबा नै बाट दे, जे इंया करसी तो तनै सुरग में आत्मिक धन मिलैगो अर बाद में तूं मेरै लारै आ जा।” आ बात सुणगे बो भोत उदास होगे बठूं उड़ग्यो क्यूंकै बो भोत अमीर हो। यीसू चारूंमेर देखगे आपगै चेला नै केयो, “अमीर लोगां गो परमेसर गै राज में जाणो भोत मुसकिल है।” आ बात सुणगे चेला नै अचंभो होयो, पण यीसू फेर केयो, “झिका लोग आपगै धन पर भरोसो राखै है बांगो परमेसर गै राज में जाणो भोत मुसकिल है। जिंया एक ऊंट गो सुई गै नाकै माखर निकळणो बिंयाई एक धनवान आदमी गो परमेसर गै राज में जाणो भोत मुसकिल है।” आ बात सुणगे बे भोत चिंता में पड़ग्या अर आपसरी में पूछण लाग्या, “फेर तो कोई बी परमेसर गी सजा ऊं बच कोनी सकै।” यीसू बांगै कानी देखगे केयो, “लोगां खातर तो ओ भोत मुसकिल है पण परमेसर इंया कर सकै।” पतरस यीसू नै केयो, “थारै लारै चालण खातर म्हे सारो कीं छोड़ दियो।” यीसू बानै केयो, “मैं थानै साची केऊं, हिस्यो कोई कोनी झिको मेरै अर सुब समाचार खातर आपगा मां बाप, भाई भेन अर टाबर आपगी खेती छोड़ दी होवै। अर ईं दुनिया में सो गुणा ऊं जादा बिनै जरूर ना मिलै, घर होवै या भाई भेन, या मां बाप या टाबर पण आं मुसकिलां गै सागै बिनै सताव गो बिं सामणो करणो पड़सी। बिंगै आण गै टेम में बिनै अनन्त जीवन मिलसी। झिका नै, आ दुनिया मोटा समझै है बामू केईयां नै आण आळै टेम में परमेसर छोटा मानसी। अर केईयां नै आ दुनिया छोटा मानै है बानै परमेसर आण आळै टेम में मोटा मानसी।” जद यीसू मसी अर बिंगा चेला अर केई ओर लोग बांगै सागै यरुसलेम जाण लागरया हा। यीसू बांगै आगै चालै हो। चेला नै अचंभो होयो। झिका सारा लोग बे बी भोत डरेड़ा हा। फेर यीसू बारा चेला नै ओटै ले जा'गे बातां बताई झिकी बिंगै सागै होण आळी ही बानै सारी बाता बताई। यीसू बानै केयो, “आपां यरुसलेम जाण लागरया हां। लोग परमेसर कनूं आएड़ै माणस नै मुख्य याजक अर यहुदी नेम सिखाण आळां गै हवालै कर देसी। बे बिनै मोत गी सजा सुणागे सैहर गै राजा गै अर अफसरां गै हवालै कर देसी। बे बिंगो मजाक उड़ावैगा। बिं पर थूक सी, कोड़ा मारसी अर मार देवैगा। पण बो तीन दिना गै बाद फेर जींवंतो होज्यै'गो।” फेर जबदी गै बेटै याकूब अर यूहना यीसू गै कनै आ'गे केण लागग्या गुरूजी म्हे थारै कनूं कीं मांगागा थे म्हानै मना ना करियो। यीसू बानै पूछयो, “थे लोग मेरै कनूं के चावो हो?” बां उतर दियो जद थे परमेसर गी मेमा गै सागै सासन करो तो, थे म्हानै दोना नै एक नै दाहिणै अर दूसरै नै खबै पासै बिठा लेईयो। यीसू बानै केयो, थे झिको कीं मांगो हो बिनै आच्छी तरियां समझ गे कोनी मांगो, के झिको दुख मैं झेलण जाण लागरयो हूं। थे बी बो दुख झेलण खातर तैयार हो? के मेरी तरियां दुख झेलगे मरण खातर तैयार हो। बां यीसू नै केयो, “म्हे तैयार हां,” यीसू बानै केयो, “थे दोनूं मेरी तरियां दुख झेलण अर मरण खातर तैयार होवोगा।” पण कुण मेरै दाहिणै अर खबै बेठसी इंगो फेंसलो मैं कोनी कर सकूं। कुण लोग बेठ सकै है बांगै खातर परमेसर पेलां ऊं बा जिग्यां तैयार कर राखी है। जद बां दूसरां दस चेला नै पतो लागग्यो कै याकूब अर यूहना यीसू कनूं के मांग्यो है तो बानै दोना पर रीस आ'गी। यीसू मसी चेला नै बुला'गे केयो, “थे जाणो हो कै गेर यहुदियां पर झिका हुकम चलावै है, बे लोग आपगी ताकत दिखाणी चावै है अर बानै मोटा लोगां पर हुकम देणो आच्छो लागै है। पण थानै हिस्यो कोनी बणणो। झिको परमेसर गी नजर में मोटो बणणो चावै है बिनै सारा गी सेवा करणी चईयै। झिको परमेसर गी नजर में मोटो बणणो चावै है। बिनै सारां गो दास बणणो चइयै। क्यूंकै माणस गो बेटो ईंखातर कोनी आयो कै दूसरा बिंगी सेवा करै। पण दूसरा गी सेवा कर'गे आपगी जान दैय। परमेसर ऊं मिलण आळी सजा ऊं बचाण खातर आयो।” फेर बे यरीहो पूग्या। जद बठूं यीसू अर चेला बोळी भीड़ गै सागै निकळ्या, सड़क गै किनारै तिमाई गो बेटो बरतिमाई झिको आंधो हो, मंगतो बण गे बेठयो हो। जद बण सुणयो कै नासरत गाम गो यीसू आवै है। बो रोळा मचागे केण लागग्यो, “दाऊद राजा गी उळाद यीसू मेरै पर दया कर।” भीड़ ऊं केई लोगां बिनै रोक्यो अर रोळा करया कै, “चुप हो'जा।” पण बो चुप कोनी रेयो अर ओर बोळा रोळा मचागे केण लागग्यो, “दाऊद राजा गी पीढी ऊं आण आळा यीसू मेरै पर दया कर।” यीसू बठै रुकगे बिनै बुला'गे ल्याण खातर केयो, “लोगां बरतिमाई नै जा'गे केयो, सबर राख अर उठ, बो तनै बुलावै है।” आ बात सुणतां ई बण आपगो गाबो परनै फेंकगे दबादब खड़यो होगे यीसू गै कनै आयो। यीसू बिनै पूछयो, “मैं तेरै खातर के करूं?” आंधै आदमी केयो, गुरूजी मैं चाऊं के मैं देखण लाग जाऊं। यीसू बिनै केयो, “जा तेरै बिस्वास गै कारण तूं ठीक हो'ग्यो।” बो बिं घड़ी देखण लागग्यो अर यीसू गै लारै लारै चाल पड़यो। फेर यीसू अर बिंगा चेला यरुसलेम गै कनै बैतफगे अर बेतनिया नाम गै दो गामां कनै पोंच्या झिका जेतुन पहाड़ पर बसेड़ा हा, यीसू आपगै दो चेला नै आ'गै भेज्या। अर बानै केयो, “आ'गै झिको गाम है बिमै जाओ। जिंयाई थे बिं गाम में बड़ोगा थानै एक गधी गो बच्चों बांदेड़ो दिखसी। बिं पर अजे तांई कणैई सवारी कोनी करी है। बिनै खोलगे अठै ले आओ। जे थानै कोई पूछै कै इनै क्यूं थे खोलो हो, तो थे बिनै केईयो प्रभु नै इंगी लोड़ है अर बेगो ई पाछो भेज दैयांगा।” दोनूं भेळा गेया अर एक गधी गै बच्चै नै एक घर गै दरवाजै गै बारै गळी में बांदेडो देख्यो बिनै जिंयाई खोलण लागग्या। बठै खड़या लोगां बानै पूछयो, “के करण लागरया हो। ईं गधी गै बच्चै नै क्यामी खोलो हो?” जिंया यीसू चेला नै केयो हो, बिंयाई बानै बता दियो। जद लोगां गधी गै बच्चै नै ले जाण दियो। बां गधी गै बच्चै नै यीसू गै कनै ल्यागे बिं पर आपगा गाबा रख दिया अर बो बिंगै उपर बेठ ग्यो। भीड़ ऊं केई लोगां आपगा गाबा अर केई लोगां दरखतां गी डाळियां खेता ऊं ल्यागे रा में बिछा दी। यीसू गै आगै अर लारै चालण आळा लोग ऊंची आवाज में केण लाग्या, “परमेसर गी बडाई होवै। परमेसर गी जय जयकार होवै। तूं झिको परमेसर कनूं आयो है। परमेसर गी खास आसिस थारै पर है। म्हारै बाप दाऊद गो राज झिको आण आळो है धन्य है।” परमेसर गी जय जयकार होवै। यीसू यरुसलेम आया अर मिन्दर में गेया। चारूंमेर घूमगे यीसू ध्यान ऊं सारो कीं देख्यो। पण देर होण गै कारण बारा चेला गै सागै बेतनिया गाम में उड़ग्या। दूसरै दिन जद यीसू अर बिंगा चेला बेतनिया गाम ऊं निकळया तो यीसू मसी नै भूख लागगी। थोड़ी सी दूर बां पता ऊं भरेड़ो अंजीर गो दरखत देख्यो। यीसू बिंगै कनै गेया तो बिंगै अंजीर लागेड़ा ई कोनी हा अर एकला पता ई लागेड़ा देख्या क्यूंकै बो टेम अंजीर पाकण गो कोनी हो। फेर बिं दरखत नै सराप दियो आज गै बाद तेरो फळ कोई बी खा ना सकै। चेला यीसू गी आ बात सुणी ही। फेर बे यरुसलेम आया अर बठै मिन्दर में गेया अर बठै लोगां दुकानां लगा राखी बानै बारै काडण लागग्यो अर सारा नै सामान खरिदणो अर बेचणो बंद करा दियो। फेर यीसू परमेसर गो बचन सिखाण लागग्यो। बण केयो, “थे जाणो हो कै पवितर सासतर में इंया लिखेड़ो है कै मेरो मिन्दर सारी जाति गै लोगां खातर पराथना करण गो घर है। पण थे इनै बोपार गो घर बणा दियो।” जद मुख्य याजक अर यहुदी नेम सिखाण आळा यीसू नै मारण गी कोसिस करण लागग्या पण यीसू कनूं बे डरता हा क्यूंकै सारा लोग बिंगो बचन सुणगे हेरान हो जावंता हा। जद आथण होई तो यीसू अर चेला सैहर ऊं बारै उड़ग्या। दूसरै दिन दिनगै जद यीसू अर चेला गाम ऊं जावै हा तो। बां बिं अंजीर गै दरखत नै देख्यो झिकै नै यीसू स्राप दियो हो। बो जड़ ऊं सूकग्यो हो। पतरस नै याद आयो अर बण यीसू नै केयो, “गुरूजी देखो, ओ बो ई अंजीर गो दरखत हो झिकै नै थे स्राप दियो बो सुकग्यो है।” यीसू केयो, “परमेसर पर बिस्वास करो। मैं थानै साची केऊं हूं कै जे कोई आपगै पूरै दिल ऊं बिस्वास करै है अर कोई संका कोनी करै कै जिंया बो केवैगो बिंया जरूर हो जासी अर जे पहाड़ नै केवै, जा'गे समुंदर में पड़ जा तो बो बिंयाई हो'सी। मैं थानै केऊं हूं कै जद थे लोग परमेसर कनूं कोई बी चीज पराथना कर'गे मांगो हो तो इंया बिस्वास करो कै बा थानै मिलैगी तो थानै जरूर मिलसी। जद थे पराथना करो हो जे थारै मन में किंगैई सागै है कीं तरियां गो बेर है तो बिनै थे माफ कर दैयो। जद थारो पिता परमेसर झिको सुरग में है थानै थारै पापां गी माफी दे देवैगो। जे थे माफ ना करोगा तो थारो पिता झिको सुरग में है थारै पापां गी माफी बी कोनी देवैगो।” बे यरुसलेम पूगगे मिन्दर में गेया, यीसू मिन्दर गै आंगण में चालण लागरया हा तो खास याजक अर नेम सिखाण आळा अर समाज गा मोटा आदमी बांगै कनै आया। अर बे यीसू नै पूछण लाग्या, “काल तूं झिको कीं करयो बो करण खातर तनै कण केयो, इंया करण गो अधिकार तनै कण दियो है।” यीसू बानै उतर दियो, “मैं थानै एक सवाल पूछूं हूं, जे बिंगो उतर देवैगो तो मैं बताऊंगा कै इयां करण गो मनै कण केयो? यूहना झिको पाणी में बतिस्मो दियो बो सुरग कानूं हो या फेर माणसा कानूं इंगो मनै उतर दैयो।” बां लोगां आपसरी में बातां करी अर एक दूसरै नै केण लाग्या जे आपां केवांगा कै यूहना गी डुबकी परमेसर कानूं ही तो यीसू केसी फेर थे बिस्वास क्यूं कोनी करयो। जे आपां केवां, यूहना कानी ऊं है क्यूंकै सारा लोग यूहना नै परमेसर गो संदेस सुणाण आळो मानता ईं बात ऊं बे लोग डरता हा। ईंखातर बां उतर दियो, “म्हे कोनी जाणा,” यीसू फेर केयो, “मैं बी थानै कोनी बताऊं कै मैं ओ काम किंगै अधिकार ऊं करूं हूं।” फेर यीसू बानै एक क्हाणी बोलगे इयां समझाण लाग्या कै, “एकर एक आदमी आपगै खेत में अंगूर गी बेलां लगाई। फेर बिं खेत गै चारूंमेर बाड़ लगाई अर दरड़ो खोद'गे अंगूरा गो रस निकाळणा गी जिग्यां बणाई। ऊंचो डूंचियो बणागे अंगूरां गो खेत ठेकै पर कीं किसाना नै दे दियो अर आप केई दिना खातर दूसरै परदेस में उड़ग्यो। जद अंगूर तोड़ण गो टेम आयो तो किसाना ऊं आपगै खेत गा कीं अंगूर ल्याण खातर एक नोकर भेज्यो। पण किसाना बिं नोकर नै पकड़गे कुंटयो अर पुठो खाली हात भजा दियो। फेर एक ओर नोकर नै भेज्यो पण किसानां बिंगै सिर पर मारी अर बिंगी घणी बेजती करी। फेर मालिक एक ओर नोकर नै घालयो। पण बिनै किसान जान ऊं मार दियो। इंया मालिक केई नौकरा नै घालतो रेयो। पण केईया नै बां कूटया अर केईयां नै जान ऊं मार दिया। आखिर में खेत गै मालिक कनै भेजण खातर आपगो बेटो ई रेग्यो झिकै ऊं बो भोत प्यार करतो हो। बण बिचार करयो, किसान मेरै बेटै गो जरूर आदर करैगा बेटै गी बात जरूर मानैगा। पण किसानां जद बेटै नै आवंता देख्यो तो आपसरी में केण लागग्या ओ खेत गै मालिक गो हकदार है। आओ म्हे इनै जान ऊं मार देवांगा तो सारी जमीन गा मालिक बण जावांगा। ईंखातर बिनै पकड़ गे मार दियो अर बिंगै सरीर नै खेत ऊं बारै फेंक दियो। अब थे सोचो जद खेत गो मालिक आ'गे आंगै सागै के करैगो बो आ'गे जान ऊं मार देवैगो अर आपगो खेत दूसरा नै ठेकै पर देवैगो। थे लोग पवितर सासतर में लिखेड़ी ईं बात नै जाणो हो के? झिकै पथर नै मिसतरिया बिना बरते न्यारो फेंक दियो। बिं पथर नै दूसरै लोगां आपगै मकान गो खास पथर बणागे बरतयो। ओ काम परमेसर करयो, अर आपणै खातर भोत चमत्कारी बात है।” ईं क्हाणी नै सुणन आळा मुख्य याजक, यहुदी नेम सिखाण आळा अर समाज गै मोटै लोगां गै समझ में आगी कै यीसू आ क्हाणी म्हारै बिरोध में दोस लगाण खातर कैई है पण बे भीड़ ऊं डरा हा। ईंखातर यीसू नै छोड़गे उड़ग्या। फेर यीसू गो बिरोध करण आळा बांगी बातां में गळती काडण खातर केई फरीसी गुट गा अर केई हेरोदेस गुट गै लोगां नै बांगै कनै भेज्या। बां यीसू गै कनै आ'गे केयो, “गुरूजी म्हे जाणा हां कै थे इमानदार हो। सच्च बोलो हो, लोग थारै बारै में के सोचै ईं बात गो फिकर कोनी करो अर आदमी, आदमी में फरक जमाई कोनी करो हो चाहे कोई कितोई मोटो क्यूं ना होवै हर काम में किंया चालणो इंगै बारै में परमेसर गी मरजी नै इमानदारी ऊं सिखावो हो। ईंखातर थे म्हानै बताओ कै रोम गै राजा केसर गो करजो चुकाणो सई है या गळत है।” म्हे केसर नै कर देवां के ना? पण यीसू बानै पूछयो थे लोग मनै क्यूं परखो हो? क्यूं मेरी बातां में गळती काडणी चावो हो? फेर यीसू केयो, “रोमी सरकार गो एक सिको ले आवो मैं थानै बताऊंगा।” बे एक सिको ले आया अर यीसू बानै पूछयो, “ईं पर किंगी फोटू है अर किंगो नाम लिखेड़ो है।” बां उतर दियो, “केसर गी फोटू अर नाम है।” फेर यीसू बानै केयो, “झिको केसर नै देणो है बो केसर नै दे देवो अर झिको परमेसर नै देणो है बो परमेसर नै दे देवो।” ओ उतर सुण गे बानै अचंभो हो'ग्यो। इंगै बाद सदूकी गुट गै कीं लोगां यीसू गै कनै आ'गे सवाल पूछयो। बे कोनी मानै हा कै सारा मरण गै बाद आखरी टेम में दुबारै जींवता हो'ज्यैगा। ईंखातर पूछयो गुरू मूसा ओ नेम बतायो है कै जे आदमी गो भाई ब्या करण गै बाद बिना उळाद मर जावै है तो बिं आदमी नै आपगै भाई गी पत्नी ऊं ब्या कर'गे टाबर पैदा करणा है, बे टाबर बिंगै भाई गा मानीजैगा। जद यीसू एक क्हाणी ऊं समझाया कै एकर सात भाई हा। बामू एक जणै गो ब्या हो'ग्यो अर बो बिना उळाद मर ग्यो। बिंगी घरआळी दूसरै भाई गै सागै ब्या करयो पण बो बी बिना उळाद मर ग्यो। इयां सातूं भाई बे उळाद मरग्या अर आखिर में बा लुगाई बी मरगी। अब बताओ, जद मरेड़ा सारा जीवंता होवैगा तो बा लुगाई किंगी घरआळी हो'सी क्यूंकै सातां बिंगै सागै ब्या करयो है। यीसू उतर दियो, “थे पवितर सासतर में लिखेड़ी बातां नै कोनी जाणो अर परमेसर गी ताकत नै बी कोनी जाणो, ईं कारण भोत मोटी गळती करो हो। जद मरेड़ा सारा जीवंता हो जावैगा तो बे ना तो छोरीया ऊं ब्या करैगा, अर ना छोरियां नै ब्या खातर देवैगा। बे लोग सुरगदूतां गी तरियां होवैगा। जद तांई मरेड़ा दुबारै जीवंता होण'गी बात है तो, थे मूसा गी लिखेड़ी किताब में पढयो कोनी कै बण बीरान में जगती हरी झाड़की देखी अर बिनै देखण गेयो परमेसर बिंऊं बात कर'गे केयो, मैं अबरहाम गो परमेसर इसहाक गो परमेसर अर याकूब गो परमेसर हूं, मैं बांगो परमेसर हूं ओ जद केयो जद ऐ तीनू भोत पेलां मरग्या हा। परमेसर तो जीवंता गो परमेसर है मरेड़ा गो कोनी। इंगो मतलब ओ है कै सदां खातर कोनी मरया है अर सारा मरण गै बाद जीवंता होवैगा ईंखातर ईं पर बिस्वास कोनी करण ऊं थे लोग भोत मोटी गळती करो हो।” बिं टेम ई एक यहुदी नेम सिखाण आळो आयो अर यीसू ऊं बेंस करण लागग्यो अर यीसू बानै आच्छी तरियां उतर देवै हो अर बानै बिंगा उतर आच्छा लागा। ईंखातर बां यीसू नै पूछयो, “म्हारै सारै नेमा मू खास नेम किस्यो है?” यीसू जबाब दियो, “सारां ऊं खास नेम ओ है इसरएल गा लोगो सुणो आपणो परमेसर झिको मालिक है। बो एक है, बिंगै बिना ओर कोई कोनी। थै पूरै दिल पूरी आत्मा पूरै मन अर पूरी ताकत ऊं थे परमेसर झिको मालिक है बिंऊं प्यार करो। दूसरो खास नेम ओ है लोगां ऊं इंया प्यार करो जिंया थे अपणै आप सागै करो हो आं दोना नेमा ऊं मोटो कोई नेम कोनी।” ओ सुण गे यहुदी नेम सिखाण आळा केयो, गुरूजी थे भोत आच्छो केयो, थे बिलकुल सई केयो है कै एक ई परमेसर है ओर बिंगै बिना दूसरो कोई परमेसर कोनी। बिं परमेसर नै पूरै दिल, पूरी समझ अर पूरी ताकत ऊं प्यार करणो है जिंया म्हे अपणै आप ऊं करां हां। ओ सारी होंबलियां अर बलिदान ऊं मोटो है। जद यीसू देख्यो कै यहुदी नेम सिखाण आळा नै आच्छी तरियां समझा गे उतर दियो है बां बिनै केयो थे परमेसर नै आपगो राजा, मालिक मानण खातर पूरी तरियां तैयार हो इंगै बाद यीसू ऊं सवाल करण गी हिम्मत कोनी रेई मसी दाऊद ऊं बी मोटो है अर परमेसर गै सागै राज करण आळो है। जद यीसू मिन्दर गै आंगण में सिखाण लागरया हा तो बां लोगां नै पूछयो, “यहुदी नेम सिखाण आळां क्यू केवै है कै मसी दाऊद राजा गो बेटो है। पवितर आत्मा दाऊद राजा नै आ बात बताण खातर केयो मेरै परमेसर मेरै प्रभु मालिक नै केयो, बिरोध करण आळा नै हरा गे तेरै पगां नीचै कर देऊं। जद तांई मेरी दाहिणी ओर बेठगे मेरै सागै राज कर।” फेर यीसू नै समझायो कै दाऊद मसी नै ही आपगो मालिक मानै है। तो फेर मसी सिरफ दाऊद गी पीढी में आण आळो किंया होयो। बो दाऊद ऊं मोटो है। यीसू गी ईं सिक्सा नै भीड़ भोत खुसी गै सागै सुणन लागरी ही। यीसू फेर केयो यहुदी नेम सिखाण आळा ऊं बचगे रेवो। बे अपणै आपनै खास आदमी गै रूप में दिखाण खातर घुमै है अर चावै है कै बाजार में लोग बानै निमस्कार करै। पराथना भवन में खास जिग्यां पर बेठणो चावै है अर ब्या या कोई कीं तरियां गै भोज, नूंतै में ऐ मोटा लोगां गै सागै खास कुरसी पर बेठणो चावै है। झिकां गा पति मरग्या है बांगी सम्पती धन पर करड़ो नेम बणागे उजाड़ देवै है। दिखावो करण खातर लम्बी पराथना करै है। हिस्यै आदमी नै परमेसर मोटी सजा दैयगो। बो मिन्दर गी दान पेटी सामै बेठयो देखण लागरयो बठै लोग दान करण लागरया। बठै केई जणा भोत जादा दान देण लागरया। पण एक गरीब विधवा, आई अर दो छोटा सिका घाल्या झिका एक पिसै गै बराबर हा। यीसू चेला नै आपगै कनै बुला गे केयो, “मैं थानै केऊं हूं अण गरीब विधवा मिन्दर में सारा ऊं जादा दान दियो है। सारा लोग आपगै कनै झिको ज्यादा धन हो, बिंऊं दियो पण अण गरीब विधवा आपगो सारो कीं दान कर दियो क्यूंकै बिंगै कनै खाण पीण गै खातर झिका पीसा हा बे घाल दिया।” जद यीसू मिन्दर मू निकळै हो जद बांगै चेला मू एक जणै केयो गुरू देखो ओ मिन्दर कितो सुणो है, ईं मिन्दर गो मकान कितो सुणो है, इंगा पथर ई किता सुणा अर मोटा मोटा है। यीसू केयो, “थे आं मोटै मकान नै देखो हो पण हिस्यो टेम आवैगो जद दुसमण ईं मिन्दर नै पूरी तरियां फोड़ दैयगा, अठै तांई कै एक ई पथर दूसरै पथर गै उपर कोनी रेवैगो।” फेर जद यीसू मिन्दर गै सामै जेतुन प्हाड़ पर जा'गे बेठग्या पतरस, याकूब, यूहना अर अन्दियास अलग ऊं यीसू नै पूछयो। म्हानै बताओ कै ओ कद हो'सी ओ होण ऊं पेलां के हो'सी जिऊ म्हानै ठा लागै कै दुसमण मिन्दर फोड़न आळो है? यीसू बानै केयो, “ध्यान ऊं संभळगे रेवो कोई बी थानै धोखो ना देवै। क्यूंकै मेरो नाम लेगे कीं लोग आवैगा ओर केवैगा मैं हूं मसी ओ केगे केईयां नै धोखो देवैगा। जद लोग थानै केवै कै लड़ाईयां होवै है या केवै लड़ाईयां होण आळी है तो डरियो ना। ऐ बातां तो जरूर होवैगी पण सारा गो अन्त इतो बेगो कोनी होवैगो। इंयु पेलां एक देस दूसरै पर अर एक राजा दूसरै राजा ऊं लड़ाई करैगा। धरती हालैगी, काळ पडै़गा। जद दुख आण गी सुरूआत हो'सी।” पण थे सावधान रेईयो क्यूंकै थारै मू केई लोगां नै पंचायत में सूंप देसी अर केईयां नै पराथना घरां में मार देसी। अर मेरै पर बिस्वास गै कारण हाकिम अर राजावां सामै खड़या करसी। जद बां लोगां नै मेरै बारै में बताण गो आच्छो मोको हो'सी। सारा गो अंत होण ऊं पेलां सुब समाचार गो परचार सारी जातियां गै लोगां में करणो जरूरी है। जद थानै पकड़गे पंचायतां में खड़या करै तो, चिंता ना करियो कै पंचायत में के बोलणो है, के केणो है बिं टेम परमेसर थानै बोलण खातर केवै बो ई बोलणो है क्यूंकै बोलण आळा थे कोनी होस्यो पण पवितर आत्मा हो'सी। अंत होण गै टेम, भाई भाई नै अर बाप बेटै नै अर बेटा मां बाप गै खिलाफ होगे मरवा दैयगा। मेरै उपर थे लोग बिस्वास करो हो ईंखातर लोग थारूं नफरत करैगा थानै बिलकुल आच्छा कोनी मानसी झिको आखरी टेम तांई मेरै उपर बिस्वास करतो रेवैगो अर दुख सेवंतो रेवैगो बो बच जावैगो। ईंखातर यीसू गी बात नै पढण आळा ध्यान ऊं समझो। जद बे माड़ी चिजां झिकी ऊं म्हे नफरत करां, मिन्दर में खड़ी देखो जद झिका यहुदी गामां में है बे पहाड़ा में भाज जाईयो। झिका छत पर होवै, बे कोई सामान लेण खातर नीचै ना उतरै अर ना घर गै मा जावै। झिको खेत में होवै बो आपगा गाबा लेण घरे ना आवै। बिं टेम बां लुगाईयां खातर माड़ो हो'सी झिकियां गै छोटा टाबर है अर झिकी गर्भवती हो'सी। क्यूंकै बाऊं भाजिजै गो कोनी। थे लोग पराथना करो कै ऐ बातां सरदी में ना होवै। क्यूंकै जद ऐ बातां घटसी आदमियां गो भोत दुख गो टेम हो'सी झिको ईं दुनिया गै सुरु ऊं लेगे जद परमेसर दुनिया बणाई अब तांई कदी कोनी होयो अर आ'गै बी कोनी हो'सी। पण दुख गै दिना नै थोड़ा कर देसी नई तो कोई कोनी बचैगो। बां दिना में जे थानै कोई केवै कै मसी आ ग्यो बो अठै है तो बां पर बिस्वास ना करियो। क्यूंकै अपणै आपनै मसी अर परमेसर गो संदेस सुणाण आळा, केण आळा आवैगा झिका साची झूठा हो'सी परमेसर नै मानण आळै लोगां नै बी धोखो देण गी कोसिस कर'गे सबूत गै रूप में अदभुत चमत्कार गा काम करैगा। ईंखातर थे सावधान रेवो क्यूंकै थानै सारो कीं पेलां ई बता दियो है। मुसीबत कळेस दुख गै बां दिना गै बाद सूरज गी रोसनी कोनी होवैगी चांद बी रोसनी कोनी देवैगो। आसमान गा तारा नीचै पड़ ज्यैगा अर झिको कीं आसमान में है हाल ज्यैगो। फेर सारा लोग परमेसर गी ओर ऊं मिनख गै बेटै नै बादळां ऊं मोटी ताकत गै सागै भोत आच्छै तरिकै ऊं आंवता देखैगा। बिं टेम बो आपगै सुरगदूतां नै भेजगे, धरती ऊं लेगे आसमान गै सिरै तांई अर च्यारूं कूंटा मू आपगै चुणेड़ा लोगां नै भेळा करैगो। अंजीर गै दरखत ऊं एक बात सिखो जिंया ईं दरखत गी डाळियां काची मुलायम होगे बामु पता निकळै है तो थानै ठा लागै है कै गरमी गो मोसम कनै है। इंयाई थे जाण ल्यो कै परमेसर गी ओर ऊं मिनख गो बेटो बेगो ई पाछो आण आळो है जद मेरी बताएड़ी सारी बातां सारी घटनावां गी बातां हो'सी मैं थानै बताऊं हूं आं बातां गै हो जाण ऊं पेलां ईं पीढी गा आदमी कोनी मरसी। आसमान अर धरती नास हो सकै पर मेरी बातां झूठी कोनी हो सकै परमेसर गै बिना कोई कोनी जाणै कै बो अंत गो टेम कद हो'सी। परमेसर गी ओर ऊं मिनख गै बेटै गै पाछो आणै गो दिन या घड़ी गो किनैई ठा कोनी ना तो बो खुद जाणै है अर ना ई सुरगदूत जाणै बिंगै बारै में सिरफ पिता परमेसर जाणै है कै बो टेम कद आवैगो। इनै एक क्हाणी ऊं समझा ऊं, बोळै दूर गै गाम में जाण आळो एक आदमी आपगै घर गै नोकरां नै सारी जिमेदारी देगे उड़ जावै है हर एक नोकर नै के काम करणो है ओ बी बता देवै है गेट पर पेरो देण आळै नै सावधान रेण खातर केगे जावै है। इयां थे बी सावधान रेवो क्यूंकै थानै ठा कोनी थारो मालिक कद पाछो आ जावैगो या आदी रात नै सूरज उगण ऊं पेलां या झांझरकै गै टेम में, जे बो चाणचकै आ जावै तो थे सुत्या होया ना दीखियो। बांगै उडीक में चोकस रेवो ऐ बातां झिकी मैं थानै केऊं हूं सारा नै बताओ। फसह गै त्यूंहार अर बिना खमीर गी रोटी गो त्यूंहार आण गै दो दिन पेलां गी बात है कै मुख्य याजक अर यहुदी धर्म सासतरी कोई हिस्यो रा ढूंढण लागरया हा जिंऊं चलाकी गै सागै बिनै बन्दी बणायो जावै अर मार दियो जावै। बे केवा हा कै पण ओ काम आपां नै त्यूंहार गै दिना में कोनी करणो चईयै इंऊं तो हो सकै है, लोग कोई ओर फसाद खड़यो कर सकै। जद बो बेतनियाह गाम में समौन कोढी गै घरे रोटी जिमै हो तो जद एक लुगाई संगमरमर गै भांडै में बाळा में लगाण आळो तेल लेगे आई अर ल्यागे यीसू गै सिर पर मूंदो मार दियो। इऊ बठै कीं आदमी रीस में आपस में केण लाग्या कै क्यामी मेंगो तेल बरबाद करयो है। ओ तीन सौ दीनारी ऊं बी जादा में बेच्यो जा सकै हो। अर बो धन कंगाला में बांटयो जा सकै हो, बे बिनै झिड़कण लागग्या। जद यीसू केयो, “बिनै क्यू तंग करो हो, छोड़ो बिनै, बण तो मेरै खातर एक बडिया काम करयो है। क्यूंकै कंगाल तो सदां थारै कनै रेवैगा थे जद चावो बांगी मदद कर सको हो, पण मैं थारै सागै सदां कोनी रेऊंगा अण लुगाई बो करयो है झिको बा कर सकै ही बण टेम ऊं पेलां ई गाडै़ जाणै गै खातर मेरै सरीर पर सुगन्ध छिड़क गे बिनै तैयार करयो है। मैं थानै साची केऊं हूं सारै संसार में जद कठैई सुब समाचार गो परचार करयो जावैगो, बठै बिंगी याद में झिको कीं बण करयो है, इंगी बात होवैगी।” जद यहूदा इस्करियोति झिको बिंगै बारा चेला मू एक हो। प्रधान याजक गै कनै यीसू नै धोखै ऊं पकड़वाण खातर गेयो। बे बिंगी बात सुणगे भोत राजी होया अर बां बिनै धन देण गो बचन दियो। ईंखातर फेर यहूदा यीसू नै धोखो देगे पकड़वाण गी ताक में रेण लागग्यो। बिना खमीर गी रोटी गै त्यूंहार ऊं एक दिन पेलां, जद फसह गी बली दी जांवंती ही बिंगा चेला बिनै पूछयो, “तूं के चावै है कै म्हे कठै जा'गे तेरै भोजण गी तैयारी करां।” जद बण आपगै दो चेला नै ओ केगे भेज्यो, “गाम में जाओ, जठै थानै एक आदमी पाणी गो घड़ो लिये मिलै, बिंगै लारै हो जावो। फेर जठै कठैई बी बो मा जावै बिं घर गै मालिक ऊं केईयो गुरूजी पूछै है भोजन गो मेरो कमरो किस्यो जठै मैं आपगै चेला गै सागै फसह गो भोजन खा सकूं। फेर बो थानै उपर एक मोटो सज्यो सजायो कमरो दिखावैगो, बठै मेरै खातर भोज तैयार करियो।” जद बिंगा चेला नगर ऊं जाण लागरया जद बां हर बात बिंयाई होई, जिंया यीसू कैई ही। जद बां फसह गो भोज तैयार करयो। दिन ढळे आपगै बारा चेला गै सागै यीसू बठै पोंच ग्या। जद बे बेठगे खाणो खावा हा, जद यीसू केयो, “मैं साची केऊं हूं, थारै मू एक झिको मेरै सागै भोज करण लागरयो है बो ही मनै धोखो देगे पकड़वावैगो।” इंऊं बे दुखी होगे एक दूसरै नै केण लागग्या साची बो मैं कोनी हूं। जद यीसू बानै केयो, “बो बारा मू एक है झिको मेरै सागै एक थाळी में खावै है। आदमी गै बेटै गै बारै में जाणै ई है, जिंया कै बिंगै बारै में लिखेड़ो है। पर बिं आदमी नै धिकार है झिकै गै द्वारा मिनख गो बेटो पकड़ाईजैगो। बिं आदमी गै खातर कितो आच्छो होवंतो कै बो पैदा ई ना होवंतो।” जद बे खाण पीण लागरया हा यीसू रोटी ली अर धन्यावाद दियो, रोटी तोड़ी अर चेला नै देवंता केयो, ल्यो आ मेरी देह है। फेर बण कटोरो लियो धन्यावाद दियो अर सारा बिमुं पीयो। जद यीसू बोल्यो, “ओ मेरो खून है झिको एक नुअ वायदै गी सुरूआत है ओ भोतां गै खातर बहायो जावैगो।” मैं थानै साची केऊं हूं कै, “अब मैं बिं दिन तांई दाखरस नै कोनी चाखूंगा जद तांई परमेसर गै राज में नूंओ दाखरस ना पीऊं।” जद बे एक गीत गा'गे जेतुन गै पहाड़ पर उड़ग्या। यीसू बानै केयो, “थारो सारा गो बिस्वास गिर जावैगो क्यूंकै लिख्यो है कै, मैं गुवाळिया नै मारूंगा अर भेड़ा तितर बितर हो जावैगी।” पण फेर मैं जी उठण गै बाद मैं थारूं पेलां ई गलील उड़ जाऊंगा। जद पतरस बोल्यो, “चायै सारा आपगो बिस्वास छोड़दैय पण मैं कोनी छोडूंगा।” ईं पर यीसू बिंऊं केयो, “मैं तनै साची केऊं हूं आज'ई रात नै कुकड़ गै दो बारी बांग देण ऊं पेलां तूं तीन बारी मेरो इनकार करैगो।” ईं पर पतरस ओर बी जोर देगे केयो, जे मनै तेरै सागै मरणो बी पडै़ तो बी मैं तनै कोनी छोडूंगा जद बाकी सारा चेला बी इयां केयो। फेर बे एक हिसी जिग्यां पर आया जिनै गतसमनै केयो जावै है। बठै यीसू आपगै चेला ऊं केयो जद तांई मैं पराथना करूं हूं थे अठै बेठो। अर पतरस, याकूब अर यूहना नै बो आपगै सागै ले गेयो। बो भोत दुखी अर परेसान हो। बण बानै केयो, “मेरो मन दुखी है जिंया मेरा प्राण निकळण लागरया है। थे अठैई रूको अर सावधान रेवो।” फेर थोड़ो ओर आ'गै जाण गै बाद बो धरती पर झुकगे पराथना करण लागग्यो कै जे हो सकै तो आ घड़ी मेरै पर ऊं टळ जावै। फेर बण केयो, “हे पिता,” तेरै खातर सारो कीं सोरो है। ईं कटोरै नै मेरै कनूं दूर कर फेर झिको कीं मैं चाऊं हूं बो कोनी पण झिको कीं थे चावो हो बो पूरो होवै। फेर बो आयो तो बण आपगै चेला नै सोऐड़ा देखगे पतरस ऊं केयो समौन के तूं सोण लागरयो है? कै तूं एक घड़ी बी जाग कोनी सक्यो? जागता रेवो अर पराथना करो कै थे कीं तरियां गी बिपता में ना पड़ो। आत्मा तो चावै है पण सरीर निरबल है। अर बो फेर उड़ग्यो अर बिंयाई बचन बोलतां होयां बण पराथना करी। जद बो दुसर आयो तो बण बानै फेर सूत्या देख्या, बांगी आंख्या में नींद भरेड़ी ही बानै समझ कोनी आई कै बानै के उतर देवां। बो तीसरी बारी फेर आयो अर बोल्यो, के थे अजे बी आराम ऊं सूत्या हो? बा घड़ी आ'गी जद मिनख गो बेटो धोखै ऊं पकड़वायो जा'गे पापियां गै हात सोंपयो जावैगो। खड़या होज्यो। मनै पकड़ाण आळो कनै आ'ग्यो है। यीसू बोलै ई हो कै बिंगा बारा चेला मू एक यहूदा बठै दिख्यो बिंगै सागै लाठियां अर तलवारां लेगे एक भीड़ ही बिनै याजका धर्म सासतरियां अर बुढा यहुदी नेता भेज्यो हो। धोखै ऊं पकड़ाण आळै आदमी बानै आ निसानी बता राखी ही झिकै गो मैं लाड करूं बो ई हो'सी। बिनै थे पकड़लेईयो अर ध्यान ऊं ले जाईयो। अर जिंयाई यहूदा बठै आयो बण यीसू गै कनै जा'गे केयो, “गुरु” अर बिनै चूमंयो। फेर बिनै बां पकड़ गे हिरासत में ले लियो। बांगै एक चेलै झिको बिंगै कनै खड़यो हो आपगी तलवार काड ली अर महा याजक गै एक दास पर चला दी जिंऊं बिंगो कान बडग्यो। फेर यीसू बिनै केयो, “मैं कोई अपराधी हूं झिकै नै थे पकड़ण खातर लाठी तलवार लेगे आया हो। रोज मिन्दर में परबचन देवंता होया मैं थारै सागै ही हो पण थे मनै कोनी पकड़यो। पण ओ इंया होयो कै सासतर गो बचन पूरो होवै।” ओ देखगे सारा चेला बिनै एकलो छोड़ भाज खड़या होया। आपगै एक नागै सरीर पर चादर लपेटेड़ी एक नोजवान बिंगै लारै चाल पड़यो अर लोगां बिनै पकड़नो चायो। पण बो आपगी चादर छोड़गे नागो ही भाजग्यो। बे यीसू नै प्रधान याजक गै कनै लेग्या। फेर सगळा मुख्य याजक बुढा यहुदी नेता ओर धर्म सासतरी कठ्ठा होया। पतरस बिंयू दूर दूर रेवंता होया बिंगै लारै लारै महा याजक गै आंगणै तांई उड़ग्यो। अर बठै पेरेदारां गै सागै बेठगे आग तपण लागग्यो। सारा यहुदी महासभा अर मुख्य याजक यीसू नै मोत गी सजा देण खातर बिंगै बिरोध में कोई सबूत ढूंढण गो यत्न करण लागरया हा पर ढुंढ कोनी पाया। भोत सारा लोग बिंगै बिरोध में झूठी गवाइयां दी, पण बे गवाइयां आपस में बिरोधी ही। फेर कीं लोग खड़या होया अर बिंगै बिरोध में झूठी गवाई देवंता होया केण लागग्या। म्हे इनै ओ केवंता सुणयो है कै आदमियां गै हात ऊं बणाऐड़ै मिन्दर नै मैं तोड़ देऊंगा ओर फेर तीन दिना में दुसर बणा देऊंगा झिको हात ऊं बणेड़ो कोनी होवैगो। पण इमै बी बांगी गवाइयां एकसी कोनी ही। जद बिंगै सामणै महा याजक खड़यो होगे यीसू कनूं पूछयो, “ऐ लोग तेरै बिरोध में ऐ के गवाईयां देण लागरया है तूं कीं उतर कोनी देण लागरयो।” ईं पर यीसू चुप रेयो बण कोई उतर कोनी दियो। महा याजक बिंऊं फेर पूछयो, “के तूं पवितर परमेसर गो बेटो मसी है?” यीसू बोल्यो, “मैं हूं।” अर थे मिनख गै बेटै नै बिंगै परम सकतीसाली गै दाहिणी ओर बेठयो ओर सुरग ऊं बादळां में आवंतो देखोगा। महा याजक आपगा गाबा फाड़गे केयो, “म्हानै ओर गवाई गी के जरूरत है?” थे ऐ झूठी बातां अब सुण ई ली। अब थारो के बिचार है? बां बिनै अपराधी मानगे केयो, “इनै दण्ड दैयो।” जद केई आदमियां बिं पर थूकयो, कणैई बिंगो मूं ढकयो अर कणैई बिंगै थपड़ मारया अर कणैई बिंगी मजाक उड़ाई कै, परमेसर गी बात बोल अर फेर पेरेदारां बिनै पकड़गे कुटयो। पतरस अजे तांई नीचै आंगण मैं बेठयो हो कै महा याजक गी एक दासी बोली। जद पतरस नै बठै आग तापतां देख्यो तो बड़ै ध्यान ऊं बिनै पिछाण गे बोली तूं बी तो यीसू नासरी गै सागै हो। पण पतरस मुकरग्यो अर केण लागग्यो मैं कोनी जाणूं मेरी समझ में कोनी आयो, कै तूं के केवै है ओ केवंता होया बो ड़ेवढ़ी तांई उड़ग्यो अर कुकड़ बांग दी। बण दासी जद बिनै दुसर देख्यो तो बठै खड़यै लोगां नै फेर केण लागी, ओ आदमी बी बामूं एक है। पतरस फेर मुकरग्यो, फेर थोड़ी देर बाद बठै खड़यै लोगां पतरस नै केयो साची ही तूं बी बामू एक है क्यूंकै तूं बी गलील गो है। जद पतरस अपणै आपनै धिकारण अर सोगन खाण लागग्यो झिकै गै बारै में थे बात करो हो बिं आदमी नै मैं कोनी जाणूं। जद, कुकड़ दूसरी बांग दी तो पतरस नै बिं टेम बिं बात गी याद आई झिकी यीसू बिनै कैई ही इंयु पेलां कै कुकड़ दो बारी बांग देवै तूं मनै तीन बारी इनकार करैगो। जद पतरस ईं बात नै सोचगे जोर जोर गो रोण लागग्यो। जिंयाई दिन उग्यो मुख्य याजकां, धर्म सासतरियां, बुढा यहुदी नेतावां अर सारी यहुदी महासभा एक योजना बणाई। बे यीसू नै बांदगे लेग्या अर बिनै राजपाल पिलातुस नै सूंप दियो। पिलातुस बिनै पूछयो कै, “तूं यहुदियां गो राजा है।” यीसू उतर दियो, “इंया ही है। तूं खुद केण लागरयो है।” फेर मुख्य याजकां बिं पर भोत सारा दोस लगाया। पिलातुस बिनै फेर पूछयो कै, “तूं उतर कोनी देवै है, देख बे किती बातां गो दोस तेरै पर लगाण लागरया है।” पण यीसू अब बी कोई उतर कोनी दियो। ईं पर पिलातुस नै भोत अचंभो होयो। फसह गै त्यूंहार गै मोकै पर पिलातुस कोई एक केदी नै, झिकै नै लोग चावै है बांगै खातर छोड़ देवंतो हो। बर अब्बा नाम गो एक केदी लड़ाई करण आळां गै सागै जेळ में हो झिकै लडाईयां में आदमियां नै मारया हा। अर भीड़ उपर जा'गे बिनै केण लागी कै, “जिंया तूं म्हारै सागै पेलां करतो आयो है बिंयाई कर।” पिलातुस बानै पूछयो, “के थे चावो हो कै मैं थारै खातर यहुदियां गै राजा नै छोड़ दैयूं?” पिलातुस ओ इंगै वास्तै केयो क्यूंकै बो जाणै हो कै मुख्य याजकां बिना दोस गै कारण पकड़वायो है। पण मुख्य याजकां भीड़ नै उकसाई कै बे बिंगी जिग्यां बरअबा नै छुड़ा लेवै। पण पिलातुस बाऊं बात चीत कर'गे फेर पूछयो, “झिकै नै थे यहुदियां गो राजा केवो हो बिंगो मैं के करूं, बताओ थे के चावो हो?” जबाब में बे चिलाया, “बिनै करूस पर चढा दैयो।” जद पिलातुस बानै पूछयो, “क्यूं अण हिस्यो के अपराध करयो है जद ओर जादा रोळो मचायो अर केयो बिनै करूस पर चढा दैयो।” पिलातुस भीड़ नै राजी करणी चावै हो ईंखातर बरअबा नै छोड़ दियो अर यीसू नै कोड़ा लगवागे करूस पर चढाण खातर दे दियो। फेर सिपाई बिनै रोमी राजपाल गे निवास में लेग्या अर बां सिपाईयां गी पूरी फोज नै बुला ली। फेर बां यीसू नै बेजणी रंग गा गाबा पिराया अर कांटा गो एक ताज बणा गे बिंगै सिर पर रख दियो। फेर बिनै सलामी देण लाग्या कै यहुदियां गै राजा गो सुवागत है। बे बिंगै सिर पर सरकणै गी मारता जाण लागरया हा। बे यीसू पर थूकै हा अर गोडा गै बल झुक गे बे बिंगै आगै नीवण करै हा। ईं तरियां जद बे बिंगी मजाक उडावा हा तो बां बिंगा बेजणी गाबा उतारया अर बिनै बिंगा आपगा गाबा पिरा दिया। अर फेर बिनै करूस पर चढाण खातर बारै लेग्या। बानै कुरेन गो रेण आळो सीमोन नाम गो एक आदमी रा में मिल्यो। बो गाम कानूं आवै हो बो सिकन्दर अर रुफस गो बाप हो सिपाईयां बिं पर दबाब बणा गे यीसू गो करूस चका दियो। फेर बे यीसू नै गुलगुता नाम गी जिग्यां पर लेग्या। जद बां बिनै लोबान रळेड़ो होयो दाखरस पीण नै दियो। पण बण बिनै कोनी पीयो। फेर बिनै करूस पर चढा दियो। जद बां बिंगै गाबा नै परची ऊं लाटरी काडगे आपस में बांट लिया। दिन गै नौ बज्या जद बां बिनै करूस पर चढायो। अर बिंगो दोस पत्र बणागे बिंगै उपर लगा दियो झिकै पर लिखेड़ो हो “यहुदियां गो राजा।” बिंगै सागै दो डाकू बी हा एक बिंगै दाहिणै पासै अर एक खबै पासै। बिंगै कनै ऊं निकळण आळा लोग बिंगी बेजती करै हा आपगो सिर झुकागे बे केवा हा अरै वा, तूं बो ई है झिको मिन्दर नै धोड़गे तीन दिना में फेर बणावै हो। अब करूस ऊं नीचै उतर अर अपणै आपनै बचा ले। ईं तरियां मुख्य याजकां अर धर्म सासतरियां बी यीसू गी मजाक उडाई। बे आपसरी में केण लागग्या, अण ओरा नै बचाया है, पण अपणै आपनै कोनी बचा सकै। अब ईं मसी अर इसराएल गै राजा नै करूस पर ऊं नीचै तो उतरण दे जिंऊं म्हे ओ देख गे बिं पर बिस्वास कर सकां अर बां दोना ई झिका बिंगै सागै करूस पर चढाया हा बिंगी बेजती करी। फेर सारी धरती पर दोफारै में अन्धेरो होग्यो। दिन गे तीन बजे ऊंची आवाज में यीसू केयो, “एली एली लमा सबकतानी।” हे मेरा परमेसर थे मनै क्यूं भूला दियो? झिका कनै खड़या हा, बामूं कीं लोगां ओ सुणयो तो बे बोल्या सुणो ओ एलिल्याह नै बुलावै है। जद एक जणो भाजगे आयो अर स्पंज सिरकै में डुबोगे अर सरकणै पर बांदगे बिनै चुसायो अर केयो, “ठेरो, देखां इनै एलियाह नीचै उतारण खातर आवै या कोनी।” फेर यीसू ऊंची आवाज में बोल्यो अर प्राण छोड़ दिया। जद मिन्दर गो पड़दो उपर ऊं नीचै तांई पाट गे दो टुकड़ा हो'ग्या। फोज गै एक अधिकारी झिको यीसू गै सामणै खड़यो हो बण इंया सुणयो अर देख्यो कै बण प्राण किंया त्याग्या। बण केयो ओ आदमी सच में परमेसर गो बेटो है। कीं लुगाईया बठूं दूर खड़ी देखै ही। बामै मरियम मगदलीनी, छोटै याकूब अर योसेस गी मां मरियम अर सलोमी ही। जद यीसू गलील में हो तो ऐ लुगाईयां बिंगी दासी ही अर बिंगी सेवा करती ही। बठै ओर बी भोत सारी लुगाईयां ही झिकी बिंगै सागै यरुसलेम तांई आयी ही। जद आथण होगी अर क्यूंकै सब्त गो दिन हो। ईंखातर अरिमतिया गो युसुफ आयो। बो यहुदी महासभा गो मानेड़ो आदमी हो अर परमेसर गै राज गै आण गी अडीक करतो हो। हिम्मत गै सागै बो पिलातुस गै कनै आयो अर बण यीसू गी ल्हास मांगी। पिलातुस नै भोत अचरज होयो कै बो इती जल्दी किंया मर ग्यो। बण सेना गै अधिकारी नै बुलायो अर बिंऊं पूछयो कै बिनै मरे भोत देर होगी के? फेर जद बण सेना गै मुख्य ऊं हाल सुण लियो तो युसुफ नै ल्हास दे दी। जद बण एक मलमल गी चादर खरीदी। अर ल्हास नै उतारगे बिमै पळेट दी अर जा'गे बणाएड़ी कबर में रख दी। अर कबर नै एक मोटै पथर ऊं बंद कर दी। मरियम मगदलीनी अर योसेस गी मां मरियम देखण लागरी कै यीसू गी ल्हास कठै रखी है। सबत गो दिन बीत जाणै पर मरियम मगदलीनी, सलोमी अर याकूब गी मां मरियम यीसू गी ल्हास पर लगाण खातर सुगन्ध सामग्री मोल ली। हफ्ते गै पेलै दिन जद सूरज निकळ्यो बे कबर पर गेई। बे आपस में केवै ही, म्हारै खातर कबर गै मूं पर ऊं पथर नै कुण सरकावै गो। फेर जद बां आंख उठाई तो देख्यो कै भोत मोटो पथर बठूं हटेड़ो है। फेर जद बे कबर गै मा गेई तो बां देख्यो कै सफेद गाबा पेरेड़ो एक जवान बेठयो है। बे डर गी। फेर जवान बानै केयो, “डरो ना, थे झिकै यीसू नासरी नै ढूंडो हो, जिनै करूस पर चढायो गेयो हो बो जी उठयो है। बो अठै कोनी है, ईं जिग्यां नै देखो जठै बां बिनै रख्यो हो। अब थे जाओ अर बिंगै चेला अर पतरस नै केवो कै बो थारूं पेलां ई गलील जाण लागरयो है जिंया कै बण थानै केयो हो, बो थानै बठैई मिलैगो।” जद डर अर अचरज में डुबेड़ी बे कबर ऊं निकळगे भाज गी। बां किनैई कोनी बतायो क्यूंकै बे भोत घबरायेड़ी ही। हफ्ते गै पेलै दिन दिनगै जी उठणै गै बाद बो सारा ऊं पेलां मरियम मगदलीनी गै सामणै परकट होयो झिकी मू बण सात ओपरी काडी ही। बण यीसू गै साथिया नै झिका दुख में हा अर विलाप करा हा जा'गे बतायो। जद बां सुण्यो कै यीसू जींवंतो है अर बां देख्यो है तो बां बिस्वास कोनी करयो। इंगै बाद बो दो जणा नै दूसरै रूप में मिल्यो झिका आपगै गाम जाण लागरया। बां पाछा आ'गे ओरा नै बी ईं बात गी जाणकारी दी पण बां बांगो बिस्वास कोनी करयो। बाद में जद बिंगा ग्यारा चेला भोजन करै हा, बो बांगै सामणै प्रकट होयो अर बां बिंगै अबिस्वास अर मन गी कठोरता गै खातर बानै झिड़क्या क्यूंकै बां बिंगो बिस्वास कोनी करयो हो झिको जींवंतो होण गै बाद बानै दिख्यो हो। फेर बण बानै केयो, “जाओ अर सारी दुनिया गै लोगां नै सुब समाचार गो उपदेस देवो। झिको कोई बिस्वास करै है अर बतिस्मो लेवै है बिंगो उद्धार होवैगो अर झिको बिस्वास ना करै है, बो दोसी मान्यो जावैगो। झिको मेरो बिस्वास करैगो, बामै ऐ निसानी हो'सी बे मेरै नाम ऊं ओपरियां नै काड सकैगा बे नूंई नूंई बोली बोलैगा। बे आपणै हातां ऊं सांप पकड़ लेवैगा अर बे जे ज्हेर बी पी लेवै तो बांगो कीं कोनी होवैगो, बे रोगियां पर आपगो हात रखैगा अर बे ठीक हो जावैगा।” ईं तरियां जद प्रभु यीसू बाऊं बात कर चुक्यो हो तो सुरग में उठा लियो गेयो बो परमेसर गै दाहिणी ओर बेठयो है। अर बां जा'गे हरेक जिग्यां प्रचार करयो। अर प्रभु बांगै द्वारा चमत्कार करता रेया अर चमत्कार ऊं प्रभु गो बचन सच्च साबित करता रेया। आदरणीय थियुफिलुस, परमेसर आपणै बिचाळै झिका काम पूरा करया है, बांनै केई लोगां लिखणै गी कोसिस करी है। आं कामां गी बातां आपां तांई बां लोगां पुगाई है, झिका आंख्या ऊं देखण आळा अर प्रभु गो बचन परचार करण आळा हा। यीसू मसी गै जन्म ऊं लेगे आखर तांई सगळी बातां नै मैं आच्छी तरियां परखी तो मनै ई ठीक लाग्यो कै ऐ सगळी बातां तेरै खातर ध्यान ऊं अर लड़ीबार लिखूं। जिंऊं थे थियुफिलुस, जाणल्यो कै यीसू मसी गै बारै में झिकी बातां थे सीखी है बे लो पर लीक है। आ घटना यहुदिया परदेस गै राजा हेरोदेस गै टेम गी है, जद जकरिया नाम गो एक याजक हो। बो याजकां गै अबियाह दल में हो। बिंगी घराळी इलीसिबा हारून गै घराणै गी ही। जकरिया अर इलीसिबा परमेसर गी नजर में निरदोस हा अर परमेसर गै हुक्म अर नेम नै मानण आळा हा। अर बांगै कोई टाबर कोनी होया क्यूंकै इलीसिबा बांझ ही अर बे दोनूं बुढा हो'ग्या। जकरिया गै दल गै याजकां गी यरुसलेम नगर में परमेसर गै मिन्दर में धूप करण गी बारी आई। याजकां गी रीति गै हिसाब ऊं परची घाली तो बा जकरिया गै नाम गी निकळी कै बो मिन्दर गी पवितर जिग्यां में जा'गे प्रभु गै सांमै धूप करै। बिं टेम बो मिन्दर में धूप करै हो तो बारै लोगां गी भोत मोटी भीड़ खड़ी होगे पराथना करै ही। बिं टेम मिन्दर में जकरिया नै परमेसर गो एक सुरगदूत धूप करण गी जिग्यां गै सजै पास खड़यो दिस्यो। जकरिया बिनै देखगे भोत डर ग्यो। जद सुरगदूत बिनै केयो, “तूं डर ना, तेरी पराथना परमेसर सुण ली, तेरी घराळी इलीसिबा गै एक छोरो हो'सी तूं बिंगो नाम यूहना राखी। बिंगै जन्म ऊं थानै खुसी मिलसी अर सगळा लोग भोत आनंद मनासी। अर बो प्रभु गी निगा में म्हान हो'सी अर आपगी मां गी कोख में ई परमेसर गी आत्मा ऊं भरपूर हो'सी अर बो दाख गो रस अर दारू कदी कोनी पिवैगो। जद बो जुआन होज्यै'गो तो इसराएल देस में परचार कर'गे भोत सारा लोगां नै परमेसर गै रा पर ल्यासी। बो एलियाह परमेसर गी बात बोलण आळै गी आत्मा अर सामरथ लेगे प्रभु गै आण ऊं पेलां आवैगो। बो प्रभु मसी गै जन्म ऊं पेलां आ'गे बिंगै खातर लायक प्रजा तैयार करसी, बो मां बाप गो मन टाबरां कनै लगासी अर परमेसर गै हुक्म नै ना मानण आळा लोगां गै मन नै परमेसर गी नजर में आच्छा लोगां गी समझ में ले आसी।” जकरिया सुरगदूत नै केयो, “म्हे दोनूं तो बुढा हां, फेर ईं बात नै मैं किंया मानूं?” सुरगदूत बिनै केयो, “मेरो नाम जिबराईल है, मैं परमेसर गै सांमै खड़यो रेगे सेवा करूं हूं, अर मनै तेरै कनै ओ सुब समाचार सुणाण खातर घाल्यो है कै थारै एक छोरो हो'सी। मेरी बातां पर तूं बिस्वास कोनी करयो बिं टेम आण पर पूरी होण आळी है। ईंखातर तूं बिं टेम तांई बोल कोनी सकैगो।” सगळा लोग बारै खड़या जकरिया नै अडिकता अडिकता हेरान होण लागरया कै बिनै मिन्दर में इती देर किंया लागी। केई देर बाद जद बो मिन्दर ऊं बारै आयो तो बिंऊं बोलीज्यो कोनी अर जद बो बानै सेन ऊं समझाण लागग्यो। ईंखातर लोग बिनै देखगे समझग्या कै मिन्दर में आज इनै परमेसर दरसण दियो है। जद बिंगा मिन्दर में सेवा करण गा दिन पूरा हो'ग्या तो पाछो आपगै घरे उड़ग्यो। बां दिनां में बिंगी घराळी इलीसिबा गरभवती होई अर पांच म्हिना तांई आपगै घर गै मांई रेई। कै ईं “बुढापै में परमेसर मेरै उपर किरपा कर'गे टाबर ना होण गो मेरै कलंक नै दूर करयो है। आ बात परमेसर मेरै खातर करी है।” जद इलीसिबा गै गरभवती होण गै छठै म्हिनै में परमेसर जिबराईल सुरगदूत नै गलील परदेस गै नासरत नगर में मरियम कनै घाल्यो। अर बिंगो रिस्तो राजा दाऊद गै घराणै गै युसुफ नाम गै एक छोरै गै सागै होयड़ो हो अर बा बिं टेम कुंआरी ही। फेर सुरगदूत मरियम गै घरे जा'गे केयो, “प्रणाम परमेसर तेरै सागै है अर तेरै उपर किरपा करी है।” मरियम आ बात सुणगे भोत घबरा गी अर सोचण लागी कै ओ के तरिकै गो प्रणाम है? सुरगदूत बिनै केयो, “डर ना, क्यूंकै परमेसर गी किरपा तेरै उपर होई है, देख, तूं गरभवती हो'सी अर तेरै एक छोरो हो'सी। तूं बिंगो नाम यीसू राखी। बो म्हान होवैगो अर परमेसर गो झिको सारा ऊं म्हान बेटो कुहावैगो अर प्रभु परमेसर बिंगै पुरखां दाऊद गो सिंहासन देसी। अर बो याकूब गै घराणै पर सदां राज करसी अर बिंगै राज गो कदी बी अंत कोनी हो'सी।” ऐ बातां सुणगे मरियम सुरगदूत नै केयो, “इंया किंया हो सकै, मैं तो अजे कुंआरी हूं।” सुरगदूत बिनै जबाब दियो, “तेरै उपर परमेसर गी किरपा ऊं पवितर आत्मा तेरै उपर ऊतरसी अर परमेसर गी सामरथ तनै संभाळसी। ईंखातर बो पवितर हो'सी अर परमेसर गो बेटो कुहासी। सुण, तेरै नेडै़ गै रिस्तै में इलीसिबा गै छठमों म्हिनों है, झिकी बांझड़ी ही, बिंगै बुढापै में एक छोरो हो'सी। क्यूंकै परमेसर नै कोई बी बात मुसकिल कोनी।” मरियम केयो, “मैं प्रभु गी दासी हूं, अर बिंगी इच्छा पूरी होवै।” आ बात सुणगे सुरगदूत पाछो सुरग में उड़ग्यो। बां दिनां में मरियम बेगी सी प्हाड़ी देस में यहूदा परदेस गै एक नगर में इलीसिबा गै घरे गेई अर, बिनै निमस्कार करयो। जिंयाई इलीसिबा बिंगो निमस्कार सुण्यो तो टाबर बिंगै पेट में खुसी ऊं उछळ्यो अर बा पवितर आत्मा ऊं भरपूर हो'गी। इलीसिबा राजी होई अर जोर ऊं बोली कै, “लुगाईयां में तेरै अर तेरै पेट गै फळ पर परमेसर गी आसिस है, मेरै उपर किरपा होई है कै मेरै प्रभु गी मां मनै मिलण आई है, देख, मरियम तेरो निमस्कार सुणता ई मेरै पेट में टाबर खुसी ऊं उछळ्यो है, धन्य है मरियम तूं झिकी बिस्वास करयो कै प्रभु गै कानी ऊं केएड़ी बातां पूरी होगे रेसी।” जद मरियम केयो, “मेरा प्राण परमेसर गी बडाई करै अर आत्मा खुस है, बण आपगी गरीब दासी पर किरपा कर'गे जुगा जुगा तांई धन्य कर दी, क्यूंकै पवितर अर सकतीसाली परमेसर मेरै खातर भोत म्हान काम करया है। झिका लोग बिंगो डर मानै है बां पर पीढियां तांईं दया बणी रेसी। बण आपगै सामरथ ऊं हंकारी लोगां नै तितर-बितर कर दिया। बण राजा नै गरीब बणा दिया अर गरीबां नै राजा बणा दिया। बण भूखै लोगां नै आच्छी चिजां ऊं धपा दिया अर अमीर लोगां नै खाली हात काड़ दिया। बण इसराएल गा लोग झिका परमेसर गा सेवक है बांगी मदद करी अर आपगो करेड़ो वायदो भुल्यो कोनी अर बां पर दया करी। बण म्हारै पुरखां, अबरहाम अर बिंगै घराणै गै सागै वायदो करयो कै मेरी दया थारै उपर सदां बणी रेसी।” मरियम लगभग तीन म्हिना तांई इलीसिबा गै घरे रेई फेर पाछी आपगै घरे आ'गी। जद इलीसिबा गै जापै गो टेम पूरो होयो तो बण एक छोरै नै जन्म दियो। जद बिंगै पड़ोसियां अर रिस्तेदारां नै पतो लागग्यो कै इलीसिबा नै छोरो देगे परमेसर दया करी है, तो बां बठै भोत खुसी मनाई। बांगी रीति-रिवाज गै हिसाब ऊं टाबर गै जन्म ऊं आठमै दिन खतनै गै रिवाज नै पूरो करण खातर अर नाम काडण खातर बिंगै घरे आया। बां टाबर गो नाम बिंगै बाप गै नाम पर जकरिया काडणो चायो। ओ देखगे इलीसिबा बोली कै, “इंगो नाम तो यूहना काडणो है।” जद बां केयो, “थारै पूरै परिवार में किंगोई ओ नाम कोनी।” जद बां बिंगै बाप नै सेन कर'गे पूछयो कै, “तूं इंगो नाम के काडणो चावै है?” बण तख्ती मंगा गे बिं पर लिख्यो कै “इंगो नाम यूहना है” ईं बात पर सारा लोग हेरान हो'ग्या। बिं टेम ई जकरिया गी जुबान खुलगी अर परमेसर गो धन्यवाद करण लागग्यो। आं बातां ऊं बठै रेण आळा सारा लोग डरण लागग्या अर यहुदियां गै पूरै प्हाड़ी देस में आं बातां गी चरचा फेलगी। झिकैई आं बातां नै सुणी बो हेरान हो'ग्यो अर सोचण लागग्यो कै ओ टाबर मोटो होगे केठा के बणैगो? क्यूंकै प्रभु गो हात इंगै सिर पर हो। ईंखातर लोग इंयाई सोचै हा। जद जकरिया पवितर आत्मा ऊं पूर्ण होगे परमेसर गी बात बोलण लागग्यो। “इसराएल गै परमेसर गी जय हो क्यूंकै बो आपगै लोगां गी मदद गै खातर आयो है अर आपगै लोगां नै आजाद कराया है। परमेसर आपणै खातर आपगै सेवक राजा दाऊद गै खानदान में मुकतीदाता घाल्यो, जिंयाई परमेसर भोत टेम पेलां आपगै पवितर परमेसर गी बात बोलण आळा ऊं बचन कुहाया हा। परमेसर आपां नै दुसमणा अर बैरियां गै हातां ऊं छुड़ाया है। परमेसर झिको पवितर वायदो आपणै पुरखां सागै करयो हो बो आपणै सागै निभायो है। परमेसर आपणै पिता अबरहाम गै सागै सोगन खाई अर बचन दियो कै थानै दुसमणा गै हातां ऊं छुड़ागे सारी उंमर प्रभु गी सेवा करण खातर धरमी, पवितर अर दिलेर बणादेस्यूं। ओ बी पूरो होण लागग्यो, हे बालक, तूं मुकतीदाता गै आणूं पेलां परचार कर'गे, लोगां गो मन बदळगे तैयार करसी। ईंखातर तूं परम प्रधान परमेसर गी बात बोलण आळो कुहासी। अर बिंगै लोगां नै समझावैगो कै आपगै पापां गी माफी मांगण ऊं मुकती मिलसी। ओ सारो आपणै परमेसर गी घणी किरपा ऊं हो'सी, झिकै गै कारण आपणै सारां पर सुरग ऊं एक नूंअ दिन गी जोती चमकैगी। आ जोती बां लोगां पर चमकैगी झिका अंधेरै अर मोत गै नेडै़ है, अर बो आपां नै सांती गै रा पर चालण गी अगुआई करसी।” अर बो टाबर यूहना जवान अर आत्मा में पूरो होंतो गेयो, अर इसराएल गै लोगां गै बिचाळै आपगी सेवा सरू करण तांई बन उजाड़ में रेयो। बां दिनां में रोमी देस गै महाराजा ओगुस्तुस हुक्म दियो कै सारै देस गी जणगणना हो'सी। ईंखातर सारा लोग आपो-आपगी जन्म-भूमी पर आपगो नाम लिखाण गेया। आ पेली जणगणना सीरिया गै राजपाल क्विरिनियूस गै टेम में होई। ईंखातर युसुफ दाऊद राजा गै खानदान में होण गै खातर गलील परदेस गै नासरत गाम ऊं यहुदियां परदेस गै बेतलेहम गाम में जांती बारी आपगी होणाळी घराळी मरियम झिकी गरभवती ही बिनै सागै लेग्यो। जद बे बठै हा तो मरियम गै जापै गो टेम पूरो हो'ग्यो। धरमसाळा में जिग्यां ना मिलण गै खातर आपगै मोबी बेटै नै गऊसाळा में जन्म दियो अर घाबै में पळेट गे ठाण में लिटा दियो। बिं रात नै बठै कनैई खेतां में भोत सारा गुवाळिया आपगी भेड़ां गी रुखाळी करा। बिं टेम ई प्रभु बठै एक सुरगदूत घाल्यो अर परमेसर गी इती घणी तेज जोती चमकी कै बे सारा देखगे डरग्या। जद सुरगदूत बानै केयो, “थे डरो ना, मैं थानै एक भोत ई आनंद गो सुब समाचार सुणाऊं, झिको धरती गै सारा लोगां खातर हो'सी। क्यूंकै आज राजा दाऊद गै नगर में थारै खातर मुकतीदाता प्रभु जन्मयो है, ओ ई मसी प्रभु है। मैं थानै मेरी ईं बात गी निसानी बताऊं कै थे बिं टाबर नै गऊसाळा गै ठाण में कपडै़ में लपेटेड़ो देखोगा।” जद चाणचकै ई बिं सुरगदूत गै सागै बोळा सारा सुरगदूत आ'गे परमेसर गी मेमां करण लागग्या। अर बोल्या, “सुरग में परमेसर गी जय हो, धरती पर बां लोगां नै सांती मिलै झिकां ऊं परमेसर खुस है।” फेर सुरगदूत पाछा सुरग में उड़ग्या, जद बे गुआळिया आपसरी में केण लाग्या कै, “आज्यो, आपां बेतलेहम गाम में चालगे देखां तो सरी झिको समाचार आपां नै प्रभु दियो है।” फेर बे बेगा सा बठै जा'गे मरियम अर युसुफ कनै गेया अर टाबर नै ठाण में सुत्यो देख्यो। गुवाळिया बिं टाबर नै देखगे झिकी बात बिंगै बारै में सुणी ही बां सारै लोगां नै बता दी, अर गुवाळिया नै झिकी बात बताई ही बिनै सुणन आळा सारा लोग हेरान होग्या। पण मरियम आं सारी बातां नै आपगै मन में राखी अर सोचती रेई। इनै बे गुवाळिया झिकी बातां बां सुणी बानै साची होएड़ी देखगे परमेसर गी बडाई करता पाछा आग्या। जद छोरै गै जन्म गा आठ दिन होया तो खतनै गी रीति-रिवाज पूरी करी अर बिंगो नाम यीसू राख्यो। आ बात बिंगी मां गै गर्भ में होण ऊं पेलां ई सुरगदूत बता दियो हो। प्रभु गै नेम-विधान में लिखेड़ो है कै पेलो छोरो प्रभु नै अर्पण करणो है। अर कबूतर या चिड़ियां गा दो बच्चां गी बली देणी है। अर झिका नेम-विधान लोगां खातर प्रभु मूसा नै दिया बिंगै हिसाब ऊं बांगै सुद्ध होणै गा दिन पूरा हो'ग्या तो यीसू नै यरुसलेम गै मिन्दर में लेग्या। यरुसलेम में समौन नाम गो एक धरमी भगत हो अर पवितर आत्मा बिंगै सागै ही, बो इसराएली लोगां गै सुखचैन गी अडीक करै हो। पवितर आत्मा बिनै कदैई पेलां बतायो कै “तूं प्रभु गै मसी गा दरसण करण ऊं पेलां समाईजै कोनी।” बालक यीसू गा मां-बाप बिनै नेम-विधान पूरो करण खातर मिन्दर में ल्याया तो समौन पवितर आत्मा गै केणै पर बिंऊं मिलण आयो। समौन यीसू नै आपगी गोदी में चक'गे परमेसर गो धन्यवाद करयो अर केयो: “हे प्रभु, अब तूं आपगै देईड़ बचन गै हिसाब ऊं मनै तेरै दास नै चेन ऊं आपगै कनै आण दे। क्यूंकै मैं तेरै भेजेडै़ मुकतीदाता गा दरसण कर लिया है। झिकै नै तूं सारै जगत गै लोगां गै खातर भेज्यो है। बो एक जोती गै समान है अर सगळी जातियां गी मुकती करसी, इसराएल देस में झिका तेरा आपगा लोग है बानै ईं बात गो गर्व हो'सी।” यीसू गा मां-बाप बिंगै बारै में भेद भरी बातां सुण गे भोत हेरान होया हा अर अचंभै में पड़ग्या। जद समौन बानै आसिरवाद दियो अर मरियम नै केयो, “सुण, ओ टाबर परमेसर गो चुणेड़ो निसान है, इसराएल देस में ईं पर बिस्वास करण आळा लोग मुकती पासी अर आनंद मनासी पण झिका लोग बिस्वास ना करसी अर बिरोध करसी बे लोग नास हो'ज्यैगा। ओ टाबर परमेसर गै कानूं चुणेड़ो एक निसान गी तरियां है बिंगो केई लोग बिरोध करैगा। बिंऊं लोगां गै दिल गी भावनां गो पतो चालज्यैगो अर तेरै बेटै गी भंयकर सतावना नै देखगे तेरो काळजो पाट ज्यासी अर तनै इंया लागसी जिंया तलवार काळजै माखर आर-पार काड़ दी।” बठै हना नाम गी एक परमेसर गी बात बताण आळी ही, बा असेर कबिलै गै फनूएल गी बेटी ही। बा ब्याऊं सात साल गै बाद में विधवा हो'गी अर बिंगी उंमर चुरासी सालां गी ही, बा मिन्दर में रेंवती अर बरत अर पराथना कर'गे रात-दिन भगती करती ही। बिं टेम बा मिन्दर में यीसू अर बिंगै मां बाप नै मिलण आई बण प्रभु गो धन्यवाद करयो अर यरुसलेम देस में छुटकारै गी अडीक करण आळै लोगां नै यीसू गै बारै में बताण लागगी। जद बां मिन्दर में प्रभु गै नेम-विधान गै हिसाब ऊं सारा कारज पूरा कर लिया तो पाछा गलील में आपगै गाम नासरत में उड़ग्या। बठै यीसू जवान अर बुद्धी में भरपूर होंतो गेयो, परमेसर गी किरपा गो हात बिंगै सिर पर हो। फसह गै त्यूंहार पर हर साल यीसू गा मां-बाप यरुसलेम नगर में जांता हा। जद बे बारा सालां गा होया तो सदां गी तरियां बे त्यूंहार मनाण यरुसलेम में गेया। जद बे त्यूंहार मना'गे पाछा घरे आण लागरया तो यीसू यरुसलेम में ई रेग्यो पण बिंगै मां-बाप नै ध्यान कोनी लाग्यो। बां सोच्यो कै यीसू दूसरा यातरियां गै सागै आंतो होणो अर इंया चालतां-चालतां एक दिन गो सफर टप ग्यो। फेर बे यीसू नै आपगै रिस्तेदारां अर जाणकारां में ढूंडण लागग्या। जद बो बानै लादयो कोनी तो बे ढूंढता ढूंढता पाछा यरुसलेम कानी चाल पड़या। जद बे तीन दिनां गै बाद में पाछा यरुसलेम गै मिन्दर में गेया अर देख्यो तो बो ग्यानी लोगां गै बिचाळै बेठयो अर सुआल-जबाब करण लागरयो। बठै सुणन आळा सगळा लोग बिंगी बुद्धी अर जबाब ऊं हेरान हा। बिंगा मां-बाप बी ओ देख गे हेरान हा अर बिंगी मां बिनै केयो, “बेटा, तूं म्हारै सागै आ के करी?, देख तनै ढूंढता-ढूंढता म्हे किता दुखी हो'ग्या।” यीसू बानै जबाब दियो, “थे मनै क्यामी ढूंढै हा, थे जाणो कोनी कै मनै मेरै पिता गै घर में ई रेणो जरूरी है?” पण बे बिंगै जबाब नै समझ कोनी सक्या। फेर बो बांगै सागै आपगै गाम नासरत में आ'ग्यो अर बांगै हुक्म गो पालण करतो रेयो। पण बिंगी मां ऐ सगळी भेद भरी बातां आपगै दिल में राखी। अर यीसू बुद्धी में तेज अर डील-डोळ में बदतो गेयो अर सागै परमेसर अर लोगां गै प्रेम में बदतो गेयो। आ बात बां दिनां गी है जद महाराजा तिबिरियुस नै रोम साम्राज में राज करतां पन्दरा साल हो'ग्या। बिं टेम पुन्तियुस पिलातुस यहुदिया राज गो राजपाल हो। हेरोदेस राजा गै राज गी च्यार पांती करी झिका में गलील परदेस में हेरोदेस, इतुरैया अर तरखोनीतिस में बिंगो भाई फिलिप्पुस अर अबिलेने राज में लिसानियास राज करतो हो। अर बिं टेम यरुसलेम में हना अर कैफा महा याजक हा, तो परमेसर आपगो बचन बन उजाड़ में रेण आळै जकरिया गै बेटै यूहना कनै पुगायो। बो यरदन नदी गै आसै पासै सगळै परदेस में जा'गे लोगां नै ओ परचार करण लागग्यो कै थे लोग परमेसर ऊं आपगै पापां गी माफी लेण खातर आपगै पापां गै खातर पसतावो कर'गे पाप करणो छोड़गे बतिस्मो ल्यो। जिंया यसयाह परमेसर गी बात बताण आळै गै बचनां गी किताब में यूहना गै बारै में आ परमेसर गी बात लिखेड़ी है: “बन उजाड़ में एक जणो हेलो मारै कै प्रभु गो रा तैयार करो अर बिंगी सड़कां सीदी बणाओ। जिंया एक बड़ै आदमी गै आवण पर रास्तै नै तैयार कर'गे सड़कां सीदी करै अर ऊंची जिग्यां नै निची करै अर निची जिग्यां नै भर देवै अर टेडै मेडै रास्तै नै सीधो करै अर उबड़ खाबड़ नै एकसो करै इंयाई प्रभु गै आवण खातर लोगां गै मना नै तैयार करो। सगळा लोग परमेसर गै मुकतीदाता गा दरसण करसी।” यूहना ऊं लोगां गी मोटी भीड़ बतिस्मो लेण आंती जद बण केयो, “अरै सांप गा बच्चों, थानै कण बता दियो कै आण आळै न्याय गै दण्ड ऊं बचण खातर मेरै कनै आओ। थे आपगो मन बदळगे दरखतां गी तरियां आच्छा फळ ल्याओ अर बानै झिड़क्या कै थे आपगै मन में घमण्ड ना करो, सागै थे इंया ना सोचो कै अबरहाम झिको धरमी आदमी हो बिंगै घराणै गै होण गै खातर म्हे बच जांवांगा, क्यूंकै मैं थानै साची केऊं कै परमेसर थानै नास कर'गे अबरहाम गै खातर तो आं पथरां ऊं बी उळाद पैदा कर सकै पण परमेसर गै न्याय ऊं कोई बच कोनी सकै। अब कुहाड़ो दरखतां गी जड़ां पर रखेड़ो है। ईंखातर झिका-झिका दरखत आच्छा फळ ना ल्यासी बानै बाडगे आग में बाळ देसी।” जद लोगां डरतां पूछयो, “तो म्हे के करां?” बण बानै जबाब दियो, “झिकै गै कनै दो कुड़ता है, बो एक कुड़तो बिनै देवै झिकै कनै कोनी अर झिकै गै कनै रोटी है बो आपसरी में बांटल्यै।” जद चुंगी लेण आळा बी बतिस्मो लेण आया अर पूछयो कै, “गुरूजी, म्हे के करां?” बण बानै केयो कै, “थे चुंगी हक ऊं जादा ना लेई करो,” अर सिपाईयां बी पूछयो, “म्हे के करां?” बण जबाब दियो कै “धकै ऊं थे रिपिआ ना ल्यो, अर ना कीं पर झूठो दोस लगाओ, आपगी तनखां में ई संतोस करो।” लोगां नै मसी गी आण गी बड़ी आस ही ईंखातर बे आपगै मन में यूहना गै बारै में सोचण लाग्या कै कठैई ओ मसी तो कोनी। तो यूहना बां सगळा नै केयो, “मैं तो थानै पाणी ऊं बतिस्मो देऊं, पण झिको आण आळो है बो मेरूं सकतीसाली है मैं बिंगै इतो लाइक कोनी कै बिंगै बुंटा गो फितो खोल सकूं। बो थानै पवितर आत्मा अर आग ऊं बतिस्मो देसी। बिंगो छालो बिंगै हात में है, बो आपगो खळो आच्छी तरियां साफ कर'गे अर कणक नै आपगी बखारी में भेळी करैगो पण फूसका नै बिं आग में गेरै गो झिकी कदी बुझण आळी कोनी अर बाळ देसी।” ईं तरियां यूहना ग्यान गी भोत बातां समझागे परमेसर गै बचन गो परचार करतो। जद सारा लोग बतिस्मो लेण लागरया तो बिं टेम यीसू बी बतिस्मो लेगे पराथना करण लागरयो हो, जद सुरग खुलग्यो। अर परमेसर गी पवितर आत्मा बिं पर कबूतर गी देह धार'गे उतरी अर आकासबाणी होई कै, “तूं मेरो लाडलो बेटो है, मैं तेरूं भोत ई खुस हूं।” जद यूहना चौथाई देस गै राजा हेरोदेस नै बिंगै भाई फिलिप्पुस गी घराळी हेरोदिआस ऊं ब्या करण खातर अर बिंगै माड़ा कामां गै खातर रोळा करया। जद हेरोदेस यूहना नै जेळ गै मा करवागे अर एक भोत बुरो काम करयो। यीसू जद आपगी सेवा सरू करी तो बिं टेम बिंगी उंमर लगभग तीस साल गी ही। लोग एली गै बेटै युसुफ गै बेटै गै रूप में बिनै जाणता हा। एली मत्तात गो बेटो हो, अर मत्तात लेवी गो बेटो हो। लेवी मलकी गो बेटो हो, अर मलकी यन्ना गो बेटो हो। अर यन्ना योसेफ गो बेटो हो। योसेफ मत्तित्याह गो बेटो हो, अर मत्तित्याह आमोस गो बेटो हो। आमोस नहूम गो बेटो हो, अर नहूम असल्याह गो बेटो हो। असल्याह नोगह गो बेटो हो। नोगह मात गो बेटो हो, अर मात मत्तित्याह गो बेटो हो। मत्तित्याह सिमी गो बेटो हो, अर सिमी योसेख गो बेटो हो। अर योसेख योदाह गो बेटो हो। योदाह यूहना गो बेटो हो, अर यूहना रेसा गो बेटो हो। रेसा जरुबाबिल गो बेटो हो, अर जरुबाबिल सालतियेल गो बेटो हो। सालतियेल नेरी गो बेटो हो। नेरी मलकी गो बेटो हो, अर मलकी अद्धी गो बेटो हो। अद्धी कोसाम गो बेटो हो, अर कोसाम इलमोदाम गो बेटो हो। अर इलमोदाम एर गो बेटो हो। एर येसू गो बेटो हो, अर येसू इलाजार गो बेटो हो। इलाजार योरीम गो बेटो हो, अर योरीम मत्तात गो बेटो हो। मत्तात लेवी गो बेटो हो। लेवी समौन गो बेटो हो, अर समौन यहूदा गो बेटो हो। यहूदा योसेफ गो बेटो हो, अर योसेफ योनान गो बेटो हो। योनान इलयाकीम गो बेटो हो। इलयाकीम मलेआह गो बेटो हो, अर मलेआह मिन्नाह गो बेटो हो। मिन्नाह मत्तता गो बेटो हो, अर मत्तता नातान गो बेटो हो। नातान दाऊद गो बेटो हो। दाऊद यिसै गो बेटो हो, अर यिसै ओबेद गो बेटो हो। ओबेद बोअज गो बेटो हो, अर बोअज सलमोन गो बेटो हो। सलमोन नहसोन गो बेटो हो। नहसोन आम्मीनादाब गो बेटो हो, अर आम्मीनादाब अरनी गो बेटो हो। अरनी हिस्त्रोन गो बेटो हो, अर हिस्त्रोन फिरिस गो बेटो हो। फिरिस यहूदाह गो बेटो हो। यहूदाह याकोब बेटो हो, अर याकोब इसहाक बेटो हो। इसहाक अबरहाम गो बेटो हो, अर अबरहाम तिरह गो बेटो हो। तिरह नाहोर गो बेटो हो। नाहोर सरूग गो बेटो हो, अर सरूग रऊ गो बेटो हो। रऊ फिलिग गो बेटो हो, अर फिलिग एबिर गो बेटो हो। एबिर सिलह गो बेटो हो। सिलह केनान गो बेटो हो, अर केनान अरफसद गो बेटो हो। अरफसद सेम गो बेटो हो, अर सेम नूह गो बेटो हो। नूह लिमिक गो बेटो हो। लिमिक मथूसिलह गो बेटो हो, अर मथूसिलह हनोक गो बेटो हो। हनोक यिरिद गो बेटो हो, अर यिरिद महललेल गो बेटो हो। महललेल केनान गो बेटो हो। केनान इनोस गो बेटो हो, अर इनोस सेत गो बेटो हो। सेत आदम गो बेटो हो, अर आदम परमेसर गो बेटो हो। फेर यीसू पवितर आत्मा ऊं पूर्ण होगे अर यरदन नदी गै माऊं बतिस्मो लेगे पाछो आयो। आत्मा बिनै चाळिस दिन तांई बन उजाड़ में लेगे गेयो अर सैतान बिनै परखतो रेयो। जद बरत गा दिन पूरा हो'ग्या तो बिनै भूख लागी। जद सैतान बिनै केयो, “जे तूं परमेसर गो बेटो है तो ईं पथर नै केओ कै रोटी बणज्यै?” यीसू बिनै जबाब दियो, “सासतर में लिखेड़ो है आदमी सिरफ रोटी ऊं जींवंतो कोनी रेवै।” फेर सैतान बिनै भोत ऊंची जिग्यां पर लिजागे पलक में जगत गो सारो राज-पाट दिखायो। अर बिनै केयो कै “ओ राज-पाट अर आंगो अधिकार तनै दे दैयूंगा क्यूंकै ओ मनै सूंपेड़ो है, अर मैं चाऊं बिनै ई दे सकूं। ईंखातर तूं मनै नीवण करैगो तो ओ सारो कीं तेरो होज्यै'गो।” यीसू बिनै उतर दियो, “सासतर में लिखेड़ो है कै, ‘तूं प्रभु आपगै परमेसर नै नीवण कर अर सिरफ बिंगी ई भगती कर।’” जद बो बिनै यरुसलेम में ले जा'गे मिन्दर गै गुमट पर खड़यो करयो अर बिनै केयो, “जे तूं परमेसर गो बेटो है तो अठुं छाळ मारज्या।” क्यूंकै सासतर में लिखेड़ो है कै, “परमेसर तेरै खातर आपगै सुरगदूतां नै आग्या देसी कै बे तनै बचाल्यै। अर बे तनै हातो हात साम लेसी, तेरै पगां में पथरां ऊं चोट कोनी लागणदैय।” यीसू उतर दियो, “सासतर में इंया बी लिखेड़ो है कै, ‘तूं प्रभु आपगै परमेसर नै अजमाई ना।’” जद सैतान बिंगी सारी तरियां ऊं परख कर ली तो बिंगै कनूं हार गे दूसरो मोको ढूंढण खातर उड़ग्यो। फेर यीसू आत्मा गी सामरथ ऊं पूर्ण होगे गलील में आयो अर बिंगी बातां पूरै देस में फेलगी। बो यहुदियां गै सतसंग घर में परबचन देंतो हो अर सारा लोग बिंगी बडाई करता हा। फेर बो नासरत गाम आयो जठै बिंगो पालण पोसण होयो। अर आपगी रीति रिवाज गै हिसाब ऊं सब्त गै दिन सतसंग घर में जा'गे सासतर पढण खातर खड़यो होयो। जद बिनै यसयाह परमेसर गी बात बताण आळै गी किताब पढण खातर दी जद बो बिं किताब में बो पद निकाळयो जठै इंया लिखेड़ो हो: “प्रभु गी आत्मा मेरै उपर है, ईंखातर कै बण कंगालां नै सुब समाचार सुणाण खातर मनै चुण्यो है। अर इंया सुणाण खातर मनै भेज्यो है कै लोगां नै गुलामी ऊं मुकती मिलैगी अर आंधा देखैगा अर दबेड़ा लोग छुटैगा। अर परमेसर गी दया आपणै उपर होणै गो टेम आ'ग्यो है।” फेर बण किताब बंद कर'गे सेवक गै हात में पाछी दे दी अर नीचै बेठग्यो अर सतसंग-घर में सगळा गी निगा बिं पर ई टिकेड़ी ही। जद यीसू बानै केयो, “आज'ई ओ लेख थारै सांमै पूरो होयो है।” बठै हर कोई बिनै सरावै हो, झिका सुहावणा बचन बण बोल्या बांऊं सगळा हेरान होगे केण लाग्या, “ओ युसुफ गो बेटो कोनी के?” फेर बण बानै केयो, “थे जरूर ई मनै आ क्हावत केस्यो, ‘अरै बेद, तूं पेलां आपगो तो ईलाज कर, सागै म्हे कफरनहूम में तेरै कामां गै बारै में जिकर सुण्यो है, बां कामां नै अठै आपगै गामै बी कर।’” मैं थानै साची केऊं कै आपगै गामै किसैई परमेसर गी बात बताण आळै गो आदर मान कोनी होवै। फेर मैं थानै साची केऊं कै इसराएल देस में एलियाह परमेसर गी बात बताण आळै गै टेम में साढे तीन सालां तांई मेह कोनी बरस्यो अर पूरै देस में एक भोत मोटो अकाळ पड़ग्यो हो। बिं देस में केई विधवा लुगाईयां ही। पण सेदा परदेस गै सारपत नगर गी एक विधवा नै छोड़गे ओर किंगै कनै एलियाह नै मदद करण खातर घाल्यो कोनी। दूसरी मिसाल आ है कै परमेसर गी बात बोलण आळै एलीसा गै टेम में इसराएल में भोत सारा कोढी हा, पण बामूं सीरिया में रेण आळै नामान कोढी नै छोड़गे अर किसैई कोढी नै ठीक कोनी करयो। जद ऐ बातां सुणतांई जिता लोग सतसंग घर में हा बानै रीस आ'गी। बे सगळा लोग खड़या हो'ग्या अर बिनै गाम ऊं बारै काड दियो अर बिनै नीचै गिराण खातर आपगै नगर गै प्हाड़ गी चोटी पर लेग्या। पण बो बांगै बिचाळूं निकळगे दूसरै पासै उड़ग्यो। फेर यीसू गलील परदेस गै कफरनहूम गाम में आ'गे सब्त गै दिन लोगां नै परबचन देण लागरयो। लोग बिंगै अधिकार पूर्ण बचन नै सुण गे हेरान हा। बठै बिं संतसंग घर में एक ओपरी बड़ेड़ो आदमी जोर ऊं किरळायो, “हे नासरत आळा यीसू, तूं म्हारूं के चावै है? तूं म्हानै नास करण आयो है के? मैं तनै जाणूं तूं परमेसर गो पवितर जन है।” यीसू बिनै ललकारयो, “चुप रे, अर इमूं बारै निकळज्या।” जद ओपरी बिं आदमी नै पटक गे अर बिना कीं नुकसान करे बारै निकळगी। ओ देख गे सारा लोग हेरान होगे आपसरी में केण लाग्या कै ओ किस्यो बचन है? झिकै गै अधिकार अर सकती ऊं ओपरी बी केणो मान गे निकळज्यै। ईं तरियां च्यारूंमेर बिंगी बातां आग दाईं फेलगी। जद यीसू सतसंग घर ऊं समौन गै घरे गेयो तो बठै समौन गी सासू नै तकड़ी बुखार चढरी तो बां यीसू गै आ'गै बिनै ठीक करण गी बिनती करी। जद यीसू बिंगै कनै खड़'गे आदेस दियो कै बुखार उतर जावै अर बा दबादब खड़ी होगे बिंगी सेवा करण लागगी। आथण पोर गै झिकै झिकै घरां में लोग न्यारी न्यारी बीमारी ऊं बीमार हा, बां सारा नै यीसू गै कनै ल्याया। बण सारा लोगां नै हात लगा गे ठीक करया। भोत सारै बां लोगां मू ओपरियां करळावंती बारै कडी अर बोली कै “तूं परमेसर गो बेटो है,” पण यीसू बानै बोलण कोनी दी क्यूंकै बे जाणै ई कै ओ मसी है। यीसू दिन गै ई बठूं सुनसान जिग्यां में उड़ग्यो अर लोगां गी मोटी भीड़ बिनै ढूंढती-ढूंढती बिंगै कनै आई अर केण लागी कै “थे म्हानै छोड़गे ना जावो।” पण बण बानै केयो, “मनै दूसरै गामां में जा'गे बी परमेसर गै राज गो परचार करणो है, क्यूंकै ईंखातर ई मनै घाल्यो है।” ईं तरियां बो गलील परदेस गै सतसंग-घरा में जा'गे परचार करतो रेयो। एक दिन यीसू गनेसरत नाम गी झील गै किनारै पर परमेसर गो बचन सुणावै हा तो बिंगै च्यारूंमेर भोत सारा लोग भेळा हो'ग्या। बिं टेम बण बठै दो किस्ती खड़ी देखी अर बांगै कनै मछुआरा जाळ साफ कर'गे पळेटण लागरया। बामूं एक किस्ती समौन नाम गै आदमी गी ही, बिं पर चढ'गे यीसू केयो, “किस्ती थोड़ी सी दूर डूंगै पाणी में कर ले।” फेर बो लोगां नै आपगा परबचन सुणाण लागग्यो। जद यीसू आपगा परबचन सुणा दिया तो समौन नै केयो, “किस्ती नै ओर डूंगै पाणी में ले जा'गे मछली पकड़ण खातर जाळ गेर।” जद समौन केयो, “हे गुरूजी, म्हे सारी रात गा मेनत करण लागरया हां, अजे तांई एक ई मछली कोनी पकड़ी, थे केवो तो एक बारी ओर जाळ गेरूं।” जद बां जाळ गेरयो तो इती मछलियां फसगी कै बांगो जाळ टूटण लागग्यो। तो बां दूसरी किस्ती पर बेठया आपगै साथियां नै हेलो मारयो कै म्हारी मदद करो। बे भाजगे आया बां दोनूं किस्तियां इती भरली कै बे मछलियां गै भार ऊं डूबण लागगी। इती मछलियां नै देखगे बिंगा साथी जब्दी गो बेटो याकूब, यूहना अर सारा साथियां नै भोत हेरानी होई। जद समौन पतरस यीसू गै पगां पड़'गे बोल्यो, “हे प्रभु, तूं अठुं उड़ज्या, क्यूंकै मैं एक पापी आदमी हूं अर थारै लायक कोनी।” यीसू बिनै केयो, “डर ना आज ऊं तूं लोगां नै परमेसर गो बचन सुणागे भगती गै रा पर ल्यासी।” फेर बे आपगी किस्ती किनारै पर ल्याया अर सारो कीं छोड़गे यीसू गै लारै हो'ग्या। जद यीसू किसैई गामै गेयो तो बठै बानै देखगे एक कोढ गो रोगी आयो अर पगां पड़'गे बिनती करण लागग्यो कै, “हे प्रभु थे चाओ तो मनै ठीक कर सको।” बण बिंगै हात लगागे केयो, “मैं चाऊं तूं ठीक होज्या” अर बो बिं घड़ी ठीक हो'ग्यो। अर यीसू बिनै केयो, “आ बात किनैई ना बताई” अर मूसा गै बणाएड़ै नेम विधान गै हिसाब ऊं याजक नै दिखा अर भेंट चढा। जिंऊं लोगां नै पतो चालै कै तूं सच्च में ठीक हो'ग्यो है। पण यीसू गी चरचा सारै फेलगी अर लोग बीमारियां ऊं ठीक होण खातर बिंगै कनै भेळा होण लागग्या। पण बो रेगीस्तान में जा'गे पराथना करतो हो। इंया होयो कै एक दिन यीसू किंगैई घर में परबचन करण लागरयो अर बो लोगां नै बीमारियां ऊं ठीक करण खातर प्रभु गै सामरथ में पूर्ण हो। बठै लोगां गी मोटी भीड़ में फरीसी अर यहुदी धरम सासतरी लोग बी बेठया हा, झिका गलील अर यहुदियां गै हर गाम ऊं अर यरुसलेम ऊं आएड़ा हा। बिं टेम केई आदमी लकवै गै एक रोगी नै मांची पर सुणागे ल्याया बे बिनै यीसू गै कनै ले जाण खातर कोई चारो ढूंढै हा। क्यूंकै मा बारै भोत भीड़ ही। पण बे बोळी भीड़ गै कारण मा कोनी जा सक्या, ईंखातर बे बिनै छत पर लेग्या अर खपरेल हटागे सणै माची बिनै यीसू गै सांमै नीचै उतार दियो। बण बां लोगां गो बिस्वास देख गे रोगी नै केयो, “जा बेटा, तेरा पाप माफ हो'ग्या।” जद यहुदी सासतरी अर फरीसी आपसरी में गुसर फूसर करण लाग'ग्या कै “ओ कुण है झिको परमेसर गी निंदा करै? परमेसर गै बिना ओर कुण है झिको पाप माफ कर सकै?” यीसू बांगै मन गी बात जाणग्यो अर केयो, “थे आपगै मन में इंया क्यामी सोचो? सोरो है के, इंया केणो कै तेरा पाप माफ हो'ग्या या इंया केणो कै उठ अर आपगी मांची चक'गे चाल। थे ओ जाणल्यो कै मिनख गै बेटै नै धरती पर पाप माफ करण गो बी अधिकार है।” बण केयो, “मैं तनै केऊं कै खड़यो हो, अर आपगी मांची चक'गे घरे चाल।” बो दबादब उठयो अर आपगी मांची चक'गे परमेसर गी बडाई करतो आपगै घर कानी चाल पड़यो। जद सारा देखगे हेरान हो'ग्या अर परमेसर गी बडाई करण लागग्या। बां डरता केयो, “म्हे आज अनोखी बात देखी है।” इंगै बाद में यीसू नगर ऊं बारै आयो तो बण लेवी नाम गो आदमी झिको चुंगी लेंतो, बिनै चुंगी गी चोकी पर बेठयो देख्यो अर बिनै केयो, “मेरै लारै आ'ज्या अर मेरो चेलो बण ज्या।” बो सारो कीं छोड़गे बिंगै लारै हो'ग्यो। फेर लेवी यीसू गै खातर आपगै घरे मोटो भोज राख्यो, झिकै में चुंगी लेण आळा गी अर दूसरै लोगां गी मोटी भीड़ बिंगै सागै भोजन करण लागरी ही। जद फरीसी अर बांगा सासतरी बिंगै चेला पर रीस बळण लागग्या कै “थे चुंगी लेण आळा अर पापी लोगां सागै क्यूं खाओ पीयो हो?” यीसू बानै जबाब दियो, “चंगा-भलां नै बेद गी जरूरत कोनी होवै, रोगियां नै होवै है। मैं पापियां गो मन बदळण खातर आयो हूं धरमियां गो कोनी।” बां बिनै केयो, “यूहना अर फरीसियां गा चेला तो बरत राखै अर पराथना करै है पण थारा चेला तो हरदम खांता-पींता रेवै है।” यीसू बानै केयो, “थे बीन गै सागै होवंता बरातियां नै बरत रखा सको के? पण बिं दिन जद बीन नै बिंगा दुसमण बरातियां ऊं न्यारो कर देसी तो जद बे बरत राखैगा।” बण बानै एक मिसाल बताई, “कोई आदमी नूंअ कपडै़ गी कारी पाड़गे, पुराणै कपड़ै पर कोनी लगावै, क्यूंकै नूंओ कपड़ो भेळो होगे पाट ज्यैगो अर पुराणै कपड़ै सागै मेळ कोनी खावैगो। अर कोई नूंओ दाख गो रस पुराणै चमड़ै गी दीवड़ी में कोनी घालै, जे घाल सी तो दाख गो रस चमड़ै गी दीवड़ी नै पाड़ देसी अर ढूळज्यैगो अर सागै चमड़ै गी दीवड़ी बी खतम हो'ज्यैगी। ईंखातर नूंओ दाख गो रस नूंई चमड़ै गी दीवड़ी में ई घालणो चईयै। कोई आदमी पुराणो दाख गो रस पीगे नूंओ कोनी मांगै, क्यूंकै बो केसी पुराणो ई ठीक है।” एक बारी बो सब्त गै दिन खेता माखर जाण लागरयो अर बिंगा चेला कणक गी बालां तोड़गे भोर-भोर गे खातां जावै हा। जद बिनै फरीसियां पूछयो, “थे ओ के करण लागरया हो, नेम विधान गै अनुसार सब्त गै दिन इंया करणो ठीक कोनी?” यीसू बानै जबाब दियो, “थे सासतर में पढयो कोनी के राजा दाऊद अर बिंगा साथी जद भूखा हा, तो बां के करयो? बे परमेसर गै तंबु में गेया अर बठै चढाएड़ी रोटियां नै बां सारा खाई, झिकी रोटी नै याजकां नै छोड़गे ओर कोई कोनी खा सकै हो।” अर बण बानै केयो, “मिनख गो बेटो सब्त गै दिन गो बी मालिक है।” इंया होयो कै एकर ओर सब्त गै दिन यीसू सतसंग घर में जा'गे परबचन सुणाण लाग्या। बठै एक आदमी हो झिकै गो सजो हात सुकेड़ो हो। सासतरी अर फरीसी यीसू पर नेम-विधान नै तोड़ण गो इल्जाम लगाण गो मोको ढूंढै हा कै देखां ओ सब्त गै दिन ठीक करै है के कोनी? पण बो बांगै मन गी बात जाणै हो ईंखातर बण बिं सुकेडै़ हात आळै आदमी नै केयो, “खड़यो हो अर बिचाळै आ” जद बो खड़यो होगे बिचाळै आ'ग्यो। यीसू बानै केयो, “मैं थानै पूछूं कै सब्त गै दिन भलो करणो आच्छो है जा बुरो; किनैई बचाणो आच्छो है जा मारणो?” जद यीसू च्यारूंमेर बां सगळा कानी देख्यो अर बिं आदमी नै केयो, “तेरो सुकेड़ियो हात आ'गै कर” बण हात आ'गै कर दियो तो बिंगो हात बिं घड़ी ई ठीक हो'ग्यो। ईं बात ऊं बे रीस बळगे आपसरी में गुसर फूसर करण लागग्या कै इनै आपां किंया फसावां? बां दिनां में यीसू प्हाड़ पर पराथना करण गेयो तो बण सारी रात पराथना में बिता दी। जद दिन उग्यो तो बण आपगै सारा चेला नै बुला'गे बामूं बारा खास चेला चुण लिया। अर बानै खास चेला केयो। बागां नाम ऐ है: समौन झिकै गो दूसरो नाम पतरस है, अर इंगो भाई अन्द्रियास अर याकूब, यूहना अर फिलिप्पुस, बरतुल्मे, मत्ती, थोमा, हलफई गो बेटो याकूब, अर समौन झिकै गो दूसरो नाम जेळोतेस है, अर याकूब गो बेटो यहूदा अर यहूदा इस्करियोति झिकै यीसू नै पकड़ायो हो। जद यीसू प्हाड़ पर ऊं उतरगे नीचै आयो तो बठै पूरै यहुदियां, यरुसलेम, सूर अर सेदा गा लोग अर बिंगै चेला गी मोटी भीड़ खड़ी ही। बे झिका बांगो परचार सुणण अर बीमारियां ऊं ठीक होण खातर कनै आया। अर झिका में ओपरियां गी कसर ही, बानै ठीक करया। सारा बिंगै हात लगाणो चावा क्यूंकै बामूं निकळण आळी सामरथ सारा नै ठीक करै ही। जद यीसू आपगै चेला कानी देखगे केयो, “धन्य हो थे झिका गरीब हो, क्यूंकै थानै बी परमेसर गै राज गी प्रजा गो हक मिलैगो। धन्य हो थे झिका अब भूखा हो, क्यूंकै सारा धपाइजोगा। धन्य हो थे झिका अब रोवो, क्यूंकै थे हांसोगा। धन्य हो थे जद मिनख गै बेटै गै कारण लोग थारै सागै बैर करसी, अर थानै काडगे थारी निंदा करसी अर थारो नाम लेणो पसंद कोनी करैगा। बिं दिन राजी होगे नाचीयो क्यूंकै थारै खातर सुरग में भोत मोटो फळ है। याद करो कै थानै बुरो केण आळा लोगां गा बाप दादा परमेसर गी बात बोलण आळा गे सागै बी इंयाई करता आया है। पण थारै उपर भोत बुरो होवैगो झिका अमीर है, क्यूंकै बां आपगो सुख चेन ले लियो है। थारै उपर भोत बुरो होवैगो झिका अब धापेड़़ा हो क्यूंकै बे भूख मरसी। थारै उपर भोत बुरो होवैगो झिका अब हांसों, क्यूंकै थे रोवोगा अर दुख करोगा। थारै उपर भोत बुरो होवैगो झिका नै सगळा लोग भला केवै, क्यूंकै बांगै बाप दादा बी झूठी बात बोलण आळा नै इंयाई केवंता हा।” “पण मैं थानै केऊं कै थे थारै दुसमणा ऊं बी प्रेम राखो झिका थारूं बेर राखै, बांगो भलो करो। झिका थारो बुरो सोचै है बानै आसिस देवो अर झिका थारी बुराई करै बां खातर पराथना करो। झिका थारै एक गाल पर थपड़ मार देवै तो बिं कानी दूसरो गाल बी कर दैयो, झिको थारो खेसलो खोसल्यै तो बिनै कुड़तो बी राजी होगे दे देवो। झिका थारूं कोई चीज मांगै तो बानै देवो अर झिका थारूं चीज खोस लेवै तो बिनै पाछी ना लेवो। मेरै केण गो मतलब है जिंया थे चावो कै थारै सागै बरताव करै बिंयाई थे बी दूसरा गै सागै बरताव करो। जे कोई थारूं प्रेम राखै अर थे बिंगै सागै ई प्रेम राखो तो के मोटी बात है, क्यूंकै पापी लोग बी इंयाई करै। जे थारो कोई भलो करै अर थे बिंगो ई भलो करो के मोटी बात है क्यूंकै पापी लोग बी इंयाई करै। जे थे किनैई कीं चीज ऊधारी दे दैयो अर बिंगी पाछी आण गी आस राखो तो के बडाई गी बात है, क्यूंकै पापी लोग बी तो इंयाई करै। थे आपगै दुसमणा ऊं प्रेम राखो बांगी भलाई करो, कोई चीज पाछी ना लेण गी आस राखगे ऊधारी देवो। इंया करणो परमेसर गी नजर में बिंगी उळाद ठेरोगा अर थानै बिंगो मोटो फळ मिलसी, क्यूंकै बो आच्छा-माड़ा सारां पर दया करण आळो है। जिंया थारो पिता परमेसर दया करै बिंयाई थे सारां पर दया करो।” “जे थे कीं पर दोस ना लगाओगा तो थारै पर बी कोनी लगाइजै गो, अर ना'ई दूसरै गो बिरोध करो क्यूंकै थारो ई कोनी करीजैगो। दूसरा नै माफ करोगा तो थानै ई माफी मिलसी। किनैई कीं देवोगा तो थानै ई बिंऊं भोत जादा मिलसी क्यूंकै झिकै नाप ऊं थे दियो बिं नाप ऊं ई थानै मिलसी।” फेर यीसू बानै मिसाल बतायी कै आंधो आंधै नै रा बतावै गो तो बे दोनूं दरडै़ में कोनी पड़सी के? चेलो आपगै गुरूं ऊं मोटो कोनी हो सकै पण झिको पूर्ण होवैगो बो गुरू गै बराबर हो सकै। तनै दूसरै गी आंख में तो फूसको दिखै पण आपगी आंख में पड़यो डोको कोनी दिखै। जद तनै आपगी आंख में लठ कोनी दिखै तो दूसरै नै किंया के सकै कै तेरी आंख गो फूसको काड़ दैयूं। अरै कपटी, पेलां आपगी आंख ऊं लठ दूर कर जद दूसरै गी आंख गो फूसको काडण खातर थानै साफ दिखैगो। हिस्यो कोई आच्छो दरखत कोनी झिकै गै माड़ो फळ लागै अर ना'ई हिस्यो कोई माड़ो दरखत है झिकै गै आच्छो फळ लागै। आच्छो दरखत आपगै आच्छै फळा ऊं पिछाणिजै क्यूंकै लोग झाड़कां गै कदी अंगुरिया अर बडिया फळ कोनी तोडै़। इंयाई भलो आदमी आपगी भली बातां ऊं अर बुरो आदमी आपगी बुरी बातां ऊं पिछाणिजै। क्यूंकै झिकी बातां बिंगै मन में है बे ई मूं पर आवै। जद थे मेरो केणो ई कोनी मानो तो फेर क्यामी प्रभु-प्रभु केण लागरया हो। झिको कोई मेरै कनै आवै अर मेरी बात सुणगे मानै बो आदमी बिं आदमी बरगो है, झिकै आदमी आपगै घर गी नींव माटी नै डूंगी पट'गे पथर पर रखी है अर बाड आई पण बिनै हिला कोनी सकी क्यूंकै बिंगी नींव मजबूत रखैड़ी ही। पण बो आदमी झिको मेरी बात सुणगे कोनी मानै बो बिं बरगो है झिको आपगै घर गी नींव रेत पर खोद'गे रखी। अर बाड ऊं खूर'गे बिंगो घर नास हो'ग्यो। जद यीसू लोगां नै उपदेस सुणागे पाछा कफरनहूम गाम में आया। तो बठै एक रोमी सुबेदार हो अर बिंगो एक दास झिको बिनै भोत प्यारो हो। बो दास कोई बीमारी ऊं मरण आळो हो जद बण सुबेदार यीसू गै चमत्कारां गै बारै में सुण्यो तो बण यहुदियां गै खास बुजरग लोगां नै यीसू नै बुलाण गी बिनती करण खातर घाल्या कै यीसू आ'गे मेरै दास नै ठीक करै। जद बे बुजरग यीसू गै कनै जा'गे बिनती करण लाग्या कै थे म्हारै सागै चालो अर बिं भलै सुबेदार गी मदद करो क्यूंकै बो मदद गै लाइक है। बो म्हारी जाती गै लोगां सागै भोत प्रेम राखै अर म्हारै सतसंग घर बणाण में भोत मदद करी है। आ बात सुणगे यीसू बांगै सागै चाल पड़यो अर जद घरूं थोड़ी सी दूर रेग्यो जद सुबेदार आपगै साथियां नै केगे समाचार भेज्यो कै “हे गुरूजी, तकलीफ ना करो, मैं ईं लाइक कोनी कै थे मेरी छत गै नीचै आओ।” अर मैं थारै कनै आण गै लाइक कोनी हूं पण थे बठूं बेठया बेठया बचन कर देवोगा तो मेरो दास ठीक होज्यै'गो। मैं बी किंगो दास हूं अर मालिक गै हुकम नै मानण आळो हूं। अर मेरै नीचै बी केई दास है बे मेरै सारै हुकम नै मानै है। ईंखातर थे हुकम देओ अर मेरो दास ठीक हो जावैगो। बिंगी बात सुणगे यीसू भोत हेरान हो'ग्यो अर पाछो फुर'गे लोगां गी मोटी भीड़ नै केयो, “मैं इसराएल देस गै लोगां में इतो पक्को बिस्वास कोनी देख्यो।” जद सुबेदार गा भेजेड़ा साथी बिंगै कनै पाछा आया तो बानै दास ठीक होएड़ो मिल्यो। यीसू थोड़ा दिनां गै बाद में कफरनहूम गाम ऊं नाइन गाम में जाण लागरयो, अर बिंगै सागै चेला अर लोगां गी भोत भीड़ ही। जिंयाई बो गाम गै कनै पूग्यो तो बठै ऊं केई लोग एक मरेड़ै छोरै नै माटी देण खातर लेगे जावा हा। बो छोरो एक विधवा गो इकलोतो बेटो हो। बिंगै सागै एक भोत बड़ी भीड़ ही। बिं विधवा नै रोंती देखगे यीसू नै तरस आ'ग्यो अर बण केयो, “रो ना।” अर बण अर्थी गै हात लगायो तो बे ठम ग्या। जद बण केयो, “अरै जवान, खड़यो हो।” ओ बचन केंतांई बो मरेड़ो छोरो जींवंतो हो'ग्यो अर लोगां सागै बातां करण लागग्यो। यीसू बिनै आपगी मां गै सागै घरे घाल दियो। ओ मोटो चमत्कार देखगे सारा घबराग्या अर परमेसर गी बडाई कर'गे केण लाग्या कै ओ आपणै बिचाळै म्हान परमेसर गी बात बोलण आळो पैदा होयो है अर परमेसर आपगै लोगां गी सुद्धी ली है। अर यीसू गै ईं चमत्कार गी चरचा सारै यहुदियां परदेस में अर आसै पासै गै सारै देस में फेलगी। यीसू गै चमत्कारां गै बारै में यूहना गै चेला बिनै जेळ में जा'गे बतायो। जद यूहना आपगै दो चेला नै बुला'गे बानै केयो, “जाओ अर जा'गे बिनै पूछगे आओ कै आण आळो मसी थे ई हो के या म्हे ओर किंगी उडीक करां?” जद बां यीसू गै कनै आ'गे बिंगो समाचार बतायो। बिं घड़ी बांगै देखतां देखतां बण भोत सारा लोगां नै अर ओपरी बडे़ड़ा नै अर भोत सारा आंधै लोगां नै ठीक करया। अर यीसू बानै केयो, “झिको थे देख्यो है अर सुण्यो है बो सारो थे जा'गे यूहना नै बता दैयो कै म्हे ऐ चमत्कार आपगी आंख्या ऊं देख्या है झिका में आंधा देखै है, लंगड़ा चालै-फिरै है, कोढी ठीक होवै है, बेरा सुणै है, मरेड़ा जींवंता होवै है, अर कंगाला नै सुब समाचार सुणाइजै है, धन्य है बे मिनख झिका मेरै उपर बिस्वास करण गै कारण ठोकर कोनी खावै” जद यूहना गा चेला बिंगै कनूं उड़ग्या तो यीसू यूहना गै बारै में बतायो अर लोगां नै केयो कै “थे बिरान में के देखण गेया? पून ऊं हालतां सरकणा नै के? तो थे के देखण गेया? के मुलाइम कपड़ा पेरेडै़ आदमी नै? पण थे सुणो, मेगां कपड़ा पेरण आळा आदमी मेल माळियां में मोज ऊं रेवै है। तो फेर थे के देखण गेया? किसैई परमेसर गी बात बोलण आळा नै? हां, पण मैं थानै बताऊं कै थे बीयाबान में परमेसर गी बात बोलण आळा ऊं मोटै नै देखण गेया। ओ यूहना बो ई है झिकै गै बारै में पवितर सासतर में लिखेड़ो है, ‘देख, मैं आपगै दूत नै तेरै आ'गै आ'गै घालूं, झिको तेरै आगै तेरो रा सीधो करसी।’ मैं थानै केऊं, अब तांई जिता आदमी पैदा होयड़ा है बामै यूहना ऊं मोटो ओर कोई कोनी, पण फेर बी झिको परमेसर गै राज में छोटै ऊं छोटो है बो बिंऊं मोटो है।” अर सारा आम लोग अर चुंगी लेण आळा नै बी यीसू मसी गी बातां नै सुणगे मान लियो कै ऐ सारा परमेसर गी ओर ऊं है क्यूंकै बां पेलां ई यूहना ऊं बतिस्मो ले लियो हो। पण फरीसियां अर धरम सासतरियां परमेसर गी इच्छा नै टाळ दी। बां यूहना ऊं बतिस्मो बी कोनी लियो हो। फेर यीसू केयो, “पण मैं ईं जुग गै लोगां गी बराबरी किंगै सागै करूं?” ऐ लोग बां टाबरां बरगा है झिका गुआड़ में खेलै अर आपसरी में ओळमो देवै कै म्हे थारै खातर बंसरी बजाई पण थे नाच्या कोनी अर म्हे थानै आपगो दुखड़ो सुणायो पण थे रोया कोनी। क्यूंकै बतिस्मो देण आळो यूहना ना तो रोटी खावै अर ना दाख गो रस पीवै। पण थे फेर ई बिमै ओपरी गी कसर बताओ। अर मैं झिको मिनख गो बेटो हूं, अर खाऊं-पीऊं हूं तो थे केवो कै ओ तो पेटू अर पियाकड़ है अर चुंगी लेण आळा अर पापियां गो साथी है। कोई बी ग्यान गै बात गी सच्चाई बानै मानण आळा गै बरताव ऊं पतो चालै है। जद एक फरीसी आदमी यीसू नै आपगै घरे भोजन गो नूंतो दियो तो बो भोजन करण बांगै घरे गेयो। बिं गाम गी एक पापण लुगाई नै जद ध्यान लागग्यो कै यीसू फरीसी गै घर में आयो है बा एक सुणै भांडै में सेंट लेगे आई। बा पापण लुगाई यीसू गै पगां कनै बेठगे अर रो-रो गे बिंगा पग आपगै आंसुआं ऊं धोण लागगी अर आपगै सिर गै बाळां ऊं पुंछण लागगी, अर पगां गा लाड कोड कर'गे सेंट लगाण लागगी। ओ देखगे फरीसी सोचण लाग्या कै जे ओ कोई परमेसर गी बात बोलण आळो होंतो तो इनै ठा लाग जांतो कै इंगा पग झिकी लुगाई पुंछण लागरी है बा कुण है? बा तो एक पापण लुगाई है। यीसू बिं फरीसी गै मन गी बात जाणगे केयो कै, “हे समौन, मैं तनै कीं केणो चाऊं” बो बोल्यो, “केवो गुरूजी,” फेर यीसू बिनै केयो, “एक साऊकार गै दो करजदार हा, एक पांच सो चांदी गा सिका गो अर दूसरो पचास चांदी गा सिका गो। पण जद बे दोनूं करजो कोनी दे सक्या तो बण साऊकार बां दोनां पर दया कर'गे कर्ज माफ कर दियो, अब तूं बता कै बांमै बिंऊं जादा प्रेम कुण करसी?” समौन बोल्यो, “मेरी समझ ऊं झिकै गो जादा कर्ज माफ कर दियो बो राखैगो” यीसू केयो, “तूं ठीक समझ्यो है” फेर बण बिं पापण लुगाई कानी देखगे समौन नै केयो, “तनै आ लुगाई दिखै है के? मैं तेरै घरे आयो पण तूं मेरा पग धोण खातर पाणी कोनी दियो पण अण लुगाई मेरा पग आपगा आंसुआं ऊं धोगे बाळां ऊं पूंछया है। तूं मेरा इता लाड कोड कोनी करया, पण जद ऊं मैं आयो हूं अण मेरै पगां गा लाड कोड करणा कोनी छोड़या, तूं मेरै सिर पर तेल कोनी लगायो पण अण मेरै पगां पर सेंट लगायो है ईंखातर मैं तनै केऊं इंगा पाप जादा माफ होया है ईं कारण आ जादा प्रेम करै है अर झिकै गा थोड़ा पाप माफ होया बो थोड़ो प्रेम करै है।” अर बण बिं लुगाई नै केयो, “जा, बेटी तेरा पाप माफ हो'ग्या।” जद लोग झिका बांगै सागै भोजन करा हा, सारा सोचण लाग्या कै, “ओ कुण है पाप माफ करण आळो।” यीसू बिं लुगाई नै केयो, “तेरै बिस्वास तनै बचा दियो, राजी खुसी जा।” बिंगै बाद में बे गाम गाम में परमेसर गै राज गी खुस खबरी सुणावंता फिरण लागग्या। बिंगै सागै बारा चेला अर केई लुगाईयां ही झिकिंयां नै ओपरी अर बीमारियां ऊं ठीक करी। बामै एक गो नाम मरियम हो झिकी मगद गाम गी ही बिनै मगदळीनी बी केंता, बिमुं यीसू सात ओपरियां काडी। अर हेरोदेस राजा गै अन्न गो भण्डारी खोजै गी बहु योअन्ना, सुसन्नाह अर केई लुगाईयां ओर बी बांगै सागै ही झिकी आपगै धन ऊं यीसू अर बिंगै चेला गी सेवा करती। जद गाम-गाम ऊं लोगां गी भीड़ बिंगै कनै आण लागरी जद बण बानै एक मिसाल बताई: “एक किसान आपगै खेत में बीज बीजण गेयो। बीजता टेम कीं बीज रा गै किनारै पड़ग्या झिका लोगां गै पगां ऊं दबग्या, अर जिनावरां चुग लिया। केई बीज पक्की जमीन में पड़ग्या अर बे उग्या तो हा पण पाणी ना लागण गै कारण सूकग्या। केई बीज झाड़कां में पड़ग्या अर बे उग्या अर मोटा होया पण झाड़कां बानै दबा लिया। केई बीज आच्छी जिग्यां पर पड़या झिका उगगे सो गुणा फळ ल्याया।” इतो केगे बो जोर ऊं बोल्यो, “झिका गै कान है बे सुणल्यो।” बांगै चेला पूछयो, “गुरूजी ईं मिसाल गो मतलब के है?” बण केयो, “थानै परमेसर गै राज गै भेद गी समझ दी है पण दूसरा नै इंगी समझ मिसाल ऊं देईजै कै बे देखता थकां बी कोनी देख सकै अर सुंणतां थकां बी कोनी समझ सकै।” ईं मिसाल गो मतलब है बीज परमेसर गा बचन है। रा गै किनारै गा बे लोग है झिका बचन नै सुण्यो पण सैतान आ'गे बांगै मन ऊं चुग लेग्यो, क्यूंकै सैतान कोनी चावै कै लोग बचन पर बिस्वास कर'गे मुकती पाल्यै। पक्की जिग्यां बे लोग है झिका खुसी ऊं बचन सुणै है पण डूंगी जड़ ना होण गै कारण थोड़ी देर तांईं बिस्वास राखै पण समस्या आण ऊं बे बिस्वास नै छोड़ देवै है। झाड़का बे लोग है झिका बचन सुणै पण आ'गै जा'गे जीणै गी चिंता अर सुख आराम अर धन में दबज्यै है। अर आ'गै कोनी बढ सकै है पण आच्छी जिग्यां बे लोग है झिका सच्चै अर आच्छै दिल ऊं बचन सुणगे अर बिंगै उपर अमल कर'गे धीरज ऊं आच्छो फळ ल्यावै है। कोई दीयै नै जगागे ढकै कोनी अर ना'ई बिनै मांची नीचै मेलै, पण बिनै सांमै आळै में मेलै कै मा आण आळै नै चानणो रेवै। ईंखातर सारी लुकेड़ी बातां सांमणै ल्याई जावैगी अर सारी गुप्त बातां सांमणै आवैगी। ईंखातर झिकी बात थे सुणो बिं पर चोकसी ऊं ध्यान लगाओ झिका मेरी सीख नै मानण खातर तैयार है बानै ओर जादा समझाईजैगो पण झिका सुणणो कोनी चावै है पण थोड़ा भोत झिका समझै है बांगी समझ बी खत्म हो जावैगी। बिंगी मां अर भाई बठै आया पण बोळी भीड़ गै कारण बिंगै कनै कोनी पूगसक्या। कणैई आ'गे केयो कै, “थारी मां अर भाई बारै खड़या है अर थारूं मिलणो चावै।” ओ सुणगे बण केयो, “मेरी मां अर भाई ऐ लोग है झिका परमेसर गो बचन सुणगे मानै।” फेर एक दिन यीसू अर बिंगा चेला किस्ती पर चढ़या अर बण चेला नै केयो, “चालो झील गै परली पार चालां जद बे चाल पड़या।” पण जद किस्ती चालण लागरी तो यीसू नै नींद आ'गी। बिं टेम झील में तूफान आ'ग्यो अर किस्ती में पाणी भरीजण लागग्यो अर बे डूबण लागग्या। जद चेला यीसू नै जगा गे केयो, “हे स्वामी, हे स्वामी, म्हे डूबण लागरयां।” जद यीसू खड़यो होगे आन्धी अर पाणी गी लेहरां नै ललकारी, तो बे ठमगी अर सारा गो जी में जी आ'ग्यो। जद बण चेला नै केयो, “थारो भरोसो किनै गेयो?” बे सारा डरग्या अर हेरान होगे केण लागग्या कै, “ओ किसो आदमी है? झिकै गो हुक्म आन्धी अर पाणी मानै।” फेर बे झील गै परली पार गिरासेनिया इलाका में आया झिको गलील झील गै सांमै हो। जद बो किनारै पर उतरयो तो बानै ओपरी बड़ेड़ो आदमी मिल्यो झिको ऊघाड़ो अर मूसाणा में रेंतो अर लोग बिनै सांकळां ऊं बांदता पण बो सांकळां तोड़ देंतो अर ओपरी गी कसर बिनै बीयाबान में भजाऐ फिरती। यीसू ओपरी नै बिमुं निकळ जाण गो केयो जद बो यीसू नै देखगे जोर ऊं करळावण लागग्यो अर पगां में पड़'गे केण लागग्यो, “हे परम प्रधान परमेसर गा बेटा मेरूं तनै के काम, मनै तंग ना कर?” यीसू बिनै पूछयो, “तेरो नाम के है?” बण केयो, “पळटण, मैं एक कोनी भोत हां।” ओपरियां यीसू नै केण लागी, “म्हानै नरक में ना घाल।” बठै प्हाड़ पर सूअरां गो मोटो रेवड़ चरै हो, ईंखातर बां यीसू नै बिनती करी, “म्हानै बामै बाड़ दे” तो यीसू बानै हुकम दे दियो। अर सारी ओपरियां केंतांई सूअरां में बड़गी अर एकैदमई सारा सूअर झील में जा पड़या अर मरग्या। बांगा गुआळिया, ओ देखगे गाम कानी भाज्या अर गामै जा'गे सारी बात बताई। गाम गा लोग भेळा होगे देखण आया अर यीसू गै कनै ओपरी बड़ेड़ै आदमी नै कपड़ा पेरेड़ा अर आराम ऊं बेठयो देख्यो तो बे डरग्या। अर गुआळिया बानै सारो कीं बतायो कै किंया बो ठीक होयो। जद गिरासेनिया नगर गा लोग यीसू ऊं बिनती करण लागग्या कै अठुं उड़ज्या। जद बो बठूं आपगी किस्ती में चढगे जाण लाग्यो। बिं टेम झिको आदमी ओपरिया ऊं ठीक होयो, बो यीसू ऊं बिनती करण लागग्यो, “मनै थारै सागै ले चालो,” पण यीसू बिनै केयो कै, “आपगै घरे उड़ज्या अर जा'गे लोगां नै बता कै परमेसर मेरै पर भोत मोटो चमत्कार करयो है अर बो जा'गे गामै परचार करण लागग्यो, यीसू मेरै पर चमत्कार करयो है।” जद यीसू बठूं पाछो आ'ग्यो अर लोग बड़ै कोडां ऊं बिनै मिल्या क्यूंकै सारा लोग बिनै अडिकै हा। जद याईर नाम गो एक आदमी झिको यहुदी सतसंग घर गो मुखिया हो यीसू गै पगां में पड़'गे केण लागग्यो, “मेरै घरे चालो।” क्यूंकै बिंगी बारा साल गी बेटी मरण आळी ही जद बो अर यीसू जाण लाग्या तो एक मोटी भीड़ बिंगै सागै चाल पड़ी। बिं भीड़ में एक लुगाई हिसी ही झिकी गै बारा साला ऊं कळ गी बीमारी ही अर बण सारो धन ईलाज खातर डाक्टरां नै दे दियो पण बीमारी ठीक कोनी होई। बण होळै सी लारूं आ'गे यीसू गै कूड़तिय गै पलै गै हात लगायो अर हातो हात बिंगी कळ गी बीमारी जांती रे'ई। यीसू लारै मुड़या अर केयो, “मेरै हात कण लगायो है” पण सारा नटग्या। पतरस केयो, “हे स्वामी, भीड़ थानै च्यारूंमेर ऊं घेर राख्यो है, अर थारै उपर गिरण लागरी है।” पण यीसू केयो, “मैं जाणग्यो मेरै माऊं बीमारी ठीक करण गी सता निकळी है।” जद बण लुगाई सोच्यो मैं लुक कोनी सकूं ईंखातर बा डरती कांपती यीसू कनै आई अर पगां पड़'गे सारी क्हाणी बता दी कै मैं किंया ठीक होई। यीसू बिनै केयो, “जा बेटी, तेरै बिस्वास तनै ठीक करी है। चेन ऊं जा” जद बो बिनै ओ केण लागरयो तो सतसंग घर गै मुखियै गै घर ऊं कणैई आ'गे केयो, “गुरूजी नै फोड़ा ना घाल, तेरी बेटी मरगी।” ओ सुणगे यीसू मुखिया नै केयो “डर ना बिस्वास राख, बा ठीक हो'ज्यैगी।” यीसू बिंगै घरे आयो अर घर में पतरस, यूहना, याकूब अर छोरी गै मां बाप गै सिवा किनैई मा कोनी आण दिया। सारा घर में रोण लागरया। यीसू बानै केयो, “रोवो ना, आ मरी कोनी सुती है।” लोग छोरी नै मरेड़ी सोचगे यीसू गी मजाक करण लागग्या। जद बण छोरी गो हात पकड़गे केयो, “हे बेटी, खड़ी होज्या।” जद बा बिं टेम ई जींवंती हो'गी अर खड़ी हो'गी, बिंगा मां बाप हेरान हो'ग्या। जद यीसू बानै केयो, “इनै खाण खातर कीं देवों पण आ बात किनैई बताईयो ना।” एक दिन यीसू आपगै बारा चेला नै बुला'गे बानै लोगां गी सारी बीमारियां नै ठीक करण अर ओपरियां काडण गी सामरथ अर हक दियो। अर बानै परमेसर गै आण आळै राज गो परचार अर बीमारां नै चंगा करण खातर घाल दिया। अर बानै केयो, “सारा खाली हात जाईयो रा गै खातर लाठी, झोळी, रोटी, पीसा, अर ना दो दो कुड़ता लेईयो अर झिकै गाम में थे जाओ, बठै किंगै एक गै ई घरे रेईयो अर बिं घर माऊं विदा होईयो।” जठै थानै लोग आदर मान ना करै बिं जिग्यां थारी करणी थारै सागै है, केगे आपगै पगां गी धूड़ झड़का देईयो। इंया बे गाम गाम में लोगां नै ठीक करता अर सुब समाचार बतावंता हा। बिं देस गै चोथै हिसै गो राजा हेरोदेस यीसू गै बारै में सुणगे घबरा'ग्यो क्यूंकै लोग केण लागग्या यूहना मरगे पाछो जीग्यो। कोई केवै कै एलियाह परमेसर गी बात बताण आळो परगट हो'ग्यो अर कणैई केयो, “पुराणै जुग गो कोई परमेसर गी बात बताण आळो जीग्यो है।” पण हेरोदेस केयो कै, “यूहना गो तो मैं सिर कटवा दियो, फेर ओ कुण है? बिंगै बारै में ऐ बातां सुणन लागरयो हूं?” बण यीसू नै देखण गी इच्छा करी। फेर बे बारा चेला झिको बां करयो बिंगो लेखो जोखो पाछा आ'गे यीसू नै बतायो अर यीसू बानै न्यारा कर'गे बेतसैदा नगर में लेग्या। पण भीड़ नै ठा लागग्यो तो बा सागै ई चाल पड़ी यीसू बानै परमेसर गै राज गी बातां बताई अर बीमारां नै ठीक करया। जद आथण होण लागी तो चेला आ'गे यीसू नै केयो, “आनै जाण दैयो तो ऐ कठैई जा'गे आपगो आसरो ढूंढै'गे रोटी-पाणी गो जूगाड़ करै, क्यूंकै आपां तो सुनसान जिग्यां में हां।” बा भीड़ लगभग पांच हजार ही। बण बानै केयो, “थे ई आनै कीं खाण नै देवो।” बां केयो, “म्हारै कनै तो पांच रोटी अर दो मछलियां गै सिवा ओर कीं कोनी, थे इंया तो कोनी चावो के म्हे नगर में जांवा अर आंगै खातर रोटी मोल लेगे आवां।” जद यीसू चेला नै केयो, “आनै सारा नै पचास पचास कर'गे लेण में बिठा दैयो।” बां सारा नै लेण में बिठा दिया। अर यीसू बे रोटी अर मछली लेगे सुरग कानी परमेसर गो धन्यवाद करयो अर तोड़ तोड़गे चेला नै देण लागग्या अर चेला लोगां नै परोसण लागग्या। लोगां धाप धाप'गे रोटी खाई अर बाकी बचेड़ी रोटियां गा बारा टोकरा भरिजग्या। इंया होयो कै जद यीसू एकान्त जिग्यां में चेला सागै पराथना करण लागरया जद बण चेला नै पूछयो, “लोग मनै के केवै?” बां केयो, “केई लोग केवै यूहना बतिस्मो देण आळो, केई केवै एलियाह अर केई केवै पुराणै टेम गो परमेसर गी बात बताण आळो पैदा हो'ग्यो।” बण बानै पूछयो, “थे मनै के मानो।” पतरस बोल्यो, “परमेसर गो भेजेड़ो मसी।” यीसू बानै चेतागे केयो, “आ बात किनैई ना बताईयो।” फेर बण केयो, “मिनख गै बेटै नै ओ जरूरी है कै बो भोत ब्यादियां में पड़ै अर बुजरग अर मुख्य याजक अर सासतरी बिनै ओछो जाणगे मार दैयगा अर बो तीसरै दिन जीज्यैगो।” बण सारा नै केयो, “जे मेरै लारै आणो चावै बो अपणै आपनै भूलज्यै अर आपगो करूस लेगे मेरै लारै हो'ज्यै, झिको आदमी आपगा प्राण मेरै खातर संसार में खो देवैगो बो सुरगा में पा'ल्यैगो। अर झिको आपगै खातर आपगा प्राण संसार में बचावैगो बो सुरग में खो देवैगो। फेर बण केयो, ‘जे आदमी सारै संसार गो राज लेण खातर आपगा प्राण खो'दैय तो बिनै के मिलै?’ जे कोई आदमी मनै अर मेरी बातां नै मानण ऊं सरमावैगो तो मिनख गो बेटो आपगी मेमा में अर आपगै पिता अर पवितर सुरगदूतां गी मेमा में धरती पर आवैगो बानै बी लेण ऊं सरमावैगो। पण मैं थानै साची केऊं, अठै केई हिस्या बी है झिका मरण ऊं पेली परमेसर गो राज देखैगा।” आं बातां गै आठ दिन बाद में यीसू, पतरस, यूहना अर याकूब नै सागै लेगे प्हाड़ पर पराथना करण गेयो। जद यीसू पराथना करण लागरयो तो बिंगै चेहरै गो रूप बदळग्यो अर बिंगा कपड़ा दूध बरगा धोळा हो'ग्या अर चमकण लागग्या। अर बिंगै सागै दो आदमी मूसा नबी अर एलियाह परमेसर गी बात बोलण आळा बातां करण लागरया। बे आपगी मेमा गै सागै दिखै हा अर यरुसलेम में बिंगै मरणै गी बात करण लागरया। पतरस अर बिंगा साथी नींद में हा। जद पतरस जाग्यो तो बांनै मेमा में दोनां नै यीसू सागै खड़या देख्या। जद बे दोनूं बांगै कनूं जाण लाग्या तो पतरस बोल्यो, “हे स्वामी, आपणो अठै रेणो ठीक है म्हे अठै तीन मण्डप बणावांगा एक मूसा गो, एक थारो अर एक एलियाह गो।” पतरस नै ठा कोनी हो बो बिं टेम के केण लागरयो है। जद पतरस आ बात करण लागरयो तो काळी घटा बानै घेर लिया। अर बे देखगे डरग्या। जद आकासबाणी होई, “ओ मेरो चुणेड़ो बेटो है इंगी बात सुणो।” आकासबाणी होंताई यीसू बानै एकलो खड़यो दिख्यो अर बे चुप हो'ग्या। झिको कीं बां देख्यो किनैई कोनी बतायो। दूसरै दिन प्हाड़ ऊं उतरतांई लोगां गी भोत भीड़ बिंगै कनै आ'गी। अर एक आदमी भीड़ माऊं ऊंची आवाज में आ बिनती करतो आयो, “हे गुरू मेरै इकलोतै बेटै पर किरपा करो।” फेर बण यीसू ऊं केयो, ओपरी बिमै बड़ जावै है अर बा जोर ऊं चिलाण लागज्यै है। बिनै इतो मरोड़ दैय है कै बिंगै मूं ऊं झाग आण लागज्यै है। बिनै बा ओपरी छोडै ई कोनी अर नास करै है। बो आदमी केण लागग्यो कै, “मैं थारै चेला नै ई केयो, पण बांऊं निकळी कोनी।” यीसू बानै केयो, “हे अबिस्वासियो अर जिदी लोगो मैं थारै सागै किताक दिन रेऊंगा अर थारी सेऊंगा। अर तेरै बेटै नै अठै ल्या।” जद बो छोरै कनै आण लाग्यो तो ओपरी बिनै पटक'गे मरोड़ दियो। जद यीसू ललकारी तो ओपरी बिमुं निकळगी अर छोरो ठीक हो'ग्यो तो बिंगै बाप नै सूंप दियो। जद लोग परमेसर गी सामरथ नै देखगे हेरान होण लागग्या। पण जद सारा लोग यीसू गै चमत्कारा ऊं हेरान होण लागरया तो बे आपगै चेला नै केण लाग्या, “थे ध्यान ऊं सुणो मिनख गो बेटो मिनखां गै हातां ऊं पकड़ाईजण आळो है।” पण बे ईं बात गो मतलब कोनी समझया अर बांऊं लुकेड़ी ही अर यीसू ऊं बिंगो मतलब पूछणै ऊं डरा हा। फेर बांमै आपसरी में विवाद होण लागग्यो कै सारा ऊं मोटो कुण है? यीसू बांगै मन गी बात जाणग्या अर एक टाबर नै कनै बुला'गे केयो जे कोई मेरै नाम ऊं ईं टाबर नै मानै तो बो मनै मानै। जे कोई मनै मानै बो मेरै घालण आळै नै मानै क्यूंकै झिको थारै मू अपणै आपनै छोटो समझै है बो ई परमेसर गी नजर में सारा ऊं मोटो है। जद यूहना बोल्यो, “हे स्वामी, म्हे एक आदमी नै थारै नाम ऊं ओपरी काडतां देख्यो अर म्हे बिनै रोक्यो बी हो क्यूंकै कै बो आपणै सागै कोनी रेवै।” यीसू बिनै केयो, “थे बिनै रोके ना करो, क्यूंकै झिको थारै बिरोध में कोनी, बो थारै सागै है।” जद यीसू गा सुरग में बुलाण गा दिन कनै आया तो बण यरुसलेम जाण गो पक्को बिचार कर लियो। बण आपगै दूतां नै सामरिया इलाका गै एक गाम में भेज्या कै बिंगै बठै पोंचणै ऊं पेलां कीं तैयारी करै। पण बठै गै लोगां बिंगो आदर कोनी करयो क्यूंकै बे यरुसलेम जावै हा। ओ देखगे याकूब अर यूहना बोल्या, “हे प्रभु, थे चावो तो म्हे पराथना करां कै परमेसर आकास ऊं आग बरसावै अर आं लोगां नै नास कर दैय।” पण यीसू बानै ललकारया। थानै अजे तांई ठा कोनी कै थे किसै मन गा हो। मिनख गो बेटो लोगां नै बचाण आयो है, नास करण कोनी आयो। अर बे बठूं दूसरै गाम में उड़ग्या। जद बे जाण लागरया तो कणैई आदमी बिनै आ'गे केयो, “मैं थारै सागै चालूंगा” यीसू बिनै केयो “गादड़ा गै कनै घुरी अर आकास गै पंछिया गै कनै तो आलणां होवै पण मिनख गै बेटै गै कनै तो सिर ढकण नै जिग्यां कोनी।” फेर बण दूसरै आदमी नै केयो, “मेरै सागै चाल” बण केयो, “मेरै बुजरग पिता नै माटी देण ऊं पेलां कोनी आ सकूं।” बण बिनै केयो, “मरेड़ै आदमिया नै आपगा मरेड़ा नै माटी देण दैयो। पण थे जा'गे परमेसर गै राज गो परचार करो।” एक आदमी ओर बोल्यो, “हे प्रभु, मैं ई थारै सागै चाल पडू़ंगा पण पेलां मैं मेरै घराळा नै पूछ आऊं।” यीसू बिनै केयो, “जे आपगो हात हळ पर रखगे पीछै देखण आळै आदमी गी तरियां थे पीछै गी सोचोगा तो थे परमेसर गै राज गै लाइक कोनी हो।” आ बातां गै बाद एक दिन में यीसू सतर चेला नै चुण्या अर झिकै झिकै गाम में बां आप जाणो, बठै दो दो कर'गे पेलां बानै घाल दिया। यीसू बानै केयो, “खेत पाकेड़ा तो घणाई है पण मजदूर थोड़ा है। ईंखातर खेत गै धणि नै जा'गे बिनती करो कै फसल बाडण खातर मजदूर घालै।” अर देखो, मैं थानै भेड़ां गी तरियां, भेड़िया गै बरगा थारो बिरोध करण आळा लोगां गै बिचाळै भेजूं हूं। ईंखातर थे जांवता आपगै सागै रिपिया, झोळो अर बुंटा गी दूसरी जोड़ी बी सागै ना लेईयो अर ना रा में किनैई निमस्कार करणै में ज्यादा टेम खराब ना करियो। झिकैई घर में जाओ तो पेलां इंया केवो कै, “ईं घर गो भलो होवै।” बिं घर में कोई धरमी भलो आदमी होयो तो बिनै थारी आसिस मिलसी। जे ना होयो तो थारो आसिरवाद थारै कनै पाछो आ'ज्यैगो। अर आपगो खाणो पीणो बिं घर में होवै अर बिं खातर घर घर ना फिरियो। बिं घर ऊं लूखि मिसी मिलै बाई खाईयो क्यूंकै दिहाड़ियै नै बिंगी दिहाड़ी मिलणी चईयै। अर जद थे किसै गाम में जाओ अर लोग राजी होगे थानै खाण खातर देवै तो बो ई खाईयो। अर बठै बीमार लोगां नै ठीक करियो अर बानै केवो, “परमेसर गो राज थारै कनै आ'ग्यो।” पण झिकै नगर में थे जाओ अर लोग थारो आदर ना करै तो बांगी गळियां में जा'गे केवो, थारै नगर गी धूड़ अठैई झाड़गे जांवां अर आपगा आप ई जाणो। फेर ई थे जाण लेईयो कै परमेसर गो राज थारै कनै आ'ग्यो। मैं थानै केऊं हूं कै न्याय गै दिन बिं नगर गै लोगां गी हालत परमेसर गी सजा पायड़ै सोदोम नगर गै लोगां गी हालत ऊं भोत बुरो हो'सी। हाय, खुराजीन अर बेतसैदा नगर गा लोगो। झिका सामरथ गा काम थारै पर करया है बे ई सूर अर सेदा नगर गै लोगां पर होंता तो बे कद गी बोरी ओढगे अर राख लगागे आपगी गळती खातर पिछतांवंता। पण न्याय गै दिन थारी हालत सूर अर सेदा गै लोगां गी हालत ऊं भोत ई बुरी होवैगी। अर हे कफरनहूम गा लोगो, थे ओ ना सोचो म्हानै आदर ऊं सुरग में चकसी पण थानै तो नरक में गेरीजैगो। फेर चेला नै केयो, “झिको थारी सुणैगो बो मेरी सुणैगो। झिको थानै धिकारैगो बो मनै धिकारैगो झिको मनै ओछो जाणै बे मनै घालण आळै नै ओछो जाणै।” बे सतर चेला बड़ा राजी होगे पाछा आया अर यीसू नै केण लाग्या, “हे प्रभु, थारै नाम ऊं ओपरी आत्मा म्हारो केणो मानै।” यीसू बानै केयो, “मैं सैतान नै आकास ऊं बिजळी गी तरियां एकदम पड़तो देख्यो। देखो, मैं थानै सांप अर बिछूआं यानी सैतान नै बस में करण गो अर बिरोदियां गी सारी ताकत नै बस में करण गो अधिकार थानै दियो है। कोई बी चीज ऊं थारो नुकसान कोनी होवै। तो बी थे खुस ना होईयो कै ओपरी आत्मा म्हारै बस में हो'गी। पण थे ईं बात पर खुस होईयो कै थारो नाम सुरग में लिखेड़ो है।” बिं घड़ी बो पवितर आत्मा गै दिएड़ै आनंद ऊं भरग्यो अर केयो, “हे पिता, सुरग अर धरती गा प्रभु मैं थारो धन्यवाद करूं कै थे आं बातां नै ग्यानी लोगां ऊं अर समझदार लोगां ऊं लकोगे राखी बां लोगां पर परगट करी झिका टाबरां गी तरियां है। क्यूंकै थानै ओ ई बडिया लागै। मनै मेरै पिता सारो ग्यान अर सामरथ दी है अर पिता गै अलावा बेटै नै कोई कोनी जाणै है अर बेटै गै अलावा पिता नै कोई कोनी जाणै है। पण झिको बेटो परगट करै है बो पिता नै जाणै है।” जद चेला कानी मुड़गे बानै केयो, “धन्य है बे आंख्या झिको थे देखण लागरया हो, बे बिनै देखै। क्यूंकै भोत सारा परमेसर गी बात बोलण आळा अर राजांवा आ सोची झिकी बात थे देखो, बानै म्हे देखां, पण देख कोनी सक्या अर थे झिकी सुणो बे कोनी सुण सक्या।” जद एक धरम सासतरी खड़यो होयो अर यीसू नै परखण खातर बोल्यो, “हे गुरू, मैं अनन्त जीवन गो बारस होण खातर के करूं?” यीसू बिनै केयो, “मूसा गै नेम-विधान में के लिखेड़ो है, तूं बिनै किंया समझ है?” बण केयो, “तूं आपगै प्रभु परमेसर ऊं आपगै पूरै दिल अर पूरै प्राण अर पूरी ताकत अर पूरै मन ऊं प्रेम कर। अर आपगै पड़ोसी ऊं बी इंयाई प्रेम कर जिंया तूं अपणै आप ऊं प्रेम करै है।” यीसू बिनै केयो, “तूं ठीक उतर दियो। तूं इंयाई करैगो तो जींवंतो रेवैगो।” पण बण अपणै आपनै सई ठेराण खातर पूछयो, “मेरो पड़ोसी कुण है?” यीसू एक मिसाल ऊं बिनै समझायो, “एक आदमी यरुसलेम ऊं यरीहो गाम में जाण लागरयो, रा गै मा डाकुआं बिंगा कपड़ा उतारगे अर कूट'गे अधमरयो कर'गे बठै रेड़ दियो। ‘केई देर बाद बिं रा पर एक याजक जाण लागरयो। बण बिं आदमी नै देख्यो अर बिंऊं कतरा गे पासो फोरगे टप ग्यो।’ बिंगै केई देर बाद बठकर लेवी गोत गो एक आदमी जावै हो। बण ई बिंऊं नफरत करी अर कतरागे पासो फोरगे टप ग्यो। पण बठाकर'ई एक सामरी जाती गो आदमी जावै हो बण बिनै देख्यो अर बिं पर तरस खायो। बण बिंगै कनै आ'गे बिंगै घावां पर मलम पटी करी। अर आपगै गधै पर बिठागे धरमसाळा में लेग्यो। अर बिंगी सेवा करण लागग्यो। दूसरै दिन धरमसाळा गै मालिक नै दो चांदी गा सिका देगे केयो, ‘इंगी सेवा करियो अर ज्यादा खरचो तेरै कनूं लागज्यै तो पाछो आऊंती बारी देस्यूं।’ यीसू बिनै पूछयो, ‘तेरी समझ ऊं बता कै बां तीनां में अधमरयै आदमी गो पड़ोसी कुण हो?’” बण केयो, “बो ई है झिकै बिं पर तरस करयो।” जद यीसू बिनै केयो, “जा तूं बी दूसरा गै सागै इंयाई कर।” जद बे चालतां-चालतां, बो एक गाम में पूग्यो। बठै एक मारथा नाम गी लुगाई ही बा बिनै आपगै घरे ले जा'गे बिंगो आदर मान करयो। बिंगी एक मरियम नाम गी भेन ही। झिकी यीसू गै पगां में बेठी अर बिंगी बातां सुणण लागगी। पण मारथा बिंगी सेवा करती करती थकगी। अर यीसू नै आ'गे केयो, “हे प्रभु, थानै मेरी चिंता कोनी के? मेरी भेन सारो काम मेरूं कराण लागरी है इनै थे केवो कै मनै सारो लगावै।” यीसू बिनै उतर दियो, “मारथा, हे मारथा, तूं भोत काम अर बातां गी चिंता करै अर घबरावै है। पण एक काम गी बात जरूरी ही, झिकी नै मरियम चुणली आ इंऊं खोसीजै कोनी।” एक दिन यीसू कठैई एक जिग्यां पराथना करा हा जद पराथना पूरी कर ली तो बिंगै चेला माऊं कणैई एक पूछयो, “हे प्रभु, जिंया यूहना आपगै चेला नै पराथना करणी सिखाई बिंया थे म्हानै बी करणी सिखादैयो।” यीसू बानै केयो, “जद थे पराथना करो तो इंया केवो, ‘हे पिता, थारो नाम पवितर मानीज्यै अर थारो राज आवै। म्हानै रोज गी रोटी दिया करो अर म्हारै पापां नै माफ करो जिंया म्हे म्हारै उपर पाप करण आळा नै माफ करां। अर म्हानै कीं बी तरियां ऊं अजमाईयो ना।’” जे थारो कोई बेली है अर आदी रात नै आ'गे थानै केवै, “हे भाई थारै कनै रोटी पड़ी है तो दे दे। क्यूंकै मेरै कनै कोई दूसरो बेली आयो है अर मेरै कनै बिनै खुवाण खातर कीं कोनी है।” अर बो अन्दर ऊं आवाज लगावै है कै मनै तंग ना कर। टाबर सारा सूत्या है अर दरवाजो बी बंद करेड़ो है ईंखातर मैं थानै अबी कोनी दे सकूं। तो मैं थानै केवूं ऊं कै बो थारो बेली होण गै खातर खाण पीण ना बी दैय पण मांगण आळो बारी बारी मांगणै गै खातर तूं बिनै जरूर देवैगो। ईंखातर मैं थानै केऊं, मांगोगा तो थानै मिलसी, ढूंढोगा तो थानै लादजीसी, जे थे बारनो खड़कास्यो तो थारै खातर खुलजीसी। क्यूंकै परमेसर ऊं झिको मांगै है बो बिनै देवै, झिको ढूंढै है बो बिनै मिलै अर जे कोई बिंगो बारनो खड़कावै तो बो जरूर खोलसी। थारै में हिस्यो कुण बाप है झिकै गो बेटो रोटी मांगै तो थे बिनै पथर देवै, अर जे दूध मांगै तो जहर देवै। अब इंया बताओ थे बुरा होगे बी आपगै बेटां नै आच्छी चिजां देवो तो परमेसर पिता थारै मांगणै पर पवितर आत्मा क्यूं कोनी देसी? एक दिन यीसू एक आदमी ऊं गूंगी ओपरी काडी तो बो बोलण लागग्यो अर लोगां नै भोत ई अचंभो होयो। ओ देखगे बामूं केई बोल्या, “ओ तो ओपरियां गै प्रधान बेलजबूल गी मदद ऊं ओपरियां काडै।” केईयां बानै परखण खातर केयो, “जे तूं सुरग ऊं आयो है तो बठै गो कोई निसान दिखा।” पण यीसू बांगै मन गी बात जाणग्यो अर केयो, “झिकै देस अर घर में फूट पड़ज्यै तो बे घर ऊजड़ज्यै, जे सैतान आपगै राज गै बिरोध में खुद काम करै तो बिंगो राज किताक दिन चालैगो? थे मेरै खातर केवो कै ओ ओपरियां गै प्रधान बेलजबूल गी मदद ऊं ओपरियां काडै। जे मैं प्रधान बेलजबूल गी मदद ऊं ओपरियां काडूं तो थारा चेला किंगी मदद ऊं काडै? थारा चेला ई थानै गळत ठहरावैगा। जे मैं परमेसर गी मदद ऊं ओपरियां काडूं तो थे जाण लेईयो कै परमेसर गो राज थारै कनै आ'ग्यो है। फेर यीसू बानै एक मिसाल बतागे समझाया कै एक तकड़ो आदमी हथियार लेगे आपगै घर गी रुखाळी करै तो बिंगो धन कोई हलावै कोनी। पण बिं आदमी ऊं कोई ओर तकड़ो आदमी आ'गे बिं पर हमलो करै तो जिं हथियार पर बिंगो भरोसो हो बो खोस ल्यै अर बिंगो सारो धन दूसरा नै बांट दयैगो। ईंखातर झिको मेरो चेलो होगे बी दूसरा नै मेरै कनै कोनी ल्यावै, इंगो मतलब ओ है कै बो दूसरा नै मेरूं दूर करै। जद ओपरी आत्मा आदमी ऊं निकळज्यै तो बा सुखी जिग्यां में आसरो ढूंढै पण बिनै जिग्यां ना मिलै तो बा ओपरी झिकै आदमी ऊं कडी ही बिमै ई पाछी आ'ज्यै। अर बिं आदमी नै सजो सजायो होयो देखगे बा जा'गे आप ऊं ओर बुरी दूसरी सात ओपरियां नै आपगै सागै ले आवै। अर फेर बिं आदमी गो हाल पेलां ऊं बी ओर जादा बुरो हो'ज्यै है।” जद बो ऐ बातां बताण लागरयो तो बिं भीड़ माऊं एक लुगाई जोर ऊं बोली, “धन्य है बा कोख झिकी में थे रेया, धन्य है बा मां झिकी गो थे दूध पीयो।” जद यीसू केयो, “पण धन्य तो बे है झिका परमेसर गो बचन सुणै अर मानै है।” जद भीड़ ओर बोळी होण लागगी तो यीसू केयो, “ईं जुग गा लोग भोत बुरा है, क्यूंकै परमेसर मनै घाल्यो है अर आं लोगां मनै परखण खातर सुरग गो निसान मांग्यो है। पण योना झिको परमेसर गो एक दास हो बिंगै अलावा आनै ओर कोई निसान कोनी मिलै। क्यूंकै जद योना नीनवे देस गै लोगां गै खातर निसान बण्यो बिंयाई मिनख गो बेटो ईं जुग गा लोगां गो निसान बणसी। परमेसर ईं जुग गै लोगां गै न्याय गै दिन दिखणाद में सीबा देस गी राणी जी उठैगी अर ईं जुग गै लोगां नै दोसी मानैगी। क्यूंकै बा राणी राजा सुलेमान गी आच्छी बातां नै सुणन खातर भोत ई दूर ऊं चालगे आई। पण अठै राजा सुलेमान ऊं बड़ो आदमी है अर थे बिंगी बातां नै कोनी मानो। न्याय गै दिन नीनवे सैहर गा लोग खड़या होगे ईं जुग गै लोगां नै दोसी ठहरावैगा क्यूंकै जद योना परमेसर गो संदेस सुणायो हो, नीनवे सैहर गा लोग आपगी बुराइंया खातर पछतावो करण लागग्या। अब तो योना ऊं बी बड़ो आदमी थारै बिचाळै है अर बिंगी बातां नै ईं जुग गा लोग कोनी मानै है।” फेर यीसू आ मिसाल दी: “कोई बी आदमी आपगै घर में रात नै दीयो जगागे बिनै ढकै कोनी पण सांमै आळै में रखै क्यूंकै बो चावै कै झिको मा आवै बिनै चानणो मिलै। तेरै सरीर गो दीयो तेरी आंख है जद तेरी नजर साफ है तो तेरो पूरो सरीर उजळयो है, जे तेरी नजर ई बुरी है तो पूरो सरीर ई अंधेरै में है। ईंखातर चोकना रेवो कै झिको चानणो थारै मा है बो अंधेरै में ना बदळ ज्यै। तो जद तेरो पूरो सरीर उजियाळै में होवैगो तो इंगै किसैई अंग पर अंधेरो कोनी रेवैगो। अर इतो चानणो होवैगो जिंया कै दीयै गी तेज रोसनी बिंगै उपर पड़ै है।” जद यीसू ऐ बातां करण लागरयो तो एक फरीसी आदमी बिनती करण लागग्यो, “मेरै घरे भोजन करण चालो।” जद बो भोजन करण लागग्यो तो, बो फरीसी आदमी हेरान होयो कै यीसू भोजन करण ऊं पेलां यहुदी रिवाज गै अनुसार हात कोनी धोया। प्रभु बिनै केयो, “हे फरीसियो, थे भांडा तो बारूं बारूं मांजो, पण थारै मा पाखंड अर बुराई भरेड़ी है। हे मूरखो, झिकै आनै बारूं बणायो बणई आनै माऊं बणायो है। देखो, झिको थारै कनै बो गरीबां नै बांट दैयो तो सारो कीं सुद्ध होज्यैगो।” “पण हे फरीसियो थारै सागै बुरो होवैगो, क्यूंकै थे पोदिनो अर सारी जड़ी बूंटियां गो दसवों हिसो परमेसर नै देवो हो पण थे दूसरा गै सागै न्याय करणो अर परमेसर ऊं प्रेम करणो भूल जावो हो। दसवों हिसो देणो आच्छो है पण आं बातां गो पालण करणो ओर बी जरूरी है।” हे फरीसियो, “थारै सागै बुरो होवैगो, थे ओ चाओ कै लोग म्हानै सतसंग घर में सारा ऊं आच्छी अर ऊंची जिग्यां बिठावै अर बजार में लोग म्हानै बारी बारी निमस्कार करै। थारै सागै बुरो होवैगो। क्यूंकै थे बां दबेड़ी कबरां बरगा हो बिंगै मा गी गंदगी ऊं अणजाण होगे बिंगै उपर लोग चालै है।” ऐ बातां सुणगे एक धरम सासतरी बोल्यो, “हे गुरू, ऐ बातां कर'गे थे म्हारी बी बेजती करो” यीसू जबाब दियो, “हे धरम सासतरी थारै सागै बुरो होवैगो। थे इतो भार जितो थारूं बी कोनी चकिजै बितो दूसरा लोगां पर लद देवो अर आप एक आंगळी बी कोनी लगाओ” थारै सागै बुरो होवैगो। थे बां परमेसर गी बात बोलण आळां गी कबरां बणाओ झिकां नै थारै बाप दादा मार दिया। आ दिखावो कै थे आपणै पुरखां गा काम ऊं राजी हो अर बांगा पक्स में गवा हो। झिका थारा पुरखां दूसरा नै मारया। बांगी कबरां गै उपर गुमटी बणागे बांगै काम नै पूरो करो हो। ईंखातर परमेसर झिकै गै कनै सारो ग्यान है बानै केयो, “मैं बांगै कनै परमेसर गी बात बोलण आळा अर खास चेला नै घालूंगा। पण बे केईयां नै मार देसी अर केईयां नै तंग करसी” संसार बणण ऊं लेगे अब तांई जिताई परमेसर गी बात बोलण आळां नै मारया है, बांगो लेखो ईं जुग गै लोगां कनूं लेईजैगो। परमेसर गै दास हाबिल ऊं लेगे धूप करण गी जिग्यां अर मिन्दर गै बिचाळै मारया गेया जकरिया तांई जिता बी परमेसर गी बात बताण आळा नै मारया हा बां सारा गो लेखो बी ईं जुग गै लोगां ऊं लेईजैगो। हे धरम सासतरियो, थारै सागै बुरो होवैगो। थे परमेसर गै नेमा नै जाणन ऊं लोगां नै रोक्या है। थे खुद'ई परमेसर गै राज में कोनी जावो हो अर लोगां नै बी कोनी जाण दैयो हो। यीसू आपगी सारी बातां कर'गे जाण लाग्या तो सासतरियां अर फरीसियां बुरी तरियां बांगै लारै पड़ग्या अर भांत भांत गा सुआल करण लागग्या। क्यूंकै बे चावा यीसू कोई हिस्यो जबाब देवै जिंऊ बानै फसा सकां। अर फेर जद बठै हजारां लोगां गी भीड़ भेळी हो'गी अर बे आपसरी में उपर थळी होण लाग्या। जद यीसू सारा ऊं पेलां आपगै चेला नै केयो, “फरीसियां ऊं चोकस रेईयो झिका ढोंगी है।” बो टेम आ'ग्यो कै सारी बातां लोगां गै सांमणै परगट हो'सी अर झिको कीं लुकेड़ो है बो लोगां नै बताईजैगो। झिकी बातां थे अंधेरै में करी है बे बातां चानणै में सुणाईजैगी, अर झिकी बातां थे मांइली साळ में करी है बे बातां छत गै उपर जोर गी आवाज ऊं सुणाईजैगी। झिका मेरा बेली है बानै केऊं कै झिका लोग थारै सरीर नै मारै इंऊं अलावा ओर कीं कोनी कर सकै हिस्या लोगां ऊं थे कदी ना डरो। मैं थानै चेतो कराऊं कै थानै किऊं डरणो चाईजै, मरणै गै बाद झिकै नै नरक में घालणै गो अधिकार है थे सिरफ बिं परमेसर ऊं डरो। मैं थानै बताऊं थोड़ा पीसा में पांच चिड़ियां मोल मिलज्यै। बे इती सस्ती है पण परमेसर फेर बी बामूं एक नै बी कदी कोनी भूलै अर बांगी संभाळ करै। देखो, थारै सिर गा बाळ तांई गिणेड़ा है ईंखातर डरो ना, परमेसर गै खातर थे चिड़ियां गी डार ऊं बी जादा किमती हो। मैं थानै केऊं कै जे कोई मनै संसार में माणसां गै सांमै मानल्यैगो तो मैं मिनख गो बेटो बिनै परमेसर गै सुरगदूतां सांमै मानल्यूंगा। पण झिको मनै संसार गै माणसां गै सांमै कोनी मानै बिनै में न्याय गै दिन परमेसर गै सुरगदूतां सांमै कोनी मानूंगा। अर बिं आदमी नै माफी मिल सकैगी झिको मिनख गै बेटै गै बिरोध में बोलै पण झिको पवितर आत्मा गै कामां गै बिरोध में बोलै है तो बिनै कदी बी माफी कोनी मिलैगी। मेरै कारण जद लोग थानै पकड़गे पंचायता अर अधिकारियां कनै ले जावै तो थे डरियो ना, कै आपगो बचाव किंया करांगा अर बानै जबाब के देवांगा? क्यूंकै बिं टेम ई पवितर आत्मा थानै आपी बता देसी कै जबाब के देणो है। बिं टेम बामूं कोई बोल्यो, “हे गुरू, मेरै भाई नै के'दे कै बो म्हारै बाप गी जमीन-जेदाद गी पांती कर ल्यै।” यीसू बिनै केयो, “मनै कुण थारै धन गी पांती करण खातर चुण्यो है?” अर बानै समझायो कै अपणै आपनै बचाण खातर हर तरियां गै लोभ लाळच ऊं बच्या रेवो अर चोकस रेवो क्यूंकै मिनख गो जीवन बिंगै धन गो गुलाम कोनी होवै। आ बात समझाण खातर बानै एक मिसाल बताई: एक अमीर आदमी गै खेत में भोत फसल होई। जद बो आपगै मन में बिचार करण लागग्यो कै, “अब मैं के करूं? मेरै कनै तो इती फसल रखण गी जिग्यां ई कोनी।” बण केयो, “मैं इंया करूंगा कै छोटी बखारियां नै फोड़'गे मोटी बणवाऊंगा अर सारी फसल अर धन बिमै रखूंगा। अर आपगै प्राण नै केऊंगा, ‘आपणो केई सालां गो कोटो पूरो हो'ग्यो अब खा-पी अर सुख-चेन ऊं रेगे ऐंस कर अर मोज मार।’” पण परमेसर बिनै केयो, “हे मूरख आदमी, आज रात नै तेरा प्राण खत्म हो'ज्यैगा। अर ओ सारो भेळो करेड़ो धन किंगो हो'सी? अर तेरै कोई काम कोनी आवै।” फेर यीसू केयो, “हिस्यो ई बो आदमी है झिको आप खातर धरती पर धन भेळो करै। पण परमेसर गी नजरां में बो कंगाल ई है।” फेर आपगै चेला नै केयो, “थे प्राणां गी चिंता ना करे करो कै, के खावांगा अर ना सरीर गी चिंता करे करो कै के पेरां'गा? क्यूंकै भोजन ऊं प्राण गो अर कपड़ा ऊं थारै सरीर गो मोल जादा है।” फेर केयो, “आं चीड़ी, कागलां नै देखो, ऐ ना तो बीजण जावै अर ना'ई बाडण जावै अर ना आं खातर कोई बखारियां भरेड़ी है फेर ई परमेसर आंगो पेट भरै अर संभाळै है। परमेसर गै खातर थारो मोल आं पंछियां ऊं भोत जादा है। थारै में हिस्यो कुण है झिको चिंता कर'गे आपगी उंमर नै एक घड़ी भदा सकै? जे आ चिंता इतो छोटो काम ई कोनी कर सकै तो दूसरै मोटै कामां गी चिंता करण ऊं के लाभ है? आं जंगळी फूलां गै बुंटा नै देखो, ऐ किंया बदै, ऐ ना तो कीं कातै अर ना'ई कीं काम करै। पण फेर ई राजा सुलेमान गै कनै सारो कीं होंता होयांई बो आं फूलां बरगो कदी कोनी सज धज सक्यो। ईंखातर मैदान गी घास नै झिकी आज है काल आग में बाळीज्यैगी परमेसर बिनै ई इती सुणी बणावै है तो, हे कचा बिस्वासियो, बो थानै क्यूं कोनी पिरावैगो, जरूर पिरावैगो। अर थे आं बातां गै लारै ना लाग्या रेवो कै म्हे के खावांगा अर के पिवांगा अर ना'ई कोई बेम करो। क्यूंकै संसार में परमेसर नै कोनी जाणन आळा लोग आं चिजां गै लारै ई लाग्या रेवै। पण थारो पिता परमेसर जाणै है कै थानै आं चिजां गी जरूरत है। जे थे परमेसर गै राज गी इच्छा करोगा तो ऐ सारी चिजां थानै आपी मिलज्यैगी।” ईंखातर हे मेरा प्यारा चेलो, “थे घबराओ ना, क्यूंकै थानै सुरग गै राज गै प्रजा गो हक देणै में पिता परमेसर नै भोत आनंद होवै। थे आपगो सारो कीं बेचगे कंगालां नै बांट देवो अर आप खातर हिस्या बटुआ बणाओ झिका कदी बी पाटण आळा ना होवै। यानी कै सुरग में धन भेळो करो झिको ना कदी घटै अर ना कदी बिनै कोई चोर सकै अर ना कोई किड़ो दीमक लागै। क्यूंकै जठै थारो धन होवैगो बठै थारो मन बी लाग्यो रेवैगो।” थे परमेसर गै काम गै खातर हरदम तैयार रेवो अर रात नै बी दीया जगागे तैयार रेवो। यानी हरदम तैयार रेवो। थे बिं दास बरगा बणो झिको रात नै ब्या में गैईड़ै आपगै मालिक नै अडीकतो होवै। कै कद मेरो मालिक आवैगो। अर बिंगै बारनो बजावंता ई दबादब खोलूं। अर बो मालिक बिं दास नै जागतो देखै धन्य है बे दास झिकां गो मालिक आ'गे देखैगो कै बे जागता है। मैं थानै साची केऊं बिं टेम बो मालिक खुद कपड़ा बदळगे आपगै नोकर नै खाणो खुहावैगो अर बिंगी सेवा करैगो जे बो मालिक आदी रात नै आवै या दिन उगण ऊं पेली आवै पण बिंगो दास बिनै जागतो मिलै तो बो दास नै धन्य मानै। पण थे आ जाणल्यो कै जे घर गै मालिक नै ठा होवै कै चोर कद आसी तो बो कदी आपगै घर में चोरी कोनी होण देवै। ईंखातर तैयार रेवो, क्यूंकै बिं घड़ी जद थे सोच्यो कोनी ई हो'सी बिं घड़ी मिनख गो बेटो आज्यैगो। जद पतरस बोल्यो, “हे प्रभु, आ मिसाल सिरफ म्हारै खातर बताई है या सगळा लोगां खातर।” प्रभु बिनै उतर दियो, “मैं हिस्यै एक बिस्वास लाइक अर बुद्धिमान दास गै बारै में बताण लागरयो हूं। झिकै नै बिंगो मालिक घर गी देखभाळ अर नोकरां नै खुवावण प्यावण गी जिमेदारी दे दी अर आप कठैई दूसरै काम ऊड़ज्यै।” पण धन्य है बो दास झिको बिंगै मालिक नै पाछो आंतै टेम ढंग ऊं काम करतो मिलै। मैं थानै साची केऊं, “बो मालिक बिंगै बिस्वास गै कारण बिनै आपगी सारी जाएदाद संभालण गी जुमेबारी सोंप देवैगो।” पण जे बिंगो दास ओ सोच लेंतो कै मेरो मालिक केई दिना गै बाद ई पाछो आसी अर बो दूसरै नोकरां गै सागै बुरो सलूक करण लागज्यै अर इतो खावै पीवै गै नसो चढ जावै जद बिंगो मालिक एकदम ई आ'ज्यै अर बिं दास नै ध्यान ना लागै कै कद आ'ग्यो। जद बिंगो मालिक बिनै भोत मोटी सजा देवैगो अर बिंगी बेईमानां में गिणती करैगो। बो दास झिको आपगै मालिक नै आच्छी तरियां जाणै है फेर बी बिंगै केयै पर कोनी चालै तो बो भोत मार खावैगो। अर झिका आपगै मालिक गै बारै में कीं ना जाणै अर बाऊं कोई भूल में गळती हो'ज्यै तो बांगै थोड़ी मार पड़ैगी। ईंखातर झिकै मालिक आपगै दास नै कीं जादा दियो बिंऊं भोत जादा मांगै'गो अर झिकै नै भोत सूंपेड़ो है बिंऊं भोत पाछो लेसी। मैं धरती पर रेण आळा लोगां नै न्यारा-न्यारा करण आळी आग लगाण आयो हूं। अर मैं चाऊं बा आग अब तांई लाग जाणी। मेरो दुख उठाणो अर मरणो एक बतिस्मै गी तरियां है अर जद तांई ऐ बातां ना हो'ज्यै, बिं दिन तांई मैं भोत उदास रेऊंगा। थे के सोचो, मैं धरती पर मिलाप कराण आयो हूं? ना, मैं थानै केऊं, मैं सारा नै न्यारा न्यारा करण आयो हूं। अब ऊं जे किसैई घर में पांच जणा होवैगा तो बे आपसरी में खिंडज्यैगा, तीन जणा दो ऊं न्यारा रेवैगा अर दो जणा तीनां ऊं न्यारा रेवैगा। बाप बेटै गै अर बेटो बाप गै खिलाफ रेवैगो, मां बेटी गै अर बेटी मां गै खिलाफ अर सासू बहु गै अर बहु सासू गै खिलाफ में रेवैगी। फेर यीसू लोगां गी भीड़ नै केयो, “थे बादळा नै छिपतै कानी ऊं निकळतो देखो तो केवो मेह आवैगो अर मेह आ'ज्यै। अर दिखणादी हवा चालज्यै तो केवो गरमी होवैगी अर हो'ज्यै। हे ढोंगीयो, थे धरती अर आकास गै रंग रूप गो तो भेद कर सको पण ईं टेम परमेसर के करै, इंगो थानै क्यूं कोनी ठा लागै।” के ठीक है के गळत है इंगो फेंसलो थे खुद क्यूं कोनी कर सको? पण थारै उपर दोस लगाण आळो थानै न्याय करण आळ गै सांमणै लेगे जाण लागरयो है। जद तूं बिंऊं रा में छूटण गो समझोतो कर ले। कठैई इंया ना होवै कै तनै न्यायी कनै ले जा'गे सजा दिरा दैय अर जेळ में बंद करा दैय। मैं तनै केऊं हूं जद तांई एक एक पीसा गो हिसाब कोनी चुकावैगो जद तांई जेळ ऊं बारै कोनी आवैगो। जद बठै के'ई लोगां आ'गे यीसू नै बतायो कै रोम देस गै राजा पिलातुस आपगै सिपाईयां ऊं गलील देस गै केई लोगां नै यरुसलेम गै मिन्दर में चढावो चढातां नै बठै मरवा दिया। ओ सुणगे यीसू केयो, “थे के सोचो, झिकै लोगां नै मारया बे लोग गलील गै दूसरै लोगां ऊं घणा पापी हा अर ईंखातर बां पर बिपता आ पड़ी।” मैं केऊं, “जे थे आपगो मन ना बदळयो तो थे ई बिंयाई खत्म हो जाओगा जिंया बे लोग मरया। अर थे बां अठारा लोगां गै बारै में के सोचो झिका पर सीलोहु नाम गी जिग्यां पर पथर गी बुरजी पड़गी अर बे दब'गे मरग्या। बे यरुसलेम में रेण आळै दूसरै लोगां ऊं घणा दोसी हा के?” मैं थानै केऊं, “जे थे परमेसर कानी मन ना लगाओगा तो थे बिंयाई खत्म हो जाओगा, जिंया बे लोग होया।” फेर बण लोगां नै एक मिसाल ऊं समझाया कै, कणैई आपगै अंगूरां गै बाग में अंजीर गो दरखत लगायो। पण बिंऊं बिनै कोई फळ कोनी मिल्यो। जद बण बाग गै माळी नै केयो, “देख मनै तीन साल हो'ग्या अठै आंतै नै, अजे तांई इंगै कोई फळ लागेड़ो कोनी देख्यो। इनै पट'दे। झिको जिग्यां तो ना रोकै।” माळी उतर दियो, “हे स्वामी, इनै आखरी एक साल ओर खड़यो रेण दैयो अबकै मैं इंगै च्यारूंमेर जिग्यां खोद'गे अर खाद रेड़ स्यूं। जे अबकै इंगै कीं ना लाग्यो तो इनै पटा'देईयो।” एकर बो सब्त गै दिन सतसंग घर में परचार करण लागरयो। बठै एक लुगाई ही झिकी में अठारा सालां ऊं ओपरी बड़ेड़ी ही अर बा बिंऊं कुबी हो'री ईंखातर सीदी कोनी हो सकै ही। यीसू बिनै देखगे, आपगै कनै बुला'गे केयो, “हे माता, तूं तेरी बीमारी ऊं छूट जावैगी।” जद यीसू बिंगै उपर हात रख्यो। अर हात रखतांई, बा सीदी खड़ी होगी अर परमेसर गी बडाई करण लागगी। जद बण बिं लुगाई नै सब्त गै दिन ठीक करी तो सतसंग घर गै मुखिया नै रीस आ'गी अर लोगां नै केण लागग्यो कै छ: दिन होवै है झिका में काम करणो चईजै अर थानै बां दिनां में आ'गे ठीक होणो चईजै पण सब्त गै दिन हिसो काम करणो ठीक कोनी। ओ सुणगे प्रभु बोल्या, “हे ढोंगी, कै सब्त गै दिन थे थारै बळद या गधिया ठाण ऊं खोलगे पाणी प्याण कोनी लेगे जाओ के? अब आ लुगाई झिकी अबरहाम गै घराणै गी बेटी है अर इनै अठारा सालां ऊं ओपरी बांद राखी। अर आज सब्त गै दिन छूट'गे कोई गळत काम कोनी करयो।” जद बण ऐ बातां कैई तो बिंगा बिरोध करण आळा गो पाणी उतर ग्यो। अर बिनै लोगां गी भीड़ बिंगै चमत्कारां गी झिका बो करतो हो बाऊं भोत खुस होण लागगी। फेर यीसू केयो, “परमेसर गो राज किंगै बरगो है मैं बिंगी तुलना किंगै सागै करूं।” फेर केयो, “बो एक राई गै दाणै गै बरगो है झिकै नै कणैई आपगै खेत में लगायो अर बो बद गे बूंटो बणग्यो अर आकास गा छोटा पंछी बिं पर बसेरो करण लागग्या।” बण फेर केयो, “मैं परमेसर गै राज नै किंगै बरगो बताऊ? बो खमीर तरियां है झिकै नै कणैई लुगाई लेगे तीन पंसेरी ऊं बोलै आटे में रळागे गूंध दियो अर होळै होळै सारो आटो फूल गे खमीर बणग्यो।” बे गाम गाम, नगर नगर परचार करता यरुसलेम कानी चाल पड़या। जद कणैई पूछयो कै, “हे प्रभु, थोड़ा सा माणसा नै मुकती मिलसी के?” यीसू बानै केण लागग्यो, “परमेसर गै राज गो बारनो भोत भीड़ो है अर बिमै जाण गी पूरी कोसिस करो क्यूंकै बिमै भोत जाणा चावैगा, पण जा कोनी सकैगा। अब तो बारनो खुलो है पण एक दिन बो मालिक खड़यो होगे बंद कर देवैगो। तो फेर थे बारै खड़या बारनो खड़का'गे हेला मारता रेईयो। हे प्रभु, म्हारै खातर खोल दे। अर बो मा बेठयो केवै'गो, ‘मैं थानै कोनी जाणू थे कठै'गा हो।’” जद थे केवोगा, म्हे थारै सागै रेंता हा, अर थारै सागै ई खांता पींता अर थे म्हानै म्हारी गळियां में ग्यान सुणावंता हा। पण बो केवै'गो, “हे पापियो, दूर होज्यो मेरूं। मैं थानै कोनी जाणू थे कठै'गा हो।” जद थे, “अबरहाम, इसहाक, याकूब अर सारै परमेसर गी बात बोलण आळा नै परमेसर गै घर में देखोगा। पण थानै बठूं बारै काड देसी। जठै रोणो अर दांत पीसणो होवैगो। अर चारूकूंटा गा लोग परमेसर गै घरे आ'गे भोजन करैगा। झिकै लोगां गी ईं संसार में भोत कदर होवै है बां लोगां नै बठै तुछ जाण सी अर बेजती करसी।” बिं घड़ी केई फरीसी लोग आ'गे केयो, “अठुं उड़ ज्याओ क्यूंकै हेरोदेस राजा थानै मारणो चावै।” बण बानै केयो, “जा'गे बिं लोंबड़ी नै के दैयो मैं आज अर तड़कै ओपरियां नै काडूंगा अर बीमारां नै ठीक करूंगा अर तीसरै दिन मैं मेरो मकसद पूरो करूंगा।” ईंखातर आज, तड़कै अर परस्यूं मनै चालणो पड़सी क्यूंकै ओ हो कोनी सकै कै कोई परमेसर गी बात बोलण आळो यरुसलेम ऊं बारै मारयो जावै। “हे यरुसलेम गा लोगो, थे झिको परमेसर गी बात बोलण आळा नै पथरां ऊं मारो। किती बारी मैं ओ सोच्यो कै कूकड़ी जिंया आपगै बच्चा नै पांख्या नीचै राखै बिंयाई मैं तेरै टाबरां नै राखूंगा। पण थे ओ कोनी चायो।” अब परमेसर थारो घर छोड़गे जावै। जद तांई थे मनै कदी कोनी देख सकोगा। जद तांई ओ थे ना केवोगा, “धन्य है बो झिको प्रभु गै नाम ऊं आवै।” एक दिन यीसू सब्त गै दिन फरीसियां गै मुखिया माऊं एक गै घरे भोजन करण गेया अर बे बिं पर दोस लगाण गी ताक में हा। यीसू नै बठै एक हात पग सूजेड़ै आदमी नै देख्यो। बिनै देखगे यीसू धरम सासतरियां अर फरीसियां नै केयो, “सब्त गै दिन इनै ठीक करणो जाइज है के कोनी?” पण बामूं कोई कोनी बोल्यो। जद यीसू बिंगै हात लगायो अर बिनै ठीक कर'गे घरे घाल दियो। अर बण बानै सारा नै केयो, “थारै माऊं हिस्यो कुण है झिकै गो पसु सब्त गै दिन कुअ में पड़ज्यै अर बो बिनै बारै ना काडै?” ओ सुणगे सारा गी जबान चिप गी। जद यीसू देख्यो कै अठै बुलाएड़ा लोग किंया सारा ऊं आगै आ'गे बेठया है। जद बण बानै एक मिसाल बताई। जद कोई थानै ब्या गै भोज में बुलावै तो सारा ऊं आगै जा'गे ना बेठियो। कठैई इंया ना होवै कै घर गै मालिक गो कोई थारै ऊं मोटै आदमी नै नूंतो देयेड़ो होवै अर बो आवै। तो घर गो मालिक थानै बठू खड़यो कर'गे बा जिग्यां बिनै देवै अर थानै सारा गै सांमै आपगो सो मूं लेगे लारै बेठणो पड़ज्यै। पण थारो मान तो जद होवै जद थे सारा ऊं लारै बेठया होवो। अर घर गो मालिक आ'गे केवै कै ऐ बेली थे आगै आ'गे बेठो। क्यूंकै झिको अपणै आपनै मोटो मानैगो बो छोटो करीज्यै'गो। अर झिको अपणै आपनै छोटो मानै बिंगो आदर मान करीजैगो। फेर यीसू नूंतो देण आळै नै केयो, “जद कदी तूं दिन या रात नै भोज राखै तो आपगै साथियां, भाईयां, रिस्तेदारां या धनवान पड़ोसियां नै ना बुलाई क्यूंकै बे सगळा तो तनै नूतो देगे ऊधारी हांती उतार देसी। पण तूं जद कोई घरे भोज रखै तो बांगै बदळै में गरीबा, आंधा, लंगड़ा अर टुंडै लोगां नै बुलाए करै। क्यूंकै बांगै कनै तनै देण नै कीं कोनी ईंखातर तूं अपणै आपनै धन्य मानी, बिंगो फळ तनै परमेसर देवैगो जद ईं धरती पर धरमी लोग जी ज्यैगा।” जद बिंगै सागै भोजन करण आळा माऊं एक आदमी बोल्यो कै, “धन्य है बो झिको परमेसर गै राज में रोटी खावैगो।” यीसू बानै एक मिसाल ऊं समझायो कै कणै'ई आदमी आपगै घरे एक मोटो भोज रख्यो अर भोत लोगां नै बिमै बुलाया। जद भोजन तैयार हो'ग्यो तो घर गै मालिक आपगै नोकर नै केयो कै नूतो देएड़ा लोगां गै घरे जा'गे कैईया कै भोजन तैयार है। जद नोकर एक कनै गेयो तो बो केण लागग्यो तेरै मालिक नै के देई मैं एक खेत मोल लियो है अर बिमै भोत काम है। मैं कोनी आ सकूं। मनै माफ कर दैय। दूसरै कनै गेयो तो बो बोल्यो, “मैं आज'ई पांच जोड़ी बळद मोल लिया है बानै देखण जाण लागरयो हूं, मेरूं आईजै कोनी। बानै के देई मनै माफ कर दैय।” तीसरै कनै गेयो तो बो बोल्यो, “मेरो नूंओ नूंओ ब्या मंडयो है, मैं कोनी आ सकूं।” बण नोकर घरे आ'गे सारी बात आपगै मालिक नै बताई तो बिंगै मालिक नै बां सारा पर रीस आ'गी अर नोकर नै केयो, “बेगो सो जा नगर गै बजारां, गळियां माऊं सारा लंगड़ा, कंगाला, टूण्डां अर आंधा लोगां नै बुला ल्या।” अर बो सारा नै बुला ल्याओ जद बण आपगै स्वामी नै केयो, “हे स्वामी, थारै केण ऊं सारा नै बुला ल्याओ पण फेर ई जिग्यां बचगी।” जद मालिक आपगै नोकर नै केयो, “सड़क पर ऊं अर खेत आळा रा गै माऊं सारा लोगां नै धकै ऊं बुला ल्या। झिका ऊं मेरो घर आदमियां ऊं भरज्यै। अर तनै केऊं मेरै पेलां नूतो देएड़ा लोगां माऊं एक बी ई भोज में ना जीमणो चईजै।” यीसू गै सागै भोत मोटी भीड़ जाण लागरी तो बण लारै मुड़गे बानै केयो, “जे कोई मेरै सागै आणो चावै अर बो अपणै आपगै सागै अर आपगै परिवार गै सागै मेरूं जादा प्रेम राखै तो बो मेरो चेलो कोनी हो सकै।” अर झिको आपगो करूस आप ना उठावै अर मेरै लारै ना चालै तो बो बी मेरो चेलो बणण गै लायक कोनी। थारै में हिस्यो कुण है झिको घर बणाण ऊं पेलां आपगी जेब ना संभाळै कै कनै गुंजाईस पूरी है के कोनी। कठैई इंया ना हो'ज्यै कै घर गी नींव तो रख ल्यै पण कठैई कंदा ई ना कढै। अर पड़ोसी थारी मजाक उडाण लागज्यै कै बणाण तो बेठग्यो पण कनै पूरी गुंजाईस ई कोनी। या हिसो राजा कुण है झिको बिना सोचगे युद्ध में जावै कै झिको राजा मेरै सांमै युद्ध करण खातर बीस हजार सिपाईयां नै लेगे आण लागरयो है बांगै सांमै मैं दस हजार सिपाईयां ऊं जीत सकूं के? जे पेली सोच्यो होंतो तो बो आपगै राजदूता नै भेजगे बिंऊं समझोतो करणो चावैगो। मानल्यो एक राजा आपगै दस हजार सिपाईयां गै सागै दूसरै राजा नै झिकै कनै बीस हजार सिपाई है लड़ाई करण खातर तैयार होण लागरयो है। बो पेलां बिचार करैगो कै मैं आपगै दस हजार सिपाईयां ऊं बिं राजा नै हरा सकूं के? जे बिनै लागै कै मैं जीत कोनी सकूं तो बो आपगै राजदूत नै भेजगे बिंगै सागै समझोतो करणो चावैगो। ईं तरियां ई थारै माऊं जे कोई आपगो सारो कीं कोनी छोड़ सकै बो मेरो चेलो कोनी हो सकै। फेर यीसू केयो, “लूण आच्छो है पण बो खराब होणै गै खातर नमकीन कोनी रयो तो दुबारै के चीज मिलागे बिनै नमकीन बणायो जा सकै। फेर बो कीं काम गो कोनी रेवै। अठै तांई लोग बिनै बारै ई फेंकैगा बिंऊं खाद बी कोनी बण सकै। जे कोई सुणनो चाओ बो सुणल्यो अर समझल्यो।” यीसू जद परबचन देंता तो सारा चुंगी लेण आळा अर पापी लोग बिंगै कनै सुणन आंता। ओ देखगे फरीसी अर सास्तरी लोग रीस बळगे केण लागग्या कै ओ तो पापी लोगां सागै खावै पीवै अर मिलै है। जद यीसू बानै आ मिसाल बताई। मानल्यो थारै माऊं किंगै कनै सो भेड़ां है अर बामूं जे एक भेड़ कठैई गमज्यै तो थे बां निनाणवै भेड़ां नै बठै छोड़गे बिं गमेड़ी भेड़ नै ढूंढता कोनी फिरोगा के? जद तांई ना मिलै। अर जद लादज्यै, तो बिनै राजी होगे आपगै मोडै पर चक ल्याओगा अर घरे आ'गे आपगै साथियां सागै अर पड़ोसियां सागै खुसी मनाण लागज्यै कै मेरी गमेड़ी भेड़ लाद'गी। मैं केऊं कै ईं तरियां ईं जद एक भटकेड़ो पापी परमेसर कनै आवै तो सुरग में इतो आनंद होवै जितो बां निनाणवै धरमी लोगां खातर कोनी होवै क्यूंकै बे भटकेड़ा कोनी हा। जिंया मानल्यो एक लुगाई गै कनै चांदी गा दस टका है जे बिंगो एक टको गमज्यै तो बा दीयो जगागे अर घर में भूआरी मारगे जद तांई बो ना मिलैगो तो बिनै जी लगागे ढूंढती कोनी रेवैगी के? जद बो चांदी गो टको बिनै लादज्यै तो बा आपगी बेलणां अर पड़ोसणां नै बुला'गे केसी, “मेरै सागै खुसी मनाओ क्यूंकै मेरो गमेड़ो टको लाद'ग्यो है।” मैं थानै केऊं बिंयाई एक पापी गै मन बदळ नै ऊं परमेसर गै सुरगदूतां सांमै सुरग में आनंद होवै। फेर बण एक ओर मिसाल कैई कै एक आदमी गै दो बेटा हा। अर बिंगो छोटियो बेटो आपगै बाप नै बोल्यो, “पिताजी, मनै मेरी जेदाद गो हिसो दे अर बिंगै बाप बिंगो हिसो बिनै दे दियो। केई दिनां गै बाद में छोटियो बेटो आपगो धन-माल लेगे दूसरै देस में उड़ग्यो अर बठै गळत कामां में आपगो सारो धन उड़ा दियो। जद बिं कनै सारो धन मुकग्यो तो बो कंगाल हो'ग्यो। बिं टेम देस में अकाळ पड़ग्यो। बण बठै एक किसान गै आ'गै बिनती करी कै मनै राख ल्यो तो बण किसान बिनै सूर चराण खेत में घाल दियो। अर बो सोचतो कै मनै बे फळियां मिल जावै झिकी सूर खांता हा। पण बिंगो मालिक बिनै ओर कीं खाण नै कोनी देंतो। जद बण आपगै घर गी सोची कै मेरै पिता गै घरे दिहाड़िया नै कितो खाण पीण नै मिलै। अर मैं अठै भूख मरण लागरयो हूं। पण अब मैं आपगै पिता कनै जाऊंगा अर केऊंगा, ‘पिताजी, मैं परमेसर गै खिलाफ अर थारी नजरां में भोत पाप करया है।’” अब मैं थारो बेटो कुहाण गै ई लाइक कोनी रेयो। अब थे मनै एक नोकर बणागे घरे राख ल्यो। अर बो आपगै घर कानी चाल पड़यो। बिंगै पिता बिनै दूर ऊं आंता देख बिं पर तरस खायो। अर सांमै भाजगे बिनै काळजै गै लगा लियो अर भोत बिंगा लाड-कोड करया। बण केयो पिताजी, “मैं पापी हूं क्यूंकै मैं सुरग अर थारी नजरां में भोत मोटो पाप करयो है। मैं थारो बेटो कुहाण गै लायक कोनी रेयो।” पण बिंगै पिता आपगै दासा नै केयो ईंखातर बडिया कपड़ा, जूती अर बिंटी ल्यागे पिरा'ओ, अर बडिया भोजन तैयार करवाओ, इंगै सागै जीमां अर सारा खुसी मनावां। क्यूंकै मेरो बेटो झिको मरग्यो आज बो जीग्यो है अर गम'ग्यो हो बो आज लाद'ग्यो है अर बे सारा खुसी मनाण लागग्या। पण बिंगो मोटोड़ो बेटो खेत ऊं आयो तो बण घर में नाचण कूदण गो खड़को सुण्यो। बण आपगै नोकर नै बुला'गे पूछयो, “ओ के होण लागरयो है?” बो बोल्यो, “तेरो भाई आयो है जद तेरै पिता बिनै चंगो भलो देखगे घरे भोज करवायो है।” ओ सुणगे बो रीसा में आ'ग्यो। अर घर गै मा कोनी आणो चावै ओ तो बिंगै पिता बिनै बारै आ'गे समझाण लागग्यो। बण आपगै पिता नै केयो, “देखो मनै थारी सेवा करता नै इता साल हो'ग्या अर थारी बात में कदी कोनी टाळी तो बी थे मनै साथियां सागै खुसी मनाण खातर कदी कीं कोनी दियो। पण अण बेटै थारो सारो धन गळत कामां में उड़ा'गे घरे आयो है अर थे ईंखातर बडिया भोजन तैयार करवायो है। बिंगै पिता बिनै समझायो कै बेटा तूं हमेसा मेरै सागै रेयो है अर झिको कीं मेरो है। बो सारो तेरो ई तो है। पण आज तनै खुस होणो चाईजै कै आज तेरो भाई झिको मरग्यो बो आज जींवंतो हो'ग्यो। गम'ग्यो हो बो आज लाद'ग्यो है।” फेर बण एक ओर मिसाल बताई: कोई धनी आदमी गो एक मुनीम हो अर लोगां बिं पर दोस लगायो कै ओ मालिक गो धन उडाये आवै। जद मालिक बिनै बुला'गे केयो कै, “मैं तेरै बारै में के सुणन लागरयो हूं? सारै भण्डार गो मनै लेखो जोखो दे। अर आगै भण्डारी तूं कोनी रेवैगो।” जद बो भण्डारी सोचण लागग्यो, “मरा दिया नी, अब के करां? क्यूंकै मेरो मालिक अब मनै तो मुनीम राखै कोनी। खेत गो काम मेरूं होवै कोनी अर मांगण ऊं बी मनै सरम आवै है। मेरै कनै एक तरिको है जे मैं बिंया करूंगा तो मेरा बोळा सारा साथी बणज्यैगा झिका अठुं हटण गै बाद में मेरै काम आ सकै। जद बण आपगै स्वामी गै कर्जदारां नै बुला बुला'गे पूछयो। पेलै नै पुछ्यो कै, ‘तूं मालिक गो कितो करजो देणो है?’ बो बोल्यो, ‘मैं सो मण तेल देणो है।’ जद बण केयो, ‘तेरो बही खातो लेगे बिमै पचास मण लिख दे।’ फेर बण दूसरै नै पूछयो, ‘तूं मालिक गो कितो करजो देणो है।’ बण केयो, ‘सो मण कणक देण आळी है।’ जद बण बिनै केयो, ‘तेरी बही लेगे असी मण लिख दे’ अर ईंखातर सारा लोग बिं कानी हो'ग्या। जद चातर भण्डारी गै स्वामी बिंगी चतुराई नै देखगे बिनै सराण लागग्यो कै अण किती चतुराई ऊं काम लियो है। फेर यीसू बानै केयो, ‘संसारिक आदमी दूसरै आदमी गै सागै लेण देण गै मामलै में धरमी आदमी ऊं जादा चातर है।’ जद बण केयो, ‘संसार गै धन ऊं गरीबां गी मदद कर'गे बेली बणा ल्यो क्यूंकै जद थारो धन मुक'ज्यैगो तो परमेसर अर सुरगदूत थानै अनन्त लोक में थारो सुआगत करैगा।’ जद थे छोटी ऊं छोटी बातां में बिस्वास गै लायक होवो तो मोटी ऊं मोटी बातां में बी बिस्वास गै लायक हो जाओगा। अर झिको छोटी ऊं छोटी बातां में बिस्वास गै लायक कोनी होवै तो बो कदी बी मोटी ऊं मोटी बातां में बिस्वास गै लायक कोनी हो सकै। जे थे संसारिक धन नै संभाळण में बिस्वास गै लायक कोनी रेया तो सुरग गै सच्चै धन नै संभाळण खातर थानै कुण बिस्वास गै लायक मानसी? झिको धन दूसरा गो है बिमै बी थे बिस्वास गै लायक कोनी रेया तो परमेसर थानै बो धन राखण खातर किंया देसी? ‘क्यूंकै एक दास दो स्वामियां गी सेवा कोनी कर सकै। जे करैगो तो एक ऊं प्रेम राखैगो अर दूसरै ऊं बेर राखैगो अर एक सागै इमानदारी ऊं रेवैगो अर दूसरै नै घटिया जाणैगो। थे परमेसर अर धन गी एक सागै सेवा कोनी कर सकोगा।’” फरीसी लोग झिका लोभी हा, बांगी बातां सुणगे मजाक उडाण लागग्या। यीसू बानै केयो, “थे लोगां गै सांमणै तो आच्छा बणगे रेवो पण परमेसर थारै मन गी बात नै जाणै। क्यूंकै झिकी चीज आदमियां गी नजरां में आच्छी है बा परमेसर गी नजरां में भोत माड़ी है।” बतिस्मो देण आळै यूहना आपगो परचार सरू करण ऊं पेलां मूसा नबी गा बतायेड़ा नेम विधान अर परमेसर गी बात बोलण आळा गी सिखाईड़ी बातां सुणाई। पण अब परमेसर गै राज्य गो सुब समाचार सुणाइजै है बिं राज्य में लोगां गी भीड़ बढण खातर भोत ऊंतावळी होवै है। पण इंगो मतलब ओ कोनी कै विधि विधान गै नेमां गो म्हत्व खतम हो'ग्यो है। धरती अर आकास गो गिरनो तो सोखो है पण नेम-विधान गी एक छोटी सी बात बी टळनी सोखी कोनी। झिको आदमी आपगी लुगाई नै छोड़गे दूसरी सागै ब्या करै तो बो बिंगै सागै बेबीचार करै। अर जे कोई हिस्यी छोडे'ड़ी लुगाई सागै ब्या करै तो बो आदमी बी बिंगै सागै बेबीचार करै। यीसू एक ओर मिसाल बताई: “अब देखो, एक धनवान आदमी हो झिको भोत मेंगा अर मलमल गा कपड़ा पेरतो अर रोजाना भोत ऐस-आराम ऊं आपगी जिंदगी जींवंतो हो। बिंगै दरवाजै गी चोकी पर लाजर नाम गो एक गरीब आदमी पड़यो रेंतो बिंगो पूरो सरीर घावां ऊं भरेड़ो हो। बो तरसतो कै मनै ईं अमीर आदमी गी थाळी गी जूंठ पेट भरण नै मिलज्यै तो ई चोखी है। अर बिंगी हालत हिसी हो'गी कै कुता बी बिंगा जखम चाटता रेंवता। फेर इंया होयो कै बो गरीब लाजर मरग्यो अर सुरगदूतां बिनै सुरग में ले जा'गे अबरहाम गी गोदी में बिठा दियो। अर फेर बो धनवान आदमी बी मरग्यो अर माटी दे दी। अर बिनै नरक में लेग्या। जद नरक में बो धनवान आदमी दुख ऊं भोत तड़फण लागरयो तो बण आदमी आंख उठागे देख्यो तो भोत दूर सुरग में लाजर नै अबरहाम गी गोदी में बेठयो देख्यो। तो बण दुख ऊं करळागे हेलो मारयो, ‘हे पिता, अबरहाम मेरै पर तरस करो, लाजर नै मेरै कनै घालदैयो बो आपगी आंगळी पाणी में भे'गे मेरी जीभ नै ठंडी करै मैं ईं आग में तड़फण लागरयो हूं।’ पण अबरहाम केयो, ‘बेटा याद कर, तूं तेरी जिन्दगी में आच्छी चिजां ले ली,’ पण लाजर नै कोनी मिली। ईंखातर अब इनै आराम मिलण लागरयो है। अर तूं तड़फण लागरयो है। ईं बात गै बिना थारै अर म्हारै बिचाळै भोत मोटी खाई बणाएड़ी है ईंन्लो बिनै कोनी जा सकै। अर बिंन्लो इनै कोनी आ सकै। जद बण अमीर आदमी केयो, ‘हे पिता, मैं थारूं बिनती करूं थे लाजर नै मेरै बाप गै घरे घालदैयो। क्यूंकै मेरा ओर पांच भाई है अर मैं चाऊं कै लाजर जा'गे अठै गो सारो बुरो हाल बानै बतावै। कठैई इंया ना होवै कै मरै बाद में बानै बी अठै आणो पड़ज्यै।’ अबरहाम केयो, ‘बां कनै मूसा नबी अर परमेसर गी बात बताण आळां गा सासतर है। बामै सारो कीं लिखेड़ो है जद चावै पढ सकै।’ बण केयो, ‘ना, हे पिता अबरहाम, जे कोई मरेड़ा माऊं जी'गे बांनै जा'गे बतावैगो तो बे सारा पापां ऊं मन बदळल्यै'गा।’” बण बिनै केयो, “जद बे मूसा नबी अर परमेसर गी बात बोलण आळां गी कोनी सुणै तो मरेड़ा माऊं जी'गे बांगै कनै उड़ज्यासी तो बी बे कदी बिंगी कोनी मानैगा।” एक दिन यीसू आपगै चेला नै केयो कै, “लोगां नै पाप में गिराणआळी चीज तो संसार होवै ई है पण बां लोगां गै सागै भोत बुरो होवैगो झिका थानै पाप में रेड़ै। अर झिका मेरै पर बिस्वास करण में कमजोर है बानै पाप में रेड़ण आळा माणसां गै गळ में चकी गो पाट बांदगे पाणी में रेड़ देण गी सजा इती बुरी कोनी हो'सी जिती परमेसर गी ओर ऊं मिलण आळी है। ईंखातर सावधान रेओ। जे तेरो भाई पाप करै तो बिनै तूं समझा अर जे बो कर'गे पछतावो करै बिनै माफ कर दे। जे बो दिन में भलांई सात बारी पाप करै अर सातूं बारी तेरै कनै आ'गे माफी मांगतो रेवै तो तूं बिनै माफ करतो रेई।” जद चेला केयो, “प्रभु म्हारो बिस्वास पक्को करण खातर म्हारी मदद करो।” यीसू बानै केयो, “जे थारै में राई गै दाणै जितो'ई परमेसर पर बिस्वास होंतो अर थे ईं सेतूत गै दरखत नै केंता कै समुंदर में जा'गे लागज्या तो ओ थारो केणो मान लेंतो।” फेर यीसू बोल्यो, “कोई आदमी हो झिकै गो सीरी खेत में हळ बावंतो होवै या भेड़ां चरांतो होवै अर जद बो घरे आ'ज्यै तो बिंगो मालिक बिनै इंया कोनी केसी तूं पेलां रोटी खा'ले। पण बो आंता ई इंया केवैगो पेलां न्हा'ले अर मेरै खातर रोटी तैयार कर अर जद तांई मैं ना जीमूं जद तांई मेरी सेवा करतो रेई। अर मेरै बाद में तूं जीम लेई। थे बताओ बो मालिक आपगै नोकर गो हेसान मानैगो के? जरूर कोनी मांनै। इंयाई थे समझल्यो झिकी आग्या थानै देएड़ी है अर थे बा मानगे सारा काम कर लिया है तो बी अपणै आप केवो, ‘म्हे कीं खास कोनी करयो। म्हानै केयो बितो'ई काम करयो है जादा कोनी करयो।’” फेर जद यीसू आपगै चेला सागै सामरिया अर गलील परदेस गै माखर यरुसलेम जाण लागरया तो, किसैई गाम में बड़ता टेम बानै दस कोढ गा रोगी मिलग्या। बे यीसू नै देखगे दूर ऊं ई जोर जोर ऊं हेला मारण लागग्या कै, “हे यीसू, हे स्वामी, म्हारै पर दया करो।” जद यीसू बानै देखगे केयो, “जाओ, ठीक होज्याओगा अर आपणै आपनै याजकां नै दिखाओ।” अर जद बे जाण लागरया तो बे “रा” में जांता जांता ठीक हो'ग्या। जद बामूं एक कोढी देख्यो कै मैं ठीक हो'ग्यो तो परमेसर गी जय जयकार करतो पाछो यीसू कनै आ'ग्यो। बो कोढी सामरी देस गो हो। अर आ'गे यीसू गै पगां में पड़ग्यो अर बांगो धन्यवाद करण लागग्यो। यीसू बिं एक नै देखगे केयो, “मैं तो दसां नै ठीक करया, फेर बाकी नो किनै गेया? ईं एक परदेसी नै छोड़गे बाकी नो जणा परमेसर गो धन्यवाद करण क्यूं कोनी आया? फेर यीसू बिनै केयो, ‘जा, तेरै बिस्वास तनै ठीक करयो।’” एकर केई फरीसियां बानै पूछयो कै, “परमेसर गो राज कद आवैगो।” जद यीसू बानै केयो, “परमेसर गो राज सांमै दिखण में कोनी आवै। लोग इंया कोनी केसी देखो ओ अठै या बठै है। क्यूंकै परमेसर गो राज थारै बिचाळै है।” फेर चेला नै केयो, “हिस्यो टेम आवैगो जद मिनख गै बेटै गै दुसर आण गै दिनां में थे एक दिन नै ई देखणो चावोगा। पण देख कोनी सकोगा। अर लोग गुमराह करैगा कै ओ रयो अठै बो रेयो बठै पण थे बांगै लारै ना लागजाईयो। जिंया बिजळी एक कूंट में चमकै तो दूसरी कूंट में रेण आळै लोगां नै ध्यान लागज्यै। बिंयाई मिनख गो बेटो जद आपगै दिनां में आवैगो तो सारा लोग बिनै देखैगा। पण बिंऊं पेलां ओ होणो जरूरी है कै लोगां गै कारण बो भोत दुख झेलैगो अर ईं जुग गा लोग बिनै ओछो जाणैगा। जद मैं, मिनख गो बेटो पाछो आऊंगा तो बिंयाई हो'सी जिंया भोत टेम पेलां परमेसर गो दास नूह हो जद लोगां सागै होयो। झिकै दिन तांई नूह अर बिंगो परिवार मोटो जहाज बणागे बिंगै उपर ना चढया जद तांई लोग खाणो पीणो करता अर आपसरी में ब्या करता। अर जद जळ परलै होई तो सारो कीं नास कर दियो। अर बिंयाई लूत गै टेम में होयो। लोग खाणो पीणो, लेणो देणो, खेती करता अर घर बणावंता। पण झिकै दिन लूत सदोम नगर ऊं बारै आ'ग्यो बिं दिन बठै आकास ऊं आग अर गंधक बरस्यो अर सारो कीं नास कर दियो। इंयाई मिनख गै बेटै गै दूसर आण पर होवैगो। बिं दिन झिको आदमी छत पर होवै बो नीचै समान लेण ना उतरै अर झिको खेत में होवै बो पाछो घरे ना आवै। लूत गी घराळी नै याद राखो झिकी परमेसर गी आग्या नै तोड़गे लारै देख्यो तो लूण गो खम्बो बणगी। झिको आपगो जीवन मेरै खातर देण नै तैयार है बिनै सुरग में जीवन मिलैगो। अर झिको तैयार कोनी बिनै सुरग में जीवन कोनी मिलै। मैं थानै केऊं, बिं रात में दो आदमी झिका एक मांची पर सूत्या होवैगा, बामूं एक नै परमेसर आपगै सागै ले जावैगो अर दूसरै नै छोड़ देवैगो। अर दो लुगाई एक सागै चाकी पीसती होवैगी तो बामूं झिकी धरमी होवैगी बिनै परमेसर आपगै सागै ले जावैगो अर एक नै बठै छोड़ जावैगो। जे खेत में दो आदमी होया तो एक तो परमेसर आपगै सागै ले जावैगो अर दूसरै नै बठै छोड़ जावैगो। जद बां यीसू नै पूछयो, ‘हे प्रभु, ओ कठै होवैगो’ यीसू बोल्यो, ‘जठै ल्हास है, बठै गिरज आपी भेळा होजी।’” फेर एक दिन यीसू बतायो कै, “थे रोजाना पराथना करता रेईयो अर ना कदैई दिल रेड़ियो” अर बानै एक मिसाल बताई कै: “किसैई गामै एक न्यायी रेंतो बो ना तो परमेसर ऊं डरतो अर ना'ई किसैई आदमी गी परवा करतो। बिं गामै एक विधवा लुगाई रेंती। बा रोजाना आपगै न्याय खातर न्यायी आगै आपगो रोणो रोंती, कै झिकै आदमी मेरै उपर अन्याय करयो है बिंऊं मनै न्याय दी'रा।” पण बो केई दिनां तांई तो आनाकानी करतो रेयो फेर बण सोच्यो, “मैं ना तो परमेसर ऊं डरूं अर ना'ई किसैई आदमी गी परवा करूं। फेर ई अण लुगाई मेरो दम ले लियो है ईंखातर मैं इंगो न्याय करवाऊंगा। झिको आ घड़ी घड़ी आ'गे मेरी स्यान तो ना पटै।” प्रभु यीसू बोल्यो, “सुणो, ओ गळत न्यायी के केवै?” बो गळत न्यायी होंताई बी विधवा गो न्याय करयो है तो परमेसर आपगै चुणेड़ा लोगां गो न्याय क्यूं कोनी करैगो? झिका बिनै रात दिन पूकारै बांगी मदद करण में देर करैगो के? मैं थानै केऊं कै परमेसर दबादब बांगो न्याय करैगो फेर परमेसर गो बेटो धरती पर आवैगो तो बिनै भोत कम लोग बिं पर बिस्वास करण आळा दिखैगा। फेर बण झिका लोग अपणै आपनै धरमी मानै हा अर दूसरा नै माड़ा समझा बानै एक मिसाल बताई कै: “एकर दो आदमी मिन्दर में पराथना करण गेया झिका में एक फरीसी हो अर दूसरो चुंगी लेण आळो हो। फरीसी आदमी न्यारो खड़यो होगे आपगै मन में पराथना करण लागग्यो कै हे परमेसर मैं थारो धन्यवाद करूं। मैं दूसरा गी तरियां ठगी मारण आळो, अन्यायी, बेबीचार अर ना'ई चुंगी लेण आळै बरगो हूं। मैं हफ्तै में दो बारी बरत राखूं अर आपगी सारी कमाई गो दसमों हिसो दान करूं।” पण चुंगी लेण आळो दूर खड़यो होगे निची नस कर'गे छाती कूट कूट'गे केण लागग्यो कै हे परमेसर, मैं जाणूं, मैं पापी हूं, मेरै पर दया कर। मैं थानै केऊं कै बो छाती पीटणआळो आदमी परमेसर गी नजरां में धरमी मानिज्यो। पण बो फरीसी आदमी अपणै आपनै भोत मोटो मानै हो ईंखातर बिंगी पराथना सुणी कोनी। क्यूंकै झिको आदमी खुद नै मोटो मानैगो बिनै परमेसर छोटो मानैगो अर झिको खुद नै छोटो मानैगो बिनै परमेसर मोटो मानैगो। फेर लोग आपगै टाबरां नै यीसू गै कनै ल्याण लागग्या कै यीसू आंगै सिर पर हात फेरै। पण बिंगै चेला लोगां नै झिड़क दिया कै थे टाबरां नै ना ल्याओ। यीसू टाबरां नै कनै बुलाया अर आपगै चेला नै केयो, “टाबरां नै मेरै कनै आण दैयो, आनै रोको ना। क्यूंकै परमेसर गो राज्य आंगै बरगै लोगां गो है। मैं थानै साची केऊं कै झिको कोई अपणै आपनै टाबरां गी तरियां कोनी बणावैगो तो बो कदी बी परमेसर गै राज्य में कोनी जा सकैगो।” फेर एक यहुदी मुखिया पूछयो कै हे उतम गुरू, मैं अनन्त जीवन गो वारिस होण खातर के करूं? यीसू बिनै केयो, “तूं मनै उतम क्यामी केवै?” क्यूंकै सिरफ परमेसर नै छोड़गे ओर कोई बी उतम कोनी। तूं बिंगी आग्या नै जाणै नी, बेबीचार ना करी, हत्या ना करी, चोरी ना करी, झूठ ना बोली, झूठी ग्वाई ना देई अर आपगै मां बाप गो आदर मान करी। बण यीसू नै केयो, “ऐ तो मैं टाबरथकां ऊं ई मान्तो आयो हूं, ओर के करूं आ बताओ?” ओ सुणगे यीसू बोल्या, “तेरै में अजे एक बात गी ओर कमी है, तूं आपगो सारो धन बेचगे गरीबां नै बांट दे जद तनै सुरग में धन मिलसी अर मेरै लारै होज्या।” बो आ बात सुणगे भोत दुखी होयो क्यूंकै बो भोत अमीर हो। यीसू देखगे बिनै केयो, “अमीर लोगां गो परमेसर गै राज्य में बड़णो भोत ई दोरो है। बिंऊं तो ऊंट गो सुई गै नाकै माखर निकळणो तो सोरो हो सकै पण अमीर आदमी गो परमेसर गै राज में बड़णो भोत ई दोरो है।” ओ सुणगे बां पूछयो तो किंगो उद्धार हो सकै? बण केयो, “झिको काम आदमी कोनी कर सकै बिनै परमेसर कर देवै।” जद पतरस बोल्यो, “देख, म्हे तो सारो घर बार छोड़गे थारै लारै हो'ग्या।” यीसू केयो, “तूं ठीक केयो है, पण मैं तनै साची केऊं कै झिकैई परमेसर गै राज गै खातर आपगो घर-बार, लुगाई, भाई, मां-बाप या टाबर छोड़या है। बानै ईं जीवन में केई गुणा जादा आसिस मिलसी अर आण आळै जुग में अनन्त जीवन बी मिलसी।” फेर यीसू आपगै बारा चेला नै बुला'गे केयो, “देखो, आपां यरुसलेम नगर में चालां'गा अर झिकी बातां ‘मिनख गै बेटै’ गै बारै में परमेसर गी बात बोलण आळां गी लिखेड़ी है बे सारी बठै पूरी होवैगी। क्यूंकै बो गेर यहुदियां गै हातां ऊं पकड़ाइजैगो अर लोग बिंगो मजाक उडावैगा अर बिंगी बेजती करैगा। अर बिं पर थूकैगा अर कोड़ा मारैगा अर जान ऊं मार देवैगा। पण बो तीसरै दिन पाछो जीज्यैगो।” पण चेला बांगी बात नै समझ कोनी सक्या अर आ बात बाऊं परमेसर लूका'गे'ई राखी कै ऐ बातां किंगै खातर केण लागरया है। जद बे चालतां चालतां यरीहो नगर गै कनै पूग्या तो बठै सड़क गै किनारै आंधो आदमी भीख मांगण लागरयो। बो रोळो सुणगे पुछ्ण लागग्यो, “अठै के होण लागरयो है?” लोगां बतायो कै “नासरत आळो यीसू जाण लागरयो है” जद बण जोर ऊं हेलो मारयो, “हे नासरत आळा यीसू, राजा दाऊद गै कुळ गा, मेरै पर दया करो।” झिका लोग सारा ऊं आ'गै जाण लागरया बे बिनै रोळा करण लागग्या कै तेरूं चुप कोनी रेईजै के, पण बो भिखारी ओर जोर जोर ऊं हेला मारण लागग्यो कै हे यीसू, राजा दाऊद गै कुळ गा, मेरै पर दया करो। जद यीसू रूक'गे आग्या दी कै, “बिनै मेरै कनै ल्याओ। जद बिनै कनै ल्याया तो पूछयो तूं के चावै? मैं तेरै खातर के करूं?” बण केयो, “हे प्रभु, मैं चाऊं कै मनै दिखण लागज्यै” यीसू केयो, “हां तूं देख, तेरै बिस्वास तनै ठीक कर दियो” जद चाणचकै ई बिनै दिखण लागग्यो अर बो परमेसर गी बडाई करतो बांगै सागै चाल पड़यो। अर सारा देखण आळा परमेसर गी भोत बडाई करण लागग्या। फेर जद यीसू यरीहो नगर माखर जाण लागरया। बठै जक्केई नाम गो रोमी सरकार गै खातर चुंगी लेण आळा गो मुखिया हो अर बो भोत अमीर हो। बो यीसू गा दरसण करणो चावै ओ पण बोळी भीड़ गै कारण बो देख कोनी सक्यो क्यूंकै बो बावनो हो। जद बो भाजगे, आ'गै रा पर एक मोटै दरखत पर चढग्यो। क्यूंकै यीसू बिं रा ई आण लागरयो। यीसू जद बिं दरखत कनै आयो तो जक्केई नै उपर चढेड़ो देखगे हेलो मारयो कै, “अरै ओ जक्कई, दबादब नीचै आ'ज्या क्यूंकै मनै आज तेरै घरे रेणो है।” बो दबादब उतरयो अर राजी राजी बानै आपगै घरे लेग्यो। ओ देखगे सारा बड़बडाण लागग्या कै ओ तो पापी आदमी गै घरे ई जावै। जद यीसू बिंगै घरे आयो तो जक्केई खड़यो होगे केयो, “हे प्रभु, आज मेरो आदो धन गरीबा नै देऊं अर झिकै आदमी कनूं मैं ठगी मारी है बिनै चोगुणो कर'गे देऊं।” जद यीसू बिनै केयो, “आज ईं घर गो कल्याण होयो है कै ईंखातर ओ ई परमेसर गै दास अबरहाम गै घराणै गो है।” ईंखातर “मिनख गो बेटो इंगै बरगा पापियां नै ढूंढ'गे आंगो कल्याण करण ई आयो है।” जद लोग बांगी बातां सुंणता सुंणता यरुसलेम नगर गै कनै आया तो लोग सोचा कै यीसू म्हारो राजा बणण आळो ई है जद यीसू बानै एक मिसाल बताई कै, एक बारी एक राज घराणै गो आदमी आपगै देस गो राजा बणगे पाछो आण खातर दूसरै देस में उड़ग्यो। जाण ऊं पेलां बण आपगै दस नोकरां नै बुला'गे बानै दस सोनै गी म्होरां देगे केयो, “जद तांई मैं पाछो नां आऊं जद तांई थे आऊं बोपार करियो।” पण बिंगै ई नगर गा केई आदमी झिका बिनै राजा बणाणो पसंद कोनी करै हा, बां आपगै दूतां नै बिंगै लारै ओ केगे भेज्या कै म्हे कोनी चावां कै ओ म्हारो राजा बणै। पण बो राजा बणगे पाछो आयो तो बण आपगै नोकरां नै झिका नै म्होरां देगे गेयो बानै कनै बुलाया कै बाऊं लेण देण गो हिसाब करां कै कितो कमायो है। जद पेलै आ'गे बोल्यो, “हे स्वामी, तेरी एक म्होर ऊं मैं दस ओर म्होरां कमा'ली।” बण केयो, “स्याबास, धन्य है तूं उतम दास। तूं थोड़ै में ई बोळो बिस्वास आळो निकळयो। जा, तनै दस गामां गो प्रधान बणा दियो।” दूसरै केयो, “हे स्वामी, तेरी म्होर ऊं मैं पांच ओर कमा'ली।” बण बिनै केयो, “स्याबास, जा तनै पांच गामां गो प्रधान बणा दियो।” तीसरै आ'गे केयो, “हे स्वामी, देख तेरी म्होर आ'री। इनै मैं पलै गै बांदगे राखी। क्यूंकै मनै तेरूं डर लागै हो कै तूं भोत करड़ो आदमी है क्यूंकै तूं झिको बीजै'ई कोनी, बिनै ई तूं बाडल्यै अर झिको तेरो कोनी बो तूं ले'ल्यै है।” बण बिनै केयो, “हे दुस्ट दास, मैं तेरी बातां ऊं तेरो न्याय करूंगा। जद तूं मनै जाणै ओ कै मैं करड़ो आदमी हूं अर झिको मैं बिज्यो कोनी बिनै मैं बाड़'ल्यूं अर झिको मेरो कोनी बिनै चकल्यूं। तो मेरी म्होर नै ब्याज पर दे देंतो मैं आपी आ'गे सणै ब्याज ले लेंतो। अर झिका लोग बिंगै कनै खड़या बानै केयो कै ईं कनूं आ म्होर लेगे झिकै आदमी दस कमाई है बिनै दे देवो।” बां केयो स्वामी, “बिं कनै दस म्होरां तो है।” जद यीसू लोगां नै केयो, “मैं थानै केऊं झिकां गै कनै है बानै ओर देईजैगो गो अर झिका गै कनै कोनी है बां कनूं बो ई लेईजैगो झिको बां कनै है।” फेर राजा आपगै सिपाईयां नै हुकम दियो, “मेरा दुसमण झिका मनै कोनी चावै कै मैं बां पर राज करूं, बानै अठै ल्यागे मेरै सांमै मारदैयो।” आ मिसाल बतागे यीसू यरुसलेम कानी आपगै चेला गै आ'गै-आ'गै चाल पड़यो। जद बे बेतफगे अर बैतनिय्याह गाम गै कनै जेतुन प्हाड़ कनै पूग्या तो बां आपगै दो चेला नै केयो, कै सांमलै गाम जाओ बठै थानै एक गधी गो बच्चों बांदेड़ो मिलैगो झिकै पर अजे तांई कणैई सवारी कोनी करी, बिनै खोलगे ल्याओ। जे थानै कोई कीं पूछै तो के देईयो प्रभु नै इंगी लोड़ है। फेर चेला जा'गे देख्यो तो बानै बिंयाई मिल्यो जिंया बा केयो। जद बे गधी गै बच्चै नै खोलण लाग्या तो बिंगै धणि केयो कै “इनै क्यामी खोलो?” बां केयो, “प्रभु यीसू नै इनै मंगायो है अर बण केयो है जद धणि बानै कीं कोनी केयो।” अर बिनै खोलगे यीसू कनै लिआया। अर आपगा खेसला उतारगे बिं पर बिछा'गे यीसू नै बिं पर बिठा दियो अर चाल पड़या। अर जद बे चाल्या तो सगळा लोग आदर करण खातर बांगै आगै आगै आपगा खेसला बिछांता गेया। अर जद बे जेतुन प्हाड़ गै कनै पूगग्या तो बिंगै चेला अर सारा लोग बांगै चमत्कारां गी झिका बां देख्या, बांगै खातर जोर जोर ऊं परमेसर गी बडाई करण लागग्या। “धन्य है बो राजा झिको धरती पर परमेसर गै नाम ऊं आवै। ईंखातर सुरग में सांती अर आकास में परमेसर गी बडाई होवै।” जद लोग बडाई करा तो फरीसी लोग बोल्या, “हे गुरूजी, आनै चुप कराओ।” यीसू बानै केयो, “जे ऐ लोग चुप हो'ग्या तो ऐ पथर जय जयकार करण लागज्यैगा।” जद बो यरुसलेम नगर गै कनै आयो तो बिनै देखगे आंख्या पाणी ऊं भरिजैगी अर केण लागग्यो, “हे यरुसलेम गा लोगो, जे सांती गी बातां नै जाण लेंता तो ठीक रेंता पण अब परमेसर बे बातां थारूं लको दी। क्यूंकै थारै पर हिस्या दिन आवैगा कै थारा दुसमण थानै च्यारूं-पासूं घेर'गे थानै दबा'ल्यैगा। अर तेरै में रेण आळा सारा लोगां नै नास कर देसी अर सारो कीं ढा देसी। क्यूंकै प्रभु थानै बचाण आयो जद तो थे बांगी कोई बात मानी कोनी।” फेर यीसू मिन्दर में जा'गे बोपारी झिकां बठै दुकानां लगा राखी बानै बारै काडण लागग्या। अर रीसा में आ'गे केयो, “पवितर सातर में तो लिखेड़ो है कै ‘ओ मेरो पराथना गो घर होवैगो’ अर थे इनै डाकुआं गो अड्डो बणा राख्यो है।” यीसू रोज मिन्दर में परबचन करण जांता जद मुख्य याजक अर सासतरी लोग, मुखिया लोग बानै मरवाण गो मोको ढूंढता रेंवता हा। बे बिनै फसाण गी कोई तरकीब कोनी निकाळ सक्या। क्यूंकै बिनै मानण आळा भोत लोग हा बे बांगी बातां नै भोत ध्यान ऊं सुंणता हा। एक दिन जद यीसू मिन्दर में परबचन करण लागरया तो मुख्य याजक, सासतरी अर पंचायती नेता बठै बांगै कनै आ'गे खड़ग्या। अर केण लागग्या कै “तूं म्हानै बता, तूं ऐ काम किसै अधिकार ऊं करण लागरयो है अर तनै ओ अधिकार कण दियो है।” यीसू बानै उतर दियो कै मैं थानै बी एक बात पूछूं, मनै बताओ? यूहना गो बतिस्मो परमेसर गै कानू हो या मिनखां गी कानूं हो? जद बे आपसरी में केण लाग्या कै जे आपां केयो सुरग गै कानूं तो ओ केवैगो फेर थे बिस्वास क्यूं कोनी करयो? अर जे आपां केयो मिनखां गै कानूं तो लोग आपां नै दगड़ां ऊं मारैगा। क्यूंकै आनै पक्को बिस्वास है कै साची यूहना परमेसर गी बात बोलण आळो हो। ईंखातर बां केयो, “म्हानै तो ठा कोनी बो किंगै कानूं हो।” जद यीसू बानै केयो, “मैं ई थानै कोनी बताऊं कै मैं ऐ काम किसै अधिकार ऊं करूं।” जद बण लोगां नै एक मिसाल बताई कै: कणैई आदमी अंगूरां गो बाग लगायो अर बिनै किसानां नै ठेकै पर देगे आप परदेस उड़ग्यो। जद फळ तोड़ण गो टेम आयो तो बण आपगै एक नोकर नै अंगूरां गी पांती गो हिसो ल्याण खातर घाल्यो। पण बां किसानां बिनै कूट'गे खाली हात काड़ दियो। फेर बण एक ओर नोकर नै घाल्यो, बिनै ई बां कुटयो अर बेजती कर'गे खाली हात काड़ दियो। फेर बण तीसरै ओर नोकर नै घाल्यो, बां बिनै कुटयो अर अधमरयो कर'गे खाली हात काड़ दियो। जद बाग गो मालिक परेसान हो'ग्यो कै अब मैं के करूं? बण सोच्यो मैं मेरै लाडलै बेटै नै घालूंगा झिको बे बिंगो आदर-मान करैगा अर अंगूरां गी पांती गो हिसो बी दे देवैगा। जद बिंगो बेटो बाग मैं आयो तो बां किसानां देख्यो कै ओ तो बाग गो बारस है आज्यो इनै आपां जान ऊं मार देवां जिंऊ बाग गा मालिक ई आपां खुद बण जावांगा। अर बां बिनै बाग ऊं घिंसगे बारै ल्यागे बिनै मार दियो। अब थे सोचो बाग गो मालिक आ'गे बां किसानां सागै के करैगो? जद मालिक आवैगो तो सारा किसानां नै मार देवैगो अर बाग दूसरा किसानां नै सूंपैगो। ओ सुणगे लोग बोल्या “परमेसर करै हिस्यो कदी ना होवै” यीसू बां कानी देखगे केयो, “झिको पवितर सासतर में लिखेड़ो है बिंगो के मतलब है? झिकै पथर नै कारिगरां निकमो केयो, बो ई पथर कूंट गो सिरो बणग्यो। झिको बी बिं पथर पर पड़ैगो बो टुकड़ा टुकड़ा होज्यै'गो, अर झिकै पर बो पथर गिरैगो बिनै चकनाचूर कर देवैगो।” जद मुख्य याजकां अर सासतरियां नै समझ आगी कै आ मिसाल म्हारै पर कैई है, ईंखातर बे बिनै पकड़णो तो चावा पण लोगां ऊं डरै हा। ईंखातर बां चाल खेल'गे आपगा आदमी बिंगै कनै घाल दिया कै बिंगै सांमै सच्चा बणगे बिनै बिंगी बात में फसाओ। अर आपां इनै पकड़गे राजा गै पेस कर दैयांगा। बांगा आदमी जा'गे केयो, “हे गुरूजी, म्हे जांणा थे सच्चा हो अर ठीक सिखाओ अर सारा नै बिना भेदभाव गै परमेसर गो रा सच्चाई ऊं बतावो।” बां पूछयो कै, “म्हानै यहुदियां नै रोमी महाराजा नै कर देणो सई है के कोनी?” यीसू बांगी चाल नै जाणग्या अर बानै केयो। “एक सिको मनै देवो अर बताओ ईं पर किंगी मोहर किंगो नाम है” बां केयो, “रोमी महाराजा गो।” यीसू बानै केयो, “जितो महाराजा गो हक है बितो रोमी महाराजा नै देवो अर जितो परमेसर गो हक है बो परमेसर नै देवो।” बे यीसू नै लोगां गै सांमै बात में फसा कोनी सक्या। पण बे बिंगो जबाब सुणगे उदास हो'ग्या अर चाल पड़या। फेर सदूकी धारमिक दल गा केई लोग आया। झिका मरगे पाछो जीणै में बिस्वास कोनी करता। बां सवाल करयो, “हे गुरू, मूसा गै नेम विधान में आपणै खातर लिखेड़ो है कै झिको आदमी निपुतरो मरज्यै तो बिंगो भाई आपगी भाबी सागै ब्या कर'गे आपगै भाई खातर उळाद पैदा करै। तो एकर सात भाई हा। सारा ऊं मोटोड़ो भाई ब्या कर'गे निपुतरो मर ग्यो। फेर दूसरै भाई आपगी भाबी गै सागै ब्या कर लियो। अर बो ई निपुतरो मर ग्यो। इंया कर'गे सातूं भाई निपुतरा ई मरग्या। अर आखिर में बा लुगाई बी मरगी। अब थे बताओ जद बा लुगाई दुसर जींवती होवैगी तो बा साता मू किंगी बहु होवैगी क्यूंकै बण पेलां ई सातां सागै ब्या कर लियो।” यीसू बानै केयो, “ईं टेम संसार गा लोग ब्या करै पण आण आळै न्याय गै टेम सुरग में परमेसर गा चुणेड़ा लोग झिका पाछा जीवैगा, बांगो बठै ब्या कोनी होवै। बे सुरगदूतां दांई अमर होवैगा। क्यूंकै बे परमेसर गी उळाद होवैगा क्यूंकै बे पेलां मरेड़ा माऊं जींवता होण आळै गी उळाद है। पण आ बात मूसा झाड़ी आळी क्हाणी में बताई है कै मरेड़ा जींवता हो'ज्यै। अर बो परमेसर नै अबरहाम, इसहाक अर याकूब गो परमेसर केवै। पण परमेसर जींवता गो परमेसर है मरेड़ा गो कोनी। बे सारा लोग झिका बिंगा है जींवता है।” जद ओ सुणगे केई सासतरी बोल्या कै “हे गुरू, थे साची केवो।” क्यूंकै फेर ओर बात पूछण खातर बांगो काळजो काम कोनी करयो। फेर यीसू बानै पूछयो कै, “मसी नै दाऊद गी उळाद क्यामी केवै? क्यूंकै दाऊद भजन संहिता में लिखै कै प्रभु मेरै प्रभु नै केयो कै मेरै बराबर सजै पासै बेठ, जद तांई मैं तेरै दुसमणां नै तेरै बस में ना कर दैयूं । पण जद दाऊद खुद मसी नै प्रभु केवै तो मसी दाऊद गी संतान किंया हो सकै?” जद ऐ बातां लोग सुणन लागरया जद यीसू आपगै चेला नै केयो कै, सासतरियां ऊं चोकस रेईयो झिका धरम गै नाम ऊं लम्बा लम्बा चोळा पेरे फिरै अर झिका नै बजारां में लोगां ऊं निमस्कार करवाणी अर सतसंग घर में झिका नै ऊंची जिग्यां में बेठणो आच्छो लागै। बे किनैई कोनी बख्सै अर विधवा लुगाईयां गा घर ई लूट'गे खा'ज्यै। अर लोग दिखाई खातर भोत देर तांई पराथना करता रेवै। पण परमेसर आनै भोत मोटी सजा देवैगो। फेर यीसू धनवान लोगां कानी देख्यो झिका दान पातर में आपगो दान घालण लागरया। बठै ई बां एक गरीब विधवा लुगाई नै दो छोटा सिका घालतां देखी। जद बण केयो, “मैं थानै साची केऊं कै अण विधवा लुगाई परमेसर गी नजरा में दूसरा लोगां ऊं जादा दान दियो है। क्यूंकै सारा लोगां आपगै बोळै धन मू थोड़ो सो दान करयो है पण अण गरीब विधवा लुगाई बिंगै कनै झिको कीं हो बो दे दियो।” जद केई लोग आपसरी में बात करा कै मिन्दर कितै सुणै पथरां अर दान करेड़ी चिजाऊं सजायो है। जद यीसू बानै केयो, “झिकै मिन्दर नै आज थे देखण लागरया हो, कदी हिस्यो टेम आसी ईं मिन्दर नै ढा देसी।” जद बां यीसू नै पूछयो, “हे गुरू, बो दिन कद आवैगो अर बिं दिन गी के निसानी हो'सी।” यीसू बानै केयो, चोकस ऊं रेईयो अर किंगी बात में आ'गे भटक ना जाईयो, क्यूंकै भोत लोग मेरै बरगा बणगे थारै कनै आवैगा अर केसी मैं मसी हूं अर दुनियां गै अंत गो टेम आ'ग्यो है। पण थे बांगै लारै ना लागज्याईयो। फेर केयो, “थे लड़ाई अर दंगा होण'गी बात सुणगे घबराईयो ना। क्यूंकै ऐ बातां तो पेलां होवैगी पण बिं टेम अंत कोनी होवैगो।” फेर बण केयो कै हरेक जाती अर हरेक देस एक दूसरै गै बिरोध में खड़या होज्यैगा। अर मोटा मोटा भूकंप आवैगा, जिग्यां-जिग्यां काळ पड़ैगा अर हरेक जिग्यां महामारी पड़ैगी। अर आकास गूंजण लागज्यैगो अर मोटा-मोटा निसान आकास में दिखण लागज्यैगा। पण ऐ बातां होण ऊं पेलां लोग थानै मेरा चेला होण खातर पकड़ैगा, दुख देवैगा अर पंचायत में सूंपगे जेळ में बंद करवा देवैगा अर मेरै नाम गै कारण थानै राजा गै सांमणै पेस करैगा। पण बो टेम मेरै बारै में बताण गो मोको होवैगो। जद थे ईं बात गी चिंता ना करियो कै आपणै पर लगाएड़ै दोसा गो जबाब के देवांगा? क्यूंकै बिं टेम मैं थानै हिस्यो ग्यान अर समझ दैयूंगा कै थारा बिरोधी थारी बात गो जबाब कोनी दे सकैगा। अर थारा मां-बाप, भाई, बन्धु झिका मेरै उपर बिस्वास कोनी करै बे थानै पकड़ुवावैगा अर थारै मू केईयां नै मरवा दैयगा। थारो मेरै पर बिस्वास होण गै कारण सारा लोग थारूं बैर राखण लागज्यैगा। पण थारो बाळ ई बांको कोनी होवैगो। थारी धीरजाई ही थारै प्राण नै बचागे राखैगी। जद थे यरुसलेम नै सेना ऊं घिरेड़ो देखल्यो तो समझ लेईयो कै सैहर उजड़णगो टेम आ'ग्यो। बिं टेम झिका यहुदियां नगर में रेण आळा लोग प्हाड़ा पर भाज जाईयो अर झिका यरुसलेम नगर में रेवै बे सारा बारै निकळ जाईयो अर झिका बारलै पासै रेवै बे नगर गै मा सरण लेण खातर ना जाईयो। क्यूंकै बो दिन पवितर सासतर में लिखेड़ी बातां पूरी होण गै कारण बठै गै लोगां नै सजा देण गो होवैगो। पण तेरै पर इतो बुरो हो'सी कै बां लुगाईयां पर झिकी बिं टेम गरभवती हो'सी या फेर नानै टाबरां नै दूध प्यांती हो'सी, बां लुगाइंया ऊं भाजीजणो कोनी क्यूंकै बिं टेम बठै भोत क्ळेस अर परमेसर गी रीस लोगां पर हो'सी। बे तलवारां ऊं बाडिज्यैगा अर झिका बच जिसी बानै बंदी बणागे दूसरा देसां में लेजीसी अर यरुसलेम पर राज करण आळा गेर यहुदी लोग बानै कुचळता रेवैगा जद ताईं बांगो टेम पूरो कोनी होज्यै'गो। जद मिनख गो बेटो दुसर आसी बिं टेम सूरज, अर चांद अर तारा में डरावणा निसान दिखैगा अर सारी धरती गै लोगां पर भोत क्ळेस आसी। क्यूंकै बे समुंदर गै ऊथळ-पुथळ होण ऊं भोत डरज्यैगा। संसार पर आण आळै क्ळेस ऊं डरतां लोगां गो जी निकळज्यैगो क्यूंकै आकास गी सकतियां हलाइजैगी। जद बे मिनख गै बेटै नै बिंगी सकती अर मेंमा गै सागै बादळा ऊं आंता देखैगा। जद ऐ सगळी बातां होण लागै तो सीधा खड़या होगे आपगो सिर उपर चकियो क्यूंकै बिं टेम थारो छुटकारो नेडै़ हो'सी। फेर बण बानै एक मिसाल देगे समझाया कै अंजीर गै दरखत नै अर दूसरा दरखतां नै देखो, जिंयाई आंगै नूंआ पता या कूंपळ निकळण लागज्यै तो थानै ठा लागज्यै कै अब गरमी गी रूत आण आळी है। ईं तरियां बे सारी बातां थानै होंती दिखण लागज्यै तो समझ लेईयो परमेसर गो राज आण आळो है। मैं थानै साची-साची केऊं कै जद तांई ऐ बातां पूरी ना हो'ज्यै बिं टेम तांई ईं पीढी गै लोगां गो अंत कोनी होवै। आकास अर धरती तो टळ जिसी पण मेरी बातां कदैई टळै कोनी। ईंखातर सावधान रेवो कठैई इंया ना होवै कै थारो मन लापरवाई अर नसै में अर ईं जीवन गी चिंतावां ऊं उदास हो'ज्यै अर बो दिन फांसी गी तरियां चाणचकै ई थारै गळै में घलज्यै। क्यूंकै बो दिन सारी धरती पर रेण आळा लोगां पर एकैदम ई आसी। ईंखातर जागता रेवो अर हर टेम पराथना करता रेवो। जिंऊ आण आळै टेम गै क्ळेस ऊं बचण खातर अर मिनख गै बेटै गै सांमणै खड़या होण गै लायक बण सको। बो दिन में मिन्दर में परबचन करतो अर रात नै बारै जा'गे जेतुन प्हाड़ पर रेंतो हो। अर दिन गै पेली सारा लोग परबचन सुणन खातर मिन्दर में बांगै कनै आंता हा। बिना खमीर गी रोटी गो त्यूंहार आण आळो हो, झिकै नै फसह बी केवै। मुख्य याजकां अर धरम सासतरियां यीसू नै पकड़ागे मराण गी जुगती बणाण में मगन हा पण बे लोगां ऊं डरा। बारा चेला माऊं एक चेलो यहूदा इस्करियोति हो जद बिमै सैतान बड़ग्यो। बण मुख्य याजक अर मिन्दर गै सिपाईयां गै अधिकारियां गै कनै जा'गे बात करी कै यीसू नै किसै तरिकै ऊं थारै हात पकड़ाऊं। बे सारा सुणगे भोत राजी होया अर बिनै रिपिया देण गो वायदो करयो। फेर यहूदा राजी होगे मोको देखण लागग्यो कै कद ओ एकलो होवै अर मैं कद इनै पकड़ाऊं। जद बिना खमीर गी रोटी गो त्यूंहार आ'ग्यो, झिकै में यहुदी लोगां नै मिन्दर में मेमणियै गी बली चढाणी जरूरी ही। जद यीसू पतरस अर यूहना नै कनै बुला'गे केयो कै, “जा'गे आपणै खाण खातर फसह गो भोजन तैयार करो” चेला बानै पूछयो, “थे कठै चावो कै म्हे जा'गे तैयार करां” बण बानै केयो, “देखो, थानै गाम में बड़तांई एक आदमी मिलैगो झिकै गै सिर पर पाणी गो घड़ो हो'सी, झिकै घर में बो जावै थे बिंगै लारै ई जाईयो। अर जा'गे घर गै धणि नै केईयो, ‘गुरू तेरूं पूछयो है कै बो कमरो किस्यो है झिकै मैं आपगै चेला गै सागै फसह गो भोजन खाऊं?’ बो थानै एक सज्यो सजायो मोटो चुबारो दिखासी बिमै जा'गे थे फसह गो भोजन तैयार करियो।” जद बे बठै गेया तो बिंयाई मिल्यो जिंया यीसू बानै केयो अर बां फसह गो भोजन तैयार करयो। जद टेम आयो तो बो आपगै चेला गै सागै भोजन करण बेठयो। जद बण चेला नै केयो, “मेरी भोत मोटी इच्छा ही कै दुख भोगण ऊं पेलां मैं ओ फसह गो भोजन थारै सागै खाऊं। क्यूंकै मैं थानै केऊं कै जद तांई परमेसर गै राज में फसह गो भोजन गो असली मतलब पूरो ना हो'ज्यै मैं इनै दुबारै कोनी खाऊंगा।” फेर बण अंगूरां गो कटोरो लेगे परमेसर गो धन्यवाद करयो अर केयो, “इनै लेगे आपसरी में बांटगे पील्यो क्यूंकै मैं थानै केऊं कै जद तांई परमेसर गो राज ना आवै जद तांई मैं दाख गो रस अबूं लेगे कदी कोनी पीऊं” फेर बण रोटी ली अर धन्यवाद कर'गे तोड़ी अर बानै देगे केयो, “आ मेरी देह है झिकी थारै खातर देऊं हूं, मेरी यादगीरी में इंयाई करे करियो।” ईं रीति ऊं रोटी गै बाद में दूसरो कटोरो लेगे बानै दियो अर केयो, “ओ कटोरो मेरै खून गै रूप में है झिको थारै खातर बहाइज्यैगो ओ एक नूंअ वायदै गो निसान है। पण देखो, मनै धोखै ऊं पकड़ाण आळै गो हात ईं मेज पर है। क्यूंकै मिनख गै बेटै गै सागै झिको कीं होणो है बो तो होगे रेसी पण थारै उपर भोत बुरो होवैगो बिं पर झिको बिनै पकड़ासी।” आ बात सुणगे बे आपसरी में पूछताछ करण लागग्या कै आपणै माऊं हिस्यो कुण है, झिको ओ काम करैगो। फेर चेला में ओ बाद विवाद बी होयो कै म्हारै माऊं कुण मोटो मानिजै। यीसू बानै केयो, “दूसरी जातियां गा राजा झिकां पर राज करै अर बां पर हक राखै बे बांगा रूखाळा कुहावै। पण थे भिस्या ना बणजाइयो, पण झिको थारै में मोटो है बो छोटै गै बरगो बणै अर झिको प्रधान है बो दास गै बरगो बणज्यै। क्यूंकै मोटो कुण है, झिको रोटी खावै बो या झिको खुआवै? मोटो बो कोनी कै झिको खावै। पण मैं थारै बिचाळै दास गै बरगो हूं। थे बे हो झिका मेरै हरेक दुख तकलीफ में सागै रेया। अर जिस्यो मेरै पिता मनै राज दियो है बिस्यो ही मैं बिं थानै राज देऊं। मेरै राज में थे मेरी मेज पर खाओगा अर पिओगा अर सिंघासन पर बेठगे इसराएल गै बारा गोतरां गो न्याय करोगा।” फेर यीसू बोल्यो, “समौन, हे समौन। जिंया किसान कणक नै साफ करै है इंया ही थारै सारा गी परीक्सा लेण गी सैतान आग्या परमेसर ऊं मांगी है। पण मैं तेरै खातर पराथना करी है कै तेरो बिस्वास ना जांतो रेवै अर जद तूं पाछो आवै तो आं भाईयां गो ई बिस्वास तकड़ो करी।” समौन केयो, “हे प्रभु, मैं थारै सागै जेळ तो के मरण नै बी तैयार हूं।” बण केयो, “हे पतरस, आज कुकड़ गै बांग देण ऊं पेलां तूं मेरो तीन बार ओ केगे इनकार करैगो कै मैं इनै कोनी जाणूं।” फेर यीसू बानै केयो, “जद मैं थानै बिना बटुआ, झोळी अर बुंटा गै घाल्या तो थानै कोई चीज गी कमी होई ही के?” बां जबाब दियो, “कोई चीज गी कमी कोनी होई” बण बानै केयो, “पण अब झिकै गै कनै बटुओ अर झोळी है बो बानै लेल्यै अर झिकै गै कनै तलवार ना है बो आपगा कपड़ा बेचगे मोल लेल्यै। क्यूंकै मैं थानै केऊं सासतर में ओ लिखेड़ो है कै, ‘बो अपराधियां गै सागै गिणीज्यो,’ आ बात मेरै में होणी जरूरी है क्यूंकै मेरै बारै में लिखेड़ी बातां पूरी होण पर है।” चेला केयो, “हे प्रभु, देख,” म्हारै कनै दो तलवारां है। बण केयो, “रेण दैयो बस भोत हो'गी, थारै बात समझ में तो आवै कोनी।” जद बे बारै निकळगे रोजाना गी तरियां जेतुन प्हाड़ पर गेया अर चेला लारै लारै चाल पड़या। बिं जिग्यां पोंचगे बण चेला नै केयो, “पराथना करो जिंऊ ब्यादि में ना पड़ो” अर यीसू बाऊं थोड़ी सी दूर जा'गे अर घुटना टेकगे पराथना करण लागग्या। हे पिता, “जे थे चावो तो ईं कटोरै नै मेरै कनूं हटा सको, तो बी मेरी नई तेरी ही इच्छा पूरी होवै।” जद बानै एक दूत दिख्यो झिकै बानै सामरथ दी। बो घोर संकट में ब्याकुल होगे ओर बी जादा हिरदय ऊं पराथना करण लागग्या अर बांगो पसीनो खून गै टपका गी तरियां जमीन पर गिरण लागरयो। जद बो पराथना कर'गे खड़यो होयो अर चेला गै कनै आ'गे देख्यो तो बे उदासी गै मारेड़ा सूत्या पड़या। अर बानै केयो, “सोवो क्यामी हो? ऊठज्यो अर पराथना करो कै ब्यादि में ना पड़ो।” बो केण लागरयो कै लोगां गी एक भीड़ आई अर सारा ऊं आगै आगै बांगो बारा चेला माऊं एक चेलो यहूदा आण लागरयो बो बानै नै चूमण खातर कनै आयो। जद यीसू बिनै केयो, “हे यहूदा, तूं चूमो लेगे मिनख गै बेटै नै पकड़ासी के?” बिंगै चेला देख्यो कै के होण आळो है जद बां केयो, “हे प्रभु, म्हे तलवार चलावां के?” जद एक चेलै यीसू गै बोलण ऊं पेलां ई मुख्य याजक गै दास गो तलवार ऊं सजो कान उड़ा दियो। ईं पर यीसू केयो, “बस भोत हो'गी कोई हद'ई होवै।” अर बिंगो कान हात लगागे पाछो जोड़ दियो। बां मुख्य याजकां अर मिन्दर गै पेरेदारां गै अधिकारियां नै अर पंचायती नेता झिका बिंगै उपर चढण लागरया बानै केयो, “थे मनै डाकू समझगे तलवारां अर लठ लेगे आया हो के? जद मैं रोज मिन्दर में थारै सागै रेंवतो जद तो थे मेरै हात ई कोनी लगायो पण ओ टेम थारो है झिको सैतान गो राज है अर अंधेरै गो बासो है।” फेर बे बिनै पकड़गे मुख्य याजक गै घरे लिआया अर पतरस दूर दूर ई बांगै लारै-लारै आण लागरयो। जद बे आंगणै में आग जगा गे सारा भेळा बेठयो तो पतरस बी बांगै बिचाळै जा बैठयो। जद बठै एक दासी आग गै चानणै में बिनै बेठयो देख्यो अर बिंगै कानी ताकगे केयो, “ओ ई बिंगै सागै हो” पण बो नटग्यो अर बोल्यो, “भेन, मैं तो बिनै कोनी जाणूं” थोड़ी सी देर बाद में बिनै कणै'ई ओर देख्यो अर केयो, “तूं बी तो बामूं'ईं है” पतरस फेर नटग्यो कै “मैं तो बामूं कोनी।” घंटै कै बाद में एक ओर आदमी जोर देगे केण लागग्यो कै “जरूर ओ बी तो बांगै सागै हो, क्यूंकै ओ गलीली है।” फेर बी बो नटग्यो अर केयो, “भाई जी मैं कोनी जाणूं, थे के केण लागरया हो।” बो बोलणई लागरयो इतनै कुकड़ बांग मार दी। जद प्रभु मुड़गे पतरस कानी देख्यो तो बिनै प्रभु गी बात याद आ'गी झिकी बण पेलां कैई ही कै, “आज कुकड़ गै बांग मारण ऊं पेलां तूं तीन बारी मनै पिछाणन ऊं नट ज्यैगो।” फेर पतरस बारै आ'गे फूट फूट'गे भोत ई रोयो। झिका आदमी यीसू नै पकड़ राख्यो बे मजाक उड़ा-उड़ा'गे कुटण लागग्या। अर बांगी आंख्या ढकगे पूछयो, “परमेसर गी बात बोल'गे बता कै तेरै कण मारी है?” बां ओर बी निंदा गी घणी बातां बांगै खिलाफ में कैई। जद दिन उग्यो तो लोगां गा बडेरां अर मुख्य याजकां अर सासतरियां भेळा होगे अर बानै आपगी पंचायती नेतावां गी सभा में बुला'गे पूछयो, “जे तूं मसी है तो म्हानै बता दे।” बण बानै केयो, “जे मैं थानै केऊंगा तो थे मानोगा कोनी, अर जे पूछूं तो जबाब कोनी देओगा। पण अबूं मिनख गो बेटो सरवसकतिमान परमेसर गै सजै पासै बेठयो रेवैगो।” ईं बात पर सारा केयो, “तो तूं परमेसर गो बेटो है के?” बण बानै केयो, “थे आप ई तो केवो, क्यूंकै मैं परमेसर गो बेटो हूं।” जद बां केयो, “अब म्हानै गुआई गी के लोड़ है, क्यूंकै म्हे खुद'ई इंगै मूं ऊं सुण लियो।” जद सगळी पंचायत बानै राजा पिलातुस कनै लेगी। बे बिं पर ओ दोस लगाण लागग्या कै ओ लोगां नै भड़कावै हो कै रोम गै महाराजा नै कर कोनी देणो। अर अपणै आपनै परमेसर गो बेटो केवै। अर अपणै आपनै मसी अर यहुदी लोगां गो राजा बतावै। जद राजा पिलातुस बिनै पूछयो, “तूं यहुदी लोगां गो राजा है के?” बण जबाब दियो, “तूं आप ई तो बताण लागरयो है।” जद राजा पिलातुस मुख्य याजकां नै केयो, मनै ईं आदमी में कोई दोस कोनी लागै। पण बे ओर जोर देगे केण लागग्या कै ओ गलील ऊं लेगे यरुसलेम तांई लोगां नै परबचन कर'गे भड़कावै है। ओ सुणगे पिलातुस पूछयो, “के ओ गलील गो रेण आळो है?” अर जद बिनै ठा लागग्यो कै बो राजा हेरोदेस गै इलाकै गो है तो बण यीसू नै हेरोदेस गै कनै घाल दियो। बिं टेम राजा हेरोदेस फसह गै त्यूंहार पर यरुसलेम में आयेड़ो। राजा हेरोदेस यीसू नै देखगे भोत खुस होयो क्यूंकै बण यीसू गै बारै भोत कीं सुण्यो। ईंखातर बो यीसू ऊं चमत्कार देखणो चावै हो। राजा बिंऊं भोत बातां पूछी। पण बण कीं जबाब कोनी दिओ। मुख्य याजकां अर सासतरियां बिं पर बडचड'गे दोस लगाण लागरया। जद राजा हेरोदेस आपगै सिपाईयां गै सागै रळगे बिंगी बेजती करी। अर बे सगळा मजाक उड़ाण लागग्या। अर बानै चिलकणा कपड़ा पिरा'गे पाछो राजा पिलातुस कनै घाल दियो। बिं दिन ऊं पिलातुस अर राजा हेरोदेस आपसरी में बेली बणग्या क्यूंकै पेलां बे एक दूसरै गा दुसमण हा। जद पिलातुस मुख्य याजकां, पंचायती नेतावां अर लोगां नै बुला'गे केयो कै, थे ईं आदमी नै झिकै जुल्म ऊं मेरै कनै ल्याया हो कै ओ लोगां नै भड़कावै पण मैं थारै सांमणै इंगी जांच करी है अर थे झिकी बात इंगै बारै में केवो बामूं एक ई बात साची कोनी निकळी। अर ना ई कोई बात इमै हेरोदेस देखी। झिकी ऊं इनै मोत गी सजा दे सकां। ईंखातर बण पाछो ई इनै मेरै कनै घाल दिओ। ईंखातर इंगै मैं कोड़ा मरवागे छोड़ दैयूं। (पिलातुस नै हर साल फसह गै त्यूंहार पर एक केदी छोड़णो जरूरी होंतो हो)। जद सारा जोर जोर ऊं रोळो मचाण लाग्या कै इंगो काम तमाम करो अर म्हारै खातर इंगी जिग्यां बरअबा केदी नै छोड़दैयो। बरअबा सैहर में दंगा अर हत्या गै जुल्म में जेळ में बंद हो। पण पिलातुस यीसू नै छोडण गी इच्छा ऊं लोगां नै ओर समझाया। पण सारा लोग रोळो मचाण लागग्या कै इनै करूस पर चढाओ, करूस पर चढाओ। पिलातुस तीसरी बारी बानै पूछयो, क्यूं अण हिस्यो के माड़ो काम करयो है? झिकै ऊं इनै मोत गी सजा सुणाऊं, क्यूंकै इमै हिसी कोई बात दिखै'ई कोनी। ईंखातर इनै मैं कोड़ा लगुवागे छोड़दैयूं। पण लोगां घर नै ई चक दियो कै इनै करूस पर चढाओ। अर पिलातुस नै बांगी बात मानणी पड़ी। अर आखिर में पिलातुस हुक्म दियो कै लोग केवै बिंयाई करयो जावै। अर दंगा अर हत्या करण आळै बरअबा झिकै गी लोग मांग करा बिनै छोड़ दियो अर यीसू नै बांगै केणै गै अनुसार करण खातर बानै सूंप दिओ। जद सिपाई यीसू नै लिजाण लागरया तो बठै समौन नाम गो कुरैन गो रेण आळो आदमी हो झिको गाम कानूं आण लागरयो। बिनै बां यीसू गो करूस चका दियो। अर बिनै यीसू गै लारै लारै ले चाल पड़या। जद लोगां गी भीड़ बांगै लारै चाल पड़ी अर बामै भोत सी लुगाईयां ही झिकी छाती कूट कूट'गे दुख करै ही। यीसू बां कानी मुड़गे देख्यो अर केयो, “हे यरुसलेम में रेण आळी बेटियो, मेरै खातर ना रोवो। पण अपणै आप अर आपगै टाबरां खातर रोवो। क्यूंकै सुणो, कदी बे दिन आसी जद लोग केसी, ‘धन्य है बे लुगाईयां झिकी बांझड़ी है अर बे कूख झिकी टाबर कोनी जन्म्या अर बे मांवां झिकिंया टाबरां नै दूध कोनी पियायो। बिं टेम बे लोग प्हाड़ां नै केसी कै म्हारै उपर गिरज्यो अर टिबां नै केसी म्हानै दबाल्यो। क्यूंकै लोग हरय भरय दरखत गै सागै इंया करै तो सूकै दरखतां नै कदी कोनी बकसैगा।’ थे सोचो, ‘ऐ लोग मेरै बरगै निरदोस आदमी सागै ई इंया करै तो ऐ दोसी आदमी सागै किंया करसी।’” अर दो आदमी झिका अपराधी हा बानै ई यीसू सागै करूस पर चढाण खातर लिजाण लागरया। अर बे खोपड़ी नाम गी जिग्यां पर आ ग्या अर बां दोनां आपराधियां गै सागै यीसू नै करूस पर लटका दियो। एक अपराधी बांगै सजै पासै अर दूसरो खबै पासै लटका दियो। जद यीसू बोल्यो, “हे पिता परमेसर, आनै माफ कर क्यूंकै ऐ लोग जाणै कोनी कै परमेसर गै बेटै गै सागै ऐ के करण लागरया है।” अर बां सिपाईयां परची गेरगे बिंगा कपड़ा आपसरी में पांती कर'गे बांट लिया। लोग खड़या खड़या देखा। अर यहुदी नेता बिंगी मजाक उड़ावा कै अण दूसरा नै तो घणाई बचाया पण जे ओ परमेसर गो चुणेड़ो है तो अपणै आपनै बचाल्यै। अर सिपाईयां बी बिंगै मूं में सिरको दे देगे बांगो मजाक उड़ावा। अर केण लाग्या। जे तूं यहुदी लोगां गो राजा है तो अपणै आपनै बचा ले। बां सिपाईयां एक तख्ती पर दोस पथर लिख्यो अर करूस पर टांग दियो कै “ओ यहुदियां गो राजा है।” झिका दो अपराधी बठै लटकाऐड़ा बामूं एक जणो बिंगी बेजती कर'गे केयो, “जे तूं मसी है तो म्हानै अर अपणै आपनै बचा ले।” ओ सुणगे दूसरै अपराधी बिनै ललकारयो कै, “तनै परमेसर ऊं डर कोनी लागै के? तनै'ई तो आ'ई सजा मिलण लागरी है। आपां नै तो आपणै करेडै़ गी सजा मिलण लागरी है, पण अण हिस्यो काम करयो ई कोनी झिकै ऊं आनै आ सजा मिलै।” जद बण केयो, “हे यीसू, जद थारो राज आवै तो मनै याद राखियो।” यीसू बिनै केयो, “मैं तनै साची केऊं, तूं मेरै सागै आज'ई सुरग में जावैगो।” जद सारै देस में दोफारै ऊं लेगे तीसरै पेर तांई अंधेरो छायो रेयो अर सूरज दिखणो बंद हो'ग्यो। अर मिन्दर गो पड़दो बिचाळूं पाटग्यो। अर यीसू जोर ऊं बोल्यो, “हे पिता परमेसर, मैं मेरी आत्मा थारै हात में सोपूं।” अर इंया केंतांई प्राण छोड़ दिया। जद एक सुबेदार ओ सारो कीं देखगे परमेसर गी बडाई करी। अर केण लागग्यो कै “ऐ सच्चा धरमी आदमी हा।” अर लोगां गी भीड़ झिकी बठै देखण खातर भेळी हो'री। ईं घटना नै देखगे सारा लोग रोंता अर छाती पिटतां बठूं उड़ग्या। पण यीसू गै जाण पिछाण आळा अर झिकी लुगाईयां बांगै सागै गलील प्रान्त ऊं आई। बे दूर खड़ी सारो कीं देखण लागरी। जद बठै युसुफ नाम गो एक आदमी आयेड़ो बो यहुदियां गी मोटी पंचायत माऊं ईं हो पण धरमी अर सजन आदमी हो। अर बो यहुदियां परदेस गो अरिमितिया नगर गो रेण आळो हो। अर परमेसर गै राज नै अडिकै हो। पण बो मोटी पंचायत गै फेंसलै अर काम ऊं नाराज हो। अर बण पिलातुस गै कनै जा'गे यीसू गी ल्हास मांगी। अर पिलातुस ल्हास देण ऊं ना कोनी करी बाद में बिं ल्हास नै उतारगे मलमल गै कपड़ा में पळेट दी। अर एक प्हाड़ में बणायेड़ी नूंई कबर में लिजागे रख दी। पेलां बिं कबर में ओर किंगी ल्हास कोनी रखी ही। अर बो दिन सब्त गी तैयारी गो दिन हो क्यूंकै सूरज गै डूबतांई सब्त चालू होणाळो हो। बे लुगाईयां झिकी बिंगै सागै गलील परदेस ऊं आई बांगै लारै-लारै देखण गेई कै ल्हास नै किसी रीति ऊं रखी है। जद बे पाछी आ'गे बिंगी ल्हास पर लेप करण खातर सुरम आळी चिजां अर सेंट तैयार करी। अर सब्त गै दिन रीति गै हिसाब ऊं आं लुगाईयां आराम करयो। फेर बे लुगाईयां दीतवार गै दिन झांझरकैई सुरम आळी चिजां झिकी बां तैयार करी बानै लेगे कबर पर आई। जद बां कबर ऊं पथर नै पासै होयड़ो देख्यो अर कबर गो मूं खुलो पड़यो देख्यो। जद बां कबर में देख्यो तो यीसू गी ल्हास बठै कोनी ही। बे ओ देखगे हेरान हो'गी तो दो सुरगदूत चमकता कपड़ा पेरेड़ा बांगै कनै आ'गे खड़ग्या। अर बे बानै देखगे डर गी आपगो सिर नीचो कर'गे खड़ी रेई। जद बां सुरगदूतां बानै केयो, “थे जींवतै नै मरेड़ा में क्यामी ढूंढो हो? बे अठै कोनी क्यूंकै बो जींवतो हो'ग्यो। थे याद करो बा बात झिकी थानै बण गलील में बताई ही कै एक दिन ‘मिनख गो बेटो’ पापी लोगां गै हात ऊं पकड़ाईज्यैगो करूस पर चढायो जावैगो अर तीसरै दिन पाछो जींवंतो होज्यै'गो।” जद बिंगी बात बांनै याद आई। अर बां कबर पर ऊं पाछी आ'गे बिंगै ग्यारा चेला अर दूसरै लोगां नै सारी बात बताई। आ बात चेला नै बताण में मरियम मगदलीनी, योअन्ना अर याकूब गी मां मरियम अर केई लुगाईयां ही। पण बांगी बात बानै मजाक सी लागै ही अर बां भरोसो कोनी करयो। पण पतरस कबर कानी उठगे भाज्यो अर जा'गे देख्यो तो बठै यीसू गा मलमल गा कपड़ा पड़या। ओ देखगे बो हेरान हो'ग्यो। अर बठूं पाछो आ'ग्यो। बिं दिन'ई बांगै चेला मू कोई दो जणा इम्माऊस नाम गै गाम में जाण लागरया। बो गाम यरुसलेम ऊं ग्यारा किलोमीटर दूर हो। बे यीसू गै बारै में होयड़ी बातां आपसरी में करता जाण लागरया। जद यीसू ई बांगै सागै रळग्या। पण परमेसर बां दोनां गी नजर बंद कर दी। झिकै ऊं बे बिनै पिछाण कोनी सक्या। यीसू बानै पूछयो, “थे किंगै बारै में बातां करण लागरया हो।” जद बे दोनूं घटना नै याद कर'गे उदास हो'ग्या अर रूकग्या। ओ सुणगे क्लियोपास नाम गो आदमी बांऊ बोल्यो कै तूं एक ई यरुसलेम में परदेसी है के झिकै नै कीं ठा कोनी कै आं दिनां में बठै के के होयो? यीसू बानै पूछयो किसी बातां? फेर बां बतायो नासरत आळै यीसू गै बारै में। बो परमेसर अर लोगां गी नजर में हिस्यो परमेसर गी बात बोलण आळो हो झिको चमत्कार करणै में अर परमेसर गो बचन सुणाण में भोत सकतीसाली हो। अर म्हारै मुख्य याजकां अर पंचायती नेतावां बिनै पकड़ागे मोत गी सजा दिरवा दी अर करूस पर चढा दियो। म्हानै भोत मोटी आस ही कै बो इसराएल नै छुटकरो देसी। पण ईं बात गै बदळै में ईं घटना नै आज तीसरो दिन हो'ग्यो। अर केई लुगाईयां म्हानै चकर में घाल दिया झिकी झांझरकै सी कबर पर गेई। अर आ'गे बतायो कै बठै बिंगी ल्हास कोनी अर सुरगदूतां म्हानै दरसण देगे केयो है कै बे जींवता हो'ग्या। जद म्हारा केई साथी कबर पर जा'गे देख्यो तो बां लुगाईयां गी बात साची निकळी। पण यीसू नै देख्यो कोनी। जद यीसू बानै केयो, “हे मूरखो, अर परमेसर गी बात बोलण आळा गी बातां पर कम बिस्वास करण आळो। ओ जरूरी कोनी हो के मसी दुनियां में दुख भोगै अर घणै आदर गै सागै सुरग में जावै।” जद यीसू बानै मूसा ऊं लेगे अर सारा परमेसर गी बात बोलण आळा ऊं सरू कर'गे सारै पवितर सासतर गै माऊं आपगै बारै में लिखेड़ी बातां गो मतलब समझा दियो। इतैन बे बिं गाम में पूगग्या झिकै में बां जाणो हो। पण यीसू ईं तरियां चाल्या मानो बे आ'गै जाणो चांवंता होवै। जद बां बिनै रोक लियो कै अब अंधेरो भोत पड़ग्यो आज म्हारै कनैई ठेरज्या। अर बे बांगै सागै ठेरग्या। जद बो बांगै सागै रोटी जीमण बेठयो तो बण हात में रोटी लेगे परमेसर गो धन्यवाद करयो अर तोड़गे बानै देण लागग्या जद बांगी आंख खुलगी अर बां बिनै पिछाण लियो कै ऐ तो प्रभु यीसू मसी है। अर बे बठूं गायब हो'ग्या। जद बे दोनूं आपसरी में बतळाण लागग्या कै जद बे आपणै सागै बात करै हा अर पवितर सासतर गो मतलब समझावै हा तो आपणै मन में भोत खुसी कोनी होई के? बे दोनूं बिं घड़ी खड़या होगे पाछा यरुसलेम आग्या अर बां ग्यारा चेला नै अर बिंगै साथिया नै बठै कठैई बेठया देख्या। अर बे आपसरी में केवा, “प्रभु यीसू साची जींवंता हो'ग्या अर बे समौन नै दिख्या है।” जद बां आपगै सागै रा में होएड़ी सारी बात बानै बता दी अर ओ ई बतायो म्हे बानै रोटी तोड़तां टेम किंया पिछाण्यो। बे ऐ बातां करण ई लागरया कै यीसू खुद बांगै बिचाळै आ'ग्यो। अर बानै केयो, “थानै सांती मिलै।” पण बे देखगे डरग्या अर घबराग्या अर समझयो कै आपां किसैई भूत नै देखण लागरया हां। यीसू बानै केयो, “क्यामी घबराओ?” अर “क्यामी मन में बेम करण लागरया हो? मैं यीसू ई हूं। ना मानो तो मेरा हात पग देखल्यो। मेरै हात लगागे देखल्यो क्यूंकै भूत गै तो हाड मांस कोनी होवै। झिको मेरै में थे देखो हो।” ओ केगे बण आपगै हातां पगां में कीलां लागणै गी निसानी दिखाई। जद खुसी गै मारै बांनै बिस्वास कोनी होयो अर अचंभो करै हा। जद बण बानै पूछयो कै थारै कनै रोटी है के? जद बां बिनै मछली गो भूंदेड़ो टुकड़ो दियो। अर बण बिं टुकडै़ नै लेगे बांगै सारा गै सांमणै खायो। फेर यीसू बानै केयो, “ऐ बातां मेरी बे है झिकी मैं थानै सागै रेंती बारी थानै बताई ही जिती बातां मूसा गै नेम विधान में अर परमेसर गी बात बोलण आळा अर भजन संहिता गी किताब में मेरै बारै में लिखेड़ी बे सारी पूरी होणी जरूरी है।” जद बण पवितर सासतर समझण खातर बांगी बुद्धी खोल दी, अर बानै केयो, “इंया लिखेड़ो है कै मसी दुख भोगैगो, अर तीसरै दिन मरेड़ा माऊं पाछो जींवंतो हो जासी, अर यरुसलेम ऊं लेगे सगळी जातियां में बिंगै नाम में ओ परचार करयो जावैगो कै झिका मन बदळ गे माफी मांगैगा बांगा पापां नै परमेसर माफ करैगो। थे आ सगळी बातां गा गुवा हो। झिकी थे देखी है अर सुणी है। झिकी पवितर आत्मा देण गो वायदो मेरै पिता परमेसर थारूं करयो है बिनै भोत बेगो थारै उपर उतारूंगा अर जद तांई पवितर आत्मा आ'गे थानै सामरथ ऊं ना भरै जद तांई थे ईं गाम में ई रेईयो।” अर केई दिनां बाद यीसू बानै यरुसलेम नगर ऊं बारै बेतनियाह नगर तांई लेग्या, अर आपगा हात चक'गे बानै आसिस दी। आसिस देंता गेया अर बांऊं न्यारा होंता गेया अर बिनै सुरग में जांता नै सगळाई देख्यो। जद सगळा लोग बिनै झुकगे परणाम करयो अर भोत आनंद करता पाछा यरुसलेम आग्या, अर बे रोज मिन्दर में जा'गे परमेसर गी स्तुति करता हा। संसार बणण ऊं पेलां बचन हो। बचन परमेसर हो, अर बो बचन परमेसर गै सागै हो। बिं बचन गै द्वारा परमेसर संसार गो सारो कीं बणायो। संसार गी कोई बी चीज बिंगै बिना कोनी बणी। बिमै सारा नै जीवन देण आळो जीवन हो झिको परमेसर गी सचाई नै एक जोती गी तरियां लोगां गै बिचाळै परगट करै है। जद ईं संसार गा लोग अन्धेरै में हा तो बांगै उपर एक जोती चमकी। पण लोगां बिं जोती नै आपगै उपर चमकण कोनी दी। परमेसर गो भेजेड़ो एक आदमी आयो झिकै गो नाम यूहना हो। अर बो जोती गै बारै में लोगां नै बताण खातर आयो। कै बिंगी सुण गे सारा बिं जोती पर बिस्वास राखै। बो आप जोती कोनी हो पण बो तो लोगां नै जोती गी गवाई देण खातर आयो हो। बा सच्ची जोती झिकी हर एक आदमी पर परमेसर गै सच्च नै परगट करै है बा जगत में आण आळी ही। बो ईं संसार में ई हो अर ओ संसार बिंगै द्वारा पैदा होयो पण संसार बिनै कोनी पिछाण्यो। बो आपगै लोगां में आयो। पण आपगै लोगां बिनै स्वीकार कोनी करयो। पण कीं लोगां बिनै स्वीकार करयो अर बिं पर बिस्वास राख्यो, ईंखातर बण बानै परमेसर गी उळाद होण गो अधिकार दियो। अर जिंया माणस गै पीढी ऊं अर माणस गी इच्छा ऊं अर आदमी लुगाई गै संबन्ध ऊं उळाद पैदा होवै। अर बो बचन माणस गो रूप लेगे पैदा होयो अर आपणै बिचाळै रेयो। बो कितो म्हान है। ओ म्हे देख्यो है। अर बो ई परमेसर गो एकलोतो बेटो है, ईंखातर परमेसर बिनै बडाई दी है। बिंगी किरपा सदां आपणै उपर रेवै अर परमेसर गो साच आपणै पर परगट होयो है। यूहना बिंगी गवाई दी अर पुकार गे केयो, ओ बो ई है, झिकै गै बारै में मैं केयो हो, बो झिको मेरै बाद आण आळो है, मेरै ऊं म्हान है क्यूंकै बो मेरूं पेलां आयो हो। बिंगी किरपा सदां आपणै उपर भरपूर है ईंखातर आपां नै किरपा पर किरपा मिलै है ओ सच्च है कै परमेसर मूसा गै द्वारा आपगो नेम दियो है, यीसू मसी गै द्वारा बण आपणै उपर किरपा करी अर आपगै बारै में सच्चाई परगट करी। कणैई परमेसर नै कदैई कोनी देख्यो पण बांगो एकलोतो बेटो झिको पिता गै सागै गैरो संबन्ध राखै है, बिनै ई लोगां गै बिचाळै बण परगट करयो है। एक दिन यरुसलेम नगर गै कीं यहुदियां गा अधिकारियां यूहना बतिस्मो देण आळै गै बारै में जाणकारी लेण खातर कीं याजकां अर मिन्दर में सेवा में मदद करण आळै लेवियां नै बिंगै कनै भेज्या। बां जा'गे बिनै पूछयो, “तूं कुण है?” जद यूहना बानै उतर दियो अर बानै सारी बातां सच्च ई बता दी कै “मैं मुकतीदाता मसी कोनी हूं।” जद बां बिनै पूछ्यो तो फेर तूं कुण है, तूं परमेसर गी बात बताण आळै एलिय्याह है के या परमेसर झिकै परमेसर गी बात बताण आळै नै घालण गो वायदो करयो हो। तूं बो है के? जद बण केयो कै मैं आं दोनां मू कोई कोनी। फेर बां बिनै पूछयो तो, तूं कुण है? तूं आपगै बारै में बता कै झिका म्हानै भेज्या है बानै तेरै बारै में बता सकां। जिंया यसयाह परमेसर गी बात बताण आळै केयो बिंयाई यूहना केयो कै मैं बन उजाड़ में ऊंची आवाज में हेलो मारण आळो हूं कै प्रभु गै खातर रा सीधो करो। आं लोगां नै फरीसियां गी ओर ऊं भेजेड़ा हा। बां बिनै पूछयो जे थे ना मसी हो, ना एलिय्याह हो, ना परमेसर गी बात बताण आळा हो तो लोगां नै बतिस्मो किंया देवो हो। यूहना बानै उतर दियो, मैं तो सिरफ पाणी ऊं बतिस्मो देऊं हूं पण थारै बिचाळै एक आदमी खड़यो है बो कुण है ओ थे कोनी जाणो हो। ओ बो ई है झिको मेरै बाद में आण आळो है। मैं बिंगो दास बणगे बिंगै बूटां गो फितो खोलण गै लाइक कोनी हूं। ऐ सारी बाता बैतनिय्याह नाम गै एक गाम में होई। ओ सैहर यरदन नदी गै दिखणादै पासै हो जठै यूहना लोगां नै बतिस्मो देण लागरयो हो। दूसरै दिन यूहना यीसू नै आपगै कनै आवंता देखगे केयो, ध्यान ऊं देखो, परमेसर बिनै एक मेमणियां गी तरियां भेज्यो है, झिको आपगा प्राण बलिदान कर'गे संसार गै सारै लोगां नै बांगै पापां ऊं मुकती दिरावैगो। ओ बो ई है झिकै गै बारै में मैं बतायो हो। एक आदमी मेरै बाद में आण आळो है झिको मेरूं म्हान है अर झिको मेरूं पेलां मोजूद है। अर मैं कोनी जाणै हो कै बो परमेसर गो भेजेड़ो मसी है पण अब मैं बिनै पिछाण लियो अर लोगां नै पाणी ऊं बतिस्मो देण खातर आग्यो हूं। ईंखातर कै इसराएल गा सारा लोग बिनै पिछाण ल्यै। अर यूहना फेर गवाई दी कै यीसू गै बारै में बतायो है कै, पेलां मैं परमेसर गै भेजेड़ै मसी नै पिछाण्यो कोनी हो, जद मनै परमेसर पाणी ऊं बतिस्मो देण खातर भेज्यो, जद मनै केयो हो कै झिकै पर पवितर आत्मा उतरती अर ठेरती देखैगो बो ई लोगां नै पवितर आत्मा ऊं बतिस्मो देण आळो है। अर मैं बिनै बतिस्मो दियो तो देख्यो कै आकास ऊं पवितर आत्मा कबूतर गै तरियां उतरी अर बिंगै उपर ठेर गी। अर मैं देख्यो अर गवाई देऊं हूं कै ओ ई परमेसर गो बेटो है। दूसरै दिन फेर यूहना अर बिंगा चेला माऊं दो जणा बठै खड़या हा। जद बण यीसू नै आपगै कनूं जावंतां देख्यो अर बण केयो देखो परमेसर गो मेमणियो। जद बां दोनां बिनै ओ केवंता सुण्यो तो बे यीसू गै लारै चाल पड़या। जद यीसू मुड़गे देख्यो तो बानै आपगै लारै आवंता देख्यो अर बानै पूछयो थानै के चईयै। बां बिनै केयो, “हे गुरूजी थे कठै रेवो?” यीसू बानै उतर दियो, “आओ अर देखो,” जद बां जा'गे बिंगै रेण गी जिग्यां देखी अर बिं दिन बिंगै सागै रेया। क्यूंकै लगभग आथण गा चार बज ग्या हा। झिका दोना यूहना गी बात सुणी ही अर यीसू गै लारै हो'ग्या हा। बामै एक समौन पतरस गो छोटो भाई अन्द्रियास हो। पेलां बण आपगै मोटै भाई समौन ऊं मिलगे बिनै केयो म्हानै मुकतीदाता मसी मिलग्यो। अन्द्रियास पतरस नै यीसू कनै लेगे आयो। यीसू बिनै देख्यो अर केयो, “हे पतरस तूं यूहना गो बेटो समौन है। पण आज ऊं मैं तेरो नाम कैफा रख दियो है।” दूसरै दिन यीसू गलील परदेस जाण गो फेंसलो करयो अर फिलिप्पुस ऊं मिलगे केयो मेरै लारै होले। जद फिलिप्पुस बिंगै लारै चाल पड़यो। अन्द्रियास अर पतरस गी तरियां फिलिप्पुस बी बेतसैदा सैहर गो रेण आळा हो। बिंगै बाद फिलिप्पुस जा'गे नतनएल ऊं मिल्यो अर बिनै केयो झिकै गै बारै में मूसा गै नेम गी किताब में लिखेड़ो है अर परमेसर गी बात बताण आळा बी बांगी किताब में लिख्यो है बो म्हानै मिलग्यो। बो नासरत सैहर गो रेण आळो युसुफ गो बेटो यीसू है। नतनएल बिनै केयो कै नासरत ऊं कोई मसी कोनी आ सकै। फिलिप्पुस बिनै केयो तूं जा'गे देख ले। यीसू नतनएल नै आपगै कनै आवंता देख्यो अर बिंगै बारै में केयो ओ सच्चो इसराएली है झिकै में कोई खोट कोनी है। नतनएल बिनै केयो, “तूं मनै किंया जाणै है?” यीसू बिनै केयो, “बिंऊं पेलां कै फिलिप्पुस तनै बुलायो हो, मैं देख्यो कै तू अंजीर गै दरखत गै नीचे हो।” नतनएल बिनै उतर दियो कै हे गुरूजी, तूं परमेसर गो बेटो है, तूं इसराएल गो महाराजा है। इंगै जबाब में यीसू केयो तूं ईंखातर बिस्वास करै है कै मैं तनै केयो कै मैं तनै अंजीर गै दरखत गै नीचै देख्यो पण तूं इंयूं ई मोटा मोटा काम होवंता देखैगो। यीसू बिनै फेर केयो, “मैं तनै साची केऊं हूं कै एक दिन थे देखोगा कै सुरग खुल जावैगो अर परमेसर गा दूत मिनख गै बेटै मतलब मेरै द्वारा नीचै ऊं उपर अर उपर ऊं नीचै आवा जाई करसी।” गलील परदेस गै काना गाम में तीसरै दिन किंगैई ब्या हो। यीसू गी मां बी ब्या में आएड़ी ही। यीसू अर बिंगा चेला नै बी ब्या में बुलाएड़ा हा। जद बठै दाख गो रस मुकग्यो तो, यीसू गी मां यीसू नै केयो, “बांगै कनै अब ओर दाख गो रस कोनी है।” यीसू आपगी मां नै केयो, “हे मां, आ बात थे मनै क्यूं केओ? मेरो काम करण गो टेम अजे तांई कोनी आयो।” फेर यीसू गी मां ब्या में काम करण आळै नोकरां नै केयो, “झिको कीं बो थानै केवै, बिंयाई करियो।” बठै पाणी भरण गै खातर छ माटला रखेड़ा हा। ऐ माटला यहुदी लोगां गै धारमिक रीति रिवाज गै अनुसार हात धोगे सुद्ध करण गै खातर रखेड़ा हा। हरेक माटलै में दो तीन मण पाणी नावड़तो हो। यीसू ब्या में काम करण आळै नोकरां नै केयो, “आं माटला में पाणी भर दैयो। नोकरां माटला नै उपर तांई भर दिया।” फेर बण बानै केयो, “माटला माऊं थोड़ो काड गे भोजन गै प्रधान नै दिखाओ।” अर बे लेग्या। भोजन गै प्रधान जद बो पाणी पीयो तो बिं टेम बो दाख गो रस बणग्यो हो, बिनै ठा कोनी हो कै दाख गो रस कठूं आयो पण झिका नोकरां माटला माऊं पाणी काडयो बानै पतो हो। फेर भोजन गै प्रधान बीन नै बुला'गे केयो, “हर कोई पेलां आच्छो दाख गो रस देवै है जद लोग धाप जावै है तो थोड़ो बिंऊं हळको दाख गो रस देवै है पण थे अजे तांई बडिया आळो दाख गो रस मेल राख्यो है।” यीसू गलील गै काना गाम में पेलो चमत्कार करयो। ईं चमत्कार गै द्वारा यीसू आपगी मेमा प्रकट करी। अर बिंगा चेला बिं पर बिस्वास करयो। इंगै बाद यीसू आपगी मां, भाईयां अर चेलां गै सागै कफरनहूम गाम उड़ग्यो अर बठै केई दिन रेयो। यहुदियां गै फसह गो त्यूंहार नेडै़ हो ईंखातर यीसू यरुसलेम उड़ग्यो। बठै मिन्दर गै आंगणै में देख्यो कै लोग बळद, भेड़ अर कबूतर बेचण लागरया है अर मिन्दर में चढाण खातर विदेसी रिपिया नै बदळगे देसी रिपिया देण आळा नै बेठया होयां देख्या। ईंखातर बण जेवड़िया गो कोड़ो बणागे सारां लोगां अर बांगी भेड़ अर बळदां नै मिन्दर ऊं बारै काढ दिया अर मिन्दर में चढाण खातर विदेसी रिपिया नै बदळगे देसी रिपिया देण आळा गा रिपिया खिंडा दिया अर बांगा पिडा मूंदा मार दिया। अर कबूतर बेचण आळा नै केयो, “आनै अठुं बारै ले जाओ,” मेरै पिता गै घर नै खरीदण अर बेचण आळा गो घर ना बणाओ। जद बिंगा चेला नै परमेसर गी लिखेड़ी बाता याद आई कै परमेसर थारै मिन्दर गै बारै में मेरी भगती मेरै मा आग गी तरियां बळती रेवै है। फेर यहुदी अधिकारियां यीसू नै पूछयो कै तूं म्हानै के चमत्कार दिखावैगो झिकै ऊं ओ साबित हो'ज्यै कै ओ सगळो कीं करण गो अधिकार तेरै कनै है। यीसू बानै जबाब दियो, “ईं मिन्दर नै ढा दैयो अर मैं इनै तीन दिनां में बणा देऊंगा।” यहुदियां गै अधिकारियां केयो ईं मिन्दर नै बणाण खातर छीयाळीस साल लागग्या हा तूं इनै तीन दिनां में किंया बणा देवैगो। पण बण खुद गै सरीर गै बारै में केयो हो। अर जद बो मरेड़ा माऊं जी उठयो तो बिंगै चेला नै याद आयो कै आ बात बण कैई ही अर जद बानै पवितर सासतर अर यीसू गी केयेड़ी बाता पर बांगो बिस्वास मजबूत हो'ग्यो। जद बो यरुसलेम में फसह गै त्यूंहार में हो, तो भोत सारा चमत्कार झिका बण करया। बानै देखगे भोत सारा लोगां बिं पर बिस्वास करयो। पण यीसू बां पर भरोसो कोनी करयो क्यूंकै बो सारा नै जाणै हो। अर बिनै जरूरत कोनी ही कै कोई आदमी गै बारै में गवाई देवै क्यूंकै बो खुद जाणै हो कै आदमी गै मन में के है। निकुदेमुस नाम गो एक यहुदियां गो नेता बठै हो अर बो फरीसिया माऊं हो। एक रात बण यीसू कनै आ'गे पूछयो, हे गुरूजी, म्हे जाणा हां कै म्हानै सिखाण खातर थे परमेसर गी ओर ऊं आया हो क्यूंकै थे झिका निसान दिखावो हो बे परमेसर गी मदद बिना कोई कोनी दिखा सकै। यीसू बिनै उतर दियो, “मैं तनै साची साची केऊं जे कोई आत्मिक रूप ऊं नुअं सिरै ऊं जन्म ना लेवै तो बो परमेसर गै राज में भागिदार कोनी बण सकै।” निकुदेमुस बिनै पूछयो, “जे कोई आदमी बुढो हो जावैगो तो फेर जन्म किंया ले सकै है। क्यूंकै जन्म लेण खातर बो दूसर आपगी मां गै कूख में कोनी जा सकै।” यीसू उतर दियो, “मैं तनै साची साची केऊं जद कोई पाणी अर पवितर आत्मा ऊं जन्म लेवै है जद ई बो परमेसर गै राज में जा सकै है। अर मां बाप ऊं लोग जन्म लेवै है तो बे सिरफ सरीर ऊं जन्म लेवै पण आत्मिक जीवन गी सुरुवात एकली पवितर आत्मा ऊं होवै है। मैं झिको कीं तनै केयो बिं पर अचंभो ना कर, तनै नुअ सिरै ऊं जन्म लेणो ई होवैगो। पून गो जिनै जी करै बा बिनै चालै है, थे बिंगी आवाज सुण सको हो पण थे कोनी जाण सको कै बा कठूं आवै है अर किनै जावै है। आत्मा ऊं जन्म लेएड़ो हर एक आदमी हिस्यो ई है।” निकुदेमुस उतर दियो कै, “ऐ बातां किंया हो सकै।” ओ सुणगे यीसू बिनै केयो, “तूं इसराएल गो एक ई गुरू होगे बी तूं आ बात क्यूं कोनी समझै। मैं तनै साची साची केऊं झिकी सच्चाई म्हे जाणा हां बो ई म्हे बोला हां। अर बो ई कीं बतावां हां झिको कीं म्हे देख्यो है। पण थे लोग जिंया म्हे केवां हां कोनी मानो। जद मैं थानै धरती गी बातां बताऊं तो तूं बिं पर बिस्वास कोनी करै। ईंखातर जे मैं सुरग गै बारै में बताऊं तो बिं पर किंया बिस्वास करैगो। मैं झिको मिनख गो बेटो सुरग ऊं आयो हूं अर अब तांई कोई बी सुरग पर कोनी गेयो पण एकलो मैं ई गेयो हूं। ईंखातर सुरग गै बारै में एकलो मैं ई जाणू हूं। जिंया मूसा बन उजाड़ में सांप नै ऊंचो चढायो इंयाई मैं झिको मिनख गो बेटो हूं आपगी जान देण खातर लोग करूस पर चढावैगा। जिंऊं झिको कोई बिं पर बिस्वास करसी बिनै अनन्त जीवन मिलसी।” क्यूंकै परमेसर संसार गै लोगां सागै इतो प्रेम करयो कै आपगो एकलोतो बेटो दे दियो कै झिको कोई बी बिं पर बिस्वास करै बो नास ना होवै पण अनन्त जीवन पावै। परमेसर आपगै बेटै नै संसार गै लोगां नै सजा देण खातर कोनी भेज्यो पण बिंगै द्वारा संसार गै लोगां नै मुकती मिलज्यै ईंखातर भेज्यो। झिको परमेसर गै बेटै पर बिस्वास करै है बिं पर सजा गी आग्या कोनी होवै पण झिको बिं पर बिस्वास कोनी करै बिनै दोसी बणागे सजा मिलैगी क्यूंकै बण परमेसर गै एकलोतै बेटै पर बिस्वास कोनी करयो। अर सजा गी आग्या गो कारण ओ है कै परमेसर गो बेटो एक जोती गी तरियां ईं संसार में आयो पण लोग भोत बुरा काम करण आळा हा। ईंखातर लोग जोती गै उपर प्रेम पसंद कोनी करयो पण अंधेरै तरियां पाप करणो पसंद करयो। क्यूंकै झिको कोई बुराई करै है बो जोती नै पसंद कोनी करै अर बो जोती गै कनै कोनी आवै जिंऊं बिंगा बुरा काम सामणै ना आ जावै। पण झिको सच्चै रास्तै पर चालै है बो जोती गै कनै आवै है अर बा जोती परगट करै है कै ओ झिको करै है बो परमेसर गी इच्छा गै अनुसार करै है। कीं दिनां गै बाद यीसू आपगै चेला गै सागै यहुदियां परदेस में आयो। चेला गै सागै रेगे लोगां नै बतिस्मो देण लागग्यो। जद यूहना बतिस्मो देण आळो बी सालोम सैहर गै नेडै़ ऐनोन गाम में लोगां नै बतिस्मो देवंतो हो क्यूंकै बठै भोत पाणी हो अर हर रोज लोग आ'गे बतिस्मो लेवंता हा। आ घटना यूहना गै जेळ में जाण ऊं पेलां होई। बठै यूहना गै चेला अर एक यहुदी गै सागै सुद्धी गै बारै में बाद बिवाद होयो। अर बां चेलां यूहना कनै आ'गे केयो, गुरूजी, झिको आदमी यरदन गै दूसरै पार थारै सागै हो अर बिंगै बारै में थे बतायो हो कै बो ई मसी है अब बो आदमी लोगां नै बतिस्मो देण लागरयो है अर भोत लोग बिंगै कनै जाण लागरया है। यूहना बानै उतर दियो कै जे परमेसर गी इच्छा ना होवै तो कोई कीं कोनी ले सकै। मैं थारै सारै लोगां गै सामै बतायो हो मैं मसी कोनी हूं पण बिंगै खातर रा तैयार करण खातर बिंऊं पेलां भेज्यो गेयो हूं। झिको बीनणी नै ब्या कर'गे ले जावै है बो ई बीन होवै है अर बीन गै सागैआळो खड़यो बिनै उड़ीकतो रेवै है अर जद बो बीन गी आवाज सुणै है, जद बो भोत राजी होवै है ओ सुणगे सारा यीसू गै कनै जाण लागग्या हा, इंऊं मेरी खुसी पूरी होवै है। जरूरी है कै बो पूरी तरियां ऊं मोटो होवै अर मैं बिंऊं छोटो होऊं। यूहना बतिस्मो देण आळै फेर बानै केयो बो ई सुरग ऊं आयो है अर सारा ऊं म्हान है। झिको ईं धरती ऊं आयो है, बे सिरफ आदमी है अर बे सिरफ ईं धरती गै बारै में ई बाता करै है। पण बो सुरग ऊं आयो है। ईंखातर बो सगळा ऊं म्हान है। झिको कीं बण सुरग में देख्यो अर परमेसर ऊं सुण्यो बिंगी गवाई देवै है पण इंगी गवाई कोई मानै कोनी। पण झिका बिंगी गवाई मानल्यै तो बो गवाई देवै है कै परमेसर साच्चो है। क्यूंकै बो झिकै नै परमेसर भेज्यो है बो परमेसर गी बाता ई बोलै है। क्यूंकै परमेसर बिनै पवितर आत्मा पूरी तरियां ऊं देवै है। पिता आपगै बेटै नै प्रेम करै है अर बण सारी चिजां गो अधिकार बिंगै हात में दे दियो है। झिको परमेसर गै बेटै पर बिस्वास करै है बिनै ई अनन्त जीवन मिलैगो। पण झिको परमेसर गै बेटै गी आग्या नै कोनी मानै बिनै कदी अनन्त जीवन कोनी मिलैगो पण परमेसर बिं पर रीस कर'गे सजा देवैगो। जद यीसू नै पतो लागग्यो कै फरीसियां सुण्यो है कै यीसू यूहना ऊं बोळा चेला बणागे बानै बतिस्मो देण लागरयो है। तो बो यहुदी प्रदेस छोड़गे गलील प्रदेस उड़ग्यो। यीसू आप बतिस्मो कोनी दियो पण बिंगा चेला देवा हा। बिंगो सामरिया प्रदेस ऊं होगे जाणो जरूरी हो। ईंखातर बो सामरिया प्रदेस गै एक नगर सूखार में आयो। ओ नगर बिं जिग्यां कनै हो, आ जिग्यां याकूब आपगै बेटै युसुफ नै दी ही। बठै याकूब गो कुओ हो, यीसू आपगी यातरा में भोत थकग्यो हो। ईंखातर बो कुअ गै कनै बेठ ग्यो, आ बात लगभग दोफारै गै टेम गी है। बिं टेम बठै एक सामरी परदेस गी लुगाई पाणी भरण आई, यीसू बिनै केयो, “मनै पाणी प्यादे।” बिंगा चेला नगर में रोटी लेण गेयेड़ा हा। सामरी परदेस गी लुगाई यीसू नै केयो, “थे यहुदी होगे बी मेरूं पीण खातर पाणी क्यूं मांगो हो? मैं तो एक सामरी परदेस गी लुगाई हूं।” (यहुदी प्रदेस गा लोग सामरी प्रदेस गै लोगां सागै कोई बी लेण देण कोनी राखता)। यीसू उतर दियो तूं कोनी जाणै कै परमेसर तनै के वरदान देणो चावै है। तेरै कनूं पाणी मांगण आळै नै बी तूं कोनी जाणै पण जे तूं बिं कनूं मांगती तो बो तनै जीवन देण आळो पाणी देवंतो। लुगाई बिनै केयो, “हे प्रभु, थारै कनै पाणी काडण खातर बाल्टी कोनी अर कुओ बी भोत डूंगो है फेर थे जीवन गो पाणी किंया देवोगा?” थे के सोचो हो थे म्हारै बडेरै याकूब ऊं मोटा हो के? झिका म्हानै ओ कुओ दियो। ईं कुअ ऊं याकूब अर बिंगै टाबरां अर बिंगा पसुआं समेत सगळा इमूं ई पीयो हो। यीसू बिनै उतर दियो, “झिको कोई ओ पाणी पीयैगो बिनै फेर बी तीस लागसी। झिको पाणी मैं देवूं बो पाणी जे कोई पीवै है बिनै कदी तीस कोनी लागै। झिको पाणी मैं देऊंगा बिंगै माऊं एक बावड़ी बण जावैगी झिकी अनन्त जीवन खातर पाणी देवंती रेवैगी।” लुगाई बिनै केयो, “हे प्रभु, बो पाणी मनै दे देवो कै मनै कदी तीस ना लागै अर कदी मनै कुअ पर पाणी खीचण ना आणो पडै़।” यीसू बिनै केयो, “जा अर आपगै घर आळै नै बुला'गे ल्या।” लुगाई उतर दियो, “मेरो घर आळो है कोनी।” यीसू बिनै केयो, “तूं साच्ची केवै है कै मैं बिना घर आळै गी हूं।” तेरा पांच घर आळा हा, तूं अब झिकै घर आळै गै सागै रेवै है। बो बी तेरो कोनी। ईंखातर तूं जिंया केयो बो सच्च है। लुगाई बिनै केयो, “हे प्रभु, मैं समझू हूं कै थे एक परमेसर गी बात बताण आळा हो। म्हारै बडेरा ईं पहाड़ पर आराधना करी पण थे यहुदी लोग केवो हो कै यरुसलेम में ई आराधना करणी चईयै।” यीसू सामरी लुगाई नै केयो, “मेरी बात पर बिस्वास कर कै एक बो टेम आवैगो जद थे पिता परमेसर गी आराधना ईं पहाड़ गै उपर अर यरुसलेम में बी कोनी करोगा। थे सामरी लोग बिनै कोनी जाणो, झिकै गी थे आराधना करो हो। पण म्हे यहुदी लोग बिनै जाणा हां झिकै गी म्हे आराधना करां हां क्यूंकै बचाण आळो यहुदियां मू आवै है। पण टेम आण लागरयो है अर आ'ईग्यो है। जद सच्चाई ऊं आराधना करण आळा लोग पिता परमेसर नै आपगै दिल अर मन ऊं अर परमेसर गी परगट करेड़ी सच्चाई ऊं करै है बिं सच्चाई ऊं आराधना करसी क्यूंकै पिता परमेसर आपगै खातर हिसै लोगां नै ढूंढै है। परमेसर आत्मा है। ईंखातर झिको बिंगी आराधना करै बो आत्मा अर सच्चाई ऊं बिंगी आराधना करणी चईयै।” फेर बण बिनै केयो मैं जाणू हूं कै मसी झिकै नै लोग “मसी” केवै है बो आण आळो है जद बो आवैगो तो म्हानै सारो कीं बता देवैगो। यीसू बिनै केयो, “मैं झिकी तनै बात केऊं हूं, मैं बो ई हूं।” इतै में बिंगा चेला आ ग्या, चेला यीसू नै लुगाई सागै बातां करतां देख्यो तो बानै भोत अचंभो होयो। ईं पर यीसू कनूं कणैई पूछयो कोनी कै थे ईं लुगाई ऊं के लेणो है अर इंयूं क्यूं बात करण लागरयो हो। जद लुगाई आपगो घड़ो छोड़गे नगर में उड़गी अर लोगां नै केण लागी। आओ अर देखो एक हिस्यो आदमी है मैं झिको कीं करयो बो सारो कीं मनै बता दियो, थे लोग ओ कोनी सोच्यो कै बो मसी हो सकै? आ बात सुणगे लोग नगर छोड़गे यीसू कनै आ ग्या। बिं टेम यीसू गा चेला बिंऊं बिनती करण लागग्या कै, “हे गुरूजी, कीं खा ल्यो” यीसू चेला नै केयो, “मेरै कनै खाण खातर हिसी रोटी है, झिकै गै बारै में थे कोनी जाणो” फेर बिंगा चेला आपसरी में पूछण लागग्या कै, “कोई बिं खातर खाण नै कीं ल्यायो हो'सी के?” यीसू बानै केयो, “मेरी रोटी आ है कै मैं मेरै भेजण आळै गी इच्छा गै अनुसार चालूं अर बिंगो काम पूरो करूं। थे बारी बारी केवो हो कै फसल बाडण खातर चार म्हिना बाकी है पण मैं थानै केऊं झिका लोग आण लागरया है बानै देखो बे बी खेत गै समान है झिका खेत आच्छी तरियां पाकगे सफेद हो'ग्या है। फसल बाडण आळा नै मजदूरी दी जावै है अर लोगां नै अनन्त जीवन में लेगे आणो ई बिंगी फसल बाडणी है। ईंखातर फसल उगाण आळो अर बाडण आळो मिलगे राजी होवै। ओ पद साची है एक आदमी उगावै है दूसरो बाडै है। मैं थानै बा फसल बाडण घाल्या है झिकी पर थे मेनत कोनी करी झिकी पर दूसरा मेनत करी अर बांगी मेनत गो फल थानै मिल्यो है।” बिं नगर गै भोत सारा सामरिया यीसू पर बिस्वास करयो क्यूंकै बण लुगाई नगर में गवाई दी कै मैं झिको कीं करयो बण मनै सारो कीं साची बता दियो। जद सामरी लोग बिंगै कनै आया तो बां बिनै आपगै सागै रेण गी बिनती करी। ईं पर बो बठै बांगै सागै दो दिन रुक्यो। बिंगै बचन गै कारण अर बिं पर भोत सारा लोग बिस्वास करयो। अर बां बिं लुगाई नै केयो म्हे तेरी एकली गवाई केण पर बिस्वास कोनी करयो पण अब म्हे आप बिनै सुण्यो है अब म्हे जाणग्या हां कै सच्च में ओ बो आदमी है झिको संसार नै मुकती देवैगो। अर सामरी लोगां गै सागै दो दिन रेण गै बाद यीसू अर बिंगा चेलां बठूं गलील प्रदेस में उड़ग्या। यीसू आप ई केयो हो कै कोई बी परमेसर गी बात बताण आळो आपगै ई देस में कदी बी आदर कोनी पावै। ईं तरियां जद बो गलील आयो तो गलीलियां बिंगो आदर मान करयो क्यूंकै बण झिको कीं यरुसलेम में त्यूंहार गै टेम करयो हो बो सारो कीं बां देख्यो हो। यीसू फेर गलील गै काना गाम में गेयो जठै बण पाणी नै दाख गो रस बणायो हो। जद काना गाम गै कनै कफरनहूम गाम में एक राजा गो अधिकारी हो झिकै गो बेटो बीमार हो। जद राजा गै अधिकारी सुण्यो कै यहुदियां ऊं यीसू गलील आयो है। तो बो बिंगै कनै आयो अर बिनती करी कै बो कफरनहूम में आ'गे बिंगै बेटै नै ठीक करै क्यूंकै बिंगो बेटो मरण आळो हो। यीसू बिनै केयो, “मोटो चमत्कार देखे बिना थे लोग मेरै उपर बिस्वास कोनी करोगा।” राजा गै अधिकारी बिनै केयो, “मेरै बेटै गै मरण ऊं पेलां मेरै सागै चाल।” यीसू केयो, “तूं जा, तेरो बेटो जींवंतो रेवैगो।” झिको कीं यीसू केयो हो, बिं पर बण बिस्वास करयो अर घर कानी चाल पड़यो। बो घरे जावंता टेम रा में बिंगा नोकर मिल्या अर बिनै समाचार दियो कै तेरो बेटो ठीक हो'ग्यो। बण नोकरां नै पूछयो, “मेरो बेटो के टेम ठीक होयो हो?” बां बिनै केयो, “काल दोफारै एक बजे बिंगो बुखार उतरग्यो हो। जद बेटै गै बाप नै ध्यान आयो कै बो ई टेम है जद यीसू केयो, तेरो बेटो जींवंतो रेवैगो।” ईं तरियां बिंगै सारै घराणै यीसू पर बिस्वास करयो। ओ दूसरो मोटो चमत्कार हो झिको यीसू यहुदियां ऊं गलील आ'गे दिखायो। इंगै बाद यीसू यहुदियां गो त्यूंहार मनाण खातर यरुसलेम गेयो। यरुसलेम में भेड़ फाटक गै कनै एक बावड़ी है, इब्रानी भासा में इनै बेतहसदा केयो जावै है। इंगै किनारै पांच बरामदा है। बरामदा में भोत सारा आंधा, लंगड़ा अर लकवै गा मारेड़ा पड़या रेवंता हा। (क्यूंकै टेम टेम पर परमेसर गो सुरगदूत बावड़ी में उतरगे पाणी नै हिलावंतो हो। पाणी गै हालतां ई झिको पेलां पाणी में उतरतो बो ठीक हो जावंतो)। बठै एक आदमी हो झिको अड़तीस सालां ऊं बीमारी में बठै पड़यो हो। यीसू बिनै बठै पड़यो देख्यो जद बिनै ठा लागग्यो कै भोत सालां ऊं ईं हालत में पड़यो है। यीसू बिनै पूछयो, अरै भाई तूं ठीक होणो चावै। बीमार आदमी केयो, “हे गुरूजी, मेरै कनै कोई कोनी है झिको पाणी हालण पर मनै बावड़ी में उतार देवै अर मेरै जाण ऊं पेलां कोई दूसरो उतर जावै है।” यीसू बिनै उतर दियो, “खड़यो हो, आपगी लोई चकले अर चाल पड़।” बो आदमी बिं टेम ई ठीक हो'ग्यो, अर आपगी लोई चक'गे चालण फिरण लागग्यो। बो सबत गो दिन हो ईंखातर ठीक होएड़ै आदमी नै यहुदियां केयो, आज सबत गो दिन है अर तेरो लोई चक'गे चालणो ठीक कोनी क्यूंकै ओ यहुदियां गै नेम गै बिरोध में है। बण बिनै उतर दियो, “झिकै मनै ठीक करयो है बण ई मनै केयो कै आपगी लोई चकले अर चाल फिर।” बां लोगां बिनै पूछयो, “पण बो कुण आदमी है, झिकै तनै केयो हो, आपगी लोई चक अर चाल फिर।” बो आदमी झिको ठीक होयो बो कोनी जाणै हो कै बो कुण हो। क्यूंकै बिं जिग्यां भोत भीड़ ही अर यीसू बठूं चुपचाप उड़ग्यो हो। बाद में ठीक होएड़ै आदमी नै यीसू मिन्दर में मिल्यो। यीसू बिनै केयो, “सुण, तूं ठीक हो'ग्यो है, ईंखातर फेर पाप ना करी, नई तो पेलां ऊं मोटो दुख तेरै पर आवैगो।” अर बण आ'गे यहुदियां ऊं केयो, मनै यीसू ठीक करयो है। यीसू ऐ सगळा काम सबत गै दिन करया हा ईंखातर यहुदी लोगां बिनै तंग करणो सुरु कर दियो। यीसू बानै उतर दियो, “मेरो पिता अब तांई जिंया काम करण लागरयो है ईंखातर मैं बी बिंयाई काम करण लागरयो हूं।” यहुदी लोग यीसू नै मारण गी योजना बणाण लागग्या क्यूंकै बो ना एकलै सबत गै नेम नै तोड़ै पण अपणै आपनै पिता परमेसर गै बराबर समझै। यीसू उतर दियो, “मैं थानै साची साची केऊं कै परमेसर गो बेटो अपणै आप कीं कोनी कर सकै। बो एकलो बो ई काम करै है झिको पिता परमेसर नै करतां देखै है अर पिता परमेसर जिंया करै है परमेसर गो बेटो बी बिंयाई करै है। पिता परमेसर आपगै बेटै ऊं प्रेम करै है अर सारो कीं बिनै दिखावै है झिका काम आप करै है अर बां काम ऊं बी मोटा काम बिनै दिखावैगो जिंऊं थे लोग अचंभो करोगा। जिंया पिता परमेसर मरेड़ा नै उठावै है बिंया परमेसर गो बेटो बी झिकै नै चावै है बिनै जींवंतो करै है। पिता परमेसर किंगो बी न्याय कोनी करै पण न्याय करण गो अधिकार परमेसर आपगै बेटै गै हात में दे दियो है, कै सारा लोग जिंया पिता परमेसर नै आदर करै है बिंयाई परमेसर गै बेटै गो बी आदर करै। झिको परमेसर गै बेटै गो आदर कोनी करै, बो पिता परमेसर गो झिकै बिनै भेज्यो है बे बिंगो बी आदर कोनी करै। मैं थानै साची बताऊं झिको मेरै बचन नै सुणगे मेरै भेजण आळै पर बिस्वास करै, बो अनन्त जीवन पावै है अर न्याय गै दिन सजा गी आग्या बिं पर कोनी होवै पण बो मोत ऊं निकळगे जीवन में उठग्यो है। मैं साची केऊं कै बो टेम आ'ग्यो है अर चालण लागरयो है जद बे झिका आत्मा गै रूप ऊं मरग्या है बे परमेसर गै बेटै गो बचन मानैगा अर झिका मानैगा बे जींवंता हो जावैगा। क्यूंकै जिंया पिता परमेसर जीवन देण आळो है बिंयाई बो आपगै बेटै नै जीवन देण गो अधिकार दियो है। अर झिकै बण बिनै न्याय करण गो अधिकार दियो है क्यूंकै बो मिनख गो बेटो है। झिको मैं केऊं बिं पर अचंभो ना करो क्यूंकै बो टेम आवै है जिता लोग कबर में है बे बिंगो बचन सुणगे बारै आवैगा अर झिका आच्छा काम करया है बे अनन्त जीवन खातर मरेडा ऊं जी उठैगा। पण झिका बुरा काम करया है बे सजा लेण खातर जी उठैगा। मैं आपणै आप कीं कोनी कर सकूं जिंया परमेसर मनै केवै है बिंयाई मैं न्याय करूं हूं। मेरो न्याय साच्चो है मैं आपगी मरजी ऊं कीं कोनी करूं पण आपगै भेजण आळै गी इच्छा ऊं करूं हूं। मैं मेरै बारै में बात करूं तो लोग कोनी मानैगा । मेरै बारै में बताण आळो एक ओर है, मेरै बारै में झिको बोलै है बो साची है। थे लोगां यूहना कनै मेरै बारै में पूछताछ करण खातर भेज्या हा बण मेरै बारै में सच्चाई बताई। मैं आपगै बारै में माणस कनूं गवाई कोनी चावूं फेर बी यूहना गी गवाई गै बारै में मैं थानै ईंखातर केऊं कै थानै मुकती मिलै। जिंया दीयो चानणो देवै है बिंयाई यूहना एक दीयै गी तरियां परमेसर गी सच्चाई लोगां गै समझाणै में मदद करी अर थानै कीं देर तांई बिं चानणै में रेणो आच्छो लाग्यो। पण मेरी गवाई यूहना गी गवाई ऊं मोटी है क्यूंकै झिको कीं काम मैं करण लागरयो हूं बे काम परमेसर पिता मनै पूरो करण खातर दियो है। ईंखातर मैं करूं हूं अर बे काम मेरी गवाई देवै है कै पिता मनै भेज्यो है। परमेसर पिता झिकै मनै भेज्यो है। मेरी गवाई दी है। पण थे लोग बिंगो बचन कदी कोनी सुण्यो अर ना थे बिंगो रूप देख्यो है। थे बिंगो बचन आपगै मना में कोनी राख्यो क्यूंकै बिंगै भेजेड़ै पर थे बिस्वास कोनी करयो। थे पवितर सासतर नै दिल ऊं ढूंडो हो, क्यूंकै थारो बिचार है कै बिमै अनन्त जीवन मिलण गो ग्यान मिल जावैगो। पण ऐ सारा सासतर मेरै बारै में बतावै है। फेर बी अनन्त जीवन पाण खातर मेरै लारै चालणो कोनी चावो। मैं लोगां कनू आदर कोनी चावूं। मनै पतो है कै थे परमेसर ऊं प्रेम कोनी करो। मेरो बाप झिकै मनै अधिकार दियो बिं अधिकार ऊं मैं आयो हूं फेर बी थे मनै स्वीकार कोनी करो पण जे कोई आपगै नाम ऊं आवै तो थे बिनै स्वीकार कर ल्योगा। थे बिस्वास किंया कर सको हो क्यूंकै थे तो एक दूसरै नै आदर देणो चावो हो पण बो आदर कोनी चावै हो झिको एकलो बिंऊं मिलै बो ई परमेसर है। थे इंया ना सोचो कै मैं पिता परमेसर गै सामणै थारै उपर दोस लगाऊंगा। पण थारै पर दोस सिद्ध करैगो बो तो मूसा है झिकै पर थे थारी आपगी आस लगाऐड़ी है। ईंखातर जे थे मूसा पर सचमुच बिस्वास करो तो मेरै पर बी बिस्वास करो। ईंखातर कै बण मेरै बारै में लिख्यो है। क्यूंकै थे मूसा गी लिखेड़ी बातां पर बिस्वास कोनी करो तो थे मेरी बातां पर बिलकुल बिस्वास कोनी करोगा।” इंगै बाद यीसू गलील गी झील गै दूसरी पार उड़ग्यो। गलील झील गो दूसरो नाम तिबिरियास बी है। यीसू ऊं बीमारां नै ठीक करण गा चमत्कार देखगे भोत मोटी भीड़ बिंगै कनै आ'गी। यीसू चेलां गै सागै ऊंची जिग्यां पर जा'गे बेठग्यो। बां दिना में यहुदियां गै फसह गो त्यूंहार कनै हो। जद यीसू चारूंमेर देख्यो कै एक भोत मोटी भीड़ बिंगै कानी आण लागरी है यीसू फिलिप्पुस ऊं पूछयो, “आपां आं सगळा लोगां खातर रोटी कठूं ल्यावांगा?” यीसू आ बात बिनै परखण खातर कैई ही क्यूंकै बो तो जाणै हो कै बो अठै के करसी? फिलिप्पुस उतर दियो, “गुरूजी, एक एक नै थोड़ी थोड़ी रोटी खूआण खातर दो सौ दिन गी मजदूरी गै पीसा गी रोटी खरीद गे ल्यावांगा तो बी पूरी कोनी आसी।” बिंगा चेला मू समौन पतरस गै भाई अन्द्रियास बिनै केयो, “अठै एक छोटो छोरो है। बिंगै कनै जौ गी पांच रोटी अर दो मछलियां है पण इता लोगां खातर बे भोत थोड़ी है।” जद यीसू केयो, “सारा लोगां नै रोटी खाण खातर बिठा देवो,” बिं जिग्यां पर भोत घास ही, ईंखातर सारा लोग घास पर बेठ ग्या, बठै आदमिया गी गिणती पांच हजार ही। जद यीसू रोटियां ली अर परमेसर गो धन्यवाद कर'गे बाटण खातर आपगै चेला नै दे दी फेर मछलियां लेगे बिंयाई करयो। जिती लोगां नै इच्छा ही बां बिती ई खाई। जद बां लोगां गो पेट भरीजग्यो तो यीसू आपगै चेलां नै केयो, “झिकी रोटियां गा टुकड़ा बच गया हा बानै भेळा कर ल्यो कै बे खराब ना होवै। फेर चेला रोटियां गै टुकाड़ा नै भेळा करया झिका जौ गी पांच रोटियां ऊं इती रोटी बचगी अर बिंऊं बारा टोकरी भरीज गी।” लोगां यीसू गै ईं चमत्कार नै देखगे केण लागग्या साची ओ बो ई परमेसर गी बात बताण आळो है झिकै नै ईं संसार में आणै गो म्हे इंतजार करण लागरया हां। यीसू ओ जाणग्यो कै ऐ लोग मनै राजा बणाणो चावै है फेर यीसू एकलो एक ऊंची जिग्यां पर उड़ग्यो। जद आथण होयो तो बिंगा चेलां झील गै किनारै गेया। अन्धेरो बोळो हो'ग्यो फेर बी यीसू बांगै कनै अजे तांई कोनी आयो अर चेला एक किस्ती में बेठगे कफरनहूम कानी चाल पड़या। अर आंधी गै कारण झील में पाणी गी लेहरा उठण लागगी। लगभग पाणी में पांच छ: किलोमीटर जाण गै बाद बां देख्यो कै यीसू पाणी गै उपर चालगे बांगै कानी आण लागरयो है। बे भोत डरग्या। पण यीसू बानै केयो, “डरो ना, मैं हूं।” चेला यीसू नै नाव में बिठाण खातर तैयार हो'ग्या, बिं टेम नाव बिं जिग्यां उड़गी जठै बां जाणो हो। दूसरै दिन लोगां गी भीड़ झिकी झील गै दूसरी पार रेगी ही जठै ऊं चेला चाल्या हा, बानै ठा हो कै बठै यीसू गा चेला किस्ती में हा पण यीसू बांगै सागै कोनी गेयो। फेर तिबिरियास नाम एक सैहर ऊं कोई नाव आई। बे बिं जिग्या पोंचग्या जठै परमेसर गो धन्यवाद देण गै बाद प्रभु यीसू लोगां नै रोटी खुवाई ही। जद भीड़ देख्यो, बिं जिग्यां ऊं चेला अर यीसू उड़ग्या तो बे लोग बिं किस्ती में बेठगै यीसू नै ढूंढता कफरनहूम उड़ग्या। झील गै पार जद बे बिनै मिल्या तो पूछयो, हे गुरूजी थे अठै कद आया। यीसू उतर दियो, “मैं थानै साची साची केऊं कै थे चमत्कार देख्यो है ईंखातर थे मनै कोनी ढूंडो हो पण ईंखातर कै थे रोटी खा'गे धापग्या हा। मैं थानै केऊं हूं कै, ईं संसार में नास होण आळी रोटी खातर मेनत ना करो पण झिकी रोटी हमेसा रेवै है अर अनन्त जीवन देवै है बिं खातर थे मेनत करो। बा सिरफ मैं परमेसर गो बेटो दे सकूं क्यूंकै बा देण खातर पिता परमेसर एकलो मनै अधिकार दियो है।” लोगां बिनै पूछयो, “झिका काम परमेसर चावै है बानै करण खातर म्हे के करां?” यीसू बानै उतर दियो, “परमेसर गो काम ओ है कै झिकै नै बण भेज्यो है बिं पर बिस्वास करो।” जद बां बिनै केयो, “तनै परमेसर भेज्यो है ओ म्हे किंया बिस्वास करां तूं म्हानै के चमत्कार दिखावैगो। जद म्हारा बडेरा बन उजाड़ माखर जाण लागरया हा। बानै मन्ना नाम गी रोटी खाण खातर दी क्यूंकै पवितर सासतर में इंया लिखेड़ो है कै परमेसर बानै सुरग ऊं खाण नै रोटी दी।” यीसू बानै केयो, “मैं थानै साची साची केऊं कै सुरग ऊं खाण खातर रोटी थानै मूसा कोनी दी पण मेरो पिता थानै सुरग ऊं साची रोटी देवै है। क्यूंकै परमेसर कानूं आण आळी रोटी आ है झिकी सुरग ऊं उतरगे संसार गै लोगां नै जीवन देवै है।” लोगां बिनै केयो, “हे गुरूजी अब म्हानै बा रोटी दे अर सदां देवंतो रे।” जद यीसू बानै केयो, “मैं ई बा रोटी हूं झिकी जीवन देवै है झिको मेरै कनै आवै है बो कदी भूखो कोनी रेवैगो अर झिको मेरै उपर बिस्वास करै है बिनै कदी तीस कोनी लागै। मैं थानै पेलां ई बता दियो कै थे मनै देख लियो है फेर बी थे मेरै पर बिस्वास कोनी करो। हर एक आदमी झिको परमेसर मनै दियो है बो मेरै कनै आवैगो झिको मेरै कनै आवैगो बिनै मैं कदी कोनी काड़ूंगा। क्यूंकै मैं सुरग ऊं आपगी इच्छा गै अनुसार काम करण कोनी आयो पण मेरै भेजण आळै गी इच्छा पूरी करण आयो हूं। मेरै भेजण आळै गी आ इच्छा है कै झिको कीं बण मनै दियो है बामूं किनैई खोऊं ना पण अन्त में न्याय गै बां सगळा नै जींवता कर देऊंगां आई मेरै परम पिता गी इच्छा है हर एक आदमी झिको बेटै नै देखै है, बिमै बिस्वास करै है, बो अनन्त जीवन पावै अर आखरी न्याय गै दिन बिनै जींवंतो कर देऊंगा।” ईंखातर यहुदी लोग झिका बिनै ढूंडै हा बिं पर रीस बळण लागग्या क्यूंकै यीसू केवंतो हो बा रोटी मैं हूं झिकी सुरग ऊं उतरी है। अर बां केयो, “ओ युसुफ गो बेटो यीसू है इंगै मां बाप नै बी आपां जाणा हां फेर ओ किंया केवै है कै मैं सुरग ऊं उतरयो हूं।” यीसू बानै उतर दियो, “आपसरी में चुगली ना करो।” जद तांई मेरो भेजण आळो किनैई मेरै कनै आप कोनी ले आवै जद तांई कोई मेरै कनै कोनी आ सकै। परमेसर गी बात बताण आळा आपगै लेखा में लिख्यो है कै परमेसर खुद बां सारा नै सिखायेड़ा हो'सी अर झिको कीं पिता ऊं सुण्यो अर सीख्यो है बो मेरै कनै आवै है । इंगो मतलब ओ कोनी कै कणैई मेरै पिता नै देख्यो है सिरफ मैं ईं बिनै देख्यो है। कणैई मेरै पिता नै कोनी देख्यो। एकलै मैं ई बिनै देख्यो है क्यूंकै मैं परमेसर कनूं आयो हूं। मैं थानै साची साची केऊं झिको कोई बिस्वास करै है बो अनन्त जीवन पावै है। मैं ई बा रोटी हूं झिकी जीवन देवै है। थारै बडेरा बन उजाड़ में मन्ना खाया हा फेर बी बे मरग्या हा। अब जे कोई सुरग ऊं उतरेड़ी रोटी खावै तो बो कोनी मरै। मैं ई बा जींवती रोटी हूं झिकी सुरग ऊं उतरी हूं जे कोई ईं रोटी नै खावै है बो सदां जींवंतो रेवैगो अर झिकी रोटी मैं बिनै देऊंगा बो मेरो सरीर है इंऊं संसार गा लोग जींवता रेवैगा। फेर यहुदी लोग आपसरी में बेंस करण लागग्या, ओ आपगो सरीर आपां नै खाण खातर किंया दे सकै है? ईं पर यीसू बानै केयो मैं थानै साची साची केऊं हूं जद तांई थे मिनख गै बेटै गो सरीर ना खाओ अर बिंगो लोइ ना पीओ तो जद तांई थानै जीवन कोनी मिल सकै। झिको मेरो सरीर खावै है अर मेरो लोइ पीयै है अर अनन्त जीवन बिंगो है। अंत गै दिन में बिनै जींवंतो कर देऊंगा। मेरो सरीर सच्ची रोटी है अर मेरो लोइ पीण गी सच्ची चीज है। झिको मेरै सरीर नै खावै है अर मेरो लोइ पीयै बो मेरै सागै मिलगे रेवै है अर मैं बिंगै सागै। जींवतै पिता मनै भेज्यो है अर मैं पिता ऊं ई जींवंतो हूं बिंयाई कोई बी मनै खावैगो तो बो मेरै कारण जींवंतो रेवैगो। सुरग ऊं उतरी रोटी मैं हूं। आ रोटी थारै बडेरा खाई भिसी रोटी कोनी। बां लोगां बा रोटी खाई अर बे मरग्या। पण जे कोई आ रोटी खावैगो बो सदां जींवंतो रेवैगो। ऐ बातां बण कफरनहूम गै एक सतसंग घर में उपदेस देवंता टेम कैई। यीसू गा भोत सारा चेला आ बात सुणगे केयो, “ऐ बाता भोत करड़ी है। आनै कुण सुणै है।” यीसू नै अपणै आप ई पतो चालग्यो कै बिंगा चेला ईं बात पर बड़बड़ावै है ईंखातर बण बानै केयो, “ऐ बातां सुणगे मेरै उपर ऊं थारो भरोसो कमजोर हो'ग्यो है के? इयां है तो थे मिनख गै बेटै नै बिंगी पेलां रेण आळी जिग्यां सुरग पर चढता देखोगा तो के बोलोगा? आत्मा तो जीवन देण आळी है। आदमियां गी कोसिस कीं काम गी कोनी झिका बचन मैं थानै केया है बे ई आत्मा है अर बो ई जीवन देवै है।” पण थारै में केई हिस्या है झिका बिस्वास कोनी करै क्यूंकै यीसू पेलां ई जाणै हो कै झिका बिस्वास कोनी करै अर बे कुण है मनै पकड़ावैगा। अर यीसू बानै केयो, “जद तांई मेरो पिता मेरै कनै आण गी आग्या ना देवै जद तांई कोई बी मेरै कनै कोनी आ सकै।” ईं कारण भोत सारा यीसू गा चेला पाछा उड़ग्या अर बां यीसू गै लारै चालणो छोड़ दियो। फेर यीसू आपगै बारा चेला नै केयो कै, “थे बी जाणो चावो हो के?” समौन पतरस बिनै उतर दियो है, “हे गुरूजी, म्हे किंगै कनै जावांगा बे बचन तो तेरै कनै झिका अनन्त जीवन देवै है। अब म्हे ओ बिस्वास कर लियो अर जाणा हां तूं ई पवितर है झिकै नै परमेसर भेज्यो है।” यीसू बानै उतर दियो, “थानै बारा नै मैं ईं चुण्या है फेर बी थारै माऊं एक सैतान है।” ओ बण समौन इस्करियोति गै बेटै यहूदा गै बारै में केयो क्यूंकै बो यीसू गै खिलाफ होगे बिनै पकड़ाण आळो हो अर बो ई बिंगै बारा चेला माऊं एक हो। आं बातां गै बाद यीसू गलील परदेस गै गाम गाम में जावंता रेया। बो यहुदियां परदेस गै गाम में जाणो कोनी चावै हो क्यूंकै यहुदी अधिकारी बिनै मारण गी योजना बणाण लागरया हा। यहुदियां गो झोंपडीयां गो त्यूंहार आण आळो हो। ईंखातर बिंगै भाईयां बिनै केयो थानै आ जिग्यां छोड़गे यहुदियां जाणो चईयै कै बठै बी तेरा चेला तेरै कामा नै देख सकै। कोई बी आदमी झिको लोगां गै बिचाळै आपगो नाम ऊंचो करणो चावै है बो आपगै काम नै लको कोनी सकै क्यूंकै ऐ सारा काम करण लागरयो है। आंगो पूरी दुनिया नै पतो लागणो चईयै। क्यूंकै बिंगा भाई बी बिं पर बिस्वास कोनी करता हा। यीसू बानै केयो, “मेरै खातर सई टेम कोनी आयो पण थारै खातर सारो टेम सई है। संसार गा लोग थारूं बेर कोनी कर सकै पण बे मेरूं बेर करै है, क्यूंकै मैं बांगै बारै में बोलतो रेऊं हूं कै बांगा काम गन्दा है। थे लोग त्यूंहार में जाओ, मैं अब ईं त्यूंहार में कोनी जाऊं क्यूंकै अजे तांई मेरो सई टेम कोनी आयो।” बो बानै ऐ बातां केगे बठै ई गलील में रेग्यो। जद बिंगा भाई त्यूंहार में गेया तो बो बी उड़ग्यो पण किनैई कोनी बता गे गेयो। यहुदी अधिकारियां त्यूंहार में बिनै ओ केगे ढूंडण लागग्या कै बो कठै है। त्यूंहार में भोत सारी भीड़ ही, बे लोग यीसू गै बारै में होळै होळै आपसरी में बातां करा, बो भलो आदमी है अर कोई केवै बो आच्छो कोनी, बो लोगां नै भरमावै है। कोई बी बिंगै बारै में खुलगे बात कोनी करै हो क्यूंकै बे लोग यहुदी अधिकारियां ऊं डरता हा। जद त्यूंहार आदो बीतग्यो हो जद यीसू मिन्दर में आ'ग्यो अर उपदेस देणो सुरू कर दियो। जद यहुदी अधिकारियां बिंगी सिक्सा नै सुणगे अचंभो करयो अर केयो, ओ आदमी कदी म्हारी धारमिक पाठसाला में कोनी आयो, फेर बी इनै इतो ग्यान किंया होयो। यीसू बानै केयो, “झिको उपदेस मैं देवूं हूं बो मेरो उपदेस कोनी पण बिंगै कनू आयो है, झिकै मनै भेज्यो है।” जे कोई साची परमेसर गी आग्या गो पालण करणो चावै तो, बो ईं उपदेस गै बारै में जाण जावैगो कै बो परमेसर गी ओर ऊं है या मेरी ओर ऊं केऊं हूं। झिको आपगै मन ऊं कीं केवै है बो आपगी बडाई करै है पण झिको आपगै भेजण आळै गी बडाई चावै है बो सच्चो है अर बिमै झूठ कोनी। मूसा थानै परमेसर गा नेम दिया है। फेर बी थे बानै मान्या कोनी। अर थे मनै मारण गी कोसिस करण लागरया हो। लोगां उतर दिया कै तेरै में ओपरी सवार है, म्हे तनै मारणो कोनी चावां। यीसू बानै उतर दियो, “सब्त गै दिन मैं एक ई चमत्कार करयो हो अर ईंखातर थे लोग अचंभो करो हो के?” अर मूसा थानै खतनै गी आग्या दी है ईंखातर सब्त गै दिन बी जे थारै बेटै गै खतनै गो दिन आयो तो थे खतनो करो हो, मैं साची बताऊं तो खतनो मूसा गी ओर ऊं कोनी ओ तो म्हारै बडेरां गी ओर ऊं चालतो आवै है। मूसा गै देऐड़ै नेम गो पालण करण खातर सब्त गै दिन जे थे खतनो कर सको हो तो फेर मैं ईं आदमी नै पूरी रीति ऊं सब्त गै दिन ठीक कर दियो तो थे मेरै पर रीस क्यों करो? थे मूं देखगे न्याय ना करो पण सच्च अर झूठ नै समझगे न्याय करो। फेर यरुसलेम में रेण आळै लोगां माऊं कीं जणा केयो, “ओ पक्को बो ई आदमी है झिकैनै मारण गी कोसिस करण लागरया है। पण देखो, बो सारै लोगां गै बिचाळै बोलण लागरयो है बे लोग बिनै कीं कोनी केवै है कै यहुदी अधिकारियां सच्च में जाण लियो कै बो मसी है के? पण ओ मसी कोनी हो सकै क्यूंकै आपां जाणा हां कै बो कठै गो हो। जद सच्चो मसी आवैगो तो कोई कोनी जाण सकै कै बो कठूं आवैगो।” जद यीसू मिन्दर में उपदेस देण लागरयो हो बण ऊंची आवाज में केयो सच्ची थे जाणो हो कै मैं कुण हूं अर कठूं आयो हूं। पण मैं खुद गै अधिकार ऊं कोनी आयो झिकै मनै भेज्यो है बो सच्चो परमेसर है बिनै थे कोनी जाणो। मैं बिनै जाणूं हूं क्यूंकै मैं बिंगी ओर ऊं आयो हूं अर बण मनै भेज्यो है। ईं पर बां बिनै पकड़णो चायो पण फेर बी पकड़ण खातर कणैई आ'गे हात कोनी करयो क्यूंकै अजे तांई बिंगै पकड़िजणै गो सई टेम कोनी आयो हो। पण भीड़ माऊं भोत लोगां बिं पर बिस्वास करयो अर केण लागग्या कै बो इयूं बोळा चमत्कार कोनी दिखा सकै झिका अण दिखाया है। ईंखातर ओ ई मसी होवैगो। भीड़ में लोग यीसू गै बारै चुपचाप बात करण लागरया हा ओ सुणगे फरीसियां अर मुख्य याजकां बिनै बन्दी बणाण खातर मिन्दर गै पेरेदारां नै भेज्या। फेर यीसू केयो कै, “थारै सागै थोड़ै टेम ओर रेऊंगा अर फेर मैं पाछो बिंगै कनै उड़ जाऊंगा झिकै मनै भेज्यो हो। थे मनै ढूंडोगा पण कोनी ढूंड सकोगा अर जठै मैं होऊंगा बठै थे कोनी आ सको।” जद यहुदी अधिकारी आपसरी में केण लागग्या ओ कठै जावैगो कै आपां इनै मिल कोनी सकां। के ओ आपणो देस छोड़गे दूसरै सैहरा में रेण आळै यहुदी लोगां अर गेर यहुदियां गै बिचाळै जा'गे बानै बी उपदेस देवैगो? आ के बात है झिकी बण कैई कै थे मनै ढूंडोगा पण मैं थानै लादूं कोनी अर जठै मैं होऊंगा बठै थे कोनी आ सकोगा। त्यूंहार गो आखरी दिन खास हो। यीसू खड़यो होगे ऊंची आवाज में केयो जे कोई तीसो है तो मेरै कनै आवै मैं झिको देऊं हूं बिनै पीओ। पवितर सासतर में इयां लिख्यो है कै झिको मेरै पर बिस्वास करैगो बिंगै माऊं अनन्त जीवन देण आळी पाणी गी नदियां बगण लाग ज्यैगी। यीसू पवितर आत्मा गै बारै में ओ बचन केयो क्यूंकै झिको यीसू पर बिस्वास करै है बानै सारा नै पवितर आत्मा मिलण आळी ही। अब तांई पवितर आत्मा कोनी दी ही क्यूंकै परमेसर गी ओर ऊं यीसू नै आदर मान मिलण गै बाद ई दी जावैगी। भीड़ माऊं कीं लोग जद ओ सुण्यो तो बे केण लागग्या सच्च में ओ आदमी परमेसर गी बात बताण आळो है। झिकै गो परमेसर वायदो करयो हो। अर कीं लोगां केयो ओ मसी है अर कीं लोगां केयो मसी गलील ऊं कोनी आवैगो इंया हो सकै है के? क्यूंकै पवितर सासतर में लिखेड़ो है कै मसी दाऊद राजा गै वंस में अर दाऊद गै ई बेतलेहम गाम में पैदा होवैगो। ईं बात गै कारण लोगां गै बिचाळै फूट पड़गी। बामूं कीं लोग बिनै पकड़णो चावा हा पण कणैई हात आ'गै कोनी करयो। ईंखातर मिन्दर गा पेरेदार मुख्य याजकां अर फरीसियां कनै पुठा आ ग्या अर बां बानै पूछयो थे बिनै पकड़गे क्यूं कोनी ल्याया। मिन्दर गै पेरेदारां उतर दियो, बो आदमी इती आच्छी आच्छी बाता सिखावै है अजे तांई कणैई हिसी बातां कोनी सिखाई। ईंखातर म्हे बिनै पकड़ कोनी सक्या। फरीसियां बानै उतर दियो म्हानै लागै है कै बण थानै बी भरमा दिया। यहुदी अधिकारियां अर फरीसियां माऊं कणैई बां पर बिस्वास कोनी करयो। पण झिकै लोगां नै परमेसर गै नेमा गै बारै में कीं ठा कोनी बे बिं पर बिस्वास राखै है। ईंखातर परमेसर बानै सराप देवैगो। निकुदेमुस नै झिको पेलां बिंगै कनै आयो बामूं एक हो बण केयो, “आपणो नेम जद तांई किनैई दोसी कोनी मानै जद तांई बिंगी सुण ना लेवै अर बिंगो पतो ना लगा लेवै है कै बण के करयो है।” बां बिनै उतर दियो, “कै तूं बी गलील परदेस गो है के? क्यूंकै तूं बी बिंगो चेलो है झिकी बाता करै है धरम सासतरां नै पढगे देख तो तनै ठा लागै कै गलील प्रदेस में कोई परमेसर गी बात बताण आळो परगट कोनी होयो।” (फेर बे सारा बठूं आपगै आपगै घरे उड़ग्या)। पण यीसू जेतुन दरखत गै प्हाड़ पर उड़ग्यो। दिनगै दिनगै बो फेर मिन्दर में आयो अर सारा लोग बिंगै कनै आया। ईंखातर बो बानै बेठगे उपदेस देण लागग्यो। जद यहुदी धरम सासतरी अर फरीसी लोग बेबीचार करण आळी एक लुगाई नै पकड़गे बिनै सारा गै सामणै खड़ी करी, अर यीसू नै केयो, “हे गुरूजी आ लुगाई बेबीचार करती पकड़ीजी है। मूसा गो नेम म्हानै ओ बतावै है कै हिसी लुगाई नै तो पथरां ऊं मारणी चईयै थे इंगै बारै में के केवो हो?” बां बानै फसाण खातर आ बात कैई क्यूंकै बे चावै हा म्हानै कोई गळती मिलै पण यीसू नीचै झुकगे जमीन पर आंगळी ऊं कीं लिखण लागग्यो। क्यूंकै बे यीसू नै बारी बारी पूछण लागरया हा, ईंखातर यीसू सीधो खड़यो होग्यो अर बानै केयो, “थारै माऊं झिकै कदी पाप कोनी करयो बो पेलो पथर मारै।” ओ केगे यीसू दुबारै झुकगे जमीन पर लिखण लागग्यो। जद लोगां ओ सुण्यो तो सारा ऊं पेलां बुडा अर बांगै बाद में जुआन एक एक कर'गे बठूं उड़ग्या। बठै बा लुगाई एकली यीसू गै सामै खड़ी रेई। यीसू खड़यो होयो अर बिं लुगाई नै केयो, “हे बेटी, बे सारा लोग अठुं उड़ग्या के पण कणैई तेरै पर दोस कोनी लगायो।” लुगाई बोली, “हे प्रभु, कणैई दोस कोनी लगायो।” यीसू केयो, “मैं बी तेरै पर दोस कोनी लगाऊं, अर अब फेर कदी पाप ना करी।” फेर यीसू लोगां नै केयो, “संसार गी जोती मैं हूं झिको मेरै लारै चालैगो बो अन्धेरै में कोनी रेवैगो, पण जीवन देण आळी जोती पावैगो।” ईं बात पर फरीसियां बिनै केयो, “तूं आपगी गवाई आप देवै है ईंखातर तेरी गवाई ठीक कोनी।” यीसू बानै उतर दियो, “जे मैं आपगी गवाई आप कानूं देऊं तो बी मेरी गवाई ठीक है क्यूंकै मैं जाणूं हूं कै मैं कठूं आयो हूं अर कठै जाऊं, पण थे लोग ओ कोनी जाणो कै मैं कठूं आयो हूं अर कठै जाऊं। थे दुनिया गै तरियां न्याय करो हो, मैं किंगोई न्याय कोनी करूं। जे मैं न्याय करूं बी तो मेरो न्याय सच्चो हो'सी क्यूंकै मैं एकलो न्याय कोनी करूं पण परमेसर पिता झिकै मनै भेज्यो है बो अर मैं मिलगे न्याय करा हां थारै नेमा में लिखेड़ो है कै दो जणा गी गवाई ठीक होवै है। मैं आपगी गवाई आप देऊं अर मेरी गवाई पिता परमेसर बी देवै झिकै मनै घाल्यो है।” बां बिनै केयो, “तेरो पिता कठै है?” अर यीसू मसी केयो, “थे मनै बी कोनी जाणो अर मेरै पिता नै बी कोनी जाणो। जे मनै जाणता तो थे मेरै पिता नै बी जाणता।” मिन्दर में उपदेस देवंता होया दान पात्र गै कनै बण ऐ बाता कैई पण बिनै कणैई कोनी पकड़यो क्यूंकै दुख झेलगे मरण गो टेम अजे तांई कोनी आयो हो। यीसू बानै एकर फेर केयो मैं उड़ जावूंगा थे लोग मनै ढूंडोगा अर थे आपगै ई पापां में मर ज्योगा, जठै मैं जाऊं बठै थे कोनी आ सको। फेर यहुदी अधिकारी आपसरी में केण लागग्या कै बो अपणै आपनै मार देणो चावै है क्यूंकै बण केयो, “थे बठै कोनी आ सको जठै मैं जाऊं।” बण बानै केयो, “थे लोग नीचै ऊं हो पण मैं परमेसर पिता गै कनूं उपर ऊं आयो हूं। थे दुनिया गी ओर ऊं आएड़ा लोग हो। मैं दुनिया गी ओर ऊं कोनी आयो। ईंखातर मैं थानै केऊं कै थे आपगै पापां में मरोगा। परमेसर गै बचन में इंया लिखेड़ो है कै जे थे बिस्वास ना करोगा कै मैं बो ई हूं तो थे आपगै पापां में मरोगा।” फेर बां यीसू नै पूछयो, “तूं कुण है।” यीसू बानै उतर दियो, “बोई हूं जिंया मैं सुरू में थानै केवंतो आयो हूं।” थारै बारै में मनै भोत कीं केणो अर न्याय करणो है पण मनै भेजण आळो सच्चो है अर झिको कीं बण मनै केयो है बो ई संसार नै केऊं हूं। बे ओ कोनी जाण सक्या कै बो पिता परमेसर गै बारै में केवै है। फेर यीसू केयो, “जद थे मिनख गै बेटै नै करूस पर चढाओगा तो थे जाणोगा कै मैं बोई हूं झिको हूं अर अपणै आप कीं कोनी करूं पण पिता परमेसर झिको कीं मनै सिखायो है बोई मैं बोलूं हूं। अर झिकै मनै भेज्यो है मेरै सागै है बण मनै कदी एकलो कोनी छोड़यो क्यूंकै मैं सदां बो करूं झिको बिनै आच्छो लागै।” यीसू जद ऐ बाता केवै हो तो भोत सारै लोगां बिंगी बातां पर बिस्वास करयो। यहुदी लोग झिका यीसू गी बातां पर बिस्वास राखता हा यीसू बानै केयो, “जे थे मेरै बचन नै मानोगा तो सचमुच मेरा चेला बणोगा।” अर थे सच्चाई नै जाणल्योगा अर बो सच्चो परमेसर थानै गुलामी में बंदेड़ा नै छुड़ा ल्यैगो। जद बां लोगां बिनै केयो, “म्हे तो अबरहाम गै वंस में पैदा होया हां अर कदी किंगैई गुलाम कोनी होया फेर तूं ओ किंया केवै है गुलामी ऊं छुड़ा लेवूंगा।” यीसू बानै उतर दियो, “मैं थानै सच्च सच्च केऊं हूं कै झिको कोई पाप करै है बो पाप गै बस में है। कोई गुलाम सदां परिवार गै सागै कोनी रे सकै पण बेटो सदां थारै सागै रे सकै है। ईंखातर बेटो थानै छुड़ा दैयगो सचमुच थे पाप गै बस माऊं छूट जाओगा। मैं जाणूं हूं कै थे अबरहाम गै वंस माऊं हो तो ई थे मनै मारणो चावो हो क्यूंकै मेरो बचन झिको मैं थानै सिखाऊं बिनै थे मानो कोनी। मैं बो ई केऊं हूं झिको कीं मेरै पिता मनै दिखायो है अर थे बो कीं करो हो झिको थारै पिता ऊं सुण्यो है।” बां बिनै उतर दियो कै म्हे अबरहाम गै वंस गा हां। यीसू बानै केयो, “जे थे लोग अबरहाम गै वंस गा होवंता तो झिको अबरहाम करयो हो बो थे बी करता। झिको साच्चो बचन मैं परमेसर कनूं सुण्यो है बो ई थानै बताऊं हूं पण थे अब मनै मार देणो चावो हो, अबरहाम कदी इयां कोनी करयो हो। पण थे आपगै असली पिता गो काम करो हो फेर बां यीसू नै केयो म्हे गळत संबध ऊं पैदा कोनी होया अर म्हारो एक ई पिता है अर बो परमेसर है।” यीसू बानै उतर दियो, “जे परमेसर थारो पिता होवंतो तो थे मनै प्रेम करता क्यूंकै मैं परमेसर कनूं आयो हूं अर अब मैं अठै हूं मैं आपगी मरजी ऊं कोनी आयो पण परमेसर मनै भेज्यो है। मैं झिको कीं केऊं हूं बिनै थे क्यूं कोनी समझो क्यूंकै थे मेरो बचन मानण खातर तैयार कोनी। थे थारै पिता सैतान गी उळाद हो अर थे थारै पिता गी इच्छा पर चालणो चावो हो। बो तो सुरूं ईं हत्यारो है अर सदां बण परमेसर गै सच्चै बचन गो बिरोध करयो है क्यूंकै बिमै कोई सच्च कोनी है बो झूठ बोलै है क्यूंकै झूठ बोलणो बिंगी आदत है अर बो झूठ बोलण आळा गो बाप है। मैं परमेसर गो सच्चो बचन ई बोलूं हूं। ईंखातर थे मेरो बिस्वास कोनी करो। थारै माऊं कोई बी मनै पापी कोनी बणा सकै। मैं सच बोलूं हूं ईंखातर थानै मेरै पर बिस्वास करणो चईयै। झिको आदमी परमेसर गो है बो परमेसर गो बचन सुणगे बिंगो पालण करै है थे परमेसर गो बचन सुणगे बिंगो पालण कोनी करो क्यूंकै थे परमेसर गा कोनी।” ओ सुणगे यहुदी लोगां बिनै केयो के म्हे ठीक कोनी केयो कै तूं सामरी जिस्यो है अर तेरै में भूत है? यीसू उतर दियो, “मेरै में कोई भूत कोनी पण मैं आपगै पिता परमेसर गो आदर करूं हूं अर थे मेरो आदर कोनी करो। मैं आपगो आदर कोनी चाऊं पण एक तो है झिको चावै है कै लोग मेरो आदर करै अर बो सगळा गो न्याय करण आळो है। मैं थानै साची साची केऊं कै जे कोई मेरै बचन नै मानैगो तो बो कदी कोनी मरैगो।” यहुदी लोगां बिनै केयो कै म्हे जाणग्या हां कै तेरै में ओपरी बडे़ड़ी है क्यूंकै अबरहाम अर परमेसर गी बात बताण आळा कद गा ई मरग्या पण तूं केवै है कै जे कोई मेरै बचन नै मानैगो तो बो कदी कोनी मरै। तूं म्हारै बडेरा अबरहाम ऊं मोटो कोनी झिको मरग्यो अर परमेसर गी बात बताण आळा बी मरग्या फेर तूं के केवै है? तूं है कुण? यीसू उतर दियो, “जे मैं आपगो आदर मान चाऊं तो बो आदर कीं कोनी पण मेरो पिता परमेसर झिकै नै थे थारो परमेसर मानो हो बो ई मेरो आदर मान करै है। थे तो बिनै कोनी जाण्यो पण मैं बिनै जाणूं हूं जे मैं केऊं कै मैं बिनै कोनी जाणूं तो मैं थारी तरियां झूठो मानीजूंगा पण मैं बिनै जाणूं अर बिंगै बचन नै मानूं हूं। मेरै धरती पर आण गै दिन गी आसा रखगे थारो पिता अबरहाम भोत खुस हो। अर बण देख्यो अर खुस होयो।” यहुदी लोगां बिनै केयो तूं अजे पचास सालां गो बी कोनी होयो ईंखातर थे कदी अबरहाम नै कोनी देख्यो। यीसू बानै केयो, “मैं साची साची केऊं कै अबरहाम गै पैदा होण ऊं पेलां बी मैं हूं।” जद बां यीसू नै मारण खातर दगड़ चकलिया पण यीसू लुकतो लुकतो मिन्दर माऊं टप ग्यो। फेर यीसू रा में जावंता टेम जन्म ऊं एक आंधै आदमी नै देख्यो। जद यीसू गा चेला यीसू नै केयो, “हे गुरूजी, ओ आदमी आपगै पापां ऊं आंधो पैदा होयो है या आपगै मां बाप गै पापां ऊं?” यीसू उतर दियो, “ना तो इंगै मां बाप पाप करयो है अर ना अण खुद। पण ओ ईंखातर आंधो पैदा होयो कै लोग बिंगै जीवन में परमेसर गै चमत्कार नै देख सकै। मेरै भेजण आळै गा काम ऐ है कै आपां बिंगा काम दिन में ई पूरा करणा जरूरी है क्यूंकै रात आण आळी है झिकै मैं आपां कोई काम कोनी कर सकां।” यीसू केयो, “जद मैं संसार में हूं, मैं संसार गी जोती हूं।” इतो केगे यीसू धरती पर थूक्यो अर माटी में कर'गे बिंगी आंख्या पर लगा दियो। यीसू बिनै केयो, “अब तूं सीलोह गै कुण्ड गै कनै जा अर आपगी आंख्यां धो ले,” फेर बण जा'गे आपगी आंख्यां धो ली अर अब देखतो होयो पाछो आयो (सीलोह गो मतलब है भेजेड़ो)। जद बिंगै पड़ोसी अर झिका बिनै भीख मांगता देख्यो हो केण लागग्या, “मनै तो इयां लागै है कै ओ बो ई है झिको पेलां बेठगे भीख मांगतो हो।” कीं लोगां केयो, “ओ बो ई है,” अर केईयां केयो, “ओ बो कोनी पण बिंगै बरगो है जद बण आंधै आदमी केयो मैं बोई हूं।” जद बे बिनै पूछण लागग्या तनै दिखण किंया लागग्यो? बण उतर दियो, “यीसू नाम गो एक आदमी मनै आपगै थूक ऊं माटी गीली कर'गे मेरी आंख्या पर लगाई अर मनै केयो जा'गे सीलोह कुण्ड में धो ले। मैं जा'गे आपगी आंख्यां धोई अर मनै दिखण लागग्यो।” फेर लोग बिनै पूछयो, “बो कठै है बण उतर दियो मनै ठा कोनी।” जद लोग बिनै झिको पेलां आंधो हो कीं फरीसियां कनै ले आया। बिं दिन यीसू माटी गीली कर'गे बिंगी आंख्या खोली ही बो सब्त गो दिन हो। ईंखातर फरीसियां बिनै पूछयो तनै किंया दिखण लागग्यो। बण बानै केयो, बण माटी गीली कर'गे मेरी आंख्या गै लगाई अर फेर मैं धो ली जद मनै दिखण लागग्यो। कीं फरीसी केण लागग्या, “ओ आदमी परमेसर गी ओर ऊं कोनी क्यूंकै ओ सब्त गै दिन गो पालण कोनी करै।” कीं केण लागग्या, “कोई पापी आदमी हिस्या चमत्कार जमाई कोनी कर सकै हो।” ईं तरियां बामै फूट पड़गी। फेर बां बिं आंधै आदमी नै झिको ठीक होयो बिनै केयो, “तेरी आंख्या ठीक करण आळै गै बारै में तूं के केवै?” जद बण केयो, “बो एक परमेसर गी बात बताण आळो है।” यहुदी अधिकारी बिंगै मां बाप नै बुला'गे पूछयो जद तांई बिं पर बिस्वास कोनी करयो कै बो आदमी आंधो हो अर बिनै आंख्या ऊं दिखण लागग्यो। बां बिंगै मां बाप नै बुला'गे पूछयो कै, “ओ थारो बेटो है के?” ओ जामतो ई आंधो पैदा होयो हो के? अर अब इनै किंया दिखण लागग्यो है? बिंगै मां बाप उतर दियो, “म्हे तो जाणा हां कै म्हारो बेटो है अर आंधो पैदा होयो हो।” म्हे ओ कोनी जाणा कै ओ अब किंया देखै अर ना म्हे ओ जाणा कै इंगी आख्यां कण ठीक करी है। इनै आपनै पूछो, क्यूंकै ओ अब सयाणो है अर आपगै बारै में ओ आप बता सकै है। बिंगै मां बाप आ बात ईंखातर कैई क्यूंकै बे यहुदी अधिकारियां ऊं डरता हा क्यूंकै बां ईं पर पेलां ई सेहमती बणा ली कै झिको कोई यीसू नै मसी मानै तो बिनै सतसंग घर ऊं बारै काड़ देवांगा। ईं कारण बिंगै मा बाप केयो कै बिनै आपनै पूछ ल्यो क्यूंकै बो सयाणो है। जद बां ठीक होएड़ै आदमी नै दूसर बुला'गे बिनै केयो, “परमेसर गै सामणै सच्च बोल क्यूंकै म्हे तो जाणा हां कै बो एक पापी आदमी है।” बण उतर दियो कै मैं कोनी जाणू पापी है या कोनी मनै तो इतो ठा है कै पेलां मनै दिखै कोनी हो पण अब मैं देख सकूं हूं। बां बिनै फेर केयो तेरै सागै बण के करयो। तेरी आंख्या किंया खुली? बण बानै केयो, “मैं थानै साची बता दियो है अर थे सुण्यो बी है, अब दुसर क्यूं सुणनो चावो हो के थे बी बिंगा चेला बणना चावो हो?” ईं पर बां बिनै धमकायो अर केयो तूं ई बिंगो चेलो है म्हे तो मूसा गा चेला हां। म्हे जाणा हां कै परमेसर मूसा सागै बात करी ही पण म्हे कोनी जाणा ओ आदमी कठूं आयो है। बण उतर दियो, “अण मेरी आंख्या ठीक कर दी थे लोग फेर बी कोनी मानो कै ओ कठूं आयो है। आ अचंभै गी बात है। आपां जाणा हां कै परमेसर पापियां गी बात कोनी सुणै पण जे कोई परमेसर नै आदर कर'गे बिंगी इच्छा पूरी करण आळो है तो बो बिंगी सुणै है। कणैई अजे तांई कोनी सुण्यो कै कणैई कोई जन्म ऊं आंधै गी आंख्या खोल दी होवै। जे ओ आदमी परमेसर कनूं कोनी आएड़ो होवै तो बो कीं कोनी कर सकै।” बां बिनै उतर दियो, “तूं पाप ऊं पैदा होयो है तनै म्हानै सिखाण गो अधिकार कोनी है। ईं तरियां यहुदी अधिकारियां बिनै सतसंग घर ऊं बारै काड़ दियो।” यीसू सुण्यो कै बां बिनै सतसंग घर ऊं बारै काड़ दियो है जद यीसू गी मुलाकात बिंगै सागै होई तो बण केयो कै तूं परमेसर गै बेटै पर बिस्वास करै है के? बण उतर दियो, “हे गुरूजी बो कुण है कै मैं बिं पर बिस्वास करूं।” यीसू बिनै उतर दियो, “तूं बिनै देख लियो है अर बो ई है झिकै गै सागै तूं अब बात करण लागरयो है।” बण केयो, “हे गुरूजी मैं बिस्वास करूं हूं अर बिनै प्रणाम करयो।” यीसू केयो, “मैं ईं संसार में फेंसलो करण आयो हूं कै बे झिका कोनी देखै बे देखण लाग जावै अर बे झिका देखण लागरया है बे आंधा हो जावै।” कीं फरीसी झिका यीसू गै सागै हा ओ सुणगे यीसू नै केयो, “सच्च में म्हे बी आंधा हां के?” यीसू बानै केयो, “थे आंधा होवंता तो परमेसर थारै पाप नै माफ करै देवंतो पण थे तो बोलो हो कै म्हे देखा हां ईंखातर थारै पापां नै परमेसर माफ कोनी कर सकै।” फेर यीसू केयो, “मैं साची साची केऊं जे कोई भेड़ा गै बाडै़ में जाणो होवै तो बारनै गै माखर जाणो चईयै पण जे कोई ओर रा ऊं चढ गे जावै है तो बो चोर अर डाकू है। पण झिको भेड़ां गो गुआळियो है बो बारनै गै माखर ई जावै है अर भेड़ा गो चोकीदार बिंगै खातर बारनो खोल देवै है अर बो भेड़ा गो नाम लेगे बुलावै है अर भेड़ा बिंगी आवाज सुणगे बिनै पिछाण लेवै है अर बो बानै चराण खातर बारै ले जावै है। जद बो आपगी भेड़ा नै बारै ले जावै है तो बो बांगै आगै आगै चालै है अर सारी भेड़ा बिंगै लारै लारै चालै है क्यूंकै बे बिंगी आवाज पिछाण है। भेड़ा कोई अणजाण गी आवाज सुणगे बारै कोनी आवै बे बिंऊं दूर भाज ज्यै क्यूंकै बे बिंगी आवाज कोनी पिछाणै।” यीसू बानै आ एक मिसाल दी पण बे कोनी समझया। ईंखातर यीसू बानै फेर केयो, “मैं थानै साची साची केऊं भेड़ा गो बारनो मैं हूं। अर मेरै ऊं पेलां जिता झूठा गुआळिया आया बे सारा चोर अर डाकू हा। ईंखातर मेरी भेड़ा बांगी आवाज कोनी सुणी। मैं बारनो हूं। जे कोई मेरै द्वारा अन्दर जावैगो तो बो मुकती पावैगो अर बो अन्दर आ सकैगो अर बारै बी जा सकैगो। अर झिकी बिनै जरूरत है बा बिनै मिलैगी। चोर एकलो चोरी करण कोनी पण मारणै अर खत्म करण खातर ई आवै है पण मैं जीवन देण खातर आयो हूं। मैं झिको जीवन देऊं हूं बो भरपूर अर आच्छो है। आच्छो गुआळियो मैं हूं। आच्छो गुआळियो आपगी भेड़ा नै बचाण खातर आपगी जान बी दे देवै है। झिको गुआळियो पीसा लेगे भेड़ा गी रुखाळी करै है बो ना तो गुआळियो है अर ना बांगो मालिक है। बे जंगळी भेड़िय नै आवंता देखगे, भेड़ा नै छोड़गे भाज जावै है अर जंगळी भेड़ियै बानै पकड़गे अर इनै बिनै कर देवै है। पण झिको पीसा लेगे भेड़ा गी देखभाल करै है बो आच्छो गुआळियो कोनी है अर बो भेड़ा नै आपगी कोनी समझै। पण भेड़ा गी आच्छी देखभाल करण आळो गुआळियो मैं ईं हूं। जिंया मेरो पिता मनै जाणै बिंया मैं बी आपगी भेड़ा नै जाणू हूं अर मेरी भेड़ा नै बचाण खातर में आपगी जान बी दे देऊं हूं। मेरी ओर बी भेड़ा है झिकी ईं भेड़ा गै बाडै़ में कोनी बानै बी ईं बाडै़ में लेगे आणो जरूरी है। बे मेरी आवाज सुणैगी अर ईं बाडै़ में आ'गे एक ई भेड़ा गो माल अर एक ई गुआळियो हो'सी। मैं आपगी जान देऊं हूं कै मैं फेर ऊं जींवंतो हो जाऊं, ईंखातर मेरो बाप मेरूं प्रेम राखै है। मेरी जान कोई लेवै कोनी पण मैं अपणै आप इनै आपगी इच्छा ऊं बिनै देऊं हूं। मेरै कनै इनै देण गो अधिकार है अर पाछी लेण गो बी अधिकार है। ओ आदेस मेरै पिता परमेसर दियो है।” आं बाता गै कारण यहुदियां में एकर फेर फूट पड़गी। बामूं भोत सारा केण लागग्या इमै भूत है अर ओ पागल है। आपां नै बिंगी बात सुणनी नई चईयै। दूसरा केण लागग्या कोई भूत किंगी आंख कोनी खोल सकै अर ऐ बाता कोई हिस्यो आदमी कोनी कर सकै झिकै में भूत होवै। फेर यरुसलेम में समरपण गो त्यूंहार हो। ऐ ठण्ड गा दिन हा। यीसू मिन्दर में सुलेमान गै बरामदा में घुमण लागरया हा। जद यहुदियां बिनै घेर लियो अर केयो, “तूं म्हानै कद तांई बेम में राखैगो, जे तूं मसी है तो साफ साफ बता दे।” यीसू बानै उतर दियो कै, “मैं पेलां ईं थानै के दियो है कै मैं बो ई हूं। पण थे लोग मेरै केण पर बिस्वास कोनी करो अर मेरै पिता गै देएड़ै अधिकार ऊं झिकै चमत्कारा गो काम करूं हूं बे ई मेरी गवाई देवै है कै मैं बो ई हूं। क्यूंकै थे मेरी भेड़ा मू कोनी हो ईंखातर थे लोग बिस्वास कोनी करो। मेरी भेड़ा मेरी आवाज पिछाणै है अर बानै मैं पिछाणु हूं अर बे मेरै लारै चालै है। मैं बानै अनन्त जीवन देऊं हूं। परमेसर बांगै पापां गी सजा कोनी देवैगो। मेरै रेवड़ मू बानै कोई ओर ले कोनी सकैगो। मेरै पिता झिकी भेड़ा मनै दी है बो सारा ऊं मोटो है। अर मेरै पिता कनूं बानै कोई खोस कोनी सकै। मेरो पिता अर मैं एक ई हां।” फेर यहुदियां यीसू नै मारण खातर पथर चक्या। यीसू बानै केयो, “पिता गी सकती ऊं मैं थानै किता आच्छा आच्छा काम दिखाया है। बामूं किसै काम खातर मनै पथर मारो हो?” यहुदियां बिनै उतर दियो, “कोई भलै काम खातर म्हे तेरै पथर कोनी मारा पण तूं झिको केवै है बिंऊं तूं परमेसर गी बेजती करै है तूं एक आदमी होगे अपणै आपनै परमेसर बतावै है।” यीसू उतर दियो कै थारै पवितर सासतर में कोनी लिखेड़ो के, “मैं केयो थे सारा ईस्वर हो?” म्हानै ठा है कै परमेसर गै बचन में झिको लिखेड़ो है कदी झूठ कोनी होवै अर झिकै लोगां नै परमेसर गो बचन दियो गेयो बानै बण ईस्वर केयो अर पिता परमेसर बांगै काम गै खातर मनै पवितर कर'गे संसार में भेज्यो है। ईंखातर मैं केयो, “मैं परमेसर गो बेटो हूं।” अर जद मैं इंया केऊं हूं तो थे क्यूं बोलो हो कै मैं परमेसर गी बेजती करूं हूं। जे मैं मेरै बाप गा काम कोनी करूं तो मेरो बिस्वास ना करो। पण जे मैं पिता गो काम करूं हूं तो चायै थे मेरै उपर बिस्वास ना बी करो, पण मैं झिका चमत्कार गा काम करया है बां पर तो बिस्वास करो। जद थे जाणोगा अर समझोगा कै पिता मेरै में है अर मैं पिता में हूं। जद यहुदियां बिनै बन्दी बणाण गी कोसिस करी पण बे बिनै पकड़ कोनी सक्या अर बो बांगै हात ऊं निकळग्यो। यीसू फेर यरदन नदी गै दूसरै पासै उड़ग्यो जठै पेलां यूहना बतिस्मो देवंतो हो, यीसू बठै ई रेयो। अर भोत लोग यीसू गै कनै आ'गे आपसरी में बात करता हा कै यूहना बतिस्मो देण आळो तो कदी चमत्कार कोनी दिखाया पण ईं आदमी गै बारै में बण झिको बतायो हो बो सारो सच्च है। अर बठै भोत सारा यीसू पर बिस्वास करयो। बैतनिय्याह गाम गो एक लाजर नाम गो आदमी बीमार हो। ओ बो ई गाम हो जठै बिंगी भेन मरियम अर मारथा रेवंती ही। मरियम बा लुगाई ही झिकी यीसू गै पगां पर सेंट लगागे आपगै बाळा ऊं बिंगा पग पूंछया हा। बीमार लाजर इंगो भाई हो। आं दोना भेनां यीसू नै समाचार भेज्यो, हे गुरूजी, झिकै ऊं तूं प्रेम करै है, बो बीमार है। ओ सुणगे यीसू केयो, “ओ रोग मरण खातर कोनी ओ परमेसर गै आदर मान खातर है अर ईं बीमार ऊं ई परमेसर आपगै बेटै नै बी आदर मान दिरावैगो।” यीसू मारथा अर बिंगी भेन मरियम अर लाजर नै प्रेम करतो हो। फेर बी जद यीसू नै पतो लागग्यो कै लाजर बीमार है तो जठै बो रुक्यो हो बठै दो दिन ओर रुकग्यो। फेर यीसू आपगै चेला नै केयो आओ आपां यहुदियां परदेस पाछा चालां। ईं पर बिंगै चेला बिनै केयो, “हे गुरूजी केई दिन पेलां यहुदी अधिकारियां तेरै पर पथर मारण गी कोसिस करी ही अर तूं फेर बठै ई जाण लागरयो है।” यीसू उतर दियो, “दिन में बारा घंटा होवै है। जे कोई आदमी दिन गै चानणै में चालै तो बो ठोकर कोनी खावै क्यूंकै बो संसार गै चानणै में चालै है। जे कोई रात में चालै तो बो ठोकर खावै है क्यूंकै बिमै चानणो कोनी है।” ओ केणै गै बाद चेला नै केयो, “आपणो मित्र लाजर सोग्यो है पण मैं बिनै जगाण खातर जाऊं हूं।” फेर चेला बिनै केयो, “हे गुरूजी, जे बिनै नींद आ'गी है तो बो जाग जावैगो।” यीसू लाजर गी मोत गै बारै में चेला नै केवै हो पण चेला समझया कै नींद गै बारै में केवै है। ईंखातर यीसू चेला नै साफ साफ बतायो कै लाजर मरग्यो है। मैं खुस हूं कै मैं बठै कोनी हो क्यूंकै जे मैं बठै होवंतो तो लाजर ना मरतो अर थे ओ चमत्कार ना देखता अर ना मेरै उपर बिस्वास करता। फेर थोमा झिको दिदिमोस कुहावंतो हो बण दूसरै चेला नै केयो आओ आपां बी प्रभु गै सागै बठै चाला कै आपां बी बिंगै सागै मर सकां। बठै जा'गे यीसू नै पतो लागग्यो कै लाजर नै कबर में रख्या चार दिन हो'ग्या। बैतानिय्याह गाम यरुसलेम ऊं लगभग तीन किलोमीटर दूर हो। भाई गै मरण पर मारथा अर मरियम गो होंसलो बधाण खातर केई यहुदी लोग आएड़ा हा। अर मारथा नै पतो लागग्यो कै यीसू आयो है तो बा बिनै मिलण गेई जद मरियम घर में ई रेई। मारथा यीसू नै केयो, “जे तूं अठै होवंतो तो मेरो भाई ना मरतो। पण मैं अब बी जाणूं कै तूं झिको कीं परमेसर कनूं मांगैगो बो तनै देवैगो।” यीसू बिनै केयो, “तेरो भाई जी उठैगो।” मारथा बिनै केयो, “मैं जाणूं हूं आखरी दिन जी उठण गो टेम आवैगो बिं टेम बो जी उठैगो।” यीसू बिनै केयो, “लोगां नै जीवंता करण आळो अर अनन्त जीवन देण आळो मैं ईं हूं। अर झिको जींवंतो है अर मेरै उपर बिस्वास करै है बो कदी कोनी मरैगो। तूं ईं बात पर बिस्वास करै है के?” बण यीसू नै उतर दियो, “हां गुरूजी, मैं बिस्वास करूं हूं कै तूं मसी है झिको परमेसर गो बेटो ईं संसार में आण आळो है।” यीसू अजे तांई गाम में कोनी पूग्यो हो अजे बठैई हो जठै मारथा बिंगै सागै बात करी ही। जद मारथा बेगी बेगी बठूं उड़गी अर आपगी भेन मरियम नै होळैसी बुला'गे केयो गुरूजी अठै ई है अर तनै बुलावै है। आ बात सुणतांई बा बेगी बेगी यीसू कनै आई। फेर झिका यहुदी बिनै होंसलो देण खातर घरे आएड़ा हा बां मरियम नै बारै जावंता देख ली अर सोचण लागग्या आ कबर पर रोण करण खातर जावै है ओ सोचगे बिंगै लारै हो'ग्या। मरियम जद बठै पुगी जठै यीसू हो तो बिंगै पगां पड़गी अर केयो जे थे अठै होवंता तो मेरो भाई ना मरतो। यीसू जद बिनै अर बिंगै सागै आएड़ै यहुदियां नै रोवंता देख्या तो बिंगी आत्मा भोत दुखी होगी। यीसू केयो, “थे बिनै कठै रख्यो है?” बां बिनै केयो, “आ अर देख ले।” यीसू गी आंख्या में आंसू आ ग्या। जद यहुदी केण लागग्या देखो बो बिंऊ कितो प्रेम करतो हो। पण बामूं कीं लोगां केयो, “बण आंधा गी आंख्या ठीक कर दी, यीसू कनै लाजर नै ठीक करण गी सकती कोनी है के?” जद यीसू आपगै मन में एकर ओर भोत दुखी होयो अर कबर कानी गेयो। बा एक गुफा ही अर बिंगै मूं गै आ'गै एक मोटो पथर लागेड़ो हो। यीसू केयो, “ईं पथर नै आगूं पासै करो। मरेड़ै गी भेन मारथा केयो, हे गुरूजी अब तांई तो बठै गिंध आण लागगी होवैगी क्यूंकै बिनै मरया चार दिन हो'ग्या।” यीसू बिनै केयो, “मैं तनै केयो है कै जे तूं बिस्वास करैगी तो तूं परमेसर गी बडाई देखैगी।” जद बां बिं पथर नै पासै कर दियो अर यीसू आपगी आंख्या उपर कर'गे केयो, “हे पिता मैं थारो धन्यवाद करूं हूं कै थे मेरी सुण ली है।” मैं जाणूं हूं कै थे सदां मेरी सुणो हो पण झिकी भीड़ च्यारूंमेर खड़ी है बिंगै खातर इंया बोलूं हूं कै सारा झिका अठै खड़या है बिस्वास करै कै थे मनै भेज्यो है। ओ केगे बण ऊंची आवाज में केयो, “हे लाजर बारै आ जा।” बो आदमी झिको मरग्यो हो, बारै निकळ आयो बिंगा हात पग अजे तांई कफण ऊं बांदेड़ा हा, बिंगो मूं कपड़ा ऊं पळेटेड़ो हो। यीसू लोगां नै केयो इंगो कफण खोल दैयो अर जाण दैयो। जद झिका यहुदी लोग मरियम कनै आएड़ा हा अर बिंगो ओ काम देख्यो बामूं भोत सारा बिं पर बिस्वास करयो। पण बामूं कीं लोग फरीसियां गै कनै गेया अर झिको यीसू करयो हो बानै बतायो। फेर महा याजक अर फरीसियां यहुदियां गी एक मोटी पंचायत बुलाई अर केयो आपां नै के करणो चईयै ओ आदमी भोत सारा चमत्कार दिखाण लागरयो है। जे आपां बिनै इंयाई करता रेण दियो तो सारा लोग बिनै मसी मान लेवैगा अर रोमी लोग आ'गे आपणै मिन्दर अर देस पर कब्जो कर लेवैगा। काईफा नाम गो बिं टेम गै महा याजक केयो थे लोग कीं कोनी जाणो। अर आपणै देस गै सारै लोगां नै रोमी सरकार गै हाता ऊं बचाण खातर आपणै खातर एक आदमी गो मरणो आच्छो है। आ बात थानै समझणी चईयै। आ बात बण आपगी ओर ऊं कोनी कैई ही पण बो बिं टेम गो महा याजक हो बण परमेसर गी बात करी ही कै यीसू लोगां खातर मरैगो। अर एकलो यहुदी लोगां खातर कोनी पण सारै संसार गा जिता बी परमेसर गै उपर बिस्वास राखण आळा लोग रेवै है बानै सारा नै भेळा करण गै खातर बो मरण आळो है। पण बिं दिन ऊं बे यीसू नै मारण गी योजना बणाण लागग्या। ईंखातर यीसू यहुदियां गै बिचाळै सारा गै सामै कोनी घुमयो अर यरुसलेम छोड़गे बन उजाड़ गै कनै इफ्राईम नगर में जा'गे चेला गै सागै रेण लागग्यो। यहुदियां गै फसह गो त्यूंहार आण आळो हो अर भोत सारा लोग आप आपणै गाम ऊं यरुसलेम कानी आवै हा कै बे फसह गै त्यूंहार ऊं पेलां अपणै आपनै सुद्ध कर लेवै। फेर मुख्य याजकां अर फरीसियां ओ आदेस दियो कै जे किनैई ठा है कै यीसू अठै है तो आ'गे म्हानै बतावै कै म्हे बिनै पकड़ सकां। ईंखातर लोग यीसू नै ढूंडण लागरया हा अर मिन्दर में खड़या होगे आपसरी में केवा हा कै थानै के लागै यीसू ईं त्यूंहार में आवैगो के? फसह गै त्यूंहार ऊं छ दिन पेलां यीसू बैतनिय्याह गाम ऊं चाल पड़यो। बठै लाजर रेवंतो हो झिकै नै यीसू मरेड़ा मू जींवंतो करयो हो। बठै यीसू गै आदर गै खातर आथण गी रोटी तैयार करी अर मारथा रोटी घाल दैय है अर लाजर बी बांगै सागै रोटी खाण बेठ ग्यो। जद मरियम जटामांसी ऊं बणाएड़ी आदै किलै गी भोत मेंगी सेंट यीसू गै पगां पर लगायो अर आपगै बाळा ऊं बिंगा पग पूंछया जद बिं सेंट गी सुरम सारै घर में होगी। जद बिंगै चेला मू एक यहूदा इस्करियोति झिको बिनै धोखो देण आळो हो। बण केयो ईं सेंट गो मोल लगभग एक साल गी मजदूरी गै बराबर है इनै बेचगे पीसा कंगाला नै देणा चईयै। बण आ बात ईंखातर कोनी कैई ही कै बो कंगाला गी चिंता करतो हो पण बो तो खुद चोर हो अर पीसां गी थेली बिंगै कनै रेवंती ही अर बिमै झिको कीं घालतो बिमुं कीं चोरी ऊं काड़ लेवंतो हो। यीसू केयो, “बिनै तंग ना करो क्यूंकै बण मेरो सरीर दफण करण ऊं पेलां सेंट लगागे तैयार करयो है। क्यूंकै कंगाल तो थारै सागै सदां रेवैगा पण मैं थारै सागै सदां कोनी रेऊंगा।” जद फसह गो त्यूंहार मानण खातर आएड़ा यहुदी लोग जाणग्या कै यीसू बैतनिय्याह गाम में है। ईंखातर बठै गेया अर एकलै यीसू नै कोनी पण झिकै लाजर नै बण मरेडै़ नै जींवंतो करयो हो बिनै बी देखण आया हा। ईंखातर मुख्य याजकां लाजर नै बी मारण गी योजना बणाई ही। क्यूंकै बिंगै कारण भोत सारा यहुदी लोग आपगै अधिकारियां नै छोड़गे यीसू पर बिस्वास करण लागग्या हा। फेर दूसरै दिन फसह गो त्यूंहार मनाण आएड़ा भोत लोग सुण्यो कै यीसू यरुसलेम में आण लागरयो है। ईंखातर बां खजूर गी डाळियां लेगे मिलण खातर चाल पड़या अर ऊंची आवाज में बोलण लागरया, “होसना!” “धन्य है बो झिको प्रभु गै नाम ऊं आवै है!” “बो झिको इसराएल गो राजा है!” जद यीसू नै एक गधै गो बच्चों दिख्यो अर बो बिं पर बेठगे जाण लागग्यो अर परमेसर गै बचन में जिंया लिख्यो हो बो पूरो होयो, जिंया कै पवितर सासतर में लिख्यो है कै, “यरुसलेम गा लोगो, ना डरो। पण देखो थारो राजा गधियै गै बच्चै पर बेठगे थारै सामणै आण लागरयो है।” जद ऐ बातां चेला गै कीं समझ कोनी आई पण यीसू गै जी उठण गै बाद जद पिता परमेसर गै कनै सुरग में उड़ग्यो जद बानै याद आई अर समझया कै ऐ बातां बिंगै बारै में लिखेड़ी ही। लोग इंया कर'गे परमेसर गै बचन में झिको लिख्यो हो बिनै पूरो करयो हो। जद यीसू लाजर नै कबर मू बुला'गे मरेड़ा मू जींवंतो करयो हो जद भीड़ मू झिका बिंगै सागै बठै हा, बां बिंगै करेडै़ चमत्कार गै बारै में दूसरा नै बतायो। ईं कारण लोग बिंऊं बाता करण नै आया हा क्यूंकै बां सुण्यो हो कै बण ओ चमत्कार करयो है। जद फरीसी आपस में केण लागग्या, “सोचो थे लोग कीं कोनी कर सक्या, देखो सारा लोग बिंगै लारै हो'ग्या है।” फसह गै त्यूंहार में झिका आराधना करण आया हा बामै कीं लोग गेर यहुदी हा। बे गलील परदेस बेतसैदा गाम में रेण आळै फिलिप्पुस कनै गेया अर बिनै बिनती करी महोदय, म्हे यीसू गो दरसण करणो चावा हां। फेर फिलिप्पुस अन्द्रियास नै आ'गे बतायो अर फेर अन्द्रियास अर फिलिप्पुस यीसू कनै आ'गे केयो। यीसू बानै उतर दियो, मिनख गै बेटै नै आदर मिलण गो टेम आ'ग्यो। मैं तनै साची केऊं कै जद तांई कणक गो दाणो धरती गै मा जा'गे मर कोनी जावै जद तांईं बो एकलो रेवै है। जद बो मर जावै है तो भोत सारा दाणा नै जन्म देवै है बिंयाई जद मैं मरूंगा तो भोत लोगां नै अनन्त जीवन मिलैगो। झिको कोई आपगै प्राण नै प्यारो जाणै है बिनै अनन्त जीवन कोनी मिलैगो पण झिको ईं संसार में आपगै प्राणा ऊं बोळो प्रेम मेरै उपर राखै है बिनै अनन्त जीवन मिलैगो। जे कोई मेरी सेवा करै तो बो मेरै लारै हो जावै अर जठै मैं हूं बठै मेरो सेवक बी होवैगो। जे कोई मेरी सेवा करै तो पिता बिंगो आदर करैगो। अब मेरो जी घबराण लागरयो है। मैं के केऊं, “हे पिता, मनै दुख गी ईं घड़ी ऊं बचा, मैं ओ के कोनी सकूं, क्यूंकै ओ दुख सेण खातर मैं ईं संसार में आयो हूं। हे पिता थे किता म्हान हो कै लोगां नै दिखाओ। जद परमेसर सुरग ऊं बोल्यो अर लोगां नै सुणीज्यो कै पेलां बी दिखा दियो है कै मैं कितो म्हान हूं अर फेर बी दिखाऊंगा।” जद बठै खड़या लोग सुणै हा, बां केयो कै बादळ गरजयो है। दूसरां केयो, कोई सुरगदूत बिनै बोल्यो है। जद यीसू केयो, “आ आवाज मेरै खातर कोनी पण थारै फायदै खातर है। अब ईं संसार गै लोगां गो न्याय करण गो टेम आ'ग्यो है अर अब संसार गै लोगां गै उपर राज करण आळी सैतान गी सकती नै परमेसर नास करैगो। जद मनै मारण खातर धरती ऊं करूस पर चढायो जावैगो तो मेरै उपर बिस्वास राखण आळा सारै लोगां नै मैं आपगै कनै ले आऊंगा।” बो ओ बताणो चावै है कै मैं हिसी मोत मरूंगा। ईं पर लोगां बिनै केयो, “परमेसर गै बचन ऊं म्हानै ठा लागै है कै मसी कदी कोनी मरैगो। फेर तूं क्यामी केवै है कै मिनख गै बेटै नै मारण खातर करूस पर चढायो जाणो जरूरी है तो फेर ओ मिनख गो बेटो कुण है?” यीसू बानै केयो, “मैं थारै खातर एक जोती हूं अर अब थोड़ी देर तांई मैं थारै सागै रेण आळो हूं। बिंगै बाद थे अंधेरै में चालण जिसा बण जावोगा अर झिको अंधेरै में चालै है। बो कोनी जाणै कै किनै जावै है। ईंखातर जद तांई मैं थारै सागै हूं जद तांई थे जोती में चालण आळा बणो। जद तांई जोती थारै सागै है बिमै बिस्वास राखो कै थे लोग जोती गी उळाद हो सको।” यीसू इतो केगे उड़ग्यो अर बांगी आंख्या गै आगै ऊं दूर रेयो। बण बांगै सामै इता चमत्कार दिखाया तो बी बां बिं पर बिस्वास कोनी करयो। ओ सारो कीं बिं तरियां जिंया यसयाह परमेसर गी बात बताण आळा गी किताब में लिखेड़ो हो, “प्रभु म्हारै संदेस पर कुण बिस्वास करयो है अर प्रभु गी सकती कण देखी है?” ईं कारण बे बिस्वास कोनी कर सक्या क्यूंकै यसयाह फेर केयो हो, परमेसर बांगी आंख्या आंधी कर दी अर बांगो मन कठोर कर दियो। ईंखातर बांगी आंख्या देख कोनी सकै अर बांगा दिल समझ कोनी सकै अर मैं बानै ठीक करूं पण बे मेरै कनै आ कोनी सकै। यसयाह ओ ईंखातर केयो हो कै बण यीसू मसी गी मेमां देखी ही अर बिंगै बारै में बात बी कैई ही। फेर बी यहुदी अधिकारियां मू भोत लोग बिं पर बिस्वास करयो। बे फरीसियों ऊं डरता हा। ईंखातर बां खुलै तोर पर घोसणा कोनी करी क्यूंकै बानै डर हो कै कठैई म्हानै सतसंग घर ऊं बारै ना काड़ दैय। बानै आदमियां गो आदर परमेसर गै आदर ऊं ज्यादा आच्छो लागतो हो। यीसू ऊंची आवाज में केयो झिको मेरै पर बिस्वास करै है बो मेरै पर ई कोनी पण मेरै भेजण आळै पर बी बिस्वास करै है। झिको मनै देखै है मेरै घालण आळै नै बी देखै है। मैं संसार में जोती गै रूप में आयो कै हर बो आदमी झिको मेरै पर बिस्वास राखै है अंधेरै में ना रेवै। जे कोई मेरी बातां सुणगे बांगो पालण कोनी करै तो मैं बिनै गुनहेगार कोनी बणाऊं क्यूंकै मैं संसार नै गुनहेगार बणागे फेंसलो करण कोनी आयो पण संसार नै मुकती देण खातर आयो। झिको मनै अर मेरी बाता नै तुछ मानै बिंगो फेंसलो करण आळो मेरो बचन है झिकै गो उपदेस मैं थानै दियो है। परमेसर लोगां गो फेंसलो करण गै दिन मेरो बचन बांगो फेंसलो करैगो। क्यूंकै मैं आपगै कनूं कोनी केयो पण पिता झिकै मनै भेज्यो है अर उपदेस दियो है कै मैं के केणो है अर मैं के बताणो है। मैं जाणूं हूं कै बिंगी आग्या अनन्त जीवन देण आळी है। ईंखातर मैं झिको बोलूं हूं बो जिंया पिता मनै केयो है बिंयाई बोलूं हूं। संसार में झिका बिंगा चेला बिंगी आग्या मानता हा बानै यीसू भोत प्रेम करतो हो, अर अंत तांई बिंयाई प्रेम करतो रेयो। जद फसह गै त्यूंहार ऊं पेलां बण जाण लियो कै संसार छोड़गे पिता परमेसर गै कनै जाण गो टेम आ'ग्यो है। जद यीसू अर बिंगा चेला आथण गी रोटी खावै हा अर सैतान समौन गै बेटै यहूदा इस्करियोति गै मन में बात घाल दी कै बो यीसू नै दुसमण गै हात में पकड़वावैगो। यीसू ओ जाण गे कै पिता सारी बाता पर अधिकार बिंगै हात में दे दियो है अर बो परमेसर कनूं आयो है अर परमेसर गै कनैई पाछो जाण लागरयो है। ईंखातर बो रोटी छोड़गे खड़यो हो'ग्यो। बण उपर पेरेड़ा गाबा उतार दिया। अर साफो लेगे आपगी कड़तू बांध ली। जद एक बठळ में पाणी घालगे चेला गा पग धोया अर झिको साफो आपगी कड़तू गै बांदयो हो। बिंऊं पूछण लागग्यो। फेर जद बो समौन पतरस कनै पूग्यो, पतरस बिनै केयो, “प्रभु के थे मेरा पग धोवोगा?” यीसू बिनै उतर दियो, “झिको मैं करूं हूं तूं बिनै अब कोनी जाणै पण इंगै बाद में समझैगो।” पतरस बिनै केयो, “थानै मेरा पग कदी धोणा कोनी चईयै।” ओ सुणगे यीसू बिनै केयो, “जे मैं तनै ना धोऊं तो तूं मेरो चेलो कोनी बण सकै।” जद समौन पतरस बिनै केयो, “प्रभु फेर तो एकला पग ई कोनी पण मेरा हात अर सिर बी धो दे।” यीसू बिनै केयो, “झिको नहा लियो है बिनै आपगै पगां गै सिवाय ओर कीं बी धोण गी जरूरत कोनी है। बो पूरी तरियां सुद्ध है। थे लोग पूरी तरियां सुद्ध हो, पण सारा सुद्ध कोनी।” यीसू बिनै जाणै हो झिको बिनै धोखै ऊं पकड़ाण आळो हो ईंखातर बण इंया केयो, थारै मू सारा सुद्ध कोनी है। जद बण सारां गा पग धो दिया तो फेर बण आपगो गाबो पाछो उपर ले लियो अर आपगी जिग्यां पर बेठ ग्यो। अर बानै केयो कै, “थे जाणो हो कै मैं थारै सागै के करयो है?” “थे लोग मनै ‘गुरू अर प्रभु’ केवो हो अर थे सई केवो हो क्यूंकै मैं बो ई हूं। जे मैं प्रभु अर गुरू होगे एक दास बणगे थारा पग धोया है बिंयाई थानै बी एक दूसरै गा पग धोणा चईयै। क्यूंकै जिंया मैं थानै एक नमुनो दिखायो है जिंया मैं थारै सागै करयो है बिंयाई थे बी करो। मैं थानै साची साची केऊं हूं, दास आपगै स्वामी ऊं मोटो कोनी होवै अर ना'ई भेजण आळो आदमी भेजेड़ै आदमी ऊं छोटो होवै। झिको मैं थानै अबी कर'गे दिखायो है, बो थानै समझ आयो है। ईंखातर जे थे बिंयाई करोगा तो परमेसर थानै आसिस देवैगो। परमेसर आसिस देवैगो इयां मैं कोनी केऊं। क्यूंकै जद ऊं मैं थानै चुण्या है जद ऊं मैं जाणूं हूं कै थे किंया हो? अर झिको मनै धोखो देवैगो बिनै बी मैं चुण लियो है। क्यूंकै परमेसर गै बचन में झिको लिखेड़ो है बो सई होणो चईयै। परमेसर गै बचन में ओ लिखेड़ो है कै झिकै मेरी रोटी खाई, बण ई मेरै आ'गै टांग अड़ाई। अब आ घटना घटणै ऊं पेलां ई मैं थानै बता दी है अर जद आ घटना घटै जद थे बिस्वास करियो कै मैं बो ई हूं। झिकै गै बारै में मैं थानै केयो हो कै थे बिंगै उपर बिस्वास करो।” मैं थानै साची साची केऊं हूं कै बो झिको मेरै भेजण आळै नै मानै है बो मनै मानै है। अर झिको मनै मानै है, बो बिनै मानै झिकै मनै भेज्यो है। ऐ बातां बतागे यीसू आत्मा में भोत दुखी हो'ग्यो अर बानै साफ साफ बता दियो कै मैं थानै साची साची केऊं हूं कै थारै मू एक जणो मनै दुसमण गै हात में पकड़वावैगो। चेला चिंता करी कै बो किंगै बारै में केवै है बे सारा एक दूसरै गै सामै देखण लागग्या। बां चेला मू एक जणो झिकै नै यीसू बोळो प्रेम करतो हो, यीसू गी छाती कानी झुक गे बेठयो हो। जद समौन पतरस बिं चेलै कानी हिसारो कर'गे केयो, “यीसू नै पूछ तो सरी कै बो किंगै बारै में केण लागरयो है।” जद बण बिंयाई यीसू गी छाती कानी झुकगे पूछयो, “हे प्रभु बो कुण है?” यीसू उतर दियो, “मैं रोटी गो टुकड़ो लोटै में डूबगे झिकै नै देऊंगा बो ई है बो।” फेर यीसू रोटी गो टुकड़ो लोटै में डबोयो अर बिनै समौन इस्करियोति गै बेटै यहूदा नै दे दियो। अर यहूदा गै रोटी गो टुकड़ो खाण गै बाद यीसू बिनै केयो, “झिको तूं करणो है जल्दी कर।” जद सैतान गो अधिकार बिं पर हो'ग्यो। पण बठै बेठैया मू किनैई समझ कोनी आई कै यीसू आ बात क्यूं कैई है। यहूदा कनै पीसां गी थैली रेवंती। यहूदा रोटी गो टुकड़ो खाण गै बाद जल्दी बारै उड़ग्यो। बो रात गो टेम हो। जद यहूदा बारै उड़ग्यो तो यीसू केयो, “अब परमेसर लोगां नै दिखावैगो कै मिनख गो बेटो कितो म्हान है। मिनख गै बेटै गै द्वारा लोगां नै ठा लागसी कै परमेसर कितो म्हान है। जे मेरै द्वारा लोगां नै ठा लागै है कै परमेसर कितो म्हान है तो परमेसर बां लोगां नै दिखावैगो कै मिनख गो बेटो कितो म्हान है अर बो जल्दी करैगो। हे मेरा प्यारा टाबरों, मैं थोड़ी देर खातर में थारै सागै हूं, बिंगै बाद थे मनै ढूंडोगा, थारै सागै कोनी रेऊंगा। अर जिंया मैं यहुदियां नै केयो बिंयाई मैं थानै बी केऊं कै जठै मैं जाऊं हूं बठै थे कोनी आ सकोगा। मैं थानै एक नुई आग्या देऊं हूं कै एक दूसरै ऊं प्रेम राखो जिंया कै मैं थारूं प्रेम राख्यो। बिंयाई थे बी एक दूसरै ऊं प्रेम राखो। जे आपसरी में प्रेम राखोगा तो इंयूं ई सारा जाणैगा कै थे मेरा चेला हो।” समौन पतरस बिनै पूछयो, “हे प्रभु थे कठै जाण लागरया हो।” यीसू उतर दियो, “तूं अब मेरै लारै कोनी आ सकै, पण बाद में तूं मेरै लारै आवैगो।” पतरस बिनै केयो, “हे प्रभु अबी मैं थारै लारै क्यूं कोनी आ सकूं। मैं थारै खातर आपगी जान बी दे देऊंगा।” यीसू उतर दियो कै, “तूं आपगी जान देवैगो, मैं तनै सच्च सच्च केऊं हूं। जद तांई तूं मेरो तीन बारी इनकार कोनी कर लेवैगो जद तांई कुकड़ो बाग कोनी देवैगो।” “थारो मन दुखी नई होणो चईयै। परमेसर में बिस्वास राखो अर मेरै में बी बिस्वास राखो। मेरै पिता गै घर में रेण खातर भोत जिग्यां है। मैं थारै खातर जिग्यां तैयार करण खातर जाऊं हूं। जे जिग्यां ना होवंती तो मैं थानै बता देवंतो। अर मैं बठै जाऊंगा अर थारै खातर जिग्यां तैयार करूंगा तो मैं फेर अठै आऊंगा अर थानै आपगै सागै ले जाऊंगा कै जठै मैं रेऊं बठै थे बी रेओ। अर जठै मैं जाऊं हूं थे बठै गो रा जाणो हो।” थोमा केयो, “म्हे कोनी जाणा प्रभु थे कठै जाण लागरया हो? फेर म्हे बठै गो रा किंया जाण सकां हां?” यीसू बानै केयो, “मैं ई रा, सच्चाई अर जीवन हूं। मेरै बिना कोई बी पिता कनै कोनी जा सकै। जे थे मनै सच्च में जाण लेवंता तो मेरै पिता नै बी जाणता पण अब थे बिनै जाणो हो, अर बिनै देख्यो बी है।” फिलिप्पुस बिनै केयो, “हे प्रभु म्हानै पिता दिखा दे अर म्हारै खातर इतो भोत है।” यीसू बिनै केयो, “फिलिप्पुस, मैं इतै लम्बै टेम ऊं तेरै सागै हूं अर अजे तांई तूं मनै कोनी जाणै है। तूं पिता नै देख लियो है, फेर तूं किंया केवै है म्हानै पिता दिखा दे। के तनै बिस्वास कोनी है कै मैं पिता में रेऊं हूं अर पिता मेरै में रेवै है? ऐ बातां झिकी मैं थानै केऊं हूं। आपगै कनै ऊं कोनी केऊं, पण मेरै में रेण आळो पिता आपगा काम मेरै द्वारा करै है। मेरै उपर बिस्वास करो कै मैं पिता में रेऊं अर पिता मेरै में है। अर जे आ नई तो मेरै द्वारा करेड़ा काम देखगे मेरै पर बिस्वास करो। मैं थानै साची साची केऊं हूं झिका काम मैं करूं हूं मेरै उपर बिस्वास करण आळो बी बे काम करैगो। मैं पिता गै कनै जाऊं हूं सच्च में बो आं कामा ऊं बी मोटा काम करैगो। झिका मेरै उपर भरोसो राखगे कीं मांगोगा तो बो ई मैं करूं क्यूंकै मेरै द्वारा पिता नै आदर मिलै। जे थे मेरै पर भरोसो राखगे कीं मांगोगा तो मैं बिंयाई दे दैयूंगा। जे थे मेरूं प्रेम करो तो मेरी आग्या नै मानोगा। मैं पिता ऊं बिनती करूंगा अर बो थानै मदद करण आळो देवैगो झिको थारै सागै सदां रेवैगो। बो मदद करण आळो सच्चाई गो आत्मा है। ईं दुनिया में बिनै कोई कोनी मानै। क्यूंकै ईं दुनिया में बिनै देख्यो कोनी अर जाण्यो बी कोनी। थे बिनै जाणो हो क्यूंकै बो थारै सागै रेवै है अर आ'गै बी थारै सागै रेवैगो। मैं थानै अनाथ कोनी छोडूंगा अर मैं थारै कनै आऊं हूं। थोड़ी देर गै बाद संसार गै लोगां नै मैं कोनी दिखूंगा पण थे मनै देखोगा अर मैं जींवंतो हूं। ईंखातर थे बी जींवता रेवोगा। जद थे जाणोगा कै मैं पिता में रेऊं हूं अर थे मेरै में रेवो हो अर मैं थारै में रेऊं हूं। झिका मेरी आग्या नै मानगे बिंगै उपर चालै है बे मेरूं प्रेम करै है। झिका मनै प्रेम करै है बानै मेरो पिता बी प्रेम करै है। अर मैं बी बिंऊं प्रेम करूंगा। अर मैं अपणै आपनै बिं पर परगट करूंगा।” यहूदा झिको इस्करियोति यहूदा कोनी, दूसरो यहूदा हो, बण केयो कै, “हे प्रभु आ किंया गी बात है कै तूं म्हानै बतावै है अर दुनिया गै लोगां नै कोनी बतावै।” यीसू उतर दियो, “जे कोई मेरूं प्रेम करै है तो बो मेरै बचन गो पालण करैगो अर बिनै पिता परमेसर बी प्रेम करैगो अर म्हे बिंगै कनै आवांगा। अर बिंगै सागै रेवांगा। झिको मेरूं प्रेम कोनी राखै बो मेरो बचन कोनी मानै अर झिको बचन थे सुणो हो, बो मेरो कोनी पण पिता परमेसर गो है झिकै मनै भेज्यो है। ऐ बाता मैं थानै जद कैई ही जद मैं थारै सागै हो। पण मदद करण आळी पवितर आत्मा झिको पिता मेरै नाम ऊं भेजैगो बा थानै सारो कीं बतावैगो अर झिको मैं थानै केयो है बो थानै याद करावैगो। मैं थानै आपगी सांती देगे जाऊं हूं। मैं आप थानै आपगी सांती देऊं हूं। जिंया संसार सांती देवै है बिंया कोनी देऊं। थारो मन दुखी ना होवै अर ना डरै। थे मनै केवंता सुण्यो है कै मैं जाऊं हूं अर थारै कनै फेर आऊंगा। जे थे मेरूं प्रेम करता तो राजी होवंता कै मैं पिता परमेसर कनै जाऊं हूं। क्यूंकै पिता मेरूं मोटो है। आ बात होण ऊं पेलां ई मैं थानै के दियो। क्यूंकै जद बो हो जावै तो थे बिस्वास करो। मनै अब थारै ऊं जादा बाता करण खातर बोळो टेम कोनी है क्यूंकै दुनिया गो राजा, सैतान आवै है। बिंगो मेरै उपर कोई अधिकार कोनी है। पण जिंया पिता मनै आग्या दी, बिंयाई मैं करूं जिंऊं दुनिया आळा जाणै है कै मैं पिता ऊं प्रेम करूं हूं। अब अठुं उठो, आपां चाला।” यीसू केयो, “सच्ची अंगूरा गी बेल मैं हूं। अर मेरो पिता देखभाळ करण आळो किसान है। झिकी डाळी मेरै में है अर फळ कोनी लागै बो बिनै बाड देवै है अर झिकी डाळी फळ ल्यावै है बिंगी देखभाळ करै है कै बा ओर जादा फळ ल्यावै है। झिको उपदेस मैं थानै दियो है बिं पर थे बिस्वास करयो है। ईंखातर थे लोग पेलां ई सुद्ध हो। थे मेरै में रेवो अर मैं थारै में रेऊंगा। जे डाळी अंगूरा गी बेल सागै जुड़गे कोनी रेवै तो फळ कोनी ल्या सकै बिंयाई जे थे बी मेरै में ना जुड़गे रेया तो फळ कोनी ल्या सको। मैं अंगूरा गी बेल हूं। थे बिंगी डाळियां हो। झिको मेरै में रेवै है अर झिकै में, मैं रेऊं हूं बो भोत फळ ल्यावै है क्यूंकै मेरै बिना थे कीं कोनी कर सको। जे कोई मेरै में ना बण्यो रेवै तो बिं डाळी गी तरियां फेंक दियो जावै है अर बो सूक जावै है। अर लोग बानै भेळी कर'गे आग लगा देवै है अर बे बळ जावै है। जे थे मेरै में बण्या रेवो अर मेरी बाता नै मानो तो झिको थे चावो अर मांगो, बो थानै मिल जावैगो। जद थे भोत सारो फळ ल्यावो तो मेरै पिता नै आदर मिलै है। जद थे दिखो कै सचमुच मेरा चेला हो। जिंया पिता मनै प्रेम करयो है मैं बी थानै बिंयाई प्रेम करयो है। मेरै प्रेम में बण्या रेवो। मैं आपगै पिता गी आग्या नै मानी है। ईंखातर सदां मैं बिंगै प्रेम में बण्यो रेऊं हूं, बिंयाई जे थे मेरी आग्या नै मानोगा तो मेरै प्रेम में बण्या रेवोगा। मैं ऐ बाता थानै ईंखातर कैई है कै मेरो आनंद थारै में रेवै अर थारो आनंद भरपूर हो जावै। आ मेरी आग्या है कै आपसरी में प्रेम करो जिंया मैं थारूं प्रेम करयो है। झिको कोई आपगै मित्र खातर जान देवै है बो ई है सारा ऊं मोटो प्रेम है। ईंखातर झिको उपदेस में थानै देऊं हूं अर थे बिं पर चालो तो थे मेरा मित्र हो। अब ऊं मैं थानै दास कोनी केऊंगा क्यूंकै कोई दास कोनी जाणै कै बिंगो मालिक के करै है। पण मैं थानै मित्र केयो है क्यूंकै मैं झिकी बाता आपगै पिता कनूं सुणी, बे सारी थानै बता दी। अर थे मनै कोनी चुण्यो पण मैं थानै चुण्या है अर जिमेदारी दी है। क्यूंकै थे जा'गे झिका आच्छा काम मैं करया बिंयाई कर'गे आच्छो फळ ल्यावो अर थारो फळ बण्यो रेवै। थे मेरै नाम ऊं पिता कनूं झिको मांगोगा बो मिल जावैगो।” मैं थानै ओ उपदेस देऊं कै थे एक दूसरै ऊं प्रेम करो। यीसू फेर चेला नै केयो, “संसार गा लोग थारूं बेर करसी पण थे याद राखियो कै बण थारै ऊं पेलां मेरै सागै बी बेर राख्यो। अर जे थे बेर राखण आळा बरगा होवंता तो बे थारूं प्रेम करता क्यूंकै थे बी पेलां बांगै जिसा काम करता। पण अब थे संसार गा कोनी हो। मैं थानै ईं संसार मू चुण लिया है। ईंखातर बे थारूं बेर राखै है। मैं थानै केयो है कै कोई दास आपगै मालिक ऊं मोटो कोनी होवै। बिं बात नै याद करो, जे बां मनै दुख दियो तो थानै बी दुख देवैगा। बिंयाई जे बां मेरी बात मानी तो थारी बात बी मानैगा। पण बे मेरै कारण थारै सागै ओ सारो कीं करैगा क्यूंकै बे बिनै कोनी जाणै झिकै मनै भेज्यो है। जे मैं ईं संसार में ना आवंतो अर बानै परमेसर गी बाता ना सिखावंतो तो बे कीं बात गा दोसी ना होवंता। पण अब आपगै पापां खातर बांगै कनै कोई बचणै गो तरिको कोनी है। झिको मेरूं बैर राखै है बो मेरै पिता ऊं बी बेर राखै है। जे मैं बांगै बिचाळै चमत्कार गा काम ना करतो झिका चमत्कार कदी कणी कोनी करया तो बे पापां गा दोसी ना होवंता। पण अब तो बां मेरै द्वारा करेड़ा चमत्कार देख लिया है फेर बी मेरै अर मेरै पिता दोनां ऊं बेर राखै है। पण ओ ईंखातर होयो है कै नेम विधान में झिको लिखेड़ो हो बो पूरो होवै। बठै इंया लिखेड़ो हो कै ‘बिना कारण बां मेरूं बेर करयो।’ बाद में पिता गै कनै ऊं एक मदद करण आळो मैं थारै कनै भेजूंगा बो पिता कनू आण आळो सच्चाई गो आत्मा है, बो मदद करण आळो आ'गे मेरै बारै में बतावैगो। अर थे बी गवाई बताओगा क्यूंकै मेरी सेवा गै सुरू ऊं थे मेरै सागै हा।” “ऐ बाता मैं थानै ईंखातर कैई कै थे आपगै बिस्वास में ठोकर ना खा सको। बे थानै सतसंग घर ऊं काड़ देवैगा। सच्च में बो टेम आण लागरयो है। जद थारै मू किनैई मारगे हर कोई सोचैगो कै बो परमेसर गी सेवा करै है। इंया बे ईंखातर करैगा कै बे ना पिता नै जाणै है अर ना मनै जाणै है। पण ऐ बाता मैं थानै ईंखातर कैई कै ऐ बाता होणै गो टेम आवै तो थानै याद आ जावै कै मैं थानै इंगै बारै में पेलां ई बता दियो हो। मैं सुरू में थारै सागै हो। ईंखातर मैं थानै ऐ बाता कोनी बताई। अब मैं आपगै भेजण आळै गै कनै जाऊं हूं अर थारै मू अब मनै कोई कोनी पूछै कै तूं कठै जावै है। पण मैं झिकी बाता थानै कैई है ईंखातर थारो मन दुख ऊं भरिजग्यो है। पण मैं थानै साची साची केऊं हूं कै मेरो जाणो थारै खातर आच्छो है क्यूंकै जे मैं ना जाऊं तो मदद करण आळो थारै कनै कोनी आवैगो, पण जे मैं जाऊंगा तो बिनै थारै कनै घाल देऊंगा। बो आवैगो तो दुनियां नै पाप गै बारै में अर धारमिकता गै बारै में अर न्याय गै बारै में गवाई बतावैगो। लोगां मेरै उपर बिस्वास कोनी करयो। ईंखातर पाप गै बारै में बतावै है। अर अब थे मनै ओर जादा कोनी देखोगा। ईंखातर धारमिकता गै बारै में बतावै है। संसार पर राज करण आळै नै दोसी बणा दियो है। ईंखातर न्याय गै बारै में बतावै है। मैं थानै ओर बी भोत सारी बाता केणी है, पण थे बानै अब सेण कोनी कर सको। पण जद सच्चाई गो आत्मा झिको परमेसर कनूं आवैगो बो सारो सच्च जाणन गै खातर थारी मदद करैगो। क्यूंकै बो आपगै कनूं कोनी केवैगो, पण झिको सुणैगो बो ई केवैगो। बो थानै आण आळी बाता बतावैगो। बो मेरो आदर करैगो, क्यूंकै मेरी बातां लेगे बे बातां थानै बतावैगो। झिको पिता गो हो बो सारो मेरो है। ईंखातर मैं केयो कै मेरी बात लेगे थानै बतावैगो।” थोड़ी देर गै बाद थे मनै कोनी देखोगा अर फेर थोड़ी देर में मनै देखोगा। जद बिंगा कीं चेला आपसरी में केयो, “ओ के है झिको बो आपां नै केवै है, थोड़ी देर में थे मनै कोनी देखोगा अर फेर थोड़ी देर में मनै देखैगा। अर ओ ईंखातर कै मैं पिता गै कनै जाण लागरयो हूं।” जद बां केयो, “थोड़ी देर आळी आ के बात है? आपां कोनी जाणा कै बो के केवै है।” यीसू जाणग्यो कै बे बिनै पूछणो चावै है तो बण बानै केयो कै, “थोड़ी देर गै बाद थे मनै कोनी देखोगा अर फेर थोड़ी देर में मनै देखोगा। इंया कर'गे झिको मैं केयो है बिं बात गै बारै में आपसरी में बात करण लागरया हो के? मैं थानै साची साची केऊं हूं, थे विलाप करोगा अर रोओगा पण ओ संसार राजी होवैगो। थे दुख करोगा पण थारो दुख खुसी में बदळ ज्यैगो। जद लुगाई गै जापै गो टेम आवै है तो बा भोत दुखी होवै है। पण जद टाबर पैदा हो'ज्यै तो बा भोत राजी होवै है। फेर बो दुख चिंता बिनै याद कोनी आवै, क्यूंकै संसार में एक टाबर पैदा हो'ग्यो। थे सारा लोग इंयाई दुखी हो, पण मैं थानै फेर मिलूंगा अर थारो मन खुसी ऊं भर ज्यैगो। अर बिं खुसी नै कोई बदळ कोनी सकैगो। बिं दिन थे मनै फेर देखोगा तो मेरूं कीं कोनी पूछोगा। मैं थानै साची साची केऊं मेरै नाम ऊं पिता कनूं झिको मांगोगा थानै देवैगो। अब तांई थे मेरै नाम ऊं कीं कोनी मांग्यो, मांगो तो मिलैगो कै थारी खुसी पूरी हो जावै। मैं ऐ बाता थानै मिसाल गै रूप में कैई है। पण अब बो टेम आ'ग्यो है कै मैं थानै मिसाल देगे कोनी बताऊंगा, पण साफ साफ पिता गै बारै में बताऊंगा। मैं पिता ऊं परगट होयो अर ईं संसार में आयो अर अब मैं ईं संसार नै छोड़गे पिता गै कनै जाण लागरयो हूं। पिता आप थानै प्रेम करै है क्यूंकै थे मनै प्रेम करयो हो अर मान्यो है कै मैं पिता कनूं आयो हूं। बिं दिन मैं थानै ओ कोनी केऊं कै थारी ओर ऊं पिता कनै पराथना करूंगा पण थे मेरै नाम में मांगोगा। बो थानै मिल जावैगो जिंया बण बतायो हो।” बिंगै चेला केयो, “देखो अब थे बिना मिसाल गै साफ साफ बताण लागरया हो। अब म्हे जाणग्या कै थे सारो कीं जाणो हो। अर इंगी जरूरत कोनी क्यूंकै पूछण ऊं पेलां ई जाणै है कै आदमियां गै मन में के सवाल है। अर तूं बिंगो जबाब दे सकै है। ईंखातर म्हे बिस्वास करां हां कै थे परमेसर कनूं आया हो।” ओ सुणगे यीसू केयो कै, “थे अब बिस्वास करो हो। देखो, थारै मू हर एक इनै बिनै होगे आपो आपगै घरे उड़ जावैगा अर मनै छोड़ण गो टेम आ'ग्यो है। पण मेरो पिता मेरै सागै है। ईंखातर मैं एकलो कोनी। मैं ऐ बाता थानै ईंखातर कैई कै थानै मेरै द्वारा सांती मिलै। संसार में थानै दुख मिलैगो पण थे होंसलो राखो, मैं संसार नै जीत लियो है।” यीसू ऐ बाता कैई अर आपगी आंख्या आसमान कानी देखगे केयो, “हे पिता, थारो चुणेड़ो टेम आ'ग्यो है। अब लोगां नै दिखा दे कै झिको तेरो बेटो हूं कितो म्हान हूं। जद मैं बां लोगां नै दिखा दैयूं कै थे बी किता म्हान हो। क्यूंकै झिकै लोगां नै थे मनै मानण खातर चुण्या है बानै मेरै हात में दिया है। बानै सारा नै अनन्त जीवन देण खातर थे मनै अधिकार दियो है। अनन्त जीवन ओ है कै बे तनै एकलै सच्चै परमेसर अर यीसू मसी नै झिकनै थे भेज्यो है, जाणै। झिको काम थे मनै करण खातर दियो है, बिनै पूरो कर'गे मैं धरती गै लोगां नै दिखा दियो है कै थे किता म्हान हो। हे मेरा पिता, संसार गी सरसटी करण ऊं पेलां जद मैं थारै सागै हो, जद मनै कितो मोटो आदर मान मिलतो हो। अब जद मैं थारै सागै रेऊंगा बो ई आदर मान मनै फेर ऊं दे।” यीसू पराथना में ओ केण लागग्यो, “हे पिता ईं संसार मू कीं लोगां नै थे मेरै हात में दिया है। अर मैं थारो नाम बां आदमियां पर परगट करयो बे तेरा ई लोग है। थे बानै दिया हो, अर बां थारै बचन नै मान लियो है। मैं बानै बो ई उपदेस दियो है। झिको थे मनै दियो हो। अर बां बिनै मान लियो है। बे जरूर जाणै है कै मैं थारै कनूं आयो हूं अर बां बिस्वास करयो कै थे मनै घाल्यो है। ईंखातर बे जाणै है कै झिको कोई चमत्कार अर बात सिखाण आळो अधिकार थे मनै ई दियो है। अब मैं संसार गै सारै लोगां खातर पराथना कोनी करूं हूं क्यूंकै अब मैं झिका चेला थे मनै दिया बां खातर पराथना करूं हूं। झिका लोग मनै मानै है बे थारा है अर झिका थारा है, बे मेरा है अर बांगै द्वारा मेरो आदर होवै है। मैं अब ओर बोळै टेम तांई ईं संसार में कोनी रेऊंगा, क्यूंकै अब मैं थारै कनै आण लागरयो हूं। पण ऐ संसार में रेवैगा। ईंखातर हे मेरा पवितर पिता, झिकी सकती थे मनै दी है बिं सकती ऊं बांगी रुख्वाळी कर। जिंया थे अर मैं एक हा, बे बी एक हो सकै। जद मैं बांगै सागै हो, मैं तेरै बिं नाम गी सकती ऊं बांगी रुख्वाळी करी, झिकी थे मनै दी ही। अर बामूं एक बिनास गै बेटै नै छोड़गे कोई बी नास कोनी होयो कै सासतर गो केणो सच्च हो। पण हे पिता अब मैं थारै कनै आण लागरयो हूं, ईंखातर मैं भोत खुस हूं। अर मैं संसार में रेवंता होया इंया पराथना करण लागरयो हूं कै जिंया मैं खुस हूं बिंयाई मेरा चेला बी खुस होणा चईयै। मैं तेरो संदेस दियो है अर बां बिं संदेस नै मान लियो है। ईंखातर संसार गै लोगां बांगै सागै बेर करयो। क्यूंकै जिंया मैं संसार गो कोनी हूं, बिंयाई बे बी ईं संसार गै बुरा लोगां जिसा कोनी है। मैं आ पराथना कोनी करण लागरयो कै तूं बानै संसार मू काड़ दे पण ओ है कै तूं दुस्ट सैतान ऊं बांगी रुखवाळी कर। जिंया मैं संसार गो कोनी हूं बिंयाई बे बी संसार गा कोनी है। तेरा बचन सच्चा है। ईंखातर तेरो काम करण गै खातर बी सच्चै बचन गै द्वारा बानै तूं तैयार कर। जिंया थे मनै संसार में घाल्यो बिंयाई मैं बानै संसार में घाल्या है। अर बांगै खातर मैं अपणै आपनै तैयार करूं हूं कै बे बी सचमुच तेरै खातर तैयार हो जावै।” यीसू पराथना में फेर केण लागग्यो, “हे पिता मैं एकला आं खातर बिनती कोनी करूं पण बांगै खातर बी झिको आंगै बचन गै द्वारा मेरै पर बिस्वास करैगो। बे सारा एक होवै, जिंया तूं मेरै में अर मैं तेरै में हूं बिंयाई बे बी आपणै में होवै। क्यूंकै संसार गा लोग बिस्वास करै है कै तूं ई मनै घाल्यो है। झिको मोटो आदर मान मनै दियो है बो मैं बानै बी दियो है कै बे बी एक हो सकै जिंया आपां एक हां। मैं बामै अर तूं मेरै में कै बे सिद्ध होगे एक हो जावै। संसार जाणै कै थे ई मनै घाल्यो है अर झिको थे मेरूं प्रेम राख्यो बिंयाई मैं बानै प्रेम राख्यो। हे पिता, मैं चावूं कै झिका लोग थे मनै दिया है बे बी मेरै सागै जठै मैं हूं, बठै बे बी मेरै सागै होवै। क्यूंकै संसार गै सुरूं ऊं पेलां ई थे मनै प्रेम राखगे मोटो आदर मान दियो है, बिनै बे बी देखै। हे पिता थे झिका धारमिक हो। संसार गै लोगां थानै कोनी पिछाणयो है, पण मैं थानै पिछाण लिया है। अर मनै मानण आळा नै ठा है कै थे ई मनै घाल्यो है। अर थे कुण हो? ओ मैं बानै बतायो है अर आगै बी बताऊंगा कै जिंया थे मेरै सागै प्रेम करयो है बिंयाई बे मेरै सागै बी प्रेम करै। अर मैं सदां बामै रेऊं।” यीसू बिनती करण गै बाद आपगै चेला गै सागै छोटी नेहर किद्रोन गै दूसरै पासै एक बगीचै में उड़ग्यो। धोखै ऊं बिनै पकड़वाण आळो यहुदा बिं जिग्यां नै जाणै हो क्यूंकै यीसू आपगै चेलां सागै बठै जाया करतो हो। जद यहूदा रोमी सिपाहियां गी टुकड़ी अर महा याजकां अर फरीसियां गी ओर ऊं भेजेड़ा मिन्दर गै पहरेदारां नै लेगे लालटेण अर संसारी मसालां अर हथियार नै लेगे बठै आयो। यीसू आपगै उपर के होवैगो ओ सारो कीं जाणतां होया बी बानै पूछयो, “थे किनै ढूंढो?” बां बिनै उतर दियो नासरत में रेण आळै यीसू नै। यीसू बानै केयो मैं हूं। बठै धोखै ऊं पकड़वाण आळो यहूदा बी खड़यो हो। जद यीसू केयो कै, “मैं हूं,” तो बे लारै हटग्या अर धरती पर पड़ ग्या। जद बण फेर बानै पूछयो, “थे किनै ढूंढो हो,” बे बोल्या, “नासरत गै रेण आळै यीसू नै।” यीसू उतर दियो, “मैं थानै केयो है बो मैं ई हूं जे थे मनै ढूंढो हो तो आं लोगां नै जाण दैयो।” ओ बो ईंखातर केयो कै झिको कीं बण केयो हो बो पूरो होवै मैं बामूं किनै कोनी गमाया झिका नै मनै दिया हा। जद समौन पतरस आपगी तलवार काढी अर महा याजक गै दास गो दाहिणो कान बाड दियो। बिं दास गो नाम मलखुस हो। जद यीसू पतरस नै केयो, “आपगी तलवार म्यान में राख। परमेसर मनै झिको दुख गो कटोरो दियो है बिमुं मनै पीणो ई पड़सी।” जद सिपाईयां अर बांगा सुबेदार यहुदियां गै मिन्दर गै पहरेदारां यीसू नै पकड़गे बिंगा हात बांध लिया। अर पेलां बिनै बिं साल गै महा याजक कैफा गै सुसरै हना कनै लेगे गेया। ओ बो ई कैफा हो झिकै यहुदी अधिकारियां नै राय दी आपणै लोगां खातर एक आदमी गो मरणो आच्छो है। जद यीसू नै ले जाण लागरया हा जद समौन पतरस अर यीसू गो एक ओर चेलो बी यीसू गै लारै चाल पड़यो क्यूंकै ओ चेलो महा याजक नै जाणतो हो ईंखातर बो यीसू गै सागै महा याजक गै आंगणै में उड़ग्यो। पण पतरस बारै दरवाजै कनै खड़ ग्यो, फेर महा याजक नै जाणन आळो चेलो बारै आयो अर चोकिदारणी नै केगे पतरस नै मा ल्यायो। चोकिदारणी पतरस नै केयो, हो सकै है तूं बी मसी गो ई चेलो है। पतरस बोल्यो नई मैं कोनी। जद भोत ठंड ही। ईंखातर नोकर अर मिन्दर गा पेरेदार कोयला जगा गे खड़या तपण लागरया हा। जद पतरस बी बांगै सागै खड़यो खड़यो तपण लागरयो हो। फेर पेलां आळो महा याजक हना यीसू ऊं बिंगै चेला गै बारै में अर बिंगै उपदेस गै बारै में पूछताछ करी। यीसू बिनै उतर दियो, “मैं सदां लोगां गै सामणै बाता करी। मैं सतसंग घर अर मिन्दर में जठै यहुदी कठा होवंता बठै उपदेस दियो, मैं लुकगे कीं कोनी करयो। फेर तूं मनै क्यूं पूछै है, बानै पूछ झिका मनै सुण्यो है, साची बानै पतो है।” जद बण ओ केयो तो मिन्दर गै एक पहरेदार झिको बठै खड़यो, यीसू नै थपड़ मारयो अर बिनै केयो तेरी आ हिम्मत कै तूं महा याजक नै इंया केवै? यीसू बिनै उतर दियो, “जे मैं कीं गळत केयो है तो साबित कर अर बता मैं के गळत करयो है, अर जे मैं ठीक केयो तो मेरै थपड़ क्यूं मारयो?” फेर हना बिनै बांदेडै़ नै महा याजक कैफा कनै घाल दियो। जद समौन पतरस खड़यो होयो जठै तपण लागरयो तो बठै खड़या लोग बिनै केयो, “तूं बी बिंगै चेला माऊं एक चेलो है कै जद बण मना कर'गे बोल्यो मैं कोनी।” महा याजक गै एक सेवक झिको बिं आदमी गो रिस्तेदार हो झिकैगो कान पतरस बाडयो हो बिनै पूछयो, “बता मैं तनै बिंगै सागै बाग में कोनी देख्यो हो?” पतरस फेर इनकार कर दियो अर बिं टेम कुकड़ बांग दे दी। फेर यीसू नै कैफा कनूं रोमी राजपाल गै किलै में दिनगै दिनगै गै टेम लेग्या। यहुदी लोग किलै गै मा कोनी गेया क्यूंकै बे अपवितर ना होवै अर फसह गै त्यूंहार गी रोटी खा सकै। पिलातुस बारै आ'गे बानै केयो, “ईं आदमी पर थे के गुनाह लगावो हो?” बां बिनै उतर दियो ओ गुनेहगार है। ईं कारण म्हे इनै थारै कनै लेगे आया हां। पिलातुस बानै केयो इनै थे ले जाओ अर आपगै नेम विधान में जिंया है बिंया ई फेंसलो करो। यहुदी अधिकारियां बिनै केयो म्हारै कनै किनैई जान ऊं मारण गो अधिकार कोनी है। यीसू झिकी बात बताई ही बिंऊं सिद्ध हो ग्यो कै बिनै किंया गी मोत मिलैगी । जद पिलातुस किलै गै मा गेयो अर यीसू नै पूछयो, “के तूं यहुदियां गो राजा है?” यीसू उतर दियो कै, “आ बात तूं आपगै कनै ऊं केवै या दूसरा झिका मेरै बारै में तनै केयो है।” पिलातुस बिनै उतर दियो, “मैं यहुदी कोनी हूं। तेरी जाती गा लोग अर मुख्य याजकां तनै मेरै कनै ल्याया है। अर पूछयो कै तूं के करयो है?” यीसू उतर दियो, “मेरो राज ईं संसार गो कोनी है जे मेरो राज ईं संसार गो होवंतो तो मेरी प्रजा मनै यहुदियां नै देण ऊं बचाण खातर लड़ाई झगड़ो करती। पण सच्च मैं मेरो राज अठै गो कोनी।” फेर पिलातुस यीसू नै केयो, “तूं राजा है के?” यीसू उतर दियो कै, “मनै राजा तूं ई केण लागरयो है। मैं ईंखातर दुनिया में आयो कै सच्चाई गै बारै में बोलूं। झिको कोई सच्चाई पर चालै है तो बो मेरी बात सुणै है।” पिलातुस बिनै पूछयो कै, “सच्चाई के है?” इंया केगे यहुदियां कनै उड़ग्यो अर बानै केयो, “मनै तो इमै कोई गुनाह कोनी लाग्यो।” अर थारी आ रीति रिवाज है कै फसह गै त्यूंहार पर मैं थारै खातर कोई एक केदी नै छोड़ दैयूं। के थे चावो हो कै मैं थारै खातर यहुदियां गै राजा नै छोड़ दैयूं? जद बां ईं बात पर रोळो मचायो इनै कोनी पण बरअबा नै छोड़ दे। बो एक डाकू हो। फेर पिलातुस यीसू नै पकड़गे सिपाईयां नै कोड़ा मारण खातर दे दियो। सिपाईयां कांटा गो मुकुट बणागे बिंगै सिर पर रख्यो अर बेजणी रंग गा गाबा पिरा दिया। अर बिंगै कनै आ'गे केण लागग्या यहुदियां गै राजा गी जय होवै, फेर बिंगै थपड़ मारण लागग्या। पिलातुस एकर ओर बारै आयो अर बानै केयो, “मैं थारै कनै एकर फेर बिनै बारै ल्याऊं हूं कै थे जाण सको मैं बिमै कोई गुनाह कोनी देख्यो।” फेर यीसू कांटा गो मुकुट अर बेगणी गाबा पेरगे बारै आयो जद पिलातुस बानै केयो, “ईं आदमी नै ध्यान ऊं देखो।” जद मुख्य याजकां अर मिन्दर गै पेरेदारां बिनै देख्यो तो रोळो मचाण लागग्या अर केण लागग्या, “इनै करूस पर चढाओ, करूस पर चढाओ।” पिलातुस बानै केयो, “थे ई इनै करूस पर चढावो क्यूंकै मनै इमै कोई गुनाह कोनी मिल्यो।” यहुदियां बिनै उतर दियो, “म्हारो बी नेम है अर बिं नेम गै अनुसार बिनै मरणो ई हो'सी क्यूंकै बो अपणै आपनै परमेसर गो बेटो बणावै।” जद पिलातुस आ बात सुणगे भोत डर ग्यो। अर किलै गै मा जा'गे यीसू नै केयो, “तूं कठूं आयो है,” पण यीसू बिनै उतर कोनी दियो। फेर पिलातुस बिनै केयो, “तूं मेरूं बात क्यूं कोनी करै? तनै छोड़ण गो अधिकार मेरै कनै है अर करूस पर चढाण गो बी।” यीसू उतर दियो, “तनै परमेसर कनूं कोई अधिकार कोनी मिलतो तो मेरै उपर तेरो कोई अधिकार कोनी होवंतो झिका आदमी मनै तेरै कनै लेगे आया बे तेरूं मोटा गुनहेगार है।” ओ सुणगे पिलातुस बिनै छोडण गो उपाय ढूंडण गी कोसिस करी। पण यहुदीयां रोळो मचायो जे तूं इनै छोडै है तो तूं सारा ऊं मोटो राजा कैसर गो मित्र कोनी। कोई बी झिको अपणै आपनै राजा होण गो दावो करै है बो कैसर गो दुसमण होवै है। जद पिलातुस आ बात सुणी बो यीसू नै बारै लेगे आयो अर फेंसलो करण गै आसण पर बेठयो। बिं जिग्यां नै पथर गो चबूतरो केवंता हा। इब्रानी भासा में इनै गब्बता केवै है। ओ फसह त्यूंहार गै हफ्तै गी तैयारी गै दिन गो लगभग बारा बजे गो टेम हो। पिलातुस यहुदियां नै केयो, “थारै राजा नै ध्यान ऊं देखो।” बां फेर रोळो मचायो इनै ले जावो इनै करूस पर चढावो पिलातुस बानै केयो कै, “थे चावो हो थारै राजा नै मैं करूस पर चढाऊं।” ईं पर मुख्य याजकां उतर दियो, “कैसर नै छोड़गे म्हारो कोई दूसरो राजा कोनी।” जद पिलातुस बिनै करूस पर चढाण खातर बांगै हात में दे दियो। जद सिपाईयां यीसू नै आपगै कब्जै में ले लियो। अर यीसू आपगो करूस चक'गे यरुसलेम सैहर ऊं बारै एक जिग्यां में लेग्यो। बिं जिग्यां गो नाम “खोपड़ी गी जिग्यां” हो अर इब्रानी बोली में इनै गुलगुता केयो जावै है। बठै बां बिनै अर बिंगै सागै दो ओर आदमियां नै करूस पर चढाया। बे दोनूं आदमी आसै पासै अर बिचाळै यीसू नै। पिलातुस एक दोस पत्र लिखवागे करूस पर लगावा दियो अर इमै लिखेड़ो हो यहुदियां गो राजा। भोत सारा यहुदियां बिं दोस पत्र नै पढयो क्यूंकै जठै यीसू नै करूस पर चढायो हो। बां जिग्यां नगर गै कनै ही। ओ दोस पत्र यहुदियां गी भासा इब्रानी अर रोमी लोगां गी भासा लतीनी अर युनानी लोगां गी भासा युनानी में लिखेड़ो हो। जद यहुदियां गै मुख्य याजकां पिलातुस नै केयो, “यहुदियां गो राजा ना लिखो, पण इंया लिखो,” बण केयो हो कै, “मैं यहुदियां गो राजा हूं।” पिलातुस उतर दियो, “मैं झिको लिख दियो बिनै बदळ कोनी सकूं।” सिपाईयां यीसू नै करूस पर चढा दियो। अर पेलां उतारगे रखेड़ा बिंगा गाबा लिया अर चार सिपाईयां नै बिंगो एक एक हिसो मिलग्यो। बां बिंगो कुड़तो बी लियो अर बो कुड़तो बिना सिडे़ड़ो हो अर उपर ऊं लेगे नीचै तांई टांका लगाएड़ा हा। ईंखातर बां आपसरी में केयो, “आपां इनै कोनी पाड़ा। पण ईं पर परची घाल ल्यां किंगो होवैगो,” अर बां सिपाईयां इंयाई करयो। ओ ईंखातर होयो कै परमेसर गै बचन में लिखेड़ी बात पूरी होवै। ओ बचन ओ है कै, “बां मेरा गाबा आपसरी में बांट लिया, मेरै कुड़तै पर पर्ची घाली।” यीसू गै करूस गै कनै बिंगी मां, अर बिंगी मोसी, क्लोपास गी घराळी मरियम अर मरियम मगदलीनी खड़ी ही। अर झिकै चेलै नै यीसू भोत प्रेम करतो हो बो बी बठै खड़यो हो। जद यीसू आपगी मां कानी देखगे बिनै केयो, “हे मां, आज ऊं ओ तेरो बेटो है।” जद बठै बिं चेलै नै केयो आ तेरी मां है। बिंगै बाद बो चेलो बिनै आपगै घरे लेग्यो अर बिंगी देखभाळ करण लागग्यो। इंगै बाद यीसू ओ जाण ग्यो कै अब बिंगो सारो काम पूरो हो'ग्यो है अर परमेसर गै बारै में लिखेड़ी बाता पूरी करण गै खातर बण केयो कै, “मैं तीसो हूं।” बठै सिरकै ऊं भरेड़ो एक बठळ पड़यो हो। बां हिस्सप नाम गै दरखत गी लाठी लेगे बिंगै सिरै पर रूई बांधी, बां ईं लाठी नै बठळ में डबोगे जद बा रूई भीज गी तो बिंगै मूं गै कनै लगा दी। फेर यीसू सिरको पी लियो तो बो बोल्यो, “पूरो होयो।” जद बण आपगो सिर झुका दियो अर प्राण छोड़ दिया। ओ फसह त्यूंहार गी तैयारी गो दिन हो। अगलो दिन सब्त गै होण गै कारण यहुदियां पिलातुस नै केयो कै सब्त गै दिन बांगी ल्हास करूस पर ना लटकी रेवै, क्यूंकै बो सब्त गो दिन मोटो दिन हो। ईंखातर बां आग्या दी कै बांगी लाता तोड़ दी जावै अर बांगी ल्हास करूस पर ऊं नीचै उतारी जावै। फेर दो सिपाई गेया अर यीसू गै सागै करूस पर लटकाऐड़ा दो लोगां मू एक गी टांग तोड़ दी। फेर दूसरै गी टांग तोड़ दी। पण यीसू गै कनै आ'गे, पेलां ईं मरेड़ो देखगे बिंगी टांगा कोनी तोड़ी। पण सिपाईयां मू एक जणै भालो बिंगी पांसळी में मारयो। जद बिमुं खून अर पाणी निकळण लागग्यो। ऐ सारी बात झिकै देखी है बण ई गवाई दी अर बिंगी बताएड़ी बात सच्ची है। बो जाणै है कै बो साची केवै है कै थे लोग बिस्वास करो। पवितर सासतर में एक जिग्यां इंया लिख्यो कै, बिंगी कोई बी हडी तोड़ी कोनी जावैगी अर दूसरी जिग्यां में इंया लिख्यो कै झिकै गै बां भालो मारयो है, बिं कानी बे देखैगा। पवितर बचन में जिंया लिखेड़ी बात इंयाईं पूरी होई। इंगै बाद अरमतियाह गो युसुफ नाम गो एक आदमी झिको यीसू नै मानतो हो। पण यहुदी अधिकारियां गै डर ऊं ईं बात नै लकोगे राखतो हो। जद बण पिलातुस कनै आ'गे यीसू गी ल्हास नै ले जाण खातर बिनती करी। पिलातुस बिंगी बात मान ली अर आ'गे बिंगी ल्हास लेग्यो। अर झिको निकुदेमुस एक बारी रात में यीसू गै कनै जा'गे बिंऊं मिल्यो हो, बो बी बिंगै सागै हो। बो लगभग बतीस ऊं तैतीस किलो गन्धरस अर एलवा नाम गी सुरम आळी चीज लेगे आयो। अर यहुदियां गै ल्हास नै गाडणै गी रीति गै अनुसार बिनै सुरम आळी चीज लगागे कफण में पळेट दियो। जठै यीसू नै करूस पर चढायो हो, बठै एक बगीचो हो। अर बिं बगीचै में एक नुई कबर ही झिकी में अजे तांई किनैई कोनी रख्यो हो। बिं दिन यहुदियां गो सब्त गी तैयारी गो दिन हो अर बांगो आथण दिन छिपण ऊं बाद सुरू होण ऊं पेलां दफण गो काम हो। ईंखातर यीसू गी ल्हास नै बिं कबर में राखी क्यूंकै बा कबर, कनै ही। हफ्तै गै पेलै दिन दीतवार नै दिनगै दिनगै मरियम मगदलीनी कबर पर आई अर बण देख्यो कै कबर पर ऊं पथर हटेड़ो है। जद बा भाजगे समौन पतरस अर बिंगै दूसरै चेलै झिकै नै यीसू प्रेम करतो हो बांगै कनै गेई। अर केण लागी, बे प्रभु गी ल्हास नै कबर मू काडगे लेग्या है। अर म्हे कोनी जाणा कै बिनै कठै रख दी है। जद पतरस अर बो दूसरो चेलो निकळगे कबर कानी भाज्या। बे दोनूं सागै सागै भाज्या जाण लागरया हा पण दूसरो चेलो पतरस ऊं आ'गै निकळग्यो। अर कबर कनै पेलां पूगग्यो। बण नीचै झुक गे देख्यो कै बठै कफण गा गाबा पड़या है। पण मा कोनी गेयो। जद समौन पतरस बिंगै लारै लारै गेयो, अर कबर गै मा गेयो अर गाबा पड़या देख्या। अर बो कपड़ो झिको बिंगै सिर पर बांदेड़ो हो, कपड़ा गै सागै कोनी पड़यो हो, पण न्यारी एक जिग्यां लपेटेड़ो देख्यो। फेर दूसरो चेलो बी झिको पेलां कबर पर पोंच्यो हो, मा गेयो अर बण देख गे बिस्वास करयो कै सचमुच यीसू मरगे जी उठयो है। अर पवितर सासतर में झिको कीं लिख्यो हो बिनै बे जद तांई समझ कोनी सक्या हा। बो बचन हिसो है कै बिनै मरेड़ा मूं जीवंतो होणो है। फेर बे चेला आपगै घरे उड़ग्या। पण मगदलीनी मरियम रोवंती होई, कबर गै कनै बारै खड़ी रेई अर रोवंता रोवंता कबर में झुकी। जठै यीसू गी ल्हास रखेड़ी ही बठै धोळा गाबा पेरेड़ा दो सुरगदूत एक सिराणै अर दूसरो पगाणै बेठयो देख्यो। सुरगदूतां बिनै पूछयो, “हे बाई, तूं क्यूं रोवै है। बण उतर दियो बे मेरै प्रभु नै चक'गे लेग्या है अर मनै ठा कोनी कै बां बिनै कठै रख्यो है।” ओ केगे बा लारै मुड़ी अर यीसू नै खड़यो देख्यो, पण पिछाण्यो कोनी कै यीसू है। यीसू बिनै केयो, “हे बाई, तूं क्यूं रोण लागरी है। तूं किनै ढूंढै है।” माळी समझगे बिनै केयो, “हे भाई, जे थे बिनै चक लियो है तो मनै बता। बिनै कठै रख्यो है। मैं बिनै ले जाऊंगी।” यीसू बिनै केयो, “हे मरियम, बा लारै मुड़ी अर इब्रानी में केयो रब्बूनी मतलब गुरू।” यीसू बिनै केयो, “मैं अजे तांई मेरै पिता कनै उपर कोनी गेयो। तूं मेरै हात ना लगा। आ बात मेरै भाईया नै बता। मैं आपगै पिता अर थारै पिता, अर आपगै परमेसर अर थारै परमेसर गै कनै उपर जाऊं हूं।” मरियम मगदलीनी चेला नै जा'गे बतायो, “मैं प्रभु नै देख्यो अर बां मनै ऐ बाता कैई।” बिं दिन आथण गै झिको हफ्तै गो पेलो दिन हो। यहुदियां गै डर गै कारण बिंगा चेला बारनो बन्द कर'गे मा बेठया हा। जद यीसू बांगै बिचाळै आ'गे खड़यो हो'ग्यो अर बानै केयो, “थानै सांती मिलै।” इतो केण गै बाद यीसू आपगो हात अर पांसळी दिखाई। चेला जद यीसू नै देख्यो तो बे भोत राजी होया। जद यीसू बानै फेर केयो, “थानै सांती मिलै, जिंया पिता मनै भेज्यो है मैं बी थानै भेजूं।” ओ केगे बण बां पर फूंक मारी अर बानै केयो, “पवितर आत्मा लेल्यो।” कोई बी आदमी गै पापां नै थे माफ करो हो बानै माफी मिलैगी अर झिकै गा पाप थे माफ कोनी करोगा बिनै माफी कोनी मिलैगी। थोमा झिको बारा मू एक हो झिको दिदुमुस कुहावंतो हो जद यीसू आयो हो बांगै सागै कोनी हो। जद दूसरा चेला बिनै केण लागग्या, म्हे प्रभु नै देख्यो है, जद बण केयो जद तांई मैं बिंगै हात में मेखा गा निसान ना देखल्यूं अर मेखा गै मोरा में आपगी आंगळी ना घालल्यूं अर बिंगी पांसळी में आपगो हात ना घालल्यूं जद तांई मैं बिस्वास कोनी करूंगा। आठ दिन गै बाद बिंगा चेला एकर फेर घर गै मा हा अर थोमा बी बांगै सागै हो। अर बारनै गै ताळो लगाएड़ो हो। जद यीसू आयो अर बांगै बिचाळै खड़यो होगे केयो, “थानै सांती मिलै।” जद बण थोमा नै केयो, “आपगी आंगळी अठै मेरै हात में लगागे देख अर आपगो हात मेरी पांसळी में घाल अर सक ना कर पण बिस्वास कर।” ओ सुणगे थोमा उतर दियो, “हे मेरा प्रभु, हे मेरा परमेसर।” यीसू बिनै केयो, “तूं मनै देखगे बिस्वास करयो है पण धन्य है बे लोग झिका मनै बिना देखे बिस्वास करै है।” यीसू आपगै चेला नै भोत सारा चमत्कार दिखाया, झिका ईं किताब में कोनी दिया। अर झिकी बाता लिखी है बे ईंखातर है कै थे बिस्वास करो कै यीसू ई परमेसर गो बेटो, मसी है। अर इंया बिस्वास करता होया बिंगै नाम में जीवन पाओ। आं बाता गै बाद यीसू अपणै आपनै तिबिरियास झील गै किनारै चेला पर ईं रीति ऊं परगट करयो। समौन पतरस अर थोमा झिको दिदुमुस कुहावंतो हो अर गलील गै काना नगर गो नतनएल अर जबदी गा बेटा अर चेला मू दो ओर जणा भेळा हा। जद समौन पतरस बानै केयो, “मैं मछली पकड़णै जाण लागरयो हूं।” बां बिनै केयो, “म्हे बी तेरै सागै चालांगा।” अर बे बिंगै सागै चाल पड़या अर किस्ती में चढग्या। पण बिं रात कीं कोनी पकड़यो। अर दिन उगग्यो जद यीसू किनारै पर आ'गे खड़यो होयो। पण चेला कोनी पिछाण सक्या कै बो यीसू है। फेर यीसू बानै पूछयो, “भाईयो थारै कनै कोई मछली है।” बां उतर दियो, “कोनी।” फेर बण केयो, “दाहिणै पासै जाळ फेंको तो थानै कीं मिलैगो। जद बां जाळ फेंक्यो तो भोत सारी मछलियां गै कारण जाळ पाछो खींच कोनी सक्या।” फेर यीसू गै प्यारै चेलै पतरस नै केयो, “ओ तो प्रभु है।” जद समौन ओ सुण्यो कै ओ प्रभु है तो बण आपगा उपर गा गाबा पेर लिया क्यूंकै उपर गा गाबा खोलेड़ा हा। अर पाणी में छाळ मार दी। पण दूसरा चेला मछलियां ऊं भरेड़ो जाल खींचता होया किस्ती नै किनारै पर ले आया क्यूंकै बे किनारै ऊं लगभग सौ मीटर दूर हा। जद बे किनारै पर उतरया तो बां कोयलै गी आग पर रोटी अर मछली रखेड़ी देखी। यीसू बानै केयो, “झिकी मछलियां थे अब पकड़ी है बामू कीं इनै ले आओ।” फेर समौन पतरस किस्ती पर गेयो अर एकसो तरेपन मोटी मछलियां ऊं भरेड़ो जाळ किनारै पर खिंचयो, जाळ में इती जादा मछलियां ही फेर बी जाळ पाटयो कोनी। यीसू चेला नै केयो, “आओ, रोटी खावो।” चेला मू बिनै कोई कोनी पूछ सक्यो कै तूं कुण है? क्यूंकै बे जाणै हा कै ओ प्रभु ई है। फेर यीसू आ'गे बानै रोटी अर मछलियां दे दी। इंया तीसरी बारी होयो कै यीसू मरया मू जी उठण गै बाद चेला नै दिख्यो। जद बां रोटी खा ली तो यीसू समौन पतरस नै केयो, “यूहना गा बेटा समौन, जितो प्रेम ऐ मेरूं करै है, तूं मेरूं बिंऊं ई जादा प्रेम करै है।” पतरस यीसू नै केयो, “हा, प्रभु थे जाणो है कै मैं तेरूं प्रेम करूं हूं।” यीसू पतरस नै केयो, “झिका मेरै मेमणिया गी तरियां है बांगी रुख्वाळी कर।” यीसू बिनै फेर केयो, “यूहना गा बेटा समौन, के तूं मनै प्रेम करै है?” पतरस यीसू नै केयो, “हा प्रभु थे जाणो हो मैं थारूं प्रेम करूं हूं।” यीसू पतरस नै केयो, “झिका मेरै भेड़ा गी तरियां है बांगी रुख्वाळी कर।” यीसू फेर तीसर पतरस नै केयो, “यूहना गा बेटा समौन, के तूं मनै प्रेम करै है?” पतरस भोत दुखी होयो कै यीसू तीसर बिनै पूछयो है कै तू मनै प्रेम करै है? अर पतरस यीसू नै केयो, “हे प्रभु, थे सारो कीं जाणो हो मैं थारूं प्रेम करूं हूं।” यीसू पतरस नै केयो, “झिका मेरै भेड़ा गी तरियां है बांगी रुख्वाळी कर।” मैं तनै साची साची केऊं जद तूं जवान हो तो आपगी कड़तू बांदगे जठै तेरो जी करतो तूं उड़ जावंतो हो पण जद तूं बुढो हो जावैगो तो आपगा हात लम्बा कर'गे अर कोई दूसरो तेरी कड़तू बांदगे जठै तूं कोनी जाणो चावै तनै बठै ले जावैगो। बण आ बात समझाण खातर कैई कै पतरस किसी मोत ऊं परमेसर गी बडाई करैगो। इतो केगे यीसू बिनै केयो, “मेरै लारै चालतो रे।” पतरस लारै मुड़यो अर देख्यो कै बो चेलो झिकै नै यीसू प्रेम करतो हो बिंगै लारै आण लागरयो है। ओ बो ई हो झिकै रोटी खावंता टेम बिंगी छाती पर झुकगे पूछयो हो, “हे प्रभु बो कुण है, झिको तनै धोखै ऊं पकड़वावैगो।” जद बिनै देखगे पतरस यीसू नै केयो, “हे प्रभु, इंगो के हाल होवैगो?” यीसू बिनै केयो, “जे मैं चावूं कै जद तांई मैं आऊं ओ अठै रेवै तो इमै तेरो कीं लेणो देणो कोनी है। पण तूं मेरै लारै चालतो रे।” यीसू आ बात कैई, ईंखातर बिस्वासी लोगां में आ बात फेलगी कै बो चेलो कदी कोनी मरैगो। पण यीसू बिनै इंया कोनी केयो हो ओ कोनी मरैगो। पण बिनै केयो हो कै, “मेरै पाछो आण तांई ओ अठै रेवै आ मेरी इच्छा है तो तनै इमै के?” ओ बो ई चेलो हो झिको आं बाता गी गवाई देवै है अर झिकै ऐ बात लिखी है अर म्हे जाणा हां कै बिंगी बाता सच्ची है। यीसू ओर बी भोत सारा काम करया झिका ईं किताब में लिख्या कोनी। जे बां सारा नै एक एक कर'गे लिख्या जावंता तो भोत किताबा बण जावंती। अर मैं समझूं हूं इती किताबा बण जावंती कै बानै रखण खातर ईं संसार में जिग्यां ना होवंती। हे थियुफिलुस, झिका काम यीसू सुरू ऊं लेगे सुरग जाणूं पेलां करया अर सिखाया बां बातां नै मैं मेरी पेली किताब में बता चुक्यो। बो सुरग जाणूं पेलां झिका खास चेला नै चुण्या बानै पवितर आत्मा गै द्वारा आग्या दी। आपगै मरण गै चाळीस दिनां गै बाद में बो बांगै सामणै आ'ग्यो, रोटी खायी, बांगै सागै बात कर'गे अपणै आपनै जींवंतो दिखायो। बिंगै बाद बो परमेसर गै राज गी बातां करतो रेयो। एकर यीसू मसी बांगै सागै रोटी खांता टेम आग्या दी कै थे लोग यरुसलेम ना छोड़ो, क्यूंकै मेरै द्वारा बतायेड़ी बात झिको पिता परमेसर पवितर आत्मा देण गो वायदो करयो है बिंगी उडीक करता रेओ। यूहना तो पाणी में बतिस्मो दियो पण थोड़ै दिनां गै बाद थे पवितर आत्मा ऊं बतिस्मो पाओगा। बां सारा जणां भेळा होगे पूछयो कै, “हे प्रभु, थे अब इसराएल गो राज पाछो ल्या देवोगा के?” बण बानै केयो कै, “झिका काम पिता परमेसर आपगै हात में राखै बानै जाणनो थारो काम कोनी। पण पवितर आत्मा थारै पर आवैगी जद थानै सामरथ मिलैगी अर थे यरुसलेम अर सारै यहुदियां अर सामरिया अर धरती गी च्यारा कूंटा तांई मेरा गवा बणोगा।” ओ केगे बो बांगै देखतां देखतां उपर सुरग में चक लियो गयो अर बादळां बिनै लको लियो। अर बिंगै उपर जांवता टेम बां आसमान कानी देख्यो तो दो आदमी धोळा गाबा पेरेड़ा बांगै कनै आया। अर केण लागग्या, “हे गलीली आदमियों थे सुरग कानी क्यामी देखो। ओ यीसू थारै कनूं सुरग में उठा लियो है अर जिंया थे इनै जावंता देख्यो है बिंयाई आवंता देखोगा।” फेर खास चेला जेतुन नाम गै प्हाड़ ऊं यरुसलेम पाछा आया, इंगी दूरी एक सबत गै दिन गै बराबर है। अर बठै पूगगे बे उपर गै बिं कमरै में गेया जठै पतरस, यूहना, याकूब, अन्द्रियास, फिलिप्पुस, थोमा, बरतुल्मै अर मत्ती, हलफई गो बेटो याकूब, समौन जेळोतोस अर याकूब गो बेटो यहूदा ठेरेड़ा हा। ऐ सारा मिलगे पराथना करता हा, आंगै सागै केई लुगाईयां अर यीसू गी मां मरियम अर यीसू गा भाई बी हा। केई दिना गै बाद बिस्वासी लोगां गी एक पराथना सभा गै मा पतरस खड़यो होगे बात करी, ऐ लगभग 120 आदमी हा। “हे मेरा भाईयों अर भेनों, यीसू नै पकड़ान आळै नेता यहूदा गै बारै में पवितर आत्मा दाऊद गै द्वारा पवितर सासतर में भोत पेलां ई बता दियो, बो पूरो होणो जरूरी हो। यहूदा ईं सेवकाई गै मा म्हारै सागै हो।” बुरै काम खातर यहूदा नै झिको धन मिल्यो बिं धन ऊं बण एक खेत मोल लियो। अर फेर बो मुंदो पड़ग्यो अर बिंगो पेट पाटग्यो अर सारी आंतड़ी बारै निकळ गी। अर इंगै बारै में यरुसलेम में रेण आळै सारै लोगां नै पतो लागग्यो। ईंखातर बिं खेत गो नाम बांगी बोली में हक्लदमा राख्योग्यो झिकै गो मतलब है “लोइ गो खेत।” पतरस इंया बी केयो हो क्यूंकै भजन संहिता में इंया लिखेड़ो है कै, “बिंगो घर उजड़ जावै अर बिमै रेण आळो कोई ना बचै ” अर इंया बी लिखेड़ो है कै, बिंगो काम कोई ओर ले लेवै। ईंखातर जद प्रभु यीसू म्हारै सागै हो जद यूहना बतिस्मो देणो सरू करयो बिं टेम ऊं लेगे यीसू मसी सुरग में लियो गयो बिं टेम तांई झिका लोग म्हारै सागै हा बामूं एक जणो चुण्यो जाणो झिको यीसू मसी गै जी उठण गी गवाई दे सकै। ईंखातर बां दो आदमियां नै चुण्या। बिमै एक युसुफ हो, बिंगो यहुदी नाम युसुफ बरसब्बा हो अर बिंगो रोमी नाम युसतुस हो। अर दूसरो मत्तियाह हो। फेर बे ओ केगे पराथना करण लागग्या कै, “हे प्रभु तूं सब गै मना नै जाणै है, म्हानै बता कै आं दोना मू थे किनै चुण्यो है। झिको एक खास चेलै गै रूप में झिकै काम नै यहूदा छोड़गे आपगी जिग्यां पर उड़ग्यो, बो ईं काम नै जिमेदारी ऊं पूरो कर सकै।” फेर बां परची घाली अर परची मत्तियाह गै नाम गी निकळी। ईं तरियां बो ग्यारा खास चेला में सामिल होग्यो। पेन्तिकुस्त गै दिन सारा बिस्वासी एक जिग्यां में भेळा हा। बिं टेम एकदम बठै सुरग ऊं भयानक आंधी आयी अर झिकै घर में बे बेठया बो भरिजग्यो। अर आग बरगी लपटा बठै सामणै दिखण लागगी। बा आग सारा गै उपर टिक गी। बे सारा पवितर आत्मा ऊं भरिजग्या अर पवितर आत्मा गी सामरथ ऊं बे दूसरी भासा में बोलण लागग्या। बिं टेम बठै यरुसलेम में सारा देसा ऊं आएड़ा यहुदी नेम विधान नै मानण आळा रेवंता। जद बां आंधी गी आवाज सुणी तो भीड़ एक पासै होगी। बे लोग अचंभै में पड़ ग्या क्यूंकै हर एक नै आपगी बोली में बोलता सुणीज्यैओ। बे सारा अचंभै में होगे बोल्या, “ऐ बोलण आळा सारा लोग गलील प्रदेस ऊं आएड़ा है के? फेर म्हे हर एक म्हारी आपगी बोली में बोलता किंया सुणा हां?” बठै पारथी, मेदी अर एलामी, मेसोपोतोमिया गा वासी, यहुदिया अर कप्पूदूकिया, पुन्तुस अर आसिया, फिरगिया अर पम्फूलिया, मिसर अर साइरीन नगर गै नेडै़ लीबिया गै कीं परदेसां गा लोग, रोम ऊं आया लोग झिका में यहुदी अर गेर यहुदी झिका यहुदी धर्म नै स्वीकार करण आळा लोग, क्रेती अर अरब में रेण आळा। म्हे सारा परमेसर गै चमत्कार गै कामां नै आप आपगी बोली में सुणन लागरया हां। बे सारा अचंभै में पड़गे आपसरी में पूछण लागग्या ओ के होवै? पण दूसरै लोगां खास चेला गो मजाक करता केयो, “आ सारी बात बोळी दारू पीणै ऊं होई है।” पतरस ग्यारा खास चेला गै सागै खड़यो होगे इंया बोल्यो, “यहुदी बेलियो अर यरुसलेम में रेण आळा सारा लोगों मेरी बात सुणो, इंगै बारै में मैं थानै बताऊं। जिंया थे समझो बिंया आं दारू कोनी पी क्यूंकै अजै तो दिनगै गा नौ बजया है।” पण आ बा बात है झिकी गै बारै में योएल परमेसर गी बात बताण आळै केयो हो, परमेसर केवै है, “अंत गै दिना में, मैं सारै आदमियां पर आपगी आत्मा दे देऊंगा थारा बेटा अर बेटियां परमेसर गी बात बोलण लागज्यैगा। अर थारै जवान लोगां नै परमेसर दरसण देवैगो अर थारै बुडै लोगां नै परमेसर सपनो दिखावैगो। बां दिना में परमेसर गी सेवा में झिका आदमी अर लुगाईयां हो'सी बानै आपगी आत्मा ऊं भर देऊंगा अर बे परमेसर गी बात करसी। मैं आकास में अचंभै गा काम करूंगा, अर धरती पर चमत्कार दिखाऊंगा मतलब खून, आग अर धूंअ गा बादळ दिखाऊंगा। प्रभु गै आण गै खास अर मोटै दिन ऊं पेलां सूरज अंधेरै में अर चांद लोइ में बदळ जावैगो। अर प्रभु नै बुलाणै आळां सारा नै बो बचावैगो।” हे इसराएल गा लोगों मेरी बात सुणो, यीसू मसी गै द्वारा परमेसर झिका चमत्कार गा काम करया हा बे थे सारा देख्या हा, बिंगै अधिकार गै बारै में बी थानै पतो है। परमेसर गी योजना गै अनुसार यीसू मसी नै थारै हात में दे दिओ अर थे लोग गळत लोगां गै हात ऊं बिनै करूस पर चढागे मार दिओ। पण परमेसर बिनै जींवंतो करयो अर मोत गै बस ऊं बिनै छुडा लिओ क्यूंकै यीसू मसी नै मोत गै बस में राखणो असंभव है। दाऊद बिंगै बारै में केयो, “मैं, यीसू प्रभु नै सदां ई आपगै सामणै देख्यो, बो मेरै सागै है, ईंखातर मैं पड़ ना जाऊं। ईंखातर खुसी गै सागै परमेसर गी मेमा करूंगा अर मेरो सरीर बी आसा में जींवंतो रेवैगो। क्यूंकै तूं मेरै प्राण नै पताळ में कोनी छोड़ैगो, तूं आपगै पवितर जण नै गळण कोनी देसी। थे मनै जीवन गै रा गो ग्यान करायो है, आपगी हजूरी में तूं मनै खुसी देसी।” हे मेरा यहुदी बेलियो, मैं बिस्वास गै सागै बडेरै दाऊद गै बारै में थानै कीं केणो चाऊं कै बिंगी मोत होगी अर बिनै दफणा दिओ अर बिंगी कबर आज तांई अठै है। क्यूंकै बो एक परमेसर गी बात बताण आळो हो। बो जाणै हो कै परमेसर बिनै बचन दियो है कै तेरै वंस ऊं किनैई सिंहासन पर बिठास्यूं। दाऊद आ'गै गै बारै में देखगे मसी गै जी उठण गै बारै में इंया केयो है, “तू मेरै प्राण नै पताळ में कोनी छोड़ैगो, तूं आपगै पवितर जण नै गळण कोनी देसी।” परमेसर यीसू मसी नै जींवंतो कर दियो, इंगा म्हे सारा गवा हां। परमेसर यीसू नै आदर देगे आपगै दाहिणै पासै बिठा लिओ। यीसू मसी परमेसर गै वायदै गै अनुसार पवितर आत्मा लेगे सारा नै भर दिया झिकै नै थे अब देखो अर सुणो हो। दाऊद सुरग पर कोनी गेयो फेर बी बो इंया बोल्यो, “परमेसर मेरै प्रभु नै इंया केयो मेरै दांहिणै पासै बैठ। जद तांई मैं तेरा बैरियां नै तेरै पगां गी चोकी ना बणा दैयूं।” ईंखातर सारा इसराएली लोगां नै ईं बात गो पक्को पतो लाग जावै है कै झिकै यीसू मसी नै थे करूस पर चढा गै मरा दियो बिनै प्रभु अर मसी ठेरायो। आ बात सुणगे बे लोग भोत दुखी हो'ग्या अर पतरस अर दूसरा खास चेला नै पूछण लागग्या, “मेरा यहुदी बेलियो, म्हे के करां?” पतरस बानै केयो, “मन बदळो, अर आपगै पापां गी माफी लेण खातर थानै सारा नै यीसू मसी गै नाम में बतिस्मो लेणो चईयै। फेर थे परमेसर गै वायदै गै अनुसार पवितर आत्मा पाओगा। क्यूंकै ओ परमेसर गो वायदो थारै खातर अर थारी उळाद खातर अर दूसरा ओर लोग झिका दूर है आं सारा नै आपगो वायदो पूरो करण खातर बुलावैगा।” पतरस बांगै सागै न्यारा न्यारा बचनां गै द्वारा बानै समझाया अर बानै बिनती करी कै थे लोग, झिका लोग परमेसर नै कोनी मानै बाऊं बचगे रेओ। अर झिकै लोगां बिं संदेस नै मान्यो बां बतिस्मो लिओ। ईं तरियां बिं दिन लगभग तीन हजार लोग यीसू पर बिस्वास करण आळा बणग्या। बे लोग अपणै आपनै समरपित कर'गे खास चेला गै संदेस अर संगती करणी अर प्रभु भोज में सामिल होणो अर हर रोज पराथना करण लागग्या। इसराएल गै सारै लोगां पर बिस्वास गो डर छाग्यो अर खास चेलां गै हाता ऊं भोत सारा चमत्कार देखता रेया। अर सारा बिस्वासी लोग भेळा रेवंता हा अर बांगै कनै झिको कीं हो बे बांट लेवंता। बां आप आपगी सारी जमीन बेच दी अर झिकै नै जरूरत होवंती बिनै बांट देवंता। बे हर रोज मिन्दर में भेळा होगे एक सागै पराथना करता। बे बारी बारी ऊं प्रभु भोज सारां घरां में रखता अर सारा लोग खुसी गै सागै रोटी खावंता। लोग परमेसर गी मेमा करता, सारा बांगै सागै खुसी ऊं रेवंता। प्रभु हर रोज भोत लोगां नै मुकती देगे बांगै सागै सामिल होण खातर मदद करतो। एक दिन पतरस अर यूहना दोफारै गै बाद तीन बजे मिन्दर में पराथना करण जाण लागरया हा। बिं मिन्दर गै कनै सुन्दर नाम गो बारनो हो, हर रोज केई आदमी जन्म ऊं लंगडै़ एक आदमी नै बठै मिन्दर में जाण आळा ऊं भीख मंगवाण खातर ले जाण लागरया हा। जद पतरस अर यूहना मिन्दर गै मा जाण लाग्या तो बण बां कनूं भीख मांगी। पतरस अर यूहना बिं कानी देखगे अर पतरस केयो, “म्हारै कानी देख।” जद बण बां दोना कनूं कीं मिलण गी आस राख गे देख्यो। जद पतरस बिनै केयो, “मेरै कनै सोनो अर चांदी तो है कोनी, पण झिको कीं मैं कर सकूं हूं बो मैं तेरै खातर करूंगा।” जद पतरस बिनै हुकम दियो कै नासरी यीसू मसी गै नाम ऊं खड़यो हो'जा अर चाल पड़। फेर बिंगो दाहिणो हात पकड़ गे बिनै उठायो, बिं टेम ई बिंगै गोडा अर पगां में जान आ'गी। अर बो आपगै पगां पर उछळयो अर चालण लागग्यो। बो उछळतो अर चालतो अर चालतो फिरतो परमेसर गी स्तुति करतो बांगै सागै मिन्दर में उड़ग्यो। सारै लोगां बिनै चालता अर परमेसर गी स्तुति करता देख्यो। बां बिनै पेहचाण लियो कै बो बोई है झिको मिन्दर गै सुन्दर नाम गै बारनै में बेठगे भीख मांगतो। बिंगै सागै झिको कीं घट्यो बिं पर बे लोग अचंभो करयो। जद बो पतरस अर यूहना कनै सुलेमान गै बरामदै में हो जद सारा लोग अचंभो करता भाजगे बां कनै आया। ओ देखगे पतरस लोगां नै बोल्यो, हे इसराएल गा लोगों थे ईं बात पर अचंभो क्यूं करो अर इंया म्हानै क्यामी देखो? थे लोग इंया सोचो हो कै म्हे आपगी सकती ऊं इनै चालण गै लायक कर दियो या म्हे परमेसर गो बोळो आदर मान करा हां, इंगै वास्तै इंया होयो। म्हारा बडेरा अबरहाम, इसहाक अर याकूब गै परमेसर यीसू मसी नै मेमा दी अर थानै दियो। थे लोगां बिनै मरवाण खातर पिलातुस नै दे दियो। पिलातुस बिनै छोडण गो बिचार करयो पण थे बिनै नकार दियो। थे बिं पवितर अर भलै आदमी नै स्वीकार कोनी करयो अर ओ मांगयो कै एक हतियारै नै म्हारै खातर छोड़ दियो जावै। लोगां नै जीवन गै रा दिखाण आळै नै थे मरवा दियो पण परमेसर बिनै मरेड़ा ऊं जींवंतो कर दियो, म्हे ईं बात गा गवा हां। यीसू मसी पर बिस्वास करण ऊं ईं आदमी नै चालण गी ताकत मिली, म्हारै बिस्वास पर यीसू मसी इनै पूरी तरियां ठीक करयो। आ बात थे देखी है। मेरा इसराएली बेलियो अब मैं जाणू हूं थे अर थारा नेता लोगां झिको काम यीसू मसी करयो बो थारी अग्यानता गी बजह ऊं होयो। पण झिकी बाता नै परमेसर आपगी बाता बताण आळै सारै लोगां गै मूं ऊं बता दी ही कै बिंगै मसी नै दुख उठाणो पड़सी अर बण इंया पूरो बी करयो हो। ईंखातर थे आपगो मन बदळो अर परमेसर कानी मुड़ जाओ कै थारा पाप धो दिया जावै। अर परमेसर थारै सागै रेगे थानै भोत बारी होंसलो देवै अर परमेसर थारै खातर यीसू मसी नै भेजैगो झिकै नै परमेसर थारै खातर पेलां ई चुण लियो है। भोत पेलां परमेसर आपगै पवितर परमेसर गी बात बताण आळा गै द्वारा बताएड़ी बाता पूरी करण तांई मसी सुरग में ई रेवैगो। मूसा इंया केयो, “प्रभु परमेसर केवै कै थारै माऊं एक मेरै बरगो परमेसर गी बात बताण आळो खड़यो करूंगा, बिंगी बात थे ध्यान ऊं सुणियो। अर झिको कोई आदमी बिंगी बातां ना सुणैगो बिनै पूरी तरियां नास कर दियो जावैगो।” समूएल अर बिंगै बाद में आया सारा परमेसर गी बात बताण आळा जद कदी कीं केयो आं दिनां गी बात करी। अर थे तो बां परमेसर गी बात बताण आळा अर बिं वाचा गा भागी हो झिकै गो परमेसर थारै बडेरा सागै वायदो करयो। परमेसर अबरहाम नै केयो, तेरी उळादा ऊं धरती गा सारा लोग आसिस पावैगा। परमेसर आपगै सेवक मसी नै चुणगे थारी आसिस खातर पेलां ई थारै बिचाळै में घाल्यो कै थे थारै माड़ै रास्तै ऊं हट जाओ। जद पतरस अर यूहना लोगां ऊं बात करा हा बिं टेम कीं याजक लोग, मिन्दर गै सिपाईयां गा मोटा अधिकारी लोग अर कीं यहुदी धरम गै लोगां गो झुंड बांगै कनै आयो। ऐ लोग भोत रीस में हा क्यूंकै ऐ दो खास चेला लोग यीसू मसी गै बारै में बतागे मरेड़ा ऊं जी उठण गो परचार करता हा। ईंखातर बां दोनां नै अगलै दिन खातर बंद कर दिया। भोत सारै लोगां पतरस अर यूहना गो संदेस सुणगे यीसू मसी पर बिस्वास करयो। बिस्वास करण आळा आदमियां गी गिणती लगभग पांच हजार होगी। अगलै दिन बांगै बुजरग नेता अर यहुदी धरम सासतरी यरुसलेम में पंचायत रखी। हना महा याजक, कैफा, यूहना, सिकन्दर अर महा याजक गै परिवार गा दूसरा लोग बी आया। बे लोग बां दोना नै पूछण लागग्या कै ओ काम करण गो अधिकार थानै कण दियो? फेर पतरस पवितर आत्मा ऊं भरिज गे बानै केयो, हे नेताओं अर बुडा लोगो, आज थे लोग ओ लंगड़ो आदमी किंया ठीक होयो इंगै बारै में पूछणो है तो म्हारूं बात करो। थानै अर पूरै इसराएली लोगां नै पतो होणो चईयै ओ काम नासरी यीसू मसी गै द्वारा होयो है। थे लोग यीसू मसी नै करूस पर चढायो पण परमेसर बिनै मरेड़ा ऊं जींवंतो कर दियो। यीसू गै बारै में पवितर सासतर में इंया लिखेड़ो है कै, “थे झिकी ईंट नै बेकार कर'गे समझी बाई एक कूंट पर लगाण आळी आच्छी ईंट बणगी।” ईंखातर म्हानै यीसू मसी में ई मुकती मिलै है अर पूरी दुनिया में मुकती पाण खातर परमेसर इंगै बिना कोई दूसरो नाम कोनी दियो। बे लोग समझग्या कै पतरस अर यूहना बांगै कनूं जमाई कोनी डरै। ऐ दोनूं अणपढ अर आम आदमी है, बानै पतो लागग्यो कै ऐ यीसू मसी गै सागै रेवंता, ईं बात गो बानै अचंभो हो'ग्यो। ठीक होएड़ो आदमी पतरस अर यूहना कनै खड़यो देखगे बां कनै बोलण गी हिमत कोनी रेयी। बां बानै यहुदी पंचायत ऊं बारै काड़ दिया अर आपसरी में आंगै बारै में बात चीत करण लागग्या। आं लोगां पर आपां कीं कोनी कर सकां क्यूंकै यरुसलेम में रेण आळा हर कोई जाणै बांगै द्वारा एक आच्छो चमत्कार होयो है अर आपां बिनै मना कोनी कर सकां पण आपां बानै चेतावां कै बे यीसू मसी गै नाम ऊं करेडै़ चमत्कार नै किनैई ना बतावै कै ईं बात नै फेलण ऊं रोक्यो जा सकै। बां बानै यहुदी पंचायत में बुलाया अर चेता दियो कै बे यीसू गो नाम किनैई ना बतावै अर ना बिं नाम गो उपदेस देवै। पतरस अर यूहना केयो, “परमेसर गी नजर में थानै परमेसर ऊं जादा आदर देणो आच्छो है या कोनी, इंगो फेंसलो थे आप ई करो।” झिको कीं यीसू मसी कनूं सीख्यो अर देख्यो बो दूसरा नै बताणो ई पड़ैगो। बां पतरस अर यूहना नै धमकाया अर छोड़ दिया अर बानै सजा कोनी दी क्यूंकै पेलां होयडै़ चमत्कार नै लेगे भोत सारा लोग परमेसर गी बडाई करा हा। झिकै आदमी पर चमत्कार होयो बिंगी उंमर चाळीस साल ही। महा पंचायत ऊं छूट'गे पतरस अर यूहना दूसरै बिस्वासी लोगां कनै आया झिको कीं महा याजकां अर बुडै लोगां बतायो बानै बता दियो। आ बात सुणगे सारा एक सागै मिलगे परमेसर गी बडाई करी अर केयो, “म्हारा म्हान प्रभु, सुरग, धरती अर समुंदर अर झिको कीं आंगै मा है सारो कीं थे ई बणायो।” थे पवितर आत्मा गै द्वारा आपगै सेवक दाऊद गै मूं ऊं केयो, गेर यहुदी लोगां रोळो क्यूं मचायो, अर लोगां बेकार गी बातां क्यूं सोची, धरती गा राजा एक सागै प्रभु अर मसी गै खिलाफ लड़ाई करण खातर खड़या हो'ग्या। हेरोदेस अर पुन्तियुस पिलातुस ईं नगर में गेर यहुदी अर इसराएली लोगां सागै मिलगे थारै सेवक यीसू गो बिरोध करयो। थे ई थारै सेवक यीसू मसी गो अभिसेक करयो थे सरवसकतिमान हो, झिको कीं थे पेलां फेंसलो करयो बो ई अब हो'ग्यो। अब प्रभु बां लोगां गी धमकाण आळी बात सोचगे म्हानै बिना डर ऊं सुब समाचार सुणाण खातर थे मदद करो। ठीक करण खातर थे आपगो हात लोगां गै उपर राखो अर निसान अर चमत्कार गा काम थारै पवितर सेवक यीसू गै नाम ऊं करया जावै। जद बे पराथना करा हा तो झिकी जिग्यां में बे सारा बेठया बा जिग्यां हालगी अर बे सारा पवितर आत्मा ऊं भरिजग्या अर परमेसर गो बचन बिना डर गै सुणावंता। यीसू मसी पर बिस्वास करण आळा सारा एक मन अर एक चित हा। कोई बी इंया कोनी केवंतो कै बिंगी कोई बी चीज आपगी है, बांगै कनै झिको कीं होवंतो बो सारो आपसरी में बाट लेवंता। अर बे खास चेला बड़ी ताकत अर खुसी ऊं प्रभु गै जी उठण गी गवाई देवंता। परमेसर कनूं झिकी आसिस बां पर ही बे दूसरा नै देवंता। बां कनै कोई बी चीज गी कमी कोनी क्यूंकै झिको कीं बां कनै खेत अर घर होवंतो बिनै बे बेचगे झिको धन मिलतो खास चेला नै ल्या देवंता अर किनै बी जरूरत होवंती बे आपसरी में बांट लेवंता। युसुफ नाम गो साईप्रस गो एक लेवी हो झिकै गो नाम खास चेलो बरनाबास रख्यो इंगो मतलब सांती देण आळो। बण आपगो खेत बेचगे सारा रिपिया खास चेला नै ल्यागे दे दिया। अर हनन्याह अर बिंगी लुगाई सफीरा दोनां रळगे आपगी जमीन गो कीं हिसो बेच दियो। बिं धन मू लुगाई गी जाणकारी में कीं धन बण न्यारो राख दियो अर बाकी खास चेला नै दे दिओ। पण पतरस हनन्याह नै केयो, सैतान तेरै मन में आ बात किंया घाली कै तूं थोड़ो धन बचा गे न्यारो राख। तूं पवितर आत्मा ऊं झूठ बोल्यो है। खेत बेचण ऊं पेलां अर बाद में बी ओ धन तेरो ई हो। पण तूं झूठ क्यूं बोल्यो। तूं मिनखा ऊं कोनी पण परमेसर ऊं झूठ बोल्यो है। जद हनन्याह आ बात सुणी तो पड़ग्यो अर मर ग्यो। झिका लोग आ बात सुणी बे भोत डरग्या। अर केई जवान लोग उठगे बिनै कफण में बांदगे बारै ले जा'गे दफणा दिओ। तीन घंटा बाद झिको कीं घटयो बिंऊं अणजाण बिंगी घराळी पतरस कनै आयी। जद पतरस बिनै पूछयो, “बता, तूं अर तेरै पति मिलगे इतै गो ई खेत बेच्यो है के?” बण केयो, “हां।” पतरस बिनै केयो, “थे दोना मिलगे प्रभु गी आत्मा गी परीक्सा क्यूं लेवै हा। तेरै पति गी ल्हास चकण आळा अठै खड़या है, बे लोग तनै बी ले जावैगा।” फेर बां पतरस गै पगां पड़गी अर मरगी। फेर जवान लोग आ'गे बिनै लेग्या अर बिंगै पति कनै दफणा दी। आ बात सुणगे सारा बिस्वासी लोग अर कण बी सुणी, सारां पर भोत भय छा गयो। खास चेला गै द्वारा लोगां गै बिचाळै भोत सारा निसान अर चमत्कार करया जावंता हा। बे सारा मिन्दर में सुलेमान गै बरान्दा में कठ्ठा होवंता। सारा लोग बिस्वासी लोगां गो आदर मान करता, फेर बी बांगै सागै मिलण गी हिम्मत कोनी होवंती। पण भोत लोग प्रभु पर बिस्वास कर'गे बिस्वासी लोगां सागै मिलता रेवंता। लोग आपगै बीमारां नै सड़क गै किनारै मांचा अर चादरां पर ल्यागे बिठा देवंता कै जद पतरस बठूं जावैगो तो बिंगी छींया बां पर पड़ै। यरुसलेम गै आसैपासै गै गामां ऊं भोत लोग बीमार अर ओपरी बडे़ड़ा लेगे आवंता बे सारा ठीक हो जावंता। जद महा याजक अर सदूकियां भोत रीस में बांगै सामणै खड़या हो'ग्या। बां खास चेला नै बंदी बणा लिया अर बानै सरकारी जेळ में कर दिया। पण एक सुरगदूत झिकै नै परमेसर घाल्यो। बण रात गै टेम जेळ गो बारणो खोल दियो अर बानै बारै ले जा'गे केयो, “जाओ, मिन्दर में खड़या होगे ईं नुअ जीवन गै बारै में सारा नै बताओ।” जद बां ओ सुण्यो तो दिनगै ई बे मिन्दर में उड़ग्या अर उपदेस देण लागग्या। फेर जद महा याजक अर बांगा साथी पूगग्या तो बां यहुदी बुडै लोगां गी एक पंचायत बुलाई। फेर बां खास चेला नै जेळ मू ल्याण गी आग्या दी। पण जद अधिकारी जेळ में गेया तो बठै बानै खास चेला कोनी मिल्या। बां पाछा आ'गे बानै सूचना दी। अर केयो म्हे इंया देख्यो कै जेळ गै ताळा लगाएड़ा हा अर गेटां पर सिपाई खड़या है। पण जद म्हे बारनो खोल्यो तो मा कोई कोनी हो। जद मुख्य याजकां अर मिन्दर गै सिपाईयां गा मुख्या आ बात सुणगे सोचण लागग्या कै खास चेला नै के हो'ग्यो? फेर कणैई आ'गे बतायो झिका नै थे जेळ में घाल्या हा, बे मिन्दर में खड़या लोगां नै उपदेस देवै है। जद मिन्दर गै करमचारियां गा मुखिया अर आपगै अधिकारियां गै सागै जा'गे खास चेला नै बिना ताकत गै ले आया क्यूंकै बानै डर हो कै लोग म्हानै पथर ना मारै। बां बानै मा ल्यागे सारी पंचायत गै सामणै खड़या कर दिया अर महा याजक बानै केयो, म्हे थानै ईं नाम ऊं उपदेस ना देण गो हुकम दियो पण थे फेर बी सारै यरुसलेम में उपदेस सुणा दियो अर बिंगी मोत गो इळजाम म्हारै उपर लगाणो चाओ। जद पतरस अर दूसरा खास चेला उतर दिओ म्हानै आदमी गी ना मानगे परमेसर गी बात मानणी चईयै। बिं यीसू नै म्हारै बडेरां गै परमेसर फेर ऊं जींवंतो कर दियो झिकै नै थे मार दियो। लोगां नै राज करण खातर अर मुकती देण खातर परमेसर यीसू नै भोत आदर मान दियो कै लोग मन बदळगे आपगै पापां गी माफी पा सकै। म्हे लोगां नै आ बात बतावां हां, पवितर आत्मा बी आई बात केवै है। परमेसर आपगी आग्या नै मानण आळै नै आपगी आत्मा देवै है। ओ सुणगे बे बळग्या अर बानै मार देण गो सोच्यो। पण गमालिएल नाम गो एक मोटो फरीसी झिको यहुदी नेम विधान सिखाणाळो हो अर बिंगी बातां सारा मानता हा। बण इंया आग्या दी कै आनै थोड़ी देर खातर बारै कर दैयो। फेर बण पंचायत में केयो, मेरा यहुदी बेलियो, झिको कीं आंगै सागै करणो चावो हो सोच समझगे करियो। कीं दिन पेलां थियूदास नाम गो एक आदमी अपणै आपनै मोटो मानै हो अर चार सौ लोग बिंगै सागै हा। पण फेर बी बो मारयो गयो अर बिंगै सागै आळा सारा लोग खिंड ग्या। बिंगै बाद गलील में रेण आळो यहूदा नाम गो आदमी उठयो अर कीं लोग बिंगै लारै बी हो'ग्या। बिनै बी मार दियो अर बिंगै सागै आळा सारा लोग खिंडग्या। मैं अब गी बात गै बारै में बताणो चाऊं हूं कै आंगै खिलाफ कीं ना करो। आनै एकला छोड़ दैयो, आंगो काम माणसां कानूं है तो खतम हो जावैगो, पण परमेसर कानूं है तो रोक कोनी सको क्यूंकै थानै पतो चालैगो कै थे परमेसर गै खिलाफ काम करयो है। फेर बां बिंगी बात नै मान ली। खास चेला नै बुला'गे कुटवाया अर हुकम दियो कै दुबारै यीसू मसी गी बात ना करियो। ओ केगे बानै छोड़ दिया। यीसू मसी गै लारै होण गै कारण परमेसर बानै आदर मान दियो, ईं बात गी खुसी गै सागै पंचायत ऊं उठग्या कै आपां बिंगै नाम गै खातर बेइजत होण गै लायक ठेरया। बे मिन्दर में घर घर में हर दिन सुब समाचार दियो कै यीसू ई मसी है अर उपदेस देणो अर परचार करणो कदी बंद कोनी करयो। बां दिना में चेला गी गिणती बढती जावै ही। युनानी बोली बोलण आळा अर इब्रानी बोली बोलण आळा पर बळण लागग्या क्यूंकै हर रोज गी चिजां बिधवावां नै बांटण गै टेम युनानी बोली बोलण आळा नै कोनी मिलती। खास चेला सारै बिस्वासी लोगां नै बुला'गे केयो, म्हारो ओ काम कोनी कै परमेसर गो बचन सुणाणो छोडगे खाण पीण गी सेवा करां। ईंखातर मेरा भाईयो अर भेनों, थारै मू सात समझदार आदमी लोग चुणल्यो। ऐ आदमी पवितर आत्मा ऊं भरेड़ा अर ग्यानवान होवै। म्हे बानै ईं काम गी जिमेदारी देवांगा। पण म्हे तो पराथना अर बचन बताण गी अर सिखाण गी सेवा में लाग्या रेवांगा। ईं बात ऊं सारी मण्डली भोत राजी होयी। स्तिफनुस नाम गो आदमी झिको पवितर आत्मा ऊं भरेड़ो अर बिस्वास में पक्को हो अर फिलिप्पुस अर प्रखुरूस अर नीकानोर अर तिमोन, परमिनास अर अन्ताकिया में रेण आळो निकुलाऊस झिकै यहुदी धर्म अपणायो हो। आं सारा नै चुण लिया। अर आंनै खास चेला गै सामणै खड़या करया अर खास चेला आंगै उपर हात राखगे पराथना करी। ईं तरियां परमेसर गो बचन फेलण लागग्यो अर यरुसलेम में बिस्वासियां गी गिणती बोळी होगी। याजकां गो एक मोटो झुण्ड बिस्वास में आ'ग्यो। परमेसर स्तिफनुस नै किरपा अर सामरथ ऊं भर दियो। बण लोगां गै बिचाळै भोत अदभुत काम करया। जद बिं सतसंग घर मू झिकी लिबिरतीनों कुहावंती ही, अर कुरेनी अर सिकन्दरिया अर किलिकिया अर एसिया ऊं आएड़ा हा, ऐ लोग बिंऊं बाद विवाद करण लागग्या। ऐ लोग बिंगै सामणै बात कोनी कर सक्या क्यूंकै बो पवितर आत्मा ऊं भरगे अर भोत ग्यान ऊं बाऊं बात करतो हो। ईं पर बां केई लोगां नै उकसाया झिका इंया के सकै कै म्हे इनै मूसा अर परमेसर गै बिरोध में गळत बातां केवंता सुण्यो। ईं तरियां बे लोगां नै, बुडा यहुदी नेतावां नै अर यहुदी नेम विधान सिखाण आळा नै भड़का दिया। फेर बां बिनै पकड़गे मोटी यहुदी पंचायत गै सामणै लेग्या। बां झूठा गवा पेस करया झिकां केयो, ओ आदमी परमेसर गै पवितर मिन्दर अर नेम विधान गै खिलाफ बोलणो कोनी छोडै। म्हे इंया केवंता सुण्यो कै यीसू नासरी परमेसर गै मिन्दर नै ढा देवैगो अर झिकी रीति रिवाज मूसा ऊं आपां नै मिलै है बानै बदळ देसी। जद महा पंचयात बिंगै सामणै देख्यो तो बिंगो मूं सुरगदूत जिंया चमकै हो। जद महा याजक स्तिफनुस नै पूछयो, “आ बात साची है के?” बण बानै केयो, “मेरा यहुदी बेलियो अर बुजुरगो, मेरी बात सुणो। हारान में रेण ऊं पेलां आपणो बडेरो अबरहाम मेसोपोतामियां में हो, जद मेमा गै लायक परमेसर बिनै दरसण देगे केयो, ‘आपगै देस अर आपगै लोगां नै छोडगे बठै जा जठै मैं तनै केऊं।’” ईंखातर बिं मेसोपोतामियां गो दूसरो नाम कसदिया गो देस कुहावै, जद बो बिनै छोडगे हारान में बसग्यो। आपगै पिता गी मोत गै बाद बिनै परमेसर बिं देस में भेज्यो जठै थे अब रेवो हो। बिं देस में परमेसर अबरहाम नै कीं कोनी दियो। पण परमेसर बिनै वायदो करयो कै तनै अर तेरै वंस नै सारो कीं दे देऊंगा, बिं टेम बिंगै उळाद बी कोनी। परमेसर बिनै इंया बी केयो, “तेरो वंस दूसरै देस में रेण आळै लोगां सागै रेसी अर चार सौ साल तांई बानै दास बणागे बांगै सागै भोत बुरो सलूक करसी।” परमेसर केयो, “दास बणाण आळै लोगां नै दण्ड देऊंगा अर बिंगै बाद बे बिं देस ऊं बारै आ'गे ईं देस में मेरी सेवा करैगा।” परमेसर बिंऊं खतनै गी वाचा बांध दी। ईंखातर अबरहाम गै बेटै इसहाक पैदा होण गै आठ दिन गै बाद बिंगो खतनो करयो अर इसहाक आपगै बेटै याकूब गो खतनो करयो याकूब आपगै बारा बेटां गो खतनो करयो। अर ऐ लोग है म्हारा बारा गोतर। ऐ लोग आपगै छोटै भाई युसुफ पर जळन राखता। आ बिनै मिस्र देस में दास बणन खातर बेच दियो। पण परमेसर बिंगै सागै हो। अर बिनै सारी मुसकिला ऊं बचागे परमेसर मिस्र गै राजा फिरोन गी नजर में बिनै बुद्धी अर ग्यान दियो। अर फिरोन बिनै सारै मिस्र पर अर आपगै घर पर हाकिम बणा दियो। जद मिस्र देस अर कनान देस में अकाळ पड़यो अर आपणै बडेरा नै बी खाण खातर कीं कोनी मिल्यो अर भोत ज्यादा क्ळेस फेल ग्यो। जद याकूब नै पतो लागग्यो कै मिस्र देस में अनाज है तो पेली बार बो युसुफ गै मोटै भाईयां नै बठै भेज्या। जद युसुफ गा भाई दुसर अनाज लेण आया तो युसुफ बानै आपगै बारै में बतायो अर राजा फिरोन नै बी युसुफ गै बारै में पतो लागग्यो। युसुफ आपगै मोटै भाईयां नै केगे भेज्यो कै आपगै पिता याकूब अर परिवार गा बाकी पचेहतर लोगां नै लेगे आइयो। जद याकूब मिस्र देस में आग्यो अर बठै बो अर आपणा बडेरा लोग मरग्या। आंगी ल्हास सेकेम में लेगे आया अर बिं कबर में राखी झिकी अबरहाम हामोर गी उळाद कनूं मोल ली। जद परमेसर झिको वायदो अबरहाम नै दियो हो बो पूरो करण गो टेम आयो तो मिस्र में आपणा लोग भोत हो'ग्या। फेर मिस्र में दूसरो राजा होयो तो बो युसुफ नै कोनी जाणतो। बण आपणै बडेरां सागै बुरो बरताव करयो अर बानै खत्म करण गी सोची अर बांगै टाबरां नै बारै फेंकण गो हुकम दियो कै बे मर ज्यै। बिं टेम मूसा गो जन्म होयो। बो परमेसर गी नजर में भोत सुणो हो। बो तीन म्हिना तांई आपगै पिता गै घर में पाळिज्यो। फेर जद बिनै बारै फेंक दियो तो फिरोन गी बेटी बिनै आपगो बेटो बणागे घरे ले आई अर बिंगी देखभाळ आपगै बेटै गै रूप में करी। मूसा मिसरियां गी सारी सिक्सा लेगे बचन अर करम दोनां में सामरथी होगे एक खास आदमी बणग्यो। जद बो चाळीस साल गो हो'ग्यो तो बण इसराएली आपगै बेलियां अर रिस्तेदारा कनै जाण गो फेंसलो करयो अर गेयो। एकर एक मिस्री आदमी इसराएली आदमी सागै लड़ पड़यो अर बिनै मार दिओ। मूसा आयो अर मिस्री नै मारगे बदळो लियो। मूसा सोच्यो कै बिंगा इसराएली भाई लोग इंया सोचैगा कै परमेसर बानै बिंगै हात ऊं छुटकारो दिरावैगो। पण बे लोग कोनी समझया। दूसरै दिन दो इसराएली लोग आपसरी में झगड़ो करै हा। मूसा बानै केयो, थे आपसरी में भाई हो इंया ना लड़ो। झिकै आदमी दूसरै आदमी गो बोळो नुक्सान करयो बण मूसा नै केयो, “परनै जा। तनै म्हारो न्याय करण खातर कण बुलायो है? जिंया तूं काल मिस्री नै मारयो बिंया मनै बी मारणो चावै है के?” आ बात सुणी तो मूसा बठूं उड़ग्यो अर मिधयान देस में रेण लागग्यो। बठै बिंगै दो बेटा होया। जद चाळीस साल बीतग्या तो सिनाई नाम प्हाड़ कनै बन उजाड़ में एक जगतै झाड़कै में परमेसर गै सुरगदूत बिनै दरसण दियो। मूसा जद ओ देख्यो तो भोत हेरान होयो, जद बो झाड़कै गै ओर कनै गेयो तो बिनै प्रभु गी वाणी सुणीजी। मैं तेरै बडेरा अबरहाम, इसहाक अर याकूब गो परमेसर हूं। जद डर गै कारण मूसा कीं देखण गी हिम्मत कोनी होई। जद प्रभु बिनै केयो, “तूं आपगी जूती उतार दे क्यूंकै तूं झिकी जिग्यां पर खड़यो है बा पवितर है।” मैं मिस्र में आपगै लोगां सागै बुरी दसा अर बांगो रोणो सुण्यो है। बानै छुड़ाण खातर मैं नीचै उतरयो हूं अर अब मैं तनै मिस्र भेजूंगा। ओ बो ई मूसा है झिकै नै इसराएल गै लोगां ओ केगे नकार दियो अर बिनै केयो म्हारै पर राज अर न्याय करण गो अधिकार तनै कण दियो है। बिनै ई परमेसर झाड़कै में सुरगदूत गै द्वारा दरसण देगे भेज्यो कै इसराएलियां पर राज करण खातर अर बानै मिस्र मू छुड़ागे लेगे आण खातर। बो ई मूसा मिस्र अर लाल समुंदर अर बन उजाड़ में चाळीस साला तांई चमत्कार गा काम कर'गे इसराएलियां नै काड़ ले आयो। बो ई मूसा है झिकै इसराएलियां नै केयो परमेसर थारै मू थारै खातर मेरै बरगो एक परमेसर गी बात बताण आळो खड़यो करैगो। बण ई इसराएल लोगां नै कठ्ठा करया, सुरगदूत सिनाई प्हाड़ पर बिंऊं अर आपणै बडेरा ऊं बात करी अर परमेसर गो जीवंतो बचन देगे मनै दियो। पण आपणै बडेरा बिंगो केणो कोनी मान्यो अर बिंगी बात बी कोनी सुणनी चाई, आपगै मन में मिस्र पाछा जाण गी सोची। अर बां हारून नै केयो, “म्हारै खातर एक हिस्यो देवता बणा झिको म्हानै आ'गै ले जावै। ओ मूसा झिको म्हानै मिस्र ऊं काड़ ले आयो म्हानै कोनी पतो है बिनै के होयो है?” बां दिनां में बां एक मूरती बणायी, मूरती पर बली चढाई अर खुसी मनाई। जद परमेसर नै बां पर रीस आ'गी अर आकास गी सारी जोतीयां गी पूजा करण खातर बानै छोड़ दिया। जिंया पवितर सासतर में लिखेड़ो है कै, थे इसराएली लोगां चाळीस साल तांई बन उजाड़ में म्हानै कोई बी बली कोनी चढायी। थे लोग मोलेक गै तंबु अर रिफान देवता गै तारै गी मूरती नै झिकै नै आराधना करण खातर थे बणायो बिनै लिये फिरता, ईंखातर मैं थानै बाबिलोण ऊं दूर ले जा'गे बसाऊंगा। आपणै बडेरा बन उजाड़ में आराधना करण खातर एक तंबु बणायो अर बिमै आराधना करी। परमेसर जिंया मूसा नै तंबु बणाण गो हुकम दियो बण बिस्यो ई बणायो। बिंगै बाद आपणै बडेरा लोग यहोसु गै सागै बिं तंबु नै लेगे परमेसर भोत पेलां आपणै बडेरा लोगां गै सामूं बारै काडेड़ा अन्य जाती लोगां गी धरती पर आ'गे अधिकार कर लियो। अर बो तंबु दाऊद गै टेम तांई रेयो। परमेसर गी किरपा दाऊद पर होई अर बण परमेसर ऊं बिनती करी कै याकूब गै परमेसर खातर इसराएली लोग आराधना करण खातर एक मिन्दर बणावै। पण बिंगो बेटो सुलेमान ई मिन्दर बणायो। “पण परम प्रधान परमेसर हात गै बणाएडै़ मिन्दर में कोनी रेवै। पवितर सासतर में इंया लिखेड़ो है कै, सुरग मेरै बेठण गी जिग्यां है, धरती मेरै पगां गी चोकी है, मेरै खातर थे किंया गो घर बणावोगा, अर मेरै आराम करण गी जिग्यां कीं तरियां गी होवैगी। ऐ सारी चिजां मेरै हात गी बणाएड़ी है।” “हे ढीठ लोगो, थे लोग परमेसर गी बात सुणनी अर मानणी कोनी चाओ। सदां पवितर आत्मा गो बिरोध करो जिंया थारा बडेरा करता। थारा बडेरा सारा परमेसर गी बात बताण आळा नै इंयाईं तंग करया झिका भोत पेलां बिं धरमी मसी गै आण गी बात बताई, थे बिनै बी धोखो देगे मार दियो। थे सुरगदूतां गै द्वारा देयैड़ो नेम विधान तो ले लियो पण बिं पर चाल्या कोनी।” जद महा पंचायत आ बात सुणी तो भोत रीस आ'गी अर दांत पीसण लागग्या। पण स्तिफनुस पवितर आत्मा ऊं भरिजगे सुरग कानी देख्यो अर परमेसर गी मेमा अर यीसू मसी नै परमेसर गै सजै पासै खड़यो देख्यो। जद बण केयो, “देखो, मैं देखूं कै सुरग खुलेड़ो है अर माणस गो बेटो परमेसर गै सजै पासै खड़यो है।” ईं पर बां रोळो मचायो अर आपगा कान बंद कर लिया। अर फेर सारा बिं पर टूट पड़या। बे बिनै घसीटता होया अर नगर गै बारै लेग्या अर बिं पर पथर मारण लागग्या। झिका लोग बिनै मारणो चावा हा बां आपगा गाबा उतारगे साऊल नाम गै आदमी गै पगां में रख दिया। बे लोग बिनै पथर मारता रेया अर बो इंया पराथना करतो रेयो, प्रभु यीसू मेरी आत्मा नै स्वीकार कर। फेर बो गोडा टेकगे पड़ग्यो अर ऊंची आवाज में बोल्यो, “हे प्रभु, थे आंनै कोई सजा ना देईयो।” ओ केगे बो मरग्यो। साऊल स्तिफनुस नै मारण में मदद करी। बिं दिन ऊं यरुसलेम गी बिस्वासी मणडली पर जुल्म होणो सुरू होग्यो। खास चेला नै छोड़गे सारा बिस्वासी लोग यहुदियां अर सामरिया गै गामां में तितर बितर हो'ग्या। कीं जणा झिका परमेसर गी आराधना करता बे लोग स्तिफनुस नै भोत दुख अर सोक गै सागै दफणा दियो। साऊल बिस्वासी मण्डली गै लोगां नै तंग करणो सरू कर दियो, अर घर घर जा'गे लुगाईयां अर आदमियां नै घींस घींस गे ले जा'गे जेळ में बंद करण लागग्यो। झिका लोग दूसरा देसां में तितर बितर हो'ग्या बे ईं सुब समाचार गो संदेस सुणाण लागग्या। फिलिप्पुस सामरिया नगर में जा'गे बठै मसी गो समाचार सुणाण लागग्यो। भोत लोग एक मन होगे फिलिप्पुस गी बात सुणता अर बिंगा करेड़ा चमत्कार देखता। भोत सारै लोगां मू ओपरियां रोळो मचावंती निकळती अर भोत सारा लकवै गा रोगी अर लंगड़ा ठीक होवंता। अर बिं नगर में भोत खुसी होगी। बिं नगर में समौन नाम गो एक आदमी रेवंतो झिको जादू टूणो करतो। बो सामरिया परदेस गै लोगां नै हेरान करतो अर अपणै आपनै एक मोटो आदमी पेस करतो। बिं नगर गा आम अर खास लोग सारा बिंगी बाता ध्यान ऊं सुणता अर केवंता, ईं आदमी नै म्हान होण खातर परमेसर सकती दी है। बे लोग भोत दिना ऊं बिंगी बात सुणता आण लागरया क्यूंकै बण भोत दिना ऊं बानै आपगै चकर में घाल राख्या। पण जद बां फिलिप्पुस ऊं परमेसर गै राज गी बातां अर यीसू मसी गै नाम गो संदेस सुण्यो तो बिस्वास कर'गे भोत आदमिया अर लुगाईयां बतिस्मो लियो। अर समौन बी बिंगी बातां पर बिस्वास कर'गे बतिस्मो लियो अर बो फिलिप्पुस गै द्वारा होवंता चमत्कारा नै देख भोत अचंभित होवंतो। यरुसलेम में खास चेला जद सुण्यो कै सामरिया गै लोगां परमेसर गो बचन मान लियो तो बां पतरस अर यूहना नै बांगै कनै घाल्या। जद बे पूग्या तो बां खातर पराथना करी कै बानै पवितर आत्मा मिलै। क्यूंकै अजे तांई पवितर आत्मा कीं पर कोनी उतरयो सिरफ प्रभु यीसू गै नाम ऊं बतिस्मो लियो। जद पतरस अर यूहना बां पर हात रख्यो जद बानै पवितर आत्मा मिली। जद सीमोन देख्यो कै खास चेला गै हात रखण ऊं बिस्वासी लोगां नै पवितर आत्मा मिलै तो बो बानै रिपिया देवंता होयां बोल्यो, “आ सकती मनै बी दैयो कै, मैं झिकै पर हात रखूं बिनै पवितर आत्मा मिलज्यै।” पतरस केयो, “तूं अर तेरो धन नास होवै क्यूंकै तूं इंया सोच्यो कै परमेसर गै वरदान नै रिपियां ऊं मोल लियो जा सकै। ओ काम करण खातर तूं बिलकुल लायक कोनी क्यूंकै परमेसर गी नजर में तेरो मन साफ कोनी। ईंखातर तूं आपगी बुराई नै दूर कर अर परमेसर ऊं पराथना कर, हो सकै झिको तेरै मन में बिचार है बिनै परमेसर माफ कर दैय। मनै ईं बात गो पतो है कै तेरै मन में जळन है अर पूरी तरियां पाप ऊं भरेड़ो है।” सीमोन, पतरस अर यूहना नै केयो, “थे प्रभु ऊं मेरै खातर पराथना करो कै थे झिको कीं मनै केयो है बिमुं कोई बी बात मेरै पर ना घटै।” जद खास चेला आपगी गवाई अर बचन सुणागे रा में भोत सारा सामरी गामां में परचार करता होयां यरुसलेम आ ग्या। प्रभु गै दूत फिलिप्पुस नै केयो, “दकसिण ऊं बिं रा पर जा झिको गाजा कानी जावै बिं पर भोत कम लोग रेवै।” बो उठगे चाल पड़यो अर देख्यो कूस देस गो एक आदमी आवै हो, बो खुसरो हो अर कूसियां गी राणी कन्दाके गो मत्री अर खजानची हो। बो आराधना करण खातर यरुसलेम आ'गे पाछो जावै हो। बिं टेम बो रथ में बेठगे यसयाह परमेसर गी बात बताण आळै गी किताब पढण लागरयो हो। जद फिलिप्पुस नै पवितर आत्मा केयो, “रथ गै कनै जा अर बिंगै सागै हो ले।” फिलिप्पुस जद रथ कानी भाजगे गयो तो बण बिनै यसयाह परमेसर गी बात बताण आळै गी किताब पढता सुण्यो अर पूछयो, “तूं झिको कीं पढै है बिनै समझै है के?” जद बण केयो, “जद तांई कोई समझाण आळो ना होवै मैं किंया समझ सकूं।” फेर बण फिलिप्पुस नै आपगै सागै बिठायो। पवितर सासतर गो ओ बचन बो पढण लागरयो, “बो काटण आळी भेड़ गी तरियां काटण आळी जिग्यां पर पूगग्यो, जिंया मेमणियों ऊन कतरता टेम चुप रेवै बिंयाई बो चुप रेयो। बिंगी दीनता में बिंगो न्याय कोनी होयो। बिंगी पीढी गी बातां कुण बतासी क्यूंकै धरती ऊं बिंगो जीवन ले लियो हो।” ईं बात पर खुसरै फिलिप्पुस नै केयो, “किरपा कर'गे मनै बता कै परमेसर गी बात बताण आळो किंगै बारै में केवै है। आपगै बारै में या दूसरै गै बारै में।” जद फिलिप्पुस आपगो मूं खोल्यो अर सासतर ऊं सरू कर'गे बिनै यीसू गो सुब समाचार सुणायो। आ'गै जावंता होया बे पाणी आळी जिग्यां पूग्या फेर बण खुसरै फिलिप्पुस नै केयो, “देख अठै पाणी है, थे मनै अब बतिस्मो दे दैयो।” फिलिप्पुस केयो, “जे तूं सारै मन ऊं बिस्वास करै तो ले सकै है।” बण उतर दियो, “मैं बिस्वास करूं कै यीसू मसी परमेसर गो बेटो है।” बण रथ रोकण गी आग्या दी अर दोनूं पाणी में उतरया अर फिलिप्पुस बिनै बतिस्मो दियो। जद बे पाणी ऊं बारै निकळया तो फिलिप्पुस नै प्रभु गी आत्मा लेगी अर खुसरै फिलिप्पुस नै कदी कोनी देख्यो अर बो खुसी गै सागै बठूं चाल पड़यो। फिलिप्पुस असतोद में आ'ग्यो, अर जद तांई बो कैसरिया ना पूग्यो जद तांई बो नगर नगर में सुब समाचार सुणावंतो रेयो। साऊल प्रभु गै चेला नै मारण गी धमकियां देवंतो रेवंतो हो अर महा याजक कनै गेयो। अर बिं कनूं दमिसक गै संतसंग घरां गै नाम ऊं अधिकार खत लियो कै बठै कोई बी आदमी अर लुगाई यीसू मसी नै मानण आळो मिलज्यै तो बिनै बांदगे यरुसलेम में ले आवै। जद बो चालतो चालतो दमिसक गै कनै आयो तो बिंगै च्यारूंमेर आकास ऊं चानणो होयो। अर बो धरती पर पड़ग्यो, बण एक इंया आवाज सुणी, “साऊल अरै साऊल, तूं मनै क्यूं तंग करै है?” साऊल बिनै पूछयो, “तूं कुण है?” बण केयो, “मैं यीसू झिकै नै तूं तंग करै है।” अब तूं खड़यो हो'जा अर नगर में जा, बठै तनै के करणो है बता दियो जावैगो। झिका आदमी बिंगै सागै सफर में हा बे डरग्या क्यूंकै बां आवाज तो सुणी पर कीं दिख्यो कोनी। जद साऊल धरती पर ऊं खड़यो होयो तो बिनै कीं कोनी दिख्यो। बे बिनै हात पकड़गे दमिसक लेग्या। तीन दिनां तांई बो ना देख सक्यो ना रोटी खाई ना पाणी पीयो। दमिसक में एक हनन्याह नाम गो एक चेलो हो। प्रभु दरसण देगे बिनै केयो, “हनन्याह,” बण केयो, “हां प्रभु।” प्रभु बिनै केयो, “खड़यो हो अर यहूदा गी गळी झिकी नै सीधी केवै है, बिंगै मा बिंगै घरे जा'गे तरसूस गै रेण आळै साऊल नै जा'गे मिल, क्यूंकै बो अब पराथना करै है।” बण इंया एक दरसण देख्यो कै हनन्या नाम गो एक आदमी अठै आयो अर बिं पर हात रख्यो अर बिनै दिखण लागग्यो। हनन्याह उतर दियो, “यरुसलेम में तेरै पर बिस्वास करण आळै लोगां सागै अण आदमी भोत बुरो सलूक करयो, बो मैं सुण्यो है।” ओ आदमी थारै पर बिस्वास करण आळा नै पकड़ण खातर महा याजक कनूं आदेस लेगे दमिसक आयो। पण प्रभु बिनै केयो, “तूं जा।” क्यूंकै मैं इनै ईंखातर चुण लियो कै मेरो सुब समाचार गेर यहुदियां अर राजावां अर इसराएल में मेरै नाम गो परचार करै। मेरै नाम खातर बिनै कितो दुख सेणो पड़ैगो ओ मैं बिनै आप बताऊंगा। जद हनन्याह चाल पड़यो अर बिंगै कनै गेयो अर साऊल पर आपगो हात रख्यो अर केयो, “भाई साऊल, प्रभु यीसू मनै भेज्यो है झिको तेरै रा में परगट होयो कै तूं फेर ऊं देख सकै अर पवितर आत्मा ऊं भरज्यै।” फेर बिं टेम ई फूसकै बरगी गी कोई चीज बिंगी आंख्या ऊं निकळी अर बो देखण लागग्यो जद बो खड़यो होयो अर बतिस्मो लिओ, फेर थोड़ो खाणो पीणो करण गै बाद बिनै सकती मिली। बो कीं दिन बिंगै चेलां गै सागै दमिसक में हो। फेर बो बेगो ई यहुदी सतसंग घरां में जा'गे यीसू गो परचार करण लागग्यो अर केयो, “ओ यीसू परमेसर गो बेटो है।” आ बात झिका बठै सुणी बे लोग चोकना हो'ग्या अर बोल्या कै ओ बो ई आदमी है झिको यरुसलेम में यीसू मसी पर बिस्वास करण आळा नै पकड़गे मार देवंतो हो। इंगो अठै आण गो मतलब ओ ई है कै अठै गै बिस्वासियां नै पकड़गे महा याजक कनै लेज्यै। साऊल ओर बोळो सकतीसाली होवंतो गेयो अर दमिसक में रेण आळै यहुदियां नै ओ केगे साबित करतो कै यीसू ई मसी है अर यहुदियां गी बोलती बंद करतो रेयो। अर भोत दिन गै बाद यहुदियां बिनै मारण गी योजना बणाई। बे नगर गी मोटोड़ी गळी गै कनै दिन रात ताक में बेठया रेवंता कै बिनै पकड़गे मार दैयां। पण साऊल नै बांगी चाल गो पतो लागग्यो। पण बिंगा चेला बिनै रात नै ई टोकरै में घालगे अर नगर गी चार दिवारी गै दूसरै पासै लटकागे नीचै उतार दियो। फेर बो जद यरुसलेम पूग्यो तो चेला सागै मिलण गी कोसिस करी। बे सारा बिंऊं डरग्या, बानै बिस्वास कोनी होवै ओ कै यीसू गो चेलो बणग्यो के? बरनबास खास चेला नै साऊल गै बारै में बतायो, इंगै सागै रा में किंया होयो अर प्रभु इंगै सागै किंया बात करी अर किंया बिना डर ऊं दमिसक में यीसू गो परचार करयो। फेर साऊल बांगै सागै यरुसलेम में बिना डरगे आवंतो जावंतो अर यीसू मसी गो परचार करतो रेयो। अर युनानी बोली बोलण आळा यहुदी लोगां सागै बात करतो हो पण बे बिनै मारणो चावा। जद बिस्वासी लोगां नै ईं बात गो पतो लागग्यो तो बिनै कैसरिया लेग्या अर बाद में तरसूस पुगा दियो। अर सारा यहुदियां, गलील अर सामरिया गा बिस्वासी लोग बड़ी सांती ऊं रेण लागग्या। पवितर आत्मा गै द्वारा ऐ लोग बिस्वास में ओर बोळा मजबूत हो'ग्या अर प्रभु गै डर गै सागै बढता गेया। इंया पतरस सारी जिग्यां में घूमता टेम एकर लुदिया देस गै बिस्वासी लोगां नै मिलण गेयो। बठै आठ साल ऊं लकवै गो बीमार एनियास मिल्यो। पतरस बिनै केयो, “एनियास, यीसू मसी तनै ठीक करै है, उठ जा।” बिं टेम ई बो खड़यो हो'ग्यो। ओ चमत्कार देखगे लुदिया अर सारोन में रेण आळा सारा लोग प्रभु कानी मुड़ग्या। याफा में तबीता नाम गी एक बिस्वासी लुगाई रेवंती झिकी नै युनानी बोली में दोरकास केवंता, इंगो मतलब है “हिरनी।” बा भोत आच्छा काम करती। बा बीमार होयी अर मरगी। बिंगी ल्हास नै नुहागे उपर गै कमरै में रख दी। याफा लुदिया गै कनै हो। जद बिस्वासियां सुण्यो कै पतरस लुदिया में है तो बां बिं कनै दो आदमी घाल्या अर बिनती करी कै म्हारै कनै जल्दी आवै। पतरस बां कानी चाल पड़यो। जद पतरस बठै गेयो तो बिनै कमरै में ले ग्या। बठै विधवा लुगाईयां रोणती होई अर बिंगै हात ऊं बणाएड़ा गाबा दिखाण लागगी। पतरस सारा नै बारै काड़ दिया अर घुटना टेकगे पराथना करी अर ल्हास कानी देखगे अर केयो, “तबीता, खड़ी हो'जा।” बण आपगी आंख्या खोली अर पतरस कानी देखण लागी। पतरस बिंगो हात पकड़गे खड़ी करी अर सारी विधवा अर बिस्वासी लोगां नै बुला'गे बानै दे दी। सारै याफा में ईं बात गो पतो लागग्यो अर भोत लोग प्रभु में बिस्वास करयो। फेर याफा में सीमोन नाम गो एक चमड़ै गो काम करण आळो रेवंतो, बिंगै कनै पतरस भोत दिनां तांई बिं कनै रेयो। कैसरिया में कुरनेलियुस नाम गै एक आदमी हो। बो रोमी सेना गी इतालियन दळ गो सुबेदार हो। बो अर बिंगो परिवार परमेसर नै मानण आळो हो। बो गरीबा नै मदद करतो हो अर सदां ई परमेसर ऊं पराथना करतो हो। दोफारै गै बाद बण एक दरसण देख्यो कै प्रभु गो एक दूत बिंगै कनै आयो अर बिनै हेलो मारयो, हे कुरनेलियुस। ओ सुणगे बो डरग्यो अर बिनै पूछयो, “हे प्रभु ओ के है?” सुरगदूत केयो, “तेरी पराथना अर तेरो दीन दुखियां नै देयैड़ो दान परमेसर कनै पूग्यो है।” अब केई जणां नै याफा में घाल अर बानै बोल, समौन नाम गै आदमी गै घरे ठेरेड़ो है झिको पतरस कुहावै, अठै बुला। बो बठै समौन नाम गै एक चमड़ै गो काम करण आळै गै घरे है, बिंगो घर समुंदर गै किनारै है। जद बो सुरगदूत उड़ग्यो। इंगै बाद कुरनेलियुस बिंगा दो सेवक अर एक सिपाई झिको परमेसर नै मानण आळो हो बिनै बुलायो। अर बानै सारी बातां बतागे याफा भेज्या। अगलै दिन दोफारै गै टेम जद बे नगर गै कनै पूगण आळा हा तो पतरस उपर गै चोबारै में पराथना करण खातर उड़ग्यो। जद बिनै भूख लागी अर कीं खाणो चायो हो, बिं टेम बिनै एक दरसण मिल्यो। अर बण देख्यो कै आकास खुलग्यो अर एक मोटी चादर बरगी चीज झिकी गी चारूं कूंटा लटकती होई धरती कानी आवैई। अर बिं पर हर तरियां गा पसु अर धरती पर रेंगण आळा जीव अर आकास गा उडण आळा जीनावर हा। फेर बण इंया आवाज सुणी, “पतरस, झिको कीं तनै दिखै है आमूं कोई बी चीज तूं बणागे खा सकै है।” बण केयो, “नई प्रभु, मैं हरेक चीज कदी कोनी खाई क्यूंकै ऐ चिजां मना करेड़ी है।” दूसरी बार इंया आवाज आयी कै परमेसर खाण खातर झिकी चिजां बणाई है बामै कोई ना खाण आळी है के? तीन बारी इंयाई होयो अर बाद में ऐ चिजां उपर आकास में पाछी उड़ गी। जद पतरस दरसण गै बारै में सोचण लागरयो बिं टेम झिकै आदमियां नै कुरनेलियुस चमड़ै गै काम करण आळै समौन गै घर में भेज्या बे बारनै पर आया। अर हेलो मारगे पूछयो कै समौन झिको पतरस कुहावै, बो अठै है के? अजे बी पतरस बिं दरसण गै बारै में सोचण लागरयो हो, बिं टेम पवितर आत्मा बिनै केयो, सुण, तनै तीन आदमी ढूंडण लागरया है। अर उठगे बां कनै जा अर बिना सोचे बिचारे बांगै सागै जाण खातर तैयार होज्या, क्यूंकै बानै मैं ईं भेज्या है। बो उठगे बां कनै गेयो अर केयो, देखो थे झिकै नै ढूंडो बो मैं ईं हूं। मेरूं थानै के काम है? बे बोल्या कै कुरनेलियुस झिको धरमी अर परमेसर नै मानण आळो है, अर सारा यहुदी लोग बिंगी इज्जत करै बणी म्हानै भेज्यो है क्यूंकै एक सुरगदूत बिनै केयो थानै ल्यागे थारूं बचन सुणै। ईं पर पतरस बानै मा बुलायो अर ठेरण खातर जिग्यां दी। फेर अगलै दिन तैयार होगे याफा गै कीं बिस्वासियां गै सागै उड़ग्या। दूसरै दिन कैसरिया पूग्या अर बठै आपगै बेलियां अर रिस्तेदारां नै बुला'गे बांगी उडीक करण लागरया। जद पतरस बिंगै कनै आयो तो कुरनेलियुस बिंगै पगां पड़ग्यो। पण पतरस बिनै इंया करण ऊं मना करयो अर केयो, मैं बी तेरै बरगो एक आदमी हूं। फेर बण बिंगै सागै बात करता करता देख्यो कै बठै भोत लोग भेळा होग्या। बण बानै केयो थे जाणो हो कै एक यहुदी गेर यहुदी सागै रिस्तो राखै ओ नेम विधान गै खिलाफ है। पण मेरूं परमेसर बात करी है कै तूं कोई बी आदमी नै असुद्ध समझण में सोच बिचार ना करी। ईंखातर मनै जद बुलायो तो बिना कोई सोच बिचार गे आ'ग्यो। अब मैं थानै पूछूं कै मनै क्यूं बुलायो है? कुरनेलियुस केयो, “चार दिन पेलां में दोफारै बाद आपगै घरे पराथना करै हो तो एकदम चमकिला गाबा पेरेड़ो एक आदमी मेरै सामणै आयो, अर केयो, कुरनेलियुस तेरी पराथना सुण ली अर दीन दुखियां गै देऐडे़ दान नै परमेसर याद करयो। ईंखातर किनैई याफा में भेज गे चमड़ै गो काम करण आळै समौन गै घरे समौन पतरस एक आदमी है बिनै बुला। ईंखातर जद मैं तनै बुलाण खातर बानै भेज्या अर थे अठै आया, आ भोत आच्छी बात है। झिको संदेस अब प्रभु थारै द्वारा सुणावैगो बो सुणण खातर म्हे सारा अठै भेळा होया हां।” पतरस बिनै केयो, “अब मैं समझग्यो कै परमेसर किंगैई सागै भेदभाव कोनी करै। परमेसर हर एक जाती गो झिको बिंगी बात नै मानै अर बिंगो आदर मान करै बो बिनै स्वीकार करै। प्रभु यीसू मसी झिको सारां गो प्रभु है बिंगै द्वारा सारै इसराएल गै लोगां नै सांती गो संदेस दियो ओ थानै पतो है। यूहना गै द्वारा बतिस्मै गो संदेस देण गै बाद गलील ऊं सरू होगे पूरै यहुदियां में के हो'ग्यो, बिंगो बी थानै पतो है। यीसू नासरी गै बारै में अर परमेसर बिनै किंया पवितर आत्मा दी थानै पतो है। बण भला काम अर सैतान ऊं बंदेड़ा नै छुड़ाया क्यूंकै परमेसर बिंगै सागै हो। यहुदी परदेस अर यरुसलेम में झिका काम बण करया बांगा में म्हे खास चेला गवा हां। पण यहुदियां बिनै काठ पर लटकागे मार दियो। पण परमेसर बिनै तीसरै दिन पूठो जींवंतो कर दियो अर म्हानै दिखा बी दियो। सारै लोगां पर कोनी पण बे गवा झिका पेलां चुण लिया। बे म्हे हां, बिंगै मरण ऊं जी उठण गै बाद बिंगै सागै खाणो पीणो करयो हो। अर बण म्हानै आग्या दी कै लोगां में परचार करो अर गवाई देओ कै परमेसर बिनै मरेड़ा अर जींवता गो न्याय करण गो अधिकार दियो। झिको यीसू मसी पर बिस्वास करै बिनै पापां ऊं माफी मिलैगी, आ बात म्हे सारा परमेसर गी बात बताण आळा गै मूं ऊं सुणी है।” पतरस आ बात बोलतांई सारा पर झिका संदेस सुणयो हो पवितर आत्मा उतरी। पतरस गै सागै आएड़ा यहुदी बिस्वासी लोगां अचंभो करयो क्यूंकै गेर यहुदी लोगां पर बी पवितर आत्मा दियो जावै। क्यूंकै बां बानै न्यारी न्यारी बोली बोलता अर परमेसर गी बडाई करता सुण्या। ईं पर पतरस केयो, “कोई बी आनै पाणी ऊं बतिस्मो लेणूं रोक कोनी सकै। क्यूंकै ऐ बी म्हारै तरियां पवितर आत्मा पाएड़ा है।” ईं तरियां बण यीसू मसी गै नाम में बानै बतिस्मो देण गी आग्या दी। फेर कुरनेलियुस अर बिंगै बेलियां बिनती करी कै केई दिन ओर अठै रेवो। गेर यहुदी लोगां बी परमेसर गो बचन मान लियो आ बात यहुदियां में रेण आळा खास चेला अर दूसरै बिस्वासियां सुणी। जद पतरस यरुसलेम में आयो तो यहुदी लोगां बिंगै सागै बाद विवाद करयो। अर बिनै केयो, “थे गेर यहुदी लोगां कनै जा'गे बांगै सागै खाणो पीणो करयो।” बिं पर पतरस बानै झिको कीं घटयो सुणा दियो। जद मैं याफा नगर में पराथना करै हो तो इंया एक दरसण देख्यो कै आकास खुलग्यो अर एक मोटी चादर बरगी चीज झिकी गी चारूं कूंटा लटकती होई धरती पर मेरै कानी आवैई। जद मैं चादर गै मा देख्यो तो बिं पर हर तरियां गा पसु अर धरती पर रेंगण आळा जीव अर आकास गा उडण आळा जी जानवर हा। फेर मैं इंया आवाज सुणी, “पतरस, झिको कीं तनै दिखै है आमूं कोई बी चीज तूं बणागे खा सकै है।” मैं केयो, “नई प्रभु, मैं कोई बी चीज कदी कोनी खाई क्यूंकै ऐ चिजां मना करेड़ी है।” दूसरी बार इंया आवाज आयी कै परमेसर झिकी खाण खातर चिजां बणाई है बामै कोई ना खाण आळी है के? तीन बारी इंयाई होयो अर बाद में ऐ चिजां उपर आकास में पाछी उड़ गी। बिं टेम कैसरिया गा तीन लोग बठै आया जठै मैं रुकेड़ो हो। पवितर आत्मा मनै केयो बिना सोच बिचार गे आंगै सागै उड़जा। अर याफा गै छ बिस्वासी लोगां सागै म्हे सारा कैसरिया में कुरनेलियुस गै घरे पूगग्या। कुरनेलियुस मनै केयो, “मेरै घरे एक सुरगदूत आयो अर बण केयो याफा में किनैई भेजगे समौन पतरस ऊं मिल ले।” बो तनै बचन सुणावैगो झिकै ऊं तूं अर तेरो सारो परिवार मुकती पावैगो। जद मैं बचन सुणावै हो तो पवितर आत्मा बां पर उतरी जिंया आपणै पर सरू में उतरी। जद मनै प्रभु गी बात याद आयी कै यूहना तो पाणी में बतिस्मो देवंतो हो पण थानै पवितर आत्मा ऊं बतिस्मो दियो जावैगो। जिंया आपां नै यीसू मसी पर बिस्वास करण ऊं पवितर आत्मा मिलै बिंयाई गेर यहुदियां नै बी परमेसर पवितर आत्मा गो वरदान दियो तो मैं कुण हो झिको परमेसर नै रोक सकै हो? ओ सुणगे बे चुप हो'ग्या अर परमेसर गी बडाई कर'गे केण लागग्या परमेसर गेर यहुदियां नै बी मन फिराव करण अर अनन्त जीवन गो मोको दियो है। बे लोग स्तिफुनुस गै टेम आया अर दुख गै कारण न्यारा न्यारा हो'ग्या अर ऐ फिरता फिरता फीनीके, साईप्रस अर अन्ताकिया में पूगग्या। बे यहुदियां नै छोड़गे ओर किनै सुब समाचार कोनी सुणावंता। पण कीं साईप्रस अर कुरैन गा बिस्वासी लोग अन्ताकिया जा'गे गेर यहुदी लोगां नै बी प्रभु यीसू गै बारै में बतायो। प्रभु बानै सुब समाचार बोलण में भोत मदद करी, ईंखातर भोत लोग बिस्वास कर'गे प्रभु कानी मुड़या। आ बात यरुसलेम गी बिस्वासी मण्डली जद सुणी तो बरनाबास नै बां बठै भेज्यो। बरनाबास जद बठै पूगग्यो तो परमेसर गी किरपा देखगे भोत राजी होयो अर सारै बिस्वासी लोगां नै केयो कै बिस्वास में ओर मजबूत हो जाओ। बरनाबास एक आच्छो आदमी हो अर पवितर आत्मा गै सागै चालण आळो अर परमेसर पर बिस्वास राखण आळो हो। ईंखातर इंगै द्वारा भोत लोग बिस्वास में आया। फेर बो साऊल नै ढूंडण खातर तरसूस उड़ग्यो। फेर बिनै ढूंडगे अन्ताकिया ल्यायो। बे पूरै एक साल तांई सारै बिस्वासियां नै मिलता रेया अर प्रभु गो संदेस देवंता रेया। सारा ऊं पेलां अन्ताकिया में रेण आळा बिस्वासी मसी कुहाया। बां दिना में केई परमेसर गी बात बताण आळा यरुसलेम ऊं अन्ताकिया आया। बामूं अगबुस नाम गो एक परमेसर गी बात बताण आळो पवितर आत्मा गै द्वारा परमेसर गी बात करी कै सारै संसार में एक भयानक अकाळ पड़ण आळो है। बो अकाळ क्लोदियोस गै टेम में पड़यो। ईंखातर अन्ताकिया में रेण आळा सारै बिस्वासियां यरुसलेम में रेण आळा गी कीं मदद करी। बठै गै बुडा लोगां कनै देण खातर बिस्वासी लोगां झिको कीं कठ्ठो करयो बो बरनाबास अर साऊल गै हाता में दियो। बिं टेम राजा हेरोदेस बिस्वासी मण्डली गै लोगां नै तंग करणो सरू करयो। बण खास चेलै यूहना गै भाई याकूब नै तलवार ऊं मरवा दियो। ईंखातर लोग भोत राजी होया अर हेरोदेस आ बात सुणी तो बण पतरस नै बी पकड़ लियो। आ बात फसह गै त्यूंहार गै दिनां गी है। अर पतरस नै जेळ में बंद कर दियो। बिंगी निगराणी खातर चार चार सिपाईयां गा चार पेरा बणाया। हेरोदेस इंया सोच्यो कै इनै फसह गै त्यूंहार गै बाद ई लोगां गै सामणै ल्याऊंगा। पण पतरस जेळ में बंद हो, जद सारा बिस्वासी लोग एक मन होगे बिंगै खातर पराथना करा। हेरोदेस पतरस नै लोगां गै सामणै ल्याण गी पेली रात पतरस दो सांकळां ऊं बांदेड़ो अर दो सिपाईयां गै बिचाळै सुत्यो हो अर सिपाई बारनै में रुखाळी करा। जद एकदम चानणो होयो अर प्रभु गो एक सुरगदूत बठै आ खड़यो होयो। बण पतरस गी पांसळी पर हात मारयो अर केयो बेगो खड़यो हो। बिं टेम सांकळां हाता मू खुल गे नीचै पड़गी। सुरगदूत बिनै केयो, “जूती पेर अर कमर बांद गे तैयार होज्या अर मेरै लारै आ'ज्या।” बो बारै निकळ्यो अर बिंगै लारै हो'ग्यो। पण ओ कोनी समझयो कै झिको कीं सुरगदूत केयो है बो साची है, बण इंया सोच्यो कै मैं सपनो देखूं। जद बे दो पेहरा में खड़या सिपाईयां नै छोडगे लोह गै फाटक कनै उड़ग्या। बो फाटक आपी खुलग्यो झिको नगर कानी हो। सुरगदूत बिनै एक गळी में छोड़गे उड़ग्यो। जद पतरस गै समझ में आयो कै प्रभु आपगो सुरगदूत घालगे मनै जेळ ऊं छुड़ायो है अर यहुदियां गी सारी आसा पर पाणी फिरग्यो। इंगै बाद यूहना झिको मरकुस कुहावै हो, बिंगी मां गै घरे गेयो बठै भोत सारा लोग कठ्ठा होगे पराथना करा हा। जद बण बारनो बजायो तो एक रुदे नाम गी दासी देखण आयी। पतरस गी बोली सुणगे बा बारनो कोनी खोल्यो पण खुसी ऊं भाजगे मा गेयी अर सारा नै बतायो कै बारै पतरस आयो है। बां केयो, “तूं पागल होगी के?” बण केयो, “नई, आ बात साची है।” जद बां केयो, “बिनै संभाळो कोई सुरगदूत होलो।” पण पतरस बारनो बजावंतो रेयो अर बां आ'गे बारनो खोल्यो अर बिनै देख्यो तो हेरान हो'ग्या। जद बण बां कानी हिसारो कर'गे केयो, “अर बतायो कै मनै किंया जेळ मू काड़गे ल्यायो हो” अर केयो आ बात याकूब अर सगळा नै बता देईयो। इतो केगे बो दूसरी जिग्यां उड़ग्यो। दिन उगतांई सिपाईया में हेलो मचग्यो कै पतरस किनै गेयो। जद हेरोदेस बिनै खोज करवाई अर जद ना लादयो तो बण सिपाईयां नै मारण गो हुक्म दियो। अर बो यहुदियां नै छोड़गे कैसरिया में रेण लागग्यो। हेरोदेस सूर अर सेदा गै लोगां ऊं नाराज रेवंतो। बे भेळा होगे बिंगै कनै आया अर बलासतुस झिको राजा गो एक करमचारी हो। बिनै लेगे हेरोदेस गै सागै समझोतो करवाण आया। क्यूंकै बांगो पालण पोसण बिंगै देस ऊं होवंतो। आं लोगां ऊं मिलण खातर हेरोदेस गो एक खास दिन ठेराएड़ो। बिं दिन हेरोदेस आपगा राज कपड़ा पेरगे कुरसी पर बेठयो अर उपदेस देण लागग्यो। जद लोग ऊंची आवाज में केयो, “ओ सबद देवता गो है, माणस गो कोनी।” बण परमेसर नै मेमा कोनी दी अर प्रभु गै एक सुरगदूत बिनै बीमार कर दियो अर बिमै कीड़ा पड़ग्या अर बिनै खाण लागग्या अर फेर बो मर ग्यो। पण परमेसर गो बचन फळतो फुलतो गेयो। जद बरनाबास अर साऊल आपगी सेवा पूरी कर ली तो यूहना झिको मरकुस कुहावंतो सागै लेगे यरुसलेम आ ग्या। अन्ताकिया गी बिस्वासी मण्डली में केई परमेसर गी बात बताण आळा अर उपदेस देण आळा हा। आमै बरनाबास अर समौन झिको नीगर कुहावंतो, कुरेन गो लुकियोस अर चौथाई देस गै राजा हेरोदेस गा साथी मनाहेम अर साऊल। एक दिन बे बरत राखगे प्रभु गी आराधना करा तो पवितर आत्मा केयो, मेरै खातर बरनाबास अर साऊल नै मैं झिकै काम खातर बुलाया, बानै न्यारा करो। जद बां बरत अर पराथना कर'गे बांगै सिर पर हात रख्यो अर बानै विदाई दी। पवितर आत्मा गै द्वारा बरनाबास अर साऊल सिलुकिया अर बठूं बे जहाज में बेठगे साईप्रस उड़ग्या। जद बे सलामिस नगर पूगग्या तो बां यहुदियां गै सतसंग घरां में परमेसर गो संदेस सुणायो अर यूहना बांगी मदद करण खातर बांगै सागै हो। बे बिं सारै राज में परचार करता होया पाफूस पूगग्या। बठै बानै एक जादू टूणा करण आळो एक झूठी बात बताण आळो मिल्यो। बिंगो नाम बार यीसू हो। बो राजपाल सिरगियुस पौलुस गै सागै हो, बो एक ग्यानी आदमी हो। बण बरनाबास अर साऊल नै आपगै कनै परमेसर गो बचन सुणण खातर बुलाया हा। पण इलिमुस झिको बार यीसू गो युनानी बोली गो नाम है झिकै बांगो बिरोध करयो अर राजपाल नै केयो कै आंगी बात पर बिस्वास ना कर। जद साऊल झिकै गो नाम पौलुस बी है पवितर आत्मा ऊं भरगे बिं कानी देख्यो अर केयो, “सारै भलै काम नै रोकण आळो अर झूठ ऊं भरेड़ो सैतान गी उळाद अर सदां ई गळत काम करण आळो, तूं परमेसर गी रा नै बांको करणो चावै। अब तूं देख, प्रभु तेरै सागै के करै? तूं केई दिना तांई आंधो रेवैगो अर तनै सूरज कोनी दिखैगो।” बिं टेम ई बिनै धूंधळो दिखण लागग्यो अर इनै बिनै हात मारण लागग्यो कै कोई बिंगो हात पकड़गे लेज्यै। जद राजपाल झिको कीं होयो देख्यो अर अचंभो होगे प्रभु गै संदेस पर बिस्वास करयो। पौलुस अर बिंगा साथी पाफूस ऊं पाणी गै जहाज में चढगे पम्फूलिया गै पिरगा में आया। अर यूहना बानै छोडगे यरुसलेम आ'ग्यो। बठूं पिसिदिया गै अन्ताकिया में पूगग्या अर सब्त गै दिन सतसंग घर में जा'गे बेठग्या। मूसा गै नेम विधान अर परमेसर गी बात बताण आळा गी किताब पढण गै बाद सतसंग घर गै मुख्य बानै केयो, “मेरा यहुदी बेलियो, थारै कनै आं लोगां गो होंसलो बधाण खातर कीं है तो बता दैयो।” जद पौलुस खड़यो होगे हात गो हिसारो कर'गे केयो, “हे इसराएली लोगों अर गेर यहुदी परमेसर नै मानण आळा सुणो, आं इसराएली लोगां गै परमेसर आपणै बडेरा नै चुण लिया अर जद बे मिस्र देस में परदेसी हा तो बांगी तरक्की खातर आपगो लंबो हात कर'गे काड़ ल्यायो। बो चाळीस सालां तांई बन उजाड़ में बांगी मदद करतो रेयो। अर कनान देस में सात जातियां गो नास कर'गे बांगो देस चार सौ पचास सालां में इसराएल गै लोगां नै दे दियो। इंगै बाद बण सामुएल परमेसर गी बात बताण आळै गै टेम तांई बानै भोत सारा न्याय करण आळा दिया। बिंगै बाद बां एक राजा मांग्यो अर परमेसर चाळीस सालां खातर बिन्यामीन जाती गो कीस गै बेटै साऊल नै बां पर राजा बणा दियो। फेर साऊल नै हटागे परमेसर दाऊद नै राजा बणायो झिकै गै बारै में आ गवाई दी, मैं यिसै गै बेटै दाऊद नै एक आच्छो आदमी बतायो झिको मेरै मन पसंद गो है, बो ई मेरी इच्छा पूरी करसी।” ईं आदमी गै वंस ऊं आपगै वायदै गै अनुसार परमेसर इसराएल में मुकतीदाता यीसू गै रूप में ल्यायो। बिंगै आण ऊं पेलां यूहना सारै इसराएल में मन फिराव अर बतिस्मै गो परचार करयो। जद यूहना आपगी सेवा पूरी कर ली तो बण केयो मनै थे के समझो हो। मैं मसी कोनी, बो मेरै बाद आवैगो। मैं तो बिंगै बुंटा गो फितो खोलण गै लाइक कोनी हूं। हे मेरा यहुदी बेलियो, “थे झिका अबरहाम गी उळाद अर परमेसर नै मानण आळा गेर यहुदियो, ओ मुकती देण आळो संदेस आपणै खातर घाल्यो। यरुसलेम में रेण आळा अर बांगै मुख्य लोगां बिनै पिछाण्यो कोनी। हर सब्त गै दिन परमेसर गी बात बताण आळा गी किताब पढी जावंती फेर बी कोनी समझया अर बिनै दोसी बणा दियो अर बां बातां नै पूरी करी। बिनै मारण गो कोई बी दोस बिमै कोनी मिल्यो फेर बी पिलातुस नै बिनती करी कै इनै मरवा दैयो। बिंगै बारै में लिखेड़ी सारी बातां पूरी होण गै बाद बिनै करूस पर ऊं उतारगे कबर में राख्यो। पण परमेसर बिनै मरेड़ा ऊं जींवंतो करयो। अर बे झिका बिंगै सागै गलील ऊं यरुसलेम आया हा बानै भोत दिना तांई दिखतो रेयो अर अब लोगां गै सामै बे ई बिंगै जींवतै होण गा गवा है।” म्हे थानै बिं वायदै गै अनुसार सुब समाचार सुणावां झिको म्हारै बडेरा सागै करयो। अब ओ सुब समाचार म्हानै सुणायो झिका बडेरा गी उळाद हां। पवितर सासतर में इंया लिखेड़ो है, “तूं मेरो बेटो है, आज ई मैं तनै जन्म दियो है।” परमेसर यीसू मसी नै मरेड़ा ऊं जींवंतो करयो अर बिनै गळण कोनी दियो। पवितर सासतर में इंया लिखेड़ो है, मैं थारै बडेरै दाऊद सागै करेड़ो वायदो पूरी तरियां थानै देऊंगा। ईंखातर पवितर सासतर में इंया बी लिखेड़ो है कै, तूं आपगै पवितर जण नै कदी गळण कोनी दैयगो। क्यूंकै दाऊद तो परमेसर गी इच्छा पर चालगे मरग्यो अर आपगै बडेरा में जा मिल्यो अर गळ बी ग्यो। पण झिकै नै परमेसर जींवंतो करयो बिनै गळण कोनी दियो। हे मेरा यहुदी बेलियो, “थे जाणो हो कै यीसू गै द्वारा ई पापां ऊं माफी गो संदेस थानै दियो है। इंगै द्वारा हर कोई बिस्वास कर'गे पापां ऊं माफी ले सकै। मूसा गो नेम विधान पापां ऊं माफी कोनी दिरावै। ईंखातर चेतै में रेओ। इंया ना होवै कै झिको कीं परमेसर गी बात बताण आळा केयो बो थारै पर आ पड़ै।” हे चुगली करण आळो, “देखो अर अचंभित होवो अर नास हो जाओ क्यूंकै थारै दिना में मैं हिस्यो काम करूंगा कै बिं काम गी जे कोई थारै मू बात करै तो थे कदी बी बिस्वास ना करियो।” पौलुस अर बरनाबास सतसंग घर ऊं बारै जावंता टेम लोगां बाऊं बिनती करी कै अगलै सब्त गै दिन ऐ बातां म्हानै फेर सुणाइयो। जद सतसंग खतम होगी तो भोत सारा यहुदी अर यहुदी मत मानण आळा लोग झिका यहुदी भगत पौलुस अर बरनाबास लारै होग्या। बां बानै केयो अर होंसलो दियो कै परमेसर गी किरपा में बण्या रेवो। अगलै सब्त गै दिन नगर गा सारा लोग बचन सुणन खातर कठ्ठा हो'ग्या। पण यहुदी लोग भीड़ नै देखगे बळग्या अर पौलुस गी बातां गो बिरोध अर निंदा करण लागग्या। पण पौलुस अर बरनाबास केयो, “थानै परमेसर गो बचन पेलां सुणायो जाणो हो। पण थे बिंऊं दूर जावै हो अर अपणै आपनै अनन्त जीवन ऊं दूर करो। ईंखातर म्हे अब गेर यहुदियां नै परमेसर गो बचन सुणावांगा। प्रभु म्हानै आग्या दी है कै, मैं थानै गेर यहुदियां खातर जोती बणाया है कै धरती गै च्यारा कूंटा तांई तूं मुकती गो रा बता सकै।” ओ सुणगे गेर यहुदी लोग खुस होया अर परमेसर गै बचन गी बडाई करी अर जिता अनन्त जीवन खातर ठेरायेड़ा हा बां बिस्वास करयो। जद प्रभु गो बचन सारै देस में फेलग्यो। पण यहुदियां अर यहुदी नेम विधान गो पालण करण आळी लुगाईयां अर नगर गा खास आदमियां पौलुस अर बरनाबास गो बिरोध करणो सरू कर दियो अर बानै आपगै इलाकै ऊं बारै काड़ दिया। जद बां बांगै सामै पगां गो रेतो झाड़गे इकुनियुम में उड़ग्या। अर अन्ताकिया गा बिस्वासी लोग खुसी अर पवितर आत्मा ऊं भरिजग्या। पौलुस अर बरनाबास जिंया अन्ताकिया नगर में सतसंग करी बिंयाई इकुनियुम में बी यहुदी सतसंग घर में करी अर ईं तरियां गो संदेस दियो कै भोत सारा यहुदी अर गेर यहुदी लोगां बिस्वास करयो। पण झिकै यहुदियां बिस्वास कोनी करयो बां गेर यहुदीया नै भड़काया अर बांगै बिरोध में खड़या होण खातर केयो। बे भोत दिनां तांई बठै रेया अर प्रभु गै भरोसै पर भोत हिम्मत ऊं परचार करता रेया। यीसू मसी बानै चमत्कार करण में मदद करी, ईं तरियां आंगै द्वारा देऐड़ै संदेस नै समझण लागग्या अर इमै सच्चाई है ओ बी जाणग्या। बठै फूट पड़गी, केई यहुदियां कानी अर केई खास चेला कानी हो'ग्या। फेर यहुदी अर गेर यहुदी लोगां आपगै नेतावां सागै मिलगे बांगै सागै बुरो बरताव करयो अर बां पर पथर फेंकण गी तैयारी करी। ईं बात गो पौलुस अर बरनाबास नै पतो लागग्यो तो बे लुकाउनिया गै लिस्तरा अर दिरबे नगरां गै नेडै़ नेडै़ इलाकै में भाजग्या। अर बठै सुब समाचार सुणाण लागग्या। लिस्तरा में एक हिसो आदमी हो झिको जन्म ऊं ई लंगड़ो हो अर कदी कोनी चाल्यो। बो लंगड़ो आदमी पौलुस गी बातां सुणै हो अर पौलुस बिं कानी देख्यो अर समझग्यो कै इमै बिस्वास है। अर बण केयो, “आपगै पगां पर सीधो खड़यो होज्या। बिं टेम ई बो उछळ गे खड़यो हो'ग्यो।” जद लोगां पौलुस गो ओ चमत्कार देख्यो तो लुकाउनिया गी बोली में ऊंची आवाज में केयो, देवता आदमियां गै रूप में होगे म्हारै कनै उतरायो है। बां बरनाबास नै जेऊस केयो अर पौलुस प्रभु गो संदेस दियो। ईंखातर बिनै हेरमोस केयो। नगर गै सामणै जेऊस गै मिन्दर में एक याजक रेवंतो। बो लोगां गै सागै कीं बलिदान करणो चावै हो। जद बरनाबास अर पौलुस नै ईं बात गो पतो लागग्यो तो आपगा गाबा पाड़ दिया अर भीड़ नै केयो, हे साथियो, थे ओ काम ना करियो। म्हे बी थारै बरगा आदमी हां। म्हे थारै खातर आच्छो संदेस लेगे आया हां। परमेसर चावै है कै दूसरै देवी देवता नै छोड़गे आपां बिंगी आराधना करां बणी सारो कीं झिको धरती गै उपर अर धरती गै मा है बणायो है। बित्यै टेम में बण सारी जातियां नै बांगी आपगी आपगी इच्छा पर चालण दियो। फेर बी बण आपां नै छोडया कोनी। पण बो भलाई करतो रेयो अर आकास ऊं मेह अर मोसम गै अनुसार फसल दी कै थे खुसी गै सागै खा पीगे जींवता रे सको। इतो केण गै बाद बी बां लोगां नै बड़ी मुसकिल ऊं रोक्यो कै बली ना चढावै। पण कीं यहुदियां अन्ताकिया अर इकुनियुम ऊं आ'गे लोगां नै आप कानी कर लिया। अर पौलुस पर पथराव करयो। आपगी जाण में मरेड़ो समझगे नगर ऊं बारै खींच गे लेग्या। पण जद चेला बिंगै कनै आ'गे खड़या होया तो बो उठगे नगर में आयो अर दूसरै दिन बरनाबास गै सागै दिरबे उड़ग्यो। बां बिं नगर में सुब समाचार सुणायो अर भोत सारा चेला बणागे लिस्तरा, इकुनियुम अर अन्ताकिया में पाछा आ ग्या। अर चेला नै बिस्वास में पक्को होण गो होंसलो देगे बानै केयो, परमेसर गै राज में जाण खातर आपां नै भोत दुख सेणो पड़ैगो। हर एक बिस्वासी मण्डली में एक मोटो आदमी बणायो अर बरत गै सागै पराथना कर'गे बानै प्रभु गै हात में दे दिया झिकै पर बानै बिस्वास हो। बे पिसिदिया माखर पम्फूलिया गेया। फेर पिरगा में संदेस सुणागे इटली में आया। इटली ऊं बे जहाज में अन्ताकिया गेया जठै बां सेवकाइ सरू करी अर बिनै पूरी कर'गे पाछा आया। बठै जा'गे बां बिस्वासी लोगां नै कठ्ठा करया अर बतायो कै परमेसर म्हारै सागै होगे किता मोटा मोटा काम करया अर गेर यहुदी लोगां खातर बिस्वास गो बारनो खोल दियो। अर बे बठै चेला सागै केई दिन रेया। फेर केई लोगां यहुदियां ऊं आ'गे बिस्वासी लोगां नै सिखाण लागग्या कै जे मूसा गी रीति पर थारो खतनो ना होयो तो थे मुकती कोनी पा सको। जद पौलुस अर बरनाबास बांगै सागै ऊंचा नीचा हो'ग्या तो ओ फेंसलो करयो कै पौलुस अर बरनाबास बामूं कीं आदमी ईं बाता गो फेंसलो करण खातर खास चेला अर बुडा लोगां कनै यरुसलेम जावै। अर बिस्वासी मण्डली गा लोगां बां खातर रा में खाण पीण गी जरूरत पूरी कर'गे छोड़ दिया अर बे फीनिके अर सामरिया गै माखर चालता गेर यहुदियां गो मन बदळण गो सुब समाचार सुणावंता गेया अर बिस्वासी भाई भोत खुस होवंता। जद बे यरुसलेम पूग्या तो बिस्वासी लोग, खास चेला अर बडेरा लोग बांगै सागै भोत खुसी ऊं मिल्या अर बां बतायो कै परमेसर म्हारै सागै होगे किता चमत्कार करया। पण कीं फरीसियां गै दळ गा बिस्वासी लोगां उठगे केयो कै गेर यहुदी लोगां नै खतनो अर मूसा गै नेम विधान मानण गी आग्या देणी चईयै। जद खास चेला अर बुडा लोग ईं बात पर बिचार करण खातर कठ्ठा होया। जद बां आपसरी में बात चीत करी तो पतरस खड़यो होगे केयो, हे मेरा साथियो, थे जाणो हो कै केई दिन पेलां थारै मू मनै परमेसर चुण लियो कै मेरै द्वारा गेर यहुदियां संदेस सुणगे बे बिस्वास करै। मना नै जांचण आळो परमेसर म्हारै तरियां ई बानै बी पवितर आत्मा देगे बांगी गवाई दी। अर बिस्वास गै द्वारा बांगा पाप माफ कर'गे बामै अर म्हारै में कोई भेदभाव कोनी करयो। फेर थे अब परमेसर नै क्यामी परखो हो कै चेला गी नस पर एक हिसो जूड़ो रखो झिकै गो भार ना म्हे चक सक्या ना म्हारा बडेरा। म्हारो ओ बिचार है कै झिकी रीति ऊं प्रभु यीसू गी किरपा ऊं यीसू मसी म्हानै मुकती दी बिं रीति ऊं बानै बी देसी। फेर सारा लोग चुप रेग्या अर बरनाबास अर पौलुस गी बात सुणण लागग्या कै परमेसर बांगै द्वारा गेर यहुदियां में किता मोटा मोटा चमत्कार अर निसान दिखाया। जद बे चुप होया तो याकूब केयो, “मेरी बात सुणो।” परमेसर पेलां गेर यहुदी लोगां ऊं एक दळ आपगै नाम खातर चुण लियो, आ बात पतरस थानै बताई ही। परमेसर गी बात बताण आळा गी किताब में ऐ बातां मिलै है जिंया लिखेड़ो है। “इंगै बाद में मैं फेर आ'गे दाऊद गो पडे़ड़ो राज बणाऊंगा। झिको राज पड़ग्यो बो दुबारै बणाऊंगा। ईंखातर बचेड़ा आदमी अर सारा गेर यहुदी झिका मेरै नाम पर बिस्वास करै है, प्रभु गी खोज करै, ऐ बातां बो ई प्रभु केवै है झिको जगत गी उतपत्ती ऊं बतावंतो आयो है।” ईंखातर मेरो बिचार ओ है कै गेर यहुदियां मू झिका बिस्वास करयो है आपां बानै तंग ना करां। आपां नै तो बानै बताणो चईयै कै, मूरतियां आगै चढाएड़ो प्रसाद थानै नई लेणो चईयै अर बेबीचार ऊं बच गे रेवो, गळ घोटेड़ै कोई बी पसु गो मांस ना खाओ अर लोइ बी ना खाओ। क्यूंकै आदि काल ऊं मूसा गो नेम विधान हर एक नगर गै सतसंग में सब्त गै दिन सिखायो जावंतो। फेर सारा बिस्वासियां अर खास चेला अर बडेरै लोगां नै आच्छो लाग्यो कै आपणै मू कीं लोग चुणगे आंगै सागै अन्ताकिया भेज्या जावै अर आनै चुण्या हा, यहूदा झिको बरसब्बा कुहावंतो अर सीलास। ऐ दोनूं बिस्वासियां में खास हा। फेर बांगै हात में एक खत लिखगे दियो अर इमै इंया लिखेड़ो कै, यरुसलेम में रेण आळा बिस्वासी, खास चेला अर बुडै लोगां गै द्वारा लिखेड़ो खत। अन्ताकिया, सीरिया अर किलिकिया गै गेर यहुदी भाईयां नै निमस्कार। म्हे सुण्यो कै म्हारै मू केई बठै जा'गे थानै आपगी बातां बतागे डरा दिया अर थारो बिस्वास कमजोर कर दियो। पण म्हे बानै आग्या कोनी दी। ईंखातर म्हे सारा एक मन होगे चुणेड़ा आदमियां नै बरनाबास अर पौलुस गै सागै थारै कनै घाल्या। ऐ हिस्या आदमी है झिका आपगी जान यीसू मसी गै काम खातर दे राखी है। ईंखातर म्हे यहूदा अर सीलास नै घाल्या है झिका आपगै मू ऊं थानै ऐ बातां बता देसी। पवितर आत्मा अर म्हे ठीक समझ्यो कै आं जरूरी बाता नै छोड़गे थारै पर ओर भार ना दियो जावै। कै थे मूरतियां नै चढाएड़ी अर लोइ अर गळ घोटेडै़ गो मांस अर बेबीचार ऊं दूर रेवो तो थारो भलो हो'सी। फेर बे बठूं चालगे अन्ताकिया पूगग्या अर सारा नै कठ्ठा कर'गे बो खत बानै दियो। बिं खत में होंसलो देण आळो संदेस पढगे भोत राजी होया। यहूदा अर सीलास झिका परमेसर गी बात बताण आळा हा, बां बानै भोत सारो होंसलो देण आळी बातां बतागे बानै बिस्वास में मजबूत करया। बठै थोड़ो टेम रेगे सांती गै सागै विदा लेगे पाछा घालण आळा कनै आ ग्या। (पण सीलास नै बठै रेणो आच्छो लाग्यो)। पौलुस अर बरनाबास अन्ताकिया में रेग्या अर भोत सारै लोगां नै प्रभु गो संदेस सुणावंता रेया। केई दिनां गै बाद पौलुस बरनाबास नै केयो आपां झिकै नगरां में प्रभु गो संदेस सुणायो हो बां बिस्वासियां नै जा'गे मिलां अर देखां बे किंया है? जद बरनाबास यूहना नै झिको मरकुस कुहावै हो बिनै सागै ले जाण गो बिचार करयो। पण पौलुस बिनै मना कर दियो क्यूंकै बण पम्फूलिया में बांगै सागै सेवकाई में मदद कोनी करी अर ना बांगै सागै रेयो। आ बात पौलुस नै आच्छी कोनी लागी। दोनां में हिस्यो विवाद होयो कै बे दोनूं एक दूसरै ऊं न्यारा हो'ग्या। बरनाबास मरकुस नै लेगे पाणी गै जहाज ऊं साईप्रस उड़ग्यो। पण पौलुस सीलास नै चेलो बणा दियो अर बिस्वासियां कनै परमेसर गी किरपा में सोंपगे बठूं उड़ग्यो। अर पौलुस किलिकिया अर सीरिया गै बिस्वासी लोगां नै मजबूत करतो होयो उड़ग्यो। फेर पौलुस दिरबे अर लिस्तरा में गेयो बठै तीमुथियुस नाम गो एक चेलो हो। बिंगी मां एक यहुदिनी बिस्वासी अर बिंगो बाप एक गेर यहुदी हो। लिस्तरा अर इकुनियुम में रेण आळा भाईयां में तीमुथियुस गै सागै आच्छी उठ बेठ ही। पौलुस तीमुथियुस नै आपगै सागै लेणो चावै हो। झिका यहुदी लोग बठै रेवंता बांगै कारण बिंगो खतनो करयो क्यूंकै बे जाणा हा कै इंगो बाप गेर यहुदी है। अर नगर नगर जावंता होया बे विधियां झिकी यरुसलेम गा खास चेला अर बुडै लोगां बणाई ही बानै मानणी सिखावंता गेया। ईं तरियां बिस्वासियां गो बिस्वास मजबूत होयो अर हर एक दिन भोत सारा लोग ओर जुड़ता गेया। बे फिरगिया अर गलातिया परदेस में होगे गेया क्यूंकै पवितर आत्मा बानै आसिया में बचन सुणाण ऊं रोक दिया। बां मूसिया प्रदेस गै कनै जा'गे बितुनिया में जाणो चायो, पण यीसू गी आत्मा बानै फेर रोक दिया। ईंखातर मूसिया में होगे बे त्रोवास में आया। बठै पौलुस रात नै एक सपनो देख्यो कै एक मकदूनियां गो आदमी खड़यो होगे बिंऊं बिनती कर'गे केवै, पार उतरगे मकदुनियां में आ म्हारी मदद कर। ओ दरसण देखतांई म्हे बिं टेम ई मकदुनिया जाणो चायो। बां ओ समझयो कै परमेसर म्हानै सुब समाचार सुणाण खातर बुलाया है। ईं तरियां म्हे पाणी आळै जहाज ऊं सुमात्राके गेया अर दूसरै दिन बठूं नियापुलिस में गेया। बठूं म्हे फिलिप्पी पूग्या झिको मकदुनिया परदेस गो खास नगर अर रोमियां गो गाम हो। अर बठै म्हे केई दिन रेया। सबत गै दिन म्हे नगर गै फाटक गै कनै नदी गै किनारै ओ समझगे गेया कै बठै पराथना करण गी जिग्यां हो'सी अर बठै बेठगे आएड़ी लुगाईयां सागै बात करण लागग्या। तुआथिरा नगर में रेण आळी लुदिया नाम गी एक लुगाई बठै ही। अर बा बेंजणी रंग गा गाबा बेचती ही। बण पौलुस गी बात नै आच्छी तरियां सुणी। आ बात सुणण खातर प्रभु बिंगो मन खोल दियो अर बण पौलुस गी सारी बातां नै मान ली। जद बा आपगै घराणै सागै बतिस्मो लियो अर बण म्हारूं बिनती करी कै जे थे मनै प्रभु गी बिस्वासी समझो तो मेरै घरे चालो अर थानै मेरै घरे आणो ई पड़सी। जद म्हे पराथना करण गी जिग्यां में जावा हा तो म्हानै एक नौकराणी मिली झिकी में सुगन बताणाळी ओपरी बडे़ड़ी। बा लोगां नै सुगन बतागे आपगै मालिकां नै भोत सारा रिपिया कमागे देवंती। बा पौलुस अर म्हारै लारै आ'गे रोळो मचागे केयो कै ऐ लोग परम प्रथान परमेसर गा दास लोग है अर झिका म्हानै मुकती देण आळो रा बतावै है। बा भोत दिना तांई इंया केवंती रेई। पण पौलुस दुखी होगे बिं ओपरी नै केयो, “तनै यीसू मसी गै नाम ऊं आग्या देऊं, बिमुं निकळ जा।” बिं टेम ई बा ओपरी बिमुं निकळगी। जद बिंगै मालिकां देख्यो कै म्हारी कमाई गो साधन खत्म हो'ग्यो तो पौलुस अर सीलास नै पकड़गे चोंक में प्रधान कनै लेग्या। फेर बानै सजा देण आळा हाकिमा कनै ले जा'गे बोल्या, ऐ लोग यहुदी है, म्हारै नगर में गड़बड़ी फेलावै है। ऐ हिस्या रीति रिवाज सिखावै झिका नै मानणा अर बां पर चालणो म्हारै रोमियो खातर ठीक कोनी। जद बोळा सारा लोग कठ्ठा हो'ग्या अर सजा देण आळा मुख्य आदमियां हुकम दियो कै आंगा गाबा पाड़गे उतारगे आंगै बेंत मारो। भोत सारा बेंत मारण गै बाद जेळ में बंद कर दिया अर जेळ गै मुख्य आदमी नै हुकम दियो कै आं पर पेरो लगवायो जावै। जेळ गै मुख्य अधिकारी बानै मा आळी कोठड़ी में बंद कर दिया अर बांगा पग काठ सागै बांध दिया। आदी रात नै पौलुस अर सीलास पराथना करता होया अर परमेसर गा भजन गावा अर केदी बानै सुणा। इतै गै मा धरती हालगी अर जेळ गी नींव बी डोलगी अर सारा बारणा खुलग्या। अर सारा केदीयां गा बंधन बी खुल गे पड़ग्या। जेळ गो मुख्य अधिकारी जागग्यो अर जेळ गा सारा बारणा खुला देखगे मन में बिचार करयो कै सारा केदी भाजग्या। बण आपगी तलवार काड़गे अपणै आपनै मारणो चायो। पण पौलुस बिनै ऊंची आवाज ऊं ओ करण ऊं रोक दियो अर बोल्यो म्हे सारा अठै ई हां। जेळ गो मुख्य अधिकारी चानणो लेगे मा गेयो अर बो डरगे बांगै सामणै पड़ग्यो। अर बानै बारै ल्यागे बण केयो, “थे मनै बताओ मुकती पाण खातर मैं के करूं?” बां केयो, “प्रभु यीसू मसी पर बिस्वास कर। तूं अर तेरो सारो घराणो मुकती पासी।” फेर बां बिनै सारै घराणै गै सागै प्रभु गो बचन सुणायो। बिं रात बानै घरे ले जा'गे बांगा जख्म धोया अर बण आपगै सारै घराणै सागै बिं टेम ई बतिस्मो लियो। अर बानै रोटी खुवाई अर घर गा सारा जणां परमेसर पर बिस्वास करयो अर खुसी मनाई। जद दिन उगग्यो तो कचेड़ी गै मोटै अधिकारी आपगै सिपाईयां गै हात जेळ गै मुख्य अधिकारी नै हुकम भेज्यो कै बानै छोड़ देओ। जेळ गै मुख्य अधिकारी बानै केयो कै, “कचेड़ी गै मोटै अधिकारी गो हुकम है थानै छोड़ दिया जावै। ईंखातर थे सांती ऊं जाओ।” जद पौलुस बानै केयो, “म्हे रोमी हां।” बां म्हानै बिना दोस गै सारा गै सामै कुटवाया अर जेळ में बंद कर दिया अर अब म्हानै केवै होळै'सी उड़ जाओ। इंया म्हे कोनी करां। पण बे आप आ'गे म्हानै बारै काडै। सिपाईयां आ बात कचेड़ी गै मोटै अधिकारी नै बताई तो बो सुणगे डरग्यो कै बे रोमी है। अर आ'गे बानै मनाया अर बानै बारै ल्यागे बिनती करी कै नगर ऊं उड़ जाओ। जद पौलुस अर सीलास जेळ मू निकळगे लुदिया गै घरे गेया अर बिस्वासियां ऊं बात कर'गे बानै सांती दी अर बठूं उड़ग्या। फेर पौलुस अर सीलास अम्फिपुलिस नगर अर अपुल्लोनिया नगर मू होगे थिस्सलुनिके नगर में आया बठै यहुदियां गो सतसंग घर हो। पौलुस आपगी रीति रिवाज गै अनुसार तीन सब्त गै दिन तांई पवितर सासतर ऊं बांगै सागै बात चीत करी। अर पवितर सासतर गो अरथ खोलगे समझावंतो कै मसी नै दुख झेलणो अर मरेड़ा ऊं जी उठणो जरूरी हो। पौलुस केवै है कै मैं बतायो बो यीसू मसी है। आ बात सुणण आळा कीं यहुदी लोग अर परमेसर गो डर मानण आळा कीं गेर यहुदी लोग अर कीं खास लुगाईयां पौलुस अर सीलास गै सागै रळ गी अर आंगी बात मान ली। पण यहुदी लोग बळग्या, बां बजार मू बदमास लोगां नै कठ्ठा करया अर जळूस काड़गे नगर में दंगा करा दिया। बे यासोन गै घर कनै उड़ग्या अर केयो, पौलुस अर सीलास नै बारै सामै ल्यावो। पण जद पौलुस अर सीलास कोनी मिल्या तो बे लोग यासोन अर कीं बिस्वासी लोगां नै कचेड़ी गै मोटै अधिकारी कनै घीसगे लेग्या अर रोळो मचायो कै आं लोगां सारी दुनिया नै उळट पुळट कर दी। अर अब अठै बी आ ग्या। यासोन बानै आपगै घरे रोक्या है अर ऐ सारा इंया केवै है कै यीसू ई राजा है अर कैसर गी आग्या गो बिरोध करै है। जद नगर गै लोगां अर कचेड़ी गै मोटै अधिकारी लोगां ओ सुण्यो तो भोत परेसान होग्या। अर बां यासोन अर बाकी लोगां नै जमानत पर छोड़ दिया। बिस्वासियां रातो रात पौलुस अर सीलास नै बिरीया घाल दिया। अर बे बठै यहुदियां गै सतसंग घर में गेया। ऐ लोग तो थिस्सलुनिकि गै लोगां ऊं आच्छा हा अर बड़ी लालसा ऊं बचन सुणता अर हर रोज पवितर सासतर में ढूंढता रेवंता कै झिकी बात पौलुस बताई सई है के? ईंखातर बामूं भोत सारी खास युनानी लुगाईयां अर आदमियां बिस्वास करयो। जद थिस्सलुनिकि यहुदी लोगां नै पतो लागग्यो कै पौलुस बिरीया में बी परमेसर गै बचन गो परचार करै है तो बां लोगां बठै बी रोळो मचाणो सरू कर दियो। जद बिस्वासियां बिं टेम ई पौलुस नै विदा कर दियो कै समुंदर गै किनारै उड़ज्या। सीलास अर तीमुथियुस बठै ई रेग्या। पौलुस नै छोड़ण आळा बिनै एथेंस तांई लेग्या। पौलुस आनै बतायो कै सीलास अर तीमुथियुस नै मेरै कनै जल्दी भेज देईयो। पौलुस एथेंस में दोना गी उडीक करता टेम नगर में सारी जिग्यां मूरतियां देखगे भोत दुखी होयो। बो सतसंग घर में यहुदी अर गेर यहुदी लोगां झिका परमेसर नै मानण आळा गै सागै अर चोंक में झिका लोग बिनै मिलता बां सारा ऊं हर रोज बात करतो। जद इपीकुरी अर स्तोईकी ग्यानियां मू केई पूछण लागग्या अर केईयां केयो, “ओ बकवादी आदमी के केणो चावै?” जद दूसरां केयो, “ओ दूसरै देवतावां गो परचारक लागै क्यूंकै बो यीसू गै दुसर जी उठण गो सुब समाचार सुणावंतो रेवै।” जद बे बिनै पकड़गे अरियुपगुस गी पंचायत में लेग्या अर केयो कै, “तूं झिको परचार करै है बा क्यांगी सिक्सा है?” तूं तो अनोखी बातां सुणावै है। म्हे जाणणो चावां हां आंगो मतलब के है? एथेंस में रेण आळा अर परदेसी लोग नुई बातां सुणन नै अर बोलण में बोळो टेम बितावंता अर इंगै अलावा कोई काम कोनी करता। जद पौलुस अरियुपगुस गी पंचायत में खड़यो होगे केयो, “हे एथेंस में रेण आळा लोगों, मैं देखूं, थे देवतांवा गी हर बात नै मानण आळा हो। क्यूंकै मैं फिरतो होयो थारी पूजा करण आळी सारी चिजां नै देखी है अर एक हिसी बेदी बी देखी झिकी पर लिखेड़ो अणजाण परमेसर खातर। ईंखातर थे झिकै नै जाणो कोनी बिंगी आराधना करो हो। मैं थानै बांगी बात बताऊं।” झिकै परमेसर दुनिया में सारो कीं बणायो है। बो सुरग अर धरती गो मालिक है। बो लोगां गै हात ऊं बणाएड़ै मिन्दर में कोनी रेवै। बिनै माणस कनूं कोई बी चीज लेण गी जरूरत कोनी। बो आप सारा नै जीवन, सांस अर सारो कीं देवै। बण एक ई मूळ ऊं धरती गी सारी जाता बणाई अर बे सारा धरती पर बस जावै। बणी लोगां गो टेम अर मोसम बणायो अर बां जिग्यां बठै बे रेवै बिंगी हद बणा दी। क्यूंकै परमेसर ओ चावै कै लोग मनै ढूंडै जद तांई ना लादै ढूंढताई रेवै। बो आपणूं दूर कोनी है। म्हे बिंगै द्वारा ई जींवता रेवां हां अर चाला फिरा हां। जिंया थारै कवियां केयो है म्हे तो बिंगी उळाद हां। आपां परमेसर गै वंस गा हां। जिंया मिसतरी सोनै, चांदी अर पथर ऊं कलपना कर'गे कीं बणावै आपां इंया कोनी। ईंखातर परमेसर अणजाणपणै गै टेम में ध्यान कोनी दियो पण अब सगळी जिग्यां सारा लोगां नै आपगै पापां ऊं दूर होगे मन बदळण गो परमेसर कनै आण गी आग्या देवै। जगत गो धरम ऊं न्याय करण खातर परमेसर एक आदमी नै चुणगे एक दिन ठेरायो। बिनै मरेड़ा ऊं जींवंतो कर'गे आ बात पक्की कर दी। मरेड़ा ऊं जी उठण गी बात सुणगे केई तो मजाक करण लागग्या अर केईयां केयो आ बात म्हे तेरै कनूं फेर कदी सुणांगा। बिं टेम पौलुस बांगै कनूं निकळ गेयो। पौलुस गी बात मानगे अरियुपगुस पंचायत गो एक आदमी दियुनुसियुस अर दमरिस नाम गी एक लुगाई अर बांगै सागै लोगां बिस्वास करयो। इंगै बाद पौलुस एथेंस छोड़गे कुरिन्थुस आयो। बठै बिनै पुन्तुस में रेण आळो अक्विला नाम गो एक यहुदी मिल्यो। बो आपगी घराळी प्रिस्किल्ला गै सागै इटली ऊं आयो क्यूंकै क्लोदियोस राजा सारै यहुदियां नै रोम ऊं बारै जाण गो हुकम दियो। पौलुस बांगै सागै रेयो अर काम करतो क्यूंकै बे दोनों तंबु बणाण गो काम करता। पौलुस हर एक सब्त गै दिन सतसंग घर में जा'गे बठै गा यहुदी अर गेर यहुदी लोगां नै यीसू गै बारै में बतावंतो अर यीसू पर बिस्वास करण खातर बानै तैयार करतो। जद सीलास अर तीमुथियुस मकिदुनिया ऊं आया तो पौलुस बचन सुणाण गी ताक में यहुदियां नै गवाई देण लागग्यो कै यीसू ई मसी है। जद यहुदी लोग पौलुस गो बिरोध करण लागग्या बण आपगा गाबा झाड़गे केयो थारो खून थारी सिर पर रेवै। मैं बे कसूर हूं। अब मैं गेर यहुदियां कनै जा'गे बचन सुणावूंगा। बठूं चालगे बो तितुस युसतुस गेर यहुदी गै घरे गेयो झिको परमेसर गी आराधना करतो। बिंगो घर सतसंग घर गै कनै हो। सतसंग घर गै मुख्य क्रिसपुस आपगै घराणै सागै बिस्वास करयो अर कुरुन्थियों में रेण आळा भोत लोगां बिस्वास करयो अर बतिस्मो लियो। पौलुस नै सपनै में दरसण देगे प्रभु केयो, “मेरै बारै में बोलतो जा, चुप ना रे। क्यूंकै मैं तेरै सागै हूं अर कोई बी तेरो नुक्सान कोनी कर सकै। ईं नगर में मनै मानण आळा भोत लोग है।” ईंखातर पौलुस बठै बानै परमेसर गो बचन सिखाण खातर डेढ साल रेयो। जद गलियो आखाया देस गो मुख्य अधिकारी हो तो यहुदी लोगां एक्को कर'गे पौलुस नै न्याय करण आळा गै सामणै खड़यो कर दियो। अर केयो, ओ आदमी इंया केवै है कै परमेसर गी आराधना ईं रीति ऊं करो झिकी नेम विधान गै खिलाफ है। जद पौलुस गै बोलण ऊं पेलां ई गलियो यहुदियां नै केयो, ओ कोई मोटो अपराध होवंतो तो मैं थारी सुणतो। पण जे ओ बाद विवाद कीं सब्दां अर कीं नामां अर थारै नेम विधान गै बारै में है तो इंऊं थे आप ई निपटो, मैं आं कामां गो न्याय कोनी करणो चाऊं। फेर बण बानै कचेड़ी ऊं बारै काड़ दिया। जद सारै लोगां सतसंग घर गै मुख्य सोस्थिनेस नै पकड़गे कचेड़ी में मारयो। पण गलियो ईं बात गी कोई चिंता कोनी करी। पौलुस भोत दिना तांई कुरुन्थी में रेयो। बिंगी मन्नत गै अनुसार बण किंखिया में रोड कढवाई अर बिस्वासियां कनूं विदा लेगे प्रिसकिल्ला अर अक्विला गै सागै सीरिया उड़ग्यो। बण इफिसुस में पोंचगे बानै बठै छोडया अर आप सतसंग घर में जा'गे यहुदियों ऊं बात चीत करण लागग्यो। जद बां बिंऊं बिनती करी कै म्हारै सागै बी कीं दिन रेओ तो बो कोनी मान्यो। अर बानै ओ केगे विदा होयो कै परमेसर चायो तो थारै कनै फेर आऊंगा। जद बो इफिसुस ऊं चाल पड़यो। जद कैसरिया में उतरगे यरुसलेम गेयो अर बिस्वासियां ऊं निमस्कार कर'गे अन्ताकिया में आयो। फेर केई दिन रेगे बठूं उड़ग्यो अर गलातिया अर फिरगिया परदेसां गै बिस्वासियां नै मजबूत करतो रेयो। अब सिकन्दरिया में रेण आळो अपुल्लोस नाम गो एक यहुदी इफिसुस में आयो। बो एक ग्यानी अर पवितर सासतर नै आच्छी तरियां जाणन आळो हो। बण प्रभु गी रा गी सिक्सा ली अर मन लगायो। यीसू गै बारै में ठीक ठीक सुणावंतो अर सिखावंतो पण बो सिरफ यूहना गै बतिस्मै गै बारै में जाणतो। बो सतसंग घर में बिना डर ऊं बोलण लागग्यो। प्रिस्किल्ला अर अक्विला बिंगी बातां सुणगे बिनै आपगै सागै ले आया अर परमेसर गै बारै में ओर ठीक ऊं सिखायो। जद अपुल्लोस गै अखाया में जाण गै टेम बिस्वासी भाईयां बानै ढांढस दियो अर बठै गै चेला नै लिख्यो कै बे बिनै आच्छी तरियां मिलै। अर बठै पोंचणै गै बाद बां लोगां नै भोत मदद करी झिका किरपा गै कारण बिस्वास करयो। बण पवितर सासतर गै द्वारा यहुदियां नै मिसाल देगे पक्को बतायो कै यीसू ई मसी है। जद अपुल्लोस कुरिन्थुस में हो पौलुस मांयलै सारै परदेसा में सफर करतो होयो इफिसुस में आयो। बठै बिनै कीं बिस्वासी लोग मिल्या। बण बानै पूछयो, “जद थे बिस्वास करयो तो पवितर आत्मा मिली के? बां केयो म्हे तो पवितर आत्मा गी बात ई कोनी सुणी।” पौलुस बानै केयो, “थे फेर किंगै नाम में बतिस्मो लियो?” बां केयो, “यूहना गो बतिस्मो लियो।” पौलुस केयो, “यूहना तो ओ केगे मन बदळण गो बतिस्मो दियो कै झिको मेरै बाद आण आळो है, बिं यीसू मसी पर बिस्वास करियो।” ओ सुणगे बां प्रभु यीसू गै नाम पर बतिस्मो लियो। जद पौलुस बां पर हात रख्यो अर तो पवितर आत्मा बां पर आई अर बे न्यारी न्यारी बोली बोलण अर परमेसर गी बात बोलण लागग्या। ऐ सारा बारा आदमी हा। पौलुस सतसंग घर में जा'गे तीन म्हिना तांई बिना कोई डर ऊं बोलतो रेयो अर परमेसर गै राज गै बारै में बात चीत करतो अर समझावंतो रेयो। पण केई लोगां बिंगी बात कोनी मानी अर प्रभु गै खिलाफ कीं बुरी बात केण लागग्या। ईंखातर पौलुस कीं बिस्वासियां नै सागै लेगे तरन्नुस गी पढण आळी जिग्यां में लेग्यो अर हर रोज बानै सिखावंतो रेवंतो। दो साला तांईं इंया होंतो रेयो अर ईंखातर आसिया गा रेण आळा सारा यहुदी अर गेर यहुदी प्रभु गो बचन सुण लियो। परमेसर पौलुस गै हात ऊं अनोखो काम दिखावंतो रेयो। अर बिंगो रूमाल अर साफा बिंगै सरीर गै लगागे बीमार गै लगावंता तो बीमारी दूर हो जावंती अर ओपरी बी निकळ जावंती। जद कीं यहुदी झिका नगर नगर में जा'गे जादू टूणा करता। झिकै लोगां में ओपरी बडे़ड़ी होवंती बानै केवंता कै यीसू गै नाम ऊं निकळ जा। बिं यीसू गो नाम लेगे केवूं झिकै गो परचार पौलुस करै है बिं नाम ऊं आग्या देऊं कै इमूं निकळ जा। स्किवा नाम गै यहुदी महा याजक गै सात बेटा हा, बे सारा इंया ई करता। एकर ओपरी बानै केयो, “यीसू नै मैं जाणूं अर पौलुस नै बी मैं जाणूं, थे लोग कुण हो?” झिकै आदमी में ओपरी ही बिमुं निकळगे बामै बड़गी अर बांगी हिसी हालत करी कै बे नागा घायल होगे बिं घर ऊं निकळगे भाजग्या। आ बात इफिसुस में रेण आळा सारा यहुदी अर गेर यहुदी जाणग्या अर सारा डरग्या अर प्रभु यीसू मसी गै नाम गी बडाई करी। झिका बिस्वास करयो बामूं भोत सारां आप आपगै करेड़ा गळत कामां नै सारा गै सामणै मान लिया। टूणा करण आळा भोत सारा आप आपगी किताबां भेळी कर'गे सारां गै सामै बाळ दी अर जद बांगो मोल जोड़यो तो पचास हजार चांदी गै सिकां गै बराबर होयो। ईं तरियां प्रभु गो बचन बड़ी सामरथ ऊं फेलतो गेयो। जद सारी बातां होगी तो पौलुस सोच लियो कै मकिदुनिया अर अखाया ऊं होगे यरुसलेम जाऊं। बठै जाण गै बाद मनै रोम गै बिस्वासियां नै बी मिलणो है। ईंखातर आपगै दो साथियां तीमुथियुस अर इरास्तुस नै मकिदुनिया घालगे आप केई दिन आसिया में रेयो। इफिसुस में बां दिना में प्रभु गै बारै में भोत रोळो पड़यो। क्यूंकै देमोतिरियुस नाम गो एक सुनार हो, बो अरतिमुस देवी गा चांदी गा मिन्दर बणावंतो हो झिकै मू मिसतरियां नै भोत काम मिलतो। बण ओ काम करण आळै सारै मिसतरियां नै कठ्ठा करया अर केयो, “हे भाईयो, थे जाणो हो कै ईं काम में आपां नै कितो धन मिलै।” पौलुस इफिसुस अर सारै आसिया में लोगां नै किंया बहकाया थानै पतो है। बो इंयाई लोगां नै केवै कै आदमियां गै हात ऊं बणाएड़ो देवता साच्चो परमेसर कोनी है। इमै आपणै काम गी बात कोनी पण म्हान देवी अरतिमुस गै मिन्दर नै बी कीं कोनी समझ्यो जावैगो। अर आसिया परदेस अर सारै जगत गी देवी गो पूरो म्हत्व खत्म हो जावैगो। बे सारा ओ सुणगे रीस ऊं भरग्या अर रोळो मचायो कै इफिसियों गी अरतिमुस देवी म्हान है। अर सारै नगर में बड़ो रोळो मचग्यो अर मकिदुनिया ऊं आएड़ो गायुस अर अरिस्तरखुस झिका पौलुस गै सागै यातरी हा, बानै पकड़ लिया अर नगर गी एक खास जिग्यां जठै बांगी पंचायत होवंती बठै लेग्या। जद पौलुस लोगां गै कनै जाणो चायो तो चेला बिनै जाण कोनी दियो। आसिया गै अधिकारियां मू कीं बिंगा साथी हा। बां बिनै संदेस भेजगे बिनती करी कै बठै जाण गी गळती ना करी। बठै कोई किंयाई रोळो मचावै, कोई किंयाई अर पंचायत में भोत हड़बड़ी होण लागरी है। भोत सारा लोगां नै तो पतो ई कोनी हो कै आपां अठै क्यामी आया। यहुदी लोगां सिकन्दर नै आ'गै खड़यो कर'गे केयो आ सारी घटना म्हानै बता। बो हातां ऊं हिसारो कर'गे आपगी बात बताणी चावै हो। पण बानै पतो लागग्यो कै बो यहुदी है तो सारां गा सारा एक ई आवाज में दो घंटा तांई रोळो मचायो कै इफिसियो गी देवी अरतिमुस म्हान है। नगर में खास फेंसलो लेण आळो एक मोटै अधिकारी लोगां नै चुप करवागे केयो, “हे इफिसुस गा लोगो ईं बात गो आपां सारा नै पतो है कै इफिसियो नगर गी म्हान देवी अरतिमुस गै मिन्दर अर जेऊस गी ओर ऊं पडे़ड़ो मूरती गो एक टुकड़ो है। क्यूंकै आं बाता नै मना कोनी करयो जा सकै। ईंखातर थानै सांती ऊं रेणो चईयै। अर बिना सोच बिचार गे कीं कोनी करणो चईयै। थे आं लोगां नै पकड़गे अठै ल्याया हो, आं ना तो कोई मिन्दर लूटयो अर ना आपणी देवी गै खिलाफ कीं बोल्या है। फेर बी देमोतिरियुस नै किंगैई बिरोध में कोई सिकायत है तो कचेड़ी खुली है अर बठै राजपाल है। बे आपसरी में एक दूसरै पर आपगी बात रख सकै। पण थे जे ओर कीं बात गै बारै में पूछणो है तो पंचायत में फेंसलो करयो जावैगो।” आज गै रोळै गै कारण आपणै पर दोस लागणै गो डर है। ईंखातर इंगो कोई कारण कोनी आ भीड़ क्यामी कठ्ठी होयी, आपणै कनै इंगो कोई उतर कोनी। अर इतो केगे बण पंचायत नै बंद कर दी। जद रोळो रुकग्यो तो पौलुस चेला नै बुला'गे बांगो होंसलो बधायो अर बां कनूं विदा ली अर मकिदुनिया कानी चाल पड़यो। बिं टेम सारै परदेस ऊं होगे चेलां नै भोत होंसलो देगे बो युनान में आयो। बठै तीन म्हिना रेगे जहाज में सीरिया जाण गी तैयारी में हो तो यहुदी बिंगै बिरोध में होगे लारै हो'ग्या। ईंखातर बण ओ फेंसलो लियो कै मकिदुनिया होगे पाछो उड़ जाऊं। बिरीया गै पिरूस गो बेटो सोपत्रुस अर थिसलुनिकिया में रेण आळा अरिस्तरखुस अर सिकुन्दुस अर दिरबे गो गायुस अर तीमुथियुस अर आसिया गो तुखिकुस अर तरफिमुस बिंगै सागै हो'ग्या। बे आ'गै जा'गे त्रोवास में म्हारी उडीक करा। अर फसह गै त्यूंहार गै दिनां गै बाद फिलिप्पी ऊं जहाज में चढगे पांच दिनां में बिंगै कनै गेया। अर सात दिन बठै ई रेया। हफ्तै गै पेलै दिन जद म्हे रोटी तोड़ण खातर कठ्ठा होया। पौलुस नै अगलै दिन जाणो हो ईंखातर आदी रात तांई बांऊं बातां करतो रेयो। झिकै माळियै में म्हे कठ्ठा हा बिमै भोत दीया जगै हा। अर युतुखुस नाम गो एक जवान बारी कनै बेठयो अर बिनै नींद आ'गी। जद पौलुस भोत देर तांई बातां करतो रेयो तो बो नींद में तीसरी मंजील ऊं नीचै पड़ग्यो अर पड़तांई मरग्यो। पण पौलुस उतरगे बिंगै बांथ भरली अर गळै लगा गे केयो, “ओ मरयो कोनी अजे जींवंतो है।” अर उपर जा'गे प्रभु भोज में सामिल हो'ग्यो अर इती देर तांई बांगै सागै बात करतो रेयो अर दिन उगग्यो अर फेर बो उड़ग्यो। अर बे बिं जवान नै जींवंतो ले आया अर सारा नै भोत सांती मिली। म्हे पेलां ई जहाज में बेठगे अस्सुस कानी चाल पड़या क्यूंकै म्हे पौलुस नै जहाज में चढाणो चावा। पण बो खुद पैदल आणो चावैओ। बो अस्सुस में म्हानै मिल्यो तो म्हे बिनै जहाज में बिठा लियो अर एक सागै मितुलेने में चाल पड़या। दूसरै दिन बठूं चालगे म्हे खियुस गै सामै जा पूग्या अर अगलै दिन सामोस गेया अर फेर बिंगै बाद दुसरै दिन मिलेतुस में आया। पौलुस पेन्तिकुस्त गै दिन यरुसलेम पोंचणो चावै हो। जद बण इंया सोच्यो कै इफिसुस गै कनकर आसिया में बिना रुक गे बेगो जाऊं। बण मिलेतुस ऊं इफिसुस ऊं संदेस घालगे बिस्वासी मण्डली गै बुडै लोगां नै बुलाया। जद बे बिंगै कनै आया तो बण केयो, “थे जाणो हो कै पेलै दिन ऊं लेगे आज तांई आसिया में मैं थारै सागै किंया रेयो।” मैं आसिया आण गै दिनूं ई यहुदियां मनै रोकण गी भोत कोसिस करी अर मनै तंग करयो। फेर बी मैं आंसू बहा बहागे दीनता गै सागै परमेसर गी सेवा करतो ई रेयो। झिकी झिकी बातां थारै बिस्वास नै मजबूत करण गी है, बे लोगां गै घर घर जा'गे सिखाण में कदी कोनी घबरायो। यहुदियां अर गेर यहुदियां सामणै गवाई देवंतो रेयो कै परमेसर कानी मन फिरावो अर मन फिरागे म्हारै प्रभु यीसू मसी पर बिस्वास करणो चईयै। पवितर आत्मा गी मानगे मैं यरुसलेम जाऊं अर मनै पतो कोनी मेरै सागै बठै के बितैगो? पवितर आत्मा मनै हर एक नगर में मेरै सागै होण आळो दुख अर परेसानी बतावै है। इंगै अलावा आ'गै के हो'सी मनै पतो कोनी। मैं आपगै प्राण नै कीं कोनी समझू पण मैं आपगी सेवा पूरी करूं झिकी परमेसर गी किरपा ऊं सुब समाचार सुणाण गी गवाई देण खातर यीसू मसी कनूं मनै मिली है। मैं जाणूं कै सारा झिकां में परमेसर गै राज गो परचार करयो हो थे बिनै अब कोनी देखोगा। मैं थानै सारो कीं पेलां बता दियो। जद कीं लोगां मेरी बातां नै कोनी मानी तो अब बा जिमेदारी मेरी कोनी। क्यूंकै मैं परमेसर गी सारी इच्छा थानै बताण ऊं कदी कोनी लारै हटयो। ईंखातर आपगी अर आपगै बिस्वासी लोगां गी रुखाळी करता रेओ। जिंया पवितर आत्मा थानै बांगी रुखाळी करण खातर बणाया है कै थे परमेसर गै बां बिस्वासियां गो ध्यान राखो झिका नै बण आपगै खून गै बदळै मोल लिया है। मैं जाणूं हूं कै मेरै जाण गै बाद गळत सिक्सा देण आळा भेड़िया बरगा लोग थारै मा आवैगा अर थानै पूरी तरियां खिंडा दैयगा। आपणै बिचाळूं हिस्या हिस्या लोग उठैगा झिका बिस्वासियां नै साची बात तोड़ मरोड़ गे बतासी अर आपगै लारै लगा लेसी। ईंखातर सावधान रेवो। याद राखो कै मैं तीन साला तांई दिन रात थानै साव चेत करणो कोनी छोड़यो। अर अब मैं थानै परमेसर गै अर बिंगी किरपा गै बचन नै थारै हाता में देऊं झिको थारी तरकी कर सकै अर सारै पवितर करेड़ा लोगां गै बिचाळै थानै आपगा वारिस बणा सकै। मैं किंगैई धन अर गाबा गो लाळच कोनी करयो। थे आप ई जाणो है कै मैं आं हाता ऊं मेरै अर मेरै साथियां गी जरूरतां नै पूरी करी। मैं काम कर'गे भोत सारा बे स्हारा लोगां नै संभाळ्या, ईं बात गो थानै पतो है। प्रभु गो बचन इंया केवै है कै लेण आळै ऊं जादा देण आळो भलो होवै है। ओ केगे बण गोडा टेकगे बां सारां गै सागै पराथना करी। बे सारा भोत रोया अर पौलुस गै गळ लाग'गे मिल्या। बे बिं बात ऊं जादा दुखी हा झिकी बण कैई कै थे अब मनै कोनी देखोगा। अर बां बिनै जहाज तांई पोंचायो। जद म्हे बाऊं विदाई लेगे जहाज खोल्यो अर सिदै रा ऊं कोस में आया अर दूसरै दिन रोदुस में अर बठूं पतरा में आया। बठै एक जहाज फीनीके में जावंतो मिल्यो अर म्हे बिं पर चढग्या। जद साईप्रस टापू सामणै दिखण लागरयो तो म्हे बिनै खबै हात छोड़ दियो अर सिरीया में जा'गे सूर में उतरया। क्यूंकै बठै जहाज ऊं समान उतरणो। चेलां नै मिलगे म्हे बठै सात दिन रेया। बां पवितर आत्मा में होगे पौलुस नै यरुसलेम जाण ऊं रोक्यो। बठै रेण गो आपगो टेम पूरो कर'गे बठूं विदाई ली अर आपगी यातरा पर चाल पड़या। बठै गा लोग लुगाईयां अर टाबरां गै सागै नगर गै बारै म्हारै सागै आया। अर म्हे बठै समुंदर गै किनारै गोडा टेकगे पराथना करी। जद म्हे बां लोगां ऊं मिलगे जहाज में चढग्या अर बे लोग आप आपगै घरां कानी चाल पड़या। जद सूर ऊं समुंदरी यातरा पूरी कर ली तो पतुलिमायिस में पूगग्या अर बिस्वासियां नै निमस्कार कर'गे बांगै सागै एक दिन रेया। दूसरै दिन बठूं चालगे कैसरिया में आया अर यीसू मसी गो संदेस सुणाण आळै फिलिप्पुस गै घरे झिको बां साता मू एक हो। बिं कनै रेया। बिंगी चार कुंवारी बेटियां ही झिकी परमेसर गी बात करती। म्हे बठै भोत दिन रेया तो अगबुस नाम गो एक परमेसर गी बात बताण आळो बठै आयो। बण म्हारै कनै आ'गे पौलुस गो साफो लियो अर आपगा पग बांदगे केयो, “पवितर आत्मा इंया केवै झिकै गो साफो है बिनै यरुसलेम में यहुदी इंयाई बांधैगा अर गेर यहुदियां गै हात में देवैगा।” जद म्हे ऐ बातां सुणी तो म्हे अर बठै गै बिस्वासी लोगां बिंऊं बिनती करी कै यरुसलेम में ना जा। ईं पर पौलुस उतर दियो, “इंया मेरो दिल ना तोड़ो, मैं यरुसलेम में बंधण खातर ई कोनी पण यीसू मसी खातर मरण नै बी तैयार हूं।” जद म्हानै पतो लागग्यो कै म्हे बिंगै मन गै फेंसलै नै बदळ कोनी सकां। अर म्हे इंया केगे चुप हो'ग्या अर बिनै केयो जिंया प्रभु गी मरजी है बिंया होण दैयो। अर बठै केई दिन रेगे यरुसलेम कानी चाल पड़या। कैसरिया गा बिस्वासी लोग म्हारै सागै हो'ग्या अर बे म्हानै मनासोन नाम गै एक साईप्रस गै पुराणै चेलै गै घरे ले आया कै म्हे बिंगै सागै रेवां। जद म्हे यरुसलेम पूगग्या तो बठै गा बिस्वासी बड़ी खुसी गै सागै म्हारूं मिल्या। दूसरै दिन पौलुस म्हानै लेगे याकूब कनै गेयो जठै सारा बुडा लोग भेळा हा। बण बानै निमस्कार कर'गे झिका काम परमेसर बिंगी सेवा गै द्वारा गेर यहुदियां में करया एक एक कर'गे सारा बताया। बां ओ सुणगे परमेसर गी मेमा करी। अर केयो, “नेम विधान नै आच्छी तरियां मानण आळा यहुदी लोगां मू केई हजार जणा बिस्वास करयो। बे यहुदी लोग तेरै बारै में इंया सोचै है कै तूं गेर यहुदियां में रेण आळा यहुदियां नै मूसा गी बात ना मानण खातर सिखावै अर केवै आपगै टाबरां गो खतनो ना करावो अर ना बांगै नेम विधान पर चालो। फेर के करयो जावै? लोग जरूर सुणैगा कै तूं आयो है। ईंखातर झिको कीं म्हे तनै केवां बिंयाई कर। म्हारै अठै चार आदमियां मन्नत मानी। बानै लेगे बांगै सागै अपणै आपनै सुद्ध कर अर बांगै खातर खरचो दे बे रोड कढावै। जद आ बात सारा जाण लेसी कै झिकी बाता तेरै बारै में केयेड़ी है बे सारी झूठ है अर बे इयां बी सोचेगा कै तूं आप ई नेम विधान नै मानण आळो है। पण बां गेर यहुदियां गै बारै में झिका बिस्वास करयो म्हे ओ फेंसलो कर'गे लिख भेज्यो कै बे मूरतियां गै सामणै चढाएड़ी चीज अर लोइ अर गळ घोटेड़ै गो मांस अर बेबीचार ऊं बचगे रेवै।” ईंखातर पौलुस बानै सागै लेगे दूसरै दिन मिन्दर में जा'गे सुद्ध होयो। बठै जा'गे बण बानै बता दियो कै अपणै आपनै सुद्ध करण गा दिन कद पूरा हो'सी अर म्हारै मू हर एक खातर चढावो कद तांई चढायो जावैगो। जद सात दिन पूरा होया तो आसिया परदेस गै यहुदियां पौलुस नै मिन्दर में देख्यो अर सारै लोगां नै भड़काया। अर रोळो मचागे पकड़ लियो। हे इसराएल गा लोगों, मदद करो। ओ बो ई आदमी है झिको सारी जिग्यां में जा'गे इसराएली लोगां गै बिरोध में बात करै अर मूसा गै नेम विधान गै खिलाफ अर ईं मिन्दर गै खिलाफ सिखावै है। अठै तांई गेर यहुदियां नै मिन्दर में ल्यागे पवितर जिग्यां नै अपवितर करै है। बां आ बात ईंखातर बोली कै इफिसुस वासी त्रोफिमुस नै इंगै सागै नगर में देख्यो अर इंया सोच्यो कै पौलुस बिनै मिन्दर में ले आयो है। जद सारै नगर में रोळो मचग्यो अर लोग भाजगे भेळा हो'ग्या अर पौलुस नै मिन्दर मू खींचगे बारै काड़ ल्याया। अर बारनो बंद कर दियो। बे बिनै मार देणो चावा जद पलटण गै मुख्य नै संदेस मिल्यो कै सारै यरुसलेम में रोळो मचग्यो। जद बो बिं टेम ई सैनिकां अर सुबेदारां नै बांगै कनै लेगे भाज्यो आयो। अर बां पलटण गै मुख्य अर सैनिकां नै देखगे पौलुस नै मारणो कूटणो छोड़ दियो। पलटण गै मुख्य बिंगै कनै आ'गे बिनै पकड़ लियो अर दो सांकळां ऊं बांधण गो हुकम दियो अर पूछयो, “कुण है? अर अण के करयो है?” पण भीड़ ऊं कणैई कीं केयो कणैई कीं केयो, रोळै गै मा बिनै समझ कोनी आयी तो बिनै किलै में ले जाण गो हुकम दियो। जद बो पेड़ियां पर पूग्यो तो इंया होयो कै भीड़ गै कारण सैनिकां बिनै चक'गे ले जाणो पड़यो। क्यूंकै भीड़ इंया रोळो मचावै ई अर बिंगै लारै पड़ गी, इनै मार दैयो। जद पौलुस किलै में पूगण आळो तो बण पळटण गै मुख्य नै केयो, मैं तनै कीं पूछूं, बण केयो, “तूं युनानी बोली बोलै है के? तूं चार हजार लोगां नै बन उजाड़ में लेग्यो, तूं बी मिस्री है के?” पौलुस केयो, “मैं तरसूस गो यहुदी हूं। किलिकिया गै तरसूस नगर गो रेण आळो हूं। मैं तेरूं बिनती करूं कै मनै लोगां ऊं बात करण दे।” जद बण आग्या दी तो पौलुस पेडि़़यां पर खड़यो होगे लोगां नै हात ऊं हिसारो करयो, जद बे चुप हो'ग्या तो पौलुस इब्रानी बोली में बोलण लागग्यो। हे मेरा यहुदी साथियो अर मेरा बुजुरगों सुणो, मैं मेरै कनूं कीं केणो चाऊं। बे सारा ओ सुणगे चुप हो'ग्या क्यूंकै बो बांगी इब्रानी बोली में केवै हो। मैं तो एक यहुदी हूं झिको किलिकिया गै तरसूस में पैदा होयो, ईं नगर में गमालिएल गै पगां में बेठगे पढयो अर बाप दादा गो देयेड़ो नेम विधान ठीक ठीक सीख्यो अर परमेसर गै खातर हिसी लगन लागी कै जिंया आज थानै सारां नै लागरी है। झिका यीसू मसी नै मानण आळा हा बानै सताया अर मरवा बी दिया। मैं भोत सारी लुगाईयां अर आदमियां नै बांदगे जेळ में करा दिया। ईं बात गा महा याजक अर बुडा लोग गवा है। मैं बांगै कनूं बिस्वासियां गै नाम गी चिट्टी लेगे बानै बांधण अर जेळ में केद करण खातर दमिसक गेयो हो कै बांदगे यरुसलेम में ल्याऊं। जद मैं चालतो चालतो दमिसक कनै पूगग्यो तो दोफारै एकदम मोटी जोती चमकी अर मेरै च्यारूंमेर होगी। मैं जमीन पर पड़ग्यो अर ओ सुण्यो, “हे साऊल हे साऊल, तूं मनै क्यूं तंग करै?” मैं उतर दियो, “हे प्रभु तूं कुण है?” बण मनै केयो, “मैं यीसू नासरी हूं झिकै नै तूं तंग करै है।” मेरै साथियां जोती तो देखी पण झिकी आवाज मेरै खातर आयी, बा कोनी सुणी। जद मैं केयो, “हे प्रभु मैं के करूं?” प्रभु मनै केयो, “तूं उठगे दमिसक जा, झिको तनै करण खातर ठेरायेड़ो है बो बठै तनै बता दियो जावैगो।” बा जोती इती तेज ई कै मनै बी कीं कोनी दिख्यो, मैं आपगै साथियां गो हात पकड़गे दमिसक में आयो। बठै एक हनन्याह नाम गो परमेसर गै नेम विधान नै मानण आळो हो अर सारा लोग बिंगी इज्जत करता, बो मेरै कनै आयो। अर केयो, “हे साऊल, फेर ऊं देखण लागज्या। बिं टेम ई मेरी आंख खुलगी अर दिखण लागग्यो।” जद बण केयो, “म्हारै बडेरां गै परमेसर गी इच्छा नै जाणन खातर अर बिं धरमी नै देखण खातर अर बिंगी बातां सुणण खातर तनै चुण्यो है।” क्यूंकै तूं बिंगी ओर ऊं सारै आदमियां गै सामणै बां बातां गो गवा है तूं देखी अर सुणी है। अब देर क्यामी करै? उठगे बतिस्मो ले ले अर बिंगै नाम ऊं सारै पापां नै धो ले। फेर मैं यरुसलेम में आ'गे मिन्दर में पराथना करै हो तो बेसुद्ध हो'ग्यो। अर मैं एक दरसण देख्यो कै बो मनै केवै है, जल्दी यरुसलेम ऊं बारै निकळ जा क्यूंकै बे मेरै बारै में बताएड़ी तेरी बाता कोनी मानै। मैं केयो, “प्रभु मैं थारै पर बिस्वास करण आळा नै जेळ में बंद करतो अर सतसंग घरां में जा'गे बानै कुटतो, आ बात बे लोग जाणै है।” जद तेरै गवा स्तिफनुस नै मारयो जावै हो तो मैं बठै खड़यो हो अर बांगै सागै सेमत हो अर मारण आळा गै गाबा गी रुखाळी करै हो। पण प्रभु मनै केयो, “उठ जा, मैं तनै गेर यहुदियां कनै घालूंगा।” बे इतै तांई बिंगी सुणता रेया। फेर ऊंची आवाज में केयो, “हिस्यै आदमी नै खत्म करो, इंगो जींवंतो रेणो ठीक कोनी।” बे लोग रोळो मचावा हा अर गाबा खोलगे फेंका अर रेतो उडावा। तो पलटण गै मुख्य केयो, “इनै ले गे मा जाओ अर कोड़ा मारगे जांच करो, जिंऊं ठा लागै कै लोग इंगै बिरोध में इता रोळा क्यामी मचावै?” जद बिनै कोड़ा मारण खातर बांधा हा तो पौलुस सुबेदार नै केयो, “आ बात आच्छी है के, थे एक रोमी आदमी नै बिना दोस गै कोड़ा मारो?” सुबेदार ओ सुणगे पलटण गै मुख्य कनै जा'गे केयो, “थे ओ जाणो हो के?, ओ तो रोमी है।” पलटण गै मुख्य बिंगै कनै आ'गे केयो, “मनै बता, तूं रोमी है?” बण केयो, “हां।” ओ सुणगे पलटण गै मुख्य केयो, “मैं रोमी होण गो पद भोत रिपिया लगागे लियो।” पौलुस केयो, “मैं तो जन्म जात ऊं रोमी हूं।” जद झिका लोग बिंगी जांच करावा हा बे सारा लारै हटग्या अर पलटण गो मुख्य बी ओ जाणगे कै बो रोमी है जद डरग्यो। दूसरै दिन पलटण गै मुख्य बिंगी सई जांच कराणी चाई कै यहुदी बिं पर दोस क्यामी लगावै। ईंखातर बिनै खोल दियो अर मुख्य याजकां अर सारी पंचायत नै भेळी होण गो हुकम दियो। अर पौलुस नै ले जा'गे बांगै सामणै खड़यो कर दियो। पौलुस महा पंचायत कानी देख्यो अर केयो, “हे भाईयो, मैं आज तांई परमेसर खातर सच्चै मन ऊं जीवन बितायो है।” ईं पर हनन्याह महा याजक झिको बिंगै कनै खड़यो बिंगै मूं पर थपड़ मारण गो हुकम दियो। जद पौलुस बिनै केयो, “ऐ कळी करेड़ी कंद, परमेसर तेरै मारसी। तूं मूसा गै नेम विधान गै अनुसार मेरो न्याय करण खातर बेठयो है अर विधान गै बिरोध में मेरै मारण गी आग्या देवै।” झिका बिंगै कनै खड़या, बां केयो, “तूं परमेसर गै महा याजक नै आच्छो माड़ो क्यूं बोलै।” पौलुस बिनै उतर दियो, “मैं कोनी जाणै हो कै ओ महा याजक है।” पवितर सासतर में इंया लिखेड़ो है, “आपगै लोगां गै प्रधान नै भलो बुरो ना केवो।” जद पौलुस ओ जाण्यो कै ओ झुण्ड संदूकियां गो अर दूसरो फरीसियां गो है। बण पंचायत नै हेलो मारगे केयो, “हे भाईयो, मैं एक फरीसी हूं अर मेरा बडेरा बी फरीसी हा। मेरो बिस्वास ओ है कै सारा मरेड़ा नै जी उठण गै बाद एक जीवन ओर मिलैगो, ईं बात गो मेरै पर मुकदमो चालै।” जद बण आ बात कैई तो फरीसियां अर संदूकियां में लड़ाई होगी अर पंचायत में फूट पड़गी। क्यूंकै सदूकी जी उठण अर सुरगदूत अर आत्मा गै बारै में कोनी मानता हा पण फरीसी लोग आं बाता नै मानता हा। जद बोळो रोळो मचग्यो अर कीं सासतरी झिका फरीसियां गै दल गा हा, खड़या होगे बोलण लागग्या, म्हे ईं आदमी में कोई बुराई कोनी देखी। कोई आत्मा अर सुरगदूत बिंगै सागै बात करी हो'सी। जद बोळो रोळो मचग्यो तो पलटण गै मुखिय नै ओ डर हो कै लोग पौलुस गा टुकड़ा टुकड़ा ना कर दैय। ईंखातर बण मुख्या सिपाईयां नै हुकम दियो कै बिनै धका ऊं पकड़गे किलै में ले आओ। बिं रात प्रभु बिंगै कनै खड़यो होगे केयो, “पौलुस, सबर राख क्यूंकै जिंया यरुसलेम में तूं मेरी आ गवाई दी है बिंया रोम में बी गवाई देणी हो'सी।” जद दिन उगग्यो तो यहुदियां चाल चाली अर सोगन खाई कै जद तांई म्हे पौलुस नै मार ना दैयां जद तांई म्हे खाणो पीणो कोनी करांगा। झिका सोगन खाई बे लगभग चाळीस जणा हा। बां मुख्य याजक अर बुडै लोगां गै कनै जा'गे केयो, म्हे ईं बात में मन बणा लियो कै जद तांई पौलुस नै मार ना दैयां जद तांई कोई चीज गै मूं कोनी लगावां। ईंखातर अब पंचायत समेत मुख्य नै समझावो कै बिनै थारै कनै ले आवै। थे बानै केवो कै म्हे इंगी ठीक ठीक जांच करणी चावां। बिंगै पोंचण ऊं पेलां ई म्हे बिनै मारण खातर तैयार रेवांगा। जद पौलुस गै भाणजै सुण्यो कै बे बिंगी झाक में है तो किलै में जा'गे पौलुस नै बता दियो। पौलुस सुबेदार मू एक नै आपगै कनै बुलायो अर केयो, “ईं जवान नै मुख्य गै कनै ले ज्याओ, ओ बिनै कीं केणो चावै है।” ईंखातर बण बिनै मुख्य गै कनै जा'गे केयो, “बंदी पौलुस मनै बुला'गे बिनती करी है कै ओ जवान मुख्य नै कीं केणो चावै। इनै बिंगै कनै ले जावो।” पलटण गै मुख्य बिंगो हात पकड़गे न्यारो कर'गे पूछयो, “तूं मनै के केणो चावै?” बण केयो, “यहुदियां योजना बणाई है कै म्हे बिंगी ठीक ठीक जांच करणी चावां अर ईंखातर बे तेरूं बिनती करसी कै काल पौलुस नै पंचायत में ल्याओ।” पण बांगी ना मानियो क्यूंकै बे चाळीस आदमी ईं झाक में है झिका मन बणा लियो जद तांई बे पौलुस नै मार ना दैय जद तांई ना कीं खावै ना कीं पीयै। इंया करण खातर अब बे तैयार है थारै आदेस गी उडीक करै। जद पलटण गै मुख्य जवान नै आग्या देगे विदा करयो कै किनैई ना बताई तूं आ बात मनै बताई है। जद बण दो सुबेदार नै बुला'गे केयो, दो सौ सैनिक, सतर सवार अर दो सौ भलैत रात नै नो बजे कैसरिया में जाण खातर तैयार राखो। अर पौलुस गी सवारी खातर घोड़ा तैयार राखो कै बिनै फेलिक्स गै कनै राजी खुसी पोंचा दैयां। बण ईं तरियां फेलिक्स नै खत बी लिख्यो। महाराज फेलिक्स नै क्लोदियोस लुसियास गो निमस्कार। ईं आदमी नै यहुदी लोगां पकड़गे मारणो चायो। जद मनै पतो लागग्यो कै बो रोमी है तो पलटण घालगे छुड़ा लियो। बिं पर क्यामी दोस लगावै है मैं ओ जाणनो चावै हो, ईंखातर बिनै बांगी पंचायत में लेग्यो। जद मैं जाण लियो कै बे आपगै नेम विधान गै बारै में बिं पर दोस लगावै है। पण मारण अर बांधण गै लायक इमै कोई दोस कोनी। जद मनै पता लागग्यो कै बे ईं आदमी गी झाक में है, तो मैं बिं टेम ई बिनै तेरै कनै घाल दियो। अर बां लोगां नै हुकम दियो कै बे तेरै कनै आ'गे झिको दोस लगावै बो थानै बतावै। जिंया सैनिकां नै आग्या दी बे बिंयाई पौलुस नै रातो रात अंतिपतरिस में ले आया। दूसरै दिन बे घोडां गै सवार नै बिंगै सागै जाण खातर छोड़गे आप किलै में उड़ग्या। बां कैसरिया पोंचगे हाकिम नै खत दियो अर पौलुस नै बी बिंगै सामै खड़यो करयो। बण खत पढगे पौलुस नै पूछयो, “तूं किसै परदेस गो है।” पौलुस उतर दियो कै, “मैं किलिकिया परदेस में रेण आळो हूं।” फेर महाराज केयो, “जद तेरै पर दोस लगाण आळा आ ज्यैगा तो मुकदमै पर बात चीत करांगा।” अर बण बिनै हेरोदेस गै किलै में सुरक्सा में राखण खातर हुकम दियो। पांच दिना गै बाद हनन्याह नाम गो महा याजक केई बुडै लोगां अर तिरतुलुस नाम गै बकिल नै लेगे आयो। बो अधिकारियां गै सामै पौलुस पर दोस सिद्ध करण आयो। जद पौलुस नै बुला'गे तिरतुलुस बिं पर दोस लगागे केण लागग्यो, हे महाराज फेलिक्स, तेरै बारै में म्हे बड़ा खुस हां क्यूंकै थारै राज में म्हे सारा भोत तरक्की करी अर म्हानै सांती बी मिली। इनै म्हे हर जिग्यां हर प्रकार ऊं धन्यवाद गै सागै माना। पण मैं थारो जादा टेम कोनी लेणो चाऊं, मैं बिनती करूं कै किरपा कर'गे म्हारी दो बात सुणो। म्हे ईं आदमी नै झगड़ालू अर सारै जगत में लड़ाई कराण आळो अर नासरी धरम गो एक मोटो आदमी मान्यो है। अण मिन्दर नै असुद्ध करणो चायो पण म्हे इनै पकड़ लियो। म्हे इनै आपगै अनुसार सजा देण खातर सोच्यो। (पण पलटण गै मुखिया लुसियास बिनै धकै ऊं म्हारै कनू छुड़ा लियो)। अर दोस लगाण आळा नै थारै सामणै आण गी आग्या दी। थे आप ई आं बातां गी जांच करो तो थानै पतो चालज्यै गो कै ऐ बाता सच्च है। यहुदियां बी बांगै सागै रळगे केयो, ऐ बातां सच्च है। जद महाराजा, पौलुस नै बोलण गो हिसारो करयो तो बण उतर दियो मैं जाणूं हूं कै थे ईं जाती गो भोत सालां ऊं न्याय करण लागरया हो। मैं बड़ी खुसी ऊं आपगी बात थारै सामै रखूं। जद मैं यरुसलेम आराधना करण आयो तो बारा दिन कोनी होया। आ बात थे जाणो हो। बां मनै ना नगर में, ना सतसंग घर में, ना मिन्दर में, ना किंगैई सागै ऊंच नीच करतां अर ना भीड़ कठ्ठी करता देख्यो। अर बे झिकी बातां गो दोस लगावै है थारै सामणै सच्च कोनी साबित कर सकै। प्रभु नै मानण आळै एक आदमी जिसो मैं मेरा बडेरां गै परमेसर गी आराधना करतो रेवूं। मैं परमेसर गै नेम विधान अर परमेसर गी बात बताण आळा गी किताब में लिखेड़ी सारी बातां नै मानूं। फेर बी ऐ लोग मेरै बिस्वास नै गळत बतावै है। मैं परमेसर पर भरोसो राखूं बिंयाई बे बी करै कै धरमी अर अधरमी दोनां गो जी उठणो हो'सी। ईंखातर मैं आप ई कोसिस करतो रेवूं कै परमेसर अर आदमियां कानी मेरो मन सदां साफ रेवै। भोत सालां गै बाद मैं आपगै लोगां में दान देण अर भेंट चढाण आयो। बां मनै मिन्दर में बिना भीड़ गै सागै अर बिना लड़ाई करता भेंट चढावंता पकड़यो। आसिया गा केई यहुदी बठै हा। जे मेरै खिलाफ कीं बात ई तो बे थानै आ'गे बता सका। अठै झिका लोग है थे बानै पूछो कै जद मैं पंचायत में खड़यो होयो जद मेरै में के दोस देख्यो? एक बात नै छोड़गे झिकी मैं बांगै बिचाळै खड़यो होगे कैई कै मरेड़ा गै जी उठण गै बारै में। बिं खातर आज थारै सामै मुकदमो होण लागरयो है। महाराज फेलिक्स प्रभु गी बातां नै ठीक ठीक जाणै हो फेर बी बण केयो, “पलटण गो मुखिया लुसियास आवैगो तो तेरो फेंसलो करूंगा।” सुबेदार नै हुकम दियो कै पौलुस नै कीं छूट दे दैयो। कोई बिंगी जरूरत पूरी करै तो बिनै ना रोको। केई दिनां गै बाद महाराज फेलिक्स आपगी लुगाई दुरसिला झिकी यहुदिनी ही सागै लेगे आयो अर पौलुस नै बुला'गे बिंगो झिको बिस्वास यीसू मसी पर हो बिंगै बारै में सुण्यो। जद पौलुस परमेसर गी नजर में आच्छै कामा गै बारै में अर म्हारी सारी इच्छा नै काबू राखण गै बारै में अर परमेसर गै न्याय गै दिन गै बारै में बी बतायो। तो बो डरग्यो अर उड़ग्यो अर केयो, “तूं अठुं उड़जा, जे मनै तेरूं जरूरत हो'सी तो मैं तनै बुलाऊंगा।” बिनै पौलुस कनूं कीं रिस्वत मिलण गी बी आस ही। ईंखातर बिनै बारी बारी बुला'गे बात करतो। दो साल गै बाद पुरकियुस फेस्तुस फेलिक्स गी जिग्यां पर आयो अर फेलिक्स यहुदियां नै खुस करण खातर पौलुस नै केद में ई छोड़ ग्यो। फेस्तुस बिं राज में जाण गै तीन दिन गै बाद कैसरिया ऊं यरुसलेम आयो। जद मुख्य याजक अर यहुदियां गै मुख्य लोगां बिंगै सामै पौलुस गी बात रखी। अर बिंऊं बिनती कर'गे पौलुस गै बिरोध में ओ चायो कै बिनै यरुसलेम में बुलायो जावै क्यूंकै बे बिनै रा में ई मार देणो चावा। फेस्तुस उतर दियो, “पौलुस कैसरिया में पेरै में है अर मैं आप बठै जल्दी जाऊंगा।” फेर केयो, “थारै मू झिका खास आदमी है मेरै सागै चालो अर पौलुस कीं गळत काम करयो तो बिं पर दोस लगावो।” बांगै कनै आठ दस दिन रेगे बो कैसरिया उठग्यो अर दूसरै दिन न्याय आसण पर बेठगे पौलुस नै बुलायो। जद बो आयो तो झिका यहुदी यरुसलेम ऊं आया, बां बिंगै आसै पासै खड़या होगे बिं पर भोत बुरा आरोप लगाया झिका नै बे सच्च साबित कोनी कर सका। पण पौलुस उतर दियो, “मैं यहुदियां गै नेम विधान अर ना मिन्दर अर ना कैसर गै बिरोध में कोई अपराध करयो है।” पण फेस्तुस यहुदियां नै राजी करणो चावै हो अर पौलुस नै केयो, “तूं चावै के यरुसलेम जाऊं? बठै मेरै सामै तेरै केस पर बात करी जावै।” पौलुस केयो, “मैं कैसर गै न्याय करण आळी जिग्यां पर खड़यो हूं। मैरे केस गो अठै फेंसलो होणो चईयै। मैं यहुदियां गै खिलाफ कोई अपराध कोनी करयो आ बात थे जाणो हो। जे मैं अपराधी हूं अर मरण गै लायक कोई अपराध करयो है तो मैं मरण ऊं कोनी डरूं। पण झिकी बातां गो दोस मेरै पर लगावै है आमूं कोई बी सच्च ना निकळै तो मनै बांगै हात में कोई कोनी दे सकै। मैं कैसर ऊं बिनती करूं।” जद फेस्तुस पंचायत में बात कर'गे उतर दियो, “तूं कैसर ऊं बिनती करी है, तूं कैसर कनैई जावैगो।” केई दिनां गै बाद राजा अग्रिपा अर बिंगी भेन बिरनिके कैसरिया में फेस्तुस नै निमस्कार देण खातर आयो। बे भोत दिन बठै रेण गै बाद फेस्तुस पौलुस गै बारै में बतायो कै एक आदमी है झिकै नै फेलिक्स जेळ में ई छोड़ ग्यो। जद मैं यरुसलेम में हो तो मुख्य याजकां अर बुडै लोगां बिंगी बात करी अर केयो कै बिनै सजा देओ। पण मैं उतर दियो कै, “रोमियां गी आ रीत कोनी कै बे कोई आदमी नै सजा खातर दे दैय। जद तांई दोसी नै आपगै उपर लगायेड़ै दोसां गो जबाब देण गो मोको ना मिलै।” जद बे अठै कठ्ठा होया तो मैं कीं देर कोनी करी। पण दूसरै ई दिन न्याय करण आळी जिग्यां में बेठगे पौलुस नै ले आण गो हुकम दियो। जद बिं पर दोस लगाण आळा खड़या होया तो बां हिसी बातां गो दोस कोनी लगायो जिंया मैं समझै हो। पण बे आपगै मसी धरम कानी ऊं यीसू नाम गो कोई आदमी मरग्यो। पौलुस बिनै जींवंतो बतागे बिंगै बारै में बात चीत करतो रेवंतो। मैं उळझण में हो कै आं बातां गो फेंसलो किंया करूं ईंखातर बिनै पूछयो कै तूं यरुसलेम जा'गे आं बातां गो फेंसलो बठै करणो चावै है के? पण जद पौलुस बिनती करी कै बिंगै केस गो फेंसलो सारा ऊं मोटै महाराज कनूं होवै तो मैं आग्या दी कै जद तांई बिनै कैसर कनै ना घालूं बिनै जेळ में ई राखूं। जद अग्रिपा फेस्तुस नै केयो कै, “मैं बिं आदमी गी बात सुणनी चाऊं।” तो फेस्तुस केयो, “तूं काल सुणी।” दूसरै दिन जद अग्रिपा अर बिरनीके बड़ी धूम धाम ऊं आया अर पलटण गै मुख्य अर नगर गै मुख्य लोगां गै सागै दरबार में पूग्या। जद फेस्तुस आग्या दी कै पौलुस नै ले आओ। फेस्तुस केयो, “राजा अग्रिपा अर हे सारा आदमियों, ईं आदमी नै देखो झिकै गै बारै में सारै यहुदियां, यरुसलेम अर अठै बी रोळो मचागे मेरूं बिनती करी कै इंगो जीणो ठीक कोनी।” मैं जाणग्यो कै बण हिस्यो कोई काम कोनी करयो कै बिनै मार दियो जावै। पण आप ई मोटै महाराजा गै सामै जाण गो केयो अर ईंखातर मैं बिनै घालण गो फेंसलो लियो है। मनै बिंगै बारै में कोई साफ बात कोनी मिली कै मोटै महाराज नै लिखूं। ईंखातर मैं बिनै थारै सामै ल्याओ कै महाराजा आग्रिपा जांच करै कै मनै कीं लिखण नै मिलै। क्यूंकै मनै, बन्दी नै मोटै महाराज कनै बिना दोस गै भेजणो सई कोनी लागै। अग्रिपा पौलुस नै केयो, “तूं आपगै बारै में बोल सकै,” तो पौलुस हात हिलागे केण लागग्यो, “हे महाराजा अग्रिपा, जिती बातां गो दोस यहुदी मेरै पर लगावै बिंऊं तेरै सामै बांगो उतर देण में मैं अपणै आपनै धन्य मानूं। खास कर'गे ईंखातर कै थे यहुदियां गा सारा बरताव अर बाद विवाद जाणो। मैं बिनती करूं कै थे ध्यान ऊं मेरी बात सुणो।” मेरो चाल चलण सरू ऊं आपगी जाती में अर यरुसलेम में किंया हो बो सारा यहुदी जाणै है। जे बे मेरै बारै में बताणो चावै तो सरूं ऊं मनै जाणै कै मैं फरीसी होगे आपगै धरम में भोत आच्छो चालतो हो। आज मेरै पर केस चालै है क्यूंकै म्हारै बडेरा ऊं परमेसर झिको वायदो करयो बिनै मैं मानूं। म्हारी बारा जातां बिं वायदै गी आस लगागे हर एक दिन परमेसर गी सेवा करता आया। हे राजा, ईं आस गै कारण ई यहुदी मेरै पर दोस लगावै है। जद परमेसर मरेड़ा ऊं जींवता करै है ईं बात गो थारै अठै बिस्वास क्यूं कोनी करयो जावै। मैं बी इंया समझ्यो कै नासरी यीसू गै नाम गै खिलाफ मनै भोत बिरोध करणो चईयै। अर मैं यरुसलेम में इंया करयो। मुख्य याजका ऊं अधिकार लेगे भोत पवितर लोगां नै जेळ में बंद करया अर जद बानै मार दिया जावंता तो मैं बांगै बिरोध में बांगी सेमती देवंतो। हर एक सतसंग घर में बानै डरा गे यीसू गो बिस्वास छोड़ण खातर तंग करतो हो। अर मैं रीस में आ'गे इतो पागल हो'ग्यो कै दूसरै देसां में बी जा'गे बां लोगां नै तंग करतो हो। एक दिन ईं काम खातर जद मैं मुख्य याजक कनूं अधिकार खत लेगे दमिसक जावै हो। हे राजा, रा में दोफारै गै टेम में आकास ऊं सूरज ऊं बोळो तेज एक चानणो देख्यो झिको मेरै च्यारूंमेर हो'ग्यो। जद म्हे सारा धरती पर पड़ग्या तो इब्रानी बोली में बोलता एक सब्द सुण्यो, “हे साऊल, हे साऊल तूं मनै क्यूं तंग करै? मेरै काम नै रोकैगो तो तूं आप ई ओखो होवैगो।” जद मैं पूछयो, “प्रभु तूं कुण है? प्रभु केयो मैं यीसू हूं झिकै नै तूं तंग करै है।” “पण तूं उठ। मैं तनै ईंखातर दरसण दियो है, मैं तनै बां बातां गो सेवक अर गवा बणाऊं झिकी तूं देखी है अर आण आळा दिना में मैं तनै बताऊंगा। मैं तनै तेरै लोगां अर गेर यहुदियां ऊं बचागे राखूंगा झिका गै कनै मैं अब ईंखातर घालूं। कै तूं बानै सिखागे अंधेरै ऊं जोती कनै ल्यावैगो अर सैतान गै अधिकार ऊं छुड़ावैगो। ईंखातर बां लोगां नै पापां गी माफी अर बां लोगां गै सामै झिका मेरै पर बिस्वास कर'गे पवितर बण्या है अर बे सारा वारिस बणज्यै।” “हे राजा अग्रिपा, मैं बिं सुरगिय दरसण गी बात नै मान ली। पेलां दमिसक में फेर यरुसलेम में अर यहुदियां गै सारा देसां में रेण आळा नै अर गेर यहुदियां नै समझावंतो रेयो। अर बां लोगां नै केयो, मन बदळो अर परमेसर कानी मुड़ो जिंऊं थानै देखण आळा लोग इंया समझै कै आंगो मन बदळ ग्यो। आं बातां गै कारण यहुदी मनै मिन्दर मू पकड़गे मारण गी कोसिस करण लागग्या। परमेसर गी मदद ऊं मैं अजे तांई जींवंतो हूं। छोटा अर मोटा सारां गै सामै गवाई देऊं, बां बाता नै छोडगे कीं कोनी केऊं झिकी मूसा गै नेम विधान अर परमेसर गी बात बताण आळा गी किताबा में केयेड़ी ही। मसी दुख झेलैगो अर बो ई सारा ऊं पेलां मरेड़ा ऊं जींवंतो होवैगो अर आपगै लोगां में अर गेर यहुदी लोगां में परचार करसी।” जद फेस्तुस ऊंची बोली में केयो, “तूं पागल है के? बोळै ग्यान तनै पागल कर दियो।” पण पौलुस केयो, “हे राजा फेस्तुस, मैं पागल कोनी, पण सच्चाई अर आच्छी बातां करूं।” राजा अग्रिपा ऐ सारी बातां जाणै है। ईंखातर मैं बिनै साफ साफ बोलूं हूं। अर आं बाता ऊं कोई बी बात बिंऊं लुकेड़ी कोनी क्यूंकै आ घटना सारां गै बिचाळै होयी। पौलुस केयो, “हे राजा अग्रिपा, थे परमेसर गी बात बताण आळा पर बिस्वास करो हो के? हां, मैं जाणूं हूं कै थे बिस्वास करो हो।” जद राजा अग्रिपा पौलुस नै केयो कै, “तूं थोड़ी सी देर मनै समझागे मसी बणाणो चावै है के?” पौलुस केयो, “परमेसर ऊं मेरी पराथना है कै टेम गी कोई बात कोनी पण जिता लोग आज मेरी बात सुणै है, ईं बंधन नै छोड़गे बे सारा परमेसर कानी मुड़ज्यै।” जद राजा अग्रिपा, फेस्तुस अर बिरनिके अर बिंगै कनै बेठण आळा सारा उठग्या। अर न्यारी जिग्यां जा'गे आपसरी में केण लागग्या अण आदमी हिसी कोई बात कोनी कैई कै इनै सजा मिलै। अग्रिपा फेस्तुस नै केयो, “कै जे पौलुस कैसर गै कनै जाण गो ना केवंतो तो आपां इनै छोड़ देवंता।” जद ओ फेंसलो हो'ग्यो कै म्हे जहाज द्वारा इटली जावां तो पौलुस अर कीं ओर बंदियां नै बी युलियुस नाम गै ओगुस्तुस गी पलटण गै एक सुबेदार गै हात में दे दियो। अरिस्तरखुस नाम गो एक मकिदूनी म्हारै सागै हो। अर म्हे अद्रमुत्तियुम ऊं एक जहाज में चढ गे आसिया गै किनारै किनारै चाल पड़या। दूसरै दिन सेदा में डेरो लगायो अर युलियुस नै पौलुस पर किरपा करी अर बिनै आपगै बेलियां कनै जाण दियो कै बिंगो आदर मान करै। बठूं जहाज चलागे हवा सामै होण गै कारण म्हे साईप्रस गै ओटै ओटै गेया। अर किलिकिया अर पंफूलिया गै कनकर समुंदर में होगे लूसिया गै मूरा में उतरया। बठै सुबेदार नै सिकन्दर गो एक जहाज इटली जावंतो मिल्यो बण म्हानै बिमै बिठा दिया। म्हे केई दिना तांई होळै होळै चालगे कनिदुस गै सामै पूग्या क्यूंकै हवा आ'गै चालण कोनी देवैई। म्हे सलमोन गै सामूं करेते गै ओटै ओटै चाल्या। बिंगै किनारै किनारै ओखा ओखा चालगे “सुबलंगरबारी” नाम गी जिग्यां पूग्या अर बठूं लसया नगर कनै हो। जद भोत दिन बीतग्या अर जल यातरा में बड़ा ओखा होया क्यूंकै ऐ दिन म्हारा बरत गा दिन हा। अर पौलुस केयो, “हे सजणों, मनै इंया लागै कै ईं सफर में ओखाई अर जान माल नै बी खतरो है।” पण सुबेदार पौलुस गी बाता ऊं कपतान अर जहाज गै मालिक गी बदगे मानी। ओ टापू पाळो काटण खातर ठीक कोनी हो। ईंखातर बिचार करयो कै फिनिक्स जा'गे पाळो काटा। ओ करेते गो एक टापू है झिको दकसिण पस्चिम अर उतर पस्चिम कानी खुलै। जद थोड़ी थोड़ी दकसिण कानी ऊं हवा चाली तो म्हे ओ समझ्यो कै म्हारो काम पूरो हो'ग्यो। बां डेरो चक लियो अर किनारै किनारै करेते कानी ऊं चाल पड़या। पण थोड़ी देर गै बाद एक जोर गी आंधी आयी, बिनै उतर पूरब गी आंधी केवै। जद आंधी जहाज गै कनै आयी तो जहाज बिंगै सामै ठेर कोनी सक्यो अर म्हे जाण दियो अर जहाज नै हवा लेगी। जद क्लोदा नाम गै एक छोटै टापू गी आड़ में बड़ी मुसकिल ऊं किस्ती नै बस में करी। फेर सुरक्सा करण आळी किस्ती नै जेवड़ा ऊं बांधी कै कठैई ईं सुरतिस गै पाणी में फस ना जावै। ईं डर ऊं पाल अर सामान उतार दियो अर जहाज चालतो रेयो। जद म्हे आंधी में भोत हिचकोळा अर धका खाया अर दूसरै दिन जहाज ऊं माल बारै फेंकण लागग्या। अर तीसरै दिन बां हात ऊं जहाज गो सामान बी फेंक दियो। जद भोत दिनां तांई ना सूरज ना तारा दिख्या, लंबी आंधी चालती रेयी अर आखिर में म्हारी बचण गी आस बी कोनी रेयी। जद बे केई दिना तांई भूखा रेया, तो पौलुस बांगै बिचाळै खड़यो होगे केयो, “थानै मेरी बात मानणी चईयै ई। करेते ऊं जहाज ना खोलता तो ओ दुख ना आवंतो। पण मैं थानै समझावूं कै होंसलो राखो। जहाज पूरो खराब हो'ज्यै तो बी आपणै प्राण गो कोई नुक्सान कोनी होवैगो। लारली रात झिकै परमेसर गी मैं सेवा करूं बिंगै एक सुरगदूत आ'गे मनै केयो, ‘हे पौलुस ना डर, तनै कैसर गै सामै खड़यो होणो पड़सी। झिका थारै सागै जहाज में है बांगी परमेसर देखभाळ करै।’ ईंखातर हे सजणो, होंसलो राखो, क्यूंकै मैं परमेसर पर बिस्वास करूं जिंया मैं थानै केयो बिंयाई हो'सी। पण आपां नै कोई टापू पर उतरणो चईयै।” जद चौदवीं रात आई तो म्हे अन्दरिया समुंदर में भटकता रेया। जहाज चलाण आळै नै सक होयो कै कोई देस गै कनै पूगण आळा हां। बां पतो लगायो कै समुंदर बीस हात डूंगो है, थोड़ी देर गै बाद फेर देख्यो तो पंदरा हात है। जद पथरीली जिग्यां ऊं बचण खातर बां जहाज गै लारै चार पिलर लगागे दिन उगण गी उडीक करता रेया। पण जद जहाज चलाण आळा भाजणो चावा हा बां बानै केयो कै जहाज गै अगलै पासै पिलर लगागे आवां। अर बां सुरक्सा किस्ती समुंदर में उतार दी। पौलुस समझग्यो जद बण सुबेदार अर सैनिकां नै केयो जे ऐ लोग जहाज पर ना रेया तो थे बी कोनी बचो। जद सैनिकां जेवड़ी बाड दी अर सुरक्सा किस्ती पड़गी। जद दिन उगण आळो हो पौलुस ओ केगे सारा नै रोटी खाण खातर समझाया अर केयो, “थानै चौवदा दिन हो'ग्या थे कीं कोनी खायो।” ईंखातर मैं थानै समझाऊं कै कीं खा ल्यो झिका ऊं थारो बचाव होवै। क्यूंकै थारै मू किंगोई एक बाळ बी कोनी झड़ै। ओ केगे पौलुस रोटी लेगे सारां गै सामै परमेसर गो धन्यवाद करयो अर तोड़गे खाण लागग्यो। जद बां सारा होंसलै ऊं रोटी खायी। म्हे सारा जहाज में दो सौ छियतर जणा हा। जद बे सारा रोटी खा'गे धापग्या तो बचेड़ी रोटी जहाज ऊं नीचै फेंकण लागग्या कै जहाज हुळको हो'ज्यै। जद दिन उगग्यो तो बां बिं देस नै पिछाण्यो कोनी अर एक सुखी जिग्यां देखी अर केयो, “जहाज नै अठै रोकां।” जद बां पिलर नै खोल गे समुंदर में छोड़ दिया अर पतवार गा बंधन खोल दिया अर हवा गै सामै किनारै कानी बदण लागग्या। बांगो जहाज रेत में फसग्यो, सगळै पासूं टूटग्यो अर बोळी जोर गी लेहरां गै कारण जहाज गो लारलो पासो बी टूटग्यो। जद सैनिकां ओ बिचार करयो कै केदिया नै मारदैयां। इंया ना होवै कै कोई तिरगे भाजल्यै। पण सुबेदार पौलुस नै बचाणो चावै हो। ईंखातर बानै रोक्या अर केयो, “झिको तिर जाणै बे पेलां कूदगे किनारै पर जावो।” अर बाकी कोई पटरी अर कोई जहाज गी ओर चिजां गै स्हारै ऊं निकळ जाओ। ईं तरियां सारा जमीन पर बारै आ ग्या। जद म्हे बचगे माल्टा टापू में आ ग्या। बठै गै निवासियां म्हारै पर किरपा करी क्यूंकै मेह गै कारण ठंड ही, ईंखातर बां आग बाळगे म्हानै सारा नै तपाया। जद पौलुस लकडि़यां गो भारो भेळो कर'गे आग पर रख्यो तो एक सांप भारीयै मू निकळ्यो अर बिंगै हात गै लपेटीजग्यो। जद बठै गै लोगां सांप नै बिंगै हात गै लपेटीजेड़ो देख्यो तो आपसरी में केण लागग्या, “साची ओ आदमी कतली है। अर समुंदर ऊं बचग्यो तो बी न्याय करण आळै इनै जींवंतो कोनी रेण दियो।” पण पौलुस सांप नै आग में झड़का दियो अर बिंगै कीं कोनी होयो। पण बे उडीका कै बो कद सुजैगो अर मर जावैगो? पण जद बे बिनै भोत देर तांई देखता रेया तो बिंगो कीं कोनी बिगड़यो तो आपगी बात नै बदळ दी अर केयो ओ तो कोई देवता है। बिं जिग्यां गै आसै पासै टापू गै मुख्य पुबलियोस गी जमीन ही। बो म्हानै आपगै घरे ले जा'गे तीन दिनां तांई आच्छो आदर मान करयो। पुबलियोस गै पिता नै बुखार अर पेट गी बीमारी ही। पौलुस बिंगै कनै जा'गे पराथना करी अर बिं पर हात रख्यो अर बो ठीक हो'ग्यो। जद इंया होयो तो बिं टापू में बाकी गा बीमार लोग बी आया अर ठीक होया। बां म्हारो भोत आदर मान करयो अर जद म्हे चालण लागग्या तो म्हारी जरूरत गी चिजां जहाज में रख दी। तीन म्हिना गै बाद म्हे माल्टा द्वीप में पाळै गै टेम में रुकेड़ा हा। सिकन्दिरियां गो जहाज झिकै गो नाम दिओसकुरी मतलब जेऊस देवता गा बचा, इमै म्हे चढग्या। अर सुरकुसा में तीन दिन रुक्या। बठूं म्हे रेगियुम में आया। एक दिन गै बाद दकसिण गी हवा चालगी अर दूसरै दिन म्हे पुतियुलि में आया। बठै म्हारै बिस्वासी भाईयां गै केण पर बांगै सागै सात दिन रेया अर फेर बठूं रोम कानी चाल पड़या। बे बिस्वासी म्हारो समाचार सुणगे अपियुस गै चोंक अर तीन सराय तांई म्हारै सागै मिलण आया झिका नै देखगे पौलुस परमेसर गो धन्यवाद करयो अर आप होंसलो बांध्यो। जद म्हे रोम पूगग्या तो पौलुस नै एक सैनिक गै सागै झिको बिंगी रुखाळी करतो एकलो रेण गी आजादी मिलगी। तीन दिनां गै बाद बण यहुदियां गै खास लोगां नै बुलाया। जद बे कठ्ठा होया तो बण केयो, “मैं आपगै लोगां गै बडेरां गी रीति रिवाज गै बिरोध में कीं कोनी केयो। फेर बी मनै बंदी बणागे यरुसलेम ऊं रोमी लोगां गै हात में सोंप दियो।” बां मेरी जांच कर'गे छोड़णो चायो क्यूंकै मनै मारण खातर कोई दोस कोनी मिल्यो। मैं मेरै लोगां गै खिलाफ कीं कोनी करयो फेर बी यहुदी लोग मेरै बिरोध में बोल्या। ईंखातर मनै कैसर नै पुकार करणी पड़ी। ईंखातर मैं थानै बुलाया है, मैं थानै मिलूं अर बात करूं। इसराएलियां नै मसी पर आस ही, ईंखातर मैं सांकळा में बंधेड़ो हूं। बां बिनै केयो, “म्हानै ना तेरै बारै में यहुदियां कनूं चिट्ठी मिली अर ना बिस्वासियां आ'गे म्हानै तेरै बारै में बतायो अर ना गळत केयो।” पण तेरो के बिचार है? म्हे तेरै कनूं सुणनो चावां क्यूंकै म्हे जाणा हां हर जिग्यां ई मसी धरम गै बिरोध में लोग बात करै है। जद बां बिंगै खातर एक दिन पक्को करयो अर भोत सारा लोग कठ्ठा होया अर बो परमेसर गै राज गी गवाई देवंतो होयो अर मूसा गै नेम विधान अर परमेसर गी बात बताण आळा गी किताब ऊं यीसू मसी गै बारै में समझा समझा गे दिनगै ऊं आथण तांई बतावंतो रेयो। जद कीं लोगां बिंगी बातां मान ली अर केईयां बिस्वास कोनी करयो। जद बे आपसरी में एक ना होया तो पौलुस आ बात बानै बताई कै पवितर आत्मा यसयाह परमेसर गी बात बताण आळै गै द्वारा थारै बडेरां गै बारै में इंया केयो, “जा'गे आं लोगां नै केवो: कै थे सुणता तो रेवोगा पण समझेगा कोनी अर देखता तो रेवोगा पण पिछाणोगा कोनी” क्यूंकै ऐ लोग परमेसर गी बाता ऊं बांगो मन समझ कोनी सकै अर बांगी बात सुण कोनी सकै अर बां मनै पूरी तरियां इनकार करयो। इंयां ना होवै कै बे मेरै कनूं भोत दूर हो'ज्यै अर बांगो मन मेरी बात समझै कोनी अर मेरी बात सुणै कोनी अर बां मनै पूरी तरियां इनकार करयो। थे जाणो हो कै परमेसर आपगी मुकती गेर यहुदियां नै दे दी अर बे आ बात मानैगा। जद बण ओ केयो तो यहुदी आपसरी में ऊंचा नीचा होण लागग्या अर बठूं उड़ग्या। पौलुस दो साला तांई किरायै गै मकान में रेयो अर झिका बिंगै कनै आवंता बां सारा ऊं मिलतो रेयो। अर बिना रोक टोक गै परमेसर गै राज गो परचार करतो रेयो अर प्रभु यीसू मसी गी बातां सिखावंतो रेयो। मैं पौलुस यीसू मसी गो दास हूं, मनै एक खास चेलो होण खातर परमेसर गी ओर ऊं बुलायो अर परमेसर गै बिं सुब समाचार सुणाण खातर चुण्यो गेयो। परमेसर भोत साला पेलां, ईं सुब समाचार गी बातां नै बताण आळा गै द्वारा पवितर सासतर में लिख दी। ओ सुब समाचार परमेसर गै बेटै अर आपणै प्रभु यीसू मसी गै बारै में बतावै है, झिको मिनख गी तरियां राजा दाऊद गै घराणै में पैदा होयो। पण पवितर आत्मा गी सकती ऊं मरेडा ऊं जी उठगे परमेसर गो बेटो ठेरायो गेयो, बोई यीसू मसी आपणो प्रभु है। परमेसर यीसू मसी गै द्वारा मनै सारी दुनियां गै लोगां में बिंगै बारै में बोलण गी किरपा दी कै सारा लोग परमेसर गी बात पर बिस्वास कर'गे मानल्यै। बामै थे लोग बी यीसू मसी में होण खातर बुलाया गेया हो। ईंखातर मैं ओ खत थारै सारां खातर लिखण लागरयो हूं झिका रोम में परमेसर गा प्यारा अर पवितर जण होण खातर बुलाया गेया है। ईंखातर आपणै पिता परमेसर अर प्रभु यीसू मसी गी ओर ऊं थानै किरपा अर सांती मिलती रेवै। सारा ऊं पेलां मैं यीसू मसी गै द्वारा थारै सारा खातर आपणै परमेसर गो धन्यवाद करणो चाऊं। क्यूंकै परमेसर पर थे किंया बिस्वास करयो बिंगै बारै में सारै संसार में लोग बातां करै है। परमेसर गै बेटै गै सुब समाचार गो उपदेस देवंता होया मैं परमेसर गी सेवा आपगै पूरै दिल ऊं करूं हूं। मैं थारै खातर हर रोज बिनै याद करतो रेंऊं हूं अर बिंगै बारै में परमेसर मेरो गवा है। मैं परमेसर ऊं बिनती करूं हूं कै कोई बी तरिका ऊं परमेसर गी इच्छा है तो मैं थारै कनै जरूर आऊंगा। क्यूंकै मैं थारै कनै आण गी भोत इच्छा राखूं कै परमेसर गी आत्मा मनै के सिखायो इंगै बारै में थानै सिखाऊं अर ईंखातर थारो भरोसो ओर बोळो हो जावै। मेरो केण गो ओ ई मतलब है कै मैं थारै बिचाळै आऊं तो आपां एक दूसरै गै सागै बिस्वास में ओर आ'गै बदण में मदद कर सकां। हे भाईयो अर भेनों, मैं चाऊं हूं कै थानै पतो हो कै मैं जिंया थारै कनै आण गी भोत योजना बणाई पण अजे तांई पूरी कोनी होई। मैं थारै कनै ईंखातर आणो चाऊं हूं कै जिंया मैं दूसरै गेर यहुदी लोगां में यीसू मसी गा चेला बणाया बिंयाई रोम में बी आ'गे चेला बणा सकूं। मैं तेज अर भोळै, अणपढ अर पढेड़ै सारै लोगां गो करजदार हूं ईंखातर झिका थे रोम में रेण आळा हो थानै बी मैं सुब समाचार सुणाण खातर पूरो तैयार हूं। सुब समाचार सुणाण खातर मनै सरम कोनी आवै। क्यूंकै ईं सुब समाचार गै द्वारा परमेसर गी ताकत लोगां नै बचावै है। बिमै पेलां यहुदी फेर गेर यहुदी बी सामिल है। क्यूंकै ओ सुब समाचार इंया बतावै है कै परमेसर आपगी नजर में आदमी नै किंया सई बणावै है। ओ आदी अर अंत तांई बिस्वास पर टिकेड़ो है जिंया कै पवितर सासतर में लिखेड़ो है, कोई बी झिको परमेसर गै उपर भरोसो राखै है बानै परमेसर सई समझैगो अर बे जींवंता रेवैगा। परमेसर नै ना मानण आळा अर बुराई करण आळा पर परमेसर गी सजा सुरग ऊं आवै है क्यूंकै आं लोगां गी बुराई गै कारण दूसरै लोगां नै सच्चाई नै जाणनै में रुकावट पैदा होवै है। परमेसर गी सजा ईंखातर आवै क्यूंकै परमेसर गै ग्यान गै बारै में बानै पेलां बी बतायो अर आं बाता नै बे जाणै बी है। जद परमेसर संसार गी रचना करी बिं टेम ऊं ई लोगां नै पतो है परमेसर धरती अर आकास बणायो है। क्यूंकै जद ऊं संसार गी रचना होई है। लोगां नै परमेसर गै बिना देखेड़ा गुण मतलब बिंगै दिव्य रूप अर म्हान सकती गै बारै में पतो लागै है। ईंखातर लोगां कनै परमेसर नै म्हे कोनी जाणा आ बात केण गो कोई भानो कोनी है। बां लोगां नै पतो होवंता होया बी बे परमेसर नै आदर कोनी देवै अर ना बिंगो धन्यवाद करै। अर ना'ई परमेसर गै बारै में ठीक ऊं सोच बिचार राखै ईंखातर बांगी बुद्धी खराब होगी। बे लोग अपणै आपनै भोत ग्यानी अर समझदार समझगे जमाई मूरख बणग्या। अर कदी ना मरण आळै परमेसर गो आदर मान करण गै बजाय बां मरण आळै आदमी, चिड़ियां, पसुआं अर सांपां ऊं मिलती मूरतियां गो आदर मान करणो सरू कर दियो। ईंखातर परमेसर बानै मन गी बुरी इच्छा में जीण ऊं कोनी रोकै। बे लोग गंदै कामा में पड़ग्या अर एक दूसरै गै सागै गंदा काम करण लागग्या। ऐ लोग परमेसर नै जाणै है पण फेर बी मानै कोनी। बे सरसटी करण आळै नै छोड़गे बिंगी बणाएड़ी चिजां गी आराधना करणी सुरू कर दी। पण सदा धन्यवाद गै लायक तो बोई सरसटी करता परमेसर है। आमीन। ईंखातर परमेसर बानै बुरी इच्छा में छोड़ दिया। लुगाईयां आदमियां गै सागै सोणो छोड़ दियो अर बदळै में लुगाई लुगाई गै सागै सोण लागगी। ईं तरियां आदमियां बी लुगाईयां गै सागै सोणो छोड़गे आदमियां आदमियां गै सागै गंदा काम करया। ईंखातर परमेसर बानै ईं काम गो ठीक बिस्यो फळ दियो। अर जद बां परमेसर नै पिछाणनो कोनी चायो ईंखातर परमेसर बानै बुरा काम सोचण अर करण खातर छोड़ दिया कै बे माड़ा काम करै। बे हर तरियां गै अधरम, पाप, लाळच अर बेर बिरोध ऊं भरिजग्या अर बळण, हत्या, लड़ाई झगड़ो, छळ कपट, चुगली करण आळा ऊं भरग्या, दूसरा गै हित खातर गळत सोचण लागग्या। बदनाम करण आळा, आपगै जीवन में परमेसर नै ना मानण आळा, दूसरा गो आदर ना करण आळा, घमण्ड करण आळा, मोटी मोटी बात बोलण आळा, गळत बात बणाण आळा, मां-बाप गो केणो ना मानण आळा, ना समझण आळा, भरोसो ना करण आळा, प्रेम ना करण आळा, दया ना करण आळा, ओ सारो कीं करण आळा नै परमेसर सजा देवैगो। ओ जाणता होया बी बे ओ सारो कीं करै है। ओ बी कोनी झिका ओ सारो कीं करै है बांगै सागै खुसी बी मनावै है। हे दोस लगाणाळा, तूं दूसरा गी गळती देखगे न्याय करै है। पण तेरै कनै न्याय करण गो कोई हक कोनी। झिकै गो तूं न्याय करै है बिंयाई अपणै आपगो बी करै है। हे मेरा मित्र, थे चायै कोई बी हो थारै कनै कोई भानो कोनी है। आपां सारा जाणा हां कै परमेसर सच्चो है अर गळत काम करण आळा नै सजा देवै है। हे मेरा मित्र, तनै पतो है कै परमेसर गळत करण आळा नै सजा देवै है, तूं के सोचै है कै जे तूं आप गळत करसी तो परमेसर गी सजा ऊं बच ज्यैगो के? तूं ओ जाणै कोनी है के परमेसर दयालु है अर तनै पछतावो करण खातर अगुवाई करै है? फेर बी तूं बिंगी किरपा, सेण सकती अर धीरज नै तुछ जाणै है। पण अपणै आपनै पथर बरगो अर कदी पछतावो ना करण आळै मन गै कारण जद परमेसर गो सच्चो न्याय परगट हो'सी तो थानै भोत करड़ी सजा देवैगो। परमेसर हर किनैई बिंगै करमा गै अनुसार फळ देवैगो। झिका लोग आपगै जीवन में आच्छा काम हरदम करता रेवै है अर बे लोग परमेसर ऊं आदर समान अर कदी ना मुकण आळै जीवन मिलण गी इच्छा राखै है। बां लोगां नै परमेसर अनन्त जीवन दैयगो। पण दूसरा लोग आपणै बारै में ई सोचगे बुरा काम करण गी सोचै है अर परमेसर गी इच्छा नै कोनी मानै है। हिस्या लोगां नै परमेसर भोत करड़ी सजा देसी। झिका लोग बुराई करै बानै पतो होणो चईयै बां लोगां नै बोळो दुख अर कस्ट जरूर आवैगो। पेलां यहुदी लोगां नै जरूर मिलसी पण फेर गेर यहुदी लोगां नै बी मिलसी। पण झिका लोग आच्छा काम करसी बानै परमेसर ऊं आदर मान अर सांती मिलसी। पेलां यहुदी लोगां नै मिलसी फेर गेर यहुदियां नै बी मिलसी। क्यूंकै परमेसर किंगी पक्सपात कोनी करै है। झिका लोगां नै परमेसर गै नेम गो पतो कोनी बे लोग पाप करसी तो बानै परमेसर सजा देसी अर झिका लोग परमेसर गै नेम नै मानगे पाप करसी तो बानै परमेसर आपगै नेम गै अनुसार न्याय देवैगो। क्यूंकै परमेसर गी नजर में परमेसर गै नेम नै सुणण आळो कोनी पण बिं पर चालण आळो ई निरदोस है। परमेसर गो नेम कोनी है तो बी गेर यहुदी लोगां गो न्याय हो'सी। क्यूंकै बां लोगां नै अपणै आप नेम गी केई बातां गो पतो चालै है। जद गेर यहुदी अपणै आप आच्छो काम करै है तो बो अपणै आप में एक नेम है। अर बां लोगां गो मन बतावै है कै ठीक है या कोनी। इंगै द्वारा म्हानै पतो लागै है कै परमेसर गै नेम विधान गी बात बांगै मना में है। मेरै परचार करेड़ै सुब समाचार गो मतलब ओ ई है कै झिको न्याय गो दिन आसी परमेसर यीसू मसी गै द्वारा लोगां गै मन में लुकेड़ी बातां गो न्याय करसी। थे लोग केवो हो कै म्हे यहुदी हां क्यूंकै परमेसर गो नेम विधान म्हारै कनै है अर बिंगो पालण करण गो कारण म्हारो आच्छो रिस्तो परमेसर सागै है। ईं बात गो थे लोग घमण्ड करो हो। थानै नेम विधान गी आच्छी सिक्सा मिली है ईंखातर थे जाणो हो कै परमेसर के चावै हो अर आच्छी अर खास बातां गै बारै में बी थानै पतो है। थे लोग इयां सोचो हो, म्हे आन्धै लोगां नै परमेसर गै रा पर ल्याण आळा हां अर अंधेरै में रेण आळा नै परमेसर गी जोती दिखाण आळा गी तरियां हां। परमेसर गै नेम में ग्यान अर सच्चाई है। ईंखातर थे लोग सोचो हो कै झिका कनै मूसा गो नेम विधान कोनी बां लोगां नै नेम विधान गी सिक्सा दे सको हो अर टाबरां नै बी सिक्सा दे सको हो। थे लोग दूसरा नै सिखाओ हो अर अपणै आपनै सिखाओ कोनी अर दूसरा नै केवो चोरी ना करो पण थे आप चोरी करो हो। थे लोग दूसरा नै सिखावो हो कै बेबीचार ना करियो पण थे आप बेबीचार करो हो। थे लोग केवो हो कै मूरतियां गो आदर ना करियो पण थे आप मिन्दर में जा'गे धन भेळो करो हो। थे लोग घमण्ड करो हो कै म्हारै कनै परमेसर गो नेम विधान है पण बिं नेम विधान गो पालण ना कर'गे परमेसर गो आदर कोनी करो हो। क्यूंकै पवितर सासतर में इंया लिखेड़ो है कै “थारै कारण गेर यहुदियां में परमेसर गै नाम गी निंदा होवै है।” मैं थानै ओ बोलणो चाऊं हूं कै थे लोग जे परमेसर गै नेम विधान नै मानो तो यहुदी रीति रिवाज में खतनै गो म्हत्व है। पण जे ना मानै तो कोई म्हत्व कोनी। फेर थे गेर यहुदी झिका खतनै नै कोनी मानै बांगै बरगा हो। पण जे एक बिना खतनो करयो गेर यहुदी आदमी परमेसर गै नेम विधान गी सारी बाता मानै है अर बिंगी तरियां आपगो जीवन बितावै है तो परमेसर बिनै एक खतनो करेड़ै बरगो समझै है। थारै यहुदी लोगां कनै नेम विधान अर खतनो बी है फेर बी थे नेम विधान नै तोड़ो हो। ईंखातर झिका लोग सरीर में खतनो कोनी करयो पण नेम विधान गो पालण करयो है बे लोग थानै दोसी ठेरावैगा। झिका लोग आपगै सरीर में खतनो करै है अर यहुदी रीति रिवाज गो पालण करै है बानै यहुदी कोनी मान सकै। पवितर आत्मा गै द्वारा मन में बदळाव होण आळो ई सच्चो यहुदी है। सच्चो खतनो जद होवै जद मन गो बदळाव होवै, ओ लिखेडै़ नेम विधान ऊं कोनी होवै पण ओ परमेसर गी आत्मा गै द्वारा होवै है। हिस्यै आदमी नै लोगां कानू कोनी पण परमेसर कानू बडाई मिलै है। थारै यहुदियां मू केई आदमी इंया सोच सकै है कै, यहुदी होण गो के फायदो है? अर खतनै करण गो के मतलब है? मैं थानै केऊं कै, थानै यहुदी लोगां नै इमै जरूर फायदो है क्यूंकै इमै खास बात आ है कै, परमेसर गो बचन झिकै में बांगो वायदो है बो थानै दिओ है। थारै मू केई लोग परमेसर गै वायदै नै कोनी मानै, बे लोग इंया सोचै है कै बांगै बिना बिस्वास गै कारण परमेसर गी सच्चाई कोई काम गी कोनी है। आ बात बिलकुल गळत है। थे झूठ बोलो हो अर सच्चाई कोनी मानो तो बी परमेसर सच्चो है। परमेसर गै बचन में राजा दाऊद इंया केयो कै, “हे प्रभु, थारो बचन सच्चो ई है अर जद थारो न्याय होवै तो तूं जीत जावै? ” अपणा झूठा अर गळत काम परमेसर गी सच्चाई नै सई तरियां ऊं दिखावै है। केई लोग इंया सोचै है परमेसर आपगी रीस म्हारै पर दिखागे अन्याय करै है। इंया सोचण आळा लोग मूरख है के? जमाई कोनी। क्यूंकै परमेसर थारो न्याय सई रीति ऊं ना करैगो तो संसार गै दूसरा लोगां गो न्याय किंया करसी? पण केई लोग इंया सोचै है कै म्हारा झूठा अर गळत कामां ऊं जे परमेसर नै बडाई मिलै है तो मैं पापी लोगां गी तरियां सजा गै लायक क्यूं ठेरायो जावूं? आपां क्यूं बुराई ना करां कै बिमुं भलाई निकळै। जिंया आपणै पर ओ दोस लगायो बी जावै अर केई केवै बी कै आंगो ओ ई केणो है। पण हिस्या नै दोसी ठेराणो ठीक है। आं सारी बातां गो मतलब ओ कोनी कै यहुदी लोग गेर यहुदी लोगां ऊं आच्छा है। क्यूंकै यहुदी लोग अर गेर यहुदी लोग पाप गै बस में है। पवितर सासतर में इंया लिखेड़ो है कै, “परमेसर गी नजर में कोई बी आच्छो कोनी। एक बी कोनी। किनैई पतो कोनी कै, के आच्छो है? अर परमेसर नै खोजण आळो कोई बी कोनी। सारा लोग परमेसर ऊं दूर होगे भटकग्या। भला काम करण आळा कोई कोनी, एक बी कोनी। ” जिंया एक हडारोड़ो मू बांस आवै है बिंयाई जद एक पापी आपगो मूं खोलै है तो बिंगै मूं ऊं धोखो देणाळी बात निकळै है। इयां कर'गे बो आपगै मूं ऊं नास अर मोत होण आळी बातां बोलै है। बे दूसरा गै बारै में स्राप अर बुरी बात बोलै है। बे लोग हमेसा दूसरा गै सागै लड़ाई करै अर बानै मारण नै उंतावळा रेवै। बे जठै जठै जावै है दूसरा गो नास करै अर बानै दुख बी देवै। बानै सांती में रेण गो पतो ई कोनी। बे लोग कदी बी परमेसर गो आदर मान कोनी करै। परमेसर गै नेम विधान में लिखेड़ी आं सारी बातां गो पालण यहुदी लोगां नै करणो चईयै। कै सारा लोगां कीं ब्हानो ना बणा सकै अर सारो संसार परमेसर गी सजा गै लायक ठेरायो जावै। नेम विधान गो पालण करण ऊं परमेसर गी नजर में आच्छो कोनी होवै क्यूंकै परमेसर गै नेम विधान में म्हे पिछाणा हां कै म्हे पापी हां। परमेसर आपां नै इंया दिखायो कै बिना नेम विधान गै मानण ऊं किंया परमेसर गी नजर में निरदोस बण सकां। ईं बात गै बारै में नेम विधान अर परमेसर गी बात बोलण आळा बतायो हो। झिका लोग यीसू मसी पर बिस्वास करसी बे लोग परमेसर गी नजर में निरदोस बण सकै है। आ बात सारा खातर एकसी है। ईंखातर सारा लोग पाप करयो अर परमेसर गै सागै झिकी मेमा ही बा अब कोनी। पण जद यीसू मसी बां लोगां नै छुटकारो देगे परमेसर गी नजर में निरदोस बणा दिया अर बे इंगै लायक कोनी हा फेर बी ओ परमेसर गी दया ऊं बानै मुफ्त इनाम जिसो मिल्यो है। परमेसर पेलां ऊं ई आपगी दया अर पापी लोगां नै माफ करण खातर इंया करयो झिको बिस्वास करण ऊं होवै कै झिका पाप पेलां करया अर झिका पर परमेसर आपगै धीरज गै कारण ध्यान कोनी दियो। बिंगै बारै में बो आपगी धारमिकता परगट करै। अर ईं टेम ई बिंगी धारमिकता परगट होवै झिका ऊं बो आप ई धरमी ठेरै अर झिका लोग यीसू मसी पर बिस्वास करै है बे परमेसर गी नजर में निरदोस बणज्यै। ईंखातर किनैई परमेसर गै नेम नै पूरी तरियां पालण करण ऊं अर आच्छै काम करण ऊं घमण्ड कोनी कर सकां क्यूंकै परमेसर नेम विधान ऊं कोनी पण यीसू मसी पर बिस्वास करण ऊं आपगी नजर ऊं निरदोस मानै। केई लोग इंया सोचै है कै परमेसर एकलै यहुदी लोगां गो है। आ बात बिलकुल गळत है। परमेसर सारै लोगां गो परमेसर है बिंगै मा यहुदी अर गेर यहुदी बी सामिल है। क्यूंकै परमेसर एक ई है। यहुदी लोग अर गेर यहुदी लोग दोनां नै यीसू मसी गै उपर बिस्वास गै द्वारा परमेसर आपगी नजर में निरदोस मानै है। के आपां नेम विधान नै बिस्वास गै द्वारा बेकार ठेरावा हां के? जमाई कोनी पण नेम नै पक्को करा हां। आपां आपणै बडेरै अबरहाम गै बारै में सोचा कै बो किंया परमेसर गी नजर में निरदोस बणग्यो। अबरहाम कोई आच्छो काम कर'गे परमेसर गी नजर में निरदोस ठेरायो जावंतो तो बिमै घमण्ड कर सकै हो पण परमेसर गी नजर में बो घमण्ड करण गै लायक कोनी है। पवितर सासतर में इंया लिखेड़ो है कै, “अबरहाम परमेसर पर बिस्वास करयो, बिं कारण बो परमेसर गी नजर में एक निरदोस आदमी बण्यो।” काम करण आळै आदमी नै मजदूरी मिलणी जरूरी है, ओ कोई दान कोनी, मजदूरी लेणो बिंगो हक है। कोई बी आदमी काम कर'गे परमेसर गी नजर में निरदोस कोनी बण सकै। बिनै परमेसर पर बिस्वास करणो ई चईयै। झिका लोग पापी है जे बे परमेसर पर बिस्वास करसी तो बे बी परमेसर गी नजर में निरदोस बण जावैगा। पवितर सासतर में दाऊद बी इंगै बारै में लिखै है कै झिका लोग परमेसर पर बिस्वास करै है बे लोग धन्य है, बिना कोई काम करया बी बे लोग परमेसर गी नजर में निरदोस बण ज्यैगा। कोई बी आदमी गा पाप माफ होया है तो, बो धन्य है। बे बी धन्य है कै झिका गै पाप गो लेखो प्रभु कोनी लेवै। दाऊद धन्य केवै, है के यहुदियां नै या गेर यहुदियां नै? आपां इंया केवा हां अबरहाम परमेसर पर बिस्वास करयो ईंखातर परमेसर बिनै आपगी नजर में निरदोस गिण्यो। आ बात अबरहाम गै खतनो करण ऊं पेलां होई या फेर बाद में। आ बात खतनो करण ऊं पेलां ई होगी। परमेसर पर भरोसो राखगे बिंगी नजर में निरदोस बणन गै भोत साल बाद एक निसानी गै जिंया परमेसर गी नजर में निरदोस आदमी बणग्यो बो दिखाण खातर अबरहाम आपगै सरीर में खतनो करयो। ईंखातर अबरहाम नै सारां गो पिता मानै है झिका परमेसर पर बिना खतनै गै बिस्वास करयो कै बे बी परमेसर गी नजर में निरदोस बण जावै। अबरहाम नै खतनो करेड़ा गो बी पिता मानै है झिका लोगां गो खतनो ना करेड़ो हो पण आपणै पिता अबरहाम खतनो करण ऊं पेलां परमेसर पर बिस्वास राखयो है बिं बिस्वास पर चालतो हो। परमेसर अबरहाम अर बिंगी आण आळी पीढी नै संसार गा वारिस बणाण गो वायदो करयो। ओ वायदो परमेसर अबरहाम नै नेम विधान गो पालण करण ऊं कोनी दियो पण परमेसर पर बिस्वास कर'गे बिंगी नजर में निरदोस बणन ऊं दियो। परमेसर आपगै वायदै नै जे नेम विधान पालण करण आळा नै देवै तो परमेसर गै उपर आपणो बिस्वास गो कोई मतलब कोनी अर परमेसर गो वायदो बी बेकार है। क्यूंकै कोई बी परमेसर गो नेम विधान गो पालण कोनी करै। लोग नेम विधान गो पालण ना करै तो परमेसर बानै सजा देवै है। जठै नेम विधान कोनी बठै बिनै तोड़ण गी बी जरूरी कोनी। झिका लोग परमेसर पर बिस्वास करै है बां पर परमेसर गो वायदो पूरो होवै है। ओ वायदो परमेसर आपगी दया ऊं मुफ्त में देवै है। ओ वायदो अबरहाम गी पीढी नै मिलतो रेसी झिका नेम विधान नै मानै अर अबरहाम बरगो बिस्वास परमेसर पर करै है बानै बी मिलसी। पवितर सासतर में इंया लिखेड़ो है, परमेसर केवै है, “मैं तनै भोत सारी जातां गो पिता बणास्यूं। बिं परमेसर गी नजर में अबरहाम आपणो पिता है झिकै परमेसर पर बिंगो बिस्वास है। बोई परमेसर मरेड़ा नै जींवंता करै है अर झिकी बातां ही कोनी बिमुं सारो कीं बणा दियो।” परमेसर अबरहाम नै केयो तूं भोत जातां गो पिता हो'सी, पण सो साल तांई बिनै एक बी टाबर कोनी मिल्यो अर बिंगी घराळी सारा बी बुढि होण गै कारण टाबर पैदा करण में कमजोर होगी। फेर बी अबरहाम आपगो भरोसो कोनी छोड़यो अर आसा गै सागै बण परमेसर पर बोळो भरोसो राख्यो। परमेसर गै वायदै पर बण कदी आपगो भरोसो कोनी छोड़यो, पण बण आपगो बिस्वास बोळो तकड़ो राखगे परमेसर नै आदर दियो। अबरहाम नै पूरो भरोसो हो झिको वायदो परमेसर करयो है बो जरूर पूरो करसी। ईं बिस्वास गै कारण परमेसर अबरहाम नै बिंगी नजर में एक निरदोस आदमी बणायो। पवितर सासतर में इंया लिखेड़ो है कै, “परमेसर गी नजर में अबरहाम एक निरदोस आदमी है।” ना एकलै बिंगै खातर लिख्यो गेयो। जिंया अबरहाम परमेसर गी नजर में एक निरदोस आदमी बणग्यो बिंया आपां बी जे परमेसर झिको प्रभु यीसू मसी नै मरेड़ा ऊं जींवंतो कर लियो बिं पर भरोसो राखां तो आपां नै बी निरदोस बणा देसी। आपां परमेसर गो नेम तोड़ दियो इंगै बदळै में यीसू मसी नै मारण खातर दे दियो अर आपां नै परमेसर गी नजर में निरदोस बणाण खातर परमेसर यीसू मसी नै मरेड़ा ऊं जींवंतो कर दियो। परमेसर गै उपर बिस्वास करण ऊं परमेसर आपां नै आपगी नजर में निरदोस बणाया। प्रभु यीसू मसी गै करूस पर बलिदान गै द्वारा आपणो आच्छो मेल मिलाप परमेसर सागै हो'ग्यो। प्रभु यीसू मसी गै द्वारा आपणै बिस्वास गै कारण बण आपगी दया आपणै पर करी झिकी गै लायक आपां कोनी हा। अर परमेसर गी मेमा में भागिदार होण'गी पक्की आसा है। ईंखातर आपां अब खुसी में हां। एक आइ बात कोनी, कोई बी परेसानी ऊं आपां खुस रेवां, ओ जाणगे कै परेसानी ऊं आपां नै धीरज राखण गी ताकत मिलसी। धीरज ऊं आपणो सभाव बोळो तकड़ो हो'सी झिको परमेसर नै आच्छो लागै अर ईं तकड़ै सभाव ऊं पक्की आसा पैदा हो'सी। पक्की आसा ऊं आपां नै कदी बी सरम कोनी आवै क्यूंकै जद पवितर आत्मा आपां नै दी जद परमेसर आपगै प्रेम ऊं आपणै जीवन नै भर दियो। आपणै पापां ऊं आपां अपणै आपनै बचा कोनी सकां अर परमेसर गी आग्या पिछाण कोनी सकां बोई ठीक टेम मसी आपां झिका परमेसर नै कोनी मानता हा आपणै पापां खातर बलिदान हो'ग्यो। झिका लोग नेम गै आ'गै पीछै जावै बां खातर कोई बी आदमी बड़ी मुसकिल ऊं मरै पण हो सकै झिका लोग भलाई अर दूसरै सागै प्रेम करै है बां खातर प्राण देण खातर कोई बी तैयार हो जावै। पण परमेसर आपणूं भोत प्रेम करयो। क्यूंकै आपां पापी हा फेर बी मसी आपणै पापां खातर बलिदान हो'ग्यो। मसी गै खून गै कारण म्हे परमेसर गै नजर में निरदोस बणग्या। मसी गै कारण परमेसर गै आखरी न्याय गी दिन गी सजा ऊं बी बच जावांगा। जद आपां परमेसर गा बेरी हा जद बिंगै बेटै गी मोत गै द्वारा आपणो मेल मिलाप परमेसर गै सागै करवा दियो अर मसी जींवंतो है इंगै कारण आपां परमेसर गी सजा ऊं जरूर बच जावांगा। एक आइ बात कोनी, पण प्रभु यीसू मसी गै द्वारा आपणै परमेसर गै सागै आच्छो मेल मिलाप होयो। ईं कारण आपां ओर बी भोत राजी होवां। पेलां ई एक मिनख आदम पाप करयो अर बिंगै द्वारा संसार में पाप आ गेयो। अर पाप गै द्वारा मोत आई अर ईं रीत ऊं मोत सारा लोगां पर फेलगी, क्यूंकै सारा ई पाप करै। मूसा गै नेम विधान आण ऊं पेलां संसार में पाप हो। जद तांई कोई नेम विधान ना होवै तो किंगोई पाप गिण्यो कोनी जावै। आदम परमेसर गी आग्या नै तोड़गे पाप करण गै कारण आदम ऊं लेगे मूसा तांई संसार गा सारा लोग झिका पाप कोनी करयो बांगै उपर बी मोत आयी। आदम बी बिस्यो हो जिसो मसी आण आळो हो। आदम गै द्वारा करेड़ै पाप अर परमेसर गी दया ऊं देयड़ो वरदान झिको यीसू मसी है आं दोना में भोत फरक है। आदम गै द्वारा भोत लोग मरग्या पण यीसू मसी गै द्वारा परमेसर गी किरपा बोळै लोगां पर भोत भोत होयी। आदम परमेसर गी आग्या नै तोड़गे पाप करयो अर परमेसर गी दया ऊं देयड़ै वरदान में एक फरक ओ है कै आदम गो पाप दण्ड गो कारण हो'ग्यो पण आपां पापी होंता होया बी परमेसर गी नजर में निरदोस बणन खातर आपगो वरदान म्हानै दियो। एक आदमी ऊं परमेसर गी आग्या तोड़ण गै कारण मोत सारै संसार पर राज करयो। पण झिका लोग परमेसर गी किरपा अर परमेसर गी नजर में निरदोस बणन गो वरदान यीसू मसी गै द्वारा लियो बे लोग पाप अर मोत गै उपर राज करसी। क्यूंकै आदम परमेसर गी आग्या नै तोड़ी ईंखातर सारै लोगां नै सजा मिली पण यीसू मसी परमेसर गी आग्या गो पालण कर'गे सारै लोगां नै परमेसर गी नजर में निरदोस बणण अर अनन्त जीवन लेण नै बी मदद करी। एक आदमी परमेसर गी आग्या तोड़ी अर बिंगै कारण भोत लोग पापी बणग्या। बिंयाई एक दूसरै आदमी परमेसर गी आग्या पालण करण गै कारण भोत लोग परमेसर गी नजर में निरदोस बणग्या। लोग आपगै पापां नै समझण खातर परमेसर बानै नेम विधान दे दियो पण जठै लोग बोळा पाप करण लागरया बठै परमेसर गी किरपा बी बिंऊं बोळी होगी। जिंया पाप लोगां पर राज करयो अर बो लोगां गै मरण गो कारण बणग्यो बिंयाई आपणो प्रभु यीसू मसी गै द्वारा परमेसर गी किरपा बी अनन्त जीवन मिलण खातर परमेसर गी नजर में निरदोस बणावंती होयी राज करै। कोई पूछै है के आपां पाप करता रेवां कै परमेसर गी किरपा आपणै उपर ओर बोळी होवंती रेवै। आ बात बिलकुल कोनी हो सकै। आपणै जीवन पर पाप गो राज कोनी है तो आपां पाप किंया कर सकां हां? मैं थानै याद करवाऊं हूं कै आपां यीसू मसी गै सागै भागिदार होण खातर अर बिंगै लारै चालण खातर बतिस्मो लिओ है। इंगै द्वारा आपां यीसू मसी गी मोत गा बी भागिदार बणग्या। बतिस्मै गै द्वारा यीसू मसी गी मोत गा भागिदार होयड़ा आपां लोग बिंगै सागै दफनायेड़ा बी हा कै पिता परमेसर गी मेमा गी सकती ऊं जिंया यीसू मसी नै मरेडा ऊं जी उठगे एक नुओ जीवन मिल्यो बिंयाई आपां नै बी एक आच्छो नुओ जीवन मिल्यो है। क्यूंकै जे आपां बिंगी मोत में भागिदार होण लागरया तो बिंगै तरियां जरूर बिनै जी उठणै गै बाद एक नुओ जीवन मिल्यो बिंयाई आपां नै बी एक नुओ जीवन मिलैगो। क्यूंकै आपां जाणा हां कै आपणो पेलां आळो पापी सभाव यीसू मसी गै सागै करूस पर चढाईजग्यो। ईंखातर आपणो पापी सभाव आपणै पर अब जोर कोनी कर सकै अर अब आपां पापां गो गुलाम ना बणा। यीसू मसी गै सागै आपां मरग्या ईंखातर आपां पाप गी गुलाम ऊं छूटग्या। जद आपां मसी गै सागै मरग्या हा तो ओ बिस्वास आपां करा कै बिंगै सागै जीयांगा बी। आपां ओ जाणा हां कै मसी मरगे जींवंतो हो'ग्यो अर अब दुसर कदी कोनी मरसी। बिं पर कदी बी मोत गो हक कोनी हो'सी। क्यूंकै मसी जद मरग्यो तो बिं पर पाप गो कोई हक कोनी। परमेसर नै मेमा देण खातर अब बो जींवंतो है। ईं तरियां इंया समझो कै थे पाप ऊं न्यारा हो'ग्या पण परमेसर खातर यीसू मसी में जींवंता हां। ईंखातर थारो नासवान होण आळै सरीर पर पाप नै राज ना करण देओ कै थे बिंगी लाळसा गै बस में होज्यो। आपगै सारै सरीर नै बुरी बातां पर ना लगावो, थे लोग पेलां मरेड़ा हा पण अब परमेसर थानै जींवंता करया है। ओ जाणगे आपगै सरीर नै आच्छी बातां झिकी परमेसर नै राजी करै है बां पर लगावो। अब थारै पर पाप राज ना करै क्यूंकै थे नेम विधान गै बस में कोनी पण परमेसर गी किरपा गै बस में हो। आपां नेम विधान गै बस में कोनी पण परमेसर गी किरपा ऊं जींवंता हां। फेर आपां कोई पाप करता रेवां हां के? नई कदी कोनी। जद थे कोई मालिक गी आग्या मानो हो तो थे बिंगै नीचै काम करण आळा दास बणग्या। जे थे पाप नै मालिक बणा लेवोगा तो जरूर मर जावोगा पण जे परमेसर गी आग्या मानोगा तो बिंगी नजर में निरदोस बण जावोगा। पेलां पाप थारो मालिक हो अर पाप थारै उपर राज करयो। पण अब थे सिखायेड़ी सिक्सा नै पूरै मन ऊं मानी। ईंखातर परमेसर नै धन्यवाद देणो भोत जरूरी है। परमेसर थानै पाप गी सकती ऊं छुड़ा लिया अर आच्छा काम करण खातर परमेसर गा दास बणग्या। मैं थानै आच्छी तरियां समझाण खातर एक मिसाल बताऊं जिंया थे थारै सरीर ऊं बेबीचार अर भोत बुरी बातां करी बिंया अब आपगै सरीर ऊं परमेसर गी नजर में एक आच्छो काम कर'गे एक पवितर आदमी बण जाओ। क्यूंकै जद थे पाप गी गुलामी में हा, जद परमेसर गी नजर में कोई आच्छो काम कोनी कर सकया। थारै करेडै़ पाप गै कारण थानै के लाभ होयो, आ बात सुणगे थे सरमिन्दा हो। क्यूंकै आखरी न्याय गै दिन थानै मोत गी सजा जरूर मिलसी। पण अब थे पाप गी गुलामी छोड़गे परमेसर गा दास बणग्या हो, ईंखातर थे अब पवितर हो अर थानै अनन्त जीवन मिलग्यो है। क्यूंकै पाप गो इनाम मोत है पण झिको इनाम परमेसर देवै है बो आपणै प्रभु यीसू मसी में अनन्त जीवन है। हे भाईयो अर भेनों, थे कोनी जाणो हो कै मैं नेम विधान नै जाणन आळा नै के केऊं हूं कै जद तांई आदमी जींवंतो है, बिनै नेम विधान गो पालण करणो ई पड़सी। मैं एक मिसाल बोलूं कै, जद कोई लुगाई गो ब्या हो'ग्यो जद तांई बिंगो घराळो मरै कोनी बा नेम विधान गै अनुसार बिंगै सागै ई रेणो पड़सी। पण जद बिंगो घर आळो मर ज्यै तो बा लुगाई नेम विधान ऊं आजाद होगे दूसरो ब्या कर सकै है। घर आळै गै जींवंतै जी लुगाई दूसरो ब्या करै तो बा लुगाई बेबिचारिणी केई जावैगी पण जे बिंगो घर आळो मरग्यो है तो बा नेम ऊं छूट गी अर दूसरो ब्या करै तो बेबिचारिणी कोनी केई जावैगी। बिंयाई, हे भाईयो अर भेनों, जद यीसू मसी मरग्यो तो थानै नेम विधान गी गुलामी ऊं आजादी मिलगी। अब थे झिको यीसू मसी मरगे जी उठयो बिंगै सागै भागिदार होग्या अर अब थे परमेसर खातर फायदो होण आळो जीवन जीओ। यीसू मसी पर बिस्वास करण ऊं पेलां आपां आपगै जीवन में गळत काम करया झिका गळत काम करया बे सारा नेम विधान ऊं पैदा होया लाळसा ऊं करया हा। अर मोत कनै ले जाण खातर म्हारै सरीर गै अंगा में काम करती ही। पण यीसू मसी गै सागै मरण गै कारण अब आपां नेम विधान ऊं छूटग्या हां अर अब आपां परमेसर गा काम नेम विधान गै अनुसार पुराणी रीति पर कोनी पण पवितर आत्मा गी मदद ऊं करां हां। इंगो मतलब ओ है कै परमेसर गो नेम विधान गळत है? कोनी बिलकुल कोनी। नेम विधान गै द्वारा ई आपां नै पाप गै बारै में पतो लागै है। नेम विधान में इंया लिखेड़ो है कै दूसरां गी चीज गो लाळच ना करी। नेम विधान गी जाणकारी आपां नै पतो कोनी है तो इंगो मतलब किंया समझ सकां। जद मैं आग्या में इंया पढयो कै दूसरां गी चीज गो लाळच ना करी, बिं ई टेम पाप मेरै जीवन में दूसरां गी चिजां पर लाळच करण लागग्यो। परमेसर गो नेम विधान जे मेरै पापां गै बारै में ना बता सकै तो मेरै मन में पाप गो कोई बी हक कोनी। पेलां मैं नेम विधान गै बिना जाणकारी गै जीवन जींवंतो हो पण आग्या आण गै बाद पतो लागग्यो कै मैं पाप करण लागरयो हूं। अर मनै पतो लागग्यो कै मैं परमेसर ऊं भोत दूर हो'ग्यो। झिकी आग्या ऊं मनै आस ही कै मनै अनन्त जीवन मिलैगो। पण बाद में मनै पतो लागग्यो कै ईं आग्या गो पालण करण ऊं मैं परमेसर ऊं भोत दूर हो'ग्यो। पाप झिको आग्या गै विरुद्ध हो बण मनै नीचै रेड़ दियो अर परमेसर गी सजा गै लायक बणा दियो अर परमेसर ऊं न्यारो हो'ग्यो। मूसा गो सारो नेम विधान परमेसर कनूं आयो है अर ऐ आग्या, बिं पवितर परमेसर गी नजर में भोत आच्छी अर ठीक है। मैं इंया सोचूं हूं कै झिको नेम विधान भोत आच्छो है बो मनै परमेसर ऊं भोत दूर लेग्यो। इंया सोचणो बिलकुल गळत है। पण परमेसर अर मेरै बिचाळै आच्छो रिस्तो पाप गै कारण टूट ग्यो, ओ नेम विधान गै कारण कोनी होयो। परमेसर गी आग्या ऊं मैं समझग्यो कै पाप भोत ई बुरो है। क्यूंकै आपां जाणा हां कै नेम विधान परमेसर कनूं आयो हो पण आपणो सरीर पाप गै बस में हो अर आपां पाप गी गुलामी में बिकग्या। मैं झिको कीं करण लागरयो हूं बिनै मैं कोनी जाणू क्यूंकै झिको आच्छो काम मैं करणो चाऊं हूं बो मैं कर कोनी सकूं। पण झिकै काम ऊं मैं नफरत करूं बो काम मैं करूं हूं। जे झिकै काम ऊं मैं नफरत करूं बोई काम मैं करूं हूं, बिंऊं मैं मानूं कै परमेसर गो नेम विधान आच्छो है। तो हिसी हालत में बिंगो करण आळो मैं कोनी पण पाप है झिको मेरै में बसेड़ो है। मैं जाणूं हूं कै मेरै मन में कोई बी आच्छी बात कोनी है अर मैं एक पापी आदमी हूं। मैं आच्छो काम करण गी सोचूं पण कर कोनी सकूं। क्यूंकै झिको मेरो मन पसंद आच्छो काम मैं करणो चाऊं बो मैं कोनी कर सकूं। पण झिको बुरो काम करण गी इच्छा मैं कोनी राखूं बो मेरूं हो'ज्यै। पण जे मैं बोई करूं हूं झिकै गी इच्छा कोनी करूं तो बिंगो करण आळो मैं कोनी मेरै मन में बसेड़ो पाप करतो रेवै है। इंया मैं मेरै जीवन में समझग्यो कै जद मैं आच्छो काम करण गी सोचूं हूं तो मेरूं बुराई ई होवै है। मैं खुसी गै सागै इंया इच्छा राखूं हूं कै परमेसर गै नेम विधान गो पूरै मन ऊं पालण करूं। पण मनै आपगै अंगा में दूसरी तरियां गो नेम दिखै है झिको मेरी बुद्धी गै नेम ऊं लड़तो रेवै है। ओ मनै पाप गै नेम विधान गै बन्धन में गुलाम बणा देवै। मेरो सरीर झिकै नै परमेसर गी सजा मिलण आळी है बिं सजा ऊं मनै कुण छुड़ावैगो। ओ सोचगे मेरो मन भोत दुखी होवै है। आपणो प्रभु यीसू मसी ई परमेसर गी सजा ऊं आपां नै छुड़ा सकै। ईंखातर मैं परमेसर गो धन्यवाद देऊं। सदा ई मेरी बुद्धी ऊं परमेसर गै नेम गो पण सरीर ऊं पाप गै नेम गो पालण करूं हूं। झिका लोग यीसू मसी पर बिस्वास करै है बानै परमेसर गी सजा कोनी मिलैगी। क्यूंकै यीसू मसी गै सागै भागिदार होण गै कारण आपां नै पवितर आत्मा गै द्वारा एक नुओ जीवन मिल्यो। यीसू मसी आपां नै पाप गी गुलामी ऊं छुटकारो दिरवा दिओ अर आपां नै मोत अर परमेसर गी सजा ऊं बचा लिओ। आपणै मन गै पाप गै कारण मूसा गै नेम विधान नै समझ कोनी सक्या अर ईं नेम विधान गै द्वारा छुटकारो कोनी मिल्यो। ओ काम करण खातर परमेसर आपगै बेटै यीसू मसी नै मिनख गै रूप में संसार में घाल्यो अर बिमै बिलकुल पाप कोनी हो। आपगै बेटै यीसू मसी गै बलिदान गै द्वारा परमेसर मिनख जाती गै मन ऊं पाप गी ताकत नै तोड़ दियो। ईंखातर कै आपां नेम विधान गै अनुसार चाल सकां हां क्यूंकै अब आपां पाप गी बुरी इच्छा गै अनुसार कोनी पण पवितर आत्मा गै अनुसार ई जीवन बितावां हां। झिका लोग पाप गी बुरी इच्छा गै अनुसार चालै है बांगो सोच बिचार पाप गै अनुसार ई होवै है पण झिका लोग पवितर आत्मा गै अनुसार चालै है बांगो सोच बिचार पवितर आत्मा गै अनुसार होवै है। झिका लोग आपगै मन में बुरी इच्छा राखगे चालै है बे आखर में परमेसर गी सजा गै लायक बण जावैगा। पण झिका लोग पवितर आत्मा गै अनुसार चालै है बानै परमेसर अनन्त जीवन अर सांती बी देवैगो। अर कोई बी आदमी बुरी इच्छा ऊं सोचै है तो परमेसर गो बेरी बण जावै क्यूंकै ना तो परमेसर गै नेम विधान गै बस में है, अर ना हो सकै है। झिका लोग मन में बुरी इच्छा राखगे चालै है बे लोग परमेसर नै राजी कोनी कर सकै। पवितर आत्मा अब थारै जीवन में काम करै है। ईंखातर अब पवितर आत्मा गी आग्या गै अनुसार थारो जीवन चालै है पण पाप गै अनुसार कोनी। जे किंगैई जीवन में मसी गी आत्मा कोनी तो बो मसी गै पक्स में कोनी। जे थे यीसू मसी गी पक्स में हो तो थारो सरीर पाप गै कारण मरग्यो तो पतविर आत्मा थानै एक आच्छो जीवन देसी क्यूंकै थे परमेसर गी नजर में निरदोस बणग्या हो। अर जे यीसू मसी नै मरण ऊं जींवंतो करयो परमेसर गी आत्मा थारै में बसेड़ी है तो झिकै नै मसी नै मरेड़ा ऊं जींवंतो करयो बो थारै नास होणाळो सरीर गो बी आपगै आत्मा गै द्वारा झिको थारै में बसेड़ो है बिंगै द्वारा जींवंतो करैगो। हे मेरा भाईयो अर भेनों, पेलां आपां पाप गी गुलामी में हा। पण अब पाप गी बुरी इच्छा गै अनुसार बिलकुल कोनी रेणो चईयै। क्यूंकै पाप गी इच्छा गै अनुसार जिओगा तो मोत गो कारण बण जाओगा। पण पवितर आत्मा गी मदद ऊं पाप कोनी करो तो थे जिओगा। ईंखातर कोई बी आदमी जे परमेसर गी आत्मा गै द्वारा आपगो जीवन बितावै है तो बो परमेसर गी उळाद कुहासी। क्यूंकै झिकी आत्मा थानै मिली है बा पाप गी गुलामी में रेगे डराण खातर कोनी मिली। पण परमेसर गी उळाद होण खातर मिली है। ईं आत्मा गै द्वारा परमेसर नै आपां के सकां कै, हे पिता, मेरा पिता। आपां परमेसर गी उळाद हां, ओ समझण गै खातर पवितर आत्मा ई आपणी मदद करै। अर जे आपां परमेसर गी उळाद हां तो बिंगा वारिस बी हां, अर परमेसर गा वारिस अर मसी गा सागी वारिस हां। जे सच्च में आपां यीसू मसी गै दुख में सामिल हो जावां तो बिंगै सागै मान समान जरूर मिलैगो। क्यूंकै मैं समझूं हूं कै अब गो दुख परेसानी आपणै पर परगट होण आळी मेमा गै सामै कीं कोनी है। परमेसर गी बणाएड़ी सारी चीज ईं बात गी बड़ी जोरदार ऊं उडीक करण लागरी है कै कद परमेसर आपगी उळाद नै मान समान देवैगो। परमेसर आपगी बणाएड़ी सारी चिजां पर स्राप दियो। ओ बणाएड़ी चिजां गी इच्छा ऊं कोनी होयो पण ओ परमेसर आप ई करयो। पण फेर बी एक पक्की आस है कै परमेसर आपगी योजना गै अनुसार बणाएड़ी सारी चिजां नै मोत गी गुलामी ऊं छुटकारो देगे आपगै बेटा नै मेमा गी आजादी देवैगो। क्यूंकै आपां जाणा हां कै परमेसर गी बणाएड़ी सारी चिजां सरू ऊं लेगे अब तांई परेसानी अर दुख भोग्यो है जिंया एक लुगाई जापै गै टेम भोगै है। सारी बणाएड़ी चिजां एकली कोनी पण आपां बी बांगै सागै मन में भोत दुखी होवां हां। म्हानै पवितर आत्मा मिलगी, आ परमेसर गै एक वायदै गी निसानी है। ईंखातर म्हे उडीक करण लागरया कै परमेसर कद पाप गी बुरी इच्छा ऊं पूरी तरियां छुड़ागे आपगी उळाद बणासी। परमेसर आपां नै छुटकारो दियो बाई आपणी पक्की आस है। जे आपां नै कोई चीज मिलज्यै तो बिं पर ध्यान लगागे आस राखां तो बा आपणी आसा कोनी। झिकी चिजां आपां नै अजे तांई मिली कोनी अर बा चीज मिलण तांई बिं पर धीरज ऊं पक्की आस राखणी चईयै। ईं तरियां आपणी कमजोरी में पवितर आत्मा आपणी मदद करै है। कदी कदी जद आपां नै पराथना करणी कोनी आवै है जद बी पवितर आत्मा आपणी मदद करै अर आपणी परेसानी में पवितर आत्मा परमेसर गै सागै बिनती करै है। बा बिनती मिनख बोल कोनी सकै परमेसर आपणी मन गी बात नै जाणै है अर पवितर आत्मा के बोलै है बिनै बी जाणै है क्यूंकै पवितर आत्मा पवितर लोगां खातर परमेसर गी इच्छा गै अनुसार बिनती करै है। आपां जाणा हां कै परमेसर झिकै लोगां ऊं प्रेम राखै है परमेसर बां खातर हरेक बात भलाई खातर करै है। बां लोगां खातर झिका बिंगी इच्छा गै अनुसार बुलाएड़ा है। क्यूंकै झिका नै बण पेलां जाण लिया अर बानै पेलां ई ठेराया बी है कै बिंगै बेटै गै स्वरूप में होवै कै बो सारै भेन भाईयां ऊं पेलो होवै। फेर झिका नै बण पेलां ऊं ठेराया अर बानै बुलाया बी अर झिका नै बुलाया बानै परमेसर गी नजर में निरदोस बी ठेराया अर बानै मेमा बी दी। आं बातां ऊं आपां नै पतो लागै है कै जे परमेसर आपणै सागै है तो आपणो बिरोध करण आळो कोई कोनी हो सकै। परमेसर आपगै बेटै यीसू मसी नै आपगै खातर कोनी राखयो पण आपणै सारा खातर मरण नै सूंप दियो। बो बिंगै सागै आपां नै ओर सारो कीं मुफ्त में क्यूं ना देवैगो? परमेसर गै चुणेड़ा नै कोई बी दोसी बणा कोनी सकै क्यूंकै परमेसर आपगी नजर में बानै निरदोस बणाया है। परमेसर गै चुणेड़ा गो कोई बी न्याय कोनी कर सकै क्यूंकै मसी आपणै खातर मरग्यो अर सारा ऊं मोटी बात आ है कै परमेसर मसी नै मरेड़ा ऊं जींवंतो करयो अर मसी परमेसर गी दाहिणै ओर बेठगे आपणै खातर बिनती करै है। आपां नै कोई बी मसी गै प्रेम ऊं न्यारो कोनी कर सकै। चायै आपणै जीवन में कोई बी परेसानी दुख आवै, चायै दूसरा लोग आपां नै तंग करै, चायै खाण खातर अर पेरण खातर कीं ना होवै, चायै आपां नै कोई मारण गी कोसिस करै अर चायै आपां मर जावां ऐ सारी बातां आपां नै मसी गै प्यार ऊं न्यारा कोनी कर सकै। पवितर सासतर में इंया लिखेड़ो है। “तेरै खातर म्हे हर रोज मारण आळा गै हात में दिया जावां हां अर मारण आळी भेड़ जिसा समझया जावां हां।” मैं झिको कीं बोल्यो है बा सारी बातां में यीसू मसी झिको आपां नै प्रेम करै है बिंगै द्वारा आ सारी बातां पर पूरी तरियां ऊं जीत मिलै है। आ बात मैं जरूर जाणूं ऊं कै मैं प्रभु यीसू मसी गै प्रेम ऊं कोई बी चीज न्यारी कोनी कर सकै। चायै आपां जीआ चायै मरां, चायै सुरगदूत या बुरी आत्मावां, आज गै डर गी बातां अर आण आळै दुख गी बातां अर झिकी सकती आसमान में अर धरती पर है आं सारी बाता ऊं प्रभु यीसू मसी गै द्वारा आपां नै परमेसर झिको प्रेम दिखायो है बिंऊं कोई बी न्यारो कोनी कर सकै। मैं झिकी बात केऊं बा साची है बिमै कीं झूठ कोनी क्यूंकै मैं मसी गै सागै भागिदार हूं। पवितर आत्मा मेरै मन गै बिचार नै पक्को करै है। ईंखातर मेरै मन गै बिचार में कोई बी झूठ कोनी। मेरै मन में बोळो दुख है अर सदा तकलीफ देवंतो रेवै क्यूंकै मेरा यहुदी भाई भेन मसी पर बिस्वास कोनी करै। मेरा इसराएली भाई भेन मसी गै बिस्वास में आण खातर चावै परमेसर मनै सराप देगे मसी ऊं न्यारो कर दैय तो बी मनै दिकत कोनी। क्यूंकै बण इसराएली लोगां नै आपगी उळाद तरियां चुण लिया अर परमेसर कितो म्हान है बो बी बानै दिखायो। परमेसर बांगै सागै भोत इकरार कर'गे एक नेम विधान बी दियो। बानै परमेसर गी आराधना मिन्दर में जा'गे करणी बी सिखाई अर बांनै सारा नै वायदो बी दे दियो। बे लोग आपगै बडेरा गी पीढी गा हा। अर मसी माणस बणगे ईं पीढी में पैदा होयो। अर बोई सारां गै उपर परम परमेसर है अर बिंगी स्तुति सदां ई होंती रेवै। आमीन। परमेसर झिको वायदो करयो बिनै पूरो करै बिनै छोड़यो कोनी। ईंखातर कै झिका इसराएली जात गा है, बे सारा इसराएली कोनी। अर झिका अबरहाम गै जात ऊं पैदा होया बे सारा अबरहाम गी उळाद कोनी क्यूंकै पवितर सासतर में इंया लिखेड़ो है कै इसहाक ऊं पैदा होएड़ा ई तेरी उळाद कुहासी। झिका लोग अबरहाम ऊं सरीर गी इच्छा ऊं पैदा होया बे लोग परमेसर गी उळाद कोनी। पण झिका परमेसर गै वायदै गै अनुसार पैदा होया बे ई अबरहाम गी पीढी गी उळाद है। क्यूंकै परमेसर अबरहाम ऊं इंया वायदो करयो कै अगलै साल ईं टेम मैं जद अठै पाछो आऊंगा तो तेरी घराळी सारा एक बेटै नै जन्म देसी। अर आई बात कोनी बोई बेटो इसहाक आपणो बडेरो हो। इसहाक गो ब्या रिबका गै सागै हो'ग्यो अर बांगै जोड़ला टाबर बी हो'ग्या। परमेसर जद किनैई चुणै है तो बो बानै बांगै कामां गै द्वारा कोनी पण बो आपगी इच्छा गै द्वारा चुणै है। ईं बात गी जाणकारी देण खातर टाबरां गै जन्म ऊं पेलां ई अर टाबरां नै भलै बुरै करण ऊं पेलां ई परमेसर रिबका नै बता दियो कै तेरो छोटो बेटो मोटोड़ै बेटै पर हुकम चलावैगो। पवितर सासतर में इंया लिखेड़ो है कै मैं याकूब नै एसाव ऊं बोळो प्रेम करयो। इंगै बारै में आपां सोचा हां कै परमेसर पक्सपात करण आळो है। पण आ बात जमाई कोनी हो सकै। क्यूंकै परमेसर मूसा नै केयो जे मैं कीं पर दया करणी चाऊं तो बिं पर दया करूंगा अर जे कीं पर मेहर करणी चाऊं तो बिं पर मेहर करूंगा। ईंखातर जे किनैई चुणनो चावै है तो बां चुणिजण आळै आदमी गी इच्छा कोनी पण परमेसर आपगी दया गै अनुसार ई चुणै है। पवितर सासतर में आपां इंया पढा हां कै परमेसर मिस्र देस गै राजा फिरोन ऊं केयो, मैं तनै ईंखातर राजा बणायो कै, मैं आपगी ताकत थारै पर दिखाऊंगा अर बिंगै द्वारा सारी दुनिया नै मेरै बारै में पतो चालैगो। ईंखातर परमेसर झिकै पर दया चावै है बिं पर दया करै है अर झिकै गो मन पथर बरगो करणो चावै है तो बो बिंयाई करै है। थारै मू मनै केई पूछ सकै है कै परमेसर म्हारै उपर फेर पापां गो दोस क्यूं लगावै है। परमेसर के चावै है बिंगै बिरोध में कोई बी कीं कोनी कर सकै। हे मिनख, तूं कुण है झिको परमेसर गै सामणै उल्टो जबाब देवै। कुम्हार आपगी मरजी ऊं घड़ो बणावै है। घड़ो बिनै कदी कोनी के सकै कै तूं मनै इंया क्यूं बणायो। कुम्हार माटी गै एक ई गोळै ऊं दो तरियां गा घड़ा बणावै है। एक खास काम खातर अर दूसरो आम काम खातर क्यूंकै घड़ो बणाण आळै कनै इंया करण गो पूरो हक है। परमेसर आपगो काम इंयाई करयो क्यूंकै परमेसर कनै रीस अर ताकत दिखाण गो हक है। परमेसर झिका लोग बिनास गै लायक है बां पर आपगी सजा देण आळो हो फेर बी धीरज करै है। झिका लोगां पर पेलां ई परमेसर मान समान में भागिदार करण खातर चुणया है बां लोगां पर दया करी अर बानै दिखायो कै बो कितो म्हान है। बे चुणेड़ा लोग आपां हां। परमेसर यहुदी लोगां नै एकला कोनी चुणया पण गेर यहुदी लोगां नै बी चुण्या है। परमेसर गेर यहुदियां गै बारै में होसया गी किताब में इंया केयो है, “झिका लोग पेलां मेरा कोनी हा बानै अब मैं आपगा लोग केऊंगा अर झिकी लुगाई पेलां लाडली कोनी अब मैं बिनै लाडली केऊंगा।” अर होसया गी किताब में इंया बी लिखेड़ो है, “परमेसर झिकी जिग्यां पर केयो हो थे लोग मेरी उळाद कोनी, बिं जिग्यां पर ई केयो थे लोग जींवतै परमेसर गी उळाद कुहाओगा।” परमेसर गी बात बोलण आळै यसयाह बी इसराएली लोगां गै बारै में इंया केयो हो, इसराएली लोग समुंदर गी बेकळू रेत गै कणा गै बराबर है तो बी बामू थोडै़ ई लोगां गो उद्धार हो'सी। यसयाह गी किताब में इंयाईं लिखेड़ो है कै, “प्रभु झिको न्याय करण गो बचन लोगां नै दियो बो बचन भोत बेगो अर पूरी तरियां ऊं करसी।” यसयाह पेलां ई बतायो, “जे सरवसकतिमान परमेसर आपणी उळाद नै ना छोड़तो तो आपां सदोम अर ओमोरा गै लोगां गी तरियां होवंता।” फेर के बताणो है, गेर यहुदी लोग परमेसर गी नजर में निरदोस बणण खातर कीं कोनी करयो पण बां लोगां यीसू मसी गै उपर बिस्वास करयो ईंखातर बे परमेसर गी नजर में निरदोस बणग्या। इसराएली लोगां नेम विधान गो पालण कर'गे परमेसर गी नजर में निरदोस बणण गी कोसिस करी। पण इंया कोनी होयो। क्यूं इंया होयो? इसराएली लोगां इंया सोच्यो कै म्हे नेम विधान मानगे परमेसर गी नजर में निरदोस बणज्यांगा पण बां लोगां यीसू मसी पर बिस्वास करण गी इच्छा कोनी करी। यीसू मसी एक पथर जिसो है। इसराएली लोगां बिं पर बिस्वास करण गी इच्छा कोनी राखी, ईंखातर बिं पथर ऊं ठोकर खा'गे पड़ जाण बरगा हो'ग्या। पवितर सासतर में परमेसर इंया केवै, “देखो मैं यरुसलेम में ठोकर खा'गे पड़ण आळो एक पथर रखूंगा। झिका बिं पथर पर बिस्वास करसी बे कदी सरमसार ना हो'सी।” हे मेरा भाईयो अर भेनों, मैं पूरै मन ऊं परमेसर ऊं पराथना करूं कै, बांगी मदद ऊं मेरा इसराएली लोग बेगी मुकती पाल्यै। बां लोगां नै परमेसर गी आग्या गो पालण करणो अर परमेसर गै पीछै चालण गो बी भोत होंसलो दिखावै है। पण बो होंसलो परमेसर गै सई ग्यान पर कोनी टिकेड़ो है। परमेसर आपगी नजर में बां लोगां नै किंया निरदोस बणावै है बानै ठा कोनी। ईंखातर बे लोग अपणै आपनै निरदोस बणाण गी कोसिस करै इंया कर'गे बे परमेसर गी इच्छा नै कोनी मानै। मसी आण ऊं पेलां लोग परमेसर गी नजर में निरदोस बणन खातर नेम विधान गो पालण करता हा। पण मसी आण गै बाद इंया करण गी कोई जरूरत कोनी। क्यूंकै मसी गै उपर बिस्वास कर'गे सारा परमेसर गी नजर में निरदोस बण सकै। नेम विधान गै द्वारा परमेसर गी नजर में आच्छा बणाण आळै खातर मूसा इंया लिख्यो है कै झिको कोई नेम विधान गो पालण आच्छी तरियां करै है बां लोगां नै सदां गो जीवन मिलैगो। बिस्वास गै द्वारा परमेसर गी नजर में निरदोस बणण खातर पवितर सासतर में इंया लिख्यो है कै तूं अपणै आपनै इंया ना पूछ, म्हारै खातर मसी नै धरती पर ल्याण खातर सुरग में कुण जावैगो अर अपणै आपनै इंया ना पूछ कै मरेड़ा मू जींवंतो कर'गे मसी नै उपर ल्याण खातर मरेड़ा गी रेण गी जिग्यां में कुण जासी। पवितर सासतर में इंया लिख्यो है कै परमेसर गो बचन थारै कनै है अर ओ ई बचन थारै मन में है अर ओ ई बचन थे बोलो हो। बिस्वास गै द्वारा झिकै बचन गो परचार करां हां ओ ई बो बचन है। कै जे थे आपगै मूं ऊं केवो कै यीसू ई प्रभु है अर आपगै मन में हिसो बिस्वास राखो हो कै परमेसर बिनै मरेड़ा मू जींवंतो करयो तो थानै जरूर मुकती मिल ज्यैगी। क्यूंकै थे आपगै मन में हिसो बिस्वास राखो हो ईंखातर परमेसर गी नजर में निरदोस बणो हो अर थे आपगै मूं ऊं केवो कै यीसू ई प्रभु है ईंखातर परमेसर थानै मुकती देवै है। यसयाह गी किताब में इंया लिखेड़ो है कै झिको कोई बिं पर बिस्वास करै बो कदी सरमसार ना हो'सी। यहुदी अर गेर यहुदी में कोई फरक कोनी है क्यूंकै सारा गो प्रभु एक ई है। झिका लोग बिं पर बिस्वास करै है बानै बो भोत आसिस देवै है। पवितर सासतर में इंया लिख्यो है कै, “जे कोई प्रभु गो नाम लेवैगो तो बो मुकती पावैगो।” झिका लोग अजे तांई परमेसर पर बिस्वास कोनी करयो बे लोग परमेसर गो नाम किंया ले सकै है अर झिका लोग परमेसर गै बारै में सुणयो कोनी बे लोग परमेसर पर किंया बिस्वास करसी। जे बानै कोई परमेसर गै बारै में ना बतावै तो बे लोग किंया सुणैगा। जे बां कनै कोई परचार करण आळा ना घाल्या तो बे किंया परचार सुणैगा। ईंखातर पवितर सासतर में इंया लिखेड़ो है झिका लोग सुब समाचार सुणाण खातर आवै है जरूर ई बांगो आणो लोगां खातर भोत खुसी गी बात है। ईं सुब समाचार नै सारै लोगां कोनी मान्यो, यसयाह परमेसर गी बात बोलण आळो इंया केवै है, हे प्रभु थोड़ा ई लोग म्हारै बताएड़ै सुब समाचार पर बिस्वास करयो है। ईंखातर बिस्वास सुब समाचार सुणाण ऊं आवै है अर सुब समाचार मसी गै बचन परचार करण ऊं आवै है। पण मैं इंया पूछूं हूं कै इसराएली लोग सुब समाचार सुणै है के? “जरूर बां लोगां सुण्यो हो क्यूंकै पवितर सासतर में इंया बतावै है, परमेसर गो बचन परचार करण आळा सारी धरती पर परचार करयो अर बां झिको कीं केयो बो सारी जिग्यां पोंच ग्यो।” फेर बी मैं पूछूं हूं कै, इसराएली लोग सुब समाचार समझै है के? “जरूर बां लोगां समझयो क्यूंकै मूसा ऊं लिखेड़ी किताब में परमेसर इंया बतावै है कै थे यहुदी लोग, मेरो गेर यहुदी लोगां सागै प्रेम देखगे थारै में बळन हो'सी अर झिका लोग मेरै बारै में कीं कोनी जाणै बां लोगां नै मैं किंया संभालूं ओ देखगे थानै रीस आवैगी।” यसयाह बिना डरे फेर बी इंया केयो, “झिका लोग मनै कोनी ढूंढै हा बां मनै देख लियो अर झिका लोग मेरै बारै में कोनी पूछयो बानै मैं अपणै आप दिखायो।” पण इसराएली लोगां गै बारै में परमेसर इंया केवै है, “झिका लोग मेरो बिरोध करै है अर मेरी आग्या नै कोनी मानै बानै मैं आपगा बणाण खातर सदां ई आपगो हात फेलाए राख्यो।” मैं केऊं हूं कै परमेसर आपगै इसराएली लोगां नै छोड़ दिया है के? आ बात जमाई कोनी क्यूंकै मैं बी एक इसराएली हूं, अबरहाम गी पीढी ऊं अर बिन्यामीन जात गो हूं। परमेसर आपगै इसराएली लोगां नै भोत पेलां ऊं चुण लिया हा। परमेसर बां लोगां नै बिलकुल छोड़या कोनी। पवितर सासतर में एलियाह परमेसर गी बात बोलण आळै गै बारै में इंया लिखेड़ो है, एलियाह इसराएली लोगां गै बारै में परमेसर ऊं किंया पराथना करै है। इंगै बारै में थानै आच्छी तरियां पतो है। एलियाह इंया बोल्यो हो, हे प्रभु बां लोगां थारी बात बोलण आळा नै मार दिया अर बां लोगां थारी मिन्दर गी बेदी नै बी ढा दी। बां सारा ऊं मैं एक ई परमेसर गी बात बोलण आळो बच्यो हूं अर बे मनै बी मारणो चावै है। परमेसर एलियाह नै के जबाब दियो थानै याद है। परमेसर एलियाह ऊं बोल्यो, “मैं आपगै खातर अजे तांई सात हजार लोग बचागे राख्या है झिका अजे तांई बाल देवता गी पूजा कोनी करी।” अजे तांई परमेसर इसराएली लोगां मू केई लोगां पर किरपा कर'गे बचा राख्या है। परमेसर आपगी किरपा ऊं बां लोगां नै चुणयो ना बांगै आच्छा कामा नै देखगे। जे परमेसर बां लोगां गा आच्छा काम देखगे चुणै है तो परमेसर गी किरपा बिलकुल बेकार है। फेर के हो'ग्यो? झिका इसराएली लोग परमेसर गी नजर में निरदोस बणनो चावै हा पण इंया कोनी होयो। बामूं थोड़ा सा लोगां नै परमेसर चुण्या हा। बे लोग परमेसर गी नजर में निरदोस बणग्या। बचेड़ा लोगां गो मन परमेसर पथर बरगो कर दियो। पवितर सासतर में इंया लिखेड़ो है कै, “परमेसर बानै गूंगा बणा दिया। आंख होवंता होया बी बे देख कोनी सकै है अर कान होवंता होया बी बे लोग सुण कोनी सकै अर अजे तांई बी इंया होवै है।” दाऊद बी इंया केवै है, “बांगो खाणो पीणो बांगी ठोकर अर सजा गो कारण अर बे आच्छै दिना में बी जाळ में फस जावै। बांगी आंख्या धुंधळी होगी अर बांगै दुखां गै कारण कड़तू बांकी होगी।” मैं इंया पूछूं हूं के बे लोग ठोकर खा'गे पड़ग्या अर कदी उठ कोनी पाया, इंया है के? कदी कोनी, बां लोगां यीसू मसी पर बिस्वास कोनी करयो। ईंखातर परमेसर गेर यहुदी लोगां नै मुकती दी। अर यहुदी लोग गेर यहुदी लोगां पर बळन लागग्या। जे आं लोगां परमेसर गी बात ना मानी आ बात जगत गै लोगां खातर आसिस गो कारण हो'ग्यो अर बां लोगां गो घाटो गेर यहुदी लोगां गै फायदै गो कारण हो'ग्यो। जे बे लोग बी परमेसर गी बात मानसी तो भोत लोगां नै बांगै द्वारा आसिस मिलसी। हे गेर यहुदी लोगो, अब मैं थारै सागै बात करूं हूं, थानै सिखाण खातर मनै परमेसर एक खास चेलो बणा गे थारै कनै घाल्यो, मेरै खातर आ एक भोत खास बात है। मैं इयां आस राखूं हूं कै थानै देखगे मेरा आपगा इसराएली लोगां नै बळन होणी चईयै कै बे लोग बी यीसू मसी पर बिस्वास कर'गे मुकती पा ल्यै। जद इसराएली लोग परमेसर ऊं दूर हो'ग्या हा जद गेर यहुदी लोग झिकां गो परमेसर सागै कोई संबन्ध कोनी हो, परमेसर बांगै सागै संबन्ध राख्यो। जद परमेसर इसराएली लोगां सागै संबन्ध राखयो तो बो इंया होयो जिंया एक मरेड़ो आदमी जींवंतो हो'ग्यो। जे परमेसर नै चढाऐड़ो पेलो पेड़ो आच्छो है तो बचेड़ो सारो गूंदेड़ो आटो बी आच्छो है अर जे एक दरखत गी जड़ आच्छी है तो दरखत गा सारा डाळा अर डाळियां बी आच्छी है। परमेसर यहुदी लोगां ऊं झिका एक जेतुन दरखत जिसा हा बिमुं फळ लेण खातर लगाया अर बानै संभाळया। पण गेर यहुदी लोग खाली जिग्यां में उगेड़ा दरखत जिसा है। परमेसर आपगै लगाएड़ै दरखत गी डाळी बाडगे खाली जिग्यां में उगेड़ै दरखत गी डाळी बाडगे परमेसर गै लगाएड़ै दरखत गै मा पेंद कर दी। ईंखातर झिकी डाळी पेंद कर दी बा डाळी अब पेलां आळै आच्छै दरखत गी जड़ सागै जुड़ गी अर बिनै बिंऊं ताकत मिलै। आच्छै दरखत गी डाळियां बाडगे तूं झिको खाली जिग्यां गै दरखत गी डाळियां नै जोड़ दी। इंया सोचगे तूं बिलकुल घमण्ड ना करी। तूं इंया याद राखी कै डाळी कदी जड़ नै कोनी संभालै पण जड़ डाळी नै संभालै है। फेर तूं केवैगो, आच्छी डाळियां नै बाडगे मनै पेंद कर दियो है। आ बात सई है। बां लोगां यीसू मसी पर बिस्वास कोनी राख्यो ईंखातर परमेसर बानै बाड दिया अर थानै जोड़ दिया क्यूंकै थे यीसू मसी पर बिस्वास करयो। ईंखातर घमण्ड ना करियो अर डरगे रेईयो। जे परमेसर पेलां आळी डाळियां पर दया कोनी करै तो थारै पर बी दया कोनी करसी। ईं बात गो ध्यान राखो, परमेसर दया बी करै है अर सजा बी देवै है। झिका लोग बिंगी बात कोनी मानै बानै बो जरूर सजा देवै। थे बिं पर बिस्वास करयो ईंखातर बण थारै पर दया करी। थे बिं पर बिस्वास कोनी करो तो थानै बी बां डाळियां तरियां बाड देसी। जे यहुदी लोग फेर ऊं परमेसर पर बिस्वास करसी तो बानै बी परमेसर बिं आच्छै दरखत सागै पेंद कर'गे जोड़ देसी क्यूंकै बिंगै कनै हक है। क्यूंकै थे झिका खाली जिग्यां में उगेड़ा दरखतां गी डाळी नै बाडगे आच्छो फळ देण आळै दरखत गै सागै जोड़ दिया। इंया है तो बिं दरखत गी सागी डाळियां जोड़ण में परमेसर नै कोई दिकत कोनी। मेरा भाईयो अर भेनों, थे अपणै आपनै समझदार ना बणाओ। ईंखातर मैं इंया चाऊं कै परमेसर गी लुकागे राखेड़ी बाता नै जाणल्यो कै कीं इसराएली लोगां गो मन पथर बरगो हो'ग्यो। सदां ई आं लोगां गो मन इंया कोनी रेवैगो अर जिता गेर यहुदियां नै परमेसर चुण्यो है बे आच्छी तरियां जद परमेसर पर बिस्वास कर लेवैगा तो बां इसराएली लोगां गो मन नरम हो जावैगो। इंया परमेसर इसराएली लोगां नै मुकती देसी। पवितर सासतर में इंया लिखेड़ो है, “मुकती देण आळो सियोन ऊं आवैगो अर याकूब गी पीढी गा लोगां गा बुरा काम पूरी तरियां दूर करसी। पवितर सासतर में इंया बी लिखेड़ो है, मेरो एक इकरार जद बांगै सागै होवैगो जद मैं बांगै पापां नै माफ कर देऊंगा।” पण बे यहुदी लोग सुब समाचार पर बिस्वास कोनी करयो। ईंखातर परमेसर बांगै सागै बेर राख्यो है, ईं बात ऊं थे गेर इसराएली लोगो थानै फायदो होणै गो कारण हो'ग्यो। पण इसराएली लोग अजे तांई परमेसर गा चुणेड़ा लोग है क्यूंकै बांगै बाप दादा गै सागै करेडै़ वायदै गै अनुसार परमेसर अब बी बां लोगां सागै प्रेम करै है। परमेसर आपगै चुणेड़ै लोगां नै कदी कोनी भूलै अर कदी आपगो देयड़ो वरदान पूठो कोनी लेवै। थे गेर यहुदी लोग, पेलां परमेसर नै कोनी मानता हा पण अब परमेसर थारै पर दया करी क्यूंकै इसराएली लोग बिनै मान्यो कोनी। इंयाईं इसराएली लोग अब परमेसर गी आग्या कोनी मानै। फेर बी परमेसर आण आळै दिनां में बां पर दया करसी जिंया पेलां थारै पर करी ही। परमेसर सारै लोगां पर दया करणी चावै है ईंखातर परमेसर सारा नै बांगी आग्या ना मानण गो मोको दियो। सच्च में परमेसर आपगी बुद्धी अर ग्यान ऊं सारो कीं बणायो, ओ सारा गी समझ ऊं बारै है। बिंगै काम करण गो तरिको किंगैई समझ कोनी आवै। पवितर सासतर में इंया लिख्यो है कै, “प्रभु गै सोच बिचार गै बारै में कुण जाणै है? अर बिनै राए देण आळो कुण है?” पवितर सासतर में इंया बी केवै है, “परमेसर नै पेलां कणैई कीं दियो है के? झिके गै बदळै में परमेसर पाछो कीं दे सकै?” क्यूंकै सारो कीं परमेसर कनूं आवै अर सारों कीं परमेसर ई बणायो अर सारो कीं बिंगो ई है। सदां ई बिनै आदर मान देवंता रेवां। आमीन। ईंखातर हे भाईयो अर भेनों, परमेसर गी देएड़ी दया ऊं मैं थारूं बिनती करूं हूं कै थे पूरी तरियां ऊं आपगो जीवन परमेसर नै बलिदान गै रूप में चढाओ झिको परमेसर नै आच्छो लागै है। ओ ई है परमेसर गी सेवा करण गो सच्चो रा। ईं संसार गै लोगां तरियां थे ना जीओ पण परमेसर नै थारो सोच बिचार बदळन दैयो। इंया करोगा तो थानै पतो लागसी कै परमेसर गी इच्छा गै अनुसार किंया चालणो है, परमेसर नै किंया राजी करणो है अर परमेसर गी पूरी तरियां पक्की इच्छा गो पतो लगावंतो रेवो। परमेसर मनै आपगी बात बताण खातर चुण लियो, ईं हक ऊं मैं थानै बताऊं कै अपणै आपनै जिंया समझणो चईयै बिंऊं बढगे कोई बी अपणै आपनै मोटा ना समझो पण परमेसर पर आपगै बिस्वास गै कारण झिका खास गुण आपां नै दिया है बानै आच्छी तरियां समझो। आपणै हरेक गै सरीर में न्यारा न्यारा अंग है अर बे सारा अंग एक दूसरै ऊं जुडे़ड़ा है अर आं सारा अंगा गो न्यारो न्यारो काम है। इंयाई आपां मसी पर बिस्वास करण आळा बिंगै सरीर बरगा बणग्या अर आपां सारा न्यारा न्यारा अंग हां। अर हर एक अंग गो एक दूसरो गै सागै मेल मिलाप है। परमेसर आपणै उपर दया कर'गे न्यारा न्यारा वरदान दिया है। जे परमेसर आपगी बात बताण गो वरदान थानै दियो है तो परमेसर थानै देऐड़ै बिस्वास गै अनुसार दूसरा नै बतावो। जे किनैई दूसरा गी मदद करण गो वरदान मिल्यो है तो इंयाई करता रेवो अर जे किनैई दूसरा नै सिखाण गो वरदान मिल्यो तो इंयाई करता रेवो। जे किनैई दूसरा नै दिलासो देण गो वरदान मिल्यो है तो बो आपगै पूरै मन ऊं दिलासो देवै। जे किनैई दूसरा नै कीं देण गो वरदान मिल्यो है तो बो पूरै मन ऊं देवंता रेवै। जे किनैई दूसरा गी अगवाई करण गो वरदान मिल्यो है तो बो बिनै पूरी हिम्मत गै सागै करै अर जे किनैई दूसरै पर दया करण गो वरदान मिल्यो है तो बो पूरी खुसी गै सागै करतो रेवै। थे दूसरा गै सागै बिना कपट ऊं प्रेम करो, अर भलो काम पूरै मन ऊं करो पण बुरै काम ऊं दूर रेवो। जिंया एक घर गा लोग आपसरी में प्रेम करै है बिंयाई थे दूसरा गै सागै प्रेम करो अर थे दूसरा नै आप ऊं मोटा समझो अर बांगो आदर मान करता रेवो। थे बोळी मेनत करता रेवो अर आळसी ना बणो। पूरै मन ऊं प्रभु गी सेवा करता रेवो। थे सदां खुसी गै सागै रेवो क्यूंकै परमेसर आण आळै दिना में थारै पर के करै है बां पर पक्की उडीक राखो। जद कोई दुख आवै बिं टेम धीरज राखो अर सदां ई पराथना करता रेवो। परमेसर गै पवितर लोगां नै कीं चीज गी जरूरत है तो बांगी जरूर मदद करो अर थारै घरे कोई आवै तो बिंगो आच्छी तरियां आदर मान करो। झिका थानै तंग करै है बानै आसिस दैयो अर सराप ना दैयो। झिका खुस है बांगै सागै खुस रेवो अर झिका दुख में है थे बांगै दुख में भागिदार हो जावो। सारा गै सागै आच्छो मेल मिलाप अर सांती ऊं रेवो अर कदी घमण्ड ना करो पण दूसरा लोग झिका नै कीं कोनी समझै बांगै सागै उठ बेठ राखो अर अपणै आपनै ग्यानवान ना समझो। झिका थारै पर बुरो करै है, थे बांगै सागै बुरो ना करो, दूसरा लोग झिकै काम नै आच्छो जाणै है बोई करो। थारूं जितो बी होवै, दूसरा गै सागै सांती ऊं रेवो। हे भाईयो अर भेनों, जे कोई थारै सागै कीं करै है थे बिंगै बदळै में कीं ना करो। पण परमेसर नै बिंगो न्याय करण दैयो। क्यूंकै पवितर सासतर में इंया लिख्यो है, “प्रभु केवै है, बदळो लेणो मेरो ई काम है, मैं बानै बदळो देऊंगा।” पवितर सासतर में इंया बी केवै है कै, “जे तेरो दुसमण भूखो है तो बिनै रोटी खुवा दे, जे तीसो है तो बिनै पाणी प्या दे क्यूंकै जे तूं इंया करसी तो बिनै ई सरम मारसी।” कोई बी थारै सागै बुरो काम करै तो थे बिंगै बदळै में कीं बुरो काम ना करो। भलाई कर'गे बुराई नै जीत ल्यो। सारा बिस्वासी भेन भाईयां गो फरज बणै कै बे सारै छोटा अर मोटा सरकारी अफसरां गी बात जरूर मानणी चईयै क्यूंकै ओ सारो अधिकार परमेसर बानै दियो है। झिका लोग बां अफसरां गी बात कोनी मानै तो बे परमेसर गी बात कोनी मानै क्यूंकै बो सारो कीं परमेसर ई बणायो है झिका लोग इंया करसी बानै सजा जरूर मिलसी। झिका लोग आच्छा काम करै है बानै अफसरां ऊं डरण गी कोई जरूरत कोनी पण झिका बुरा काम करसी बानै अफसरां ऊं डरणो पड़सी। ईंखातर जे थे अफसरां ऊं डरणो कोनी चावो हो तो आच्छा काम करो जद बे थानै आच्छा बतासी। परमेसर सारै अफसरां नै ईंखातर बणाया कै संसार में रेण आळै सारै लोगां गी भलाई करण खातर सेवा करै। जे तूं गळत काम करसी तो तनै जरूर डरणो पड़सी क्यूंकै बांगै कनै थानै सजा देण गो अधिकार है अर ओ अधिकार बानै परमेसर दियो है। ईंखातर थे अफसरां गी बात कोनी मानो तो थानै सजा मिलसी इंया सोचगे बां अफसरां गी बात माना पण थे जाणो हो कै इंया करणो सई बात है। ईंखातर थे अफसरां नै सारै कामा गी चुंगी देणी चईयै क्यूंकै झिको काम परमेसर बानै दियो है बो एक सेवा गै रूप में पूरो हो'ज्यै। ईंखातर झिकै झिकै काम गी चुंगी देणी है बानै चुंगी देणी चईयै अर झिका नै मामलो देणो है बानै मामलो दैयो अर जिंऊं डरणो चईयै बाऊं डरो अर झिका गो आदर मान करणो है बांगो आदर मान करो। थे आपसरी में प्रेम करण गै अलावा कदी किंगा करजदार ना बणो क्यूंकै झिको कोई दूसरा ऊं प्रेम राखै है बो परमेसर गी आग्या नै पूरी तरियां पालण करै है। क्यूंकै परमेसर गै नेम विधान में आ आग्या बतावै है, बेबीचार ना कर, किनैई ना मार, चोरी ना कर अर दूसरां गी चिजां देखगे लाळच ना कर। परमेसर गी पूरी आग्या मिलगे एक ई आग्या गै बारै में बतावै है बा आई है कै जिंया तूं अपणै आप सागै प्रेम करै है बिंयाई दूसरा सागै कर। जे आपां दूसरा सागै प्रेम करांगा तो बां लोगां सागै बुरो काम कोनी कर सकां। ईंखातर जे आपां दूसरा सागै प्रेम राखां हां तो परमेसर गी आग्या गो पूरी तरियां पालण करां हां। अब आपां हिसै टेम में जीण लागरया हां इंगो थानै जरूर पतो है। ईंखातर झिको कीं मैं थानै बतायो है बिंयाई करता रेवो। क्यूंकै झिकै टेम आपां यीसू मसी पर बिस्वास करयो जद परमेसर म्हानै देण आळै उद्धार ऊं भोत दूर हा पण अब ओ भोत कनै आ ग्यो है। ईंखातर थे चेतगे रेवो। पाप गै कारण संसार रात जिसो है पण अब रात बितगी अर चानणो होण आळो है। इंगो मतलब ओ है कै यीसू मसी जल्दी आण आळो है। ईंखातर आपांनै सारा बुरा काम छोड़णा चईयै अर जिंया एक सिपाई बन्दुक लेगे तैयार रेवै है बिंयाई आपांनै बी दिन गै चानणै में आच्छा काम करतां रेणो चईयै। जिंया दिन में चानणो रेवै है बिंयाई आपांनै बी चानणै में रेगे सीधी चाल चालणी चईयै। दूसरां गी पाल्टी में जा'गे दारू पीगे उल्लु नई बणनो चईयै, बेबीचार अर सरम आण आळा काम नई करणा चईयै, बळण राखगे दूसरां गै सागै लड़ाई झगड़ो नई करणो चईयै। जिंया प्रभु यीसू मसी गो जीवन हो जिंया थे बी जीओ अर थारै मन गी बुरी इच्छा करण गी बात बी छोड़ दैयो। हे भाईयो अर भेनों जे थारै सागै आळा में किंगोई बिस्वास कम है तो बानै आपगै सागै मिला ल्यो। बांगै भेदभाव गै बारै में कोई बी बात ना करो। केई इंया मानै है कै बे सारी तरियां गी खाण आळी चिजां खावंता हा। पण बिस्वास में कमजोर लोग एकली सब्जी ई खावै है। सारी चीज खाण आळा लोग दूसरा नै झिका एकली सब्जी खावै बाऊं आपनै मोटो ना समझो। झिका एकली सब्जी खावै है बे दूसरा नै बुरा ना केवै। क्यूंकै आं दोना लोगां नै परमेसर ई स्वीकार करयो है। आपणा हरेक बेली परमेसर गा सेवक लोग है। ईंखातर दूसरां गै सेवकां पर दोस लगाणो आपणो हक कोनी है। बे झिको गळत या सई करै है बांगो फेंसलो करण आळो परमेसर है झिको बांगो मालिक है। सई काम करण खातर प्रभु बां लोगां नै खड़या कर सकै। केई लोग कीं दिना नै दूसरा दिना ऊं खास मानै है। पण केई लोग हरेक दिना नै खास मानै है। ईंखातर हरेक आदमी नै आपगै सोच बिचार में पक्को रेणो चईयै। झिका लोग कीं दिना नै दूसरै दिना ऊं खास मानै है बे लोग प्रभु गो आदर मान करै है। बिंयाई झिका लोग सारी तरियां गी चीज खावै है बे लोग बी प्रभु नै आदर मान देण खातर खावै है। इंगै द्वारा बे लोग परमेसर गो धन्यवाद बी करै। झिका लोग एकली सब्जी खावै बे लोग ईंखातर खावै है कै प्रभु नै आदर मिलै अर परमेसर गो धन्यवाद बी होवै। आपां झिका प्रभु में हां, आपां लोग आपणै खातर कोनी जींया पण प्रभु खातर जींया हां अर आपणै खातर कोनी मरां पण प्रभु खातर मरां हां। ईंखातर आपां जींया या मरा आपां प्रभु गा ई हां। ईं कारण मसी मरग्यो अर जी उठयो हो झिका लोग अब जीयै है अर पेलां मरग्या हा, बां सारां गो प्रभु बोई है। ईंखातर दूसरा झिका बिस्वास में है बां पर दोस ना लगावो अर बानै आप ऊं छोटा ना समझो क्यूंकै आपां सारा नै एक दिन परमेसर गै सामै न्याय खातर खड़यो होणो ई पड़सी। पवितर सासतर में इंया लिखेड़ो है, “प्रभु केवै है, मैं जींवंतो परमेसर हूं। ईंखातर सारा नै मेरै सामै झुकणो ई पड़ैगो अर सारी मिनख जाती परमेसर नै मान ल्यैगी।” ईंखातर आपां सारा नै आपगै कामा गो लेखो परमेसर नै देणो ई पड़सी। ईंखातर आपां कदी बी किंगैई उपर दोस ना लगावां अर आपणै बिस्वासी भाई भेनां गो बिस्वास कम होण आळा अर पाप करण आळा कोई बी काम आपां ना करां। प्रभु यीसू मसी मनै साफ रीति ऊं समझायो कै हर खाण आळी चीज, खाण खातर आच्छी है पण जे कोई मिनख कीं खाण गी चीज नै आच्छी ना समझै तो बिंगै खातर बा आच्छी कोनी। जे थारै बिस्वासी भाई भेन नै थे आपगी खाण गी चिजां ऊं बिस्वास में कमजोर करो हो तो थे बानै सई रीति ऊं प्रेम कोनी करो। ईंखातर थारै खाण गी चीज गै द्वारा कोई भाई भेन नै बिस्वास में लारै ना हटण दैयो क्यूंकै बांगै खातर बी मसी आपगी जान दी। ईंखातर झिको काम तूं करै है तनै आच्छो लागै है पण दूसरा नै कोजो लागै है तो तूं बो काम ना कर। परमेसर गै राज में खाणै पीणै गो कोई मतलब कोनी। बिंगो राज इंया होवै है कै झिका लोग परमेसर गी नजर में आच्छो जीवन जीवै है अर सांती ऊं अर झिकी खुसी पवितर आत्मा ऊं मिलै है। जे कोई ईं रीति ऊं मसी गी सेवा करै है तो परमेसर बिं पर खुस हो'सी अर लोग बिनै आदर मान बी देसी। ईंखातर आपणो जीवन दूसरै गै जीवन में सांती देण गो कारण बणज्यै अर जिंऊं दूसरै लोगां गो बिस्वास पक्को होण में बी मदद मिलज्यै। थारै खाणै पीणै ऊं परमेसर गै काम नै ना बिगाड़ो। हर एक चीज खाण खातर सुद्ध है। पण जे थारै खाण गी चीज ऊं दूसरा लोग पाप में पड़ज्यै तो हिसी चीज ना खाओ। अर जे तेरै खाणै पीणै या कोई दूसरो काम करण ऊं तेरा बिस्वासी भाई भेन बिस्वास में हटै तो तूं इंया ना कर। आं बातां गै बारै में तूं किंया बिस्वास राखै आ बात किनैई बताण गी जरूरत कोनी। आ बात तेरै अर परमेसर गै बिचाळै रेण दे। झिका लोग आपगी नजर में झिको काम आच्छो समझै है अर बिं काम नै बुरो कोनी मानै तो बां लोगां नै आसिस मिलैगी। पण जे कोई आदमी आपगै मन में बेम राखगे खावै है तो बो पाप करै है। बे लोग बिना बिस्वास ऊं इंया करै है। ईंखातर बे परमेसर गी सजा गै लायक बण चुक्या है। झिको कीं बिस्वास ऊं कोनी, बो पाप है। आपां झिका बिस्वास में पक्का लोग हां अर झिका लोग बिस्वास में कमजोर है बांगै सागै धीरज ऊं बांगी मदद करणी चईयै अर अपणै आपनै राजी करण खातर कीं ना करो। आपणै में हर एक आदमी गो फरज बणै कै दूसरै हर एक भाई भेनां गो बिस्वास नै पक्को करणो चईयै अर बांगी भलाई कर'गे बानै राजी करणो बी चईयै। क्यूंकै मसी अपणै आपनै राजी कोनी करयो। पवितर सासतर में इंया लिखेड़ो है कै, “हे परमेसर झिकी बुरी बात लोग थानै बोलता हा, बाई बात मेरै खातर बोलै है।” पवितर सासतर में झिकी बात पेलां लिखेड़ी है बे सारी बातां आपांनै सिखाण खातर है। ऐ बातां आपांनै धीरज अर होंसलो भदाण खातर मदद करै है अर झिको वायदो परमेसर पवितर सासतर में आपांनै दियो बिं पर आस राखण में बी मदद करै है। परमेसर थानै धीरज अर होंसलो बढाण गी मदद करी है बोई परमेसर थानै दूसरै गै सागै एक मन होगे रेण खातर मदद करै है जिंया यीसू मसी आपां नै कर'गे दिखायो। कै अब थे सगळा एक सागै मिलगे एक ई मन ऊं आपणै प्रभु यीसू मसी गै पिता परमेसर नै आदर मान देणो चईयै। ईंखातर मेरा भाईयो अर भेनों, जिंया यीसू मसी परमेसर नै आदर मान देण खातर थानै अपणाया बिंया थे बी एक दुसर नै अपणाओ। मैं थानै एक बात बताऊं हूं कै परमेसर यहुदी लोगां गै बडेरा सागै झिको वायदो करयो हो बिनै पक्को करण खातर यहुदी लोगां में मसी बांगो सेवक बणग्यो। अर गेर यहुदी लोग बी दया गै कारण परमेसर गो आदर मान करै। पवितर सासतर में इंया लिखेड़ो है कै, “मैं गेर यहुदी लोगां में तेरो धन्यवाद करूंगा अर तेरै नाम गो भजन गाऊंगा।” पवितर सासतर में इंया बी लिखेड़ो है, “थे गेर यहुदी लोगो परमेसर गा चुणेड़ा यहुदी लोगां सागै रळगे खुसी मनाओ।” अर फेर बी परमेसर गै बचन में इंया लिखेड़ो है, “हे गेर यहुदी लोगो प्रभु गी आराधना करो अर धरती पर रेण आळी सारी जाती गा लोगो थानै बिंगी आराधना करणी चईयै। ” पवितर सासतर में परमेसर गी बात बोलण आळो यसयाह बी इंया केवै है, “यिसै गी पीढी ऊं एक राजा पैदा होवैगो अर बो संसार गै गेर यहुदी लोगां पर राज करसी अर बे सारा बिं पर आस बी राखसी।” मैं चाऊं हूं कै सारा नै आस देण आळो परमेसर थारै लोगां गै बिस्वास गै द्वारा थारै मन में सांती अर खुसी देवै, कै पवितर आत्मा गी ताकत ऊं झिकी आसा थानै है बा ओर बी बोळी होवंती जावै। मेरा भाईयो अर भेनों, मैं जरूर जाणूं हूं कै, थे भोत भलाई ऊं भरेड़ा आच्छा लोग हो। परमेसर कनूं मिलेड़ी सिक्सा गै बारै में थानै भोत ग्यान है। ईं ग्यान गै द्वारा थे दूसरै लोगां नै सिखा सको हो कै, के गळत अर के सई है? मैं थानै कीं ओर याद कराण खातर बड़ी हिम्मत गै सागै ओ खत लिखूं हूं। ओ बिं किरपा गै कारण होयो झिकी परमेसर मनै दी है कै मैं गेर यहुदी लोगां गै बिचाळै मसी यीसू गो सेवक बणगे एक याजक गै रूप में परमेसर गै सुब समाचार गी सेवा करूं। ईंखातर मैं बां लोगां नै परमेसर गै सामै एक बलिदान गै रूप में ल्या सकूं झिकैऊं परमेसर खुस होवै क्यूंकै बे लोग पवितर आत्मा गै द्वारा सुद्ध हो'ज्यै। क्यूंकै मनै अपणै आप पर घमण्ड करण में कीं बी सरम कोनी आवै क्यूंकै यीसू मसी गी मदद ऊं परमेसर गी सेवा करूं हूं। मेरै द्वारा यीसू मसी गेर यहुदी लोगां में झिका बी काम करया बानै छोडगे ओर कोई बी बात बोलण गी हिम्मत मेरै कनै कोनी। गेर यहुदी लोगां बी यीसू मसी गी बातां मानण खातर मेरै द्वारा बोलेड़ा बचन सुणगे अर पवितर आत्मा गी ताकत ऊं मेरै द्वारा करेड़ी निसानी अर चमत्कार देखगे बां लोगां बिस्वास करयो। इंया कर'गे मैं यरुसलेम सैहर ऊं लेगे इल्लुरिकुम परदेस तांई मसी गो सुब समाचार सारै लोगां नै पूरी तरियां सुणायो। मैं हिसी जिग्यां में जा'गे सुब समाचार गो परचार करणो चाऊं जठै अजे तांई मसी गो नाम कोनी लियो। इंया ना होवै कै जिंया केई दूसरा गी खोदेड़ी नीव पर घर बणाणो चावै है बिंयाई दूसरा गै करेड़ै परचार पर चालगे परचार करण में मैं कोनी चाऊं। पवितर सासतर में लिखेड़ी योजना गै अनुसार मैं चालूं, सासतर में इंया लिखेड़ो हो, “झिका लोगां नै बांगै बारै में कोनी बतायो बे लोग बांगै बारै में देखैगा, अर झिकै लोगां कदी बी बांगै बारै में सुणयो कोनी बे लोग बानै समझैगा।” जठै अजे तांई सुब समाचार कोनी सुणायो गेयो मैं बठै जा'गे सुब समाचार भोत टेम तांई सुण्यो। ईंखातर थारै कनै आण में देर लागगी। अब मैं आं सारा परदेसा में सुब समाचार सुणाण गो काम पूरो कर दियो। ईंखातर मैं जद स्पेन देस में जाण गै टेम थारै कनै रुकूंगा क्यूंकै थारै कनै आ'गै थानै मिलण गी मेरी इच्छा भोत साला ऊं ही। ईंखातर जद मैं थारै कनै कीं दिन खुसी गै सागै रेण गै बाद मनै आस है कै मेरी आ'गै गी यातरा में बी थे मनै मदद करोगा। पण मैं अब यरुसलेम सैहर गै बिस्वासी लोगां गी सेवा करण खातर बांगै कनै जाण लागरयो हूं क्यूंकै मकदुनिया अर अखया गै बिस्वासी लोगां यरुसलेम सैहर गै परमेसर गै पवितर लोगां नै देण खातर मनै कीं दान बी दियो है। बां लोगां झिको दान दियो बड़ी खुसी गै सागै दियो क्यूंकै ओ देण खातर बे यरुसलेम गै बिस्वासी लोगां गा करजदार हा। यहुदी बिस्वासी लोगां कनूं गेर यहुदी लोगां परमेसर गी बाता सुणी ही। ईंखातर बानै संसारिक बाता में बांगी मदद करणी चईयै ही। ईंखातर मेरो बो काम पूरो कर'गे अर झिको दान कठो करयो है बो बानै देगे स्पेन जावंता टेम थारै माखर जाऊंगा। मैं इंया जाणूं हूं, मैं जद बठै आऊंगा तो आपां सारा नै मसी गी पूरी आसिस मिलैगी। मेरा भाईयो अर भेनों, आपां सारा प्रभु यीसू मसी पर बिस्वास करां हां। मैं थारूं पवितर आत्मा गै द्वारा मिलेड़ै प्रेम ऊं बिनती करूं हूं। मेरै सागै मिलगे परमेसर ऊं सच्चै मन ऊं पराथना करता रेवो। थे लोग इंया करो कै यहुदी परदेस में झिका लोग बिस्वास कोनी करै। बां लोगां ऊं बचगे रेऊं अर झिको दान में यरुसलेम गै लोगां खातर ले जाण लागरयो हूं बो बी खुसी गै सागै अर रा में कोई परेसानी ना आवै। कै परमेसर गी इच्छा गै अनुसार मैं थारै कनै आऊंगा अर जिंऊं आपां एक दूसरै नै हिम्मत दे सकां। मैं पराथना करूं हूं कै आपणो सांती देण आळो परमेसर थारै सागै रेवै। आमीन। हे मेरा भाईयो अर भेनों किखिया सैहर गी बिस्वासी मण्डली गी सेवा करण आळी आपणी भेन फेबे गै खातर ईं खत गै द्वारा बिनती करूं हूं, थे बिनै प्रभु में एक बिस्वासी भेन तरियां आपगै सागै रळा ल्यो क्यूंकै बा परमेसर गै लोगां बिचाळै आदर गै लायक है। जे बिनै कोई चीज गी जरूरत है तो बिनै थे मदद करो क्यूंकै बण पेलां मेरी अर दूसरै लोगां गी मदद करी ही। मेरी ओर ऊं भेन प्रिस्का अर भाई अक्विला नै निमस्कार केवो। ऐ दोनूं मेरै सागै यीसू मसी गी सेवा करण आळा है। मेरो जीवन बचाण खातर आं दोना आपगो जीवन खतरै में रेड़ दियो। ईंखातर मैं अर सारी गेर यहुदियां गी बिस्वासी मण्डली धन्यवाद करै है। झिकी बिस्वासी मण्डली बिंगै घरे कठी होवै है बिनै बी मेरी ओर ऊं निमस्कार केवो। मेरा प्यारा बेली इपनितुस झिको आसिया परदेस गो पेलो बिस्वासी है बिनै बी मेरी ओर ऊं निमस्कार केवो। मरियम नै बी मेरी ओर ऊं निमस्कार केवो क्यूंकै बण थारै खातर भोत मेनत करी ही। अन्दरनीकुस अर युनियास नै मेरी ओर ऊं निमस्कार केवो। ऐ दोनूं मेरा रिस्तेदार है अर मेरै सागै जेळ में बी रेया हा। खास चेला लोग बानै भोत आदर मान देवंता हा अर मेरै बिस्वास में आण ऊं पेलां बे बिस्वास में आया हा। मेरै भाई अम्पलियातुस नै बी मेरी ओर ऊं निमस्कार केवो। बण प्रभु में बिस्वास करयो। ईंखातर मैं बिनै भोत प्रेम करूं हूं। भाई अरबानुस झिको म्हारै सामै यीसू मसी गी सेवा करी है। मेरै प्यारै बेली इस्तुखुस नै बी मेरी ओर ऊं निमस्कार केवो। भाई अपिल्लेस नै बी मेरी ओर ऊं निमस्कार केवो। बो यीसू मसी गो इमानदार अर सच्चो आदमी हो। अर अरिस्तुबुलुस गै घर में रेण आळा सारा बिस्वासी भेन भाईयां नै बी मेरो निमस्कार केवो। मेरो भाई हिरोदियोन झिको मेरो रिस्तेदार है बिनै बी निमस्कार केवो। नरकिस्सुस गै घर में रेण आळा सारा झिका प्रभु पर बिस्वास राखै है बानै बी निमस्कार केवो। दोनों भेना तरुफेना अर तरुफोसा अर मेरो बेली परसिस सारा प्रभु गै काम में भोत मेनत करै है अर बानै बी मेरी ओर ऊं निमस्कार केवो। भाई रुफस झिको प्रभु गी सेवा करण खातर चुण्यो है अर बिंगी मां मेरी मां बरगी है बां दोना नै मेरी ओर ऊं निमस्कार केवो। असुंक्रितुस अर फिलगोन अर हिरमोस, पतरोबास अर हिरमास अर बांगै साथी भाईयां अर भेनां नै बी निमस्कार केवो। भाई फिलुलुगुस अर भेन यूलिया नै मेरो निमस्कार केवो अर भाई नेरेयुस अर बिंगी भेन अर भाई उलुम्पास अर बिंगै सागै रेण आळा सारा बिस्वासियां नै मेरी ओर ऊं निमस्कार केवो। सगळा नै पूरै मन ऊं निमस्कार केवो अठै गी मसी गी सारी बिस्वासी मण्डली गा भाई भेन लोग थानै निमस्कार केवै है। हे मेरा भाईयो अर भेनों, मैं थानै चेतो कराऊं। थानै मिलेड़ी सच्ची सिक्सा गै अलावा दूसरी सिक्सा देण आळा ऊं दूर रेवो क्यूंकै बे लोग थानै न्यारा न्यारा करसी अर बिस्वास में बी कमजोर करसी। क्यूंकै हिस्या लोग प्रभु मसी गी सेवा कोनी करै है। बे आपगै पेट गै बारै में सोचैगा। बे मीठी मीठी बाता बोलगे भोळै भाळै लोगां नै फसा ल्यै। सारा भेन भाई जाणै है कै थे परमेसर गी इच्छा ऊं चालो हो। ईं बात गी मनै भोत खुसी है। मेरी इच्छा आई है कै झिको काम आच्छो है बिनै आच्छी तरियां समझाओ अर झिको काम बुरो है बिंऊं दूर रेवो। सांती देण आळो परमेसर आपां नै सैतान पर बेगो ई पूरी तरियां जीत दिरासी अर मैं पराथना करूं कै आपणो प्रभु यीसू मसी थारै पर दया करै। मेरै सागै सेवकाइ करण आळो तीमुथियुस थानै निमस्कार केवै है। मेरा रिस्तेदार बेली लुकियुस अर यासोन अर सोमिपतरुस बी थानै निमस्कार केवै है। मैं, तिरतियुस झिको ओ खत लिखण लागरयो हूं थानै प्रभु गै नाम ऊं निमस्कार केऊं हूं। भाई गायुस गै घर में मैं अजे तांई रुकेड़ो हूं झिकै गै घर में बिस्वासी लोग आराधना करण खातर कठा होवै है। बो थानै निमस्कार केवै है। ईरातुस झिको नगर गो भण्डारी है अर भाई क्वारतुस बी थानै निमस्कार केवै है। मैं पराथना करूं हूं कै आपणो प्रभु यीसू मसी थानै सांती देवंतो रेवै। आमीन। परमेसर गी स्तुति होवै। मैं यीसू मसी गै बारै में बोलेड़ै सुब समाचार गै द्वारा परमेसर थानै बिस्वास में पक्का करै। बिं सुब समाचार नै परमेसर भोत साला तांई लुकोगे राख्यो हो। पण अब बो सारा पर परगट करयो है। ईं सुब समाचार गो मैं अब परचार करूं हूं। पेलां परम परमेसर गी आग्या ऊं परमेसर गी बात बोलण आळा आपगी किताबा में इंगै बारै में बतायो हो। अब ओ सुब समाचार सारी दुनिया में लोगां नै सुणाणो चईयै कै बे लोग बी बिस्वास ऊं परमेसर गी आग्या गो पालण करै। परमेसर झिको हर तरियां गै ग्यान ऊं भरेड़ो है। बोई सदां खातर आदर गै लायक है क्यूंकै बण ई यीसू मसी नै संसार में भेज्यो है। मैं पौलुस ओ खत आपणै बिस्वासी भाई सोस्थिनिस गै सागै कुरुन्थी सैहर में रेण आळै बिस्वासियां खातर लिखण लागरयो हूं। मनै परमेसर आपगी इच्छा गै अनुसार यीसू मसी गो खास चेलो कर'गे बुलायो है। ओ खत थारै खातर है झिका यीसू मसी में पवितर करया है। अर सारा लोग बठै ई रेगे आपगै प्रभु यीसू मसी गै नाम गी पराथना करै है बांगै खातर बी लिखण लागरयो हूं। बो बांगो अर आपणो सारां गो बी प्रभु है। थानै पिता परमेसर अर प्रभु यीसू मसी गी ओर ऊं किरपा अर सांती सदां ई मिलती रेवै। आमीन। हे मेरा भाईयो अर भेनों, थानै यीसू मसी गी ओर ऊं परमेसर गी किरपा मिली है। ईंखातर मैं थारै खातर परमेसर गो सदां धन्यवाद करूं हूं। थे यीसू मसी गै सागै एक होण गै कारण थानै आत्मिक जीवन में भोत आसिस मिली। परमेसर गो बचन समझण अर दूसरा नै समझाण खातर बी ग्यान मिल्यो है। म्हे थानै झिकी सारी बातां यीसू मसी गै बारै में बताई है बे साची है। अब थानै ईं बात गो पतो लागग्यो है। परमेसर थानै सारा नै सारा आत्मिक वरदान दिया है। ईंखातर थे सगळा आपणै प्रभु यीसू मसी गै आण गी उडीक करता रेवो। प्रभु यीसू मसी सारी माणस जाती गो न्याय करण खातर आण गै टेम तांई परमेसर थानै पाप ऊं बचागे थारै बिस्वास नै मजबूत कर'गे राखसी। आपगै बेटै प्रभु यीसू मसी गी संगती में थानै बुलाण आळो परमेसर बिस्वास लायक है। हे मेरा भाईयो अर भेनों, मैं थानै प्रभु यीसू मसी गै नाम ऊं बिनती करूं कै थे लोग आपसरी में लड़ाई झगड़ा कर'गे न्यारा न्यारा ना हो। थारा सारा कामां में एक मन अर एक बात होवै। क्यूंकै खलोए भेन गै घर गै लोगां मनै पेलां बतायो कै थारै बिचाळै लड़ाई झगड़ा होवैे। मेरो केण गो मतलब ओ है कै थारै मू लोग न्यारी न्यारी बातां करै है। कोई केवै, “म्हे पौलुस गै सागै हां,” कोई केवै, “म्हे अपुलुस गै सागै हां,” कोई केवै, “म्हे पतरस गै सागै हां” अर केई केवै, “म्हे मसी गै सागै हां।” आ बात बिलकुल गळत है। मसी न्यारा न्यारा झुण्ड कोनी बणाया। मैं पौलुस थारै खातर करूस पर मरयो कोनी अर मेरै नाम में थे बतिस्मो बी कोनी लियो। कोई बी इंया कोनी बोल सकै कै मैं पौलुस गै नाम में बतिस्मो लियो है। ईंखातर मैं परमेसर गो धन्यवाद देऊं कै भाई क्रिसपुस अर भाई गयुस नै छोड़गे मैं किनैई बतिस्मो कोनी दिओ। अर ओ बी मनै याद है कै भाई स्तिफनुस गै घराणै गै लोगां नै मैं बतिस्मो दियो। क्यूंकै मसी मनै बतिस्मो देण खातर कोनी घाल्यो पण सुब समाचार सुणाण खातर घाल्यो। मैं सुब समाचार बतावंतां टेम आपगी समझ कोनी बरतूं, जे मैं इंया करतो तो लोग मसी गै करूस पर मरण गी बात नै भूल जावंता अर बिनै इतो आदर कोनी देवंता। नास होण आळा लोग मसी गै करूस पर मरण गी बात नै म्हत्व कोनी देवै। पण आपां मुकती मिलेड़ा लोग आ बात जाणा हां कै आ परमेसर गी ताकत है। पवितर सासतर में इंया लिख्यो है कै, “मैं संसार गै ग्यानी लोगां नै कोई म्हत्व कोनी दियो। मैं इंया कर'गे दिखाऊंगा कै बे लोग बिलकुल ग्यानी कोनी। ” इंऊं मनै पतो लागग्यो कै दुनिया गै ग्यानी लोगां गै ग्यान गी कोई किमत कोनी। अर मूसा गै नेम विधान नै सिखाण आळा गी कोई किमत कोनी। संसार में बाद विवाद करण आळा गी कोई किमत कोनी। परमेसर दुनिया ऊं मिलण आळै ग्यान नै कोई म्हत्व कोनी देवै। परमेसर ग्यानी है। अर बण इंया फेंसलो लियो कै दुनिया गा ग्यानी लोग आपगै ग्यान ऊं परमेसर नै मान कोनी सकै। पण इंगै बदळै में म्हारै द्वारा मसी गै बारै में परचार करण आळै सुब समाचार पर बिस्वास करण आळा नै बचाणो परमेसर नै आच्छो लाग्ग्यो। यहुदी लोग सुब समाचार नै म्हत्व कोनी देवै क्यूंकै बे लोग सुब समाचार नै मानण खातर कोई निसान देखणो चावै अर गेर यहुदी लोग ईं सुब समाचार नै मानण खातर ग्यान मांगै है। जद म्हे यीसू मसी गै करूस गी मरण गी बात यहुदी लोगां नै बतावां तो बां लोगां नै ईं बात पर बिस्वास करण में दिकत होवै अर गेर यहुदी लोग ईं बात नै मूरखता गी बात समझै। पण परमेसर गा चुणेड़ा यहुदी अर गेर यहुदी लोगां खातर मसी परमेसर गी ताकत अर ग्यान है। परमेसर गी मूरख योजना संसार गै ग्यानी लोगां गी योजना ऊं उतम है। अर परमेसर गी कमजोरी संसार गै लोगां गी ताकत ऊं भोत ताकतवर है। हे मेरा भाईयो अर भेनों, जद थानै परमेसर बुलाया, बिं टेम गै बारै में थे सोचो। दुनिया गा लोग थानै इता ग्यानी कोनी समझै अर ना थे लोग इता ताकतवर हा अर ना थे कोई ऊंचै परिवार ऊं आया। परमेसर ग्यानी लोगां नै सरम मारण खातर संसार गै मूरख लोगां नै चुण लिया अर संसार में ताकतवर लोगां नै सरम मारण खातर संसार गा बां लोगां नै चुण लिया झिका खास कोनी। संसार गी खास बातां नै नास करण खातर परमेसर नीचा अर झिका कीं काम गा कोनी बानै चुण लिया। परमेसर ऐ सारी बातां ईंखातर करी कै कोई बी माणस बिंगै सामै घमण्ड ना करै। परमेसर थानै यीसू मसी गै सागै मिलायो अर बचायो। परमेसर मसी गै द्वारा आपां नै ग्यान दियो अर बण ई आपां नै परमेसर गै सामै धरमी बणाया अर बण ई आपां नै परमेसर गै सामै पवितर लोग बणाया अर बण ई आपां नै सारी बुराई ऊं छुड़ाया। ईंखातर पवितर सासतर में इंया लिख्यो कै, “कोई बी माणस घमण्ड करणो चावै तो बो प्रभु गी करेड़ी बातां नै याद कर'गे घमण्ड करै।” हे मेरा भाईयो अर भेनों, जद मैं थारै कनै पेली बारी आण गै टेम ओखै सब्दा ऊं अर ग्यान ऊं सुब समाचार कोनी बतायो। जद मैं थारै कनै बठै हो तो मैं ओ फेंसलो लियो कै करूस पर मरेड़ै यीसू गै अलावा ओर कोई बात ना जाणूं। मैं दीनता अर डर गै सागै कांपतो होयो थारै कनै आयो। जद मैं थारै सागै परचार करतै टेम मेरै ग्यान ऊं कीं कोनी बतायो पण मैं पवितर आत्मा गी सकती ऊं बतायो। मैं माणस गै ग्यान ऊं कोनी पण परमेसर गी ताकत पर भरोसो राखण खातर आ बात कैई। जद म्हे थारै कनै सुब समाचार बोलता टेम ग्यान गी बात कोनी बताई पण जद म्हे परमेसर गै रा पर चालण आळा पक्का बिस्वासियां नै सुब समाचार सुणायो तो ग्यान ऊं सुणायो। ओ ग्यान ईं संसार अर संसार गै अधिकारियां गो ग्यान कोनी क्यूंकै ईं संसार गै अधिकारियां गो ग्यान खत्म हो जावै। झिको ग्यान म्हे बतावां हां बो परमेसर गो लकोगे राखेड़ो ग्यान है। परमेसर धरती बणाण ऊं पेलां फेंसलो लियो कै परमेसर गो ग्यान आण आळै दिनां में आपां सारा नै एक आच्छो जीवन जीण खातर मदद देसी। परमेसर गी ईं ग्यानी योजना गै बारै में ईं संसार गै अधिकारी लोगां नै पतो कोनी हो। जे इंगै बारै में जाणता तो बे लोग प्रभु नै कदी करूस पर ना चढावंता। पवितर सासतर में इंया लिखेड़ो है कै, “परमेसर आपगै प्रेम करण आळै लोगां गै सागै करेड़ी बातां गै बारै में अब तांई कणी कोनी देखी अर कणी सुणी बी कोनी अर इंगै बारै में कणी सोच्यो बी कोनी। ” पण परमेसर ऐ बातां आपगी आत्मा गै द्वारा आपां सारा पर परगट करी क्यूंकै बाई आत्मा सारी चिजां नै आच्छी तरियां समझै अर परमेसर गै मन गी गेहरी बातां नै बी समझै। कोई माणस गै मन गी बात बिंगै बिना ओर कोई दूसरो कोनी जाण सकै। बिंयाई परमेसर गी बातां परमेसर गी आत्मा ई जाणै। परमेसर आपां सारा नै आपगी आत्मा दी। ईंखातर परमेसर आपां नै देयेड़ी बातां नै जाणै है अर संसार गा लोग जिंया सोचै बिंया आपां सारा कोनी सोचा। माणस ऊं मिलेड़ै ग्यान ऊं म्हे थानै कोनी सिखावां पण परमेसर गै मिलेड़ै ग्यान ऊं सिखावां हां। परमेसर गी आत्मा ऊं मिलेड़ी साची बातां म्हे पवितर आत्मा मिलेड़ै लोगां नै बतावां। झिकै माणस नै पवितर आत्मा कोनी मिली, परमेसर गी आत्मा ऊं बताएड़ी बातां नै समझै कोनी। बे आं बाता नै मूरखता गी बातां समझै। पवितर आत्मा मिलेड़ा माणस ई परमेसर गी आत्मा ऊं बताएड़ी बातां समझ सकै। पवितर आत्मा मिलेड़ा माणस हर एक बात समझण में कामयाब होवै। पण झिका नै पवितर आत्मा कोनी मिली बे लोग पवितर आत्मा मिलेड़ै माणसां गै बिचारां नै कोनी समझ सकै। पवितर सासतर में इंया लिखेड़ो है कै, “प्रभु गै मन नै कोई कोनी जाणै है। प्रभु नै कोई बी सिखा कोनी सकै।” पण आपां आं बातां नै समझा हां क्यूंकै आपणै में मसी गो मन है। हे मेरा भाईयो ओर भेनों, जद मैं थारै कनै हो तो जिंया पवितर आत्मा मिलेड़ा लोगां नै सिखाणो चईयै बिंया मैं थानै कोनी सिखायो। पण मैं ईं दुनिया गै लोगां गै सागै जिंया बात करणी चईयै बिंयाई थारूं बात करी। जद थे बिस्वास में इता मजबूत कोनी हा ईंखातर जिंया छोटा टाबरां सागै बात करीजै बिंयाई थारूं बात करी। ईंखातर जिंया टाबरां नै रोटी कोनी खुवाईजै अर दूध प्याईजै बिंयाई थानै परमेसर गो बचन भोत सोखै तरियां ऊं सिखायो। बिं टेम थानै ओखो बचन समझ कोनी आवै हो। अजे तांई थे लोग बिंयाई हो। अजे तांई थे लोग दुनियां गै लोगां गै पापी सभाव तरियां जीओ हो। थे लोग दूसरा पर बळो अर लड़ाई झगड़ा करो हो। आं बाता ऊं पतो लागै कै थे दुनिया गी बुराईयां गै सागै चालो अर थारै अर दुनियां गै लोगां में कोई फरक कोनी। थारै मू कोई बोलै है, “मैं पौलुस गो चेलो हूं” अर कोई बोलै है, “मैं अपुलुस गो चेलो हूं।” फेर बी थे लोग दुनिया गा लोग झिका परमेसर नै कोनी जाणै बांगै बरगा हो। थे बताओ, पौलुस कुण है? अपुलुस कुण है? म्हे परमेसर गा सेवक हां। म्हे लोग थानै यीसू मसी पर बिस्वास करण में मदद करी। प्रभु म्हानै इंया करण में सहायता करी। मैं थानै एक बूंटो लगाण गी तरियां सुब समाचार गो काम थारै मा चालू करयो अर अपुलुस बुंटा में पाणी घालण गी तरियां थानै ओर सिखागे आ'गै लेग्यो। पण बुंटा नै मोटा करण आळा म्हे कोनी। परमेसर थारै बिस्वास नै मजबूत कर'गे बिं काम नै पूरो करयो। बुंटा लगाण आळो अर पाणी घालण आळो कीं कोनी। परमेसर ई खास है क्यूंकै बुंटा नै मोटो करण आळो बोई है। बुंटा लगाण आळो अर पाणी घालण आळै में कोई फरक कोनी। दोनूं एक बरगा है। परमेसर दोनां नै बांगै काम गै हिसाब ऊं मजदूरी देवैगो। क्यूंकै म्हे परमेसर गा साथी हां। थे लोग परमेसर गै खेत बरगा हो अर परमेसर गै बणाएडै़ घर बरगा हो। परमेसर मेरै पर करेड़ी किरपा ऊं एक आच्छो मिस्तरी मकान बणावंता टेम जिंया नींव घालै बिंयाई मैं थारै में प्रभु गो काम सरू करयो। जिंया नींव गै उपर रदा लगागे मकान ऊंचो करयो जावै बिंयाई मेरै सरू करेड़ै काम नै दूसरो आ'गै करै। पण जिंया नींव घालण आळो अर मकान बणाण आळो जिमेदारी ऊं काम करै है बिंयाई परमेसर गो काम हर एक आदमी जिमेदारी में करै। परमेसर यीसू मसी नै एक नींव जिंया ठेहरायो। एक नींव गै उपर दूसरी नींव कोनी घाली जा सकै बिंयाई परमेसर ठेरेड़ी नींव यीसू मसी गै उपर ओर कोई रक्सा करण आळो कोनी हो सकै। परमेसर गा देयेड़ा काम इमानदारी ऊं करया बे लोग बिं नींव गै उपर सोनो, चांदी या भोत मेंगै पथर गा बणाएडै़ रदै बरगा है अर झिका लोग परमेसर गो काम इमानदारी ऊं कोनी करयो हो'सी बे लोग बिं नींव गै उपर काठ या घास फूस गा बणाएड़ा रदै बरगा हो'सी। एक दिन हर एक माणस गो काम परख्यो जावैगो। जद न्याय गै दिन सारां गा काम सामणै परगट हो जावैगा। बिं दिन किसी चीज आच्छी है अर किसी चीज माड़ी है पतो चालैगो। क्यूंकै ऐ सारी चिजां आग ऊं परखी जावैगी। आच्छी चिजां ऊं बणाएड़ी नींव आग में बच जावैगी अर बिमै काम करण आळा लोगां नै बांगी मजदूरी मिलसी। अर कमजोर चिजां ऊं बणेड़ी नींव आग में बळ जावैगी अर बिमै काम करण आळा नै मजदूरी कोनी मिलैगी। पण आग ऊं ऐ लोग बच जावैगा। थे लोग जाणो हो कै थे परमेसर गा मिन्दर हो अर परमेसर गी आत्मा थारै में वास करै। जे कोई परमेसर गै मिन्दर नै नास करैगो तो परमेसर बिनै नास करैगो क्यूंकै परमेसर गो मिन्दर पवितर है। अर बोई मिन्दर थे हो। अपणै आपनै मूरख ना बणावो। जे कोई इंया सोचै कै, “मैं ईं संसार गै हिसाब ऊं ग्यानी हूं तो बो सच्च में अपणै आपनै ग्यानी बणाण खातर मूरख समझै।” ईं दुनिया गो ग्यान परमेसर गी नजर में मूरखता है। पवितर सासतर में इयां लिखेड़ो है कै, “परमेसर बोळी होसियारी करण आळा ग्यानी लोगां नै पकड़ लेवै। ” पवितर सासतर में इंया बी लिखेड़ो है कै, “जद लोग सोचै है कै ‘म्हे ग्यानी हां,’ तो प्रभु बानै कीं काम गा कोनी समझै। ” ईंखातर कोई बी माणस पर घमण्ड ना करै। क्यूंकै परमेसर सारो कीं थारी भलाई खातर करयो है। परमेसर मनै अर अपुलुस अर पतरस नै थारी भलाई खातर घाल्या। परमेसर ईं संसार नै थारी भलाई खातर बणायो। थे जीओ अर मरो बो बी परमेसर थारी भलाई खातर करै। अर परमेसर अब गी सारी आच्छी चिजां अर आण आळै दिनां गी सारी चिजां थारी भलाई खातर देवैगो। पण याद राखियो, थे लोग मसी गा हो अर मसी परमेसर गो है। ईंखातर कोई बी जन म्हारै बारै में इंया सोचणो चईयै कै म्हे मसी गा सेवक हां अर परमेसर आपगै लकोगे राखेड़ै ग्यान गो भंडार थानै समझाण खातर म्हानै दे दियो। हर एक सेवक आपगै मालिक गै सागै इमानदारी ऊं काम करण आळो होणो चइयै। थे लोग या कोई माणसां गो न्याय करण आळो मेरै बारै में कीं बोलै तो बिंऊं कीं कोनी होवै। मेरो काम भलो है या बुरो है, इंगै बारै में मैं बी कोनी सोचूं। मेरो मन साफ है। इंगो मतलब ओ कोनी कै मैं लगातार आच्छा काम करूं। मनै परखण आळो प्रभु है। ईंखातर प्रभु आण ऊं पेलां कोई बी चीज गै उपर न्याय ना करो। प्रभु आ'गे अंधेरै में लुकेड़ी बातां नै चानणै में दिखावैगो अर लोगां गै मन गी बात बतावैगो अर बिं टेम परमेसर गी ओर ऊं हरेक आदमी गै कामां गै अनुसार न्याय होवैगो। हे मेरा भाईयो अर भेनों, मैं आपगै नाम नै अर अपुलुस गै नाम नै मिसाल गै रूप में बतायो है। जे थे मेरै द्वारा पवितर सासतर में लिखेड़ी बातां नै ध्यान ऊं पढोगा तो थे लोग इंया कोनी के सकोगा कै एक सेवक दूसरै सेवक ऊं बोळो मोटो है। दूसरा ऊं मोटो समझण खातर तेरै कनै के है? परमेसर कनूं मिलेड़ी चिजां नै छोडगे तेरै कनै के है? तूं घमण्ड गै सागै इंया किंया बोल सकै कै ओ सारो कीं मैं आप ई करयो, परमेसर कनूं कोनी होयो। थे इयां ना सोचो कै थानै के चिजां गी जरूरत है बे चिजां पेलां थारै कनै है। थे इयां ना सोचो कै पवितर आत्मा ऊं मिलण आळी सारी आत्मिक आसिस म्हारै कनै है। अर थे इंया ना सोचो है कै म्हे सेवक लोगां नै छोडगे राज करण लागरया हां। जे थे लोग राज करो तो आच्छी बात है क्यूंकै म्हे बी थारै सागै राज कर सकां। मैं इंया सोचूं हूं कै परमेसर म्हानै सेवक लोगां नै इता खास कोनी बणाया। म्हे लोग बां लोगां बरगा हां झिका नै दूसरै लोगां गै सामणै मारण खातर ले जावै। क्यूंकै आ बात संसार गा सारा लोग अर सुरगदूत बी देखै। म्हे सेवक लोग यीसू मसी गै बारै में परचार करां हां ईंखातर लोग म्हानै मूरख समझै है। थे लोग इंया सोचो हो कै, “म्हे ग्यानी लोग हां क्यूंकै म्हे यीसू मसी गै सागै एक हो'ग्या।” लोग म्हारै बारै में इंया सोचै है कै, “म्हारै कनै कोई अधिकार कोनी।” थे लोग इंया सोचो कै, “म्हारै कनै ताकत है। लोग थारो आदर मान करै है पण म्हारो आदर कोनी करै।” ईं टेम तांई म्हारै कनै खाण पीण खातर कीं कोनी हो। पेरण खातर आच्छा गाबा बी कोनी हा। लोग म्हानै मारता हा। म्हे इनै बिनै फिरता रेवंता क्यूंकै म्हारै कनै रेण खातर घर बी कोनी हो। म्हे भोत काम कर'गे आपगो गुजारो करता हा। लोगां म्हानै बुरी बातां बोली तो म्हे बानै आसिस दी अर जद लोगां म्हानै तंग करया तो म्हे सेह लियो। जद लोग म्हारो नाम बदनाम करै तो म्हे बांगै सागै आच्छी तरियां बात करां। सरू ऊं आज तांईं लोगां म्हानै बिलकुल कचरै जिंया समझ्या। मैं थानै सरम मारण खातर ऐ बातां कोनी लिखण लागरयो हूं पण मैं आपगै टाबरां जिंया समझगे थानै आग्या देऊं। यीसू मसी गै बारै में थानै भोत लोग सिखाण आळा होणता तो बी मैं एक पिता जिस्यो पेली बारी थारै कनै सुब समाचार लेगे आयो। ईं कारण थे लोग यीसू मसी पर बिस्वास करयो। ईंखातर मैं थानै बिनती करूं हूं जिंया मैं मसी गै रा पर चालूं बिंया थे बी चालो। ईं कारण मैं तीमुथियुस नै थारै कनै घालूं हूं। बो प्रभु पर बिस्वास करै अर मेरै बेटै जिस्यो है। मैं बिंऊं प्रेम करूं अर प्रभु गै काम में बी मैं बिं पर भरोसो राखूं। जद बो थारै कनै आवैगो तो थानै बतावैगो कै मैं प्रभु में किंया चालूं जिंया मैं न्यारी न्यारी जिग्यां में जा'गे बिस्वासी लोगां नै बतायो हो। थारै मू केई लोग इंया सोचै है कै पौलुस म्हारै कनै कोनी आवैगो। थे लोग इंया सोचगे घमण्ड करो हो। पण जे प्रभु गी इच्छा है तो मैं थारै कनै बेगो ई आऊंगा। मैं आ'गे बांगै घमण्ड गी बात कोनी देखणो चाऊं पण बे प्रभु गो काम किती ताकत ऊं करै बो देखणो चाऊं। जे परमेसर म्हारै में राज करै तो परमेसर गै बारै में बात करण गै अलावा म्हानै हर एक काम परमेसर गी ताकत ऊं करणो ई पड़सी। अब थे लोग सोच्यो कै जद मैं थारै कनै आऊंगा तो मैं थारै सागै किंया करूं? जद तांई मैं थारै कनै आऊं थे थारी गळती नै समझल्यो नई तो मैं मेरै अधिकार ऊं समझाऊंगा। पण जे थे ठीक हो'ग्या तो मेरी दया अर प्रेम थानै दिखाऊंगा। थारै बिचाळै गळत काम होण लागरया है। आ बात मैं सुणी। परमेसर नै ना मानण आळा बी हिस्या काम कोनी करै। मैं इंया सुण्यो कै थारी बिस्वासी मण्डली में एक आदमी आपगै पिता गै दूसरी घराळी गै सागै रेवै। आ बात होण गै बाद बी थे लोग घमण्ड करो हो। ईं बात ऊं थानै दुख होणो चईयै। हिस्या गळत काम करण आळै माणस नै थारै बिचाळ ऊं काड देणो चईयै। मैं सरीर गै रूप में थारै कनै कोनी पण मन ऊं थारै कनै हूं। इंया मानो कै मैं थारै सागै होगे गळत काम करण आळै आदमी नै बिंगै खिलाफ में आपगो फेंसलो सुणा दियो। अर थे लोग प्रभु यीसू गै नाम ऊं भेळा होण गै टेम अर मैं मन ऊं थारै सागै होण गै टेम आपां प्रभु यीसू मसी गै नाम ऊं अर बिंगी ताकत ऊं बिं गळत काम करण आळै आदमी नै सैतान गै हात में देणो चईयै क्यूंकै बिंगो बुरो सभाव नास होणो चईयै अर जद प्रभु मसी गै दुसर आण गै टेम बिंगी आत्मा बच जाणी चईयै। फेर बी थे लोग घमण्ड करो हो। आ बात आच्छी कोनी। थे लोग जाणो हो कै थोड़ो सो खमीर पूरै गुंदेड़ै आटै नै खमीर बणा दैय। ईंखातर पुराणै खमीर नै छोडगे अपणै आपनै सुद्ध करो। अर बिना खमीर गो गूंदेड़ो आटो बण जाओ क्यूंकै यहुदियां गै फसह गै त्यूंहार गै टेम एक मेमणियै गी भेंट चढायी जावंती इंयाई यीसू मसी आपणै सारै पापां खातर बलिदान हो'ग्यो। ईंखातर आपां बिना कपट अर सच्चाई ऊं बिना खमीर गी रोटी ऊं फसह गो त्यूंहार मनावां झिको ना पुराणै खमीर ऊं अर ना बुराई ऊं, अर ना दुस्टता गै सागै होवै। बेबीचार करण आळै गै सागै संबन्ध कोनी राखण गै बारै में पेलां ई मैं थानै लिख्यो है। मैं ईं संसार गै अबिस्वासी लोगां गै बारै में कोनी झिको बेबीचार करै है, अर लाळची, लुटेरा, अर मूरती पूजा करण आळा। इंया है तो थानै ईं संसार ऊं निकळ जाणो चईयै। पण अब मैं थानै लिखण लागरयो हूं कै थारै में कोई माणस बो गळत काम करै है अर लाळची है, अर मूरती पूजा करै है, अर दूसरा गै खिलाफ बुरी बात बोळण आळो है, अर पियक्ड़ है, अर लुटेरो है तो बिंगै सागै मेळ ना राखो अर ना'ई खाणो पीणो करो। बिस्वासी मण्डली गै बारै गै लोगां गो न्याय करणो मेरो काम कोनी। ओ काम परमेसर करसी। बिस्वासी मण्डली गै मा झिका लोग पाप करै है बांगो न्याय करणो थारो काम है। पवितर सासतर में इंया लिखेड़ो है कै, “बुरा काम करण आळा नै थारै मू काड दैयो। ” थारै में एक बिस्वासी गो दूसरै बिस्वासी गै सागै कोई लड़ाई झगड़ो होवै तो बिंगो फेंसलो करवाण खातर थे अबिस्वासी लोगां कनै क्यूं जावो? थारा झिका बिस्वासी पवितर लोग है बांगै कनै जाणो चईयै। ईं बात गो थानै पतो कोनी कै आण आळै दिनां में थे परमेसर गा पवितर लोग ईं संसार गो न्याय करोगा। जे थे संसार गो न्याय कर सको हो तो आ छोटा लड़ाई झगड़ा गो फेंसलो क्यूं कोनी करो हो? थे कोनी जाणो कै आपां आण आळै दिनां में सुरगदूतां गो बी न्याय करांगा। इंया है तो थानै संसार गी बातां गो फेंसलो करण में के दिकत है? जे थानै संसार गै लोगां गो न्याय करण गो अधिकार है तो थे थारै आपसरी गै झगड़ा नै लेगे अबिस्वासी कनै क्यूं जावो? ईं बात गी थानै सरम आणी चईयै। थारै बिस्वासी लोगां गै झगडै़ गो फेंसलो करण खातर थारै में कोई ग्यानी कोनी के? थारै बिचाळै लड़ाई झगड़ो होण गै टेम थे फेंसलो करवाण खातर अबिस्वासी लोगां कनै जावो, आ बात जमाई ठीक कोनी। जद थे एक बिस्वासी नै अबिस्वासी लोगां कनै न्याय करण खातर ले जाओ तो थे परमेसर गी नजर में हारग्या। इंगै अलावा जे बण बिस्वासी थारै खिलाफ कीं करयो तो बिनै सेह लेणो चईयै अर जे बण बिस्वासी थानै लूट लियो है तो थे बिनै देणो ई चईयै। इंगै बदळै में थे लोग आपसरी में अन्याय करो हो अर एक दूसरै नै लूटो हो। ओ सारो कीं थे थारै बिस्वासी लोगां खातर करो हो। थानै ईं बात गो पतो है कै दूसरा गै खिलाफ न्याय करण आळा लोग परमेसर गै राज गा वारिस कोनी होवैगा। ईंखातर थे धोखो देण आळा गी बात ना मानो। मैं ईं तरियां गै लोगां गै बारै में बात करूं झिका परमेसर गी नजर में बेबीचार करै है अर मूरती पूजा करै है, अर दूसरा गी लुगाईयो गो लाळच करण आळा अर झिका आदमी आदमी गै सागै गळत काम करै है, अर चोरी करण आळा, अर लाळच करण आळा, अर पियकड़ अर झिका दूसरां गै खिलाफ बुरी बात बोलण आळा, अर लुटेरा लोग है। पेलां इंयाई थारै में हिस्या पापी लोग हा। पण प्रभु यीसू मसी अर परमेसर गी आत्मा थारै पापां नै धो दिया अर थानै पवितर अर धरमी ठेराया। जिंया मैं चावूं बिंया कर सकूं पण ऐ सारी बातां फायदेमंद कोनी। जिंया मैं चावूं बिंया कर सकूं पण मैं किंगी बात गै दबाब में कोनी रेऊंगा। रोटी पेट खातर अर पेट रोटी खातर। पण आण आळै दिनां में परमेसर आं दोनां चिजां नै खतम करैगो। आपणो सरीर दूसरा गै सागै बेबीचार करण खातर कोनी पण प्रभु गी सेवा खातर है। प्रभु आपणै सरीर गो ध्यान राखै। परमेसर आपगी ताकत ऊं प्रभु नै मरेड़ा मू जींवंतो करयो बिंयाई आपां नै बी जींवंतो करसी। थानै पतो है कै थारो सरीर यीसू मसी गो एक एक अंग है। इंया है तो यीसू मसी गै अंग नै लेगे बेबीचार करण आळी लुगाई गै सरीर गो अंग किंया बणावो? आ बात कदी कोनी होवै। थानै ईं बात गो पतो है कै जे एक आदमी बेबीचार करण आळी लुगाई गै सागै सो जावैगो तो बे दोनूं एक ई सरीर बण जावैगा। पवितर सासतर में इंया लिखेड़ो है कै, “बे दोनूं एक ई सरीर बण जावैगा। ” पण कोई बी आदमी प्रभु गी संगती में मिलगे रेवैगो तो बो आपगी आत्मा में बिंगै सागै एक हो जावैगो। आ बात थे लोग ध्यान ऊं सुणो। दूसरा गै सागै बेबीचार बिलकुल ना करो। क्यूंकै ओ पाप भोत बुरो है। इनै छोडगे दूसरा पाप सरीर गो नुकसान कोनी करै पण झिको बेबीचार करै बो आपगै सरीर नै गंदो करै है। थानै ईं बात गो पतो है कै थे परमेसर गा मिन्दर हो अर पवितर आत्मा थारै में वास करै। अर आ आत्मा परमेसर ई थानै दी है। ईंखातर थारो अपणै आप पर कोई अधिकार कोनी। परमेसर भोत मोटो मोल भरगे थानै मोल ले लिया। ईंखातर थे परमेसर गो थारै सरीर गै द्वारा आदर मान करो। थे मनै खत गै द्वारा एक सवाल पूछयो कै, “कोई माणस गी लुगाई गै सागै गळत संबन्ध राखणो आच्छो है के कोनी?” इंगो उतर मैं थानै देऊंगा। कै भोत बेबीचार होण गै कारण हर एक आदमी नै आपगी घराळी राखणी चईयै अर हर एक लुगाई नै आपगो घराळो राखणो चईयै। ब्या करेड़ै एक आदमी नै पति होण'गी पूरी जिमेदारी निभाणी चईयै। बिंयाई ब्या करेड़ी लुगाई नै बी पत्नी होण'गी पूरी जिमेदारी निभाणी चईयै। ब्या करेड़ी लुगाई गो आपगै सरीर पर कोई हक कोनी। पण बिंगै सरीर पर हक बिंगै पति गो है। बिंयाई ब्या करेडै़ आदमी गो सरीर पर हक आदमी कनै कोनी पण बिंगै सरीर पर हक बिंगी पत्नी गो है। पति पत्नी दोनां गी सेमती ऊं पराथना करण गै टेम नै छोडगे न्यारा न्यारा ना रेईयो। इंगै बाद दोनां नै एक सागै रेणो चईयै। इंया ना है तो थे थारै मन नै बस में ना राखण गै कारण सैतान थानै परखैगो। मैं थानै ईं बात गी राए देऊं, पण ओ हुकम कोनी। मैं इंया चाऊं कै मेरै तरियां बिना ब्या गै रेवो। पण परमेसर केई लोगां नै ब्या ना करण गो वरदान दियो है अर केईयां नै ब्या करण गो वरदान दियो है। मैं थानै ओ बताऊं कै अजे तांई झिकै लोगां गो ब्या कोनी होयो अर झिकी अब विधवा है बानै बिना ब्या गै ई रेणो ठीक है। पण जे कोई आदमी अपणै आपनै बस में कोनी राख सकै तो ब्या करणो चईयै क्यूंकै बे लोग गळत काम करण गी इच्छा नै रोक कोनी सकै ईंखातर ब्या करणो ई ठीक है। ब्या करेड़ै लोगां नै मैं एक आग्या देणी चाऊं। आ आग्या मेरी ओर ऊं कोनी पण प्रभु गी ओर ऊं है। पत्नी आपगै पति ऊं न्यारी ना होवै। जे न्यारी होगी तो बिना ब्या गै रेणो चईयै। जे बा इंया कोनी रे सकै तो बिनै आपगै पति सागै रळ जाणो चईयै। अर पति नै बी आपगी पत्नी नै कदैई छोडणी ना चईयै। अब दूसरा नै प्रभु गी ओर ऊं कोनी मेरी ओर ऊं केणो चाऊं कै, कोई मसी भाई गै अबिस्वासी घराळी है तो जे बा लुगाई बिंगै सागै रेणो चावै है तो बिनै छोडणी ना चईयै। इंयाई कोई मसी लुगाई गै अबिस्वासी घराळो है तो बो आदमी बिंगै सागै रेणो चावै तो बिनै छोडणो ना चईयै। क्यूंकै एक अबिस्वासी घराळै नै आपगी बिस्वासी लुगाई गै कारण परमेसर बिनै आपगै लोगां जिसो समझै। बिंयाई एक अबिस्वासी घराळी नै आपगै बिस्वासी आदमी गै कारण परमेसर बिनै आपगै लोगां जिसो समझै। जे इंया ना होवंतो तो आंगा टाबर परमेसर नै ना मानण आळा बरगा होवंता। पण अब ऐ टाबर परमेसर गा ई बणग्या। एक अबिस्वासी घराळो आपगी बिस्वासी लुगाई ऊं अर अबिस्वासी घराळी आपगै बिस्वासी आदमी ऊं ब्या तोड़णो चावै तो बानै ना रोको। हिसी हालत में बिस्वासी आदमी अर बिस्वासी लुगाई नै ब्या होयड़ो जिसो रेणो जरूरी कोनी। परमेसर आपां नै सांती ऊं रेण खातर बुलाया। बिस्वासी लुगाई नै मैं ओ केणो चाऊं थे आपगै अबिस्वासी घराळै नै बिस्वास में ल्या सको हो। बिंयाई एक बिस्वासी आदमी नै मैं ओ केणो चाऊं कै थे आपगी अबिस्वासी घराळी नै बिस्वास में ल्या सको हो। मेरी बोलेड़ी सारी बातां गो सार ओ है कै हर एक आदमी नै परमेसर बुलायो जद बो जिसी हालत में है बिमै ई बण्यो रेवै। ईं बात नै मैं सारी बिस्वासी मण्डली गै लोगां नै सिखाऊं। जद थे बिस्वासी बण्या बिं टेम थारो खतनो करेड़ो या ना करेड़ो होवै इंऊं कोई फरक कोनी पडै़। थे जिंया हो बिंयाई बण्या रेवो। खतनो करणो ना करणो इतो खास बात कोनी पण परमेसर गी आग्या नै मानणी ई खास बात है। हर एक आदमी किंया बिस्वासी बण्या बिंयाई रेणो चईयै। जद थे बिस्वासी बणण गै टेम गुलामी में हा तो ईं बात गै बारै में चिंता ना करो। पण जे थानै आजादी मिलै तो थारी आजादी नै आच्छा काम खातर लगावो। जे एक गुलाम आदमी नै परमेसर गै बुलाण पर बो एक बिस्वासी बणग्यो तो बिं आदमी नै आजादी मिल गी क्यूंकै प्रभु यीसू मसी बिनै आजाद कर दियो। इंयाई झिको आदमी बिस्वासी बणण गै टेम गुलामी में कोनी हो बो अब मसी में होगे मसी गो दास बणग्यो। परमेसर थानै भोत मोटो मोल देगे आजाद करया। ईंखातर अब थे माणसां गा गुलाम ना बणो। हे मेरा भाईयो अर भेनों, जद थानै परमेसर बुलाया अर जिसी हालत में थे हा बिं हालत में ईं परमेसर गै सागै बण्या रेवो। बिना ब्या होएड़ी लुगाईयां गै बारै में थारै द्वारा पुछेड़ै सवाल गै बारै में प्रभु कनूं मनै कोई बी उतर कोनी मिल्यो। फेर बी प्रभु गै द्वारा मिलेड़ै ग्यान ऊं मैं थानै कीं बताणो चाऊं। आज काल बिस्वासी लोगां गै बिचाळै भोत परेसानी होण लागरी है। ईंखातर मैं थानै आ बात बताणी चाऊं कै जे कोई आदमी गो ब्या ना होयो तो बिनै इंयाई रेणो ठीक है। जे कोई ब्या करेड़ो आदमी है तो आपगी घराळी नै छोडै ना अर जे किंगोई ब्या अजे तांई कोनी होयो तो ब्या कराण खातर लुगाई ढूंडै ना। पण जे कोई ब्या करै तो बी कोई पाप कोनी। अर जे बिना ब्या करेड़ी ब्या करैगी तो बी कोई पाप कोनी। पण इयां करण आळां गै जीवन में दुख आवंता रेवै। मैं इंया चाऊं कै थे बिं परेसानी ऊं बचगे रेवो। ईंखातर मेरा भाईयो अर भेनों, मेरो केण गो मतलब ओ है, आपगै कनै ईं दुनियां में इतो टेम कोनी। ईंखातर आपणै जीवन गै बारै में इती चिंता ना करो। ब्या करेड़ो आदमी आपगी पत्नी ऊं ज्यादा परमेसर गी सेवा में ध्यान राखै। अर रोण आळा ना रोण आळा जिसा समझगे रेवो अर खुसी मनाण आळा खुसी ना मनाण आळा जिसा रेवो अर मोल लेण आळा इंया समझगे रेवो कै बिंगै कनै कीं कोनी है। ईं दुनियां गी कोई बी चीज काम में ले सकां। पण बां चिजां नै इती खास कोनी समझणी। एक दिन हिस्यो आवैगो ओ संसार अर झिको कीं इंगै मा है सारो कीं खत्म हो जावैगो। मैं ओ चाऊं कै थे ईं संसार गी बाता नै सोचगे चिंता में ना पड़ो। एक ब्या ना करेड़ो आदमी परमेसर गै काम में बोळो टेम बितावै क्यूंकै बो सोचै है कै मैं इंया कर'गे परमेसर नै खुस कर सकूं। ब्या करेड़ो आदमी आपगी घराळी नै खुस करण खातर ईं संसार गी बातां गै बारै में सोचै है। ईंखातर बो आदमी दो तरियां गी बात सोचतो रेवै कै मैं किंया प्रभु नै खुस करूं अर किंया आपगी घराळी नै खुस करूं। बिना ब्या करेड़ी लुगाई अर विधवा परमेसर गै काम गै बारै में सोचती रेवै क्यूंकै इंगै द्वारा बे पूरै तन मन ऊं परमेसर नै समरपण कर सकै। पण ब्या करेड़ी लुगाई आपगै घराळै नै खुस करण गै खातर ईं संसार गी बातां गै बारै में सोचती रेवै। मैं ऐ सारी बातां थारै फायदै खातर बोलूं। मैं ऐ बातां थारी परेसानी खातर कोनी पण परमेसर गा लोग किंया जीवन बितावै है मैं थानै बिंयाई जीवन बिताण खातर मदद करणी चाऊं कै थे लोग संसार गी बातां नै ना सोचगे परमेसर गो काम आच्छी तरियां कर सको। जे कोई आदमी आपगी बेटी गो ब्या कोनी करयो है पण बो सोचै है मेरी सोच इती आच्छी कोनी है क्यूंकै मेरी बेटी गो ब्या करण गी उमर होण लागरी है। इंया है तो बेटी गो ब्या करणो चईयै। जे बो इंया करै तो कोई पाप कोनी। इंगै बदळै में बो आदमी इंया सोचै कै बिना किंगै दबाब गै मनै मेरो आपगो फेंसलो करण गो अधिकार है। इंया सोचगे जे बो आदमी आपगी बेटी गो ब्या ना करणो चावै तो बण आच्छो काम करयो है। ईंखातर एक आदमी आपगी बेटी गो ब्या करवावै आ बात आच्छी है पण बो आपगी बेटी गो ब्या ना करवावै तो बी आ आच्छी बात है। जे एक बिस्वासी लुगाई गो ब्या होयड़ो है तो जद तांई बिंगो आदमी जींवंतो है बिनै बिंगै सागै ई रेणो पड़सी। जे आदमी लुगाई ऊं पेलां मर जावै तो बा लुगाई कोई मसी आदमी सागै ब्या करै तो कोई दिकत कोनी। पण मेरो बिचार इंया है जे बा लुगाई बिना ब्या करै रेवै तो ओर ई आच्छी बात है। मैं इंया सोचूं हूं कै परमेसर गी आत्मा मेरूं इंया बात करै है। अब मूरती गै सामै चढाएड़ी चीज गै बारै में थारै सवाल गो मेरो बिचार ओ है कै “आपां सारा नै ग्यान है,” ग्यान लोगां नै घमण्ड ऊं भर देवै पण प्रेम ऊं बिस्वास मजबूत होवै। जे कोई सोचै है कै बो सारो कीं जाणै है तो बिनै समझणो चईयै कै बो ओर बी सीखै। जे कोई परमेसर नै प्रेम करै है तो परमेसर बिंगै बारै में आच्छी तरियां जाणै है। मूरती गै सामै चढाएड़ी चिजां गै बारै में थे इंया केवो हो कै म्हानै पतो है कै “मूरती दुनियां में परमेसर कोनी पण परमेसर एक ई है ओ आपां सारा नै पतो है” धरती अर आकास में लोगां गै द्वारा बुलाया जाण आळा भोत सारा देवता अर प्रभु है। पण आपां समझां कै एक ई परमेसर है। बोई पिता परमेसर है झिकै सारी चिजां बणाई। बिंगै खातर आपां सारा ई हां अर एक ई प्रभु है, बो यीसू मसी। परमेसर इंगै द्वारा सारो कीं बणायो अर इंगै द्वारा ई आपां जींवंता हां। पण सारै बिस्वासी लोगां नै ईं बात गो इतो ग्यान कोनी। पेलां ऐ लोग मूरती गै कनै जा'गे बिंगी पूजा करता हा। ईंखातर भोत सारा लोग आपगै मन में इंया सोचै है कै मूरती जींवंती है। ईंखातर बे मूरती गै चढाएड़ी चिजां नै मूरती गी चिजां समझगे खावै। ईंखातर बांगी सोच इती कमजोरी होगी। अर बे लोग गळती ऊं इंया सोच्यो कै मूरती नै चढाएड़ी चिजां खा'गे म्हे पाप कर लियो। खाण गी चीज परमेसर कनै कोनी ले जा सकै। जे आपां ऐ चिजां ना खावां तो बी कोई नुकसान कोनी अर जे खावां तो कोई फायदो बी कोनी। थे कोई बी चीज सोच समझगे खा सको हो। थारै खाण गी चीज गै कारण कमजोर बिस्वासी लोग पाप में ना पड़ज्यै। तनै इंगै बारै में भोत ग्यान है। ईंखातर तूं मिन्दर में मूरती गै चढाएड़ी चीज खाण में तेरै कोई फरक कोनी पडै़। पण जे बिस्वास में कमजोर आदमी तेरी आ बात देखसी तो बिंगै मन गी कमजोरी गै कारण ऊं मूरती गै चढाएड़ी चीज खाणी पाप समझगे बी बो तेरै सागै खाण खातर जासी। ईंखातर थारै ग्यान गै कारण बो कमजोर बिस्वासी झिकै खातर प्रभु यीसू मसी मरग्यो बो आखिर में नास हो जावैगो। बिस्वास में कमजोर लोगां गै खिलाफ थे इंया पाप कर'गे अर बांगै कमजोर मन नै दुखी कर'गे थे प्रभु यीसू गै खिलाफ पाप करो हो। ईंखातर मूरती गै चढाएड़ी चीज खाण गै कारण दूसरा बिस्वासी लोग बिस्वास छोडै तो मैं हिसी चिजां नै कदी कोनी खाऊंगा अर मैं दूसरै बिस्वासियां गै बिस्वास छोडण गो कारण बी कोनी बणूंगा। मैं परमेसर गो काम करण में बिलकुल आजाद हूं। मैं यीसू मसी गो सुब समाचार बताण आळो एक खास चेलो हूं। आपणै प्रभु यीसू मसी नै मैं सच्च में देख्यो। मेरै काम गै द्वारा ई थे लोग प्रभु पर बिस्वास करयो है। जे मैं दूसरा खातर एक खास चेलो कोनी हूं पण थारै खातर मैं एक खास चेलो हूं। मेरै द्वारा थे प्रभु पर बिस्वास करयो, ऐ बातां साफ साफ दिखावै कै मैं एक खास चेलो हूं। अर झिका मनै परखै है बां खातर मेरो जबाब ओ ई है। प्रभु यीसू गो काम करण गै टेम में म्हारी रोटी पाणी गो बंदोवस्त करणो थारो फरज है। जिंया दूसरा खास चेला लोग, प्रभु यीसू गा भाई अर पतरस सुब समाचार बताण गै टेम आपगी लुगाईयां नै आपगै सागै ले जावै है बिंयाई एक मसी साथी गी मनै बी जरूरत है। या फेर बरनाबास अर मनै रोटी पाणी गो बदोंबस्त आपनै ई करणो पड़सी। कोई बी सिपाई आपगै खरचै ऊं काम कोनी करै है। दाख गी बाड़ी लगाण आळै नै बिंगो फळ खाण गो हक होवै। अर एक गुआळियै नै आपगै भेड़ ऊं मिलण आळै दूध पर हक होवै। मैं ऐ बातां माणस गै सोच बिचार गै अनुसार कोनी बताऊं पण मूसा गै नेम विधान में ऐ बातां साफ लिखेड़ी है। मूसा गै नेम विधान में इंया लिखेड़ो है कै, “खेत गी जुताई करता टेम पसु गै मूं पर छिंको नई लगाणो चईयै। ” थे के सोचो हो कै परमेसर पसुआं गै बारै में ई ऐ बातां केवै है के? बिलकुल कोनी। क्यूंकै ऐ बातां आपणै खातर लिखेड़ी है। क्यूंकै एक खेत जोतण आळै नै खेत ऊं कीं आस होवै है अर दाणां काडण आळै नै बी दाणा मू आस होवै। जिंया लोग खेत में बीज बीजै है बिंयाई म्हे थारै मन में प्रभु गो बचन रूपी बीज बिज्यो है। ईंखातर थारो फरज है कै थे म्हानै संसार गी खाण पीण गी चिजां फसल गै रूप में देणी चईयै। थे लोग दूसरै मसी लोगां गी मदद करो हो बिंऊं जादा थे म्हारी मदद करण गा हकदार हो। पण म्हे इंया करावां कोनी क्यूंकै प्रभु गै सुब समाचार गै रा में म्हे कोई बाधा कोनी करणी चावां। के थे जाणो कोनी कै झिका लोग मिन्दर गी सेवा करै तो बां लोगां नै मिन्दर ऊं सारो कीं मिलै है अर झिका लोग धूप करण गी जिग्यां पर सेवा करै है बांगो गुजारो बठै गै चढावै ऊं होवै। ईं तरियां ई प्रभु गी इच्छा है कै सुब समाचार सुणाण आळां गो गुजारो सुब समाचार ऊं मिलण आळी मजदूरी ऊं होणो चईयै। आं बातां मू मैं एक ई बात कोनी बरती। मनै थारै ऊं कीं मिलैगो ओ सोचगे मैं ऐ बातां कोनी लिखी। पण थारूं मनै कीं बी खाण पीण नै कोनी मिलै आ मेरै खातर घमण्ड गी बात है। क्यूंकै मैं कीं बी लिये बिना सुब समाचार गो परचार करूं अर हिस्यो घमण्ड करण ऊं जे कोई मनै रोकै तो मेरै खातर मरणो आच्छो है। जे मैं सुब समाचार परचार करूं तो इमै कोई घमण्ड गी बात कोनी क्यूंकै ओ तो मेरो फरज है। जे मैं सुब समाचार परचार ना करूं तो ओ मेरै पर धिकार है। जे मैं ओ काम आपगी मरजी ऊं करूं तो मनै इंगी मजदूरी मिलणै गो हक है। पण जे मैं ओ काम आपगी इच्छा ऊं ना करूं तो बी ओ परमेसर गै सोंपेड़ै काम गै अलावा ओर कीं कोनी करूं। फेर मेरी मजदूरी के है? मजदूरी आ है कै मैं सुब समाचार गो परचार बिना प्रतिफल ऊं करयो है। ईंखातर मैं सुब समाचार परचार करण गै टेम में मेरै हक नै कदी बी कोनी बरत्यो। मैं किंगैई बस में कोनी हो, फेर ई मैं सारै लोगां गो दास बण्यो कै बां लोगां नै प्रभु में खींच ल्याऊं। मैं यहुदी लोगां में रेवंतो जद मैं बां लोगां बरगो बण्यो अर झिका लोग नेम विधान गै बस में हा बां लोगां बिचाळै मैं नेम विधान गै बस में ना होवंता बी बस में रेयो कै बां लोगां नै प्रभु में खींच ल्याऊं। जद मैं नेम विधान ना मानण आळा गै बिचाळै रेगे नेम विधान ना मानण आळो बण्यो क्यूंकै बां लोगां नै प्रभु में खींच ल्याऊं। पण इंया कोनी हो कै मैं परमेसर गी आग्या नै कोनी मानतो जिंऊं मैं मसी नेम विधान गै बस में हो। मैं बिस्वास में कमजोर लोगां गै बिचाळै रेवंता टेम बां लोगां बरगो बण्यो कै बां लोगां नै प्रभु में खींच ल्याऊं। मैं हरेक तरियां गै लोगां बिचाळै बां बरगो बण्यो कै बानै किसी रीति ऊं प्रभु गै बिस्वास में खींच ल्याऊं। मैं ओ ईं कारण करयो कै सुब समाचार हर एक लोगां में फेलज्यै कै सुब समाचार में बताएड़ी सारी आच्छी बातां में मैं बी भागी होज्यूं। दोड़ गै खेल में भोत जणां भाजै पण इनाम एक नै मिलै। थे बिंयाई भाजो कै इनाम जीत सको। एक कुस्ती लड़ण आळो पेलवान लड़ण खातर हरेक तरियां ऊं तैयार होवै। बो तो एक नास होण आळै इनाम खातर ओ सारो कीं करै पण आपां तो बिं इनाम खातर तैयारी करां हां झिको कदी नास कोनी होवै। ईंखातर मैं एक निसानो लेगे दोड़ लगाऊं कै बिं तांईं पोंच सकूं अर मैं बिं पेलवान तरियां कोनी लड़ूं झिको आपगा हात हवा में चलावै पण मैं आपगा हात निसानै पर चलावूं। मैं आपगी मन गी बुरी इच्छावां नै बस में राखूं कै जिंऊं मैं दूसरा गै सामै सुब समाचार गो परचार करता टेम मैं खुद निकमो ना बणूं। हे मेरा भाईयो अर भेनों, थे ओ जाणल्यो कै मूसा गै लारै चालण आळा आपणा बडेरा बादळ गी छतर छाया में सई सलामत लाल सागर पार करग्या। बो टेम बां खातर बतिस्मै बरगो हो। अर बां सारा परमेसर गै देयेडै़ आत्मिक भोजन अर पाणी नै खायो पीयो। ओ सारो कीं बानै बिं चटान ऊं मिलतो झिकी बांगै सागै चालती। बा आत्मिक चटान ई मसी है। पण परमेसर बां माऊं भोतसा लोगां ऊं नाराज हा। ईंखातर बे लोग बन उजाड़ में मरग्या हा। ऐ सारी बातां आपणै खातर एक मिसाल गै रूप में है कै जिंया बे लोग आपगी बुरी लालसा ऊं नास होया बिंया आपां ना हो जावां। अर आपां मूरती पूजण आळा ना बणा जिंया बामूं कीं लोग बणग्या। पवितर सासतर में इंया लिखेड़ो है कै, “लोग खाण पीण नै बेठग्या अर खेलण कूदण लागग्या। ” अर बामूं भोत जणा बेबीचार करयो झिका एक दिन में 23,000 लोग मरग्या। पण आपां नै हिस्यो काम नई करणो चईयै। अर ना'ई आपां नै परमेसर नै परखणो चईयै। अर जिता बानै परख्यो बामूं केई लोग सापां गै खाण ऊं मरग्या। अर ना'ई थे परमेसर गै खिलाफ बोलगे नास होवो जिंया बे नास करण आळै गै द्वारा नास होया। ऐ बातां बां पर ईंखातर घटी कै एक मिसाल बणी रेवै जिंऊं आपां चोकस रेवां कै संसार गो अंत बेगो ई आण आळो है। ईंखातर झिको अपणै आपनै समझै कै, “मैं पक्को बिस्वासी हूं” बो चोकस रेवै कै बुराई में गिर ना ज्यै। थे सिरफ इसी परीक्सा में कोनी पड़या झिकै मिनख गै सेण ऊं बारै होवै क्यूंकै परमेसर आपगै वायदै नै साची रीति ऊं करण आळो है अर बो थानै ना सेण आळी परीक्सा में कोनी पड़ण दैय। पण बो थानै परीक्सा में पड़ण गै टेम बिंऊं बारै निकळण गी ताकत दैयगो। ईंखातर हे मेरा भाईयो अर भेनों, मूरती पूजा करण ऊं बचो। थे सारा लोग ग्यानी हो। ईंखातर झिको मैं थानै केऊं बिनै थे परखो। जद आपां प्रभु भोज करां तो बो दाखरस गो कटोरो झिकै पर आपां धन्यवाद कर'गे पीवां हां बिंऊ आपां मसी गै खून गै द्वारा भेळा होवां। ईं तरियां, बा रोटी झिकी नै आपां तोड़गे खावां हां बिंऊं आपां मसी गै देह गै द्वारा देयेडै़ बलिदान गै रूप में भेळा होवां। आपां भोत सारा हां फेर ई आपां एक ई रोटी नै खावां। जिंऊं आपां सारा एक देह समान हो जावां। बां इसराएली लोगां गै बारै में सोचो, झिका बेदी पर चढाएड़ी भेंट नै खा'गे बिमै भेळा हो जावंता। मेरै केण गो मतलब ओ है कै मूरती अर बिनै चढाएड़ी भेंट कीं खास बात कोनी क्यूंकै ऐ मूरती परमेसर कोनी है। परमेसर नै ना मानण आळा लोग झिकी भेंट मूरतियां नै चढावै बे परमेसर नै कोनी पण दुस्ट आत्मा नै चढावै। अर मैं कोनी चाऊं कै थे बी बां दुस्ट आत्मावां गी पूजा में भेळा होवो। ईंखातर इंया दोनूं एक सागै करणो ठीक कोनी कै थे प्रभु भोज में दाखरस पीओ अर रोटी बी खाओ अर मूरतियां आ'गै चढाएड़ै भेंट नै बी खावो। जे आपां इंया करां तो आपां प्रभु नै रीस दिराण लागरया हां। अर आपां बिंगी रीस ऊं बच कोनी सकांगा क्यूंकै बो भोत ताकतवर है। थारै मू कीं लोग इंया केवै है कै, “हरेक काम करण में म्हे आजाद हां।” अर आ बात सई है पण सारा काम आच्छा कोनी है अर दूसरा गै बिस्वास नै मजबूत करण खातर मदद बी कोनी दैय। ईंखातर थे सिरफ आपगी भलाई खातर ना सोचो पण दूसरां गी भलाई खातर बी सोचो। अर बजार में झिको कीं बिकै बो थे बिना झिझक गै खरीदगे खा सको। अर आपगै मन में ओ बेम ना करियो कै आ चीज मूरती आ'गै चढाएड़ी है। क्यूंकै पवितर सासतर में लिखेड़ो है कै, “सारी धरती अर झिको कीं धरती पर है बो सारो प्रभु गो है। ” जे तनै कोई अबिस्वासी आपगै घरे भोजन पर बुलावै अर तूं जाणो चावै तो झिको कीं तनै जीमण नै दैय बो तूं बिना सोचे कै ओ भोजन मूरती आ'गै चढाएड़ो है अर बिनै खालेई। पण जे तनै कोई के दैय कै, “ओ भोजन मूरती आ'गै चढाएड़ो है तो तूं बिंगै मन गै बिचार गै कारण अर बिंगै केण पर ना खाई।” मैं थारै मन गी सोच गै बारै में कोनी केऊं पण मैं बिंगै मन गी सोच गै बारै में केऊं। अर दूसरो कोई इंगै मन गै सोच बिचार ऊं मनै दोसी ना ठेरावै कै मैं ओ खा'गे ठीक कोनी करण लागरयो हूं। अर मैं झिको कीं खाऊं बो परमेसर गो धन्यवाद कर'गे खाऊं इमै दूसरा नै गळत नई सोचणो चईयै। ईंखातर थे झिको कीं खाओ, पीओ अर कीं करो बो सारो परमेसर गी बडाई खातर होणो चईयै। यहुदी, गेर यहुदी अर बिस्वासी मण्डली गै लोगां खातर तूं रुकावट गो कारण ना बणी। मैं हर एक तरियां हर एक आदमी नै खुस करण गी कोसिस करूं। अर खुद गै लाळच गै बारै में कदी कोनी सोचूं अर दूसरा गै फायदै खातर कोसिस करूं कै बां सारा लोगां नै मुकती मिलज्यै। जिंया मैं मसी गी आग्या गो पालण करयो है बिंयाई थे करो। हे मेरा भाईयो अर भेनों, थे मनै हरेक बात में याद करता रेवो अर झिकी आग्या मैं थानै बताई बिंगो थे पालण करो। ईंखातर मैं थानै सरावंतो रेऊं। पण मैं चाऊं कै थे आ बात जाणल्यो कै हर एक पति गो सिर मसी है अर पत्नी गो सिर बिंगो पति है। अर मसी गो सिर परमेसर है। झिको आदमी आपगो सिर ढकगे पराथना या परमेसर गी बात बोलै तो बो आपगै सिर झिको मसी है बिंगी बेजती करै है। बिंयाई झिकी लुगाई उघाड़ै सिर पराथना या परमेसर गी बात करै तो बा आपगो सिर झिको बिंगो पति है बिंगी बेजती करै है। क्यूंकै बा लुगाई आपगै सिर गो मुंडन कराण आळै बरगी है। जे कोई लुगाई आपगो सिर ना ढकणो चावै तो बा आपगा बाळ कटवा ल्यै। जे लुगाई बाळ कटाणा सरम गी बात समझै तो आपगो सिर ढकगे राखै। पण आदमी नै आपगो सिर ढकणो आच्छी बात कोनी क्यूंकै परमेसर बिनै आपगै बरगो बणायो अर ईंखातर बिंगै द्वारा परमेसर नै आदर मिलै। पण लुगाई नै आपगो सिर ढकगे राखणो चईयै क्यूंकै इंऊं बिंगै पति नै आदर मिलै। क्यूंकै परमेसर आदमी ऊं लुगाई नै बणाई, लुगाई ऊं आदमी कोनी। अर आदमी लुगाई गी मदद खातर कोनी बणायो पण लुगाई आदमी गी मदद खातर बणायेड़ी है। ईंखातर लुगाईयां नै आपगो सिर ढकगे राखणो चईयै कै बे आपगै पति गी आग्या में रेवै है। क्यूंकै सुरगदूत आपणी करणी नै देखता रेवै। पण फेर बी परमेसर गी नजर में आदमी लुगाई एक बरगा ई है अर बे एक दूसरै बिना कीं बी कोनी कर सकै। क्यूंकै जिंया लुगाई आदमी ऊं बणी बिंयाई आदमी लुगाई ऊं पैदा होयो। पण ओ सारो कीं परमेसर गो बणायेड़ो है। थे जाणो हो कै एक लुगाई नै सिर उघाडे़ परमेसर ऊं पराथना करणी सोभ्या कोनी दैय। अर एक आदमी नै लम्बा बाळ राखणा बी सरम गी बात है। पण लुगाई नै लंबा बाळ राखणा बिंगो सिंगार है। क्यूंकै लंबा बाळ परमेसर बिनै सिर ढकण खातर दिया है। पण अब इंगै बारै में जे कोई विवाद करै तो मैं बानै ओ ई केऊंगा कै इंगै अलावा परमेसर गी आराधना करण गी आपणी कोई दूसरी रिवाज कोनी अर परमेसर गी दूसरी बिस्वासी मण्डली में बी ओ ई रिवाज बणेड़ो है। अब मैं एक दूसरी बात बताणी चाऊं कै मैं थानै ईंखातर कोनी सरावूं कै जद थे भेळा होवो तो थे थारी भलाई कोनी पण नुकसान करो। मैं इंया सुण्यो है कै जद थे बिस्वासी मण्डली में भेळा होवो तो थारै आपस में फूट होवै। अर मैं मानूं कै इमै कीं सच्चाई है। पण इंया करण ऊं थानै ठा लागजासी कै थारै मू कुण परमेसर गो आच्छी तरियां आदर मान करै अर कुण कोनी करै। थे यीसू मसी गै बलिदान नै याद करण खातर प्रभु भोज में भेळा होवो पण थे सच्च मुच यीसू मसी नै याद कोनी करो। अर ना थे प्रभु भोज खाण गै टेम एक दूसरै नै अडीको हो। पण केई लोग तो पेलां ई आपगो भोजन खा पीगे मतवाळा बी होज्यै, जिंऊं केई लोग आखर में भूखा ई रेज्यै। जे इंयाई करणो है तो थारै घर में बेठगे ई खा पी लेवंता। इंया करण ऊं थे परमेसर गै चुणेड़ा लोगां नै तुछ समझो अर गरीब लोगां गी बेजती करो हो। ईं बात में मैं थानै कोई बडाई कोनी दैयूं। झिकी बात मनै प्रभु बताई बा'ई बात मैं थानै बताई है। अर बा बात आ है कै झिकी रात प्रभु यीसू पकड़ाईजो बिं रात बण रोटी ली, अर परमेसर गो धन्यवाद कर'गे तोड़ी अर बानै देगे केयो, “ओ मेरो सरीर है झिको थारै खातर देऊं हूं: मेरी यादगीरी में थे इंयाई करे करियो।” ईं रीति ऊं रोटी खाण गै बाद में दाखरस गो कटोरो लेगे बानै दियो अर केयो, “ओ कटोरो मेरै खून गो है झिको थारै खातर बहाइज्यैगो अर ओ नूंअ वायदै गो निसान है। जद बी थे प्रभु भोज गो दाखरस पीओ तो मनै याद करियो।” ईंखातर मैं पौलुस, थानै आ बात केणी चाऊं कै, जद थे जिती बारी ईं प्रभु भोज नै लेवो बिती बारी थे दूसरा नै प्रभु गै बलिदान गै बारै में बताये करो अर बांगै दुसर आण तांई इंयाई करता रेवो। ईंखातर जद थे यीसू मसी गै बलिदान नै याद करण खातर प्रभु भोज में सई रीत ऊं रोटी ना खावो अर ना दाखरस पीओ तो थे गळत करो अर प्रभु मसी गै सरीर अर खून गो आदर कोनी करो। ईंखातर थे प्रभु भोज में भेळा होण ऊं पेलां अपणै आपनै परख ल्यो। क्यूंकै जे कोई प्रभु गी देह नै ना पिछाणै बिना प्रभु भोज गी रोटी खावै अर दाखरस नै पीवै तो बो बिं खाणै पीणै ऊं अपणै आप पर परमेसर गी सजा गो भागी बणै। ईं कारण ई थारै मू भोतसा लोग कमजोर अर रोगी बणग्या अर केई मर बी ग्या। पण जे आपां अपणै आपनै आच्छी तरियां परख लेवंता तो आपणै पर परमेसर गी आ सजा कोनी आवंती। अर जद प्रभु आपणो न्याय कर'गे आपां नै सजा दैय तो आपां इंऊं भोत कीं सिखां कै संसार गा लोग आपणै पर दोस ना लगा सकै। ईंखातर हे मेरा भाईयो अर भेनों, जद थे प्रभु भोज में भेळा होवो तो एक दूसरै नै अडिके करो। ईंखातर जे कोई सच्च में भूखो है तो बो आपगै घरे ई खाणो खाईयावै। जिंऊं थे बिना भेदभाव गै प्रभु भोज में भेळा हो सको अर परमेसर थारो न्याय कर'गे थानै सजा ना दैय। अर बाकी बातां मैं थानै थारै कनै आ'गे बताऊंगा। हे मेरा भाईयो अर भेनों, मैं चाऊं कै थे पवितर आत्मा गै वरदाना ऊं अणजाण ना रेवो। थे जाणो हो जद थे परमेसर नै ना मानण आळा हा, तो थे अणजाण मूरतियां गै लारै चालता हा। ईंखातर अब मैं थानै केऊं कै झिको पवितर आत्मा ऊं बोलै बो कदी यीसू गै बारै में सरापित कोनी केवै अर ना कोई पवितर आत्मा गै बिना के सकै कै “यीसू ई प्रभु है।” वरदान तो न्यारा न्यारा है। पण देण आळी आत्मा एक ई है। अर आपणी सेवा बी न्यारी न्यारी है। पण आपां एक ई प्रभु गी सेवा करां। अर बिंयाई आपां न्यारी न्यारी तरियां गी सेवा करां पण आपणै में काम करण आळो परमेसर एक ई है अर बोई आपणी मदद करै है। आपां सारा बिस्वासी हां, आपां नै पवितर आत्मा सारा गी भलाई खातर एक एक वरदान दियो है। मतलब ओ है कै केई लोगां नै परमेसर गी आत्मा ऊं ग्यान गी बात करण गो वरदान मिल्यो है अर केई लोगां नै बिं आत्मा ऊं समझण गी बुद्धी मिली है। बिंयाई बिं आत्मा ऊं केईयां नै बिस्वास राखण गो अर बीमारियां ऊं ठीक करण गो वरदान मिलेड़ो है। बिंयाई केई लोगां नै चमत्कार करण गो, परमेसर गी बात बोलण गो, मन गी भावनां नै जाणन गो अर दूसरी भासावां नै बोलण गो अर बांगो अरथ समझाण गो वरदान मिलेड़ो है। ऐ सारा वरदान पवितर आत्मा गा है। बा हरेक बिस्वासी नै आपगी इच्छा ऊं वरदान दैय। जिंया न्यारा न्यारा अंग मिलगे एक देह नै बणावै है बिंयाई मसी अर बिमै बिस्वास राखण आळा है। क्यूंकै आपणै में केई लोग यहुदी है अर केई लोग गेर यहुदी है अर केई लोग गुलाम है अर केई आजाद है। पण आपां सारां नै एक देह बणण खातर आपणो एक ई पवितर आत्मा ऊं बतिस्मो होयो है। अर आपां सारा नै एक ई आत्मा मिलेड़ी है। अब देखो, माणस गी देह एक ई अंग ऊं कोनी बणेड़ी पण बिंगै भोत सारा अंग होवै। मानल्यो, पग केवै, “मैं हात कोनी,” ईंखातर मैं देह गो हिसो कोनी। पण फेर ई बो बिं देह गो ई हिसो है। बिंयाई जे कान केवै, “मैं आंख कोनी हूं,” ईंखातर मैं देह गो हिसो कोनी हूं। पण फेर ई बो बिं देह गो ई हिसो है। जे आपणी सारी देह आंख ई होवंती तो आपां सुण कोनी सकता बिंयाई जे आपणी सारी देह कान ई होवंती तो सुरुम कोनी ले सकां। पण आ बात सच्च है कै परमेसर आपगी इच्छा ऊं हरेक अंग नै देह में सई रीति ऊं काम करण खातर आच्छी तरियां बणाया। अर देह गा सारा अंग एक बरगा ई होवंता तो आपां बिनै देह कोनी केवंता। पण बे न्यारा न्यारा अंग होवंता बी एक ई देह है। ईंखातर आंख हात नै कोनी के सकै कै मनै तेरी लोड़ कोनी। अर इंयाई सिर पगा नै कोनी के सकै कै मनै तेरी लोड़ कोनी। पण बे अंग झिका दूसरा ऊं कमजोर दिखै है बांगी बी भोत लोड़ पड़ै। अर देह गा बे अंग झिका आपां दूसरा नै दिखाण में सरम आवै बानै आपां कपड़ा में आच्छी तरियां ढकगे राखां। पण झिका अंग आपणी देह ऊं बारै रेवै बानै ढकण गी लोड़ कोनी। क्यूंकै परमेसर देह नै ई ढंग ऊं बणाई है आपां बां ढकेड़ै अंगा नै बी ज्यादा आदर देगे आच्छी तरियां राखां। परमेसर इंया करयो कै देह गा हरेक अंग एक दूसरै गो ध्यान राखै अर एक जुट होगे काम करै। अर जे देह गो एक अंग दुखण लागज्यै तो सारी देह दुख भोगै, इंयाई जे एक अंग नै आदर मिलै तो पूरी देह आनंद मनावै है। मेरै केण गो अरथ है कै थे सारा बिस्वासी लोग मसी गी देह अर बिंगा न्यारा न्यारा अंग हो। अर परमेसर बिस्वासी मण्डली में पेलां खास चेलां नै, दूसरा परमेसर गी बात बताण आळा अर तीसरा बचन सिखाण आळा नै चुण्या। इंगै बाद चमत्कार करण आळा, बीमारियां नै ठीक करण आळा, दूसरा गी मदद करण आळा, अर अगुवाई करण आळा अर न्यारी न्यारी भासावां गो अरथ समझण आळा नै चुण्या। ईंखातर ना तो सारा खास चेला होवै अर ना ई परमेसर गी बात बताण आळा होवै, बिंयाई सारा परमेसर गो बचन सिखाण आळा कोनी होवै अर ना चमत्कार करण आळा होवै। बिंयाई सारा नै बीमारियां ऊं ठीक करण गो वरदान कोनी मिलेड़ो अर ना सारा नै न्यारी न्यारी भासा बोलण गो वरदान मिलेड़ो है अर ना सारा भासावां गो अरथ समझण गो वरदान मिलेड़ो होवै है। ईंखातर थे पवितर आत्मा ऊं मिलण आळै मोटै वरदान नै पाण गी कोसिस करता रेवो। अब मैं थानै एक खास वरदान गै बारै में बताऊंगा। जे मैं मिनखां गी अर सुरगदूतां गी भासा बोलूं अर दूसरा सागै प्रेम ना राखूं तो मेरो बोलणो खड़कतै भांडै अर झांझर गी तरियां है। अर जे मैं परमेसर गी बात लोगां नै बता सकूं अर बिंगी सारी भेद भरी बातां नै समझ सकूं अर मनै बिस्वास है कै प्हाड़ नै हटा सकूं अर मैं दूसरा सागै प्रेम ना राखूं तो मैं कीं कोनी। अर जे मैं मेरी सारी संपती गरीबा नै बांट दैयूं अर आपगै देह नै बाळण खातर बलिदान कर दैयूं पण दूसरा ऊं प्रेम ना राखूं तो इंया करण में कोई फायदो कोनी। पण झिको दूसरा ऊं प्रेम राखै बो हरेक बातां नै सेण करण आळो अर दूसरा गै उपर दया करण आळो होवै है। अर बो दूसरा पर जळन कोनी करै अर ना आपगी बडाई करै। बो दूसरा सागै माड़ो बरताव कोनी करै, अर ना सुवारथी होवै, अर ना बो कोई बात गी गांठ बांदै अर ना एकदम रीस करै। बो बुरै काम में खुसी कोनी मनावै पण आच्छै कामा ऊं भोत खुस रेवै। बो परमेसर पर बिस्वास राखतो आपगै जीवन में हरेक बात सेण कर सकै। अर बो हरेक बातां में परमेसर पर ई आसा अर धीरज राखै। अर एक दिन हिसो टेम आवैगो कै परमेसर गी बात करणी अर न्यारी न्यारी भासा बोलणी खत्म हो'ज्ययैगी अर परमेसर गै बारै में समझण खातर ग्यान बी खत्म हो'ज्यैगो पण प्रेम सदांई बण्यो रेवैगो। क्यूंकै आपणो ग्यान अर परमेसर गी बात बताण गी योग्यता सदांई खातर अटल कोनी है पण जद यीसू आवैगो तो झिको सदांई खातर कोनी बिंगी बी लोड़ कोनी पड़सी। इंगै बारै में थानै एक मिसाल बताऊं कै जद मैं छोटो टाबर हो तो टाबर गी भासा बोलतो अर बांगी तरियां सोचतो। पण जद मैं जुवान हो'ग्यो तो बचपन गी सारी बातां मैं छोड़ दी जिंया धूंधळै सिसै में आपां नै साफ तोर ऊं कोनी दिखै बिंयाई आपां परमेसर नै साफ तोर ऊं कोनी देख सकां। पण एक दिन आवैगो जद आपां बिनै आपणै सामणै खड़यो देखांगा। अब आपां बिंगै बारै में थोड़ो भोत ई जाणां पण बो जद आवैगो बिं टेम जिंया बो आपणै बारै में पूरी तरियां जाणै है बिंयाई आपां बी बिंगै बारै में सारो कीं जाण ल्यांगा। ईंखातर अब आपां नै ऐ तीन बातां करणी सई है। एक परमेसर पर बिस्वास अर परमेसर गै वायदै पर आसा राखणी अर दूसरा ऊं प्रेम करणो। पण आं तीन बाता मू सारा ऊं मोटी बात दूसरा ऊं प्रेम करणो है। प्रेम में बढता रेवो। पवितर आत्मा ऊं मिलण आळै वरदानां खातर बाट जोवंता रेवो। अर खास कर'गे थे आ बाट जोवो कै थानै परमेसर गी बात बताण गो वरदान मिलै। जे कोई माणस दूसरै लोगां सामै अणजाण भासा बोलै तो बे परमेसर गै लुकेड़ै भेद गी बातां होवै। अर ऐ बातां पवितर आत्मा ऊं बोलै अर ऐ माणसा ऊं कोनी पण परमेसर गी ओर ऊं होवै। पण झिको परमेसर गी बात करै बो दूसरा लोगां नै मजबूती, हिम्मत अर होंसलो भदाण खातर करै। झिको माणस दूसरा लोगां सामै अणजाण भासा बोलै तो बो अपणै आपनै ई मजबूत करै पण झिको परमेसर गी बात करै बो बिस्वासी मण्डली गै बिस्वासी लोगां नै मजबूत करै। मैं चाऊं कै थे सारा अणजाण भासा बोलो पण जे कोई इंगो अरथ ना बता सकै तो मैं इंऊं जादा ओ ई चाऊ कै थे परमेसर गी बात करो जिंऊं बिस्वासी मण्डली गै लोगां नै ओर मजबूत होण में मदद मिलै। हे मेरा भाईयो अर भेनों, जे मैं थारै कनै आ'गे हिसी अणजाण भासा बोलूं झिकी थे समझ ना सको तो थानै बिंऊं कोई फायदो कोनी मिलै। पण परमेसर झिकी ग्यान गी बातां मनै बताई बे बातां जे मैं थानै सिखाऊं अर परमेसर गी बात बताऊं तो थानै फायदो मिलैगो। आपां बेजान बंसरी अर बीण गी मिसाल ल्यां। जे ऐ दोनूं एकसी आवाज काडै गी तो लोगां नै किंया ठा लागसी कै बंसरी बाजै या बीण। अर जे युद्ध में जाण खातर जे तुरई ढंग ऊं ना बजायी तो कोई बी युद्ध में जाण खातर तैयार कोनी हो'सी। बिंयाई जे दूसरा सामै अणजाण भासा बोलां तो बानै किंया ठा लागसी कै थे के बोलो। इयां है तो थारी बातां बेकार में जैगी। पण सच्च तो ओ है कै संसार में भोत तरियां गी भासा है अर बांगो अरथ न्यारो न्यारो है। तो जद तांई मैं दूसरै गी कोई भासा समझण गो जाणकार कोनी तो मैं बी बोलण आळै गी नजर में एक अणजाण आदमी हूं, अर बिंयाई बो बी मेरै खातर एक अणजाण आदमी है। अर ऐ बातां थारै पर बी लागू होवै। थे पवितर आत्मा ऊं मिलण आळै वरदानां नै लेण खातर भोत इच्छा राखो हो। तो थे बी ईं वरदान लेण गी कोसिस करो कै जिंऊं बिस्वासी मण्डली मजबूत बण सकै। ईंखातर झिको अणजाण भासा बोलै बो पराथना करै कै बो बिंगो अरथ बी बता सकै। जे मैं अणजाण भासा में पराथना करूं तो बा मेरी आत्मा ई करै अर बिंगी बातां नै मैं समझ कोनी सकूं। ईंखातर जद मैं पवितर आत्मा गी मदद ऊं पराथना करूं बिं टेम दूसरा नै समझण आळी भासा में मनै पराथना करणी चईयै अर बिंयाई जद मैं पवितर आत्मा गी मदद ऊं भजन गाऊं तो बिं टेम मनै दूसरा नै समझ लागण आळी भासा में बी गाणो चईयै। जे कोई आदमी पवितर आत्मा ऊं अणजाण भासा में धन्यवाद गी पराथना करै तो बिनै सुणन आळा लोग बिंगै सागै किंया रळसी। सायद तेरी धन्यवाद गी पराथना बडिया हो सकै है पण सुणण आळां गै समझ में ना आई तो बा पराथना बां खातर कोई फायदाळी कोनी होवै। मैं परमेसर गो धन्यवाद करूं कै मैं थारै सारा मू जादा दूसरी अणजाण भासावां नै बोलूं। पण जे मैं बिस्वासी लोगां नै अणजाण भासा में हजार बात बताऊं अर बांगै समझ ना आवै तो कोई फायदो कोनी। अर जे बांगै समझ में आण आळी भासा में एक ई बात समझा दैयूं तो बा मेरै खातर भोत आच्छी बात है। हे मेरा भाईयो अर भेनों, जिंया छोटा टाबर सोचै बिंया थे ना सोचो। पण बुद्धी में जुवान बणो। पण जिंया टाबर बुराई करण गी कोनी सोचै बिंयाई थे बी बांगै बरगा बणो। पवितर सासतर में लिखेड़ो है झिकै मैं, प्रभु केवै है कै, “मैं अणजाण भासावां बोलण आळा गै द्वारा अर परायै मूं गै द्वारा आपगै लोगां ऊं बात करूंगा तो बी ऐ मेरी बात नै कोनी सुणैगा। ” ईंखातर अणजाण भासा बोलण ऊं अबिस्वासियां गो ध्यान परमेसर कानी आवै पण परमेसर गी बात करण ऊं बिस्वासी लोगां गो बिस्वास ओर बी मजबूत होवै। ईंखातर जद सारा बिस्वासी लोग बिस्वासी मण्डली में भेळा होगे सारा जणां अणजाण भासा में बोलण लागज्यै अर जद बठै बे लोग अजे झिका ईं वरदान गै बारै में कोनी जाणै तो बे लोग बानै पागल समझैगा। पण जद सारा बिस्वासी लोग बिस्वासी मण्डली में भेळा होगे सारा जणां परमेसर गी बात करण लागज्यै अर जद बठै कोई अबिस्वासी आजै तो बांगै मन में झिको पाप छिपेड़ो है बो परगट होज्यैगो अर बिनै ठा लागज्यैगो कै मैं पापी हूं। जद बो खुद नै बदळण गी कोसिस करैगो अर परमेसर नै झुकगे मानल्यैगो कै सच्च में परमेसर थारै बिचाळै है। हे मेरा भाईयो अर भेनों, जद बी थे परमेसर गी आराधना में भेळा होगे कोई भजन गाओ या सिखावो या परमेसर गो बचन परगट करो या कोई अणजाण भासा बोलो या कोई भासा गो अरथ बतावो तो मैं चाऊं कै ऐ सारी बातां सारां गी भलाई खातर होवै। अर जे कोई अणजाण भासा बोलै तो बे दो तीन जणा ई होणा चईयै। अर हरेक नै बारी बारी बोलणो चईयै अर बां भासावां गो अरथ बताण आळो बी एक जणो जरूर होणो चईयै। पण जे कोई अणजाण भासा गो अरथ बताण आळो बठै ना होवै तो बो चुपचाप आपगै मन में परमेसर ऊं बात करै। बिंयाई बिस्वासी मण्डली में दो तीन जणा ई परमेसर गी बात करै अर बाकी सुणण आळा लोग बांगी बात नै आच्छी तरियां समझै। अर जे बठै कोई आदमी परमेसर गी बात करण लागरयो है अर बिंगै सामै बेठयै आदमी गै मन में परमेसर कीं परगट करयो तो बिनै बी बोलणो चईयै अर झिको पेलां बोलै हो बिं आदमी नै चुप होजाणो चईयै। ईं रीति ऊं हरेक जणो एक एक कर'गे परमेसर गी बात कर सकै। इंया करण ऊं थानै एक दूसरै ऊं सीखण में होंसलो मिलै। झिका परमेसर गी बात बोलै बानै आपगी आत्मा बस में राखणी चईयै कै जद कोई दूसरो कीं बोलै तो आप चुप होजै। क्यूंकै परमेसर आपगी आराधना सई रीति अर सांती ऊं चावै जिंया पवितर लोगां गी सारी बिस्वासी मण्डली में होवै। बिंयाई बिस्वासी मण्डली में लुगाईयां नै एक दूसरी सागै हताई नई करणी चईयै। अर पवितर सासतर में जिंया बताएड़ो है बिंयाई बानै चुपचाप बेठगे सुणनो चईयै। अर जे लुगाई नै कीं सीखणो है तो आपगै घर में आपगै पति ऊं पूछगे सीखै क्यूंकै लुगाई नै बिस्वासी मण्डली में हताई करणी सोभ्या कोनी दैय। हे कुरुन्थियुस गा बिस्वासी लोगो, परमेसर गो बचन थारूं सरू कोनी होयो अर ना बो सिरफ थारै कनैई आयो है। जे कोई अपणै आपनै परमेसर गी बात बताण आळो या पवितर आत्मा ऊं वरदान पायेड़ो आदमी समझै तो बो ओ जाणल्यै कै झिको कीं मैं थानै लिखण लागरयो हूं बे सारी प्रभु गी आग्यावां है। पण झिको कीं मैं केऊं बिं पर कोई ध्यान ना देवै तो थे बी बां लोगां पर ध्यान ना देओ। ईंखातर हे मेरा भाईयो अर भेनों, थे परमेसर गी बात करण खातर मोटी इच्छा राखो अर अणजाण भासा बोलण आळै नै मना ना करो। पण ऐ सारी बातां सई रीत ऊं करणी चईयै। हे मेरा भाईयो अर भेनों, झिको सुब समाचार मैं थानै पेलां बी सुणा चुक्यो हूं बोई सुब समाचार थानै फेर सुणाण लागरयो हूं। झिकै नै थे मानगे बिं पर मजबूत खड़या हो। अर बिं सुब समाचार पर बिस्वास कर'गे मजबूत होण गै कारण थारो उद्धार होयो। नई तो थारो बिस्वास करणो बेकार है। क्यूंकै झिको बचन मैं सुण्यो बोई थानै बतायो है। बामूं खास बात पवितर सासतर में आ है कै यीसू मसी आपणै पापां खातर बलिदान हो'ग्यो। अर बिनै दफणा दियो अर पवितर सासतर गै अनुसार तीसरै दिन पाछो जीग्यो। अर बो पतरस नै दिख्यो अर इंगै बाद बाकी चेला नै बी दिखाई दियो। आंगै बाद बो पांच सौ ऊं जादा बिस्वासी लोगां नै दिखाई दियो। बामूं भोतसा लोग अजे जींवंता है पण केई लोग गुजरग्या। इंगै बाद बो याकूब अर बाकी खास चेला नै बी दिखाई दियो। आं सारां गै बाद मैं झिको सई टेम पर ना पैदा होण आळै टाबर बरगो हो झिको मैं बिंगै सई टेम पर खास चेलो ना बण सक्यो। पण फेर बी बण मनै दरसण दियो। क्यूंकै मैं सारा खास चेला में बदनसीब हूं अर अठै तांई कै मैं खास चेलो केहलाण गै लायक बी कोनी। क्यूंकै मैं परमेसर गी बिस्वासी मण्डली नै भोत दुख दियो हो। पण मैं झिको कीं आज हूं बो परमेसर गी दया ऊं हूं अर झिकी दया बण मेरै पर करी बा बेकार कोनी गेई क्यूंकै मैं सारा ऊं बढगे मेनत करी। पण ओ सारो कीं मेरो कोनी पण परमेसर गी दया गै कारण होयो। ईंखातर चायै मैं हूं अर चायै बे दूसरा खास चेला है, म्हे सारा एक ई सुब समाचार गो परचार करां अर बिं पर ई थे बिस्वास बी करयो है। म्हे परचार करां हां कै परमेसर मरेड़ै यीसू मसी नै पाछो जींवंतो कर दियो तो फेर थारै मू केई लोग इंया क्यामी केवै है कै मरेड़ा लोग कदी जींवंता कोनी होवै? जे मरेड़ा जींवंता ना हो सकै तो यीसू मसी बी जींवंतो कोनी होयो। अर जे यीसू मसी नै जींवंतो कोनी करयो हो तो म्हारो परचार करणो अर थारो बिं पर बिस्वास करणो बेकार है। अर जे ओ सच्च है तो आपणो सिरफ परचार ई बेकार कोनी पण इंऊं मोटो बुरो ओ है कै म्हे परमेसर गै बारै में झूठी गवाई दैयां कै परमेसर मरेड़ै यीसू मसी नै जींवंतो कर दियो। पण मरगे जे कोई जींवंतो होई कोनी सकै तो परमेसर बिनै किंया जींवंतो करयो। मैं आ'ई बात थानै फेर केऊं कै जे मरेड़ा लोग ना जींवंता होया तो मसी बी जींवंतो कोनी होयो हो। अर जे परमेसर मसी नै जींवंतो करयो कोनी तो थारै बिस्वास करण ऊं कोई लाभ कोनी अर थे अजे बी पाप गै ई बंधन में हो। अर झिका मसी पर बिस्वास कर'गे मरै है बे बी सारा नास ई होया है। अर जे सिरफ संसार गै ई जीवन गी भलाई खातर आपां मसी पर आसा राखां तो सारै माणसां में आपां निरभागी हां। यीसू मसी मरगे पाछो जी उठ्यो अर बो पेलो फळ है झिकै ओ साबित कर दियो कै झिका बिस्वासी लोग बिस्वास में रेगे मरया है बे बी एक दिन जींवंता करीजैगा। क्यूंकै पेलै आदम गै बुरै करमां गै कारण संसार में मोत आई बिंयाई दूसरो आदम झिको यीसू मसी है, बिंगै द्वारा मोत ऊं जी उठणो आयो। जिंया आदम गै पाप गा भागिदार बणगे आपां सारा मरा हां बिंयाई यीसू मसी गै सागै मेळ करण ऊं एक दिन पाछा जींवंता होस्यां। पण हरेक खातर जी उठण गो एक टेम है। पेलां यीसू मसी झिको पेलो फळ हो बो जी उठ्यो अर जद बो दुसर आवैगो तो बिं पर बिस्वास करण आळा सारा लोग एक सागै जी उठैगा। इंगै बाद संसार गो आखरी टेम आज्यैगो। अर संसार पर राज करण आळा अधिकारी अर बुरी सकतियां नै यीसू नास कर'गे बिं पर राज करैगो अर सारो राज पिता परमेसर गै हात में सोंप दैयगो। क्यूंकै जद तांई बो आपगै सारै दुसमणां नै आपगै पग नीचै ना कर ल्यै बिं टेम तांई बिंगो राज करणो भोत जरूरी है। अर सारा ऊं आखरी दुसमण मोत नै बी खत्म करीजैगी। क्यूंकै पवितर सासतर में ओ लिखेड़ो है कै, “परमेसर सारो कीं यीसू मसी गै बस में कर दियो।” पण बस में करण आळो परमेसर बिंगै बस में कोनी हो। अर जद सारो कीं परमेसर आपगै बेटै यीसू मसी गै बस में दियो तो बो बी अपणै आपनै बिंगै बस में कर दैयगो जिंऊं परमेसर सारा पर राज कर सकै। अर जे थानै ईं बात पर बिस्वास ई कोनी कै परमेसर एक दिन मरेड़ै लोगां नै पक्का ई जींवंता करैगो तो थारै मू झिका लोग मरेड़ै आदमी खातर बतिस्मो ल्यै तो थे के आस पर ल्यो? अर जे परमेसर मरेड़ै लोगां नै जींवंता कोनी करैगो तो क्यूं बारी बारी म्हे म्हारै जीवन नै ब्यादि में रेड़ा। हे मेरा भाईयो अर भेनों, थारै खातर यीसू मसी में मैं घमण्ड करूं कै मैं हरेक दिन मोत गो सामणो करूं हूं। अर इफिसुस सैहर गै लोगां मेरै सागै जंगळी जानवरां बरगो बरताव करयो। जे मरेड़ा लोगां नै जींवंता ना करीज्या तो मेरी लड़ाई ईं संसार तांई रेज्यैगी। मनै इंऊं कोई फळ कोनी मिलैगो। अर केई लोग इंया केवै कै, “कीं होण आळो तो है कोनी तो चालो, खावां पीवां अर ऐंस करां, क्यूंकै एक दिन तो मरणो ई है। ” पण झिका लोग इंया केवै बांगै भेकावै में ना आ जाईयो। क्यूंकै बुरी संगती आच्छी आदतां नै बिगाड़ दैय। ईंखातर थे होस में रेवो अर पाप करणो छोड़ दैयो। सरम आळी बात आ'ई है कै थारै मू केई लोग परमेसर गी साची सिक्सा नै कोनी जाणै। पण केई लोग इंया पूछैगा कै, “मरेड़ा लोग किंया जींवंता होवैगा? अर बे किसी देह गै सागै जींवंता हो'सी?” हे मूरख बकवादी लोगों, झिको बीज थे बीजो बो पेलां जमीन गै मा जा'गे मरै है। अर बिंगै बाद ई बो एक नुओ बूंटो बणगे जींवंतो होवै। अर थे कोई फसल गो बूंटो कोनी लगावो पण सिरफ बीज ई बिजो। पण परमेसर आपगी इच्छा ऊं बां बीजा नै रूप दैय अर हरेक बीज ऊं न्यारी न्यारी तरियां गा बुंटा निकळै। अर बिंयाई जींवंता प्राणियां गी देह एक बरगी कोनी। मिनखां गी एक तरियां है अर जानवरां गी न्यारी है बिंयाई चिड़ियां गी देह एक तरियां गी है तो मछलियां गी न्यारी है। बिंयाई आकास गै चांद, सूरज अर तारा अर संसार में रेण आळां ऊं भोत न्यारा है। क्यूंकै आकास में रेण आळा अर संसार में रेण आळा गो रूप न्यारो न्यारो है। अर आकास में रेण आळा गो बी चानणो आपस में न्यारो न्यारो होवै। जिंया सूरज गो एक तरियां गो अर चांद गो दूसरी तरियां गो बिंयाई तारा गो चानणो बी न्यारी न्यारी तरियां गो है। अर मरेड़ा लोग बी इंयाई जींवंता होवैगा। जिंया एक बीज धरती में जा'गे गळै बिंयाई माणस गी ईं देह नै मरण गै बाद माटी देईजै अर बा बी गळज्यै। पण झिकी देह जींवंती हो'सी बा अमर है। अर जद ई संसारिक देह नै माटी देईजै जद बा ताकतहीण होवै पण झिकी देह नै जींवंती करीजैगी बा ताकत ऊं भरेड़ी होवैगी। अर झिकी देह नै माटी देईजै बा संसार गी देह होवै पण जद बा जींवंती करीजैगी तो बा आत्मिक देह बण ज्यैगी क्यूंकै संसारिक देह माटी गी है पण आत्मिक देह सुरग गी है। पवितर सासतर में लिखेड़ो है कै, “पेलो मिनख आदम जींवंतो आदमी बण्यो। अर आखरी आदम यीसू मसी आत्मिक सरीर नै देण आळो बण्यो।” पण पेलां आपां नै संसारिक देह मिली है इंगै बाद आपां नै आत्मिक देह मिलैगी। अर धरती गो पेलो मिनख आदम माटी ऊं बणाइजो हो। अर दूसरो आदम यीसू सुरग ऊं आयो हो। अर बिं पेलै मिनख गै कारण संसार गा बाकी सारा लोग माटी गा बणेड़ा हा। पण दूसरो मिनख सुरग गो है। ईंखातर सुरग में रेण आळा सारा लोग बिं बरगा ई है। अर जिंया आदम गै कारण आपां नै रूप माटी गो मिल्यो है बिंयाई दूसरै मिनख झिको सुरग ऊं आयो है अर एक दिन आपणी देह बी बिंगी सुरगिय देह बरगी होवैगी। हे मेरा भाईयो अर भेनों, मैं थानै बतावूं कै ईं हाड मास गी बणेड़ी देह नै लेगे सुरग में कोनी जा सकां क्यूंकै आ नासवान है पण सुरग अमर है। सुणो, मैं थानै परमेसर गी एक लुकेड़ी बात गो भेद बताऊं कै आपणै मू केई लोग मरैगा कोनी पण आपणै सारां गी देह बदळ ज्यैगी। जद आखरी तुरई बाजैगी तो एक पलक में ई सारा मरेड़ा लोग एक अमर देह में जी उठैगा अर आपणै सारां गी देह बदळ ज्यैगी। क्यूंकै ईं नासवान देह नै लेगे आपां सुरग में कोनी जा सकां, ईंखातर आपणी नासवान देह नै अविनासी देह में बदळीजणी जरूरी है। अर जद नासवान देह अविनासी देह में बदळ ज्यैगी जद पवितर सासतर में लिख्यो बचन पूरो होज्यैगो कै, “मोत नै खत्म कर'गे बिं पर जीत हासिल कर ली। ” “हे मोत कठै गेई तेरी जीत? अर हे मोत कठै गेयो तेरो मारण आळो डंक? ” अर नेम विधान ऊं आपां नै पतो चालै है कै आपां सारा पापी हा अर पाप करां। ईंखातर मोत नै ताकत मिलै अर आ आपां नै आवै। पण आपां नै परमेसर गो धन्यवाद देणो चईयै कै बो आपणै प्रभु यीसू मसी गै द्वारा पाप अर मोत पर जीत दिरावै है। ईंखातर मेरा भाईयो अर भेनों, थे बिस्वास में मजबूत रेवो अर प्रभु गो काम करण खातर थे खुद पूरी रीति ऊं बिंगै अरपण होज्यो। क्यूंकै थानै ठा है कै झिको काम थे करण लागरया हो, बिंगी मेनत बेकार कोनी ज्यैगी। हे मेरा भाईयो अर भेनों, अब मैं थानै परमेसर गै बिस्वासी लोगां गी मदद खातर दान भेळो करण गो केवूं। इंगै बारै में गलातिया परदेस गी बिस्वासी मण्डली नै झिको कीं मैं केयो बिंया थे बी करो। अर बो ओ है कै थे थारी कमाई मू कीं हिसो हरेक हफ्तै गै पेलै दिन काडगे छोड़ दे करो। इंया करण ऊं जद मैं थारै कनै पाछो आवूंगा तो दान भेळो करण गी जरूरत ना पड़ै। अर बो दान झिको यरुसलेम भेजणो है बिं खातर थे आप ई कीं आदमियां नै चुणल्यो कै जद मैं आ'गे बांगै हात ऊं बो दान यरुसलेम सैहर तांई पोंचा दैयूं अर बांगै हात में चिठ्ठी लिखगे दे दैयूं कै आं लोगां नै थे खुद चुण्या है। अर बठै जे मेरी जाण गी जरूरत पड़ी तो मैं बी बांगै सागै जाऊंगा। अर मनै मकदुनिया परदेस माखर जाणो ई है। जद मैं बठाकर जाऊंगा तो थारूं मिलण जरूर आऊंगा। अर हो सकै सारी सरदी मैं थारै कनैई रेऊं क्यूंकै बाद में मनै जठै बी जाणो हो'सी थे मेरै सफर में मेरी मदद करोगा। अर मेरी इच्छा थारूं मिलगे जाण गी कोनी पण मैं चाऊं प्रभु गी इच्छा ऊं केई दिन थारै सागै ई रेऊं। पण पेन्तिकुस्त त्यूंहार तांई मैं इफिसुस सैहर में ई रेऊंगा। क्यूंकै बठै बिरोध करण आळा बी भोत है फेर ई बठै आच्छी सेवा करण गो एक मोटो मोको है। जद तीमुथियुस थारै कनै आवै तो बिंगो आच्छो आदर मान करियो जिंऊं बो थारै सागै रेण ऊं घबरावै ना। क्यूंकै जिसो मैं हूं बिसो बो बी प्रभु गी सेवा करण आळो दास है। ईंखातर कोई बी बिनै तुछ ना जाणै अर बिंगै सफर में बिंगी पूरी मदद करै कै बो मेरै तांई आच्छी तरियां पोंचा दैय। क्यूंकै मैं बिंगी अडीक में हूं कै बो दूसरै भाईयां सागै मेरै कनै आ'ज्यै। मैं आपणै भाई अपुल्लोस ऊं भोत बारी बिनती करी ही कै बो दूसरै भाईयां सागै थारै कनै आ'ज्यै। पण अब बिंगी इच्छा थारै कनै आण गी कोनी है। पण जद बिनै मोको मिलैगो तो बो थारै कनै जरूर आवैगो। मेरा भाईयो अर भेनों, थे चोकस अर बिस्वास में बण्या रेवो, बिस्वास ऊं लारै ना हटो अर मजबूत बणो। झिको कीं थे करो बो प्रेम ऊं करो। अर भाई स्तिफनुस गै घर में रेण आळै लोगां गै बारै में थानै ठा है। बे अखाया परदेस गा पेला बिस्वासी लोग है। अर परमेसर गै लोगां गी सेवा करण खातर हमेसा तैयार रेवै। ईंखातर मैं बिनती करूं कै थे हिस्या लोगां गै बस में रेवो अर झिका बांगै सागै कड़ी मेनत करै बांगै बी बस में रेवो। अर थारी ओर ऊं भाई स्तिफनुस, फुरतुनातुस अर अखइकुस मेरूं मिलण आया। मनै भोत आनंद होयो क्यूंकै थे मेरै सागै ना होण'गी बजह ऊं झिकी मदद ना कर सक्या बा आं लोगां करी। जिंया आ थानै खुस करया हा बिंयाई मनै करयो है। हिस्या लोगां गो थे आदर करो। आसिया परदेस गा बिस्वासी लोग अर भाई अक्विला अर बिंगी पत्नी प्रिस्किल्ला बी थानै निमस्कार केवै। अर बांगी घर में भेळी होण आळी बिस्वासी मण्डली गा लोग बी थानै प्रभु गै नाम में पूरै मन ऊं निमस्कार केवै। सारा बिस्वासी भाई भेन थानै निमस्कार केवै। अर थे बी एक दूसरै नै पवितर मन गै सागै प्रेम ऊं निमस्कार केवो। मैं पौलुस अब थानै खुद गै हात ऊं लिखगे निमस्कार केऊं। जे कोई प्रभु ऊं प्रेम ना राखै तो बो सरापित है। आपणो प्रभु बेगो ई आण आळो है। मैं पराथना करूं कै आपणो प्रभु यीसू मसी थानै सारा नै किरपा दैय। अर यीसू मसी गै नाम में मेरो प्रेम सदां थारै सारां गै सागै रेवै। आमीन। मैं पौलुस ओ खत आपणै भाई तीमुथियुस गै सागै कुरुन्थी में रेण आळै बिस्वासियां खातर अर अखाया परदेस में रेण आळै सारै पवितर लोगां गै खातर बी लिखण लागरयो हूं। मनै परमेसर आपगी इच्छा गै अनुसार यीसू मसी गो खास चेलो कर'गे बुलायो है। आपणो पिता परमेसर अर प्रभु यीसू मसी गी ओर ऊं किरपा अर सांती थानै मिलती रेवै। आपणै प्रभु यीसू मसी गो परमेसर, अर पिता नै धन्यवाद होवै, झिको दया गो पिता अर सारी तरियां गी सांती देण आळो परमेसर है। परमेसर आपां नै हर एक परेसानी में सांती देवै है क्यूंकै बा सांती झिकी परमेसर देवै है बिंऊं आपां बानै बी सांती दे सकां झिका हर एक तरियां गी परेसानी में होवै है। क्यूंकै जिंया मसी पर बिस्वास करण ऊं म्हानै बोळो दुख होवै है बिंयाई मसी गै द्वारा म्हानै सांती बी मिलै है। जे म्हे दुख पावां तो बो थारी सांती अर मुकती खातर है अर जे म्हे सांती पावां तो बा थारी सांती खातर ई है। बिं सांती ऊं थे धीरज गै सागै बिं दुख नै सेहल्यो झिको म्हे बी सेहलेवां हां। थारै पर म्हानै पूरो भरोसो है क्यूंकै म्हे जाणा हां कै जिंया थे म्हारै दुख में सामिल हो बिंयाई म्हारी सांती में बी सामिल हो। हे भाईयो अर भेनों, झिको दुख म्हे आसिया में सेयो बिंगै बारै में थानै जाणनो चईयै। म्हारै उपर भोत दुख आयो झिको सेणो भोत मुसकिल हो। म्हे इंयाई सोच्यो कै म्हे जींवंता कोनी बच सकांगा। म्हे इंया सोचण लागग्या कै म्हे मरण खातर जावां हां। ईंखातर म्हे म्हारै उपर कोनी पण परमेसर झिको मरण आळा नै जीवंता करै है बिं पर भरोसो राखणो चईयै। बण ई परमेसर म्हानै मोत ऊं बचा लिया अर बचाण लागरयो है। म्हारो भरोसो बिं पर है झिको म्हानै आण आळै दिना में बी बचागे राखैगो। थे लोग बिनती गै सागै म्हारी मदद करो कै थारै बिनती करण ऊं झिको वरदान म्हानै मिल्यो है, बिं कारण भोतसा लोग परमेसर गो धन्यवाद दे सकै। म्हारो मन साफ है ईंखातर म्हे भोत खुस होवां हां। ईं दुनिया में अर खास कर'गे थारै बिचाळै में म्हारो चाल चलण पवितर अर सच्चाई गै सागै हो। बो दुनिया ऊं मिलण आळो ग्यान कोनी पण परमेसर गी मदद ऊं हो। म्हे थानै ओ ई लिख्यो है कै झिको थे पढो हो अर समझो हो, अर म्हानै आसा है कै ऐ बातां थे आखर तांई बी मानोगा। जिंया म्हे थारै खातर खुसी गा कारण होवां इंयाई थे बी म्हारै खातर प्रभु यीसू गै दुसर आण गै टेम खुसी गा कारण होवोगा। अर ईं भरोसै ऊं मैं चाऊं हूं कै मैं पेलां थारै कनै आऊं अर थानै ओर एक दान मिलै। अर मैं इंया सोच्यो कै थारै कनूं मकिदुनिया जाऊं अर फेर थारै कनै पाछो आऊं। बिं टेम थे मेरी यहुदियां जाण नै मदद करो। थे इंया सोचो हो कै मैं आ जल्दबाजी करी है, ईंखातर मैं एक पक्को आदमी कोनी हूं। अर थे इंया सोचो हो कै मैं एक बिना भरोसै गो हूं। पण आ बात इंया कोनी, जिंया परमेसर भरोसै लायक है बिंयाई थानै बताएड़ी म्हारी बात बी सच्च है। क्यूंकै परमेसर गै बेटै यीसू मसी, झिकै गै बारै में, मैं, सिलवानुस अर तीमुथियुस थारै में परचार करयो है इंऊं थानै ठा है कै बो बिस्वास लायक है अर बो बिंगै वायदै नै पूरो करण आळो ई है। परमेसर गो हर एक वायदो यीसू मसी गै द्वारा पूरो होवैगो अर बिंगै कारण परमेसर गो वायदो सच्चो है अर बिंऊं परमेसर नै आदर मान बी मिलै। ईंखातर बिंगै द्वारा आमीन बी होवै। बोई परमेसर म्हानै थारै सागै मसी में मजबूत करै है अर म्हानै अभिसेक बी करयो है। बण म्हारै पर छाप लगाई अर बयानै में पवितर आत्मा म्हारै मन में दी। मैं परमेसर गो गवा ठेरगे केऊं कै अब तांई मैं कुरिन्थुस में कोनी आयो क्यूंकै थानै पीड़ा ऊं बचाणो चावै हो। आ बात कोनी कै म्हे थारै बिस्वास गै विसय में ओर जादा हक जताणो चावां, पण म्हे थारी खुसी खातर थारै सागै काम करणो चावां क्यूंकै थे बिस्वास में मजबूत बणगे रेवो हो। मैं फेंसलो कर चुक्यो कै फेर मेरै आण पर थानै उदास ना करूं। क्यूंकै थे मनै खुस राखण आळा हो। ईंखातर मैं थानै उदास कोनी करणो चाऊं। मैं थानै ऐ बातां ईंखातर लिखी कै कठैई मेरै आण ऊं झिका नै खुसी होणी चईयै, मैं बामै दुख ना देखूं। मनै थारै पर पूरो भरोसो है कै मेरी खुसी में ई थारी खुसी है। मैं भोत मोटै दुख में हूं अर रो रोगे थानै ओ खत लिख्यो है। मैं ओ कोनी चाऊं कै थानै इंऊं दुख मिलै। पण मैं ओ चाऊं कै थे मेरै बिं प्रेम नै जाण सको झिको मैं थारै ऊं करूं। जे थारै मू कणैई मनै निरास करयो है तो इंऊं सिरफ मैं एकलो कोनी होयो पण थे सारा बी होया हो। हिस्यै नै थे बिस्वासी लोगां सजा दी है। अर बिं खातर इती ई सजा भोत है। पण बिं खातर आच्छो ओ ई है कै बिंगै दोस नै माफ करयो जावै अर बिनै होंसलो देणो चईयै जिंऊं हिस्यो मिनख ओर जादा निरास में ना डूब ज्यावै। ईंखातर मेरी थारूं आ'ई बिनती है कै बिनै आपगै प्रेम गो सबूत दैयो। क्यूंकै मैं थानै ऐ बातां ईंखातर लिखी है कै थानै मैं परख ल्यूं कै थे ऐ मेरी सारी बातां नै मानो या कोनी मानो। झिकै नै थे माफ करो बिनै मैं बी माफ करूं हूं, क्यूंकै झिको कीं माफ मैं करयो है बो थारी बजह हूं अर थारै खातर मसी गी जिग्यां में होगे करयो है। जिंऊं सैतान आपां नै धोखो ना दे सकै। क्यूंकै बिंगी चतुराई ऊं आपां अणजाण कोनी। अर मैं मसी गो सुब समाचार सुणाण खातर तरोवास में आयो तो प्रभु मेरै खातर एक नुओ दरवाजो खोल्यो। पण मेरो मन उदास हो क्यूंकै मैं मेरै भाई तीतुस ऊं कोनी मिल सक्यो। ईंखातर मैं बठूं मकिदुनिया कानी चाल पड़यो। पण परमेसर गी बडाई होवै झिको मसी गै बिस्वास में आपां नै जीत गै जुळुस माखर लेगे चालै अर मसी गै ग्यान गी सुरम आपणै द्वारा सारी जिग्यां फेंलावै। क्यूंकै म्हे परमेसर गै सामणै मुकती पाण आळा अर ना पाण आळा दोनो तरियां गै लोगां खातर यीसू गी सुरम हां। केईयां खातर मोत गी बांस अर केईयां खातर जीवन गी सुरम हां। इती मोटी जिमेदारी कोई कोनी ले सकै। क्यूंकै आपां बां लोगां गी तरियां कोनी झिका परमेसर गै बचन नै आपगै कनूं बढा चढागे बतावै पण म्हे मन गी सच्चाई ऊं अर परमेसर नै आपगै कनै हाजिर मानगे मसी गै बिस्वास में बोलां। म्हे आपगी बडाई करणी सुरू कोनी करी। म्हानै दूसरै लोगां गी तरियां सिफारिस गो खत थारै कनै कोनी ल्याणो या थारै मू लेणो है। म्हारै मन पर लिखेड़ो खत तो थे ई हो। सारा लोग बिनै पेहचाणै अर पढै है। ओ दिखण लागरयो है कै थे यीसू मसी गा खत हो, झिका ना तो स्याई ऊं अर ना'ई पथर गी पटिया पर लिखेड़ा हो पण ऐ तो परमेसर गी आत्मा ऊं दिल गी मांस रूपी पटिया पर लिखेड़ा है। मसी गा होगे म्हे परमेसर पर हिस्यो ई भरोसो करां। म्हे अपणै आपनै ई लायक कोनी समझा पण म्हारी काबलियत गी जड़ तो परमेसर ई है। बण ई म्हानै नुई वाचा गा सेवक होण गै लायक बणाया है म्हे सब्दा गा सेवक कोनी पण पवितर आत्मा गा हां क्यूंकै सब्द तो मारै पण आत्मा जींवंतो करै। पण बा वाचा झिकी मोत ऊं भरेड़ी ही मतलब नेम विधान झिको पथर पर लिखेड़ो हो बो इतो तेज चमकै है कै इसराएल गा लोग मूसा गै चमकतै मूं पर एक पलक ई कोनी देख सक्या तो आत्मा गी वाचा इंऊं ओर जादा तेज हो'सी। क्यूंकै जद दोसी ठेरण आळी वाचा इती तेज चमकी तो निरदोस ठेरण आळी वाचा इंऊं बी भोत ई तेज चमकैगी। अर जे नुई वाचा गो तेज प्रकास गो मेळ पुराणी वाचा सागै करां तो पुराणी वाचा बिंगै आ'गै ठेरै कोनी। क्यूंकै जद पुराणी वाचा गी चमक कम होवंती जावैगी तो जद झिकी पक्की रेण आळी नुई वाचा है बिंगी चमक ओर जादा होवंती जावैगी। ईंखातर म्हे हिसी आसा राखगे हिम्मत ऊं बोला हां। म्हे मूसा गी तरियां कोनी झिकै आपगो चेहरो कपड़ै ऊं ढक लियो जिंऊं इसराएल गा लोग बी कम होवंतै प्रकास नै खत्म होवंता ना देख सकै। पण इसराएली लोगां गी बुद्धी खराब होगी क्यूंकै आज बी जद पुराणो बिचार पढगे सुणायो जावै तो बोई पड़दो लाग्यो रेवै। बिं पड़दै नै यीसू मसी ई हटा सकै। अजे तांई जद कदी बी मूसा गी किताब पढी जावै तो बांगै मना पर पड़दो पड़यो रेवै। पण जद कदी बांगो मन प्रभु पर लागै गो तो बो पड़दो खत्म होज्यैगो। क्यूंकै प्रभु तो आत्मा है अर जठै बी प्रभु गी आत्मा है बठै आजादी है। ईंखातर जद आपणै सारा गै उघाड़ै चेहरै पर प्रभु गो प्रकास सीसै गी तरियां चमकै तो प्रभु गी आत्मा ऊं आपां होळै होळै बी प्रकास में बदळता जावां। ईंखातर जद म्हारै पर परमेसर गी हिसी दया होई कै म्हानै आ सेवा मिली तो म्हे हार कोनी माना। पण म्हे लज्जा गै कामा नै छोड दिया अर ना'ई कपट करां अर ना परमेसर गै बचन में आप कनूं कीं जोड़ा। म्हे सारां गै सामणै सच्चाई गो परचार करां जिंऊं परमेसर गै सामणै हरेक मिनख गै मन में आपगी भलाई बिठावां हां। जे म्हारो ओ सुब समाचार लुकेड़ो पड़यो है तो ओ नास होण आळै रा पर चालण आळै लोगां खातर है। अर बां बिस्वास ना करण आळा खातर झिकां गी बुद्धी ईं दुनिया गै सैतान बंद कर राखी है। जिंऊं बे मसी झिको परमेसर गो सरूप है बिनै ना पेहचाण सकै अर ना'ई बिंगै ग्यान ऊं भरेड़ै सुब समाचार गो प्रकास बां पर चमक सकै। क्यूंकै म्हे थानै म्हारो कोनी पण यीसू मसी गो संदेस सुणावां कै बो प्रभु है। म्हे म्हारै बारै में तो ओ ई केवां कै म्हे यीसू मसी गै कारण ई थारा दास हां। ईंखातर परमेसर ई है झिकै केयो, “अंधेरै में चानणो होज्यै,” बांई ईं चानणै नै म्हारै दिला में चमकायो जिंऊं म्हे प्रभु यीसू में परमेसर गी मेमा देख सकां। पण ओ गुण गो धन म्हारै बरगा माटी गै भांडा में रेखेड़ो है अर आ अलोकिक सकती म्हारी कोनी पण परमेसर गी है। म्हे हमेसा संकटा ऊं घिरेड़ा रेवां पण म्हे कदी हार कोनी मानी। म्हे परेसान तो दिखां पण कदी निरास कोनी होवां। म्हानै लोग सतावै तो भोत है। पण छोडां कोनी। म्हानै लोग मारै तो है पण म्हे मरां कोनी। जिंया यीसू मरयो बिं तरियां ई हरेक टेम म्हे बी मरण गै खतरै में रेवां। जिंऊं यीसू झिको मरगे पाछो जीग्यो बो सभाव म्हारी बी देह में चमकतो रेवै। म्हे हमेसा जींवंतै जी यीसू गी बजह ऊं मोत गै हवाले करीजां जिंऊं यीसू गो जीवन म्हारी मरण आळी देह में प्रकट होज्यै। ईंखातर म्हे तो हमेसा मोत गो सामणो करता रेवां पण थानै आत्मा में फायदो मिलै। ईंखातर कै म्हारै में बाई बिस्वास गी आत्मा है झिकी गै बारै में पवितर सासतर में लिखेड़ो है कै, “मैं बिस्वास करयो, ईंखातर मैं केयो। ईं कारण म्हे बी बिस्वास करां अर थारै सामै बोला।” क्यूंकै म्हे जाणा हां कै झिकै परमेसर यीसू नै दुसर जींवंतो करयो बो एक दिन म्हानै बी जींवंता करैगो। अर बो थारै सागै म्हानै बी आपगै सामै खड़या करैगो। ऐ सारी बातां थारै फायदै गी है। जिंया जिंया परमेसर गी किरपा जादा लोगां तांई पोंचैगी बिंयाई जादा परमेसर गी मेमा गो धन्यवाद बढतो जावैगो। ईंखातर म्हे कदी हिम्मत कोनी हारां। चायै म्हारो सरीर कमजोर होणतो रेवै पण फेर ई म्हारो मायलो सरीर दिन रात चो गुणो बधै। क्यूंकै म्हारो पल भरगो दुख म्हारै खातर भोत जरूरी है। ओ दुख अनंत जीवन गी मेमा पैदा करतो रेवै। क्यूंकै म्हे दिखण आळी चिजां पर ध्यान कोनी देवां पण ना दिखण आळी चिजां पर म्हारो ध्यान टिक्यो रेवै। क्यूंकै देखेड़ी चिजां पल भरगी है पण अणदेखी चिजां हमेसा खातर है। क्यूंकै आपां नै ठा है कै आपणी आ संसार गी देह एक दिन खत्म हो'ज्यैगी अर बाद में आपां नै परमेसर गी बणायेड़ी एक देह मिलैगी झिकी आदमी गी बणायेड़ी कोनी हो'सी पण बा अमर देह हो'सी। ईं देह में तो आपां दुख पावां अर बिं अमर देह नै पाण खातर काळ करता रेवां आपां नै बा अमर देह जरूर मिलैगी। आपां सिरफ बिना देह गी आत्मा कोनी होस्या। ईं देह में तो आपां भोत दुख पावां अर मरणो बी कोनी चावां कै ईं देह नै छोड़ दैयां पण आपां बिं अमर सरीर नै पाणो चावां झिको खत्म होण आळी देह नै निगळ ल्यै। झिकै आपां नै ईं योजना खातर तैयार करया है बो परमेसर है। बण ई आपां नै पवितर आत्मा बयानै में दी है। ईंखातर आपां सदां परमेसर पर भरोसो राखां। आपां जाणा हां कै जद तांई आपां ईं देह में हां जद तांई आपां प्रभु ऊं दूर हां। क्यूंकै आपां रूप पर कोनी पण बिस्वास पर चाला हां। ईंखातर आपां भोत हिम्मत राखां कै ईं देह नै छोड़गे प्रभु कनै उड़ज्यां। ईं कारण आपणै मन में आई इच्छा रेवै कै चायै आपां बिंगै कनै हां या दूर बस बिनै ई आच्छा लागता रेवां। क्यूंकै जरूरी है कै आपां सारा मसी गै न्याय गै कनै आ जा। आपां सारा नै एक दिन आपणै जीवन गो लेखो जोखो देणो हो'सी। ईंखातर आपां जाणा कै प्रभु ऊं क्यूं डरणो चईयै। आपां आई बात लोगां नै समझावां। कै आपणै अर परमेसर गै बिचाळै कोई पड़दो कोनी है, थे म्हानै आच्छी तरियां जाणो। इंया केगे म्हे थारूं बडाई कोनी चावां कै थे म्हारै पर घमण्ड कर सको अर थे बानै जबाब दे सको झिका दिल गी मायली बाता गी बजाए दिखावटी बाता पर मन लगावै है। जे म्हे हिमती हां तो परमेसर खातर हां। अर जे सियाणा हां तो थारै खातर हां। मसी गो प्रेम आपां नै बेबस कर दैय है अर आपां ईं बात नै जाणा हां कै यीसू सारां खातर मरग्यो है। ईंखातर आपां बी आपणै पुराणै जीवन खातर मर चुक्या हां। अर यीसू ईंखातर मरयो कै झिका लोग जींवंता है बे आपगै आगै गै जीवन खातर ना जीयै पण मेरै खातर जीयै झिको बां लोगां खातर मरगे पाछो जींवंतो हो'ग्यो हो। ईंखातर आज ऊं आपां किनैई संसार गी देह ऊं कोनी जाणांगा। पण आपां यीसू नै बी देह गै रूप में जाण्यो, पण अब आपां इंया कोनी जाणांगा। ईंखातर जे कोई मसी में है तो बो एक नुई सरसटी है। बिंगो पुराणो जीवन खत्म हो'ग्यो अर नुओ जीवन सरू हो'ग्यो है। ओ सारो कीं परमेसर ई करयो है झिकै मसी गै द्वारा म्हानै आप में मिला लिया है अर बांई ओ काम म्हानै सुंपयो है कै दूसरै लोगां गो मिलाप परमेसर ऊं करा सकां। परमेसर मसी गै द्वारा आपगै सागै संसार गो मेल मिलाप करयो है अर लोगां गै पापां गो दोस बां पर कोनी लगायो। अर बण ईं मिलाप गो संदेस लोगां नै सुणाण गो काम म्हानै सूंप्यो है। ईंखातर ई म्हे मसी गा राजदूत हां, अर ओ ई सई टेम है कै म्हे यीसू गी ओर ऊं बोलण लागरया कै थे परमेसर सागै आच्छो रिस्तो बणा ल्यो। झिको दोसी कोनी बिनै परमेसर आपणै पापां खातर दोसी बणायो कै बिंगै द्वारा आपां परमेसर गी सच्चाई बण ज्यां। ईंखातर म्हे थारूं ओ ई निवेदन करां कै आपां सारा परमेसर गो काम करण आळा हां। ईंखातर थे परमेसर गी किरपा नै बेकार ना जाण दैयो। परमेसर केयो कै, “मैं थारी सई टेम पर पुकार सुणी अर मुकती गै दिन थारी मदद करी।” ईंखातर मैं थानै केऊं अबी सई अर मुकती गो टेम है। आपां हिस्यो जीवन जीण लागरया हां झिकै में दूसरां खातर कीं दोस कोनी। अर दूसरा नै आपणी सेवा में कोई खोट ना दिखै। आपां दुख, घटी, संकट, कोड़ां गी मार, जेळ अर क्ळेस में बी धीरज धार राख्यो है अर कठोर काम, जागता रेणो, भूखा मरता गी हालत में ई आपां ओ दिखावां कै म्हे परमेसर गा सच्चा दास हां। आपणो ओ ई फरज है कै आपां पवितरता में, ग्यान में, धीरज में, किरपा में, पवितर आत्मा में, प्रेम में, सच्चाई गै संदेस में अर परमेसर गी सकती में मजबूत रेवां अर दोनां हातां में धारमिकता गा हथियार लेगे हमेसा लड़ता रेवां। आपां आदर अर बेजती, बडाई अर निंदा में कपटी दिखां पण हिस्या हां कोनी। आपां अणजाण दिखां पण हां कोनी, मरेड़ा गी तरियां लागां पण जींवंता हां। मार खाणाळा गी तरियां हां पण जान ऊं कोनी मारिज्यां। दुखी दिखां पण सदां आनंद में रेवां, देखण में गरीब लागां पण दूसरा नै अमीर बणा दैयां, आपणै कनै देखण में कीं कोनी लागै पण आपणै कनै सारो कीं है। ईंखातर, हे भाईयो अर भेनों, म्हे थानै सारी बात इमानदारी ऊं दिल खोलगे कैई है। थारै खातर म्हारै मन में कोई संका कोनी है पण थे ई म्हारूं प्रेम करणो कम कर दियो है। म्हे थानै आपगा बच्चा जाणगे थारूं बातचीत करां हां। थे बी म्हानै पूरै मन ऊं प्रेम करो। झिका लोग मसी पर बिस्वास ना करै है थे बांगी संगती ना करो। क्यूंकै धारमिकता अर अधर्म गो मेळ कोनी होवै अर ना'ई चानणै अर अंधेरै गो मेळ होवै। जिंया मसी अर सैतान दोनूं साथी कोनी बण सकै बिंयाई बिस्वासी अर अबिस्वासी दोनूं साथी कोनी हो सकै। इंयाई परमेसर गै मिन्दर में मूरती गो मेळ कोनी हो सकै क्यूंकै आपां खुद'ई बिंगा जींवंता मिन्दर हां। जिंया परमेसर केवै है, “मैं बामै वास करूंगा, अर बांगै बिचाळै चालू फिरूंगा। मैं बांगो परमेसर होऊंगा अर बे मेरा लोग होवैगा।” ईंखातर प्रभु केयो है, “आंगै माऊं निकळगे न्यारा रेवो अर माड़ी चिजां गै हात ना लगावो तो मैं थानै आपगा जाणूंगा।” अर मैं थारो पिता कुहाऊंगा अर थे मेरा बेटा बेटी होवोगा। ईंखातर हे मेरा प्यारा भाईयो अर भेनों, आपां नै ऐ भोत किमती आग्यावां मिली है तो आओ आपां आपणै तन मन नै आं बातां ऊं सुद्ध करां झिकी बाता ऊं आपणी देह अर आत्मा असुद्ध रेवै। इंया आपां परमेसर ऊं डरता होया पवितरता कानी चाल पड़ां। थे म्हारै खातर आपगै दिल में दया राखो क्यूंकै म्हे किंगोई बुरो कोनी करयो अर ना कीं सागै ठगी मारी अर ना किनै ठेस पोंचाई। मैं थानै दोसी ठेराण खातर ओ कोनी केण लागरयो क्यूंकै मैं पेलां ई ओ के चुक्यो हूं कै थे म्हानै भोत आच्छा लागो। म्हे थारै सागै जीणै मरणै खातर तैयार हां। मनै थारै पर भोत भरोसो अर घमण्ड है क्यूंकै थे म्हानै म्हारै सारै दुख तकलीफा में भोत होंसलों दियो अर खुस राख्या। जद म्हे मकिदुनिया परदेस ऊं आया तो म्हारै दिल में सांती कोनी क्यूंकै म्हे चारा पासूं क्ळेस में घिरेड़ा हा, बारै लोगां गी लड़ाई ही अर मन में लड़ाई गो डर हो। पण बो परमेसर झिको निरास लोगां नै होंसलो दैय। बण ई तीतुस नै म्हारै कनै भेजगे म्हारो बी होंसलो भदायो। अर ना सिरफ बिंगै आण ऊं म्हानै होंसलो मिल्यो पण ओ कारण बी है कै थे बी बिंगो होंसलो भदायो हो। ईंखातर ई मेरी खुसी ओर जादा बद गी ही। क्यूंकै बण म्हारै कानी थारी लगन, थारो दुख अर म्हारी चिंता गै बारै में बी खबर दी। भलैईं पेलां मैं आपगै खत में थानै दुखी करया पण बिंऊं मैं पछतावूं कोनी जिंया पेलां पछतावंतो। क्यूंकै मनै दिखै कै बिं खत ऊं झिको दुख थानै होयो बो पल भर गो हो। अब मैं खुस हूं पण ईंखातर कोनी कै थानै दुख पोंच्यो पण ईंखातर कै बिं दुख गी बजह ऊं थे थारो मन बदळ्यो क्यूंकै ओ दुख परमेसर गी इच्छा ऊं हो कै म्हारी ओर ऊं थानै कोई तरियां गो नुक्सान ना पोंचै। झिको दुख परमेसर गी ओर ऊं होवै बो मन बदळ दैय अर इंगो फळ मुकती होवै। हिस्यो दुख आपणै अंदर पछतावो पैदा कोनी करै पण संसार गो दुख तो मोत नै ईं पैदा करै है। ईंखातर देखो परमेसर गी ओर ऊं आयेड़ै दुख थारै जीवन में कितो बेगो बदळाव पैदा करयो है कै थारै अंदर अपणै आपनै निरदोस साबित करण गी चाह, किती रीस, कितो डर, किती इच्छा, कितो जोस अर न्याय गी इच्छा पैदा होगी। थे ईं तरियां ऊं ओ साबित कर दियो कै थे ईं बात में निरदोस हो। थानै लिखण में मेरो ओ मतलब कोनी कै थे ईं बात पर गोर करो। कण अन्याय करयो है अर किंगै उपर करयो है। पण मेरो मतलब ओ है कै परमेसर गी नजर में ओ साफ होज्यै कै थे म्हारै कानी किता गंभीर हो। ईंखातर म्हानै तसली होगी अर इंगै सागै ई तीतुस गै आनंद नै देखगे म्हानै ओर बी जादा आनंद होयो क्यूंकै बिंगो मन थारै सारां गै कारण खुसी ऊं भरग्यो। क्यूंकै मैं बिंगै सामै थारै लोगां पर झिको घमण्ड करयो बिं खातर म्हानै सरमिन्दा कोनी होणो पड़यो। पण जिंया म्हे थानै सारी बात सच्च सच्च कैई बिंयाई म्हारो घमण्ड दिखाणो तीतुस गै सामणै बी सच्च निकळयो। जद बिनै थारै आग्याकारी होण'गी याद आवै है कै थे किंया बिनै आदर मान ऊं अपणायो तो बिंगो प्रेम थारै कानी ओर बी भोत जादा होज्यै। मनै थारै पर भोत भरोसो है। ईं कारण मैं खुस हूं। हे भाईयो अर भेनों, अब म्हे थानै परमेसर गी बिं म्हान किरपा गै बारै में बताणो चावां हां झिकी मकिदुनिया परदेस गी बिस्वासी मण्डलियां पर होयी है। कै बठै गा लोग भोत मोटै क्ळेस में बी आनंद मनावा अर भोत भारी गरीबी में बी बे दूसरां गी मदद करण में लारै कोनी हटया। अर मैं बांगो गवा हूं कै बां लोगां आपगी मरजी ऊं अर आपगी हेसियत ऊं जादा दान दियो। ईं दान में अर यरुसलेम गै पवितर लोगां गी मदद करण में हिसेदार बणन खातर बां लोगां बारी बारी म्हारूं बिनती करी। म्हारी आस ऊं बढगै बां लोगां पेलां ई अपणै आपनै प्रभु आ'गै सोंप दिया। अर बाद में परमेसर गी इच्छा ऊं म्हारो बी केणो मानण लागग्या। ईंखातर म्हे तीतुस नै दान भेळो करण गी सला दी कै जिंया थे पेलां सरुवात करी बिंयाई दान भेळो करण गो काम बी अब पूरो कर ल्यो। ईंखातर जिंया थे लोग हर तरियां गै बिस्वास, बचन, ग्यान अर सारी तरियां गी मदद में मजबूत रेवो अर म्हारूं प्रेम करण में बढता जावो बिंयाई दान करण में बढता जावो। मैं थानै इंया आग्या गै रूप में कोनी केऊं पण मैं दूसरै लोगां गै दान देण गी खुलै दिल गी चरचा करगे थारै प्रेम गी सच्चाई गी परख करण खातर केऊं। थे आपणै प्रभु यीसू मसी गी दया नै जाणो हो कै बो धनवान होवंता बी बो थारै खातर कंगाल बणग्यो जिंऊं आपां बिंगी कंगाली ऊं धनवान बण ज्यां। ईं काम गै बारै में मैं थानै सला देऊं झिकी थारै खातर भोत आच्छी है कै लारलै साल थे ना सिरफ दान देण में सारा ऊं आ'गै हा पण सारा ऊं पेलां थे ई दान देण गी इच्छा करी ही। ईंखातर अब थारै खातर ओ ई आच्छो है कै अब ओ काम थे पूरो कर ल्यो। अर झिको जोस थे सरू में दिखायो बिं जोस गै सागै ई थारी हेसियत गै अनुसार दान करो। क्यूंकै झिको दान मन ऊं देयिजै बिनै परमेसर स्वीकार करै अर किऊं ई आ आस कोनी करिज्यै कै बो आपगी हेसियत ऊं जादा दान दैय। अर मैं ओ कोनी चाऊं कै थारै दान ऊं दूसरा नै मदद मिलै अर थे तंगी झेलता रेवो। मैं तो सारा नै एकसा चाऊं। म्हारी इच्छा तो आई है कै आज थारै दान ऊं बां लोगां नै मदद मिलै तो आण आळै टेम में बां लोगां गै दान ऊं थारी बी मदद हो सकै कै एक जिसा हो'ज्यै। जिंया पवितर सासतर में लिखेड़ो है कै, “झिकै आदमी जादा धन जमा करयो बिंगै कनै जादा कोनी निकळ्यो अर झिकै आदमी कम धन जमा करयो बिंगै कनै कोई कम कोनी निकळ्यो।” मैं परमेसर गो धन्यवाद करूं कै जिंया थारी चिंता मनै है बिंयाई तीतुस नै बी है। बण आपणी बिनती नै मान ली कै मैं थारूं मिलूंगा पण सच्चाई तो आ है बो खुद थारूं मिलण नै भोत काळो है। अर म्हे तीतुस सागै एक ओर भाई नै भेजण लागरया झिको बिस्वासी मण्डली में सुब समाचार सुणाण में मानिजेड़ो है। अर इंगै अलावा बो बिस्वासी मण्डली गो चुणेड़ो आदमी है अर बे चावै कै ओ ईं दान गै काम में म्हारै सागै जावै। म्हे आ सेवा ईंखातर करां कै प्रभु गी मेमा होवै, अर म्हारै मन में दूसरा गी मदद करण गी झिकी लालसा है, बिंगो दूसरा नै ठा लागज्यै। अर म्हे ईं बात ऊं बी चोकस रेवां कै भोत जादा दान भेळो करण गै आच्छै काम में म्हारै पर कोई दोस ना लगा सकै। ईंखातर म्हानै, ईं बात गी चिंता रेवै कै म्हे बोई काम करां झिको परमेसर अर मिनख दोनां गी नजरा में सई होवै। म्हे बिंगै सागै आपगो एक ओर भाई भेज्यो है झिकै नै म्हे भोत बारी परख्यो है अर बो सेवा करण में भोत माहिर है। पण अब थारै पर बिनै भोत भरोसो है, ईंखातर बिनै थारी मदद करण गी ओर जादा लालसा है। जे कोई तीतुस गै बारै में पूछै तो बो मेरो सेवा गो साथी है। जे बिस्वासी मण्डली गै लोगां गो सवाल है तो बे मसी नै आदर देण आळा लोग है। ईंखातर थे थारो प्रेम अर म्हारो बो घमण्ड झिको थारै उपर है बिनै थे बिस्वासी मण्डलियां गै सामणै सबूत गै सागै दिखावो। मनै थारै पवितर लोगां गै ईं दान गी सेवा गै बारै में लिखणो जरूरी कोनी। क्यूंकै मैं पेलां ई जाणूं हूं कै थे मदद करण में भोत आ'गै रेवो। मैं हमेसा मकिदुनिया परदेस गी बिस्वासी मण्डलियां में थारी बडाई करतो रेवंतो कै एक साल पेलां ई अखाया परदेस गा लोग दान देणै में तैयार हा। पण सच्च तो ओ है कै थारै ई जोस ऊं, भोतसा मकिदुनिया गा बिस्वासी लोग दान देण नै तैयार हो'ग्या। पण मैं आं भाईयां नै ईंखातर भेजण लागरयो हूं कै झिको घमण्ड म्हे थारै पर करयो बो बेकार ना निकळै। अर जिंया मैं बानै केयो बिंयाई थे तैयार मिलो। कठैई इंया ना होवै कै मकिदुनिया गा लोग मेरै सागै अठै आवै अर थे तैयार ना मिलो। अर जद आपां सारा नै बां लोगां सामणै सरमिन्दा होणो पड़ै। क्यूंकै मनै थारै पर भोत भरोसो है। ईंखातर मैं आं भाईयां नै बिनती करी कै बे पेलां थारै कनै आ'गे बो दान भेळो करै झिकै गो थे वायदो करयो। पण दान थे किंगैई दबाब ऊं ना देईयो पण थारी इच्छा ऊं देईयो। क्यूंकै सच्चाई तो आ है कै झिको कोई थोड़ो बिजैगो बो थोड़ो ई बाडैगो अर झिको कोई बोळो बिजैगो बो बोलो ई बाडैगो। ईंखातर हरेक जणो, ना मन में रीस बळगे अर ना'ई किंगै दबाब ऊं दान करियो। क्यूंकै परमेसर मन ऊं देण आळै दान नै भोत प्रेम करै है। अर परमेसर थारी हर तरियां गी घटी नै पूरी करण गो वरदान दे सकै जिंऊं थे थारी हरेक जरूरत नै पूरी कर सको अर हरेक भलै काम नै करण खातर थारै कनै कोई कमी कोनी रेवैगी। जिंया पवितर सासतर में लिखेड़ो है कै, बो सारा नै खुलै दिल ऊं देवै अर बिंगा आच्छा काम हमेसा याद रेवै। ईंखातर बो परमेसर, बीज बिजण आळै नै बीज अर जीमण आळै नै रोटी देवै। बो थानै बीजण खातर बीज देगे, बिनै भोत जादा बढावै। बिंयाई बो थारो दान देण गै उपकार नै बी बढावैगो। ईं तरियां थानै बो धनवान बणावैगो जिंऊं थे दूसरै लोगां गी हरेक टेम मदद कर सको अर बे लोग परमेसर गो धन्यवाद कर सकै। क्यूंकै ईं दान गी सेवा ऊं सिरफ बिस्वासी लोगां गी मदद ई कोनी होवै पण ईं मदद ऊं भोतसा लोग परमेसर गो धन्यवाद बी देवै। ईं सेवा गो फळ ओ होवै है कै लोग परमेसर गी बडाई करैगा। अर थारै उपकार ऊं बिस्वासी लोगां खातर आ बात साबित होज्यै कै थे यीसू गै सुब समाचार नै मानगे बिंगी रजा में रेवो। अर सारै लोगां खातर दिल खोलगे दान देवो। अर बे थारूं प्रेम करै अर थारै खातर पराथना बी करता रेवै कै थारै पर परमेसर गी भोत मोटी दया है। ईंखातर बे थारूं मिलण गी लालसा करता रेवै। झिकै दान गी बडाई गो बखान कोनी करयो जा सकै बिं खातर परमेसर गो धन्यवाद होवै। मैं पौलुस, यीसू गी कोमलता अर दया गै सागै थारूं ओ निवेदन करूं कै थे लोग भरम में हो कै केई लोग मेरी पीठ लारै सोचै है कै मैं डरपोक हूं पण ईं खत नै लिखता टेम भोत निडर लागूं। मैं पौलुस फेर थानै केऊं कै झिका लोग समझै कै मैं संसार गी रीति पर चालूं हूं। मैं बांगै सागै करड़ो बरताव कर बी सकूं। म्हे मिनख तो हां पण म्हारी लड़ाई गो तरिको संसार बरगो कोनी। क्यूंकै म्हारी लड़ाई गा हथियार संसार आळा कोनी पण बुराई गै गढ नै ढाण खातर परमेसर गी सकती है। अर बिं सकती गै हथियार ऊं म्हे लोगां गै बाद विवाद अर हरेक बिरोध नै झिको परमेसर गै खिलाफ उठै बिनै तोड़ दैयां। अर हरेक आदमी गी भावना नै केद कर'गे यीसू मसी गा आग्याकारी बणा दैयां। अर थे पूरी तरियां आग्या मानणै नै तैयार रेवो जद झिका आग्या ना मानै बानै सजा देण खातर तैयार रेवां। थे देखी बातां पर बिस्वास करो, जे थारै मू कोई ओ समझै कै मैं मसी गो भगत हूं तो बो ओ बी जाणल्यै कै जिंया बो भगत है बिंया म्हे बी हां। अर झिको हक मनै परमेसर दियो है बिं पर घमण्ड करूं तो बो थारै फायदै खातर है ना कै नुकसान खातर। ईंखातर मैं आपगै ईं हक नै बताण में सरम कोनी राखूंगा। ईंखातर मैं अपणै आप पर काबू राखूं। कै झिका खत मैं लिखूं बामै मैं थानै, डराण आळो ना लागूं। क्यूंकै केई लोग केवै कै, मेरो खत गेहरो अर असरदार है, अर जद बो लोगां गै सामणै होवै तो इतो जादा कोनी बोलै। पण झिका लोग इंया सोचै तो बे ओ समझल्यै कै जिंया खत में म्हे बोला बिंयाई थारै सामणै बोलण गी बी हिम्मत दिखावांगा। म्हे आपगी बराबरी बां लोगां सागै कोनी करां झिका अपणै आपगी बडाई करै। हिस्या लोग आपस में एक दूसरै गी बराबरी करगे आपगी मूरखता दिखावै। म्हे हद ऊं बारै घमण्ड कोनी करांगा पण झिकी हद परमेसर म्हारै खातर बणाई है बिं तांई करांगा अर बिं हद में थे बी भेळा हो। म्हे आपगी ईं हद नै तोड़नी कोनी चावां झिकी हद में थे बी हो क्यूंकै सारा ऊं पेलां, म्हे थारै अठै मसी गो सुब समाचार सुणायो। म्हे म्हारी हद ऊं बारै दूसरा गै काम पर घमण्ड कोनी करां। पण म्हानै आस है कै जिंया जिंया थारो बिस्वास बदतो जावैगो, बिंया बिंया थारी बजह ऊं म्हारी सेवा गो काम बी बदतो जावैगो। जिंऊं म्हे थारै पड़ोस गै इलाकै में सुब समाचार सुणा सकां अर बे इलाका जठै सुब समाचार गो काम हो चुक्यो बिं पर म्हे घमण्ड ना करां। पवितर सासतर में इंया लिखेड़ो है कै झिको घमण्ड करै है बो प्रभु पर करै झिको ओ सारो कीं करण आळो है। क्यूंकै आच्छो आदमी बो कोनी होवै झिको खुद नै आच्छो मानै। पण आच्छो तो बो होवै झिकै नै प्रभु मानै। मैं चाऊं कै थे मेरी ईं थोड़ी मूरखता में धीरज राखो अर इनै सेण बी करो। जिंया थारी चिंता परमेसर करै बिंया म्हे बी करां। थे एक पवितर कुंवारी छोरी गी तरियां हो झिकी गो रिस्तो म्हे मसी नाम गै मिनख सागै कर दियो। पण मनै डर है जिंया सांप आपगी चतुराई ऊं धरती गी पेली लुगाई हवा नै भेकाई कठै बिंयाई थारै मन ऊं मसी गी सुद्ध भगती अर पवितरता ना भेकाईज्यै। क्यूंकै जद कोई थारै कनै दूसरो आदमी आ'गे हिस्यै यीसू गो उपदेस सुणावै झिकै गो उपदेस म्हारै उपदेस ऊं न्यारो है, या थानै कोई दूसरी आत्मा गै बारै में बतावै झिकी पवितर आत्मा ऊं न्यारी है या थानै म्हारै सुणायेड़ै सुब समाचार ऊं कोई न्यारो सुब समाचार सुणावै तो थे बिनै भोत आसानी ऊं मान्लयो। हिस्या लोग झिका अपणै आपनै मोटा खास चेला मानै मैं बांऊ कम कोनी। पण हो सकै मैं इतो बोलण में मायिर कोनी, पण मेरै में परमेसर गै ग्यान गी कोई कमी कोनी। ऐ सारी बातां म्हे पेलां ई साफ साफ केवंता आया। थानै उपर उठाण खातर मैं छोटो बण्यो अर थानै मुफ्त में सुब समाचार सुणागे मैं कोई पाप कोनी करयो। आ गळत तो कोनी के? मैं थारी सेवा करण खातर दूसरी बिस्वासी मण्डलियां ऊं चंदो मांग्यो। अर जद मैं थारै कनै हो अर मनै क्यांगी लोड़ पड़ी तो मैं थानै कदी तंग कोनी करया क्यूंकै मकिदुनिया गै भाईयां मेरी मदद कर दी। मैं ना तो कदी थानै तंग करया अर ना'ई करूंगा। जद तांई मेरै में मसी गी सच्चाई है मनै अखाया परदेस में घमण्ड करण ऊं कोई कोनी रोक सकै। पण मेरै केण गो मतलब ओ कोनी कै मैं थारूं प्रेम कोनी करूं क्यूंकै परमेसर ईं बात नै जाणै कै मैं थारूं प्रेम करूं। पण झिको कीं मैं अब करण लागरयो हूं बो आ'गै बी करतो रेवूंगा। जिंऊं बे लोग झिका अपणै आपनै म्हारै बरगा समझै बानै मैं घमण्ड करण गो मोको ना दैयूं। हिस्या ऐ लोग झूठा अर धोखे बाज है झिका मसी गै खास चेला गो रूप धारगे लोगां में आवै। पण आ हेरानी आळी बात कोनी क्यूंकै सैतान खुद बी परमेसर गै सच्चै सुरगदूत गी तरियां भेस बणावै है। ईंखातर जे बिंगा सेवक भलाई गा काम करण गो ढोंग बणावै तो इमै कोई मोटी बात कोनी। क्यूंकै अंत में बानै बांगी करणी गो फळ जरूर मिलसी। मैं थानै फेर केऊं कै, मनै कोई मूरख ना समझै, जे कोई मनै मूरख समझै तो बो मेरी बातां मानल्यै जिंऊं मैं बी थारै पर थोड़ो भोत घमण्ड कर सकूं। हिस्यो घमण्ड प्रभु गी आग्या ऊं कोनी है पण मैं एक मूरख गी तरियां केण लागरयो हूं। अर हिस्या लोग आपगै संसार गै जीवन पर घमण्ड करैगा तो मैं बी करूंगा। ईंखातर थे अपणै आपनै भोत ग्यानी मिनख समझो अर म्हारै बरगा मूरख लोगां गी बाता नै बी सेण कर ल्यो। पण थे इंया हो कोनी। क्यूंकै मनै बिस्वास कोनी होवै कै, जद थानै कोई गुलाम बणागे थारै सागै माड़ी करै या थारै सागै धोखो करै या अपणै आपनै थारूं मोटो समझै या थारै मूं पर थपड़ बी मारै तो थे बिनै राजी राजी सेल्यो हो। मनै आ बात केवंता भोत सरम आवै है कै म्हे बांगी तरियां थारै सागै सलूक करण में जादा कमजोर हा। पण जे कोई कीं तरियां गी बात पर घमण्ड करण गी हिम्मत राखै तो मैं बी बिं पर घमण्ड कर सकूं। आ बात मैं एक मूरख गी तरियां केण लागरयो हूं। जे बे इब्रानी लोग है तो मैं बी हूं, जे बे इसराएली लोग है तो मैं बी हूं अर जे बे अबरहाम गी पीढी गा है तो मैं बी हूं। जे बे मसी गा भगत है तो मैं बी, बाऊं मोटो भगत हूं। मैं आऊं जादा ओखी मेनत करी हूं, मैं भोत बार जेळ गेयो, कोड़ा खाया अर बार बार मोत गो सामणो बी करयो हो। मैं यहुदी लोगां गै हात ऊं पांच बारी उनचाळिस कोड़ा खाया। अर तीन बारी तो डंडा गी खाई, एकर लोगां ऊं मैं दगड़ा गी खाई, तीन बारी मेरो समुंदर में जहाज टूटग्यो अर एकर मैं चौबीस घंटा समुंदर में बिताया। इंया मैं भोत खतरनाक नदियां, डाकुआं, आपगै समाज गै लोगां ऊं, दूसरै समाज गै लोगां ऊं, मोटै नगरा ऊं, जंगळा ऊं, समुंदर ऊं अर आपगै कपटी भाईयां गै खतरै माखर भोत बार सफर करयो है। ईं काम में मैं भोत कठोर मेनत करी है। मैं ठंड में बिना गाबा गै कांपतो अर भूखो प्यासो रेगे भोत बार जागगे रात काडी है। इंगै अलावा हरेक दिन सारी बिस्वासी मण्डलियां गी चिंता मेरै मन में रेवै। जद कोई मनै कमजोर दिखै तो मैं बी अपणै आपनै कमजोर समझूं। अर झिकै नै पाप में पड़यै नै देखूं तो मनै भोत दुख होवै। जे मैं घमण्ड करूंगा तो बां बातां पर करूंगा झिकी मेरी कमजोरी नै दिखावै। परमेसर झिको आपणै प्रभु यीसू मसी गो पिता है। बिंगी मेमा जुगा जुगा तांई धन्य है अर बो जाणै है कै मैं झूठ कोनी बोलूं। जद मैं दमिसक में हो तो राजा अरितास गै मुख्य अधिकारी मनै पकड़ण खातर नगर पर पेरो लगवा दियो। पण बठै गै लोगां मनै टोकरै में बिठागे भींत गी खिड़की माखर नगर ऊं बारै काड दियो अर मैं बठूं बचगे निकळग्यो। भलैईं घमण्ड करणो आच्छी बात कोनी पण फेर बी मैं घमण्ड करूंगा। ईंखातर कै मैं प्रभु गै देयेड़ै दरसणा अर बांगी प्रकट होयड़ी बातां गै बारै में जरूर चरचा करूंगा। मैं मसी में एक भगत नै जाणूं झिकै नै चोवदा साल पेली परमेसर तीसरै सुरग में उठा लियो। पण बो देह गै सागै उठाईज्यो या बिना देह गै। इंगो मनै ठा कोनी। ओ परमेसर ई जाणै। बण भगत बठै इसी बाता सुणी झिकी गो बखान कोनी करयो जा सकै अर बे बातां मिनख गै मूं ऊं बताई बी कोनी जा सकै। मैं हिस्यै आदमी पर घमण्ड करूंगा पण जठै तांई मेरै खुद गो सवाल है मैं आपगी कमजोरियां नै छोड ओर कोई बात पर घमण्ड कोनी करूंगा। जे मैं घमण्ड करूं तो आ मेरी मूरखता कोनी पण मैं साची बोलूं। पण इयां ना होवै कै झिका लोग मनै देखै अर सुणै; जद बे मनै बाऊं मोटो समझै। अर परमेसर झिकी मनै प्रकट होयेड़ी बातां गै बारै में बतायो बांगै घमण्ड में मैं फूल ना जाऊं। ईंखातर बण मेरै सरीर में एक दर्द भर दियो। अर एक सैतान गो दूत मेरै ईं घमण्ड नै कम करण खातर हरेक टेम दुख देवंतो रेवै। अर न्यारै-न्यारै टेम मैं तीन बार परमेसर ऊं बिनती करी कै मेरो ओ दुख काट दे। पण प्रभु बोल्या, “मेरी किरपा तेरै पर भोत है। अर मेरी सामरथ तेरी कमजोरी में जादा काम करैगी।” ईंखातर मैं भोत आनंद गै सागै आपगी कमजोरियां पर घमण्ड करूंगा जिंऊं मसी गी ताकत मेरै में बणी रेवै। ईं कारण मैं मसी खातर कमजोरी, चुगली, कस्ट, सताव अर दुख-तकलीफ में बी सुखी रेवूं क्यूंकै जद मेरै में कमजोरी आवै तो मैं अपणै आपनै ताकतवर समझूं। मैं मूरख तो बण्यो पण थे ई मनै बणन पर मजबूर करयो। थानै तो मेरी बडाई करणी चईयै। भलैईं मैं कीं कोनी जाणूं फेर बी बां मोटा खास चेला ऊं कोई बात में कम कोनी हूं। सच्च में मैं थारै सामणै बड़ी धीरज ऊं एक साच्चो खास चेलो होण गो सबूत दिखायो अर थारै बिचाळै चमत्कार, निसानी अर सामरथ गा काम बी करया हा। के थे कोई बात में दूसरी बिस्वासी मण्डली ऊं न्यारा हो? सिरफ ईं बात में ई कै मैं थारै पर बोझ कोनी बण्यो। मेरी ईं गळती खातर मनै माफ करो। अर देखो, मैं तीसर थारै कनै आण आळो हूं। पण मैं थारै कनूं कीं मांगण कोनी आऊं क्यूंकै मनै थारै धन दोलत गी कोनी पण थारी चिंता है। बच्चा आपगै मां बाप खातर धन भेळो कोनी करै पण मां बाप आपगै बच्चां खातर धन भेळो करै। अर अब मैं खुसी ऊं थारै उपर आपगो तन मन धन खरच कर दैयूंगा क्यूंकै मैं थारूं भोत प्रेम करूं अर मनै पूरो भरोसो है कै मेरै खातर बी थारो प्रेम कदी कम कोनी होवै। थे जाणो हो कै मैं थारै पर बोझ कोनी बण्यो पण फेर ई थारै बिचाळै केई लोग सोचे कै मैं आपगी चलाकी ऊं थानै आपगै फायदै खातर फसा लिया। अब थे ई बताओ कै झिकै लोगां नै मैं थारै कनै भेज्या बाऊं मैं थानै ठग्या के? मैं तीतुस अर बिंगै सागै एक ओर भाई नै थारै कनै भेज्यो। के बां थारै कनूं कीं लियो? क्यूंकै म्हारै में एक ई आत्मा है झिकी काम करै है। थानै लागतो होणो कै म्हे थारै सामणै आपगी सफाई देण लागरया हां। पण हिसी बात कोनी। म्हे मसी गा दास होगे आ बात केण लागरया हां अर इंगो गवा खुद परमेसर है। ईंखातर मेरा प्यारा भाईयों, म्हे झिको कीं करां बो थारै आत्मिक बिस्वास नै मजबूत करण खातर करां हां। पण मनै डर है कै जद मैं थारै कनै आऊं तो जिंया मैं थानै देखणो चाऊं बिंया थे ना दिखो अर जिंया मनै थे देखणो चावो बिंया मैं थानै ना दिखूं। कठैई इंया ना होवै कै थारै में लड़ाई झगड़ो, ईरखा, रीस, मतलबी, बदनामी अर घमण्ड होवै अर म्हानै थे सारा आपसरी में खिंडेड़ा लादो। अर मेरो परमेसर कदी बी मनै फेर ऊं थारै कनै आण पर दबाब दैय अर मनै बां लोगां खातर रोणो पड़ै झिका पेलां पाप करता हा। अर बां अजे तांई आपगै आं कुकरमा ऊं, बेबीचार ऊं अर भोग विलास ऊं आपगो मन कोनी बदळयो होवै। अब मैं तीसर थारै कनै आण लागरयो हूं, “हरेक बातां गो फेंसलो दो तीन गवा गी मोजूदगी में होणो चईयै ” जद मैं थारै कनै दूसरी बार आयो तो जद बी मैं थानै चेतायो अर अब थारूं दूर हूं तो बी मैं थानै आई चेताण लागरयो हूं कै झिकै लोगां पेलां पाप करया है अर अब करण लागरया है, बानै मैं जद थारै कनै आऊंगा तो बकसूंगा कोनी। इंया, मैं ईंखातर केण लागरयो हूं कै थानै तो ईं बात गो सबूत चईयै कै यीसू मसी मेरै द्वारा बोलै है कै कोनी? बो थारै सागै निपटण खातर कमजोर कोनी पण सामरथी है। पण ओ सच्च है कै जद बिनै करूस पर चढायो तो बो कमजोर दिखै हो पण फेर ई परमेसर गी सामरथ ऊं बो जींवंतो है। ईंखातर आपां बी बिमै कमजोर हां पण परमेसर गी सामरथ ऊं यीसू गै सागै जींवंता हां अर जिंऊं थारी सेवा कर सकां। थे लोग अपणै आपनै परखो कै थे यीसू मसी गै बिस्वास में जीवन बितावो के कोनी? अर ओ बी देखो कै, यीसू मसी थारै दिल में वास करै के कोनी? जे इंया ना है तो थे बिं खातर खोटा हो। पण फेर ई मैं आस करूं कै थे ओ जाणल्योगा कै म्हे, बिं खातर खोटा कोनी हा। अर थारै खातर म्हारी परमेसर ऊं आई पराथना है कै थे कोई गळत काम ना करो। पण ओ ईंखातर कोनी कै आपां आच्छा दिखां पण ईंखातर कै थे भलाई गा काम करता रेवो चाये आपां खोटा ई क्यूं ना दिखता होवां। क्यूंकै म्हे सच्चाई गै खिलाफ कीं कोनी बोला पण सच्चाई गी पकस्स करां। म्हानै खुसी जद होवै जद म्हे, कमजोर अर थे तकड़ा दिखो। म्हे पराथना करता रेवां कै थे बिस्वास में ओर बी तकड़ा होवंता रेवो। ईंखातर आ बात मैं थानै दूर बेठयो लिखण लागरयो हूं कै जद मैं थारै कनै आऊं तो मनै परमेसर गै देयेड़ै हक ऊं थारै सागै करड़ो बरताव ना करणो पड़ै। क्यूंकै बण ओ हक मनै थानै बसाण खातर दियो है ना कै उजाड़न खातर। ईंखातर हे भाईयो अर भेनों, अर आखरी में मैं थानै आई बात केगे मेरी बात बंद करणी चाऊं कै थे खुस रेवो, सिद्ध बणो, एक दूसरा नै होंसलो दैयो अर सांती ऊं सारा मिलगे रेवो। अर देखो, जद परमेसर झिको सांती अर प्रेम गो दाता है, बो थारै सागै हमेसा रेसी। अर एक दूसरै ऊं लाड कोड करता मिलता रेवो। अर अठै गै सगळै, परमेसर गै पवितर लोगां गी ओर ऊं थानै सारा नै आसिस मिलै। प्रभु यीसू मसी गी किरपा अर परमेसर गो प्रेम अर पवितर आत्मा गी संगती थारै सागै सदां सदां होवंती रेवै। आमीन। मैं पौलुस, यीसू मसी अर पिता परमेसर गी ओर ऊं झिकै बिनै मरेड़ा ऊं जींवंतो करयो है, बिंगो खास चेलो हूं, मनै ना कोई माणस गी ओर ऊं अर ना कणी माणसां गै द्वारा भेज्यो है। मैं ओ खत सारा भाई झिका मेरै सागै है, बांगी ओर ऊं गलातिया गै इलाकै गै बिस्वासी मण्डली गै नाम लिखण लागरयो हूं। आपणै पिता परमेसर अर प्रभु यीसू मसी गी ओर ऊं थानै परमेसर गी किरपा अर सांती मिलती रेवै। प्रभु यीसू मसी झिको आपणै पापां खातर अपणै आपनै बलिदान कर दियो कै आपणै परमेसर अर पिता गी इच्छा ऊं आपां नै अब ईं टेम गै बुरै संसार ऊं छुड़ावै। बांगी सदां सदां ई बडाई होवंती रेवै। आमीन। थे लोग यीसू मसी गी किरपा ऊं बुलाएड़ा हो बिंऊं थे इता बेगा बदळगे दूसरै सुब समाचार गै लारै लागग्या, ओ देखगे मनै भोत अचंभो होयो। पण कोई दूसरो सुब समाचार है ई कोनी। पण कीं लोग थानै डरागे मसी गै सुब समाचार नै बिगाड़नो चावै है। म्हे थानै झिको सुब समाचार सुणायो है बिनै छोड़गे जे म्हे या कोई सुरगदूत थानै कोई ओर सुब समाचार सुणावै है तो बो सरापित है। झिको म्हे पेलां केयो बिंयाई मैं फेर केऊं हूं कै बो सुब समाचार झिको थे मान्यो है बिनै छोड़गे कोई दूसरो संदेस सुणावै तो बो सरापित है। मैं लोगां नै राजी कोनी करूं, पण मैं परमेसर नै राजी करूं हूं। थे के सोच्यो है के मैं लोगां नै सराण आयो हूं? जे मैं लोगां नै राजी करण आयो हूं तो मैं मसी गो दास कोनी। हे भाईयो अर भेनों, मैं थानै बताणो चावूं हूं कै झिको सुब समाचार मैं सुणायो है बो माणसां गी ओर ऊं कोनी। क्यूंकै मैं कोई बी सुब समाचार माणसां कनूं कोनी लियो अर ना कणैई मनै सिखायो पण यीसू मसी गै द्वारा परगट होयो। मैं पेलां यहुदी धरम में किंया जींवंतो हो बो थे जाणो हो। अर थे ओ बी सुण्यो हो कै मैं परमेसर गी बिस्वासी मण्डली नै किती तंग करी अर बानै खत्म करण गी बी कोसिस करी ही। यहुदी धरम गै पालण में मैं आपगै युग गै सारा यहुदी लोगां ऊं आ'गै हो क्यूंकै मेरा बडेरा गी रीति रिवाज गो पालण करण खातर मैं भोत उंतावळो हो। पण परमेसर मनै मेरै जन्म ऊं पेलां ई चुण लियो। अर आपगी किरपा ऊं मनै बुला लियो। जद बांगी इच्छा होयी कै मेरै में आपगै बेटै गै रूप में परगट करै कै मैं गेर यहुदी लोगां में बिंगो सुब समाचार सुणाऊं जद मैं ईं बात गी सला कोई माणसा कनूं कोनी ली। अर ना मैं बां लोगां कनै यरुसलेम गेयो झिका मेरूं पेलां खास चेला बण्या हा पण मैं अरब में गेयो अर बठै ऊं दमिसक पाछो आयो। फेर तीन सालां गै बाद पतरस ऊं मिलण खातर यरुसलेम गेयो बिंगै कनै पंदरा दिन रुक्यो। पण बठै मैं प्रभु गै भाई याकूब नै छोड़गे दूसरा खास चेला ऊं कोनी मिल्यो। मैं परमेसर गै सामणै सोगन खा'गे केऊं हूं झिको मैं लिखण लागरयो हूं बिमै झूठ कोनी है। इंगै बाद मैं सीरिया अर किलिकिया परदेसां में गेयो। पण यहुदियां गी बिस्वासी मण्डली गा मसी नै मानण आळा लोग ना मनै कदी देख्यो अर ना'ई मनै जाणता हा। पण बां ओ सुण्यो हो कै झिको म्हानै पेलां तंग करतो हो बो मसी गो सुब समाचार सुणावै है झिकै नै पेलां खत्म करणो चावै हो। अर बे मेरै बारै में परमेसर गी बडाई करी। चौवदा साल गै बाद मैं बरनाबास अर तीतुस गै सागै फेर यरुसलेम सैहर गेयो। मैं परमेसर गा बोल सुणगे बठै गेयो। मैं गेर यहुदियां गै बिचाळै सुब समाचार सुणाऊं हूं ओ ई सुब समाचार एक बिस्वासी मण्डली गै मुख्य लोगां नै न्यारो कर'गे बी सुणायो। मैं बठै ईंखातर गेयो कै झिका काम मैं पेलां करया अर अब करण लागरयो हूं बे बेकार ना जावै। तीतुस झिको मेरै सागै हो बो एक युनानी हो फेर बी बिनै खतनो करण खातर मजबूर कोनी करयो। अर बो झूठै बिस्वासियां गै कारण होयो झिका चोरी चुपकै म्हारै मा आ ग्या कै बां यीसू मसी में म्हारी आजादी गो पतो लगागे म्हानै गुलाम बणा सकै। झिको साच्चो सुब समाचार थारै मा निवास करै है अर बो थारै मा बण्यो रेण खातर म्हे बांगै सामै एक घड़ी बी गोडा कोनी टेक्या। यरुसलेम गी बिस्वासी मण्डली गा खास लोग मेरो संदेस बदळण खातर जोर कोनी दियो, बे लोग किंया गा हा मनै कोई लेणो देणो कोनी, क्यूंकै परमेसर गै सामणै सारा लोग एक जिस्या है। पण आं खास लोगां देख्यो के मनै परमेसर गेर यहुदी लोगां में सुब समाचार सुणाण गो काम दियो जिंया पतरस नै परमेसर गो यहुदी लोगां नै सुब समाचार सुणाण गो काम दियो। परमेसर पतरस नै एक खास चेलै गै रूप में यहुदी लोगां में काम करण गी सकती दी जिंयाई परमेसर मनै बी एक खास चेलै गै रूप में गेर यहुदी लोगां गै बिचाळै में काम करण गी सकती दी है। बे लोग इंया समझग्या कै मेरै पर परमेसर गी किरपा है अर बिस्वासी मण्डली गा मुख्य मानिजण आळा पतरस, याकूब, यूहना यहुदी लोगां में काम करण गी सेमती कर ली अर बरनाबास अर मेरै ऊं साझेदारी कर ली अर म्हे गेर यहुदी लोगां में काम करण गी सेमती बी ली। बे आ'ई बात केवा कै, म्हे गरीब लोगां गी सुध ल्यां, अर ओई काम करण में मैं भोत लालसा करण लागरयो हो। पण जद पतरस अन्ताकिया सैहर आयो तो मैं खुलगे बिंगो बिरोध करयो कै बो गळत रा पर चालै हो। मैं बिंगो बिरोध ईंखातर करयो कै याकूब गा भेजेड़ा कीं लोग अठै आणै ऊं पेलां पतरस गेर यहुदी लोगां गै सागै खांतो पींतो हो पण बां लोगां गै आण गै बाद यहुदी लोगां ऊं डरतो होयो बांगै सागै उठणो बेठणो छोड़ दियो। दूसरै यहुदी बिस्वासी लोगां बी बिंगी गळत चाल पर साथ दियो अर बरनाबास बी बांगै कपट गै कारण भटकग्यो। जद मैं देख्यो कै बे सुब समाचार गी सच्चाई पर सीधा कोनी चालै तो मैं सारां गै सांमणै पतरस नै केयो, “जद थे यहुदी होगे गेर यहुदी गो जीवन जियोगा अर यहुदियां गी तरियां कोनी तो फेर गेर यहुदी लोगां नै यहुदियां गी रीति रिवाज पर चालण खातर क्यामी केवो हो?” मैं अर तूं तो यहुदी मां बाप गी उळाद हां झिका म्हानै परमेसर गै नेमा गै बारै में बतायो पण गेर यहुदी लोग परमेसर गै नेमा गै बारै में कोनी जाणै। कोई बी आदमी नेमा नै मानण ऊं परमेसर गी नजर में निरदोस कोनी बण सकै। पण जे यीसू मसी पर बिस्वास करां तो परमेसर गी नजर में निरदोस बण सकां हां। आपां नेम मानण ऊं परमेसर गी नजर में निरदोस कोनी बण्या पण यीसू मसी पर बिस्वास करण ऊं इंया बण्या। कोई बी नेमा नै मानगे परमेसर गी नजर में निरदोस कोनी बण सकै। कीं यहुदी लोग आपां नै पापी समझै है क्यूंकै परमेसर गी नजर में निरदोस बणण खातर आपां नेम विधान ना मानगे एकलै यीसू मसी पर बिस्वास करां हां। इंगो मतलब ओ कोनी कै मसी पाप गो सेवक है। कदी कोनी हो सकै। जे मैं पेलां आळै नेम विधान नै छोड़गे दुसर बिंगो पालण करण लाग जाऊं तो मैं नेम विधान नै तोड़ण आळो अपराधी बण जाऊंगा। पेलां मैं नेम विधान मानगे आपगो जीवन जींवंतो हो। पण जद मेरो नेम विधान ऊं छुटकारो होयो तो मैं परमेसर गै सागै जीवन जीण गै काबिल बण ग्यो। मैं मसी गै सागै करूस पर चढायो गेयो हूं अब मैं जींवंतो कोनी हूं पण मसी मेरै में जींवंतो है। मैं अब बिस्वास में जींवंतो हूं, मैं अब परमेसर गै बेटै पर बिस्वास कर'गे जींवंतो हूं झिकै मेरूं प्रेम करयो अर मेरै खातर अपणै आपनै बलिदान कर दियो। मैं परमेसर गी किरपा गो इनकार कोनी करूं हूं, जे नेम विधान गै द्वारा म्हे परमेसर गी नजर में निरदोस बणता तो मसी गो मरणो बेकार है। हे गलातियों गा बिस्वासी लोगो, थे मुर्खा गी तरियां क्यूं हो'ग्या हो। थारै पर कण जादू कर दियो है। मैं थानै पेलां बी समझायो हो कै थारै खातर यीसू मसी करूस पर मरग्यो है। मैं थारूं ओ जाणनो चाऊं कै थानै पवितर आत्मा गो वरदान नेम विधान गो पालण करण ऊं मिल्यो या सुब समाचार सुणगे बिं पर बिस्वास करण ऊं मिल्यो। झिकै जीवन नै थे पवितर आत्मा ऊं सुरू कर'गे बिनै अब थे माणसां गी मेनत ऊं पूरो कर'गे इता मूरख क्यूं बणो हो? थे बिस्वासी होण गै नातै इता दुख झेल्या। मनै आसा है कै बे दुख बेकार कोनी है। परमेसर झिकै थानै पवितर आत्मा गो दान दियो है झिको थारै बिचाळै चमत्कार करै है बो ईं कारण होयो है, के थारै नेम विधान मानण ऊं या सुब समाचार सुणगे बिं पर बिस्वास करण ऊं? पवितर सास्तर में अबरहाम गै बारै में इंया केवै है कै, “बण परमेसर पर बिस्वास करयो अर ईंखातर बिनै परमेसर आपगी नजर में निरदोस बणायो। ” फेर थे ओ बी जाणल्यो झिको परमेसर पर बिस्वास करण आळो है बोई अबरहाम गी उळाद है। पवितर सासतर पेलां ई ओ जाणै कै परमेसर गेर यहुदी लोगां नै बी बांगै बिस्वास गै द्वारा आपगी नजर में निरदोस बणावैगो, पेलां ई अबरहाम नै सुब समाचार सुणा दियो कै, “तेरै ऊं सारी जाती आसिस पावैगी। ” झिका परमेसर पर भरोसो राखै, बे लोग बिस्वासी अबरहाम ऊं आसिस पावै है। झिका लोग नेम विधान गै काम में बिस्वास राखै है बे लोग सराप गै बस में है क्यूंकै पवितर सासतर में इंया लिख्यो है कै, “झिको कोई नेम विधान में लिखेड़ी सारी बात कोनी मानै तो बो सरापित है। ” नेम विधान गै द्वारा कोई परमेसर गी नजर में निरदोस कोनी बण सकै। आ बात सई है। पवितर सासतर में इंया लिखेड़ो है कै, “परमेसर गी नजर में निरदोस आदमी बिस्वास गै द्वारा जींवंतो रेवैगो। ” नेम विधान गै बिस्वास ऊं कोई लेणो देणो कोनी। पण पवितर सासतर गै अनुसार झिको नेम विधान नै मानैगो बो बिंगै द्वारा जींवंतो रेसी। मसी म्हारै सराप नै आपगै उपर लेगे नेम विधान गै सराप ऊं आपां नै छुड़ा लिया क्यूंकै पवितर सासतर में इंया लिख्यो है कै, “झिको कोई काठ पर लटकायो जावै बो सरापित है। ” मसी आपां नै ईंखातर छुड़ायो कै अबरहाम नै देएड़ी आसिस यीसू मसी गै द्वारा गेर यहुदियां नै बी मिल सकै कै म्हे बिस्वास गै द्वारा बिं पवितर आत्मा नै ले सकां झिकै गो वायदो करेड़ो है। हे भाईयो अर भेनों, अब मैं थानै हर एक दिन ऊं एक मिसाल बताऊं, जिंया दो आदमी आपसरी में इकरारनामो करै है तो एक दिन पक्को करै है अर फेर बिंगै बाद बिनै आ'गै लारै कोनी करयो जा सकै। परमेसर गो वायदो बी हिसो ई है। परमेसर अर अबरहाम गी आण आळी एक उळाद गै सागै एक वायदो करयो, पवितर सासतर में इंया कोनी केवै है “बिंगी आण आळी उळाद” इंया होवंती तो भोत लोगां गै बारै में हिसारो होवंतो। पण सासतर इंया केवै है “अर तेरी आण आळी एक उळाद नै, इंगो मतलब बो यीसू मसी है।” मेरै केण गो मतलब ओ है के परमेसर अबरहाम गै सागै एक पक्को इकरारनामो कर लियो। बिंगै चार सौ तीस साल बाद मूसा नै नेम विधान परमेसर दे दियो। मूसा नै देएड़ा नेम विधान अबरहाम गै इकरारनामै नै बदळ कोनी सकै। क्यूंकै वारिस जे नेम विधान पर टिकेड़ो है तो बो परमेसर गै वायदै पर कोनी टिकेड़ो। पण परमेसर अबरहाम नै वायदै गै द्वारा वारिस बणा लियो। फेर नेम विधान गी के जरूरी है? लोग परमेसर गी बात नै मान लियो ईंखातर नेम विधान बानै दे दियो है। नेम विधान बा उळाद आण तांई रेवै झिकै गो वायदो करयो गेयो हो अर परमेसर ओ नेम विधान सुरगदूतां गै द्वारा मूसा नै बिचाळै लेगे दियो। झिका आदमी बिचाळै गा काम करै है बो दोना नै सागै लेगे करै है। पण परमेसर झिका वायदा अबरहाम नै दिया बांगै बिचालै कोई कोनी हो। तो नेम विधान परमेसर गै वायदै गो बिरोधी है के? जमाई कोनी। क्यूंकै जे नेम विधान दियो जांवतो झिको जीवन दे देवंतो तो साची में परमेसर गै सामणै एक आच्छो जीवन नेम विधान ऊं होवंतो। पण पवितर सासतर केवै है झिको कीं संसार में है बे सारा पाप गै बस में है। कै परमेसर गो वायदो यीसू मसी पर बिस्वास करण आळा सारा लोगां खातर है। यीसू मसी गै आण ऊं पेलां आपां नेम विधान गै बस में हा। ओ नेम विधान यीसू मसी गै आण तांई आपानै बन्दी गै रूप में राख्या हा। ईं तरियां आपानै नेम विधान मसी तांई ले जाण में मदद करी कै आपां आपगै बिस्वास ऊं परमेसर गी नजर में निरदोस बण सकां। पण जद आपां आपणो बिस्वास मसी में करयो तो अब आपां सिखाण आळै नेम विधान गै बस में कोनी रेवां। यीसू मसी में बिस्वास गै कारण थे सारा परमेसर गी उळाद हो। थारै ऊं जिता मसी में बतिस्मो लियो है बां सारा मसी नै मान लियो है। अब थे सारा यीसू मसी में एक ई हो। अब किमैई कोई फरक कोनी है, अब ना कोई यहुदी रेयो ना गेर यहुदी रेयो, ना कोई दास रेयो ना कोई आजाद, ना कोई आदमी रेयो ना कोई लुगाई। अर जे थे मसी गा हो तो अबरहाम गी उळाद हो अर परमेसर गै वायदै गै अनुसार अबरहाम गा वारिस बी बण ग्या। मैं एक मिसाल बोलणो चाऊं हूं, बाप गी संपती बेटै गी है पण बेटो अजे तांई छोटो है ईं कारण संपती बाप गै कनै है। अर बिमै अर दास में कोई फरक कोनी है। पण पिता गै ठेराएड़ै टेम तांई बो बेटो संभालण आळा गै बस में रेवै है। आपणी बी हिसी हालत ही आपां जद टाबर हा तो आपां बी ईं दुनिया गै बेकार नेम गै बस में हा। पण परमेसर झिकै टेम गो फेंसलो करयो बिं टेम आपगै बेटै नै घाल्यो झिको एक लुगाई ऊं पैदा होयो अर बिनै नेम विधान पूरी तरियां मानणो जरूरी हो। कै नेम विधान गै बस में रेण आळै लोगां नै छुड़ागे आपां नै परमेसर गोद लेगे उळाद बणा सकै। अब आपां परमेसर गी उळाद हां। ईंखातर परमेसर आपणै मन में आपगै बेटै गी आत्मा घाली। बिं आत्मा गी मदद ऊं आपां परमेसर नै हेलो मार सकां कै “हे म्हारा पिता।” ईंखातर अब थे ईं दुनिया गा बेकार नेम गै बस में कोनी हो, पण परमेसर गी उळाद हो। थे उळाद हो, ईंखातर परमेसर गै द्वारा अब वारिस बी बणग्या। पेलां जद थे परमेसर नै कोनी जाणता हा तो थे लोग बांगै बस में हा झिका सच्च में परमेसर कोनी। पण अब थे परमेसर नै जाणो हो अर परमेसर थानै पिछाण लिया है। अब थे कमजोर अर निकम्मी धारमिक सिक्सा कानी क्यूं मूड़नो चावो हो? थे ओर बी बिंगै बस में होणो चावो हो के? मैं इयां सुण्यो हो कै थे लोग दिना अर म्हिनां अर खास मोसम अर त्यूंहार नै बी मानो हो। आ बात सुणगे मैं भोत डरूं हूं। कठैई इंया ना होवै कै मैं झिकी मेनत करी बा बेकार हो'ज्यै। हे भाईयो अर भेनों, मैं थारूं बिनती करूं कै, थे लोग बुरा कामा नै छोड़गे मेरै जिसा बण जाओ। मैं बी थारै जिसो बणग्यो हूं। थे मेरो कीं बिगाड़यो कोनी। मैं पेलां थारै कनै यीसू मसी गो सुब समाचार सुणाण आयो हो जद मेरो सरीर भोत कमजोर हो, ईं बात गो थानै पतो हो। मेरै सरीर गी कमजोरी थारी परीक्सा गै कारण ही, फेर बी थे मनै तुछ कोनी जाण्यो अर ना मेरूं नफरत करी पण परमेसर गै दूत गै रूप में मेरो मान समान करयो। थे इंया समझो कै मैं आप ई यीसू मसी हो। थारी पेलां आळी खुसी कठै गेई? मैं खुद थारो गवा हूं कै जे हो सकै तो थे मनै आपगी जान बी दे देवंता। मैं थारै सागै सच्च बोलण ऊं थारो दुसमण बणग्यो हूं के? ऐ झूठी सिक्सा देण आळा लोग थानै आपगा बेली बणाणा चावै है। बांगी नीत आच्छी कोनी है। थानै मेरूं न्यारा करणा चावै है कै थे बांगा बेली बण जावो। आच्छी सिक्सा देण आळा गै सागै चालणो भोत आच्छी बात है। मैं थारै सागै होऊं या ना होऊं, इंया सदां ई करता रेईयो। मेरा प्यारा टाबरों, जद तांई थे मसी जिस्या ना बण जावो जद तांई जिंया मां जापै गै टेम दुख झेलै है बिंयाई मैं एकर थारै खातर दुख झेलू हूं। मैं अब बी इंया चाऊं हूं कै थारै कनै आ'गे मैं न्यारी तरियां गी बात करूं क्यूंकै थारै बारै में सोचगे मैं भोत दुखी हो'ग्यो हूं। मैं थारै ऊं एक बात पूछणी चाऊं हूं, थे मूसा गो नेम विधान मानणो चावो हो पण बिमै के लिखेड़ो है थानै क्यूं कोनी पतो? पवितर सासतर में इंया लिखेड़ो है कै अबरहाम गै दो बेटा हा एक बेटो हाजिरा ऊं पैदा होयो झिकी दासी ही अर दूसरो बेटो सारा ऊं पैदा होयो झिकी दासी कोनी ही अर बा बिंगी घराळी ही। हाजिरा ऊं पैदा होएड़ो बेटो आदमी गी योजना गै अनुसार होयो अर सारा गै पैदा होएड़ो बेटो परमेसर गै वायदै ऊं पैदा होयो। ऐ दोनूं लुगाई परमेसर गै इकरारनामै गी एक मिसाल है। एक इकरारनामो हाजिरा अरब गो सिनै पहाड़ गी मिसाल है अर हाजिरा ऊं दास ई पैदा होवै है अर बा अब आळै यरुसलेम गी तरियां है क्यूंकै बा आपगै टाबरा गै सागै नेम विधान गै बस में है। पण सारा झिकी आजाद लुगाई बिं तरियां जिंया यरुसलेम सुरग में है अर बाई आपणी माता है। पवितर सासतर इंया केवै है, “हे बांझ, तूं झिकी बिना उळाद है, जय जयकार कर, क्यूंकै तनै बो दुख कोनी होयो, तूं मूं खोलगे जय जयकार कर अर हेलो मार क्यूंकै छोडेड़ी गी उळाद सुहागण ऊं बोळि है। ” ईंखातर हे भाईयो अर भेनों, अब थे इसहाक गी तरियां परमेसर गै वायदै गी उळाद हो। पण जिंया बिं टेम आदमी गी इच्छा ऊं पैदा होयेड़ा परमेसर गै वायदै ऊं पैदा होएड़ा नै तंग करता हा, बे आज बी करै। पण पवितर सासतर में परमेसर अबरहाम नै इंया केवै है कै, “दासी अर बिंगै बेटै नै काड दैयो, क्यूंकै दासी गो बेटो तेरै घराळी आजाद लुगाई गै बेटै गै सागै वारिस गी हकदार कोनी हो'सी। ” ईंखातर, हे भाईयो अर भेनों, आपां अब्रहाम गी दासी गी उळाद कोनी हां पण आपां तो अबरहाम गी घराळी आजाद लुगाई गी उळाद हां। मसी आपां नै नेम विधान गी गुलामी ऊं आजाद कराया इमै टिक्या रेवो, फेर दुसर नेम विधान गी गुलामी गी गांठड़ी गो भार ना चको। देखो, मैं पौलुस थानै केऊं हूं, जे थे परमेसर गी नजर में निरदोस बणण खातर खतनो करो हो तो मसी में थारो कीं लेणो देणो कोनी। मैं थानै फेर केऊं हूं खतनो करण आळै आदमी नै पूरै यहुदी नेम गो पालण करणो ई पड़ैगो। परमेसर गी नजर में निरदोस बणण खातर जे थे यहुदी नेम विधान गो पालण करोगा तो मसी ऊं थे न्यारा हो'ग्या अर परमेसर गी किरपा ऊं दूर हो'ग्या। पण म्हे पवितर आत्मा गै कारण बिस्वास ऊं परमेसर गै सामणै धरमी होण'गी आस राखगे इंगी उडीक करण लागरया हां। यीसू मसी अर आपणै रिस्तै गै बिचाळै में खतनो करणो अर खतनो ना करणै गो कोई लेणो देणो कोनी। पण बिमै थारै प्रेम ऊं पैदा होएड़ै बिस्वास गो ई म्हत्व है। थे तो भोत आच्छी तरियां एक मसी जीवन जींवंता हा। अब थानै परमेसर गी सच्चाई पर चालण ऊं कण रोक दिया। झिकी बात थानै सच्च ऊं दूर करण लागरी है बा थारै बुलाण आळै परमेसर गी ओर ऊं कोनी। जिंया थोड़ो सो खमीर सारै गुंदेड़ै आटै नै खमीर बणा दैय है बिंयाई थोड़ी सी झूठी सिक्सा बिस्वासियां नै भटका देवै है। प्रभु पर मेरो पूरो भरोसो है थे कोई बी दूसरी सिक्सा कोनी मानोगा पण झिको थानै भटकावै है बो कोई बी होवै, बिनै परमेसर गी ओर ऊं जरूर सजा मिलैगी। हे भाईयो अर भेनों, जे मैं अजे तांई खतनै गो परचार करूं हूं तो अजे तांई मेरै पर दुख आण गो कोई कारण कोनी। अर जे मैं अजे तांई खतनै गो परचार करूं हूं तो मसी गै करूस गै कारण पैदा होएड़ो मेरो सारो दुख खत्म होणो चईयै। मैं तो चाऊं हूं कै झिका लोग थानै गिराणो चावै है, खतनो कराण गै सागै अपणै आपगो अंग बी काट लेवंता तो कितो आच्छो है। हे भाईयो अर भेनों, परमेसर थानै आजाद करया है पण बिं आजादी नै मन गी बुरी इच्छा पूरी करण गो साधन ना बणाओ, अर प्रेम ऊं एक दूसरै गी सेवा करो। क्यूंकै मूसा गै नेम विधान गो सार ओ है कै आपगै साथियां ऊं बिंया प्रेम करो जिंया थे अपणै आपनै करो हो। जिंया कुतिया एक दूसरै नै फाड़ खावै है बिंया थे एक दूसरै गै सागै लड़ाई कर'गे सत्य नास ना करो। आं बातां में सावधान रेवो। पण मैं केऊं कै जे थे पवितर आत्मा गी बात मानगे चालो तो थे थारै मन गी बुरी इच्छा कोई बी तरियां पूरी ना करोगा। क्यूंकै मन गी बुरी इच्छा अर पवितर आत्मा गी इच्छा एक दूसरै गी बिरोधी है। ईंखातर झिको कीं थे बुरी इच्छा गै अनुसार करणो चावो हो तो ना कर सको। पण जे थे पवितर आत्मा गै अनुसार चालो हो तो नेम विधान गै बस में कोनी रेवो। अब देखो, आपणै सरीर गै पापां नै सगळा जाणै है। बे है, बेबीचार, मन गो खोट, लुचपन, मूरती पूजा, जादू टूणो, बिरोध, लड़ाई झगड़ो, दूसरै नै देखगे बळणो, दूसरै लोगां नै नीचा दिखाण खातर रीस आणी, अपणै आपगै बारै में सोचणो, एक दूसरै गी बात ना मानणी, लड़ाई झगड़ो करण खातर गुट बणाणो, दूसरा गी चिजां देखगे बळणो, कोई नसो कर'गे आपगी मस्ती में मस्त रेणो, दारू पीगे रंग रळियां मनाणी। आंगै बरगा ओर बी काम है। आं बातां गै बारै में मैं थानै चेताव ऊं हूं। पेलां मैं इंया करतो हो। झिको कोई हिस्या काम करसी बो परमेसर गै राज में वारिस कोनी हो'सी। पण पवितर आत्मा गा फळ ऐ है, प्यार, खुसी, सांती, धीरज, किरपा, भलाई, बिस्वास, दीनता, सेण सीलता। आं कामा गै बिरुध कोई बी नेम कोनी है। झिका लोग यीसू मसी गा है बां आपगै पापी सभाव नै बुरी वासना अर बुरी इच्छा गै सागै करूस पर चढा दियो। क्यूंकै जद आपां पवितर आत्मा गै अनुसार जीवां हां तो पवितर आत्मा गै अनुसार चालणो बी चईयै। आपां घमण्डी होगे एक दूसरा गै सागै लड़ाई झगड़ो ना करां अर दूसरां गी चिजां देखगे बळां ना। हे भाईयो अर भेनों, थारूं जे कोई पाप करतो पकड़यो जावै तो थे झिका बिस्वास में मजबूत हो, झिको पकड़यो है बिनै दीनता गै सागै बिस्वास में पाछो ले आणो चईयै। थे अपणै आपनै बी संभाळो कै थे आप परीक्सा में ना पड़ जाओ। दूसरो मिनख कोई ओखो काम करै है तो तूं बिंगी मदद कर, ईं तरियां थे मसी गै नेम नै पूरो करोगा। जे कोई मिनख मोटो कोनी होण पर बी अपणै आपनै मोटो समझै है तो अपणै आपनै धोखो देवै है। पण अपणै आपगा कामां नै आच्छी तरियां जांच करणी चईयै इयां करांगा तो बिंऊं अपणै आप पर, कीं दुसर गै सागै बराबरी करे बिना, घमण्ड करण गो मोको मिलसी। मैं आ बात ईंखातर केऊं हूं क्यूंकै हर एक आदमी नै अपणै आपगै काम गी जिमेदारी लेणी चईयै। परमेसर गो बचन सिखाण आळो, बचन सीखण आळै नै झिकी आच्छी चीज आपगै कनै है बा बिनै देणी चईयै। धोखो ना खावो, परमेसर गो मजाक नई उडाणो चईयै। क्यूंकै आदमी जिसो करम करसी बिनै बिसो ई फळ मिलसी। झिको आदमी आपगी पापी इच्छावां गै खातर बुरो काम करसी तो बो अनन्त बिनास में जावैगो। पण झिको आदमी परमेसर गी आत्मा नै राजी करण खातर आच्छा काम करसी बो पवितर आत्मा गै द्वारा अनन्त जीवन पावैगो। ईंखातर आपां सारा भलाई करण में हिम्मत ना छोडां। जे आपां भला काम करता रेगे थका ना तो सई टेम पर इंगो फळ मिलसी। ईंखातर जिंयाई आपां नै कोई मोको मिलै तो भलाई करता रेणो चईयै, खास कर'गे बिस्वासियां गै सागै। देखो, मैं आ आखरी बात आपगै हात ऊं थानै मोटै सब्दा में लिखगे देण लागरयो हूं। जिंया केई लोग संसारिक रूप नै दिखाणो चावै है, बे ई थारै पर खतनो करण गो जोर देवै है। कै बानै एकला नै मसी गै करूस पर दुख ना सेणो पडै़। क्यूंकै खतनो करण आळा खुद नेम विधान पर कोनी चालै। पण थारो खतनो ईंखातर करणो चावै है कै बे अपणै आप पर घमण्ड करै कै म्हे इंगो खतनो करायो है। प्रभु यीसू मसी गै करूस नै छोड़गे मनै ओर कीं पर घमण्ड कोनी होवै क्यूंकै मैं यीसू मसी गै करूस गै कारण इंया रेऊं हूं पण दुनिया नै पतो बी कोनी कै मैं इंया क्यूं रेऊं हूं। क्यूंकै खतनो करणो या ना करणो इमै कोई खास बात कोनी है। इमै खास बात आ है कै परमेसर गै द्वारा एक बदळाव आयो है। आ बात मानगे ईं पर चालण आळै चुणेड़ै लोगां पर परमेसर गी दया अर सांती मिलती रेवै है। ईं खत नै खत्म करण गै टेम मैं थारूं बिनती करूं हूं कै मनै कोई दुख ना देवै क्यूंकै मैं यीसू मसी गा घाव आपगै सरीर में लेगे चालूं हूं अर दिखावूं हूं कै मैं यीसू मसी गो दास हूं। हे भाईयो अर भेनों, थारै सगळां पर प्रभु यीसू मसी गी किरपा होवंती रेवै। आमीन। मैं पौलुस, परमेसर गी इच्छा ऊं यीसू मसी गो खास चेलो बण्यो हूं। मैं ओ खत इफिसुस में रेण आळा सारा परमेसर गै पवितर लोगां खातर लिखण लागरयो हूं झिका यीसू मसी पर बिस्वास राखै। थानै सारा नै आपणै पिता परमेसर अर प्रभु यीसू मसी गी ओर ऊं किरपा अर सांती मिलती रेवै। आपणै प्रभु यीसू मसी गै पिता परमेसर गो धन्यवाद होवै कै बण सुरग गी हरेक तरियां गी आत्मिक आसिस ऊं आपां नै मसी गै द्वारा भर दिया है। संसार बणाण ऊं पेलां परमेसर आपां नै मसी गै द्वारा बांगै लोगां गी तरियां चुण लिया कै आपां बिंगी नजर में पवितर अर निरदोस बण जावां। परमेसर आपगै प्रेम ऊं आपां नै यीसू मसी गै द्वारा आपगा बेटा बेटी कर'गे मान लिया। बां आपगी खुसी ऊं इंया करयो है। बां इंया ईंखातर करयो कै बांगी किरपा गी मेमा गी बडाई होवै, झिकी नै बां आपगै लाडलै बेटै यीसू मसी में आपां नै सेंत मेंत कर दिया। यीसू मसी गै बलिदान गै द्वारा आपां नै छुटकारो या पापां ऊं माफी मिली है। ओ काम बांगी मोटी किरपा ऊं होयो है। परमेसर आपगै ग्यान अर समझ गै सागै आपां नै आपगी किरपा भोत जादा दी है। यीसू मसी गै द्वारा परमेसर आपां नै आपगी लुकेड़ी इच्छा नै सारा गै सामै परगट करी झिकी बा पेलां ई तैयार कर राखी ही। अर परमेसर गी लुकेड़ी इच्छा आ है कै बे आपगी योजना गै टेम में झिको कीं सुरग अर धरती में है बिनै सारै नै यीसू मसी गै बस करसी। आपां मसी में रळग्या ईंखातर आपां परमेसर गा वारिस बणग्या क्यूंकै बां यीसू मसी गै द्वारा आपां नै भोत पेलां ई चुण लिया हा। परमेसर हरेक बात आपगी इच्छा ऊं ईंखातर करी, क्यूंकै म्हे यहुदी लोग झिका पेलां ई यीसू मसी पर बिस्वास करयो हो कै बे बानै आदर मान दे सकै। थे लोगां बी साच गै बचन अर आपगी मुकती गै सुब समाचार नै सुणन गै बाद मसी पर बिस्वास करयो अर जद थारै पर बिं पवितर आत्मा गी छाप लागी झिकी गो वायदो करेड़ो हो। बा पवितर आत्मा परमेसर गै मोल लेयेड़ा लोगां गै छुटकारै खातर वारिस होण गो सबूत है कै बांगी मेमा गी स्तुति होवै। ईं कारण, प्रभु यीसू गै उपर थारो बिस्वास अर परमेसर गै लोगां सागै थारै प्रेम गी बात सुणगे, मैं मेरी पराथना गै टेम में थानै याद कर'गे धन्यवाद देणो कदी बंद कोनी करयो। आपणै प्रभु यीसू मसी गो परमेसर झिको मेमा गो पिता है, थानै आपगी पिछाण में ग्यान अर दरसण गी आत्मा दे सकै कै थे सारा परमेसर गै ग्यान में आगै बधता जावो। मेरी पराथना आ'ई है कै थारै मन गी आंख्या खुल जावै अर परमेसर गी जोती नै देख सको कै थानै पतो लाग जावै कै आ आस के है झिकै खातर थानै बां बुलाया है। अर झिकी वारिस बो आपगै लोगां नै देवैगो बो कितो अद्भुद अर म्हान है। परमेसर गी मोटी ताकत झिकी पर बिस्वास करां हां इंगै बारै में थानै पतो होणो चईयै। ईंखातर मैं पराथना करूं कै बा ताकत आपणै खातर जोरदार तरिका ऊं काम करै। जद परमेसर मसी में बा ताकत दिखाई तो बा यीसू मसी नै मरेड़ा मू जींवंतो करयो अर सुरग में आपगै दाहिणै पासै बिठायो। बठै मसी सारै सासकां, अधिकारियां अर हरेक चिजां गै उपर राज करै अर ईं जुग में अर आण आळै जुग में बी बो राज करसी। परमेसर यीसू मसी गै पगां नीचै सारो कीं कर दियो। अर बिनै सारै कीं पर अधिकारी बणागे बिस्वासी मण्डली गो अगुओ बणा दियो। ईंखातर मसी सिर बरगो है अर बिस्वासी मण्डली मसी गी देह बरगी है। बिस्वासी मण्डली मसी ऊं भरपूर होवै अर मसी परमेसर ऊं भरपूर होवै। पेलां थे लोग परमेसर गी आग्या नै ना मानण अर पाप करण खातर परमेसर गी संगती ऊं दूर हा। बिं टेम थे सैतान गी बात मानगे ईं संसार गै बुरै रा पर चाल्या। बण ईं संसार नै बस में कर राख्यो अर बिंगी आत्मा अब झिका लोग परमेसर गी आग्या नै कोनी मानै बां लोगां में काम करण लागरी है। आमै पेलां आपां बी सारा बां लोगां बरगा हा अर आपगी बुरी इच्छा गै सागै जीया हा। आपणो मन अर सरीर के चावै हो बिंयाई जीया। ईंखातर परमेसर गी सजा गै लायक बणग्या। पण परमेसर दया करण आळो है। आपां पाप गै कारण मरेड़ै बरगा हा पण परमेसर आपां नै प्रेम करयो अर यीसू मसी गै सागै जींवंता करया। बांगी किरपा गै द्वारा थानै पाप गी सजा ऊं मुकती मिली है। परमेसर यीसू मसी में आपां नै जींवंता करया अर बिंगै सागै सुरग में बेठण गो मोको बी दियो। बण इंया ईंखातर करयो कै यीसू मसी में आपगी अणगिणत किरपा नै आण आळा जुग में दिखा सकै। क्यूंकै परमेसर गी किरपा गै द्वारा थारै बिस्वास गै कारण थानै मुकती मिलै। ओ परमेसर गो वरदान है पण थारै कानी ऊं कोनी। ओ सारो आपणै करमा गो फळ कोनी है, इंया ना होवै कै आपां कीं बात पर घमण्ड कर सकां। परमेसर आपां नै बणाया है। बण यीसू मसी गै द्वारा आपां नै बणाया है झिका ऊं आपां भला काम करता रेवां अर बिं रा पर ई चालता रेवां झिको रा परमेसर आपणै खातर बणायो है। परमेसर थानै किंया मुकती दी इंगै बारै में थानै आच्छी तरियां याद राखणो चईयै। थे जन्म ऊं गेर यहुदी हा, अर झिका लोग खतनो करयो हो, बे थानै बिना खतनो करेड़ा लोग समझा। बे लोग आपगै सरीर में खतनो करेड़ा, पण मन में कीं साफ कोनी। बिं टेम थानै यीसू मसी गै बारै में पतो कोनी हो। इसराएली लोगां गी पीढी में सामिल बी कोनी अर परमेसर गै वायदै गा भागिदार कोनी हा अर थे बिना आस गै सागै ईं संसार में बिना परमेसर गै सागै जीया हा। थे यीसू मसी ऊं भोत दूर रेया हा। पण बण आपगो जीवन थारै खातर दियो अर थानै परमेसर कनै ले आयो। यीसू मसी आपगो जीवन बलिदान कर'गे यहुदी लोगां अर गेर यहुदी लोगां बिचाळै सांती दी अर दोना गै बिचाळै नफरत गी कंद नै तोड़ दी। अर आपगी मोत गै द्वारा पुराणै नेम विधान नै खतम कर दियो। ईं तरियां बण यहुदी अर गेर यहुदी लोगां नै एक सागै मेल मिलाप करा दियो अर एक नुअ मिनख गी रचना करी अर सांती बी दे दी। अर करूस पर आपगी मोत गै द्वारा दोना बिचाळै बांदेड़ै बेर नै दूर कर दियो। बण आपणै अर परमेसर गै बिचाळै सांती बी देण गी मदद करी। यीसू मसी गेर यहुदी लोग झिका परमेसर ऊं दूर हा अर यहुदी लोग झिका परमेसर गै भोत नेडै़ हा दोनां में सांती गो परचार करयो। यीसू मसी गै द्वारा आपां सारा एक ई आत्मा ऊं पिता परमेसर कनै पूग सकां हां। ईंखातर थे गेर यहुदी लोग अब अणजाण अर बारलै देसां गा कोनी। पण पवितर लोगां गै संगी देस अर परमेसर गै परिवार गा लोग बणग्या। थे सारा एक मकान बरगा हो झिका खास चेला अर परमेसर गी बात बोलण आळा गी नीवं में खड़या हो अर यीसू मसी खुद'ई मकान गै खास पथर बरगो है। बिमै पूरो मकान खड़यो रेवै है ईंखातर मकान मजबूत है। प्रभु में एक पवितर मिन्दर बणतो जावै है झिकै में थे बी आत्मा गै द्वारा परमेसर गी रेण आळी जिग्यां होण खातर एक सागै बणाया गेया हो। ईंखातर मैं पौलुस झिको गेर यहुदियां गी भलाई खातर यीसू मसी गै कारण केदी बणयो। थारी भलाई खातर परमेसर आपगी किरपा गै सागै ओ काम मनै दियो है, इंगै बारै में थे जरूर सुण्यो हो। कै बण लुकेड़ी बातां परमेसर गै दरसण गै रूप में मेरै पर परगट करी, जिंया मैं थानै पेलां इंगो सार लिख चुक्यो हूं। जे थे ओ खत पढस्यो तो थानै मसी गी लुकेड़ी बात गै बारै में पतो लागैगो। परमेसर आ लुकेड़ी बात आपगी पेलां आळी पीढी गै लोगां नै कोनी बतायी पण अब आपगी आत्मा ऊं आ बात बांगै पवितर खास चेला अर परमेसर गी बात बताण आळा नै बतायी है। आ बात आ है कै, यीसू मसी गै सुब समाचार गै द्वारा गेर यहुदी लोग यहुदी लोगां सागै वारिस बणग्या। ऐ दोनूं एक ई सरीर गा अंग है अर मसी यीसू में झिको वायदो दियो है बिमै भागिदार है। अर मैं परमेसर गी किरपा गै बिं दान गै अनुसार झिको ताकत गै प्रभाव गै कारण मनै दियो, बिं सुब समाचार गो सेवक बणग्यो। मैं झिको परमेसर गै सारा पवितर लोगां ऊं एकदम छोटो हो फेर बी मनै गेर यहुदियां नै मसी गै कदी खत्म ना होण आळै धन गो सुब समाचार परचार करण खातर परमेसर आ किरपा करी। कै मैं सारै लोगां खातर परमेसर गी बिं लुकेड़ी बातां नै आच्छी तरियां बताऊं झिको सारो कीं बणाण आळो परमेसर गी रचना गै सरू ऊं लेगे आज तांई लुकेड़ी ही। जिंऊं अब बिस्वासी मण्डली गै द्वारा परमेसर गो केई तरियां गो ग्यान बां प्रधानां अर अधिकारियां झिका सुरग में है बां पर दिखायो जावै। परमेसर बिं अनन्त काल ऊं झिकी योजना आपगै मन में बणा राखी बा आपणै प्रभु यीसू गै द्वारा पूरी करी। आपां ईं मसी में बिस्वास करां हां, ईं कारण पूरै भरोसै गै सागै बिना डरगे परमेसर गै नेडै़ आण गो अधिकार है। अर ईंखातर मैं बिनती करूं कै झिको क्ळेस थारै खातर मनै होवै है बांगै कारण हिम्मत ना छोड़ो, क्यूंकै बिमै थारी बडाई है। मैं ईंखातर बिं पिता परमेसर गै सामै गोडा टेकूं। झिकैऊं सुरग अर धरती पर हरेक घराणै गो नाम राखिजै है कै, मैं बिनती करूं हूं कै, बो आपगी बडाई गै धन गै अनुसार थानै दान दैय कै थे बिंगी आत्मा ऊं आपगै मन गै मा सामरथ लेगे बलवन्त होज्यो। अर बिस्वास गै द्वारा मसी थारै मन में बसै है। थे प्रेम में नींव राखगे अर जड़ पकड़गे, सारै पवितर लोगां सागै भली भांती समझण गी सकती पावो कै बिंगै प्रेम गी चोड़ाई, लम्बाई अर ऊंचाई अर गेहराई किती है। अर मसी गै बिं प्रेम नै जाण सको झिकै गै ग्यान गो कोई अंत कोनी है। कै थे परमेसर गी सारी भरपूरी तांई परिपूर्ण होज्यो। अब झिको हिस्यो सामरथी है कै आपणी बिनती अर समझ ऊं भोत जादा काम करै है बिं सामरथ ऊं झिकी आपणै में काम करै। बिस्वासी मण्डली में अर यीसू मसी में बिंगी बडाई पीढी ऊं पीढी तांई जुग जुग होणती रेवै। आमीन। ईंखातर मैं झिको प्रभु में बंदी हूं थारूं बिनती करूं कै झिकी बुलाहट ऊं थे बुलाएड़ा हो बिंगै योग्य चाल चलण राखो। मतलब, सारी दीनता अर नमरता ऊं अर धीरज राखगे प्रेम ऊं एक दूसरै गी सेण करो। अर मेळ गै बंधन में आत्मा गी एकता राखण गी हर टेम कोसिस करता रेवो। एक ई देह है अर एक ई आत्मा है जिंया थानै बुलाएड़ा है। अर बुलाण ऊं एक ई आस है। एक ई प्रभु है एक ई बिस्वास, एक ई बतिस्मो, अर सारां गो एक ई पिता परमेसर है। झिको सारां गै उपर अर सारां गै बिचाळै अर मा है। पण आपणै मू हरेक नै मसी गै खास वरदान गै नाप तोल ऊं किरपा मिलेड़ी है। ईंखातर पवितर सासतर केवै है, “बो ऊंचै पर चडयो अर केदियां नै बांध लेग्यो अर माणसा नै दान दियो।” बो चडयो, इंगो मतलब ओ है कै, बो धरती गी निचली जिग्यां पर उतरयो बी हो। अर झिको निचली जिग्यां पर उतरयो बो ओ ई है झिको पूरै आकास पर चडग्यो कै सारो कीं पूरी तरियां पूरो करै। बण केईयां नै खास चेला चुणगे अर केईयां नै परमेसर गी बात बोलण आळा चुणगे अर केईयां नै सुब समाचार सुणाण आळा अर केईयां नै सिखाण आळा अर केईयां नै उपदेस देण आळा कर'गे दे दिया। झिकैऊं पवितर लोग सिद्ध हो'ज्यै अर सेवा गो काम करै अर मसी गी देह झिकी बिस्वासी मण्डली है बा आत्मिक रूप में ओर फळै। जद तांई कै आपां सारा बिस्वास अर परमेसर गै बेटै गी पेहचाण में एक ना होजावां अर मसी गै सभाव जिसा ना बण ज्यावां। जिंऊं आपां टाबरां गी तरियां ना बण्या रेवां। झिका मिनखा गी ठग ग्यान अर चतुराई ऊं, बांगै भ्रम गै तरिका ऊं अर उपदेस गै हरेक पाखंड ऊं इनै बिनै ना घुमाईजा। पण प्रेम में सच्चाई ऊं चालता सारी बाता में झिकी बिमै सिर है, मतलब मसी में बडता जावां। झिकैऊं सारी देह, हरेक जोड़ गी मदद ऊं एक सागै रळगे, एक सागै बंदगे बिं प्रेम भाव ऊं झिका हरेक काम करण ऊं बिमै होवै। अपणै आपनै बधावै है कै बा प्रेम में उन्नती करती जावै। ईंखातर मैं केऊं अर प्रभु में बिनती करूं कै जिंया झिका लोग परमेसर नै मानै कोनी बे लोग मन गी बेकार रीति पर चालै बिंया थे अब ना चालो। क्यूंकै बांगी बुद्धी खराब होगी अर बे लोग बिना ग्यान गै कारण झिकी बातां बामै है, बांगै मन गी कठोरता गै कारण बे परमेसर ऊं न्यारा करेड़ा है। अर बे सुन्ना होगे लुचपन में लागग्या कै बे सारा हर तरियां गा गंदा काम लालसा ऊं करै। पण थे मसी गी हिसी सीख कोनी पाई। पण थे सच्च में बिंगी सुणी है झिकी यीसू में साची है। बिमै ई सिखेड़ा बी हो। थारो पुराणो चाल चळण अर पुराणै मन गी गळत बात नै उतार फेंको। अर आपगै मन गै आत्मिक सभाव में नुआ बणता जाओ। अर नुअ मन नै पेर ल्यो झिको परमेसर गै अनुसार सच्चाई गी धारमिकता अर पवितरता में सरजेड़ो है। ईंखातर झूठ बोलणो छोडगे हरेक आपगै पड़ोसी ऊं सच्च बोलो। क्यूंकै आपस में आपां एक दूसरै गा अंग हां। रीस में आ'गे पाप ना करो, सूरज छिपण तांई थारी रीस ना रेवै। अर ना'ई सैतान नै मोको दैयो। चोरी करण आळो फेर चोरी ना करै। पण भला काम करण में आपगै हाता ऊं मेनत करै। ईंखातर झिकै कनै देण खातर कीं है तो बो झिकै कनै ना है बिनै दे दैय। कोई गंदी बात थारै मूं ऊं ना निकळै। पण जरूरत होवै बाई निकळै झिकी आत्मिक उन्नती खातर उतम होवै। झिकै ऊं सुणण आळै पर किरपा हो'ज्यै। परमेसर गी पवितर आत्मा नै दुखी ना करो झिकी ऊं थारै पर छुटकारै आळै दिन खातर मोहर लगा दी है। सारी तरियां गी बळण, मजाक अर रीस अर लड़ाई झगड़ो, चुगली अर सारै बेरभाव समेत थारूं दूर हो'ज्यै। एक दूसरै पर दया करण आळा बणो जिंया परमेसर मसी में थारा पाप माफ करया बिंयाई थे बी एक दूसरै नै माफ करो। प्यारै टाबरां गी तरियां परमेसर गो अनुकरण करो। अर प्रेम ऊं चालो, जिंया मसी थारूं प्रेम करयो हो अर आपणै खातर अपणै आपनै सुखदायक सुरम खातर परमेसर गै आ'गै भेंट कर'गे बलिदान कर दियो। जिंया पवितर लोगां गै लायक है बिंयाई थे बी बेबीचार अर ओर कीं तरियां गा माड़ा काम अर लाळच गी बात बी थारै कनै ना होवै। अर ना'ई सरम आळी बात अर ना'ई मूरखता गी बात होवै अर ना'ई मजाक करण आळी क्यूंकै ऐ बाता सोभ्या कोनी देवै पण सारा ऊं धन्यवाद ई सुणीजै। क्यूंकै थे जरूर जाणो हो कै कोई बेबीचारी, अपवितर अर लोबी आदमी झिको मूरतिपूजा गै बराबर है बो मसी अर परमेसर गै राज में वारिस कोनी। थानै कोई बेकार गी बातां ऊं धोखो ना दैय क्यूंकै आं बाता ऊं परमेसर गी रीस आग्या ना मानण आळा पर भड़कै। ईंखातर थे बां सागै भेळा ना रेवो। क्यूंकै पेलां थे अंधैरे में हा पण अब परमेसर गी जोती में हो। ईंखातर जोती गी उळाद बणो। अर बिं तरियां चालो। क्यूंकै जोती गो फळ सारी तरियां गी भलाई अर धारमिकता अर सचाई है। अर ओ परखो कै प्रभु नै के भावै है। अंधेरै गा माड़ा कामा में भेळा ना होवो पण बानै धमकाओ। क्यूंकै बांगै लुकेड़ै कामा गी चरचा बी सरम गी बात है। पण जिताई बुरा काम छोड़िजै बे सारा जोती गै कारण ई होवै। क्यूंकै झिको सारो कीं परगट करै बा जोती है। ईं कारण पवितर सासतर में इंया केवै, हे सोण आळा लोगो, जागज्यो अर मरेड़ा मू जी उठो। जद मसी गी जोती थारै पर चमकैगी। ईंखातर ध्यान ऊं देखो कै थारो चाल चलण किंया है। मूरखा गी तरियां ना पण बुद्धिमान गी तरियां चालो। टेम नै किमती समझो क्यूंकै दिन भोत बुरा है। ईंखातर मूरख ना बणो, पण ध्यान ऊं समझो कै प्रभु गी इच्छा के है? दारू पीगे मतवाळा ना बणो क्यूंकै इंऊं बुरी इच्छा पैदा होवै। पण पवितर आत्मा में परिपूर्ण होवंता जाओ। अर आपस में रळमिल गे भजन अर स्तुति गीत अर आत्मिक गीत गाये करो। अर आप आपगै मन में प्रभु गै सामै भजन करता रेवो। अर हमेसा सारी बातां खातर आपणै प्रभु यीसू मसी गै नाम ऊं पिता परमेसर गो धन्यवाद करता रेवो। अर मसी ऊं डरता एक दूसरै गै बस में रेवो। हे लुगाईयो, थे आपगै पतिया गै इंया बस में रेवो जिंया प्रभु गै हो। क्यूंकै पति, पत्नी गो सिर होवै जिंया मसी बिस्वासी मण्डली गो सिर है। अर बो आप ई बिस्वासी मण्डली झिकी बिंगी देह है बिंगो मुकतीदाता है। पण जिंया बिस्वासी मण्डली, मसी गै बस में है बिंयाई लुगाईयां बी हरेक बात में आपगै पति गै बस में रेवै। हे पतियो, आप आपगी पत्निया ऊं प्रेम राखो जिंया मसी बिस्वासी मण्डली ऊं प्रेम कर'गे अपणै आपनै बिं खातर बलिदान करयो है। कै बिंगै बचना गै द्वारा जळ में स्नान ऊं सुद्ध कर'गे पवितर बणावै। अर बिनै एक हिसी पवितर बिस्वासी मण्डली बणागे आपगै कनै खड़ी करै झिकी में कोई दाग ना होवै पण निरदोस अर पवितर होवै। ईं तरियां ओ ई सई है कै पति आपगी पत्नी ऊं बिंयाई प्रेम राखै जिंया बो आपगै सरीर सागै राखै है अर झिको आपगी पत्नी ऊं प्रेम राखै बो अपणै आप ऊं राखै। क्यूंकै कोई आदमी आपगै सरीर ऊं बेर कोनी राखै पण बिंगी देखभाळ राखै है जिंया मसी बिस्वासी मण्डली गै सागै करै। ईंखातर आपां बिंगी देह गा अंग हां जिंया पवितर सासतर में लिखेड़ो है कै, “ईंखातर आदमी आपगै मां बाप नै छोड आपगी पत्नी सागै मिल्यो रेवैगो। अर बे दोनूं एक तन होवैगा।” ओ भेद तो मोटो है पण मैं अठै मसी अर बिस्वासी मण्डली गै बारै में केऊं। पण थे हरेक जणो आपगी लुगाई नै खुद गी तरियां प्रेम राखो। अर लुगाई बी आपगै पति गो मान समान करै। हे टाबरों, थे प्रभु गा हो, ईंखातर आपगै मां बाप गो आदर मान करो अर बांगी आग्या नै मानो। इंया करणो आच्छी बात है। आपगै मां बाप गो आदर मान करो कै थारो भलो होवै, अर थे धरती पर भोत टेम जींवंता रेवो। ओ परमेसर गो पेलो नेम है झिकै गै सागै एक वायदो बी मिलै है। हे मां बाप, थे आपगै टाबरां नै रीस आण गो कोई बी काम ना करो। पण बानै प्रभु ऊं मिलेड़ी सिक्सा दैयो अर चेतागे आच्छी तरियां पालण करो। गुलामी में रेण आळा लोगो, थे आपगै ईं दुनियां गा स्वामी लोगां गै डर गै सागै आदर मान करो जिंया थे मसी गी आग्या नै मानो हो। थे लोग आप नै देखण आळा नै खुस करण खातर कीं ना करो, पण मसी गै दास गै रूप में पूरै मन ऊं परमेसर गी इच्छा पर चालो। थे लोग प्रभु गै खातर काम करो हो पण माणस खातर कोनी, ओ समझगे खुसी गै सागै पूरै मन ऊं काम करो। क्यूंकै थे जाणो हो कै झिको कोई आच्छो काम करणो चावै बो गुलामी या आजादी, प्रभु ऊं बिनै बिंयाई फळ मिलैगो। हे मालिको, थे बी आपगै बस में रेण आळा गै सागै बिंयाई करो, बानै डरावो अर धमकावो ना। थे याद राखो, थारो अर बांगो मालिक सुरग में है अर बो किंगी ई पक्सपात कोनी करै। आखर में, मैं ओ केणो चावूं, थे लोग प्रभु गै सागै अर बांगी ताकत ऊं बलवन्त हो जाओ। परमेसर गा सारा हथियार लेल्यो कै थे सैतान गी योजना ऊं सामणो कर सको। क्यूंकै आ आपणी लड़ाई माणसा ऊं कोनी पण प्रधान, अधिकारियां अर ईं संसार गै अंधैरै गै हाकिमा ऊं अर सैतान गी आत्मिक सेना ऊं है झिकी आकास में है। ईंखातर परमेसर गा सारा हथियार बांध ल्यो कै जिंऊं बुरा दिना में सामणो कर सको अर सारो कीं कर'गे खड़या रे सको। अर सच्चाई ऊं आपगी कमर कसगे अर धारमिकता गो कोट पेरगे अर पगां में मेळ गै सुब समाचार गी तैयारी गा जूता पेरगे अर सारा सागै बिस्वास गी ढाळ लेगे खड़या रेवो, जिंऊं थे बिं दुस्ट सैतान गा जगता तीरा नै बुझा सको। अर मुकती गो टोप, अर आत्मा गी तलवार झिकी परमेसर गो बचन है बिनै सागै लेल्यो। हरेक टेम अर हरेक तरियां ऊं आत्मा में पराथना करता रेवो अर ईंखातर ई जागता रेवो कै सारा पवितर लोगां खातर लगातर पराथना करता रेवो। अर मेरै खातर बी, कै मनै बोलण गै टेम हिस्यो प्रबल बचन देईजै कै होंसलै गै सागै यीसू मसी गै सुब समाचार गी लुकेड़ी बात बता सकूं। झिकै गै खातर मैं जेळ में सांकळा ऊं बांदेड़ो यीसू मसी गी ओर ऊं बोलण आळो राजदूत हूं अर मनै झिको कीं बोलणो होवै बो होंसलै ऊं बोल सकूं। ऐ सारी बात मेरो बेली अर प्रभु गै सागै मोटै बिस्वास गै सागै काम करण आळो तुखिकुस थानै सारो कीं बतासी कै थे बी मेरी हालत नै जाणो कै मैं किंया हूं अर के करण लागरयो हूं। ईंखातर मैं बिनै थारै कनै घालूं क्यूंकै थे मेरी हालत जाण सको अर थारै मन नै सांती मिल सकै। हे भाईयो अर भेनों, थानै पिता परमेसर अर प्रभु यीसू मसी गी ओर ऊं सांती अर बिस्वास गै सागै प्रेम बी मिलै। झिको प्रभु यीसू मसी पर साच्चो प्रेम राखै, बां सारा नै परमेसर गी किरपा होवंती रेवै। यीसू मसी गै दास पौलुस अर तीमुथियुस गी ओर ऊं फिलिप्पी सैहर में रेण आळा सारा परमेसर गा लोग झिका यीसू मसी सागै गेहरो सबंध है अर बिस्वासी मण्डली गी रुखाळी करण आळा मुख्य लोग अर बिस्वासी मण्डली गी सेवा में मदद करण आळा लोग, आपणै पिता परमेसर अर प्रभु यीसू मसी गी ओर ऊं थानै किरपा अर सांती मिलती रेवै। मैं जद बी थानै याद करूं हूं बिं टेम ई परमेसर गो धन्यवाद करूं हूं। जद बी मैं पराथना करूं हूं तो थारै खातर सदां ई बड़ी खुसी ऊं पराथना करूं हूं। क्यूंकै पेलै दिन ऊं लेगे आज तांई यीसू मसी गै सुब समाचार नै फेलाण में थे मेरै सागै रेया हा। मनै ईं बात पर पूरो भरोसो है कै बो परमेसर झिकै थारै बिचाळै एक आच्छो काम सरू करयो है बो बिं दिन पूरो करसी जद यीसू मसी फेर आवैगो। जद मैं जेळ में हो अर जद मैं यीसू मसी गो सुब समाचार सुणायो जद बी थे सारा लोग मेरै सागै किरपा में रेवो हो। थे सारा मेरै मन में सदां ई रेवो हो। ईंखातर थारै सारा गै बारै में मेरो सोचणो ठीक ई है। परमेसर मेरो गवा है कै यीसू मसी गै प्रेम गै द्वारा मैं थानै मिलण गी भोत इच्छा राखूं। मैं आ पराथना करतो रेऊं हूं, थारो प्रेम दूसरां गै सागै बदतो रेवै अर थे आपगो ग्यान अर हर टेम आच्छी अर माड़ी बाता नै समझण में लगातार बदता रेवो। झिका ऊं थे आच्छो आच्छो काम ढूंडण गै लायक बण ज्यो अर मसी गै दुसर आण तांई थे सच्चा अर बिना दोस गै बण्या रेवो। अर यीसू मसी गी दया नै पा'गे थे लोग परमेसर गी नजर में आच्छा काम करोगा अर इंगै द्वारा परमेसर गी मेमा स्तुति होवंती रेवै। हे भाईयो अर भेनों, थे ओ जाणल्यो कै झिको कीं मेरै सागै बित्यो बिंऊं मेरो काम रुक्यो कोनी पण बिंऊं सुब समाचार गी बढोतरी होई है। ईंखातर केसर गी राजभवन गी सारी पळटण अर सारै दूसरै लोगां नै पतो लागग्यो है मनै मसी गो चेलो होण खातर ई बंदी बणायो हो । मेरै केद में होण गै कारण जादा बिस्वासी भाई भेन लोग प्रभु पर भरोसो राखगे परमेसर गो बचन बिना कोई डरगे सुणाण गी हिम्मत करी है। ओ सच्च है कै बामूं केई लोग बेर अर जळन गै सागै मसी गो बचन सुणावै है अर ऐ लोग तो सच्चाई ऊं कोनी पण आपगी भलाई सोचगे मसी गो परचार करै है। क्यूंकै बे केद में मेरै दुख भदाण खातर इंया करयो है। पण कीं लोग भली इच्छा ऊं मसी गो बचन सुणावै है अर ऐ लोग प्रेम गै कारण इंया करै है क्यूंकै ऐ जाणै है परमेसर गै सुब समाचार नै बचाण खातर मनै अठै राख्यो है। पण इंऊं कोई फरक कोनी पड़ै चायै भानै ऊं या सच्चाई ऊं मसी गो परचार करै है अर बिनै आदर मिलै है। मैं इंऊं भोत राजी हूं अर राजी रेऊंगा। क्यूंकै मैं जाणूं हूं कै थारी पराथना अर यीसू मसी गी आत्मा ऊं मिलेड़ी मदद ऊं मैं छूट जाऊंगा। मेरी इच्छा अर आस आई है अर मनै हिस्यो बिस्वास है कै मैं कोई बी बात ऊं निरास कोनी होस्यूं। अर बिना कोई डर गै सागै मसी गी मेमा सदां होवंती रेवै। अर आ'गै बी हो'सी, चायै मैं मरूं या जीऊं। क्यूंकै मसी मेरै जीवन में सारो कीं है अर मैं मर जाऊं तो बी मनै ओर बी फायदो है। पण जे मैं ईं सरीर में जींवंतो रेऊं तो मैं मसी गै खातर आच्छो काम कर सकूंगा। पण मैं कोनी जाणूं कै जीणो अर मरणो इमै किसो बडिया है। आमूं किनै चुणू मेरी कीं समझ में कोनी आवै। मेरी इच्छा आ'ई है कै मैं मसी गै कनै उड़ जाऊं क्यूंकै ओ भोत आच्छो है। पण अठै मेरो सरीर में रेणो थारै खातर ओर बी जरूरी है। ईंखातर मनै इंगो पूरो भरोसो है कै मैं जींवंतो रेऊंगा अर थारै सगळां गै सागै रेऊंगा जिंऊं थे बिस्वास में ओर मजबूत अर खुस रेवंता रेवो। अर जद मैं थारै कनै दुसर आण गै टेम, यीसू मसी मेरै द्वारा करेड़ै काम नै सुणगे थे लोग भोत आच्छो बतास्यो। मैं आ'गै थानै देखूं या ना देखूं पण थे इतो करो कै थारो रेणो सेणो मसी गै सुब समाचार गै लायक होणो चईयै। मैं थारै बारै में ओ सुणनो चाऊं कै थे सारा भेळा होगे एक मन ऊं मसी गै सुब समाचार गै बिस्वास खातर भोत मेनत करता रेवो। अर कोई बी बात में थे आपगै बिरोधियों ऊं डरो ना। ओ बांगै खातर बिनास गो कारण है पण थारै खातर परमेसर गी ओर ऊं आएड़ी मुकती गो निसान है। क्यूंकै मसी गै कारण थारै पर किरपा होई है कै ना एकलो बिं पर बिस्वास करो पण बिंगै खातर दुख बी झेलो। मेरी मेनत अर दुख गै बारै में थानै पतो है अर ओ दुख थानै बी है। यीसू मसी में थारो जीवन है बिमै थे मजबूत हो जाओ अर बिंगै प्रेम में हिमत बांध ल्यो। अर थारै पर दया अर करुणा बी है अर एक दूसरै गै सागै भागिदार होण खातर पवितर आत्मा थानै मदद करण लागरी है। इंया होणूं थे एक मन में रेगे अर एक तरियां सोचगे अर एक दूसरै ऊं प्रेम राखगे, थे मेरो आनंद पूरो करो। बिरोध अर आपगै स्वारथ खातर कीं ना करो पण दीनता ऊं एक दूसरै नै आप ऊं आच्छो समझो। हरेक जणो सिरफ आपगै हित गी कोनी पण दूसरै गै हित गी बी चिंता करो। जिंया यीसू मसी गो सभाव हो बिंयाई थारो सभाव बी राखो। झिको परमेसर गै स्वरूप में होगे बी अपणै आपनै परमेसर गी बराबरी नै छोडण तैयार हो'ग्यो। पण बण अपणै आपगो सारो कीं छोडगे इतो नीचो करयो अर एक गुलाम जिस्यो बणग्यो। अर मिनख गै रूप में पेस कर'गे अपणै आपनै दीन कर दियो अर आपगा प्राण तांई त्याग दिया अर करूस गी मोत बी सैह ली। ईं कारण परमेसर बिनै भोत म्हान करयो अर बिनै बो नाम दियो झिको सारै नामा ऊं उपर है। कै सुरग में अर धरती पर अर धरती गै नीचै है, बे सारा यीसू गै नाम पर गोडा टैकै। अर हरेक जणो पिता परमेसर गी बडाई खातर बिनै मानल्यै अर बोलै, “यीसू मसी ई प्रभु है।” ईंखातर हे मेरा प्रियो, जद मैं थारै सागै हो, थे मेरै निरदेसां गो जिंया पालण करयो बिंयाई मैं जद थारै सागै कोनी हूं बिंयाई कांपता अर डरता होया थारी मुकती गै काम में लाग्या रेवो। क्यूंकै परमेसर ई है झिको आपगी आच्छी इच्छा ऊं थारै मन में काम अर इच्छा दोना नै पैदा करै है। ईंखातर बिना कोई सिकायत अर बाद विवाद गै सारा काम करता रेवो। जिंऊं थे भोळा भाळा अर पवितर बण जाओ अर घमण्डी अर लड़ाई झगड़ा करण आळै लोगां गै बिचाळै परमेसर गी उळाद बण जाओ। बांगै बिचाळै अंधेरी दुनिया में थे जोती गी तरियां चमको। थे जीवन देण आळै सुब समाचार गो इंयाई परचार करता रेवो। यीसू मसी गै दुसर आण गै टेम मनै भोत खुसी होवै अर थारै बारै में आच्छी बात कर सकूं क्यूंकै मेरो काम बेकार कोनी होयो अर आच्छो फळ बी मिलै। थारो बिस्वास एक बली चढाण गी तरियां है अर जे मनै मेरो खून थारै बिस्वास खातर बहाणो पडै़ तो बी मैं राजी हूं। थारी खुसी में मैं बी भागिदार हूं। बिंया थे बी खुस रेवो अर मेरै सागै खुसी मनाओ। मनै प्रभु यीसू में आसा है कै मैं तीमुथियुस नै थारै कनै बेगो घालूंगा कै थारी आसा देखगे मनै बी सांती मिलै। क्यूंकै मेरै कनै हिस्यै सभाव गो कोई कोनी झिको सच्चै मन ऊं थारी फिकर करै। सारा लोग आप आपगै कामां में लागेड़ा है, यीसू मसी गै कामां में कोई कोनी लागड़ो। थानै तीमुथियुस गै बारै में ईं बात गो पतो है कै जिंया एक बाप बेटो एक सागै काम करै है इंयाई बण यीसू मसी गो सुब समाचार सुणाण में मेरी मदद करी है। ईंखातर जिंयाई मनै ठा लागैगो कै मेरै सागै के बितैगी ओ जाणगे बेगो ई मैं बिनै थारै कनै घालण गी आस राखूं। अर मनै प्रभु पर पूरो भरोसो है कै मैं बी थारै कनै बेगो ई आऊंगा। मैं ओ जरूरी समझ्यो कै इपफ्रुदीतुस नै थारै कनै घाल्यो झिको यीसू मसी में मेरो सच्चो भाई अर मेरै सागै काम करै है अर परमेसर गै काम में एक सिपाई जिंया मेरै सागै काम करण आळो अर मेरी जरूरत गै टेम थे लोग बिनै मेरै कनै घाल्यो अर अब मैं बिनै पाछो घालूं। क्यूंकै बो थानै सदां ई याद करतो रेयो अर थे बिंगी बीमारी गै बारै में सुण्यो हो ईं कारण बो भोत दुखी रेवंतो हो। बो बीमार हो अर मरण आळो हो पण परमेसर बिं पर दया करी एकलै बिं पर कोनी पण मेरै पर बी कै मनै दुख पर दुख ना मिलै। बिनै देखगे थे लोग भोत खुस होजाओ ईंखातर मैं बिनै थारै कनै भेजूं अर इंगै द्वारा मेरी बी चिंता दूर हो जावै। ईंखातर थे लोग बिंगो भोत खुसी गै सागै सुवागत करियो जिंया बिस्वासी लोग प्रभु में करै है। हिस्यै लोगां नै आदर मान देणो भोत जरूरी है। क्यूंकै बो मसी गै काम खातर आपगा प्राण खतम करण आळो हो। बण आपगै प्राणा नै भोत म्हत्व कोनी दियो क्यूंकै थे लोग झिका काम कर कोनी सक्या बां कामां नै बो पूरा करणा चावै है। हे मेरा भाईयो अर भेनों, प्रभु थारै पर करेड़ी सारी बातां नै याद कर'गे खुसी में रेवो। मैं पेलां लिखेड़ी बात एकर फेर लिखूं क्यूंकै आ बात लिखण में मनै कोई दिकत कोनी अर आ बात थारै भलाई खातर है। बुरा काम करण आळा ऊं थे दूर रेवो। मैं बां लोगां नै कुतै बरगो समझयो क्यूंकै बे लोग इंया सिक्सा देवै है कै खतनै गै द्वारा ई मुकती मिलै है। साचो खतनो करण आळा आपां हा। परमेसर गी आत्मा गै द्वारा आपां बानै आराधना करां अर आपणो यकीन यीसू मसी पर ई है। आपां करेड़ी बाता नै याद कर'गे घमण्ड करण गी कोई जरूरत कोनी है। मैं मेरै काम पर पूरो भरोसो राख सकूं। जे किनैई अपणै काम पर भरोसो राखै है तो मैं बिंऊं बोळो राखूं। क्यूंकै ईं बात नै ध्यान ऊं सुणल्यो, जद मैं आठ दिन गो हो, मेरो खतनो होग्यो। मैं एक पक्को यहुदी हूं झिको इसराएल गै खानदान गो हूं। मैं बिन्यामीन जात गो हूं, मैं इब्रानी मां बाप ऊं पैदा होएड़ो हूं। अर मैं एक फरीसी हूं झिको मूसा गै नेम विधान नै भोत भोत आच्छी तरियां मानण आळो हूं। मनै परमेसर सागै इतो लगाव है। इंगै कारण मैं बिस्वासी मण्डली गा लोगां नै तंग करण आळो हो अर यहुदी नेम विधान गै अनुसार मैं परमेसर गी नजर में भोत आच्छो आदमी हो। इमै मनै कोई बी दोसी कोनी बणा सकै। पण मसी गै खातर सारो कीं मनै फायदो हो बां सारा नै मैं बेकार है सोचगे छोड़ दिया। इतो ई कोनी आज तांई सारी बात आच्छी सोची बां सारा नै मैं आपगै प्रभु यीसू मसी गै ग्यान गी बढोतरी गै कारण त्याग कर दियो। बिंगै खातर मैं सारी चिजां नै कचरो समझगे छोड़ दियो अर इंगै द्वारा मसी नै पा सकूं। जिऊं बिनै पा सकूं, यहुदी नेम विधान गै आधार पर मिलण आळा धारमिकता गै कारण कोनी पण झिकी धारमिकता यीसू मसी गै उपर भरोसो राखण ऊं मिलण आळी है। मैं यीसू मसी नै जाणनो चाऊं अर जी उठण गी मसी गी ताकत नै बी जाणनो चाऊं। जिंया बो मरयो बिंयाई मैं बी मरणो चाऊं। क्यूंकै मैं कोई बी तरिकै ऊं आस राखूं कै परमेसर मनै बी मरण गै बाद जी उठण तांई लेगे जावै। मेरै केण गो मतलब ओ कोनी, मनै पेलां ई सारो कीं मिलग्यो अर पूरी तरियां ऊं सिद्ध हो'ग्यो। मैं पक्को होण खातर अजे तांई कोसिस करण लागरयो हूं झिकै खातर यीसू मसी मनै पकड़यो हो। हे भाईयो अर भेनों, मैं ओ कोनी सोच्यो कै मैं बिनै पकड़ लियो। पण मैं लारै गी सारी बाता नै भूलगे आ'गै गी बातां पर नजर लगागे आ'गै बदण लागरयो हूं। मैं सुरग तांई पूगण खातर भोत कोसिस करतो रेऊं कै मैं आपगो इनाम ले ल्यूं झिकै नै यीसू मसी में पाण खातर परमेसर मनै बुलायो है। झिका लोग अपणै आपनै आत्मिक रूप में पक्का समझै बे सारा इंया गी सोच राखै। पण कोई बी आदमी नै दूसरो सोच बिचार है तो बो परमेसर सई करसी। ईंखातर आपां झिकी सच्ची आग्या तांई पोंचा बिं पर चालता रेवां। हे भाईयो अर भेनो, दूसरा गै सागै मिलगे मेरै बरगी चाल चालो अर बांगी पिछाण करो झिका ईं रीति ऊं चालै है बांगी मिसाल थे म्हारै में देखो हो। ऐ बातां मैं भोत बार थानै कैई है अर अब बी रो रोगे केऊं कै हिस्या भोत लोग है झिका यीसू मसी गै करूस ऊं बेर राखगे चालै है। बां लोगां नै परमेसर जरूर सजा देवैगो। बां लोगां गो ईस्वर लालसा अर अभिलासा है। बे लोग सदां ई बुरै काम पर घमण्ड राखै है अर संसार गी बाता पर बोळो सोचै है। पण आपणो देस सुरग में है। बठूं आपां आपणै मुकतीदाता प्रभु यीसू मसी गै आण गी उडीक करण लागरया हां। बो आपगी मोटी ताकत ऊं सारी चिजां नै आपगै बस में कर सकै अर बिं ताकत ऊं आपणै कमजोर अर हीण सरीर नै बदळगे आपगी मेमा गी देह गै बरगो बणा दैयगो। हे मेरा प्यारा भाईयो अर भेनों, मैं थानै मिलण गी इच्छा राखूं। थे लोग मनै खुसी दी अर मेरै काम गो फळ बी है। ईंखातर थे लोग प्रभु में बोळै बिस्वास गै सागै रेवो। मैं युवोदियो अर संतुखे भेनों थानै बिनती करूं कै थे दोनूं आपसरी में फालतू बातां ना करो अर प्रभु में एक जिसी सोच बिचार राखो। मेरा आच्छा बेली तनै बी मेरी बिनती है कै तूं आं दोना भेना गी मदद कर। ऐ दोनूं भेना मेरै सागै यीसू मसी गै सुब समाचार बोलण में मदद करी अर आं दोना मेरा बेली क्लेमेस अर दूसरै बेली गै सागै मेनत करी अर आं लोगां गो नाम अनन्त जीवन गी किताब में लिख्यो है। प्रभु गी थारै पर करेड़ी सारी बातां नै याद कर'गे थे सदां खुसी में रेवो। अर मैं फेर बी थानै केऊं कै थे खुसी में रेवो। थारी सेण सकती सारै मिनखां पर बणी रेवै। प्रभु बेगो आण आळो है। थे कोई बी बात गी चिंता ना करियो पण हर टेम थारी बात पराथना अर बिनती गै द्वारा धन्यवाद गै सागै परमेसर नै बोलणी चईयै। जद परमेसर थारै जीवन में सांती जरूर देसी झिकी नै कोई बी समझ कोनी सकै। आ सांती थारै मन अर सोच नै यीसू मसी में संभाळगे राखैगी। आखिर में, हे मेरा भाईयो अर भेनों, बां बातां पर ध्यान करियो झिकी सच्च है, झिकी बात आदर गै लायक है, झिको काम परमेसर नै आच्छो लागै है, झिको काम बिना पाप गो है, झिको खुसी गै योग्य है अर आच्छो गुण अर बडाई गै लायक है। झिकी बातां थे मेरूं सुणी, देखी ही अर सीखी ही बां पर ध्यान लगागे करता रेवो जद सांती देण आळो परमेसर थारै सागै रेसी। थे मेरै बारै में पेलां ई सोच्यो हो, पण अब थानै मेरै बारै में याद करण नै अर मदद करण में मोको मिल्यो है। ईं बात में मैं प्रभु में भोत खुस हूं। मनै कोई बी चीज गी जरूरत है इंगै बारै में मैं थानै बतायो कोनी। मैं हरेक हालात में रेणो सीख्यो है। मेरी कमी गै टेम अर बफराई गै टेम किंया रेणो मनै जरूर पतो है। जद पेट भरयो अर भूखो हो, अर छोटो अर मोटो, कोई बी टेम किंया रेणो ओ बी मनै सिखाएड़ो है। यीसू मसी झिकै मनै ताकत दी है बिंगै द्वारा कोई बी हालात गो सामणो कर सकूं। पण थे मेरै दुख अर परेसानी गै टेम मेरी मदद करी आ बात मनै भोत आच्छी लागी। हे फिलिपियो गा बिस्वासी भाईयो अर भेनों, यीसू मसी गै सुब समाचार सुणाण गै सरू गै टेम जद मैं मकिदुनिया छोडयो हो, तो लेण देण में थारी बिस्वासी मण्डली नै छोड़गे ओर कोई बी मनै मदद कोनी करी। ईं तरियां जद मैं थिस्सलुनिकि में हो, बिं टेम बी थे लोग मनै भोत बार मदद करी। मैं थारै ऊं ओर कीं दान लेण खातर ऐ बातां कोनी बोल्यो पण मनै देण ऊं थानै परमेसर बोळो फळ देवै। मेरै कनै सारो कीं है अर भोत है। थे इपफ्रदितुस गै हात ऊं झिको इनाम मनै भेज्यो ओ मेरी जरूरतां ऊं भोत बोळो हो अर झिको एक आच्छी खुसबु गै रूप में परमेसर नै संतुस्ट करण गै लायक है। मेरो परमेसर थारी सारी जरूरतां नै यीसू मसी में आपगै बोळै धन ऊं पूरी करसी। आपणै पिता परमेसर गी सदां तांई मेमा होवंती रेवै। आमीन। मैं यीसू मसी गै एक एक पवितर लोगां नै निमस्कार देऊं। मेरै कनै झिका भाई है, थानै निमस्कार देवै है। अठै रेण आळा ओर सारा बिस्वासी भाई भेन थानै निमस्कार केवै है। खास कर'गे केसर परिवार गा लोग बी निमस्कार केवै है। प्रभु यीसू मसी गी किरपा थारै सारां पर होवंती रेवै। आमीन। मैं पौलुस, परमेसर गी इच्छा ऊं यीसू मसी गो खास चेलो बणेड़ो हूं अर आपणै भाई तीमुथियुस गी ओर ऊं। कुलुसी सैहर में रेण आळा परमेसर खातर न्यारा करेड़ा मसी बिस्वासी भाईयां अर भेनां नै ओ खत लिखू हूं। आपणै पिता परमेसर गी ओर ऊं थानै किरपा अर सांती मिलै। जद म्हे थारै खातर पराथना करां हां तो, सदां ई प्रभु यीसू मसी गै पिता परमेसर गो धन्यवाद करां हां। क्यूंकै यीसू मसी में थारो सारां गो बिस्वास अर परमेसर गै लोगां खातर थारो प्रेम ऐ सारी बातां म्हे सुणी है। ऐ सारी बातां इयां होयी कै झिकी आस थारै खातर सुरग में पक्की है अर इंगै बारै में थे पेलां ई यीसू मसी गो साच्चो सुब समाचार सुण्यो है। अर थारै जीवन में काम करयो बोई सुब समाचार सारै संसार में पोंचागे जिंया फळ ल्यावै है बिंया फळ थारै ऊं मिल्यो जद थे परमेसर गी किरपा गै बारै में सुण्यो हो अर बिंगै बारै में समझयो हो। परमेसर गै सुब समाचार गी सिक्सा गै बारै में थे म्हारै प्यारै साथी इपफ्रास ऊं सुण्यो अर झिको म्हारै खातर मसी गो बिस्वासी सेवक है। पवितर आत्मा गै द्वारा दूसरां गै बिचाळै थारै प्रेम गै बारै में बण ई म्हानै बतायो। ईंखातर जद थारै बारै में म्हे सुण्यो तो थारै खातर पराथना अर बिनती करणी कोनी छोड़ी। म्हे हर रोज पराथना करी कै परमेसर थानै सारी बातां झिकी बांगी इच्छा है बो करण गी मदद करै अर थे पवितर आत्मा गै द्वारा मिलण आळी समझ अर ग्यान ऊं भर जाओ। कै थारो रेणो सेणो प्रभु नै आच्छो लागतो रेवै अर बो सारा कामां में खुस होवै। अर थारै पर हर तरियां गा आच्छै कामां गा फळ ल्यागे अर थारै कामा गै द्वारा थे परमेसर नै ओर बडिया तरियां समझ सको। म्हे पराथना करां कै परमेसर थानै आपगी बोळी मेमा गै सागै मजबूत कर'गे थानै खुसी ऊं धीरज अर सेणसकती दिखाण में मदद करै। पिता परमेसर गो धन्यवाद करणो चईयै क्यूंकै बां थानै बे लोग झिका जोती में रेवै है बां लोगां गै सागै वारिस होण खातर चुण्या है। परमेसर आपां नै सैतान गै अंधेरै ऊं छुड़ागे आपगै लाडलै बेटै गै राज में लेग्यो। बिं बेटै गै ई द्वारा आपां नै पापां गी सजा ऊं मुकती मिली, इंगो मतलब आपणै पापां गी माफी मिली है। मसी ना दिखण आळै परमेसर गो रूप है अर बो सारी सरसटी बणण ऊं पेलो है अर सारां गै उपर है। क्यूंकै बिंगै द्वारा ई सारो कीं बणाएड़ो है, झिको कीं सुरग में है अर धरती पर, देखण आळी चिजां अर झिकी चिजां नै देख कोनी सकां, चायै सुरगदूत अर सारी चिजां पर सासन करण आळी बुरी आत्मावा सारो कीं बिंगै द्वारा अर बिं खातर ई बणाएड़ो है। सारो कीं बणावण ऊं पेलां ई बो हो अर सारी चिजां बिमै ई टिकेड़ी है। बोई सरीर मतलब बिस्वासी मण्डली गो सिर है। बोई सरुवात है अर मरेड़ा ऊं जी उठण आळो पेलो है। ईंखातर सारी चिजां में पेली जिग्यां बिंगी है। परमेसर इंया चायो है कै बो आप संपूरण रूप में मसी में वास करै परमेसर मसी नै ईं संसार में घाल्यो झिको करूस पर बलिदान हो'ग्यो। ईं बलिदान गै द्वारा संसार गी सारी चिजां गो मेळ परमेसर सागै हो'ग्यो। परमेसर झिकी चिजां सुरग में है अर धरती पर है सारा नै सांती दी। एक टेम हो जद थे लोग परमेसर नै कोनी जाणै हा क्यूंकै थे लोग मन में बुरी इच्छा राखगे बांगै बिरोध में हा। पण मसी एक माणस गै रूप में धरती पर आ'गे बलिदान होयो। ईंखातर परमेसर थारो मेळ करायो कै थे परमेसर गै सामै पवितर, बिना दोस अर थारै में एक बी गळती ना होगे थानै पेस कर सकै। पण थानै यीसू मसी पर बिस्वास राखगे जीणो चईयै। थारो सूणेड़ो सुब समाचार अर बिं सुब समाचार में झिको वायदो परमेसर थानै दियो है बिमै ध्यान कर'गे जीणो चईयै अर कदी बी बिंऊं न्यारा नई होणो चईयै। ईं सुब समाचार नै सारै संसार में सुणायो हो अर ईं सुब समाचार गै द्वारा मैं पौलुस परमेसर गो दास बणग्यो। मैं झिका दुख खुसी गै सागै थारै खातर झेलूं हूं अर बिस्वासी मण्डली झिकी मसी गी देह है, बांगै खातर झिकी परेसानी में कीं कमी रेगी बां मेरै सरीर में पूरी करूं। परमेसर आपगी बातां थानै बताण खातर मनै बिस्वासी मण्डली गो एक दास बणायो अर पूरी जुमेबारी दी। आ बात भोत साला ऊं अर पीढी पीढी ऊं लुकेड़ी ही अर अब परमेसर बां बाता नै आपगै चुणेड़ा लोगां खातर खोल दी। परमेसर गेर यहुदियां नै आपगी लुकेड़ी सच्ची म्हान बाता दिखाणी चायी। अर बे आ है कै मसी थारै में है मतलब थे परमेसर गी मेमा गा भगिदार बण जावोगा। ईंखातर परमेसर म्हानै झिको ग्यान दियो है बिंगै द्वारा दूसरां नै मसी गै बारै में बतागे चेतावां। म्हे चावां हां कै बे लोग यीसू मसी गै सागै एक आच्छो रिस्तो बणा सकै। ओ मकसद पूरो करण खातर झिकी ताकत मेरै में है बिंऊं मैं तन मन लगागे बोळो काम करूं। हे भाईयो अर भेनों, मैं थानै बताणो चावूं कै थारै खातर अर लौदिकिया में रेण आळा लोगां खातर अर झिका नै मैं दिख्यो कोनी हो बां सारा खातर मैं किती मेनत करूं हूं। मैं बोळि मेनत करूं कै, बां लोगां गो प्रेम आपसरी में बदतो जावै अर मन में सांती मिलै अर परमेसर गी लुकेड़ी बाता नै पूरी तरियां समझ सकै क्यूंकै बे बातां मसी ई है। बिमै ग्यान अर बुद्धी गो सारो भंडार लुकेड़ो है। मैं ऐ सारी बातां ईंखातर बताऊं कै दुसर लोग थानै मीठी मीठी बातां में बाद विवाद कर'गे धोखो ना दैय। मैं थारै ऊं भोत दूर हूं पण आत्मिक रूप ऊं थारै भोत नेडै़ हूं। मैं ईं बात ऊं खुस हूं कै थे लोग यीसू मसी गै उपर भरोसो राखगे भोत आच्छो जीवन जीवो हो। अब थे यीसू मसी पर बिस्वास करयो अर बिनै प्रभु कर'गे समझ लिओ ईंखातर बिंगी आग्या गो पालण कर'गे चालता रेवो। जिंया एक दरखत जड़ पकड़ै है बिंयाई थे यीसू मसी पर बोळो भरोसो राखगे मजबूत हो जाओ। जिंया थानै सिखाया बिंया थे बिस्वास में बदता जाओ। अर भरपूरी ऊं बिंगो धन्यवाद बी करो। कोई बी आपगै ग्यान ऊं परमेसर गै बारै में थानै सिखावै तो बिं बात पर ध्यान ना देईयो अर चेतो कर'गे रेईओ क्यूंकै बिं ग्यान में कीं खास बात कोनी अर धोखो देण आळा है। ऐ बाता माणस ऊं आवै है अर ईं संसार नै चलाणाळी बुरी ताकतवर सकती ऊं आवै है पण मसी ऊं कोनी आवै है। क्यूंकै परमेसर गो सभाव अर सारी ताकत मसी में पूरी तरियां वास करै। ईं संसार गो सारो राज अर सारो अधिकार बिंगै कनै है। ईंखातर थे बिंगै सागै पूरी तरियां भागिदार हो जाओ। क्यूंकै थे लोग मसी में आया हो अर बिंऊं थे लोग खतनो करयो है। ओ खतनो माणस गै हात ऊं कोनी होयो पण मसी आप ई करयो है। बण थानै पाप गी गुलामी ऊं छुड़ागे खतनो करयो है। जद थे बतिस्मो लियो बिं टेम थानै बी यीसू मसी तरियां गाड़ दियो अर बिं तरियां ई जी उठगे एक नुओ जीवन लिओ क्यूंकै थे परमेसर गी मोटी ताकत पर भरोसो राख्यो झिको यीसू मसी नै मरेड़ा ऊं दुसर जींवंतो करयो। पेलां थे गेर यहुदी लोग आपगै पाप गै कारण आत्मिक रूप में मरेड़ा हा अर थानै परमेसर गो नेम बी कोनी दियो गेयो हो। पण मसी द्वारा थानै जीवन दियो अर थारै हर एक बुराई अर पाप नै माफ करयो। परमेसर आपणा सारा पाप झिका मूसा गै नेम विधान गो पालण ना करण ऊं आया हा बां सारी विधियां नै मिटा दी अर बिनै कीलां ऊं करूस पर जड़गे मिटा दियो है। यीसू मसी सारै अंधेरै गी ताकत अर सासक गी सकतियां नै खत्म कर'गे अर करूस गै द्वारा बानै हरागे बांगै उपर जे जयकार कर'गे सारै सासकां झिका बां पर सासन करै बां लोगां नै पूरी तरियां सरमसार कर दिया। ईंखातर हे मेरा भाईयो अर भेनों, कोई बी थारै मू खाण पीण गै बारै में, अर त्यूंहार गै बारै में अर नुअ चांद गै बारै में अर पवितर दिनां गै बारै में फेंसलो ना करै। इंगै बारै में होएड़ा सारा यहुदी नेम विधान आण आळै दिन गै जिंया है। पण आखरी बात मसी में ई मिलै है। परमेसर ऊं मिलण आळा वायदा ऊं कोई बी थानै झूठी सिक्सा देगे न्यारो ना कर दैय क्यूंकै बे लोग इंया बोलै है म्हानै ग्यान है अर भविस्य गै बारै में बोल सकै अर बिंया बी बोलै थे दीन होगे दूतां नै आराधना कोनी करो तो परमेसर थानै स्वीकार कोनी करसी। बां लोगां गी बात में कोई मतलब कोनी क्यूंकै बे लोग संसार गी सोच गै अनुसार मूरख बाता बतावै है अर अपणै आप घमण्ड करै है। बे लोग झिका बात यीसू मसी झिको आपणै सिर जिसा है बिमुं आएड़ी बाता नै कोनी मानी। आपां झिका यीसू मसी पर बिस्वास करयो है बे सारा यीसू मसी गै सरीर जिसो है। जिंया सिर सरीर नै संभाळै है अर सरीर गी नसां अर जोड़ा गै सागै संबन्ध है बिंयाई यीसू मसी आपां नै परमेसर गी इच्छा गै अनुसार ओर मजबूत करै है। थे मसी गै सागै थारै पुराणै जीवन गो तरिको खत्म कर दियो, ईंखातर संसार नै चलाण आळी बुरी ताकत गो थारै पर कीं अधिकार कोनी। फेर ईं संसार गै अबिस्वासी लोगां गै तरियां थे क्यूं बांगै बस में रेवो हो? थे ईं संसार गै ई नेम गो क्यूं पालण करो हो, “आं चिजां गै उपर हात ना लगाओ, इनै चाखो ना अर इनै छूओ ना।” ऐ सारी बातां नास होण आळी है। अर ऐ बातां माणस गा बणायेड़ा नेम अर सिक्सा है। ऐ सारी बाता बोळै ग्यान गो दिखावो है। ऐ सारी बातां ऐ है कै दूता नै आराधना करणी, अर झूठी दीनता, अर सरीर नै दंड करण ऊं दिखावै है, पण सरीर गी लालसा नै रोकण गी कोई बी मदद कोनी। जे थानै मसी पर बिस्वास करण ऊं परमेसर एक नुओ जीवन दियो है तो थे झिकी चिजां सुरग में है बानै ढूंढता रेवो। बिं जिग्यां मसी अब है अर परमेसर गै दाहिणै ओर बेठयो है। सदां ई झिकी सुरग पर है बां बातां नै याद करता रेवो पण झिकी धरती में है बां पर ध्यान ना देओ। क्यूंकै थारो बुरो सभाव मरग्यो अर अब थानै यीसू मसी गै सागै परमेसर गै सामै एक नुओ जीवन मिल्यो है अर थारै जीवन नै दुसरा लोग समझ कोनी सकै। मसी झिको आपणो जीवन है बिंगै दुसर आण गै टेम थे बी बिंगै सागै आदर ऊं परगट करिजोगा। ईंखातर बेबीचार, मन गो खोट, बुरी इच्छावां, सरीर गी लालसा, संसार गी सारी लालसा झिकी मूरती पूजा गै बराबर है बानै पूरी तरियां छोड़दैयो। आं सारी बातां गै द्वारा परमेसर गी सजा झिका लोग बानै कोनी मानै बां पर आवै है। परमेसर पर आपगो जीवन समरपित करण ऊं पेलां थे बी आं सारी बातां गै लारै चाला हा। अब थे रीस, बिरोध, बेरभाव, चुगली करणी, गळत बात बोलण गी आदत आं सारी बातां नै छोडणी है। दूसरां गै सागै झूठ ना बोलो क्यूंकै थे सारी बुरी इच्छावां अर सारी चिजां झिकी पेलां करता हा बानै सारा नै छोड़ दी है। परमेसर थानै अब एक नुओ जिसो बणाण लागरयो है ईंखातर आपणो परमेसर कितो म्हान है ओ समझ सकां अर बांगै बारै में ओर बोळो जाण सकां। बिमै यहुदी अर गेर यहुदी अर खतनो करण आळा अर बिना खतनो करण आळा, पढेड़ो अर अणपढ, गुलाम अर आजाद आमै कोई फरक कोनी। मसी सारो कीं अर सारा में है। थे लोग परमेसर गै चुणेड़ा पवितर अर प्यारा लोग हो। ईंखातर थे दया, सेण सकती, दीनता, कोमलता अर धीरज नै धारण करो। अर जे कोई किनै ई कीं पर ई दोस लगाण गो कोई कारण होवै तो बिनै सेण कर ल्यो अर जे कोई थारै सागै लड़ाई करै तो बिनै माफ करणो चईयै अर थे एक दूसरै नै इंया माफ करो जिंया प्रभु थानै माफ करया। सारा ऊं मोटी बात प्रेम है। ओ प्रेम सारा नै एक सागै रेण में मदद करै है। मसी ऊं मिलण आळी सांती ऊं थे थारै मन नै संभालो। ईंखातर थे बिमै एक ई सरीर में बुलाएड़ा हो। सदां ई धन्यवाद करता रेवो। सदां ई धन्यवाद गै सागै भजन अर स्तुति अर आत्मिक गीत गाओ अर एक दूसरै नै सिखाओ। मसी गो बचन थारै मा बोळो बसण दैयो। अर बचन ऊं या काम ऊं झिको कीं थे करो हो बो सारो कीं प्रभु यीसू गै नाम ऊं करो। बिंगै द्वारा पिता परमेसर नै धन्यवाद देवंता रेवो। हे लुगाईयो, थारै घर आळै गै सागै दीनता ऊं रेवो। इंया कर'गे थे प्रभु गी बातां नै पूरी करो। हे आदमियों, थारै घर आळीयां गै सागै प्रेम ऊं रेवो। बांनै कदैई तंग ना करो। हे टाबरों, सारी बातां में आपगै मां बाप गी आग्या गो पालण करो क्यूंकै इंगै द्वारा प्रभु खुस होज्यै'गो। हे पिताओं, आपगै टाबरा नै तंग ना करो। जे थे इंया करोगा तो बे निरास हो'ज्यैगा। हे गुलामी में रेण आळा लोगो, आपगै मालिकां नै झिका संसार में है बांगी सारी बाता नै मानो। बां लोगां नै खुस कोनी करण पण सच्चै मन ऊं बानै मानो इंया करो तो थे प्रभु नै आदर देवो हो। झिको कीं थे करो बो तन मन ऊं करो। ओ सारो प्रभु खातर करणो चईयै। झिका काम करो हो बे संसार गै लोगां खातर कोनी। क्यूंकै थे जाणो हो कै थानै इंगै बदळै प्रभु वारिस बणावैगो अर प्रभु मसी गी सेवा करता रेवो। मसी किंगी पक्सपात कोनी करै। पण बुरो करण आळा नै सजा जरूर देवैगो जिसी बानै मिलणी चईयै। हे मालिको, थे आपगै गुलाम लोगां सागै आच्छो बरताव करो। आ बात थानै याद राखणी है कै सुरग में एक मालिक थारै खातर है। सदां ई पराथना में रेवो अर सदां परमेसर गो धन्यवाद करता रेवो। म्हारै खातर बी पराथना करो कै परमेसर म्हानै बचन सुणाण खातर एक बारनो खोल दैय कै म्हे मसी गी बे लुकेड़ी बातां बोल सका बिं कारण मैं केद हो'ग्यो। मेरै खातर पराथना करो कै मैं साफ साफ दूसरा नै परमेसर गी बात नै बोल सकूं। हे भाईयो अर भेनों, जद थे अबिस्वासी लोगां सागै हो बिं टेम बांगै सागै आच्छो बरताव करो कै बे लोग यीसू मसी पर बिस्वास कर सकै। थारी बात सदां ई मीठी होवै कै दूसरां गै सवाल गो किंया उतर देणो बोई थानै आ'ज्यै। मेरो इमानदार साथी अर प्रभु में मेरै सागै काम करण आळो तुखिकुस मेरै बारै में सारो कीं थानै बतासी। मैं बिनै ईंखातर थारै कनै घालूं कै बो म्हारै बारै में थानै बतावै अर थानै ओर होंसलो देवै। मैं बिंगै सागै उनेसिमुस झिको बिस्वास योग्य अर प्यारो भाई है बिनै बी भेजूं झिको थारै मू एक है। अठै के होयो ऐ सारी बातां बे थानै बतासी। अरिस्तरखुस झिको जेळ में मेरै सागै रेवै हो अर बरनाबास गो रिस्तेदार मरकुस बी थानै निमस्कार केवै (मरकुस थानै कीं सिक्सा पेलां दी है, जे बो थारै कनै आयो है, बिंगो आदर मान करो)। यीसू अर बिंगो नाम युसतुस बी है, बो बी थानै निमस्कार केवै है। यहुदी लोगां ऊं बे ई परमेसर गै राज में मेरा साथी अर बे लोग मेरी सांती गा कारण होग्या। इपफ्रास बी थानै निमस्कार पुगायो। बो थारै मू एक है। अर बो मसी गी सेवा करै है। बो थारै खातर सदां ई मन लगागे पराथना करतो रेवै है कै थे आत्मिक रूप में भोत आ'गै बध जावो अर परमेसर गी आग्या नै मानण आळा बी हो जाओ। बो थारै खातर अर लौदिकिया अर हियरापुलिस में रेण आळां खातर सदां भोत मेनत करण लागरयो है। मैं इंगो गवा हूं। म्हारै प्यारै मित्र बेद लूका अर देमास बी थानै निमस्कार भेजै है। लौदिकिया में रेण आळा भाईयो अर भेनों अर नमुफास अर बिंगै घर में रेण आळा सारी बिस्वासी मण्डली गै लोगां नै बी निमस्कार केवो। थे पेलां ओ खत पढण गै बाद में लौदिकिया गी बिस्वासी मण्डली नै पढगे सुणाओ अर लौदिकियां ऊं मेरै खातर मिलण आळो खत थे बी पढो। प्रभु झिको काम भाई अरखिपुस नै दियो है बो करण खातर बिनै याद करणो है। मैं पौलुस ओ खत लिखण लागरयो हूं। मैं अब बी जेळ में हूं। आ बात थानै याद राखणी जरूरी है। परमेसर गी किरपा थारै सागै सदां रेवै। आमीन। पौलुस, अर सिलवानुस अर तीमुथियुस गी ओर ऊं थिस्सलुनिकियों नगर गी बिस्वासी मण्डली गै नाम झिका परमेसर पिता अर प्रभु यीसू मसी गा लोगो, थानै परमेसर गी किरपा अर सांती मिलती रेवै। म्हे आपगी पराथना में थानै याद करां अर सदां ई थारै सारां गै खातर प्रभु गो धन्यवाद करता रेवां। प्रभु पर बिस्वास करण गै कारण झिको काम करो अर प्रभु अर सारा बिस्वासियां ऊं प्रेम करण गै कारण झिकी मेनत करो हो अर थारी आस गै कारण झिको दुख सेयो हो बानै म्हे परमेसर गै सांमै याद करां हां। भाईयो अर भेनों, म्हे जाणा कै परमेसर थानै प्रेम करै है अर थानै चुण लिया है। क्यूंकै म्हारै सुणायेड़ै सुब समाचार नै थारै कनै सब्दां में कोनी पोंचायो है पण सामरथ अर पवितर आत्मा अर मजबूत बिस्वास गै सागै पोंचायो है। थे जाणो कै म्हे जद थारै सागै हा, थारै लाभ गै खातर किंया जीवन बितायो हो। अर थे मोटै क्ळेस में पवितर आत्मा गै आनंद गै सागै बचन नै मानगे म्हारी अर प्रभु गी सी चाल चालण लागग्या। ईंखातर थे मकिदुनिया अर युनान देस गै सारा बिस्वासियां गै खातर नमुनो बणग्या। थारै ऊं प्रभु गो संदेस मकिदुनिया अर अखाया देस में कोनी फेलयो पण सारी जिग्यां ई फेलग्यो है। ईं जिग्यां में लोग थारै बिस्वास गी बातां करै। म्हानै थारै बारै में केण गी जरूरत ई कोनी। क्यूंकै बे आप ई म्हारै बारै में बतावै है, थे म्हारो किंया मान करयो हो अर जींवंतै अर साच्चै परमेसर गी सेवा करण गै खातर अर सुरग ऊं परमेसर गै बेटै गै आण गी उडीक करण गै खातर थे मूरतियां गी ओर ऊं जींवंतै परमेसर गी ओर किंया मूड़या हा। यीसू नै बण मरेड़ा माऊं फेर जींवंतो उठायो हो अर बोई यीसू मसी परमेसर गै आण आळी रीस ऊं म्हारी रक्सा करै है। हे भाईयो अर भेनों, थे आप ई जाणो हो कै थारै कनै म्हारो आणो गळत कोनी हो। थे जाणो हो कै म्हानै पेलां फिलिप्पी नगर में दुख अर बेजती सेणी पड़ी फेर बी परमेसर इती हिम्मत दी कै, परमेसर गो सुब समाचार भारी बिरोध में थानै सुणायो। म्हारो उपदेस ना तो बेम में टिकेड़ो है अर असुद्धता गो कोनी अर ना कोई छल-कपट गै सागै होवै। परमेसर म्हानै लाइक समझगे म्हानै सुब समाचार सुंपयो है ईंखातर म्हे माणसां नै कोनी पण म्हारै दिल नै परखण आळै परमेसर नै खुस करण गै खातर उपदेस देंवंता रेवां। म्हे कदैई चापलूसी गी बातां गै सागै थारै सांमणै कोनी आया। जिंया कै थे जाणो हो कै म्हारो उपदेस अर चाल चलण लाळच गै कारण कोनी हो, परमेसर गवा है। म्हे लोगां ऊं कोई आदर मान बी कोनी चायो ना थारै ऊं अर ना कीं ओर कनूं। म्हे मसी गा खास चेला होण गै कारण थारै ऊं म्हारै खाण पीण गो खरचो मांग सका हा। पण जिं तरियां मां आपगै टाबरां गो लाड-प्यार करै है बिंयाई म्हे बी थारै बिचाळै दीनता गै सागै रेंता हा। अर म्हे थानै भोत ई प्रेम करयो है। ईंखातर परमेसर ऊं मिल्यो सुब समाचार गो ई कोनी पण अपणै आपनै बी म्हे थारै सागै बांटयो हो क्यूंकै थे म्हारा निजी हो'ग्या हा। हे भाईयो अर भेनों, थे म्हारै ओखै काम अर कस्ट नै याद राखो झिको म्हे दिन-रात ईंखातर करयो है कै म्हे परमेसर गै सुब समाचार नै सुंणांता होयां थारै पर बोझ ना होवां। थे आप ई गवा हो अर परमेसर बी पण थे झिका यीसू मसी पर बिस्वास करण आळा हो, थारै बिचाळै में म्हे किंया पवितरता अर धारमिकता अर बिना दोस ऊं रेंता हा। थे जाणो कै जिंया पिता आपगै टाबरां गै सागै बरताव करै है बिंयाई म्हे बी थारै सगळा नै उपदेस दियो अर सांती दी अर समझाया बी हा। कै थारो चाल-चलण प्रभु गै लाइक है झिको थानै अपणै राज अर मेमा में परमेसर गै सागै मिलण खातर बुलावै है। अर ईंखातर म्हे परमेसर गो धन्यवाद सदां ई करता रेवां क्यूंकै म्हारै ऊं जद थे परमेसर गै बचन नै मान्यो हो तो बो माणस गै संदेस गै रूप में कोनी पण परमेसर गै संदेस गै रूप में मान्यो जिंया कै बो सच्च में है। अर थारै बिस्वासियां पर झिकै गो असर बी है। हे भाईयो अर भेनों थे परमेसर गी बिस्वासी मण्डली गी चाल-चालण लागग्या झिकी यहुदियां में मसी यीसू में है। क्यूंकै थे बी आपगै लोगां ऊं बिस्यो ई दुख पायो। झिको बां यहुदीयां ऊं पायो हो। झिका प्रभु यीसू अर परमेसर गी बात बताण आळा नै बी मार दिया अर म्हानै बी सताया अर परमेसर बां कानी ऊं राजी कोनी है। अर बे सारा आदमियां गो बिरोध ईं तरियां करै है। अर अन्यजातियां ऊं बांगै उद्धार गै खातर सुब समाचार सुणाण ऊं सदां ई म्हानै रोकै है अर आपगै पापां गो घड़ो भरता रेवै, पण बां पर परमेसर गी रीस पूरी तरियां आ'गी है। हे भाईयो अर भेनों, जद म्हे थोड़ी देर गै खातर मन ऊं कोनी पण सरीर ऊं न्यारा हो'ग्या हा तो म्हारी थारै ऊं फेर मिलण गी आस ओर बी बणगी अर म्हे थानै मिलण गी भोत कोसिस करी। ईंखातर म्हे खास कर'गे, मैं पौलुस बारी बारी थारै कनै आण गी कोसिस करी पण सैतान म्हारो रास्तो रोक राख्यो। जद म्हे यीसू मसी गै आण गै टेम बिंगै सांमणै खड़या होवांगा तो म्हारी आसा, खुसी अर बडाई जरूर थे ई होस्यो अर म्हारै प्रभु गै आण गै टेम थे बी प्रभु यीसू मसी गै सांमणै जरूर होस्यो। म्हारी बडाई अर आनंद थे ई हो। ईंखातर जद म्हे थारा हाल चाल जाणे बिना कोनी रे सकां, तो म्हे एथेंस नगर में एकला ई ठेर जाण गो फेंसलो करयो। अर म्हे तीमुथियुस झिको मसी गै सुब समाचार गै परचार करण में आपणो भाई अर परमेसर गो दास है बिनै ईंखातर भेज्यो कै थारै बिस्वास नै तरो ताजा अर पक्को कर सकै। जिंऊं कोई बी बिस्वासी भाई अर भेन ईं क्ळेस गै कारण डगमगा ना जावै क्यूंकै थे आप ई जाणो हो कै आपणै खातर हिस्या दुख जरूर आवैगा। थारै बठै रेंवता टेम म्हे थारै ऊं केवंता हा कै म्हानै दुख उठाणो पड़ैगो अर बिंयाई होयो है अर थे तो जाणो ई हो। ईंखातर क्यूंकै मैं ओर जादा उडीक कोनी कर सक्यो हो। ईंखातर मैं थारै बिस्वास गै बारै में जाणगे तीमुथियुस नै घाल दियो क्यूंकै मनै डर हो कै परीक्सा करण आळो सैतान थारी परीक्सा कर'गे थारै खातर म्हारी सारी मेनत नै बेकार कर दी। तीमुथियुस अबी अबी अठै आयो अर बो थारै बिस्वास अर प्रेम गै बारै में सुब समाचार ल्यायो है। बो म्हानै बतावै है कै थे सदां ई मनै याद राखो अर थे म्हानै फेर देखणै गै खातर भोत ई उंतावळा हो बिंयाई म्हे थानै मिलण ऊं। ईंखातर, हे भाईयो अर भेनों, म्हे आपगै सारै दुख अर क्ळेस गै बावजूद में बी थारै बिस्वास गै बारै में जाणगे म्हानै सांती मिली है। म्हे जाणग्या कै प्रभु में थे टिकेड़ा हो ईंखातर म्हे फेर सुख गा सांस लेण लागरया हां। अर जिस्यो आनंद म्हानै थारै कारण आपणै परमेसर गै सांमणै है बिंगै बदळै में थारै बारै में म्हे परमेसर गो धन्यवाद किंया करां। म्हे दिन-रात खुसी गै सागै परमेसर ऊं आ पराथना करता रेवां कै म्हे थानै दुबारै देख सकां अर थारै बिस्वास में झिकी कमी रेगी है बिनै पूरी कर सकां। आपणो पिता परमेसर अर म्हारो प्रभु यीसू थारै कनै आण गो म्हारै रास्तै गी रुकावट नै दूर करै। प्रभु हिस्यो प्रेम करै कै जिंया म्हे थारै ऊं प्रेम राखां बिं तरियां ई थारो प्रेम बी एक दूसरै गै अर सारां गै सागै बढतो रेवै अर बढतो जावै। ईं तरियां प्रभु यीसू थारै दिल नै मजबूत बणावै कै थानै आपणै पिता परमेसर गै सांमणै पवितर अर निरदोस बणाये राखै जद आपणो प्रभु यीसू आपगै सारा पवितर लोगां गै सागै आवैगो। हे भाईयो अर भेनों यीसू मसी गै नाम पर मैं थारै ऊं पराथना अर निवेदन करूं कै थे ईं बात गो उपदेस म्हानै दियो हो कै परमेसर नै खुस करण खातर किंया चालणो चईयै। बिंयाई चालणो चईयै जिंया थे अब चालण लागरया हो अर आ'गै बढता जाओ। क्यूंकै थे जाणो कै प्रभु यीसू गै अधिकार ऊं म्हे थानै आग्या दी है। अर परमेसर गी आ'ई इच्छा है कै थे पवितर हो जाओ अर बेबीचार ऊं दूर रेईयो। थारै ऊं हर एक जणो अपणै आपनै बस में राखण आळो होवै अर आपगै सरीर नै पवितर अर आदर गै लाइक बणागे राखो अर बिंगो आदर करो। अर परमेसर नै ना जाणन आळा आदमियां गी तरियां सरीर गी लाळसा नै पूरी करण खातर बिंगो स्हारो ना ल्यो। ईंखातर ईं बारै में कोई आपणै बिस्वासी भाई गै सागै कोई पाप ना करै अर कोई बी गळत लाभ ना उठावै क्यूंकै हिस्यै सारै पापां गै खातर प्रभु सजा देवैगो। झिको म्हे थानै बता दियो है अर चितायो बी है। क्यूंकै परमेसर आपां नै असुद्ध होण खातर कोनी पण पवितर होण खातर बुलाया है। ईंखातर झिको ईं उपदेस नै कोनी मानै बिं माणस नै कोनी पण परमेसर नै कोनी मानै है झिको थानै आपगी पवितर आत्मा देवै है। अब थारै भाई भेनां गै प्रेम गै बारै में बी लिख्यो जावै पण इंगी थानै जरूरत कोनी है क्यूंकै परमेसर आप ई थानै एक दूसरै गै सागै प्रेम करण गो उपदेस दियो है। अर सारै मकिदुनिया गै सगळा बिस्वासी भाई भेनां गै सागै प्रेम करो, पण हे भाईयो अर भेनों म्हे थानै समझावां कै ओर प्रेम में बढता जाओ। अर जिसी म्हे आग्या दी है बिंयाई पूरी कोसिस गै सागै सांती ऊं रेवो अर आप आपगो काम करणो अर आप आपगै हात ऊं कमाण गी कोसिस करता रेवो। ईं तरियां गो चाल चलण करण ऊं बिस्वासी मण्डली ऊं बारआळा लोग थारो आदर करैगा अर थानै कोई बी बात गी कमी कोनी होवैगी। हे भाईयो अर भेनों, म्हे चावां कै यीसू मसी में बिस्वास करण आळा झिका अब ईं दुनिया में कोनी है बांगै बारै में थानै पूरी तरियां गी जाणकारी होवै। कठै इंया ना होवै कै थे बी यीसू मसी पर बिस्वास कोनी करण आळा लोगां गी तरियां दुख मनाओ झिका नै कोई आस कोनी। क्यूंकै जे म्हे बिस्वास करां कै यीसू मरग्यो अर बो फेर जींवंतो हो'ग्यो तो बिं तरियां ई झिका बिं पर बिस्वास करण आळा मरग्या झिका नै बी परमेसर जींवंता करैगो अर यीसू गै सागै ले जावैगो। क्यूंकै म्हे प्रभु गै बचन गै अनुसार थारै ऊं ओ केवां कै प्रभु यीसू गै दुबारै आण गै टेम यीसू में मरेड़ा है झिका बिस्वासी लोग जींवता है बांऊं पेलां यीसू ऊं मिलैगा। क्यूंकै प्रभु यीसू जोर ऊं ललकारता अर प्रधान सुरगदूत अर परमेसर गी तुरई गी आवाज गै सागै जद सुरग ऊं उतरैगो झिका प्रभु पर बिस्वास करता मरग्या बे पेलां जींवंता होवैगा। इंगै बाद में आपां बिस्वासी झिका जींवंता होवांगा अर बचेड़ा होवांगा, परमेसर बां लोगां गै सागै आकास में ले जावैगो अर प्रभु यीसू ऊं मिलांगा अर ईं तरियां आपां सदां ई प्रभु यीसू गै सागै रेवांगा ईंखातर आं बातां गै सागै एक दूसरै नै तरो ताजा करता रेवो। हे भाईयो अर भेनों, ओ सारो कीं कद होवैगो, इंगै बारै में थानै लिखण गी कोई जरूरत कोनी है। क्यूंकै थे आप ई भोत आच्छी तरियां ऊं जाणो हो कै जिंया चोर चाणचकै आवै बिंयाई प्रभु गो दुबारै आणो होवैगो। लोग ओ केवै है कै अब तो सांती अर सुरक्सा है। बिं टेम जिंया एक टाबर नै जन्म देण आळी लुगाई पर पीड़ा आवै है बिं तरियां बां पर बिनास चाणचकै आ पड़ैगो अर बे बिंऊं कोनी बच सकैगा। पण हे भाईयो अर भेनों, थे बुरी दुनिया गी तरियां अन्धेरै में तो कोनी कै थारै पर बो दिन चोर गी तरियां आ'गे थानै अचंभै में कोनी गेरैंगो। थे सारा जोती अर दिन गी उळाद हो आपां अन्धेरै अर रात गी उळाद कोनी हां। ईंखातर आपां यीसू मसी पर बिस्वास कोनी करण आळै गी तरियां कोनी सोणो पण जागता अर संभळगे रेणो है। क्यूंकै झिका रात नै सोवै है बे रात नै ई सोवै है अर नसा करण आळा है बे रात नै ई नसो करै है। पण आपां तो दिन गी उळाद हां ईंखातर आपां नै संभळगे रेणो है। बिस्वास अर प्रेम गो सुरक्सा कवच अर उद्धार गी आसा गो टोप पेरगे संभळगे रेवो। क्यूंकै परमेसर आपां नै आपगी रीस गै खातर कोनी पण आपणै प्रभु यीसू गै द्वारा मुकती होवै अर ईंखातर बणाया है। यीसू मसी आपणै खातर मरग्यो कै आपां जींवंता हां या मरेड़ा हां। जद बिंगै दुबारै आण गै टेम में बिंगै सागै जींवंता रेवां। ईंखातर एक दूसरै नै होंसलो दैयो अर एक दूसरै गी आत्मिक उन्नती गो कारण बणो झिको थे करण लागरयो हो। हे भाईयो अर भेनों, म्हे थारै ऊं बिनती करां कै झिका लोग थारै मा मेनत करै है अर प्रभु में थारा अगुवा है अर थानै चेतावै बी है अर बांगो आदर करता रेवो। अर बांगै कामा गै कारण प्रेम गै सागै बानै भोत ई आदर गै लाइक समझो अर आपस में मेल मिलाप गै सागै रेवो। हे भाईयो अर भेनों, म्हारी थारै ऊं बिनती है आळसियां नै चेतावो, कमजोर दिल आळा नै होंसलो बढाओ, कोई बी तरियां कमजोर लोगां गी मदद करो। सारां गै सागै धीरज राखो। थे ईं बात गो ध्यान राखो कै बुराई गै बदळै कोई बी किंगैई सागै बुराई ना करै। थे सदां ई दूसरै गै अर सारां माणसां खातर भलाई करण गी कोसिस करता रेवो। थे सदां ई खुस रेवो। हर टेम पराथना में लाग्या रेवो। हर एक बात में बी परमेसर गो धन्यवाद करता रेवो क्यूंकै थे झिका यीसू मसी गा हो थारै खातर परमेसर गी आई इच्छा है। पवितर आत्मा गै काम नै ना दबाओ। परमेसर गी बात नै कदी छोटी ना समझो। सगळी बातां नै परखो अर झिकी आच्छी है बानै मानता रेवो। अर हर तरियां गी बुराई ऊं बच्या रेवो। सांती देण आळो परमेसर थानै पूरी रीति ऊं पवितर करै अर थारी आत्मा अर प्राण अर सरीर आपणै प्रभु यीसू मसी गै आण तांई पूरा पूरा निरदोस अर सुरक्सित राखो। बो परमेसर झिकै थानै बुलाया है बिस्वास गै लाइक है अर बो इंयाई करैगो। हे भाईयो अर भेनों, थे म्हारै खातर बी पराथना करो। सगळा बिस्वासी भेन-भाई नै यीसू मसी गै प्रेम ऊं निमस्कार करो। थानै प्रभु गी सोगन देगे मैं ओ केऊं कै ईं खत नै सगळै भाई-भेनां नै पढगे सुणायो जावै। आपणै प्रभु यीसू मसी गी किरपा थारै सागै रेवै। पौलुस अर सिलवानुस अर तीमुथियुस गी ओर ऊं थिस्सलुनिकियों सैहर गी बिस्वासी मण्डली गै लोगां गै नाम गो खत। थे झिका पिता परमेसर अर प्रभु यीसू मसी गा लोग हो। थानै परमेसर पिता अर प्रभु यीसू मसी ऊं किरपा अर सांती मिलती रेवै। हे भाईयो अर भेनों, म्हे थारै बारै में हर टेम परमेसर गो धन्यवाद करां अर इंया करणो जरूरी बी है। क्यूंकै थारो बिस्वास बढण लागरयो है अर थारै सगळां गो प्रेम आपसरी में भोत ई बढण लागरयो है। अठै तांई कै म्हे खुद परमेसर गी बिस्वासी मण्डली में थारै बारै में घमण्ड करां, कै झिको लड़ाई झगड़ो अर क्ळेस थे सेयो बां सारां में थारो धीरज अर बिस्वास परगट होवै। ओ ईं बात गो सबूत है कै परमेसर गो फेंसलो साच्चो है। बिंगो मकसद ओ ई है कै थे परमेसर गै राज में आण गै लाइक बणो। अब थे बां खातर कस्ट उठाण लागरया हो। क्यूंकै परमेसर न्यायी है ईंखातर झिको थानै कस्ट देवै बिंगै बदळै में बिनै कस्ट मिलैगो। अर थे झिको कस्ट सेण लागरया हो, थानै परमेसर आराम देवैगो, जद प्रभु यीसू मसी आपगै सकतीसाली दूतां गै सागै सुरग ऊं जगती आग में परगट हो'सी। जद बो लोगां नै सजा देवैगो झिका परमेसर नै मानै कोनी अर झिका सुब समाचार नै कोनी मानै है। आं लोगां नै प्रभु आपगै सामैं ऊं अर आपगी मेमां अर सकती गै तेज ऊं दूर कर'गे अनन्तकाळ गी सजा देवैगो। ओ बिं दिन होवैगो जद पवितर लोग प्रभु यीसू नै आदर अर मेमां देवैगा अर प्रभु नै देखगे अचंभो करसी बिमै थे बी सामिल होवोगा क्यूंकै म्हे बिंगै बारै में गवाई दी, बिं पर थे बिस्वास करयो हो। ईंखातर म्हे सदां ई थारै खातर पराथना करां कै म्हारै परमेसर झिकै मकसद ऊं थानै बुलायो है बिंगै लाइक बणा दैय अर थारी सारी आच्छी इच्छा नै अर प्रभु में बिस्वास गै कारण करेड़ै हर एक काम नै आपगै सामरथ ऊं पूरो कर देवै। ईं तरियां आपणै प्रभु यीसू मसी गो नाम थारै द्वारा आदर पावैगो अर थे बिंगै द्वारा आदर पावोगा ओ सारो कीं आपणै परमेसर गै अर यीसू मसी गी किरपा ऊं होवैगो। हे भाईयो अर भेनों, आपणै प्रभु गै दुसर आण गै बारै में अर आपां बिंगै सागै भेळा होण गै बारै में थानै बताणो चावूं हूं। केई लोग केवै है कै प्रभु गो दिन आ'ग्यो है। बे लोग कोई परमेसर गी बात अर उपदेस गो सबूत अर म्हारै लिखेड़ै खत ऊं दावो पेस करै है। ओ सुणगे थे घबराईयो ना कोई थानै कीं तरियां ऊं ना भेकावै। बो दिन जद तांई कोनी आवै जद तांई परमेसर गो भारी बिरोध ना हो जावै अर मनमानी करण आळो आदमी पैदा ना होवै झिकै गो नास होणो ई है। बो आपगै घमण्ड में परमेसर अर सगळां गो बिरोध करैगो अर सारां ऊं अपणै आपनै मोटो मानैगो झिका देवता कुहावै है या पूजनीय समझया जावै। अठै तांई कै यरुसलेम में परमेसर गै मिन्दर में विराजमान होगे अपणै आपनै परमेसर होण गो दावो पेस करैगो। के थानै याद कोनी है कै थारै बिचाळै रेगे मैं थानै ऐ सगळी बातां समझाया करतो हो? अर थे तो अब आ जाणो ई हो कै बण किंया रोक राख्यो है बो सई टेम आणै पर ई परगट होवै। मनमानी करण आळो आदमी अबी बी लोगां गै मा काम करण लागरयो है पण बो बिं टेम लुकेड़ो जिं टेम तांई रोकण आळो कोनी हट ज्यै। जद ई बो मनमानी करण आळो आदमी परगट होवैगो जद प्रभु यीसू मसी आपगी मेमां में फेर परगट होवैगो। बो बिनै आपगै मूं ऊं निकळण आळै आदेस ऊं मार देवैगो अर आपगै आण गै तेज ऊं नस्ट कर दैयगो। बिं मनमानी करण आळै आदमी गो आणो सैतान गी सकती ऊं होवैगो अर भोत बड़ी सकती, झूठा निसान अर चमत्कारां गै सागै परगट होवैगो। नास होण आळा आदमियां नै हरेक तरियां गी बुराई ऊं होण आळै धोखै में घालै है क्यूंकै बिं सच्चाई ऊं प्रेम करण नै मान्यो कोनी झिको बानै बचाणै में सामरथी हो। अर ईं कर'गे ई परमेसर बानै भटका देण आळी सामरथ नै भेजैगो जिंऊं बे झूठ पर बिस्वास करै। अर जिता बी लोग सच्चाई ऊं प्रेम कोनी करै पण बे अधर्म ऊं खुस होंता रेवै बे सगळा सजा पावैगा। हे भाईयो अर भेनों, प्रभु थानै प्रेम करै है, थारै खातर म्हानै सदां ई परमेसर गो धन्यवाद करता रेणो चईयै क्यूंकै परमेसर आदि ऊं थानै चुण लिया है जिंऊं थे पवितर करण आळी आत्मा गै द्वारा अर सच्च में आपगै बिस्वास गै सागै उद्धार पाओ। अर ईं उद्धार गै खातर झिकै सुब समाचार गो म्हे थानै उपदेस दियो हो बिंगै द्वारा परमेसर थानै बुलाया कै थे बी आपणै यीसू मसी गी मेमां नै धारण कर सको। ईंखातर हे भाईयो अर भेनों, मजबूत बणगे रेवो अर झिको उपदेस थे बचन अर खत गै द्वारा म्हारै ऊं सीख्यो है बिंगो पालण करता रेवो। आपणै प्रभु यीसू मसी आप ई अर आपणै पिता परमेसर आपां ऊं प्रेम राख्यो अर किरपा ऊं सांती अर आच्छी आसा दी है, थारै मना नै सांती देवै अर थानै हरेक आच्छै काम अर बचन में मजबूत राखै। आमीन। हे भाईयो अर भेनों, थे म्हारै खातर पराथना करो झिकै ऊं प्रभु गो बचन जल्दी ऊं फेल जावै अर सारी सरसटी आदर गै सागै स्वीकार करी जावै जिंया कै थारै बिचाळै होयो है। पराथना करो कै म्हे भटकेड़ा ऊं अर बुरै आदमिया ऊं दूर रेवां क्यूंकै सारा लोग तो प्रभु पर बिस्वास कोनी करै। पण प्रभु तो बिस्वास लाइक है बो थारी सकती बढावैगो अर थानै बुरा लोगां ऊं बचागे राखैगो। अर म्हानै प्रभु पर अर थारै पर भरोसो है कै झिकी आग्या म्हे थानै देवां बिनै थे मानो अर मानता बी रेवोगा। परमेसर गै प्रेम अर मसी गै धीरज नै समझण में अर म्हारै जीवन में परगट करण में प्रभु थारै मन गी अगुवाई करै। हे भाईयो अर भेनों, अब थानै आपणै प्रभु यीसू मसी गै अधिकार ऊं आग्या देवां बां भाई-भेनां ऊं न्यारा रेवो झिका हिस्यो जीवन बितावै कै झिको बांगै खातर सई कोनी अर झिकी सिक्सा म्हारै ऊं ली बिंगै अनुसार कोनी करै। मैं ईंखातर केऊं क्यूंकै थे तो आप ई जाणो हो कै थानै म्हारी तरियां चालणो चईयै क्यूंकै थारै बिचाळै रेगे म्हे बी आळसी कोनी बण्या। म्हे किंगैई कनूं अठै मुफ्त में रोटी कोनी खाई पण म्हे ओखो काम दिन-रात करता रेया कै थारै किंगैई उपर भार ना बणा। म्हानै थारी मदद लेण गो अधिकार कोनी हो इसी बात कोनी है, पण म्हे थारै सामणै एक नमुनो राखणो चावां झिकै ऊं थे समझ सको। ईंखातर म्हे जद थारै सागै हा म्हे थानै आ आग्या दी जे कोई काम ना करणो चावै तो बो रोटी बी ना खावै। अब म्हारै सुणण में आयो है कै थारै मू केई लोग आळसियां गो जीवन बितावै है। बे आप ई काम कोनी करै अर दूसरा गै काम में बी टांग अड़ावै है। म्हे हिस्यै लोगां नै प्रभु यीसू मसी गै अधिकार ऊं आ आग्या देवां अर बानै बिनती करां कै बे चुपचाप काम करता रेवै अर आपगी कमाई गी रोटी खावै। पण भाईयो अर भेनों थे भलाई करता हिम्मत ना हारियो। जे कोई ईं खत में बताएड़ी म्हारी बातां नै ना मानै तो बां पर ध्यान राखियो अर बां कानी ऊं रिस्तो तोड़ लेईयो झिकै ऊं बो आपगै चाल चलण ऊं सर्मिंदो हो'ज्यै। फेर बी थे बिंगै सागै दुसमण बरगो बरताव ना करियो पण बिनै भाई भेन गी तरियां समझा दैयो। सांती गो प्रभु यीसू मसी आप थानै हर टेम अर हर तरियां गी सांती देंवंतो रेवै। प्रभु यीसू मसी थारै सारां सागै होवै। मैं पौलुस आपगै हात ऊं ओ निमस्कार लिखण लागरयो हूं। आ मेरै सारा खतां गी पिछाण है। मैं इंयाई लिखूं। आपणै प्रभु यीसू मसी गी किरपा थारै सारा पर बणी रेवै। आमीन। मैं पौलुस, यीसू मसी गो खास चेलो हूं, क्यूंकै परमेसर झिको आपां नै मुकती देण आळो है अर यीसू मसी झिकी आपणी आस है, बाई मनै खास चेलो बणण गो हुक्म दियो हो। हे तीमुथियुस, ओ खत मैं थानै लिखण लागरयो हूं। आपां दोनूं एक ई प्रभु यीसू पर बिस्वास करण आळा हां। ईंखातर तूं मेरै बेटै जिस्यो है। मैं पराथना करूं हूं कै आपणो पिता परमेसर अर म्हारो यीसू मसी थानै किरपा अर दया अर सांती देंवंतो रेवै। जिंया मकिदुनिया परदेस में जांवता टेम मैं तनै इफिसुस सैहर में रेण गो केयो हो, मैं अब बी बोई हुक्म दुसर देण लागरयो हूं। क्यूंकै दूसरै बिस्वासी लोगां नै झूठी बातां सिखाण आळै लोगां नै थे हुक्म दैयो ओर झूठी बातां सीखणाळा नै रोक दैयो। अर बांगै मन में बणाएड़ी बातां अर पुरखां गै नामा गी लंबी सूची पर झिकी लड़ाई-झगड़ै नै बढावो देवै है ध्यान ना लगाण नै केवो। ऐ बातां परमेसर पर बिस्वास राखण आळा लोग अर बांगी मरजी गी तरियां चालण में मदद कोनी देवै है। ईं आग्या गो मतलब ओ है, लोग एक दूसरै गै सागै प्रेम भाव करै, झिको प्रेम साच्चै हिरदय ऊं आवै है, आच्छी सोच ऊं ओर बिना कपट गै बिस्वास ऊं पैदा होवै है। आं बातां ऊं कीं लोग दूर हो'ग्या अर बेमतलब गी बातां में लीन हो'ग्या है। बे नेम गा सिक्सक बणना चावै है, पण झिको कीं बे केवै है अर बां बातां पर बे भोत जोर लगावै है, बां बातां नै बे कोनी समझै। म्हे जाणा कै परमेसर गा नेम आच्छा है। जे म्हे सई तरिकै ऊं सिखावां। अर ओ बी जाणा कै परमेसर गो नेम धरमी लोगां खातर कोनी पण बां लोगां खातर है, झिका लोग परमेसर गै नेम नै तोड़ण आळा अर झिका परमेसर गै नेम गै सामै जाण आळा, अर झिका लोग परमेसर नै मानै कोनी अर ना आराधना करै है, अर झिका लोग माड़ा काम करै है अर परमेसर ऊं जुडे़ड़ा कोनी रेवै, अर झिका लोग मां बाप नै मारण आळा अर दूसरै लोगां नै मारण आळा है। लुगाईयां अर छोरियां गै सागै गळत काम करण आळा लोग अर झिका आदमी आपगै सागै रेण आळा आदमियां गै सागै गन्दा काम करै है अर झिका लोग आदमियां नै चुरावै है अर बानै गुलाम गै रूप में बेचै है अर झूठ बोलण आळा अर सोगन तोड़ण आळा अर हिस्यो ई ओर कामां गै खातर दियो है, झिका आच्छी सिक्सा गो सांमणो करै है। बा भोत आच्छी सिक्सा बिं सुब समाचार गै समान है झिकी परमेसर गी म्हानता नै बतावै है झिका लोग स्तुति करै है। परमेसर मनै जिमेदारी दी है कै मैं सुब समाचार गी बातां लोगां नै सिखाऊं। मैं आपणै प्रभु यीसू मसी गो धन्यवाद करूं हूं। बण मनै सुब समाचार गी बातां सुणाण गै लाइक बणायो है। बण मनै भरोसै गै लाइक समझगे आपगी सेवा करण खातर तैयार करयो है। मैं यीसू मसी में बिस्वास करण ऊं पेलां, बिंगी बेजती करण आळो अर यीसू मसी पर बिस्वास करण आळा नै दुख देण आळो अर लोगां नै नुक्सान करण आळो हो पण यीसू मसी मेरै पर आपगी दया करी है। क्यूंकै मैं बिं टेम यीसू मसी पर बिस्वास कोनी करै हो। ईंखातर ओ कोनी जाणै हो कै मैं के करण लागरयो हूं? अर प्रभु आपगी किरपा मनै भरपूरी ऊं दी कै मैं बिं पर बिस्वास करूं अर दूसरा ऊं प्रेम करूं। क्यूंकै यीसू मसी गै सागै मेरो मजबूत रिस्तो है। आ बात सच्च है अर हर तरियां ऊं मानण गै लाइक है कै यीसू मसी ईं संसार में पापियां गो उद्धार करण गै खातर आयो है। फेर मैं तो सारा पापियां ऊं बड़ो पापी हूं। पण मैं सारा पापियां ऊं जादा पाप करया है फेर बी परमेसर मेरै पर दया दिखाई कै लोगां नै ठा लागै कै बो बानै बिंयाई माफ करैगो जिंया बण मनै माफ करयो है। अर लोग बिं पर बिस्वास कर सकै अर अनन्त जीवन ले सकै। झिको सदां गै खातर राज करण आळो राजा है। बिं परमेसर गी जुग जुगान्तर तांई आदर अर स्तुति होंती रेवै। आमीन। हे मेरा बेटा तीमुथियुस, परमेसर गी बात बताण आळा गै बचनां गै अनुसार भोत पेलां ऊं ई तेरै बारै में झिकी परमेसर गी बातां करी है, मैं थानै आ आग्या देऊं हूं, जिंया एक फौजी युद्ध में जीतण खातर आच्छी लड़ाई लड़ै है बिंयाई तूं पूरी ताकत गै सागै गळत सिक्सा गै बिरोध में लड़ाई लड़। यीसू मसी गै बिस्वास में सदा ई बणयो रे अर बोई कर झिको सई है। पण केई लोग सच्चाई नै मानै कोनी अर बांगो बिस्वास डूबगे नास होण आळै जहाज गी तरियां हो जावै है। हुमिनयुस अर सिकन्दर आपगै बिस्वास नै नास कर दियो है। मैं आनै बिस्वासी मण्डली ऊं न्यारा राखूं कै बे परमेसर गी निन्दा करणी छोड़ सकै। ईंखातर तीमुथियुस, सारा ऊं पेलां मेरो खास कर'गे ओ निवेदन है कै सगळां गी जरूरत पूरी करण खातर परमेसर ऊं बिनती करै, अर दूसरा लोगां गै खातर पराथना करो अर परमेसर गो धन्यवाद करो झिको सगळां माणसां गै खातर करयो जावै। बिस्वासी लोगो थे सासकां गो अर सगळै अधिकारियां गो धन्यवाद पराथना करे करो कै आपां आराम ऊं सुरक्सित जीवन जी सकां अर परमेसर नै आदर दे सकां अर जिंया परमेसर चावै बिंया जीवन आपां जी सकां। ओ आपणै मुकतीदाता परमेसर नै खुस करण आळो है अर आच्छो बी है। परमेसर चावै है सगळा लोग आपगै पापां ऊं मुकत हो'ज्यै अर बिंगै सच्चै बचन नै सिखै। क्यूंकै परमेसर एक ई है अर माणस अर परमेसर गै बिचाळै मेल मिलाप करण आळो आदमी बी एक है, बो यीसू मसी ई है। बण सगळा लोगां गै छुटकारै गै खातर आपगी जान दे दी। ईं तरियां परमेसर सई टेम में ओ साबित करणो चावै कै बो लोगां नै मुकती देणो चावै है। अर ईं गवाई गो परचार करण गै खातर परमेसर मनै सुब समाचार बताण आळो एक परचारक अर खास चेलो चुण्यो है। मैं साची केण लागरयो हूं झूठ कोनी बण मनै गेर यहुदियां नै सिखाण खातर चुण्यो है कै लोग बिंगै साच्चै संदेस पर बिस्वास कर सकै। ईंखातर मेरी इच्छा है कै जद कदी बी थे लोग आराधना गै खातर भेळा होवो तो सगळा आदमी लोग परमेसर गी इच्छा गै अनुसार जीवन बितागे आपगै पवितर हातां नै उपर उठागे परमेसर ऊं पराथना करो अर ओ रीस अर झगड़ै ऊं ना करियो। ईं तरियां मैं चाऊं कै लुगाईयां आच्छी तरियां कपड़ा पेरगे सीदी सादी होवै अर मानण गै लाइक होवै, बानै आपगै बाळा नै सई ढंग ऊं बांदगे राखणा चईयै अर दूसरा नै दिखाण खातर बे मेंगा कपड़ा, मोती अर सोनै गा गेणा ना पेरणा चईयै। पण हिसी लुगाईयां नै झिकी अपणै आपनै परमेसर गी सेवा करण आळी समझै है। बांगै खातर सई ओ है कै बे दूसरा गै खातर आच्छा काम करै जिंऊं दूसरा नै मदद मिलै। जद आदमी परमेसर गो संदेस बिस्वासियां नै सिखांतो होवै तो जद हरेक लुगाई चुपचाप ऊं सुणै अर पूरी तरियां बानै आदर देणो चईयै। मैं ओ कोनी चाऊं कै कोई लुगाई बिस्वासी मण्डली में आदमी नै सिखावै अर पढ़ावै। बिं पर हुक्म चलावै पण बिनै चुपचाप रेणो चईयै। क्यूंकै परमेसर पेलां आदम नै बणायो, बिंगै बाद में हव्वा नै बणायी। सैतान आदमी नै कोनी भेकायो पण लुगाई नै भेका दी अर बा पाप में पड़गी। पण जद एक लुगाई बांगी जिमेदारी नै निभावै अर परमेसर पर बिस्वास करै अर दूसरा ऊं प्रेम करै अर परमेसर नै मानणै गै लाइक बणै अर बिंगै सागै पवितरता में बणी रेवै तो मुकती मिल जावैगी। झिको कोई बिस्वासी मण्डली गो मुखिया बणनो चावै बो सच्च में भोत ई आच्छो काम है। आ बात बिस्वास करण गै लाइक है। बिस्वासी मण्डली गै मुखिया गो जीवन हिस्यो होणो चईयै कै बो निरदोस, अर आपगी घराळी गै जींवता होयां दूसरो ब्या ना करण आळो होवै, अपणै आपनै बस में राखण आळो, समझदार, अर झिकै गो लोग आदर करता होवै, अर घरे आण आळां गो आदर मान करण आळो होवै अर आच्छी सिक्सा देण आळो होवै। बो पिय्याकड़ ना होणो चईयै अर मार पीट करण आळो बी ना होणो चईयै अर हर बात पर झगड़ो करण आळो ना होणो चईयै अर पीसा गो लाळची बी ना होणो चईयै अर बो मारण कुटण आळो ना होवै पण नरम सभाव गो होणो चईयै। बो आपगै परिवार गै लोगां नै आच्छी तरियां संभालण आळो होवै अर बाल बच्चा बिंगी बात नै मानता होवै अर बिंगो पूरो आदर करता होवै। जे कोई आपगै परिवार गो परबन्द करणो कोनी जाणै तो बो परमेसर गी बिस्वासी मण्डली गै लोगां गो बी परबन्द कोनी कर सकै। बो एक नुओ बिस्वासी ना होणो चईयै कठैई इंया ना होवै कै बो हंकार ऊं फूल ना जावै अर परमेसर सैतान नै हंकार गै कारण झिकी सजा दी। बा'ई सजा बिनै ना देवै। बिस्वासी मण्डली गै मुखिया नै यीसू मसी में बिस्वास ना करण आळा लोगां गै सागै आच्छो नाम होवै पण इंया ना होवै कठैई सरमिन्दा होगे सैतान गै हात में ना फसज्यै। बिंयाई बिस्वासी मण्डली गी सेवा में मदद करण आळो बी आदर मान गै लाइक होवै, पाखण्डी, पिय्याकड़, अर बेहक गी कमाई करण आळो ना होवै। पण बिस्वास गै बारै में झिको सच्चाई गो संदेस परमेसर परगट करयो है बिनै सुद्ध मन ऊं बिस्वास करणो चईयै। अर बिस्वासी मण्डली गी सेवा में मदद करण आळो होवै, बिनै पेलां परख्यो जावै जे बिमै कोई दोस ना निकळै तो बो बिस्वासी मण्डली गी सेवा में मदद करण आळो बणज्यै। ईं तरियां बिस्वासी मण्डली गी सेवा में मदद करण आळा गी लुगाईयां बी आदर मान गै लाइक होवै, चुगलखोर ना होवै पण अपणै आपनै बस में राखण आळी अर सारी बातां में बिस्वास गै लाइक होवै। बिस्वासी मण्डली गी सेवा में मदद करण आळो आपगी घराळी गै जींवंता होयां दूसरो ब्या ना करण आळो होवै अर बो आपगै बाल-बच्चा अर आपगै घर गो आच्छो परबन्द करण आळो होवै। क्यूंकै कोई बिस्वासी मण्डली गी सेवा में मदद करण आळो आच्छी सेवा करै है तो लोग बिंगो आदर मान करै अर यीसू मसी गै उपर झिको बिस्वास बण राख्यो बिं बिस्वास नै दूसरा नै बी बताण खातर बिंगी मोटी किमत मिलैगी। मैं ईं आसा गै सागै थानै आ बात लिखण लागरयो हूं कै जल्दी ई थारै कनै आऊंगा। जे मेरै आण में देर हो'ज्यै तो ईं खत ऊं तनै ठा हो'सी कै जींवंतै परमेसर गी बिस्वासी मण्डली में लोगां गो रेणो सेणो किसोक होणो चईयै। अठै गा सगळा बिस्वासी सुब समाचार गी सच्चाई गो खंबो अर नींव बरगा है अर जिंया खंबै अर नींव गै सहारै ऊं मकान नै ताकत मिलै है बिंयाई बिस्वासी मण्डली गा बिस्वासी लोग सच्चाई नै सहारो देवै है। म्हे झिको बिस्वास करां हां बिंगै डर ऊं सच्चाई भोत मोटी है। इमै कोई बी संका कोनी है। बा सच्चाई हिसी है कै, यीसू मसी माणस गै रूप में जन्म लेगे अर पवितर आत्मा बिनै धरमी ठरायो। सुरगदूतां बिनै देख्यो अर बिंगै बारै में चेलां गेर यहुदियां गै लोगां में परचार करयो हो। फेर संसार गा लोग बिं पर बिस्वास करयो अर परमेसर मोटै आदर गै सागै बिनै सुरग में ले लियो। पवितर आत्मा सई रूप में केवै है कै यीसू मसी गै दुसर आण ऊं पेलां कीं लोग भटकाण आळी झूठी आत्मा गै परचार अर बुरी आत्मां गी सिक्सा पर मन लगागे पक्कै बिस्वास ऊं भटक जावैगा। ऐ झूठा पाखण्डी सिक्सक है। आं लोगां नै सई अर गळत गै बारै में ठा कोनी। झूठी सिक्सा देण आळा लोग ब्या करण ऊं रोकैगा अर खाण गी कीं चिजां ना खाण खातर बी सिक्सा देवैगा। पण परमेसर पर बिस्वास करण आळा नै अर झिकी चिजां नै परमेसर ईंखातर बणाई है कै बिंगी सच्चाई नै जाणन आळा धन्यवाद देगे खा सकै है। क्यूंकै परमेसर गी सरसटी में हर चीज आच्छी है, ओर कोई चीज ना करण गै लाइक कोनी है। हर खाण आळी चीज नै धन्यवाद गै सागै खा सकै है। क्यूंकै परमेसर गै बचन में इंया लिख्यो है परमेसर झिको कीं बणायो बो आच्छो है। ईंखातर परमेसर गै बचन अर पराथना गै द्वारा बो पवितर हो जावै। हे तीमुथियुस, मैं थानै बोल्यो कै सारी बातां तूं भाईयां अर भेनां नै सिखावैगो तो यीसू मसी गो आच्छो सेवक ठेरैगो अर बिस्वास गी सच्चाई में अर झिको साची सिक्सा पर तूं चालतो आयो है बिं में थारो आत्मिक पालण पोसण होवैगो। झूठ अर बकवास क्हाणियां ऊं तूं अपणै आपनै दूर ई राखी। हिसी क्हाणियां परमेसर नै आदर देण गै खातर मदद कोनी करै है। अर परमेसर गी आग्या नै पालण कर'गे जीयो। क्यूंकै सरीर गी सादना ऊं तो आपां नै जद तांई मदद मिलै जद तांई आपां धरती पर रेवां। पण परमेसर गो आदर करण में आ'गै बदण ऊं तो अब अर आण आळै जीवन में बी मदद मिलैगी। आ बात साची अर हर तरियां ऊं मानण आळी है। क्यूंकै आपां मेनत ईंखातर करां कै आपणो भरोसो परमेसर गै उपर है। बो जींवंतो परमेसर है ओर सारां गो झिका बिं पर बिस्वास करै है बानै पापां ऊं मुकती देवै है। सारै बिस्वासियां नै आं बातां गी आग्या दैयो अर सिखावो। तेरी जवानी नै कोई माड़ी ना जाणै क्यूंकै तूं तकड़ो जवान है। पण तूं आपगी बातां में अर चाल चलण में अर प्रेम में अर बिस्वास अर पवितरता में बिस्वासियां गै खातर एक नमुनो बण जा। जद तांई मैं तेरै कनै आऊं जद तांई तूं बिस्वासी लोगां नै आराधना गै खातर भेळा होण गै टेम परमेसर गो बचन जोर ऊं पढ अर उपदेस देण में अर सिखाणै में अपणै आपनै लगाए राख। थे झिको वरदान परमेसर कनूं लियो है बिनै काम में ल्यो। ओ थानै परमेसर गै संदेस गै द्वारा दियो गेयो हो। ओ जद होयो जद बिस्वासी मण्डली गै अगुवा लोगां तेरै पर हात रख्यो हो। आं बातां नै सोचतो रे अर आं पर ध्यान लगाए राख। जिंऊं तेरै परचार करण गी अर सिखाण गै सामरथ गी बढोतरी सारै लोगां सांमणै परगट हो'ज्यैगी। आपगै जीवन अर उपदेस गो पूरो ध्यान राख। मेरी बताएड़ी बातां पर टिक्यो रे क्यूंकै इंया करतो रेवैगो तो तूं आप खातर अर आपणै सुणण आळा गै खातर बी मुकती गो कारण होवैगो। तीमुथियुस थारै ऊं जादा उंमर गै आदमी नै कठोरता ऊं ना समझावो पण बिनै पिता समझगे समझावो। अर थारै ऊं छोटा नै भाईयां बरगो समझगे समझावो। जादा उंमर गी लुगाईयां नै मां समझगे समझावो अर जवान लुगाईयां नै आपगी भेन समझगे सुद्ध मन गै सागै समझावो। बिं विधवा गो ध्यान राखो झिकी नै साची में मदद गी जरूरत है। पण जे कोई विधवा गै छोरो-छोरी अर पोती-पोता है तो बानै सारा ऊं पेलां आपगै धरम गै उपर बिस्वास करता होया आपगै परिवार गी देख-भाळ करणी सिखै। बे छोरा-छोरी अर पोती-पोता आपगै मां-बाप गै पालण-पोसण गो बदळो चुकावै क्यूंकै इंऊं परमेसर खुस होवै है। बा लुगाई झिकी साची में विधवा है अर बिंगो ध्यान राखण आळो कोई कोनी है अर परमेसर ई बिंगो सहारो है अर बा दिन-रात मदद गै खातर पराथना करती रेवै अर पराथना में लागी रेवै है। पण झिकी भोग विलास गै खातर जीयै, बा तो सरीर में जीयै पण आत्मा में मरेड़ी है। ईंखातर बिस्वासी लोगां नै आ बातां गी आग्या दे कै कोई बी बानै दोसी ना बणावै। पण जे कोई आपगै रिस्तै ऊं, खास कर'गे आपगै परिवार गै सदस्य गी मदद ना करै तो बो बिस्वास ऊं मुकरग्यो है अर झिको यीसू मसी में बिस्वास कोनी करै है बिंऊं बी जादा बुरो है। बिस्वासी मण्डली गी ओर ऊं मदद लेण गै लाइक विधवा गी सूची में सिरफ बां विधवा गा नाम लिखो झिकी साठ साल ऊं कम ना होवै अर आपगै पति गै सागै वफादार रेई होवै। बे हिसी होवै झिकी आपगै आच्छै कामां खातर जाणी जावै जिंया आपगै टाबरां नै पाळणा, घरे आण आळां गो आदर मान करणो, पवितर लोगां गा पग धोणा, दुखी लोगां गी मदद करणी, अर आच्छा कामां में लागी रेणो। पण जवान विधवा लुगाई नै ईं आच्छा कामा गी सूची में सामिल ना करो कै यीसू मसी गै सागै प्रेम में कम होगे सरीर गै सबंध गी इच्छा राखैगी अर बा ईंखातर फेर ब्या करणो चावैगी। अर दोसी बण जावैगी क्यूंकै यीसू मसी गै सागै पेलां वायदो करयो है बिनै तोड़ देवैगी। ईंखातर बानै आळस गी आदत पड़ज्यै है। बे एक घर ऊं दूसरै घर में घूंमती रेवै है अर बे आळसी हो'ज्यै अर बे बकवास करती रेवै अर दूसरै लोगां गै कामां में टांग अड़ांती रेवै। अर हिसी बातां बोलण लागज्यै कै बानै ना बोलणी चईयै। ईंखातर मैं चाऊं कै जवान विधवा ब्या कर लेवै अर टाबरां गो पालण पोसण कर'गे आपगै घर-बार गी देखभाळ करै कै कोई मसी गै बिरोधी नै बदनाम करण गो मोको ना मिलै। मैं आ ईंखातर बतांऊं केई विधवा भटकगे सैतान गै लारै चालण लागज्यै है। जे कोई बिस्वासी लुगाई गै घर में विधवा है तो बानै बिंगी मदद आप ई करणी चईयै अर बिस्वासी मण्डली पर कोई भार ना होवै अर बिस्वासी मण्डली साची विधवा गी मदद कर सकै। झिकी बिस्वासी मण्डली में अगुवा आच्छो परबन्द करता होवै अर खास कर'गे बे झिका बचन सुणाणै अर सिखाणै गो काम करै है, बे दो गुणा आदर मान गै लाइक समझया जावै। क्यूंकै पवितर सासतर में लिख्यो गेयो है कै बळद जद खेत में होवै तो बिंगो मूं ना बांधो क्यूंकै मजदूर नै आपगी मजदूरी लेण गो पूरो हक है। बिस्वासी मण्डली गै अगुवा पर लगाएड़ै दोस नै जद तांई कोनी सुणनो जद तांई बिंगा दो अर तीन साथी गवा ना होवै। झिकी बिस्वासी मण्डली गा अगुवा लोग पाप में लाग्या रेवै तो बानै सगळां गै सांमणै आच्छी तरियां समझावै कै दूसरा बाकी लोग बी अपणै आप ई समझज्यै। परमेसर अर यीसू मसी गी ओर ऊं परमेसर गै चुण्या होया सुरगदूतां गै सांमणै मैं सच्चाई गै सागै थानै उपदेस देऊं कै तूं मन खोलगे आं बातां नै मान्या कर अर कोई काम पक्सपात ऊं ना करे कर। बिना सोचे समझे किनैई बिस्वासी मण्डली गो अगुवा बणाण गै खातर बिं पर जल्दी हात ना रखी। किंगैई पापां गो भागिदार ना बणी अर अपणै आपनै सदां पवितर राखी। अर पाणी ई ना पींतो रेई पण आपगै हाजमै खातर अर बारी-बारी बीमार होण ऊं बचण खातर थोड़ो सो अंगूरां गो रस बी पी लिया कर। केई लोग पाप करै है अर परमेसर गै न्याय करण ऊं पेलां लोगां नै ठा लागज्यै कै बो पापी है, पण केई लोग लुकगे पाप करै है अर न्याय गै दिन तांई किनैई ठा कोनी होवै। ईं तरियां ईं भला काम बी सई रूप ऊं परगट हो'ज्यै है पर झिका परगट कोनी होवै बे बी लुकेड़ा कोनी रेवै। जिता दास थारै माऊं मालिकां गै नीचै गुलाम है, बानै आपगै मालिक नै आदर मान गै लाइक समझणो चईयै। कै परमेसर गै नाम अर म्हारै उपदेस गी निन्दा ना होवै। अर हिस्या दासा नै बी झिकां गो मालिक बिस्वासी है ईंखातर कै बे बांगा बिस्वासी भाई है। बांगो कम आदर कोनी करणो पण बानै तो आपगै मालिक गी जादा सेवा करणी चईयै क्यूंकै झिका नै इंगो लाभ मिलण लागरयो है, बो परमेसर गै उपर बिस्वास राखण आळो है, झिका नै परमेसर प्रेम करै। आं बातां नै सिखांवंतो रे अर आनै मानणै गी इच्छा करतो रे। जे कोई झूठी सिक्सा सिखावै है अर आपणै प्रभु यीसू मसी गै सच्चै बचन नै मानै कोनी अर लोगां नै परमेसर गी इच्छा गै अनुसार बरताव करण में मदद कोनी करै है। तो बो जादा घमण्ड करतो रेवै अर बो लोगां नै सिखावै है अर आप ई बिंगै बारै में कोनी जाणै अर बो केई सब्दां नै लेगे बेंस अर झगड़ा करण गी बुरी आदत में पड़ज्यै। आं बातां ऊं जळन अर लड़ाई झगड़ा करणा अर निंदा गी बातां अर दूसरा गै उपर झूठो बेम पैदा होवै है। अर हिस्यै लोगां नै भलै बुरै गी समझ कोनी है अर सच्चाई के है बे आ कोनी समझै है कै परमेसर गी सिक्सा सुणाण गै खातर म्हे भोत पीसो कमा सकां अर हिस्या लोगां गै बिचाळै सदां ई झगड़ो होंतो रेवै है। पण एक आदमी नै जितो मिलै है बो बितै में ई बो खुसी ऊं परमेसर गो आदर करण आळो जीवन जीयै। बा'ई बिंगै खातर एक मोटी कमाई है। क्यूंकै आपां ना तो संसार में कीं लेगे आया हा में अर ना ई कीं लेगे जा सकांगा। जे आपणै कनै खाण खातर रोटी अर पेरण खातर कपड़ा है तो आपां बिंऊं खुस हां। पण झिको धनी बणनो चावै है बे परीक्सा में पड़गे लाळच में फसज्यै है अर झिकी बुरी सोच अर नुक्सान करण आळी इच्छावां गै द्वारा कोई बी लाभ कोनी होवै। अर खुद ऊं नुक्सान ई होवै है बे आदमियां नै बिगाड़ दैय अर नास गै रास्तै में लेज्यै। क्यूंकै धन गो प्रेम हर तरियां गी बुराई नै जन्म देवै है। केई लोग आपगी इच्छावां गै कारण यीसू मसी गै उपर बिस्वास करणो छोड़गे अपणै आपनै भोत जादा दुख में लेज्यै। हे तीमुथियुस, तूं परमेसर गो आदमी है ईंखातर आं बातां ऊं दूर रे अर धारमिकता बणाण खातर पूरी तरियां ऊं कोसिस करे कर, अर परमेसर गो आदर करण आळो जीवन जी, यीसू मसी गै उपर बिस्वास राख अर सगळा ऊं प्रेम कर। धीरज अर कोमल बण। बिस्वास ऊं गिराण खातर थारै पर भोत दुख आवैगो। जद तूं कड़ी मेनत करी जिंऊं तूं पीछै ना जावै क्यूंकै बिं बिस्वास नै तूं भोत गवावां गै सांमणै मान लियो हो अर झिको अनन्त जीवन मिल्यो है बिनै गमा ना देई। क्यूंकै ईंखातर ई परमेसर तनै बुलायो है। परमेसर गै सांमणै झिको सगळा नै जीवन देवै है अर यीसू मसी गै सांमणै जिता पुन्तियुस पिलातुस गै सांमणै आपगै बारै में आच्छी गवाई दी है। बिनै साक्सी कर'गे मैं थानै आ आग्या देऊं कै, जद तांई आपणै प्रभु यीसू मसी गै पाछो आण तांई परमेसर गी सगळी आग्या नै आच्छी तरियां ऊं अर बिना दोस गै मानतो रेई। आपणो परमेसर झिको स्तुति गै लाइक है अर राजावां गो राजा है अर प्रभुवां गो प्रभु है। बण झिको टेम पक्को करयो है बिं टेम पर आपणै प्रभु यीसू मसी नै परगट करैगो। अर बोई परमेसर सदां गै वास्ते जींवंतो है अर बो जोती है अर झिकै नै कणैई कोनी देख्यो है अर देख बी कोनी सकै है। ईं संसार गै धनवानां नै आग्या दे कै बे घमण्डी ना होवै अर झिको धन बेगो ई खत्म हो'ज्यै बिं पर आसा ना राखै। परमेसर पर ई आपगी आसा राखै कै झिको आपां नै आनंद गै खातर सारो कीं देवै है। बानै आग्या दे कै बे आच्छा आच्छा काम करै। आच्छै काम ऊं ई धनी बणै। खुलै दिल ऊं दूसरा गै सागै आपगी चिजां बांटै। इंया कर कै झिको धन बानै सुरग में लेगे जावै, बिनै बे बठै भेळो करैगा। अर बो धन आण आळै दिनां गै खातर एक आच्छी नींव जिस्यो होवैगो। झिको असली जीवन है कै बिनै बो हासिल कर ल्यै। हे तीमुथियुस, झिको सच्चो बचन तनै दियो है बो लोगां नै सिखांतो रे झिकी सिक्सा परमेसर गै बिरोध में सिखावै है अर बाऊं दूर रे अर बेमतलब गी बातां ऊं बी दूर रे। केई लोग गळती ऊं सगळा नै ग्यान बोलै है। अर बिं पर बिस्वास कर'गे सच्चै बिस्वास ऊं दूर हो'ग्या। म्हान परमेसर गी किरपा गो हात सदां थारै सिर पर रेवै। आमीन। मैं पौलुस, यीसू मसी गो खास चेलो हूं, मनै परमेसर गी इच्छा ऊं चुण्यो है। झिका यीसू मसी गै उपर बिस्वास राखै है बानै जीवन देण गो वायदो परमेसर करयो है। इंगै बारै में बताण खातर परमेसर मनै भेज्यो है। हे तीमुथियुस, तूं मेरै बेटै बरगो है, मैं ओ खत लिखूं हूं। मैं पराथना करूं कै पिता परमेसर अर आपणो प्रभु यीसू मसी थानै किरपा अर दया अर सांती देंवंतो रेवै। दिन रात आपगी पराथना में सदां ई थानै याद करता होयां, मैं बिं परमेसर गो धन्यवाद करूं अर झिकै गी सेवा जिंया मेरै बाप दादा करी है बिंयाई सुद्ध मन ऊं करूं। तूं मेरै खातर भोत रोयो जद मैं तेरूं न्यारो होण लागरयो हो आ बात याद कर'गे तेरूं मिलण गी इच्छा करूं कै तेरूं मिलगे भोत खुस होज्यूं। मनै तेरो यीसू मसी गै उपर साच्चो बिस्वास बी याद है झिको पेलां तेरी नानी लोईस अर तेरी मां यूनीके में हो। मनै भरोसो है कै बोई बिस्वास तेरै में बी है। ईंखातर मैं तनै याद करूं कै परमेसर गै वरदान गी बिं जोती नै जगागे राख झिकी तनै मिली ही जद ई मैं तेरै पर आपगो हात रख्यो हो। क्यूंकै परमेसर झिकी आपां नै आत्मा दी है बा आपां नै कायर कोनी बणावै है अर आपां नै आपगी सकती अर प्रेम अर काबू में राखै। ईंखातर तूं आपणै प्रभु गै बारै में दूसरा नै बताण गै खातर सरमिन्दो ना होई, मैं प्रभु गै खातर जेळ में कर दियो गेयो हूं। ईंखातर मेरै ऊं मिलण खातर सरमिन्दो ना हो। पण तनै परमेसर झिकी सकती दी है बिमू सुब समाचार गै खातर मैं झिको दुख उठाण लागरयो हूं तूं बी बिमै ओ दुख उठा। परमेसर आपणो उद्धार करयो है अर एक पवितर जीवन जीण गै खातर आपां नै बुलाया है। पण ईंखातर कोनी कै आपां आच्छा काम करया है पण आपणै उपर किरपा कर'गे आपगै उदेस्य नै पूरो करण खातर आपां नै बुलाया है क्यूंकै संसार गी सरसटी ऊं पेलां ई बण आपगी किरपा दिखागे यीसू मसी गै द्वारै आपां नै देण गी योजना बणा दी ही। पण जद आपणो मुकतीदाता यीसू मसी संसार में आयो जद बण किरपा परगट करी, अर बण ई यीसू मसी मोत गी सकती नै खत्म कर दी अर जिता बिंगै सुब समाचार नै मान्यो है अर बानै परमेसर गै सागै सदां गै खातर जीवन बिताण गो मोको दियो है। ईं सुब समाचार नै फेलाण खातर मनै यीसू मसी गो सुब समाचार सुणाण आळै परचारक अर खास चेलै अर सिक्सक गै रूप में चुण्यो है। अर ओ ई कारण है झिकी बातां गो मैं दुख उठाण लागरयो हूं बिंऊं मैं सरमिन्दा कोनी क्यूंकै झिकै पर मैं बिस्वास करयो है मैं बिनै जाणूं हूं अर मैं ओ मानु हूं कै बण मनै झिको सुंपयो है बो बिंगी रक्सा करण में सामरथी है जद तांई यीसू मसी गै दुसर आण गो दिन ना आवै। झिकी सच्चाई गी सिक्सा मैं तनै सिखाई है बिनै पकड़े राख अर थे बी यीसू मसी गै उपर बिस्वास कर'गे अर सगळां गै सागै प्रेम कर'गे बांगी खरी सिक्सा नै दूसरा नै सिखांतो रे। आपणै मा वास करण आळी पवितर आत्मा गै द्वारा तूं बिं किमती सुब समाचार गी रुखाळी कर झिको तनै सुंपयो है। जिंया कै तूं जाणै है कै सगळा आसिया परदेस गा बिस्वासी लोग, मनै छोड़ग्या है। फुगिलुस अर हिरमुगिनेस बामू ई है। उनेसिफुरुस गै परिवार पर प्रभु किरपा करै। क्यूंकै बो मनै मिलण आयो अर जद मैं जेळ में हो जद मनै मिलण ऊं सरमायो कोनी। पण बो तो जद रोम सैहर में आयो हो, जद तांई मेरै ऊं मिल्यो कोनी, अर पूरै जत्न ऊं मनै ढूंढतो रेयो। प्रभु करै बिनै, यीसू मसी गै आण गै दिन प्रभु गी ओर ऊं दया मिलती रेवै, बण इफिसुस में मेरी केई तरियां गी झिकी सेवा करी है तूं बानै भोत आच्छी तरियां जाणै है। ईंखातर तूं झिको मेरै बेटै बरगो है, यीसू मसी में मिलण आळी किरपा गै द्वारा आत्मिक जीवन में बलवान हो'जा। अर झिकी बाता भोतसा गवा लोगां गै सामणै मेरूं सुणी। बे बाता बां बिस्वासी आदमिया नै सूंप दे झिका दूसरा नै सुणाण गै लायक है। अर यीसू मसी गै एक आच्छै सिपाई गी तरियां मेरै सागै दुख भोग। जद कोई सिपाई लड़ाई करण जावै है तो आपगै सेनापती नै खुस करै अपणै आपनै लड़ाई गै काम ऊं छोड़गे संसार गै दूसरै कामां में मन कोनी फसावै है। अर जद कोई आदमी दोड़ गै खेल में भाग लेवै तो बिनै जीत गो मुकुट बिं टेम तांई कोनी मिलै जद तांई बो खेल गै नेमा गो पालण करतो होयो ना खेलै। जादा ओखो काम करण आळै किसान नै ई फसल गो सगळा ऊं पेलो भाग मिलणो चईजै। झिको मैं केंऊं हूं बिं पर धयान दे अर प्रभु तनै सारी बातां गी समझ देवैगो। यीसू मसी नै याद राखो झिको मरेड़ा मू जी उठयो अर झिकै दाऊद गी पीढी में जन्म लियो है ओ ई बिं सुब समाचार गो मतलब है झिकै गो मैं उपदेस देऊं हूं। ईंखातर मैं इतो दुख सेऊं हूं अठै तांई कै मैं केदी बी हूं पण परमेसर गै बचन नै बताण ऊं कोई रोक कोनी सकै। ईं कारण झिकै लोगां नै परमेसर चुण्या है बां खातर मैं हरेक दुख झेलतो रेऊंगा क्यूंकै बे बी यीसू में मिलण आळी मुकती लेगे सदां खातर भोत आदर मिलण गी जिग्यां में जावै। ओ बचन बिस्वास गै लाइक है कै, जे आपां बिंगै सागै मरांगा तो बिंगै सागै जीयांगा बी; जे आपां यीसू मसी गै सागै दुख झेलता रेवांगा तो बिंगै सागै राज बी करांगा। जे आपां बिगों इनकार करांगा तो बो बी आपणो इनकार करैगो। जे आपां परमेसर गै सागै बिस्वास गै लाइक ना रेवां तो बी बो बिस्वास गै लाइक रेवैगो क्यूंकै बो आपगी बात बदळ कोनी सकै। बिस्वासी लोगां नै आं बातां नै याद करावंतो रे अर परमेसर नै गवा बणागे बानै सावचेत करतो रे कै बां बातां नै लेगे लड़ाई झगड़ा ना करै हिस्यै लड़ाई झगड़ा में कोई फायदो कोनी पण झिका आनै सुणै है बे बी गळत हो जावैगा। अपणै आपनै परमेसर गो मानगे अर लाइक बणगे एक हिस्यै दास गै रूप में पेस करण गो जत्न करतो रे झिका नै कीं बात ऊं सरमाणो ना पड़ै झिको परमेसर गै सच्चै बचन नै सई रूप में सिखांतो होवै। अर संसार गै बाद विवाद ऊं बच्यो रे क्यूंकै ऐ बातां लोगां नै परमेसर ऊं दूर करै है। हिस्यै लोगां गी सिक्सा खाज गी तरियां सरीर पर फेल ज्यै बिंयाई बा गळत सिक्सा लोगां में फेल ज्यै। बिं गळत सिक्सा देण आळा में हुमिनयुस अर फिलेतुस है। झिका सच्चाई ऊं भटकग्या है बांगो केणो है कै मरेड़ा गो जी उठणो हो'ग्यो है। अर किता बिस्वासी लोगां गै बिस्वास नै खतम कर दैय है। चायै कीं बी होवै झिका परमेसर गै उपर बिस्वास राखै है बे बिं मकान गी तकड़ी नींव गी तरियां टिकया रेवै है। बिं पर ऐ बातां लिखी है, “प्रभु आपगै भगता नै जाणै है” अर ओ बी लिखेड़ो है “बो हरेक झिको केवै है कै बो प्रभु गो है बिनै बुराईयां ऊं बचणो चईयै।” एक मोटै घर में सोनै चांदी गा ई भांडा कोनी होवै बिमै लकड़ी अर माटी गा भांडा बी होवै है कीं खास काम गै खातर होवै है अर कीं हळकै काम गै खातर। ईंखातर जे आदमी अपणै आपनै बुराईयां ऊं सुद्ध कर लेवै तो बो बिं खास भांडै गी तरियां काम में ल्यावै अर पवितर ठेरैगो झिको हरेक भलै काम खातर आपगै मालिक गै काम आवै है। हे तीमुथियुस, ईंखातर तूं जवानी गी बुरी इच्छा ऊं दूर रे अर सुद्ध मन ऊं परमेसर गी आराधना करण आळा गै सागै तूं परमेसर गी निगा में धारमिकता गो जीवन जी, बिस्वास गै लाइक बण अर दूसरा गै सागै प्रेम राख अर सच्चै साथियां गै सागै सांती ऊं रे। मूरखता अर बेकार गै झगड़ा ऊं सदां बचगे रे क्यूंकै तूं जाणै है कै लड़ाई झगड़ा ऊं बेर पैदा होवै है। अर प्रभु गै सेवक नै तो झगड़नो ई कोनी चईयै बिनै तो सारां गै सागै प्रेम भाव ऊं रेणो चईयै अर परमेसर गो बचन आच्छी तरियां सिखाण आळो होणो चईयै अर हर बात नै सेण आळो बी होणो चईयै। झिको थारी सिक्सा गै उपर बाद विवाद करै है बिनै बी हात जोड़गे ईं आसा ऊं समझावो कै परमेसर बिनै बी मन बदळण गी सकती देवै अर बिनै बी सच्चाई गो ग्यान होवै। अर बे सावचेत होगे सैतान गै बस ऊं छूट जावै झिका नै सैतान आपगी इच्छा ऊं चलाण खातर पकड़ राख्या है अर बे बी परमेसर गी इच्छा नै धारण कर सकै। हे तीमुथियुस, पण याद राख कै यीसू मसी गै दुबारै आण ऊं पेलां आं आखरी दिनां में आपणै पर भोत बुरो टेम आवैगो। अर लोग अपणै आपगै सागै प्रेम करसी अर पीसा गै लाळच में पड़ जावैगा बे आपगै बारै में घमण्ड करसी अर दूसरां ऊं अपणै आपनै न्यारा समझैगा अर दूसरां गी निंदा करसी बे आपगै माता पिता गी आग्या गो पालण कोनी करसी अर मदद करण आळा नै धन्यवाद कोनी करसी अर बे परमेसर गो आदर बी कोनी करैगा। बे लोग आपगै परिवार अर दूसरै लोगां गै सागै प्रेम कोनी करैगा अर दूसरा गी चुगली करसी अर दूसरा नै माफ कोनी करैगा बे लोग आपगी बुराई नै रोकण नै कामयाब कोनी होवैगा अर भोत पक्का लोग होवैगा बे लोग आच्छी बातां ऊं प्रेम कोनी करसी। अर बे बेलिया नै दुस्मण गै हात में दे देवैगा अर बिना सोचे समझे गन्दा काम करैगा अर बे लोग घमण्ड़ी होवैगा अर परमेसर ऊं जादा संसार गै सुख ऊं प्रेम करैगा। बे लोग परमेसर गी भगती गो भेस तो धारैगा पण बिंगी सकती नै कोनी मानैगा। तूं हिस्यै लोगां ऊं दूर'ई रेई। अर आमै ई केई लोग हिस्या बी होवै, झिका लोगां गै घरां में होळै होळै बड़गे पाप ऊं दबेड़ी अर हरेक तरियां गी अभिलासा में फसेड़ी लुगाईया नै आपगै बिस्वास में फसा ल्यै। बे लुगाईयां सदां नूंई सिक्सा तो सिखै है पण सच्चाई गै पूरै ग्यान तांई कदी कोनी पोंचै। भोत साल पेलां यनेस अर यमबरेस जिंया मूसा गो बिरोध करयो हो बिंयाई झूठा सिक्सक सच्ची सिक्सा गा बिरोधी है। आं लोगां गी बुद्धी भ्रस्ट है अर बे सदां यीसू मसी गी सच्ची सिक्सा में बिस्वास कोनी करै है। पण ऐ लोग जादा आ'गै कोनी बध सकै क्यूंकै जिंया यनेस अर यमबरेस गी मुरखता सांमणै आई ही बिंयाई आंगी मुरखता सांमणै आ जावैगी। पण तीमुथियुस, तूं आच्छी तरियां मेरी सीख गी पालण करी है। अर मेरै चाल चलण में मेरै जीवन गै उदेसय नै, मेरै बिस्वास नै, मेरै धीरज नै, मेरै प्रेम नै अर सारी मुसीबतां नै झिकी मैं सैई हूं तूं बानै जाणै है। तूं तो जाणै ई है अंताकिया, इकुनियुम अर लुस्तरा सैहर में लोगां मनै किती तकड़ी सजा दी झिकी मैं सैई, पण यीसू मसी मेरै बां दुखां अर पीड़ा में मेरै सागै हो, बां सारां ऊं मनै बचायो। पण झिका लोग यीसू मसी में बिस्वास कर'गे परमेसर गै आदर करण आळै जीवन नै जीणो चावैगा। बे जादा सताईजैगा। पण दुस्ट अर पाखंडी लोग आपगी बुराई आप ई करता रेवैगा अर दूसरा नै बी बुराई करण में आ'गै बधांता जावैगा अर दूसरा नै धोखो देवैगा अर आप ई धोखो खावैगा। पण तीमुथियुस तूं झिकी बातां नै म्हारै सागै सीखी है अर बिस्वास करयो है बां बातां नै सिखांतो जा। तूं जाणै ई है कै ऐ बातां कण सिखाई ही। पण तनै ठा है कै तूं छोटै थकां ई बचन नै जाणै हो ओ पवितर बचन तनै मदद करै है कै झिका यीसू मसी पर बिस्वास राखै है बे परमेसर गै द्वारा छुटकारो पासी। परमेसर गै बचन नै लिखण आळा परमेसर गै द्वारा आया हा। बचन लोगां गै मन में चानणो करयो, ओ पवितर बचन लोगां नै सच्चाई गी सिक्सा देवै है अर बानै सुधारण में मदद करै है अर बानै दरसण देवै है कै बां के गळत करयो है? ओ बचन पवितर जीवन जीण गी सिक्सा गै खातर लाभकारी है। पण झिका परमेसर गै सागै रिस्तो राखै है बे आच्छा काम करण खातर सामरथी अर तैयार रेवै। हे तीमुथियुस, परमेसर अर यीसू मसी मेरो गवा है, यीसू मसी लोगां गै उपर राज करण खातर आवैगो अर जींवंता अर मरेड़ा गो न्याय कर'गे बिंगै सांमणै मैं तनै आग्या देगे केऊं कै, तूं सुब समाचार गो परचार कर। चायै तनै सुविधा मिलै या ना मिलै, आपगै काम खातर तैयार रे। लोगां नै के करणो चईयै सारी तरियां गी सेण सीलता सागै बानै समझा। जद बे कोई गळत करै बानै चेता दे। लोगां नै धीरज गै सागै समझागे होंसलो दे। मैं आ ईंखातर बताण लागरयो हूं कै एक टेम हिस्यो आवैगो जद लोग खरयो संदेस सुणनो कोनी चावैगा पण झिकी बांगी इच्छा है बे बिंयाई करैगा अर आपगै खातर भिसी बातां भोत सुणैगा झिकी बे सुणनी चावै है। झिको खरयो उपदेस है बिनै ना सुणगे मन घड़ंत बातां पर ध्यान देण लागज्यैगा। पण तूं हर दुख सुख में अपणै आपनै काबू में राख, दुख उठा अर परमेसर झिकी सेवा तनै दी है बिनै पूरी कर। जठै तांई मेरी बात है तो मेरो जीवन परमेसर खातर बलिदान करण गो टेम आ'ग्यो है अर ईं जीवन ऊं बिदा होण गो बी टेम आ'ग्यो है। एक युद्ध में भाग लेण आळै फौजी गी तरियां मैं परमेसर गी सेवा पूरी हिम्मत गै सागै कर चुक्यो हूं अर झिको काम परमेसर मेरै हात में दियो है बिनै मैं पूरो कर दियो है अर मैं बिस्वास गी रुखाळी बी करी है। अब मेरै खातर एक ई उडीक है। बा आ है कै मैं धरमी जीवन बिताऊं, ईंखातर सुरग में मेरै खातर एक इनाम रखेड़ो है। बो धारमिक जीवन जीण आळै नै दियो जावैगो। बिं दिन न्याय करता प्रभु मनै जीत गो मुकुट पेरावैगो बो मनै ई कोनी, पण सगळा नै झिका प्रेम गै सागै बिंगै दुबारै आण गी उडीक करता रेवैगा। हे तीमुथियुस, मेरै कनै जल्दी आण गी कोसिस कर। क्यूंकै ईं संसार गै मोह में पड़गे देमास मनै छोड़ दियो है अर बो थिस्सलुनिकि सैहर में चल्यो गेयो है। क्रेसकेंस गलातियो नै अर तीतुस दलमातिया नै उड़ग्यो है। एकलो लूका मेरै कनै सेवा में है। मरकुस गै कनै जा अर जद तूं आवै बिनै आपगै सागै ले आई जिंऊं मेरै काम में मेरी मदद करै है। तुखिकुस नै मैं इफिसुस भेज दियो है। जद तूं आवै तो बिं पेरण आळै बागै नै आवंतो लीयाई, झिको मैं त्रोवास में करपुस गै घर में भूलग्यो हो अर खास कर'गे मेरै चमड़ै गै पतड़ा नै जरूर लीयाई झिकै पर मेरो कीं लिखेड़ो है। लोह गो काम करण आळै सिकन्दर मेरो भोत नुक्सान करयो है। बण जिंया करयो है प्रभु बिनै बिस्यो ई फळ दियो है। तूं बी बिंऊं चोकस रे क्यूंकै बण यीसू मसी गै सुब समाचार गो भोत बिरोध करयो है। जद रोमी सैहर गी कचेरी में मनै पेस करयो हो बिं टेम मनै बचाण खातर कणैई कीं गवाई कोनी दी। मैं पराथना करूं हूं कै परमेसर बानै माफ करै। मेरै पक्स में तो प्रभु खड़या होगे मनै सांती दी है कै मेरै द्वारा सुब समाचार गो भरपूर परचार हो सकै झिकै नै सगळा गेर यहुदी सुण सकै। सेर गै मूं ऊं बचायो जिंया मसी मनै पक्को मरण ऊं बचायो। अर प्रभु मनै हर एक बुरै काम ऊं छुड़ावैगो अर मनै आपगै सुरग गै राज में सई सलामत लेगे जावैगो अर बिंगी ई स्तुति आपां नै सदां ई करणी चईयै। प्रिसकिल्ला, अक्विला अर उनेसिफुरुस गै परिवार नै निमस्कार केणो है। इरास्तुस कुरिन्थुस में ठेरग्यो है। मैं तरफिमुस नै बिंगी बीमारी गै कारण मिलेतुस में छोड़ आयो हूं। सर्दी ऊं पेलां आण गो जत्न करी। यूबुलुस, पूदेंस, लिनुस अर क्लोदिया अर सारां भाईयां थानै निमस्कार केयो है। प्रभु यीसू मसी तेरै सागै रेवै। थारै सगळां पर प्रभु गी किरपा होंती रेवै। आमीन। मैं पौलुस, परमेसर गो दास हूं अर यीसू मसी मनै खास चेलो चुणगे भेज्यो है। तीतुस, ओ खत मैं तनै लिखण लागरयो हूं। अर परमेसर चावै कै मैं बिंगै चुणेड़ै लोगां गो बिस्वास मजबूत करूं। अर बानै सच्चाई गै बारै में सिखाऊं कै बे सच्चाई नै जाणगे परमेसर गी इच्छा गै हिसाब ऊं आपगो जीवन जीयै। आपणै बिस्वास अर सच्चाई गी आस आ ई है कै परमेसर आपां नै अनन्त जीवन देण गो वायदो आदि काल में करयो हो। बो वायदो अटल है अर सगळा नै ध्यान है कै परमेसर कदी बी झूठ कोनी बोलै। अर परमेसर आपगै बांदेड़ै टेम पर ईं सच्चाई गो संदेस आपगै लोगां तांई पुगायो अर ओ संदेस सुणाण गी जिमेदारी मनै सोंपी है। हे तीतुस, आपां दोनूं एक ई प्रभु, यीसू पर बिस्वास करण आळा हां। ईंखातर तूं मनै आपगै सागी बेटै बरगो लागै। पिता परमेसर अर आपणै मुकतीदाता यीसू मसी गै कानी ऊं तेरै पर किरपा होवै अर सांती मिलती रेवै। हे तीतुस, मैं तनै ईंखातर करेते टापू में छोड़गे आयो कै झिको काम बिचाळै रेग्यो बिनै तूं पूरो करै। मैं जिंया तनै बतायो बिंयाई तूं हरेक नगर गी बिस्वासी मण्डली में जा'गे अगुवा नै चुणगे नियुक्त करी। झिका निरदोस होवै अर बांगै किंगैई एक ऊं जादा घराळी ना होणी चईयै। बांगा टाबर बी प्रभु गै बिस्वास में पक्का होवै अर बे बदमासी करण आळा ना होवै पण सभाव गा आच्छा अर आग्या मानण आळा होवै। क्यूंकै मुखिया नै बिस्वासी मण्डली संभालण गी जिमेदारी दी है ईंखातर बे निरदोस होणा चईयै अर बे जिदी, क्रोधी, पिय्याकड़, झगड़ालु अर बेहक गी कमाई करण आळा ना होवै। पण बे आपगै घरे आण आळा गो आदर-मान करण आळा, अर सारां गी भलाई करण आळा होवै अर समझदार, इमानदार, पवितर अर अपणै आपनै बस में राखण आळा होवै। आपां झिकी सच्ची सिक्स्या यीसू मसी गै बारै में दी है बिं पर बे मजबूत बिस्वास करण आळा होणा चईयै। जिंऊं बे खरी सिक्स्या देगे लोगां गै बिस्वास नै मजबूत कर सकै। अर झूठा उपदेस देण आळा नै गळत साबित कर'गे बांगो मूं बंद कर सकै। क्यूंकै भोतसा लोग हिस्या है झिका खरी सिक्स्या मानै कोनी अर गळत सिक्स्या देगे लोगां नै धोखो देवै। आमै खास कर'गे जादा बे लोग है झिका ऐ सिखावै है कै सारा मसी खतनै गी यहुदी रीति रिवाज नै मानणो चईयै। अर ऐ लोग नीच कमाई करण खातर लोगां नै गळत सिक्स्या दे देगे घर गा घर बिगाड़न लागरया है। हिस्या लोगां गो मूं बंद करवाणो चईयै। बां लोगां गै बारै में भोत पेलां करेते टापू गै एक ग्यानी आदमी केयो, “अठै गा घणकरा सा लोग सदां ऊं झूठा है अर ऐ खतरनाक जानवरां गी तरियां अर आळसी पेटू होवै।” मैं तनै बतांऊं कै बिं ग्यानी आदमी गी बात साची है ईंखातर बांनै सखताई ऊं बताये कर कै यहुदी लोगां गी मनघंड़त क्हाणियां पर अर झिका सच्चै बचन नै मानै कोनी अर झिका सच्चै बचन ऊं भटक जावै। बांगी सिक्सया पर मन ना लगावै। पण बे आपगै मुकतीदाता गै बिस्वास में मजबूत होगे खड़या रे सकै। झिका लोग सुद्ध है बां खातर सारी चिजां सुद्ध है। अर झिका यीसू मसी पर बिस्वास कोनी करै बां खातर सारी चिजां असुद्ध है क्यूंकै बांगी बुद्धी अर मन बुराईयां ऊं खराब होएड़ी है। हिस्या लोग केवै कै म्हारो रिस्तो परमेसर सागै आच्छो है पण बांगै काम ऊं लागै कै बांगो कोई रिस्तो कोनी। क्यूंकै बानै कोई पसन्द कोनी करै अर परमेसर गी आग्या नै मानै कोनी अर बे कोई आच्छै काम गै लाइक बी कोनी। पण हे तीतुस, तूं भिसी झूठी सिक्सया देण आळा बरगो ना बणी। पण तूं बिस्वासी मण्डली गै लोगां नै खरी सिक्सया देंतो रे'ई। अर बुडै लोगां नै सिखा कै बे चोकस अर आदर मान गै लाइक अर समझदार बणै। अर बागों बिस्वास, प्रेम अर धीरज पक्को होणो चईयै। ईं तरियां ई बुडी लुगाईयां नै सिखा कै बे आपगो चाल-चलण पवितर राखै अर चुगलखोर अर पिय्याकड़ ना होवै। पण बे दूसरा नै आच्छी बातां सिखाण आळी होवै। अर बे जवान लुगाईयां नै समझांती रेवै कै आपगै पति अर टाबरां ऊं प्रेम राखै। अर बे समझदार, पवितर अर भली होवै अर पति गी आग्या मानण आळी अर घर-परिवार नै आच्छी तरियां संभालण आळी बणै। जिंऊं परमेसर गै बचन गी कोई निंदा ना कर सकै। इंयाई तूं जवान आदमियां नै सिखाये कर कै बे समझदार बणै। हे तीतुस, तूं अपणै आपनै भलै कामां गो नमुनो बणा। अर तूं झिको सिखावै बो बिना कपट, सुणगे मानण गै लाइक अर खरो होणो चईयै। जिंऊं कोई बी तेरी बात नै गळत ना बता सकै। क्यूंकै आपणै बिरोदियां नै आपणी बात नै गळत साबित करण गो मोको ना मिलैगो तो बे आपी सरम ऊं झूकज्यैगा। नोकर लोगां नै समझा कै बे आपगै मालिक गी आग्या में रेवै अर बानै सारी बातां में खुस राखै। अर उथळगे जबाब ना देवै। अर बे कीं बी तरियां गी चोरी चलाकी ना करै अर हरेक तरियां ऊं मालिक गै भरोसै आळा होवै। जिंऊं हरेक बातां में आपणै चाल चलण ऊं दूसरै लोगां गै सांमणै आपगै मुकतीदाता परमेसर गै बचन गी सोभा बढा सकै। क्यूंकै परमेसर गी किरपा सारी मिनख जाती गो उद्धार करण खातर परगट होयी है। अर आ किरपा आपां नै ओ ई चेतावै कै आपणै जीवन में संसारिक लालसा अर माड़ा काम छोडगे अर आपगो मन बस में राखगे भगती अर धारमिक जीवन जीणो चईयै। अर आपां आपणै मुकतीदाता परमेसर यीसू मसी नै मेमा गै सागै धरती पर आण गी मोटी आस लेगे अडिकता रेंवां। झिकै आपणै खातर अपणै आपनै करूस पर बलिदान कर दियो कै आपां पाप ऊं मुकत होज्यां अर बिंगी रजा में चालण आळा खास लोग बणगे भला-भला काम करण में सदां तैयार रेंवां। हे बेटा, ऐ बातां तूं पूरै हक ऊं बता, सिखा अर समझा जिंऊं सगळा लोग तेरो आदर-मान करता रेवै। लोगां नै सुद्धी करा कै बे अफसरां गै अधीन में रेगे बांगी आग्या मानता रेवै अर हरेक भलो काम करण खातर हरदम तैयार रेवै। अर किंगी बदनामी ना करै अर झगड़ालु ना होवै पण बे सारै लोगां सामै छोटा बणगे कोमल, हसमुख, नरम सभाव गा बण्या रेवै। क्यूंकै आपां नै यीसू मसी पर बिस्वास करण ऊं पेलां सच्चै परमेसर गी समझ कोनी ही अर आपां धोखै में रेंता हा। अर हरेक तरियां गी लालसा अर मोह-माया गा गुलाम होगे बेमां में पड़ेड़ा हा। अर बेर-भाव, ईरस्या, एक दूसरै ऊं आपस में घिरणा करता हा। पण जद आपणै मुकतीदाता परमेसर गी किरपा ऊं प्रेम यीसू मसी गै रूप में लोगां गै बिचाळै आयो। तो बण आपणो उद्धार करयो। पण आपां नै ठा है आपणो उद्धार आपणै धारमिक कामां ऊं कोनी होयो पण परमेसर आपणै पर दया कर'गे पवितर आत्मा ऊं आपणा सारा पाप धो दिया अर आपां नै एक नूंओ जन्म अर जीवन दियो है। आ पवितर आत्मा परमेसर आपगी दया ऊं आपणै मुकतीदाता यीसू मसी गै द्वारा आपां नै जादा ऊं जादा दी है। झिकी ऊं परमेसर आपणै पर किरपा कर'गे आपां नै निरदोस बणाया अर अनन्त जीवन गा वारिस बणण गी आस दी है। ऐ सगळी बातां साची है अर लोगां खातर भली अर लाभदायक है। ईंखातर मैं चाऊं कै तूं ऐ बातां लोगां नै जोर देगे सिखा। जिंऊं झिका लोग परमेसर पर बिस्वास करयो है बे भला-भला काम करण में आपगो ध्यान देंता रेवै। पण तूं मुर्खता अर खानदान गी बडाई गी बातां गै बाद विवाद ऊं दूर'ई रेई। अर यहुदी लोगां गै नेम-विधान गै झगडै़ अर कीं बी तरियां गै बिरोध में ना पड़ी। क्यूंकै ऐ सगळी बातां बेमतलब अर कोई काम गी कोनी। जे कोई फूट घालण आळो आदमी बिस्वासी मण्डली में फूट घालै तो बिनै एक-दो बारी ध्यान ऊं समझाई पण बो फेर ई ना सुधरै तो तूं बी आपगो टेम ना खराब करी। अर बिस्वासी लोगां पर बिंगो कोई असर ना पड़ण देई। तनै ओ ठा है कै हिस्या आदमी सच्चै रा ऊं भटकग्या अर पाप कर'गे अपणै आपनै दोसी बणावंता रेवै। जद मैं तेरै कनै भाई अरतिमास, भाई तुखिकुस माऊं एक नै भेजूंगा जद तेरै कनै पूग जावै तो तूं मेरै कनै निकुपुलिस सैहर में आण गी पूरी कोसिस करी। क्यूंकै मैं बी बठै जा'गे स्याळै में रेण गो पक्को सूंआज करयो है। अर सुण। जेनास बकील अर अपुल्लोस नै कोसिस कर'गे आ'गै गी यातरा में बांगी मदद करियो अर ध्यान राखियो आनै कोई बी चीज गी कमी-घटी ना रेण देईयो। अर आपणै बिस्वासी लोगां नै बी सिखा कै आपगी जरूरतां पूरी करण खातर आच्छै-आच्छै कामां में लाग्या रेवै। जिंऊं बांगै आच्छै कामा अर जीवन ऊं दूसरै लोगां नै ई फायदो मिलै। मेरै अर मेरै सगळा साथियां कानी ऊं तनै अर करेते टापू में रेण आळै सारै बिस्वासी भेन-भाईयां नै निमस्कार। म्हान परमेसर गी किरपा गो हात सदां ई थारै सिर पर रेवै। आमीन। प्यारा भाई फिलेमोन, मेरी ओर ऊं निमस्कार। यीसू मसी गै सुब समाचार सुणाण गै कारण जेळ में पड़यो पौलुस अर आपणै भाई तीमुथियुस गी ओर ऊं आपणै प्यारै साथी अर बिंगै सागै रेण आळा अर थारै खातर ओ खत लिखण लागरयो है। आपणी बिस्वासी भेन अफफिया अर आपणै सागै एक सिपाई गी तरियां सुब समाचार सुणाण आळो अरखिपुस अर थारै घर में भेळी होण आळी बिस्वासी मण्डली खातर ओ खत लिखण लागरयो हूं। आपणै परम पिता परमेसर अर प्रभु यीसू मसी गी ओर ऊं थानै किरपा अर सांती मिलती रेवै। आमीन। मेरी पराथना में थानै याद करता टेम मैं सदां ई आपणै परमेसर गो धन्यवाद करूं हूं। क्यूंकै परमेसर गै लोगां गै सागै थारो प्रेम अर यीसू मसी में थारै बिस्वास गै बारै में मैं लोगां ऊं सुणतो रेऊं हूं। मेरी पराथना है कै थानै आपणै बिचाळै दिखायड़ै बिस्वास ऊं सारी आच्छी चिजां गो ग्यान हो जावै झिकी मसी गै मकसद नै आगै बढ़ाण में मदद करण लागरी है। हे भाई, तेरी कोसिस ऊं परमेसर गा लोग तरो ताजा हो'ग्या, ईंखातर तेरै प्रेम ऊं मनै भोत खुसी मिली है। ईंखातर कै मसी में मनै थारी जिमेदारी गै खातर आग्या देण गो अधिकार है। पण मैं प्रेम ऊं थानै बिनती करूं हूं कै मैं पौलुस झिको अब बुढो हो'ग्यो अर मसी यीसू गै खातर अब केदी बणेड़ो हूं। मैं उनेसिमुस झिको मेरै बेटै बरगो है बिंगै खातर बिनती करूं। जद मैं जेळ में केदी होणता टेम, बिंगो धरम गो पिता बणयो हो। पेलां बो तेरै कीं काम गो कोनी हो, पण अब तेरै अर मेरै भोत काम गो है। मैं बिनै फेर तेरै कनै भेजूं हूं। मैं बिनै आपगै दिल ऊं प्रेम करूं हूं। मैं बिनै अठै आपगै ई कनै राखणो चाऊं हूं क्यूंकै बो तेरी ओर ऊं मेरी सेवा कर सकै क्यूंकै सुब समाचार गै कारण मैं केदी बणयो। पण तेरी मरजी गै बिना मैं कीं कोनी करणो चायो, क्यूंकै तेरो कोई आच्छो काम किंगैई दबाब ऊं कोनी पण तेरी मरजी ऊं ई होवै। बिनै थोड़ै टेम गै खातर तेरै ऊं दूर करण गो कारण हो सकै है कै जिंऊं फेर सदां गै खातर बो तेरै कनै रेवै। अब ई थे बिनै एक दास गै रूप में कोनी पण सेवक ऊं जादा एक भाई गै तरियां राखियो। मैं बिंऊं भोत प्रेम करूं पण तूं बिनै ओर बोळो प्रेम करी। आदमी गै रूप में कोनी पण प्रभु में एक भाई गै समान। जे तूं मनै साझेदार गै रूप में समझै तो बिनै बी मेरै तरियां ई समझ। अर जे बण तेरो कीं बुरो करयो है तो अर तेरो कीं देणो है तो मैं दे देऊंगा। मैं पौलुस, खुद आपगै हातां ऊं ओ लिखण लागरयो हूं, बिंगो करजो मैं देऊंगा पण याद राख, तेरो जीवन अजे तांई मेरो अभारी है, क्यूंकै मैं थानै यीसू मसी गै बिस्वास में लेगे आयो। हे भाई, मनै तेरै ऊं इंगो फायदो लेण खातर मदद कर अर मनै एक साथी बिस्वासी गै तरियां तरो ताजा कर। तेरै पर बिस्वास करता मैं ओ खत तनै लिखण लागरयो हूं। मैं जाणू हूं कै थानै मैं जितो केऊं, तूं बिंऊं बोळो करैगो। अर मैं एक बात ओर केऊं कै मेरै रुकण खातर तेरै घर में जिग्या तैयार कर क्यूंकै मनै बिस्वास है कै थारी पराथना गो उतर परमेसर देवैगो अर मनै थारूं मिलण गो मोको देसी। इपफ्रास झिको यीसू मसी में मेरो साथी जेळ में है, तनै निमस्कार देवै है। मेरै सागै सेवा करण आळा मरकुस, अरिस्तरखुस, देमास अर लूका बी थानै निमस्कार देवै है। थारै सारां पर प्रभु यीसू मसी गी किरपा बणी रेवै। आमीन। परमेसर पुराणै युग में आपणै बडेरा ऊं न्यारी न्यारी तरियां अर न्यारै न्यारै टेम में बांगी बात बोलण आळां गै द्वारा ऊं बात करी ही। पण अब आखरी दिनां गै टेम में आपगै बेटै गै द्वारा आपणूं बाता करी है। झिकै नै बण सारी धरती आसमान पर वारिस ठेरायो है अर झिकै गै द्वारा बण आनै बणाया है। ओ बिं परमेसर गी मेमा गो प्रकास अर बांगै गुणा गो रूप है। अर बोई ईं संसार गी चिजां नै आपगी ताकत गै बचन ऊं संभाळै है अर अब बो पापां नै मिटागे परमेसर गी दाहिणी ओर बेठयो है। अर बानै सुरगदूतां ऊं ऊंचो पद मिलेड़ो है। क्यूंकै झिको नाम बानै परमेसर गो वारिस होण में मिल्यो है बो नाम बां सुरगदूतां गै नाम ऊं भोत म्हान है। क्यूंकै परमेसर कदी कोई सुरगदूत नै कोनी केयो कै, “तूं मेरो बेटो है अर आज मैं तेरो पिता हूं,” अर ना ओ केयो है “मैं तेरो पिता होऊंगा, अर तूं मेरो बेटो कुहावैगो।” अर जद बो आपगै इकलोतै बेटै नै ईं संसार में भेजै जद बो सारै सुरगदूतां नै केवै कै, “सारा इनै झुकगे निमस्कार करो।” अर बो सुरगदूतां गै बारै में केवै है कै, “बो आपगै सुरगदूतां नै पून अर सेवका नै धधकती आग बरगा बणा देवै है।” पण आपगै बेटै गै बारै में केवै है कै, हे परमेसर थारो सिंहासन जुगा जुगा तांई बण्यो रेवै अर तेरो राज न्याय गै सागै होवंतो रेवै। तूं सच्चाई गी पक्स लेगे बुराई गी निन्दा करी है। ईंखातर कै, “हे परमेसर,” तेरै परमेसर तेरै लोगां ऊं चुण्यो है अर आदर पाण गो महा आनंद तनै दियो है। परमेसर ओ बी केवै है “हे प्रभु तूं सरू में धरती गी नींव राखी अर आकास बी तेरै हात गी कारिगरी है। ऐ तो एक दिन खत्म हो'ज्यैगा पण तूं सदां खातर अमर रेवैगो अर बे कपडै़ गी तरियां एक दिन पुराणा हो'ज्यैगा। अर तूं बानै चादर गी तरियां सांवट ल्यैगो अर बे पुराणै कपड़ै गी तरियां बदळीजैगा। पण थे बोई हो अर तेरै टेम गो अंत कदी कोनी होवैगो।” अर बण सुरगदूतां मू कदी किनैई कोनी केयो है, “तूं मेरै दाहिणै बेठ, जद तांई मैं तेरै दुसमणा नै तेरै पगां नीचै ना कर दैयूं।” सुरगदूतां बां लोगां गी देखभाल करण आळी आत्मा है झिका आण आळै टेम में मुकती पावैगा। ईंखातर आपां नै हमेसा चोकस रेणो है अर आपणो मन हमेसा बांगी बातां पर राखणो है। अर कठैई इंया ना होवै कै आपां बांगी बातां ऊं भटक ज्यावां। क्यूंकै झिकी बातां सुरगदूतां गै द्वारा कैएड़ी बे पक्की रेयी ही। अर बिं टेम हरेक आदमी नै बिंगै गुनाह अर आग्या ना मानण गै बदळै में सजा मिली ही। तो आपां लोग बिं मुकती गी बात ऊं बेफिकर होगे बिंगै दण्ड ऊं किंया बचांगा झिकी बात गी चरचा प्रभु पेलां ई कर चुकयो है अर झिकै लोगां बिंगी बातां नै सुणी, बां आं बातां नै सई साबित करी ही। अर आंगै सागै सागै परमेसर आपगी इच्छा ऊं चमत्कार, निसान अर हरेक तरियां गा सामरथ बांटणै गै द्वारा ईं बात गी गवाई देवंतो रेयो है। परमेसर आण आळै बिं राज नै सुरगदूतां गै बस में कोनी करयो है झिकै गी आपां बात करण लागरया हां। पण पवितर सासतर में कणैई आदमी परमेसर नै पूछयो है कै, “आदमी के है, कै थे बिंगी सुधी लेवो हो के? या मिनख गो बेटो के है कै थे बिं पर इतो ध्यान राखो हो?” तूं तो सिरफ थोड़ै ई टेम खातर सुरगदूतां गी बराबरी में बिंगो पद कम करयो हो अर बिनै आदर अर मेमा गो राज मुकुट पिहरायो हो अर आपगै करेड़ा कामा पर हक बी दियो है। तूं संसार गो सारो कीं बिंगै हक में कर दियो है बण हिसी कोई चीज कोनी छोडी झिकी बिंगै बस में ना होवै। पण इंया होवंता बी, सारो कीं बिंगै बस में कोनी दिखै है। पण आपां बी यीसू नै देखां झिकै नै थोड़ै टेम खातर सुरगदूतां गी बराबरी में कम करीज्यो कै बो परमेसर खातर बलिदान हो'ज्यै। अर बिनै ईं मोत गै दुख गै कारण ई मेमा अर आदर गो मुकुट मिलेड़ो है। कै परमेसर गी किरपा ऊं हर एक माणस खातर मोत गो दुख झेलै। क्यूंकै झिकै परमेसर सारो कीं बणायो है अर झिकै खातर सारो कीं है, बिनै ओ ई आच्छो लाग्यो कै यीसू भोतसा लोगां नै बिंगी मेमा में पोंचावै। जिंऊं बे मुकती देण आळै यीसू नै दुख भोगण गै कारण सिद्ध करै। क्यूंकै पवितर करण आळो यीसू अर पवितर करीजण आळा लोग बी एक ई पिता गी उळाद है। ईंखातर बो बानै भाई केण में कोनी सरमावैगो। बिंगो केयेड़ो है कै, “मैं तेरो नाम आपगै भाईयां नै सुणाऊंगा अर बांगै बिचाळै तेरो भजन गाऊंगा।” अर यीसू ओ बी केयो, “मैं परमेसर पर पूरो भरोसो राखूंगा झिकै आपगा टाबर मनै सूंपया है।” बे सारा हाड मांस गा बणेड़ा है अर बो बी बांगै बरगो बणग्यो कै आपगै बलिदान ऊं बिं सैतान नै कमजोर कर सकै झिकै नै मोत देण गी ताकत है। अर जिता लोग मोत गै डर गी गुलामी में जीवै बानै बी गुलामी ऊं छुड़ा ल्यै। पण आ बात तो पक्की है कै बो सुरगदूतां ऊं ज्यादा अब्रहाम गी पीढी गै लोगां गो ध्यान राखै है। ईंखातर बिनै ईं संसार में मिनख बरगो बणाणो जरूरी है अर परमेसर गी बाता गै अनुसार बो सारै लोगां सागै एक दयालु अर बिस्वास लायक महा याजक बण्यो। जिंऊं बो लोगां गै पापां गो बलिदान दे सकै। अर बो बां लोगां गी बी मदद कर सकै झिका गी परख होवै है क्यूंकै बण आप बी परख गै टेम भोत दुख भोग्यो है। तो हे मेरा भाईयो अर भेनों, थे झिका परमेसर गै सुरगीय बुलाहट में भागी हो। थे बिं खास चेलै अर महा याजक यीसू गी बाता पर ध्यान राखो झिकै पर बिस्वास करयो है। जिंया मूसा परमेसर गै लोगां में बिस्वास लायक रेयो हो बिंयाई यीसू बी परमेसर कानी बिस्वास लायक रेयो है। परमेसर मूसा ऊं ज्यादा यीसू नै मेमा में मोटो मान्यो हो। जिंया एक मकान बणाण आळै मिस्तरी नै मकान ऊं मोटो मानिजै है। क्यूंकै हरेक मकान नै बणाण आळो कोई नै कोई होवै है पण हरेक चीज नै बणाण आळो परमेसर ई है। बिं टेम में मूसा परमेसर गै सारै लोगां खातर एक दास गी तरियां बिस्वास लायक रेयो हो। कै झिकी बातां आण आळै टेम में होवैगो बांगी गवाई दे सकै। पण मसी तो बिंगै बेटै गी तरियां है झिको बिंगै घर गो वारिस है। बिंगो घर, आपां बिस्वासी लोग हां। ईंखातर आपां नै अंत गै टेम तांई हिम्मत अर पक्की आसा गै घमण्ड पर मजबूत रेणो है। ईंखातर आज, पवितर आत्मा आई चावै कै जे थे बिंगी बात सुणो। तो आपगो मन कठोर ना करियो जिंया पुराणै टेम में इसराएली लोगां बन उजाड़ में परख गै दिनां में बिंगो बिरोध करयो हो। जठै थारै बडेरा, मेरै म्हान कामा नै चालीस साल तांई देखता रेया। पण फेर बी बां मेरी परख करी। ईं कारण मनै बां लोगां पर रीस आई ही। अर जद मैं केयो, आंगो मन हमेसा भटकतो रेयो अर ऐ मेरै बताएड़ै रा पर कोनी चाल्या। जद मैं आ सोगन खाई कै ऐ लोग कदी मेरी आराम आळी जिग्यां में कोनी बड़ सकैगा। ईंखातर हे मेरा भाईयो अर भेनों, थे चोकस रेईयो। कठैई इंया ना होवै कै थारो मन बी बां तरियां बुरो अर अबिस्वासी हो'ज्यै। जिंऊं थे जींवंतै परमेसर ऊं दूर होज्यो। पण बिं दिन तांई झिकै नै आज गो दिन केयो जावै है, थे सारा लोग मिलगे हरेक दिन एक दूसरै नै होंसलो देवंता रेवो। जिंऊं थारै मू कोई बी पाप गै भहकावै में आ'गे कठोर ना हो'ज्यै। क्यूंकै आपां मसी गै सागै सेहभागी होयड़ा हां। ईंखातर आपां नै आपणै बिस्वास सागै आखरी टेम तांई पक्को रेणो है। जिंया पवितर सासतर में लिखेड़ो है कै, जे थे आज बिंगी आवाज सुणन लागरया हो तो आपगो मन कठोर ना कर लेईयो। जिंया बां इसराएली लोगां रीस गै टेम करयो हो। अब बताओ, के ऐ लोग बे कोनी हा, झिका परमेसर गी बात सुणगे रीस करी ही? के ऐ लोग बे कोनी हा झिका मूसा गै द्वारा मिस्र देस गी गुलामी ऊं छुड़ाया हा? अर बो चाळीस साल तांई किसयै लोगां ऊं रुसेड़ो रेयो। ए बे ई कोनी हा के झिका पाप करयो हो? अर बांगी ल्हास बन उजाड़ में पड़ी रेयी। अर बण किस्य लोगां खातर सोगन खायी है कै थे मेरी आराम आळी जिग्यां में कोनी बड़ सकोगा। सिरफ बां लोगां खातर ई झिका बिंगी आग्या कोनी मानी ही। इंऊं आपां देख सकां कै बे लोग बिंगी आग्या ना मानण गी बजह ऊं आराम आळी जिग्यां में कोनी बड़ सक्या। परमेसर गो बिं आराम आळै दिन गो वायदो आज बी कायम है। ईंखातर आपां चोकस रेणो है कै आपां बिं जिग्यां में जाण ऊं चूक ना ज्यावां। क्यूंकै आपां नै बी बिंयाई सुब समाचार सुणायेड़ो है जिंया बां लोगां नै सुणायो हो। पण बां लोगां ईं पर बिस्वास कोनी करयो। ईंखातर बानै इंगो लाभ कोनी मिल्यो है। पण अब देखो, आपां बिस्वास सागै बिंगी आराम आळी जिग्यां में आया हां पण झिका बिस्वास कोनी करयो, बानै परमेसर रीस में आ'गे केयो, ऐ लोग मेरी आराम आळी जिग्यां में कोनी बड़ सकैगा। भलैई बे काम धरती बणांवता टेम परमेसर गा तैयार करेड़ा हा। क्यूंकै पवितर सासतर में आ बात लिखेड़ी है। परमेसर छ: दिना में सारो काम पूरो कर'गे सातवैं दिन आराम करयो हो। अर बाई बात फेर केयी, ऐ मेरी आराम आळी जिग्यां में बड़ कोनी सकैगा। आ बात तो पक्की है कै बिं आराम आळी जिग्यां गो बारनो खुलो है। पण बठै बे लोग कोनी जा सक्या, झिका बिंगी बात पर बिस्वास कोनी करयो हो। ईंखातर परमेसर एक खास दिन ओर चुण्यो झिको है “आज गो दिन।” ईं दिन गै बारै में परमेसर भोत टेम बाद राजा दाऊद गै मूं ऊं फेर जिकर करयो कै, “जे थे बिंगी बात सुणो तो, मन कठोर ना कर लेईयो।” अर जे बां लोगां नै यहोसु आराम आळी जिग्यां में बाड़ देवंतो तो फेर बी दूसरै दिन गी चरचा कोनी होवंती। ईंखातर थे ओ जाणल्यो कै परमेसर गै लोगां खातर आराम आळो दिन बणेड़ो है। क्यूंकै झिको बिंगी आराम आळी जिग्यां में जावै तो बो परमेसर गी तरियां आपगै छ: दिना गै कामा नै पूरो कर'गे आराम पावै है। तो आपां नै बी, बिं जिग्यां में जाण खातर कोसिस करणी है, कठैई इंया ना होवै कै इसराएली लोगां गी तरियां आपणै मू बी कोई बिंगी आग्या तोड़गे लारै रेज्यै। क्यूंकै परमेसर गो बचन प्रबल अर दो धारी तलवार ऊं बी चोखो है अर बो जीव अर आत्मा नै अर गांठ गांठ अर गुदै नै न्यारा कर'गे आर पार छेद दैय। अर आपणै मन गी भावनावां अर विचारां गी जांच पड़ताल करै है। संसार गी कोई बी चीज बिंऊं लुकेड़ी कोनी है। अर हिस्यो कोई जीव कोनी झिको बिंगी नजर ऊं ओलै है। बिंगी नजर हरेक चीज पर है अर एक दिन आपां नै बांगो लेखो देणो पड़सी। ईंखातर जद आपणो महा याजक परमेसर गो बेटो यीसू सुरग में दाखिल हो'ग्यो है तो आपां बी आपणै बिस्वास गै सागै मजबूत बणया रेवां। आपणो महा याजक हिस्यो कोनी है, झिको आपणी परेसानिया में आपणै सागै ना रेवै। पण बो तो हरेक बाता में आपणी तरियां परखिजेड़ो है। पण फेर बी बो बेगुना ई निकळ्यो। ईंखातर आज्यो, आपां बिंगी किरपा गै सिंहासन कनै हिम्मत ऊं पोंचा जिंऊं आपां नै जरूरत गै टेम मदद मिल सकै। हरेक महा याजक मिनखां मू चुणीजै है अर बो बांगी बां बातां खातर चुणीजै झिकी परमेसर ऊं मेळ राखै है। बो भेंट अर बांगै गुनावां खातर पाप बली चढाये करै। अर ओ अग्यानी अर परमेसर गै रा ऊं भटकेड़ै लोगां सागै नरमी ऊं बरताव कर सकै। क्यूंकै एक महा याजक गै खुद ऊं बी कोई ना कोई गळती होवै है। ईंखातर बिनै लोगां गै गुनावा गी पाप बली सागै आप खातर बी चढाणी पड़ै है। ओ महा याजक गो पद, खुद कोई आदमी कोनी ले सकै। क्यूंकै हरेक, महा याजक हारून गी तरियां परमेसर गी ओर ऊं चुणीजै है। इंया यीसू मसी बी ओ पद आपी कोनी लियो है। पण परमेसर बिनै चुणगे केयो कै “तू मेरो बेटो है, अर मैं तेरो पिता हूं।” अर इयां बी दूसरी जिग्यां में केवै कै, “तू मलकिसिदक गी तरियां हमेसा खातर एक याजक है।” यीसू जद ईं संसार में हो तो बण आपगी मोत गी सजा नै टाळन खातर, परमेसर ऊं रो रोगे अर गिड़गिड़ागे पराथना करी ही अर बिंगी भगती गै कारण बिंगी सुणी बी ही। यीसू इतो दुख भोग भोगगे बी, आपगै पिता परमेसर गी आग्या मानणी सीखी ही। अर सिद्ध बणगे आपगै आग्या मानण आळै लोगां खातर अर हमेसा खातर मुकतीदाता बणग्यो। अर परमेसर गी ओर ऊं बिनै मलकिसिदक गी तरियां महा याजक गो पद मिलग्यो। इंगै बारै में केण खातर म्हारै कनै भोत सी बातां है। पण इंगो बखान करणो ओखो है क्यूंकै थे आज कल कम सुणन लागग्या। टेम देखता तो थे अब नै गुरूजी बण ज्याणो, पण थानै देखण ऊं लागै कै थानै एक हिस्यै मिनख गी लोड़ है, झिको थानै परमेसर गी सरू आळी बाता दुसर ऊं सिखावै। थे तो दूध पीण आळै टाबरां बरगा हो, झिका नै रोटी गी जिग्यां पीण नै दूध चईयै। क्यूंकै दूध पीण आळो टाबर परमेसर गी भगती गी बाता नै कोनी समझ सकै। पण रोटी मोटै मिनखा खातर है झिका आपगै सयाण पण ऊं आच्छै माड़े नै जाणन लागग्या है। ईंखातर मसी गी लारली बातां नै बारी बारी कोनी दोहराणी। जिंया मोत कानी ले जाण आळै कामा खातर मन बदळणो, परमेसर में बिस्वास करणो, बतिस्मै गी सीख, सिर पर हात रखणो, मरगे पाछो जीणो अर झिकी आण आळै न्याय बरगी बातां है। पण आपां आं बातां नै छोड सिद्धता कानी बढता चालणो है। अर जे परमेसर चायो तो आपां इंयाई करांगा। क्यूंकै झिका परमेसर गी एकर सच्चाई नै जाण ली अर झिका सुरग गै वरदान गो आनंद ले चुक्या है अर झिका पवितर आत्मा गै सागै भेळा हो'ग्या है। अर झिका परमेसर गै उतम बचन गा अर आण आळै सामरथी जुग गो आनंद चाखण गै बाद बी जे बे बिं रा ऊं भटकग्या है तो बानै पाछा पछतावै गै रा पर ल्याणो भोत मुसकिल है। क्यूंकै बे लोग परमेसर गै बेटै नै आप खातर करूस पर चढावै अर परगट रूप में बिं पर कलंक लगावै है। ऐ लोग बिं माड़ी जमीन बरगा है झिकी बारी बारी मेह गो पाणी सोखगे कांटा अर ऊंटकटारा उगावै है। आ बेकार अर सरापित होण आळी है। अर ईं पर आखिर में आग ई लगाईजैगी। पण आदी जमीन बे लोग है झिकी पर आच्छी फसल होवै है। क्यूंकै परमेसर ऊं आसिरबाद पायेड़ी होवै। हे प्यारा भाईयो अर भेनों, चायै म्हे थारै खातर इंया बोलण लागरया हा, पण म्हानै थारै पर भोत ज्यादा बिस्वास है कै थे आच्छी अर मुकती आळी बातां पर बिस्वास करो हो। क्यूंकै परमेसर अन्यायी कोनी कै बो थारै कामा अर थारी मेनत गो फळ ना दैय। झिकी थे बिंगै पवितर लोगां गी सेवा करण में करी ही। अर अजे तांई करण बी लागरया हो। अर म्हे ओ ई चावां कै थारै मू हरेक जणो आखिर तांई पूरी आसा गै सागै आई कोसिस करता रेवो। जिंऊं थे आळसी ना बण सको। अर थे बांगै बतायेड़ै रा पर चालता रेवो। झिका बिस्वास अर धीरजाई ऊं बिं वायदै गा वारिस होवै है। जद परमेसर अबरहाम ऊं वायदो करयो बिं टेम बिनै खुद ऊं मोटो ओर कोई कोनी लाग्यो। जद बण खुद गी सोगन खा'गे केयो कै, मैं तनै सच्च में आसिस दैयूंगा। अर तेरी पीढी नै बधावंतो रेऊंगा। अर इंया अबरहाम धीरज गै सागै उडीक करतो रेयो। अर बाद में बिनै बिं वायदै गो फळ मिल्यो। मिनख हमेसा आप ऊं मोटै गी सोगन खावै है। अर बांगै हरेक झगडै़ गो फेंसलो बी सोगन ऊं हो'ज्यै है। परमेसर इनै बां लोगां खातर पूरी तरियां ऊं पक्की करणी चावै है झिका नै बण चुणना हा अर झिका नै आसिस देण गो वायदो करयो कै बो आपगै ईं वायदै ऊं कदी कोनी मुकरै गो। ईंखातर बण आपगै बचन सागै आपगी सोगन जोड़ दी। तो अठै दो बात है एक तो बिंगी सोगन अर दूसरो बिंगो वायदो। आं दोना ऊं कदी कोनी बदळैगो अर ना'ई बो कदी झूठ बोलै है। आपां ईंखातर बिंगी सरण ली है कै आपणो होंसलो मजबूती ऊं बढ ज्यै जिंऊं आपां बिं आसा तांई पोंच ज्यावां। बा आसा आपणै जीवन खातर पाणी गै जहाज गै लंगर गी तरियां है झिकी आपां नै कदी डोलण कोनी दैय। अर बा आपां नै पड़दै माखर परमेसर तांई पोंचावै है। जठै यीसू मलकिसिदक गी तरियां हमेसा खातर महा याजक बणगे आपणै खातर अगुवै गै रूप में दाखिल हो'ग्यो है। ओ मलकिसिदक सालेम सैहर गो राजा अर परम प्रधान परमेसर गो याजक हो। जद अबरहाम राजावां नै हरागे पाछो आवै है जद बो मलकिसिदक इनै मिल्यो। अर इनै आसिरबाद दियो। अर जद अबरहाम इनै युद्ध में जीतेड़ी सारी चिजां गो दसवों हिसो दियो। मलकिसिदक गै नाम गो मतलब है धर्म गो राजा अर सालेम मतलब सांती गो राजा। इंगी पीढी गै बारै में किनैई आज तांई ठा कोनी कै इंगा मा बाप कुण है अर इंगो कद जन्म होयो अर कद मोत होयी ही। पण ओ आज हमेसा खातर परमेसर गै बेटै गी तरियां एक अमर याजक है। अब ईं बात पर ध्यान दैयो कै मलकिसिदक कितो म्हान है। झिकै नै सारी पीढियां गो मालिक अबरहाम आपगै लुटेड़ै माल गो दसवों हिसो दियो है। देखो, नेम विधान गै अनुसार झिको लेवी गी पीढी ऊं याजक बणै है बानै आग्या दी कै बो आपगै लोगां कनूं दसमांस ल्यै चायै, ऐ लोग अबरहाम गी पीढी गा बी है। पण मलकिसिदक लेवी गी पीढी गो कोनी हो। तो बी बण अबरहाम ऊं दसमांस लियो अर बिनै आसिरबाद दियो झिकै गै कनै परमेसर गो वायदो है। ईं बात में कोई सक कोनी कै हमेसा छोटो ई मोटै ऊं आसिरबाद ल्यै है। अठै तो नासवान मिनख दसमांस ल्यै। पण बठै बो मलकिसिदक केवै झिकै गै बारै में पवितर सासतर में लिखेड़ो है कै बो सदां खातर जींवंतो है। तो आपां के सकां कै लेवी झिको दसमांस लेवै, बो दसमांस पेलां बण अबरहाम गै द्वारा ऊं मलकिसिदक नै दियो है। क्यूंकै जद मलकिसिदक लेवी गै पिता ऊं मिल्यो हो बिं टेम लेवी गो जन्म कोनी होयड़ो हो। बो अबरहाम गै परिवार में भोत सालां बाद जन्मयो हो। जे लेवी गी पीढी ऊं बणन आळै याजक पद ऊं सिद्धी मिल जावंती (झिका गै द्वारा ऊं लोगां नै नेम विधान मिल्यो) तो फेर मलकिसिदक गी रीति पर दूसरो याजक बणन गी के लोड़ ही? अर बो हारून याजक गी रीति गो ना कुहावै। क्यूंकै जद याजक गो पद बदळीज्यै बिं टेम नेम विधान गो बदळणो जरूरी होवै है। ईंखातर याजक गै बारै में आ बात केईजै कै बो दूसरी पीढी गो है। अर बिं पीढी गो कोई बी आदमी बेदी पर सेवा करण आळो कोनी बण्यो। तो ईं बात ऊं साफ है कै आपणो प्रभु यहूदा गी पीढी ऊं जन्मयो है अर मूसा ईं पीढी गै याजका गै बारै में पवितर सासतर में कठैई कोई बखान कोनी करयो हो। तो आ बात ओर बी ज्यादा साफ हो'ज्यै कै मलकिसिदक गी तरियां एक दूसरो याजक बी पैदा होण आळो है। झिको पीढी गै रीति रिवाज ऊं कोनी बण्यो है। ईं बात ऊं आपणो दावो ओर बी पक्को हो'ज्यै है। क्यूंकै इंगै बारै में गवाई देयेड़ी है कै तूं मलकिसिदक गी तरियां अमर याजक रेवैगो। पेलै पुराणै नेम विधान ऊं मुकती कोनी मिल सकै ईंखातर बिनै खत्म कर दियो हो क्यूंकै बो कमजोर हो'ग्यो हो। बिं नेम विधान में किनैई सिद्ध कोनी बतायेड़ो हो पण अब आपणै कनै एक उतम आसा है झिकी गै द्वारा ऊं आपां परमेसर कनै जा सकां। क्यूंकै आ बात पक्की है कै परमेसर मसी नै सोगन गै द्वारा ई याजक बणायो है। पण बे लोग बिना सोगन गै बणेड़ा हा। परमेसर बिनै चुणता टेम सोगन खाई ही झिकी गै बारै में पवितर सासतर में लिखेड़ो है कै बो आपगी जुबान ऊं कदी कोनी बदळै अर तूं मलकिसिदक गी तरियां सदां अमर याजक रेवैगो। ईं सोगन गै कारण ई यीसू आपणै खातर एक ओर आच्छै वायदै गो जामन बणग्यो है। एक तो पेलां याजक होवंता झिका आपगी याजक गी सेवा जींवंतै जी करता हा। एक यीसू अब है झिको सदां खातर अमर याजक है। इंया इंगो पद सदां खातर अटल है। झिका लोग बिंगै द्वारा ऊं परमेसर गी सरण में आवै बानै बो मुकती देण में ताकत्वर है क्यूंकै बो बांगै खातर परमेसर ऊं बिनती करण खातर अमर है। हिस्यो ई महा याजक आपणै खातर जरूरी हो। झिको पवितर अर बिना पाप गै अर निरमल अर पापियां ऊं न्यारो करेड़ो अर सुरग ऊं बी ऊंचो करेड़ो होवै। ईं महा याजक मसी नै दूसरै याजकां गी तरियां हरेक दिन आप अर लोगां खातर बली चढाण गी लोड़ कोनी पड़ै है क्यूंकै ओ रिवाज बण खुद बलिदान होगे खत्म कर दियो है। क्यूंकै नेम विधान तो कमजोर मिनखां नै महा याजक बणावै है। पण परमेसर बा सोगन नेम विधान गै बाद में खाई ही। अर बिंगै द्वारा ई आपगै बेटै यीसू मसी नै महा याजक बणायो झिको हमेसा खातर सिद्ध है। ऐ झिकी बातां आपां करण लागरया हां, आमै सारा ऊं मोटी बात आ है कै आपणो हिस्यो महा याजक है झिको सुरग में परम पिता परमेसर गी दाहिणी ओर बेठयो है। बो बठै पवितर अर सच्चै तंबु में सेवा करै है झिकै नै कणई मिनखा कोनी बणायो पण प्रभु ई बणायो है। क्यूंकै धरती पर महा याजक नै ईंखातर चुणीजै कै बो आप खातर अर लोगां खातर भेंट अर बलिदान चढावै। ईंखातर ओ जरूरी हो कै बो बी बठै कीं चढावै। जे बो अजे तांई धरती पर होवंतो तो याजक कोनी बण सकतो क्यूंकै नेम विधान गी रीति ऊं भेंट चढाण आळा लोग ईं धरती पर है। ऐ लोग बे याजक है झिका सुरग गी चीज गै नमूनै गी सेवा करै है क्यूंकै जद मूसा ईं धरती पर परमेसर खातर तंबु बणाण पर हो बिं टेम परमेसर बिनै केयो कै तूं तंबु बणावंता टेम ध्यान राखी कै झिको नमुनो मैं तनै पहाड़ पर दिखायो, सारी चिजां बिं बरगी होणी चईयै। पण झिकी सेवा यीसू नै मिलेड़ी ही बा आंगी सेवा ऊं भोत ज्यादा उतम ही। क्यूंकै झिकै वायदै गै बिचाळै बो ओर बी उतम वायदै गै सहारै बांदेड़ो हो। क्यूंकै जे पुराणो वायदो सिद्ध होवंतो तो आज बिंगै नुअ वायदै गी लोड़ कोनी पड़ती। पण परमेसर बां लोगां में दोस देख्यो हो तो केयो, देखो, बो दिन आण आळो है जद मैं इसराएल गै अर यहूदा गै लोगां सागै एक नुओ वायदो करूंगा। मेरो ओ वायदो, बिं वायदै बरगो ना हो'सी झिको मैं पुराणै जमानै में बांगै बड़ेरा सागै करयो हो। अर बानै मिस्र देस गी गुलामी ऊं छुड़ाया हा। पण बे लोग मेरै वायदै पर कोनी रेया हा। ईंखातर अब मैं बानै याद कोनी राख्या। अर बां ओ बी केयो कै, झिको वायदो में इसराएल गी पीढी ऊं करूंगा बो ओ है कै मैं आपगो नेम विधान बानै सुणागे बांगै हिड़दैय पर लिखूंगा, बे मेरा लोग कुहावैगा अर मैं बांगो परमेसर ठेरूंगा। बिं टेम बानै एक दूसरै नै ओ केण गी लोड़ कोनी पड़ैगी कै तूं परमेसर पर बिस्वास कर। क्यूंकै बिं टेम छोटा मोटा सारा मनै जाण ल्यैगा। क्यूंकै मैं बांगै पापां नै माफ कर'गे बांगा पाप भूल ज्यूंगा। परमेसर ईं नुअ वायदै गै कारण ई बिं पुराणै नेम विधान नै बंद कर दैय है क्यूंकै झिकी चीज पुराणी अर कमजोर हो'ज्यै, बा एक दिन खत्म हो'ज्यै है। पुराणै जमानै में आदमी गी बणायेड़ी पवितर जिग्यां होवंती ही। अर लोग पुराणी रीति रिवाज ऊं आराधना बी करता हा। मतलब एक तंबु बणेड़ो होवंतो झिकै गै बिचाळै पड़दो लगागे दो भाग करेड़ा हा। पेलै भाग में दीवटी, मेज अर भेंट चढायेड़ी रोटी रखेड़ी होवंती ही। इनै पवितर जिग्यां केवंता हा। अर दूसरै हिसै नै परम पवितर जिग्यां केवंता। इमै सोनै गी धूपदाणी, सोनै गो बणेड़ो संदूक अर ईं संदूक में मन्ना ऊं भरेड़ो सोनै गो बरतन, हारून गी छड़ी झिकी पर फूल उगेड़ा हा अर परमेसर गी आग्या लिखेड़ी पथर गी पटिया रखेड़ी ही। अर बिं संदूक पर प्रकास मान दो करूब प्राणी बणेड़ा हा। झिका आपगी पांख्या ऊं बिं पाप माफ करण गी जिग्यां नै ढक राखी ही। पण अब आ सारी चिजां गै बारै में न्यारो न्यारो बताणो मुसकिल है। जद ऐ चिजां रीति अनुसार तैयार होज्यै ही। जद याजक तंबु गी पेली जिग्यां में हरेक दिन जा'गे सेवा करतो हो। पण दूसरी महा पवितर जिग्यां में सिरफ महा याजक ई साल में एकर जावंतो हो। बो आप अर लोगां गै अणजाण पापां खातर जानवर गो लोई लेगे बठै चढावंतो हो। इंऊं पवितर आत्मा बताणो चावै कै, जद तांई ईं संसार में बणेड़ै तंबु गो बारनो खुलो है जद तांई सुरग गै तंबु गो बारनो बंद है। ओ तंबु आज गै जुग खातर एक मिसाल है झिकै में हिसी भेंट अर बलिदान चढाईजै है। आं चिजां ऊं लोगां गो मन कदी सुद्ध कोनी हो सकै। ईंखातर आंगो मेळ सिरफ खाणै पीणै अर न्यारी न्यारी विधियां ऊं सरीर नै सुद्ध करण गो है। आ रीति बिं टेम तांई ही जद तांई यीसू धरती पर ना आयो। पण अब मसी आपणै होण आळै कल्याण गै रूप में प्रधान महा याजक बणगे आयो है। बो हिस्यै तंबु में रेवंतो हो। झिको संसार गै बणायेड़ै तंबु ऊं भोत म्हान है अर झिकै नै कणैई मिनख कोनी बणायो। अर बो इमै बकरा अर बछड़ा गो लोई लेगे कोनी गेयो। पण बो खुद बलिदान होगे बिं परम पावन जिग्यां में आपणी हमेसा गी मुकती खातर जा बेठयो है। क्यूंकै लोई अर बांगी राख, लोगां पर छिड़कण ऊं सिरफ बांगो सरीर ई सुद्ध होवंतो हो। तो फेर मसी गो बो बलिदान झिको बण आपगी सनातन आत्मा ऊं परमेसर सामै निरदोस चढायो हो बो आपणै मरेड़ै मन नै क्यूं कोनी सुद्ध करैगो। जिंऊं आपां बी जींवंतै परमेसर गी सेवा कर सकां। अर इंगै कारण ई यीसू नुअ वायदै गो बिचावलो बणयो है, झिकै गै बलिदान ऊं लोगां गै पेलै वायदै गै टेम गै अपराध ऊं मुकती मिलज्यै। अर परमेसर गा चुणेड़ा लोग वायदै गै अनुसार हमेसा खातर बिंगा वारिस बणज्यै। क्यूंकै झिकै गो बसियतनामो लिखीजै है बठै बिंगी मोत गो प्रमाण देणो जरूरी है। क्यूंकै हिसी बात आदमी गै मरण गै बाद मानिजै है अर जद तांई आदमी खुद जींवंतो है इतै ओ मानिजै कोनी। ईंखातर पेलो वायदो, बिना बलिदान गै कोनी बांदेड़ो हो। क्यूंकै पुराणै जमानै में मूसा हरेक लोगां नै नेम विधान गी सारी आग्या बता दी ही। जद बण बछड़ा अर बकरा गो खून लेगे अर सारै लोगां पर छिड़कगे केयो हो कै, ओ वायदै गो लोई है झिकै गी आग्या बण खुद परमेसर दी है। अर इंयाई बण आपगी रीति ऊं बिं तंबु अर सेवा गै सारै समान पर छिड़क्यो। बांगै नेम विधान गी रीत में बिना लोई छिड़के कोई बी चीज सुद्ध कोनी होवंती ही। ईंखातर बे लोग पाप गी बली चढावंता हा। बे ओ जरूरी समझता कै सुरग गी चिजां गै नमूनै नै आऊं ई सुद्ध करीजै। पण सुरग गी चिजां नै आऊं बी उतम ऊं उतम बलिदान ऊं सुद्ध करणी जरूरी है। क्यूंकै मसी बांगै हात गी बणायेड़ी पवितर जिग्यां में कोनी बड़यो हो। पण बो तो परमेसर गै बणायेड़ै सुरग में बड़यो हो। जठै बो आपणै खातर परमेसर गै सामै हाजिर रेवै। अर बिनै खुद नै बारी बारी बली गो लोई चढाण गी जरूरत कोनी पड़ै है। जिंया ईं संसार गा महा याजक, हरेक साल जा'गे चढावंता हा। जे इंया होवंतो तो बिनै संसार गै बणाण गै टेम ऊं लेगे आज तांई बारी बारी दुख उठाणो पड़तो। पण अब, जुग गै आखरी में बो एकर ई आयो है, जिंऊं बो खुद नै बलिदान कर'गे लोगां गै गुनावां नै खत्म कर दैय। जिंया मिनख गै मरण गो दिन बणेड़ो है, बिंयाई बिंगै न्याय गो बी दिन बणेड़ो है। इंया मसी लोगां गै पापां खातर एकर ई बलिदान होयो हो। अर अब झिका लोग बिनै उडीकण लागरया है। बे बिनै एक दिन बिना पाप गै आपगी मुकती सागै देखैगा। क्यूंकै ईं नेम विधान में आण आळी आच्छी चिजां गो नमुनो है। ऐ असली कोनी है। ईंखातर हरेक साल एक ई तरियां गै बलिदान चढाण ऊं भगती करण आळा लोग कदी सुद्ध कोनी कर सकै है। जे ओ नेम विधान लोगां नै सुद्ध कर देवंतो तो बांगो ओ चढावो बंद हो जावंतो। ईंखातर कै बे लोग एकर में ई पवितर हो जावंता अर फेर बांगो मन कदी दोसी कोनी होवंतो। पण बे लोग हरेक साल इंगै द्वारा पाप नै याद करता हा। क्यूंकै इंया कदी कोनी हो सकै कै बकरा अर बछड़ा गो खून बांगै पापां नै दूर कर दैय। ईंखातर जद यीसू ईं दुनिया में आयो, बिं टेम बण केयो कै तूं ना तो बलिदान अर ना'ई कोई भेंट मांगी, पण मेरै खातर एक देह तैयार करी है। तूं ना तो होम बलियां ऊं अर ना'ई पाप बलियां ऊं खुस होयो। जद मैं केयो, “मैं तो तेरी इच्छा पूरी करण आयो हूं,” झिकी पवितर सासतर में लिखेड़ी है। बण पेलां बी केयो कै, तूं तो बलिदान ऊं अर ना ई भेंट ऊं अर ना'ई होम बली ऊं अर ना'ई पाप बली ऊं राजी होयो। पण ऐ तो नेम विधान गी रीति गै कारण चढाईजै ही। अर बण केयो, “देख मैं तेरी इच्छा पूरी करण आयो हूं।” इयां बो पुराणी रीति नै हटागे नुई रीत नै सरू करै है। ईंखातर बिं इच्छा गै द्वारा ऊं ई, आपां सारा बिंगै एकर ई बलिदान होण ऊं पवितर होयड़ा हां। पण हरेक याजक तो पवितर जिग्यां में खड़यो होगे एक ई तरियां गी बली चढावंतो हो, झिकी पाप नै कदी दूर कोनी कर सकै ही। पण मसी खुद नै एकर ई बलिदान कर'गे परमेसर गै दाहिणै जा बेठयो। जद ऊं बो बिं टेम नै अडीकण लागरयो है जद परमेसर बिंगै दुसमणां नै बिंगै बस कर दैय। क्यूंकै यीसू आपगै एक ई बलिदान गै द्वारा ऊं बां पवितर लोगां नै सदां खातर सिद्ध बणा दिया है। ईं बात गी पवितर आत्मा गवा है क्यूंकै आ बात बण पेलां बी केयी ही कै, झिको वायदो मैं बां दिनां गै बाद बाऊं करूंगा। बो ओ है कै मैं आपगै नेम विधान गी बातां बांगै हिड़दयै पर लिखूंगा अर बांगै मन में बसाऊंगा। अर फेर कदी मैं बांगै पापां नै अर बांगै माड़ै करमा नै याद कोनी करूंगा। जद इंया होज्यै'गो तो फेर बलिदान चढाण गी रीति सदां खातर खत्म हो'ज्यैगी। तो हे मेरा प्यारा भाईयो अर भेनों, अब आपां नै यीसू गै बलिदान गै द्वारा बिं नुअ रा ऊं पवितर जिग्या में दाखिल होण'गी हिम्मत मिलगी है। झिकै गो बारनो, बण आपगी देह रूपी पड़दै नै हटागे खोल्यो है। बो आपणो हिस्यो महा याजक है झिको परमेसर गै घराणै गो अधिकारी है। तो आओ, आपां सच्चै मन अर पूरै बिस्वास गै सागै आपणै मन गै मेल नै दूर कर'गे, बिना कपट गै सुद्ध पाणी ऊं नहागे, बिं परमेसर गै कनै चाला। अर झिकी आसा नै आपां मानी है बिं पर डटया रेवां क्यूंकै झिकै परमेसर आपणूं वायदो करयो, बो बिस्वास लायक है। तो आओ आपां एक दूसरै गै सागै प्रेम अर भलै कामां नै करण खातर होंसलो देवंता रेवां। अर एक दूसरै गो सागो ना छोड़ा, जिंया भोतसा लोग छोडग्या है। पण एक दूसरै नै सुख दुख में समझांता रेवो। अर जिंया जिंया बो न्याय गो दिन नेड़ै दिखै बिंयाई ऐ काम ओर जादा करता रेवो। क्यूंकै जे आपां सच्चाई नै जाणन गै बाद बी, जाणबूजगे पाप करांगा, तो फेर आपणै पापां खातर दूसरो कोई बलिदान कोनी बचै। पण फेर बचैगी भयानक सजा अर एक भीसण आग झिकी परमेसर गै खिलाफ चालण आळा नै खत्म कर दैयगी। जद नेम विधान नै ना मानण आळै नै दो या तीन जणा गी गवाई ऊं बिना दया करे मार दियो जावंतो हो। तो सोचो, बो किती मोटी सजा गो भागी हो'सी? झिको परमेसर गै बेटै गो इनकार कर'गे बिंगै वायदै गै खून नै तुछ जाणै है अर किरपा गी आत्मा गी बेजती करै है। क्यूंकै आपां परमेसर नै जाणा हां, झिकै गो केयेड़ो है कै, बदळो लेणो मेरो काम है अर मैं ई बिनै सजा दैयूंगा। अर फेर प्रभु आपगै लोगां गो न्याय करसी। परमेसर गो गुनेगार बणनो खतरनाक बात है। पण थे, बां पेलां गै दिना नै याद करो, जद थे सच्चाई नै जाणी ही अर दुखा में बी पक्का रेया हा। थारै मू केई हिस्या है झिका सारां गै सामणै बेजती अर जुल्म सेयो अर केई लोग आंगै दुखा में मदद बी करता रेया। क्यूंकै थे जेळ में बंद लोगां गै दुखा में भागी होया अर आपगी जायदाद नै आनंद गै सागै लुटीजती देखता रेया। क्यूंकै थे जाणो हो कै थारै कनै इंऊं उतम मोटी जायदाद है झिकी हमेसा खातर थारी है। ईंखातर मन ना रेड़ो क्यूंकै थारै खातर आ'गै भोत मोटो फळ है। अर थानै सबर राखणो चईयै, जिंऊं थे परमेसर गी इच्छा नै पूरी कर'गे, बिं म्हान वायदै गै फळ नै ले सको। अब बिंगै आण में जादा टेम कोनी रेयो है। बिंगो केयेड़ो है कै मनै मानण आळा लोग बिस्वास में जींवंता रेवैगा अर जे बो लारै हटग्यो तो मेरो मन बिंऊं खुस कोनी रेवैगो। पण आपां बे कोनी झिका बिस्वास में लारै हटगे नास होज्यां। पण आपां तो बांमू हां झिका बिस्वास गै कारण अमर जीवन पावां हां। अब बिस्वास, आसा अर अणदेखी चिजां गो पक्को सबूत है। क्यूंकै बिस्वास गै कारण ई पुराणै टेम गै लोगां गै बारै में आच्छी गवाई देई। बिस्वास गै कारण ई आपां जाणा कै परमेसर ईं पूरी धरती नै बणाई ही। ईंखातर झिको कीं दिखण लागरयो है बो अणदेखी चिजां ऊं बणेड़ो है। बिस्वास गै कारण ई हाबिल आपगै भाई केन ऊं ज्यादा उतम बली चढाई ही। अर परमेसर बिंगै चढावै नै मानगे बिनै आपगो भगत समझयो। बिंगो ओ ई बिस्वास आज आपणूं गवाई गै रूप में बात करै है। अर आ बात बी, आपां बिस्वास ऊं माना कै हानोक नै परमेसर जींवंतै नै ई उठा लियो, जिंऊं बो मोत नै ना देख सकै अर बिंगै बारै में किनैई कीं पतो कोनी कै बो कठै उड़ग्यो। इंगै बारै में पवितर सासतर में लिखेड़ो है कै, बिंऊं परमेसर भोत खुस है। इंया परमेसर बिना बिस्वास गै राजी कोनी होवै अर झिको बिनै खोजणो चावै बिनै पेलां ओ मानणो जरूरी है कै परमेसर ई सारो कीं है। जद बो बिनै इंगो फळ दैयगो। बिस्वास गै कारण ई नूह, बिं टेम परमेसर गी अणदेखी बात पर बिस्वास करयो हो। झिकी बात बण बिनै बताई ही। अर आपगै परिवार नै बचाण खातर एक मोटो जहाज बणायो हो। इंगै कारण ई परमेसर दूसरै लोगां नै दोसी मान्या हा। अर बो आपगै बिस्वास गै कारण भगती गो वारिस बण्यो हो। बिस्वास गै कारण ई अबरहाम परमेसर गी आग्या मानी अर आपगो सारो कीं छोडगे परमेसर गी बतायी जिग्यां कानी चाल पड़यो, झिकी नै बो जाणै बी कोनी हो। क्यूंकै परमेसर बिनै बठै गो वारिस बणाण आळो हो। बिस्वास गै कारण ई बो वायदै गी जिग्यां में परदेसी बणगे रेण लागग्यो। बो याकूब अर इसहाक गै सागै तंबु में रेवंतो हो। झिका बिंगै सागै बी वायदै गा वारिस हा। बठै बो तकड़ी नींव आळै नगर गी उडीक में हो झिकै नै बणाण आळो अर रचण आळो खुद परमेसर है। बिस्वास गै कारण ई सारा, बुढापै में गरभवती होयी। क्यूंकै बण परमेसर गै बचन नै साच्चो मान्यो हो। ईं कारण ई अबरहाम झिको मरण आळो हो, बिंऊं परमेसर आकास गै तारां अर टीबै गी बेकळू रेत तरियां अणगिणत पीढी पैदा करी ही। अर इंया अबरहाम, इसहाक अर याकूब बिस्वास करता मरग्या। पण ऐ लोग वायदै गी चिजां नै कोनी देख सक्या पण दूर ऊं ई बानै देखगे खुस होगे बतायो कै, आपां ईं दुनिया में एक परदेसी गी तरियां हां। झिका लोग हिसी बात करै, बांऊं आ बात परगट है कै बे लोग एक हिस्यै देस गी खोज में हा झिको अमर है। बे लोग बिं देस गी बात कोनी करा, झिकै मू बे आया हा। क्यूंकै बे बठै पाछा बी जा सका हा। पण बे तो उतम देस सुरग गी खोज में हा। ईंखातर खुद परमेसर बां लोगां गो परमेसर कुहाण में बांऊं कोनी सरमावै है। क्यूंकै बण ई बो देस, बां लोगां खातर बणायो है। अर परमेसर अबरहाम गो बिस्वास परखण खातर ई बिंगी परख करी ही। अर जद बो बिस्वास कर'गे आपगै इकलोतै बेटै गी बली देण नै तैयार हो'ग्यो हो। अर झिकै अबरहाम ऊं परमेसर गो वायदो बी करेड़ो हो कै, “मैं इसहाक ऊं तेरी पीढी बधाऊंगा।” क्यूंकै बो जाणै हो कै परमेसर मरेड़ा नै बी जींवंतो कर सकै। ईंखातर बिनै आपगो बेटो जींवंतो मिलग्यो। बिस्वास गै कारण ई, इसहाक याकूब अर एसाव नै आ'गै होण आळी बातां खातर आसिरबाद दियो हो। बिस्वास गै कारण ई, याकूब मरतै टेम, युसुफ गै हरेक बेटै नै आसिरबाद दियो हो। अर आपगै गेडियै गै सिरै पर सिर रखगे परमेसर नै निमस्कार करयो हो। अर ईं बिस्वास गै सागै ई युसुफ बी मरतै टेम इसराएली लोगां नै मिस्र ऊं निकळ जाण गी बात केई ही। अर बण बानै ओ बी केयो कै, मेरै मरण गै बाद मेरी असथियां नै थे अठुं ले जाईयो। बिस्वास गै कारण ई मूसा गै माता पिता बिनै जन्म गै तीन म्हिनां तांई राजा ऊं लकोगे राखयो हो। क्यूंकै बो आम टाबरां बरगो कोनी हो। अर ना'ई बे राजा गी आग्या ऊं डरया हा। जद मूसा जुआन हो'ग्यो हो तो बण अपणै आपनै फिरोन गी बेटी गो बेटो कुहाण ऊं मना कर दियो हो। ईंखातर कै बण दुनिया गै लोगां सागै सुख भोगण ऊं आच्छो परमेसर गै भलै लोगां सागै दुख भोगणो आच्छो समझयो। अर बण मिस्र गी धन सम्पती ऊं ज्यादा मसी गै कारण दुख झेलणो जादा किमती समझयो। क्यूंकै बिंगी नजर बिं अमर फळ पर टिकेड़ी ही। बिस्वास गै कारण ई, बण राजा गी रीस गी परवा करे बिना मिस्र देस नै छोड़ दियो हो। अर इंया लागै हो जिंया बो बी अणदेखै परमेसर नै देखण लागरयो हो अर इंया बो आ'गै ई बडतो रेयो। बिस्वास गै कारण ई मूसा इसराएली लोगां नै फसह गै त्यूंहार अर खून छिड़कण गी आग्या दी। जिंऊं नास करण आळो दूत बांगै मोबी बेटा गै हात ना लगा सकै। बिस्वास गै कारण ई बे इसराएली लोग लाल समुंदर माखर इंया टपग्या, जिंया सुखी जिग्यां माखर टपे करै। पण जद मिस्र गी सेना टपण लागी तो सारी समुंदर में डूबगी। बिस्वास गै कारण ई यरीहो नगर गी चार दिवारी पड़गी। जद बठाकर इसराएली लोग सात दिन तांई चकर काट चुक्या हा। बिस्वास गै कारण ई राहाब बेस्या परमेसर गी आग्या ना मानण आळा सागै नास कोनी होई ही। क्यूंकै बण बठै गो भेद जाणन आळै लोगां गो आदर सागै साथ दियो हो। अब ओर थानै के बताऊं? क्यूंकै टेम कोनी कै थानै मैं गिदोन, बाराक, सिमसोन, यिफतह, दाऊद अर सामूएल अर दूसरै ओर परमेसर गी बात बोलण आळै गै बारै में बता सकूं। आं बिस्वास गै कारण ई दूसरै राज्यावां नै जीत्या अर भगती गा काम करया। अर परमेसर गै करेड़ै वायदै गी चिजां नै पाई अर सेरां गा मू बंद कर दिया हा। अर भभकती आग नै ठंडी कर दी, तलवार गी धार ऊं बच निकळया अर कमजोर होवंता बी ताकतवर बण्या अर लड़ाई में वीर बणगे बिदेसियां गी सेना नै मार भजाई। केई लुगाईयां आपगै मरेड़ै आदमियां नै पाछा जींवता पा लिया, पण भोतसा मार खावंता खावंता मरग्या हा। अर बां आजादी कोनी चाई, क्यूंकै बे उतम जीवन में दुसर जी उठण गा भागी होणा चावै हा। केई हिस्या हा झिका गी परख बेजती अर कोड़ा मारण ऊं होयी। अर केईया गी जंजीरा में बांदगे जेळ में बंद करण में होई ही। केई लोग दगड़ा ऊं मारिज्या, केईया नै आरै ऊं बाड दिया अर केई तलवार ऊं मारिज्या अर केई कंगाली अर क्ळेस में दुख भोगता भेड़ बकरिया गी खाल ओडे, जंगळ, पहाड़, गुफावां अर धरती गी दरारा में लुकता भटकता रेया। क्यूंकै संसार गा लोग आंगै खिलाफ हा। पण बिस्वास गै कारण परमेसर आं सारा नै भोत सराया हा। पण फेर बी ऐ लोग बी फळ नै कोनी पा सक्या झिकै नै देण गो परमेसर वायदो करयो हो। क्यूंकै परमेसर आपणै खातर पेलां ई एक उतम योजना बणायेड़ी ही कै ऐ लोग परमेसर गै बिना सिद्ध ना हो सकै। ईंखातर आपणै कनै परमेसर पर बिस्वास करण आळै लोगां गी भोत सारी गवाइयां है, तो आओ आपां बी बुराई में ले जाण आळी अर पाप में उळझाण आळी, रुकावट नै दूर कर'गे बिस्वास गी दोड़ में धीरज ऊं दोड़ा। अर बिस्वास गै करता अर सिद्ध करण आळै यीसू पर हमेसा ध्यान लगाये राखां। क्यूंकै झिको आनंद बिंगै आ'गै हो, बिनै बण बिना सरम करे करूस गो दुख उठा लियो हो। अर परमेसर गी दाहिणी ओर न्याय गै सिंहासन पर जा बेठयो। ईंखातर हमेसा बिनै याद करता रेवो। झिकै पापी लोगां गै हाता ऊं घोर दुख सेण करयो हो। जिंऊं थे क्ळेस में निरास होगे आपगो होंसलो ना रेड़ सको। अजे तांई थारी पाप ऊं हिसी लड़ाई कोनी होयड़ी झिकी में थारो खून बहाइज्यो होवै। कै थे पवितर सासतर गी बात नै भूलग्या? झिकी में केयेड़ो है कै, हे मेरा बेटा तूं प्रभु गी फटकार नै हळकी ना जाण अर बिंगी डांट नै कदी बुरी ना मान। क्यूंकै प्रभु झिकै ऊं प्रेम करै, बिनै सुधारण खातर फटकार बी दैय है। अर झिकै नै बेटो समझै, बिनै सजा बी दैय है। थे झिको दुख भोगण लागरया हो, बिनै थे बिंगी फटकार ई समझो। क्यूंकै परमेसर थानै बेटै गै जिस्यो बरताव करै है। हिस्यो कोई बेटो कोनी झिकै नै बाप फटकार ना। जे थारी दूसरै बेटै गी तरियां फटकार ना होई है तो थे बिंगा सच्चा बेटा कोनी हो। जद आपां आपणै दुनिया गै पिता गी फटकार सेण कर'गे बिंगो आदर करां तो के आपां पिता परमेसर गी फटकार नै सेण कोनी कर सकां? झिको आपां नै अमर जीवन दैय है। दुनिया गो पिता तो सिरफ संसार गै जीवन नै सुधारण खातर फटकार दैय, पण पिता परमेसर तो आपगी पवितरता में आपां नै भागी होण खातर फटकारै है। पण आं दिना में हरेक तरियां गी फटकार आनंद गी कोनी, पण दुख गी बात लागै है। पण झिको आदमी, इनै सेण करतो करतो पक्को होज्यै। बिनै परमेसर बाद में भगती सागै जीवन जीण गो फळ दैय है। ईंखातर आपगै कमजोर हात पगा नै तकड़ा कर ल्यो। अर परमेसर गै बतायेड़ै रा पर सीधा चालता रेवो। जिंऊं बे लोग झिका बिस्वास में कमजोर है भटक ना ज्यै। पण बिस्वास में मजबूत होज्यै। सारां सागै मेळ मिलाप राखो अर बिं पवितरता नै खोजता रेवो, झिकी गै बिना कोई बी परमेसर गो दरसण कोनी कर सकै। अर थे ध्यान राखो कै थारै मू कोई आदमी, परमेसर गी किरपा ऊं रे ना ज्यै। अर ओ बी ध्यान राखो कै थारै बिचाळै हिसी कोई झगड़ै गी जड़ ना निकळ ज्यै जिंऊं थानै कस्ट होवै अर इंऊं भोतसा लोग कठैई बिस्वास ऊं भटक ज्यै। ईंखातर चोकस रेवो कै, थारै मू कोई बेबीचारी ना बणज्यै अर ना ई एसाव गी तरियां पापी बणज्यै झिकै एकर गै भोजन खातर आपगै मोबी होण गै हक नै खो दियो। अर बाद में बिनै पिता गो आसिरबाद कोनी मिल्यो हो। बो भोत रो रोगे गिड़गिड़ायो हो पण फेर झिको कीं बण करयो बिनै बदळण गो कोई रा कोनी रेयो। थे बी सीनै पहाड़ कनै कोनी आया, जठै काळी घटा, अंधेरो, तूफान अर भभकती आग ही। हिसी जिग्यां कनै थे अजे आया कोनी हो। अर ना'ई अजे थे तुरई गी आवाज अर डरावणो आदेस सुण्यो। झिकी नै सुणगे इसराएली लोग परमेसर नै दुहाई देवंता हा कै म्हानै अब हिसी ओर बातां ना के। क्यूंकै बे ईं आदेस ऊं घबराग्या हा कै जे कोई पसु बी पहाड़ गै सारै लाग जावंतो तो बो दगड़ा ऊं मारयो जावंतो। बो दरसण इतो डरावणो हो कै खुद मूसा केवै कै, जद मैं बिनै याद करूं तो डरगे कांपण लागज्यूं। पण थे तो सियोन पहाड़ अर परमेसर गी जींवती नगरी अर सुरग गै यरुसलेम कनै आ ग्या हो। अर लाखां सुरगदूतां गै सागै। जठै परमेसर गी पेली उळाद झिका गा नाम सुरग में लिखेड़ा है बांगी सभा कनै पोंचग्या हो झिकी परमेसर गै भगत लोगां गी आत्मावां है अर अब सिद्ध करीजी है। अर नुअ वायदै गै बिचाळै यीसू गै खून कनै आया हो। झिको हाबिल गै खून ऊं भोत जादा कल्याणकारी है। ईंखातर चोकस रेवो। थे बिंगी आग्या नै ना टाळो। क्यूंकै जद बे लोग बी कोनी बच्या झिका परमेसर गी चेतावनी मूसा गै मूं ऊं सुणगे टाळी ही, तो आपां सुरग गी सीदी चेतावनी नै टाळगे किंया बच सकां? बिं टेम तो बिंगै सब्द ऊं ई सारी धरती हालगी। पण अब तो बिंगो ओ वायदो करेड़ो है कै मैं एकर ओर धरती अर आकास नै हलाऊंगा। ईं बात ऊं ओ परगट होज्यै कै झिकी चिजां बणायेड़ी है बे सारी हलाण ऊं खत्म हो'ज्यैगी अर झिकी चिजां हलाईजै गी कोनी सिरफ बे ई अटल रेवैगी। ईंखातर जद आपां नै हिस्यो राज मिलण लागरयो है झिको हलाईजै गो कोनी। तो आओ आपां बिं किरपा नै हात ऊं ना जाण दैयां झिकै गै द्वारा आपां भगती अर डर गै सागै बिं परमेसर गी आराधना कर सकां झिकै ऊं बो राजी रेवै है। क्यूंकै आपणो परमेसर भस्म करण आळी आग है। ईंखातर भाईचारै गो परेम बणायो राखो अर आयेड़ै मेहमान गो आदर मान करणो ना भूलो। क्यूंकै इंया करण ऊं केई लोगां भूल में सुरगदूतां गो आदर मान करयो हो। अर इयांई सताव गै कारण जेळ में बंद लोगां नै ओ समझगे याद करता रेवो, जिंया थे खुद जेळ में हो। अर झिका सागै भोत बुरो होयो है क्यूंकै इंया एक दिन थारै सागै बी हो सकै। थे लोग ग्रहस्ती जीवन गो आदर करो। क्यूंकै परमेसर बेबीचारियां अर दूसरी लुगाई कनै जाण आळै लोगां नै सजा दयैगो। ध्यान राखो, थारो सभाव लालची ना होवै। अर झिको कीं थारै कनै है बिं पर ई संतोस राखो। क्यूंकै परमेसर गो बचन है कै, “मैं तनै ना कदी छोडूंगा अर ना कदी तेरूं दूर होऊंगा।” ईंखातर आपां बेधड़क होगे के सकां कै, “तूं मेरी मदद करण आळो है। आदमी मेरो कीं कोनी बिगाड़ सकै, मैं किंऊं ई कोनी डरूं।” अर बानै याद राखो झिका थारा अगुवा है झिका थानै परमेसर गो सुब समाचार सुणायो हो। बांगै चाल चलण नै देखगे थे बी बिंयाई बिस्वास गै सागै चाले करो। यीसू मसी आज काल अर जुगा जुगा तांई एकसो ई है। ईंखातर थे ओर कोई उपरली सीख में पड़गे भटक ना जाईयो। उतम बात तो आई है कै आपणै मन नै भोजन ऊं कोनी पण परमेसर गी किरपा ऊं ताकत मिलै है। खाण पीण गै नेम नै मानण आळै लोगां नै आऊं कदी कोई लाभ कोनी मिलै। पण आपणै कनै बी एक हिसी बेदी है झिकी पर चढायेड़ै चढावै नै खाण गो हक बां लोगां नै कोनी झिका तंबु में सेवा करै है। क्यूंकै झिकै पसु गो खून महा याजक पाप बली खातर महा पवितर जिग्यां में लेगे जावंतो, बांगो सरीर बे नगर गी कांकड़ ऊं बारै ले जा'गे बाळ देवंता हा। ईंखातर यीसू खुद लोगां नै आपगै खून ऊं पवितर करण खातर, यरुसलेम ऊं बारै करूस गो दुख उठायो हो। तो आओ आपां बिंगै दुख गो भार आप पर लदगे, नगर ऊं बारै बिं कनै चालां। क्यूंकै आपणो ईं धरती पर सदां रेण आळो नगर कोनी है पण आपां तो बिं नगर गी उडीक में हा झिको आ'गै आण आळो है। तो आओ आपां झिकै होटा ऊं यीसू नै प्रभु केगे माना बिंगै द्वारा ई परमेसर नै बडाई रूपी भेंट चढावां। पण भलाई अर दुसरां गी मदद करण गी भेंट चढाणी ना भूलो। क्यूंकै परमेसर हिसी भेंट ऊं ई राजी रेवै है। अर आपगै अगुवा गी मानता रेवो अर बांगै बस में रेवो। क्यूंकै बे थारी आत्मावां गा पेरेदार है झिका नै आंगो लेखो देणो हो'सी। ईंखातर बांगो केणो मानता रेवो, जिंऊं बे ओ काम आनंद ऊं करता रेवै। जे बां ओ काम दुखी होगे करयो तो थानै इंऊं कोई लाभ कोनी मिलैगो। अर थे म्हारै खातर बी पराथना करता रेवो। क्यूंकै म्हानै पूरो बिस्वास है कै म्हारो मन सुद्ध है अर म्हे हरेक हालत में आपगो चाल चलण सुद्ध राखणो चावां हां। मैं खास तोर ऊं थानै केऊं कै थे मेरै खातर पराथना करे करो जिंऊं मैं थारै कनै बेगो आ सकूं। अब सांती दाता परमेसर, आपणै प्रभु यीसू नै झिको भेड़ा गो म्हान गुआळियो है। बिनै परमेसर आपगै सनातन वायदै गै खून गै गुणा ऊं मरेड़ा मू जींवंतो करयो है झिको थानै हरेक गुणा में सिद्ध कर सकै। जिंऊं थे बी परमेसर गी इच्छा पूरी कर सको। अर झिको कीं बो आपणूं चावै बो बिनै आपणै में पैदा करै। जिंऊं बिंगी बडाई जुगा जुगा तांई होवंती रेवै। तो हे मेरा भाईयो अर भेनो, मैं थारूं आई बिनती करूं कै थे ईं उपदेस गी बातां पर गोर राखो। मैं थानै ओ खत भोत कम बातां में लिख्यो है। मैं चाऊं कै थानै ईं बात गो ठा लागज्यै कै, आपणो भाई तीमुथियुस जेळ ऊं छूटग्यो है। जे बो मेरै कनै बेगो ई आ'ग्यो तो मैं बिंगै सागै थारूं मिलण आऊंगा। थारै सारै अगुवा नै अर सारै पवितर लोगां नै म्हारी ओर ऊं निमस्कार केईयो। अर इटली देस गा लोग बी थानै निमस्कार केवै है। परमेसर गी किरपा थारै सारां पर सदां होवंती रेवै। मैं याकूब, परमेसर अर प्रभु यीसू मसी गै दास गी ओर ऊं संसार गै न्यारा न्यारा इलाका में फेलेड़ी बारा जातियां नै निमस्कार पुगाऊं। हे भाईयो अर भेनों, जद थारै पर कीं तरियां गो दुख आवै तो बिनै पूरी खुसी गी बात समझो। क्यूंकै थे जाणो हो कै परीक्सा गै टेम बिस्वास करां हां तो बिंऊं धीरज पैदा होवै है। धीरज नै थारै उपर पूरो काम करण देवो कै थे पूरा अर सिद्ध हो जावो अर झिकै में कोई कमी कोनी रेवैगी। जे थारै में बुद्धी गी कमी है तो परमेसर कनूं मांगो बो थानै खुसी ऊं अर उदारता गै सागै दैयगो। पण बिस्वास ऊं मांगो अर मन में इंया ना सोचो कै थानै मिलसी या कोनी क्यूंकै आ सोचण आळो समुंदर गी लेहरां गै समान होवै है झिकी पून ऊं उछळै है। हिस्यो आदमी ओ ना समझै कै प्रभु कनूं मनै कीं मिलसी, अर हिस्यो आदमी दो घोड़ा पर सवार है अर आपगै कोई काम में मन कोनी लगावै है। गरीब भेन भाई आपगै ऊंचै पद पर घमण्ड करै क्यूंकै बांगो नाम परमेसर ऊंचो करयो है। अर धनी भेन भाईयां नै आपगी निची दसा पर घमण्ड करणो चईयै, क्यूंकै बे फूल गी तरियां झड़ ज्यैगा। सूरज निकलतां ई बिंगो तावड़ो इतो तपै है कै बुंटो सूक जावै है, बिंगो फूल झड़ जावै है अर बिंगी सुंदरता खराब हो जावै है। इंयाई धनवान आदमी आपगै रा पर चालतो एक दिन माटी में मिल जावै है। धन्य है बो आदमी झिको परीक्सा गी घड़ी में खड़यो रेवै है क्यूंकै परीक्सा में खरो उतरण गै बाद बो जीवन गै बिं जीतण गै मुकट नै पेरैगो झिको परमेसर आपगै प्रेम करण आळा नै देण गो वायदो करयो है। जद कोई कोजो काम करण गै टेम परीक्सा आवै तो बो ओ ना केवै कै, “मेरी परीक्सा परमेसर भेजी है” क्यूंकै बुरी बातां में परमेसर गो कीं लेणो देणो कोनी बो किंगी परीक्सा कोनी लेवै। हर कोई आदमी आपगी बुरी बातां, बुरा बिचार अर बुरी इच्छा में फसगे ई परीक्सा में पडै़ है। जद बिंगा बुरा बिचार ऊं पाप पैदा करै है जद पाप बोळो हो जावै तो मोत नै पैदा कर देवै है। मेरा प्यारा भाईयो अर भेनों, धोखै में ना रेवो। सारा आच्छा दान अर आच्छा ईनाम उपर ऊं मिलै है अर बे बिं परम पिता गी ओर ऊं झिकै आसमान गो चानणो पैदा करयो है ना बिनै अदळ बदळ करयो जा सकै है अर ना बिं पर अदळ बदळ गी छियां पडै़ है। परमेसर सच्चाई गै संदेस गै द्वारा आपगी उळाद बणाण गै खातर आपां नै चुण्या है कै आपां सारा जीवां गै बिचाळै बिंगी फसल गा पेलां फळ होवां। हे मेरा प्यारा भाईयो अर भेनों याद राखो, हरेक सुणन में तैयार रेणो चईयै, बोलण में उंतावळ ना करो, रीस करण में बी उंतावळ ना करो क्यूंकै आदमी गी रीस ऊं परमेसर गी धारमिकता कोनी पैदा होवै। ईंखातर हर बुरो चाल चलण अर च्यारूंमेर फेलेडै़ बेर ऊं दूर रेवो अर दीनता गै सागै थारै मना में सोंपेडै़ परमेसर गै बचन नै मानल्यो झिको थारै प्राणा गी मुकती कर सकै है। परमेसर गी सिक्सा पर चालण आळा बणो ना कीं सुणण आळा जे थे सुणण आळा ई हो तो थे अपणै आपनै धोखो देण लागरयो हो। जे कोई परमेसर गी सिक्सा नै सुणै है अर बिं पर चालै कोनी तो बो बिं आदमी बरगो है झिको आपगो मूं सिसै में देखै है। बो अपणै आपनै आच्छी तरियां देखै है पण जद बठूं उड़ज्यै है तो बेगो ई भूल जावै है कै बो किस्योक हो। पण झिको परमेसर गै पूरै नेमा नै मानण खातर आच्छी तरियां सीखल्यै है झिकै ऊं आजादी मिलै है अर आपणै काम पर आसिस मिलैगी कै बिनै सुणगे भूले बिना आपगै जीवन में लागू करै है अर बिंया अपणै आपगै कामा गै खातर परमेसर गै द्वारा धन्य होवैगो। जे कोई अपणै आपनै भगत समझै है अर आपगी जीभ पर लगाम कोनी लगावै तो बो मन नै धोखो देवै है अर बिंगी भगती लाइक कोनी है। आपणै परम पिता परमेसर गै सांमणै साच्ची अर सुद्ध भगती बा'ई है कै अनाथ अर विधवा गै क्ळेस अर दुख में सुधि लेवै अर अपणै आपनै संसार ऊं बेदाग राखै। हे मेरा भाईयो अर भेनों, आपणो आदर मान प्रभु यीसू मसी में झिको थारो बिस्वास है, बो पक्सपातपूर्ण ना होवै। जे थारी सतसंग घर में एक अमीर आदमी सोनै गी मुदड़ीयां अर आच्छा गाबा पेरगे आवै है अर एक गरीब आदमी गंदा गाबा पेरगे आवै है, अर थे झिको आच्छा गाबा पेरेड़ो है बिनै आदर देवंता होया केवो है, “तूं मेरै कनै बेठ जा” अर बिं गरीब आदमी नै केवो है, “तूं बठै ई खड़यो रे।” इंया करता होया के थे आपसरी में भेदभाव कोनी करयो है अर बुरा बिचारां गै सागै न्याय करण आळा कोनी ठेरया? हे मेरा प्यारा भाईयो अर भेनों, सुणो के परमेसर ईं संसार गै गरीबा नै कोनी चुण्या कै बिस्वास में धनी अर बिं सुरग राज गा अधिकारी होवै झिकी वाचा बण आपगै प्रेम करण आळा ऊं बांधी है? पण थे बिं गरीब आदमी गी बेजती करी है कै धनी लोग थारै पर जुलम करै अर बे थानै कचेरी में घीस घीसगे कोनी लेजै के? बे ई कोनी है के झिका मसी गै बिं उतम नाम गी निंदा करै है, झिको थानै दियोग्यो है? जे थे पवितर सासतर में मिलण आळै नेम गो सच्चै मन ऊं पालण करो हो तो थारै पड़ोसी ऊं बिंयाई प्रेम करो जिंया थे अपणै आप ऊं करो। जे थे पक्सपात करो तो थे पाप करो हो। थे नेम विधान नै तोड़ण आळा बणोगा। क्यूंकै जे कोई सगळा नेमां गो पालण करो हो अर एक ई बात में चुक जावो तो बो सगळा नेमां गो दोसी मानयो जावै है। क्यूंकै झिको सारा नेमां नै बणायो है, ओ ई परमेसर केयो है, “थे बेबीचार ना करियो,” बण ओ बी केयो, “थे हत्या ना करियो,” जे थे बेबीचार कोनी करयो अर थे हत्या करो हो तो थे नेम विधान नै तोड़ण आळा हो। थे बां लोगां गी तरियां बोलो अर बां लोगां गै बरगो बरताव करो झिका गो बिं नेम विधान गै अनुसार न्याय होणो चईयै झिकै ऊं छुटकारो मिलै है। झिको दयालु कोनी, बिंगै खातर परमेसर गो न्याय बी बिना दया गै हो'सी। पण दया न्याय पर जीतै है। हे मेरा भाईयो अर भेनों, जे कोई आदमी केवै है कै मनै बिस्वास है तो बिगों के फायदो है? बिंगा काम बिस्वास गै सागै ना होवै हिस्यो बिस्वास बिंगो उद्धार कर सकै है के? जे एक भाई अर भेन नै गाबा गी जरूरत होवै अर बांगै कनै खाण नै कीं ना होवै, अर थारै ऊं कोई बिनै केवै, “सांती ऊं जावो, परमेसर थारो कल्याण करै, थे अपणै आपनै गरम राखो अर आच्छी चिजां खावो।” पण जद थे बिंगै सरीर गी पेरनै गी जरूरी चिजां ना देवो तो इंगो के फायदो है? ईंखातर जे बिस्वास गै सागै काम कोनी करो तो बो अपणै आप में मरेड़ो है। पण कोई केवै, “थानै बिस्वास है अर मनै काम है।” थे बिना काम गै सागै आपगो बिस्वास मनै दिखाओ अर मैं थानै आपणो बिस्वास आपगै काम गै सागै दिखाऊंगा। थानै बिस्वास है कै परमेसर एक ई है। अर ओपरी बी बिस्वास करै अर घबरावै है। अरै मूरख। तनै के सबूत देऊं कै करम बिना बिस्वास कोई काम गो कोनी? जद म्हारै बाप अबरहाम आपगै बेटै इसहाक नै बेदी पर चढायो तो बो करमा ऊं धारमिक कोनी ठेरयो के? तूं देख कै बिगों ओ बिस्वास कामां ऊं दिख्यो अर बिगों कामा ऊं बिस्वास पूर्ण होयो हो। ईं तरियां सासतर गो केईड़ो पूरो होयो, अबरहाम परमेसर पर बिस्वास करयो अर बिस्वास गै उपर ई बो धरमी ठेरयो। बो परमेसर गो बेली कुहायो। ईंखातर थे देखो कै एकलो बिस्वास ऊं कोनी पण आपगै कामा ऊं आदमी धरमी ठेरायो जावै है। ईं तरियां राहब बेस्या बी बिं टेम आपगै करमा ऊं धरमी ठेरी जद बण दूता नै आपगै घर में सरण दी अर फेर दूसरै रा ऊं कठैई घाल दिया। जिंया बिना आत्मा ऊं सरीर मरेड़ो होवै है बिंयाई बिस्वास बी बिना काम ऊं मरेड़ो है। हे मेरा भाईयो अर भेनों, थारै मू भोत सारा उपदेसक बणण गी इच्छा ना करो थे जाणो हो कै म्हे झिका उपदेसक हां, म्हारै पर बोळी सखताई गै सागै न्याय करयो जावैगो। कै आपां सारा भोत बार केई तरियां गी गळती कर लेवां हां; जे बोलण में कोई बी गळत ना होवै तो बो सिद्ध आदमी है अर सारी देह पर लगाम लगा सकै है। आपां घोड़ां गै मूं में लगाम ईंखातर लगावां कै बे आपणै बस में रेवै अर ईं तरियां आपां बांगै सारै सरीर नै बस में कर सकां हां। अर पाणी में चालण आळा जहाज गी मिसाल ले सकां हां। देखो, बो कितो मोटो होवै है अर जोर गी आंधी ऊं चलायो जावै है पण एक छोटी सी पतवार ऊं बिंगो केवटियो बिनै जठै कठै ई ले जाणो चावै है, बिनै काबू कर'गे ले जा सकै है। ईं तरियां जीभ झिको सरीर गो छोटो अंग है मोटी-मोटी बातां करै है। देखो, एक थोड़ी सी चिंगारी सारै जंगळ नै बाळ दैय है। हां, जीभ एक सिंगारी है। आ बुराई गो एक पूरो संसार है। आ जीभ आपणै सरीर गै अंगा में एक छोटो सो अंग है, झिकी सारै सरीर नै भ्रसट कर देवै है अर आपणै सारै जीवन में आग लगा देवै है। आ जीभ नरक गी आग ऊं बळती रेवै है। देखो, हर एक तरियां गा जंगळी पसु पक्सी अर धरती पर चालण आळा जीव जन्तु अर पाणी में रेण आळा नै आदमी बस में कर सकै है अर कर बी राख्या है। पण जीभ नै कोई आदमी बस में कोनी कर सकै। आ जैहर ऊं भरेड़ी इसी बुराई है झिकी चेन ऊं कोनी रेवै। आपां इंऊं आपणै प्रभु परमेसर गी आराधना करा हां अर इंऊं ई बां लोगां नै झिका परमेसर गै रूप में पैदा करया, बानै बी सराप देवां। एक ई मूं ऊं धन्यावाद अर सराप दोनूं ई निकळै है, मेरा भाईयो अर भेनों इंया ना होणो चइयै। नळकै गै एक ई मूं ऊं खारो अर मीठो दोनू तरियां गो पाणी निकल सकै है के? मेरा भाईयो अर भेनों कै अंजीर गै दरखत पर जेतुन या अंगूर गी बेल पर आच्छी अंजीर लागै है के? ईंखातर थानै समझणो पडै़गो कै खारै नळकै ऊं कदी मीठो पाणी कोनी निकळ सकै। थारै ऊं, ग्यानी अर समझदार कुण है? झिको है बिनै आपगै व्यवहार ऊं ओ दिखाणो है कै बिंगै कामां ऊं अर दीनता गै सागै करया है झिका ग्यान ऊं जुडै़ है। पण जे थारै मना में ईरस्या अर स्वारथ भरेड़ो है, तो आपगै ग्यान गो ढोल ना पीटो। इंया कर'गे तो थे सच्चाई पर पड़दो कर'गे झूठ बोलण लागरया हो। हिस्यो ग्यान, तो सुरग ऊं कोनी मिलै, पण ओ संसारिक है, आत्मिक कोनी है पण ओ तो सैतान गो है। क्यूंकै जद ईरस्या अर स्वारथपूर्ण भावना रेवै है बठै नेमां नै तोड़ण गी अर हर तरियां गी बुरी बाता होवै है। पण सुरग ऊं आण आळो ग्यान सगळा ऊं पेलां तो पवितर होवै है, फेर सांतिपूर्ण, सैणसील, आनंद, दया ऊं भरेड़ो होवै है अर बिंऊं उतम कामां गी फसल उगै है। बो बिना कपट अर साचो होवै है। सांती गै खातर काम करण आळा आदमी सांती गो बीज उगावैगा अर धारमिक जीवन गो फळ पावैगा। थारै बिचाळै में लड़ाई झगड़ा क्यूं होवै है? बिंगो कारण थारै आपगै ई मा कोनी है के? बे बुरै कामां गी इच्छा झिकी थारै मा हमेसा बणी रेवै है कै बिंऊं ई ऐ लड़ाई झगड़ा पैदा होवै है। थे लोग चावो हो पण थानै मिलै कोनी। थारै में ईरस्या है अर थे हत्या करो हो फेर मिलै कोनी। ईंखातर थे लड़ाई झगड़ा करो हो। झिकी थे चिजां चावो, कोनी मिलै क्यूंकै थे बे चिजां परमेसर ऊं कोनी मांगो। अर जद मांगो हो तो पावो कोनी। थारी सोच सई कोनी होवै। क्यूंकै थे बिनै आपगी बुरी इच्छा पूरी करण खातर मांगो हो। हे गंदा लोगो, थे कोनी चाओ के संसार ऊं प्रेम करणो परमेसर ऊं नफरत करण जिसो है? झिको कोई ईं दुनिया ऊं दोसती राखणो चावै है बो अपणै आपनै परमेसर गो दुसमण बणावै है। अर के थे इंयाई सोचो हो कै सासतर इंया गळत केवै है कै परमेसर आपणै मा ई आत्मा दी है, बा ईरस्या पूर्ण इच्छांवा ऊं भरी रेवै है? पण परमेसर आपणै पर भोत किरपा करी है ईंखातर सासतर में केऐड़ो है, “परमेसर घमण्डियां गो बिरोधी है जद दीन लोगां पर किरपा करै है।” ईंखातर अपणै आप परमेसर गै बस में हो जावो अर सैतान गो सामणो करो तो बो थारै सामणुं भाज्यैगो। परमेसर गै कनै आओ, अर परमेसर बी थारै कनै आवैगो। अरै पापियो, आपगा हात सुद्ध करो, अरै बेम करण आळा, आपगै मन नै पवितर करो। सोक करो, रोवो अर दुखी होवो। हो सकै है थारी खुसी सोक में बदळ जावै अर थारी आ खुसी उदासी में बदळ जावै। प्रभु गै सामणै दीन बणो अर बो थानै ऊंचो करैगो। हे मेरा भाईयो अर भेनों, एक दूसरै गै बिरोध में ना बोलो। झिको आपगै भाई गै बिरोध में बोलै है बो नेम नै दोसी मानै है बो नेम गै बिरोध में बोलै है अर नेम नै दोसी ठेरावै है। अर जे थे नेम पर दोस लगावो हो तो नेमा नै कोनी मानो पण बिं पर न्याय करण आळा बण जावो। नेम देण आळो अर बिंगो न्याय करण आळो तो एक ई है। अर बोई रक्सा अर नास कर सकै है। तो फेर आपगै साथी गो न्याय करण आळा थे कुण होवो। इंया केण आळा सुणो, आज या काल म्हे ईं या बिं नगर में जा'गे एक साल बठै ब्यापार में धन लगागे भोत सारा रिपिया कमा लेवांगा। पण थे तो इतो बी कोनी जाणो कै काल थारै जीवन में के होवैगो? देखो थे तो बिं धुंध गै समान हो झिकी थोड़ी सी देर आवै है अर फेर उड जावै है। थे तो सदां आ'ई केणो चईयै, “जे प्रभु चायो तो म्हे जीयांगा अर काम करांगा।” पण अब तो आ है कै थे आपगै दिखावै पर घमण्ड करो हो। हिसा सारा घमण्ड बुरा है। तो फेर ओ जाणता होया बी कै ओ सई है बिनै ना करणो पाप है। हे धनवानो सुणो झिकी मुसकिलां थारै पर बेगी आण आळी है, बिंगै खातर रोवो अर ऊंची आवाज में रोवो। थारो धन बळग्यो है। थारा गाबा नै कीड़ा कतर दिया है। थारै सोनै चांदी गै जंगाळ लागग्यो है बां पर लागेड़ी जंगाळ थारै बिरोध में गवाई देवैगी अर थारै मांस नै आग गी तरियां खा जावैगी। थे आखरी दिनां में धन भेळो करयो है। देखो थारै खेता में झिकां मजदूरां काम करयो हो थे बांगी मजदूरी रोक राखी है बाई मजदूरी चीखगे हेला मारै है अर खेता में काम करण आळा गी बे चीखा सरवसकतिमान प्रभु गै काना तांई सुणीजी है। धरती पर थे सुख गो जीवन जीयो है अर अपणै आपनै बुराई में डुबोगे राख्यो है ईं तरियां थे अपणै आपनै वध करण गै दिन गै खातर पाळ पोसगे ताजो मोटो कर लियो है। थे धरमी लोगां नै दोसी बणागे बानै मरवा दिया है। बे थारो सामणो कोनी कर सकै। हे भाईयो अर भेनों, प्रभु गै दुसर आण तांई धीरज राखो। बिं किसान गी तरियां धयान राखो झिको आपगी जमीन गी किमती फसल गै खातर अडीकतो रेवै है बिंगै खातर बो सुरु गै मेह ऊं लेगे आखरी मेह तांई लगातार धीरज राखै है थानै बी धीरज गै सागै उडीक राखणी है आपगै मना नै पक्का बणागे राखो क्यूंकै प्रभु गो दुसर आणो नेडै़ है। हे भाईयो अर भेनों, आपसरी मैं एक दूसरै गै उपर दोस ना लगावो कै थे दोसी ना बण जावो। देखो, न्याय करण आळो तो मा आण गै खातर दरवाजै पर खड़यो है। हे मेरा भाईयो अर भेनों, बां परमेसर गी बात बताण आळा नै याद राखो झिका प्रभु गै खातर बोल्या बे म्हारै खातर दुख झेलता अर धीरज अर सैण सीलता गा उदारण है। ध्यान राखो म्हे बांगी सैण सीलता गै कारण बानै धन्य माना हा थे अयुब गै धीरज गै बारै में सुण्यो ई है अर प्रभु बिनै बिंगो झिको फळ दियो बिनै बी थे जाणो ही हो कै प्रभु कितो दयालु अर करुणामय है। हे मेरा भाईयो अर भेनों, सारा ऊं मोटी बात आ है कै सुरग गी अर धरती गी या कीं तरियां गी सोगन खाणी छोड़ दैयो। पण थारी हां गी हां अर ना गी ना होणी चइयै कै थारै पर परमेसर गी सजा ना होवै। जे थारै मू कोई बिपती में पडै़ है तो बिनै पराथना करणी चईयै अर जे कोई सुखी है तो बिनै भजन गाणा चईयै जे थारै मू कोई बीमार है तो बिस्वासी मण्डली गै मुखिया नै बुलाणो चईयै कै बो बिंगै खातर पराथना करै अर बिं पर प्रभु गै नाम ऊं तेल लगावै। बिस्वास गै सागै करेड़ी पराथना ऊं बीमार ठीक होज्यै'गो अर प्रभु बिनै खड़यो कर देवैगो जे बण पाप करया है तो प्रभु बिनै बी माफ कर देवैगो। ईंखातर आपगै पापां नै आपसरी में मानल्यो अर एक दूसरै गै खातर पराथना करो कै थे चंगा भला हो जावो धरमी आदमी गी पराथना सकतीसाली अर असर आळी होवै है। एलियाह एक आदमी हो जिंया आपां हा बण गिड़गिड़ागे पराथना करी कै मेह ना आवै अर साडे तीन साल तांई धरती पर मेह कोनी बरस्यो। बण फेर पराथना करी अर आकास में बादळ उमटया अर मेह बरस्यो अर धरती पर फसलां उगी। हे मेरा भाईयो अर भेनों, थारै मू केई जे सच्चाई ऊं भटक जावै अर बिनै कोई पाछो ले आवै, कै जे कोई पापी नै पाप गै रा ऊं पाछो ल्यावै है तो बिं पापी गी आत्मा तो अनन्त गी मोत ऊं बच ज्यावै है अर बिंगै भोत पापां गी माफी मिलण गो कारण बी बणै है। मैं पतरस, यीसू मसी गो खास चेलो हूं, परमेसर गा चुणेड़ा लोग झिका पुन्तुस परदेस, गलातिया परदेस, कप्पदुकिया परदेस, एसिया परदेस अर बितुनिया परदेस में फेलगे बठै रेण आळा नै, अर परमेसर गी इच्छा गै अनुसार चुणेड़ा अर बांगी आत्मा गै द्वारा पवितर होयेड़ा लोग अर यीसू मसी गै खून गै द्वारा पवितर करेड़ा अर बांगी आग्या मानण आळा लोगो, थे सारा किरपा अर सांती ऊं भरगे रेवो। आमीन। आपणै प्रभु यीसू मसी गै पिता परमेसर गो धन्यवाद करां। मरण गै बाद जी उठयो प्रभु यीसू मसी गै द्वारा बण आपगी दया ऊं आपां नै एक नुई आसा गो जीवन दियो। क्यूंकै परमेसर थारै खातर सुरग में कदी ना खत्म होण आळो जीवन सुरक्सित राख रख्यो है। थानै परमेसर पर बिस्वास है झिको थानै आपगी ताकत ऊं संभालैगो अर परमेसर आखर में सारा नै सजा देण गै टेम थानै मुकती देसी। अब जे थे कीं टेम तांई भोत दुख में हो तो थानै खुस होणो चईयै क्यूंकै बो दिन आण आळो है। थारै परखेड़ै बिस्वास आग में तपायेड़ै नासवान सोनै ऊं बी भोत मेंगो है। जद यीसू मसी दुसर आण गै टेम परमेसर ऊं थानै बडाई, मेमा अर आदर मान मिलसी। थे अजे तांई यीसू मसी नै देख्यो कोनी फेर बी बिनै प्रेम करयो अर अब थे बिनै देख्यो कोनी फेर बी बिं पर बिस्वास करयो। इंया कर'गे थारी खुसी गो ब्यान कोनी कर सकूं। थे बिं पर बिस्वास करयो ईंखातर थानै मुकती मिलगी। थानै मिलण आळी ईं मुकती गै बारै में परमेसर गी बात बताण आळा भोत खोजबीन अर जांच पड़ताल करी। झिका बिं किरपा गै बारै में थानै बतायो झिकी थारै पर होण आळी ही। मसी गी आत्मा झिकी बामै काम करती बण आत्मा बानै बतायो कै “मसी कुण है” अर किंया बो दुख सेवैगो अर बाद में किंया बिनै आदर मान मिलैगो इंगै बारै में बतायो। ईंखातर बे आं बाता गी खोजबीन करता रेवंता। ऐ बातां आप खातर कोनी पण थारै खातर बोली। झिकी बातां पेलां परमेसर गी बात बताण आळा गी केयेड़ी है बे बातां अब बी थे सुणो हो ऐ बातां सुरग ऊं पवितर आत्मा गै द्वारा बताएड़ी है। सुरगदूत बी आं बातां नै सुणण गी इच्छा करै। थे आपगी बुद्धी ऊं अर सोच समझगे चेतै में रेवो। अर थानै झिकी किरपा मिलण आळी है बिंगी पूरी आसा राखो झिकी यीसू मसी आण गै टेम थानै मिलैगी। आग्या मानण आळै बालकां गी तरियां थानै परमेसर गी आग्या मानणी चईयै। थे थारै मन गी पुराणी लालसावां में ना उळज्या रेवो। पण जिंया थानै बुलाण आळो परमेसर पवितर है बिंया थे बी सारै चाल चलण में पवितर बणो। क्यूंकै पवितर सासतर में परमेसर गी बाणी है कै, “थे पवितर बणो, क्यूंकै मैं पवितर हूं।” थे लोग पराथना करण गै टेम “हे पिता” केगे बुलाण आळै परमेसर झिको बिना भेदभाव गै हर एक गो न्याय बिंगै कामां गै अनुसार करै। ईंखातर थे परदेसी बणगे थारो बचेड़ो जीवन बिंऊं डरगे बिताओ। थारै बडेरा ऊं आएड़ै थारै बिना मतलब गै चाल चलण ऊं थारो छुटकारो किंया होयो, ईं बात गो थानै पतो है। थारो छुटकारो नास होण आळै सोनै चांदी ऊं कोनी होयो। पण थारो छुटकारो मसी गै पवितर खून ऊं होयो झिको बिना दोस अर बिना कपट गै मेमणिया बरगो हो। संसार बणण ऊं पेलां यीसू मसी चुणेड़ो हो ईंखातर यीसू मसी गै द्वारा परमेसर पर भरोसो राखण आळो थारै खातर ईं जुग में बिनै परगट करयो है। थारो बिस्वास अर आस परमेसर पर राखण खातर परमेसर यीसू मसी नै मरेड़ा ऊं जींवंतो कर'गे बिनै आदर मान बी दियो। थे सच्चाई नै मानण खातर आपगै मना नै पवितर करया। अब थे दूसरै लोगां नै पूरै मन ऊं प्रेम करो। थानै नुओ जीवन इंया मिल्यो है कै एक बेगो मुकण आळै जीवन खातर कोनी पण परमेसर गै अनन्त अर जींवंतै बचन गै द्वारा मिल्यो है। पवितर सासतर में इंया लिखेड़ो है कै, “हरेक प्राणी एक घास बरगो है, बे घास गै फूल गी तरियां सुणा तो है। क्यूंकै घास सूख जावै अर फूल झड़ जावै, पण परमेसर गो बचन कदी बी बदळै कोनी अर बो सदां एक जिस्यो ई रेवै। ” बोई बचन थानै सुणायो है। ईंखातर हर एक तरियां गी बुराई अर बेर बिरोध अर झूठ बोलगे लारो लगाणो अर चुगली करण ऊं बचगे रेवो। एक छोटै टाबर गी तरियां आत्मिक दूध झिको प्रभु गो बचन है बिंगै मा मुकती खातर बढता जाओ। जिंऊ थानै पतो लागै कै प्रभु कितो दयालु है। थे यीसू मसी कनै आओ। बो जींवंतो पथर है। बिनै लोगां मान्यो कोनी। पण परमेसर बिनै चुणगे भोत आदर मान दियो। अब थे बी एक आत्मिक घर बणाण आळा जींवंता पथर हो। अर थे पवितर याजक हो अर यीसू मसी गै द्वारा थे परमेसर नै राजी करण खातर अपणै आपनै बलिदान करो। पवितर सासतर में इंया लिखेड़ो है, “देखो, मैं सियोन में कूंट गो पथर रखूं झिको भोत मेंगो अर चुणेड़ो पथर है। ईं पर झिको कोई बिस्वास करसी बिनै कदी सरमिन्दा कोनी होणो पड़सी। ” थे लोग यीसू गै लारै चालण आळा लोग हो। अर बो पथर थारै खातर खास है। पण झिका इंगै लारै कोनी चालै बां खातर ओ कीं कोनी। “झिकै पथर नै मिस्तरियां बेकार कर'गे फेंक दियो बोई कूंट गो एक आच्छो पथर बणग्यो। ” पवितर सासतर में इंया बी लिखेड़ो है कै, “अर ठेस लागण गो पथर अर ठोकर खाण गी चटान बणगी। ” बां लोगां परमेसर गै बचन नै मान्यो कोनी, ईंखातर बां बिं पथर ऊं ठोकर खाई अर बे ठेरायेड़ा बी हा। थे लोग परमेसर गा चुणेड़ा खास लोग हो। अर थे एक खास याजकां गो समाज हो अर पवितर लोग अर परमेसर गी खास प्रजा हो। ईंखातर झिकै थानै अंधेरै ऊं पवितर चानणै में बुलाया है बिंगै द्वारा भलाई गी बातां दूसरा नै बताओ। पेलां थे कीं कोनी हा पण अब परमेसर गी खास प्रजा हो। पेलां परमेसर गी दया थारै पर कोनी होई पण अब थारै पर दया होगी। हे मेरा भाईयो अर भेनों, थे लोग ईं संसार में अपणै आपनै परदेसी जाणगे ईं संसार गै लाळच में ना पड़ो। ईंखातर मैं थानै बिनती करूं कै संसार गी लालसा झिकी थारी आत्मा ऊं लड़ाई करै बिंऊं दूर रेवो। दूसरै लोगां में थारो चाल चलण आच्छो होवै कै बे झिकी बातां में थानै गळत बतावै अर जद यीसू दुसर आण गै टेम बे थारै भले कामां नै देखगे परमेसर गी बडाई करै। प्रभु इंया चावै है कै थे सारै अधिकारी लोगां गै अधीन में रेवो। खास कर'गे राजा लोगां गी बात मानगे रेवो। थे लोग राजपाल गै अधीन में रेवो। क्यूंकै बां लोगां बुराई करण आळा नै सजा देण खातर अर आच्छा काम करण आळा नै बडाई करण खातर घाल्या है। परमेसर गी आ'ई इच्छा है कै थे लोग भला काम कर'गे मूरख लोग अर अग्यानी लोगां नै चुप करा दैयो। थे लोग अब आजाद हो। अर परमेसर गा दास बी हो। ईंखातर थारी आजादी नै बुरा काम करण खातर ना लगाओ। सारां गो आदर मान करो, बिस्वासी भाई भेना नै प्रेम राखो अर परमेसर ऊं डरगे रेवो अर राजा गो समान करो। हे नोकरो, थे थारै मालिका ऊं डरगे अर बांगै अधीन में रेवो। चायै भला है चायै बुरा है दोनां गी बात मानणी है। जे कोई परमेसर पर बिस्वास कर'गे अन्याय ऊं दुख अर क्ळेस सेवै तो बो आच्छो है। जे थे बुरो काम कर'गे दुख उठावो तो आ कोई मोटी बात कोनी है। पण जे भलो काम कर'गे दुख सेवो तो परमेसर थानै जरूर आसिस देवैगो। यीसू मसी थारै खातर कितो दुख उठायो अर थानै ईंखातर बुलाया कै थे बी बिंगै बताएड़ै रा पर चालो। पवितर सासतर में इंया लिखेड़ो है कै, “बण कदी पाप कोनी करयो अर ना कदी झूठ बोल्यो। ” लोगां बिंगी बेजती करी बण फेर बी बानै कीं कोनी केयो। लोगां बिनै दुख दियो, बदळै में बण कीं कोनी करयो अर अपणै आपनै साच्चै परमेसर गै हातां में दे दियो। आपणै पापां नै बण आपगै उपर ले लिया अर बण अपणै आपनै करूस पर चढागे आपां नै पापां ऊं बचा लिया अर आपां नै आच्छी तरियां रेण खातर मदद करी। बिंगै सारा दुख झेलण ऊं आपां ठीक होया। पण पेलां थे लोग भटकेड़ी भेड़ा गी तरियां भटका हा। पण अब थे थारी रुखाळी करण आळै गुआळियै कनै आग्या। ईं तरियां हे पत्नियों, थे थारै पति गो आदर मान करो। जे किंगोई पति बचन नै ना मानतो होवै तो थारै परमेसर पर पवितर अर डर गै सागै चाल चलण देखगे बिना कीं बोले बिं पर बिस्वास करैगो। थारो सिंगार लोगां नै दिखाण खातर ना होवै जिंया थारा बाळ अर थारा गाबा अर थारी सोनै गी टुमा। पण थारो सिंगार हिस्यो होणो चईयै कै थारै मन गै मा दीनता अर धीरज राखण आळो होवै। हिस्यो सिंगार परमेसर गी नजर में भोत आच्छो है। पेलां गै टेम में लुगाईयां आपगै पति गो आदर मान कर'गे अर परमेसर गी आराधना करती अर बिं पर भरोसो राखती ही। जिंया भेन सारा आपगै पति अबरहाम गो आदर मान करती अर बिनै आपगो स्वामी मानती । जे थे बी आच्छो काम कर'गे किऊं बी ना डरोगी तो थे सगळी भेन सारा बरगी बणज्योगी। हे पतियो, थे बी थारी पत्नियां गै सागै समझदार बणगे रेवो। बानै कमजोर समझगे बांगो आदर मान करो अर ओ समझो कै आपां दोनां नै जीवन गो वरदान मिलसी। इंया करोगा तो थारी पराथना कदी कोनी रुकै। आखर में, आपां सगळा एक सागै होगे दूसरां पर किरपा करण आळा अर दूसरै भाईयां सागै प्रेम राखण आळा होवां अर इंगै सागै दीनता ऊं रेवां। बदळो लेण गी भावना ना राखां अर गाळ गै बदळै गाळ ना काडां। पण इंगै बदळै में आसिस दैयां क्यूंकै आपां नै आसिस गा वारिस होण खातर बुलाएड़ा है। पवितर सासतर में इंया लिखेड़ो है कै, “झिको कोई आच्छो जीवन जीणो चावै अर आच्छा दिन देखणा चावै बो आपगी जीभ नै गंदी बात बोलण ऊं अर आपगै होटा नै झूठ बोलण ऊं रोकगे राखै। बो बुरा कामा नै छोड़गे आच्छा काम करै अर सांती पाण खातर कोसिस करतो रेवै। क्यूंकै प्रभु गी नजर धरमी लोगां पर लागी रेवै अर बिंगा कान बांगी पराथना कानी लाग्या रेवै पण बुरै लोगां ऊं बो ओलै रेवै है।” जे थे आच्छा काम करोगा तो थारो बुरो करण आळो कुण है? जे थानै आच्छा काम कर'गे बी दुख मिलै तो थे बिमै धन्य हो। थे कोई बी काम गै खातर झिका लोग थानै दुख देण गी कोसिस करै हिस्या लोगां ऊं डरण गी अर घबराण गी लोड़ कोनी। मसी नै प्रभु मानगे बिंगो आदर मान करो। थारी आसा गै बारै में थानै कोई पूछै तो बिनै बताण खातर दीनता अर इज्जत गै सागै डरगे रेवो। आं बाता नै इज्जत देगे अर साफ मन ऊं करो अर थारो मन पवितर राखो कै थारा आच्छा काम देखगे थारी बेजती करण आळा लोग सरमिन्दा होवै। जे थारो दुख झेलणो परमेसर गी इच्छा है तो थे आच्छो काम कर'गे दुख झेलता रेवो क्यूंकै बुरै काम ऊं ओ आच्छो है। मसी झिकै बिना दोस गै आपणै खातर एक बार दुख उठायो अर मरग्यो अर परमेसर सागै आपां नै मिला दिया। बो सरीर ऊं तो मरग्यो पण आत्मा ऊं जींवंतो है। बण ईं आत्मा ऊं जा'गे केदी आत्मावां में बी परचार करयो। झिका नूह गै जहाज बणावंता टेम परमेसर गी बात कोनी मानी। बां लोगां पर परमेसर सबर राख्यो। पण बां सारां मू आठ लोग ईं जल प्रळय ऊं बच्या। बोई पाणी बतिस्मै बरगो है झिका ऊं थानै अब मुकती मिलै है। बतिस्मो सरीर नै साफ करणो कोनी पण यीसू मसी गै जी उठण गै द्वारा परमेसर कनै साफ मन ऊं आण गो एक रा है। बोई यीसू मसी सुरग में जा'गे परमेसर गै दाहिणै पासै बेठग्यो अर सुरगदूत अर अधिकार अर सारी सकतियां बिंगै अधीन में है। मसी दुनिया में दुख झेल्यो अर थे बी अब इंया दुख झेलण खातर तैयार रेवो क्यूंकै दुख झेलोगा तो पाप ऊं छूट जावोगा। इंगो अरथ ओ है कै थे थारी मन गी इच्छा नै छोड़गे परमेसर गी आग्या मानगे आपगो जीवन जीओ। थे पेलां परमेसर नै ना मानण आळा गी तरियां जीवन जींवता। थे लोग गळत काम कर'गे बुरी लालसा में फसेड़ा हा। थे दारू पीण आळा अर मूरती पूजा करण आळा अर काम वासना करण आळा हा। पण अब थे ऐ काम ना करो। अब थारा पुराणा बेली थानै पूछैगा कै थे बे काम क्यूं छोड़ दिया। ईंखातर थानै बे बुरो भलो बी केसी। बांगै द्वारा करेड़ा कामां गो लेखो जोखो मरेड़ा अर जींवता गो न्याय करण आळै परमेसर नै देणो पड़सी। ईंखातर झिका बिस्वासी मरग्या बानै सुब समाचार गो संदेस दियो गेयो कै सरीर में बांगो न्याय माणस गै अनुसार होवै पण आत्मा में बे परमेसर गी तरियां जींवंता रेवै। सारो कीं जल्दी खत्म होण आळो है। ईंखातर मन नै बस में कर'गे पराथना गै सागै सचेत रेवो। सारा ऊं आच्छी बात आ है कै एक दूसरै ऊं प्रेम करो क्यूंकै प्रेम हरेक बात नै ढक देवै। मन में बिना कीं सोचगे आएड़ा गो आदर मान करो। थानै झिको वरदान परमेसर आपगी दया ऊं दियो है बिनै दूसरां गी भलाई खातर काम में ल्याओ। जे किनैई परमेसर गो बचन बोलण गो वरदान है तो बिनै बोलण दैयो। जे किनैई दूसरां गी मदद करण गो वरदान है तो बिनै परमेसर गी सकती ऊं करै। झिको कीं बो करै है परमेसर गी मेमा खातर करै। क्यूंकै मेमा अर सामरथ सदां यीसू मसी गी है। आमीन। हे प्यारो, जे थारै जीवन में आग बरगो दुख बी आ'ग्यो तो डरो ना अर ना अचंभो करो। यीसू मसी किंया दुख झेल्यो बो समझगे थे बी खुसी गै सागै दुख झेलो। बिंगै मेमा गै सागै दुसर आण गै टेम थानै खुसी मिलैगी। जे थे यीसू मसी गै नाम में दुख झेलो तो बी खुस रेवो क्यूंकै परमेसर गी मेमा गी आत्मा थारै में वास करै है। थारै में कोई बी जान ऊं मारण आळो, चोरी करण आळो अर गंदा काम करण आळो अर दूसरै गो काम खराब करण आळो ना होवै। जे थे यीसू मसी गा चेला होण गै कारण दुख बी झेलो तो सरमिन्दा ना होवो। पण ईं बात पर परमेसर गो धन्यवाद करो। क्यूंकै परमेसर आपगै लोगां में न्याय सुरू कर दियो है। इंया है तो परमेसर नै ना मानण आळां गो के हाल हो'सी? पवितर सासतर में इंया लिखेड़ो है कै, “जे धरमी आदमी नै बड़ी मुसकिल ऊं मुकती मिलैगी तो पापी लोगां गो के हाल हो'सी?” ईंखातर झिका परमेसर गी इच्छा गै अनुसार दुख झेलै बे आपगा आच्छा काम कर'गे आपगै मन नै पूरी तरियां बिस्वास योग्य सरसटी करण आळै परमेसर गै हात में सूंप दैय। हे बिस्वासी मण्डली गा अगुवा लोगों, मैं थानै ओ खत लिखगे होंसलो देवूं कै मैं बी एक अगुवो हूं। यीसू मसी गै दुख गो गवा बी हूं अर बिंगै दुसर आण गै टेम परगट होण आळी मेमा में बिंगै सागै सहभागी बी होऊंगा। जिंया गुआळियो भेड़ां नै संभाळै इंया थे बी परमेसर गै लोगां गी रुखाळी करो। ओ काम परमेसर नै खुस करण खातर पूरै मन ऊं करो। किंगैई केण पर ना करो। अर ना ओ काम धन गै लाळच में करो पण सेवा समझगे करो। झिका लोग परमेसर थानै दिया है बानै संभाळो अर बां पर कोई दबाब ना बणाओ। पण बां पर एक नमुनो बणो। यीसू मसी झिको सारां गो एक मोटो गुवाळियो है। बो आण गै टेम थानै मेमा गो एक मुकुट देवैगो झिकै गी सोभ्या कदी खत्म कोनी होवैगी। ईंतरिया जवानों, थे बी बिस्वासी मण्डली गै अगुवै लोगां गै अधीन में रेवो। एक दूसरै गी अधीनता में रेगे सेवा करो। क्यूंकै “परमेसर घमण्डी लोगां गो बिरोध करै पण दीन लोगां नै आसिस देवै।” ईंखातर परमेसर गी ताकत आळै हात गै नीचै रेवो। बो सई टेम आण पर थानै ऊंचा करसी। थे आपगी सारी चिंता बिं पर छोड़ दैयो क्यूंकै बो थानै संभाळण आळो है। चेतै में रेवो अर ध्यान राखो कै थारो बिरोधी सैतान एक सेर गी तरियां इंया फिरतो रेवै कै किनैई मार खाऊं। थे बिस्वास में मजबूत होगे सैतान गो सामणो करो। थानै ठा है कै दुनिया में दूसरा बिस्वासी बी इंया दुख झेलै। परमेसर आपगी दया सगळां पर करै। ईंखातर यीसू मसी गै द्वारा थानै अनन्त जीवन देण खातर मदद करी। थोड़ी देर खातर थे जे दुख झेलो तो परमेसर थानै पूरी तरियां मजबूत करैगो। परमेसर गी सकती सदां इंयाई होवंती रेवै। आमीन। भाई सिलवानुस ओ खत लिखण में मेरी मदद करी। मैं बिनै प्रभु गो एक बिस्वास योग्य चेलो समझ्यो। मैं थानै होंसलो देऊं कै परमेसर कितो दयालु है कै थे सारा बिंगै उपर बिस्वास राखो। बेबिलोण सैहर गी बिस्वासी मण्डली झिकी नै थारी तरियां परमेसर चुणी है, थानै निमस्कार केवै है। मसी में मेरो बेटो मरकुस बी थानै निमस्कार केवै। प्रेम ऊं लाड कोड कर'गे एक दूसरै नै निमस्कार केओ। थे सारा झिका यीसू मसी में हो, थानै सांती मिलती रेवै। आमीन। मैं समौन पतरस यीसू मसी गो सेवक अर खास चेला गी ओर ऊं, म्हारै बरगा खास अर आच्छा बिस्वास करण आळै लोगां नै ओ खत लिखण लागरयो हूं। बो बिस्वास थानै ईंखातर दियो है कै आपणो परमेसर अर मुकतीदाता यीसू मसी गी भलाई अर धारमिकता पर थे बिस्वास करयो। परमेसर गी ओर ऊं अर आपणै यीसू गै पेहचाण गै द्वारा थानै परमेसर गी किरपा अर सांती ओर बोळी मिलती रेवै। आपां आपणै जीवन खातर परमेसर नै किंया माना जिंया बो चावै ईंखातर परमेसर आपगी सामरथ गै द्वारा आपां नै सारो कीं दियो है। क्यूंकै आपां बिनै जाणा हां झिकै आपां नै आपगी मेमा अर धारमिकता गै अनुसार बुलाया है। इंगै द्वारा परमेसर आपां नै बे म्हान अर आच्छा वरदान दिया है झिका बण आपां नै देण गो वायदो करयो है। बिंगै द्वारा थे आप परमेसर गै सभाव बरगा होज्यो अर मसी पर बिस्वास ना करण आळै लोगां जिसा बुरा काम ना करो। अर ईंखातर थे सारी तरियां गी कोसिस कर'गे आपगै बिस्वास पर सदगुण अर सदगुण पर आच्छी समझ। अर आच्छी समझ ऊं बुरै काम नै छोड़गे आच्छो काम करण गी सोच अर बिंऊं धीरज अर धीरज ऊं भगती। अर भगती ऊं भाईचारो अर बिंऊं प्रेम बी बढतो जावै है। अर आं गुणां गी बढोतरी थारै में होवै है तो थानै आच्छा कामयाब बणा देसी। बिंऊं थानै आपणै प्रभु यीसू मसी गो सारो ग्यान मिलसी। पण कोई बी आदमी ईं तरियां ना जीयै तो बो एक आंधो है अर बो भूलग्यो कै बिंगा पेली आळा करेड़ा पाप परमेसर माफ कर दिया। ईंखातर हे भाईयो अर भेनों, ओ दिखाण खातर उणतावळ करो कै थानै परमेसर बुलाया अर चुण्या है क्यूंकै ऐ बातां करता रेवोगा तो कदी ठोकर कोनी खाओगा। ईं रीति ऊं आपां आपणै प्रभु अर मुकती देण आळै यीसू मसी गै अनन्त राज में बडै़ आदर मान ऊं जा सकांगा। ईंखातर जे थारै में ऐ बातां है अर झिको सच्चाई गो बचन थानै दूसरा ऊं मिल्यो है बिमै थे बण्या रेवो। फेर बी ऐ बातां मैं थानै याद दिरावंतो रेस्यूं। मैं चाऊं कै जद तांई मैं जींवंतो रेऊं ऐ बातां लगातार बतावंतो रेऊं जिंऊं थे ईं बात नै भूल ना जाओ। अर मैं जाणूं हूं कै मैं जल्दी मरण आळो हूं। क्यूंकै आ बात मनै प्रभु यीसू मसी गी पेलां ई बताएड़ी है। ईंखातर मैं हर तरियां गी कोसिस करतो रेऊं कै मेरै मर जाणै गै बाद बी थे लोग ऐ बातां याद राख सको। आपणै प्रभु यीसू मसी गै दुसर आण गै बारै में बताएड़ी बातां चापलूस अर मनघड़त कोनी क्यूंकै म्हे यीसू मसी गी सामरथ आपगी आंख्या ऊं देखी। जद बिनै परमेसर पिता कनूं आदर मान मिल्यो अर परमेसर झिको सारा ऊं मोटो है, बिंगी एक आवाज आई कै ओ मेरो लाडलो बेटो है। मैं इंऊं भोत खुस हूं। जद म्हे प्रभु गै सागै परमेसर गै पवितर पहाड़ में हा जद सुरग ऊं परमेसर गी आवाज म्हे सुणी। परमेसर गी बात बताण आळा गै द्वारा लिखेड़ी हर एक बात सच्च है। आ बात आपां सारा जाणां हा। ईं पर ध्यान देगे थे बी सारा आच्छा काम करण लागरया हो क्यूंकै ओ तो एक चानणो है झिको एक अंधेरै में चमकण लागरयो है। जद तांई दिन उगै अर थारै मना में दिनगै गो तारो उगै। थे ओ जाणल्यो कै पवितर सासतर गी कोई बी बात परमेसर गी बात बताण आळा गी मन घड़त क्हाणी कोनी। परमेसर गी बात आदमी गी आपगी बात कोनी होवै पण पवितर आत्मा गी ओर ऊं आदमी परमेसर गी बात बोलै। भोत साल पेलां जिंया झूठी बात करण आळा लोग हा। इंया झूठी सिक्सा देण आळा लोग बी आपणै बिचाळै होज्यैगा। बे परमेसर गै बारै में झूठी बात बोलता रेवै अर बांगी बात मानण आळा बी पूरी तरियां नास हो जावैगा। झिकै मालिक बानै आजाद करया है बे बिनै भूलगे बिनै आदर बी कोनी देवै। इंया कर'गे बे आपगै जल्दी होण आळै बिनास नै बुलावो देवैगा। भोत सारा लोग बांगै तरियां बेईमानी करसी अर बांगै कारण सच्चाई गो रा बदनाम हो'सी। लाळच गै कारण बे आपगी बणाऐड़ी बातां बतागे धन कमासी। बांगी सजा परमेसर भोत पेलां ई चुणगे राख राखी है। परमेसर बानै भोत जल्दी नास करैगो। क्यूंकै परमेसर पाप करण आळै सुरगदूतां नै बी कोनी छोड़या। बानै बी नरक गी अंधेरी कोठड़ी में बंद कर दिया कै न्याय गै दिन तांई बिंगै मा ई रेवै। भोत पेलां संसार में रेण आळा लोग परमेसर नै कोनी मानता। ईंखातर परमेसर बां पर जल प्रळय घाली। नूह झिको भलाई अर परमेसर गै आच्छै कामां गै बारै में बतावंतो, बिनै बचा लियो। नूह गै सागै सात लोग ओर बी बच्या। परमेसर सदोम अर अमोरा नगरां नै बिनास गी सजा देगे राख बणा दी। ओ कर'गे परमेसर इंया दिखावै कै बिनै ना मानण आळै लोगां सागै इंया होवै। परमेसर लूत नै बचा लियो झिको एक आच्छो आदमी हो। बो सदोम नगर गै लोगां ऊं खुस कोनी रेवंतो क्यूंकै बे परमेसर गै नेम नै कोनी मानगे बुरा काम करता। बो बांगै बिचाळै रेवंतो होयो अर बां लोगां गा बुरा काम हर एक दिन सुणगे अर देखगे बो भोत दुखी होवंतो क्यूंकै बो एक आच्छो आदमी हो। ईं तरियां परमेसर आपगी बात मानण आळै लोगां नै हर एक दुख ऊं बचागे राखै अर बुरै लोगां नै न्याय गै दिन तांई सजा देवंतो रेवै। मन गी बुरी इच्छा कर'गे झिका परमेसर गी बात कोनी मानै बानै परमेसर सजा देवै। अर ऐ लोग गळत काम करता जमाई कोनी डरै अर अपणै आप पर घमण्ड करै अर झिका लोग सुरग में है बांगो बी आदर मान कोनी करै अर बानै कीं कोनी समझै। ऐ सुरगदूत झिका सकती अर सामरथ में आं लोगां ऊं तकड़ा है, फेर बी प्रभु गै सामै झिका लोग सुरग में है बां पर कोई दोस कोनी लगावै। पण ऐ लोग तो सुन्नै जानवरां बरगा है। आंगो जन्म ईंखातर होवै कै दूसरा लोग आनै पकड़गे मार दैय। झिकां गै बारै में बानै कोई ध्यान ई कोनी बांगै बारै में बुरी बात बोलै। जिंया सुन्ना जानवर मर जावै है बिंया आनै बी नास कर दिया जावैगा। आनै बुराई गै बदळै बुराई मिलसी। अर दिन गै चानणै में बी बोळो खा पीगे मोज मस्ती करणी आनै आच्छी लागै। जद ऐ थारै कनै खाणो पीणो करण आवैगा तो आंगै मन में गळत बिचार हो'सी। ऐ लोग सदां ई गंदा काम करण गी झाक में रेवै। अर पाप करण में लारै कोनी रेवै। झिका मसी पर बिस्वास करै है झिका आच्छी तरियां मसी गै बारै में जाणै कोनी, हिस्यै लोगां नै भड़कागे गळत काम करण खातर ले जावै। आंगो मन पूरी तरियां लाळची है। अर परमेसर बां लोगां नै सराप देसी। आं सीधो रा छोड़गे गळत रा पकड़ लियो। ऐ लोग बओर गै बेटै बिलाम गै रा पर चालै, आनै गळत काम गी कमाई आच्छी लागै। परमेसर एक अणबोल गधी नै माणस गी बोली बुलागे, परमेसर गी बात बताण आळै बिलाम नै बुरा काम करण ऊं रोक दियो। ऐ झूठा सिक्सक लोग सुखी नेहर बरगा है। ऐ लोग बिना पाणी गा बादळ है झिका नै आंधी उड़ा लेज्यै। परमेसर आनै बिं अंधेरी कोठड़ी में बंद कर देसी। बे लोग आपगी गळत अर घमण्ड भरेड़ी बातां अर सरीर गी लालसावां नै जगागे साच्चै रा ऊं भटका देवै झिका भटकेड़ै लोगां ऊं अबी निकळण लागरया है। बे झूठा सिक्सक आप गळत काम करगे लोगां नै छुटकारै गो बचन दैय। झिको आदमी झिकै ऊं हार गेयो बो बिंगो गुलाम बणग्यो है। जे कोई प्रभु अर मुकती देण आळै यीसू मसी नै जाणल्यै अर संसार गै गळत काम ऊं बचगे फेर बी बिमै फसज्यै तो बिंगी हालत पेलां ऊं ओर बोळी खराब होज्यैगी। म्हे परमेसर गै अनुसार पवितर जीवन जीण खातर परमेसर गी देएड़ी आग्या नै ना माना इंऊं आच्छो है परमेसर गी आग्या गै बारै में म्हानै पतो ई ना लागतो। बांगै सागै बिंयाई बिती जिंया कहावत में केयैड़ो हो कै कुत्तो आपगी करेड़ी उल्टी खुद'ई खावै अर नहायेड़ी सुरड़ी पाछी कीचड़ में जावै। हे मेरा भाईयो अर भेनों, मैं थानै एक खत पेलां लिख्यो अर अब दूसरो खत लिखण लागरयो हूं। आं दोनां खतां में मैं थानै होंसलो देगे याद कराऊं कै झिको कीं केयो है बिनै ठीक तरियां ऊं मानता रेवो। परमेसर गी बात बताण आळा गी बात अर म्हारै मुकती देण आळा यीसू मसी गै खास चेला गै द्वारा केयेड़ी बातां नै बी मैं थानै याद करवाऊं। सारा ऊं पेलां ओ जाण लेणो चईयै कै अंत गै दिनां में सच्चाई गी मजाक उडाण आळा आवैगा अर आपगी इच्छा पूरी करण खातर गळत काम करता रेवैगा। अर बे लोग इंया केवैगा कै बिंगो के होयो झिकै नै थे उडीकण लागरया हा? क्यूंकै थारा बडेरा तो चाल बस्या पण सरसटी बणाण ऊं लेगे सारी चिजां बिंया है जिंया आज। पण जद बे भूल जावै कै परमेसर गै बचन द्वारा आसमान बणाएड़ो है अर धरती पाणी ऊं बणी अर पाणी में टिकेड़ी है। अर इंऊं परमेसर जल प्रळय गै द्वारा पेलां गै संसार नै खत्म करयो। पण ओ आकास अर धरती झिकी आज है परमेसर गै बिं आदेस गै द्वारा आग ऊं नास होण खातर राखेड़ी है झिकै दिन परमेसर नै ना मानण आळा नै नास करया जावैगा। प्यारा बेलियो, ईं बात नै भूल ना जाईयो। प्रभु गो एक दिन एक हजार साल गै बराबर है अर एक हजार साल एक दिन गै बराबर है। केई लोग इंया सोचै है कै परमेसर आपगै करेड़ा वायदा में देर लगावै। पण बो आपणै पर धीरज राखै। अर बो कोई बी आदमी नै नास कोनी होण देणो चावै पण चावै है कै सारा मन बदळै। पण प्रभु गो दिन होळै'सी चोर गी तरियां आवैगो। बिं दिन भयंकर गरजनां गै सागै आसमान अर झिको कीं बिंगै मा है सारो कीं विलीन हो जावैगो। अर धरती अर धरती पर झिकी चिजां है बळ ज्यैगी। जद ओ ईं तरियां सारो कीं नास हो'सी। ईंखातर थे लोग सोचो कै आपणो जीवन हिस्यो होणो चईयै अर आपणो जीवन परमेसर गी इच्छा गै अनुसार पवितर होणो चईयै। अर थानै परमेसर गै न्याय गै दिन गी उडीक करणी चईयै। बिं दिन नै ल्याण खातर कोसिस बी करो। बो दिन आण तांई आकास आग गी लपटा में बळगे नास हो जावैगो। अर आकास गै मा झिको कीं है आग ऊं बळगे पिंगळ जावैगो। पण आपां परमेसर गै बचन गै अनुसार नुअ आकास अर नुई धरती गी उडीक करण लागरया हां जठै धरमी लोग वास करैगा। ईंखातर हे प्यारा बेलियो, थे आं बातां गी उडीक करण लागरया हो अर पूरी कोसिस करो कै प्रभु गी नजर में सांती ऊं अर बिना दोस अर कोई बी पाप आपणै में ना पायो जावै। आपणै प्रभु गै धीरज नै थे इंया समझो कै बो सारां नै पाप ऊं माफी गो मोको देणो चावै। ऐ बातां आपणै प्यारै पौलुस परमेसर गै द्वारा देएड़ै ग्यान ऊं लिखेड़ी है। पौलुस आपगै सारै खता में आ बात लिखी है। पण केई बातां समझण में ओखी है। जिंया बिस्वास में कमजोर लोग अर अणपढ लोग पवितर सासतर गी दूसरी किताबां सागै करै है बिंयाई ईं किताब गै बारै में अरथ गळत बतावै है। इंऊं बे आपगै पगां पर आप कुल्हाडी मारै है। हे प्यारा बेलियो, थानै ऐ बातां पेलां ऊं ई पतो है कै थे बुराई अर गळत लोगां गै द्वारा भटकगे आपगी जिग्यां ऊं पड़ ना जाईओ। इंऊं सावधान रेवो। पण आपणै प्रभु अर मुकती देण आळै यीसू मसी गी किरपा अर ग्यान में आ'गै बढता जाओ। अर आखरी टेम तांई आपां सारा बिंगी मेमा करता रेवा। आमीन। हे भाईयो अर भेनों, म्हे थानै यीसू गै बारै में लिखण लागरया हां, झिको जीवन गो बचन है। बो सरसटी गै सुरू ऊं ई हो, म्हे इंऊं सुण्यो है, आपगी आख्यां ऊं ध्यान ऊं देख्यो, अर आपगै ई हातां ऊं म्हे छूयो है। बिं जीवन गो ग्यान म्हानै परमेसर करायो। म्हे बिनै देख्यो । म्हे बिंगा गवा हां अर अब म्हे थानै बिं अनन्त जीवन गो समाचार देवां झिको पिता गै सागै हो अर म्हारै पर परगट होयो। झिको कीं म्हे देख्यो है अर सुण्यो है थानै बी बिंगो उपदेस देवां। पण थे बी म्हारै सागै साझेदारी करो। आपणी आ साझेदारी पिता परमेसर अर बिंगै बेटै यीसू मसी गै सागै है। म्हे आं बातां नै थानै लिखण लागरयां कै आपणी सारां गी खुसी में कोई कमी ना रेज्यै। म्हे यीसू मसी ऊं झिको सुब समाचार सुण्यो है, बो ओ है अर इनै ई म्हे थानै सुणावां हां, परमेसर जोती है अर बिमै कीं बी अन्धेरो कोनी है। जे आपां केवां कै आपां बिंगै सागै सांझेदार हां अर पाप गै अन्धेरै में चालां, तो आपां झूठ बोलण लागरया अर सच्चाई पर कोनी चालण लागरया। पण जे आपां जोती में चालां, जिंया परमेसर जोती में है, जद आपां एक दूसरै गै सागै सांझेदार हां, अर परमेसर गै बेटै यीसू गो खून आपणै पापां नै माफ करै है। जे आपां केवां कै आपां कोई पाप कोनी करयो तो आपां अपणै आपनै धोखो देवां अर आपणै में सच्चाई कोनी है। पण जे आपणै पापां नै मान लेवां तो आपणै पापां नै माफ करण गै खातर परमेसर बिस्वास गै लाइक है अर धरमी है अर आपां सारा नै पवितर कर'गे हर पापां ऊं बचावै। जे केवां कै आपां कोई पाप कोनी करयो तो आपां बोलां हां परमेसर झूठो है अर बिंगा बचन आपणै में कोनी है। मेरा प्यारा बच्चों, ऐ बातां मैं थानै ईंखातर लिखण लागरयो हूं कै थे पाप ना करो। पण जे कोई पाप करै है तो धरमी यीसू मसी परमेसर ऊं आपणै पापां नै माफ करण खातर बिनती करै है। यीसू मसी ई एक बलिदान है झिको आपणै पापां गो पछतावो है अर ना आपणै पापां गो पण सारै संसार गै लोगां गै पापां गो बी। जे आपां परमेसर गी आग्या गो पालण करां तो आपां सच्च में बिनै जाण लियो है। जे कोई केवै है कै, “मैं परमेसर नै जाणू हूं,” अर बिंगी आग्या गो पालण कोनी करै तो बो झूठो है। बिंगै मन में सच्चाई कोनी है। पण झिको परमेसर गी आग्या गो पालण करै है तो परमेसर गै प्रेम ऊं भरेड़ो है झिकै ऊं आपां नै ठा लागै कै आपां परमेसर में हां। झिको ओ केवै है कै मैं परमेसर में बण्यो रेऊं हूं, बिनै यीसू गी तरियां चालणो चईयै। हे प्यारा भाईयो अर भेनों, मैं थानै कोई नुई आग्या कोनी लिखण लागरयो हूं पण आ एक पुराणी आग्या है, झिकी थानै सुरू में ई मिली है, आ पुराणी आग्या बो बचन है झिको थे सुण लियो हो। फेर बी मैं थानै एक ओर दूसरी नुई आग्या लिखण लागरयो हूं। आ सच्चाई मसी गै जीवन में अर थारै जीवना में दिख सकै है क्यूंकै अन्धेरो मिट जावैगो अर सच्ची जोती चमकती ई रेवै है। झिको केवै है, “मैं जोती में हूं” अर फेर बी आपगै बिस्वासी भाई अर भेनां ऊं नफरत करै है, तो बो अजे तांई अन्धेरै में रेवै है। झिको आपगै भाई अर भेन नै प्रेम करै है, बो जोती में रेवै है। बिंगै जीवन में हिस्यो कीं बी कोनी है झिकै ऊं बो कोई पाप में पड़ै। पण झिको आपगै भाई अर भेन ऊं नफरत करै है, अन्धेरै में है अर बो अन्धेरै में चालै है। बो कोनी जाणै, बो कठै जाण लागरयो है क्यूंकै अन्धेरै बिनै आंधो बणा दियो है। हे बच्चों, मैं थानै लिखण लागरयो हूं, कै परमेसर यीसू मसी गै कारण थारा पाप माफ करया है। हे पिताओं, मैं थानै लिखण लागरयो हूं, क्यूंकै झिको अनादि काल ऊं है बिनै थे जाणै हो। हे जवानों, मैं थानै ईंखातर लिखण लागरयो हूं, क्यूंकै थे बिं दुस्ट-सैतान ऊं जीत ग्या। हे बच्चों, मैं थानै लिखण लागरयो हूं, क्यूंकै थे पिता परमेसर नै पिछाण लियो है। हे पिताओं, मैं थानै लिखण लागरयो हूं, क्यूंकै थे झिको सरसटी गै अनादि काल ऊं है बिनै जाण लियो है। हे जवानों, मैं थानै लिखण लागरयो हूं, क्यूंकै थे सकतीसाली हो, परमेसर गो बचन थारै मा वास करै है अर थे बिं दुस्ट-सैतान ऊं जीत ग्या। संसार गी अर संसारिक चिजां ऊं प्रेम ना करो। जे कोई संसार ऊं प्रेम करै है तो बिंगै मन में पिता परमेसर गो प्रेम कोनी है। क्यूंकै ईं संसार गी हर एक चीज आंख्यां गी लाळसा अर ईं संसार गी लाळसा, झिकी पर लोग इतो घमण्ड करै है। बो पिता परमेसर गी ओर ऊं कोनी है पण बो तो संसारिक है। ओ संसार अर इंगी लाळसा अर इच्छावां मिटती जावै है पण बो झिको परमेसर गी इच्छा गो पालण करै है, बो सदां ई बण्यो रवैगो। हे प्यारा बच्चों, अन्त गो टेम है; अर जिंया कै थे सुण्यो है कै मसी गो बिरोधी आण लागरयो है। ईंखातर अब भोत सारा मसी गो बिरोध करण आळा परगट हो'ग्या है। इंऊं आपां जाणा कै अन्त गो टेम है। बे मसी गा दुसमण आपणै माऊं निकळै पण सच्च में बे आपणा कोनी है क्यूंकै जे बे सच्च में आपणा होंता तो आपणै सागै ई रेवंता। पण बे आपां नै छोड़ग्या जिंऊं ओ ठा लागज्यै कै बामूं कोई बी सच्च में आपणो कोनी है। पण थारो तो मसी पवितर आत्मा ऊं अभिसेक करयो है। ईंखातर थे सारा सच्चाई नै जाणो हो। मैं थानै ईंखातर कोनी लिख्यो है कै थे सच्चाई नै कोनी जाणो हो, पण थे तो बिनै जाणो हो अर सच्चाई ऊं कोई झूठ कोनी निकळै। पण झिको ओ केवै है कै यीसू मसी कोनी है, बो झूठो है। हिस्यो आदमी मसी गो दुसमण है। बो तो पिता परमेसर अर बेटै दोनां नै कोनी मानै है। झिको बेटै नै कोनी मानै है, बो पिता नै बी कोनी मानै है। पण झिको बेटै नै मानै है, बो पिता नै बी मानै है। झिको बचन थे आदि काल ऊं सुण्यो है, थे बिमै बण्या रेवो तो थे बेटै अर पिता दोनां में बण्या रेवोगा। अर ईंखातर यीसू मसी आपां सारा नै अनन्त जीवन देण गो बचन दियो है। मैं ऐ बातां थानै बां लोगां गै बारै में लिखण लागरयो हूं, झिका थानै भरमावै है। पण थे तो बिं पवितर आत्मा में बणया रेवो। थानै सिखाण खातर किंगी जरूरत कोनी। परमेसर गी आत्मा सारो कीं सिखावै है अर झिको बा सिखावै झूठ कोनी, सच्च है। पवितर आत्मा गी आग्या गो पालण करता रेईयो अर मसी में बण्या रेईयो। ईंखातर प्यारा बच्चों, मसी में बण्या रेवो अर बांगै दुसर आण गै बारै में पूरो बिस्वास राखो जिंऊं आपां नै बांगै आण पर, बांगै सामणै सर्मिंदा ना होणो पड़ै। जे थे ओ जाणो हो कै मसी धरमी है तो थे ओ बी जाणल्यो कै बो झिको धरम पर चालै है परमेसर गो ई बेटो है। देखो, पिता परमेसर आपणै ऊं कितो म्हान प्रेम करयो है कै आपां सारा बिंगा बेटा-बेटी कहला सकयां अर सच्च में आपां सारा हां। संसार गा लोग आपां नै कोनी पिछाणै क्यूंकै बे परमेसर नै कोनी पिछाणै। हे प्यारा भाईयो अर भेनों, आपां परमेसर गी उळाद हां पण अजे तांई ओ परगट कोनी होयो कै भविस्य में आपां सारा के होवांगा? आपां ओ जाणा कै मसी गै दुबारै आण पर आपां बिनै ठीक बिंयाई देखांगा जिंया बो है, आपां बिंगै तरियां होज्यांगा। हर कोई झिको मसी पर हिसी आस राखै है, बो अपणै आपनै बिंयाई पवितर करै है जिंया मसी पवितर है। झिको कोई पाप करै है, बो परमेसर गै नेम नै तोड़ै है क्यूंकै नेम गो तोड़णो ई पाप है। अर थे तो जाणो हो कै मसी लोगां गै पापां नै हरण खातर ई परगट होयो, अर बिमै कोई पाप कोनी। झिको कोई मसी में बण्यो रेवै है, पाप कोनी करै पण हर कोई झिको पाप करतो रेवै है बण ना तो बिनै देख्यो है अर ना कदैई बिनै जाण्यो है। हे प्यारा बच्चों, थे भटक ना जाईयो। झिको धरम गो काम करतो रेवै है, बो धरमी है, बिंयाई जिंया मसी धरमी है। झिको पाप करतो ई रेवै है, बो सैतान गो है क्यूंकै सैतान आदि काल ऊं पाप करतो आयो है। ईंखातर परमेसर गो बेटो परगट होयो कै बो सैतान गै काम नै नास करै। झिको परमेसर गो बेटो बणज्यै, पाप कोनी करै, क्यूंकै बिंगो बीज तो बिमै रेवै। बो पाप कोनी करै क्यूंकै बो परमेसर गो बेटो बणग्यो है। ईंखातर आपां बोल सकां कै परमेसर गो बेटो कुण है? अर सैतान गो बेटो कुण है? झिको धरम पर कोनी चालै अर आपगै भाई नै प्रेम कोनी करै, बो परमेसर गो बेटो कोनी है। ओ उपदेस थे सरू ऊं ई सुण्यो है कै आपां नै आपसरी में प्रेम करणो चईयै। आपां केन गी तरियां कोनी हां झिको दुस्ट ऊं हो अर झिकै आपगै भाई हाबिल नै मार दियो हो। बण आपगै भाई नै क्यूं मारयो? बण ईंखातर मारयो कै केन गा काम बुरा हा अर बिंगै भाई हाबिल गा काम धरम गा हा। हे भाईयो अर भेनों, जे संसार थारूं बैर राखै है, तो अचंभो ना करियो। जे कोई एक दूसरै ऊं प्रेम ना राखै तो बो नरक गो भागी है पण आपणै बिस्वासी भाई भेनां गै आपसरी प्रेम भाव ऊं आ बात पूखता हो'ज्यै कै आपां नरक ऊं बचग्या अर आपां नै अनन्त जीवन मिलग्यो। झिको आपगै भाई भेन ऊं नफरत करै है, समझो बो हत्यारो है अर थे तो जाणो ई हो कै कोई हत्यारै नै अनन्त जीवन कोनी मिल सकै। यीसू मसी आपणै खातर आपगो जीवन बलिदान करयो। इंऊं जाणा कै प्रेम के है? आपां बी आपगै भाईयां अर भेनां खातर आपगी जान देणी चईयै। झिका कनै जादा धन है, अर झिको आपगै भाई अर भेन नै कंगाल देखगे बी बिं पर दया कोनी करै, बिमै परमेसर गो प्रेम किंया बण्यो रे सकै है? हे प्यारा बच्चों, आपणो प्रेम सब्दा अर बातां तांई ई कोनी रेणो चईयै पण बो प्रेम काम गै द्वारा साच्चो होणो चईयै। आपणै सारां गा काम दिखावैगा कै आपां सच्चाई गा हां जद आपां परमेसर गै सांमणै पूरै भरोसै ऊं खड़या होजावांगा। पण आपणो मन जद बी आपां नै बुरै कामां ऊं रोकै है तो परमेसर आपणै मन ऊं मोटो है अर बो सारो कीं जाणै है। प्यारा भाईयो अर भेनों, जे आपां दोसी ना हां तो आपां पूरै बिस्वास गै सागै परमेसर गै सामणै आ सकां। अर झिको कीं आपां बिंऊं मांगा, बो मिलै है क्यूंकै आपां बिंगी आग्या पर चालण लागरया हां अर बे काम करां, झिका बिनै आच्छा लागै। बिंगी आग्या आ है कै आपां बिंगै बेटै यीसू मसी गै नाम में बिस्वास राखां अर जिंया कै बण आपां नै आग्या दी है आपां एक दूसरै ऊं प्रेम करां। झिको बिंगी आग्या गो पालण करै है बो बिमै बण्यो रेवै है अर बिमै परमेसर गो वास होवै है। ईं तरियां, पवितर आत्मा गै द्वारा झिकी परमेसर आपां नै दी है, आपां इंऊं जाणा कै आपणै मा परमेसर रेवै है। हे प्यारा भाईयो अर भेनों, हरेक आत्मा गो बिस्वास ना करो पण सदां बिनै परखगे देखो कै बा परमेसर गी ओर ऊं है या कोनी? क्यूंकै भोत ई झूठी बात बताण आळा संसार में फेलेड़ा है। परमेसर गी आत्मा नै थे ईं तरियां पिछाण सको हो कै झिकी आत्मा ओ मानै है कै, यीसू मसी आदमी गै रूप में धरती पर आयो है। बो परमेसर गै कानी ऊं है। अर झिकी आत्मा यीसू नै कोनी मानै है, बो परमेसर गै कानी ऊं कोनी है। बाई तो मसी गै दुसमण गी आत्मा है, झिकै गी बातां थे सुणी है, बो आण आळो है अर बो ईं संसार में ई है। हे प्यारा बच्चों, थे परमेसर गा हो। ईंखातर थे मसी गै दुसमणा ऊं जीत ग्या। क्यूंकै बो परमेसर झिको थारै में है, संसार में रेण आळै सैतान ऊं मोटो है। बे लोग संसार गा है। ईंखातर बे झिको कीं बोलै है, बो संसारिक है अर संसार ई बांगी सुणै है। आपां परमेसर गा हां झिका परमेसर नै जाणै बो आपणी सुणै है, पण झिको परमेसर गो कोनी है बो आपणी कोनी सुणै है। ईं तरियां आपां सच्चाई गी आत्मा नै अर लोगां नै भटकाण आळी आत्मा नै पिछाण सकां। हे प्यारा मित्रों, आपां सारा आपसरी में प्रेम करां। क्यूंकै प्रेम परमेसर ऊं मिलै है अर हर कोई झिको प्रेम करै है, बो परमेसर गो बेटो बणग्यो है अर परमेसर नै जाणै है। झिको प्रेम कोनी करै है, परमेसर नै कोनी जाणै है। क्यूंकै परमेसर ई प्रेम है। परमेसर आपगो प्रेम ईं तरियां दिखायो है: बण आपगै इकलोतै बेटै नै ईं संसार में भेज्यो कै आपां सारा बिंगै बेटै गै द्वारा जीवन पा सकां। साच्चो प्रेम इमै कोनी कै आपां सारा परमेसर ऊं प्रेम करयो है, पण इमै है कै एक हिस्यै बलिदान गै रूप में झिको आपणै पापां नै मानण खातर बण आपगै बेटै नै भेजगे आपणै खातर आपगो प्रेम दिखायो है। हे प्यारा भाईयो अर भेनों, जे परमेसर इंया आपणै पर आपगो प्रेम दिखायो है तो आपां बी एक दूसरै ऊं प्रेम करणो है। परमेसर नै कदी कणैई देख्यो कोनी है, पण जे आपां सारा आपसरी में प्रेम करां तो परमेसर आपणै मा वास करै है अर बिंगो प्रेम आपणै मा सिद्ध हो'ग्यो है। ईं तरियां आपां जाण सकां कै आपां पिता परमेसर में ई रेवां अर बो आपणै मा रेवै है। क्यूंकै बण आपगी पवितर आत्मा आपां नै दी है। इंऊं म्हे देख्यो है अर म्हे इंगा गवा हां कै पिता परमेसर संसार गै मुकतीदाता गै रूप में आपगै बेटै नै घाल्यो है। जे कोई ओ मानै है कै, “यीसू परमेसर गो बेटो है,” तो परमेसर बिमै रेवै है अर बे परमेसर में रेवै है। झिको प्रेम परमेसर आपणै खातर दियो है बिं प्रेम नै आपां जाणा हां अर बिस्वास बी करां। परमेसर प्रेम है अर झिको प्रेम में बण्यो रेवै है, बो परमेसर में बण्यो रेवै है अर परमेसर बिमै बण्यो रेवै है। आपणै मा ईं रूप में प्रेम सिद्ध होयो है कै न्याय गै दिन आपां सारा बिस्वास में बण्या रेवां। आपणो ओ बिस्वास ईंखातर बण्यो है कै आपां ईं संसार में झिको जीवन जीण लागरया, बो मसी गै जीवन जिस्यो है। प्रेम में कोई डर कोनी होवै पण पूरो प्रेम तो डर नै भजा दैय। पण डर तो बिमै है, झिकै में प्रेम सिद्ध कोनी होयो क्यूंकै डर गो रिस्तो तो सजा ऊं होवै है। आपां प्रेम करां हां क्यूंकै पेलां परमेसर आपणै ऊं प्रेम करयो है। जे कोई केवै है, “मैं परमेसर नै प्रेम करूं हूं,” अर आपगै भाई भेन ऊं नफरत करै है झिका नै बण देख्या है बाऊं प्रेम कोनी करै तो झिकै परमेसर नै बण देख्यो ई कोनी, बिनै प्रेम किंया कर सकै। मसी ऊं आपां नै आ आग्या मिली है कै झिको परमेसर नै प्रेम करै है, बिनै आपगै भाई ऊं बी प्रेम करणो चईयै। झिको कोई ओ बिस्वास करै है कै यीसू मसी परमेसर गो बेटो है अर झिको पिता परमेसर ऊं प्रेम करै है बो बिंगी उळाद ऊं बी प्रेम करैगो। जे आपां परमेसर गी आग्या गो पालण करां तो आपां जाण लेवां कै आपां परमेसर गी उळाद ऊं प्रेम करां। जे आपां बिंगी आग्या गो पालण करां अर माना तो आपां परमेसर ऊं प्रेम करां। बिंगी आग्या ओखी कोनी है। क्यूंकै हर झिको कोई परमेसर गो बेटो संसार गै उपर जीत पा लेवै है अर संसार गै उपर आपां नै झिकै ऊं जीत मिली है, बो है आपणो बिस्वास। जे ओ बिस्वास करै है कै यीसू परमेसर गो बेटो है, बोई संसार नै जीत सकै है। बो यीसू मसी ई है झिको आपणै कनै आयो अर बतिस्मो लियो अर खून बहायो। एकलो बतिस्मो कोनी, पण बतिस्मो लियो अर खून बी बहायो हो। अर बा पवितर आत्मा है झिकी बिंगी गवाई देवै है क्यूंकै आत्मा ई सच्चाई है। गवाई देण आळा तीन है। आत्मा, पाणी अर खून अर ऐ तीनूं एक ई गवाई देवै है। आपां आदमी गै द्वारा देएड़ी गवाई नै माना, पण परमेसर गी गवाई बिंऊं मोटी है। आपगै बेटै यीसू गै बारै में गवाई बण दी है। बो झिको परमेसर गै बेटै पर बिस्वास राखै है, बो आपगै मा गवाई राखै। बिं पर झिको बिस्वास कोनी राखै, बो परमेसर नै झूठो मानै है। क्यूंकै बो परमेसर गै आपगै बेटै गै बारै में देएड़ी बातां में बिस्वास कोनी राखै है। अर बा गवाई आ है: परमेसर आपां नै अनन्त जीवन दियो है अर बो जीवन बिंगै बेटै यीसू गै द्वारा मिल्यो है। झिको बिंगै बेटै नै मानै है, बिंगै कनै अनन्त जीवन है। पण झिको परमेसर गै बेटै नै कोनी मानै है, बो परमेसर गै सागै अनन्त जीवन कोनी जी सकै है। परमेसर में बिस्वास राखण आळो, थानै ऐ बातां ईंखातर लिखण लागरयो हूं झिकै ऊं थे ओ जाणल्यो कै अनन्त जीवन थारो है। आपणो परमेसर में पूरो भरोसो है कै जे आपां बिंगी इच्छा गै अनुसार बिंऊं बिनती करां तो बो आपणी सुणै है जद आपां जाणा कै झिको कीं आपां मांगा बो आपणी सुणै है तो आपां ओ बी जाणा कै झिको आपां मांगयो है, बो आपां नै दियो है। जे कोई देखै है कै बिंगा भाई अर भेन कोई हिस्यो पाप करण लागरया है झिका गो फळ मोत कोनी है, तो बांगै खातर परमेसर ऊं पराथना करणी चईयै अर परमेसर बानै जीवन देवैगो। मैं बांगै खातर जीवन गै बारै में बात करण लागरयो हूं, झिका हिस्यै पाप में लागेड़ा है, झिको बानै मोत तांई कोनी लेगे जावैगो। हिस्यो पाप बी होवै है झिकै गो फळ मोत है। इंगै बारै में बिनती करण खातर कोनी केण लागरया हूं। सारा बुरा काम पाप है। पण हिस्यो पाप बी होवै है झिको मोत कानी कोनी ले जावै। आपां जाणा कै झिको कोई परमेसर गो बेटो बणग्यो, बो पाप कोनी करै। परमेसर गो बेटो बिंगी रक्सा करै। बो दुस्ट बिंगो कीं कोनी बिगाड़ सकै। आपां जाणा कै आपां परमेसर गा हां। पण ओ सारो संसार बिं दुस्ट गै बस में है। पण आपां नै ठा है कै परमेसर गो बेटो, यीसू मसी आ'ग्यो है अर बण आपां नै ग्यान दियो है कै आपां बिं साच्चै परमेसर नै जाणल्या। अर आपां बिमै हां, झिकी सच्चाई है, क्यूंकै आपां बिंगै बेटै यीसू मसी में पक्का हां। बोई सच्चो परमेसर है अर बोई अनन्त जीवन है। हे बच्चों, अपणै आपनै झूठै देवतावां ऊं दूर राखो। मैं यूहना, बिस्वासी मण्डली गो मुखिया ओ खत लिखण लागरयो हूं, बिं लुगाई नै झिकी परमेसर चुणी ही अर बिंगै टाबरा गै नाम झिका नै मैं साच्चो प्रेम राखूं हूं, अर मैं ई कोनी पण बे सारा प्रेम करै है झिका परमेसर ऊं आएड़ा है अर बे सच्चाई नै जाणै है। मैं थानै प्रेम राखूं क्यूंकै बा सच्चाई झिकी आपणै में रेवै है अर सदां ई आपणै सागै रेवैगी। परम पिता परमेसर अर परमेसर गो बेटो यीसू मसी आपां नै किरपा, दया अर सांती देवै अर सच्चाई, प्रेम सदां आपणै सागै रेवैगो। आमीन। थारी बिस्वासी मण्डली गै कीं टाबरां नै बा सच्चाई झिकी आपां नै परम पिता ऊं मिली है बिं तरियां जीवन जींवता देखगे मैं भोत राजी हूं। अर मैं थानै अब दुबारै याद कराऊं कै आपां नै आपसरी में प्रेम करणो चईयै। मैं थानै कोई नुई आग्या कोनी पण बिं आग्या नै लिखण लागरयो हूं, झिकी आपां नै आदि काल ऊं मिली है। प्रेम गो मतलब ओ ई है कै आपां बिंगी आग्या पर चालां। आ बाई आग्या है झिकी थे सरू में ई सुणी है कै थानै प्रेम गै सागै चालणो चईयै। संसार में भोत ई भटकाण आळा है। झिका ओ कोनी मानै कै ईं धरती पर आदमी गै रूप में यीसू मसी आयो हो, बे भटकाण आळा है अर मसी गा दुसमण है। आपगै बारै में सावधान रेवो। अर झिकी मेनत म्हे करी है बिनै थे गमा ना देईयो, पण थे बिंगो पूरो प्रतिफळ पावो। झिको कोई भोत दूर उड़ग्यो है अर मसी गै बारै में बण्यो कोनी रेवै, परमेसर बिंगै कनै कोनी है अर झिको बिंगी सिक्सा में बण्यो रेवै है, पिता परमेसर अर बिंगो बेटो यीसू मसी दोनूं ईं बिंगै सागै है। जे कोई थारै कनै आ'गे ओ संदेस कोनी देवै है तो आपगै घरे बिंगो आदर सत्कार ना करो अर बिंगै सुवागत में निमस्कार बी ना बोलो। क्यूंकै झिको हिस्यै आदमी गो निमस्कार करै है, बो बिंगै बुरै कामां में भागिदार बणै है। थानै लिखण नै मेरै कनै भोत सारी बातां है पण बानै मैं कागज अर स्याई ऊं कोनी लिखणो चाऊं। पण मनै भरोसो है कै थारै कनै आ'गे आमै-सांमै बेठगे बातां करूंगा। झिकै ऊं आपणी खुसी पूरी होवैगी। तेरी चुणेड़ी भेन गा टाबर थानै निमस्कार केवै है। मैं यूहना, बिस्वासी मण्डली गो मुखिया ओ खत लिखण लागरयो हूं, मेरै प्यारै साथी गायुस गै नाम झिकै नै मैं साच्चो प्रेम करूं हूं। हे मेरा प्यारा साथी, जिंया तूं आत्मा अर सरीर में बदण लागरयो है, बिंयाई सारी तरियां ऊं आगै बदतो रेवै अर आच्छो भलो रेवै। आमीन। मेरा प्यारा मित्रों, जद म्हारै कीं बिस्वासियां मेरै कनै आ'गे थारी बिं सच्चाई गी गवाई दी झिकी पर तूं साची चालै हो तो मैं भोत खुस होयो। मनै इंऊं बड़ी ओर कोई खुसी कोनी कै मैं सुणूं कै मेरा बिस्वासी बच्चा सच्चाई पर चालै है। हे मेरा प्यारा मित्र, थे म्हारै भाईयां गै सागै झिको कीं करो बो बिस्वास गै सागै करो। पण बे आदमी थारै खातर अणजाण है। बिस्वासी मण्डली गै लोगां गै सांमणै थारै प्रेम गी गवाई दी है। बांगी यातरा नै बणाए राखण खातर बांगी ईं तरियां मदद करणी है जिंया परमेसर मदद करै। क्यूंकै बे यीसू मसी गी सेवा खातर यातरा पर निकळ पड़या है अर बे यीसू मसी पर बिस्वास ना करण आळा ऊं कोई मदद कोनी ली। ईंखातर आपां बिस्वासियां नै हिस्या आदमियां गी मदद करणी चईयै, ईंखातर आपां बी सच्चाई गै पक्स में बांगै सागै होवां। एक खत मैं बिस्वासी मण्डली नै पेलां ई लिख्यो हो पण दियुतरिफेस झिको बिस्वासी मण्डली गो अगुवा बणनो चावै है, झिको म्हे केवां हां बिनै बो मानै कोनी। जद मैं आऊंगा तो बिस्वासी मण्डली गै लोगां नै बताऊंगा कै बो के करण लागरयो है। बो झूठ बोलण गै सागै मेरै उपर दोस लगावै है अर आं बातां ऊं बो दुखी कोनी है, बो आपणै गाम गाम फिरगे परचार करण आळै बिस्वासी भाईयां गो आदर कोनी करै है पण झिको आदर करै है, बानै मना कर'गे बिस्वासी मण्डली ऊं बारै काढ देवै है। हे प्यारा मित्रों, बुराई कोनी पण भलाई करो। झिको भलाई करै है बो परमेसर गो है अर झिको बुराई करै है बण परमेसर नै कोनी देख्यो। दिमोतरियुस गै बारै में सारां आच्छी गवाई दी है अर सच्चाई गी बी गवाई दी है। म्हे बी बिंगै बारै में गवाई दी है। अर थे जाणो कै म्हारी गवाई साची है। थानै लिखण गै खातर मेरै कनै भोत सारी बातां है। पण मैं थानै कलम अर स्याई ऊं लिखणो कोनी चाऊं। पण मनै भरोसो है कै मैं थानै बेगो ई मिलूंगा जद आपां आमै सामै बातां करांगा। सांती थारै सागै रेवै। अठै गा सारां साथी थानै निमस्कार केवै। बठै गा म्हारै सारा साथियां नै निजी तोर ऊं निमस्कार केऊं। हे भाईयो अर भेनों, थानै परमेसर चुण्या है अर प्रेम करै अर यीसू मसी बचा राख्या है। थानै निमस्कार। मैं यहूदा, झिको यीसू गो दास अर याकूब गो भाई हूं। ओ खत मैं थानै लिखूं हूं। थानै परमेसर गी दया, सांती अर प्रेम मिलतो रेवै। आमीन। हे भाईयो अर भेनों, मैं हमेसा आई कोसिस करूं कै मैं थानै बिं मुकती गै बारै में लिखूं झिकी आपणै सारां खातर है तो मैं थानै ओ समझाणो जरूरी समझ्यो कै बिं बिस्वास में बढता जाओ झिको पवितर लोगां नै परमेसर एकर ई दियो है। क्यूंकै आपणै बिचाळै हिस्या भोतसा झूठा गुरू लोग होळै सी घुसग्या है झिका गै बारै में पेलां ई पवितर सासतर में लिखेड़ो है अर बानै सजा मिलसी। ऐ धोखेबाज लोग आपणै परमेसर गी किरपा नै, लुचपन में बदळ दैय अर प्रभु यीसू मसी नै मानण ऊं इनकार करै। थे बिं बात नै याद करो कै जद परमेसर इसराएल गै मिनखां गी पीढी नै मिस्र देस गी गुलामी ऊं छुड़ाया हा अर बामूं केई लोगां परमेसर पर बिस्वास कोनी करयो तो बानै खत्म कर दिया हा। अर मैं थानै बां सुरगदूतां गै बारै में बी बताऊं झिका आपगै हक गै पद नै कोनी संभाळगे राख्यो अर बिनै छोड़गे भाजग्या। जद बानै परमेसर न्याय आळै दिन तांई अंधेरी कोठड़ी में सदां खातर बांद गै छोड़ दिया कै न्याय गै दिन आंनै सजा मिलै। अर बिंयाई सदोम अर अमोरा सैहर अर बिंगै आसै पासै गै सैहरां गा लोग बेबीचार में पड़ग्या। बानै बी परमेसर ना बुझण आळी आग में झोक दिया जिंऊं दूसरै नै बी आऊं सबक मिलै। इंयाई ऐ झूठा गुरू लोग है झिका बांगी तरियां कुकरम में फसगे आपगी देह नै खराब करै। अर प्रभु गी ताकत नै इतो म्हत्व कोनी देवै अर सुरग गी मेमा गै दूतां गै खिलाफ बोलै है। थानै याद होणो कै मीकाईल सुरगदूत झिको सारै सुरगदूता गो मुखिया है। बण मूसा गी ल्हास खातर सैतान ऊं जीरै करी कै आ ल्हास ले जाण गो हक किंगो है। जद बी बो सैतान नै आच्छो माड़ो कोनी बोल्यो, पण बण इतो ई केयो कै, “प्रभु ई तनै सजा देवै। ” पण ऐ मिनख तो झिकी बात जाणै ई कोनी, बिंगै बारै में आपगी मरजी ऊं बोलै। अणबोल जानवरां गी तरियां है झिका गै मन में आवै बोई बोलै। आ बुरी बातां गी बजह ऊं बांगो नास हो जावै। आंगै सागै बुरो हो'सी। ऐ लोग मिनख केन गी तरियां बुराई लारै चाल पड़या। अर ऐ धन गै लाळच में बिलाम गी तरियां करै है। अर कोरह गी तरियां बिरोध कर'गे नास होवै है। ऐ लोग थारै सागै भोज में भेळा होवै। पण ऐ बेसरम होगे आपगो पेट भरै। ऐ तो बिना पाणी गै बादळां बरगा है झिका ऊं कोई आस कोनी। अर पून ऊं उड़ता रेवै। ऐ बां दरखता गी तरियां है झिकै गै आपगी रुत में बी फळ कोनी लागै अर आखर में बिनै पटणो ओ ई पड़ै। ऐ लोग आपगै बुरै करमा गी गंदगी खिंडावै जिंया तूफान में समुंदर खिंडावै। ऐ लोग तारां गी तरियां है झिका इनै बिनै फिरता रेवै आंनै एक दिन नरक गै दरड़ै में पटकिजैगा। थे आं लोगां ऊं दूर रेईयो। हानोक झिको आदम गी सातवीं पीढी में हो, आं मिनखां गै बारै में बात करी कै, “देखो प्रभु आपगै लाखूं पवितर लोगां सागै आवैगो।” अर बो बां दुस्ट लोगां नै बांगै कुकरमा गै कारण सजा देसी अर बां कठोर बातां खातर बी झिकी बां प्रभु गै बारै में केयी है। क्यूंकै ऐ लोग बड़ बड़ाण आळा, दूसरां पर दोस ढूडण आळा, लाळसा गा गुलाम अर आपगै मूं ऊं घमण्ड गी बातां बोलण आळा अर आपगै फायदै खातर दूसरां नै देखगे बिंगी बडाई बोलण आळा लोग है। हे मेरा प्यारा भाईयो अर भेनों, थे आं बाता नै ना भूलियो झिकी आपां नै आपणै प्रभु यीसू मसी गै खास चेला पेलां कैई। कै अंत गै दिना में हिस्या बी लोग आसी झिका प्रभु अर बिंगै लोगां गी मजाक उड़ासी अर परमेसर नै ना मानण आळा लोग आपगी मन मरजी करसी। ऐ बे लोग हो'सी झिका थारै में फूट गेरै। ऐ पवितर आत्मा गो केणो ना मानणा आळा अर संसारिक लोग हो'सी। पण हे प्यारो, थे बिस्वास गी बिं पवितर नींव पर तकड़ा रेगे पवितर आत्मा गी ताकत ऊं पराथना करता रेवो। अर अपणै आपनै परमेसर गै प्रेम में बणाये राखो अर प्रभु यीसू मसी गै बिं दिन नै अडिकता रेवो झिकै दिन बो थानै दया कर'गे अनन्त जीवन दैयगो। अर झिका ईं बात पर बेम करै बां पर दया करो। झिको आग गै खतरै में है थे बां लोगां नै, ईं आग ऊं बचा ल्यो। अर भोतां पर डर गै सागै दया राखो पण बां गाबा ऊं घिरणा करो झिका पर सरीर गी बजह ऊं कलंक लागेड़ो है। प्रभु यीसू मसी गी बजह ऊं आपां नै बचावण आळै परमेसर गी जे-जेकार होवै। एक परमेसर ई है झिको थानै बचा सकै अर थारै पापां नै धो सकै। अर बो थानै आपगी हजूरी अर मेमा में राजी करगे निरदोस खड़या कर सकै। जुगा जुगा ऊं लेगे अब तांई मेमा, मान, ताकत अर हक परमेसर गो ई है अर इंयाई सदां रेवै। आमीन। आ किताब यीसू मसी गै अलोकिक ग्यान गी बातां गी किताब है झिकी पिता परमेसर बिनै दिखाई कै बे आपगै दास लोगां नै बतावै कै ऐ बातां आण आळै टेम बेगी अर चाणचकै घटण आळी है। ऐ बातां परमेसर सुरग ऊं आपगो सुरगदूत भेजगे यूहना नै बताई। अर यूहना पिता परमेसर गी झिकी बातां सुणी अर यीसू मसी गै बारै में झिको कीं देख्यो बिंगै बारै में गवाई दी। आसिस बिं मिनख पर है झिको परमेसर गी आं बातां नै पढै, सुणै अर मानै क्यूंकै टेम भोत नेड़ै है। यूहना गी ओर ऊं एसिया प्रांत गी सातूं बिस्वासी मण्डली गै नाम। परमेसर गी ओर ऊं झिको है अर झिको हो अर झिको आण आळो है, अर बे सात आत्मावां झिकी परमेसर गै सिंघासन गै सामै है। अर यीसू मसी गी ओर ऊं, झिको बिस्वास लायक अर झिको मरेड़ा माऊं पेली जींवंतो होण आळो है अर ईं धरती गै राजावां पर हाकिम है अर आपणूं प्रेम करै। बिं यीसू मसी कानी ऊं थारै पर किरपा अर सांती होवै। अर बण आपां नै आपगै खून ऊं छुटकारो दिरायो है। बण आपां नै राजा अर पिता परमेसर गा याजक बणाया है। बिंगी मेमा जुग जुग होवंती रेवै अर इंयाई होवै। “अर सुणो। बो बादळां सागै आण आळो है अर हरेक आंख अर बे मिनख झिका बिनै मारयो बे सारा बिनै आवंता देखसी। दुनिया गा सारा लोग बिनै देखगे बिलख बिलखगे रोसी। हां इंयाई होवैगो।” प्रभु परमेसर बो सरवसकतिमान है, अर झिको है, झिको हो अर झिको आण आळो है बो इंया केवै है कै “मैं अल्फा अर ओमेगा हूं, पेलो अर आखरी हूं।” मैं यूहना, थारो भाई, यीसू मसी गी बजह ऊं दुख, परमेसर गो राज अर धीरज में थारै सागै भागिदार हूं। मैं पतमुस नाम गै टापू में परमेसर गै बचन अर यीसू गी गवाई देण गी बजह ऊं जेळ में हो। मैं हफ्ते गै पेलै दिन आत्मा ऊं भरग्यो अर मैं मेरै लारै तुरई बरगी एक मोटी आवाज सुणी। अर बिं आवाज में ओ हेलो आवै हो कै झिको कीं थे देख्यो है बिनै एक किताब में लिखगे आसिया गी सातूं मण्डळिया इफिसुस, स्मुरणा, पिरगमुन, थुआतीरा, सरदीस, फिलदिलफिया, अर लौदिकिया नै भेज दैयो। अर जद मैं पळटगे बोलण आळै नै देखणो चायो। जिंयाई मैं मुड़यो तो मैं सोनै गा सात दीपदान देख्या। बां दीपदान गै बिचाळै में मिनख गै बेटै बरगै एक मिनख नै देख्यो झिकै पगां तांई मोटो चोळो पेर राख्यो अर छाती पर सुनेरै रंग गो पटको बांद राख्यो। बिंगो सिर अर बाळ दूध गी तरियां धोळा अर ऊन गी तरियां मुलायम हा। बिंगी आंख आग गी लपटा तरियां दिखै ही। बिंगा पग इंया लागा जिंया आग गी भटी में तपायेड़ो पीतळ होवै। बिंगी आवाज समुंदर गी लेहरां गी तरियां ही। बिंगै दाहिणै हात में सात तारा हा अर मुं ऊं दो धारी तलवार निकळै ही बिंगो चेरो दोफारै गै तावड़ै तरियां चमकै हो। जद मैं बिनै देख्यो तो मरेड़ै गी तरियां बिंगै पगां में पड़ग्यो। जद बां आपगो दाहिणो हात मेरै उपर रखगे केयो, डर ना, मैं ई पेलो अर आखरी हूं। मैं बोई हूं झिको मरग्यो हो। पण अब सदां खातर जींवंतो हूं। इंयाई होवै। मोत अर अधोलोक गी चाबियां मेरै कनै है। ईंखातर झिकी बातां थे देखी है, झिकी बितण लागरी है अर इंगै बाद बितण आळी है। बानै सारीयां नै लिख ले। मतलब बां सात तारां गो भेद झिको थे मेरै हात में देख्यो हो। बां सात दीपदान गो मतलब है बे सात तारा सातूं मण्डलिया गा दूत है, अर बे सात दीपदान सात मण्डलिया है। इफिसुस गी मण्डली गै सुरगदूत नै ओ लिख कै झिको आपगै दाहिणै हात में सात तारा ले राख्या हा। अर सोनै गै सात दीपदान गै बिचाळै चालै फिरै बो इंया केवै कै। मैं थारी मेनत गै कामा अर धीरजता नै जाणू अर आ बात बी कै थे दुस्ट लोगां नै सेण कोनी करो क्यूंकै थे बां लोगां नै परखगे झूठा जाण्या है झिका खुद नै खास चेला मानै पण बे है कोनी। थारै में धीरज राखण गी ताकत है, थे मेरै कामा में भोत मेनत करी अर निरास कोनी होया। पण मनै तेरै खिलाफ आ सिकायत है जिंया तू मेरूं पेलां प्रेम करतो बिंया अब कोनी करै। ईंखातर अब चेतो कर कै तूं बिं प्रेम ऊं कितो दूर उड़ग्यो। तूं आपगो मन बदळ अर पेलां तरियां काम कर। जे तूं इंया ना करयो तो मनै तेरै कनै बेगो आणो पड़सी अर तेरै दीपदान नै बठूं हटा दैयूंगा। पण आ बात आच्छी है कै, थे निकुलिया गै लोगां गै कामा ऊं नफरत करो हो। झिका ऊं मैं बी नफरत करूं। झिको सुणनो चावै बो सुण ल्यै कै पवितर आत्मा बिस्वासी मण्डलियां ऊं के केवै, कै झिको जीतैगो बिनै मैं परमेसर गै बाग में जीवन गै दरखत गो फळ खाण गो हक देस्यूं, झिको सुरग में है। स्मुरणा गी बिस्वासी मण्डली गै दूत नै ओ लिख कै झिको पेलो अर आखरी है, झिको मरग्यो हो अर अब जीग्यो है, बो इंया केवै कै। मैं थारा काम, दुख अर गरीबी नै जाणू हूं पण थे अमीर हो। अर बे लोग झिका अपणै आपनै यहुदी मानै पण बे है कोनी। बे लोग सैतान गी मण्डली है बांगी निन्दा नै बी मैं जाणूं। झिको दुख थे भोगण आळा हो बिंऊं ना डरियो। अर सुणो। थारै मू केई लोगां नै सैतान जेळ में बंद करवा दैयगो जिंऊं थारी परख होवै अर थानै दस दिना तांई क्ळेस सेणो पड़ैगो। आखरी सांस तांई बिस्वास में मजबूत रेईयो, जद मैं थानै जीवन गो मुकुट देऊंगा। झिकै गै कान है बो सुण ल्यै कै पवितर आत्मा बिस्वासी मण्डलियां ऊं के केवै। झिको जीतैगो बिनै दूसरी मोत ऊं कोई नुकसान कोनी होवैगो। अर पिरगमुन गी बिस्वासी मण्डली गै दूत नै ओ लिख कै ओ संदेस बिंगो है झिकै कनै दो धारी तेज तलवार है। मैं थारै कामा नै जाणूं हूं अर मनै ओ बी ठा है कै थे बठै रेवो जठै सैतान गो राज है। थे मेरै नाम पर बिस्वास राख्यो है। जद मेरो बिस्वास लायक गवा अन्तिपास थारै बिचाळै मार दियो, जठै सैतान गो बास है बिं टेम बी थे मेरो इनकार कोनी करयो हो। फेर बी मेरै कनै थारै खिलाफ केई सिकाईतां है कै थारै बिचाळै केई लोग हिस्या है झिका बिलाम गी सीख पर चालै। क्यूंकै बिलाम, बालाक नै ओ सिखायो कै तूं इसराएली लोगां नै मूरतियां गो प्रसाद खाण खातर अर बेबीचार करण खातर उकसा। इंयाई थारै बिचाळै केई निकुलिया गी सीख मानण आळा है झिका ऊं मैं नफरत करूं। ईंखातर आपगो मन बदळो, नईं तो मैं बां लोगां सागै आपगै मुं गी तलवार ऊं आ'गे लड़ूंगा। झिको सुणनो चावै बो सुण ल्यै कै आत्मा बिस्वासी मण्डली ऊं के केणो चावै है झिको जीतैगो बिनै मैं परमेसर गी नगरी में लकोयड़ा मन्ना देऊंगा। अर पथर बी दैयूंगा झिकै पर एक नुओ नाम खुदेड़ो हो'सी। बो नाम बिं मिनख गै अलावा दूसरो कोनी जाण सी कै ईं पर के लिखेड़ो है। थुआतीरा गी बिस्वासी मण्डली गै दूत नै ओ लिख कै परमेसर गो बो बेटो झिकै गी आंख्या आग गी लपटां तरियां अर पग चमकतै पीतळ गी तरियां है बो इंया केवै कै। मैं थारो काम, प्रेम, बिस्वास, सेवा अर धीरज नै जाणूं हूं अर मैं जाणूं कै तूं अब पेलां ऊं जादा काम करै। पण थारै खिलाफ मनै आ बी सिकायत है कै थे बिं इजेबेल लुगाई नै थारै बिचाळै रेण दी। बा खुद नै परमेसर गी बात बताण आळी बतावै ही अर आपगी सीख ऊं मेरै लोगां नै कुकरम अर मूरती गो प्रसाद खाण खातर उकसावै ही। मैं बिनै मन बदळण गो मोको दियो है पण बा ऐ बुराईयां छोडणी कोनी चावै है। अर सुणो, जे बा आपगा सारा बुरा काम कोनी छोडै गी, तो मैं बिनै बीमार कर'गे मांची पर रेड़ूंगा अर झिको कोई बिंगै सागै कुकरम करैगो बानै भोत मोटी पीड़ा दैयूंगा। मैं बिंगै सारै टाबरां नै महामारी ऊं मारूंगा जिंऊं सारी बिस्वासी मण्डलियां जाण जावैगी कै मन नै अर दिल नै जांचण आळो मैं ईं हूं। अर मैं थारै मू हरे कनै बिंगै कामा गै मुताबिक बदळो दैयूंगा। पण मैं थुआतीरा गै बाकी लोगां ऊं ओ केणो चाऊं कै झिका बिं लुगाई गी सीख नै कोनी मानी अर सैतान गै भेद गी बातां नै कोनी जाणी तो मैं थारै पर ओर भार कोनी लादू। पण झिकी मेरी सीख थारै कनै है बिं पर चालता रेवो। झिको जीतैगो अर मेरी सीख पर चालैगो बिनै मैं भोत देसां पर हक दैयूंगा। अर बो लोह गी छड़ी ऊं बां पर राज करसी अर बो बां लोगां नै माटी गै बरतन गी तरियां चकनाचूर करसी अर जिस्यो हक मैं आपगै पिता ऊं पायो है। मैं बिनै झांजरकै गो तारो देस्यूं। झिकै गै कान है बो सुण ल्यै कै आत्मा के केवै है अर ओ बी समझ ल्यै कै आत्मा बिस्वासी मण्डली ऊं के केणो चावै। सरदीस गी बिस्वासी मण्डली गै दूत नै लिख कै झिकै गै कनै परमेसर गी सात आत्मावां अर सात तारा है बो इंया केवै कै मैं थारै कामा नै जाणू हूं, थे जीवंता तो दिखो पण हो मरेड़ा। ईंखातर चेतो करो, अर झिकी अजे बाकी है अर मिटण आळी है बिनै मजबूत करो। क्यूंकै मैं थारै कामा नै परमेसर गी नजर में सई कोनी पाई। ईंखातर याद करो कै थे किसी सीख पाई अर सुणी ही। बिमै बण्या रेवो अर मन बदळो। जे इंया ना करयो तो मैं चोर गी तरियां आऊंगा अर थानै ठा बी कोनी लागै गो कै मैं थारै कनै कद आग्यो। पण सरदीस में थारै कनै थोड़ा लोग हिसा बी है झिका आपगै तन रूपी कपड़ै नै असुद्ध कोनी करयो। अर बे धोळा गाबा पेरगे मेरै सागै सागै चालैगा क्यूंकै बे खरा मिनख है। झिका जीतैगा बानै मैं हिसा ई गाबा पेहराऊंगा अर मैं बिंगो नाम जीवन गी किताब ऊं कदी कोनी मिटाऊंगा पण बिंगै नाम नै पिता परमेसर अर बिंगी नगरी गै सुरगदूतां सामै मानल्यूंगा। झिको सुणनो चावै बो सुण ल्यै कै आत्मा बिस्वासी मण्डलियां ऊं के चावै है? अर फिलदिलफिया गी बिस्वासी मण्डली गै दूत नै आ बात लिख कै झिको पवितर अर सच्चो है अर झिकै गै कनै दाऊद गी चाबी है झिकै नै बो खोलै बिनै कोई बंद कोनी कर सकै अर झिकै नै बंद करै बिनै कोई खोल कोनी सकै, बो इंया केवै कै। मैं थारै कामा नै जाणू हूं। अर देखो मैं थारै खातर एक दरवाजो खोल्यो है झिकै नै कोई बंद कोनी कर सकै भलैईं थारै में इती ताकत कोनी फेर बी थे मेरै संदेस नै मान्यो है अर मेरो इनकार कोनी करयो। पण सुणो, झिका सैतान गा साथी है अर अपणै आपनै यहुदी केवै, बे झूठ बोलै है। मैं बानै मजबूर करूंगा थारै पगां में झूकण खातर जिंऊं बे जाण ज्यै कै मैं थारूं प्रेम करयो है। ईंखातर कै थे धीरज ऊं मेरै बचन नै मान्यो है अर मैं बी थारी परख गै टेम में थारी रुखाळी करूंगा। मतलब बिं न्याय गै टेम झिको सारी दुनिया पर आण आळो है जिंऊं सारां गो लेखो लियो जा सकै। मैं चाणचकै ई आऊंगा। झिको बिस्वास थारै कनै है, बिमै बण्या रेवो। जिंऊं थारो मुकुट ना जावंतो रेवै। झिको जीत ज्यैगो बिनै मैं परमेसर गै घर में एक खम्बो बणाऊंगा, बठूं बो कदी बारै कोनी जावैगो। अर मैं आपगै परमेसर गो नाम अर सैहर मतलब नुंअ यरुसलेम गो नाम, झिको परमेसर गी ओर ऊं सुरग ऊं उतरण आळो है अर आपगो नुओ नाम बिं पर लिखूंगा। झिको सुणनो चावै बो सुण ल्यै कै आत्मा बिस्वासी मण्डलियां ऊं के चावै है। लौदिकिया गी बिस्वासी मण्डली गै दूत नै आ बात लिख कै झिको आमीन, झिको भरोसै लायक, साच्चो गवा अर परमेसर गी सरसटी गो मूळ है बो इंया केवै कै। मैं थारै कामा नै जाणू हूं कै ना थारो सभाव ठंडो है अर ना'ई तातो है। पण आच्छो होवंतो कै थारो सभाव ठंडो या तातो होवंतो। ईंखातर तूं नुन्यायो सो है। ईंखातर मैं तनै उगळन आळो हूं। थे केवो मैं अमीर हूं, मेरै कनै सारी चिजां है अर मनै क्यांगी लोड़ कोनी है। पण थे कोनी जाणो कै थे निरभागा, तुछ, कंगाल, आंधा नागा हो। ईंखातर मैं थानै सलाह दैयूं कै थे मेरूं चोखो सोनो मोल लेल्यो जिंऊं थे अमीर बण ज्यो अर धोळा गाबा लेल्यो, जिंऊं थारो तन ढकीज ज्यै। अर आपगी आंख्या खातर सुरमो लेल्यो जिंऊं थे साफ साफ देखण लाग ज्यो। झिकै नै मैं प्रेम करूं बिनै मैं सुधारनो चाऊं कै बे जोसीला बणगे मन बदळ ल्यै अर सई तरियां चालण लागज्यै। अर सुणो। मैं थारै दरवाजै पर खड़यो कूंटो खड़काण लागरयो हूं। जे आवाज सुणगे आपगो बारनो खोलै तो मैं अंदर आ'गे बिं सागै रोटी जीमूंगा। झिको जीेतैगो, बिनै मैं आपगै सागै मेरै सिंघासन पर बिठाऊंगा। जिंया मैं जीतगे आपगै पिता सागै सिंघासन पर बेठयो हूं। झिको सुणनो चावै बो सुण ल्यै कै आत्मा बिस्वासी मण्डलियां ऊं के केवै है। आं बाता गै बाद मैं देख्यो कै सुरग में एक दरवाजो खुलो है। बिं तुरई गी आवाज झिकी मैं पेलां सुणी ही, बण मनै केयो, “अठै उपर आ'ज्या अर मैं तनै बे बातां सुणाऊंगा झिकी आ'गै घटै गी।” जद मैं एकदम ई पवितर आत्मा ऊं भरग्यो अर मैं सुरग में एक सिंघासन देख्यो झिकै पर एक जणो बेठयो है। बिंगो मुं चमकै हो अर बो यसब अर माणिक्य तरियां अर सिंघासन गै चयारूंमेर पना गी तरियां मेघ धनुस दिखै हो। ईं सिंघासन गै च्यारूंमेर चौबीस सिंघासन है। बां पर मैं चौबीस बुडा मिनखां नै धोळा कपड़ा पेरेड़ा बेठया देख्या। अर बांगै सिर पर सोनै गा मुकुट है। बिं सिंघासन ऊं बिजळी गो चानणो, गरजन अर बादळां गी गड़गड़ाहट निकळै ही अर सिंघासन गै सामै सात दीया जगै है झिकी परमेसर गी सात आत्मावां है। बिं सिंघासन गै सामणै चमकतै काच गी तरियां समुंदर है। अर सिंघासन गै बिचाळै अर च्यारूंमेर जीवंता प्राणी है झिकां गै सारै सरीर पर आंख ई आंख है। पेलो प्राणी सेर गी तरियां है, दूसरो बछड़ै गी तरियां, तीसरै प्राणी गो चेरो मिनख गी तरियां अर चोथो प्राणी उकाब गी तरियां है। आं सारा गै छ: छ: पांख है। बांगै च्यारूंमेर अर बिचाळै आंख्या ई आंख्या है। बे दिन रात ओ केवंता कोनी थकै है। “पवितर, पवितर, पवितर परमेसर, सरवसकतिमान है, झिको हो, झिको है अर झिको आण आळो है।” ऐ जींवता प्राणी सिंघासन पर बेठया मिनख नै मेमा इज्जत अर धन्यवाद देवंता रेवै। झिको हमेसा खातर अमर है। जद बे चौबीस बुडा मिनख झिका दूसरै सिंघासना पर बेठया है बिंगै सामणै गोडा टेक गै निवण कर'गे अर आपगा मुकुट सिंघासन गै सामै रखगे बडाई करगे कैवै, “हे म्हारा प्रभु अर परमेसर थे ई मेमा, इज्जत अर हक गै लायक हो क्यूंकै सारो कीं थारो ई बणायेड़ो है अर थारी इच्छा ऊं ई सारी चिजां गी रचना होयी अर बे अजे तांई है।” ओर मैं देख्यो कै झिको सिंघासन पर बेठयो है बिंगै दाहिणै हात में मैं एक किताब देखी। आ किताब मा बारूं दोना पासू लिखेड़ी ही अर इनै सात मोहर लगागे बंद कर राखी ही। फेर मैं भोत तकड़ै सुरगदूत नै देख्यो, झिको ऊंची आवाज में इंया केवै कै कोई हिस्यो मिनख है झिको ईं किताब गी मोहर तोड़गे इनै खोल सकै। पण ना सुरग में ना धरती पर, ना पाताळ में बिं किताब नै खोलण आळो अर नजर ऊं देखण आळो मिल्यो। जद इंया देख्यो तो मैं फूट फूटगे रोण लागग्यो। जद बां बुडा मिनखा मू एक जणो मनै बोल्यो, रो ना। सुण। यहूदा गी पीढी गो बो सेर, झिको दाऊद गो मूळ है, ईं किताब गी सात मोहरां नै तोड़गे खोलण खातर जीतग्यो है। जद मैं बिं सिंघासन अर च्यारूं प्राणियां अर बां बुडा गै बिचाळै, घायल करेड़ो एक मेमणो खड़यो देख्यो। बिंगै सात सींग अर सात आंख्या ही। ऐ परमेसर गी सात आत्मावां है झिकी सारी धरती पर भेजेड़ी है। बण मेमणै, बिं सिंघासन पर बेठयै मिनख गै दाहिणै हात ऊं बा किताब ले ली। इंया होवंतै ई बे च्यारूं प्राणी अर बे चौबीस बुडा मिनख बिं मेमणै गै सामै पड़ग्या। बां सारां गै हात में बीणा अर धूप ऊं भरेड़ा सोनै गा कटोरा हा। ऐ पवितर लोगां गी पराथना है। बे ओ नुओं गीत गाण लागग्या, कै “थे ई, ईं किताब नै लेण गै अर इंगी मोहरां खोलण गै लायक हो। क्यूंकै तूं मरगे अर आपगै खून ऊं हर एक कुल, भासा, लोग अर देस मू परमेसर खातर म्हानै खरीद लिया। अर म्हानै म्हारै परमेसर खातर एक राज अर याजक बणायो अर म्हे धरती पर राजा होवांगा।” जद मैं देख्यो कै बिं सिंघासन अर बां प्राणिया अर बां बुडा मिनखां गै च्यारूंमेर भोतसा सुरगदूत बोलण लागग्या। झिका गी गिणती लाखां करोड़ा में ही। बे जोर ऊं केण लाग्या कै वध करेड़ो मेमणो ई सारै हक, धन, ग्यान, सकती, आदर, मेमा अर धन्यवाद गै लायक है। फेर मैं धरती, पताळ, सुरग अर समुंदर गी सारी चिजां झिकी इमै है बानै ओ केवंता सुण्यो कै झिको सिंघासन पर बेठयो है बिंगो अर मेमणै गो धन्यवाद, आदर, मेमा अर राज हमेसा हमेसा रेवै। जद च्यारूं प्राणिया केयो, “आमीन” अर बां बुडा मिनखा गोडा टेकगे निवण करयो। अर फेर मैं देख्यो कै जद बण मेमणै बां साता मोहरा मू एक नै खोली, जद बां च्यार प्राणिया मू एक जण बादळां गै गरजन गी तरियां ओ केवंता सुण्यो कै, “आज्यो।” जद मैं देख्यो कै एक धोळै घोड़ै पर एक सवार बेठयो हो अर बिंगै हात में एक धनुस हो अर एक कनै मुकुट हो। बो युद्ध जीतण खातर निकळयो है। जद बण दूसरी मोहर तोड़ी तो मैं दूसरै प्राणी नै ओ केवंता सुण्यो “आज्यो।” जद लाल रंग गो एक घोड़ो निकळयो। बिंगै सवार नै धरती पर ऊं सांती खत्म करण गो हक देयेड़ो हो। अर बिनै एक मोटी तलवार बी देयेड़ी कै लोग एक दूसरै नै मारै। जद बण तीसरी मोहर खोली तो मैं तीसरै प्राणी नै ओ केवंता सुण्यो, “आज्यो।” जद मैं देख्यो तो एक काळै घोड़ै पर सवार मिनख गै हात में ताकड़ी ही। अर मैं च्यारूं प्राणिया गै बिचाळूं ओ हेलो सुण्यो कै “एक दिन गी दिहाड़ी गै बदळै खाण खातर एक दिन गी कणक अर एक दिन गी दिहाड़ी गै बदळै खाण खातर तीन दिना गा जो पण जेतुन गै तेल अर दाखरस गो नुकसान ना करियो।” जद बण चोथी मोहर तोड़ी तो मैं चोथै प्राणी नै ओ केवंतो सुण्यो “आज्यो।” जद मैं हळकै पीळै रंग गै घोड़ै नै देख्यो। बिं पर बेठयै सवार गो नाम मोत हो। अर अधोलोक बिंगै लारै लारै चालण लागरयो। बिनै धरती गै एक चोथै हिसै पर हक देयेड़ो कै बो तलवार, काळ, महामारी अर धरती गै जानवरां ऊं मिनखां नै मरवावै। जद मेमणै पांचवी मोहर तोड़ी तो मैं बेदी गै नीचै बां लोगां गै प्राणा नै देख्या झिका परमेसर गै बचन अर बिंगी गवाई बताण गी बजह ऊं मारेड़ा हा। अर बे जोर जोर ऊं केवा कै, “हे पवितर अर सच्चा परमेसर थे कद न्याय करोगा। अर दुनिया में रेण आळै लोगां ऊं म्हारी मोत गो बदळो कद लेवोगा। बां हरेक नै धोळो चोळो दियो अर बानै केयो, थोड़ी देर ओर आराम करो जद तांई थारा सागड़ती अर बिस्वासी लोग झिका थारी तरियां मारीजैगा अर जिंऊं बांगी गिणती बी पूरी हो'ज्यै।” अर जद मैं मेमणै नै छटी मोहर तोड़ता देख्यो तो धरती हालगी अर ऊन ऊं बणेड़ै कामळ गी तरियां सूरज काळो, अर चांद खून गी तरियां दिखण लागग्यो। अर आकास ऊं तारा जमीन पर इंया पड़ण लागग्या जिंया अंजीर गै दरखत ऊं काचा फळ टूटगे पड़ै। अर आकास पाटगे चादर गी तरियां भेळो हो'ग्यो अर हरेक पहाड़ अर टापू आपगी जिग्यां ऊं दूर हो'ग्या। जद धरती गा राजा, प्रधान, सेनाधिकारी, अमीर गरीब ताकतवर, दास अर हरेक आजाद आदमी पहाड़ गी गुफावां अर चटाना में जा'गे लुक ग्या। अर बे पहाड़ अर चटान ऊं केण लागग्या, “म्हारै उपर पड़ ज्यो जिंऊं सिंघासन पर बेठयै न्यायी अर मेमणै गी रीस ऊं बचा ल्यो। क्यूंकै बिंगी रीस गो टेम आ'ग्यो है अर हिस्यो कोई कोनी झिको बिंगो सामणो कर सकै।” फेर मैं च्यार सुरगदूत धरती गै च्यारूं कोणा में खड़या देख्या। बां च्यारा पासूं पून रोक राखी। जिंऊं धरती, समुंदर अर कोई बी दरखत नै पून ना मिल सकै। फेर मैं एक ओर सुरगदूत नै जीवंतै परमेसर गी मोहर लेयड़ै पूरब दिसा गी ओर ऊं उपर आवंतै देख्यो। बण बां च्यारा सुरगदूतां नै झिका नै धरती, समुंदर नै नुकसान पोचाण गो हक देयेड़ो हो बानै ऊंची आवाज में केयो कै। जद तांई म्हे आपगै परमेसर गै दासां गै माथा पर मोहर ना लगा दैयां जद तांई धरती, समुंदर अर दरखतां नै नुकसान ना पोंचाईयो। अर मोहर लागेड़ां गी मैं गिणती सुणी झिका 144,000 हा। ऐ लोग इसराएल गी सगळी पीढियां मू हा। बां पीढियां में यहूदा, रूबेन, गाद, आसेर, नपताली, मनसिस्ह, समौन, लेवी, इस्साकार, जबुलून, युसुफ अर बिन्यामीन हा अर आं सारी पीढियां मू बारा बारा हजार मिनख हा। इंगै बाद, मैं मिनखां गी अणगिणत भीड़ नै देखी। बिं भीड़ में सगळी पीढी गा सगळी जाती गा अर हरेक बोली बोलण आळा लोग हा। बे बिं सिंघासन अर मेमणै गै सामणै धोळा गाबा पेरै अर हात में खजूर गी डाळियां लियै खड़या। अर बे गळो पाड़ पाड़गे केण लागरया कै सिंघासन पर बेठयै म्हारै परमेसर अर मेमणै गी जे जेकार होवै। अर सारा सुरगदूत बिं सिंघासन, बुजुरगा अर च्यारूं प्राणिया गै च्यारूंमेर खड़या। फेर बे सारा गोडा टेकगे परमेसर नै निवण करा। अर केवा, इंयाई होवै। म्हारै परमेसर गी जे जेकार, धन्यवाद, मेमा अर बड़ाई सदां ई होवंती रेवै। जद बां बुजुरगा मू एक जणै मनै पूछयो कै ऐ धोळा गाबा पेरेड़ा लोग कुण है अर कठूं आया है? मैं केयो, हे मालिक ओ तो थे ई जाणो। जद बां मनै केयो, ऐ बे लोग है झिका भोत तकलीफ झेलगे अठै आया है। आं आपगा गाबा मेमणै गै खून ऊं धोगे धोला करया है। इंगै कारण ई ऐ लोग परमेसर गै सिंघासन गै सामणै है अर आंगै घर में दिन रात आंगी सेवा करता रेवै, अर झिको सिंघासन पर बेठयो है बो आमै बास करतो आंगी रुखाळी करसी। “आनै ना कदी भूख लागसी अर ना कदी तीस लागसी। अर ना बानै सूरज गी तपती आग ऊं कीं हो'सी। क्यूंकै झिको मेमणो सिंघासन गै बिचाळै है बो बांगी रुखाळी करसी। अर बो बानै जीवन देण आळै पाणी गै तलाब कनै ले जाये करैगो अर परमेसर बांगी आंख्या ऊं सगळा आंसू पूंछ दैयगो।” जद मेमणै सातवीं मोहर तोड़ी तो सुरग में आदै घंटै तांई सरणाटो हो'ग्यो। जद मैं सात सुरगदूत देख्या झिका परमेसर गै सामणै खड़या रेवै अर बांगै हात में सात तुरिइयां दे दी। इंगै बाद एक ओर सुरगदूत सोनै गो धूपदान ले'र आयो। अर बेदी गै कनै खड़ ग्यो। बिनै धरमी लोगां गी पराथना गै सागै सोनै गी बेदी पर झिकी सिंघासन गै सामै ही। बिं पर चढाण खातर बोळी सारी धूप देयेड़ी ही। अर धूप गो धुंओ पवितर लोगां गी पराथना सागै सुरगदूत गै हात ऊं परमेसर गै सामै पोंचै है। जद सुरगदूत धूपदान में बेदी गी आग भरगे धरती पर फेंक दी। जद धरती पर रोळो, बादळां गी गड़गड़ाट, बिजळी गो चमकणो अर धरती गो हालणो सरू हो'ग्यो। जद बे सातूं सुरगदूत आपगी तुरईयां नै बजाण खातर तैयार हो'ग्या। जिंयाई पेलै सुरगदूत तुरई बजाई तो खून गा ओळा अर आग पैदा होगी अर आनै धरती पर फेंका दिया। आऊं धरती गो एक तिहाई हिसो बळग्यो। अर एक तिहाई दरखत अर सारी हरी घास बळगे राख होगी। दूसरै सुरगदूत गै तुरई बजांवता ई इंया लागग्यो जिंया जगतै पहाड़ गी तरियां कोई चीज समुंदर में फेंक दी होवै। जिंऊं समुंदर गो एक तिहाई हिसो खून में बदळग्यो। अर इंऊं समुंदर गा एक तिहाई जीव मरग्या। एक तिहाई पाणी गा जहाज खत्म हो'ग्या। अर जद तीसरै सुरगदूत आपगी तुरई बजाई तो एक मोटो सारो तारो मसाल गी तरियां जगतो आसमान ऊं नदिया अर झरना गै एक तिहाई हिसै पर जा पड़यो। ईं तारै गो नाम नागदोन है। इंऊं पाणी गो एक तिहाई हिसो नागदोन बरगो खारो हो'ग्यो। ईं पाणी गै खारै होण ऊं भोतसा लोगां गी मोत होगी। चोथै सुरगदूत गै तुरई बजांवता ई सूरज चांद अर तारां गो एक तिहाई हिसै नै खत्म कर दियो। जिंऊं आंगै एक तिहाई हिसै में अंधेरो हो'ग्यो, जिंऊं दिन गै एक तिहाई हिसै गी रोसनी जावंती रेई। जद मैं एक आसमान गै बिचाळै एक सुरगदूत नै उडता देख्यो झिको ऊंची आवाज ऊं केवै हो कै अजे तीन सुरगदूतां गी तुरई बाजणी बाकी है आंगी बजह ऊं धरती पर रेण आळै मिनखां पर हाय, हाय, हाय। जद पांचवै सुरगदूत तुरई बजाई तो मैं सुरग ऊं धरती पर एक तारो पड़ता देख्यो। बिं सुरगदूत कनै गेहरै कुण्ड गी चाबी ही। जद बण बिं कुण्ड नै खोली तो बिमू मोटी भटी गो सो धुओं निकळयो। सूरज अर वायुमण्डल ईं धुवै ऊं काळो हो'ग्यो। ईं धुंवै मू धरती पर टिडियां निकळी। आं टिडिया नै धरती गै बिछुआ बरगी ताकत देएड़ी ही। अर आनै आ आग्या बी देएड़ी कै बे धरती गी घास, दरखत या कोई हरी चीज नै नुकसान ना पोंचावै। पण बां मिनखा गो नुकसान करै झिकां गै माथा पर परमेसर गी मोहर कोनी है। बानै जान ऊं मारण गो हक कोनी देयेड़ो हो। पण पांच म्हिनां तांई पीड़ा देण गो आदेस हो। आ पीड़ा बिछु गै डंक मारणै बरगी ही। बां दिना में लोग मोत नै ढूंढैंगा, पण बानै लादैगी कोनी। बे मरणो चावैगा पण मोत बानै आवैगी कोनी। ऐ टिडियां घोड़ां गी तरियां ही झिका युद्ध पर जाण खातर तैयार होवै। बांगै सिर पर इंया लागै हा जिंया सोनै गा मुकुट होवै। बांगो चेरो मिनख गी तरियां हो। बांगा बाळ लुगाईयां तरियां हा अर दांत सेर गी तरियां हा। बांगा कवच लोह गी तरियां हा। बांगै पांखा गी आवाज लड़ाई में भाजता भोत सारै रथां गी तरियां ही। बांगी पूंछ बिछुवां गी तरियां ही। बांगा हिसा डंक हा झिका ऊं लोगां नै पांच मिंन्हा तांई पीड़ा हो सकै ही। एक अथाह कुण्ड गो दूत बां पर राजा हो। यहुदी भासा में बिंगो नाम अबदोन अर युनानी भासा में अपुल्योन है। पेली बिपती तो खत्म होगी पण सुणो, इंगै बाद दो बिपता ओर बाकी है। छटै सुरगदूत गै तुरई बजावंता ई मैं परमेसर गी सामली सोनै गी बेदी गै च्यार सींगा मू एक आवाज सुणी। बा आवाज अठै सुरगदूत नै केवै ही कै, बां च्यार सुरगदूतां नै झिका फरात म्हानदी गै कनै बांदेड़ा हा बानै आजाद कर दैय। जद बां च्यारा दूता नै छोड़ दिया झिका नै बिं घड़ी, बिं म्हिनै अर साल खातर रोकेड़ा हा। जिंऊं बे धरती गै एक तिहाई मिनखां नै मार दैय। मैं बांगी घुड़सवारा गी गिणती सुणी झिकी बीस करोड़ ही। मनै दरसण में बे घोड़ा अर बांगा असवार इंया लागा जिंया बां सवार कवच पेर राख्या है झिका धधकती आग, निलै अर पीळै रंग गा हा अर बां घोड़ा गो सिर सेरा गी तरियां हो। अर बांगै मूं माखर आग, धुंओं अर गंधक निकळै ही। अर बिं धुंवै, आग अर गंधक ऊं मिनख जाती गो एक तिहाई हिसो खत्म कर दियो। बां घोड़ां गी ताकत बांगै मूं अर पूंछ में ही क्यूंकै बांगी पूंछ सांप गी तरियां ही। झिका में बांगा सिर हा आऊं बे नुकसान पोचांवता हा। अर ईं बिपता ऊं बचेड़ा लोग, आपगै हातां गै बुरै कामा में फस्या रेया, बे ऐ हा कै बे सोनै, चांदी, पीतळ, पथर अर लकड़ी गी मूरतिया गी पूजा करणी कोनी छोड़ी अर ना बां आं कामा ऊं पछतावो करयो। ऐ मूरतिया ना तो बोल सकै ई अर ना देख सकै ई अर ना ई सुण सकै ई अर ना ई चाल सकै ई। अर आं लोगां हत्या करण ऊं, बेबीचार करण ऊं, जादू टूणा करण ऊं अर चोरी करण ऊं मन कोनी बदळयो। फेर मैं एक ओर सुरगदूत नै बादळ ओडे सुरग ऊं उतरता देख्यो। बिंगै सिर पर मेघ धनुस हो। बिंगो चेरो सूरज गी तरियां अर पग आग गै खंबै गी तरियां हा। बिंगै हात में एक खुलेड़ी छोटी किताब ही। बण दाहिणो पग समुंदर पर अर खबो पग धरती पर रख्यो। बो ऊंची आवाज में इंया चिलायो जिंया सेर दहाड़ै। बिंगै चिलाण ऊं गरजन गा सात सब्द सुणिज्या। गरजन गा सातूं सब्द खत्म होण पर मैं लिखण आळो ई हो। इतै में मनै आसमान ऊं ओ सब्द केवंता सुणाई दियो कै, झिकी बातां गरजन गै सातूं सब्दा कैई है बां पर मोहर लगा दे अर बानै ना लिख। जद बो सुरगदूत झिको मैं समुंदर अर धरती पर खड़यो देख्यो, बण आपगो दाहिणो हात सुरग कानी चक्यो। बण बिं परमेसर नै झिको सदां सदां जींवंतो है अर झिकै सुरग अर बिंगी सारी चिजां नै अर समुंदर अर बिंगी सारी चिजां नै अर धरती अर इंगी सारी चिजां नै बणाई है बिंगी सोगन खा'गे केयो, “अब ओर जादा देर कोनी होवैगी।” पण जद सातवैं सुरगदूत गो तुरई बजाण गो टेम आसी जद परमेसर गी लुकेड़ी बातां गो भेद पूरो हो'सी। झिकै गी सूचना बां पेलां ई आपगै दासा नै परमेसर गी बात बोलण आळां दी ही। अर सुरग ऊं बोलण आळो फेर मेरै सागै बातां करण लागग्यो। बो मनै केण लागग्यो कै, जा झिको सुरगदूत धरती अर समुंदर पर खड़यो है बिंगै हात मू बा खुलेड़ी किताब ले ले। जद मैं बिं सुरगदूत कनै जा'गे केयो, “आ छोटी किताब मनै दे दे।” बण मनै केयो, “तूं इनै खा'ले, आ तेरै पेट नै खारो कर दैयगी। पण मूं में सेत बरगी मीठी लागैगी।” जद मैं बा किताब लेगे खाग्यो अर बा सेत बरगी मीठी लागी। पण खाण गै बाद मेरो पेट खारो हो'ग्यो। इंगै बाद मनै केईज्यो तनै ओ संदेस भोत सारै लोगां नै, देसा नै, सगळी भासावां गै लोगां नै अर सगळै राजावां नै परमेसर गी बात बोलगे सुणाणो पड़सी। इंगै बाद कणैई मनै नापण खातर एक कानो दियो अर केयो, “उठ, परमेसर गै मिन्दर अर बेदी अर बिमै आराधना करण आळा लोगां नै गिण ले।” पण मिन्दर गो बारलो आंगण छोड़ देई, बिनै ना नापी क्यूंकै बो गेर यहुदियां खातर है। बे बंयाळीस म्हिनां तांई पवितर नगर नै कुचळैगा। अर मैं आपगै दो गवावां नै हक दैयूंगा अर बे टाट ओडगे एक हजार दो सौ साठ दिना तांई परमेसर गी बात बतासी। ऐ जेतुन गा दो दरखत अर दो दीपदान है झिका धरती गै मालिक गै सामणै खड़या रेवै है। जे बानै कोई नुकसान करण गी कोसिस करै तो बे आपगै मूं ऊं आग निकाळगे आपगै दुसमण नै खत्म कर दैय। जे बानै नुकसान पोंचाणो चावै तो बे पक्का ई मारीजैगा। बांगै कनै आसमान बंद करण गो हक है। बानै परमेसर गी बात बोलण गै दिन में जिंऊं बे मेह बरसाणो बंद कर सकै। बां कनै ओ हक बी है कै सारै पाणी नै खून में बदळ सकै। अर बानै ओ हक बी है कै बे धरती पर हरेक तरियां गी बिपती ल्या सकै। जद बे आपगी गवाई दे दैयगा तो बो पसु झिको गेहरै कुण्ड मू निकळै गो बाऊं युद्ध करैगो। अर बो जीत हासिल करैगो बानै मार दैयगो। बांगी लोथ बिं सैहर गै चुरावै पर पड़ी रेवैगी। ओ सैहर आत्मिक रूप ऊं सोदोम अर मिसर कुहावै है। बठै ई बांगो प्रभु यीसू करूस पर चढायो हो। सारै देसां, जातियां गा, भासावां गा अर राज्यावां गा लोग साडे तीन दिन तांई बांगी लोथा नै देखता रेवैगा। पण बांगी लोथा नै दाबण कोनी दैयगा। धरती पर रेण आळा लोग बांगी मोत पर खुसी मनावैगा। अर एक दूसरै खातर भेंट भेजैगा क्यूंकै आं दोना परमेसर गी बात बताण आळा धरती पर रेण आळै लोगां नै सताया हा। अर साडे तीन दिन गै बाद परमेसर गी ओर ऊं जीवन गो सांस बामै समाग्यो। अर बे खड़या हो'ग्या अर बानै देखण आळै लोगां पर डर छाग्यो। जद बानै सुरग ऊं एक ऊंची आवाज सुणीजी कै अठै उपर आज्यो। ओ सुणगे बे बादळ पर सवार होगे आपगै दुसमणा गै सामै सुरग पर चडग्या। जद बिं टेम ई जोर ऊं धरती हाली अर धरती गो दसमो हिसो पड़ग्यो। अर सात हजार लोग मरग्या। अर बाकी बचेड़ा लोग डरग्या अर परमेसर गी बडाई करण लागग्या। इंया दूसरी बिपती खत्म होई अब तीसरी बिपती बेगी आण आळी है। जद सातवैं दूत तुरई बजाई तो सुरग में मोटा मोटा हेला होण लागग्या अर लोग केवा हा कै दुनिया गो राज म्हारै मालिक अर बांगै मसी गो राज बणग्यो है अर बो हमेसा हमेसा खातर राज करैगो। जद बे चौबीस बुजरग झिका परमेसर गै सामै आप आपगै सिंघासन पर बेठया हा बे परमेसर सामै गोडा टेकगे आराधना करण लाग्या कै, हे सारा ऊं सकतीसाली मालिक परमेसर झिका थे हो झिका थे हा थारो धन्यवाद करां कै थे आपगै मोटै हक ऊं राज करण लागग्या। “अर जद गेर यहुदियां इंगी रीस करी तो थारो प्रकोप बां पर आ पड़यो। अर अब बो टेम आ'ग्यो कै मरेड़ै लोगां गो न्याय करीजै। अर सागै ई सागै थारा सेवक परमेसर गी बात बताण आळा अर पवितर लोगां अर बे छोटा मोटा लोग झिका थारै नाम गो डर मानै बानै प्रतिफळ मिलै अर बां लोगां नै बर्बाद करीजै झिका लोग धरती नै बिगाड़ै है।” जद परमेसर गो भवन सुरग में खोलिज्यो अर बिमै बांगी वाचा गो संदूक दिख्यो। जद बिजळी चमकण लागगी अर जोर जोर ऊं आवाज गरजन अर धरती हालण लागगी अर मोटा मोटा ओळा पड़ण लागग्या। फेर आकास में एक निसान दिख्यो झिकै में एक लुगाई सूरज नै ओड राख्यो अर चांद बिंगै पगां गै नीचै अर सिर पर बारा तारां गो मुकुट पेर राख्यो। बा गर्भवती होई, अर बा गर्भ गी पीड ऊं चिलांवती ही। फेर एक ओर निसान दिख्यो अर देखो, बिमै एक लाल रंग गो अजगर हो। बिंगै सात सिर अर दस सींग हा। अर सारै सिरां पर एक एक मुकुट हो। बण आपगी पूंछ ऊं आकास गै तारां गो एक तिहाई हिसो खींचगे धरती पर फेंक दियो अर बो अजगर गर्भवती लुगाई सामै खड़यो हो'ग्यो। बो बिंगै टाबर नै जामंता ई खा लेणो चावै हो। जद बण लुगाई एक टाबर नै जन्म दियो झिको लोह गै राज दण्ड ऊं सारै देसा पर राज करण आळो हो। अर चाणचकै ई बिं लुगाई गै टाबर नै परमेसर अर बिंगै सिंघासन गै सामै उठागे पोंचा दियो। अर बा लुगाई भाजगे जंगळ में उड़गी जठै परमेसर गी ओर ऊं बिं खातर जिग्यां तैयार करेड़ी ही। जिंऊं बा एक हजार दो सौ साठ दिना तांई पाळी जा सकै। फेर सुरग में एक युद्ध होयो। झिकै में मीकाईल अर बिंगा सुरगदूत अजगर ऊं लड़ण खातर चाल्या अर बठै अजगर अर बिंगै दूता सागै बांगो घमासाण युद्ध छिड़ग्यो। अजगर अर बिंगै दूता नै मूं गी खाणी पड़ी अर बठै बां खातर जिग्यां कोनी बची। जद बिं मोटै अजगर नै नीचै गिरा दियो झिको इबलीस अर सैतान कुहावै है अर सारी धरती गै लोगां नै भटकावै है बिनै बिंगै दूता समेत धरती पर गिरा दियो। जद मैं सुरग में ऊंची आवाज में ओ केवंता सुण्यो कै, “अब आपणै परमेसर गी मुकती, राज, ताकत अर बिंगै मसी गो हक दिखाई दियो है क्यूंकै झिको म्हारै बिस्वासी लोगां पर दोस लगावंतो अर म्हारै परमेसर सामै रात दिन बानै दोसी ठहरावंतो हो बिनै आज नीचै फिकवा दियो।” पण बां आ जीत मेमणै गै खून अर आपगी गवाई गै बचन गी बजह ऊं पाई है क्यूंकै बां आखरी सांस तांई मरण गी चिंता कोनी करी ही। ईंखातर हे सुरग अर इमै रेण आळा लोगो खुस रेवो। पण धरती अर समुंदर पर हाय। क्यूंकै सैतान अब भोत रीस ऊं थारै कनै उतर आयो है। क्यूंकै बो जाणै कै बिंगो टेम थोड़ो ई है। जद बण अजगर देख्यो कै मनै धरती पर फेंक दियो है तो बिं लुगाई नै सताण लागग्यो झिकी टाबर नै जन्म दियो हो। पण बिं लुगाई नै उकाब गा दो पांख देयड़ा हा कै बा बिं अजगर गै सामूं उडज्य। जठै बा एक हजार दो सौ साठ दिना तांई पाळिजै। फेर बण अजगर आपगै मूं माखर बी लुगाई सामै नदियां गो सो पाणी बहायो जिंऊं बो बिं लुगाई नै तीरागे लेज्यै। पण धरती बिं लुगाई गी मदद करी। धरती आपगो मूं खोलगे बो पाणी पी गी। झिको अजगर आपगै मूं ऊं निकाळयो हो। अजगर नै बिं लुगाई पर रीस आगी। जद बो बिं लुगाई गी बाकी उळाद नै झिकी परमेसर गी आग्यावां नै मानती ही अर यीसू गी गवाई देवंती ही। बां सागै लड़ण नै चाल पड़यो। अर समुंदर गै किनारै गी रेत पर जा'गे खड़ग्यो। मैं एक हिस्यै पसु नै समुंदर मू निकळता देख्यो झिकै गै दस सींग अर सात सिर हा। अर बिंगै सींगा पर दस राज मुकुट हा। अर सिरा पर परमेसर गी निंदा गा नाम लिखेड़ा हा। बो पसु चीतै गी तरियां लागै हो अर बिंगा पग भालू गी तरियां अर मूं सेर गी तरियां हो। अर ईं पसु नै अजगर आपगी ताकत, सिंघासन अर मोटो हक दियो। बिं पसु गै सारा सिरा मूं एक सिर बुरी तरियां ऊं जखम होण'गी बजह ऊं बो मरण आळो सो लागै हो। पण बो जानलेवा जखम ठीक हो'ग्यो हो अर सारी दुनिया गा लोग इनै मानण लागग्या। लोग बिं अजगर गी पूजा ओ केवंता करण लागग्या कै क्यूंकै अजगर बिनै राज करण गो हक दियो हो। ईं पसु बरगो ओर कोई कोनी है। अर इंगै खिलाफ कोई कोनी लड़ सकै। बिं पसु नै डींग मारण अर बेजती करण गो मूं देयड़ो हो। बिनै बंयाळीस म्हिनां तांई राज करण गो हक देएड़ो हो। ईंखातर बण पसु मूं खोलगे परमेसर गी निंदा करी। जिंऊं परमेसर गै नाम गी अर बठै रेण आळां गी बदनामी हो सकै। अर ईं पसु नै परमेसर गै लोगां गै खिलाफ लड़ाई छेड़न गो हक देयेड़ो हो कै बो बानै जीत ल्यै। बिनै सारी जनजाती, लोग, न्यारी न्यारी भासा बोलण आळा लोग अर सारै देसां गै उपर राज करण गो हक देयड़ो हो। अर सारी दुनिया गा लोग ईं पसु गी पूजा करैगा मतलब ओ है कै बे लोग झिकांगो नाम बिं जीवन गी किताब में कोनी, झिको मेमणो बलिदान होग्यो बिंगी है। ओ मेमणो दुनिया गै सरुआत गै टेम ऊं ई मारिज्यैगो हो। “झिकै गै कान है बो सुण ल्यै कै, झिको केदी होण खातर बुलायो है बो जेळ में रेड़िजैगो। झिको तलवार ऊं मारै बो खुद तलवार ऊं मारिजैगो। पवितर लोगां गो धीरज अर बिस्वास इमै ई है।” फेर मैं धरती मू एक ओर पसु नै निकळता देख्यो झिकै गै मेमणै गी तरियां दो सींग हा। पण ओ अजगर गी तरियां बोलै हो। बिं पेलै पसू गी मोजूदगी में ओ दूसरो पसु बिंगा सारा हक काम में लेवंतो हो। ओ दूसरो पसु बी पेलै पसु गी पूजा सारी दुनिया गै लोगां ऊं करवांवतो हो। बो मोटा मोटा अजीब काम दिखावंतो हो अठै तांई कै बो आसमान ऊं धरती पर आग बी बरसा देवंतो हो। आ अजीब कामा ऊं झिका नै पसु गै सामणै दिखाणै गो हक बिनै मिल्यो हो। बो धरती पर रेण आळै लोगां नै धोखो देवंतो हो। बो बानै ओ केवंतो कै बिं पसु गी मूरती बणाओ झिकै गी देह पर तलवार गो घाव हो। बो पाछो जींवंतो हो'ग्यो है। क्यूंकै बिनै बिं पसु गी मूरती में जान घालण गो हक मिलेड़ो हो। जिंऊं बा मूरती बोल सकै अर इंयां बी कै झिका लोग बिं मूरती नै पूजण ऊं इनकार करै तो बानै मरवा दैय। बण छोटा मोटा, अमीर गरीब आजाद गुलाम सारै लोगां गै दाहिणै हात या माथै पर एक छाप लगावा दी। बण इंया बी करयो कै झिकै आदमी कनै बिं पसु गो नाम होवै अर बिंगै नाम गी संख्या गी छाप होवै, बिनै छोड़गे ओर कोई मिनख लेण देण ना कर पावै। झिकै नै समझ होवै तो बो बिं पसु गी संख्या गो हिसाब लगाल्यै। क्यूंकै आ संख्या मिनख गी है आ संख्या 666 है। जद बठै मैं नजर मारी तो मेमणै नै सियोन पहाड़ पर खड़यो देख्यो। बिंगै सागै एक लाख चोमाळिस हजार लोग हा। बांगै माथै पर मेमणै गो अर बिंगै पिता गो नाम लिखेड़ो हो। फेर मैं सुरग ऊं एक हिसी आवाज सुणी झिकी पाणी गी भोत सी धारावां अर गरजन गी सी ही। आ आवाज बीणा बरगी ही। बे सिंघासन गै सामणै अर च्यारूं जीवंता प्राणिया अर बुडां गै सामणै एक नुओ गीत गावण लागरया हा। धरती ऊं मोल लेगे छुडायेड़ा एक लाख चोमाळिस हजार लोगां नै छोड़ बिं गीत नै ओर कोई कोनी सीख सकै हो। ऐ बे लोग हा झिका कुंआरा रेया अर कदी किऊं सरीर गो मेळ कोनी करयो हो। ऐ बे लोग है झिका मेमणै सागै हरेक जिग्यां पर गेया हा। परमेसर अर मेमणै खातर एक खास भेंट गै रूप में बानै धरती पर रेण आळै लोगां मूं खरिदेड़ा हा। बे कदी झूठ कोनी बोल्या अर निरदोस है। फेर मैं एक ओर सुरगदूत नै आकास में उड़ता देख्यो। बिं कनै सुणाण खातर अनन्त खुसी गी खबर ही। आ हरेक देस, कुळ अर हरेक भासा गै लोगां खातर ही। बण ऊंची आवाज में केयो कै, “परमेसर गी मेमा करो, बिंगी उपासना करो, क्यूंकै बिंगै न्याय करण गो टेम आ'ग्यो है। बिंगी आराधना करो, झिकै आसमान, धरती, समुंदर अर पाणी गा झरना बणाया है।” जद एक ओर सुरगदूत ओ केवंतो आयो कै पड़ग्यो मोटो बाबुल पड़ग्यो झिकै आपगै बुरै कामा गी वासना ऊं भरेड़ी दारूं सारै देसां गै लोगां नै प्याई ही। इंगै बाद एक तीसरो सुरगदूत ऊंची आवाज में ओ केवंता आयो कै जे कोई पसु अर इंगी मूरती गी पूजा करै अर आपगै माथै या हात पर बिंगी छाप लगावै। बिनै बी परमेसर गै रीस रूपी दारू झिकी बिंगै रीस रूपी कटोरै मू काडै है बा पीयैगो। बिनै पवितर सुरगदूत अर मेमणै गै सामणै आग अर गन्धक गी भयानक पीड़ा सेण करणी पड़ैगी। बांगी पीड़ा गो धुंओं हमेसा हमेसा खातर उठतो रेवैगो। झिका लोग बिं पसु गी अर बिंगी मूरती गी उपासना करैगा अर बिंगै नाम गी छाप राखैगा बानै दिन रात चेन कोनी मिलैगो। अठै परमेसर गै लोगां गी बात आवै, अठै बे लोग है झिका परमेसर गी आग्यावां नै मानै अर बिं पर बिस्वास राखै है। फेर मैं सुरग ऊं ओ सुण्यो कै, “लिखो, बे धन्य है झिका बिस्वास कर'गे मरैगा। पवितर आत्मा केवै, हां, क्यूंकै बे आपगी मेनत ऊं आजाद हो'ज्यैगा अर बांगै कामा गो हिसाब राखिजैगो।” फेर मैं नजर मारी तो मैं एक उजळो बादळ देख्यो। बिं बादळ पर मिनख गै बेटै बरगो कोई बेठयो हो। बिंगै सिर पर सोनै गो मुकुट अर हात में तीखी दांती ही। इंगै बाद फेर एक ओर सुरगदूत पराथना घर मू निकळगे बादळ पर बेठयै मिनख नै ऊंची आवाज में केयो कै, “दांती लेगे फसल बाड ले। क्यूंकै धरती गी सारी फसल पाक गी है अर फसल नै भेळी करण गो टेम आ'ग्यो है।” जद बादळ पर बेठयै मिनख सारी फसल नै बाड दी। जद एक ओर सुरगदूत पराथना घर मूं निकळयो बिंगै हात में बी एक तीखी दांती ही। फेर एक ओर सुरगदूत बेदी ऊं बारै आयो झिकै नै आग पर हक देयेड़ो हो। बण बिं तीखी दांती आळै सुरगदूत नै केयो कै, “ईंखातर कै अंगूर पूरी तरियां पाकग्या है। बांगा गुछा नै दांती ऊं बाड ले।” जद बण सुरगदूत आपगी दांती नै धरती पर घुमागे सारा गुच्छा बाड दिया। अर बानै परमेसर गी रीस आळै रस कुण्ड में फेंक दिया। अर नगर ऊं बारै बिं कुण्ड में कुचळिज्यैगा अर रस कुण्ड ऊं इतो खून निकळ्यो कै घोड़ां गी लगाम तांई पोंचग्यो अर सो कोस तांई फेलग्यो। फेर मैं सुरग में एक ओर मोटो अजीब निसान देख्यो। बो ओ कै सात सुरगदूतां कनै आण आळी सात बिपतियां ही। आंगै खत्म होण पर परमेसर गी तकड़ी रीस गो अन्त है। फेर मैं आग में मिलेड़ै कांच गो सो समुंदर देख्यो। बिमै बे लोग झिका बिं पसु अर बिंगी मूरती गी अर बिंगै नाम गी गिणती पर जीत हासिल करी, बानै बिं समुंदर कनै परमेसर गी बीणा नै लेगे खड़या देख्या। बे सारा मूसा अर मेमणै गो गीत गागे केवा, हे सारा ऊं जादा ताकत आळा प्रभु परमेसर थारा काम अजीब अर मोटा है। हे पवितर, जुग गा राजा थारा काम न्याय ऊं भरेड़ा अर सच्चा है। हे प्रभु, थारूं कुण कोनी डरै अर थारै नाम गी मेमा कुण कोनी करैगा? क्यूंकै, थे ई पवितर हो। सारा देस आ'गे थारी आराधना करैगा। क्यूंकै थारै न्याय गा काम दिखग्या है। इंगै बाद मैं ओ देख्यो कै झिको सुरग में बो पराथना घर झिको गवाई गो तंबु है बिनै खोल दियो। बिं पराथना घर में बे सातूं सुरगदूत झिका कनै सात बिपतियां ही, बे मलमल गा सुद्ध अर चमकदार गाबा पेरे अर छाती पर सोनै गी पटिया बांदे, मिन्दर ऊं बारै निकळया। जद बां च्यार जींवंता प्राणिया मू एक जणै हमेसा हमेसा खातर जींवंतो रेण आळै परमेसर गी रीस ऊं भरेड़ा बां साता कटोरा नै सात सुरगदूतां नै दिया। पराथना घर परमेसर गी मेमा अर बिंगी ताकत गै धुंवै ऊं भरग्यो। अर जद तांई बां सात सुरगदूत गी सात बिपतियां खत्म ना होई जद तांई पराथना घर में कोई कोनी जा सक्यो। जद मैं पराथना घर मू कणैई सुरगदूतां ऊं ऊंची आवाज में ओ केवंता सुण्यो कै, जाओ परमेसर गी रीस गै सातूं कटोरा नै धरती पर ढोळ दैयो। जद पेलै सुरगदूत जा'गे आपगो कटोरो धरती पर ढोळ दियो। ईं बजह ऊं झिकै लोगां पसु गी छाप ली ही अर बिंगी मूरती गी पूजा करता हा। बांगै भोत पीड देण आळा गुमड़िया निकळग्या। दूसरै सुरगदूत जद आपगो कटोरो ढोळयो तो धरती गो सारो पाणी मरेड़ै आदमी गै खून गी तरियां हो'ग्यो अर पाणी गा हरेक जीव मरग्या। तीसरै आपगो कटोरो नदियां अर पाणी गै सोता पर ढोळ दियो अर बे सारा खून में बदळग्या। फेर मैं पाणी गै सुरगदूत नै ओ केवंता सुण्यो कै, हे पवितर झिको है अर झिको हो, थे झिका न्याय करण आळा हो अर थे ई ओ न्याय करयो है। क्यूंकै आं लोगां पवितर लोगां गो अर परमेसर गी बात बताण आळा गो खून बहायो हो, ईंखातर थे आनै पीण नै खून दियो है अर बे इंगै लायक ई है। फेर मैं बेदी ऊं आ आवाज सुणी कै, हे सर्व सकतिमान प्रभु परमेसर, थारा फेंसला सई अर ठीक है। अर चोथै सुरगदूत आपगो कटोरो सूरज पर ढोळ दियो। बिनै मिनखां नै झूळसाणै गो हक देयड़ो हो। जद भयंकर गरमी ऊं लोग झूळसग्या अर बां परमेसर गी निन्दा करी झिका नै बिपतिया गो हक देयेड़ो। बां आपगै बुरै कामा नै कोनी छोडया अर ना ई परमेसर गी बडाई करी। फेर पांचवै सुरगदूत आपगो कटोरो पसु गै सिंघासन पर ढोळ दियो अर बिंगो राज अंधेरै में डूब ग्यो। बिनै पूजण आळा लोग दांत पीसण लागग्या। आपगी पीड अर गुमड़िया गी बजह ऊं बे परमेसर नै बुरो केण लागग्या। पण बां आपगै बुरै कामा नै कोनी छोडया अर ना ई परमेसर कानी मूड़या। फेर छटै सुरगदूत आपगो कटोरो मोटी नदी फरात पर ढोळ दियो। अर बा सारी सूक गी जिंऊं पूरब दिसा गा राजा आपगी फोज नै बिना कोई रुकावट गै पस्चिम दिसा कानी ले जा सकै। फेर मैं डेडर बरगी तीन ओपरिया नै अजगर, बिं पसु अर झूठी बात बताण आळा गै मूं माखर निकळती देखी। ऐ ओपरिया बे है झिकी अजीब काम करण गै सागै दुनिया गै राजावां कनै जावै है। ऐ सारा ऊं सरवसकतिमान परमेसर गै मोटै न्याय गै दिन प्रभु गै खिलाफ युद्ध करण खातर बानै भेळी करै है। अर देखो, मैं चोर गी तरियां चाणचकै आऊंगा पण बे लोग आसिस ऊं भरेड़ा है झिका मनै उडीकण लागरया है झिका आपगा गाबा तैयार राखै है जिंऊं बानै आपगै नंगैपण अर सरम गो सामणो ना करणो पड़ै। फेर बां ओपरियां, राजावां अर फोज नै बिं जिग्यां भेळी करी झिकी नै इब्रानी में हर-मगिदोन नाम केवै। जद सातवैं सुरगदूत आपगो कटोरो हवा में खाली कर दियो। जद सुरग गै पवितर स्थान में परमेसर गै सिंघासन ऊं एक जोर गी आवाज ओ केवंता सुण्यो कै सारो कीं पूरो हो'ग्यो है। फेर बिजळियां, सब्द, गरजना अर धरती हाली। धरती इती जोर ऊं हाली कै धरती पर मिनख बणाण गै बाद ऊं कदी कोनी हाली ही। इंऊं बो मोटो सैहर तीन हिसा में बंटग्यो। अर देसां देसां गा सैहर नास हो'ग्या। परमेसर गै सामणै बड़ा बेबिलोण नै याद करैयो ग्यो, जिंऊं परमेसर गी रीस गी दारू बिनै प्यायिजै। हरेक टापू आप आपगी जिग्यां ऊं सीरक ग्या। पहाड़ गो तो ठा ई कोनी लाग्यो। अर आकास ऊं लोगां पर मण मण गा ओळा पड़या। आ बिपता भोत दुखदायी होण'गी बजह ऊं लोगां परमेसर नै बुरो केयो। बां सातां सुरगदूतां मू एक मनै आ'गे केयो कै, आओ झिकी मोटी बेस्या लुगाई झिकी बोळै पाणी पर बेठी है मैं बिंगै दण्ड नै तनै दिखाऊंगा। इंगै सागै दुनिया गै राजावां कुकर्म करयो हो। अर दुनिया गा लोग इंगै सागै कुकर्म गी दारू में मतवाळा हो'ग्या हा। इंगै बाद बो सुरगदूत मनै पवितर आत्मा में जंगळ में लेग्यो। बठै मैं सात सिर अर दस सींग आळै एक लाल पसु नै देख्यो। ओ पसु निन्दा गै नामा ऊं ढकेड़ो हो अर ईं पर एक लुगाई बेठी ही। अण लुगाई बेजणी अर लाल रंग गा गाबा पेर राख्या अर हीरै मोती अर सोनै ऊं सजेड़ी ही। इंगै हात में एक सोनै गो कटोरो हो, झिको घिनोणी चिजां अर कुकर्म गी गंदगी ऊं भरेड़ो हो। अर बिंगै माथै पर ओ भेद भरेड़ो नाम लिखेड़ो हो, बड़ा बेबिलोण, बेस्यावां अर धरती गी घिनोणी चिजां गी मां। मैं बिनै पवितर लोगां अर यीसू गै गवा गो खून पीगे मतवाळी होयेड़ी देखी। बिनै देखगे मैं हेरानी ऊं भरग्यो। बण सुरगदूत मनै केयो, तनै हेरानी क्यूं होवै? मैं सात सिर अर बिं सींग आळै पसु अर बिं पर बेठी लुगाई गै भेद नै तेरै पर परगट करूंगा। झिको पसु तूं देख्यो है बो पेलां हो। पण अब कोनी है बो अथाह कुण्ड मू निकळगे बिनास में पड़ ज्यैगो। दुनिया गी सरुआत ऊं सारा लोग झिका गा नाम जीवन गी किताब में कोनी लिखेड़ा है। ओ पसु झिको पेलां हो, अब कोनी पण आण आळो है बिनै देखगे अचंभो करैगा। अठै बुद्धी गी बात है झिका सात सिर है बे सात पहाड़ झिका पर बा लुगाई बेठी है। बे सात राजा बी है झिका में पांचा गो राज खत्म हो'ग्यो है। एक राज करण लागरयो है अर एक अजे तांई आयो कोनी है। जद बो आवैगो तो थोड़ै टेम खातर जरूर बण्यो रेवैगो। बो पसु झिको पेलां हो अब कोनी है। बो खुद आठवो राजा है। पण बो साता मू एक है झिको नास होण आळो है। अर दस सींग झिका तूं देख्या हा बे दस राजा है। झिका नै अजे तांई राज कोनी मिल्यो। पण आं राजावां नै बिं पसू सागै एक घंटै राज करण गो हक मिलैगो। आ राजावां गो एक ई मकसद है बे आपगी ताकत अर हक बिं पसु नै दैयगा। बे सारा मेमणै ऊं लड़ैगा पण मेमणो बानै जीत ल्यैगो। बोई प्रभुआं गो प्रभु अर राजावां गो राजा है। झिको मेमणै गै सागै है बानै चुणेड़ो अर बिस्वास लायक केईजै है। जद सुरगदूत मनै केयो कै झिकै पाणी पर तूं बिं बेस्या लुगाई नै बेठी देखी है अर बा भीड़ न्यारै न्यारै देस अर न्यारी न्यारी भासा गै लोगां गी है। झिका दस सींगा अर पसु नै तूं देख्यो है, बे अर पसु रळगे बिं बेबीचारी लुगाई ऊं नफरत कर'गे बिनै बरबाद कर दैयगा। बे बिनै खा ज्यैगा अर बाळ दैयगा। परमेसर आपगो मकसद पूरो करण खातर बानै एक मन दियो, कै जद तांई परमेसर गी केयेड़ी बात पूरी ना हो'ज्यै जद तांई बिं पसु नै आपगी हकुमत गो हक सूंप दैय। आ लुगाई झिकी नै तूं देखी ही बो मोटो नगर है झिको ई दुनिया गै राजावां पर राज करै है। इंगै बाद मैं एक ओर सुरगदूत नै सुरग ऊं उतरता देख्यो झिकै गै कनै मोटो हक हो। बिंगै प्रकास ऊं धरती चमकण लागगी। जद बण ऊंची आवाज में केयो, “मोटो नगर बाबुल ढैह ग्यो, ढैहग्यो। बो ओपरिया गी सारी तरियां गी गंदी आत्मावां गो अर माड़ी अर घिनोणै पंछिया गो टिकाणो बणग्यो। क्यूंकै बिंगी बेबीचार गी भयानक दारू सारै देसां पी ली। ईं दुनिया गै सारै राजावां बिंगै सागै कुकर्म करयो है। अर बिंगै भोग बिलास गी बजह ऊं बोपारी अमीर हो'ग्या है।” फेर मैं सुरग ऊं एक आवाज नै ओ केवंता सुण्यो कै, “हे मेरा लोगो बिं नगर मू निकळ ज्याओ। जिंऊं थे बिंगा अपराधी ना बण सको अर बिं पर आण आळी बिपतियां ऊं बच ज्यो। क्यूंकै बिंगा अपराध सुरग तांई पोंचग्या है अर परमेसर बिंगै गळत कामा नै याद करया है। जिंया बण थारै सागै करयो है, बिंयाई थे बिंगै सागै करो अर बिंगै कामा गै हिसाब ऊं बिनै दुगणो बदळो दैयो। झिकै कटोरै ऊं बण उंडेळयो है। बिंगै बदळै बिंगै कटोरै में दुगणो दैयो। जिती बण अपणै आप नै इज्जत दी है। आपगो जीवन सुखबिलास में बितायो है। बिती बिनै पीड़ा अर दुख दैयो। क्यूंकै बा आपगै मन में केवै कै, मैं राणी गी तरियां बेठी हूं अर सुहागण होण गै कारण मनै कदी कीं दुख कोनी होवैगो। ईंखातर एक ई दिन में बिं पर बिपतियां आ पड़ैगी अर ऐ हो'सी मोत, बिलाप अर अकाळ अर बा आग में भस्म हो'ज्यैगी। क्यूंकै न्याय करण आळो प्रभु परमेसर भोत सरवसकतिमान है।” ईं दुनिया गै झिकै राजावा बिं सागै कुकर्म करयो है अर बिंगै सागै सुख बिलास करयो है अर बे बिंगै बळण गो धुंओ देखगे बिं खातर रोवैगा अर विलाप करैगा। अर बिंगी पीड़ा गी बजह ऊं बे डरगे दूर खड़या केवैगा, “हाय, हाय मोटा सैहर बाबुल। ताकत आळा सैहर। एक पल में ई तनै सजा मिलगी।” ईं दुनिया गा राजा बिं खातर रोवैगा अर दुख करैगा। क्यूंकै बांगो कोई कीं बी माल कोनी खरीदैगो। सोनो, चांदी, किमती पथर, मोती, बडिया मलमल, बेजणी कपड़ा, रेसम, लाल कपड़ा, हरेक तरियां गी लकड़ी, हाती दांत गी बणायेड़ी चिजां, मेंगी लकड़ी, पीतळ, लोह अर मारबळ गी चिजां। दाळ चीणी, ईतर, सुरमाळी चिजां, लोबान, दारू, तेळ, आच्छी किसम गो आटो, जानवर, भेड़ घोड़ा, रथ, लोगां गी देह अर आत्मा। झिकी आच्छी चिजां गी कामना थारी आत्मा करती रेई है, बा थानै कोनी मिल पाई। थारी बिलासता अर सान थारूं जावंती रेई। अर थे बिनै कदी कोनी देखोगा। झिका बोपारी बिंगी बजह अमीर बण्या हा, बे बिंगी पीड़ा गै डर ऊं भोत दूर खड़या बिलख बिलखगे रोवैगा। बे केवैगा, “हाय। हाय। बो मोटो सैहर झिको बड़िया मलमल बेजणी लाल कपड़ा, सोनै, किमती पथरां अर मोतिया ऊं सजेड़ो हो। बिंगी एक पल में ई सारी धन संपती गायब होगी। जहाज गो हरेक कपतान अर बिंगा सवार, मलाह झिका समुंदर में बोपार करै बे सारा दूर खड़या रेया।” जद लोगां बिंगै बळण गो धुंओ देख्यो तो चिलागे केवैगा, कै कोई ईं सैहर ऊं मोटो सैहर है। बां आपगै सिर में रेत गेरता ऊंची आवाज में रोवंता बिलखता केयो, “हाय। हाय। बो मोटो सैहर जठै पाणी आळै जहाज गा मालिक, बिं लुगाई गै धन ऊं अमीर बणग्या हा क्यूंकै एक पल में बर्बाद होगी। हे सुरग, पवितर लोगो अर परमेसर गी बात बताण आळो थे ईं बात ऊं खुस होओ क्यूंकै परमेसर बिनै सजा दी।” जद एक ताकतवर सुरगदूत एक चाकी गै पथर गी तरियां एक मोटै पथर नै चकगे समुंदर में रेड़गे केयो, “ईं तरियां बो मोटो सैहर बाबुल भोत फेंकिजै गो, जिंऊं बिंगो नाम निसान ई मिट ज्यैगो।” “बीण बजाण आळा, गीत गाण आळा, बंसरी बजाण आळा अर तुरई फूंकण आळां गी आवाज फेर कदी तेरै में सुणाई कोनी देसी। चाकी चालण गी आवाज तेरै में कदी कोनी सुणैगी अर कोई बी काम करण आळो आदमी तेरै में कोनी लादैगो। अर ना ई तेरै में कदी दीयै गो चानणो दिखैगो अर बीन बीनणी गी आवाज कदी तेरै में कोनी सुणाई देवैगी। दुनिया गा मोटा लोग अर सारै देसां गा बोपारी तेरै जादू टूणै ऊं भरमाएड़ा हा। ईं धरती पर झिका लोग मारिज्या हा बांगो पवितर लोगां गो अर परमेसर गी बात बताण आळा गो खून तेरै में मिल्यो हो।” आं सारी बातां गै बाद सुरग में मैं एक ऊंची आवाज सुणी, हालेलुया, मुकती, मेमा अर ताकत म्हारै प्रभु परमेसर कनै है। ईंखातर कै बांगो न्याय साच्चो अर सई है। मोटी बेस्या लुगाई नै सजा मिली है झिकी सारी दुनिया नै अण कुकरम ऊं गुमराह कर राखी ही। बिंगै द्वारा बहायड़ै खून गो बदळो बी बिंऊं ले लियो। बां फेर केयो, हालेलुया। अर हमेसा हमेसा खातर बिंगै बळण गो धुंओ उठतो रेवैगो। अर चौबीस बुडा अर च्यार जीवंता प्राणीयां परमेसर नै झिको सिंघासन पर बेठयो हो बां माथो टेकगे प्रणाम करयो अर आराधना करता केयो, इयां ई होवै, हालेलुया। जद सिंघासन ऊं आ आवाज सुणाई दी कै, “थे सारा झिका दास हो चायै छोटा है चायै मोटा अर बाऊं डरो हो, परमेसर गी बडाई करो।” फेर मनै भीड़ गो सोर सुणाई दियो। ओ बोळै पाणी अर तकड़ी गरजना गी तरियां सब्द सुणीज्यो हो। हालेलुया। म्हारो सरवसकतीमान परमेसर राज करण लागरयो है। आओ आपां खुस होवां अर परमेसर गी बडाई करां क्यूंकै मेंमणै गै ब्या गो टेम आ'ग्यो है अर बिंगी बीनणी अपणै आपनै तैयार कर राखी है। पेरण खातर बिनै आच्छी किसम गी साफ अर चमकती मलमल देएड़ी है। ईं आच्छी किसम गो मतलब है पवितर लोगां गा धारमिकता गा काम है। अर बण केयो, लिखो बे आसिस पायेड़ा लोग है झिका नै मेमणै गै ब्या में नूतेड़ा है। बण मनै ओ बी केयो, आ परमेसर गी केयेड़ी साची बात है। अर मैं बिंगै पगां पड़गे बिंगी आराधना करी जद बण मनै केयो, देख इयां ना कर। क्यूंकै मैं तेरै अर तेरै भाईयां बरगो हूं झिका कनै गवाई है। बां तरियां एक दास हूं। सिरफ परमेसर गी आराधना कर। क्यूंकै यीसू मसी गी गवाई परमेसर गी बात गी आत्मा है। अर मैं सुरग खुलो देख्यो अर बिमै मैं एक धोळो घोड़ो देख्यो झिकै पर कोई बेठयो हो। बो बिस्वास लायक अर साच्चो कुहावै है। बो धारमिकता, न्याय अर युद्ध करै है। बिंगी आंख्या आग गी लपटा गी तरियां ही अर बिंगै सिर पर भोतसा मुकुट हा। बांगै माथै पर एक नाम लिखेड़ो हो, झिकै नै बिंगै सिवाय ओर कोई कोनी जाणै हो। बण हिस्या कपड़ा पेर राख्या झिका खून में डबोयेड़ा हा, बिंगो नाम परमेसर गो बचन हो। सुरग गी सेना, धोळै घोड़ां पर धोळा साफ अर बडिया किसम गी मलमल पेरेड़ी मेमणै गै लारै लारै जाण लागरी। मेमणै गै मूं माखर तेज तलवार निकळै ही झिकी ऊं बो देसां गै लोगां नै मारतो हो। बो बांगै उपर लोह गै राज दंड ऊं राज करैगो। बो सरवसकतिमान परमेसर गी रीस गी जळन गी दारू गै कुण्ड में अंगूर कुचळैगो। बिंगै जांघ अर गाबा पर एक नाम लिखेड़ो हो, राजावां गो राजा अर प्रभुवां गो प्रभु। फेर मैं एक सुरगदूत नै सूरज पर खड़यो देख्यो। बण ऊंची आवाज में चिलागे आसमान में उड़ण आळै पंछिया ऊं केयो, “आज्यो अर म्हान परमेसर गै भोज में भेळा होवां। जिंऊं थे राजावां, प्रधाना, तकड़ै लोगां, घोड़ां बांगै असवारा अर सारी तरियां गा लोग आजाद, गुलाम, छोटा अर मोटा गो मांस खा सको।” फेर मैं दुनिया गै राजावां अर बांगी सेना नै घोड़ै पर बेठयो आदमी अर बिंगी सेना ऊं लड़ण खातर भेळा देख्या। बिं पसु अर झूठी बात बताण आळा नै झिको बिंगै सामणै निसान दिखावंतो बिनै पकड़ लियो। ओ निसान बो बानै धोखो देवंतो हो। झिका बिं पसु गो निसान ले राख्यो हो। अर झिका मूरती गी आराधना करता हा। बां दोना नै गंधक ऊं जगती आग में जीवंता फेंक दिया। बाकी बचेड़ै लोगां नै घोड़ै पर बेठयै आदमी गै मूं ऊं निकळती तलवार ऊं खत्म कर दिया अर बांगै मांस ऊं सारा पंछी धाप ग्या। फेर मैं सुरग ऊं उतरता एक ओर सुरगदूत नै देख्यो, झिकै गै कनै अथाह कुंड गी चाबी अर मोटी सांकळ ही। बण अजगर बिं पुराणै सांप नै झिको मोटो सैतान है बिनै एक हजार साल खातर बांद दियो। बण बिनै अथाह कुंड में ताळो लगागे उपर एक मोहर लगा दी जिंऊं हजार साला तांई लोगां नै भरमा ना सकै। बिंगै बाद बिनै थोड़ी देर खातर आजाद करीजैगो। फेर मैं सिंघासन अर बां पर बेठयै लोगां नै देख्या बानै लोगां गो न्याय करण गो अर सजा देण गो हक देयेड़ो हो। फेर मैं बां लोगां गी आत्मावां नै देखी। झिकां गा सिर यीसू गी गवाई देण गी बजह ऊं अर परमेसर गै बचन गै कारण धड़ ऊं न्यारा करेड़ा हा। बां पसु या मूरती गी पूजा कोनी करी ही। अर ना ई आपगै माथै पर बांगो निसान लगायो हो। बे जीवंता होगे मसी सागै एक हजार साल तांई राज करता रेया। बाकी लोग जद तांई जीवंता ना होया जद तांई एक हजार साल खत्म कोनी होया। ओ पेलो जी उठणो हो। आसिस पायेड़ो अर पवितर आदमी बो है झिको पेलै जी उठण में सामिल होवैगो, हिस्यै लोगां पर दूसरी मोत गो हक कोनी हो'सी, पण बे परमेसर अर मसी गा याजक हो'सी। अर एक हजार साल तांई बांगै सागै राज करैगा। जद एक हजार साल पूरा हो'ज्यैगा जद सैतान नै केद ऊं आजादी मिल ज्यैगी। बो युद्ध खातर गोग मगोग अर धरती गै चयारूंमेर गै सारा देसा नै भेळा करण गै बाद में धोखो दैयगो। बांगी गिणती अणगिणत होवैगी। बे धरती गी सारी दिसावां ऊं निकळगे प्यारै सैहर अर पवितर लोगां गी जिग्यां नै च्यारूंमेर ऊं घेर ल्यैगा। जद सुरग ऊं परमेसर गी ओर ऊं आग निकळैगी। अर ईं सेना नै भस्म कर दैयगी। अर सैतान झिकै बानै धोखै में राखतो हो बो आग अर गंधक गी झील में रेड़ीज्यैगो, जठै बो पसु अर झूठी बात बोलण आळो हो। बठै बे दिन रात अर हमेसा हमेसा खातर पीड़ा में तड़फता रेवैगा। फेर मैं एक धोळो सिंघासन अर बिं पर बेठयै नै देख्यो। बिंगै सामणू धरती अर आकास भाज खड़या होया। अर बानै कठैई जिग्यां कोनी मिली। अर फेर मैं छोटा मोटा झिका मरग्या हा, बानै सिंघासन सामै खड़या देख्या अर जद किताबा खोलीजी अर बिंगै बाद जीवन गी किताब खोलीजी अर बांगो न्याय बांगै कामा गै आधार पर होयो झिकां गो लेखो ईं किताब में हो। समुंदर बां मरेड़ा नै उगळ दिया झिका बिमै हा। मोत अर कबर आप में समायड़ै मरेड़ै लोगां नै उगळ दिया। आ दूसरी मोत है। झिकै गो नाम जीवन गी किताब में ना मिल्यो, बिनै आग गी झील में फेंक दियो। फेर मैं नुअ सुरग अर नुई धरती नै देखी। पेलो सुरग अर धरती खत्म होगी। अर समुंदर बी कोनी दिख्यो। फेर मैं नुअ यरुसलेम नै सुरग ऊं परमेसर कनूं उतरता देख्यो। बा इंया लागै ही जिंया एक बीनणी आपगै पति खातर सिंगार कर राख्यो होवै। फेर मैं सुरग ऊं आवंती ऊंची आवाज नै सुणी कै, देखो, परमेसर गो वास लोगां गै बिचाळै है अर बे बांगै सागै रेवैगा अर बे बांगा लोग हो'सी। परमेसर खुद बांगै सागै रेवैगो अर बांगो परमेसर होवैगो। परमेसर बांगी आंख्यां गा सारा आंसू पूंछ दैयगो। इंगै बाद मोत, दुख अर रोणो कोनी होवैगो, दर्द बी खत्म होज्यैगो, क्यूंकै पुराणी बातां बीत गी। सिंघासन पर बेठयै केयो, देखो मैं सारी बातां नै नुई कर दैयूं हूं। बण मनै केयो, ओ लिख ले क्यूंकै ऐ बातां सच्ची अर मानण गै लायक है। फेर बण केयो, “पूरो होयो। मैं अल्फा अर ओमेगा, सरुआत अर अंत मैं ई हूं। झिको तीस्यो है, बिनै मैं जीवन गै सोतै मू मुफ्त पाणी दैयूंगा। झिको जीतैगो बो बिं चिजां गो वारिस हो'सी मैं बिंगो परमेसर होस्यूं अर बो मेरो बेटो होवैगो। कायर, अबिस्वासी, दुस्ट, हत्यारा, बेबीचारी, जादुगर, मूरतिपूजण आळा अर झूठा गो हिसो बिं झील में होवैगो झिकी आग अर गंधक ऊं जगती रेवै आ दूसरी मोत है।” सात सुरगदूतां मू एक झिकै कनै आखरी साल गै बिपता गा भरेड़ा सात कटोरा हा। बण मनै आ'गे केयो, “अठै आ तनै मेमणै गी बीनणी दिखाऊंगा।” जद बो मनै पवितर आत्मा में एक मोटै अर ऊंचै पहाड़ पर लेग्यो। अर मैं एक मोटै सैहर पवितर यरुसलेम नै सुरग मू परमेसर गी तरफ ऊं बिंगी मेमा ऊं भरेड़ो उतरता देख्यो। परमेसर गी मेमा बिमै ही। बिंगो चानणो भोत सै किमती पथरां गी तरियां, यसब गी तरियां साफ हो। ईं सैहर गी मोटी अर ऊंची कंदा में बारा दरवाजा हा। आं बारा दरवाजा पर बारा सुरगदूत हा। आं दरवाजा पर इसराएल गै बारा गोतरां गो नाम लिखेड़ो हो। पूरब दिसा कानी तीन दरवाजा, उतर कानी तीन दरवाजा दिखणाद कानी तीन अर पस्चिम कानी तीन दरवाजा हा। ईं सैहर गै कंदा गी बारा निंवा ही। ईं पर मेमणै गै बारा खास चेला गो नाम लिखेड़ो हो। झिको मेरूं बात करै हो बिं कनै, दरवाजा अर कंद नापण खातर सोनै गो गज हो। सैहर चोकोर अकार गो हो। बिंगी लंबाई, चोड़ाई एक बरगी ही। बण बिं गज ऊं सैहर नै नाप्यो झिको साढै सात सो कोस हो। इंगी लम्बाई, चोड़ाई अर ऊंचाई एकसी ही। जद बण कंद नै नापी तो बण छ फूट मोटी पाई। कंद यसब गी बणेड़ी ही अर सैहर साफ कांच गी तरियां सुद्ध सोनै गो हो। बिं सैहर गी नींव गा पथर सारी तरियां गै किमती पथरा ऊं सजेड़ा हा। नींव गो पेलो पथर यसब दूसरो नीलम, तीसरो लालड़ी, चोथो मरकत। पांचवो गोमेद, छटो माणिक्य, सातवों पीतमणी। आठवों पेरोज, नोवों पुखराज, दसवों लहसनिया, ग्यारवों धूमरकान्त अर बारवो चनद्रकान्त हो। बारा फाटक बारा मोती गा हा। हरेक फाटक एक एक मोती गो बणेड़ो हो। सैहर गी सड़क साफ सीसै गी तरियां सुद्ध सोनै गी ही। मैं बिं सैहर में कोई मिन्दर कोनी देख्यो। क्यूंकै बठै परमेसर अर मेमणो ई मिन्दर हा। बठै चांद सूरज गै चानणै गी लोड़ कोनी ही। क्यूंकै परमेसर गै तेज ऊं ई चानणो भरेड़ो हो। अर मेमणो बिंगो दीयो हो। झिकै देसां गै लोगां उद्धार पायो है, बे बिंगै चानणै में चालैगा अर दुनिया गा राजा आपगै प्रताप नै बिमै ल्यावैगा। बिंगा फाटक दिन में कदी बंद कोनी हो'सी क्यूंकै बठै रात कोनी होवैगी। बे देसां गी सान अर इज्जत नै बिमै ल्यावैगा। कोई तरियां गी गंदी चीज इमै आ कोनी सकैगी। अर ना असुद्ध अर झूठ बोलण आळा आवैगा। सिरफ बे ई आवैगा झिका गो नाम जीवन गी किताब में लिखेड़ो है। फेर बण मनै जीवन गै पाणी गी सुद्ध नदी दिखाई। आ नदी बिं नगर गी सड़का गै बिचाळै बणेड़ी ही। आ साफ पाणी गी नदी परमेसर अर मेमणै गै सिंघासन ऊं निकळै ही। सड़क गै बिचाळै अर नदी गै दोना पासै जीवन गा दरखत हा। हरेक म्हिनै आं दरखता ऊं बारा तरियां गा फळ निकळता हा। आं दरखता गै पता ऊं देसां-देसां गा लोग निरोगा रेंवता हा। अब ओर कोई सजा कोनी रेवैगी, पण सैहर में मेमणै गो अर परमेसर गो सिंघासन रेवैगो। अर बांगा सेवक बांगी सेवा करैगा। बे बांगी हजूरी में रेवैगा अर बांगै माथा पर यीसू गो नाम लिखेड़ो हो'सी। बठै कदी रात कोनी हो'सी अर ना बठै चानणै गी लोड़ पड़सी। क्यूंकै प्रभु परमेसर बानै चानणो देसी। अर बे हमेसा हमेसा खातर राज करैगा। अर फेर बण केयो, “ऐ बातां भरोसेमंद अर साच्ची है। पवितर परमेसर गी बात बताण आळा गो प्रभु परमेसर आपगै दास कनै सुरगदूत ईंखातर भेज्यो है कै चाणचकै होण आळी बातां नै बतावै कै। देखो, मैं चाणचकै ई आण आळो हूं। आसिस पायेड़ो मिनख बो है झिको ईं किताब में लिखेड़ी परमेसर गी बात गो पालणा करै है।” अर मैं, यूहना आं सारी बातां नै देखी अर सुणी है। आं सारी बातां नै देखण अर सुणन गै बाद झिकै सुरगदूत मनै ऐ बातां दिखाई, मैं बिंगी उपासना करतो बिंगै पगां पड़ग्यो। पण बण मनै केयो, “देख इंया ना कर। मैं बी थारी तरियां दास अर परमेसर गी बात बताण आळा भाईयां गो साथी हूं, सिरफ परमेसर नै ई निवण करो।” फेर बण केयो, “ईं किताब गी बातां पर मोहर ना लगा, क्यूंकै टेम कनै आ'ग्यो है। झिको अन्यायी है बो बिंयाई बण्यो रेवै, झिको दुस्ट है, बो दुस्ट झिको धरमी है बो धरमी बण्यो रेवै अर झिको पवितर है बो पवितर बण्यो रेवै।” “सुणो, मैं चाणचकै ई आण आळो हूं अर लोगां नै बांगै करमा गै हिसाब ऊं दियो जाण आळो फळ मेरै कनै है। मैं अल्फा अर ओमेगा हूं, मैं ई सरुआत अर अंत हूं अर मैं ई पेलो अर आखरी हूं। आसिस पायेड़ा लोग बे है झिका आपगा गाबा धोगे सुद्ध हो'ज्यै है जिंऊं बानै जीवन गै दरखत कनै अर सैहर में जाण खातर बारनै माखर हक मिलै। अर कुता, जादुगर, बेबीचारी, हत्यारा, मूरती पूजण आळा अर झूठ ऊं प्रेम राखण आळा अर झूठी बाता बताण आळा है बे बारै रेवैगा। मैं, यीसू, सुरगदूतां नै ईंखातर भेज्यो जिंऊं बो बिस्वासी मंडलिया में गवाई दे सकै। मैं दाऊद गो मूळ अर चमकतो झांझरकै गो तारो हूं।” पवितर आत्मा अर बीनणी गो केणो है कै आओ झिको सुणै बो केवै है, आओ अर झिको तीस्यो है बो बी आओ। झिको इंया करैगो बो जीवन गो पाणी मुफ्त में पीयैगो। हरेक झिको ईं किताब में परमेसर गी बात सुणै है बिं खातर मेरी आ गवाई है जे कोई आं बातां में ओर कीं जोड़ैगो तो परमेसर ईं किताब में लिखेड़ी बिपतियां बिं पर बढावैगो। झिको आदमी ईं किताब गी परमेसर गी बात मू कीं निकाळै तो परमेसर जीवन गै दरखत, पवितर सैहर अर ईं किताब मू बिंगो नाम मिटा दैयगो। झिका आं बातां गी गवाई दैय है अर केवै है, “मैं जरूर बेगो ई आण आळो हूं। इंयाई होवै है, प्रभु यीसू बेगा आओ।” प्रभु यीसू मसी गी किरपा पवितर लोगां सागै रेवै। आमीन।