ईसू मसीह अब्राहम कौ बन्सज और दाऊद कौ बन्सज है। ईसू मसीह के बाप दादान के नाम जा तरैह ते हैं। अब्राहम कौ बेटा इसहाक, इसहाक कौ बेटा याकूब और याकूब कौ बेटा यहूदा और वाके भईया हते। यहूदा और वाकी पत्नी तामार के बेटा फिरिस और जोरह हते। फिरिस कौ बेटा हिस्रोन हतो। हिस्रोन कौ बेटा एराम हतो। एराम कौ बेटा अम्मीनादाब हतो। अम्मीनादाब कौ बेटा नहसोन और नहसोन कौ बेटा सलमोन हतो। सलमोन और वाकी पत्नी राहब कौ बेटा बोअज हतो। बोअज और वाकी पत्नी रूत कौ बेटा ओबेद हतो। ओबेद कौ बेटा यिसै हतो। यिसै कौ बेटा दाऊद राजा हतो। दाऊद कौ बेटा सुलेमान हतो, बू बा औरत ते पैदा भयौ, जो पहलें उरिय्याह की पत्नी हती। सुलेमान कौ बेटा रहबाम हतो। रहबाम कौ बेटा अबिय्याह हतो। अबिय्याह कौ बेटा आसाफ हतो। आसाफ कौ बेटा यहोसाफात हतो। यहोसाफात कौ बेटा योराम हतो। योराम कौ बेटा उज्जियाह हतो। उज्जियाह कौ बेटा योताम हतो। योताम कौ बेटा आहाज हतो। आहाज कौ बेटा हिजिकिय्याह हतो। हिजिकिय्याह कौ बेटा मनश्शे हतो। मनश्शे कौ बेटा आमोन हतो। आमोन कौ बेटा योसिय्याह हतो। इसरायल ते बन्दी बनाकै बेबीलोन जाबे के समै में योसिय्याह के बेटा यकुन्याह और वाके भईया पैदा भए। बन्दी हैके बेबीलोन में पौहचायबे के बाद यकुन्याह कौ बेटा सालतिएल पैदा भयौ। और सालतिएल कौ बेटा जरुब्बाबिल हतो। जरुब्बाबिल कौ बेटा अबीहूद हतो। अबीहूद कौ बेटा इल्‍याकीम हतो। इल्‍याकीम कौ बेटा अजोर हतो। अजोर कौ बेटा सदोक हतो। सदोक कौ बेटा अखीम हतो। अखीम कौ बेटा इलीहूद हतो। इलीहूद कौ बेटा इलियाजर हतो। इलियाजर कौ बेटा मत्‍तान हतो। मत्‍तान कौ बेटा याकूब हतो। याकूब कौ बेटा यूसुफ हतो। जो मरियम कौ पती हतो। मरियम ते ईसू पैदा भयौ जाकूं लोग मसीह कैहतैं। जा तरैह ते अब्राहम ते लैके दाऊद तक सब चौदह पीढ़ी भईं। और दाऊद ते लैके बेबीलोन में बन्दी बनाकै पौंहचाए जाबे तक चौदह पीढ़ी भईं। बेबीलोन में पौहचबे के बाद ते लैके मसीह तक चौदह पीढ़ी भईं। ईसू मसीह कौ जनम जा तरीका ते भयौ, जब वाकी मा मरियम की सगाई यूसुफ नाम के आदमी के संग भई हती बिनकी सादी हैबै ते पैहले बू पबित्र आतमा की सक्‍ती ते गर्भवती भई हती। जब यूसुफ कूं जि मालूम परी, तौ बानें मरियम ते चुपचाप सगाई तोड़बे की सोची। चौंकि यूसुफ एक धरमी और भलौ आदमी हतो और बू अपनी हैबे बारी पत्नी कूं बदनाम करबौ नांय चाहतो। यूसुफ इन बातन के बारे में सोचई रयो, तबई पिरभू के सुरग दूत ने बाते सपने में कही, “कै दाऊद के बन्सज यूसुफ तू मरियम कूं सादी करकें अपने घर लायबे ते मत डरपै। चौंकि जो वाके पेट में है, बू पबित्र आतमा की सक्‍ती ते है। बू बेटा जनैगी, तू वाकौ नाम ईसू रखियो। चौंकि बू अपने लोगन कौ बिनके पापन ते उद्धार करैगौ।” जि सबरी बात जा बजैह ते हैरइऐं कै, पिरभू के बे वचन जो परमेस्‍वर की ओर ते बात बतायबे बारेन के द्वारा कहे गये हते, बे पूरे होंय। “एक क्वारी गर्भवती होगी, और बू एक बेटाए जनैगी और वाकौ नाम इम्मानुएल रखौ जाबैगौ” जाकौ मतलब है “परमेस्‍वर हमारे संग है।” इतनी सुनकें यूसुफ नींद ते जग गयौ और पिरभू के सुरग दूत की आग्‍या मानकै मरियम कूं अपने घर ब्याह करकें लै आयौ। और जब तक वाके बेटा पैदा नांय भयौ, तब तक बू मरियम के संग नांय सोयौ। और बानें वाकौ नाम ईसू रखौ। राजा हेरोदेस के समै में ईसू कौ जनम यहुदिया के बैतलहम सहर में भयौ हतो। तब पूरब दिसा ते कछू जोतसी येरूसलेम में आयकें, पूछवे लगे कै, “यहुदी लोगन के राजा कौ जनम कहाँ पै भयौ है, चौंकि हमनें वाके नाम कौ तारौ पूरब दिसा में देखौऐ और हम वाकूं नमस्‍कार करबे आये हैं।” जि सुनकें हेरोदेस राजा और येरूसलेम के जादातर लोग घबरा गये। तब राजा ने सबरे यहुदी पिरधान पुरोहित और सास्त्रन कूं सिखाबे बारे इकट्ठे करे और बिनते पूछी कै, “मसीह कौ जनम कहाँ भयौ है?” बिन्‍नें बाते कही, “कै यहुदिया के बैतलहम सहर में। चौंकि परमेस्‍वर की ओर ते बात बताबे बारेन ने जि लिखौए, “हे यहुदिया पिरदेस के बैतलहम सहर के लोगों, तुमारौ सहर दूसरे सहरन ते काऊ बात में कम नांय चौंकि जामें ते एक राजा निकरैगौ जो मेरी पिरजा इसरायल की रखबारी करैगौ।” तब हेरोदेस ने उन जोतसीन कूं चुपचाप बुलायौ और बिनते पूछी कै तारौ कौंन से समै उनैं दिखाई दियौ। हेरोदेस ने बिनें जि कैहके बैतलहम भेजौ, “बा बालक के बारे में ठीक ठीक पतौ करौ और जब बू मिल जावे तौ मोय बताय दियौं जाते कै मैऊं म्हांपै जायके बा बालक कूं नमस्‍कार करुं।” राजा की बात सुनबे के बाद बे म्हांते चल परे और जो तारौ बिन्‍नें पूरब दिसा में देखौ हतो बेई तारौ बिनके आगे-आगे चलौ और बे वाके पीछे-पीछे चल दिए और बू तारौ बा जगह पै रुक गयौ जाँपै बू बालक हतो। और बा तारेए देखके बे भौत खुस भये। और जा घर में बू बालक पैदा भयौ, म्हांपै भीतर गये और बा बालक और वाकी माँ मरियम कूं देखौ और बिन्‍नें घुटुअन के बल झुककै बालक कूं नमस्‍कार करौ और अपने अपने थेलन कूं खोलकें लोहबान, गन्धरस और सौनों भेंट चढ़ायौ। जब जोतसी सो रये हते तब परमेस्‍वर नें बिनकूं सपने में चेतायौ के बे हेरोदेस के जौरै नांय जाय और दूसरे रस्ता ते हैके अपने देस कूं लौट जांय। जोतसीन के जायबे के बाद पिरभू कौ एक सुरग दूत यूसुफ कूं सपने में दिखाई दियौ और बानें बाते कही, “कै तू जा बालक और जाकी माँ कूं लैकें मिस्र कूं चलौ जा और जब तक मैं तोते नांय कहूं तब तक तू मिस्र मेंईं रहियो। चौंकि हेरोदेस राजा जा बालक कूं मरबाबे काजै ढूंढ रयौए।” तब यूसुफ रात कूंई बा बालक कूं और वाकी माँ कूं लैके मिस्र की ओर चलौ गयौ। और जब तक हेरोदेस मर नांय गयौ तब तक बे मिस्र मेंई रहे। चौंकि पिरभू नें परमेस्‍वर की ओर ते बात बतायबे बारेन कूं जो वचन कहौ बू वचन पूरौ हैबौ जरूरी हतो, “कै मैनें अपने बेटाये मिस्र ते बुलायोए।” जब हेरोदेस ने जि देखी के वाके संग जोतसी लोगन नें चालाकी करीए, तौ बू भौत गुस्सा में भर गयौ और बानें अपने लोगन कूं, जोतसीन ते पूछे गये समै के अनुसार येरूसलेम और बैतलहम के जौरै जितने दो साल तक के और बिनते छोटे बालक जनमे हते बिन सबनकूं मरबा डारौ। चौंकि परमेस्‍वर की बात बतायबे बारे यिर्मयाह ने जो वचन कहौ हतो, बू पूरौ भयौ, “राहेल के सहर रामाह में भौत बड़ौ बिलाप हे रयोए, बू अपने बालकन के काजै रोय रही हे, और बू नांय चाहत कै बाय कोई तसल्‍ली दैबै, चौंकि बिनके बालक अब नांय रहे।” हेरोदेस के मरबे के बाद पिरभू के सुरग दूत ने एक बार फिर मिस्र में यूसुफ कूं सपने में दरसन दैकें जि कही, “यूसुफ उठ जा बालक और वाकी माँ कूं लैकें इसरायल देस कूं चलौ जा चौंकि जो जा बालक कूं जान ते मारबौ चाँहते हते बे सबके सब मर गयेएं।” जि सुनकें यूसुफ उठो और बा बालक और वाकी माँ कूं लैकें इसरायल देस में आ गयौ। पर म्हांपै यूसुफ कूं पतौ चली कै हेरोदेस कौ बेटा अरखिलाउस यहुदिया पिरदेस पै राज कर रयोए तौ यूसुफ म्हांपै जायबे ते डर रयो हतो। तब फिरते पिरभू के सुरग दूत की चेतावनी सपने में यूसुफ कूं मिली तौ बू गलील देस में चलौ गयौ। और गलील देस के नासरत सहर मेंई रैहबे लगौ और परमेस्‍वर की बात बतायबे बारेन कौ जेऊ वचन पूरौ भयौ कै “बू नासरी कैहलाबेगौ।” जब ईसू नासरत सहर में हतो तब बिनई दिनान में यूहन्‍ना बपतिस्मा दैबे बारौ आयकै यहुदिया पिरदेस के बेहड़ में जि पिरचार कर रयौ हतो। “अपने पापन ते मन फिराऔ चौंकि सुरग कौ राज तुमारे बीच में और तुमारे जौरै आ गयौए।” जि बेई यूहन्‍ना है जाकी चर्चा परमेस्‍वर की बात बताबे बारे यसायाह नाम के आदमी ने करी हती। “बेहड़ में एक पुकारबे बारे की अबाज सुनाई दै रयी है, ‘पिरभू के आयबे काजै आपने मन कूं तैयार करौ जाते पिरभू के आयबे कौ रस्ता सीधौ है जाय।’ ” यूहन्‍ना ऊँट के बारन कौ कपड़ा पैहनतो और अपनी कमर में चमडे़ की पट्टी बांधे रैहतो। और टिड्‍डियन कूं और बेहड़ में मिलवे बारे सहद कूं खायौ करतो। येरूसलेम नगर के और यहुदिया पिरदेस के और यरदन नदी के जौरै के भौत से लोग यूहन्‍ना की सुनबे काजै वाके जौरै आए। भौतसे लोगन्‍नें अपने अपने पापन कूं मानकै यरदन नदी में बपतिस्मा लियौ। तब भौतसे फरीसी और सदूकी लोगन कूं बपतिस्मा के काजै अपने जौरै आते देखौ तौ यूहन्‍ना नें बिनते कही, “अरे सांप के सपोरेओ परमेस्‍वर के दन्‍ड ते तुम बच सकौ जाके बारे में तुमें कौन्‍नें चैताय दियौ है? तुमारे कामन ते जि पतौ चलनों चहिऐं कै तुमनें अपने पापन ते मन फिराय लियौ है। अपने मन में जि मत सोचौ कै अब्राहम तुमारौ पिता है चौंकि मैं तुमते सच कैहतूं कै परमेस्‍वर इन पत्‍थरन ते अब्राहम के काजै सन्‍तान पैदा कर सकतै। देखौ, अब कुल्हाड़ी पेड़न की जड़ पै धरीए, जामारै जो कोई पेड़ अच्‍छौ फल नांय लाबत बू काटौ जातै और आग में झौंकौ जातै। “मैं तुमें पानी ते बपतिस्मा दै रयौ हूं जाते जि पतौ चलै कै तुमने अपने पापन ते मन फिरा लियौ है। पर मेरे बाद जो आयबे बारौ है बू मोते जादा तागतबर है। और मैं तौ वाके जूतान नेंऊ उठायबे लायक नांऊ। बू तुमें पबित्र आतमा और आग ते बपतिस्मा दैबैगौ। वाकौ सूप वाके हात में है बू अपने खेत कूं इकसार करके गेंहून कूं खलिहान में इकठ्‌ठौ करैगौ और बाय अच्‍छी तरैह ते साफ करैगौ और बामेंते जो भुसी निकरैगी बाय आग में जराबैगौ और बू आग कबऊ नांय बुझैगी।” बाई समै ईसू गलील ते यरदन नदी के किनारे यूहन्‍ना के जौरैं बपतिस्मा लैबे आयौ। पर यूहन्‍ना बाय रोककै कैहबे लगौ “कै मोय तौ तोते बपतिस्मा लैबे की जरूरत है, और का तू मेरे जौरै बपतिस्मा लैबे आयौए?” जापे ईसू ने बाय जबाब दियौ, “कै अब तौ ऐसैई हैन दै। चौंकि हमन्नें सबरी धारमिकता जाई तरैह ते पूरी करनी है।” तब यूहन्‍ना ने ईसू की बात मान लई। और ईसू बपतिस्मा लैके जैसेई पानी में ते निकरौ और बाई समै आकास खुल गयौ, और बिन्नें परमेस्‍वर की आतमा कूं ईसू के ऊपर कबूतर कि तरैह उतरते भए देखौ। और तबई आकासबानी भई, “जि मेरौ प्यारौ बेटा है जाते मैं भौत खुस हूं।” जाके बाद पबित्र आतमा ईसूए बेहड़ में ले गयौ जाते कै सैतान ईसू की परीछा लैबे। ईसू चालीस दिना और चालीस रात बिना खाए पिये रयौ और जाके मारे बाय भूंख लगी। तब परखबे बारे नें जौरै आयके बाते कही “कै अगर तू परमेस्‍वर कौ बेटाए तौ इन पत्‍थरन ते कैह दै कै जे रोटी बन जांय।” ईसू ने बाय जबाब दियौ, “पबित्र सास्त्र में लिखौ है कै, ‘आदमी केवल रोटी तेई जीबित नांय रैहबै, पर बू परमेस्‍वर के मोंह ते निकरबे बारे हरेक वचन ते जीबित रैहबै।’ ” जाके बाद सैतान बाय पबित्र नगर येरूसलेम में लै गयौ, और बड़े पिराथना घर की सबते ऊंची चोटी पै लै जायके खडौ करौ। और बाते कैहबे लगौ, “कै अगर तू परमेस्‍वर कौ बेटाए, तौ अपने आप कूं जा चोटी पैते नीचे गिराय दै। चौंकि जि लिखौए, “‘बू तेरे काजै अपने सुरग दूतन नें आग्‍या दैबैगौ, और बे तोय अपने हातई हातन में उठाय लिंगे, और तेरे पामंन में पत्‍थर ते ठेस नांय लगेगी।’ ” ईसू नें बाते कही, “जेऊ लिखौ भयौ है, ‘तू अपने पिरभू परमेस्‍वर की परीछा मत करियो।’ ” जाके बाद सैतान ईसू कूं एक ऊंचे पहाड़ पै लै गयौ और बानें ईसू कूं दुनियां कौ सबरौ राज और बैभव दिखायौ। और कही, “अगर तू झुककै मोय दन्‍डबत करै तौ मैं जा सबरेय तोकूं दै दुंगो।” ईसू नें बाते कही, “हे सैतान दूर है जा चौंकि पबित्र सास्त्र में लिखौ भयौ है, ‘तू पिरभू अपने परमेस्‍वर कूं दन्‍डबत करियो और बई की सेबा करियो।’ ” तब सैतान ईसू के जौरैं ते चलौ गयौ और सुरग दूत आयकै वाकी सेबा करबे लगे। जब जि बात ईसू नें सुनी कै यूहन्‍ना बपतिस्मा दैबे बारौ जेल में डार दयौए, तौ बू गलील कूं चलौ गयौ। और बू नासरत सहर छोड़कै कफरनहूम नगर में जायकें रैहबे लगौ, जो झील के किनारे जबूलून और नपताली पिरदेस में है। जाके मारे बू वचन जो परमेस्‍वर की बात बतायबे बारे यसायाह नाम के आदमी ने कहौ हतो, बू पूरौ होय। “जबूलून और नपताली पिरदेस, झील के रस्ता ते यरदन नदी के पार, गैर यहुदियन कौ देस गलील, जो लोग अन्धेरे में जि रहे हते, बिन्नें बड़ौ उजीतौ देखौ, और जो लोग मौत के साये में जि रहे हते, बिनपे उजालौ चमकौ।” बाई समै ते ईसू ने पिरचार करबौ सुरू करौ, और जि कही, “अपने पापन ते मन फिराऔ चौंकि सुरग कौ राज तुमारे जौरै आय गयौए।” एक बार ईसू गलील की झील के किनारे जा रयो हतो, तब ईसू नें दो भईयान कूं देखौ बिनमें ते एक कौ नाम सिमौन हतो, जाय पतरसऊ कैहतें और दूसरे भईया कौ नाम अन्द्रियास हतो। बे झील में जाल डार रये हते चौंकि बे मछुआरे हते। ईसू ने बिनते कही, “मेरे पीछे आओ मैं तुमें परमेस्‍वर काजै लोगन्नें लायबे बारौ बनांऊगो।” बे बाई समै अपने जालन नैं छोड़कै ईसू के पीछे है लिये। आगे जायकें ईसू ने याकूब और वाके भईया यूहन्‍ना कूं अपने पिता जबदी के संग नाव पै जाल समारते भये देखौ और बानें बिनकूं बुलायौ। और बे बाई समै नाव और अपने पिताए छोड़कै ईसू के पीछे चल दिए। ईसू सबरे गलील पिरदेस में डोलतौ और बिनके पिराथना घरन में सिछा देतौ। और परमेस्‍वर के राज के सुभ समाचार की बातन्‍नें बतातौ हतो, और लोगन की सब तरैह की बीमारी ठीक करीं और कमजोरीए दूर करतौ रयौ। सबरे सीरीया देस में वाकौ नाम मसहूर है गयौ, और लोग ईसू के जौरैं सब बीमार लोगन्नें और तरैह-तरैह की बीमारी और दुखन में फसे भए, और जिनमें दुस्‍ट आतमा हतकाई और कछू मिरगी के मारे और कछू फालेस के मारे हते,बिन लोगन्नें ईसू के जौरै लाए और ईसूने बिनकूं चंगौ करौ। गलील और दिकापुलिस और येरूसलेम और यहुदिया ते और यरदन के पार ते भीड़ की भीड़ ईसू के पीछे चलबे लगी। बा भीड़ कूं देखके ईसू पहाड़ पै चढ़ गयौ और जब बू बैठ गयौ तब वाके चेला वाके जौरै आए, और बू बिनकूं परमेस्‍वर के वचन की सिछा दैबे लगौ। “धन्य हैं बे जो आतमिक रूप ते जरूरत मन्द है, चौंकि सुरग कौ राज बिनईं कौए। धन्य हैं बे, जो बिलाप करतें चौंकि बे तसल्‍ली पाबिंगे, धन्य हैं बे जो नम्र हैं, चौंकि बे धरती के अधिकारी बनाए जांगे। धन्य हैं बे जो धारमिकता के भूंखे और पियासेए, चौंकि बे तृप्‍त करे जांगे। धन्य हैं बे, जो दयालू हैं, चौंकि बिनपै दया करी जाबैगी। धन्य हैं बे, जिनके मन पबित्र हैं, चौंकि बे परमेस्‍वर कूं देखिंगे। धन्य हैं बे जो मेल-मिलाप कराबे बारेऐं, चौंकि बे परमेस्‍वर के बेटा बेटी कहे जांगे। धन्य हैं बे, जो धारमिकता की बजैह ते दुख उठातैं और सताए जाबतैं, चौंकि सुरग कौ राज बिनईं कौ है। “धन्य हो तुम, जब मेरी बजैह ते लोग तुमारौ अपमान करतैं और तुमें सताबतें और झूंठ बोल बोलकें सब तरैह ते बुरी बुरी बात करतैं। तब तुम आनन्द मगन होईओं, चौंकि सुरग में तुमारे काजै भौत बड़ौ फल रखौए। जाई बजैह ते बिन्‍नें उन परमेस्‍वर की ओर ते बात बताबे बारेन कूं जो तुमते पैहले हते बिनकूं जाई रीति ते सतायौ हतो। “तुम जा धरती के नौन हौ। अगर नौन अपनों नुनखरौ पन छोड़ दैवे तौ फिर बाय दुबारा काये ते नुनखरौ करौ जाय सके? फिर बू काऊ काम कौ नांय रैहबेगौ केबल जाके कै फैंकौ जाय और आदमिन के पामन ते रोंदौ जाय। “तुम जगत के उजीते हौ। जो सहर पहाड़ पै बसौ होय बू छिप नांय सके। लोग दीयौ जरायकै परात के नीचे नांय रखतई पर बाय दीबट के ऊपर रखतें तब बाते घर के सब लोगन कूं उजीतौ पौंहचतेै। बाई तरैह ते तुमारौ उजीतौ लोगन के सामने चमकै और बे तुमारे भले कामन कूं देखके सुरग में रैहबे बारे तुमारे पिता परमेस्‍वर की बड़ाई करैं। “तुम जि मत समझौ कै मैं परमेस्‍वर की व्‍यबस्था या परमेस्‍वर की ओर ते बात बताबे बारेन की किताबन कूं खतम करबे आयौऊं। मैं बिन्नें खतम करबे काजै नांय आयौ, पर मैं तौ बिनकूं पूरौ करबे आयौऊं। चौंकि मैं तुमते सच कैह रयौऊं भलेई आकास और धरती टल जांय पर परमेस्‍वर की व्‍यबस्था की एक मात्रा और एक बिन्दीऊ पूरौ भये नांय टलेंगी। जामारै अगर जो कोई आदमी परमेस्‍वर की व्‍यबस्था की किताब में ते छोटी ते छोटी एकऊ आग्‍याए तोड़ेगौ और दूसरेन्‍नें तोड़बौ सिखाबेगौ तौ बू सुरग राज में छोटे तेऊ छोटो करौ जाबेगौ। पर जो कोई इन आग्‍यान कौ पालन करैगौ और दूसरेन कूं पालन करबौ सिखाबेगौ बू सुरग राज में बड़ौ करो जाबेगौ। मैं तुमते कैह रयौऊं कै अगर तुमारी धारमिकता सास्त्रन कूं सिखाबे बारे और फरीसियन की धारमिकताते बढ़के नांय होय तौ तुम सुरग के राज में कबऊ नांय घुस पाऔगे। “तुम पैहलेई सुन चुकेऔ कै पुराने जमाने के लोगन ते कही हती, ‘तुम हत्‍या मत करियों, और जो कोई हत्‍या करैगौ बू दन्‍ड कौ भागी होगौ।’ पर मैं तुमते कैह रयौऊं कै जो कोई अपने भईया पै गुस्सा करे तौ बू दन्‍ड कौ भागी होगौ और जो कोई अपने भईया को अपमान करैगौ तौ बाय पंचायत में जबाब देनौ होगौ और जो कोई अपने भईया कूं बद दुआ दैबेगौ बू नरक की आग के दन्‍ड के लायक होगौ। “जामारै अगर तू अपनी भेंट परमेस्‍वर काजै बेदी पै चढ़ाबे लाबे और म्हांपै तोय जि याद आबे कै मेरे भईया के मन में मेरी ओर ते कछू मन-मुटाब है, तौ तू अपनी भेंट बेदी के सामने छोड़ दै। और जायकें सबते पैहले अपने भईया ते मेल-मिलाप कर लै वाके बाद, आयकै अपनी भेंट चढ़ा। “अगर तेरौ बिरोधी तोय कचैहरी लै जाय रौ होय, तौ तू रस्ताई में बाते झटपट मेल-मिलाप कर लियो कऊं ऐसौ नांय होय तेरौ बिरोधी तोय न्याय करबे बारे के हात में दै देय और न्याय करबे बारौ तोय सिपाइयन के हात में सौंप दैबै और सिपाही तोय जेल में डार देबें। मैं तोते सच सच कैह रयौऊं, कै जब तक तू मुद्‍दई की पाई पाई नां भर देगौ तब तक म्हांते छूट न पाबेगौ। “तुम पैहलेई सुन चुकेऔ, ‘कुकर्म मत करियों।’ पर मैं तुमते कैह रयौऊं, कै अगर तुम काऊ औरत पै बुरी निगाह डारतौ तौ समझ लेओ के तुम अपने मन में बा औरत ते कुकर्म कर चुकेऔ। अगर तेरी सीधी आँख तोय पाप के रस्ता पै लै जाबै, तौ तू बा आँख कूं फोड दै, जाते तौ जि बढ़ियाए कै तेरौ एक अंग नांस है जाय और पूरौ सरीर नरक में नांय डारौ जाय। और अगर तेरौ सीधौ हात तोते पाप करबाबतै तू बाय काट के अपने जौरै ते फैंक दै जाते तौ जि बढ़ियाए कै तेरौ एक अंग नांस है जाय और पूरौ सरीर नरक में नांय डारौ जाय। “तुमते जेऊ कही गयी, ‘अगर कोई अपनी पत्नी कूं छोडै तौ बाय लिखकै त्‍याग पत्र देय।’ पर मैं तुमते कैहतूं, अगर कोई आदमी अपनी पत्नी कूं कुकर्म के अलाबा काऊ दूसरी बजैह ते छोड़तै और बू पत्नी दूसरे आदमी के संग रैहते तौ वाके कुकर्मी हैबे कौ जिम्मेदार वाकौ पैहलौ आदमी होगौ। और जो कोई बा छोड़ी भयी ते ब्याह करै तौ बेऊ वाके संग कुकर्म करतै। “तुम जेऊ सुन चुकेऔ कै पुराने जमाने के लोगन ते कही गयी हती, ‘तुम सौगन्ध मत तोरियों पर पिरभू के काजै अपनी सौगन्ध कूं पूरी करियों।’ पर मैं तुमते कैह रयौऊं, तुम कबऊ सुरग की सौगन्ध मत खईंयों। चौंकि बू परमेस्‍वर की राजगद्‍दी है। और ना धरती की सौगन्ध खईंयों चौंकि बू वाके पामन की चौकीए, ना येरूसलेम सहर की सौगन्ध खईंयों चौंकि जाकौ राजा महान हैं। और अपने सिर कीऊ सौगन्ध मत खईयों चौंकि तू अपने सिर कौ एकऊ बाल न तौ कारो कर सकै और न सफेद कर सकै। पर तुमारी बात हाँ की हाँ और नां की नां होय, चौंकि जाते और कछू जादा होबे तौ बू बुराई ते पैदा होतै। “तुम लोग सुन चुकेऔ कही गई हती, ‘आँख के बदले आँख, और दांत के बदले दांत।’ पर मैं तुमते कैहरौऊ कै बुराई करबे बारे आदमी के संग बुराई मत करिओं। पर कोई तेरे सीदे गाल पै थप्पड़ मारै तौ वाके माऊं अपनों दूसरौ गाल कर दियौ। अगर कोई तुमते तुमारौ कुरता जबरन लेबौ चाहबे तौ तुम बाय अपनी लोईऊ दै दियौं। अगर कोई तुमें बेगार में एक कोस ले जाए तौ तुम वाके संग दो कोस तक चले जईयों। अगर कोई आदमी तोते कछू मांगे तौ तू बाय दै और जो कोई आदमी तोते उधार लैबै तौ तू बाते मौंह मत मोड़िऔ। “तुम सुन चुकेऔ कै जि कही गई हती, ‘अपने पड़ौसी ते पिरेम रखियों और अपने बैरिन ते बैर।’ पर मैं तुमते कैहरौऊ कै अपने बैरिन ते पिरेम रखौ और अपने सतायबे बारेन के काजै पिराथना करौ, जाई ते तुम अपने सुरगीय पिता की सन्‍तान ठहरौगे चौंकि बू भले और बुरे दोनोंन पै अपनों सूरज निकारे और बू भले और बुरे दोनोंन पै अपनों मेह बरसाबे है। चौंकि अगर तुम अपने पिरेम करबे बारेन तेई पिरेम करतौ तौ वाके काजै तुमें का इनाम मिलैगौ? ऐसौ काम तौ चुंगी लैबे बारेऊ करतैं। अगर तुम अपने भईयन तेई नमस्‍कार करतौ तौ का भलौ काम करतौ? ऐसौ तौ गैर यहुदीऊ करतैं। जामारै तुम सब तरैह ते सिद्ध है जाऔ जैसे कै तुमारौ सुरगीय पिता सिद्ध है। “सावधान रहीयौ! तुम आदमिन के दिखाबे काजै अपने धारमिकता के काम मत करौ नांय तौ तुमें सुरगीय पिता ते कोई फल नांय मिलेगौ। “जाके मारै जब तुम दान करे करौ तब वाकौ ढिढोरा मत पीटे करौ, जैसे कपटी लोग पिराथना घर और गलीयन में करतैं, जाते लोग बिनकी बड़ाई कर सकें। मैं तुमते सच कैह रयौऊं कै उने बाको फल मिल गयौए। जब तू सीदे हात ते दान करै वाकौ उल्टे हात कूं पतौ नांय चल पाबै। जाते तेरौ दान गुप्‍त रैहबै और तेरौ पिता जो जि सब कछू देख रयोए बू तोय वाकौ प्रतिफल देगौ। “जब तू पिराथना करे करौ तब कपटीन की तरैह ते ना होय चौंकि बिन लोगन कूं पिराथना घरन में और सड़कन के चौकन पै पिराथना करबौ अच्‍छौ लगतै, जाते लोग उनें देखें और बिनकी बढ़ाई करें। मैं तुमते सच कैह रयौ हूं कै बे अपनों प्रतिफल पाय चुके है। पर जब तू पिराथना करै तौ अपनी कोठरी में जायके द्वार बन्द करकै पिता ते पिराथना कर जो तोय गुप्‍त मेंऊ देख रयौ है बू तेरी पिराथना कौ तोकूं प्रतिफल देगौ गैर यहुदिन की तरैह जादा बोल बोल के पिराथना मत करै करौ चौंकि बे सोचतै के बिनके जादा बोलबे ते बिनकी पिराथना जल्दी सुन लई जाबैगी। जाके मारे तुम बिनके जैसे मत बनों चौंकि तुमारे पिताए तुमारे मांगबेते पैहलेंई पतौए के तुमें काए चीज की जरूरतै। “जामारै तुम जा तरैह ते पिराथना करे करौ, “ ‘हे हमारे सुरगीय पिता, तेरौ नाम पबित्र मानों जाय, तेरौ राज आबै, जैसे तेरी इच्‍छा सुरग में पूरी होतिए, बैसेई धरती पैऊ पूरी होय। तू आज हमारे दिन भर की जरूरत पूरी कर। जैसे हमनें अपने अपराधिन कूं छमा करौ है, वैसेई तू अऊ हमारे अपराधन कूं छमा कर। और हमें परखे जाबे ते दूर रख। और बुराई ते बचा।’ अगर तुम आदमिन के अपराध छमा करौगे तौ तुमारौ सुरगीय पिताऊ तुमें छमा करैगौ। अगर तुम आदमिन के अपराध छमा नांय करौगे तौ तुमारौ सुरगीय पिता तुमें छमा नांय करैगौ। “जब तुम बर्त रखौ तौ तुम म्हों लटकाए भये कपटीन की तरैह ते मत दीखौ, चौंकि बे तरैह-तरैह के म्हों बनाबते कै लोग जाने के बे बर्त रख रये हैं। मैं तुमते सच कैह रयौऊं के बे अपनों प्रतिफल पाय चुके हैं। पर जब तुम बर्त रखौ तब अपने सिर में तेल लगाऔ और म्हों धौऔ, जाते लोग जि नांय जाने कै तुमने बर्त रखौए, पर तेरौ परम पिता, जाय तू नांय देख सकत, बू देखै कै तू बर्त कर रयौए। तब तेरो परम पिता जो छिपकै करे भये सब कामन कूं देखतुए तोय उनकौ प्रतिफल दैबेगौ। “अपने काजै धरती पै खजानौ इकठ्‌ठौ मत करौ, ज्हांपै कीड़ा और काई बिगाड़त हैं, और ज्हां चोर सेंध लगायकें चुराते हैं।” जाके बदले ऐसे काम करौ जो परमेस्‍वर कूं अच्‍छे लगतै हैं ऐसो करबौ सुरग में खजानौ इकठ्‌ठौ करबे जैसो है जहां कीड़ा नांय लगत और काई नांय बिगाड़त और जहां चोर सेंध नांय लगाते और नांय चुराते हैं। चौंकि जहां तेरौ धन है म्हांपै तेरौ मनऊं लगौ रैहबेगौ। “सरीर कौ दीयौ आँख है अगर तेरी आँख अच्‍छी खासी है तौ तेरे सबरे सरीर में उजीतौ होगौ। पर अगर तेरी आँख अच्‍छी खासी नांय होय तौ तेरौ सबरौ सरीर अन्धेरे में होगौ। जामारै जो उजीतौ तोमें हतुए बू अन्धेरौ है जाय, तौ बू अन्धेरौ कितनौ बड़ौ होगौ। “कोई सेबक दो स्‍वामी की सेबा नांय कर सकै, चौंकि बू एक ते बेर और दूसरे ते पिरेम करैगौ, और एक ते मिलौ रेहबेगौ और दूसरे कूं तुच्छ जानेगौ। तुम परमेस्‍वर और धन दोनोंन की सेबा नांय कर सकतई। “जामारै मैं तुमते कैहतूं, कै अपने पिरान के काजै चिन्‍ता मत करौ कै हम का खाबिंगे, और का पिबिंगे और ना अपने सरीर के काजै कै हम का पैहनिंगे। का पिरान भोजन ते या सरीर कपड़न ते बढ़कें नांय है? आकास के पंछीन कूं देखौ कै बे ना तौ बोतैं। और ना काटतैं और ना बे अपने काजै कुठरियन में नाज इकठ्‌ठौ करतैं, फिरऊ तुमारौ सुरगीय पिता बिनकौ पेट भरतै। का तुम बिनते कऊं जादा कीमती नाऔ? तुम मेंते य्हांपै ऐसौ कौए जो चिन्‍ता करकै अपनी उमर में एकऊ पल बढ़ाय सकै? “तुम कपड़न के काजै चिन्‍ता चौं कर रये हौ? जंगल के फूलन के माऊं ध्‍यान करौ, कै बे कैसे बढ़तै, बे ना तौ मेहनत करतैं ना काततें। फिरऊ मैं तुमते कैहतूं, कै राजा सुलेमानऊ अपने बैभव में बिन फूलन की सुन्दरता के समान कपड़ा पैहने भये नांय हतो। अरे भरोसे में कमजोर लोगों मैदान की घास कूं देखौ जो आज हतें ओर कल आग में झोंक दयी जाबैगी। अगर परमेस्‍वर बाय इतनी भढ़िया तरैह ते सजातै तौ बू तुमें बाते बढकें कपड़े चौं नांय पैहनाबैगौ। जामारै जि कैहत भये चिन्‍ता मत करौ कै, ‘हम का खाबिंगे? का पीबिंगे? और का पैहनिंगे?’ चौंकि गैर यहुदी लोग इन सब चीजन के पीछे भाजतै। पर तुमारौ सुरगीय पिता खुदई जानतै कै तुमें इन सब चीजन की जरुरत है। पर तुम पैहले परमेस्‍वर के राज और धारमिकता की खोज में लगे रहो तौ जि सबरी चीजें तुमें खुद ही मिल जाबेगीं। और तुम आज आयबे बारे कल की चिन्‍ता मत करौ, चौंकि आयबे बारे कल अपनी चिन्‍ता खुदई कर लेगौ। हर दिना कौ दुख बा दिना के काजै भौतै। “तुम दूसरेन पै दोस मत लगाऔ जाते के तुम पैऊ दोस नांय लगायौ जाबै। चौंकि जा तरीका ते तुम दोस लगाबतौ बाई तरीका ते तुम पैऊ दोस लगाऔ जाबैगौ, और जा नाप ते तुम दूसरेन काजै नापतौ बाई नाप ते परमेस्‍वर तुमारे काजैऊ नापैगौ। “तोए तेरे भईया की छोटी-छोटी बुराई तौ दीखतै पर तोए अपनी बडी-बडी बुराई नांय दीखत? जब तेरी ही आँख में लठ्‌ठाए तौ तू अपने भईया ते कैसे कैह सकै कै, ‘मैं तेरी आँख में ते तिनका निकार दऊं’? अरे ओ कपटी पैहले तू अपनी आँख कौ लठ्‌ठा तौ निकार लै जाते तू बड़िया तरैह ते देखकें अपने भईया की आँख कौ तिनका निकार सकै। “कुत्‍तान के आगे अपनी पबित्र चीजन कूं मत डारियों और अपने मोती सूगरन के आगे मत डारियो। कऊं ऐसौ नांय होय कै सूगर बिन्‍नें रौंदें और कुत्‍ता उल्टे तुमेंई फार खामें। “परमेस्‍वर ते मांगौगे तौ तुमें मिलेगौ, ढ़ूढोगे तौ तुम पाऔगे, खटखटाऔगे तौ तुमारे काजै खोलौ जाबैगौ। चौंकि जो कोई मांगतै बू पाबतै और जो ढूंडतै बाय मिलतै और जो द्वार खटखटाबतै वाके काजै खोलौ जाबैगौ। “तुम मैं ऐसौ कौन सौ पिता है, जाकौ बालक रोटी मांगे तौ बू बाय पत्थर देय? और मछली मांगै तौ बू बाय सांप देय? जब तुम बुरे हैके अपने बालकन्‍नें अच्‍छी चीज दैबौ जानतें तौ तुमारौ सुरगीय पिता अपने मांगबे बारेन्‍नें अच्‍छी चीज चौं नांय दैबेगौ? जामारै तुम जैसो दूसरेन ते अपने काजै बरताब चाहतौ। बैसेई तुम दूसरेन के संग बरताब करौ। चौंकि परमेस्‍वर की व्‍यबस्था और परमेस्‍वर की बात बतायबे बारेन की जेई सिछाऐ। “सकरे द्वार के रस्ता ते भीतर घुसौ। चौंकि चौड़े दरबाजे कौ रस्ता नांस की ओर लै जाबतै, भौत से लोग ऐसै हैं जो चौढे रस्ता के दरबाजे ते जाय रये हैं। पर सकरे दरबाजे कौ रस्ता जीबन की ओर लै जाबतै बापे थोरेई लोग जाय रये हैं। “परमेस्‍वर के बारे में झूंठी बात बतायबे बारे जो परमेस्‍वर की ओर ते नांय तुम बिनते सावधान रहियों, जो तुमारे जौरै भेड़ के भेस में आबतै असल में बे फाड़बे बारे भेड़ियाएं। बिनके कामन ते तुम बिनकूं पैहचान लिंगे। चौंकि झाड़ीन में अंगूर और ऊँट कटारे में अंजीर नांय लगत। जई तरैह ते अच्‍छे पेड़ अच्‍छे फल लाबतै, पर बुरे पेड़ बुरे फल लाबतै। अच्‍छौ पेड़ कबऊ बुरौ फल नांय लाबै और बुरौ पेड़ कबऊ अच्‍छौ फल नांय लाबै। बू हरेक पेड़ जो अच्‍छे फल ना लाबै, बू काटौ जाबैगौ और आग में डारौ जाबैगौ। परमेस्‍वर के बारे में झूंठी बात बतायबे बारे जो परमेस्‍वर की ओर ते नांय तुम बिनकूं बिनके कामन ते पैहचान लिंगे। “जो लोग मोय पिरभू पिरभू कैहतै, बिनमें ते सब परमेस्‍वर के राज में नांय घुसिंगे, पर बेई सुरगीय राज में घुसेगौ जो मेरे सुरगीय पिता की इच्‍छाऐ पूरी करतै। बा दिनां भौत से लोग कहिंगे कै, ‘है पिरभू मैंनें तेरे नाम ते भविस्‍यबानी नांय करी, का दुस्‍ट आतमान कूं नांय निकारौ और का तेरे नाम ते भौत से अचम्भे के काम नांय करे?’ तब मैं बिनते कैह दुंगो, ‘मैं तुमें कबऊ नांय जान्‍त। अरे कुकरमियों तुम मेरे जौरै ते चले जाऔ।’ “जो आदमी मेरे वचनन नें सुनतै और बिनपै चलतै बू आदमी बा बुद्धिमान आदमी जैसौए, जानें अपनों घर चट्टान पै बनांयौ। बरसात आयी, बाढ़ आई और आँधी आयी तबऊ बा घर कौ कछू नांय बिगरौ और नांय बू गिरौ। चौंकि बा घर की नींव चट्टान पै हती। पर जो आदमी मेरी इन बातन्‍नें सुनें और उनपै नांय चलै, बू बा मूर्ख आदमी के जैसौए जाने अपनों घर बालू पै बनांयौ। और आँधी आई मेह बरसौ और बाढ़ आई और वाकौ घर बिनकी लहरन की टक्‍कराबे कें मारै मईं गिरकै सत्‍यानांस है गयौ।” जब ईसू जि बात कैह चुकौ, तब भीड़ वाके उपदेस ते चकित भई। चौंकि बू सास्त्रन कूं सिखाबे बारेन की तरैह ते सिछा नांय देतौ पर अधिकारी की तरैह ते सिछा देतौ हतो। जब ईसू पहाड़ पैते नीचे उतर रयौ हतो, तब वाके पीछे एक भौत बड़ी भीड़ चलबे लगी। म्हांपै एक कोढ़ी आदमी हतो। बानें ईसू कूं झुककै नमस्‍कार करी और कही, “हे पिरभू तू चाहबे तौ मोय सुद्ध कर सकतै।” तब ईसू ने अपनों हात बढ़ायकै कोढ़ी कूं छूऔ। और कही, “मैं चाहतूँ, तू सुद्ध है जा।” बू बाई समै सुद्ध है गयौ। तब ईसू नें बाते कही, “देख तू जा बात कूं काऊ ते मत केहियो। पर अपने आप कूं यहुदी पुरोहित कूं दिखइयो और मूसा की ठहराई भई भेंट चढ़ा, जाते लोगन में तेरे ठीक हैबे की गबाही होबें।” जब ईसू कफरनहूम आय रयौ हतो, तब एक सूबेदार ने जौरै आयकें ईसू ते बिनती करी, “हे पिरभू! मेरौ सेबक घर मैं लकबा के रोग ते भौत परेसान है।” तब ईसू ने कही, “मैं आयकें वाकूं ठीक करुंगौ।” तब सूबेदार कैहबे लगौ, “हे पिरभू! मैं जा लायक नांऊ, कै तू मेरी छत के नीचे आवे। पर तू अपने मौंह ते कैह दै, तौ मेरौ सेबक ठीक है जाबैगौ। चौंकि मैंऊ काऊ के नीचे काम करतूं और मेरे अधीन कछू सैनिक काम करतें। जब मैं एक ते कहूं, ‘जा’ तौ बू चलौ जाते, जब मैं दूसरे ते कहूं, ‘आ’ तौ बू आयबे लगतै। जब मैं अपने सेबक ते कहूं, कै ‘जाय कर’ तौ बू बाय करतै।” जि सुनकें ईसूए अचम्भौ भयौ और वाके पीछे जितनी भीड़ आय रयी हती बाते कैहबे लगौ, “मैं तुमते सच कैह रयौऊं, मैने इसरायली लोगन मेंऊ ऐसौ भरोसौ नांय देखौ। और मैं तुमते कैह रयौऊं, पूरब और पस्चिम ते भौत से लोग आयकै अब्राहम, इसहाक और याकूब के संग सुरग के राज में खाने काजै बेठिंगे। जिन लोगन कूं पहले सुरग कौ राज मिलबे बारौ हतो, बिन लोगन कूं बाहर अंधेरे में डार दियौ जाबैगौ और बे लोग रोबिंगे और दाँत पीसिंगे।” तब ईसू ने सूबेदार ते कही, “ ‘जा’ जैसो तेरो भरोसौ है बैसौई तेरे काजै होय।” और वाकौ सेबक बाई समै सही है गयौ। जब ईसू ने पतरस के घर जायकें देखौ, कै पतरस की सास बुखार की बजैह ते खाट पै परीए। तब ईसू ने पतरस की सास कौ हात छीयौ और वाकौ बुखार उतर गयौ और बू उठके बिनकी सेबा करबे लग गई। और जब संझा भई तब भौत से लोग बीमार लोगन कूं और जिनमें दुस्‍ट आतमा हती बिनें वाके जौरै लाए। और ईसू ने अपने वचनन ते दुस्‍ट आतमा निकार दईं और बानें सब बिमारन कूं ठीक करौ। परमेस्‍वर की ओर ते बात बतायबे बारे यसायाह कौ जि वचन पूरौ भयौ, “बानें हमारे रोगन कूं अपने ऊपर लै लियौ है, और बानें हमारी बीमारी सह लयीं।” ईसू ने अपने चारौ लंग एक बड़ी देखकें चेलान कूं झील के पल्‍ली पार चलबे की आग्या दई। तब एक सास्त्रन कूं सिखाबे बारे नें जौरै आयकै ईसू ते कही, “हे गुरू जहां तू जाबैगौ, मैं तेरे पीछे-पीछे चलूंगौ।” जि सुनकें ईसू ने कही, “लोमड़िन के काजै तौ भाट और आकास के पंछीन काजै घोंसला होतैं, पर मैं, ‘मनुस्‍य के बेटा’ के काजै सिर ढकबे काजै कोई जगैह नांय।” एक दूसरे चेला नें ईसू ते कही, “पिरभू पैहले मोय जायके मेरे पिता कूं घाड आन दै, तब मैं तेरे संग चलूंगो।” तब ईसू नें बाते कही, “अब तू मेरे पीछे चल, बिन लोगन कूं अपने मुरदेन नें घाड़न देओ, जिन लोगन के जौरै कबऊ खतम हैबे बारौ जीबन नांय हत।” जब ईसू नाव पै जायकें बैठौ तब वाके चेला वाके संग हते। तब अचानक एक बड़ौ तूफान आयौ और नाव लहरन ते डूबबे लगी, पर ईसू नाव में सो रयौ हतो। तब ईसू के चेला वाके जौरै जायके बाते कैहबे लगे, “हे पिरभू! हम डूबे जाय रये हैं हमारी रछा करौ।” तब ईसू चेलान ते कैहबे लगौ, “हे भरोसे में कमजोर लोगों तुम चौं डर रयेऔ?” और तब ईसू ने खड़े हैके पानी और तूफान कूं डांटौ, और चारौ लंग बड़ी सान्‍ती है गई। और तब लोग चकित हैके कैहबे लगे, “जि कैसौ आदमी है? तूफान और पानीऊ जाकौ कहनों मान रये हैं।” जब ईसू झील के पल्‍ली पार गिरासेनियों के देस में पौंहचौ, तौ दो आदमी जिनमें दुस्‍ट आतमाएं हतीं कब्रिस्तान में ते निकरते भए बाय मिले, जो इतने भयंकर हते बिनके डरके मारै, बा रस्ता ते कोई नांय जातौ हतो। बे चिल्लाय के कैहबे लगे, “हे परमेस्‍वर के बेटा तू हमते का चाहबतेै? का तू हमें बखत ते पैहले दुख दैबे आयौऐ?” बिनते कछू दूर सूगरन कौ एक बड़ौ झुन्ड चर रयौ हतो। दुस्‍ट आतमा नें ईसू ते जि कैहके बिनती करी, “अगर तू हमें निकारबौ चाहबे, तौ हमें बिन सूगरन के झुंड में भेज दै।” ईसू ने बिन दुस्‍ट आतमांन ते कही, “जाओ।” बू निकरकें सूगरन के झुंड में घुस गईं और बू सूगरन कौ झुंड पहाड़ पैते लुढ़कत लुढ़कत पानी में जाय गिरौ और डूब मरौ। और जि देखकें सूगरन कूं चरायबे बारे भाजकैं सहर में गये और सहर में जायकें जि सब बात जो बिन्‍नें देखी हतीं, जो कछू बिन दुस्‍ट आतमान ते परेसान लोगन के संग भयौ बिन्नैं कह सुनाईं। और सहर के जादातर लोग ईसूए देखबे के काजै आये, और ईसू ते जि कैहकै, बिनती करबे लगे कै, “तू हमारे सहर ते बाहर चलौ जा।” ईसू नाव में बैठकै झील के बा पार कफरनहुम नगर में आयौ, ज्हाँ बू रैहतो। तब बानें देखी, कै कछू लोग लकबा के मारे भयेए खाट पै डारकै वाके जौरै ला रये हैं। ईसू नें बिनकौ भरोसौ देखके बा लकबा के मारे भये ते कही, “बेटा हिम्मत रख, तेरे पाप छमा है गये हैं।” जि सुनिकें कछू सास्त्रन कूं सिखाबे बारे आपस में बात करबे लगे, “जि ऐसौ कैहके परमेस्‍वर की अपमान कर रयोए।” ईसू बिनके मन की बातन कूं जानिके कैहबे लगौ, “तुम अपने मन में जि चौं सोच रये हो? आसान का है, जि कैहबौ कै, ‘तेरे पाप छमा है गये हैं’ या जि कैहबौ, ‘उठ और चलबे लग’? मैंनें जि बात जामारै कहिए, कै तुम लोग जि जान लेओ मुझ, ‘मनुस्‍य के बेटा’ कूं धरती पै पाप छमा करबे कौ अधिकार है।” तब ईसू नें लकबा के मारे भये ते कही, “उठ और खाट उठायकै अपने घर कूं चलौ जा।” तब बू लकबा कौ मारौ भयौ आदमी उठौ और अपने घर चलौ गयौ। और जि देखके सब लोग डर गये और जि कैहकै परमेस्‍वर की महिमा करबे लगे, कै परमेस्‍वर नें आदमिन कूं अचरज के काम करबे कौ अधिकार दयौए। जब ईसू म्हांते आगे जा रयौ हतो तब बानें चुंगी लैबे बारे मत्‍ती नाम के आदमी कूं चुंगी लैबे बारी जगह पै बैठौ भयौ देखौ। और बाते कही, “मेरे पीछे पीछे आजा।” और मत्‍ती उठकै ईसू के पीछै चलबे लगौ। जब ईसू चेलान के संग में मत्‍ती के घर में खानों खायबे बैठौ, तब बिनके संग चुंगी लैबे बारे और पापी लोगऊ खानों खायबे बैठे। जि देखकें फरीसी लोग ईसू के चेलान ते कैहवे लगे, “तुमारौ गुरू चुंगी लैबे बारे और पापिन के संग चौं खातै?” जि सुनिकें ईसू नें फरीसी लोगन ते कही, “बैद्य की जरूरत भले-चंगे लोगन कूं नांय होबे पर बीमार लोगन कूं होबे। जामारै तुम जाकौ मतलब जान लेओ, कै ‘मैं बलिदान नांय पर दया चाहतूं।’ चौंकि मैं धरमिन कूं नांय पर पापिन कूं बुलाबे आयौ हूं।” फिर यूहन्‍ना बपतिस्मा दैबे बारे के चेला ईसू के जौरै गये और बाते कैहबे लगे, “हम और फरीसी तौ अकसर बर्त रखतें, पर तेरे चेला बर्त चौं नांय रखतें?” ईसू नें बिनते कही, “जि कैसे है सकते कै जब तक दूला बरातिन के संग है तब बे दुखी होबें? पर बू समैंऊ आबेगौ जब दूल्हा बिनते अलग करौ जाबैगौ तब बे बर्त रखेंगे। “ऐसे ही पुराने कपड़ा पै कोई नये सूती कपड़ा की थेगरी नांय लगात अगर कोई लगाते तौ नयौ कपड़ा सिकुड़कै पुराने कपड़ा कूं और जादा फाड़ देतै। और जई तरैह ते पुरानी मसकन में कोई नये अंगूरन कौ रस नांय भरत। अगर कोई ऐसा करै तौ नये अंगूरन कौ रस पुरानी मसकन कूं फाड़ दैबेगौ। चौंकि अंगूर कौ रस कछू दिना बाद फूलबे लगतै, जामारै पुरानी मसक फट जातै। और मसक के संग-संग अंगूर कौ रसऊ खराब है जाबेगौ। जामारै नयौ अंगूर कौ रस नयी मसक मेंई भरनौं चहिऐं जाते कै दोनों चीज बची रैहमें।” जब बपतिस्मा दैबे बारे यूहन्‍ना के चेलान ते ईसू जि बात कैह रयो हतौ। तब पिराथना घर कौ अधिकारी वाके जौरै आयकें दडंबत करके कैहबे लगौ, “मेरी बेटी अबई मरी है अगर तू चलकें वाके ऊपर अपनों हात रख दैबेगो, तौ मेरी बेटी जीबित है जाबैगी।” और तब ईसू उठकै अपने चेलान समैंत वाके संग चल दियौ। और तब एक औरत जाकूं बारह साल ते खून भैहबै की बीमारी हती। बानें पीछे ते आयकै ईसू के कपड़ा कौ कौनों छू लियौ। चौंकि बानें अपने आप ते कही हती कै, “अगर मैं ईसू के कपड़न्‍नेंउ छू लुंगी तौ मैं ठीक है जाऊंगी।” ईसू ने पीछे मुड़कै बा औरत कूं देखौ। और बाते कही, “बेटी हिम्मत रख, जा तेरे भरोसे नें तोय ठीक करौ है।” और बू औरत बाई बखत ठीक है गई। जब ईसू पिराथना घर के मुखिया के घर पौंहचौ। तब बानें देखौ कै सबरे लोग रो-रोय कें हल्ला मचाय रये हैं। तब ईसू ने कही, “सब लोग बाहर चले जाऔ लड़की मरी नांय पर सोय रयी है।” जा बाते सुनकें सबरे लोग ईसू की हसी उड़ायबे लगे। और जब सबरी भीड़ बाहर निकर गयी तौ ईसू ने भीतर जायके लड़की कौ हात पकड़ौ और बू जि उठी। जा बात की चर्चा सबरे पिरदेस में फैल गई हती। जब ईसू म्हांते जा रयो हतो, तब दो आँधरे आदमी चिल्लाय के कैहबे लगे, “हे दाऊद की सन्‍तान हम पैऊ दया करौ।” जब ईसू घर के भीतर गयौ तब आँधरे आदमी वाके जौरै आये, तब ईसू ने बिनते पूँछी, “का तुमें भरोसौ है कै मैं तुमारी आंखन नें सही कर सकतूं?” और तब बिन्‍नैं कही, “हाँ पिरभू।” तब ईसू नें बिनकी आंखन पै हात रखकैं कही, “जाऔ तुमारे भरोसे नें तुमें ठीक कर दियौ है।” और बिनकी आंख अच्छी है गयीं, और बे देखबे लगे और ईसू ने बिनकूं चैतायकैं कही, “जा बाते काऊ ते मत केहियों।” पर बिन्‍नें जि बात सबरे पिरदेस में फैलाय दयीं। जब ईसू जा रयो हतौ, तबई कछू लोग एक गूंगे आदमी कूं जामें दुस्‍ट आतमा हती बाय वाके जौरै लाये। और जब ईसू नें दुस्‍ट आतमा निकार दई तब गूंगौ बोलबे लगौ तबई भीड़ चौंकके कैहबे लगी, “हमनें इसरायल में ऐसौ कबऊ नांय देखौ।” पर फरीसी लोगन नें कही, “जि तौ दुस्‍ट आतमा के मुखिया बालजबुल की सक्‍ती ते दुस्‍ट आतमांन कूं निकारते है।” ईसू गांम गांम, सहर सहर, पिराथना घरन में जायकें परमेस्‍वर के राज के सुभ समाचार की बातन्‍नें बतातौ हतो। और लोगन की सब तरैह की बीमारी ठीक करीं और कमजोरीए दूर करत रयौ। तब ईसू ने भीड़ कूं देखौ और बिन लोगन पै बाय बड़ौ तरस आयौ, और बे लोग बिन भेड़न की तरैह हते। जिनकौ कोई चरायबे बारौ नांय होबै और बे भेड़ इत बितकूं भटकती रैहमें। तब ईसू नें अपने चेलान ते कही, “पके भये खेत तौ भौतेरैंए पर मजदूर तौ थोरेसे हैं। जामारै खेत के मालिक ते पिराथना करौ कै, अपनी फसलेै काटबे काजै मजदूर भेज दैबै।” ईसू नें भेजे भये बारह चेलान कूं अपने जौरै बुलायकै बिनकूं दुस्‍ट आतमान्नें निकारबे और हर तरैह की बीमारी ठीक करबे और कमजोरी दूर करिबे कौ अधिकार दियौ। और भेजे भये बारह चेला जे हते, जिनमें ते पैहले कौ नाम सिमौन जो पतरस कहौ जातौ, और वाकौ भईया अन्द्रियास, जब्दी कौ बेटा याकूब, और वाकौ भईया यूहन्‍ना, फिलिपुस और बरतुलमै थोमा और चुंगी लैबे बारौ मत्‍ती, हलफई कौ बेटा याकूब और तद्‍दै। देस भक्‍त सिमौन, और यहूदा इस्करियोती, जानें बिसबास घात करकै ईसूए पकरबायौ। ईसू नें बिन भेजे भये बारैह चेलान कूं जि आग्‍या दैकें भेजौ, “गैर यहुदी लोगन के जौरै मत जईंयों, और सामरिया के काऊ सहर में मत जईयों। पर इसरायल के लोगन के जौरै जईयों जो खोई भई भेड़न के तरैह हैं। और बिनके जौरै जायकै जि बतईयौ, ‘सुरग कौ राज जौरै आय गयौए।’ बीमारन कूं सही करियों, मरे भयेन कूं जीबित करियों, कोढ़ीन कूं सुद्ध करियों और दुस्‍ट आतमा निकारियों। जैसे मैंनें तुमें सैत-मैत दयौ है बैसेई तुमऊं सैत-मैत में बाटियों। “और अपनी आँटी में सौंनौ चांदी और तांमो मत रखियों। जब तुम रस्ता में जाऔ तौ अपने संग थैला मत लियौ और जो तुमनें पैहनों है वाके अलाबा ना दूसरौ कुरता,ना जूता और ना लठिया लियौ। चौंकि मजदूर कूं वाकी जरूरतन की चीजें पाबे कौ अधिकार है। जब तुम काऊ सहर और गांम में जामें तौ सबते पैहले जि पतौ लगईयो कै म्हांपै अच्‍छौ आदमी कौए। फिर तुम तब तक बई के घर मेंईं रहियौं जब तक तुम काऊ और दूसरे सहर में ना जामें। अगर तुम काऊ के घर के भीतर घुसौ तौ वाकूं आसीरबाद दियौं। अगर बा घर के लोगन में कोई तुमारी सान्‍ती लैबे लायक होगौ तौ तुमारौ आसीरबाद बापै बनों रैहबेगौ नांय तौ तुमारौ आसीरबाद बापिस लौट आबैगौ। जो कोई तुमारी इज्‍जत नांय करै, और तुमारी बातन्नें नांय मानें तौ बा घर और बा सहर ते बाहर निकर अईयौं और अपने पांमन की धूरेै महीपै झराय दियौं। ऐसौ करकें बिनपै चेतावनी ठहरै, कै परमेस्‍वर बिनें दन्‍ड दैबेगौ। मैं तुमते सच कैह रयौऊं, न्याय के दिनां बा सहर की हालत सदौम और अमोरा देस की दसा तेऊ भौत बुरी हैबैगी। “सुनों, मैं तुमें भेड़न की तरैह भेड़ियान के बीच में भेज रयौऊं। जामारै सांपन की तरैह चतुर और कबूतर की तरैह भोले बनों। सावधान रैहौ। तुम जिन लोगन कूं मेरे बारे में बतांएगे। बे लोग तुमें पकरबाके पंचायतन में सौपिंगे और बे तुमें पिराथना घरन में कौड़ान्ते पिटबांगे। तुम मेरे बारे में सिखातौ जामारै तुम लोगन कूं राजा और अधिकारिन के आगे खड़ौ करौ जाबैगौ। जाते कै तुम बिनमें और गैर यहुदिन में मेरी गबाही देओ। और जब तुमें पकड़ौ जाबे, तौ बा समै जि चिन्‍ता मत करियों कै तुमें का कहनों है और कैसे कहनों है। चौंकि तुमें बाई समै बताय दियौ जाबेगौ कै तुमें का कहनों है, चौंकि बोलबे बारे तुम नांय हुंगे पर पिता परमेस्‍वर की आतमा तुम में हैके बोलैगी। “भईया भईयाए धोखे ते पकरबाके मरबाबेगौ, पिता अपने बालकन्‍नें मरबांगे और बालक मा-बाप के खिलाफ हैकै बिनें मरबांगे। मेरौ नाम लैबे की बजैह ते सब लोग तुमते घृना करिंगे। पर जो अंत तक धीरज धरैगौ बई कौ उद्धार होगौ। अगर बे तुमें एक नगर में सतामें तौ तुम दूसरे नगर में चले जइयों। मैं तुमते सच कैह रयौऊं, जाते पैहले कै तुम इसरायल के सब नगरन कौ चक्‍कर पूरौ करौ, मैं, ‘मनुस्‍य कौ बेटा’ दुबारा आय जाऊंगो। “चेला अपने गुरू ते बड़ौ नांय हौबे, और ना कोई सेबक अपने स्‍वामी ते बड़ौ होत। चेला काजै अपने गुरू के जैसौ हैबो और सेबक काजै स्‍वामी के जैसौ हैबोई भौत है। जब बे घर के स्‍वामी कूं ही बालजबुल कहतें, तौ वाके घर के दूसरे लोगन के संग तौ और बुरौ व्‍यवहार करिंगे। “तुम बिन लोगन ते मत डरपियों चौंकि ऐसौ कछू ढकौ नांय जो खोलो ना जाबे और ऐसौ कछू दुबकौ भयौ नांय जो उजागर नांय करौ जाबे। जो बात मैंनें तुमते अंधेरे में कही है बिनैं तुम उजीते में सुनाऔ,और लोगन कूं कानन में बताई हतीं। उनकौ छत्‍तन पै चढ़कें जोर-जोर ते पिरचार करौ। बिन लोगन ते मत डरपियों जो तुमारे सरीरे नांस कर सकतैं, पर बे तुमारी आतमाएं नांस नांए कर सकत। पर परमेस्‍वर ते डरपौ जो तुमारी आतमाए और सरीर कूं नरक में डारकै नांस कर सकतै। का एक पईसा की दो चिरइया नांय मिलतई? पर पिता परमेस्‍वर की इच्‍छा के बिना एक चिरइया धरती पै नांय गिर सकै। तुमारी सिर के सबरे बारऊ गिने भये हैं। जामारै तुम डरपौ मत, तुम परमेस्‍वर काजै चिरईयन तेऊ बढ़के हौ। “जो कोई मोय लोगन के आगे अपनांय लेगौ, वाकूं मैं सुरग में पिता के आगे अपनांय लुंगो। और जो कोई मोय लोगन के सामने अपनांयबे ते मनैं कर देगौ, मैंऊ वाकूं सुरग में पिता के सामने अपनाबे ते मनैं कर दुंगो। “तुम लोग जि मत सोचौ कै मैं धरती पै मेल-मिलाप करायबे आयौऊं। मैं मेल-मिलाप करबायबे नांय आयौ पर मैं तौ तुम लोगन के बीच में तलबार चलबायबे आयौऊं। मैं तौ जाईमारै आयौऊं, “ ‘कै बेटा कूं वाके पिता ते, और बेटी कूं वाकी माँ ते, और बहू कूं सास ते, अलग करबायबे आयौऊं और आदमी के दुसमन बई के घर बारे हुंगे।’ “जो लोग अपने माँ-बाप ते और अपने बालकन ते मोते जादा पिरेम करतैं बे मेरे चेला नांय है सकैं। जो लोग मेरे काजै मरबे और दुख उठाबे काजै तैयार नांय, बे मेरे चेला नांय बन सकै। और जो लोग अपने पिरान बचाबौ चाहते, बे अपने पिरान खौबेगौ। और जो लोग मेरे काजै अपने पिरान कूं दिंगे। बे अपने पिरान कूं पांगे। “जो लोग तुमकूं अपना लिंगे बे मोऊये अपना लिंगे,और जो लोग मौकूं अपना लिंगे बे लोग मोय भेजबे बारे पिता परमेस्‍वर कूंऊ अपना लिंगे। जो कोई परमेस्‍वर की बात बताबे बारे कूं जि जानिकें अपना लेगौ, कै बू परमेस्‍वर की ओर ते बात बताबे बारौ है। तौ बा आदमी कूं जि फल मिलेगौ, जो परमेस्‍वर की ओर ते बात बताबे बारे कूं मिलेगौ। और कोई धरमी कूं जि जानिके अपना लेगौ तौ बा आदमी कूं बोई फल मिलैगौ जो धरमी कूं मिलेगौ। मैं तुमते सच कैह रौऊं, कै अगर कोई इन छोटेन में ते एकऊ कूं मेरौ चेला समझकै एक गिलास पानी पिबाबैगौ तौ बाय वाकौ फल जरूर मिलैगौ।” ईसू अपने भेजे भये बारैह चेलान कूं आदेस दैबे के बाद यहुदी नगरन में परमेस्‍वर के वचन की सिछा दैबे और सुभ समाचार कौ पिरचार करबे म्हांते चल दियौ। यूहन्‍ना बपतिस्मा दैवे बारे नें जेल में मसीह ईसू के कामन की चर्चा सुनीं, तौ बानें अपने चेलान कूं जि पूछवे काजै भेजौ, “का तू बेईऐ जो आयबे बारौ है, या हम काऊ और कौ इन्‍तजार करें?” तब ईसू नें बिनते कही, “जो कछू तुम देखतौ और सुनतौ, बू सब जायकें बपतिस्मा दैवे बारे यूहन्‍ना ते कैह देऔ। अन्धे देखतै, लंगड़े चल रये हैं और कोढ़ी सुद्ध है रये है। बहरे सुन पाय रये हैं और मुरदे जिलाए जाय रये हैं। और कंगालन कूं सुभ समाचार सुनांयौ जाय रयौ है। धन्य है बे जो मोपै भरोसौ करते रैहतै।” जब यूहन्‍ना के चेला ईसू के जौरै ते चल दिये तब ईसू नें बपतिस्मा दैबे बारे यूहन्‍ना के बारे में लोगन कूं बताबौ सुरू करौ, “तुम बेहड़ में का देखबे गये हते? का हबा में हलते भये सरकन्‍डेन कूं? अगर नाऐं तौ का देखबे गये हते, का बढिया कपड़ा पैहरे भये आदमी कूं? बढिया कपड़ा पैहरबे बारे तौ राज महलन में रहतै। तौ फिर काए कूं गये हते? का तुम काऊ परमेस्‍वर की ओर ते बातन कूं बतायबे बारेए देखबे कूं गये हते? हाँ मैं तुमते कैहतूं कै तुमने जाए देखौऐ बू परमेस्‍वर की ओर ते बात बतायबे बारे तेऊ महान है। बू बेईए जाके बारे में परमेस्‍वर के वचन में लिखौ है, “ ‘देख, मैं तोते पैहले अपने दूत कूं भेजुंगो, बू तेरे काजै रस्ता बनाबेगौ।’ मैं तुमते सच कैह रयौऊं, कै बपतिस्मा देबे बारे यूहन्‍ना ते बड़ौ कोई आदमी पैदा नांय भयौ। फिरऊ सुरग के राज में छोटे ते छोटौ आदमी यूहन्‍ना ते जादा बड़ौ है। यूहन्‍ना बपतिस्मा दैबे बारे के समैं ते लैकै सुरग के राज के लोगन के संग मार-पीट करी जातै और जो मार-पीट करबे बारे हैं, बे जबरन राज कूं लैबे की कोसिस कर रये हैं। यूहन्‍ना के आयबे तक सब परमेस्‍वर की ओर ते बात बताबे बारे और मूसा की व्‍यबस्था ने इन बातन की भविस्‍यबानी करी हती, कै परमेस्‍वर लोगन के जीबन में राज करैगौ। तुम चाहौ तौ मान लैओ कै यूहन्‍ना बेई एलियाए जो आयबे बारौ है। जाके जौरै सुनवे के कान होंय बू सुन लैय।” “मैं जा पीढ़ी के लोगन की बराबरी कौन ते करूं? जे तौ बिन बालकन के जैसेऐं जो बजार में बैठकै एक दूसरेए पुकारतैं, “ ‘हमनें तुमारे काजै बांसुरी बजायी, और तुम नांय नांचे। और हमनें तौ तुमारे काजै मातम मनांयौ, और तुमने छाती नांय पीटी।’ बपतिस्मा दैबे बारौ यूहन्‍ना आयौ बू ना तौ दूसरेन की तरैह खातौ और न पीतौ, तौऊ बे लोग कैहतै, ‘बामें दुस्‍ट आतमाएं।’ मैं, ‘मनुस्‍य कौ बेटा’ आयौ जो दूसरेन की तरैह ते खातौ और पीतौ और बे लोग कैहतै, ‘देखौ, जि तौ पेटू है, पियक्‍कड़ है। जाके मित्र चुंगी लैबे बारे और पापीएं।’ पर परमेस्‍वर कौ ग्‍यान तौ वाके वचनन के ऊपर चलबे बारे के कामन ते साबित करौ जाबैगौ।” तब ईसू नें उन नगरन के लोगन कूं धिक्‍कारौ, जामें बानें अचम्भे के काम करे हते। चौंकि बिन्‍नें पाप करबौ नांय छोड़ौ और अपने पापन ते मन नांय फिरायौ। “धिक्‍कारै खुराजीन में रैहबे बारेऔ, धिक्‍कारै बैतसैदा में रैहबे बारेऔ। जितने चमत्‍कार कै काम तुमारे नगरन में करे गये, अगर जि काम सूर सैदा के नगरन में करै जाते तौ म्हांके लोग बोरी ओढकें राख में बैठकैं कबके अपने पापन ते मन फिराय लेते। मैं तुमते सच सच कैह रयौऊं, न्याय के दिना तुमारी हालत सूर और सैदा तेऊ जादा बुरी होबैगी। हे कफरनहूम, का तू सुरग तक ऊंचौ उठायौ जाबैगौ? नांय, तू तौ पाताल में नीचे तक गिरायौ जाबैगौ। चौंकि जो सामर्थ के काम तोमें करे गये अगर बे काम सदौम में करे जाते तौ बू नगर अब तक बनों रैहतो। मैं तुमते सच सच कैह रयौऊं, न्याय के दिना तेरे लोगन की हालत सदौम नगर के लोगन तेऊ जादा खराब होबैगी।” बाई समै ईसू नें कही, “सुरग और धरती के पिरभू पिता, मैं तेरौ धन्यबाद करतूं कै, तैने इन बातन कूं ग्‍यानबान और समझदार लोगन ते छिपायके रखौ और बालकन कूं बतायौए। हाँ पिता तोय जेई अच्‍छौ लगतै। “मेरे पिता परमेस्‍वर ने मोय सब कछू सौंप दयोए। पिता परमेस्‍वर कूं छोड़कै कोई पुत्र कूं नांय जान्‍त, और जाई तरैह ते बेटा के अलाबा कोई पिताए नांय जान्‍त, बेई लोग पिता कूं जान्‍तै जाकूं बेटे ने बतायौए। “हे सब थके मादे लोगो और बौझ ते दबे भए लोगो, तुम सब मेरे जौरै आऔ मैं तुमें आराम दुंगो। मेरौ जूआ अपने ऊपर लै लेओ और मोते सीखौ मेरौ सुभाव नम्र और दयालू है जा तरैह ते तुम अपनी आतमा में सान्‍ती पाऔगे। चौंकि मेरौ जूआ जोतने में सरल है और वाकौ बोझउ हलकोऐ।” एक बार ईसू और वाके चेला यहुदियन के आराम के दिना खेतन ते हैके जाय रयो हतो वाके चेलान ने भूंक लगी तौ बिन्‍नें गेहूँ की कछू बाल तोड़ी और बिन्‍नें खायबे लग गये। जि देखकें फरीसीयन नें ईसू ते कही, “देख तेरे चेला बू काम कर रयेएं जो यहुदियन के आराम के दिना में करबौ हमारी व्‍यबस्था के बिरोध में है।” ईसू ने बिनते कही, “का तुम लोगन नें जि नांय पढौ कै जब दाऊद कूं और वाके संगियन कूं भूंख लगी हती, तब बानें का करौ हतो? बिन्‍नें तौ परमेस्‍वर के बड़े पिराथना घर में घुसकै भेंट की रोटी खाईं ऐसौ करबौ व्‍यबस्था के बिरोध में हतो। चौंकि व्‍यबस्था के अनुसार केवल यहुदी पुरोहितई खाय सकतै। का तुम लोगन नें व्‍यबस्था में जि नांय पढ़ौ, कै यहुदी पुरोहितई आराम के दिना में बड़े पिराथना घर में काम करके आराम के दिना कौ नियम तोड़तै तौऊं बिनें कोई दोसी नांय ठहराबत? पर य्हांपै बू खड़ौ है जो बड़े पिराथना घर तेऊ बड़ौ है। ‘मैं चाहतूँ आदमी दया करे, पर मैं जि नांय चाहत कै बू बलिदान चढ़ाबै,’ अगर तुम जा बातै जान जाते तौ तुम बिन पै दोस ना लगाते जो निरदोस है। चौंकि मैं, ‘मनुस्‍य कौ बेटा’ यहुदियन के आराम के दिनां कौऊ पिरभू हूं।” म्हांते चलकें ईसू पिराथना घर में आयौ, म्हांपै बाय एक आदमी मिलौ जाकौ हात सूखौ भयौ हतौ। म्हांपै कछू लोगऊ हते, बिन्‍नें ईसू पै दोस लगायबे काजै बाते पूछी, “का आराम के दिना व्‍यबस्था के अनुसार काऊऐ चंगौ करबौ सही है?” तब ईसू नें बिनते कही, “तुम मेंते ऐसौ को है जाकी एकई भेड़ होय और बू यहुदियन के आराम के दिन में गढ्‍ढे में गिर जाबे तौ का तुम बाय नांय निकारौगे? तौ फिर आदमी तौ भेड़ ते कहीं बढ़कै है, जामारै आराम के दिना भलौ करबौ व्‍यबस्था के अनुसार सही है।” तब ईसू नें बा आदमी ते कही, “अपनों हात आगे कूं बढा।” और बा आदमी नें अपनों हात आगे बढ़ायौ और बा आदमी कौ हात दूसरे हात की तरैह ते जैसौ पैहले हतो बैसौई ठीक है गयौ। फरीसियन्‍नें बाहर आयकें जि योजना बनाबे लगे कै हम जाय कैसै मारें। ईसू बिनकी योजना समझ गयौ और बू म्हांते चल दियौ। पर एक बड़ी भीड ईसू के पीछे चल दई और बानें भौत ते बिमारन कूं चंगौ करौ। और बानें बिनें चेतायकै कही, “मेरे बारे में काऊ ते मत कहियों।” बानें जि जामारै करौ कै परमेस्‍वर की ओर ते बात बतायबे बारे यसायाह नें जो वचन कहौए बू पूरौ है जाय, “देखौ, जि मेरौ दास है जाकूं मैने चुनों है, जि मेरौ प्यारौए, जाते मेरौ मन भौत खुस है। मैं अपनी आतमा बापै डारूंगौ, बू देस देस के लोगन कौ ईमानदारी ते न्याय करैगो। ना तौ बू लड़ेगौ ना बू ऊदम मचाबैगौ। और गलियों में ना कोई वाकी अबाज सुनैगौ। बू झुके भये सकन्डेऐ नांय तोड़ेगौ, ओर भुजते भये दीयाऐं नांय बुझाबैगौ। जब तक बू आदमिन कौ ईमानदारी ते न्याय नांय कर देय बू काऊ कौ नांस नांय करैगौ। तब फिर सब देस के लोग बाई के नाम पै आसा रखेंगे।” तब कछू लोग एक आदमीऐ ईसू के जौरै लाये जामें दुस्‍ट आतमा हती बानें बाय अँन्धो और गूँगौ बनाए रखौ हतो। बा आदमी कूं ईसू नें चंगौ करौ जाते बू देखबे और बोलबे लगौ। जा चमत्‍कार कूं देखकै सबरे लोग चकित भये और कैहबे लगे, “का जि दाऊद कौ बन्सज है?” जब फरीसियन्‍नें जि सुनों तब बे कैहबे लगे, “जि तौ दुस्‍ट आतमांन कूं वाके मुखिया बालजबुल की सहायता ते निकारतै।” ईसू ने बिनके मन की बात जानकै फिर बिनते कही, “जा राज में दरार पर जाबै तौ बू कैसे टिकौ रैहबेगौ बू तौ खतमई है जाबेगौ। और जा नगर और कुल में फूट पर जाबे तौ बू उजड़ जाबैगौ। अगर सैतान सैतानईए निकार रयोए तौ बू अपनौई दुसमन बन रयोए। वाकौ राज कैसै सही सलामत रैहबैगौ? अगर मैं बालजबुल की सहायता ते दुस्‍ट आतमांन कूं निकार रयौऊं तौ तुमारे लोग कौन की मदद ते दुस्‍ट आतमांन कूं निकारतैं? जामारै बेई तुमारौ न्याय करिंगे। अगर मैं परमेस्‍वर की आतमा की मदद ते दुस्‍ट आतमान्‍नें निकारतूं तौ समझ लेओ कै परमेस्‍वर कौ राज तुमारे जौरै आ पौंहचौ है। “का कोई आदमी काऊ बलबान के घर में घुस के वाके माल कूं लूट सकै? जब तक कै बू बा बलबान कूं बांध नांय दैबै, तब बू वाके घर कूं लूट लैबैगौ। “जो मेरे संग नांय, बू मेरौ बिरोधी है। जो मेरे संग इकठ्‌ठौ नांय करत, बू बाय बिखेरतै। जो कोई आदमी मेरे यानी की ‘मनुस्‍य के बेटा’ के बिरोध में कैहबेगौ, वाकौ जि पाप तौ मांफ कर दियो जाबेगौ। पर जो कोई पबित्र आतमा के बारे में बुरौ कैहबेगौ, तौ वाकौ जि पाप न तौ जा लोक में और ना परलोक में मांफ करौ जाबैगौ। जामारै मैं तुमते कैहतूं, कै आदमी के सबरे पाप और बुराई मांफ करे जाबिंगे, पर जो आदमी पबित्र आतमा की बुराई करैगौ, तौ बू मांफ नांय करौ जाबैगौ। “तुम लोग जानतेऔ के अच्‍छौ फल लैबे काजै तुमें अच्‍छौ पेड़ई लगानों चहिऐं। और बुरे पेड़ ते बुरौ फलई मिलतै चौंकि हर एक पेड़ अपने फलतेई जानों जातै। अरे सांप के सपोलेओ! तुम बुरे हैकें अच्‍छी बात कैसे कर सकौ? चौंकि जो मन में भरौ रैहतै बेई मौंह पै आबतै। जो आदमी अच्‍छौ होगौ, बू अपने मन के भन्‍डार में ते अच्‍छी बात निकारैगौ। और बुरौ आदमी अपने मन में ते बुरीई बात निकारैगौ। मैं तुमते कैह रयौऊं, न्याय के दिनां में, हर एक आदमी कूं अपनी कही भई हर एक निकम्मी बात कौ लेखा दैनों परैगौ। चौंकि तू अपनी इन बातन की बजैह ते दोसी और इनई बातन के बजैह ते निरदोस ठहरायौ जाबैगौ।” फरीसी और सास्त्रन कूं सिखाबे बारेन्‍नें ईसू ते कही, “गुरू हम तोते एक चिन्‍न देखबौ चांहतें।” तब ईसू नें बिनते कही, “जा युग की बुरी और कुकर्म करबे बारी पीढ़ी के लोग चिन्‍न माँगतैं। पर मैं तुमते कैहतूं परमेस्‍वर की ओर ते बात बतायबे बारे योना की बातन नें छोड़कै और कोई दूसरौ चिन्‍न नांय दिखायौ जाबैगौ। जा तरैह ते योना तीन दिन और तीन रात तक बड़ी मछली के पेट में रहौ, जाई तरैह ते मैं, ‘मनुस्‍य कौ बेटाऊ’ धरती के भीतर तीन दिन और तीन रात तक रहूंगौ। नीनबे के लोग न्याय के दिना जा पीढ़ी के लोगन के संग उठकै बिनईऐं दोसी ठहराबिंगे। चौंकि बिन्‍नें योना कौ पिरचार सुनकें अपने पापन ते मन फिरायो हतो, य्हांपै बू है जो योना तेऊ महान है। दछिन की रानी न्याय के दिना जा पीढ़ी के लोगन के संग उठकै, बिनईऐं दोसी ठहराबैगी चौंकि बू सुलेमान कौ ग्‍यान सुनिबे काजै धरती कै छोर ते आई है पर जो य्हांपै है बू तौ सुलेमान तेऊ जादा महान है। “जब दुस्‍ट आतमा आदमी में ते निकर जाबै तौ बू सूखी जगैहन में भटकत रैहते और जब बाय आराम करबे कूं जगैह नांय मिलत, तौ बू कैहतै, ‘मैं अपने बा घर में जाऊँ जामें ते निकरी हती’ और जब बू बामें जातै तौ घर कूं पैहले ते साफ सुथरौ और सजौ सजायौ पाबतै। और बू अपने संग अपने तेऊ बुरी सात आतमांन्‍नें संग लैकै आवतै और वाके भीतर घुस जातै और बा आदमी कै भीतर रैहबे लगतै, और बा आदमी की दसा पैहले तेऊ और जादा बुरी कर दैतै। जा पीढ़ी के बुरे लोगन की दसा ऐसीई होबैगी।” जब ईसू भीड़ ते बातें कर रयौ हतो, तबई वाकी माँ और भईया बाहर आये और बे बाते बात करबौ चाह रये हते। तब काऊ नें बाहर ते आयकै कही, “कै तेरी माँ और भईया बाहर खड़े भए हैं और तोते बात करबौ चाहतैं।” जि सुनकें ईसू नें कही, “मेरी माँ और मेरे भईया को हैं?” बानें अपनों हात चेलान की ओर बढ़ायकै कही, “मेरी माँ और मेरे भईया जेई हैं। जो मेरे सुरगीय पिता की इच्छा पै चलतै बेई मेरी माँ और मेरे भईया बहन हैं।” बा दिनां ईसू घर तै निकरकै झील के किनारे पै जाय बैठौ। और वाके जोरै इतनी बड़ी भीड इकठ्‌ठी है गयी और बू भीड़ केमारै नाव में जायके बैठ गयौ और सबरी भीड किनारे पैई खडी रही। बानें बिनकूं दृस्‍टान्‍तन में भौत सी बात बताईं। ईसू नें कही, “एक किसान बीज बोयबे निकरौ। जब बू बीज बो रयौ हतो तब कछू बीज रस्ता के किनारे पैई गिर गये और चिड़ियन नें आयकें बा बीज कूं चुंग लये। कछू बीज कंकरीली धरती पै गिरे म्हांपै गहरी मट्‍टी न मिलबे की बजैह ते बे बीज जल्दी उपज आये। और जब घाम निकरी तौ पौधे झुलस गये और जड़ न पकरबै की बजैह ते सूख गये। कछू बीज कटीली झाड़िन में गिरे और झाड़ी बढी और झाड़ी नें पौधन कूं दबाय लियौ। पर जो बीज अच्‍छी धरती पै गिरे, बे उग आये और बढ़कें फल दैवे बारे भये कोई सौ गुना, कोई साठ गुना, कोई तीस गुना फल लाये। जाके जौरै सुनवे के कान होबें बू सुन लैबे।” चेलान नें ईसू ते कही, “तू लोगन कूं दृस्‍टान्‍तन में बात चौं बताबतुए?” ईसू नें बिनते कही, “सुरग के राज कौ भेद जानबे कौ अधिकार केवल तुमेंई दयो गयौए, बिनकूं नांय। चौंकि जाके जौरै है बाय और जादा दयौ जाबैगौ और वाके जोरै भौत है जाबैगौ। पर जिनके जोरै कछू नांय बा पैते बेऊ छीन लयो जाबैगौ जो वाके जोरै हतुऐ।” मैं दृस्‍टान्‍तन में बताबतूं, चौंकि, “बे देखत भयेऊ न देखैं और सुनत भयेऊ न सुनें और न बू समझें।” जा तरैह ते परमेस्‍वर की ओर ते बतायबे बारे यसायाह की बात पूरी होते। “ ‘तुम कानन ते सुनौगे, पर कछू समझ में नांय आबैगौ, और तुम आंखन ते देखत रहौगे, पर तुम कछू देख नांय पाओगे। चौंकि इन लोगन की बुद्धी भ्रस्‍ट है गयी है। और इन्‍नें अपने कान बन्द कर लिये हैं, बिन्‍नें अपनी आंख मूंद लयीऐं। कऊं ऐसौ नांय होबे कै जे आंखन ते देखबे लगे, और कान ते सुनें, और मन ते समझबे लगें, और जि पापन ते मन फिरामें और मैं इनकौ उद्धार करूं।’ पर धन्य हैं तुमारी आंख जो देखतै और तुमारे कान जो सुनतैं। चौंकि मैं तुम लोगन ते सच कैह रयौ हूं,भौत से परमेस्‍वर की ओर ते बात बताबे बारे और धरमी लोग इन बातन नें सुनबो और देखबो चाहते हते। जिनें तुम देखत और सुनतौ। पर बे इनें ना सुन सके ना देख सके। “अब तुम बीज बोयबे बारे दृस्‍टान्‍त कौ मतलब सुनों। रस्ता के किनारे पै बोए गये बीज बिन लोगन कूं दिखातै। जिन्‍नें परमेस्‍वर के राज कौ वचन सुनकें नांय समझौ और जो वचन वाके मन मैं बोयौ गयौ है, बाय सैतान आयकै छीन लै जातै। कंकरीली धरती पै गिरौ भयौ बीज बिन लोगन कूं दिखातै जो वचन कूं सुनकें खुसी के संग मान लेतै। पर बे वचन कूं अपने मन में नांय रख पात और परमेस्‍वर के वचन की बजैह ते उनपै जब दुख संकट और परेसानी आतै और लोग उन्नें सतातें तौ बे भरोसौ करबे ते पीछे हट जातैं। झाड़िन में गिरे भये बीज उन लोगन कूं दिखातै जो वचन कूं तौ सुनतें पर संसार की चिन्‍ता और धन-दौलत कौ लोभ-लालच वचन कूं दबा देतै और बू फल नांय लाबत। अच्‍छी धरती पै बोयौ गयौ बीज बे लोग है जो परमेस्‍वर के वचन कूं सुनतै और समझतें बू वचन उनमें फल लाबतै कोई सौ गुनों कोई साठ गुनों और कोई तीस गुनों।” ईसू ने बिनते एक और दृस्‍टान्‍त में बात कही, “सुरग कौ राज बा आदमी के जैसौए जानें अपने खेत में अच्‍छौ बीज बोयो। जब सब सो गये तब वाकौ दुसमन आयौ और वाके गेहूँ के खेत में जंगली बीज बोयकै चलौ गयौ। जब गेंहू उपजे और बामें बाल लगबे लग गईं तब बिनके संग में जंगली बीजऊ उपजे। “तब मालिक के सेबक ने कही, ‘हे मालिक का तुमनें अच्‍छौ बीज नांय बोयौ हतो? तौ जि जंगली बीज कांते आय गयौ?’ “तब बा मालिक नें कही, ‘जि काऊ दुसमन कौ काम है।’ “तब सेबक ने बा मालिक ते कही, ‘अगर तू कहे तौ इन जंगली पौधन कूं उखाड़ दऊं।’ “फिर बा मालिक नें कही, ‘कहूं ऐसो ना होय कै तुम जंगली पौधन के संग में गेंहू कै पौधन्‍नेंऊ उखाड़ लैओ। कटबे तक दोनोंन्‍नें संग बढन देओ। कटबे के बखत में काटबे बारेन ते कहुंगो, कै सबनते पैहले तुम उन जंगली पौधन्‍नें इकठ्‌ठौ करकें जराबे काजै गठरी बांध लेओ और गेंहून नें मेरे गोदाम में इकठ्‌ठौ कर देओ।’” ईसू नें लोगन कूं एक और दृस्‍टान्‍त बतायौ, “सुरग कौ राज बा राई के दाने के समान है जाकूं एक किसान नें अपने खेत में बोयौ। बू सबरे बीजन ते छोटौ है पर जब बू बढ़ जातै तब बू सबरे साग पात के पौधन ते बड़ौ है जातै और ऐसौ पेड़ है जातै कै आकास के पंछी वाकी डारन में बसेरौ कर सकतैं।” ईसू ने लोगन कूं एक और दृस्‍टान्‍त बतायौ, “सुरग कौ राज बा खमीर की तरैह ते है जाकूं काऊ औरत नें तीन पसेरी आटे में मिलायौ और बू सबरौ आटौ खमीर है गयौ।” ईसू लोगन्‍नें सब बात दृस्‍टान्‍तन में समझाबत हतो। बू बिनते बिना दृस्‍टान्‍तन के कछू बात नांय करतौ हतो। जाते परमेस्‍वर की ओर ते बात बतायबे बारे की जि बात पूरी है जाय, “मैं दृस्‍टान्‍तन में बोलुंगौ, जो बातें जगत की उत्पत्ती ते छिपी रहीं हैं, मैं उन बातन्‍नें उजागर करूंगो।” जब ईसू भीड कूं छोड़कै घर में आयौ, तब वाके चेलान नें वाके जौरै आयकै पूछी, “हमें बा जंगली बीज के दृस्‍टान्‍तन कौ मतलब समझाय दै।” तब ईसू नें बिनते कही, “अच्‍छौ बीज बोयबे बारौ मैं, ‘मनुस्‍य कौ बेटाऊं’। और खेत जि संसार है अच्‍छे बीज कौ मतलब जि है सुरग के राज के लोग और जंगली बीज कौ मतलब है आदमी जो सैतान की सन्तान है। बू दुसमन जानें जंगली बीज बोयौ हतो बू सैतान है। और कटाई कौ समै जगत कौ अन्‍त है, और कटाई करबे बारे सुरग दूत हैं। “जैसे जंगली पौधा इकठ्‌ठे करके जराए हते, बैसेई जगत कौ अंत हैबैगौ। तब मैं, ‘मनुस्‍य कौ बेटा’ म्हांते सुरग दूतन्‍नें भेजूंगौ और बे वाके राज में ते सबरे पापी दुस्‍ट और कुकरमिन नें जो लोगन कूं पाप करबे काजै उकसावते, बिन सबन कूं इकठ्‌ठौ करके बा नरक की आग में फिकबा दुंगो, जहां पै केवल दांत पीसबौ और रोबोई होबैगौ। तब धरमी अपने सुरगीय पिता के राज में सूरज के समान चमकिंगे। जाके जौरै सुनवे के कान होबें बू सुन लैबे। “सुरग कौ राज खेत में छिपे भए खजाने की तरैह है, जो काऊ आदमीऐं मिलौ और बानें बू दुबारा ते खेत में गाढ़ दियौ, बू इतनों खुस भयौ कै बानें खुसी केमारै अपनों सब कछू बेचकैं बा खेत कूं मोल खरीद लेतै। “सुरग कौ राज बा अच्‍छे मोती ढूढबे बारे ब्यापारी के जैसौ है, जब बाय एक भौत कीमती मोती मिल जातै, तौ बू अपनों सब कछू बेच देतै और बा भौत कीमती मोतीऐ मोल लै लेतै। “सुरग कौ राज बा बड़े जाल की तरैह है जो मछली पकरबे काजै समुन्दर में डारौ गयौ। और जाल हर तरैह की मछलिन ते भर गयौ। तब मछुआरे जाल कूं खैंच कै किनारे पै लै आऐ और बिनने अच्छी-अच्छी मछली बरतनन में इकठ्‌ठी कर लयीं और बेकार बेकार मछली फैंक दयीं। संसार के अन्‍त में ऐसौ ही होगौ। सुरग दूत आयकै धरमियन्‍नें दुस्‍ट ते अलग करिंगे, और दुस्‍टन कूं नरक की आग के कुन्‍ड में झोंक दिंगे, मापै बे लोग रोबिंगे और दाँत पीसत रैहबिंगे।” ईसू ने कही, “का तुम लोग जिन सब बातन्‍ने समझ गये?” चेलान नें उत्‍तर दियौ, “हाँ।” ईसू ने बिनते कही, “हरेक सास्त्रन कूं सिखाबे बारे जो सुरग के राज में चेला बन चुके हैं। बे बा घर के मालिक के समान है, जो अपने खजाने में ते नई और पुरानी चीजन्‍नें निकारतै।” जब ईसू दृस्‍टान्‍तन्‍नें कैहबे के बाद म्हांते चलौ गयौ। और अपने नगर नासरत में आयकें, बिनके पिराथना घरन में जायकें बिन्‍नें ऐसी सिछा दैबे लगौ, जापै बे सब अचरज करके कैहबे लगे कै, “जाकूं जि ग्‍यान और सामर्थ के काम कांते मिले? का जि मरियम और बढई कौ बेटा नांय और का जाके भईयन कौ नाम याकूब, यूसुफ, सिमौन और यहूदा नांय? का जाकी बहन हमारे बीच में नांय रैहती? तौ फिर जाय जि सबरौ ग्‍यान कांते मिलौ है?” जाके मारें बिन्‍नें ईसू कूं नांय अपनांयौ। पर ईसू नें कही, “कै कोई परमेस्‍वर की बात बतायबे बारौ अपने नगर और घर कूं छोड़कै सब जगैह पै सम्मानित होतै।” और बिन लोगन के भरोसौ ना करबे की बजैह ते ईसू नें म्हांपै कोई सामर्थ के काम नांय करे। जब हेरोदेस गलील कौ राजा हतो तब बानें ईसू के बारे में सुनीं। और बानें अपने सेबकन ते कही, “का जि बेई यूहन्‍ना बपतिस्मा दैबे बारौ है, जो मरे भयेन में ते जीबित है गयौ है? जामारै जामें सामर्थ के काम पिरगट होत हैं।” चौंकि हेरोदेस ने अपने भईया फिलिपुस की पत्नी हेरोदियास के कैहबे पै यूहन्‍ना कूं पकरकै जेल खाने में डाल दयौ हतो। फिलिपुस के जीबित रैहते भये, हेरोदेस ने वाकी पत्नी हेरोदियास ते ब्याह कर लयौ हतो। जामारै यूहन्‍ना बार बार बाते जि बात कैहतो, “तेरौ अपने भईया की पत्नी के संग रैहबो व्‍यबस्था के बिरोध में है।” जामारै बू बाय मरबाबौ चाह रयो हतो, पर बू लोगन ते डरपत हतो, चौंकि बे लोग यूहन्‍ना कूं परमेस्‍वर की बात बतायबे बारौ मानते हते। पर जब हेरोदेस राजा कौ जनम दिन आयौ, तब हेरोदियास की बेटी नें दरबार में नांच दिखायकें बाय खुस कर दयौ। जामारै हेरोदेस नें सौगन्ध खायकें कही, “तू जो कछू मांगेगी बेई मैं तौकूं दै दुंगो।” अपनी माँ के सिखाबे में आयकें बानें हेरोदेस ते कही, “मौय अबई थारी में रखके यूहन्‍ना बपतिस्मा दैबे बारे कौ सर दै दें।” तब हेरोदेस राजा कूं भौत दुख भयौ, पर बानें अपनी सौगन्ध खायबे के मारे और म्हांपै मौजूद आदमिन की बजैह तै बानें वाकी मांग पूरी करबे कौ आदेस दे दयौ। तब बानें अपनों सिपाही जेल में भेजके यूहन्‍ना बपतिस्मा दैबे बारे कौ सर कटबाय दयौ। और यूहन्‍ना के सर कूं थारी में रखकै हेरोदियास की बेटी कूं दै दियौ। और बानें बाय अपनी माँ कूं दै दियौ। और यूहन्‍ना बपतिस्मा दैबे बारे के चेलान ने वाकी लास लैके गाढ़ दयी। और जाके बाद जि सब बात ईसू कूं बताई। जब ईसू ने जि बात सुनीं तब बू नाव में बैठकै म्हांते एक सून सान जगैह पै बेहड़ में चलौ गयौ। और जि सुनकें नगरन के लोग वाके पीछे-पीछे चल दये। जब ईसू नाव ते बाहर आयौ और बानें अपने पीछे भौत बड़ी भीड़ देखी। तब ईसू ने बापै तरस खायौ और बिनकी बीमारिन कूं चंगौ करौ। जब सन्जा है गई तब ईसू के चेलान नें बाते कही, “जि सून सान जगैह है और पैहले तेई देर है गयी है। इन लोगन नें बिदा कर, कै जे अपने काजै गांम में जायके अपने खायबे कूं काजै कछू खरीद लामें।” तब ईसू ने बिनते कही, “इनकौ जायबौ जरूरी नांय, तुमईं इनें खायबे कूं देऊ।” उन्‍नें बाते कही, “हम पै तौ केवल पांच रोटी और दो मछलीन कूं छोड़कै और कछू नांय।” ईसू ने कही, “बिनकूं मेरे जौरै लाऔ।” तब बानें चेलान ते, लोगन कूं घास पै बैठबे की कही। और बानें पाँच रोटी और दो मछली हात में लैकें सुरग की ओर देखके परमेस्‍वर को धन्यबाद करौ। और तोड़कै चेलान कूं दईं और चेलान ने लोगन कूं खायबे दई। तब सब लोगन कौ खायकै पेट भर गयौ और बचे भये टुकड़न ते चेलान नें बारह डलियां भरकै उठाई। और खायबे बारेन में औरत और बालकन कूं छोड़कै पांच हजार केवल आदमी हते। और तब ईसू नें अपने चेलान कूं नाव पै चढ़ायौ, कै बे बाते पैहले पल्‍ली पार चले जाएं, जब तक कै बू लोगन कूं बिदा करै। बू लोगन नें बिदा करके पिराथना करबे काजै पहाड़ पै चलौ गयौ और रात तक मईं पै अकेलौ रहौ। नाव किनारे ते भौत दूर जा चुकी हती। तब नाव झील कै बीचों बीच डगमगाबे लगी,चौंकि हबा सामने की हती। और फिर ईसू रात के चौथै पैहर झील पै चलत भयौ चेलान के जौरै आयौ। बाय झील पै चलत भयौ देखके चेला डरप गये और बे कैहवे लगे, “जितौ भूतै।” और डर के मारे चिल्लाय उठे। ईसू ने बाई समै बिनते कही, “हिम्मत रखौ। मैं हूं। डरपौ मत।” तब पतरस ने ईसू ते कही, “हे पिरभू अगर तू है, तौ मोय अपने जौरै पानी पै चलकै आयबे की आग्‍या दै।” तब ईसू नें बाते कही, “आ।” तब पतरस नाव पैते उतरकै ईसू के जौरै आयबे काजै पानी पै चलबे लगौ। पर बू तेज हबा देखके डरप गयौ और डूबबे लगौ चिल्लायबे लगौ, “हे पिरभू! मोय बचाय लेओ।” तब ईसू ने बाई समै अपनों हात बढायो और वाकूं पकरकै कही, “हे भरोसे में कमजोर तेने संका चौं करी?” जब बे नाव पै चढ़ गये तब हबा रुक गयी। तब नाव में बैठे भये लोगन नें ईसू की जय जयकार करी और बात कही, “तू सच मुच तू परमेस्‍वर कोई बेटाए।” जब बू झीले पार करके गन्‍नेसरत देस में पौंहचे, तब मांके लोगन नें वाकूं पहचान लियो और आस-पास के सबर नगरन में ईसू कै आयबे की खबर भेज दई, और बे सब लोग बीमार लोगन कूं ईसू के जौरै लाये। और बाते बिनती करबे लगे, कै बू बीमारन नें अपने कपड़ा कौ कौनोंई छू लेन देय और जितनेन ने कपड़ा कौ कौनों छूऔ बे ठीक हे गये। येरूसलेम ते कछू फरीसी और सास्त्रन कूं सिखाबे बारे ईसू के जौरै आयकै पूछबे लगे, “तेरे चेला पुरखन की रीति रिबाजनें चौं नांय मानें? और बे रोटी खाबे ते पैहले हमारी रीति के अनुसार हात धोए बिना रोटी चौं खाबत हैं?” ईसू नें बिनते कही, “तुमऊं अपनी रीति-रिबाजन की बजैह ते, परमेस्‍वर की आग्‍या चौं नांय मान्‍त? चौंकि परमेस्‍वर ने कही है, ‘तुम अपने मा-बाप की इज्‍जत करौ’ और ‘जो कोई अपने मा-बाप कूं बुरौ कहे, तौ बू मार डारो जाबेगौ।’ पर तुमतौ लोगन नें सिखातौ, कै अगर तुमारे मा-बाप तुमते कछू मदद मांगे तौ तुम बिनते कह दियौं कै, ‘बू तौ मैनें अपने परमेस्‍वर के काजै दै दियौ।’ ऐसौ कैहके बू अपने मा-बाप की इज्‍जत नांय करत और तुम अपनी रीति-रिबाजन की बजैह ते परमेस्‍वर कौ वचन टाल देतौ। हे कपटियो, तुमारे बारे में परमेस्‍वर की ओर ते बात बताबे बारे यसायाह ने सही भविस्‍यबानी करीए, “ ‘जे लोग होटन ते तौ मेरौ आदर करतें, पर इनकौ मन मोते कोसन दूर रैहतै। और जामारै इन लोगन की उपासना बे कारे, चौंकि इनकी जि सिछाए, बू लोगन के बनांये भए नियमन तेई है।’ ” ईसू नें बिनकूं अपने जौरै बुलायकै बिनते कही, “सुनों और समझौ। आदमी के मौंह ते जो भीतर जाबे, बू बाय असुद्ध नांय करत। पर जो सब्द वाके मौंह ते निकरतुए बेई बाय असुद्ध करतुए।” तब चेलान नें आयकै ईसू ते कही, “हे पिरभू, का तू जानते कै फरीसी तेरी जि बात सुनकें बुरौ मान गये हैं?” तब ईसू नें कही, “हर एक पौधा जो मेरे सुरगीय पिता ने नांय लगायौ, बू उखाड़ो जाबेगौ। बिन्‍नें छोड़ो। बे तौ अन्धेन के अन्धे नेताएं, अगर अन्धोई अन्धे ऐं रस्ता दिखाबैगौ तौ बे दोनोंई गढ्‍ढा में गिर जाबिंगे।” जि सुनकें पतरस ने ईसू ते कही, “तू हमें जा दृस्‍टान्‍त कौ मतलब समझाय दै।” ईसू नें कही, “का तुम अब ही तक नांय समझे? का तुम नांय सझतौ? जो कछू मौंह में जाबे बू तौ पेट में जाबे और बू बाहर निकर जाबे। पर जो कछू मौंह ते बौलो जाबे, बू मन ते आबे और बेई आदमी कूं असुद्ध करतै। चौंकि बुरे बिचार,हत्‍या, पराई औरत की लालसा, कुकर्म, झूंठी गबाही, चोरी, और सब बुरे सब्द मन तेई निकलतैं। और जेई बातें लोगन कूं असुद्ध करतै, पर बिना हात धोए खानों खायबौ आदमी कूं असुद्ध नांय करत।” ईसू म्हांते निकरकै सूर और सैदा के पिरदेस में चलौ गयौ। और म्हांपै एक कनान देस की रैहबे बारी औरत चिल्‍लाबत भई आयी, “हे पिरभू दाऊद की सन्‍तान! मोपै दया कर, मेरी बेटीए दुस्‍ट आतमा भौत परेसान कर रयोए।” पर ईसू ने वाकूं कोई जबाब नांय दयौ। और वाके चेलान नें बाते बिनती करके कही, “जाय बिदा कर चौंकि जि चिल्‍लाबत भयी हमारे पीछे आबते।” ईसू नें कही, “मैं इसरायल कै कुनबा की खोई भयी भेड़न कूं छोड़कै काऊ और के जौरै नांय भेजौ गयौ।” पर बू औरत आई और ईसूए नमस्‍कार करके कैहबे लगी, “हे पिरभू! मेरी मदद कर।” ईसू ने कही, “बालकन की रोटी लैके कुत्‍तन के आगे डारबौ अच्‍छौ नांय।” बा औरत ने कही, “पिरभू जि बात तौ सहीए, पर मालिक के मेज पैते गिरे भए खाने के चूर चार कूं कुत्‍तई खाते।” जापे ईसू नें बाते कही, “हे औरत तेरौ भरोसौ तौ भौत बड़ौऐ और जैसौ तू चाँह रयी है बैसौई तेरे काजै होबैगौ।” और बा औरत की बेटी बाई समै ठीक है गयी। ईसू म्हांते चलकै गलील की झील के जौरै आयौ और पहाड़ पै चढकें बैठ गयौ। तब भीड की भीड ईसू के जौरै आई और बे अपने संग लंगड़े, अन्धे, गूंगे, लूलेन कूं और भौत से बीमार लोगन कूं वाके जौरै लाये। बिन्‍नें बे सब ईसू के पामन में डार दिये और ईसू नें बिनकूं सही कर दियौ। जब लोगन नें देखौ, कै लंगड़े चलबे लग गये, अन्धे देखबे लग गये, गूंगे बोलबे गये, लूले सही है गये। तब बे सब अचम्भौ करके इसरायल के परमेस्‍वर की बड़ाई करबे लगे। ईसू नें अपने चेलान कूं अपने जौरै बुलायके कही, “मोय जा भीड पै तरस आय रयौए। जि लोग तीन दिन ते मेरे संगे, और इनके जौरै खायबे काजै कछू नांय। मैं नांय चाहतूं कै इन्‍नें भूंकौ बिदा करूं, और ऐसौ नां होबे कै जि रस्ता में थककै गिर जामें।” ईसू के चेलान नें कही, “हम जा बेहड़ में इनके काजै इतनी रोटी कांते लामें के हम जा भीड कौ पेट भर सकें?” ईसू नें बिनते पूछी, “तुमारे जौरै कितनीं रोटी हैं?” बिन्‍नें कही, “सात और थोड़ी सी छोटी मछली हैं।” तब ईसूने बिन लोगन कूं धरती पै बैठबे की आग्‍या दई। और ईसू नें बे सात रोटी और मछली लयीं और परमेस्‍वर कौ धन्यबाद करकें तोड़ी, और अपने चेलान कूं देतौ गयौ और चेला लोगन कूं। तब सब लोगन कौ पेट झिक गयौ,और तब चेलान नें बचे भये टुकड़न ते भरीं भई सात डलियां उठाईं। और खायबे बारेन में औरत और बालकन कूं छोड़कै चार हजार आदमी हते। तब ईसू भीड कूं बिदा करकें नाव पै चढ़ गयौ,और मगदन देस की सीमा में आयौ। फरीसी और सदूकीन्‍नें ईसू के जौरै आयकै बाय परखबे काजै बाते कही, “हमें कोई सुरग कौ चिन्‍न दिखा।” तब ईसू नें बिनकूं उत्‍तर दियौ, “जब दिन ढलतै तौ तुम कहतौ, ‘कै आज मौसम खुलौ रैहबेगौ चौंकि आज आकास लाल है,’ और सबेरे कहतौ, ‘कै आज आँधी आवेगी, चौंकि आज आकास लाल और धूधरौए।’ तुम आकास के रंग ढंग देखकें भेद बता देतौ,पर समै के चिन्‍न कौ भेद नांय बता सकैं। जा जमाने के लोग बुरे और व्यभिचारी हैं, और जि चिन्‍न मांगतैं, पर इनकूं परमेस्‍वर की बात बतायबे बारे योना के चिन्‍न कूं छोड़कै और कोई चिन्‍न नांय दियौ जाबेगौ।” जाके बाद ईसू बिन्‍नें छोड़कै चलौ गयौ। चेला झील के दूसरी पार जाते समै रोटी लैबौ भूल गये। ईसू नें बिनते कही, “तुम फरीसी और सदूकीन के खमीर ते सावधान रहियों।” बे आपस में बिचार करके कैहबे लगे, “हम रोटी नांय लाए जा बजैह ते बू ऐसौ कह रयो है।” जि जानकें ईसू ने बिनते कही, “हे भरोसे में कमजोर लोगो, तुम जि बिचार चौं कर रये हो कै हमारे जौरै रोटी नांय? का तुम अब तक नांय समझ पाये? का तुमें याद नांय जब मैंनें पांच हजार लोगन कूं पांच रोटिन ते खिलायौ हतो तब तुमने बचे भये टुकड़न की कितनीं डलिया भरीं हती? और जब मैंनें चार हजार लोगन कूं सात रोटी ते खिलायौ तब बचे भये टुकड़न की तुमनें कितनीं डलिया भरीं हती? तुम चौं नांय समझत कै मैंनें तुमते रोटिन के बारे में नांय कही? पर फरीसियों और सदूकिन के खमीर ते सावधान रैहबे काजै कही है।” तब बिनकी समझ में आयी, कै बानें रोटीन के खमीर के बारे में नांय कही, पर फरीसियन और सदूकिन की सिछा ते सावधान रहबे की कही है। जब ईसू केसरिया पिरदेस के फिलिप्पी सहर के जौरै आयौ, तौ बू अपने चेलान ते पूछबे लगौ, “लोग मुझ, ‘मनुस्‍य के बेटाऐ’ का कैहतें। मैं को हूं?” तब चेलान नें बाते कही, “कछू तौ यूहन्‍ना बपतिस्मा दैबे बारौ, और कछू एलियाह और कछू यिर्मयाह यां फिर परमेस्‍वर की बात बतायबे बारेन में ते एक बतातै।” तब ईसू नें बिनते कही, “तुम मेरे बारे का कैहतौ, कै मैं कौन हूं?” तब सिमौन पतरस नें कही, “तू जीबते परमेस्‍वर कौ पुत्र मसीह है।” ईसू नें बाते कही, “हे सिमौन योना के बेटा तू धन्य है। चौंकि जि बात मांस और लहू ते नांय पर सुरग में बैठे भये, मेरे पिता ने तोपै पिरगट करीए। मैंऊ तोते जि बात कैह रयौऊं, कै तू पतरस, एक चट्‍टान है और मैं जा चट्‍टान पै अपनी कलिसिया बनाऊंगौ और बापै नरक के फाटक कबऊ हाबी नांय हुंगे। मैं तोय सुरग के राज की तारी दुंगो, और तू जो कछू जा धरती पै बांधेगौ बू सुरग मैं बंध जाबैगौ, और जो तू जा धरती पै खोलेगौ बू सुरग में खुल जाबैगौ।” तब बानें चेलान कूं चेताके कही, “कै तुम जा बातें काऊ ते मत कहियों मैं मसीह हूं।” बा समै ते ईसू अपने चेलान कूं बतायबे लगौ जि जरूरी है कै, “मैं येरूसलेम कूं जाऊंगो और मांके बुजुर्ग नेता, और यहुदी पिरधान पुरोहित और सास्त्रन कूं सिखाबे बारेन के हातन ते भौत दुख उठाऊंगो। य्हां तक कै मैं मार डारो जाऊंगो पर मैं तीसरे दिना जी उठुंगो।” जा बात पै पतरस नें ईसू कूं अलग लै जायके झिड़ककें कही, “हे पिरभू! परमेस्‍वर करै कै तेरे संग ऐसौ कबऊ नांय होबै।” ईसू ने पीछे मुड़कै पतरस ते कही, “हे सैतान! तू मेरे सामने ते दूर है जा, तू मेरे काजै ठोकर कौ कारन बन रयौए, चौंकि तू परमेस्‍वर की बातन कूं नांय पर आदमिन की बातन कूं सोचतै।” तब ईसू नें अपने चेलान ते कही, “जो कोई मेरे पीछै आयबौ चाहबै बू अपने आपकूं कछू ना समझै,और अपनों क्रूस उठाबै और मेरे पीछे आवे। चौंकि जो कोई अपनों पिरान बचाबौ चाहबै बू बाय खोबैगौ और जो कोई मेरे काजै अपने पिरान खोबैगौ बू बाय पाबैगौ। अगर कोई आदमी सबरी दुनियांए पाय लेबै पर अपने पिरान खो दैबै तौ बाय का फायदा होगौ? आदमी अपने पिरान के बदले में का दै सकतैं? मैं, ‘मनुस्‍य कौ बेटा’ अपने सुरग दूतन के संग अपने पिता की महिमा में आऊंगो और बा समै मैं हरेक कूं वाके कामन के अनुसार प्रतिफल दुंगो। “मैं तुमते सच कैहतूं कै ज्हांपै जितने हैं बिनमें ते कितने तौ ऐसे हैं जब तक ‘मनुस्‍य के बेटा’ कूं अपने राज में आबत भयौ नांय देख लिंगे तब तक बे नांय मरिंगे।” छै दिन के बाद ईसू पतरस, याकूब और वाके भईया यूहन्‍ना कूं अपने संग लैके एकान्‍त में ऊंचे पहाड़ पै गयौ। और बिनकेई सामने ईसू कौ रूप बदल गयौ और वाकौ मौंह सूरज के नाईं चमकबे लगौ और वाके कपड़ा उजाले की तरैह ते चमकबे लगे। और देखौ बिन्नें बू मूसा और एलियाह के संग बात करते भये दिखाई दियौ। जापे पतरस ने ईसू ते कही, “हे पिरभू य्हांपै रैहबौ हमारे काजै कितनौ अच्‍छौ है। अगर तेरी इच्‍छा हौबे तौ हम तेरे काजै, एलियाह और मूसा कै काजै तीन कुटिया बना दैमें।” जब बू जि बात कैह रयौ हतो तबई एक चमकते भये बादर ने बिन तीनोंन कूं ढक लियौ और बामें ते अबाज आई, “जि मेरौ प्यारौ बेटा है, जाते मैं भौत खुस हूं। और तुम जाकी बातन्‍नें सुनौ।” चेला जि सुनिकें डरप गये और बे मौंह के बल गिर गये। तब ईसू ने बिनके जौरै आयकै बिनकूं छूऔ और बिनते कही, “उठौ, डरपौ मत।” तब चेलान नें अपनी आँख खोलकें देखौ तौ बिनें ईसू कूं छोड़कै और कोई दिखाई नांय दियौ। ईसू नें पहाड़ पैते नीचे उतरते समै बिनकूं जि आग्‍या दई कै, “जब तक मैं, ‘मनुस्‍य कौ बेटा’ मरे भयेन में ते जीबित नांय है जाऊं, तब तलक जो कछु तुमनें देखौ है बू काऊ ते मत कहियों।” तब चेलान नें बाते पूछी, “सास्त्रन कूं सिखाबे बारे जि चौं कैहतैं कै एलियाह कौ पैहले आयबौ जरूरिए?” और तब ईसू नें बिनते कही “एलियाह जरूर सब कछू सही करबे आबेगौ। पर मैं तुमते जि कैह रयौऊं, कै एलियाह तौ आ चुकौ है। पर लोग बाय पैहचान नांय पाये, पर लोगन्‍नें वाके संग बैसौई करौ जैसौ बिन्‍नें करबौ चाहौ। जाई तरैह ते मैं, ‘मनुस्‍य कौ बेटा’ बिनके हातन ते दुख उठाऊंगौ।” तब बे चेला समझ गये कै जि बपतिस्मा दैबे बारे यूहन्‍ना के बारे में कैह रयौए। जब ईसू बापस भीड़ के जौरै आयौ तब एक आदमी ईसू के जौरै आयौ, और वाके पामन में घुटुनन के बल बैठकै, बाते ते कही, “हे पिरभू! मेरे बेटा पै दया कर। जाय मिरगी आतै जामारै जाकी हालत भौत खराब है और जि बार बार आग और पानी में गिर जातै। और मैंनें तेरे चेलान ते कही पर बे जाय ठीक नांय कर पाये।” तब ईसू ने बिनते कही, “अरे अबिसबासी और हटीले लोगो मैं तुमारे संग कब तक रहूंगौ? और कब तक मैं तुमें सहुंगो? बा लड़का कूं मेरे जौरै लैके आऔ।” तब ईसू ने बा दुस्‍ट आतमा कूं फटकारौ और बू दुस्‍ट आतमा बामें ते निकर गई और वाकौ बेटा बाई समै सही है गयौ। तब चेला ईसू कूं एकान्त में लै गये और ईसू ते पूछी, “हम बाय चौं नांय निकार सके?” तब ईसू ने बिनते कही, “तुमारे भरोसे की कमी की बजैह ते। मैं सच कैह रयौ हूं, अगर तुम में राई के दाने कै बराबर भरोसौ होतौ तौ तुम जा पहाड तै कैहते, ‘कै य्हांते चलौ जा’ तौ बू चलौ जाबैगौ। तुमारे काजै कोई काम असम्भब नांय होबेगौ।” जब बे गलील में हते,तब ईसू नें चेलान ते कही, “मैं, ‘मनुस्‍य कौ बेटा’ आदमिन के हातन ते पकरबायौ जाऊंगौ। और बे मोय मार डारिंगे और मैं तीसरे दिन जी उठूंगौ।” जा बात पै चेला भौत उदास भये। जब बे कफरनहूम में आये, तौ पिराथना घर के काजै कर लैबे बारेन में ते दो लोगन नें पतरस के जौरै आयके पूछी, “का तुमारौ गुरू बड़े पिराथना घर कौ कर नांय देतै?” बानें कही, “हाँ देत तौ हतै।” जब पतरस अपने घर में आयौ तौ ईसू नें पतरस के बोलबे ते पैहलेई बाते पूछी, “हे सिमौन तू का समझतै? जा धरती के राजा ब्याज और कर कौन पैते लैतें अपने बेटातें या परायेन ते?” तब पतरस नें कही, “परायेन ते।” जापै ईसू ने कही, “तब तौ बेटा बच गये। फिरऊ हमें बिन लोगन कूं नाराज नांय करनों। तू झील कै किनारे जा और म्हांपै अपनी बन्सी डारिओ और जो मछली पैहले फसै वाके मौंह खोलियो। तौ तोय एक सिक्‍का मिलेगौ, बाय तू अपने और मेरे बदले में कर दै दियो।” बाई समै ईसू के चेलान ने ईसू ते आयकै पूछी, “सुरग के राज में सबनते बड़ौ को है?” तब ईसू नें एक बालक कूं बुलायकै बिनके बीच में खड़ौ करौ। और बिनते कही, “मैं तुमते सच कैह रयौ हूं, जब तक तुम लोग अपने पापन ते मन ना फिराऔ और एक बालक के समान न बनौंगे, तौ तुम सुरग के राज में पिरबेस नांय कर पाऔगे। जो कोई अपने आप कूं जा बालक के समान छोटौ करैगौ, तौ बू सुरग के राज बड़ौ करौ जाबैगौ। और जो कोई मेरे नाम ते जा बालक के समान काऊ आदमी कूं अपनाबै, तौ बू मोय अपनाबै। “मोपै भरोसौ करबे बारे छोटे ते छोटेन में ते एकऊऐ, अगर कोई आदमी पाप में गिराबे कौ कारन बनतै, तौ वाके काजै जि अच्‍छौ होतो कै वाके गले में एक चाकी कौ पाट बांधकै गैहरे समुन्दर में धकेल दियौ जातो। संसार के लोगन पै धिक्‍कार है, जो मोपै भरोसौ करबे बारेन नें पाप में गिराबे कौ कारन बनतैं। मोपै भरोसौ करबे बारेन ने लोग पाप में जरूर गिरायेंगे। पर धिक्‍कार है बापै जाकी बजैह ते ऐसौ होतै। अगर तेरौ हात या पाम तेरे काजै पाप में गिराबे की बजैह बनतुए तौ तू बाय काट के फैंक दै। चौंकि हात और पामन के रैहत भये कबऊ न बुझबे बारी नरक की आग में जरबे ते तौ भलौ होतौ तू लूलौ ओर लंगड़ो हैकें सुरग के जीबन में पिरबेस करनों भलौ है। अगर तेरी आँख पाप के रस्ता पै लै जाबै की बजैह बने तौ तू बाय फोड दै। भलौ तौ जेईए के तुम काने हैकें सुरग के जीबन में पिरबेस करौ। पर दोनों आँखन के रैहत भये नरक की आग में डारे जाऔ। “सावधान रहौ, कै उन छोटेन में ते एकऊऐ तुच्‍छ न समझौ। मैं तुमते कहतूं, कै बिनके दूत सुरग में निरन्‍तर मेरे सुरग के पिता के दरसन करतैं। मैं, ‘मनुस्‍य कौ बेटा’ खोये भयेन कूं ढूढ़बे काजै आयौऊं । “तुमारौ का बिचारे? काऊ आदमी पै सौ भेड होंय और वाकी एक भेड़ खो जाय तौ, का बू उन निन्यानबे भेड़न कूं पहाड़ी पै छोड़कै बा एक खोई भई भेड कूं ढूढ़बे ना जाय? और अगर बू भेड़ बाय मिल जाबै, तौ मैं तुमते सच कैह रयौऊं कै बाय उन निन्यानबे भेड़न की बजाय, बा खोई भेड़ कूं मिलबे ते जादा आनन्द होगौ। और जाई तरैह तै मेरौ सुरगीय पिता नांय चाहत कै उन छोटेन मेंते एकऊ नांस होबे। “अगर तुमारौ कोई भरोसौ करबे बारौ भईया पाप करतुए, जायकें बाय अकेले में समझा। यदि बू तुमारी बात मान जाबै,तौ तुमने अपनों बा भईया कूं बचाय लयौ। यदि बू तुमारी बात नांय मानें, तौ और एक-दो आदमी कूं संग ले जाओ, जाते दो या तीन गबाहन के सहारे सब कछू साबित है जाबै। अगर बू बिनकीऊ नांय सुनें, तौ कलिसिया कूं बताय देओ और अगर बू कलिसिया कीऊ नांय सुनें, तौ बाय गैर यहुदी और चुंगी लैबे बारेन जैसौ बरताब करैं। “मैं तुमते सच कैहतूं, कै तुम जा धरती पै जो कछू बांधौगे बू सुरग मैं बंध जाबैगौ और जो धरती पै खौलोगे बू सुरग मैं खुल जाबैगौ। “मैं तुम ते सच कैह रयौऊं, कै अगर तुम दो या तीन आदमी धरती पै एक मन हैके मेरे सुरगीय पिता ते मागिंगे, तौ बू उनै मेरे सुरगीय पिता की ओर ते निस्चय मिलैगौ। चौंकि जहाँ दो या तीन आदमी मेरे नाम इकठ्‌ठे होतै, मापै मैं बिनके बीच में मौजूद रैहतूं।” तब पतरस ने जौरै आयकै ईसू ते कही, “हे पिरभू! अगर मेरौ भरोसौ करबे बारौ भईया मेरे बिरोध में पाप करै, तौ मैं बाय कितनीं बेर मांफ करूं? का मैं बाय सात बार तक मांफ करूं?” तब ईसू ने बाय उत्‍तर दयौ कै, “मैं तुमते जि नांय कैहतूं कै सात बेर तक मांफ कर पर सात कौ सत्‍तर गुना बार बाद तक मांफ करतौ रहियो। “जेई बजैह ते सुरग कौ राज बा राजा कै समान है, जो अपने सेबक ते हिसाब लैबे की सोचतै। जब बू हिसाब लेबौ सुरू करैगौ, तौ वाकौ दस लाख रुपईयन कौ एक कर्जदार वाके सामने लायो गयौ। और बापे कर्जा चुकाबे काजै कछू नांय हतौ,जामारै वाके मालिक ने वाकूं जि आदेस दयौ कै जाकी जमीन जायदाद और बालक और पत्नी कूं बेचके बा पैते कर्जा चुकायो जाबै। “तब बू अपने मालिक के पामन में गिरके भौत गिड़गिड़ायौ और कर्जा चुकाबे काजै कछू समै मांगौ और कही, ‘कै हे मालिक तुम मोय थोरौ समै और दै देओ, मैं तुमारौ सब कर्जा चुकाय दुंगो।’ बा सेबक के मालिक ने बापे रहम खायौ और वाकौ सबरौ कर्जा मांफ कर दियौ। और बाय जान दियौ। “जब बू सेबक बाहर निकरौ, तौ बू अपने संग के एक सेबक ते मिलौ, बापै वाकौ सौ चाँदी सिक्‍कन कौ कर्जा हतौ। बानें वाकौ गलौ पकरकै घौंटौ और बाते कही, ‘कै मेरे कर्जाए दै।’ “तौ बू सेबक वाके पामन में गिर परौ और जि कैहते भये गिड़गिड़ायौ, ‘कै मोय थोरौ समै और दै। मैं तुमारौ कर्जा चुकाय दुंगौ।’ “पर बानें नांय मानी और जायके वाकूं जेल में डरबाय दयौ, जब तक कै बू अपनों कर्ज नांय चुकाय देय। जि सब देखकें वाके संग के दूसरे सेबक भौत दुखी भये और बिन्‍नें मालिक के जौरै जायकें जि सबरी बात बताय दई। “तब मालिक ने बा सेबक कूं बुलायकै कही, ‘कै अरे दुस्‍ट सेबक! जब मैने तेरे गिड़गिड़ायबे पै तेरौ सबरौ कर्जा मांफ कर दयौ। तौ तेनें बापै दया चौं नांय करी जैसे मैंनें तोपै करी? का तोय अपने संग के सेबक पै दया ना करनी चहिऐं?’ और मालिक नें गुस्सा हैकें बाय जल्‍लादन के हात में जब तक कूं दै दियौ, जब तक कै बू कौड़ी-कौड़ी न चुकाय देय। “अगर तुम में ते हर एक अपने भरोसे करबे बारे भईया कूं पूरे हृदय ते मांफ नांय करैगौ तौ, तुमारे संग मेरौ सुरगीय पिताऊ ऐसौई करैगौ।” जब ईसू सिछा दै चुकौ वाके बाद बू गलील कूं छोड़कै यरदन नदी पार करकें यहुदिया पिरदेस में पौहचौ। और वाके पीछे एक बड़ी भीड आई और बानें बिनकूं बिमारिन ते ठीक करौ। तब कछू फरीसी ईसू की परीछा करबे काजै वाके जौरै आयकें बाते पूछबे लगे, “का हमारी व्‍यबस्था के काऊ आदमी कूं, काऊ कारन ते अपनी पतनीएं छोड़बो सही है?” ईसू नें बिनते कही, “का तुमने जि नांय पढ़ी? संसार कूं बनाबे बारे नें बिनें सुरू ते नर और नारी करके बनायौ है। और कही, ‘कै जा बजैह ते आदमी अपने माँ-बाप ते अलग रैहके अपनी पत्नी के संग रैहबेगौ और बे दोनों एकई तन हुंगे।’ पर बे अब दो नांय पर एकई सरीरे। जामारै जाकूं परमेस्‍वर नें जोड़ोऐ बाय कोई आदमी अलग नांय करै।” बिन्‍नें बाते कही, “तौ फिर मूसा ने जि चौं ठहरायौ कै त्‍याग पत्र लिखकै छोड़ देय?” तब ईसू नें बिनते कही, “कै जि बात मूसा ने तुमारे जिद्‍दी मन की बजैह तै तुमें अपनी पतनीएं छोड़बे की आग्‍या दई हती, पर सुरू में ऐसौ नाओ। और मैं तुमते कैहतूं, कै अगर कोई औरत कुकर्मी नांय, जाके बादऊ वाकौ पती बाय छोड़तै और बू दूसरी ते ब्याह करतै तौ बू कुकर्म करतै।” चेलान नें ईसू ते कही, “कै अगर पती और पत्नी कौ सम्बन्ध ऐसौ होय तौ ब्याह ना करबौई अच्‍छौ है।” ईसू नें चेलान ते कही, “कै जा बातै सब लोग नांय समझत, केवल बेई समझतै जिनकूं समझबे कौ वरदान मिलौऐ। चौंकि कछू लोग तौ अपनी माँ के पेट तेई नपुंसक पैदा भए हैं और कछू लोगन कूं आदमीन्‍नें नपुंसक बनांय दयौ है। और कछू लोगन्‍नें अपने आप सुरग के राज काजै ब्याह ना करबे कौ फैसला लयौऐ। जो समझ सकतै, बे समझलें।” बा समै कछू लोग ईसू के जौरै बालकन नें लैकें आये कै बू बिनपै हात रखकें आसीरबाद दैबै और पिराथना करै, पर चेला लोगन कूं डांट रये हते। तब ईसू नें चेलान ते कही, “कै बालकन कूं मत रोकौ बिन्‍नें मेरे जोरै आन देओ। चौंकि सुरग कौ राज इनके जैसे लोगन कौई है।” और ईसू बालकन पै हात रखके आसीरबाद दैबे के बाद म्हांते चलौ गयौ। ईसू के जौरै एक आदमी आयकें बोलौ, “हे अच्‍छे गुरू, कबऊ नांय खतम हैबे बारे जीबन पाबे काजै, मैं कौन सौ अच्‍छौ काम करुँ?” ईसू नें बाते कही, “का अच्‍छौ है जाके बारे में तू मोय चौं पूछतै? केवल परमेस्‍वरई है जो अच्‍छौ है। अगर तू कबऊ नांय खतम हैबे बारे जीबन में पिरबेस करबौ चाहबै, तौ वाकी आग्‍यान कौ पालन कर।” बानें बाते पूछी, “कौन सी आग्‍या कौ?” ईसू ने कही, “कै हत्‍या न करबौ, कुकर्म नांय करबौ, चौरी नांय करबौ और झूंठी गबाही नांय दैबौ। अपने माँ-बाप कौ आदर करौ, और अपने पड़ोसिन ते अपने समान पिरेम करौ।” तब बा आदमी नें ईसू ते कही, “मैं इन बातन कूं तौ मैं मान्‍तौ आयौ हूं, तौ मोमें कौन सी बात की कमीऐं?” ईसू ने बाते कही, “अगर तू अपनी कमी कूं दूर करबौ चांहतै तौ जा तू अपनी सबरी धन-दौलत कूं बेचकै गरीब लोगन में बांट दै और सुरग में तेरे काजै आतमिक धन-दौलत होगी। तब तू आयकै मेरे पीछे चल।” जि सुनकें बू आदमी भौत उदास हैगौ और म्हांते चले गयौ चौंकि बापै भौत धन-दौलत हती। तब ईसू ने अपने चेलान ते कही, “मैं तुम लोगन ते सच कैहतूं कै, धनी आदमी कै काजै सुरग के राज में पिरबेस करबौ कठिन है। पर मैं तुमते जेऊ कैह रयौऊं कै ऊँट सूंई के छेद में ते नांय निकर सकत, बैसेई धनबान आदमी कौ परमेस्‍वर के राज्‍य में जावे भौत कठिन है।” जि सुनकें चेला चकित है गये और बोले, “तौ फिर कौ बच सकतै?” ईसू नें बिनकी ओर देखकें कही, “जि आदमी ते तौ नांय है सकत। पर परमेस्‍वर सब कछू कर सकतै।” जापै पतरस नें ईसू ते कही, “देख हम तौ सब कछू छोड़कै तेरे पीछै आये है, तौ हमें का मिलैगौ?” ईसू ने बिनते कही, “मैं तुमते सच कैह रयौऊं नई सृस्टी में जब मैं, ‘मनुस्‍य कौ बेटा’ अपनी महिमा के संग राजगद्‍दी पै बैठुंगो, तब तुमऊं जो मेरे पीछे आयेऔ, बारह राजगद्‍दीन पै बैठकै इसरायल के बारह गोतन कौ न्याय करौगे। और जा काऊनें अगर घर,भईया, बहन, माँ-बाप और बालक बच्‍चे और खेत कूं मेरे नाम ते छोड़ दयोए बाय वाकौ सौ गुनों मिलैगौ। और बू कबऊ नांय खतम हैबे बारे जीबन कौ अधिकारी होगौ। पर भौत से जो पैहले हैं बे पिछले है जांगे। और भौत ते जो पिछले हैं बे पैहले है जांगे। “सुरग कौ राज बा जमींदार की तरैह है, जो सबेरे सबेरे निकरौ कै,अपनी अंगूर की बारी में मजदूर लगाबै। तब बानें एक मजदूर काजै एक चाँदी कौ सिक्‍का रोजाना पै ठहरायके बू अपनी अंगूर की बारी में भेजौ। “फिर एक पहर दिन चढे बजार में और मजदूरन कूं बेकार ठाड़ौ देखौ। तौ बानें बिनते कही, ‘कै तुम अंगूर की बारी में जाऔ मैं तुमें जो कछू ठीक है बू मजदूरी दुंगो।’ तौ बेऊ बारी में गये। “फिर बानें दूसरे, तीसरे पहर बाहर निकरकें बैसौई करौ। जब एक घन्‍टा दिन रैह गयौ तब फिर निकरकै गयौ तौ और दूसरे मजदूरन कूं ठाड़ौ देखकें बौलो, ‘तुम चौं दिन भर य्हां बेकार खडे रये?’ “बिन्‍नें बाते कही, ‘काऊनें हमें मजदूरी पै नांय लगायो।’ “बानें बिनते कही, ‘कै तुमऊ बारी में जाऔ और काम करौ।’ “बानें सांझ कूं अंगूर की बारी के मालिक ने मुनीम ते कही, ‘सब मजदूरन कूं बुलायकै मजदूरी दै दे। जो सबसे बाद में आये है बिनें पैहले दियौ और जो पैहले आये है बिनै बाद में दियौ।’ “तब जो मजदूर एक घन्‍टा पैहले लगाए हते बिनै एक-एक चाँदी कौ सिक्‍का मिलौ। और जो बिनते पैहले आये हते बिन्‍नें जि समझी कै हमें और जादा पर मिलैगौ। पर बिनेंऊंऐं एक-एक चाँदी कौ सिक्‍का मिलौ। पर बिन्‍नें एक-एक चाँदी कौ सिक्‍का तौ लयौ पर बे कुड़ कुड़ायबे और कैहबे लगे, ‘कै इन्‍नें तौ एक घन्‍टई काम करौए और तैनें इनकूं हमारे बराबर मजदूरी दई है। पर हमनें सबरी दुपैरी चटकती घाम में काम करौये।’ “बानें बिनमें ते एक आदमी ते कही, ‘कै हे भईया मैंनें तेरे संग कछू अन्याय तौ करौ नांय। का मैने तेरे काजै एक दिना कौ एक चाँदी कौ सिक्‍का नांय ठहरायो? जो तेरौ है बाय उठाय लै और चलौ जा। मेरी इच्‍छा जि है कै मैंनें तोय जितनों दयौए ऊतनौई बाद बारे कूं दऊं। का मोय जि हक नांय कै मैं अपनी धन-दौलत कौ जो चांहू सो करूं? का तू मेरे भले हैबे की बजैह ते मोय बुरी निगाह ते देखरौ?’” फिर ईसू ने बिनते कही, “जो पिछले हैं बे पैहले हुंगे, और जो पैहले हैं बे पिछले हुंगे।” जब ईसू येरूसलेम कूं जाय रये हते तब अपने भेजे भये चेलान नें एकान्‍त में लै जायके चलत-चलत कैहबे लगौ, “देखौ, हम येरूसलेम कूं जा रये हैं और मैं, ‘मनुस्‍य कौ बेटा’ यहुदी पिरधान पुरोहितन और सास्त्रन कूं सिखाबे बारे के हातन में धोखे ते पकरबायौ जाऊंगौ, और बे लोग मोय मौत की सजा दिंगे। और मोय गैर यहुदियन कै हातन में सौंप दिंगे, मोय ठट्‍टानमें उड़ांगे और कौडे लगबायकै क्रूस पै चढाय दिंगे और मैं तीसरे दिना जीबित है जाऊंगौ।” तब जब्दी के बेटन की माँ अपने बेटन के संग ईसू के जौरै पौंहची और बाते नमस्‍कार करके कछू मांगबे लगी। ईसू नें बाते कही कै, “तू का चाहतै?” बानें बाते कही, “मैं चाहरई हूं कै तेरे राज में मेरे जे दोनों बेटा एक तेरे दाहिने बैठे और एक तेरे बांए बैठे।” तब ईसू ने बिनते कही, “तुम नांय जानें तुम का मांगतौ। का मैं जो कटोरा पीबे जा रयौ हूं, का तुम बाय पी सकतौ?” बिन्नैं बाते कही, “हा हम पी सकतै।” ईसू नें बिनते कही, “तुम पक्‍कौ मेरे कटोरे में ते पीऔगे पर मेरे दाइने और बाये बैठारबे कौ अधिकार मेरे जौरै नांय। पर मेरे दाऐं और बाय बेई बैठेंगे जिनें मेरौ पिता बैठारैगौ।” जि सुनकें दसऊ चेला उन दोनों भईयन पै भौत गुस्सा भये। तब ईसू ने बिनकूं जौरै बुलाके कही कै, “तुम जानतौ कै गैर यहुदी राजपाल अपने लोगन पै राज करतैं और जो बड़े हैं बे छोटेन पै जबरदस्ती अधिकार जतातै। पर तुमारे बीच में ऐसौ नांय होनों चहिऐं। जो कोई तुम में बड़ौ हैबौ चाहतै बू तुमारौ सेबक बनें। और जो पिरधान बनबौ चाहतै बू तुमारौ दास बने। मैं, ‘मनुस्‍य कौ बेटा’ जामारै नांय आयौ कै लोग मेरी सेबा-टहल करैं। पर मैं, ‘मनुस्‍य कौ बेटा’ तौ सेबा-टहल करबे आयौ है। और अपनी जान भौतन के छुटकारे काजै दैवे आयौ हूं।” जब ईसू और वाके चेला यरीहो नगर ते निकर रये, तब एक भौत बड़ी भीड उनके पीछै आयी। और देखौ, दो अन्धे आदमी सड़क के किनारे बैठे हते। और बिनैं पैरन की अबाज सुनीं कै ईसू जा रयौ है, तौ बू चिल्लायकै कैहबे लगौ, “हे पिरभू! दाऊद की सन्‍तान, हम पै दया कर।” तब लोगन नें बिनें डांटकै कही, “चुप रहो।” पर बू और जोर ते चिल्‍लायकै बोलौ, “हे पिरभू दाऊद की सन्‍तान, हम पै दया कर।” तब ईसू खडौ है गयौ और बिनकूं बुलायौ और कही, “कै तुम का चाहतौ कै, मैं तुमारे काजै करूं?” बिन्‍नें ईसू ते कही, “कै हे पिरभू, हमारी आंख खुल जांय।” ईसू नें तरस खायकें बिनकी आंखन कूं छूऔ और बे तबई देखबे लगे,और वाके पीछे चल दये। ईसू और वाके चेला येरूसलेम के जौरै जैतून पहाड़ के जौरै बैतफगे आ गये। तब ईसू ने अपने दो चेला जि कैहत भये भेजे, “सामने के गांम में जाओ। म्हांपै पौंहचतेई तुमें एक बंधी भई गधी मिलैगी और वाके संग वाकौ एक बच्‍चा होगौ। बिनें खोलकै मेरे जौरै लै आऔ। अगर तुमते कोई कछू पूछे बाते कह दियौं, ‘कै पिरभू कूं इनकी जरूरत है, बू इनैं जल्दी बापस भेज देगौ।’” जि जाके मारे भयौ कै परमेस्‍वर की ओर ते बात बतायबे बारेन की बात पूरी होय, “सियोन नगर के लोगन ते कहौ, ‘देख! तेरौ राजा तेरे जौरै आ रयौ है, बू बिनम्र हैं, बू गधी के बच्‍चा पै सबार हैं।’” चेला चले गये और ईसू ने जैसी आग्‍या बिनकूं दयी हती, बिन्‍नें बैसौई करौ। बे गधी और वाके बच्‍चा कूं लैके आये और बिन्‍नें वाके ऊपर अपनी लोई डारी और बापै ईसू बैठ गयौ। भीड़ में ते भौत से लोगन नें अपनी लोई रस्ता में बिछाय दईं। कछू लोगन्‍नें पेड़न की डारी काटकै रस्ता में फैला दईं। जो लोग ईसू के आगे-आगे जा रये हते और जो लोग वाके पीछे-पीछे आ रये हते बे सब लोग जि नारौ लगाय रहे हते, “दाऊद की सन्‍तान की स्तुति हो!” “धन्य है जो पिरभू के नाम ते आबतै!” “सुरग में परमेस्‍वर की स्तुति हो!” जब ईसू येरूसलेम आयौ, तब सबरे सहर में हलचल मच गयी और लोग पूछ रये हते, “जि कोए?” और सबरे लोग जि कैह रये हते, “जि गलील पिरदेस के नासरत सहर कौ परमेस्‍वर की ओर ते बात बतायबे बारौ ईसू है।” जब ईसू बड़े पिराथना घर के चौक में आयौ तौ म्हांते सबरे बेचबे और खरीदारी करबे बारेन कूं बाहर निकार दियौ। बानें दूसरे देस के रुपईया कूं बदलवे बारेन की मेज और कबूतर बेचबे बारेन की चौकिऊ पलट दईं। ईसू नें बिनते कही, “जि लिखौ है, ‘मेरौ घर पिराथना कौ घर कहौ जाबैगौ,’ पर तुम लोगन्‍नें जाय ‘लुटेरेन कौ अड्‍डौ’ बनांय दियौ है।” बड़े पिराथना घर में अन्धे और लंगड़े ईसू के जौरै आये। बानें बिनकूं ठीक कर दियौ। तब पिरधान पुरोहित और सास्त्रन कूं सिखाबे बारेन्‍नें जि चमत्‍कार देखे, जो बानें करे हते। और बिन्‍नें बालकन कूं पिराथना घर में जि नारौ लगाबत भये सुनौ, “दाऊद की सन्‍तान की स्तुति हो!” जि सुनकें बिनें गुस्सा आयौ। तब बिन्‍नें ईसू ते कही, “का तुम सुन रयेऔ कै जि बालक का कैह रये हैं?” ईसू ने बिनते कही, “हाँ मैं सुन्‍त तौ हूं। का तुम लोगन नें जि कबऊ नांय पढ़ौ, “ ‘तैनें बालकन, और दूध पीवे बारे बालकन तक ते अपनी स्तुति करबाईऐ?’” सबिनैं मंई छोड़कै ईसू बैतनियां सहर कूं चलौ गयौ और रात कूं म्हांपैई रयौ। ईसू सबेरे होतेई जब सहर कूं लौट रयौ हतो तब रस्ता में वाकूं भूंख लगी। रस्ता के किनारे अंजीर कौ एक पेड़ देखकें बू वाके जौरै आयौ। बाय बामें पत्‍तन के सिबा और कछू नांय मिलौ। तब बानें पेड़ ते कही, “तौमें फिर कबऊ फल नांय लगेंगे।” और बाई समै अंजीर कौ बू पेड़ सूख गयौ। जि देखके चेला अचम्भे में पर गये और आपस में कैहबे लगे, “जि अंजीर कौ पेड़ इतनी जल्दी कैसै सूख गयौ?” ईसू नें बिनते कही, “मैं तुम लोगन ते सच कैहतूं। अगर तुम में भरोसौ होय और तुम सक नांय करौ, तौ तुम ना केबल बू करौगे जो मैं जा अंजीर के पेड़ के संग कर चुकौऊ, पर तुम जा पहाड ते कहौगे, ‘उठ और समुन्दर में गिर जा,’ तौ बू गिर जाबैगौ। और जो कछू तुम भरोसे के संग पिराथना में मांगौगे, तौ बू सब तुमें मिल जाबैगौ।” जब ईसू बड़े पिराथना घर में जायके परमेस्‍वर के वचन की सिछा दै रयो हतो, तब यहुदी पिरधान पुरोहितन और यहुदी बुजुर्ग नेतान नें वाके जौरै आयकै पूंछी, “ऐसी बात तू कौन-से अधिकार ते करतै? और जि अधिकार तोय किन्‍नें दयो है?” ईसू नें बिनैं उत्‍तर दियौ, “मैंऊं तुम लोगन ते एक प्रस्‍न पूछबौ चाहतूं। अगर तुम मोय वाकौ उत्‍तर देओगे, तौ मैंऊ तुमें बताय दुंगो। कै मैं जि सब कौन के अधिकार ते करतूं। बताओ, यूहन्‍ना कौ बपतिस्मा कौन की ओर ते हतो? सुरग की ओर ते या आदमिन की ओर ते?” बे आपस में बिचार करते भये कहबे लगे, “अगर हम कैहबे, ‘सुरग की ओर ते’, तौ जि हमते कैहबेगौ, ‘तौ तुमनें बापै भरोसौ चौं नांय करौ?’ अगर हम जि कैहबें, ‘आदमिन की ओर ते’ तौ हमें आदमिन कौ डर है। चौंकि बू यूहन्‍ना कूं परमेस्‍वर की ओर ते बात बतायबे बारौ मानतें।” जामारै बिन्‍नें ईसू कूं उत्‍तर दयौ, “कै हम नांय जानतई।” जापे ईसू बिनते कही, “तौ मैंऊ तुम लोगन्‍नें नांय बताऊंगौ, कै मैं जि सब काम कौन के अधिकार ते करतौऊं।” “अच्‍छा तुमारौ जाके बारे में का बिचारै? काऊ आदमी कै दो बेटा हते। बानें बड़े बेटा कै जोरै जायकें कही, ‘बेटा जा, आज अंगूर की बारी में काम कर।’ “पर बा बेटा नें जबाब दयौ, ‘मैं नांय जाऊंगो,’ पर कछू देर बाद वाकौ मन बदल गयौ और बू चलौ गयौ। “फिर बा बाप नें दूसरे बेटा के जौरैऊं जायके जेई बात कही। बेटा नें बाते कही, ‘जि हाँ बापू! मैं जाऊंगौ,’ पर बू नांय गयौ। “बताऔ वाके इन दोनों बेटन मेंते कौन नें अपने बाप की इच्‍छा पूरी करी?” बिन्‍नें ईसू कूं जबाब दयौ, “बड़े बेटा नें।” ईसू नें बिनते कही, “मैं तुमते सच कैहतूं, चुंगी लैवे बारे और बेस्याऐं तुम लोगन ते पैहले परमेस्‍वर के राज में जायेंगे। जि मैं जाके मारै कैह रयौऊं, चौंकि यूहन्‍ना बपतिस्मा देबे बारौ तुमें धारमिकता कौ रस्ता दिखाबे आयौ। पर तुमने बापै भरोसौ नांय करौ। पर बेस्‍या और चुंगी लैबे बारेन्‍नें बापै भरोसौ करौ। जि देखबे के बादऊ तुमनें पापन ते मन नांय फिरायौ और तुम लोगन्‍नें बापै भरोसौ नांय करौ।” ईसू नें कही, एक दृस्‍टान्‍त और सुनों। “काऊ जमीदार नें अंगूरन कौ बगीचा लगायौ, वाके चारों ओर बाड़ लगाई, और अंगूरन कौ रस निकारबे काजै बामें एक रस कौ कुन्‍ड खुदबायौ और रखबारी करबे काजै एक पक्‍कौ मचान बनबायौ। तब बू बारीऐ कछू किसानन कूं बटाई पै दैकें परदेस चलौ गयौ। फसल कौ समै आयबे पै जमींदार नें फसल कौ हिस्सा बसूल करबे काजै अपने कछू दासन कूं भेजौ। “किसानन नें वाके दासन कूं पकरकै बिनमें ते काऊऐ मारौ-पीटौ, काऊ पै पत्‍थर फैंके और काऊ कूं तौ मारई डारौ। और जाके बाद जमींदार नें पैहले तेऊ और जादा दासन कूं भेजौ, और उन किसानन बिनके संगऊ बैसौई करौ। अन्‍त में बानें जि सोचके अपने बेटा कूं किसानन के जौरै भेजौ कै बे ‘मेरे बेटा कौ आदर करिंगे।’ “पर बिन्‍नें वाके बेटा कूं देखकें एक दूसरे ते कही, ‘जि तौ जाकौ बारिस है। चलो, हम जाय मार डारें और जाकी जायजादै हथिया लैंबें।’ जामारै बिन्‍नें बाय पकर लयौ और अंगूर की बारी ते बाहर निकारकें मार डारौ। “जब अंगूर की बारी कौ मालिक आबेगौ, तौ बू उन किसानन के संग का करैगौ?” बिन्‍नें ईसू ते कही कै, “बू उन सब दुस्‍टन कौ सर्वनांस करैगौ। और अपनी अंगूर की बारी कूं दूसरे किसानन कूं बटाई पै दै दैबेगौ, जो समै पै फसल का हिस्सा देत रहिंगे।” ईसू ने उनते कही, “का तुम लोगन्‍नें पबित्र सास्त्र कौ बू वचन कबऊ नांय पढ़ौ, “ ‘राज मिस्त्रीन नें जा पत्‍थर कूं बेकार समझकें निकार दयौ हतो, बेई कोने कौ पत्‍थर बन गयौ। जि पिरभू कौ काम है और जि हमारी निगाह में भौत अच्‍छौ है’? “जामारै मैं तुम लोगन ते कैहतूं, परमेस्‍वर कौ राज तुम पैते छीन लयौ जाबैगौ और बू बिन लोगन कूं दै दयौ जाबैगौ, जो अच्‍छौ फल पैदा करिंगे। जो जा पत्‍थर पै गिरैगौ, बू चूर-चूर है जाबैगौ और जापै बू पत्‍थर गिरैगौ बाऊऐ पीस डारैगौ।” यहुदी पिरधान पुरोहित और फरीसी ईसू के दृस्‍टान्‍तन्‍नें सुनकें समझ गये कै “बू बिनके बारे मेंई कह रयौ है।” जामारै बे ईसूए पकरबौ चाहते, पर बे लोगन ते डरपते हते। चौंकि लोग ईसू कूं परमेस्‍वर की ओर ते बात बतायबे बारौ मान्‍त हते। ईसू एक बार फिर बिनें दृस्‍टान्‍त सुनांयबे लगौ। ईसू नें कही, “सुरग कौ राज बा राजा के जैसौऐ जाने अपने बेटा के ब्याह की दाबत दई। बानें नौते भए लोगन कूं बुलायबे काजै अपने सेबकन कूं भेजौ, पर जिनें नौतौ दयौ गयौ हतो, बे नांय आये। “फिर राजा ने दूसरे सेबकन कूं जि कैहके भेजौ, ‘जिनें नौतौ दयौ है बिनते कहियों, मैंनें दाबत की सब तैयारी कर लईए। और मोटे मोटे जानबरन कूं काटौ जा चुकौ है, सब कछू तैयार है। ब्याह की दाबत में आ जाऔ।’ “नौते भए लोगन नें जाऊ बात की कोई परबाह ना करी। कोई अपने खत पै चलौ गयौ और कोई बौपार देखबे चलौ गयौ। और दूसरे लोगन नें बुलायबे बारेन कूं पकरकै बिनके संग मार-पीट की और बिनकूं जान ते मार दयौ। जा बात पै राजा कूं भौत गुस्सा आई। बानें अपनी सेना भेजकें बिन हत्‍यारेन कौ सत्‍यानांस कर दयौ और बिनकौ नगर जराय दयौ। “तब फिर राजा ने अपने सेबकन ते कही, ‘ब्याह की दाबत कौ खानों तैयार है, पर जिनकूं बुलायौ बे जाके लायक नांय निकरे। जामारै तुम चौराहेन पै जाओ और जितनेऊ लोग मिले बिन सबन कूं दाबत काजै बुला लाऔ।’ सेबक सड़कन पै गये और सब बुरे भले लोगन कूं जो मिले बिनें बुला लाये और बिनते दाबत बारौ आंगन पूरौ भर गयौ। “राजा दाबत में आये भए लोगन कूं देखबे आयौ तौ वाकी निगाह एक ऐसे आदमी पै परी जाने ब्याह के कपड़ा नांए पैहने हते। तब बानें बाते कही, ‘अरे भईया, ब्याह के कपड़ा पैहने बिना भीतर कैसे आय गयौ?’ बू आदमी चुप रहौ। “तब राजा ने अपने सेबकन ते कही, ‘जाके हात पाम बांधकै जाय बाहर अंधेरे फेंक देओ ज्हांपै रोबो और दांत पीसबो है।’ “चौंकि बुलाए भये तौ भौत है, पर चुने भये भौत कम है।” फिर फरीसियन्‍नें जायकै सलाह करी कै हम कैसे ईसू कूं वाकी खुद की कही बातन के फन्दा में फसायें। बिन्‍नें ईसू के जौरै हेरोदियन के गुट के कछू लोगन के संग, अपने चेलान कूं बाते जि सबाल पूछबे भेजौ, “हे गुरू, हम जि जानतें कै तू सच्‍चाई ते परमेस्‍वर के रस्ता की सिछा देतैं और तू सच बोलतै। तोय काऊ की परबाह नांय। तू काऊ के म्हों देखकै बात नांय करतई। जामारै तू हमें बता, कै हमें रोमी समराठ कूं कर देनौ व्‍यबस्था अनुसार सही है, कै नांय?” ईसू बिनकी मन्सा जानकें बोलौ, “अरे ढोगियौ, तुम मेरी परीछा चौं ले रयेऔ? एक सिक्‍का मेरे जौरै लाऔ। जाय दैकै तुम कर चुकातौ।” तब बिन्‍नें ईसू कूं एक चाँदी कौ सिक्‍का दयौ, तब ईसू ने कही, कै “जापै कौन कौ मौंह छपौ है और कौन कौ नाम लिखौए?” बिन्‍नें जबाब दयौ, “रोमीं समराठ कौ” जापै ईसू ने बिनते कही, “जो समराठ कौए, बाय समराठ कूं देओ। और जो परमेस्‍वर कौए, बाय परमेस्‍वर कूं देऊ।” जि सुनिकें बे सब अचम्भे में पर गये। और ईसू कूं मईं पै छोड़कै चले गये। बाई दिना ईसू कै जौरै कछू सदूकी आये, बे जि मानते कै मरबे के बाद जी उठबौ नांय होत। बिन्‍नें ईसू के सामने जि सबाल रखौ, “हे गुरू, मूसा ने कही, कोई आदमी बिना सन्‍तान के मर जाय तौ वाकी बिधबा ते वाकौ भईया ब्याह करै और अपने भईया के काजै सन्‍तान पैदा करै। हमारे य्हांपै सात भईया हते। पैहले ने ब्याह करौ और बू बिना सन्‍तान केई मर गयौ और अपनी बिधबा कूं अपने भईया कूं छोड़ गयौ। दूसरे और तीसरे ते लेकर सातऊ भईयन के संग बैसौई भयौ। सब भईयन के मरबे के बाद बू औरतऊ मर गई। चौंकि बानें सब भईयन के संग ब्याह करौ हतो। जब बे सब जिलाये जाबेंगे तौ बू कौन की पत्नी होगी?” ईसू नें बिनते कही, “तुम लोग भ्रम में पडै हो। तुमनें ना तौ पबित्र सास्त्र कूं जानों और ना परमेस्‍वर की सामर्थ कूं। फिर ते जी उठबे पै आदमी औरतन में ब्याह नांय हुंगे। पर बे तौ सुरग दूतन के समान है जाबेगे। य्हां तक मरे भयेन कौ जी उठबे कौ सबाल है, तुम लोगन्‍नें जि कबऊ नांय पढ़ी परमेस्‍वर नें तुमते कही, ‘मैं अब्राहम कौ परमेस्‍वर, इसहाक कौ परमेस्‍वर और याकूब कौ परमेस्‍वर हूं’? बू मरे भयेन कौ नांय, पर जीबतेन कोई परमेस्‍वर है।” जि सुनकें लोग बिनकी सिछा ते बडे़ अचम्भे में पर गये। जब फरीसियन्‍नें जि सुनी कै ईसू ने सदूकिन कौ मौंह बन्द कर दयौ है, तौ बे इकठ्‌ठे है गये। बिनमें ते एक नें जो सास्त्र कौ ग्‍यानी हतो, ईसू कूं फसाबे काजै बाते पूंछी, हे गुरू, “व्‍यबस्था में सबनते बड़ी आग्‍या कौन सी है?” ईसू ने बाते कही कै, “ ‘तू अपने पिरभू परमेस्‍वर ते अपने सबरे मन और अपने सबरे पिरान और अपनी सबरी बुध्दी ते पिरेम कर।’ बड़ी मुख्‍य आग्‍या तौ जेईए। और जाई कै समान दूसरी आग्‍या जीए, ‘कै तू अपने पड़ोसी ते अपने समान पिरेम रख।’ जेई दो आग्‍याऐं सबरी व्‍यबस्था और परमेस्‍वर की बात बतायबे बारेन कौ आधार हैं।” जब फरीसी इकठ्‌ठे हते, तब ईसू नें बिनते पूछी, “तुम मसीह के बारे में का समझतौ? बू कौन की सन्‍तान है?” बिन्‍नें बाते कही, “दाऊद की।” फिर ईसू नें बिनते कही, “तौ फिर दाऊद चौं आतमा में हैकें बाय ‘पिरभू’ कैहतै? जेऊ लिखौ भयौ है, “ ‘कै पिरभू ने मेरे पिरभू ते कही, “तू मेरे सीदे हात मांऊ बैठ जब तक कै मैं तेरे बैरियन कूं तेरे पामन के नीचे नांय कर दूं।” ’ भलैई जब दाऊद बाय पिरभू कैहतै, तौ बू वाकौ बेटा कैसे भयौ?” वाके जबाब में काऊ नें एकऊ बात नांय कही,पर बा दिना ते काऊए, बाते कछू पूछबे की हिम्मत नांय भयी। ईसू नें भीड और अपने चेलान ते कही, “सास्त्रन कूं सिखाबे बारे और फरीसिन कूं मूसा की व्‍यबस्था कूं समझाबे कौ अधिकार है। जामारै बे तुमते जो कछू कहिंगे बाय मानियों और बाय करियों। पर बे जो करतै बाय मत करियों, चौंकि बे जो कैहतें बाय बे खुद नांय करत। बे एक ऐसे भारी बोझ कूं आदमिन के ऊपर लाद दैतै, जिनकौ उठाबौ बिनके काजै कठिन है, पर बे खुद एक उगरिया कौ सहारौऊ देबौ नांय चांहत। “बे अपने हात और माथे पै बांधबे बारे ताबीजन कूं, जामें बे सास्त्र रखतें, बिनें बे चौंड़ौ बनबातें, और अपने कपड़न की झालरन कूं बढ़ी भयी रखतै। बे जि सब काम लोगन कूं दिखाबे काजै करतैं। जाते के लोग बिनैं धरमातमा समझें। बे दाबत में आदर बाई जगैह पै और पिराथना घरन में मुख्‍य जगैन में बैठबौ चाहतैं। और बिनें बजारन में नमस्‍कार करबाबौ और ‘गुरू’ कैहबायबो अच्‍छौ लगतै। “पर तुम कबऊ अपने आप कूं काऊ ते ‘गुरू’ मत कैहबईयों। चौंकि तुमारौ गुरू तौ एकईए और तुम सब तौ भईया-बहन हो। और धरती पै काऊए अपनों ‘पिता’ मत कहियों। चौंकि पिता तौ एकईऐ और बू सुरग में हैं। और तुम अपने आपकूं कबऊ उपदेसक मत कैहलबईयों चौंकि उपदेसक तौ एकईऐ बू ‘मसीह’ है। जो तुम में बड़ौ होय बू तुमारौ सेबक बनैं। और जो कोई अपने आप कूं बड़ौ बनाबेगौ बू छोटौ करौ जाबैगौ और जो कोई अपने आप कूं छोटौ बनाबेगौ बू अपने आपकूं बड़ौ बनाबेगौ। “हे कपटी सास्त्रन कूं सिखाबे बारेऔ और फरीसियौ तुम पै हाय। तुम आदमिन कै काजै सुरग के राज में जायबे बारे दरबाजे कूं बन्द कर देतौ, ना तौ तुम खुद जामें और जो सुरग में जायबौ चाहते बिननेंऊ नां जान दैमें। हे कपटी सास्त्रन कूं सिखाबे बारेऔ और फरीसियौ तुम पै हाय। तुम एक आदमी कूं अपने मत में लायबे काजै दिन रात एक कर देतौ। जब बू तुमारे मत में आय जाबते तौ तुम बाय अपनी तरैह ते नरक की सन्‍तान बनांय दैतौ। तुम बिधबान की सम्पत्‍तीय खाय जातौ। और दिखावे काजै बे लम्बी-लम्बी पिराथना करते रहतौ, जाई मारें तुम लोगन कूं परमेस्‍वर ज्‍यादा दन्‍ड दैबैगौ। “हे अन्धे अगुवाऔ, तुम पै हाय, तुम कैहतौ, ‘अगर कोई बड़े पिराथना घर की सौगन्ध खाबै तौ कछू नांय होत, अगर कोई बड़े पिराथना घर के सौने की सौगन्ध खाबै तौ बू सौगन्ध बंध जाबैगी।’ हे अन्धे मूर्खो, को बड़ौऐ, सोनो यां बू बड़ौ पिराथना घर, जो सौनेऐं पबित्र करतै? और तुम जेऊ कहतौ, ‘अगर कोई बेदी की सौगन्ध खाबै तौ कछू नांय, पर जो भेंट बापै रखी है, अगर कोई वाकी सौगन्ध खाबै तौ बंध जाबैगौ।’ हे आँन्धरेऔ, को बड़ौऐ, भेंट या बेदी जाते भेंट पबित्र होत है? जामारै जो बेदी की सौगन्ध खाबे, बू वाकी और जो कछू बापै रखौ जाते बाऊ की सौगन्ध खातै। और जो बड़े पिराथना घर की सौगन्ध खाबे, बू वाकी और बामें रैहबे बारेन कीअऊ सौगन्ध खाबतुए। और जो सुरग की सौगन्ध खाबै, बू परमेस्‍वर के राजगद्‍दी और बापै बैठबे बारे कीऊ सौगन्ध खाबतुए। “हे कपटी सास्त्रन कूं सिखाबे बारेऔ और फरीसियों हाय है तुम पै। तुम पुदीना और सौफ जीरे कौ तौ दसमांस देतौ। पर सबनते बड़ी बात परमेस्‍वर की व्‍यबस्था कूं मानबो भूल जातौ। जैसे न्याय, दया, भरोसा भलौ तौ जि होतौ कै तुम इन्‍नेंऊ बिनके संग और इनकूं अऊं मानते। हे अन्धे नेताऔ तुम मच्‍छरन्‍नें तौ छान डारतौ पर ऊँठ के ऊँठ निगल जातौ। “हे कपटी सास्त्रन कूं सिखाबे बारेऔ और फरीसियों, तुम पै हाय तुम उन थारी और कटोरन की तरैह हो ऊपर ते मांजे जाते चौंकि तुमारे मन में लालच और अन्याय भरौ भयौ है। हे अन्धे फरीसियों, जैसे पैहले कटोरा और थारीन कूं भीतर ते मांजो जाते तौ बे बाहरऊ साफ है जातै। “हे कपटी सास्त्रन कूं सिखाबे बारेऔ और फरीसियों, तुम पै हाय। तुम चूना फिरी भई कबरन के समान हो जो ऊपर ते तौ सुन्दर दिखाई देतीं हैं, परन्तु भीतर मुरदेन की हड्‍डियन और सब प्रकार की गन्दगी ते भरी हैं। जाई तरैह ते तुमऊ ऊपर ते आदमिन कूं धरमी दिखाई दैतौ, पर भीतर ते कपट और अधर्म ते भरे भए हो। “हे कपटी सास्त्रन कूं सिखाबे बारेऔ और फरीसियों, तुम पै हाय। तुम परमेस्‍वर की ओर ते बात बतायबे बारेन की कब्रन्‍नें खोदते हो और धरमियन की कबरन कूं सबांरते हो। और कैहतौ, ‘अगर हम अपने बाप-दादन के दिनान में होते तौ परमेस्‍वर की ओर ते बात बतायबे बारेन की हत्‍या में बिनके साझी न होते।’ जाते तौ तुम अपनी गबाही खुदई देतौ, कै तुम परमेस्‍वर की ओर ते बात बतायबे बारेन के मारबे बारेन की सन्तान हो। जामारै तुम अपने बाप-दादन के पाप कौ घड़ा भर रये हो। “हे सांपो, और सांप के सपोलाओ। तुम नरक की सजा ते कैसे बचौगे? जामारै देखौ कै, मैं तुम्हारे जौरै परमेस्‍वर की ओर ते बात बतायबे बारे और बुद्धिमान और सिखाबे बारेन कूं भेजरौऊं और तुम बिनमें ते कछुन नें मार डारिंगे और कछुन नें क्रूस पै चढ़ाऔगे और कछुन नें अपने पिराथना घरन में कौडे मारौगे, और कछुन नें एक नगर ते दूसरे नगर में खदेड़ते फिरिंगे। जामारै धरमी हाबिल ते लैकें बिरिक्याह कै बेटा जकरयाह तक, जाकूं तुमने बड़े पिराथना घर और बेदी के बीच में मार डारौ हतो और जितने धरमियन कौ खून धरती पै बहायौ गयोऐ, बू सब तुमारे सिर पै परैगौ। मैं तुमते सच कैहतूं, जे सब बातें जा समै के लोगन पै आय परैगी। “हे येरूसलेम, हे येरूसलेम, तू जो परमेस्‍वर की ओर ते बात बतायबे बारेन कूं मार डालतै, और जिनें परमेस्‍वर ने तेरे जौरै भेजौए, बिनपै पत्‍थर बरसाबतै, मैंनें कितनीऊं बेर तेरे लोगन कूं बैसेई आपस में इकठ्‌ठौ करबौ चाहौए जैसे एक मुरगी अपने बच्‍चन कूं अपने पंखन के नीचे समैट लेतै। पर तैने नांय चाहौ। देखौ, तुमारौ घर तुमारे काजै उजाड़ छोड़ दियौ जाबेगौ। चौंकि मैं तुमते कहतूं, ‘अब ते जब तक तुम न कहोगे, कै धन्य है बू जो पिरभू के नाम ते आबे। तब तक तुम मोय फिर कबऊ नांय देखेगौ।’” जब ईसू बड़े पिराथना घर ते निकरकै जाय रयौ हतो, तौ वाके चेला बाय बड़े पिराथना घर की इमारतन नें दिखाबे काजै वाके जौरै आये। बानें अपने चेलान ते कही, “जि तुम देख रयेऔ। मैं तुमते सच सच कैह रयौऊं कै य्हांपै एकऊ पत्‍थर नांय बचैगौ जो गिरायौ नांय जाबैगौ।” जब ईसू जैतून के पहाड पै बैठौ हतो तब चेलान नें अकेले में आयकें बाते कही, “जि सब बात कब होगीं तेरे आयबे कौ और जा संसार के अन्‍त को का चिन्‍न होगौ?” ईसू ने बिनते कही, “साबधान रहौ तुमें कोई भैकाय नांय दैबे। चौंकि भौतेरे मेरे नाम ते आयकै कहिंगे कै, ‘मैंई मसीह हूं’ और बे भौतन कूं बहकांगे। तुम लड़ाई और लड़ाइन की चर्चा सुनों तब घबरईयों मत। चौंकि इनकौ हैबौ जरूरी है पर बा समै अन्‍त नांय होबेगौ। चौंकि देस देस पै और राज्य राज्य के बिरुद्ध खडे होंगे। जगैह जगैह अकाल परिंगे और भूकम्प आंगे। जि तौ बच्‍चा पैदा होवे ते पहले माँ कूं हैबे बारे पैहले दर्द कै जैसौ है। “तब बे तुमें सताब देबे काजै तुमें पकरबांगे और तुमें मार डारिंगे और मेरे नाम पै भरोसौ करबे की बजैह ते सब लोग तुमते घृना रखिंगे तब भौत ते भरोसौ खो देंगे और एक दूसरे कूं धोखे ते पकरबांगे और एक दूसरे ते घृना रखिंगे। भौतसे परमेस्‍वर के बारे में झूंठी बात बतायबे बारे खडे है जांगे। और भौतन कूं बहकांगे। अधर्म के बढ़बे ते भौतन कौ पिरेम ठन्‍डौ पर जाबैगौ। पर जो अन्‍त तक धीरज धरै रैहबेगौ बाई कौ उद्धार होगौ। और परमेस्‍वर के राज कौ जि सुभ समाचार सबरे संसार में पिरचार करौ जाबैगौ कै सब लोगन पै गबाही हौबे, तब अन्‍त आ जाबैगौ। “जाके मारे जब तुम बा ‘उजारबे बारी घृनित चीज’ कूं जाकी चर्चा परमेस्‍वर की ओर ते बाते बतायबे बारे दानियेल के द्वारा भई हती, बड़े पिराथना घर की पबित्र जगैह मैं खडी भई देखौ, पढ़बे बारौ खुद समझ लैबे जाकौ का मतलब है। जो लोग यहुदिया में हों, बे पहाड़न पै भाग जायें। जो छत पै होंय, बू अपने घर में समान लैबे नीचे नांय उतरै। जो खेतन में हो, बू अपनी लोई लेबै के काजै ना लौटै। “उन औरतन के काजै हाय, जो बिन दिनान में पेटते होगी और जिनके बालक बिनकौ दूध पीते होंगे। पिराथना करौ कै तुमें जाड़ेन में या आराम के दिना में भागनों ना परै। ऐसौ कलेस संसार के सुरूआत ते लैकै अब तक ना भयौए और ना कबऊ आगे होगौ। “और अगर बे दिन घटाये ना जाते, तौ एकऊ आदमी नां बचतौ, जि चुने भए लोगन की बजैह ते दिना घटाये गये हैं। अगर बा समै में कोई तुमते जि कहबै, ‘देखौ! मसीह य्हांपै है’ या ‘बू म्हांपै है!’ तौ तुम बिनकी बातन पै भरोसौ मत करियों। चौंकि झूंठे मसीह और परमेस्‍वर के बारे में झूंठी बात बतायबे बारे खडे होगें,और ऐसे-ऐसे चिन्‍न और चमत्‍कार जामारै दिखायेंगे कै है सकै जो चुने भयेऐं, बे भैहक जांमे। देखौ, मैने तुमें बा समै के बारे में पैहलेई ते चितायौ दियौ है। “जामारै कोई तुम लोगन ते कैहबे, ‘देखौ, बू बेहड़ में है,’ तौ म्हांपै मत जईयों या, ‘बू य्हां कोठरी में है,’ तौ भरोसौ मत करियों। जैसे बिजली पूरब ते निकरकै पस्चिम तक चमकतै, बैसेई मैं, ‘मनुस्‍य कौ बेटा’ आऊंगौ। तुम जानतौ कै ज्हाँ कऊं ल्हास होगीं, म्हांपैई गिद्ध इकठ्‌ठे हुंगे। “बिन दिनान के कलेस के तुरन्‍त बाद, “ ‘सूरज कारौ है जाबैगौ, चन्दा उजीतौ नांय देगौ। तारे आकास ते गिर जायेंगे, और आकास की सक्‍ती हिलाई जाबेंगी।’ “तब आकास में मैं, ‘मनुस्‍य कौ बेटा’ कौ चिन्न दिखाई देगौ। धरती के सबरे लोग छाती पीटिंगे और मुझ, ‘मनुस्‍य के बेटा’ कूं अपार महिमा और सामर्थ के संग आकास के बादरन में आते भए देखौगे। मैं तुरही की अबाज के संग अपने दूतन कूं भेजुंगा और बे आकास के जा छोर ते बा छोर तक चारों दिसान में ते, परमेस्‍वर के चुने भए लोगन कूं इकठ्‌ठौ करिंगे। “अंजीर के पेड़ ते सीख लेओ। जब वाकी टहनी बन जांमे और बिनमें अंकुर फूटबे लगतें,तौ तुम जान जातौ कै गरमी आय रयीं हैं। जाई तरैह ते जब तुम लोग जि सब बात होते भये देखौ, तौ जान लियौं कै बू समै जौरैई है, बस द्वार पैई हैं। मैं तुमते सच कह रयौऊं, कै जब तक जे बातें पूरी नांय है जाबैगीं, तब तक जा पीढ़ी कौ अन्‍त नांय होबेगौ। धरती और आकास टल जायें, तौ टल जायें, पर मेरी कही बात नांय टल सकें। “बा दिना और बा समै के बारे में कोई नांय जान्त, ना तौ सुरग दूत और ना बेटा। पर केबल पिता ही जानतें। जैसौ नूह कै दिनान में भयौ बैसेई मुझ, ‘मनुस्‍य के बेटा’, के आयबे के समै में हौबैगो। चौंकि जल परलय ते पैहले जब तक नूह जहाज पै नांय चढौ तब तक लोग खा-पी रये हते और उनमें ब्याह सादी है रयी हतीं। जब तक जल पिरलय नांय आई और बानें सबकूं नांय बहाय लयौ तब तक काऊए कछू मालूम नांय पड़ौ, और जब मैं, ‘मनुस्‍य कौ बेटा’ आऊंगौ तब बैसौई हैबैगौ। बा समै दो आदमी खेत में हुंगे तौ एक उठाय लियौ जाबैगौ और दूसरौ छोड़ दियौ जाबैगौ। दो औरत चाकी चला रयी होंगी, उनमें ते एक उठा लई जाबैगी और दूसरी छोड़ दई जाबैगी। “जामारै तुम साबधान रहौ चौंकि तुम नांय जानतई कै मैं, तुमारौ पिरभू, कौन-से दिना आऊंगौ। पर जि अच्‍छी तरैह समझ लेओ अगर घर के मालिकै मालूम होय कै चोर रात के कौन से पैहर आबैगौ, तौ बू जागत रहतै और अपने घर में चोरी नांय करन देत। जामारै तुम लोगऊ तैयार रहौ, चौंकि जा समै की तुम सोचतऊ नाऔ बाई घड़ी मैं, ‘मनुस्‍य कौ बेटा’ आ जाऊंगौ। “ऐसौ भरोसेमंद और बुद्धिमान सेबक को है? जाकौ स्‍वामी बाय नौकर-चाकरन पै मुखिया ठहराबै कै बू बिन्‍नें समै पै खानों और पानी देय? धन्य है बू सेबक जाय वाकौ स्‍वामी आयकै ऐसौ करते भये पाबे। मैं तुम लोगन ते सच कैहतूं, बू बाय अपनी सब धन-दौलत पै मुखिया ठहराबेगौ। पर अगर कोई सेबक बुरौ होबे तौ बू अपने आप ते कैहबेगौ, ‘मेरे मालिक के आयबे में अबई देर है,’ और बू अपने संगी सेबकन कूं मारै पीटे और सराबिन के संग खायबे पीबे लगे। तब बा सेबक कौ मालिक बा समै आबैगौ, जा समै और बा दिना के बारे में बानें सोचीऊ नांय होगी। बू मालिक बा सेबक कूं भयंकर सजा दैगौ और वाकौ भाग कपटिन के संग ठहराबेगौ। ज्हांपै रोयबो और दांत पीसबो होगौ।” तब ईसू ने कही, “सुरग कौ राज बिन दस क्वारी लड़किन के जैसौ होगौ, जो दूला ते मिलबे काजै अपनी मसाल संग लैकें गई। बिनमें पाँच मूर्ख और पाँच समझदार हतीं। मूर्खन नें अपने संग मसाल तौ लयीं पर अपने संग कुप्पी में जादा तेल नांय लियौ। पर समझदार मसाल के संग अपनी कुप्पीन्‍नें तेल भरकै लै गयीं। जब दूला कूं आयबे में देर भयी, तब बे सब औंगबे लगी और सोय गयीं। “जब आधी रात में दूला के आयबे कौ हल्‍ला भयौ देखौ, ‘बू आय रयौ है, बाहर आयकें बाते मिलौ।’ “तब बे सब क्वारी अपनी अपनी मसाल तैयार करबे लगी। और मूर्खन ने समझदारन ने कही, ‘तुम हमें अपने तेल मेंते थोरौ तेल दै देओ चौंकि हमारी मसाल बुझी जाय रयीं हैं।’ पर उन समझदारन नें बिनते कही, ‘जि तेल तुमारे और हमारे काजै पूरौ नांय होगौ।’ जाते तौ भलौ जि है कै ‘तुम बेचबे बारे के जौरै जाऔ और अपने काजै तेल मोल ले आऔ।’ जब बे तेल खरीदबे जाय रयी हतीं तब तक दूला आय गयौ। जो क्वारी लड़कियां तैयार हतीं बे दूला के संग ब्याह बारे घर में चली गयीं। और दरबाजौ बन्द कर दियौ। “जाके बाद बे दूसरी क्वारी आयकै कैहबे लगी, ‘हे मालिक! हे मालिक, हमारे काजै द्वार कूं खोल देओ।’ तब बानें कही मैं तुमते सच कह रयौऊं, ‘मैं तुमें नांय जान्‍त।’ ” जामारै तुम जागते रहौ और साबधान रहौ चौंकि तुम बा दिना और बा समै के बारे में नांय जान्त। “सुरग कौ राज बा आदमी के समान है, जो परदेस जायबे ते पैहले अपनी धन-दौलत अपने सेबकन में सौंप दैतै। बानें एक सेबक कूं पाँच थैले सोना और दूसरे कूं दो थैले सोना और तीसरे कूं एक थैला सोना दियौ मतलब, बिनकी सामर्थ के अनुसार बिनकूं सौंपकै परदेस कूं चलौ गयौ। तब जा आदमी कूं पाँच थैले सोना मिले बानें बिनते लेन देन करौ,और बानें पाँच थैले सोना और कमाए लियौ। और जाई तरैह ते दूसरे नेऊँ बिन दो थैले सौने ते लैन देन करौ और बानेंऊ दो थैले सोना और कमाए लियौ। पर जाकूं एक थैला सोना मिलौ हतो बानें जायकै धरती में गढ्‍ढा खोदौ और अपने मालिक कौ धन घाड दयौ। “भौत दिनान के बाद बिनकौ मालिक बापिस आयौ तब बानें बिनते हिसाब मांगौ। जाकूं पाँच थैले सोना मिलै बानें अपने मालिक ते कही, ‘हे मालिक, तैनें मोय पाँच थैले सोना के दिए हते देख बिनते मैंनें पाँच थैले सोना और कमाए हैं।’ “वाके मालिक नें बाते कही, ‘साबास अच्‍छे भरोसेमंद सेबक तू थोरे में भरोसेमंद निकरौए। मैं तोय भौत चीजन कौ अधिकारी बनांऊंगौ। आ अपने मालिक के आनन्द में सामिल है जा।’ “जाकूं दो थैले सोना मिलै बानें अपने मालिक ते कही, ‘हे मालिक, तैनें मोय दो थैले सोना दिए हते देख, बिनते मैंनें दो थैले सोना और कमाए हैं।’ “वाके मालिक ने बाते कही, ‘साबास। अच्‍छे भरोसेमंद सेबक तू थोरे में भरोसेमंद निकरौए। मैं तोय भौत चीजन कौ अधिकारी बनांऊगो। आ अपने मालिक के आनन्द में सामिल है जा।’ “जाकूं एक थैला सोना मिलौ बानें अपने मालिक ते कही, ‘हे मालिक, मैं तौ तोय जानतौ कै तू कितनौ कठोर आदमी है, तू ज्हांपै बखेरत नांय म्हांते बटोरतुए। ज्हांपै बोत नांय म्हांते काटतै। जा डरके मारै तेरे बा एक थैला सोना कूं मैंनें धरती में घाड कै छिपाय दियौ, जि लै अपनों एक थैला सोना।’ “तब वाके मालिक ने बाते कही, ‘हे बुरे और आलसी दास,’ जब तू जानतौ कै ‘मेरौ मालिक कठोर है, और जहां ते मैं बोत नांऊ म्हाते काटतूं और ज्हांपै मैं बखेरत नांऊ म्हाते बटोरतूं, जामारै तोय मेरौ रुपया उधार दै देनौ चहिऐंऔ, जब मैं आबतौ तौ ब्याज समैत बापिस लै लेतौ। “जामारै बा पैते सौने कौ थैला लै लेओ और बाकूं दैदेओ जापै दस थैला पैहले ते हते। चौंकि जापै हतुए बाय और दयौ जाबैगौ, जाते बिनके जौरै भौत है जाबेगौ। जापै नांय हत बापै ते बेऊ लै लियौ जाबैगौ जो बिनके जौरै है। और ऐसे आलसी दास कूं बाहर अंधेरे में डार देओ जहां रोयबौ और दांत पीसबौई होगौ।’ “जब मैं, ‘मनुस्‍य कौ बेटा’ अपनी महिमा में सुरग के सुरग दूतन कै संग आऊंगौ तौ अपनी महिमा के आसन पै बैठुंगो। तब सबरे लोग मेरे सामने इकट्ठे है जांगे। चरायबे बारौ भेड़ और बकरियन कूं अलग अलग करतै, बैसेई मैं बिन्‍नें एक दूसरे ते अलग करुंगौ। मैं भेड़न कूं अपने सीदे हात मांऊ और बकरियन कूं उल्टे हात मांऊ खडी करुंगौ। “तब मैं,राजा अपनी सीदे हात की ओर बारेन ते कहुंगो, ‘हे मेरे पिता के धन्य लोगों, आओ, बा राज्य के अधिकारी है जाओ, जो जगत की सुरूआत ते तुमारे काजै तैयार करौऐ। चौंकि जब मैं भूंकौ हतो तब तुमनें मोय कछू खानों दियौ और मैं जब पियासौ हतो तब तुमनें मोय पानी दियौ और जब मैं परदेसी हतो तब तुमने मोय अपने घर में ठहरायौ। जब मैं नंगौ हतो तब तुमने मोय कपड़ा दिए, जब मैं बीमार हतो, तब तुमने मेरी सुधी लई, जब मैं जेल में हतो तब तुम मोते मिलबे काजै आये।’ “तब धरमी कहेंगे, ‘हे पिरभू, हमनें तोय कब भूंकौ देखौ और तौकूं खबायौ, और कब पियासौ देखौ और पानी पिबायौ? हमनें कब तोय परदेसी देखौ और अपने घर में ठहरायौ और कब नंगौ देखौ तब तोय कपड़ा पैहराये? हमनें कब तोय बीमार और कब तोय जेल में देखौ, कै हमनें तेरी सुधी लयी और मिलबे आये?’ “मैं राजा बिनकूं जबाब दुंगो कै, ‘मैं तुमते सच कैह रयौऊं कै, तुमने मेरे इन भईयन में ते एकऊ के काजै, चाहे बू कितनोंऊ छोटौ चौं नांय न हो, जो कछू तुमने छोटेन के संग करौए, बू तुमने मेरे संग करोऐ।’ “तब मैं, उल्टे हात की ओर बारेन ते कहुंगौ, ‘हे सापित लोगो मेरे सामने ते बा कबऊ न बुझबे बारी नरक की आग में गिर जाओ, जो सैतान और वाके दूतन के काजै तैयार करी गयी है। चौंकि मैं भूंकौ हतो, और तुमनें मोय खायबे कूं नांय दियौ,और जब मैं पियासौ हतो, और तुमनें मोय पानी नांय पियायौ, जब मैं परदेसी हतो, तब तुमने मोय अपने घर में नांय ठहरायौ, जब मैं नंगौ हतो तब तुमने मोय कपड़ा नांय पहनाए, जब मैं बीमार और जेल में हतो, और तुमने मेरी सुधि नांय लई और ना मिलबे आये।’ “तब बे उत्‍तर दिंगे, ‘हे पिरभू, हम ने तोय कब भूंकौ, या पियासौ, या परदेसी, या नंगौ, या बीमार, या जेल में देखौ, और तेरी सेबा-टहल नांय करी?’ “तब मैं बिन्‍नें उत्‍तर दुंगो, ‘मैं तुमते सच कैहतूं कै, तुमने जो कोई इन छोटे ते छोटेन मेंते एक केऊ संग नांय करौ, बू मेरेऊ संग नांय करौ।’ “और जे कबऊ नांय खतम हैबे बारी सजा पाबिंगे पर धरमी लोग कबऊ नांय खतम हैबे बारे जीबन में पिरवेस करिंगे।” इन सब बातन के बाद ईसू ने अपने चेलान ते कही, “तुम जानतौ कै दो दिना बाद फसह कौ तौहार होगौ। और मैं, ‘मनुस्‍य कौ बेटा’ क्रूस पै चढ़ाबे काजें बिसबास घात करकै पकरबायौ जाऊंगौ।” तब पिरधान पुरोहित और यहुदी बुजुर्ग, कैफा नाम के यहुदी महा पुरोहित के आंगन में इकठ्‌ठे भये। और बे आपस में योजना बनाबे लगे कै ईसू कूं का तरैह ते धोखे ते पकरकै मार डारै। बे कैह रये हते, “हमें जि काम फसह के तौहार के दौरान नांय करनों चहिऐं। कऊं ऐसौ नांय होबै के लोग दंगा फसाद करें।” जब ईसू बैतनियां नगर में सिमौन,जाकौ कोढ़ ठीक करौ हतो, वाके घर पै हतो, तब मापै एक औरत संगमरमर के बरतन में जटामासी कौ भौत कीमती इत्र लैकै आई और जब ईसू खानों खा रयौ हतो तबई, बानें बू वाके सर पै कुरै दियौ। जि देखकै चेला झुंझला उठे और बोले, “जानै इतनौ मंहगो इत्र काये कूं बरबाद करौए? जाय भौत अच्‍छे दामन में बेचकै गरीबन में बांटो जा सकतौ।” जि जानकें ईसू नें अपने चेलान ते कही, “तुम जा औरत कूं चौं सताय रयेऔ? जानें तौ मेरे संग भलौ करौ है। गरीब लोग तौ हमेसा तुमारे संग रहिंगे, पर मैं हमेसा तुमारे संग नांय रहुंगो। जाने तौ मेरे दफनांयबे की तैयारी के काजै पैहले तेई मेरे सरीर पै इत्र लगायौए। मैं तुमते सच कैहतूं, सबरे संसार में जहां कऊं जा सुभ समाचार पिरचार करौ जाबेगौ म्हांपै जाके काम की चर्चा जाय याद करके करी जाबैगी।” तब ईसू कै भेजे भये बारह चेलान मेंते यहूदा इस्करियोती नामके आदमी ने पिरधान पुरोहितन के जौरै जायके कही, “अगर मैं ईसू कूं पकरबायकै तुमारे हातन में दैदऊ तौ तुम मोय का देओगे?” तब बिन्‍नें बाये चांदी कै तीस सिक्‍का दै दिये। तब ते यहूदा इस्करियोती ईसू कूं पकरबाबे कूं अच्‍छे मौके की तलास करबे लगौ। बिना खमीर की रोटी कै तौहार के पैहले दिन ईसू के चेला वाके जौरै आयकें बोले कै, “तुम का चांहतौ कै हम तुमारे काजै फसह कै खाने की तैयारी करें?” ईसू ने बिनते कही, “सहर में बा आदमी कै जौरै जाऔ और बाते कहौ, ‘गुरू जी नें कहिए कै, मेरौ समै जौरै आय गयौए। मैं अपने चेलान के संग तुमारे ज्हां पै फसह मनांऊंगो।’” ईसू ने चेलान ते जैसे कही, बैसेई बिन्‍नें करौ। और फसह के भोजन की तईयारी कर लयी। जब संझा भई, तब ईसू अपने बारैह चेलान के संग खानों खायबे बैठौ। जब बे सब खानों खाय रये हते, तब ईसू ने अपने चेलान ते कही, “मैं तुम लोगन ते सच कैहतूं कै तुम लोगन में तेई एक जन मोय बिसबास घात करके पकरबाय दैगौ।” तब बे सब उदास है गये और आपस में एक-एक करके पूछबे लगे, “हे पिरभू! का बू मैं तौ नांऊ?” ईसू नें बिनते कही, “जो मेरे संग जा कटोरे में ते डुबायके खा रयौ है, बू मोय बिसबास घात करके पकरबा दैगौ। मुझ, ‘मनुस्‍य के बेटा’ के संग वेसौई होगौ जैसौ पैहले तेई लिखौ भयौ है। पर बा आदमी कूं धिक्‍कार जाकी बजैह ते मैं, ‘मनुस्‍य कौ बेटा’ बिसबास घात करकें पकरबायौ जाऊंगौ। बा आदमी काजै जेई अच्‍छौ होतौ कै बू पैदाई नांय होतौ।” तब बा बिसबास घाती यहूदा नें पूछी, “हे गुरू, कऊं बू मैं तौ नांऊ?” ईसू ने बाते कही, “तैंने सच कहीए।” खानों खाते समै ईसू ने रोटी लई और धन्यबाद की पिराथना करके तोड़ी और चेलान कूं जि कैहके दैबे लगौ, “लेओ और खाऔ जि मेरी देह है।” ईसू ने पियालौ लैकै धन्यबाद की पिराथना करके जि कैहत भये चेलान कूं दयौ, “तुम सब जामें ते पीयौ। चौंकि जि बाचा कौ मेरौ बू खून है, जो भौतन के पापन की छमा के काजै बहायौ जा रयौए। मैं तुम लोगन ते कैहतूं, मैं जब तक अपने पिता के राज में, तुमारे संग अंगूरन कौ नयौ रस नांय पीलूं, तब तक मैं अंगूर कौ रस कबऊ नांय पीऊंगौ।” तब बे भजन गाते भए जैतून के पहाड पै चले गये। बा समै ईसू नें बिनते कही, “आज रात तुम सबन कौ भरोसौ मोपै ते डगमगा जाबैगौ, चौंकि लिखौ भयौए, “ ‘परमेस्‍वर ने कही है, मैं चरबाहे कूं मारूंगो, और झुंड की भेड़ तितर-बितर है जायेंगी।’ पर जाके बाद मैं जी उठुंगो और तुमते ते पैहले गलील कूं पौहच जाऊंगो।” जा बात पै पतरस नें कही, “हे पिरभू! चांहै सब तितर-बितर हैजाये पर मैं कबऊ नांय डगमगाऊंगौ।” ईसू नें बाते कही, “मैं तोते सच कैह रयौ हूं, आज की रात मुरगा के बांग दैबे ते पैहले तू मोय पैहचानबे ते तीन बेर मनै कर दैगौ।” पतरस ने फिर कही, “चांहै मोय तेरे संग मरनों परै, तौऊं मैं कबऊ तोय पैहचानबे ते मनै नांय करूंगो।” और दूसरे चेलान नेऊँ जेई बात कही। तब ईसू अपने चेलान के संग गतसमनी नाम की जगह में पौहचे, और बानें चेलान ते कही, “जब तक मैं म्हांपै जाऊं और पिराथना करूं, तब तक य्हांपै बैठौ।” बू जबदी के दोनों बेटा और पतरस कूं अपने संग लै गयौ। तब ईसू उदास और ब्याकुल हैबे लगौ। और बिनते बोलौ, “मेरी आतमा इतनी उदास है कै मेरे पिरान अबई निकरे जा रये है। और अब य्हांपै रुक जाऔ और मेरे संग जागत रैओ।” बू थोड़ी आगे जायकै मौंह के बल गिरके पिराथना करबे लगौ, “मेरे पिता, अगर है सकै तौ जि दुख कौ पियालौ मेरे सामने ते हट जाबे। फिरऊ मेरी नांय पर तेरी इच्‍छा पूरी होय।” जब बू अपने चेलान के जौरै आयौ और बिनकूं सोबते भये पायौ। और पतरस ते बोलौ, “का तुम मेरे संग एक घन्‍टाऊ तक नांय जाग सके? जागते रैओ और पिराथना करौ, जाते तुम परीछा में नांय परें आतमा तौ तैयार है पर सरीर कमजोर है।” ईसू फिर दूसरी बार पिराथना करबे गयौ और जि कैहके पिराथना करी, “हे मेरे पिता अगर जि दुख पियालौ मेरे बिना पिये नांय हट सकत तबऊ तेरी इच्‍छा पूरी होय।” जब बू लौटकै आयौ तौ बानें चेलान कूं फिर सोबत पायौ, चौंकि बिनकी आँखें नींद ते भरी भई हती। बू तीसरी बार बिनें छोड़कै पिराथना करबे गयौ और बिनईं सबदन नें दोहराबत भये तीसरी बेर पिराथना करी। जाके बाद बानें अपने चेलान के जोरै आयकें बिनते कही, “का तुम अब तक सोय रहे हो? और आराम कर रये हो? देखौ! बू समै आय गयौऐ, जब मैं, ‘मनुस्‍य कौ बेटा’ पापिन के हबाले कर दयौ जाऊंगौ। उठौ, हम चलें मेरौ बिसबास घाती आ रयौ है।” ईसू जि कैहई रयौ हतो कै, भेजे भये बारेन में ते एक यहूदा आय गयौ। वाके संग तलबार और लठिया लये भए एक बड़ी भीड़ हती, जाकूं पिरधान पुरोहित और यहुदी नेतन्‍नें भेजौ हतो। बानें ईसू के संग बिसबास घात करबे काजै जि इसारौ दयौ, “मैं जाकूं चूंमू बाई कूं तुम पकर लियों।” बानें सीदे ईसू कै जौरै आयकें बाकूं चूंमौ और कही, “गुरू नमस्‍कार।” ईसू ने बाते कही, “हे मित्र, तू जो करबे आयौए बाय कर।” तब लोगन्‍नें आगे आयकें ईसू कूं पकरकें गिरफ्तार कर लियौ। जा बात पै ईसू के संग बारे एक साथी नें तलबार खैंचकैं यहुदी महा पुरोहित के सेबक कौ कान काट दियौ। तब ईसू ने बाते कही, “अपनी तलबार कूं म्यान में रख लै चौंकि जो तलबार चलातें, बे तलबार तेई नांस हुंगे। का तुम जि समझ रयेऔ कै मैं अपने पिता ते बिनती करकै मदद नांय मांग सकतौ, तौ का बू अबई मेरे काजै सुरग दूतन की बारैह ते जादा सेनाएं नांय भेज दैबेगौ? पर तब पबित्र सास्त्र में लिखी भई बात कैसे पूरी होगी? बामे तौ जि लिखी भईए कै, जि तौ हैबौ जरूरी है।” जाके बाद ईसू ने भीड़ ते कही, “तुम का मोय चोर डाँकू जानकें पकरबे के काजै लठिया और तलबार लैके आयेऔ? मैं तौ रोजाना बड़े पिराथना घर में बैठकै सिछा देतौ, तब तुमने मोय गिरफ्तार चौं नांय करौ? जि सब जामारै भयौ कै परमेस्‍वर की बात बतायबे बारेन्‍नें जो लिखीए बू बात पूरी हे जाय।” तब चेला बाय अकेलौ छोड़कै भाग गये। जिन्‍ने ईसू कूं गिरफ्तार करौ हतो, बे बाय महा पुरोहित कैफा के य्हां लैके गये, माँहपै सास्त्रन कूं सिखाबे बारे और यहुदी नेता इकठ्‌ठे हते। पर पतरस ईसू कै पीछै पीछै कछू दूर चलत भये, महा पुरोहित कैफा के घर कै आंगन तक पौहच गयौ। मापै हैबे बारी घटना कूं देखबे कै काजै बू सिपाइ लोगन के संग में बैठ गयौ। यहुदी पिरधान पुरोहित और सबरी पंचायत के लोग ईसू कूं मारबे काजै वाके बिरोध में झूंठी गबाही ढूँढ रये हते। पर गबाही नांय मिली तबऊ भौत से झूंठे गबाह सामने आये। और अन्‍त में दो गबाह आयकें बोले, “जा आदमी नें कही है कै, ‘मैं परमेस्‍वर के जा बड़े पिराथना घर कूं ढाय सकतूं और तीन दिना में दुबारा ते बनांय सकतूं।’” तब यहुदी महा पुरोहित नें खडे हैके ईसू ते कही, “जे लोग तेरे बिरोध में गबाही दै रये हैं। का तोपै जाकी सफाई में कैहबे काजै कोई जबाब नांय?” पर ईसू मौन रयौ। तब महा पुरोहित ने बाते कही, “तोय जीन्दे परमेस्‍वर की सौगन्ध, का तू परमेस्‍वर कौ बेटा मसीह है, तौ हमें बताय दै?” ईसू नें कही, “हाँ तैनें सच कहीए। पर मैं तुम लोगन ते जेऊ कैहतूं कै अब ते तुम मुझ, ‘मनुस्‍य के बेटा’ कूं सर्वसक्‍तिमान के सीदे हात मांऊ बैठौ भयौ और सुरग के बादरन पै आबते देखौगे।” तब महा पुरोहित ने अपने कपड़ा फारे और कही, “जि तौ परमेस्‍वर की निन्दा कर रयौए, अब गबाह की कोई जरूरत नांय। अबई तुम लोगन्‍नें परमेस्‍वर की निन्दा सुनीए। तुम लोगन कौ का बिचारै?” बिन्‍नें जबाब दियो, “जि तौ मौत की सजा पायबे लायक है।” तब बिन्‍नें ईसू के मौंह पै थूंको और बामें घूंसा मारे और कछू लोगन्‍नें थप्पड़ मारते भए, जि कही, “मसीह! भविस्‍यबानी कर और बता तोय किन्‍नें पीटौ है?” पतरस बा समै आंगन में बैठो हतो तब म्हांपै एक नौकरानी ने वाके जौरै आयकै कही, “तू अऊ तौ ईसू गलीली के संग रहतो।” तब बानें सबन के सामने मनै कर दयी कै, “मैं नांय जानू कै तू कौंन के बारे कैह रयीए।” जाके बाद पतरस फाटक की ओर निकर गयौ, पर एक दूसरी नौकरानी ने बाय देखकै म्हांकै लोगन ते कही, “जि आदमी अऊं ईसू नासरी के संग हतो।” तब बानें सौगन्ध खायकै मनैं करी, “मैं बा आदमी कूं नांय जान्‍त।” जाके थोड़े समै बाद पतरस के आस-पास खडे भये लोगन्‍नें वाके जौरै आयकै कही, “जरूर तुमऊं बिनईं लोगन में तेऐ। तेरी बोली तेरौ भेद खोल रयीए।” तब पतरस ने अपने कूं कोसते भये सौगन्ध खायकै बिनते कही, “मैं बा आदमी कूं जानतई नांऊ।” ठीक बाई समै मुरगा नें बांग दई। तब पतरस कूं ईसू की कही भई बात याद आई, “मुरगा कै बांग दैबे ते पैहले तू तीन बार मोय पैहचानबे ते मनें करैगौ।” तब बू फिर बाहर निकरकै फूट-फूट के रोयौ। सबेरे, सबरे पिरधान पुरोहित और यहुदी नेतन्‍नें ईसू कूं मरबाबे की योजना बनाई। बिन्‍नें ईसू कूं बांधकै राज्यपाल पिलातुस कूं सौंप दयौ। जब बिसबास घाती यहूदा ने देखौ के बिन्‍नें ईसू कूं दोसी ठहराय दयौ है, तब बू भौत पछतायौ और बानें बे तीस चांदी के सिक्‍का यहुदी पिरधान पुरोहित और यहुदी बुजुर्ग नेतन के जौरै लै जायकें लौटाय दये। और यहूदा ने कही, “मैने एक बेकसूर कूं मारबे काजै बिसबास घात करकै पकरबाके पाप करौ है।” तब बिन्‍नें बाते कही, “हम का जानें जि तौ तेरौई मामलौ है तूई जानें।” और यहूदा नें बे सिक्‍का बड़े पिराथना घर में फैंक दिये और बाहर आयकें फांसी लगाय लयी। तब यहुदी पिरधान पुरोहित नें सिक्‍के उठाते भये कही, “जि तौ हमारी व्‍यबस्था के बिरोध में है, जि सिक्‍का बड़े पिराथना घर के भन्‍डार में रखबे लायक नांय चौंकि इन सिक्‍कन ते एक आदमी मारबे काजै खरीदों गयौ है।” तब बिन्‍नें सलाह करी कै इन पईसन ते बाहर ते आयबे बारे परदेसीन के मरे भये आदमिन कूं घाड़बे के काजै कुम्हार के खेत कूं खरीद लेओ। और जाई बजैह ते बू खेत आज तक खून के खेत के नाम ते जानौ जाबै। जा तरैह ते परमेस्‍वर की ओर ते बात बतायबे बारे यिर्मयाह कौ बू वचन पूरौ भयौ, “बिन्‍नें चाँदी के तीस सिक्‍के लये जो इसरायल के लोगन्‍नें वाकी कीमत काजै ठहराए हते। जैसे पिरभू नें मोय आग्‍या दई हती बैसेई बिन्‍नें कुम्हार को बू खेत कीमत दैकै मोल लै लियौ।” जब ईसूए राजपाल के सामने लायौ गयौ तब बानें ईसू ते पूछी, “का तू यहुदियन कौ राजाए?” तौ ईसू नें कही, “खुदई तौ कह रयौए।” तब यहुदी पुरोहित और बिनके बुजुर्ग नेतन्‍नें ईसू के ऊपर तरैह-तरैह के इलजाम लगाये पर बानें कोई जबाब नांय दियौ। पिलातुस नें कही, “का तू सुन नांय रयौ जे लोग तोपै इलजाम लगाय रयेएं?” फिरऊ ईसू ने बाय कोई जबाब नांय दियो, जा बात ते राजपाल कूं भौत अचम्भौ भयौ। तौहार के मौके पै राजपाल अपनी रीति के अनुसार लोगन के द्वारा चुने भये एक कैदी कूं छोड़ देतो। बा समै एक बरअब्बा नाम कौ डाँकू पिलातुस की जेल में कैदी हतो। जाय सब भौत अच्‍छे ते जानते। जामारै पिलातुस नें म्हांपै इकठ्‌ठे लोगन ते कही, “मैं तुमारे काजै कौने छोड़ दूं। बरअब्बा कूं या ईसू कूं जो मसीह कैहलाबै है?” चौंकि पिलातुस जानतो कै बिन्‍नें ईसू कूं जलन ते पकरबायौ है। जब पिलातुस न्याय गद्‍दी पै बैठौ हतो तब वाकी पत्नी नें जि कैहलबाई, “तू बा धरमी आदमी के मामले में हात मत डारियों, चौंकि मैंनें आज रात कूं वाकी बजैह ते सपने में भौत दुख उठायौए।” जा समै में म्हांपै मौजूद यहुदी पिरधान पुरोहित और नेतन्‍नें भीड़ कूं उकसायौ के बे बरअब्बा कूं छुड़बा लैं और ईसू कौ नांस करें। राजपाल पिलातुस नें कही, “मैं तुमारे काजै दोनोंन में ते कौन कूं छोड़ दऊं?” बिन्‍नें कही, “बरअब्बाऐ।” जापै बात पै पिलातुस ने कही, “मैं ईसू कौ का करूं जाय लोग मसीह कैहतें?” सब लोगन्‍नें कही, “बाय क्रूस पै चढ़ाऔ।” पिलातुस कही, “चौं? बानें ऐसौ कौन सौ अपराध करौए?” पर बे और जोर-जोर ते चिल्‍लाबे लगे, “जाय क्रूस पै चढ़ाऔ।” तब पिलातुस ने जि देखी, कै मेरी अब एकऊ नांय चल रही और उल्टौ हंगामा होतौ जाय रयौए तौ बानें पानी मंगाय कें लोगन के सामने हात धोए और कही, “मैं जा निरदोस के खून कौ दोसी नांऊ। तुम लोग खुदयी जानौं।” तब सबरी भीड़ बोली, “जाकौ खून हम और हमारी सन्‍तान पै होय।” जा बजैह ते बानें बनके काजै बरअब्बा कूं छोड़ दियौ और ईसू कूं कौड़ा लगबायकें क्रूस पै चढ़ाबे काजै सिपाइन कै हातन में सौंप दियौ। जाके बाद राजपाल के सिपाई ईसू कूं किले के भीतर लै गये और ईसू के जौरै सबरी पलटन इकठ्‌ठी है गयी। और बिन्‍नें ईसू के कपड़ा उतारकै लाल चौगा पैहनांयौ। और कांटे कौ मुकुट बनांयकै वाके सिर पै रखौ और वाके दाहिने हात में सरकन्डा दै दयो। तब वाके सामने घुटने टेककै जि कैहत भये वाकौ मजाक उड़ायबे लगे, “यहुदियन के राजा नमस्‍कार।” बे वाके ऊपर थूकते और बाई सरकन्डे कूं छीनकै वाके सिर पै मारने लगे। जब बे वाकौ ठट्‍ठा कर चुके, तौ बू चौगा बापै तै उतारकै फिर बाई के कपड़ा बाय पहनाए। और क्रूस पै चढ़ाबे के काजै ले चले। जब बे बाहर जाय रये हते तब उने एक सिमौन नाम कौ कुरेनी आदमी मिलौ बिन्‍नें बाकूं जबरदस्ती पकरौ कै बू ईसू कौ क्रूस उठायकै लै चलै। बे बा जगैह पै पौहचे जो “गुलगत्‍ता” कैहलातै जाकौ मतलब, “खोपडी की जगैह” है। म्हांपै ईसू कूं पित्‍त मिलौ भयौ अंगूर कौ रस पीबे कूं दयौ बानें बाकूं चख लयौ पर बानें बाय पीबे की मने कर दयी। तब बिन्‍नें ईसू कूं क्रूस पै चढायो और परची डारकै वाके कपड़ा आपस में बांट लये। और म्हांपै बैठकै वाकौ पैहरौ दैबे लगे। बिन्नें ईसू के सिर के ऊपर जि लिखकै दोस पत्र लटकाय दयौ कै, “यहुदियन कौ राजा ईसू” है। ईसू के संगई दो डाँकू और क्रूसन पै चढ़ाये हते, एक वाके सीदे हात मांऊ और एक वाके उल्टे हात मांऊ। आयबे जायबे बारे लोग अपनों सिर हिला हिलायकै ईसू की निन्दा करते भये, जि कैहते, “ओ बड़े पिराथना घर कूं गिरायबे बारे और बाय तीन दिना में फिर ते बनांयबे बारे अगर तू परमेस्‍वर कौ बेटा है, तौ जा क्रूस पैते उतरकै खुद कूं बचा लै।” जा तरैह ते सास्त्रन कूं सिखाबे बारे, यहुदी नेतन के संग पिरधान पुरोहित जि कैहके वाकौ मजाक उड़ाते हते। बिन्‍नें कही, “जाने दूसरेन कूं बचायौ पर अपने आप कूं नांय बचाय सकै जि तौ, ‘इसरायल कौ राजा है’। अगर अब जि क्रूस पैते उतर आबे तौ हम जाकौ भरोसौ करिंगे। जाने परमेस्‍वर कौ भरोसौ रखौ है। अगर परमेस्‍वर चाहे तौ जाय छुड़ाय लैए, चौंकि जाने तौ जि कही कै, ‘मैं परमेस्‍वर कौ बेटाऊं।’” और जो डाँकू ईसू के संग क्रूस पै चढ़ाये गये हते, बेऊ जाई तरह वाकी निन्दा रये हते। दोपहर बारह बजे ते लैकें तीन बजे तक पूरे देस में अंधेरौ छायौ रयौ। और तीन बजे के लगभग ईसू ने बड़े जोर ते चिल्लायकै कही, “एली, एली, लमा सबक्‍तनी?” जाकौ मतलब “हे मेरे परमेस्‍वर, हे मेरे परमेस्‍वर, तैंने मोय चौं छोड़ दियौ?” जो लोग म्हांपै पै खड़े हते, उनमें ते कछुन नें जि सुनकें कही, “बू तौ एलियाह कूं पुकार रयौ है।” बिनमें ते एक आदमी तुरन्त दौड़कै आयौ, और सोख्ता कूं सिरका में डुबोयो, और सरकन्डे पै रखके बाय चुसायौ। और दूसरे लोगन्नें कही, “रुक जाओ देखेंगे कै, एलियाह जाय बचायबे आबैगौ कै नांय।” तब ईसू ने फिर बड़े जोर ते चिल्लायकें पिरान छोड़ दिए। और बाई समै बड़े पिराथना घर कौ परदा ऊपर ते नीचे तक फटकै दो टुकड़न में है गयौ। और धरती हल गई और चट्‍टानें तड़क गईं। और कब्र खुल गईं, और मरे भए पबित्र लोगन की लास जी उठीं। और ईसू के जी उठबे के बाद, बे कबरन में ते निकलकै पबित्र नगर येरूसलेम में गए, और भौतन कूं दिखाई दए। तब सूबेदार और बे जो वाके संग ईसू कौ पहरौ दै रये हते, और धरती कौ हलबौ और जो कछू म्हापे भयौ बाय देखकें भौत लोग डर गए, और बिन्‍नें कही, “सचमुच जि परमेस्‍वर कौ बेटा हतो।” म्हांपै भौत सी औरत जो गलील ते ईसू की सेबा करती भईं वाके संग आयी हतीं, जि सब दूर ते देख रयीं हतीं। बिनमें मरियम मगदलीनी और याकूब और योसेस की माँ मरियम और जब्दी के बेटान की माँ हती। जब साँझ भई तौ यूसुफ नामकौ अरिमतिया कौ रैहबे बारौ एक धनी आदमी जो खुदई ईसू कौ चेला बन गयौ हतो। बू आयौ बानें ने पिलातुस के जौरै जायके ईसू की ल्हास मांगी। जापै पिलातुस ने दै दैबे की आग्‍या दई। यूसुफ ने ल्हास कूं एक साफ मलमल के चादर में लपेटौ। और बाय चट्टान में खुदी भयी कब्र में रख दियौ, और कब्र के मौंह पै एक बड़ौ पत्थर लुढकायकै चलो गयौ। और मरियम मगदलीनी और दूसरी मरियम म्हांपै कब्र के सामने बैठी हतीं। सुक्रबार के अगले दिना जो यहुदिन कौ आराम कौ दिन हतो, बा दिना पिरधान पुरोहित और फरीसी पिलातुस के जौरै इकठ्‌ठे भये और बिन्‍नें कही, “हे गुरू जी, हमें याद है, कै बा भरमाबे बारे नें, जब बू जीबित हतो तब जि कही हती, ‘कै मैं तीन दिन के बाद जी उठूंगौ।’ जामारै आग्‍या दे तीसरे दिन तक कब्र की रखबारी करी जाय। ऐसौ न होय कै वाके चेला आयकें वाकी ल्हास चुराय लै जाएं और लोगन ते कहबे लगें, कै बू मरे भयेन में ते जी उठोए। जि धोखौ पहले तेऊ बुरौ होगौ।” पिलातुस ने बिनते कही, “कछू पैहरेदारन कूं लै जाओ और अपनी समझ के अनुसार रखबारी करो।” बे पैहरेदारन कूं संग लैकै गए, और पत्थर पै मौहर लगायकें कब्र पै पेहरौ दैबे काजै सिपाइयन कूं बैठा दियौ। जब यहूदिन कौ आराम दिन बीत गयौ,तब सप्‍ताह के पहले दिन इतबार कूं बडे़ सबेरे मरियम मगदलीनी और दूसरी मरियम कब्र देखबे आई। तब अचानक भौत जोर ते धरती हली और पिरभू कौ एक सुरग दूत सुरग ते उतरौ और कब्र के जौरै आयकै बानें पत्‍थर लुढ़कायौ और बापै बैठ गयौ। वाकौ मौंह बिजली की तरैह ते चमक रयो हतो और कपड़ा बर्फ की तरह सफेद हते। सुरग दूत कूं देखकै पहरेदार भय ते थर थर कांपबे लगौ और मरे जैसौ है गयौ। सुरग दूत ने बिन औरतन ते कही, “डरपौ मत तुम ईसू कूं ढूढ रहीऔं जो क्रूस पै चढायो गयौ हतो। बू य्हांपै नांय बू तौ जी उठोए, जैसे बानें कही हती, आऔ तुम बा जगैह कूं देख लेओ ज्हांपै बू रखौ गयौ हतो। जल्दी जायकै वाके चेलान ते कहौ, ‘बू मरे भयेन में ते जी उठौ हैं। बू तुम लोगन ते पैहले गलील कूं पौंहचेगौ। और म्हांपै तुम लोग बाय देखिंगे।’ जि तुम लोगन के काजै मेरौ सन्देस है।” जल्दी ते बे औरत भय और बड़े आनन्द के संग कब्र पैते लौटकै चेलान कूं खबर दैबे भागीं। तब ईसू अचानक बिन औरतन के आगें आयकै खडौ है गयौ और बानें नमस्‍कार करौ। और बिनें आगे बढकें ईसू कै पामन में झुककै दन्‍डबत करौ और पैरन कूं पकर लियौ। तब ईसू ने बिनते कही, “डरपौ मत मेरे भईयन ते जायके कहौ, कै बे गलील कूं जायें, म्हांपै बे मोय देखिंगे।” जब बे जाय रयीं हती तब पहरेदारन में ते कछु लोगन नें नगर में आयकै पूरौ हाल यहुदी पिरधान पुरोहितन कूं कैह सुनांयौ। तब यहुदी पिरधान पुरोहित और यहुदी बुजुर्ग नेतन्‍नें इकठ्‌ठे हैके सलाह करी और सिपाइन नें भौत सारौ पईसा दियौ, और कही, “तुम लोगन ते ऐसे कह दियौ, कै जब ‘हम सब सो गये हते’, तब ईसू के चेला रात में आये और वाकी ल्हासै उठायकें लै गये। अगर जि बात राजपाल कूं पतौ परैगी तौ बाय हम समझा दिंगे, और तुमें जोखिम ते बचाय लिंगे।” पहरेदारन्‍ने पईसा लै लिये और बैसौई करौ, जैसौ उनैं सिखायौ गयौ हतो। तब ते यहुदिन में जि बात फैल गयी, और अबई तक यहुदिन में प्रचलित है। तब ईसू के ग्‍यारह चेला गलील के पहाड के जौरै गये ज्हांपै ईसू नें बिनकूं बुलायौ हतो। चेलान नें ईसू कूं देखकें नमस्‍कार करौ पर काऊ काऊए संका ना भई। तब ईसू ने बिनके जौरै आयकें कही, “मोय सुरग और धरती कौ सबरौ अधिकार मिलौ है। जामारै तुम जाऔ और सबरे देसन के लोगन कूं चेला बनाऔ, और बिनकूं पिता और पुत्र और पबित्र आतमा के नाम ते बपतिस्मा देओ, और उन सब बातन कूं जिनकी मैंनें तुमकूं आग्‍या दईएं मानबौ सिखाऔ, और देखौ,मैं दुनियां के अन्‍त तक हमेसा तुमारे संग हूं।” परमेस्‍वर के बेटा ईसू मसीह के सुभ समाचार की सुरुआत जा तरैह ते भई, जैसौ कै परमेस्‍वर की बात बताबे बारे यसायाह नाम के आदमी की किताब में लिखौ भयौ है। “देख, मैं अपनों दूत तेरे आगे भेजुंगो, जो तेरे काजै लोगन के मन कूं तैयार करैगौ। बेहड़ में एक बुलावे बारे की अबाज सुनाई दै रयी है, कै पिरभू के आयवे के काजै अपने मन कूं तैयार करौ, जाते पिरभू के आयवे कौ रस्ता सीधौ है जाबै।” यूहन्‍ना बपतिस्मा दैबे बारौ बेहड़ में आयौ, और जि पिरचार करतो कै, अपने मन कूं पापन ते दूर करकै बपतिस्मा लेओ जाते परमेस्‍वर तुमारे पापन कूं छमा करैगौ। और यहुदिया पिरदेस और येरूसलेम नगर के भौत से लोग यूहन्‍ना की सुनबे के काजै वाके जौरें आए, और अपने पापन कूं मानकें यरदन नदी में बपतिस्मा लियौ। यूहन्‍ना ऊँठ के बारन कौ कपड़ा पैहनतो और अपनी कमर में चमड़ा की पेटी बांधे रैहतो और टिड्‍डियन कूं और बेहड़ में मिलवे बारे सहद कूं खायौ करतो। और बू जि पिरचार करतो कै, “मेरे बाद जो आबे बारौ है बू मोते ताकतबर है। मैं तौ जा लायकऊ नांऊँ कै झुककै वाके जूतान के फीता खोल सकूं। मैं तौ तुमें पानी ते बपतिस्मा देतूं, पर बू तुमें परमेस्‍वर ते मिले भये पबित्र आतमा ते बपतिस्मा दैबैगौ।” ईसू नें गलील के नासरत नगर ते आयकै यरदन नदी में यूहन्‍ना ते बपतिस्मा लियौ। जब बू पानी में ते निकरकै ऊपर आयौ, तबई बानें आकास कूं खुलते भये और परमेस्‍वर के पबित्र आतमा कूं कबूतर के रूप में अपने ऊपर उतरते भये देखौ। तब सुरग में ते जि अबाज सुनाई दई, “तू मेरौ प्यारौ बेटा है, मैं तोते भौत खुस हूं।” तब परमेस्‍वर की पबित्र आतमा बाई समै ईसू कूं बेहड़ में भीतर की ओर लै गयौ। और सैतान बेहड़ में चालीस दिना तक बाय पाप में गिराबे काजै परीछा लेतो रयौ, ईसू मांपै जंगली पसुन के संग रयौ, और सुरग दूत वाकी सेबा करते रये। यूहन्‍ना बपतिस्मा दैबे बारेए जेल में डार दियौ गयौ वाके बाद, ईसू नें गलील में आयकै परमेस्‍वर के सुभ समाचार पिरचार करते भये कही कै, “समै पूरौ है चुकौ है, और परमेस्‍वर कौ राज तुमारे जौरें आय गयोऐ, अपने पापन ते मन फिराऔ और परमेस्‍वर के सुभ समाचार पै भरोसौ करौ।” ईसू गलील की झील के किनारे जा रयो हतो, तब बानें सिमौन और वाके भईया अन्द्रियास कूं देखौ बे मछुआरे हते, और मछली पकरबे काजै झील में जाल डार रये हते। ईसू नें बिनते कही, “मेरे पीछे चले आओं, मैं तुमें परमेस्‍वर के जौरें आदमिन कूं लायबे बारौ बनांऊगो” और बे बाई समै अपने जालन कूं छोड़कै ईसू के पीछे है लिये। कछू अगारी जायकै ईसू नें जब्दी के बेटा याकूबे और वाके भईया यूहन्‍ना कूं नाव पै जाल समारते भये देखौ। ईसू नें बिनै बाई समै बुलायौ बे अपने पिता जब्दी कूं मजदूरन के संग नाव में छोड़कै ईसू के पीछे है लिये। ईसू और वाके चेला कफरनहूम नगर में आये और यहुदियन के आराम के दिन में ईसू पिराथना घर में जायकै परमेस्‍वर के वचन की सिछा दैवे लगौ। लोग वाकी सिछा ते चकित भये चौंकि बू सास्त्रन कूं सिखाबे बारेन की तरैह ते नांय, पर अधिकार के संग सिछा देतौ। बाई समै पिराथना घर में एक आदमी हतो, बू दुस्‍ट आतमा के वस में हतो, बानें चिल्लायकें कही, “हे नासरत नगर के ईसू! हमें तोते का काम? का तू हमें नांस करबे आयौ है? मैं तोय जान्‍तूं कै, तू कौऐ, तू परमेस्‍वर कौ पबित्र जन हैं!” ईसू नें बा दुस्‍ट आतमा कूं फटकारकै कही, “चुप है जा, और जा आदमी में ते निकर जा।” तब दुस्‍ट आतमा आदमीए मरोड़ती भई, और बड़ी जोर ते चिल्लायकै बामें ते निकर गई। जापै सब लोगन कूं बड़ौ अचम्भौ भयौ और बे आपस में बात करबे लगे कै, “जि का बात है? जि तौ नयी तरैह की सिछा है। जि तौ दुस्‍ट आतमान कूं अधिकार के संग आग्‍या दैबे है और दुस्‍ट आतमा जाकी आग्‍यान कूं मानेंऊऐं!” ईसू के जा काम की चर्चा तुरन्‍त गलील के आस-पास के सबरे परदेस में सब जगह फैल गई। जाके बाद ईसू पिराथना घर में ते निकरकै याकूब और यूहन्‍ना के संग सिमौन और अन्द्रियास के घर में आयौ। मांपै सिमौन की सास बुखार में पड़ी भयी हती, और लोगन्‍नें तुरन्‍त वाके बारे में ईसू ते कही, तब ईसू नें वाके जौरें जायकै वाकौ हात पकड़कै बाकूं उठायौ, वाकौ बुखार उतर गयौ, और बू बिनकी सेबा करबे लग गई। बई दिना संजा कूं जब सूरज डूब गयौ, तौ लोग सब बीमारन नैं और जिनमें दुस्‍ट आतमाएं हतीं बिनें ईसू के जौरें लाये। और बा सहर के जादातर लोग घर के द्वार पै इकठ्‌ठे है गये। ईसू नें तरैह-तरैह की बीमारियनं ते परेसान भौत ते बीमार लोगन कूं ठीक करौ, और भौत सी दुस्‍ट आतमांन कूं निकारौ, और ईसू नें दुस्‍ट आतमांन कूं बोलन तक नांय दियौ चौंकि दुस्‍ट आतमा बाय पैहचान्ती हतीं कै बू परमेस्‍वर को पबित्र जन है। दूसरे दिना ईसू दिन निकरबे ते पैहले सबेरे उठकै घर ते निकरौ और काऊ एकान्‍त जगह पै जायकै पिराथना करबे लगौ। तब सिमौन और वाके संगी बाय ढूंढबे गये। जब बू मिलौ तौ बिन्‍नें बाते कही कै, सब लोग तोय ढूँढ रये हैं। ईसू नें बिनते कही, आओं हम आस-पास की बस्तियन में चलें और मांपै पिरचार करें, चौंकि जई काजै तौ मैं आयौ हूं। जामारै बू सबरे गलील में बिनके पिराथना घरन में परमेस्‍वर के वचन की सिछा देतौ रहौ और दुस्‍ट आतमांन कूं निकारतो रयौ। एक कोढ़ी वाके जौरें आयौ और वाके सामने घुटूअन के बल बैठकै बाते बिनती करकै कही, “हे ईसू तू चांहे तौ मोय सुद्ध कर सकते है।” ईसू नें बापै तरस खायकै हात बढ़ायौ और बाय छूकै कही, “मैं चाहतूँ तू कोढ़ ते सुद्ध है जा। और तुरन्त वाकौ कोढ़ जातौ रहो और बू सुद्ध है गयौ।” ईसू नें बाय बाई समै जि चेतावनी देते भये बिदा करौ। और बाते कही कै, “काऊ ते मत कहियों पर जायकै अपने आपकूं यहुदी पुरोहित कूं दिखा और अपने ठीक हैबे के बारे में जो कछू मूसा नें ठहरायौ बाय भेंट चढा बिनपे गबाही होवे कै परमेस्‍वर नें तोए ठीक करौ है।” पर बू बाहर जायकै जा बात कौ भौत पिरचार करवे लगौ जाते ईसू फिर खुलकै नगर में नांय जा सकौ। पर बाहर बेहड़ में रयौ और मांपैऊ चारौं तरफ ते लोग वाके जौरें आयवे लगे। कछू दिनान के बाद ईसू कफरनहुम सहर में लौटौ तौ जि खबर फैल गई कि बू घर पैई है। जामारै इतने लोग इकठ्‌ठे है गये कै घर के द्वार के बाहरऊ जगह नांय रही, ईसू बिनैं परमेस्‍वर के वचन की सिछा दे रयो हतो। बाई समै लकबा के मारे भये एक आदमीए चार आदमी खाट पै डारकै ईसू के जौरें लाये। पर बे बाए भीड़ की बजैह ते ईसू के जौरें नांय लै जाय सके तब बिन्‍नें बा घर में जहाँ ईसू हतो वाके ऊपर की छत खोल दई, और छेद में ते बा लकबा के मारे की खाट नीचे उतार दई। ईसू नें बिन लोगन कौ भरोसौ देखके बा लकबा मारे भये ते कही, “बेटा तेरे पाप छमा है गये।” कछू सास्त्रन कूं सिखाबे बारे मांपै बैठे हते और अपने मन में सोचबे लगे, “जि आदमी ऐसो चौं कैहवे? ऐसो करके जि तौ परमेस्‍वर की अपमान कर रयोए, परमेस्‍वर के अलाबा और कौन पापन कूं छमा कर सकै?” ईसू नें बाई समै आतमा में जान लियौ कै बे अपने अपने मन में ऐसो बिचार कर रये हैं, और बिनते कही कै, तुम अपने अपने मन में जि चौं सोच रये हो? “आसान का है, लकबा के रोगी ते जि कैहबौ तेरे पाप छमा है गये कै, जि कैहबौ उठ अपनी खाट उठायकें चल फिर?” पर जामारै कै तुम लोग जि जान लेओ कै मुझ, “मनुस्‍य के बेटा” कूं धरती पै पाप छमा करबे कौऊ अधिकार मिलौ भयौ है। बानें बा लकबा के मारे भये ते कही, मैं तोते कैहतूं कै, अपनी खाट उठायकै अपने घर कूं चलौ जा। और बू उठो और बाई समै खाट उठायके और सबन के सामने ते निकरकै चलौ गयौ, जापै सब लोगनें अचम्भौ करौ और परमेस्‍वर की बड़ाई करके कैहवे लगे कै हमनें पैहले ऐसौ कबऊ नांय देखौ। ईसू एक बार फिर ते गलील की झील के किनारे गयौ, और बड़ी भीड़ वाके जौरें आई और बू बिनै परमेस्‍वर के वचन की सिछा दैवे लगौ। ईसू नें जाते भये हलफई के बेटा, लेबी कूं चुंगी लैवे बारी जगह पै बैठौ भयौ देखौ चौंकि, बू चुंगी लैवे कौ काम करतौ। ईसू नें बाते कही, मेरे पीछे चलौ आ और बू वाके पीछे चल दियौ। जब एक दिना ईसू अपने चेलान के संग लेबी के घर में खानों खा रयो और वाके संग भौत से चुंगी लैवे बारे और बुरे काम करबे बारे लोगऊ खानों खा रये हते। बिनमें भौत से बे लोग हते जो ईसू के पीछे-पीछे चले आये हते जि देखकै कै ईसू तौ पापी लोग और चुंगी लैवे बारेन के संग खानों खा रयौ है, सास्त्रन कूं सिखाबे बारे और फरीसियन नें ईसू के चेलान ते कही, “ईसू चुंगी लैबे बारेन के संग और पापी लोगन के संग चौं खातै-पीतै है? ईसू कूं ऐसौ नांय करनों चहिए।” ईसू नें जि सुनिकें बिनते कही, भले-चंगे लोगन के काजै बैद्य की जरूरत नांय पर बीमारन कूं बैद्य की जरूरत होबे है। मैं धरमियन कूं नांय पर पापिन कूं बुलाबे आयौ हूं। एक दिना यूहन्‍ना बपतिस्मा दैबे बारे के चेला और फरीसिन के चेला बर्त कर रये हते, तब कछू लोगन्‍नें ईसू के जौरें आयकें बाते कही कै, “यूहन्‍ना के चेला और फरीसिन के चेला चौं बर्त रखतें हैं पर तेरे चेला बर्त चौं नांय रखतें हैं?” ईसू नें बिनते कही, “जब तक दूल्हा बरातिन के संग रैहबै, का बे बर्त कर सकें? कबऊ नांऐं, जामारै जब तक दूल्हा बिनके संग है तब तक बे बर्त नांय कर सकतई। पर बे दिन आवेगें जब दूल्हा बिनते अलग करौ जाबैगौ बा समै बे बर्त करिगें। “कोई पुराने कपड़ा में कोरे कपड़ा की थेगरी नांय लगात और अगर लगाबैगौ तौ कपड़ा धुब्बै के बाद में कोरौ कपड़ा सिकुड़ जाते और कोरे कपड़ा की थेगरी पुराने कपड़ा कूं फाड़ दैवे है। और पुरानों कपड़ा पैहले तेऊ जादा फट जाबैगौ। जाई तरैह ते पुरानी मसकन में कोई नये अंगूरन कौ रस नांय भरत। और अगर कोई ऐसो करतै तौ नये अंगूरन कौ रस पुरानी मसकन कूं फाड़ दैबेगौ, चौंकि अंगूर कौ रस कछू दिना बाद फूलबे लगतै जामारै पुरानी मसक फट जातै और मसक के संग-संग अंगूर कौ रसऊ खराब है जाबेगौ। जामारै नयौ अंगूर कौ रस नयी मसकन में ही भरौ जाबै।” ऐसौ भयौ कै, ईसू और वाके चेला यहुदियन के आराम के दिना में, खेतन ते होत भये जा रये हते। और चलत-चलत ईसू के चेला खेत मेंते नांज की बालन्नें तोड़बे लगे। जापै फरीसी ईसू ते कैहवे लगे, “देख तेरे चेला आराम के दिनां में ऐसौ काम चौं करतें है? जो काम व्‍यबस्था के अनुसार आराम के दिना में करबौ मनें है।” ईसू नें बिनते कही, का तुम लोगन्‍नें जि कबऊ नांय पढौ कै, जब हमारे पुरखा दाऊद कूं और वाके संगके लोगन कूं भूख लगी हती, तब बानें का करौ? बानें कैसे अबियातार यहुदी महा पुरोहित के समै में परमेस्‍वर के घर में जायकै भेंट की रोटी खायीं अपने संगकेन नेंऊँ खायबे कूं दई हतीं, जिनै खाबे की अनुमती व्‍यबस्था के अनुसार यहुदी पुरोहित नें छोड़कै और काऊ के काजै नांय हती। तब ईसू नें बिनते कही, “आराम कौ दिनां आदमी के काजै बनांयौ है नां कि आदमी आराम दिना के काजै। जामारै मैं, ‘मनुस्‍य कौ बेटा’ आराम के दिना कौऊ पिरभू हूं।” ईसू फिर पिराथना घर में गयौ। मांपै एक आदमी हतो जाकौ हात सूख गयौ हतो। कछू लोग जा बात की ताक में हते कै ईसू आराम के दिना में बा आदमीए ठीक करै और बे बापै दोस लगामें। ईसू नें सूखे हात बारे आदमी ते कही, “बीच में खड़ौ है जा।” ईसू नें बिनते पूछी, “व्‍यबस्था में आराम के दिना में भलौ करबौ अच्‍छौ है या बुरौ करबौ, जान बचाबौ या मारबौ” पर बे चुप रहये। ईसू नें बिनके मन की कठोरता ते दुखी हैके बिनकूं गुस्सा ते चारौ लगं देखौ, और बा आदमी ते कही, “अपनों हात आगे बढ़ा” बानें अपनों हात बढ़ायौ, और वाकौ हात पैहले जैसो ठीक है गयौ। तबई फरीसी मांपै ते चले गये और हेरोदियन के गुट संग मिलकै ईसू के बिरोध में सलाह करबे लगे, कै जाय का तरैह ते नांस करौ जाय। ईसू अपने चेलान के संग गलील झील की ओर चलौ गयौ, और गलील, और यहुदिया ते एक बड़ी भीड़ वाके पीछे है लई। येरूसलेम, इदूमिया और यरदन नदी के पार ते और सूर और सैदा के आस-पास ते भौत से लोगन की भीड़ जि सुनिकै ईसू के जौरें आई कै बू कैसे अचम्भे के काम कर रैहैं। भीड़ की बजैह ते ईसू नें अपने चेलान ते कही, “मेरे काजै एक नाव तैयार रखौ, जाते भीड़ मोय दाब नांय लै।” चौंकि ईसू नें भौत से लोगन कूं ठीक करौ हतो, जामारै जितने लोग बीमार हते, बाये छूबे के काजै बापै गिरे पड़ रये हते। जो दुस्‍ट आतमांन के वस में हते बू ईसूए देखतेई वाके अगारी गिर पड़तीं, और चिल्लायकें कहतीं कै “तू परमेस्‍वर कौ बेटा है।” और ईसू नें दुस्‍ट आतमांन कूं भौत चितायौ, कै मोय पिरगट मत करौ कै मैं कोऊं। जाके बाद ईसू एक पहाड़ पै चढ़ गयौ, और जिनैं बू चाहतो, बिनकूं अपने जौरें बुलायौ और बे ईसू के जौरें आये, तब ईसू नें बिनमें ते बारह लोगन कूं चुनों और बे ईसू के भेजे भये चेला कहे गये, बे ईसू के संग-संग रये और बानें बिनैं भेजौ, कै बे सुभ समाचार कौ पिरचार करैं। और बे दुस्‍ट आतमान नेंऊं निकारबे कौ अधिकार रखैं। ईसू नें जिन बारह चेलान कूं चुनों हतो, बे जि हैं, सिमौन जाकौ नाम ईसू नें पतरस रखौ, और जबदी को बेटा याकूब, और याकूब को भईया यूहन्‍ना, (जिनकौ नाम ईसू नें बुअनरगिस रखौ, जाकौ मतलब है “गर्जन के बेटा”) अन्द्रियास, फिलिपुस, बरतुलमै, मत्‍ती, थोमा, हलफई कौ बेटा याकूब, तद्‍दी, और देस भक्‍त सिमौन, और यहूदा इस्करियोती, जानें बिसबास घात करकै ईसूए पकरबायौ। एक बार दुबारा ते ईसू घर के भीतर आयौ, एक बार फिर इतनी भीड़ इकठ्‌ठी है गई कै ईसू और वाके चेला रोटियां नांय खा सके। जब वाके घर बारेन नें जि सुनी तौ बे बाय पकड़कै अपने घर लै जाबे काजै आये, चौंकि कछू लोग कैहते हते, कै ईसू कौ चित्‍त अब ठिकाने पै नांय रयौ। सास्त्रन कूं सिखाबे बारे कछू लोग येरूसलेम ते आये हते, बू जि कैहते कै, “जामें सैतान है,” बे जेऊ कैहते कै “बू दुस्‍ट आतमांन के मुखिया बालजबुल की सहायता ते दुस्‍ट आतमांन कूं निकारतै है।” ईसू नें बिनैं जौरें बुलायौ और बिनते दृस्टान्तन में कहवे लगौ, “दुस्‍ट आतमांन कौ राजा सैतान कायकूँ अपनी दुस्‍ट आतमांन नैं निकारैगौ?” और यदि काऊ राज्य में फूट पड़ जाबै, तौ बू राज्य कैसे एकता में रह सकेगौ? और जब काऊ घर परिबार में फूट पड़ जाबै, तौ बू घर परिबार कैसे एकता में रह सकैगौ। और अगर सैतान अपनों ही बिरोधी हैकें अपने में फूट डारै, तौ वाकौ राज कैसे बनों रह सकै? वाकौ तौ अन्त ही है जाबैगौ। कोई आदमी काऊ बलबान के घर में घुसकें वाकौ माल लूट नांय सकै, जब तक के बू पैहले बा बलबान कूं बांध नांय लै, और तब वाके घर कूं लूट लैबैगौ। मैं तुमते सच कह रयौऊं कै, आदमिन के सबरे पाप और परमेस्‍वर के बिरोध में करी गई बुराई तौ मांफ करी जा सकै हैं। पर जो कोई परमेस्‍वर ते मिले भये पबित्र आतमा के बिरोध में बुरौ कैहते, बू कबऊ मांफ नांय करौ जाबैगौ। बू अनन्‍त पाप कौ भागी होगौ। ईसू नें जि जाके मारे कही हती, कै सास्त्रन कूं सिखाबे बारेन में ते कछू लोग कह रये हते, कै जि दुस्‍ट आतमा के वस में है। तब ईसू की माँ और वाके भईया मांपै आये, और घर के बाहर खड़े हैके बाय बुलबायौ। लोग ईसू के चारौ लंग कूं बैठे भये हते, और बिन्‍नें बाते कही, “देख तेरी माँ तेरे भईया और तेरी बहन बाहर तोय बुला रये हैं।” ईसू नें बिनैं जबाब दियौ, “मेरी माँ और मेरे भईया को हैं?” और जो वाके चारौ लंग कूं बैठे हते, बिनकी ओर देखिकै कही, “देखौ, मेरी माँ, भईया और बहन जेई हैं।” चौंकि जो कोई परमेस्‍वर की इच्छा पै चलै, बेई मेरौ भईया, बहन, और मेरी माँ है। ईसू फिर गलील की झील के किनारे पै परमेस्‍वर के वचन की सिछा दैवे लगौ। और फिर एक ऐसी भीड़ ईसू के जौरें इकठ्‌ठी है गई, कै बू झील में एक नाव पै चढ़िकें बैठ गयौ, और सबरी भीड़ झील के किनारे धरती पै खड़ी रही। और बू बिनैं दृस्टान्‍तन में भौत सी बात सिखाबे लगौ, और बानें एक दृस्टान्‍त में बिनते कही, “सुनों! एक किसान बीज बोयबे निकरौ। बीज बोते भये कछू बीज रस्ता के किनारे पै गिरे, और चिड़ियन नें आयकें बा बीज कूं चुंग लियौ। कछू बीज कंकरीली धरती पै गिरे, मांपै बिनकूं भरपूर मट्‍टी नांय मिली, और गहरी मट्‍टी नांय मिलवे पै जल्दी उग आये। और जब सूरज निकरौ, तौ बे झुलस गये, और जड़ न पकरबै की बजैह ते सूख गये। कछू बीज कटीली झाड़िन में गिरे, और झाड़ियन नें बढ़कें बिनैं दबाय लियौ, और जाके मारे बे फल नांय लाये। कछू बीज अच्‍छी धरती पै गिरे, बे उग आये, और बढ़कें फल दैवे बारे भये, और कोई तीस गुना, कोई साठ गुना, और कोई सौ गुना फल लाये।” तब ईसू नें कही, “जाके जौरें सुनवे कान होबें बू सुन कै समझ लैबे।” जब ईसू अकेलौ रह गयौ, तौ वाके सुनवे बारेन में ते कछू लोग और वाके बारह भेजे भये चेला ईसू के जौरें आये और जा दृस्टान्‍तन के बारे में ईसू ते पूछी। ईसू नें बिनते कही, “तुम लोगन कूं परमेस्‍वर के राज के भेदन कूं समझबे की बुद्धी दयी गयी है, बाहर बारेन के काजै सबरी बातें दृस्टान्तों में ही होबै हैं। जामारै “बे देखते भये देखें, पर बिन्नैं दिखाई ना पड़े। बे सुनते भये सुनें, पर नांय समझें। अगर बे समझ पाते तौ अपने पापन कूं छोड़िकें मनकूं परमेस्‍वर की ओर लगाबते, और परमेस्‍वर बिनें छमा करतो।” फिर ईसू नें बिनते कही, “का तुम लोग जे दृस्टान्त नांय समझे? तौ फिर दूसरे सब दृस्टान्त नैं कैसे समझौगे?” किसान जो बीज बोते बू परमेस्‍वर के वचन कूं दिखातै। रस्ता के किनारे गिरौ भयौ बीज, बिन लोगन के जैसे हैं, जो वचन सुनते है पर बिनमें ते सैतान आयकें वचन कूं उठाय लै जातै, जो बिनके हृदय में बोयों गयौ है। जाई तरैह ते, जो कंकरीली धरती पै गिरौ भयौ बीज, बिन लोगन के जैसौ है, जो वचन कूं सुनतेई बाय खुसी ते अपना लैवे है। पर अपने भीतर जड़ नांय रखवे के कारन बे थोड़े ही दिनान के काजै रैवे हैं, जाके बाद जब वचन केमारै बिनपै दुख या अत्‍याचार होत है, तौ बे बाई समै अपनों भरोसौ खो बैठत हैं। झाड़िन में गिरौ भयौ बीज, बिन लोगन के जैसे हैं, जिननें वचन सुनौ है पर सांसारिक चिन्‍तांए, धन कौ लालच और दूसरी चीजन कौ लालच बिनमें घुसकें वचन कूं दाब लैवे है। जाते बे फल नांय ला सके। पर कछू लोग बा बीज के समान हैं जो अच्छी उपजाऊ धरती बोयो गयौ, बे बिन लोगन के जैसे हैं, जो वचन सुनते, बाय अपनावें, और फल लाबै हैं, कोई तीस गुनों, कोई साठ गुनों, कोई सौ गुनों। ईसू नें बिनते कही, “का दीये कूं जामारै जलाबै हैं कै बू परात या खाट के नीचे रखौ जावें? का जामारै नांय जलाबै के दीबट के ऊपर धरौ जाबै और बाते पूरे घर में उजीतौ है जाये। चौंकि ऐसौ कछू छिपौ भयौ नांय, जो उजागर नांय करौ जावेगौ और कछू भी ढको भयौ नांय जो खोलो नांय जाबैगौ। यदि जाके जौरें सुनिवे के काजै कान हौंवे बू सुन कै समझ लैवे।” फिर ईसू नें बिनते कही, “जौ कछू सुनतौ वाके काजै चौकस रहौ, जैसो बौहार तुम दूसरेन के संग करतौ बैसेई परमेस्‍वर तुमारे संग करैगौ और बाऊते ज्यादा करैगौ। चौंकि जाके जौरें हतें बाई कूं और दयौ जावेगौ, और जाके जौरें नांय, बाते बोऊ जो बापै हते लै लियौ जावेगौ।” फिर ईसू नें बिनते कही, “परमेस्‍वर कौ राज्य ऐसौ है, जैसे कोई किसान खेत में बीज बौवे। और किसान रात कूं सोतो, और सुबह कूं जागतो, पर किसान कूं जि पतौ नांय चलौ कै बीज कैसे उपजौ, और कब बढ़तौ गयौ। धरती अपने आप नाज उपजातै, पहिलें अंकुर, तब बाल, और बालन में दानौं बनतै। जब दानौ पक जातै तब किसान बाई समै हैंसिया ते बाये काटतै, चौंकि काटवे को समै आ गयौ है।” फिर ईसू नें कही, “हम परमेस्‍वर के राज्य की बराबरी काय ते करैं? और कौन ते दृस्टान्‍त ते परमेस्‍वर के राज्‍य के बारे में बतायें। परमेस्‍वर कौ राज्‍य राई के दाने के समान है, जब बू मांटी में बोयो जातै तौ धरती के सबरे बीजन ते छोटो होतै। जब राई कौ दानों बोयो जातै तब उपजकै सब साग-पातन ते बड़ौ है जातै, और वाकी बड़ी डारियाँ निकरतें, आकास की चिड़ियाँ वाकी छाया में बसेरौ कर सकतैं।” ईसू लोगन नें जा तरैह के भौत ते दृस्टान्‍त सुनाबतो, बू बिनकी समझ के अनुसार वचन सुनाबत हतो। ईसू बिना दृस्टान्तन के लोगन ते कछू नांय कैहत हतो, पर एकान्त में अपने चेलान नैं सब दृस्टान्तन कौ मतलब बताबतो। बाई दिना जब सन्जा भई, तौ ईसू नें अपने चेलान ते कही, “आऔ, हम झील के पल्‍ली पार चलें।” और बू भीड़ कूं छोड़िकें अपने चेलान के संग एकई नाव में बैठकै आगे कूं गयौ और वाके संग दूसरी नावें हतीं। अचानक भौत जोरन की आँधी आयी और पानी की लहरें नाव पै ऊपर तक आ रयीं हतीं, जाते नाव पानी ते भरीं जा रयी हती। पर ईसू नाव के पीछे के हिस्सा में तकिया लगाये सो रयौ हतो। तब चेलान नें ईसू कूं जगायकें बाते कही, “हे गुरू! का तोय चिन्ता नांय, कै हम मरे जा रहै हैं?” तब ईसू नें उठकै आँधी कूं डांटौ, और पानी की लहरों ते कही, “सान्त है जा, रुक जा।” और आँधी रुक गई, और चारौ लंग बड़ी सान्‍ती है गई। तब ईसू नें अपने चेलान ते कही, “तुम चौं डरप रयेऔ? का तुमकूं अबई तक भरोसौ नांय।” पर चेला भौतई डरप गये, और एक दूसरे ते कहवे लगे, “जि कोए? आँधी और पानी जाकौ आग्‍या मानें हैं!” ईसू और वाके चेला झील के पल्‍ली पार गिरासेनियों के देस में पौंहचे। जैसेई ईसू नाव पैते उतरौ तौ बाई समै एक आदमी जामें दुस्‍ट आतमाएं हतीं, कब्रिस्तान में ते निकर के बाते मिलौ। बू आदमी कब्रिस्तान में रैहतो और कोई बाय साँकरन तेऊ नांय बांध पातो। चौंकि वाके हात और पाँम में बार-बार बेड़ी डारी जातीं और साँकरन ते बांधो जातो पर बू साँकरन कूं तोड़ देतो और बेड़ियन के टुकड़े-टुकड़े कर देत हतो और कोई बाय बस में नांय कर सकौ। बू रात और दिन में कब्रिस्तान और पहाड़न में भटकतौ रहतो, और अपने आप कूं पत्‍थरन ते घायल करतो और चिल्लातौ रैहतो। बू ईसू कूं दूरते देखतेई भागत भयौ आयौ और बाये दन्‍डबत कियौ। और ऊँची अबाज ते चिल्लाय के कही, “हे ईसू! परम पिरधान परमेस्‍वर के बेटा मोय तोते का काम, मैं तोय परमेस्‍वर की सौगन्ध देतूँ कि मोय मत सतावे।” चौंकि ईसू नें बाते कही हती, “हे दुस्‍ट आतमा जा आदमी में ते निकरआ।” ईसू नें बाते पूछी, “तेरौ नाम काए?” बानें बाते कही, “मेरौ नाम सेनाएं चौंकि हम भौत हैं।” और बानें ईसू ते भौत बिनती करी कै, “हमें जा जगैह में ते बाहर ना निकारे।” मांपै पहाड़ के ढलान पै सूगरन को एक बड़ौ झुन्ड चर रयौ हतो। असुद्ध आतमा नें जि कैहत भये ईसू ते जि बिनती करी कै हमें बिन सूगरन में भेज दै कै हम बिनके भीतर जाएँ। ईसू नें बिनैं आग्‍या दियौ और असुद्ध आतमाएं बा आदमी में ते निकरकें सूगरन के भीतर घुसि गईं। और सबरौ सूगरन कौ झुन्ड जो लगभग दो हजार कौ हतो, पहाड़ के ढलान पैते भागत भये झील में जा गिरे और डूबके मर गए। सूगर चरायबे बारे भागते भये गये और नगर और बस्तियन में बू खबर फैला दई, जो कछू मांपै भयौ हतो जि सुनिकै, लोग बाय देखवे काजै आये। जब बे ईसू के जौरें आये और जि देखके डरप गये, जामें दुस्‍ट आतमांन की सेना हती कपड़ा पैहने और सान्त भाव ते बैठो भयौ है। जिन लोगन नें जि सब बात अपनी आँखन ते देखी हती, बिन्‍नें लोगन कूं बतायो कै जामें दुस्‍ट आतमांऐं हतीं, वाके संग का भयौ और सूगरन पै का बीती। तब गेरासेनी के लोग बाते बिनती करके कैहवे लगे के हमारे देस ते चलौ जा। जब ईसू नाव पै चढ़बे लगौ, तब बू आदमी जामें दुस्‍ट आतमा हती, बू ईसू ते बिनती करबे लगौ “मोय अपने संग रहन दै।” पर ईसू नें बाते अपने संग आबे की मनै करी और बाते कही, “तू अपने घर जायकै अपने घर बारेन कूं बता कै तोपे पिरभू नें दया करकै तेरे काजै कैसौ बड़ौ काम करौ है।” तब बू आदमी लौट गयौ और बानें दस नगरन में जायकै जि बात बतायी कै ईसू नें मेरे काजै कैसौ बड़ौ काम करौ है, जितने लोग जि बात सुनते बे सब अचम्भौ करते। जब ईसू झील के जा पार आयकै नाव में ते उतरौ, तब एक भौत बड़ी भीड़ वाके जौरें इकठ्‌ठी है गई। बू झील के किनारे पैई हतौ तब पिराथना घर कौ एक अधिकारी जाकौ नाम याईर हतो। बू आयौ और ईसू कूं देखके वाके पामन में गिर पड़ो। और जि कहिकें बाते भौत बिनती करी कै “मेरी छोटी बेटी मरवे मेंई है। तू चलकै बापे हात रख दै कै बू ठीक है जाबें और जीबित रैहबै।” तब ईसू वाके संग चल दियौ। और बू बड़ी भीड़ऊ वाके पीछे चल दई और भीड़ के लोग बापे गिरे पड़ रये हते। बा भीड़ में एक औरत कूं बारह साल ते खून भैहबे की बीमारी हती। बू भौत सारे बैधन ते इलाज कराबत-कराबत, भौत दुखी है गई हती और अपनों सब कछू खर्च करबे के बादऊ बाय कोई फायदा नांय भयौ, पर बू और जादा बीमार है गई। बा औरत नें ईसू के बारे में सुनी हती। बानें भीड़ में पीछै ते आयकै ईसू कौ कपड़ा छू लियौ। चौंकि बू मन में सोचती, कै अगर मैं ईसू के कपड़ऊए छू लूँगी तौ ठीक है जाऊँगी और कपड़ा छूतेई वाकौ खून भैहबो बन्द है गयौ और बानें सरीर में जानि लई के मैं बा बीमारी ते ठीक है गयी हूं। ईसू नें बाई समै अपने आप में जान लई कै मोमें ते सामर्थ निकरी है और भीड़ में पीछे मुड़कै बानें पूछी कै “मेरौ कपड़ा किन्‍नैं छूऔ है।” ईसू के चेलान नें बाते कही, “तू देख तौ रयौ है कै भीड़ तेरे ऊपर गिरी पड़ रयी है और तू कैह रयो है कै मोय किन्‍नै छूऔ है।” पर ईसू जि जानबे के काजै कै मोय किन्‍नै छूऔ है चारौ लंग नजर करकै देखौ। तब बू औरत जि जानिकें कै मेरे संग का भयौ है। ईसू के जौरें डरपत और काँपत भयी आयी और वाके पामन में गिरके बाय सब कछू सच सच बता दियौ ईसू नें बाते कही, बेटी तेरे भरोसे नें तोय ठीक करौ है। चैन ते जा और अपनी जा बीमारी ते बची रै। ईसू जि कैही रयो हतो कै पिराथना घर के अधिकारी के घर ते कछू लोगन नें आयकै यायीर ते कही, “तेरी बेटी तौ मर गई, अब गुरू कूं परेसानी दैवे की का जरूरत है।” इन सब बातंन की अनसुनी करत भये ईसू नें पिराथना घर के अधिकारी ते कही, “डरपै मत केवल भरोसौ रख।” और ईसू नें पतरस और याकूब और याकूब के भईया यूहन्‍ना कूं छोड़ काउ दूसरे अपने संग नांय आन दियौ। पिराथना घर के अधिकारी के घर में पौंहचकै ईसू नें लोगन कूं मांपै भौत रोते और चीखते भये देखौ। तब बानें भीतर जायकै बिनते कही, “तुम चौं हल्ला मचातौ लड़की मरी नांय पर सो रयी है।” जा बात पै बे वाकी हसी उड़ायवे लगे पर ईसू नें सबन कूं निकारकें, लडकी के माँ-बाप और अपने तीनों चेलान के संग जहाँ पै लड़की पड़ी भई हती बा कमरा में गयौ। और ईसू नें लड़की कौ हात पकड़कै बाते कही “तलीता कूमी” जाकौ मतलब है कै “लड़की मैं तोते कैहतूं उठ।” और लडकी बाई समै उठके चलवे फिरबे लगी, बू लड़की बारह साल की हती। जापै बिन्‍नें अचम्भौ करौ। फिर ईसू नें लड़की के मा-बाप कूं चिताके आग्‍या दियौ कै जि बात कोई जान न पाबैं। ईसू नें बिनते कही, “लड़की कूं कछू खायबे कूं देऊ।” ईसू और वाके चेला पिराथना घर के अधिकारी के घर ते निकर के नासरत सहर में आये जाँपै बू पलौ-बड़ौ हतो। जब यहुदियों कौ आराम दिन आयौ तब ईसू पिराथना घर में परमेस्‍वर के वचन की सिछा दैवे लगौ, सब सुनबे बारे चकित है गये और कैहबे लगे, जा आदमी में जि बात कहाँ ते आ गई और बू कैसो ग्‍यान है जो जाय दियौ गयौ है, जाके हातन ते कैसे सामर्थ के काम पिरगट होतै। का जि बेई बढई नांय जो मरियम कौ बेटा है और याकूब योसेस, यहूदा ओर सिमौन को भईया है, का वाकी छोटी बहनें हमारे बीच में नांय रहतीं और लोगन नें जा बजैह ते ईसू की सिछा कूं नांय मानौ। ईसू नें बिनते कही “कै परमेस्‍वर की ओर ते बातें बतायबे बारौ अपने नगर और घर कुनबा कूं छोड़कै सब जगैह पै सम्मानित होतै।” ईसू नें कछू बीमारन पै हात रखके बिनकूं ठीक करौ और बू जाके अलाबा कोई सामर्थ के काम मापै नांय कर सकौ। लोगन नें भरोसौ नांय करौ जा बात पै ईसू नें अचम्भों करौ। और फिर ईसू आस-पास के गांमन के चारौ और घूमतौ भयौ परमेस्‍वर के वचन की सिछा देतौ रहो। ईसू नें बिन बारह चेलान कूं अपने जौरें बुलायकै दो-दो करिके भेजिवे लगौ, और बिनैं असुद्ध आतमान कूं निकारबे कौ अधिकार दियौ और ईसू नें बिनै हुकुम दियौ कै रस्ता के काजै लठिया छोड़कै और कछू मत लियों न तौ रोटी, न झोरी और न आँटी मेँ रुपया पैसा लेऔ, पर पामन में जूता पहनों और जो कपड़ा पैहनोए, वाके अलाबा दूसरो कपड़ा मत लेऔ। और ईसू नें बिन्‍ते जि बात कही, “जा घर में तुम आदर के संग बुलाये जाऔ तौ जब तलक बा सहर ते बिदा न होऔ तब तक बाई घर मेँ रुके रहो।” जा जगैह के लोग तुमें ना अपनाबें और तुमारी नांय सुनें, तौ मांते चलतेई अपने पामन की धूर झाड़ दियौ जाते बिनके बिरोध में गबाही रैहबे कै बे अपने नांस हैबे कौ कारन खुदई है। तब भेजे भये चेलान नें जायकै लोगन में पिरचार करौ कै अपने पापन ते मन फिराऔ। और भेजे भये चेलान नें भौतसी दुस्‍ट आतमांन कूं निकारौ और भौत ते बीमारन के सर पै जैतून कौ तेल मलिकें बिनै ठीक करौ। हेरोदेस राजा नेंऊं ईसू के बारे में सुनों, चौंकि ईसू कौ नाम फैल गयौ हतौ। और कछू लोग जि कैहते कै यूहन्‍ना बपतिस्मा दैबे बारौ मरे भयेन में ते जीबित है गयौ है, जामारै बामें ते सामर्थ के काम पिरगट हौतै। कछू लोग कैहते हते कै जि परमेस्‍वर की ओर ते बात बतायबे बारौ एलियाह है, और कछू लोग कैहते हते, कै जि परमेस्‍वर की ओर ते बाते बताबे बारौ है, जैसे पुराने समै में परमेस्‍वर की ओर ते बात बतायबे बारे होते। जब हेरोदेस नें जा बात के बारे में सुनों तब बानें कही, जा यूहन्‍ना बपतिस्मा दैबे बारे कौ सर मैनें कटबायौ हतो बू जी उठौ है। चौंकि हेरोदेस नें खुद अपने सिपाईयों कूं भेजकें यूहन्‍ना कूं जेल में डलबा दियौ हतो ऐसौ बानें हेरोदियास के कैहवे पै करौ, जाते हेरोदेस नें ब्याह कर लियौ हतो, जो पैहले वाके भईया फिलिपुस की पत्नी हती। चौंकि यूहन्‍ना हेरोदेस ते बार बार जि कैहतो रेहतो कै, “तैने जो अपने भईया के जीबित जि वाकी औरतै, अपनी औरत बना लयोए बो सई नांय।” जामारै हेरोदियास यूहन्‍ना ते बैर रखती हती, और जि चाहती कै बाकूं मरबा डारे पर ऐसो नांय है सकौ, चौंकि हेरोदेस यूहन्‍ना कूं पबित्र और धरमी जानिकै बाते डरपतो और बाय बचाय रखतो और हर समै वाकी बात सुनिकै भौत घबरा जातौ पर खुसी ते वाकी सुनत रेहतो। हेरोदियास कूं अपने मन्सूबेन कूं पूरौ करवे के काजै मौकों मिलौ। जब हेरोदेस नें अपने जन्मदिन पै अपने पिरधान और सैनापति और गलील के बड़े-बड़े लोगन के काजै दाबत करी। तब हेरोदियास की बेटी भीतर आयी और बानें नाचकै हेरोदेस और वाके संग बैठे भये लोगन कूं खुस करौ, तब राजा हेरोदेस नें बा लड़की ते कही, तू जो चाहै सो मोतै माँग लै मैं तोकूं दुंगो। और हेरोदेस नें सौगन्ध खाई कै मैं तोय अपने आधे राज्‍य तक जो कछू तू मोते माँगेगी मैं तोय दे दूँगो। लड़की नें बाहर आयकै अपनी मा ते पूछी कै, “मैं का मांगूं?” तब वाकी मा हेरोदियास बोली, “यूहन्‍ना बपतिस्मा दैबे बारे कौ सर माँग लै।” लड़की तुरन्त राजा हेरोदेस के जौरें भीतर गयी और बाते कही कै तू अबई यूहन्‍ना बपतिस्मा दैबे बारे कौ सर थार में रखिके मँगाय दै। तब राजा भौत दुःखी भयौ पर बानें अपनी बा सौगन्ध की बजैह ते जो बानें अपने संग बैठबे बारेन के सामने खाई हती, बाते मनें नांय कर सकौ। जामारै राजा नें बाई समै एक सिपाही कूं हुकुम दियौ कै बू जायकै यूहन्‍ना बपतिस्मा दैबे बारे के सर कूं काटि लावे। और सिपाई नें जेल खाने मेँ जायकै वाकौ सर काटौ, और बाय थारी में रखकै लायो और बा सर कूं लडकी कूं दियौ, बा लडकी नें अपनी मा कूं दियौ। और जब यूहन्‍ना के चेलान नें जि पतौ चलौ कै यूहन्‍ना कौ सर काट दयौ गयौ है तब बू आये और वाकी लास कूं लै जायके कब्रिस्तान में एक कब्र में रख दियौ। ईसू की ओर ते भेजे भये चेला बापस आये, जो कछू बिन्‍नें करौ और सिखायौ हतो बू सब ईसूए बतायौ। तब ईसू नें बिनते कही “चलौ हम लोग काऊ एकान्‍त जगह पै चलते हैं जहाँ तुम थोड़ो आराम कर सकौ।” चौंकि भौत सारे लोग आवत जावत हतै और बिनै खानों खायवे कौऊ मौकों नांय मिलतो। जामारै बे नाव पै चढिके काऊ सून सान जगह पै अलग चले गये। भौत ते लोगनें ईसू कूं जावत भयौ देखिकें पहिचान लियौ और बे सब नगरन तै इकठ्‌ठे हैके वहाँ पैदल भागे और बिनते पैहले मापैं जा पौंहचे। जब ईसू नाव ते उतरौ तब बानें एक भौत बड़ी भीड़ देखी और बापै तरस खायौ, चौंकि बे बिन भेड़न के जैसे हते जिनकौ कोई चरायबे बारौ नांय होबै। और ईसू बिनै भौत सी बातन्‍नेँ सिखाबे लगौ। जब सूरज डूबबे लगौ तब ईसू के चेला वाके जौरें आयकै कहिवे लगे कै, “जि सून सान जगह है और सूरजऊ डूबबे बारो है। इन लोगन नें भेज दै कै जि जायकै आस जौरें के गांम और बस्तियन मेँ ते अपने खाबे काजै कछू खरीद लैबे।” पर ईसू नें चेलान ते कही, “तुमही इनैं खायवे काजै देओ।” पर बिन्‍नें ईसू ते कही, “का हम जायकै दो सौ दीनार की रोटी खरीदकै इन लोगन नैं खबाबैं, ऐसो नांय है सकतै चौंकि इतनों पईसा हमारे जौरें नांय।” ईसू नें बिन्‍ते कही, “जायकै देखौ तुम पै कितनीं रोटी हैं,” बिन्‍नें मालुम करिकै कही, “पाँच रोटियां और दो मछलियाँ हैं।” फिर ईसू नें चेलान कूं आग्‍या दियौ, सब लोगन कूं हरी घास पै लाइन-लाइन में बैठाय देओ। तब चेलान नें लोगन कूं सौ-सौ और पचास-पचास करिकै लाइन-लाइन बैठाय दयौ। ईसू नें बिन पाँच रोटी और दो मछलीन कूं हात में लियौ और ऊपर सुरग की ओर देखिके परमेस्‍वर कौ धन्यबाद करौ, और रोटी तोड़ तोड़ कै चेलान्‍ने देत गयौ और बे लोगन कूं परोसें और एसैई बिन दो मछलीन कूं बिन सब लोगन में बांट दयी। सबन्‍नें पेट भरिकें खायौ और झिक गये। जाके बाद मेंऊ रोटी और मछलिन के इतने टुकडा बच गये कै चेलान नें बचे भये टुकड़न ते बारह डलियां भरीं जिन लोगन नें रोटी खायीं बिनमें केवल आदमी-आदमी की गिनती पाँच हजार हती। तब ईसू नें अपने चेलान कूं बाई समै नाव पै चढिवे कूं मजबूर करौ, कै बे बाते पैहले झील के पार बैतसैदा नगर कूं पहुँच जाबै जब तक कै बू लोगन्‍ने बिदा करै, ईसू बिनै बिदा करिके पहाड़ पै पिराथना करिबे काजै चलौ गयौ। जब सूरज डूब गयौ तब जा नाव में चेला हते, बू नाव झील के बीच में हती, परि अबई तलक ईसू अकेलौ धरती पै हतौ, ईसू नें देखौ कै चेला नाव चलावत चलावत हाँप गये है, चौंकि हबा बिनके बिपरीत हती। तब सबेरे के तीन बजे ते छै बजे के बीच में ईसू झील के पानी पै चलतौ भयौ बिनके जौरें आयौ बू बिनते आगे निकर जावौ चाँहत हतो। तब चेलान नें बाय पानी पै चलतौ भयौ देखिके समझौ कै जि भूत है और बे चीख उठे, चौंकि बे सब बाय देखिकें घबरा गये हते। पर बाई समै ईसू नें बिनते कही, हिम्मत रखौ डरपौ मत मैं हूं। तब ईसू बिनके जौरें नाव पै आयौ और बिपरीत हबा रुक गयी, और चेला भौतई अचम्भौ करिबे लगे। चौंकि बे रोटियन कौ जो चमत्कार भयौ हतो, वाके बारे में मैंऊँ नांय जान पा रये हते, बिनकी समझ में नांय आयौ जि कैसे भयौ। बू सोच नयी पा रहे हते। बे झील के बा पार पै उतरिके गन्‍नेसरत देस में पौंहचे, और नाव किनारे पै लगाई। और बे नाव पैते उतरि ही रये हते बाई समै लोगन नें ईसू को पहिचान लियौ। फिर बे लोग आस-पास की जगहन में भागकें गये और जायकै लोगन कूं ईसू के बारे में बतायौ और लोग जि सुनते तब लोग बीमार लोगन कूं खाट पै डारकें ईसू के जौरें लायवे लगे। और जहाँ कहीं ईसू गांम, सहर और बस्तियन में जातो, तौ लोग अपने बीमारन कूं बाजारन के चौक में रखिके बाते बिनती करते हते कै बू बिनैं अपने कपड़ा कौ किनारे ही कूं छू लैन दे और जितने बाय छूवत हते बे ठीक है जावत हते। एक दिना कछू फरीसी और सास्त्रन कूं सिखाबे बारे जो येरूसलेम सहर ते आये हते बू ईसू के जौरें इकठ्‌ठे भये। बिन्‍नें देखौ कै ईसू के कछू चेला यहुदिन की तरैह ते हात धोयकै खानों नांय खा रये हैं चौंकि फरीसी और सब यहुदी अपने पुरखन की रीति पर चलते, और जब तक बे अपनी रीति के अनुसार हात नांय धो लेते तब तक खानों नांय खाते। याँ तक की बाजारन ते लायी भई चीजन कूं जब तलक बे अच्छी तरैह ते नांय धोय लेते तब नांय खाते, औरऊ भौत सी रीति हैं जिनैं बे मानतें जैसे कटोरन नें, लोटन नें और तांबे कै बरतन नें धोयबो और बिनकूं मांजबो। जाके मारे बिन फरीसी और सास्त्रन कूं सिखाबे बारेन नें ईसू ते पूछी के तेरे चेला पुरखन की रीति पै चौं नांय चलतयी और बिना हात धोये खानों खातें। ईसू नें बिनते कही, “कै परमेस्‍वर की ओर ते बात बताबे बारे यसायाह नें तुम कपटीन के बारे में पैहले तेई जि बिलकुल सही कही है, जैसो लिखौ भयौ है, “‘परमेस्‍वर कैहवे है, कै जे लोग मौंह ते तौ मेरौ आदर करतें, पर बिनकौ मन मोते दूर रैहते। और जे बेकार में मेरी उपासना करतें, आदमी के बनांये भये नियमन कूं मेरे नियम बतायके सिखाबै है।’ “चौंकि तुम परमेस्‍वर के आग्‍या कूं नांय मानके आदमिन की रीतियन कूं मानें है।” और ईसू नें बिनते कही, तुम भौत चालाक हो कै अपनी रीति-रिबाजन कूं मानबे काजै परमेस्‍वर की आग्‍या कूं कैसी अच्छी तरैह ते टाल देतौ। चौंकि परमेस्‍वर कौ नियम लिखवे बारे मूसा नें कही है, अपने मा और बाप कौ आदर करौ, और जो कोई मा-बाप कूं बुरौ कहे वु जरूर मार डालौ जावे। पर तुम सिखातौ, कै जब तुमारे मा-बाप तुमते काऊ चीज कूं मांगबो चाहतै तौ तुम बिनते कैहतौ कै जि चीज तौ मैंनें परमेस्‍वर कूं चढ़ा दई ऐसै कहिकें अपने मा-बाप की सेबा करवे ते बच जातौ। और ऐसौ सिखायकें तुम बाय वाके मा-बाप की सेबा नांय करन दे तई। जाई तरैह ते तुम अपनी रीतिन की सिछा सिखायकें जिनैं तुमने बनांयौ है, परमेस्‍वर के वचन कूं टाल देतो और ऐसे-ऐसे भौत ते काम करतो। तब ईसू नें भीड़ कूं अपने जौरें बुलायकै कही, तुम सब मेरी बात सुनों और समझौ। ऐसौ कछू नांय जो आदमी में भीतर घुसकै बाय असुद्ध करते पर जो कछू आदमी के भीतर ते निकरत है बेई बाय असुद्ध करते। जाके जौरें सुनिवे के काजै कान हौंवे बू सुन कै समझ लैवे । जब ईसू भीड़ कूं छोड़कै घर में गयौ तौ वाके चेलान नें जा दृस्टान्‍त के बारे में बाते पूछी। ईसू नें बिनते कही, का तुमऊं कछू नांय समझे का तुमारी समझ में नांय आयौ कै जो चीज आदमी के भीतर जाबे बू बाय असुद्ध नांय कर सकै। चौंकि बू वाके मन मैं नांय पर पेट में जातै और सन्‍डास में निकर जावे। जि कहिकें बानें सब खायबे की चीजन कूं सुद्ध बतायो। फिर बानें कही, आदमी के मन में ते जो बुरे बिचार निकरते बुई आदमी कूं असुद्ध करै है। चौंकि आदमी के मन के भीतर तेई बुरे बिचार, चोरी, हत्‍या, कुकर्म, व्‍यभिचार, लालच, हर तरैह के बुरे काम, धोकौ, गन्दी नजर, चुगल खोरी, जलन, घमन्ड और मूर्खता निकरते। जि सब बुरी बातें आदमी के मन तेई निकरती है और आदमी कूं असुद्ध करै। फिर ईसू मांपै ते उठकै सूर नाम के सहर मैं आयौ और एक घर में गयौ। बू नांय चाहतो कै वाके आयवे की काऊए पतौ चले, पर बू अपने आप कूं छिपाय नांय सकौ। और बाई समै एक औरत जाकी बेटी में दुस्‍ट आतमा हती बू ईसू के बारे मैं सुनिकै ईसू के जौरें आई और वाके पामन में गिर गई। जि औरत यहुदी नांय हतीं और सीरीया देस के फिनीकी नगर की रैहबै बारी हतीं और बानें बिनती करी कै, “मेरी बेटी में ते दुस्‍ट आतमा निकार दे।” ईसू नें बाते कही, “कै पैहले मोय मेरे यहुदी बालकन कौ पेट भरने दे चौंकि बालकन की रोटी लैके कुत्‍तन के आगे फैंक दैबो अच्‍छौ नांय।” बानें ईसू कूं जबाब दियौ कै सच है पिरभू तौऊ कुत्‍तऊ तौ बालकन की गिरी रोटी की चूर चार खाय लेतै। फिर ईसू नें बाते कही, तैनें भौत बड़िया बात कही है जामारै तू अपने घर कूं चली जा, दुस्‍ट आतमा तेरी बेटी में ते निकर गयी है। तब बा औरत नें अपने घर आयकै देखौ के वाकी लड़की खाट पै ठीक ठाक पड़ी है और बामें ते दुस्‍ट आतमा निकर गई है। फिर ईसू सूर सहर ते निकरकै सैदा सहर के रस्ता ते दस नगरन में ते होतौ भयौ गलील की झील पै पौंहचो। तब मांपै कछू लोग एक बैहरेए जो गूँगौऊ हतो ईसू के जौरें लाये और बाते बिनती करी के बू अपनों हात बापे रखे जाते बू ठीक है जाबै। तब ईसू बाय भीड़ में ते दूर लै गयौ और अपनी अंगुरिया वाके कानन मैं डारीं और अपनों थूंक वाकी जीब पै लगायौ और फिर ईसू नें सुरग की ओर देखके गहरी साँस लैत भये कही “इफत्‍तह,” मतलब “खुलजा!” और वाके कान खुल गए और वाकी जीब हलकी है गई, और बू साफ-साफ बोलवे लगौ। तब ईसू नें लोगन कूं चितायौ कै काऊ ते मत कहियों, पर जितनो बानें लोगन कूं चितायौ बिन्‍नें उतनोई पिरचार करौ। जितनों नें जि बात सुनी बे भौत अचम्भौ करकें कैहवे लगे, ईसू जो करै है भलौ करै है जहां तक के बानें बहरेन कूं सुनिवे की ताकत और गूगेंन कूं बोली दैबे है। बिन दिनान में जब एक बार फिर भौत भीड़ इकठ्‌ठी भई और बिनके जौरें कछु खायवे नांय हतो, तौ ईसू नें अपने चेलान कूं जौरें बुलायकै बिनते कही, “मोय इन लोगन पै दया आ रही है, चौंकि जि लोग पिछले तीन दिनान ते लगातार मेरे संग रह रये हैं, और इनके जौरें खायवे काजै कछु नांय। अगर मैं इन लोगन नैं भूखौं ही घर भेजूं तौ जि रस्ता में बेहोस है जावेगें। इनमें ते कछू लोग तौ भौत दूर ते आये हैं।” ईसू के चेलान नें बाकूं जबाब दियौ कै, “याँपै जा बेहड़ में इतनी रोटियां कोई कहाँ ते लावें? कै जे खायकें पेट भरैं।” ईसू नें बिनते पूछी, “तुम्हारे जौरें कितनीं रोटियां हैं?” बिन्‍नें कही, “सात।” तब ईसू नें लोगन कूं धरती पै बैठवे को आग्‍या दियौ, और बानें बे सात रोटियां लीं, और परमेस्‍वर कूं धन्यबाद करकें तोड़ी और अपने चेलान कूं देतौ गयौ कै बे लोगन कूं परोसैं और चेलान नें ऐसौ ही करौ। बिनके जौरें कछु छोटी मछलियाऊँ हतीं और ईसू नें परमेस्‍वर कौ धन्यबाद करके मछलियौ को लोगन के आगे परोसवे को आग्‍या दियौ। लोगन नें पेट भरकै खायौ, और फिर चेलान नें बचे भये टुकड़न कूं इकठ्‌ठौ करिकै सात डलियां भरीं। खायबे बारे लोगन की संख्या लगभग चार हजार हती। ईसू नें लोगन कूं बिदा कर दियौ। और ईसू बाई समै अपने चेलान के संग नाव पै बैठिकै दलमनूता देस कूं चलौ गयौ। जब फरीसियों नें जि सुनी कै ईसू य्हांपै है तब बिनमें ते कछु फरीसी आयकें ईसू ते बहस करिवे लगे और ईसू कूं फसायवे के काजै बे सुरग की ओर ते कोई चमतकारी चिन्ह माँगते जाते जि साबित होबै कै जि बू परमेस्‍वर की ओर ते आयौ है। तब ईसू नें अपने दिल में गैहरी साँस लैत भये कही, “जा समै के लोग चिन्ह चौं माँगते हैं? मैं तुमते सच कहूं कै जा समै के लोगन कूं कोई चिन्ह नांय दयौ जाबैगौ।” और बू बिनैं छोड़िकें अपने चेलान के संग नाव पै बैठकै, झील के बा पार चल दियौ। ईसू के चेला खायवे कूं रोटियां लेबौ भूल गये हते, नाव में एक रोटी के सिबाय बिनके जौरें खायबे काजै और कछु नांय हतो। ईसू नें चेलान नैं चेतायकै कही, “फरीसियन और हेरोदेस के खमीर ते चौकस रहौ।” चेला आपस में बिचार करके कैहबे लगे, कै “हमारे जौरें रोटी नांय जामारै जि ऐसौ कह रयो है।” ईसू जि जानकै कै चेला का बिचार कर रहै हैं? बिनते कैहबे लगौ, “तुम चौं आपस में बिचार कर रये हो? कै हमारे जौरें रोटी नांय। का तुम अबई तक नांय जान पाये और नांय समझ पाये? आँखन के होत भये तुम नांय देखतों और कानन के रहत भये सुनत नाँओं। का तुमकूं बू बातें याद नांय है? जब मैंनें बिन पाँच हजार लोगन के काजै पाँच रोटियन के टुकड़े करे हते और तुमने बिन लोगन के खायबे के बाद बिन बचे भये टुकड़न की कितनीं डलियां भरीं हती?” चेलान नें बाते कही, “बारह डलियां।” फिर ईसू नें बिनते कही, “जब मैंनें चार हजार लोगन के काजै सात रोटियन के टुकड़ा करे हते, तौ तुमने बिन लोगन के खायबे के बाद बिन बचे भये टुकड़न की कितनीं डलियां भरीं हती?” चेलान नें कही, “सात डलियां।” फिर ईसू नें बिनते कही, “तो फिर तुम अब तक चौं नांय समझे?” फिर ईसू और वाके चेला बैतसैदा में आये और कछू लोग एक आँधरे कूं ईसू के जौरें लै आये और ईसू ते बिनती करी कै बाये छूकै ठीक कर। ईसू बा आँधरे के हाते पकरिकें गांम के बाहर लै गयौ, और वाकी आँखन में थूकिकें बापै हात रखै, और बाते पूछी, “का तोए कछु दिखाई दै रयौ हैं?” बानें आँख खोलकै चारौ लंग देखिकें ईसू ते कही, “मैं आदमिन कूं देखतूं पर बे मोय चलते भये पेड़न के जैसे दिखाई दै रये हैं।” तब ईसू नें दुबारा ते आँधरे की आँखन पै हात रखे और बू अच्छी तरैह तै देखवे लगौ और दूर तक साफ-साफ देख सकत हतो। फिर ईसू नें मंई ते बाय जि कहते भये भेजौ कै “घर चलौ जा गांम में मत जईयो।” जाके बाद ईसू अपने चेलान के संग केसरिया फिलिप्पी के गांमन में चलौ गयौ। और रस्ता में बानें अपने चेलान ते पूंछी, “कै लोग मोय का कहते हैं कै मैं कौन हूं?” चेलान नें बाते कही, “कछु लोग तोय यूहन्‍ना बपतिस्मा दैबे बारौ, पर कछु एलियाह और कछु परमेस्‍वर की ओर ते बात बताबे बारेन में ते तू एक है, जेऊ कहतै।” ईसू नें बिनते पूँछी कै, “तुम मोय का कहतौ?” पतरस नें बाय जबाब दियौ, “तू मसीह है।” तब बानें बिनै चितायके कही कै, “मेरे बारे में जि काऊ कूं मत बतईयों।” बाई समै ते ईसू नें अपने चेलान कूं समझाबे सुरू करों मैं, “मनुस्‍य कौ बेटा” कूं भौत ते दुख सहने होंगे और बुजुर्ग और यहुदी पिरधान पुरोहितन और सास्त्रन कूं सिखाबे बारेन के द्वारा नकारों जावेगों और मार दियौ जावेगों और फिर तीसरे दिना मरे भयेन में ते जी उठेंगों। ईसू नें जि बात बिनते साफ-साफ कह दई जापै पतरस नें बाय अलग लै जायकै डांटकै कही, “पिरभू ऐसौ मत कहौ!” पर ईसू नें अपने चेलान की ओर मुड़ के देखौ और पतरस कूं फटकार के कही, “हे सैतान मेरे सामने ते दूर है जा चौंकि तू परमेस्‍वर की बातन कूं नांय पर आदमिन की बातन कूं सोचतै।” तब ईसू नें अपने चेलान के संग भीड़ कूं अपने जौरें बुलायौ और कही, “जो मेरे पीछे आयबो चाहबै बू खुद की इच्‍छा ते जीबौ छोड़ दैवे और मेरे पीछे चलवे काजै जा हद तक दुख उठावें कूं तईयार होबै कै अपने मरबे कीअऊ चिन्‍ता नांय करै। चौंकि जो अपने पिरान कूं बचाबैगौ बू बाय खो दैवेगों और जो कोई मेरे काजै और सुभ समाचार के काजै अपनों पिरान दैबेगौ बू बाय बचावेगों आदमीए जाते का लाभ, अगर बाय सबरौ संसार मिल जावें पर बू अपने पिरान कूं खो दैवे? हाँ बाय कछु लाभ नांय! चौंकि ऐसो कछु नांय जाय दैकै आदमी दुबारा अपनों पिरान पा सकै। और जो कोई परमेस्‍वर कूं नांय मानवे बारी जा व्यभिचारी और पापी पीढ़ी में मोते और मेरी सिछा ते लजावेगौं तौ मैं, ‘मनुस्‍य कौ बेटा’ जब पबित्र सुरग दूतन के संग अपने परम पिता की महिमा में दुबारा आऊंगौ तब बाते लजाऊंगो।” और ईसू नें बिनते कही, “मैं तुमते सच कैहतूं याँपै कछू लोग एसेऊ हैं, जब तलक बे परमेस्‍वर के राज्य कूं सामर्थ के संग आयौ भयौ नांय देख लिंगे तब तक नांय मरिगें।” छै दिना के बाद ईसू पतरस, याकूब और यूहन्‍ना के संग एक ऊँचे पहाड़ पै एकान्त में गयौ। और बिनके सामने वाकौ रूप बदल गयौ। और वाके कपड़ा ऐसे चमकबे लगे और बगुला तेऊ जादा सफेद है गये और पतरस, याकूब और यूहन्‍ना कूं ईसू अचानक ते परमेस्‍वर कौ नियम लिखवे बारे मूसा और परमेस्‍वर की ओर ते बात बताबे बारे एलियाह के संग बात करत भयौ दिखाई दयौ। तब पतरस नें ईसू ते कही, “हे गुरू य्हांपै हमारौ हैबो कितनों अच्‍छौ है, हमें याँपै तीन कुटिया बनाबन दै, एक तेरे काजै, एक मूसा काजै, और एक एलियाह के काजै” जि बात पतरस नें जाके मारे कही चौंकि बे भौत डरप गये हते और वाकी समझ में नांय आ रयौ कै बू का कैहबें। तब एक बादर नें आयकें बिनै ढांक लियौ, और बादर में ते जि अबाज आयी कै “जि मेरौ प्यारौ बेटा है, जाकी सुनों।” और जाके तुरन्‍त बाद में चेलान नैं चारौ ओर नजर करी तौ बिनै केवल ईसू के अलाबा और कोई नांय दिखौ। तब पहाड़ पैते उतरते भये ईसू नें बिनै आग्‍या दियौ कै, “जब तक मैं, ‘मनुस्‍य कौ बेटा’ मरे भयेन में ते जीबित नांय है जाऊं तब तलक जो कछु तुमनें देखौ है बू काऊ ते मत कहियों।” चेलान नें ईसू कि जि बात मान लयी पर बे आपस में बात चीत करिवे लगे कै मरे भयेन में ते जीबित हैबे कौ का मतलब है। और बिन्‍नें ईसू ते पूंछी, “सास्त्रन कूं सिखाबे बारे जि चौं जि चौं कैहतै कै एलियाह कौ पैहले आयबौ जरूरिए?” ईसू नें बिनै जबाब दियौ कै, “हाँ एलियाह पहिलें आयकै सब कछु ठीक करैगौ, पर ‘मनुस्‍य के बेटा’ के बारे में जि चौं लिखौ है कि बू भौत दुख उठावेगौ और बू अपनांयौ नांय जावेगौ?” पर मैं तुमते कैहतूं कै, “एलियाह तौ आ चुकौ है और जैसो वाके बारे में परमेस्‍वर के वचन में लिखौ है, लोगन नें वाके संग बैसौई बुरौ व्‍यवहार करौ है।” जब ईसू तीनों चेलान के संग अपने दूसरे चेलान के जौरें आयौ, तौ बानें देखी कै चेलान के चारौ लंग भौत लोगन की भीड़ लगी भयी है, और कछु सास्त्रन कूं सिखाबे बारे बिनके संग बहस कर रये हैं। पर जैसेई लोगन नें ईसू कूं देखौ, सब भौतई अचम्भौ करिवे लगे। और बिन्‍नें भाग के ईसू कूं नमस्कार करौ। ईसू नें चेलान ते पूछी कै, “तुम इनते काय बात पै बहस करि रये हौ?” तब भीड़ में ते एक आदमी नें ईसू कूं जबाब दियौ कै, “हे गुरू! मैं अपने बेटा कूं तेरे जौरें लायो जामें दुस्‍ट आतमा घुसी भयी है और बू जाय बोलन नांय देती। और जब दुस्‍ट आतमा जापै आवत है, तब जाय नीचे पटक देते, और जाके मोंह ते झाग निकरिवे लगतें, और जाकी दाँती भिच जाबै है और जि अकड़ जाबै है। मैंनें तेरे चेलान ते बिनती करी हती, कै बे दुस्‍ट आतमा कूं बाहर निकार दै, पर बे बाय नांय निकार सकै।” जि सुनकें ईसू नें बिनकूं जबाब दियौ, “हे भरोसौ ना करिबे बारे लोगो, मैं कब तक तुमारे संग रहुंगो, और कब तक तुमैं सहन करुंगो? लड़के कूं मेरे जौरें लै आऔ।” तब बे लड़का कूं वाके जौरें लाये और दुस्‍ट आतमा नें ईसू कूं देखिके लड़का कूं मरोड़ दियौ, और लड़का धरती पै गिर गयौ और वाके मोंह में ते झाग निकरबे लगे और बू लोट-पीट करवे लगौ। ईसू नें लड़का के बाप ते पूंछी, “जाकी जि दसा कब ते है?” लड़का के बाप नें कही, “बचपन तेई है। दुस्‍ट आतमा जाय मारबे काजै कबऊ आग में गिरा दैवे है और कबऊ पानी में गिरा दैवे, पर तू कछु कर सकतै तौ हम पै दया करिके हमारौ भलौ कर।” ईसू नें बाते कही, “तैने ऐसे चौं कही कै तू कछु कर सकतै? भरोसौ करिवे बारे लोगन काजै सब कछु है सकै।” जि सुनिकै लड़का के बाप नें तुरन्‍त ईसू ते कही, “हे पिरभू! मैं भरोसौ करतूं, पर मेरौ भरोसौ इतनों मजबूत नांय, तू जाय मजबूत कर।” जब ईसू नें देखौ कै लोगन की भीड़ भड़ती जा रयी है, तौ ईसू नें दुस्‍ट आतमा कूं जि कहिकें फटकारौ, “हे दुस्‍ट आतमा तैनें जा लड़का कूं गूंगौ और बहरौ बनांय रखौ है मैं तोकूं आग्‍या देतूं कै जामें ते निकरि जा और दुबारा कबऊ जा लड़का में मत घुसियो।” तब दुस्‍ट आतमा चिल्लाई और लड़का कूं भौत जोर ते मरोड़कें बामें ते निकर गई और लड़का मरौ भयौ सौ है गयौ, य्हां तक के भौत ते लोग कहिवे लगे कै जि तौ मर गयौ है पर ईसू नें वाकौ हात पकरकै उठायौ और बू खड़ौ है गयौ। जब ईसू घर में आयौ, तब वाके चेलान नें एकान्त में ईसू ते पूंछी, “हम बा दुस्‍ट आतमा कूं चौं नांय निकार सके?” ईसू नें बिनते कही, “ऐसी दुस्‍ट आतमा बिना पिराथना के नांय निकारी जा सकै।” जाके बाद ईसू और वाके चेला मापै ते चल दिये, और बे गलील में ते हैके जा रये हते, ईसू नांय चाहतो कै लोगन नैं जि पतौ चलै कै बे काँपै है, चौंकि बू अपने चेलान कूं एकान्‍त में सिछा दैवौ चाहतौ। तब ईसू नें बिनते कही, “मैं, ‘मनुस्‍य कौ बेटा’ लोगन के द्वारा बिसबास घात करिके पकरबायो जाऊंगो और बे मोय मार डारिंगे और मैं मरिवे के बाद तीसरे दिना जी उठूंगौ।” पर बे ईसू की जा सिछाए समझ नांय सकै और बे ईसू ते दुबारा पूंछवे ते डरपते। फिर बे कफरनहुम में आये, ईसू जब घर में हतो बानें बिनते पूंछी कै रस्ता में तुम का बात पै बहस कर रये हते। पर बे चुप रये, चौंकि बे रस्ता में चलते भये आपस में जि बहस कर रये हते, कै हम में ते सबनते बड़ौ कौन है। तब ईसू बैठ गयौ और बानें बिन बारह भेजे भये चेलान कूं अपने जौरें बुलायकै बिनते कही, “अगर कोई सबते बड़ौ हैवौ चाहै तौ बू सबनते छोटो हैके सबकौ सेबक बनें।” और ईसू नें एक बालक कूं लैके बिनके बीच में खड़ौ करौ, और फिर बाय अपनी गोद में बैठायकै बिनते कहबे लगौ, जो कोई मेरे नाम ते जा जैसे काऊ बालक कूं अपनातो है, बू मोय अपनातो है, और जो कोई मोय अपनातै बू मोय और मेरे भेजवे बारे परमेस्‍वर कूं अपनातो है। एक दिना यूहन्‍ना नें ईसू ते कही, “हे गुरू! हमनें एक आदमी कूं तेरे नाम ते दुस्‍ट आतमांन कूं निकारते भयौ देखौ है, हमनें बाते मनें करी कै तू ऐसौ मत करै। चौंकि बू हम में ते नांय हतो।” ईसू नें कही, “तुम बाय मत रोको, चौंकि जो कोई मेरे नाम ते चमत्‍कार के काम करतै, बू तुरन्‍त बाद मेरे काजै बुरी बातें नांय कह पावेगौ। जो हमारौ दुसमन नांय बू हमारौ साथी है। जाके मारे जो कोई तुमैं मेरे चेला समझकै एक गिलास पानी पियाबेगौ, तौ मैं तुमते सच कहुं कै बू अपनों इनाम कबऊ नांय खोवेगौ।” और जो कोई इन छोटे बालकन में ते काऊ है, जो मोपै भरोसौ रखत हते, पाप के रस्ता पै लै जातैं वाके काजै तौ जि अच्‍छौ होतो कै वाके गले में एक चाकी कौ पाट बांधकै समुन्दर में धकेल दियौ जातो। और अगर तेरौ हात तोय पाप के रस्ता पै लै जातै तौ बाय काट डारियो। चौंकि दोनों हातन के रैहत भये तू नरक में डारौ जाये जाकी आग कबऊ भुजत नांय, जाते तौ तेरे काजै जि अच्‍छौ होतो कै तू लूलो बनके कबऊ नांय खतम हैबे बारे जीबन में पिरवेस करतो नरक कौ कीड़ा कबऊ नांय मरे और वहाँ की आग कबऊ नांय बुझे। और तेरौ पाँम तोय पाप के रस्ता पै लै जावे तौ बाय काटि डारियो चौंकि दोनों पांमन के रैहत भये अगर तू नरक में डारौ जाये जाकी आग कबऊ नांय भुजत, जाते तौ तेरे काजै जि अच्‍छौ होतो कै तू लंगड़ो बनके कबऊ नांय खतम हैबे बारे जीबन में पिरवेस करै। नरक कौ कीड़ा कबऊ नांय मरे और मांकी आग कबऊ नांय बुझे। और अगर तेरी सीधी आँख तोय पाप के रस्ता पै लै जाबै तौ तू बाय निकार डारियो चौंकि दोनों आँखन के रैहत भये तू नरक में डारौ जाये जाकी आग कबऊ भुजत नांय, जाते तौ तेरे काजै जि अच्‍छौ होतो कै तू काँनों बनके परमेस्‍वर के राज्‍य में पिरबेस करतो नरक कौ कीड़ा कबऊ नांय मरे और मांकी आग कबऊ नांय बुझे। हरेक आदमी नौन और आग ते सुद्ध करौ जावेगौ। “नौन तौ अच्‍छौ है। पर नौन अगर अपनों नुनखरौ पन छोड़ दैवे तौ तुम बाय दुबारा कैसै नुनखरौ बना सकतौ? नौन भौत सी चीजन के काजै लाभदायक है बैसेई तुमारो व्‍यवहार दूसरेन के काजै लाभदायक होनों चहिऐं और हर एक तै मेल-जोल के संग रहौ।” जाके बाद ईसू वहां ते उठकै यहुदिया के छेत्र में और यरदन के पार आयौ, और एक बार फिर भीड़ वाके जौरें फिर इकठ्‌ठी है गई और बू अपनी रीति के अनुसार बिनैं फिर ते परमेस्‍वर के वचन कि सिछा दैवे लगौ। तब फरीसियन नें जौरें आयकें ईसू कूं फसायवे के काजै बाते पूंछी, “का हमारौ नियम में काऊ आदमी कूं अपनी औरत कूं तलाक दैबे की छूट है।” ईसू नें बिनकूं जबाब दियो, “जा बारे में मूसा नें तुमैं का आग्‍या दयौ हतो?” फरीसियों नें कही, “मूसा नें त्‍याग पत्र लिखकै अपनी औरत कूं तलाक दैबे कौ आग्‍या दियौ हतो।” ईसू नें बिनते कही, “मूसा नें तौ तुमारे हठीले मन के कारन जि आग्‍या लिखौ हतो। पर सृस्‍टी की सुरुआत ते परमेस्‍वर नें मनुस्य ए आदमी औरत के रूप में बनांयौ है। जाके मारे आदमी अपने मा-बाप ते अलग हैके अपनी औरत के संग रैवेगौ, और बे दोनों एक सरीर होंगे। अब बे दो नांय एक सरीर हैं। जाई मारे परमेस्‍वर नें जिनैं जोड़ो है बाय आदमी अलग अलग नांय करै।” जब बे बापस घर में आये तब चेलान नें जा बात के बारे में ईसू ते पूंछी। ईसू नें बिनते कही, “जो कोई अपनी औरत कूं तलाक दैकै दूसरी औरत ते ब्याह करै तौ बू अपनी पैहली औरत के बिरोध में व्‍यभिचार करतै। और अगर औरत अपने आदमी कूं तलाक दैकै दूसरे आदमी ते ब्याह करै तौ बू अपने पैहले आदमी के बिरोध व्‍यभिचार करतै।” एक दिना कछू लोग बालकन कूं ईसू के जौरें लाये, कै बू बिनपै हात रखकै आसीरबाद दैबे, पर चेलान नें बिन लोगन कूं फटकारौ ईसू कूं जि देखकें चेलान पै गुस्सा आयी, फिर बानें नें बिनते कही, “कै बालकन कूं मेरे जौरें आन देओ, बिनैं मना मत करौ। चौंकि परमेस्‍वर कौ राज्य ऐसैन कोई है।” मैं तुमते सच कहतूं कै, “जो कोई इन बालकन की नांई परमेस्‍वर के राज्य कूं नांय अपनावे, तौ बू बामें कबऊ नांय जाय पावेगौ।” और फिर ईसू नें बालकन कूं गोदी में लियौ और बिनपै हात रखके बिनकूं आसीरबाद दयौ। ईसू जब मापै ते निकरिकें रस्ता ते जाय रयो, तौ एक आदमी वाके जौरें भागत भयौ आयौ, और बानें घुटअन गिरकें बाते पूछी, “हे भले गुरू मैं कबऊ नांय खतम हैबे बारे जीबन कूं पाबे काजै का करूं?” ईसू नें बाते कही, “तू मोय अच्‍छौ चौं कैह रयौ है? परमेस्‍वर कूं छोडकै कोई अच्‍छौ नांय। तू हुकमन नैं तौ जानतै, कै हत्‍या मत करियो, झूंठी गबाही मत दियो, व्‍यभिचार मत करियो, चोरी मत करियो, धोकौ मत दियो और अपने मा-बाप को आदर करियो।” बानें ईसू ते कही, “हे गुरू मैं इन सब हुकमन कौ पालन तौ बालकपन ते करतौ आयौ हूं।” ईसू नें बा आदमी की तरफ पिरेम ते देखिकें बाते कही, “तोय अबऊ एक और काम करवे की जरूरत है। तू जा, और जो कछु तेरे जौरें है बाय बेचके वाके पईसन कूं गरीबन में बांट दै जाकौ फल तोय सुरग में मिलेगौ और आयकें मेरे पीछे चल दै ।” जि बात सुनकें बा आदमी कौ मौंह उतर गयौ, और बू दुखी हैके चलौ गयौ चौंकि बू भौतई अमीर हतो। ईसू नें चारौ लंग कूं देखके अपने चेलान ते कही कै, “जिन लोगन कौ मन धन-दौलत की ओर लगौ रैहत है बिन लोगन के काजै परमेस्‍वर के राज्‍य में जायबो भौत कठिन है।” चेला वाकी बातनें सुनकें अचम्भे में पड़ गये, ईसू नें बिनते फिर कही, “हे मेरे बालकों परमेस्‍वर के राज्‍य में जायबो भौत कठिन है। जैसै ऊँठ सूंई के छेद में ते नांय निकर सकत, बैसेई धनबान आदमी कौ परमेस्‍वर के राज्‍य में जावे भौत कठिन है।” चेलान कूं भौतई अचम्भों भयौ और आपस में कहवे लगे, “फिर किनकौ उद्धार है सकतै?” ईसू नें बिनके मांऊ देखकें कही, “आदमी अपने आप अपनों उद्धार नां कर सकै, पर परमेस्‍वर सब कछू कर सकतै।” तब पतरस ईसू ते कहवे लगौ, “कै देख हम तौ सब कछू छोड़कै तेरे पीछे है लिये हैं।” ईसू नें बिनते कही, “मैं तुमते सच कैहतूं कै जो कोई मेरे काजै और मेरे सुभ समाचार के काजै अपनों घर, भईया, बहन, मा-बाप, अपने बालक, खेत और अपनों सब कछू छोड़तें, तौ जो कछु बानें छोड़ौ है बू जाई युग में अपनों घर, भईया, बहन, मईया, बालकन और खेतन पै सौ गुना आसीस पावेगौ, पर बाय जा युग में संसार ते दुख मिलिंगे। इतनोंई नांय पर सुरग में वाके काजै कबऊ नांय खतम हैबे बारौ जीबन है। पर भौत ते जो पैहले हैं, बे पीछे है जावेगें और जो पिछले हैं बे पैहले होंगे।” फिर ईसू अपने चेलान के संग येरूसलेम जाते भये, रस्ता में अपने चेलान ते आगे-आगे चल रयौ हतो। चौंकि बे येरूसलेम जा रये हते जाके मारे चेला अचम्भे में हते और वाके पीछे चलवे बारे डरप लगे। तब बू बिन बारह भेजे भये चेलान नें अलग लै जायकै अपने संग हैबै बारी बातन के बारे में बताबे लगौ। ईसू नें बिनते कही देखौ, “हम येरूसलेम कूं जा रये हैं, मैं, ‘मनुस्‍य कौ बेटा’ बिसबास घात ते यहुदी पिरधान पुरोहितन और सास्त्रन कूं सिखाबे बारेन के हात में सौंप दियौ जाऊंगो और बे मोय मौत की सजा सुनायकै जो यहुदी नांय बिनके हातन में मारबे काजै सौंप दिंगे। और बे मेरी हसी उड़ावेगे, मोपै थूकेगें, मोय कौड़ा मारिंगे और मोकूं मार डारिगें पर मैं फिर तीसरे दिना जीबित है जाऊंगौ।” तब जब्दी के बेटा याकूब और यूहन्‍ना नें ईसू के जौरें आयकै बिनती करत भये कही, “हे गुरू हम चाहतैं है कै जो कछु हम तोते मांगे बही तू हमारे काजै कर।” ईसू नें बिनते कही, “तुम का चाहौ कै मैं तुमारे काजै करूं?” बिन्‍नें बाते कही, “कै हमें जि अधिकार दै कै तेरे महिमा भरे राज्‍य में हम मेंते एक तेरे सिंगासन के दाहिने ओर और दूसरौ तेरे बांए बैठे।” ईसू नें बिनते कही, “तुम नांय जानतई कै, तुम का मांग रये हौ? जो दुख भरौ कटोरा मैं पीने को हूं, का तुम बाय पी सकौ? या जो बपतिस्मा मैं लैवे कूं हूं, तुम बाय लै सकतौ?” बिन्‍नें ईसू ते कही, “हम बैसा कर सकतें” फिर ईसू नें बिनते कही, “हाँ जो दुख भरौ कटोरा मैं पीवे पै हूं तुम बामें ते पीयौगे, और जो बपतिस्मा मैं लैवे पै हूं, बाय तुम लोगे। पर मेरे दांयें और बाये बैठवे की जगह दैबो, मेरे अधिकार में नांय। परमेस्‍वर नें पैहले तेई जि जगेह बिन आदमिन के काजै दई है जिनके काजै तैयार करी गई है।” जब दूसरे दस चेलान नें जि सुनी, तौ बे याकूब और यूहन्‍ना पै रिसियावे लगे। तब ईसू नें बिनकूं जौरें बुलायकै बिनते कही, “तुम जानों हौ कै जो राजा यहुदी नांय बे लोगन पै धोंस जमाय कै परभुता करतें और बिनके सरदारऊ बिन लोगन पै अपनों अधिकार जमातैं। पर तुम ऐसे नाँओं जो कोई तुम में बड़ौ बननों चाहबै बू तुमारौ सेबक बनें। जो कोई तुम में पिरधान हैबो चाहै, बू सबकौ दास बनै चौंकि मैं, ‘मनुस्‍य कौ बेटा’ जाके मारे नांय आयौ कै मेरी सेबा-टहल करी जावें, पर जा काजै आयौ हूं कै दूसरों की सेबा-टहल करूं। और भौतन के छुटकारे काजै अपनों पिरान बिनकी जगैह पै दै दऊं।” बे यरीहो में आये, जब ईसू और वाके चेला और लोगन की भीड़ यरीहो ते निकर रयी हती, तब तिमाई को बेटा बरतिमाई नाम को एक आँधरों भिखारी सड़क के किनारे बैठो हतो। बानें जि सुनी कै जे नासरत सहर कौ ईसू है, तब बू चिल्ला चिल्लायकें कहवे लगौ, “हे ईसू! दाऊद की सन्तान मोपै दया कर।” भौतसे लोगन नैं बाय फटकारौ कै चुप रहै, पर बू औरऊ जोर ते चिल्लावे लगौ, “हे ईसू! दाऊद की सन्तान मोपै दया कर।” तब ईसू नें रुककै कही, “जाय बुलायकै लाऔ।” और लोगन नें बा आन्धरे ते जायकै कही, “खुस हो जा, उठि बू तोकूं बुलाय रयौ है।” बू अपनों कम्बर फेंक के तुरन्‍त उठौ, और ईसू के जौरें आयौ। तब ईसू नें बाते कही, “तू का चाहबै कै मैं तेरे काजै करूं?” आँधरे नें ईसू ते कही, “हे गुरू जि कर कै मैं फिर ते देखबे लगूं।” ईसू नें बाते कही, “चलौ जा तेरे भरोसे नें तोकूं ठीक कर दियौ है।” और बू बाई समै देखवे लगौ, और रस्ता में वाके पीछे चल दियौ। जब बे येरूसलेम के जौरें जैतून पहाड़ के ढलान पै बसे भये बैतफगे और बैतनियां सहर के जौरें आये, तब ईसू नें अपने चेलान में ते दो कूं जे कहिकें भेजौ “सामने के गांम में जाऔ, बामें पौंहचतेई एक गधी कौ बच्‍चा बंधौ भयौ मिलेगौ जापे अब ही तक कोई नांय बेठो बाय खोलकै याँपै लै आऔ अगर कोई तुम तै पूछे जि चौं करि रये हौ तौ तुम बाते कहियों कै, पिरभू ईसू कूं जाकी जरुरत है और बू जल्दी ही बाय लौटा दैवेगौ।” बे गये, और गधी कौ बच्‍चा बिनै गली के बाहर घर के द्वार पै बंधौ भयौ मिलौ और बे बाय खोलिवे लगे मांपै खड़े लोगन में ते कछू लोग कैहवे लगे कै, “तुम जि का कर रये हो ओर जा गधी के बच्‍चा कूं चौं खोल रये हौ?” तब जैसौ ईसू नें बिनते कही हती बैसेई बिन्‍नें बिन लोगन ते कह दई, तब लोगन नैं बिनकूं जाने दियो फिर बे गधी के बच्‍चा कूं ईसू कै जौरें लै आये, बिन्‍नें जो कपड़ा ओढ़ के रखै हते बू गधी के बच्‍चे पै डार दये, फिर ईसू वाके ऊपर बैठि गयौ और जब बू बैठिके चलवे लगौ तब भौत ते लोगन नें वाके सम्मान में अपने कपड़ा रस्ता में बिछाये और कछु लोगन नें खेत में ते डालियाँ तोड-तोड के फैलाय दई। जो लोग वाके आगे-आगे जाय रये हते और पिछै चल रये हते ऊंची अबाज में के कहते जाय रये हते, “होसन्‍ना!” “धन्य हे बू जो पिरभू के नाम ते आबे है!” “हमारे पिता दाऊद को राज्‍य जो आ रयो है धन्य है!” “सुरग में होसन्‍ना!” और बू येरूसलेम पौंहचकै बडे़ पिराथना घर में आयौ और चारौ लग कूं सब चीजन कूं देखौ और फिर बू अपने बारह भेजे भये चेलान के संग बैतनियां गयौ चौंकि संजा हेबै बारी हती। दूसरे दिना जब बे बैतनियां तै निकरे तब ईसू कूं भूंख लगी और बू दूर ते अंजीर के हरे भरे पेड़ कूं देखके वाके जोरै गयौ, कै बामें तै खायवे कूं फल मिल जाबै पर पत्‍तन के अलाबा बामें कछू नांय मिलौ चौंकि फल कौ समै नांय हतो। जाके मारे ईसू नें पेड़ कूं साप दैकै कही, “जा समै तै तेरो फल कोई कबऊ नांय खाबे।” वाके चेला जि बात सुन रये हते। जब बे येरूसलेम में आये और ईसू बड़े पिराथना घर में गयौ और मांपै ते बिन लोगन कूं जो सौदे बाजी कर रये हते बाहर निकारबौ सुरू कर दयौ और बानें दूसरे देस के रुपईया कूं बदलवे बारेन की मेज और कबूतर बैचवे बारेन की चौकियाँ पलट दईं। और बानें बड़े पिराथना घर की चार दीबारी में ते होत भये काऊ कूं कछु लावे और लै जान नांय दयौ। और परमेस्‍वर के वचन की सिछा दैते भये बिनते कही, “सास्त्रन में लिखौ भयौ है, “‘कै मेरौ घर सब देसन के लोगन के काजै, बड़ौ पिराथना का घर कहलावेगौ।’ पर तुमने जाय चोरन को अड्‍डौ बना दियौ है।” और जब यहुदी पिरधान पुरोहित और सास्त्रन कूं सिखाबे बारेन नें जि सुनों और देखौ कै भीड़ ईसू की सिछा ते चकित ए और वाकी सिछाउ मानते जामारै बे ईसू ते डरके बाये मारबे कूं उपाय ढ़ूँढबे लगे। और संजा होतई बे सहर ते बाहर चले गये। फिर दूसरे दिना सबेरे जब ईसू अपने चेलान के संग जाय रहो हतो, तौ चेलान नें देखौ कै अंजीर कौ पेड़ जड़ तक सूखौ भयौ है तब पतरस कूं ईसू की बू बात याद आई और बानें ईसू ते कही, “हे गुरू देख जि अंजीर कौ पेड़ जाकूं तैने साप दियौ हतो बू सूख गयौ है।” ईसू नें बाय जबाब दियौ, “कै परमेस्‍वर पै भरोसौ रखो मैं तोते सच कहूं अगर कोई जा पहाड़ ते कहे तू उखड़ जा, और समुन्दर में जाय गिर, और अपने मन में संका नांय करे पर भरोसौ करे कै जो बानें कहि है बू हे जाबेगौ, तौ वाके काजै बैसोही है जाबेगौ। जाके मारे मैं तुम तै कहूं, कै जो कछू तुम पिराथना करिके मांगौ और भरोसौ करौ, कै बू तुमकूं मिल गयौ है बू तुम्हारे काजै है जाबेगौ। जब कबऊ तुम खडे़ हैके पिराथना करते हौ तौ अगर तुम्हारे मन में काऊ ते कोई सिकायत है तौ बाय मांफ कर देओ जाके मारे कै तुमारौ सुरगीय पिता तुम्हारे पाप मांफ कर दैवे। अगर तुम दूसरेन कूं मांफ नांय करोगे तौ तुमारौ सुरगीय पिताऊ तुमारे पापन कूं मांफ नांय करैगौ।” बे एक बार फिर येरूसलेम में आये। जब ईसू बड़े पिराथना घर के चौक में घूम रयो हतो तौ यहुदी पिरधान पुरोहित और सास्त्रन कूं सिखाबे बारे और कछु यहुदी बुजुर्ग वाके जौरें आये। और बाते पूछी, “कै तू जे काम कौन के अधिकार ते करतो है और कौन नें जि अधिकार तोकूं दियो है कै तू जि काम करे?” ईसू नें बिन तै कही, “मैं तुमते एक बात पूछतूं अगर तुम मोय जबाब देओ, तौ मैं तुमें बताऊंगो कै मैं जि काम कौन के अधिकार तै करतूं। यूहन्‍ना कूं बपतिस्मा दैवे कौ अधिकार सुरग ते परमेस्‍वर नें दयौ हतो कै आदमिन नें दयौ हतो मोय जबाब देओ?” तब बे आपस में बात चीत करिबे लगे, “अगर हम कैहवे ‘परमेस्‍वर नें सुरग ते दयौ’ तौ बू कैहवेगो ‘फिर तुमने बापे भरोसौ चौं नांय करौ।’ और अगर हम जि कैहबें ‘आदमिन नें दयौ’ तौ लोगन को डर है चौंकि भौत ते लोग मानते हते कै यूहन्‍ना सच मुच में परमेस्‍वर की ओर ते बात बताबे बारौ हतौ।” जामारै बिन्‍नें ईसू कूं उत्‍तर दयौ, “कै हम नांय जानते।” ईसू नें बिनते कही, “मैंऊ तुमकू नांय बताय रयौ जि काम कौन के अधिकार ते करतूं।” ईसू बिनते दृस्टान्‍तन में बात करिबे लगौ, “एक बार एक आदमी नें अंगूरन कौ बगीचा लगायौ। और वाके चारौ लंग बाड़ौ बांध दियौ, और फिर अंगूर कौ रस निकारवे काजै एक हौदी बनांयी और एक मचानऊ बनांयौ। और फिर कछु किसानन नैं आद बटाई पै दैकै परदेस कूं चलौ गयौ। फिर अंगूरन के पकवे के समै में बानें बिन किसानन के जौरें अपनों एक दास भेजौ, कै बू बिन पैते अंगूर के बगीचा में जो अंगूर भये है बिनमें ते वाकौ हिस्सा लियावे। पर बिन्‍नें बाय पकड़ के पीटौ और खाली हात बापिस कर दियौ। फिर बानें एक और दास कूं भेजौ, और बिन्‍नें बऊ दास की चांद फोर डारी, और वाकौ अपमान करौ। फिर बानें एक और दास कूं भेजौ, पर किसानन नैं बाय मार डारौ, तब बानें भौत से दासन कूं भेजौ और किसानन नें भौतेरेन की पिटाई करी, और भौतेरे मार डारे। अब वाके जौरें भेजवे कूं अपनों प्यारौ बेटा ही बचौ हतो, आखिर में बानें बाकूं बिनके जौरें भेजौ। बानें जि सोची कै ‘बे मेरे बेटा कौ आदर करिगें।’ “पर किसानन नें एक दूसरे ते कही, ‘जेई तौ जा बगीचा कौ बारिस है आऔ हम जाय मार डारै, तब जाकौ जि बगीचा हमारों है जावेगौ।’ और बिन्‍नें बाय पकड़कै मार डारौ और अंगूर के बगीचा के बाहर फेंक दियौ। “जापै अंगूर के बगीचा कौ मालिक का करैगौ? बू आयकें किसानों कूं मार डारेगौ और बगीचा दूसरेन कूं दै दैवेगौ। का तुमनें पबित्र सास्त्र में जि वचन नांय पढ़ौ? “‘कै जा पत्थर कूं राज मिस्त्रीन नें बेकार मानों हतो बेई सिरे कौ पत्थर है गयौ। जि हमारी नजर में अनौखो है, जाकूं पिरभू नें पूरौ करौ है।’” यहुदी नेता जि समझ गये हते कै ईसू नें जि दृस्टान्त बिनके बिरोध में कहौ है सो बे बाय पकड़वे कौ उपाय ढूढ़वे लगे पर बे लोगन ते डरपत हते, जाके मारे बाय छोड़ के चले गये। तब यहुदी नेतन नैं ईसू कूं बातन में फसायवे काजै कछु फरीसियों और हेरोदियन के गुट के लोगन कूं वाके जौरें भेजौ। और बिन्‍नें आयकै बाते कही, “हे गुरू! हम जानतै कै तू सच्‍चौ है, और लोग का कहेंगे तू जऊ बात की परबाह नांय करत चौंकि तू आदमिन कौ मौंह देखिके बात नांय करै, पर सच्‍चाई के संग परमेस्‍वर को रस्ता बतातै जामारै हम तोते पूछबो चाहतै। व्‍यबस्था के अनुसार का हमें समराठ कूं कर देनौ चहिऐं कै नांय हम दैबे या नांय दैबे?” ईसू बिनकी चाल कूं समझ गयौ और बानें बिनते कही, “मोय चौं परखतो, एक दीनार मेरे जौरें लाऔ।” बे एक दीनार लाये और ईसू नें बिनते कही, “कै जापै कौन को चेहरा और नाम छपौ है?” बिनै कही, “समराठ कौ।” ईसू नें बिनते कही, “जो समराठ कौ है बू समराठ कूं देओ, और जो परमेस्‍वर को है बाकूं परमेस्‍वर कूं देओ।” तब बे ईसू की जा बात पै भौत अचम्भों करवे लगे। जाके बाद सदूकी ईसू के जौरें आये। बे मानते हते कै मरे भयेन में ते जीबित हैबो नांय होत। बिन्‍नें ईसू ते पूंछी, हे गुरू मूसा नें हम यहुदिन काजै जि लिखौ है कै, “अगर काऊ को भईया बिना सन्‍तान के मर जाबै, और वाकी औरत रह जाबै, तौ बा आदमी कौ भईया वाकी औरत कूं ब्याह लैवे और अपने भईया के काजै वंस बढ़ाबै।” एक बार की बात है, कै सात भईया हते, बिनमें ते सबन्ते बड़ौ भईया ब्याह करबे के बाद बिना सन्‍तान के मर गयौ। जाके बाद वाके दूसरे भईया नें बा औरत ते ब्याह करौ और बेऊ बिगैर सन्तान के मर गयौ। बैसेई तीसरे भईया नेऊँ ऐसौ करौ और बऊ के संगऊ ऐसौ भयौ। और सातौ भईयन नें बा औरत ते सादी करी और बे बिना सन्तान के ही मर गये। फिर सबन के बाद बू औरतऊ मर गई। तौ फिर तू हमें बता कै, “जब सब लोगन कूं मरे भयेन में ते जीबित करौ जावेगौ तौ बा समै बू औरत कौन की होबेगी। चौंकि बू सातौन की औरत रह चुकी हती।” ईसू नें बिनते कही कै, “तुम भूल में पडे़ हो चौंकि तुम नां तौ पबित्र सास्त्र कूं जानों हो और ना परमेस्‍वर की सामर्थ कूं। चौंकि जब मरे भयेन कूं जीबित करौ जावेगौ तौ बिनमें ब्याह सादी नांय होंगे, पर बे सुरग में दूतन के समान होंगे। मरे भयेन के जी उठिवे के बारे में का तुमनें मूसा की किताब में झाड़ी की कथा में नांय पढ़ौ, कै परमेस्‍वर नें बाते कही, ‘मैं अब्राहम को परमेस्‍वर और इसहाक को परमेस्‍वर और याकूब को परमेस्‍वर हूं।’ परमेस्‍वर मरे भयेन को नांय पर जीबतेन कौ परमेस्‍वर है। सो तुम बड़ी भूल में पड़े हौ।” और यहुदी सास्त्रन कूं सिखाबे बारेन में ते एक नें आयकें बिनै बहस करते भये सुनौ, और जि जानकें कै ईसू नें बिनै अच्‍छौ जबाब दियौ, ईसू ते पूंछी, “कै सबनते बड़ी आग्‍या कौन सी है?” ईसू नें बाये जबाब दियौ, “कै सब हुकमों में ते बड़ौ आग्‍या जे है, “‘हे इसरायल सुन! हमारे परमेस्‍वर कूं छोड़िके, कोई पिरभू नांय है। और तू अपने पिरभू परमेस्‍वर ते, अपने पूरे मन ते, पूरी आतमा ते, अपनी सबरी बुद्धी ते और अपनी सबरी सक्‍ती ते, पिरेम रखियों।’ दूसरों आग्‍या जि है, ‘कै अपने पड़ोसी ते, अपने आप की तरैह ते पिरेम रखियों।’ इन दोनों हुकमन ते बड़ौ कोई आग्‍या नांय।” तब सास्त्रन कूं सिखाबे बारे नें बाते कही, “हे गुरू! भौत अच्‍छौ जबाब दियौ है, तैने सच कही कै परमेस्‍वर एक ही है और बाय छोड़ और कोई परमेस्‍वर नांय है। और बाते पूरे मन ते, पूरी आतमा ते और अपनी सबरी बुद्धी ते और सबरी सक्‍ती ते पिरेम रखियों और अपने पड़ोसी ते अपने आप की तरैह ते पिरेम रखियों जि सबई होमबलि और बलिदानन ते बढ़कें है।” जब ईसू नें देखौ, कै बानें समझदारी के संग जबाब दियौ है, तौ ईसू बाते बोलौ “तू परमेस्‍वर के राज्‍य ते दूर नांय।” जाके बाद काऊ और नें सबाल पूंछवे की हिम्मत नांय करी। जाके बाद ईसू नें बड़े पिराथना घर में परमेस्‍वर के वचन की सिछा देते भये जि कही, “सास्त्रन कूं सिखाबे बारे जि चौं कहवें कै मसीह दाऊद के कुल कौ है? दाऊद नें खुद ही पबित्र आतमा में हैकें कही है, “‘पिरभू नें मेरे पिरभू ते कही, मेरे दाहिने बैठ। जब तक कै मैं तेरे बैरियन कूं, तेरे पाँमन के नीचे नांय करि दऊँ।’ दाऊद तौ खुद ही बाय पिरभू कहै है, फिर मसीह दाऊद के कुल कौ कैसे है सकै?” और भीड़ के लोग भौत आनन्द ते वाकी बातें सुनत हते। बानें अपनी सिछा में बिनते कही, सास्त्रन कूं सिखाबे बारेन ते सावधान रहौ, बे लम्बे चोगे पहने भये फिरतैं और बाजारों में नमस्‍कार चाहतैं। पिराथना घरों में और दावतन मेंऊं मुख्‍य जगह ही चाहतै। बे बिधबान की सम्पंत्‍ती हड़प जावें। और दिखावे काजै बे लम्बी-लम्बी पिराथनांयें करते रहतें इन लोगन कूं परमेस्‍वर ज्‍यादा दन्‍ड दैवेगौ। ईसू दान पेटी के सामने बैठो भयौ देख रहो हतो कै लोग दान पेटी में धन डारि रये है और अमीर लोगन नें भौत सो धन डारौ। फिर एक गरीब बिधबा आयी और बानें बामें दो सिक्‍के डारे जाकी कीमत एक पैसे ते कम हतीं। तब बानें अपने चेलान कूं जौरें बुलायौ और बिनते कही, मैं तुमते सच कहूँ अमीर लोगन के द्वारा दान पेटी में डारौ गयौ दान ते जा गरीब बिधबा कौ जि दान सबनते बढ़कें है। चौंकि इन सबन नें तौ अपनी बढ़ती में ते डारौ है पर जाने अपनी घटी में ते जो कछू वाकौ हतो मतलब बानें अपने जीबन की सबरी जीबिका डार दई। जब बू बड़े पिराथना घर ते निकर रयौ हतो तौ वाके चेलान में ते एक नें बाते कही, “हे गुरू! देख जि पत्‍थर और भवन कितने अनोंखे है।” ईसू नें बाते कही, “तुम जि बड़े-बड़े भवन देखतों पर य्हांपै जा भवन कौ एकऊ पत्‍थर नांय बचौ रेहबेगौ जो गिरायौ ना जाबैगौ।” ईसू जब जैतून के पहाड़ पै बैठकै बड़े पिराथना घर कूं देख रयौ हतो तब पतरस, याकूब, यूहन्‍ना और अन्द्रियास नें अलग जायकै बाते पूछी, “हमें बता के जि बात कब हुंगी? और जब जि बात पूरी हुगीं तौ बा समै ते पैहले कौन सी बातन तै हमें पतौ चलेगौ।” ईसू बिनते कहवे लगौ, “सावधान रहो! कोई तुमें गुमराह नांय कर पाबै। भौतई लोग मेरे नाम ते आयकें अपने आप कूं कहिंगे, कै ‘मैं मसीह हूं’ और भौतन कूं गुमराह करिंगे। और जब तुम लड़ाईयों की चर्चा सुनों तब घबरईयों मत चौंकि इनकौ हैबौ जरूरी है। पर बा समै अन्‍त नांय होबेगौ। चौंकि एक कुल दूसरे कुल पै और एक राज्‍य दूसरे राज्‍य पै चढ़ाई करैगौ और भौत सी जगहन पै भूचाल होंगे और अकाल पड़ेंगे। जि तौ बच्‍चा पैदा होवे ते पैहले मा कूं हैबै बारे पैहले दर्द कै जैसौ है। “पर तुम अपने बारे में सावधान रहियों, चौंकि लोग तुमें पंचायतों में सौंपेगे और तुमें यहुदी पिराथना घरन में पीटिंगे और मेरे कारन तुम दीबान और राजाओं के आगे खड़े करे जाओगे। जि तुमारे काजै बिनै सुभ समाचार सुनाबे कौ अच्‍छौ मौकों है। पर जरूरी है कै इन बातन ते पहलै सुभ समाचार सब देसन के लोगन में पिरचार करौ जाबै। जब बे तुमें लै जायकै पूँछ ताछ करवे कूं सौंपेगे तौ तुम कछु चिन्ता मत करियों कै हम का कहिगें, पर परमेस्‍वर ते मिलौ भयौ आतमा बाई समै तुमें बताबेगौ और तुम बुई बोलियों चौंकि बोलवे बारे तुम नांऔ पर परमेस्‍वर ते मिलौ भयौ पबित्र आतमा होगौ। “भईया-भईया कूं बिसबास घात करिकें मरबा डारेगौ और बाप-बेटा कूं बिसबास घात करिकें मरबा डारेगौ। बालक मा-बाप के बिरोध में हैके बिनै मरबा डारिंगे। मेरे नाम के कारन सब लोग तुमते घृना रखिंगे, पर जो अखिर तक भरोसौ रखेगौ बई कौ उद्धार होबेगौ। “जब तुम असुद्ध करवे बारी घृनित चीजों को जहां बे नांय होनी चहिऐं मांपे देखौ तब बे लोग जो यहुदिया में हों पहाड़न पै भाग जाबै। (पढ़वे बारौ इन बातनें खुद समझ लैबे।) जो लोग अपने घर की छत पै होबै, बे तुरन्‍त नीचे उतरें और पहाड़न पर भाग जायें पर अपने घर में कछु भी लावे काजै नांय जायें। बैसेई जो लोग बाहर खेतन में होबै बू पीछे मुड़कै अपनों चद्‍दरा तक नांय लैबै, बस भागै। बिन औरतन काजै बू दिना भौत भयानक होंगे जो पेट ते होंगी या जिनके दूध पीवे बारे बच्‍चा होंगे। पिराथना करै करौ, कै जि सब जाड़ेन में नांय होबै। बिन दिनान में ऐसे कलेस आवेगौ, जब ते परमेस्‍वर नें जा सृस्‍टी कूं बनांयौ है, तब ते ना तौ कबऊ आज तक आयौ और ना कबऊ आवेगौ। और अगर पिरभू नें बिन दिनान कूं घटायौ नांय होते, तौ कोई आदमी जीबित नांय बचतो, पर परमेस्‍वर नें अपने चुने भये लोगन के कारन बिन दिनान कूं घटायौ। “बा समै अगर कोई तुमते कैहवे देखौ मसीह य्हां है या देखौ वहां है तौ भरोसौ मत करियों। चौंकि बा समै झूंठे मसीह और परमेस्‍वर के बारे में झूंठी बात बतायबे बारे लोग दिखाई दिंगे और बे कछू ऐसे निसान और अद्‍भुत काम दिखायेंगे। सायद बे परमेस्‍वर के चुने भयेन कूं गुमराह करवे की कोसिस करिंगे। जाके मारे तुम सावधान रहियो, देखौ मैनें तुमें पैहले तेई जि सब बात बता दयी हैं। “बिन दिना में, बा कलेस के बाद, “सूरज रोसनी नांय दैवेगौ, और चन्दा कौ चमकबो बन्द है जावेगौ। आसमान में ते तारे गिरवे लगेंगे, और आकास की सक्‍ती हिलाई जाबेंगी। तब लोग, मोए ‘मनुस्‍य के बेटा’ कूं बड़ी सामर्थ और महिमा के संग, बादरों में आतौ भयौ देखिंगे। बा समै मैं अपने सुरग दूतन कूं भेजके धरती के जा छोर ते आकास के बा छोर तक चारौ दिसन ते अपने चुने भये लोगन कूं इकठ्‌ठो करुंगौ। “अंजीर के पेड़ ते सीखौ, जब वाकी डारी मुलायम है जातै और वाके पत्‍ता निकरवे लगतें तौ तुम जान लेतौ कै गर्मीन को समै आयवे बारौ है जाई तरैह ते जब तुम इन बातन कूं होते भये देखौ तौ जान लियौ कै बू समै जौरें आ पौहचों है बल्कि द्वार पैई है। मैं तुमते सच कह रयौऊं कै निस्चित रूप ते जा पीढ़ी के लोगन के मरबे ते पैहलै जि बातें हौ जावेगीं। धरती और आकास हमेसा नांय रहेंगे पर मेरी बोली भयी बातें हमेसा बनीं रैहबेंगी। “बू दिना और बू समै कब आबेगौ वाके बारे में कोई नांय जान्त, ना सुरग दूत और ना ‘बेटा’ कूं पर केबल परम पिता परमेस्‍वर ही जानतें। जागते रहौ और साबधान रहौ चौंकि तुम नांय जानौ हौ कै जि समै कब आबेगौ। “जि ऐसे होबेगौ जैसे एक आदमी परदेस जाते समै अपनों घर छोड़कै अपने दासन कूं अधिकार दैकै जाते। बो हरेक कूं वाकौ काम दै जावें और चौकीदार कूं जि आग्‍या दैवे कै बू जागतौ रैवे। जाके मारे तुमऊं जागते रहौ, चौंकि घर कौ मालिक ना जाने कब आ जावें, सांम कूं या आधी रात कूं या मुरगा के बांग दैवे के समै या फिर सुवह कूं ऐसो नांय होबै कै बू एक दम ते आयकें तुमकूं सोतो भयौ पावें। और जो मैं तुमते कहु हूं बुई सबनते कहूँ जागते रहो।” दो दिना के बाद फसह और बिना खमीर की रोटी के तोहार के दिना आयबे बारे हते। जामें यहुदी पिरधान पुरोहित और सास्त्रन कूं सिखाबे बारे ईसू कूं पकरकै मार डारबे कौ उपाय ढूँढ रये हते पर बे आपस में कहि रये हते कै जि काम हम तोहार के दिनान में नांय कर सकते, ऐसो करवे पै लोगन में बबाल मच जावेगौ। जब ईसू बैतनियां में सिमौन के घर के में खानों खाबे बैठो हतो, जि बुई सिमौन है जो पैहले कोढ़ी हतो। तबई एक औरत संगमरमर के बरतन में सुद्ध जटामांसी को भौत मंहगो इत्र लैके आई। और बानें बा बरतन कौ मोंह खोलकें इत्र ईसू के सिर के ऊपर उड़ेल दियो। मांपे कछु लोग रिसियाय के कैहवे लगे, “जाने इत्र को सत्‍यानांस करदौ। जि इत्र तीन सौ दीनार ते ज्‍यादा में बिक सकतौ और बू पईसा गरिबन में बांटो जा सकतो।” और बे बा औरत कूं बुरी तरह ते झिड़कबे लगे। तब ईसू नें कही, “बाय चौं परेसान कर रये हो बाय छोड़ देओ। बानें तौ मेरे संग भलौ करौ है। गरीब तौ तुमारे संग हमेसा रहिंगे, तुम जब चाहौ बिनकी मदद करि सकतौ पर में तुमारे संग हमेसा नांय रहूंगौ। जा औरत नें बेई करौ है जो बू कर सकत हती। बानें मेरे गाढ़े जायबे की तैयारी तै पैहले ही मेरी देह पै इत्र डारो है। मैं तुमते सच कैहतूं, ‘सारे संसार में झां कऊँ सुभ समाचार पिरचार करौ जाबेगौ मांपै जा औरत कूं याद करके जाके जा काम की चर्चा करी जाबैगी।’” तब यहूदा इस्करियोती जो ईसू के बारह भेजे भये चेलान में ते एक हतो। बू यहुदी पिरधान पुरोहितन के जोरै ईसू कूं पकरबाबे काजै बिनते बात चीत करवे कूं गयौ। बे जि बात सुनिकें भौतई खुस भये और बिन्‍नें यहूदा कूं धन दैवे को बादा कर दियो और यहूदा ईसू कूं पकरबाबे को मोकौ ढ़ूढ़िवे लगौ। बिना खमीर की रोटी के तौहार के एक दिनां पैहले, जब फसह के तौहार पै भेड़ के बच्‍चे कूं बलि करौ जातौ, बा दिना चेलान नें ईसू पूछी, तू का चाहबै के हम कहाँ पै जायकै तेरे काजै फसह को भोजन तैयार करें। तब बानें अपने चेलान में ते दो चेलान कूं जि कैहके भेजौ कै “नगर में जाऔ मांपे एक आदमी पानी को घड़ा उठाये भये मिलेगौ वाके पीछे चल दियो। और बू जा घर में जाबे बा घर के मालिक ते कहियों कै ‘गुरू नें कही है, “मेरे काजै बैठक को कमरा कहाँ है? जामें में अपने चेलान के संग फसह को भोजन खाऊंगौ।”’ बू तुमकूं सजो सजायौ और तैयार करौ भयौ ऊपर कौ एक बड़ौ कमरा दिखावेगौ मांपे हमारे काजै तैयारी करियों।” तब चेला निकर के नगर में आये, ईसू नें बिनते जैसौ कहौ हतो मांपे सब कछू बैसौई मिलौ, और मांपे बिन्‍नें फसह के भोजन की तईयारी कर लयी। जब सांज हे गयी, तौ ईसू अपने बारह चेलान के संग आयौ। और जब बे बैठ के भोजन कर रये हते, तब ईसू नें कही, “मैं तुमते सच कैहतूं के तुम में ते एक जो मेरे संग भोजन करि रहौ है, बू मेरे संग बिसबास घात करिकें मोय पकड बावेगौ।” जाते बे दुःखी भये और बे एक-एक करिके पूछिवे लगे “का बू मैं तौ नांऊ?” ईसू नें बिनते कही, बू तुम बारहन में ते एक है, जो मेरे संग रोटी कूं जा कटोरे में डुबोयकै खाय रहो है। चौंकि मैं, “मनुस्‍य के बेटा” कूं तौ मरनों ही है जैसो कै मेरे बारे में सास्त्रन में लिखौ भयौ है बैसेई होनों है पर बा आदमी के संग भौत भयानक होबेगौ, जो मुझ, “मनुस्‍य के बेटा” के संग बिसबास घात करैगौ। बा आदमी के काजै कितनों अच्‍छौ होतो के बू पैदा ही न होतौ। जब बे खानों खाई रये हते, “तो ईसू नें रोटी लयी और परमेस्‍वर कौ धन्यबाद करिकें तोरी, और बिनें दयी और कहि लेउ जि मेरी देह है।” फिर बानें प्याला लयो और परमेस्‍वर कौ धन्यबाद करिके बिनें दियो और बिन सबन्‍ने पीयौ। और ईसू नें बिनते कही, “जि मेरौ बू खून है जो परमेस्‍वर की नई बाचा को सबूत है। जो भौतन के पापन की मांफी काजै बहायौ जावते।” मैं तुमते सच कैहतूं कै अंगूर कौ रस बा दिना तक फिर कबऊ नांय पीऊंगो, जब तक परमेस्‍वर के राज्‍य में नयौ ना पीऊं। फिर बे भजन गायके जैतून के पहाड़ पै चले गये। तब ईसू नें अपने चेलान ते कही, “तुम सब को भरोसौ डगमगा जाबेगौ, चौंकि लिखौ है, “‘के मैं चरबाहे कूं मारूंगो, और भेड़ तितर-बितर है जायेंगी।’ पर जी उठिवे के बाद मैं तुमते पैलेई गलील कूं चलौ जाऊंगो।” जापै पतरस नें कही, “चाहे सब अपनों भरोसौ खोय दे पर मैं नांय खोऊंगो।” ईसू नें पतरस ते कही, “मैं तोते सच कहूँ के तू आज रात कूं मुरगा के दो बार बांग देबे ते पैहले तू तीन बार मोय पहचानवे ते इनकार करैगौ।” जापै पतरस नें और जोर दैकै कही, “मोय तेरे संग मरनों परै तौऊं तोय पहचानबे ते इनकार कबऊ नांय करूंगो।” तब दूसरे सब चेलान नें ऐसेई कही। फिर बे गतसमनी नाम की एक जगह में आये, और ईसू नें अपने चेलान ते कही, “जब तक मैं पिराथना करूं तुम य्हां बैठे रहो।” और बू पतरस, याकूब, और यूहन्‍ना कूं अपने संग लै गयौ। ईसू भौत दुःखी और ब्याकुल है रयो हतो। ईसू नें बिनते कही, मेरौ मन भौत दुःखी है, जैसे कै मैं मरबे बारो हूं, तुम यहीं रुकौ और जागते रहो। और बू थोड़ी दूर चला फिर धरती पै झुककै पिराथना करिबे लगौ कै यदि है सकै तौ जि घड़ी मोपै ते टल जाये। और फिर ईसू नें कही, “पिता! हे मेरे पिता! तू सब कछु कर सकतें। जा दुख भरे प्याले कूं मेरे आगे ते हटा लै। पर फिरऊ मेरी नांय तेरी इच्छा पूरी हो।” फिर ईसू अपने चेलान के जौरें आयौ और बिनैं सोबतौ भयौ देखकें पतरस ते बोलो, “हे सिमौन तू सोय रयो है? का तू एक घन्‍टाऊ नांय जग सकौ? जागते रहो और पिराथना करते रहो के तुम काऊ परीछा में नांय परौ। आतमा तौ तईयार है पर सरीर कमजोर है।” फिर बू चलौ गयौ और बैई बात कहिकें पिराथना करी। जब बू चेलान के जौरें दुबारा आयों तौ बानें फिर बिनैं सोबतौ भयौ पायौ। बिनकी आँखन में नींद भरीं हती। बिनैं कछू सूझ नांय रहो, कै बे बाकूं का उत्‍तर दें। ईसू जब तीसरी बार अपने चेलान के जौरें आयौ, और बिनते कही, “का तुम अबऊ सोय रये हौ और आराम कर रये हो? भौत भयौ। देखौ अब बू समै आय गयौ है कै मैं, ‘मनुस्‍य कौ बेटा’ बिसबास घात करिके पापिन के हातन में पकरबायौ जाऊंगौ। खड़े हे जाऔ, आऔ चलौ देखौ, मेरे संग बिसबास घात करिबे बारो पकरबाबे बारौ आय रयो है।” ईसू जि कहि ही रयो हतो, कै यहूदा जो भेजे भये चेलान में ते एक हतो, अपने संग लठिया और तलबार लये भये एक भौतु बड़ी भीड़ लैके आयों, यहुदी पिरधान पुरोहितन नें, सास्त्र सिखाबे बारेन और बुजुर्ग यहुदी नेतन नें भेजौ हतो। ओर ईसू के पकरबाबे बारे नें बिनैं पैहले तेइ बताय दयी हती, कै जाय मैं चूंमू बाय सावधानी ते पकर के लै जईयों। यहूदा नें तुरन्त ईसू के जौरें आयकै कही, “हे गुरू!” और बाकूं चूंमौ। तब बिन लोगन नें ईसू कूं गिरफ्तार कर लयौ। जापे ईसू के जौरें खडे़ भये चेलान में ते एक चेला नें तलबार निकारकै यहुदी महा पुरोहित के दास कौ कान काट दियौ। ईसू नें बिनते कही, “का, तुम मोय डाकू समझ रये हौ, जो मोय पकरवे काजै तलबार और लठिया लैके आये हो। मैं तौ रोजाना बड़े पिराथना घर में तुमें सिछा देतौ, तब तुमने मोय गिरफ्तार नांय करो, पर जि जामारै भयौ है कि सास्त्र में जो लिखौ भयौ है बू पूरौ है जाय।” फिर वाके सब चेला बाय अकेलौ छोड़कै भाग गये। एक जबान अपनी नंगी देह पै चद्‍दरा ओढ़कै ईसू के पीछे आय रहो हतो। लोगन नें बाय पकरिबौ चाहौ पर बू अपनों चद्‍दरा छोड़कै नंगौ भाग गयौ। बे ईसू कूं यहुदी महा पुरोहित के घर में लै गये। मांपै सिगरे यहुदी पिरधान पुरोहित, और सास्त्रन कूं सिखाबे बारे और बुजुर्ग यहुदी नेता इकठ्‌ठे हते। पतरस बाते दूरई दूर ते वाके पीछे-पीछे यहुदी महा पुरोहित के आंगन में भीतर तक पौहच गयौ, और पेहरेदारों के संग बैठकै आग तापवे लगौ। सिगरे पिरधान पुरोहित और यहुदी पंचायत ईसू कूं मार डारबे काजै वाके बिरोध में गबाही ढ़ूंढ रये हते, पर कोई गबाह नांय मिलौ। भौतों नें वाके बिरोध में गबाही दयी। पर बिनके बयान मेल नांय खाते। तब कछू लोग खड़े है गये और जि कैहते भये झूंठी गबाही दयी, “हमनें जाकूं जि कैहते भये सुनौ है कै ‘मैं हात के बने भये बड़े पिराथना घर कूं गिराय दुंगो और तीन दिना के भीतर एक दूसरो बड़े पिराथना घर बनांय दुंगो जो हात को बनों भयौ नांय होगो।’” पर जाऊ में बिनके सब बयान मेल नांय खाते। तब यहुदी महा पुरोहित नें सभा के बीच में खडे़ हैके ईसू ते पूछी, जे लोग तोपै दोस लगा रये है, का तोय जाके उत्‍तर में कछू नांय कैहनों। पर ईसू चुपचाप रहो और, बानें कोई उत्‍तर नांय दियौ। “महा पुरोहित नें फिर पूछी, का तू पबित्र परमेस्‍वर कौ बेटा मसीह है?” ईसू नें जबाब दियौ, “मैं हतूँ। तुम मुझ, ‘मनुस्‍य के बेटा’ कूं सर्वसक्‍तिमान परमेस्‍वर के दाहिनी ओर बैठौ और सुरग में बादरन के संग आतों भयौ देखोगे।” तब महा पुरोहित नें कपड़ा फाड़ते भये कही, “अब हमें गबाहों की का जरूरत है? ‘तुम लोगन नें जाते परमेस्‍वर की निन्दा की बात सुनी है, तुमारी का राय है?’” तबई सिगरे बोले जाय मौत की सजा मिलनी चहिऐं। तब कछू लोग बापे थूकवे लगे और वाकी आँखन पै पट्‍टी बांधकै जि कैहते भये बाय घूंसा मारते और वाकी हसी उडाबते कै, “यदि तू नबी हे, तौ बता तोय किन्‍नें पीटौ है!” और फिर पैहरेदारन नेंऊ बाय पीटौ। पतरस जब नीचे आंगन में ही बैठो हतो तब यहुदी महा पुरोहित की एक दासी आयी। और बानें पतरस कूं आग तापत भये बड़े गौर ते देखौ। और बू बोली, “तू भी नासरत सहर के ईसू के संग हतो।” पर पतरस नें मनें करके कही, “मैं बाय नांय पैहचान्‍त, मेरी समझ में नांय आ रयी कै तू का कह रयी है,” जि कैहते भये बू आंगन की देहरी तक चलौ गयौ, और तब मुरगा नें पहली बांग दयी दासी पतरस कूं देखकें फिर मांपे खडे़ लोगन ते कहवे लगी, के जि आदमी बिनमें ते एक हते। पतरस नें फिर पहचानवे ते मनें कर दयी। फिर मांपे खडे़ भये लोगन्‍ने पतरस ते कही निस्चय तू बिनमें ते एक है चौंकि तू गलील को रैहबे बारौ है। तब पतरस नें कही, मैं सौगन्ध खायकें कैहतूं अगर मैं झूंठ बोलूँ तौ मोपै स्राप पड़ै। जाकी तुम बात कर रये हो मैं वाकूं नांय पैहचान्‍त। तबई मुरगा नें दूसरी बांग दयी, पतरस कूं बू बात याद आयी जो ईसू नें बाते कही हती, कै मुरगा दो बार बांग देबेगौ बाते पैहले तू तीन बार मनें कर देगौ कै मोय नांय पैहचान्‍त। बू फूट-फूट के रोबे लगौ। और सबेरो होतई यहुदी पिरधान पुरोहित ओर बुजुर्ग यहुदी और सास्त्रन कूं सिखाबे बारेन नें और सिगरी यहुदी पंचायत नें मिलके ईसू कूं बंधबायौ, और लै जायकै रोमी राज्‍यपाल पिलातुस के हातन में सौंप दियो। पिलातुस नें बाते पूछी, “का तू यहुदियन कौ राजा है?” ईसू नें बाय जबाव दियौ, “तू खुदई तौ कह रयौए।” और यहुदी पिरधान पुरोहित बापे भौत बातन कौ दोस लगाय रये हते। पिलातुस नें बाते फिर पूछी, का तोय कछू उत्‍तर नांय दैनों? जे तोपे कितनीं बातन को दोस लगाय रये है। ईसू नें फिरऊ कछू उत्‍तर नांय दियो, जापै पिलातुस कूं भौत अचम्भों भयौ। और फसह के तोहार के दिन पिलातुस काऊ एक बन्दी कूं जाय लोग चांहते, बिनके काजै छोड़ि दयो करतो। बाई समै बरअब्बा नाम कौ एक आदमी बलबा करवे बारेन के संग पिलातुस की कैद में हतो। जानें बलबा में एक आदमी कूं मार दियौ हतो। भीड़ पिलातुस के जौरें आयकें कहिवे लगी कै, “जैसो तू हमारे काजै हर साल एक कैदी कूं छोड़तो आयौ हे बैसौई कर।” पिलातुस नें बिनते पूंछी, “का तुम चाहतौ कै मैं तुम्हारे काजै यहुदियन के राजा कूं छोड़ दूं?” चौंकि बू जानतो कै यहुदी पिरधान पुरोहित नें जलन ते ईसू कूं पकरबायौ है। पर यहुदी पिरधान पुरोहित नें लोगन कूं उकसायौ, कै बू बरअब्बा कूं अपने काजै छोड़ दैवे की कहें। पिलातुस नें भीड़ ते फिर पूछी, “जा आदमी कौ का करूं, जाय तुम यहुदियन के राजा कहतौ?” भीड़ चिल्‍लायकै कैहबे लगी, “बाकूं क्रूस पै चढ़ाय दे।” पिलातुस नें बिनते पूछीं, “जाने का अपराध करौ है?” पर बे औरऊ जौर ते चिल्लायकै कहिवे लगे, “जाय क्रूस पै चढाय दै।” तव पिलातुस नें भीड़ कूं खुस करिबे काजै बरअब्बा कूं छोड़ दियौ और ईसू कूं कोड़े लगबायकै क्रूस पै चढ़ाबे काजै सौंप दियौ। और फिर सिपाही बाय किले के आंगन में लै गये, और बिन्‍नें सबरी पलटन कूं बुला लियौ। और बिन्‍नें बाकूं बैंगनी रंग की साही पोसाक उड़ायी और सर पै काँटेन को मुकुट बनांयकें पहनांयौ। और वाकौ मजाक बनांयकें बाते नमस्‍कार करिवे लगे, “के है यहुदियन के राजा, नमस्‍कार।” और बे वाकी सर पै सरकन्‍डे मारते जा रये हते, और बापे थूंक रये हते, और घुटनों के बल झुककै, बे बाय नमस्‍कार करते जा रये हते। और जब बे वाकौ मजाक उड़ाय चुके, तौ बा पैते साही पोसाक उतारिके फिर ते बायी के कपड़ा पहिनांये, और ईसू कूं क्रूस पै चढायवे काजै बाहर लै गये। कुरेन को रैहबै बारौ सिमौन नाम को आदमी जो गांम ते आय रहो हतो। बू सिकन्दर और रुफुस को पिता हतो, सिपाइयन नें बाय बेगार में पकरौ कै बू ईसू कौ क्रूस उठकै लै चलै। फिर बे ईसू कूं गुलगत्‍ता नाम की जगह पै जाकौ मतलब “खोपडी की जगैह हतो” लै लाए। और बे बाकूं मुर नाम की दबाई मिलौ भयौ अंगूर कौ रस पीबे काजै दैवे लगे पर ईसू नें बाय नांय लयौ। और तब बिन्‍नें ईसू कूं क्रूस पै चढायो और वाके कपड़न कूं परची डारकै बांट लियौ। जब बिन्‍नें ईसू कूं क्रूस पै चढायो बा समै दिन के नौ बजे हते। और बाको दोस पत्र लिखकै वाके ऊपर लगा दियो गयौ “यहुदीयन का राजा।” और ईसू के संग दो डाँकू क्रूस पै चढाए गये हते एक वाके सीदे हात मांऊ और एक वाके उल्टे हात मांऊ। तब धर्मसास्त्र को बू वचन कै “बु अपराधिन के संग गिनो गयौ पूरौ भयौ।” रस्ता में जायवे बारे लोग अपनी सर हिला हिलाय के, “जि कैहकै बाको अपमान कर रये हते के बड़े पिराथना घर के ढायवे बारे और तीन दिन में बनावे बारे क्रूस पैते उतरकै खुद कूं बचा लै।” जाई रीति ते यहुदी पिरधान पुरोहित और सास्त्रन कूं सिखाबे बारेन नें लोगन के संग ईसू की खिल्ली उडाई, और आपस में खिल्ली उडायके के कहते हते के “औरन कूं बचायवे बारौ खुद कूं नांय बचाय सकौ। जि तौ ‘मसीह’ इसरायल कौ राजा है। अब जि क्रूस पैते उतरै तौ हम जि देखकै भरोसौ करें।” और जो डाँकू ईसू के संग क्रूस पै चढ़ाये गये हते बेऊ वाकौ अपमान कर रये हते। और दुपहर होतई बारह बजे ते तीन बजे तक पूरे देस में अंधेरौ छायौ रयौ। तीन बजे ईसू नें पुकार के कही, “एलोई! एलोई! लामा सबक्तनीं” जाकौ मतलब है, “हे परमेस्‍वर, हे परमेस्‍वर, तैने मोय चौं छोड़ दियो?” जि सुनिकै जौरें खड़े लोगन में ते कछुन नें कही, “सुनो! जि एलियाह कूं बुलाय रहो है।” तब एक आदमी भागकें सिरका में डुबोयो भयौ सोख्ता एक सरकन्डे पै रखके लायौ और ईसू कूं चुसायकै कहवे लगे, “रुको, देखें कै जाय नीचे उतारबे एलियाह आवते कै नांय।” तब ईसू नें बड़ी अबाज ते चिल्लायकें अपने पिरान छोड़ दिये। और बड़े पिराथना घर कौ परदा ऊपर ते नीचे तक फटकै दो टुकड़न में है गयौ। जो सूबेदार वाके सामने खड़ो हतो, जब बानें ईसू कूं चिल्लायकें पिरान छोड़ते भये देखौ तौ बानें कही, “सचमुच जि आदमी, परमेस्‍वर को बेटा हतो।” कछू औरतें दूर ते खड़ी भई जि देख रही हतीं। बिनमें मरियम मगदलीनी और छोटे याकूब की और योसेस की मईया मरियम और सलोमी हती। जब ईसू गलील में हतो तौ जि औरतें वाके संग रैहके वाकी सेबा-टहल करती हतीं औरऊ भौत सी औरतें हतीं जो ईसू के संग येरूसलेम में आई हती। जब सन्जा हे गई बू दिनां यहुदिन के आराम दिन ते एक दिन पैहले कौ तैयारी को दिना हतो। अरिमतिया को रैहबै बारो यूसुफ आयौ, बू यहुदी पंचायत कौ सम्मानित सदस्‍य हतो और परमेस्‍वर के राज्‍य के इन्तजार में हतो बू हिम्मत के संग पिलातुस के जौरें गयौ बाते ईसू की ल्हास मांगी। पिलातुसऐ अचम्भौ भयौ, कै बू इतनी जल्दी कैसे मर गयौ और सूबेदार कूं बुलायकै बाते पूछी, “कै का बाकूं मरे भये देर हे गई?” फिर बानें जब सूबेदार ते हाल जान लियो तब यूसुफ कूं ईसू की ल्हास लै जावे की आग्‍या दै दई। तब बानें एक पतरो मल मल कौ चादर खरीदौ और लास कूं उतार के मलमल के चादर में लपेटौ और एक कब्र में जो चट्टान में खोदी गई हती बामें रख दियौ और कब्र के मौंह पै एक बड़ौ पत्थर लुढकायकै रख दियौ। मरियम मगदलीनी और योसेस की माता मरियम देख रही हती के ईसू कूं कहाँ रखौ गयौ है। जब यहुदिन कौ आराम दिन बीत गयौ, तब मरियम मगदलीनी और याकूब की माता मरियम और सलोमी नें ईसू की लास पै लगाबे कै काजै खुसबूदार चीज खरीदी और सप्‍ताह कै पैहले दिन इतबार कूं सुबह सुबह जब सूरज निकरौ तौ बे कब्र पै आई। बे आपस में कह रही हतीं, “के हमारे काजै कब्र के द्वार पैते इतनों बड़ौ पत्‍थर कौन हठाबेगौ?” जब बिन्‍नें देखौ के पत्‍थर लुढको भयौ रखौ है और बू पत्‍थर भौत बड़ौ हतो। बे कब्र के भीतर गईं और देखके चकित रह गयी, बिनैं मांपै सीदे हात की तरफ सफेद कपड़ा पहने भयौ एक जबान बैठौ भयौ देखौ। फिर बा जबान नें कही, “कै डरपो मत, तुम बा नासरत सहर के ईसू कूं ढ़ूंढ रयी हौ, जो क्रूस पै चढ़ायौ गयौ हतो, बू तौ जीबित है गयौ है। अगर भरोसौ नांय तौ देखौ जि बैई जगह है जहाँ बाय रखौ गयौ हतो। तुम य्हांते जाऔ और वाके चेलान ते और पतरस ते कहौ, ‘कै बू तुमते पैहले गलील कूं पौहच जाबेगौ’ जैसौ बानें तुमते कही हती तुमें बू मंईं पै मिलेगौ।” बे अचम्भित हैके कांपती भईं कब्र ते निकरकै भाग गयीं और बिन्‍नें डरके मारै काहू ते जि बात नांय बताई। चौंकि बे सच मुच डर गईं हती। सप्‍ताह के पैहले दिना इतबार की सुबह में ईसू जी उठवे के बाद, सबनते पैहले मरियम मगदलीनी कूं दिखाई दियौ जामें ते बानें सात दुस्‍ट आतमांऐं निकारी हती। मरियम नें जायकै ईसू के संगीन कूं, जो सोक में डूबे, रोय रये हते जि खबर दई। जब बिन्‍नें जि सुन कै ईसू मसीह जीबित है गयौ है और मरियम कूं दिखाई दयौ है तौ जापै बिन्‍नें भरोसौ नांय करौ। जाके बाद ईसू दूसरे रूप में दो चेलान कूं दिखाई दयौ, जब बे गांम कि ओर जाय रये हते। बिन्‍नें लौटकै दूसरे चेलान ते कही पर बिन्‍नें बिनकौ भरोसौ नांय करो। जाके बाद में जब बे ग्‍यारह भेजे भये चेला खानों खाय रये हते ईसू बिनके आगे परगट भयौ और बानें बिनमें अबिसबासी और मन की जड़ता के काजै फटकारौ। चौंकि बिन्‍नें बिनपै भरोसौ नांय करौ हतो, जिन्‍नैं बाय जी उठवे के बाद देखौ हतो। और ईसू नें बिनते कही, “कै पूरे संसार में जायकै सारी दुनियां के लोगन में सुभ समाचार पिरचार करों। जो कोई सुभ समाचार पै भरोसौ करैगौ और बू बपतिस्मा लैवे बाई कूं उद्धार होगौ और जो कोई सुभ समाचार पै भरोसौ नांय करैगौ बू दोसी ठहरायो जावेगौ। और भरोसौ करिबे बारेन में जे निसान हुंगे, कै बे मेरे नाम ते दुस्‍ट आतमान कूं निकारिंगे और नयी-नयी भासा बोलेंगे, बे अपने हातन ते सांप कूं पकर लिंगे और अगर बे जहर कूं पी जायें तोंऊ बिनै कोई नुकसान नांय होबेगौ, बे बीमारन पै अपने हात रखिंगे और बीमार चंगे हे जाबिंगे।” जि बात पिरभू ईसू अपने चेलान ते करि चुकौ तब पिरभू ईसू कूं सुरग में उठा लियौ गयौ। बू परमेस्‍वर के दाहिने जा बैठो। चेलान नें बाहर जायकै हर जगेह पै सुभ समाचार पिरचार करौ, और पिरभू बिनमें काम करतौ रयो। और बिन निसान के द्वारा जो संग-संग होते हते, वचन कूं दृढ़ करतो रहो। जो बात हमारे बीच में भई हैं, बिनकौ इतिहास लिखबे की भौत ते लोगन नें कोसिस करी। जोकि वचन के सेबक हैं, बिन्‍नें बू बात सुनींऐं और बिनके द्वारा हम तक पौहचीं हैं। हे स्रीमान थियुफिलुस! मोऊए जि अच्‍छौ लगौ कै, मैं इन सब बातन कूं सुरू ते सावधानी के संग तेरे काजै सही सही जाँचकें क्रमते लिखूं, जाते कै तू इन बातन्‍नें जान सकै कै, बे सबरी बात सहीऐं और अटल हैं। यहुदियन के राजा हेरोदेस के समै में यहुदी पुरोहित समाज के अबिय्याह के दल में जकरयाह नाम कौ एक यहुदी पुरोहित हतो, वाकी पत्नी हारून के बन्स की हती और वाकौ नाम इलिसिबा हतो, बू दोनों परमेस्‍वर के सामने धरमी हते और पिरभू की सबरी आग्‍या मानबे बारे और बिनपै चलबे बारे हते। बिनके कोई औलाद नांय हती। चौंकि इलिसिबा बांझ हती और बे दोनों बूढ़े हते। एक बार जकरयाह अपने दल की पारी पै परमेस्‍वर के सामने पुरोहित कौ काम कर रयौ हतो, तब पुरोहितन के नियम के अनुसार वाके नाम की परची निकरी कै, बू पिरभू के बड़े पिराथना घर में जायकै धूप जराबै। धूप जराबे के समै सबरे लोगन कौ झुंड बाहर पिराथना कर रयौ हतो। तब जकरयाह कूं धूप जराबे की बेदी के सीदे हात माऊं पिरभू कौ सुरग दूत खड़ौ दिखाई दयौ। जकरयाह बाय देखकें घबरा गयौ और भौत भय भीत है गयौ। पर सुरग दूत नें बाते कही, “हे जकरयाह डरपै मत चौंकि परमेस्‍वर नें तेरी पिराथना सुन लयी है और तेरी पत्नी इलिसिबा एक बेटा जनैगी तू वाकौ नाम यूहन्‍ना रखियो। तोय भौत खुसी होबैगी और वाके पैदा हैबे ते लोग खुसी मनाबेगें। बू पिरभू के सामने महान हैबैगौ और वाके काजै अंगूर कौ रस और नसीली चीजन्‍नें पीवौ मना है और बू अपनी माँ के पेट में तेई पबित्र आतमा ते भरौ होबैगौ। और बू इसरालीयन में ते भौतन कूं बिनके पिरभू परमेस्‍वर की ओर फेरैगौ, और बू बाई सक्‍ती और आतमा ते जो एलियाह के जौरें हती, बाई सामर्थ ते पिरभू के आगे-आगे चलैगौ और बू बाप दादान कौ मन अपने बालकन के मांऊ फेरैगौ और परमेस्‍वर की आग्‍यान मानबे बारेन कूं बू धरमियन की समझ दैबेगौ और बू पिरभू के काजै भौत ते लोगन कूं तैयार करैगौ।” जकरयाह नें सुरग दूत ते पूछी, “मैं जि कैसै जानूं? चौंकि मैं तौ बूढौ है गयौऊं और मेरी पत्नीऊं बूढी है गई है।” तब सुरग दूत नें बाते कही, “कै मैं जिबरायल हूं, मैं परमेस्‍वर के सामने वाकी सेबा के काजै खड़ौ रैहतूं और मैं तोते बात कर रयौ हूं, मैं तेरे जौरें सुख कौ समाचार सुनांयबै काजै भेजौ गयौ हूं। देख जा दिना तक जि सबरी बात पूरी न हे जाबैगीं बा दिना तक तू गूंगौ रैहबेगौ और तू बोल नांय सकेगौ चौंकि तैने मेरी बातन पै भरोसौ नांय करौ।” लोग जकरयाह कौ इन्‍तजार कर रये हते और जब जकरयाह बाहर आयौ तब लोगन कूं अचम्भौ भयौ चौंकि बू बोल नांय सकौ, बू गूंगौ है गयौ और बू केवल इसारे करतो हतो, तब बे सब जान गये कै बड़े पिराथना घर में इतनी देर चौं भईए जरुर जानें कोई दरसन देखौए। जब वाके सेबा के दिन पूरे है गये तब बू अपने घर कूं चलौ गयौ। कछू दिनां बाद वाकी पत्नी इलिसिबा पेट ते भई और बू पाँच महीना तक अपने आप कूं दुबकाबत रही। और बू ऐसे कैहती, “कै लोगन में मेरौ अपमान दूर करबे काजै इन दिनान में पिरभू नें मेरे ऊपर किरपा करके मेरे काजै ऐसौ करौ है।” इलिसिबा कूं छटमों महीना लगौ तब परमेस्‍वर की ओर ते जिबरायल नाम कौ सुरग दूत गलील के नासरत सहर में, एक क्वारी के जौरें भेजौ गयौ, जाकी सगाई दाऊद के घराने में ते यूसुफ नाम के एक आदमी के संग भई। बा क्वारी को नाम मरियम हतो। सुरग दूत नें वाके जौरें भीतर आयकें कही, “तोकूं नमस्‍कार, तोपै परमेस्‍वर की किरपा भईए और पिरभू तेरे संग है।” जि वचन सुनकें मरियम घबरा गई और सोचबे लगी कै, “जा नमस्‍कार कौ का मतलब है?” तब सुरग दूत नें बाते कही, “हे मरियम डरपै मत, चौंकि तोपै परमेस्‍वर की किरपा भईए, और सुन तू पेट ते होबैगी और एक बेटा जनेंगी तू वाकौ नाम ईसू रखियो। बू महान होबैगौ और परम पिरधान कौ बेटा कहौ जावेगौ, पिरभू परमेस्‍वर बाय वाके पुरखा दाऊद की राजगद्‍दी दैवेगौ। और बू याकूब के वंसजन पै हमेसा राज करैगौ और वाकौ राज कबऊ खतम नांय हैबैगौ।” मरियम नें सुरग दूत ते कही, “कै जि कैसै है सकैं? मैं तौ अबई क्वारी हूं।” तब सुरग दूत नें बाते कही, “कै तोपै पबित्र आतमा आबैगौ और परम पिरधान की सामर्थ की छाया तोपै परैगी जामारै बू पबित्र पैदा हैबैगौ और बू परमेस्‍वर को बेटा कहौ जाबैगौ। और सुन तेरे खानदान की इलिसिबा बुढापे में बेटा जनैगी जाय सब लोग बांझ कैहतें अब वाकौ छटौ महीना चल रयौ है। परमेस्‍वर के काजै कछू अनहोनौ नांय, जाय बू नांय कर सकै।” मरियम नें बाते कही कै, “देख मैं पिरभू की दासी हूं। और तेरे वचन के अनुसारई मेरे संग हैबैगौ, जाके बाद बू सुरग दूत मांते चलौ गयौ।” कछू दिनान के बाद मरियम तैयार हैके जल्दी ते यहुदिया के पहाड़ी इलाके के एक नगर में गई। बानें जकरयाह के घर में जायकै इलिसिबा कूं नमस्‍कार करौ। जैसेई इलिसिबा नें मरियम कौ नमस्‍कार सुनों तबई वाके पेट में बालक कूंदबे लगौ। और इलिसिबा पबित्र आतमा ते भर गई। और बानें ऊंची अबाज ते कही, तू सबरी औरतन में धन्य है और तेरे पेट कौ बालकऊ धन्य है। जि किरपा मोपै कांते भईए, कै मेरे पिरभू की मा मेरे जौरें आईए। जबई मैंनें तेरौ नमस्‍कार सुनों तबई मेरे पेट कौ बालक कूंदबे लगौ। तू धन्य है कै तैने पिरभू की बातन पै भरोसौ करौ है जो बातें पिरभू नें कहीएं बे सबरी पूरी होबैगी। तबई मरियम नें कही, “मेरौ पिरान पिरभू की बड़ाई करतै मेरी आतमा उद्धारकरता परमेस्‍वर की खुसी ते भर गई हती। मैं जो वाकी दासी हूं बानें मोपै दया दिखाईए, जाके मारे लोग मोय जुग-जुग तक धन्य कहिंगे, और वाकौ नाम पबित्र है, चौंकि बा सक्‍तीमान नें मेरे काजै बड़े-बड़े काम करे हैं। और जो वाकौ भय मानतै उनपै वाकी दया पीढ़ी ते पीढ़ी तक बनी रैहतै, बानें अपनी सामर्थ ते जो अपने आप कूं बड़ौ समझत काए बिनकूं बिखेर दयौ है। बानें राजा महाराजन कूं राजगद्‍दी ते नीचे गिराय दयौ है और दीन कमजोर लोगन कूं बानें ऊँचौ कर दयौए, सब जरूरत मन्दन की जरूरत अच्‍छी चीजन ते पूरी कर दई है और धनबानन के हात बानें खाली कर दये हैं। परमेस्‍वर नें बू बात याद रखीं जो बानें हमारे पुरखा अब्राहम और वाकी पीढ़ी ते कही हतीं कै, ‘मैं अब्राहम और वाकी पीढ़ी पै सदा दया करुंगो।’ जामारै बानें अपने दास इसरायल कूं सम्हारोए।” मरियम लगभग तीन महीना तक इलिसिबा के संग रही और वाके बाद बू अपने घर बापिस लौट गई। तब इलिसिबा के बालक पैदा हैबे कौ समै भयौ और वाके एक बेटा पैदा भयौ, वाके पड़ौसी और खानदान के सबरे लोगन नें जब जि सुनी कै पिरभू नें बापै दया करी है तौ बे सब वाके संग बड़े खुस भये। जब आठमें दिना खतना करबे बारे बा बालक कौ खतना करबे काजै आये और वाकौ नाम वाके बाप के नाम पै जकरयाह रखबे लगे, पर वाकी माँ बोल उठी कै जाकौ नाम जकरयाह नांय रखौ जाबैगौ, जाकौ नाम तौ यूहन्‍ना रखौ जाबैगौ। तब लोगन नें बाते कही, “तेरे खानदान में जि नाम तौ काऊ कौ नांय।” फिर बे वाके बाप ते इसारे में पूछबे लगे कै, “तू जा बालक कौ नाम का रखबौ चाहतै?” तब बानें लिखबे बारी पट्टी मंगाई और वाकौ नाम बानें यूहन्‍ना लिख दयौ तब सबन्‍नें अचम्भौ करौ। और तबई जकरयाह की जीब की गाँठ खुल गई और बू बोलबे लग गयौ। और परमेस्‍वर की बड़ाई करबे लगौ। जा बात ते मांके अड़ौस परौस के सब रैहबे बारेन पै भय छा गयौ और इन सब बातन की चर्चा सबरे यहुदिया के देस के पहाड़ी इलाके में फैल गई, और सब सुनिबे बारे अपने मन में जि कैहबे लगे कै, “जि बालक कैसौ है?” पिरभू वाके संग है। यूहन्‍ना कौ बाप जकरयाह पबित्र आतमा ते भर गयौ और परमेस्‍वर की ओर ते कैहबे लगौ। “इसरायल के पिरभू परमेस्‍वर की महिमा होबै चौंकि बानें अपने लोगन पै दया करी है और बिनैं छुड़ायौ है। और बानें अपने दास दाऊद के घराने में हमारे काजै एक सामर्थी उद्धारकरता भेजौ है, जैसौ कै बानें परमेस्‍वर की ओर ते बातें बताबे बारे पबित्र लोगन के द्वारा पैहले समैं तेई कही हतीं। कै बू आबैगौ और तुमें तुमारे बैरियन ते और तुमते नफरत करबे बारेन के हातन ते छुड़ाबैगौ। बानें अपनी पबित्र बाचाए याद रखी, और हमारे पुरखन पै दया दिखायी कै जो सपथ बानें हमारे पिता अब्राहम ते खाई हती। कै बू हमें हमारे बैरीयन के हातन ते छुड़ाबैगौ, और हम बिना डर के पिरभू की सेबा करते रैहबें, हम पूरी जिन्दगी वाके सामने पबित्रता और धारमिकता ते जि सकै। हे मेरे बेटा, तू परम पिरधान परमेस्‍वर की ओर ते बातें बताबे बारो कहौ जाबैगौ तू पिरभू के काजै लोगन के मन कूं तैयार करैगौ और वाके आगे-आगे चले करैगौ। और परमेस्‍वर के पबित्र लोगन कूं बिनके पापन की मांफी के काजै उद्धार कौ ग्‍यान दैवेगौ। और हमारे परमेस्‍वर की बड़ी किरपा ते हम पै उद्धारकरता ऊपर सुरग ते उगते भये सूरज की तरैह ते चमकैगौ। और जि उजीतौ अंधेरे और मौत की छाया में बैठबे बारेन के ऊपर चमकैगौ और बू हमारे पामंन कूं सान्‍ती के रस्ता पै चलाबैगौ।” और बू बालक बड़तौ और आतमा में बलबन्‍त होत गयौ और इसरायल के लोगन के सामने पिरकट हैबे ते पैहले बू बेहड़ में रहौ। बिन दिनान में राजा अगस्तुस की ओर ते जि आग्‍या निकारी गई कै सबरे रोमी प्रान्‍तन के लोगन की जनगनना करी जाबै। जि रोमी प्रान्‍तन के लोगन की पैहली जनगनना हती। जि बा समै भई, जब कुरिनियुस सीरीया देस कौ राजपाल हतो। और सब लोग जनगनना कराबे काजै अपने अपने नगरन में गये। जामारै यूसुफ, जो दाऊद के घराने और वाके बन्स कौ हतो बू गलील के नासरत सहर ते यहुदिया देस में दाऊद के नगर बैतलहम कूं गयौ। जाते कै बू अपनी मंगेतर मरियम जो पेट ते हती वाके संग जनगनना में नाम लिखबाबै। जब बे बैतलहम में हते तब मरियम के बालक पैदा हैबे कौ समै भयौ। तब बानें अपने पैहले बेटा कूं जनम दयौ और बाय बानें कपड़ा में लपेटकै चरनी में लिटा दयौ, चौंकि सराय पैहले तेई भरी हती, जामारै यूसुफ और मरियमऐं रैहबे काजै जगैह नांय मिलीं। बा इलाके के खेतन में गड़रिया हते, जो रात में अपने भेड़न के झुन्‍डन कौ पैहरौ दै रये हते। और बाई समै पिरभू कौ एक सुरग दूत बिनके जौरें आयकै खड़ौ है गयौ। और बिनके चारौ ओर पिरभू की महिमा की रोसनी चमकी और बे भौत डरप गये। तब सुरग दूत नें बिनते कही, “डरपौ मत, चौंकि मैं तुमारे काजै बड़े आनन्द कौ सुभ समाचार सुनांयबे आयौ हूं, जि सुभ समाचार सब लोगन के काजै होगौ। आज दाऊद के नगर में तुमारे काजै एक उद्धारकरता पैदा भयौए और जेई मसीह पिरभू है। वाकी जि पहचान होगी कै बू तुमें कपड़ा में लिपटौ भयौ चरनी में परौ मिलैगौ।” तबई मांपे अचानक और भौत ते सुरग दूतन की भीड़ परमेस्‍वर की स्तुति करते भये पिरगट भयी। और बे जि कह रहे हते कै, “सुरग में परमेस्‍वर की महिमा हो और धरती पै बिन लोगन कूं सान्‍ती मिलै जिनते बू खुस होते।” और जब सुरग दूत सुरग कूं चले गये तब सब गड़रिया आपस में कैहबे लगे, “आऔ हम बैतलहम कूं चलें और जो बात पिरभू नें बताईए बिनें देखें कै बू सही है कै नांय।” बे सब जल्दी मांते गये और बिन्‍नें मांपे मरियम, यूसुफ और चरनी में एक बालक कूं लेटौ भयौ देखौ। जब गड़रियन नें बैतलहम में बालक कूं चरनी में देखौ और जो बात बालक के बारे में सुरग दूतन ते सुनीं बू सब लोगन में बताय दई। जब लोगन नें गड़रियन की बात सुनीं तौ सब लोग अचम्भौ करबे लगे पर मरियम इन सब बातनें अपने मन में रखकै उनपै गहराई ते बिचार करबे लगी। और जैसौ गड़रियन ते कहौ गयौ हतो बैसौई बिन्‍नें देखौ और बे सब परमेस्‍वर की महिमा और स्तुति करते भये अपने अपने घर कूं लौट गये। आठमें दिनां जब बा बालक के खतना करबे को दिना आयौ तब बा बालक कौ नाम ईसू रखौ गयौ, जो नाम सुरग दूत नें मरियम के पेट में बालक परबे ते पैहलेई बता दयी हती। और तब मूसा की व्‍यबस्था के अनुसार जच्‍चा के सुद्धीकरन कौ दिन आयौ तब यूसुफ और मरियम बा बालक कूं पिरभू के सामने उपस्थित करबे काजै येरूसलेम कूं गये। जैसे कै पिरभू की व्‍यबस्था में लिखे अनुसार पहिलौटे बालक कूं पिरभू परमेस्‍वर की सेबा के काजै देनों पड़ेगौ, और बेऊ पिरभू की व्‍यबस्था के अनुसार कबूतर के दो बच्‍चे या पांडुकों के एक जोड़े को बली चढाबे काजै गये। बा समै येरूसलेम में सिमौन नाम कौ परमेस्‍वर कौ एक भक्‍त और धरमी आदमी हतौ। बू इसरायल की सान्‍ती की बाट जोह रयौ हतो और पबित्र आतमा वाके संग हतो। पबित्र आतमा नें बाय बता रखौ कै, “जब तक तू पिरभू के मसीह के दरसन नांय कर लेगौ, तब तक तू नांय मरैगौ।” बू आतमा की बात मानकै बड़े पिराथना घर में आयौ और जब मूसा की व्‍यबस्था के अनुसार बा रीति कूं पूरौ करबे काजै बालक ईसू कूं वाके माँ-बाप (मरियम-यूसुफ) बड़े पिराथना घर में लाए। तब सिमौन ईसू कूं गोद में लैकें परमेस्‍वर की स्तुति करिबे लगौ और बोलो, “हे पिरभू तैनें अपनों वचन पूरौ करौ है। अब अपने दास कूं सान्‍ती के संग मरने दै, चौंकि मैंनें तेरे भेजे गये बा उद्धारकरता के दरसन कर लये हैं। जाय तैनें संसार के सब लोगन के काजै भेजौए, कै जि बालक ईसू, गैर यहुदियन के काजै, तेरौ रस्ता दिखाबे बारौ उजीतौ है। और इसरायल के लोगन कै काजै महिमा बनैगौ।” मरियम और यूसुफ ईसू के बारे में कही गई बातन ते अचरज में पड़ गये। फिर सिमौन नें उनै आसीरबाद दयौ और मरियम ते कही, “जा बालकए परमेस्‍वर नें चुनोंए, जि इसरायल में बहुतन के नांस और उद्धार कौ कारन ठहरैगौ और भौत ते लोगन के द्वारा जाकौ बिरोध करौ जाबैगौ, जि जा बात की निसानी होगी कै, जि परमेस्‍वर की ओर ते है। जाते भौतन के हिरदयन के बिचार सामने आबेंगे। पर तेरी आतमा तड़पेगी।” आसेर के बन्स में फनुएल की बेटी जाकौ नाम हन्‍नाह हतो, बू परमेस्‍वर की ओर ते बात बताती, बू भौत बूढी हती, बू ब्याह के बाद सात साल तकई सुहागन रही हती। अब बू चौरासी साल की है गयी हती। बू दिन और रात बर्त रखती और बानें कबऊ बड़े पिराथना घर जायबौ और उपासना करबौ नांय छोड़ो। बाई समै बानें परमेस्‍वर कौ धन्यबाद करौ और जो लोग येरूसलेम में छुटकारे की राह देख रये हते, बानें बिन सबन कूं बा बालक ईसू के बारे में बतायौ। पिरभू की व्‍यबस्था के अनुसार सब पूरौ करबे के बाद यूसुफ और मरियम गलील में अपने सहर नासरत कूं लौट गये। बू बालक बुद्धि और तागत में बढ़तौ गयौ। परमेस्‍वर की किरपा बापै हती। ईसू के माँ-बाप हर साल फसह के तौहार पै येरूसलेम जाते हते। जब ईसू बारह साल को भयौ, तब बू और वाके माँ-बाप हमेसा की तरैह ते फसह के तौहार पै येरूसलेम गये। जब तौहार पूरौ भयौ तब ईसू के माँ-बाप घर लौट रये हते तब बालक ईसू येरूसलेम मेंई रैह गयौ पर उनैं पतौ नांय चलौ। बे जि सोचिबे लगे कै बू हमारे लोगन के संग मेंई होगो। बे दिन भर सफर करत रहे फिर अपने घर के सम्बन्धी लोग और मित्रन के बीच में ईसू कूं ढूढबे लगे। जब उन्‍नें ईसू नांय मिलौ तौ बू बाय ढूढत ढूढत येरूसलेम लौट आये। और तीन दिनान के बाद उन्‍नें ईसू कूं बड़े पिराथना घर में सास्त्रन कूं सिखाबे बारेन के बीच बहस करत भयौ पायौ। जितनेऊ ईसू की बातैं सुनते बे सब ईसू की समझ और जबाब ते अचम्भे में हते। ईसू के माँ-बाप बाय देखकै चौंक गये और वाकी माँ नें बाते कही मेरे बेटा तू हमारे संग ऐसौ चौं कर रयौ है तेरा बाप और मैं तोय ढूढत ढूढत परेसान है रये है। ईसू नें उनते कही, “तुम मोय चौं ढूँढ रये हते, का तुम नांय जानत के मोय अपने पिता के घर में होनौं चहिऐं?” पर ईसू की बात बिनकी समझ में नांय आयीं। फिर ईसू बिनके संग नासरत लौट आयौ और बिनकी आग्‍या कौ पालन करतौ रहो और वाकी माँ नें जि सब बात अपने मन में रखी। ईसू मांपै डील डौल और बुद्धि में और परमेस्‍वर और आदमिन की किरपा में बढ़तौ गयौ। तिबिरियुस राजा के पन्द्रहमें साल में, जब यहुदिया कौ राजपाल पुन्‍तियुस पिलातुस हतो और गलील कौ राजपाल हेरोदेस हतो और वाकौ भईया फिलिपुस इतूरैया और त्रखोनितिस कौ राजपाल हतो और लुसानियस अबिलेने कौ राजपाल हतो, और हन्‍ना और कैफा यहुदी महा पुरोहित हते। बा समै परमेस्‍वर कौ वचन बेहड़ में जकरयाह के बेटा यूहन्‍ना के जौरें पौंहचौ। और यूहन्‍ना बपतिस्मा दैबे बारौ यरदन नदी के जौरें के सबरे देसन में आयकें जि पिरचार करबे लगौ कै, अपने मन कूं पापन ते दूर करकै बपतिस्मा लेओ जाते परमेस्‍वर तुमारे पापन कूं छमा करैगौ। जैसौ कै परमेस्‍वर की ओर ते बात बतायबे बारे यसायाह की किताब में लिखौ भयौ है, “बेहड़ में एक बुलाबे बारे की अबाज सुनाई दै रयी है, ‘कै पिरभू के आयबे के काजै अपने मन कूं तैयार करौ, जाते पिरभू के आयबे कौ रस्ता सीधौ है जाबै। हरेक घाटी भर दई जाबैगी हरेक पहाड़ और पहाड़ी समतल करै जांगे टेड़ी मेड़ी सड़कै सीधी करी जांगी और ऊबड़ खाबड़ रस्ता चीकने करे जांगे और सबरे लोग परमेस्‍वर के उद्धार कूं देखिंगे!’” और जो लोग भीड में ते यूहन्‍ना के जौरें बपतिस्मा लैबे काजै आबते उनते बू कैहतो, “अरे सांप के सपोरेओ परमेस्‍वर के दन्‍ड ते तुम बच सकतौ जाके बारे में तुमें कौन्‍नें चैताय दयौए? और अब तुमारे कामन ते जि पतौ चलनों चहिऐं कै तुमनें अपने पापन ते मन फिराय लयौ है। और मन में जि मत सोचौ कै, ‘हम अब्राहम की सन्‍तान हैं।’ मैं तुम लोगन ते कैहतूं कै परमेस्‍वर इन पत्‍थरन ते अब्राहम के काजै सन्‍तान पैदा कर सकतै। अब कुल्हाड़ी पेड़ की जड़ पै धरीए जो पेड़ अच्‍छौ फल नांय देतु बू काटौ जायगौ और आग में झौंक दयौ जायगौ।” और तब लोगन नें यूहन्‍ना ते पूछी, “तौ हम का करें?” बानें उत्‍तर दयौ कै, “जाके जौरें दो कुरता होंय, बू एक कुरता बाये दै देबे जाके जौरें न होंय और जापै भोजन होय बेऊ एसौई करै।” कछू चुंगी लैबे बारेऊ बपतिस्मा लैबे आये और बाते पूछी, “हे गुरू हम का करें?” “जापै बानें बिनते कही कै जितनों ठहरायो गयौए बाते जादा मत लियों।” और सिपाइयन नेंऊ बाते पूछी कै, “हम का करें?” बानें उनते कही, “कै तुम काऊ पै दबाव ते रुपया मत लेओ,और काऊ पै झूंठौ दोस मत लगाऔ और जो तनखा तुमें मिले बाई में सबर करौ।” और सब लोग यूहन्‍ना के बारे में सोच रये हते और सब अपने अपने मन में आसा लगाये भए कैह रये हते, कै कऊं जेई मसीह तौ नांय हत। तब यूहन्‍ना नें लोगन ते कही कै, “मैं तौ तुम लोगन कूं पानी ते बपतिस्मा देतूं पर जो मेरे बाद आयबे बारौ है, बू मोते जादा ताकतबर है, मैं तौ वाके जूतन के फीतन कूं खोलिबे के लायकऊ नांऊ, बू तुम लोगन नें पबित्र आतमा और आग ते बपतिस्मा देगौ। वाकौ सूप वाके हात में है बू अपने खेत कूं समतल करके गेंहून कूं खलिहान में इकठ्‌ठौ करैगौ और बाय अच्‍छी तरैह ते साफ करैगौ और बामेंते जो भुसी निकरैगी बाय आग में जराबैगौ और बू आग कबऊ नांय बुझैगी।” और बू ऐसी भौत सी परमेस्‍वर के वचन की सिछा दे दैकै लोगन नें सुभ समाचार सुनातौ हतो। जब यूहन्‍ना नें हेरोदेस राजपाल कूं वाके भईया फिलिपुस की पत्नी हेरोदियास के संग वाके बुरे सम्बन्ध और बुरे कामन की बजैह ते फटकारौ हतो, जामारै हेरोदेस नें यूहन्‍ना कूं जेल में डार दियौ। और जि काम वाके सबरे बुरे कामन में ते एक हतो। यूहन्‍ना कूं जेल में डारबे ते पैहले जब सब लोग यूहन्‍ना ते बपतिस्मा लै रये हते, तब ईसू नेंऊं बपतिस्मा लियो। और जब ईसू पिराथना कर रयौ हतो तब परमेस्‍वर नें आकास कूं खोल दियौ। और पबित्र आतमा कबूतर की देह में बापै उतरौ और सुरग में ते जि अबाज सुनाई दई, “कै तू मेरौ प्यारौ बेटा है, मैं तोते भौत खुसऊं।” बा समै ईसू नें परमेस्‍वर के वचन की सेबा सुरू करी तब ईसू की उमर तीस साल के करीब हती। और लोग जि समझते हते कै जि ईसू यूसुफ कौ बेटा है। यूसुफ एली कौ बेटा हतो। एली मत्‍तात कौ, मत्‍तात लेबी कौ, लेबी मलकी कौ, मलकी यन्‍ना कौ, यन्‍ना यूसुफ कौ बेटा हतो, यूसुफ मत्‍तित्‍याह कौ, मत्‍तित्‍याह आमोस को, आमोस नहूम कौ, नहूम असल्‍याह कौ, असल्‍याह नोगह कौ बेटा हतो। नोगह मात कौ, मात मत्‍तित्‍याह कौ, मत्‍तित्‍याह सिमी कौ, सिमी योसेख कौ, योसेख योदाह कौ, योदाह योनान कौ, योनान रेसा कौ, रेसा जरुब्बाबिल कौ, जरुब्बाबिल सालतिएल कौ, सालतिएल नेरी कौ, नेरी मलकी कौ, मलकी अद्‍दी कौ, अद्‍दी कोसाम कौ, कोसाम इलमोदाम कौ, इलमोदाम ऐर कौ, ऐर यहोसू कौ, यहोसू इलाजार कौ, इलाजार योरीम कौ, योरीम मत्‍तात कौ, मत्‍तात लेबी कौ, लेबी सिमौन कौ, सिमौन यहूदाह कौ, यहूदाह यूसुफ कौ, यूसुफ योनान कौ, योनान इल्‍याकीम कौ, इल्‍याकीम मेलिया कौ, मेलिया मिन्‍ना कौ, मिन्‍ना मत्‍तात कौ, मत्‍तात नातान कौ, नातान दाऊद कौ, दाऊद यिसै कौ, यिसै ओबेद कौ, ओबेद बोअज कौ, बोअज सलमोन कौ, सलमोन नहसोन कौ, नहसोन अम्मीनादाब कौ, अम्मीनादाब आरनी कौ, आरनी हिस्रोन कौ, हिस्रोन फिरिस कौ फिरिस यहूदाह कौ, यहूदाह याकूब कौ, याकूब इसहाक कौ, इसहाक अब्राहम कौ, अब्राहम तिरह कौ, तिरह नाहोर कौ, नाहोर सरूग कौ, सरूग रऊ कौ,रऊ फिलिग कौ, फिलिग एबिर कौ, एबिर सिलह कौ, सिलह केनान कौ, केनान जो अरफछद का, अरफछद सेम कौ, सेम नूह कौ, नूंह लिमिक कौ, लिमिक मथूसिलह कौ, मथूसिलह हनोक कौ, हनोक यिरिद कौ, यिरिद महललेल कौ, महललेल केनान कौ, केनान एनोस कौ, एनोस सेत कौ, सेत आदम कौ, और आदम जाय परमेस्‍वर नें बनांयौ हतो। ईसू पबित्र आतमा ते भरकै यरदन नदी ते बापस आयौ। तब आतमा बाय बेहड़ में लै गयौ। ईसू चालीस दिना तक मांपै रहो और सैतान नें वाकी परीछा लई। ईसू नें बिन दिनान में कछू नांय खायौ और जाके बाद बाय भूंक लगी। तब सैतान नें बाते कही, “कै अगर तू परमेस्‍वर कौ बेटाए तौ इन पत्‍थरन ते कैह दै कै जे रोटी बन जांय।” पर ईसू नें जबाब दयौ, “पबित्र सास्त्र में लिखौ है कै, ‘आदमी केवल रोटी तेई नांय जीबित।’” फिर सैतान बाय ऊंची जगैह पै लै गयौ और पल भर में दुनियां कौ सबरौ राज दिखायौ और बानें ईसू ते कही कै, “मैं जि सब अधिकार और बैभव तोय दै दुंगो चौंकि जि सब मोय सौंपो गयौ है और मैं जाय चाहूँ बाय दै देतूं। अगर तू झुककै मोय दन्‍डबत करै तौ जि सब तोय दै दुंगो।” ईसू नें बाते कही कै, “पबित्र सास्त्र में लिखौ भयौ है, “‘तू केवल अपने पिरभू परमेस्‍वर कूं दन्‍डबत कर और बाई की अराधना कर। तू केवल बई की सेबा कर।’” तब सैतान बाय येरूसलेम के बड़े पिराथना घर की सबते ऊंची जगह पै लै गयौ और बाते कही, “कै अगर तू परमेस्‍वर कौ बेटाए तौ तू अपने आप कूं य्हांते नीचै गिरा दै। चौंकि लिखौ भयौ है कै, “‘बू तेरे काजै अपने सुरग दूतन कूं आग्‍या देगौ और बे तेरी रछा करिंगे।’ ‘बे तोय हातो हात उठाय लिंगे कऊं ऐसौ न होय, कै तेरे पामंन में पत्‍थर ते ठेस लगे।’” ईसू नें बाय उत्‍तर दयौ, “जेऊ लिखौ भयौ है, ‘कै तू अपने पिरभू परमेस्‍वर की परीछा मत करियो।’” जब सैतान ईसू की सब तरैह ते परीछा लै चुकौ वाके बाद बू बाय थोड़े समै तक छोड़कै चलौ गयौ। फिर जब ईसू आतमा की सामर्थ ते भरकै गलील कूं लौटौ तौ वाकी चर्चा जौरें के सबरे इलाकेन में फैल गई। और ईसू पिराथना घरन में परमेस्‍वर के वचन की सिछा देतौ रहौ और सब लोग वाकी बड़ाई करते हते। ईसू नासरत में आयौ ज्हांपै बू पलौ-बड़ौ हतो और यहुदियन के आराम दिना में बू अपनी आदत के अनुसार पिराथना घर जायकै पढ़बे के काजै खड़ौ भयौ। परमेस्‍वर की ओर ते बात बताबे बारे यसायाह नाम के आदमी की किताब पढ़बे काजै बाय दई गई और बानें किताब खोलकें,बू पाठ निकारौ ज्हांपै जि लिखौ भयौ हतो। “पिरभू को आतमा मोपै है, जामारै बानें कंगालन कूं सुभमाचार सुनांयबे काजै मेरौ अभिसेक करौ है और मोय जाई के काजै भेजौ है कै, बंधुअन कूं छुटकारे कौ और अंन्धेन कूं रोसनी मिलबे कौ सुभ समाचार पिरचार करूं और कुचले भयेन नें छुड़ाऊं। और पिरभू के दया के समै कौ पिरचार करूं।” तब ईसू नें किताब बन्द करके दास के हात में दे दई और बू मंई बैठ गयौ। पिराथना घर के लोग ईसू की ओर देखबे लगे। तब ईसू उनते कैहबे लगौ, “कै पबित्र सास्त्र में लिखौ भयौ, जि लेख आज तुमारे सामने पूरौ भयौ है।” हर कोई ईसू की बड़ाई कर रयौ हतो, वाके मौंह ते दया ते भरे वचनन कूं सुनकें लोग अचम्भौ करबे लगे,और कहबे लगे, “का जि यूसुफ कौ बेटा नांय?” तब ईसू नें बिनते कही, “तुम लोग मोते जि कहाबत जरूर कहौगे, ‘कै हे बैद्य तू अपने कूं ठीक कर और जो कछू तैनें कफरनहूम में करौ हतो वाके बारे में हमनें सुनौ है, बाय तू अपने नगर मेंऊं करकै दिखा।’” फिर ईसू नें कही, “मैं तुमते सच कह रयौ हूं कै, कोई परमेस्‍वर की ओर ते बात बतायबे बारौ अपने नगर में सम्मान नांय पावत। मैं तुमते सच कैहतूं, कै एलियाह के दिनान में साढे़ तीन साल तक आकास ते मेह नांय बरसौ और सबरे देस में अकाल पर गयौ, तब इसरायल में भौत सी बिधबा हती। पर एलियाह सैदा नगर के जौरें बारे सारपत गांम की एक बिधबा के जौरें ही गयौ। और ऐसेई परमेस्‍वर की ओर ते बात बताबे बारे एलिसा के दिनान में इसरायल में भौत ते कौढ़ी हते। पर सीरीया देस में रैहबे बारे नामान कोढ़ी कूं छोड़िकें और काऊ कूं सुद्ध नांय करौ गयौ हतो।” पिराथना घर में जितने लोग हते, बे सब जा बात कूं सुनकें गुस्सा ते भर गए। और बे सब लोग ईसू कूं नगर ते बाहर पहाड़ की चोटी पर लै गये जा पहाड़ पै बू नगर बसौ भयौ हतो कै बे बाकूं मांते नीचे गिराय दें, पर ईसू चुपचाप बिनके बीच में ते निकरकै चलौ गयौ। फिर ईसू गलील के कफरनहूम नगर में गयौ और यहुदियन के आराम दिन में लोगन कूं परमेस्‍वर के वचन की सिछा दैवे लगौ। बे लोग वाकी परमेस्‍वर के वचन की सिछा ते चकित है गये, चौंकि वाकौ वचन अधिकार ते भरौ भयौ हतो। पिराथना घर में एक आदमी हतो जापै दुस्ट आतमा हती बू बड़े जोर ते चिल्लायौ, “हे नासरत नगर के ईसू! तोय हमते का काम? का तू हमें नांस करबे आयौ है? मैं तोय जान्‍तूं कै तू कौऐ, तू परमेस्‍वर कौ पबित्र जन हैं।” ईसू नें बाय फटकारकै कही, “चुप है जा और जा आदमी में ते निकर जा” तब दुस्‍ट आतमा नें बा आदमी कूं धरती पै पटक दयौ और वाकौ बिना कछू नुकसान करे भये बामें ते निकर गई। जापै सब लोगन कूं बड़ौ अचम्भौ भयौ और बे आपस में बात करबे लगे कै, “जि कैसी बात है? कै जि अधिकार और सामर्थ के संग दुस्‍ट आतमान कूं आग्‍या देतुए और बे निकरकै भाग जाबें।” और ईसू की जा बात की चर्चा आस-पास के सबरे इलाकेन में फैल गयी। तब ईसू पिराथना घर में ते उठकै सिमौन के घर में गयौ, मांपै वाकी सास कूं बुखार चढ़ि रयौ हतो, बिन्‍नें ईसू ते वाके काजै बिनती करी, कै बू बाय ठीक करै। ईसू नें वाके जौरें जायकै बुखार कूं डांटौ और बू ठीक है गई और बू उठकै बिनकी सेबा करबे लग गई। जब सूरज छिपबे पै हतो तब जिनके य्हां लोग अलग अलग तरैह की बीमारिन में परे हते, बे सब बिनैं ईसू के जौरें लैके आए और तब बानें हर एक के सिर के ऊपर हात रखत भये बिनकूं ठीक कर दियो। और भौतन में ते दुस्‍ट आतमा चिल्लावत भए जि कैहकै बाहर निकर जातीं, “कै तू परमेस्‍वर कौ बेटा है” पर ईसू बिनें फटकारतौ और बिनें बोलबे कौऊ मौकौ नांय देतौ चौंकि बे जानतीं हती कै “बू मसीह है।” जब सबेरौ भयौ तब ईसू मांते निकरकै बेहड़ में गयौ और भीड़ बाय ढूढत भये वाके जौरें आई और बाय रोकत भये कैहबे लगी, “य्हांते मत जा।” पर ईसू नें बिनते कही, “मोय दूसरे नगरन मेंऊ परमेस्‍वर के राज कौ सुभ समाचार सुनांबौ जरूरी है, चौंकि मैं जाई कै काजै भेजौ गयौ हूं।” और बू यहुदिया देस के पिराथना घरन में परमेस्‍वर के वचन की सिछा देतौ रहौ। एक बार ईसू गन्‍नेसरत झील के किनारे पै खड़ौ हतो और तब भीड़ नें परमेस्‍वर के वचन की सिछा सुनबे काजै बाय चारौ लंग ते घेर लियौ और बे ईसू के ऊपर गिरे जा रये हते। बा समै झील के किनारे पै दो नाव लगी हतीं और मछुआरे बिन पैते उतरकै जाल धो रये हते। बिनमें ते एक नाव जो सिमौन की हती बा नाव पै ईसू चढ़ गयौ और बाते कही कै तू नाव कूं किनारे पैते थोड़ी दूर लै चल, तब ईसू नाव पै बैठकै लोगन कूं परमेस्‍वर के वचन की सिछा दैबे लगौ। जब बू सिछा दै चुकौ, तब सिमौन ते कही, “नाव कूं गहरे पानी में लै चल और मछली पकरबे काजै अपनों जाल डार।” तब सिमौन बोलौ, “हे स्‍वामी, हमनें पूरी रात मेहनत करीऐ और कछू नांय पकर पाये, तबऊ तुमारे कैहबे ते मैं जाल डारूंगौ।” जब बिन्‍नें एसौई करौ तौ जाल मछलीन ते इतनौ भर गयौ कै जाल फटबे लगौ। तब बिन्‍नें अपने संगियन कूं जो दूसरी नाव पै हते, बिनकूं इसारे ते मदद के काजै बुलायौ और बे आये और बिन्‍नें दोनों नाव मछलिन ते इतनी भर लयीं कै नाव डूवबे लगी। जि देखकै सिमौन पतरस ईसू के पांमन में गिर परौ और बाते कहबे लगौ कै, “हे पिरभू मेरे जौरें ते चले जाऔ, मैंनें तेरे बात पै भरोसौ नांय करौ चौंकि मैं एक पापी आदमीऊं।” जाल में इतनी सारी मछली आयबे की वजह ते वाके संगी भौत अचम्भौ कर रये हते। और जाई तरैह ते जब्दी के बेटा याकूब और यूहन्‍ना कूं अचम्भौ भयौ, बेऊ सिमौन के संगी हते। जापै ईसू नें सिमौन ते कही, “डरपै मत अब ते तू आदमिन कूं परमेस्‍वर के राज में लाबे बारौ बनेंगौ।” बिन्‍नें सब नावन कूं किनारे पै लगायौ और सब कछू छोड़कै ईसू के पीछे है लिये। जब काऊ नगर में ईसू हतो तब बाय एक आदमी मिलौ जो कोढ़ तै भरौ हतौ। बू ईसू कूं देखकै वाके पामन में गिर परौ और पिराथना करके बौलो, “पिरभू तुम चाहौ तौ मोय सुद्ध कर सकतौ।” ईसू नें अपनों हात बढ़ायके कोढ़ी कूं छूऔ और बाते कही कै, “मैं तौ चाहतूं कै तू सुद्ध है जा।” और वाकौ कोढ़ तबई सुद्ध है गयौ। ईसू नें बाय आग्‍या दयी कै जे बात काऊ ते मत कहियों और अपने आप कूं यहुदी पुरोहित कूं दिखा और अपने ठीक हैबे कौ चढ़ायौ मूसा की व्‍यबस्था के अनुसार चढ़ा। कै बिनपै गबाही होय। पर ईसू की चर्चा और जादा फैल गई और भीड़ की भीड़ वाकी सुनबे के काजै और अपनी बीमारिन ते ठीक हैबे के काजै इकठ्‌ठे होते हते। पर ईसू बेहड़ में जायकै एकान्‍त में पिराथना करतो। ईसू एक दिना परमेस्‍वर के वचन की सिछा दै रयौ हतो तब सास्त्रन कूं सिखाबे बारे और फरीसी मांपे बैठे हते। जे सब गलील और यहुदिया के गांमन ते और येरूसलेम ते आये हते। बीमारन कूं ठीक करबे काजै पिरभू परमेस्‍वर की सामर्थ ईसू के संग हती। तब कछू लोग एक लकबा के मारे भये आदमी कूं खाट पै डारकै लाए। बे बाय ईसू के जौरें लै जावौ चांहते। पर भीड़ के मारे बाय भीतर नांय लै जाय सके तौ बे बा छत्‍त के ऊपर चढ़ गये, जाके नीचे ईसू हतो और वाकी खपरैल हटायकै खाट नीचे लटकाकै ईसू के सामने रख दयी। ईसू नें बिन लोगन कौ भरोसौ देखके बा लकबा के मारे भये ते कही, “हे भईया तेरे पाप छमा है गये।” सास्त्रन कूं सिखाबे बारे और फरीसी आपस में कहबे लगे, “कै जि पापन कूं छमा करबे बारौ कोऐ परमेस्‍वर के अलाबा और कौन पापन कूं छमा कर सकतै? जि तौ सरासर परमेस्‍वर की अपमान कर रयोए।” ईसू नें बिनके मन की बातन कूं जानिके बिनते कही, “तुम अपने मन में जि चौं सोच रये हो? आसान का है? जि कैहबौ कै ‘तेरे पाप छमा है गये’ या जि कैहबौ कै ‘उठ चल फिर?’ पर तुम जि जान लेओ कै मुझ, ‘मनुस्‍य के बेटा’ कूं धरती पै पाप छमा करबे कौऊ अधिकार है।” ईसू नें लकबा के मारे भये ते कही, “मैं तोते कैहतूं कै अपनी खाट उठायकै अपने घर कूं चलौ जा।” तब बू तुरन्‍त सबन के सामने ते खड़ौ भयौ और जा खाट पै बू परौ हतो, बाय उठायकै परमेस्‍वर की बड़ाई करतो भयौ अपने घर कूं चलौ गयौ। तब सब लोग अचम्भित हैके परमेस्‍वर की बड़ाई करबे लगे और डरपकें कैहबे लगे, “कै आज हमनें अनोखी बात देखीए।” जाके बाद ईसू बाहर गयौ और एक लेबी नाम के चुंगी लैबे बारे कूं चुंगी लैबे बारी जगह पै बैठौ भयौ देखौ। तब ईसू नें बाते अपने संग चलबे कूं कही। और बू खड़ौ भयौ और अपनों सब कछू छोड़कै ईसू कै पीछे चल दियौ। चुंगी लैबे बारे लेबी नें ईसू कै सम्मान के काजै अपने घर पै भोजन तैयार करौ और मांपै चुंगी लैबे बारे और एक बड़ी भीड़ ईसू के संग हती, बे सब वाके संग भोजन कर रये हते। फरीसी और बिनके सास्त्रन कूं सिखाबे बारे वाके चेलान ते जि कैहकै कुडकुडाबे लगे, “तुम चुंगी लैबे बारे और पापिन के संग चौं खावत पीवतौ?” ईसू नें उत्‍तर दयौ, “कै बैद्य की जरूरत ठीक ठाक लोगन कूं नांय होबे पर बीमार लोगन कूं होबे। मैं धरमी लोगन के काजै नांय आयौ पर पापिन कौ मन फिरायबे काजै आयौ हूं।” और बिन्‍नें ईसू ते कही कै, “यूहन्‍ना बपतिस्मा दैबे बारे के चेला तौ बराबर बर्त रखतें और पिराथना करतें, बैसेई फरीसियन के चेलाऊ करतें, पर तेरे चेला चौं खाबत-पीबतै?” ईसू नें बिनते कही, “का तुम बरातिन कूं भूखौ रख सकौ जब तक दूल्हा बिनके संग रैहबे? पर बू दिना आबेंगे जब दूल्हा बरातिन ते अलग करौ जाबेगौ। तब बे बिन दिनान में बर्त करिंगे।” ईसू नें एक और दृस्‍टान्‍त में बिनते कही, “कै नऐ कपड़ा में ते फारकै पुराने कपड़ा में कोई थेगरी नांय लगाबत चौंकि नयौ कपड़ा फट जाबेगौ और पुराने कपड़ऊ में मेल नांय खाबेगौ। और कोई नयौ अंगूर कौ रस पुरानी मसकन में नांय भरत तौ नयौ अंगूर कौ रस मसकन कूं फाड़ दैबेगौ और बू बह जाबेगौ और मसकन कौऊ नांस है जाबेगौ पर नई मसकन में नयौ अंगूर कौ रस ही भरनौं चहिऐं कोई आदमी पुरानौ अंगूर कौ रस पीके नयो नांय चाहबें चौंकि बू कैहतै कै, ‘जाते अच्‍छौ तौ पुरानौई है।’” एक बार ईसू और वाके चेला यहुदियन के आराम के दिना में खेतन ते हैके जाय रये हते और वाके चेला बाल तोड़ तोरकर और हातन ते मसलकै खावत भये जा रये हते। तब फरीसियन में ते कछू लोग कैहबे लगे, “तुम लोग बू काम चौं करतें, जो यहुदियन के आराम के दिना हमारे नियम के अनुसार नांय कर सकते।” ईसू नें बिनकूं उत्‍तर दियो, “का तुमने जि नांय पढ़ी। कै जब हमारे पुरखा दाऊद और वाके संगी भूंखे हते, तब दाऊद नें का करौ हतो? बू परमेस्‍वर के घर में गयौ और भेंट की रोटी खाईं,और अपने संगिन कूं भी दई जिन रोटीन नें खाबे की इजाजत केवल यहुदी पुरोहितन नें ही हती और काऊए नांय हती।” और बानें बिनते कही, “मैं, ‘मनुस्‍य कौ बेटा’ यहुदियन के आराम के दिना कौऊ पिरभू हूं।” और ऐसो भयौ के एक और दूसरौ यहुदियन के आराम दिना आयौ तब ईसू पिराथना घर में जायकै परमेस्‍वर के वचन की सिछा दैबे लगौ। मांपै एक आदमी हतो वाकौ सीधौ हात सूखौ हतो। सास्त्रन कूं सिखाबे बारे और फरीसी बापे दोस लगायबे के मौके ढूँन रये, कै देखें बू यहुदियन के आराम दिन में जाय ठीक करतुए के नांय। पर बू बिनके बिचार जानत हतो, जामारै बानें सूखे हात बारे आदमी ते कही कै, “उठ और सबन के सामने खड़ौ है जा।” बू उठकै खड़ौ भयौ। ईसू नें बिनते कही, “मैं तुमते जि पूछतूं। कै यहुदियन के आराम के दिना में व्‍यबस्था के अनुसार का सही है? भलौ करनों या बुरौ करनों, पिरान कूं बचायबौ या नास करबौ?” और बानें चारौ ओर बिन सबन की ओर देखकै बा आदमी ते कही, अपनों हात बढ़ा बानें ऐसा ही करौ और वाकौ हात पैहले के जैसौ सही है गयौ। बे भौत गुस्सा हैकें आपस में बात करबे लगे कै, “हम ईसू के संग का करें?” बिन दिनान में ईसू एक पहाड़ पै पिराथना करबे कूं गयौ और परमेस्‍वर ते पिराथना करबे में सबरी रात बिताई। जब सबेरौ भयौ, तब बानें अपने चेलान कूं अपने जौरें बुलायौ और बिनमें ते बारह चेला चुन लए और बिनकूं बानें “भेजे भये चेला” कहा। और बिनके नाम जि हैं, सिमौन जाकौ नाम बानें पतरस रखौ और वाकौ भईया अन्द्रियास और याकूब और यूहन्‍ना और फिलिपुस और बरतुलमै। और मत्‍ती और थोमा और हलफई कौ बेटा याकूब और सिमौन जो देस भक्‍त कहौ जातौ। और याकूब कौ बेटा यहूदा और यहूदा इस्करियोती जानें बिसबास घात करकै ईसूए पकरबायौ। तब ईसू बिनके संग पहाड़ पैते उतरकै चौरस जगह में खड़ौ भयौ, मांपै वाके भौत ते चेला और सबरे यहुदिया, येरूसलेम, सूर, सैदा और समुन्दर के किनारे के भौत ते लोग, वाकी सुनवे और अपनी बीमारिन ते ठीक हैबे के काजै वाके जौरें आये हते। मांपै ईसू नें दुस्‍ट आतमान ते सताए भए लोगन कूं अच्‍छौ करौ। और सब बाय छूनों चाहते हते, चौंकि बामें ते सामर्थ निकरकें बिन सबन कूं ठीक करती हती। फिर ईसू नें अपने चेलान की ओर देखके कही, “धन्य हौ तुम जो दीन हो चौंकि सुरग कौ राज तुमारौईए। धन्य हो तुम, जो अब भूखे हो, चौंकि तृप्‍त करे जाओगे, धन्य हो तुम, जो अब रोबतौ, चौंकि आनन्द मनाऔगे। धन्य हो तुम, जब मुझ, ‘मनुस्‍य के बेटा’ के पीछे चलबे की बजैह ते लोग तुमते बैर करें और तुमें समाज ते निकाल देबें और तुमारी बेज्‍जती करें और तुमारे नाम कूं बुरौ कहबें। बा दिना खुस हैकें उछलियौ, चौंकि सुरग में तुमारे काजै भौत बड़ौ फल रखौए। याद रखौ कै बिनके पुरखा परमेस्‍वर की ओर ते बात बतायबे बारेन के संगऊ एसौई करौ करते। पर बा आदमी के काजै, भौत बुरौ होगौ। जो धनबान हो, चौंकि तुम अपनी सान्‍ती पा चुके। हाय है तुम लोगन पै जो अब तृप्‍त हो, चौंकि तुम भूखे होंगे, हाय है तुम लोगन पै जो अब तू आनन्द मनातौ, चौंकि तुम सोक करोगे और रोओगे। हाय है तुम लोगन पै, जब सब आदमी तुमें भलौ कहें, चौंकि बिनके पुरखा परमेस्‍वर के बारे में झूंठी बात बताबे बारेन के संगऊ एसौई करौ करते हते। “पर मैं तुम सुनबे बारेन ते कहतूं, कै अपने बैरिन ते पिरेम रखो, जो तुमते नफरत करें, बिनकौ भलौ करौ। जो तुमें स्राप दें, बिन्‍नें आसीस देओ जो तुमारे संग बुरौ व्‍यवहार करें, बिनके काजै पिराथना करौ। जो तेरे एक गाल पै थप्पड़ मारै तौ वाके माऊं अपनों दूसरौ गाल कर दियौ और जो तेरी लोई छीन लैबे, तौ बाय कुरता लैबे तेऊ मत रोकौ। जो कोई तोते मांगे, बाय दै दे और जो तेरी वस्तु छीन लै, बाते मत मांग। और जैसौ तुम दूसरेन ते अपने काजै बरताब चाहतौ बैसेई तुम दूसरेन के संग बरताब करौ। “यदि तुम अपने पिरेम करबे बारेन तेई पिरेम करतौ, तौ जामें तुमारी का बड़ाई है? चौंकि पापीअऊ तौ अपने पिरेम रखबे बारेन के संग पिरेम रखतै। और अगर तुम अपनी भलाई करबे बारेन के संग भलाई करतौ, तौ जामें तुमारी का बड़ाई है? चौंकि पापीअऊ तौ ऐसौई करतै। और अगर तुम काऊऐ उधार देतौ और बा पैते बापस पायबे की आसा रखतौ, तौ जामें तुमारी का बड़ाई है? चौंकि पापीअऊ तौ बिनें उधार देतै, कै उतनोंई फिर पाबें। बरन अपने दुसमनन ते पिरेम रखो और भलाई करौ और बापस पाबे की आस ना रखत भये उधार देउ, तौ तुम्हारे काजै बड़ौ फल होगौ और तुम परम पिरधान के सन्‍तान ठहरौगे, चौंकि जो परमेस्‍वर कौ धन्यबाद नांय करत और बिनके काजैऊ कृपालु है। जैसा तुमारौ सुरगीय पिता दयावन्‍त है, बैसेई तुमऊ दयावन्‍त बनो। “तुम काऊ कौ भलौ बुरौ कैहके न्याय मत करौ जाते कै तुमारौऊ न्याय ना करौ जाबेगौ। दोस मत लगाऔ, तौ तुम पैऊ दोस नांय लगायौ जाबैगौ। छमा करौ, तौ तुमेंऊ छमा करौ जाबेगौ। दयौ करो, तौ तुमेऊं दयौ जाबैगौ पूरौ दबाय दबाय कै और हिलाय हिलायके ऊपर तक निकरतौ भयौ तुमें दयौ जाबेगौ चौंकि जिस नाप ते तुम नापतौ, बाई नाप ते तुम्हारे काजैऊ नापौ जाबैगौ।” फिर बानें बिनते एक दृस्‍टान्‍त कहौ, “का एक अंन्धौ, अन्धे कूं रस्ता दिखा सकतै? अगर बू ऐसौ करिगें तौ दोनोंई गढ्‍ढा में गिरेंगे। चेला अपने गुरू ते बड़ौ नांय, पर जो कोई सिद्ध होगौ, बू अपने गुरू के समान होगौ। “तोए तेरे भईया की छोटी-छोटी बुराई तौ देखतै पर तोए अपनी ही बडी-बडी बुराई नांय दीखत? और जब तोए अपनी ही बडी-बडी बुराई नांय दीखत, तौ तू अपने भईया ते चौं कैहते कै ‘हे भईया’ रुक जा मैं तेरी बुराई नें दूर करूं? हे कपटी, पैहले तू अपनी बुराई दूर कर जाके बाद तू अपने भईया की बुराई दूर कर सकेगौ। “अच्‍छे पेड़ पै अच्‍छे फल आबतै और बुरे पेड़ पै बुरे फल आबतै। हर एक पेड़ अपने फलन ते पहचानौ जाते, चौंकि लोग झाड़ियन ते अंजीर नांय तोड़त और न झड़बेरी ते अंगूर। भलौ आदमी अपने मन के भले भन्‍डार ते भली बात निकारतै और बुरौ आदमी अपने मन के बुरे भन्‍डार ते बुरी बातें निकारतै, चौंकि जो वाके मन में भरौए बेई वाके मौंह ते बाहर आवते। “जब तुम मेरौ कहनों नांय मानतई, तौ चौं मोय, ‘हे पिरभू, हे पिरभू,’ कहते हो। जो कोई मेरे जौरें आवतै और मेरी बातें सुनकें बिनैं मानतै, मैं तुमें बताबतूं कै बू कौन के समान है। बू बा आदमी के जैसौए जानें अपनों घर बनाते समै गैहरी नींव खोदी और बू नींव चट्टान पै डारी और जब बाढ़ आई तौ धारा बा घर ते टकराई, पर बा घर कूं हिला नांय सकी, चौंकि बू पक्‍कौ बनों हतो। पर जो सुनिकै मान्‍त नांय, बू बा आदमी के समान है, जानें मट‍्टी पै बिना नींव के घर बनांयौ। जब बापै धारा टकराई, तौ बू तुरन्‍त गिर पड़ौ और बू गिरकै सत्‍यानांस है गयौ।” ईसू लोगन कूं परमेस्‍वर के वचन की सिछा दैबे के बाद कफरनहूम में आयौ। तब मांपै एक सूबेदार हतो, जाकौ सेबक इतनौ बीमार हतो कै बू मरबे पै हतो। बू सूबेदार को भौत प्यारौ हतो। सूबेदार नें जब ईसू के बारे में सुनी,तब बानें कछू यहुदी नेतन कूं जि बिनती करबे काजै भेजौ कै बू आयकै मेरे सेबक के पिरान बचायले। तब यहुदी नेतन नें ईसू के जौरें पौहचकै बाते सच्‍चे मन ते बिनती करत भए कही कै सूबेदार जा लायक है कै तू वाके काजै ऐसौ करै। चौंकि बू हमारे लोगन ते पिरेम करतुए और बानें हमारे काजै पिराथना घरऊ बनबायौ है। ईसू बिनके संग गयौ और बू वाके घर ते थोड़ी दूर अई हतो तबई बा सूबेदार नें अपने संगीअन कूं ईसू ते जि कैहबे भेजौ कै, “हे पिरभू अपने आप कूं दुख मत देय चौंकि मैं जा लायक नांऊ कै तू मेरे घर में आबै। जामारै मैने तेरे जौरें आयबे तक कीऊ नांय सोची। पर तू कह दै तौ मेरौ सेबक ठीक है जाबैगौ। मैं खुदऊ एक अधिकारी के नीचे काम करतूं और मेरे नीचेऊ कछू सैनिक काम करतें और मैं बिनते कैहतूं ‘आ’ तौ बे आबतै और मैं कैहतूं ‘जा’ तौ बे जाबतै और जब मैं अपने सेबक ते कैहतूं कै ‘जाय कर’ तौ बू बाय करतुए।” ईसू नें जब वाकी बात जि सुनी तौ बाय वाकी बात पै अचम्भौ भयौ और जो आदमिन की भीड़ वाके पीछे चल रई हती, वाकी ओर मुड़क कै कही के मैने ऐसौ भरोसौ तौ इसरायल के लोगन मेंऊ कऊं नांय देखौ। फिर बा सूबेदार के भेजे भये लोग जब बापिस घर लौटे तौ बिन्‍नें बू दास बिलकुल सही मिलौ। अगले दिन ईसू जब नाइन नाम के नगर कूं जाय रयौ और वाके चेला और एक बड़ी भीड़ वाके पीछे चल रयी हती जैसेई ईसू नगर के फाटक के जौरें पौंहचौ तौ कछू लोग एक मुरदे कूं अर्थी पै रखकै लै जाय रये हते। बू अपनी बिधबा मा कौ इकलौतो बेटा हतो जामारै वाके संग नगर के भौत ते लोग चल रये हते। जब पिरभू ईसू नें देखौ तौ बाय बिधबा पै भौत तरस आयौ और बू बोलौ, “रोबै मत” तब ईसू नें आगे बढ़कै बा अर्थी कूं छूऔ और जो लोग अर्थी कूं लै जाय रये हते बे रुक गये और ईसू नें बा मुरदे ते कही, “हे जबान मैं तोते कह रयौ हूं खड़ौ है जा” तबई बू मुरदा जीन्दों हैके खड़ौ है गयौ और बोलबे लगौ ईसू नें वाकूं वाकी मा कूं दै दयौ। तब सब लोगन पै भय छाय गयौ और बे परमेस्‍वर की बड़ाई करते भये जि कहबे लगे कै हमारे बीच में परमेस्‍वर की ओर ते एक महान बोलने बाला पिरकट भयौ है। और बे जेऊ कहबे लगे की परमेस्‍वर अपने लोगन की मदत करबे काजै आ गयौ है। और ईसू मसीह कै बारे में जि खबर यहुदिया के जौरें चारौ लंग के इलाकेन में फैल गई। इन सब बातन के बारे में यूहन्‍ना के चेलान नें यूहन्‍ना कूं बतायो। तब यूहन्‍ना नें अपने दो चेलान कूं बुलायौ, और बानें बिनकूं पिरभू ईसू ते जि पूछबे भेजौ कै, “आयबे बारौ मसीह तूइऐ कै हम काऊ और कौ इन्‍तजार करें।” फिर बे लोग जब ईसू के जौरें गये तब बिन्‍नें ईसू ते पूछी, “बपतिस्मा दैबे बारे यूहन्‍ना नें हमें तोते जि पूछबे काजै भेजौए कै ‘तू बुई मसीह है जो आयबे बारौ है कै हम काऊ और कौ इन्‍तजार करें?’” बा समै ईसू नें भौत ते बीमारन कूं और दुखिअन कूं ठीक करौ और भौतन कूं दुस्‍ट आतमा ते छुड़ायौ हतो भौतसे अंन्धेन की आँखन कूं रोसनी दयी। और बानें बिनते कही कै, “जाऔ और जो कछू तुमने देखौए और सुनौए बाय यूहन्‍ना कूं बताय देऊ कै अन्धे देखतएं, लंगड़े चल रये हैं और कोढ़ी सुद्ध है रये है। बहरे सुन पाय रये हैं और मुरदे जिलाए जाय रये हैं। और कंगालन कूं सुभ समाचार सुनांयौ जाय रयौ है। बू आदमी धन्य हैं जाय मोय अपनांयबे में कोई परेसानी नांय।” जब यूहन्‍ना कौ सन्देस लाबे बारे चेला चले गये तब ईसू नें भीड़ में लोगन कूं बपतिस्मा दैबे बारे यूहन्‍ना के बारे में बताबौ सुरू करौ “तुम बेहड़ में का देखबे गये हते? का हबा में हलते भये सरकन्‍डे कूं? तब फिर तुम का देखबे गये हते? का काऊ आदमीए जानें भौत ऊजरे कपड़ा पहने हते? बे लोग जो भौत ऊजरे कपड़ा पैहनतें और जो भोग-बिलास का जीबन जीबतैं, बे तौ राज-भवनन मेंई पाये जातैं। पर तुम बताऔ कै का देखबे गये हते? कै काऊ परमेस्‍वर की ओर ते बातन कूं बतायबे बारे कूं? हाँ, मैं तुम्हें बताबतूं, जो तुमनें देखौए बू परमेस्‍वर की ओर ते बात बतायबे बारे तेऊ महान है। जि बूईए जाके बारे में लिखौ गयौ है, “‘देख मैं तोते पैहलेई अपनों दूत भेज रयौऊं, बू तोते पैहले तेई रस्ता तैयार करैगौ।’” मैं तुमें बताबतूं कै, “औरतन ते पैदा हैबे बारेन में यूहन्‍ना ते बड़ौ कोई नांय। पर फिरऊ परमेस्‍वर के राज में छोटे ते छोटौ आदमी अऊं बाते बड़ौ है।” यूहन्‍ना ते बपतिस्मा पाये भये लोगन नें और चुंगी लैबे बारेन नेऊं ईसू की ये बात सुनिकै मान लयौ कै परमेस्‍वर कौ रस्ता सहिए और सच्‍चौ है। पर फरीसी और सास्त्रन कूं सिखाबे बारेन नें बाते बपतिस्मा नां लियौ और परमेस्‍वर के उद्‍देस्‍य कूं ठुकराय दयौ। ईसू नें फिर कही, “तौ फिर मैं जा पीढ़ी के लोगन की बराबरी कौन ते करूं कै बे कैसै हैं? बे लोग बाजार में बैठे बिन बालकन के समान हैं जो एक दूसरे ते कहतें कै, “‘हमनें तुमारे काजै बांसुरी बजायी पर तुम नांय नांचे। हमनें तुमारे काजै सोक-गीत गाये पर तुम नांय रोये।’ चौंकि बपतिस्मा दैबे बारौ यूहन्‍ना आयौ जो ना तौ रोटी खातो और न ही अंगूर कौ रस पीतौ और तुम कैहतौ कै, ‘बामें दुस्‍ट आतमाएं।’ फिर मैं, ‘मनुस्‍य कौ बेटा’ खाते पीते भए आयौ, तौ तुम बाते कहतौ, ‘कै देखौ जि तौ पेटू है, पियक्‍कड़ है, जि तौ चुंगी लैबे बाये और पापिन कौ संगी है।’ परमेस्‍वर की बुद्धी के पीछे चलबे बारे लोगई परमेस्‍वर की बुद्धी कूं सही साबित करते हैं।” तब काऊ फरीसी नें ईसू कूं अपने याँपै भोजन करबे काजै बुलायौ। सो बू फरीसी के घर गयौ और वाके घर में भोजन करबे बैठा। बई नगर में एक पापी औरत हती, जब बाय जि पता लगौ कै ईसू एक फरीसी के घर में भोजन कर रयोए तौ बू संगमरमर की एक सीसी में इत्र लैके आयी। बू वाके पीछे वाके जौरें पामन की ओर खड़ी हती। बू रोय रयी हती अपने आँसुन तै बू वाके पामन कूं भिगो रयी, फिर बानें ईसू के पामन कूं अपने बालन ते पौछ कें वाके पामन कूं चूमने लगी और वाके पामन पै इत्र उड़ेल दयौ। बू फरीसी जानें ईसू कूं अपने घर बुलायौ हतो, जि देखकै मन ही मन सोचौ कै, “अगर जि परमेस्‍वर की ओर ते बाते बतायबे बारौ होतौ तौ बू जान जातौ कै बाकूं छूबे बारी जि औरत कोए? बू जान जातौ जि तौ पापिन है।” ईसू नें बाते कही, “सिमौन मोय तोते कछू कहनोंए।” बू बोलौ, “गुरू, कह।” ईसू नें कही “काऊ साहूकार कौ दो आदमी पै कर्ज हतो। एक पै वाके पाँच सौ चाँदी के सिक्‍का और दूसरे पै पचास हते। चौंकि बे कर्ज नांय लौटाय पाये, जा बजैह ते बानें दोनोंन पै दया करी और बिनकौ कर्जा मांफ कर दयौ। अब तू बता दोनोंन में ते बा साहूकार कूं कौन जादा पिरेम करैगौ?” सिमौन नें उत्‍तर दयौ, “मेरौ बिचार है, बू जाकौ बानें जादा कर्ज मांफ करौ।” ईसू नें कही, “हाँ तैनें सही उत्‍तर दयौए।” फिर ईसू नें बा औरत की और मुड़क कै बू सिमौन ते बोलौ, “तू जा औरत कूं देख रयोए मैं तेरे घर में आयौ, तब तैने मेरे पांम धोयबे काजै मोय पानीअऊं नांय दयौ, पर जानें तौ मेरे पांम आँसुन ते भिगोये हैं और फिर बानें अपने बारन ते पौंछौए। तैने मेरे स्‍वागत में मोय गलेऊ नांय लगायौ पर जब ते मैं भीतर आयौऊं तब ते जि मेरे पामन कूं लगातार चूंम रयी है। तैने तौ मेरे सिर पै तेलऊ नां लगाऔ, पर जानें तौ मेरे पामन पै इत्र मलौए। जामारै मैं तोते कैहतूं कै, जाकौ जि भौत गहरौ पिरेम जि दिखावते, कै जाके भौत पाप छमा करे गए हैं, पर जाके थोड़े पाप छमा करे गए हैं जानें थोड़ौ पिरेम करौऐ।” तब ईसू नें बा औरत ते कही, “तेरे पाप छमा कर दये गये हैं।” फिर जो लोग वाके संग भोजन कर रये हते बे मन ही मन सोचबे लगे, “जि को आदमी है जो पापन कीऊ छमा देतुए?” तब ईसू नें बा औरत ते कही, “तेरे भरोसे नें तोय बचायौ है। सान्‍ती के संग चली जा।” जाके बाद ईसू गांम और नगर नगर में घूमत भयौ परमेस्‍वर के राज कौ सुभ समाचार सुनांयबे लगौ और वाके बारह भेजे भये चेलाऊ वाके संग रैहते। और ईसू कै संग कछू ऐसी औरतऊ हती जिनमें दुस्‍ट आतमा हतीं, बानें जिनकूं बीमारी और दुस्‍ट आतमा ते छुटकारौ दयौ। बिनमें मगदला की रहबे बारी मरियम नाम की एक औरत हती जामें ते ईसू नें सात दुस्‍ट आतमा निकारी हती। और हेरोदेस के भंडारी खोजा की पत्नी योअन्‍ना और सूसन्‍नाह और भौत सी औरत अपने धन-दौलत के जरिये वाकी और वाके चेलान की सेबा करती हती। जब बड़ी भीड़ इकठ्‌ठी भई और नगर नगर के लोग वाके जौरें चले आते हते, तौ बानें दृस्‍टान्‍त में कही, “एक बार एक किसान बीज बोयबे निकरौ बीज बोते भए कछू बीज रस्ता के किनारे गिरे और बू बीज पामन ते कुचलौ गयौ और आकास की चिड़ियन नें बा बीज कूं चुंग लियौ। और कछू बीज कंकरीली धरती पै गिरे और उपजौ, परन्‍तु नमी न मिलबे की बजैह ते सूख गये। कछू बीज कटीली झाड़िन में गिरे और झाड़िन नें संग संग बढ़कें बिनैं दबाय लियौ। और कछू अच्‍छी धरती पै गिरे और उपजकै सौ गुना फल लायो।” जि कैहके बानें ऊंची अबाज ते कही, “जाके जौरें सुनवे के कान होबें बू सुन कै समझ लैबे।” वाके चेलान नें बाते पूछी, जा दृस्‍टान्‍त कौ का मतलबए? ईसू नें बिनते कही, “तुम लोगन कूं तौ परमेस्‍वर के राज के भेदन कूं समझबे की बुद्धी दयी गयी है, पर औरन कूं दृस्‍टान्‍तन में सुनांयौ जातै जाके मारे कै, “‘बे देखत भयेऊ न देखें, और सुनत भएऊ न समझें।’ “जा दृस्‍टान्‍त कौ मतलब जि है कै, बीज तौ परमेस्‍वर कौ वचन है। रस्ता के किनारे के गिरे बीज बिन लोगन कूं दिखातै, जिन्‍ने परमेस्‍वर कौ वचन सुनौ, पर सैतान आयकैं बिनके मन में ते वचन कूं निकार लयो, के कऊं ऐसौ ना होय कै बू भरोसौ करके उद्धार पाय जाय। कंकरीली धरती पै गिरौ भयौ बीज,बिन लोगन कूं दिखातै जो वचन कूं सुनतै और आनन्द ते वचन कूं अपनाबत तौ है, पर बिनके हिरदय में वचन गहराई न पकड़बे की बजैह ते बे थोड़ी देर तक भरोसौ रखतें और परीछा के समै भरोसे ते हट जावतै। जो बीज झाड़िन में गिरे, बिन लोगन कूं दिखातैं, जो वचन कूं सुनतै, पर जब उनपे चलतैं तौ चिन्‍ता, धन-दौलत और जीबन के सुख बिलास में फंस जातैं और वचन फल नांय पाबत। पर अच्‍छी धरती में गिरे भए बीज बिन लोगन कूं दिखाबतै, जो वचन कूं सुनकें भले और उत्‍तम मन में सम्भाले रैहतैं और धीरज ते फल लावतें। “कोई दीया कूं जरायकै परात नीचे नांय रखतई और नां खाट के नीचे रखतै, पर दीबट के ऊपर रखतें कै भीतर आयबे बारेऊ उजीतौ पाबें। “ऐसौ कछू दुबकौ भयौ नांय, जो उजागर नां करौ जाबै और ऐसौ कछू अनजानो नांय, जो जानौ न जाए। “सो तुम चौकस रहौ, कै तुम कौन सी रीति ते सुनतौ? चौंकि जाके जौरें हतै, बाय और दयौ जाबेगौ और जाके जौरें नांय बा पैते बेऊ लेलौ जाबैगौ, जाय बू अपनों समझतुऐ।” ईसू की मा और वाके भईया बाते मिलबे आए, पर भीड़ की बजैह ते बाते मिल नांय सके। और काऊ नें बाते कही, “कै तेरी मा और तेरे भईया बाहर खड़े भए है बू तोते मिलबो चाह रये हैं।” ईसू नें उनकूं उत्‍तर दयौ, कै मेरी मा और मेरे भईया तौ जेई हैं, जो परमेस्‍वर के वचन कूं सुनतै और मानतै। एक दिन ईसू और वाके चेला नाव पै चढ़े और बानें बिनते कही, कै आओ, हम झील के पल्‍ली पार चलें सो बिन्‍नें नाव खोल दईं। पर जब नाव चल रही हती, तब ईसू सो गयौ और तब अचानक एक आँधी आई और नाव पानी ते भरबे लगी और बे सब बड़े खतरा में पर गये। तब बिन्‍नें ईसू के जौरें आयकै बाय जगायौ और कही, हे गुरू! गुरू हम डूबे जातै। तब बानें उठकै आँधी और पानी की लहरन कूं डांटौ, आँधी और पानी थम गए और मांपै सान्‍ती छाय गई। और ईसू नें बिनते कही कै “तुमारौ भरोसौ कां गयौ?” पर बे डर गए और अचम्भौ करके आपस में कहबै लगे, “जि कोए? जो आँधी और पानी कूं आग्‍या देतै और आँधी और पानी वाकी आग्‍या कूं मानतै।” फिर बे नाव ते गिरासेनियों के देस में पौंहचे, जो झील के पल्‍ली पार गलील के सामने हतौ। जब ईसू किनारे पै उतरौ, तौ बाय बा नगर कौ एक आदमी मिलौ, जामें दुस्‍ट आतमाएं हतीं और भौत दिनान तै बानें ना तौ कपड़ा पहने हते और न घर में रहतौ हतो, पर बू कबरन में रहौ करतौ हतौ। बू ईसू कूं देखकै चिल्लायौ और वाके सामने गिरकें ऊंची अबाज ते कही, हे परम पिरधान परमेस्‍वर के बेटा ईसू, तोय मोते का काम! मैं तोते बिनती करतूं,मोय दुख मत दे, चौंकि ईसू बा दुस्‍ट आतमा कूं बा आदमी में ते निकरबे की की आग्‍या दे रयौ हतो, जाके मारे कै बू बापे बार-बार हाबी होती रैहती और य्हां तक लोग बाय सांकरन और बेड़ियन ते हात पैर बांधकै रखत हते। तबऊ बू सबन कूं तोर देतौ और दुस्‍ट आतमाएं बाकूं बेहड़ में लै जातीं हतीं। ईसू नें बाते पूछी, “तेरौ नाम काए?” बानें बाते कही, “मेरौ नाम सेनाएं,” चौंकि बामें भौत सी दुस्‍ट आतमाएं हतीं। और बिन्‍नें बाते बिनती करी, कै हमें पाताल में जायबे की आग्‍या मत दे। पहाड़ पै सूगरन कौ एक बड़ौ झुन्ड चर रयौ हतो सो बिन्‍नें बाते बिनती करी, कै हमें बिन सूगरन में घुस जान दे, तब बानें बिनकूं जायबे की आग्‍या दै दई। तब दुस्‍ट आतमाएं बा आदमी में ते सूगरन में चलीं गईं और बू झुन्ड ढलान के किनारे पैते लुढ़कत लुढ़कत झील में जाय गिरे और डूबके मर गए। और जि देखकें सूगर चरायबे बारे मांते भागे और नगर में और गांमन में जायकै वाकौ समाचार कह सुनांयौ। और लोग जो कछू भयौ बाय देखबे कूं ईसू के जौरें आये और जि देखकै बे डरप गये कै जा आदमी में तै दुस्‍ट आतमाएं निकरीं हती, बू आदमी ईसू के पामन के जौरें पूरे कपड़ा पैहने भए सही दिमाग ते बैठौ हतो। और देखबे बारेन नें बिनकूं बतायौ, कै बू दुस्‍ट आतमा कौ सतायौ भयौ आदमी कैसै अच्‍छौ भयौ। तब गिरासेनियों के आस जौरें के सब लोगन नें ईसू ते बिनती करी, कै तू हमारी सीमा में ते चलौ जा, चौंकि बिनपै बड़ौ भय छा गयौ हतो जामारै ईसू नाव पै चढ़कें लौटबे लगौ। जा आदमी में ते दुस्‍ट आतमाएं निकरी हतीं, बू ईसू ते बिनती करबे लगौ, “कै मोय अपने संग रहन दै।” पर ईसू नें बाय बिदा करके कही, “अपने घर में लौट जा और लोगन ते कह दै, कै परमेस्‍वर नें तेरे काजै कैसौ बड़ौ काम करौ है।” बू जायकै सबरे नगर में पिरचार करबे लगौ, कै ईसू नें मेरे काजै कैसौ बड़ौ काम करौ है। जब ईसू झील के जा पार लौट आयौ तब लोग बाते आनन्द के संग बाते मिले, चौंकि बे सब वाकौ इन्‍तजार कर रये हते। बई समै, याईर नाम को एक आदमी जो पिराथना घर कौ अधिकारी हतो आयौ और ईसू के पामंन पै गिरकै बाते बिनती करके कैहबे लगौ, “मेरे घर चल।” चौंकि वाकी बारह बरस की इकलौती बेटी हती और बू मरबे कूं हती। फिर बू वाके संग चल दियौ और रस्ता में बड़ी भीड वाके ऊपर गिरे पड़ रयी हती। मांपै एक औरत हती जाकूं बारह साल ते खून भैहबै की बीमारी हती और बू अपनों सबरौ पईसा बैद्यन पै खर्च कर चुकी हती पर बू काऊ तरैह ते ठीक नांय भई हती। बानें पीछे ते आयकै ईसू के कपड़ा कौ कौनों छू लियौ और तुरन्‍तई वाकौ खून भैहबौ बन्द है गयौ। जापे ईसू नें कही कै मोय कौन्‍नें छूऔऐ? जब सब मनैं कर रये हते, तब पतरस नें कही, “हे स्‍वामी सब लोगन नें तौकूं चारौ ओर ते घेर रखौए और भीड़ तोपै गिरी जा रही है तौ कैसै पतौ चलेगौ के तोए कौन्‍नें छूऔ है।” पर ईसू नें कही, कै मोय काऊनें छूओऐ चौंकि मैंनें जान लयोए कै मोमें ते सामर्थ निकरी है। जब औरत नें देखौ, कै मैं दुबक नांय सकत, तब काँपत भयी आयी और वाके पामन में गिरके सब लोगन के सामने बतायौ कि मैंनें का बजैह ते तोय छूऔऐ और कैसै मैं बाई समै ठीक गई। जापे ईसू नें कही, जा बेटी तेरे भरोसे नें तोय ठीक करौ है, चैन के संग जा। ईसू जब जि कैह ही रयौ हतो तबई पिराथना घर के सरदार के य्हांते कोई आयकै सरदार कूं कैहबे लगौ, “तेरी बेटी तौ मर गई। अब गुरू कूं दुख मत देय।” जि सुनिकें ईसू नें याइर ते कही, “डरपै मत, केवल भरोसौ रख, तौ तेरी बेटी बच जाबैगी।” जब ईसू याईर के घर पौंहचौ तब बानें पतरस, यूहन्‍ना, याकूब और लड़की के माँ-बाप कूं छोड़कै काऊए अपने संग भीतर न आवन दयौ। और सब वाके काजै रोय रये और बिलाप कर रये हते, पर ईसू नें कही रोओ मत, बू मरी नांय पर सो रयी है। बे जि जानते, कै लड़की मर गई है, सो वाकी हसी करबे लगे। पर बानें वाकौ हात पकरौ और कही, हे लड़की उठ! तब वाके पिरान फिर आय गये और बू तुरन्‍त बैठ गयी, फिर बानें आग्‍या दई, कै बाय कछू खायबे कूं देऊ। वाके माँ-बाप चकित भए, पर बानें बिनें चितायौ कै जो कछू भयौए, बाय बू काऊए न बतामें। ईसू नें बिन बारह भेजे भये चेलान कूं अपने जौरें बुलायौ और बिनकूं दुस्‍ट आतमाएं निकारबे कौ अधिकार दियौ और बानें बीमारी कूं ठीक करबे की सामर्थ दई। और बानें बिनकूं परमेस्‍वर कै राज कौ सुभ समाचार पिरचार करबे और बीमारन कूं ठीक करबे के काजै भेजौ। ईसू नें बिनते कही कै तुम रस्ता के काजै, ना तौ लठिया ना तौ झोरी और ना तौ रोटी,और आँटी मेँ रुपया पैसा मत लियों और पैहनबे कूं अलग ते कुरता और ना कछू जरूरत कौ सामान लियो, और जा घर में तुम जाऔ बा घर में तब ठहरे रहियों जब तक बा सहर कूं ना छोड़ देऔ जा जगैह के लोग तुमें ना अपनाबें और तुमारी नांय सुनें, तौ मांते चलतेई अपने पामन की धूल झाड दयौ जाते बिनके बिरोध में गबाही रैहबे कै बे अपने नांस हैबे कौ कारन खुदई है। फिर बे मांते निकरकै गांमन में सुभ समाचार सुनाबत भये और लोगन नें ठीक करत भये फिरते रहै। बा देस कौ राजपाल हेरोदेस जि सुनिकै डर गयौ कै चौंकि कछू लोग मांपै बात कर रये हते कै यूहन्‍ना बपतिस्मा दैबे बारौ मरे भयेन मेंते जीबित हैके आय गयौ है। और कछू लोग कैह रये कै एलियाह दिखाई दै रयौ है और कछू लोग जि कैह रये कै, पुराने समै कौ परमेस्‍वर की ओर ते बात बतायबे बारौ जिन्दा है गयौ है। जिन बातन्‍नें सुनिकै हेरोदेस कैहबे लगौ कै, “यूहन्‍ना बपतिस्मा दैबे बारे कौ तौ सर मैंनें कटबा डारौऐ तौ जि कोए जाके बारे में जीबित हैबे की खबर मोय सुनिबे में आय रयी है?” और बू ईसू कूं देखबे काजै उताबलौ हैबे लगौ। जब ईसू के बारह भेजे भये चेला ईसू कै जौरें लौटकै आए और जो कछू बिन्‍नें करौ बू सब कछू ईसू कूं बतायौ तौ ईसू बिन्‍नें चुपचाप मांते लैकें बैतसैदा नाम कै नगर कूं चलौ गयौ। पर लोगन जाके बारे में पतौ और भीड़ ईसू के पीछे है लयी। तब ईसू नें बिनकौ स्‍वागत करौ और बू परमेस्‍वर के राज के बारे में बिनकूं बतायबे लगौ। फिर ईसू नें बिन लोगन कूं ठीक करौ जिनें ठीक हैबे जरूरत हती। जब साँझ भई तब ईसू के बारह भेजे भये चेलान नें ईसू के जौरें आयकै बाते कही, “कै जा भीड़ कूं जौरें के गांमन में भेज दै कै, जि अपने खायबे पीबै कौ इन्‍तजाम कर सकैं चौंकि हम तौ बेहड़ में है।” ईसू नें बिनते कही कै, “तुमंई इनैं कछू खायबे कूं देऊ।” बिन्‍नें कही, “हम पै तौ बस पाँच रोटी और दो बे मछलीन कूं छोड़िकें और कछू नांय हत। तू का चाहते कै हम बाजार कूं जांय और इन सबन लोगन के काजै भोजन खरीदकै लायें?” (मांपै करीबन पाँच हजार आदमिन की भीड़ हती।) ईसू नें चेलान ते कही, “तुम इन सबन कूं पचास-पचास की पंगतिन में बैठाय देओ।” तब चेलान नें बैसौई करौ और हरेक कूं बैठाय दियौ। तब ईसू नें बे पाँच रोटी और दो मछलीन कूं सुरग की ओर उठायकै परमेस्‍वर कौ धन्यबाद करौ और फिर उनके टुकड़ा करकै अपने चेलान कूं दये कै बे लोगन में परौस दें। बिन सब लोगन कौ खायकै पेट भर गयौ, वाके बादऊ चेलान नें बचे भये टुकड़न ते भरीं भई बारह डलिया उठाईं। जब ईसू अकेले में पिराथना कर रयौ बा समै ईसू के चेला वाके जौरें आये। तब ईसू नें बिनते पूंछी कै “लोग मोय का कैहतें मैं कोऊं।” तब चेलान नें कही, कै कछू तौ तोए यूहन्‍ना बपतिस्मा दैबे बारौ और कछू एलियाह कैहते पर कछू जि कैहते कै पुराने जमाने कौ परमेस्‍वर की ओर ते बात बतायबे बारौ जीबित हैके आय गयौए। ईसू नें कही, कै तुम मोय का कैहतो कै मैं कोऊं? पतरस नें कही, “परमेस्‍वर कौ मसीह।” फिर ईसू नें बिनै अच्‍छे ते चेतायकै कही, जि बात काऊ ते मत कहियों। ईसू नें बिन चेलान ते कही कै, “मुझ, ‘मनुस्‍य के बेटा’ के काजै जि बात जरूरीए के, मैं दुख उठाऊं और यहुदी नेता, यहुदी पिरधान पुरोहित और सास्त्रन कूं सिखाबे बारे मोए तुच्‍छ जानिंगे और मरबा डारिंगे। पर मैं तीसरे दिना मरे भयेन में ते जीबित है जाऊंगो।” ईसू नें बिनते कही कै, “जो मेरे पीछे आयबो चाहबै बू खुद की इच्‍छा ते जीबौ छोड़ दैवे और मेरे पीछे चलवे काजै जा हद तक दुख उठावें कूं तईयार होबै कै अपने मरबे कीअऊ चिन्‍ता नांय करै। फिर मेरे पिछै आनों है। चौंकि जो कोई धरती पै अपनों जीबन बचाबौ चांहैगौ, बू सुरग में अपने जीबन कूं खोबैगौ जो कोई धरती पै मेरे काजै अपने जीबनए दैबैगौ, बू सुरग में जीबन पाबेगौ। बा आदमी कूं जाते का फायदा कै बू संसार के सबरे सुख पाय लैबे और अपने सुरग के जीबन कूं खो दैबै? जब कोई आदमी मोय और मेरे वचन कूं अपनांयबे में सरम करै तौ मैं, ‘मनुस्‍य कौ बेटा’ जब अपने परम पिता और पबित्र सुरग दूतन के संग महिमा में आऊंगौ तब मैऊं बाए अपनांयबे ते लजाऊंगो। “मैं तुमते सच कैहतूं कै यांपै ऐसेऊएं कछू लोग हैं बे जब तक नांय मरिंगे तब तक परमेस्‍वर के राज कूं नांय देख लिंगै।” इन बातन के कैहबे के लगभग आठ दिना के बाद ईसू पतरस,यूहन्‍ना,और याकूब कूं लैके पहाड़ पै पिराथना करबे गयौ। जब ईसू पिराथना कर रयौ हतो तब वाके चेहरा कौ रूप अचानक बदल गयौ और वाके कपड़ा एक दम ऊजरे हो गये और चमकबे लगे। तब मांपै दो आदमी पिरगट भए बे ईसू ते बात कर रये हते बे मूसा और एलियाह हते। बे अपनी महिमा संग पिरगट भए हते और,ईसू की मौत के हैबै के बारे में बात कर रये हते। जाय ईसू परमेस्‍वर की मरजी ते येरूसलेम में पूरौ करबे बारौ हतो पतरस और वाके संगी उघियाय रये हते,जब बे पूरी तरैह ते जग गए। बिन्‍नें ईसू की महिमा और बिन दो आदमिन कूं देखौ हतो। जब बे लोग ईसू के जौरें ते जाबे लगे, तब पतरस नें ईसू कही, “हे गुरू जि य्हांपै हमारौ हैबो कितनौ अच्‍छौ है कै हम यांपै तीन कुटिया बनाऐं एक तेरे काजै एक एलियाह के काजै और एक मूसा, के काजै,” बाय जि नांय मालूम हती कै बू का कैह रयौए। बू जि कैही रयौऔ कै, बादल बिनपै आयकै छाय गयौ और बे बादल तै घिरबे की बजैह ते भयभीत है गये। तबई आकास में ते जि अबाज आई कै, “जि मेरौ प्यारौ बेटा है। जाय मैंनें चुनों है तुम जाकी सुनौ।” जि अबाज आबे के बाद मांपै ईसू अकेलौ रैह गयौ। चेला इन बातन कै बारे में चुप रये जो बिन्‍नें देखी हतीं और बा बारे में बिन्‍नें काऊ ते कछू नांय कही। दूसरे दिना जब बे पहाड़ पैते नीचे उतरकै आये तौ एक भौत बड़ी भीड़ ईसू के जौरें आई। भीड़ मेंते एक आदमी नें चिल्‍लायकै कही, “हे गुरू मैं तुम तोते बिनती करतूं कै तू मेरे बेटा पै दया कर बू मेरौ इकलौतो बेटाए। दुस्‍ट आतमा बाय जकड़ लेते और बू चीख उठतौ और मोंह मेंते झाग डारबे लग जाते और बू बाय मरोड़ डारते और बाय कबऊ नांय छोड़ती और बाय भौत सताबती रैहतै। मैने तेरे चेलान ते बिनती करि कै ‘बे बाय निकार दे, पर बे बाय नांय निकार सके।’” तब ईसू नें भीड ते कही, “अरे अबिसबासियों और भटके भये लोगो में कब तक तुमारे संग रहुंगो और तुमें कब तक सहुंगो? जा अपने बेटा है मेरे जौरें लैके आ।” जब बू अपने लड़का कूं ईसू के जौरें लाय रयौ तबई दुस्‍ट आतमा बा लड़का में आ गयी और बानें बाकूं मरोड़ के धरती पै पटक दयौ,तब ईसू नें बा दुस्‍ट आतमा कूं फटकारौ और बा लड़का कूं ठीक करके वाके बाप कूं दै दयौ। बे सब परमेस्‍वर की महिमा देखकै चकित रैह गए। ईसू जो कछू कर रयौ हतो बाय देखकै लोग अचम्भौ कर रये हते। तब ईसू नें अपने चेलान ते कही, “तुम जि बात ध्‍यान में राखियों कै मैं, ‘मनुस्‍य कौ बेटा’ आदमिन कै हातन ते बिसबास घात करिके पकरबायौ जाऊंगौ।” पर जि बात चेलान की समझ में नां आई और बा बात कौ मतलब बिनते छिपौ रहौ और जि बात बिनकी समझ में नांय आयी। जाके बारे में बे ईसू ते पूछबे में डरते हते। एक बार ईसू के चेला आपस में बहस के रये हते कै, हम में ते बड़ौ कोए। तब ईसू बिनके मन के बिचार जानिकें, एक बालक कूं अपने जौरें बुलायकै खड़ौ करौ। और बिनते केहबे लगौ, “कोई मेरे नाम ते जा छौटे बालक कूं अपनातै बू मोए अपनातै और मेरे भेजबे बारे परमेस्‍वर कूंअऊं अपनाबतै, जामारै तुम में जो सब में छोटौऐ बेई बड़ौऐ।” ईसू के चेला यूहन्‍ना नें कही, “हे गुरू, हमनें तेरे नाम ते एक आदमी कूं दुस्‍ट आतमांन कूं निकारते भयौ देखौ है और हमनें बाय रोकबे की कोसिस करी, चौंकि बू हम में ते एक नांओ।” ईसू नें बाते कही, “बाय मत रोकौ। चौंकि जो तुमारे बिरोध में नांय बू तुमारेई पच्‍छ में है।” जब ईसू कौ सुरग जायबे कौ समै आयौ, तब ईसू नें येरूसलेम जायबे की ठान लयी। और ईसू नें चेलान कूं पैहले तेई सन्देस पौंहचाबे बारे सामरी लोगन के गांम में भेज दयौ के बे वाकौ रैहबे कौ इन्‍तजाम करें। पर सामरी लोगन नें ईसू कौ स्‍वागत करबे ते मनै कर दयी चौंकि बू येरूसलेम कूं जाय रयो। जि देखकै ईसू के चेला याकूब और यूहन्‍ना नें कहा पिरभू तुम का चांहतौ कै हम आग्‍या देबे के आकास ते आग बरसै और बिन्‍नें भस्म कर देय। जापे ईसू नें बिनकूं डांटौ और फटकारौ। और कही, “का तुम ना जानौ कै तू कैसी आतमा के हो? मैं, ‘मनुस्‍य कौ बेटा’ लोगन की आतमा कौ नांस करबे नांय बल्कि बिनकौ उद्धार करबे काजै आयौ हूं।” तब बे दूसरे गांम में चले गये। जब बे रस्ता के किनारे जाय रये हते तब काऊ नें बाते कही, “कै तू ज्हां कहूं पै जाबेगौ मैं तेरे पीछे चलूंगौ।” ईसू नें बाते कही, “लोमड़िन की तौ भाट और आकास में उड़िबे बारे चिड़ियन केऊ घोंसला होतै, पर मुझ, ‘मनुस्‍य के बेटा’ के काजै सिर ढकबे काजै कोई जगैह नांय।” बानें काऊ दूसरे आदमी ते कही, “कै तू मेरे पीछे हो लै।” पर बा आदमी नें कही “पिरभू पैहले मोय जायके मेरे बाप कूं घाड आबन दै।” तब ईसू नें बाते कही कै, “मरे भयेन कूं अपने मुरदे घाड़न दै। तू जा और परमेस्‍वर के राज कौ पिरचार कर।” फिर कोई दूसरो बोलो, “पिरभू! मैं तुमारे पीछे चलूंगौ, पर मोय अपने घर बारेन ते बिदा लै लेन दै।” ईसू नें बाते कही, “हल की मूठ पकड़बे के बाद जो मुड़कर पीछे देखत रैहतै, बू परमेस्‍वर के राज की सेबा करबे के लायक नांय।” जाके बाद पिरभू ईसू नें बहत्‍तर चेलान कूं चुनों और जिन नगर और गांम में बू खुद जायबे बारौ हतो, मांपै बिनकूं दो-दो करके अपने ते आगे भेजौ। और फिर ईसू नें बिन चेलान ते कही, “कै फसल तौ भौतई खड़ी है, पर मजदूर तौ थोरेसे हैं। जामारै खेत के मालिक ते पिराथना करौ कै अपनी फसलैं काटबे काजै मजदूर भेज दैबे।” जाऔ मैं तुमें भेड़ियन के बीच में मैमना की तरैह ते भेजतूं। तुम ना तौ बटुआ और झोला और जो जूता तुमनें पैहने है बिनके अलाबा दूसरे जूता मत लियों और रस्ता में रुककै काऊ ते नमस्‍कार मत करियों। “जब तुम जा काऊ के घर पै जाऔ मांपै सबते पैहले जि कहियों, ‘कै जा घर में सान्‍ती होय।’ और अगर बा घर में सान्‍ती पाबै लायक कोई होबेगौ, तौ बा घर में तुमारी सान्‍ती ठहरैगी और ना होगौ तौ बू सान्‍ती तुमारे जौरें बापिस लौट आबैगी। बई घर में ठहरियों और बिनपै जो कछू होय बाईऐ खईंयों-पीयों, चौंकि मजदूर कूं मजदूरी पायबे कौ अधिकार है। रैहबे काजै घर घर मत भटकियों। “जा नगर में तुम जाऔ और बा नगर के लोग तुमारौ स्‍वागत करबे में तुमारे सामने जो कछू परोसें बईऐ खईंयों। और मांपै बीमारन कूं ठीक करियों और बिनते कहियों के ‘परमेस्‍वर कौ राज तुमारे जौरें आय गयोऐ।’ अगर तुम काऊ नगर में जाओ और मांके लोग तुमें न अपनाबें तौ तुम मांके गलियारों में जायकै कहौ, ‘हमारे पामन में लगी भयी तुमारे नगर की धूरऊ हम तुमारे सामने चेताबे काजै झार रहै है। फिरऊ तुम जि जान लेओ के परमेस्‍वर कौ राज तुमारे जौरें आय गयोऐ।’ मैं तुमते कैहतूं, कै परमेस्‍वर के न्याय के दिना बा नगर की दसा सदौम नगर तेऊ जादा बुरी होगी। “हाय है खुराजीन के लोगन पै, हाय है बैतसैदा के लोगन पै, चौंकि जो अचम्भे के काम तुम में करे गए, अगर बू सूर और सैदा नगर में करे जाते, तौ मांके लोग कब के बोरी पहनकै और राख पै बैठकै जि दिखातै के बिन्‍नें अपने पापन ते मन फिरा लियौ है। परमेस्‍वर के न्याय के दिना तुम सूर और सैदा नगर तेऊ ज्‍यादा दन्‍ड पाऔगे। हे कफरनहूम, का तू सुरग तक ऊंचौ उठायौ जाबैगौ? नांय, तू तौ पाताल में नीचे तक गिरायौ जाबैगौ।” ईसू नें फिर अपने चेलान ते कही, “कोई तुमारी सुनतें बू मेरी सुनतें और जो कोई तुमें ठुकरातै है बू मोय ठुकरातै और जो कोई मोय ठुकरातै बू मेरे भेजबे बारे कूं ठुकरातै।” फिर बे बहत्‍तरऊ चेला आनन्द मनाबत भये लौटे और केहबे लगे, “हे पिरभू! तेरे नाम तै असुद्ध आतमऊ हमारौ कैहबौ मानतैं।” ईसू नें बिन्‍नें कही, “मैंनें सैतान कूं बिजली की नाईं सुरग ते गिरतौ भयौ देखौए। देखौ, मैंनें तुमें सांप और बिच्छुन कूं कुचलबे कौ और सैतान की सबरी सक्‍तीन पैऊ अधिकार दयौ है जाते कै बू तुमारी कैसीऊ हानि ना कर सकै। पर तुम जा बात में खुस मत हो, कै दुस्‍ट आतमा तुमारौ कैहबौ मानतें,पर तुम जा बात में खुसी मनाऔ कै तुमारे नाम सुरग में लिखे हैं।” बाई समै ईसू पबित्र आतमा में भरकै कैहबे लगौ, “हे पिता परमेस्‍वर, आकास और सबरी धरती के मालिक मैं तेरौ धन्यबाद करतूं कै, तैने इन बातन कूं ग्‍यानबान और समझदार लोगन ते छिपायके रखौ और इन बातन कूं बालकन पै पिरगट करौ। और जेई तोकूं अच्‍छौ लगौ। “मेरे पिता नें मोय हरेक बात की जिम्बेदारी सौंपीए। पिता कूं छोड़कै कोई नांय जान्‍त कै बेटा कोऐ और बेटे कूं छोड़कै कोई जि नांय जान्‍त कै पिता परमेस्‍वर कोऐ। केवल बेई जानतैं, जापे बेटा पिरगट करबे की किरपा करतुए।” तब ईसू नें अपने चेलान की ओर मुड़क कै बिनते एकान्‍त मैं कही, “धन्य हैं बे आँखें, जो जि सब देखतें जाय तुम देख रये हो। चौंकि मैं तुमते कैहतूं कै जो बात तुम देख रयेऔ बिन बातन नें कितने राजा और परमेस्‍वर की ओर ते बात बताबे बारे बिन बातन कूं देखबौ चाहते हते, पर बिन्‍नें बिनकूं नांय देखौ। और जो बातें तुम सुन रयेओ, बे बिनें सुनबौ चाहते हते, पर बे बिन्‍नें सुन नांय सके।” फिर काऊ दिन एक सास्त्रन कौ सिखाबे बारौ ईसू की परीछा करबे, काजै आयौ और ईसू ते जि पूछबे लगौ, “हे गुरू मैं कबऊ नांय खतम हैबे बारे जीबन कौ अधिकारी हैबे काजै का करूं?” तब ईसू नें कही, “कै व्‍यबस्था की किताब में का लिखौ है? और तुम बाय कैसै पढ़तौ?” बानें ईसू कूं उत्‍तर दयौ कै, “तू अपने पिरभू परमेस्‍वर ते अपने सबरे मन ते, अपनी सबरी आतमा ते, अपनी सबरी सक्‍ती ते और सबरी बुद्धी ते पिरेम कर और अपने पड़ौसी तेऊ अपने समान पिरेम कर।” ईसू नें बाते कही कै, “तैने सही उत्‍तर दयौ है जेई काम कर तौ तू कबऊ नांय खतम हैबे बारौ जीबन पाबेगौ।” तब बानें अपने आप कूं जादा धरमी ठहरबे की इच्‍छा के काजै ईसू ते पूछी कै, “मेरौ पड़ौसी कोऐ।” ईसू नें बाय उत्‍तर दयौ कै, “एक आदमी येरूसलेम ते यरीहो कूं जा रयौ हतो, बू डाकूंन के हात में लग गयौ और बिन्‍नें वाकूं लूटौ और य्हां तक कै वाके कपड़ऊ छीन लिये और बाते मार पीट करके अधमरौसौ करके छोड़ गये। तब बाई समै एक यहुदी पुरोहित जो बाई रस्ता में हैकें जाय रयौ हतो बानें बा घायल आदमी कूं देखौ पर बू बाते कतरायके चलौ गयौ। और जाई तरैह ते बड़े पिराथना घर में सेबा करबे बारौ लेबी गोत कौ एक आदमीऊं बाय ऐसेई छोड़कै कतरायके चलौ गयौ। और जाके बाद में एक सामरी आदमी आयौ और बानें बाय देखकें बापै तरस खायौ। और बानें वाके घावन पै तेल और अंगूर कौ रस डारकै वाके पट्टीयां बांधी और बाय अपने गधा पै बैठाय के सराय में लायकै वाकी सेबा-टहल करी। अगले दिना फिर बानें बा सराय बारे कूं दो चाँदी के सिक्‍के दये और कही, ‘जा आदमी की सेबा-टहल करना और अगर तेरौ जऊ ते जादा खर्च है जायगौ तौ मैं बापिस आयकै तोए दै दुंगो।’” जि दृस्‍टान्‍त कैहबे के बाद ईसू नें पूँछी, “तुमारी राय में बा डाँकू के हात में परे भए आदमी कौ इन तीनोंन मेंते पड़ौसी को निकरौ?” सास्त्रन कूं सिखाबे बारे में बाय उत्‍तर दयौ, “बू आदमी जानें बापे दया करी।” तब ईसू कही, “जा तू अऊ एसौई करियो।” जब ईसू अपने चेलान के संग रस्ता में जाय रये हते तौ मांपै एक गांम परौ और मांपै एक मारता नाम की औरत ईसू कूं अपने घर पै लै गयी। वाकी मरियम नाम की एक बहन हती, बू पिरभू के पामन में बैठकै वाके वचन सुनती रैहती। पर मारता सेबा की तैयारी में लगी हती, जामारै बू व्‍याकुल हैके ईसू के जौरें आयी और केहबे लगी, “हे पिरभू का तोय चिंता नांय कै मेरी बहन नें सबरौ काम बस मोई पै डार दयौ है? जामारै तू बाते मोय सहारौ दैबे की कैह।” पिरभू नें बाय जबाव दयौ, “मारता, हे मारता, तू भौत सी बातन के काजै चिंतित और व्‍याकुल रैहतै। पर बस एकई बात जरूरीए और मरियम नें अपने काजै बा अच्‍छे भाग कूं चुनों है, सो बू बाते छीनौ नांय जाबैगौ।” एक दिना ईसू मसीह काऊ जगैह पै पिराथना कर रऔ। जब बू पिराथना कर चुकौ तब वाके चेलान में ते एक चेला नें वाके जौरें आयकै कही “हे पिरभू! हमें पिराथना करबौ सिखा, जैसे कै यूहन्‍ना बपतिस्मा बारे नें अपने चेलान कूं पिराथना करबौ सिखाऔ।” तब ईसू मसीह नें बिनते कही, “तुम जब पिराथना करै करौ तौ कहौ, “‘हे पिता तेरौ पबित्र नाम आदर पाये। तेरौ राज आबै, हमें रोजाना की रोटी रोज दैवौ कर जैसे हमनें अपने अपराधिन कूं छमा करौ है, बैसेई हमारे अपराधन कूं छमा कर, और हमें परखे जाबे ते दूर रख।’” फिर ईसू मसीह नें बिनते कही, “मानों तुम में ते काऊ कौ एक मित्र आधी रात कूं वाके जौरें आयकै कहै कै, ‘हे मित्र मोय तीन रोटी दै दै, चौंकि मेरौ मित्र यात्रा पैते आयोए और मोपै बाय खबायबे काजै कछू नांय हत।’ “सोचौ कै बू आदमी भीतर तेई जबाब दे कै, ‘मोय परेसान मत करै। मेरौ दरबज्‍जौ बन्द है चुकौए मेरे बालक मेरे संग बिछौना पै है। मैं तोय कछू दैबे काजै मैं नांय उठ सकत।’ मैं तुमते कैहतूं कै, अगर बू वाकौ मित्र होत भयेऊ वाके काजै ना तौ उठे और न बाय कछू दैबे। तौऊं वाके गिड़गिड़ाबत रैहबे की बजैह ते बाय जितनी जरूरतै उतनी बाय दैबैगौ। “जाई मारे मैं तुमते कह रयौऊं, कै तुम मागिंगे तौ तुमें दयौ जाबैगौ, ढ़ूढौगे तौ पाऔगे,खटखटाओगे तौ तुमारे काजै द्वार खोलौ जाबैगौ। चौंकि जो कोई मांगतै बू पाबतै और जो ढूंडतै बाय मिलतै और जो द्वार खटखटाबतै वाके काजै खोलौ जाबैगौ। “तुम मेंते ऐसौ कौन सौ बाप है जाकौ बेटा बाते मछली मांगै तौ बाय सांप दैबै और अगर बू अन्‍डा मांगे तौ बू बाय बिच्छू दैबै? जामारै तुम बुरे होत भऐऊ अपने बालकन कूं अच्‍छी चीज दैबौ जानतौ तौ तुमारौ सुरगीय पिता अपने मांगबे बारेन कूं पबित्र आतमा चौं नांय दैवेगौ?” एक दिनां ईसू नें एक आदमी में ते गूंगी दुस्‍ट आतमा निकारी, बानें बा आदमी कूं गूंगौ बनांय रखोऔ और जब बू आतमा निकर गई तब गूंगा आदमी बोलबे लगौ जि देखकै लोग भौत अचम्भित भये। पर बिन आदमिन में ते कछू आदमी कैहबे लगे कै जि तौ दुस्‍ट आतमा के मुखिया बालजबुल की सहायता ते दुस्‍ट आतमा निकारतै, तब लोगन नें ईसू कूं परखबे काजै बाते सुरगीय चिन्ह माँगौ। जाते जि पतौ चल सकै कै बू सुरग की ओर ते भेजौ गयौ है। बिनके मन की बातन कूं ईसू जानतौ हतो बानें लोगन ते कही, “जा राज में फूट पड़ जाबै बू राज तौ जल्दी अई खतम है जाबै और घर में फूट परबे पै बू घर नस्‍ट है जाबतें, अगर सैतानई सैतान कौ बिरोधी है जाय तौ वाकौ राज कहां टिकौ रैहबेगौ वाकौ राज तौ खतमई है जाबैगौ और मैं जि जामारै कैह रयौ हूं कै तुम कैहतौ, कै मैं सैतान के मुखिया बालजबुल की सहायता ते दुस्‍ट आतमाएं निकारतूं। अगर मैं बालजबुल की सहायता ते दुस्‍ट आतमांन कूं निकारतूं तौ फिर तुमारे चेलाऊ बालजबुल की सहायता ते दुस्‍ट आतमा निकारते होंगे। जा बात कै काजै बुई तुमें गलत साबित करिंगे। यदि में सच मैं परमेस्‍वर की सामर्थ ते दुस्‍ट आतमा निकारतूं तौ समझ लेओ कै परमेस्‍वर कौ राज तुमारे नजदीक आय गयौए। “जब कोई तागतबर आदमी हतियार बांधकै अपने घर की रखबारी करतुए तौ वाकी सम्पत्‍ती बची रैहबैगी। अगर बाऊते जादा तागतबर आदमी आयकै बापै चढ़ाई करके बाय जीत लैबे और जिन हतियारन पै बाय भरोसौए बिनें छीनके वाकी सम्पत्‍तीऐ बांट दैबे। “जो मेरे संग नांय बू मेरौ बिरोधी है और जो मेरे संग इकठ्‌ठौ नांय करत, बू बाय बिखेरतै। “जब कोई दुस्‍ट आतमा काऊ आदमी में ते निकरतै तौ बू आराम करबे काजै बेहड़न में भटकती फिरतै, जब बाय कहूं जगह नांय मिलै तौ बू कैहबे कै, ‘मैं तौ बाई घर में जाऊगीं।’ जब बू बापस बा घर में आबतै और बा घर कूं साफ सुथरौ और सजौ सजायौ पाबतै। तौ फिर बू जायकै अपने तेऊ जादा सात बुरी दुस्‍ट आतमान कूं अपने संग लैके आबतै और बामें घुस जातै और बा आदमी की दसा पैहले तेऊ जादा बुरी है जाबतै।” जब ईसू जि बात कैह रयौ तबई भीड़ मेंते एक औरत नें ऊंची अबाज में कही कै धन्य है बू माँ जानें तोय जनम दयौ और धन्य है बू माँ जानें तोकूं अपनों दूध पिलायौ। पर ईसू नें बिनते कही कै, “बाते जादा तौ तुम लोग धन्य हो जो परमेस्‍वर कौ वचन सुन्‍तें और बिनकूं मानतें।” जब ईसू के चारौं ओर भीड़ इकठ्‌ठी है गयी तब बिनैं देखकै ईसू नें कही कै, “जा युग के लोग बुरे हैं जो चिन्ह मागतएं पर इनकूं परमेस्‍वर की बात बतायबे बारे योना कूं छोड़ और कोई चिन्ह नांय दयौ जाबेगौ चौंकि जैसे योना नीनबे कै लोगन के काजै एक चिन्ह बन गयौ बैसेई मैं, ‘मनुस्‍य कौ बेटा’ जा युग के लोगन के काजै चिन्ह ठहरैगौ। परमेस्‍वर के न्याय के दिनान में दछिन की रानी सीबा खड़ी हैके जा युग के लोगन पै दोस लगाबैगी चौंकि बू सुलेमान की ग्‍यान की बात सुनबे के काजै धरती के जा छोर ते बा छोर तक गयी। पर देखौ मैं तुमते कैहतूं, याँपै एसौऊ कोई है जो सुलेमान तेऊ जादा महान है। न्याय के दिना में नीनबे के लोगऊ जा युग के बिरोध में जि उठिंगे और बिनपै दोस लगायेंगे,चौंकि बिन्‍नें योना की परमेस्‍वर के वचन की सिछा सुनिकै पापन ते मन फिरायौ हतौ। और में तुमते कैहतूं, याँपै एसौऊ कोई है जो योना तेऊ महान है। “कोई आदमी दीये कूं जरायकै छुपाके नांय रखत और ना परात के नीचे रखे पर बाय दीबट के ऊपर रखतें, जाते भीतर आबे जाबे बारे उजीते में देख सकें। ऐसेई तुमारे सरीर कौ दीया तुमारी आँख है, जामारै तुमारी आँख साफ हैं तौ तुमारौ सरीर उजीते में भरौ रैहबेगौ,अगर तुमारी आँख साफ नांय तौ तेरौ सरीर अंधेरे ते भरौ रेहबैगौ। जामारै तुम सावधान रहीयौ कै जो तुमारे भीतर कौ उजीतौ है अंधेरे में नांय बदल जाबे। अगर तुमारौ सबरौ सरीर उजीते ते भरौए और सरीर में कोई अंग अंधेरे में नांय है तौ बू पूरी तरैह ते चमकेगौ,जैसे कोई दीया अपनी किरनन ते चमक रयौ होय।” ईसू जब इन बातन्‍ने कर चुकौ तब एक फरीसी नें ईसू कूं अपने घर खाने पै बुलायौ और बू भीतर जायकै खानों खायबे बैठ गयौ। पर फरीसियन्‍नें देखौ, कै ईसू नें खानों खायबे ते पैहले बिनकी रीति के अनुसार हात नांय धोए तौ बिनै बड़ौ अचम्भौ भयौ। जापे पिरभू नें बिनते कही कै, “तुम फरीसी थाली लौटा कटौरा केबल बाहर ते तौ मांज देतौ पर भीतर ते तुम लोग लालच दुस्‍टता ते भरे भये हैं। हे मूर्ख लोगो जानें बाहर कौ भाग बनांयौ है का बानें भीतर को भाग नांय बनांयौ? बेई भीतर केऊ भाग कूं बनाबतै। जामारै अपने मन कूं साफ करकै तुम अपनी चीजन कूं गरीबन में बांट देओ, फिर तुमारे काजै सब कछू पबित्र हे जाबैगौ। “हे फरीसियो, तुमारे काजै धिक्‍कारै, चौंकि तुम पुदीना साग पात और जड़ी बूटियों का दसमों हिस्सा तौ परमेस्‍वर कूं देतौ,पर तुम लोगन के संग पछपात करते हो और परमेस्‍वर के पिरेम कूं टाल दैतौ भलौ तौ जि होतौ कै तुम लोगन के संग पछपात ना करते और तुम परमेस्‍वर के पिरेम कूं दिखाते और दसमों हिस्साऊ देतै। “हे फरीसियो तुमें धिक्‍कारै, तुम पिराथना घरन में ऊंची ऊंची जगह पै बैठबे ते पिरेम करतौ और बजारन में नमस्‍कार करबाबौ तुमें अच्‍छौ लगतै। “तुम लोगन कूं धिक्‍कार चौंकि तुम बिन छिपी भयी कबरन के समान हो जिनपै अनजाने मेंईं लोग चलतै।” तब सास्त्रन कूं सिखाबे बारे नें ईसू ते कही हे, “गुरू ऐसी बात करके तू हमारौ अपमान करतए।” जापे ईसू नें कही, “अरे सास्त्रन कूं सिखाबे बारेऔ तुमकूं धिक्‍कारै चौंकि तुम लोगन पै इतनौ बोझ लाद दैतौ कै जिनें बू उठाय नांय सके और तुम बा बौझ कूं उठाबे में एक ऊंगलीऊ नांय लगाबो चाहत।” “तुमें धिक्‍कारै के तुमने परमेस्‍वर की ओर ते बात बतायबे बारेन कूं कब्र बनाबतौ जो तुमारे पुरखई हते जिन्‍ने बिनकी हत्‍या करी हती। जाते तुम जि दिखाबतौ कै तुम अपने पुरखन कोई समर्थन कर रयेऔ चौंकि बिन्‍नें तौ बिनकूं मारौ और तुम बिनकी कब्र बनांय रयेऔ। जामारै परमेस्‍वर के ग्‍यान नैऊ कही ‘मैं परमेस्‍वर की ओर ते बात बतायबे बारेन नें और भेजे भये चेलान नैऊ बिनके जौरें भेजुंगो फिर बिनमें ते कितने नें तौ मार दिंगे और कितने नैऊ सताबिंगे।’ जाई मारे में तुमते कैहतूं कै संसार के सुरू ते परमेस्‍वर की ओर ते बात बतायबे बारेन कौ खून बहाबे बारेन कौ हिसाब जा युग के लोगन ते लयो जाबेगौ, जाकौ मतलब जि है कै, हाबिल ते लैके जकरयाह की हत्‍या तक कौ हिसाब जो परमेस्‍वर के बड़े पिराथना घर और बेदी कै बीच में करी गई हती। हाँ, मैं तुम लोगन ते कैहतूं कै, जाकौ लेखा-जोखा जा युग के लोगन ते लयो जाबेगौ। “हे सास्त्रन कूं सिखाबे बारेऔ तुमें धिक्‍कार चौंकि तुम लोगन नें ग्‍यान के दरबाजे की तारी तौ लै लयी पर तुम खुद ही बामें नांय घुस पाये और जो घुसबौ चाँहते बिन्‍नेऊं तुम जाबे ते रोक देतौ।” और जब ईसू मांते चलौ गयौ तब सास्त्रन कूं सिखाबे बारे और फरीसी बाते भौत दुसमनी रखबे लगे। और बाते भौत ते सबाल जबाब पूछबे लगे। और बे बाय फसायबे के मौके की तलास में लगे रैहते बे वाके मौंह की कोई बात पकरकै फसा दैबे पर बिनें कोई मौकों नांय मिलौ बे वाके मौंह की कोई बात पकरकै फसा दैबे। एक बार जब हजारन की भीड़ इकठ्ठी है गई, य्हां तक कै लोग एक दूसरे पै गिरे पर रये हते, तौ ईसू नें पैहले अपने चेलान ते कहबे लगौ, कै फरीसियन के खमीर ते चौकस रहौ जो बिनकौ कपट है। कछू ढकौ नांय, जो खोलो नांय जाबैगौ और न कछू छिपौ भयौए, जो उजागर नांय करौ जाबेगौ। जामारै जो कछू तुमनें अंधेरे में कही है, बू दिन के उजीते में सुनो जाबैगौ और जो तुमकूं कुठरियन के भीतर कानन में सुनांयौ गयौ हतो, बू छत्‍त पैते पिरचार करौ जाबैगौ। हे मेरे भईयाओ मैं तुमते कैहतूं, “कै जो तुमारे सरीर कूं नांस कर सकतै, बिनते डरपौ मत चौंकि बे जाके अलाबा और कछू नांय कर सकतई।” और मैं तुमें चिताबतू कै परमेस्‍वर कौ भय मानों जाय तुमारे सरीर और आतमा दोनोंन कूं नांस करके नरक में डारबे कौ अधिकार है। का दो पईसा की गौरईया मामूली सी चिरईया नाऐं, फिरऊ परमेस्‍वर एकऊ कूं नांय भूलत। तुमारी चांद के सबरे बारऊ गिने भये हैं,जामारै तुम मत डरपौ चौंकि तुमतौ गौरईयन ते भौत बढ़केऔ। मैं तुमते कैहतूं, “कै तुम मोय लोगन के सामने मान लेओगे तौ मैं, ‘मनुस्‍य कौ बेटा’ तुमें परमेस्‍वर के सुरग दूतन के आगे अपनांय लुंगो। पर जो लोगन के सामने मोय मानबै ते मनैं करैगौ तौ मैंऊ परमेस्‍वर के सुरग दूतन के सामने वाकौ इनकार कर दुंगो। अगर जो कोई मुझ, ‘मनुस्‍य के बेटा’ के बिरोध में बात करैगौ तौ है सकतै वाकौ पाप छमा करौ जाबें, पर कोई पबित्र आतमा के बिरोध बात करैगौ तौ वाकौ जि पाप छमा नांय होगौ। “जब लोग तुमें पकरकै यहुदी पिराथना घर में, हाकिमों और अधिकारिन के सामने लै जायें तौ तुम चिन्‍ता मत करियों कै तुमें अपने बचाव में का बोलनों है। चौंकि बाई समै पै पबित्र आतमा तुमें बताय दैवेगौ के तुमें का कैहनों चहिऐं।” फिर भीड़ में ते एक आदमी नें ईसू ते कही कै, “हे गुरू तू मेरे भईया ते कैहकै पिता की धन-दौलत मोय बांट दे।” ईसू नें बाते कही कै, “हे भईया का काउ नें मोय तुमारौ न्यायी या बांटबे बारौ ठहराय रख्खौए।” और ईसू नें बिनते कही, “चौकस रहो और हरेक तरैह के लोभ ते अपने आप कूं बचाय के रखो। चौंकि जीबन में धन दौलतई सब कछू नांय होबै।” ईसू नें बिनें एक दृस्‍टान्‍त सुनांयौ, “कै काऊ धनबान की खेत में बड़ी उपज भई। तब बू सोचबे लगौ कै ‘मैं का करूं? जाय कहां रख्खूं? चौंकि मेरे जौरें तौ इतनी जगैहऊ नांय हत।’ “तब बानें कही कै ‘मैं जि करूंगो, कै अपनी कुठरियाए तोरकै बाय बड़ी बनांऊंगौ और मांपै मैं अपनों सबरौ नाज और अपनी सबरी धन-दौलत रख्खूंगौ, और अपने पिरान ते कहुंगौ, कै अब तेरे काजै भौत सालन के काजै अच्‍छी धन-दौलत जमा है गयीए सो अब तू आराम कर और खा पी और सुख चैन ते रह।’” “पर परमेस्‍वर नें बाते कही, ‘हे मूर्ख तेरे पिरान आज रात कूं लै लये जांये तौ फिर जि सबरौ धन-दौलत तेरे का काम कौए और बू कौन कौ होगौ?’ “एसौई बू आदमी है जो अपने काजै धन-दौलत बटोरतै पर परमेस्‍वर की निगाह बू धनबान नांय हत।” फिर ईसू मसीह नें अपने चेलान ते कही, “कै मैं तुमते जामारै कैहतूं कै, तुम अपने जीबन की चिन्‍ता मत करौ कै हम का खाबिंगे, का पिबिंगे और न अपने सरीर की, कै हम का पैहनिंगे। चौंकि भोजन ते जीबन,और कपड़ा ते सरीर बढ़के है। कऊअन पै ध्‍यान देओ कै बे ना तौ बोतैं और न काटतैं और ना बिनकौ कोई भन्‍डार होत, तौऊं परमेस्‍वर बिनें दानों देतै। तुमारी कीमत तौ बिन पंछीन तेऊ भौत जादाए। तुम मेंते य्हांपै ऐसौ कौए जो चिन्‍ता करकै अपनी उमर में एकऊ पल बढ़ाय सकै? जामारै तुम एक छौटे ते छोटौ कामऊं नांय कर सकत तौ फिर तुम चिन्‍ता चौं करतौ? “जंगली फूलन पै ध्‍यान करौ कै बे कैसै बढ़तै, बे ना तौ मेहनत करतै, ना खुद के काजै कपड़ा बनातें तौऊं मैं तुमते कैहतूं, कै राजा सुलेमानऊ अपने सबरे बैभव में, बिनमें ते काऊ एक के समान कपड़ा पैहने भये नांय हतो। जामारै यदि परमेस्‍वर जंगली फूलन कूं जो आज हैं और कल भार में झौंके जाबेगें बिनें अच्‍छी तरैह ते कपड़ा पैहरावतै, तौ हे कम भरोसौ करबे बारेऔ,तौ फिर बू तुमारी देखभाल चौं नांय करैगौ? और तुम जा बात की चिन्‍ता मत करौ,कै हम का खाबिंगे? का पीबिंगे और सन्देह मत करो। चौंकि परमेस्‍वर कूं ना जानने बारे सांसारिक लोग इन सब चीजन की खोज में रैहतें और तुमारौ पिता जानतै, कै तुमें इन चीजन की जरुरत है। पर तुम परमेस्‍वर के राज की खोज में रहो, तौ जि सबरी चीजें तुमें खुद ही मिल जाबेगीं। “हे छोटे झुन्‍ड, मत डर, चौंकि तुमारे पिता कूं जि अच्‍छौ लगौ है, कै तुमें राज दे। अपनी सम्पत्‍ती बेचकै गरीबन में दान कर देओ और अपने काजै ऐसे बटुआ बनाओ, जो पुराने नांय होतई, मतलब सुरग में ऐसौ खजानौ इकठ्‌ठौ करौ जो घटत नांय और जाके जौरें चोर नांय जावत और कीड़ा नांय बिगाड़त। चौंकि जहां तुमारो धन है, मांपै तुमारो मनऊं लगौ रैहबेगौ। “तुम कपड़ा पहनकै सेबा काजै खुद कूं तईयार रखौ और तुमारे दीया जलत रहें। और तुम बिन आदमिन के समान बनो, जो अपने स्‍वामी कौ इन्‍तजार कर रहो होय, कै बू ब्याह में ते कब लौटेगौ, कै जब बू आयकें द्वार खट खटाबे,तो तुरन्‍तई वाके काजै द्वार खोल दे। धन्य हैं बे सेबक, जिनें बिनकौ स्‍वामी आयकें जागतौ भयौ पाबे। मैं तुमते सच कहतूं, कै बू भी अपनी कमर पै साफी बांधकै बिन्‍नें भोजन करबे कूं बैठाबेगौ और बिनकी सेबा करैगौ। यदि मालिक रात के दूसरे पहर या तीसरे पहर में आयकें बिनकूं जागते भये पाबे, तौ बे सेबक धन्य हैं। पर तुम जि जान लेउ, कै अगर घर कौ स्‍वामी जान लैबे, कै चोर कौन ते समै आबैगौ, तौ बू जागत रहतौ और अपने घर में ऐंडौ नांय लगन देतौ। तुम लोगऊ तैयार रहौ, चौंकि जा समै की तुम सोचतऊ नाऔ बाई घड़ी मैं, ‘मनुस्‍य कौ बेटा’ आ जाऊंगौ।” तब पतरस नें कही, “हे पिरभू का जि दृस्‍टान्‍त तू हमते या सबनते कैह रयोए?” पिरभू नें कही, “बू भरोसेमंद और बुद्धिमान भंडारी को है? जाकौ स्‍वामी बाय नौकर-चाकरन पै मुखिया ठहराबै कै बू बिन्‍नें समै पै खानों और पानी देय? धन्य है बू सेबक जाय वाकौ स्‍वामी आयकै ऐसौ करते भये पाबे। मैं तुमते सच कैहतूं, बू बाय अपनी सब धन-दौलत पै मुखिया ठहराबेगौ। पर बू सेबक सोचबे लगौ, ‘कै स्‍वामी आयबे में देर कर रयोए,’ और दास और दासी कूं मार पीट करबे और खायबे पीबे और पियक्‍कड़ हैबे लगौ। तौ बा सेबक कौ स्‍वामी ऐसे दिना, कै बू वाके आयबे कौ इन्‍तजार नांय कर रयौ होय और बू ऐसे समै में आबैगौ, जाय बू नांय जान्‍तु होय और बू वाके टुकड़े-टुकड़े कर दैबेगौ और अबिसबासियों के संग ठहराबेगौ। “बू सेबक जो अपने स्‍वामी की इच्‍छा कूं जानतौ और बू तैयार न रहै और न वाकी की इच्‍छा के अनुसार नांय चलौ तौ बू भौत मार खाबैगौ। पर जो न जानकें मार खायबे के लायक काम करै बू थोड़ी मार खाबैगौ। जामारै जाय जादा दयौ गयौए, बा पैते जादा की आसा करी जाबैगी और जाय भौत जादा सौंपो गयौए,बा पैते भौत जादा लयो जाबैगौ।” ईसू नें कही, “मैं धरती पै आग लगाबे आयौऊं और मैं चाहतूं केवल जेई कै जि अबई सुलग जाबें। मोय तौ एक कठिन बपतिस्मा के समै ते जाना है जब तक जि पूरौ नांय होबेगौ तब तक मेरे भीतर व्‍याकुलता बनी रैहबैगी। का तुम जि समझ रये हो कै मैं धरती पै मेल-मिलाप करायबे आयौऊं? मैं कहतूं, नांय बरन फूट डारबे आयौऊं। चौंकि अब ते एक घर में पाँच जने आपस में बिरोध रखेंगे, तीन दो ते, दो तीन ते। बाप बेटा ते और बेटा बाप ते बिरोध रखेगौ, मा बेटी ते और बेटी माँ ते, सास बहू ते और बहू सास ते बिरोध रखेगी।” ईसू बानें भीड़ तेऊ कही, “जब तुम बादल कूं पच्‍छिम ते उठत भये देखते हो, तौ तुम तुरन्‍त कहतौ, ‘कै मेह परैगौ’ और ऐसौई होतै। और जब दखिनी हबा चलतै तौ कहतौ, ‘कै लू चलैगी’ और ऐसौई ही होतै। हे कपटियों, तुम धरती और आकास के रंग रूप देखकै हाल बता देतौ। पर जा पीढ़ी के बारे में चौं नांय जान्‍त? “और तुम खुद ही फैसला चौं नांय कर लेत, कै का सही है? जब तू अपने मुद्‍दई के संग जज के जौरें जाबे जाते तौ अच्‍छौ तौ जि है कै तुम रस्ता मेंई बाते छूटबे कौ उपाय कर लेऔ ऐसो न होय, कै बू तोय जज के जौरें खैंच लै जाबै और जज तोय सिपाइयन के हात में सौंप दैबै और सिपाही तोय जेल में डार देबें। मैं तुमते कैहतूं, कै जब तक तू मुद्‍दई की पाई पाई ना भर देगौ तब तक मांते छूट न पाबेगौ।” बाई समै मांपै इकठ्‌ठे भये लोगन नें ईसू ते कही, कै पिलातुस नें कछू गलीली लोगन की हत्‍या कर डारी जब बे बली चढ़ा रये हते। तब ईसू नें बिनते कही, “तुम का समझतौ कै जि गलीली और दूसरे सबरे गलीली लोगन ते जादा पापी है जामारै बिनपै ऐसी बिपत्‍ती पड़ी। मैं तुमते कैह रयौ हूं नांय, अगर तुम पापन ते मन नांय फिराबेंगे तौ तुमऊ नांस करे जाओगे। तुम का समझतौ, कै बे अट्ठारह लोग जो सीलोह के गुम्मट के नीचे दबके मर गये बे येरूसलेम में रैहबे बारे बिन दूसरे जीन्दे आदमिन ते जादा पापी हते। नांय, पर मैं तुमें बताबतूं कै तुमऊ पापन ते मन नांय फिराओगे तौ तुम सबऊ मरौगे जैसे बे मरे हते।” फिर बानें जि दृस्‍टान्‍त कहौ “काऊ आदमी की अंगूर की बारी हती जामें एक अंजीर कौ पेड़ हतो। बू बा पेड़ पै फल ढूँढ़त भयौ आयौ पर बाय कछू नांय मिलौ जापै बानें माली ते कही, ‘अब देख मैं तीन साल ते अंजीर के जा पेड़ पै फल ढूँढ़त आय रयौऊं पर मोय जापे एकऊ फल नांय मिलौ, सो जाय काट डार। जि धरतीये बेकार में चौं घेरे परौऐ?’ माली नें बाय उत्‍तर दयौ, ‘हे स्‍वामी’, जाय जा साल और छोड़ दै, कै मैं जाके चारौ लंग गढ्‍ढा खोदकै जामें ‘खात लगाऊँ। अगर जि अगले साल फल देय तौ अच्‍छौ है और अगर न देय तौ तू जाय काट सकतें।’” यहुदिन के आराम दिना में काऊ पिराथना घर में ईसू जब परमेस्‍वर के वचन की सिछा दै रयौ हतो, मांपै एक औरत हती जामें दुस्‍ट आतमा समाई भई हती जानें बाय अट्ठारह साल तै अपाहिज बनांय दयौ हतो। जाई बजैह ते बू झुककै कुबड़ी है गयी हती और थोड़ी सीऊ सीधी नांय है सकत हती। ईसू नें जब बाय देखौ तौ बाय अपने जौरें बुलायौ और कही, “हे माई, तोय अपने रोग ते छुटकारौ मिलौ है।” जि कैहत भए ईसू नें वाके सिर पै अपने हात रख दिये और बू तबई सीधी खड़ी है गयी और बू परमेस्‍वर की स्तुति करबे लगी। ईसू नें यहुदियन के आराम दिन में बीमार औरत कूं ठीक करौ हतो, जामारै यहुदी पिराथना घर के सरदार क्रोध में भरकै लोगन ते कैहबे लगौ, “काम करबे काजै छै दिन होत हैं सो बिनई दिनान में आऔ और अपने रोग दूर करबाऔ, पर यहुदियन के आराम के दिन में ठीक हैबे मत आऔ।” पिरभू नें उत्‍तर देत भए बाते कही, “अरे कपटियों! का तुम मेंते हर कोई यहुदियन के आराम के दिन अपने बैल या अपने गधा कूं बाड़े ते निकाल कर पानी पियायबे कहूं नांय लै जाबत? अब जि औरत जो अब्राहम की बेटी है और जाय सैतान नें अट्ठारह साल ते पकड़ रखौ हतो, का यहुदियन के आराम दिन में जा बीमार औरत कूं ठीक नांय करनों चहिऐं?” जब ईसू नें जि बात कही, तौ सबन के मौंह सरम ते नीचे है गये। और सबरी भीड़ बिन अचम्भे के कामन ते जिनकूं बानें करौ हतो, बे सब खुसी मनां रये हते। ईसू नें कही, “परमेस्‍वर कौ राज कैसौए और मैं वाकी की तुलना काए ते करूं? बू राई के दाने के समान है, जाय काऊ नें लैके अपने बाग में बो दियौ। बू बड़ौ भयौ और एक पेड़ बन गयौ। फिर आकास की चिड़ियन नें वाकी डारन पै घोंसला बना लये।” ईसू नें फिर कही, “परमेस्‍वर के राज की तुलना मैं काए ते करूं? जि बा थोड़े खमीर की तरैह ते है जाकूं एक औरत नें लैकें तीन पसेरी आटे में मिलायौ और बू सबरौ आटौ खमीरत है गयौ।” ईसू जब नगर नगर और गांमन में परमेस्‍वर के वचन की सिछा देतौ भयौ येरूसलेम जा रयौ हतो। तबई बाते काऊ नें पूछी, “पिरभू का थोड़े ते ही आदमी बचाये जायेंगे?” ईसू नें बाते कही, “सकरे द्वार में ते घुसबे की हर तरैह ते मेहनत करौ, चौंकि मैं तुमते कैहतूं कै भीतर जायबे की कोसिस भौत ते लोग करिंगे पर जाय नांय पाबिंगे। जब एक बार घर कौ स्‍वामी उठकै द्वार बन्द कर देतै, तौ तुम बाहर तेई दरबाजेए खटखटाबतै भये कहौगे, ‘हे स्‍वामी, हमारे काजै दरबाजौ खोल दे।’ “पर बू तुमें उत्‍तर देगौ, ‘मैं नांय जान्‍तु तुम कौन हो और कांते आये हो?’ “तब तुम कैहबे लगौगे, ‘हमनें तेरे संग खायौ, तेरे संग पियो, तैने हमारी गलिन में हमें परमेस्‍वर के वचन की सिछा दयी है।’ “पर बू तुमते कहेगौ, ‘कै मैं नांय जान्‍तु तुम कांते आये हो? हे कुकर्मियों! मेरे जौरें ते भाग जाओ।’ “तुम अब्राहम, इसहाक, याकूब और दूसरे सबरे परमेस्‍वर की ओर ते बाते बतायबे बारेन कूं परमेस्‍वर के राज में देखोगे किन्‍तु तुम बाहर धकेल दियो जाबैगौ तौ ज्हाँपै तुमें बस रोयबौ और दाँत पीसबौई होगौ। फिर पूरब और पस्चिम, उत्‍तर और दछिन ते लोग परमेस्‍वर के राज में आयकें भोजन की चौकी पै अपनी जगैह पै बैठिंगे। ध्‍यान रहे के, मांपै पिछले पैहले हे जाबिंगे और जो पैहले हैं, बे आखरी है जाबिंगे।” बाई समै ईसू के जौरें कछू फरीसी आये और बाते कही, “हेरोदेस तोय मारबौ चाहतै, जामारै तू य्हांते कऊं और जगै पै चलौ जा।” ईसू नें उनते कही, “जाओ और बा चालाक लोमड़ी ते कहौ, ‘सुन मैं लोगन में ते दुस्‍ट आतमान कूं निकारूँगौ, मैं आजऊ बीमारन ठीक करुंगो और कलऊ। फिर तीसरे दिन में अपनों काम पूरौ करुंगो।’ फिरऊ मोय आज, कल और परसों चलतेई रहनों होगौ। चौंकि काऊ परमेस्‍वर की ओर ते बातन्‍ने बतायबे बारे कौ येरूसलेम ते बाहर पिरान छोड़बौ ठीक नांय होगौ। “हे येरूसलेम, हे येरूसलेम! तू जो परमेस्‍वर की ओर ते बात बतायबे बारेन कूं मार डालतै और जिनें परमेस्‍वर ने तेरे जौरें भेजौए, बिनपै पत्‍थर बरसाबतै। मैंनें कितनीऊं बेर तेरे लोगन कूं बैसेई आपस में इकठ्‌ठौ करबौ चाहौए जैसे एक मुरगी अपने बच्‍चन कूं अपने पंखन के नीचे समैट लेतै। पर तैने नांय चाहौ। देख तेरे काजै तेरौ घर परमेस्‍वर नें छोड़ दयौए। मैं तोतें कैहतूं कै तू मोय बा समै तक फिर कबऊ नांय देखेगौ जब तक बू समै ना आ जाय, जब तू जि कहेगौ, ‘धन्य है बू जो पिरभू के नाम ते आबे है।’” एक बार ईसू यहुदियन के आराम दिना में फरीसियन के सरदार के घर पै भोजन करबे गयौ,मांपे बे ईसू के ऊपर अपनी आँख लगाऐ भये हते ईसू के सामने एक आदमी हतो। वाके हात पैर पानी भरबे की बजैह ते सूज गये हते। ईसू नें जि देखकै सास्त्रन कूं सिखाबे बारेन ते और फरीसियन ते पूछी, कै यहुदीयन के आराम दिन में काऊ बीमार कूं ठीक करनों नियम के अनुसार सही है कै नांय। पर बे चुप रये। ईसू नें बा आदमी के हात कूं पकड़कै ठीक कर दयौ और बाय भेज दियौ। फिर ईसू नें उनते पूछी कै, “तुम मेंते काऊ कौ बेटा या बैल कूआ में गिर जाबै तौ का यहुदियन के आराम के दिन में तुम बाय बाहर नांय निकारौगे?” बे जा बात कौ ईसूए उत्‍तर नांय दै सके। जब ईसू नें देखौ कै नौते बाए अपने बैठबे काजै अच्‍छी जगैह चुन रये हैं तब ईसू नें उन्‍नें एक दृस्‍टान्‍त सुनांयौ, “जब कोई तुमें ब्याह में खाबे बुलाबै तौ मांपै बैठिबे काजै खास जगैह मत देखियों। है सकै कै मांपै कोई तुमतेऊ बड़ौ आदमी आयौ होय। फिर तुम दोनोंन्‍नें बुलायबे बारो तुमते कहेगौ कै, ‘जा जगैह पै जा आदमी कूं बैठन देऊ’ और फिर तुमें सरम के मारे सबते नीची जगैह पै बैठबौ परैगौ। जब तुमें बुलाऔ जाबें, तौ तुम सबते नीची जगैह पै बैठौ, जाते तुमें बुलायबे बारौ तुमारे जौरें आयकै कैहबेगौ, ‘अरे मित्र उठ ऊपर बैठ।’ फिर बिन सबन के सामने जो तेरे संग बुलाए भयेन के सामने तेरौ सम्मान बढ़ैगौ। चौंकि हरेक कोई जो अपने आपकूं बड़ौ करैगौ बू छोटौ करौ जाबैगौ और जो अपने आपकूं छोटौ करैगौ बू बड़ौ करौ जाबैगौ।” जाके बाद ईसू नें अपने बुलाबे बारे ते कही, “जब कबऊ तू दिन या रात में काऊऐ दाबत दैबे तौ अपने मित्रन, भईयन और सगे सम्बन्धी,आड़-पड़ोस के सब धनी लोगन्‍नें मत बुला, चौंकि बदले में बे तोय बुलाबिंगे और जा तरैह ते तोय वाकौ बदलौ मिल जाबैगौ। जब तू कोई दाबत करै तौ गरीबन, अपंग, लँगड़न और अंन्धेन कूं बुला।” चौंकि बिनके जौरें तोय बापस लौटायबे कूं कछू न होगौ पर बे तेरे काजै आसीरबाद बन जाबिंगे, जाकौ प्रतिफल तोय ठहराये भये धरमी लोगन के जी उठबे कै समै मिलैगौ। ईसू के संग दाबत में खाय रये बिन लोगन में ते एक नें जि सुनिकै ईसू ते कही, “हरेक बू आदमी धन्य है जो परमेस्‍वर के राज में दाबत खाबेगौ।” तब ईसू नें कही, “एक आदमी बड़ी दाबत की तैयारी कर रयौ हतो,और बानें भौत ते लोगन कूं नौतौ दयौ। फिर दाबत के समै जिनकूं बानें नौतौ दयौ हतो बिनके जौरें बानें अपनों दास जि कैहकै भेजौ ‘कै आओ, अब दाबत तैयार है’ बे सब आना कानी करबे लगे। पैहले नें बाते कही, ‘मैंनें एक खेत मोल लयोए, मोय जायकै बू देखनौए। किरपा कर मोय छमा कर।’ “फिर दूसरे नें कही, ‘मैंनें पाँच जोड़ी बैल मोल लये हैं, मैं तौ बस बिनें परखबे जाय रयौऊं। किरपा कर मोय छमा कर।’ “एक औरऊ बोलौ, ‘मेरौ तौ अबई ब्याह भयौए, सौ मैं तौ नांय आ सकत।’ “सो जब बू सेबक लौटौ तौ बानें अपने स्‍वामी कूं जे बातें बताईं। जा बात पै बा घर कौ स्‍वामी भौत गुस्सा भयौ और अपने सेबक ते बौलो, ‘जल्दी तू सहर कूं जा मांकी गली और चौराहेन पैते अन्धे, अपंग, लंगड़े और गरिबन कूं बुलबा ला।’ “बा सेबक नें कही, ‘हे स्‍वामी, तुमारी आग्‍या पूरी कर दई गईए अबऊ भौत जगैह बची है।’ “फिर स्‍वामी नें सेबक ते कही, ‘सड़कन पै और खेतन की मेंढ़न तक जाओ और बिनके हात पांम जोड़कै लोगन कूं बुलाय लाऔ जाते मेरौ घर भर जाये। और मैं तुमते कैहतूं, जो पैहले बुलाये गये हते उनमें ते एकऊ मेरी दाबत में ते एक निबालौऊ चख नांय पाबै।’” जब ईसू कै पिछै एक भौत बड़ी भीड़ आय रई हती, बू बिनकी ओर मुड़कै बोलौ, “जो कोई मेरौ चेला बनबौ चाहै और बू अपने मा-बाप पत्नी और बालक या भईया बहन य्हां तक कै बू अपने जीबन तेऊ जादा उनते लगाव रखे तौ बू मेरौ चेला नांय है सकत जो मेरे काजै दुख उठाबे और मरबे तक कूं तईयार हैके मेरे पीछे नांय चलें बू मेरौ चेला नांय बन सकै। “अगर कोई तुम मेंते घर बनांबौ चाहबै तौ पैहले बू अपनों हिसाब लगा लैबे कै इतने खर्चा में काम पूरौ हे जाबेगौ तबई काम की सुरूआत करै और बिना हिसाब-किताबके काम नांय लगाबै। और ऐसौ ना होबै कै घर की नींव डार दै और बाद में काम पूरौ नांय होय तौ बे लोग जिन्‍ने बाय काम करते भये देखौ बेई वाकी मजाक उड़ाबिंगे। ‘अरे देखौ जानें बनांबौ तौ सुरू करौ पर जाय पूरौ नांय कर पायौ?’ “मान लेओ ऐसो कोई राजा होगौ जो दूसरे राजा ते युद्ध करबे जाय और पैहले बैठकै जि बिचार नांय करै कै बू अपने दस हजार सैनिकन तै बीस हजार सैनिकन कौ सामनों कैसै करैगौ? और यदि बू जा लायक सामर्थ बान नांय होय, तौ वाकौ बिरोधी रस्ता मेंई होबें तबई अपने दूतन्‍नें भेजैगौ और मेल-मिलाप कर लेबेगौ। “तो फिर जाई तरैह ते तुम में ते कोई भी जो अपनों सब कछू छोड़बे ते पैहले, मेरौ चेला नांय होबेगौ। “नौन तौ अच्‍छौ है पर बाको स्‍बाद चलौ जाबें तौ बाय कैसै नमकीन करौ जाबेगौ? ना तौ बू मट्टी के और न खाद केई काम में आबै, बस लोग बाय एसैई फेंक देतै। “जाके जौरें सुनवे के कान होबें बू सुन कै समझ लैवे।” जब चुंगी लैबे बारे और पापी सब परमेस्‍वर के वचन की सिछा सुनबे ईसू के जौरें आयबे लगे। तब फरीसी और सास्त्रन कूं सिखाबे बारे बड़बड़ाते भए कहबे लगे, “जिय आदमी तौ पापिन ते मिलतै और उनकेई संग खावतै।” जापे ईसू नें उन्‍नें जि दृस्‍टान्‍त सुनांयौ, “मानों तुम मेंते काऊ के जौरें सौ भेड़ होबें और बिनमें ते एक खो जाबें, तौ का बू निन्यानबे भेड़न कूं छोड़कै खोई भई भेड़ कूं जब तक ढूढतै कै जब तक बू मिल नांय जाबे? हाँ बू एसौई करतै। फिर जब बाय बू भेड़ मिल जावतै तौ बू बाय खुसी ते अपने कन्धा पै उठाय लेतुए। और जब घर लौटतै तौ अपने मित्र और पड़ोसियन कूं जौरें बुलायकै बिनते कैहतै, ‘मेरे संग खुसी मनाऔ, चौंकि मोय मेरी खोयी भई भेड़ मिल गयी है।’ मैं तुमते कहतूं, जाई तरैह ते काउ एक पापी के मन फिरायबे के काजै सुरग में भौत आनन्द होते, बिन निन्यानबे धरमी आदमिन कूं पापन ते मन फिराबे की जरुरत नांय। “या सोचौ काऊ औरत के जौरें दस चाँदी के सिक्‍के होबैं और बिनमें ते एक सिक्‍का खोय जाय तौ कौ बू दीया जराय कें घर कूं तब तक नांय झारत बारत रहेगी और सावधानी ते नांय ढूढत रहेगी जब तक कि बू बाय मिल न जाय? और जब बू बाय मिल जातै तौ अपनी सखी और पड़ोसियन कूं जौरें बुलायकै कैहतै, ‘मेरे संग खुसी मनाऔ चौंकि मेरौ सिक्‍का जो खो गयौ हतो,बू मिल गयौए।’ मैं तुमते कैहतूं कै जाई तरैह तै एक मन फिरायबे बारे पापी के काजैऊ परमेस्‍वर के सुरग दूतन की मौजूदगी में मांपै खुसी मनाई जाबेगी।” फिर ईसू नें कही “एक आदमी के दो बेटा हते। सो छोटे बेटा नें अपने बाप ते कही,हे पिता ‘जो धन-दौलत मेरे बट में आतै, बाय मोय दै दै।’ तौ बाप नें दोनों बेटान में अपनों धन बांट दियौ। “और जैसेई थोड़े दिना बीते तौ छोटौ लड़का सबरी धन-दौलत कूं इकठ्‌ठी करकै दूसरे देस कूं चलौ गयौ मांपे बानें अपनी सबरी धन-दौलत जंगली जीबन जीते भये बुरे कामन में उड़ाबे लगौ। जब वाकी सबरी धन-दौलत खतम है गई तौ बा समै बा देस में भौत बड़ौ अकाल पड़ौ। जामारै बू मांपै भौत परेसानी में रहबे लगौ। जामारै बू बा देस के काऊ आदमी के याँपै जायकै मजदूरी करबे लगौ बानें बाय अपने खेतन में सूगर चरायबे भेज दियौ। मांपे बू सोचिबे लगौ कै बाय बे फरीअई पेट भरबे कूं मिल जांय बिन्‍नें सूगर खावत है। पर काऊ नें बाय एक फरी तक नांय दई। “जब वाके होस ठिकाने आये तौ बू बोलौ, ‘मेरे बाप के जौरें कितने मजदूरऊएं जिनपै खायबे के बादऊ बचौ रैहते और मैं य्हां भूखों मर रयौऊं। मैं य्हांते उठकै अपने बाप के जौरें जाऊंगौ और बाते कहूँगौ बाप, “मैंनें सुरग के परमेस्‍वर और तेरे बिरोध में पाप करौ है। अब मैं तेरौ बेटा कहबे के लायक नांय रयौ हूं। मोय अपनों एक मजदूर समझकैं रख लै।” ’ जामारै बू उठकै अपने बाप के जौरें कूं चल दियौ। “बू अबई दूर अई हतो कै वाके बाप की नजर बापै परी और बाय बापै तरस आयौ बू दौड़कै आयौ और बानें बाकूं अपनी बाहँन में समैट लियौ और बाकूं भौत चूंमबे लगौ। बेटा नें बाप तै कही, ‘हे बापू, मैंनें तुमारी नजर और परमेस्‍वर की नजर में और सुरग के बिरोध में पाप करौ है, जामारै मैं अब तुमारौ बेटा कैहबे लायक नांऊ।’ “पर बाप नें अपने सेबकन तै कही, ‘जल्दी ते बढ़िया कपड़ा निकारकै लाऔ और बिनकूं जाय पैहनाओ। जाके हात में अँगूठी और पामन में जूतियाँ पैहनाओ। और कोई मोटौ ताजी जानबर लाऔ और मारौ, बाय खायकै हम आनन्द मनाबिंगे। चौंकि जि मेरौ बेटा मर गयौ अब बू फिर ते जीबित है गयौए जि खोय गयौ हतो सो अब मिल गयौए’, जामारै बे खुसियां मनांयबे लगे। “पर वाकौ बड़ौ बेटा जो खेत में हतो बू लौटकै घर के जौरें आयौ तौ बानें नाँचबे और गायबे की अबाज सुनी। बानें अपने एक सेबक कूं बुलायकै पूछी, ‘जि सब का है रयोऐ?’ सेबक नें बाते कही, ‘तेरौ भईया बापस घर लौट आयौ है और तेरे बाप नें वाकूं सही सलामत देखकै एक मौटो ताजी जानबर कटबायो है।’ “बड़ौ भईया आग बबूला है उठो, बू घर में भीतर तक नांय जायबौ चांहतो जामारै वाके बाप नें बाहर आयकैं बाय समझायौ बुझायौ। पर बानें बाप कूं उत्‍तर दयौ, ‘देख मैं सालन ते तेरी सेबा गुलाम की तरैह ते करतौ आ रयौऊं। मैंनें तेरी काऊ सी आग्‍या कौ बिरोध नांय करौ, पर तैने मेरे काजै तौ कबऊ एक बकरिया कौ बच्‍चऊ नांय दयौ के मैं अपने मित्रन के संग खुसी मनाबतौ। पर जब तेरौ जि बेटा आयौ जानें बुरे कामन में तेरी सबरी धन-दौलत उड़ाय दई, तौऊं तैनें वाके काजै तैनें मोटौ ताजौ जानबर मरबायौ है।’ “बाप नें बाते कही, ‘मेरे बेटा, तू तौ हमेसा मेरे जौरेंई हतो और जो कछू मेरे जौरें हतो, बू सब तेरोइऔ। पर हमें खुस होनौं चहिऐं और जस्न मनानों चहिऐं चौंकि तेरौ जि भईया, जो मर गयौ हतो, अब फिर जीबित है गयौए। जि खोय गयौ हतो, जो फिर अब मिल गयौए।’” ईसू नें अपने चेलान ते कही, “एक धनी आदमी हतो। वाकी धन-दौलत कौ हिसाब किताब रखबे बारौ एक मुनीम हतो। मुनीम पै लोग इलजाम लगाय रये हते, ‘कै बू तेरी धन-दौलत कूं बरबाद कर रयोऐ।’ सो धनबान नें मुनीम बुलायौ और बाते कही, ‘कै मैं तेरे बारे मैं जि का सुन रयौऊं? अपने हिसाब किताब कौ लेखा-जोखा दै, चौंकि आगे ते अब तू मुनीम नांय रैह सकत।’ “जापै मुनीम नें मन ही मन में कही, ‘मेरौ स्‍वामी मोपै ते मुनीम गीरि कौ काम छीन रयोए, सो अब मैं का करूं? मोमें अब इतनी तागतऊ नांय रही कै मैं खेतन में खुदाई-गुड़ाई कौ काम तक कर सकूं और भीख मांगबे में मोय सरम आवतै। ठीक है अब जि बात मेरी समझ में आ गईए कै मोय अब का करनों चहिऐं, जब मैं मुनीम गीरि पैते हटाय दयौ जांऊ तब लोग अपने घरन में मेरौ आदरमान करें।’ “फिर मुनीम नें स्‍वामी के सबरे उधार लैबे बारे बुलाए और बिन सबन तै एक-एक करके पूछबे लगौ कै, तोपै ‘मेरे स्‍वामी कौ का उधारै?’ “उधार लैबे बारे नें बाते कही, ‘सौ मन जैतून तेल,’ “फिर मुनीम बाते कही कै, ‘जि लै अपनी बही, जल्दी बैठ और सौ की जगह पै पचास मन लिख दै।’ “फिर बानें दूसरे कही, ‘तोपै कितनों उधारै?’ “बानें मुनीम ते कही, ‘अरसठ मन नाज।’ “मुनीम बाते बौलो, ‘जिय लै अपनी बही और अरसठ कौ चऊअन मन लिख दै।’ “जापे वाके स्‍वामी नें बेईमान मुनीम की भौत बड़ाई करी चौंकि बानें जि काम बड़ी चालाकी ते करौ। सांसारिक आदमी परमेस्‍वर के पबित्र लोगन ते व्‍यवहार में जादा चालाकै। मैं तुमते कैहतूं कै, अधर्म के धन ते अपने काजै मित्र बनांय लेओ। चौंकि जब धन-दौलत खतम है जाबैगी, तब बे अनन्‍त निबास में तुमारौ स्‍वागत करिंगे। “जो लोग थोड़े में भरोसे योग्‍य है, बे जादा मेंऊं भरोसे योग्‍य हुंगे और जो थोड़े में भरोसे योग्‍य नांय, बे जादा मेंऊं भरोसे योग्‍य नांय ठहरिंगे। जाई तरैह ते तुम अधर्म की धन-दौलत मेंई भरोसे योग्‍य नांय निकरै तौ सुरग कौ सच्‍चौ धन तुमकूं को सौंपेगौ? और अगर तुम पराये की धन-दौलत मेंई भरोसेमंद नांय रये तौ तुमारे रखे धन कूं तुमें कौन दै दैगौ। “कोई सेबक दो स्‍वामी की सेबा नांय कर सकत। बू एक ते पिरेम करैगौ और एक ते नफरत करैगौ या बू एक कौ आदर करैगौ और दूसरे कौ अपमान करैगौ। तुम परमेस्‍वर और धन दोनोंन की सेबा एक संग नांय कर सकतई।” जब लोभी फरीसीयन नें ईसू की जि बात सुनी तब बिन्‍नें वाकौ भौत मजाक उड़ायौ। जापै ईसू नें बिनते कही, “तुम लोगन कूं जि जतायबौ चाहतौ कै हम भौत धरमी हैं पर परमेस्‍वर तुमारे मन कूं अच्‍छी तरैह ते जानतै। चौंकि जो चीज लोगन की नजरन में भौत कीमती है बू परमेस्‍वर कि नजर में तुच्‍छ है। “मूसा की व्‍यबस्था और परमेस्‍वर की ओर ते बात बतायबे बारेन की, बातन कौ पिरचार यूहन्‍ना बपतिस्मा दैबे बारे के समै तक करौ गयौ। पर यूहन्‍ना बपतिस्मा दैबे बारे के समै ते परमेस्‍वर के राज कौ सुभ समाचार सुनांयौ जाय रयौए और सब लोग परमेस्‍वर के राज में घुसबे की खूब मेहनत कर रहे है। धरती और आकास टल जांगी, पर परमेस्‍वर के नियम में ते एक मात्रा और बिन्दू तक नांय टलेगी। “जामारै अगर कोई आदमी अपनी पत्नी कूं छोड़िके काऊ दूसरी औरत तै ब्याह करतै, बौ व्‍यभिचार करतै और ऐसेई छोड़ी भयी औरत ते अगर कोई आदमी ब्याह करतै तौ बेऊ व्‍यभिचार करतै। “एक भौत धनी आदमी हतो। बू मंहगे कपड़ा पैहनतौ और रोजाना हर सुख भोग में अपनों जीबन बितावतौ। वाकी दैहरी पै एक घाबनं ते भरे भये आदमी कूं छोड़ दयौ जातो, जाकौ नाम लाजर हतो। बू बा अमीर आदमी की मेज पैते गिरी भई झूठन तेई अपनों पेट भरबे कूं तरसतो। य्हां तक कै वाके घावन कूं कुत्‍ता चाट जाते हते। “एक दिना ऐसौ भयौ कै गरीब लाजर मर गयौ और बू सुरग दूतन नें अब्राहम की गोद में लै जायकै बैठार दियो। एक दिना बू अमीर आदमीऊं मरौ और बाय लोगन नें गाढ़ दियौ। पाताल में तड़पते भए बानें जब आँखें उठायकै देखौ तौ अब्राहम बाय भौत दूर ते दिखाई दियो, वाकी गोद में बानें लाजर कूं देखौ। तब बानें पुकार कें कही, ‘हे पिता अब्राहम, मोपै दया कर, जा लाजर कूं भेजकै पानी में अपनी उँगरिया डुबोयकै मेरी जीब ठंडी कर दे, चौंकि मैं जा आग में तड़प रयौऊं।’ पर अब्राहम नें कही, ‘हे बेटा तू याद कर कै तैने अपने जीबन में सबरे अच्‍छे सुख पा लिए और लाजर कूं सब दुख मिलै, जामारै बू अब य्हां सान्‍ती पा रयोए और तू दुख में तड़प रयोऐ। इन सबन कूं छोड़ दै, जाके अलाबा हमारे और तुमारे बीच में एक बड़ी खाई है, ना तौ मेरे माऊं कौ तेरे माऊं जाय सकै न तेरे माऊं ते कोई मेरे माऊं आय सकै।’ “तब बा अमीर आदमी नें कही, ‘तौ हे पिता, मैं तोते पिराथना करतूं कै तू लाजर कूं मेरे पिता के घर भेज दै, चौंकि मेरे पाँच भईयाए,बू उन्‍नें चेताय आबे, कै बिनै जा पीड़ा की जगैह में आनों परै।’ “किन्‍तु अब्राहम नें कही, ‘उनके जौरें मूसाऐ और परमेस्‍वर की ओर ते बाते बतायबे बारेंन की किताबें है बिनै वाकी सुननी और माननी चहिऐं।’ “अमीर आदमी नें कही, ‘नांय, पिता अब्राहम, अगर कोई मरे भयेन में ते बिनके जौरें जाय तौ बे पापन ते मन फिराएंगे।’ “अब्राहम नें बाते कही, ‘यदि बे मूसा और परमेस्‍वर की ओर ते बाते बतायबे बारेंन की नांय सुनत तौ, अगर कोई मरे भयेन में ते बिनके जौरें जाय तौ बे उनकीऊ नांय मानिंगे।’” ईसू नें अपने चेलान ते कही, “ऐसौ है नांय सके कै लोगन कूं पाप में गिराबे बारी बातैं ना घटैं। पर धिक्‍कार बाकूं जाके द्वारा ठोकर की बातें होतै। वाके काजै तौ जेई अच्‍छौ होतौ कै वाके गले में एक चक्‍की का पाट लटकायके बाय समुन्दर में धकेल दियौ जातो। सावधान रहो! “यदि तुमारौ भईया पाप करै तौ बाय डांट और अगर बू अपने करे भये पापन ते मन फिराबै तौ तू बाय छमा कर दियौ। अगर यदि हर दिन बू तेरे बिरोध में सात बार पाप करै और सातों बार लौटकै तोते कहे कै ‘मोय पछताबो है’ तौ तू बाय छमा कर दियौ।” तब भेजे भये चेलान नें पिरभू ते कही, “कै हमारौ भरोसेऐ बढ़ा।” तब ईसू मसीह नें कही, “कै अगर तुमारौ भरोसौ राई के दाने के जितनों होतौ तौ तुम जा सहतूत के पेड़ ते कैहते के ‘जा समुन्दर में लग जा तौ बू लग जातौ’ और बू तुमारी बात मान लेतौ”। “तुम मेंते काऊ पै सेबक होय और बू खेत जोतकै और भेड़ चरायकैं आबे तौ का वाकौ मालिक बाते कहे, ‘तू जलदी आ और रोटी खायलै’? नांय, ‘पर बू बाते जि कहेगौ कै मेरे काजै रोटी बना अपने कपड़ा पहन और जब तक मैं खाय-पी न लूँ, तब तक तू मेरी सेबा कर, तब जाके बाद तू भी खाय-पी सकत’ अपनी आग्‍या पूरी करबे पै का बू बा सेबक कौ धन्यबाद करतुए? तुमऊं एसेई हो और जो कछू तुमते करबे कूं कहौ जाए, बा कामें करबे के बाद तुमें कैहनी चहिऐं, ‘हम तौ सेबक हैं, हमें काऊ की बड़ाई की जरूरत नांय। हमनें तौ बस अपनों कर्तव्‍य पूरौ करौ है।’” ईसू येरूसलेम जाय भये सामरिया और गलील के बीच की सीमा ते होतौ भयौ निकरै। जब बे एक गांम में जा रये हते तबई ईसूए एक संग दस कोढ़ी मिले। बे कछू दूरी पै खड़े हते। बे जोर की अबाज में चिल्लाय कें बोले, “हे ईसू! हे स्‍वामी! हम पै दया कर!” तब ईसू बिनैं देखकै बोलौ, “जाओ और अपने आप कूं पुरोहितन कूं दिखाओ।” बे अबई जाई रये हते, कै बिनकौ कोढ़ सुद्ध है गयौ। पर बिनमें ते जब एक नें जि देखौ कै बू ठीक हे गयौए, तौ बू बापस लौटकै आयौ और ऊंची अबाज में परमेस्‍वर की स्तुति करबे लगौ। बानें मौंह के बल ईसू कै पामन में गिरकै वाकौ आभार पिरकट करौ। और, बू एक सामरी हतौ। ईसू नें बाते पूछी, “का बिन दसऊन कौ कोढ़ सुद्ध नांय भयौ? तौ बे नौ काँ हैं? का जा परदेसी कूं छोड़कै उनमें ते कोई भी परमेस्‍वर की स्तुति करबे कूं बापस नांय लौटौ।” फिर ईसूने बाते कही, “खड़ौ है जा और चलौ जा, तेरे भरोसे नें तोय ठीक करौ है।” एक बार जब फरीसियन नें ईसू ते पूंछी, “परमेस्‍वर का राज कब आबैगौ?” तब बानें उन्‍नें जबाब दयौ, “परमेस्‍वर कौ राज दीखबे बारे रूप में नांय आबै। लोग जि नांय कहिंगे कै देखौ ‘बू यांपै’, या बू मांपै चौंकि परमेस्‍वर कौ राज तौ तुमारे भीतरईऐ।” पर बानें चेलान ते कही कै “ऐसौ समै आबैगौ जब तुम मुझ, ‘मनुस्‍य के बेटा’ के दिनान में ते एक दिनउ कूं भी देखबे काजै तरसौगे पर,बाय देख नांय पाऔगे। और लोग तुमते कहिंगे, ‘देखौ बू जाँपै है!’ या ‘बू माँपै है’ तुम माँपै मत जईंयों या बिनकौ पीछौ मत करियों। “बैसेंई जैसे बिजली चमककै एक छोर ते दूसरे छोर तक आकास कूं चमकाय देतै, बैसेंई मैं, ‘मनुस्‍य कौ बेटाऊ’ अपने दिनान में पिरकट हुंगो। पर जि बात जरूरीए के मैं, ‘मनुस्‍य कौ बेटा’ भौत दुख उठाऊंगौ और जा पीढ़ी के लोग मोए नकारेंगे। “जैसौ नूह के समै में भयौ हतो, बैसेई मुझ, ‘मनुस्‍य के बेटा’ के समै मेंऊ हौबैगो। जब नूह जहाज में चढो बा दिना तक, लोग खावते-पीबत और ब्याह करते रैहते। फिर जल परलय आई और बानें सब कछू खतम कर दियौ। “जाई तरैह ते लूत कै समै मेंऊ भयौओ। लोग खावते-पीवते, मोल लेतै, बेचतै खेती करतै और घर बनाबतै। पर बा समै जब लूत सदौम ते बाहर निकरबे के बाद आकास मेंते आग और गंधक बरसबे लगी और बे सब नस्‍ट है गये। और जब मैं, ‘मनुस्‍य कौ बेटा’ पिरगट हुंगो, बा समैऊं ठीक ऐसौई होगौ। “बा समै अगर कोई आदमी छत्‍त पर होय और वाकौ सामान घर में होय तौ बू बाय लैबे काजै नीचे नांय उतरै। और ऐसेई कोई आदमी जब खेत में होय तौ बू कोई भी सामान लैबे काजै बापस नांय आबै। लूत की पत्नी कूं याद करौ कै वाके संग का भयौ, “चौंकि जो कोई धरती पै अपनों जीबन बचाबौ चांहैगौ बू सुरग में अपने जीबन कूं खोबैगौ जो कोई धरती पै मेरे काजै अपने जीबनए दैबैगौ बू सुरग में जीबन पाबेगौ। मैं तुमते कैहतूं, बा रात एक खाट पै दो आदमी हुंगे, बिनमें ते एक उठाय लयौ जाबैगौ और दूसरौ छोड़ दयौ जाबेगौ। दो औरत संग-संग चाकी चला रयी होंगी, उनमें ते एक उठा लई जाबैगी और दूसरी छोड़ दई जाबैगी।” मैं तुमते कहतूं, दो आदमी खेत में काम कर रये हुंगे, उनमें ते एक कूं उठाय लियौ जाबैगौ और दूसरौ कूं छोड़ दयौ जाबैगौ। फिर ईसू कै चेलान नें बाते पूछी, “हे पिरभू ऐसौ कहाँ होगौ?” तब बानें बिनते कही, “जब तुम ल्हास के जौरें गिद्धन कूं देखोगे बैसेई इन बातनें तुम पहचान लोगे।” तब ईसू नें चेलान कूं रोजाना पिराथना करबे और हिम्मत नांय हारनी चहिऐं के बारे में एक दृस्‍टान्‍त कहौ, “एक नगर में एक जज रैहतो, बू ना तौ परमेस्‍वर ते डरतौ ना काऊ आदमी की परबाह करतौ। बाई गांम में एक बिधबा रैहती बू रोज वाके जौरें आयकै कैहती, ‘कै मेरे दुसमनन के खिलाफ मोय न्याय दिबा दै।’ “भौत समै तक तौ बू जज आना कानी करतौ रहौ। फिर बू मन में सोचबे लगौ, ‘कै मैं ना तौ परमेस्‍वर ते डरूँ ना काऊ आदमी की परबाह करत। तौऊं जि बिधबा आयकै मोय परेसान करतै, जामारै मैं जाकूं न्याय दिबाऊंगो जाते कै जि बार-बार आयकै मेरी नाक में दम ना करै।’” पिरभू नें कही, “सुनों, जि अधर्मी जज का कैह रयौ है? का परमेस्‍वर अपने चुने भये लोगन कौ सच्‍चौ न्याय ना करैगौ, जो बाकूं दिन रात पुकारत रैहतैं, का बू बिनकी सहायता करबे में देर लगाबेगौ? मैं तुमते कैह रयौ हूं, कै बू तुरन्‍तई बिनकौ सच्‍चौ न्याय करैगौ। तौ का जब मैं, ‘मनुस्‍य कौ बेटा’ आऊंगौ तब का मैं धरती पै पिराथना और भरोसौ पाउंगो?” और जो अपने ऊपर भरोसौ रखतै बू अपने आप कूं धरमी कैहते और दूसरे कूं कछू नांय समझते बिनके ऊपर ईसू नें एक दृस्‍टान्‍त सुनांयौ, “एक बार दो आदमी पिराथना करबे बड़े पिराथना घर में गये बिनमें एक फरीसी और दूसरौ चुंगी लैबे बारौ हतो। फरीसी खड़ौ हैके जि पिराथना करबे लगौ कै, ‘हे परमेस्‍वर, मैं तेरौ धन्यबाद करतूं कै मैं दूसरे लोगन की नाईं अन्धेर करबे बारौ, अन्यायी और व्‍यभिचारी नांऊ और ना जा चुंगी लैबे बारे के जैसौ हूं। मैं सप्‍ताह में दो बार बर्त रखूं मैं अपनी सबरी कमाई कौ दसमों हिस्सा परमेस्‍वर कूं देतूं।’ पर चुंगी लैबे बारौ दूर तेई खड़े हैके सुरग की ओर आँख उठायबोऊ नांय चाहौ बरन अपनी छाती पीटत भये कहबे लगौ, ‘हे परमेस्‍वर मैं पापी हूं मो पापी पै दया कर।’” फिर ईसू नें कही, मैं तुमते कैहतूं परमेस्‍वर की नजर में बू फरीसी नांय पर चुंगी लैबे बारौ धरमी हैके अपने घर कूं गयौ। चौंकि जो कोई अपने आप कूं बड़ौ बनाबेगौ बू छोटौ करौ जाबेगौ और जो अपने आप कूं छोटौ बनाबेगौ बू बड़ौ करौ जाबेगौ। एक बार लोग बालकन्‍नें ईसू के जौरें लाये कै बू बिनपै हात रखकै आसीरबाद दैबे। जब वाके चेलान जि देखौ तौ बे बिनें फटकारबे लगे। ईसू नें कही, “बालकन नें मत रोकौ जिनें मेरे जौरें आन देओ चौंकि परमेस्‍वर कौ राज जा तरैह के लोगन कौ ही है। मैं तुमते सच कैह रयौ हूं जो कोई परमेस्‍वर के राज कूं एक बालक के समान अपनाबैगौ बुई सुरग में जाबेगौ।” फिर काऊ यहुदी नेता नें ईसू ते पूंछी, “हे अच्‍छे गुरू, कबऊ नांय खतम हैबे बारे जीबन कूं पाबे काजै मैं का करूं?” ईसू नें बाते कही, “तू मोय अच्‍छौ चौं कैह रयौ है? परमेस्‍वर कूं छोडकै कोई अच्‍छौ नांय। तू वाकी आग्‍यान नें जानते, ‘व्‍यभिचार मत करियो, हत्‍या मत करियो, चोरी मत करियो, झूंठी गबाही मत दियो, अपने मा-बाप कौ आदर करियो।’” फिर बा यहुदी नेता नें ईसू ते कही, “मैं तौ इन सब बातन नें बचपन तेई मानतौ आयौ हूं।” जि सुनिकै ईसू नें बाते कही, “तोमें अबऊ एक बात की कमी है, तू अपनी सबरी धन-सम्पत्‍ति बेच दै और जो पईसा मिलै बाय गरीबन में बांट दै। और मेरे पीछे है लै जाके बदले कौ धन तोय सुरग में मिलैगौ।” जि सुनिकै बू भौत उदास भयौ चौंकि बू भौत धनी हतो। ईसू नें वाकी उदासी देखकै कही, “धनी आदमी कौ परमेस्‍वर के राज में जाबों भौत कठिन है। जैसै ऊँठ सूंई के छेद में ते नांय निकर सकत, बैसेई धनबान आदमी कौ परमेस्‍वर के राज में जावे भौत कठिन है।” “बे लोग जो जि बात सुन रये हते बिन्‍नें कही, तौ फिर कौन बचायौ जाबेगौ?” तब ईसू नें कही, जो बातें आदमी के काजै असम्भव है बू परमेस्‍वर काजै सम्भव हैं। तब पतरस नें कही, देख हम तौ अपनों सब कछू छोड़कै तेरे पीछे है लिये हैं। ईसू नें कही, “मैं तुमते सच कैह रयौ हूं, जो कोई परमेस्‍वर के राज के काजै अपनों घर बार, घरबारी, भईया और अपने माँ-बाप और बाल बच्‍चेन कूं छोड़ देते, बू जा युग में बाते जादा और सुरग में कबऊ नांय खतम हैबे बारौ जीबन पाबेगौ।” फिर ईसू नें बारैह भेजे भये चेलान कूं एक ओर लै जायकै बिनते कही, “देखौ हम येरूसलेम कूं जा रये हैं जाँपै मुझ, ‘मनुस्‍य के बेटा’ के बारे में परमेस्‍वर की ओर ते बात बताबे बारेन नें जो कछू लिखौ है, बू सब पूरौ हैबे बारौ है। मैं गैर यहुदियन के हातन में सौंप दयौ जाऊंगो और बे मेरौ मजाक उड़ांगे, मेरी बेज्‍जती करिंगे, मोपै थूकिंगे। और मोपै कोडे लगाये जांगे और मोए मार डारिंगे। पर मैं तीसरे दिना जीबित है जाऊंगौ।” बिन चेलान की समझ में कछू नांय आयौ और इन बातन कौ मतलब बिनते छुपौ रहौ और बे इन बातन नें नांय समझ पाये। जब ईसू यरीहो नगर के जौरें हैके जा रयौ तौ एक आँधरौ भिखारी सड़क के किनारे बैठौ भीख माँग रयौ हतो। और बू अन्धौ भीड़ के पामंन की अबाज सुनिकै पूँछबे लगौ कै जि का है रयौ है? लोगन नें बाय बताई, “ईसू नासरी जा रयौ है।” जि सुनिकै बू अन्धौ पुकारबे लगौ, “हे ईसू, दाऊद की सन्‍तान, मोपै दया कर।” जो लोग आगे जा रये हते बिन्‍नें बाकूं फटकारते भये कही, “चुप रह” पर बू औरऊ जोर ते चिल्लाबे लगौ, “हे दाऊद की सन्‍तान, मोपै दया कर।” तब ईसू रुक गयौ और बिनकूं आग्‍या दयी, “बाय मेरे जौरें लाऔ” जब बू जौरें आयौ तब ईसू नें बाते पूँछी, “तू का चाहबें कै मैं तेरे काजै करूं?” बानें ईसू ते कही, “हे पिरभू, मैं देखबे लगूं।” ईसू नें बाते कही, “देखबे लग तेरे भरोसे नें तोय ठीक कर दियौ है।” और बू तुरन्‍त देखबे लगौ और परमेस्‍वर की बड़ाई करतौ भयौ ईसू के पीछे है लियौ और जि देखकै बारे सब लोगन नें परमेस्‍वर की स्तुति करी। एक बार ईसू यरीहो नगर ते हैके जा रयो। और मांपै जकई नाम कौ एक आदमी जो चुंगी लैबे बारेन कौ सरदार हतो और बू भौत धनी हतो। बू ईसूए देखबों चाहतौ, “कै बू कैसौ है,” पर भीड़ की बजैह ते बू बाय देख नांय पा रयौ चौंकि बू नाटों हतो और भीड़ भौत जादाई तब बू ईसूए देखबे काजै भीड़ ते आगे जायकै एक गूलर के पेड़ पै चढ़ गयौ चौंकि ईसू बाई रस्ता ते जाबे बारौ हतो। जब ईसू बा पेड़ के नीचे पौंहचौ, तौ ऊपर देखकै पेड़ पै बैठे जकई ते केहबे लगौ, “जकई, झटपट उतर आ चौंकि आज मोय तेरेई घर में ठहरनों है।” बू तुरन्‍त उतर आयौ और आनन्द के संग ईसूए अपने घर लै गयौ। जि देखकै सब लोग कुड़ कुड़ायकै कैहबे लगे “जि तौ एक पापी आदमी कै जाँपै ठहरबे जा रयौ है।” जकई खड़ौ भयौ और पिरभू ते बोलों, “हे पिरभू देख मैं अपनी आधी सम्पत्‍ती गरीबन कूं दे दुंगा और मैंनें काऊ कौ कछू भी अन्याय करकै लियौ है तौ मैं बाय वाकौ चौगुनों लौटा दुंगो।” तब ईसू नें बाते कही, “जा घर में आज उद्धार आयौ है, चौंकि जा आदमी नें भरोसौ करकै जि दिखा दयौ है कै जि आदमीऊं अब्राहम की सच्‍ची सन्‍तान है। चौंकि मैं, ‘मनुस्‍य कौ बेटा’ खोए भयेन कूं ढूढ़बे और बिनकूं बचाबे आयौ है।” जब लोग जि बात सुन रये हते, तब ईसू नें बिनैं एक दृस्‍टान्‍त सुनांयौ, चौंकि ईसू येरूसलेम के जौरें हतो और बे जि सोचते कै परमेस्‍वर कौ राज तुरन्‍त पिरकट हैबे बारौ है। जामारै ईसू नें कही, “एक धनी आदमी राज करबे की सिछा लैबे दूर देस कूं चलौ गयौ। और बानें अपने दस सेबकन कूं बुलायकै हर एक कूं, एक-एक मौहर दयी और कही, ‘देखौ, मेरे लौटबे तक जाते लेन देन करियौ।’ “पर बाते नगर के लोग घिरना करते हते, जामारै वाके पीछे दूतन के द्वारा जि कैहला भेजौ कै ‘हम नांय चाहबे कै जि आदमी हम पै राज करै।’ “पर बू राज की पदवी पायकै लौटौ और बानें जिन सेबकन कूं मौहर दयीं हतीं, बिनैं अपने जौरें बुलायौ कि बू जानें कै बिन्‍नें बिनते कितनों लाभ कमायौ है। “पैहले नें आयकै कही, ‘हे स्‍वामी! तेरी एक मौहर ते दस मौहर कमायीं हैं।’ “जापै वाके मालिक नें बाते कही, ‘साबास अच्‍छे सेबक।’ तू थोड़े में भरोसे योग्‍य निकरौ, ‘जामारै तोय दस नगरन पै अधिकार मिलैगौ।’ “जाके बाद दूसरे सेबक नें आयकें कही, ‘हे स्‍वामी, तेरी एक मौहर ते पाँच और मौहर कमायीं हैं।’ “मालिक नें बाते कही, ‘तोय पाँच नगरन पै अधिकार मिलैगौ।’ “अब तीसरे नें आयकै कही, ‘हे मालिक देख तेरी मौहर जि है जाय मैंनें अगौछे में बांध रखौ हतो। मोय तोते डर लगतो चौंकि तू कठोर आदमी है। जो तैनें नांय रखौ बाय उठा लैबे और जो तेने बोयो नांय बाय तू काटतै।’ “मालिक नें बाते कही, ‘हे दुस्‍ट सेबक, मैं तेरे कहे अनुसार तेरौ न्याय करुंगो। तू जानतौ कै में एक कठोर आदमी हूं। जो मैंनें रखौ नांय बाय उठा लेतूं और जो मैंनें बोयो नांय बाय काटतूं। जाते तौ तू जा मौहर कूं ब्याज पै दै देतौ और में बापस आयकै बाय ब्याज समैत लै लेतौ।’ “मालिक नें मांपै खड़े आदमिन ते कही, ‘जापै ते मौहर लैकै बाय दै देओ जापै दस मोहरें।’ “बिन्‍नें बाते कही, ‘हे मालिक, वाके जौरें तौ पैहले ते दस मोहरें हैं।’ “बानें कही, ‘मैं तुमते कैहतूं, जाके जौरें है बाय और जादा दयौ जाबेगौ और जाके जौरें नांय बा पैते बोऊ जो बापै है छीन लयौ जाबेगौ। पर बे जो मेरे दुसमन है बे नांय चाहबें कै, में राज करूं बिनें मेरे सामने लायकै मार डारौ।’” जि बात कैहबे के बाद ईसू चेलान ते आगे-आगे येरूसलेम की ओर चल दियौ। जब बू जैतून नामक पहाड़ पै बैतफगे और बैतनियां कै जौरें पौहचों, तौ बानें अपने दो चेलान कूं जि कैहकै भेजौ, “कै सामने के गांम में जाऔ मांपै तुम्हें एक गधी कौ बच्‍चा बंधौ भयौ मिलैगौ, जापै अबई तक कोई नांय बैठौ। बाय खोलकै याँपै लै आऔ। अगर कोई तुमते पूँछै कै, ‘जाय चौं खोल रये हो?’ तौ बाते कहियों, ‘पिरभू कूं जाकी जरूरत है।’” जो चेला भेजे गये बिनै मांपै बैसौई मिलौ जैसौ ईसू नें बिनै बतायौ हतो। जब बे गधी के बच्‍चा कूं खोल रये, तौ वाके मालिक नें बिनते पूँछी कै, “तुम जाय चौं खोल रये हो?” तब बिनैं कही, “पिरभू कूं जाकी जरूरत है।” बे बा गधी के बच्‍चा कूं ईसू के जौरें ले आये और अपनी अपनी लोई बा गधा पै डारकै ईसू कूं बापै बैठा दयौ। जब ईसू बापै बैठकै जा रयौ हतो तौ भौत ते लोग अपनी लोई रस्ता में बिछाते जा रये। ईसू जब जैतून पहाड़ के ढलान पै पौंहचो, तौ चेलान की सबरी भीड़ नें वाके सबरे सामर्थ के काम जो बिन्‍नें देखें हते बिनके काजै, आनन्दित हैके ऊंची अबाज में परमेस्‍वर की स्तुति करबे लगे। “धन्य है बू राजा, जो पिरभू के नाम में आबें! सुरग में सान्‍ती होबें और आकास में परमेस्‍वर की महिमा होबें।” भीड़ में कछू फरीसी हते, बिन्‍नें कही, “गुरू, अपने चेलान कूं चुप कर दै।” ईसू नें बिनै जबाब दयौ, “में तुमते कैहतूं अगर ये चुप रये, तौ पत्‍थर चिल्ला उठेंगे।” जब बू नगर के जौरें पौंहचो तौ बा नगर कूं देखकै पै रो परौ। और कैहबे लगौ, “कितनों अच्‍छौ होतौ के तू जा अच्‍छे दिना कूं पहचान पातो, कै कौन सी बातन ते तोए सान्‍ती मिलैगी, पर तोए अबऊ बे बात नांय दिख रयी। चौंकि बे दिनांऊ आबेंगे जब तेरे बैरी तोए चारौ लंग ते घेर के, मोरचा बांधिंगे और तोपै चारों ओर ते दबाब डारिंगे। बे तोय और तेरे संग के लोगन कूं मटियामेट कर दिंगे, बे एक पत्‍थर पै दूसरौ पत्‍थरऊ नांय छोड़िंगे, चौंकि तेने अपने परमेस्‍वर के आयबे के समै कूं नांय पैहचानों।” ईसू बड़े पिराथना घर में गयौ और जो मांपै बौपार कर रये हते बिनैं बाहर निकारबे लगौ। बानें बिनते कही, “जि लिखौ भयौ है, ‘कै मेरौ घर पिराथना कौ घर होगौ’, पर तुम लोगन नें तौ जि डाकूंन कौ अड्‍डौ बना डारौ है।” ईसू रोजाना बड़े पिराथना घर में जायकै परमेस्‍वर के वचन की सिछा देतौ हतो। यहुदी पिरधान पुरोहित और सास्त्रन कूं सिखाबे बारे और यहुदी नेता बाय नांस करबे कौ उपाय ढ़ूढ रये हते। पर उनैं समझ में नांय आ रयौ कै बू का करैं चौंकि सब लोग मन लगायकै वाकी सिछा सुनते। एक दिना जब ईसू यहुदियन के बड़े पिराथना घर में परमेस्‍वर के वचन की सिछा देते भये सुभ समाचार सुना रयो, तब यहुदी पिरधान पुरोहित और सास्त्रन कूं सिखाबे बारे और यहुदी नेता वाके जौरें आये। और बाते पूछबे लगे, “कै इन कामन नें तू कौन ते अधिकार ते कर रयौ है? बू कौन है जानें तोय जि अधिकार दयौ है?” तब ईसू नें बिनते कही, “मैंऊ तुमते एक बात पूँछतूं, तुम मोय बताऔ, यूहन्‍ना कूं बपतिस्मा दैबे कौ अधिकार सुरग ते मिलौओ कै आदमी ते मिलौओ?” तब बे आपस में कैहबे लगे, “कै अगर हम कैहबे ‘सुरग की ओर ते मिलौओ’, तौ जि कैहबेगौ, ‘तौ तुमनें बापै भरोसौ चौं नांय करौ?’ और हम जि कैहबें, ‘आदमिन की ओर ते’ मिलौ हतो तौ लोग हम पै पत्‍थर मारिंगे। चौंकि बे मानते कै यूहन्‍ना परमेस्‍वर की ओर ते बात बताबे बारौ हतो।” बिनैं ईसू कूं उत्‍तर दयौ, “कै हम नांय जानत कै बाय अधिकार कौन की ओर ते मिलौ हतो।” फिर ईसू नें बिनते कही, “तौ मैंऊ तुमें नांय बता रयौ कै मैं जे काम कौन के अधिकार ते करतूं।” ईसू लोगन ते एक दृस्‍टान्‍त कैहबे लगौ, “एक आदमी नें अंगूरन कौ बगीचा लगायौ और किसानन कूं आद बटाई पै दैकै कछू दिनान के काजै परदेस कूं चलौ गयौ। जब फसल कौ समै आयौ तब बानें किसानन के जौरें अंगूरन के बगीचा में ते अपनों हिस्सा लैबे अपनों एक सेबक भेजौ पर किसानन नें बाय पीटकै खाली हातई लौटा दियौ। फिर बानें अपनों दूसरों सेबक भेजौ और किसानन नें बाऊऐ पीटकै और वाकौ अपमान करकै खाली हात लौटा दियौ। फिर बानें तीसरौ सेबक भेजौ बिन्‍नें बाय अधमरौ करकै बाहर फेंक दियौ। “बगीचा कौ मालिक सोचबे लगौ, ‘कै अब मैं का करूं? मैं अपने प्यारे बेटाए भेजुंगो, का पतौ बे जाकौ आदर करै।’ “जब किसानन नें वाके बेटा कूं देखौ, तौ बे आपस में बिचार करबे लगे कै, ‘जि तौ इकलौतो बारिस है जाये हम मार दिंगे तौ सबरी जायजाद हमारी है जाबेगी।’ और बिन्‍नें बाय अंगूरन के बगीचा में ते बाहर निकारकै मार डारौ। “जापै बगीचा कौ मालिक अब बिन किसानन के संग का करैगौ? बू आयकै बिन किसानन कूं मार डारैगौ,और अंगूर के बगीचाए औरन कूं सौंप दैबेगौ।” जि सुनिकै लोगन नें कही, “परमेस्‍वर ऐसौ ना करै।” ईसू नें बिनकी ओर देखकै कही, “धर्मसास्त्र में जि चौं लिखौ है, “‘कै जा पत्‍थर कूं राज मिस्त्रीन नें बेकार समझकै निकार दयौ हतो, बुई कोने कौ पत्‍थर बन गयौ’? जो कोई जा पत्‍थर पै गिरैगौ बू चकना चूर है जाबेगौ और जापै जि पत्‍थर गिरैगौ बाय पीस डारैगौ।” सास्त्रन कूं सिखाबे बारे और यहुदी पिरधान पुरोहित जि समझ गये, कै जि दृस्‍टान्‍त हम पैई कहौ है और बे बाय बाई समै पकड़बौ चाहते, पर बे लोगन ते डरते हते। बे ईसू कूं फसाबे की ताक में लगे रहते और बिन्‍नें जासूस भेजे कै बे धरमी हैबे कौ भेस धरकै, वाकी अपनी बातन में फसायकै रोमी राजपाल के हात और अधिकार में सौंप दें। बिन्‍नें ईसू ते पूंछते भये कही, “हे गुरू! हम जानतै कै तू जो ठीक है बेई कैहबे और बाई परमेस्‍वर के वचन की सिछा दैबे और काऊ की तरफदारी नांय करत, बल्कि सच्‍चाई ते परमेस्‍वर के रस्ता पै चलबे की सिछा देतै। का कैसर राजा कूं कर दैबौ हमारे काजै हमारे नियम के खिलाफ सही है कै नांय?” ईसू नें बिन लोगन की चालाकी कूं जानकै बिनकी ते कही, “मोय एक दीनार दिखाओ, जापै कौन की सकल छपीऐ और किनकौ नाम लिखौ है?” बिन्‍नें कही, “कैसर राजा कौ।” ईसू नें बिनते कही, “जो कैसर राजा कौ है बाय कैसर कूं देओ और जो परमेस्‍वर कौ है बाय परमेस्‍वर कूं देओ।” बे ईसू कौ उत्‍तर सुनिकै अचम्भे में पड़कै चुप है गये और बे लोगन के सामने वाकी बातन में दोस नांय निकार सके। जाके बाद कछू सदूकी ईसू के जौरें आये जो जिनकौ जि माननों हतो, कै मरे भयेन में ते कोई फिर ते जीबित नांय है सकत, बिनमें ते कछुन नें ईसू के जौरें आयकै बाते पूंछी, “हे गुरू, मूसा नें हमारे काजै लिखौ है कै यदि काऊ आदमी कौ भईया अपनी औरत के रहते भये बिना औलाद के मर जाबें तौ वाकौ भईया अपने वाकी बिधबा औरत ते ब्याह करकै अपने भईया के काजै बाते बच्‍चा पैदा करे। एक बार कोई सात भईया हते, पैहले नें ब्याह करौ और बिना सन्‍तान के मर गयौ। फिर दूसरे नें बाई औरत ते ब्याह करौ और बोऊ बिना सन्‍तान के मर गयौ। और ऐसे ही तीसरे नें और सातो भईयन नेंऊं बा औरत ते ब्याह करौ और सबके संग एक जैसो भयौ बे सबई बिना सन्‍तान के मर गये। सबके बाद बू औरतऊ चल बसी। अब सबन के जी उठबे के बाद बू कौन की औरत होगी चौंकि बानें तौ सातन तेऊ ब्याह करौ हतो?” ईसू नें बिनते कही, “जा युग के लोगन में ब्याह सादी होबें, पर जो लोग बा सुरगीय युग के बारिस और मरे भयेन में ते फिर ते जी उठबे काजै ठहराये गये हैं बिनमें ब्याह सादी नांय हुंगी। और बे लोग फिर कबऊ नांय मरते चौंकि बे सुरग दूतन की तरैह ते हुंगे और मरे भयेन में ते जी उठबे की वजह ते बे परमेस्‍वर कीऊ सन्‍तान होंगे। मूसा नें झाड़ि की कथा में, जि पिरगट करौ है कै मरे भये जीन्दे करे गये हैं और बानें जि कही हती पिरभू, ‘अब्राहम कौ परमेस्‍वर है, इसहाक कौ परमेस्‍वर और याकूब कौ परमेस्‍वर है।’ परमेस्‍वर मरे भयेन कौ नांय, पर जीबतेन कौ परमेस्‍वर है चौंकि परमेस्‍वर के सब लोग वाके काजै जीन्दे हैं।” जि सुनिकै सास्त्रन कूं सिखाबे बारेन में ते कछुन नें बाते कही, “हे गुरू, तैनें सही कही है।” जाके बाद बिनकी लोगन कूं ईसू ते और कछू पूछबे की हिम्मत नांय भयी। ईसू नें बिनते कही, “तुम कैहतौ कै मसीह दाऊद कौ बेटा है। ऐसौ कैसै है सकते? दाऊद नें खुदई भजन संहिता की किताब में कहौ है, “ ‘पिरभू परमेस्‍वर नें मेरे पिरभू ते कही, “मेरे सीदे हात माऊं बैठो रैह, जब तक कै मैं तेरे बैरीयन कूं तेरे पामन के नीचें ना कर दऊं।” ’ जा तरैह ते दाऊद मसीह कूं ‘पिरभू’ कैहबें, तौ मसीह दाऊद कौ बेटा कैसै है सकैं?” जब सबरे लोग सुन रये हते तब ईसू नें अपने चेलान ते कही, “सास्त्रन कूं सिखाबे बारेन ते सावधान रहो, जिनें लम्बे लम्बे चोगे पहनकै य्हां वहाँ घूमबो, बजारन में लोगन के जरिये नमस्‍कार पाबो, पिराथना घरन में मुख्‍य आसन और दाबत में सबनते आगे बैठबो बिनकूं अच्‍छौ लगतै। और बे लोग बिधबान की सम्पंत्‍तीऐ खा जाबें और दिखाबे के काजै बड़ी देर तक लम्बी लम्बी पिराथना करतै इन लोगन कूं भौत दन्‍ड भुगतनों पड़ेंगौ।” जब ईसू बड़े पिराथना घर में हतो तब बानें देखी कै अमीर आदमी दान पेटी में अपनों अपनों दान डार रये हैं। फिर बानें एक गरीब बिधबा कूं भी दान पेटी में दो दमड़ी डारते भये देखौ। तब बानें लोगन ते कही, “मैं तुमते सच कैहतूं कै जा गरीब बिधबा नें सबनते बढ़कै दान डारौ है। चौंकि इन सबन नें तौ अपनी बढ़ती में ते दान डारौ है पर जा बिधबा नें गरीब रैहते भये भी जो कछू जाके जौरें हतो बू सब कछू डार दियौ।” जब कछू लोग बड़े पिराथना घर के बारे में कैह रये कै पिराथना घर भौत सुन्दर पत्‍थरन ते और दान करी गयी चीजन ते सजायौ है। तब ईसू नें कही, “बे दिन आबेंगे जिनमें ऐसौ होगो जो तुम अब जाँपै देखतौ बिनमें ते एक पत्‍थर पै दूसरो पत्‍थर नांय रैहबेगौ जो गिरायौ नांय जाबे।” लोगन नें ईसू ते पूछी, “हे गुरू जे सब कब होबेगौ? और जब जि बात होबेगी तौ बा समै कौ का निसान होबेगौ?” ईसू नें कही, “चौकन्‍ने रहियों तुमें कोई भैहका ना लै चौंकि भौत ते लोग मेरौ नाम लैके आबेंगे और कहिंगे कै ‘मैं मसीह हूं’ और जेऊ कहिंगे कै ‘बू समै जौरें आ गयौ है’ पर तुम बिनकी बातन में मत आ जईयों। और जब तुम लड़ाई और बलबो के बारे में सुनों तौ घबरईयों मत चौंकि इनकौ हैबौ जरूरी है। पर बा समै अन्‍त नांय होबेगौ।” और फिर ईसू नें बिनते कही, “कुल पै कुल और राज्य पै राज्य चढ़ाई करैगौ। और बड़े-बड़े भूकम्प आंगे, जगैह जगैह अकाल और महामारी फैलैगी, आकास में अजीब अजीब घटनाएँ घटेंगी और बड़े-बड़े डराबने निसान दिखाई दिंगे।” पर जि सब हैबे ते पहलै बू मेरे पीछे चलबे की बजैह ते तुमें पकड़िंगे, परेसान करिंगे और पंचायत में लै जांगे और जेल में बन्द कर दिंगे, राजाओं और राजपाल के सामने लै जांगे। लेकिन जि समै तुमारौ गबाही दैबे कौ मौंको होगौ जामारै अपने अपने मन कूं तईयार कर लेऔ और जा बात की चिन्‍ता मत करियों कै तुम अपने बचाब में का बोलोगे। चौंकि मैं तुमकूं ऐसौ वचन और ऐसी बुद्धी दुंगो जाते तुमारे सबरे बिरोधी ना तौ तुमारौ सामनों कर पाबेंगे ना तुमारी बातें काट पाबेंगे। तुमारे माँ-बाप, भईया, कुटुम्बी और मित्र तुमें पकरबांगे और तुमें ते कछुन कूं मरबा डारिंगे। और मेरी नाम लैबे की बजैह ते भौत ते लोग तुमते नफरत रखिंगे। फिरऊ तुमारे सिर को एक बारऊ नांस नांय हैबेगौ । पर भरोसे में मजबूत बने रहबे की बजैह ते तुम अपने कबऊ नांय खतम हैबे बारे जीबनें पाओगे। “जब तुम लोग येरूसलेम कूं सेनान ते घिरौ भयौ देखौ तौ समझ जईयों कै वाकौ नांस हैबे बारौ है। तब जो यहुदिया में होबें बे पहाड़न पै भाग जाबें और जो येरूसलेम के भीतर होबें बे बाहर निकर जाबें और जो बाहर गांमन में होबै बे सहर के भीतर ना आबें। चौंकि जि दन्‍ड के ऐसे दिना होंगे, जिनके बारे में पबित्र सास्त्र में पैहले तेई लिखौ गयौ, बे सबरी बात पूरी है जाबेंगी। और बिन औरतन के काजै बे दिना भौत भयानक होंगे जो पेट ते हुंगी और जो बालकन कूं दूध पियावत हुंगी। चौंकि बिन दिनान में जा धरती पै भौत बड़ी बिपत्‍ति आबेगी और इन लोगन पै परमेस्‍वर कौ क्रोध पड़ेगौ। लोग तलबार ते मारे जांगे और बिनकूं बन्दी बनांयकै दूसरे देसन में सौंप दयौ जाबेगौ और येरूसलेम गैर यहुदियन के द्वारा जब तक रौंदौ जाबेगौ जब तक परमेस्‍वर के द्वारा दयौ गयौ समै पूरौ ना होगो। “सूरज, चन्दा और तारेन में निसान दिखाई दिंगे और धरती पै देस देस के लोगन पै बिपत्‍ति आंगीं, बे समुनदर के गरजबे ते और लहरन के उठबे ते घबरा जांगे। लोग संसार पै आबे बारी बिपत्‍तीन ते डरकै अधमरे है जांगे चौंकि आकास की सक्‍ती हिलाई जाबेंगी। तब लोग मुझ, ‘मनुस्‍य के बेटाए’ अपार सामर्थ और बड़ी महिमा के संग बादर पै आतौ भयौ देखिंगे। जब जे बात हैबे लगिंगी तौ खड़े हैके ऊपर देखियों चौंकि तुमारौ उद्धार जौरें होगौ।” ईसू नें बिनते एक दृस्‍टान्‍त में कही, “कै अंजीर के पेड़ कूं और दूसरे सब पेड़न नें देखौ, जैसेई बिनकी कोंपलें निकरतै तौ तुम देखकै खुदई समझ जाबें कै गरमी आबे बारी हैं। जाई तरैह ते जब तुम इन बातन नें होते भये देखौ तौ समझ जईयों कै परमेस्‍वर कौ राज आबे बारौ है। “मैं तुमते सच कह रयौऊं जब तक मेरी कही जि बात नांय घटेंगी तब तक जा पीढ़ी कौ अन्‍त नांय होबेगौ एक बार कूं धरती और आकास टल जायेंगे पर मेरौ वचन हमेसा अटल बनो रैहबेगौ। “जामारै साबधान रहौ ऐसौ ना होबे कै तुम भोग-बिलास, खाने पीबें और इन संसार की चिन्‍तान ते तुमारौ मन हटीलौ है जाबें और बू दिना फन्दे की तरैह ते अचानक तुम पै आ पड़े। चौंकि बू दिना सबरी धरती के सब रैहबे बारेन पै आ पड़ेगौ। जामारै जागते रहो और हर समै पिराथना करते रहो जाते तुम इन सब आबे बारे संकट ते बचबे और भरोसे के संग मुझ, ‘मनुस्‍य के बेटा’ के सामने खड़े है होबे लायक बन जाऔ।” रोजाना ईसू बड़े पिराथना घर में परमेस्‍वर की वचन की सिछा देतौ और रात बिताबे काजै साम कूं जैतून नाम की पहाड़ी पै चलौ जातौ और सब लोग परमेस्‍वर की वचन की सिछा सुनबे काजै सबेरे सबेरे बड़े पिराथना घर में आ जाते। अखमीरी रोटी कौ तौहार जो फसह के नाम ते जानों जातै, बू आबे बारौ हतो। और यहुदी पिरधान पुरोहित और सास्त्रन कूं सिखाबे बारे ईसूए मारबे कौ उपाय ढ़ूढ रये, पर बिनै लोगन ते डर लगतौ हतो। ईसू के बारह भेजे भये चेलान में ते एक में सैतान घुस गयौ जो यहूदा इस्करियोती कैहलातौ। बानें जायकै बड़े पिराथना घर के यहुदी पिरधान पुरोहितन ते और सिपाइन के अधिकारिन ते बात करी कै, बू कैसै ईसूए बिनके हात में पकरबाबें। बे भौत खुस भये और जाके बदले में बिन्‍नें बाय पईसा दैबे कौ बादा करौ। और यहूदा राजी है गयौ और ऐसौ मौकौ ढ़ूढबे लगौ जब भीड़ भाड़ ना होय तब बू ईसूए बिनके हातन में बिसबास घात करकै पकरबा दैबै। तब बिना खमीर की रोटी कौ तौहार आयौ जामें फसह के काजै मैमना की बली दैवौ जरूरीऔ। ईसू नें पतरस और यूहन्‍ना कूं जि कैहके भेजौ जाऔ और हमारे काजै फसह कौ भोजन तईयार करौ जाते हम बाय खा सकैं। बिन्‍नें ईसू ते पूंछी, “तू का चाहबें? कै हम काँपै भोजन की तईयारी करै।” ईसू नें बिनते कही, “देखौ, नगर में घुसतेई तुमें एक आदमी मिलैगौ, जाके हात में मटका होगौ और जा घर में बू घुसै, बा घर में तुम वाके पीछे चले जईयों। और बा घर के मालिक ते कहियों, ‘गुरू नें पूंछी है, कै बैठक की जगैह काँ है, जामें मैं अपने चेलान के संग फसह कौ भोजन खा सकूं?’ और बू तुमें ऊपर कौ सजौ सजायौ कमरा दिखा दैबेगौ मँईपै तईयारी करियों।” जाके बाद बू नगर में गये और जैसौ ईसू नें बतायौ बिन्‍नें माँपै बेसोई पायौ और बिन्‍नें फसह के भोजन की तईयारी कर लयी। जब बू समै आयौ तौ ईसू अपने भेजे भये चेलान के संग भोजन करबे बैठौ। और बानें चेलान ते कही मेरी बड़ी इच्‍छा हती कै दुख भोगबे तै पैहले मैं जि फसह कौ भोजन तुमारे संग खांऊ, चौंकि में तुमते कैह रयौ हूं कै जब तक परमेस्‍वर के राज में जा भोजन कौ मतलब पूरौ ना है जाबेगौ, तब तक मैं जाय दुबारा ना खाऊंगौ। तब ईसू नें प्यालौ लैके धन्यबाद की पिराथना करी और कही, “लेओ और जायें आपस में बांट लेओ। चौंकि मैं तुमते कैह रयौऊं कै जब तक परमेस्‍वर कौ राज ना आबेगौ तब तक मैं अंगूर कौ रस नांय पीऊंगो।” फिर ईसू नें रोटी लयी और धन्यबाद करिकै तोड़ी और बिनकूं जि कैहते भये दयी कै, “जि मेरौ सरीर है जो तुमारे काजै दयौ जा रयौ है, मेरी याद में ऐसेई करै करियों।” और जाई तरैह ते ईसू नें भोजन के बाद चेलान कूं प्यालौ दयौ और कही, “जि प्यालौ मेरे बा खून के रूप में है, जो तुमारे काजै बहायौ जातै जि परमेस्‍वर कि नई बाचा है। “पर देखौ, मेरे संग बिसबास घात करबे बारौ मेरे संग जा मेज पै भोजन कर रयौ है। चौंकि मुझ, ‘मनुस्‍य के बेटा’ कौ तौ मरनों पक्‍कौ है जैसौ कै निस्चित करौ गयौ है। पर धिक्‍कार है बा आदमी कूं जो मोय बिसबास घात करकै पकरबाबैगौ।” चेला आपस में एक दूसरे पूंछबे लगे, “कै हम में ते कौ है जो जि काम करैगौ?” और चेलान में जि बाद बिबादऊ भयौ कै “हम में ते कौन बड़ौ है?” ईसू नें बिनते कही, “गैर यहुदियन के राजा बिनपै प्रभुता रखैं और जो बिनके सरदार हैं, बेऊ बिनपै अधिकार कौ प्रयोग करतै ‘बे खुद कूं लोगन का उपकारक’ कहलबाबों चाहबें। पर तुम ऐसे नांय हत बल्कि जो तुम में बड़ौ है बू छोटे कि तरैह ते और जो पिरधानें बू सेबक जैसे बनियों। चौंकि बड़ौ कौ है, जो मेज पै बैठकै भोजन कर रयौ है, या बू जो परोस रयौ है? का बुई नांय जो भोजन पै बैठौ है? पर मैं तौ तुमकूं भोजन परोसबे बारौ सेबक जैसौ हूं। “तुम बेई है जो समस्‍याओं के समै में लगातार मेरे संग रहे। और मैं तुमें बैसेई राज दै रयौ हूं जैसे मेरे पिता नें जाये मोय दयौ हतो, ताकि तुम मेरे राज में मेरी मेज पै खाऔ पीऔ और राजगद्‍दी पै बैठकै इसरायल के बारह गोतन कौ न्याय करौ।” ईसू नें पतरस कही, “सिमौन, हे सिमौन देख जैसे एक किसान नाज कूं फटककै भूसे ते अलग करतै, बैसेई तुम सबन की परीछा लैबे की सैतान नें आग्‍या लै लयी है। पर मैंनें तेरे काजै पिराथना करी है कै तेरौ भरोसौ ना डगमगाबें और जब तू बापस आबें तौ अपने भईयन कूं सम्भाल लैबें।” तब पतरस नें ईसू ते कही, “हे पिरभू, मैं तेरे संग जेल जायबे और मरबे कूअऊं तईयार हूं।” तब ईसू नें पतरस ते कही, “कै मैं तोते कह रयौ हूं आज सबेरे मुरगा के बांग दैबे तै पैहले तू मोय तीन बार पहचानबे ते मनें कर दैबेगौ कै ‘मैं बाय नांय जानूं।’” तब ईसू नें चेलान ते कही, “जब मैंनें बटुआ, थैला और जूतियों के बगैर भेजौ हतो तौ का तुमें काऊ चीज की कमी भयी?” बिन्‍नें कही, “काऊ चीज की कमी नांय भयी।” ईसू नें बिनते कही, “पर अब, जाके जौरें बटुआ होबे, बू बाय लै लैबे और थैलऊ लै लेऔ और जाके जौरें तलबार ना होबै, बू अपनी लोईऐ बेचकै एक तलबार खरीद लेऔ। चौंकि मैं तुमते कैह रयौ हूं, जो लिखौ भयौ है कै, ‘मैं अपराधिन के संग गिनों जाऊंगो,’ वाकौ मोमें पूरौ हैवौ जरूरी है, चौंकि मेरे बारे में लिखी बातें पूरी हैबै पै है।” चेलान नें कही, “देख पिरभू हमारे जौरें दो तलबार हैं।” तब ईसू नें कही, “बस भौत हैं।” जाके बाद ईसू मांपै ते बाहर निकरकै रोजाना की तरैह ते जैतून पहाड़ पै चलौ गयौ। और चेलाऊ वाके पीछे-पीछे गये। ईसू नें पहाड़ पै पौहचकै चेलान ते कही, “पिराथना करौ जाते तुमें परीछा में ना पड़नों परै।” तब बू काऊ डेला कूं जितनी दूर तक फेंकौ जा सकतौ लगभग बिनते उतनी दूर चलौ गयौ। और घोंटू के बल बैठकै पिराथना करबे लगौ। “हे पिता, यदि तू चाहबें तौ मेरे सामने ते जा दुख भरे प्यालेऐ हटा लै, तौऊं मेरी नांय तेरी इच्‍छा पूरी होबें।” तबई माँपै एक सुरग दूत पिरकट भयौ जो बायें सामर्थ देतौ। और ईसू बड़ी बैचेनी के संग औरऊ मन की बेदना ते पिराथना करबे लगौ वाकौ पसीना मानों खून की बड़ी बड़ी बूंदन की नाईं धरती पै गिर रयौ हतो। और जब बू पिराथना करकै अपने चेलान के जौरें आयौ तौ बिनै उदासी केमारै थके भये सोतौ भयौ पायौ। तब ईसू नें बिनते कही, “चौं सो रये हौ? उठौ, पिराथना करौ कै तुमें परीछा में नांय पड़नों परै।” बू जि कह ही रयौ हतो कै एक भीड़ आयी और बारह भेजे भये चेलान में ते एक चेला जाकौ नाम यहूदा हतो बू बिनके आगे-आगे आ रयौ हतो। बू ईसूए नमस्‍कार करबे काजै वाके जौरें आयौ और बाकूं चूमों। ईसू नें बाते कही “हे यहूदा, का तू मुझ, ‘मनुस्‍य के बेटाए’ बिसबास घात करकै पकरबाबे काजै चूम रयौ है?” जब वाके चेलान नें देखी कै का हैबे बारौ है, तब बिन्‍नें कही, “हे पिरभू का हम तलबार चलाबें?” और बिनमें ते एक नें यहुदी महा पुरोहित के दास कौ सूधौ कान काट दियौ। जापै ईसू नें कही, “अब बस करौ” और वाकौ कान छूकै बू सही कर दियौ। फिर ईसू नें यहुदी पिरधान पुरोहितन और बड़े पिराथना घर के अधिकारिन और बुजुर्ग यहुदी नेतन ते कही, जो बायें पकरबे काजै आये “का तुम मोकूं डाकू समझकै तलबार और लठ्‌ठन नें लैके आये हौ? जब मैं बड़े पिराथना घर में रोजाना तुमारे संग हतो, जब तौ तुमनें मैं पकरौ नांओ पर जि समै तुमारौ है और जापै अंधेरे कौ अधिकार है।” फिर बे ईसूए पकरकै यहुदी महा पुरोहित के घर लै गये और पतरस बिनते दूरई दूर रैहकै बिनके पीछे-पीछे आयौ। जब पेहरेदार आंगन में आग जरायकै ताप रये हते और पतरसऊ बिनके बीच में बैठकै तापबे लगौ। तब एक दासी आँच के उजीते में पतरस कूं बड़े गौर ते देखकै कैहबे लगी, “जि बुई है जो ईसू के संग हतो।” और पतरस नें बाते जि कैहकै मनें कर दई कै, “हे नारी मैं बाय नांय जानूं।” कछू देर बाद काऊ आदमी नें बाय देखकै कही, “तू अऊ तौ बिनमें तेई है।” पतरस नें कही, “अरे भले मान्स, मैं बिनमें ते नांऊ।” फिर एक घन्‍टा बाद एक और आदमी जोर दैकै कैहबे लगौ, “जेऊ तौ वाके संग हतो। चौंकि जि गलील कौ रैहबे बारौ है।” पर पतरस नें कही, “अरे भले मान्स, मोय नांय पतौ कै तू का कैह रयौ है। बू जि कैही रयौ हतो कै तबई मुरगा नें बांग दई।” तब पिरभू नें मुड़कै पतरस की ओर देखी और पतरस कूं बू बात याद आयी जो पिरभू नें बाते कही हती, “कै आज मुरगा के बांग दैबे ते पैहले तू तीन बार मोय पैहचानबे ते मनें करैगौ।” और पतरस बाहर निकरकै फूट-फूट के रोबे लगौ। जि आदमिन नें ईसू पकर रखौ हतो बे वाकौ मजाक बनाकै बाय पीटबे लगे। और वाकी आँखन पै पट्टी बांधकै बाते पूँछबे लगे कै, “भविस्‍यबानी करकै बता तोय किन्‍नें पीटौ है?” और बिन्‍नें भौत सी निन्दा की बात वाके बिरोध में कही। जब दिन निकरौ तौ यहुदी बुजुर्ग नेता और यहुदी पिरधान पुरोहित और सास्त्रन कूं सिखाबे बारे इकठ्‌ठे भये और ईसूए यहूदी महापंचायत में लै जायकै पूंछी, “यदि तू मसीह है तौ हमकूं बता दै।” ईसू नें बिनते कही, “अगर में तुमनें बताय दऊं तौ तुम मेरौ भरोसौ नांय करिंगे। और अगर मैं तुमते पूछुंगो, तौ तुम जबाब नांय दिंगे। पर अब ते मैं, ‘मनुस्‍य कौ बेटा’ सर्वसक्‍तिमान परमेस्‍वर के सीदे हात की ओर बैठुंगौ।” जापै सबनें कही, “तौ का तू परमेस्‍वर कौ बेटा है?” ईसू नें बिनते कही, “तुम खुदई तौ कैह रये हो। चौंकि मैं हतूं।” तब बिन्‍नें कही, “अब हमें और गबाही की का जरूरतै, चौंकि हमनें खुदई वाके मौंह ते सुन लयी है।” ईसूए सबरी यहुदी पंचायत पिलातुस राज्यपाल के जौरें लै गयी। और बे जि कैहके ईसू पै इलजाम लगाबे लगे कै, “हमनें जाय लोगन कूं भैकाबते भये और कैसर राजा कूं कर दैबे ते मनें करते और खुद कूं मसीह राजा कैहते भये सुनों है।” जापै पिलातुस नें ईसू ते पूंछी, “का तू यहुदियन कौ राजा है?” ईसू नें बाय जबाब दयौ, “तू खुदई तौ कह रयौए। मैं हतूं।” तब पिलातुस नें यहुदी पिरधान पुरोहितों और लोगन ते कही, “मोय जा आदमी में कोई दोस नांय दिख रयौ।” पर बे और जोर दैकै कैहबे लगे कै, “जि गलील ते लैके य्हां तक सबरे यहुदिया देस में अपनी सिछा दैकै लोगन कूं भड़काबें।” जि सुनकें पिलातुस नें पूंछी, “का जि आदमी गलील कौ रैहबे बारौ है?” जब बाय पतौ चली कै जि हेरोदेस के अधिकार छेत्र कौ है तौ बानें ईसू कूं वाके जौरें भेज दियौ। हेरोदेस बिन दिनान में येरूसलेम मेंई हतो। हेरोदेस ईसूए देखकै भौत खुस भयौ, चौंकि बानें ईसू के बारे में सुनी हती जामारै बू बाते मिलबौ चाँहतो। वाकी भौत दिनान ते इच्‍छा हती के ईसू वाके सामने कोई चमत्‍कार करै। हेरोदेस नें बाते भौत प्रस्न पूछे, पर बानें बाय काऊ तरैह कौ जबाब नांय दियो। यहुदी पिरधान पुरोहित और सास्त्रन कूं सिखाबे बारे बाय हर तरैह ते दोसी ठहरावत रहे। तब हेरोदेस नें अपने सिपाइयन के संग ईसू कौ अपमान करके बाको मजाक उड़ायौ। फिर राजसी बस्त्र पैहनांयकै बाकूं पिलातुस कै जोरै बापिस भेज दियौ। जाते पैहले हेरोदेस और पिलातुस एक दूसरे के दुसमन हते। पर अब बे दोनों मित्र बन गये। पिलातुस नें यहुदी पिरधान पुरोहितों, यहुदी बुजुर्ग नेता और लोगन कूं बुलायौ। और बिनते कही, “कै तुम जा आदमी है मेरे जौरें जामारै लाएऔ कै जि आदमिन कूं भड़कातै और मैंनें जा बात की तुमारे सामने जाँच करीए और जो दोस जा आदमी पै लगाये हैं पर मैने जामें ऐसौ कोई दोस नांय पायो। और ना हेरोदेस नें पायो और बानें जि दुबारा हमारे जौरें भेज दियो है। जानें ऐसौ कछू नांय करौ कै मैं जाय मौत की सजा दऊं। जामारै मैं जाय कोड़े लगबाकै छोड़ देतूं।” फसह के तौहार के दिना लोग जाय चाँहते हते, बिनके काजै पिलातुस एक कैदीए छोड देतो हतो चौंकि मांपै हर साल एक कैदीए छोड़बे को नियम हतो। तब बे सब जोर दैकै कैहबे लगे, “जाय आदमी कूं जानते मार देऊ। और हमारे काजै बरअब्बा कूं छोड़ देओ।” बरअब्बा सहर में भये बलबा में हत्‍या के इलजाम में जेल में हतो। पिलातुस नें दुबारा ईसू कूं छोड़बे की इच्‍छा ते लोगन कूं समझायौ। पर बिन्‍नें चिल्ला चिल्‍लायकै कही, कै “जाय आदमी कूं क्रूस पै चढ़ाऔ,जाय क्रूस पै चढ़ाऔ।” पिलातुस नें तीसरी बार फिर कही, “चौं, जानें ऐसौ कौन सौ अपराध करौ मैंनें जामें कोई दोस नांय पायौ कै मैं जाय मौत की सजा दऊं? मैं जामें कोड़े लगबाकै छुड़बा देतूं।” पर लोग चिल्लाय चिल्‍लायकै पीछे पड़ गये के जा आदमीए क्रूस पै चढ़ाऔ। और बिनकौ चिल्लाबो कामयाब भयौ। जामारै पिलातुस ने आग्‍या सुनायी, कै जि लोग जैसौ चाह रये हैं बेसोई करौ जाय। और बरब्बाये जो नगर में बलबा में हत्‍या करबे की बजैह ते जेल में हतो। जाय छोड़बे की बू मांग कर रये हते बाकूं छोड़ दयौ और ईसू कूं लोगन के हात में सौंप दयौ कै जैसौ बे चाबें वाके संग करै। जब बे लोग ईसूए लै जाय रये हते, तब बिन्‍नें सिमौन नाम को कुरेन कौ रैहबे बारौ एक आदमी कूं गांम ते आतौ भयौ देखौ। बाय पकड़कै वाके ऊपर क्रूस लाद दयौ और बाय ईसू के पीछे-पीछे लै गये। लोगन की बड़ी भीड़ ईसू कै पीछै चल रयी हती। उनमें भौत सी औरतऊ हती, बू छाती पीट पीटकै रो रयी हती। और ईसू नें बिनकी ओर देखकै कही, “येरूसलेम की बेटियों! तुम मेरे काजै मत रोऔ, पर अपने बालकन के काजै रोऔ। चौंकि ऐसे दिन आय रये हैं जब लोग कहिंगे, ‘के बे औरत धन्य है जो बांझ है, धन्य है बिनकी कोख जिन्‍ने कबऊ बच्‍चा पैदा नांय करे और धन्य है जिन्‍ने कबऊ काऊ बच्‍चा कूं अपनों दूध नांय पिलायौ।’ और बा समै लोग कैहबे लगिंगे के पहाड़ ‘हमारे ऊपर गिर जाऔ’ और पहाड़ी ‘हमें ढक लेओ।’ चौंकि जब बे हरे पेड़ के संग ऐसौ कर सकतें, तौ सूखे पेड़ के संग का का नांय करिंगे?” सिपाही ईसू के संग दो अपराधिन कूं भी वाके संग मारबे लै जा रये हते। बे ईसूए खोपड़ी नाम की जगैह पै लै गये। बिन्‍नें ईसू के संग दोनों अपराधिन कूं क्रूस पै चढ़ायौ, एक कूं वाके सीदे हात मांऊ और दूसरे कूं उल्टे हात मांऊ क्रूस पै लटकायौ। फिर ईसू नें कही, “हे पिता इनकूं छमा कर चौंकि जि नांय जानतई कै जि का कर रयेएं।” फिर सिपाइयन नें परची डारकै ईसू के कपड़ा बांट लये। मांपै खड़े लोग जि सब देख रये हते, यहुदी नेता जि कैहके ईसू कौ मजाक उड़ायबे लगे के जानें भौतन कूं बचायौ है। “अगर तू परमेस्‍वर कौ चुनों भयौ मसीह है तौ अपने आपकूं बचा लै।” सिपाइयन नेऊं ईसू कौ मजाक उड़ायौ बे जौरें आयकै सिरका देत भये कही, “अगर तू यहुदिन कौ राजाए तौ अपने आप कूअऊं बचा लै।” और बिन्‍नें वाके ऊपर एक लिखबे बारी पट्टी पै जि लिखकै टाँग दयौ कै “जि यहुदियन कौ राजा है।” ईसू के जौरें लटकाए भये एक अपराधी नें वाकौ अपमान करते भये कही “तू मसीह है तौ अपने आपकूं बचा और हमेंऊं बचा।” पर दूसरे अपराधी नें बाय डांटत भये कही, का तोय परमेस्‍वर कौ डर नांय? तू अऊ तौ बई सजाए भोग रयोए। हम तौ अपने करे की सजा भोग रये हैं, “पर जानें तौ कोई पाप नांय करौ।” तब बानें बाते कही, “ईसू जब तू अपने राज में आबे, तौ मोय याद रखिओ।” ईसू नें बा अपराधी ते कही, “मैं तोते सच कैह रयौ हूं, कै तू आजई मेरे संग सुरगलोक में होगौ।” बा समै दिन के बारह बजे कौ समै होगौ तब ते तीन बजे तक सबरी धरती पै अंधेरौ छायौ रयौ। चौंकि सूरज नें चमकबो छोड़ दयौ और यहुदीयन के बड़े पिराथना घर कौ परदा ऊपर ते नीचे तक फटकै दो टुकड़न में है गयौ। ईसू नें जोर ते पुकारकै कही, “हे पिता मैं अपनी आतमा तेरे हात में सौंपतूं।” और जि कैहके बानें अपने पिरान छोड़ दये। तब मांपै जो सूबेदार जि सब देख रयौ हतो, बानें परमेस्‍वर बड़ाई करते भए कही के, “निस्चय ही, जि धरमी आदमी हतो।” और भौत ते आदमी जि देखबे काजै आए हते, जा घटना देखकै बे अपनी छाती पीटत भये लौट गये। पर बे सब जो ईसूए जानबे बारे,और जो औरतन वाके पीछे-पीछे गलील ते आयी हतीं, बे दूर खड़े हैके जि सब देख रही हतीं। यहुदिया देस में अरिमतिया नगर कौ रैहबे बारौ एक अच्‍छौ धरमी आदमी हतो, जाकौ नाम यूसुफ हतो। बू यहुदी महापंचायत कौ सदस्‍य हतो। बू पंचायत के दूसरे आदमिन की बातन में सामिल नांय भयौ, जामें ईसू कूं मारबे की बात पै सहमती बनी हती चौंकि जि परमेस्‍वर के राज कौ इन्‍तजार कर रयौ हतो। बू पिलातुस के जौरें गयौ और बानें ईसू की ल्हास बाते मांगी। और बानें ईसू की ल्हास क्रूस पैते नीचे उतारकै बड़िया सफेद मल मल के कपड़ा में लपेटौ फिर बानें बाकूं चट्टान में खुदी भयी कब्र में रख दियौ, जामें पैहले काऊ की लास नांय रखी गयी हती बू सुक्रबार कौ दिना हतो और यहुदियन कौ आराम दिन सुरू हैबे बारो हतो। जो औरतें ईसू के संग गलील ते आयीं हतीं बिन्‍नें यूसुफ कै पीछे-पीछे चलकै कब्र कूं देखौ, के ईसू की ल्हास कूं कैसै रखौ गयौए। फिर उन्‍नें अपने घर लौटके ईसू की लास पै लगाबे काजै खुसबूदार चीज तैयार करीं। और व्यबस्था की आग्‍या के अनुसार बिन्‍नें यहुदियन के आराम दिन में आराम करौ। सप्‍ताह के पैहले दिना इतबार कूं सबेरे सबेरेई बे औरतें खुसबूदार चीज जो बिन्‍नें तैयार करी हतीं, उन्‍नें लैके बे कब्र पै पौंहची। और बिनैं कब्र के मोंह पै रखौ भयौ बड़ौ पत्‍थर हटो भयौ मिलौ। और बिनैं भीतर जायकै देखौ और पिरभू ईसू की ल्हास कब्र में नांय मिली। तब जि देखकै बिन्‍नें बड़ौ अचम्भौ भयौ, तबई ऊजरे कपड़ा पैहने भये दो आदमी मांपे खड़े भये दिखाई दये। बिन आदमिन कूं देखकै बे डरप गईं और अपनों मौंह धरती माऊं झुका लियो, तब बिन्‍नें नें औरतन ते कही कै, “तुम जीबित आदमी कूं मुरदेन में चौं ढूँढ रहीयौ? बू जीबित है गयौए, बू य्हांपे नांय। याद करौ जब बू जीबित हतो तब गलील में बानें का कही हती। बानें कही हती, कै मैं, ‘मनुस्‍य कौ बेटा’ पापिन के हातन में पकरबायौ जाऊंगौ और क्रूस पै लटकायौ जांगो और तीसरे दिनां जी उठूंगौ।” तब बिन औरतन्‍नें बू बात याद आई। तब बे कब्र पैते लौट आई और बिन्‍नें जि बात ग्‍यारह भेजे भये चेलान और बिनके सब संगीन कूं बताईं। जिन्‍ने भेजे भये चेलान ते जि बात कही हती, बिन औरतन में मरियम मगदलीनी, योअन्‍ना और याकूब की माँ मरियम और बिनके संग औरऊ औरत हतीं। चेलान्‍ने बिनकी बात पै भरोसौ नांय करौ और चेलान नें बिनकी बात कहानी समझी। पर पतरस भागतौ भयौ कब्र पै पौंहचौ और बानें झुककै देखौ तौ बाय सफेद मल मल कपड़न के सिबा मांपै और कछू नांय दिखौ। और बू मांते अचम्भौ करके अपने घर बापिस लौट गयौ। बाई दिनां बिनमें ते दो चेला इमाउस नाम के गांम में जाय रये हते। बू गांम येरूसलेम ते चार कोस दूर हतो। बे बात मांपै भईं हतीं बिनके बारे में बे बात करते भये जा रये हते, तबई ईसू बिनके संग आयकै बिनके संग संग चल दियौ। और बिनकी आँखन पै ऐसौ परदा सौ पर गयौ कै बे बाय पैहचान नांय सके। तब ईसू नें बिनते कही, “कै तुम आपस में का बात कर रयेऔ? जो तुम आपस में चलते कर रये हो, बे उदास खड़े रैह गए।” जि सुनकें किलौपास नाम के एक आदमी नें कही, “कै तू का जा येरूसलेम में नयो आयोए। तोय नांय मालूम कै इन दिनान में का याँपै भयौए?” तब ईसू नें बिनते पूछी, “कै ऐसौ का भयौए?” बिन्‍नें बाते कही, “बात ईसू नासरी के बारे में है, बू एक ऐसौ मनुस्‍य हतो बानें जो कहौ बेई करौ और बानें परमेस्‍वर और सब लोगन के सामने जि दिखा दयौ, कै बू एक महान परमेस्‍वर की ओर ते बात बतायबे बारो हतौ। और यहुदी पिरधान पुरोहितन्‍नें और बड़े पिराथना घर के अधिकारिन नें बाय पकड़बा दियो कै बाकूं मौत की सजा दी जाबे और बू क्रूस पै लटकबाय दियो। जि तीन दिन पैहले की बात है। हमें तौ जि आसा हती कै बू इसरायल कौ उद्धार करबे बारो हतौ। कैऊ औरतन्‍नें जो कब्र पै गईं हतीं उन्‍नें मांपै ईसू की ल्हास नांय मिली। बिन्‍नें हमकूं अचम्भे में डाल दियो और बिन्‍नें हमते जि बात कही कै, हमते सुरग दूतन नें कही,कै ईसू जीबित है गयौए। तब हमारे कछू संगी मांपै कब्र पै गये और हमनें माँपै बैसौई देखौ जैसौ बिन औरतन्‍नें हमते कही हती, पर ईसू कूं नांय देखा।” तब ईसू नें बिनते कही, “अरे निर्बुद्धीयौ परमेस्‍वर की ओर ते बात बतायबे बारेन की बातन पै भरोसौ ना करबे में तुम मन्द बुद्धीयौ। का जि जरूरी नांओ कै, मसीह दुख उठायकै अपनी महिमा में आबे?” तब ईसू नें मूसा ते लैकै और दूसरे परमेस्‍वर की ओर ते बातन्‍नें बतायबे बारेन तक पूरे पबित्र सास्त्र में ते अपने बारे में जो बात लिखी हती बिनकौ अर्थ समझायौ। इतने में बे बा गांम में पौहच गये, जा गांम में बे जाय रये हते और ईसू नें ऐसो बरताब करो कै बू बिनते आगे जायबो चाह रयौ है पर दोनों चेलान नें जि कैहकै रोक लियौ कै “हमारे संग रह चौंकि सन्झा हे गयीए, तब बू बिनके संग रहबे भीतर गयौ।” जब बू बिनके संग भोजन करबे बैठो तब बानें रोटी उठाई और धन्यबाद करके तोड़कै दैबे लगो, तबई बिनकी आँखन को परदा हट गयौ और उन्‍नें ईसू कूं पैहचान लियो और बू बिनके सामने ते गायब है गयौ। तब चेलान नें एक दूसरे ते कही, “जब बू हमनते बात कर रयौ हतो और पबित्र सास्त्र कौ अर्थ समझाय रयौ हतो तौ का हमारे मन में ज्बालाएं नांय भड़की हती?” और बे बाई समै माँते उठके येरूसलेम कूं लौट गए और मांपै ग्‍यारह चेलान और दूसरे संगिन कूं इकठ्‌ठौ पायो हतो। और माँपै बैठे भये लोग कैह रये हते कै, “सचमुच में पिरभू जीबित है उठौ है और सिमौन कूं दिखाई दयौ है।” तब बिन दोनोंन नें इमाउस के रस्ता में भईं हती बे सबरी बात बताईं और कैसै जब बानें रोटी तोड़ी हती तब हमनें ईसू कूं पहचान लियौ हतौ। बे सब इन घटनान की बात कर ही रये हते, कै ईसू बिनके बीच में आयकै खड़ो है गयौ,और बिनते बौलो, “कै तुमें सान्‍ती मिलै।” पर बे ईसूए देखकै घबरा गये और डरप गये चौंकि बे समझ रये के बू काऊ भूत कूं देख रये है। तब ईसू नें बिनते कही, “चौं घबरा रयेओ और मन में सन्देह चौं कर रयेओ? मेरे हात और पामंन कूं देखौ मैं बेई हूं। भूतन के हाड़-माँस नांय होतई मोय छूकै देखौ।” जि कैहके, ईसू नें बिनैं अपने पांम और हात दिखाये। तब बे खुसी के मारे अबऊ भरोसौ नांय कर पा रये हते कै, हम बाय देख रये हैं और बे अचम्भे में हते। तब ईसू नें बिन्‍ते कही कै, “तुमारे जोरै कछू खायबे काजै हतै।” तब बिन्‍नें भूजी भयी मछली कौ एक टुकड़ा बाकूं दियौ। और मछली के टुकड़ा कूं ईसू नें बिनकेई सामने खायौ। ईसू नें बिनते कही, जब मैं तुमारे संग रैहतो हतो तब मैंनें तुमते कही हती, “जो कछू मूसा नियमन में और परमेस्‍वर की ओर ते बात बतायबे बारेन की किताबन में और भजन की किताब में मेरे बारे में लिखौ है, बू सब पूरौ होनों जरूरिए।” तब बानें बिनके मन को अंधेरौ दूर करते भये पबित्र सास्त्र कौ अर्थ समझायौ। तब ईसू नें बिनते कही, “ऐसौ लिखौ है कै मसीह दुख भोगैगो और तीसरे दिना मरे भयेन मेंते जि उठेगौ। और येरूसलेम ते लैके धरती के सब लोगन में मन फिराब कौ और पापन की छमा कौ पिरचार बाई के नाम ते करो जाबैगौ। और तुम सब इन बातन कै गबाह होगें। और देखौ जा पबित्र आतमा देबे कौ बादा मेरे पिता नें करौ है, मैं बाकूं तुमारे ऊपर उतारूंगो। पर जब तक तुम सुरग ते सामर्थ ना पाय लेओ, तब तक जा सहर में ही ठहरे रहना।” जाके बाद ईसू बिन्‍नें बैतनियां तक बाहर ले गयौ और अपनों हात उठायकै बिनकूं आसीस दियो। और बू आसीस देते भयौ बिनते अलग हो गया और ईसू कूं सुरग में उठा लियौ गयौ। और बे लोग ईसू कूं दन्‍डबत करकें बड़ी खुसी के संग येरूसलेम कूं लौट गये। और सबरो समै परमेस्‍वर की स्तुति करते भये बड़े पिराथना घर में बितायबे लगे। सुरू में वचन हतो। वचन परमेस्‍वर के संग हतो और वचनई परमेस्‍वर हतो। बेई सुरू में परमेस्‍वर के संग हतो। बाई के द्वारा परमेस्‍वर नें सब कछू बनांयौ। ऐसौ कछू नांय जो वाके बिना बनांयौ गयौ होबे। बामें जीबन हतो और बू जीबन लोगन के काजै उजीतौ हतो। बू उजीतौ अंधेरे में चमकतै पर अंधेरौ बाय मिटा नांय सकौ। परमेस्‍वर नें एक आदमी भेजौ वाकौ नाम यूहन्‍ना हतो। बू जिय गबाही दैबे आयौ के बू उजीते की गबाही देय, जाते लोग वाकी सुनें और भरोसौ करें। बू खुद तौ उजीतौ नांय हतो पर बू उजीते की गबाही दैबे आयौ हतो। बू सच्‍चौ उजीतौ हतो और सब आदमिन के अंधेरे कूं दूर करतो हतो और बू दुनियां की नजर में आयबे बारौ हतो। बू दुनियां में हतो और दुनियां वाके द्वारा रची गयी पर दुनियां ने बाय नांय पैहचानों। बू अपने लोगन के बीच में आयौ पर लोगन नें बाय नांय अपनांयौ। पर जितने लोगन नें बाकूं अपनांयौ और बापै भरोसौ करौ, बानें बिनकूं परमेस्‍वर की सन्‍तान हैबे कौ अधिकार दै दियौ। बे खून और मांस ते पैदा नांय भये, और न काऊ आदमी की इच्‍छा ते पर परमेस्‍वर की इच्‍छा ते आतमिक रूप ते पैदा भये। वचन देह धरकें हमारे बीच रहौ। हमनें वाकी ऐसी महिमा देखी जैसी पिता के इकलौते बेटा की, जो दया और सच्‍चाई ते भरकै परमेस्‍वर ते आयौ है। यूहन्‍ना ने वाके बारे में गबाही दई और पुकार के कही, “जि बेईए जाके बारे में मैने कही हती, ‘जो मेरे बाद में आयबे बारौ है और बू मोऊते बढ़कें चौंकि बू मोते पैहले हतो।’” वाकी दया ते भरे भये हैबे की बजैह ते हमें किरपा पै किरपा मिली है। जामारै सच्‍चाई तौ जि है कै मूसा ने तौ हमें व्‍यबस्था दई पर किरपा और सच्‍चाई ईसू मसीह के द्वारा हम तक पौंहची है। परमेस्‍वर कूं कबऊ काऊनें नांय देखौ। पर पिता कौ इकलोता बेटा जो परमेस्‍वर है बू परमेस्‍वर के जौरें है और बानेंई परमेस्‍वर कूं हमें दिखायोए। जब येरूसलेम ते यहुदी नेतन नें पुरोहितन और लेबीन कूं बाते जि पूछबे काजै भेजा, “तू को है?” तब यूहन्‍ना नें बिनते खुलके साफ सबदन में कही, “मैं मसीह नांऊ।” बिन्‍नें बाते पूछी, “तौ फिर तू को है? का तू एलियाह हैं?” तब बानें कही, “मैं एलियाह नांऊ।” जाके बाद बिन्‍नें बाते पूंछी, “तौ का तू परमेस्‍वर की ओर ते बात बतायबे बारौ है।” बानें कही, “कै मैं नांऊ।” तब बिन्‍नें बाते पूछी कै, “तू को है? हमें बता जाते कै हम बिनकूं बतामें जिन्‍नें हमें भेजौए। तू अपने बारे में का कैहतै?” परमेस्‍वर की ओर ते बात बतायबे बारे यसायाह के सब्दन के अनुसार यूहन्‍ना नें बिनते कही, “मैं, बेहड़ की बू अबाज हूं, बू अबाज जि कहती है। ‘पिरभू के काजै रस्ता सीधी करौ।’” फरीसी जिनें भेजौ गयौ हतो, बिन्‍नें बाते पूछी कै, “अगर तू मसीह नांय और तू ना एलियाह और ना परमेस्‍वर की ओर ते बात बतायबे बारौऐं तौ फिर तू बपतिस्मा चौं देतुए?” बिनकूं जबाब देते भये यूहन्‍ना नें कही, “मैं पानी ते बपतिस्मा देतूं पर यांपै बू खड़ौए जाय तुम नांय पैहचानत। जो मेरे बाद आयबे बारौ है, मैं तौ वाके जूतन के फीतऊ खोलिब के लायक नांऊ।” जि सब कछू यरदन नदी के पार बैतनियां सहर में भयौ, ज्हां यूहन्‍ना बपतिस्मा देतो। अगले दिना यूहन्‍ना ने ईसूए अपनी ओर आते भए देखकें कही, “देखौ, जि परमेस्‍वर कौ मेमनाऐं, जो दुनियां के पापन कूं दूर करतै। जि बेई है जाके बारे में मैंनें तुमते कही हती, ‘कै मेरे पीछे एक आदमी आयबे बारौ है, बू मोते बढ़कें है चौंकि बू मोते पैहले हतो।’ पैहले मैंऊ नांय जानतो कै बू को है पर मैं जाके मारे पानी ते बपतिस्मा देतौ आयौऊ, कै बू इसरायल के लोगन पै उजागर होबे।” फिर यूहन्‍ना ने जि गबाही दई, “मैंनें सुरग में ते पबित्र आतमा कूं कबूतर की तरैह वाके ऊपर उतरते भये देखौ और बू बाई के ऊपर ठहर गयौ। मैं तौ बाय नांय जान्‍त हतो पर जानें मोय पानी ते बपतिस्मा दैबे कूं भेजौ, बानें मोते कही, ‘जाके ऊपर पबित्र आतमा कूं कबूतर की तरैह ते उतरते भये देखेगौ, बेई पबित्र आतमा ते बपतिस्मा देबेगौ।’ मैंनें जि देखौऐ और मैं जाकी गबाही देतूं, कै जि परमेस्‍वर कौ बेटा है।” दूसरे दिनां बपतिस्मा दैबे बारे यूहन्‍ना अपने दो चेलान के संग मांपै हतो। बानें ईसू कूं मांते जाते भये देखौ, और कही, “देखौ, जि परमेस्‍वर कौ मेमनाऐं।” तब वाके दोनों चेला वाकी जि बात सुनकें, ईसू के पीछे चल दये। ईसू नें पीछे मुड़कै उन्‍नें अपने पीछे आबत देखकै कही, “तुम कौनें ढ़ूढ़ रयेऔ?” बिन्‍नें बाते पूछी, “हे गुरू, तू कहां रैहते?” बानें बिनते कही, “चलौ चलकै देख लेओ।” तब बिन्‍नें आयकै बू जगैह देखी ज्हांपै बू रैहतो हतो और बे म्हांपै वाके संग रहे और जि साम के चार बजे कौ समै हतो। जो दो चेला यूहन्‍ना की बात सुनकें ईसू के पीछे गये हते बिनमें ते एक सिमौन पतरस कौ भईया अन्द्रियास हतो। बानें सबनते पैहले जायकै अपने भईया सिमौन ते कही, “हमें मसीह मिल गयौऐ।” मसीह, जाकौ मतलब चुनों भयौ होतै। तब बू बाय ईसू के जौरें लायो। ईसू नें बाय देखकें कही, “तू यूहन्‍ना कौ बेटा सिमौन है, तू कैफा कैहलाबेगौ।” कैफा जाय पतरसऊ कैहतै इनकौ मतलब चट्‍टान है। ईसू नें दूसरे दिना गलील जायबो चाहौ और फिलिपुस ते मिलौ और बाते कही, “मेरे पीछै आजा।” फिलिपुस, अन्द्रियास और पतरस के नगर बैतसैदा कौ रैहबै बारौ हतो। फिलिपुस नतनेल ते मिलौ और बोलौ, “जाकौ बर्नन मूसा की व्‍यबस्था और परमेस्‍वर की बात बतायबे बारेन ने करौ है, बू हमें मिल गयौए। बू यूसुफ कौ बेटा नासरत कौ रैहबे बारौ ईसू है।” नतनेल ने बाते कही, “नासरत! का नासरत तेऊ कोई अच्‍छी चीज आ सकतै?” तब फिलिपुस ने कही, “आऔ चलकै देख लेओ।” नतनेल कूं अपनी ओर आबत भयौ देखके ईसू नें कही, “देखौ, जि सच्‍चौ इसरायली है। जाके मन में कोई कपट नांय।” नतनेल नें ईसू ते पंछी, “तू मोय कैसे जानतै?” ईसू नें बाते कही, “तोय फिलिपुस के बुलायबे ते पैहलेई मैंनें तोय अंजीर के पेड़ के नीचे बैठो देखौ।” नतनेल ने बाते कही, “हे गुरू, तू तौ परमेस्‍वर कौ बेटा है, और तू इसरायल कौ राजा है।” ईसू नें बाते कही, “मैनें तोते कही, मैंनें तोय अंजीर के पेड़ के नीचे देखौए, का तू जा बजैह ते भरोसौ कर रयौए? तू जाऊते बड़े-बड़े चमत्‍कार देखेगौ।” ईसू नें बाते कही, “मैं तुमते सच कैह रयौऊं कै तुम सुरग कूं खूलो भयौ और परमेस्‍वर के दूतन कूं मुझ, ‘मनुस्‍य के बेटा’ के जौरें उतरते भये और चढ़ते भये देखौगे।” इन बातन के हैबे के दो दिना बाद गलील पिरदेस के काना सहर में काऊ के य्हां ब्याह हतो, म्हांपै ईसू की माँ मौजूद हती। ब्याह में ईसू और वाके चेलान कूंऊं बुलायौ गयौ हतो। जब ब्याह में अंगूर कौ रस खतम है गयौ, तब ईसू की माँ ने ईसू ते कही, “बिनके जौरें अब अंगूर को रस खतम है गयौ है।” ईसू नें बाते कही, “हे माँजी, जि सब तू मोते चौं कैह रही है? अबई मेरौ समै नांय आयौ।” तब वाकी माँ ने सेबकन ते कही, “कै बू जो कहे तुम बाई काम कूं करौ।” म्हांपै यहुदियन की रीति के अनुसार नहाबे धोने के काजै पानी भरबे के पत्‍थर के बड़े छै चपटा रखे हते, जिनमें हर एक में लगभग सौ लीटर पानी आबतो। ईसू नें सेबकन ते कही, “चपटन कूं लबालब पानी ते भर देऊ।” और सेबकन ने बे चपटा मौंह तक पानी ते भर दये। फिर बानें कही, “इन चपटन में ते निकार के भोजन के भन्‍डारी के जौरें लै जाऔ।” और तब सेबकन ने एसौई करौ, तब भोजन के भन्‍डारी ने बू पानी चखौ, जो अंगूर कौ रस बन गयौ हतो। बाय नांय पतौई कै बू कांते आयौ है, पर सेबक जानते हते चौंकि बिन्‍नें बू पानी निकारौ हतो। तब भोजन के भन्‍डारी ने दूला कूं बुलायकै कही, “हर कोई आदमी सबनते पैहले अच्‍छौ अंगूर कौ रस देतै, जब लोग पीके झिक जातै तब फिर बिनकूं घटिया अंगूर कौ रस देतै, पर तैने तौ अंगूर कौ भढ़िया रस अबई तक छिपायकें रखौ है।” ईसू नें गलील पिरदेस के काना सहर में जि पैहलौ चमतकार दिखायकें अपनी महिमा पिरगट करी। वाके चेलान ने बापे भरोसौ करौ। जाके बाद ईसू अपनी माँ, भईयन,और चेलान के संग कफरनहूम नगर में चलौ गयौ। बू कछू दिना मापै रुको। यहुदिन के फसह के तौहार के दिना जौरें हतो, जामारै ईसू येरूसलेम कूं चलौ गयौ। ईसू बड़े पिराथना घर के आँगन में आयौ और देखौ, कै मांपै लोग मबेसियों, भेड़,कबूतरों को बेच रये हैं और दूसरे देस के रुपईयन कूं बदलबे कौ काम कर रये हैं। तब ईसू नें रस्सी कौ कौड़ा बनाकै भेड़न के संग मबेसियन कूं बड़े पिराथना घर के आँगन ते बाहर खदेड़ दयौ। बानें पैसों के बदलबे बारेन के सिक्‍का बिखेर दये और बिनकी चौकियन कूं उलट दयौ। और बानें कबूतर बेचबे बारेन ते कही, “इनें लैके बाहर चले जाओं। मेरे पिता के घर कूं बजार बनाबौ बन्द करौ।” ईसू के चेलान कूं पबित्र सास्त्र में लिखौ भयौ बू वचन याद आयौ, “तेरे घर की धुन मोय खाय जाबैगी।” जापै यहुदिन ने बाते कही, “तू कौन सो चमतकार दिखा सकतै, जाते जि साबित होबे कै तू जो कछू कर रयौ है वाकौ अधिकार तोय है?” ईसू नें बिनकूं जबाब दियौ, “तुम जा बड़े पिराथना घर कूं गिराय देओ और मैं तीन दिना में जाय दुबारा बनांय दुंगो।” जा बात कूं सुनकें यहुदी बोले, “जा बड़े पिराथना घर कूं बनांयबे में छियालीस साल लग गये, और तू का जाय तीन दिना में बनांय देबेगौ?” पर ईसू नें जा बड़े पिराथना घर की बात करी हती, बू वाकौ अपनौई सरीर हतो। जब ईसू अपनी मौत के बाद जी उठो, तब चेलान कूं ईसू की कही भई बात याद आई। तब बिन्‍नें सास्त्र में लिखी और ईसू की कही भई बात कौ भरोसौ करौ। फसह के दिना जब ईसू येरूसलेम में हतो तब भौत ते लोगन नें वाके चमतकार के कामन कूं देखकै भरोसौ करौ। पर ईसू ने खुद कूं बिनके भरोसे पै नांय छोड़ौ, चौंकि बू सब लोगन कूं जान्‍त हतो। बाय जा बात की जरूरत नांय हती, कै लोग बाते लोगन के बारे में आयकै कहै, चौंकि बू खुद एक-एक कूं जानतौ के लोगन के मन में का चल रयीए। म्हांपै एक निकुदेमुस नाम कौ फरीसी आदमी हतो। बू यहुदियन कौ नेता हतो। बू एक रात ईसू के जौरें आयौ और बाते बोलौ, हे गुरू, हम जानतै कै परमेस्‍वर नें तोय हमें सिछा दैबे काजै भेजौ है। चौंकि जो चमत्‍कार कौ काम तू करतै, बाय परमेस्‍वर की मदद के बिना कोई और नांय कर सकत। ईसू नें बाय उत्‍तर दयौ, “मैं तुमते सच कैह रयौऊं, कै जब तक कोई नये सिरे ते जनम नांय लैबे, तब तक बू परमेस्‍वर के राज्‍य कूं नांय देख सकैगो।” निकुदेमुस नें ईसू ते कही, “कोई बूढ़ौ आदमी अपनी माँ के पेट में दुबारा जायकै कैसे जनम लै सकतै?” ईसू नें बाते कही, “कै मैं तोते सच कैह रयौऊं, कै जब तक कोई पानी ते और पबित्र आतमा ते जनम नांय लेबेगौ, बू परमेस्‍वर के राज्‍य में पिरबेस नांय कर पाबैगौ। चौंकि जो सरीर ते जन्मों है, बू सरीर है, पर जो आतमा ते जन्मों है बू आतमा है। अचम्भौ मत करै। मैं तोते कैह रयौऊं, कै तुम सबन कौ नये सिरे ते जनम लैबौ जरूरी है। हबा जितकूं चांहै उतकूं चलतै। तू वाकौ सबद सुनतै, पर तू नांय जान्‍त कै बू काँते आय रयी है और काँकूं जाय रयी है। जो आतमा ते जन्मों है बू बैसौई है।” जि बात सुनकें निकुदेमुस नें बाते कही, “जि कैसे है सकतै?” जि सुनिकें ईसू नें बात कही, “तू इसरायलीन कौ गुरू हैकें, का इन बातन कूं नांय जान्‍त? मैं तोते सच कैह रयौऊं, हम जो जानतै बेई कैहतै, और हमनें जो देखौ है बाई की गबाही देतै, पर तुम लोग हमारी गबाहीऐ नांय मान्‍त। मैंनें तुमें धरती की बात बताईऐं और तुम भरोसौ नांय करत। अगर मैं तुमें सुरग की बात बताऊं तौ तुम कैसे भरोसौ करौगे? मैं, ‘मनुस्‍य कौ बेटा’ सुरग ते उतरौऊं, मेरे अलाबा और कोई सुरग में नांय पौंहचौ। जा तरैह ते मूसा नें बेहड़ में काँसे के सांप कूं ऊँचे पै उठायौ, बई तरैह ते मैं, ‘मनुस्‍य कौ बेटा’ ऊँचे पै उठायौ जाऊंगो। जाते जो मोपै भरोसौ करतै, बू कबऊ नांय खतम हैबे बारौ जीबन पाबै। “परमेस्‍वर नें दुनियां ते ऐसौ पिरेम करौ कै बानें दुनियां के काजै अपनों इकलौतो बेटा दै दियौ ताकि जो कोई बापै भरोसौ करैगौ बू नांस नांय हैबैगौ बरन कबऊ नांय खतम हैबे बारौ जीबन पाबैगौ। परमेस्‍वर नें अपने बेटाए जा दुनियां में जामारै नांय भेजौ, कै बू दुनियां कूं दन्‍ड की आग्‍या दैबे। पर जामारै भेजौ कै दुनियां वाके द्वारा उद्धार पाबै। और जो बापै भरोसौ करैगौ बापै दन्‍ड की आग्‍या नांय होबैगी,पर जो बापै भरोसौ नांय करत बेऊ दोसी ठहरायौ जा चुकौ है। चौंकि बानें परमेस्‍वर के इकलौते बेटा के नाम पै भरोसौ नांय करौ। दन्‍ड की आग्‍या जामारै आई, जब उजीतौ दुनियां में आयौ, तब लोगन नें बाकूं ना अपनांयकै अंधेरे ते पिरेम करतैं चौंकि बिनके काम बुरे हते। चौंकि हरेक आदमी जो बुरे काम करतै, बू उजीते ते बैर रखतै और उजीते के जौरें जामारै नांय जाबत कै कऊं बिनके बुरे काम उजागर नांय है जांय। पर जो सच्‍चाई पै चलतै बू उजीते कै जौरें रैहतै, जाते जि उजागर होतै कै वाके काम परमेस्‍वर की योजना के अनुसार भये हैं।” जाके बाद ईसू और वाके चेला येरूसलेम नगर ते यहुदिया पिरदेस के खादरन में आये। म्हांपै बे बिनके संग रैहतै और लोगन कूं बपतिस्मा देतै। सालेम नगर के जौरें एनोन में एक पानी कौ सोता हतो जामें यूहन्‍नांऊ बपतिस्मा देतौ। चौंकि म्हांपै पानी भौत हतो जा बजैह ते लोग मांपै आबते और बपतिस्मा लेते। यूहन्‍ना कूं अबई तक गिरफ्तार नांय करौ गयौ हतो। यूहन्‍ना के चेला और एक यहुदी में सुद्धीकरन कूं लैके बाद-बिबाद छिड़ गयौ। बिन्‍नें यूहन्‍ना के जौरें जायकें कही, “हे गुरू, देखौ, जो लोग यरदन नदी के बा पार तुमारे संग हते जिनके बारे में तैनें गबाही दई, कै बू बपतिस्मा देतै और लोग वाके जौरें जातैं।” यूहन्‍ना ने बिनते कही, “आदमी कूं बेई मिलतै जो सुरग की ओर ते बाय दयौ जातै। तुम सब लोग खुद गबाह हो कै मैंनें कही हती कै, ‘मैं मसीह नांऊ पर मैं तौ बाते पैहले भेजौ गयौऊं।’ जाके जौरें दुलहन है बेई दूला है। पर दूला कौ साथी जो खड़े हैके दूला की बातन कूं सुनकें आनन्दित है जातै। बैसेई मेरौ आनन्द है,और अब बू पूरौ भयौ है। अब जि जरूरी है कै वाकी महिमा बढ़े और मेरी घटे।” जो ऊपर ते आबतै बेई सबते ऊपर है। जो धरती ते जुड़ो भयौ है जामारै बू धरती की बात करतै। जो सुरग ते आतै बू सब बातन के ऊपर है। बानें जो कछू देखौऐ और सुनों है, बू बाई की गबाही देतै, पर वाकी गबाहीऐ कोई नांय मान्‍त। जानें वाकी गबाही मान लई है, बानें जा बात पै मौहर लगा दयी है कै परमेस्‍वर सच्‍चौ है। चौंकि, जाकूं परमेस्‍वर ने भेजौ है बू परमेस्‍वर की बात करैगौ। चौंकि परमेस्‍वर नें बाय भरपूर पबित्र आतमा कौ दान दयौ है। बाप अपने बेटाते पिरेम करतै और बानें सब कछू बाई के हात में दै दयौ है। जो बेटा पै भरोसौ करैगौ बाय कबऊ नांय खतम हैबे बारौ जीबन मिलेगौ, जो बेटा कूं नांय अपनाबेगौ बाय बू जीबन नांय मिलैगौ, पर बापै परमेस्‍वर कौ क्रोध बनों रैहबेगौ। फरीसियन कूं जि मालूम परी कै ईसू यूहन्‍ना तेऊ जादा चेला बनातै और बपतिस्मा देतै। पर ईसू खुद अपने हातन ते बपतिस्मा नांय देतौ, बल्कि जि काम वाके चेला कर रये हते। जब ईसू नें जि सुनी तौ बू यहुदिया पिरदेस कूं छोड़कै गलील पिरदेस में चलौ गयौ। ईसू कूं सामरिया पिरदेस ते हैके जानौ परौ। जामारै बू सामरिया पिरदेस की सुखार नाम की जगैह पै आयौ, जि नगर बा जगैह कै जौरें हतो, जो पूर्वज याकूब ने अपने बेटा यूसुफ कूं दयौ हतो। म्हांपै याकूब कौ कूआ हतो। ईसू सफर की बजैह ते थकौ भयौ हतो, जामारै बू कूआ पै बैठ गयौ। जि लगभग दुपैर की बात है। जब एक सामरी औरत पानी भरबे काजै आई, तब ईसू नें बाते पानी मांगौ। बा समै ईसू के चेला नगर में भोजन खरीदबे काजै गए हते। बा समै यहुदी लोग सामरी लोगन के संग कोई बौहार नांय रखते। जामारै बा औरत नें कही कै, “एक यहुदी हैके तू मुझ सामरी औरत ते पानी कैसे मांग सकतै?” ईसू नें बाते कही कै, “अगर तू परमेस्‍वर के वरदान कूं जानती और जि जानती कै मैं को हूं, जो तोते कैह रयौ हूं कै मोय पानी पिया दै, तौ तू मोते मांगती और मैं तोय जीबन कौ पानी दैतौ।” बा औरत ने ईसू ते कही, “हे गुरू, तोपै तौ रस्सी और बाल्टी अऊ नांय और कूआऊ भौत गैहरौ है फिर तोपै मोय दैबे काजै जीबन कौ पानी कांते ते आयौ? का तू हमारे पुरखा याकूब तेऊ महान है, जानें हमें जि कूआ दयौ है बानें खुद जामें ते पियौऐ और वाकी सन्‍तान और पसुअन ने जामें ते पियौऐ?” ईसू नें बाते कही, “जो कोई जि पानी पीतै तौ बू दुबारा पियासौ है जातै, पर जा पानी कूं मैं देतूं, जो कोई जा पानी में ते पीबैगौ, बू फिर कबऊ पियासौ नांय होगो और बू जीबन दैबे बारौ ऐसौ सोता बन जाबैगौ जो कबऊ नांय खतम हैबे बारे जीबन के काजै उमड़त रैहबेगौ।” तब बा औरत नें ईसू ते कही, “हे गुरू, तब तौ फिर तू बा पानी कूं मोय दैदे, जाते मोय फिर कबऊ पियास ना लगे और दुबारा पानी लैबे नांय आनों परे।” ईसू नें बा औरत ते कही, “जाकर अपने पती कूं य्हां बुला ला।” बा औरत ने जबाब दयौ, “मेरौ कोई पती नांय।” तब ईसू नें बा औरत ते कही, “तैनें जि बिलकुल सही कही है कै मेरौ कोई पती नांय। तू पांच पती कर चुकी है और जा आदमी के संग तू रैह रई है बेऊ तेरौ पती नांय। जामारै तैनें जो कछू कही है बू बिलकुल सही कही है।” जापै बू औरत बोली, “हे गुरू, मोय तौ लगतै कै तू परमेस्‍वर की ओर ते बात बतायबे बारौ है। हमारे पुरखन ने जाई पहाड़ पै अराधना करी हती, पर तुम यहुदी जि दाबा करतै कै येरूसलेम बू जगैह है ज्हांपै हमें अराधना करनी चहिऐं।” ईसू नें बाते कही, “हे नारी, तू भरोसौ कर। बू समै आयबे बारौ है जब तुम परमेस्‍वर पिता की अराधना ना तौ जा पहाड़ पै और ना येरूसलेम में करौगे। तुम सामरी लोग नांय जानत कै तुम कौन की अराधना करतौ। पर हम यहुदी तौ जि जानतैं और बाई की अराधना करतै। चौंकि उद्धार तौ यहुदियन में तेईऐं। पर अब बू समै आयबे बारौ है आबे बारौ का बू आ गयौ है कै परमेस्‍वर के सच्‍चे भक्‍त लोग वाकी अराधना आतमा और सच्‍चाई ते करिंगे, और परमेस्‍वर पिता ऐसेई भक्‍तन कूं ढूंढतै। परमेस्‍वर आतमा है जामारै जो वाकी अराधना करतें, बिनैं आतमा और सच्‍चाई ते वाकी अराधना करनी चहिऐं।” फिर बा औरत नें ईसू ते कही, “मैं जान्‍तू कै मसीह, जाकौ मतलब परमेस्‍वर कौ चुनों भयौ आयबे बारौ है। जब बू आबैगौ तौ बू हमें सब बातन्‍नें सही सही बता देबेगौ।” ईसू नें बा औरत ते कही, “मैं बेईऊं। तोते जो बातें कर रयौऊं।” बाई समै ईसू के चेला म्हांपै लौट आये और ईसू कूं बा औरत ते बात करते भये देखकें अचरज में पर गये। पर बिनमें ते ना काऊ नें बा औरत ते पूंछी, “तू का चाहती है?” और ना काऊ नें ईसू ते पूंछी, “तू जा औरत ते बात चौं कर रयौ है?” बू औरत बाई समै अपनों पानी कौ चपटा म्हींपै छोड़कै नगर में बापस चली गयी और लोगन कूं बताबे लगी, “आऔ और देखौ, एक ऐसौ आदमीऐ बानें मेरे बारे में सब कछू सही सही बताय दयौ है। कऊं जेई मसीह तौ नांय?” जापै लोग नगर कूं छोड़कै ईसू के जौरें पौहचे। बाई समै ईसू के चेलान नें ईसू ते बिनती करी, “हे गुरू, कछू खा लेओ।” पर ईसू नें बिनते कही, “मेरे जौरें तौ ऐसौ भोजन है जाके बारे में तुम कछू नांय जान्‍तई।” तब ईसू के चेला आपस में कैहबे लगे, “का काऊ नें जाय कछू खायबे कूं दयौ है?” ईसू नें उन लोगन ते कही, “मेरौ भोजन तौ अपने भेजबे बारे की इच्‍छा कूं पूरौ करनों है और बू काम पूरौ करनों है जो बानें मोए सौंपो है। तुम अक्सर जाई बात कूं कैहतौ, कै चार महीना बाद फसल कटनी के काजै तैयार है। देखौ, मैं तुमें बताबतूं, कै अपनी आंखन कूं खोलकै खेतन के मांऊ देखौ फसल कटबे काजै तैयार है चुकी है। बू जो कटाई कर रयौ है बू अपनी मजदूरी पा रयौ है बू कबऊ नांय खतम हैबे बारे जीबन काजै फसल इकठ्‌ठी कर रयौ है। जाते बीज बोयबे बारौ और काटबे बारौ दोनों एक संग आनन्द मनाबें। जि बात सच्‍ची है कै बोयबे बारौ आदमी कोई और होतै और काटबे बारौ कोई और आदमी। मैंनें तुमें बा फसल कूं काटबे काजै भेजौ है जाके काजै तुमनें बिलकुल मेहनत नांय करी। जाके काजै मेहनत तौ काऊ दूसरे आदमी नें करी है और बिनकी मेहनत के फल में तुमऊं हिस्सेदार हो।” बा नगर में भौत ते सामरी लोगन नें बा औरत की जा गबाही कूं सुनकें, “जो कछू मैंनें करौओ बू सब कछू मोय बताय दयीं है।” जामारै बिन लोगन नें ईसू मसीह पै भरोसौ करौ। तब सामरी लोग ईसू के जौरें आये और बिन्‍नें ईसू ते बिनके संग रुकबे काजै बिनती करी, जाकी बजैह ते ईसू म्हांपै दो दिनां ठहरौ। ईसू की बातन कूं सुनकें भौत ते दूसरे लोगन नेऊं भरोसौ करौ और बिसबासी बन गये। तब बे बा औरत ते कैहबे लगे, “कै तेरे कैहबे तेई भरोसौ नांय करत, पर अब तौ हम जान गये हैं कै जेई बास्तव में संसार कौ उद्धार करबे बारौ है।” दो दिना बाद बू म्हाते गलील कूं गयौ। चौंकि ईसू नें जि बात खुद कही हती कै, “कोई परमेस्‍वर की ओर ते बात बतायबे बारौ खुद के नगर में कबऊ सम्मान नांय पावत।” जब ईसू गलील पिरदेस में आयौ, तब गलील के लोगन नें वाकौ स्‍वागत करौ। चौंकि बिन लोगन नें बू सब कछू देखौ हतो जो बानें फसह के तौहार के दिना येरूसलेम करौ हतो। चौंकि बे सब जा तौहार में सामिल हते। ईसू एक बार गलील पिरदेस के काना नगर में जाय रयौ हतो ज्हांपै बानें पानी कूं अंगूर के रस में बदलौ हतो। पर अबकी बार कफरनहूम नगर में एक राजा के अधिकारी कौ बेटा बीमार हतो। जब बा राजा के अधिकारी ने सुनी कै, ईसू यहुदिया ते गलील में आयौ है तब बू बाते बिनती करबे लगौ, कै बू कफरनहूम आयकें वाके बेटाऐ सही करै जो मरबे बारौ है। ईसू नें बा अधिकारी ते कही कै, जब तक “तुम आस्चर्य काम नांय देख लोगे,” तब तक “तुम कबऊ भरोसौ नांय करौगे।” बा अधिकारी नें ईसू ते कही, “हे गुरू, बा बालक के मरबे ते पैहले तू मेरे घर चल।” ईसू नें बाते कही, “जा, तेरौ बेटा जीबित रैहबेगौ।” ईसू नें जो बात कही हती बापै बानें भरोसौ करौ और अपने घर कूं चलौ गयौ। अबई अधिकारी आधे रस्ता मेंई पौंहचौ हतो तब तक वाके सेबकन ने बाय जि खबर दई कै, “तेरौ बेटा जीबित है गयौ है।” तब बानें अपने सेबकन ते पूछी कै, “कब सही भयौ है।” तब बिन्‍नें जबाब दयौ कै, “कल दुपहर के एक बजे वाकौ बुखार उतर गयौ हतो।” तब बू समझ गयौ कै जि बेई समै हतो जब ईसू नें कही हती कै, “तेरौ बेटा जीबित रैहबेगौ।” तब बानें और वाके सबरे घराने नें भरोसौ करौ। ईसू नें यहुदिया ते गलील आयबे के बाद जि दूसरौ आस्चर्य कौ काम दिखायौ। जाके बाद ईसू यहुदियन के एक तौहार पै येरूसलेम में गयौ। येरूसलेम में भेड़-द्बार के जौरें एक कुन्‍ड हतो, इब्रानी भासा में जो “बेतहसदा” कहौ जातौ। जाके किनारन पै पाँच बरामदे बने भये हते। जामें अन्धे, अपंग और लकबा के बीमारन की भीड़ परी रहती। चौंकि बिनकौ जि मानबौ हतो कै परमेस्‍वर के सुरग दूत समै समै पै बा पानी कूं बा कुन्‍ड में उतरकै हिलाबेंगे बा समै सबनते पैहले जो कोई आदमी बा कुन्‍ड में नहाय लेबेगौ बू ठीक है जाबेगौ चांहै बाय कैसी अऊ बीमारी चौं ना होबे। बिन बीमारन में एक आदमी अड़तीस साल ते बीमार हतो। ईसू नें बा आदमी कूं देखौ और जान लयौ कै बू इतने लम्बे समै ते बीमार है। तब ईसू नें बाते पूछी, “कै का तू ठीक हैबौ चाहतै?” तब बा बीमार आदमी ने कही, “हे गुरू, मेरे जौरें ऐसौ कोई आदमी नांय जब जा कुन्‍ड कौ पानी हिलायौ जाय तब मोय कोई कुन्‍ड में उतार दै। पर मेरे पौहचबे ते पैहले बामें दूसरौ आदमी उतर जाबतुए।” तब ईसू नें बाते कही, “तू अपनी चटाई उठा और चल फिर।” बू आदमी बाई समै ठीक है गयौ और बू अपनी चटाई उठायकें चलबे फिरबे लगौ। बू दिना यहुदियन के आराम कौ दिन हतो। यहुदी लोग बा ठीक हैबे बारे आदमी ते कैहबे लगे, “आज तौ यहुदियन के आराम कौ दिनाएं व्‍यबस्था के अनुसार आज के दिना तेरौ चटाई उठाबौ सही नांय।” बा आदमी ने बिनते कही, “कै जा आदमी नें मोय ठीक करौ है बाईनें कही हती कै ‘अपनी चटाई उठा और चल फिर।’” तब बिन्‍नें बा आदमी ते पूँछी, “बू कोए जानें तोते ऐसे कही, ‘कै अपनी चटाई उठा और चल फिर?’” तब बा ठीक हैबे बारे आदमी नें कही, “मैं नांय जान्‍त कै बू को आदमीए?” चौंकि भीड़ की बजैह ते ईसू म्हांते चलौ गयौ हतो। इन बातन के बाद बू ईसू कूं बड़े पिराथना घर में मिलौ। तब ईसू नें बाते कही, “देख, तू ठीक है गयौ है, अब दुबारा ते पाप मत करिओ कऊं ऐसौ नांय होबे कै जाऊते भारी बिपत्‍ती तोपै आ परै।” बा ठीक हैबे बारे आदमी ने यहुदी नेतन ते कह दई, “कै जा आदमी ने मौकूं ठीक करो हतो बू ईसूए।” जा बजैह ते यहुदी ईसू कूं सतायबे लगे चौंकि बू ऐसे काम यहुदियन कै आराम दिना मेंई करतौ। जा बात पै ईसू नें बिन्‍ते कही, “मेरौ पिता हमेसा काम करतुए और मैंऊ काम करतूं।” जा बजैह ते यहुदी लोग ईसू कूं मारबे की योजना बनाबे लगे। ईसू केवल यहुदियन के आराम दिना की बिधी कूंई नांय तोरतौ, पर परमेस्‍वर कूं अपनों पिता कैहकै अपने आपकूं परमेस्‍वर के समान बताबतै। जापै ईसू नें बिनते कही, “मैं तुमते सही सच कैह रयौऊं, मैं, बेटा, अपने आप कछू नांय कर सकत, मैं, बाई काम कूं करतूं जो अपने पिता कूं करते भये देखतूं। चौंकि जिन जिन कामन कूं पिता करतै, बिन कामन कूं मैं, बेटा, बाई रीति ते करतै। चौंकि बाप मुझ,बेटा ते पिरेम करतुए और जो जो काम बू करतुए उन कामन कूं मुझ,बेटा कूं सिखाबतुए,और बू इन तेऊ बड़े काम मोय दिखातै जाते तुम अचम्भौ करौ। जा तरैह ते बाप मरे भयेन नें उठायकै जीन्दौ करतै, बैसेई मैं, बेटा जाय चाहतूं बाय जीबित करतूं। पिता काऊ कौ न्याय नांय करतै, पर बू सब बानें मुझ,बेटा कूं सौंप दयौ है। जामारै लोग जैसे बाप कौ आदर करतै बैसेई मुझ,बेटा कौऊ आदर करै। जो मुझ,बेटा कौ आदर नांय करत बू वाके भेजबे बारे बाप कौऊ आदर नांय करत। “मैं तुमते सही सच कैह रयौऊं कै, जो मेरौ वचन सुनकें मेरे भेजबे बारे पै भरोसौ करतै, कबऊ नांय खतम हैबे बारौ जीबन वाकौ है। बापै दन्‍ड की आग्‍या नांय होबेगी, पर बू मौत कूं जीतकै जीबन में पिरबेस कर चुकौ है। मैं तुमते सही सच कैह रयौऊं कै बू समै आयबे बारौ है और आ चुकौ है, मरे भये लोग परमेस्‍वर के बेटा कौ सब्द सुनिंगे और जो सुनिंगे बे जी उठेंगे। जा तरैह ते पिता अपने आप में जीबन रखतै, बाई तरैह ते बानें बू अधिकार मुझ,बेटा कूं दयौए कै मैं अपने आप में जीबन रखूं। बल्कि मोय न्याय करबे कौऊ अधिकार दयौए। चौंकि मैं, ‘मनुस्‍य कौ बेटा’ हूं। “जा बात कौ अचम्भौ मत करौ। चौंकि बू समै आयबे बारौ है कै जितने कबरन में हैं मेरी अबाज सुनिकें, कबरन ते निकरिंगे। जिन्‍नें अच्‍छे काम करे हैं बे जीबन कै काजै जी उठेंगे और जिन्‍नें बुराई करीऐ बे दन्‍ड की सजा पायबे काजै जी उठेंगे। मैं खुद कछू नांय कर सकत, जैसौ परमेस्‍वर पिता ते सुनतूं बैसौई न्याय करतूं और मेरौ न्याय सच्‍चौ है। चौंकि मैं अपनी इच्‍छा नांय पर अपने भेजबे बारे की इच्‍छा पूरी करतूं। “अगर मैं खुदई अपनी गबाही दूं तौ मेरी गबाही कोई सच्‍ची नांय मानेंगौ। पर मेरे बारे में गबाही दैबे बारौ मैं नांऊ कोई और है। मैं जान्‍तू कै वाकी गबाही सच्‍ची है। “तुमनें बपतिस्मा दैबे बारे यूहन्‍ना ते पूंछी और बानें सच्‍चाई की गबाही दई। मोय काऊ आदमी की गबाही की जरुरत नांय। पर मैंनें ऐसौ जामारै करौओ कै तुमें उद्धार मिले। यूहन्‍ना बा दीया की तरैह तेऐ जो जरतै और उजीतौ देतै और कछू देर तक लोगन कूं बा उजीते ते मगन हैबो अच्‍छौ लगौ। “पर मेरे जौरें एक और गबाह है, वाकी गबाही यूहन्‍ना की गबाही ते बढ़के है। चौंकि जो काम परमेस्‍वर पिता नें मोय पूरौ करबे काजै सौंपेऐ मतलब जि काम जो मैं करतूं, बे मेरे गबाह है कै मोय परमेस्‍वर पिता ने भेजौ है। और परमेस्‍वर पिता जानें मोय भेजौए बानें जि गबाही दई है। तुमनें ना कबऊ वाकी अबाज सुनींऐ और ना वाकौ रूप देखौऐ। और तुम वाके वचनन कूं अपने मन में नांय रुकन देत चौंकि मोय, जिसे बानें भेजौए बापै तुमने भरोसौ नांय करौ। तुम पबित्र सास्त्र में ढूढतौ चौंकि समझतौ कै बामे तुमें कबऊ नांय खतम हैबे बारौ जीबन मिलतुऐ और जि बेई पबित्र सास्त्र है जो मेरी गबाही देतैं। फिरऊ तुम कबऊ नांय खतम हैबे बारौ जीबन पायबे काजै मेरे जौरें आबौई नांय चाहत। “मैं आदमिन ते आदर पायबौ नांय चाहत, पर मैं तौ तुमें जानतूं। कै तुमारे मन में परमेस्‍वर काजै पिरेम नांय। मैं अपने पिता कै नाम ते आयौऊं और तुमने मोय नांय अपनांयौ। अगर कोई अपने नाम ते आबै तौ तुम बाय अपनांय लैओगे। तुम कैसौ भरोसौ करतो? चौंकि तुम एक दूसरे ते आदर चांहतौ पर तुम सिर्फ बा महान परमेस्‍वर की ओर ते आदर नांय चांहत। “तुम जि मत समझौ कै मैं पिता के सामने तुम पै दोस लगाऊंगौ। तुम पै दोस लगायबे बारौ तौ हतै, मतलब मूसा जापै तुम आसा टिकाए भयेऔ। चौंकि तुम मूसा पै भरोसौ करतौ तौ मोपैऊ भरोसौ करौ चौंकि बानें मेरे बारे में लिखौ है। पर तुम वाकी लिखी भई बातन कौ भरोसौई नांय करत तौ फिर मेरी कही भई बात पै कैसे भरोसौ करौगे?” जाके बाद ईसू गलील झील, जाय तिबिरियास झील कहते हैं, के बा पार पै पौंहचौ। और एक भौत बड़ी भीड़ वाके पीछे आय रयी हती जो अचरज के काम बू म्हांपै बीमारन में करतौ, बिनकूं बे देखते हते। ईसू पहाड़ पै चढ़कें अपने चेलान के संग बैठ गयौ। यहुदियन कौ फसह कौ तौहार जौरें हतो। जब ईसू नें अपनी आंख उठायकें देखी कै एक भौत बड़ी भीड़ वाके मांऊ आय रयी है, तब बानें फिलिपुस ते पूछी, “कै हम जा इतनी बड़ी भीड़ के काजै इतनों भोजन खरीदकै कहाँ ते लामें?” ईसू नें जि बात वाकी परीछा लैबे काजै कही हती। चौंकि बू तौ जानतई हतो कै बू का करबे जाय रयौ है। फिलिपुस ने बाय उत्‍तर दयौ, “दो सौ चाँदी के सिक्‍कन तेऊ इतनी रोटियां नांय खरीदी जा सकतीं कै जिनमें ते हरेक आदमी कूं एक कौर ते जादा मिल सके।” एक दूसरे चेला सिमौन पतरस के भईया अन्द्रियास ने ईसू ते कही, “य्हांपै एक छोटे बालक पै पांच जौ की रोटी और दो मछली हैं, पर इतने लोगन में इनते का होगौ?” ईसू नें चेलान ते कही कै, “इनकूं घास पै बैठाय देओ” जिनमें पांच हजार तौ आदमीअईं हते। फिर ईसू नें रोटी लई और परमेस्‍वर कौ धन्यबाद करबे के बाद जो लोग म्हांपै बैठे हते बिनकूं जितनी जरूरत हती परौस दई। एसौई बानें मछली लैकै करौ। जब लोगन के पेट भर गये तब ईसू नें चेलान ते कही, “कै बची भयी जौ रोटिन कूं इकठ्‌ठी करौ, ताकि कछू बेकार नांय जाबै।” फिर चेलान नें बिन पाँच जौ की रोटियन में ते जो बचौ हतो बाय इकठ्‌ठौ करके बारैह डलियां पूरी भरीं। ईसू के जा अदभुत काम कूं देखकें लोग कैहबे लगे, “कै सच में जि तौ बेई परमेस्‍वर की ओर ते बात बतायबे बारौ आदमी है जाकूं जा दुनियां में आनों हतो।” ईसू नें जि जान लई कै, लोग मोय जबरन राजा बनाबौ चाहतै तौ बू अकेलौ पहाड़ पै चलौ गयौ। जब सन्झा भई तब ईसू के चेला झील के किनारे पै गये, और नाव में बैठकै कफरनहूम कूं जायबे लगे। बा समै अंधेरौ है गयौ हतो और ईसू अबई तक बिनके जौरें नांय आयौ हतो। तब एक बड़ी आँधी आयी जाते झील में भौत जोर की लहर उठबे लगी। जब बे नाव चलाबत चलाबत करीब एक, दो कोस निकर गये, तब बिन्‍नें ईसू कूं झील पै चलत भए नाव कै जौरें आबत भये देखौ, तौ बे डरप गये। पर ईसू नें बिनते कही, “कै मैंऊं, डरपौ मत।” तब उन्‍नें खुसी के संग ईसू कूं नाव पै चढ़ायलो तबई एक दम नाव किनारे पै पौहच गयी ज्हां बिनकूं जानौ हतो। दूसरे दिनां बा भीड़ ने जो झील के बा पार रह गयी हती, बिनें पतौ चली म्हांपै एकई नाव हती, और ईसू अपने चेलान के संग बा नाव पै नांय चढ़ौ। पर वाके चेला वाके बिनाई चले गए हते। तब तिबिरियास नगर ते कछू नाव बा जगैह पै आयकें रुकीं, ज्हाँ पिरभू कूं धन्यबाद दैबे के बाद लोगन नें रोटी खायी हतीं। जब भीड़ ने देखौ, कै य्हांपै न तौ ईसू है और न वाके चेला है, तौ बेऊ नावन पै चढ़कें ईसू कूं ढूंढते भए कफरनहूम पहुँचे। झील के पार बाते मिलकै बे लोग बोले, “हे गुरू, तू य्हांपै कब आयौ?” तब ईसू नें बिनते कही, “मैं तुमें सच बताबतूं कै तुम मोय जामारै नांय ढूंढ रये कै तुमने अचम्भे के काम देखेऐं। बल्कि जामारै कै तुमने भर पेट रोटी खाई हती। बा रोटी कै काजै मेहनत मत करौ जो सड़ जातै, पर कबऊ नांय खतम हैबे बारे जीबन कूं दैवे बारी रोटी काजै मेहनत करौ। जि बू रोटी है जो मैं, ‘मनुस्‍य कौ बेटा’ तुमें दुंगो जि रोटी हमेसा बनी रैहतै चौंकि परमेस्‍वर ने मोय जि अधिकार दयौ है।” लोगन नें बाते पूछी, “जिन कामन कूं परमेस्‍वर चाहतै उने करबे काजै हम का करें?” ईसू नें बिनते कही, “परमेस्‍वर जि चाहतै, कै मोय, जिसे बानें भेजौए बापै भरोसौ करौ?” लोगन नें ईसू ते पूछी कै, “तू कौन कौन ते चमतकार के चिन्ह दिखाबैगौ जिनै हम देखें और तोपै भरोसौ करें? तू का काम करैगौ? हमारे पुरखन नें बंजर जगैह में मन्‍ना खायौ जैसौ लिखौऐ, ‘बानें उन्‍नै खायबे काजै सुरग ते रोटी दई।’” जा बात पै ईसू नें बिनते कही, “कै मैं तुमें सही बताबतू, कै सुरग ते रोटी तुमें मूसा नें नांय, पर जानें बू रोटी तुमारे खायबे काजै दई हती, बू मेरौ सुरगीय पिताए जो तुमें सुरग ते सच्‍ची रोटी देतै। बू रोटी जाय परमेस्‍वर पिता देतुए बू सुरग ते उतरीऐ और दुनियां कूं जीबन देतै।” तब लोगन नें ईसू ते कही, “हे गुरू, अब बू रोटी हमें दै और हमेसा देतौ रैह।” तब ईसू नें बिनते कही, “बू जीबन की रोटी मैंऊं। जो मेरे जौरें आबैगौ बू कबऊ भूंकौ नांय रैहबेगौ और जो मोपै भरोसौ करतुए बू कबऊ पियासौ नांय रैहबेगौ। मैं तौ तुमें पैहलेई बताय चुकौऊं, तुम मोय देख चुकेऔ और फिरऊ तुम मोपै भरोसौ नांय करत। बू हरेक आदमी जाकूं पिता नें मोय सौंपौए मेरे जौरें आबैगौ और जो मेरे जौरें आबैगौ मैं बाय कबऊ नांय जानें दुंगो। चौंकि मैं सुरग ते अपनी इच्‍छा के अनुसार काम करबे नांय आयौ। पर अपने भेजबे बारे की इच्‍छाऐ पूरी करबे काजै आयौऊं। मोय भेजबे बारे की जेई इच्‍छाऐ जिनकूं परमेस्‍वर ने मोय सौंपौए, बिनमें ते मैं काऊए नांय खोऊं और आखरी दिन में मैं बिन सबन कूं जीबित करूं। और मेरे पिता की जेई इच्‍छाए कै जो कोई पुत्र कूं देखेगौ बापै भरोसौ करैगौ, बू कबऊ नांय खतम हैबे बारौ जीबन पाबैगौ और आखरी दिन में मैं बाय जीबित करुंगो।” जामारै यहुदी बापै कुड़कुडायबे लगे चौंकि बानें कही हती कै, “बू रोटी मैंऊ जो सुरग ते उतरौऊं।” बे आपस में कैहबे लगे, “का जि यूसुफ कौ बेटा ईसू नांय, का हम जाके मा-बाप कूं नांय जानतई? जि कैसे कह सकतुए कै, ‘मैं सुरग ते उतरौऊं’?” ईसू नें बिनते कही, “तुम आपस में कुड़कुडाबौ बन्द करौ। मेरे जौरें जब तक कोई नांय आय सकत जब तक मोय भेजबे बारौ मेरौ पिता बाय मेरे जौर खैंचके नांय लाबै और मैं आखरी दिन में फिर बिनें जीबित करूंगो। परमेस्‍वर की ओर ते बात बतायबे बारेन नें जि लिखौए, ‘कै बे सब परमेस्‍वर के सिखाये भये हुंगे।’ जा काऊ नें पिता ते सुनों और सीखौऐ बू मेरे जौरें आबतै। पिता कूं काऊ नें नांय देखौ सिबाय वाके जाकूं परमेस्‍वर सुरग ते भेजौए, पिता कूं तौ केबल बाई ने देखौऐ। मैं तुमते सच कैहतूं, कै जो मोपै भरोसौ करतुए, कबऊ नांय खतम हैबे बारौ जीबन वाकौऐ। जीबन की रोटी मैंऊं। तुमारे पुरखन ने बंजर जगैह में मन्‍ना खायौ और बे मर गये। पर सुरग ते आई भई जा रोटी कूं अगर कोई खाबैगौ तौ बू नांय मरैगौ। मैंई बू जीबन की रोटी हूं जो सुरग ते उतरौऊं। अगर कोई जा रोटीए खाबेगौ तौ कबऊ नांय मरैगौ। और बू रोटी जाय मैं दुंगो बू मेरौ सरीरै। जाई ते दुनियां जीबित रैहबैगी।” फिर यहुदी आपस में बहस करके कैहबे लगे, “कै जि हमें अपनों सरीर कैसे खायबे दै सकतै?” जापै ईसू नें बिनते कही, “कै मैं तुमें सच्‍चाई बताबतू, जब तक तुम मुझ, ‘मनुस्‍य के बेटा’ कौ सरीर नांय खाऔगे और खून नांय पीयौगे तब तक तुम में जीबन नांय होबेगौ। जो मेरौ सरीर खातै और खून पीवतै, कबऊ नांय खतम हैबे बारौ जीबन वाकौऐ और आखरी दिन में मैं बाय फिर जीबित करूंगो। मेरौ सरीर सच्‍चौ भोजन है और मेरौ खून सच्‍ची पीबै की चीज है। जो मेरौ सरीर खातै और खून पीवतै बू मोमें बनों रैहतै और मैं बिनमें बनों रैहतूं। जैसे बा जीन्दे पिता नें मोय दुनियां में भेजौ और मैं वाकी बजैह ते जीबितऊं बैसेई बेऊ मेरे सरीर कूं खायबे की बजैह ते जीबित रैहबेगौ। जि बेई रोटीए जो सुरग ते उतरीऐ। जि बू मन्‍ना नांय जो हमारे पुरखन ने खायौ हतो और बे मर गये, पर जो जा रोटी कूंऊं खाबत रैहबेगौ बू हमेसा के काजै जीबित रैहबेगौ।” जि सब बात ईसू नें कफरनहूम नगर के पिराथना घर में सिछा देते भये कही हती। ईसू के भौत ते चेलान ने जि सुनकें कही, “जि सिछा तौ भौत कठिन है। जापै कौन चल सकतुए?” ईसू कूं जब जि पतौ पर गई कै वाके चेला आपस में कुड़कुड़ाय रयेऐं, तौ बानें बिनते पूछी, “का जि बात तुमें बुरी लगीं हैं? जब तुम मुझ, ‘मनुस्‍य के बेटा’ कूं ऊपर जाबत भये देखौ ज्हां मैं पैहले हतौ, तब तुम का करौगे? परमेस्‍वर की आतमाईऐं जो जीबन देतै, पर आदमी की ताकत काऊ काम की नांय। जो वचन मैंनें तुमते कहे हैं, बे परमेस्‍वर की आतमा ते हैं और जीबन दैतै। पर तुम में कछू तौ ऐसे हैं जो भरोसौ नांय करत।” चौंकि ईसू सुरू तेई जानतौ कै बे कोए जो भरोसौ नांय करत और बू कोए जो बाय धोके ते पकरबाबेगौ। और फिर बानें कही तबई तौ मैंनें कही हती, “जब तक कोई मेरे जौरें नांय आय सकत तब तक परमेस्‍वर पिता बाय मेरे जौरें आयबे की अनुमती नांय देबेगौ।” जाई बजैह तै ईसू के भौत ते चेला बापस चले गये,और फिर कबऊ वाके पीछे नांय चले। फिर ईसू नें अपने बारह चेलान ते कही, “का तुमऊं जायबौ चाहतौ?” सिमौन पतरस ने ईसू ते कही, “हे पिरभू, हम कौन के जौरें जाऐं? कबऊ नांय खतम हैबे बारे जीबन की बात तौ तेरेई जौरें है। हमनें भरोसौ करौ है और हम जानऊ गयेऐं कै तूई परमेस्‍वर कौ भेजौ भयौ पबित्र जन है।” ईसू नें बिनते कही, “का मैंनें तुम बारह कूं नांय चुनों? फिरऊ तुम में ते एक सैतानें।” ईसू जि बात सिमौन इस्करियोती के बेटा यहूदा के बारे में बात कर रयौ हतो। चौंकि उन बारेन में ते, बेई बाय धोके ते पकरबायबे बारौ हतो। इन बातन के बाद ईसू गलील में घूमतौ रहौ। बू यहुदिया पिरदेस जायबौ नांय चांहतौ, चौंकि यहुदी नेता बाय मारबे की ताक में हते। यहुदीयन कौ झौपड़ी कौ तौहार आयबे बारौ हतो। जामारै ईसू के भईयन ने ईसू ते कही, “तुमें जि जगैह छोड़कै यहुदिया चले जानौ चहिऐं, जाते जो काम तू करै बिनकूं तेरे चेला देखें। ऐसौ कोई नांय जो लोगन में मसहूर हैबै चांहे और अपने कामन कूं दुबक के करै। अगर तू इन कामन कूं करतौ, तौ खुद कूं जा दुनियां पै उजागर कर।” ईसू के भईया तक बापे भरोसौ नांय करते हते। तब ईसू नें कही, “कै मेरे काजै अबई समै नांय आयौ, पर तुमारे काजै सब समै ठीक है। दुनियां के लोग तुमते बैर नांय कर सकत, पर मोते सब बैर करतै, चौंकि मैं बिनके खिलाप जि गबाही देतूं कै बिनके काम बुरेऐं। तुम तौहार में जाऔ। मैं अबई जा तौहार में नांय जा रयौ, चौंकि अबई तक मेरौ ठीक समै नांय आयौ।” ईसू बिनते जि बात कैहबे के बाद गलील मेंई रैह गयौ। जब ईसू के भईया तौहार में चले गये, तौ वाके बाद बू खुद उजागर हैके नांय, पर चुपचाप तौहार में गयौ। यहुदी नेता बा तौहार में जि कैहकै ढ़ूढ़ रये हते कै “बू आदमी काँ है?” लोग ईसू कै बारे में गुप चुप भीड़ में तरैह-तरैह की बात कर रये हते। कछू तौ कैह रये हते, “कै बू तौ अच्‍छौ आदमीऐ।” और कछू कैह रये हते, “के बू लोगन कूं बहकाबतुऐ।” कोई आदमी वाके बारे में खुलके बात नांय कर पाय रये हते, चौंकि बे यहुदी नेतन ते डरपत हते। जब तौहार के करीब आधे दिन बीत गये, तब ईसू नें बडे़ पिराथना घर में सिछा देबौ सुरू करी। तब यहुदी लोगन अचम्भौ करकें कैहबे लगे, “बू हमारी पाठसाला में कबऊ पढ़बे नांय आयौ तौ जि ग्‍यान जाय कांते मिलौ है?” ईसू नें बिनते कही, “कै जि मेरी सिछा नांय, पर मेरे भेजबे बारे कीऐं। अगर कोई परमेस्‍वर की इच्‍छा पै चलबौ चांहे, तौ बू जा ग्‍यान के बारे में जान जाबैगौ, कै मैं जि सिछा अपनी ओर ते नांय पर परमेस्‍वर की ओर ते दै रयौऊं। जो कोई खुद की ओर ते बोलतै तौ बू अपनी बड़ाई चाहतै। पर जो कोई अपने भेजबे बारे कौ आदर चाहतै, बू सच्‍चौ है और बामें कोई अधर्म नांय। का मूसा ने तुमें व्‍यबस्था नांय दई? फिरऊ तुमनें बू नांय मानी। तुम लोग मोय मार डारबे की ताक में चौं रैहतो?” लोगन नें बाते कही, “तोपै तौ सैतान सबार है गयौए। तोय को मारबे की ताक में रैहतै?” ईसू नें बिनते कही, “मैंनें एक चमतकार कौ काम करौ और तुम सब चकित है गये। चौंकि मूसा नें तौ तुमें खतना की व्‍यबस्था दई, पर जि मूसा की ओर ते नांय जि तौ पुरखन ते चली आय रयी है, यहुदिन के आराम दिना में आदमी कौ खतना करके तुमंऊ तौ काम करतौ। अगर आराम के दिना में आदमी कौ खतना करबे की बजैह ते मूसा की व्‍यबस्था भंग नांय होत, तौ मैंनें आराम के दिना में एक आदमी कूं पूरी तरैह ते सही करौऔ तौ तुम लोग मोते जा बात पै चौं गुस्सा करतौ? मौंह देखकें न्याय मत करौ, पर सही कौ सही न्याय करौ।” कछू येरूसलेम में रैहबे बारे जि कैहते, “कै जि बेई नांय जाय हमारे नेता मारबे की ताक में रैहते? पर बू तौ सब लोगन के बीच में बोल रयौए और बे लोग कछू नांय कैह रये। कंऊ ऐसौ तौ नांय कै बे लोग सच जान गये हैं कै जि मसीह है? पर हम जानतै कै बू आदमी कांते आयौऐ। और जब बास्तव में मसीह आबैगौ कोई नांय जान पाबैगौ कै बू कांते आयोऐ।” जब ईसू बड़े पिराथना घर में सिछा दै रयौ हतो तब बानें ऊंची अबाज में कही, “तुम कैहतौ कै मोय जानतौ और जेऊ कै मैं कांते आयौऊ, फिरऊ मैं अपनी इच्‍छा ते नांय आयौ, पर जानें मोय भेजौऐ बू सच्‍चौऐ। तुम बाय नांय जान्‍त, पर मैं बाय जानतूं चौंकि बानें मोकूं भेजौऐ, मैं वाके ज्हां ते आयौऊं।” फिरऊ बे बाय पकरबौ चाहते, पर काऊ नें बापै पकरबे काजै हात नांय डारौ, चौंकि वाकौ समै अबई तक नांय आयौ हतो। तबई भौत ते लोगन नें ईसू पै भरोसौ करौ और आपस में कैहबे लगे, “कै सच में जि मसीह अई है तबई तौ जि ऐसे चमतकार के काम करतै।” फरीसियन नें चुपके ते लोगन कूं ईसू के बारे में बात करते भये सुनौ, तब यहुदी पिरधान पुरोहितन और फरीसियन ने बाय गिरफ्तार करबे काजै बड़े पिराथना घर के पेहरेदार भेजे। फिर ईसू बोलौ, “मैं तुम लोगन के संग कछू समै और रहूंगौ फिर मैं वाके जौरें चलौ जाऊंगौ, जानें मोकूं भेजौऊ। तुम लोग मोय ढ़ूढोगे पर ढूढ नांय पाऔगे। और जहां मैंऊ म्हांपै तुम नांय आय सकत।” यहुदी आपस में कैहबे लगे, “जि कां जाबैगौ, कै हम जाय ढूंढ नांय पाबिंगे? का जि हमारे लोगन जौरें जाबैगौ जो यूनानी में तितर-बितर हैके रैहतै और यूनानिन नें सिछा दैबैगौ? जि बात जानें चौं कही, ‘कै तुम मोय ढ़ूढोगे पर ढूंढ नांय पाऔगे,’ और ‘ज्हां मैंऊ, म्हांपै तुम नांय आय सकत’?” तौहार के आखरी मुख्‍य दिना ईसू ठाड़े हैके ऊंची अबाज में कैहबे लगो, “अगर कोई पियासौ हो तौ मेरे जौरें आबै पीवे। जो कोई मोपै भरोसौ करैगौ, वाके जीबन ते जल की नदियां बह निकरैगी। जैसौ के पबित्र सास्त्र में लिखौ भयौए।” ईसू नें जि सब बात पबित्र आतमा के बारे में कही हती, जो भरोसौ करबे बारे लोग पायबे बारे हते। पबित्र आतमा अबई तक काऊ के ऊपर उतरौ नांय हतो चौंकि ईसू अबई महिमाबान नांय भयौ। जब भीड़ के लोगन नें जब जि बात सुनीं तब बे आपस में कैहबे लगे, “जरूर जि आदमी परमेस्‍वर की ओर ते बात बतायबे बारौऐ।” और कछू आदमी जि कैह रये हते, “कै जि आदमी मसीह है।” कछू लोग कैह रये हते, “कै मसीह गलील ते नांय आबैगौ। का पबित्र सास्त्र में जि बात नांय लिखी, कै मसीह दाऊद की सन्‍तान होगौ और बैतलहम ते आबैगौ, जा नगर में दाऊद रैहत हतो?” जा तरैह ते लोगन में फूट पर गई। कछू तौ बाय बन्दी बनांबौ चाहते, पर काऊ ने बापै हात नांय डारौ। जब बड़े पिराथना घर के पैहरेदार पिरधान पुरोहित और फरीसियन के जौरें लौटकै आये तौ उन्‍नें पैहरेदारन ते पूछी, “तुम ईसूए चौं नांय पकरकै लाए?” पैहरेदारन नें जबाब दयौ, “आज तक काऊ नें ऐसी बात नांय करीं जैसी बू करतै।” जा बात पै फरीसियन नें बिनते कही, “कै कऊं तुमऊं भैकाबे में तौ नांय आय गये? का तुम हमारे काऊ यहुदी नेता और फरीसी कूं जानतौ जानें बापै भरोसौ करौ होय? पर जि लोग मूसा की व्‍यबस्था कूं नांय जान्‍त, जा बजैह ते बे परमेस्‍वर के साप के लायक हैं।” निकुदेमुस जो ईसू ते पैहले मिलबे आयौ हतौ। बू एक फरीसी हतो। बानें कही, “का हमारी व्‍यबस्था काऊ आदमी की सुनबाई करै बिना, कै बानें का करौ है बाय दोसी ठहरा सकतै?” बिन्‍नें बाते कही, “का तू अऊ गलील कौ है? पबित्र सास्त्रन में ढ़ूढके पढ़ तौ तोय पतौ चलैगौ, कै गलील ते कोई परमेस्‍वर की ओर ते बात बतायबे बारौ कबऊ नांय आबैगौ।” फिर बे सब अपने अपने घर चले गये, पर ईसू जैतून पहाड़ पै चलौ गयौ। और अगले दिना बू बड़े सबेरे, बड़े पिराथना घर आयौ और सब लोग वाके जौरें आयकै बैठ गये और बू परमेस्‍वर के वचन की सिछा दैबे लगौ। तब सास्त्रन कूं सिखाबे बारे और फरीसी व्‍यभिचार में पकड़ी गयी एक औरत कूं लाये और बाकूं बीच में ठाड़ौ करौ। उन्‍नें ईसू ते कही, “हे गुरू, जि औरत व्‍यभिचार करत भये पकरी गयी है। व्‍यबस्था में मूसा ने ऐसी औरत कूं पत्‍थर मारकै मार दैबे की आग्‍या दई है। तू जाके बारे में का कैहतै?” उन लोगन नें जि बात ईसूए परखबे काजै पूछी, कै बिनैं कोई ईसू पै दोस लगायबे कौ मौंकौ मिल जाय। पर ईसू उकड़ू बैठकै धरती पै अपनी उंगरियाते कछू लिखबे लगौ। चौंकि बे ईसूए पूछतई जाय रये हते, जामारै ईसू तनकै खड़ो भयौ और बिनते बोलौ, “तुम में ते जो पापी नांय होय बेई जा औरत कूं पैहलौ पत्‍थर मारै।” और फिर बू उकड़ू बैठकै धरती पै लिखबे लगौ। जब लोगन नें जि सुनीं तौ बड़े छोटे सब एक-एक करके सबके सब किनारौ करबे लगे, सबनते पैहले बड़े लोगन नें किनारौ करौ। और म्हांपै अकेलौ ईसूई रैह गयौ। बू औरत अबई तक वाके सामने खड़ी हती। ईसू नें खड़े हैकें बा औरत ते पूछी, “हे नारी, सब लोग कां गये? का कोई नांय जो तोय दन्‍ड दैबे?” तब बा औरत ने कही, “हे गुरू, कोई नांय।” और तब ईसू नें बाते कही, “कै मैंऊं तोय दन्‍ड नांय देत। जा फिरते पाप मत करियो।” ईसू नें फिर ते कही, “जगत कौ उजीतौ मैंईऊं। जो कोई मेरे पीछे रैहबेगौ बू कबऊ अंधेरे में नांय चलेगौ, पर जीबन कौ उजीतौ पाबैगौ।” फरीसियन्‍ने ईसू ते कही, “कै तू अपनी गबाही खुद दैरयौए, जामारै तेरी गबाही सच्‍ची नांय मानी जाबैगी।” ईसू नें बिनते कही, “कै चाहे भलैई मैं अपनी गबाही खुदई दे रयौऊं, पर मेरी जि गबाही सच्‍ची है चौंकि मैं जान्‍तूं कै मैं कांते आयौऊ और काँकूं जाय रयौऊं। पर तुम नांय जान्‍त कै मैं कांते आयौऊं और कां जा रयौऊं। तुमतौ आदमी की रीति पै न्याय करतौ। पर मैं काऊ कौ न्याय नांय करत। अगर मैं न्याय करूं तौ मेरौ न्याय सच्‍चौ होगौ। चौंकि मैं अकेलौ नांऊ मेरे संग मेरौ परमेस्‍वर पिताए जानें मोय भेजौए। तुम लोगन की व्‍यबस्था मेंऊं लिखौए, दो जनेन की गबाही सच्‍ची होतै। एक तौ मैं खुद अपनी गबाही देतूं और दूसरौ मेरौ परमेस्‍वर पिता मेरी गबाही देतुए जानें मोय भेजौऐ।” जा बात पै बिन्‍नें ईसू ते कही, “कै तेरौ पिता कांऐ?” ईसू नें जबाब दयौ, “कै तुम मोय और मेरे पिता कूं नांय जानते। अगर तुम मोय जानते तौ मेरे पिताऊऐ जान लेते।” जि बात बानें बड़े पिराथना घर की दान दैबे बारी जगैह पै सिछा देतै भये कही हती। पर काऊ नें बाय गिरफ्तार नांय करौ चौंकि बू समै अबई तक नांय आयौ हतो। ईसू नें एक बार फिर कही, “कै मैं चलौ जाऊंगौ और तुम मोय ढ़ूढौगे पर अपने पापन मेंई मर जाऔगे। ज्हां मैं जाय रयौऊं म्हां तुम नांय आय सकतई।” फिर यहुदी नेता कैहबे लगे, “का तुम जि सोच रयैऔ कै जि आत्‍महत्‍या करैगौ, चौंकि बानें जि कही है, ‘ज्हां मैं नांय जाय रयौऊं म्हांपै तुम नांय आय सकत’?” जापै ईसू नें कही, “कै तुम नीचे केऔ और मैं ऊपर कौऊं। तुम जा जगत केऔ और मैं जा जगत कौ नांऊ। जामारै मैंनें तुमते कही हती, कै तुम अपने पापन मेंई मरौगे चौंकि तुम भरोसौ नांय करत कै बू मैंऊं, तौ तुम अपने पापन मेंईं मरौगे।” फिर बिन्‍नें ईसू ते पूँछी, “कै तू कोऐ?” ईसू नें बिनते कही, “मैं बेईऊं जो तुमते सुरू तेई कैहत आय रयौऊं। मैं तुमें भौत सी बातन में दोसी ठहराय सकतूं। पर मेरौ भेजबे बारौ सच्‍चौ है और मैं तौ जा जगत कूं बेई बात बताबतूं जो मैंनें बाते सुनीऐं।” बे जि नांय समझ पाये, कै ईसू परमेस्‍वर पिता के बारे में कैह रयौ है। तब ईसू नें कही, “जब तुम मुझ, ‘मनुस्‍य के बेटा’ कूं ऊंचे पै चढ़ाऔगे तब तुम जान जाऔगे कै मैं कौन हूं और तुम जेऊ जान जाऔगे कै मैं अपनी ओर ते कछू नांय कैहत, पर जैसौ मेरे पिता ने मोय सिखायौऐ बैसी अई बात कैहतूं। और जानें मोय भेजौऐ बू मेरे संगै बू मोय कबऊ अकेलौ नांय छोड़त। चौंकि मैं हमेसा बेई काम करतूं जो बाय अच्‍छौ लगतै।” ईसू की इन बातन ते भौत ते लोगन नें बापै भरोसौ करौ। जितने यहुदियन ने बापै भरोसौ करौओ बिनते ईसू नें कही, “अगर तुम मेरी सिछा मानौगे तौ सचमुच मेरे चेला ठहरौगे। तब तुम सच्‍चाई कूं जान जाऔगे और सच तुमें आजाद करैगौ।” बिन्‍नें बाते कही, “हम तौ अब्राहम की सन्‍तान हैं और हम कबऊ काऊ के गुलाम नांय भये। फिर तुम जि कैसै कैह सकतै कै, ‘तुम आजाद करै जायेंगे’?” ईसू नें बिनते कही, “मैं तुमते सच कैह रयौऊं जो पाप करतै बू पाप कौ गुलामें। एक गुलाम कौ मालिक के घर पै कोई हक नांय होत पर मालिक कौ बेटा घर कौ हमेसा हकदार रैहतै। जामारै अगर तुमें बेटा आजाद करैगौ तौ तुम सच मुच आजाद है जाऔगे। मैं जानतूं कै तुम अब्राहम की सन्‍तानों। फिरऊ तुम मोय मारबे की ताक में रैहतो, चौंकि मेरी सिछा के काजै तुमारे मन में कोई जगैह नांय। मैंनें अपने परमेस्‍वर पिता के ज्हां जो देखौए बेई मैं तुमते कैहतूं। और तुम लोगन नें जो अपने पिता के ज्हां सीखायौऐ तुम बाईऐ करतौ।” बिन्‍नें बाते कही, “कै अब्राहम तौ हमारौ पिताए।” ईसू नें बिनते कही, “अगर तुमारौ पिता अब्राहम होतौ तौ तुम बुई करते जो अब्राहम नें करौ हतो। जो सच्‍चाई मैंनें परमेस्‍वर ते सुनीऐ बू तुम लोगन कूं बताय दई है, जामारै अब तुम मोय मारबे की ताक में रैहतो। पर अब्राहम ने तौ तुमारे जैसौ नांय करौ। तुम लोग तौ अपने पिता जैसौ चाल-चलन चलतौ।” उन्‍नें ईसू ते कही, “कै हम व्‍यभिचार ते पैदा नांय भये हमारौ तौ एकई पिताए और बूऐ परमेस्‍वर।” ईसू नें बिनते कही, “अगर तुमारौ पिता परमेस्‍वर होतौ तौ तुम मोऊते पिरेम करते, चौंकि मैं परमेस्‍वर के य्हांते आयौऊं। मैं अपनी इच्‍छा ते नांय आयौ, पर मोय तौ परमेस्‍वर नें भेजौऐ। तुम मेरी बात चौं नांय समझत? चौंकि तुमतौ मेरी सिछाए सुनबोई नांय चाहत। तुम अपने पिता सैतान की सन्‍तानों और तुम अपने पिता की इच्‍छा पै चलबौ चाहतौ। बू तौ सुरू तेई एक हत्‍यारा हतो और बानें सच्‍चाई कौ संग कबऊ नांय दयौ चौंकि बामें सच्‍चाई हतई नांय। वाकौ तौ सुभाव झूंठ बोलबौ है चौंकि बू झूठोऐ और झूंठ कौ बापै। पर मैं सच बोलतूं जामारै तुम मोपै भरोसौ नांय करते। तुम में ते ऐसौ कोऐ जो मोपै पाप कौ दोस लगाय सके? अगर मैं सच बोलतूं तौ तुम मोपै भरोसौ चौं नांय करत? जो आदमी परमेस्‍वर कौऐ बू परमेस्‍वर की बातें सुनतै। तुम परमेस्‍वर के नाऔ जामारैई तुम मेरी बात नांय सुनत।” जि बात सुनकें यहुदियन ने ईसू ते कही, “का हम सई नांय कैह रये कै तू सामरीए और तोपै दुस्‍ट आतमा सबार हे गयौऐ?” तब ईसू नें जबाब दयौ, “मोपै कोई दुस्‍ट आतमा सबार नांय। पर मैं तौ अपने पिता कौ आदर करतूं और तुम मेरौ अपमान करतौ। मैं अपनी महिमा नांय चाहत पर एक हतै जो मेरे काजै महिमा चाहतै और बू सही न्याय करतै। मैं तुमते सच कैहतूं, कै जो मेरी सिछा पै चलैगौ बू कबऊ नांय मरेगौ।” जि बात सुनकें यहुदियन ने ईसू ते कही, “अब तौ हमें पक्‍कौ भरोसौ है गयौऐ कै तोपै दुस्‍ट आतमा सबार हे गयौऐ। य्हां तक कै अब्राहम और परमेस्‍वर की ओर ते बात बतायबे बारेऊ मर गये और तू कहरोऐ, ‘अगर कोई मेरी सिछा पै चलैगौ तौ बू कबऊ नांय मरैगौ।’ का तू हमारे पुरखा अब्राहम तेऊ महान है? बू मर गया और परमेस्‍वर की ओर ते बात बतायबे बारेऊ मर गये। तू अपने कूं का समझतुए? तू कोऐ?” ईसू ने बिनते कही, “मैं खुद अपनी महिमा करूं, तौ मेरी बा महिमा कौ कोई मतलब नांय, पर मेरी महिमा करबे बारौ तौ मेरौ पिताऐ, जाके बारे में तुम कहतौ, ‘कै बू हमारौ परमेस्‍वर है।’ तुम में ते तौ कोई बाय नांय जानतूं पर मैं बाय जानतूं। अगर मैं कहूं कै मैं बाय नांय जानत तौ तुम लोगन की तरैह ते झूंठा ठहरुंगो। मैं बाय अच्‍छी तरैह ते जानतूं और जो बू कैहतै मैं बाईए करतूं। तुमारौ पुरखा अब्राहम, मेरे आयबे के दिनाऐ देखबे काजै मगन भयौ। बानें देखौ और मगन भयौ।” फिर यहुदी नेता बाते कैहबे लगे, “कै अबई तौ तू पचास साल कौऊ नांय फिर तैंने अब्राहम कूं कैसे देख लयौ?” ईसू नें बिनते कही, “मैं तुमते सच कैहतूं कै मैं अब्राहम के पैदा हैबे ते पैहले तेई हूं।” जा बात पै उन लोगन नें ईसू कूं मारबे काजै पत्‍थर उठाय लये, पर बू चुपके ते बड़े पिराथना घर ते चलौ गयौ। फिर ईसू नें रस्ता में एक जनम के अन्धे कूं देखौ। वाके चेलान नें बाते पूछी, “हे गुरू, जि आदमी खुद के पापन की बजैह ते जनम ते अन्धौ या जाके मा-बाप के पापन की बजैह ते?” ईसू नें बिनें जबाब दयौ, “नांय! जानें कोई पाप नांय करौ और ना जाके मा-बाप नें, पर जितौ जनम तेई अन्धौ जामारै पैदा भयौए कै, परमेस्‍वर की महिमा होय। जानें मोय भेजौए वाके काम कूं हमें दिनई में कर लेनौ चंहिएं, चौंकि जब रात है जाबेगी तौ कोई काम नांय कर सकैगौ। जब तक मैं संसार मेंऊ, तब तक मैं जा संसार कौ उजीतौ हूं।” इतनी बात कैहबे के बाद ईसू नें धरती पै थूकौ और मट्‍टी कूं सानों और बू मट्टी बा अन्धे की आंखन पै लगाय दई। और ईसू नें बाते कही, “जा सीलोह के कुन्‍ड में जायकें धोयआ।” (सीलोह कौ मतलबे भेजौ भयौ) और फिर बा अन्धे ने जायकें आँखें धोय डारी। जब बू लौटौ तौ बाय दीखबे लगौ। फिर वाके पड़ोसी और बे लोग बा अन्धे कूं भीख माँगत देखते हते, बे बोले, “का जि बेई नांय जो बैठौ भीख मांगतौ?” कछू लोग बाय देखकें कैहबे लगे, कै जि बेईऐ। और दूसरेन ने कही, “नांय, जि बू नांय,पर वाके जैसौ दीख रयौ है।” इन सबकी बातन कूं सुनकें बू बोलो, “मैं बेईऊं।” तब बे बाय पूछबे लगे, “कै तोय कैसे दीखबे लगौ?” बानें बिनते कही, “के एक ईसू नाम कौ आदमी हतो, बानें मट्‍टी सानी और मेरी आंखन पै मल दई और मोते कही, ‘जा सीलोह के कुन्‍ड में धोयआ,’ और जब मैं धोय के आयौ तौ मोय दीखबे लगौ।” बाते उन लोगन नें पूछी, “बू आदमी कांऐ?” तौ बानें जबाब दयौ, “कै मोय नांय पतौ।” जो आदमी पैहले आंधरौ हतो, बे लोग बाय फरीसियन के जोरै ले गये। ईसू नें जा दिना बा अन्धे की आंख, मट्‍टी सानकै सही करी हतीं, बू यहुदिन के आराम कौ दिना हतौ। फरीसी बेर बेर बाय पूछवे लगे, “कै तेरी आंख कैसे सही भईं?” बा अन्धे आदमी नें बताई, “कै बानें मट्‍टी सान के मेरी आंखन पै लगाई और मैंनें बू धोईं और मोय दीखबे लगौ।” कछू फरीसी कैहबे लगे, “कै जि परमेस्‍वर की ओर ते तौ हत नांय, चौंकि जि आराम के दिना कूं नांय मान्‍त।” पर दूसरे बोले, “कोई पापी आदमी भले ऐसे चमतकार के काम कैसे कर सकतै?” जा तरैह ते बिनमें आपसई में बाद-बिबाद हैबे लगौ। बे बा अन्धे आदमी ते फिर बोले, “तू वाके बारे में का कैहबौ चाह रयौए? चौंकि बानें तेरी आंखे सही करीऐं।” तब बानें कही, “बू तौ परमेस्‍वर की ओर ते बात बतायबे बारौऐ।” यहुदी नेतान नें अब तक भरोसौ नांय करौ कै बू जनम ते अन्धौ हतो और अब देखतै, जामारै बिनें वाके मा-बाप कूं बुलायके, बिनते पूँछी, “का जि तुमारौई बेटा है? का जि जनम तेई अंन्धौ हतो? अब जि कैसे देख रयौए?” जापै वाके मा-बाप ने जबाब दयौ, “कै हम जानतै कै जि हमारौ बेटा है और जि अन्धौ पैदा भयौ हतो। पर हम अब जि नांय जान्‍त कै जि कैसे देख रयौ है और हम जेऊ नांय जान्‍त कै जाकी आंख कोनें सही करीऐं। जाई ते पूछ लेओ, अब तौ जि भौत बड़ौ है गयौऐ और अपने बारे में खुद बताय सकतै।” बा अन्धे के मा-बाप ने जा बजैह ते जि बात कही, कै बे यहुदी नेतन ते डरपते हते। चौंकि बे जा बात मानते कै अगर कोई ईसू कूं मसीह मान लेगौ तौ बू पिराथना घर ते अराधना करबे ते निकार दयौ जाबैगौ। जामारै वाके मा-बाप ने कही हती, “कै अब तौ बू भौत बड़ौ है गयौए तुम बाई ते पूछ लेओ।” यहुदी नेतन ने बाकूं दूसरी बार फिर बुलायौ जो अंन्धौ हतो, और कही, “तू ठीक भयौए वाके काजै परमेस्‍वर की स्तुति कर, बा आदमी कूं नांय। चौंकि हमें मालूमें कै बू आदमी पापी है।” जापै बानें जि जबाब दयौ, “कै मैं नांय जान्‍त कै बू पापी है कै नांय। पर इतनौ जान्‍तू कै पैहले मैं आंधरौ हतो और अब देख सकतूं।” जा बात पै उन लोगन नें बाते पूछी कै, “बता कै बानें तेरे संग का करौ, जाते तेरी आंख सही है गयी हती।” जापै बानें उन्‍नकूं जबाब दयौ, “मैं तुमकूं बता चुकौऊ, पर तुमतौ मेरी बात सुनतई नाऔ। तुम बू सब कछू दुबारा सुनबौ चौं चांहतौ? का तुमऊ वाके चेला बनबौ चाहतौ?” तब बिन्‍नें बाते बुरी भली बात कही कै, “तूई वाकौ चेला बन जा। हम तौ मूसा कै चेलाऐं। और हम जेऊ जानतै कै मूसा ते परमेस्‍वर ने बात करी हती, पर हम जि नांय जान्‍त कै, जि आदमी कांते आयौए।” बा आँधरे आदमी ने बिनें जबाब देत भये कही, “अचम्भे की बात है कै तुम नांय जान्‍त कै बू कांते आयौए। पर बानें मेरी आंखन कूं जोती दयी है। हम जानतै कै परमेस्‍वर पापिन की नांय सुनत। पर बू तौ बिनकी सुनतै जो परमेस्‍वर के निमित्‍त बाई काम कूं करें, जो परमेस्‍वर की इच्‍छा है। दुनियां की सुरुआत ते जि कबऊ सुनबे में नांय आयौ कै, काउ नें जनम ते आँधरे कूं आंखन कूं जोती दयी होय। अगर जि आदमी परमेस्‍वर की ओर ते नांय होतौ तौ जि कछू नांय कर सकतौ।” जबाब में यहुदी बोले, “तू जनम कौ पापी रयौए और तू हमें कैसे सिखा सकतै? और यहुदी नेतन ने बाय पिराथना घर ते बाहर धकेल दयौ।” तब ईसू नें जि बात सुनिकै यहुदी नेतन ने बा अन्धे कूं धकेल के बाहर निकार दयौए, बाते मिलकै ईसू नें पूछी, “का तू ‘मनुस्‍य के बेटा’ पै भरोसौ करतुए?” बानें जबाब दयौ, “हे गुरू, बताओ बू कोऐ, जाते मैं बापै भरोसौ करूं।” ईसू नें बाते कही, “तू बाय देख चुकौए और बू बेईऐ जाते तू जा समै बात कर रयौ है।” बू फिर घुटुअन के बल गिरकें बोलो, “हे पिरभू मैं भरोसौ करतूं।” ईसू नें कही, “मैं जा जगत को न्याय करबे आयौऊ, जाते जो नांय देखतएं देख सके और जो देख रयेऐं बे आँधरे है जाय।” कछू फरीसी जो ईसू के संग हते बे जि सुनकें बोले, “का हमऊं अन्धे हैं?” ईसू ने बिनते कही, “अगर तुम अन्धे होते तौ तुम पापी नांय होते, पर जैसे तुम कैहतौ कै, ‘तुम देख सकतौ’ जामारै तुम पाप में बने रहोगे।” ईसू नें फिर कही, “कै मैं तुमते सही सच कैह रयौऊं,भेड़न के बाड़े में दरबज्‍जे की बजाय दीबार ते कूंदकै आयबे बारौ या तौ चोर है या फिर लुटेरौए। पर जो दरबाजे ते आबतै बू उन भेड़न कौ चरायबे बारौईऐ। द्वारपाल जब वाके काजै दरबाजौ खोलते तौ भेड़ चराबे बारे की अबाज सुनतै। बू अपनी भेड़न कूं नाम लैकें बुलाबतै और बिनकूं बू बाडे़ ते बाहर लै जाबतुए। जब बू अपनी सब भेड़न कूं निकाल लेतै तौ बिनके आगे-आगे चलतै और भेड़ वाके पीछे-पीछे चलतै, चौंकि बे वाकी अबाज पैहचानतींऐं। भेड़ अनजान आदमी के पीछे कबऊ नांय जाबती, बे तौ बाते दूर भाग जाबतैं चौंकि बे वाकी अबाज नांय पैहचानत।” ईसू नें बिनकूं जि दृस्‍टान्‍त कहौ पर फरीसी समझ नांय पाये कै बू बिनें का बताय रयौए। जापै फिर ईसू नें बिनते कही, “मैं तुमें सच बताबतूं, भेड़न के काजै द्वार मैंऊ। बे सब जो मोते पैहले आये हते बे चोर और लुटेरै हते। पर भेड़न ने उनकी नांय सुनीं। मैं द्वार हूं, अगर जो कोई मोमें हेकें घुसेगौ तौ वाकी रछा होबेगी। बू भीतर बाहर आबैगौ जाबैगौ और बाय चारौ मिलैगौ। चोर केवल चोरी, हत्‍या और बिनांस के काजेई आबतै। पर मैं जामारै आयौऊं कै लोग जीबन पामें और भरपूर जीबन पा सकें। “अच्‍छौ चरबाहा मैऊं, अच्‍छौ चरबाहा अपनी भेड़न काजै अपनों पिरान देतै। पर जो किराये कौ मजदूर होतै बू चरबाहौ नांय होत और वाकी अपनी भेड़ नांय होतीं। जामारै जब भेड़िआ आबैगौ तौ बू भेड़न कूं छोड़कै भाग जातै। तब भेड़िया झुंड पै हमला करकें उनकूं तितर कर देतै। किराये कौ मजदूर जाई बजैह ते भाग जातै चौंकि बू एक मजदूरै बाय भेड़न की कोई चिन्‍ता नांय। “मैं अच्‍छौ चरायबे बारौऊ मैं अपनी भेड़न कूं जानतूं और मेरी भेड़ मोय जानतीऐं, जैसे परम पिता मोय जान्‍तै और पिता कूं मैं जान्‍तूं और मैं भेड़न काजै अपने पिरान देतूं। मेरी औरऊ भेड़ हैं जो जा भेड़ साला की नांय। मोय उन्‍नेंऊ लानोंऐं। बेऊ मेरी अबाज सुनेंगी और जा बाड़े में आयकै एक हे जाबैगी। फिर सबन कौ चरायबे बारौ एकई होगौ। परमेस्‍वर पिता मोते जामारै पिरेम करतै चौंकि मैं अपने पिरान देतूं ताकि मैं पिरान फिर बापिस पा सकूं। मेरौ पिरान मोते कोई छीन नांय सकत पर मैं अपनों पिरान खुदई दै रयौऊं। मोय अपनों पिरान दैबे कौऊ अधिकारै और बाय फिर ते लैबे कौऊ अधिकारै। जि आग्‍या मोय अपने परमेस्‍वर पिता ते मिली है।” इन बातन की बजैह ते यहुदियन में फिर फूट पड़ गई। भौत ते कैहबे लगे, “कै जि तौ पागल हे गयौऐ, जापै तौ दुस्‍ट आतमा सबार है गईऐ। तुम जाकी चौं सुनतौ?” दूसरे कैहबे लगे, “जि बात तौ ऐसे आदमी की नांय है सकतीं, जापै दुस्‍ट आतमा सबार होय। जि सईऐ कै कोई दुस्‍ट आतमा काऊ अन्धे आदमी कूं आंख नांय दे सकती।” येरूसलेम में बड़े पिराथना घर की स्थापना कौ तौहार मनांयो जा रयो हतो। जि जाड़े कौ समै हतौ, ईसू बड़े पिराथना घर में सुलेमान के बरामदे में घूम रयौ हतो। तब यहुदी नेता ईसू के चारौ लग आयकै पूछबे लगे, “कै तू हमे कब तक दुबिधा में रखैगौ? तू सही सही बताय दै कै तू ही मसीह है।” ईसू नें बिनते कही, “मैंनें तौ सही बताय दयी, पर तुम भरोसौ नांय कर रये। जिन कामन नें मैं मेरे परमेस्‍वर पिता के नाम ते करतूं बेई मेरे गबाह है, पर तुम भरोसौ नांय करत चौंकि तुम मेरी भेड़न में ते नाऔ। मेरी भेड़ मेरी अबाज कूं जान्‍तै, मैं उनैं जान्‍तू और बे मेरे पीछै पीछै चलतै। मैं उनैं कबऊ नांय खतम हैबे बारौ जीबन देतूं, बिनकौ कबऊ नांस नांय होगौ। और नां कोई मेरे हात ते बिनें छीन पाबैगौ। बिनें मेरे हात में दैबे बारौ पिता सबते महान है। कोई बिनें मेरे पिता के हातन में ते नांय छीन सकत। मैं और मेरौ पिता एकईऐ।” यहुदी नेतन ईसू कूं मारबे काजै पत्‍थर उठाय लये, पर ईसू नें बिनते कही, “मैंनें अपने परमेस्‍वर पिता की ओर ते भले काम दिखाए हैं। बिनमें ते कौन ते काम के काजै तुम पत्‍थर मार रयेऔ?” यहुदियन नें बाय जबाब दयौ, “हम तेरे भले कामन के काजै तोमें पत्‍थर नांय मार रये, पर तू आदमी हैके अपने आप कूं परमेस्‍वर बताय रयौए। ऐसौ करकै तू परमेस्‍वर को अपमान कर रयौए।” ईसू ने बिन्‍नें जबाब दैकै कही, “का तुमारी व्‍यबस्था में नांय लिखौ कै, ‘परमेस्‍वर ने कही तुम सब ईस्‍वर के जैसे हो’? का ईस्‍वर के जैसे बिन लोगन के काजै नांय कही है, जिनें परमेस्‍वर कौ वचन मिलौ है पबित्र सास्त्र में लिखी भई बात झूंठी नांय है सकत। तौ जा परमेस्‍वर नें मोय पबित्र ठहरायके दुनियां में भेजौऐ, तुम बाई ते कैह रयेऔ कै तू वाकी निन्दा कर रयौ है। का जामारै कै मैंनें कहीए, ‘मैं परमेस्‍वर कौ बेटाऊं’? अगर मैं परमेस्‍वर पिता कौ काम नांय कर रयौ तौ तुम मोपै भरोसौ मत करौ। अगर मैं परमेस्‍वर पिता केई काम कर रयौऊं तौ तुम मोपै भरोसौ नांय करत, तौ बिन कामन पैई भरोसौ करौ जिनें तुम समझ सकौ और जानों कै परमेस्‍वर पिता मोमें और मैं पिता मेंऊ।” जा बात पै फिर एक बार यहुदी ईसू कूं गिरफ्तार करबे की कोसिस करबे लगे पर ईसू बिनके हातन ते बचकै निकर गयौ। तब ईसू यरदन नदी के बा पार पै पौहचौ ज्हांपै पैहले यूहन्‍ना बपतिस्मा देतौ। बू म्हींपै रुकौ, और भौत ते लोग ईसू के जौरें आयकै कैहबे लगे, “यूहन्‍ना नें कोई चमतकार कौ काम नांय करौ, पर जा आदमी के बारे में जो कछू कही हती, बू बिलकुल सही निकरी।” फिर म्हांपै भौत ते लोग ईसू पै भरोसौ करबे बारे बन गये। बैतनियां गांम में लाजर नाम कौ एक बीमार आदमी हतो। बा नगर में बू अपनी दो बहन मरियम और मारता के संग रैहतो। जि बेई मरियम हती जानें पिरभू ईसू के पामन पै इत्र डारके अपने बालन ते पौछौ हतो, बाई कौ भईया लाजर बीमार हतो। जामारै लाजर की बहनन ने ईसू के जौरें खबर भेजी, “हे पिरभू, जाते तू पिरेम करतो बू लाजर बीमारै।” जब ईसू नें जाके बारे में सुनी तब बानें कही, “लाजर की जि बीमारी मरबे काजै नांय, पर परमेस्‍वर की महिमा काजैऐ और जाई ते परमेस्‍वर के बेटा की महिमा होबेगी। ईसू मारता, उसकी बहन मरियम और लाजर ते पिरेम करतो हतो। जब ईसू नें सुनी कै लाजर बीमारै तौ ज्हां पै बू ठहरौ हतो, म्हांपै दो दिना और रुकौ।” और फिर ईसू नें अपने चेलान ते कही, “चलौ हम यहुदिया काजै लौट चलें।” जापै ईसू के चेलान ने कही कै, “हे गुरू, कछू दिना पैहले यहुदी नेतन नें तोय पत्‍थर मारके मारबे की कोसिस करी हती और तू फिर म्हींपै चौं जाय रयौ है?” ईसू नें जबाब दयौ, “का एक दिना में बारैह घन्‍टा उजीते के नांय होत? अगर कोई आदमी दिन के उजीते में चलतै, तौ बू ठोकर नांय खाय सकत चौंकि बू जगत के उजीते कूं देखतै। अगर कोई रात में चलैगौ तौ बू ठोकर खाबैगौ चौंकि रात में उजीतौ नांय हौबे।” फिर ईसू नें चेलान ते कही, “कै हमारा मित्र लाजर सोय गयौए, मैं बाय जगायबे जाय रयौऊं।” तबई वाके चेलान ने कही, “हे पिरभू, अगर बू सोय गयौऐ तौ सही है जाबैगौ।” ईसू लाजर की मौत के बारे में कैह रयौ हतौ, पर चेलान ने सोची कै बू स्वभाबिक रूप ते सोयबे की बात कर रयौ है। ईसू नें फिर दुबारा साफ-साफ कही, “कै लाजर मर गयौऐ। मैं तुमारी बजैह ते खुसऊं कै मैं मांपै नांय हतो, चौंकि तुम मोपै भरोसौ कर सकौगे। आऔ, अब हम वाके जौरें चलें।” तब थोमा नें जो जुड़बा कहौ जाबतौ बानें अपने संग के चेलान ते कही, “चलौ हम जाके संग मरबे चलें।” म्हांपै पौहचबे के बाद ईसू कूं मालूम परी कै लाजर कूं चट्‍टान में खोदी भयी कब्र में रखे भये चार दिन है गये हैं। बैतनियां गांम येरूसलेम ते लगभग एक कोस दूर हतो। भौत ते यहुदी नेता मारता और मरियम कूं वाके भईया की मौत पै तसल्‍ली दैबे कूं आये हते। जब मारता कूं जि मालूम परी कै ईसू आयोऐ, तौ बू बाते मिलबे गयी, पर मरियम घर मेंईं हती। मारता ने ईसू ते कही, “हे पिरभू, अगर तू य्हांपै होतौ तौ मेरौ भईया नांय मरतौ। पर मैं जानती हूं, कै अबऊ तू परमेस्‍वर ते जो कछू मांगेंगौ तौ बू तोय दै देबैगौ।” ईसू नें बाते कही, “तेरौ भईया जी उठैगौ।” मारता ने बाते कही, “हाँ मैं जानती हूं, जी उठबे के आखरी दिन बू जी उठैगौ।” ईसू नें बाते कही, “मैं जीबन हूं और मरबे के बाद जी उठिबौ मोमेंई है। जो कोई मोपै भरोसौ करैगौ बू मरबे के बाद जी उठैगौ। और बू जो जीबित है मोमें भरोसौ करतुए बू कबऊ नांय मरैगौ का तू मोपै भरोसौ करतै?” तब फिर मारता ने ईसू ते कही, “हाँ पिरभू, मैं भरोसौ करतूं, जो परमेस्‍वर कौ बेटा मसीह है, जो दुनियां में आयबे बारौ हतो, बू तूईऐ।” जि कैहके मारता म्हांते चली गयी और अपनी बहन मरियम कूं बुलायकै कैहबे लगी कै, “गुरू जी य्हांपैईऐ और तोय बुलाय रयौ है।” मारता की बात सुनिकै मरियम तबई म्हांते उठकै बाते मिलबे चली दई। ईसू अबई तक गांम में नांय पौंहचौ हतो पर अबई म्हींपै हतो ज्हांपै मारता मिली हती। फिर बे यहुदी नेता जो घर पै तसल्‍ली दैबे काजै आये हते, बे सोचबे लगे कै मरियम लाजर की कब्र पै रोयबे जाय रयी है, और बे सब वाके पीछै चल दये। जब मरियम ने ईसू कूं देखौ तौ मरियम वाके पामन में गिरकें बोली, “हे पिरभू, अगर तू ज्हांपै होतौ तौ मेरौ भईया लाजर नांय मरतौ।” ईसू नें जब मरियम और वाके संग आये यहुदिन कूं रोबत भये देखकें, ईसू की आतमा भौत दुखी भयी और ब्याकुल भयौ, और बोला, “तुमनें लाजर की लास कूं कांपै रखौऐ?” बे बाते बोले, “आ पिरभू देख लै।” ईसू की आँखन ते आँसू निकरबे लगे। तब यहुदी कैहबे लगे, “देखौ, ईसू लाजर ते कितनौ पिरेम करतै।” पर बिनमें ते कछू बोले, “जानें अन्धे कूं आंख दयीं। का जि लाजर कूं मरबे ते नांय बचाय सकत हतो?” तब ईसू अपने मन में एक बार फिर ब्याकुल हैकें कब्र के माऊं गयौ जि एक गुफा हती और वाकौ द्वार एक बडे़ पत्‍थर ते ढकौ हतो। ईसू नें कही, “कै जा पत्‍थर कूं हटाऔ।” मरे भये लाजर की बहन मारता ने कही, “हे पिरभू, अब तौ बामें ते बास आय रयी होगी चौंकि बाय य्हांपै रखे भये चार दिना है गयेऐं।” ईसू नें बाते कही, “का मैंनें तोते नांय कही कै तू भरोसौ करैगी तौ परमेस्‍वर की महिमा कूं देखेगी?” तब उन लोगन नें बू पत्‍थर हटाय दयौ और ईसू नें अपनी आंख उठावत भये कही, “हे परम पिता, मैं तेरौ धन्यबाद करतूं कै तेनै मेरी सुन लयीऐ। और मैं जान्‍तू कै तू मेरी हमेसा सुनतुऐ, जि बात मैंनें ज्हांपै चारौ ओर इकठ्‌ठी भीड़ के काजै कही कै जाते बे भरोसौ कर सकैं कै मोय तेने भेजौऐ।” जि कैहबे के बाद ईसू ने भौत जोर ते चिल्‍लायकै कही, “हे लाजर, बाहर आजा।” तब मरौ भयौ लाजर कब्र ते बाहर निकर आयौ, बू अबई तक कफ्फन में लिपटो भयौ हतो और वाकौ मौंह कपड़ा ते बंधौ भयौ हतो। ईसू नें लोगन ते कही, “जाय खोल देऊ और जान देऊ।” तब फिर बे यहुदी जो मरियम के जौरें आऐ हते बिन्‍नें ईसू कौ जि काम देखौ और बिनमें तेई भौतन ने ईसू पै भरोसौ करौ। बिनई में ते कछुन ने फरीसियन के जौरें जायके ईसू नें जो करौओ वाकी खबर दयी। फिर पिरधान पुरोहितन और फरीसियन ने यहुदियन की एक बड़ी पंचायत बुलाई। और कही, “कै हमें का करनों चहिऐं? जि आदमी भौत ते आस्चर्य के काम कर रयौ है। अगर हमनें जि ऐसौ करबे ते नांय रोकौ तौ हरेक कोई जापै भरोसौ करबे लगैगौ, तब रोमी लोग य्हां आय जांगे और हमारे बड़े पिराथना घर और देस कौ नांस कर दिंगे।” पर बा साल के महा पुरोहित कैफा ने बिनते कही, “तुम लोग कछू नांय जानत। और ना तुम जा बाते समझत कै, सबन के काजै एक आदमी को मर जाबौ अच्‍छौ है, जाते हमारौ सबरौ देस नांस हैबे ते बच जायगौ।” जि बात बानें अपनी ओर ते नांय कही, पर बा साल कौ महा पुरोहित हैबे की बजैह ते पैहलेई भविस्‍यबानी करी हती कै ईसू यहुदी लोगन के काजै मारौ जाबैगौ, बू य्हांके यहुदिन के काजेई नांय पर परमेस्‍वर की सन्‍तानन के काजै जो तितर-बितर हे गयेऐं उने इकठ्‌ठौ करबे काजै होगौ। तब बे बाई दिना ते ईसू कूं मारबे काजै साजिस रचबे लगे। ईसू फिर यहुदिया पिरदेस में उजागर रूप में कबऊ नांय गयौ और बू येरूसलेम कूं छोड़कै बेहड़ के जौरें इफ्राईम नगर में अपने चेलान के संग रैहबे लगौ। यहुदियन कौ फसह कौ तौहार आयबे बारौ हतो। पूरे देस ते भौत ते लोग येरूसलेम आये। जाते कै बे अपने आप कूं तौहार ते पैहले यहुदी रीति के अनुसार सुद्ध कर सकें। बे लोग ईसू कूं ढ़ूढ रये हते। जब बे बड़े पिराथना घर के आंगन में हते तब बे आपस में एक दूसरे ते पूछबे लगे, “तुम का सोचतौ? का बू जा तौहार में आबैगौ?” फिर पिरधान पुरोहितन और फरीसियन ने जि आदेस दयौ, कै अगर कोई ईसू की खबर पाबे कै ईसू कांऐं तौ बू जाकी सूचना देय जाते बे बाय गिरफ्तार कर सकैं। ईसू फसह के तौहार ते छै: दिना पैहले बैतनियां सहर में आयौ, ज्हांपै लाजर रैहतो, जाकूं ईसू नें मरे भयेन में ते जीबित करौ हतो। म्हांपै लोगन नें ईसू काजै रात कौ खानों बनांयौ। मारता नें खानों परोसौ और ईसू के संग खानों खाबे बारेन में लाजरऊ हतो। तब मरियम बरतन में असली जटामांसी कौ भौत मंहगो इत्र लैके ईसू के पैरन पै लगायौ, और अपने बारन ते वाके पैर पौंछे। इत्र की खुसबू सबरे घर में है गयी। जापै ईसू के एक चेला, यहूदा इस्करियोती जानें बाकूं बिसबास घात करके पकरबायौ हतो बानें कही, “जा इत्र कूं तीन सौ चाँदी के सिक्‍कन में बेचकै, बू धन गरीबन कूं चौं नांय दै दयौ गयौ?” यहूदा नें जि बात जामारै नांय कही, कै बाय गरीबन की चिन्‍ता हती, पर बू खुद एक चोर हतो। वाके जौरें रुपईयन की थैली रैहती और बामें जो डारौ जातो बामें ते बू चुरा लेतो। तब ईसू नें कही, “रैहन देओ, जा औरत कूं मत रोकौ, जानें मेरे गाड़े जाबे के दिना की तईयारी में जि काम करौ है। गरीब लोग तौ हमेसा तुमारे जौरें रैहतैं, पर मैं तुमारे संग हमेसा नांय रहुंगो।” भौत ते यहुदिन नें जि पतौ चली कै ईसू बैतनिया में है। बे वाके काजैई नांय पर बा लाजरऊ ऐं देखबे आये जाय ईसू नें मरे भयेन में ते जीबित करौ हतो। जामारै यहुदी पिरधान पुरोहितन नें लाजर कूंअऊं मारबे की योजना बनाई। चौंकि लाजर की बजैह ते भौत ते यहुदी बिनते अलग हैके ईसू पै भरोसौ करबे लगे हते। दूसरे दिना फसह के तौहार पै आई भीड़ ने जब जि सुनी, कै ईसू येरूसलेम में आ रयौ है। जामारै बिन्‍नें खजूर के पेड़ की डारी लयीं और बाते मिलबे काजै निकरे। बे पुकार रये हते, “होसन्‍ना! ‘धन्य है बू जो पिरभू के नाम ते आतै।’ बू जो इसरायल कौ राजा है।” तब ईसूए एक गधा मिलौ और बू बापै बैठ गयौ। जैसौ कै सास्त्र में लिखौ भयौ है, “हे सियोन की बेटी मत डर, देख, तेरौ राजा गधे के बच्‍चे पै बैठकै, तेरे जौरें आ रयौ है।” ईसू के चेला पैहले तौ जि समझत नांय,पर जब ईसू की महिमा पिरकट भयी तौ बिनें याद आयी, कै जे वाके बारे में लिखौ भयौ है और लोगन नें वाके संग बैसौई करौ हतो। ईसू के संग जो भीड़ हती बानें जि गबाही दयी, कै बानें लाजर कूं कब्र में अबाज दैकै मरे भयेन में ते जीबित करौ हतो। जामारै भौत ते लोग ईसू ते मिलबे आये, बिन्‍नें सुनीं हती कै जि बेई है जानें बू चमतकार कौ काम करौ है। तब फरीसी आपस में कैहबे लगे, “सोचौ तौ सही, पूरी दुनियां जाके पीछे चल दयी है और हम कछू नांय कर पा रये।” जो लोग तौहार पै अराधना करबे आये हते बिनमें कछू लोग यूनानी हते। बे गलील में बैतसैदा के रैहबे बारे फिलिपुस के जौरें जायकै बाते बिनती करकै कैहबे लगे, “महोदय, हम ईसू ते मिलबो चाहतै।” तब जि बात फिलिपुस नें आयकै अन्द्रियास कूं बताई, और अन्द्रियास नें फिलुपुस के संग जायकै ईसू कूं बताई। जि सब जानकै ईसू नें बिनते कही, “बू समै आ गयौ है जब मुझ, ‘मनुस्‍य के बेटा’ की महिमा पिरकट होबैगी। मैं तुमते सच कैह रयौऊं, जब तक गेंहूँ कौ दानों धरती की मट्‍टी में गिरकै मर नांय जात, तब तक बू एकई रैहतै, पर जब बू मर जातै तौ अनगिनत दानेन नें जनम देतै। जाय अपनों जीबन प्यारौ है बू बाय खो दैबेगौ, पर जो जा संसार में अपने जीबन ते बैर रखतै, बू कबऊ नांय खतम हैबे बारौ जीबन पाबेगौ। अगर कोई मेरी सेबा करबौ चाहतै तौ बाय मेरे पीछे आनों परैगौ और जाँपै मैं हूं मंई मेरौ सेबकऊ होगौ। जो कोई मेरी सेबा करैगौ तौ मेरौ परमेस्‍वर पिता बाकूं आदर दैबेगौ। “अब मेरौ जी व्‍याकुल है। मैं का कहूं, ‘हे पिता, जा संकट के समै ते मोय बचा’? पर जा संकट के समै काजैई तौ मैं आयौ हूं। हे पिता, अपने नाम की महिमा पिरकट कर।” बाई समै सुरग ते अबाज आयी, “मैंनें अपनी महिमा पिरकट करी है और मैं फिर ते करुँगो।” तब भीड़ के लोग जो मांपै खड़े जि सुन रये हते, कैहबे लगे कै, “बादर गरजौ है।” पर कछू दूसरे लोगन नें कही, “सुरग दूत नें बाते बात करीं हैं।” तब ईसू नें कही, “जि अबाज मेरे काजै नांय पर तुमारे भले काजै है। अब जा संसार के न्याय कौ समै आ गयौ है। जब जा संसार के राजा सैतान कूं बाहर निकार दियौ जाबैगौ। और जब मैं, धरती ते ऊंचे पै उठायौ जाऊँगो, तौ सब लोगन कौ ध्‍यान अपनी ओर खीचुँगो।” ऐसौ कैहके ईसू नें जि जता दियौ कै बू कैसी मौत मरबे जा रयौ है। तब जि सुनिकै लोगन नें ईसू ते कही, “हमनें व्‍यबस्था की जि बात सुनीं है कै, मसीह हमेसा जीबित रैहबेगौ जामारै तू कैसे कैह सकतै कै, ‘मनुस्‍य के बेटा’ कूं निस्चय ऊँचे पै उठायौ जाबेगौ? जि ‘मनुस्‍य कौ बेटा’ को है?” तब ईसू नें बिनते कही, “अब थोड़ेई समै तक उजीतौ तुमारे बीच में रैहबेगौ। जब तक उजीतौ तुमारे जौरें है चलते रहौ। कंऊ ऐसौ ना होबै कै अंधेरौ तुमें घेर लैबे चौंकि जो अंधेरे में चलतै, बू नांय जान्‍त कै बू कहाँ जा रयौ है। जब तक उजीतौ तुमारे संग है, उजीते पै भरोसौ करौ, जाते तुम उजीते की सन्‍तान है जाऔ।” ईसू जि बात कैहके चलौ गयौ और बिनते छिपौ रहो। ईसू नें बिनके काजै भौत सारे चमतकार दिखाये हते, फिरऊ बिन्‍नें बापै भरोसौ नांय करौ। जाते परमेस्‍वर की ओर ते बात बताबे बारे यसायाह कौ बू वचन पूरौ हो जो बानें कहौ है, “हे पिरभू, हमारे सन्देस पै कौन नें भरोसौ करौ है? पिरभू की सामर्थ कौन पै पिरकट भयी है?” जामारै बू लोग भरोसौ नांय कर सके, चौंकि यसायाह नें जा तरैह ते और कही हती, “बानें बिनकी आँख अंन्धी, और बिनकी बुद्धी कठोर कर दयी है। जाते ना तौ बे आँखन ते देखें, और बुद्धी समझ सकै। कऊं ऐसौ ना होबे कै बू अपने मन कूं मेरी ओर फिराबें और मैं बिनें भलौ चंगौ कर दऊं।” यसायाह नें जे बातें जामारै कही चौंकि बानें ईसू की महिमा देखी हती और वाके बारे में बातेंऊं करी हतीं। फिर यहुदी नेतन में ते भौतन नें बापै भरोसौ करौ। पर बे फरीसियन की बजैह ते जा बात कूं सबन के सामने खुलकै जामारै नांय मानते हते, चौंकि बिनें पिराथना घर ते निकारे जाबे कौ डर हतो। चौंकि बिनें परमेस्‍वर के दये भये सम्मान ते जादा आदमिन कौ दयौ भयौ सम्मान पिरेम हतो। ईसू नें तेज अबाज में कही, “जो कोई मोपै भरोसौ करतै, बू मोपैई नांय, बल्कि जानें मोकूं भेजौ है बापैऊ भरोसौ करतै। जो मोय देखतै, बू बाकूं देखतै जानें मोकूं भेजौ है। मैं जा संसार में उजीतौ बनकै आयौ हूं, ताकि जो कोई मोपै भरोसौ करैगौ, बू कबऊ अंधेरे में नांय रैहबेगौ। “अगर कोई मेरी बात सुनकें मेरी बात ना मानें तौ मैं बाय दोसी नांय ठहराऊंगो। चौंकि मैं जा संसार कूं दोसी ठहराबे काजै नांय, पर मैं जा संसार कौ उद्धार करबे आयौ हूं। जो कोई मोय नांय अपनाबे और मेरी सिछा कूं मानबे ते मनें करतै, बू निस्चितई दोसी ठहरायौ जाबेगौ, जो सिछा मैंनें दयी है, बेई बाय आखरी दिना में दोसी ठहरा दैबेगी। चौंकि जो कछू मैं कैह रयौ हूं बू अपनी ओर ते नांय कैह रयौ, पर जा पिता नें मोय भेजौ है बानें मोय जि आग्‍या दयी है, कै मोय का कैहनों और कैसे बोलनों है। और मैं जि जान्‍तू कै वाकी आग्‍या कबऊ नांय खतम हैबे बारे जीबन में लै जातै है। जामारै मैं जो कछू कैहतूं, बाय बैसेई कैहतूं जैसे परमेस्‍वर पिता ने मोते कही है।” फसह के तौहार ते पैहले कौ दिना हतो। ईसू जि जानतौ कै, “अब मेरौ बू समै आ गयौ है, जब मोय जा संसार कूं छोड़कै पिता के जौरें जानों है।” जा संसार में जो वाके अपने लोग हते, बिनते जैसौ पिरेम करतौ आयौ हतो बैसौई पिरेम अन्‍त तक बिनते करतौ रयौ। सैतान साम कूं खानों खायबे के समै तक सिमौन के बेटा यहूदा इस्करियोती के मन में जि डार चुकौ हतो कै बू ईसू कूं धोखे ते पकड़बा दैबे। ईसू जि जानतौ कै, “परमेस्‍वर पिता ने मेरे हातन में सब कछू दै दयौ है और मैं परमेस्‍वर के जौरें आयौऊं और परमेस्‍वर के जौरेंई जा रयौ हूं।” जामारै ईसू नें खानों खायबे पैते उठकै अपनों कुर्ता उतारौ और कमर में अँगौछा बांध लियौ। तब बू एक परात में पानी भरकै अपने चेलान के पाँम धोबे लगौ और अपनी कमर में बंधे अँगौछे ते पाँमन नें पौंछबे लगौ। फिर जब बू सिमौन पतरस के जौरें पौंहचौ तौ पतरस नें बाते कही, “हे पिरभू, का तू मेरे पाँमन नें धोबेगौ?” तब ईसू नें बाते कही, “तू अबई नांय जान्‍त कै मैं का कर रयौऊं, पर तू बाद में जान जाबैगौ।” पतरस नें ईसू ते कही, “मैं तोय अपने पाँम कबऊ नांय धोन दूँगो।” ईसू नें बाते कही, “अगर मैं तेरे पाँम नांय धोऊंगो तौ तेरौ मोते कोई सम्बन्ध नांय रैहबेगौ।” जापै सिमौन पतरस नें ईसू ते कही, “पिरभू, तब तौ मेरे पाँमन नेंई नांय, बल्कि मेरे हातन नें और मेरे सिरऊऐं धो दै।” तब ईसू नें बाते कही, “जो नहाय चुकौ है, बाय अपने पाँमन के सिबा और कछू धोबे की जरूरत नांय। चौंकि बू पूरी तरैह ते सुद्ध है। तुम लोग सुद्ध हो, पर सबके सब नांय।” ईसू अपने संग बिसबास घात करकै पकरबायबे बारेऐं जानतो हतो जामारै बानें कही हती कै, “तुम सबके सब सुद्ध नांऔ।” तब चेलान के पाँम धोबे के बाद ईसू नें अपनों कुर्ता लयौ फिर बैठकै बिनते बोलों, “का तुम समझतौ कै मैंनें तुमारे संग का करौऐं? तुम मोय, ‘गुरू’ और ‘पिरभू’ कैहतौ, और तुम ठीकई कैहतौ। चौंकि मैं बेई हूं। जामारै अगर मैंनें पिरभू और गुरू हैके तुमारे पाँम धोये हैं, तौ तुमऊऐं एक दूसरे के पाँम धोने चहिऐं। चौंकि मैंनें तुमें नमूना दिखायौ है, कै जैसौ मैंनें तुमारे संग करौ है, बैसौई तुमऊं करै करौ। मैं तुमते सच कैह रयौऊं, सेबक अपने मालिक ते बड़ौ नांय और ना भेजौ भयौ बाते बड़ोऐ जानें बाय भेजौ है। तुमतौ सच्‍चाई जानतौ अगर तुम इन बातन पै चलोगे तौ तुम धन्य हो। “मैं जि तुम सबन के बारे में नांय कैह रयौ, मैं जान्‍तू कै मैंनें किन किन लोगन कूं चुनों है। पर जि जामारै भयौ है कै पबित्र सास्त्र कौ बू वचन पूरौ होबै, ‘जानें मेरी रोटी खायी बुई मेरे बिरोध में है गयौ।’ “अब मैं पैहले तेई तुमें जि जामारै बता रयौऊं, कै जब ऐसौ होबै तब तुम भरोसौ करौ कै बू मैंई हूं। मैं तुमते सच कैह रयौऊं, जो मेरे भेजे भयेऐं अपनाबतै, बू मोय अपनाबतै और जो मोय अपनाबतै, बू बाय अपनाबतै जानें मोकूं भेजौ है।” जि कैहबे के बाद ईसू की आतमा भौत व्‍याकुल भयी और जि गबाही दयी, “मैं तुम लोगन ते सच कैह रयौऊं तुम में तेई एक मोय धोखे ते पकड़बा दैबेगौ।” चेला एक दूसरे कूं देखत रहे, बे समझ नांय पा रये हते कै बू कौन के बारे में कैह रयौ है। ईसू के चेलान मेंते एक चेला, जाय बू पिरेम करतौ, बू वाके बगल में बैठौ भयौ हतो। तब सिमौन पतरस नें बाते इसारौ करकै कही, “पूंछ तौ सई, बू कौ है?” तब बा चेला नें धीरे ते ईसू ते पूंछी, “हे पिरभू, बू कौन है?” ईसू नें कही, “बू बेईऐ, जाय मैं जि रोटी कौ टुकड़ा जा कटोरा में डुबोयकै दुंगो।” बानें रोटी कौ टुकड़ा डुबोयकै सिमौन इस्करियोती के बेटा यहूदा कूं दयौ। यहूदा के टुकड़ा लेतेई सैतान बामें घुस गयौ। तब ईसू नें बाते कही, “तोय जो करनों है, बाय जल्दी कर।” पर मांपै बैठे भयेन में कोई जि नांय समझ पायौ कै ईसू नें बाते जि बात चौं कही। यहूदा के जौरें रुपईयन की थैली रैहती जामारै कछू लोग जि समझ रये हते कै ईसू बाते कह रयौ है कै तौहार काजै जरूरी सामान खरीद लै या जि कैह रयौ है कै गरीबन कूं कछू दै दै। तब यहूदा रोटी कौ टुकड़ा लैके बाई समै बाहर चलौ गयौ। जि रात कौ समै हतो। जब यहूदा बाहर चलौ गयौ तब ईसू नें कही, “मुझ, ‘मनुस्‍य के बेटा’ की महिमा पिरकट भयी है और मेरे द्वारा परमेस्‍वर की महिमा पिरकट होगी। अगर मेरे द्वारा परमेस्‍वर की महिमा पिरकट होतै, तौ परमेस्‍वरऊ अपने में मुझ, ‘मनुस्‍य के बेटा’ की महिमा पिरकट करैगौ और बू जल्दी अई महिमा पिरकट करैगौ। “हे मेरे प्यारे बालकौ! मैं और थोड़े समै तक तुमारे संग हूं। तुम मोय ढ़ूढोगे, और जो मैंनें यहुदियन ते कही हती, अब तुमतेऊ बेई कैह रयौऊं, मैं ज्हाँपै जा रयौऊं, मांपै तुम नांय आ सकत। “मैं तुम लोगन कूं एक नयी आग्‍या दै रयौऊं, तुम एक दूसरे ते पिरेम करौ जैसौ मैंनें तुम लोगन ते पिरेम करौ है, बैसेई तुम एक दूसरे ते पिरेम करौ। अगर तुम एक दूसरे ते पिरेम करौगे तौ बाई ते सब लोग जानिंगे कै तुम मेरेई चेला हो।” सिमौन पतरस नें ईसू ते कही, “हे पिरभू, तू काँपै जा रयौ है?” ईसू नें बाते कही, “मैं जाँपै जा रयौऊं, माँपै तू जा समै मेरे पीछे नांय सकत। पर तू बाद में मेरे पीछे आबेगौ।” पतरस नें बाते पूँछी, “हे पिरभू, मैं जा समै तेरे पीछे चौं नांय आ सकत? मैं तेरे काजै अपने पिरान दै दूँगो।” ईसू नें बाते कही, “का तू मेरे काजै अपनों पिरान दैबेगौ? मैं तोते सच सच कैह रयौऊं मुरगा के बांग दैबे ते पैहले तू मोय तीन बार पैहचानबे ते इनकार करैगौ।” ईसू नें अपने चेलान ते कही, “तुम मन कूं कच्‍चौ मत करौ। तुम परमेस्‍वर पै भरोसौ करौ और मोपैऊ भरोसौ करौ। मेरे पिता के घर में भौत रैहबे काजै जगैह है, अगर ऐसौ ना होतौ तौ मैं तुमते कह देतौ, चौंकि मैं तुमारे रैहबे काजै जगैह तैयार करबे जाय रयौऊं। मैं म्हांपै जायके तुमारे काजै जगैह तैयार करबे के बाद दुबारा तुमें अपने संग अपने पिता कै घर लै जाऊंगौ, जाते ज्हां मैं रहूं म्हांपै तुमऊ रहौ। और ज्हांपै मैं जा रयौऊं म्हां कौ रस्ता तुम जानतौ।” थोमा नें ईसू ते कही, “हे पिरभू, हम तौ जि नांय जानत कै तू कां जाय रयौए। तौ म्हां कौ रस्ता कैसे जान सकतै?” ईसू नें बाते कही कै, “मैं रस्ता, सच्‍चाई और जीबन हूं। बिना मेरे कोई पिता के जौरें नांय पौहच सकत। अगर तू मोय जान जातौ तौ परम पिता कूंअंऊ जान जातौ और अब तुम बाय जानतौ और बाय देखऊ चुकेऔ।” फिलिपुस नें ईसू ते कही, “हे पिरभू, हमेंऊं परम पिता के दरसन करबा दै, हमारे काजै इतनोंई भौत है।” ईसू नें कही, “फिलिपुस मैं इतने समै तक तुम लोगन के संग रयौ, फिरऊ तू मोय नांय जानत? जानें मोय देखौए बानें परम पिता कूं देखौए। फिर तू कैसे कैह रयौ है कै, ‘मोय परम पिता के दरसन करबा दै’? का तोय भरोसौ नांय कै मैं पिता में हूं और पिता मोमें है? मैं जो सिछा देतूं बू मेरी खुद की सिछा नांय, पर मोमें रैहबे बारौ पिता मेरे द्वारा अपने काम करतै। मोपै भरोसौ करौ और मेरी जा बात पै भरोसौ करौ, कै मैं पिता में हूं और पिता मोमें है, नांय तौ बिन महान कामन की बजैह तेई जा बात पै भरोसौ करौ। मैं तुमते सच कैह रयौऊं, जो मोपै भरोसौ करतै, बू खुद बिन कामन कूं करैगौ जिनें मैं करतूं। सच में बू इन कामन तेऊ बड़े काम करैगौ, चौंकि मैं पिता के जौरें जा रयौऊं। जो कछू तुम मेरे नाम ते मांगौगे, मैं बू सब कछू तुमारे काजै करूंगो, जाते बेटा में पिता की महिमा होबें। अगर तुम मेरौ नाम लैके मोते जो कछू मांगौगे, बू मैं तुमारे काजै करूंगो। “अगर तुम मोते पिरेम करौगे, तौ मेरी आग्‍यान कूं मानौंगे। मैं पिता ते बिनती करूंगो और बू तुमें एक दूसरौ सहायक देबेगौ, जो हमेसा तुमारे संग रैहबेगौ। बू सच कौ आतमाएं, बाय दुनियां नांय अपनांय सकत, चौंकि बू ना तौ बाय देखतै और ना पैहचानतै। पर तुम बाय पैहचानतौ, चौंकि बू तुमारे संग तुम में रैबेगौ। “मैं तुम लोगन कूं अनाथ छोड़कै नांय जाऊंगो। मैं तुमारे जौरें आऊंगौ। थोड़े समै कै बाद जि दुनियां मोय फिर नांय देखेगी, पर तुम मोय देखौगे। चौंकि मैं जीबित रहुंगो और तुमऊं जीन्दे रहौगे। बा दिना तुम जान जाऔगे कै, मैं पिता में हूं और तुम मोमेंऔ और मैं तुम में हूं। जो मेरी आग्‍या कूं मानतै और उनपै चलतै बू मोते पिरेम करतै। जो मोते पिरेम करतै, बू मेरे पिता तेऊ पिरेम करैगौ और मैंऊ बाते पिरेम करुंगो, और मैं अपने आपकूं बापै उजागर करुंगो।” दूसरे यहूदा जो यहूदा इस्करियोती नांय हतो, बानें बाते कही, “हे पिरभू ऐसौ चौंऐं कै तू अपने आपकूं हम पै उजागर करबौ चांहतै और जा दुनियां पै नांय?” तब ईसू नें बाते कही, “अगर कोई मोते पिरेम करैगौ, तौ बू मेरे वचन कौ पालन करैगौ और बाते मेरौ परमेस्‍वर पिता पिरेम करैगौ और हम वाके जौरें आयेंगे और वाके संग रैहबिंगे। जो मोते पिरेम नांय करत बू मेरे वचन पै नांय चलत। जि सिछा जाय तुम सुन रयेऔ, बू मेरी सिछा नांय, जि तौ मोय भेजबे बारे मेरे परमेस्‍वर पिता की है। “अब जब मैं तुमारे संग हूं, जि बात मैंनें तुमते कह दयी है। पर सहायक पबित्र आतमा जाय परमेस्‍वर पिता मेरे नाम ते भेजैगौ, तुमें सब कछू बताय देगौ और जो कछू मैंनें तुमते कही है, बिनें तुमें याद कराबैगौ। मैं तुमारे काजै अपनी सान्‍ती छोड़ रयौऊं, मैं तुमें खुद अपनी सान्‍ती दै रयौऊं। पर मैं तुमें जैसे जगत के लोग देतै बैसे नांय दै रयौ। तुमारौ मन ब्याकुल नांय होय और बाते मत डरपियों। “तुमनें मोय कैहत भये सुनों हतो कै, ‘मैं तौ जाय रयौऊं और तुमारे जौरें फिर आऊंगौ।’ अगर तुमनें मोते पिरेम करौ होतो तौ तुम मोते खुस होते, चौंकि मैं पिता के जौरें जाय रयौऊं और मेरौ पिता मोते महान है। जि सब बात मैंनें हैबे ते पैहलेई तुमें बताय दयी हैं, कै जब जे बात हौंय तौ तुम भरोसौ करौ। “मैं जादा समै तक तुमते बात नांय करुंगो, चौंकि जा जगत कौ राजा सैतान आय रयोए। पर मोपै वाकौ कोई जोर नांय चलत, जि बात तौ जामारै है रयी है कै जा जगत के लोगन कूं पतौ चल जाय कै, मैं पिता ते पिरेम करतूं और परमेस्‍वर पिता नें मोय जैसी आग्‍या दयी है, मैं बैसौई काम करतूं। “अब उठो, य्हांते चलें।” ईसू नें कही, “सच्‍ची अंगूर की बेल मैंईऊं, और मेरौ पिता किसानें। हरेक डार जापै फल नांय लगत बाय बू काट देतुए, और जापे फल लगतें बाय बू छांटके सफाई करतै जाते बापै और जादा फल आयें। एसेई तुम लोगऊ जो सिछा मैंनें तुमें दई है, बा की बजैह ते पैहलेई साफ है गयेऔ। तुम मोमें बने रहौ और मैं तुम में बना रहूंगौ। जैसे एक डार अपनी बेल ते अलग हैकें फल नांय लाय सकत। बैसेई तुमऊं तब तक सफल नांय है सकत जब तक मोमें नांय रहौगे। “बू अंगूर की बेल मैंऊ और तुम डारिऔ। जो मोमें रैहतै, और जामें मैं रैहतू बू भौत फलतुए। चौंकि तुम मेरे बिना कछू नांय कर सकत। अगर कोई मोमें नांय बनों रैहतू तौ बू बा डार की तरैह ते है जो काटकै फेंक दयी जाते और बू डार सूख जातै। फिर बाकूं बटोर के आग में झौककै जराय दयौ जातै। अगर तुम मोमें बने रहौ तौ मेरौ वचन तुम में बनों रैहतै, तौ चाहे जो मांगौ बू तुमें मिल जाबेगौ। मेरे पिता की महिमा जाई ते होतिए, कै तुम भौतसे फल लाऔ तब तुम मेरे चेला कहे जाऔगे। “जैसे मेरे पिता ने मोते पिरेम करौ है। बैसेई मैंनेंऊ तुमते पिरेम करौ है और तुम मेरे पिरेम में बने रहौ। अगर तुम मेरी आग्‍या मानौगे, तौ तुम मेरे पिरेम में बने रहौगे, बैसेई जैसे मैं अपने पिता की आग्‍या कूं मान्‍त भये वाके पिरेम में बनों भयौऊं। “मैंनें जि बात तुमते जामारै कहीएं, कै मेरौ आनन्द तुममें बनो रहै और तुमारौ आनन्द पूरौ है जाय। जि मेरी आग्‍या है कै तुम आपस में पिरेम करौ, बैसेई जैसे मैनें तुमते करौऐ। जाते बड़ौ और कोई पिरेम नांय कै कोई अपने मित्र के काजै अपनी जान दै देय। अगर तुम मेरी आग्‍या मानौगे तौ तुम मेरे मित्र हो। अब मैं तुमें कबऊ सेबक नांय कहुंगो चौंकि कोई सेबक नांय जानत, कै वाकौ मालिक का कर रयौ है। पर मैं तुमें मित्र कैहतूं चौंकि मैंनें तुमें बे सब बात बताय दयी हैं जो मैने अपने पिता ते सुनीऐं। तुमने मोय नांय चुनों पर मैंनें तुमें चुनों है कै तुम जाऔ और भौतसे फल लाऔ और बे फल तुम में हमेसा बनो रहें और मेरौ नाम लैकें तुम जो कछू पिता ते मांगौगे तौ बू तुमें दै देगौ। मैं तुमें जि आग्‍या दै रयौऊं कै तुम एक दूसरे ते पिरेम करौ। “अगर दुनियां के लोग तुमते बैर करतें तौ याद रखौ कै बे तुमते पैहले मोते बैर करतें। अगर तुम जा दुनियां कै होते, तौ लोग तुमते पिरेम करते। पर तुमतौ जा दुनियां के नांय हत, तुमें तौ मैंनें चुन लयौऐ और जाई बजैह ते जा दुनियां लोग तुमते बैर करतें। मेरे वचन कूं याद रखौ एक सेबक कबऊ अपने मालिक ते बड़ौ नांय, अगर बे मोय सतातें तौ बे तुमेंऊ सतांगे और उन्‍नें मेरौ वचन मानौऐ तौ बे तुमारौऊ मानिंगे। मेरे नाम की बजैह ते बे तुमारे संग ऐसौ करिंगे, चौंकि बे बाय नांय जानत जानें मोय भेजौऐ। अगर मैं नांय आबतौ और बिनते बात नांय करतौ तौ बे काऊ पाप के दोसी नांय होते, पर अब तौ बिनके जौरें पापन ते बचबे कौ कोई बहानौ नांय। जो मोते बैर करतुए बू मेरे पिता ते बैर करतुए। अगर मैं बिनके बीच बे काम नांय करतौ जो मैंनें करे हैं, तौ बे पाप कै दोसी नांय होते। पर अब तौ बे उन कामन कूं देख चुके है, तबऊ बे मोते और मेरे पिता दोनोंन ते बैर करतें। पर जि तौ जामारै भयौए कै बिनकी व्‍यबस्था में लिखे भये वचन पूरे होंय, ‘उन्‍नें बेकार मेंई मोते बैर करौऐ।’ “जब बू सहायक (जो सच्‍चाई कौ आतमाऐ) जो पिता की ओर ते आबतुऐ, जाय मैं पिता की ओर ते भेजूंगौ और बू मेरी ओर ते गबाही देबेगौ। और तुमऊ मेरी गबाही देओगे चौंकि तुम सुरू तेई मेरे संग रहेऔ।” “जि बात मैंनें तुमते जामारै कहीयें, कै तुमारौ भरोसौ डगमगाय नांय जाय। बे तुमें पिराथना घर में ते निकार दिंगे। अब बू समै आय रयौ है तुम मेंते काऊऐ मारके सोचिंगे कै बे परमेस्‍वर की सेबा कर रये हैं। बे ऐसौ जामारै करिंगे चौंकि बे नांय तौ परमेस्‍वर पिता कूं जान्‍त और नांय मोय। मैंनें जि सब बात तुमते जामारै कहिऐ, जब उनकौ समै आबे तब तुमें याद रहै बिनके बारे में तुमकूं बताय दयौ हतो। सुरुआत में जि बात मैने तुमें जामारै नांय बताई चौंकि मैं तुमारे संग हतो। “पर अब मैं वाके जौरें जाय रयौऊं जानें मैं भेजौऊं और अब तुम मेंते मोते कोई नांय पूछैगौ कै, ‘तू कां जाय रयौ है?’ मैंनें तुमें जि बात बताईऐं जामारै तुमारे मन दुख ते भर गयेऐं। अब मैं तुमते सच कैह रयौऊं, कै मेरौ जायबौ तुमारे काजै भौत अच्‍छौ है, चौंकि अगर मैं नांय जाऊं तौ बू मददगार तुमारे जौरें नांय आबैगौ। पर जब मैं जाऊंगौ तब बाय भेजुंगो। और जब बू आबैगौ तब बू जि साबित करैगौ कै पाप, धारमिकता और परमेस्‍वर के न्याय के बारे में जा दुनियां के लोग गलत हैं। बू लोगन कूं जि बताबेगौ कै मोपै भरोसौ न करबौ पाप है। धारमिकता के बारे मेंऊ बताबेगौ चौंकि मैं पिता के जौरें जाय रयौऊं और बे मोय फिर कबऊ नांय देखिंगे। और बू परमेस्‍वर के न्याय के बारे में बताबेगौ कै परमेस्‍वर जा दुनियां के सरदार सैतान कूं दन्‍ड दैबेगौ। “तुमते कैहबे काजै मेरे जौरें भौत सी बात हैं। पर तुम बिनें अब सहन नांय कर सकत। पर जब सत्‍य कौ आतमा आबैगौ तौ बू तुमें पूरौ सच्‍चौ रस्ता दिखाबैगौ चौंकि बू अपनी ओर ते कछू नांय कैहबेगौ। बू जो कछू सुनैगौ बेई बताबैगौ। और जो कछू हैबे बारौ है बाय उजागर करैगौ। बू मेरी महिमा करैगौ चौंकि जो कछू बातें मैं तुमें कैहबे काजै कहुंगो बू तुमें बताबेगौ। जो कछू पिता कौ है बू मेरौऐ। जामारै मैंनें तुमते कहिऐ कै पबित्र आतमा तुमें बुई बताबेगौ जो कछू बाय मोते मिलैगौ। “ईसू नें आगे कही, ‘कछू समै बाद मोय ओर जादा नांय देख पाऔगे। और वाके थोरे समै बाद तुम मोय फिर देखौगे।’ ” जब ईसू के कछू चेलान ने कही, “जि हमे का बताय रयौए? ‘थोरी देर बाद तुम मोय नांय देख पाऔगे और थोरी देर बाद तुम मोय फिर देखौगे,’ और ‘मैं परमेस्‍वर पिता कै जौरें जाय रयौऊं।’” फिर बे कैहबे लगे, “का है जि थोरी देर बाद? जाके बारे में बू हमे बताय रयौए हम नांय जानत।” ईसू समझ गयौ कै बे जा बारे में बाते सबाल पूछबौ चांहते, जामारै बानें बिनते कही, “का तुम बा बात पै सोच बिचार कर रहे हो कै जो बात मैंनें तुमते कहिऐ, ‘कछू समै बाद मोय ओर जादा नांय देख पाऔगे। और वाके थोरे समै बाद तुम मोय फिर देखौगे’? मैं तुमते सच कैह रयौऊं, तुम बिलाप करौगे और रोओगे पर जि दुनियां खुस होबैगी। तुमें दुख होगौ पर तुमारौ दुख आनन्द में बदल जाबैगौ। जब काऊ औरत कै बालक पैदा हैबै कौ समै होतुऐ तौ बाय पीड़ा होतै। पर जब बालक पैदा है जातै, तौ तब बू जा आनन्द ते कै जगत में एक बालक पैदा भयौए बू आनन्दित हैकें अपने बा पीड़ा कूं भूल जाबतै। अब तुम सबऊ जाई तरैह ते दुखी हुंगे और मैं तुमते जब दुबारा मिलूंगौ तब तुमारौ मन आनन्द में बदल जाबैगौ और तुमारे बा आनन्द कूं तुमते कोई छिनांय नांय पाबेगौ। बा दिना तुम मोते कोई सबाल नांय पूछौगे। मैं तुमते सच कैह रयौऊं, मेरे नाम ते तुम जो कछू मेरे पिता ते मांगौगे बू बाय तुमें दै देगौ। अब तक तुमने मेरे नाम ते कछू नांय मांगौ। मांगौ और तुमें मिल जाबैगौ जाते तुमारौ आनन्द पूरौ है जाबैगौ। “मैंनें जि बात तुमें दृस्‍टान्‍त में बतायीऐं। अब बू समै आय रयौए जब मैं तुमते दृस्‍टान्‍तन में जादा देर तक बात नांय करूंगो। पर परम पिता के बारे में खोलकें तुमें बताऊँगो। बा दिना तुम मेरे नाम ते पिता ते मांगौगे। और मोय जि कैहबे की जरूरत कै तुमारे काजै पिता ते मांगुगो। मेरौ पिता खुद तुमते पिरेम करतुए चौंकि तुमने मोते पिरेम करौ है और तुमने जि भरोसौ करौ है कै मैं परमेस्‍वर की ओर ते आयौऊं। मैं पिता के ज्हां ते जा जगत में आयौऊं अब संसार कूं छोड़ के पिता के जौरें जाय रयौऊं।” ईसू के चेलान ने कही, “देख अब तू हमे बिना काऊ दृस्‍टानत के खुलके बताय रयौ है। अब हम समझ गयेऐं कै तू सब कछू जानतैं अब तोय जि जरूरत नांय के हम तोते सबाल पूंछे जाते हमे जि भरोसौ हे गयौऐ। कै तू परमेस्‍वर की ओर ते आयौए।” ईसू नें बिनते कही, “का तुमें अब भरोसौ भयोऐ? अब बू समै आय रयौए, पर आय गयौए, जब तुम तितर-बितर है जाऔगे और तुम मेंते हरेक अपने अपने घर कूं लौट जाबैगौ और मोय अकेलौ छोड़ देओगे। पर मैं अकेलौ नांऊ चौंकि पिता मेरे संगै। “मैने जे बात तुमते जामारै कही, कै मेरे द्वारा तुमें सान्‍ती मिले। जा जगत में तुमें दुख मिलौ है, पर तुम हिम्मत रखौ, मैने जगत कूं जीत लयौए।” जि बात कहिकें ईसू नें आकास की ओर देखौ और बोलौ, “हे पिता जी, बू समै आय चुकौए अपने बेटा कूं महिमा दै ताकि तेरे बेटा तेरी महिमा कर सकें। तेने बाय सबरी मनुस्‍य जाति पै अधिकार दयौ है कै बू, हरेक बाको जो तेने बाय दयौए बाय कबऊ नांय खतम हैबे बारौ जीबन देय। बाय कबऊ नांय खतम हैबे बारौ जीबन तौ जिऐ कै बे तोय एकमात्र सच्‍चे परमेस्‍वर कूं और ईसू मसीह कूं जानलें जाकूं तेने भेजौए बाय, जो काम तेने मोय दये हते, उन्‍नें पूरौ करकें पूरी धरती पै मैंनें तोय महिमाबान करौ है। हे पिता जगत की सुरूआत ते पैहले जो महिमा तेरे य्हां मोय मिली हती बा महिमा ते मोय महिमाबान कर। “जिन आदमिन कूं जगत में ते तैनें मोय दयौ है, मैंनें बिनपै तेरी महिमा कौ नाम उजागर करायोऐ। बे लोग तेरे हते पर तेने बिनकूं मोय दे दयौए और बिन्‍नें तेरे वचन कौ पालन करौऐ। अब बे जानतै कै हरेक चीज जो तेने मोय दई है, बू सब तेरी ओर तेऐं। मैंनें उन्‍नें बू सिछा दयी है जो तेने मोय दयी है और उन्‍नें बाकूं अपनांयौ है। बे जि जरूर जानतै कै मैं तेरी ओर ते आयौऊ। और उन्‍नें भरोसौ है गयौऐ कै तेने मोय भेजौए। मैं बिनके काजै पिराथना कर रयौऊं। मैं जगत के काजै पिराथना नांय कर रयौ पर बिनके काजै कर रयौऊं, जिनकूं तेने मोय दयौ है। जो तेने मोय दये हैं चौंकि बे तौ तुमारेई हैं, बे सब मेरेऐं, जो तेरेऐं और जो तेरौए बू मेरौऐ। और मैंनें बिनके द्वारा महिमा पायीऐ। मैं अब और जादा समै जगत में नांय रहूंगौ। पर बे जगत में रहिंगे अब मैं तेरे जौरें आय रयौऊं हूं। हे पबित्र पिता अपने बा नाम सामर्थ ते उनकी रछा कर जो नाम तेने मोय दयौ है ताकि जैसे तू और मैं एकऐ, बेऊ एक है सकें। जब मैं बिनके संग हतो, तब मैंनें तेरे बा नाम की सामर्थ ते उनकी रछा करी, जो नाम तेने मोय दयौ हतो। और बिनमें ते कोई नांस नांय भयौ, सिबाय बा आदमी के जानें नांस की ओर ले जाबे बारे रस्ता कूं चुन लियो, ताकि सास्त्र कौ बू वचन पूरौ होय। “अब मैं तेरे जौरें आय रयौऊं, पर जि बात मैं जा जगत में रैहत भये कैह रयौऊं ताकि बे अपने हिरदयन में मेरे पूरे आनन्द कूं पाय सकें। मैंनें तेरौ वचन उन्‍नें दियौ है पर संसार ने बिनते नफरत करी चौंकि बे सांसारिक नांय। बैसेई जैसे मैं संसार कौ नांऊ। मैं जि पिराथना नांय कर रयो, कै तू उन्‍नें संसार ते निकार लै, बल्कि जि पिराथना कर रयौऊं कै तू बिनकी दुस्‍ट ते रछा कर। बे संसार के नांय, बैसेई जैसे मैं संसार कौ नांऊ। सच के द्वारा तू उन्‍नें अपनी सेबा के काजै पबित्र कर। तेरौ वचन सच्‍चौ है। जैसे तेने मोय जा संसार में भेजौऐ, बैसे ही मैंनें उन्‍नें संसार में भेजौए। मैं बिनके काजै खुद कूं पबित्र हैकै तेरी सेबा कर रयौ हूं, ताकि बेऊ सच के द्वारा पबित्र हैकै खुद कूं तेरी सेबा कर सकें। “किन्‍तु मैं केवल उनई के काजै पिराथना नांय कर रयौऊं, पर बिनके काजैऊ कर रयौऊं इनकी सिछा ते मोमें भरोसौ करिंगे। है पिता मैं जि पिराथना कर रयौऊं के बे सब एक होंय। बैसेई जैसे तू मोमें है और मैं तोमेंऊं में। बेऊ हममें एक हों। ताकि संसार जि भरोसौ करे कै मोय तेने भेजौऐ। और बू महिमा जो तेने मोय दयीऐ और बू मैने उन्‍नें दयी है। बेऊ बैसेई एक है सके जैसे हम एक हैं। मैं उनमें हुंगो और तू मोमें होगौ, जाते बे सब पूरी तरैह ते हमारे संग एक है जाय और जगत जान जाबै कै तैने मोय भेजौए, जैसे तू मोते पिरेम करतै, बैसेई बिनतेऊ पिरेम करतै। “हे पिता, जो लोग तेने मोय सौंपेऐ, मैं चाहतूं कै ज्हाँ मैं हूं, बेऊ मेरे संग मेरी बा महिमा कूं देख सकें जो तेने मोय दयी है। चौंकि संसार की रचना तेऊ पहले तेने मोते पिरेम करौ है। “हे धरमी पिता, संसार नें तोय नांय जानों पर मैंनें तोय जान लयौऐ और मेरे चेलाऊ जानतै कै तैनें मोय भेजौऐ। मैंनें तेरे सामर्थी नाम कोई ग्‍यान करायौ है, और जइकौ ग्‍यान करबातौ रहूँगो, ताकि बू पिरेम जो तेने उनमें हैकै दिखायौऐ, उन मेंऊ होय। और मैंऊं उनमें रहूं।” जि पिराथना करकै ईसू अपने चेलान के संग किद्रोन नामक घाटी के बा पार गये। म्हापे एक बगीचा हतौ। ईसू नें अपने चेलान के संग बा बगीचा पिरबेस करौ। बिस्‍बास घाती यहूदा बा जगैह कूं पैहले ते जानतो, चौंकि ईसू अपने चेलान के संग मांपै आबत जाबत रैहतो। जामारै बू रोमी सिपाइयन की टोली, पिरधान पुरोहित और फरीसियन के भेजे भये बड़े पिराथना घर के पैहरेदार, जिनके हातन में मसाल, लालटेन और हथियार हते। मांपै आय पौहचों। तब ईसू जि जानकै कै मरे संग का हैबे बारौ है, आगे आयौ और बिनते बोलौ के, “तुम कौन कूं ढ़ूढ रयेऔ?” बिन्नें कही, “कै नासरत के रैहबे बारे ईसू कूं।” ईसू नें कही कै, “बू मैंऊं।” तब धोके ते पकरबायबे बारौ यहूदा म्हांपै ठाड़ौ हतो। जैसेई ईसू नें बिनते जि कही कै, “बू मैंऊ,” बे तुरंत पीछे हटकै धरती पै गिर परै। जाके बाद फिरते ईसू ने बिनते पूंछी, “तुम कौन कूं ढ़ूढ रयेऔ?” बिन्‍नें कही, “नासरत के रैहबे बारे ईसू कूं।” ईसू नें कही, “मैं तुमते कह चुकौ हूं कै बू मैंईऊं, अगर तुम मोय ढुढ रयेऔ तौ इन लोगन कूं जान देऊ।” जि बात ईसू नें जामारै कही, कै बू वचन पूरौ होय कै “जिनकूं तैनें मोय दयौ उनमे ते मैने एकऊ कूं नांय खोयौ।” फिर सिमौन पतरस नें जाके जौरें तलबार हती अपनी तलबार निकारी और यहुदी महा पुरोहित के सेबक कौ कान काट दियौ। बा सेबक कौ नाम मकखुस हतो। फिर ईसू नें पतरस ते कही, “कै तलबार कूं म्यान में रख लै। जो दुख कौ कटोरा पिता नें मोय दयौए का मैं बाय नांय पीऊं?” फिर रोमी सिपाही, सूबेदार और यहुदी बड़े पिराथना घर के पैहरे दारंनें ईसू कूं बन्दी बनांय लयौ। और बाय बांध के सबनते पैहले हन्‍ना के जौरें लै गये, चौंकि हन्‍ना बा साल के महा पुरोहित कैफा कौ ससुर हतो। जि कैफा बेई आदमी हतो जानें यहुदी नेतन कूं जि सलाह दयी हती के सब लोगन के काजै एक आदमी कौ मर जाबौ अच्‍छौ है। सिमौन पतरस और एक और चेला ईसू के पीछे है लये। महा पुरोहित बा चेला कूं अच्‍छी तरैह ते जानतो हतो, जामारै ईसू के संग बू महा पुरोहित कैफा के आंगन में घुस गयौ। पर पतरस बाहर द्वार पैई ठाड़ौ रैह गयौ। तब महा पुरोहित की जान पैहचान बारौ दूसरौ चेला बाहर आयौ और द्वारपालिन ते कैहके पतरस कूं भीतर लै आयौ। जापै द्वारपालिन ने पतरस ते कही, “का तू ईसू कौ चेला नांय?” पतरस ने जबाब दयौ, “नांय मैं नांऊ।” ठन्‍ड भौत हती जा बजैह ते सेबक और पैहरेदार आंच पै ताप रये हते और पतरसऊ आंच पै तापबे लगौ। तब महा पुरोहित ने ईसू ते वाके चेला और वाकी सिछा के बारे में पूंछी। ईसू नें जबाब दयौ, “मैंनें संसार ते खुलकै बात करीं पिराथना घर और बड़े पिराथना घर में ज्हां पै सब यहुदी इकठ्‌ठे होते मैंनें सबन कूं सिछा दई। मैंनें कोई बात दुबक के नांय करी। फिर तू मोते चौं पूछ रयौ है? मैंनें का कहिऐ बिनते पूंछ जिननें सुनीए। जो मैंनें कही है बू जरूर जानत होंगे।” जब बानें जि कही, तब पिराथना घर के एक पेहरेदार ने ईसू के थप्पड़ मारौ और कही, “तेरी महा पुरोहित ते जबान लड़ाबे की हिम्मत कैसे भई?” ईसू नें जबाब दयौ, “मैंनें कौन सी गलत बात कहीए, तू साबित कर कै का गलत है। अगर मैने सच कहिए तौ तू मोय चौं मारतुए?” फिर हन्‍ना नें ईसू कूं बंधे भऐई महा पुरोहित कैफा के जौरें भेज दयौ। अबऊ सिमौन पतरस ठाड़ौ आंच ते ताप रयौ हतो। तब बिन्‍नें बाते कही, “का तू ईसू कौ चेला नांय?” पतरस ने जबाब दयौ, “नांय मैं नांऊ।” महा पुरोहित के एक सेबक ने जो बाको सम्बन्धी हतो जाकौ पतरस ने कान काटो हतो। बानें पूछी, “का मैंनें तोय बगीचा में ईसू के संग नांय देखौ?” जापे पतरस ने एक बार फिरते मने कर दयी और तबई मुरगा नें बांग दई। फिर ईसू कूं सबेरे के समै में कैफा के घर ते रोमी राज भवन में ले गये। पर यहुदी लोग राज भवन में जायबौ नांय चाहत हते कै कऊं बे असुद्ध नांय है जाय और फसह कौ भोजन नांय खाय सकें। तब पिलातुस बिनके जौरें बाहर आयौ और बोलो जा आदमी के ऊपर तुम का दोस लगाबतौ? तब बिन्‍नें बाते कही, “अगर जि दोसी नांय होतौ तौ हम जाय तेरे पास चौं लाते?” जापे पिलातुस बोलो, “जाय तुम लै जाऔ और अपनी व्‍यबस्था के अनुसार जाकौ न्याय करौ।” यहुदियन ने बाते कही, “हमें काऊए मौत की सजा दैबे को अधिकार नांय।” ऐसौ जामारै भयौ कै ईसू नें जो बात अपनी मौत के बारे में कही बू पूरी है सकै। जब पिलातुस किले में चलौ गयौ और ईसू कूं बुलायकै बाते पूछी, “का तू यहुदियन कौ राजाए?” ईसू नें जबाब दयौ, “कै जि बात तैने मोए जानबे के काजै कही है या काऊ नें तोए जि बात पूंछबे के काजै कही है?” पिलातुस ने जबाब दयौ, “तू का सोचतुए कै मैं यहुदीऊ? तेरे लोगन और पिरधान पुरोहित ने तोय मेरे हातन में सोंपौए। तैने का करौ है?” ईसू नें जबाब दयौ, “मेरौ राज जा संसार कौ नांय। अगर मेरौ राज जा संसार के काजै होतो तौ मेरे लोग लड़ते और मोय यहुदियन के हातन में नांय जान देते। पर अब मेरौ राज जा संसार को नांय।” जापे पिलातुस बौलो, “तो का तू राजाए?” ईसूने जबाब दयौ, “तू खुदई तौ कह रयौए कै मैं राजा हूं। मैं तौ जाई काजै पैदा भयौऊं जाई बजे ते मैं जा संसार में आयौऊ कै सच्‍चाई की गबाही दऊं और बू हरेक आदमी जो सच्‍चाईऐ के पच्‍छ में हतै। बू मेरौ वचन सुनतुए।” पिलातुस ने बाते पूछी, “सच्‍चाई काऐ?” जि बात कैहके बू बाहर गयौ और यहुदिन ते बोलो, “मैं जा आदमी में कोई दोस नांय पाबतु। पर तुमारी जि रीति है कै तुमारे काजै फसह के तौहार पै काऊ एक बन्दी कूं छोड़ दूं। तौ तुम का चांहतौ के मैं तुमारे काजै यहुदियन के राजा कूं छोड़ दूं?” जापै बे चिल्‍लायकै कैहबे लगे, “कै जाय नांय पर बरअब्बा कूं छोड़ देऊ।” बरअब्बा एक लुटेरौ हतो। तब पिलातुस ने ईसू कूं कोड़े लगबाए। सैनिकन ने कांटे की लकड़ियां तौर के उनको एक मुकुट बनांयौ और वाके सिर पै रख दियौ। और बाय साही पोसाक पैहनांयी, और वाके जौरें आयकै कही, “यहुदियन के राजा की जय हो!” और फिर वाके थप्पड़ मारबे लगे। पिलातुस एक बार फिर बाहर आयौ बिनते बोलौ, “देखौ मैं जाय फिर बाहर लाय रयौऊं ताकि तुम जान जाओ के मैंनें जामें कोई दोस नांय पायो।” जब ईसू साही पोसाक और कांटेन कौ मुकुट पहनकै बाहर आयौ। तब पिलातुस ने बिनते कही, “जि रयो बू आदमी।” पिरधान पुरोहितन नें और बडे़ पिराथना घर के पैहरेदारन ने जब बाकूं देखौ तौ बे चिल्‍लाय चिल्‍लायकै कैहबे लगे, “जाय क्रूस पै चढ़ाऔ, क्रूस पै चढ़ाऔ।” पर पिलातुस ने बिनते कही, “तुमईं जाय लै जायकै क्रूस पै चढ़ाऔ। मोय तौ जामें कोई दोस नांय मिलौ।” यहुदियन ने कही, “के हमारी व्‍यबस्था तौ जि कैहतै कै जाय तौ मरनौ परैगौ, चौंकि जानें परमेस्‍वर कौ बेटा हैबे कौ दाबा करौऐ।” जब पिलातुस ने उनकूं जि कैहत भये सुनौ, तौ बू भौत डर गयौ। और फिर पिलातुस नें राज भवन में भीतर जायकै ईसू ते पूछी, “कै तू काँते आयौए?” पर बानें कोई जबाब नांय दयौ। पिलातुस ने बाते कही, “का तू मोते बात करबौ नांय चाहत? का तू नांय जानत के मैं तोय छोड़बे कौ अधिकार रखतूं और क्रूस पै चढ़ाबे कौऊ अधिकारै?” ईसू नें बाते कही, “तोय तब तक मोपै कोई अधिकार नांय है सकै, जब तक बू तुमें परम पिता के द्वारा नांय दयौ गयौ होतो, जामारै जा आदमी नें मोय तेरे हबाले करोऐ बू मोतेउ जादा पापी है।” जि सुनिकै पिलातुस बाय छोड़बे को उपाय ढूढबे लगो। पर यहुदी चिल्‍लाये, “अगर तू जाय छोड़तुए तौ केसर कौ मित्र नांय, अगर जो कोई अपने आप कूं राजा हैबे कौ दाबा करतुए तौ बू राजा कैसर कौ बिरोधीए।” जब पिलातुस ने जि बात सुनी, तौ बू ईसू कूं बाहर बा जगैह पै लै गयौ जो पत्‍थर को चौंतरा कहौ जाबतो। जो इब्रानी में गब्बता कहौ गयौ। बू न्याय की गद्‍दी पै बैठो। जि लगभग दुपैरी के समै, फसह के तौहार की तैयारी कौ दिन हतो। पिलातुस ने यहुदिन ते कही कै, “जि रयौ तुमारौ राजा।” फिर बे चिल्‍लाए जाय लै जाऔ, “जाय लै जाऔ। जाय क्रूस पै चढाय देऊ।” पिलातुस ने कही, “तुम का चाहतो कै तुमारे राजा कूं क्रूस पै चढ़ाऊं?” जा बात पै पिरधान पुरोहितन नें कही, “केसर कूं छोड़कै हमारौ कोई दूसरौ राजा नांय।” फिर पिलातुस ने ईसू कूं क्रूस पै चढ़ाबे काजै उनकूं सौंप दयौ। जा तरैह ते सिपाइन नें ईसू कूं अपने कब्जा में लै लयौ, और तब बे ईसू कूं वाकौ क्रूस बापे लादकै बा जगैह पै लै गये जो खोपड़ी की जगैह कही जाबती। जाय इब्रानी में गुलगत्‍ता कैहते हते। म्हांपै उन्‍नें ईसू कूं और वाके संग दो लोगन कूं क्रूसन पै चढ़ायौ। एक कूं सीदे हात की तरह और एक कूं उल्टे हात की तरफ और बीच में ईसू कूं लटकायौ। पिलातुस ने जि दोस पत्र लिखकै क्रूस पै लगबाय दयौ कै “ईसू नासरी, यहुदियन कौ राजा।” भौत ते यहुदियन ने बू दोस पत्र पढ़ौ चौंकि जा जगैह पै ईसू कूं क्रूस पै चढ़ायौ गयौ हतो बू नगर के जौरेंई हतो। और बू दोस पत्र इब्रानी और लतिनी और यूनानी भासा में लिखौ हतौ। यहुदियन के पिरधान पुरोहितन नें पिलातुस ते जि बिनती करी कै, “ऐसे मत लिखबा कै जि यहुदियन कौ राजा है। पर ऐसे लिखबा कै ‘जि यहुदियन कौ राजा हैबे कौ दाबा करतै।’” पिलातुस ने कही, “मैंनें जो लिख दई सो लिख दई।” जब सिपाही ईसू कूं क्रूस पै चढ़ाय चुके तब उन्‍नें वाके कपड़न कूं चार हिस्सन में बाट दये, हरेक सिपाई ने एक-एक हिस्सा लै लियौं। उन्‍नें कुर्तऊ उतार लयौ चौंकि बू ऊपर ते नीचे तक पूरौ बिनां सिलाई के बनों भयौ हतो। जामारै उन सबन ने कही, “कै जाय मत फारौ जाके ऊपर परची डारौ कै जाय को लैबेगौ।” जाते पबित्र सास्त्र कौ बू वचन पूरौ होय, “उन्‍नें मेरे कपड़ा आपस में बांट लये और मेरे कपड़न काजै परची डारी।” सिपाइयन ने ऐसौई करौ। ईसू के क्रूस के जौरें वाकी मईया मरियम और मईया की बहन क्‍लोपास की पत्नी मरियम और मरियम मगदलीनी ठाड़ी हतीं। ईसू नें अपनी मा और अपने बा चेला कूं अपने जौरें ठाड़े देखौ जाते बू पिरेम करतौ हतो। तौ बानें अपनी मा ते बा चेला कै माऊं इसारौ करकें कही, “हे माँजी, जि तेरौ बेटाऐ।” और जाके बाद उन चेला ते कही, “कै जि तेरी मईया है” और फिर बू चेला बाई समै बाय अपने घर लै गयौ। तब ईसू नें जि जान लई कै अब सब कछू पूरौ है चुकौ, फिर जि जामारै कै पबित्र सास्त्र में लिखी भई सब बात पूरी होय और बानें कही, “मैं पियासौऊं।” म्हांपै सिरका ते भरौ भयौ बरतन रखौ हतो। बिन्‍नें एक सोख्ता बामे डुबाय कै सरकन्डा पै रखकें बू ईसू के मौंह पै लगाय दयौ। जब ईसू नें बू सिरका चखौ तौ कही, “पूरौ भयौ” और इतनौ कैहके बानें अपनों सिर झुकायकै अपने पिरान छोड दये। जि फसह की तईयारी कौ दिन हतो, और जाके अगले दिन यहुदियन के आराम कौ दिन हतो। यहुदियन ने पिलातुस ते जायकें कही, “कै बू आग्‍या देय के हम उनकी टांग तोड़ दई जाय और उनकी लास क्रूस पैते हटाय दई जाय।” चौंकि यहुदी नेता नांय चाहते कै आराम के दिन में वाकी लास टगी रैहबै। तब सिपाई आये उनमें ते पैहले, पैहले की और फिर दूसरे की टांग तोड़ी। जो ईसू के संग क्रूस पै चढ़ाये गये हते। जब बे ईसू के जौरें आये तौ उन्‍नें देखौ के बू पैहलेई ते मर गयौ हतो। जा बजे ते वाकी टांग नांय तोड़ी। तबई एक सिपाई ईसू के जौरें आयौ और वाकी पसली के नीचे भालौ छेदौ तौ बामे ते खून और पानी बैह निकरौ। जानें जि देखौए बे जाकी गबाही देतै और उनकी गबाही सच्‍चीऐ। बू जानतुए के बू सही बोल रयौए जाते लोग बापै भरोसौ करें। जि सब कछू जा बजैह ते भयौऐ के पबित्र सास्त्र में लिखी भई सब बात पूरी होय, “वाकी एकऊ हड्‍डी नांय तोरी जाबैगी।” और पबित्र सास्त्र में जेऊ लिखी भयीऐ, “जिन्‍ने वाके भालौ छेदौ बे वाकी ओर ताकिंगे।” जाके बाद अरिमतिया कौ यूसुफ जो ईसू कौ चेला हतो, बू यहुदियन के डरके मारै अपने आपकूं छिपायके रखतो। बानें पिलातुस ते बिनती करी कै बू बाय ईसू की ल्हास की लै जायबे की अनुमती दै दै। पिलातुस ने बाय अनुमती दै दयी। और बू ईसू की ल्हास कूं लै गयौ। निकुदेमुस जो रात कूं ईसू के जौरें रात कूं पैहले मिलबे आयौ हतो बू तीस किलो के लगभग मिलौ भयौ गन्धरस और ऐलबा लैकें आयौ। फिर बे ईसू की ल्हास कूं ले गये। और यहुदियन की घाड़बे की रीति के अनुसार खुसबूदार चीजन के संग कफ्फन में लपेट दयौ। ज्हांपै ईसू कूं क्रूस चढ़ायो गयौ हतो म्हापे एक बगीचा हतो और चट्टान में खुदी भई नई कब्र हती, जामें अबई तक काऊ की लास नांय रखी गयी हती। चौंकि बू यहुदियन के आराम दिन की तैयारी कौ सुक्रबार बारौ दिना हतो बू कब्र भौत जौरें हती ईसू कूं बाई में रख दयौ। सप्‍ताह के पैहले दिनां सबेरौ हैबेते पैहले अंधेरे मेई मरियम मगदलीनी कब्र पै आयी और बानें देखौ के कब्र के द्वार पैते पत्‍थर हटो भयौए, फिर बू भाजकें सिमौन पतरस और दूसरे चेला जो ईसू कौ लाड़लौ कहौ जाबतौ वाके जौरें पौहचीं और बिनते बोली, “के बे पिरभू कूं कब्र मेंते निकार ले गयेऐं, और हमे नांय पतौ कै उन्‍नें बू कांपै रखौए।” फिर पतरस और दूसरौ चेला कब्र पै तबई गये। बे दोनों संग संग भाज रये हते पर दूसरौ चेला पतरस ते आगे निकर गयौ और कब्र पै पैहले जाय पौंहचौ। बानें नीचे झुककै देखौ तौ म्हांपै बाय कफ्फन के कपड़ा परे दिखाई दये। पर बू भीतर नांय गयौ। तब सिमौन पतरस जो वाके पीछे आय रयो हतो बेऊ आय पौंहचौ और कब्र के भीतर चलौ गयौ बानें देखौ के मांपै कफ्फन के कपड़ा परेऐं। बू कपड़ा घाड़बे के समै वाके सिर पै हतो बू कपड़ा कफ्फन के कपड़ा ते अलग जगैह पै परौ रखौ मिलौ। फिर दूसरौ चेला जो पैहले तैई कब्र पै पौहचौ हतो बानें भीतर देखौ और भरोसौ करौ। बे अबई तक पबित्र सास्त्र के वचन कूं नांय समझ पाये कै वाकौ मरे भयेन मेंते जी उठिबौ जरूरीऐ। फिर बे चेला अपने घर चले गये। और मरियम म्हांपै रोबती बिलखती कब्र में झांकबे काजै नीचे झुकी। जहां पै ईसू की लास रखी हती म्हांपै दो सुरग दूत सफेद ऊजरे कपड़ा पैहने भये ईसू कै सिराने पै ठाड़े और दूसरे कूं पामन के माऊं बैठौ देखौ हतो। उन्‍नें मरियम ते पूछी, “कै हे औरत तू चौं रोय रयी है?” बू बोली, “बे मेरे पिरभू कूं उठाय लै गयेएं पर मौकूं जि मालूम नांय कै बिन्‍नें बाकूं कांपै रखौए।” इतनी बात कैहकै बू पीछे मुड़ी तौ बानें देखौ के म्हांपै ईसू ठाड़ौए और बाय पैहचान नांय पाई के बू ईसूए। ईसू नें बाते कही, “कै हे औरत तू चौं रोय रयी है? बू कौन है जाय तू ढ़ूढ रयी है?” बानें बाते कही, “हे गुरू, अगर बाय तुमने उठायौ होय तौ मोय बताय देओ, कै तुमने बाय कांपै रखौऐ मैं बाय लै जाऊंगी।” ईसू नें बाते कही, “मरियम।” बू पीछे मुड़ी और इब्रानी में बोली “रब्बूनी” मतलब, “हे गुरू।” ईसू नें बाते कही, “मोय मत छू चौंकि मैं अबई तक में पिता के जौरें ऊपर नांय गयौ। पर मेरे भईयन के जौरें जायकें उन्‍नें बता दै, ‘के मैं तुमारे परमपिता और अपने परमपिता और तुमारे परमेस्‍वर और अपने परमेस्‍वर के जौरें जाय रयौऊं।’” मरियम मगदलीनी जि कैहत भई चेलान के जौरें आई, “मैंनें पिरभू कूं देखौए और बानें मोय जि बात बताईएं।” जो पिरभू ने बाते कही हती बे सब बात उनकूं बताय दयौ। बा दिना साझ कूं जो सप्‍ताह कौ पैहलौ दिना हतो,वाके चेला यहुदियन के डरके मारे घर के दरबाजे बन्द करे भये हते। तबई ईसू बिनके बीच में आयकै खड़ो है गयौ,और बिनते बौलो, “कै तुमें सान्‍ती मिलै।” इतनी कैहबे के बाद बानें अपनी बगल और हात दिखाये,चेलान ने जब पिरभू कूं देखौ, तौ बे भौत खुस भये। तब ईसू नें फिर बिनते कही, “तुमे सान्‍ती मिलै। जैसे परम पिता ने मोय भेजौऐ बैसेई मेंऊ तुमें भेज रयौऊं।” जि कैहके बानें सबन पै फूंक मारी और बिनते कही, “पबित्र आतमा लेओ। जा काऊ आदमी के तुम पाप छमा करोगे वाके पाप छमा है जांगे और जिनके पाप तुम छमा नांय करौगे तौ बे अपने पाप के बन्धन मेंई बंधे रैहबिंगे।” उन बारेन में ते थोमा जो जुड़बा कहौ जातो, जब ईसू आयौ तब बू मापै नांय हतो। और दूसरे चेला कैह रये हते, “कै हमनें पिरभू कूं देखौए।” पर बानें कही, “कै जब तक मैं वाके हातन में कीलन के निसान नांय देखलूं और बिनमें अंगुरिया घुसा के और वाके पंजर में अपनों हात डारकै नांय देख लूं तब तक मोय भरोसौ नांय करूंगो।” आठ दिना बाद वाके चेला एक बेर फिर घर के भीतर हते। और थोमाऊ बिनके संग हतो। जब दरबाजे पै तारौ लगौ हतो। ईसू आयौ और बिनके बीच में ठाड़ौ हैकें बोलौ, “तुमे सान्‍ती मिलै।” फिर बानें थोमा ते कही, “अपनी उगली डार और मेरे हात देख। अपनों हात फैलाय के मेरे पंजर में डारकै देख। संदेह करबौ छोड दै और भरोसौ कर।” थोमा बोलो, “हे पिरभू मेरे परमेस्‍वर।” ईसू नें बाते कही, “तेनै मोय देखकै मोपै भरोसौ करौ है। पर बे धन्यै जो मोपै बिना देखे भरोसौ करतें।” ईसू नें भौत ते चमतकार अपने चेलान कूं दिखाये जो जा किताब में नांय लिखे। जो बात जा किताब में लिखे हैं, बे जा बजैह ते लिखीऐं कै तुम भरोसौ करौ ईसू ही परमेस्‍वर कौ बेटा मसीह है। तुम बापै भरोसौ करौ और वाके नाम ते जीबन पाऔ। जाके बाद ईसू तिबिरियास झील के किनारे, अपने चेलान कूं दिखाई दयौ। और बू जा तरैह ते भयौ। तब सिमौन पतरस, थोमा जो जुड़बा कहौ जाबतो, गलील के काना के नगर में रहबे बारौ नतनेल और जब्दी के बेटा और ईसू के दूसरे दो चेला म्हांपै हते। सिमौन पतरस ने उनते कही, “मैं मछली पकरबै जाय रयौऊं।” बे बाते बोले, “हमऊं तेरे संग चल रये हैं।” तौ बे वाके संग नाव में बैठकै चले गये। पर बे बा रात कछू नांय पकर पाये। जब सबेरौ हेई रयौ हतो कै ईसू किनारे पै आयकें ठाड़ौ है गयौ, पर चेला जि नांय जान पाये कै जि ईसूए। तब ईसूने बिनते कही, “हे दोस्तो का तुम पै कोई मछली हतें?” उन्‍नैं जबाब दयौ, “नांय।” फिर ईसू नें बिनते कही, “जाल कूं नाव के सीदे हात माऊं डारौ तौ तुमें कछू मछली मिल जाबैगीं।” वाके कैहबे पै बिन्‍नें जाल डारौ तौ उनकौ जाल इतनौ भर गयौ कै बे जाल कूं दुबारा खेंच नांय पाये। तब जो चेला ईसू को लाड़लौ कहौ जातो बानें पतरस ते कही, “जि तौ पिरभूए।” जब सिमौन ने सुनी कै जी तौ पिरभूए तौ बानें अंगरखा कस लियौ चौंकि बू केबल लंगोटी में हतो और जल्दी ते किनारे पै पौहच काजै पानी में कूंद गयौ। पर दूसरे चेला मछलीन ते भरे भये जाल कूं खैंचत भये नाव ते किनारे पै आये चौंकि बे किनारे ते भौत दूर नांय हते,बे दो सौ हात दूर हते। जब बे किनारे पै आये तौ उन्‍नें दहकते भये कौला की आंच जलते भये देखी, बापे मछली और रोटी पकायबे रखी भयी हती। ईसू नें बिनते कही, “कै अबई तुमने जो मछली पकरीएं उनमे ते कछू लै आऔ।” फिर सिमौन पतरस नाव पै गयौ और 153 बड़ी मछली भरौ भयौ जाल किनारे पै खैंचौ। जाल में इतनी जादा मछली भर गयी फिरऊ जाल फटौ नांय। ईसू नें बिनते कही, “आऔ खानों खाय लेओ।” पर ईसू के चेलान में ते काऊ की जि हिम्मत नांय भई कै बाए पूछ लैबे कै तू कोऐ? चौं के बे जान गये हते कै बू पिरभूऐ। तब ईसू नें आगे बढ़कै रोटी लई और उन्‍नें दै दयी, एसेई मछली अऊ दई। जि अबकी तीसरी बार ईसू मरे भयेन मेंते अपने चेलान कूं दिखाई दयौ। जब बे खानों खाय चुके तौ ईसू नें सिमौन पतरस ते कही, “यूहन्‍ना के बेटा सिमौन, जितनों पिरेम जि मोते करतै, का तू मोए इन तेऊ जादा पिरेम करतुए?” पतरस ने कही, “हाँ पिरभू, तू तौ जानतुए कै मैं तोते पिरेम करतूं।” ईसू नें कही, “मेरे मेमनों कूं चरा।” ईसूने दुबारा बाते कही, “हे यूहन्‍ना के बेटा सिमौन, का तू मोते पिरेम करतुए?” पतरस ने फिर ईसू ते कही, “हाँ पिरभू तू जानतै कै मैं तोते पिरेम करतूं।” ईसूने कही कै, “मेरी भेड़न की रखबारी कर।” ईसूने फिर तीसरी बार पतरस ते पूंछी, “यूहन्‍ना के बेटा सिमौन का तू मोते पिरेम करते?” पतरस भौत परेसान भयौ। ईसू नें तीसरी बार जि पूछी कै, “तू मोते पिरेम करतुए?” अबकी बेर पतरस ने ईसू ते कही, कै पिरभू तू तौ सब कछू जानतुए कै मैं तोते पिरेम करतूं। ईसू नें कही, “जा मेरी भेड़न ने चरा। मैं तोते सच कैहतूं कै, जब तू जबान हतो तब तू अपनी कमर में फेंटा कसकै ज्हां चाहतो चलौ जातौ पर जब तू बूढौ है जाबैगौ तब हात फैलाबैगौ और कोई दूसरौ तोय बांधकै, ज्हां तू जायबौ नांय चांहत, म्हां लै जाबैगौ।” ईसू नें जि दिखाबे काजै जि बात कही, कै पतरस कैसी मौत ते परमेस्‍वर की महिमा करैगौ। इतनी कैहके बानें बाते कही, “कै मेरे पीछै आजा।” पतरस पीछे मुड़ौ और बानें देखौ कै जो चेला ईसू को लाड़लौ कहलातो, बिनके पीछे आय रयौए। जि बुई हतो जानें खानों खाबे के समै ईसू के भौत जौरें आयकै पूछी हती कै, “पिरभू बू कोऐ जो तोय धोके ते पकरबाबेगौ?” तब बाय देखकै पतरस ईसू ते बोलो, “हे पिरभू, जाकौ का होगौ?” ईसू नें बाते कही, “अगर में चाहूँ कै जब तक मैं आय नांय जाऊं जि यहीं रहै, तौ तोय का? तू तौ मेरे पीछे चलौ आ।” जामारै जि बात भईयन में फैल गयी कै जि चेला नांय मरैगौ। ईसू नें बाते जि नांय कही, की बू नांय मरेगौ पर ईसू नें बाते कही, “अगर में चाहूँ कै जब तक मैं आय नांय जाऊं जि यहीं रहै, तौ तोय का?” जि बेई चेलाऐं जो इन बातन की गबाही दैतौ जानें जि बात लिखी है और हम जानतै कै वाकी गबाही सच्‍चीऐ। ईसू नें औरऊ भौत ते काम करे हते। अगर बे सबरे कामन एक-एक करकें लिखे जाते तौ मैं सोचतूं कै जो किताब लिखी जाती बू इतनी बड़ी होती कै सबरे संसार मेंऊ समाय नांय पातीं। हे थियुफिलुस, मैंनें अपनी पैहली किताब में ईसू की सुरुआत की सेबकाई ते लैके सुरग में उठा लये जाबे के समै तक बानें जो काम करे हते और सिखाये हते बिन बातन के बारे में लिखौ है। ईसू नें सुरग में उठाय जाबे ते पैहले अपने भेजे भये चेलान कूं पबित्र आतमा की सामर्थ ते आग्या दईं हतीं। अपनी मौत के बाद चालीस दिनन तक बु भौत बार बिनके सामने पिरकट भयौ और सबूत दये कै बू जीबित है। बिन्नें वाकूं देखौ और बानें बिनते परमेस्‍वर के राज की बातें करीं। एक बेर जब ईसू अपने चेलान के संग भोजन कर रयौ हतो, तब बानें अपने चेलान कूं जि आग्‍या दयी कै, “येरूसलेम कूं मत छोड़ियों, पर जाके बारे में तुमनें मोते सुनीऐं, मेरे पिता परमेस्‍वर के बा बादा कूं पूरे हैबै कौ इन्‍तजार करौ। चौंकि तुमें यूहन्‍ना ने तौ तुमें पानी ते बपतिस्मा दयौ, पर कछू दिनन बाद तुमें पबित्र आतमा ते बपतिस्मा देगौ।” जब बे सब इकठ्‌ठे भये तब उन्‍नें ईसू ते पूछी, “हे पिरभू, का तू इसरायल के राज कूं दुबारा बनाबेगौ?” ईसू ने उनते कही कै, “बू समै और बातन कौ जानबौ तुमारे काजै जरूरी नांय, जिनें पिता परमेस्‍वर ने अपने अधिकार मेंई रखौए। पर जब पबित्र आतमा तुम पै आबेगौ, तब तुम सामर्थ पाऔगे और सबरे येरूसलेम, सामरिया, यहुदिया और धरती कै छोर तक तुम मेरे गबाह ठहरौगे।” जि कैहबे के बाद देखतई देखत ईसू कूं सुरग में उठा लियौ गयौ और बादरन नें उन सबन की आंखन ते छिपाय लयौ। जब ईसू सुरग में ऊपर उठाय लयौ तब बे सब सुरग की ओर टक टकी लगायकै देख रये हते तबई दो जने सफेद कपड़ा पहने भये उनके सामने आयकै ठाड़ौ है गयौ। और बे कैहबे लगे, “अरे गलीली लोगो तुम सुरग की ओर टक टकी लगायकें का देख रयेऔ? जा तरैह ते ईसू कूं बादरन में जाबत भये देख रयेऔ बैसेई बाय दुबारा आबत भये देखौगे।” फिर बे जैतून के पहाड़ पैते येरूसलेम कूं लौटे और बू पहाड़ एक किलो मीटर की दूरी के लगभग हतौ, लौट आये। तब बे म्हांपै पौंहचकै ऊपर के एक कमरा में गये ज्हांपै बे रुके भये हते। ज्हांपै पतरस, यूहन्‍ना, याकूब, अन्द्रियास, फिलिपुस, थोमा, बरतुलमै और मत्‍ती, हलफई कौ बेटा याकूब, उत्साही सिमौन और याकूब कौ बेटा यहूदा रैहते हते। इनके संग कछू औरतें, ईसू की मा मरियम और ईसू के भईयऊ हते। जे सब एक मन ते अपने आपकूं एक संग पिराथना में लगाये रैहत हते। फिर इन्हीं दिनन में पतरस नें करीब एक सौ बीस बिसबासी लोगन के बीच में ठाड़े हैकें कही, “हे भईयाओ, जि जरूरीए के परमेस्‍वर के वचन में लिखी भई बात पूरी होय। जो पबित्र आतमा ने दाऊद राजा के द्वारा यहूदा के बारे में पैहले तेई कैहलबाई हतीं। यहूदा ईसू कूं पकरबायबे बारेन कौ अगुबा बन गयौ हतो, चौंकि बू हम मेंई गिनौ गयौ और सेबा में हमारौ संगी बनों।” यहूदा की अधर्म की कमाई ते बू खेत खरीदौ गयौ। ज्हांपै बानें फाँसी लगाई हती और बाद बू मौंह के बल नीचै गिरौ और वाकौ पेट फट गयौ और वाकी सबरी आंतें बाहर निकर आयीं हतीं। सबरे येरूसलेम में रैहबे बारेन ने जि मालूम पर गयी, जाके मारे उनकी भासा में बा खेत कूं हक्‍लदमा कहौ गयौ जाकौ मतलब “खून कौ खेत”। पतरस ने कही, “चौंकि भजन संहिता में जि लिखौ भयौ है कै, “ ‘वाकौ घर उजर जाबे और बामे रहबे काजै कोई नांय बचै।’ और ‘वाकौ अधिकार कोई और दूसरौ लैलेय।’ जामारै जि जरूरीए कै जब पिरभू ईसू हमारे बीच में हतो तब जो लोग हमेसा हमारे संग हते, बिनमें ते काऊ एक कूं चुनों जाय। यानी जब ते यूहन्‍ना नें लोगन कूं बपतिस्मा दैबौ सुरू करौ और जब तक पिरभू ईसू मसीह हमारे बीच में ते नांय उठाय लये गये। इन लोगन में ते एक हमारे पिरभू ईसू के फिर ते जी उठबे की गबाही दै सकें।” जामारै उनने दो आदमी बताये, एक यूसुफ जो बरसब्बा कहौ जातौ जि यूसतुस नाम तेऊ जानौ जातौ। और दूसरो मत्‍तियाह। और जि कैहके पिराथना करी कै, “हे पिरभू, तू सबन के मन कूं जानतुए और जि मालूम है जायकै तैने इन दोनोंन में ते कौन चुनों है, ताकि बू चुनकें भेजे भये चेला कौ पद लै और बा सेबा कूं कर सके जाकूं यहूदा छोड़कै दन्‍ड भुगतने की जगैह पै चलौ गयौ।” तब उन्‍नें दोनोंन काजै चिठ्‌ठी डारी और चिठ्‌ठी मत्‍तियाह के नाम की निकरी, जामारै बू उन गियारैऊन में भेजौ भयौ चेला ठहरौ। जब पेन्‍तेकुस तौहार कौ दिन आयौ तब सब बिसबासी लोग एकई जगैह पै इकठ्‌ठे हते। तबई अचानक म्हांपै आकास में ते जोर की आँधी के जैसी अबाज आई और सबरौ घर गूँज उठौ ज्हांपै बे बैठे हते। बिन्‍नें देखौ कै, आग की उठती भई लपट के जैसी जीभें फटती भई उनमें ते हरेक के ऊपर आयकै रुक गई। बे सब पबित्र आतमा ते भर गये और जा तरैह ते आतमा नें बिनें बोलबे की सामर्थ दयी, बे अलग अलग भासा बोलबे लगे। म्हांपै आकास के नीचे ते सब देसन ते आये भये औरऊ यहुदी भक्‍त येरूसलेम में आकर रैहते हते। जब जि गरजन की अबाज सुनी तब एक भीड़ इकठ्‌ठी है गयी। और बे सब अचरज में पर गये चौंकि बे सब अपनी अपनी भासा में उने बोलत भये सुन रये हते। बे सब अचम्भे में परकें कैहबे लगे, “कै का जे सब गलील कै रैहबे बारे नांय? तौ फिर हम में ते हरेक कोई अपनी अपनी जनम भूमि की भासा चौं सुन रये हैं? मांपै पारथी, मेदी और एलामी, मेसोपोटामिया के रैहबे बारे, यहुदिया और कप्पदूकिया, पुन्‍तुस और आसिया। फ्रुगिया और पंफूलिया, मिस्र और कुरेन नगर के जौरे लीबिया के कछू पिरदेसन के लोग, रोम ते आये यात्री जिनमें जनमजात यहुदी और यहुदी धर्म कूं मानबे बारे लोग, क्रेती तथा अरब के रहबे बारे सब परमेस्‍वर के बडे़-बडे़ कामन की चरचा अपनी अपनी भासा में सुन रये हते।” बे सब अचम्भे में पर के आपस में पूछबे लगे, “कै जि सब का है रयौए?” पर कछू लोग जि कैहकै हसी उड़ाबत भये कहबे लगे, “कै इन सबन ने कछू नए अंगूर के रस कौ नसा है गयौए।” पतरस उन भेजे भये गियारे चेलान के संग ठाड़ौ हैकै पिरचार करबे लगौ, “हे यहुदी भईयाओ और येरूसलेम के सब रैहबे बारेऔ, मेरी बात कूं धियान ते सुनौ और जि जान लेओ। जे लोग पीये भये नांय, जैसौ तुम समझ रयेऔ। चौंकि अबई तौ सबेरे के नौ बजे हैं। चौंकि जाके बारे में परमेस्‍वर की ओर ते बात बताबे बारे योएल ने कही हती, “परमेस्‍वर कैहतै, ‘आखरी दिनन में ऐसौई होगौ, मैं सब लोगों के ऊपर अपनी पबित्र आतमा उतारूंगो। फिर तुमारे बेटा और बेटी भविस्‍यबानी करिंगे। और तुमारे जबान लोग दरसन देखिंगे, बुजुर्ग सपने देखिंगे। हाँ, उन दिनन में मैं अपने दास दासीन पै अपनी पबित्र आतमा उतारूंगो, और बे भविस्‍यबानी करिंगे। मैं आकास में अदभुत काम और धरती पै चिन्‍न दिखाऊगौ, खून, आग और धुआं के बादल। तब पिरभू की महिमा कौ बू महान दिन आबैगौ, बाते पैहले सूरज कारौ हे जाबैगौ, और चन्दा खून के जैसौ लाल है जाबैगौ। और तब बू हरेक काऊए बचाबैगौ जो पिरभू के नाम कूं पुकारेगौ।’ “इसरायली भईयाओ, मेरी बात ध्‍यान ते सुनौ, तुम जा बात ते खुदई जानतौ कै परमेस्‍वर ने ईसू नासरी के द्वारा तुम लोगन के बीच में कितने महान काम, चमत्‍कार और चिन्ह दिखाये हैं। जाते जि सिध्द भयोऐ कै ईसू परमेस्‍वर की ओर ते तुम लोगन के जौरे भेजौ गयौ हतो। बाई ईसू कूं परमेस्‍वर की ठहराई योजना के अनुसार पकरबायौ गयौ और तुमने बाकूं अधर्मी लोगन की मदद ते क्रूस पै चढ़ाय दयौ और कील ठोककै मार डारौ। पर परमेस्‍वर ने बाय मौत के दरद ते छुड़ाय के दुबारा जीबित करौ, चौंकि जि हैई नांय सकत कै मौत बाय अपने बस में कर सकै। चौंकि वाके बारे में हमारे पूर्वज दाऊद राजा ने कही हती, “ ‘मैंनें पिरभू कूं हमेसा अपनेई सामने देखौए। बू मेरी दाहिनी ओर बैठतै, ताकि मैं डिग नांय जाऊँ। जाते मेरौ हृदय खुस है और मेरी आतमा आनन्दित है, मेरौ सरीरऊ आसा में जीबेगौ, चौंकि तू मेरी आतमा कूं पाताल में नांय छोड़ेगौ। तू अपने पबित्र जन कूं कबर में सड़ने नांय देबेगौ। तेने मोय जीबन की रस्ता दिखाईऐ। अपनी मौजूदगी ते तू मोय आनन्द ते भर देबेगौ।’ “हे मेरे भईयाओ, मैं भरोसे के संग तुमते कैह सकतूं कै हमारे पुरखा दाऊद की मौत है गयी और बाय दफनांय दयौ। और वाकी कबर हमारे य्हां आज तक मौजूद है। पर बू तौ एक परमेस्‍वर की ओर ते बात बतायबे बारौ हतो और जानतो कै परमेस्‍वर ने सौगन्ध के संग बाय वचन दयौ, कै बू वाके वंस में ते काऊ एक कूं वाके सिंहासन पै बैठाबेगौ। जामारै जौ घटना हैबै बारी है, बाय देखत भए बानें मसीह के फिर ते जी उठबे के बारे में जि कही हती कै, बू पाताल में नांय छोड़ो गयौ। और वाकी देह कूं सड़बे गलबे नांय दयी। “जाई ईसू कूं परमेस्‍वर ने दुबारा जीबित करौ, जाके हम सब गबाह हैं। ईसू परमेस्‍वर के दाहिने हात, सबते ऊँचौ पद पायकै बैठौए, बानें परम पिता परमेस्‍वर की प्रतिग्‍या के अनुसार पबित्र आतमा पाई और फिर बानें जा आतमा कूं हम पै उतार दयौ, जैसौ कै अब तुम देख रयेऔ और सुन रये हो। चौंकि दाऊद सुरग में नांय गयौ, जामारै बू खुद कैहतै, “ ‘पिरभू परमेस्‍वर ने मेरे पिरभू ते कही, “मेरे दाहिने बैठ, जब तक मैं तेरे दुसमन कूं तेरे पामन के नीचे रखबे की चौकी नांय कर दूं।” ’ “जामारै सबरौ इसरायल जरूर जि जान लेय कै परमेस्‍वर ने ईसू कूं जाय तुमने क्रूस पै चढ़ाय दयौ हतो, बू पिरभू और मसीह दोनों ही ठहरायौ हतो।” लोगन्‍ने जब जिय सुनी तौ बे व्‍याकुल है उठे, तब पतरस और दूसरे भेजे भये चेलान ते कही, “हे भईयाओ, तौ हमें का करनों चहिंयें?” पतरस ने उनते कही, “अपने पापन ते मन फिराऔ और अपने पापन की छमा पायबे काजै तुम में ते हर एक कूं ईसू मसीह के नाम ते बपतिस्मा लैनों चहिंयें। फिर तुम परमेस्‍वर की पबित्र आतमा कौ वरदान पाय लोगे। चौंकि जि प्रतिग्‍या तुमारे काजै, तुमारी सन्‍तानन के और उन सबन के लयें है जो भौत दूर हैं। जि प्रतिग्‍या उन सबन के काजै है जिनकूं हमारौ पिरभू परमेस्‍वर अपने जौरे बुलाबतुऐ।” पतरस नें भौत सी बातन ते उन्‍नें चेतावनी दयी और बिनती करके उनके संग उनते कही, “जा कुटिल पीढ़ी ते अपने आपकूं बचायकें रखौ।” जिन्‍नें लोगन नें पतरस की बातन पै भरोसौ करौ, उनकूं बपतिस्मा दयौ गयौ। जा तरैह ते बा दिन उनके झुंड में करीब तीन हजार लोग और जुड़ गये। भरोसौ करबे बारे लोग भेजे भये चेलान ते सिछा पायबे, संगत करबे और एक संग मिलकर रोटी खाने में और पिराथनान में लौलीन रहते हते। सब लोगन में भय छा गयौ हतो और सब लोग भेजे भये चेलान के कामन ते अचम्भौ करते हते। सबरे भरोसौ करबे बारे एक संग रहते हते और उनके जौरे जो कछू अपनों हतो, बे सब बाय आपस में बांट लेतै हैं। और बे अपनी सब चीजन कूं और सम्पती बेचकै उनकी जरूरतन कूं पूरौ करते हते और उनमे जिनकूं जितनी जरूरत होती आपस में बांट देते हते। बे सब मिलके रोजाना बडे़ पिराथना घर में जाते हते। बे आपस में अपने घरन में मिल जुलकै आनन्द के संग रोटी खाबते। बे लोग परमेस्‍वर की स्तुति करतें और सारे लोग बिनते खुस हते। नये लोगन कूं जिनकूं उद्धार मिल जातो, बिनें पिरभू रोजाना भरोसा करबे बारे लोगन के झुंड में मिलाय देतो। दो पैहर तीन बजे पिराथना के समै पतरस और यूहन्‍ना बड़े पिराथना घर में जाय रये हते। तब एक ऐसौ आदमी जो जनम ते लंगड़ो हतो बाय कछू आदमी लै जाय रये हते। बे बाय रोजाना बडे़ पिराथना घर के “सुन्दर” नाम के फाटक पै बैठाय दैते जाते बू मांपै आयबे जाबै बारेन पैते भीख मांग सकै। जब यूहन्‍ना और पतरस बड़े पिराथना घर में घुसबे बारेई हते तबई बानें उनते पैसा मांगे। पतरस और यूहन्‍ना ने बाय धियान ते देखौ और पतरस ने कही कै, “हम माऊं देख।” जामारै बानें बिनके माऊं कछू मिलबे की इच्‍छा ते देखौ। पतरस नें कही, “मोपै सौनों चांदी तौ हत नांय, पर जो है, बू मैं तोय दै रयौऊं। ईसू मसीह नासरी के नाम ते ठाड़ौ है जा और चल दै।” फिर वाकौ सीधौ हात पकरकै पतरस ने बू उठायौ। तबई वाके पामन में और जोड़न में तागत आय गयी। और बू अपने पामन के बल उछलौ और चलबे लगौ। बू उछलत कूंदत भयौ उनके संग परमेस्‍वर की बड़ाई करते भये बड़े पिराथना घर के आंगन में गयौ। सबरे लोगन्‍नें बाय परमेस्‍वर की बड़ाई करते भये देखौ, तब बाय लोगन्‍नें पैहचान लयौ कै, जि तौ बोईऐ जो बड़े पिराथना घर के “सुन्दर” नाम के फाटक पै बैठकै भीख मांगतौ। बा लगडे़ के संग जो कछू भयौ, बाय देखकें सब लोग अचरज करबे लगे और सोच में पर गये। बू अबई पतरस और यूहन्‍ना के संगई हतौ। जामारै सब लोग अचम्भौ करकें बा जगैह पै वाके जौरे दौडे़ दौडे़ आये, जो सुलेमान कौ बरामदौ कहौ जातौ हतो। जि देखकें पतरस ने कही, “इसरायल के लोगो तुम अचरज चौं कर रयेऔ? तुम ऐसें घूर-घूरकै हमे चौं देख रयेऔ? का हमनें अपने सामर्थ और भक्‍ती के बल ते जा आदमी कूं चलबे फिरबे लायक कर दो? अब्राहम, इसहाक और याकूब के परमेस्‍वर, हमारे पुरखन के परमेस्‍वर ने अपने सेबक ईसू की महिमा करी। पर तुमने बाय मरबा डारबे काजै पकरबाय दयौ और फिर पिलातुस ने बाय छोड़बे काजै फैसला करबे पै, पिलातुस के सामनेई तुमनें बाय नांय अपनांयौ। बा पबित्र और भले आदमी कूं तुमने नांय अपनांयौ और जि मांगौ के तुमारे काजै एक हत्‍यारे कूं छोड़ दयौ जाबै। लोगन कूं जीबन कौ रस्ता दिखाबे बारे कूं तुम लोगन नें मार डारौ। पर परमेस्‍वर ने बाय मरे भयेन मेंते जीबित करौऐ। हम जाकी गबाही दै रये हैं। चौंकि हम ईसू के नाम में भरोसौ करतैं, जामारै जि वाके नाम तैई है, जानें जा आदमी में जान फूंकी है जाय तुम देख रयेऔ और जानतौ। हाँ बू भरोसौ ईसू ते मिलतुऐ, तुम सबन के सामने जा आदमी कूं ठीक करौऐ। “हे भईयाओ, अब मैं जानतूं कै जैसे अनजाने में तुमने बैसौई करौ, बैसौई तुमारे नेतन नेंऊ करौ। पर परमेस्‍वर नें अपनी ओर ते बात बतायबे बारेन के द्वारा पैहलेई कैहलबायौ हतो कै, मसीह कूं ताड़ना भोगनी परैगी। बानें बू जाई तरैह ते पूरौ करौ है। जामारै तुम अपने पापन ते मन फिराऔ और परमेस्‍वर के माऊं लौट आऔ, जाते तुमारे पाप धुब जामें। और तुम परमेस्‍वर के सामने आतमा की सान्‍ती के समै आय सकें, और बू तुमारे काजै पिरभू मसीह कूं भेजे। बू तुमारे काजै चुन चुकौऐ, मतलब ईसू कूं। “मसीह कूं तब तक सुरग में रैहनौ होगौ जब तक सब बात पैहले जैसी नांय है जांय। जाके बारे में परमेस्‍वर नें अपनी ओर ते बात बतायबे बारे पबित्र लोगन के द्वारा पैहले समैं तेई बताय दयी हती। मूसा ने कही हती, ‘पिरभू परमेस्‍वर तुमारे काजै तुमारे भईयन में ते ऐसौ परमेस्‍वर की ओर ते बात बतायबे बारौ ठाड़ौ करैगौ। बू तुमते जो कहे तुम बाई पै चलियों। पर कोई आदमी वाकी बात नांय सुनैगौ, बू परमेस्‍वर के पबित्र लोगन ते अलग करके नांस कर दयौ जाबैगौ।’ “समूएल और वाके बाद में आये भये सब परमेस्‍वर की ओर ते बात बतायबे बारेन ने जब कबऊ कही, तब इन दिनन की घोसना करी हती। और तुम परमेस्‍वर की ओर ते बात बतायबे बारेन कै बादा के अधिकारी हैबे काजै परमेस्‍वर ने तुमारे पुरखन के संग करौ हतो। बानें अब्राहम ते कही हती कै, ‘तेरी सन्‍तानन ते, धरती के सबरे लोग आसीरबाद पामिंगे।’ परमेस्‍वर ने जब अपने चुने भये बेटे ईसू कूं जीबित करौ तब सबते पैहले तुमारे जौरे भेजौ कै, बू तुमें बुरे रस्ता ते हटाय के आसीरबाद देय।” पतरस और यूहन्‍ना लोगन ते बात कर रये हते तबई यहुदी पुरोहित और बड़े पिराथना घर के पैहरेदारन कौ मुखिया और कछू सदूकी बिनके जौरे आये। बे बिनते जा बात पै गुस्सा हते कै भेजे भये चेला सिछा दै रये हते और ईसू कौ उदाहरन दैकें, मरे भयेन में ते जी उठबे कौ पिरचार कर रये हते। जामारै उनकूं बन्दी बनांयौ, बा समै सांझ है चुकी हती, जामारै अगले दिनां तक जेल में रखौ हतौ। पर जिन्‍नें बू संन्देस सुनौ हतो उनमें ते भौतसे लोगन नें भरोसौ करौ। जा तरैह ते लोगन की गिनती बढ़कें पांच हजार के करीब है गयी। अगले दिना यहुदी नेता, बुजुर्ग और सास्त्रन कूं सिखाबे बारे येरूसलेम में इकठ्‌ठे भये। महा पुरोहित हन्‍ना, कैफा, यूहन्‍ना, सिकन्दर और महा पुरोहित के परिबार के सबरे लोगऊ मापै मौजूद हते। बे इन भेजे भये चेलान कूं बिनके सामने ठाड़े करके पूछबे लगे, “तुम जि सामर्थ के काम कौन के नाम और अधिकार ते कर रयेऔ?” फिर पबित्र आतमा में भरकै पतरस ने उनते कही, “हे लोगन के नेताऔ और बुजुर्ग, यदि आज हमते एक लंगड़े आदमी के संग करी गयी भलाई के बारे में जि पूछ ताछ करी जाय रही है कै, बू अच्‍छौ कैसे है गयौ, तौ तुम सब इसरायली लोगन कूं जि मालूम है जानी चहिऐं कै, जि काम ईसू मसीह नासरी के नाम ते भयौऐ। जाकूं तुमने क्रूस पै चढ़ाय दयौ हतो और जाय परमेस्‍वर ने मरे भयेन मेते दुबारा जीबित कर दयौ हतो। जि आदमी बाई के नाम के द्वारा पूरी तरैह ते ठीक भयौए और तुमारे सामने ठाड़ौए। जि बू पत्‍थर ईसूए, “ ‘जाय तुम राज मिस्तरीन ने बेकार ठहराय दयौ हतौ, बैई भौत जरूरी पत्‍थर बन गयौ।’ और काऊ दूसरे के द्वारा उद्धार नांय, चौंकि आकास के नीचे संसार के लोगन कूं और कोई दूसरौ नाम नांय दयौ गयौ, जाके द्वारा हमारौ उद्धार है सकै।” उन्‍नें जब पतरस और यूहन्‍ना की निडरता कूं देखौ और जि समझी कै, बे बिना पढ़े लिखे और साधारन ते आदमी हैं तौ उन्हें भौत अचरज भयौ। तब उनकूं पतौ चली के जि ईसू के संग रह चुके हैं। और चौंकि बे बा आदमी कूं जो सही भयौ हतो, बाय उनईं के संग ठाड़ौ देख रये हते, जामारै बे जबाब में कछू नांय बोल पाय रये हते। तब उन्‍नें यूहन्‍ना, पतरस और बा आदमी ते यहुदी सभा ते बाहर जायबे की कही, और फिर बे जि कैहत भये आपस में सोच बिचार करबे लगे कै, “इन लोगन के संग कैसौ बौहार करौ जाबै? चौंकि येरूसलेम में रैहबे बारे सब आदमी इनके करे भये अचम्भे के कामन कूं जानतुए और बाय झुठलाय नांय सकत। पर इनकूं जा बात की कड़ी चेतावनी दैं कै, बे जा नाम की चरचा और काऊ आदमी ते ना करें, जाते लोगन में जा बात कूं फैलबे ते रोकौ जाय सकैं।” जामारै बिनें फिर ते भीतर बुलायौ और उन्‍नें आग्‍या दैकै कही, “बे ईसू के नाम की न तौ काऊ ते चरचा करे और न वाके नाम ते काऊए उपदेस दें।” पर पतरस और यूहन्‍ना ने उनैं जबाब दयौ, “अब तुमईं न्याय करौ, का जि परमेस्‍वर के सामने हमारे काजै सही होगौ कै, हम परमेस्‍वर की न सुनिकें तुमारी सुनें? चौंकि हमनें जो कछू देखौऐ और सुनौए बाय बतायबे ते तौ हम चूक नांय सकत।” जा बात पै उन्‍नें पतरस और यूहन्‍ना कूं धमकायकै छोड़ दयौ और उन्‍नें सजा देबे काजै कोई रस्ता नांय मिलौ, चौंकि जो कछू भयौ हतो वाके मारे सब लोग परमेस्‍वर कि बड़ाई कर रये हते। जा आदमी के संग अचम्भे कौ काम करकें सही करौ हतो वाकी उमर चालीस साल के ऊपर होती। जब बे छोड़ दये गये तब अपने लोगन में आयकें, बू सब कछू जो पिरधान पुरोहितन, बुजुर्ग यहुदी नेतन ने कहौ हतौ, कैह सुनांयौ। जब उन्‍नें जि सुनी तौ बे ऊंची अबाज में परमेस्‍वर कूं पुकारकें बोले, “हे पिरभू, तैनेई ही आकास, धरती, समुन्दर और वाके भीतर जो कछु हतुऐ, वाकी रचना करिऐ। तैनेई पबित्र आतमा के द्वारा अपने सेबक हमारे पुरखा दाऊद के द्वारा कही हती, “ ‘इन गैर यहुदियन ने चौं उतपात मचायौ? लोगन नें बेकार मेई सड़यन्त्र चौं रच डारे? धरती के राजान ने, वाके खिलाप युद्ध करबे काजै तैयार करौ। और सासक पिरभू और वाके मसीह के बिरोध में इकठ्‌ठे भये।’ हाँ सच मुच, हेरोदेस और पुन्‍तियुस पिलातुसऊ गैर यहूदिन और इसरायलियन के बंसन के संग मिलकै जा नगर में तेरे पबित्र सेबक ईसू के खिलाफ, जाकौ तैनें अभिसेक करौ, सड़यन्त्र रचौ हतो। बे इकठ्‌ठे भए जाते तेरी सक्‍ती और इच्‍छा के अनुसार जो कछु पैहले तेई तैय है चुकौ हतो, कै बू पूरौ होय। और अब, हे पिरभू, उनकी धमकिन पै ध्‍यान दै और अपने सेबकन कूं बिना डरके, तेरौ वचन सुनांयबे की सामर्थ दै। बीमारन कूं ठीक करबे काजै तू अपनों हात बढ़ाए, ताकि ईसू के नाम ते चिन्ह और अदभुत काम तेरे पबित्र सेबकन के द्वारा करे जाय।” जब उन्‍नें पिराथना पूरी करी तौ जा जगह पै बे सब इकठ्‌ठे हते, बू हिलबे लगी और उन सबन में पबित्र आतमा समा गयौ, और बे बिना डरके सामर्थ के संग परमेस्‍वर के वचन बोलबे लगे। भरोसौ करबे बारेन कौ सबरौ झुंड एक मन और एक हिरदय हतो। कोई जि नांय कैहतो कै वाकी कोई चीज अपनी है। उनके जौरे जो कछू हतो, बामें सबकौ साझौ हतो। बे भेजे भये चेला सबरी सामर्थ के संग पिरभू ईसू के फिर ते जी उठबे की गबाही देते हते। परमेस्‍वर की बड़ी किरपा उनके ऊपर बनी रैहती हती। बा झुंड में काऊए कोई कमी नांय हती। चौंकि जा काऊ पै खेत और घर होतो, बे बाय बेच देते और बाते मिले भय धन कूं लायकें, भेजे भये चेलान के पामन में रख देते और जा काऊऐ जितनी जरूरत होती, बे बाय उतनों धन देते हते। मांपै यूसुफ नाम कौ आदमी हतो जो साइप्रस में पैदा भयौ और बू लेबी वंस कौ हतो। भेजे भये चेला बाय बरनबास कहौ करते हते, जाकौ मतलब, “सान्‍ती कौ बेटा।” वाके जौरे कछू जमीन हती बानें बू जमीन बेच दयी और बाते मिले धन कूं भेजे भये चेलान के पामन में रख दयौ। हनन्याह नाम कौ एक आदमी और वाकी पत्नी सफीरा ने मिलकै अपनों एक खेत बेच दयौ। और बानें बाते मिले धन में ते कछू धन बचाय लयौ जाके बारे में वाकी पत्नी जानती हती और वाकी बचा धन बानें भेजे भये चेलान के पांमन में रख दयौ। जापै पतरस ने बाते कही, “हे हनन्याह, सैतान कूं तेने अपने मन में जि बात चौं डारन दयी कै, तेने पबित्र आतमा ते झूंठ बोलौ और खेत कूं बेचबे ते जो कछु धन मिलौ हतो बामें ते थोरौ सौ बचाय लियौ? बेचबे ते पैहले का बू खेत तेरौ नाऔ? और अब तेने बेच दयौ है तौ बू धन तेरे अधिकार में नांय? तेने जि बात चौं सोची? तैने आदमिन ते झूंठ नांय बोलौ तेने परमेस्‍वर ते झूंठ बोलौऐ।” हनन्याह ने जब जि बात सुनी तौ बू पछाड़ खाके गिर पड़ौ और मर गयौ। तब जा काऊनें जि बात सुनी तौ सबन के ऊपर बड़ौ भय छाय गयौ। फिर कछू जबान लोगन नें बाकूं कप्फन में लपेटकें काठी पै धरकें बाहर लै गये और दफनांय दयौ। लगभग तीन घन्‍टा बाद, जो कछू भयौ हतो, बाते अनजान वाकी पत्नी भीतर आयी। पतरस ने बाते कही, “बता, का तुमने अपनों जि खेत इतने मेंईं बेचौ हतो?” तौ बानें कही, “हाँ, इतने मेंईं।” तब पतरस ने बाते कही, “तुम दोनों पिरभू की आतमा की परीछा लैबे काजै एक मन चौं है गये? देख तेरे पती कूं दफनांयबे बारेन के पांम तेरे दरबाजे तक आय पहुँचे हैं और बे तोऊऐ उठायले जांगे।” तब बू बाई समै वाके पामन में गिर परी और मर गयी। फिर जबान लोग भीतर आये और उन्‍नें बू मरी भई मिली तौ बे बाय उठायकें लै गये और वाके पती के जौरेई बाकूं दफनांय दयौ। और तब सब भरोसौ करबे बारेन पै और इन बातन कूं सुनबे बारेन पै, बड़ौ भय छा गयौ। भेजे भये चेलान के द्वारा लोगन के बीच में भौत ते चिन्‍न दिखाऐ और अचरज के काम करे जाय रये हते। बे सब भरोसौ करबे बारे लोग मिलकर सुलेमान के बरामदे में इकठ्‌ठे होते हते। दूसरे लोगन में ते काऊ की हिम्मत नांय होती के बे बिनमें सामिल है सकैं, पर लोग बिनकी बड़ाई जरूर करते हते। फिरऊ पिरभू पै भरोसौ करबे बारे औरत और आदमिन की भीड़ बड़त जाय रयी हती। जाकौ नतीजा जि भयौ कै लोग सड़क के किनारे पै बीमारन कूं खाटन पै और चटाई पै लिटाय देते हते के जब पतरस आबैगौ तौ वाकी परछाई इन पै पर जाबे। येरूसलेम के आस-पास के नगरन में तेऊ लोग बीमारन और दुस्‍ट आतमान ते सताये भये लोगन कूं लाय लायकै इकठ्‌ठौ करते हते, और बे सब अच्‍छे है जाबते हते। फिर महा पुरोहित और वाके साथी, मतलब सदूकियन कौ दल, उनके खिलाप ठाड़े है गये। बे जलन ते भरे भए हते। जामारै बिन्‍नें भेजे भये चेलान कूं पकरकै जेल में डार दयौ। पर रात के समै पिरभू के एक सुरग दूत ने जेल के फाटक खोल दये। बानें उनकूं बाहर ले जायकें कही, “जाओ, बड़े पिराथना घर में ठाड़े है जाओ और जा नये जीबन के बारे में लोगन कूं सब कछू बताओ।” जब उन्‍नें जि सुनी तौ सबेरे तड़के बे बड़े पिराथना घर में घुस गये और सिछा दैबे लगे। जब महा पुरोहित और वाके साथी म्हां पौहंचे तौ उन्‍नें यहुदी सभा बुलबाई और सबरे इसरायल के बुजुर्ग इकठ्‌ठे करे, फिर उन्‍नें जेल ते भेजे भये चेला बुलबाये। पर जब अधिकारी जेल में पौहंचे तौ उन्‍नें बे म्हांपै नांय मिले। तब उन्‍नें जा बात की खबर दयी और कही कै, “हमनें सबरी जेल के तारे अच्‍छी तरैह ते बन्द करे हते, और पैहरेदार द्वार पैई ठाड़े हते। पर जब दरबाजौ खोलौ तौ बे मांपै भीतर नांय हते।” तब बड़े पिराथना घर के पैहरेदारन के मुखिया और यहुदी पिरधान पुरोहितन्‍नें जि बात सुनी, तौ बे भारी चिन्‍ता में पर गये कै अब का होगौ। फिर काऊ ने आयकै उनकूं बताई कै, “देखौ, जिनकूं तुमने जेल में बन्द करौ हतो, बे तौ बड़े पिराथना घर में ठाड़े हैके लोगन कूं सिछा दै रये है।” तब बड़े पिराथना घर के पैहरेदारन कौ मुखिया कछू पैहरेदारन के संग भेजे भये चेलान कूं पकरबे गयौ, और बे बिनें बिना जोर दबाब के बापस ले आये, उन्‍नें जि डर हतो कै कहूं बे उनपै पत्‍थर न फैंककै मारै। बे उनकूं महा सभा में भीतर लै आये और बिनते महा पुरोहित ने पूछी कै, “का हमनें तुमें जि चेतावनी नांय दयी कै तुम ईसू नाम ते सिछा मत दियौं? फिरऊ तुमने पूरौ येरूसलेम जा सिछा ते भर दयौए। तुम बा आदमी की हत्‍या कौ दोस हम पै लगायबौ चांहतौ।” पतरस और दूसरे भेजे भये चेलान ने जबाब दयौ, “हमें आदमिन की नांय पर परमेस्‍वर की बात माननी चहिऐं। बा ईसू कूं हमारे पुरखन के परमेस्‍वर ने मौत में ते जिलायकै दुबारा ठाड़ौ कर दयौ है। जाय क्रूस पै लटकायकै तुम लोगन्‍नें मार डारौ हतो। और बाई परमेस्‍वर ने बू राजा और हमारौ उद्धारकरता ठहरायके अपने सीदे हात माऊं बैठारौ है। जाते सबरे इसरायल के लोग अपने पापन ते मन फिरामें और छमा पाय सकें। इन सब बातन के हम गबाह हैं और बैसेऊं बू पबित्र आतमाऊ हतुऐ जो परमेस्‍वर ने उन्‍नें दयौ है जो वाकी आग्‍या कौ पालन करतें।” जब महा सभा के लोगन नें जि सुनी तौ बे आग बबूला हे उठे और भेजे भये चेलान कूं मार डारबौ चांहौ। पर महा सभा में ते एक गमलिएल नाम के फरीसी, जो धर्मसास्त्र की सिछा देबे बारौ हतो, और जाकौ सब लोग आदर करते हते, ठाड़ौ भयौ और आग्‍या दई के भेजे भये चेलान कूं थोड़ी देर के काजै बाहर कर देऊ। फिर बू उनते बोले, “इसरायल के लोगो, तुम इन लोगन के संग जो कछू करबे काजै उतारूऔ, बाय सोच समझकै करिओं। कछू समै पैहले अपने आपकूं बड़ौ कैहत भयौ, थियूदास उजागर भयौ हतो। और कोई चार सौ लोग वाके पीछेऊ है गये हते, पर जब बू मार डारौ तौ बाय मानबे बारे सबके सब तितर-बितर है गये। और नतीजा कछू नांय निकरौ। वाके बाद जनगनना के समै गलील कौ रहबे बारौ बाला यहूदा उजागर भयौ। बानेंऊ कछू लोगन कूं अपने पीछे मोह में कर लयौ हतो। जब बेऊ मारौ गयौ तौ वाकेऊ मानबे बारे सब तितर-बितर है गये। जामारै मैं अब तुमते कैह रयौऊं, इन लोगन ते अलग रहो और इनें ऐसेई अकेले छोड़ देऊ चौंकि इनकी जि योजना और जि काम आदमिन की ओर ते हतुए तौ अपने आपई खतम है जाबैगौ। पर अगर जि परमेस्‍वर की ओर ते है तौ तुम उन्‍नें रोक नांय पाओगे। तब है सकतुए तुम अपने आप कूंई परमेस्‍वर के खिलाप लड़त भये पाऔ।” उन्‍नें वाकी सलाह मान लई और भेजे भये चेलान कूं भीतर बुलायकै उनमें कोड़ा लगबायकै जि आग्‍या दैकें कै, बे ईसू के नाम की कोई चर्चा न करें, उनकूं जान दयौ। जामारै बे भेजे भये चेला जा बात कौ आनन्द मनाबते भए यहुदी महा सभा ते चले गये कै, उन्‍नें ईसू के नाम के काजै अपमान सैहबे लायक गिनौ गयौऐ। फिर बड़े पिराथना घर और घर-घर में रोजाना जि सुभ समाचार देते कै, “ईसू अई मसीह हतुए” सिछा दैबौ और पिरचार करबौ उन्‍नें कबऊ नांय छोड़ौ। बिन दिनन में जब चेलान की संख्‍या बढ़ रयी हती, तब यूनानी भासा बोलबे बारेन, इब्रानी भासा बोलबे बारेन पै कुड़ कुड़ायकै लगे कै, “हमारी रोजाना की सेबकाई में हमारी बिधबान की सुधी चौं नांय लयी जा रयी?” तब उन भेजे गये बारे चेलान ने सब भरोसौ करबे बारे भईयन कूं अपने जौरे बुलायकै कही कै, “जि सही नांय कै हम परमेस्‍वर के वचन की सिछा दैबो छोड़कै खायबे पीबै की सेबकाई करें। जामारै हे भईयाओ, तुम अपने बीच में ते ऐसे सात आदमिन कूं चुन लेओ जो पबित्र आतमा ते भरौ भयौ और बुद्धी ते भरौ भयौ होय। और बिनें जा खबायबे पियायबे के काम में लगाय देऊ। हम लोग तौ पिराथना और परमेस्‍वर के वचन की सेबा में लगे रहिंगे।” जि बात सबरे झुन्‍ड कूं अच्‍छी लगी। उन्‍नें भरोसे और पबित्र आतमा ते भरे भये स्तिफनुस नाम के आदमी और फिलिपुस, प्रोखोरुस, नीकानोर, तीमोन, परमेनास और यहुदी धर्म में नबदिछित अन्ताकिया निबासी नीकुलाउस कूं चुन लयौ। उन्‍नें उनकूं भेजे भये चेलान के सामने खड़ौ करौ और बिन्‍नें उनके ऊपर हात रखकै पिराथना करी। और परमेस्‍वर कौ वचन फैलत गयौ और येरूसलेम में चेलान की गिनती बढ़त गयी। भौत ते यहुदी पुरोहित ईसू पै भरोसौ करबे लगे। स्तिफनुस एक ऐसौ आदमी हतो जो परमेस्‍वर की किरपा और सामर्थ में भरकै बडे़-बडे़ अदभुत काम और चिन्‍न दिखाबतौ। लिबरतीनों नाम के यहुदी पिराथना घर के कछू लोग और कुरेनी, सिकन्दरिया, किलकिया और आसिया ते आये कछू लोग उठकै स्तिफनुस ते बाद-बिबाद करबे लगे। पर बे लोग बा ग्‍यान और आतमा कौ सामनों नांय कर पाये जाते बू बात करतौ। तब उन्‍नें कछु लोगन कूं धन कौ लालच दैकें बिनते झूंठी गबाही दिब्बाई कै, “हमनें इनकूं मूसा के और परमेस्‍वर खिलाप निन्दा की बात कैहत भये सुनों है।” और जा तरैह ते बिन्‍नें लोगन कूं, यहुदी नेतान कूं और सास्त्रन कूं सिखाबे बारेन कूं भड़का दयौ। फिर बे बाय पकड़कै यहुदी महा सभा में ले आए। और मांपै बिन्‍नें झूंठे गबाह ठाड़े करे, जिन्‍नें कही कै, “जि आदमी जा पबित्र जगैह और मूसा की व्‍यबस्था की निन्दा करबौ नांय छोड़त। चौंकि हमनें जाय जि कैहत भये सुनौए कै, ईसू नासरी जा बड़े पिराथना घर कूं ढाय देगौ और मूसा की रीती कूं बदल डारैगौ जो हमे मूसा ने दयीऐ।” तब सबरी यहुदी सभा में बैठे भये सब लोगन्‍नें स्तिफनुस की ओर ध्‍यान ते देखौ तौ वाकौ मौंह सुरग दूत कै मौंह जैसौ दिख रयौ हतो। तब महा पुरोहित ने स्तिफनुस ते कही, “का जे बात सही है?” बानें कही, “हे भईयाओ और बुजुर्गो मेरी बात सुनो। जब हमारौ पिता अब्राहम हारान में रैहबे ते पैहले जब मेसोपोटामिया में हतो, तब महिमा मय परमेस्‍वर ने बाय दरसन दये। और बाते कही कै, ‘तू अपने देस और अपने कुटुम्ब ते निकरकै बा देस में चलौ जा, जाय मैं तोय दिखाऊंगौ।’ तब बू कसदियन के देस ते निकर के हारान में जायकै रैहबे लगौ, और वाके पिता की मौत के बाद परमेस्‍वर ने बाय मांते जा देस में लायकें बसायौ जामें अब तुम रैहतो हो। परमेस्‍वर नें बाय कछु बिरासत नांय दयी य्हां तक कि पाम रखबे काजैऊ जगैह नांय दयी हती, पर जि प्रतिग्‍या करी कै, ‘मैं जा देस कूं, तेरे और तेरे बाद तेरे वंस के हात में कर दुंगो।’ बा समै बापै कोई बेटा नांय हतो। और परमेस्‍वर ने ज्‍यों कही, ‘कै तेरी सन्तान के लोग पराये देस में परदेसी हुंगे, और बे उन्हें गुलाम बनांगे, और चार सौ साल तक दुख दिंगे।’ फिर परमेस्‍वर ने कही, ‘जा जाति के बे गुलाम हुंगे, बाय मैं दन्ड दुंगो और जाके बाद बे निकरकें जा जगैह पै मेरी सेबा करिंगे।’ तब परमेस्‍वर नें अब्राहम ते खतना की बाचा बांधी। और जा हालत में इसहाक बाते पैदा भयौ और आठमें दिना वाकौ खतना करौ गयौ, और इसहाक ते याकूब और याकूब ते बारह कुलपति पैदा भए। “उन कुलपतिन ने यूसुफ ते जलन करकें बाय दास बनबे काजै मिस्र देस में जाने बारेन के हातन में बेच दयौ। पर परमेस्‍वर वाके संग हतो। और परमेस्‍वर नें यूसुफ कूं वाके सब दुख और कलेसन में ते छुड़ायकै मिस्र के राजा फिरौन के आगे किरपा और बुद्धि दयी, और बानें बाय मिस्र पै और अपने सबरे घर पै अधिकारी ठहरायौ। तब मिस्र और कनान के सबरे देसन में अकाल परौ, जाते भारी क्लेस भयी, और हमारे बाप-दादन कूं खाबे काजै नाज नांय मिलौ। जब याकूब ने जि सुनीं कै, मिस्र में नाज है, अपने बेटन कूं, हमारे पुरखन कूं पैहली बार भेजौ। और दूसरी यात्रा के मौके पै यूसुफ ने अपने भईयन के सामने अपने आपकूं पिरकट करौ और तब मिस्र के राजा फिरौन कूं यूसुफ की जाति मालूम है गई। तब यूसुफ ने अपने पिता याकूब और अपने सबरे कुटुम्ब कूं, जो पिचैत्‍तर आदमी हते, उनकूं मिस्र में बुलबायौ। याकूब मिस्र में गयौ मांपै बू और हमारे पुरखा मर गए। और बाद में उनकी लास सेकेम में लाई गयी और कबर में रखी गयी, जाय अब्राहम ने चांदी दैकें सेकेम में हमोर की सन्तान ते मोल लयौ हतो। “पर जब बा प्रतिग्‍या के पूरे हैबे कौ समै जौरे आयौ, जो परमेस्‍वर ने अब्राहम ते करौ हतो, तौ मिस्र में हमारे लोग बढ़ गए, और भौत है गए। जाके बाद मिस्र में दूसरौ राजा भयौ जो यूसुफ कूं नांय जानत हतौ। बानें हमारी जाति ते चतुराई करकें, हमारे बाप-दादन के संग इतनौ बुरौ बौहार करौ। कै उन्‍नै अपने बालक फैंकने परे के, बे जीबित नांय रहें। “बाई समै मूसा पैदा भयौ। बू परमेस्‍वर की नजर में भौत खूब सूरत हतौ, और बू तीन महीना तक अपने पिता के घर में पालौ गयौ। पर जब मूसा कूं घर के बाहर छोड़ दयौ गयौ तब बू फिरौन की बेटी कूं मिल गयौ, और अपनों बेटा मानकें पालौ। और मूसा कूं मिस्रीयों की सबरी बिद्या पढ़ाई गई, और बू बातन में और कामन में सामर्थी हतो। “जब मूसा चालीस साल कौ भयौ, तौ वाके मन में आयौ कै, ‘मैं अपने इसरायली भईयन ते मिलूं।’ और बानें एक इसरायली आदमी पै अन्याय होत भये देखकें वाकौ पछ लयौ और मिस्रीयों कूं मार मारकै वाकौ बदलौ लयौ। मूसा नें सोची कै, ‘मेरे भईया समझिंगे कै, परमेस्‍वर मेरे हातन ते उनकौ उद्धार करैगौ।’ पर बे बाय समझ नांय पाये। दूसरे दिना जब बिनमें ते दो इसरायली लोग आपस में लड़ रहे हते, तब बू बिनके जौरे गयौ, और बू जि कैहके बिनमें मेल करबे काजै समझायौ, ‘हे जबानों, तुमतौ भईया भईयाओ। एक दूसरे पै चौं अन्याय कर रयेऔ?’ “पर बा आदमी नें जो अपने पड़ौसी के संग अन्याय कर रयौ हतो, बानें मूसा कूं धक्‍का मारते भये कही कै, ‘तोय कौनें हम पै हाकिम और न्यायी ठहराऔऐ? जैसे तैने कल बा मिस्री कूं मार डारौ। का तू बैसेई मोऊए मार डारबौ चाहतुऐ?’ मूसा नें जब जि बात सुनीं तौ बू मांते चलौ गयौ और मिद्यान देस में परदेसी के रूप में रहबे लगौ। म्हांपै वाके दो बेटा पैदा भए। “जब पूरे चालीस साल बीत गए, तब मूसा कूं सिने पहाड़ के पास बेहड़ में एक जलती भई झाड़ी की लपटन के बीच में एक सुरग दूत ने दरसन दये। मूसा ने बू दरसन देखकें अचम्भौ करौ, और जब देखबे के काजै जौरे आयौ, तौ पिरभू की जि अबाज आई, ‘मैं तेरे बाप-दादन कौ, अब्राहम कौ, इसहाक कौ और याकूब कौ परमेस्‍वर हूं।’ तब तौ मूसा कांप उठौ, य्हां तक कै बाय देखबे कीऊ हिम्मत नांय रही। “तब पिरभू ने बाते कही, ‘अपने पामन ते जूती उतार लै, चौंकि जा जगैह तू खड़ौऐ, बू पबित्र धरती है। मैंनें मिस्र में अपने लोगन की दुर्दसा देखी है और उनकी आह और उनकौ रोयबौ सुन लयौऐ। जामारै मैं उन्‍नें छुड़ायबे के काजै उतरौऊं। अब आ, मैं तोय मिस्र में भेजुंगो।’ “जाई मूसा कूं उन्‍नै जि कहिकें नांय अपनांयौ कै ‘तू कोऐ और कौने हम पै हाकिम और न्यायी ठहरायौए?’ बाई कूं परमेस्‍वर ने सुरग दूत के द्वारा, जाने बाय झाड़ी में दरसन दये हते हाकिम और छुड़ायबे बारौ ठहरायके बिनके जौरे भेजौ। जि बेई मूसा है जो मिस्र देस और लाल समुन्दर और बेहड़ में चालीस साल तक अदभुत काम और चिन्‍न दिखाय दिखायकें उन्‍नें निकार लायौ। जि बैई मूसा है, जाने इसरायलियन ते कही हती, ‘परमेस्‍वर तुमारे भईयन में ते तुमारे काजै मो जैसौ एक परमेस्‍वर की बात बतायबे बारौ भेजे।’ जि बैई है, जो बेहड़ में हमारे इसरायली बाप दादान के संग हतो और जाते सिने पहाड़ पै सुरग दूत ने बात करीं हतीं। बाई कूं परमेस्‍वर कौ जीबित वचन मिलौ, जाते बू बाय हम लोगन कूं सुनाबै। “पर हमारे बाप दादन्‍नें वाकी बात मानबौ न चाही, पर बाय हटायकै अपने मन मिस्र की ओर फेरैं। और बिन्‍नें हारून ते कही, ‘हमारे काजै ऐसौ देबता बना, जो हमें रस्ता दिखाबै। चौंकि जो मूसा हमें मिस्र देस ते निकार लायौ, हम नांय जानत कै वाकौ का भयौ।’ उन दिनन में उन्‍नें एक बछड़ा बनांयकें, वाकी मूरत के आगे बलि चढ़ाई और बे अपने हातन के कामन में मगन हैबे लगे। जामारै परमेस्‍वर ने बिनते मौंह मोड़ लयौ हतो। बिनें आकास की सक्‍तीन की पूजा करबे काजै छोड़ दयौ हतो। जैसौ कै परमेस्‍वर की ओर ते बात बतायबे बारेन की किताब में लिखौ भयौऐ, “ ‘हे इसरायल के घराने, का तुम बेहड़ में चालीस साल तक पसुबलि और अन्‍न बलि मेरे काजै चढ़ाबते रहे? तुम मोलेक के तम्बू और अपने देबता रिफान देबता के तारे कूं अपने संग लै गये हते। बिन मूरतीन कूंअऊं तुम लै गये जो तुमने दन्‍डबत करबे काजै बनाई हतीं। जामारै मैं तुम लोगन कूं बेबीलोन देस ते निकारकें बाहर भेजुंगो।’ “गबाही कौ तम्बू बीहड़न में हमारे बाप दादेन के संग हतो। मूसा कूं परमेस्‍वर ने जाके बारे में जि आदेस दयो, ‘जो तेने देखौऐ, आयकें वाके अनुसार जाय बना।’ बाई तम्बू कूं हमारे बाप दादे पैहले समै ते पायकें, यहोसू के संग ज्हां ले आऐ, जा समै उन्‍नें उन गैर यहुदिन कौ अधिकार पायौ जिनकूं परमेस्‍वर ने हमारे बाप-दादन के सामने ते निकार दयौ हतो, और बू तम्बू दाऊद राजा के समै तक रहौ। दाऊद पै परमेस्‍वर ने किरपा करी, जामारै बानें बिनती करी कै, ‘मैं याकूब के परमेस्‍वर के रैहबे काजै जि जगैह ठहराऊं।’ पर सुलेमान ने परमेस्‍वर के काजै भवन बनांयौ। “पर परम पिरधान, हात के बनाए घरन में नांय रैहतु, जैसी कै परमेस्‍वर की बात बतायबे बारेन ने कही हती, “ ‘पिरभू यौं कैहतुऐ, सुरग मेरी राजगद्‍दी है और धरती मेरे पामन की चौकी है, मेरे काजै तुम कैसौ घर बनाओगे, और मेरे आराम की कौन सी जगैह होगी? का जे सब चीज मेरे हात की बनाई भई नांय?’ “अरे हठीले लोगो, तुम न तौ सुनबौ चांहत और नांय समझबौ चांहत। तुम सदां पबित्र आतमा कौ बिरोध करतौ। जैसौ तुमारे बाप दादा करते हते, बैसेई तुमऊं करतौ। तुमारे बाप-दादन ने, काऊ परमेस्‍वर की बात बतायबे बारेन कूं न छोड़ो जिनकूं न सतायौ होय। उन्‍नें तौ बू परमेस्‍वर की ओर ते बात बताबे बारेऊ कूंअऊं मार डारौ जिन्‍नें भौत पैहले तेई बा धरमी के आयबे के बारे में भविस्‍यबानी करी हती, और अब तुमऊ बा धरमी कूं धोखे ते पकरबाबे बारे और मार डारबे बारे भए। तुमने सुरग दूतन के द्वारा व्‍यबस्था तौ पाई, पर वाकौ पालन नांय करौ।” महा सभा के लोगन नें स्तिफनुस की बात सुनीं तौ बे आग बबूला हे गए और बापै दांत पीसबे लगे। पर बानें पबित्र आतमा ते भरकै सुरग के माऊं देखौ और परमेस्‍वर की महिमा कूं और ईसू कूं परमेस्‍वर की दाहिनी ओर ठाड़ौ देखकें कही, “देखौ, मैं सुरग कूं खुलौ भयौ, और मनुस्‍य के बेटा कूं परमेस्‍वर के सीदे हात की ओर ठाड़ौ भयौ देखतूं।” तब उन्‍नें बड़े अबाज ते चिल्लायकै अपने कान बन्द कर लए, और फिर बे सब मिलकै बापै झपटे। बे दोस लगाबे बारे बाय घसीटत भये येरूसलेम नगर ते बाहर लाये। बिन्‍नें पत्‍थर मार करबे काजै अपनी लोई उतारकै साऊल नामके जबान के पामन में रखी। और जब बे स्तिफनुस पै पत्थर मार कर रये हते तब बू जि कैहकै पिराथना करत रहौ कै, “हे पिरभू ईसू, मेरी आतमा कूं ग्रहन कर।” फिर बू घुटने टेककै ऊंची अबाज ते चिल्‍लायौ, “हे पिरभू, जि पाप इन पै मत लगा।” जि कहिकें बानें अपने पिरान छोड़ दिये। साऊल वाकी हत्‍या में सहमत हतो। बा दिन ते येरूसलेम की कलिसियान पै भौत अत्‍याचार भयौ। भेजे भये चेलान कूं छोड़कै सब भरोसौ करबे बारे यहुदिया और सामरिया के गांमन में बिखर गये। परमेस्‍वर के पबित्र लोगन नें स्तिफनुस की लास बिलाप करते भये कब्र में रखी। साऊल बा समै कलिसिया कूं सताय रयो हतो। बू घर घर में ते, का आदमी, का औरत सबन कूं घसीट घसीट के जेल में डार रयो हतो। जो भरोसौ करबे बारे तितर-बितर है गये हते, बे घूम घूम कर परमेस्‍वर कौ वचन सुनाबत हते। फिलिपुस सामरिया के एक नगर में जायकें, लोगन में मसीह कौ पिरचार करबे लगे। जो बात फिलिपुस ने कही हती, उन लोगन नें सुनकें और जो चिन्‍न और चमत्‍कार बू दिखाबतो उन्‍नें देख केंई एक चित हैकें मन लगायौ। चौंकि भौतन में ते दुस्‍ट आतमा चिल्‍लाबत भई निकर गयीं और भौत ते लकबा के मारे भये और लंगड़े ठीक करे हते। और जामारै बा नगर के लोग भौत खुसी मनांय रये हते। जाते पैहले जा नगर में सिमौन नाम कौ एक आदमी रैहतो, जो जादू टौना करकें सामरिया लोगन कूं अचरज में डारतो और अपने आप कूं महान आदमी हैबे कौ दाबा करतो। और छोटे बड़े सब वाकी बात मानते हते और जि कहते कै, “सच में जा आदमी में परमेस्‍वर की सामर्थ है।” चौंकि बानें भौत दिनन ते अपनी जादूगरी के कामन ते लोगन कूं भरमाय रखौ हतो, जामारै बे बाय भौत मानते हते। पर अब उन्‍नें फिलिपुस की बात पै भरोसौ करौ चौंकि बानें बिनें परमेस्‍वर के राज और ईसू मसीह के नाम कौ सुभ समाचार बताबतो हतो। तब का आदमी का औरत बपतिस्मा लैबे लगे। तब खुद सिमौन नैऊ भरोसौ करौ और बपतिस्मा लयौ और फिलिपुस संग रैहबे लगो। बू चिन्‍न और सामर्थ के काम देखकै दंग रह जातो। और जो भेजे भये चेला येरूसलेम में रैहते जब उन्‍नें जि मालूम परी कै सामरिया जिला के लोगन नें परमेस्‍वर के वचन भरोसौ कर लयौए, तौ पतरस और यूहन्‍ना कूं उनके जौरे भेजौ। बिन दोनोंन नें सामरिया में जायके लोगन के काजै पिराथना करी कै, बे पबित्र आतमा पाबें। चौंकि अब तक उनमे ते काऊऐ पबित्र आतमा नांय मिलौ हतो, उन्‍नें तौ बस पिरभू ईसू के नाम कौ बपतिस्मा लयो हतो। जामारै पतरस और यूहन्‍ना नें बिनपै हात रखै और तब उन्‍नें पबित्र आतमा पायौ। जब सिमौन नें जि देखौ कै भेजे भये चेलान के हात रखबे ते पबित्र आतमा दयौ जाबतुए, तौ उनके जौरे आयकें रुपया पईसा लायके कही, “जि अधिकार मोऊऐ देऊ कै, मैं जा काऊ पै हात रखूं, बू पबित्र आतमा पाबै।” पतरस ने बाते कही, “तेरे रुपया पईसा तेरे संगई नांस होंय, चौंकि तैने परमेस्‍वर कौ वरदान रुपया पईसान मोल लैबे कौ बिचार करौ। जा बात में तेरौ कोई साझौ नांय और न कोई अधिकार चौंकि तेरे मन में परमेस्‍वर के काजै कपटुए। जामारै तू अपनी बुराईन ते मन फिरायकै पिरभू ते पिराथना कर तौ हे सकै कै तेरौ मन के बिचार मांफ करै जांय। चौंकि मैं देखतूं कै, तेरौ मन में लालच कूट कूटकें भरौ भयौ हैं और अधर्म के चगुंल में फंसो भयौऐ।” जा बात सिमौन नें जबाब दयौ, “तुम मेरे काजै पिरभू ते पिराथना करौ, जाते जो बात तुमने कहीये उनमें ते एकऊ मोपै नांय बीतें।” तब भेजे भये चेला पतरस और यूहन्‍ना ने गबाही दैके, पिरभू कौ वचन सुनाबे के बाद येरूसलेम लौटे और बिन्‍नें लौटते समै रस्ता में समारिया के भौत ते गांमन में सुभ समाचार सुनांयौ। तब पिरभू के एक दूत ने फिलिपुस ते कही, “उठ बा रस्ता पै जा, जो येरूसलेम ते गाजा कूं दछिन दिसा में जाबतुए।” जि सुनसान रस्ता है। बू उठकै चल दयौ। बा रस्ता पै कुस देस कौ एक अधिकारी आय रयौ हतो, जो कूस देस की रानी कन्दाके कौ मन्त्री और खजान्‍ची हतो। बू येरूसलेम ते भजन संगती करकें लौट रयौ हतौ। बू अपने रथ पै बैठौ भयौ परमेस्‍वर की ओर ते बात बतायबे बारे यसायाह की किताब कूं पढ़त भयौ आ रयौ हतो। तबई फिलिपुस ते पबित्र आतमा ने कही, “आगे बढ़ और जाके रथ के संग चल।” तब फिलिपुस भाजकें रथ के जौरे पौहचौ और बा अधिकारी कूं परमेस्‍वर की ओर ते बात बतायबे बारे यसायाह की किताब कूं पढ़त भये सुनकें बाते पूछी, “जो तुम पढ़ रयेऔ, का वाकौ मतलब समझतुऐ?” तब बा अधिकारी नें बाते कही, “जब तक मोय कोई नांय समझाबे तब तक मैं कैसै समझूंगौ?” और बानें फिलिपुस ते बिनती करके कही कै, “रथ में आयकै मेरे जौरे बैठ।” सास्त्र कौ जो पाठ बू पढ़ रयो हतो बामें लिखौ हतो, “बू मैमना की तरैह ते मारबे काजै लै जायो गयौ, और बू ऊन कतरबे बारी भेड़ की नाईं चुप रयौ, और बानें अपनों मौंह नांय खोलो। बाय अपमान सैहनो परौ वाके संग न्याय नांय करौ गयौ। वाके बन्स की चरचा को कर सकतुए? चौंकि वाकौ जीबन तौ धरती पै तेई उठाय लयौ गयौ।” तब अधिकारी नें फिलिपुस ते बिनती करी कै, “तुम मोय जि बताऔ कै परमेस्‍वर की बात बतायबे बारौ कौन के बारे में कैह रयौ है? अपने या काऊ और के बारे में?” फिलिपुस ने पबित्र सास्त्र के बा पाठ ते लेकै ईसू के सुभ समाचार तक बाय सब सुनांयौ। रस्ता पै चलत-चलत बे एक पानी की जगैह पै पौहचे। तब अधिकारी ने फिलिपुस ते कही, “देख अब य्हांपै पानीअऊऐ। अब मोय बपतिस्मा लैबे में का रुकाबट है?” तब फिलिपुस ने कही, “अगर तू पूरे मन ते भरोसौ करतै तौ तू बपतिस्मा लै सकतुए।” बानें जबाब दयौ के, “मैं भरोसौ करतूं कै ईसू मसीह परमेस्‍वर कौ बेटाऐ।” तब अधिकारी नें रथ रोकबे की कही, फिलिपुस और अधिकारी दोनों पानी में उतर गये और फिलिपुस नें बाकूं बपतिस्मा दयौ। जब बे पानी में ते बाहर निकरे तबई पिरभू कौ आतमा फिलिपुस कूं उठाय लै गयौ और अधिकारी ने बाय फिर नांय देखौ और बू आनन्द मनाबत भये अपने रस्ता पै चलौ गयौ। फिलिपुस ने खुद कूं असदोद नगर पाया और जब तक केसरिया नगर में नांय पौंहचौ तब तक नगरन में सुभ समाचार सुनाबत भयौ गयौ। साऊल अब तक पिरभू के चेलान नें धमकायबे और मार डारबे की धुन में रैहतो हतो। बू महा पुरोहित के जौरे गयौ। और दमिस्‍क के यहुदी पिराथना घरन के नाम की चिठ्‌ठी मांगी, जामें बाय जि अधिकार मिलौ हतो कै, बू मांके उन लोगन कूं जो ईसू के नाम पै चलबे बारे मिले, का आदमी, का औरत उनकूं बांधकै येरूसलेम लै आबै। पर बू चलत-चलत जब दमिस्‍क के जौरे पौहचौ तौ अचानक आकास ते वाके चारौ ओर एक रोसनी चमकी। और बू धरती पै गिर परौ और बाय एक अबाज सुनाई दयी, “साऊल! हे साऊल! तू मोय चौं सताय रयौ है?” तब साऊल नें बाते पूछी, “हे पिरभू! तू कोऐ?” तब बानें कही, “मैं ईसू हूं, जाय तू सताबतुए। अब उठ नगर कूं जा और जो कछू तोय करनोंए, बू तोय बताय दयो जाबैगौ।” जो आदमी वाके संग हते बे दंग रैह गये चौंकि बे अबाज तौ सुन रये हते पर उनकूं कोई दिखाई नांय दे रयौ हतो। जब साऊल धरती पैते उठौ तौ बाय कछु नांय दीखौ और बे बाय पकरकें दमिस्‍क कूं लै गये। और बू तीन दिन तक आंखन ते कछू नांय देख सकौ और बानें कछू नांय खायौ पीयौ। दमिस्‍क में हनन्याह नाम कौ एक चेला रैहतो, बाते पिरभू ने दरसन में कही कै, “हे हनन्याह।” और बानें कही, “हाँ पिरभू” तब पिरभू ने कही, “उठ और बा गली में जा जो ‘सीधी कही जाबतिऐ।’ मांपै यहूदा के घर में एक साऊल नाम कौ तरतुस नगर कौ रैहबे बारौ आदमी पूछलै, चौंकि देख बू पिराथना कर रयौ है, और बानें दर्सन में देखौ है कै, हनन्याह नाम कौ एक आदमी भीतर आयौ है और बू वाके ऊपर हात रखकें पिराथना कर रयौ है, जाते बू दुबारा देखबे लगे।” जा बात पै हनन्याह ने कही, “हे पिरभू, मैने बाय येरूसलेम में तेरे पबित्र लोगन पै अत्‍याचार करत भये सुनोंऐ, और ज्हांपै यहुदी पुरोहितन की ओर ते अधिकार मिलौ भयौए के, जो कोई तेरो नाम लेय, बू बाय बांधकै येरूसलेम में लै जाय।” तब पिरभू ने हनन्याह ते कही, “तू जा। चौंकि बू तौ मेरौ चुनों भयौ आदमीऐ। बू गैर यहुदियन और उनके राजान और इसरायलीन कै बीच में मेरे नाम ते पिरचार करैगौ। मैं खुद बाय बताऊंगो कै बाय मेरे नाम की बजैह ते कितनौ दुख उठानौ परैगौ।” तब हनन्याह बा घर में गयौ और बानें साऊल पै हात रखकें कही, “हे भईया साऊल, तू जा रस्ता ते आय रयो बा समै तोय पिरभू ईसू दीखौ हतो बाई ने मैं भेजौऊ कै, तू फिर ते देखबे लगे और पबित्र आतमा ते भर जाबे।” ओर तबई वाकी आंखन में ते छिलका ते गिरे और बू देखबे लगौ और उठके बपतिस्मा लियौ। फिर बानें भोजन खायौ और तागत पाई। और बू कैऊ दिन चेलान के संग दमिस्‍क मेंई रहौ। फिर बू तबई म्हांपै यहुदी पिराथना घरन में भीतर जायकै ईसू के बारे में पिरचार करबे लगौ कै, “ईसू अई परमेस्‍वर कौ बेटाऐ।” और सब सुनिबे बारे अचरज करबे लगे कै, “जि बैई आदमी नांय जो येरूसलेम में ईसू के नाम लैबे बारेन कूं मार डारबे की कोसिस करतौ? का जि य्हांपैऊ जाई काजै तौ नांय आयौ कै, उन्‍नैं बांधकै महा पुरोहित के जौरे लै जाबें?” पर साऊल सामर्थ में बढ़त गयौ और दमिस्‍क में रैहबे बारे यहुदियन कूं जि सबूत दै दैकें, ईसू ही मसीह हे,लोगन कौ म्हों बन्द करतो रहौ। जब भौत दिना बीत गये तब यहुदियन ने साऊल कूं मारबे कौ जतन करौ। पर साऊल कूं जा जतन के बारे में मालुम है गयी कै, बे बाय मारबे काजै दिन और रात फाटकन पै पैहरौ दै रये हते। पर रात कूं वाके चेलान ने बाय एक डलिया में बैठायकै नगर की चार दीबारी के सहारे नीचे उतार दयौ। जब साऊल येरूसलेम में पौहचकें चेलान ते मिलबे कौ जतन करौ पर सब बाते डरपते हते। बिनें जि भरोसौ नांओ कै जेऊ एक चेलाऐ। पर बरनबास बाय अपने संग भेजे भये चेलान के जौरे लै जायकें उनते कही कै जानें रस्ता में का रीती ते पिरभू कूं देखोऐ और जाने बाते बात करी, और फिर जाने दमिस्‍क में हिम्मत के संग ईसू के नाम में पिरचार करौ। जाके बाद साऊल उनके संग येरूसलेम में आबत जाबत रयौ। बू साहस ते भर के पिरभू के नाम कौ पिरचार करत रयो। बू यूनानी भासा बोलबे बारेन यहुदियों के संग बात चीत और बाद-बिबाद करतौ रयौ, पर बे लोग बाय मारबे कौ जतन करबे लगे। जब बिसबासी भईयन कूं जि मालूम परी तौ बे साऊल कूं केसरिया में ले आये और तरतुस कूं भेज दयौ। जामारै सबरे यहुदिया, सामरिया और गलील की कलीसियन में सबन कूं सकुन मिलौ। बिकास होत गयौ और बे पिरभू के भय में, पबित्र आतमा की सान्‍ती में बढ़त गये। और ऐसौ भयौ के पतरस चारौ और घूमत भये काऊ दिन लुद्‍दा में रैहबे बारे परमेस्‍वर के उन पबित्र लोगन में पौहच गयौ। और म्हांपै बाय एक अनियास नाम कौ लकबा कौ मारौ भयौ रोगी मिलौ जो आठ साल ते खाट पै परौ हतौ। पतरस ने बाते कही हे, “हे अनियास, ईसू मसीह तोय ठीक करतै। उठ और अपनों बिछौना उठायकें सही कर और बू बाई समै ठाड़ौ हे गयौ।” लुद्‍दा नगर और सारोन इलाके के सब लोगन नें बाय देखौ और पिरभू के माऊं फिरें। याफा में तबीता नाम की एक बिसबासिन रैहती हती। तबीता कूं यूनानी में दोरकास जाकौ मतलब “हिरनी” हैं। बू भौत भले काम और गरीबन नें दान करती हती। उन दिनन में बू बीमार परी और चल बसी और लोगन नें वाकी ल्हास नहबायकें अट्‍टारी पै लिटाय दयी। लुद्‍दा नगर याफा नगर के जौरेई हतौ। जब चेलान ने जि सुनी के, पतरस म्हांपैईऐ, तब उन्‍नें दो आदमी भेजे कै बे बाते बिनती करें कै, “हमारे जोरै जल्दी आय में देर नांय करै।” तब पतरस उठकै संगई चल दियौ। जब बू म्हांपै पौहचौ तौ बे बाय बा अट्‍टारी पै लै गये, ज्हांपै तबीता कूं लिटायौ हतो और सबरी बिधबा वाके जौरे आयकें अपने कपड़न कूं देखकै जि कैहके रोयबे लगी जि कुरता और कपड़ा जाकेई संग रैहत भये बनांये हते उनकूं दिखाबे लगीं। तब पतरस ने सबन कूं बा अट्‍टारी में ते बाहर निकार दयौ और घुटना टेककै पिराथना करी और बा ल्हास के माऊं देखके कही कै, “हे तबीता, उठ और तब बानें अपनी आंख खोल दयीं और पतरस कूं देखकें उठ बैठी।” पतरस ने बू हात बढ़ायके उठाई और परमेस्‍वर के पबित्र लोगन कूं और बिधबान कूं बुलायके बू जीबित और जागती भई दिखाई। जि बात सबरे याफा नगर में फैल गयी और भौत ते लोगन नें पिरभू पै भरोसौ करौ। और पतरस याफा नगर में सिमौन नाम के चमड़ा कौ काम करबे बारे के घर में भौत दिनन तक रयौ। केसरिया में कुरनेलियुस नाम कौ एक आदमी हतो, जो रोम देस में इटालियन नाम की पलटन कौ सूबेदार हतो। बू परमेस्‍वर कौ भय मानबे बारौ हतो और वाकौ सब घरानोंऊ परमेस्‍वर कौ भय मानतो हतौ। बू यहुदी गरीब लोगन कूं भौत दान देतो, और सदा परमेस्‍वर की पिराथना में लगौ रहतो। बानें बा दिन दोपहर के तीन बजे के करीब एक दरसन देखौ कै, परमेस्‍वर के सुरग दूत ने मेरे जौरे भीतर आयकै बोलौ, “हे कुरनेलियुस।” बानें सुरग दूत कूं डरते भये ध्‍यान ते देखौ और कही, “हे पिरभू, काये?” सुरग दूत नें बाते कही, “तेरी पिराथना और गरीब कूं दयौ दान परमेस्‍वर के सामने पौंहचेएं और बू तोय याद कर रयौ है। और अब याफा नगर में आदमिन कूं भेजकें सिमौन कूं, जाय पतरस कहतै, बुलबा लै। बू चमड़ा कौ काम करबे बारे सिमौन के घर ठहरौए। वाकौ घर समुन्दर के किनारे पै हतो।” जब बू सुरग दूतन, जौ बात कर रयौ हतो बू चलौ गयौ, तब करनेलियुस नें अपने दो सेबकन कूं और एक भक्‍त सिपाही कूं बुलायौ, और जो कछू भयौ हतो, उनकूं सब कछू बतायके याफा नगर में भेज दयौ। दूसरे दिना जब बे चलते चलते याफा नगर के जौरे पौहचे, तब पतरस दोपहर के समै अटरिया में पिराथना करबे चढ़ो। तब बा समै बाय भौत भूंक लगी और बू कछु खायबौ चांहतो। पर जब खानों बनांयबे बारे खानों बनांय रये हते, तब बानें एक दर्सन देखबे लगौ। और बानें देखौ कै, आकास खुल गयौए और एक लम्बो चौंड़ौ चद्‍दरा के जैसी कोई चीज उतर रयी है और बाय चारों कोनेन ते पकरकै धरती पै उतारौ जा रयौ है। जामें धरती के हर तरैह के चौपाये जानबर और धरती पै रेंगबे बारे जीव जन्‍तु और आकास में उड़बे बारे पंछी हते। तबई बाय एक अबाज सुनाई दई के, “हे पतरस, उठ और मारके खा।” पर पतरस ने कही, “नांय, हे पिरभू, कबऊ नांय। चौंकि मैंनें कबऊ कोई असुद्ध चीज नांय खाई।” फिर बू अबाज बाय दूसरी बार सुनाई दयी, “हे पतरस, जो चीज कूं परमेस्‍वर ने सुद्ध ठहराईऐ बाय तू असुद्ध मत ठहराबै।” तीन बैर एसौई भयौ और जाके बाद बू चद्‍दरा तुरन्त आकास में उठाय लयौ गयौ। पतरस जा दरसन कूं देखकें दुबिधा में पर गयौ, बू जाकौ मतलब नांय समझौ कै, इतने में कुरनेलियुस के द्वारा भेजे भये लोग सिमौन के घर कौ पतौ करकै दरबाजे पै आ गये हते। उन्‍नें अबाज लगायकै बाहर ते पूछीं, “का पतरस जाते सिमौन कैहते, बू जा घर में रुकौ भयौ है?” पतरस अबई बा दर्सन के बारे में सोचई रयौ हतो कै पबित्र आतमा ने बाते कही, “देख, तीन आदमी बाहर तोय ढूंढ रये हैं। जामारै तू जल्दी नीचे उतर और बेधड़क उनके संग चलौ जा, चौंकि उनकूं मैंनेईं भेजौए।” तब पतरस नीचे उतर के आयौ और उन आदमिन ते कही, “देखौ, तुम जा आदमी कूं ढूंढ रयेऔ, बू मैंईं हूं। बताऔ तुम काय कूं आयेऔ?” तब उन्‍नें बाते कही, “कुरनेलियुस सूबेदार जो धरमी और परमेस्‍वर कौ भय मानबे बारौ है और सबरे यहुदी लोग वाकौ आदर करतें। बाते पबित्र सुरग दूतन ने जि कही कै, बू तोय अपने घर बुलायकै तोते वचन सुनें।” तब पतरस नें उनकूं भीतर बुलायकै उनें रुकबे काजै जगैह दई। और दूसरे दिन सबेरे उनके संग चलौ गयौ। और याफा नगर के रैहबे बारे कछू बिसबासी भईया वाके संग गये। बे दूसरे दिना केसरिया में पौहचे तौ मांपै उनकी मुलाकात कुरनेलियुस ते भई जो अपने प्यारे मित्र और अपने लोगन ते मिलबे कौ इन्‍तजार कर रयौ हतो। पतरस जब भीतर पौंहचौ तौ कुरनेलियुस बाते मिलौ और बानें वाके पामन में झुकके नमस्‍कार करौ। पर पतरस ने बाकूं हात पकरकै उठायौ और कही, “ठाड़ौ हे जा, मैंऊ तौ एक आदमी हूं।” और वाके संग बात चीत करते भये घर में भीतर गयौ और भौत ते लोगन कूं मांपै इकठ्‌ठौ देख बिनते कही, “तुम जानतौ कै, यहुदी, गैर यहुदी लोगन ते कोई मतलब नाऔ जि हमारे नियम के बिरोध में हतो। पर परमेस्‍वर ने मोय बताई कै मैं काऊ आदमी कूं अपबित्र और असुद्ध नांय कहूं। जामारै जब मैं बुलायौ गयौ तौ मैं बिना आना कानी करे य्हांपै आय गयौ। जामारै मैं तुमें पूछतूं कै तुमने मैं कायै कूं बुलायौऊं?” जा बात पै कुरनेलियुस ने कही, “कै चार दिन पैहले मैं दो पैहर के तीन बजे के करीब पिराथना कर रयौ हतो तब अचानक चमाचम चमकत भयौ कपड़ा पहनकै एक आदमी मेरे सामने ठाड़ौ भयौ। और बानें मोते कही कै, ‘हे कुरनेलियुस, तेरी पिराथना सुन लयी गयीऐ और तैने जौ गरीब लोगन कूं दान करौ बे परमेस्‍वर ने याद करे हैं। और अब याफा नगर में आदमिन कूं भेजकें सिमौन कूं, जाय पतरस कहतै, बुलबा लै। बू चमड़ा कौ काम करबे बारे सिमौन के घर ठहरौए। वाकौ घर समुन्दर के किनारे पै हतो।’ जामारै मैंनें तेरे जौरे अपने लोग जलदी भेजे और तेने ज्हांपै आयकें भौत अच्‍छौ करौऐ। जामारै सुन अब जो आदेस पिरभू ने तोय दयौ है बाय सुनबे काजै हम सब परमेस्‍वर के सामने मौजूद हैं।” फिर पतरस बोलौ, “मैं अब अच्‍छी तरैह ते समझ गयौऊं सच में परमेस्‍वर काऊ ते भेद भाव नांय करै। पर अब मोय जि भरोसौ है गयौ है कै कोई आदमी जो वाकौ भय मानतै और धारमिकता के काम करै, बू परमेस्‍वर कूं अच्‍छौ लगतै। तुम जानतौ जो वचन परमेस्‍वर नें इसरायलीन के जौरे भेजौ, बुई सान्‍ती कौ सुभ समाचार हमें ईसू मसीह के द्वारा सुनांयौ, जो सबन कौ पिरभूए। “तुम बा समै की महान बातै जानतौ, जो सबरे यहुदिया पिरदेस में भई हती। यूहन्‍ना के बपतिस्मा कौ पिरचार के बाद गलील ते सुरू हैकें सबरे यहुदिया पिरदेसन फैल गयौ। परमेस्‍वर ने ईसू नासरी कौ पबित्र आतमा की सामर्थ ते अभिसेक करौ, और बू चारों ओर भलाई करतौ रयौ, जिनकूं दुस्‍ट आतमान ने सतायौ हतो उनकूं बू ठीक करतौ हतो चौंकि परमेस्‍वर वाके संग हतो। “हम सब वाकी उन सब बातन के गबाह हैं, जो बानें यहुदिया और येरूसलेम के बीच में करे हैं। और बिन लोगन नें बाय क्रूस पै लटकायकै मार डारौ। पर परमेस्‍वर ने बाकूं तीसरे दिना जीबित कर दियौ और लोगन के सामने उजागर करौऐ। जि सब लोगन के सामने नांय, पर उन गबाहन के सामने जिनकूं परमेस्‍वर ने पैहले तेई चुनों है। बे गबाह हम हैं। मरे भये में ते जी उठबे के बाद हमनें वाके संग खायौ पीयौ हतो। “बाई नें हमें जि आदेस, दयौए कै, लोगन कूं सिछा दै कै जि साबित करें कै जि बेईऐ जाकूं परमेस्‍वर ने मरे भये और जीन्देन कौ न्याय करबे बारौ है और बू जाई काजै चुनों गयौए। सब परमेस्‍वर की बात बतायबे बारे जि गबाही दयी कै, जो ईसू पै भरोसौ करैगौ, बू वाके नाम ते सब पापन ते छमा पाबतुए।” पतरस अबई जि बात कर ही रयो हतौ, तबई उन सब लोगन पै जो वचन सुन रये हते, उनके ऊपर पबित्र आतमा उतरौ। गैर यहुदियन पैऊ पबित्र आतमा उतरौ हतो। जामारै पतरस के संग आयबे बारे खतना करे भये बिसबासी जि देखके अचरज में पर गये। चौंकि बे सबके सब अलग अलग भासा बोलकें परमेस्‍वर की महिमा कर रये हते। तब पतरस ने कही, “इन लोगन कूं हमारेई समान पबित्र आतमा मिलौ है, तौ का कोई इनें पानी ते बपतिस्मा लैबे काजै मनें कर सकतुऐ?” और पतरस नें उनें ईसू मसीह के नाम ते बपतिस्मा दैबे की आग्‍या दयी। तब उन लोगन नें पतरस ते बिनती करी कै, “बू कछू दिन हमारे संग रैहबै।” भेजे भये चेलान और यहुदिया में सब भरोसौ करबे बारे भईयन नें जि सुनी कै गैर यहुदी लोगन नें परमेस्‍वर कौ वचन अपनांय लयौए। जब पतरस येरूसलेम पौहचौ, तब कछू यहुदी खतना करे भये लोग वाकी निन्दा करबे लगे। और बे बोले तोय सरम नांय आयी, “तू बिना खतना बारे लोगन के य्हां रुकौ और तेने बिनके संग खानों खायौ।” तब पतरस ने जो कछू वाके संग भयौ, वाके बारे में सुरू ते बिनें समझाबे लगौ कै, “मैं जब याफा नगर में पिराथना कर रयौ हतौ, तब मैने एक दरसन देखौ कै, आकास खुल गयौए और एक लम्बो चौंड़ौ चद्‍दरा के जैसी कोई चीज उतर रयी है और बाय चारों कोनेन ते पकरकै धरती पै उतारौ जा रयौ है। मैंनें बाय ध्‍यान ते देखौ, बामें धरती के हर तरैह के चौपाये जानबर, जंगली पसु और धरती पै रेंगबे बारे जीव जन्‍तु और आकास में उड़बे बारे पंछी हते। तबई बाय एक अबाज सुनाई दई के, ‘हे पतरस, उठ और मारके खा।’ “पर तब मैंनें कही, ‘हे पिरभू, मैने कबऊ असुद्ध भोजन नांय खायौ।’ “आकास मेंते दुबारा अबाज आई, ‘जाय परमेस्‍वर ने पबित्र ठहरायौए तू बाय अपबित्र मत कह।’ तीन बैर ऐसौई भयौ और जाके बाद बू सब कछू आकास में बापिस उठा लयौ गयौ। “बाई समै तीन आदमी मेरे जौरे आये, जो केसरिया ते मेरे जौरे भेजे गये हते। बे बा घर पै आयकै ठाड़े भये, जा घर में मैं रुकौ हतो। पबित्र आतमा ने मोते कही, कै तू इनके संग बेधड़क चलौ जा। जे छै भईया मेरे संग गये और हम कुरनेलियुस के घर में घुस गये। “कुरनेलियुस नें हमें जि बतायौ कै, ‘मैंनें अपने घर में एक सुरग दूत कूं खड़े देखौ। और बानें कही कै, “याफा नगर में काऊऐ भेजकै सिमौन कूं जो पतरस कहौ जातै बाय बुलबायलै। बू तोय परमेस्‍वर कौ वचन सुनाबेगौ, जाके द्वारा तेरौ और तेरे घराने कौ उद्धार होबेगौ।” ’ “जब मैंनें बोलबौ सुरू करौ, तबई सुनबे बारे लोगन पै पबित्र आतमा उतरौ हतो जैसे सुरू में हम पै उतरौ हतो। फिर मोय पिरभू कौ कहौ बू वचन याद आयौ कै, ‘यूहन्‍ना तौ पानी ते बपतिस्मा देतो हतो, पर तुमें पबित्र आतमा ते बपतिस्मा दयौ जाबैगौ।’ जा तरैह ते परमेस्‍वर ने उन्‍नेऊ बुई वरदान दयौ जौ हमें, पिरभू ईसू मसीह पै भरोसौ करबे बारेन कूं दयौ गयौ हतो, तौ मैं को हतो जो परमेस्‍वर कूं रोक सकतौ?” जे बातें सुनकें बे यहुदी भरोसौ करबे बारे चुप है गये और बिन्‍नें जि कहते भये परमेस्‍वर की महिमा करी कै, “परमेस्‍वर ने गैर यहुदियन कूअऊं पापन ते मन फिरायबे कौ मौकौ दयौ है, जो जीबन के माऊं लै जातै।” स्तिफनुस की बजैह ते येरूसलेम में जो अत्‍याचार सुरू भयौ हतो, जामारै भौत ते भरोसौ करबे बारे तितर-बितर है गये हते, और बे फिनीकी, साइप्रस और अन्ताकिया में जायकें रैहबे लगे, पर बे यहुदियन के अलाबा काऊए सुभ समाचार नांय सुनाबते। पर बिनमेंई कछू लोग कुरेनी और साइप्रस के रैहबे बारे हते जौ अन्ताकिया में आयकें, यूनानिन कूंअऊं पिरभू ईसू कौ सुभ समाचार सुनाबत हते। पिरभू की सामर्थ उनके संग हती और भौत ते लोग भरोसौ करकें पिरभू की और फिरे। सबरे येरूसलेम की कलिसिया ने जि सुनीं तौ उन्‍नें बरनबास कूं अन्ताकिया भेजौ। जब बनरबास नें मांपै पौंहचकै परमेस्‍वर की किरपा कूं देखौ तौ बू भौत खुस भयौ। बानें बिन सबन कूं जि सिछा दई कै बे सारे तन मन ते पिरभू के प्रति ईमानदार बने रैहबें। चौंकि बनरबास भरोसे और पबित्र आतमा ते परिपूर्न एक भलौ आदमी हतो और भौत सारे लोग पिरभू में आ मिले। जाके बाद बरनबास साऊल कूं ढ़ूढबे तरतुस कूं चलौ गयौ। और बू बाय ढूंढकै अन्ताकिया में लायौ। बे दोनों पूरे एक साल तक कलिसिया के संग मिलते और भौत लोगन कूं परमेस्‍वर के वचन की सिछा देत रहे। अन्ताकिया मेंई पहली बार चेलान कूं “मसीही” कहौ गयौ। उन दिनन में येरूसलेम ते कछू परमेस्‍वर की ओर ते बात बतायबे बारे अन्ताकिया में आये। उनमे ते अगबुस नाम के एक परमेस्‍वर की बात बतायबे बारे नें खड़े हैके पबित्र आतमा के द्वारा जि भविस्‍यबानी करी कै, सबरी धरती पै घोर अकाल परबे बारौ है। बू अकाल सम्राठ क्‍लौदियुस कै समै में परौ। तब चेलान नें जि निस्चय करौ कै, यहुदिया में रैहबे बारे भईयन की सहायता काजै बिनमें ते हरेक आदमी अपनी सम्पत्‍ति के अनुसार दान भेजै। और उन्‍नें ऐसौई करौ बरनबास और साऊल के हातन ते कलिसिया के अगुवन के जौरे दान भेजौ। बा समै हेरोदेस राजा ने भौत सी कलिसियान के लोगन कूं दुख दैबे काजै उनपै हात डारौ। और बानें यूहन्‍ना कै भईया याकूब कूं तलबार ते कटबायकै मरबा डारौ। और जब बानें देखी कै, यहुदी लोग खुसी मनांय रये हैं तौ बानें पतरस कूंअऊं पकर लयो। बू बिना खमीर की रोटी के तौहार कौ दिना हतो। और बानें पतरस कूं पकरकै जेल में डरबाय दयौ और बाये चार चार सिपाइन के चार दलन के पहरे में रख दयौ। बे फसह के तौहार के बाद बाय लोगन के सामने लाबौ चाहते। जब पैहरेदार पैहरौ दै रये हते, तब कलिसिया पतरस काजै परमेस्‍वर ते मन लगायकें पिराथना कर रयी हती। जब हेरोदेस पतरस कूं लोगन के सामने लायबे बारौ हतो, बाते पैहली रात पतरस दो सांकरन ते बंधौ भयौ, दो सिपाइयन के बीच में सोय रयो हतो और पैहरेदार द्वार कौ पैहरौ दै रये हते। तब अचानक पिरभू कौ एक सुरग दूत आयौ और कोठरी में उजीतौ चमकौ और बानें पतरस की पसरिया पै हात मारके बाय जगायौ और कही, “उठ, जल्दी कर।” वाके हातन मेंते सांकर और बेड़ी खुलकें गिर परीं। तब सुरग दूत ने बाय आग्‍या दैकै कही, “उठ कमर बांध और अपने जूता पहन लै।” बानें बैसौई करौ। और फिर बानें कही, “अपनी लोई लैले और मेरे पीछै चल।” पतरस वाके पीछे चलबे लगौ, पर बू जि नांय जान पायौ कै सुरग दूत जो कर रयौ है, बू सच है। पर बू जि समझ रहो कै, “मैं सपनों देख रयौऊं।” तब बे पैहले और दूसरे पैहरे पैते निकर के लोहे के फाटक जौरे पौंहचे जो नगर की ओर जाते, बू उनके काजै अपने आपई खुल गयौ। और बे एक गली में हैकें गये, तबई सुरग दूत बाय छोड़कै चलौ गयौ। तब पतरस सचेत हैकें बोलौ कै, “मैने सच्चाई जान लई कै, पिरभू ने मोय हेरोदेस के हातन ते छुड़ायबे काजै अपनों सुरग दूत भेजौ है और यहुदियन की सबरी आसान पै पानी फेर दियौ।” जब बानें जि समझ लियौ तौ यूहन्‍ना जो मरकुस कहौ जाबतौ वाकी मा मरियम के घर आयौ। मापै और भौत ते लोग इकठ्‌ठे हैकें पिराथना कर रये हते। जब पतरस नें घर कौ दरबज्‍जौ खटखटायौ तौ मापै एक रूदे नाम की दासी देखबे काजै आयी। और पतरस की अबाज पैंहचानके, बानें खुसी के मांरै दरबज्‍जौ खोलबो भूल गयी और घर के भीतर जि बतायबे चली गई कै, “पतरस द्वार पैई ठाड़ोऐ।” तब लोगन नें बाते कही, “का तू पागल है गईए?” पर बू बाई बात कूं पूरी मजबूती कै संग कैहती रही कै, “जि बुई है।” जापै बे बोले कै, “बू वाकौ सुरग दूत होगौ।” पर पतरस दरबज्‍जौ खटखटाबतई रयौ तौ उनने बू दरबज्‍जौ खोलौ और पतरस कूं सामने ठाड़ौ देखके बड़ौ अचरज करबे लगे। तब बानें हातन ते चुप रैहबे कौ इसारौ करके कही कै, “पिरभू नें मोय कैसी अदभुत रीती तै जेल मेंते निकार के लायौऐ।” फिर बानें कही कै, “याकूब और भईयन कूं जि बात बता दियौ।” तब बू निकर के दूसरी जगैह पै चलौ गयौ। सबेरे सबेरे सिपाइन में हड़कम्प मच गयौ कै आखिर पतरस कौ का भयौ। जब हेरोदेस ने बाकूं भौत ढ़ुढबायौ और जब वाकौ कंऊ पतौ नांय चलौ, तब बानें पैहरेदारन ते पूछ ताछ करी और जि आग्‍या दयी कै, बे मार डारे जाय। तब हेरोदेस यहुदिया कूं छोड़कै केसरिया गयौ और मईं में रैहबे लगौ। हेरोदेस सूर और सैदा कै लोगन ते भौत नाराज रैहतो हतो। जामारै मांके लोग एक संग मिलकै वाके जौरे आये। बे राजा के करीबी सेबक बलासतुस कूं मनांयकें मेल करबौ चांहो, चौंकि राजा के देस ते वाकौ पालन पोसन होतै। और ठहराये भये दिना हेरोदेस राजसी कपड़ा पैहने कें राजगद्‍दी पै बैठौ और लोगन कूं भासन दैबे लगौ। लोग चिल्लायकें कैहबे लगे, “जि आदमी खुद नांय बोल रयो जाके मौंह ते देबता बोल रयौए।” बाई समै पिरभू के सुरग दूतने बीमारी में डार दयौ, चौंकि बानें परमेस्‍वर की महिमा नांय करी और वाके सरीर में कीरा पर गये और बू मर गयौ। पर परमेस्‍वर कौ वचन फैलतौ गयौ और भरोसौ करबे बारेन की संख्‍या बढ़ती गयी। बरनबास और साऊल अपनी सेबा पूरी कर येरूसलेम ते अन्ताकिया कूं लौटे और अपने संग यूहन्‍ना कूं लाये जाय मरकुस कैहते हते। अन्ताकिया की कलिसिया में कछू परमेस्‍वर की ओर ते बात बतायबे बारे और सिछा दैबै बारे हते। बे बरनबास, और सिमौन जो नीगेर कहौ जाबतौ, और लूकियुस कुरेनी, और मनाहेम जो चौथाई देस के राजा हेरोदेस कौ भौत करीबी संगी हतो, और साऊल। जब बे उपबास के संग पिरभू की पिराथना कर रहे हते, तब पबित्र आतमा ने कही, “मेरे बा काम काजै बरनबास और साऊल कूं अलग करौ जाके काजै मैने उन्‍नें बुलायौऐ।” तब उपबास और पिराथना खतम करबे के बाद बिन्‍नें बरनबास और साऊल कूं सेबकाई के काजै नियुक्त करते भये बिनपै हात रखे और बिनकूं बिदा करौ। पबित्र आतमा के द्वारा भेजे गये बरनबास और साऊल सिलूकिया नगर कूं गये और बे मांते जहाज में बैठकै साइप्रस टापू कूं चले गये। सलमीस नगर में पौंहचकै बे यहुदिन के पिराथना घरन में जायकें परमेस्‍वर कौ वचन सुनांयौ और यूहन्‍नांऊ बिनके संग रैहकै सेबक के रूप में काम में मदद करबे लगौ। और बा सबरे टापू में होत भये पाफुस टापू तक पौंहचे मापै उनकूं बर-येसु नाम कौ एक यहुदी जादूगर मिलौ। बू परमेस्‍वर के बारे में झूंठी बात बतायबे बारौ हतो। बू टापू के राजपाल सिरगियूस पौलुस के संग रैहबै बारौ हतो। बू राजपाल बुध्दिमान आदमी हतो। बू बरनबास और साऊल कूं बुलायके बिनते परमेस्‍वर कौ वचन सुनबो चांहतो। पर बर-येसु जाकौ दूसरौ नाम इलीमास जादूगरऊ हतो। बू बिनकौ बिरोध करकें नगर के राज्‍यपाल कूं भरोसौ करबे ते रोकबो चांहतौ। पर अब साऊल नें, जो खुद कूं पौलुस अऊ कैहते बानें पबित्र आतमा ते परिपूर्न हैके वाकी ओर टक टकी लगायकै देखौ। और कही, “हे सारे कपट और चतुराई ते भरे भये, सैतान की सन्‍तान, तू सब तरैह की धारमिकता कौ बैरी है। का तू पिरभू कै सीधे रस्ता कूं टेड़ो करबौ नांय छोड़ेगौ? अब देख, पिरभू कौ गुस्सा तोपै हतुऐ और तू कछू समै तक आंधरौ रैहबेगौ और तू सूरज कूं नांय देखेगौ।” तबई बाय आंखन ते धूधरौ दीखबे लगौ और अन्धेरौ छाय गयौ और टटोरबे लगो कै कोई वाकौ हात पकरकै लै जाबें। फिर नगर के राज्‍यपाल ने जो कछू भयौ हतौ, बाय देखकें, पिरभू के उपदेस ते चकित हैके भरोसौ करौ। पौलुस और वाके संगी पाफुस ते जहाज खोलकै पंफूलिया जिले के पिरगा नगर में आये। पर यूहन्‍ना उन्‍नें छोड़कै येरूसलेम कूं लौट गये। पौलुस और बनरबास पिरगा मैं होत भये पिसदिया पिरदेस के अन्ताकिया नगर में पौंहचे,और यहुदी के आराम दिना में यहुदी पिराथना घर में जायकें बैठ गये। व्‍यबस्था और परमेस्‍वर की बात बतायबे बारेन की किताब पढ़ी और वाके बाद यहुदी पिराथना घर के अधिकारिन ने उनके जौरे जि खबर भिजबाई कै, “हे भईयाओ, सिखाबे काजै तुम पै कछू और नयौ सुनांयबै काजै होय तौ सुनाऔ।” तब पौलुस नें ठाडे़ हैकै अपनों हात ते चुप रैहबे कौ इसारौ करकें कही कै, “हे इसरायल के लोगो और परमेस्‍वर ते डरबे बारे गैर यहुदी लोगो, सुनौ। इन इसरायल के लोगन के परमेस्‍वर ने हमारे पुरखन कूं चुनों हतो, जब जे लोग मिस्र में गुलामी में रैह रये हते। तब परमेस्‍वर नें उनकूं भौत बढ़ायौ और अपनी महान सक्‍ती ते उनकूं मिस्र देस ते बाहर लै आयौ। और परमेस्‍वर चालीस साल तक बेहड़ में बू उनके संग रैहकै देखभाल करतौ रयौ। जाके बाद बानें कनान देस के सात राज्‍यन के लोगन कूं नांस करकें, बा धरती कूं इसरायल के लोगन के अधिकार में सौंप दयी। और जि सब हैबे में साढ़े चार सौ साल लगे। “और जाके बाद बिनकूं परमेस्‍वर की बात बतायबे बारे समूएल कै समै तक भौतसे न्याय करबे बारे दये। जाके बाद उन सबन ने अपने काजै एक राजा की मांग करी, तब परमेस्‍वर ने बिन्यामीन की जाति के एक आदमी मतलब कीस कौ बेटा साऊल कूं चालीस साल कै काजै राजा करकें ठहराय दयौ। फिर परमेस्‍वर नें कीस के बेटा साऊल कूं हटायकें दाऊद कूं राजा बनांयौ जाके बारे में जि गबाहीऐ कै, ‘मैने यिसै के बेटा दाऊद कूं एक ऐसे आदमी के रूप में पायौए, जो मेरे मन कौए मैं जो कछू बाते करबायबौ चाहतूं बू बाय करैगौ।’ “और परमेस्‍वर ने अपने बादा और इच्‍छा ते दाऊद के घराने में ते एक उद्धार करबे बारौ जाकौ नाम ईसूए बू भेजौ। जाके आयबे ते पैहले यूहन्‍ना ने सबरे इसरायली कूं मन फिरायबे के बपतिस्मा कौ पिरचार करौ। जब यूहन्‍ना अपनों काम पूरौ करबे बारौ हतो तब बानें कही, ‘तुम मोय का समझतौ? मैं बू नांऊ। पर देखौ, ऐसौ तौ एकईऐ जो मेरे बाद में आयबे बारौऐ मैं तौ वाके जूता उतारबे लायकऊ नांऊ।’ “हे भईयाओ, तुम जो अब्राहम की सन्तान हो और परमेस्‍वर ते डरबे बारे उद्धार कौ जि सुभ समाचार तुमारे जौरे भेजौ गयोऐ। चौंकि येरूसलेम में रैहबे बारेन नें और बिनके अगुवों ने ईसू कूं नांय पैहचान पाये, और ना परमेस्‍वर की ओर ते बात बतायबे बारेन की बातें नां समझी जो यहुदिन के हरेक आराम के दिना पढ़ी जाबती है। पर ईसू कूं दोसी ठहरायकै सास्त्र कौ वचन पूरौ करौ। उनकूं बाय मार डारबे लायक बामे कोई दोस नांय मिलौ फिरऊ उन्‍नें पिलातुस ते बाय मार डारबे काजै बिनती करी। “वाके बारे में जो कछू लिखौ हतो, बू सब पूरौ करबे के बाद, उन्‍नें बाय क्रूस पैते नीचे उतार लयौ और एक पत्‍थर में खोदी भयी कबर में रख दयौ। पर परमेस्‍वर ने फिर बू मरे भयेन मेते दुबारा जीबित कर दियौ। फिर जो लोग गलील ते येरूसलेम तक उनके संग रहे हते और ईसू बिनके सामने कैऊ बेर पिरकट हैके आये। अब लोगन के सामने बेई ईसू के गबाह हैं। “हम तुमें बा प्रतिग्‍या के बारे में सुभ समाचार सुनांय रये है जौ हमारे पुरखन ते करी गयी हती। ईसूए मर जायबे कै बाद बाय दुबारा जीबित करकै परमेस्‍वर ने अपनी सन्‍तान ते करौ भयौ बादा पूरौ करोऐ जैसौ भजन संहिता में लिखौ भयौऐ, “ ‘तू मेरौ बेटा है आजई मैंनें सबनकूं दिखायौ है कै मैं तेरौ पिताऊं।’ और परमेस्‍वर नें बाय मरे भयेन मेंते जीबित करौ, जाते बू फिर कबऊ नांय सड़े, और बानें जौं कही, ‘मैंनें दाऊद ते जो पबित्र और अटल प्रतिग्‍या करी हती, बाय तुमारे काजै पूरी करुँगो।’ जा तरैह ते भजन में लिखी भई है कै, ‘तू अपने पबित्र जन कूं कबऊ नांय सड़न दैबेगौ।’ “और दाऊद तौ परमेस्‍वर की इच्‍छा के अनुसार अपने समै में सेबा करकें मर गयौ। बाकूं वाके पुरखन के संग दफनांयौ गयौ और वाकी ल्हास सड़ गयी। पर परमेस्‍वर ने जाकूं मरे भयेन मेंते जिलायौ और वाकी ल्हास कूं सड़बे नांय दयौ। “जामारै हे भईयाओ, तुम जि जान लेओ कै, ईसू मसीह के द्वारा तुम लोगन कूं पापन की छमा कौ सुभ समाचार तुमें दयो गयौए। मूसा की व्‍यबस्था के अनुसार कोई निरदोस नांय ठहर सकतौ पर ईसू मसीह पै भरोसौ करबे बारौ अपने पापन ते निरदोस ठहरतै। जामारै तुम साबधान रहौ कै कऊं ऐसौ नांय होय जौ परमेस्‍वर की बात बतायबे बारेन ने कही है, बू तुम पैई नांय घट जाय कै, “ ‘है बुराई करबे बारेऔ, देखौ, और अचम्भौ में परकें मर जाऔ, चौंकि में तुमारे दिनन में एसैई काम करूं, जिन बातन कूं तुम सुनौ, पर तुम कबऊ भरोसौ नांय करौगे।’ ” जब पौलुस और बरनबास जब यहुदी पिराथना ते निकरे तब लोगन नें अगले यहुदिन के आराम के दिना, एसीअई और बात बतायबे की बिनती करी। जब सभा खतम भयी तब भौत ते यहुदी और गैर यहुदी पौलुस और बरनबास की बात मानबे लगे। पौलुस और बरनबास ने उनते बात चीत करी और समझायौ कै बे परमेस्‍वर की किरपा में मजबूत बने रैहबे। अगले यहुदिन के आराम के दिना सबरे नगर के लोग पिरभू कौ वचन सुनबे काजै इकठ्‌ठे है गये। जब यहुदी लोगन नें इतनी बड़ी भीड़ देखी, तौ बे कुढ़ गये और पौलुस की निन्दा करते भये वाकी बातन कौ बिरोध करबे लगे। पर पौलुस और बरनबास बिना डरके कैहबे लगे कै, “जरूरिऐ कै, परमेस्‍वर कौ वचन पैहले तुमेंई सुनांयौ जातौ, पर तुमतौ बाय मानतई नांय, तुम खुद कूं कबऊ नांय खतम हैबे बारे जीबन के लायक नांय समझत, जामारै अब हम गैर यहुदी लोगन के जौरे जा रये है। चौंकि पिरभू ने हमे ऐसी आग्‍या दई है, ‘मैने तुमें गैर यहुदी लोगन के काजै उजालौ ठहरायौ है, जाते धरती के छोर तक सब लोगन काजै तुम उद्धार कौ जरिया बन जाऔ।’” गैर यहुदी लोगन नें जब जि बात सुनी तौ बे भौत खुस भये और उन्‍नें पिरभू के वचन कौ आदर करौ और उनकूं कबऊ नांय खतम हैबे बारे जीबन कौ पूरौ भरोसौ करौए। जा तरैह ते सबरे पिरदेस में पिरभू के वचन फैलबे लगौ। पर मापै यहुदी नेतन ने, ऊंचे घराने की औरतन कूं और बा नगर के माने भये आदमिन कूं भड़कायौ और उन्‍नें पौलुस और बरनबास के बिरोध में अत्‍याचार करबे लगे, और उनपै दबाब बनांयकें उनैं अपने छेत्र ते बाहर निकर बाय दो। फिर पौलुस और बरनबास बिनें चेतावनी दैबे काजै अपने पामन की धूर झारकै इकुनियुम कूं चले गये। पर अन्ताकिया के चेला आनन्द और पबित्र आतमा ते भरे भये रैहते। पौलुस और बरनबास इकुनियुम मेंऊं यहुदी पिराथना घरन में गये। मापै बिन्‍नें जा तरीका ते बखान करौ कै, यहुदी और यूनानिन में ते भौत ते लोगन की एक बड़ी भीड़ ने भरोसौ करौ। पर भरोसौ न करबे बारे यहुदिन ने गैर यहुदिन कूं भरोसौ करबे बारे भईयन के प्रति भड़कायकै उनके मन में बैर पैदा कर दयौ। जामारै पौलुस और बरनबास मापै भौत दिना तक टिके रहे और बे पिरभू के बारे में बिना डरे पिरचार करते रहे और पिरभू उनके द्वारा भौत ते अदभुत काम करबाबतु रयो और अपनी दया ते अपनों वचन मापै उनमे बैठ गयौ। और मांपै नगर के लोगन में फूट पर गयी। कछू लोग भेजे भये चेलान में मिल गये, और कछू लोग यहुदिन में मिल गये। तब गैर यहुदी लोग और यहुदी लोग अपने नेतन के संग मिलकै बनरबास और पौलुस के संग बुरौ बौहर करबे और पथराब करबे की चाल चली। जब पौलुस और बरनबास कूं जा बात कौ पतौ परौ तौ बे लुकाउनिया के लुस्त्रा और दिरबे के आस-पास के छेत्रन में चले गये, और मापैऊं बे सुभ समाचार सुनाबे लगे। लुस्त्रा में एक जनम कौ लंगड़ो आदमी हतौ। बू अपने जीबन में कबऊ नांय चल पायौ। जा आदमी नें पौलुस कूं जि बोलत भये सुनौ हतो कै पौलुस अपनी निगाह ते बाकूं बडे़ गौर ते देखौ कै, बामें चंगो हैबे कौ भरोसौ हतुए। और पौलुस नें बाते कही कै, “अपने पामन पै सीधौ ठाड़ौ है जा और चल फिर।” और बू उछलके ठाड़ौ है गयौ चलबे फिरबे लगौ। पौलुस ने जो कछू मापै करौ हतो बाय देखकें लोग लुकाउनिया भासा में कैहबे लगे कै, “हमारे बीच में आदमिन कै भेस में देबता आय गये है।” बे बरनबास कूं ज्‍यूस और पौलुस कूं हिमिस कैहबे लगे। पौलुस कूं जामारै हिरमेस कहौ गयौ चौंकि बू मुख्‍य बोलबे बारौ हतो, नगर के बाहर ज्‍यूस कौ बड़े पिराथना घर हतो। बा बड़े पिराथना घर कौ पुजारी माला पहनकै साँड़न के संग नगर के द्वार पै पौहचौ। बे भीड़ के संग पौलुस और बरनबास के काजै भेंट दैबौ चांहते हते। जब भेजे भये चेला पौलुस और बरनबास ने जि सुनी तौ, अपने कपड़ा फार डारे और भीड़ में जि कैहत भये घुस गये, “हे भईयाओ, तुम जि का कर रयैऔ? हमऊं तौ तुम जैसे आदमी हैं। हम तौ तुमें ज्हांपै सुभ समाचार सुनांयबे आये हैं, जाते तुम इन बेकार की बातन नें छोड़कै जीबित परमेस्‍वर के माऊं लौटौ, जाने आकास, धरती, समुन्दर और इनमें जो कछु है, बू सब कछू बनांयौऐ। “परमेस्‍वर नें पिछले समै में सब जातीन कूं अपनी अपनी रस्ता पै चलने दियौ। पर तुमें बानें खुद गबाही के बिना नांय छोड़ौ, चौंकि बानें तुमारे संग भलाई करीऐ, बानें तुमारे काजै आकास ते मेह बरसायौ और अपनी रितु पै फसल दयी। बैई हम सबन कूं भोजन देतै और हमारे मन कूं खूसी ते भर देय।” इतने समझायबे के बादऊ बिनके लिए बड़ी मुस्‍किल हती के बा भीड़ कूं बली चढ़ाबे ते रोक सकैं। जाके बाद अन्ताकिया और इकुनियुम ते आये भये कछु यहुदियन ने भीड़ कूं अपनी ओर मिला लयौ और पौलुस पै पथराब करौ और बाय मरौ समझकै नगर के बाहर घसीटकै लै गये। पर जब वाके चेला वाके चारों ओर इकठ्‌ठे भये, तौ बू उठकै नगर में आय गयौ। दूसरे दिनां बू बरनबास के संग दिरबे नगर कूं चलौ गयौ। बा नगर में उन्‍नें सुभ समाचार सुनायकै भौत ते चेला बनांये और उनकी आतमा भरोसे में मजबूत करबे काजै उन्‍नें तैयार करौ और कही, “हमे बड़ी ताड़ना सैहकें परमेस्‍वर के राज जानोंऐ।” तब बे लुस्त्रा और इकुनियुम में जाकर पिसदिया जिले के जौरे अन्ताकिया में लौट आये। और पौलुस और बनरबास नें म्हांकी कलीसियन में अगुवन कूं चुनों और उपबास और पिराथना करबे के बाद बिनें कूं पिरभू कूं सौंप दयौ, जापै उन्‍नें भरोसौ करौ हतो। जाके बाद पिसदिया जिले होत भये बे पंफूलिया जिले में आय गये। और जब बे सारे पिरगा नगर में सुभ समाचार सुनांय चुके, तौ अत्‍तालिया नगर चले गये। मांते बे जहाज ते सीरीया के अन्ताकिया आये, मापै जा काम कूं करबे गये बा काम के काजै परमेस्‍वर ते किरपा मांगी हती और अब बू काम पूरौ करौ हतो। जब बे मापै पौहचे तब उन्‍नें कलिसिया के लोगन कूं इकठ्‌ठौ करौ और उनकूं बू सब कछू जो परमेस्‍वर ने उनके संग करौ हतो, बू सबरौ हाल कै सुनांयौ कै परमेस्‍वर ने गैर यहुदिन के काजैऊ भरोसौ करबे के द्वार खोल दये है। फिर पौलुस और बनरबास भौत दिनन तक अन्ताकिया में चेलान के संग रुके रये। कछु लोग यहुदिया पिरदेस ते अन्ताकिया में आयकें भरोसौ करबे बारे भईयन कूं परमेस्‍वर के वचन की सिछा देबे लगे कै, “तुमारौ मूसा की व्‍यबस्था के अनुसार खतना नांय हैबैगौ तब तक तुमारौ उद्धार नांय है सकत।” पौलुस और बरनबास बिनकी जा बात ते सहमत नांय हते, जा बजैह ते बिनके बीच में बाद-बिबाद पैदा है गयौ। जा बात के समाधान काजै पौलुस और बरनबास और वाके कछू संगीन कूं भेजे भये चेलान और कलिसिया के अगुवन जौरे येरूसलेम भेजबे कौ निस्चय करौ गयौ। अन्ताकिया की कलिसिया नें बिनें बिदा करौ। बे फिनीके और सामरिया ते हैकें, गैर यहुदियन कूं पापन ते मन फिरायबे कौ सुभ समाचार सुनाबत भये गये। जा समाचार ने सब भरोसौ करबे बारे भईयन कूं बड़ौ खुस करौ। और जब पौलुस और बरनबास येरूसलेम में पौंहचे तौ भरोसौ करबे बारे और भेजे भये चेला और कलिसिया के अगुवे बिनते बड़े आनन्द के संग मिले और बिनें बतायौ कै, बिनके संग परमेस्‍वर कैसे कैसे काम करै। पर फरीसी के दल के कछू भरोसौ करबे बारे खड़े भये और बोले कै, “गैर यहुदिन कूं खतना करायबे और मूसा की व्‍यबस्था मानबे की आग्‍या देनी चहिऐं।” तब जा बात पै बिचार करबे काजै कलिसिया के अगुवे और भेजे भये चेला इकठ्‌ठे भये। जा बात पै भौत बिचार करबे के बाद पतरस खड़ौ भयौ और बिनते बोलौ, “हे भईयाओ, तुम जानतौ कै, भौत समै पैहले तुम में ते मोय परमेस्‍वर ने गैर यहुदी लोगन कूं वचन सुनांयबे काजै चुनों हतो कै, लोग सुभ समाचार सुनें और भरोसौ करै। और हमारे मन कूं जांचबे बारे परमेस्‍वर ने हमारेई समान उन्‍नेंऊ पबित्र आतमा कौ वरदान दैकै, उनके सम्बन्ध में अपनों समरथन दिखायौ। परमेस्‍वर ने भरोसे के द्वारा बिनके मन कूं पबित्र करकें हमारे और उनके बीच में कोई भेद भाव नांय करौ। जामारै भरोसौ करबे बारे गैर यहुदिन के कन्धा पै ऐसौ जूआ लाध दयो, जाय हम और हमारे पुरखा नांय उठाय सकते। तुम लोग परमेस्‍वर कूं झमेला में चौं डारतो? पर हमारौ तौ जेई भरोसौऐ कै पिरभू ईसू की किरपा के द्वारा जैसे हमारौ उद्धार भयौए, बैसेई हमें भरोसौ है कै उनकौऊ उद्धार होगौ।” जा बात पै सभा के सबरे लोग चुप हैकै बरनबास और पौलुस की बात सुनबे लगे। बे बिन बड़े चिन्‍न और अचरज के कामन के बारे में बताय रये हते, जो परमेस्‍वर नें बिनके द्वारा गैर यहुदियन के बीच में कराये हते। जब बे बोल चुके, तब याकूब कैहबे लगौ, “हे भईयाओ, मेरी सुनों। सिमौन नें हमें बताई हती कै, परमेस्‍वर अपने नाम काजै गैर यहुदियन में ते कछू लोगन कूं चुनकें उनते सबते पैहले अपनों पिरेम पिरगट करौ हतो। परमेस्‍वर की ओर ते बात बतायबे बारेन नेंऊ इन बातन कौ समरथन करकै लिखौ है, “ ‘मैं जाके बाद फिर आऊंगो। और खुद दाऊद के गिरे भये घर कूं फिर उठाऊंगौ और टूटे भये खन्‍डरन कूं दुबारा बनांऊंगौ और बिन्‍नें समारूंगो। ताके बे जो बचे भये लोग और गैर यहुदी सब लोग अब मेरे कहलाये जातै, बे पिरभू कूं ढ़ूढ़बे में लगे रहे।’ ‘इन बातन्‍नें बुई पिरभू कैहतै, जौ युग-युग ते इन बातन कूं पिरगट करतौ रहौऐ।’ “जामारै मेरौ बिचार जि है कै, गैर यहुदियन मेंते जो परमेस्‍वर की ओर फिर रयेऐं, उन्‍नें सतानों नांय चहिऐं। पर उनके काजै हमें जि लिखकै भेजनी चहिऐं कै, बे मूरतीन के आगे चढ़ाई भई चीज नांय खानी चहिऐं, और व्‍यभिचार नांय करनों चहिऐं और गले घोंटके मारे भये पसुन कौ मांस नांय खानों चहिऐं और न खून खानों चहिऐं। चौंकि पुराने समै तेई नगर नगर में मूसा की व्‍यबस्था कौ पिरचार करबे बारे हते। और आराम के दिनन में व्‍यबस्था की किताब हमारे सब पिराथना घरन में पढ़कै सुनाई जात हती।” भेजे भये चेलान और कलिसिया के अगुवन नें सब भरोसौ करबे बारेन के संग जि निस्चय करौ कै, उनयी में ते कछू लोगन कूं चुनकें पौलुस और बरनबास के संग अन्ताकिया भेजौ जाय। उन्‍नें बरसब्बा कैहबे बारे यहूदा और सीलास कूं चुनों, बे सब भरोसौ करबे बारे भईयन में पिरमुख हते। बिन्‍नें बिनके हात में जि चिठ्‌ठी लिखकै भेजी कै, अन्ताकिया, सीरीया और किलकिया में रैहबे बारे, उन सबरे गैर यहुदी भईयन कै काजै, तुमारे भरोसे में भईयन, अगुबो और भेजे भये चेलान की ओर ते नमस्‍कार। “हमनें सुनीऐ के हमारे य्हांके लोगन हमनें जिन लोगन कूं कोई अधिकार नांय दियौ हतो, बिन्‍नें अपनी बातन ते तुम लोगन में घबराहट पैदा कर दयीऐ। और तुमारे मन कूं उलझन में डर दयौए। जामारै हम सब ने एक मन हैकें जि निस्चय करौए कै अपने प्यारे पौलुस और बरनबास के संग चुनकै कछु लोगन कूं तुमारे जौरे भेजे। जे बेई लोग हैं जिन्‍ने हमारे पिरभू ईसू मसीह कौ सुभ समाचार सुनांयबे काजै अपनी जान जोखिम में डार दयी हती। हम यहूदा और सीलास कूं तुमारे जौरे भेज रये हैं। बे तुमें इन सबरी बातन कूं बतामिंगे। पबित्र आतमा कूं और हमैंऊ जि ठीक लगौ के जो बात सही और जरूरीये इन बातन कूं छोड़कै तुम पै कोई बोझ नांय डारौ जाबे। मूरतीन के आगे चढ़ाई भई चीज नांय खानी चहिऐं, और व्‍यभिचार नांय करनों चहिऐं और गले घोंटके मारे भये पसुन कौ मांस नांय खानों चहिऐं और न खून खानों चहिऐं। तुम अपने आपकूं इन बातनते बचायकै रखौगे तौ तुमारौ कल्‍यान होगो।” बे मांते बिदा हैके अन्ताकिया पौहचे। मांपै उन सब भरोसौ करबे बारे भईयन कूं इकठ्‌ठौ करकें जि चिठ्ठी दयी। बे सब चिठ्‌ठी में लिखी भयी बातन कूं पढ़कै भौत खुस भये। यहूदा और सीलास जो खुदई परमेस्‍वर की ओर ते बात बतायबे बारे हते, भौत देर तक भरोसौ करबे बारे भईयन कूं परमेस्‍वर के वचन की सिछा दैकें, बिनें हिम्मत दयी और उनैं भरोसे में मजबूत करौ। कछू दिना और मापै रुकबे के बाद भरोसौ करबे बारे भईयन ने उनकूं सान्‍ती के संग बिदा करौ, और उन लोगन के जौरे बापिस लौटे जिन्‍ने उने भेजौ हतो। पर सीलास कूं मापै रैहबौ अच्‍छौ लगौ। पौलुस और बरनबास अन्ताकिया में ही रैह गये और दूसरे भौत ते लोगन के संग पिरभू के वचन की सिछा देत भये सुभ समाचार कौ पिरचार करते रहे। कछु दिनन के बाद पौलुस ने बरनबास ते कही, “आऔ, हम उन नगर में फिरते चलें ज्हां हमनें पिरभू के वचन कौ पिरचार करो, और भरोसौ करबे बारे भईयन के बीच में जायके उनते मुलाकात करें कै, बे कैसे हैं।” बरनबास तौ चाहतौ के बू यूहन्‍ना कूंअऊं जौ मरकुस कहौ जाबतौ बाय अपने संग लै जाबै। पर पौलुस कौ जि बिचार हतो कै, “जब हम पंफूलिया में हते तब उनते अलग है गयौ और पिरभू के काम में मेरौ हात नांय बटायौ।” जा बजैह ते जाय संग लै जायबौ ठीक नांय। जा बात ते इन दोनोंन में आपस में मत-भेद है गयौ। बे अलग अलग है गये और बरनबास मरकुस कूं अपने संग लैके जहाज में बैठकै साइप्रस कूं चल गयौ। पौलुस ने सीलास कूं चुन लियौ और भरोसौ करबे बारे भईयन नें बिनें पिरभू के अनुग्रह में सौंप दियौ और बे मांते चले गये। बे सीरीया और किलकिया में घूमत भये कलिसिया कूं धीरज बंधायौ और भरोसे में मजबूत करतौ रहौ। जाके बाद पौलुस दिरबै ते लुस्त्रा में पौंहचे, मापै तिमुथियुस नाम कौ एक चेला हतो, वाकी माँ यहुदी बिसबासी हती, और पिता यूनानी हतो। लुस्त्रा और इकुनियुम के भरोसौ करबे बारे भईयन में तिमुथियुस कौ अच्‍छौ नाम हतो। पौलुस तिमुथियुस कूं अपने संग लै जायबौ चांहतो। बा पिरदेस में रैहबे बारे यहुदिन की बजैह ते बानें तिमुथी कौ खतना करायो चौंकि बे सब जानते कै, वाकौ बाप एक यूनानी है। बे नगर नगर में जायके बिन नियमन कूं बताबते जिनकौ पालन करबे कौ आदेस देते जो येरूसलेम में भेजे भये चेलान नें और कलिसिया के अगुवन नें दयो हतो। जा तरैह ते कलिसिया भरोसे में मजबूत होत जाय रयी हती और लोगन की संख्‍या बढ़त जाय रयी हती। जब पबित्र आतमा ने आसिया में परमेस्‍वर कौ वचन सुनांयबे ते मनें करी, तौ बू मांते फ्रुगिया और गलातिया के काजै चले गये। बे मुसिया पिरदेस की सीमा में पौहचकें बिथुनिया जायबे की तैयारी कर रये हते तब ईसू की आतमा ने मापै जायबे की मनै कर दयी। जामारै बे मुसिया पिरदेस ते हैके त्रोआस नगर में आये। मापै पौलुस ने रात में एक दिब्य दरसन देखौ के, एक मकिदुनियां जिले कौ आदमी वाके सामने ठाड़ौ हैके बाते बिनती करके कैह रयौ है कै, “आप मकिदुनियां जिले में आऔ और हमारी मदद करौ।” जा दरसन के बाद पौलुस ने जान लयी कै, “परमेस्‍वर ने हमे इन लोगन के बीच में सुभ समाचार सुनांयबे काजै बुलायौऐ और तबई हमनें मकिदुनियां जायबे की ठान लयी।” हम त्रोआस ते जहाज में बैठकै सुमात्राके टापू पौहचे, मांते दूसरे दिना नियापुलिस पौंहचे, और मांते हम फिलीपी नगर में पौहचे जो मकिदुनियां जिले का मुख्‍य नगर और रोमी बस्तीऐ, मापै कछू दिना रहै। यहुदिन के आराम के दिनां हम जि सोचकै नगर के बाहर नदी के किनारे पै गये कै कऊं पिराथना करबे की जगैह होगी, जामारै हम मापै बैठ गये और मापै इकठ्‌ठी औरतन ते बात चीत करबे लगे। बिन औरतन में लुदिया नाम की औरत हती बू थूआतीरा नगर की रैहबे बारी हती जो कीमती बैजनीं कपड़न कौ बौपार करती हती, जो परमेस्‍वर पै भरोसौ करबे बारी हती। और पिरभू ने वाकौ मन खोलौ ताकि बू पौलुस की सिछा पै ध्‍यान दै सकै। बानें अपने सबरे परिबार के संग बपतिस्मा लयौ, और लुदिया हमें अपने घर लै जाबे की बिनती करबे लगी, “अगर तुम मोय पिरभू की सच्‍ची बिसबासी समझौ तौ आऔ, मेरे घर पै ठहरौ।” बानें हमें अपने घर लै जाबे काजै राजी कर लियौ। जब एक बेर हम पिराथना करबे की जगैह पै जा रये हते तब रस्ता में एक दासी मिली जामें भाग्‍य बतायबे बारी दुस्‍ट आतमा हती और बू अपने मालिकन के काजै भौत धन कमाबती हती। बू पौलुस और हमारे पीछे आयकै चिल्‍लाबे लगी कै, “जे आदमी परम पिरधान परमेस्‍वर के सेबक हैं, जो उद्धार कौ सुभ समाचार सुनाबतें।” बू दासी हमे भौत दिना तक परेसान करती रयी, तब पौलुस ने पीछे मुड़कै बा दुस्‍ट आतमा ते कही के, “मैं तोय ईसू मसीह कै नाम ते जामें ते निकरबे कौ आदेस देतूं।” और बू बायी समै निकर गयी। तब वाके मालिकन ने देखौ कै उनकौ कमाई कौ सबरौ रस्ता बन्द है गयौ तौ बे पौलुस और सीलास कूं बाजार में घसीटत भये अधिकारिन के जौरे खैंचके लै गये। उन्‍नें पौलुस और सीलास कौ न्यायी करबे बारेन के सामने पेस करौ और कही कै, “जे लोग यहुदी हैं,और हमारे नगर में असान्‍ती फैलाय रये है, और ऐसी रीति रिवाजन कौ पिरचार कर रये है जिनकौ मानबौ और उनपै चलबौ हम रोमीन के काजै सही नांय।” तब एक भौत बड़ी भीड़ उनके खिलाप ठाड़ी है गयी तब राजपाल ने उनके कपड़ा फारकै उतरबायकै उनमें कौड़ा लगबायबे कौ आदेस दयौ। बिन्‍नें पौलुस और सीलास कूं खूब पिटबायौ और बिन्‍नें जेल में डरबाय दयो और जेलर कूं जि आग्‍या दयी, “इनकी अच्‍छी तरैह ते चौकसी करौ।” तब जेलर ने बिन्‍नें जेल की भीतरी कोठरी डार दयौ और बिनके पाम काठ जकड़ दये। आधी रात के समै जब पौलुस और सीलास पिराथना करत भये परमेस्‍वर के भजन गा रये हते, और दूसरे कैदी सुन रये हते, तब अचानक एक भौत भारी भूकम्प भयौ और जेल की नींव हिल गयीं और जेल के सबरे फाटक खुल गये, और सबरे कैदीन की बेड़ी ढीली है गयीं। जेलर जगौ और बानें जब जेल के दरबाजे खुले भये देखे, तौ जि समझी कै कैदी भाज गये हैं, जामारै बानें अपनी तलबार खैंची और अपने आपकूं मारबौ चांहौ, तबई पौलुस ने चिल्‍लायकै कही, “तू अपने आपकूं मत मारे। हम सब जयी पै हैं।” तब जेलर दीया लैकें भीतर गयौ काँपते भये पौलुस और सीलास पामन में गिर परौ। बानें उनकूं बाहर लै जायकें उनते कही, “हे गुरू, मैं उद्धार पायबे काजै का करूं?” तब बिन्‍नें कही, “पिरभू ईसू मसीह पै भरोसौ कर, तौ तू और तेरौ घरानौ उद्धार पाबैगौ।” जाके बाद पौलुस और सीलास ने जेलर कूं वाके पूरे घराने समेत पिरभू कौ वचन सुनांयौ। जेलर उन्‍नें रात में अपने घर लै गयौ और उनके घाब धोए, और सबरे घराने नें पिरभू पै भरोसौ करौ और अपने सब घर बारेन समेत बपतिस्मा लयो। जेलर अपने घर लै गयौ और खानों खबायौ और सबरे घराने ने के संग आनन्द मनांयौ चौंकि बिन्‍नें परमेस्‍वर पै भरोसौ करौ। जब सबेरौ भयौ तौ राजपाल ने जेलर ते जि कैहलबा भेजी कै, बिन लोगन छोड़ दयौ जाबे। तब जेलर ने उन्‍नें जि बताई कै, “राजपाल ने जि कहलबा भेजीए कै, बिन लोगन कूं छोड़ दयौ जाबे जामारै तुम सान्‍ती ते चले जाऔ।” पर पौलुस ने सिपाइन ते कही, “हम रोम के रैहबे बारे हैं और बिन्‍नें बिना जांच करे कै हम दोसी हैं, बिन्‍नें हम में कौड़ा लगबाये और जेल में डार दयौ। अब जि नांय है सकत कै हम चुपचाप निकर जायैं। बू खुद आयकें निकारै।” जब सिपाइन ने आयकै जि बात न्याय करबे बारेन ते कही कै, बे लोग रोमी हैं, तौ बे भौत डरप गये। और आयकै बिनते मांफी मांगी, और जेल ते बाहर लै जायके बिनते कही कै, बे जा नगरै छोड़कै चले जामें। तब पौलुस और सीलास जेल ते निकरकै लुदिया के घर गये और बे अपने भरोसौ करबे बारे भईयन ते मिले और उन्‍नें परमेस्‍वर के नाम में हिम्मत दयी और म्हांते चले गये। पौलुस और सीलास अम्फिपुलिस और अपुलोनियां होत भये थिस्सलुनीके में पहुँचे। मापै एक यहुदिन कौ पिराथना घर हतो। पौलुस अपनी आदत कै अनुसार म्हांपै बिनते मिलबे गयौ। बानें तीन यहुदी आराम दिनन में उनके संग सास्त्रन ते तर्क बितर्क करतौ। और बिनकौ अर्थ खोल खोल के समझाबतो। मसीह कौ दुख उठाबो और मरे भयेन मेंते जी उठिबौ जरूरिऐ। बानें जेऊ कही कै, “ईसू ही मसीह है। मैं बाई कौ पिरचार तुमारे बीच में कर रयौऊं।” उनमें ते कछू लोगन नें भरोसौ करौ जो पौलुस और सीलास ते सहमत हते और बे उनमे सामिल है गये, और परमेस्‍वर ते डरपबे बारे अनगिनत यूनानीअऊ उनमे मिल गये, जिनमें भौत सी बड़े घराने की औरतऊ सामिल हतीं। पर यहुदी जलन के मारे जरे जाय रये हते। बिन्‍नें बजारू लोगन कूं इकठ्‌ठे करके एक बड़ौ झुंड बनांयौ और नगर में दंगा करा दयौ। उन्‍नें यासोन के घर पै धाबा बोल दयौ, और जि कोसिस करबे लगे कै पौलुस और सीलास कूं बाहर खैंचके लोगन के सामने लै आबें। पर जब बे उनकूं नांय पाय सके तौ यासोन और कछू भरोसौ करबे बारे भईयन कूं बांधकै नगर के अधिकारिन के सामने घसीट के लाये और कैहबे लगे कै, “इन लोगन नें सबरी दुनियां में उथल पुथल मचाय रखीऐ और अब ज्हांपै आये है। यासोन ने उनकूं अपने घर में छिपाय रखौऐ और बे सब रोमी समराठ केसर के आदेसन के बिरोध में काम करकें कैहते है कै एकई राजा है जाकौ नाम ईसूए।” जब भीड़ और अधिकारिन ने सुनी तौ बे भड़क उठे। और जा तरैह ते उन्‍नें यासोन और दूसरे लोगन ते जमानती मुचलका लैकें छोड़ दयो। भरोसौ करबे बारे भईयन ने रातों रात पौलुस और सीलास कूं बिरिया नगर भेज दियौ। मापै पौंहचकै बे यहुदी पिराथना घर में गये। बिरिया नगर के लोग थिस्सलुनीके के लोगन ते जादा भले हते। इन लोगन नें पूरौ मन लगायकै वचन कूं अपनांयौ और रोज सास्त्रन में जि जाँचत रैहते कै जो बात इन्‍ने बतायी हैं, बे सही है कै गलत है। जाकौ नतीजा जि निकरौ के भौतसी यहुदी और बड़े घराने की यूनानी औरत और आदमिन ने भरोसौ करौ। पर थिस्सलुनीके के यहुदियन कूं जि मालूम परी कै, पौलुस बिरिया मेंऊ परमेस्‍वर के वचन कौ पिरचार कर रयो है तौ बे मापैऊ आय धमके। बिन्‍नें मापैऊ दंगा करबौ और लोगन कूं को भड़कायबौ सुरू कर दियौ। जामारै भरोसौ करबे बारे भईयन ने तुरन्‍त पौलुस कूं समुन्दर के किनारे पै भेज दयौ। सीलास और तिमुथियुस मईं पै ठहरे रहे। पर पौलुस के संगी बाय ऐथेन्स में लै गये। मांते लौटकै बिन्‍नें सीलास और तिमुथियुस कूं जि आग्‍या दयी कै, जितनी जल्दी है सके बे वाके जौरे आ जायें और बे चल पड़े। पौलुस एथेन्स में तिमुथियुस और सिलास कौ इन्‍तजार कर रयौ हतो, तब बू जि देखकै सबरौ नगर मूरतीन ते भरौ भयौ भयौए आतमा में भौत दुखी भयौ जामारै बू रोजाना यहुदिन ते बिनके पिराथना घरन में और यूनानी ते और मांके बाजार में मिलबे बारे लोगन ते रोजाना बहस करते रैहते। कछू इपीकुरी और स्तोइकी पंडित बाते सास्त्रन ते तर्क बितर्क करते और उनमें ते कछू लोग कैहबे लगे कै, “जि बकबास करबे बारौ का कैहबौ चाहतुए?” और दूसरे कैहबे लगे कै, “जि तौ बिदेसी देबतन कौ परचार करबे बारौऐ।” उन्‍नें जि बात जामारै कही हती कै, बू ईसू कै बारे में सिछा देतौ और वाके दुबारा जी उठबे कौ पिरचार करतो। बे पौलुस कूं अपने संग अरिगपुस नाम के पंचायत घर में ले गये और बोले कै, “का हम जान सकतै कै, तू हमे जि कौन सी नयी सिछा दैरयौए? तू जो कछू अनोंखी बात कैह रयोए, हम बाको मतलब जानबौ चाहते कै वाकौ का मतलबे।” बिन्‍नें ऐसे जामारै कही चौंकि ऐथेन्स के सब रैहबे बारे लोग और मांके रैहबे बारे बिदेसी लोग नयी-नयी बात सुनबे और बोलबे अलाबा कोई और काम नांय करते हते। तब पौलुस अरियुपगुस की पंचायत के सामने ठाडे़ हैकें कही, “हे ऐथेन्स के लोगो, मैं देख रयौऊं कै तुम लोग हर तरैह ते देबतन के मानबे बारेऔ। जब मैं तुमारे पिराथना करबे बारी जगैन में घूम रयो हतो, तब मैने एक ऐसी बेदी देखी बापै लिखी हती, ‘अनजाने देबता के काजै।’ जामारै तुम बिना जाने वाकी पिराथना करतो, और मैं तुमें बा परमेस्‍वर के बारे में वचन सुनांयबे आयौऊ। जा परमेस्‍वर ने संसार और आकास और बामें की सबरी चीजन कूं बनायौ है। बू सुरग और धरती कौ पिरभू है। बू हात की बनाए भये घरन में नांय रैहतू। वाके काजै काऊ चीज की कमी नांय, बू काऊ आदमी कै हातन की सेबा नांय चांहतु, चौंकि बानें सबन कूं जीबन और सांस दयीऐं और सब कछू बेई देतुए। बानें एकई आदमी ते धरती पै रैहबे बारी सबरी जात के लोगन कूं बनांयौ ताके सबरी धरती पै बस जांय और बाई ने समै निस्चित करौऐ और सब जगैह की सीमा ठहराईऐ। जि सब कछू जामारै भयौ के लोग परमेस्‍वर कूं ढूंढे और बे बाय पाय लै। सच में बू हम में ते काऊते दूर नांय। चौंकि बाई में हम जीबित हैं और बाई में चल रये हैं और बाई में हम टिके भये हैं। तुमारे भौत ते कबि ने कहिऐ कै, ‘हम तौ वाकेई बालक है।’ “चौंकि हम परमेस्‍वर की सन्तान हैं, जामारै हमें जि नांय सोचनी चहिऐं कै परमेस्‍वर सौने चांदी या पत्‍थर की आदमी कै हातन ते बनाई भई मूरतीन के जैसौ है। अब तक परमेस्‍वर नें बीते समै के लोगन कौ हिसाब लैबौ नांय चांहतु, पर अब वाकी जि आग्‍या है कै, लोग अपने पापन ते मन फिराऔ। चौंकि बानें न्याय के काजै एक दिना ठहरयौए, जामें बू पैहले ते ठहराये आदमी के द्वारा धारमिकता ते संसार कौ न्याय करैगौ, परमेस्‍वर नें मरे भयेन मेंते जीबित करके बानें जि सबूत दयौ है।” जब उन लोगन नें मरे भयेन मेंते जी उठबे की जि बात सुनी तौ वाकी हसी उड़ायबे लगे पर दूसरे कछू लोग कैहबे लगे कै, “हम तेरी बातन के बारे में औरऊ काऊ दिना सुनिंगे।” जामारै पौलुस उन्‍नें छोड़कै पंचायत घर चलौ गयौ। कछु लोगन नें भरोसौ करौ और बे पौलुस के संग है गये। इनमें अरियुपगुस की पंचायत को दियुनुसियुस नाम कौ एक सदस्‍य और दमरित नाम की एक औरत और बिनके संगी औरऊ लोग हते। जाके बाद पौलुस ऐथेन्स नगर छोड़कै कुरिन्थियुस नगर कूं चलौ गयौ। मापै पौलुस पुन्‍तुस के रैहबे बारे अक्‍बिला नाम के यहुदी ते जायकें मिलौ, जाकौ जनम पुन्‍तुस में भयौ हतो, जो हालई में अपनी पतनी प्रिसकिल्‍ला के संग इटली ते आयौ हतो। उन्‍नें इटली जामारै छोड़ी कै क्‍लौदियुस ने सब यहुदियन कूं रोम ते निकर जायबे कौ आदेस दयौ हतो। पौलुस और अक्‍बिला कौ एकई काम हतो, बे दोनों तम्बू बनांयबे बारे हते जामारै बू बिनके संग रहौ। पौलुस हर यहुदी आराम के दिना यहुदी पिराथना घरन में बिनते तर्क बितर्क करतो रैहतो, और यहुदी और यूनानी लोगन कूं समझायबे की कोसिस करतो। जब मकिदुनियां ते सीलास और तिमुथियुस आये तब पौलुस नें अपनों सबरौ समै परमेस्‍वर को वचन सुनांयबे में लगा दियौ और यहुदियन कूं जि गबाही देतौ रैहतो कै ईसू ही मसीह है। जब उन लोगन नें वाके बिरोध करौ और बाते बुरौ भलौ कैहबे लगे तौ बानें अपने कपड़ा झाड़त भये उनते कही, “तुमारो खून तुमारे सिर पै परे। वाकौ मोते कोई मतलब नांय। मैं अब गैर यहुदिन के जौरे चलौ जाऊंगौ।” जा तरैह ते पौलुस मांते चलौ गयौ और तीतुस यूसतुस नाम के आदमी के घर गयौ। बू परमेस्‍वर कूं मानबे बारौ हतो वाकौ घर एक यहुदी पिराथना घर के नजदीक हतौ। यहुदी पिराथना घर कौ मुखिया क्रिसपुस हतो बानें अपने सबरे घराने ने पिरभू पै भरोसौ करबे बारौ हतो। संगई भौत ते कुरिन्थियों के रैहबे बारे लोग जिन्‍ने परमेस्‍वर कौ वचन सुनौ हतो और भरोसौ करके बपतिस्मा लयौ हतो। एक रात दर्सन में पिरभू ने पौलुस ते कही, “डरपै मत, बोलत रैह और चुप मत होय। चौंकि मैं तेरे संग हतूं तोपै हमला करके कोई तोय नुकसान नांय पौहचाबैगौ। चौंकि जा नगर में भौत ते लोग मेरे अपने हते।” जामारै पौलुस कुरिन्थियन्स में डेढ़ साल तक परमेस्‍वर के वचन की उनके बीच में सिछा देत रयौ। जब अखाया कौ राजपाल, गल्‍लियो हतो तब यहुदी लोग एक हैके इकठ्‌ठे भये और पौलुस चढ़ आये, और बाय पकरकै अदालत में लै गयौ। और बोले कै, “जि आदमी हमारे ज्हां परमेस्‍वर की पिराथना ऐसे ढ़ग ते करबे की कैहतै जौ हमारे नियम के खिलापै।” पौलुस अबई बोलबे बारौई हतो, तब गल्‍लियो ने यहुदियन ते कही, “अरे यहूदियों अगर अन्याय या पाप कौ मसला होतौ तौ तुमारी बात मैं सुनतो। पर जि बाद-बिबाद सिछा, नाम और तुमारी अपनी व्‍यबस्था कौ है, तौ तुमईं जानौ मैं ऐसी बातन कौ न्याय नांय करबौ चांहतु।” और फिर बानें बे सब अदालत मैं ते बाहर निकार दिये। तब सब लोगन्‍ने यहुदी पिराथना घर कै मुखिया सोस्थिनेस कूं पकड़कै अदालत के सामने मारपीट करबे लगे पर गल्‍लियो ने जा बात की चिन्‍ता नांय करी। भौत दिना तक पौलुस कुरिन्थ में ठहरौ रयौ। फिर भरोसौ करबे बारे भईयन ते बिदा लैकें प्रिसकिल्‍ला और अक्‍बिला के संग, जहाज ते सीरीया कूं गयौ। जाबे ते पैहले पौलुस ने किंख्रिया में अपनों मुंडन करायौ चौंकि बानें मन्‍नत मांगी। फिर बे इफिसुस पहुँचे और पौलुस ने प्रिसकिल्‍ला और अक्‍बिला कूं मंई छोड़ दयो। और खुद यहुदी पिराथना घर में जायकें यहुदियन के संग बहस करबे लगो। जब मांके लोगन नें बाते मा रुकबे की कही कै, बू कछु दिना और बू रुके, तौ बानें मांपै रैहबे की मने कर दयी। पर पौलुस ने जाते समै बिनते कही, “अगर परमेस्‍वर की इच्‍छा भई तौ मैं तुमारे जौरे दुबारा आऊंगो।” बू जहाज पै चढ़ के इफिसुस ते चलौ गयौ। फिर बू केसरिया हैकें येरूसलेम गयौ और मांपै कलिसिया के लोगन ते मिलौ। फिर अन्ताकिया कूं चलौ गयौ। मापै कछू दिनां तक रैहबे के बाद में बू मांते बिदा हैकै गलातिया और फ्रुगिया के छेत्रन में अलग जगैन में यात्रा करत भये चेलान कूं भरोसे में मजबूत करतौ रयौ। मापै अपुल्‍लोस नाम कौ एक यहुदी हतो। बू सिकन्दरिया कौ रैहबे बारौ भौत ग्‍यानी और सास्त्रन कौ अच्‍छौ जानबे बारौ हतो। बू इफिसुस में आयौ। बाय पिरभू के रस्ता की सिछऊ मिली। वाके मन में पिरचार करबे की उमंग भरी हती। और ईसू के बारे में बड़ी सावधानी के संग सिछा देतो। पर बाय यूहन्‍ना के बपतिस्मा कोई ग्‍यान हतो। बू यहुदी पिराथना घर में बिना काऊ डर के बोलबे लगौ। जब प्रिसकिल्‍ला और अक्‍बिला ने बाय बोलत भये सुनौ तौ बे बाय एकान्‍त में लै जायकें, गहराई के संग परमेस्‍वर के रस्ता कौ अर्थ समझाऔ। जब अपुल्लोस ने अखाया जायबे की सोची तौ इफूसिस के भरोसौ करबे बारे भईयन ने वाकी सहायता की और अखाया के चेलान के काजै चिठ्‌ठी लिख भेजी कै बे वाकौ स्‍वागत करें। बानें मापै पौंहचकै भरोसौ करबे बारेन की मदद करी जिन्‍नें परमेस्‍वर की दया ते भरोसौ कर लियौ। चौंकि बू सास्त्रन ते जि सिद्ध करतो कै ईसू ही मसीह है, बानें यहुदी लोगन की भीड़ के बीच में सास्त्र के जोरदार सबदन ते उनकूं निरुत्‍तर कर दयौ। जब अपुल्‍लोस कुरिन्थुस में हतो, तब पौलुस सबरे देसन कौ दौरा करकें इफिसुस में आयौ। मापै बाय वाके कछू चेला मिले। तब पौलुस ने उनते पूछी, “जब तुमने भरोसौ करौऔ का तब तुमने पबित्र आतमा पायो?” और बानें बिन्‍ते कही, “हमनें तौ पबित्र आतमा के बारे में सुनोंई नांय कै पबित्र आतमा का होतै।” फिर बू बोलौ, “तौ तुमने काये कौ बपतिस्मा पायौए?” तब उन्‍नें कही, “यूहन्‍ना कौ बपतिस्मा।” तब पौलुस ने कही कै, “यूहन्‍ना कौ बपतिस्मा तौ पापन ते मन फिराब कौ बपतिस्मा हतो। बानें तौ लोगन ते जि कही हती कै, ‘जो मेरे बाद आय रयौए बापै,’ मतलब ईसू पै भरोसौ करौ।” जि सुनिकें उन्‍नें पिरभू ईसू के नाम ते बपतिस्मा लयो। जब पौलुस ने उनपै अपने हात रखे तब उनपै पबित्र आतमा उतर आयौ और बे अलग अलग भासा बोलबे लगे, और भविस्‍यबानी करबे लगे। जे कुल मिलाय के लगभग बारह आदमी हते। फिर पौलुस तीन महीने तक यहुदी पिराथना घरन में बिना डरे परमेस्‍वर के वचन सुनातौ रयौ। बू यहुदियन के संग बहस करते भए उन्हें परमेस्‍वर के राज्‍य के बारे में समझाबतो। पर कछू लोग तौ बड़े हटीले हते और मानबे काजै तईयारई नांय और लोगन के सामने जा सीख के बारे में बुरी भली बात कैहते, जामारै बू अपने चेलान कूं मापै छोड़ के खुद तुरन्‍नुस की पाठसाला में रोजाना बिचार बिमर्स करबे लगौ। दो साल तक ऐसैई होत रयौ जाकौ नतीजा जि भयौ कै, आसिया के रैहबे बारे यहुदी और गैर यहुदी सबन नें पिरभू कौ वचन सुन लयो। परमेस्‍वर पौलुस के हातन ते अनोंखै अचम्भे के काम कर रयो हतो। य्हां तक के वाके छुए रूमालन कूं और अँगौछान कूं रोगीन के जौरे ले जायो जातो और उनकी सब बीमारी दूर है जातीं और दुस्‍ट आतमा उनमें ते निकर भागतीं। कछू यहुदी लोग जो दुस्‍ट आतमा निकारत फिरते, और जि करबे लगे कै जिन लोगन में दुस्‍ट आतमा समाई हती, उनपै पिरभू ईसू कौ नाम लैके कैहते हते, “जा ईसू कौ पौलुस पिरचार करै, वाके नामते मैं आदेस देतूं उनकी दुस्‍ट आतमा निकारबे की कोसिस करते हते।” एक स्‍कीबा नाम के यहुदी महा पुरोहित के सात बेटा हते बेऊ ऐसौ कर रये हते। तब एक बैर दुस्‍ट आतमा ने उनते कही, “मैं ईसू कूं जानू और पौलुस के बारे में जानूं, पर तुम लोग को हैं?” फिर जो आदमी दुस्‍ट आतमा के बस में हतो, बू बिनपे ऐसौ झपटकै सबनकूं पछाड़ दियौ और उनकी ऐसी हालत कर दयी कै बे नंगे और घायल भाजे। इफिसुस में रैहबे बारे यहुदी और गैर यहुदी लोगन नें जब जि सुनी, तौ बे लोग भौत डरप गये और जाते पिरभू ईसू के नाम कौ आदर भौत बढ़ गयौ। उनमें ते भौतसेन्‍नें भरोसौऊ करौ, और अपने करै भये बुरे कामन कूं सबन के सामने मान्‍त भये आये। भौत ते जादू करबे बारेन ने अपनी किताबन कूं इकठ्‌ठी करकें, उन सबन के सामने जराय दयीं। उन किताबन की कीमत पचास हजार चांदी के सिक्‍कन के बराबर हती। जा तरैह ते पिरभू को वचन फैलबे लगौ और पिरभाव बढ़तौ गयौ। इन घटनान के बाद पौलुस ने अपने मन में मकिदुनियां और अखाया होत भए येरूसलेम जायबे कौ निस्चय करौ। बानें कही, “मांपै जायबे के बाद मोय रोमऊएं देखनों चंहिएं।” जामारै बानें अपने संगी तिमुथियुस और इरास्तुस नामक दो सहायकन कूं मकिदुनियां भेज दयौ और खुद आसिया में थोरे समै और रहौ। उन दिनन में जा सच्‍चाई कूं लैकें बड़ौ दंगा फसाद भयौ। मांपै देमेत्रियुस नाम कौ एक चाँदी कौ काम करबे बारौ सुनार हतो। बू अरतिमिस देवी के चाँदी के मन्दिर बनबाबतो, जाते कारीगरन कूं भौत काम मिलतो। बानें कारीगरन और जा काम ते जुड़े भये सब आदमिन कूं इकठ्‌ठौ करौ और उनते कही कै, “हे भईयाओ, तुम जानतौ कै जा काम ते हमे अच्‍छी कमाई मिलते। तुम सुन और देख सकतौ कै पौलुस ने इफिसुस मेंई नांय पर पूरे आसिया के सबरे छेत्र में लोग समझा बुझाकै भड़काय दये हैं। बू कैहतै कै, हातन के बनाए भए देबता कोई सच्‍चे देबता नांय होत। और हमे तौ जा बात कौ डरै कै कऊं हमारौ धन्धौ खतम ना है जाबै और अरतिमिस देवी के मन्दिर जो हम बनातै बू तुच्‍छ समझौ जाबेगौ और पूरे आसिया में संसार में जा देबी की पूजा करी जाबै वाकी गरिमा खतम हैबे कौ डरै।” जब उन्‍नें जि सुनी तौ बे भौत गुस्सा भये और चिल्‍लाय चिल्‍लायकै कैहबे लगे, “इफिसियों की देवी अरतिमिस महान है।” म्हांपै सबरे नगर की भगदड़ मच गयी। जामारै लोगन नें मकिदुनियां ते आये, जो पौलुस के संग यात्रा कर रये हते, गयुस और अरिस्तर्खुस कूं धर दबौचौ और उनकूं रंगसाला में लै भागे। पौलुस लोगन के सामने जायबौ चांहतो, पर वाके चेलान ने बाकूं जान नांय दयौ। कछू राज के अधिकारिन नें जौ पौलुस के मित्र हते। उनते कैहलबाई और बिनती करी कै बू रंगसाला में आयबे की हिम्मत नांय करै। मांपै सभा में भौत हल्‍ला है रयौ हतो और लोग जेऊ नांय जानते कै हम ज्हांपै काए कूं इकठ्‌ठे भए है। तब यहुदियन नें सिकन्दर कूं ठाड़ौ करौ। कछु लोगन नें सोची कै जा लड़ाई की बजैह सिकन्दर है बू हात कौ इसारौ करके लोगन के सामने अपने बचाव में कछु कैहबो चाहतौ। जब उनकूं जि मालूम परी कै जि तौ यहुदी है, तौ बे एकई सुर में सबरे दो घन्‍टे तक चिल्‍लाबत रये कै, “इफिसुस की देवी अरतिमिस महान है।” तब नगर के मन्त्री ने लोगन कूं सान्‍त करकें कही, “हे इफिसुस के रैहबे बारेऔ, दुनियां के सारे लोग जि जानतै कै, इफिसुस नगर महान देवी अरतिमिस और आकास ते नीचे गिरी भई मूरतीन के रखबारे हैं। इन बातन ते तुम इनकार नांय कर सकत जामारै तुमें सान्‍त रैहनौ चहिऐं और बिना बिचारे कछू मत करौ। “तुम उन लोगन कूं पकर के लाय रयेऔ जिन्‍ने न तौ कोई मन्दिर लूटौ और न हमारी देबी कौ अपमान करौ। फिरऊ देमेत्रियुस और वाके संगी कारीगरन कूं काऊ के खिलाप कोई सिकायत है तौ अदालत खुलीए मांपै राजपालऊ हतुए। बे एक दूसरे अपनी बात रख सकतै। अगर तुम और कछु जानबौ चाहतौ तौ सभा में बापै बिचार करौ जाबैगौ। पर आज के जा दंगा की बजैह ते हम पै, दोस लगायो जाय सकतुए। चौंकि हम जा दंगा कौ कोई सही कारन नांय बताय पाबेंगे।” बानें इतनी कैहकै सभा खतम कर दयी। जब दंगा थम गयौ, तब पौलुस ने अपने चेलान कूं बुलायौ और बिनकी हिम्मत बढ़ायी और बिनते बिदा हैके मकिदुनियां कूं चल दयो। सबरे देस में ते हैके वचनन के द्वारा समझाबत भये उनकौ उत्साह बढ़ायौ और बू यूनान देस पौहचौ। मांपै तीन महीना तक रैहबे के बाद जहाज ते सीरीया जायबौ चांहतो, पर बा समै कछू यहुदिन के बिरोध की बजैह ते बानें मकिदुनियां लौटबे कौ निस्चय करौ। पौलुस के संग पुर्रुस कौ बेटा सोपत्रुस जो बेरैया कौ रैहबे बारौ हतो, थिस्सलुनीके के अरिस्तर्खुस तथा सेकुन्दुस, दिरबै कौ गयुस, तिमुथी, और आसिया के तुखिकुस और त्रुफिमुस एसिया जायबे बारे हते। बे हमते पहले चलकें त्रोआस नगर में हमारौ इन्‍तजार कर रये हते। हम बिना खमीर की रोटी के तौहार के दिनन के बाद फिलीपी ते जहाज में बैठकै चले गये और पांच दिना बाद त्रोआस नगर में उनके जौरे पौहचे। मापै हम सात दिना रहे। सप्‍ताह के पहले दिन जब हम रोटी तोरबे काजै इकठ्‌ठे भए, तौ पौलुस उनते बातचीत करबे लगौ। बाय अगले ही दिन जानों हतो, जामारै बू आधी रात तक बातचीत करतोई रहो। हम ऊपर कमरा में ज्हांपै इकठ्‌ठे हते, म्हांपै भौत से दिया जर रये हते। म्हांपै युतखुस नाम कौ एक जबान जो कुआरौ हतो, खिड़की पै बैठौ हतो और बू उंघियाय रयौ हतो। चौंकि पौलुस भौत देर ते बोलेई जा रयौ हतो और बाय गैहरी नींद आय गयी और बू तीसरी मन्जिल पैते नीचे गिर परौ और जब बू उठायौ तौ बू मर चुकौ हतो। पौलुस ने नीचे उतर के बाते लिपट गयौ और बाय अपनी बाहों में लैकें कही कै, “घबराऔ मत बू अबई जीबित है।” फिर बानें ऊपर जायकें पिरभू भोज की रोटी तोड़ी और भोजन करौ। तब बू भौत देर तक दिन निकरबे तक बात करत रयौ, और जाके बाद बू चलौ गयौ। बे बा जबान के संग घर आये और वाके जीबित हैबे पै, बिनें बड़ी सान्‍ती मिली। हम लोग पैहलेई जहाज में चढ़ के अस्सोस कूं गये। म्हांपै हमे पौलुस कूंअऊं संग लेनौ हतो। बू रस्ता ते जायबो चांहतो, जा बजैह ते बानें ऐसौ करौओ। जब बू हमते अस्सोस में मिलौ तौ हम बाय नाव पै चढ़ायकै मितुलेने नगर लै आये। म्हांते चलकें दूसरे दिना खियुस के सामने पौंहचे। और अगले दिना समोस टापू आय गये और वाके दूसरे दिनां मिलेतुस नगर में आय पौहचे। चौंकि पौलुस पेन्‍तेकुस के दिन तक येरूसलेम पौंहचबे की जितनी जल्दी है सकती उतनी जल्दी कर रयो हतो, जामारै बानें जि फैसला करौ कै इफिसुस में बिना रुके आगे चलौ जाबैगौ, जाते बाय आसिया इलाके में समै न बितानों परै। पौलुस नें मिलेतुस ते इफिसुस की कलिसिया और बिनके अगुवन कूं खबर भेजकै अपने जौरे बुलायौ। उनके आयबे पै पौलुस ने कही, “तुम जिय जानतौ कै, मैं आसिया पौहचबे के बाद पैहले दिना तेई हरेक समै तुमारे संग कैसे रहो। दीन हैकें आँसू बहाय बहायकै यहुदिन की साजिस की बजैह ते मोपै परबे बारी मुसकिलन मेंऊ, मैं पिरभू की सेबा करतौ रयौ। तुम जिय जानतौ कै मैं तुमारी भलाई कै काजै काऊ बाते तुमें बतायबे में हिचकिचायौ नाऔ और मैं तुमें उन सब बातन कूं घर घर जायके सिखाबे में नांय झिझको। पर मैं तौ यहुदिन और यूनानिन के सामने गबाही देत रैहतो के परमेस्‍वर की ओर मन फिराऔ और पिरभू ईसू मसीह पै भरोसौ करौ। “अब मैं आतमा में भर के येरूसलेम कूं जाय रयौऊं पर मोय नांय मालूम कै म्हांपै मेरे ऊपर का बीतैगौ। मैं तौ बस इतनौ जानतूं के, पबित्र आतमा मोय हर समै जिय बताबते कै जेल की बेड़ी और परेसानी मेरौ इन्‍तजार कर रयी है। पर मेरे काजै मेरे पिरान की कोई कीमत नांय। मैं तौ बस बा दौड़ धूप और बा सेबा कूं पूरौ करबौ चाहतूं। जाय मोय पिरभू ईसू ने सोंपौए कै, परमेस्‍वर की किरपा के समाचार की गबाही दूं। “अब मैं जि जानतूं कै, तुम मेंते जिनके बीच में मैं परमेस्‍वर के राज्‍य कौ पिरचार करतो, बे मेरौ मौंह कबऊ नांय देख पामिंगे। जामारै आज मैं तुमारे सामने जि घोसना कर रयौऊं कै, जाके बादऊ तुम में ते कोई नांस है जातै तौ मैं तुम में ते काऊ के खून कौ दोसी नांऊ। चौंकि मैं परमेस्‍वर की सबरी इच्‍छा कूं तुमें बतायबे ते नांय हिचकिचायौ। अपनी और अपने झुंड की रखबारी करत रहो। पबित्र आतमा ने तुमें बिनकौ रखबारौ बनांयौए, ताके तुम परमेस्‍वर की बा कलिसिया कौ ध्‍यान रख सकौ, जाकूं बानें अपने बेटे के खून के बदले मोल लयो। मैं जानतूं मेरे जायबे के बाद खूंखार भेड़िया तुम लोगन के बीच में घुस आमिंगे जो तुमारे झुंड पै रहम नांय करिंगे। और तुमारे बीच में भौत ते ऐसे लोग निकर आमिंगे जो चेलान कूं भटकायकै उने टेड़ी मेड़ी बात कहिंगे। जामारै सावधान रहौ और जिय याद रखौ, मैने तीन साल तक दिन और रात आँसू बहा बहायकै तुम लोगन कूं सचेत करबौ नांय छोड़ो। “अब मैं परमेस्‍वर की दया के समाचार कूं तुमें सौंपतूं और जिय तुमें बढ़बे में और सब पबित्र लोगन के संग बिरासत दिबाबे में सामर्थीऐ। मैने कबऊ काऊके सोनो चांदी और कपड़ा नांय चांहे। तुम लोग जानतौ कै मैंनें अपनी और अपने संगीन की जरूरत पूरी करबे काजै अपने हातन ते काम करो। मैंनें तुमें अपने हरेक काम ते जि नमूना दयौए कै, कर्री मेहनत करकें कमजोर लोगन की सहायता कैसै करनी चहिऐं और हमे पिरभू ईसू कौ जि वचन ध्‍यान रखनों चहिऐं कै, ‘लैबे ते दैबे में जादा खुसी।’” जि कैहबे के बाद उन सबन के संग घुटुअन के बल पिराथना करी। हरेक पौलुस के गले मिल मिलकै फूट फूटकै रोय रयो हतो, बानें जि बात कही के, “तुम मेरौ मौंह फिर कबऊ नांय देखोगे,” जा बात ते भौत दुखी हते। फिर उन्‍नें बू जहाज पै सुरछित पौहचाय दयौ। उनते बिदा हैबे के बाद हमनें जहाज खोलौ और सीदे कोस टापू में आये। हम दूसरे दिन रुदुस नगर आये और म्हांते पतरा नगर में चले गये। म्हांपै हमनें एक जहाज देखौ जो फिनीकी इलाके कूं जाय रयौ हतो। हम बामें बैठकै चल दिये। जब साइप्रस टापू दीखबे लगो, तौ हम बाय उल्टे हात मांऊ छोड़कै सीरीया नगर मांऊ आगे बढ़े और सूर नगर पौंहचे चौंकि जहाज कूं सूर नगर में माल उतारनों हतो, जामारै हमऊ मईं पै उतर परे। म्हांपै हमे और परमेस्‍वर के चेला मिले मांपै हम बिनके संग सात दिनान तक रुके। पबित्र आतमा ने उनकूं सिखायो कै बे पौलुस ते कहें के बू येरूसलेम जायबे कौ बिचार छोड़ देय। जब म्हां रैहबे के दिन पूरे है गये, तौ हम म्हांते चल और बे सब लोग और उनकी पतनी और बालकन समेत नगर के बाहर तक हमारे संग आये। हमनें समुन्दर के किनारे पै घुटने टेककै पिराथना करी। और एक दूसरे ते बिदा हैकै हम जहाज पै चढ़ गये, और बे अपने घर कूं लौट गये। सूर नगर ते समुद्री यात्रा करते भये पतलिमियुस नगर में पौंहचे और सब भरोसौ करबे बारे भईयन कूं नमस्‍कार करौ और एक दिना उनके संग रहे। अगले दिनां उनकूं छोड़कै हम केसरिया में आय गये। और म्हांपै सुभ समाचार कौ पिरचारक फिलिपुस के घर रुके, जो येरूसलेम की कलिसिया मेंते चुन भये सात सेबकन मेंते एक हतो। वाकी चार क्वारी बेटीयाँ हती, जिनें परमेस्‍वर की ओर ते बात बताबे कौ वरदान मिलौ भयौ हतो। जब हमें म्हापे रैहते कई दिना है गये, तब यहुदिया ते एक अगबुस नाम कौ एक परमेस्‍वर की बात बतायबे बारौ आयौ। बानें हमारे जौरे आयकें पौलुस की कमर कौ पटका लै लयी और बाते अपने हात पाम बांधकै कही कै, “पबित्र आतमा ऐसे कैहतै कै, जा आदमी कौ जि पटका है बाय यहुदी जाई तरैह ते येरूसलेम में बांधेंगे, और गैर यहुदिन के हातन में सौंप दिंगे।” जब हमनें जिय सुनी तौ हमनें और म्हाँ के लोगन नें पौलुस ते येरूसलेम न जायबे की बिनती करी। जापै पौलुस ने उनते कही, “तुम जि का कर रयेऔ, रोय रोयकै मेरौ दिल चौं तोर रयेऔ? मैं तौ पिरभू ईसू के नाम के काजै येरूसलेम में बांधे जायबे काजैई नांय, पर मैं तौ मरबे तक तईयारऊं।” जब बू हमारी बात मानबे के काजै तईयार नांय भये, तौ हम जि कैहकै चुप है गये कै, “जैसी पिरभू की इच्‍छा।” जब हमारे मांपै रैहबे के दिना पूरे है गये, तौ हम अपनों सामान बांधकै येरूसलेम चल दिये। केसरिया तेऊ कछू चेला हमारे संग आये। बे हमे साइप्रस के एक आदमी मनासोन के घर ले गये, जो एक पुरानौ चेला हतो और हमे वाके घर रुकनों हतो। जब हम येरूसलेम पौंहचे तौ भरोसौ करबे बारे भईयन नें खुसी ते हमारौ आदर करौ। दूसरे दिना पौलुस हमारे संग याकूब ते मिलबे गयौ, म्हांपै सबरे कलिसिया के अगुवे हते। पौलुस ने उन सबन कूं नमस्‍कार करौ और उन सब कामन के बारे में जो सेबा के काम गैर यहुदी लोगन के बीच में परमेस्‍वर नें वाके द्वारा करे हते। बे सब एक-एक करके बताये। जब उन लोगन नें सुनी, तौ बे परमेस्‍वर की बड़ाई करते भये बोले, “हे भईया पौलुस, तुमतौ जि देख रयेऔ कै, कितने हजार यहुदी लोगन नें जो व्‍यबस्था के कट्‍टर मानबे बारेऐ जिन्‍नें भरोसौ करौ। तेरे बारे में जि बात कही गयीए कै, तू गैर यहुदिन के बीच में रैहबे बारे यहुदिन कूं तू मूसा की व्‍यबस्था छोड़बे की सिछा देतुए और तू उनते कैहतै कै, ‘उनके बालक ना तौ खतना करबामे और न हमारी रीति रिबाजन पै चलें।’ “जामारै अब का करौ जाय? बे जि तौ सुनई लिंगे कै तू आयौऐ। जामारै तोते हम कहे, तू बा काम कूं कर। हमारे संग चार ऐसे आदमी हैं जिन्‍ने कोई मन्‍नत मानींऐ। तू इन लोगन के बीच सुद्धीकरन के समारोह में सामिल है जाऔ और उनकौ खरचा दैकें अपनों सिर मुड़बा लै। जामारै बे लोग जि जान जामें कै, बिन्‍नें तेरे बारे में जो बात सुनीए, बू सही नांय। चौंकि तू तौ खुद व्‍यबस्था के अनुसार जीबन जीबतै। पर ज्हां तक भरोसौ करबे बारे गैर यहुदी की बातै, तौ हमनें उनकूं एक चिठ्‌ठी लिखीऐ कै, ‘मूरतीन के आगे चढ़ायौ भयौ भोजन नांय खानों चहिऐं और गलो घौंट के मारे भये पसु कौ मांस खायबे ते बचें, और खून कूं कबऊ मत खईयों, और व्‍यभिचार ते बचे रहियों।’” दूसरे दिना पौलुस बिन लोगन कूं लै गयौ और बिनके संग सुद्ध हैबे की रीति करबे के बाद बू बड़े पिराथना घर गयौ, और बानें बताई कै, “सुद्ध हैबे के दिना कब पूरे हुंगे, और हम मेंते हर एक के काजै चढ़ाबौ कब चढ़ायौ जाबैगौ।” जब सुद्ध हैबे की रीति के सात दिना पूरे हैबे बारे हते, तब आसिया देस के कछू यहुदिन ने बू बड़े पिराथना घर में देख लयो और उन्‍नें आयकें लोगन कूं भड़काय दयौ और पौलुस कूं बन्दी बना लयो। फिर बे चिल्‍लायकै कैहबे लगे, “हे इसरायल के लोगो हमारी मदद करौ। जि आदमीऐ हमारी व्‍यबस्था के खिलाप लोगन कूं भड़काय रयौए, अब तौ जानें यूनानी लोगन कूं पिराथना घर में लायके पबित्र जगैह कूं असुद्ध कर दयौए।” उन्‍नें तौ जाते पैहले त्रुफिमुस नाम के इफिसी कूं वाके संग नगर में देखौ हतो और बे जि समझते कै पौलुस बाय बड़े पिराथना घर में ले आयौ हतो। जामारै सबरौ नगर पौलुस के बिरोध में चढ़ आये और बाय पकरकै बड़े पिराथना घर मेते घसीटत भये बाहर लेगये और वाकौ फाटक बन्द कर दयौ। बे बाय मारबे की सलाह कर रये हते तबई रोमी सेना की एक टोली के सेनापती के जौरे खबर पौहची के सबरे येरूसलेम में खलबली मची भई है। तब बानें बाई समै कछू सिपाही और अधिकारिन कूं अपने संग लयो और पौलुस पै हमला करबे बारे यहुदिन के माऊं गयौ। जब यहुदिन ने सेनापती और सिपाइन की टोली देखी तौ बिन्‍नें पौलुस कौ मारबौ पीटबौ बन्द कर दयौ। तब सेनापती और उन सिपाइन नें पौलुस कूं बन्दी बनांय लयौ, और बाय जंजीरन में बांधबे कौ आदेस दयो। जाके बाद बानें पूछी कै, “जि कोऐ और जानें का करौए?” तब भीड़ मेते कछू लोग बोले, पर हल्‍ला गुल्‍ला के मारे सेनापती सच्‍चाई नांय जान पायौ कै का मामलौए। जामारै बानें सिपाइन कूं आग्‍या दयी कै जाय छाबनी में लै जाऔ। जब पौलुस सीढ़ी के किनारे पौंहचौ, तब भीड़ के गुस्सा के मारे सिपाही पौलुस कूं ऊपर उठा लैके गये। चौंकि भीड़ चिल्‍लाय रयी हती कै, “जाय मार डारौ।” जब पौलुस छाबनी के भीतर लै जायबे बारौ हतो तब पौलुस ने सेनापती ते कही, “का मैं तोते कछू पूँछ सकतूं?” सेनापती बौलो, “का तू यूनानी भासा जानतै? का तू बू मिस्री तौ नांय जानें भौत समै पैहले बिद्रोह करौ हतो, जो चार हजार आतंकबादीन की बेहड़ में अगुबाई कर रयो हतो?” पौलुस ने कही, “मैं तरतुस नगर कौ रैहबे बारौ यहुदीऊ, और प्रसिद्ध किलकिया कौ नागरिकऊ। मैं तोते बिनती कर रयौऊं के मोय जा भीड़े समझायबे की आग्‍या दे।” आग्‍या मिलबे के बाद पौलुस सीढ़ीन पै ठाड़े हैकें लोगन कूं चुप रैहबे कौ इसारौ करौ बे सब चुप हैगये तब बू इब्रानी भासा में बोलबे लगो। “हे भईयाओ और बुजुर्गो, अब मेरी सुनौ, मोय अपनी सफाई में कछू कहनों है।” जब लोगन नें सुनी कै, जि इब्रानी भासा बोल रयौए तौ बे सब चुप हैगये। तब पौलुस ने कही कै, “मैं यहुदी हूं और मेरौ जन्म किलकिया के तरतुस नगर में भयौ हतो, पर मेरौ पालन पोसन य्हांपै जा नगर में भयौए। गमलिएल कै पामन में बैठकै मोय बाप-दादन की व्‍यबस्था की अच्‍छी तरैह ते सिखाई गयीए। परमेस्‍वर के काजै बैसी अई धुन लगी भईए, जैसे आज तुम सबन में हतिए। मैने उनकूं जो ईसू की सिछा कौ मानने और वाके पीछे चलबे बारेन कूं इतनौ सतायौ कै, बे मर गये। मैने आदमी और औरतन कूं जबरन खेंच के जेल में डार दयौ। खुद महा पुरोहित और तुमारे नेतन की सबरी सभा मेरी जा बात की गबाह है। बिनई ते चिठ्‌ठी लैके दमिस्‍क के भरोसौ करबे बारे भईयन के जौरे जाय रयो हतो कै, ईसू के पीछे चलबे बारे लोगन कूं बांध के येरूसलेम लै आऊं और दन्‍ड दिब्बाऊ। “जब मैं यात्रा करते भये दमिस्‍क के जौरे पौहचौ, तब दुपहर के समै अचानक एक बड़े जौर की रोसनी आकास ते मेरे चारों ओर चमकी। और मैं धरती पै गिर परौ और मैने एक अबाज सुनी, ‘साऊल, हे साऊल, तू मोय चौं सताय रयेऔ?’ “मैने जबाब दयौ के, ‘हे पिरभू, तुम को है?’ “तब उन्‍नें मोते कही, ‘मैं ईसू नासरी हूं, जाय तू सताय रयेऔ।’ बू रोसनी मेरे संगीन नैऊ देखी, पर मोते बात करबे बारे की अबाज कूं समझ नांय सके। “मैंनें कही, ‘हे पिरभू, मोय का करनों चहिंयें?’ “तौ पिरभू नें मोते कही कै, ‘उठ और दमिस्‍क कूं चलौ जा। तोय जो कछू करनोंए, बू सब कछू महीं पै बताय दयौ जाबैगौ।’ चौंकि बू रोसनी इतनी तेज हती कै मैं वाके मारे फिर देख नांय सकौ और मेरे संगी मेरौ हात पकरकै दमिस्‍क कूं लै गये। “मांपै हनन्याह नाम कौ एक आदमी मोय देखबे आयौ। बू व्‍यबस्था कूं मानबे बारौ भक्‍त हतो और मांके यहुदिन में मानों भयौ आदमी हतो। बू मेरे जौरे आयौ और खड़े हैकै बोलौ, ‘हे भईया साऊल, देखबे लग।’ बाई समै मैं बाय देखबे लगौ। “और हनन्याह ने कही, ‘हमारे बाप-दादन के परमेस्‍वर ने तू जाई के काजै ठहरायौए कै, तू वाकी इच्‍छा कूं जान सकै और बा धरमी कूं देखै और वाके मौंह ते वाके वचन सुनें। चौंकि तुमें सब लोगन के सामने जि गबाही देनी है कै, तुमने पिरभू कूं देखौए और सुनोंए। जामारै अब देर मत कर। उठ, बपतिस्मा लै, और वाकौ नाम लैके अपने पापन कूं धोय डार।’ “येरूसलेम ते लौटबे के बाद बड़े पिराथना घर में पिराथना कर रयौ हतो, तबई मैंनें पबित्र आतमा में एक दर्सन देखौ। मैने पिरभू कूं देखौ और बू मोते जि कैह रयौ हतो कै, ‘जल्दी कर। येरूसलेम ते जल्दी अई चलो जा, चौंकि य्हांके लोग तेरी गबाहीऐ नांय मानिंगे।’ “मैने कही, ‘हे पिरभू, बे जानते कै मैं तुम पै भरोसौ करबे बारेन कूं यहुदी पिराथना घरन मेंते पकरबायके जेल में डरबाबतो और कौड़ा लगबाबतो। जब तेरे गबाह स्तिफनुस कौ खून बहायो जाय रयौ हतो, बा समै मैं म्हांपै उनके संग हतो, और मारबे बारेन के कपड़न की रखबारी कर रयौ हतो।’ “और पिरभू ने मोते कही के, ‘मैं तोय गैर यहुदियन के बीच में भेजुंगो।’” सब लोग पौलुस की जा बात कूं सुनत रये हते, पर अब बे सब चिल्‍लाय उठे कै, “जाय मार देऊ। जि धरती पै जीबित रैहबे लायक नांय।” जब बे चिल्‍लाय रये हते, तब बे कपड़न्‍नें उछारकें हबा में धूल उड़ाय रये हते, तब सेनापती ने जि आग्‍या दयी के, जाय किले में भीतर लायो जाबे और जाते कौड़ा लगबायकें पूछ ताछ करी जाबे, जाते जि पतौ चलै कै जि लोग चौं चिल्‍लाय रये हैं। पर जब बे पौलुस कूं कोड़ा लगबायबे काजै बांध रये हते, तबई पौलुस ने मांपै खड़े सूबेदार ते पूछी, “काऊ रोमी आदमी कूं जापै कोई दोस नांय पायो गयौ हो, का बामें कोड़ा लगायबौ सही है?” जि सुनकें सूबेदार ने सेनापती के जौरे आयकें कही, “तू जि का कर रयौए? जि एक रोमी आदमी है।” जि सुनकें सेनापती ने वाके जौरे आयकें पूछबे लगौ, “का तू रोमी आदमी है?” बानें कही, “हाँ।” जा बात पै सेनापती ने बाते कही, “रोमी नागरिकता पायबे काजै मोय भौत पैसा खर्च करनों परौ हतो।” तब पौलुस ने कही कै, “मैं तौ जनम कोई रोमी हूं।” तब बे लोग जो बाय जांचबे काजै आये हते, बे पीछे हट गये और बू सेनापती समझ गयौ के, पौलुस एक रोमी आदमी है, तौ बू डरप गयौ कै, मैने रोमी आदमी कूं बंधबायौऐ। दूसरे दिना सेनापती सही सही पतौ लगाबे की इच्‍छा ते कै यहुदी नें पौलुस पै चौं दोस लगायौ गयौए तौ वाकी बेड़ी खोल दयी, और पिरधान पुरोहित और सबरी महा सभा कूं इकठ्‌ठी हैबे की आग्‍या दयी कै सबरे दोस कौ पतौ लगामें। पौलुस ने यहुदी महा सभा कै माऊं टक टकी लगायकै देखौ और कही, “हे मेरे भईयाओ, मैने आज तक परमेस्‍वर के सामने पूरी तरैह ते, सच्‍चे बिबेक ते जीबन बितायौ है।” पर हनन्याह महा पुरोहित ने बिन लोग जो वाके जौरे ठाड़े हते उनते कही कै, बे वाके मौंह पै थप्पड़ मारै। तबई पौलुस ने कही, “अरे सफेदी ते पुती भई भीत, तोपै परमेस्‍वर की मार परैगी। तुम व्‍यबस्था के अनुसार मेरौ न्याय करबे बैठेऔ पर तू मोय व्‍यबस्था के बिरोध में थप्पड़ मारबे काजै आग्‍या देतौ।” पर पौलुस के जौरे ठाड़े लोगन नें बाते कही, “परमेस्‍वर के महा पुरोहित कौ अपमान करबे की हिम्मत कैसे है गई?” पौलुस ने जबाब दयौ के, “हे मेरे भईयाओ, मोय पतौई नांय के जि महा पुरोहितै। चौंकि सास्त्र में जि लिखी भईए कै, ‘तू अपनी पिरजा के नेता के काजै बुरे बोल मत बोल।’” जब पौलुस कूं जि मालूम परि गयी कै, ज्हांपै फरीसी और सदूकी दो गुट हैं तौ बानें महा सभा में पुकार के कही कै, “हे भईयाओ, मैं फरीसी और फरीसियन के बन्स कोऊं। मेरे ऊपर जामारै मुकद्‍दमा चल रयौ है कै मैं जि भरोसौ करतूं कै व्‍यक्‍ति मरबे के बाद जीबित होतै।” जब बानें जि बात कही तौ फरीसी और सदूकीन में आपस में झगड़ौ हैबे लगौ और महा सभा में फूट पर गयी। चौंकि सदूकी तौ जौं कहते कै, मरे भयेन में ते जीबित हैबौ, सुरग दूत और आतमा हति अई नांय। पर फरीसी इन सब बातन कूं मानते हते। तब बड़ौ हल्‍ला मचौ और भौत ते सास्त्रन कूं सिखाबे बारे फरीसी ठाड़े भये और जि कैहकै लड़बे लगे कै, “हमे जा आदमी में कोई बुराई नांय मिली, अगर कोई सुरग दूत या आतमा बाते बोलिऐ तौ जाते काऐ?” उनके बढ़त भये बिबाद कूं देखके सेनापती डरप गयौ के, कऊं बे पौलुस के टुकड़ा टुकड़ा नांय करदें। जामारै बानें अपने सैनिकन कूं जि आग्‍या दयी कै, बे बाय छाबनी में लै जाय। बाई रात कूं पिरभू ने पौलुस ते कही, “धीरज रख, जैसी तेने येरूसलेम में मेरी गबाही दयी है, बैसी गबाही रोम मेंऊं देनीं है।” जब अगलौ दिना भयौ, तब मापै कछु यहुदी इकठ्‌ठे भये और उन्‍नें जि सौगन्ध खायी कै, “जब तक पौलुस मार दयौ नांय जाबैगौ तब तक हम न तौ कछू खामिंगे और न कछू पीमिंगे।” जा साजिस में चालीस ते जादा लोग सामिल हते। बे यहुदी पिरधान पुरोहित और नेतान के जौरे जायके बोलकै, “हमनें जि सौगन्ध खाई है कै, जब तक हम पौलुस कूं मार नांय दिंगे, तब तक अन्‍न पानी गिरहन नांय करिंगे। तुम लोग महा सभा की सलाह ते सेनापती कूं जि खबर दें कै, बू पौलुस कूं जा बहाने ते लोगन के जौरे भेजै कै, ‘हम जाके मामले की सही सही जांच करबौ चांहते।’ वाके म्हां पौहचबे ते पैहले, हम बाय मारबे काजै पैहले ते मापै तैयार हैं।” पर पौलुस के भान्जे कूं जा साजिस की मालुम पर गयी और बानें छाबनी जाके पौलुस कूं जा बात की खबर पौहचाय दयी। तब पौलुस ने सूबेदार कूं अपने जौरे बुलायकै कही कै, “जा लड़का कूं सेनापती के जौरे लै जाबे। जाय सेनापती कूं एक नयी खबर देनीं है।” बानें बा लड़का कूं सेनापती के जौरे पौहचाय दयौ और कही कै, “पौलुस ने जा लड़का कूं तुमारे जौरे निबेदन करबे काजै भेजौऐ, जि तुमते कछू कैहबौ चाहतुऐ।” तब सेनापती ने वाकौ हात पकरौ और अकेले में लै जायके पूछबे लगौ कै, “बता तोय मोते कौन सी बात कैहनीयें?” बानें सेनापती ते कही कै, “यहुदिन की जि साजिसे कै बे पौलुस कूं तुमते जा बहाने तै कै हम सभा में जाके मामले की सही सही जांच करिंगे। तुम उनकी बात मत मानियों चौंकि मापै पौलुस कूं मारबे काजै चालीस आदमी जा मौके की थांग में बैठे हैं। बिन्‍नें जि सौगन्ध खाई है कै, ‘जब तक हम पौलुस कूं मार नांय दिंगे तब तक अन्‍न पानी गिरहन नांय करिंगे।’ बस अब तेरे फैसला कौ इन्‍तजार है।” तब सेनापती ने बा लड़का ते कही कै, “जा बाते तू काऊ ते मत कहियौ कै मैने सेनापती कूं जि बात बताईये।” तब सेनापती ने दो सूबेदार बुलाये और कही कै, “रात के नौ बजे तक केसरिया जायबे काजै दो सौ सैनिक, सत्‍तर घुड़ सबार और दो सौ भालेदार तैयार रहें। पौलुस के काजैऊ घोड़े कौ इन्‍तजाम करौ जाबे, जाते बू बाय सही सलामत राजपाल फेलिक्स के जौरे पौहचाय सके।” बानें जि लिखकें एक चिठ्‌ठीअऊ दयी। “महामहिम राज्‍यपाल फेलिक्स कूं क्‍लौदियुस लुसियस की ओर ते नमस्‍कार। यहुदिन ने जा आदमी कूं पकर लयौ हतो और जे जाय मार डारबौ चांहते, पर मैने अपने सैनिक भेजकें वाकूं छुड़ाय लयौए चौंकि मोय जि मालूम परी के जि एक रोम कौ रैहबे बारौऐ। मैं जि जानबौ चाहतौ के जि लोग जापै का दोस लगाय रये हैं जा बजैह ते महा सभा में लै गयौ हतो। पर में समझ गयौ कै बे जापै अपनी व्‍यबस्था की बजैह ते दोस लगाय रये हते। बे ऐसे सबाल कर रये हते जिनकौ जापै जौ दोस लगाये जाय रये हते बाते कोई मतलब नांय हतो कै जि बन्दी बनांयबे या मारबे लायक होय। मोय जाके मारबे की साजिस की खबर मिल गयी, जामारै अब मैं जाय तुमारे जौरे भेज रयौऊं। मुद्‍दइयों को भी आग्‍या दी, कि तेरे साम्हने बा पर साबित करें।” जैसे सिपाइयन कूं आग्‍या दी गई हती, बैसेई पौलुस कूं लैकें रातों रात अन्तिपत्रिस नगर में ले आए। दूसरे दिन बे घुड़ सबारन कूं पौलुस के संग जायबे के काजै छोड़कै वाकी के सिपाई छाबनी में लौट आये। घुड़ सबारन नें केसरिया में पौहचकै राजपाल कूं चिठ्‌ठी दयी और पौलुस कूं वाके सामने ठाड़ौ करौ। बानें चिठ्‌ठी पढ़कै पूछी कै, “जि कौन ते देस कौ रैहबे बारौ है?” और जब बू जि जान गयौ कै, जि किलकिया कौऐ, तौ बानें बाते कही, “जब तेरे बिरोधी आमिंगे, तौ मैं तेरौ मुकद्‍दमा करूंगो।” बानें पौलुस कूं हेरोदेस के किला में पहरे में रैहबे की आग्‍या दई। पाँच दिनां बाद महा पुरोहित हनन्याह कछू यहुदी नेतान और तिरतुल्‍लुस नाम के एक बकील कूं संग लैकें केसरिया आयौ। बे राजपाल के सामने पौलुस पै दोस साबित करबे आये हते। फेलिक्स के सामने पौलुस की पेसी हौनी हती और मुकद्‍दमा की सुनबाई हौनी हती, तब तिरतुल्‍लुस बोलौ कै, “हे महाराज फेलिक्स, तुमारी बजैह ते हम बड़ी सान्‍ती के संग रैह रये हैं और तुमारी आंखन के सामने देस में भौत ते सुधार भये हैं। तुमारी जो हम पै दया भयीए बाय हम मानतै। जामारै मैं तुमारौ जादा समै खराब नांय करत भये, तुमते जि बिनती करबौ चाहतूं के, तुम मेरी थोरी सी बात सुन लें। “जि आदमी उतपाती में पायौ गयौए और सबरे दंगा फसाद जाने करबाये हैं और जि नासरत के रैहबे के पंथ कौ नेता है। जाने हमारे बड़े पिराथना घर कूं असुद्ध करबौ चाहौए, जामारै हमनें जि पकरौए। पर सेनापती लुसियस ने जि हम पैते जबरन छीन लयौ। हम जापै जो दोस लगा रये है, वाके बारे में तुम जाय खुद पूछ सकतौ।” जा दोस में यहुदीअऊ सामिल है गये है। बेऊ पक्‍की तरैह ते कैह रये हते जि बात सही है। फिर राजपाल नें पौलुस के माऊं इसारौ करकें अपने बारे में बोलबे की कही, तब पौलुस बोलौ कै, “तू भौत सालन ते जा जात कौ न्याय कर रयौए, जामारै में तोय खुसी ते बताबतूं। जाते तू खुद जि जान सकै, जब मैं येरूसलेम में अराधना करबे आयौ, मोय कुल बारैई दिना भये हते। तब इन लोगन नें मोय न तौ बड़े पिराथना घर में और न सभा में, न नगर में कऊं दंगा फसाद करते भये पायौ। जिन बातन के बारे में अब तेरे सामने मोपै जो दोस लगाय रये हे, बाय साबित नांय कर सकिंगे। पर मैं तेरे सामने जा बात कूं मांनतू कै, मैं अपने पुरखन के परमेस्‍वर की अराधना अपने ईसू के रस्ता के अनुसार करतूं, और जाय जे गलत बतातै, चौंकि जाके बारे में व्‍यबस्था बतातै और परमेस्‍वर की ओर ते बात बताबे बारेन की किताब में लिखौ है और मैं बाई पै भरोसौ करूं। और परमेस्‍वर पै भरोसौ करते भये बिनकी तरैह ते जि आसा करतूं कै धरमी और अधर्मी दोनों जी उठेंगे। जामारै मैं आदमी और परमेस्‍वर के सामने अपनी आतमा कूं सुद्ध बिबेक कूं निरदोस रखबे की कोसिस करतूं। “भौत सालन के बाद मैं जब अपने लोगन कूं दान पौंहचाबे और बड़े पिराथना घर में भेंट चढ़ाबे येरूसलेम में आयौ हतो। तौ आसिया के कछू यहुदिन ने मोकूं मेरे सुद्धीकरन के बाद ऐसौ करते भये पायौ। मेरे संग न तौ कोई भीड़ हती और न कोई दंगा फसाद हतौ। उनमें ते मोपै दोस लगायबे बारे हाजिर होने चंहिऐ। य्हां जो लोग हैं बेई लोग बतायें कै, जब मैं महा सभा के सामने खड़ौ हतो तब बिन्‍नें मोमें कौन सौ दोस पायौ। हाँ, एक बात जरूर भयी हती, मैंनें बिनके बीच में खड़े हैकै जोर ते चिल्‍लाके कही हती कै, ‘मरे भयेन मेंते जी उठबे के बारे में आज तुम लोगन के सामने मोपै मुकद्‍दमा चल रयौ है।’” फेलिक्स राजपाल ईसू पन्थ के बारे में जानतो हतो, जा बजैह ते बानें मुकद्‍दमा की सुनबाई टाल दयी, और यहुदिन ते कही के, “जब तक लुसियस सेनापती नांय आ जाय, तब तक मैं निरनय नांय करूंगो।” फिर बानें सूबेदार कूं जि आग्‍या दयी कै, “पौलुस कूं पैहरे के भीतर रखौ जाबै और जाकी जरूरत पूरी करबे ते जाके संगीन कूं रोकौ नांय जाबै।” कछू दिना बाद फेलिक्स अपनी पत्नी द्रुसिल्‍ला के संग मापै आयौ और वाकी पतनी यहुदी हती। फेलिक्स ने पौलुस बुलबायौ और ईसू मसीह पै भरोसे के बारे में सुनौ। जब पौलुस ने परमेस्‍वर के नेकी, आत्‍मसंयम और आयबे बारे न्याय के बारे में बोलबे लगौ, तब फेलिक्स डरप गयौ, और बोलौ, “अब तौ तू जा। जब मौकौ मिलैगौ तोय मैं बाद में बुलबाऊंगौ।” बा समै फेलिक्स कूं एक आसा हती कै पौलुस बाय पैसा देगौ। जामारै पेलिक्स बाय बार बार बूलायौ हतो। दो साल बीतबे के बाद फेलिक्स की जगैह पै पुरिखियुस फेस्तुस राजपाल आयौ। फेलिक्स यहुदिन कूं खुस रखबौ चांहतो, जामारै बानें पौलुस कूं जेल मेंई रैहन दयौ। तीन दिन बाद फेस्तुस राजपाल केसरिया ते येरूसलेम देस में पौंहचौ। पिरधान पुरोहित और यहुदी नेता पौलुस पै दोस लगायबे काजै वाके जौरे आये। और बानें बाते बिनती करी कै, बू पौलुस कूं येरूसलेम भिजबायकै वाकौ पच्‍छ लेय, चौंकि बे लोग बाय मरबे की ताक में हते। फेस्तुस ने जबाब दयो कै, “पौलुस केसरिया में बन्दी है और मैं मांपै जल्दी जाऊंगो।” बानें कही, “तुम अपने कछू मुख्‍य नेतान कूं मेरे संग भेज देओ। अगर बानें कछू गलत करौए तौ बापै तुम दोस साबित करौ।” फेस्तुस जादा ते जादा आठ-दस दिन उनके बीच में रैहके केसरिया कूं चलौ गयौ और दूसरे दिना अदालत में बैठकै बानें पौलुस बुलबायौ। जब पौलुस आयौ तौ येरूसलेम ते आये भये यहुदिन नें बापै भौत गम्भीर दोस लगाते भये वाके चारों ओर खड़े है गये, पर बे दोस साबित नांय कर सके। तब पौलुस ने जबाब दयौ, “मैने यहुदिन की व्‍यबस्था के बिरोध में और ना बड़े पिराथना घर और कैसर के बिरोध में कोई गलत काम नांय करौ।” पर फेस्तुस यहुदियन कूं खुस करबौ चांहतो, जामारै बानें पौलुस ते कही, “का तू येरूसलेम जायबौ चाहतुए, जाते मैं तोपै लगाये गये दोसन कौ न्याय कर सकूं?” पौलुस ने कही, “अब जा समै तौ मैं कैसर की अदालत में ठाड़ौऊ और मेरौ न्याय जाई अदालत में हौनो चंहिऐं, चौंकि तू जानतुए के मैने यहुदिन के संग कछू गलत नांय करौ और जाय तू भौत अच्‍छी तरैह ते जानतुए। अगर मैने कोई ऐसौ पाप करौए जाकी सजा मेरी मौत है तौ मैं जाते बचबौ नांय चांहतु। अगर मोपै जो दोस लगाये जाय रये हैं, बे गलत हैं तौ मोय कोई इनके हात में नांय दे सकत। मेरी बिनती है कै मेरौ मुकद्‍दमा रोमी सम्राठ केसर की अदालत में भेज दयौ जाबै।” तब फेस्तुस राजपाल ने सभा के मन्त्रीन ते सलाह करकें बाते कही, “तेने मांग करी है कै, तेरौ मुकद्‍मा सम्राठ केसर की अदालत में सुनों जाबें, जामारै मैं तेरे मुकद्‍मे कूं केसर की अदालत मेंई भेज रयौऊं।” कछू दिना बाद राजा अग्रिप्पा अपनी छोटी बहन बिरनीके के संग केसरिया आयकै फेस्तुस ते मुलाकात करी। बे भौत दिना मांपै रह चुके तब फेस्तुस ने राजा कूं पौलुस के बारे में बात बाय बताई के, “एक आदमी है जाय फेलिक्स बन्दी करके छोड़ गयौ हतो। जब मैं येरूसलेम में हतो, तब यहुदी पिरधान पुरोहित और बिनके नेतन ने बापै दोस लगायौ और बाय मौत की सजा दैबे की मांग करी। मैने बाते कही कै, रोमियन में ऐसौ चलन नांय कै काऊ आदमी कूं, जब तक दोस लगायबे बारे कौ आमनों सामने नांय करौ दियौ जाबे और बापे लगाये भये दोस बचायबे कौ बाय मौकौ नांय देय, बाय सजा के काजै सौंपो जाबे। जामारै बे सब लोग मेरे संग य्हांपै आये तौ मैने बिना देर करें अगलेई दिनां अदालत में बैठकै बा आदमी कूं हाजिर हैबे की आग्‍या दयी। जब बापै दोस लगायबे बारे बोलबे ठाड़े भये तौ उन्‍नें बापै कोई ऐसौ दोस नांय लगायौ, जैसो कै मैं सोच रयौ हतो। पर बिनें केवल अपने मत के बारे में कछू बाते मत-भेद हतो, और ईसू नाम के आदमी के बारे में जो मर गयौए और पौलुस वाके जीबित हेबौ कौ दाबा करतुए। मैं उलझन में फस गयौ, जामारै मैने जाते पूछी कै, ‘का तू येरूसलेम कूं जाबैगौ म्हां इन सब बातन कौ न्याय है जाबैगौ?’ पर पौलुस ने जि बिनती करी कै, मेरे मुकद्दमें कौ फैसला सम्राठ केसर करे, तौ जब तक बाय में कैसर के जौरे नांय पौहचाय दूं, तब तक बाय जेल मेई रखूं।” अग्रिप्पा ने फेस्तुस ते कही, “मैं बा आदमी की बात सुनबौ चाहतूं।” फैस्तुस ने कही कै, “तुम कल सुन लियों।” दूसरे दिन अग्रिप्पा राजा और बिरनीके बड़ी धूम धाम के संग आये और सूबेदारन और नगर के माने भये लोगन के संग सभा भवन में लायो गयौ। फेस्तुस के आदेस के अनुसार पौलुस कूं वाके सामने लयौ गयौ। फिर फेस्तुस राजपाल बौलो, “हे महाराज, अग्रिप्पा और ज्हांपै मौजूदा लोगो, तुम जा आदमी कूं देख रये हौ। जाके बारे में सबरे यहुदी लोग, येरूसलेम में और ज्हां, मोते चिल्‍ला-चिल्‍ला कर मांग कर रये है कै, जि आदमी अब जीबित नईं छोड़ो जाय। पर मैंनें जि जान लई के जामें ऐसौ कोई दोस नांय कै, जाय मौत कि सजा दयी जाबे, चौंकि जाने खुद सम्राठ ते बात करबे की मोते बिनती करी जामारै मैंनें जाय म्हां भेजबे को फैसला करौ। पर मैने जाके बिसय में ऐसी कोई बात नांय पाई जाय मैं अपने स्‍वामी रोमी सम्राठ केसर काजै लिखूं। जामारै, हे महाराजा अग्रिप्पा, अब मैं खुदयी जाय तेरे सामने लायौऊं कै जांचबे के बाद मोय कछू लिखबे काजै मिल जाबे। चौंकि मोय काऊ बन्दी कूं बिना दोस पत्र लिखकें सम्राठ के जौरे भेजबौ सही नांय लगत।” राजा अग्रिप्पा ने पौलुस ते कही के, “तोय अपने बारे में बोलबे की अनुमती है।” तब पौलुस हातन ने फैलायकै बोलौ, “हे महाराज अग्रिप्पा, यहुदिन ने मोपै भौत ते दोस लगाये हैं, पर उनकी सफाई में तुमते बोल सकतूं जाय में अपनों सौभाग्‍य समझतूं। जि सहीए कै तोय यहुदिन के रीती और वाके दंगा फसादन के बारे में जानकारीऐ। जामारै मेरी तोते बिनतीए कै, मेरी बात धीरज के संग सुनी जाबे। “जे सबरे यहुदी जा बात ते जानते के मैने बचपन ते जबानी तक अपने देस के लोगन के बीच और येरूसलेम मेंऊं कैसौ जीबन जीयौऐ। बे मोय भौत पैहले ते जानतै और अगर बे चांहे तौ जा बात की गबाही दै सकतै कै, मैं फरीसी हैकैऊ अपनी व्‍यबस्था पै खराई के संग चलकै जीबित हूं। जौ बादा परमेस्‍वर ने हमारे पुरखन ते करौए वाकी आसा की बजैह ते मोपै मुकद्‍दमा चल रयौए। और बा बादा के पूरे हैबे की आसा में हमारे बारैऊ कुलन के लोग रात और दिन पूरे मन ते परमेस्‍वर की सेबा करते भये आये हैं। हे राजा! जाई आसा कै बारे में जे यहुदी मोपै दोस लगाबते। मैं इन यहुदिन ते जि पूछबौ चाहूं कै, मरे भयेन में ते जीबित हैबे की बात पै जे भरोसौ चौं नांय करें? परमेस्‍वर मरे भयेन कूं जीबित करतुए। “मैऊं हर तरैह ते ईसू नासरी के नाम कौ बिरोध करतौ और जाईए अपनों कर्म समझतौ। और मैंनें येरूसलेम में बुई करौऊऐ। मैंनें परमेस्‍वर के भौत से पबित्र लोगन कूं पकरकै जेल में डारबे कौ पिरधान पुरोहित ते अधिकार की चिठ्‌ठी लैके जब उन्‍नें मारौ, तब में उनके संग बिरोध करतो। मैं यहुदिन के पिराथना घरन में उन अत्‍याचार करतो, और ईसू के बिरोध में बोलबे काजै उनपै दबाब बनाबतो, उनते मोय इतनी गुस्सा हती और उन्‍नें सतायबे काजै दूसरे नगरन तक गयौ। “एसैईं एक बैर में अपनी यात्रा पै निकरौ और यहुदी पिरधान पुरोहितन ते अधिकार लैकें दमिस्‍क कूं जाय रयौ हतौ। तब दोपहर कूं मैं रस्ता में हतो तब हे राजा, मैंनें एक रोसनी सुरग ते मेरे और संगीन पै उतरत भये देखी। बू सूरज तेऊ जादा चमक रयी हती। बू मेरे संग के लोगन के चारौ लग चमकी। हम सब धरती पै लुढ़क गये। फिर मैंनें एक इब्रानी भासा सुनी, जौ मोते कैह रयी हती कै, ‘है साऊल, है साऊल, तू मोय चौं सताय रयौए?’ मोय सतायकै, तू खुद कूं दर्द पहुचातौ। “फिर मैंनें पूछी, ‘है पिरभू, तू कोऐ?’ “पिरभू ने जबाब दयौ के, ‘मैं ईसू हूं, जाय तू सताय रयौए। पर अब तू ठाड़ौ है जा। मैं तेरे सामने जामारै पिरगट भयौऊं कै, तोय एक सेबक के रूप में चुनूं और जो कछू तेने मेरे बारे में देखौए और जो कछु मैं तोय दिखाऊगौ, वाकी गबाही देय। मैं तोय तेरे लोगन और गैर यहुदिन के बीच में भेजुंगो और उनते तोय बचाबत रहूंगो। तू उन लोगन की आंख खोलबे काजै, बिनें अंधेरे ते उजीते की ओर लाबे, सैतान कै अधिकार कूं तोरकै, उने परमेस्‍वर के माऊं मोड़बे काजै तोय बिनके जौरे भेज रयौऊं। जाते बे पापन ते छमा पामिंगे और बिन लोगन बीच में स्थान पामिंगे जो मोपै भरोसौ करबे की बजैह ते पबित्र भये हैं।’ “हे महाराज अग्रिप्पा, जामारै मैंनें बू सुरगीय दरसन की आग्‍या नांय टाली। सबते पैहले मैं दमिस्‍क और येरूसलेम के लोगन में और वाके बाद सबरे यहुदिया और गैर यहुदीयन में जा बात कौ पिरचार करौ के, बे अपने पापन ते मन फिरामें और पस्चाताप करकें जीन्दे परमेस्‍वर की सरन में आ जाय और मन फिरायबे जैसेई काम करें। जाई बजैह ते जि यहुदी लोग मोय बड़े पिराथना घर में पकरकें मार डारबौ चांहते। परमेस्‍वर की दया ते मैं आज जीबितऊं और जा बात की गबाही दै रयौऊं। जिन बातन के बारे में परमेस्‍वर की ओर ते बात बतायबे बारेन नें और मूसा ने जि भविस्‍यबानी करी हती कै, मसीह कूं दुख उठानौ होगौ और बू सबते पैहले मरे भयेन मेंते जी उठके हम यहुदी लोगन और गैर यहुदी लोगन के काजै उजीते कौ पिरचार करैगौ।” पौलुस जा तरैह ते अपनी सफाई मैं बोलई रयौ हतो तबई फेस्तुस ने चिल्लाय कही कै, “हे पौलुस तेरौ दिमाग खराब है गयौ का? तू जादा पढ़बे की बजैह ते पागल है गयौए।” पौलुस ने कही, “हे महानभाब फेस्तुस, मैं पागल पन में नांय बोल रयो, पर पूरे होस में बोल रयौऊं, जे बात बिलकुल सच्‍ची हैं। महाराज अग्रिप्पा खुद इन बातन कूं जानतो जामारै मैं बिना डरे इन बातन नें वाके सामने कैह रयौऊं। मोय दृढ़ भरोसौ है कै इन बातन में एकऊ इनते छिपी नांय, चौंकि जि बात काऊ कोने में छिपकै नांय करी। हे राजा अग्रिप्पा, का तू परमेस्‍वर की ओर ते बात बतायबे बारेन की बात पै भरोसौ करतै? मैं जानतूं के तू भरोसौ करतै।” तब अग्रिप्पा ने पौलुस ते कही, “का तू मोय थोरौ समझाय केई मसीह बनांयबौ चाहतुए?” पौलुस ने जबाब दयौ कै, “का थोरौ, का जादा, पर मेरी तौ परमेस्‍वर ते जि पिराथना है कै, तूई नांय, पर जौ लोग आज मोय सुन रये हे, बे सब लोग इन बन्धन मेते निकरकें मेरे जैसे है जामें।” राजा अग्रिप्पा ठाड़ौ है गयौ और वाके संग वाकी बहन बिरनीके, फेस्तुस राजपाल और बैठे भये लोगऊ ठाड़े है गये। बे सब मांते निकरकै आपस में बात करबे लगे कै, “जा आदमी ने ऐसौ कछू नांय करौ कै जाय मौत की सजा या जेल की सजा दयी जाय।” राजा अग्रिप्पा ने फेस्तुस ते कही कै, “अगर जि आदमी रोमी सम्राठ केसर ते अपील ना करी होती तौ छोड़ौ जाय सकतो।” जब जि बात तैय भयी कै हम लोगन कूं जहाज ते इतालिया जानौए तौ पौलुस और दूसरे बन्दीन कूंअऊं रोमी सम्राठ की सेना के, यूलियुस नाम के सूबेदार के हात में सौंप दयो। अद्रमुत्‍तियुम नगर के एक जहाज पै हम चढ़कै आसिया के छेत्रन मैं हैकें जानौ हतो जामारै समुद्री यात्रा पै निकर परे। और मकिदुनियां पिरदेस के थिस्सलुनीके नगर कौ रैहबे बारौ अरिस्तर्खुस हमारे जा यात्रा संग हतो। और अगले दिन हम सैदा में उतरे मापै यूलियुस ने पौलुस के संग अच्‍छौ बौहार करौ और बाकूं मित्रन के जौरे जान दो जाते कै बे बाय जरूरत की चीज दै सकैं। हम साइप्रस टापू के किनारे किनारे जाय रये हते चौंकि हबा सामने तै आय रयी हती। जाके बाद हम किलकिया और पंफूलिया इलाके के सागर के किनारे किनारे हैकें लूसिया पिरदेस के मुरा नाम के नगर पहुँचे। म्हां सूबेदार को सिकन्दरिया कौ एक जहाज मिलौ जो इटली जायबे बारौ हतो हमकूं बापै चढ़ाय दयौ। और हम कैऊ दिनां तक बड़ी मुस्‍किलन में धीरे धीरे आगे बढ़त भये कनिदुस नगर पौंहचे। हबा हमारे सामने की चल रयी हती जामारै हम सलमोने के सामने ते हैंके क्रेते टापू की आड़ में हेकें चले। क्रेते टापू के किनारे किनारे मुस्‍किल ते “सुभलंगरबारी” नाम के बन्दरगाह पै पौंहचे, ज्हांते लसेआ नगर जौरेई हतो। भौत समै बीतबे के बाद समुन्दर की यात्रा खतरनाक है गयी हती। उपबास कौ दिन बीत चुकौ हतो, तब पौलुस ने उन लोगन कूं जि कैहत भये सावधान करौ, “हे महानभाबो, मोय लग रयौ है कै अब आगे की यात्रा और खतरनाक होगी, है सके हमे, जहाज माल और जान कौऊ नुकसान उठानौ परै।” पर सूबेदार कूं पौलुस की बातन की बजाय जहाज के कप्‍तान और वाके मालिक पै जादा भरोसौ हतो। बू बन्दरगाह जाड़े बितायबे काजै अच्‍छी जगै नांय हती, जामारै जादातर लोग मांते जाबे के पछ में हते। उन्‍नें काउ न काऊ तरैह ते पैनिक्स तक पौंहचबे और मांपै जाड़ो बितायबे की आसा हती। पैनिक्स क्रेते कौ ऐसौ बन्दरगाह हतो जो दछिन पस्चिम और उत्‍तर पस्चिम के माऊं खुलो भयौ हतो। जब दछिन हबा बैहबे लगी, तौ बे लोग समझे कै अब हमारौ काम बन गयौ। जामारै उन्‍नें लंगर खोल दये कै, बे क्रेते टापू की आड़ में आगे बढ़बे लगे। पर जल्दी अई उत्‍तर पूरब ते तूफानी हबा बैहबे लगी जो यूरकुलीन कहलातै। तौ जहाज वाके मारे आगे नांय जाय सकौ और बू बहाव की दिसा में बहौ जा रयौ हतो। कौदा नाम के छौटे ते टापू की आड़ में आयकै, हमें जीबन नौकान कूं बचाबे में भौत मेहनत करनी परी। उन्‍नें बू ऊपर ते खैंचके चारौ लंग ते रस्सन ते कसकै बांध दयी कै कऊं सुरतिस के उथले पानी में फस न जामें, जा डर के मारे जहाज कौ पाल उतारकै पानी बहाव के संग बहन दयौ। दूसरे दिना भौत जौर कौ तूफान आयौ और जहाज हिचकोला खायबे लगो तौ हमनें अपनों माल समुन्दर में फैंकबौ सुरू कर दयौ। और तीसरे दिना हमनें अपने हातन ते जहाज कौ साज-सामान जहाज मेंते फैक दयौ। जब कैऊ दिना तक सूरज और तारे दिखाई नांय दये और आँधी जौर की चल रयी हती, जामारै हमारी बचबे की आसा खतम है गयी। उन लोगन नें भौत समै ते भोजन नांय खायौ हतो तब पौलुस ने ठाड़े हैकें कही, “हे महानभाबो, अगर तुम मेरी मानकै क्रेते में ते जहाज कूं आगे नांय बढ़ाबते तौ तुमें इतनौ नुकसान नांय उठानों परतौ। पर मैं तुमते जि बिनती करतूं के तुम धीरज रखो। चौंकि तुम मेंते काऊए अपने पिरान नांय खोने, पर जि जहाज जरूर नांस है जाबैगौ। चौंकि बीती रात जा परमेस्‍वर कौ उपासक और वाकी सेबा करतूं वाके सुरग दूत ने मेरे जौरे आयकें कही, ‘हे पौलुस, डरपै मत। तोय कैसर के सामने जरूर ठाड़ौ होनौएं, और देख परमेस्‍वर ने यात्रा करबे बारे तोय दये हैं।’ जामारै महानभाबो, तुम हिम्मत रखौ, चौंकि मोय परमेस्‍वर पै भरोसौए, बानें मोते जैसे कहिए बैसौ होगौ। पर हमें काऊ टापू कै ऊपर रुकनों होगौ।” जब चौदहमी रात आयी तब हमारौ जहाज अद्रिया समुन्दर के पानी की लहरन के थपेडे़ खाय रयौ हतो, तौ आधी रात के समै जहाजे चलायबे बारेऐ, जि लगौ के कोई किनारौ जौरेई है। जब उन्‍नें पानी की गैहराई नापी तौ अस्सी हात हती। थोरी देर बाद गैहराई नापी गयी तौ साठ हात रैह गयी हती। उनकूं जि डर हतो कै कऊं हमारौ जहाज चट्‍टान ते टकराय नांय जाबै। जामारै उन्‍नें जहाज के पिछै की ओर चारौ लंगर डार दये और सबेरौ हैबे की कामना करबे लगे। जब जहाज चलायबे बारे जहाज मेंते निकरकै भाजबे की कोसिस करबे लगे, और उन्‍नें जि बहानौ लगायो कै हम जहाज के अगले हिस्सा में लंगर डारबे जाय रये हैं जीबन नौका समुन्दर में उतार दयी। तब सूबेदार ने पौलुस ते कही, “अगर जे लोग जहाज पै नांय रुके, तौ हमऊं नांय बचिंगे।” जामारै सिपाइन नें जीबन नाबन की रस्सी काट दयीं और नाबन कूं नीचे गिराय दयौ। सबेरौ हैबे ते पैहले पौलुस ने जि कैहकै भोजन करबे काजै समझाये कै, “चौदेह दिन ते तुम चिन्‍ता करके भूंखे रैह रयैऔ। तुमने कछू नांय खायौ। जामारै मैं तुमें बिनती करतूं कै, तुम भोजन खाय लेओ। जाते तुमारौ बचाब है जाबैगौ और तुमारे सिर कौ बारऊ नांय गिरैगौ।” पौलुस ने जि कैहकै रोटी लयी और सबन के सामने परमेस्‍वर कौ धन्यबाद करकें तोर तोरकै खायबे लगौ। तब सबन की जान में जान आयी और उन्‍नेंऊ खानों खायौ। जहाज में कुल मिलायकै हम दो सौ छियत्‍तर जने हते। जब सब खायकै झिक गये तौ बे नाज कूं जहाज में ते फेंक फैंककै जहाज कूं हल्कौ करबे लगे। दिन निकरबे पै एक अनजाने देस कूं देखौ पर एक घाटी देखी बू एक समुनदर के किनारे जैसी लग रयी हती। बे बाय देखकें सलाह करबे लगे के है सकै तौ जहाज कूं य्हांपै रोकें। जामारै उन्‍नें जहाज के लंगर काटकै समुन्दर मेई छोड़कै पतबार ते बंधी भयी रस्सी काट दयी और जहाज पै अगलौ पार चढ़ायकै किनारे के माऊं बढ़बे लगे। पर बिनके जहाज कौ अगलौ हिस्सा बारू में फसबे की बजैह ते आगे नांय बढ़ सकौ समुन्दर की तेज लहरन ते जहाज कौ पिछलौ हिस्सा टूटबे लगो। कैदी काऊ तरैह ते बचकै भाज ना जाबे, जामारै सैनिकनन्‍नें कैदीन कूं मारबे कौ बिचार करौ। पर सूबेदार नें पौलुस कूं बचाबे के बिचार ते बिनें रोकौ और आदेस दियौ कै, “तुम में ते जो कोई तैर सकै बू पैहले कूंदकै किनारे पै लग जामें, और वाकी सब लोग जहाज के तख्तन और दूसरी चीजन के सहारे ते किनारे पै चले जाय।” जा तरैह सब लोग किनारे पै पौहच गये। जाके बाद बे सब सही सलामत बच निकरबे के बाद पतौ चलो कै बू माल्टा नाम कौ टापू। मांके रैहबे बारेन्‍नें हमारे संग भौत अच्‍छौ बरताब करौ। बारिस हैबे लगी और ठन्‍ड पर रयी हती जामारै बिन्‍नें आग बरायकै हम सबन कौ स्‍वागत करौ। पौलुस लकड़ियन कौ गठ‍्ठर बटोरकें आग पै रख रयौ हतो, तबई आग की तपन की बजैह ते जहरीलौ सांप ने निकरकें वाके हात में डस के हात में लटक गयौ। तब सांप कूं वाके हात में लटकौ देखके, बे लोग आपस में कैहबे लगे कै, “जि आदमी जरूर हत्‍यारौए, जि समुन्दर मेते बच गयौ तौऊ न्याय कौ देबता जाय जीबन नांय दै रयौ।” पर पौलुस ने सांप कूं आग मेंई झटक दयौ और बाय कोई नुकसान नांय भयौ। पर बे लोग सोचबे लगे कै, बू सूज जाबैगौ या जि गिरकें मर जाबेगौ। बाय कछू नांय भयौ तौ लोग अपनों मन बदलकै कैहबे लगे कै, “जि जरूर कोई देबताऐं।” जब देर है गयी और बा जगैह के जौरेई बा टापू के पिरधान पुबलियुस के खेत हते। बानें हमे अपने घर लै जायकें तीन दिना तक हमारौ आदर सतकार करौ। बाई समै पुबलियुस कौ बाप खाट में परौ हतो, बाय बुखार और दस्त है रये हते। पौलुस बाते मिलबे गयौ और वाके ऊपर हात रखकै पिराथना करी और बू सही है गयौ। जा घटना कूं देखकै बा टापू के सबरे बीमार वाके जौरे आये और बिनके काजै पौलुस नें पिराथना कि और बे सबरे ठीक हैगये। और बिन लोगन नें वाकौ भौत ते उपहारन ते सम्मान करौ और जब हम मांते नाव पै आगे कूं चले तौ उन्‍नें हमारी जरूरत की चीज हमे लायकें दयीं। हम तीन महीना बाद सिकन्दरिया के मिथुन नामक एक जहाज पै चल निकरे जौ बा टापू पै जाड़े भर रयौ हतो, जहाज के अगले हिस्सा में जुड़बा देबता भईयन कौ निसान हतो। फिर हम सरकुस नगर के बन्दरगाह पै पौंहचे और मापै तीन दिना रुके। मांते हम जहाज ते रेगियुम नगर पौंहचे और अगले दिना दछिन की हबा चलबे लगी। जामारै हम अगले दिना पुतियूली नगर आय गये। मांपै हमे कछू भरोसौ करबे बारे भईया मिले। जिन्‍ने हमे मापै सात दिना रुकबे की पूंछी, जाके बाद हम रोम की ओर चल पड़े। मांके भरोसौ करबे बारे भईयन ने सुनी, तौ बे अप्पियुस के बाजार में “तीन सराय” नाम की जगैह तक हमते मिलबे आये। पौलुस ने जब उनकूं देखौ तौ बानें परमेस्‍वर कौ धन्यबाद करौ और वाकी हिम्मत बंध गयी। जब हम रोम पौहचे तौ पौलुस कूं जि अनुमती मिल गयी कै, बू एक पैहरेदार की देख रेख में जहां चांहे मापै रैह सकते। तीन दिना बाद पौलुस ने मुख्‍य यहुदी नेतन कूं बुलायौ और उनके इकठ्‌ठे है जायबे पै उनते कही, “हे मेरे भईयाओ, मैने देस के और अपने पुरखन की रीति के बिरोध में कोई पाप नांय करौ, तौऊं मोय इनके बिरोध में बन्दी बनांयौ और येरूसलेम में पकरकै रोमीन के हात में दै दयो। उन्‍नें जा बात की जाँच करी मोय छोड़बो चांहौ, चौंकि मैने मौत की सजा पायबे जैसौ कोई पाप नांय करौ। पर जब यहुदिन ने बिरोध करौ तौ मोय मजबूर हैकें सम्राठ कैसर की दुहाई दैनी परी। सच में मोय अपनेई लोगन पै कोई दोस नांय लगानों चाहतो। जाई बजैह ते मैं तुमते मिलकै बात करबौ चांहतो, चौंकि इसरायल की मसीहा का आसा के काजै मैं सांकरन में बंधौऊ।” यहुदिन नेतान ने पौलुस ते कही, “हमे तौ तेरे बारे में यहुदीया ते कोई चिठ्‌ठी नांय मिली और ना मांते कोई बिसबासी भईया आयौए और न मांते कोई समाचार मिलौ और न बिन्‍नें तेरे बारे में कोई बुरी बात कही है। पर जि बता कै, तेरौ बिचार काए? चौंकि हम जानतै कै सब जगैह सब लोग जा मसीह पन्थ बुराई करें।” तब यहुदिन ने वाके काजै एक दिन ठहरायौ, ज्हांपै बू रुको हतो म्हांपै भौत ते लोग इकठ्‌ठे हे गये। बानें मूसा की व्‍यबस्था और परमेस्‍वर की ओर ते बात बतायबे बारेन की किताबन मेंते समझायबे की कोसिस करबे लगौ, बानें परमेस्‍वर के राज की और अपनी गबाही दयी ईसू मसीह के बारे में समझायौ सबेरे ते सन्झा तक जाईमें लगो रहो। बानें जो कछू कही हती, बाते कछू लोग तौ सहमत हते और कछुन ने भरोसौ नांय करौ। जब बे एक दूसरे के बिचारन ते सहमत नांय भये, तौ बे मांते जायबे लगे। तब पौलुस ने कही, “तुमारे पुरखन बारे में पबित्र आतमा ने परमेस्‍वर की बात बतायबे बारे यसायाह के द्वारा सही कही है, “ ‘जाके इन लोगन ते कह दे, “तुम सुनौगे तौ सही पर समझौगे नांय, तुम देखौगे पर तुमें दिखाई नांय दैबेगौ।” चौंकि इन लोगन के मन मौंटे और कान बैहरे हे गये है, और इन्‍ने अपनी आंख बन्द कर लयीऐं कै, कऊं ऐसौ नांय होय कै, जि अपनी आँखन ते देखें और कानन ते सुनें, और मन ते समझे अगर जे मेरी ओर लौट आबे, तौ मैं इनकूं सुद्ध करुंगो।’ “जामारै तुमें जान लेनी चहिऐं कै, परमेस्‍वर कौ जि उद्धार गैर यहुदी लोगन के जौरे भेज दयौ है। बे जाय सुनिंगे।” जब बानें जि बात कही, तौ बे लोग आपस में बिरोध करबे लगे। और मांते चले गये। पौलुस किराये के मकान में पूरे दो साल तक मंई रहौ। जो कोई बाते मिलबे आबतौ, बू वाकौ स्‍वागत करतो। बू परमेस्‍वर के राज कौ सुभ समाचार पिरचार करतो और पिरभू ईसू मसीह के बारे में सिखाबतौ बू जा काम कूं बेरोक टोक और बिना डरे करतौ हतौ। मैं,पौलुस जि चिठ्‌ठी, रोम की कलिसिया काजै लिख रयौऊं। मैं ईसू मसीह कौ सेबक, परमेस्‍वर के द्वारा भेजौ भयौ चेला चुनों गयौऊं, और सुभ समाचार पिरचार काजै बुलायौ गयौऊं। जा सुभ समाचार के बारे में परमेस्‍वर की ओर ते बात बताबे बारेन नें पबित्र सास्त्र में पैहलेई घोसना कर दयी हती। जि सुभ समाचार परमेस्‍वर के बेटा हमारे पिरभू ईसू मसीह के बारे में है। बू आदमी के रूप में दाऊद के वंस में पैदा भयौ और पबित्र आतमा के द्वारा मरे भयेन में ते जिलाये जाबे की बजह ते सामर्थ के संग अपने कूं परमेस्‍वर कौ बेटा साबित करौ है। जेई ईसू मसीह हमारौ पिरभू है। जाई के द्वारा हमें किरपा और भेजे भये चेला बनवे कौ अधिकार मिलौ है, जाते मैं ईसू मसीह के नाम में सब गैर यहुदियन में पिरचार करूं और बे सब लोग भरोसौ करके वाकी मानें। बिनमें तुम लोगऊ हतो जो परमेस्‍वर के द्वारा ईसू मसीह के हैबे काजै बुलाए गयेऔ। इन सब में तुम लोगऊ परमेस्‍वर के प्यारे और परमेस्‍वर के पबित्र लोग हैबे काजै बुलाए गये हैं। हमारे पिता परमेस्‍वर और पिरभू ईसू मसीह की ओर ते तुमें किरपा और सान्‍ती मिलती रैहबै। तुम लोगन के भरोसे की चरचा सबरी दुनियां में है रयी है। जामारै सबनते पैहले मैं तुम सबन के काजै ईसू मसीह द्वारा अपने परमेस्‍वर कूं धन्यबाद देतूं। परमेस्‍वर, जाकी सेबा में अपनी आतमा ते, वाके बेटा ईसू के सुभ समाचार के बारे में करतूं, बेई मेरौ गबाह है कै, मैं अपनी पिराथनान में तुम लोगन कूं लगातार याद करतौ रैहतूं। मैं अपनी पिराथनान में सदाई बिनती करतूं कै, परमेस्‍वर की इच्‍छा ते तुमारे जौरे आबे की मेरी यात्रा काऊ ना काऊ तरैह ते पूरी होबे। चौंकि मोय आप ते मिलबे की बड़ी इच्छा है, मैं आप कूं बिस्‍बास में सुदृढ़ बनाबे के काजै तुमकूं अऊं एक आतमिक वरदान दैबो चाहतूं, मतलब कै, मैं चाहतूं कै तुम लोगन के य्हांपै रैहके तुमारे भरोसे ते उत्साहित होऊं और तुम मेरे भरोसे ते। हे भईया बहनों, मैं तुम लोगन कूं बताबौ चाहतूं कै मैंनें बार बार तुमारे य्हां आबे की योजना बनाई, पर अब तक जामें कोई ना कोई बाधा आती रयी। मेरे आबे की बजैह जि हती कै जा तरैह ते मोय दूसरे गैर यहुदिन में मेरी सेबकाई कौ फल मिल रयौ है, बैसौई तुमारे बीच मेंऊ मिले। मैं यूनानिन और गैर यूनानिन, बुद्धिमानन और बुद्धहीन सबन कूं सुभ समाचार सुनाबे काजै खुद कूं जिम्मेदार समझतूं। जामारै मैं तुम रोम बासीन कूंअऊं सुभ समाचार सुनाबे काजै बेसबरी ते इन्‍तजार कर रयौऊं। चौंकि मैं सुभ समाचार ते लज्जित नांय होत जि हर एक भरोसौ करबे बारे के काजै पहले यहुदी और फिर गैर यहुदिन के काजै उद्धार के काजै परमेस्‍वर की सामर्थ है। चौंकि सुभ समाचार परमेस्‍वर की धारमिकता कूं बनातै। जि धारमिकता सुरुआत ते आखरी तक भरोसे पै टिकी भयी है। जैसौ कै पबित्र सास्त्र में लिखौ भयौ है कै, “भरोसे ते धरमी जन जीबित रैहबेगौ।” परमेस्‍वर कौ कोप सुरग ते बिन लोगन के सब तरैह के पाप और अधर्म पै पिरकट होतै, जो बुराई के द्वारा सच्‍चाई कूं दबाये रखतै। परमेस्‍वर के बारे में जो कछू जानों जा सकतै, बू बिनके बीच में साफ-साफ दिखतै, चौंकि परमेस्‍वर नें खुद उनें जि बातें दिखाई हैं। चौंकि जा संसार की सुरूआत तेई वाके अनदेखे गुन साफ-साफ दिखाई देतैं। वाकी सदा काल की सक्‍ती और वाकौ परमेस्‍वरीय स्‍वभाव प्रकृति में वाके कामन के द्वारा देखौ जा सकतै। जामारै लोग काऊ तरैह कौ बहानों नांय बना सकत। चौंकि बे लोग परमेस्‍वर कूं जानतै, पर बे बाय परमेस्‍वर के रूप में आदर और धन्यबाद नांय देत। जाके बदले बे बेकार की बातन नें सोचबे में लग गये और बिनकौ मूर्खतापूर्न मन अंधेरे ते भर गयौ। बे खुद कूं बुद्धिमान समझतैं, पर बे मूर्ख हैं। बिन्‍नें अबिनासी परमेस्‍वर की महिमा कूं नांसबान लोगन, चिरईयन, पसुअन, और रेंगबे बारे जन्‍तुअन की मूरत की समानता में बदर डारौ है। जामारै परमेस्‍वर ने बिन्‍नें मन की बुरी इच्‍छान के हातन में सौंप दयौ है। ताकि बे एक दूसरेन के संग कुकर्म करके सरीरन कौ अनादर करबे लगें। उन्होंने परमेस्‍वर के सच की जगैह पै झूंठ कूं अपनांयौ और सृस्टी की चीजन की उपासना और अराधना करी पर बा सृस्टिकर्ता की नांय, जो युगानुयुग तक धन्य है। जामारै परमेस्‍वर नें बिनें नीच बासनाओं के हातन में सौंप दयौ है। य्हां तक कै बिनकी औरतें बिनते सम्बन्ध ना बनांयकै, औरतन के संग सम्बन्ध बनाबे लग गयीं। बैसेई आदमी औरत के संग सम्बन्ध बनाबौ छोड़कै एक दूसरे के संग सम्बन्ध बनाबे की कामना करबे लग गये। आदमी नें आदमी के संग व्‍यभिचार करौ और जा तरैह ते बे अपने भ्रस्‍ट हैबे कौ ठीक फल भोग रये हैं। चौंकि बिन्‍नें अपने जीबन में परमेस्‍वर कूं पहचानबे की कीमत नांय जानीं, जामारै परमेस्‍वर नेंऊ बिनें गलत काम करबे काजै, बिनके भ्रस्‍ट मन के हबाले कर दयौ। बे हर तरैह के अधर्म, दुस्टता, लोभ और बुराई ते भर गये। बे ईरसा, हत्‍या, बैर, छल-कपट और जलन ते परिपूर्न हैं। बे चुगलखोर, निन्दा करबे बारे, परमेस्‍वर के बैरी, हिसंक, घमन्डी और डींग मारने बारे लोग हैं। बे बुराई करबे में चतुर हैं, अपने माता-पिता की आग्‍या नांय मानते और बिबेकहीन तथा बिसबास घाती हैं। उनमें पिरेम और दया का अभाव है। बे जानतै कै, परमेस्‍वर न्याय करबे बारौ है, और ऐसे कामन की सजा मौत है, फिरऊ ना केवल खुद ऐसे कामन कूं करतै पर ऐसौ करबे बारेन कौ समर्थनऊ करतै। जामारै दूसरेन पै दोस लगाबे बारे, तुम चाहे जोऊं हों, तुमारे जौरे कोई बहानों नांय। तुम दूसरेन पै दोस लगाबे की बजैह ते खुद कूं दोसी ठैरातौ, चौंकि जा काम के काजै तुम बिनपै दोस लगातौ तुम खुदई बिन कामन कूं करतौ। हम जानतै कै ऐसे काम करबे बारेन पै परमेस्‍वर की ओर ते मिलबे बारौ दन्‍ड सच के अनुसार है। हे लोगों! तुम ऐसे कामन काजै दूसरेन पै दोस लगातौ और खुदई बिन कामन कूं करतौ, तौ का तुम जि समझतौ कै तुम परमेस्‍वर के दन्‍ड ते बच जाऔगे? का तुम परमेस्‍वर की असीम किरपा, सहनसक्‍ती और धीरज कूं तुच्‍छ समझतै? का तू जि नांय जान्‍त कै परमेस्‍वर की दया तोय पापन ते मन फिराबे की ओर लै जातै? पर तुम अपने जा हठ और कबऊ पछताबौ ना करबे बारे मन की बजैह ते, वाके क्रोध कूं अपने काजै बा दिना काजै इकठ्‌ठौ कर रयौ है, जब परमेस्‍वर कौ सच्‍चौ न्याय पिरकट होबैगौ। परमेस्‍वर हर एक कूं वाके कामन के अनुसार फल दैबेगौ। जो लोग भलाई के काम करते भये महिमा, आदर और अमरता की खोज में रैहतै, परमेस्‍वर बिनें कबऊ नांय खतम हैबे बारौ जीबन दैबेगौ। पर जो लोग स्‍बार्थी हैं और सच्‍चाई कूं ना मानकै अधर्म के पीछै चलतै, बे परमेस्‍वर के क्रोध और प्रकोप के पात्र होंगे। हर बा आदमी पै दुख और संकट आबेंगे जो बुराई पै चलतै। पैहले यहुदिन पै और फिर गैर यहुदिन पै। भलाई करबे बारे हर एक कूं महिमा, आदर, और सान्‍ती मिलैगी। पैहले यहुदिन कूं और फिर गैर यहुदिन कूं। चौंकि परमेस्‍वर काऊ के संग धुमांत नांय करत। जो मूसा की व्‍यबस्था कूं नांय जानते अगर बिन्‍नें पाप करौ होगौ, तौ बे बिना व्‍यबस्था के नांस है जाबेंगे और जिन्‍ने व्‍यबस्था कूं जानते भये पाप करौ होगौ, बिनकौ न्याय व्‍यबस्था के अनुसारई करौ जाबेगौ। चौंकि व्‍यबस्था सुनबे बारे परमेस्‍वर की नजर में धरमी नांय हत। पर व्‍यबस्था कौ पालन करबे बारे धरमी माने जाबेंगे। जब गैर यहुदी, जिनें व्‍यबस्था नांय मिली, तबऊ बे खुद अपने सुभाव ते वाकी आग्‍यान कूं मानते हते, तौ चाहे बिनके जौरे व्‍यबस्था नांय तौऊं अपने काजै बे खुदई व्‍यबस्था हैं। चौंकि बे अपने कामन ते जाकौ सबूत देतै कै, व्‍यबस्था की आग्‍याए बिनके हिरदय पै लिखी भयी हैं। बिनकौ बिबेक अऊ जाई की गबाही देतै, बिनके दूसरे बिचार बिनें कबऊ दोसी और कबऊ निरदोस ठैरातैं। जि सब बातें बा दिना होंगी, जब परमेस्‍वर, मेरे द्वारा पिरचार करे गये सुभ समाचार के आधार पै लोगन की छुपी भई बातन कौ न्याय ईसू मसीह के द्वारा करैगौ। तू अपने आप कूं यहुदी कैहतै, और व्‍यबस्था पै भरोसौ रखतै और अपने परमेस्‍वर पै घमन्‍ड करतै, और वाकी इच्‍छा कूं जानतै और व्‍यबस्था ते सिखकै उत्‍तम बातन कूं अपनातै। तोय जि भरोसौ है कै तू खुद अन्धेन कूं रस्ता दिखाबे बारौ है और जो अन्धेरे में हैं बिनके काजै उजीतौ है। तू बुद्धिहीनन कूं सिखाबे बारौ और बालकन कूं सिछा दैबे बारौ है चौंकि तेरे जौरे सबरौ ग्‍यान और सबरौ सच जो व्‍यबस्था में है, तोय मिलौ है। जामारै जो तू दूसरेन कूं सिखातै, बू तू खुद को चौं नांय सिखाबत? तू पिरचार करतै कै चोरी नांय करनी चहिऐं, का तू खुद चोरी करैगौ? तू सिखातै कै, “व्‍यभिचार नांय करनों चहिऐं,” का तू खुद व्‍यभिचार करैगौ? तू जो देब मूरतीन ते घृना करतै, का तू खुद मन्दिरन कूं लूटौगे? तू जो व्‍यबस्था कौ घमन्‍ड करतै, तौ व्‍यबस्था कूं तोरकै परमेस्‍वर कौ अनादर चौं करतै? चौंकि पबित्र सास्त्र में लिखौ भयौ है कै, “तुमारी बजैह ते गैर यहुदिन के बीच में परमेस्‍वर के नाम कौ अपमान होतै।” अगर तुम व्‍यबस्था कौ पालन करतौ तौ खतना कौ फायदा है। पर अगर तुम व्‍यबस्था तोरबे बारे हो तौ खतना बारे होते भयेऊ बिना खतना बारे है जातौ। जामारै अगर कोई खतना नां कराबे बारौ व्‍यबस्था के नियमन कौ पालन करतै, तौ का वाकी बिना खतना की दसा, खतने के बराबर नांय गिनी जाबेगी? जो आदमी सरीर कौ खतना कराये बिना व्‍यबस्था कौ पालन करतै, बू तुमें दोसी ठहराबेगौ, चौंकि तुमें लिखी भयी व्‍यबस्था मिली है और तुमनें खतनऊ करायौ, पर तुम व्‍यबस्था कौ पालन नांय करत। जो लोग यहुदी हैबे कौ दिखाबौ करतै बेई असली यहुदी नांय। असली खतना बू नांय जो केवल सरीर में दिखाबे काजै होतै। जो अन्दर ते यहुदी है, बू सच्‍चौ यहुदी है। सच्‍चौ खतना आतमा के द्वारा मन कौ खतना है नां कै लिखी व्‍यबस्था कौ। ऐसे आदमी की बड़ाई लोग नांय पर परमेस्‍वर की ओर ते करी जातै। यहुदी हैबे ते का लाभ या खतना कराबे ते का फायदा है? हर तरैह ते भौत कछू, चौंकि सबनते पैहले परमेस्‍वर कौ वचन यहुदिन कूं सौंपौ गयौ हतो। अगर यहुदिन में ते कछू भरोसे योग्‍य नांय निकरे, तौ का भयौ? का बिनके भरोसे योग्‍य नांय निकरबे ते परमेस्‍वर भरोसे योग्‍य नांय रैहबेगौ? बिलकुल नांय। भलेई हरेक लोग झूंठे निकर जाबें, पर परमेस्‍वर सच्‍चौ ठहरैगौ। जैसौ कै पबित्र सास्त्र में लिखौ भयौ है कै, “तू अपनी कही भयी बातन में धरमी ठहरायौ जा सकै, और जब तेरौ न्याय होबे तब जीत पा सकै।” जामारै अगर हमारौ अधर्म परमेस्‍वर की धारमिकता कूं दिखातै, तौ मैं जि आदमी के स्‍वभाब के अनुसार कैह रयौऊं, का परमेस्‍वर अन्याय नांय करत, जब बू हमें दन्‍ड देतै? बिलकुल नांय। अगर परमेस्‍वर अन्यायी होतौ तौ बू संसार कौ न्याय कैसे कर सकतौ? पर कछू लोग कह सकतै कै, “मेरे झूंठ की बजैह परमेस्‍वर की सच्‍चाई और जादा उजागर होतै, तौ जाते वाकी महिमाई होतै, फिरऊ मोय दोसी चौं ठहरायौ जातै?” फिर चौं नांय कहें, “तौ आओ, हम बुराई करैं, जाते भलाई उत्‍पन्‍न होबे”? जैसौ कै कछू लोग हमारे बारे में ऐसौ कैहकै हमें बदनाम करतै कै, हम ऐसौ कैहतैं। ऐसे लोगन कूं दोसी ठहरायौ जाबौ ठीक है। तौ फिर हम का कहें? का हम यहुदी, गैर यहुदिन ते काऊ तरैह ते अच्‍छे है, नांय बिलकुल नांय। चौंकि हम पैहलेई यहुदी और गैर यहुदिन के बारे में जि कैह चुके हैं कै, बे सबके सब पाप के वस में हैं। जैसौ के पबित्र सास्त्र में लिखौ भयौ है, “कोई धरमी नांय, एकऊ नांय। कोई समझदार नांय, एकऊ नांय। कोई ऐसौ नांय, जो परमेस्‍वर कूं खोजतौ होबे। सब भटक गये हैं, बे सबई निकम्मे बन गये, कोई भलाई नांय करत, एकऊ नांय। उनकौ गलौ खुली भयी कबर के जैसे है, बे अपनी जीब ते झूंठ बोलतैं। बिनके होटन के नीचे सांप कौ जहर है। बिनकौ मौंह साप और कड़बाहट ते भरौ भयौ है। हत्‍या करबे काजै बे हर दम उतावले रैहतैं। बे ज्हांऊं जातै मांपै नांस और कलेस लातैं। बे सान्‍ती कौ रस्ता नांय जान्‍त। बिनकी आँखन में परमेस्‍वर कौ भय नांय।” अब हम जि जानतैं कै, व्‍यबस्था जो कछू कैहतै, बू बिनई लोगन ते कैहतै, जो व्‍यबस्था कूं मानतैं। ताकि हर एक कौ मौंह बन्द करौ जा सकै और परमेस्‍वर के सामने सबरी दुनियां दन्‍ड के लायक मानी जाबै। जामारै व्‍यबस्था के कामन के द्वारा कोई आदमी परमेस्‍वर के सामने धरमी नांय मानों जाबेगौ। पर व्‍यबस्था केई द्वारा पाप की पैहचान होतै। पर अब बास्तव में लोगन के काजै जि बतायौ गयौ है कै, परमेस्‍वर व्‍यबस्था के बिनाई बाय अपने काजै धारमिकता कैसे बनातै। जाकी गबाही व्‍यबस्था और परमेस्‍वर की ओर ते बोलबे बारे देतैं। परमेस्‍वर ते मिलबे बारी धारमिकता ईसू मसीह पै भरोसौ करबे ते मिलतै, सब भरोसौ करबे बारेन काजै है, चाहे बे कोई चौं ना होबैं। चौंकि सबन नें पाप करौ है और सब परमेस्‍वर की महिमा ते दूर हैं। पर परमेस्‍वर की किरपा ते सब कूं सेंत मेंत में पापन की छमा मिली है, चौंकि ईसू मसीह नें सबन कौ उद्धार करौ है। परमेस्‍वर ने ईसू मसीह कूं, बामें भरोसे के द्वारा पापन ते छुटकारौ दिलाबे काजै लोगन कूं दयौ। बानें जि काम ईसू मसीह के बलिदान के रूप में करौ। ऐसौ जि साबित करबे काजै करौ गयोओ कै परमेस्‍वर सहनसील है चौंकि बानें पैहले के लोगन कूं बिनके पापन कौ दन्‍ड दये बिना छोड़ दयौ हतो। आजऊ अपनों न्याय दिखाबे काजै बू न्यायपूर्न है और बिन सबन कौ न्याय करबे बारौऊ है, जो ईसू में भरोसौ करतै। जामारै काऊऐ अपने पै घमन्‍ड करबे कौ अधिकार नांय रहौ। किस व्‍यबस्था की बजैह ते जि अधिकार जातौ रहौ? जि करम कान्‍ड की व्‍यबस्था की बजैह ते नांय, पर भरोसे की व्‍यबस्था की बजैह ते भयौ है। जाते हम जान सकतै कै लोग व्‍यबस्था के करम कान्‍ड के द्वारा नांय पर भरोसे के द्वारा धरमी ठहरतै। का परमेस्‍वर केवल यहुदिन कौ परमेस्‍वर है? का बू गैर यहुदिन कौ परमेस्‍वर नांय? हाँ, पक्‍कौ बू गैर यहुदिन कौऊ परमेस्‍वर है। चौंकि केवल एकई परमेस्‍वर है जो खतना बारेन कूं भरोसे ते और बिना खतना बारेन कूंअंऊ बाई भरोसे ते धरमी ठहराबेगौ। तौ का, हम भरोसे के आधार पै व्‍यबस्था कूं बेकार ठहरा रये हैं? बिलकुल नांय। पर हम तौ व्‍यबस्था कूं और जादा सक्‍तीसाली बना रये हैं। तौ अब हम का कहें कै हमारे सारीरिक पुरखा अब्राहम कूं का मिलौ? चौंकि अगर अब्राहम कूं वाके कामन की बजैह ते धरमी ठहरायौ जातै तौ वाके घमन्‍ड करबे की बात हती। पर परमेस्‍वर के सामने बू हकीकत में घमन्‍ड नांय कर सकत। पबित्र सास्त्र का कैहते? “अब्राहम नें परमेस्‍वर पै भरोसा करौ और बू भरोसा वाके काजै धारमिकता गिनौ गयौ।” काम करबे बारे कूं मजदूरी देना कोई दान नांय है, बू तौ वाकौ हक है। पर अगर कोई आदमी काम करबे की बजाय बा परमेस्‍वर पै भरोसा करतै, जो पापी कूंअऊं धरमी ठहरातै, तौ वाकौ भरोसा ही वाकी धारमिकता कौ कारन बन जातै। ऐसेई दाऊद भी बाय धन्य मानतै जाय कामन के आधार के बिना ही परमेस्‍वर धरमी मानतै। दाऊद जब कहतै, “धन्य हैं बे जिनके अधर्म मांफ करे गये और जिनके पापों कूं ढक दयौ गयौ! धन्य है बू पुरुस जाके पापन कूं पिरभू ने गिनों नांय हैं!” तब का जि धन्यपन केवल बिनई के काजै है जिनकौ खतना भयौ है, या बिनके काजैऊ है जिनकौ खतना नांय भयौ। हाँ, जि बिन पैऊ लागू होतै जिनकौ खतना नांय भयौ चौंकि हमनें कही है अब्राहम कौ भरोसौई वाके काजै धारमिकता गिनौ गयौ। तौ जि कब गिनौ गयौ? जब वाकौ खतना है चुकौ हतो या जब बू बिना खतने के हतो। खतना हैबे के बाद नांय पर खतना हैबे ते पहले। और फिर एक निसान के रूप में बानें खतना करबायौ। जो बा भरोसा के परिनाम स्‍वरूप धारमिकता की एक छाप हती, जि तब भयौ, जब वाकौ खतना नांय भयौ हतो। ताकि अब्राहम बिन सबकौ पिता बने, जिन्ने बिना खतने के भरोसौ करौ हतो। ताकि बेऊ धरमी गिने जाबें। बू बिनकौऊ पिता है जिनकौ खतना भयौ है, जो हमारे पुरखा अब्राहम के बा भरोसे के रस्ता पै चलतै, जापै बू खतना हैबे ते पैहले चलौ हतो। परमेस्‍वर नें अब्राहम और वाके वंस ते जि बादा करौ हतो कै बे संसार के बारिस होंगे। जि बादा व्‍यबस्था ते नांय मिली पर बा धारमिकता ते मिली हती जो भरोसे के द्वारा पैदा होतै। अगर व्‍यबस्था कूं मानबे बारौ बारिस बन जातै तौ भरोसे कौ कोई अर्थ नांय रैहत और बादा बेकार ठहरतै। लोगन द्वारा व्‍यबस्था कौ पालन नांय करबे की बजैह ते परमेस्‍वर कौ क्रोध आते पर जहाँ व्‍यबस्थाई नांय वहाँ व्‍यबस्था कौ तोड़बोई का? जामारै परमेस्‍वर कौ बादा भरोसे कौ फल है और ताकि बादा किरपा के आधार पै होय और वाकौ बादा अब्राहम के सबरे वंस के काजै पक्‍कौ होय, न केवल बिनकेई काजै जो व्‍यबस्था कूं मानतै पर बिन सबके काजैऊ जो अब्राहम के समान भरोसौ रखतै। बू हम सबकौ पिता है। जैसौ के पबित्र सास्त्र में लिखौ भयौ है, “मैंनें तोय भौत देसन के लोगन कौ पिता बनांयौ।” परमेस्‍वर की नजर में अब्राहम हमारौ पिता है, जा परमेस्‍वर पै बानें भरोसौ करौ है। परमेस्‍वर जो मरे भयेन कूं जीबन देतै और जो बातें हैई नांय, बिनें पुकारकै मौजूदगी में लातै। कोई आसा ना हैबे पैऊ अब्राहम नें मन में आसा रखकै भरोसौ करौ। जामारै बू भौत देसन के लोगन कौ पिता बनों, जैसा कै पबित्र सास्त्र में लिखौ भयौ है, “तेरे अनगिनत वंसज होंगे।” जि जानते भयेऊ कै वाकी देह सौ साल की बूढ़ी मरियल सी है चुकी है और सारा बांझ है फिरऊ वाकौ भरोसौ कमजोर नांय भयौ। और ना अबिसबासी हैके परमेस्‍वर की प्रतिग्‍या पै सन्देह नांय करौ पर भरोसे में मजबूत हैके परमेस्‍वर कूं महिमा करी। अब्राहम कूं पूरौ भरोसा हतो कै, परमेस्‍वर ने बाते जो बादा करौ है, बाय पूरौ करबे में बू पूरी तरैह समर्थ है। जामारै, “जि भरोसौ वाके काजै धारमिकता गिनौ गयौ।” पबित्र सास्त्र कौ जि वचन है कै, “भरोसा वाके काजै धारमिकता गिनौ गयौ,” न केवल अब्राहम काजै है, पर हमारे काजैऊ है। परमेस्‍वर हमअऊंऐं जो बामें भरोसे रखतै, धरमी ठहराबेगौ। बानें हमारे पिरभू ईसू कूं मरे भयेन में ते जीबित करौ। ईसू हमारे पापन के काजै मारे जाबे कूं पकरबायौ गयौ और हमें धरमी बनाबे के काजै मरे भयेन में ते जीबित करौ गयौ। चौंकि हम अपने भरोसे की बजैह ते परमेस्‍वर के काजै धरमी है गये है, तौ अपने पिरभू ईसू मसीह के द्वारा हमारौ परमेस्‍वर ते मेल है गयौ है। बाई के द्वारा भरोसा की बजैह ते वाकी जा किरपा में हम सब बने है, बा तक हमारी पौहच है गयी है। और हम सब जा बात पै घमन्‍ड करतै कै हमें परमेस्‍वर की महिमा के भागी बनबे की आसा है। इतनोंई नांय, हम तौ अपनी बिपत्‍तियन मेंऊ आनन्द लेतैं। चौंकि हम जानतै कै बिपत्‍ति धीरज कूं जन्म देतै। धीरज ते परखौ भयौ चरित्र निकलतै। परखौ भयौ चरित्र आसा कूं जन्म देतै। जि आसा हमें निरास नांय होन देत चौंकि पबित्र आतमा के द्वारा, जो हमें दयौ गयौ है, परमेस्‍वर कौ पिरेम हमारे हिरदयन में उँडेल दयौ गयौ है। चौंकि जब हम अबऊ कमजोरई हते तौ ठीक समै पै हम अधर्मीयौ के काजै मसीह ने अपनों बलिदान दयौ। धारमिक मनुस्‍य के काजै सायदई कोई अपने पिरान दैबे। फिरऊ है सकतै कै भले मनुस्‍य के काजै कोई मरने कूं तैयार है जाबे, पर हम तौ पापी अई हते, तब मसीह कूं हमारे पापन काजै मरबे भेजौ। वाके द्वारा परमेस्‍वर ने हमारे काजै अपने पिरेम कूं दिखायौ। चौंकि अब जब हम वाके लहू के बजैह ते धरमी है गये है तौ अब वाके द्वारा परमेस्‍वर के क्रोध ते जरूरई बचाये जाबेंगे। चौंकि जब हम बैरी हते, बानें अपनी मौत के द्वारा परमेस्‍वर ते हमारौ मेल-मिलाप करायौ तौ अब जब हमारौ मेल-मिलाप है चुकौ है, तौ वाके जीबन के द्वारा पक्‍कौई हमारौ उद्धार होगौ। इतनोंई नांय पर हम अपने पिरभू ईसू मसीह के द्वारा परमेस्‍वर ते मेल-मिलाप करके खुसी मनातै। जामारै एक आदम के द्वारा जैसे संसार में पाप आयौ और पाप ते मौत और जा तरैह मौत सब लोगन के काजै आयी चौंकि सब पापी हैं। अब देखौ, व्‍यबस्था के आबे ते पहले संसार में पाप हतो, पर जब तक कोई व्‍यबस्था नांय म्हांपै पाप कौ लेखा नांय रखौ जातौ। पर आदम ते लेकर मूसा के समै तक मौत सब पै राज करती रयी। मौत बिन पर भी बैसे ही हावी रही जिन्‍नें पाप नांय करौ हतो जैसे आदम पै। आदमऊ बैसौई हतो जैसा आबे बारौ मसीह। पर परमेस्‍वर कौ वरदान आदम के पाप के जैसा नांय हतो चौंकि अगर बा एक आदमी के पाप के बजैह ते सब लोगन की मौत भई, तौ बा एक आदमी ईसू मसीह की करुना की बजैह ते मिले परमेस्‍वर की किरपा और वरदान तौ सब लोगन की भलाई के काजै भौत जादा है। परमेस्‍वर वरदान और एक आदम के पाप में कोई तुलना नांय। एक के पाप के फल के रूप में दन्‍ड की आग्‍या तौ दयी पर अनेक पापन के बाद जो वरदान आयौ हतो वाके द्वारा पाप मांफी की ओर ले जातै, जि सच है कै मौत कौ राज एक आदम के पाप की बजैह ते एकई के द्वारा सुरू भयौ, पर जिनें परमेस्‍वर की किरपा और पाप की छमा कौ धरम रूपी वरदान भरपूर मात्रा में मिलेगौ, बे एकई मनुस्‍य ईसू मसीह के द्वारा जीबन कौ राज प्राप्‍त करेंगे। जामारै जैसे एकई आदम के पाप की बजैह ते सब लोगन कूं दन्‍ड की आग्‍या मिली, बाई तरैह ते एकई मनुस्‍य के धरम कामन के द्वारा सबन कूं पापन ते छमा और जीबन मिलौ। जा तरैह ते बा एक आदम के आग्‍या न मानबे की बजैह सब लोग पापी बना दये गये बैसे ही बा एक मनुस्‍य की आग्‍याकारिता की बजैह ते भौत लोग धरमी बना दये जायेंगे। बाद में व्‍यबस्था आयी और जाते अपराध बढ़ गये। पर जहाँ पाप बढ़ौ, वहाँ परमेस्‍वर की किरपा औरऊ जादा बढ़ी। ताकि जैसे मौत के द्वारा पाप ने राज करौ है ठीक बैसे ही हमारे पिरभू ईसू मसीह के द्वारा कबऊ नांय खतम हैबे बारे जीबन कूं लाबे के काजै परमेस्‍वर की किरपा धारमिकता के द्वारा राज करे। तौ फिर हम का कहें? का हम पापई करते रैहबें ताकि परमेस्‍वर की किरपा बढ़ती रैहबे? बिलकुल नांय। हम सब जो पाप के काजै मर चुके हैं पाप मेंई कैसे जीन्दे रैहबेंगे? का तुम नांय जानते कै, हम सब जितनों नें ईसू मसीह में बपतिस्मा लयौ है, तौ वाकी मौत कोई बपतिस्मा लयौ है? जामारै वाकी मौत में बपतिस्मा लैबे ते हम सबऊ वाके संगई गाड़ दिये गये हते ताकि जैसे परम पिता की महिमामय सामर्थ के द्वारा ईसू मसीह कूं मरे भयेन में ते जीबित करौ गयौ हतो, बैसेई हमऊ एक नयौ जीबन पाबें। जब हम वाकी मौत में वाके संग रहे हैं तौ वाके जी उठबे मेंऊ वाके संग रहेंगे। चौंकि हम जि जानते हैं कै हमारौ पुरानौ स्‍वभाब ईसू के संगई क्रूस पै चढ़ा दयौ गयौ हतो ताकि पाप ते भरे हमारे सरीर नांस है जाबें। और हम आगे के काजै पाप के दास न बने रहें। चौंकि जो मर गया बू पाप के बन्धन ते छुटकारौ पा गयौ। हम मसीह के संग मर गये, जामारै हमारौ भरोसा है कै हम बाई के संग जीयेंगेऊ। हम जानते हैं कै मसीह जाय मरे भयेन में ते जीबित करौ हतो अमर है। बापै मौत कौ जोर कबऊ नांय चलेगौ। बू पाप के काजै एकई बार मरौ है, पर जो जीबन बू जी रयौ है, बू जीबन परमेस्‍वर के काजै है। जाई तरैह ते तुम अपने काजैऊ सोचौ कै, तुम पाप के काजै मर चुकेऔ, पर ईसू मसीह में परमेस्‍वर के काजै जीन्दे हौ। जामारै तुमारे नांसबान सरीरन के ऊपर पाप कौ जोर ना चले। ताकि तुम पाप की इच्‍छान पै कबऊ ना चलो। अपने सरीर के अंगन कूं अधर्म की सेबा के काजै पाप के हबाले ना करो, पर मरे भयेन में ते जी उठबे बारेन के समान परमेस्‍वर के हबाले कर दो। और अपने सरीर के अंगन कूं धारमिकता की सेबा के साधन बनबे काजै परमेस्‍वर के हबाले कर दो। तुम लोगन पै पाप कौ कोई अधिकार नांय रैहबेगौ। चौंकि अब तुम व्‍यबस्था के सहारे नांय जीन्दे पर परमेस्‍वर के किरपा के सहारे जीन्दे हो। तौ हम का करें? का हम पाप करें, चौंकि हम व्‍यबस्था के अधीन नांय, पर परमेस्‍वर की किरपा के अधीन जीन्दे हैं? कबऊ नांय। का तुम नांय जानते कै, जब तुम काऊ की आग्‍या मानबे के काजै अपने आप कूं दास के रूप में बाय सौंपते, तौ तुम बाई के दास बन जातौ? चाहे तुम पाप के दास बनो, जो तुमें मार डारेगौ और चाहे आग्‍याकारिता के, जो तुमें धारमिकता की ओर ले जाबेगी। पर परमेस्‍वर का धन्यबाद है कै, तुम लोग जो पैहले पाप के दास हते, अब अपने सबरे मन ते बिन उपदेसन की रीति पै चलबे लगे, जो तुमें सौंपे गये हते। तुमें पापन ते छुटकारौ मिल गयौ और तुम धारमिकता के दास बन गए हो। मैं एक उदाहरन दे रयौऊं, जाय सब लोग समझ सकें चौंकि बाय समझबौ तुम लोगन के काजै कठिन है। चौंकि तुमने अपने सरीर के अंगन कूं कुकरम के काजै असुद्धता और कुकर्म के दास के रूप में सौंप दयौ हतो, अब तुम लोग ठीक बैसे ही अपने सरीर के अंगन कूं दास के रूप में धारमिकता के हाथों सौंप दो जाते बू पबित्र है जाबें। चौंकि तुम जब पाप के दास हते तौ धारमिकता की ओर ते तुम पर कोई बन्धन नांय हतो। देखौ, बा समै तुमें कैसौ फल मिला? जाके काजै आज तुम सर्मिन्दा हो, जाकौ अंतिम परिनाम मौत है। पर अब तुमें पाप ते छुटकारौ मिल चुकौ है और परमेस्‍वर के दास बना दये गये हो, तौ जो खेती तुम काट रये हो, तुमें परमेस्‍वर के प्रति सम्पूर्न समर्पन में ले जाबेगी। जाकौ अंतिम परिनाम कबऊ नांय खतम हैबे बारौ जीबन है। चौंकि पाप की मजदूरी तौ बस मौतई है जबकि हमारे पिरभू ईसू मसीह में कबऊ नांय खतम हैबे बारौ जीबन, परमेस्‍वर का सेंत मेंत कौ वरदान है। हे भईया बहनों, का तुम लोग जि नांय जानते कै, मैं व्‍यबस्था कौ पालन करबे बारेन ते कैह रयौऊं, आदमी पै व्‍यबस्था कौ अधिकार तबई तक है जब तक बू जीबित है? उदाहरन के काजै एक सादी सुदा औरत अपने पती के संग कानून के हिसाब ते तबई तक बंधी है जब तक वाकौ पती जीबित है, पर अगर वाकौ पती मर जातै, तौ बू ब्याह के सब नियमन ते आजाद है जातै। पती के जीबित रैहते अगर काऊ दूसरे आदमी ते सम्बन्ध रखतै तौ बाय व्‍यभिचारिनी कहौ जातै पर अगर वाकौ आदमी मर जातै तौ ब्याह के सब नियम ते आजाद है जातै और जामारै अगर बू दूसरे आदमी ते सादी करके वाकी है जातै तौ बू व्‍यभिचारिनी नांय। हे मेरे भईया बहनों, ऐसेई मसीह की देह के द्वारा व्‍यबस्था के काजै तुमऊ मर चुकेऔ। ताकि तुम मरे भयेन में ते जीन्दे हैके मसीह के है जाऔ और परमेस्‍वर के काजै उत्‍तम फल लाऔ। चौंकि जब हम पुराने स्‍वभाव के अनुसार जी रये हते, तौ हमारी पाप पूरन बासनाऐं जो व्‍यबस्था के द्वारा आयी हतीं, बू हमारे अंगन पै हावी हतीं और मौत कौ फल पैदा करतीं हतीं। पर अब हमें व्‍यबस्था ते छुटकारौ दे दयौ गयौ है। चौंकि जा व्‍यबस्था के अधीन हमें बंदी बनांयौ हतो, हम वाके काजै मर चुके हैं। और अब पुरानी लिखित व्‍यबस्था ते नांय, पर परमेस्‍वर की आतमा की नयी रीति के अनुसार हम अपने स्‍वामी परमेस्‍वर की सेबा करतै। तौ फिर हम का कहें? का हम कहें कै व्‍यबस्था पाप है? बिलकुल नांय। फिरऊ व्‍यबस्था के द्वाराई पाप कौ पतौ चलौ कै पाप का है। अगर व्‍यबस्था नांय बताती, “तुम लालच मत करौ” तौ पक्‍कौई मैं जि नांय जान पातौ कै लालच का है। पर पाप ने मौकौ पायकै आग्‍या के द्वारा मोमें सब तरैह कौ लालच पैदा कर दयौ, चौंकि बिना व्‍यबस्था के पाप मुरदा है। एक समै हतो जब व्‍यबस्था की आग्‍या नांई और मैं जीबित हतो, पर जब व्‍यबस्था आयी तौ पाप कौ जनम भयौ, और मैं मर गयौ। बुई व्‍यबस्था कौ आदेस जो जीबन देबे काजै हतो, मेरे काजै मौत ले आयौ। चौंकि पाप कूं मौकौ मिल गया और बानें बाई व्‍यबस्था के आदेस के द्वारा मोय धोखौ दयौ और बाई के द्वारा मोय मार डालौ। जा तरैह व्‍यबस्था पबित्र है और बू आग्‍या पबित्र, धरमी और उत्‍तम है। तौ फिर का इसका जि अर्थ है कै जो उत्‍तम है, बुई मेरी मौत का कारन बना? बिलकुल नांय। पर पाप बा उत्‍तम के द्वारा मेरे काजै मौत कौ जामारै कारन बना कै, पाप कूं पैहचानों जा सके। और व्‍यबस्था की आग्‍या के द्वारा वाकी भयानक पाप पूरौ दिखाई जा सकै। चौंकि हम जानते हैं कै व्‍यबस्था तौ आतमिक है पर मैं हाड़-माँस कौ सांसारिक मनुस्‍य हूं जो पाप की दासता के काजै बिकौ भयौ है। मैं नांय जान्त कै मैं का कर रयौऊं, चौंकि मैं जो करबौ चाहतूं नांय करत, पर मोय बू करनों पड़तै, जाते मैं घृना करतूं। अगर मैं बुई करतूं जो मैं नांय करबौ चाहत, तौ मैं स्‍वीकार करतूं कै व्‍यबस्था उत्‍तम है। पर हकीकत में बू मैं नांऊ जो जि सब कछू कर रयौ है, पर जि मेरे भीतर बसौ पाप है। हाँ, मैं जान्तूं कै, मोमें यानी मेरे भौतिक मानव सरीर में काऊ अच्‍छी चीज का बास नांय। भलौ करबे के इच्‍छा तौ मोमें है, पर नेक काम मोते नांय होत। चौंकि जो अच्‍छौ काम मैं करबौ चाहतूं, मैं नांय करत, पर जो मैं नांय करबौ चाहत, बुई बुरे काम मैं करतूं। और अगर मैं बुई काम करतूं जिनें करबौ नांय चाहत तौ हकीकत में बिनकौ करबे बारौ जो बिनें कर रयौ है मैं नांऊ, पर बू पाप है जो मोमें बसौ भयौ है। जामारै मैं अपने में जि नियम पातूं कै मैं जब अच्‍छौ करबौ चाहतूं, तौ अपने में बुराई कूंई पातूं। अपनी अन्‍तरआतमा में मैं परमेस्‍वर की व्‍यबस्था ते भौत खुस रैहतूं। पर मैं अपने सरीर में एक दूसरेई नियम कूं काम करते देखतूं जि मेरी बुद्धी की व्‍यबस्था ते युद्ध करतै और मोय पाप की व्‍यबस्था कौ बंदी बना लेतै। जि व्‍यबस्था मेरे सरीर में काम करती रैहतै। मैं एक अभागौ इंसान हूं। मोय जा मौत के सरीर ते छुटकारौ कौन दिबाबेगौ? मैं अपने पिरभू ईसू मसीह के द्वारा परमेस्‍वर का धन्यबाद करतूं। जामारै अपनी बुद्धि ते परमेस्‍वर की व्‍यबस्था कौ सेबक हूं, पर अपने हाड़-माँस के सरीर ते मैं पाप की व्‍यबस्था कौ गुलाम हूं। जा तरैह अब बिनके काजै जो ईसू मसीह में हैं, कोई दन्‍ड नांय। चौंकि बे सरीर के अनुसार नांय पर आतमा के अनुसार चलतै । चौंकि जीबन की आतमा की व्‍यबस्था ने मसीह ईसू में मोय पाप की, और मौत की व्‍यबस्था ते आजाद कर दयौ है। जाय मूसा की व्‍यबस्था मनुस्‍य के भौतिक स्‍वभाव की बजैह ते दुर्बल हैके नांय कर सकी बाय परमेस्‍वर नें अपने बेटा कूं हमारेई जैसे सरीर में भेजकै जाते हम पाप करते हैं वाकी सांसारिक देह कूं पाप बारी बनाकर पाप कूं निरस्त करके पूरौ करौ। जाते कै हम में, जोकि देह के अनुसार नांय, पर आतमा के नियम के अनुसार जीबित हैं, व्‍यबस्था की जरूरत पूरी की जा सकें। चौंकि बे जो अपने सांसारिक मानव स्‍वभाव के अनुसार जीबित हैं, बिनकी बुद्धि मानव स्‍वभाव की इच्‍छान पै टिकी रैहतै पर बे जो आतमा के अनुसार जीबित है, बिनकी बुद्धि जो आतमा चाहतै बिन अभिलासओं में लगी रहतै। सांसारिक मानव स्‍वभाब के बस में रहबे बारे मन कौ अन्‍त मौत है, पर आतमा के वस में रहबे बारी बुद्धि कौ परिनाम जीबन और सान्‍ती है। जा तरैह सांसारिक मानव स्‍वभाव ते अनुसासित मन परमेस्‍वर कौ बिरोधी है। चौंकि बू न तौ परमेस्‍वर के नियमन के अधीन है और ना है सकत। पर बे जो सरीर के इच्‍छान के अनुसार जीबित हैं, परमेस्‍वर कूं खुस नांय कर सकत। अगर सचमुच तुम में परमेस्‍वर की आतमा कौ निबास है तौ तुम लोग सरीर के इच्‍छान के अधीन नांय हो, पर आतमा के अधीन हो। पर अगर काऊ में ईसू मसीह की आतमा नांय है तौ बू मसीह कौ नांय। अगर तुम में मसीह है, तौ चाहे तुमारी देह पाप के काजै मर चुकी है, फिरऊ पबित्र आतमा, परमेस्‍वर के संग तुमें धारमिक ठहराकै खुद तुमारे काजै जीबन बन जातै। अगर बू आतमा जाबें ईसू कूं मरे भयेन में ते जीबित करौ हतो, तुमारे भीतर बास करतै, तौ बू परमेस्‍वर जानें मसीह कूं मरे भयेन में ते जीबित करौ हतो, तुमारे नांसबान सरीरन कूं अपनी आतमा ते जो तुमारेई भीतर बसती है, जीबन देगौ। जामारै मेरे भईयाओ, हम पर जा सांसारिक सरीर कौ कर्ज तौ है पर ऐसौ नांय कै हम जाके अनुसार जीबन जीबें। चौंकि अगर तुम सांसारिक सरीर के अनुसार जिऔगे तौ मरौगे। पर अगर तुम आतमा के द्वारा सरीर की इच्‍छान कौ अंत कर देओगे तौ तुम जीबन जिऔगे। जो परमेस्‍वर की आतमा के अनुसार चलतै, बे परमेस्‍वर की सन्‍तानें हैं। चौंकि बू आतमा जो तुमें मिलौ है, बू तुमें फिर ते दास बनाबे या डराबे के काजै नांय, पर बू आतमा जो तुमनें पायौ है तुमें परमेस्‍वर की सन्‍तान बनातै। जाते हम पुकारकै कैहतै, “हे अब्बा, हे पिता!” बू पबित्र आतमा खुद हमारी आतमा के संग मिलकै गबाही देतै कै, हम परमेस्‍वर की सन्‍तान हैं। अगर हम वाकी सन्‍तान हैं, तौ हम वाकी बिरासत के भागी हैं, हम मसीह के संग परमेस्‍वर की बिरासत के भागी हैं। हम हकीकत में वाके संग दुःख उठातैं, तौ हमें वाके संग महिमा मिलेगी। चौंकि मेरे बिचार में जा समै के हमारे कलेस और दुख हम पै पिरकट हैबे बारी भावी महिमा के आगे कछू अऊ नांय। चौंकि जि सबरी सृस्‍टी बड़ी आसा ते बा समै कौ इंतजार कर रयी है, जब परमेस्‍वर की सन्‍तान कूं पिरकट करौ जाबेगौ। चौंकि जि सृस्‍टी अपनी इच्‍छा ते नांय, पर वाकी इच्‍छा ते, जानें जाय जा आसा के अधीन करौ, कै जि कबऊ अपनी बिनांस की गुलामी ते छुटकारौ पायकै परमेस्‍वर की सन्‍तानों की महिमामय आजादी कौ आनन्द लेबेगी। चौंकि हम जानतै कै, अब तक सबरी सृस्‍टी बच्‍चा पैदा हैबे के समै में हैबै बारी पीड़ा के जैसे कराहती भई तड़पती रयी है। केवल जि सृस्‍टी अई नांय, पर हमऊ जिनें आतमा का पहलौ फल मिला है, अपने भीतर कराहते रहे है। चौंकि हमें वाके द्वारा पूरी तरैह अपनांये जाबे कौ इंतजार है कै हमारी देह मुक्‍ती है जाबेगी। आसा के द्वारा हमारौ उद्धार भयौ है। पर जा चीज की आसा करी जातै बाय देख लेते हैं, तौ बू आसा नांय रहती। जो दिख रयौ है वाकी आसा कौन कर सकतै? पर अगर जाय हम देख नांय रहे वाकी आसा करतैं तौ धीरज के संग वाकी बाट जोहते हैं। ऐसे ही जैसे हम कराहते हैं, आतमा हमारी कमजोरी में हमारी सहायता करबे आतै चौंकि हम नांय जानत कै हम कौन के काजै पिराथना करें। पर परमेस्‍वर की आतमा खुद ऐसी आहें भर भरकै जो सब्दन ते बाहर है, हमारे काजै बिनती करतै। पर बू मन कूं जाँचबे बारौ जानतै कै, परमेस्‍वर की आतमा की मनसा का है। चौंकि परमेस्‍वर की इच्‍छा तेई बू पबित्र लोगन के काजै बिनती करतै। हम जानतैं कै परमेस्‍वर बिन लोगन के संग भलाई करतै जो बाते पिरेम करतैं, जिनें बानें अपने उद्‍देस्य के अनुसार बुलायौ है। चौंकि जिनें बानें पहले ही चुनों है बिनें पैहलेई अपने बेटा के रूप में ठहरायौ ताकि भौत ते भईयाओ में बू सबते बड़ौ भईया बन सकै। फिर जिनें परमेस्‍वर नें पैहले ते ठहरायौ, बिनें बुलायौऊं है। जिनें बानें बुलायौ है, बिनें धरमी अऊ ठहरायौ। जिनें बानें धरमी ठहरायौ, बिनें महिमा अऊ दई है। तौ जाय देखते भये हम का कैहबे? अगर परमेस्‍वर हमारी ओर है तौ हमारौ बिरोध में कौन है सकतै? बानें अपने बेटे तक कूं बचाकै नांय रखौ, पर बानें हम सबके पापन काजै मरने कूं सौंप दयौ। बू भला, हमें वाके संग और सब कछू चौं नांय देबेगौ? परमेस्‍वर के चुने भये लोगन पै ऐसौ कौन है जो दोस लगाबेगौ? बू परमेस्‍वरई है जो बिनें निरदोस ठहरातै। ऐसौ कौन है जो बिनें दोसी ठहराबेगौ? का मसीह ईसू ऐसौ करैगौ? बू तौ जो मर गयौ बल्कि मरे भयेन में जीबित करौ गयौ है और परमेस्‍वर के दाहिनी ओर बैठौ है और हमारी ओर ते बिनतीऊ करतै कौन है जो हमें मसीह के पिरेम ते अलग करैगौ? का कलेस या मुसीबतै या अत्‍याचार या अकाल या नंगापन या जोखम या तलबार? जैसा कै पबित्र सास्त्र में लिखौ भयौ है, “तेरे काजै हर समै हम मौत कौ सामनों करतै। हम काटी जाबे बारी भेड़न जैसे समझे जातैं।” तबऊ वाके द्वारा जो हमें पिरेम करतै, इन सब बातन में हम एक अच्‍छी जीत पा रये हैं। चौंकि मैं मान चुकौऊं कै न मौत और न जीबन, न सुरग दूत और न राज करबे बारी सक्‍ती, न बर्तमान की कोई चीज और ना भबिस्‍य की कोई चीज, ना कोई सामर्थ, ना कोई हमारे ऊपर कौ और ना हमते नीचे कौ, न सृस्‍टी की कोई और चीज हमें परमेस्‍वर के बा पिरेम ते, जो हमारे भीतर पिरभू ईसू मसीह के काजै है, हमें अलग कर सकैगी। मसीह में मैं सच कैह रयौऊं। मैं झूंठ नांय कैह रयौ और मेरौ बिबेक जो पबित्र आतमा के द्वारा मेरे संग मेरी गबाही देतै, कै मोय गहरा दुख है और मेरे मन में लगातार पीड़ा रैहतै। मैं य्हां तक चाहतो कै अपने यहुदी भईया बहनों और अपने देस के लोगन काजै मैं मसीह कौ साप अपने ऊपर ले लेतो और बाते अलग है जातो। जो इसरायली हैं और जिनें परमेस्‍वर की सन्‍तान हैबे कौ अधिकार है, जो परमेस्‍वर की महिमा कूं देख चुके है, परमेस्‍वर की बाचा के भागीदार हैं। जिनें मूसा की व्‍यबस्था, सच्‍ची उपासना और प्रतिग्‍या मिली है। इब्रानी पुरखे बिनई ते रिस्तौ रखते हैं और मसीह अऊ मानव सरीर में बिनई में पैदा भयौ जो सबकौ परमेस्‍वर है और सदा धन्य है। ऐसौई होबे ऐसौ नांय कै परमेस्‍वर नें अपनों वचन पूरौ नांय करौ होय चौंकि जो इसरायल के वंसज हैं, बे सब इसरायली नांय। और न ही अब्राहम के वंसज हैबे की बजैह ते बे सब सचमुच वाकी सन्‍तान है। पर जैसे परमेस्‍वर नें अब्राहम ते कही, “तेरे वंसज इसहाक के द्वारा अपनी परम्परा बढ़ाएंगे।” मतलब जि नांय कै सरीर ते पैदा हैबे बारे बच्‍चे परमेस्‍वर के वंसज हैं, पर परमेस्‍वर की प्रतिग्‍या के अनुसार हैबे बारे वाके वंसज माने जातैं। प्रतिग्‍या जा तरैह ते करी गयी कै, “ठीक समै पै मैं लौटुंगो और सारा बेटा जनैगी।” इतनोई नांय जब रिबकाऊ अपने पूर्वज इसहाक ते गर्भवती भई, तौ जुड़बा बेटन के पैदा हैबे ते पैहले और बिनके कछू भलौ बुरौ करबे ते पैहले रिबका ते परमेस्‍वर नें कही, “बड़ौ बेटा छोटे बेटे की सेबा करैगौ।” जाते परमेस्‍वर का इच्‍छा वाके चुनाव ते सिद्ध होतै। जो आदमी के कामन पै नांय टिकी पर बा परमेस्‍वर पै टिकी है जो बुलाबे बारौ है। जैसौ के पबित्र सास्त्र में लिखौ भयौ है, “मैंनें याकूब ते पिरेम करौ है और एसाब कूं नकार दयौ है।” तौ फिर हम का कहें? का परमेस्‍वर अन्यायी है? बिलकुलई नांय। चौंकि बानें मूसा ते कही हती, “मैं जा काऊ पै दया करबे की सोचूंगो, बापैई दया करुंगो। जा काऊ पै किरपा करबौ चाहूंगो, बापैई किरपा करूंगो।” जामारै जि बात न तौ काऊ आदमी की इच्‍छा ते होतै और न काऊ की दौड़ धूप ते, पर जि तौ दयालु परमेस्‍वर पै निर्भर करतै। चौंकि पबित्र सास्त्र में परमेस्‍वर ने फिरौन ते कही हती, “मैंनें तोय जामारै खड़ौ करौ हतो कै, मैं अपनी सामर्थ तोमें दिखा सकूं, और मेरे नाम कौ पिरचार सबरी धरती पै होबे।” जामारै परमेस्‍वर जापै चाहतै दया करतै और जाय चाहतै कठोर बना देतै। तौ फिर तू सायद मोते कहे, “अगर हमारे कामन कूं काबू में करबे बाला परमेस्‍वर है, तौ फिर भी बू बामें हमारौ दोस चौं समझता है? आखिरकार वाकी इच्‍छा कौ बिरोधी कौ है सकतै?” मनुस्‍य तू कौ है, जो परमेस्‍वर कूं उलटकै उत्‍तर दैबे? का कोई रचना अपने रचने बारे ते पूछ सकती है, “तूने मोय ऐसौ चौं बनांयौ?” का काऊ कुम्हार कूं मट्टी पै जि अधिकार नांय कै, बू काऊ एक मट्टी के लौंदे ते एक बरतन आदर के काजै और दूसरा बरतन अनादर के काजै बनाबे? तौ जामें का है? अगर परमेस्‍वर ने अपनों क्रोध दिखाबे और अपनी सामर्थ जताबे के काजै बिन लोगन कूं जो क्रोध के पात्र हते और जिनकौ बिनांस हैबे कूं हते, बड़े धीरज के संग सहन करौ। जाते जो लोग दया के पात्र हते और जिनें बानें अपनी महिमा पाबे काजै बनांयौ हतो, बिनपै अपनी महिमा पिरकट कर सके। मतलब हम जिनें बानें ना केवल यहुदियन में ते बुलायौ पर गैर यहुदिन में तेऊ बुलायौ है, जैसा कै परमेस्‍वर की ओर ते बोलबे बारे होसे की किताब में लिखौ है, “जो लोग मेरे नांय हते बिनें मैं अपनों कहूँगो। और जो पिरजा मेरी पियारी नांय हती, मैं बाय पियारी कहूँगो।” और, “बैसौई घटेगौ जैसा बाई भाग में बिनते कही हती, ‘तुम लोग मेरी पिरजा नांऔ,’ बाई जगह बे जीबित परमेस्‍वर की सन्‍तान कहलाएँगे।” और परमेस्‍वर की ओर ते बोलबे बारौ यसायाह इसरायल के बारे में पुकारकै कहतै, “चाहे इसरायल की सन्‍तान समुनदर के बालू के कड़ के समान असंख्‍य हैं। तोऊ बिनमें ते केवल थोड़ेई बच पाबेंगे। चौंकि पिरभू धरती पै अपने न्याय कूं पूरी तरैह ते और जल्दी अई पूरौ करैगौ।” और जैसा कै परमेस्‍वर की ओर ते बोलबे बारे यसायाह ने भविस्‍यबानी करी हतीं, “अगर सर्वसक्‍तीमान पिरभू हमारे काजै, वंसज न छोड़तो, तौ हम सदौम और अमोरा जैसे नांसई है जाते।” तौ फिर हम का कहें? हम जा नतीजे पै पहुँचे हैं कै गैर यहुदी लोग जो धारमिकता की खोज में नांय हते, बिन्‍नें धारमिकता कूं पा लयौ है। और जो भरोसा के अनुसारई धारमिक ठहराए गए। पर इसरायल के लोगन नें जो ऐसी व्‍यबस्था पै चलबो चाहते जो बिनें धारमिक ठहरातै, वाके अनुसार नांय जी सके। चौंकि बे जाकौ पालन भरोसे ते नांय, पर अपने कामन ते कर रये हते, बे बा चट्‍टान पै ठोकर खा गये, जो ठोकर दिलातै। जैसौ कै पबित्र सास्त्र में लिखौ भयौ है, “देखौ, मैं सियोन में एक पत्‍थर रख रयौऊं, जो ठोकर दिलातै, और एक चट्‍टान जो पाप करातै। पर बू जो बामें भरोसा करतै, बाय कबऊ निरास नांय होनों होगौ।” हे भईया बहनों, मेरे हृदय की इच्‍छा है और मैं परमेस्‍वर ते बिन सब इसरायल के लोगन काजै पिराथना करतूं कै, बिनकौ उद्धार हो। चौंकि मैं गबाही देतूं कै बिनमें परमेस्‍वर की धुन है। पर बू ग्‍यान पै नांय टिकी है, चौंकि बे लोग बा धारमिकता कूं नांय जानते जो परमेस्‍वर ते मिलतै और बे अपनी अई धारमिकता की स्थापना की जतन करते रये जामारै बिन्‍नें परमेस्‍वर की धारमिकता कूं नांय अपनांयौ। मसीह ने व्‍यबस्था कौ अंत करौ ताकि हर कोई जो भरोसा करतै, परमेस्‍वर के काजै धारमिक बने। मूसा व्‍यबस्था की धारमिकता के बारे में लिखतै, “जो व्‍यबस्था के नियमन पै चलेगौ, बू बिनके बजैह ते जीबित रैहबेगौ।” पर भरोसा ते मिलबे बारी धारमिकता के बारे में पबित्र सास्त्र में जि लिखौ भयौ है, “तू अपने आप ते जि मत पूछ कै, ‘सुरग में ऊपर कौन जाबेगौ?’” यानी कै, मसीह कूं नीचे धरती पै लाबे काजै। “या, ‘नीचे पाताल में कौन जाबेगौ?’” यानी कै, मसीह कूं मरे भयेन में ते बापस लावे काजै। पबित्र सास्त्र में जि लिखौ भयौ है, “वचन तेरे जौरे है, तेरे होटन पै है और तेरे मन में है।” यानी भरोसा कौ बू वचन जाकौ हम पिरचार करतै कै, अगर तू अपने मौंह ते कहे, “ईसू पिरभू है,” और तू अपने मन में जि भरोसा करे कै परमेस्‍वर ने बाय मरे भयेन में ते जीबित करौ तौ तेरौ उद्धार है जाबेगौ। चौंकि अपने हृदय के भरोसे ते आदमी धारमिक ठहरायौ जातै और अपने मौंह ते वाके भरोसा कूं स्‍वीकार करबे ते वाकौ उद्धार होतै। चौंकि पबित्र सास्त्र में जि लिखौ भयौ है, “जो कोई बामें भरोसा रखतै बाय निरास नांय होना पड़ेगौ।” जि जामारै है कै यहूदियों और गैर यहुदिन में कोई भेद नांय चौंकि सबकौ पिरभू तौ एकई है। और वाकी दया अपरम्पार है जो बिन सबके काजै, जो वाकौ नाम लेते है। चौंकि पबित्र सास्त्र में जि लिखौ भयौ है, “हर कोई जो पिरभू कौ नाम लेतै, बू उद्धार पाबेगौ।” पर बे जो बामें भरोसा नांय करते, वाकौ नाम कैसे पुकारेंगे? और बे जिन्‍नें वाके बारे में सुनी अई नांय, बामें भरोसा कैसे कर पाबेंगे? और फिर भला जब तक कोई बिनें सुभ समाचार सुनाबे बारौ न हो, तौ बे कैसे सुन सकेंगे? सुभ समाचार सुनाबे बारौ तब तक सुभ समाचार कैसे सुना पाबेंगे जब तक बिनें भेजौ न गयौ हो? जैसा कै पबित्र सास्त्र में जि लिखौ भयौ है, “सुभ समाचार सुनाबे बारेन के पाँम पड़बौ कितने सुहाबने हैं।” पर सब ने सुभ समाचार कूं अपनांयौ नांय। परमेस्‍वर की ओर ते बात बताबे बारौ यसायाह कैहतै, “हे पिरभू, हमारे उपदेस पै किन्नें भरोसौ करौ है?” वचन सुनबे ते भरोसौ पैदा होतै और जो सुनायौ जातै, बू मसीह कौ वचन है। पर मैं कैहतूं, “का बिन्‍नें हमारे पिरचार कूं नांय सुनों?” हाँ, पक्‍कौ सुनों है। पबित्र सास्त्र में जि लिखौ भयौ है, “बिनकी अबाज सबरी धरती पै फैल गयी, और बिनके वचन संसार के एक छोर ते दूसरे छोर तक पौंहचे हैं।” पर मैं पूछतूं, “का इसरायली नांय जानते हते?” पहले तौ मूसा कैहतै, “मैं तुम लोगन के मन में ऐसे देसन के लोगन के द्वारा जो हकीकत में काऊ देस के लोग हैई नांय, जलन पैदा करूँगो। मैं भरोसौ ना करबे बारे लोगन के द्वारा तुमें क्रोध दिलाऊँगो।” फिर यसायाह हिम्मत के संग कैहतै, “मोय बिन लोगन नें पा लयौ है जो मोय खोज नांय रये हते मैं बिनके काजै पिरकट है गयौ जो मेरी खोज खबर नांय करते।” पर परमेस्‍वर ने इसरायलियन के बारे में कही, “मैं सारे दिन आग्‍या न मानबे बारे और अपने बिरोधियन की ओर अपनाबे के काजै हात पसारे रहौ।” जामारै मैं पूछतूं, “का परमेस्‍वर नें अपनेई लोगन कूं नकार दयौ?” बिलकुल नांय। चौंकि मैंऊं एक इसरायली हूं, अब्राहम के वंस ते और बिन्यामीन के गोत तैऊं। परमेस्‍वर नें अपने लोगन कूं नांय नकारौ जिनें बानें पहले तेई चुनों हतो। का तुम नांय जानते कै, एलियाह के बारे में पबित्र सास्त्र का कहतै, जब एलियाह परमेस्‍वर ते इसरायल के लोगन के बिरोध में बिनती करतै? बानें कही, “हे पिरभू, बिन्‍नें तेरी ओर ते बात बताबे बारेन कूं मार डारौ। तेरी बेदीयन कूं तोड़कै गिरा दयौ। केवल मैंई अकेलौ तेरी ओर ते बोलबे बारौ बचौ हूं और बे मोऊऐ मार डारबे कौ जतन कर रये हैं।” पर तब परमेस्‍वर ने बाय का उत्‍तर दयौ? “मैंनें अपने काजै सात हजार लोग बचा रखे हैं, जिन्‍नें बाल देबता के आगे माथौ नांय टेकौ।” जामारै बैसेई आजऊ कछू इसरायली लोग बचे हैं जो वाके किरपा की बजैह ते चुने भये हैं। अगर जि परमेस्‍वर की किरपा ते भयौ है तौ लोग जो कर्म करतै, जि बिन कामन कौ परिनाम नांय, तौ परमेस्‍वर की किरपा, किरपाई नांय ठहरती। तौ जाते का भयौ? इसरायल के लोग जाय खोज रये हते, बे बाय नांय पा सके, पर चुने भयेन कूं बू मिल गयौ। जबकि बचे भये सब कूं कठोर बना दयौ। पबित्र सास्त्र में लिखौ भयौ है, “परमेस्‍वर ने बिनें बिना चेतना की आतमा दयी है। ऐसी आँखें दईं जो देख नांय सकती हतीं, और ऐसे कान दिए जो सुन नांय सकते हते। और यही दसा ठीक आज तक बनी भई है।” दाऊद कहतै, “अपनेई भोजनन में फसकै बे बंदी बन जाएँ बिनकूं ठोकर और बिनें दन्‍ड मिले। बिनकी आँखें धुंधली हो जायें ताकि बे देख न सकें, और तू बिनकी पीड़ान तै, बिनकी कमर सदा झुकाए रखें।” जामारै मैं कैहतूं, का बिन्‍नें जामारै ठोकर खाई कै बे नांस है जाबें? बिलकुलई नांय। पर बिनके गलती करबे ते गैर यहुदी लोगन कूं छुटकारौ मिलौ ताकि यहुदियन में होड़ पैदा होबे। जा तरैह अगर बिनके गलती करबे का मतलब सारे संसार कौ बड़ौ लाभ है और अगर बिनके भरोसे ते भटकबे ते गैर यहुदियन कौ लाभ है, तौ बिनके भरोसे में लौटबे ते तौ भौत कछू होगौ। अब मैं तुम गैर यहुदिन ते जि कैह रयौऊं, चौंकि मैं बिसेस रूप ते गैर यहुदियन के काजै भेजौ भयौ चेलाऊं, मैं अपनी सेबा के काजै पूरौ प्रयास कर रयौऊं। मैं अपने लोगन मेंऊ होड़ पैदा कर सकूं और बिनमें ते कछुन कौ उद्धार कराऊं। चौंकि अगर परमेस्‍वर के द्वारा बिनके नकार दिये जाबे ते संसार में परमेस्‍वर के संग मेल-मिलाप पैदा होतै, तौ फिर बिनकौ अपनांयौ जाबौ, का मरे भयेन में ते जीबित हैबे के बराबर नांय होगौ? अगर हमारी भेंट कौ एक भाग पबित्र है तौ का बचौ सबरौई भाग पबित्र नांय? अगर पेड़ की जड़ पबित्र है तौ वाकी डालिअऊ पबित्र हैं। पर अगर कछू डाली तोड़कै फेंक दी गयीं और तू जो एक जंगली जैतून की डाली है, बापै कलम लगा दयी और बू जैतून के अच्‍छे पेड़ की जड़न की सक्‍ती कौ हिस्सा बटाने लगे, तौ तोय बिन डालिन के आगे, जो तोड़ कर फेंक दी गयी, घमन्‍ड नांय करबौ चाहिऐं। अगर तू घमन्‍ड करतै तौ याद रख जि तू नांय जो जड़न कूं पाल रयौ हैं, पर जि तौ बू जड़ई है जो तोय पाल रयी है। अब तू कैहबेगौ, “हाँ, पर डालियां जामारै तोड़ी गयीं कै, मेरौ कलम लगायौ जाबे।” जि सच्‍चाई है, बे भरोसौ ना करबे की बजैह ते तोड़ फेंकी गयीं, पर तुम अपने भरोसे के बल पै अपनी जगह पै टिके रहे। जामारै जाकौ घमन्‍ड मत कर पर भय मान। अगर परमेस्‍वर ने मूल डालियाँ नांय रैहन दयीं तौ बू तोऊऐ नांय रहन देबेगौ। जामारै तू परमेस्‍वर की किरपा कूं देख और वाकी कठोरता पै ध्‍यान दे। जि कठोरता बिनके काजै है जो पाप में गये पर वाकी किरपा तेरे काजै है, तू अपने पै वाकी किरपा बनी रहने दे। नांय तौ पेड़ ते तू अऊ काट फैंकौ जाबेगौ। और अगर बे अबिसबासी में न रहे तौ बिनेंऊ फिर ते पेड़ कलम करके जोड़ लिया जाबेगौ चौंकि परमेस्‍वर बिनें फिर ते कलम करबे में समर्थ है। जब तोय प्राकृतिक रूप ते जंगली जैतून के पेड़ ते एक डारी की तरैह काटकै प्रकृति के बिरुद्ध एक उत्‍तम जैतून के पेड़ ते कलम करके जोड़ दयौ गयौ, तौ ये जो बा पेड़ की अपनी डालियाँ हैं, अपनेई पेड़ में आसानी से, फिर ते कलम करकै चौं नांय जोड़ दी जाबेंगी। हे भईया बहनों, मैं तुमें जा छिपी भयी सच्‍चाई ते अनजान नांय रखबो चाहता, कै तुम अपने आप कूं बुद्धिमान समझबे लगो कै इसरायल के कछू लोग ऐसे ही कठोर बना दिए गए हैं और ऐसे ही कठोर बने रहेंगे जब तक कै भौत ते गैर यहुदी परमेस्‍वर के परिबार के अंग नांय बन जाते। जा तरैह समूचे इसरायल कौ उद्धार होबेगौ। जैसा कै पबित्र सास्त्र में लिखौ भयौ है, “उद्धार करबे बारौ सियोन ते आबेगौ, बू याकूब के परिबार ते सब बुराइन कूं दूर करैगौ। मेरी जेई बाचा बिनके संग तब होगी, जब मैं बिनके पापन कूं दूर कर दुंगो।” ज्हाँ तक सुभ समाचार कौ सम्बन्ध है, बे तुमारे हित में परमेस्‍वर के बैरी हैं, पर ज्हाँ तक परमेस्‍वर द्वारा बिनके चुने जाबे का सम्बन्ध है, बे बिनके बाप दादाऔ कूं दिये बाचा के अनुसार परमेस्‍वर के प्यारे हैं। चौंकि परमेस्‍वर जाय बुलातै और जाय वरदान देतै, वाकी तरफ ते बू अपनों मन कबऊ नांय बदलत। चौंकि जैसे तुम गैर यहुदी पहले कबऊ परमेस्‍वर की आग्‍या नांय मानते हते, पर अब यहुदी लोगन के आग्‍या ना मानबे की बजैह ते परमेस्‍वर की दया मिली है, बैसेई अब बे वाकी आग्‍या नांय मानते चौंकि परमेस्‍वर की दया तुम गैर यहुदी पै है। ताकि अब बिनेंऊ परमेस्‍वर की दया मिले। चौंकि परमेस्‍वर ने सब लोगन कूं अबाग्‍या के बन्धन में जामारै डाल रखा है कै, बू बिन सब पै दया कर सके। परमेस्‍वर कौ बैभव, बुद्धि और ग्‍यान भौत अपरम्पार हैं। वाके न्याय भौत गैहरौ हैं, वाके रास्ते भौत रहस्‍य मय है। पबित्र सास्त्र में लिखौ भयौ है, “पिरभू के मन कूं कौन जानतै? और बाय सलाह देबे बारौ कौन है सकत हैं? का परमेस्‍वर कूं काऊ ने कबऊ कछु दयौ है, कै वाके बदले कछू दे?” चौंकि सब का रचने बाला बुई है। बाई ते सब स्थिर है और बू बाई के काजै है। वाकी महिमा युगानुयुग हो! ऐसौई होबे! जामारै हे भईया बहनों, परमेस्‍वर की दया कूं याद दिलाकै, मैं तुमते निबेदन करतूं कै, अपने सरीर कूं जीबित और पबित्र बलिदान के रूप में परमेस्‍वर कूं खुस करते भये चढ़ाऔ। जि तुमारी आतमिक सेबा है। अब और आगे जा संसार की रीति पै मत चलो पर अपने मनन कूं नयौ करके अपने आप कूं बदल डारौ, ताकि तुमें पतौ चल जाये कै, परमेस्‍वर तुमारे काजै का चाहतै, जो उत्‍तम है, जो बाय भाता है और जो सम्पूर्न है। जामारै बा किरपा की बजैह ते जो वरदान बानें मोय दयौ है, बाय ध्‍यान में रखते भये, मैं तुम में ते हर एक ते कहता हूं, अपने कूं यथोचित समझो अर्थात् जितना भरोसा परमेस्‍वर नें तुमें दयौ है, बाई के अनुसार अपने कूं समझनों चहिऐं। चौंकि जैसे हम मेंते हर एक के सरीर में भौत ते अंग हैं। सब अंगों का काम एक जैसा नांय, बैसेई हम अनेक हैं पर मसीह में हम एक देह के रूप में है जाते। जा तरैह हर एक अंग हर दूसरे अंग ते जुड़के एक देह है जातै। तौ फिर वाकी किरपा के अनुसार हमें जो अलग अलग वरदान मिले हैं, हम बिनकौ प्रयोग करें। अगर काऊ कूं भविस्‍यबानी की छमता दी गयी है तौ बू वाके पास जितना भरोसा है वाके अनुसार परमेस्‍वर की ओर ते भविस्‍यबानी करे। अगर काऊ कूं सेबा करबे का वरदान मिला है तौ अपने आप कूं सेबा के काजै अर्पित करे, अगर काऊ कूं उपदेस देने का काम मिला है तौ बाय अपने आप कूं प्रचार में लगाना चहिऐं। अगर काऊ कूं हिम्मत बढ़ाबे कौ वरदान मिलौ है बू हिम्मत बढ़ाबे। अगर काऊ कूं दान देने का वरदान मिला है तौ बाय खुले मन ते दान देनों चहिऐं। अगर काऊ कूं अगुबाई करबे का वरदान मिलता है तौ बू लगन के संग अगुबाई करे, जाय दया दिखाने कौ वरदान मिलौ है, बू खुसी ते दया करे। तुमारौ पिरेम बिना कपट के हो। बुराई ते घृना करो। भलाई में लगे रहौ। भईया चारे के संग एक दूसरे के प्रति समर्पित रहो। आपस में एक दूसरे कूं आदर के संग अपने ते जादा सम्मान दो। मेहनती बनो, आलसी नांय, आतमा में जोस ते भर जाऔ और पिरभू की सेबा करो। अपनी आसा में खुस रहो। बिपत्‍ति में धीरज धरौ। निरन्‍तर पिराथना करते रहो। परमेस्‍वर के पबित्र लोगन की जरूरतन में हात बटाओ। अतिथि सत्‍कार के मौकौ ढूँढते रहो। जो तुमें सतातें हैं बिनें आसीरबाद दो। बिनें साप मत दो पर आसीरबाद दो। जो खुस हैं बिनके संग खुस रहो। जो दुखी है, बिनके दुख में दुखी होओ। आपस में मेलमिलाप ते रहो। घमन्‍ड मत करो पर दीनों की संगति करो। खुद कूं बुद्धिमान मत समझो। बुराई कौ बदला बुराई ते काऊ कूं मत दो। जो बाते सब लोगन की नजर में अच्‍छी हो बिनईऐ करौ। जहाँ तक बन पड़े अपनी ओर ते सब लोगन के संग सान्‍ती ते रहो। काऊ ते अपने आप बदला मत लो। मेरे प्यारे मित्रों, पर जाय परमेस्‍वर के क्रोध पर छोड़ दो चौंकि पबित्र सास्त्र में लिखौ भयौ है “पिरभू ने कही है, ‘बदला लेबौ मेरौ काम है। मैंई बदलौ दुंगो।’” पर तू तो, “अगर तेरौ बैरी भूखौ है तौ बाय भोजन करा। अगर बू पियासौ है तौ बाय पीने कूं पानी दे। चौंकि अगर तू ऐसौ करतै तौ बू लज्‍जित होगौ।” बुराई ते मत हार पर अपनी भलाई ते बुराई कूं हरा दे। हर आदमी कूं अधिकारिन की अधीनता स्‍वीकार करबौ चहिऐं। चौंकि अधिकार परमेस्‍वर की ओर ते है। और जो अधिकारी मौजूद है बू परमेस्‍वर ने ठहरायौ है। जामारै जो अधिकारी कौ बिरोध करतै, बू परमेस्‍वर की आग्‍या कौ बिरोध करतै। और जो परमेस्‍वर की आग्‍या कौ बिरोध करतै, बे दन्‍ड पाबेंगे। अब देखौ कोई सासन करबे बारौ आदमी कूं जो नेकी करतै, नांय डराबत, पर बाई कूं डरातै, जो बुरे काम करतै। अगर तुम अधिकारी ते नांय डरनों चाहत, तौ भले काम करते रहो। तुमें सत्‍ता की प्रसंसा मिलेगी। जो सत्‍ता में है बू परमेस्‍वर का सेबक है। बू तेरौ भला करबे के काजै है। पर अगर तू बुरौ करतै तौ बाते डर, चौंकि वाकी तलबार बेकार नांय। बू परमेस्‍वर कौ सेबक है, जो बुरौ काम करबे बारेन पै परमेस्‍वर कौ क्रोध लातै। जामारै वाके अधीन रैहबो जरूरी है, ना केवल डर की बजैह ते पर तुमारे अपने बिबेक की बजैह तेऊ जरूरी है। जामारै तौ तुम लोग लगानऊ चुकातै चौंकि अधिकारी परमेस्‍वर के सेबक हैं जो अपने कर्तव्‍यों कूंई पूरौ करबे में लगे रहतै। जा काऊ कौ तोय देनों है, बाय चुका दे। जो लगान तोय देनों है, बाय दे। जाकी चुंगी तोपै निकरतै, बाय चुंगी दे। जाते तोय डरनों चहिऐं, तू बाते डर। जाकौ आदर करबौ चहिऐं वाकौ आदर कर। आपसी पिरेम के अलाबा काऊ कौ कर्जा अपने ऊपर मत रख चौंकि जो अपने संगियन ते पिरेम करतै, बू जा तरैह व्‍यबस्था कूंई पूरौ करतै। मैं जि जामारै कैह रयौऊं, “व्‍यभिचार मत कर, हत्‍या मत कर, चोरी मत कर, लालच मत रख,” और जो भी दूसरी आग्‍याऐं है, बू जा वचन में समा जातै, “तोय अपने पड़ोसिन ते ऐसे ही पिरेम करबौ चहिऐं, जैसे तू खुद ते करतै।” पिरेम अपने पड़ोसी कौ बुरौ कबऊ नांय करत। जामारै पिरेम करबौ व्‍यबस्था के नियम कूं पूरौ करबौ है। जि सब कछू तुम जामारै करो कै जैसे समै में तुम रह रहे हो, बाय जानतौ। तुम जानतौ कै तुमारे काजै अपनी नींद ते जागबे कौ समै आ पौंहचौ है, चौंकि जब हमनें भरोसा करौ हतो वाके हिसाब ते हमारौ उद्धार अब जादा जौरे है। रात लगभग बीत चुकी है, दिन निकरबे बारौ है, जामारै आओ हम बिन कामन ते छुटकारौ पालें जो अँधकार के हैं। आओ हम उजाले के हतियारन कूं ले लो। जामारै हम बैसेई उत्‍तम रीति ते रहें जैसे दिन के समै रहते हैं। खा पीकै धुत्‍त ना है जाओ। लुच्‍चपन, कुकर्म, व्‍यभिचार में ना पड़ें, ना झगड़े और नांई ईरसा रखें। पर पिरभू ईसू मसीह के सुभाब कूं धारन करौ। और अपनी सांसारिक देह की इच्‍छान कूं पूरौ करबे मेंई मत लगे रहो। जो भरोसे में कमजोर है, वाकौऊ स्‍वागत करो पर वाके बिचारन पै झगड़ा करबे के काजै नांय। कछू लोग मानतै कै, बे सब कछू खा सकतै, पर जो भरोसे में कमजोर है बस साग-पातई खातै। तौ बे जो हर तरैह कौ खाना खातै, बिनें बिनकूं हीन नांय समझनों चहिऐं जो कछू चीजन कूं नांय खात। बैसेई बे जो कछू चीजन कूं नांय खात, बे सब कछू खाने बारेन कूं बुरौ नांय कहनों चहिऐं। चौंकि परमेस्‍वर ने बिनकूं अपना लयौ है। तू काऊ दूसरे घर के दास पै दोस लगाबे बारौ कौ होतै? बाय मजबूत या बाय अनुचित ठहराबो स्‍वामी पैई निर्भर करतै। बू जरूर मजबूत बनों रैहबेगौ चौंकि पिरभू बाय मजबूत बनांये रखबे में समर्थ है। कोई एक दिन कूं दूसरे दिनन ते बढ़कै मानतै और दूसरा बाय सब दिनन कूं बराबर मानतै। हर एक आदमी जाके बारे में अपनेई मन में पक्‍कौ कर लैबे। जो कोई काऊ एक दिन कूं मनातै बू बाय पिरभू के आदर देने के काजैई मनातै। और जो सब कछू खाता है बोऊ पिरभू कूं आदर देबे के काजैई खातै। चौंकि बू परमेस्‍वर का धन्यबाद करतै। और जो कछू चीजन कूं नांय खाता, बोऊ ऐसौ जामारै करतै चौंकि बोऊ पिरभू कूं आदर देना चाहता है। बोऊ परमेस्‍वर कूं ही धन्यबाद देतै। हम में ते न तौ कोई अपने काजैई जीतै, और न अपने काजैई मरतै। चौंकि हम जीबित हैं तौ पिरभू के काजै और अगर मरते है तौऊं पिरभू के काजै। जामारै चाहे हम जीयें चाहे मरें हम है तौ पिरभू केई। चौंकि मसीह जामारै मरौ और जामारै जी उठौ, ताकि बू जो अब मर चुके हैं और बे जो अबऊ जीबित हैं, दोनोंन कौ पिरभू है सकै। जामारै तू अपने भरोसा में ससक्‍त भईया पै दोस चौं लगातै? या तू भरोसा में कमजोर भईया कूं तुच्‍छ चौं मानतै? हम सब कूं परमेस्‍वर के न्याय के सिंहासन के आगे खड़ौ होनों है। चौंकि पबित्र सास्त्र में लिखौ भयौ है, “पिरभू ने कही है, ‘मेरे जीबन की सौगन्ध हर काऊ कूं मेरे सामने घुटने टेकने होंगे और हर जुबान परमेस्‍वर कौ अंगीकार करैगी।’” जामारै हम मेंते हर एक कूं परमेस्‍वर के आगे अपनों लेखा-जोखा देनों होगौ। जामारै हम आपस में दोस लगाना बंद करें, और जि पक्‍कौ करें कै अपने भईया के रास्ते में हम कोई अड़चन खड़ी नांय करेंगे और ना ही बाय पाप में गिरबे काजै उकसायें। पिरभू ईसू में हैबे की बजैह ते मैं पक्‍कौ मानतूं कै अपने आप में कोई खानों असुद्ध नांय। पर अगर कोई जि समझतै कै जि खानों असुद्ध हैं, तौ बू वाके काजै असुद्ध है जो बाय असुद्ध मानतैं। अगर तुम अपने खाने की बजैह ते अपने भईया कूं दुःख देते हैं, तौ तुम भाई पिरेम के अनुसार नांय चलते। जा मनुस्‍य के काजै मसीह मर गयौ, तुम अपने खाने की बजैह ते, वाके नांस हैबे कौ कारन मत बनों। जामारै जो तेरे काजै अच्‍छौ है, बाय निन्दनीय मत बनबे दे। चौंकि परमेस्‍वर का राज्‍य बस खाना-पीना नांय, पर बू तौ धारमिकता, सान्‍ती और पबित्र आतमा ते मिलबे बारौ आनन्द है। जो इन बातन के द्वारा मसीह की सेबा करतै, बे परमेस्‍वर के प्यारे है और लोग बाय सम्मान देते हैं। जामारै, बिन बातन में लगें जो सान्‍ती कूं बढ़ाती हैं और जिनते एक दूसरे कूं आतमिक बढ़ोत्‍तरी में सहायता मिलतै। खाने के पीछै परमेस्‍वर के काम कूं मत बिगाड़ो। हर तरैह कौ खानों सुद्ध है, पर काऊ आदमी के काजै बू कछू खाना ठीक नांय है, जो काऊ और भईया कूं पाप के रास्ते पर ले जाबे। अगर मांसाहारी भोजन, अगूंर कौ रस पीबौ औरऊ कछू बातें तेरे भईया के काजै पाप में गिरबे कौ कारन बन जाये तौ इन सबते बचबौ अच्‍छौ है। तेरौ जो भरोसौ है, बाय परमेस्‍वर के साम्हने अपनेई मन में रख। धन्य है बू, जो बा बात में जिसे बू ठीक समझतै, अपने आप कूं दोसी नांय ठहरातै। पर अगर कोई सन्देह करके चीज कूं खाता है, जाके खाने के काजै बू आस्‍वस्त नांय है तौ बू दोसी ठहरता है। चौंकि वाकौ खाना वाके भरोसा के अनुसार नांय है और बू सब कछू जो भरोसा पर नांय टिकौ है, बू पाप है। हम लोग जो भरोसे में मजबूत हैं, बिनें जो भरोसे में कमजोर हैं बिनकौ ध्‍यान रखनों चाहिएं। हम बस अपने आपको ही खुस न करें। हम में ते हर एक, दूसरे बिसबासी भईया की भलाई के काजै खुस करौ कै बिनकी आतमिक बढ़ोत्‍तरी हो। य्हां तक कै मसीह नेंऊ खुद कूं खुस नांय करौ। जैसा कै मसीह के बारे में पबित्र सास्त्र में लिखौ भयौ है, “बिनकौ अपमान जिन्‍नें तेरौ अपमान करौ है, मोपै आ पड़ा है।” हर बू बात जो सास्त्रन में पहले लिखी गयी, हमें सिछा देबे के काजै है, जाते जो धीरज और हिम्मत सास्त्र ते मिलतै, हम बाते आसा प्राप्‍त करें। परमेस्‍वर अई धीरज और सान्‍ती कौ स्रोत है, कै बू आप लोगन कूं जि वरदान दे कै आप मसीह ईसू की सिछा के अनुसार आपस में मेल-मिलाप बनांये रखौ, ताकि तुम सब एक संग एक स्‍वर ते हमारे पिरभू ईसू मसीह के पिता परमेस्‍वर कूं महिमा देऔ। जामारै एक दूसरे कूं अपनाऔ जैसे तुमें मसीह ने अपनांयौ, जि परमेस्‍वर की महिमा के काजै करो। मैं तुम लोगन ते कहतूं कै, जो प्रतिग्‍याएं बाप-दादन कूं दी गई हतीं, बिनें मजबूत करबे काजै मसीह, परमेस्‍वर की सच्‍चाई का प्रमान देने के काजै खतना करे भये लोगन कौ सेबक बनों, ताकि गैर यहुदी लोगन कूं परमेस्‍वर की किरपा मिले और वाकी महिमा करें। जैसौ के पबित्र सास्त्र में लिखौ भयौ है, “जामारै देस देस के लोगन के बीच तोय पैहचानुंगो, और तेरे नाम के भजन गाऊंगो।” और जेऊ लिखौ भयौ है, “हे सब लोगो, परमेस्‍वर के चुने भये लोगन के संग खुस रहो।” और फिर पबित्र सास्त्र में जेऊ लिखौ है, “हे गैर यहुदी लोगो, तुम पिरभू की स्तुति करो। और सब देस के लोगो, परमेस्‍वर की स्तुति करो।” और परमेस्‍वर की ओर ते बताबे बारे यसायाह कीऊ किताब में लिखौ भयौ है, “यिसै कौ एक वंसज पिरकट होगौ जो गैर यहुदी लोगो पै सासक के रूप में उठेगौ। और बे लोग बापै अपनी आसा लगाबेंगे।” सब आसाओं का स्रोत परमेस्‍वर, तुमें सम्पूर्न आनन्द और सान्‍ती ते भर देबे जैसा कै बामें तुमारौ भरोसा है, ताकि पबित्र आतमा की सक्‍ती ते तुम आसा ते भरपूर है जाओ। हे मेरे भईया बहनों, मोय खुद तुम पर भरोसौ है कै तुम नेकी ते भरे हो और हर तरैह के ग्‍यान ते परिपूर्न हो, ताकि तुम एक दूसरे कूं सिछा दे सकतौ। पर तुमें फिर ते याद दिलाबे काजै मैंनें कछू बातन के बारे में चिठ्‌ठी में साफ-साफ लिखौ है। मोय परमेस्‍वर की जो किरपा मिली है, वाकी बजैह ते जि करौ है। मैं गैर यहुदिन के काजै ईसू मसीह कौ सेबक बनकै परमेस्‍वर के सुभ समाचार के काजै एक पुरोहित के रूप में काम करूं ताकि गैर यहुदी परमेस्‍वर के आगे अपनाबे योग्‍य भेंट बन सकें और पबित्र आतमा के द्वारा परमेस्‍वर के काजै पूरी तरैह पबित्र बनें। जामारै मसीह ईसू में एक आदमी के रूप में परमेस्‍वर के काजै अपनी सेबा कौ मोय घमन्‍ड है। चौंकि मैं बस बिनी बातन कूं कहने कौ साहस रखता हूं, जिनें मसीह ने गैर यहुदिन कूं परमेस्‍वर की आग्‍या मानबे का रस्ता दिखाने कौ काम, मेरे वचनों, मेरे कर्मों, आस्चर्य चिन्हों और अदभुत कामन की सक्‍ती और पबित्र आतमा की सामर्थ से, मेरे द्वारा पूरौ करौ। जामारै येरूसलेम ते लेकर इल्‍लुरिकुम के चारों ओर मसीह के सुभ समाचार के पिरचार का काम मैंनें पूरौ करौ। मेरे मन में सदा जि अभिलासा रही है कै मैं सुभ समाचार का पिरचार वहाँ करूं जहाँ कोई मसीह का नाम तक नांय जानत, ताकि मैं काऊ दूसरे आदमी की नींव पै काम न करूं। जैसौ कै पबित्र सास्त्र में लिखौ भयौ है, “जिनें वाके बारे में नांय बतायौ गयौ है, बे बाय देखेंगे। और जिन्‍नें सुना तक नांय, बेई समझेगें।” मेरे कर्तव्‍य मोय तुमारे जौरे आबे ते बार बार रोकते रये हैं। पर अब इन देसन में और कोई जगैह नांय बची जहां मैने सुभ समाचार नांय सुनांयौ होय और भौत सालन ते मोय तुमते मिलबे की लालसा है। जामारै मैं जब इसपानिया जाऊँगो तौ आसा करतूं तुमते मिलुंगो! मोय आसा है कै इसपानिया जाते भये तुमते भेंट होगी। तुमारे संग कछू दिन ठहरबे कौ आनन्द लेवे के बाद मोय आसा है कै यात्रा के काजै मोय तुमारी मदद मिलेगी। पर अब मैं परमेस्‍वर के पबित्र लोगन की सेबा करबे काजै येरूसलेम जा रयौऊं। चौंकि मकिदुनियां और अखाया के कलिसिया के लोगन नें येरूसलेम में परमेस्‍वर के पबित्र जनों में जो दरिद्र हैं, बिनके काजै कछू देने का निस्चय करौ है। हाँ, बिनके काजै बिनकौ कर्तव्‍यऊ बनतै चौंकि अगर गैर यहुदिन ने यहूदियों के आतमिक कामन में भागी भये हैं तौ गैर यहुदिन कूं अऊं बिनके काजै सांसारिक चीजन ते बिनकी सेबा करनीं चाहिएं। जामारै अपनों जि काम पूरौ करके और इकठ्‌ठौ करे गये जा धन कूं हिपाजत के संग बिनके हात सौंपकै, मैं तुमारे नगर ते होता भयौ इसपानिया के काजै रबाना होऊँगा। मैं जानतूं कै, जब मैं तुमारे जौरे आऊँगो तौ तुमारे काजै मसीह के पूरे आसीरबादन समेत आऊँगो। हे भईया बहनों, तुमते मैं पिरभू ईसू मसीह की ओर ते पबित्र आतमा ते जो पिरेम पाते हैं, वाकी गबाही दैकै बिनती करतूं कै, तुम मेरी ओर ते परमेस्‍वर ते सच्‍ची पिराथनाओं में लगे रहो। तुम जि पिराथना करौ कै, मैं यहुदिया के अबिसबासिन ते बचौ रहूं और जा सेबा काजै मैं येरूसलेम जा रयौऊं बाय म्हां रैहबे बारे परमेस्‍वर के पबित्र लोग अपनामें, ताकि परमेस्‍वर की इच्‍छा के अनुसार मैं खुसी के संग तुमारे जौरे आकर तुमारे संग आनन्द मना सकूं। सम्पूर्न सान्‍ती कौ परमेस्‍वर तुमारे संग रहे। ऐसौई होबे! मैं किंख्रिया की कलिसिया की बिसेस सेबिका हमारी बहन फीबे की सिफारिस तुमते करतूं, कै तुम बाय पिरभू में ऐसी रीति ते अपनाऔ जैसी रीति परमेस्‍वर के पबित्र लोगन के योग्‍य है। बाय तुमते जो कछू जरूरत हो सब कछू ते तुम वाकी मदद करना, चौंकि बानें भौतन की और मेरीऊ बड़ी सहायता करी है। ईसू में प्रिसकिल्‍ला और अक्‍बिला कूं मेरौ नमस्‍कार। बे मसीह ईसू में मेरे सहकर्मी हैं। बिन्‍नें मेरे पिरान बचाबे के काजै अपने जीबन कूं भी दाब पर लगा दयौ हतो। न केवल मैं बिनकौ धन्यबाद करतूं पर गैर यहुदिन की सब कलिसियाऊ बिनके धन्यबादी हैं। बा कलिसिया कूं अऊं मेरौ नमस्‍कार, जो बिनके घर में इकठ्‌ठी होती है। मेरे प्यारे मित्र इपनितुस कूं मेरौ नमस्‍कार जो आसिया में मसीह कूं अपनाबे बारेन में पैहलौ है। मरियम कूं जानें तुमारे काजै भौत काम करौ है नमस्‍कार। मेरे कुटुम्बी अन्द्रनीकुस और यूनियास को, जो मेरे संग कारागार में हते और जो पिरमुख धर्म प्रचारकन में प्रसिद्ध हैं, और जो मोतेऊ पहले मसीह में हते, मेरौ नमस्‍कार। पिरभू में मेरे प्यारे मित्र अम्पलियातुस कूं नमस्‍कार। मसीह में हमारे सहकर्मी उरबानुस और मेरे प्यारे मित्र इस्तुखुस कूं नमस्‍कार। मसीह में खरे और सच्‍चे अपुल्‍लोस कूं नमस्‍कार। अरिस्तुबुलुस के परिबार कूं नमस्‍कार। यहुदी संगी हेरोदियोन कूं नमस्‍कार। नरकिस्सुस के परिबार के बिन लोगन कूं नमस्‍कार जो पिरभू में हैं। त्रुफेना और त्रुफोसा कूं जो पिरभू में मेहनती काम करबे बारी हैं, नमस्‍कार। मेरी प्यारी पिरसिस कूं, जानें पिरभू में कठिन परिस्रम करौ है, मेरौ नमस्‍कार। पिरभू में चुने भये रुफुस कूं और वाकी माँ को, जो मेरी माँ जैसी है, नमस्‍कार। असुंक्रितुस, फिलगोन, हिरमेस, पत्रुबास, हिर्मास और बिनके संगी सब भरोसौ करबे बारे भईयन कूं नमस्‍कार। फिलोलुगुस, यूलिया, नेरयुस और वाकी बहन, और उलुम्पास और बिनके सब संगी परमेस्‍वर के पबित्र लोगन कूं नमस्‍कार। तुम लोग आपस में पबित्रता के संग गले मिलकै एक दूसरे कौ स्‍वागत करौ। तुमें सब मसीही कलिसियान की ओर ते नमस्‍कार। हे भईयाओ, मैं तुमते पिराथना करतूं कै तुमने जो सिछा पाई हैं, वाके बिपरीत तुम में जो फूट डारतें हैं और दूसरों के भरोसा कूं बिगाड़ते हैं, बिनते सावधान रहो, और बिनते दूर रहो। चौंकि ये लोग हमारे पिरभू मसीह की नांय, पर खुद के पेट की सेबा करते हैं, और अपनी खुसामद भरी चिकनी चुपड़ी बातन ते भोले भाले मन के लोगन कूं बहका देतै। तुमारी आग्‍याकारिता की चर्चा बाहर हर काऊ तक पहुँच चुकी है। जामारै तुमते मैं भौत खुस हूं। पर मैं चाहतूं कै, तुम भलाई के काजै बुद्धिमान बने रहो और बुराई के काजै अबोध रहो। सान्‍ती कौ सोत परमेस्‍वर जल्दी अई सैतान कूं तुमारे पैरों तले कुचल देबेगौ। हमारे पिरभू ईसू की किरपा तुम पै होती रैहबे। हमारे संगी काम करबे बारे तिमुथियुस और मेरे यहुदी संगी लूकियुस, यासोन और सोसिपत्रुस की ओर ते तुमें नमस्‍कार। जा चिठ्‌ठी के लिखबे बारे मुझ, तिरतियुस कौ पिरभू में तुमें नमस्‍कार। मेरौ और समूची कलिसिया के आतिथ्यकर्ता, गयुस कौ तुमें नमस्‍कार। इरास्तुस जो नगर कौ खजान्‍ची है और हमारे भईया क्‍बारतुस कौ तुमकूं नमस्‍कार। हमारे पिरभू ईसू मसीह का की किरपा तुम सबके संग रहे । वाकी महिमा हो जो तुमारे भरोसा के अनुसार यानी ईसू मसीह के सन्देस के जा सुभ समाचार का मैं उपदेस देतूं, वाके अनुसार तुमें सुदृढ़ बनाबे में समर्थ है। परमेस्‍वर का जि रहस्‍यपूर्न सत्‍य युग-युग ते छिपौ भयौ हतो। पर जाय अनन्‍त परमेस्‍वर के आदेस ते परमेस्‍वर की ओर ते बात बताबे बारेन की किताब के द्वारा अब हमें और देस देस के लोगन पै पिरकट करके बता दयौ गयौ है जाते भरोसा ते आग्‍या मानबे बारे है जाबें। ईसू मसीह द्वारा बा एकमात्र ग्‍यानमय परमेस्‍वर की अनन्‍त काल तक महिमा हो। ऐसौई होबे! परमेस्‍वर की इच्‍छा के अनुसार ईसू मसीह कौ भेजौ भयौ चेला बनबे काजै चुनों गयौ, मैं,पौलुस और बिसबासी भईया सोस्थिनेस, जि चिठ्‌ठी कुरिन्थुस सहर में स्थित परमेस्‍वर की कलिसिया के लोगन कूं लिख रये हैं। जो ईसू मसीह में पबित्र करे गये हैं और जो पबित्र हैबे काजै बुलाये गये है और बिन सब लोगन के काजैऊ लिख रयौऊं जो हर जगैह हमारे पिरभू ईसू मसीह कौ नाम पुकारते रैहते। हमारे परम पिता परमेस्‍वर और पिरभू ईसू मसीह की ओर ते तुम सबन कूं किरपा और सान्‍ती मिलती रैहबै। तुम लोगन कूं मसीह ईसू के द्वारा परमेस्‍वर की किरपा मिली है, वाके काजै मैं परमेस्‍वर कौ हमेसा धन्यबाद देतूं। चौंकि मसीह में तुमें हर तरैह ते मतलब, बोलने में और सबरे ग्‍यान ते सम्पन्‍न करौ गयौए। मसीह के बारे में हमनें जो गबाही दयीऐ, बू तुमारे बीच में परमेस्‍वर नें सच्‍ची साबित करी है। जाई बजैह ते तुमारे जौरे वाके काऊ आतमिक वरदानन की कमी नांय। तुम सब हमारे पिरभू ईसू मसीह के पिरगट हैबे कौ इन्‍तजार करते रहो। पिरभू अन्‍त तक तुम लोगन कूं भरोसे में मजबूत बनांये रखैगौ, जाते तुम हमारे पिरभू ईसू मसीह के दिन में निरदोस पाये जाओ। परमेस्‍वर भरोसे योग्‍य है, बाई नें तुम लोगन कूं अपने बेटा हमारे पिरभू ईसू मसीह की संगती काजै बुलायौ है। हे मेरे भईया बहनों, मैं तुमते ईसू मसीह जो हमारौ पिरभू है वाके नाम में तुम सबनते जि बिनती है कै, तुम एकई बात बोलो। तुमारे बीच में मत-भेद ना होबे पर तुमारे बिचार और इच्‍छा एकई होय। चौंकि हे मेरे भईया बहनों, मोय खलोए के घराने के कछू लोगन ते पतौ चलौ कै, तुम में आपस में लड़ाई चल रयी है। मैं तुमते जि कैह रयौऊं के, तुमते कोई कैहतै कै, “हम पौलुस के चेला हैं।” और कोई कैहतै, “हम अपुल्‍लोस के चेला हैं।” काऊ कौ जि मते कै, “हम पतरस के चेला हैं।” तौ कोई कैहतै के, “हम मसीह के चेला हैं।” का मसीह बट गयौए? का मैं,पौलुस तुमारे काजै क्रूस पै चढ़ो हतो? का तुमें पौलुस के नाम ते बपतिस्मा दयौ? नांय ऐसौ नांय। मैं परमेस्‍वर कौ धन्यबाद करतूं कै, क्रिसपुस और गयुस कूं छोड़कै मैंनें तुम में ते काऊ कूं बपतिस्मा नांय दयौ। जामारै कोई जि नांय कैह सकत कै, तुम लोगन कूं मेरौ चेला बनाबे काजै बपतिस्मा दयौ गयौए। हाँ, मैंनें स्तिफनास के परिबार कूं बपतिस्मा दयौ हतो। जाके अलाबा मोय याद नांय कै मैने काऊ और कूं बपतिस्मा दयौ होय। चौंकि मसीह ने मोय बपतिस्मा दैबे काजै नांय, पर बानें मोय बिना इन्सानी ग्‍यान लगाये सुभ समाचार पिरचार करबे काजै भेजौ हतो। जाते कै मसीह कौ क्रूस पै मरबौ बेकार नांय चलौ जाय। बे लोग जो बिनांस के रस्ता पै चलतैं, बे क्रूस की सिछा कूं मूर्खता समझतैं। पर जो उद्धार के रस्ता पै चल रये हैं उनके काजै परमेस्‍वर की सक्‍ती है। चौंकि पबित्र सास्त्र में लिखीऐ, “मैं ग्‍यानीन के ग्‍यान कूं खतम कर दुंगो और बुद्धिमान लोगन की बुद्धिमानी कूं तुच्‍छ कर दुंगो।” बिद्वानन कांये? सास्त्रन कूं सिखाबे बारे कांये? जा संसार के बाद-बिबाद करबे बारे कांये? का परमेस्‍वर ने जा संसार के ग्‍यान कूं मूर्खता नांय सिद्ध करौए? चौंकि परमेस्‍वर ने अपने ग्‍यान के अनुसार कबऊ जि नांय चाहौ कै, संसार के लोग अपने ग्‍यान के बल ते बाय पैहचानें। पर परमेस्‍वर कूं जि अच्‍छौ लगौ कै हमारे दिये गये संदेस के पिरचार के द्वारा भरोसौ करबे बारे बचाये जायें। जा पिरचार कूं संसार के लोग मूर्खता समझतै। यहुदी लोग चमत्‍कार के चिन्‍न मागतें और यूनानी लोग ग्‍यान की खोज में रैहतें। पर हम तौ क्रूस पै चढ़ाये गये मसीह कौ पिरचार करतै। जि सिछा यहुदिन के भरोसे में बाधा है और गैर यहुदिन काजै मूरखता है। पर परमेस्‍वर के बुलाये भये चाहे, बे यहुदी होंय या यूनानी होंय, दोनोंन के काजै मसीह परमेस्‍वर की सक्‍ती, और परमेस्‍वर कौ ग्‍यान है। चौंकि परमेस्‍वर की मूरखता आदमिन के ग्‍यान ते कऊं जादा ग्‍यानबान है। परमेस्‍वर की कमजोरी आदमी की तागत ते कऊं जादा तागतबर है। हे भईयाओ बहनों, याद करौ जब परमेस्‍वर नें तुमें बुलायौ, बा समै संसार की नजर में तुम में ते भौत कम लोग ग्‍यानी समझे जाते हते और कछुई सक्‍तीसाली हते, कछुई अच्‍छे घराने के हते। पर परमेस्‍वर ने तौ जगत के ऐसे मूरख लोगन कूं चुनों है कै, बे ग्‍यान बानन कूं लज्जित करें और कमजोर लोगन कूं चुनों है कै, बे बलबान लोगन कूं लज्जित करें। और परमेस्‍वर ने जगत में बिनई कूं चुनों है जो नीचे हते जो दुनियां की नजर में तुच्‍छ और जो कछू नांय बिन लोगन कूं चुन लयौऐ। ताकि जो बड़े समझे जातैं बिनें कछू ना समझौ जाबै। जाते कोई आदमी परमेस्‍वर के सामने घमन्‍ड नांय कर पाबै। पर परमेस्‍वर की ओर ते तुम मसीह ईसू में बने भये हो, मसीह जो परमेस्‍वर की ओर ते हमारे काजै ग्‍यान मतलब धारमिकता, पबित्रता और छुटकारौ ठहरौ है। जैसौ कै पबित्र सास्त्र में लिखौ है कै, “अगर कोई घमन्‍ड करबौ चाहबै, तौ बू पिरभू पै घमन्‍ड करें।” हे भईयाओ, जब मैं परमेस्‍वर के भेद की सच्‍चाई बताबत भयौ तुमारे जौरे आयौ, तौ लुभायबे बारी बातन के संग और इन्सानी ग्‍यान के संग सिछा देते भये नांय आयौ। चौंकि मैंनें जिय ठान लई हती कै, तुमारे बीच ईसू मसीह, बरन क्रूस पै चढ़ाए भये मसीह कूं छोड़ और काऊ के बारे में बात नांय करूंगो। मैं निरबलता और भय के संग, और भौत थरथराबत भयौ तुमारे संग रहो। और मेरे वचन, और मेरे पिरचार में ग्‍यान की लुभायबे बारी बात नांय। पर पबित्र आतमा और सामर्थ कौ सबूत हतो। जामारै तुमारौ भरोसौ आदमिन के ग्‍यान पै नांय, पर परमेस्‍वर की सामर्थ पर निर्भर होय। हम ग्‍यानी लोगन के बीच में बुद्धी की बातें बतातैं, पर जि जा संसार और संसार के हाकिमन कौ ग्‍यान नांय जो कछु समै बाद नांस है जातै। पर हम परमेस्‍वर के बा ग्‍यान के भेद कूं बतातैं, जाय परमेस्‍वर ने संसार की सृस्‍टी ते पैहलेई तेई हमारी महिमा कै काजै ठहरा दयौ हतो। जा संसार कौ कोई हाकिम जा सच्‍चाई कूं नांय जान पायो, चौंकि अगर बे जानते तौ महिमामय पिरभू कूं क्रूस पै नांय चढ़ाबते। जैसौ पबित्र सास्त्र में लिखौ है, “जो ग्‍यान कबऊ काऊ ने नांय देखौ, और कानन नें नांय सुनी, और न कोई आदमी कल्पना कर पायौ, जो परमेस्‍वर नें अपने पिरेम करबे बारेन काजै तईयार करीं हैं।” पर जि सब परमेस्‍वर ने अपनी आतमा ते हमारे काजै पिरगट करौए। चौंकि परमेस्‍वर का आतमा सब बातन कूं ढूंढ लेतै य्हां तक कै परमेस्‍वर के गुप्‍त भेदऊए जानतै। एक आदमी की आतमा के अलाबा वाके बारे में कौन जान सकतै? जाई तरैह ते परमेस्‍वर के बिचारन कूं परमेस्‍वर की आतमा कूं छोड़ के और को जान सकतुए? हमें सांसारिक आतमा नांय, पर परमेस्‍वर की आतमा मिलौऐ, जाते हम उन बातन कूं जान सकें जो परमेस्‍वर ने हमें सेंत मेंत में दयीऐं। हम इन बातन कूं इन्सानी ग्‍यान ते नांय, पर परमेस्‍वर की आतमा ते मिले भये सबदन ते, आतमिक बातन कूं समझाबतें। एक सांसारिक आदमी परमेस्‍वर की आतमा की बातन कूं नांय अपनाबत, चौंकि वाके काजै बे बाते निरी मूरखता की होतें। जामारै बू उन्‍नें समझ नांय पाबत चौंकि उनकी जाँच आतमा के आधार पै करी जाय सकते। एक आतमिक आदमी हर बात की पहचान रखतै पर कोई बा आदमी की परख नांय कर सकै। चौंकि पबित्र सास्त्र में लिखौ है, “पिरभू के मन कूं कौने जानौए? और बाय को सिखाबेगौ?” पर हमारे जौरे तौ मसीह ईसू कौ मन है। हे मेरे भईयाओ, मैं तुमते ऐसें बात नांय कर सकौ, जैसे आतमिक लोगन ते करतूं। पर मोय तुमते सांसारिक लोगन की तरैह ते बात करनी परीं, चौंकि तुम अबई मसीह में बालक जैसे हो। अबई तौ मैने तुमें दूध पीबे कूं दयौए, कर्री रोटी नांय दयी चौंकि तुम बाय खाय नांय पाऔगे और न तुम जाय आज खाय सकत। चौकी तुम अबई तक सांसारिक औ। का तुम सांसारिक नाऔ, जब कै तुम में आपसी जलन कलेस भरींएं, और तुम सांसारिक लोगन जैसौ बौहार करतौ? जब तुम मेंते कोई कैहतै कै, “मैं पौलुस कौऊं” और दूसरौ कैहतै कै, “मैं अपुल्‍लोस कोऊं” तौ का तुम सांसारिक लोगन की नाईं बौहार नांय कर रये? अच्‍छा तौ जि बताऔ कै, अपुल्‍लोस काऐ और पौलुस काऐ? हम तौ केबल मसीह के सेबक हैं, जिनके द्वारा तुमने भरोसौ करौऐ। हम में ते हर एक नें बस बैई काम करौए जो हमे पिरभू ने सौंपौ हतौ। मैने बीज बोयौ, अपुल्‍लोस ने सींचौ और परमेस्‍वर ने बढ़ायो, पर बड़ौ तौ परमेस्‍वरै जानै बाकूं बढ़ायौऐ। जामारै ना तौ बैबे बारौ बड़ौ और न पानी लगायबे बारौ। पर बड़ौ तौ परमेस्‍वर है जाने बाकूं बढ़ायौऐ। बैबे बारे और पानी लगायबे बारे दोनोंन कौ एकई मकसद होतै। पर हरेक अपनी मेहनत के अनुसार मजदूरी पामिंगे। परमेस्‍वर की सेबा में हम सब संग काम करिबे बारे हैं। तुम लोग तौ परमेस्‍वर के खेत हौ और तुम परमेस्‍वर के मन्दिरऊ हो। परमेस्‍वर की किरपा ते मोय जो कछु दयौ गयौए, वाकी मैने एक अच्‍छे राज मिस्त्री की तरैह ते नीब डारीए पर बाय बनांयबे बारौ कोई और है, पर हरेक कूं सावधानी के संग ध्‍यान रखनौ चहिऐं कै बू बाय कैसै बनांय रयौए। चौंकि जो नीब डारी गयीऐ, बू खुद ईसू मसीह है, और वाके अलाबा दूसरी नीब कोई नांय डार सकत। अगर लोग बा नीब पै बनाबते तौ फिर चांहे बे उसमें सोना लगायें, चाँदी लगायें, भौत कीमती रत्न लगायें, लकड़ी लगायें, फूस लगायें या घास लगायें, तौ हरेक आदमी कौ काम अलग अलग दिखाई देबेगौ, चौंकि न्याय कौ दिन आग के संग पिरगट होगौ और वाकी आग हरेक आदमी के काम कूं परखेगी कै वाके काम कैसे हैं। अगर काऊ ने बा नीब पै टिकाऊ काम करौऐ, बू वाकौ प्रतिफल पाबैगौ। अगर काऊ कौ काम आग में भस्म है जाबैगौ तौ बाय नुकसान उठानौ परैगौ। फिरऊ बू ऐसे बच निकरैगौ जैसे कोई आग लगे भये घर में ते भाग के बच निकरै। का तुम नांय जानत कै तुम खुद परमेस्‍वर के बड़े पिराथना घर हौ और परमेस्‍वर की आतमा तुम में रैहतै? अगर कोई परमेस्‍वर के बड़े पिराथना घर कूं नांस करैगौ तौ परमेस्‍वर बाय नांस कर देगौ। चौंकि परमेस्‍वर कौ बड़े पिराथना घर तौ पबित्र है। हाँ, तुमई तौ परमेस्‍वर के बड़े पिराथना घर हो। कोई अपने आप कूं धोकौ नांय देय। अगर कोई तुम में ते जि सोच रयौ होय, कै जा संसार के अनुसार तौ हम बुद्धिमानें तौ बू सच मुच कौ ग्‍यानी बनवे काजै अपने आप कूं मूरख बनांय लेबै। चौंकि संसार कौ ग्‍यान परमेस्‍वर की निगाह में तौ मूरखता है। पबित्र सास्त्र में लिखौ भयौ है कै, “परमेस्‍वर ग्‍यानीन कूं उनकी अई चतुराई में फसाय दैबे।” और फिरऊ, “पिरभू जानतुए के ग्‍यानीन के सब बिचार बेकार हैं।” जामारै लोगन के कामन पै काऊऐ घमन्‍ड नांय करनों चहिऐं। चौंकि जि सब कछु तुमारेई भलाई काजै तौऐ। फिर चाहे बू पौलुस होय या अपुल्‍लोस होय या पतरस चाहे संसार होय, जीबन होय या मृत्‍यु होय, चाहे ये आज की बातें होंय या आयबे बारे कल की। जि सब कछु तुमारेई भलाई काजै हैं। और हम लोग मसीह के हैं और मसीह परमेस्‍वर कौऐ। लोग हमें मसीह कौ सेबक और परमेस्‍वर के वचन के भेदन कौ भन्‍डारी समझें। फिरऊ भन्‍डारी में जि बात हौनी चहिऐं कै बू भरोसे योग्‍य होय। पर मेरी निगाह में जि तौ भौत छोटी बातै कै, तुम या लोगन की कोई और अदालत मोय परखे, पर मैं तौ अपने आपकूं खुद नांय परखत। चौंकि मेरौ मन मोय काऊ बात में दोसी नांय ठहराबै, पर मैं जाते निरदोस नांय ठहरत चौंकि मेरौ परखबे बारौ मेरौ पिरभू है। जामारै समै ते पैहले काऊ बात कौ न्याय मत करौ। पिरभू के आबे कौ इन्‍तजार करौ बेई अन्धेरे में छिपी भई बातन्‍ने उजीते में पिरगट करैगौ, और सबके मन की बातन कूं पिरगट करैगौ। तब परमेस्‍वर की ओर ते सबकी बढ़ाई होगी। हे मेरे भईयाओ, मैंनें तुमारे फायदा के काजै इन बातन कूं अपने और अपुल्‍लोस की चर्चा कथा कहानी कै आधार पै करी, जामारै तुम हमते जि सीखौ कै, पबित्र सास्त्र में लिखे भये ते आगे नांय जानौ चहिऐं और ना एक के पच्‍छ में और दूसरे के बिरोध में घमन्‍ड नांय करनों चहिऐं। कौऐ बू जो तुमकूं दूसरेन ते जादा महत्व देतै? तुमारे जौरे का है, जो तुमें ना दयौ होय? और अगर तुमकूं सब कछू दयौ गयौ है तौ जापै घमन्‍ड चौं करतौ जैसे कै जि तुमें दयौ ना गयौ होबे? तुमतौ झिक चुकेऔ, और धनी है गयेऔ तुमने हमारे बिना राज करौऐ। पर भलौ तौ जि होतौ कै तुम जब राज करते तब हमऊ तुमारे संग राज कर रये होते। मोय तौ ऐसौ लगतुऐ कै परमेस्‍वर ने हम भेजे भये चेलान कूं मौत की सजा पाये भये लोगन की तरैह ते सबनते आखरी जगैह में रखौए। चौंकि हम तौ जा जगत में सुरग दूत और लोगन के काजै तमासौ बन गये हैं। लोगन की नजर में हम मसीह काजै मूरख बने, ताकि तुम मसीह में बुद्धिमान बनों। हम कमजोर बने ताकि तुम बलबान बनो। तुमें आदर मिलतै और हमें बेजत्‍ती। हम जा समै भूंके और पियासेऐं, फटे पुराने कपड़ा पहन रये हैं, मार खाय रये हैं, भटकत फिर रये हैं। हम अपने हातन ते मेहनत करत-करत थक जातै। तौऊ लोग हमारी बेजत्‍ती कर रयैहै और हम उनकूं आसीरबाद दे रये हैं तौऊ बे हम पै अत्‍याचार कर रये है और हम सहन करत जाय रयैहै। बे हमारी निन्दा करतै और हम उनते नम्रता ते बिनती करतै। तौऊं लोग अबऊ हमारे संग ऐसौ बौहार करतै जैसे हम संसार के कचरा और समाज के कूड़े करकट हों। मैं इन बातन कूं तुमें सरमिन्दा करबे काजै नांय लिख रयौ, पर अपनों प्यारौ बेटा समझकें चिताय रयौऊं। मसीह में तुमें सिछा दैबे बारे दस हजार है सकतै पर बे सब तुमारे पिता नांय है सकत, चौंकि सबते पैहले सुभ समाचार सुनाबे के द्वारा मैं मसीह ईसू में तुमारौ पिता बनोंऊ। जामारै मेरी तुमते जि बिनतीए कै तुम मेरी तरैह जीबन जीऔ। जामारै मैंनें तिमुथियुस कूं जो पिरभू में मेरौ प्यारौ और भरोसे योग्‍य बेटा है, तुमारे जौरे भेजौए। और बू तुमें मसीह ईसू में मेरे चाल-चलन के बारे में बताबैगौ जैसे में हरेक जगैह की कलिसिया कूं सिछा देतो। कछू लोग जि समझ के ऐसें फूल गये हैं, जैसे मैं तुमारे जौरे आऊंगोई नांय। अगर पिरभू की इच्‍छा भयी तौ मैं जल्दी अई तुमारे जौरे जरुर आऊंगौ और फिर उन फूले भयेन की बातन कूं नांय पर उनकी सामर्थ कूं जान लुंगो। चौंकि परमेस्‍वर कौ राज केवल बातन पै नांय, पर सामर्थ पै टिकौ है। तुम का चांहतौ? का मैं तुमारे जौरे लठिया लैके आऊं या नरमाई और पिरेम की आतमा के संग आऊं? मैने जि सुनीऐ कै, तुम में व्‍यभिचारी भौत बढ़ गयौऐ, ऐसौ तौ गैर यहुदिन मेंऊं नांय होत कै, कोई आदमी अपने पिता की दूसरी पत्नी कूं रखे। तबऊ तुम घमन्‍ड में फूले भयेऔ। तुमकूं सोक मनानों चहिऐं और जानें ऐसौ काम करौऐ, बाय अपने बीच में ते बाहर निकार देनों चहिऐं। मैं सरीर ते तौ तुमारे जौरे नांऊ पर आतमा में तुमारेई जौरे हतूं। मानों कै मैं अपनी मौजूदगी में, जानें जि काम करौऐ वाके बिरोध में जि फैसला कर चुकौऊं। मेरौ फैसला जि है कै, हमारे पिरभू ईसू के नाम पै तुम लोग और मैं आतमा ते सामर्थ के संग इकठ्‌ठे होय, तब ऐसे आदमी के पाप ते भरे भये सुभाव कूं नस्‍ट करबे काजै सैतान कूं सौंप दयौ जाबेगौ, जाते पिरभू के दिना में वाकी आतमा उद्धार पाय सकै। तुमारे काजै घमन्‍ड करबौ अच्‍छौ नांय। का तुम जि नांय जानें कै थोरे ते खमीर ते पूरौ मड़ौ भयौ चून खमीर है जातै? अपने बीच में ते पुराने खमीरै निकार देऊ और अपने आप कूं सुद्ध मड़ौ भयौ चून बनांय लेओ, जाते तुम बिना खमीर के है जाऔ। चौंकि हमारी फसह जो मसीह है। बू बलिदान भयौ है। जामारै हमें न तौ पुराने खमीर ते और न बुराई ते, न दुस्‍टता कै खमीर ते पर ईमानदारी और सच्‍चाई की बिना खमीर की रोटी ते तौहार मनानों चहिऐं। मैने तुम लोगन कूं अपनी चिठ्‌ठी में लिखौ है कै, तुम व्‍यभिचारिन की संगती मत करियों। मेरौ जि मतलब बिलकुल नांय के, तुम जा दुनियां के व्‍यभिचारीन, लोभीयन ते, ठगन ते और मूरती पूजबे बारेन ते कोई मतलब मत रखौ। ऐसौ करबे काजै तुमें जा संसार मैं ते निकरकें जानौ होगौ। मेरौ जि केहनोंऐ कै, अगर तुम मेंते कोई बिसबासी भईया हैकैऊ, व्यभिचारी, या लोभी, या मूरती पूजबे बारेन, निन्दा करबे बारौ, या पियक्‍कड़, या अन्धेर करबे बारौ होय, तौ वाकी संगति मत करियौ, ऐसे आदमी के संग रोटीऊ तक मत खईयों। चौंकि जो लोग बाहर के हैं, बे कलिसिया के नांय उनकौ न्याय करबे ते मोय का काम? का तुमें उनई कौ न्याय करनों चहिऐं जो कलिसिया के भीतर के हैं? पर बाहर बारेन कौ न्याय तौ परमेस्‍वर करैगौ। जामारै पबित्र सास्त्र जि कैहतै कै, “तुम बा कुकर्मी कूं अपने बीच ते बाहर निकार देओ।” का तुम में ते काऊ में जि हिम्मतै कै अपने साथी ते झगड़ौ होय और न्याय के काजै परमेस्‍वर के पबित्र लोगन के जौरे नांय जायकें अधर्मी लोगन की पंचायत में जाबै? का तुम जि नांय जानत कै, परमेस्‍वर के पबित्र लोगई संसार कौ न्याय करिंगे? अगर तुमें संसार कौ न्याय करनों है, तौ का तुम छोटी-छोटी बातन कौ फैसला करबे के लायक नांओ? का तुम जि नांय जानत कै, हम सुरग दूतन कौऊ न्याय करिंगे? फिरऊ जा जीबन की रोज रोज की छोटी मोटी बातन कौ का कैहबौ? अगर तुमें सांसारिक बातन कौ न्याय करनोंए, तौ का तुम उनकूं न्यायी बनाऔगे जो कलिसिया में कछू नांय समझे जायैं। जि बात मैं तुमते जामारै नांय कैह रयौ के तुम लज्‍जित हो। का तुम में एकऊ ऐसौ नांय जौ अपने बिसबासी भईयन के आपसी झगड़े कौ न्याय कर सकै? जाकी का जरूरत है कै, एक बिसबासी भईया अपने दूसरे भईया पै अबिसबासिन की अदालत में मुकद्‍दमा चलाबें? पर तुमतौ जाई बात में हार गयेऔ कै तुम आपस में मुकद्‍दमा कर रयैऔ। पर अन्याय चौं सैह लेओ और अपनों नुकसान चौं नांय सैह लैत? पर जाके बदले तुमतौ खुदई अपने बिसबासी भईयन कौ नुकसान करकें अन्याय कर रयेऔ। का तुम जि नांय जानत कै, अन्याय करबे बारे लोग सुरग के राज के बारिस नांय हुंगे? धोखा मत खाओ, बैस्‍यागामी, मूरती पूजा करबे बारे, पराई औरत के संग रैहबे बारे, और आदमी-आदमी के संग कुकरम करबे बारे, न चोर, न लोभी, न पियक्‍कड़, न निन्दा करबे बारे, न ठगने बारे परमेस्‍वर के राज्य के बारिस नांय होंगे। तुम मेंते भौतसे ऐसेई जीबन जी रये हते। पर तुम अब धोयकै पबित्र करे गयेऔ और तुमकूं परमेस्‍वर की सेबा के काजै, पिरभू ईसू मसीह के नाम ते और परमेस्‍वर की आतमा के द्वारा धरमी ठहराये हो। तुम कैहतौ कै, “मैं तौ सब कछू करबे काजै आजादऊं।” पर सब चीज फायदा की नांय। सब चीज मेरे काजै सहीऐं। पर मैं फिरऊ अपने ऊपर काऊऐ हाबी नांय हौन दुंगो। जि कहाबते कै, “पैट के काजै रोटी और रोटी काजै पेट बनांयौ है।” पर परमेस्‍वर इन दोनोंन कूं खतम कर दैगौ। हमारौ सरीर व्‍यभिचारी के काजै नांय बनांयौ, पर बू तौ पिरभू के काजै है और पिरभू हमारे सरीर के भले के काजै है। परमेस्‍वर ने अपनी सामर्थ ते पिरभू कूं मरे भयेन में ते जीबित करौऐ, बायी तरैह ते बू हमेंऊ जीबित करैगौ। का तुम जि नांय जानौ कै, तुमारी देह मसीह कौ अंगे? तौ का मैं जा अंगे बैस्‍या कौ अंग बनांऊ? कबऊ नांय। का तुम नांय जानौ के जो कोई बैस्‍या की संगती करै, बू वाके संग एक तन है जाबें? चौंकि सास्त्र में लिखीऐं के, “बे दोनों एक तन हुंगे।” जो आदमी पिरभू की संगती में लगौ रहतै, बू पिरभू की आतमा में एक है जातै। व्‍यभिचारी ते बचे रहौ। आदमी के दूसरे सब पाप वाके सरीर ते बाहर हैं, पर व्‍यभिचारी करबे बारौ अपनेई सरीर के बिरोध में पाप कर रयौ है। का तुम नांय जानौ के, तुमारी सरीर पबित्र आतमा कौ बड़ौ पिराथना घर है, बू तुम में बसौ भयौऐ, बू तुमें परमेस्‍वर की ओर ते मिलौ है? बू आतमा तुमारौ अपनों नांऐं। चौंकि तुम लोग तौ दाम लैकें मोल लै लये गयेऔ। जामारै तुमें अपने सरीर के द्वारा परमेस्‍वर की महिमा करनी सईऐ। जिन बातन के बारे तुमनें लिखी हती, बिनपै मेरौ जेई बिचार है कै, लोग ब्याह ना करैं, तौऊं अच्‍छौ है। पर व्‍यभिचार के पाप ते बचबे काजै हरेक औरत कौ अपनों पती होय और हरेक आदमी की अपनी पत्नी होय। पती कूं चहिए कै पतनी के रूप में जो कछू पतनी कौ कर्तव्‍य बनतै बू बाय करै। और जाई तरैह ते पतनी कूअऊं चहिए कै पती काजै अपनों कर्तव्‍य पूरौ करै। केबल पतनी कौ अपनी देह पै अधिकार नांय, पर वाके पती कौऊ अधिकारै, बैसेई केबल पती कूंअऊं अपनी देह पै अधिकार नांय, पर वाकी पतनी कौऊ अधिकारै। जामारै एक दूसरे कूं जा अधिकार ते अलग मत करौ। कछू समै काजै एक दूसरे की सहमती ते सम्बन्ध मत बनाऔ ताकि पिराथना काजै समै मिले और जाके बाद पैहले जैसेई रहौ। कहूं ऐसौ नांय होय कै, तुमारे अलग हैबे कौ मौकौ मिलबे ते सैतान तुमें परखै। मैं जि आग्‍या के रूप में नांय पर अनुमती के रूप में कैह रयौऊं। मैं तौ जि चाहतूं कै तुम सब मेरे जैसे होते। पर परमेस्‍वर ने हरेक कूं अलग वरदान दयौ है। एक कूं जि, दूसरे कूं दूसरौ। अब मोय कुआरौ और बिधबान के बारे में जि कहनौए कै, बे मेरे जैसे अकेले रहे तौ उनके काजै अच्‍छौ है। अगर बे अपने आप कूं काबू में नांय रख पामे और व्‍यभिचारी में परें, जाते तौ जि बढ़ियाए कै बे अपनों ब्याह करलें। पर अब जिनकौ ब्याह है गयौए उनते जि कहनौए, बल्कि पिरभू की आग्‍या है कै काऊ पतनी कूं अपनों पती नांय छोड़नौ चंहिए। अगर बू छोड़ऊ देय तौ दुबारा ते ब्याह नांय करै और अपने पती ते मेल-मिलाप कर लै। और ऐसैई पतीन कूं अपनी पतनी नांय छोड़नी नांय चहिऐं। दूसरे लोगन ते पिरभू नांय, पर मैं कैहतूं, अगर मसीह भईया की पतनी जो बिसबासी नांय होय और बू संग रैहबे में खुस होय तौ बू बाय नांय छोडे़। अगर काऊ औरत कौ पती अबिसबासी होय और वाके संग रैहबे ते खुस होय तौ बाय बू पती छोड़नौ नांय चहिंयें। ऐसौ पती जो अबिसबासी है, बू अपनी पतनी की बजैह ते सुद्ध ठहरतै, और एसैई पतनी बिसबास नांय करै और अपने पती की बजैह ते सुद्ध ठहरती। नांय तौ तुमारी सन्‍तान अपबित्र होतीं, पर अबई बे पबित्र है। अगर कोई आदमी अबिसबासी होय बू अलग होय, तौ अलग हौन देऊ। ऐसी हालत में कोई भरोसौ करबे बारौ भईया या बहिन काऊ बन्धन में नांय। पर परमेस्‍वर ने तौ हमें मेल-मिलाप काजै बुलायोऐ। पर का पतौए, है सकतै कै, पतनी अपने पती के छुटकारै कौ कारन बन जाबै और पती अपनी पतनी के छुटकारे कौ कारन। पिरभू ने जाकूं जैसौ दयौ है और जाकूं जा रूप में चुनों है, बाय बैसेई जीनों चहिऐं। मैं सब कलिसियान में जेई आग्‍या देतूं। जो खतना करौ भयौ बुलायौऐ, बू खतना करौ भयौ बने रहे। जो बिना खतना के बुलायोऐ, बू बिना खतना केई रहे। न तौ खतना कछूऐ और न बिना खतना कछूऐ। पर परमेस्‍वर की आग्‍या मानबौई सब कछूऐ। हरेक आदमी कूं जा हालत में बुलायौ होय, बू बाई हालत में रहै। अगर तू दास की हालत में बुलायोए तौ जा बात की चिन्‍ता मत करै। अगर तू आजाद है सके तौ आगे बढ़ और मौके कौ फायदा उठा। चौंकि जाय पिरभू के दास के रूप में बुलायौ गयौ, बू पिरभू कौ आजाद करौ भयौ है। बायी तरैह ते जाय आजाद आदमी के रूप में बुलायौ गयौ बू मसीह कौ दास है। चौंकि परमेसवर ने तुमें कीमत दैकें मोल खरीद लयौए, जामारै तुम आदमिन के दास मत बनों। हे भईयाओ, तुमकूं जा हालत में बुलाएऔ तौ तुम बाई हालत में परमेस्‍वर के संग रहौ। कुआरेन के बारे पिरभू की ओर ते मोय कोई आग्‍या नांय मिली। जामारै मैं तुमें पिरभू की दया प्राप्त करकै भरोसेमंद रैहबे की सलाह दै रयौऊं। मैं तौ जि समझतूं कै जा परेसानी के बजैह ते अच्‍छौ तौ जि है कै तुम मेरे जैसे अकेले रहौ। अगर तुमारौ ब्याह है गयौए तौ बाते बचबे की कोसिस मत करौ। अगर तुम बिना औरत केऔ तौ औरत की तलास मत करौ। अगर तुम सादी कर लेतौ, तौ तुमने कोई पाप नांय करौ। अगर कोई क्वारी ब्याह करै तौ बू कोई पाप नांय करत। पर जो लोग सादी करेंगे, बे जा संसार में सारीरिक दुखन कौ सामनों करेंगे। मैं तुमें बिन सब परेसानिन ते बचाबो चाहतूं। हे भईयाओ, मैं तुमते जि कैह रयौऊं, समै भौत थोरौए। जामारै अब ते जो सादी सुदा हैं, बे ऐसे रहें मानौ उनकी सादी भई ही नांय। जो रोय रये हैं, बे ऐसे रहें जैसे उन्‍नें कोई दुख नांय। खुसी मनांयबे बारे ऐसे रहें जैसे उनें कोई खुसी नांय। बे जो सामान मोल लेते, ऐसे रहें मानों बिनके जौरे कछु नांय हो। जो आदमी जा दुनियां के सुख कौ आनन्द उठाय रये है, बे ऐसे रैहबें मानों बे चीज उनके काजै कछू कीमत नांय रखत। चौंकि जा दुनियां कौ सुख नांस है जाबैगौ। मैं चाहतूं कै तुम चिन्‍ता मत करौ, एक कुआरौ आदमी पिरभू की बातन के बारे में चिन्‍तित रैहतै पिरभू कूं का तरैह ते खुस करै। जा आदमी कौ ब्याह है गयौए बू आदमी सांसारिक बातन की चिन्‍ता में लगौ रहे कै बू अपनी पतनी कूं कैसै खुस करै। जा तरैह ते, कुआरी और सादी सुदा अन्‍तर है। एसेई क्वारी औरतऊ पिरभू के बारे में चिन्‍ता करतै कै बू अपने सरीर और आतमा दोनोंन कूं पबित्र रख सके। पर जा औरत कौ ब्याह है जाबे बू सांसारिक बातन में और अपने पती कूं हर तरैह ते खुस करबे और रिझायबे में लगी रहतै। मैं जि तुमारे भले काजै कैह रयौऊं, नाकि तुमें फसायबे काजै, पर जैसौ अच्‍छौ लगे बैसौई करौ, और तुम एक चित्‍त हैकें बिना काऊ रुकावट के पिरभू की सेबा में लगे रहौ। अगर कोई सोचतै कै काऊ आदमी की मंगेतर लड़की, जाकी जबानी ढल रयी होय, तौ बिन दोनों की सादी होन देऔ, बिनें आगे बढ़कें ब्याह कर लेनौ चहिऐं, जामें कोई पाप नांय। जि काऊ पै दबाब नांय अपने मन कूं पक्‍कौ करौ, जैसे तुम अपनी इच्‍छा कूं बस में कर सकौ तौ अपनी मंगेतर ते ब्याह नांय करै तौ बू जि अच्‍छौ कर रयौए। जा तरैह ते जो अपनी मंगेतर लड़की ते सादी करतै, बू अच्‍छौ करतै और जो सादी नांय करत, बू औरऊ अच्‍छौ करतै। जब तक काऊ औरत कौ पती जीबित है तब तक बू अपने पती ते ब्याह के बन्धन में बंधी रहै। और वाके मरबे के बाद बू आजाद है जातै और जाके संग चाहे वाके संग दूसरौ ब्याह करै। पर जरूरी है कै बू आदमी पिरभू में होबे। अगर बू जैसी हतिए बैसी रहै तौ और जादा खुस रहेगी। जि मेरौ बिचारै। मोमेंऊ परमेस्‍वर कौ आतमा रैहतुए। अब मूरतीन पै चढ़ाई भई चीजन के बारे में हम जानतें, “चौंकि हम सब ग्‍यानी हैं।” ग्‍यान लोगन में घमन्‍ड भर देतै, पर पिरेम ते सबकौ भलौ होतै। अगर कोई जि सोचै कै, बू कछू जानतूं, पर बू बाय नांय जानत जाके बारे में बाय जाननों चहिऐं, तौ बू कछू नांय जान्‍त। अगर कोई परमेस्‍वर ते पिरेम रखतै, तौ बाय परमेस्‍वर पैहचानतै। जामारै मूरतीन के आगे चढ़ायी भयी चीजन के खाबे के बारे में हम जानतै कै, मूर्ती संसार में कछू नांय। परमेस्‍वर केवल एकई है। जब कै, जा धरती पै और आकास में भौत ते देबता और पिरभू कैहलातै। पर हमारौ तौ एकई पिता परमेस्‍वर है, जानें सब कछू बनांयौ है और बाई के काजै हम जीबत हैं। हमारौ पिरभू तौ एकई है, ईसू मसीह, बाई के द्वारा सब चीज भईएं और बाई के द्वारा हमारौ जीबन है। पर जि ग्‍यान हर काऊ के जौरे नांय। कछू लोग, जो अब तक मूरतीन की पूजा करतें और उनके आगे चढ़ाई भई चीजन कूं जि जानकै खातै कै, जि देबता के आगे चढ़ाई भई है, तौ बिनके जा काम ते बू समझतै कै बे असुद्ध है गये हैं। चौंकि बिनकौ बिबेक कमजोर है। पर चढ़ाई भई चीजें, हमें परमेस्‍वर के जौरे नांय लै जाय सकत। जामारै हमारे खाबे ते कोई फायदा नांय और ना खायबे ते कोई नुकसान नांय। जामारै तुम सावधान है जाऔ। तुमारी जि आजादी भरोसे में कमजोर लोगन के काजै पाप में गिरबे कौ कारन न बन जाय। चौंकि अगर कोई ऐसा आदमी, जाकौ बिबेक कमजोर है, बू तुम ग्‍यानी लोगन कूं बड़े पिराथना घर में मूरतीन के आगे चढ़ाये भये खाने कूं खाबत भये देखतै, तौ का वाकौ मन बा चढ़ाये भये खानों खाबे कौ ना करैगौ? जा तरैह ते तुमारे ग्‍यान की बजैह ते भरोसे में कमजोर भईया बहन कौ नांस है जाबेगौ, जाके काजै मसीह नें जान दयी है। जा तरैह ते तुम भईयाओ के बिरोध में पाप करके बिनके कमजोर बिबेक कूं चोट पौंहचातौ, ऐसौ करकै तुम लोग मसीह के बिरोध में पाप कर रयेऔ। जामारै अगर मेरौ खायबौ भरोसे में कमजोर भईया बहन के पाप में गिरबे कौ कारन बनतै, तौ मैं ऐसौ मांसाहारी खानों कबऊ नांय खाऊंगौ। कऊं ऐसौ ना होबे कै मैं भईया बहन के काजै पाप में गिरबे कौ कारन बनूं। का मैं आजाद नांऊ? का मैं मसीह कौ भेजौ भयौ चेला नांऊ? का मैंनें अपने पिरभू ईसू मसीह के दरसन नांय करे? का पिरभू में मैंनें जो काम करे हैं तुम उन कामन के फल नाऔ? चाहे दूसरे लोग मोय मसीह कौ भेजौ भयौ चेला नांय मानें, पर तौऊं मैं तुमारे काजै मसीह कौ भेजौ भयौ चेलाऊं। चौंकि तुम पिरभू में मेरे भेजे भये चेला हैबे की सबूत की मौहरैं। बे लोग जो मोय परखबो चांहते उनते मेरौ जेई केहनोंऐ। का हमें जि अधिकार नांय कै, तुम हमारे खायबे पीबे की जरूरत पूरी करौ? का हमें जि अधिकार नांय कै, हम किसी बिसबासी लड़की ते सादी करके अपने संग रखे। जैसौ कै दूसरे भेजे भये चेला, पिरभू के सगे भईयन और पतरस ने करौए? का मोय और बरनबास कूंईं जि अधिकार नांय कै अपनों जीबन जीबे काजै काम करनों चहिऐं? सेना में ऐसौ को आदमी होगौ, जो बिना खर्चा मिले अपने खर्चा ते सेना में काम करे? और ऐसौ को होगौ, जो अंगूर की बारी लगाबे और वाकौ फल नांय खाबे? ऐसौ को है, जो भेड़न की देखभाल तौ करतै पर वाके दूध कूं नांय पीबत? का मैं जि बात मनुस्‍य की रीती पै कैह रयौऊं? का व्‍यबस्थाऊ जि नांय सिखाती? का मूसा की व्‍यबस्था की किताब में जि नांय लिखीए कै, “खलिहान में काम करबे बारे बैल के मौंह पै मुछीका नांय बांधनों चंहिएं।” का परमेस्‍वर बैलन केई बारे में बता रयौ है? नांय, जि बात जरूर हमारे काजेई लिखीए, चौंकि जि सहीए कै खेत जोतबे बारौ काऊ आसा तैई खेत कूं जोततऊए और लामनी करबे बारौ फसल में ते भुस और नाज मिलबे की आसा करतै। हमनें तुमारे बीच में आतमिक बीज बोए है। तौ का तुमारी रोज मर्रा की चीजन में ते भागीदारी लेबौ कोई बड़ी बात है? अगर दूसरे लोगन कूं तुमते आर्थिक सहायता लैवे कौ अधिकार है, तौ का हमें बिनते जादा अधिकार नांय? पर फिरऊ हमनें बा अधिकार कौ उपयोग नांय करौ। पर हम तौ चांहै कै मसीह के काजै दुख उठायकें मसीह के सुभ समाचार के काम में कोई रुकाबट न होय। का तुमें पतौ नांय कै, जो लोग बड़े पिराथना घर में काम करतै, बे बड़े पिराथना घर में तेई रोटी खातें, और जो बेदी की सेबा करतै, बे बेदी पै चढ़ाई भई चीजन के हिस्सेदार होतै? जाई तरैह ते पिरभू की जि आग्‍या है कै, जो लोग सुभ समाचार पिरचार करतै, बिनकी जीबिका सुनबे बारेन तेई पूरी होनीं चहिऐं। पर मैने इन अधिकारन मेंते कोई अधिकार पिरयोग नांय करौ। मैं जि बात जामारै ना लिख रयौ कै, मेरे काजै ऐसौ करौ जाबै। मैं भलेई मर जाऊं, पर मैं काऊ दूसरेए अपने जा घमन्‍ड कूं छिनन नांय दुंगो। जब मैं सुभ समाचार पिरचार करतूं, तौ जामें मेरे काजै कौन सी घमन्‍ड की बात है? चौंकि ऐसौ करबौ तौ मेरे काजै जरूरी है। अगर मैं सुभ समाचार पिरचार नांय करूं तौ मोपै हाय। अगर मैं जि अपनी इच्‍छा ते जि कम कर रयौऊं, तौ मोय जाकी मजदूरी मिलनी चहिऐं। पर जि काम मैं फर्ज के रूप में करतूं चौंकि परमेस्‍वर नें जि जिम्मेदारी मोय सौंपी है। तौ फिर मेरौ प्रतिफल का है? जामारै जब मैं मसीह के सुभ समाचार कौ पिरचार करूं तौ मैं बाय सैंत मैंत में करूं। ताकि सुभ समाचार के पिरचार में जो कछू पाबे कौ मेरौ अधिकारै, मैं वाकौ पूरौ उपयोग नांय करत। चौंकि मैं काऊ कौ गुलाम नांऊ। फिरऊ मैं मसीह के काजै तुमारौ सेबक बन गयौऊं कै, मैं जादा ते जादा लोगन कूं मसीह के जौरे लै आंऊ। मैं यहुदिन काजै यहुदी जैसौ बनों कै, यहुदिन कूं मसीह में ले आऊं। जो लोग व्‍यबस्था के अधीन है, उनके काजै में व्‍यबस्था के अधीन ना होते भयेऊ, व्‍यबस्था के अधीन बनों कै, उनकूं मसीह में ले आऊं। जौ गैर यहुदी लोग हते, मैं बिनें मसीह में लाबे काजै यहुदी व्‍यबस्था के अनुसार नांय चलकै, मैं गैर यहुदियन की तरैह जीऔ। जाकौ मतलब जि नांय कै मैं परमेस्‍वर की व्‍यबस्था कूं नांय मान्‍त, पर मैं तौ मसीह की व्‍यबस्था के अधीन जीबन जीतूं। मैं भरोसे में कमजोरन काजै कमजोर जैसौ बनों कै, उनकूं मसीह में ला सकूं। मैं सब लोगन काजै बिनकेई जैसौ बन गयौ, जाते मैं काऊ ना काऊ तरैह ते बिनकौ उद्धार करा सकूं जि सब कछू मैं मसीह के सुभ समाचार के काजै करतूं, जाते कै मैं दूसरेन के संग जामें भागीदार बन जाऊं। का तुम जि नांय जानत कै दौड़ में तौ सब दौड़तें, पर इनाम तौ जीतबे बारेईये मिलतुऐ? तुम एसेई दौड़ो कै इनाम पाओ। हर एक पहलबान हर बात में अपने आप पै काबू करतै। बू जि सब नासबान मुकट कूं पायबे काजै करतै। पर हम तौ बा मुकुट काजै करतूं जो मुरझाबत नांय। जामारै मैं तौ बा आदमी की तरैह ते दौड़तूं जाकौ अपनों एक लक्छ होतुऐ। मैं ऐसे मुक्‍केबाज जैसौऊं जो हबा में मुक्‍का नांय मारत। पर मैं तौ ऐसे कर्रे अनुसासन में रैहके सरीर कूं कस्‍ट दैकें बाय अपने बस में करतूं, कऊं ऐसौ ना होबे कै मैं सुभ समाचार पिरचार करबे के बादऊ, खुद बिनके सामने अयोग्‍य ठहर जाऊं। हे मेरे भईयाओ, मैं तुमें याद करायबौ चाहतूं कै, हमारे सब पुरखा बादर की छाया में चले और सबके सब लाल समुन्दर में हैकें कैसे पार हे गये हते। बिन सब कूं बादर के नीचे और समुनदर में होकर मूसा कौ चेला हैबे काजै बपतिस्मा मिलौ। बिन सबन नें एकई आतमिक भोजन खायौ हतो, और सबन नें एकई आतमिक पानी पीऔ, चौंकि बे सब एक आतमिक चट्‍टान कौ पानी पीबते हते, जो उनके संग संग चलती हती और बू चट्‍टान मसीह हती। पर परमेस्‍वर उनमे ते भौत ते लोगन ते खुस नांय हतो, जामारै बे बेहड़ मेंई मर गये। जे बातें हमें जि सिखातैं कै, हम बुरी चीजन की कामना नांय करें, जैसे बिन्‍नें करीं हती। तुम बिनके जैसे मूरती पूजबे बारे कछू लोगन की तरैह ते मत बनों। जिनके बारे में पबित्र सास्त्र में लिखी है कै, “बे खायबे, पीबे बैठे और मूरती के आगे नाचबे गाने और आपस में मौज-मस्ती करबे में लग गये।” हम व्‍यभिचार नां करै, जैसे उनमे ते कछू लोगन नें करौ हतो। और जाई बजैह बिनमें ते एकई दिना में तेईस हजार मर गये हते। हमें अपने मसीह की परीछा नांय करनी चहिऐं, जैसे बिनमें ते कछू लोगन नें करी हती और बे सांपों के काटबे ते मर गये हते। तुम बिनकी तरैह ते एक दूसरे की सिकायत मत करौ, जैसे बिनमें ते कछू लोग एक दूसरे की करी हती और बिनमें ते कितने तौ नांस करबे बारे बिनासक दूत के द्वारा मार डारे गये। पर जे सब बात उनके संग भईं, बे एक नमूना बन गयी और जि हमें चेतावनी दैवे काजै लिखी गयीएं, चौंकि हम संसार के ऐसे समै में जी रहे है जाकौ अन्‍त जौरे है। अगर तुम में कोई जि समझे कै, “मैं भरोसे में मजबूती के संग ठाड़ौऊ,” तौ बाय साबधान रैहनौ चहिऐं, कऊं ऐसौ नांय होबे कै बू भरोसे ते डगमगा जाबै। तुम ऐसी काऊ परीछा में नांय परें जौ आदमी के सैहबे ते बाहर हो। परमेस्‍वर भरोसे योग्‍य है, बू तुमें ऐसी परीछा में नांय डारेगौ जो तुमारे सामर्थ ते बाहर हो। बू परीछा के संग संग बामें ते निकरबे कौ रस्तऊ बताबैगौ, जाते तुम बा परीछा कूं पार कर सकौ। हे मेरे प्यारौ! तुम मूरती पूजा ते बचे रहौ। मैं तुमें समझदार समझ के बताय रयौऊं, जो कछू मैं तुमें बताय रयौऊं बाय परख लेओ। धन्यबाद कौ बू कटोरा, जाके काजै हम धन्यबाद देतैं, का बू मसीह के खून में हमारी साझेदारी नांय? का बू रोटी जाय हम आपस में तोरकै बांटते मसीह की देह में साझेदारी नांय? जामारै एकई रोटी है, तौ हमऊं जो भौत हैं एकई देह है। चौंकि हम सब बा रोटी में खातै। उन इसरायलियन के बारे में सोचौ, जो बेदी पै चढ़ाई भई चीजन कूं खातै। का बे बेदी के साझीदार नांय होत? का मैं जि कैह रयौ कै, मूरतीन के आगे चढ़ाई भई चीज या मूरती कछू मायने रखतै। बिलकुल नांय, मेरौ कैहबे कौ मतलब जि है कै, गैर यहुदी जो चढ़ाबौ चढ़ाबते बे परमेस्‍वर के काजै नांय, पर बे तौ दुस्‍ट आतमान के काजै। मैं नांय चाहत के उन दुस्‍ट आतमान के तुम साझीदार बनो। तुम पिरभू और दुस्‍ट आतमा दोनोंन के कटोरा में एक संग सामिल नांय है सकत। तुम पिरभू की मेज और दुस्‍ट आतमा की मेज दोनोंन मेंते एकई मेते खा सकत। का हम अपने पिरभू कूं गुस्सा दिबा रये हैं? का हम अपने पिरभू ते जादा सक्‍तीसाली है? जैसे कही है कै, “मैं सब कछू करबे काजै आजादऊं।” पर सब कछू भलाई काजै तौ नांय होत। “मैं कछू भी करबे काजै आजादऊं।” पर हर बात ते हमारौ भरोसौ मजबूत नांय होत। तुम में ते काऊऐ केबल अपनी अई भलाई नांय ढुढनी चहिऐं, पर दूसरेन कीऊ भलाई कौ ध्‍यान रखनों चहिऐं। बाजार में कसाई के य्हांपै जौ कछू बिकतै, बू सब कछु खाऔ और अपने बिबेक की वजह ते वाके बारे में कछू सबाल मत करौ। चौंकि पबित्र सास्त्र में लिखौ है कै, “धरती और धरती के ऊपर जौ कछू हतुए, बू पिरभू कोई है।” अगर तुमें कोई अबिसबासी भोजन पै बुलाबै और मांपै तुमें जानों परै तौ अपने बिबेक के मारे बिना सबाल जबाब करें खाऔ, जो तुमारे सामने परोसौ जाय। अगर कोई तुमें जि बतामें के, “जि मूरतीन के आगे चढ़ायौ भयौए,” तौ बताबे बारे और बिबेक के मारे बाय मत खाऔ। मेरौ मतलब तुमारे बिबेक ते नांय, पर बा दूसरे आदमी के बिबेक ते है। मेरी आजादी, दूसरे आदमी के बिबेक ते चौं परखौ जाबे? अगर मैं धन्यबाद करकें बा भोजन में साझी होतूं, तौ जा चीज के काजै मैं परमेस्‍वर कोई धन्यबाद देतूं, वाके काजै मैं दोसी चौं ठहरायौ जातूं? जामारै तुम जो कछू खाऔ पीऔ और जो कछू करौ सब कछू परमेस्‍वर की महिमा के काजै करौ। यहुदी, गैर यहुदिन काजै और परमेस्‍वर की कलिसिया के काजै पाप कौ कारन मत बनो। मैं खुद हरेक कूं खुस करबे को यतन करतूं, बिना जि सोचै कै, जामें मेरौ का फायदा है। पर मैं तौ जि सोचतूं कै भौतन कौ उद्धार होय। तुम लोग ऐसे चलौ, जैसे मैं मसीह के पीछे चलतूं, बैसेई तुमऊ मसीह के पीछे चलौ। मैं तुमारी बड़ाई करूं, चौंकि तुम मोय हर बात में याद करत रैहतो, और मैने जो पिरभू कौ वचन तुमें सिखायौऐ, तुम वाकौ साबधानी ते पालन कर रयेऔ। पर मैं जि चाहतूं कै, तुम जि जान लेओ कै औरत कौ सिर वाकौ आदमी है बैसेई मसीह हरेक आदमी कौ सिर है और मसीह कौ सिर परमेस्‍वर है। जो आदमी अपनों सिर ढांककें पिराथना करतै या परमेस्‍वर की ओर ते बोलतै, तौ बू अपने सिर मसीह कौ अपमान करतै। जो औरत उघारे सिर ते पिराथना करतै या लोगन में परमेस्‍वर की ओर ते बोलतै, तौ बू आदमी कौ अपमान करतै जो वाकौ सिर है। बू ऐसी औरत के जैसी है जाकौ सिर गंजौ कर दयौ हो। अगर कोई औरत अपनों सिर नांय ढांकत तौ बू अपनों सिर गंजौ करबा लेय। अगर बार कटबाबो और सिर गंजौ करबाबौ लज्‍जा की बात है तौ बाय अपनों सिर ढ़कनौ चहिऐं। पर आदमी कै काजै सिर ढांकबो सही नांय, चौंकि बू परमेस्‍वर कौ सरूप और महिमा है। पर औरत, आदमी की महिमा कूं दिखातै। चौंकि आदमी औरत ते नांय बनों, पर औरत आदमी ते बनी हैं। आदमी औरत के काजै नांय बनो, पर औरत आदमी कै काजै बनीऐ। जामारै परमेस्‍वर ने आदमी कूं जो अधिकार दयौए, बाय दिखाबे काजै औरत कूं अपनों सिर ढ़कनौ चंहिएं। बाय सुरग दूतन के मारैऊ ऐसौ करनों चहिऐं। फिरऊ पिरभू में ना तौ औरत बिना आदमी और ना आदमी बिना औरत के है। चौंकि आदमी ते औरत बनी है बैसेई औरत अब आदमी कूं जनम देतै, पर जि सब कछू परमेस्‍वर की ओर ते होतै। तुम खुद बिचार करौ। का औरत कूं उघारे सिर ते परमेस्‍वर ते पिराथना करबौ अच्‍छौ है? का तुम जि खुद नांय जानत के औरतन की तरैह ते लम्बे बार रखबो आदमी काजै लज्‍जा की बात है? एक औरत के काजै जि सोभा की बाते कै, परमेस्‍वर ने बाय ओढ़नी कै रूप में लम्बे बार दये है। अब अगर जाके बारे में कोई मोते बहस करबौ चाहे, तौ बू जि जान लैबे कै, ना तौ हमारे य्हां ऐसी रीतै और न परमेस्‍वर की कलिसिया में। पर मैं जि आग्‍या देते भये तुमारी बढ़ाई नांय कर रयो कै, तुमारौ कलिसिया में इकठ्‌ठौ हैबौ, तुमारी भलाई कै बजाय तुमारौ नुकसान कर रयौ है। चौंकि पैहली बात तौ जि है कै, मेरे सुनबे में आयौ है कै जब तुम लोग कलिसिया में इकठ्‌ठे होतौ तब तुम में आपस में फूट साफ दीखाई देतै। और कऊं तक मैं जा बात पै भरोसौ करतूं। पर तुमारे बीच में फूट पड़बौ जरूरिए, जो लोग खरे है बे सामने आ जामें। जामारै जब तुम लोग आपस में इकठ्‌ठे होतौ, तौ सच में तुम पिरभू भोज लैबे काजै नांय होत। चौंकि जब तुम भोजन करतौ तौ एक दूसरे ते पैहले अपनों भोजन खा लेतै, जाते कोई आदमी तौ भूंखौई चलौ जातै और कोई आदमी झिक्‍कै खा लेतै और कोई जरूरत ते जादा पीके मतबारौ है जाबै। का खायबे पीबे काजै तुमारौ घर नांय? जा तरैह ते तुम परमेस्‍वर की कलिसिया कौ अनादर करतौ। पर जिनके जौरे नांय हत, तुम बिनकी बेज्‍जिती करतौ। मैं तुमते का कहूं? जाके काजै का मैं तुमारी बड़ाई करूं? जा बारे में तुमारी बढ़ाई नांय करूंगो। चौंकि जो सीख मोय पिरभू ते मिली है, बुई सीख मैं तुमें लिख रयौऊं। जा रात पिरभू ईसू धोखे ते पकरबाये गये, बा रात पिरभू ने एक रोटी लयी, और परमेस्‍वर कौ धन्यबाद करकें बानें बू तोरी और कही, “जि मेरी देह हे, जो तुमारे काजै है। मोय याद करबे काजै तुम एसैई करै करौ।” जाई तरीका ते रोटी खायबे के बाद बानें कटोराऊ उठायो और कही, “जि कटौरा मेरे खून के द्वारा करी गयी नई बाचा है। जब कबऊ तुम जाय पियो, तौ मोय याद करबे काजै ऐसें करै करौ।” जितनी बैर तुम जा रोटी में ते खाबतौ और जा कटौरा मेंते पीबतौ, उतनी बेर जब तक पिरभू नांय आ जाय, वाकी मौत कौ पिरचार करौ। अगर कोई जा रोटी मेंते और कटौरा मेंते अनुचित रीती ते खाबत पीबते, तौ बू पिरभू की देह कौ और वाके लहू के बिरोध में पाप करतै। जामारै मनुस्‍य कूं चहिऐं कै, बू पैहले खुद कूं जांच लैबे और फिर जा रोटी में ते खाबे और जा कटोरे में ते पीबे। चौंकि जो पिरभू की देह कूं बिना समझे जा रोटी में ते खाबै और जा कटोरे मेंते पीतै तौ बू जा तरैह ते खा पीके अपनी देह पै परमेस्‍वर कौ दन्‍ड लातै। जामारै तुम मेंते कछू लोग कमजोर और बीमार है गये और कछू तौ मरऊ गये। पर अगर तुमनें पैहले खुद कूं जांच लयौ होतौ, तौ परमेस्‍वर कौ दन्‍ड नांय भोगनों परतो। पर पिरभू हमें सुधारबे काजै जि दन्‍ड देतै, जाते हम संसार के संग दोसी ना ठहराये जाबें। जामारै हे मेरे भईया बहनों, जब तुम पिरभू भोज काजै इकठ्‌ठे होतौ तौ एक दूसरे कौ इन्‍तजार करौ। अगर काऊऐ भूंख लगी होय, तौ बाय घर पैई खाय लैनौ चहिऐं, ताके तुमारौ इकठ्‌ठौ हैबो, तुमारे काजै दन्‍ड कौ कारन नांय बने। और दूसरी बातन कूं जब मैं आऊंगो तब सब सही करूंगो। हे मेरे भईया बहनों, मैं चाहतूं कै तुम लोग आतमिक बरदानन के बारे में जरूर जानों। तुम खुद जानतो कै जब तुम परमेस्‍वर कूं नांय मानते हते, तब तुमें गुँगी मूरतीन के पीछे जैसे चलायौ जातो, बैसेंई चलते। जामारै मैं चाहतूं कै, तुम जि समझ लेओ कै परमेस्‍वर की आतमा की ओर ते बोलबे बारौ कोई ना कैह सकत कै, “ईसू सापित है,” जाई तरैह ते बिना पबित्र आतमा के कोई नांय कैह सकत कै, “ईसू पिरभू है।” वरदान तौ अलग अलग है, पर बिनें दैवे बारौ एकई पबित्र आतमा हैं। सेबा तौ कई तरैह की है, पर सेबा तौ एकई पिरभू की है। काम तौ भौत तरैह के हैं, पर सबन के बीच में काम करबे बारौ परमेस्‍वर तौ एकई है। एक दूसरे की भलाई के काजै हम में ते हरेक कूं पबित्र आतमा कौ वरदान दयौ गयौ है। चौंकि काऊऐ पबित्र आतमा के द्वारा बुद्धी ते बोलबे की योग्‍यता दयी है, तौ काऊऐ बाई आतमा ने परमेस्‍वर के वचन कौ पिरचार करबे कौ ग्‍यान दयौ है। और काऊए बाई पबित्र आतमा के द्वारा भरोसे कौ वरदान दयौ है, तौ काऊ कूं बीमारन कूं ठीक करबे की सामर्थ दयी है। और काऊ कूं अचम्भे के काम करबे की सक्‍ती दयीऐ, तौ काऊ कूं परमेस्‍वर की ओर ते बोलबे की सामर्थ दयीऐ। काऊए आतमान कूं पैहचानबे की सामर्थ, तौ काऊए अलग अलग भासा बोलबे कौ वरदान मिलौ है और काऊ कूं अलग अलग भासान कौ अर्थ बतायबे कौ वरदान दयौ है। पर जि बैई पबित्र आतमा है, जौ सब काम करतै, बू अपनी इच्‍छा के अनुसार हरेक कूं अलग अलग वरदान देतै। जैसे हमारौ सरीर एक है पर वाके अलग अलग अंग हैं, फिरऊ तौ भौतसे अंगन ते मिलकै देह बनैं, बैसेई मसीह अऊ है। चौंकि हम चाहे यहुदी होंय या गैर यहुदी होंय, गुलाम होय या आजाद। हम सबन कूं एकई पबित्र आतमा के द्वारा एक देह हैबे काजै बपतिस्मा दयौए, और हम सबन के जीबन में एकई पबित्र आतमा बसबे काजै आयौ है। जामारै देह में एकई अंग नांय, पर अलग अलग भौत ते अंग हैं। अगर पांम कैहबे कै “मैं हात नांऊ, जामारै मेरौ देह ते कोई मतलब नांय,” तौ का बू देह कौ अंग नांय? जाई तरैह ते अगर कान कहे कै, “मैं आंख नांऊ, जामारै मैं देह कौ नांऊ,” तौ का बू देह कौ नांय रैहबेगौ? अगर एक आंख ही सबरी देह होतौ, तौ बू कैसे सुन सकतो? अगर सबरौ देह कानई होतौ, तौ सूंघौ कांते जाबतौ? पर परमेस्‍वर ने जा अंग कूं जैसौ ठीक समझौ बैसी जगैह देह में दयी। अगर देह के सबरे अंग एक जैसे होते तौ देह नांय होती। जामारै देह तौ एकईए, पर अंग अनेक हैं। आंख हात ते नांय कैह सकै कै, “मोय तेरी जरूरत नांय।” या एसेई सिर पांम ते नांय कैह सकत के, “मोय तेरी जरूरत नांय।” जाके बिपरीत देह के जो अंग कमजोर दीखतै, बे भौत जरूरी होत हैं। देह के जा अंग कूं हम दूसरेन कूं दिखाबो ठीक नांय समझत, बापै हम जादा ध्‍यान देतै और बाय हम ढककै रखतै। देह के दीखबे बारे अंग कूं ढकबे की जरूरत नांय, पर परमेस्‍वर ने सरीर कूं जा तरीका ते बनांयौए, के देह में ना दिखाबे बारे अंग और जादा आदर पामे। ताके देह में फूट नांय परै, जामारै देह कौ हरेक अंग एक दूसरे कौ ध्‍यान रखे। अगर देह के काऊ अंग में दरद होय, तौ देह के सबरे अंग दुखी होतये। अगर काऊ एक अंग कौ सम्मान मिलतै, तौ सबरे अंग खुसी होतै। जाई तरैह ते तुम सब लोग मिलकर मसीह की एक देह हो और तुम वाके अलग अलग अंग हो। परमेस्‍वर ने कलिसिया में अलग अलग पद दयौ है, पैहलौ पद भेजे भये चेला कूं और दूसरौ पद परमेस्‍वर की ओर ते बोलबे बारे कूं, तीसरौ पद सिछा दैबै बारेन कूं, चौथा पद अचम्भे के काम करबे बारेन कूं, पांचमों पद बीमारन कूं ठीक करबे बारन कूं, छटमों पद मदद करबे बारेन कूं, सातबों पद अगुबाई करबे बारेन कूं और आठमों पद अलग अलग भासा बोलबे बारेन कूं पद। का जे सब भेजे भये चेला है? सब परमेस्‍वर की ओर ते बात बतायबे बारे है? सब सिछा देबे बारे हैं? का अचम्भे के काम करबे बारे है? का इन सबन पै बीमारन कूं ठीक करबे की सामर्थ है? का जे सब अन्य भासा बोलतै? का इनें अन्य अन्य भासन कौ अर्थ बताबे कौ वरदान मिलौ है? तुम सबके सब आतमा और बड़े ते बड़ौ वरदान पायबे की कोसिस करते रहौ। पर अब मैं तुमें औरऊ सबते अच्‍छौ रस्ता बताऊंगौ। अगर मैं आदमी और सुरग दूतन की बोली बोलूं और पिरेम नांय करूं, तौ मैं ठनठनाती पीतर और झनझनाती झांझ हूं। अगर मैं भविस्‍यबानी करूं और मैं परमेस्‍वर के सबरे भेदन कूं जानूं और मेरौ भरोसौ इतनों होय कै, पहाड़ कूं सरकाय सकतूं और पिरेम नांय होय, तौ मैं कछू नांऊ। अगर मैं अपनी सबरी धन-दौलत गरीबन में बांट दूं और सुभ समाचार काजै मैं देह के सबरे अंगन कूं जरायबे काजै दैदूं और मैं पिरेम नांय करूं, तौ जाते मेरौ भलौ हैबे बारौ नांय। पिरेम में धीरज होतै, पिरेम दयालू है, पिरेम में डाह नांय होत, पिरेम अपनी बड़ाई खुद नांय करत। बू घमन्‍ड नांय करत। बू कबऊ गलत बौहार नांय करै, बू स्वार्थी नांय, पिरेम कबऊ झुझलाबत नांय, बू बुराई कौ कोई हिसाब नांय रखे। बू कुकर्म ते कबऊ खुस नांय होबे, पर बू तौ सच्‍चाई ते खुस होतै, और पिरेम सब कछू ढाँक देतै, और सब बातन पै भरोसौ करतै, और पिरेम में आसा पूरी होतै। बू सब सैहबे बारौऐ। भविस्‍यबानी की सामर्थ खतम है जाबैगी, अलग अलग भासा बोलबे बारेन कौ वरदान चलौ जाबेगौ, ग्‍यान कौ वरदान मिट जाबैगौ, पर पिरेम कौ कबऊ अन्‍त ना होबेगौ। चौंकि हमारौ ग्‍यान तौ अधूरौ है और हमारी भविस्‍यबानी पूरी नांय। पर जब पूरौ करबे बारौ आ जाबैगौ, तब बू सबरे अधूरेपन कूं खतम कर देगौ। जब मैं एक बालक हतौ, तब मैं एक बालक की तरैह बोलतौ और बैसेई सोचतौ और बाई तरैह ते समझतौ। पर अब जब मैं बड़ौ है गयौऊं तब बे सब बचपन की बात छोड़ दयीं। अबई तौ हमें सीसा में धूधरौ सौ चेहरा दीख रयौए, पर बा समै तौ परमेस्‍वर कूं आमने सामने देखिंगे। अबई तौ मेरौ ग्‍यान अधूरौ है पर समै आबे पै बू पूरौ है जाबैगौ। बैसेई जैसे परमेस्‍वर मोय पूरी तरैह ते जान गयौ है। पर अब भरोसौ, आसा, और पिरेम जे तीनों हमेसा बने भये हैं, पर इन तीनोंन में सबते महान पिरेम हैं। पिरेम के रस्ता में चलते रहो, और आतमिक वरदान की धुन में लगे रहौ। बिसेस रूप ते भविस्‍यबानी के वरदान की अभिलासा करो। चौंकि जाय अन्य भासा बोलबे कौ वरदान मिलौ है, बू लोगन ते नांय पर परमेस्‍वर ते बात करतुए। बाय कोई समझ नांय पाबत, चौंकि बू पबित्र आतमा में हैके भेद भरी बानी बोलतै। पर जिनकूं भविस्‍यबानी करबे कौ वरदान मिलौ है, बू लोगन की आतमिक बढ़ोत्‍तरी करतै, प्रोत्साहित और सान्‍ती की बातें करतै। जाय अलग अलग भासा बोलबे कौ वरदान मिलौ है, बू अपनी कूं मजबूत करतै। पर जो भविस्‍यबानी करै बू पूरी कलिसिया कूं आतमिकता में मजबूत करै। अब मैं जि चाहतूं कै, तुम सब अन्य भासाओं का वरदान मिलै, पर जाऊते जादा मैं जि चाहतूं कै तुमें भविस्‍यबानी कौ वरदान मिलै। चौंकि कलिसिया की आतमिक मजबूती के काजै अन्य भासा बोलबे बारे कौ अर्थ करबे बारौ कोई नांय हौ, तौ बाते का फायदा? जामारै परमेस्‍वर की ओर ते बोलबे बारौ जादा अच्‍छौ करतै। हे भईया बहनों, अगर में तुमारे जौरे आयकै अन्य अन्य भासा में बातैं करूं और मेरी बातन में ना तौ कोई नयी सच्‍चाई होबे, ना ग्‍यान होबे, ना भविस्‍यबानी, ना कोई सिछा, तौ जाते तुमारौ का फायदा? जि बोलबौ तौ ऐसें होगो जैसे बेजान चीज बांसुरी और सारंगी में ते धुन बज रयी होय। अगर बिनकी सुरों में आपस में कोई अन्‍तर नांय होय, तौ कोई कैसे पैहचान पाबेगौ कै, बांसुरी और सांरगी पै कौन सी धुन बज रयीए? अगर तुरही की अबाज साफ नांय होय तौ युध्द काजै को तैयार होगौ? जाई तरैह ते तुमंऊ अगर अपने मौंह ते साफ तरीका ते बात ना करौ तौ जो तुम कैह रयेऔ बाय लोग कैसे समझिंगे? तुमतौ हबा ते बात करबे बारेई ठहरौगे। जामें कोई सक नांय कै, दुनियां में अलग अलग भासाऐं हैं और उनमें कोई बिना अर्थ की नांय। अगर मैं काऊ भासा कौ अर्थ नांय जान्‍त, तौ मैं बोलबे बारे काजै परदेसीऊं और बू बोलबे बारौ मेरे काजै परदेसी है। तुमारे बारे मेंऊ जेई बात है। तुम लोग आतमिक वरदान ने पायबे की अभिलासा करतौ, जामारै तुम वरदानन में भरपूर हैबे की कोसिस करौं, जाते कलिसिया की आतमिक मजबूती बढ़े। जामारै जो अन्य भासा बोलतै बाय पिराथना करनी चहिऐं कै, बू वाकौ मतलबऊ बताय सकै। चौंकि अगर मैं अन्य भासा में पिराथना करूं, तौ मेरी आतमा तौ पिराथना करतै, पर मेरी समझ काम ना करैगी। तौ फिर का करनों चहिऐं? मैं अपनी आतमा ते तौ पिराथना करूंगोई, पर अपनी समझ तेऊ पिराथना करूंगो और मैं आतमा और समझ ते भजन गाऊंगो। अगर तुम अपनी आतमा ते अन्य भासा में स्तुति करौगे तौ म्हांपै बैठौ कोई आदमी जो सुन रयौए, बू कैसे ऐसौई होबे बोलेगौ, चौंकि बू तौ जानतुई नांय कै तुम का कैह रयेऔ? अब देख, तू तौ चाहे भली-भाँति धन्यबाद दै रयौ है, पर दूसरे लोगन कूं बाते कोई आतमिक मजबूती नांय मिलैगी। मैं परमेस्‍वर कौ धन्यबाद दै रयौऊं के मैं तुम सबनते जादा बार, अन्य भासा में बोलौऊ। पर अन्य भासा में दस हजार सबद बोलबे की बजाय, कलिसिया में अपनी समझ ते पांच सबद बोलबौ पसन्द करतूं, ताकि दूसरेन कूं सिछा दै सकूं। हे भईया बहनों, तुम समझ में बालक नांय बनो, तुम बुराई के बारे में तौ बालक की तरैह रहौ। पर अपने सोच बिचार में समझदार बन जाऔ। जैसौ व्‍यबस्था में लिखौऐ, “मैं अन्य भासा में बोलबे के द्वारा दूसरे परदेसी आदमिन के मौंह ते, लोगन ते बात करूंगो, पर तौऊं बे मेरी बात नांय सुनिंगे।” पिरभू ऐसेई कैहतै। जामारै अन्य भासा भरोसौ करबे बारेन के काजै चिन्‍न नांय, पर अबिसबासिन के काजै चिन्‍न के रूप में हैं। भविस्‍यबानी भरोसौ ना करबे बारेन के काजै चिन्‍न नांय, पर भरोसौ करबे बारेन के काजै चिन्‍न है। जामारै कलिसिया एक जगैह इकठ्‌ठी होय और सबके सब अन्य भासा बोलबे लगे, और बा समै अबिसबासी और इन बातन कूं ना जानबे बारे लोग भीतर आ जायें तौ का बे तुमें पागल नांय कहिंगे? पर अगर सब परमेस्‍वर की ओर ते बोलबे लगे, और तबई कोई अबिसबासी या इन बातन कूं ना जानबे बारे आदमी भीतर आ जाय तौ बिनकी बात बा आदमी कूं बताबेगी कै, बू पापी है और परमेस्‍वर बाय दन्‍ड दैबेगौ, अगर बू पाप के रस्ता ते अपनों मन ना फिराबेगौ। वाके भीतर छिपी भई बुरी बातै पिरगट है जाबिंगी, और बू मौंह के बल गिरकें परमेस्‍वर कूं दन्‍डबत करैगौ। और बू जि मान लैबेगौ कै, सचमुच परमेस्‍वर तुमारे बीच में रैहतै। जामारै है भईया बहनों, का करनों चहिऐं? जब तुम इकठ्‌ठे होतौ तौ कोई भजन सुनातै, कोई सिछा देतै, कोई अलग अलग भासा बोले और कोई वाकौ अर्थ बताबे कोई, दरसन बतातै। जि सब कछू आतमिक बढ़ोत्‍तरी के काजै हौनो चंहिए। अगर काऊऐ अन्य भासा में बोलनोंऐ तौ दो या तीन जने बारी बारी ते बोले और एक आदमी अर्थ बताबे। अगर अर्थ बतायबे बारौ आदमी कलिसिया में नांय होय, तौ अन्य भासा बोलबे बारौ चुप बैठे और अपने मन ते और परमेस्‍वर ते बात करै। परमेस्‍वर की ओर ते बात बतायबे बारे दो या तीन बोले और वाकी सब बिनके वचन कूं परखें। अगर बैठे भये काऊ एक पै परमेस्‍वर कौ दरसन पिरकट है जाबै, तौ परमेस्‍वर की ओर ते बोल रये पैहले आदमी कूं चुप है जानों चहीएं और जापै दरसन पिरकट भयौए बाए बोलबे कौ मौकौ देनों चहिऐं। चौंकि तुम सब लोग परमेस्‍वर की ओर ते बोल सकते पर तुम एक-एक करकें बोलो, जाते सबकूं सिछा और प्रोत्साहन मिले। परमेस्‍वर की ओर ते बात बतायबे बारेन की आतमा उनकेई बस में हैं। चौंकि परमेस्‍वर गड़बड़ी कौ परमेस्‍वर नांय, बल्कि सान्‍ती कौ परमेस्‍वर है। जैसे परमेस्‍वर के पबित्र लोगन की सब कलिसिया में होतै। कलिसिया में औरतन कूं मौन रहनों चहिऐं, चौंकि उन्‍नें बात करबे की आग्‍या नांय। बे अधीनता ते रैहबे, जैसौ व्‍यबस्था में लिखौ भयौ है। अगर कोई औरत सीखबौ चांहे, तौ बू अपने पती ते अपने घर में सीखैं, चौंकि कलिसिया में औरत के काजै बात करबौ अच्‍छौ नांय। का परमेस्‍वर कौ वचन तुम लोग के य्हांते फैलौऐ? या केवल तुमई तक पौहचौए? अगर कोई आदमी अपने आप कूं परमेस्‍वर की ओर ते बात बतायबे बारौ आतमिक आदमी समझै, तौ बू जि जान लेय, कै मैं जो तुमें लिख रयौऊं, बू पिरभू की आग्‍या हैं। पर अगर कोई जा सच्‍चाई कूं नांय माने, तौ तुमऊ बाय मत मानौ। जामारै हे भईया बहनों, परमेस्‍वर की ओर ते बोलबे की धुन में लगे रहौ, और काऊए अन्य भासा बोलबे ते मनें मत करौ। पर सब बात सही तरैह ते और सही सही किरम ते करी जामै। हे भईया बहनों, अब मैं तुमें बा सुभ समाचार के बारे याद दिबा रयौऊं, जाय मैं पैहले बताय चुकौऊं और बाय तुमने अपनांयौऊऐं, और जामें तुम मजबूत बनेऊ भयेऔ। अगर तुम बा सुभ समाचार कूं जो मैंनें तुमें सुनांयौ हतो बामें मजबूती के संग बने रहो तौ तुमारौ उद्धार होबेगौ। अगर तुम ऐसौ नांय करत तौ तुमारौ भरोसौ करबौ बेकार हैबेगो। जो मुख्य बात मोय मिली हती, मैंनें बू तुम लोगन तक पौंहचा दयी। बू जेई है कै पबित्र सास्त्र के वचन के अनुसार, मसीह हमारे पापन के काजै मारौ गयौ, और गाढ़ौ गयौ और पबित्र सास्त्र के अनुसार बू तीसरे दिना जी उठौ। बू पैहले पतरस कूं और बाद में बारैन कूं दीखाई दयौ। फिर पांच सौ ते जादा भरोसौ करबे बारे भईयन कूं एकई समै में दिखाई दयौ, जिनमें ते भौत ते तौ आजऊ जीन्दे हैं और कछू मर गये। फिर याकूब कूं और वाके बाद में सब भेजे भये चेलान कूं फिर दिखाई दयौ। आखरी में ईसू मोऊऐ दिखाई दयौ। मैं तौ अजीब तरैह ते भेजौ भयौ चेला बनोंऊं। चौंकि मैं तौ भेजे भये सब चेलान ते छोटौऊं। मैं भेजौ भयौ चेला कैहबे लायकऊ नांऊ, चौंकि मैने परमेस्‍वर की कलिसिया कूं सतायौ हतो। पर आज मैं जो कछू हतूं, परमेस्‍वर की किरपा ते हूं। वाकी किरपा मोपै भई है, बू किरपा बेकार नांय। पर मैंनें दूसरे भेजे भये चेलान ते बढ़ चढ़कें मेहनत करी है, बू मेहनत करबे बारौ मैं नांओ पर परमेस्‍वर की किरपा हती जो मेरे संग रैहती है। जामारै चाहे बे होंय या मैं होऊं, हम सब बाई पिरचार कूं करतैं, जापै हमनें और तुमनें भरोसौ करौ है। हम मसीह कौ जि पिरचार करतै कै, बू मरे भयेन में ते जी उठौ, पर तुम में ते कछू लोगन कौ जि मानबौए के मरबे के बाद जी उठिबौ हतुई नांय। अगर मरे भयेन नें फिर ते जीबित नांय करौ जा सकत, तौ मसीह कूंअऊं जीन्दौ नांय करौ गयौ। अगर मसीह जीबित नांय भयौ, तौ हमारौ पिरचार करबौ बेकार है, और तुमारौ भरोसौऊ बैकारै। तब हमऊ परमेस्‍वर के झूंठे गबाह ठहरतै। चौंकि हमनें परमेस्‍वर के बारे में जि गबाही दयीऐ कै, बानें मसीह कूं मरे भयेन मेंते जीबित करौऐ। अगर मरे भये जीन्दे नांय करे जाते तौ परमेस्‍वर नें मसीह कूअऊं जीबित नांय करौ। चौंकि अगर मरे भये जीन्दे नांय करे जाते तौ मसीह अऊ नांय जी उठौ। अगर मसीह जी नांय उठौ, तौ तुम लोगन कौ भरोसौ करबौ बेकार है, और तुम अब तक अपने पापन में परे भयेऔ। फिर तौ, जो लोग मसीह में भरोसौ करते भये मरे हैं, बेऊ नांस भए हैं। अगर मसीह पै हमारी आसा जाई जीबन तक है, तौ हम सब लोगन में सबनते जादा अभागे हैं। पर सच मुच मसीह मरे भयेन मेंते जी उठौ। जो लोग मर गये हैं बिनमें ते बू सबनते पैहले जी उठौ है। चौंकि जब एक आदमी द्वारा मौत आई, तौ आदमी के द्वाराई मरे भयेन कौ दुबारा जीबन आयौ। चौंकि ठीक बैसेई जैसे आदम के काम की वजैह ते सबन के काजै मौत आयी, बैसेई मसीह के काम की बजैह ते मौत ते जी उठिबौ सबन काजै होबेगौ। जाई तरैह ते हम सबकी बारी आबेगी, सबते पैहले मसीह कूं मरे भयेन में ते जीबित करौ हतौ, बैसेई मसीह के फिर ते आयबे पै बू लोग जीन्दे करे जांगे जो मसीह के लोग हैं। जाके बाद जब मसीह सब राज करबे बारे और सबरे अधिकार और हर तरैह की सक्‍तीन कौ अन्‍त करकें राज कूं परमेस्‍वर पिता के हातन में सौंप देगौ। तब अन्‍त आ जाबेगौ। चौंकि जब तक परमेस्‍वर सब बैरिन कूं वाके पामन के नीचै नांय करदे, तब तक मसीह कौ राज करबौ जरूरीये। सबते आखरी बैरी, जो नांस करौ जाबैगौ, बू मौत है। चौंकि “परमेस्‍वर ने सब कछू वाके पामन के नीचे कर दयौए।” पर जब सास्त्र जि कैहतै कै, “सब कछू वाके अधीन कर दयौए।” तौ जि साफ है कै, परमेस्‍वर जाने सब कछू मसीह के अधीन करौए, पर वा सब में परमेस्‍वर नांय। जब सब कछू बेटा के अधीन कर दयौ गयौ है, तब बेटाऊ खुद बा परमेस्‍वर के अधीन है जाबैगौ। जानें सब कछू बेटा के अधीन कर दयौ, ताके हर काऊ पै पूरी तरैह परमेस्‍वर कौ राज हो। अगर जी उठबो हैई नांय, तौ बिन लोगन कौ का, जो मरे भयेन के काजै बपतिस्मा लेतै? अगर मरे भयेन कौ दुबारा ते जी उठिबौ बिलकुल नांय होतौ तौ मरे भयेन के काजै बपतिस्मा चौं लयौ जातो? मरे भयेन कौ जी उठबो हैई नांय, तौ फिर हम चौं खुद हरेक समै मुसीबतन कौ सामनो करत रैहतै? हे मेरे भईया बहनों, तुम हमारे पिरभू ईसू मसीह में बने भये हो, जामारै मैं तुम पै घमन्‍ड करतूं, जि बात जितनी सच्‍ची है, उतनी जेऊ सच्‍ची है कै, “मोय वाकी बजैह ते रोजाना मौत कौ सामनो करनों परतै।” इफिसुस नगर में मैं जंगली जानबरन जैसे लोगन ते लड़ौ हतो, तौ मोय जाते का फायदा भयौ? मरे भयेन कौ जी ऊठबौ नांय हत, जैसे कै कछू लोग कैहतै कै, “आऔ हम खामें और पीमें, चौंकि एक दिना तौ हमकूं मरनोंईए।” धोके में मत रहौ। बुरी संगती ते अच्‍छे अच्‍छे लोगन कौ चरित्र नस्‍ट है जाबतै। होस में आ जाऔ, अच्‍छौ जीबन जीऔ, जैसौ कै तुम में होनों चहिऐं। सही तौ जि है कै पाप करबौ छोड़ देऊ। चौंकि तुम में कछू लोग तौ परमेस्‍वर के बारे में जान्‍तई नांय। मैं तुमें सरमिन्दा करबे काजै जि कैह रयौ। अब कोई जि सबाल पूछ सकतै कै, “मरे भये कैसे जी उठतै और बे बाद में कौन सौ सरीर लैके आबतै?” मूर्ख मत बनो, तुम जो बीज बोबतौ, बू तब तक नांय उपजैगौ। जब तक बू मर नांय जात। जो तुम बोबतौ, जि बू देह नांय जो पैदा हैबे बारी है, पर बू तौ दानोंऐ चांहे, बू गेंहू कौ होय या काऊ और कौ होय। पर परमेस्‍वर अपनी इच्‍छा के अनुसार सबन्‍ने सरीर देतुए, हरेक दाने कौ वाकौ अपना सरीर देतै सबरे सरीर एक जैसे नांय होत। इन्सानन कै सरीर अलग हैं, और जानबरन के सरीर अलग हैं, पच्‍छीन के सरीर अलग हैं, और मछलीन के सरीर अलग हैं। कछू सरीर सुरगीय होतै और धरती केऊ सरीर होतै, पर सुरगीय सरीर कौ तेज अलग तरैह कौ है, धरती की सरीर कौ कछू अलग है। एसेईं सूरज, चन्दा और तारेन कौ तेज अलग अलग है, य्हां तक कै एक तारे ते दूसरे तारे कौ तेज अलग है। मरे भयेन कौ जी उठबोऊ एसौई होगौ। जो सरीर गाढ़ौ गयौ है बू नांसबान है और जो सरीर जी उठौऐ बू अबिनासी है। जो सरीर धरती में गाढ़ौ गयौ है कमजोर और बिना आदर कौ है पर बू सरीर जो बापस जीबित भयौ है। बू सामर्थीऔर महिमामय है। सांसारिक सरीर बोयौ जाबे और आतमिक सरीर जी उठतै। जब सांसारिक देह है, तौ आतमिक सरीरऊ है। पबित्र सास्त्र में जि लिखीए कै, “पैहलौ आदमी, आदम के रूप में जीबित पिरानी बनो।” और आखरी आदम जो मसीह है, जीबन दैबे बारौ आतमा बनों। पैहले आतमिक सरीर नांय मिलत, पर सांसारिक सरीर मिलतै, जाके बादई आतमिक सरीर मिलतै। पैहलौ आदमी धरती कौ हतो, मतलब बू मट्‍टी को बनों हतौ। दूसरौ आदमी मसीह सुरग ते है। मट्‍टी ते बने भये लोग मट्‍टी ते बने आदम के जैसे है। बैसेई सुरगीय लोग सुरग ते आये मसीह जैसे हैं। जा तरैह हमनें मट्‍टी के बने आदम कौ रूप धारन करौ है, बाई तरैह ते हम सुरग के आदमी मसीह कौ सौ रूप धारन करिंगे। हे भईया बहनों, मैं तुमते जि कैहबौ चाहतूं कै, सांसारिक सरीर मांस और खून ते बनों है जो परमेस्‍वर के राज कौ बारिस नांय है सकत। ना नांसबान कबऊ अबिनासी कौ बारिस है सकत। देखौ, मैं तुमें भेद की बात बताबतूं कै, “हम सब तौ नांय मरेंगे, पर हम सबकौ रूप बदल जामिंगे। जि पल भर में, पलक झपकतेई आखरी तुरई बजतेई होगौ चौंकि अखीरी तुरही बजतेई मरे भये अबिनासी हैके उठाये जाबेंगे और हमारौ रूप बदल जाबैगौ। चौंकि जरूरी है कै, जि नांसबान सरीर, अबिनासी सरीर कूं पहन लैवे और मरबे बारे, अमर सरीर कूं पहन लैवे। जब जि नांसबान सरीर अबिनासी सरीर कूं पहन लैबेगौ और जि मरबे बारौ सरीर अमर सरीर कूं पहन लेगौ। तब पबित्र सास्त्र कौ लिखौ भयौ जि वचन पूरौ है जाबैगौ, “मौत कूं बिजय नें निगल लयौ। हे मौत, तेरी जीत कां रही? हे मौत, तेरौ डंक काँ है?” मौत कौ डंक तौ पाप है, और पाप कौ बल है व्‍यबस्था हमें बतातै कै हमनें पाप करौ है। पर परमेस्‍वर को धन्यबाद होय, जो पिरभू ईसू मसीह के द्वारा हमें पाप और मौत पै जीत दिलबातै। जामारै हे मेरे प्यारे भईया बहनों, तुम अटल और मजबूत बने रहौ और जि जानिकें कै पिरभू के काजै तुमारी मेहनत बेकार नांय, तुम पूरी तरैह ते पिरभू के काम करते रहौ। अब देखौ, यहुदिया पिरदेस के पबित्र लोगन के काजै दान इकठ्‌ठी करौ, जैसी आग्‍या मैने गलातिया की कलिसियान कूं दयी हती, अब तुमऊं वेसौई करौ। तुम हरेक इतबार कूं अपनी कमाई में ते कछू न कछू बचायकै इकठ्‌ठौ रखो, जाते मैं जब तुमारे जौरे आऊं तौ बा समै तुमें दान इकठ्‌ठौ नांय करनों परैगौ। जब मैं आऊंगौ, तौ जिन्‍ने तुम चाहोगे उनकूं मैं चिठ्‌ठी दुंगो और बे तुमारौ दान येरूसलेम सहर में पौहचाय दिंगे। अगर मेरौ जायबौ जरूरी भयौ तौ, बे मेरे संगई चले जाबिंगे। मैं मकिदुनियां होतौ भयौ तुमारे जौरे आऊंगो चौंकि मोय मकिदुनियां जानोंऊ है। अगर है सकौ तौ मैं तुमारे य्हांपै कछू दिना तक रहुंगो और सायद जाड़ेऊ तुमारे य्हां काटूं। फिर मोय ज्हां कऊं जानों होगो, तौ तुम मेरे काजै मांपै जाबे कौ इन्‍तजाम कर सकौ। मैं अबकी बेर तुमते यात्रा करते भये बस मिलबौई नांय चांहत, पर मोय आसा है कै अगर पिरभू ने चाही तौ मैं कछू समै तुमारे संग रहुंगो। पर पेन्‍तेकुस के तौहार तक मैं य्हां इफिसुस मेंईं रहुंगो। चौंकि य्हांपै मेरे काम के काजै एक बड़ौ और फायदेमन्द द्वार खुलौ है और मांपै मेरे भौत ते बिरोधऊएं। जब तिमुथी तुमारे जौरे आबेगौ तौ तुम वाकौ खयाल रखियों कै, बू तुमारे य्हां बिना चिन्‍ता के रहे, चौंकि बेऊ मेरी तरैह पिरभू कौ काम कर रयौ है। जामारै कोई बाय छोटो नांय समझे, बाय वाकी यात्रा में सान्‍ती के संग बिदा करियों, ताके बू मेरे जौरे आ जाय। मैं दूसरे बिसबासी भईयन के संग वाकौ इन्‍तजार कर रयौऊं। हमारे बिसबासी भईया अपुल्‍लोस ते मैने भौत बिनती करी कै, बू तुमारे ज्हां जाबै पर बू अब एक दम जायबौ नांय चाहत। जामारै जब बाय मौकौ मिलैगौ तब बू आ जाबेगौ। चौकस रहौ। भरोसे में मजबूती के संग अटल बने रहौ। साहसी और सामर्थी बनो। तुम जो कछू करौ बू सब कछू पिरेम के संग करो। हे मेरे भईयाओ, तुम लोग स्तिफनुस के परिबार के बारे में तौ जानतो के बे लोग अखाया पिरदेस में सबते पैहले भरोसौ करबे बारे हैं। उन्‍नें परमेस्‍वर के पबित्र लोगन की सेबा करबे कौ बीड़ा उठायौऐ। जामारै मैं तुमते बिनती करतूं कै, तुम ऐसे लोगन के अधीन रहें, और हरेक के जो जा काम में लगे भयेऐं मेहनत करतै। स्तिफनुस, फुरतुनातुस और अखइकुस के आयबे ते मैं भौत खुसऊं, चौंकि उन्‍नें मेरे काजै जो तुम नांय कर सके बू कर दिखायौ है। उन्‍नें मेरी और तुमारी आतमा कूं चैन दयौए, जामारै तुम ऐसे लोगन कौ आदर करौ। आसिया की ओर ते तुम सबन कूं पिरभू में नमस्‍कार। अक्‍बिला और प्रिसकिल्‍ला का और उनके घर की कलिसिया कूं भौत भौत नमस्‍कार। य्हांके हम सब भईयन तुमें पिरेम के संग नमस्‍कार कहतै। पबित्रता के संग एक दूसरे के गले लगके नमस्‍कार किया करौ। मैं, पौलुस, खुद अपने हातन ते तुमकूं नमस्‍कार लिख रयौऊं। अगर कोई पिरभू ते पिरेम नांय रखे तौ बू सापित होगौ। हे पिरभू, आऔ। पिरभू ईसू की किरपा तुमें मिले। ईसू मसीह में मेरौ पिरेम तुमारे सबके संग रहे। मैं, पौलुस, परमेस्‍वर की इच्‍छा के अनुसार ईसू मसीह कौ भेजौ भयौ चेला, और भईया तिमुथी जि चिठ्‌ठी कुरिन्थियुस सहर की कलिसिया कूं और अखाया नगर में रैहबे बारे सब परमेस्‍वर के पबित्र लोगन के काजै लिख रये हैं। हमारे पिता परमेस्‍वर और पिरभू ईसू मसीह की ओर ते तुमें किरपा और सान्‍ती मिले। हमारे पिरभू ईसू मसीह कौ पिता दया करबे बारौ और तसल्‍ली दैवे बारौ परमेस्‍वर धन्य है। बू सब दुख तकलीफ में हमकूं तसल्‍ली देतुए। परमेस्‍वर ने हमें जो तसल्‍ली दयी है, वाके द्वारा हमऊं सब दुख तकलीफन में परे भये लोगन कूं तसल्‍ली दै सकें। चौंकि जा तरैह ते हम मसीह के भौत दुखन में सहभागी भये हैं, बैसेऊं मसीह के द्वारा परमेस्‍वर की तसल्‍ली मेंऊ सहभागी भये हैं। अगर हम सताये जातै, तौ जि तुमारे काजै तसल्‍ली और उद्धार की बातै। अगर हमें तसल्‍ली मिलतै, तौ जि तुमारे तसल्‍ली के काजै है, बाई ते तुम धीरज के संग बा दुख कूं सह लेतौ जाय हमऊ सह तै। तुमारे बारे में हमारी आसा मजबूत है, चौंकि हम जानतैं कै जैसे तुम हमारे दुखन में सामिल हो, बैसेई तुम हमारी तसल्‍ली मेंऊ सामिल हो। हे भईया बहनों, हम जि चांहते कै तुम उन कस्‍टन के बारे में जान जाऔ जो हमें आसिया में झेलने परे हते। जि कस्‍ट भौत जादा हते और हमारे सैहबे की सक्‍ती ते बाहर हते, ज्हां तक कै हमनें जीबित रैहबे की आसऊ छोड़ दयी हती। सचमुच हमनें तौ अपने मन में मान लयौ हतो कै, अब तौ हमे मौत की सजा दयी जाय चुकीऐ, जामारै हम अपने ऊपर भरोसौ न करकें केवल परमेस्‍वर पै भरोसौ करें, जो मरे भयेन नेऊं जीबित कर देतै। परमेस्‍वर नेंई हमे भयानक मौत ते बचायौ और बचाबत रैहतै। हमारी आसा बाई पै है कै आबे बारे समै में बुई हमकूं बचाबत रैहबेगौ। तुमऊ मिलके पिराथना के द्वारा हमारी मदद करौ कै, परमेस्‍वर आबे बारी समस्‍यान ते हमें बचाबै। परमेस्‍वर ने हमें बचायौऐ जाते भौत ते लोगन कूं मौका मिलौऐ कै, बे हमारी ओर ते परमेस्‍वर कौ धन्यबाद करें। हम जा बात कूं घमन्ड के संग सच्‍चे मन ते कैह सकते कै, हमनें जा दुनियां के संग और खास करकें तुमारे संग परमेस्‍वर की किरपा के अनुसार ही बौहार करौए। हमनें सीधे और सच्‍चे मन के संग बौहार करौए, जो हमे परमेस्‍वर ते मिलतिए, जा दुनियां की बुध्दी ते नांय। हम तुमारे काजै जो चिठ्‌ठी लिख रये हैं, बामें ऐसी कोई बात नांय, जाय पढ़कै तुम समझ नांय सकत। मोय आसा है, तुम जो बात अब पूरी तरैह ते नांय समझते, बाय बाद में पूरी तरैह ते समझ लेओगे और बू बात जि है कै, जा तरैह ते तुम पिरभू ईसू के फिर ते आबे बारे दिन में, हम पै घमन्‍ड करौगे, बाई तरैह ते हमऊ तुम लोगन पै घमन्‍ड करेंगे। जाई भरोसे की बजैह ते मैंनें तुमारे जौरे दो बार आयबे की ठानी है जाते तुमें दो बार आसीरबाद मिले। मैं जि सोचतूं कै, मकिदुनियां कूं जाबत भये तुमते मिलूं और जब मकिदुनियां ते लौटूं तौ फिर तुमारे जौरे जाऊं, और फिर तुमईं मेरे काजै यहुदिया पिरदेस जाबे कौ इन्‍तजाम करौ। मैने जब जि योजना बनाई हती, तब मोय कोई संसय नांय हती। जो योजना मैने बनाई हती, जा दुनियां के लोगन की तरैह ते नांय बनाई हती, एकई समै में “हाँ” “हाँ” ऊं कैहत रहूं और फिर “ना” “ना” ऊं करत रहूं। जा तरैह ते परमेस्‍वर भरोसे योग्‍य है और बेई जा बात की गबाही देगौ के, हमनें तुमारे जौरे जो वचन पहुंचायौ है बामें एक संग “हाँ” और “ना” दोनों नांय मिलती। चौंकि सिलबानुस, तिमुथियुस और मैने, तुमारे बीच में परमेस्‍वर के बेटा, ईसू मसीह, के वचन कौ पिरचार करौऐ। बामें “हाँ” और “ना” दोनों नांय हते। ईसू मसीह में केवल “हाँ” ही होतै। चौंकि परमेस्‍वर ने जो सब प्रतिग्‍या करीऐ, बू ईसू में “हाँ” में पाई जातै। जामारै बाई के द्वारा हम परमेस्‍वर की महिमा के काजै “ऐसौई होबे ” कैहतै। परमेस्‍वरई है, जो हमें तुमारे संग मसीह में मजबूत बनांये रखतै और बाई ने हमारौ अभिसेक करौ है। बाई परमेस्‍वर नें हमारे ऊपर जि मौहर लगाईऐ कै, हमारौ बू स्‍वामी है। बाईनें हमें हमारे हिरदय में अपनी पबित्र आतमा दयौ है, जो जा बात कौ सबूत है कै, बू हमें बे सब आसीरबाद दैबेगौ, जिनें दैवे कौ बानें बादा करौ है। मैं परमेस्‍वर कूं गबाह ठहराकै कैहतूं कै, अब तक मैं दुबारा कुरिन्थियुस जामारै नांय आयौ कै, मैं तुम लोगन कूं दुख दैबौ नांय चांहतो। जाकौ मतलब जि नांय के हम तुमारे मालिक है, जाते कै हम तुमते कैहबे कै, तुमारौ भरोसौ कैसौ है। पर हम तौ तुमारी खुसी कै काजै तुमारे संग हैं चौंकि तुम लोग भरोसे मेंई मजबूत रैहतो। जामारै मैने जि फैसला करौऐ कै फिर दुबारा तुमें दुख दैबे तुमारे जौरे नांय आऊंगौ। चौंकि अगर मैं तुमें दुख देतूं, तौ को मोय सुख कर सकतै? केवल बुई जाय मैंनें दुखी करौ है। जेई बात मैने तुमारे काजै बा चिठ्‌ठी में लिखीं हती कै, जब मैं तुमारे जौरे आऊं तौ जिनते मोय आनन्द मिलनौ चहिऐं, बेई मोय दुखी करै। चौंकि मेरौ तुम सब लोगन में जि भरोसौ रहोऐ के मेरी खुसी में तुम खुस रहो। मैने तुमारे काजै दुख भरे भये मन ते और दरद के संग आँसू बहाय बहायकै लिखौ हतो। पर बू मैंनें तुमें दुख दैबे काजै नांय, पर जामारै लिखौ कै, तुम जि जान सकौ कै तुमारे काजै जो मेरौ पिरेम है, बू कितनौ जादा है। अगर काऊनें मोय दुख दयौ है, तौऊं मैं वाके संग कड़ाई नांय कर रयौ चौंकि बानें मोय नांय पर थोरौ भौत तुम सबन कूंअऊं दुख दयौ है। ऐसे आदमी कूं तुम भरोसौ करबे बारे भईयन में ते जो सजा दयीऐ, बैई भौत है। जामारै तुम बाय छमा करके तसल्‍ली देऔ। ताकि बू आदमी भौत जादा निरासा में ना डूब जाबै। जामारै मैं तुमते जि बिनती करतूं कै तुम वाके काजै अपने पिरेम कौ सबूत देऔ। जि मैने तुमारी परीछा लैवे के उद्‍देस्‍य तेऊ लिखौ हतो। मैं जि जानबो चाहतो कै तुम सब बातन में आग्‍याकारी हतो कै नांय। अगर काऊ की बात के काजै तुम काऊए मांफ करतौ, तौ बाय मेंऊ मांफ करतूं और जो कछू मैने छमा करौए तौ बुअउ मसीह की मौजूदगी में तुमारे काजेई करौ है, ताकि हम सैतान ते मात ना खा जांय। चौंकि वाकी चालन ते हम अनजान नांय। जब मैं मसीह के सुभ समाचार कूं पिरचार करबे काजै त्रोआस में आयौ हतो तब मेरे काजै मांपै पिरभू कौ द्वार खुलौ भयौ हतो। मेरौ मन भौत ब्याकुल हतो चौंकि मोय मांपै भईया तीतुस नांय मिलौ। जामारै मांके लोगन ते बिदा हैके मकिदुनियां पिरदेस कूं चल परौ। पर परमेस्‍वर तौ धन्य है जो मसीह के द्वारा जीत की खुसी में हमे हमेसा रस्ता दिखाबतै। हमारे द्वारा हरेक जगैह पै अपने नाम के ग्‍यान की खुसबू फैलाबतै। चौंकि अब जो उद्धार की रस्ता पै हते और उनके काजै जो नांस के रस्ता पै हतै, दोनोंन के काजै हम परमेस्‍वर कै काजै चढ़ाई भई मसीह की मीठी और भीनी खुसबूदार धूप जैसे है। पर उनके काजै जो नांस के रस्ता पै चल रये हैं, जि मौत की ऐसी बदबूऐ जो मौत की और खेंच लै जातै। पर उनके काजै जो उद्धार के रस्ता पै चल रये है, जीबन की ऐसी खुसबूए जौ जीबन के काजै आगे बढ़ाबतै। इन बातन के काजै भलौ हकदार कोऐ? हम बिन भौत ते दूसरे लोग की तरैह ते नांय, जो परमेस्‍वर के वचन में अपने फायदा कै काजै, मिलाबट करतै। हम तौ परमेस्‍वर की ओर ते भेजे भये लोगन के समान, परमेस्‍वर के सामने मसीह में मजबूत हैकें सच्‍चाई के संग पिरचार करतै। का हमनें फिर अपनी बड़ाई करनीं सुरू कर दयी है? या हमे भौतन की तरैह ते सिफारिस की चिठ्ठी तुमारे जौरे लानी और तुमते लेनींऐं? हमारी चिठ्ठी तौ तुमईंयों, जो हमारे हृदय पै लिखी भई है, और बाईऐ सब लोग पढ़तैं और पैहचानतैं। जि उजागरै, कै तुम मसीह की लिखी चिठ्ठी हो, जो हमारी सेबा कौ परिणाम है और जाय स्‍याही ते नांय पर जीबते, परमेस्‍वर की पबित्र आतमा ते पत्‍थर की पटियन पै नांय, पर हृदय की मांस रूपी पटियन पै लिखौए। हम जि दाबा जामारै कर सकतै चौंकि मसीह के द्वारा परमेस्‍वर पै ऐसौई भरोसौए। जि नांय कै, हम खुदई जा लायक हैं कै अपनी ओर ते काऊ बात कौ बिचार कर सकें, पर हमारी योग्‍यता तौ परमेस्‍वर की ओर ते है। बानें हमे नई बाचा कै सेबक बनबे योग्‍य ठहरायौए। जि कोई लिखी भई व्‍यबस्था नांय, पर पबित्र आतमा की बाचा है। चौंकि लिखी भई व्‍यबस्था तौ मौत लातै, जबकि पबित्र आतमा जीबन देतै। बा व्‍यबस्था के सेबा काम जो पत्‍थर पर खोद के लिखे गये हते, जो मौत लाती हती, बू इतनी तेजोमय भयी हती, मूसा कै मौंह के तेज की बजैह ते इसरायली लोग वाके मौंह कूं निगाह करके नांय देख सके और वाकौ जि तेज बाद में खतम है गयौ। अगर पत्‍थर पै लिखी भई व्‍यबस्था इतनी तेजोमय भयी, तौ जीबन लाबे बारी पबित्र आतमा की व्‍यबस्था के सेबा काम और जादा तेज ते भरी चौं नांय होगी? अगर दोसी ठहरायबे बारी व्‍यबस्था के सेबा काम इतने तेजोमय हते, तौ धरमी ठहरायबे बारी व्‍यबस्था के सेबा काम और जादा तेज ते भरी चौं नांय होगी? नयी व्‍यबस्था की भव्‍य महिमा के आगे पुरानी व्‍यबस्था की महिमा कछु नांय। चौंकि जब तेजोमय की चमक घटत जाबतै, तब हमेसा टिके रैहबो बारौ तेजोमय डटौ रैहबेगौ और जादा तेजोमय चौं नांय होबेगो? अपनी जाई आसा की बजैह ते हम बिना डर ते बोलतें। हम मूसा की नाईं नांय, जाने अपने मौंह पै परदा डारौ हतो, जाते इसरायली बा खतम हैबे बारे तेज कूं नांय देख सकै। पर इसरायलीन की बुद्धि बन्द है गयी हती, चौंकि आजऊ जब पुरानी व्‍यबस्था कूं पढ़कै सुनांयौ जातै बा समै बुई परदा उनके हृदय पै परदा परौ रैहतो। चौंकि बू परदा केवल मसीह मेंई हट सकतै। आज तक जब कबऊ मूसा की व्‍यबस्था पढ़कै सुनांयौ जात, तौ बिनके हृदय पै बू परदा परौ रैहतै। पर जब बिनकौ हृदय पिरभू कै माऊं फिरैगौ, तौ उनके हृदय कौ बू परदा हटा दयौ जाबेगौ। चौंकि पिरभू तौ आतमांऐं और जहां कऊं पिरभू कौ आतमांऐं मांपै आजादीए। जामारै हमारे मौंह पै परदा नांय। हमारे बिना परदा के मौंह पिरभू के तेज कूं दिखातै। पिरभू के द्वारा जो आतमा दयौ है, हम बाई के महिमामय रूप में थोरे थोरे करकें बदलते जा रये हैं। चौंकि जब हम पै ऐसी दया भयी, कै हमे जि सेबा मिली, तौ हम हार नांय मान्‍त। पर हमनें लज्‍जा के छिपे भये कामन कूं त्‍याग दयौए। ना तौ हम चुतराई ते चलतै और ना परमेस्‍वर के वचन में मिलाबट करतै। पर हरेक आदमी पै सच्‍चाई कूं पिरगट करके परमेस्‍वर के सामने आदमी के समझ में अपनी भलाई बैठातै। जा सुभ समाचार कौ हम पिरचार करतै बापै अगर परदा परौए तौ जि केवल बिन लोगन के काजै है जो नांस है रये है। जा संसार के देबता सैतान नें अबिसबासिन के मन में इतनों अन्धेरौ कर दयौ है कै, बे परमेस्‍वर के स्‍वरूप मसीह के महिमा के सुभ समाचार कौ प्रकास नांय देख पा रये हैं। चौंकि हम अपनों नांय पर मसीह ईसू कौ पिरचार करतें कै, बैई पिरभू है और वाके बारे में जि कैहते कै, हम ईसू की बजैह ते तुमारे सेबक है। जामारै परमेस्‍वर ही है, जाने कही है कै, “अंधेरे में ते उजीतौ है जाबे।” बाईनें हमारे हिरदयन में अपने उजाले कूं चमकायौ है, जाते हम ईसू मसीह में परमेस्‍वर की महिमा के ग्‍यान कौ तेज देख पाबै। पर हम जैसे मट्‍टी के बासनान में जि आतमिक धन रखौ भयौऐ, जाते जि मालूम पड़ जाबै कै, जि असीम सामर्थ हमारे मांऊते नांय, पर परमेस्‍वर की ओर ते है। हम चारौ ओर ते कठिन दबाब रैहतै पर हम कुचले नांय जात। हम घबराते तौ हैं पर निरास नांय होत। हम सताये तौ जामै पर त्‍यागे नांय जामें, गिराये तौ जातै पर नांस नांय होमें। हम हर समै अपने सरीर में ईसू की मौत कूं लये फिरतै, जाते ईसू कौ जीबनऊ हमारे सरीरन में पिरगट होय। चौंकि हमें जीबित रैहते भये ईसू की बजैह ते मौत के हात में दै दये जाबते कै, ईसू को जीबन हमारे मरबे बारे सरीरन में पिरगट होतौ रैहबे। जा तरैह ते हम तौ मौत कौ सामनों करत रैहतै। पर तुमें आतमिक जीबन कौ लाभ होतै। जामारै हम में बाई भरोसे की आतमाये। जाके बारे में पबित्र सास्त्र में लिखौ है कै, “मैने भरोसौ करौ, जामारै मैं बोलौ, हमऊ भरोसौ करते जाईमारै बोलतै।” चौंकि हम जानतें कै, जाने पिरभू ईसू कूं जीबित करौऐ, बैई ईसू में हमकूं जीबित करैगौ और तुमारे संग हमेंऊ अपने सामने खड़ौ करैगौ। सब कछू तुम लोगन की भलाई काजै है रयौ है, ताकि जा तरैह ते परमेस्‍वर की किरपा भौत लोगन तक बढ़ती जातै, बाई तरैह ते परमेस्‍वर की महिमा के काजै धन्यबाद की पिराथना करबे बारेन की गिनती बढ़ती जातै। जामारै हम हिम्मत नांय हारत। हमारौ बाहरी मानबीय सरीर कमजोर होतौ जा रयौ है, तौऊं हमारौ भीतरी जीबन दिन प्रतिदिन मजबूत होतौ जा रयौ है। चौंकि हमारौ छड़ भर कौ कलेस हमारे काजै कबऊ नांय खतम हैबे बारी महिमा कूं लैके आतै, जाकी तुलना काऊ ते नांय करी जा सकत। चौंकि हम देखी भई चीजन कौ नांय पर अनदेखी चीजन कूं देखत रैहतें। चौंकि दीखबे बारी चीज तौ थोरेई दिनां कीऐं, पर अनदेखी चीज सदा के काजै बनी रैहतैं। चौंकि हम जानते कै जा धरती पै हमारौ डेरा जैसौ सरीर नांस करौ जाबैगौ तौ हमे परमेस्‍वर की ओर ते सुरग में ऐसौ डेरा मिलेगौ जौ हातन ते नांय बनो पर सदा सुरग में बनों रैहबे बारौऐ। जामारै जब तक हम जा डेरा में हैं हम कराहते रैहतें और अपने सुरगीय डेरे में रैहबे की बड़ी इच्छा रखतै। चौंकि जा डेरे में रैहबे के बाद हम नंगे नांय रहिंगे। जा सरीर में रैहते भये हम बोझ ते दबे कराहते रैहतै, जाकौ मतलब जि नांय कै हम जाय उतार लैबे पर और पहन लैबे, ताकि जा मरनहार कूं जीबन निगल लैबे। परमेस्‍वर नें हमें खुद जा उद्‍देस्‍य काजै बनांयौए बाई नें जमानत के रूप में हमे पबित्र आतमा दयौए। जामारै हम सदा हिम्मत बाँधे रैहतैं और जि जानतैं कै, जब तक हम जा सरीर में हते तब तक पिरभू ते दूर है। चौंकि हम रूप देखकै नांय पर भरोसे में जीबते। हम हिम्मत बाँधे रैहतैं और देह कूं छोड़कै पिरभू के संग रैहबौ औरऊ अच्‍छौ समझतें। जामारै हम चांहे जा देह में रहें या नांय रहें हमारी तौ जेई इच्‍छाए कै हम पिरभू कूं भाते रैहबें। हम सबन्‍ने अपने सरीर में रैहके भलौ बुरौ जो कछू करौए वाकौ फल पायबै काजै हम सबनकूं मसीह के न्याय के सिंहासन के सामने ठाड़ौ होनौ परेगौ। जामारै हम पिरभू कौ भय मानते भये सच्‍चाईऐ अपनावे काजै लोगन कूं समझाबत हैं। और परमेस्‍वर पै हमारा हाल पिरकट है और मोय जि आसाऐ कै तुमारे बिबेक नेंऊ जाय जान लयौ होगौ। हम तुमारे सामने अपनी कोई बड़ाई नांय कर रये बल्कि हम तुमें मौकौ दै रये है कै तुम हम पै घमन्‍ड कर सकौ। ताकि जो आदमी अपने मन की बातन कूं छोड़कै दिखाबटी बातन पै घमन्‍ड करतै बिनें तुम जबाब दै सकौ। अगर हम पागल की तरैह दिखतै तौ परमेस्‍वर के काजै, अगर हम सयाने है तौ तुमारे काजै है। चौंकि हमें तौ मसीह कौ पिरेम बेबस कर देतै जा मारै हम जि समझ गये हैं कै मसीह सबन के काजै मर गयौ। तौ सबऊ मर गये। और बू सबन के काजै मरौ ताकि जो लोग जीबित है, बे अपने काजै नांय जीबें, बल्कि वाके काजै जीबें जो बिनके काजै मर गयौ और फिर जीबित करौ गयौ। जामारै हम अब काऊए दुनियां की निगाह ते नांय देखत। हमनें पहले मसीह कूं दुनियां की निगाह ते देखौ हतो, पर अब हम ऐसौ नांय करें। जामारै अगर कोई मसीह में बनों भयौ है, बू नई रचनां है। पुरानी बातें बीत गयीं और देखौ, सब नयौ है गयौऐ। जि सब बात परमेस्‍वर की ओर ते हुई हैं, जाने मसीह के द्वारा अपने संग हमारौ मेल मिलाप कर लयौए। और लोगन कौ परमेस्‍वर ते मेल मिलाप कराबे की सेबकाई हमें सौंपी है। हमारौ संन्देस जि है कै, परमेस्‍वर ने संसार के लोगन के पापन की अनदेखी करते भये, मसीह के द्वारा बिनकौ अपने संग मेल मिलाप कर रयौए। और बाई नें लोगन कौ परमेस्‍वर ते मेल-मिलाप करबे कौ सन्देस हमें सौंपौ है। जामारै हम मसीह के राजदूत हैं, मानों परमेस्‍वर हमारे द्वारा तुमते बिनती कर रयौए। हम मसीह की ओर ते तुमते बिनती करतै कै, परमेस्‍वर के संग मेल मिलाप कर लेओ। मसीह नें कोई पाप नांय करौ। तौऊं परमेस्‍वर नें हमारे काजै बाय पापी बनायौ कै हम वाके द्वारा परमेस्‍वर के सामने धरमी ठहराये जांय। हम परमेस्‍वर के संग काम में संगी हैबे के नाते, तुम लोगन ते बिनती करतैं के, परमेस्‍वर की जो किरपा तुम पै भयी है, बाय बेकार मत जान देऊ। चौंकि परमेस्‍वर नें कही है कै, “मैने सही समै पै तेरी सुन लयी, और उद्धार के दिना सहारौ दैबे आयौ।” देखौ, अब “सही समै” जेईऐ। अब “उद्धार कौ दिनऊ” जेईऐ। हम काऊ के काजै रुकावट पैदा नांय करै, जाते हमारे सेबा काम पै कोई अंगूरीआ ना उठाबै। पर हम तौ परमेस्‍वर के सेबक के रूप में हम अपने आप कूं हर तरैह ते लोगन में अच्‍छौ साबित करत रैहतें। बड़े धीरज के संग सब कछू सहत भये, परेसानी और मुसीबतन के बीच में, कठनाई के में, कोड़े खाबे में, कैद में, दंगन में, असान्‍ती के बीच में मेहनत करत भए, रातों रात पलकऊ नांय झपकाये, भूंखे रैहके अपनी पबित्रता ग्‍यान, और धीरज ते, अपने दयालुपन, पबित्र आतमा के वरदान ते और सांचे पिरेम, सच्‍चे संन्देस और परमेस्‍वर की सच्‍ची सक्‍ती ते, अपने दोनों हातन में धारमिकता के हथियार लैकें, हम आदर और निरादर के बीच में, प्रसंसा और निन्दा के बीच में अपने आपकूं मौजूद रखतै। हमे तौ बहकाबौ बारौ समझौ जाबतुए जबकि हम तौ सच्‍चे हैं। हम अनजान समझे जाबते, तौऊ हमे सब जानतें। हम तौ मुरदेन जैसे समझे जामें, पर देखौ, हम तौ जीबित हैं। हम तौ सजा भोगबे बारे जैसे समझे जातै, तबऊ हम मौत कूं नांय सौंपे जाते। हमे सोक में व्‍याकुल समझौ जातै जबकि हमतौ हमेसा खुस रहतें। हम दीन हीन के रूप में जाने जाबते, जबकि हम तौ भौतन कूं बैभव साली बनांय रये हैं। लोग हमझतें के इन पै कछू नांय, पर हमारे जौरे तौ सब कछू है। हे कुरिन्थयन के लोगो, हमनें तुमते पूरी तरैह ते खुलकै बात करी हैं। तुमारे काजै तौ हमारौ दिल खुलो भयौऐ। हमारौ पिरेम तुमारे काजै कम नांय भयौ। पर तुमारौ पिरेम हमारे काजै ठन्‍डौ परतौ जा रयौ है। तुमें अपनों बालक समझत भये जि कैह रयौऊं जाके बदले में तुम अपनों मन हमारे काजै पूरी तरैह खुलौ रखनौ चहिऐं। जो अबिसबासी हैं बिनके संग साझेदारी मत करौ। चौंकि भलाई और बुराई कैसे समान है सकतै? उजीतौ और अंधेरौ आपस में सम्बन्ध कैसे है सकतै? एसेई मसीह कौ सैतान ते कोई तालमेल नांय। एसेईं अबिसबासी कौ बिसबासी के संग कोई नातौ नांय। परमेस्‍वर के बड़े पिराथना घर को मूरतीन ते का नातौ? चौंकि हम खुद बा जीन्दे परमेस्‍वर के बड़े पिराथना घर है, जैसा परमेस्‍वर ने कही हती, “मैं उनके बीच में रहूंगौ और चलूंगौ फिरूंगौ, मैं उनकौ परमेस्‍वर हुंगो और बे मेरे लोग हुंगे।” “जामारै पिरभू कैहतै कै, तुम बिनते बाहर आय जाऔ, उनते अपने आप कूं अलग कर लेओ अब कबऊ असुद्ध चीज कूं मत छूऔ। तब मैं तुमकूं अपनांऊंगौ। और मैं तुमारौ पिता बनुंगो, और तुम मेरी सन्‍तान हुंगे, सर्वसक्‍तीमान पिरभू जि कैहतै।” हे प्यारे भईयाओ, हमते जि प्रतिग्‍या मिली है कै, अपने सरीर और मन की सब तरैह की गंदगी कूं तियागकें, परमेस्‍वर को भय मानकें, अपनी आतमा कूं सुद्ध करौ और अपने आप कूं पूरी तरैह ते सुद्ध हैबे की कोसिस करौ। हमे अपने दिल में थोरी सी जगै देओ। ना तौ हमनें काऊ के संग अन्याय करौए, ना हमनें काऊ कौ कछू बिगारौए और न हमनें कोई ठगौए। तुम मेते तौ कोई दोसी नांय, जो हम तुम पै दोस लगामें, चौंकि मैं तुमते पैहलेई कैह चुकौऊ कै तुम हमारे दिल में ऐसे बस गयेऔ कै हम तुमारे काजै जीबे मरबे काजै तैयार हैं। मैं तुमते हिम्मत के संग बोल रयौऊं। मैं तुम पै बड़ौ घमन्‍ड कर रयौऊं। जाते मोय बड़ी सान्‍ती मिलतै,और मैं सबरे दुख में बड़े भरपूर आनन्द के संग रैह रयौऊं। जब हम मकिदुनियां में आये, तौ हमारे सरीर कूं कछू चैन नांय मिलौ, पर हम चारौ लंग दुख उठावत आये, बाहर लड़ाई है रयी हती और हमारे अन्दर डर हतो। तौऊं दीन दुखियन कूं तसल्‍ली दैबे बारे परमेस्‍वर ने जब तीतुस कूं भेजौ, तौ वाके आयबे ते हमे हिम्मत मिली, और न केवल वाके आयबे ते पर वाकी बा तसल्‍ली तेऊ, जो बाय तुमारी ओर ते मिली हती और बानें तुमारी लालसा, तुमारे दुख और मेरे काजै तुमारी धुन कौ समाचार हमें सुनांयौ, जाते हमें औरऊ खुसी भई। चौंकि मैंनें तुमें अपनी बा चिठ्‌ठी ते दुखी करौ हतो, पर फिरऊ मैं बाते पछिताय नांय रयौ, जैसे मैं पैहले पछिताय रयौ हतो। मोय बा चिठ्‌ठी ते तुमें दुख तौ भयौ, पर बू थोरी देर कौऐ। पर अब मोय खूसीऐ, जि खुसी मोय जामारै नांय के मैने तुमें दुखी करौए, पर बा दुख केमारै तुमारौ मन परमेस्‍वर के माऊं फिर गयौ। चौंकि तुम लोगन नें बू दुख कूं परमेस्‍वर की इच्‍छा मानकै स्‍वीकार करौऐ और जा तरैह ते तुम लोगन कूं मेरी ओर ते कोई नुकसान ना भयौ। चौंकि जो दुख परमेस्‍वर की ओर ते आतै, बाते मन में पछताबा पैदा होतै जाके काजै तुमें पछतानौ नांय परै, चौंकि बू तौ उद्धार देतुए। पर सांसारिक दुख तौ मौत देतुए। देखौ, तुमने जो दुख परमेस्‍वर की ओर ते मिलौओ, बानें तुम में कितनों उत्साह पैदा करीए, अपने भोले पन की कितनीं बचत करीऐ, कितनौ आक्रोस और भय, कितनीं व्‍याकुलता, हमते मिलबे की बेचैनी, बाते कितनीं हिम्मत और पापी के प्रति न्याय चुकाबे की कैसी भावना पैदा कर दयी है। तुमने हरेक बात में जि दिखाय दयौ कै तुम हरेक बात में निरदोस हते। जामारै अगर मैने तुमारे काजै लिखौ हतो, तौ बा आदमी के बजैह ते नांय जो गलत हतो और न वाकी बजैह कै बानें जो गलत करौ हतो। पर जामारै लिखौए कै, तुम्हारौ उत्साह जो हमारे काजै है, बु परमेस्‍वर के सामने तुम पै पिरकट है जाय। जाते हमे तसल्‍ली मिलतै। हमारी जा तसल्‍ली के अलाबा, तीतुस की खुसी कूं देखकै हम और जादा खुस भये हैं, चौंकि तुम सबन नें वाकौ मन हरा कर दयौ है। मैंनें वाके सामने तुम लोगन पै जो घमन्‍ड दिखायौ वाके काजै मोय सर्मिन्दा नांय होनों परौ। पर हमनें जैसौ सच सांच कहौ, बैसौई तुमारे बारे में तीतुस के आयबे पै हमारौ घमन्‍ड सही साबुत भयौ। जब बू जि याद करतै कै तुम सबन ने वाकी कैसी आग्‍या मानी और भय और आदर के संग तुमने बाकूं कैसै अपनांयौ तौ तुमारे काजै वाकौ पिरेम और भौत बढ़ जातुए। मोय भौत खुसी है, चौंकि मैं पूरी तरैह ते तुम लोगन पै भरोसौ रख सकतूं। हे भईया-बहनो, हम अब जि चांहतै कै, तुम परमेस्‍वर की बा किरपा के बारे में जानौ जो मकिदुनियां की कलिसियान पै करी गई हती। मेरौ मतलब जि है, कै जब संकटन में उनकी कर्री परीछा लयी, तौऊं बे खुस हते और अपनी तंगीहाली मेंऊ रैहते भये बिन्‍नें बड़ी उदारता कौ परिचय दयौ। मैं जि साबित करतूं कै, बू जितनों दान दै सकतें उतनोंई नांय, पर अपनी सामर्थ तेऊ बढ़कें पूरे मन ते दयौए। बिन्‍नें खुदई आकर मोते बड़ी बिनती करी कै बिनेंऊ यहुदिया पिरदेस में रैहबे बारे परमेस्‍वर के पबित्र लोगन की मदद करबे काजै दान दैबे कौ मौकौ मिले। बिन्‍नें अपनी उदारता में हमारी आसा ते भौत आगे बढ़के करौ। उन्‍नें पैहले खुद कूं पिरभू के हात में सौंप दयौ और फिर परमेस्‍वर की इच्‍छा के अनुसार खुद कूं हमें दै दयौ। जामारै हमनें तीतुस ते बिनती करी कै, जैसौ बानें पैहले जा काम की सुरूआत करबे में तुमारी मदद करी हती, बा अनुग्रह के काम कूं तुमारे बीच में पूरौ करबे काजै मदद करै। पर तुमें हर बात की सिछा दयी गयीए मतलब भरोसे में, बानी में, ग्‍यान में, और तरैह-तरैह के उपकार करबे में, पिरेम के संग भरपूर है जाऔ, और एसेई अनुग्रह के जा काम में बढ़ते जाऔ। मैं जाके बारे में कोई आग्‍या नांय दै रयौ, पर दूसरे लोगन के मन में मदद करबे काजै जो जोस है वाके बारे में बताकैं, मैं तुमारे पिरेम की सच्‍चाई कूं परखबे चाहतूं। चौंकि तुम लोग हमारे पिरभू ईसू मसीह की किरपा जानतौ। तुम जिय जानतौ कै बू धनी हतो फिरऊ तुम लोगन काजै कंगाल बन गयौ, जाते तुम वाकी कंगाली ते धनी है जाऔ। जाके बारे में तुमें एक सलाह देतूं। तुमें जि सोभा देतुए कै, तुम लोग पिछले साल ना केवल दान दैबे की इच्‍छा में आगे हते, पर अब दान दैबे मेंऊ सबते आगे हो। अब दान दैबे की बा इच्‍छा कूं, तुम पै जो कछू है, बाते पूरौ करौ। तुम जाय उतनी अई लगन ते पूरौ करौ जितनी लगन ते तुमने जाय चांहौ हतो। चौंकि अगर काऊ आदमी की दान दैबे की लगन होतै, तौ वाकौ दान जो कछु बापै है, बाई के अनुसार ग्रहन करौ जाबैगौ, ना कै वाके अनुसार जो बापै हतुई नांय। हम जि नांय चांहत कै, दूसरेन कूं तौ सुख मिले और तुमें दुख मिले, पर हम तौ बराबरी चाहतैं। हमारी इच्‍छाऐ कै बिनकी जा तंगी के समै में तुमारी मजबूती बिनकी जरूरत पूरी करें, जाते आगे चलबे पै बिनकी मजबूती तुमारी तंगी में काम आय सकै और जा तरैह ते बराबरी है जाबे। जैसौ कै पबित्र सास्त्र में लिखौ है, “जाने भौत बटोरौए, वाके जौरे जादा नांय रहौ, और जाने थोरौ बटोरौए, वाके जौरे कम नांय रहौ।” परमेस्‍वर को धन्यबादै, जाने तीतुस के मन में तुमारी सहायता के काजै बैसी तेज इच्‍छा भर दयीऐ जैसी हमारे मन में है। चौंकि बानें हमारी सलाह मान लयीऐ और बू वाके काजै अपनी इच्‍छाऊ रखतुए, जामारै बू खुद अपनी इच्‍छा तेई तुमारे जौरे आयबे कूं तईयार हे रयौ है। हम वाके संग बा भईया कूं भेज रहै हैं, जाकौ सुभ समाचार के पिरचार के रूप में सब कलिसियान में हरेक जगैह नामबरी फैल गयी। जाके अलाबा, जा दया ते भरे भये काम में कलिसियान ने बाय हमारे संग यात्रा करबे काजै चुनों है। जि सेबा कौ काम जाकौ प्रबन्ध हमारे द्वारा करौ जा रयौ है, खुद पिरभू कूं महिमा दैबे काजै और परोपकार करबे में हमारी जल्दबाजी दिखाबे काजै है। हम तुमारे जा बड़े दान कूं सम्भालकै लै जाबे में भौत साबधानी बरततै, ताकि कोई हम पै जाके बारे में दोस ना लगा पाबे। चौंकि हमें अपनी अच्‍छी साख बनांयबे की चिन्‍तांए, बस पिरभू के सामनेई नांय पर लोगन के बीच मैऊं। हम उनके संग अपने बा भईया कूं भेज रये हैं, जाने भौत ते कामन में भौत ते मौकेन पै दूसरेन की भलाई करबे में उत्सुकता करबे बारे आदमी के रूप साबित कर दयौ है। पर अब तौ बामे तुमारे काजै बामें बेसुम्बार बिसबास भरौए, बाते बामे मदद करबे कौ उतसाह और बढ़ गयौए। तीतुस अपने छेत्र में तुमारे बीच में मेरौ काम करबे में संगी और संग संग काम करबे बारौ रयौए। जहां तक हमारे भईयन की बाते, बे तौ कलिसियान के भेजे भये तथा मसीह के सम्मान हैं। जामारै तुम उने अपने पिरेम कौ सबूत देनोंए, और हम तुमारे काजै इतनौ घमन्‍ड चौं करतें, जाय साबित करियों, जाते सबरी कलिसिया बाय देख सकें। अब मोय जि लिखबे की जरूरत नांय कै तुमें यहुदिया पिरदेस में रैहबे बारे परमेस्‍वर के पबित्र लोगन की सेबा करनी है। चौंकि मैं जानतूं कै तुम हमेसा मदद के काजै तैयार रहतौ। मोय मकिदुनियां के लोगन के सामने जि कैहवे में घमन्‍डै कै अखाया के लोग तौ पिछले साल ते तईयारै और तुमारी उत्साह नें उनमें जादा ते जादा काम करबे की प्रेरना दयीऐ। पर मैं इन भईयन कूं तुमारे जौरे जामारै भेज रयौऊं कै हम तुमारी बजैह ते घमन्‍ड करतै, वाके बारे में बू बेकार साबित नांय होय। जामारैऊ तुम तैयार रहौ, जैसे मैं कैहत आय रयौऊं। कऊं ऐसौ ना होबें, जब कछू मकिदुनियां के रैहबे बारे मेरे संग तुमारे जौरे आबे और तुमें तैयार नांय पाबे तौ, हम बा बिसबास की बजैह जाय हमनें तुम पै करौऔ लज्‍जित हुंगे और तुमतौ औरऊ जादा लज्‍जित होंगे। जामारै मैने भईयन ते जि बिनती करबौ जरूरी समझो कै, बे हमते पैहले तुमारे जौरे आमें और जा दान कूं देबे के बारे में तुम पैहलेई कह चुकेऔ बाय पहले तेई उदारता ते देबे काजै तैयार रखौ। जामारै जि दान अपनी इच्‍छा ते तैयार रखौ जाबे, ना कै दबाब के संग तुमते छीनी गयी काऊ चीज के रूप में। जा बाते तुम ध्‍यान में रखौ जो थोरौ बोबैगौ बू थोरौ काटेगौ और जो जादा बोबैगौ बू जादा काटैगो। हरेक कोई बिना कुड़ कुड़ और बिना काऊके दबाब के उतनों दान देऔ जितनो मन में सोचीऐ। चौंकि खुसी ते देबे बारे ते परमेस्‍वर पिरेम करतें। परमेस्‍वर हर तरैह की दया तुमें भरपूरी ते दै सकतै, तब हर समै, सब कछू जो तुमारी जरूरतै पूरी होबैगी और हे एक भले काम के काजै तुमारे जौरे भौत कछू होगौ। जैसी पबित्र सास्त्र में लिखौ भई है, “जो खुले मन ते गरीबन कूं दान देय, और वाकौ भले कामन कूं हमेसा याद करौ जाबेगौ।” जामारै परमेस्‍वर बोबे बारे कूं बीज और खायबे कूं रोटी देय, बेई तुमें बीज देऔ और बैई तुमें बढ़ाबैगौ, और बेई तुमारे भले कामन कूं बढ़ाबैगौ। तुम सब तरैह ते धनी बनांये जाऔगे, जाते तुम हरेक मौके पै पूरे मन ते दैबे बारे बने रहौ। जब हम तुमारौ दान जरूरत मन्दन तक पौंहचाबे तौ बे परमेस्‍वर कौ धन्यबाद दैबे। चौंकि जा दान की सेबकाई ते ना केवल परमेस्‍वर के पबित्र लोगन की जरूरतई पूरी होत, पर लोगन की ओर ते परमेस्‍वर कौ धन्यबाद होतै। तुमारी जा सेबकाई कौ नतीजा जि होगौ कै लोग परमेस्‍वर की बड़ाई करिंगे। चौंकि तुम ईसू मसीह के सुभ समाचार कूं अपनांयकै वाके अधीन रैहतो और गरीब बिसबासिन और सबन काजै पूरे मन ते दान देतौ। बे लोग तुमें अपनी पिराथना में याद करतै जामारै कै तुम पै परमेस्‍वर की बड़ी किरपा भई है मिलबे की इच्‍छा कर रयैहै। परमेस्‍वर के वरदान की बड़ाई सब्दन में नांय करी जा सकत। वाके काजै वाकौ धन्यबाद होबै। मैं, पौलुस, खुद मसीह की सी दयालुता और दीनता ते तुम लोगन ते निबेदन करतूं। कछू लोग कैहतै, जब मैं तुम लोगन के संग हतो तौ नम्रता रखतूं, पर जब मैं तुमते दूर हूं तौ तुमारे प्रति कठोरता दिखातूं। अब तुमते मेरी जि बिनतीए कै, जब मैं तुमारे बीच में आऊं तौ मोय कठोरता ते पेस आबे काजै मजबूर मत करियों, जैसौ कै मैं कछू लोगन के संग कठोरता दिखाऊंगो, जो जि समझतै कै हम एक सांसारिक जीबन जीतैं। चौंकि हम जा संसार मेंई रैहते, पर हम सांसारिक लोगन की तरैह ते नांय लड़त। चौंकि हमारी लड़ाई के हतियार संसार में इस्तमाल करे जाबे बारे हतियार नांय, पर सांसारिक बातन के गढ़ो कूं तोर डारबे और झूंठे तर्क बितर्क कूं खतम करबे काजै परमेस्‍वर के द्वारा सामर्थी हैं। जामारै हम परमेस्‍वर के ग्‍यान के बिरोध में उठबे बारी हर कल्पना और हर एक ऊंची बात कौ खन्‍डन करतै, और हर एक भावना कूं कैद करकै मसीह कौ आग्‍याकारी बना देतै। जब तुम पूरी तरैह ते आग्‍या मानबे बारे बन जातौ, तब मैं सब आग्‍या न मानबे बारे हर एक काम कूं दन्‍ड दैबे काजै तैयार है। तुम बिनई बातन कूं देखतौ, जो आँखन के सामने हैं, अगर काऊऐ जि भरोसौ है बू मसीह कोऐ, तौ बाय जेऊ मान लैनों चहिऐं कै बू मसीह कौ है तौ हमऊ मसीह के हैं। अगर मैं बा अधिकार के बारे में औरऊ घमन्‍ड करूं, जो पिरभू नें हमे तुमारे बिनांस के काजै नांय, पर आतमिक जीबन के काजै दयौ है, तौ जामें लज्‍जित नांऊ। मेरी चिठ्‌ठीन के द्वारा मेरौ कोई इरादौ नांय कै मैं तुमें डराऊं। चौंकि कछू लोग कैहतै कै, “पौलुस की चिठ्‌ठीन में बू बजन दार और ताकतबर दिखतै, पर जब बू सामने होतै तौ बू सरीर ते कमजोर और वाके बोलबे में कोई दम नांय होत।” पर ऐसे कैहबे बारेन ने जि समझ लेनौ चहिऐं कै, हम तुमारे बीच में न रैहत भये अपनी चिठ्‌ठीन में वचन लिखतें, बैसेई तुमारे बीच में रैहत भये हम जो काम करते बामें कोई अन्‍तर नांय। हम बिन लोगन के संग अपनी तुलना करबे को साहस नांय करत, जो अपनी बड़ाई खुद करतै। पर जब बे अपने कूं एक दूसरे ते नापतै और आपस में तुलना करतें तौ ऐसौ करके बे मूरख बन जातै। हम तौ हद ते बाहर कबऊ घमन्‍ड नांय करिंगे, पर बा हद तक घमन्‍ड करेंगे जो परमेस्‍वर ने हमारे काजै ठहराईए, बामे तुमऊं सामिल है गयेऔ। हम अपनी हद में रैहकै तुम पै घमन्‍ड करतै, चौंकि ईसू मसीह कौ सुभ समाचार लैकें हम सबते पैहले तुमारे जौरे पौंहचे हते। हम सीमा ते बाहर औरन की मेहनत पै घमन्‍ड नांय करत। पर हम तौ जि आसा करते के जैसे जैसे तुमारौ भरोसौ बढ़त जाबेगौ बैसेई हम अपनी हद के अनुसार तुमारी बजैह ते औरऊ बढ़त जांगे, ताकि हम तुमारी हद ते बाहर निकरकै सुभ समाचार सुनामें। ऐसौ नांय कै, हम दूसरेन की हद के भीतर करी भई मेहनत पै घमन्‍ड करें। जैसौ कै पबित्र सास्त्र में लिखौ है, “अगर कोई घमन्‍ड करे तौ अपने पिरभू पै घमन्‍ड करें।” चौंकि जो अपनी बड़ाई खुद करतै बू नांय, पर जाकी बड़ाई पिरभू करतै बेई अपनांयौ जाबतुऐ। मैं चाहतो कै, तुम मेरी थोरी सी नादानी सहन कर लेओ। हाँ, बैसे तौ तुम मेरी सहनऊ कर लेतौ। चौंकि मैं तुमारे बीच में परमेस्‍वर की धुन लगाये रैहतूं। जामारै मैने तुमारे एकमात्र दुल्हे मसीह ते सगाई पक्‍की कर दयी है कै, तुमें पबित्र क्वारी के नाईं मसीह कूं सौंप दूं। पर मैं डरपतूं कै कऊं ऐसौ ना होबे कै जैसे सांप ने हब्बा कूं चतुराई ते भरमा दयौ हतौ, बैसेई तुमारे मन मसीह के प्रति पबित्र और तुमारी भक्‍ती ते भटक ना जाबें। चौंकि अगर कोई तुमारे जौरे आयकें जा ईसू कौ सुभ समाचार हमनें सुनांयौए वाके अलाबा कोई दूसरौ सुभ समाचार सुनाबे या जो आतमा तुमें मिलीऐ बाते अलग काऊ और आतमा कूं तुम ग्रहन करतौ, और तुमने छुटकारे के जा संदेस कूं अपनांयौऐ, बाते अलग काऊ दूसरे संदेसउऐ अपनाबतौ, तौ तुम बड़ी आसानी ते बिनें अपना लेतौ। तुम जो इनें बड़े भेजे भये चेलान मानतौ, मैं इनते खुद कूं काऊ तरैह ते कम नांय समझत। है सकतुए कै, मैं अच्‍छौ बोलबे बारौ नांऊ, जाके बाउजूद मैं ग्‍यान में कम नांऊ। जाकौ सबूत हम सब तरैह ते और सब बातन में साफ-साफ तुम लोगन कूं दै चुकौऊं। पर मैने सेंत मेंत में परमेस्‍वर के सुभ समाचार की सिछा दैकै अपने आपकूं नीचौ करते भये तुमें ऊंचौ उठायौए, तौ का मैंनें कोई पाप करौए? कछू लोग कैहतै हैं कै, मैने तुमारी सेबा के काजै, दूसरी कलिसियान ते आर्थिक सहायता लैके बिनें लूटौऐ। पर जब मैं तुमारे संग हतो और मोय जरूरत परी, तौ मैने तुमारे ऊपर कोई दबाब नांय डारौ, चौंकि मकिदुनियां ते भईयन ने आयकै मेरी जरूरत पूरी करी। मैने अपने आप कूं तुमारे ऊपर बोझ बनबे ते रोकौ और रोके रहूंगौ। चौंकि मोमें मसीह की सच्‍चाई निबास करतै, जामारै अखाया पिरदेस में कोई मोय जा घमन्‍ड ते बोलबे ते नांय रोक सकत। ऐसौ चौं? का मैं तुमते जामारै पिरेम नांय करत? परमेस्‍वर जानतुए, मैं तुमते पिरेम करतूं। पर जो मैं कर रयौऊं बाय तौ करतई रहूंगो, जातै बिन लोगन कूं जा बात पै घमन्‍ड करबे कौ मौका ना मिलै कै, बे पिरचार के काम में मेरे बराबर हैं। चौंकि बे लोग बनाबटी भेजे भये चेलाऐ और छल ते काम करबे बारे है। जो मसीह के भेजे भये चेला हैबे कौ ढोंग करतें। जि कोई अचम्भे की बात नांय, चौंकि सैतानऊ, तौ चमकबे बारे सुरग दूत जैसौ रूप धरबे की कोसिस करतै। जामारै अगर वाके सेबकऊ नेकी के सेबकन कौ सौ रूप धरलें तौ जामें, का बड़ी बाते? पर अखिर में तौ बिनें करनी कौ फल मिलैगौई। मैं फिर कैहतूं कोई मोय मूरख नांय समझै। पर अगर फिरऊ तुम मोय ऐसौ समझतै तौ मूरखई समझ के मेरी सहन कर लेओ, जाते मैंऊ थोरौ सौ घमन्‍ड करूं। जा बेधड़क घमन्‍ड ते, मैं जो जि कैह रयौऊं, बू पिरभू की आग्‍या के अनुसार नांय पर एक मूरख के नाईं कैह रयौऊं। चौंकि भौत ते लोग अपने सांसारिक जीबन पैई घमन्‍ड करतै, तौ मैऊं घमन्ड करुंगौ। पर तुमतौ इतने अकलमन्द हो, कै तुम मूरखन की बातन कूं खुसी के संग सहन कर लेतौ। अगर कोई तुमें दास बनांय लेतुए, तुमारी धन सम्पती खा जातै, या धोके ते फसाय लेतुए और अपने आप कूं बड़ौ बताबे और तुमारे मौंह पै थप्पड़ मारै और तुम वाकी सह लेतौ। मोय मेरी सरम की बजैह ते कैहनों पर रयौ है ऐसौ करबे में हम भौत कमजोर हते। अगर कोई काऊ तरैह कौ घमन्‍ड करबे की हिम्मत करतै, तौ मेंऊ बा बात के काजै घमन्‍ड कर सकतूं। का बेई इब्रानी है? मैऊं हतूँ। का बेई इसरायली है? मैंऊ हतूं। का बेई अब्राहम की सन्‍तान है? मैऊं हतूं। का बे मसीह के सेबक है? मैं सनकी की नाईं जि कैहतूं, मैं तौ बिनतेऊ बड़ौ मसीह कौ सेबकऊं। मैने भौत जादा मेहनत करीऐ, मैं बेर बेर जेल गयौ और बेर बेर कोढ़ खाये, और बार बार मोय मौत कौऊ सामनों करनों परौ। पांच बेर मैंनें यहुदीयन ते उनतालिस उनतालिस कौड़ा खाये हैं। मैं तीन तीन बेर बैंतन ते पीटो गयौ एक बेर मोपै पत्‍थर मार करी गयी, तीन बेर मेरौ जहाज पानी में डूब गयौ, एक दिना और एक रात मैने समुन्दर के गहरे पानी में बिताई। मैं बेर बेर यात्रान में, नदियन के जोखिमन में, डाकूंन के जोखिम में, अपने जाति बारेन ते जोखिमन में, गैर यहुदिन ते जोखिमन में, नगरों में के जाखिमन में, बेहड़ के जोखिमन में, समुन्दर के जाखिमन में, झूंठे भईयाओ के बीच जोखिमन में यात्रा की हैं। मैंनें कर्री मेहनत करके, थकाबट ते चूर हैकै जीबन जीयौऐ। मैं भौत मौकेन पै सोयौऊ नांय पायौ और कैऊ दिना तक भूखौ पियासौ रैहकें, जाड़े में कम कपड़न की बजैह ते ठठूरत रयौऊं। अब और जादा का कहूं? मोपै सब कलिसियान की चिन्‍ता कौ बोझऊ रोज बनो रयौ है। का मैं दूसरेन की कमजोरी में कमजोर नांय भयौ? का काऊ के पाप में गिरबे ते मेरौ जी दुखी नांय भयौ? अगर मोय काऊ बात पै घमन्‍ड करनों है, तौ मैं बिन बातन पै घमन्‍ड करुंगो जो मेरी कमजोरी है। हमारे पिरभू ईसू कौ पिता परमेस्‍वर युगानुयुग धन्य हैं, बू जानतुए कै मैं झूंठ नांय बोल रयौऊं। जब मैं दमिस्‍क में हतो, तब महाराज अरितास के राजपाल ने दमिस्‍क पै घेरा डारकें मोय बन्दी बनांयबे की कोसिस करी हती। पर मोय नगर की चार दीबारी की खिड़की ते डलिया में बैठायकै उतार दयौ हतो और जा तरैह ते मैं वाके हातन ते बच निकरौ। मैं पिरभू के दिव्‍य दरसनन और पिरभू द्वारा पिरकट करे भये रहस्‍यन की चरचा करूँगो। जाके काजै मेरौ घमन्‍ड करबौ ठीक नांय फिरऊ मैं जापै घमन्‍ड करतौ रहुंगो। मैं मसीह में एक आदमी कूं जानतूं, जो चौदह साल पैहले तीसरे सुरग में उठा लयौ हतो। बू सरीर समेत उठा लयौ या बिना सरीर के, जाके बारे में मोय मालूम नांय। जाके बारे में तौ परमेस्‍वरई जानतै । मैं दुबारा कैह रयौऊं कै, मैं एक आदमी के बारे में जानतूं बू सुरगलोक में उठा लयौ हतो, बू सरीर समेत उठा लयौ या बिना सरीर के, जाके बारे में मोय मालूम नांय। जाके बारे में तौ परमेस्‍वरई जानतै। सुरगलोक में बा आदमी नें ऐसी अनोखी बात सुनीं जो बयान करबे ते बाहर हैं और बिन बातन कूं बताबे की अनुमती काऊ आदमी कूं नांय। मैं ऐसे आदमी पै घमन्‍ड कर सकतूं। पर अपनी कमजोरिन के अलाबा मैं खुद के बारे में घमन्‍ड नांय करूँगो। अगर मैं खुद पै घमन्‍ड अऊ करूं तौ मूर्ख नांय ठहरुंगो, चौंकि मैं सच अई कहुंगो। पर मैं तुमें जाते बचातूं कै, लोग जैसौ मोय देखतैं और सुनतैं बाते बढ़कै कछू नांय समझें। परमेस्‍वर नें मोय भौत सी रहस्‍य की बातें बताईं हैं। मैं इनकी बजैह ते घमन्‍ड ते ना भर जाऊं, जामारै मेरे सरीर में एक काँटों चुभा दयौ है, सैतान कौ दूत बाय दुखायकै मोय दरद देतौ रैहतै, ताकि मोय घमन्‍ड ना है जाबै। जा काँटे के बारे में मैंनें पिरभू ते तीन बार बिनती करी कै, बाय मोमें ते निकार दैबै। पर पिरभू नें मोते कही है कै, “तेरे काजै मेरी किरपा भौत है, चौंकि कमजोरिन मेंई मेरी सामर्थ सबते जादा होतै।” जामारै मैं अपनी कमजोरी पै खुसी के संग घमन्‍ड करतूं, ताकि मसीह की सामर्थ मोमें बनी रैहबै। जामारै मैं मसीह काजै कमजोरिन में, अपमानों में, कस्‍टन में, सताब और कठनाईन में, खुस हूं। चौंकि जब मैं कमजोर होतूं तबई बलबान होतूं। मैं मूर्खन की तरैह ते बात करतौ रयौ, पर तुमई नें मोय ऐसौ करबे काजै मजबूर करौ हतो। तुमें तौ मेरी बड़ाई करनी हती, चौंकि हालांकि मैं कछू नांऊ, तौऊं तुम जिनें बड़े भेजे भये चेलान मानतौ, बिनते काऊ तरैह ते कम नांऊ। मैंनें भौत ते चिन्‍न, चमत्‍कार, और सामर्थ के काम तुमारे बीच में बड़े धीरज के संग दिखाये हते, जो जि साबित करतें कै मैं एक सच्‍चौ भेजौ भयौ चेला हूं। कौन सी बात में तुम दूसरी कलिसियान ते कम समझे गये हते? केवल जा बात में कै मैं तुम लोगन पै बोझ नांय बनों। मेरौ जि अन्याय मांफ करौ। देखौ, अब मैं तीसरी बार तुमारे जौरे आबे कूं तईयारऊं, पर मैं तुम पै काऊ तरैह कौ बोझ नांय बनुंगो। चौंकि मैं तुमारी धन-दौलत कूं नांय, पर तुमें चाहतूं। बालकन कूं अपने मा-बाप के काजै धन इकठ्‌ठौ करबे की जरूरत नांय होत, पर मा-बाप कूं अपने बालकन काजै धन इकठ्‌ठौ करबे की जरूरत होतै। मैं तुम लोगन की सहायता काजै अपनों सब कछू खर्च कर दुंगो और अपने आप कूंअंऊ दै दुंगो। अगर मैं तुमते इतनों पिरेम करतूं, तौ का तुम मोते कम पिरेम करौगे? तुम जि मानतौ कै, मैं तुम पै बोझ नांय बनों। फिरऊ कछू लोग कैहतै कै, मैं झूठों हूं और चालाकी ते मैंनें तुमते फायदा उठायौ है। जिन लोगन कूं मैंनें तुमारे जौरे भेजौ हतो, का बिनके द्वारा मैंनें तुमते कछू लाभ लयौ है? मैंनें तीतुस कूं समझायकै और वाके संग एक दूसरे भईया कूं तुमारे जौरे भेजौ हतो। का तीतुस नें तुम पैते कोई लाभ लयौ? का हम दोनों एकई आतमा ते प्रेरित हैके एकई रस्ता पै नांय चले? तुम लोग जि समझ रये हुंगे कै, हम जि सब लिखकै, तुमें अपनी सफाई दै रये हैं। ऐसी बात नांय। हम जि सब परमेस्‍वर के सामने मसीह में हैके कैह रये हैं। हे मेरे प्यारे भईयाओ, हम जो कैहतै और करतै है, बू तुमें आतमिक रूप ते सामर्थी बनाबे काजै है। चौंकि मोय डर है कै, कऊं ऐसौ ना होबे कै, मैं तुमारे जौरे आयकै जैसौ तुमें चाहतूं, वेसौ ना पांऊ, और तुमंऊ मोय वेसौ ना पाओ जैसौ मोय पानों चाहतौ। कऊं ऐसौ ना होबे कै मैं तुम लोगन के बीच में आपसी झगड़े, ईरसा, बैर, स्‍बार्थीपन, गुस्सा, चुगली, घमन्‍ड,और बखेड़े पाऊं। कऊं ऐसौ ना होबे कै तुमारे य्हां पौंहचबे पै परमेस्‍वर मोय फिर तुमारे सामने नींचौ दिखाबै और मोय बिन भौत लोगन काजै दुखी होनों परै, जिन्‍नें पैहले पाप करे हते और अपने गन्दे काम, व्‍यभिचार, और लुच्‍चपन में डूबे रैहते, बिनते मन नांय फिरायौ हतो। जि तीसरी बार है जब मैं तुमते मिलबे आ रयौऊं। पबित्र सास्त्र में लिखौ भयौ है कै, “हर एक बात की पुस्‍टी दो या तीन गबाहन की गबाही पै करी जाबेगी।” जब में दूसरी बार तुमारे संग हतो, तब मैंनें तुमें चेतावनी दयी हती और अब जब मैं तुमते दूरूं, मैं तुमें फिर चेतावनी दै रयौऊं कै, अगर मैं फिर तुमारे जौरे आ रयौऊं तौ जिन लोगन नें पाप करे हैं और जो पाप कर रये है, बिनपै दया नांय करुंगो। ऐसौ मैं जामारै कैह रयौऊं कै, तुम जा बात कौ सबूत चाहतौ कै, मसीह मोमें हैके बोलतै। बू तुमारे काजै कमजोर नांय, पर तुम में सामर्थी है। जि सच है कै, जब बू क्रूस पै चढ़ायौ गयौ हतो, तब कमजोर दिख रयौ हतो, पर परमेस्‍वर की सामर्थ ते जीबित है। जामारै हमऊ बामें कमजोर हैं पर हम परमेस्‍वर की सामर्थ ते ईसू के संग जीन्दे हैं, ताकि तुमारी सेबा करते रैहबें। तुम खुद कूं जांचो कै, भरोसे में जीबन जी रयेओ या नांय। का तुमें जि नांय, पतौ कै ईसू मसीह तुम में है? अगर ऐसौ नांय, तौ तुम जा जाँच में असफल साबित भये हो। पर मैं आसा करतूं कै तुम जि जान जाओगे कै हम जा जाँच में असफल नांय भये। हम परमेस्‍वर ते पिराथना करतें कै, तुम कोई बुराई ना करौ। जामारै बुई करौ जो अच्‍छौ है। चाहे हम जा जाँच में असफलई चौं ना दिखाई दैबै। चौंकि हम सच्‍चाई के बिरोध में कछू नांय कर सकत, पर हम जो करतें सच्‍चाई काजैई करतें। जब हम कमजोर हैं तब तुम बलबान हो, जा बात ते हमें भौत खुसी मिलतै। हम पिराथना करतें कै तुम पूरी तरैह ते भरोसे में मजबूत है जाऔ। मैं तुमते दूर रैहते भये इन बातन कूं जामारै लिख रयौऊं कै, जब मैं तुमारे बीच में आऊं तौ मोय पिरभू के द्वारा दये गये अधिकार कौ इस्तमाल करकै तुमारे संग कठोरता ते बरताब ना करनों परै। चौंकि पिरभू नें मोय जि अधिकार तुमारौ नुकसान करबे काजै नांय पर आतमिक रूप ते मजबूत बनाबे काजै दयौ है। अब हे भईया-बहनो, आखिर में मेरौ तुमते जेई कैहनों है कै खुस रहौ। सिद्ध बनते जाऔ, एक मन रहौ, हिम्मत रखौ, मेल ते रहौ। पिरेम और सान्‍ती कौ परमेस्‍वर तुमारे संग रैहबै। पबित्रता के संग एक दूसरे के गले मिलकै स्‍वागत करौ। परमेस्‍वर के सब पबित्र लोग जो य्हांपै है बे तुम लोगन कूं नमस्‍कार कैहतै। पिरभू ईसू की किरपा और परमेस्‍वर कौ पिरेम और पबित्र आतमा की संगति तुम सबके साथ होती रैहबै। जि चिठ्‌ठी पौलुस की ओर तेऐ, जाय भेजौ भयौ चेला हैबे काजै मनुस्यन की ओर ते नांय बुलायौ गयौ पर ईसू मसीह और पिता परमेस्‍वर की ओर ते बुलायौ है, परमेस्‍वर जानें ईसू मसीह कूं मरे भयेन में ते जीबित करौए, मैं पौलुस और बिन सब भईयन की ओर ते जो मेरे संग है, गलातियन की कलिसिया कूं नमस्‍कार करतूं। तुमें पिता परमेस्‍वर और पिरभू ईसू मसीह की ओर ते किरपा और सान्‍ती मिलती रैहबे। ईसू मसीह नें हमारे पापन के काजै अपने आप कूं दै दियौ, ताकि हमारे पिता परमेस्‍वर की इच्‍छा के अनुसार हमें जा समै, जा बुरे संसार ते छुड़ाय लेय। वाकी महिमा युगानुयुग होती रहे। ऐसौई होबे। मोय अचम्भौ हे रयौ है, कै परमेस्‍वर जाने तुमें मसीह ईसू की किरपा ते बुलायौ है, भौत जल्दी तुम परमेस्‍वर कूं छोड़ के और काऊ समाचार की ओर मुड़ रये हो। पर जा सच्‍चे सुभ समाचार कूं छोड़कै कोई दूसरौ समाचार तौ कोई है ही नांय, कछू लोग तुमें बिचलित करके ईसू मसीह के सुभ समाचारै बिगारबो चाँह रये है। पर जो सच्‍चौ सुभ समाचार हमनें तुमकूं सुनांयौ है, जाके अलाबा अगर हम या कोई सुरग दूत तुमें कोई दूसरो सुभ समाचार सुनाबै तौ बू सापित है। जैसौ मैं पैहले कह चुकौऊं बैसेई फिरऊ कह रयौऊं जो सच्‍चौ सुभ समाचार तुमनें सुनौ है, यदि वाके अलाबा कोई और समाचार तुमें सुनाबे तौ बू सापित होय। का मैं मनुस्यन की किरपा पानों चाहूं या अपने परमेस्‍वर की? का मैं मनुस्यन कूं खुस करनों चाहूं? यदि मैं मनुस्यन कूं खुस करनों चाहूं या मैं वाकी कोसिस कर रयौऊं तौ मैं मसीह कौ दास नांय होतो। हे भईयाओ, मैं तौ चाहतूं के तुम जिय जान लेउ जो सुभ समाचार मैने तुमें सुनांयौ हतो बू मनुस्यन के द्वारा बनांयौ भयौ नांय, चौंकि बू मोय काऊ आदमी ते नांय मिलौ,न काऊ नें मोय वाकी सिछा दयी है पर बू तौ मोय ईसू मसीह के प्रकासन ते मिलौ है। पैहले जब मैं यहुदी मत कूं मानतो तब तुम मेरे चाल-चलन जानते हते,कै मैं कैसे परमेस्‍वर की कलिसियाऐं मारतो पीटतौ और नांस करवौ चाहतो, मैं यहुदी रीतिन में अपने सब संग केन ते जो मेरे संग बा समै हते, बिनते भौत आगे बढ़ गयौ हतो, और अपने पुरखन रीतिन के काजै भौत उत्साहित हतो। पर परमेस्‍वर जानें मौकूं माँ के गर्भ में चुन लियौ, वाकी किरपा ते मैं बुलायौ गयौ हूं। तब परमेस्‍वर की महान किरपा मोपै भई, जाते मैं वाके बेटाये, अपने आप में प्रगट करूं,तब मैं गैर यहुदीयन मेंऊ बाको सुभ समाचार सुनांयवे गयौ, तब मैंनें तुरन्‍त काऊ आदमी ते सलाह नांय लई। और न मैं बिनके जौरे गयौ जो मोते पैहले येरूसलेम नगर में भेजे भये चेला हते, पर मैं तौ पैहले अरब देस कूं चलौ गयौ और मांते दुबारा फिर दमिस्‍क नगर में लौट आयौ। तीन साल बाद मैं पतरस ते मिलवे येरूसलेम नगर गयौ और पन्द्रह दिनां तक बाई के संग रयो पिरभू के भईया याकूबे छोड़ के मैं और काऊ भेजे भये चेला ते नांय मिलौ। जो बात मैं तुमकूं लिख रयौ हूं, परमेस्‍वर गबाह है बे बात सच्‍ची हैं, जाके बाद मैं सीरीया और किलकिया कै छेत्रन में गयौ, बा समै तक यहुदिया देस की कलिसिया नें जो मसीह में हती, बिन्‍नें मोकूं कबऊ नांय देखौ हतो। और जेई सुना करते कै बू आदमी पैहले हम पै अत्‍याचार करतो और हमें नांस करिबे को प्रयास करतो, अब बू हमारेई मत में आ गयौ है और हमारेई भरोसे के सुभ समाचार को प्रचार करतें। बे मेरी बजैह ते परमेस्‍वर की महिमा करतैं। चौदह साल बाद मैं दुबारा येरूसलेम नगर में बरनबास के संग तीतुस कूं लैके गयौ। परमेस्‍वर नें मोय दरसन दयौ हतो, बाई के अनुसार मैं मांपे गयौ हतो। मांपै जो सुभ समाचार मैं गैर यहुदियन के बीच में पिरचार करतूं, वाके बारे में एकान्त में कलिसिया के बड़े लोगन कूं सुनांयौ, ताकि कऊं ऐसौ न होय कै मेरी मेहनत और पिछली दौड़ धूपऊ बेकार चली जाय। तीतुस जो मेरे संग हतो बू यूनानी हतो, फिरऊ मैनें खतना कराबे के काजै बाय बिबस नांय करो। जि सब बिन झूंठे भईयन की बजैह ते भयौ है, जो हम में चोरी ते घुस आये हते, जो आजादी हमें मसीह ईसू ते मिली है वाकौ भेद लैके हमें दास बनावें। हमनें एक पल के काजैऊ बिनकी अधीनता स्‍वीकार नांय करी, ताकि सुभ समाचार की सच्‍चाई तुमारे काजै बनी रहे। पर बे लोग जो खास समझे जाते हते, बिनें मेरे द्वारा सुनांये सुभ समाचार में कोई कमी नांय मिली। बे भले चाहे कोई भी होबै, जाते मोय कोई फरक नांय पड़त, चौंकि परमेस्‍वर काऊ कौ पछपात नांय करत। जाके बिपरीत बे लोग समझ गये, कै पतरस कूं परमेस्‍वर नें खतना बारे यहुदिन के बीच में सुभ समाचार सुनाबे कौ काम सौंपौ है, बैसेई मुझ, पौलुस कूं परमेस्‍वर नें गैर यहुदी लोगन के बीच में सुभ समाचार सुनांयवे कौ काम सौंपो है। जा तरैह ते परमेस्‍वर नें यहुदी लोगन के बीच में सुभ समाचार पिरचार करबे काजै पतरस कूं भेजौ भयौ चेला बनाकै वाकी सेवकाई में काम कर रयौ है, बई तरैह ते परमेस्‍वर गैर यहुदिन के बीच में सुभ समाचार पिरचार करवे काजै मोय भेजौ भयौ चेला बनाकै मेरी सेवकाई में काम कर रयौ है। याकूब, पतरस और यूहन्‍ना जो कलिसिया के खम्भे हते परमेस्‍वर के बा अनुग्रह कूं जान गये जो मोय मिलौ हतो बिन्‍नें मोते और बरनबास ते संगती कौ हात मिलायकै जा बात में राजी है गये कै मैं और बनरबास गैर यहुदिन में काम करिगें और बे यहुदी लोगन में काम करिगें। बिन्‍नें हमते केबल जेई बात कही, कै तुम गरीब लोगन कौ ध्यान रखौ, और मैं खुदई जाई कामें करबे कौ भौतई इच्छुक हूं। जब पतरस अन्ताकिया नगर में आयौ, तब मैनें वाके मौंह पैई कही कै तू गलत हतो। चौंकि याकूब के य्हांते कछू लोगन के आयबे ते पैहले बू गैर यहूदिन के संग भोजन करतो हतो, पर जब बे आये तौ बू खतना करबाने बारे यहूदिन ते डरके बिनते किनारों करिबे और अलग होने लगौ। और दूसरे यहुदियन नेऊं वाके संग जा तरैह कौ ढोंग रचौ, याँ तक कै बरनबासऊ बिन लोगन के ढोंग की बजैह ते भैहक गयौ। पर जब मैंनें जि देखौ कै बे लोग सुभ समाचार की सच्‍चाई के अनुसार चाल-चलन नांय चल रये, तब मैंनें सबके सामने पतरस ते कही, “जब तू यहुदी हैके गैर यहुदिन जैसे जीबन जी रयौ है, और यहुदियन की तरैह ते नांय कर रयौ तौ तू गैर यहुदिन कूं यहुदिन की तरैह चाल-चलन चलवे कूं चौं बिबस कर रयौ है?” हम तौ जनम तेई यहुदी हैं, पापी गैर यहुदियन नांय। तौऊं जि जानकै कै मनुस्य व्‍यबस्था के कामन ते नांय, पर ईसू मसीह पै भरोसौ करिबे ते धरमी ठहरेगौ। जाई कारन हमनेंऊ मसीह ईसू पै भरोसौ करौ है, ताकि हम व्‍यबस्था के कामन ते नांय पर मसीह पै भरोसौ करवे ते धरमी ठहरे हैं, जा मारै व्‍यबस्था के कामन ते कोई आदमी धरमी नांय ठहरैगौ। यदि हम जो मसीह ईसू में धरमी ठहरबो चाहतै, यदि खुदई पापी निकरैं, तौ का मसीह पाप को सेबक है? ऐसौ नांय। और जिन यहुदी रीतिन मैं छोड़ चुकौऊं, बिन रीतिन कूं दुबारा मानूं, तौ मैं खुदई नियमन कूं तोरबे बारौ हूं। चौंकि मैं व्‍यबस्था द्वारा व्‍यबस्था के काजै मर गयौ हूं ताकि मैं परमेस्‍वर के काजै जी सकूं। मैं मसीह के संग संग क्रूस पै चढ़ायौ गयौ हूं। पर अब जीबे बारौ मैं नांऊ बल्कि मसीह मोमें जीबित है, और अब जो जा सरीर में जीबित हूं, केबल बा भरोसे ते जीबितऊं जो परमेस्‍वर के पुत्र पै है, जाने मोते पिरेम करौ है, और अपनों जीबन मेरे काजै दे दियौ है। मैं परमेस्‍वर की किरपा कूं बेकार नांय ठहराऊंगो। चौंकि यदि धारमिकता व्‍यबस्था के द्वारा मिलतिये, तौ मसीह को मरबो तौ बेकार है। अरे बुद्धिहीन गलातियो की कलिसिया तुमें कौने भैकाय दयौ है? मैंनें तुम लोगन कूं हर एक बात साफ-साफ बता दयी हती, जैसे के तुमारे सामने ईसू मसीह क्रूस पै चढ़ाए गयौ। मैं तौ तुमते जेई जाननों चाहूं, जो पबित्र आतमा तुमनें पाई है बू नियम के कामन ते पाई है, कै भरोसे के सुभ समाचार सुनवे ते पाई है? का तुम इतने बुद्धिहीनों, कै आतमा की रिति ते सुरू करिके सारीरिक रीति पै पूरे पौंहचौगे? का तुमने इतने दुख बेकार उठाये? जो बेकार में नांय उठाये! परमेस्‍वर तुमें पबित्र आतमा दैवे, और तुम में सामर्थ के काम करै। का तुमने व्‍यबस्था को मानों हैं? जा लयें के तुमने सु समाचार पै भरोसौ करै। जि ऐसौई है जैसे कै पबित्र सास्त्र में लिखौ है, “अब्राहम नें तौ परमेस्‍वर पै भरोसौ करौ हतो और जेई वाके काजै धारमिकता गिनी गई।” अब जि जान लेओ कै भरोसौ करिबे बारेई अब्राहम की सन्तान ठहरिंगे। और पबित्र सास्त्र में सुरू ते जि लिखौ है “कै परमेस्‍वर भरोसौ ते ही गैर यहुदिन कूं धरमी ठहराबेगौ, पैहले तेई अब्राहम कूं जि सुभ समाचार सुनांय दियौ, कै सिगरी जात तोमें आसीस पाबैगीं।” जामारै जो लोग परमेस्‍वर पै भरोसौ करतें, बे भरोसे योग्‍य अब्राहम के संग आसीस पाबिंगे। जो कोई आदमी नियम के कामन कूं मानतै, बू साप के अधीन है, चौंकि सास्त्र में लिखौ है, “जौ कोई नियम की किताब में लिखी भई सब बातन कौ पालन नांय करे बू सापित है।” जामारै जि बात तौ साफ है, कै नियम के द्वारा परमेस्‍वर की नजर में कोई धरमी नांय ठहरेगौ “चौंकि धरमी जन भरोसे ते जीबित रैहबेगौ।” पर भरोसे कौ व्‍यबस्था ते कोई मतलब नांय, पर जाकौ उल्टौए “के जो व्‍यबस्था के नियम की बातन को पालन करैगौ बू बिनकेई कारन जीबित रैहबेगौ।” मसीह हमारे काजै दोसी बनो। जाते बानें हमे मोल लैकै नियम के साप ते छुड़ायो चौंकि लिखौ है, “के जो कोई काठ पै लटकाऔ जाबे बू सापित है।” अब्राहम की आसीस मसीह ईसू में गैर यहुदिन तक पौहच सके और भरोसे ते बा पबित्र आतमा कूं प्राप्‍त करें जाकी प्रतिग्‍या भई है। हे भईयाओ, मैं आदमिन की रीति पै कह रयौऊं, जब दो आदमी काऊ बात कौ इकरार कर लैवे तौ बाय कोई ना तौ टाल सके न बामें कछू बढ़ाय सके। ऐसे ही, परमेस्‍वर नें अब्राहम और वाके बंस ते बाचा करी, परमेस्‍वर नें ऐसे नांय कही कै मैं तेरे वसंन ते बाचा करतूं, वसंन कौ मतलब तौ भौत ते वंस हैं बानें तौ कही एक वंस कूं चौंकि वंस एक आदमीये दिखातै, बू ईसू मसीह है। पर मैं जिय कैह रयौऊं जो इकरार परमेस्‍वर नें पैहलेई पक्‍कौ करो बाकूं व्‍यबस्था चार सौ तीस बरस के बादऊ आयकै नांय काट सकी। ना ही वाकी बाचा कूं बेकार ठहरा सकी। चौंकि यदि बिरासत अगर व्‍यबस्था ते मिलती, तौ बाचा ते नांय मिलती, पर परमेस्‍वर नें अब्राहम पै अपनी किरपा दिखाई और बिरासत बाये बाचा के अनुसार सेत मेंत में दै दयी। तौ फिर व्‍यबस्था की का जरूरत रही? बू तौ अपराधन की बजैह ते बाद में दे दयी और बा बन्स के आयवे तक जाकी प्रतिग्‍या करी गयी हती और नियम सुरग दूत के द्वारा एक बिचौलिया के हात ठहराई गयी। बिचौलिया कमते कम दो आदमिन के बीच में हौबे, पर परमेस्‍वर तौ एकई है। तौ का व्‍यबस्था परमेसवर की बाचा के बिरोध में? ऐसौ नांय। चौंकि यदि ऐसी बात होती, अगर व्‍यबस्था जीबन दे सकती तौ सचमुच धारमिकता व्‍यबस्था तेई आती। पर पबित्र सास्त्र लिखौ है, कै पाप नें सब कूं गुलाम कर लियौ है, ताकि बू बाचा जाकौ आधार पिरभू ईसू मसीह पै है पूरी होय और भरोसौ करबे बारेन में होय। पर भरोसे कै आयबे ते पैहले हम व्‍यबस्था की सरन में बन्दी हते। और भरोसे के पिरगट होवे तक बाई की सरन में बन्दी रहे। जा तरैह ते व्‍यबस्था मसीह तक पौहचबे काजै हमारी सिछक बन गयी है। जाते हम भरोसे के द्वारा धरमी गिने जांय पर अब भरोसे आय चुकौ है तौ हम सिछक के गुलाम नांय रये। चौंकि तुमने जो मसीह ईसू पै भरोसे करौ है बाई बजैह ते तुम परमेस्‍वर की सन्‍तान हो। तुम मेंते जितनेन नें मसीह को बपतिस्मा लियौ है बिनने मसीह कूं पहन लियौ है। अब ना यहुदी रये हो, ना कोई यूनानी है, ना कोई दास है, ना कोई स्‍वतन्त्र है, ना कोई आदमीये, ना कोई औरते, चौंकि तुम सब मसीह ईसू में एक है गये हो। और यदि तुम मसीह के हतो तौ अब्राहम के बन्स और बाचा के अनुसार बारिसऊऔ। मैं जि कैह रयौ हूं, जो बारिसे बू नाबालिक है, पर फिरऊ सब चीजन कौऊ मालिकै बामें और दास में कोई अन्तर नांय। बू पिता के द्वारा ठहराये भये समै तक देख रेख करबे बारे और पिरबन्ध के वस में ही रैहबै, बैसे ही हमऊं पैहले बच्‍चन के जैसे संसार के रीति-रिबाज के वस में हते। पर जब समै पूरौ भयौ, तब परमेस्‍वर नें अपने पुत्र कूं भेजौ, जो स्त्री ते पैदा भयौ और व्‍यबस्था के अधीन उत्पन्‍न भयौ। और जो आदमी व्‍यबस्था के गुलाम हैं, बिनैं कीमत चुकाय के छुड़ाय लेय और हमकूं लेपालक बेटा हैबे को अधिकार मिलै। और फिर तुम परमेस्‍वर के बेटा हों जामारै परमेस्‍वर नें अपने पुत्र की आतमा कूं, जो हे अब्बा, हे पिता कह के पुकारतै, हमारे हृदय मैं भैजो है। जामारै अब तुम दास नांय, पर पुत्र हौ और पुत्र हैबे के नाते तुम परमेस्‍वर की बिरासत के अधिकारी हौ। पैहले तुम लोग परमेस्‍वर कूं नांय जानते, जामारै तुम ऐसे ईस्‍वर के दास हते, जो हकीकत में परमेस्‍वर नांय हते। पर अब तुमनें परमेस्‍वर कूं पैहचान लियौ है, और परमेस्‍वर नेऊं तुमकूं पैहचान लियौ है, अब तुमें निरबल, बेकार, पुरानी सिछान की ओर नांय लौटनों। का तुम दुबारा ते बिनके दास हैबो चाहतौ? तुम बिसेस दिनान नें, महीनन नें और रितु नें, बरसन नें मानतौ, मोय तौ जा बात कौ डर है, कै कऊं मैंनें जो तुमारे काजै जो मेहनत करि है, बू बेकार नांय चली जाबै। हे भईयाओ, मैं तुमते बिनती कर रयौ हूं, कै तुमऊं मेरे समान बन जाऔ, चौंकि मैऊं तुमारे समान बन गयौ हूं, तुमने मेरे संग कोई अन्याय नांय करौ। तुमें याद होगो मैंनें तुमें पैहली बार सुभ समाचार चौं सुनांयौ हतो? का जि जामारै भयौ हतो कै मैं बीमार हतो? जाके बाउजूद तुमनें मोय तुच्छ नांय जानों, तुमने मेरी सारीरिक दसा कूं जो तुमारी परीछा कौ कारन हती, और ना नफरत करी पर तुमने मोय परमेस्‍वर को दूत बरन ईसू मसीह के समान समझ के अपनांयौ हतो। अब तुमारौ आनन्द मनांयबौ कां गयौ? जा बात कौ मैं खुद गबाहूं, बा समै तौ तुम मोय अपनी आँखेऊ निकार के दै देते। का सच बोलबे की बजैह ते मैं तुमारौ दुसमन बन गयौ हूं? नियम कूं मानवे बारे लोग तुम पै जादा ध्‍यान देकर अपनों बनानों चाहतै, पर बिनकौ इरादौ अच्‍छौ नांय, बे सिर्फ जेई चाहतै कै बे तुमें मोते अलग कर दैवे जाते कै तुम बिनयीं के बने रैहबै। पर जि औरऊ अच्‍छौ है कै भले उद्‍देस्‍य ते आनन्द पूर्वक अपनों बनांयबे की कोसिस हर समै करी जाय, केबल बाई समै नांय जब मैं तुमारे संग रैहतूं। हे मेरे बालकौ, जब तक तुम में मसीह को रूप नांय बन जाय, तब तक मैं तुमारे काजै जच्‍चा की सी पीड़ा सहतौ रहुंगो। मेरी तौ जि इच्‍छा होतै, कै अब मैं तुमारे जौरे आयकें औरई तरैह ते बोलतो, अब मैं तुमारे काजै दुबिधा मेंऊं। तुम में ते जो कोई व्‍यबस्था के अधीन रैहबौ चाँहतो, मोय बताऔ, का तुमने व्‍यबस्था की नांय सुनी? बामें जि लिखौ है, “कै अब्राहम के दो पुत्र भये हते, एक दासी ते और एक आजाद ब्याहता औरत ते। वाकौ बू बेटा जो दासी तै पैदा भयौ बू सारीरिक रीति ते जनमों, पर जो ब्याहता औरत ते पैदा भयौ बू परमेस्‍वर की बाचा कौ परिनाम हतो।” इन मेंऊ एक दृस्टान्‍ते, कै मानों जे औरतें दो इकरार हैं, एक सिनई परबत की, जाते केबल दासई पैदा होबै, बू तौ हाजिरा है। हाजिरा मानों अरब देस कौ सिनई परबतै, जो जा समै के येरूसलेम नगर के समान है, चौंकि बू अपनी सन्‍तानन समेत दासत्व में परी है। पर दूसरी औरत सुरग में स्थित परमेस्‍वर के येरूसलेम के जैसी है, बू आजाद है और बुई हमारी माँ है। चौंकि पबित्र सास्त्र में लिखौ है: “कै हे बांझ, तैने कबऊ बालक नांय जनों, अब आनन्द मना। तू जो जच्‍चा की पीड़ायें नांय जान्‍त, तू जय जय कार कर। चौंकि त्‍यागी भयी औरत की सन्‍तान, ब्याहता औरत की सन्‍तान तेऊ जादा है।” हे भईयाओ, तुम अब्राहम के बेटा इसहाक की तरैह बाचा की सन्तान हो। पर जैसौ कै बा समै सरीर के अनुसार जनमौ भयोऔ, परमेस्‍वर की बाचा के परिनाम ते पैदा भये कूं सताबतो, बैसौई अबऊ होते। पर पबित्र सास्त्र में लिखौ है, “दासी और वाके बेटा कूं निकाल दे दासी के बेटा तौ आजाद ब्याहता औरत के बेटा संग उत्‍तराधिकारी नांय होंगे।” जामारै हे भईयाओ, हम तौ दासी के नांय पर आजाद ब्याहता औरत की सन्तान हैं। मसीह नें आजादी के काजै हमें आजाद करौये, सो जाईमें डटे रहो और दासत्व के जूआ में हम फिर ते नांय जुतें। मैं पौलुस तुमते कैह रयौऊं अगर तुम भरोसौ करबे के बाद धरमी हैबे के काजै खतना करबातौ तौ जाकौ मतलब जि है कै मसीह कौ तुमारे काजै कोई महत्व नांय। मैं हरेक कूं चेतावनी दै रयौ हूं कै जो कोई धरमी हैबे काजै खतना करबाबतै बिनैं सबरी व्‍यबस्था कौ पालन करनों पड़ेगौ। और अगर तुम व्‍यबस्थाए मानबे के द्वारा धरमी के रूप में परमेस्‍वर कूं खुस करबौ चाहतौ, जाकौ मतलब जि है तुमनें मसीह ते अपने आप कूं दूर कर लियौ है और मसीह की किरपा ते बन्चित है गये हो। पर मसीह पै भरोसे की बजैह ते परमेस्‍वर के सामने धरमी हैबे की आस करतें जाके काजै पबित्र आतमा नें हमें इन्‍तजार करबे की सामर्थ दयी है ईसू मसीह में न तौ खतना बारेन कौ कोई महत्व है, और न बिना खतना बारेन को कोई महत्व है। मसीह में तौ केबल भरोसे के द्वारा जो पिरेम पिरगट भयौ है, बाई कौ महत्व है। तुमतौ मसीह जीबन में भली भांति दौड़ रये हते, पर अब सच्‍चाई कूं मानवे ते तुमें किन नें रोक दियौ है? जा तरैह की बात परमेस्‍वर की ओर ते नांय, जानें तुमें चुनों है, ऐसी बात वाकी ओर ते तौ हैई नांय सकत। “चौंकि याद रखौ थोड़ो सो खमीर गूंथे भये पूरे आटे है खमीरत बना देतै।” मोय पिरभू में तुम पै पूरौ भरोसौ है कै तुम काऊ दूसरी बिचार धाराये नांय अपनांगे। पर तुमें डरपाबे बारे चाहे कोई चौं नांय होवें, बू परमेस्‍वर ते दन्ड पावेंगे। पर हे भईयाओ, अगर मैं खतना कौ पिरचार करतो तौ, मैं चौं सतायौ जातो? मैं जो क्रूस के बारे में समाचार सुनातूं, अगर मैं लोगन कूं खतना करबाबे की कैहतो, तौ मोय कोई परेसानी नांय होती। भलौ तौ जेई होतो के जो तुमें बिचलित कर रये है, बे खतना करबाबे के समै में अपनों अंगऊ काट लें। हे भईयाओ, तुमें आजाद हैबे काजै बुलाये गये हो पर जा आजादीऐ सरीर की इच्‍छा पूरी करबे कौ साधन मत बनाऔ, पर पिरेम ते एक दूसरे की सेबा करौ। चौंकि सबरी नियम जाई कथन में पूरी हे जाबे, “कै तू अपने पड़ौसी ते अपने समान पिरेम रख।” पर अगर तुम एक दूसरे कूं काटतौ और फाड़ खाबतौ तौ साबधान रहो कऊं ऐसौ नांय होये कै तुम एक दूसरे को सर्वनास कर देओ। पर मैं तुमते कैह रयौ हूं कै तुम पबित्र आतमा के अनुसारई चलौ, तबई तुम सरीर की बुरी इच्छा कूं काबू कर पांबगे। चौंकि सरीर की बुरी इच्‍छा तौ पबित्र आतमा के बिरोध में और पबित्र आतमा सरीर की बुरी इच्‍छा के बिरोध में लालसा करतें, जि एक दूसरे के बिरोधी है, जई मारे तुम जो करबौ चाहतो बू नांय कर पावत। पर तुम पबित्र आतमा के चलाये चलतौ तौ व्‍यबस्था के अधीन नांय रहे। सरीर के काम तौ स्पस्ट हैं जैसे व्‍यभिचार, असुद्धता, भोग-बिलास, मूरती पूजा, जादू टौना, बैर भाव, लड़ाई झगडे़, ईरसा, क्रोध,स्‍बार्थीपन, मत-भेद, दलबन्दी डाह, मतबारौपन, रंग रलियां, ऐसे औरऊ काम हैं जिनके बारे में मैं तुमें पैहले तेई चिताय चुकौ हूं, और अबऊ चिताय रयौ हूं कै ऐसे काम करिबे बारे परमेस्‍वर के राज्‍य के बारिस नांय होंगे। पर पबित्र आतमा का फल पिरेम, आनन्द, सान्‍ती, धीरज, दयालुता, भलाई, भरोसौ नम्रता और संयम है। ऐसे-ऐसे कामन के बिरोध में कोई नियम नांय। और जो ईसू मसीह में हते बिन्‍नें अपनी सरीर की बुरी इच्‍छा और बासना क्रूस पै चढ़ाय दयीं हैं। यदि हम आतमा के अनुसार जीबित हैं तौ पबित्र आतमा के अनुसार ही चलें। हम अहंकारी न बनें न एक दूसरे कूं चिड़ायै, और ना ही आपस में इस्‍र्या रखें। हे भईयाओ, यदि कोई आदमी काऊ पाप में पकड़ौ जावें, तौ तुम जो आतमिक हो, बाय बड़ी नरमाई ते सम्हारौ जाते बू फिर ते अच्‍छे रस्ता पै आ जाये और खुदऊ हुसियार रहो, कऊं ऐसौ ना होय तुमऊं काऊ परीछा में ना पड़ जाऔ। जा तरैह ते एक दूसरे की दुख के समै में सहायता करौ, जाके द्वारा तुम मसीह की व्‍यबस्थाऐ पूरी करौगे। यदि कोई आदमी ना कछू होते भये अपने आप कूं सब कछू समझबे कौ दाबा कर रयौ है, तौ बू अपने आपकूं धोकौ दे रयौ है। पर हर एक आदमी अपने काम कूं अच्‍छी तरैह ते जाँच लैवे तबई वाके जौरे गर्व करवे काजै कछू होगौ, पर एक दूसरे ते अपनी तुलना नांय करै। चौंकि हरेक आदमीएं अपनौई बोझ उठानों चाहिऐ। जो तुमें परमेस्‍वर के वचन की सिछा देतै, बिनके संग हर एक अच्‍छी चीज कूं बांट लैओ। धोके में मत रहियों, परमेस्‍वर ऐ हसी में नांय उड़ायौ जाय सकै। चौंकि जो आदमी जैसो बोवेगौ बैसौई काटेगौ। जो सरीर की बुरी इच्‍छा के द्वारा बोवेगौ बू सरीर की बुरी इच्‍छा के द्वारा ही बिनास की कटनी काटेगौ। जो पबित्र आतमा के द्वारा बोवेगौ बू कबऊ नांय खतम हैबे बारे जीबन की कटनी काटेगौ। हमें भलाई करत-करत निरास नांय होनौं, चौंकि हम मजबूत बने रहेंगे तो, सही समै पर अनन्‍त जीबन की कटनी काटिंगे जाई मारे जहां पै मौकौ मिले सबके सब भलाई करो, और खास करके बिन लोगन के संग जो पिरभू में भरोसौ करबे बारे हैं। देखौ अब मैं तुमें कैसे बड़े-बड़े अछरन में अपने हातन ते तुमें लिख रयौ हूं। जो लोग सारीरिक दिखाबा चांहते बुई तुमारौ खतना करबाबे पै तुले भये हैं। और बू ऐसौ जामारै करतें, कै बिनें मसीह के क्रूस के पिरचार करवे कि बजैह ते सतायौ नां जाबै। चौंकि जिनकौ खतना है चुकौए और जो खतना करबाबो चाहतै, बे खुद तौ व्‍यबस्थाऐ नांय मानतई, पर बू तुमारौ खतना जई बजैह ते करायबौ चाहते कै बे तुमारी सारीरिक दसा पै घमन्ड करै कै बिन्‍नें तुमारो खतना करबायोए। मैं तौ केवल पिरभू ईसू मसीह के क्रूस पैई घमन्‍ड करतूं, मैं काऊ और बात पै घमन्‍ड नांय करत चौंकि जाके द्वारा मेरी नजर में सबरौ संसार क्रूस पै चढ़ायौ जाय चुकौ और मैऊं संसार की दृस्टि में चढ़ चुकौ हूं। चौंकि न तौ खतना को न बिना खतना को कोई महत्व है, पर महत्व जा बात कोए कै हम पूरी तरह तै नई सृस्‍टी है। चौंकि जितने जा रीति पै चलिगें बिनपे और परमेस्‍वर के इसरायल सब बिसबासी लोगन पै सान्‍ती और दया होती रैहबेगी। आगे कूं कोई मोय दुख नांय देय मैं ईसू मसीह के घाबन्‍नें अपने सरीर में संग लिये फिर रयौऊं। सो हे भईयाओ, हमारे पिरभू ईसू मसीह की किरपा और आतमा हमेसा तुमारे संग बनी रहबे। ऐसौई होबे। मैं परमेस्‍वर की इच्‍छा ते ईसू मसीह कौ भेजौ भयौ चेला पौलुस, इफिसुस में रैहबै बारे सब परमेस्‍वर के पबित्र लोगन कूं जो ईसू मसीह पै भरोसौ रखतै नमस्‍कार लिख रयौऊं। तुमें हमारे परमेस्‍वर पिता और पिरभू ईसू मसीह की ओर ते किरपा और सान्‍ती मिलती रैहबै। हमारे पिरभू ईसू मसीह के परमेस्‍वर और पिता की स्तुति होबै जानें हमें ईसू मसीह में सुरगीय स्थान में सब तरैह की आतमिक आसीस दे दयीं हैं। परमेस्‍वर नें हमें दुनियां बनावे ते पैहलेई मसीह में चुन लियों, कै हम वाके पिरेम में पबित्र और निरदोस होबै। और बानें पिरेम के अनुसार अपनी खुसी और मकसद ते पैहलेई ठहरा दियो, कै हम ईसू मसीह के जरिये वाकी गोद लये भये सन्तान कहलाबें। परमेस्‍वर नें अपनी किरपा की महिमा हम पै पिरकट करी और बू किरपा हमें वाके लाड़ले बेटा पिरभू ईसू मसीह के जरिये सेंत मेंत में मिली है। जाकी वजैह ते वाकी स्तुति होबै। और ईसू के खून ते हमें छुटकारौ और अपराध ते छमा मिली है, जि हमारे परमेस्‍वर की अपार किरपा के अनुसार मिलौ है। जा बड़ी किरपा को परमेस्‍वर नें हमको सबरी बुद्धी और समझ के साथ बहुतायत ते दयी है। चौंकि बानें अपने भले उद्देस्य के अनुसार अपने भेद को हम पै पिरगट करो और जि भेद बुई है जाये परमेस्‍वर नें मसीह में पूरौ करबे काजै पैहले तेई तय कर लयो हतो। परमेस्‍वर नें जि सब कछू जामारै करो कै समै के पूरे है जायबे पै सबरी चीजन कूं यानि कै जो सुरग में हैं और धरती में हैं बिन सबरी चीजन कूं एक करके मसीह के अधीन में कर दै। सब बात परमेस्‍वर के उद्देस्य और योजना के अनुसार होतें। बानें हमें अपनी योजना में पैहले तेई ठहरायौए, कै हम ईसू मसीह के जरिये परमेस्‍वर के पबित्र लोग बनबे काजै चुने गये हैं। मसीह पै आसा रखबे बारे पैहले हम लोग हैं, हम लोगन जरिये परमेस्‍वर की महिमा की स्तुति होवे। तुम लोगनेंऊं तौ सच्‍चाई कौ वचन जो उद्धार कौ सुभ समाचार है, बाये सुनिकै मसीह पै भरोसौ करो और परमेस्‍वर नें तुमें पबित्र आतमा की मौहर लगायकै लोगन कूं जि बतायौ है कै तुम वाके है गयेऔ, पबित्र आतमा कौ बादा परमेस्‍वर नें पैहले तेई करौ है। जि पबित्र आतमा, हमें पूरी तरैह ते छुटकारौ मिलबे तक हमारी बिरासत की जमानत है, कै परमेस्‍वर की महिमा की स्तुति होबै। मैंनें पिरभू ईसू में तुम लोगन के भरोसे और सब परमेस्‍वर के पबित्र लोगन के काजै तुमारे पिरेम के बारे में सुनों है, जा मारै मैंनें तुमारे काजै परमेस्‍वर को धन्यबाद करबौ नांय छोड़ो और अपनी पिराथना में हमेसा तुमें याद करतौ रैहतूं। मैं पिराथना करतूं कै हमारे पिरभू ईसू मसीह को परमेस्‍वर, जो महिमा कौ पिता है, तुमें ग्‍यान और प्रकासन की आतमा दैवे, जाते तुम बाये और अच्‍छे तरीके ते जान लेओ। मैं जऊ बात के काजै पिराथना करतूं कै बू तुमारे मन की आँखन नें खोल दैबे कै तुम जान जाऔ कै वाकी बुलाहट की आसा का है? और परमेस्‍वर के पबित्र लोगन में वाकी बिरासत की महिमा कौ धन कितनों जादा है। तुम जेऊ जान जाऔ कै हम भरोसौ करबे बारेन के काजै वाकी महान सक्‍ती कितनीं अनगिनती है। हमारे अन्दर काम करबे बारी बेई सक्‍ती महान सक्‍ती है। और बई सक्‍ती ते परमेस्‍वर नें मसीह को मरे भयेन में ते जीबित करके सुरगीय जगैह में अपने सीदे हात की तरफ बैठा लियौ। और मसीहए सब राज करबे बारेन पै, अधिकारिन पै और आतमिक सक्‍तीन पै और प्रभुतान के ऊपर ठहरायौ है कै बू हर एक नाम के ऊपर, जाई युग में नांय बल्कि आबै बारे युग में राज करै। परमेस्‍वर नें सब कछू वाके पामन के नीचे कर दियौ और बाये कलिसिया की सब चीजन के ऊपर सिरोमनी ठहरायौए, कलिसिया जो मसीह कौ सरीर है, और कलिसिया मसीह की परिपूर्नता है, और मसीह सब में सब कछू भरपूर करते। तुम लोग अपने अपराध और पापन के कारन आतमिक रूप ते मर गये हते, चौंकि तुम पैहलेई संसार की बुरी रस्ता पै चलत भये बिन आकास के अधिकार के हाकिम मतलब बा दुस्‍टआतमान के तरीका ते चलते हते। ये आतमाए बिन आदमिन के हृदय में काम करै जौ परमेस्‍वर के आग्‍या कूं नांय मान्‍त। हम सबऊ पैहले अपने सरीर की लालसान में दिन बिताते और अपने सरीर और मन की इच्‍छान कूं पूरी करते हते। हम खुद दूसरे लोगन की तरैह ते परमेस्‍वर की गुस्सा के लायक हते। पर परमेस्‍वर की दया अपार ए। हम अपने पापन की बजैह ते मर गये हते, पर बानें हमते इतनों पिरेम करौ, कै जब हम अपराधन की बजैह ते आतमा में मरे भये हते तौ बानें हमें मसीह में जीबित करौए और परमेस्‍वर की किरपा तेई हम लोगन कौ उद्धार भयौ है। चौंकि हम ईसू मसीह में है, जामारै परमेस्‍वर नें हमें मसीह के संगई जीबित करौ जाते हम मसीह के संग सुरग में राज करें। कै परमेस्‍वर बा किरपा ते जो ईसू मसीह में हम पै है, आवे बारे युग में अपने अनुग्रह कौ असीम धन दिखाबै जाकी कोई बराबरी नांय। चौंकि भरोसे के द्वारा किरपा तेई तुमारौ उद्धार भयौ है, जि तुमनें तुमारी ओर ते नांय मिलौ बरन जि तौ परमेस्‍वर कौ दान है। जि तुमारे काऊ काम की वजह ते नांय भयौ जाते कै तुम घमन्‍ड करौ। चौंकि परमेस्‍वर नें हमें बनांयौ है, और बानें ईसू मसीह में हमारी सृस्‍टी जामारै करी है कै हम अच्‍छे काम करै, जिनै परमेस्‍वर नें पैहले तेई हमारे काजै तैयार करौ है। तुमतौ पैहले तेई गैर यहुदी हो और जो लोग सरीर में खतना कराये भये हैं बे तुमें खतना रहित कैहतै। तुम लोग याद रखियों कै पैहले तुम मसीह ते अलग हते और इसरायल कि बिरादरी ते छिके भये हते और प्रतिग्‍या की बाचाओं ते अनजान, और जा संसार में बिना परमेस्‍वर के निरास जीबन जीते हते। पैहले तुम जो परमेस्‍वर ते दूर हते, पर अब ईसू मसीह के खून के जरिये वाके जौरे है गये हैं। चौंकि ईसू मसीह हमारी सान्‍ती है, और बाई नें यहुदी हों चाहे गैर यहुदी हों सबनकूं एक कर दयौ है, और दोनोंन में जो नफरत की दिबार हती बाय गिरा दियो है। और मसीह नेंई अपनी मौत के जरिए सबरी रीति-रिबाज, व्‍यबस्था और आग्‍यान कूं मिटा दियौ और जाई तरैह ते बानें यहुदिन और गैर यहुदिन कूं अपने आप में मिला लयौ और एक नयौ मनुस्‍य बनांयकै सान्‍ती स्थापित करी। और बानें क्रूस के जरिये दोनोंन के सरीरै एक बनांयकै परमेस्‍वर के संग में मेल करायौ और जई तरैह ते बानें बिनकी सबरी नफरत कूं खतम कर दयौ। तब बानें आयकै बिन लोगन कूं जो परमेस्‍वर ते तुम जो दूर हते, और जो जौरे हते सान्‍ती कौ सन्देस सुनांयौ। चौंकि मसीह के जरिए हम दोनों एकई आतमा में हैकै अपने परम पिता परमेस्‍वर के जौरे पौंहच सकतैं। अब तुम लोग ना तौ पराये रहै ना परदेसी रहे, पर परमेस्‍वर के पबित्र लोगन के संगी और परमेस्‍वर के घराने के है गये हो। तुम लोगन कूं एक ऐसे घर के रूप में बनांयौ गयौ है जो भेजे भये चेलान की और परमेस्‍वर की बात बताबे बारेन की नींव पै खड़ौ है और वाके कौने कौ पत्‍थर खुद ईसू मसीह है। मसीह में सब बिसबासी एक संग मिलकै पिरभू के काजै एक पबित्र बड़े पिराथना घर बन जातै। और ईसू मसीह में तुमऊ बड़े पिराथना घर बनबे काजै बुलाये गये हो, जामें आतमा के जरिये खुद परमेस्‍वर बास करतें। जामारै मैं तुम जो गैर यहुदिन है बिनकी भलाई काजै ईसू मसीह की कैद में हूं। तुम लोगन नें जि जरूर सुनों होगों कै परमेस्‍वर नें तुम लोगन की भलाई के काजै मोय अपनी किरपा की सेबकाई कौ काम सौंपौं हैं। जाकौ मतलब जि है कै बू मोय पैहले तेई रहस्‍य समझा दयौ गयौ जाके बारे में संछेप में लिख चुकौ हूं। जाये तुम पढ़कै जान सकतौ कै मैं ईसू मसीह के भेद है कहां तक समझ गयौ हूं। जि रहस्‍य पिछली पीढ़ी के आदमिन कूं नांय बतायो गयौ पर आतमा के जरिये वाके पबित्र भेजे भये चेलान कूं और परमेस्‍वर की बात बताबे बारेन कूं समझायौ गयौ है। बू रहस्‍य जि है कै सुभ समाचार के जरिये यहुदी और गैर यहुदी एकई वसीयत के अधिकारी हैके, एकई सरीर के अंग है, और ईसू मसीह के बारे में जो बाचा करी गयी हती बामें सामिल है गये हो। परमेस्‍वर नें अपनी सक्‍ती के अधिकार ते मोय जि किरपा दयी है, कै मैं बा सुभ समाचार कौ सेबक बन सकूं। और मैं जो परमेस्‍वर के सब पबित्र लोगन में छोटे ते छोटौऊं जि वरदान मिलौ है,कै जो गैर यहुदी हैं बिनें ईसू मसीह की अपार किरपा के खजाने कौ सुभ समाचार सुनांऊ। और सबन नें जा रहस्‍य ते भरे भयी योजना के बारे में बता सकूं जाये सबरी दुनियां के बनावे बारे सृस्‍टी करता परमेस्‍वर नें अब तक छुपायकें रखौ। और अब परमेस्‍वर की जा योजनाए बिसबासियों की कलिसिया के जरिये आतमिक सक्‍ती और अधिकारिन पै परमेस्‍वर के महान ग्‍यान के हरेक हिस्साए पिरकट करौ जाबै, परमेस्‍वर नें जि पैहले समैं तेई अपने मन में सोच रखौ कै बू बाय पिरभू ईसू मसीह के जरिये पूरौ करै। हम पिरभू ईसू मसीह पै भरोसौ करै कै हम बई भरोसे के संग बिना डर के परमेस्‍वर पिता के जौरे जा सकैं। जाईमारै मैं तुम लोगन ते जि बिनती करतूं, कै मैं तुम लोगन के काजै जो परेसानी सैह रयौ हूं, वाके मारै तुम हिम्मत मत हारौ चौंकि जाईमें तुम लोगन की महिमा है। जाई बजैह ते मैं पिता के सामने घुटने टेककै पिराथना करतूं, जाके द्वारा सुरग और धरती कौ हरेक घरानों पहचान पातै, परमेस्‍वर अपनी महिमा के धन के अनुसार तुमें जि दान दैवे कै तुम वाकी आतमा ते भीतरी स्‍वभाव में सामर्थ पायकै ताकतवर हैते जाऔ। और भरोसे के जरिये मसीह तुमारे हिरदय में रैहबै, जाते तुम वाके पिरेम में जड़ पकड़ते जाऔ और तुमारी नींबऊ मजबूत हैती जाबै। जाई ते तुम सब परमेस्‍वर के सब पबित्र लोगन के संग ईसू मसीह के पिरेम की लम्बाईऐ, चौड़ाईऐ, ऊंचाईऐ, और गहराईऐ समझ सकौगे। और तुम लोगन नें मसीह के पिरेम कौ ग्‍यान मिलै, जो सबरी समझ ते परे है कै तुम परमेस्‍वर की सबरी भरपूरी तक परिपूर्न होते जाऔ। परमेस्‍वर तौ ऐसौ सामर्थी है, कै हमारी बिनती और समझ तेऊ जादा काम कर सकतै, बई सामर्थ ते जो हममें काम करतै, कलिसिया में और ईसू मसीह में वाकी महिमा युगानुयुग तक होती रैहबै। ऐसौई होबे। मैं पौलुस, जो पिरभू के सुभ समाचार सुनाबे की बजैह ते जेल में बन्दी हूं, तुमते बिनती करतूं कै जा बुलाहट ते तुम बुलाये गये हों बाई तरैह ते अपनों चाल-चलन रखौ। मतलब सबरी दीनता और कोमलता के संग धीरज धरकै पिरेम ते एक दूसरे की सह लेऔ, बू सान्‍ती जो मेल-जोल करातै वाके जरिये आतमा की एकता कूं बनांय रखवे की कोसिस करौ। चौंकि एकई सरीर है, और एकई आतमाए, एकई आसा है, जाके काजै तुम लोगन कूं परमेस्‍वर नैं बुलायौ है। और एकई पिरभू है, एकई भरोसौ है, एकई बपतिस्मा है। और सबकौ एकई परमेस्‍वर है जो सबन कौ पिता है, और बू सबन में सबन के बीच में और सबन के ऊपर है। हम में ते हर एक को मसीह के दान के परिनाम के अनुसार किरपा मिली है। जामारै पबित्र सास्त्र में कहौ गयौ है, “कै जब बू ऊंचे पै चढ़ौ, और अपने संग बन्दीयन कूं छुड़ायकै लै गयौ, और लोगन कूं दान दियौ।” वाके चढ़वे ते जि पतौ चलतै कै बू धरती के नीचे पाताल मेंऊ उतरौ हतो। और जो नीचे उतरौ बू बुई है जो आकास तेऊ ऊपर चढ़ौ, जाते बू अपनी मौजूदगी ते सब कछू परिपूर्न कर सकै। बानें खुदई कछू लोगन कूं भेजे भये चेला और कछुन कूं परमेस्‍वर की बात बताबे बारे और सुभ समाचार सुनाबे बारे, रखबारे, और कछुन कूं उपदेस दैवे बारे नियुक्‍त करौ। जाते परमेस्‍वर के पबित्र लोग सिद्ध है जावें और सेबा कौ काम और बढ़ जाये, जाते मसीह की देह और जादा उन्‍नति पाबै। जब तक हम सब परमेस्‍वर के भरोसे में और वाके पुत्र के ग्‍यान में एक ना है जाबैं और मसीह की परिपूर्नता के अनुसार एक सिद्ध आदमी न बन जाबैं। जाते हम आगे कूं बालक ना रैहबै जो आदमिन की ठग बिध्‍या, चतुराई, बहकाबे बारी योजनान, बिनके उपदेस और झांसेन ते बहकाये ना जावें। पर पिरेम ते सच्‍चाई में चलत भये मसीह के सरीर रूपी कलिसिया में बढ़ते जाऔ, मसीह ही कलिसिया कौ सिर है। बई ते सबरौ सरीर अपने जोड़न की सहायता ते, एक संग मिलकै और हरेक अंग के सई सई काम करवे ते, बू सरीर पिरेम में उन्‍नति करते भये अपने आप में और बढ़त जातै। जाईमारै मैं पिरभू के नाम में तुमें चेतायकै कैहतूं कै जैसे अबिसबासी लोग अपने मन कि बुरी बातन के अनुसार चलतै पर तुम अब ऐसे मत चलौ। चौंकि बिनकी बुद्धी पै अन्धेरौ छा गयौ है और बू अपनी अग्‍यानता की बजैह ते जो बिनमें है और बिनकी मन की कठोरता की बजैह ते बे परमेस्‍वर के जीबन ते अलग है गये हैं। और बे सरम हया छोड़कै लुचपन में लग गये है, और सब तरैह के गन्दे काम लालसा ते करतें। तुम लोगन कूं ईसू मसीह में ऐसी सिछा नांय दई गयी। अगर तुम लोगन नें ईसू के बारे में सुनों है और वाके सत्‍य के अनुसार सिछा लयी है, जो ईसू मसीह ते पिरकट होतै, तौ तुम लोगन नें अपनों पैहलौ सुभाब और आचरन त्‍याग दैनों चहिऐं। जो धोकौ दैवे बारी रस्ता पै चलायकै तुमारौ नांस करतें। और अपने मन के आतमिक सुभाब ते नये बनते जाऔ। और एक नये स्‍वभाब कूं पहन लेऔ जो परमेस्‍वर के जरिये सत्‍य की धारमिकता और पबित्रता के जरिये बनांयौ गयौ है। जाईमारै तुम लोग झूंठ बोलबौ छोड़कै, आपस में एक दूसरे ते सच बोलौ चौंकि तुम सब एकई सरीर के अंग हौ। गुस्सा तौ करौ पर पाप मत करौ और सूरज डूबबे ते पैहले तुमारौ गुस्सा चलौ जाबै। तुम सैतानें और मौकौ मत देऔ। जो चोरी करतै बू अब ते चोरी नां करै बल्कि ईमानदारी के संग अपने हातन ते काम करै और जिनैं जरूरतै बिनै दान दै सकै। तुमारे मौंह ते कोई गन्दी बात नांय निकरै पर दूसरेन कौ भलौ करवे बारी बात निकरै जाते सुनवे बारेन की जरूरतै पूरी हौ और बिनपै अनुग्रह होबै। परमेस्‍वर की पबित्र आतमाऐ दुखी मत करौ, जाते तुमें छुटकारे के दिना के काजै तुम पै मौहर लगाई गयी है। तुम सब लोग हर एक कड़बाहट, गुस्सा, लड़ाई-झगड़ा, प्रकोप, निन्दा और हर तरैह के बैर भाव अपने बीच में ते दूर करौ। पर एक दूसरे पै दया और किरपा बनी रैहबै जैसौ परमेस्‍वर नें ईसू मसीह में तुमारे अपराधन कूं छमा कर दियौ बैसेई तुमऊं एक दूसरे के अपराधन कूं छमा करौ। तुम लोग परमेस्‍वर की प्यारी सन्‍तानें हैं जामारै परमेस्‍वर के सुभाव पै चलौ। और तुम पिरेम ते जीबन जिये करौ जैसे मसीह नें हमते ते पिरेम करौ और परमेस्‍वर के सामने अपनी भेंट चढ़ा दयी। वाकौ जि पिरेम अपने बानें परमेस्‍वर कौ सुख दैवे बारी सुगन्धित धूप के समान परमेस्‍वर कौ भाबै अपने आपें बलिदान कर दयौ। जैसे कै जि सईऊ है कि तुम परमेस्‍वर के पबित्र लोगन के बीच में काऊ तरैह कौ व्‍यभिचार, अपबित्रता और लालच की बात चीतऊ नांय होबै। और ना बेसरमाई की बात करौ, ना मूर्खता की बात चीत, ना मजाक उड़ाऔ, चौंकि जि सब बात तुमें सोभा नांय देत बल्कि तुमारे मौंह ते परमेस्‍वर कूं धन्यबादई दयौ जाबै चौंकि तुम जि जान लेऔ कै कोई आदमी व्‍यभिचारी, अपबित्र, और लालच करतै जो मूरती पूजबे के बराबर है, बिनके काजै ईसू मसीह और परमेस्‍वर के राज्‍य में कोई हिस्सेदारी नांय। कोई तुमें बेकार की बातन ते धोकौ नांय दैवे चौंकि इनई कामन की बजैह ते परमेस्‍वर की गुस्सा बिन लोगन पै भड़कतै जो वाकी बातन कूं नांय मानतई। जाईमारै तुमारौ बिन लोगन ते कोई सम्बन्ध नां हत। पैहले तुम अन्धेरे में हते पर अब पिरभू के चेला हैबे काजै उजीते में बुलाये गये हौ जामारै तुम उजीते की सन्‍तान के जैसे चलौ, चौंकि जाँपै उजीतौ होते मांपै हर तरैह की भलाई, धारमिकता और सच्‍चाई पैदा होतै। जाते तुम पतौ लगाय लेऔ कै पिरभूए कौन सी बात अच्‍छी लगतै, बू लोग जो बेकार के काम अन्धेरे में करतै, बिन लोगन की संगती ते दूर रेयौ और बिनकी बुराई के बारे में चेतावनी देऔ। चौंकि जो काम बे चुपचाप करतै बू बेसरमाई के काम है और बिनैं बताबे मेंऊ सरम आतै। पर जब सब बात उजाले में आ जातै तौ बिन सब बातन कौ राज सबन के सामने पिरकट है जाते, चौंकि उजालोई है, जो सब कछू पिरकट करते। जई मारै जि कहौ गयौए, “कै हे सोबे बारेओ जग जाऔ, और मरे भयेन में ते जि उठौ, तबई तुम पै ईसू मसीह कौ उजीतौ चमकैगौ।” जामारै पूरी तरीका ते ध्‍यान रखौ कै मूर्खन की तरीका ते नांय बल्कि बुद्धिमानन के तरीका ते जीऔ। जई मारे अब जो समै चल रयौ है बामें तुम पूरौ-पूरौ लाभ उठाऔ चौंकि दिना बुरे हैं। जामारै नासमझ मत बनों बल्कि पिरभू की इच्‍छाए पैहचानों। और पबित्र आतमा ते परिपूर्न है जाऔ, दारूऐं पीकै मतबारे मत होऔ, चौंकि जाई ते लुचपन पैदा होतै। आपस में भजन, स्तुति और आतमिक गीत गात भये पूरे हिरदय ते पिरभू के सामने आदर के संग गाते बजाते रेयौ। और हमेसा सब बातन काजै पिरभू ईसू मसीह के नाम में परमेस्‍वर पिता कौ धन्यबाद करतै रेयौ। और ईसू मसीह के भय ते एक दूसरे के अधीन रहौ। हे पतनिंयो अपने अपने पतिन के अधीन रहौ जैसे कै पिरभू के अधीन रैहतो। जैसै पती पतनिन कौ सिर है बैसेई कलिसिया कौ सिर मसीह है,और बू खुदई अपने सरीर रूपी कलिसिया कौ उद्धार करतै है। जा तरैह ते कलिसिया मसीह के अधीन रैहतै बाई तरैह ते पतनिऊं कूं सब बातन में पती के अधीन रैहनौ चहिऐं। हे पतियों अपनी अपनी पतनिन ते पिरेम करौ जैसे ईसू मसीह नें कलिसिया ते पिरेम करकै अपने आप कूं बाय दै दयौ। जाते बू बाय वचन और पानी ते नभायकै सुद्ध करकै पबित्र बना सकै। और बू बाय ऐसी कलिसिया के रूप में खड़ी कर सकै जामें ना कोई कलंक हो, ना कोई झुर्री हो ना कोई दोस होय पर पबित्र और निरदोस होय। पतिए अपनी पतनी ते अपने के सरीर की तरैह पिरेम करनों चहिऐं। चौंकि जो पती अपनी पतनी ते पिरेम करतै बू अपने आप ते पिरेम करतै चौंकि काऊ नें अपने सरीर ते दुसमनाई नांय रखी बरन अपने सरीर की देखभाल और वाकौ पालन पोसन करतै बैसेई मसीह अपनी कलिसिया के संग ऐसौई करतै। चौंकि हमऊ वाके सरीर के अंग हैं। और परमेस्‍वर के वचन में जि लिखौ है “कै आदमी अपने मा-बाप कूं छोड़ दैवेगौ और अपनी पतनी के संग रैबेगौ और बू एकई सरीर है जाबेंगे।” जि एक बड़ौ रहस्‍य है जाय मैं समझतूं कै जि मसीह और कलिसिया के बारे में बतायौ गयौ है। और कछू भी होय, तुम लोग अपनी पतनी ते अपने जैसौ पिरेम करौ और हे पतनी अपने पती कौ आदर करै। हे बालकौ! पिरभू में अपने मा-बाप की बातन कूं मानें करौ, चौंकि जेई तुमारे काजै सही है। “अपने मा-बाप कौ आदरऊ करै करौ।” जि पैहली एक ऐसी आग्‍या है, जाके संग में बाचाऊ जुड़ी भयी है, “अगर तुम अपने मा-बाप की बातन नैं मानिंगे तौ तुमारौ भलौ होगौ और धरती पै तुम भौत दिनान तक जीबित रैवेगौ।” और हे बालक बारेऔ अपने बालकन नें गुस्सा मत दिबाऔ। बल्कि पिरभू की सिछा और वाके उपदेसन देत भये बिनकौ लालन-पालन करौ। हे सेबकों जा संसार में जो तुमारे स्‍वामी हैं बिनकी आग्‍या कौ पालन आदर और भय के संग और सच्‍चे हिरदय ते करौ, और जि सोचौ कै तुम ईसू मसीह की सेबा कर रये हौ। और आदमिन नें दिखावे काजै और बिनै खुस करवे काजै अपनी सेबाऐ मत करौ पर ईसू मसीह के सच्‍चे दास के समान और परमेस्‍वर की इच्‍छा के अनुसार चलते रहौ। और जा सेबाऐ आदमिन की मत समझो बल्कि पिरभू की समझकै खुसी मन ते करते रेयौ। चौंकि तुम जानतौ कै हर एक आदमी चाहे बू दास होय, चाहे आजाद होय जो भलाई करैगौ बाईए इनाम मिलैगौ। और बू इनाम पिरभू की ओर ते होगों। और तुम जो स्‍वामीऐं तुमऊ बई के समान बिनके संग ऐसौई व्‍यवहार करौ और बिनैं धमकी दैबै छोड़ देऔ चौंकि तुम जानतौ कै सुरग में तुमारौऊ और बिनकौऊ एकई स्‍वामी है। और बू काऊ के संग में पछपात नांय करतौ। पिरभू में वाकी महान सामर्थ के पिरभाव में ताकतवर हैते जाऔ। परमेस्‍वर के सबरे हतियारन नें बांध लेऔ जाते तुम सैतान की योजनाए रोकबे काजै डटे रैह सकौ। हमारौ मल युद्ध आदमिन ते नांय पर जा संसार की अंधकार की बुरी सक्‍ती के पिरधानन ते और ऊंचे अधिकारिन ते है, और बा दुस्‍ट की बुरी आतमिक सेना ते है जो आकास में है। जाई मारे परमेस्‍वर के सबरे हतियार बांध लेओ, जाते तुम बुरे दिनन कौ सामनो कर सकौ और लड़ाई ए आखिर तक पूरौ करबे के बादऊ डटे रहो। सत्‍य ते अपनी कमरै कसकै धारमिकता की झिलमें पहन के, पामन में मेल-मिलाप के सुभ समाचार की तैयारी के जूता पहन के तैयार है जाऔ। बिन सबके संग भरोसे की ढाल लैके डटे रहो जाते तुम बा दुस्ट के सब जलते भये तीरन नें बुझाय सको। और उद्धार कौ टोप आतमा की तलबार जो परमेस्‍वर कौ वचन है लै लेओ। और हर समै हर तरैह ते आतमा में पिराथना करतै रहौ, बिनती करत रहो और जागत रहो, और सब परमेस्‍वर के पबित्र लोगन के काजै पिराथना करते रहो। मेरे काजैऊ पिराथना करतै रहो। कै जब मैं बोलूं तब साहस के संग सुभ समाचार कौ भेद बताय सकूं। जा सुभ समाचार कै काजै मैं जंजीरन तै जकड़ो भयौ राजदूत हूं। और जऊ काजै पिराथना करै करौ कै जैसै परमेस्‍वर चाहतै बैसै सुभ समाचारए बड़े साहस के संग सुना सकूं। तुखिकुस जो मेरौ प्यारो भईया और पिरभू में भरोसे योग्‍य सेबक है, बाय मैं तुमारे जौरे जाई मारे भेज रयौऊं कै बू तुम लोगन के हिरदय में सान्‍ती दैबे और मेरी दसाये बता सके कै मैं कैसै रह रयौ हूं और का कर रयौऊं। हमारे परमेस्‍वर पिता और पिरभू ईसू मसीह की ओर तै तुम सब भईयन कूं सान्‍ती ओर भरोसे संग पिरेम मिले। जो हमारे पिरभू ईसू मसीह तै सच्‍चौ पिरेम रखतें बिन सबन पै किरपा होती रैहबै। हम ईसू मसीह के सेबक पौलुस और तिमुथियुस, जि चिठ्‌ठी फिलीपी में रैहबै बारे मसीह में मेल-जोल रखवे बारे सब परमेस्‍वर के पबित्र लोगन कूं और कलिसिया की देखभाल करवे बारे और काम में हात बटाबे बारेन कूं लिख रयौ हूं। हमारे पिता परमेस्‍वर और पिरभू ईसू मसीह की ओर ते तुमें किरपा और सान्‍ती मिलती रैहबै। जब जब मैं तुमें याद करतूं, तब तुमारे काजै परमेस्‍वर कौ धन्यबाद देतूं। और जब कबऊ मैं तुमारे काजै पिराथना करतूं, तौ बडे़ आनन्द के संग करतूं। चौंकि तुम सुरू तेई अब तक सुभ समाचार फैलायबे में मेरे संग रहे हो। मोय जा बात कौ भरोसौ है, कै परमेस्‍वर नें जि भलौ काम तुमारे बीच में सुरू करौये, परमेस्‍वर जा काम कूं पिरभू ईसू मसीह के आयबे तक पूरौ करैगौ। जि सही है कै मैं तुम सबन काजै ऐसौई सोचूं चौंकि तुम मेरे मन में बस गये हो। तुम सब बा अनुग्रह में मेरे हिस्सेदार है जो परमेस्‍वर नें मोए दियो है, चांहे मैं जेल में हूं या चांहे आजादी के संग सुभ समाचार की सच्‍चाईऐ लोगन कूं सुनाऊ। परमेस्‍वर जा बात कौ गबाह है कै जैसे ईसू मसीह तुमते पिरेम करते बैसेंई मैऊं तुमते भौत पिरेम करतूं। मैं पिराथना करतूं कै तुमारो पिरेम, बुद्धि और सबरी समझ के संग बढ़तौ जाबै। जाते तुम सही ते सही बातन कूं प्यारौ जानों और ईसू मसीह के आबे तक पबित्र और निरदोस बने रेयौ। ईसू मसीह तुमें भले कामंन के सद्गुनन ते भर दैबै जाते परमेस्‍वर की महिमा और स्तुति होती रैहबै। हे भईयाओ, मैं चाहतूं कै तुम अब जि जान लेओ कै जो मोपै बीती है बाते सुभ समाचार की भौत बढ़ोत्‍तरी भई है। जांह तक कै कैसर के राज भवन की सबरी पलटन और सब लोगन कूं जि पतौ चल गयौ है कि मैं ईसू मसीह कौ सेबक हूं, जाकी बजैह ते मैं जेल मेंऊ। मेरे जेल में हैबे की बजैह ते जो पिरभू में मेरे भौत से भईया हैं बिनकूं हिम्मत मिल गयी है और बे बिना डर के परमेस्‍वर कौ वचन सुनाबतें। कछू लोग तौ ईरसा ते, कछू लड़ाई कै बजैह ते और कछू भली इच्छा ते ईसू मसीह कौ पिरचार करतें। जो भली इच्छा ते पिरेम के संग पिरचार करतें बे जानतें कै परमेस्‍वर नें मोए सुभ समाचार सुनाबे के काजैंई बुलायौ गयौ हूं और कछू लोग तौ अपने मतलब कूं निकारबे के काजै मसीह कौ पिरचार करतैं कै बे मेरे काजै जेल में और परेसानी बढा सकें। पर मोए इन बातन ते कोई फरक नांय परै। चाँहे बुरी इच्‍छा ते, चाँहे अच्‍छी इच्‍छा ते मसीह के सुसमाचर कौ पिरचार तौ है रयौ है, जाते मैं भौत आनन्द में हूं। और मैं आनन्द मेंई रहुंगो, चौंकि मैं जानतूं कि तुमारी पिराथना और ईसू मसीह की आतमा की मदद ते इन बातन कौ फल जि होगो कै मैं जेल ते छूट जाऊंगो। और मैं जि चाहूं और जेई आसा है मैं चाहे जीऊं चाँहे मरूं, मोय काऊ बात ते बेइज्जत नांय होनों पडे़गौ। और ईसू मसीह की बड़ाई मेरे जीबन ते होती रैहबै। चौंकि मेरे काजै जीबित रैहबौ मसीह है, और मर जाबौ सबते अच्‍छौ है। अगर मैं सरीर में जीबित रहूं तौ भौत से फायदा के काम कर सकतूं पर मैं नांय जान्‍त, कै इनमें ते कौन सी बात टालनी चहिऐं। चौंकि मैं दोनोंन के बीचों बीच में लटकौ भयौऊं पर मन तौ जि करै कै मैं सरीरे छोड़कै ईसू मसीह के जौरें चलौ जाऊं, जि मेरे काजै भौत अच्‍छौ है। पर मेरौ सरीर में जीबित रैहबौ तुमारे काजै भौत जरूरी है। जाई मारे मोय पक्‍कौ भरोसौ है कै मैं जीबित रहुंगो और तुमारे संग रहूंगो और जाते तुमारौ भरोसौ और मजबूत है जाबैगौ और तुम सब आनन्द के संग रिंगे। जब मैं तुमारे जौरें फिर आऊंगो तौ मेरी बजैह ते तुमें ईसू मसीह पै गर्व करबे के औरऊ कारन मिलिंगे। बस एक बात को ध्‍यान रखौ, कै तुमारो चाल-चलन ईसू मसीह के सुभ समाचार के योग्‍य होय। चाँहे मैं तुमारे जोरै आयकै मिलूं चाँहे नांय मिलूं, पर जब कबऊ तुमारे बारे में सुनूं तौ जेई सुनूं कै, तुम एक आतमा में डटे रैहकें और एक मन हैकें सुभ समाचार के भरोसे के काम काजै भौत मेहनत करतौ और तुमें अपने सताबे बारेन ते बिलकुल डर नांय लगै चौंकि तुमारो डटौ रैहबौ परमेस्‍वर की ओर ते बिरोधीन के काजै नांस हैबे कौ और तुमारे काजै उद्धार को एक संकेत है। तुम लोगन कूं ईसू मसीह पै भरोसौ करवे कौई नांय बल्कि वाकी वजह ते दुख भोगबे कौऊ वरदान मिलौ है। और तुम बैसौई संघर्स कर रये है जैसे मैं करतौ आयौ हूं और जा बातै तुम देखैं और सुनैं कै मैं अबऊ बैसौई संघर्स कर रयौऊं। अगर ईसू मसीह में तुमें हिम्मत मिलै और पिरेम तुमें सान्‍ती दैबै, और पबित्र आतमा तुमारे संग है और तुम में एक दूसरे के काजै नम्रता और दया पाई जाबै तौ तुम मेरौ जि आनन्द पूरौ करौ, कै एक मन ते और एकई पिरेम ते रहौ और तुमारे बिचार एकई होंय खुद कौ मतलब निकारबे काजै बुरी इच्‍छा ते कछू मत करौ, बल्कि अपने आप कूं छोटो करके एक दूसरे कूं अपने ते अच्‍छौ समझौ ओर हर कोई अपनेई फायदा की नांय बल्कि दूसरे के फायदा कीऊ चिन्‍ता करै। जैसौ ईसू मसीह को सुभाबो बैसौई तुमारौऊ सुभाब होय। बू परमेस्‍वर के स्‍वभाव में हतो, जाके बाउजूदऊ बानें परमेस्‍वर के बराबर होबे के हक कूं नांय जतायौ। पर सब कछू छोड़कै एक सेबक को रूप धारन कर लियौ, और आदमिन के समान हैगौ। और आखरी तक इतनों आग्‍याकारी रहौ, और अपने आप कूं इतनों दीन बना लियौ, कै क्रूस की मोंतऊ सह लयी। जाई मारै परमेस्‍वर नें बाय महान करौ और सबते ऊंची जगैह पै बैठायौ। और बाय एक ऐसो नाम दियौ जो सब नामन ते ऊंचौ है। जाते ईसू मसीह को नाम सुनकैं, सुरग, धरती और पाताल के सब रैहबे बारे घुटने टेकिंगे। और परमेस्‍वर पिता की महिमा के काजै, सब लोग स्‍वीकार कर लिंगे और कहिंगे के ईसू मसीह ही पिरभू है। हे मेरे प्यारे भईयाओ, तुम लोग सदां ते मेरी आग्‍या मान्‍त आये हैं, अब मैं तुम लोगन ते दूर हूं पर जब में तुमारे संगओ बउते जादा अब उतसाह के संग परमेस्‍वर की आग्‍या मानते भये आदर भाव ते अपने उद्धार के कामन कूं पूरौ करते जाऔ। परमेस्‍वर नें अपने उद्‍देस्‍ये पूरौ करवे काजै तुम लोगन के मन में जि इच्‍छा जगाईये और बा कामें करबे काजै सक्‍तीऊ दयीऐ। तुम सबरे काम बिना लड़ाई झगड़े और बिना कुडकुडाये करे करौ। जाते तुम निरदोस और पबित्र बनकें टेडे़ और जिद्‍दी लोगन के बीच में परमेस्‍वर की ऐसी सन्‍तान बनों, जापै कोई कलंक नांय होय। तुम संसार में ऐसे चमकौ जैसे आकास में तारे। जब तुम जीबन दैवे बारे सुभ समाचारए सुनातौ और ऐसौ करतैं तौ पिरभू ईसू मसीह के आयबे के दिना मोय तुम पै घमन्ड होगौ कै, मेरी दौड़ और मेहनत बेकार नांय गयी। मोय तुमारे भरोसे रूपी बलिदान और सेबकाई काजै खूनंऊ बहानों पडै़ तौऊं मैं आनन्दित हुंगो और तुम सबन के संग आनन्द करुंगो। बैसेई तुमऊं आनन्दित रहो और मेरे संग अपने आनन्द कूं बांट लेऔ। मोय पिरभू ईसू मसीह पै आसा है कै मैं जल्दी तिमुथियुस कूं तुमारे जौरें भेजुंगो, जाते कै मोए तुम लोगन कौ हाल चाल पतौ चलै और मैं सान्‍ती पांऊ चौंकि मेरे जौरें ऐसौ और कोई आदमी नांय जो तिमुथियुस के जैसौ सच्‍चे मन ते तुमारो ध्यान रखै और तुमारी चिन्ता करे चौंकि सब लोग अपने ही फायदा की चिन्ता करें ना की ईसू मसीह की। पर तिमुथियुस के बारे में और वाके व्‍यवहार के बारे में तुम जानतो जैसे एक बेटा अपने पिता के संग रैहकें, वाके सब कामन नें करै, बाई तरैह ते बानें सुभ समाचार की सेबा मेरे संग रैहके करिऐ और मैं आसा करतूं कै जैसेई मोय पतौ चलैगौ कै मेरे संग का हैबे बारौ है तौ मैं जल्दी ही बाय तुमारे जौरें भेज दुंगो। फिरऊ मोय पिरभू पै भरोसौ है कै मैं जल्दी तुमारे जौरें आऊंगो। पर मैं इपफ्रुदीतुस जो मेरौ भईया, सहकर्मी और संगी योद्धा है, बाए तुमनें मेरी जरूरतन्‍नें पूरी करबे काजै भेजौ, बाय बापस तुमारे जौरें भेजबो भौतई जरूरी है। चौंकि बाको मन तुमते लगो भयौए और बू तुमते मिलबौऊ चाहते चौंकि तुमनें वाकी बीमारी में वाकौ हाल सुनो हतो। बास्तव में बू भौत बीमार हतो ज्हां तक कै बू मरतौ-मरतौ बचौ है, पर परमेस्‍वर नें बापे तरस खायौ और बई पै नांय मोपैऊ तरस खायौ कै, मोय दुख पै दुख सहनों ना पड़ौ। जाई मारे मैं बाय तुमारे जौरें जल्दी भेज रौऊं कै तुम बाय देखकें आनन्दित है जाओ और मेरौ दुख कम है जाबे। तुम पिरभू में आनन्द के संग वाकौ स्‍वागत करियों और तुमें ऐसे लोगन कौ आदर करनों चहिऐं। चौंकि बानें ईसू मसीह के काम काजै भौत खतरा उठाए और जांह तक के बानें मौंत कौऊ सामनों करौ है और मेरे काजै बा सेबा कौ काम पूरौ करौ है जाय करिबे में तुम असफल रये हो। हे मेरे भईयाओ, पिरभू में हमेसा आनन्दित रहौ मोय बार-बार जि बात लिखबे में कोई परेसानी नांय, और जाई ते तुमारो कल्‍यान है। और बिन आदमिन ते सावधान रहौ जो कुत्‍तन की तरैह व्‍यवहार करतै, बे बुराई करतै और सारीरिक खतना पै जोर देतै। सई पूछौ तौ सच्‍चे खतना बारे हमई हैं, चौंकि हम पबित्र आतमा के जरिये परमेस्‍वर की उपासना करतैं हम सरीर में खतना जैसी बातन पै भरोसौ नांय करत, पर ईसू मसीह पै गर्व करते। बैसे तौ ऐसी बातन में मैंऊ खुद पै घमन्‍ड कर सकूं। अगर कोई जि सोचै कै बू अपनी सारीरिक बातन पै घमन्‍ड करै तौ बाऊ ते जादा सारीरिक बातन पै घमन्‍ड करवे की बजैह मोपै है। जब मैं आठ दिना कौ हतो तब मेरौ खतना भयौ और मैं इसरायल के वंस कौ और बिन्यामीन के गोत कौऊं और इब्रानिन कौ इब्रानी हूं और व्‍यबस्था कूं मानवे की बात करें तौ मैं फरीसीऊ। अगर मेरे जोस की बात करौ तौ कलिसिया पै अत्‍याचार करबे बारो और व्‍यबस्था की धारमिकता की बात करौ तौ मैं बिलकुल निरदोस हतो। पर जिन बातन्नें मैं फायदा की समझतौ, बिन बातन कूं मैं मसीह की वजह ते काऊ काम की नांय समझूं। जाई मारे मैं पिरभू ईसू मसीहे जानबो सबसे अच्‍छौ फायदा समझूं और ग्‍यान के बारे में कहौ तौ सब बातन्नें काऊ काम की नांय समझूं, जाते मैं ईसू मसीहे पाय लऊं। और मैं पूरी तरैह ते मसीह कौ है जाऊं, पर मैं खुद की धारमिकता की बजैह ते धरमी नांऊ जो नियम मानवे ते मिलै, पर जि धारमिकता है जो मसीह में भरोसे की बजैह ते परमेस्‍वर पिता ते मिलै हते। मैं मसीहे जानबो चाहतूं और बा सक्‍तीऊए जानबो चाहतूं जाते बू मरबे के बाद जी उठो, मैं वाकी सी पीड़ा उठाकैं वाके मरवे में सामिल हैवौ चाहूं। और मैं बा रूप कूं पाबो चाहूं जो बानें अपनी मौत के जरिये पायौ। जाते मैं काऊ रीती ते मरे भयेन में ते जी उठवे के पद तक पौंहचूं। मेरौ जि मतलब नांय कै मैंनें सब चीज पाय लयीऐं या पूरी तरीका ते सिद्ध है गयौऊं पर मैं बा ईनामें पाबै काजै कड़ी मेहनत कर रौहूं जाके काजै ईसू मसीह नें मोय पैहले तेई बुलायौ है। हे मेरे भईयाओ, मैं जि नांय समझूं कै मैंनें अब तक बू लक्छ पकर लियोए, मैं इतनोई कैहनौं चाहतूं के पीछे की बातन्‍ने भूलकै लक्छ की मांऊ बढ़तौ जाऊं। मैं बड़ी उत्सुकता के संग अपने लक्छ की मांऊ दौड़तौ चले जाऊं जाते मैं सुरग में जायकै बू उपहार पाऊं जाके काजै परमेस्‍वर में मोय पिरभू ईसू मसीह नें बुलायोए। हम में जितने लोग आतमा में मजबूत हैं बे जेई बिचार रखैं, अगर काऊ तरैह ते बिनके बिचार दूसरे है तौ परमेस्‍वर बिनें खुदई वाके बारे में बता दैवेगौ। पर याद रखौ कै जा सच्‍चाई कूं मानकें हम अब तक आये हैं। बई सच्‍चाई कूं मानकै आगे बढ़ते जायें। हे मेरे भईयाओ सब मिलकें मेरे जैसे चलौ और मैंनें तुम लोगन के काजै एक नमूना दियोए और बाई के अनुसार चलबे बारेन पै ध्यान देऔ। चौंकि जैसौ मैं तुमते बार-बार कैह चुकौऊं और रोते भयेऊ कैहरौऊ, भौत से लोग तौ ऐसी चाल चलतें कै ईसू मसीह के क्रूस के दुसमन बन गये हैं। बिनकौ नांस हैबौ तौ जरुरी है चौंकि बिन्नें अपने खाबे कूंईं परमेस्‍वर बना लियौ है और ऐसी बातन पै घमन्‍ड करैं जिन बातन पै सरम आनी चहिंयें और धरती की बातन पै मन लगाय भये है। पर हमारौ देस तौ सुरग है और हम सुरग ते आयबे बारे हमारे उद्धारकरता पिरभू ईसू मसीह कौ बेसबरी ते इन्तजार कर रये हैं। बू बाई सामर्थ के जरिये सब कछू अपने अधिकार में कर लेगौ और बाई के जरिये बू हमारे नास हैबे बारे सरीरे बदल के अपने महिमामय सरीर के अनुसार बदल देगौ। हे मेरे प्यारे भईयाओ। पिरभू में जई तरैह ते डटे रहौ, और हे मेरे भईयाओ मोय तुम लोगन ते मिलवे की बड़ी इच्छा है, चौंकि तुमई मेरौ आनन्द और मुकुट हैं। मैं यूआदिया और सुन्तुखे दोनोंन ते जि बिनती करतूं, कै जे दोनों औरतें पिरभू में एक दूसरे ते मेल-मिलाप करकै बहनन की तरैह ते रैहमें। हे मेरे प्यारे सच्‍चे संगी सुजुगे, मैं तोते बिनती करतूं कै तू बिन औरतन की मदद कर चौंकि बिन्‍नें मेरे संग सुभ समाचार फैलायबे में क्लेमेस और अन्य सहकर्मी लोगन के संग भौत परेसानी उठाई है, चौंकि परमेस्‍वर नें बिनकौ नाम जीबन की किताब में लिखौ है। पिरभू में हमेसा आनन्दित रहौ मैं दुबारा ते कैहतूं कै आनन्दित रहौ। और सब लोग तुमारी नम्रता कूं जान लेंमे कै पिरभू जल्दी आ रयौ है। और काऊ बात की चिन्‍ता मत करौ, हर बात में पिराथना और बिनती, धन्यबाद के संग परमेस्‍वर के सामने अपने निवेदन रखौ। और परमेस्‍वर की सान्‍ती जो हमारी बुद्धि ते परे है, जो तुमारे हृदय और बिचारन कूं ईसू मसीह में सुरछित रखैगी। जामारैं हे मेरे भईयाओ, जो जो बात सच्‍चीयें, जो बात आदर कीयें, जो बात सही है, जो बात पबित्र है, जो बात सुनिबे में अच्छी हैं, जो बात मन कूं अच्छी लगें, जिन बातन में अच्छे गुन हैं और जिन बातनते भौत बड़ाई हैबै बिन बातन पैई ध्यान लगाऔ। और जो बात तुमने मोते सुनीयें और सीखीयें और मोते प्राप्‍त करी है और मोमें देखी है बिन कोई पालन करौ, तब जो परमेस्‍वर सान्‍ती कौ पिता है तुमारे संग रैहबैगौ। मोय पिरभू में जामारैं भौत आनन्द हैबे कै तुम लोगन के बीच में इतने दिनान के बाद मेरे काजै पिरेम जागौ है, जातेऊ पैहले तुम मेरी चिन्ता जरूर करते पर तुमें दिखाबे कौ मोकौई नांय मिलौ। मैं जामारैं नांय कैहरौ कै मोय काऊ बात की कमीयें, चौंकि मैंनें हर परिस्थिति में जि सीख लयौ है कै मैं बई में सन्‍तुस्‍ट रहूं। मैं अमीरी और गरीबी में जीबौ जान्‍तू और हर बात हर परिस्थिति में तृप्‍त हैबौऊ और भूखौ रैहबौउ और भरे पेट में या मेरे जौरें भौत होय या कछू ना होय फिरऊ मैंनें हर हालत में जीबौ और खुस रहबो सीख लियौ है। मसीह जो मोय तागत दैबै बामें मैं हर हालात कौ सामनों कर सकूं। जेऊ भलौऐ कै तुमनें संकट में मेरे संग रेह के मेरौ संग दियो है। है फिलिप्पियों तुम लोग जानें कै जब मैं सुभ समाचार की सुरूआत करबे काजै मकिदुनियां ते चले गयौ तौ तुम लोगन नें छोड़ कें और काऊ कलिसिया नें मेरी मदत नांय करी। और जब मैं थिस्सलुनीके में हतो तब तुम लोगन नें मेरी जरुरत पूरी करबे काजै एक बार नांय पर एक बार ते जादा मेरे जौरें दान भेजौ हतो। जाकौ मतलब जि नांय के में दान चाहूं पर मैं तुम में ऐसी आसीस देखबो चाहतूं जो दान दैवे तेई आती है। मेरे जौरें सब कछूऐ और काऊ बात की कमी नांय जो चीज तुमन्नें इपफ्रुदीतुस के हातन ते भेजी हती बिनैं पायकें मैं तृप्‍त है गयौ, बू तौ खुस करबे बारे खुसबूदार ग्रहनयोग्य बलिदान के जैसो है जो परमेस्‍वर कूं अच्‍छौ लगै। मेरौ परमेस्‍वर अपने बा अपार धन ते जो महिमा के संग ईसू मसीह में तुमारी हर जरूरतन नें पूरी करैगौ। हमारे परमेस्‍वर पिता की महिमा हमेसा हमेसा तक हैती रैहबै। ऐसौई हैबै। हरेक परमेस्‍वर के पबित्र लोगन कूं ईसू मसीह में नमस्‍कार। जो मेरे संग भईया है बिनकी ओर ते तुमें नमस्कार। य्हांके सब परमेस्‍वर के पबित्र लोग और खासकर जो कैसर के महल में रैहबे बारे परमेस्‍वर के पबित्र लोग तुम सबन काजै नमस्‍कार कहमें। हमारे पिरभू ईसू मसीह की किरपा तुमारी आतमा के संग रैहबे। ऐसौई हैबै। मैं परमेस्‍वर की इच्‍छा के अनुसार ईसू मसीह कौ भेजौ भयौ चेला पौलुस, और भईया तिमुथियुस जि चिठ्‌ठी कुलुस्से सहर में सब रैहबै बारे, मसीह पै भरोसौ करवे बारे परमेस्‍वर के भरोसे योग्‍य पबित्र लोगन कूं लिख रौऊँ। तुम सबन पै हमारे परमेस्‍वर पिता कौ अनुग्रह और सान्‍ती होती रैहबै। हम तुमारे काजै हमेसा अपने पिरभू ईसू मसीह के पिता कौ धन्यबाद करतै और बिनते पिराथना करतैं। चौंकि हमनें तुमारे बारे में सुनों है कै तुमारौ भरोसौ ईसू मसीह पै पक्‍कौ है और तुम सब परमेस्‍वर के पबित्र लोगन के संग बड़ेई पिरेम भाव ते रैहमें। और जि बा आसा की बजैह ते भयौए जो तुमारे काजै सुरग में रखी भयी है और जा आसा के बारे में तुमने पैहले तेई सुभ समाचार के सच्‍चे वचन के जरिये सुन लियौ है। जो सुभ समाचार तुमारे जौरें पौहचों है और जैसौ संसार में बू वचन फल और फूल रयौ है और बढ़तोई जा रोहै, और बाई तरीका ते जा दिना बू वचन तुमनें सुनों और बाय सुनकें तुमनें पूरी सच्‍चाई ते परमेस्‍वर कि किरपा की पैचान करी बा वचन नें तुमारे भीतर बैसौई काम करौ है। और बा सुभ समाचार की सिछा तुमन्‍नें हमारे प्यारे साथी इपफ्रास ते लयी है जो हम सबन के काजै मसीह कौ पूरी तरीका ते भरोसे योग्‍य सेबक है। और जो पिरेम पबित्र आतमा नें तुमारे हिरदय में रखौ है, वाके बारे में बानें हमकूं बतायौ है। हमनें जा दिना ते जि बात तुमारे बारे में सुनी है, बई दिना ते तुमारे काजै पिराथना करबौ नांय छोड़ो, हम पिराथना करैं कै परमेस्‍वर तुमें अपनी इच्‍छा के ग्‍यान ते भर दैबै मतलब सारी बुद्धी और समझ ते भर देय जो पबित्र आतमा तुमें दैबै। जाते कै तुमारौ चाल-चलन बिलकुल पिरभू के जैसौ है जावै और तुम सब तरैह ते पिरभूए खुस रख सकौ। तुमारे जीबन ते हर तरह के भले काम होते जावें और परमेस्‍वर कौ ग्‍यान तुम में दिन प्रतिदिन बढ़तौ जाबै। वाकी महिमा की सक्‍ती के अनुसार हर तरैह की सामर्थ में ताकतवर हैते जाऔ। हर तरैह ते सहन करबे में और धीरज दिखाबे में बढ़ते जाऔ। आनन्द के संग पिता को धन्यबाद करते रहौ, जानें तुम लोगन कूं जा लायक बनांयौ है कै वाके उजाले में तुम परमेस्‍वर के सब पबित्र लोगन के संग बसीयत में हिस्सेदार है जाऔ। बाईनें हमें अन्धकार की सक्‍ती के बस में ते छुड़ायकै अपने प्यारे बेटा के राज्‍य में दाखिल करायो है। और बाई के बेटा नें कीमत दैकें हमें छुटकारौ दियौ है जो पापन की छमा है। मसीह तौ अन देखौ परमेस्‍वर को दिखायी दैबै बारौ रूप है और बुई सबरी सृस्‍टी में पैहलौठौ है। और बई में सुरग और धरती की सबरी चीजन की सृस्‍टी भयी है, चाहे बू सुरग की हों, चाहे देखी हों, चाहे अनदेखी हों, चाहे राज्‍य की हों, चाहे सिंहासन की हों, चाहे बू पिरधान की हों, चाहे अधिकार की हों, जि सबरी चीज बाई के जरिये और वाके काजै बनाई गयीं हैं। बू सब चीजन में पैहलौठौ है और सबरी चीज वाकी सामर्थ तेई अपनी अपनी जगह स्थिर रैहमें। बुई सरीर रूपी कलिसिया कौ सर है और बुई जीबन की सुरुआत है और मरे भयेन में ते जीबित हैबे बारेन में पैहलौठौ है, जाते बू सब बातन में परम पिरधान मानों जावे। चौंकि परमेस्‍वर जाई बात में खुस होवे, कै बामें परमेस्‍वर की सबरी परिपूर्नता बास करै। और वाके क्रूस पै बहे खून तेई, परमेस्‍वर नें सब चीजन कौ अपने आप ते मेल-मिलाप करायौ है चाहे धरती की हों, चाहे सुरग की हों। बू एक समै हतो जब तुम अपने बुरे बिचार और बुरे कामन की वजह ते परमेस्‍वर ते भौत दूर और वाके बिरोधी हते। पर अब परमेस्‍वर नें मसीह के सरीर की मौत के जरिये अपने आप ते तुमारो मेल-मिलाप करा लियौ है जाते तुमकूं अपने सामईं पबित्र और निसकलंक और निरदोस बनायकै खड़ौ कर सकै। और जि सब तबई है सकै, जब तुम अपने भरोसे में अटल बने रहिंगे और जो आसा तुमनें सुभ समाचार में सुनी है बाय मत छोड़ौ, आकास के नीचे सब आदमिन कूं जि समाचार दियौ गयौ है और मैं पौलुस बई कौ सेबक हूं। अब मैं तुमारे काजै जो कस्ट उठाऊं बामें मोय बड़ौ आनन्द प्राप्‍त हैबै, और मसीह के सरीर रूपी कलिसिया के काजै मसीह नें जो कस्ट भोगो है बामें मैं लगातार वाके संग सहभागी बन रौऊँ। परमेस्‍वर नें मोय, तुमारी भलाई काजै जो आदेस दियौ है और मैं बई के अनुसार कलिसिया कौ सेबक ठहरायौ गयौ हूं जाते मैं परमेस्‍वर के वचन कौ पूरी तरैह ते पिरचार कर सकूं। जि सन्देस भेदन ते भरौ भयौ है जो पैहले समैं तेई सबन की आँखन ते ओझल रैहयौ है पर अब परमेस्‍वर नें अपने चुने भये पबित्र लोगन पै पिरगट करौ है। परमेस्‍वर अपने चुने भये लोगन के जरिये जि पिरगट करबाबौ चावै कै भेदन ते भरौ सत्‍य कितनों बहुमूल्‍य है और जि सत्‍य सबन के काजै है और सत्‍य जि है कै मसीह तुमारे भीतर रैहबै, और परमेस्‍वर की महिमा कूं पाबे काजै बुई हमारी एकमात्र आसा है। हम मसीह कौ पिरचार करकें हर व्‍यक्‍ति कूं जि चेतावनी दैमें और सबरे ग्‍यान कूं सरल करकें सिखामें, कै हम हरेक व्‍यक्‍ति कूं मसीह में सिध्द करकें परमेस्‍वर के सामईं उपस्थित कर सकैं। मैं जाई उद्‍देस्‍य ते मसीह की पूरी सक्‍ती के अनुसार जो मोमें पूरे सामर्थ के संग पिरभाव डालतै, तन मन ते मेहनत करत हूं। जो तुम लौदिकिया में रैह रये हैं तुम सब मनुस्‍य सुन लेओ मैं तुमें जि बात बतानौ चाहूं जो तुम मोते कबऊ नांय मिले, मैं बिन काजैऊं भौत जोर ते मेहनत कर रयौ हूं। ऐसौ कैहवे के पीछे मेरौ उद्‍देस्‍य जि है कै तुम समझदार है जाऔ जाते तुमारे मन में हिम्मत आ जाबै और तुम एक दूसरे ते पिरेम के रिस्ते में बंधे रहौ जाते तुम परमेस्‍वर की गहरी बातन नें अच्‍छी तरीका ते समझ पाऔ और मसीह कूं अच्‍छी रीति ते जान लेऔ। ईसू मसीह सबरे ग्‍यान और बुद्धी कौ भन्‍डार है। मैं तुमते जिन सब बातन नें जामारैं कह रयौ हूं कै कोई आदमी तुमैं चिकनी चुपड़ी बातन ते धोखौ ना दै सकै। तुम ऐसौ मत सोचियों कै मैं मनते तुमते दूर हूं, पर आतमा ते मैं तुमारे संग हूं, जो जीबन तुम मसीह पै भरोसौ करके बिता रये हो और बामें मजबूती ते टिके रेओ, बाते मैं भौत खुस हूं। जा तरैह ते तुम ईसू मसीह कूं पिरभू जानके अपने जीबन में उतार लियौ और अंत तक तुम बाई के पीछे चलते जाऔ। जैसैं पेड़ अपनी जड़न नें पकड़ते भये बड़तौ जाबै बैसेंई तुमऊं, जो तुमारे अगुबा तुमें सिखामें बैसेंई मसीह और वाके भरोसे में बड़ते जाऔ और परमेस्‍वर कूं जादा ते जादा धन्यबाद करौ। इन बातन कौ ध्‍यान रखियों कै कोई तुमें बेतुके बिबादन की बहस करबे ते मूर्ख ना बना दैवे। जि बात सुनवे में भौत समझदारी की लगें पर जे बात आदमिन की रीति-रिबाजन ते और संसार की सिछा ते आमें, ना कै मसीह की सिछा ते आमें। चौंकि ईसू मसीह जो मनुस्‍य कौ रूप लैके आयौ और परमेस्‍वर बामें पूरी तरे ते बास करै। और बई परिपूर्नता में तुमऊं सहभागी हैं। मसीह संसार के सबरे अधिकारन और सासकन तेऊ ऊपर है, और सब कछू बई के अधीन हैं। तुमारे खुद के पापी स्‍वभाब ते तुमारे छुटकारै काजै तुमारौ खतना मनुस्‍य के हातन ते नांय पर मसीह ते करायौ गयौ है। जा दिना तुमनें बपतिस्मा लियौ बाई दिना तुम वाके के संग गाढ़ेऊ गये तबई हमें परमेस्‍वर की ताकत पै भरोसौ भयौ और जा परमेस्‍वर नें ईसू मसीह कूं मरे भये में ते जिन्दौ करौ वाके संग हमऊं जीन्दे है गये। बानें जो तुम सबरे बुरे कामन में खतना रहित सरीर की वजह ते मरे भये हते तब परमेस्‍वर नें अपने बेटा के संग हमें जीबित करौ और बू हमारे सबरे बुरे कामन नेंऊ मांफ करैगौ बे सब बुरे काम, जिनकौ हमें ऊपर जायकै हिसाब किताब दैनों पड़तौ, बिनकी सजाऊ भयानक होती, बे सब बात जो हम सबन के खिलाफ हती,बानें कीलन के संग क्रूस पै चढ़कै, सब मिटा दईं। बानें बुरी आतमिक पिरधानता, और अधिकारन कूं अपने ऊपर ते उतारकै, क्रूस पै खूब खुल्‍लम खुल्‍ला मजाक उड़ायों और जीत कौ ढिढोरा सुनांय दियौ। जई मारे तुमारे खाबे पीवे में, तुमारे तौहार के बारे में और तुमारे पूनों के चांद के दिना और यहूदियौं के आराम के दिना, इन्हें तुम मानों या ना मानों इनके बारे में तुम काऊए मौकौ मत देऔ कै कोई तुम पै दोस लगाबै। चौंकि जि हमेसा नांय बनै रिंगे। ये रीति-रिबाज तौ छाया के जैसे है पर सच्‍चाई तौ मसीह है। कोई मनुस्‍य तुमारे जौरें दीनता कौ दिखाबौ करकें, और दूतन की पूजा कराकैं, बा प्रतिफल ते वंचित ना कर दैबै जो तुमें मिलवे बारौ है। ऐसौ आदमी हमेसा बिन दिव्‍य दरसनन के बारे में झूंठ बोलतौ रैहबै पर जे सबरी फालतू की बात हैं अपने स्‍बार्थ के काजै अपने आप कूं में फूले रैहमें। और ऐसौ आदमी मसीह में बनो ना रैहबै। मसीह जो सरीर रूपी कलिसिया कौ सिर है। और बई के काबू में सबरी सरीर रूपी कलिसिया पलै और जोड़ और हड्‍डी ते मिलकै जैसौ परमेस्‍वर चाहबै बढ़ती जातै। चौंकि तुमतौ मसीह के संग मर गये, और अब तौ तुमारो संसार पै राज करवे बारी बुरी आतमन ते छुटकारौ है गयौऐ। तौ फिर तुम जा संसार की बातनें और नियमन नें चौं मानतौ? और तुम ऐसी रीति-रिबाजन के पीछे चौं चलतो? कै जाय मत खाओं बाय मत खाओं, जायें मत छूऔ, य्हां तक कै जाये हातऊ मत लगाऔ। इन सब नियमन कौ तौ एक दिना अन्‍त है जाबैगौ। चौंकि जि सबरी बात और नियम तौ आदमिन की ओर ते है। जि सब बात तौ अपनी मरजी के आडम्बरन ते बनाई गयीं है जैसै कै भक्‍ती कौ तरीका, झूंठी दीनता और सरीर के काम, इन सबनते सारीरिक लाभ तौ हते पर जि सरीर की बुरी इच्‍छान कूं छोड़बे में कोई मदत नांय करैं। अगर तुम मसीह के संग जिन्दे भयेऐं, तौ सुरग की चीजनें ढुढबे में लगे रहौ, जहां पै मसीह बिराजमान है और परमेस्‍वर के सीदे हात माऊं बैठौ है। जामारैं तुम धरती की चीजन पै ध्‍यान मत लगाऔ पर जो सुरग में है बापै ध्‍यान लगाऔ। चौंकि तुमारौ पुरानों स्‍वभाव तौ मर गयौ है और तुमारौ जीबन मसीह के संग परमेस्‍वर में छिपौ भयौ है। मसीह ही हमारों जीबन है, और जब मसीह अपनी महिमा में पिरगट होगो तौ हमऊं वाके संग महिमा में पिरगट करे जांगे। जामारैं तुम अपने सरीर की बुरी इच्‍छान कूं मार डारौ जो धरती पै हैं, जैसे व्‍यभिचार, असुद्धता, दुसकामना, बुरी लालसा, और लोभ कूं जो मूरती पूजा के बराबर है। और जामारैं परमेस्‍वर कौ प्रकोप जो वाकी आग्‍यानें न मानें बिनपै पड़तै। बोऊ एक समैओ जब तुमऊ इन बुरी बातन में अपनों जीबन जीते और बिन्नें मानते। अब तौ तुमें जि सब चीज छोड़ दैनी चहिऐं जैसे कि गुस्सा, चिड़चिड़ोपन, दोस लगाबौ, निन्दा करबौ, गाली बकबो। और कबऊ आपस में एक दूसरे ते झूंठ मत बोलौ चौंकि तुमनें अपने पुराने स्‍वभाब कूं छोड़ दियौ है। और तुमनें एक नये स्‍वभाव कूं धारन कर लियौ है और बा स्‍वभाव ते तुम सृस्‍टी करता के गुन और वाके ग्‍यान कूं प्राप्‍त करवे काजै दिन प्रतिदिन बड़ते जाऔ। मतलब जि है कै अब मसीह में ना तौ कोई यूनानी रयौ, ना यहुदी रयौ, ना कोई खतना बारौ रयौ, और ना कोई बिना खतना बारौ रयौ, ना जंगली स्‍वभाव रयौ, ना कोई बिना बुद्धी बारो रयौ, ना गुलाम रयौ, ना आजाद रयौ, अब सब एकई है, केबल मसीह ही सब कछू है और सब कछू मसीह में और मसीह इन सब में है। तुम परमेस्‍वर के प्यारे चुने भये पबित्र लोग हैं। जामारैं पिरेम ते भरे भये, बड़ी दया, भलाई, और नम्रता, सहनसीलताऐ अपनां लेऔ। अगर कोई काऊ पै दोस लगावे कौ कारन पावें तौ एक दूसरे की सह लेऔ और एक दूसरे की गलतीन नें छमा करौ, जैसे कै पिरभू नें हमारे सबरे अपराध छमा करे हैं बैसेई तुमऊं सबन के अपराधन नें छमा करै करौ। इन सबन के ऊपर जो पिरेम है बा पिरेम के स्‍वभाब कूं अपना लेओ चौंकि जि पिरेमई है जो हम सबन्नें एक डोर में बांधकै रखतै। परमेस्‍वर नें तुमें एकई मसीह की देह में सान्‍ती ते रैहबै काजै बुलायौ है और मसीह नें जो सान्‍ती तुमें दई है, बाय अपने हिरदय में बसन देओ और परमेस्‍वर कौ धन्यबाद हमेसा करते रहौ। मसीह के वचनन नें अपने हिरदय में अच्‍छी तरैह ते बैठा लेओ और वाके सिद्ध ग्‍यान के संग एक दूसरेन नें सिखायकै चिताये करौ, और अपने मन में दया के संग परमेस्‍वर के काजै महिमा के गीत, और भजन स्तुति और आतमिक गीत धन्यबाद के संग गाए करौ। देखौ पिरभू के वचन में या पिरभू के काम में जो कछू करौ बाय पिरभू ईसू मसीह के नाम तेई करियों और बाईके जरिये परमेस्‍वर कौ धन्यबादऊ करते रहियों। हे पिरभू कूं मानवे बारी पतनिंयों पिरभू में जो सई है बैसेई अपने अपने पतीन के अधीन रैहकै बिनकी बातन नें माने करौ। हे पिरभू के मानबे बारे पतियों अपनी अपनी पतनिंन ते पिरेम करौ और बिनते कड़े मन ते बात मत करो। हे बालकौ, सब बातन में अपने माँ-बाप की हरेक आग्‍या कौ पालन करै करौ चौंकि देखौ पिरभू इनई बात ते खुस हैबै। हे माँ-बापौ अपने बालकन नें परेसान मत करौ, जाते कहूं बिनकी हिम्मत नांय टूट जाबै। हे सब सेबकों परमेस्‍वर कौ भय मान्‍त भये सीदे मन ते रैह करौ, और जि नांय कै तुम मनुस्यन नें दिखावे काजै पर पिरभू कूं खुस करवे काजै तुम अपने मालिकन की आग्‍यान नें सच्‍चाई के संग मानकें पालन करे करौ। और जो कछू तुम करौ बाये मन ते करै करौ, और जि समझै करौ कै तुम जो कर रये हैं बू मनुस्‍य के काजै नांय कर रये पर पिरभू के काजै कर रये हैं। तुम जानें के पिरभू जाके बदले में तुमें उपहार दैबैगौ, चौंकि तुम पिरभू जो मसीह है वाकी सेबा कर रये हैं। चौंकि परमेस्‍वर हर एक कौ बराबरी ते न्याय करतै बू काऊ कौ पछपात नां करै। और जो कोई गलत करै बाये हर बुराई की सजा मिलैगी। हे मालिकों जा बाते समझ लेओ कै सुरग में हम सबन कौ एकई स्‍वामीं है जामारैं अपने अपने दासन के संग न्याय और सई सई व्‍यवहार करौ। पिराथना में लगे रहौ और परमेस्‍वर कूं धन्यबाद दैते रहौ, और बई में जागते रहौ। और हमारे काजैऊ पिराथना करै करौ, कै परमेस्‍वर हमारे काजै वचन कूं सुनाबे कौ ऐसौ रस्ता खोल दैबै जाते हम मसीह के वचन कूं खुलकै और वाकी रहस्‍यमयी बातन कूं लोगन कूं बता सकें जाके कारन मैं जेल में बन्दी हूं। और जा बात काजै पिराथना करै करौ, कै मैं परमेस्‍वर के वचन कूं साफ-साफ लोगन में ऐसौ बता सकूं जैसौ मोय बतानों चहिए। हर मौका कौ पूरौ-पूरौ फायदा उठाये करौ और बाहर बारेन के संग बुद्धी के संग व्‍यवहार करौ। तुमारी बोली हर समै दयालू और मीठी रहनी चहिऐं, जाते कै तुम जान लेओ कि हर एक आदमी कूं कैसे उत्‍तर दैनों चहिऐं। पिरभू में मेरौ प्यारौ भईया, संगी और मसीह कौ भरोसे योग्‍य सेबक तुखिकुस मेरी बातन नें तुमें बताय दैगौ। बाय मैं जामारैं तुमारे जौरें भेज रयौऊं ताकि बू तुमें हमारी हालत बता सकै और तुमारे हिरदयन में तसल्‍ली दैबै। और बई के संग मैं भरोसे योग्‍य प्यारे भईया उनेसिमुसे भेज रयौऊं, बू तुमारे देस कोई है बू तुमें हमारे य्हांकी सबरी बातन नें बता देगौ। अरिस्तर्खुस जो मेरे संग जेल बन्द है और मरकुस जो बरनबास कौ भईयाए बिनकी ओर ते, तुम सब लोगन कूं नमस्‍कार भेज रयौऊं। मैं तुमते पैहले तेई मरकुस के बारे में बता चुकोऊं अगर बू तुमारे जौरें आवें तौ वाके संग अच्‍छी तरीका ते व्‍यवहार करियों। और बू ईसू जो यूसतुस कहलाबें वाकौ तुमकूं नमस्कार, खतना बारेन में ते केबल तीन जन है जो मेरे संग परमेस्‍वर राज्‍य के काम में लगे भये हैं, जेऊ मेरे काजै बड़े आनन्द की बात है। ईसू मसीह कौ दास इपफ्रास जो तुमारे देस कौई है बू तुमें नमस्‍कार कैह रयो है, और बू हमेसा तुमारे काजै पूरे मन ते पिराथना करतै कै तुम सिध्द हैकै पूरे भरोसे के संग परमेस्‍वर की इच्‍छा में स्थिर रहौ। मैं जा बात कौ गबाह हूं कै बू तुमारे काजै और जो लौदिकिया, हियरापुलिस में रह रये हैं बिनके काजै बू मन ते बड़ी मेहनत कर रयौ है। प्यारे बैध लूका और देमास कौ तुमें नमस्‍कार लौदिकिया नगर में रहबे बारे भईयन कूं और नुमफास और वाके घर में इकठ्‌ठी हैबे बारी कलिसिया कूंऊ नमस्‍कार। जब तुमारे य्हाँपै जि चिठ्‌ठी पढ़ लयी जावें तौ जा चिठ्‌ठीऐ, लै जायकै लौदिकिया की कलिसिया मेंऊ पढ़ दियौ, और जो चिठ्‌ठी लौदिकिया के नाम ते आयी है बायें तुम पढ़ लियौ, और अरखिप्पुस ते जि कह दियौं कै जो सेबा पिरभू में तोए सौंपी गईऐ बाये पूरी सावधानी के संग और बाये हर तरीका ते पूरौ कर। अब मैं पौलुस खुद अपने हातन ते जा चिठ्‌ठी में नमस्‍कार लिख रयौ हूं। मैं जेल खाने में बन्द हूं और मेरे हात हतकड़िन में बंधे भये हैं। तुम पै परमेस्‍वर कौ अनुग्रह होतौ रैहबै। ऐसौई हैबै। जि चिठ्‌ठी पौलुस, सिलबानुस और तिमुथियुस थिस्सलुनिकियों की कलिसिया कूं लिख रये हैं जो पिता परमेस्‍वर और पिरभू ईसू मसीह के नाम है। परमेस्‍वर तुम लोगन कूं अनुग्रह और सान्‍ती दैवै। हम हमेसा तुम सबन काजै परमेस्‍वर कौ धन्यबाद दैमें और अपनी पिराथना में तुमें याद करतै। और अपने परमेस्‍वर पिता के सामने तुमारे भरोसे के काम, पिरेम के काम और कठिन मेहनत और हमारे पिरभू ईसू मसीह में आसा ते उत्‍पन्‍न तुमारी सहन सीलता कूं लगातार याद करैं। हे भईयाओ, हम जानें कै परमेस्‍वर तुमते पिरेम करै और बाई नें तुमकूं चुनों है। चौंकि हमारौ सुभ समाचार तुमारे याँपै केवल सब्दन में ही नांय बल्कि सामर्थ, पबित्र आतमा में और बडे़ निस्चय के संग पौंहचायौ गयौ है। जैसो कै तुम जानतें, जब हम तुमारे बीच में हते तौ तुमारे काजै कैसे बने हते। तुम बड़े दुख में पबित्र आतमा की ओर ते मिले आनन्द के संग वचन कूं मानकै हमारी और हमारे पिरभू की सी चाल चलवे लगेऔ। य्हाँ तक कै तुम मकिदुनियां और अखाया देस के सब भरोसौ करबे बारे लोगन के काजै सीख दैवे बारे नमूना बन गएऔ। चौंकि तुमारे य्हांते पिरभू कौ वचन केवल मकिदुनियां और अखाया देस मेंई ना सुनांयौ गयौ, पर तुम्हारो भरोसौ जो परमेस्‍वर पै है वाकी चर्चा हर जगैह फैल गयी है। जाकी बजैह ते बिनते हमें कछू कैहवे की जरूरतई नांय परी। चौंकि बे लोग खुदई हमें बतामें कै, हम कैसे तुम लोगन के बीच में आये और तुम कैसे मुरतीन कूं छोड़कै परमेस्‍वर की ओर फिर गये, ताकि जीन्दे और सच्‍चे परमेस्‍वर की सेबा करें। और वाके बेटा ईसू की सुरग पैते आयवे की बाट जोह रहे हैं, जाकूं परमेस्‍वर नें मरे भयेन में ते जिलायौ हतो और बुई हमें आयवे बारे परमेस्‍वर के प्रकोप ते बचा सकै। हे बिसबासी भईयाओ! तुम जि खुद ही जानतौ कै हमारौ तुमारे जौरें आयबो बेकार नांय भयौ। और तुम जेऊ जानें कै तुमारे जौरें आयबे ते पहलै हमें फिलीपी नगर में दुख और बुरौ व्‍यवहार सहनों परौ। और जब हम थिस्सलुनिकियों में आये तौ य्हांपैऊ हमारौ भौत बिरोध भयौ। फिरऊ परमेस्‍वर नें हमें हिम्मत दयी कै हम बिना डर के तुम लोगन के बीच में सुभ समाचार कौ पिरचार करें। चौंकि हमारी सिछा न तौ झूंठ ते, न असुद्धता ते और न छल के संग है। पर परमेस्‍वर नें हमें योग्‍य समझकें सुभ समाचार सुनाबे कौ काम सौंपौ है। जामारैं हम लोगन कूं नांय, पर मन कूं जांचबे बारे परमेस्‍वर कूं खुस करबे काजै सिछा दैमें चौंकि तुम जानें के, ना तौ हम तुमते कबऊ चापलूसी की बात करते, और ना लालच में तुमते कोई बात कही। जा बात कौ परमेस्‍वरऊ गबाह है। और ना तौ हमनें लोगन ते और ना तुमते और ना काऊ ओर ते आदर पावौ चाहौ। हम मसीह के भेजे भये चेला हैबे की वजह ते तुम पै अधिकार जता सकैं, पर अपने बालकन कौ लालन-पालन करबे बारी माँ की तरैह ते हमनें तुम्हारे बीच में रैहके कोमल व्‍यवहार करौ है। और हम तुमते पिरेम करतै जामारैं केवल परमेस्‍वर को सुभ समाचारई तुमारे संग नांय बांटौ, पर हम तुम्हारे काजै अपने पिरानऊं दैवे काजै तैयार हते, चौंकि तुम हमारे प्यारे बन गये है। हे भईयाओ, तुमें हमारी बू कड़ी मेहनत और कस्ट तौ याद हुंगे, जो तुम लोगन के बीच में परमेस्‍वर के सुभ समाचार कौ पिरचार करते समै जामारैं हम रात-दिन काम-धन्धों करते रये कै हम काऊ पै बोझ नांय बनें। जा बात के तुम खुदई गबाह हो और परमेस्‍वरऊ गबाह है कै तुम भरोसौ करबे बारे लोगन के बीच में हमारौ व्‍यवहार पबित्र, धारमिक और निरदोस हतो। चौंकि तुम जानतो जैसो पिता अपने बालकन के संग व्‍यवहार करतै, बैसेई हमनेंऊ तुमारे संग में व्‍यवहार करौ है। और हम तुम में ते हर एक कूं हिम्मत और सान्‍ती देते और समझामें हते कै तुमारौ चाल-चलन परमेस्‍वर के लायक है जाय जो तुमें अपने राज्‍य और महिमा के काजै बुलाबै। हम जामारैऊ परमेस्‍वर कौ लगातार धन्यबाद करतें। जब हमारे द्वारा परमेस्‍वर कौ वचन तुम्हारे जौरें पौंहचौ तौ तुमने बू आदमी कौ वचन नांय, पर जैसौ कै बू बास्तव में है परमेस्‍वर कौ वचन समझ के अपनांयो हतो। और जि वचन तुम भरोसौ करबे बारे लोगन मेंऊ काम करतै। हे भईयाओ, अब तुम परमेस्‍वर की बिन कलिसियान की तरैह ते जीबन जीबे लगेऔ, जो यहुदिया देस में मसीह ईसू में हैं चौंकि तुमनेंऊ अपने लोगन ते बैसौई दुख पायो है जैसौ बिन्‍नें यहुदी लोगन ते पायौ हतो। बिन यहुदी लोगन नें पिरभू ईसू और परमेस्‍वर की ओर ते बात बताबे बारेन कूं मार डारो और हमकूं सतायौ हतो। परमेस्‍वर बिनते खुस नांय हैमें और बे सबकौ बिरोध करतै। और बे गैर यहुदियन कूं उद्धार कौ सुभ समाचार सुनाबे तेऊ हमें रोकतै और जा तरैह ते बे अपने पापन कौ घड़ा भर रये है और अब परमेस्‍वर कौ प्रकोप बिनपै पूरी तरैह ते आ परौ है। हे भईयाओ, जब कछू दिनान के काजै हम सरीर ते तौ तुमते अलग है गये हते, जबकि मन ते तौ तुमारे जौरें हते बा समै तुमें देखबे की हमें भौत इच्‍छा भयी और हमनें तुमते दुबारा मिलबे की भौत कोसिस करी हती। जामारैं हमनें तुमारे जौरें आयबों चाहौ, अकेले मुझ, “पौलुस” नें खुद दो बार तुमारे जौरें आबे की कोसिस करी, पर सैतान नें हमें रोक दियौ हतो। जब हम पिरभू ईसू के दुबारा आबे पै हम वाके सामने खड़े होबेंगे, तब तुम लोगन कूं छोड़कै हमारी आसा, आनन्द और बड़ाई कौ मुकुट का है सकै? चौंकि सच में तुमई लोग हमारी बड़ाई और आनन्द हैं। जब हम तुमारे बारे में जानने कौ और ज्‍यादा इन्‍तजार नांय कर सके, तब हमनें एथेन्स में अकेले रुकबे कौ और तिमुथियुस कूं जो मसीह कौ सुभ समाचार सुनाबे में हमारौ संगी भईया और परमेस्‍वर कौ सेबक है, बाकूं तुमारे जौरें भेजबे कौ निस्चय करलो। जाते बू तुमारे भरोसे के बारे में तुमें समझाबै और तुमें उत्साहित करै, तुम जा परीक्छा के समै में डगमगा ना जाओ चौंकि तुम खुदई जानतौ कै हम सब जाई काजै ठहराये गये हैं कै हम दुख के समै में डटे रैहमें और जेई परमेस्‍वर की इच्‍छा है। चौंकि जब हम तुमारे जौरें हते तब तुमते कैहते, कै हम सब लोगन कूं कठिन समै ते गुजरनों परैगौ, और ऐसौई भयौ जैसे के तुम सब जानते। जा वजेह ते मोपै और नांय रहयो गयौ तौ तुम्हारे भरोसे को हाल जानबे काजै तिमुथियुस कूं भेजौए। कंहूं ऐसौ न भयौ होय के सैतान ने तुमारी परीक्छा करी होय और तुम डगमगा गये होंय और हमारी करी भयी मेहनत बेकार है गई होय। तिमुथियुस जो तुमारे जौरें ते बापस आयौ हतौ, बानें तुम्हारे पिरेम और भरोसे को समाचार सुनांयौ। बानें जेऊ बात बताई के तुम हमें हमेसा पिरेम के संग याद करतौ, और हमें देखवे की इच्‍छा रखतो जैसे कै हमऊं तुम्हें देखवे की इच्‍छा रखतै। जामारैं भईयाओ हमनें अपने सबरे दुख मुसीबतन में तुम लोगन के भरोसे ते सान्‍ती पाई है। जि हमें जानबे कूं नयौ जीबन देतै कै अब तुम पिरभू में मजबूत है। और जैसो आनन्द तुमारी वजह ते परमेस्‍वर के सामने हमें मिलौ है वाके बदले तुमारे बारे में हम कौन सी तरैह ते परमेस्‍वर को धन्यबाद करें? हम रात और दिन भौतई पिराथना करते रहतै कै हम तुमें देखें और तुमारे भरोसे की कमीऐं पूरी करें। अब हमारौ परमेस्‍वर पिता और हमारौ पिरभू ईसू खुदई तुमारे जौरें आयवे में हमारी अगुबाई करै। और पिरभू ऐसौ करै के जैसै हम तुमते पिरेम रखतें बैसेई तुमारो पिरेम एक दूसरे के काजै और सब लोगन के काजै बढै़ और उमड़तौ रैहबे। बू तुमारे मन कूं ऐसौ स्थिर करे कै जब पिरभू ईसू अपने सब पबित्रन लोगन के संग आवे तब हमारे परमेस्‍वर पिता के सामईं पबित्रता में हम पै कोई दोस न होय। हे भईयाओ, अब हमें तुमकूं कछु और बात बतानी हैं। पिरभू ईसू के नाम में हम तुमते पिराथना और निबेदन करतै, कै तुमनें हमते परमेस्‍वर कूं खुस करबे काजै जो सिछा पाई है और निस्चय तुम बा तरैह ते चल रये हैं, और बामें बैसेई जादा ते जादा चलते रहो। चौंकि तुम जानतौ कै हमनें तुमकूं जो सिछा दई हती बू पिरभू ईसू के अधिकार ते हती। परमेस्‍वर की जेई इच्‍छा है, कै तुम पबित्र है जाऔ और कुकर्म ते दूर रहो। और तुम में ते हर एक कूं अपनी पत्नी के संग पबित्र और आदर भाव के संग जीबन जीनों चहिऐं और जा कामें सरीर की इच्‍छा पूरी करवे काजै मत करौ जैसे कै गैर यहुदी जो परमेस्‍वर कूं नांय जानै करतै। कोई आदमी अपने भईया की पत्नी पै गलत नजर ना रखें। चौंकि पिरभू ऐसौ करवे बारेन कूं भौत सजा दैवेगौ, जाके बारे में हमनें तुमकूं पहले तेई बता दई है और सावधान कर दिये हते। चौंकि परमेस्‍वर ने हमकूं असुद्ध जीबन जीबे काजै नांय, पर हमें सुद्ध जीबन जीबे काजै बुलायौ है। जा बजैह ते जो इन सिछान कूं तुच्‍छ जानतै, बू आदमिन कूं नांय पर पबित्र आतमा दैबे बारे परमेस्‍वर कूं तुच्‍छ जानतै। हमें जरूरत नांय कै हम तुमें भाई चारे के पिरेम के बारे में लिखें। चौंकि परमेस्‍वर ते तुम सीख चुके हो कै तुमें एक दूसरे ते कैसै पिरेम करनों चहिए। सच में तुम मकिदुनियां के भईयन के संग पिरेम करतौ, पर हम तुमें समझातें कै तुम पिरेम करबे में और बढ़ते जाऔ। जा बात कौ ध्‍यान रखौ कै तुम एक दूसरे के संग मेल-मिलाप ते रहौ और तुमारौ ध्‍यान तुमारे काम मेंईं लगो रैहबै। तुम दूसरे के कामन में टाँग मत अड़ाऔ पर तुम बैसौई करौ जैसै हमनें तुमते करबे कूं कही हती। ऐसौ करबे ते अबिसबासी लोग तुमारौ आदर करिंगे और तुम्हें काऊ चीज की कमी नां होगी। हे भईयाओ हम चांहतै कै तुम अपने मरे भये बिसबासी लोगन के दुबारा ते जी उठिवे के सच कूं जानों, जाते कै तुम अबिसबासी लोगन की तरैह ते निरास हैके दुखी मत हो जिनके जोरै कोई आसा नांय। चौंकि हम भरोसौ करतै कै ईसू मरौ और बू मरे भयेन में ते जी उठौ, बैसेई हमें जा बात पैऊ भरोसौ रखनों है कै जब ईसू आबेगौ तौ परमेस्‍वर ईसू के संग बिननेंऊ भेजैगौ, जो ईसू पै भरोसौ करते भये मर गये। चौंकि हम पिरभू के सिखाये वचन के अनुसार तुमते जि कहते है। कै पिरभू के आबे तक जो लोग सरीर में जीन्दे रैहबिंगे, बे मरे भयेन में ते जी उठबे बारेन मेंते पैहले सुरग नांय जाबेंगे। चौंकि पिरभू खुदई सुरग में ते उतरेगौ। बाई समै दहाड़ कौ और पिरधान सुरग दूतन कौ सब्द सुनाई देगौ और परमेस्‍वर की तुरही फूंकी जाबेगी, जो मसीह पै भरोसौ करते भये मर गये है, बे पहलें जी उठिंगे। जाके बाद हम सब बा समै तक जीन्दे रैहगे, हम सब बिनके संग बादरन पै उठाय लिये जांगे और हबा में पिरभू ते मिलिंगे और जाई रीति ते हम सब पिरभू के संग हमेसा रहेंगे। जामारैं ऐसी बातन ते एक दूसरे कूं हिम्मत देत रहौ। हे भईयाओ, पिरभू के दुबारा आवे के समै और तिथि के बारे में तुमारे काजै कछू लिखवे की जरूरत नांय। चौंकि तुम खुदई जानतो कै जैसे रात कूं चोर अचानक आवते, बैसेई पिरभू के दुबारा आबे कौ दिन आबे बारौ है। और जब लोग कहिंगे कै अब सब कछु सान्‍त है और अब कछु डर नांय तबई बिनास बिनपै गर्भबती के दर्द की तरैह ते अचानक आ परैगौ और बे काऊ तरैह ते नांय बचेंगे। हे भईयाओ, तुमतौ अन्धकार में नांय हत, कै बू दिना तुम पै चुपके ते चोर की तरैह अचानक आ परै। चौंकि तुम सब ज्‍योति की सन्‍तान हो मतलब दिन की सन्‍तान हो। हम ना अन्धेरे की सन्‍तान है और ना रात की सन्‍तान है। जामारैं हम औरन की तरैह ते अन्धकार में ना रहै पर खुद कूं बस में रखकै साबधान रहें। चौंकि जो सोमें बे रात कूँई सोमें, और जो मदिरा पीतै बे रात कूँई मतबारे होतें। पर हम जो दिन की सन्‍तान हैं। हमें खुद कूं बस में रखकै भरोसे और पिरेम की झिलम पहनकै और उद्धार की आसा कौ टोप पहनकै तईयार रहें। चौंकि परमेस्‍वर ने हमें अपने गुस्सा काजै नांय, पर जा काजै ठहरायो है कै, हम अपने पिरभू ईसू मसीह के द्वारा उद्धार कूं प्राप्‍त करें। ईसू मसीह हमारे काजै मरौ। जामारैं हम सब वाके संग सदा जीन्दे रैहबिंगे, चाहे वाके आवे तक हम जीन्दे रैहबें या मर जावें। जाई बजैह ते एक दूसरे कूं हिम्मत देते रहौ और भरोसे में मजबूत करौ, जैसे के तुम कर रये हो। हे भईयाओ, हम तुमते बिनती करतै कै, तुमारे काजै जो मेहनत करतै और पिरभू में जो तुमारे अगुबा है और बे तुमें बे सिछा देतै, बिनकौ आदर करै करौ। और बिनके कामन की बजैह ते पिरेम के संग बिनकूं भौतई आदर लायक समझो। और आपस में मेल-मिलाप ते रहो। हे भईयाओ, हम तुमें समझाबते कै जो आलसी लोग है बिनकूं समझाऔ। और डरपोकन कूं हिम्मत देऊ और कमजोर कूं सम्हारो, सबन के संग सहन सीलता दिखाओ। और ध्‍यान रखौ कै कोई बुराई कौ बदलौ बुराई ते नांय दैवे, पर सब लोग सदा एक दूसरे के संग भलाई करवे कौ जतन करें। सदा खुस रहो। लगातार पिराथना में लगे रहौ। हरेक परिस्थिती में परमेस्‍वर कौ धन्यबाद करो। चौंकि तुम्हारे काजै ईसू मसीह में परमेस्‍वर की जेई इच्‍छा है। पबित्र आतमा की अनसुनी मत करौ। परमेस्‍वर की ओर ते कही बातन कूं तुच्‍छ मत जानों। और सब बातन कूं सच्‍चाई ते परखो और जो अच्‍छी है बिनैं मजबूती ते पकरे रहौ। सब तरह की बुराई ते बचे रहौ। सान्‍ती कौ परमेस्‍वर खुदई तुमें पूरी तरह ते पबित्र करै। और तुमारी आतमा, पिरान और सरीर, हमारे पिरभू ईसू मसीह के दुबारा आयबे तक, पूरी तरैह ते बिना दोस के बने रहें। तुमारौ बुलायबे बारौ भरोसे योग्‍य है और बू ऐसौई करैगौ। हे भईयाओ, हमारे काजै पिराथना करै करौ। और सब भईयन कूं पबित्रता के संग गले लगकै नमस्‍कार करौ। मैं पिरभू के नाम ते तुमें आदेस दै रयौऊं कै जि चिठ्‌ठी सब भईयन कूं पढ़कै सुनाई जावें। हमारे पिरभू ईसू मसीह कौ अनुग्रह तुम्हारे संग रहबै। जा चिठ्‌ठीऐ, मैं पौलुस, सिलबानुस और तिमुथियुस थिस्सलुनिकियों नगर की कलिसिया कूं लिख रये हैं जो पिता परमेस्‍वर और पिरभू ईसू मसीह के नाम है। हमारे परमेस्‍वर पिता और पिरभू ईसू मसीह की ओर ते तुमें अनुग्रह और सान्‍ती मिलती रैहबै। हे भईयाओ, तुमारे बारे में हमें हर समै परमेस्‍वर कौ धन्यबाद करनों चहिऐं, और जि ठीकउ है। चौंकि तुम सब भरोसे में भौतई बढ़ते जा रयेऔ और तुम में आपसी पिरेमऊ भौत बढ़तौ जा रयौ है। जामारैं हम परमेस्‍वर की दूसरी कलिसियान मेंऊ तुम लोगन पै घमन्‍ड करतै। चौंकि जितने उपद्रव और कस्ट तुम सहतौ उन सब में तुमारी सहन सीलता और भरोसौ पिरगट होतै। जि बात परमेस्‍वर के सच्‍चे न्याय को स्पस्ट सबूत है। कै तुम परमेस्‍वर के राज्‍य के योग्‍य ठहरौ, जाके काजै तुम दुखऊ उठाबतौ। चौंकि परमेस्‍वर न्याय करबे बारौ है। जो तुमें दुख दैमें बू बिन्नें बदले में दुख दैवेगौ। और तुम जो दुख सैह रये हैं, बिन दुखन में परमेस्‍वर तुमें हमारे संग आराम दैवेगौ, जि बा दिना होगो जब पिरभू ईसू अपने सामर्थ बान दूतन के संग धधकति भई आग में ते सुरग ते पिरगट हैबेगो। और जो लोग परमेस्‍वर कूं नांय जानें और हमारे पिरभू ईसू के सुभ समाचार कूं नांय मानें, बिनकूं दन्‍ड दैवेगौ। बे पिरभू के सामईं ते और वाकी सामर्थ की महिमा ते दूर कर दिये जाबेंगे और कबऊ नांय खतम हैबे बारौ दन्‍ड भोगिंगे। जि बा दिना हैबेगौ, जब बू अपने सब पबित्र लोगन ते जो बापै भरोसौ करतै बिनते महिमा और आदरमान लेवे आवेगौ। तुमंऊ बिन लोगन में हुंगे चौंकि तुमने हमारी गबाही पै भरोसौ करौ है। जामारैं हम लगातार तुमारे काजै जि पिराथना करतै कै, हमारौ परमेस्‍वर तुमें कबऊ नांय खतम हैबे बारे जीबन लायक बनामें जाके काजै तुम बुलाए गये हो। हम चाहमें कै परमेस्‍वर तुमें अपनी सामर्थ ते भर दैबै, जाते तुम भलाई की हरेक इच्‍छा और भरोसे के हरेक काम कूं पूरौ कर सकैं। जाते हमारे परमेस्‍वर और पिरभू ईसू मसीह के अनुग्रह के अनुसार हमारे पिरभू ईसू कौ नाम तुम में महिमा पावें और तुम बामें महिमा पाओ। हे भईयाओ, अब हम अपने पिरभू ईसू मसीह के दुबारा आयवे और वाके जौरें हम सबन के आपस में इकठ्‌ठे हैबे के बारे में तुमते बिनती कर रेहैं, कै जो कोई जि कैहवे कै जि बात परमेस्‍वर की ओर तेऐ या काऊ और के वचन या लिखी भयी चिठ्‌ठी कूं जाके बारे में कोई जि कहवे कै, जि चिठ्‌ठी हमनें भेजी है और जामें जि लिखौ होय, कै पिरभू के आयबे कौ समै आय गयौ है तौ तुम भैहक मत जईयौ और तुम घबरा मत जईंयों। तुम अपने आप काऊ की बातन में मत आ जईंयों। मैं जि जा बजैह ते कैह रयौ हूं, कै बू दिना जब तक नांय आबैगौ जब तक सब लोगन कौ परमेस्‍वर ते मौंह मोड़बे कौ समै ना आ जाय, व्‍यबस्था कूं ना मानबे बारे पिरगट ना है जांय। बा पाप के आदमी कौ अन्‍त बिनांस है। जो बिरोध करै और अपने आपकूं सबसे बड़ौ बताबै और य्हाँ तक कि बू परमेस्‍वर और जो पूज्‍य कहलामें बिनकौ बिरोध करैगौ और बड़े पिराथना घर में बैठकै अपने आप कूं परमेस्‍वर बताबैगौ। का तुमें याद नांय जब मैं तुमारे य्हां हतो, तब तुमते जि बात कैहतौ हतो? कै तुम बा चीज कूं जानौ जो बाय रोक रयी है चौंकि परमेस्‍वर नेंउ वाके काजै एक निस्चित समै कर रखौऐ। चौंकि व्‍यबस्था कूं ना मानबे बारौ जा समै मेंऊ रहस्‍य मय तरीका ते काम कर रयौ है। पर बू तब तक छिपौ रैबैगौ जब तक बाय रोकबे बारौ दूर ना है जाय। तब व्‍यबस्था कूं ना मानबे बारौ पिरकट होगो और बाय पिरभू ईसू अपने मौंह की फूंक ते और अपने आगमन की चकाचौंध ते नास कर देगौ। पर वाके नास हैबे ते पहलै बू झूंठे चमत्कार और झूंठे आस्चर्य के काम करैगौ चौंकि बामें सैतान की सक्‍ती होगी। बू इन सक्‍तीन ने बिन लोगन कूं भरमाबे के काम में लैवेगौ जो नास हैबे बारे है। चौंकि बिन्‍नें सच्‍चाई ते पिरेम नांय करौ, जाते उनकौ उद्धार है जातौ। जामारैं परमेस्‍वर उन लोगन की बुद्धी कूं भ्रस्‍ट कर दैबेगौ और जाते बे लोग व्‍यबस्था कूं न मानबे बारे के भैकाबे में आसानी ते आजांगे और बे बिन बातन पै भरोसौ करिंगे जो सच्‍ची नांय। ताकि जितने लोग सत्‍य पै भरोसौ नांय करें और अधर्म ते खुस हैमें, बे सब दन्‍ड पाएंगे। पिरभू में प्यारे भईयाओ, तुमारे काजै हमें हमेसा परमेस्‍वर कौ धन्यबाद करते रहनों चहिऐं। चौंकि परमेस्‍वर नें तुमकूं पैहले तेई चुन लियौ है। तुम आतमा के द्वारा पबित्र बनके और सत्‍य पै भरोसौ करके उद्धार पाऔ। परमेस्‍वर नें हमारे सुभ समाचार पिरचार के द्वारा तुमकूं बुलायौ है जाते कै तुम हमारे पिरभू ईसू मसीह की महिमा कूं लै सकौ। जाके मारे भईयाओ, भरोसे में मजबूत रहो और जो बातें तुमनें हमते सुनींऐ और जा चिठ्‌ठी के द्वारा सीखीऐं बिन्नें पकड़े रहौ। हमारे पिरभू ईसू मसीह खुदई और हमारे पिता परमेस्‍वर जानें हमते पिरेम करौऐं और अनुग्रह ते कबऊ नांय खतम हैबे बारी सान्‍ती और उत्‍तम आसा दयी है, तुम्हारे मन में सान्‍ती देय और तुमें हरेक अच्‍छे काम और वचन में स्थिर करै। हे भईयाओ, हम आखरी में एक और बात तुमते चाहमें कै तुम हमारे काजै पिराथना करै करौ जाते कै पिरभू कौ वचन एसैई और जगैन पैऊ जल्दी ते फैलै और महिमा पाए, जैसो तुम में फैलौ है, और हम टेड़े और दुस्‍ट लोगन ते बचे रैहमें। चौंकि हर एक आदमी परमेस्‍वर पै भरोसौ करबे बारौ नांय। पर पिरभू तौ भरोसे योग्‍य है। बू तुमें मजबूत करैगौ और सैतान ते बचाबैगौ। हमें पिरभू में तुमारे ऊपर पूरौ भरोसौ है कै हम तुमें जो जो आग्‍या दैमें बिन्नें तुम मानें और मानते रिंगे। परमेस्‍वर के पिरेम और मसीह के धीरज की ओर पिरभू तुमारे मन की अगुबाई करै। हे भईयाओ, हम तुमें पिरभू ईसू मसीह के नाम ते जि आग्‍या दैमें कै, तुम हरेक आलसी भईयन ते अलग रहौ, जो काम काज नांय करैं और बा सिछा के अनुसार नांय चलें जो बिन्‍नें हमते पाई है। तुम खुदई जानें कै तुमें हमारी जैसै चलनों चहिऐं। चौंकि जब हम तुमारे जौरें हते तबऊ काम धन्धो करते। हमनें काऊ की रोटी सैंत मैंत में नांय खायीं, पर मेहनत और कस्ट ते रात और दिन काम धन्धो करते रये, कै हम तुम में ते काऊ पै बोझ ना बनें। हमें जि अधिकार हतो कै हम तुमते खा सकते, पर हमनें जि जामारैं नांय करौ चौंकि हम तुमारे सामने एक नमूना रखबो चाहते कै तुम हमारी जैसी चाल चलौ। चौंकि जब हम तुमारे जौरें हते, तबऊ हम तुमें जि आग्‍या दैते हते कै जो कोई काम धन्धो करै, बुई रोटी खाबै। हमारे सुनबे में आयौ है कै, तुम में ते कछू लोग आलसी है। बे कछु काम धन्धो नांय करें पर दूसरेन के काम धन्धेन में बाधा डारें। ऐसे लोगन कूं हम पिरभू ईसू मसीह के नाम में समझामकें आग्या दैमें कै, बे दूसरे के काम धन्धे में दखल नांय दैमें और अपनों कमायकै खानों खामें। पर हे भईयाओ, तुम भलाई करबे में हिम्मत मत हारौ। जा चिठ्‌ठी के द्वारा हमारी दई गयी आग्‍या पै अगर कोई ना चलै, तौ बा आदमी पै नजर रखौ ओर बाते कोई बास्तौ मत रखौ, जाते बाय लज्‍जा आवे। पर बिनके संग दुसमनन जैसौ ब्यौहारऊ मत करौ, पर बाय भईया की तरैह ते समझाओ। अब सान्‍ती कौ पिरभू खुद तुमें हर समै और हर तरैह ते सान्‍ती दैबै। पिरभू तुम सबके संग रैहबै। मैं, पौलुस, अपने हात ते जि नमस्‍कार लिख रयौऊं और मेरी जि लिखाबट सब चिठ्‌ठीन की पहचान है, कै जि चिठ्‌ठी मेरी ओर ते भेजी गयी है। हमारे पिरभू ईसू मसीह कौ अनुग्रह तुम सबन पै बनों रैहबें। मैं, पौलुस जो हमारे मुक्‍तीदाता परमेस्‍वर और हमारी आसा ईसू मसीह के आदेस के अनुसार ईसू मसीह कौ भेजौ भयौ चेला हूं, जि चिठ्‌ठीये तिमुथियुस काजै लिख रयौ हूं, जो भरोसे में मेरौ सच्‍चौ बेटा है। पिता परमेस्‍वर और हमारे पिरभू ईसू मसीह तोय अनुग्रह, दया और सान्‍ती दैतौ रैहबै। मैने तोय मकिदुनियां जाते समै जि समझायौ हतो कै इफिसुस में रैहकें कछू लोगन कूं आग्‍या दै, कै बे झूंठी सिछा नांय दैमें, और बिन मनगढ़न्त कहानी और बिन पीढ़ीन पै मन ना लगामें, जो लड़ाई झगडे़ करबामें और परमेस्‍वर की बा इच्‍छा कूं पूरौ नांय करैं जो केबल भरोसे तेई पूरी करी जा सकते हैं। मेरे सिखाबे कौ मतलब तौ जि है कै सब भरोसे करवे बारे पिरेम ते भर जामें, जो भले मन और अच्छी आतमा और कपट रहित भरोसे ते पैदा हैमें। कछू आदमी इन बातन कूं छोड़कै बेकार की बातन माऊं भटक गये हैं। बे व्‍यबस्था के सिखाबे बारे बनबौ चाहमें जिन बातन नें बे बोलें और जोर देतें बिन बातन नें बे खुदई नांय समझें। पर हमें जि पतौ है अगर कोई व्‍यबस्था कूं सही ढ़ग ते काम में लैवे तौ बू अच्छी है। जि जानकै कै व्‍यबस्था धरमी आदमी के काजै नांय पर बिन आदमिन के काजै है जो धरम कूं नांय मानें, कोई की बातन नें नांय मानें, परमेस्‍वर कूं नांय मानें, पाप करें, अपबित्र आदमी हैं, और मईया बापन कूं मारबे बारे हत्‍यारे हैं। और कुकर्मी हैं, आदमी-आदमी के संग सम्बन्ध बनाबे बारे हैं और बे आदमी बेचबे बारे, झूंठ बोलवे बारे, झूंठी सौगन्ध खायवे बारे और जाके अलाबा खरी सिछा के सब बिरोधिन कूं ठहराई गई है। जि खरी सिछा महान परमेस्‍वर की महिमा के बा सुभ समाचार के अनुसार है, जो मोकूं सौंपौ गयौ है। मैं, पिरभू ईसू मसीह कौ धन्यबाद करूं जानें मोय सामर्थ दई है, और मोय भरोसे योग्‍य समझकै अपनी सेबा के काजै चुनों है। पहलें तौ मैं परमेस्‍वर कौ अपमान करबे बारौ, और लोगन नें सताबे बारौ, अन्धेर करबे बारौ हतो। तोऊं मोपै परमेस्‍वर की दया भई है, चौंकि मैंनें तौ जि काम अबिसबास की दसा में बिना समझ बूझ के करे हते। और हमारे पिरभू कौ अनुग्रह और पिरेम बा भरोसे के संग जो ईसू मसीह में है, भौतायत ते भयौ। जि बात सही है और सब तरैह ते भरोसे योग्‍य है कै ईसू मसीह पापिन कौ उद्धार करवे काजै जा संसार में आयौ, बिनमें ते सबते बड़ौ पापी मैं हूं। पर मोपै जामारैं दया भई कै मैं जो सबनते बड़ौ पापी ऊं, मोपै ईसू मसीह ने पूरी सहन सीलता दिखाई है, और जो लोग ईसू मसीह में कबऊ नांय खतम हैबे बारे जीबन के काजै भरोसौ करिंगे बिनके काजै मैं नमूना बनूं। और अब सदा काल के राजा, अनदेखे, अमर और बा एकमात्र परमेस्‍वर कौ आदर और बड़ाई युग-युग तक होती रैहबै। ऐसौई होबे। हे मेरे बेटा तिमुथियुस जो बात तेरे बारे में परमेस्‍वर की ओर ते बताबे बारेन नें पैहले तेई कही हैं, वाके अनुसार मैं तोये जि आग्‍या सौंप रयौऊं और बिनईं बातन नें ध्‍यान में रखकै तू अच्‍छी लड़ाई लड़तौ रैह। भरोसौ और भलौ बिबेक रख, चौंकि कछू ऐसेऊ लोग है जिन्‍नें भलौ बिबेक नांय रखो जामारैं बे भरोसे ते भटक गये हैं। बिनमें तेई हुमिनयुस और सिकन्दरऊ हैं, जिनकूं मैंनें सैतान कूं सौंप दियो है जाते बू सिछा पा लैमें कै परमेस्‍वर की बुराई नांय करनी चहिऐं। अब मैं सबते पैहले जि कैहरौऊं कै बिनती, पिराथना, निवेदन, और धन्यबाद सब लोगन के काजै परमेस्‍वर कूं दिये जामें। राजा और सब अधिकारिन के काजैऊ पिराथना करे करौ, जाते हम चैन के संग सान्‍ती ते सबरी भक्‍ती और परमेस्‍वर के काजै आदर ते जीबन जी सकैं। जा तरैह ते पिराथना करबौ भलौ है और हमारे उद्धारकरता परमेस्‍वर कूं भाबै परमेस्‍वर चाहबै कै सब लोगन कूं उद्धार मिलै और सब सच्‍चाई कूं अच्छी तरैह ते जानें, चौंकि एकई परमेस्‍वर है, और परमेस्‍वर और मनुस्यन के बीच में एकई बिचौलिया है, और बू ईसू मसीह है जो खुद एक मनुस्‍य है। बानें अपने आप कूं सबन के उद्धार के काजै फिरौती के रूप में दे दियौ जाते कै सही समै पै जि गबाही दई जावै कै परमेस्‍वर सबन नें बचाबौ चाहबै। और मैं सच कैह रयौऊं, झूंठ नांय बोल रयो कै मैं जाई मारें पिरचारक, भेजौ भयौ चेला और गैर यहुदिन काजै भरोसे और सच्‍चाई को उपदेसक ठहरायो गयौ हूं। मैं जि चांहू कै हर एक आदमी गुस्सा और झगड़े कूं छोड़कै अपने पबित्र हात जोड़कर पिराथना करे करें। बैसेई माताऐं और बहनऊं सरम और संयम के संग सादगी भरे कपड़न ते अपने आपकूं संमारे, ना की बाल गूंथकें, सौने और मोतीन के गहने पहर कें और ना कीमती कपड़ा पहर कें संमारे, चौंकि परमेस्वर की भक्‍ति मैं रैवे बारी औरतन के काजै जेई ठीक है कै बे अपने आप कूं भले कामन ते संमारे। धरम की सिछा सीखबे के समै औरत अधीनता में रैहकै आग्‍याकारिता ते सिछा ग्रहन करें। और मैं जि कहरौऊं कै औरत ना तौ आदमिन कूं सिछा दैबै और ना बिनपै पै हुकम चलाबे पर चुपचाप रैहबै। चौंकि आदम पैहले बनांयौ बाद में हब्बा बनाई, और आदम बहकाबे में नांय आयौ पर औरत बहकाबे में आयकें पापी बनी। जाके बाबजूद औरत बच्‍चा पैदा करबे के द्वारा उद्धार पाबैगी, और बाय चहिऐ कै बू संयम के संग भरोसे में पिरेम और पबित्रता मैं स्थिर रैहबै। जि एक बात भौत अच्‍छी भरोसे योग्‍य है, अगर कोई कलिसिया कौ पिरधान होंनों चाहबै। पर जि जरूरी है कै बा कलिसिया के पिरधान पै कोई दोस नांय होनों चहिऐ वाकी एकई पत्नी होनी चहिऐ और संयमी, सुसील, सभ्य और अनजानेन कौ आदर सम्मान करवे बारौ और अच्‍छी सिछा दैबे बारौ हौनो चहिऐ। बू दारू बाज ना होय, मारपीट करबे बारौ ना होय, पर बू एक सज्‍जन और सान्‍ती ते रहबे बारौ आदमी होय और बाय धन को लालच बिलकुल नांय होंनों चहिऐं। और बू अपने घर की देख रेख अच्‍छी तरैह ते करतो होय और बाय अपने बालकन कूं ऐसी सिछा देनी चहिऐ जाते वाके बालक वाकौ आदर करें और वाकी बातन नें मानें। जब बू अपने घर की देख रेख अच्‍छी तरैह ते नांय करबौ जानै तौ बू परमेस्‍वर की कलिसिया की देख रेख कैसे करैगौ। बू नयौ चेला नां होंनों चहिए, कऊं ऐसौ नां होय कै बू घमन्‍ड करकें सैतान के जैसी सजा पाबै और बू कलिसिया मेंई नांय पर जो भरोसौ नांय करें बिनमेंऊ वाको अच्‍छौ नाम होय कऊं ऐसौ ना होय कि बू बदनाम हैके सैतान के जाल में फस जाय। जाई तरैह ते कलिसिया के सेबकन नेंऊ सम्मानित होनों चहिऐ, बे दोगले नां हो, दारूबाज नां हो और नीच कमाई कै लालची नां हों, पर बे साफ मन ते भरोसे की गहराई कूं पकड़बे बारे होने चहिऐं। बिन्नें पहलै तेई परख लैनों चहिऐ अगर बिनमें कोई दोस नां होय तौ बिन्नें कलिसिया के सेबक के रूप में काम करनों चहिऐ। बैसेई बिनकी पतनीन नेंऊ सम्मानित होंनों चहिऐ और बे चुगलखोर नां हों, बिनें सब बातन में हुसियार और भरोसे योग्‍य होंनों चहिऐ। कलिसिया के सेबक एकई पत्नी के पती हों और अपने घर और बाल बच्‍चेन की अच्छी देख रेख करबौ जानते हों। चौंकि जो सेबक अच्‍छौ काम करें बे सम्मान पांयगे और जो भरोसौ बिनें ईसू मसीह पै है बाये बू हिम्मत के संग बोल पांयगे। मैं तुमते जल्दी मिलवे की आसा रखता ऊं पर अबई काजै में जि चिठ्‌ठी लिख रयौ हूं, अगर मोय आवे में देर है जाबै तौ तुम जि जान लियौं कै परमेस्‍वर कौ घरानौ जो जीबित परमेस्‍वर की कलिसिया और सच्‍चाई की नींव और खम्भा है वाके संग तुमारौ व्‍यवहार कैसो होनों चहिऐं। और जामें कोई संदेह नांय के भक्‍ती को भेद कैसौ महान है, बू जो आदमी के रूप में पैदा भयौ, आतमा में धरमी ठहरो, सुरग दूतन कूं दिखाई दीयो, देस देस के लोगन में बाको पिरचार करौ गयौ, संसार में बापे भरोसौ करो गयौ, और जो महिमा में सुरग में उठायौ गयौ। परमेस्‍वर कौ आतमा साफ-साफ जि कैहबे कै, बे दुस्‍ट आतमांन की सिछान नैं मानिंगे और बहकाबे बारी आतमा के पिछै चलिंगे। और भरोसे ते पीछे हट जायेंगे। जि सिछा झूंठे पाखन्‍डी लोगन की बजैह ते फैलैगी, जिनकौ बिबेक मर गयौ है। ऐसे लोग ब्याह करबे ते रोकिंगे और बे खायवे की कछू चीजन ते दूर रैवे की आग्‍या दिंगे, पर भरोसौ करबे बारे और सत्‍य के पैहचानबे बारेन कूं चहिऐ कै बे बिन चीजन कूं परमेस्‍वर कौ धन्यबाद करकै खामें। चौंकि परमेस्‍वर कौ बनांयौ भयौ सब कछू अच्‍छौ है, और कछू फैंकबे लायक नांय, पर धन्यबाद दैकै सब कछू खायौ जा सकै। चौंकि परमेस्‍वर के वचन और तुमारी पिराथना ते बे सब चीज पबित्र हे जामें। अगर तू भईयन कूं इन बातन कौ ध्यान करातो रैहबेगौ तौ ईसू मसीह को अच्‍छौ सेबक बनो रैहबेगौ,ऐसौ करबे ते जि पतौ चलैगौ कै तेरौ पालन पोसन बा भरोसे और सिछा ते भयौ है जिननैं तू मानतौ आयौ है। पर असुद्ध और पुरानी कहानिन ते दूर रैह जिनमें परमेस्‍वर नांय, पर अपने आप कूं परमेस्‍वर की भक्‍ति में लगा। सरीर की मेहनत ते कम फायदा होगौ पर परमेस्‍वर की भक्‍ती तौ सब बातन के काजै फायदेमन्द है, चौंकि मैं तोते कैह रयौऊं कै जा जीबन कौ और आयवे बारे जीबन में आसीसन कौ बादा जाई में हैं। जि बात सही है और सब तरैह ते भरोसे योग्‍य हैं। हम सब जामारैं मेहनत और कोसिस कर रये है चौंकि हमारी आसा जीन्दे परमेस्‍वर पै है। जो सबरे लोगन कौ और खासतौर पै बिनकौ जो बापे भरोसौ करैं बिनकौ उद्धारकर्ता है। तू इन बातन की आग्‍या दै और सिखातौ रैह। तू जबान है जामारैं तोय काऊ के सामने नजर झुकानी ना परै, पर वचन, चाल-चलन, पिरेम, भरोसौ और सभ्यता में परमेस्‍वर पै भरोसौ करबे बारेन काजै नमूना बन जा। जब तक मैं ना आऊं तब तक तू सास्त्र कूं पढ़कैं सुनाबे में, पिरचार करबे में और सिछा दैवे में लगौ रैह। जो वरदान तोए परमेस्‍वर की ओर ते बात बताबे बारेन के द्वारा बुजुर्गन के हात रखवे कि बजैह ते मिले है बिन बरदानन के प्रति लापरबाह मत रैहबै। इन बातन्‍ने याद करतौ रैह जाते तेरो बढ़बो सब देखैं। खुद के जीबन पै और खुद की सिछा पै ध्‍यान दै, और बिनमें मजबूत रै, चौंकि अगर तू ऐसौ करतो रैहबेगौ तौ तू अपने और अपने सुनिवे बारेन के काजैऊ उद्धार कौ कारन होगो। बड़े-बूढ़ेन कूं फटकारते भये मत समझावै, पर बिनके संग पिता के जैसौ और जबानन के संग भईयान जैसौ व्‍यवहार कर। बड़ी-बूढ़ी औरतन कूं माता जानिकें और जबान औरतन कूं पूरी सुद्धता के संग बहन समझकें व्‍यवहार कर। बिन बिधबान कौ आदर कर, जिनकी देख-भाल करबे बारौ कोई नांय। पर बिन बिधबान के बालक या नाती पोते होमें तौ बे बालक और नाती पोतेन नें चहिऐ कै बू अपने घराने में भक्‍ती के संग बरताब करें, और बे अपने मां-बापन की सेबा करके अपने पालन पोसन को बदलो चुकामें चौंकि परमेस्‍वर जेई चाहबै। बे औरत जो हकीकत में बिधबाएं हैं जिनकौ कोई नांय, बे परमेस्‍वर पै आसा रखें और रात-दिन पिराथना में लगी रैहमें और परमेस्‍वर ते मदत मांगें। पर जो बिधबा भोग-बिलास में पड़ गई है बे जीते जी मर गई है। तू सब लोगन कूं जिन बातन नें बता जाते बिनपै कोई दोस ना लग पावें। अगर कोई अपने घराने की और अपने परिबार की देखभाल नां करै, बानें अपनों भरोसौ खो दियौ है और बू बिनतेऊ बुरौ है जो परमेस्‍वर पै भरोसौ नां करें। केबल बई बिधबा कौ नाम सहायता की सूची में लिखौ जाबे जाकी उमर साठ साल ते कम ना होय और बू एक ही आदमी की पत्नी रही हो और अच्‍छे कामन में बाको नाम रहो होय, जानै अपने बालकन को पालन पोसन अच्‍छी तरैह ते करौ होय, जानें अनजान लोगन की और परमेस्‍वर के पबित्र लोगन कि अपने घर में सेबा करी हो और दुखियान की सहायता करी होय और हर भले काम में मन लगायौ होय। पर जबान बिधबान कौ नाम सहायता सूची में नां लिखौ जाबे। चौंकि बे भोग-बिलास में पर जामें और मसीह को बिरोध करकें ब्याह करबौ चाहमें ऐसौ करकै बे अपने पहलै जैसौ भरोसौ छोड़कै पापी बन गई हैं। और बे घर-घर घूमके अपनों समै खराब करतें इतनोई नांय बे बेकार में बक-बक करैं और दूसरेन के कामन में दखल दैमें। जाके मारे मैं चाहूं कै जबान बिधबाएं ब्याह करें, मां बनें और अपने घर बार कूं संमारे जाते काऊ बिरोधीऐ बिनपै दोस लगाबे कौ मौकौ नां मिले, चौंकि कछू जबान बिधबा तौ बहककै सैतान के पीछे चलबे लग गई है। अगर काऊ बिसबासी औरत के परिबार में बिधबा होय तौ बाय चहिऐ कै बे बिनकी सहायता करें। जाते बे कलिसिया पै बौझ ना बनें और कलिसिया बिनई की सहायता करे जिन बिधबान की देख-भाल करबे बारौ कोई नांय। जो कोई अगुवा के रूप में कलिसिया की अच्‍छी देख-भाल करै बे दुगने आदर के योग्‍य समझे जांये। खासतौर पै बे जो पिरचार करैं और वचन सिखाबे में मेहनत करैं। चौंकि पबित्र सास्त्र में लिखौ भयौ है, “दाबबे बारे बैल के मौंह पै मुछीका मत लगाऔ” चौंकि “मजदूर अपनी मजदूरी को हकदार है।” अगर कोई कलिसिया के मुखिया पै दोस लगाबै तौ वाकी दो तीन गबाहन के बिना मत सुनों। पाप करवे बारेन कूं सबन के सामने फटकार जाते औरऊ लोग पाप करवे ते डरैं। परमेस्‍वर और ईसू मसीह और चुने भये सुरग दूतन कूं मौजूद जानिके मैं तोय जि चेताबनी दै रयौ हूं, कै तू अपने मनें खोल के इन बातनें माने कर और कोई काम भेद भाव के संग मत करै। आदमी के सर पै बिना सोचे समझे जल्दी बाजी में हात रखकै बाय परमेस्‍वर की सेबा में मत दे देना। दूसरेन के पापन में हिस्सेदार मत बनियों और अपने आप कूं सुद्ध बनांये रख। केवल पानी पीवे बारौ मत रैहबै, पर अपने पैट के बार-बार बीमार हैबे के मारे थोड़ो थोड़ो अंगूर कौ रस पीलै कर। कछू आदमिन कै पाप सामने दिखाई दैमें बिनके अनुसारई बिनकौ न्याय हैबै और कछुन के पाप पीछे ते दिखाई दैमें। ऐसेंई भले कामऊ सामईं दिखाई दैमें, पर जो भले काम दिखाई ना दैमें बेऊ छिप नां सकें। जो लोग दास है, बे अपने मालिक कूं बड़े सम्मान के योग्‍य समझें, जाते के परमेस्‍वर को नाम और हमारी सिछा कौ अपमान ना हैबै। जिन दासन के मालिक परमेस्‍वर पै भरोसौ रखैं, बे बिनके बिसबासी भईया हैबे के मारे मामुली नांय समझै, पर बिनकी औरऊ सेबा करें। चौंकि बिनके काम ते जिनें फायदा मिल रयो है बे भरोसौ करबे बारे और पिरेम करबे बारे है, तू इन बातन की सिछा देतौ रह और पिरचार करतौ रह। अगर कोई दूसरी तरैह की सिछा दैबे, और हमारे पिरभू ईसू मसीह की सिछाऐ नां मानें, तौ ऐसौ आदमी अभिमानी और घमन्डी है, पर बू कछू नांय जानै। वाकी बुद्धी भ्रस्‍ट है गई है और बाय हर बात पै बहस करबे की बीमारी है। वाके मौंह ते जलन अपमान, दोस की बात और बुरे बुरे बहम निकरैं। बिन लोगन में बेमतलब के रगड़े झगड़े पैदा होमें, जिनकी बुद्धी भ्रस्‍ट है गईऐ और बे सच्‍चाई ते भटक गये है। और बे सोचें कै परमेस्‍वर की सेबा कमाई कौ रस्ता है। परमेस्‍वर की भक्‍ती में खुस रहबौई सच्‍ची अमीरी है। चौंकि हम संसार में नां तौ कछू लैके आये है और नां कछू लैकें जायेंगे। अगर हमारे पास कछू खायबे और पहनबे कूं कपड़ा होय तौ बई में सन्‍तुस्‍ट रहनों चहिऐ। पर जो आदमी पईसा बारौ बनबौ चाहबे बू भौत सी बेकार और नुकसान दैवे बारी लालसान में फस जाते। ऐसी बातें लोगन नें बिगाड़ दैमें और बिनास के गढ्‍ढा में डुबा दैमें। चौंकि पईसन कौ लोभ सब तरह की बुराइयन की जड़ है। कछू लोग पईसन के चक्‍कर में फसकै भरोसे ते भटक गये और खुद कूं अलग अलग तरैह के दुखन ते छलनी कर लियौ है। तू परमेस्‍वर कौ सेबक हैबे के नाते इन सब बातन ते अलग रह और धारमिकता, भक्‍ती, भरोसौ, पिरेम, धीरज, और बिनम्रता में बनों रै। तू भरोसे की अच्छी कुस्ती लड़, और खुद के काजै कबऊ नांय खतम हैबे बारे जीबन कूं जीत लै, जाके काजै तू बुलायौ गयौ है, और जाई के काजै तू भौत गबाहन के सामने अपने भरोसे को सबूत दियो है। मैं, सबन्नें जीबन दैबे बारे परमेस्‍वर के सामईं और ईसू मसीह कूं जानें अपने भरोसे कूं पुन्तियुस पिलातुस के सामईं दिखायौ हतो, बिन्नें गबाह मानके तोय जि आग्‍या दै रौऊं। तू पिरभू ईसू मसीह के आयवे बारे दिन तक इन आग्‍यान नें मानकै निसकलंक और निरदोस बनों रह। बाय परमेस्‍वर सही समै पै दिखावेगौ, जौ परम धन्य और एकमात्र राज्‍य करबे बारौ राजान कौ राजा और पिरभून कौ पिरभू है। अमरता केबल बाई की है, बू अगम्य जोति में रैहबै जाके जौरें कोई नांय पौहच सकै, बाय कोई आदमी नें नांय देखौ और ना कबऊ देख सकैगौ, वाकी प्रतिस्ठा और राज युग-युग तक रैहबैगौ। ऐसौई हैबै। जो आदमी धनबान है बिन्नें सिखा कै बे मिटबे बारे धन पै घमन्‍ड ना करै। बिनकी आसा परमेस्‍वर में होनी चहिऐ जो हमें हमारे सुख के काजै सब कछू दैबै। भले काम करबे काजै बिन्नें आग्‍या दै जाते बे भले काम करबे बारे, दान दैवे बारे और मन ते दैवे बारे बनें। ऐसौ करबे ते आबे बारे समै काजै ऐसौ धन इकठ्‌ठौ करिगें जो आबे बारे समै में एक अच्छी पक्‍की नींव ठहरे। तब जायकै बू बा सच्‍चे जीबनें जीबे योग्‍य हुंगे। तिमुथियुस, जा धरोहर की रखबारी करतौ रह और संसार की बातन और बेफिजुल की बहस ते खुद कूं दूर रख जिन्नें कछू लोग गलती ते ग्‍यान की बात मानै। और कछू लोग जा झूंठे ग्‍यानें मानकै भरोसे की सच्‍चाई ते भटक गये है। तुम सब पै परमेस्‍वर की किरपा होती रैहबै। पौलुस की ओर ते जि चिठ्‌ठी। जो परमेस्‍वर की इच्‍छा ते ईसू मसीह कौ भेजौ भयौ चेला है, जाये परमेस्‍वर नें बा जीबन को पिरचार करबे कूं भेजौ है, जा जीबन के बारे में परमेस्‍वर ने ईसू मसीह में बादा करौ है। मेरे प्यारे बेटा तिमुथियुस मैं तोए जि चिठ्‌ठी लिख रयौऊं। परमेस्‍वर पिता और हमारे पिरभू ईसू मसीह की ओर ते तोय अनुग्रह और दया और सान्‍ती मिलती रैहबै। मैं परमेस्‍वर की सेबा अपने पुरखन की तरैह ते सुद्ध मन ते करूं, और परमेस्‍वर कौ धन्यबाद देते भये मैं अपनी पिराथनान में तोय दिन रात याद करतौ रहूं। मैं तेरे आँसून्‍नें याद कर करके तोते मिलवे की इच्‍छा रखूं, जाते मैं आनन्द ते भर जाऊं। मोय तेरे बा निसकपट भरोसे की याद आवें है, जो भरोसौ पैहले तेरी नानी लोइस और तेरी मा यूनिके मेंऊं हतो, और मोय निस्चय भयौ है कि बू अब तोमेंऊ हतै, जामारैं मैं तोय याद दिला रयौ हूं कै परमेस्‍वर कौ बू वरदान जो मेरे हात रखवे के द्वारा तोय मिलौ है बायें पकड़े रह। परमेस्‍वर नें हमें डर की नांय पर सामर्थ, पिरेम और संयम की आतमा दई है। जामारैं तू हमारे पिरभू और मेरी गबाही ते लज्‍जित मत हैबै। मैं जो ईसू मसीह के पीछे चलवे की बजैह ते जेल में हूं, पर परमेस्‍वर की सामर्थ के अनुसार सुभ समाचार के काजै मेरे संग दुख उठा। जानें हमारौ उद्धार करौ है, और परमेस्‍वर के पबित्र लोग हैबे काजै बुलायौ है, और जि हमारे कामन के अनुसार नांय पर वाकी मनसा और वाके अनुग्रह के अनुसार है जो ईसू मसीह में सुरुआती समै ते हम पै भयौ है। पर अब हमारे उद्धारकरता ईसू मसीह के पिरगट हैबे के द्वारा हम पै प्रकासित भयौ है। जानें मौत पै पूरी तरह तै बिजय पायी और जीबन और अमरता कूं बा सुभ समाचार के द्वारा प्रकास मान कर दियौ। परमेस्‍वर नें मोय सुभ समाचार पिरचारक, ईसू को भेजौ भयौ चेला और सिछा दैवे बारौ ठहरायौ है। जामारैं मैं य्हांपै इन दुखन नें सह रयौऊं, पर मैं जाते लज्‍जित नांऊ। चौंकि मोय पतौ है कै मैंनें कौन पै भरोसौ करौए और मोय निस्चय है कै बू मेरी धरोहर की आखरी दिना तक रखबारी करवे में सामर्थी है। जो खरी बात तैनें मोते सुनीए बा भरोसे और पिरेम के संग जो मसीह ईसू में हैं अपनों आदर्स बनांये रख पबित्र आतमा हम भरोसौ करबे बारेन में बसौ भयौए, वाके द्वारा जो सुभ समाचार कौ काम तोकूं सौंपौ गयौ है बा धरोहर की अच्छी रखबारी करतौ रह। तू जानैं कै आसिया के रैहबे बारे सबन्‍नें मोते मौंह मोड़ लियो है, जिनमें फूगिलुस और हिरमुगिनेस हैं। पिरभू उनेसिफुरुस के घर बारेन पै दया करें चौंकि बानें भौत बार मेरी हिम्मत बढ़ाईए और मेरे जेल में हैबे की बजैह ते बू लज्‍जित नांय भयौ। और जब बू रोम में आयौ तब बानें तौ मोय बड़े जतन ते ढ़ूढके, बानें मोते मुलाकात करी। आखरी दिना में पिरभू बापै दया करे और जो सेबा बानें इफिसुस में करी है, बिन्‍नेऊं तू अच्‍छी तरैह ते जानें। हे मेरे बेटा तिमुथियुस, तू बा किरपा ते, जौ ईसू मसीह में तोपै भई है ताकतबर है जा, और जो बात तैनें भौत से गबाहन की मौजूदगी में मोते सीखी हैं, बिन बातनें भरोसौ करबे बारे आदमिन कूं सौंप दै, जो दूसरे आदमिन कूं सिखाबे के लायक होंय। ईसू मसीह के अच्‍छे योद्धा की तरैह मेरे संग दुख उठा। एक योद्धा काम के समै अपने अधिकारिन कूं खुस करबों चाहतै जामारैं बू खुद कूं संसार के दूसरे कामन में नां फसाबै। अगर कोई पहलबान काऊ अखाड़े में नियम के अनुसार नां लड़ै, तौ बाय जीत कौ उपहार नां मिल सकैगौ। मेहनत करबे बारे किसान कूं सबनते पैहले फसल कौ भाग मिलनों चहिऐ। अब जौ मैं कहूं बिन बात पै ध्‍यान दै और पिरभू तोय सब बातन की समझ दैबैगौ। ध्‍यान रख ईसू मसीह जो दाऊद के बन्स में पैदा भयौ, और मरे भयेन में ते जीबित है उठौ, जेई मेरौ सुभ समाचार है। जा सुभ समाचार काजै मैं अपराधिन की तरैह दुख उठाऊं य्हां तक कै जेल में बन्द हूं, पर परमेस्‍वर कौ वचन बन्दी नांय। मैं चुने भये लोगन के काजै सब कछू सहन करूं। कै बेऊ बा उद्धार कूं जो मसीह ईसू में है, कबऊ नां खतम हैबे बारी महिमा के संग पायें। “जि वचन भरोसे योग्‍य है, “अगर हम वाके संग मर गये है, तौ हम वाके संग जींगेऊ। अगर हम धीरज के संग सहन करते रिंगे, तौ वाके संग राज्‍यऊ करिंगे। अगर हम वाकौ इन्कार करिंगे, तौ बोऊ हमारौ इन्कार करैगौ। अगर हम भरोसौ नां करैं, फिरऊ बू हमेसा भरौसे मन्द रैहबैगौ, चौंकि बू खुद कौ इन्कार नां कर सकै।” लोगन कूं इन बातन कौ ध्‍यान दिलातौ रैह और परमेस्‍वर कूं गबाह मानकै बिनते बिनती करतौ रैह, बे भौत से सब्दन के बारे में आपस में लड़ाई झगड़ौ नां करें। चौंकि जाते कोई फायदा नां हैबै बल्कि जो इन्हें सुनं बिनके काजै ये नांस कौ कारन है सके। अपने आप कूं परमेस्‍वर कौ मानबे बारौ बना, और ऐसे अच्‍छे काम करबे की खूब कोसिस कर, जाते तोय लज्‍जित न होनौ परै, और सत्‍य के वचन कूं सही तरैह ते सच सच सिखा। पर बेकार के काम और बकबासी बातन ते बचौ रैह, चौंकि ऐसी बात लोगन कूं परमेस्‍वर ते दूर लै जाऐं। चौंकि ऐसी बातें सड़े भये घाव की तरैह फैलती जाऐं, हुमिनयुस और फिलेतुस बिन लोगन में तेई है, जो जि कैहकै सच्‍चाई ते भटक गये हैं, कै हमारौ मरे भयेन मेते जीबित हेबौ है चुकोए। जि कैहके बिनें कछू बिसबासी लोगन के भरोसे कौ नास कर दियौ है। पर परमेस्‍वर की नीब पक्‍की बनी भई है और बापे जि मौहर लगी भईए कै, “पिरभू अपने लोगन कूं पैहचानें, जो कोई पिरभू कौ नाम लैबै बाय अधर्म ते बचौ रैहनों चहिऐ।” काऊ बड़े घर में सौने और चांदी केई नांय पर लकड़ीया और मट्‍टी केऊ बरतन रैहमें। कछू बरतन खास काम के काजै और कछू साधारन काम काजै रैहमें। अगर कोई आदमी अपने आप कूं बुराई ते दूर करैगौ तौ बू खास काम के बरतन के जैसौ सुद्ध ठहरैगौ, और अपने स्‍वामी के काम आबैगौ और हरेक भले काम करबे कूं तैयार रहबैगौ। तू जबानी की बासनान ते भाग, जौ कोई सुद्ध मनते पिरभू को नाम लेतै बिनके संग धरम, भरोसे, पिरेम और मेल-मिलाप के संग संगती करतौ रैह। पर मूर्खता और बेकार की बातन ते दूर रैह, चौंकि तू जानें कै इन बातन ते लड़ाई-झगड़े पैदा हैमें। पिरभू के सेबक कूं लड़ाई-झगडो करबे बारौ नांय होनौ चहिऐ, पर बू सबन के संग मिलनसार, सहनसील और अच्‍छी सिछा दैवे बारौ होंनो चहिऐं। बू बिरोधिन कूं नम्रता ते समझाबे बारौ होनों चहिऐं, ना जाने परमेस्‍वर बिनकूं मन फिराबे को मन दैवे जाते बेऊ सच्‍चाई कूं जानें, और बू सैतान कै फन्दा ते छूट जांये जानें अपनी इच्‍छा पूरी करबे काजै बिनें पकड़ रखौ है। जि ध्‍यान रख कै, आखरी दिनान में कठिन समैं आबैगौ। चौंकि आदमी स्‍वार्थी, लालची, डींग मारबे बारौ,घमन्‍डी, निन्दा करबे बारौ, मां-बाप की आग्‍या ना मानबे बारे, निरदयी, अपबित्र, पिरेम ना करबे बारे, छमा न करबे, मौंह ते बुराई करबे बारे, धीरज न धरबे बारे, कठोर और भले के बैरी, धोकेबाज, ढीट, घमन्‍ड में फूले भये और परमेस्‍वर कूं ना मानबे बारे और भोग-बिलास केई चाहबे बारे हुंगे। बे परमेस्‍वर की भक्‍ती को भेस तौ धरिंगे पर वाकी सक्‍तीऐ नां मानिंगे। ऐसे लोगन ते तू दूर रहियों। बिनमें ते कछू सिखाबे बारे लोगन के घरन में चुपचाप घुस आमें और बिन कमजोर मन बारी औरतन्‍नें बस में कर लैमें, जो पाप और बुरी इच्‍छान में फसी भई हैं। जे औरत हमेंसा बिन सिखाबे बारेन ते सीखबौ तौ चाहतै पर सच्‍चाई कूं नांय जान पामें। जे सिखाबे बारे यन्‍नेस और यम्ब्रेस की तरह हैं जिन्‍नें मूसा कौ बिरोध करौ हतो, बैसेई जेऊ लोग सच्‍चाई कौ बिरोध करैं, इनकी बुद्धि भ्रस्‍ट है, बे भरोसे में बनें ना रह सकिंगे। पर जि जादा आगे नांय बढ़ सकतै चौंकि जैसै यन्‍नेस और यम्ब्रेस की अग्‍यानता सब लोगन पै पिरगट है गईए बिनकी भी सामईं आजाबेगी। तैनें मेरी सिछा, चाल-चलन, मन्सा, भरोसे, सहन सीलता, धीरज, पिरेम, और मेरे सताए जायबे और दुख उठाए जायबे में मेरौ साथ दियो और एसेऊ दुखन मैंऊ जो मोपै अन्ताकिया, इकुनियुम और लुस्त्रा में पड़े हते और दूसरे दुखन ते पिरभू नें मोय छुड़ाय लियो। पर बे सब ईसू मसीह में भक्‍ती के संग जीबन बितायबौ चांहे बे सबरे सताये जाबेंगे। पर पापी और धोकेबाज धोकौ दैते भए धोकौ खाते भए बिगड़ते भये चले जांगे। पर तू बिन बातन पै जौ तेने सुनीए ओर सीखी हैं और उनपै भरोसौ करौ है, जि जानकै डटौ रैहके तैने किन लोगन ते सीखौऐ। और बचपन ते पबित्र सास्त्र तेरौ जानों भयौ है जो तोय ईसू मसीह पै भरोसौ करबे ते उद्धार काजै तोय सनझदार बनांय सके। पूरौ पबित्र सास्त्र परमेस्‍वर की आतमा की सामर्थ ते लिखौ गयौ है, जो सत्‍य की सिछा दैवे और गलती पै समझाबे और सुधारबे और धरम की सिछा के काजै फायदेमन्द है। ताकि परमेस्‍वर कौ जन सब भले काम करबे काजै निपुड़ और तईयार है जामें। मसीह ईसू जो अपने राज्‍य में पिरगट होगौ और जीन्देन कौ और मरे भयेन कौ न्याय करैगौ। बाय और परमेस्‍वर कूं गबाह मानकैं, मैं तौकूं जि आग्‍या दै रयौऊं। परमेस्‍वर के सुभ समाचार कौ पिरचार कर और समै और असमै सिछा दैवे काजै तैयार रैह। तू लोगन कूं बिनके पापन के काजै डांट, और ध्‍यान रख ऐसौ करते समै बे उदास ना होंय जाके मारै धीरज के संग बिनें सिखा। चौंकि ऐसो समै आबैगौ कै लोग सही सिछा कूं सहन नांय कर सकिंगे। पर बे अपने काजै ऐसे भौत से सिछक इकठ्‌ठे कर लिंगे जो ऐसी सिछा दिंगे। जो बे लोग सुनबो पसंद करतें। बे अपने कानन नें सच्‍चाई ते फेर के कथा कहानीन पै लगांगे पर तू इन सब बातन में साबधान रैह। दुख उठा और अच्छे सुभ समाचार कौ काम कर और जो सेबा तोए सौंपी गयी है, बा सेबा कूं पूरौ करतौ रैह। मैं पिरभू कूं अर्पित करौ जा चुकौ हूं और मेरे अंत कौ समै आ गयौए। मैं अच्‍छी लड़ाई लड़ चुकौऊ और अपनी दौड़ पूरी कर चुकौऊं, मैंनें अपने भरोसे की रखबाली करीए। आगे आयवे बारे समै में मेरे काजै बू धर्म कौ मुकुट रखौए, जाय पिरभू जो धर्मीए और न्याईए मोय न्याय के दिना पैहराबैगौ। और बू बाय मोईऐ नांय पर उन सबनकूं पैहराबैगौ जो पिरेम के संग वाके पिरगट हैबे कौ इन्‍तजार कर रये हैं। मेरे जौरें जल्दी आयबे की कोसिस कर। चौंकि देमांस ने जा संसार कूं प्यारौ जानके मोय छोड़ दियोए और थिस्सलुनीके नगर कूं चले गयौए। क्रेसकेंस गलातिया नगर कूं तथा तीतुस दलमतिया नगर कूं चले गयौ है। बस लूका मेरे संगे। मरकुस कूं मेरे जौरें लैकै चलौ आ चौंकि सेबा के काम में बू मेरे भौत काम कौ है। तुखिकुस कूं मैंनें इफिसुस भेजौ है। जब तू आबै तौ त्रोआस नगर में करपुस के घर ते मेरौ कुरता, किताब और खासकर चरमपत्र कूं तू ध्‍यान ते लेतो अइओ। धातु कौ काम करबे बारे सिकन्दर नें मोय भौत दुख दियौ है। बानें जैसो करौए, पिरभू बाय बैसौई फल दैबै। तू अऊ बाते खबरदार रैह चौंकि हम जो सिछा दैमें, बू वाकौ भौत बिरोध करतै। जब मोय कचैहरी में पैहली बार सफाई दैनी परी, तब काऊ नें मेरौ संग नां दियो सबन नें मोकूं छोड़ दियौ। मैं आसा करूं बिन्नें जाकौ लेखा नांय दैनों परै। पर पिरभू ने मेरी सहायता करी और मोकूं तागत दई, जाते कै मैं सब गैर यहुदिन में पूरी तरह ते सुभ समाचार को पिरचार कर सकौ और मैं सेर के मौंह ते बच निकरौ। पिरभू मोय दुस्‍टन के सब फंदान ते छुड़ाबैगौ। बू मोय सुरछित रखैगौ और बू मोय सुरग राज तक पौहचाबैगौ, बाकूं कबऊ न खतम हैबे बारे समै तक महिमा मिलती रैहबे। ऐसौई होबे! प्रिसकिल्‍ला, अक्‍बिला और उनेसिफुरुस के कुनबा कूं मेरौ नमस्‍कार कहियो। इरास्तुस कुरिन्थुस में रह गयौ। मैंनें त्रुफिमुस कूं मिलेतुस नगर में बीमार छोड़ौ है। जाड़ेन ते पैहले आयबे की पूरी-पूरी कोसिस करियो। यूबुलुस, पूदेंस, लीनुस,क्‍लौदिया और सब भरोसौ करबे बारे भईयन कौ तोय नमस्‍कार। पिरभू तेरी आतमा के संग रैहबे। तुम सबन पै परमेस्‍वर की किरपा होवें। जि चिठ्‌ठी पौलुस की ओर ते है, जो परमेस्‍वर कौ दास और ईसू मसीह कौ भेजौ भयौ चेला है, ताकि बू परमेस्‍वर के चुने भये लोगन कूं भरोसे बढ़ाबे और सच्‍ची भक्‍ती कौ ग्‍यान दैबे काजै तीतुस कूं भेज रौय, और कबऊ नांय खतम हैबे बारे जीबन की आसाऐ, जाकी प्रतिग्‍या सत्‍यबादी परमेस्‍वर नें अनादि काल ते करी हती। परमेस्‍वर नें ठीक समै पै अपने बा वचन कूं, बा पिरचार के द्वारा पिरकट करौ है, बू हमारे उद्धारकरता परमेस्‍वर की आग्‍या के अनुसार मोय सौंपो गयौ है। जा चिठ्‌ठीऐ मैं तीतुस काजै लिख रयौ हूं। जो भरोसे में सहभागी मेरौ सच्‍चौ बेटा है। तोय परमेस्‍वर पिता और हमारे उद्धारकरता ईसू मसीह की ओर ते अनुग्रह और सान्‍ती मिलती रैहबै। मैं जामारैं तोय क्रेते में छोड़ आयौ हतो कै तू बची भयी बातन नें सुधारै, और मेरी आग्‍या के अनुसार हर नगर में कलिसिया के अगुवे नियुक्‍त करै, और बिनमें कोई दोस ना होय, बू एकई पत्नी कौ पती हो, वाके बालक भरोसौ करबे बारे हों, और लुचपन कौ दोस बिनपै ना लगायौ जा सकै और बे आग्‍या मानबे बारे होंय। चौंकि कलिसिया के पिरधान कूं परमेस्‍वर कौ भन्‍डारी हैबे की बजैह ते बिना दोस बारौ होनों चहिऐ। बू घमन्‍डी, जल्दी गुस्सा करबे बारौ, पीवे बारौ, झगड़ौ करबे बारौ और नीच कमाई कौ लोभ करबे बारौ नांय होनों चहिऐ। पर बू लोगन कौ आदरभाव करबे बारौ, भलाई कौ चाहबे बारौ, संयमी, सच्‍चौ न्याय करबे बारौ, पबित्र और नियम के अनुसार चलबे बारौ होनों चहिऐ। और बाकूं बा भरोसे योग्‍य वचन में मजबूत बनों रहनों चहिऐं, जाकी सिछा बाकूं दई गयी है। जाते बू लोगन कूं खरी सिछा ते उपदेस दै सकै और जो जा सिछा कौ बिरोध करै बिनकौ मौंह बन्द कर सकै और बिन्नैं बिनकी गलती कौ एहसास दिबा सकै। चौंकि यहुदी पन्थ में भौत से लोग सच्‍ची सिछा ते बिरोध करबे बारे, बकबादी और धोखौ दैवे बारे हैं खासकर, बे जो कहमें कै बिना खतना कराये उद्धार नांय। ऐसे लोगन कौ मौंह बन्द कर देनों चहिऐ चौंकि बे नीच कमाई काजै गलत बातन नें सिखाकै भरोसौ करबे बारे भईयन के घर के घरन नें बिगाड़ दैमें। क्रेते नगर के परमेस्‍वर की ओर ते बात बनावे बारेन नें बिनके बारे में सही कही है कै, “क्रेते के रैहबे बारे हमेसा झूंठ बोलें, बे जानबर, पेटू और आलसी हैं।” जामारैं ऐसे लोगन कूं कड़ी चेतावनी दैतौ रैह जाते कै बे सच पै भरोसौ कर सकैं। और बिन्नें समझा कै सच्‍चाई ते भटके भए यहुदियन की झूंठी कथा कहानिन पै और आदमिन की आग्‍यान पै मन ना लगामें। पबित्र लोगन के काजै सब कछू पबित्र है, पर जो अपबित्र और भरोसौ नांय करें, बिन के काजै कछू पबित्र नांय। बिनके मन और आतमा दोनोंई अपबित्र हैं। और बे परमेस्‍वर कूं जानबे कौ दाबा तौ करैं पर बे अपने कामन के जरिये वाकौ इन्कार करैं। चौंकि बे घृनित और आग्‍या ना मानबे बारे हैं। और बे काऊ अच्‍छे काम के लायक नांय। तीतुस, तू ऐसी सिछा दै, जो सई है। बड़े-बुढ़े आदमिन कूं सिछा दै जाते बे गम्भीर, लोगन में सम्मान पावे बारे, संयमी, धीरज बान, पिरेमी और भरोसे में पक्‍के होंय। बड़ी-बूढ़ी औरतन कौ चाल-चलन पबित्र लोगन की तरैह ते होंय, बे पीवे बारी, और बे चुगलखोर नांय होंय। पर बे अपनी अच्‍छी-अच्‍छी बातन कूं सिखाबे बारी होंय। बे जबान औरतन कूं ऐसी सिछा दैमें जाते बे अपने पतीन ते और अपने बालकन ते पिरेम करें, बे संयमी, पबित्र, भली, घर कौ काम काज करबे बारी, और अपने पती के अधीन रैहबे बारी होंय, जाते लोग परमेस्‍वर के वचन की निन्दा ना कर सकें। जई तरैह ते जबान लड़कन कूं समझा जाते बे सब संयम ते जीबन जीमें। तू अपनी सब अच्छी बातन में बिनके काजै खुद एक नमूना बन जा। तेरी सिछा में सफाई और गम्भीरता होय। और बामें ऐसी खराई पाई जावें कै कोई बाय बुरौ ना कैह सकै। जाते तेरे बिरोधी लज्जित होंय, चौंकि बिनके जौरें हमारे बिरोध में बुरौ कैहबे काजै कछु नांय होगौ। सेबकन कूं सिखा कै बे सब बातन में अपने स्‍वामी के अधीन रैहमें, बिनें खुस रखें, और उलटौ जबाब नां दैमें। और स्‍वामी के य्हाँ चोरी ना करै, पर सब तरैह ते अच्‍छे और भरोसे मन्द रैहमें। ऐसौ करबे ते बे हमारे उद्धारकरता परमेस्‍वर की सिछा की सोभा बढ़ांगे। चौंकि परमेस्‍वर कौ अनुग्रह सब लोगन के उद्धार काजै पिरगट भयौ है। जि अनुग्रह हमें सिछा दैबै कै हम अभक्‍ति और संसार की बुरी अभिलासान ते मन फेरकैं जा समै में संयम, न्याय और परमेस्‍वर की भक्‍ती में जीबन बितामें, और बा धन्य दिना की बाट जोहते रहमें जब हमारी आसा पूरी होगी, और हमारे महान परमेस्‍वर और उद्धारकरता ईसू मसीह की महिमा पिरगट होगी। बानें हमारे काजै अपने आप कूं दै दियौ, जाते बू हमें हर तरैह के पापन ते छुड़ा लैबै और हमें एक ऐसी सुद्ध पिरजा बनाबै, जो वाकी खुद की होय और बे भले-भले काम करबे काजै लालायित होय। तू लोगन कूं इन बातन की सिछा पूरे अधिकार के संग दै और समझा बिन्नें हिम्मत दै और जरूरत होय तौ बिनें डाँट। कोई तोय तुच्‍छ नां जान पाबें। लोगन कूं याद करातो रैह कै बे राज्‍य करबे बारे और अधिकारिन के अधीन रैहमें और बिनकी अग्‍यान कूं मानें। और हर एक अच्‍छे काम काजै तईयार रैहमें, काऊ की निन्दा नां करें और झगड़ालू नां हों, पर सहनसील हों और लोगन के संग कोमलता कौ व्‍यवहार करें। चौंकि हमऊं पैहले, निरबुद्धी, अग्‍या ना मानबे बारे, भटके भये, हर तरैह की बासना और सुखविलास के दास हते। हम बैर भाव और जलन रखबे में अपनों जीबन जीते और एक दूसरे ते नफरत रखते। पर जब उद्धारकरता परमेस्‍वर की किरपा और लोगन पै वाकौ पिरेम पिरगट भयौ तब बानें हमारौ उद्धार करौ और जि बानें हमारे काऊ धरम के कामन की बजैह ते ऐसौ नांय करौ, पर हम पै अपनी दया ते ऐसौ करौ है। ऐसौ बानें पबित्र आतमा के जरिए हमे बचाकैं करौए पबित्र आतमा जाने हमें धोयकें नयौ जनम दियौए। बानें पबित्र आतमा हमारे उद्धारकरता ईसू मसीह के द्वारा हम पै भरपूरी उंडेलौ है। हम वाके अनुग्रह ते धरमी ठहरे हैं, जाते हम कबऊ नांय खतम हैबे बारे जीबन के बारिस हैबे की आस रख सकैं। जि बात सई है और मैं चाहूं, कै तू इन बातन के बारे में दिरनता ते बोले कर, जाते बे लोग जो परमेस्‍वर में भरोसौ करें, बे भले कामन में लगे रैहबें। जे बात अच्‍छीऐं और लोगन के काजै लाभ की हैं। मूर्खता के बिबाद, और बंसावलि, और लड़ाई झगड़े और व्‍यबस्था सम्बन्धी झगड़न ते दूर रै। चौंकि इनते कोई लाभ नांय और जि बेकार के है। फूट डारिबे बारे कूं चेतावनी दै, कै बू ऐसौ नां करै। बाय एक बार चेतावनी दै, और बू ना मानें तौ दूसरी बार चेतावनी दै, फिरऊ ना मानें तौ बाते अलग है जा। चौंकि तू जानें कै ऐसौ आदमी रस्ता ते भटक गयौ है और वाके पाप बाय खुद कूं दोसी ठहरातै। जब मैं तेरे जौरें अरतिमास या तुखिकुस कूं भेजूं तब बिनके पौहचतेई तू मोते मिलबे निकुपुलिस आबे कौ जतन करियो। चौंकि मैंनें मंई पै जाड़े काटबे की ठानी है। बकील जेनास और अपुल्‍लोस की यात्रा काजै अच्‍छौ प्रबन्ध करियो, जाते बिन्नें काऊ बात की कमी नांय होय। हमारे अपने लोगन नें पूरे मन ते भले काम करते रहनों सीखनों चहिऐं, जाते बे औरन की जरूरत पूरी कर सकें और निकम्मे नांय बैठे रैहमें। जो मेरे संग है बिन सबन कौ तोकूं नमस्‍कार और जो भरोसे की बजैह ते हमते पिरेम रखतै बिन काजैऊ हमारौ नमस्‍कार। परमेस्‍वर कौ अनुग्रह तुम सबन पै हैतौ रैहबै। मैं पौलुस, ईसू मसीह के सुभ समाचार सुनाबे की बजैह ते बन्दी हूं। मैं और भईया तिमुथियुस जि चिठ्‌ठी, हमारे प्यारे संगी फिलेमोन कूं, और बहिन अफफिया, संगी योद्धा अरखिप्पुस और तुमारे घर में इकठ्‌ठी हैबे बारी कलिसिया कूं लिख रौऊं। हमारे पिता परमेस्‍वर और पिरभू ईसू मसीह की ओर ते तुमें किरपा और सान्‍ती मिलती रैहबै। जब जब मैं पिराथना करूं, मैं तुमें याद करूं, तब हमेसा परमेस्‍वर कौ धन्यबाद दऊं। चौंकि पिरभू ईसू और परमेस्‍वर के पबित्र लोगन के प्रति जो तुमारो पिरेम और भरोसौ है वाके बारे में सुन्‍तौ रैहूं। मेरी जि पिराथना है कै तुमारौ भरोसौ हर एक भली बात के ग्‍यान में प्रभाबसाली होय, जाते लोग मसीह कूं आदर दैमें। मेरे भईयाओ! मोय तुमारे पिरेम ते आनन्द और सान्‍ती मिली है, चौंकि तुमारी दया की बजैह ते परमेस्‍वर के पबित्र लोगन के मन तरो ताजा है गये हैं। जामारें मोय मसीह में बड़ी हिम्मतै कै तुमें जो बात सहीए बिन्नें करबे की आग्‍या दऊं। मेरी तौ उमर है गई है, और ईसू मसीह के सुभ समाचार सुनांयवे की बजैह ते बन्दी हूं, फिरऊ पिरेम की बजैह ते तुमते बिनती कर रौऊ, मैं अपने बालक उनेसिमुस के काजै बिनती करूं, चौंकि बू मसीह में मेरौ बेटा है। जब मैं जेल में हतो तब मैं वाकौ आतमिक पिता बनों, पैहले उनेसिमुस तुमारे काऊ काम कौ नाओ पर अब बू तुमारे और मेरे काजै भौत काम कौय। मैं अपने कलेजा के टुकड़ा उनेसिमुस कूं तुमारे जौरें बापस भेज रयौऊं। चौंकि मैं सुभ समाचार की बजैह ते जेल में हूं, मैं जाय अपने जौरें रखबौ चाहतो, कै बू तेरे बदले मेरी सेबा कर सकै। पर फिलेमोन मैनें तेरी मरजी के बिना कछू नांए करबौ चाहौ। मैं तौ चाहूं कै तू मेरी मदद करै, बू काऊ दबाव ते नांय पर बू तेरी खुद की इच्छा ते हैवे। का पतौए उनेसिमुस थोड़े समै के काजै तोते जाई बजैह ते अलग भयौ के बू सदा के काजै तेरे जौरें रैहबै। पर बू एक सेबक की नांई नांय, पर एक भईया की तरैह मोय भौत प्यारौ है, बू मनुस्‍य के रूप में और पिरभू के पिछै चलबे बारे के रूप में, मोते जादा तोऊऐ भौत प्यारो होगौ। अगर तू मोय अपनों संगकौ समझै तौ जैसे तू मोय अपनावे बैसेई तू उनेसिमुस कूं अपनइयो। अगर बानें तेरौ कछू बुरौ करौ होय या तेरो बापे कछू उधार होय तौ बाऊऐ मेरे नाम पै लिख दियो। मैं पौलुस, तोय अपने हात ते लिख रयोहूं, के मैं तेरो सब कछू चुकाय दुंगो। पर मैं तोय जि याद कराय रयौऊं के तोपैऊ मेरौ कछू उधारै,पर तू तौ मेरौई ऐ। हे भईया मोय पिरभू में तेरी ओर ते भौत आनन्द मिलौ है, मसीह के कारन तू मेरे जी कूं हरौ भरौ कर दै। मैं तेरी आग्‍याकारिता पै भरोसौ करकें लिख रयौऊं और मैं जेऊ जानतूं के मैं जो कछू कहुंगो तू बाते ज्‍यादा करैगौं। एक बार और तू मेरे रैहबे काजै जगह तैयार कर चौंकि मोय आसाये के मैं तुमारी पिराथनन की बजैह ते तुमते मिलूंगौ। इपफ्रास जो ईसू मसीह के पीछे चलवे की बजैह ते मेरे संग जेल में है, और मेरे संगी मरकुस, अरिस्तर्खुस और देमांस और लूका की ओर ते तुमें नमस्‍कार। हमारे पिरभू ईसू मसीह की किरपा तुम लोगन पै हैती रैहबे। ऐसौई होबे। पैहले युग में परमेस्‍वर नें अपनी ओर ते बात बताबे बारेन के द्वारा भौत से मौकेन पै भौत तरैह ते हमारे बाप दादान ते बातचीत करीं। पर अब इन आखरी दिनान में बानें हमते अपने बेटा के द्वारा बातचीत करीं, जाये बानें सब चीजन कौ बारिस ठहरायौ है और वाके द्वारा बानें सबरे संसार की रचना करी है। बू बेटा परमेस्‍वर की महिमा कौ तेज और वाके सुभाब कौ प्रतिरूप है। बू बेटा अपने सामर्थी सब्दन के द्वारा सबरी सृस्‍टी कूं बनांये रखतै। बानें हमारे पापन कूं दूर करौ है और अब बू ऊपर सुरग में सर्वसक्‍तीमान परमेस्‍वर के दाहिने हात जा बैठौ है। जा तरैह ते वाकी जगैह सुरग दूतन ते ऊंची है, चौंकि जो नाम बाय उत्‍तराधिकार में मिलौ है, बू बिनके नाम तेऊ जादा उत्‍तम है। चौंकि परमेस्‍वर नें काऊ सुरग दूत ते कबऊ ऐसैं नां कही, “तू मेरौ बेटा है, आज मैं तेरौ पिता बनों हूं।” और नां काऊ सुरग दूत ते बानें जि कही है कै, “मैं वाकौ पिता बनुंगो, और बू मेरौ बेटा होगौ।” और फिर परमेस्‍वर जब अपने पैहलौठे कूं संसार में लाबै, तौ कहबै, “परमेस्‍वर के सब सुरग दूत वाकी अराधना करें।” सुरग दूतन के बारे में बताते भये बू जि कहबै, “बानें अपने सब सुरग दूतन कूं हबा बनांयौ, और अपने सेबकन कूं आग की लपट बनांयौ।” पर अपने बेटा के बारे में बू कहबै, “हे परमेस्‍वर! तेरौ सिंहासन युगानुयुग तक बनों रहबैगौ, और तेरौ राज्य कौ राजदन्‍ड न्याय कौ अधिकार दन्‍ड है। तैने धरम ते पिरेम करकें अधर्म ते बैर करौ है, जामारैं हे परमेस्‍वर, तेरे परमेस्‍वर नें, तुमकूं साथिन के ऊपर उठायकै आनन्द के तेल ते तुमारौ अभिसेक करौ है।” परमेस्‍वर जि कहबै, “हे पिरभू, जब सृस्‍टी की रचना है रयी, तब तैने धरती की नींव डारी। और आकास तेरे हातन कौ काम हैं। जे नस्‍ट है जांगे पर तू हमेसा रैहबेगौ, जे सब कपड़न की तरैह ते पुराने है जांगे। और तू चादर की तरैह बिनकूं लपेटेगौ। बे फिर कपड़न के जैसे बदल जाबेंगे। पर तू जैसौ है बैसौई बनों रैहबेगौ, तेरे काल कौ अंत युग-युगन हैबैगौ।” परमेस्‍वर ने कोई सुरग दूत ते कबऊ ऐसौ नां कही, “तू मेरे दाहिने बैठ जा, जब तक मैं तेरे दुसमन नें तेरे पामन के नीचे की चौकी नां बना दऊं।” का सबरे सुरग दूत उद्धार पाबे बारेन की सेबा काजै भेजी गयी सहायक आतमाएं हैं? जामारैं हमें जो सन्देस मिलौ है, बापै अच्‍छी तरैह ध्‍यान देनों चहिऐ। कऊं ऐसौ ना होय कै हम रस्ता ते भटक जामें। अगर सुरग दूतन के द्वारा दिये भये सन्देस कौ इतनों महत्व होतो कै वाके हर एक अपराध और आग्‍या ना मानबे कौ उचित दन्‍ड मिलौ। अगर हम बा महान मुक्‍ती कूं ना मानें तौ हम कैसे बच सकिंगे? जाकी घोसना पैहले पहल पिरभू द्वारा भयी हती, जिन लोगन नें पिरभू कूं सुनों, बिन्‍नें बिनके सन्देस कूं हमारे काजै पक्‍कौ करौ है। परमेस्‍वर नें चिन्ह, चमत्‍कार, और तरैह-तरैह के महान कामन और अपनी इच्‍छा के अनुसार पबित्र आतमा के वरदानन द्वारा जा उद्धार कौ सबूत दियौ है। परमेस्‍वर नें बा आबे बारे संसार कूं, जाकी चरचा हम कर रये हैं, सुरग दूतन के अधीन नां करौ। पबित्र सास्त्र में जाके बारे में काऊ नें जि गबाही दई है, “मनुस्‍य का है, जो तू वाकी सुधि लेतै? ‘मनुस्‍य कौ बेटा’ का है, जाके काजै तू चिन्‍तित है? तैने बाय सुरग दूतन ते कछूई छोटौ बनांयौ, और बाय महिमा और आदर कौ मुकुट पहनांयौ। तैनें सब कछू वाके पामन के नीचे कर दियौ।” जामारैं जब परमेस्‍वर नें सब कछू वाके अधीन कर दियौ, तौ बामें कछू ऐसौ नांय छोड़ौ, जो वाके अधीन ना होय। हकीकत में हम अब तक जि नांय देखैं कै सब कछू वाके अधीन है। पर हम जि देखैं कै मौत की यातना सैहबे की बजैह ते ईसू कूं महिमा और आदर कौ मुकुट पहरायौ गयौ है। बू सुरग दूतन ते कछूई छोटौ बनांयौ गयौ हतो, जाते बू परमेस्‍वर की किरपा ते हर एक मनुस्‍य के काजै मर जाबै। परमेस्‍वर, जाकी बजैह और जाके द्वारा सब कछू हैबै, भौत से बेटान कूं महिमा तक ले जाबों चाहबै। जामारैं जि ठीक है कै बू बिन सबन की मुक्‍ती के बिधाता कूं अर्थात् ईसू कूं दुख भोगबे के द्वारा पूरौ सिद्ध करै। जो पबित्र करै और जो पबित्र करे जामें, बिन सबन कौ पिता एकई है, जामारैं ईसू कूं बिन नें अपनों भईया मानबे में लज्‍जा नां आबै। बे कहमें, “मैं अपने भईयान के सामईं तेरे नाम कौ बखान करूंगो, मैं सभान में तेरौ गुनगान करूंगो।” और बू कैहबै, “मैं बापै पूरौ भरोसौ रखूँगो।” और बू फिर ते कहमें, “मैं य्हां हूं और बे सन्‍तान जो मेरे संग हैं। जिनकूं परमेस्‍वर ने मोय दियौ है।” चौंकि परिबार के सबरे सदस्यन कौ खून और मांस एकई हैबै, जामारैं बोऊ हमारी तरैही मनुस्‍य बन गयौ, जाते बू अपनी मौत के द्वारा मौत पै अधिकार रखबे बारे सैतान कूं हरा दैय, और गुलामी में जीबन बिताबे बारे लोगन कूं मौत के भय ते मुक्‍त कर दैबे। चौंकि बू सुरग दूतन की नांय, पर अब्राहम के वंसजन की सुधि लैबै। जामारैं जि जरूरी हते कै, बू सब बातन में अपने भईयन के जैसौ बन जाबें, जाते बू परमेस्‍वर के सम्बन्धी बातन में लोगन के दयालू और भरोसे योग्‍य महा पुरोहित के रूप में बिनके पापन की मांफी काजै बलिदान है सकै। चौंकि जब वाकी परीक्छा लयी गयी और बानें खुद दुःख भोगो है, जामारैं बू परीक्छा में दुःख भोगबे बारेन की सहायता कर सकै। हे पबित्र भईया बहनों, तुम जो एक सुरगीय बुलावे के सहभागी हैं, जामारैं परमेस्‍वर के भेजे भये और महा पुरोहित ईसू पै अपनों ध्‍यान लगाये रखौ, जापै हम भरोसौ करैं। जा तरैह ते परमेस्‍वर के सबरे घराने में मूसा भरोसेमंद हतो, बाई तरैह ते ईसू अऊ, जानें बाय चुनों है बा परमेस्‍वर के प्रति भरोसेमंद हतो। जैसे घर की अपेछा घर कौ बनाबे बारौ जादा आदर के योग्‍य समझौ जाबै, जाई तरैह ते मूसा की अपेछा ईसू जादा आदर के योग्‍य समझौ गयौ है। चौंकि हर एक घर कौ कोई ना कोई बनाबे बारौ रहबै, पर परमेस्‍वर तौ हर चीज कौ सिरजनहार है। परमेस्‍वर के सबरे घराने में मूसा एक सेबक के समान भरोसेमंद हतो, बू बिन बातन कौ गबाह हतो जो आबे बारे समै में परमेस्‍वर के द्वारा कही जानी हतीं। पर परमेस्‍वर के घराने में मसीह तौ एक बेटा के रूप में भरोसौ करबे योग्‍य है और अगर हम अपने साहस और बा आसा में भरोसे कूं बनांये रखैं तौ हम बइके घराने के हैं। जामारैं पबित्र आतमा कैहबैं, “अगर आज वाकी अबाज सुनों, तौ अपने बाप दादान की तरैह ते अपने मन कूं कठोर मत करौ, जैसे बिन्‍नें बगावत के दिनन में करे हते। जब बिनकी बेहड़ में परीक्छा है रयी हती। मोय तुमारे बाप दादान नें परखौ हतो, बिन्‍नें मेरे धीरज की परीक्छा लयी और मेरे काम देखे, जिन नें मैं चालीस साल तक करतौ रहौ! बू जेई बजैह हती जाते मैं बिन लोगन ते खुस नांय हतो, और फिर मैंनें कही हती, ‘इनके मन सदा भटकते रैहमें, बे मेरे रस्ता जानबौ नां चाहते।’ तब मैंनें क्रोध में आयकैं सौगन्ध खाकैं कही हती, ‘बे कबऊ मेरे आराम में पिरबेस नां करिंगे।’” हे भईया बहनों, सावधान रहौ, कऊं तुम लोगन में काऊ के मन में इतनी बुराई और अबिसबास न समा जाबे जो तुमें जीबित परमेस्‍वर तेई दूर भटका देय। जब तक बू “आज” बनों रैहबै, तुम लोग रोजीना एक दूसरे कौ धीरज बंधाते रहौ जाते कै तुम में ते कोई पाप के फन्दा में परकै कठोर नां बन जाबै। अगर हम अंत तक मजबूती के संग अपने सुरू के भरोसे में बने रैहमें तौ हम मसीह के भागीदार बन जामें। जैसौ कै पबित्र सास्त्र में लिखौ भयौ है, “अगर तुम आज वाकी जि अबाज सुनों, तौ अपने मन कूं कठोर मत करौ, जैसे पैहले तुमारे बाप दादान नें बगावत के दिनन में करे हते।” जिन लोगन नें अबाज सुनकें बिद्रोह करौ हतो, बे कौन हते? का बे, बेई नांय हते, जिनकूं मूसा नें मिस्र देस ते बचाकै निकारौ हतो? परमेस्‍वर चालीस साल तक किन लोगन पै क्रोधित रहौ? का बिनई ते नांय जिन्‍नें पाप करौ हतो और जिनकी लास बेहड़ में पड़ी रयीं हतीं? परमेस्‍वर नें किन लोगन के बारे में सौगन्ध खाकै कही हती कै, “बे मेरे आराम में पिरबेस नां कर पांगे?” का बे बेई नांऐ, जिन्‍नें वाकी आग्‍या कूं नांय मानों हतो? जा तरैह ते हम देखतै कै बे अपने अबिसबास की बजैह तेई पिरवेस नां कर पांगे। परमेस्‍वर के आराम में पिरबेस करबे की बू प्रतिग्‍या अब तक बनी भयी है, जामारैं हमें सावधान रैहनों चहिऐं कै, तुम लोगन में कोई बामें पिरबेस करबे ते ना रैह जाबे। हमकूं बिनई लोगन की तरैह सुभ समाचार सुनांयौ गयौ है। पर बिन लोगन नें जो सन्देस सुनों, बिनें बाते कोई लाभ नांय भयौ, चौंकि बिन्‍नें जब बाय सुनों तब जाय भरोसे के संग नांय अपनांयौ। देखौ अब, हम भरोसौ करबे बारे बन गये हैं, जामारैं हम बा आराम में पिरवेस करैं,जाके बारे में परमेस्‍वर नें कही है कै, “मैंनें क्रोध में आयकै जि सौगन्ध खाकै कही, ‘बे कबऊ मेरे आराम में पिरबेस नांय करेंगे।’” परमेस्‍वर नें जि तब कही, जब बू अपनों काम संसार की सृस्‍टी के समैई पूरौ कर चुकौ हतो। चौंकि पबित्र सास्त्र में सातवें दिन के बारे में जि लिखौ भयौ है कै, “परमेस्‍वर नें अपनों सबरौ काम खतम करकै सातवें दिन आराम करौ।” सास्त्र में हम जेऊ पढ़तै कै, “बे कबऊ मेरे आराम में पिरवेस नांय करिंगे।” जि तौ पक्‍कौ है कै, कछू लोगन कूं आराम में पिरबेस करनों है, पर जिन लोगन कूं पैहले सुभ समाचार सुनांयौ गयौ हतो, बे आग्‍या ना मानबे की बजैह ते पिरबेस नांय कर पाये। जामारैं परमेस्‍वर नें फिर एक बिसेस दिन ठहरायौ है और कछू सालन के बाद दाऊद की किताब में बाय “आज” कौ दिन कैहतै कै, “अगर तुम आज वाकी जि अबाज सुनौ, तौ अपनों मन कठोर मत करौ।” जामारैं अगर यहोसू बिनें आराम की जगैह में लै गयौ होतौ, तौ परमेस्‍वर बाद में काऊ और दिन की चर्चा नांय करतो। जामारैं अबऊ परमेस्‍वर के पबित्र लोगन के काजै एक आराम दिन बनों भयौ है। जैसें परमेस्‍वर काजै सातमों दिना कौ आराम दिना हतो। चौंकि जो कोई परमेस्‍वर के आराम में पिरबेस करै, बू अपनों काम समाप्‍त करै बाई तरैह ते आराम करै, जा तरैह ते परमेस्‍वर नें अपनों काम समाप्‍त करकें आराम करौ हतो। जामारैं आओ हम बा आराम में पिरबेस करबे की पूरी-पूरी कोसिस करें, जाते कोई बिन लोगन की तरैह आग्‍या ना मानते भये बाते वंचित ना हैबै। चौंकि परमेस्‍वर कौ वचन जीबित, काम करबे बारौ और काऊ दुधारी तलबार तेऊ पैनों है। बू हमारी आतमा, जीव, गांठ-गांठ, गूदे-गूदे कूं आर-पार छेदै और हमारे मन के भाव कूं और बिचारन कूं पिरकट कर दैबै। परमेस्‍वर की नजर ते जा सबरी सृस्‍टी में कछू ओझल नांय। वाकी आँखन के सामने सब चीज खुली भयी और बेपरदा है। जाकौ हमें बाकूं अपनों लेखा देनों पड़ेगौ। हमारौ अपनों एक महान महा पुरोहित हैं, अर्थात् परमेस्‍वर कौ बेटा ईसू, जो सुरग में गयौ है। जामारैं जो हमनें अपनांयौ है बामें भरोसे के संग मजबूत बने रैहमें। चौंकि हमारौ ऐसौ महान महा पुरोहित नांय जो हमारी कमजोरिन में हमारे संग दुखी नां है सकै, बल्कि बू सब बातन में हमारी तरैह परखौ गयौ तौऊं बिना पाप के निकरौ। जामारैं आओ, हम भरोसे के संग परमेस्‍वर की किरपा के सिंहासन के जौरें जामें, जाते हमें दया मिलै और हमें बू किरपा मिलै, जो हमारी जरूरतन में हमारी सहायता करैगी। हर एक महा पुरोहित लोगन में तेई चुनों जाबै। परमेस्‍वर सम्बन्धी बातन में लोगन काजै बाकूं ठहरायौ जाबै ताकि बू पापन के काजै भेंट और बली चढ़ाबै। चौंकि बू खुदई कमजोरिन के अधीन है, जामारैं बू ना समझै और भटके भयेन के संग कोमल व्‍यवहार करै। जामारैं बाय अपने पापन के काजै और बैसेई लोगन के पापन के काजै बलियाँ चढ़ानी पड़ै। जा आदर के पद कूं कोई खुद ते नांय लैबै। जब तक कै हारून की तरैह परमेस्‍वर की ओर ते ना ठहरायौ जाबै। जा तरैह ते मसीह नेऊं महान महा पुरोहित बनबे की महिमा कूं खुद नांय अपनांयौ, बल्कि परमेस्‍वर नें बाते कही, “तू मेरौ बेटा है, आज मैं तेरौ पिता बनोंऊं।” और एक दूसरी जगैह पैऊ बू कैहबै, “तू मलकिसदेक की तरैह, सदा के काजै एक पुरोहित है।” ईसू ने जा धरती के जीबन काल में जो बाय मौत ते बचा सकतौ हतो, ऊँचे स्‍वर में पुकारते भये और रोते भये बाते पिराथना और बिनती करीं और आदरपूर्न भक्‍ती की बजैह ते वाकी सुनी गयी। बू वाकौ पुत्र हतो फिरऊ यातना झेलते भये बानें आग्‍या का पालन करनों सीखौ। और एक बार सम्पूर्न बन जाबै पै बिन सबन काजै जो वाकी आग्‍या का पालन करैं, बू अनन्‍त छुटकारे का स्रोत बन गयौ। परमेस्‍वर के द्वारा मलकिसदेक की रीति पै बाय महा पुरोहित कौ पद मिलौ। जाके बारे में हमारे जौरें कहबे काजै भौत कछू है, पर इन बातन कौ समझाबौ कठिन है चौंकि बिन्नें समझबे कौ तुमारौ मन नांय। हकीकत में जा समै तक तौ तुम्हें सिछा दैबे बारौ बन जानों चहिऐं। पर तुम्हें तौ अबऊ काऊ ऐसे व्‍यक्‍ति की ही जरूरत है जो तुम्हें नए सिरे ते परमेस्‍वर की सिछा की प्रारम्भिक बातई सिखाबै। तुम्हें तौ अबऊ दूधई चहिऐं, ठोस आहार नांय। जो अबऊ दुध पीबे बारौ बच्‍चाई है, बाय धारमिकता के वचन की पहचान नांय हैबै। पर रोटी तौ बिन बड़ेन के काजैई हैबै जिन्‍नें अपने अनुभव ते भले-बुरे में पहचान करबौ सीख लियौ है। जामारैं आओ, मसीह की सिछा की सुरूआत की बातन नें छोड़कै, हम पूर्नता की ओर बढ़ें। हमें बिन बातन की ओर नांय बढ़नों चहिऐं जिनते हमनें सुरूआत करी हती, जैसे मौत की ओर लै जाबे बारे कामन के काजै मन फिराब, परमेस्‍वर में भरोसौ, बपतिस्मा की सिछा, सर पै हात रखबौ, मरबे के बाद फिर ते जी उठिबौ और आखरी न्याय जाते हमारौ कबऊ नांय खतम हैबे बारौ जीबन पक्‍कौ होगौ। अगर परमेस्‍वर नें चाही, तौ हम ऐसौई करिंगे। जिन्‍ने एक बार उजालौ मिल चुकौ है, जो सुरगीय वरदान कौ स्‍बाद चख चुके हैं, और पबित्र आतमा के सहभागी है गए हैं, जो परमेस्‍वर के वचन की उत्‍तमता और आबे बारे युग की सक्‍तिन कौ अनुभव कर चुके हैं, अगर जे भरोसे ते भटक जामें तौ बिन्नें मन फिराब की ओर लौटा लाबौ असम्भव है। चौंकि बिन्नें जैसे अपने ढंग ते नए सिरे ते परमेस्‍वर के बेटा कूं फिर क्रूस पर चढ़ायौ और बाय सबके सामने अपमान कौ बिसय बनांयौ। बे लोग ऐसी धरती के समान हैं जो बार बार हैबे बारी मेह के पानी कूं सोख लैमें, और जोतबे बोबे बारे के काजै उपयोगी फसल प्रदान करें है, बे परमेस्‍वर की आसीस पामें। पर अगर बू धरती काँटे और झाड़ी उपजाबै, तौ बू बेकार की है। और बाय सापित हैबे कौ भय है। अन्‍त में बाय जरा दियौ जाबैगौ। हे पियारे मित्रों, चाहे हम जा तरैह कहैमें पर तुमारे बारे में हम जिनतेऊ अच्‍छी और उद्धार करबे बारी बातन कौ भरोसौ करें। चौंकि तुमने परमेस्‍वर के पबित्र लोगन की लगातार सहायता करते भये जो पिरेम दिखायौ है, बाय और तुमारे दूसरे कामन कूं परमेस्‍वर कबऊ नांय भुलैगौ। बू अन्यायी नांय। हमारी इच्‍छा है कै, तुम में ते हर कोई अन्‍त तक ऐसौई कठिन परिस्रम करतौ रैहबै। अगर तुम ऐसौ करौ तौ तुम पक्‍कौई बाय पा जाओगे जाकी तुम आसा कर रये हैं। हम जि नांय चाहमें कै तुम आलसी है जाओ। पर तुम बिनकौ अनुकरन करौ जो भरोसे और धीरज के संग बिन चीजन कूं पा रये हैं जिनकौ परमेस्‍वर ने बादा करौ है। जब परमेस्‍वर ने अब्राहम ते प्रतिग्‍या करी हती, तब खुद बाते बड़ौ कोई और नांय हतो, जाके नाम की सौगन्ध खायी जा सकै, जामारैं अपनी सौगन्ध खायकै, बू कहबे लगौ, “निस्चयई मैं तोय आसीरबाद दूँगो और मैं तोय अनेक वंसज दूँगो।” और जा तरैह धीरज के संग बाट जोहने के बाद बानें बू प्राप्‍त करौ, जाकी बानें प्रतिग्‍या करी हती। लोग वाकी सौगन्ध खामें, जो कोई बिनते महान हैबै और बू सौगन्ध सब बाद-बिबाद कौ अन्‍त करके जो कछू कहौ जाबै, बाय पक्‍कौ कर दैबै। परमेस्‍वर जाय बिन लोगन के काजै, पूरी तरह साफ कर देनों चाहबै, जिननें बाय पानों हतो, जाय दैबे की बानें प्रतिग्‍या करी हती कै बू अपनी इच्‍छा कूं कबऊ नांय बदलैगौ। जामारैं अपने प्रतिग्‍या के संग बानें अपनी सौगन्ध कूं जोड़ दियौ। य्हां कबऊ नांय बदलबे बारी दो बातें हैं जो कबऊ नांय बदल सकें वाकी प्रतिग्‍या और वाकी सौगन्ध जिनके बारे में परमेस्‍वर कबऊ झूंठ नांय कह सकै। जामारैं हम जो परमेस्‍वर के जौरें आसरौ पाबे काजै आए हैं और जो आसा बानें हमें दयी है, बाय थामे भये भौत उत्साहित हैं। बू आसा हमारे पिरान के काजै स्थिर और मजबूत लंगर के रूप में हैं, जो परदा के पीछे अति पबित्र स्थान तक पौंहचाबै, ज्हां ईसू मलकिसदेक की रीति पै सदा-सर्वदा के काजै महा पुरोहित बनकें हमारे काजै पिरबेस करौ है। मलकिसदेक सालेम कौ राजा हतो, और परम पिरधान परमेस्‍वर कौ पुरोहित हतो। जब अब्राहम राजान कूं हराकै लौट रयौ हतो तब बू अब्राहम ते मिलौ और बाय आसीरबाद दियौ। अब्राहम ने बाय युद्ध में जीती भयी सब चीजन कौ दसमांस दियौ। मलकिसदेक नाम कौ अर्थ है, “धारमिकता कौ राजा” और बू सालेम कौ राजाऊ है जाकौ अर्थ है, “सान्‍ती कौ राजा।” वाके माँ-बाप और बाप दादान कौ कोई इतिहास नां मिलै। वाके जनम और मौत के बारे मेंऊ कऊं लिखौ भयौ नांय। परमेस्‍वर के बेटा के समानई बू सदा-सदा के काजै पुरोहित बनों रैहबै। अब जा बातै सोचौ कै, मलकिसदेक कितनों महान हतो। जाय कुलपति अब्राहम तक नें युद्ध में जीती भयी अच्‍छी ते अच्‍छी चीजन कौ दसमांस दियौ हतो। अब देखौ, लेबी वंस में ते जो पुरोहित बनैं, बिनकूं जि आग्‍या मिली है कै लोगन ते और अपनेई भईयन ते चाहे बेऊ अब्राहम ते पैदा चौं नांय भये हों मूसा की व्‍यबस्था के अनुसार दसमांस लै। पर मलकिसदेक ने, जो लेबी वंस कौ नां हतो, तौऊं अब्राहम ते दसमांस लियौ और बानें अब्राहम कूं आसीरबाद दियौ जाके जौरें परमेस्‍वर की प्रतिग्‍या हतीं। जामें कोई सन्देह नांय कै जो आसीरबाद दैबै बू आसीरबाद लैबे बारे ते बड़ौ हैबै। य्हां तौ दसमांस पाबे बारे लेबी-बंसज मरनहार लोग हैं, जब कै मलकिसदेक के बारे में पबित्र सास्त्र कहबै कै, “बू अबऊ जीबित हैं।” तौ फिर हम जेऊ कैह सकैं कै, जो लेबी दसमांस लैमें, बिनें अपने पुरबज अब्राहम के द्वारा मलकिसदेक कूं दसमांस दियौ। चौंकि जब मलकिसदेक अब्राहम ते मिलौ हतो, बा समै तक तौ लेबी वंस हतई नांओ पर जामें ते लेबी वंस निकरौ है बू अब्राहम है। अगर लेबीय परिबार के पुरोहितन के द्वारा पूर्नता मिल सकती और बिनई के द्वारा लोगन कूं व्‍यबस्था मिली हती, तौ काऊ दूसरे पुरोहित के आबे की जरूरतई का हती? एक ऐसे पुरोहित की जो मलकिसदेक की रीति कौ हो, ना कै हारून के परिबार की रीति कौ। चौंकि जब पुरोहित कौ पद बदल जाबै, तौ व्‍यबस्था मेंऊं बदलाब होनों जरूरी है। जा पुरोहित के बारे में जे बातें कही गयी हैं, बू काऊ दूसरे गोत कौ है, और बा गोत कौ कोई आदमी कबऊ बेदी कौ सेबक नांय बनों। चौंकि जि तौ साफई है कै, हमारौ पिरभू यहूदा के वंस कौ हतो और मूसा नें बा वंस के काजै पुरोहितन के बारे में कछू नांय कही हती। जो कछू हमनें कही है, बू औरऊ साफ है कै मलकिसदेक के जैसौ एक दूसरौ पुरोहित पिरकट होतै। बू सांसारिक आग्‍या की व्‍यबस्था के आधार पै नांय, पर एक अमर जीबन की सामर्थ के आधार पै पुरोहित बनों है। चौंकि वाके बारे में पबित्र सास्त्र में जि लिखौ भयौ है कै, “तू मलकिसदेक के जैसौ सदा पुरोहित बनों रैहबेगौ।” पुरानी आग्‍या कमजोर और बेकार हैबे की बजैह ते एक तरफ है गयी। चौंकि व्‍यबस्था के नियम नें काऊऐ पूर्न सिद्ध नां करौ। हमें एक उत्‍तम आसा दयी गयी है जाके द्वारा हम परमेस्‍वर के जौरें पौंहचतै। जि बातऊ खास है कै, परमेस्‍वर नें ईसू कूं सौगन्ध के द्वारा महान महा पुरोहित बनांयौ है। जबकि औरन कूं बिना सौगन्ध केई पुरोहित बनांयौ गयौ हतो। चौंकि मसीह के चुने जाबे के समै परमेस्‍वर नें सौगन्ध खायी हती। जैसें कै पबित्र सास्त्र कहबे, “पिरभू नें सौगन्ध खायी है, और बू अपनों मन कबऊ नांय बदलैगौ ‘तू सदा के काजै पुरोहित है।’” जा सौगन्ध की बजैह ते ईसू एक और उत्‍तम बाचा कौ जमानती बन गयौ है। अब देखौ, ऐसे भौत से पुरोहित बनते आये हते जिन्नें मौत नें अपने पदन पै रहन नांय दियौ। पर ईसू अमर है, जामारैं वाकौ पुरोहित पद सदा बनों रहबे बारौ है। जेई कारन है कै, जो लोग वाके द्वारा परमेस्‍वर तक पौंहचें, बू बिनकौ हमेसा के काजै उद्धार करबे में सामर्थी है, चौंकि बू बिनके काजै बिचौलिया बनकै सदैव जीबित है। जामारैं ऐसौई महान महा पुरोहित हमारी जरूरतन कूं पूरौ कर सकै, जो पबित्र हो, बिना दोस के हो, बिना कपट बारौ होय, पापिन ते दूर रहतौ हो और बू सुरग में उठायौ गयौ हो। जाके काजै दूसरे महा पुरोहितन के समान जि जरूरी नांओ कै बू दिन प्रतिदिन पैहले अपने पापन के काजै और फिर लोगन के पापन के काजै बलि चढ़ाबें। बू तौ सदा-सदा के काजै बिनके पापन के काजै खुद बलिदान है गयौ। पर परमेस्‍वर नें सौगन्ध के संग एक बाचा दयी। जि बाचा व्‍यबस्था के नियमन के बाद आयी और जा बाचा नें महान महा पुरोहित के रूप में बेटा कूं ठहरायौ है जो सदा के काजै सिद्ध बन गयौ। जो कछू हम कैह रये हैं, वाकी मुख्‍य बात जि है कै, पक्‍कौई हमारे जौरें एक ऐसौ महान महा पुरोहित है जो सुरग में परम पिरधान परमेस्‍वर के सिंहासन के दाहिने हात जा बैठौ है। बू अति पबित्र जगैह मतलब सच्‍चे तम्बू कौ सेबक है, जो लोगन के द्वारा नांय, पर पिरभू द्वारा ठहरायौ है। हर एक महा पुरोहित जामारैं ठहरायौ है कै, बू भेंट और बलि दोनोंन कूं चढ़ाबै। जा महान महा पुरोहित के काजैऊ जि जरूरी हतो कै वाके जौरेंऊ चढ़ावे काजै कछू होय। अगर बू धरती पै होतौ तौ बू पुरोहित नांय होतौ। चौंकि य्हां पैहले तेई व्‍यबस्था के नियम के अनुसार भेंट चढ़ाबे काजै पुरोहित हैं। जबकि बे एक ऐसी अति पबित्र जगैह में सेबा कौ काम करै जो सुरग की चीजन की बास्तबिक नकल और छाया मात्र है। जामारैं जब मूसा पबित्र तम्बू कूं बनाबे जा रयौ हतो, तबई बाय परमेस्‍वर की ओर ते जि चेतावनी मिली हती कै, “ध्‍यान रैहबै कै, जो नमूना तोय परबत पर दिखायौ गयौ हतो, तू हर चीज ठीक बाई के अनुसार बनाबै।” पर जो सेबा कौ काम ईसू कूं मिलौ है, बू बिन पुरोहितन की सेबा के काम ते उत्‍तम है। चौंकि बू जा बाचा कौ बिचौलिया है बू पुरानी बाचा ते उत्‍तम है और उत्‍तम चीजन की प्रतिग्‍यान पै आधारित है। चौंकि अगर पैहली बाचा में खोट ना होतौ तौ वाकी जगैह पै दूसरी बाचा की का जरूरत होती? पर परमेस्‍वर कूं बिन लोगन में खोट मिलौ। बानें कही, “पिरभू जि बताबै कै, बे दिना आ रये हैं, जब मैं इसरायल के घराने ते और यहूदा के घराने ते एक नयी बाचा बांधुंगो। जि बाचा बैसी नांय होगी जैसी मैंनें बिनके बाप दादान के संग बा समै बांधी हती, जब मैंनें बिनकौ हात मिस्र देस ते निकार लाबे काजै पकड़ौ हतो। चौंकि पिरभू कहबै, बे मेरी बाचा के बिसबासी नांय रहे, मैंनें बिनते मौंह फेर लियौ है। पिरभू कहबै, बू बाचा जाय मैं इसरायल के घराने ते करूंगो, और फिर वाके बाद पिरभू घोसित करै। बिनके मन में अपनी व्‍यबस्था रख दुंगौ, बिनके हिरदयन पै, मैं बाकूं लिख दुंगौ। मैं बिनकौ परमेस्‍वर बनुंगौ, और बे मेरे लोग हुंगे। फिर तौ कबऊ कोई अपने पड़ोसी कूं ऐसे ना सिखाबेगौ और कोई लोग अपने भईया ते ना कबऊ कैहबेगौ, तुम पिरभू कूं पैहचानों, चौंकि तब बे सब छोटे ते लैकै बड़े ते बड़े तक मोय जानिंगे। चौंकि मैं बिनके अधर्म कूं छमा करूंगो, और बिनके पापन कूं कबऊ याद नांय रखुंगो।” जा बाचा कूं नयी कैहके, परमेस्‍वर नें पैहली बाचा कूं अयोग्‍य ठहरायौ, और जो चीज पुरानी पड़ जातै और अयोग्‍य है जातै, बू तौ जल्दी अई मिट जातै। अब देखौ, पैहली बाचा मेंऊ अराधना के नियम हते, और मनुस्‍य के हातन की बनी अराधना की पबित्र जगह हती, म्हांपै एक तम्बू बनांयौ गयौ, जाके पैहले कक्छ में दीपाधार हते, मेज हती और भेंट की रोटी रखीं हतीं। बू अति पबित्र जगैह कही जात। बाई में परदा के पीछे एक और कक्छ हतो, जाय अति पबित्र जगैह कहमें हते। जामें सौने की बनी भयी धूप जराबे की बेदी और सौने ते मढ़ौ भयौ बाचा कौ सन्दूक हतो। जा सन्दूक में सौने कौ बनों एक बरतन हतो, जामें मन्‍ना हतो और हारून की बू छड़ी हती जापै कोंपलें फूटी हतीं और बाचा की पत्‍थर की पट्टीयां हतीं। सन्दूक के ऊपर परमेस्‍वर की महिमामय मौजूदगी के प्रतीक मतलब करूब बने हते जो पापन की मांफी की जगैह पै छाया कर रये हते। पर जा समै हम इन बातन की बिस्तार के संग चरचा नांय कर सकें। सब कछू जा तरैह तईयार हैजाबे के बाद पुरोहित पैहले कक्छ में रोजाना पिरबेस करके अपनी सेबा कौ काम करबे लगे। पर दूसरे कक्छ में केवल महा पुरोहित साल में एकई बार पिरबेस करतौ हतो। बू बिना बा लहू के कबऊ पिरबेस नांय करतो, जाय बू खुद अपने द्वारा और लोगन के द्वारा अनजाने में करे गए पापन के काजै भेंट चढ़ातौ हतो। जाके द्वारा पबित्र आतमा जेई दिखाबौ चाहतै कै जब तक अबई तम्बू कौ पैहलौ कक्छ खड़ौ है, तब तक अति पबित्र जगैह कौ रस्ता उजागर नांय भयौ। जि आज के युग के काजै एक प्रतीक है जो जि दिखातै कै, बे भेंटे और बलि जिनें चढ़ायौ जा रयौ है, अराधना करबे बारे की समझ कूं सुद्ध नां कर सकतीं। जे तौ बस बाहरी नियम हैं जो खाबे-पीबे और अनेक तरैह के सुद्धीकरन की बिधी ते सम्बन्ध रखतै। जे परमेस्‍वर की नयी व्‍यबस्था के समै काजैई लागू रहेंगे। पर अब मसीह हमारे काजै अच्‍छी व्‍यबस्था कौ महान महा पुरोहित के रूप में आयौ है, बानें बा उत्‍तम और सम्पूर्न तम्बू में ते हैकें पिरवेस करौ जो मनुस्‍य के हातन कौ बनों भयौ नांय हतो। मतलब जो सांसारिक नां हैं। जानबरन के लहू कूं लैके बानें पिरबेस नां करौ पर सदा-सर्वदा के काजै भेंट स्‍वरूप अपनेई लहू कूं लैके अति पबित्र जगैह में दाखिल भयौ। जा तरैह बानें हमारे काजै पापन ते सदा कौ छुटकारौ सुनिस्चित कर दियौ। मूसा की व्‍यबस्था के अनुसार पुरोहित जानबरन कौ लहू और बिनकी राख असुद्ध लोगन पै छिरकैं, जाते कि बे बाहरी तौर पै पबित्र है जाबैं। जब जि सच है, तौ मसीह कौ लहू कितनों प्रभाबसाली होगौ। बानें अनन्‍त आतमा के द्वारा खुद कूं एक सम्पूर्न बलि के रूप में परमेस्‍वर कूं समर्पित कर दियौ। जामारैं वाकौ लहू हमारी समझ कूं बिन कामन ते छुटकारौ दिबाबैगौ जो मौत की ओर ले जाबै जाते हम जीबित परमेस्‍वर की सेबा कर सकें। जाई बजैह ते मसीह एक नयी बाचा कौ बिचौलिया बना जाते जिनें बुलायौ गयौ है, बे बिरासत कौ अनन्‍त आसीरबाद पा सकें जाकी परमेस्‍वर नें प्रतिग्‍या करी हती। अब देखौ, पैहली बाचा के अधीन में करे गए पापन ते बिनें छुड़ाबे काजै फिरौती के रूप में बू अपने पिरान दे चुकौ है। वसीयत के बारे में वसीयत करबे बारे की मौत कौ प्रमानपत्र दैनों पड़ै, चौंकि मौत के बादई बसीयतनामा कारगर हैबै। चौंकि कोई वसीयत केवल तबई कारगर हैबै जब वाके लिखबे बारे की मौत है जाबै। जब तक वाकौ लिखबे बारौ जीबित रहबै, बू कबऊ कारगर नांय हैबै। जामारैं लहू के बिना पैहली बाचाऊ नांय बांधी गयी। चौंकि जब मूसा नें सारी पिरजा के सामने व्‍यबस्था की सब आग्‍यान कूं पढ़ कें सुनांयौ हतो, तब बानें जल के संग जानबरन कौ खून लियौ और लाल ऊन और जूफा की डारियों ते व्‍यबस्था की किताब और सबरी पिरजा पै छिड़कते भये, बानें कही, “जि बा बाचा कौ लहू है, परमेस्‍वर नें जाके पालन की आग्‍या तुमें दयी है।” बानें जा तरैह ते तम्बू और अराधना में काम आबे बारी हर चीजन पै लहू छिड़कौ। हकीकत में व्‍यबस्था के अनुसार हर चीज कूं लहू ते सुद्ध करौ जाबै। और बिना लहू बहाये छमा है ही नांय। तौ फिर जि जरूरी है कै बे चीजें जो सुरग की प्रतिरूप हैं, बिन कूं जानबरन के बलिदान ते सुद्ध करौ जाबै, पर सुरग की चीजन नें तौ इन तेऊ उत्‍तम बलिदान ते सुद्ध करबे की जरूरत है। मसीह नें आदमी के हातन की बनी अति पबित्र जगैह में, जो सच्‍चे पबित्र स्थान की प्रतिरूप है बामें पिरबेस नांय करौ। बानें तौ खुद सुरग मेंई पिरबेस करौ है जाते अब बू हमारी ओर ते परमेस्‍वर की उपस्थिति में पिरकट होय। महा पुरोहित बलि कौ लहू लेकैं हर साल अति पबित्र जगैह में पिरबेस करै। ईसू के काजै खुद कूं बार-बार चढ़ाबे की जरूरत नांय। अगर ऐसौ होतौ तौ संसार की सुरूआत ते ईसू कूं बार बार दुख भोगनों पड़तो। पर अब देखौ, युग के अन्‍त बू अपने बलिदान के द्वारा सबके पापन कौ अंत करबे काजै बू सदा-सदा के काजै एकई बार पिरकट है गयौ। जैसें एक बार मरबो और वाके बाद न्याय कौ सामनों करबों आदमी काजै पक्‍कौ है। बाई तरैह मसीह भौतन के पापन कूं हटाबे काजै एकई बार बलिदान भयौ है। बू दूसरी बार, पापन के काजै नांय, बल्कि जो वाकी बाट जोह रये हैं, बिनके काजै उद्धार लाबे कूं पिरकट होगौ। व्‍यबस्था कौ बिधान तौ आवे बारी उत्‍तम बातन की छाया मात्र प्रदान करतै। अपने आप में बे बात यथार्थ नांय हैं। जामारैं बिनईं बलिदानन के द्वारा जिन्हें निरन्‍तर प्रतिबर्स अनन्‍त रूप ते दियौ जातौ रैहबै, उपासना के काजै निकट आबे बारेन कूं सदा-सदा के काजै सम्पूर्न सिद्ध नांय करौ जा सकै। अगर ऐसौ है पातौ तौ का बिनकौ चढ़ायौ जाबौ बंद नांय है जातौ? चौंकि फिर तौ उपासना करबे बारे एकई बार में सदा-सर्वदा के काजै पबित्र है जाते। और अपने पापन के काजै फिर कबऊ खुद कूं अपराधी नांय समझते। पर अब तौ बिन बलिदानन द्वारा हर साल पापन की याद दिलाई जाबे। चौंकि जानबरन कौ लहू पापन कूं दूर कर देय, जि सम्भव नांय है। जामारैं जब ईसू जा जगत में आयौ हतो तौ बानें कही हती, “तूने बलिदान और कोई भेंट नांय चाही, पर मेरे काजै एक देह तैयार करी है। तू कोई होमबलि ते,और पापबलि ते खुस नांय भयौ, तब फिर मैंनें कही हती, ‘और किताब में मेरे काजै जेऊ लिखौ है, मैं य्हां हूं। हे परमेस्‍वर, मैं तेरी इच्‍छा पूरी करबे कूं आयौ हूं।’” बानें पैहले कही हती, “बलिदान और भेंटे, होम बलि और पाप बलि न तौ तू चाहबै और नां तू बिनते खुस हैबै।” भलेंई व्‍यबस्था कौ नियम जि चाहबै कै बे चढ़ाई जाबें। तब बानें कही, “मैं य्हां हूं। मैं तेरी इच्‍छा पूरी करबे आयौऊं।” ऐसौ करकें बू मसीह के बलिदान कूं लागू करबे काजै, पैहले बारे बलिदान नें मिटा दैबै। जामारैं परमेस्‍वर की इच्‍छा ते एकई बार सदा-सर्वदा के काजै ईसू मसीह की देह के बलिदान द्वारा हम पबित्र कर दिए गए। हर पुरोहित एक दिन के बाद दूसरे दिन खड़ौ हैकें अपने धारमिक कर्तव्यन नें पूरौ करतै। बू बार बार एक जैसी ही बलि चढ़ाबै जो पापन कूं कबऊ दूर नांय कर सकै। पर पुरोहित के रूप में मसीह तौ पापन के काजै, सदा के काजै एक ही बलि चढ़ाकर परमेस्‍वर के दाहिने हात जा बैठा, और उसी समै ते बाय अपने बिरोधीन कूं वाके पामन की चौकी बना दिए जाने की प्रतीछा है। चौंकि बानें एक ही बलिदान के द्वारा, जो पबित्र किए जा रहे हैं, बिनें सदा-सर्वदा के काजै सम्पूर्न सिद्ध कर दियौ। जाके काजै पबित्र आतमाऊ हमें गबाही दैबै। पैहले बू बताबै, “जि बू बाचा है जाय मैं बिनते करूंगो, और फिर वाके बाद पिरभू घोसित करतै। अपनी व्‍यबस्था बिनके हिरदयन में बसाऊँगो, मैं बिनके मनन पै बिन नें लिख दूँगो।” और बू जिऊ कहबै। “बिनके पापन और बिनके कुकरमन नें और अब मैं कबऊ याद नांय रखुंगो।” और फिर जब पाप छमा कर दिए गए तौ पापन के काजै कोई बलि की कोई जरूरत नांय जात। जामारैं भईयाओ, चौंकि ईसू के लहू के द्वारा हमें बा अति पबित्र जगैह में पिरवेस करबे का निडर भरोसा है, जिसे बानें परदे मतलब वाकी देह के द्वारा हमारे काजै एक नयौ और जीबित रस्ता खोल दियौ गयौ है। और चौंकि हमारे जौरें एक ऐसा महान महा पुरोहित है जो परमेस्‍वर के घराने कौ अधिकारी है। तौ फिर आओ, हम सच्‍चे हृदय, पूरे भरोसे के संग, और बिबेक कौ दोस दूर करबे काजै हृदय पै मसीह के लहू कौ छिड़काब लेकर, और सुद्ध जल ते धोए भये अपने सरीरन के संग, परमेस्‍वर के जौरें पौंहचतैं। जिस आसा कूं हमनें अंगीकार करौ है, हम मजबूती ते बापै डटे रहें। चौंकि जानें हमें वचन दियौ है, बू भरोसे योग्‍य है। हम ध्‍यान रखें कै हम पिरेम और अच्‍छे कर्मन के प्रति एक दूसरे कूं कैसे बढ़ाबा दे सकतै। हमारी सभान में आनों मत छोड़ौ। जैसी कि कछुन कूं तौ म्हाँ नांय आने की आदतई पर गयी है। बल्कि हमें तौ एक दूसरे कूं उत्साहित करनों चहिऐं, और जैसौ कै तुम देख ही रये हैं कै परमेस्‍वर कौ दिन निकट आ रयौ है। जामारैं तुम्हें तौ जि और जादा करनों चहिऐ। सत्‍य कौ ग्‍यान पा लैबे के बादऊ अगर हम जानबूझ कै पाप करतेई रहतैं, तौ पापन के काजै फिर कोई बलिदान बचौई नांय रैहबै। बल्कि फिर तौ न्याय की भयानक प्रतीछा और भीसन आगई बची रह जातै, जो परमेस्‍वर के बिरोधीन कूं चट कर जाबैगी। जो कोई मूसा की व्‍यबस्था के नियमन कौ पालन करबे ते मना करतै, बाय बिना दया दिखाए दो या तीन गबाहन की गबाही पै मार डारौ जातो। अब बिचार करौ कै, बू आदमी कितने जादा कड़े दन्‍ड के योग्‍य ठहरैगौ, जानें परमेस्‍वर के पुत्र कौ तिरस्‍कार करौ है, और बाचा के बा लहू कौ जाके द्वारा बू पबित्र करौ गयौ हतो, एक अपबित्र चीज मानों और अनुग्रह की आतमा कौ अपमान करौ। चौंकि हम बाय जानतै, जानें कही हती, “बदलौ लैनों मेरौ काम है, मैंई बदलौ दुंगो।” और फिर, “पिरभू अपने लोगन कौ न्याय करैगौ।” काऊ पापी कौ जीबित परमेस्‍वर के हातन में पड़ जानों एक भयानक बात है। सुरुआत के बिन दिनन कूं याद करौ जब तुमनें ज्‍योति पाई हती, और तुरन्‍त वाके बाद जब तुम कस्‍टन कौ सामना करते भये कठोर संघर्स में मजबूती के संग डटे रये हते। तुम लोगन में कछुन कूं सबन के सामईं अपमानित करौ गयौ और सतायौ गयौ और जिनके संग ऐसौ बरताब करौ जा रयौ हतो, तुमने बिनकौ संग दियौ। चौंकि जो मसीह कौ नाम लैबे की बजैह ते बंदीघर में पड़े हते, तुम बिनके कस्‍टन में सहभागी बने और जब तुम लोगन की धन-सम्पत्‍ति जब्त करी गयी तौ तुमनें जि आनन्द के संग स्‍वीकार करौ, चौंकि तुम जि जानते हते कै, तुम्हारे जौरें बिनते अच्‍छी और हमेसा ठहरबे बारी सम्पत्‍ति है। जामारैं हिम्मत कूं मत त्‍यागौ, चौंकि जाकौ भरपूर प्रतिफल दियौ जाबैगौ। तुम लोगन कूं धीरज की जरूरत है, ताकि तुम जब परमेस्‍वर की इच्‍छा पूरी कर चुकौ तौ जाकौ वचन बानें दियौ है, बाय तुम पा सकौ। चौंकि पबित्र सास्त्र में लिखौ भयौ है, “जो आबे बारौ है, बू जल्दी ही आबेगौ। मेरौ धरमी जन भरोसे ते जीबित रैहबेगौ, और अगर बू भरोसे ते पीछे हट जाबैगौ तौ मैं बाते खुस नांय रहूँगो।” पर हम बिन लोगन में ते नांय हैं, जो भरोसे ते पीछे हट जातै और नांस है जातैं, बल्कि हम बिनमें ते हैं जो भरोसौ करतै और उद्धार पातैं। भरोसे कौ मतलब है, जाकी हम आसा करतै वाके काजै पक्‍कौ होनों, और हम काऊ चीज कूं देख नांय रये हों, पर वाके अस्तित्व के बारे में पक्‍कौ होनों, कै बू है। जाई कारन ते हमारे पुरखान कूं परमेस्‍वर कौ आदर प्राप्‍त भयौ हतो। भरोसे के आधार पैई हम जि जानतै कै, परमेस्‍वर के वचन के द्वारा संसार की रचना भयी हती। जामारैं जि नांय कै जो कछू देखबे में आतै, बू देखी भयी तेई बनों है। भरोसे तेई हाबिल ने कैन ते उत्‍तम बलिदान परमेस्‍वर के काजै चढ़ायौ और बाई के द्वारा वाके धरमी हैबे की गबाहीऊ दयी गई। चौंकि परमेस्‍वर ने वाकी भेंटन कूं स्‍वीकार करौ और भरोसे की बजैह तेई अबऊ तक हमते बातें करतै, भलेई बू मर चुकौ है। भरोसे के कारन ही हनोक कूं जा जीबन ते ऊपर उठा लियौ गयौ, ताकि बाय मौत कौ अनुभव ना होय। चौंकि परमेस्‍वर नें बाय ऊपर उठा लियौ हतो, जामारैं बू फिर दिखाई नां परौ। पबित्र सास्त्र वाके बारे में कैहतै कै, वाके ऊपर उठाए जाबे ते पैहले परमेस्‍वर कूं खुस करबे बारे के रूप में बाय सम्मान मिल चुकौ हतो। भरोसे के बिना परमेस्‍वर कूं खुस करनों असम्भव है। चौंकि हर एक जो परमेस्‍वर के जौरें आतै, वाके काजै जि जरूरी है कै, बू जा बात कौ भरोसौ करै कै परमेस्‍वर कौ अस्तित्व हतै और बे जो बाय सच्‍चाई के संग खोजते, बू बिनकूं वाकौ प्रतिफल दैबै। भरोसे के कारन ही नूह कूं जब बिन बातन की चेतावनी दी गयीं, जो बानें देखी तक नांय हतीं, तौ बानें भक्‍ती के संग अपने परिबार कूं बचाबे के काजै एक जहाज कौ निरमान करौ हतो। अपने भरोसे ते ही बानें जा संसार कूं दोसी ठहरायौ और बा धारमिकता कौ उत्‍तराधिकारी बनों जो भरोसे ते आबै। भरोसे के कारन ही, जब अब्राहम कूं ऐसी जगैह पै जाबे के काजै बुलायौ गयौ हतो, जाय बू बाद में बिरासत के रूप में लैबे बारौ हतो, भलेई बू जि जानत तक नांओ कै, बू कहाँ जा रयौ है, फिरऊ बानें आग्‍या मानी और बू चलौ गयौ। भरोसे के कारन ही जा धरती कूं दैबे कौ बाय वचन दियौ गयौ हतो, बापै बानें एक अनजाने परदेसी के समान, इसहाक और याकूब के संग तम्बुअन में निबास करौ, जो परमेस्‍वर की बाई प्रतिग्‍या के बारिस हते। चौंकि बू पक्‍की नींव बारी बा नगरी की बाट जोह रयौ हतो, जाकौ रचबे बारौ और बनाबे बारौ परमेस्‍वर है। भरोसे के कारन ही, अब्राहम जो बूढ़ौ है चुकौ हतो और सारा जो खुद बांझ हती, जानें वचन दियौ, बापै भरोसौ करके सामर्थ पाई और गर्भवती भई और अब्राहम कूं बाप बना दियौ। और जा तरैह ते, जा एकई आदमी ते जो मरियल सौ हतो, आकास के तारेन की तरैह असंख्‍य और सागर तट के रेत कड़ जितनी अनगिनत सन्‍तानें भईं। भरोसे कूं अपने मन में लये भये ये लोग मर गए। जिन चीजन की प्रतिग्‍या दी गयी हती, बिनें बे चीजें नांय पायीं। बिन्‍नें बस बिनें दूर तेई देखौ और बिनकौ स्‍वागत करौ और बिन्‍नें जि मान लियौ कै बे जा धरती पै परदेसी और अनजाने हैं। बे लोग जो ऐसी बातें कहतै, बे जि दिखातै कै, बे एक ऐसे देस की खोज में हैं जो बिनकौ अपनों है। अगर बे बा देस के बारे में सोचते, जाय बे छोड़ चुके हैं तौ बिनके फिर ते लौटबे कौ मौकौ रहतो। पर बे तौ एक उत्‍तम देस मतलब सुरगीय देस की खोज में लगे भये हैं। जामारैं परमेस्‍वर कूं बिनकौ परमेस्‍वर कहलाबे में संकोच नांय होत, चौंकि बानें तौ बिनके काजै एक नगर तैयार कर रखौ है। जब परमेस्‍वर अब्राहम की परीक्छा ले रयौ हतो, तब भरोसे के कारन बानें इसहाक कूं बलिदान के काजै अर्पित करौ। बईये जे प्रतिग्‍याएँ मिली भईं हतीं, अपने एकमात्र पुत्र की जब बलि दैबै बारौ हतो। तौ भलेई, परमेस्‍वर नें बाते कही हती कै, “इसहाक के द्वाराई तेरौ वंस बढ़ेगौ।” पर अब्राहम ने सोची कै, परमेस्‍वर मरे भये कूंअऊं जीबित कर सकतै, और अगर एक तरैह ते कही जाय, तौ बानें इसहाक कूं मौत ते फिर बापस पा लियौ। भरोसे के कारन ही इसहाक ने याकूब और एसाब कूं बिनके भबिस्‍य के बारे में आसीरबाद दियौ। भरोसे के कारन ही याकूब ने मरते समै में, यूसुफ के दोनों बेटान कूं आसीरबाद दियौ और अपनी लाठी के ऊपरी सिरे पै झुककै सहारौ लेते भये परमेस्‍वर कूं दडंबत करौ। भरोसे के कारन ही यूसुफ नें जब बू मरबे पै हतो, तब मिस्र ते इसरायलीन नें निकर जाने के बारे में बतायौ और अपनी अस्थियन के बारे में आदेस दियौ। भरोसे के कारन मूसा के माँ-बाप ने जब जि देखौ कै, बालक भौत सुन्दर है, तब बिन्‍नें बाय जन्म के बाद तीन महीना तक छुपाय कें रखौ, और बे राजा की आग्‍या ते नां डरे। भरोसे तेई, जब मूसा बड़ौ भयौ तौ बानें फिरौन की बेटी कौ बेटा कहलाबे ते इन्कार कर दियौ। जामारैं बाय पाप में थोड़े दिन के सुख भोगबे की अपेछा परमेस्‍वर के पबित्र जनों के संग दुख भोगबौ औरई उत्‍तम लगौ। बानें मसीह के काजै अपमान झेलने कूं मिस्र के धन भंडारन की अपेछा जादा मूल्‍यबान मानों, चौंकि बू अपनों प्रतिफल पाबे की बाट जोह रयौ हतो। भरोसे के कारन ही, बानें मिस्र देस कौ परित्‍याग कर दियौ। बू राजा के कोप ते भयभीत नांय भयौ बल्कि बू डटौ रयौ, मानों बाय अदृस्‍य परमेस्‍वर दिख रयौ हो। भरोसे ते ही, बानें फसह कौ त्यौहार और लहू छिड़कबे की बिधि कौ पालन करौ, ताकि नास करबे बारौ दूत, इसरायलीन के पैहलौठे बेटन कूं नास ना कर पाए। भरोसे के कारन ही, लोग लाल समुन्दर ते ऐसे पार है गए, जैसे बू कोई सूखी धरती होय। पर जब मिस्र के लोगन नें पार हैबौ चाहौ तौ बे डूब गए। भरोसे के कारन ही, यरीहो नगर की चार दीबारी ढह गयी, जब इसरायली लोग सात दिना तक वाके चारों ओर परिक्रमा कर चुके हते। भरोसे के कारन ही, राहब नाम की बेस्या, आग्‍या ना मानबे बारेन के संग नां मारी गयी हती, चौंकि बानें गुप्‍तचरों का स्‍वागत-सत्‍कार करौ हतो। अब मैं और जादा का कहूँ? गिदोन, बराक, समसौन, यिफतह, दाऊद, समूएल और दूसरे परमेस्‍वर की ओर ते बोलबे बारेन की चर्चा करबे कौ मेरे जौरें समै नांय है। जिन्‍नें भरोसे ते, राज्‍यन कूं जीत लियौ, धारमिकता के काम करे और परमेस्‍वर ने जो दैबे कौ वचन दियौ हतो, बाय प्राप्‍त करौ। जिन्‍नें सेरन के मौंह बंद कर दिये, और लपलपाती लपटन के क्रोध कूं सांत करौ और तलबार की धार ते बच निकले, जिनकी दुर्बलताई सक्‍ती में बदल गई, और युद्ध में जो सक्‍तीसाली बने और जिन्‍नें बिदेसी सेनान कूं छिन्‍न-भिन्‍न कर डारौ। स्त्रियन नें अपने मरे भयेन कूं फिर ते जीबित पायौ। बहुतन कूं सतायौ गयौ, पर बिन्‍नें छुटकारौ पाबे ते मना कर दियौ, ताकि बिनें एक और अच्‍छे जीबन में पुनरुत्‍थान मिल सके। कछू लोगन कौ उपहास और कौडेन कौ सामनों करनों पड़ौ, जबकि कछुन कूं जंजीरन ते जकड़ कै बंदीघर में डाल दियौ गयौ। कछू लोगन पै पथराब करौ गयौ। कछू आरे ते चीरकै दो फाँक कर दये गये, और कछुन कूं तलबार ते मौत के घाट उतार दियौ गयौ। कछू लोग गरीब हते, बिनें यातनाएँ दी गई और बिनके संग बुरौ व्‍यवहार करौ गयौ। बे जानबरन की खालै ओढ़े भये इधर-उधर मारे-मारे फिरे। जा संसार नें भरोसौ करबे बारे इन लोगन कूं नां अपनांयौ। बे बेहड़न, और पहाड़न में घूमते रहे और गुफान और धरती में बनी दरारन में, छिपते-छिपाते फिरे। भरोसे के कारन ही, इन सबके बारे में अच्‍छी गबाही दयी गयी। फिरऊ परमेस्‍वर नें जाकौ वचन बिनें दियौ हतो, बाय बे नांय पा सकौ। चौंकि परमेस्‍वर नें हमकूं ध्‍यान में रखकै एक उत्‍तम योजना बनांयी हती। बू चाहतो कै बे हमारे संगई पूर्नता तक पहुँचे। जब भरोसे के गबाहन की इतनी बड़ी भीड़ ते हम घिरे भये हैं, तौ आओ बाधा पौंहचाबे बारी हर एक चीज कूं और बा पाप कूं जो सहज मेंई हमें उलझा लेतै बाय झटक फैंकें और बू दौड़ जो हमें दौड़नी है, आओ धीरज के संग बाय दौड़ें। आओ हम, हमारे भरोसे के मालिक और सिद्ध करबे बारे ईसू पै नजर लगायें, जानें बा आनन्द के काजै जो वाके सामने मौजूद हतो, लज्‍जा की कछू चिंता नां करके क्रूस कौ दुख सहयौ, और परमेस्‍वर के सिंहासन के दाहिने हात बैठ गयौ। जामारैं वाकौ ध्‍यान करौ जानें पापिन कौ ऐसा बिरोध जामारैं सहन करौ, ताकि तुम निरास हैके हिम्मत ना छोड़ देओ। तुमने पाप के बिरोध अपने संघर्स में तुम्हें इतनों नांय अड़नौ पड़ौ कै, अपनों लहू ही बहानौ पड़ा होय। तुम बा साहसपूर्न वचन कूं भूल गये हो, जो तुम्हें पुत्र के नाते बतातै, “हे मेरे बेटा, पिरभू की ताड़ना कूं हलकी बात मत जानें, वाकी फटकार ते हिम्मत मत हारौ। चौंकि पिरभू बिनकूं सुधारतै, जाते बू पिरेम करतै, बैसेई जैसे पिता बा पुत्र कूं दन्‍ड देतै, जो वाके अति प्यारे है।” तुम दुख कूं ताड़ना समझकै सह लेओ। परमेस्‍वर तुम्हारे संग अपने बेटे के समान ब्यबहार करतैं। ऐसौ बेटा कौ होगौ, जाय अपने पिता के द्वारा ना डाँटौ हो? अगर तुम्हें बैसेई ताड़ना नां दयी गयी, जैसे सबकूं ताड़ना दयी जातै, तौ तुम अपने पिता ते पैदा भये पुत्र नांओ और सच्‍ची सन्‍तान नांओ। हमारे सांसारिक पिताऊ हमें डांटतै और हम बिनें सम्मान देतैं, तौ फिर हमें अपने आतमिक पिता के अनुसासन के अधीन रहते भये जीबन जीनों चहिऐ। हमारे सांसारिक पिताओं ने थोड़े से समै के काजै जैसौ बिन नें उत्‍तम समझौ, हमें ताड़ना दई, पर परमेस्‍वर नें हमें हमारी भलाई के काजै ताड़ना दई है, जाते हम वाकी पबित्रता के सहभागी है सकें। जा समै डाँट दयी जातैं, बा समै डाँट अच्‍छी नां लगै। पर हमें बाते दुख होतै, पर जो डाँट सहते सहते पक्‍के है गये हैं, बे आगें चलकै नेकी और सान्ती कौ प्रतिफल पांगे। जामारैं अपनी ढीली बांह नें और कमजोर घुटनन कूं मजबूत बनाओ। अपने पैरन के काजै सीदे रस्ता बनाऔ, ताकि जो लँगड़ा है, बू अपंग नांय, बरन चंगौ है जाए। सबन के संग सान्‍ती के संग रहबे और पबित्र हैबे के काजै हर प्रकार ते प्रयत्नसील रहौ। बिना पबित्रता के कोई भी पिरभू का दरसन नांय कर पाबैगौ। तुम सावधान रहौ, ऐसौ ना होय कै, कोई परमेस्‍वर की किरपा ते वंचित रह जाबे, या कोई ऐसी फूट ना पर जाये जो कस्ट देय, और वाके द्वारा तुम में ते भौत से लोग असुद्ध है जाएं। देखौ, आप लोगन में न तौ कोई व्‍यभिचारी हो और न एसाब के जैसे कोई अधर्मी, जानें एकई खाने के काजै अपनों पहलौठे का अधिकार बेच दियौ। जैसौ कै, तुम जानतई हो, जब बाद में बानें जा आसीरबाद कूं प्राप्‍त करबौ चाहौ, तौ बाय अयोग्‍य ठहरायौ गयौ। जब कै बानें रोय-रोय कर आसीरबाद पानों चाहौ, पर बाय अपने करे को पछताबा करबे कौ मौकौ नांय मिल सकौ। तुम लोग बा पहाड़ के जौरें नांय पौहचे, जैसे इसरायली लोग सिनाई पहाड़ के जौरें पौहचे। मांपै आग धधकती और कारे बादल, घोर अन्धकार, बबन्‍डर, और तुरही की तेज अबाज और परमेस्‍वर के बोलबे के ऐसे सब्द हते, जाके सुनबे बारेन नें बिनती की अब हमते और बातें नांय सुनीं जाती। जो आदेस दियौ गयौ हतो, बे बाय झेल नां पाये। चौंकि बिनते कही गयी हती, “अगर कोई पसु तक बा पहाड़ कूं छुलेय, तौ बापै पथराब करौ जाये।” बू दृस्‍य इतनों भयभीत कर डारबे बारौ हतो कै मूसा ने कही, “मैं भय ते थर थर काँप रयौऊं।” पर तुमतौ सियोन पहाड़, जीबित परमेस्‍वर की नगरी, सुरगीय येरूसलेम के जौरें आ गये हैं। तुमतौ हजारों हजार सुरग दूतन की खुस करबे बारी सभा, परमेस्‍वर की पहलौठी सन्‍तान है, जिनके नाम सुरग में लिखे हैं, बिनके जौरें पौहच चुके हो। तुम सबके न्यायकर्ता परमेस्‍वर और बिन धर्मात्‍मा, सिद्ध पुरुसन की आतमान, और एक नयी बाचा के बिचौलिया ईसू और वाके छिड़के भये बा लहू ते जौरें आ चुकेओ, जो हाबिल के लहू ते कऊं जादा उत्‍तम बातें बोलतै। ध्‍यान रैहबै कै, तुम बा बोलबे बारे कूं मत नकारौ। अगर बे बाकूं नकार कें नांय बच पाये, जानें बिन कूं धरती पै चेतावनी दयी हती, तौ अगर हम बाते मौंह मोड़िंगे, जो हमें सुरग ते चेतावनी दै रयौ है, तौ हम तौ दन्‍ड ते बिल्कुलऊ नांय बच पांगे। बा समै वाके सब्द ने धरती कूं झकझोर दियौ हतो, पर अब बानें प्रतिग्‍या करी है, “एक बार फिर न केवल धरती कूं ही बल्कि आकास कूंऊं मैं झकझोर दूँगो।” इन सब्दन ते, “एक बार फिर” जि संकेत मिलतै कै, सृस्‍टी की जो चीजें हिलायी जांगी, बे नस्‍ट है जांगी। और जो नांय हिलायी जांगी, बे बनी रैहंगी। चौंकि हमें जो राज्‍य मिलौ है, बू हिलायौ नां जा सकै, जामारैं आओ, हम परमेस्‍वर कौ धन्यबाद दैं और आदर के संग भय मानते भये बाय खुस करबे बारी भक्‍ती के संग अराधना करें। चौंकि हमारौ परमेस्‍वर भस्म कर डारबे बारी एक आग है। बिसबासी भईयान की तरैह एक दूसरे ते पिरेम करते रहौ। अतिथिन कौ आदर सत्‍कार करबौ मत भूलौ, चौंकि ऐसौ करते भये कछू लोगन नें अनजाने मेंई सुरग दूतन कौ स्‍वागत-सत्‍कार करौ है। ईसू कौ नाम लैबे की बजैह ते जो बंदी हैं, बिनकूं जा रूप में याद करौ, जैसें तुमऊ बिनके संग बंदी रये होंय। जिनके संग बुरौ व्‍यवहार भयौ है, बिनकी जा तरैह सुधि लेऔ, जैसे मानों खुद की देह पीड़ित होय। ब्याह कौ सब कूं आदर करनों चहिऐ। सादी सुदा जीबन में पती और पतनी एक दूसरे काजै बफादार रैहमें। चौंकि परमेस्‍वर व्‍यभिचारिन और कुकरमिन कूं दन्‍ड दैबैगौ। अपने जीबन में धन कौ लालच बिलकुल नां करौ। जो कछू तुम्हारे जौरें है, बाई में संतोस करौ, चौंकि परमेस्‍वर ने कही है, “मैं तोय कबऊ नांय छोड़ूँगो, और नां कबऊ त्‍यागूंगो।” जामारैं हम भरोसे के संग कहमें, “पिरभू मेरौ सहायक है, मैं कबऊ भय भीत न हुंगो। कोई आदमी मेरौ का कर सकै?” तुम लोग अपने रस्ता दिखाबे बारेन कूं याद रखो, जिन्‍नें तुम्हें परमेस्‍वर कौ वचन सुनांयौ है। बिनके जीबन के परिनाम पै बिचार करौ और बिनई के जैसौ भरोसौ करौ। ईसू मसीह कल, आज और युगानुयुग तक एक जैसौ है। हर तरैह की अनजानी सिछान ते भटक मत जईयों। चौंकि तुम्हारे मन के काजै जि अच्‍छौ है कै, बू परमेस्‍वर की किरपा के द्वारा मजबूत बनें, ना कै खाबे-पीबे सम्बन्धी नियमन कूं मानबे ते, इन नें मानबे बारेन में ते कबऊ काऊ कौ भलौ नांय भयौ। हमारे जौरें मसीह में एक बेदी है, जापै ते खाबे कौ अधिकार बिन पुरोहितन कूं नांय, जो तम्बू में सेबा करतै। महा पुरोहित अति पबित्र जगैह में पापबलि के रूप में पसुन कौ लहू तौ लै जाबै, पर बिनके सरीर डेरन के बाहर जरा दिये जामें। जाई बजैह ते ईसू नेंऊ खुद अपने लहू ते लोगन कूं पबित्र करबे के काजै नगर द्वार के बाहर यातना झेली। तौ फिर आओ, हमऊ जाई अपमान कूं झेलते भये जाय बानें झेलौ हतो, डेरन के बाहर वाके जौरें चलें। चौंकि य्हां हमारौ कोई स्थायी नगर नांय। पर हम तौ बा नगर की बाट जोह रहे हैं, जो आवे बारौ है। जामारैं आओ, हम ईसू के द्वारा परमेस्‍वर कूं स्तुति कौ बलिदान मतलब बिन होटन कौ फल है, जो वाके नाम कौ अंगीकार करतै। पर नेकी करबौ और अपनी वस्तुन नें औरन के संग बांटबो मत भूलौ। चौंकि परमेस्‍वर ऐसीई बलिदान ते खुस हैबै। अपने अगुबा और रस्ता दिखाबे बारेन की आग्‍या मानों और बिनके अधीन रहौ। बे तुमारी ऐसे चौकसी रखते हैं, जैसे बिन व्‍यक्‍तियन पर रखी जाबै है जिनकौ अपना लेखा-जोखा बिनें दैनौ है। बिनकी आग्‍या मानों जाते बिनकौ काम आनन्द बन जाय। ना कै एक बोझ बनें। चौंकि बोझ बनबे ते तुम्हारो कोई लाभ नांय होगौ। हमारे काजै पिराथना करते रहौ। चौंकि हमें भरोसौ है कै हमारी समझ सुद्ध है। और हम हर प्रकार ते बेई करनों चाहमें, जो अच्छौ है। मैं बिसेस रूप ते निबेदन करता हूं कै तुम पिराथना करे करौ ताकि मैं सीघ्रअई तुम्हारे जौरें आ सकूं। सान्‍ती कौ परमेस्‍वर, जानें भेड़न के बा महान रखबारे हमारे पिरभू ईसू के लहू द्वारा बा अनन्‍त बाचा पै मौहर लगाकैं मरे भयेन में ते जीबित करौ है, तुम्हें सब उत्‍तम साधनन ते सम्पन्‍न करै। जाते तुम वाकी इच्‍छा पूरी कर सको। और ईसू मसीह के द्वारा हमारे भीतर बू सब कछू पैदा करै जो बाय भाबै है। वाकी महिमा युगान युग तक हैती रहबै। ऐसौई हैबै! हे भईयाओ, मेरी बिनती है कै तुम हिम्मत दैबे बारे मेरे जा वचन कूं अपना लेऔ। चौंकि मैंनें तुम्हें जि चिठ्‌ठी भौत संछेप में लिखी है। मैं चाहूं कै, तुम जि जान लेऔ कै, हमारौ भरोसे में भईया तिमुथियुस जेल ते रिहा कर दियौ गयौ है। अगर बू जल्दी य्हां आ गयौ, तौ मैं बाईके संग तुमते मिलबे आऊंगो। तुमारे सब अगुबा और परमेस्‍वर के सब पबित्र लोगन कूं मेरौ नमस्‍कार कहियौं। इतालिया ते आये बिसबासी लोग तुम्हें नमस्‍कार भेजरे हैं। परमेस्‍वर की किरपा तुम सबके संग रैहबे। परमेस्‍वर और पिरभू ईसू मसीह के दास मुझ, याकूब की ओर ते इसरायल के बारैह गोतन कूं जो तितर-बितर हैके रैह रये हैं बिनकूं नमस्‍कार लिख रयौऊं। हे मेरे भईया बहनों, जब तुम तरैह-तरैह की मुसीबतन में परौ, तौ जाय बड़े आनन्द की बात समझौ। तुम जि जान लेओ कै तुमारे भरोसे के परखे जाबे ते धीरज पैदा हैबै। पर धीरज कूं अपनों काम पूरौ करन देओ कै, तुम पूरे और सिद्ध है जाऔ और तुम में काऊ बात की कमी नांय रहबै। अगर तुम में ते काऊ में बुद्धी की कमी होय तौ, बू परमेस्‍वर ते मांगै जो बिना उराहने दिये आनन्द के संग सबन कूं बुद्धी दैबै। पर भरोसे ते मांगौ और नेकऊ संका मत करौ, संका करबे बारौ समुन्दर की लहरन की तरैह है जो हबा ते बनें और बिगरैं। ऐसे आदमी कूं जि नांय सोचै कै, “मोय पिरभू ते कछू मिलैगौ।” ऐसे आदमी कौ मन दुचित्‍तौ है और वाकौ मन सब बातन में स्थिर नांय रैहबै। जो भईया गरीबै, बे जा बात पै घमन्‍ड करै कै परमेस्‍वर नें बिनकूं ऊंचौ उठायौ है। और धनी बिसबासी भईया अपनी नीची दसा पै घमन्‍ड करै, चौंकि बू घास कै फूल की नाईं खतम है जाबैगौ। जैसे सूरज निकरतई कर्री घाम में घास सूख जाबै और फूल झर जामें और वाकी सुन्दरता चली जाबै। जा तरैह ते धनी आदमी कौ जीबनऊ दौड़ भाग मेंई खतम है जाबैगौ। धन्य है बू आदमी जो परखबे के समैं में अड़ौ रैहबै चौंकि बू खरौ निकर कें जीबन कौ मुकुट पाबैगौ, जाय दैबे कौ पिरभू नें अपने पिरेम करबे बारेन ते बादौ करौऐ। कोई आदमी परखे जाबे के समैं में जि नांय कह सकै कै, “मेरौ परखबौ परमेस्‍वर नें करौ है।” चौंकि बुरी बातन ते नांतौ परमेस्‍वर की परख करी जाय सकै और न बू खुद काऊऐ परखै। पर हरेक आदमी अपनी बुरी सोच ते बुरे कामन में परबे ते परखबे में फसै। जो कोई आदमी बुरे काम की सोचकें पाप में गिरै और जब बू पाप में भड जाबै तौ बू अपनी मौत खुद बुलाबै। हे मेरे प्यारे भईया बहनों! धोखौ मत खाओ। जो कछू अच्‍छे दान, वरदान ऊपर के है और जे बा उजीते के पिता की ओर ते मिलें, बामें कोई बदलाब नांय है सकै और ना अदल बदल की बजैह ते बापै कोई छाया पड़त। परमेस्‍वर नें अपनी इच्‍छा ते हमें सत्‍य के वचन ते पैदा करौ है, ताकि हम वाकी बनाई भई चीजन में पैहलौठे ठेहरैं। हे मेरे प्यारे भईया बहनों! सुनबे काजै तईयार रहौ और बोलबे में जल्दबाजी मत करौ, गुस्सा में उताबले मत बनों, चौंकि काऊ आदमी की गुस्सा ते कबऊ परमेस्‍वर की धारमिकता पैदा नांय हैबे। सब घिनोंने आचरन और फैले भये बुरे कामन नें छोड़कै नरमाई ते पिरभू के वचन कूं मान लेओ, बाई ते तुमारौ उद्धार होगौ। पिरभू के वचन पै चलबे बारे बनों, जो कोई पिरभू के वचन कूं सुनकें नांय माने, बू आदमी अपने आपकूं धोखौ दै रयौ है। बाय तौ ऐसे मान लेओ जैसे बू अपनों मौंह सीसा में देख रयौ है। बू खुद कूं सही तरीका ते देखै पर जब बू म्हांते चलौ जाबै तौ बू थोरी देर में भूल जाबै कै, “मेरी सकल कैसी हती?” पर जो आदमी आजादी की सिद्ध व्‍यबस्था पै ध्यान करै, बू अपने सबरे कामन पै जा मारै आसीस पाबैगौ चौंकि जो बू सुनें बाय भूलै नांय पर बैसेई करै। अगर कोई आदमी अपने आपकूं परमेस्‍वर कौ भक्त समझै और अपनी जीब पै लगाम नांय लगाबै, तौ बू अपने आपकूं धोखौ दै रयैहै और वाकी भक्‍ती बेकार है। हमारे पिता परमेस्‍वर के जौरें सुद्ध और निरमल भक्‍ती तौ जि है कै अनाथ और बिधबान के दुखन में बिनकी सुधी लैमें, और अपने आप कूं संसार की बुराईन ते अलग करें। हे मेरे भईयाओ, हमारे महिमावान पिरभू ईसू मसीह में बिसबासी भईयाओ भेद भाव बारौ बौहार मत करौ। तुमारी संगती में अगर धनी आदमी अच्‍छे कपड़ा और सौने चांदी के गहने पहरकें आमें तौ तुम बाय ऊंची जगैहन पै बैठामें, और कोई गरीब आदमी मैले कुचैले कपड़ा पहरकें आबै तौ तुम बाय नीची जगैन पै बैठामें और तुम मौंह देखौ भिबार करतौ। ऐसौ करकें तुमने भेद भाव बारौ काम करौऐ। जितौ न्याय नांय। हे मेरे प्यारे भईयाओ सुनो। का परमेस्‍वर ने संसार के गरीब और लाचार लोगन कूं नांय चुनों कै बेऊ भरोसे में धनी है जाय और परमेस्‍वर ने जो बादौ करौ है कै जो कोई मोते पिरेम करैगौ बे राज में घुस पांगे। का तुम बिन गरीबन कौ अपमान नांय कर रये? का धनी लोग तुम पै अत्‍याचार नांय करें? का बे धनी आदमी तुमें घसीट-घसीटकै कचैरिन में नां लै जाय रये है? का बे बा उत्‍तम नाम की निन्दा नांय करें, जा नाम ते तुम जानें जामें? तौऊ तुम अगर अपने परौसी ते पिरेम कर रये है तौ परमेस्‍वर की राज व्‍यबस्था कूं पूरौ कर रये हैं, कै “तू अपने परौसी ते अपने समान पिरेम कर।” तौ तुम सही कर रयेऔ। अगर तुम भेद भाव कर रयेऔ तौ तुम पाप कर रयेओ और तुम परमेस्‍वर की व्‍यबस्था कूं तोर रयेऔ जा बजैह ते तुम दोसी हो। जो कोई सबरी व्‍यबस्था कूं माने और एक बात में चूक जाबै तौ बू सबरी व्‍यबस्था कौ दोसी है। चौंकि बानें कही हती, “तू व्‍यभिचार मत करियो” और बानें जेऊ कही, “तू हत्‍या मत करियौ।” अगर तुम व्‍यभिचार नां करौ और हत्‍या करौ तौ तुम व्‍यबस्था कूं तोरबे बारेऔ। तुम बिनईं लोगन की तरैह ते बोलौ और बिन जैसौई भिबार करौ जिनकौ न्याय परमेस्‍वर की व्‍यबस्था के अनुसारई होनौएं, जाते छुटकारौ मिलै। चौंकि जिन्‍ने दया नांय करी, वाके काजै परमेस्‍वर कौ न्याय बिना दया केई होगौ। पर दया हमें पाप की सजा ते बचाबै। हे मेरे भईयाओ, अगर कोई कहबै कै मैं भरोसौ करुं तौ जाते का फायदा जब तक वाके काम भरोसे लायक नांय होंय? ऐसे भरोसे ते का वाकौ उद्धार है सकै? मान लेओ अगर काउ भईया और बहिन के जौरें खायबे और पैहरबे कूं नांय होय, और तुम बाते कहमें कै, “खुसी ते जाओ, गरम कपड़ा पैहनों और पेट भरकै भोजन करौ” और तुम बिनें देह के काजै जरूरत की चीज ना देओ तौ का फायदा? जा तरैह ते भरोसे के संग काम नांय होय तौ ऐसौ भरोसौ मरे भये के समानैं। कोई कह सके के, “तोय भरोसौए और मैं काम करुं।” तू अपनों भरोसौ मोय बिना काम करे दिखाबै और मैं तोय अपनों भरोसौ अपने काम के द्वारा दिखाऊंगौ। का तुम भरोसौ करैं कै परमेस्‍वर एकईए। तौ तुम अच्‍छौ करैं। दुस्‍ट आतमाऊ तौ जि भरोसौ करैं कै परमेस्‍वर है, और थर थर कांपें। अरे मूर्खो, तुम्हें जाकौ सबूत चहिंयें कै काम के बिना भरोसौ बेकार है। जब हमारे पिता अब्राहम नें भरोसे ते अपने बेटे इसहाक कूं बेदी पै चढ़ायौ तौ बू कामन तेई धरमी ठहरौ। तैने देख लियो कै वाके भरोसे के कामन तेई पिरभाब डारै और काम तेई भरोसौ सिद्ध भयौ। और पबित्र सास्त्र कौ जि वचन पूरौ भयौ “अब्राहम नें परमेस्‍वर पै भरोसौ करौ, और जि वाके काजै धरमी गिनौ गयौ।” और जाइते बू “परमेस्‍वर कौ मित्र” कहौ गयौ। जामारैं तुमने देख लियौ आदमी भरोसे तेई नांय पर अपने कामन तेऊ धरमी ठहरै। एसेई राहाब बैस्‍या नें जब दूतन कूं अपने घर में ठहरायौ और दूसरे रस्ता ते बिदा करौ तौ का बू अपने कामन ते धरमी नांय ठहरी? जैसे आतमा के बिना देह मरी भई है बैसेई कामन के बिना भरोसौ मरौ भयौऐ। हे मेरे भईयाओ, तुम मेंते भौत से सिक्छा दैवे बारे मत बनों चौंकि तुम जानें कै सिक्छा दैवे बारेन तेई जादा कर्राई ते हिसाब मांगौ जाबैगौ। मैं तुमें जामारैं चेता दै रयौऊं कै हम सबन पै भौत सी भूल हैती रैहबै। अगर कोई आदमी बोलबे में चूक नांय करै तौ बू पूरौ सिध्द आदमीऐ, और बुई अपने सरीर पै पूरौ काबू पाय सकै। हम घोड़न के मौंह में लगाम जामारैं लगातें कै बे हमारे बस में चलें। और जा तरैह ते हम बिनके सबरे सरीरै काबू में कर सकें। उदाहरन के काजै पानी के जहाज कूं देख लेओ चांहे बे कितनेऊ बड़े चौं नांय होमें और बिनकूं तेज हबा बहाय रई होय फिरऊ एक छोटी सी पतबार ते जहाज कूं चलाबे बारौ बिनपै काबू करकें चलाबै। ऐसेंई जीबऊ सरीर कौ एक छोटौ सौ अंगे और बू बड़ी बड़ी बात करै, और देखौ छोटी सी आग की चिन्गारी बडे़ बड़े जंगल कूं जराय सकै। जीभऊ आग की लपट है। जि बुराई कौ पुरौ संसार है। जि जीब हमारे सरीर के अंगन मेंते एक ऐसौ अधर्मी अंगे अगर जाते कोई बात गलत निकर जाये तौ हम गलत साबित हे जाबतै, और हमारे पूरे जीबन में आग लगा देतै। आखरी में जीभऊ नरक कुन्‍ड की आग में जराय दयी जाबैगी। देखौ आदमी ने जानबरन पै, और उड़बे बारे पंछीन पै और पानी में रैहबे बारे जीब जन्‍तु और रेंगबे बारे कीड़ा मकोड़न पै काबू पाय लियो है। पर कोई अपनी जीब पै काबू नां कर पायौ। जितौ जहर ते भरी भई भौत बुरी बला है। और हम जई जीब ते पिरभू और पिता परमेस्‍वर की बड़ाई करें और जई ते लोगन कूं साप दैमें जिनकूं परमेस्‍वर ने अपने स्वरूप में बनांयो हतो। एकई मौंह ते आसीरबाद और स्राप दोनों निकरैं। हे मेरे भईयाओ, ऐसौ नां होनों चहिऐ। का पानी के एकई सोता ते मींठौ और खारौ दोनों तरैह कौ पानी निकर सकै? हे मेरे भईयाओ, का अंजीर के पेड़ पै जैतून या अंगूर की बेल पै कबऊ अंजीर लगै? बैसेई खारे सोता ते मीठौ पानी नांय निकरै। तुम में समझदार और ग्‍यानी कोऐ? जो अपने आप कूं अच्‍छे कामन और चाल-चलन ते नम्रता के संग बौहार करै, जो ग्‍यान ते पैदा होय। अगर तुमारे मन में जलन और स्‍वार्थ भरौ होय तौ अपने ग्‍यान कौ ढिढोरा मत पीटो, ऐसौ करके तुम झूंठ बोलकै सच्‍चाई ऐ दबाबौ चाहमें। जि बू ग्‍यान नांय जो सुरग ते आबै पर सांसारिक, सारीरिक और सैतानीऐ। जामारैं ज्हांपै जलन और स्‍बार्थ होतुऐ, म्हांपै उपद्रव और सब तरैह की बुराई हैमें। सुरग ते आयबे बारौ ग्‍यान तौ पबित्र, सान्तीपूरन, सहनसील, और मिलनसारऊ है बू करुना ते भरौ भयौ है और अच्‍छे कामन की फसल पैदा करै। बामें पछपात और कपट ना होऐ। धारमिकता सान्‍ती के छेत्र में बुई जाबै और सान्‍ती बनांयबे में जीबन कौ फल मिलैगौ। तुम में जि लड़ाई और झगड़े कांते आय गए? का उन सुख-बिलासन ते नांय जो तुमारे देह के अंगन में लड़त-भिड़तें? तुम लालसा करैं और तुमें नांय मिलत, जामारैं तुम हत्‍या और डाह करतौ। जब तुम कछू पाय नां सकै, तौ तुम लड़ें और झगड़े। तुमें जामारैं नांय मिलत कै तुम बाय परमेस्‍वर ते नांय मागत। तुम मांगें तौ हैं और तुमें मिलै नांय, चौंकि तुम बुरी इच्‍छा ते मांगें, ताकि अपने भोग-बिलास में उड़ाय दें। अरे व्यभिचारीन और बेईमानों का तुम जि नांय जानें कै संसार ते पिरेम करबे कौ मतलब तौ परमेस्‍वर ते बैर करबौ। जो जा संसार कौ मित्र बनें बू परमेस्‍वर कौ बैरी बनें। का तुम पबित्र सास्त्र में लिखी जा बात कूं बेकार समझें कै, परमेस्‍वर जानें हमारे भीतर पबित्र आतमा डारिए, जा बात की भौत लालसा करै कै हम भरोसे योग्‍य बने रैहमें? परमेस्‍वर ने हम पै भौत बड़ी किरपा करीऐं, सास्त्र में लिखी भईए कै, “परमेस्‍वर घमन्‍डी कौ बिरोध करतै और दीन लोगन पै किरपा करै।” जामारैं तुम लोग परमेस्‍वर के अधीन रहो। सैतान कौ बिरोध करौ तौ बू तुमारे जौरें ते भाग जाबैगौ। परमेस्‍वर के जौरें आऔ तौ बू तुमारे जौरें आबैगौ। अरे पापीयौ अपने हात और दुचित्‍ते मन कूं सुद्ध करौ। सोक करौ, बिलाप करौ और दुःखी होऔ। तुमारी जि हसी रोबे में और खुसी निरासा में बदल जाय। पिरभू के सामने दीन बनों, तौ बू तुमें ऊँचौ उठाबैगौ। हे मेरे भईयाओ, एक दूसरे की बुराई मत करौ। जो अपने भईया की बुराई करै, बू अपने भईया पै दोस लगामें और बा व्‍यबस्था पैऊ दोस लगामें और बुराई करैं। तुमतौ व्‍यबस्था पै चलबे बारे नांय पर वाके न्यायी बन जाऔ। व्‍यबस्था दैबे बारौ और न्यायी तौ एकईऐ, जामें बचायबे और नास करबे की सामर्थे। तू कोऐ जो अपने पड़ौसी पै दोस लगाबै? देखौ, तुम जि कहमें कै, “इन दिनांन में और आबे बारे दिनन में हम काऊ नगर में जायके एक साल बितांगे म्हांपै बौपार कर करकें भौतसौ धन कमा लिंगे।” पर तुम जि नांय जानत कै कल का होगौ, तुमारौ जीबन हैई का? बू तौ भाप के समानै जो कछू देर दिखाई दैतै फिर खतम है जाय और दीखैई नांय। पर तुमें तौ हमेसा जि कैहनों चहिऐ कै, “अगर पिरभू चाहे तौ हम जीन्दे रहिंगे, जि और बू सब कछू करिंगे।” पर तुमतौ अपनी दुस्‍टता पै घमन्‍ड करै जा तरैह कौ घमन्‍ड बुरौए। जो आदमी भलाई करबौ जानें बाय बू करनों चहिए अगर बू भलाई नां करै तौ पाप करै। हे धनी आदमीयों, सुनों, तुम पै कलेस आयबे बारीऐ, वाके काजै चिल्‍लायकै रोऔ सोक मनाऔ। चौंकि तुमारौ धन सड़ गयौए और तुमारे कपड़न में कीरा लग गये हैं। तुमारौ सौनों चांदी जंग लगबे ते बिगर गयौऐ। बिनपै लगी जंग तुमारे बिरोध में बोलैगी और आग की तरैह तुमारे माँस कूं खा जाबैगी। तुमने आखरी समै में धन बटोरौए। जिन मजदूरन ने तुमारे खेत काटे, तुमने बिनकी मजदूरी धौके ते रख लई। काटबे बारे मजदूर मजदूरी काजै चिल्‍ला रये हैं और बिनकी दुहाई पिरभू के कानन तक पौहच गयीऐ। तुमने धरती पै अपने सरीरन कूं भोग-बिलास में डारकै, एक दिनां अपने आप कूं कटबे काजै पाल पोसकै हट्‍टौ कट्‍टौ कर लियौए। तुमने धरमी लोगन कूं, जिन्‍ने तुमारौ कोई बिरोध नांय करौ, बिनकूं दोसी ठहरायके बिनकी हत्‍या कर डारी है। हे भईयाओ, पिरभू के बापस आयबे तक धीरज रखौ जैसे किसान धरती की फसल के पकबे तक, पैहले और आखरी मेह कि लगातार इन्‍तजार की आसा में धीरज रखै। अब तुम लोग हिम्मत मत हारौ और अपने मनन कूं तईयार करौ चौंकि पिरभू के आयबे कौ समै जौरें है। हे भईयाओ, एक दूसरे पै दोस मत लगाऔ नांय तौ तुम पैऊ दोस लगायो जाबैगौ। देखौ, न्याय करबे बारौ द्वार पैई खड़ौए। हे भईयाओ, परमेस्‍वर की ओर ते बात बतायबे बारेन कूं याद करौ, जिन्नें पिरभू के नाम की गबाही दैबै की बजैह ते तमाम ताड़ना झेली और धीरज के संग सहते रये जि उदाहरन है। जा बात कौ ध्‍यान रखौ, हम सहन करबे की बजैह ते बिनें महान मानतें। तुमनें अयूब के धीरज के बारे में नां सुनी कै, पिरभू ने बाय वाकौ प्रतिफल दियौ, तुम बाऊए जानतौ के पिरभू कितनौ दयालू और करुना ते भरौ भयौऐ। हे भईयाओ, सबनते बड़ी बात जि है कै तुम सुरग और धरती की और काऊ की सौगन्ध मत खाऔ, तुमारी बात तौ “हाँ” की हाँ और “ना” की ना हौनी चहिऐ, तब तुम परमेस्‍वर के राज में दन्‍ड पायबे बारे ना ठहरिंगे। अगर तुममें कोई दुखी होय तौ पिराथना करै और खुसी होय तौ परमेस्‍वर की महिमा के भजन गाबै। अगर तुम में ते कोई बीमार होय तौ कलिसिया के अगुवन नें बुलाय कें, बिनके काजै पिराथना करें और पिरभू के नाम कौ तेल मलें। भरोसे की पिराथना ते बीमार ठीक है जाबैगौ पिरभू बाय उठायकें ठाड़ौ कर देगौ। अगर बानें पाप करे होंय तौ पिरभू बाय छमा कर देगौ। जामारैं तुम एक दूसरे के सामने अपने अपने पापन नें मान लेओ और एक दूसरे काजै पिराथना करौ कै, तुम सही सलामत है जाऔ। धरमी आदमी की पिराथना ते भौत कछू हे सकतुए। एलियाऊ तौ हमारे समान दुख सुख भोगबे बारौ आदमी हतो और बानें गिड़-गिड़ाय कें पिराथना करी कै मेह नांय परै। तब साढे तीन साल तक धरती पै मेह नांय परौ। जब फिर ते बानें पिराथना करी तौ फिर आकास में ते मेह परौ और धरती फलीभूत भई। हे भईयाओ, अगर तुम मेंते कोई सच्‍चाई के रस्ता पैते भटक जाबै, तौ कोई दूसरौ बाय सच्‍चाई के रस्ता पै लै आबै, तौ बू जि जान लेय अगर बू एक पापी कूं सच्‍चाई के रस्ता लै आबतुए, तौ बू वाकी आतमा कूं अनंत मौत ते बचाय लेतुए और वाके भौत ते पापन की छमा कौ कारन होय। जि चिठ्‌ठी ईसू मसीह की ओर ते भेजे भये मुझ, पतरस की ओर ते, पुन्‍तुस, गलतिया, कप्पदूकिया, आसिया और बिथुनिया में तितर-बितर हैके रैहबे बारे परमेस्‍वर के पबित्र लोगन के काजै हैं। पिता परमेस्‍वर तुम्हें पैहले तेई जानैं, और वाके अनुसार तुम बुलाये गयेऔ। वाके आतमा ने तुमें पबित्र बनांयौ है जाते तुम ईसू मसीह की आग्‍या मानौ और वाके खून ते पबित्र है जाऔ। तुमारे ऊपर भौत किरपा और सान्‍ती हैती रैहबै। हमारे पिरभू ईसू मसीह के पिता परमेस्‍वर कौ धन्यबाद होय। बानें हमारे पिरभू ईसू मसीह कूं मरे भयेन में ते जी उठबे के द्वारा अपनी बड़ी दया ते हमें जीबित आसा में नयौ जन्म दियौ है। जामारैं अब तुम लोगन काजै सुरग में बू बिरासत रखी है, जो न तौ कबऊ सड़ैगी, और न कबऊ खोबैगी और कबऊ ना नास हैबैगी। तुम लोगन के भरोसे की बजैह ते परमेस्‍वर की सामर्थ तुमकूं बा उद्धार के काजै सुरछित रखै जो अब ते लैके और अन्‍त के समै में पिरकट हैबे बारौ है। जि तुम लोगन के काजै भौत खुसी की बात है हालांकि अब थोरे समै के काजै तुम लोगन कूं भौत तरैह के कस्‍ट सहने पर रये हैं। जि जा बजे ते भयौ कै तुमारौ परखौ भयौ भरोसौ आग ते ताये भये नासबान सौने तेउ जादा कीमतीऐ। ईसू मसीह के पिरकट हैबे बारे दिन में तुम लोगन कूं आदर महिमा और बड़ाई मिलैगी। तुमनें बाय कबऊ नांय देखौ फिरऊ तुम बाते पिरेम करतें। और तुम बिना देखे बापै भरोसौ करके खुस हैमें जो महिमा ते भरौ भयौऐ जाकौ बरनन नांय करौ जाय सकै। तुम अपने भरोसे कौ प्रतिफल मतलब अपनी आतमान कौ उद्धार पा रये हो। जा उद्धार के बारे में परमेस्‍वर की ओर ते बात बतायबे बारेन नें भौत ढूंढ ढाढ और जांच पड़ताल करी और बा किरपा के बारे में जो तुम पै हैबे बारी हती वाकी भविस्‍यबानी करी हती। उन्‍नें जा बात की खोज करी हती कै मसीह कौ आतमा बिनमें हतो और पैहलै ते मसीह के दुखन की और वाके बाद हैबे बारी महिमा की गबाही दयी हती और जि जा बात कौ चिन्‍नैं कै जि बात कब होंगी और जा दुनियां कौ का होगौ। बिनपै जेऊ उजागर करौ गयौए कै बे खुद अपनी सेबा नांय कर रये, पर तुमारी सेबा कर रये हैं। बे बातें सुरग ते भेजे गये पबित्र आतमा के द्वारा तुमें सुभ समाचार की सिछा दैबे बारेन के जरिये बता दयीं गई हतीं। जिन बातन कूं जानबे काजै सुरग दूत तरसते हते। जामारैं तुम मनन नें तईयार करौ और चौकन्‍ने रहौ और वाकी किरपा की पूरी आसा रखौ जो तुमें ईसू मसीह के आयबे पै मिलबे बारी है। तुम लोग आग्‍या मानबे बारे बालकन की तरैह बनकैं, बा समै की बुरी इच्‍छा के अनुसार काम मत करौ जो तुम पैहले करते हते, पैहले तुम अग्‍यानी हते। पर जैसौ तुमारौ बुलायबे बारौ परमेस्‍वर पबित्र है बैसेई तुमऊ अपने सबरे चाल-चलन में पबित्र बनों। चौंकि लिखौए, “तुम पबित्र बनों, चौंकि मैं पबित्रऊं।” अगर तुम बाय, “हे पिता” कैहकै बुलामें, जो पछपात करे बिना हर आदमी कौ वाके कामन के अनुसार न्याय करतै। तौ तुम जा परदेसी धरती पै अपने जीबन में, आदर के संग वाके भय में जीबन जीऔ। तुमारौ छुटकारौ तुमारे बाप-दादन ते चलौ आय रयौ, निकम्मे चाल-चलन ते, सौने चांदी जैसी कीमती और नासबान चीजन ते नांय भयौ। पर तुमारौ छुटकारौ निरदोस और बिना कलंक बारे मैमना मतलब मसीह के भौत कीमती खून के बहाबे ते भयौऐ। जा दुनियां कूं बनाबे ते पैहलेई बाय चुन लियौ गयौ हतो, पर आखरी समै में तुमारे काजै पिरगट करौ है। वाके बजैह तेई तुम परमेस्‍वर पै भरोसौ करतौ, जाने बाकूं मरे भयेन में ते जीबित करौ हतो और महिमा दयी। तुमारौ भरोसौ और आसा परमेस्‍वर पै होय। अब देखौ तुमनें अपने आप कूं भाई चारे के सच्‍चे पिरेम कूं दिखाबे काजै अपनी आतमा कूं पबित्र कर लियौऐ तौ पबित्र मन ते एक दूसरे ते बिना कपट के पिरेम करबे कौ मन बनांय लेओ। तुमने दुबारा जनम लियौऐ और अब तुमने बा नासबान बीज ते जनम नांय लियौ, पर बा कबऊ ना नास हैबे बारौ बीज, परमेस्‍वर के जीबित वचन ते भयौऐ जो अटल है। चौंकि लिखौ भयौ है, “सब लोग घास की तरैह ते है, और वाकी सोभा घास कै फूल की तरैह ते है। घास सूख जाबै और फूल गिर जामें। पर पिरभू कौ वचन हमेसा हमेसा तक टिकौ रैहबेगौ।” जि वचन बुई सुभ समाचारै जो तुमें सुनांयौ गयौ हतो। तुम सब तरैह की बुराई, छल-कपट, जलन और एक दूसरे पै दोस लगाबे ते बचे रैहौ। एक छोटे नबजात बालक की तरैह ते आतमिक दूध की लालसा में लगे रहौ, जाते बामे उद्धार पाबे काजै बढ़ते जाऔ। चौंकि अब तुमने पिरभू की किरपा कौ स्वाद चख लियौऐ। पिरभू जीबित पत्‍थर है जाकूं लोगन्‍नें बेकार समझकै निकार दियौ हतो, पर परमेस्‍वर के काजै भौत कीमती और वाके द्वारा चुनों गयौ है। तुमऊ जीबते पत्‍थरन की नाईं आतमिक घर बनते जारे हैं, जाते तुम पुरोहितन कौ पबित्र समाज बनकें एक ऐसौ बलिदान चढ़ाऔ जो ईसू मसीह के द्वारा परमेस्‍वर के अपनांबे लायक है। जाके बारे में सास्त्र में लिखौ है, “देखौ, मैं सियोन नगरी में एक कौने कौ पत्‍थर रखूं, जो चुनों भयौ और भौत कीमती है जो कोई बापे भरोसौ करैगौ बू कबऊ लज्‍जित नांय होगौ।” भरोसौ करबे बारे तुम लोगन काजै बू पत्‍थर भौत कीमतीऐ। पर जो भरोसौ नां करें बिनके काजै सास्त्र में लिखौ भयौ है, “राज मिस्त्री ने जा पत्‍थर कूं बेकार ठहरायौ बुई कौने कौ पत्‍थर ठहरौ।” “जि एक ऐसौ पत्‍थर बन जाबे जाते लोग ठोकर खामें है जि बू चट्‍टानें जाते लोग फिसलकै नीचे गिर जामें।” ऐसे पत्‍थर जाते ठोकर लगकै भरोसे ते भटक जामें और वचन कूं नां मानें और बे जाई के काजै ठहराये गये हते। पर तुम लोग चुने भये वंस, राज पदधारी पुरोहितन के समाज, और पबित्र लोग और परमेस्‍वर की चुनी भई निज पिरजा हैं, जामारैं तुम लोगन कूं अन्धेरे में ते निकारकैं अपनी अदभुत उजीते की रोसनी में बुलायौऐ। तुम वाके गुन उजागर करौ। तुम पैहले तौ कछू नांय हते, पर अब तौ परमेस्‍वर की अपनी खुद की पिरजाऔ। तुम पै पैहले तौ दया नांय भयी हती, पर अब तुम पै दया भयीऐ। मेरे प्यारे दोस्तो, मैं तुमते बिनती करूं जा दुनियां में तुम अपने आपकूं परदेसी जानकें, सरीर की बुरी इच्‍छा ते बचायकें रखौ, जिनके काजै आतमा जूझतिऐ। गैर मसीह लोगन मेंऊ तुमारौ चाल-चलन अच्‍छौ होय। जामारैं बे तुमें जिन जिन बातन में सरीर की इच्‍छा कूं मारबे काजै तुमारी आतमा जूझती हती। बे भले कामन ने देखकैं पिरभू के आयबे के दिनन में परमेस्‍वर की महिमा करें। पिरभू के काजै लोगन के ठहराये भये अधिकारिन के अधीन रहौ। राजा की अधीनता में रहौ जाके जौरें सब अधिकार है। अधिकारिन के अधीन जामारैं रहौ चौंकि उन्‍नें सब बुरे लोगन कूं दन्‍ड दैबे कौ और अच्‍छे लोगन कूं सम्मानित करबे काजै राजा के द्वारा ठहराये गये हैं। चौंकि परमेस्‍वर की जेई इच्‍छाऐ के तुम अपने भले कामन ते उनके मूरखता ते बोलबे बारे मौंह कूं बन्द कर देऊ। और तुम काऊ बन्धन में नाऔ, पर अपनी जा आजादीऐ बुराई के काजै आड़ मत बनाऔ, और परमेस्‍वर के सेबक के जानकै समझदारी ते चलौ। सबन कौ आदर करौ आपस में बिसबासी भईयन ते पिरेम रखौ परमेस्‍वर कौ आदर के संग भय रखो और राजा कौ सम्मान करौ। हे सेबकौ, आदर ते अपने मालिक के अधीन रहौ। नम्र और भलेन केई नांय, पर कुटिलन केऊ। अगर कोई अच्‍छौ करकैऊ दुख उठाबतै, चौंकि बू परमेस्‍वर ते पिरेम करतुए तौ जि वाके काजै भौत भली बातै। पर तुम बुरे काम करके लात घुँसे खाकर कछू नांय कहते तौ जामें कौन सी बड़ाई की बात है। अच्‍छे काम करबे के बादऊ तुमकूं दुख भोगनों पड़तै और तुम बाय धीरज ते सहतौ तौ जि परमेस्‍वर कूं भलौ लगतुए। और तुम जाई काजै बुलाये गयेऔ चौंकि मसीह नेंऊं तुमारे काजै दुख उठायौ और तुमारे काजै एक आदर्स नमूना बन गयौ, कै तुम वाके नमूना पै चलौ। सास्त्र में लिखौ है, “ना तौ बानें कोई पाप करौ और न वाके मौंह ते कोई छल की बात निकरी।” बू गारी सुनकें काऊऐ गारी नांय देतौ और दुख उठायके काऊए धमकी नांय देत हतो, पर अपने आप कूं सांचे न्यायी कै हात में दै देतौ। बानें हमारे सबरे पापन कूं अपने ऊपर लै लियौ और क्रूस पै चढ़ गयौ, जाते हम पापन के काजै मरकें धारमिकता के काजै जीबन बितामें वाकी मार खायबे तेई हम भले-चंगे भये है। चौंकि तुमतौ भेड़ की नाईं भटक गये हते पर अब अपने चरायबे बारे जो हमारी आतमा की रखबारी करवे बारे के जौरें लौट आए हैं। हे पतनिंयो अपने पतिन कौ कहनों मानों। जामारैं अगर कोई पती वचन कूं न मान्‍ते होंय बेऊ तुमारे भय सहित पबित्र चाल-चलन कूं देखकें वचन की ओर खिचे चले आंगे। तुमारौ सिंगार सांसारिक बनाबटी नांय होनों चहिऐं, जो बारन कूं समारबौ, सौने के गैहने पैहरबौ, और चटक मटक के कपड़ा पैहरकें करौ जाबै। पर तुमारौ सिंगार तौ तुमारे मन के अन्दर की, नम्रता और बा अबिनासी सान्‍त आतमा ते सजौ भयौ होय तौ परमेस्‍वर की निगाह में वाकौ जादा मोलै। चौंकि पैहले पबित्र औरत परमेस्‍वर पै आसा रखती हती। और अपने आपकूं जाई तरीका ते सजाकें अपने पती के अधीन रैहति हतीं। जैसे सारा अपने पती अब्राहम के अधीनता में रैहती और बाय स्‍वामी कैहती हती। अगर तुमऊं अच्छे काम करौ और काऊते कैसेऊ मत डरपौ तौ तुम वाकी बेटी ठहरिंगी। हे पतीयों अगर तुमऊं अपनी पतनीन के संग समझदारी ते एसौई ब्यबहार करौ, और बिनकूं निरबल समझकें आदर देऔ और अपने कबऊ नांय खतम हैबे बारे जीबन के वरदान में दोनों बारिस बनों, जाते तुमारी पिराथनान में कोई रुकाबट नांय आबै। इन बातन कौ मतलब है कै तुम सबके सब एक मत हैकें किरपा और भाई चारे की पिरीत, करुना करबे बारे और नरम बनों। बुराई के बदले बुराई मत करौ और न गारी के बदले गारी देओ। पर तुम जाके बदले में आसीस देओ चौंकि तुम आसीस के बारिस हैबे काजै बुलाये गयेऔ। चौंकि सास्त्र में लिखौ है, “जो कोई जीबन कौ आनन्द उठाबौ चाहमें, और अच्‍छे दिन देखबौ चाहमें। बू अपनी जीब ते कबऊ बुराई नांय करै, अपने होटन कूं छल-कपट की बात करबे ते रोके रैहौ। बू बुराई छोड़ै और भलाई करै और मेल-मिलाप कूं ढ़ूढे और बाई के जतन में लगौ रह। चौंकि पिरभू की आंखे भले और धरमी आदमी पै लगी रैहमें, और वाके कान वाकी दुहाई कूं सुनबे काजै लगे रैहमें। पर पिरभू बुराई करिबे बारेन ते अपनों मौंह फेर लेय।” अगर तुम भलाई करबे काजै लालायित रहिंगे तौ को तुमारी बुराई करैगौ? अगर तुमें भले कामन की बजैह ते दुख उठानौ परै तौ तुम धन्य हौ, जामारैं तुम बिन लोगन के काऊ डर ते घबरा मत जईंयों। पर मसीह कूं अपनों पिरभू जानकें अपने अपने मन में पबित्र समझकें जो लोग तुमारी आसा कै आधार पै वाके बारे में तुमते जो कोई पूछे तौ बाय बताबे काजै आदर के संग हमेसा तैयार रहौ। पर आदर और नरमाई के संग ऐसौ करौ और अपने मन कूं सुद्ध रखौ जाते कोई ईसू मसीह में तुमारे चाल-चलन के बारे में तुमारी बुराई करबे तेऊ सरमाबें। अगर परमेस्‍वर की जेई इच्‍छाऐ के तुम दुख उठाऔ तौ बुरे काम करबे की बजाय भले काम करते भये दुख सहन करौ। चौंकि मसीह ने हमारे पापन के काजै दुख उठायौ, बू तौ धरमी हतो फिरऊ हमारे काजै मर गयौ कै, हमे परमेस्‍वर के जौरें लै जाबै, बू सरीर में तौ मर गयौ पर आतमा में जिलायौ गयौ। बू आतमा रूप मेंई, पाताल में कैदी आतमन कूं उद्धार कौ सन्देस सुनांबे गयौ। जि बिन लोगन की आतमा हतीं, जिन लोगन नें भौत पैहले परमेस्‍वर कौ बिरोध करौ हतो, जब नूह कौ जहाज बन रयौ हतो और परमेस्‍वर धीरज के संग इन्‍तजार कर रौ हतो, बा जहाज में आठ आदमी पानी ते बच पाये हते। बू पानी की बाढ़ बपतिस्मा के समान है जाते अब तुमारौ उद्धार हैबै जामें सरीर कौ मैल नांय छुड़ायौ जाबै, पर अपने पबित्र मन ते अपने आपकूं परमेस्‍वर के हातन में सौंपें। जि बपतिस्मा पिरभू ईसू मसीह के जी उठबे ते हमारौ उद्धार करै। बू सुरग में परमेस्‍वर के सीदे हात मांउ बैठौ है और अब सुरग दूत और सुरग की सब सामर्थी और अधिकारी वाके अधीन में कर दिये गये हैं। जब मसीह ने सरीर में दुख उठायौऐ तौ तुमऊ अपनों मन बनांय लेओ, चौंकि जो सरीर में दुख उठामें बे पापन ते छुटकारौ पाय लैमें। जामारैं तुम आदमी की इच्‍छा पै मत चलौ बरन तुम परमेस्‍वर की इच्‍छा कूं जानौ और वाके अनुसार काम करते भये, बचे भये जीबन कूं जीऔ। चौंकि तुम गैर यहुदिन की तरैह काम करबे और लुचपन, बुरी लालसा, व्‍यभिचार, मतबारौपन, पियक्‍कड़ और घृनित मूरती पूजा जहां तक हमनें पैहले समै बितायौ बुई भौत है। बे जा बजैह ते अचम्भौ करें कै तुम बिनकौ लुचपन में संग नांय दैमें, तौ बे तुमारी बुराई करैं। पर बिन जीबित और मरे भयेन कौ न्याय करबे बारे परमेस्‍वर कूं अपने चाल-चलन कौ हिसाब दिंगे। जाई मारे मरे भयेन कूं सुभ समाचार सुनांयौ गयौ, कै सरीर में तौ बिनकौ आदमी के अनुसार न्याय होय पर आतमा में बे परमेस्‍वर की इच्‍छा के अनुसार जीबित रहें। सब बातन के खतम हैबे कौ समै जौरें आय गयौऐ। जामारैं संयम के संग पिराथना करते भये सावधान रैहौ। सबते बड़ी बात तौ जि है कै एक दूसरे ते निरन्‍तर पिरेम करते रैहौ चौंकि पिरेम भौत पापन कूं ढक दैबै। बिना कुडकुडाये एक दूसरे कौ आदर सतकार करौ। जा काऊए जो जो वरदान मिलौ है, बू बाय परमेस्‍वर के नाना प्रकार के अनुग्रह ते भले भंडारी की तरैह ते, एक दूसरे की सेबा में लगाबै, अगर कोई बोलै तौ ऐसे बोलै जैसें परमेस्‍वर कौ वचन बोल रौ होय और सेबा करै तौ बा सामर्थ के संग, जौ परमेस्‍वर तुमें दैबै, इन सब बातन में ईसू मसीह के द्वारा परमेस्‍वर कूं महिमा मिलै और महिमा और सामर्थ युगानुयुग बाई कौय। ऐसौई होबे। हे प्यारे भईयाओ, जो दुख की आग तुमें परख रयी है, जाकौ तुम अचम्भौ मत करौ, जि कोई तुम पै अनोंखी नांय बीत रयी। अगर तुम लोग सताये जाओ तौ मसीह के दुख भोगबे में सहभागी बन जाबे के नाते खुस रैहौ। जा दिनां मसीह की महिमा पिरकट हैबैगी, तब तुम लोग खुसी मनांगे। अगर तुमारौ मसीह कौ नाम लैबे की बजैह ते अपमान करौ जाय और दुख उठानौ परै, तौ तुम अपने आप कूं धन्य समझौ, चौंकि जि जाकौ सबूते कै परमेस्‍वर की महिमा कौ आतमा तुमारे ऊपर छाया करै। सावधान रहौ, के तुम हत्‍यारे, चोर, कुकर्मी हैबे और दूसरेन के कामन में रुकाबट बनबे बारे बनकें दुख न उठामें। अगर तुम मसीह कूं मानबे की बजैह ते दुख उठामें तौ तुमें सरमानों नांय चहिऐं। पर तुमें मसीह के नाम कूं मानौऐ जा बजैह ते परमेस्‍वर की महिमा करनी चहिऐं। चौंकि अब न्याय कौ समै सुरू है गयौए। और परमेस्‍वर अपने निज घराने तेई न्याय सुरू कर रयौ है, तौ जिनें परमेस्‍वर के सुभ समाचार कूं नांय मानों तौ बिनकौ का हाल होगौ? सास्त्र में लिखौ है, “अगर धरमी आदमी कौ उद्धार पाबौ इतनौ कठिन है, तौ पापी आदमी के संग का होगौ?” जामारैं जो लोग परमेस्‍वर की इच्‍छा ते दुख उठाते भये काम करैं बे भलाई करते रैहमें और भरोसे योग्‍य सृस्‍टी करबे बारे परमेस्‍वर के हातन में अपने आप कूं सौंप देंमें। तुमारे बीच में जो कलिसिया के अगुवा हैं, मैं बिनते बिनती करुं। मैं खुद एक अगुवा हूं और मसीह ने जौ ताड़ना झेलीऐं, बिनकौ मैं खुद गबाह हूं और वाकी हैबे बारी महिमा कौ संगी हूं। जिन लोगन कौ झुंड तुमकूं परमेस्‍वर ने दयौए वाके अच्‍छे रखबारे बनके देखभाल करौ, जि काऊ के दबाब ते मत करौ पर परमेस्‍वर की इच्‍छा जानकें अपनी खुद की इच्‍छा ते करौ, जि काम काऊ धन के लालच की बजैह ते नांय पर सेबा के भाव ते करते रहौ। जो लोग तुमें सौंपे गये हैं बिनपै अपनों अधिकार मत जताऔ, पर बिनके काजै एक नमूना बनों। जब बू पिरधान चराबे बारौ आबैगौ तब तुमें महिमा कौ मुकुट दैबैगौ वाकी चमक कबऊ नां जाबैगी। हे जबानों जाई तरैह ते, तुमऊं कलिसिया के अगुवन की अधीनता कूं मानौ और नरमाई ते एक दूसरे की सेबा करते रैहौ चौंकि “परमेस्‍वर घमन्‍डीन कौ बिरोध करै और नरमाई बारेन पै दया करै।” जामारैं तुम अपने आप कूं सर्ब सक्‍तीमान परमेस्‍वर के हातन के नीचें नरम बनों तौ बू तुमें सही समै पै बढ़ाबैगौ। तुम अपनी सबरी चिन्‍ता बापै डार देओ, चौंकि बाय तुमारौ धियानें। साबधान है जाऔ और जागत रैहौ चौंकि तुमारौ बिरोधी सैतान, गर्जबे बारे सेर की तरैह जा ताक में रैहबै कै कब कौन कूं फार खाबै। तुम भरोसे में मजबूत हैकै सैतान कौ सामनों करौ। चौंकि तुम जि जानें के जा संसार भर में तुमारे भईया-बहन जाई तरैह ते ताड़ना झेल रयेऐं। अब परमेस्‍वर सबरी किरपा करबे बारौ है, जानें तुमकूं ईसू मसीह में कबऊ नांय खतम हैबे बारी महिमा में सामिल हैबे काजै बुलायोऐ, अब थोड़े समै के दुख उठाबे के बाद बू तुमें मजबूत करैगौ और टिके रैहबे में बलबन्‍त करैगौ। वाकौ राज युगानुयुग तक बनों रैहबै। ऐसौई होय। मैं सिलबानुस कूं भरोसे में अपनों भईया समझूं। तुमारे भरोसेऐ बढ़ाबे काजै परमेस्‍वर की सच्‍ची किरपा जेईऐ, जा बात की गबाही दैबे काजै जि चिठ्‌ठी लिख रयौऊं के तुम जामें मजबूत बने रैहौ। जो बेबीलोन की कलिसिया तुमारी नाईं चुनी भयी हैं बू और मसीह में मेरौ बेटा मरकुस तुमें नमस्‍कार करें। पिरेम ते एक दूसरे के गले मिलकें नमस्‍कार करौ। मसीह के सांचे लोग तुमें सान्‍ती मिलै। जि चिठ्‌ठी ईसू मसीह के भेजे भये चेला मुझ, सिमौन पतरस की ओर ते बिन लोगन काजैंऐ, जिनें हमारे परमेस्‍वर और हमारे उद्धारकरता मसीह ईसू की धारमिकता के द्वारा हमारौ सौ भौत कीमती भरोसौ पायौए। तुम परमेस्‍वर और हमारे पिरभू ईसू की पैहचान के द्वारा किरपा और सान्‍ती में भौतायत ते बढ़ते जाऔ। चौंकि हमारे जीबन के काजै और परमेस्‍वर की सेबा के काजै बानें हमें अपनी सामर्थ ते बू सब कछू दयौए जाकी हमे जरूरतै। चौंकि हम जानें कै बानें हमे अपनी धारमिकता और महिमा की बजैह ते बुलायोए। और बाई महिमा के पिरताप ते बानें अपनी भौत कीमती बाचा पूरी करीऐ, जाते हम खुद बा परमेस्‍वर के सुभाव में साझी है जांय और जा जगत के लोगन की बुरी इच्‍छा की बजैह ते हैबे बारे नांस ते बच जांय। जामारैं तुम अपनी पूरी लगन ते कोसिस करौ, जाते तुम अपने भरोसे कूं बढ़ा सकौ, भरोसे ते सदगुन और सदगुन की समझ ते, तुमारी समझ संयम ते और संयम ते धीरज और धीरज ते पिरेम की भक्‍ती, और पिरेम की भक्‍ती ते भाई चारौ और भाई चारे ते पिरेम में। अगर जे बात तुम में बनी रैहमें तौ तुमें पिरभू ईसू मसीह के पैहचानबे में तुमें निकम्मों और निसफल नां होन देंगी। और जा आदमी में जे बात नांय बू आदमी आँधरौ है और बाय धूंधरौ दीखै बू अपने पुराने पापन कूं धोकैं सुद्ध हैबौ भूल गयौऐ। हे भईयाओ, तुम जा काम के काजै बुलाये और चुने भयेऔ, बाय पूरौ करबे के जतन में लगे रहौ, अगर तुम ऐसौ करिंगे तौ तुम कबऊ भरोसे ते नां डगमगाएंगे। पिरभू और हमारे उद्धारकरता ईसू मसीह के कबऊ नां खतम हैबे बारे राज में आदर के संग घुस पांगे। जामारैं मैं तुमें बिन बातन कूं जिनै तुम जानें और जिनकौ तुमें सुभ समाचार मिलौऐ, बाई में बने रहौ, फिरऊ मैं तुमें जि याद दिवातौ रहुंगो। जब तक मैं जा सरीर में हतूं तब तक तुमें याद कराकें चेतातौ रहुंगो, जाय मैं अपने काजै ठीक समझूं। चौंकि मैं जि जानू के हमारे पिरभू ईसू मसीह के बताबे के अनुसार जा सरीर कूं जल्दी छोड़ देनोंऐ। जामारैं मैं सब तरैह ते जि जतन करूंगो कै मेरे मरबे के बाद तुम इन बातन कूं हमेसा याद कर सकौ। जब हमनें अपने लोगन कूं पिरभू ईसू मसीह के सामर्थ और आबे के बारे में तुमें बतायो हतो, बू कहानी कोई चालाकी ते नांय बनाई पर हमनें तौ वाकी जि महिमा आँखन ते देखीए और हम वाके गबाह हैं। जब बानें परमेस्‍वर पिता ते आदर और महिमा पाई, तब एक महिमा ते भरी भयी अबाज सुनाई दयी कै, “जि मेरौ प्यारौ बेटा है और जाते मैं भौत खुस हूं।” और जब हम वाके संग पबित्र पहाड़ पै हते तबऊ हमनें सुरग ते जि अबाज सुनी हती। और अब हमारे जौरें परमेस्‍वर की ओर ते बात बताबे बारेन कौ वचन है, बू घटना ते और मजबूत ठहरौए। तुम जि अच्‍छौ करैं कै तुम बाय जि समझकें ध्‍यान करैं के बू एक दीयौए है जो अन्धेरी जगैह में बा समै तक उजीतौ दैतौ रैहबैगौ जब तक सबेरौ हैबे की रोसनी नांय दिखाई दैबै, और तुमारे मन में भोर कौ तारौ निकरै। पर पैहले तुम जि जान लेओ कै पबित्र सास्त्र की कोई भविस्‍यबानी काऊ परमेस्‍वर की बात बताबे बारे की मनगढ़न्‍त कहानी नांय। चौंकि कोई भविस्‍यबानी कबऊ काऊ आदमी की ओर ते नांय हैबै, जब तक पबित्र आतमा बाय बोलबे काजै नांय बताबै। इसरायली लोगन में भौत से परमेस्‍वर के बारे में झूंठी बात बताबे बारे दिखाई दिंगे, बे तुमते भरमाबे बारी झूंठी बेमतलब की बात करिंगे और सांचे परमेस्‍वर कूं मानबे ते मने करिंगे, जाने बिनकूं मोल लैके छुड़ायौ है। और जाई तरैह ते बे अपने नास कौ कारन खुद बनिंगे। और भौत से लोग बिनकी तरैह लुचपन में पर जांगे जा बजे ते सच्‍चाई कौ रस्ता बदनाम हैबैगौ। बे लालच की बजैह ते झूंठी बनाबटी बातन ते धन कमाईंगे। बिनकी सजा तौ परमेस्‍वर भौत पैहले तैई तैय कर चुकौए, बिनकौ नास बिनै नास करबे काजै तैयार बैठौए। चौंकि परमेस्‍वर नें पाप करबे बारे सुरग दूतन कूं छमा नांय करौ और बिनकूं पाताल लोक की अंधेरी कोठरीन में डार दियौ कै बे आखरी न्याय के समै तक बाई में बन्द रैहमें। परमेस्‍वर नें पैहले युग की दुनियां कूं नांय छोड़ो, पर नूह की बा समै में रछा करी, जब अधर्मी दुनियां पै बाढ़ की पिरलै भेजी तब धरमी नूंह समेत आठ आदमी बचे हते। धारमिकता कौ पिरचार करबे बारौ नूंह जि सिक्छा दैतौ। परमेस्‍वर नें सदौम और अमोरा नगरन कूं ऐसौ दन्‍ड दियौ के बाकूं राख में मिला दियो हतो, जाते आबे बारे अधर्मी लोगन काजै एक चेताबनी ठहरै। पर बानें लूत कूं बचा लियौ हतो जो एक धरमी आदमी हतो और बू उदन्‍डी लोगन के बरताब ते दुखी रैहतो हतौ। चौंकि बू धरमी, अधर्मी लोगन के बीच में रैहतो और बिनके अधर्म के कामन कूं प्रतिदिन देखतो और सुनतो जाते वाकी आतमा भौत दुखी होती। जा तरैह ते पिरभू जानें के अपने लोगन कूं न्याय के दिना तक कैसै बचायौ जाबै और दुस्‍ट लोगन कूं दन्‍ड के काजै कैसे रखौ जाबै। परमेस्‍वर बिसेस तौर ते बिन लोगन कूं दन्‍ड दैबेगौ, जो सरीर की इच्‍छा कूं पूरी करबे काजै पाप ते भरी भई इच्‍छा ते जीबन कूं असुद्ध करें और इतने डीठ और घमन्‍डी है, कै बे सुरग की सक्‍ती और सामर्थ की बुराई करबे तेऊ नांय डरपैं। जबकि जि सुरग दूतऊ सामर्थी और भौत सक्‍तीसाली है, फिरऊ पिरभू के सामने बिनपै काऊ बुराई कौ दोस नांय लगा सकें। पर जे लोग तौ नासमझ जानबर की तरैह हैं। बू सिकार हैबे और मारे जाबे काजै पैदा भये हैं। बे बिन बातन की निन्दा करें जिनें बे नांय समझें। बे पसुन की तरैह नांस है जांगे। दूसरेन कौ बुरौ करबे के चक्‍कर में बिनकौ अपनौई बुरौ होगौ बिन्‍नें दिन दुपैरी में भोग-बिलास करबौ अच्‍छौ लगै। बे कलंकित और दोसी हैं जब जे लोग तुमारे संग दाबत खामें तौ, ऐसी औरत की ताक रैहमें कै जिनके संग कुकर्म करौ जा सके, जा तरैह बिनकी आंख पाप करबे ते बाज नांय आमें और बिचलित मन बारी औरतन कूं भरमाय लैमें हैं, और इनके मन पूरी तरैह ते लालच के आदी हैं। जे तौ स्राप की सन्तान हैं। जे लोग सीधे रस्ता ते भटककै बओर के बेटा बिलाम के रस्ता पै चलबे लगे हैं, बिलाम, जाकूं अधर्म की कमाई पियारी हती। पर वाके पाप के बारे में बाय एक गदहिया जो बोल नांय पाती, वाकी डांट खानी परी जौ एक आदमी की अबाज में बोली और बाय परमेस्‍वर की बात बताबे बारे कूं वाके पागल पन ते रोकौ। पर जे झूंठी सिछा दैबे बारे, सुखे कूआ और आँधी के उड़ाये भये बादर के जैसे हैं, बिनके काजै तौ कबऊ नांय खतम हैबे बारौ अंधेरौ ठहरायौए। बे बेकार की घमन्‍ड भरी बातनतें और लुचपन ते बिन लोगन कूं सरीर की अभिलासा में फसा लैमें जो भटके भयेन मेते निकर रये हैं। बे बिन नें आजाद करबे की सिछा देत हैं जबकि बे खुद वाके बन्धन में हतें। चौंकि जो कोई काऊऐ जीत लैबै बू बाको दास है जाबै। अगर तुम पिरभू और उद्धारकरता मसीह ईसू कूं जानबे के बाद और सांसारिक बन्धन में ते निकरबे के बाद फिर ते बाइ में फंसकें हार गये हैं तौ बिनकी जि हालत पैहले तेऊ बुरी होगी। जाते तौ जि अच्‍छौ होतौ के बे धारमिकता के रस्ता कूं जानई नां पाते, जो पबित्र आग्‍या बिनें मिली हती बाते मौंह मोड़ लैमें। बिन लोगन के काजै जि कहाबत बिलकुल सही बैठें कै, “कुत्‍ता अपनी उलटी के जौरें आबै।” और “एक सूगरिया नहाबे के बाद कीच में लोटबे काजै फिर लौट आबै।” हे मेरे प्यारे दोस्तो, मैं तुमें बिन बातन कूं याद दिबाबे के काजै जा दूसरी चिठ्‌ठीऐ लिख रयौऊं के मैंनें तुमारे सुद्ध मन कूं जगाबे कौ जतन करौय। तुम पबित्र परमेस्‍वर की बात बताबे बारेन की पैहले ते कही भई बातन कूं और पिरभू और अपने उद्धार करबे बारे की दई भई बा आग्‍या कूं याद करौ जो भेजे भये चेलान के द्वारा दई गयीं हती। जा बातै तुम पैहले ते जान लेओ के आखरी दिनन में अपनी बुरी इच्‍छा ते जीबे बारे, हसी उड़ायबे बारे हसी उड़ाते भये आंगे। और कहिंगे, “जौ मसीह नें फिर आयबे कौ बादा करौ, वाकौ का भयौ? चौंकि हमारे बाप दादा चल बसे जब ते जि दुनियां बैसेई चली आ रयी है।” पर बे तौ जा बाते जान बूजकै भूल गयेएं कै, परमेस्‍वर नें आकास और सबरी दुनियां कूं अपने वचन बोल के बनायौ और धरती पानी ते बनी और बाई में टिकी भई हैं। बा जुग की दुनियां पानी की पिरलय ते नास है गयी। पिरलय ने बाय पानी में डुबो दियौ। पर अब परमेस्‍वर के वचन के अनुसार जा समै के आकास और धरती कूं आग के काजै छोड़ रखौऐ, जब अधर्मी लोगन को न्याय होगौ और बे नास कर दिये जांगे। पर मेरे प्यारे दोस्तो, एक बात तुमते नांय छिपी रैहबै, कै पिरभू के काजै एक दिनां एक हजार साल के बराबर कौऐ और हजार साल एक दिनां के बराबर की हैं। पिरभू अपने बादे के काजै देर नांय करै जाय लोग कितनीं देर में समझें और तुमारे बारे में धीरज धरौ है कै बू जि नांय चाहबै के और कोई नास होय। पर सबन कूं मन फिराबे कौ मौकौ मिलै। पर पिरभू कौ दिना चोर की नाईं आबैगौ। बा दिना भयंकर गरजन के संग आकास बिलीन है जाबैगौ, आकास के पिन्‍ड आग में जरकें नास है जांगे, और जा धरती और धरती के सबरी चीज आग में जर जांन्गी। चौंकि जि सब चीज जा तरैह ते नस्‍ट हैबे बारीऐं, तौ तुम चाल-चलन में सब तरैह ते अच्‍छे काम करते भये पबित्र जीबन जीऔ। और परमेस्‍वर के बा दिन की बाट देखनी चहिऐं, और बा दिनां कूं जल्दी लायबे काजै कोसिस करौ, बा दिना आकास आग की लपट ते जरकें नस्‍ट है जाबैगौ और आकास के गन भौतई गरम हैके गल जांगे। पर परमेस्‍वर के बादा के अनुसार हम नये आकास और नई धरती की आसा देख रयेएं जामें धारमिकता ठहरेगी। जामारैं हे मेरे प्यारे मित्रों, जब तुम इन बातन की आसा देख रयेऔ तौ तुम जि जतन करौ कै सान्‍ती ते पिरभू की नजर में दोस रहित बेकसूर ठहरौ। अगर पिरभू अपनी सहन सीलता की बजैह ते देर करतै तौ जाय अपनों उद्धार समझौ। जो हमारे प्यारे भईया पौलुस नें परमेस्‍वर ते मिले ग्‍यान ते तुमारे काजै लिखौ हतौ। बैसैंई बानें अपनी सब चिठ्‌ठीन में जा बात कौ जिकर करौय, कितनीं बात तौ एसीऐं, जो हमारे समझबे काजै भौत मुस्‍किलें और नासमझ और भरोसे में अस्थिर लोग बिनके अर्थ कौ मतलब गलत बतामें और ऐसौई दूसरे सास्त्रन के संग करें ऐसौ करकें बे अपने पामन पै खुद कुलहाड़ी मार रये हैं। अब हे प्यारे भईयाओ, तुमें जे सब बात पैहले तैई समझाय दयीऐं के, तुम बुराईन में परकें भटक नांय जाऔ जामारैं तुम मजबूती में डटे रहौ। हमारे उद्धार करबे बारे हमारे पिरभू ईसू मसीह की किरपा और ग्‍यान में बड़ते जाऔ। अब हमेसा हमेसा वाकी महिमा होती रहै। ऐसौई होबे। हम बा वचन के बारे में जो सुरू ते हतो, और जाये हमनें सुनों और जाय अपनी आँखन ते देखौ और ध्‍यान ते निहारौ है और हातन ते छूऔ है वाके बारे में बात कर रहे हैं, और बू वचन ही जीबन है। बू जीबन पिरगट भयौ और हमनें बाकूँ देखौ और वाकी गबाही देते भये तुमारे सामईं जि घोसना करें, कै कबऊ नांय खतम हैबे बारौ जीबन जो परमेस्‍वर पिता के संग हतो हम पै पिरगट भयौ है। जो कछू हमनें देखौ और सुनो है बुई तुम लोगन कूं भी बतातैं, जाते तुमऊ हमारे संग, पिता और वाके बेटा ईसू मसीह के जीबन के सहभागी है जाऔ। हम इन बातन्‍नें तुमें जामारैं लिख रए हैं कै हम सबन की खुसी पूरी है जाय। जो समाचार हमनें ईसू मसीह ते सुनोंए बाय तुमऊऐं सुनामें, और बू जि है कै परमेस्‍वर उजीतौऐ, और बामें कछू अंधेरौ नांय। अगर हम सब कहें कै हम वाके संग संगती रखतें और अबऊ पाप के अंधेरे में जीबन जीतें, तौ हम झूंठ बोलें और सच्‍चाई पै नांय चलें। पर हम उजीते में जीबन जीतें, जैसै कै परमेस्‍वर खुद उजीतौए, तौ हम एक दूसरे के संग संगती करें, और वाके बेटा ईसू कौ खून हमारे सब पापन्‍ते हमें सुद्ध करै। अगर हम कहमें कै हम में कछू पाप नांय, तौ हम खुदई कूं धोकौ दैमें और हम में सच्‍चाई नांय। अगर हम परमेस्‍वर के सामने अपने सब पाप कूं मानलें, तौ बू हमारे पाप कूं मांफ करवे और हमें अधर्म ते सुद्ध करैगौ चौंकि बू भरोसे योग्‍य और धरमी है। अगर हम कैहतें कै हमनें कछू पाप नांय करौ तौ हम बाय झूठो ठहरातें, और बाको वचन हम में नांय। हे मेरे बालकौ मैं जिन बातन्‍नें तुमें जा बजैह ते लिख रयौऊं कै तुम पाप नांय करौ। अगर कोई पाप करे तौ, परमेस्‍वर पिता के जौरें हमारौ एक सहायक है और बू है धरमी ईसू मसीह। बाई नें हमारे पापन के प्रायस्चित के काजै अपने आप कूं बलिदान करौय, और वाकौ जि बलिदान केवल हमारेई काजै नांय बल्कि सबरे संसार के पापन के काजैऊ है। अगर हम परमेस्‍वर की आग्‍या को पालन करें तौ, हमें जि निस्चित है जाते, कै हम बाकूँ जानतें। पर कोई जि कैहबे कै,मैं परमेस्‍वर कूं जान गयौऊं, और वाकी आग्‍या को पालन ना करै तौ बू झूठौ है और बामें सच्‍चाई नांय। पर कोई परमेस्‍वर के वचन पै चलते तौ बामें सचमुच परमेस्‍वर को पिरेम सिध्द भयौ है, जाते हम जान जामें कै हम बामें बने भये हैं। और जो कोई जि कहबै कै मैं परमेस्‍वर में बनो भयौऊं तौ बाय ईसू मसीह के जैसौ जीबन जीनों चहिऐ। हे मेरे प्यारे भाईयाऔ, मैं तुमें कोई नयी आग्‍या नांय लिख रयौ, जि बुई पुरानी आग्‍या है, जो सुरू तेई हती और जो तुमनें पैहले तेई सुनी है। पर मैं तुम्हें एक और नयी आग्‍या लिख रौऊ। जो सच, मसीह के जीबन में और तुम्हारे जीबन मेंऊं पिरकट भयी है, चौंकि अंधेरौ मिट रयौ है और सच्‍चे पिरभू को उजीतौ चमकबे लगौ है। अगर कोई जि कहबै कै मैं उजीते मेंऊं, और परमेस्‍वर पै भरोसौ करबे बारे भईयन ते दुसमनी रखते, तौ बू अबई तक अंधेरे मेंई है। पर जो परमेस्‍वर पै भरोसौ करबे बारे भईयन ते पिरेम रखै बू उजीते में रहते, और बू काऊ तरीका ते ठोकर नां खा सकत। पर जो परमेस्‍वर पै भरोसौ करबे बारे भईयन ते दुसमनी रखते बू अंधेरे में, और अंधेरे में ही चलते और बू जि नां जानें के बू कहाँ जा रयौ है, चौंकि अंधेरे नें बू अन्धो कर दियौ है। हे प्यारे बालकौ मैं तुमें जा बजैह ते लिख रयौऊं, चौंकि ईसू मसीह के सामर्थी नाम तेई तुमारे पाप मांफ करे गये हैं। हे पिताऔ मैं तुमें जा बजैह ते लिख रयौऊं, चौंकि तुम बाय जानें, बू सुरूबात तेई स्थिर है। हे जबानों मैं तुमें जा बजैह ते लिख रयौऊं चौंकि तुमनें दुस्‍ट पै जीत हासिल कर लयी है। हे प्यारे बालकौ में तुमें जा बजैह ते लिख रयौऊं, चौंकि तुम बा परमेस्‍वर पिता कूं जान गये हैं। हे पिताऔ में तुमें जा बजैह ते लिख रयौऊं चौंकि तुम बाय जो सुरूबातई स्थिर है बाय जान गए हौ, हे जबानों मैने तुमारे काजै जा बजैह तै लिख रयौऊं चौंकि तुम ताकतवर औ, परमेस्‍वर कौ वचन तुममें बनो भयौ है ओर तुमनें बा दुस्‍ट पै जीत हासिल कर लयी है। संसार ते पिरेम मत करौ और न बिन चीजन्‍ते जो संसार में हैं, अगर कोई संसार ते पिरेम करै, तौ बामें परमेस्‍वर पिता कौ पिरेम नांय। चौंकि जो कछू जा संसार में है, जैसे सरीर की अभिलासा, मन की बुरी अभिलासा और जीबन कौ घमन्‍ड, जि सब परमेस्‍वर पिता की ओर ते नांय, पर संसार की ओर तेई है। जि संसार और जा संसार की बुरी अभिलासा तौ खतम है जांगी, पर बू जो परमेस्‍वर की इच्‍छा पै चलै बू हमेसा बनों रहबैगौ। हे प्यारे बालकौ अन्‍त कौ समै जौरें है, और जैसे तुमने सुनों है कै मसीह कौ बिरोधी आबे बारौ है। और जा समैऊ भौतसे मसीह के बिरोधी आ गये हैं, जाते हम जान जातै कै अन्‍त कौ समै आ गयौ है। बे हम में तेई निकरे हैं, पर बे सच में हम में तै नांय। चौंकि बे हम में तै होंते तौ हमारे संग रहते, पर बे हम में ते निकर गये जाते जि निस्चित है, जाबै के बे सच में हम में ते नांय। पर तुम लोगन नें तौ परमेस्‍वर की ओर ते पबित्र आतमा मिलौ है जामारैं तुम सच्‍चाई कूं जानें। मैं तुमें जा बजैह ते ना लिख रयौ कै तुम सच्‍चाईऐ नां जानें, पर जा बजैह ते लिख रयौऊं कै तुम सच्‍चाईऐ जानतौ कै काऊ सच्‍चाई में झूंठ नांय होत। पर झूठों बुई है, जो ईसू कूं मसीह नांय मानें। बुई मसीह कौ बिरोधी है, बू परमेस्‍वर पिता और पुत्र दोनोंन कूं नांय अपनाबै। जो पुत्र कूं नांय अपनाबै बू पिताऊऐ नांय अपनाबै पर जो पुत्र कूं अपनाबै बू पिताऊऐ अपनाबै। जो सिछा तुम लोगन नें सुरू ते सुनीं है बू तुम में बनी रैहबै। अगर बू सिछा तुम में बनी रैहबेगी तौ तुमंऊ पिता और पुत्र में बने रिंगे। मसीह नें खुद हमते कबऊ नांय खतम हैबे बारे जीबन कूं दैवे की प्रतिग्‍या करी है। मैंनें जि बात तुम लोगन कूं, बिन लोगन ते साबधान करबे कूं लिखीं है, जो तुमकूं भरोसे ते भटकाबो चाहमें। तुम लोगन कूं परमेस्‍वर ते जो पबित्र आतमा मिलौ है, बू तुम में बनों भयौ है, जामारैं तुमें काऊ दूसरे गुरू की जरूरत नांय जो तुमें सिखाबै कै सही का है। पबित्र आतमा तुमें सब कछू सिखाबै। और वाकी सिछा सच्‍ची है झूंठी नांय। बानें तुमें जैसे सिखायौ है तुम मसीह में बैसेई बने रहौ। हे मेरे प्यारे बालकौ! अब तुम मसीह में बने रहौ, चौंकि जब बू बापस आबेगौ, तौ तुममें हिम्मत होगी और वाके सामईं लज्‍जित नांय होनों परैगौ। अगर तुम जि जानें कै मसीह धरमी है, तौ तुम जेऊ जान लेओ कै जो कोई बा धारमिकता पै चलै, बू परमेस्‍वर की सन्‍तान है। देखौ परमेस्‍वर पिता नें हमते कितनों पिरेम करौ है, कै हम वाकी सन्‍तान कहलाबें, और हम सच में बुई है। पर जा संसार के लोग हमें पैहचान्‍तई नांय कै हम वाकी सन्‍तान हैं, चौंकि बे परमेस्‍वर कूंई नांय जानें। हे प्यारे भईयाओ अब हम परमेस्‍वर की सन्‍तान है, पर जि अबऊ तक हमें नांय पतौ कै हम का बनिंगे हम इतनौई जान्‍तें कै जब परमेस्‍वर कौ बेटा पिरगट होगौ, तौ हम बाई के जैसे बन जांगे चौंकि हम बाय बैसौई देखिगें जैसो कि बू बास्तव में है। जो कोई मसीह पै आसा रखतें बाय अपने आप कूं बैसौई सुद्ध बनानों चहिऐ जैसौ मसीह सुद्ध है। जो कोई अधर्म करतै बू परमेस्‍वर की आग्‍या कूं नां मानें और परमेस्‍वर की आग्‍या कूं न मानबौई पाप है। और तुम जानतौ कै मसीह हमारे सब पापन कूं दूर करबे कूं आयौ, और बामें कोई पाप नांय। जामारैं अगर हम मसीह में बने रैहतें तौ हम पाप में जीबन ना जीमें, पर जो पाप करते रैहमें बिन्‍नें बाकूं नांय देखौ और बे बाय नांय जानें। हे प्यारे बालकौ काऊ के बहकाबे में मत आऔ, चौंकि जो धरम के काम करतें बै बू धरमी है, जैसै मसीह धरमी है। जो कोई पाप करतै बू सैतान की सन्‍तान है, चौंकि सैतान सुरू ते पाप करतौ चलौ आ रयौ है, परमेस्‍वर को बेटा जाके मारे आयौ के बू सैतान के कामन्‍नें खतम कर देय। पर जो कोई परमेस्‍वर ते पैदा भयौ है, बू पाप में जीबन नांय जीत, चौंकि परमेस्‍वर कौ जीबन बामें बनो रैहबै। और बू पाप में जीबन जीअई नां सकै, चौंकि परमेस्‍वर वाकौ पिता है। परमेस्‍वर की सन्‍तान और सैतान की सन्‍तान की पहचान जि है, कै जो धरम के काम नांय करें, बू परमेस्‍वर की सन्‍तान नांय और जो अपने भईया ते पिरेम नांय करें बेऊ वाकी सन्‍तान नांय। चौंकि तुमने जो समाचार सुरू ते सुनौ है, बू जि है कै तुमें एक-दूसरे ते पिरेम करनों चहिऐं। हमें बा कैन की तरह ते नांय होनौं चहिऐं जो दुस्‍ट की सन्‍तान ओ, बानें अपनों भईया मारौ, और बानें अपने भईया कूं काहे कूं मारौ? चौंकि वाके खुद के काम दुस्‍टता के हतै और वाके भईया के काम धरम के हते हे भईयाओ अगर संसार तुमते बैर करै तौ जापै अचम्भौ मत करौ हम जान्‍तें कै हमनें मौत तै निकरकै जीबन में पिरवेस करौ है, चौंकि हम अपने बिसबासी भईया और बहनन ते पिरेम करतें जो पिरेम नांय करे बू मौत की दसा में रैहतें। जो अपने बिसबासी भईया ते बैर करै बू हत्‍यारौ है, और तुम जि जानें कै काऊ हत्‍यारे के पास, कबऊ नांय खतम हैबे बारौ जीबन नांय। ईसू मसीह नें अपने पिरान कूं हमारे काजै दैदियौ, जई ते हमें पतौ चलते कै सच्‍चौ पिरेम का है। जई तरैह ते हमऊंऐं अपने भईयन के काजै पिरान देबे काजै तईयार रहनों चहिऐं। अगर काऊ के जौरें सांसारिक धन-दौलत होय, और बू अपने भईया की जरूरत में वाकी मदत नांय करै तौ, बामे परमेस्‍वर को पिरेम कैसे बनों रह सकै? हे प्यारे बालकौ हमें अपने बिसबासी भईयन ते केवल सब्द और मौंह तेई पिरेम नांय करनों चहिऐं, पर करमन ते और सच्‍चे मन ते एक-दूसरे कूं पिरेम करनों चहिऐं। जई बजैह ते हम जान पातें, कै हम सच्‍चाई में जीबन जीमें, और जाते हम जब परमेस्‍वर के सामने खडे हुंगे तौ हमकूं बड़ौ साहस मिलेगौ। जाके बाबजूदऊ अगर हमारे बुरे कामन की बजैह ते हमारौ मन सरमिन्दौ हैबै तौ, हमें जि याद रखनों चहिऐं, कै परमेस्‍वर हमारे मन ते बड़ौ है और बू सब कछु जानें। हे प्यारे भईयाओ अगर हमारौ मन साफ है तौ, परमेस्‍वर के सामने हमकूं बड़ौ साहस मिलेगौ। हम बाते जो कछु मागिगें, बू हमें बुई दैवेगौ चौंकि हम वाकी आग्‍या कौ पालन करतैं, और बुई करतैं जो बाय अच्‍छौ लगतै। और परमेस्‍वर की आग्‍या जेई है, के हम वाके बेटा ईसू मसीह के सामर्थी नाम में भरोसौ करें और एक दूसरे ते पिरेम करें जैसो के ईसू नें हमकूं आग्‍या दयी है। और जो ईसू की आग्‍या मान्‍ते बे परमेस्‍वर में बने रैहते और परमेस्‍वर बामे, और जाई तै हम जान पाबते के वु हममें बनो रहतै चौंकि बानें हमकूँ अपनों आतमा दियौ है। हे प्यारे भईयाओ! हरेक आतमा कौ भरोसौ मत करौ, पर आतमा कूं पैहचानों कै बू परमेस्‍वर की ओर ते हते कै नांय, चौंकि संसार में भौत से परमेस्‍वर के बारे में झूंठी बात बतायबे बारे है गये हैं। परमेस्‍वर की आतमा कूं तुम जा तरैह ते पैहचान सकें, कै जो आतमा जि मानें कै, “ईसू मसीह मनुस्‍य के रूप में जा धरती पै आयौ।” बू आतमा परमेस्‍वर की ओर ते है। पर हर बू आतमा जो परमेस्‍वर के बेटा ईसू के बारे में जा बात कूं ना मान्‍त, बू परमेस्‍वर की ओर ते नांय। बेई मसीह के बिरोधी की आतमाऐ, जाके बारे में तुम पैहले ते सुन चुकेओ, कै बू आबे बारौ है, और अब तौ बू जा संसार में आ चुकौ है। हे प्यारे बालकौ! तुम परमेस्‍वर केहो और तुमनें मसीह के बिरोधीन पै जीत पाई है। चौंकि तुम में रैहबे बारौ परमेस्‍वर जा संसार में रहबे बारे सैतान तेऊ बड़ौ है। बे जो मसीह के बिरोधी हैं बू जा संसार के हैं, जामारैं बे संसार की बात करें, और संसार बिनकी सुनें। पर हम परमेस्‍वर के हैं और जो परमेस्‍वर कूं जानें, बू हमारी सुनें और जो परमेस्‍वर कूं नांय जानें, बे हमारी सुनबोई नांय चाहमें, जा तरैह ते हम सत्‍य की आतमा और भटकाबे बारी आतमा की पहचान कर सकें। हे प्यारे भईयाओ! हम सब एक दूसरे ते पिरेम करें चौंकि पिरेम परमेस्‍वर ते है और जो पिरेम करें, बू परमेस्‍वर की सन्‍तान है और परमेस्‍वर कूं जानें। जो परमेस्‍वर ते पिरेम नांय करै, बू परमेस्‍वर कूं नांय जान पायो चौंकि परमेस्‍वर ही पिरेम है। परमेस्‍वर नें अपनों पिरेम ऐसें दिखाऔ कै बानें हमारे काजै अपनों इकलौता बेटा संसार में भेजौ, कै हम वाके द्वारा जीबन पामें। सच्‍चौ पिरेम जामें नांय के हमनें परमेस्‍वर ते पिरेम करौ, बलकि जामें है कै बानें हमते पिरेम करौ, और हमारे पापन कूं दूर करबे काजै, अपने बेटा कूं बलिदान है बे काजै संसार में भेजौ। हे प्यारे भईयाओ! अगर परमेस्‍वर नें हमते इतनों पिरेम करौ है तौ हमऊंऐं एक-दूसरे ते पिरेम करनों चहिऐं। काऊनें परमेस्‍वर कूं कबऊ नांय देखौ, अगर हम आपस में पिरेम रखें तौ परमेस्‍वर हम में बनो रहबै, और वाकौ पिरेम हमारे भीतर पूरौ है जाबै। जाई ते हम जानें कै, हम परमेस्‍वर में बने भये हैं और परमेस्‍वर हम में, चौंकि बानें अपनी आतमा हमकूँ दई है। परमेस्‍वर पिता नें अपने बेटा कूं संसार के उद्धारकरता के रूप में भेजौ। बाय हमनें देखौ है और हम वाकी गबाही देमें। जो कोई जि मानें कै, “ईसू परमेस्‍वर कौ बेटा है,” तौ परमेस्‍वर बामें निबास करै और बू परमेस्‍वर में। और जो पिरेम परमेस्‍वर हमते रखै, बाय हम जान गये है, और हमें जापै पूरौ भरोसौऊ है। परमेस्‍वर पिरेम है, और जो पिरेम में बनों रैहबै, बू परमेस्‍वर में निबास करै और परमेस्‍वर बामें। और जाई ते पिरेम हम में पक्‍कौ भयौ कै हम में न्याय के दिना में भरोसौ बनों रैहबै। हमारौ जि भरोसौ जा बजैह ते बनों भयौ है कै हम जा संसार में जो जीबन जी रये हैं बू मसीह के जीबन जैसौ है। पिरेम में डर नांय होबै, पर सिद्ध पिरेम डर कूं खतम कर दैबै चौंकि डर कौ सम्बन्ध दन्‍ड ते हैवै और जो डर करै वु पिरेम में सिध्द नांय। हम जाई बजैह ते पिरेम करतें, चौंकि बानें पैहले हम सबनते पिरेम करौ हतो। जो कोई जि कैहबै, “मैं परमेस्‍वर ते पिरेम करूं,” और अपने भईया ते बैर रखै तौ बू झूंठौ है, जो अपने भईया ते जाये बानें देखौ है, बाते पिरेम नांय करै तौ बू बा परमेस्‍वर ते कैसैं पिरेम कर सकै? जाये बानें देखौऊ नांय। और मसीह ते हमें जि आग्‍या मिली है कै जो परमेस्‍वर ते पिरेम करै बाय अपने भईया तेऊ पिरेम करनों चहिऐं। जो लोग जि भरोसौ करें कै ईसूई, मसीह है, बे लोग परमेस्‍वर की सन्‍तान है, और जो कोई परमेस्‍वर पिता ते पिरेम करै बू वाकी सन्‍तान तेऊ पिरेम करै। जब हम परमेस्‍वर ते पिरेम करें और वाकी आग्‍यान नें मानें, तौ हमें वाकी सन्‍तान तेऊ पिरेम करनों चहिऐं। परमेस्‍वर ते पिरेम करबे कौ मतलब जि है कै हम वाकी आग्‍यान नें मानें। वाकी आग्‍या कठिन नांय। चौंकि परमेस्‍वर की हर सन्‍तान संसार पै बिजय पा लैबै। संसार के ऊपर जो बिजय मिलै बू हमारे भरोसे तेई मिलै। संसार पै बुई बिजय पा सकै जाकौ जि भरोसौ है कै, ईसूई परमेस्‍वर कौ पुत्र है। बू तौ ईसू मसीहई है, जो हमारे जौरें बपतीस्मा के पानी और क्रूस पै बहाये गये अपने खून के संग आयौ। बू केवल बपतीस्मा के पानी केई संग नांय, बल्कि पानी और खून के संग आयौ, जाके बारे में परमेस्‍वर की आतमा गबाही देतै चौंकि आतमा सच्‍ची है। जा तरैह की जि तीनों गबाही दैमें है, पानी, आतमा और खून तीनों एकई बात कहमें। जब हम लोगन की गबाही मान लैमें, तौ परमेस्‍वर की गबाही तौ बाते बढ़कें है, और परमेस्‍वर की गबाही जि है, कै बानें अपने पुत्र के बारे में खुदई गबाही दई है। जो परमेस्‍वर के पुत्र पै भरोसौ करतै, वाके हृदय में परमेस्‍वर की जि गबाही मौजूद रैहबै। जो परमेस्‍वर पै भरोसौ नांय करें बे बाय झूठों समझें चौंकि बू पुत्र के बारे में परमेस्‍वर की गबाहीऐ नांय मानें। और बू गबाही जि है कै परमेस्‍वर नें हमें कबऊ नांय खतम हैबे बारौ जीबन दयौए और बू जीबन वाके पुत्र ईसू मसीह में है। जाके जौरें पुत्र है वाके जौरें कबऊ नांय खतम हैबे बारौ जीबनें और जाके जौरें परमेस्‍वर कौ पुत्र नांय, वाके जौरें कबऊ नांय खतम हैबे बारौ जीबन नांय। जो परमेस्‍वर के पुत्र के नाम पै भरोसौ करें मैं बिन सबन के काजै जि बात लिख रयौऊं, जाते तुम जि जान लेओ कै कबऊ नांय खतम हैबे बारौ जीबन तुमारे जौरेईऐ। हमारौ परमेस्‍वर में जि भरोसौए कै, जब हम वाकी इच्‍छा के अनुसार पिराथना करें तौ बू हमारी सुनें। हम जि बात जानें कै हम जो कछू मांगें, बू हमारी पिराथना सुनें, और हम जेऊ जानें कै अब तक हमनें जो कछू मांगौऐ, बू हमें मिल गयौऐ। अगर कोई अपने भईयाए ऐसौ पाप करते भये देखै जाकौ फल मौत नांय है, तौ बाय अपने भईया के काजै पिराथना करनी चहिऐं। परमेस्‍वर बाय जीबन देगौ। मैं उन लोगन के जीबन के बारे में बात कर रयौऊं, जो ऐसे पाप में लगे भयेऐं, जो उन्‍नें हमेसा की मौंत तक नांय पौंहचाबै। ऐसेऊ पाप हैमें जिनकौ फल मौत है। मैं तुमते ऐसे पाप के काजै पिराथना करबे की नांय कैह रयो। सब तरैह के अधर्म पाप हैं, पर कछू पाप एसैऊएं जो हमेसा की मौत की ओर नांय लै जामें। हम जानें कै जाकूं परमेस्‍वर नें चुन लयौऐ बू पाप में जीबन नांय जीबै और परमेस्‍वर बाकूं बचाबैगौ, और बाय सैतान कूं छूअनऊ नांय देबेगौ हम जानतैं कै हम परमेस्‍वर के हैं पर सबरौ संसार बा सैतान के बस में है। हम जानें कै परमेस्‍वर कौ पुत्र आयौ है, और बानें हमें जि समझ दई है कै हम सच्‍चे परमेस्‍वर कूं पैहचान लैमें और बामे रैहमें जो सच्‍चौए, मतलब परमेस्‍वर के पुत्र ईसू मसीह के संग, सच्‍चौ परमेस्‍वर और कबऊ नांय खतम हैबे बारौ जीबन जेईऐ। हे प्यारे बालकौ तुम अपने आपकूं मूरतीन ते बचायकै रखौ, चौंकि बे परमेस्‍वर नांय। मैं कलिसिया कौ मुखिया यहुन्‍ना, जि चिठ्‌ठी बा औरत कूं, और वाकी सन्‍तान के काजै लिख रयौऊं, जाये परमेस्‍वर नें चुनों है, और जाये मैं सच्‍चाई की बजैह ते पिरेम करूं, और केबल मैं ही नांय पर बे सब बाय पिरेम करें, जो परमेस्‍वर की सच्‍चाई कूं जान गये हैं। और जि सब बा सच्‍चाई की बजैह ते भयौ है, जो हम में बनी भयी है और हमेसा हमेसा तक बनी रैहबैगी। परमेस्‍वर पिता हमें अनुग्रह, किरपा और सान्‍ती दैबै और वाके बेटा ईसू मसीह की सच्‍चाई और पिरेम हमेसा हमारे साथ रैहबै। मोय बड़ी खुसी मिली जब मैंनें तेरे कछू बालकन कूं बा सत्‍य की आग्‍या पै चलते भए पायो, जो हमें परमेस्‍वर पिता की ओर ते मिली हती। अब हे औरत, मैं तोए याद दिबाते भये जि लिख रयौऊं कै, हम बिसबासिन कूं आपस एक दूसरे ते पिरेम रखनों चहिऐं, जि आग्‍या नई नांय, पर जि बोई आग्‍या जौ हमें सुरू ते मिलीऐ। पिरेम कौ मतलब जिऐ कै हम वाकी आग्‍यान पै चलें। जि बोई आग्‍या है जो तुमनें सुरू ते सुनी है, और तुमें बापै चलनोंऊं चहिऐं। संसार में भौत से भटकाबे बारे फैल गये हैं। बे लोग जि नांय मानें कै, ईसू मसीह जा धरती पै मनुस्‍य के रूप में आयौ है। ऐसैई लोग धोकौ दैवे बारे और मसीह के बिरोधी हैं। अब तुम जाके बारे में साबधान रहौ कै, जाके काजै हमनें जो कठोर मेहनत करीए वाकौ फल खो मत दियौं, पर तुमें तौ अपनों पूरौ फल पानोंए। अगर कोई आदमी भौत आगे बढ़ जाबै और मसीह की सच्‍ची सिक्छा पै नांय टिकौ रैहबै, तौ बू पिता परमेस्‍वर कूं नांय पाय सकै, पर जो मसीह की सच्‍ची सिक्छा पै टिकौ रैहबैगौ, बू पिता परमेस्‍वर और पुत्र ईसू मसीह दोनोंन कूं पाय लैबै। अगर कोई आदमी तुम लोगन के जौरें आबै और बू मसीह की सच्‍ची सिक्छा नांय दैवै, तौ बाय न तौ अपने घर में आन दियौ और न बाकूं नमस्‍कार करौ। चौंकि जौ आदमी, ऐसे आदमी कौ आदर सत्‍कार करै, बू वाके बुरे कामन में भागीदार बनें। मोय तुम लोगन कूं भौत कछू लिखनोंए पर मैं स्‍याही ते कागज पै और लिखबौ नांय चाहूं, पर मोय जि आसाऐ कै मैं तुमारे सामने आकें बात करूं जाते हमारी खुसी पूरी है जाबै। तेरी पियारी बहन के बालकन की ओर ते तुमकूं नमस्‍कार। जिन्हें परमेस्‍वर नें चुनों है। मैं, यहुन्‍ना कलिसिया कौ मुखिया जि चिठ्‌ठी, गयुस कै काजै लिख रयौऊं, जाते मैं सच्‍चौ पिरेम करूं। हे मेरे प्यारे भईया, मैं पिराथना करूं कै तू जा तरैह ते आतमा में तरक्‍की कर रयेऔ बैसेंई सब बातन में तरक्‍की कर,और तू सरीर तेऊ भलौ चंगौ रह। चौंकि कछू भईया य्हांपै आये बिन्‍नें तेरी सच्‍चाई की गबाही दई,जापै तू सच मुच कूं चल रयेओ तौ मोय भौत बड़ी खुसी भई, और मोय काऊ बात में इतनी खुसी नांय भई जितनी जा बातै सुनकें कै तुम मेरे बालक सच्‍चाई के रस्ता पै चल रये हैं। है मेरे प्यारे भईया, तू बिसबासी भईयन के भले काजै भौत कछू करै, चाहे बू परदेसी चौं नाय हों। जो पिरेम तैनें बिनपै दिखायोए बिन्‍नें बा पिरेम गबाही कलिसिया के सामयी दई है। अगर तू बिनकी अगली यात्रा के काजै एसेईं प्रबन्ध करैगौ, जैसौ परमेस्‍वर के पबित्र लोगन के काजै अच्‍छौ है। चौंकि बे मसीह की सेबा काजै निकरे है और बे परमेस्‍वर कूं नांय मानबे बारे लोगन ते कछू मदत नांय लैमें। जामारैं हम में, जो बिसबासी है बिनकौ ऐसौई स्‍वागत करनों चहिऐं, जाते हमारौ काम सच्‍चाई की सेबा में बिनकौ संगी बन सकें। मैंनें कलिसिया के काजै एक चिठ्‌ठी लिखी, पर दियोतेफेस, जो मांकौ पिरधान बनबौ चाहतौ। बानें हमें नांय अपनांयौ। जब मैं आऊंगौ तब वाके कामन की बाय याद दिबाऊगौ, कै बू हमारे बारे में कैसे कैसे झूंठ बोलकें बुरी बातन के संग मोपै दोस लगाबै, और बू केबल जेई नां करै, पर भरोसौ करबे बारे भईयन कौऊ आदरमान नांय करै, और जो कोई बिनकौ आदरमान करबौ चांहबै बिनकूं नांय करन दैबै और बिनकूं कलिसिया ते बाहर धकेल दैबै। है मेरे प्यारे भईयाओ, बुराई के पीछे मत चलौ पर भलाई कौ पीछौ करौ, भलाई परमेस्‍वर की ओर ते है, पर बुराई परमेस्‍वर की ओर ते नांय। और जो बुराई करै बानें परमेस्‍वर कूं नांय जानौं। देमेत्रियुस के बारे में हर काऊ ने अच्‍छी गबाही दई है, य्हां तक कै जि सचऊ है। हमनेंऊ वाके बारे में गबाही दैमें और तुमतौ जानें कै हमारी गबाही सच्‍ची है। तोय लिखबे काजै मोपै भौत सी बात हैं जिन्‍नें मैं कलम और स्‍याही ते लिखनौं नांय चाहूं। पर मोय जि आसाऐ कै मैं तुमते जल्दी मिलूंगो, तब हम आमने सामने बात करिंगे। तोए सान्‍ती मिलै। य्हांपै रैहबे बारे तेरे मित्र तोए नमस्‍कार करें। तू सबरे बिसबासी भईयन कूं एक-एक करकैं नमस्‍कार कह दियौं। मैं,यहूदा, ईसू मसीह कौ सेबक और याकूब कौ भईया हूं, जि चिठ्‌ठी परमेस्‍वर के बुलाए भयेन कूं, जिनें परमेस्‍वर पिता पिरेम करै और ईसू मसीह के काजै अलग करे गये है, बिनकूं लिख रयौऊं। तुम लोगन कूं किरपा, सान्‍ती और पिरेम बहुतायत ते मिलती रैहबै। हे प्यारे भईयाओ, हम जा उद्धार में बराबर के सहभागी हैं। मैं वाके बारे में तुमें लिखबे की कोसिस कर रयौ हतो, पर अब मैंनें जि जरूरी समझौ कै, जा चिठ्‌ठी के द्वारा तुम लोगन ते जि बिनती करूं कै तुम लोग बा भरोसे में बने रैहबे काजै संघर्स करौ, जो सदा काजै परमेस्‍वर के पबित्र लोगन कूं सौंपौ गयौ है। चौंकि कछू आदमी तुम लोगन के बीच में चुपचाप घुस आये हैं। इन लोगन की सजा के बारे में भौत समै पैहलेईं पबित्र सास्त्र में लिखौ भयौ है। जे लोग परमेस्‍वर ते दूर हैं और इन्‍नें परमेस्‍वर के अनुग्रह कूं भोग-बिलास कौ एक बहानों बनां डारौ है, और जे हमारे एकमात्र स्‍वामी पिरभू ईसू मसीह कूं नांय मानें। इन सब बातन कूं तुम लोग अच्‍छी तरैह ते जानें, फिरऊ मैं तुमें याद दिबाबौ चाहूं कै, पिरभू नें मिस्र देस ते इसरायली लोगन कूं बचायकैं निकार लायौ हतो। पर बाद में जिन्‍नें भरोसौ नांय करौ, बिनकौ नास कर दियौ हतो। मैं तुमें जेऊ याद दिब्बा रयौऊ कै, जिन सुरग दूतन नें अपने पद कूं संभालकै नांय रखौ और अपने खुद की रैहबे की जगैह कूं छोड़ दियौ हतो, परमेस्‍वर नें बिनऊंऐं न्याय के दिन के काजै नरक के अंधेरे में, जो सदा काल काजै है बेड़िन में बांधकै रखौ है। जाई तरैह ते सदौम और अमोरा और वाके आस पास के नगरन नें बिन सुरग दूतन की तरैह व्‍यभिचार करौ और बे अप्राकृतिक बासनान के दास बन गये हते। बू हमें चेतावनी दैवे काजै कबऊ न बुझबे बारी आग कौ दन्‍ड पा रये हैं। ठीक जाई तरैह ते तुम लोगन के बीच में घुस आबे बारे जे लोग अपने सपनेन के पीछै दौड़ते भये, अपने सरीर कूं असुद्ध कर रये हैं। जे पिरभू की सामर्थ कूं तुच्‍छ समझें और महिमावान सुरग दूतन कूं बुरौ भलौ कहमें। पर जब पिरधान सुरग दूत मिकाईल सैतान के संग बाद-बिबाद करते भये मूसा की लास के बारे में बहस कर रयौ हतो कै, मूसा की लास किनके जौरें रैहबैगी, तब मिकाईल सुरग दूत नेंऊं बुरौ भलौ कैहकै सैतान पै दोस लगाबे की हिम्मत नांय करी। पर बानें बाते केवल जेई कही कै, “पिरभू तोय फटकारै।” पर जे लोग बिन बातन की निन्दा करें, जिनें जि समझ नांय। जे बेसमझ जानबर की तरैह ते, जिन बातन कूं सुभाब तेई जानें, बे बिनईं के द्वारा नास है जामें। हाय, बिन लोगन पै, जो कैन के जैसे बुराई के रस्ता पै चल रये हते। जे रुपईयन के काजै बिलाम की नांई भटक गये और कोरह की तरैह बिद्रोह करबे के कारन नास कर दये गये हते। जे लोग तुमारी दावतन में बिन छुपी भयी चट्टानन की तरैह ते हैं, जो घातक हैं। जे लोग बेधड़क तुमारे संग खामें पीमें, पर बिनें केवल अपनेई स्‍बार्थ की चिन्‍ता रैहबै। जे बिन बादरन की तरैह ते हैं, जो हबा के संग चलै,पर बारिस नांय लामें। जे पतझड़ के ऐसे पेड़न की तरैह हैं जो फल नांय दैमें, जि पेड़ पूरी तरैह ते जो दो बार मर चुके हैं, जिनें जड़ ते उखाड़ दियौ गयौ है। जे समुनदर की ऐसी भयानक लहरें जो अपनी बेसरमी कौ झाग उछारैं। जे इतकूं बितकूं भटकते भये ऐसे तारेन की तरैह हैं जिनके काजै अनन्‍त काल तक गैहरौ अंधेरौ ठहरायौ गयौ है। आदम के बाद सातवीं पीढ़ी के हनोक नेंऊं बिन लोगन के बारे में जि कैहते भये भविस्‍यबानी करी हती कै, “देखौ, पिरभू अपने हजारों हजार पबित्र दूतन के संग आकैं, सब लोगन कौ न्याय करैगौ। लोगन नें जितने बुरे काम करे हैं, बिनके काजै और जिन्‍नें परमेस्‍वर के बिरोध में बुरे वचन बोले हैं, पिरभू बिन सब बातन के काजै बिनें दोसी ठहराबैगौ।” जे बे लोग हैं, जो भुनभुनाते रैहमें और दूसरेन में खोट निकारते रैहमें। जे अपनी इच्‍छान के अनुसार चलबे बारे हैं और अपने मौंह ते घमन्‍ड की बात बोलें और अपने लाभ के काजै दूसरेन की खुसामद करें। पर हे प्यारे भईयाओ, तुम बिन बातन कूं याद रखौ, जो हमारे पिरभू ईसू मसीह के भेजे भये चेलान नें पैहलेंई कही हतीं। बिन्‍नें कही हती कै, “अंत समै में ऐसे लोग होंगे, जो परमेस्‍वर के पबित्र लोगन की हसी उड़ाय करिंगे और अपनी बुरी इच्‍छान के पीछै चले करिंगे।” जे लोग तुम लोगन में फूट डालें। जे अपनी सारीरिक बुरी इच्‍छान के दास हैं, इनमें पबित्र आतमा नांय। पर हे प्यारे भईयाओ, तुम एक दूसरे कूं आतमिक रूप ते अपने अति पबित्र भरोसे में मजबूत करते रेओ और पबित्र आतमा ते पिराथना करते रेओ। तुम अपने आप कूं परमेस्‍वर के पिरेम में बनाए रखौ और बा दिना कौ इन्‍तजार करौ जब हमारे पिरभू ईसू मसीह की किरपा हमकूं कबऊ नांय खतम हैबे बारौ जीबन की ओर लै जाबैगी। जिन लोगन कौ भरोसौ मजबूत नांय बिनपै दया करौ। दूसरे लोगन कूं आग में ते झपटकें निकाल लेओ और बिनपै भय के संग दया करते समै सावधान रेओ पर बिनके कपड़न तक घृना करौ जो पाप पूर्न सरीर के द्वारा कलंकित है गये हैं। अब परमेस्‍वर जो तुमें पाप में गिरबे ते बचा सकै और अपनी महिमा की भरपूरी के सामने आनन्दित और बिना दोस के खड़ौ कर सकै, और जो हमारे पिरभू ईसू मसीह के द्वारा उद्धार करतै, बाई एकमात्र परमेस्‍वर की महिमा, बैभव, पराक्रम और अधिकार सदा-सदा ते अब तक और युगानुयुग तक बनों रैहबै। ऐसौई हैबै! जा किताब में बे बात लिखी गयीं है जो ईसू मसीह नें दरसन के द्वारा बताईं हैं। जे बात परमेस्‍वर नें ईसू मसीह कूं बताई हैं जाते बू परमेस्‍वर के दासन कूं जे बता सकै कै आबे बारे समै में जल्दी हैबे बारी हैं और बानें अपने सुरग दूत कूं भेजकें अपने दास यूहन्‍ना कूं जे बात बताईं। यूहन्‍ना नें परमेस्‍वर कौ वचन और ईसू मसीह की गबाही और जो कछू देखौ वाकी गबाही दई। धन्य है बू जो भविस्‍यबानी के वचन कूं पढ़े और सुनें और जामें लिखी भई बातन कूं मानें चौंकि समै भौत जौरें है। मैं, यूहन्‍ना आसिया की सातौ कलीसियन के नाम लिख रयौऊं, जो है और जो हतो और जो आवे बारौ है बा परमेस्‍वर की ओर ते और बिन सातौ आतमन की ओर ते जो वाकी राजगद्‍दी के सामने हैं। और जो भरोसेमंद गबाही और मरे भयेन में ते जीबित हैबे बारौ पैहलौठौ है और सबरी धरती के राजान कौ हाकिम है। बा ईसू मसीह की ओर ते तुमें किरपा और सान्‍ती मिलती रैहबै। बू हमते पिरेम करै, जाने अपने खून के द्वारा हमारे सबरे पाप छुड़ा दिये हैं। बानें हमें एक राजबंस और अपने पिता परमेस्‍वर की सेबा करबे काजै पुरोहित बना दियौ हैं और बिनकी महिमा और पराक्रम युगानुयुग होती रैहबै। ऐसौई हैबै। देखौ, बू बादरन पै आबे बारौ है, हरेक आँख बाय आते भये देखेगी और बेऊ जिन्‍ने बाय मारौ हतो, बेऊ बाय देखिंगे और धरती के सगरे कुल वाके कारन छाती पीटिंगे। ऐसौई हैबै। हमारौ पिरभू परमेस्‍वर जो हतैए, जो हतो और जो आवे बारौ है, बुई सर्वसक्‍तीमान जि कैहबै कै, “मैं ही अलफा और ओमेगा हूं।” मैं यूहन्‍ना जो तुमारौ भईयाऊं, जो ईसू मसीह कौ कलेस और राज में, धीरज में तुमारौ सहभागी रहौ, परमेस्‍वर के वचन और ईसू मसीह की गबाही के कारन देस निकारौ दैकें पतमुस नाम के टापू में भेज दियौ हतो। मैं पिरभू के दिनन में पबित्र आतमा में आ गयौ और मैंनें तुरही के समान बड़े सब्द में मेरे पीछे जे कैहते भये सुनौ, “जो कछू तू देखै बू सब किताब में लिखलै और सातों कलिसिया के जौरे भेज दै मतलब इफिसुस, और स्मुरना, पिरगामुन, थूआतीरा, सरदिस, फिलदेलफिया और लौदिकिया कूं।” तव मैंनें जो बोल रयो हतो बाय देखिबे काजै अपनों मौंह पीछे फेरौ और मुड़कें मैंनें सात सौने की दीबट देखीं। और बिन दीबटन के बीच में मनुस्‍य के बेटा के समान आदमी देखौ, जो पामन तक कपड़ा पैहनें भये हतो और वाकी छाती पै सौने को पट्‍टा बंधौ भयौ हतो। वाके सिर के बाल ओरे तेऊ जादा सफेद हते और वाकी आँख धधकती भयी आग के समान हतीं। वाके पाम बढ़िया पीतल की तरैह हते, मानों आग की भट्‍टी में तपाये गये होंय और वाकी अबाज भौत पानी की गरजन की तरैह हती। बू अपने सीदे हात में सात तारे लिये भये हतो और वाके मौंह ते तेज दुधारी तलबार निकर रई हती। वाकौ म्हों ऐसौ तेज चमक रयौ हतो जैसे सूरज की तेज कर्री घाम। जब मैंनें देखौ तौ मैं वाके पामन पै मुर्दे जैसौ गिर गयौ और बानें मेरे सिर पै सीधौ हात रखकें कही, “डरपै मत। मैं पैहलौ और आखरी हूं। मैं बुईऊं जाके जौरें जीबन है। मैं पैहले मर गयौ हतो, अब युगानुयुग जीबतौ हूं। देखौ, मौत और पाताल की तारी मेरे जौरें है। जामारैं तू बिन बातन कूं जो तैंनें देखी हैं, और जो बात है रयीं हैं और जो जाके बाद हैबे बारीऐ बिन सबन कूं लिखलै। मतलब बिन सात तारेन कौ भेद जो तैनें मेरे सीदे हात पै देखौ हतो, और बिन सात सौने की दीबटन कौ भेद, बे सात तारे सातौ कलीसियन के दूत हैं, और बे सात दीबट सात कलिसिया है। “इफिसुस की कलिसिया के दूत कूं जि लिख। “जो अपने सीदे हात में सातों तारे लिये भये और सौने की सात दीबटन के बीच में घूमें, बे जे कहमें कै, मैं तेरे कामन कूं, तेरी मेहनत और तेरे सबर कूं जानूं। मैं जेऊ जानूं कै तू बुरे लोगन कूं पसन्द नांय करै, और जो अपने आपकूं प्रेरित तौ कहमें पर बे हत नांय, बे तैनें परख केऊ देख लिये हैं कै बे झूंठे हैं। तोय सबर तौ हते पर तैनें मेरे नाम के काजै कस्ट उठायो, पर कस्ट उठातै-उठातै थकौ नांय। पर मोय तोते एक सिकायत है कै तैनें मोते पैहलौ जैसो पिरेम करबौ छोड़ दियौ है। जामारैं याद कर तू कहां ते गिरौ है, जामारैं मन फिरा और पैहले जैसे काम कर और अगर तू अपनों मन न फिराबैगौ तौ मैं तेरे जौरें आकैं बा स्थान ते तेरी दीबटें हटा दुंगो। पर हाँ तोमें एक बात तौ हते के तू निकुलईयन के लोगन के कामन ते नफरत करै जिनते मैऊं नफरत करूं। “जाके कान हौंय बू सुन लेय के कलिसियान ते आतमा का कैह रयौ है। “जो जय पाबैगौ बाय मैं बा जीबन के पेड़ में ते जो परमेस्‍वर के बगीचा में लगायौ है वाकौ फल खाबे के काजै दुंगो।” “स्मुरना की कलिसिया के दूत कूं जि लिख। “बू जो पैहलौ और आखरी हतो जो मर गयोओ और फिरते जीबित है गयौऐ। बू जि कैहबै कै, मैं तुमारी कलेस और गरीबी कूं जानूं। तुम हकीकत में धनी हतो। मैं बिनकी निन्दा कूंअऊं जानूं, जो अपने आप कूं यहुदी कहमें पर बे हत नांय, बे सैतान की सभा हैं। जो दुख तोय झेलने हैं बे तौ झेलनेई हैं पर बिनते तू डरपियो मत। चौंकि सैतान तुम मैं ते कछुन्‍नें जेल खाने में डारैगौ और बे परखे जांगे और दस दिनां तक कलेस उठांगे। चाहे तुमें मौत आ जाबे तौऊ भरोसे योग्‍य रहिओं तौ मैं तुमें जीबन कौ मुकुट दुंगो। जाके कान हौंय बू सुन लेय कै कलिसिया ते आतमा का कैहबै। जो जय पाबैगो बाय दूसरी मौत ते कोई नुकसान नांय होगो।” “पिरगामुन की कलिसिया के दूत कूं जि लिख। “बापै दुधारी तलबारै, बू जि कैहबै कै, मैं जानूं झांपै तू रैहबै म्हांपै सैतान की राजगद्‍दी है। और म्हांई पै तू मेरे नाम मेंऊ टिकौ भयौए और तू हमेसा काजै भरोसेमंद रहो और तू बिन दिनन मेंऊ भरोसे ते पीछे नांय हटो और ना मेरौ नाम को इनकार करो बा समै पै मेरौ भरोसेमन्द गबाह अन्तिपास बा जगह पै मारौ गयौ ज्हांपै सैतानऊ रैहबै। मोय तोते कछू सिकायत है तुम मेंते कछू लोग जो बिलाम की सिक्छाये मानें। जाने बालाक कूं इसरायल के आगें ठोकर को कारन रखबौ सिखायौ कै बे मूरतिन पै चढ़ायौ भयौ भोजन खामें और व्‍यभिचार करें। य्हांपै कछू लोग एसैऊएं जो निकुलईयन की सिक्छाये मानें। जामारैं अपनों मन फिरा, नांय तौ मैं जल्दी आकें अपने मोंह की तलबार ते बिनते युद्ध करूंगो। “जाके कान हौंय बू सुन लेय के कलिसिया ते आतमा का कैहबै। “जो जीतैगौ बाय मैं गुप्‍त कौ मन्‍ना दुंगो और सफेद पत्थर प्रदान करुंगो, बा पत्थर पै एक नयौ नाम लिखौ भयौ होगौ। बा नाम कूं पाबे बारोई जान सकै।” “थूआतीरा की कलिसिया के दूत कूं लिख। “परमेस्‍वर कौ पुत्र जाकी आँख आग की लपट की समान है और वाके पांम बढिया पीतल की तरैह है, बू तोते जे कैहबै कै, तेरौ काम और तेरौ भरोसौ, पिरेम,सेबा और तेरी धीरज के संग सहन सक्‍ती कूं मैं जानूं। मैं जानूं कै जो काम पैहले करतो बाते और जादा कर रयौ है। पर मोय तोते जि सिकायत है, बा स्त्री इजेबेल जो अपने आप कूं परमेस्‍वर की बात बताबे बारी कहबै बाय रैहन देतौ, जौ अपने आप कूं परमेस्‍वर की बात बताबे बारी और मेरे दासन कूं बिभचार करबे मूर्ती के आगें चढ़ाई भई चीजन्‍नें खबाकें भरमाबै। मैंनें बाय मन फिराबे कौ मौकौ दियौ, पर बू अपने व्‍यभिचार ते मन फिराबौ नांय चाहबै। देख, मैं बाय बीमारी की खाट पै डार दुंगो और वाके संग जो व्यभिचार करबे बारे हैं बे अपने कामन ते मन नांय फिरांगे तौ मैं बिनपै बड़ी बिपत्‍ती डारुंगो। और वाके बालकन ने मार दुंगो तब सब कलिसिया जान लिंगी मैं तुमारे मन और बुद्धी कौ जानबे बारोऊं, मैं तुमें हर एक कूं बिनके कामन के अनुसार बदलो दुंगो। “पर तुम थूआतीरा के वाकी लोगन ते जितने जा सिक्छाये नांय मानें, जिनते जो सैतान की गहरी बातन के भेद नांय जानें। जे कहमें, कै मैं ओर बोझ नांय डारुंगो। पर हाँ जो सिक्छा तुमारे जौरें हते बाय मेरे आबे तक मान्‍ते रेओ। जो जीतैगौ और जिन बातन कूं मानबे काजै मैंनें आदेस दियौ बिन्‍नें अन्त तक मान्‍तौ रैहबैगौ तौ मैं बिन्‍नें संसार के सब लोगन पै अधिकार दुंगो। बू लोहे के राजदन्ड ते राज करैगौ और मांटी के बासनन की तरैह चकनाचूर कर देगौ, मैंनेंऊ बैसेंई अधिकार अपने पिता ते पायोऐ, और मैं बाय भोर के तारे की तरैह चमकाऊंगौ। “जाके कान हौंय बू सुन लेय के कलिसिया ते आतमा का कैहबै।” “सरदिस की कलिसिया के दूत कूं जि लिख। “जाके जौरें परमेस्‍वर की सात आतमांऐं और सात तारे हैं, बू जे कहमें, कै मैं वाके कामन्‍नें तौ जानूं, बे लोग अपने आपकूं जीबित कहमें, पर बे जीबित नांय, जामारैं मैं तुमते कैहतूं जो चीज बची भई हैं और जो नांस हैबे बारीऐं, बिन्‍नें मजबूत करलै। चौंकि मैंनें तेरौ कोई काम मेरे परमेस्‍वर की नजर में पूरौ नांय पायो। जामारैं तू चेत जा और यादकर कै तैनें कैसी सिक्छा पाईए और सुनीए तू बाई में बनो रैह और अपनों मन फिरा, जो तू चेतैगो नांय तौ मैं चोर की तरैह ते आ जाऊंगो, और तू कबऊ नांय जान पाबैगौ के मैं तेरे जौरें कब आ परूंगो। “हाँ पर सरदिस में तेरे ज्हां कछू लोग एसेऊ हते, जिन्‍नें अपने कपड़ा मैले नांय करै। बे सफेद कपड़ा पैहनिंगे और बे मेरे संग घूमिंगे चौंकि बे जाई लायक हैं। और जो जय पाबैगौ, बाय जाई तरैह ते सफेद कपड़ा पैहनांये जांगे, बाको नाम जीबन की किताब में लिखौ जाबैगौ, बाय मैं काऊ रीति ते नांय काटुंगो और मैं बाय अपने परमेस्‍वर पिता के और वाके सुरग दूतन के सामने अपना लुंगो। जाके कान हौंय बू सुन लेय के कलिसिया ते आतमा का कैहबै।” “फिलदेलफिया की कलिसिया के दूत कूं जि लिख। “जो पबित्र और सच्‍चौ है जाके हात में राजा दाऊद की तारीऐ, जाके खोले भये दरबाजेए कोई बन्द नांय कर सकै और जाके बन्द करे भये दरबाजेए कोई खोल नांय सकै बू जे कैहबै कै, मैं तेरे कामन कूं जानूं। देख, मैंनें तेरे सामने एक द्वार खोलोए, जाय कोई बन्द नांय कर सकै। तेरी सामर्थ थोड़ी सी कम तौ हते पर फिरऊ तैनें मेरे वचन को पालन करौए और मेरे नाम कौ इन्कार नांय करो। देख, मैं बिन दुस्टन की मन्‍डली कूं तेरे बस में कर दुंगो। जो यहुदी बन बैठे है, पर बे हत नांय और झूंठ बोलें। देख, मैं ऐसौ करूंगो कै बे आकें तेरे पामन में गिरिंगे तब तू जान लैबैगो के मैं तोते कितनों पिरेम करुं। तैनें मेरे धीरज के वचन कूं मानोंए और मैं तोय परीक्छा के बा समै में बचाय कें रखूंगो, धरती पै रैहबे बारेन के बा परखवे के काजै संसार में आबै, मैं जलदी आबे बारोऊं, जो कछू तोपे हतेये बाय तू पकड़े रैह कोई तेरौ जीबन को मुकुट छीन नांय लेय। जो जय पावेगो बाय में अपने परमेस्‍वर के बड़े पिराथना घर को खम्भा बनांऊंगो और बाय फिर कबऊ कोई बामें ते बाहर नांय निकारैगौ। मैं अपने परमेस्‍वर कौ नाम और परमेस्‍वर के नगर, नये येरूसलेम जो मेरे परमेस्‍वर के जौरें सुरगते उतरबे बारौ है वाकौ नाम और मैं अपनों नयौ नाम बापै लिखूंगो। जाके कान हौंय बू सुन लेय के कलिसिया ते आतमा का कैहबै।” “लौदिकिया की कलिसिया के दूत कूं जि लिख। “जो ऐसौई हैबै और भरोसेमंद सच्‍चौ गबाह और परमेस्‍वर की सृस्‍टी को मूल कारनें। बू जे कैहबै, मैं तेरे कामन कूं जानूं, तू ना तौ ठन्‍डौ और न गर्म। भलौ होतौ कै तू ठन्‍डौ या गर्म होतो, तू गुनगुनोयें, तू न तौ ठन्‍डौए और न गर्मे, देख मैं जामारैं तोय उगलवे पेऊं। तू जे कैहबै कै, ‘मैं धनी है गयौऊं और धनबान है गयौऊं मोय काऊ बात की घटी नांय।’ जामारैं तू जि नांय जानें कै तू कितनौ अभागौ और तुच्‍छ और कंगाल और अन्धौ और नंगौए। जा बजैह ते मैं तोय सलाह दऊं के तू आग में ते तपो भयौ सौनों मोपैते मोल लैलै, जाते तू धनी है जाय। और सफेद कपड़ा खरीदलै और जाय पहनकें अपने नंगेपन की लज्जा बचालै। और सुरमा लैलै बाय अपनी आँखन में लगा लै जाते तू देखवे लगै। “मैं जिन जिनते पिरेम करुं बिनें तारना दऊं और उलाहनों दऊं जा बजैह ते तू उत्साहित हो और अपने पापन ते मन फिरा। देख, मैं द्वार पै खड़ौ खटखटाऊं। जौ कोई मेरी अबाज सुनकें द्वार खोलेगौ, मैं वाके घर में आकें भोजन करूंगो और बू मेरे संग भोजन करैगौ। “जो जय पाबैगो बाय मैं राजगद्‍दी पै बैठाऊंगो जैसे मैं बिजयी हैकें पिता के संग राजगद्‍दी पै बैठोऊं। जाके कान होय बू सुन लेय कै आतमा कलिसिया ते का कैहबै।” इन बातन के बाद मैनें अपनी आँखन ते देखौ, सुरग में एक द्वार खुलौ भयौए। तुरही के समान एक बड़ी अबाज जो मैंनें पैहले सुनी बानें मोते कही, “मेरे जौरें ऊपर आ। मैं बिन बातन नें तोय दिखाऊंगो जिनकौ हैबो पक्‍कौ है।” फिर मैं तबई पबित्र आतमा मोय ऊपर उठा लै गयौ। और मैनें देखौ कै सुरग में एक राजगद्‍दी रखीऐ और बापै कोई बैठौए, बू असब और लाल मनिक्य के समान चमक रयौ हतो। राजगद्‍दी के चारों ओर हरे पन्‍ना के समान मेघ धनुस दीख रयौ हतो। बा राजगद्‍दी के चारौ ओर गोलाई में चौबीस राजगद्‍दी हतीं और बिनपे चौबीस अगुवे सफेद कपड़ा पैहने भये बैठे हते। और बिनके सिरन पै सौने के मुकुट हते। बा राजगद्‍दी में ते बिजली की चकाचौंध, घड़घड़ाहट, बादल की गर्जन निकल रयी हती। और राजगद्‍दी के सामनेई लपलपाती भई सात मसालें जल रयीं हतीं। जे मसालें परमेस्‍वर की सात आतमांऐ हैं। राजगद्‍दी के ठीक सामने आर-पार दीखबे बारे कांच के जैसौ समुन्दर हैं। राजगद्‍दी के चारों ओर चार जीबते पिरानी और वाके आगे और पीछे आँखईं आँख हतीं। पैहलो जीबित पिरानी सेर के समान और दूसरौ जीबित पिरानी बैल के समानै और तीसरौ जीबित पिरानी आदमी के समान और चौथौ जीबित पिरानी उड़ते भये उकाब की नाईं हतो। बिन चारौ जीबित पिरानीन के छै छै पंख हते और बिनके चारौ लंग आँखई-आँखे हतीं और बिना थके भये परमेस्‍वर की महिमा कर रये हते और जि कैह रये “पबित्र, पबित्र, पबित्र पिरभू परमेस्‍वर, सर्वसक्‍तीमान जो हतो, जो है और जो आयबे बारौ है।” जो राजगद्‍दी पै बैठौए, बू युगानुयुग जीबित है, बाको आदर, महिमा, धन्यबाद कर रये हैं। बे चौबीसऊ बुजुर्ग वाके पाँमन में गिरकें जो युगानुयुग जीबित है वाके सामने उपासना करें और अपनों मुकुट सिंहासन के सामने डार देमें और कहमें, “हे हमारे पिरभू और परमेस्‍वर, तू आदर, महिमा और सामर्थ के योग्य है। चौंकि जो कछू तैनें बनांयौ है, बू सब कछू तेरी मरजी ते बनांयो भयौ है और जीबतै।” जो राजगद्‍दी पै बैठौ भयौए वाके सीदे हात में, मैंनें लपटी भयी एक किताब देखी बू भीतर और बाहर लिखी भई हती और बू सात मौहर लगाय के बन्द करी गई हतीं। फिर मैंनें एक बलबान सुरग दूत देखौ, जो ऊंची अबाज ते जि कैह रयो हतो कै, “जा किताबे खोलबे बारौ और जाकी मौहरै खोलबे बारौ, जा लायक कोऐ।” और न तौ सुरग में, और न धरती पै, न धरती के नीचे कोई बा किताबै खोलबे और बापै निगाह करवे बारौ कोई नांय निकरौ। तब मैं भौत फूट फूटकै रोयौ चौंकि मोय बा किताबै खोलबे बारौ और बापे निगाह करबे के लायक कोई नांय मिलौ। जा बजैह ते बिन बुजुर्गन में ते एक नें मोते कही, “मत रोबै। देख, यहूदा के गोत में ते एक सेर है जो दाऊद कौ मूलै। जा किताब की मौहरें खोलवे और तोड़बे काजै बिजयी भयौ है।” तब मैंनें बा राजगद्‍दी के और चारौं जीबते पिरानीन और बुजुर्गन के बीच में, एक मैमना देखौ, जो मारे भये मैमना जैसौ हतो। वाके सात सींग और सात आँख हती जे परमेस्‍वर की आतमाऐ हतीं जो सबरी धरती पै भेजी गईं हतीं। बानें आयकें जो राजगद्‍दी पै बैठौ, सीदे हात ते बू किताब लै लयी जब बानें बू किताब लै लयी। तब बे चौबीसऊ बुजुर्ग और चारौ जीबते पिरानी बा मेमनां के सामने गिर पडे़। और बिनमें ते हर एक के हात में बीनां और धूप ते भरे भये सौने के कटोरा हते और जे पबित्र लोगन की पिराथना हतीं। और जब बे नए गीत गायबे लगे, “तू जा किताबे लैबे के लायक और मौहर के खोलबे के लायक है, तू मारौ भयौ और तैनें अपनों खून बहायकैं परमेस्‍वर के काजै हरेक कुल, हरेक भासा और हरेक जाती मैं ते लोगन कूं मोल लै लियौ है। और बिन्नें हमारे परमेस्‍वर के काजै एक राज और पुरोहित कौ समाज बनांय दियो, के बे धरती पै राज करिंगे।” जब बा राजगद्‍दी और बिन जीबते पिरानी और बुजुर्गन के चारौं और भौत से सुरग दूतन की अबाज सुनाई दयी, बिनकी गिनती लाख और करोड़न मैं हती। बे जोर-जोर ते कैह रये हते, कै मारौ भयौ मैमना धन बुद्धि आदर महिमा सामर्थ, सक्‍ती और धन्यबाद के लायक है। फिर मैंनें सुरग में और धरती में और वाके बीच में जो चीज बनी भईं हैं। बिन्‍नें जि कैहते भये सुनों कै, “मैमना बा राजगद्‍दी पै बैठबे बारे को धन्यबाद, और आदर, और महिमा और राज युगानुयुग रैहबै।” और चारौं जीबते पिरानिन नें कही ऐसौई हैबै और बुजुर्गन ने दन्‍डबत करी। तब मैंनें मैमना कूं बिन सात मौहरन में ते पैहली मौहर कूं खोलते भये देखौ। और बिन चारौं जीबते पिरानीन में ते एक की बादर गरजबे के जैसी अबाज सुनी “आओ।” तब मैंनें एक सफेद घोड़ा देखौ, बापै जो सबार हतो वाके हात में तीर कमान हतो और बाय मुकुट दियौ गयौ हतो, और बू जय की अबाज करतौ भयौ जय पायबे काजै निकर परौ। और तब मैमना नें दूसरी मौहर खोली तब मैं ने दूसरे जीबते पिरानी कूं जि कैहते भये सुनौ कै “आओ।” मैंनें एक और लाल रंग कौ घोड़ा बाहर आतौ देखौ, वाके ऊपर जो सबार बैठो हतो वाके हात में एक लम्बी तलबार दयी गयी हती। बाय जि अधिकार दियौ गयौ, बू सबरी धरती की सान्‍ती कूं नांस करै और लोग एक दूसरेन नें मारैं। जब मैमना नें तीसरी मौहर खोली तब मैंनें तीसरे जीबते पिरानी कूं जि कैहते भये सुनौ कै “आऔ।” और मैंनें निगाह करकें देखौ कै एक कारे रंग कौ घोड़ा हतो वाके ऊपर जो बैठो हतो वाके हात में तराजू हतो। तब मैंनें चारौं जीबते पिरानीन के बीच में ते जि अबाज आते भये सुनी कै, “आयबे बारे अकाल के दिनांन में एक दिनां की मजदूरी के बदले केवल एक दिनां के खायबे के काजै गेंहू मिलैगौ या एक दिनां की मजदूरी के बदले केवल तीन दिनां के खायबे के काजै जौ मिलैगौ, पर जैतून के तेल और अंगूर कौ रस के भाव में कोई बदलाब नांय होगौ।” जब मैमना नें चौथी मौहर खोली तौ मैंनें चौथे जीबते पिरानी कूं जि कैहते भये सुनी कै “आऔ।” और मैंनें एक पीरौ घोड़ा देखौ, वाके ऊपर जो सबार हतो बाको नाम “मौत” हतो, नरक वाके पीछे-पीछे हतो, बाय एक चौथाई धरती कौ अधिकार दियौ गयौ हतो कै बू अकाल, महामारी ते, तलबार ते और जंगली पसुअन के द्वारा लोगन कूं मार दें। जब मैमना नें पाँचमी मौहर खोली तब मैंनें बेदी के नीचे मरे भये लोगन की आतमा देखी, जो परमेस्‍वर के वचन और वाकी गबाही की बजैह ते मारे गये हते। बिनकी आंतमाऐं जोर-जोर की अबाज ते कैह रयीं हतीं, “हे पबित्र और सच्‍चे पिरभू, तू हमें इन धरती के लोगन ते और हमारौ खून बहायबे बारेन ते हमारौ न्याय कब करैगौ?” और बिनें सफेद कपड़ा दिये गये और बिनते कही कै, “थोड़े समै तक और सबर करौ जब तक कै मसीह में मारे भये बिसबासी भईयन और तुमारे संगीन की गिनती पूरी नांय है जाय।” जब मैमना नें छटी मौहर खोली तौ मैंनें देखौ कै एक बड़ौ भूकम्प आयौ और सूरज को रंग कौला की तरैह कारौ है गयौ और चन्दा कौ रंग खून की तरैह ते लाल है गयौ। आकास के तारे धरती पै ऐसें गिर परे जैसें जोर की आँधी में अंजीर के पेड़ के हिलबे ते वाके कच्‍चे फल गिर जामें। आकास ऐसें सरक गयौ जैसें काऊ नें कागज कौ पुलिन्दा लपेट लियौ होय और पहाड़ और टापू अपनी अपनी जगैह ते हटा दिये गये। और धरती के राजा, पिरधान, सरदार, धनबान और सामर्थी लोग, हर एक दास,और हर एक आजाद पहाड़न की खौहन में और चट्टानन में जायकै दुबक गये। और बे पहाड़ और चट्टानन ते कैहबे लगे, “हमारे ऊपर गिर परौ। हमें वाके मौंह ते जो राजगद्‍दी पै बैठो है, और मैमना के कोप ते दुबकाय लेओ। चौंकि बिनके गुस्सा कौ भयानक दिन आ गयौ है, ऐसौ को है जो जाय झेल सकै?” जाके बाद मैंनें धरती के चारौं कोनेन पै चार सुरग दूतन कूं खडे देखौ, बे धरती की सबरी हबाये पकरे भये हते। जाते धरती पै या समुन्दर पै या फिर काऊ पेड़ पै हबा न चलै। फिर मैंनें एक और सुरग दूत कूं जीबते परमेस्‍वर की मौहर लये भये पूरब ते ऊपर की ओर आवत भये देखौ, बानें बिन चारौ सुरग दूतन ते जिनें धरती और समुन्दर को नुकसान करवे को अधिकार मिलौ भयौ हतो ऊंचे अबाज ते पुकार के कही के, “जब तक हम हमारे परमेस्‍वर के दासन के मांथे पै मौहर न लगाय दें, तब तक धरती पै और समुन्दर पै और पेड़न कूं नुकसान मत पौंहचईयों।” जिन पै मौहर लगाई गयी मैंनें बिनकी गिनती सुनी, के इसरायल की सन्तान के सब गोतन मैं ते एक लाख चौबालिस हजार पै मौहर लगाई गई हती। यहूदा के गोत में ते बारह हजार पै, रूबेन के गोत में ते बारह हजार पै, गाद के गोत में ते बारह हजार पै। आसेर के गोत में ते बारह हजार पै, नप्‍ताली के गोत में ते बारह हजार पै, मनश्शे के गोत में ते बारह हजार पै। सिमौन के गोत में ते बारह हजार पै, लेबी के गोत में ते बारह हजार पै, इस्साकर के गोत में ते बारह हजार पै। जबूलून के गोत में ते बारह हजार पै, यूसुफ के गोत में ते बारह हजार पै, और बिन्यामीन के गोत में ते बारह हजार पै, मौहर लगाई गई। जाके बाद मैने निगाह करकें देखौ, के हरेक देस, हरेक जात, हरेक कुल, हरेक भासा के लोगन की एक भौत बड़ी भीड़ जाय कोई गिन नांय सकै, बे सब सफेद कपड़ा पैहने और अपने हात में खजूर की डाली लिये भये राजगद्‍दी और मैमना के सामने खड़ी है। और बड़े जोर की अबाज ते पुकार कें कैह रैह हैं, “उद्धार के काजै, हमारे परमेस्‍वर की जो राजगद्‍दी पै बैठौए और मैमना की जय जय कार हो।” सबरे सुरग दूत बा राजगद्‍दी के और बुजुर्ग और चारौं जीबते पिरानीन के चारौं और खड़े हते। बिन्‍नें परमेस्‍वर कूं दन्डबत करकें कही, “ऐसौई हैबै! हमारे परमेस्‍वर की महिमा और स्तुति, और ग्‍यान, और धन्यबाद, और आदर और सामर्थ, और सक्‍ती हमेसा हमेसा बनी रैहबै। ऐसौई हैबै।” जापै बिन बुजुर्गन मैं ते एक नें मोते कही, “जे सफेद कपड़ा पैहने भये को है? और कहाँ ते आए हैं?” मैंनें बाते कही, “गुरू तू तौ जानें।” बानें मोते कही, “जे बुईयें जो बा बडे़ महा कलेस मैं ते निकर कें आए हैं। जिन्‍नें अपने कपड़ा मैमना के खून ते धोय कें इतने सफेद करे हैं। जाई बजैह ते बे, परमेस्‍वर की राजगद्‍दी के सामने हैं, और वाके बड़े पिराथना घर में दिन और रात वाकी सेबा करें, और जो राजगद्‍दी पै बैठौए, बू बिनमें रैहकें बिनकी रक्छा करैगौ। बे फिर भूंके और प्यासे नांय हुंगे और न बिनपे सूरज की घाँम परैगी जाते बे जरैं। चौंकि जो राजगद्‍दीन के बीच में बू मैमना बिनकी रखबाली करैगौ, और बिनें जीबन रूपी जल के सोतान के जौरें लैजाय करैगौ, और परमेस्‍वर बिनकी आँखन मैं ते सब आँसून्‍नें पौंछ डारैगौ।” जब मैमना ने सातमीं मौहर खोली तौ सुरग में लगभग आधे घन्टा तक सन्‍नाटौ सौ छाय गयौ। फिर मैंनें परमेस्‍वर के सामने ठाड़े रैहबै बारे सात सुरग दूतन कूं देखौ और बिनें सात तुरही दई गईं गयी हती। फिर एक और सुरग दूत सौने के धूपदान लिये भये आयौ, बेदी के जौरें ठाड़ौ है गयौ और बाकूं भौत धूप दई कै सब लोग परमेस्‍वर के पबित्र लोगन की पिराथना के संग राजगद्‍दी के सामने बारी सौने की बेदी पै चढ़ामें। और बा धूप कौ धुआं पबित्र लोगन की पिराथनन के संग सुरग दूत के हात ते परमेस्‍वर के सामने पौंहच गयौ। और सुरग दूत ने धूपदान लैकें बामें बेदी की आग भरी, और धरती पै फैंक दई, और गर्जन और अबाज और बिजली और भूकम्प हैबे लगे। और बे सातों सुरग दूत जिनके जौरें सात तुरहियां हती, बे अपनी अपनी तुरहि बजाबे कूं तैयार भये। पैहले सुरग दूत नें तुरही बजाई, और लहू ते मिले भये ओरे और आग पैदा भई, और धरती पै डारी गई और एक तिहाई धरती भस्म है गई, और एक तिहाई पेड़ भस्म है गये और सब हरी घासऊ जल गई। और दूसरे सुरग दूत नें तुरही बजाई, तौ मानों आग जैसौ जलतौ भयौ एक बड़ौ पहाड़ समुन्दर में डारौ गयौ और एक तिहाई समुन्दर खून बन गयौ। और समुन्दर की एक तिहाई सृजी भई वस्तुएं जो जीबित हती, बे मर गईं, और एक तिहाई जहाज नास है गये। और तीसरे सुरग दूत नें तुरही फूंकी, और एक बड़ौ तारौ जो मसाल की नाईं जरतौ हतो आकास ते टूटौ, और बू एक तिहाई नदिन पै, और पानी के सोतान पै आय परौ। और बा तारे कौ नाम नागदौना है, और एक तिहाई पानी नागदौना जैसौ कड़बौ है गयौ, और भौतेरे आदमी बा पानी के कड़बे हैबे ते मर गए। और चौथे सुरग दूत नें तुरही बजाई, और सूरज की एक तिहाई, और चन्दा की एक तिहाई और तारेन की एक तिहाई पै आपत्‍ति आई, य्हां तक कै बिनकौ एक तिहाई हिस्सा अन्धेरौ है गयौ और एक तिहाई दिन में उजीतौ नांय रयौ, और बैसेंईं रात मेंऊ। और मैंनें फिर देखौ, तौ आकास के बीच में एक उकाब कूं उड़ते और ऊंची अबाज ते जि कहते सुनौ, “बिन तीन सुरग दूतन की तुरही की अबाज के मारैं, जिनकौ बजाबौ अबई वाकी है, धरती के रहबे बारेन पै हाय! हाय! हाय!” और जब पाँचमे सुरग दूत नें तुरही फूंकी, तौ मैंनें सुरग ते धरती पर एक तारौ गिरतौ भयौ देखौ, और बाय पाताल के कुन्ड की तारी दई गई। और बानें पाताल कुन्ड कूं खोलौ, और कुन्ड में ते बड़ी भट्‍टी के जैसौ धुआं उठौ, और वाके धुआं ते सूरज और आकास में अंधेरौ है गयौ। और बा धुआं में ते धरती पै टिड्‍डी निकरीं, और बिन्‍नैं धरती के बिच्छुन की सी सक्‍ती दई गई। और बिनते कही, न धरती की घास कूं, न काऊ हरियाली कूं, न काऊ पेड़ कूं नुकसान पौंहचईयों, केवल बिन आदमिन कूं जिनके माथे पै परमेस्‍वर की मौहर नांय लगी होय। और बिन्‍नैं मारबे काजै नांय, पर पाँच महीना तक लोगन कूं दुख दैबे कौ अधिकार दियो हतो और बिनकौ दुख ऐसौ हतो, जैसें बिच्छू के डंक मारबे ते आदमी कूं हैबै। बिन दिनांन में आदमी मौत कूं ढूंढिंगे, ओर बे नांय पांगे, और मरबे की इच्‍छा करिंगे, और बाते मौत दूर भागैगी। और बिन टिड्‍डिन के आकार युद्ध के काजै तईयार करे भए घोड़ान जैसी हती, और बिनके सिरन पै मानों सौने के मुकुट हते, और वाके मौंह आदमी जैसे हते। और बिनके बार औरतन जैसे, और दांत सेर के दातन के जैसे हते। और बे लोहे की सी झिलम पहिने हते, और बिनके पंखन की अबाज ऐसी हती मानौ जैसें रथ और भौत से घोड़ान की जो लड़ाई में दौड़ते होंय। और बिनकी पूंछ बिच्छुन की सी हती, और बिनमें डंक हते, और बिन्‍नैं पाँच महीना तक आदमिन कूं हानि पौंहचाबे की जो सक्‍ती हती, बू बिनकी पूंछन में हती। पाताल कुन्ड कौ दूत बिनपै राजा हतो, वाकौ नाम इब्रानी में अबद्‍दोन, और यूनानी में अपुल्लयोन हतो। इन दोनोंन कौ मतलब बिनास करबे बारौ हतो। पहली बड़ी बिपत्‍ति बीत चुकी, देखौ अब इनके बाद दो बिपत्‍ति और हैबे बारीऐं। और जब छठे सुरग दूत नें तुरही बजाई तब सौने की बेदी जो परमेस्‍वर के सामने हती वाके, चारौं कौनेन के सींगन मेंते मैं नें एक अबाज सुनी। कोई छठवें सुरग दूत ते जाके जौरें तुरही हती बू कैह रहौ है कै, “बिन चार सुरग दूतन कूं जो बड़ी फरात नदी के जौरें बंधे भए हैं, खोल दैय।” और बे चारों दूत खोल दिए गए जो बा घड़ी, और दिन, और महीने, और साल के काजै आदमिन की एक तिहाई के मारबे कूं तैयार करे गए हते। घुड़ सबार फौजिन की गिनती बीस करोड़ हती, मैं नें बिनकी गिनती सुनी। और मोय जा दरसन में घोड़ा और बिनके ऐसे सबार दिखाई दए, जिनकी झिलमें आग जैसे लाल रंग, और नीले, और गन्धक जैसे पीले रंग की हती, और बिन घोड़न के सिर सेर के सिरन केसे हते। और बिनके मौंह मेंते ते आग, और धुआं, और गन्धक निकर रयी हती। इन तीनों बिपत्‍तीन ते, आग और धुएं, और गन्धक ते जो वाके मौंह ते निकर रयी हती, एक तिहाई आदमी मारे गये। चौंकि बिन घोड़न की सक्‍ती बिनके मौंह और पूछ में हती, जामारैं बिनकी पूछ सांप जैसी हती, और बिन पूंछन केऊ सिर हते और बे इनते हानि पौहचाते हते। और बचे भये आदमिन ने जौ मरी में मरे नांय, अपने हातन के कामन ते मन नांय फिरायौ, कै दुस्‍ट आतमान की, और सौने और चान्दी, और पीतल, और पत्थर, और काठ की मूरतन की पूजा न करें, जो न तौ देख सकें, न सुन, न चल सकें। और जो खून, और टोना, और व्‍यभिचार, और बिनने जो चोरी करी हती, बिन तेऊ मन नांय फिरायौ। फिर मैं नें एक और बलबान सुरग दूत कूं बादल ओढ़े भए सुरग ते उतरते देखौ, वाके सिर पै सतरंगी धनुस हतो और वाकौ मौंह सूरज जैसौ और वाके पांम आग के खम्भा जैसे हते। और वाके हात में एक छोटी सी खुली भई किताब हती, बानें सीधौ पांम समुन्दर पै उलटौ पाम धरती पै रखौ। और जौर की अबाज ते चिल्‍लायौ,जैसें कोई सेर दहाड़ रयौ होय, और जब बू चिल्लायौ तौ गर्जन की सात अबाज सुनाई दई। और जब गर्जन की सात अबाज सुन चुकौ, तब मैं लिखबे बारौ हतो, और मैं ने सुरग मेंते जि अबाज सुनी, “जौ बात गरजन की सात अबाज कै संग सुनीं हैं बाय छिपायकें रख और लिखै मत।” और मैं नें जा सुरग दूत कूं समुन्दर और धरती पै ठाड़ौ देखौ हतो, बानें अपनों सीधौ हात सुरग की ओर उठायौ। और बा सुरग दूत नें, युगानुयुग जीबते परमेस्‍वर की, जानें सुरग कूं और जो कछू बामें हते, और धरती कौ और जो कछू बापै हते, और समुन्दर कौ और जो कछू बामें हते जो बनांयौए, वाकी सौगन्ध खायकें कही, “अब तौ और देर न होगी। पर जब सातवें सुरग दूत की अबाज के दिन में जब बू तुरही बजाबे पै होगौ, तब परमेस्‍वर कौ छिपौ भयौ भेद परमेस्‍वर की ओर ते बात बताबे बारेन ते कहौ हतो, बू पूरौ है जाबैगौ।” और जा अबाज करबे बारे कूं मैं नें सुरग मेंते बोलते भये सुनौ हतो, बू फिर मेरे संग बात करबे लगौ, “जा,जो सुरग दूत समुन्दर और धरती पै ठाड़ौए, वाके हात में ते खुली भई किताबे लैलै।” और मैं ने सुरग दूत के जौरें जायकें कही, “जा छोटी किताबै मोय दै दै।” और बानें मोते कही, “जाय लै और खायलै जो, तेरौ पेट में जलन तौ करैगी, पर तेरे मौंह में सहद के जैसी मीठी लगैगी।” सो मैं बा छोटी किताबै बा सुरग दूत के हात मेंते लैकें खाय गयौ, बू मेरे मौंह में सहद जैसी मीठी तौ लगी, पर मेरे पेट में जलन हैबे लगी। तब मोते जि कही कै, “तोय भौत से लोगन, और जातियन, और भासान, और राजान पै, फिर भविस्‍यबानी करनी होगी।” फिर बानें मोय नापबे कूं सरकन्डौ दियौ और कही, “उठ परमेस्‍वर कौ बड़ौ पिराथना घर और बेदी कूं नाप लै और भगतन कूं गिन लै। और बड़े पिराथना घर के आंगन कूं और चारदीबार कूं नाप लै और चारदीबार की बाहर की जगैह कूं छोड़ दै, बाय मत नापै चौंकि बू गैर यहुदियन कूं दियौ गयौऐ। बे पबित्र नगर कूं बियालिस महीनन तक रौदिंगे। और मैं अपने दो गबाहन कूं जि अधिकार दुंगो,कै बे टाट ओढे़ भये बारै सौ साठ दिना तक भविस्‍यबानी करें।” जि दोनों गबाह बुईऐ जो, दो जैतून के पेड़न कूं और दो दीबटन कूं दिखामें, जो धरती पै राज करबे बारे पिरभू परमेस्‍वर के सामने सुरग में ठाड़े रैहमें। यदि कोई इन्‍ने नांस करबौ चाहबै, तौ इनके मौंह ते आग निकरै जो इन दुसमनन कूं नास करै। अगर कोई इनकौ बुरौ करबौ चाहबै तौ बू जरूर जाई तरैह ते मार डारौ जाबैगौ। इनै सबरे आकास पै अधिकारै इनकी भविस्‍यबानी कै बिना मेह नांय बरसैगौ इनकूं पानी कौ खून बनाबे कौऊ अधिकारै जब चाहे तब सबरी धरती पै हर बिपत्‍ती लामें। जब जे अपनी गबाही दै चुकिंगे तब पाताल कुन्‍ड में ते निकरबे बारौ डराबनौ पसु इनते लड़ाई लड़कें इनैं जीतैगौ बिनकूं मार डारैगौ। और बिनकी लास बा बडे़ नगर के चौक में परी रैहबैगी। मापै बिनके पिरभू कूं क्रूस पै चढ़ायौ हतो। जा नगरै बुराई की बजैह ते सदौम या मिस्र के नाम तेऊ जानें। और सबरी धरती के सबरे कुल और भासा और जातिन मेंते कछू लोग साढे तीन दिना तक बिन लासन कूं देखते रिंगे, पर बिनकी लासन कूं कबर में नांय रखन दिंगे। और धरती कै रैहबे बारे लोग खुस हुंगे और एक दूसरे के जौरें भेंट भेजिंगे चौंकि बिन दोनों परमेस्‍वर की बात बताबे बारेन कूं धरती के रैहबे बारेन नें दुख पौंहचायौ हतो। और साढ़े तीन दिना के बाद परमेस्‍वर की ओर ते जीबन की आतमा बिनमें घुस गई, और बे अपने पांमन के बल ठाड़े है गए, और बिनके देखबे बारेन पै बड़ौ भय छाय गयौ। और बिनें सुरग ते एक बड़ी अबाज सुनाई दई, “य्हां ऊपर आऔ।” जि सुनकें बे बादल पै सबार हैकें अपने बैरिन कूं देखते-देखते सुरग पै चढ़ गए। फिर बाई घड़ी एक बड़ौ भूकम्प भयौ, और नगर कौ दसमौ हिस्सा गिर परौ, और बा भूकम्प ते सात हजार आदमी मर गए और बचे भये सेस डर गए, और सुरग के परमेस्‍वर की महिमा करी। दूसरी बिपत्‍ति बीत चुकी, देखौ, तीसरी बिपत्‍ति जल्दी आयबे बारीऐ। और जब सातमे दूत नें तुरही बजाई, तौ सुरग में जा बिसय की बड़ी बड़ी अबाज हैबे लगी, “जगत कौ राज हमारे पिरभू कौऐ, और वाके मसीह कौ है गयौ। अब बू युगानुयुग राज करैगौ।” चौबीसौं बुजुर्ग जो परमेस्‍वर के सामने अपने अपने सिंहासन पर बैठे हते मौंह के बल गिरकें, परमेस्‍वर कूं दन्‍डबत करकें, जि कैहबे लगे कै, “हे सर्वसक्‍तीमान पिरभू परमेस्‍वर, जो है, और जो हतो, हम तेरौ धन्यबाद करें। तैनें अपनी बड़ी सामर्थ कूं काम में लायकें सब राजान पै राज करौये। और गैर जातियन नें गुस्सा करौ, अब तेरौ कोप आय परौ बू समै आय पौहचोंए, मरे भयेन कौ न्याय करौ जाए, और तेरे दास परमेस्‍वर की बात बताबे बारेन कूं और पबित्र लोगन कूं और बिन छोटे बड़ेन कूं तेरे नाम ते डरपैं हते, बदलौ दियौ जाए, और धरती के बिगाड़बे बारेन कौ नास करौ जाएं।” और परमेस्‍वर कौ पिराथना घर सुरग में है, बू खोलौ गयौ, और वाके बड़े पिराथना घर में वाके बाचा कौ सन्दूक दिखाई दियौ, और बिजली चमकी और गर्जन की अबाज आई और भूकम्प भए, और बड़े-बड़े ओरे परे। फिर सुरग में एक बड़ौ चिन्ह देखौ, अर्थात् एक औरत सूरज कूं ओढ़े भए हती, और चन्दा वाके पांमन के नीचे हतो, और वाके सिर पै बारैह तारेन कौ मुकुट हतो। और बू पेट ते हती और चिल्लाती हती, चौंकि वाके बालक हैबे कौ दरद है रयौ हतो। सुरग में एक और चिन्ह देखौ, एक बड़ौ लाल अजगर हतो जाके सात सिर और दस सींग हते, और वाके सिरन पै सात राजमुकुट हते। और वाकी पूंछ ने आकास के एक तिहाई तारेन कूं खैंचके धरती पै गेर दियौ, और बू अजगर बा औरत के सामने, जाकें बालक जनबे बारौ हतो वाके सामने ठाड़ौ है गयौ, कै जब बू बालक जनमें तौ बू बाय निगल जाबै। और बानें बेटा जनमौ जो लोहे कौ दन्ड लिए भए, सब जातिन पै राज करबे बारौ हतो, पर अचानक बू बालक उठा कें परमेस्‍वर के जौरें और राजगद्‍दी के जौरें पौंहचायदौ। और बू औरत बेहड़ में भाग गई, जहां परमेस्‍वर की ओर ते वाके काजै एक जगह तईयार करी, म्हांपै बाय बारै सौ साठ दिना तक भोजन मिलबे बारौ हतौ। फिर सुरग में एक युद्ध भयौ, पिरधान सुरग दूत मिकाईल और वाके सुरग दूत अजगर ते युद्ध करबे आऐ, अजगर और वाके दूत बातै लड़े। पर बू अजगर बिनते जीत नांय सकौ, और सुरग में बिनके काजै फिर जगैह नांय रही। बू बड़ौ अजगर मतलब बुई पुरानौ सांपै जो इबलिस और सैतान कहौ जातौ, जौ सबरे संसार कूं भरमाबे बारौ हतो बू और वाके दूत धरती पै गिरा दिये। फिर मैंनें सुरग मेंते एक बड़ी अबाज सुनी कै, “अब हमारे परमेस्‍वर कौ उद्धार, सामर्थ और राज और वाके मसीह कौ अधिकार उजागर भयौ है। चौंकि बू हमारे भईयन पै दोस लगाबे बारौए जो रात और दिन बू हमारे परमेस्‍वर के सामने दोस लगाबै बू गिरा दियौ गयौ। बे मैमना के खून और अपनी गबाही के वचन की बजैह ते बाते जीत गये हैं। और बिन्नें अपने पिरानन कूं प्यारौ नांय जानौ और बिन्नें मौतऊ सैह लई। जामारैं, हे सुरग और बामें रैहबे बारेऔ मगन है जाऔ। पर हे धरती और बापै रैहबे बारे और समुन्दर तुम पै हाय चौंकि सैतान बड़े जौर गुस्सा के संग तुमारे जौरें उतर आयौए। चौंकि बू जानें कै वाकौ थोरौ समै और बचौए।” और जब अजगर नें देखौ कै, “मैं धरती पै ऊपर ते गिरा दियौऊं,” तौ बानें बा औरत कूं जानें बेटा जनों हतो बाकूं जायकै सतायौ। पर बा औरत कूं उकाब केसे बड़े-बड़े दो पंख दिये गये के बू अजगर के सामने ते उड़कें बेहड़ में बा जगै पै चली जाय ज्हां बाय सबकी पौहच ते दूर साढे तीन साल तक वाकौ पालन पौसन करौ जाय। फिर बा अजगर नें औरत के पीछे अपने मौंह मेंते नदियां की तरैह पानी बहायो, पानी की बाढ़ बाय बहाय देय। पर धरती ने बा औरत की मदद करी, और बानें अपनों मौंह खोलकें, बा अजगर की बहाई भई नदियां कौ पानी पी लियौ। तब बू अजगर बा औरत पै भौत गुस्सा भयौ और बची सन्‍तान ते जो परमेस्‍वर की आग्‍यान कूं मानें और ईसू की गबाही दैबे पै टिके रैहमें, बिनते युद्ध करबे कूं गयौ। और बू अजगर समुन्दर की बारू पै जायकें ठाड़ौ है गयौ। मैंनें एक डराबनों पसु समुन्दर मेंते निकरते भये देखौ, जाके दस सींग और सात सिर हते, बिनपै दस राज मुकुट हते। बा पसु के हरेक सिर पै परमेस्‍वर की बुराई करबे बारेन के नाम लिखे भये हते। जो डराबनों पसु मैंनें देखौ, बू चीता की तरैह हतो वाके पांम भालू जैसे हते, और मौंह सेर जैसौ हतो। और बा अजगर नें अपनी सामर्थ, अपनी गद्‍दी और बड़े अधिकार बाय दै दिये। और वाके सिरन मेंते एक सिर पै ऐसौ घाव हतौ, जाते बू मर जाबैगौ। पर वाकौ बू पिरान घातक घाव ठीक है गयौ, और सबरी धरती के लोग अचम्भौ करकें बा डराबने पसु के पीछे चलबे लगे। और बिन्‍नें बा अजगर की पूजा करी। चौंकि बानें बा डराबने पसु कूं अपनों अधिकार दै दियौ हतो। और बिन्‍नें बा डराबने पसु कीऊ पूजा करी और जि कैहबे लगे, “जा पसु के समान कोऐ? और को जाते युद्ध कर सकै?” डराबने पसु कूं डींग मारबौ और परमेस्‍वर की निन्दा करबे कौ अधिकार, और बियालिस महीनन तक बने रैहबे कौ अधिकार दियौ गयौ। बानें परमेस्‍वर की निन्दा करबे के काजै मौंह खोलौ कै वाके नाम और वाके तम्बू अर्थात् सुरग के रैहबे बारेन की निन्दा करै। बाय जि अधिकार दियौ गयौ कै, बू परमेस्‍वर के पबित्र लोगन ते युद्ध करै और बिनपै जीत पाबै की अनुमती और हरेक बन्स और हरेक जात और भासा और राज पै अधिकार दियौ गयौ। बे सब धरती के रैहबे बारे जिनके नाम मैमना के जीबन की किताब में नांय लिखे हते। बे बा डराबने पसु की पूजा करिंगे। मैमना जो जगत की रचना के समैं ते पैहलेंई बलिदान हैबे काजै तैयार करौ हतो। अगर काऊ के सुनबे के कान होंय तौ बू सुनले। जाकूं बन्दी बननौंए, बू बन्दी बनांयौ जाबैगौ। अगर काऊए तलबार ते मरनोंए, बू तलबार ते मारौ जाबैगौ। जामारैं परमेस्‍वर के पबित्र लोगन कौ धीरज और भरोसौ जाईमें। तब मैंनें धरती में ते एक और डराबने पसु कूं निकरते भये देखौ। मैमना के सींग के समान वाके दो सींग हते पर बू अजगर की तरैह बोलतो। बू पैहले डराबने पसु के सबरे अधिकारन कौ पिरयोग करतौ, बानें सबरी धरती पै रैहबे बारेन ते अपनी पूजा करबाई जाकौ मरबे लायक घाव ठीक है गयौ हतो। दूसरे डराबने पसु नें बड़े-बड़े अचम्भे के काम करे। ज्हां तक बानें सब लोगन के सामने आकास ते आग बरसाई हती। बू धरती के लोगन कूं भरमांतो चौंकि बापै पैहले डराबने पसु के अधिकार ते बू चमत्‍कार के काम करतौ। और दूसरे बा डराबने पसु नें धरती के लोगन ते आदर पायबे काजै, तलबार ते लगे भये घाव बादऊ बू डराबनों पसु जीबित हतो, वाकी मूरती बनबाबे की कही। और बा दूसरे डराबने पसु कूं पैहले डराबने पसु की मूरती में पिरान डारबे कौऊ अधिकार हतो कै बू मूरती बोलबे लगै, और जौ बा मूरती की पूजा नांय करें बिन सबन कूं मार डारौ जाय। और बानें छोटे, बड़े,धनी, कंगाल आजाद और सेबक सबके सीधे हात पै या माथे पै मौहर लगबाबे कूं मजबूर करतो। जापै डराबने पसु कौ नाम और नम्बर की जि मौहर नांय लगी होय तो, बाय कोई न तौ खरीद सकै और न बाय कोई बेच सकै। जामें बुद्धि होय बू जा पसु के अंक कौ हिसाब लगाय लैय चौंकि बू अंक काऊ आदमी के नाम ते सम्बन्ध रखै, वाकौ अंक छै सौ छियासठ है। फिर मैंनें देखौ कै सियोन परबत पै मैमना ठाड़ोऐ और वाके संग एक लाख चम्बालिस हजार बे लोग जिनके माथेन पै वाकौ और वाके पिता कौ नाम लिखौ हतो। फिर मैंनें एक आकासबानी सुनी, बू एक नदी के पानी के बैहबे और बादर के गरजबे की सी अबाज सुरग ते आती भयी सुनाई दयी। मैंनें जो अबाज सुनी हती बू बीना बजाबे बारेन की सी हती। बे राजगद्‍दी और चार जीबते पिरानी और बुजुर्गन कै सामने एक नयौ गीत गा रये हते। बिन एक लाख चम्बालिस हजार लोगन के अलाबा जिनकूं धरती पैते खरीद लियौ गयौ हतो, बिनके अलाबा और कोई जा गीतै नांय गा सकतौ। जे बे लोगें जिन्‍नें अपने आपकूं औरतन ते असुद्ध नांय करौ, जि कुआरे हैं। ज्हां कऊं मैमना जातौ जि वाके संग चलतैं। परमेस्‍वर और मैमना के काजै पैहले फल के रूप में सबरे देसन के लोगन में ते खरीदौ गयौ हतो। जिन्नें कबऊ झूंठ नांय बोलौ जे बिलकुल निरदोस हते। फिर मैंनें आकास में एक और सुरग दूत कूं उड़ान भरते भये देखौ वाके जौरें धरती पै रैहबे बारे हरेक राज, जात, भासा, कुल के लोगन काजै सुभ समाचार कौ एक कबऊ नांय खतम हैबे बारौ सन्देस हतो। बू ऊंची अबाज में बोलौ, “परमेस्‍वर ते डरौ, और वाकी महिमा करौ। चौंकि वाके न्याय कौ समै आय गयौए। वाकी भक्‍ती करौ जानें आकास, धरती और समुन्दर और पानी के सोतन कूं रचौऐ।” जाके बाद वाके पीछैं एक दूसरौ सुरग दूत आयौ और बोलौ, “कै वाकौ सरब नास है चुकौऐ, महा नगरी बेबीलोन कौ सरब नास है चुकौऐ। बानें सबरी जातियन कूं व्‍यभिचार की बासना मय सराब पिबाई है।” बिन दोनोंन के बाद तीसरौ सुरग दूत आयौ बू ऊंची अबाज में बोलौ कै, “अगर कोई बा डराबने पसु और वाकी मूरती की पूजा करै और अपने हात और माथे पै वाकी मौहर लगबाबै, तौ बाय परमेस्‍वर के गुस्सा की सराब पियाई जाबैगी जो गुस्सा कै कटोरे में डारी गयीऐ, बा आदमी कूं पबित्र सुरग दूतन और मैमना के सामने बा गन्धक बारी आग में डारौ जाबैगौ। जो लोग बा डराबने पसु की मूरती की पूजा करें या वाकी मौहर लगबामें बिनकौ दुख सदा-सदा बिन्नें मिलैगौ और बिनें रात और दिन कबऊ चैन नांय मिलैगौ।” जा जगैह पै सबरे परमेस्‍वर के पबित्र लोगन कौ धीरज और सहन सक्‍ती, जौ परमेस्‍वर की आग्‍यान कौ पालन करै और ईसू पै भरोसौ करै। फिर मैंनें आकास मेंते आकासबानी सुनी, “जा बातै लिखलै अब आगे ते बेई लोग धन्य हुंगे जो पिरभू पै भरोसौ करते भय मरे हैं।” आतमा कैहबै, “हाँ जि ठीक है। अब बिनकूं अपनी मेहनत ते आराम मिलैगौ चौंकि बिनके अच्‍छे काम बिनके संगै।” फिर मैंनें अपने सामने एक सफेद बादर देखौ। और बा बादर पै एक आदमी बैठौ हतो बू मनुस्‍य के बेटा जैसौ हतो, बानें अपने सिर पै सौने कौ मुकुट रखौ हतो और वाके हात में एक पैनों हैंसिया हतो। तबई पिराथना घर में ते एक और सुरग दूत निकरौ, बानें जौ बादर पै बैठौ हतो, बाते ऊंची अबाज में कही, “हैंसिया चला और फसल इकठौरी कर चौंकि फसल काटबे कौ समै आ पौंहचौऐ धरती की फसल पक चुकी है।” तब जौ बादर पै बैठौ हतो बानें धरती पै अपनों हैंसिया चलायौ और धरती की सबरी की सबरी फसल काट लई गई। फिर एक और सुरग दूत पिराथना घर में ते निकरौ जो सुरग में है बापैऊ एक पैनों हैंसिया हतो। तबई बेदी ते एक और सुरग दूत आयौ वाकौ आग पै अधिकार हतो, बा सुरग दूत नें ऊंची अबाज में कही, “अपने पैने हैसिया कूं चला और जा धरती की बेल पैते अंगूर के गुच्‍छान नें उतार लै, चौंकि अंगूर पक चुके हैं।” तौ बा सुरग दूत नें धरती पै अपनों हैंसिया चलायौ अंगूर उतार लिये और बिनकूं परमेस्‍वर के गुस्सा के कोप के कुन्‍ड में डार दिये। अंगूर नगर के बाहर कुन्‍ड में निचोड़ लिये गये, और कुन्‍ड में ते इतनौ खून निकरौ कै बू घोड़ान की लगाम तक पौंहच गयौ, और बू लगभग सौ कोस दूर तक बैह गयौ। सुरग में मैंनें फिर एक अदभुत चिन्‍न देखौ, कै सात सुरग दूत जौ सात अखीरी बिपत्‍तीन कूं लिये भये हैं। जे अखीरी बिपत्‍ती हैं चौंकि जाके बाद परमेस्‍वर के गुस्सा कौ कोप खतम है जाबैगौ। फिर मोय कांच के समुन्दर जैसौ दीखौ जामें मानौ आग मिली होय और बिन्‍नें डराबने पसु, वाकी मूरती पै और वाके नाम जुड़े भये अंक पैऊ जीत पाय लई बेऊ कांच के समुन्दर पै ठाड़े हैं। बिन्‍नें बे बीना लै लयी जो परमेस्‍वर ने दई हती। बे परमेस्‍वर के सेबक मूसा और मैमना कौ जा गीतै गा रये हते, “बे काम जिनें तू करै बे महान हैं। तेरी अदभुत सक्‍ती कबऊ खतम हैबे बारी नांय, हे पिरभू परमेस्‍वर, तेरौ रस्ता सच्‍चाई और धारमिकता ते भरौ भयौ है, सबरी जातिन कौ राजाए, हे पिरभू, सब लोग तोते हमेसा। भय भीत रहिंगे तेरौ नाम लैकें सब लोग तेरी महिमा करिंगे, चौंकि तूई एकमात्र पबित्र है। सबरी जाति तेरे सामईं ठाड़ी होंगी और तेरी अराधना करेंगी, चौंकि तेरे काम उजागरै पिरभू जौ तू करै बुई न्याय है।” जाके बाद मैंनें देखौ के सुरग में बाचा के तम्बू कौ पिराथना घर खोलौ गयौ। बे सातौ दूत जिनके जौरें अखीरी बिपत्‍ती हती बे पिराथना घर ते बाहर आये बिन्‍नें सफेद सनी के बड़िया रेसा के बने भये कपड़ा पैहने हते। और अपनी छाती पै सौने के पट्‍टा बांधे भये हते। फिर बिन चारौ जीबते पिरानीन में ते एक ने बिन सात दूतन कूं सात सौने के कटोरा दिये, जो सदा जीबित रहबे बारे परमेस्‍वर के कोप ते भरे भये हते। बू पिराथना घर परमेस्‍वर की महिमा और वाकी सक्‍ती के धुआं ते भरौ भयौ हतो। जाते जब तक बिन सात सुरग दूतन सात बिपत्‍ती पूरी नांय है जाय तब तक कोई बा पिराथना घर में घुस नांय सकौ। फिर मैंनें पिराथना घर मेंते जोर की अबाज सुनी बे सातौं दूत जि कैह रये हते, “जाऔ परमेस्‍वर के कोप के सातो कटोरान नें धरती पै उड़ेल देऔ।” तौ पैहलौ सुरग दूत गयौ और बानें अपनों कटोरा उड़ेल दियौ और जिन लोगन पै डराबने पसु के अंक को निसान हतो और जो मूरती कूं पूजते उनके भौत दरद देबे बारे फोड़ा निकर आये। जाके बाद दूसरे सुरग दूत ने अपनों कटोरा समुन्दर पै उड़ेल दियौ और समुन्दर कौ सबरौ पानी मरे भये आदमी कै खून के समान है गयौ, और समुन्दर में रैहबे बारे सबरे जीब जन्‍तु मर गये। फिर तीसरे सुरग दूत ने अपनों कटोरा नदी और पानी के झरनन पै उड़ेल दियौ और बे सब खून में बदल गये। तब मैने पानी के दूत कूं जि कैहत भये सुनौ, “बू तूईए जो नियाईऐ, जो हमेसा ते हतो तूईऐ जौ पबित्र है। तैने जो करौए बुई न्याय है। बिन्‍नें परमेस्‍वर के पबित्र लोगन और परमेस्‍वर की बात बतायबे बारेन कौ खून बहायौ। तू नियाईऐ तेने बिनकूं पीबे कूं बस खूनई दियौ है, चौंकि बे जाईके लाइक हते।” फिर मैने बेदी ते जि अबाज आबत भये सुनी, “हाँ, सर्वसक्‍तीमान पिरभू परमेस्‍वर, तेरे न्याय सच्‍चे और भले हैं।” फिर चौथे सुरग दूत ने अपनों कटोरा सूरज पै उड़ेल दियो और बाय आदमिन कूं झुलसायबे की सक्‍ती दैदई, और लोग भयंकर गरमी ते झुलसबे लगे, बिन्‍नें मुसीबतन पै अधिकार रखबे बारे परमेस्‍वर के नाम कौ अपमान करौ। पर बिन्‍नें मन नांय फिरायौ और ना परमेस्‍वर की महिमा करनी चाही। जाके बाद पाँचमे सुरगदूत नें अपनों कटोरा सिंहासन पै उढेलौ और डराबने पसु के राज में अन्धेरौ छाय गयौ लोग दरद के मारे झटपटायबे लगे और अपनी जीभै चबायबे लगे। बिन्‍नें अपने दरद और फोड़न की बजैह ते सुरग के परमेस्‍वर की निन्दा करी पर अपने कामन ते मन नांय फिरायौ। छटमे दूत ने अपनों कटोरा फरात महा नदी पै उढेल दियो और फरात नदी कौ पानी सूख गयौ जाते पूरब के राजान के काजै रस्ता तैयार है जाय। फिर मैने बा अजगर के मौंह ते और बा डराबने पसु के मौंह ते और परमेस्‍वर के बारे में झूंठी बात बतायबे बारे के मौंह ते मेढ़का जैसी तीन दुस्‍ट आतमांन कूं निकरत भये देखौ। जि सैतानी दुस्‍ट आतमा हती जिनमें चमत्‍कार दिखाबे की सक्‍ती हती, जो सर्ब सक्‍तीमान परमेस्‍वर के बा बड़े दिन के युद्ध के काजै सबरे संसार के राजान कूं इकठ्‌ठौ करबे निकर परे। देख, “मैं चोर के समान अचानक आय जाऊंगो। धन्य हैं बू जो जगतौ रैहबै और अपने कपड़न की चौकसी करतौ रैहबै, बे नंगे ना फिरे और बिनके नंगेपन कूं कोई नांय देखे।” और बिन दुस्‍ट आतमान ने सब राजान कूं बा जगैह पै इकठ्‌ठौ करौ जो इब्रानी में हर-मगिदोन कहौ जातौ। सातबें सुरग दूत ने अपनों कटोरा हबा पै डार दियो, और पिराथना घर के सिंहासन ते एक बड़ी अबाज आई के, “सब पूरौ है चुकौ है।” फिर बिजली चमकी और एक गड़ गड़ाहट भई और बादर गरजबे लगे और धरती पै एक ऐसौ भूकम्प भयौ कै जब ते आदमी की रचना भई है, तबते ऐसौ बड़ौ भूकम्प कबऊ नांय भयौ। जाते बा बड़े नगर के तीन टुकड़ा हे गये और अधर्मीन के नगर नास है गये। परमेस्‍वर ने बेबीलोन नगरी कूं दन्‍ड देबे काजै याद करौ और अपने लोगन कूं गुस्सा के कोप की सराब कौ कटोरा पिबायौ। और हरेक टापू अपनी जगैह ते हट गयौ और पहाड़न कौऊ पतौ नांय परौ। और आकास ते लोगन पै मन मन भर के बड़े-बड़े ओरे गिरे। जामारैं जि बिपत्‍ती भौत भारी हती लोगन नें ओरेन की बजैह ते परमेस्‍वर को अपमान करौ। जाके बाद बिन सात सुरग दूतन नें जिनपै सात कटोरा हते बिनमें ते एक ने मेरे जौरें आयकै कही, “आ मैं तोय बा बड़ी बेस्‍या के दन्‍ड कूं दिखाऊंगौ जो नदिन के किनारे पै बैठी है। धरती के राजान ने वाके संग व्‍यभिचार करौए और बे सब धरती पै रैहबे बारे वाके संग व्‍यभिचार की सराब पीके मतबारे है गयेएं।” तब बू आतमा मोय बेहड़ के माऊं लै गयौ, म्हांपै एक औरत लाल रंग के ऐसे पसु पै बैठी हती, बा पसु के सरीर पै परमेस्‍वर के नाम की निन्दा की बाते लिखी हतीं, वाके सात सिर और दस सींग हते। और बू औरत बैजनी और लाल रंग के कपड़ा पैहने भये हती। बू सौने और भौत कीमती मड़ी और मोतीन ते सजी भई हती और वाके हात में एक सौने कौ कटोरा हतो जो बुरी बात व्‍यभिचार की असुद्ध चीजन ते भरौ भयौ हतो। वाके माथे पै भेद ते भरौ भयौ नाम लिखौ देखौ, “बड़ौ बेबीलोन, बेस्‍यान की और धरती के सब गन्दे कामन की मईया।” बा औरत कूं परमेस्‍वर के पबित्र लोगन और ईसू कै गबाहन कौ खून पीके मतबारी भई। मैं बाय देखकै अचम्भे में पर गयौ। तब बा सुरग दूत ने मोते पूछी, “तू अचरज में चौं पर गयौऐ? मैं तोय बा डराबने पसु जाके सात सिर और दस सींग है जापे बू बैठीऐ, वाकौ भेद समझातूं। जो तुमने देखौए बू पैहले कबऊ जीबित हतो, पर अब बू जीबित नांय रयौ। बू पाताल मेंते निकरबे बारौ है, तबई वाकौ नास है जाबैगौ, फिर धरती के बे लोग जिनके नाम सृस्‍टी के पैहले ते जीबन की किताब में नांय लिखे भये नांय हते, बा पसु कूं देखके अचरज करिंगे, चौंकि बू कबऊ जीबित हतो पर अब जीबित नांय पर फिरऊ बू आयबे बारौ है। “ज्हां थोरी बुद्धी की जरूरते जे सात सिर बे सात परबतें जिनपै बू औरत बैठी है। बे सात सिर उन राजान केऊ चिन्‍नैं। जिनमें ते पांच कौ तौ सर्वनास है चुकेएं और एक अबऊ राज कर रयौ है और एक आयबे बारौ है बू कछू देर तक रैहबेगौ। जो डराबनो पसु पैहले कबऊ जीबित हतो, पर अब जीबित नांय बू खुद आठमो राजाए जो उनमे तेई एकऐ, वाकौऊ नास हैबे बारौऐ। “जो दस सींग तुमने देखैएं बे दस राजा हैं जिन्‍ने अबई तक राज नांय न करौ, पर बा डराबने पसु के संग कछू समै के काजै राज करबे कौ अधिकार पामिंगे। इन राजान कौ केबल एकई उद्‍देस्‍य होगौ कै बे अपनी सक्‍ती और अपनों अधिकार बा पसु कूं सौंप देंगे। बे मैमना के बिरुध युद्ध करेंगे,पर मैमना अपने बुलाये भये, चुने भये और अपने भरोसे योग्‍य चेलान के संग उनकूं हराय देगौ चौंकि बू राजान कौ राजा और पिरभून कौ पिरभू है।” फिर बा दूत ने मोते कही, “जो नदिया तैने जापै बैस्‍या बैठी देखी है, बू सबरे कुल, समुदाय जात और भासान कौ चिन्‍नैं। और बे दस सींग जो तैनें देखिऐं बे बा डराबने पसु और बा बैस्‍या कूं नंगौ करिंगे और वाकौ मांस खा जामिंगे और बाय आग में जराय डारिंगे। चौंकि परमेस्‍वर बिनके मन में जि बात डारेगौ कै बे वाकी मनसा पूरी करें, जब तक परमेस्‍वर कौ वचन पूरौ नांय होय, तब तक बे एक मन हैकें अपनों अपनों राज बा डराबने पसु कूं दैदें। जो औरत तुमने देखीऐ बू महा नगरी हती जो धरती के राजान पै राज करै।” जाके बाद मैंनें एक और सुरग दूत सुरग ते उतरते भये देखौ, बाय महान अधिकार मिलौ भयौ हतो और वाके आयबे ते सबरी धरती चमक उठी। बानें तेज अबाज में चिल्‍लायकै कही, “नांस है गयौ बड़ौ बेबीलोन नांस है गयौ अब बू सब दुस्‍ट आतमांन की और असुद्ध पंछीन और असुद्ध पसुन के रैहबे की जगै बन गईए। चौंकि सबरे देसन ने व्‍यभिचार के गुस्सा की सराब पीलाईए, धरती के सबरे राजान ने वाके संग व्‍यभिचार करौऐ। और धरती के बौपारी वाकी सानों सौकत ते धनी हैगये।” मोय सुरग ते एक अबाज और सुनाई परी, “मेरे लोगो तुम ज्हांते निकर जाऔ, कऊं ऐसौ न होय के तुमऊ इनके पापन में साझी है जाऔ और बिन बिपत्‍तीन के सिकार बनों, चौंकि पाप आकास तक ऊंचे हे गयेएं और परमेस्‍वर ने इनके पाप याद करेएं। बानें जैसौ करौए बैसौई वाके संग होगौ, वाके कुकरमन कौ दुगनौ बदलौ चुकाऔ और बानें जो कटोरा दूसरेन काजै भरौए बामे दुगनौ डार देउ। बानें अपनी जितनी बड़ाई करी और जितनो भोग-बिलास करो बाय उतनोई दुख देओ और उतनोंई सोक देओ, बू अपने मन में जि सोचै, ‘मैं तौ रानी बन गयीऊं मैं कबऊ बिधबा की तरैह ते सोक नांय मनाउंगी।’ जामारैं बापे एकई दिना में बिपत्‍ती आय परैगी, मौत सोक, और अकाल बापै परैगौ। बू आग में भस्म कर दयी जाबैगी, चौंकि वाकौ न्याय करबे बारौ सर्वसक्‍तीमान पिरभू परमेस्‍वर है।” “जब धरती के राजा, जिन्‍ने वाके संग व्‍यभिचार करौए और वाके भोग-बिलास में संगी बने हैं, वाके जरबे के धुआं कूं देखौगे तौ बे वाके काज रोबिंगे और छाती पीटेंगे। बे वाके इन कस्‍टन ते डरप के भौत दूर ही ठाड़े रहिंगे और कहिंगे, “ ‘हे बड़े नगर बेबीलोन हाय बेबीलोन सर्व सक्‍तीसाली नगर बस छड़ भर मेई दन्‍ड तोय मिल गयौ।’ “जा धरती के सबरे बौपारी जाकी बजैह ते रोंगे और छाती पीटिंगे, चौंकि बिनके मालै फिर कबऊ कोई नांय खरीदैगौ, चीज सौने की, चाँदी की, भौत कीमती रत्न, मोती, मलमल, बैजनी, रेसमी और किरमिजी कपड़ा, हर तरैह की सुगंधित लकड़ी, हाँती दाँत की बनी भई हरेक तरैह की चीज, अनमोल लकड़ी, काँसे, लोहे और संगमरमर ते बनी भई तरैह-तरैह की चीज दार चीनी, गुल मेंहदी, सुगंधित धूप, गंध रस, लोहबान, सराब, जैतून का तेल, मैदा, गेंहू, मबेसी, भेड़े, घोड़े और रथ,आदमिन कूं गुलाम बनांयबे काजैऊ बेचतैं। “हे बेबीलोन नगर, बे सब बड़िया चीज जिनमें तेरौ मन लगौ भयौए बे सब तोय छोड़ के चली गयीएं, ‘तेरी सबरी तड़क भड़क और सानों सौकत सर्बनांस है गयीऐ, बाय फिर दुबारा नांय देखेगी।’ ” बे बौपारी जो इन चीजन कौ बौपार करते बे माला-माल हैगये और बे दूर ठाड़े रहिंगे चौंकि बे वाके दुख ते डरप गये हैं। बे रोबत और बिलखत भये बोलेंगे, “ ‘हाय बा नगरी पै जौ मलमल, बैंगनी एवं लाल कपड़ा पहने हती और सोनो, मनि और मोतियन ते सजी रैहती। जि सबरी सान सौकत पलभर मेई खतम है गयौ।’ “फिर जहाज कौ कप्‍तान और पानी पै यात्रा करबे बारे नाव चलाबे बारे और समुन्दर के बे सब बौपारी बा नगरी ते दूर ठाड़े रये। और वाके जरबे कौ धुआं उठौ तौ बे ऊंची अबाज में बोलबे लगे, ‘जा बड़े नगर की बराबरी कौन सौ नगर कर सकै?’ फिर बे अपने सिर पै धूर डारके रोते चीखते भये कैह रये हते, “ ‘हाय जा नगर के सान और सौकत ते जहाज के सबरे मालिक धनबान बन गये और देखौ, जि पल भर में उजड़ गयीऐ।’ “हे सुरग, हे परमेस्‍वर के पबित्र लोग, भेजे भये चेला और परमेस्‍वर की बात बतायबे बारेऔ आनन्द मनाऔ चौंकि परमेस्‍वर ने बाय सही दन्‍ड दियौए जैसौ बाय मिलनौ हतो।” फिर एक ताकतबर सुरग दूत ने बड़ी चक्‍की जैसौ बड़ौ पत्‍थर उठायौ और जि कैहके समुन्दर में फैंकौ, “बड़ौ नगर बेबीलोन, जाई तरै ते गिराय दियौ जाबैगौ और वाकौ फिर कबऊ पतौ नाय परैगौ। फिर तोमें कबऊ बीना नांय बजैगी और ना कबऊ भजन गाये जाबिंगे काऊ काम के कारीगर तोमें फिर कबऊ नांय मिलिंगे, चाकी की अबाज तोमें फिर कबऊ सुनाई नांय परैगी। दीये कौ उजीतौ तोमें फिर कबऊ नांय दीखैगौ, दूल्हा और दुलहन की अबाज फिर कबऊ नांय सुनाई दैबेगी। चौंकि तेरे अधिकारी धरती के बौपारी हते और तेनै अपने जादू ते सबरे देस के लोगन कूं बहकायो हतो। परमेस्‍वर की बात बताबे बारे और परमेस्‍वर के बिन मरे भये पबित्र लोगन कौ और बिन सब धरती के मरे भये लोगन के खून कौ जिम्मेदार बेबीलोन नगरै।” जाके बाद मैनें सुरग में मानों भीड़ जैसी अबाज सुनी जो चिल्‍लाय रयी हती बे लोग कैह रये हते, “हल्‍लिलूय्याह! परमेस्‍वर की जय हो, जय हो! उद्धार, महिमा और सामर्थ बोई दैबै। वाकौ न्याय हमेसा सच्‍चौए और धारमिकता ते भरौ भयौए बा एक बड़ी बैस्‍या कौ न्याय करौ जो अपने व्‍यभिचार ते धरती कूं असुद्ध कर्रयी हती, जिनकूं बानें मार दियौ हतो। बिन भगतन की मौत को बदलौ है चुकौऐ।” फिर बिन्‍नें कही, “हल्लिलूय्याह! वाकी जय हो,और बा नगर के जरबे कौ धुआं हमेसा हमेसा उठतौ रैहबैगौ।” चौबीस बुजुर्ग और चारौ जीबते पिरानिन नें गिरकें परमेस्‍वर, जो राजगद्‍दी पै बैठौ भयौ हतो बाकूं नमस्‍कार करौ और कही, “हल्‍लिलूय्याह ऐसौई होबे।” फिर राजगद्‍दी में ते एक अबाज आई, “हे हमारे परमेस्‍वर ते डरपबे बारेऔ का छोटे का बड़े तुम बा परमेस्‍वर की महिमा करौ।” फिर मैनें बड़ी भीड़ और पानी झरना के जैसी, बादरन के गरजबे की अबाज सुनी, “हल्लिलूय्याह! जामारैं कै हमारे पिरभू परमेस्‍वर, सर्वसक्‍तीमान राज करै। अब तुम आनन्द करौ और खुसी मनाऔ और वाकी बड़ाई करौ, चौंकि अब मैमना के ब्याह कौ समै आय पौंहचौए वाकी दुलहन सज धज कें तैयीयार है गयीए। बाय अनुमती मिलिए बू साफ मलमल के चमकदार कपड़ा पैहरें बू कोमल सफेद मलमल! जाकौ मतलब है पबित्र लोगन के धरम के काम।” फिर बू सुरग दूत मोते कैहबे लगौ, “बे धन्य हैं जो मैमना के ब्याह के भोजन में बुलाये हैं।” फिर बानें मोते कही, “परमेस्‍वर कौ वचन सच्‍चौ है।” और मैं नमस्‍कार करबे काजै वाके पामन में गिर परौ। बू मोते बोलौ, “देख, ऐसौ मत कर, मैं तौ तेरे और तेरे भईयन के संग परमेस्‍वर कौ सेबक हूं। जिनपै ईसू नें गबाही दई बा सन्देस की जिम्मेदारी हती। परमेस्‍वर की अराधना कर चौंकि ईसू नें जई बात की गबाही दई है कै बिनमें एक परमेस्‍वर की बात बताबे बारे की आतमा हतैए।” फिर मैं नें सुरग कूं खुलौ भयौ देखौ, और देखौ एक सफेद घोड़ा है, और बापै एक सबारै, जो भरोसेमन्द और सच्‍चौ कहौ जाबै और बू धर्म के संग न्याय और युद्ध करैं। वाकी आँखें आग की लपटें और वाके सिर पै भौत से राजमुकुट हैं, और वाकौ एक नाम लिखौए, जाय बाय छोड़ कें और कोई नांय जानें। और बे खून ते छिड़के भये कपड़ा पैहरे हैं और वाकौ नाम दियौ गयौ है “परमेस्‍वर कौ वचन है।” और सुरग की सेना सफेद घोड़न पै सबार सुद्ध और सफेद मलमल पहिने भए वाके पीछे-पीछे है। और जाति जाति कूं मारबे काजै मौंह ते एक चोखी तलबार निकरै, और बू लोहे कौ राजदन्ड लए भए बिनपै राज करैगौ, और बू सर्वसक्‍तीमान परमेस्‍वर के भयानक कोप की जल जलाहट की सराब के कुन्‍ड में दाख रौंदैगौ। और वाके कपड़ा और जांघ पै जि नाम लिखौ भयौ है, “राजान कौ राजा और पिरभून कौ पिरभू।” फिर मैं नें एक सुरग दूत कूं सूरज पै ठाड़े देखौ, और बानें बड़े जोर ते चिल्‍लायकै आकास के बीच में उड़बे बारे सब पंछिन ते कही, “आओ परमेस्‍वर के बडे़ भोज के काजै इकठ्‌ठे है जाओ, जाते तुम राजान कौ मांस, और सरदारन कौ मांस, और सक्‍तीमान पुरूसन कौ मांस, और घोड़ा और बिनके सबारन कौ मांस, और का स्वतंत्र, का दास, का छोटे, का बड़े, सब लोगन कौ मांस खाओ।” फिर मैं नें बा डराबने पसु और धरती के राजा और उनकी सेना कूं उनके घुड़ सबार, और वाकी सैना ते युद्ध करबे काजै इकठ्‌ठे देखौ। और बू डराबने पसु और वाके संग बू “झूठे” परमेस्‍वर की बात बताबे बारौ पकरौ गयौ, जाने वाके सामईं ऐसे चिन्‍न दिखाए हते, जिनते बानें बिनकूं भरमायौ, जिन्‍ने डराबने पसु की छाप लगबाही हती, और जो वाकी मूरत की पूजा करते, डराबनों पसु और वाके संग परमेस्‍वर के बारे में झूंठी बात बतायबे बारे जीते जी बा आग की झील में जो गन्धक ते जरतै, डारे गए। और बचे भये लोग बा घुड़ सबार की तलबार ते जो वाके मौंह ते निकरती हती, मार डारे गए, और सबरे पंछी बिनकौ मांस खायबे ते झिक गये। फिर मैंनें सुरग ते एक सुरग दूत कूं नीचे आते भये देखौ वाके हात में पाताल की तारी हती और एक बड़ी सांकर हती। बानें अजगर कूं पकर लियौ जो सैतान इबलिस हतो, बाय पकर कें हजार साल के काजै साकर ते बांध दियौ। तब बा सुरग दूतनें बाकूं पाताल के बा अथाह कुन्‍ड में धकेल दियौ और बापै मौहर लगाय दई जाते, जब तक हजार साल पूरे नांय है जाय तब तक लोगन कूं भरमाय नांय पाबै। हजार साल पूरे हैबे के बाद थोरे समैं के काजै छोड़ौ जाबैगौ। फिर मैंनें कछू राजगद्‍दी देखीं, जिनपै कछू आदमी बैठे हते बिनकूं न्याय करबे कौ अधिकार दियो हतो और मैनें बिन आदमिन की आतमन कूअऊं देखौ जो ईसू की गबाही और परमेस्‍वर के वचन की बजैह ते और बा डराबने पसु की मूरती की पूजा नांय करी और न वाके अंक अपने ऊपर लिखबाये जा बजैह ते बिनके सिर काट दिये हते। बे फिर जीबित है उठे और मसीह के संग हजार साल तक राज करौ। और जब तक जे हजार साल पूरे नांय भये तब तक बे दुबारा जीबित नांय भये। जि पैहले मरे भयेन मेंते जी उठबोए। बे धन्य हैं और पबित्र है, जो पैहले मरे भयेन मेंते जी उठबे में सामिल है रये हैं, इन आदमिन पै दूसरी मौत कौ कोई अधिकार नांय, पर बे तौ परमेस्‍वर और मसीह के पुरोहित होकर वाके संग हजार साल तक राज करिंगे। जब हजार साल पूरे है जांगे तब सैतान बा जेल में ते छोड़ दयो जाबैगौ। और बू सबरी धरती पै फैली भई मनुस्‍य जात जो गोग और मागोग कही जाबै बिनें भरमाबे काजै निकर परैगौ, बू बिनै युद्ध के काजै इकठ्‌ठे करैगौ। बे समुन्दर की बारू के किनकन के जितने अनगिनत हुंगे। सैतान की सेना सबरी धरती पै फैल जाबैगी और बे सबरे परमेस्‍वर के पबित्र लोगन के तम्बू और बिनकी पियारी नगरी कूं घेर लिंगे। पर आग सुरग ते निकरैगी और बिनकूं निगल जाबैगी, जाके बाद भरमाबे बारे सैतान कूं आग और गन्धक की झील में फैक दियौ जाबैगौ, ज्हांपै डराबने पसु और परमेस्‍वर के बारे में झूंठी बात बतायबे बारे दोनोंई डारे गये हैं, बे युगानुयुग तक रात-दिन तड़पैंगे। फिर मैनें एक बड़ी सफेद राजगद्‍दी और बाय जो बापै बैठो हतो देखौ वाके सामई धरती और आकास भाग कें ठाड़े भये। बिनकौ नाम निसान नांय रयौ। फिर मैनें छौटे बड़े सब मरे भये लोगन कूं राजगद्‍दी के सामई ठाड़ौ देखौ हतो कछू किताबें खोली गयीं फिर एक और किताब खोली गयी जि “जीबन की किताब हती” जामें मरे भये लोगन के कामन के अनुसार लिखौ भयौ न्याय करौ गयौ। जो मौत के सागर में हते बिनकूं समुन्दर नेंउ दै दियौ और मौत और पाताल नेऊ अपने मरे भये सौंप दिये। हरेक कौ न्याय बिनके कामन के अनुसार करो गयौ। जाके बाद मौत और पाताल कूं आग की झील में झोंक दियौ जाबैगौ। जि आग की झील दूसरी मौत होगी। अगर काऊ कौ नाम “जीबन की किताब” में नांय लिखौ तौ बाऊए आग की झील में धकेलौ जाबैगौ। मैनें एक नयौ आकास और नई धरती देखौ, चौंकि पैहलो आकास और धरती जाते रये, और अब बू समुद्रअऊ नांय रहो। मैंनें परमेस्‍वर के जौरें सुरग मेंते पबित्र नगरी नये येरूसलेम कूं नीचें उतरते भये देखौ। बू ऐसी सजी भयी हती, जैसें दुलहन अपने दूला काजै सजै। तब मैंनें राजगद्‍दी मेंते काऊ आदमी की अबाज जि कैहते भये सुनी, “देख, परमेस्‍वर कौ डेरा लोगन के बीच में हतै और बू लोगन के बीच में रैहबैगौ। बे वाके अपने लोग हुंगे परमेस्‍वर खुद बिनके संग रैहबैगौ और बिनईं कौ परमेस्‍वर होगौ। और बू बिनकी आंखन के आँसू पौछैगौ, फिर जाके बाद कबऊ मौत नांय होगी ना सोक होगौ और ना दुख और ना बिलाप होगौ, चौंकि पुरानी बात सब बीत चुकी।” तब राजगद्‍दी पै बैठे भये नें कही, “मैं सब कछू नयौ बनांय दिंगो।” बानें फिर कही कै, “लिखलै, चौंकि जि वचन भरोसे के लायक और सच्‍चौए।” फिर बू मोते बोलौ कै, “जि बात पूरी है गयी। मैंई अलफा और ओमेगा हूं, आदि और अंतऊ। जो कोई पियासौए मैं बाय जीबन के सोता में ते सेंत मेंत पिबाऊंगौ। जो जीत जाबैगौ बई की जि बिरासतै। मैं वाकौ परमेस्‍वर हुंगो और बू मेरौ बालक होगौ। पर डरपोक और अबिसबासी, दुस्‍ट, हत्‍यारे, व्‍यभिचारी, टौना, मूरती पूजबे बारे और सब झूंठान कौ भाग बा आग और गन्धक बारी झील में होगौ जो दूसरी मौतै।” फिर जिन सात सुरग दूतन के जौरें सात पिछली बिपत्‍तीन ते भरे भये सात कटोरा हते, बिनमें ते एक मेरे जौरें आयौ और मोते बोलौ, “इतकूं आ। मैं तोय दुलहन मतलब मैमना की पतनी दिखाऊंगौ।” और बू सुरग दूत मोय पबित्र आतमा में एक ऊंचे पहाड़ पै लै जाकें परमेस्‍वर के जौरें ते पबित्र नगर येरूसलेम कूं उतरते भये देखौ। बू परमेस्‍वर की महिमा ते भरौ हतो। वाकौ उजीतौ भौत कीमती यसब रतन के समान चमक रयी हती। बा नगर के चारौं लंग एक भौत ऊंची दीबार बनी हती। वाके बारै द्वार हते और बारै द्वारन पै बारै सुरग दूत बैठे हते और हरेक द्वार पै इसरायल के बारै कुलन के नाम लिखे हते। पूरब की ओर तीन फाटक, उत्‍तर की ओर तीन फाटक, दक्खिन की ओर तीन फाटक, और पस्चिम की ओर तीन फाटक हते। और नगर की दीबार की नींव बारैह पत्‍थरन पै बनी हतीं, और बिनपै मैमना के बारै भेजे भये चेलान के बारैह नाम लिखे हते। जो सुरग दूत मोते बात कर रयो हतो, बापै नगर और द्वार और नगर की चार दीबारीऐं नापबे काजै एक सौने की लम्बी छड़ हती। बू नगर चौकोर हतो और वाकी लम्बाई चौड़ाई कूं नापौ गयौ साढे सात सौ कोस निकरौ और वाकी लम्बाई चौड़ाई और ऊंचाई बराबर हती। और बा सुरग दूत नें बू चारदीबार आदमी के नाप ते नापी तौ एक सौ चंबालीस हात निकरी। और बा नगर के दीबार की चिनाई यसब नाम के रतन की बनी हती और नगर कूं कांच के समान चमकबे बारे सुद्ध सौने की बनाई हती। नगर के परकौटा की नींव भौत कीमती रतन ते सजाई गयी हती, नीब कौ पैहलौ पत्‍थर यसब, दूसरी नीलम और तीसरी लालड़ी,चौथी पन्‍ना की पाँचमीं गोमेद ते, छठी मानक ते, सातमीं पीत मनि ते, आठमीं पेरोज ते, नौमीं पुखराज ते, दसमीं लहसनिया ते, ग्‍यारहमीं धूम्रकांत ते और बारहमीं चन्द्रकाँत मनि ते बनी हती। बारै द्वार बारै मोतीन ते बने हते, हर द्वार एक-एक मोती ते बनो हतो। नगर की गली साफ कांच के जैसें सुद्ध सौने की बनी हती। मोय नगर में कोई पिराथना घर नांय दीखौ चौंकि सर्वसक्‍तीमान पिरभू परमेस्‍वर और मैमनाईं वाकौ पिराथना घर हतो। बा नगर में सूरज और चन्दा की कोई जरूरत नांय हती चौंकि परमेस्‍वर कौ तेज इतनौ अलौकिक हतो और मैमना बा नगर कौ दीया हतो। सबरी जाति बा दीये के उजीते के सहारे आगे बढ़िंगे और जा धरती के राजा अपने तेज कूं नगर में लांगे। दिन में कबऊ म्हांके दरबज्‍जे बन्द नांय हुंगे चौंकि म्हांपै रात कबऊ नांय होगी। सब जातिन कौ तेज, धन-दौलत बा नगर में लायो जाबैगौ। कोई असुद्ध चीज बामे घुस तक नांय पाबैगी और न सर्मायबे बारे काम करबे बारे और झूंठ बोलबे बारे बामे घुस नांय पांगे। बा नगर में बेई घुस पांगे जिनकौ नाम मैमना की जीबन किताब में लिखौ भयौए। फिर बानें मोय आर-पार दीखबे बारे कांच की सी झलकती भई, जीबन के जल की एक नदी दिखाई, जो परमेस्‍वर और मैम्‍ना की राजगद्‍दी ते निकरकैं बा नगर की सड़क के बीचों बीच भै रयी हती। और नदी के जा पार, और बा पार, जीबन कौ पेड़ हतो। बामें बारै तरैह के फल लगते हते, और बू हर महीना फलतो हतो, और बा पेड़ के पत्‍तन ते देस देस के लोग चंगे होते हते। और फिर साप न होगो और परमेस्‍वर और मैम्‍ना की राजगद्‍दी बा नगर में होगी, और वाके सेबक वाकी सेबा करिंगे। और वाकौ मौंह देखिंगे, और वाकौ नाम बिनके माथेन पै लिखौ भयौ होगौ। और फिर रात न होगी, और उन्हें दीया और सूरज के उजीते की जरूरत नांय होगी, चौंकि पिरभू परमेस्‍वर बिन्‍नैं उजीतौ दैबैगौ, और बे युगानुयुग राज करिंगे। फिर सुरग दूत नें मोते कही, “जि बात भरोसे के लायकें, और सच्‍चीऐं। और पिरभू परमेस्‍वर जो परमेस्‍वर की बात बतायबे बारेन कूं आतमा दैबै, बानें अपने सुरग दूत कूं भेजौए, कै अपने सेबकन कूं बे बात जिनकौ भौत जल्दी पूरौ हैबौ जरूरीऐ दिखाबै।” ईसू नें कही, “देख मैं भौत जल्दी आयबे बारौऊ धन्य है बू, जो जा किताब की भविस्‍यबानी की बातन्‍नें मांनें।” मैं बुई यूहन्‍नांऊ, जो जिन बातन्‍नें सुनतौ, और देखतौ हतो, और जब मैं नें सुनी और देखी। तौ जो सुरग दूत मोय इन बातन कूं ये बातें दिखातौ, मैं वाके पांमन में दन्‍डबत करबे के काजै गिर परौ। और बानें मोते कही, “देख, ऐसौ मत कर, चौंकि मैं तेरौ और तेरे भईया परमेस्‍वर की बात बताबे बारे और जा किताब की बातन के मानबे बारेन कौ संगी सेबकऊं, परमेस्‍वरई कूं दन्‍डबत कर।” फिर बानें मोते कही, “जा किताब की भविस्‍यबानी की बातन कूं बन्द मत करै, चौंकि समै जौरें है। जो अन्याय करैगौ, बू अन्याय करतौ रहबै, और जो दुस्‍टता करै, बू दुस्‍टताई करतौ रहबै, और जो धरमी है, बू धरमी बनों रहबै और जो पबित्र है, बू पबित्र बनो रहबै।” ईसू नें कही देख, “मैं भौत जल्दी आयबे बारौऊं, और हर एक के काम के अनुसार बदलौ दैबे काजै प्रतिफल मेरे जौरेऐ। मैं अलफा और ओमेगा, पैहलौ और आखरी, आदि और अन्तऊं।” धन्य बे हैं, जो अपने कपड़ा धोय लैमें, चौंकि बिन्‍नें जीबन के पेड़ के जौरें जायबे कौ अधिकार मिलैगौ, और बे फाटकन मेंते हैकें नगर में घुसिंगे। पर टोन्हे, व्यभिचारी, हत्‍यारे और मूरती पूजक, और हरेक झूंठ बोलबे बारे और झूंठ कूं चाहबे बारे, गली के कुत्‍तान की तरैह ते, बे बाहर परै रिंगे। “मुझ, ईसू नें अपने सुरग दूत कूं तुमारे काजै और कलीसियन के काजै भेजौए कै इन बातन की गबाही देय। मैं दाऊद कौ मूल, और वंस, और भोर कौ चमकतौ भयौ तारौऊं।” और पबित्र आतमा और दुलहन कहमें, “आ।” और सुनबे बारैऊ कहमें “आ।” और जो पियासौ होय, बू आबै और जो कोई चाहे बू जीबन कौ जल सेंत मेंत लेय। मैं यूहन्‍ना हरेक कूं जो जा किताब की भविस्‍यबानी की बातन्‍ने सुनातौ होय, गबाही दऊं, कै अगर कोई आदमी इन बातन में कछू बढ़ाबै, तौ परमेस्‍वर इन बिपत्‍तियन कूं जो जा किताब में लिखीऐं, बापै बढ़ाबैगौ। और अगर कोई जा भविस्‍यबानी की किताब की बातन में ते कछू निकारै तौ, परमेस्‍वर बा जीबन के पेड़ और पबित्र नगर में ते जाकी चरचा जा किताब में हतै, वाकौ भाग निकार देगौ। जो इन बातन की गबाही दैबै, बू जि कैहबै, “हाँ, मैं भौत जल्दी आयबे बारौऊं।” ऐसौई हैबै। हे पिरभू ईसू आ। पिरभू ईसू की किरपा, परमेस्‍वर के सबरे पबित्र लोगन के संग रहबै। ऐसौई हैबै।