Yĕsu Krito che mawng Dawut la Awbraham chen äng käh dä. Niche Ani chen äng käh khrawng khäl ming. Awbraham che Aijak paw, Aijak che Yakub paw, Yakub che Yuda la ani ta nawu khäl paw. Yuda che Peret la Zara paw awlaw anih nu che mäi hüt saw Tamal, Peret che Hisron paw. Hisron che Aram paw. Aram che Aminadab paw, Aminadab che Nason paw. Nasawn che Salmon paw. Salmon che Boat paw, Boat nu che mäi hüt saw Rahab, Boat che Obet paw, Obet nu che mäi hüt saw Rut, Obet che Yesi paw. Yesi che mawng Dawut paw. Dawut che Solomon paw, Solomon nu che mäi hüt saw Uria käh phiya. Solomon che Robom paw, Robom che Abija paw, Abija che Asap paw Asap che Yosaphat paw, Yosaphat che Yoram paw, Yoram che Ujia paw. Ujia che Yotham paw, Yotham che Ahat paw, Ahat che Hejeki paw; Hejeki che Manasi paw; Manasi che Amon paw, Amon che Yosi paw; Yosi che Yakoni paw. Anih ta nawu khäl Isawlael khäl Babil a heng naw ini hmuei khaw a, luhdül äng ini lo. Yakoni che Salatiel paw. Ni Salatiel Isawlael khäl Babil a heng naw ini hmuei pänäng luhdül äng lo saw. Salatiel chaw che Yirubabel. Yirubabel che Abiut paw, Abiut che Iliakim paw, Iliakim che Azol paw, Azol che Yadok paw, Yadok che Akhim paw, Akhim che Eliut paw, Eliut che Eliajal paw. Eliajal che Mathan paw. Mathan che Yakub paw, Yakub che Yosep paw. Yosep che Meri pawtaw awlaw Yĕsu che Meri chaw. Ni Yĕsu a Krito ting panei hmuei. Awbraham känäng chah bala Dawut täh chen leihli ini mäi. Awlaw Dawut känäng chah bala Babila hengnaw ini hmuei saw täh chen leihli ini mäi. Awlaw Babila hengnaw ini hmuei saw täh känäng Krito täh chen leihli ini mäi. Yĕsu Krito ni huih luhdül äng athän hüt. Meri ting mingei nawtih hngawk hnguchaw hngat mäi hüt. Yosep äng a hnih i hnih om naweyeih saw khidih i hnih tawei hüt. Äini a hnih omnawei khawngah Meri la awhmawtei Asanh chang Khraw tha äng ani upungvawn mäi. Yosep che hngat konghmuh sang mäi hüt awlaw Meri a khrawng khälla ini keleih ei ting umuchaw äng ani a nawaih tiyah ting awtawkei. Yosep la ni khäl tawk khaw a, Boi käh Hawn natchaw hngat awmawnga lo bala ani a tak, “Dawut chen äng käh Yosep o, Meri a nawnawkaih saw keh ei ti. Iyaäm ani hän äng käh sämäichaw che Asanh Chang khraw känäng lo saw dä. Ani a pawtaw chaw thäneyeih saw awlaw nang Ani ming Yĕsu ting suyei bäi. Iyaäm Ani la Ani käh khrawng khäla ngulai känäng khiyawtalai.” Ni khäl thänei saw Hnadaga sidawng hiyawktih la hawu hüt saw Boi käh ni kheu uluih yeih saw koong. “Khin! Hngawk hnguchaw hngat upungvawn mäi bala pawtawchaw chawnawkai awlaw Ani ming Imanuel tawk hmueyei. Ni kheu naw phawhngal hi, Hnadaga nangkei ängtu mäi ting thänei.” Yosep ip känäng thou. Äidä Boi käh hawn natchaw la taksaw huih ani la Meri a nawk. Äini Meri mäiyeiyah saw sawgraw ahnih utu ip häih. Äi pänäng Yosep la ihni chaw ming Yĕsu ting suyei. Herawt mawng khin khaw a, pre lekchaw Yudia a käh Betlehem nama Yĕsu athän hüt. Äi khaw a hnithoh pawt känäng pochong hnih thum ngen mawh khrawng Yĕlusalem mräh a ini lo. Awlaw anih la ini hawu, “Luhdül äng athäntih Yudi khäl käh mawng mawnga äm? Keinih Ani käh asĕ hnithoh pawta kini hmuh khäh awlaw Ani a kini khäh aih koong kini lo saw.” Herawt mawng la äi yaw bala thasa okonggrah awlaw Yĕlusalem saw khäl ha ini konggrah. Ani la pujawtih elenchaw khäl awlaw Mosi käh thung choktih khäla lum bala anih a hi, “Mesaya mawnga äthän saw äm?” Anih la ani a ini tak, “Ani Betlehem nama käh pre lekchaw Yudia a dä äthäneyeih saw ting Hnadaga sidawng hiyawktih la yok hüt, “Yudia pre lekchaw a käh Betlehem o, nang ha Yudia a käh la dukäng alang gong hngat, iyaäm nang duk känäng dä khiyuptih khrawng hngat lo ai awlaw Ani la kei käh Isawlael yapsaw chetchaw ai. Nang känäng kei käh Isawlael saw a samphomah khiyong tih huih hngat thokai.” Äidä Herawt mawng la umuchaw äng ngen mawh khrawng khäl panei bala äi asĕ itih khaw a ini hmuh äm ting ihi. Ani la anih a tak, “Betlehema chet chula äi sämäichaw a mawtchaw asui khäl. Nini bün khaw kei a awhawu pek bäichu. Kei ha chet ngala Ani a kakhäh ai.” Äi ngen mawh khrawng khälla mawng kheu ini khin pänäng ini chetal. Anih la hnithoh pawta ini hmuh saw asĕ anih hmawi mawh a chet. Äi asĕ sämäichaw mäi saw laa dümah saw sawgraw anih asĕ hnung hnung äng ini chet. Asĕ dümsaw hmu ula anih mawmawt ini piyaw. Äi khrawng khäl im duka vawng ula sämäichaw a unu Meri ängtu ini hmuh. Anih khokgru dül äng om ula äi sämäichaw a ini rosi. Anih la äi sämäichaw koong ini lo pek saw ha, phrankinsen, awlaw mür ini khoila känäng thoh pek ula ini pek. Äi pänäng anih la Herawt mawng khäka krawnalaih u saw ting ini mawngnawk ni anih awhngaw lawm pawt känäng anih pre a ini chetal. Anih ini chetal pänäng Boi käh Hawn natchaw hngat la Yosepa awmawnga dawnei bala tak, “Thou, ni sämäichaw la unu a chi tila Aigup pre a chen! Kei kini ta nga saw sawgraw äiya mäi bäichu. Iyaäm Herawt mawng la ni sämäichaw a tukaih saw koong sui ei.” Yosep ip känäng thou bala äi yawna ani chaw la iphiya a law bala Aigup pre a chet. Herawt mawng düah saw sawgraw anih äiya ini mäi. Hnadaga sidawng hiyawktih la hawu hüt saw Hnadaga kheu u luih, “Kei Aigup känäng kawchaw a kapaneiyal.” Äi ngen mawh khrawng khälla ani a ini kramei ting Herawt mawng la hmawtei ni, mawmawt aman pok. Ani la ani käh khrawng khäla te bala Betlehema awlaw äi nam kena käh khumhnih awlaw khumhnih dawng äng mäitih sämäichaw khäl kheni ini tukaih saw tak. Ngen mawh khrawng khälla ini hawu hüt saw i khin tawk bala ani la ni poh. Hnadaga sidawng hiyawktih Jirimi la hawu hüt saw huih Hnadaga kheu luih, “Athak ini kap saw la ini o ei saw sam Rama mräh lekchaw känäng awthawng. Rahel awchawtih koong akap tun, ani la lung ne hyelal saw hlüeyah, iyaäm ani chawtih ini dü däk.” Herawt mawng dü pänäng Yosep Aigup pre a mäipe khaw a, Boi käh hawn natchaw la awmawnga awdawnei. Hawn natchaw la tak, “Thou, nawchaw la niphiya Isawlael a chipui naw al. Sämäichaw sawk tuaih khiyang hüttih khrawng khäl ini dü chak däk.” Yosep thou bala sämäichaw la unu ängtu Isawlael pre a awkrawn pui nawkal. Äini Yudia pre lekchaw a Herawt mawng chaw Akhila tua mawngeyal khäh ting Yosep la yawk ni, ani echetalaih saw keh. Äi pänäng Galila chetalaih saw koong ani la mawng nawk. Äiche anih Nazaret ting mingei nawk saw mräh a ana mäiyal. Hnadaga sidawng hiyawktih khälla ini hawu hüt saw huih Hnadaga käh kheu uluih. Anih la ini hawu hüt, “Ani a Nazarin ting panei hmueyei.” Awbawng khokum pänäng tuilüh pektih Yohan Yudia pre lekchaw a käh ala honga lo bala tara haw. Ani la khrawng khäla tak, “Ngulai känäng nini lung hleyeyal khäl, iyaäm hawna käh Mawng pre che lo aih däk.” Hnadaga sidawng hiyawktih Aijaya la Yohan krong hawu hüt saw, “Täulung chinga khrawng hngat la athak hek bala hawu, ‘Boi käh lawm pochula taw khäl, Ani koong lawm chokjog po khäl.’” Yohan la ut ting ini taksaw mäksetdäva hmul äng käh awat wat hüt awlaw echeng äng awnvun khabaih henei hüt chi. Ani la khawng khäu pü la khoitui dä ei hüt saw. Yohan la tara hawsaw khina Yĕlusalem mräh awlaw Yudia pre lekchaw a mäitih awbawng khrawng Yawldan hlonga ini lo. Anih käh epret khawmeyal ula Yawldan hlong äng tuilüh ini lawkeyal. Äini Yohan la tuilüh pekdüna awbawng Pherasai awlaw Suduki khäl ini lo. Yohan la anih ini lo saw hmu bala anih a tak, “Phol chen khälo! Hnadaga känäng olo tunsaw dam känäng nini chenaih koong ula nangnih a kram anang pek saw äm? Nangnih käh bi kawi äng dawnei khäl nangnih ngulai känäng nini lung nini hleyeyal däk. Keinih Awbraham chen dä äi koong Hnadaga la keinih a dam äng khrawng khraw hnawh ting nangnih nini lung äng hawuvaichu awlaw tawkaichu. Kei nangnih a kanang tak, Hnadaga la ni lung khäl känäng ha Awbraham chena ibih hnäng khäh. Thing yungkung awtaih koong hĕi che ächän tawk hmuyei khäh. Mawng thing äng etheih pawi theiyah äm, äi thing che khruk hmueyei awlaw mei äng chawh hmueyalai. Nangnih ngulai känäng nini lung nini hleyeyal koong kei nangnih a tuilüh kanang pek. Äini kei pänäng loaih tih che kei thawka mawt dogo mawh. Ani käh thanap jäi kusuh aih saw bang kei tawn nga. Ani la che nangnih a Asanh chang Khraw la mei äng dä tuilüh anang pekaih saw. Ani kut äng chawngkou mäi khäh. Ani la chawng chelh dün la ho bala mawmawt chaw asanh poh ai. Ani la chawng taktih kheni leng äng tawkalai, äini chawng hitih kheche sätak ha yupah tih mei äng chawh hmueyei.” Yĕsu Galil pre lekchaw känäng Yawldan hlonga tuilüh lawkeyeih saw koong Yohan khäka lo. Äini Yohan la Yĕsu a nga hnäh. Yohan la Yĕsu a tak, “Kei dä nang khäka tuilüh kawlawkeyeih saw tawn saw. Äini nang dä kei khäka iya nolo saw äm?” Yĕsu la krawn bala takal, “Ni huih tua thänei seh. Hnadaga la hlüei saw huih nangkei ini poh aih lah saw.” Äidä Yohan la Yĕsu a tuilüh pekaih saw ngei hnäh. Yĕsu la tuilüh lawei bala thouwal khaw a hawn hongei. Äidä Hnadaga käh khraw khü huih lo bala Ani khrung äng adümsaw Yĕsu la hmuh. Äi khaw a hawn känäng ni huih asam thawng, “Nidä Kei käh kekhet sum chaw, Ani äng dä kei kawpiyaw saw.” Yĕsu la tuilüh lawkei pänäng Mannat la chawmsi äng khraw hnäng hmawna Asanh chang Khraw la Yĕsu a ala honga chih pui nawk. Yĕsu äiya khomhnüp hligip ümü ngo iha ei oa pak mäi hüt. Äi khaw a Yĕsu üdüei. Äidä mannat la lo bala Yĕsu a tak, “Nang dä kawchawng chawng Hnadaga chaw hi, äi lungpel khäla ha ini thäneyeih saw ta.” Yĕsu la krawn bala takal, “Kiyam äng yoei bala mäi khäh, “Luhchaw eisaw jiji äng heng u. Äini Hnadaga mongkhok känäng thoksaw kheu ula khinäm äidä hengaih saw.” Äidä Yĕsu a Mannat la asanh chang Yĕlusalem mräh a chipui naw bala äiya käh Hnadaga im phaiya hiyapui nawk. Mannat la Yĕsu a tak tü hnäh, “Nang dä kawchawng chawng Hnadaga chaw näthänei khaw, awdawnga chu. Iyaäm kiyam äng yoei bala mäi khäh, “Hnadaga la hawn natchaw khäla teh ei. Anih la nanga anang mawnai, nokho lungpel äng naw büneiyah hmawna.” Yĕsu la krawn bala takal, “Kiyam äng ni huih ha yoei bala mäi khäh, “Nang käh Boi Hnadaga a asang chawmaiti.” Mannat la awlaw krawnak Yĕsu a hlüngtih khuyung khrunga chih pui nawk. Äi känäng luhdül äng käh mawng pre awlaw anih käh thayung awdawn. Äidä Mannat la tak, “Kei a kuntila ini khäh khaw, awlaw ini rosi khaw, kei nanga ni khäl kheni kini pekai.” Äi khaw a Yĕsu la ani a takal, “Kei kena mäitiyei ti, chonal hnäh! Kiyam äng yoei bala mäi khäh, “Nangnih käh Boi Hnadaga a dä nini chetchaw aih saw awlaw Ani a dä nini rosiyeih saw.” Äi khaw a Mannat la Yĕsu a hlätal bala chetal. Hawn natchaw khäl lo ula Yĕsu a ini sokhreyal. Yĕsu la Yohan a othong ima ini hengnawk saw sidawng yawk. Äidä Yĕsu Yudi a känäng Galil pre lekchaw a chetal. Ani Nazaret nam hlätal bala Kawpalnahum a mäiyeh saw koong chetal. Kawpalnahum mräh che Galil guda kena, Jabulun la Nazaret pre lekchaw a mäi saw. Hnadaga sidawng hiyawktih Aijaya mongkhok känäng Hnadaga la hawu hüt saw kheu khäl ihisaw a thänei. “Jabulun pre lekchaw awlaw Naphtali pre lekchaw, mret kena käh lawm, Yawldan hlong chuphawt jala mäitih Galila käh Yudi hiyahtih khälo khin khäl! Uhiyung äng mäitih khrawng khälla, wachawi chawi a‍ mei ini hmuh däk. Nüdü nawk saw laa uhiyung äng mäi hüttih khrung äng, awa akraw däk.” Ni tähkän Yĕsu la tara haw aih saw chah. Ani la hawu, “Ngulai känäng nini lung hleyeyal khäl, iyaäm hawna käh Mawng pre che loaih däk.” Hnüpak khaw a Yĕsu lungkhiyang Galil guda kawm äng chetei tunsaw. Ani la Simon, Pitol ting mingei nawtih awlaw Endu a hmuh. Simon la Endu la mret äng kawn ihnih tong tunsaw. Ahnih che dum ihni mäi hüt. Yĕsu la ahnih a tak, “Kei ängtu lo hnih! Ngaw ni hni mawn saw huih iba khrawng khäl kei tebeih nihnih poh aih saw äm, äi Kei kanang chokai.” Äi äng tutu ahnih la kawn ihnih hiyän hüt. Tanawu pai hnih ni Yĕsu ängtu ihnih chet. Yĕsu awlaw bitchaw chet ni äiya tanawu pai hnih hmuh tü. Ahnih che Yakub la Yohan. Ahnih che Jebidi chaw. Ahnih la awpaw ängtu long äng om häih la kawn ini khoyal saw. Yĕsu la äi tanawu pai hnih a ha panei. Äi äng tutu ahnih la long la ihni paw hlät häih la Yĕsu ängtu ihnih chet. Yĕsu Galil pre lekchaw püh chak bala, Yudi ini lumeidün im khäla ochok. Ani la mawng pre a käh sidawng pawi kheu hawu pek. Äi düna Ani la ayapyap lawgase khäl kheni awpawi poh al. Yĕsu la tara haw saw la lawgase khäl awpawi poh al saw Siriya pre a khrih ei chak. Äidä ayapyap lawga khomeitih a khrawng la Ani khäka ini lo. Üküt che khrawse la mawntih, üküt che vok lu kopeitih awlaw üküt che chektih khäl. Yĕsu la hang hanga ni awpawi poh al. Galil pre lekchaw känäng awbawng khrawng Yĕsu ängtu ini chet. Dikapoli ting ini taksaw mräh Paiha känäng awlaw Yĕlusalem mräh, Yudia pre a käh hang hang la känäng awlaw Yawldan hlong awhngaw kawpa käh khrawng khäl ha Yĕsu ängtu ini chet. Yĕsu la awbawng khrawng hmuh ni khuyunga kawi. Ani äi khuyunga om awlaw Ani tebeih khäl ha Ani a wan ula ini om chak. Äidä Ani la chokaih saw chah. Yĕsu la hawu, “Awkhraw lawm äng sanglaitih a Hnadaga la pisih pek, Iyaäm hawna käh Mawng pre che, äi khrawng khäl käh dä. Ula ulung dukhah pi ei äm äiche pisih mawh, Hnadaga la anih a hiyelai. Hnadaga la ngiyaw ngiyaw chaw mäitih a pisih pekai, Iyaäm luhdül anih ängtu mäiyei! U käh khraw konghmuh koong düyei äm, anih la ulung nüm hmawna ini büneyei. Uabang jenei äm, äila Hnadaga pisih büniyei, Hnadaga la anih a jenei yei. U käh lung sanh näm äila pisih büniyei, anih la Hnadaga ini hmuh ai! Ulabang khrawng lung hiyel äm, anih la Hnadaga pisih büneyei, anih a Hnadaga chaw ting panei hmueiyei. Konghmuh lawm äng chetei saw koong khrawng känäng kuluh nawk hmuyei tih la pisih büneyei, hawna käh Mawng pre che anih huih khrawng koong dä. “Nangnih Hnadaga bi nini bisaw koong keleih nini hmuei khaw, awlaw kuluh nawk nini hmuyei khaw awlaw i hiyah pak ese anang tak khaw Hnadaga la nangnih a pisih anang pekai. Ni koong piyaw khäl awlaw äjaw khäl! Iyaäm hawn pre a nangnih koong elen phiyaw phoih mäi khäh. Iyaäm nangnih khawngah Hnadaga sidawng hiyawktih khäl ha kulunawk ini hmuei hüt.” “Nangnih luhdül äng käh chi. Äini chi ngan tiyah khaw, ibakawla krawnak nganalaih sawk saw äm? Äi chi i äng ha usum vawngtiyah, äiya däu hmueyalai awlaw khrawng khälla ini cheh lal chakaih saw tawn.” “Nangnih luhdül äng käh awa. Khuyung khrung äng mäitih mräh khuitila taw hnäng hnawh tih. Awlaw hngat la ha simiya choi bala tong kawla taw ah, äi chaw a simiya tawk dün laa dä ini tawk. Äihi che im duka mäitih hang hang la awa ini bünei chak. Äi huih kawchawng chawng, nangnih käh awa khrawng khäl khäka awa seh. Anih la nang käh awpawi saw khrang hmu ula hawna käh nang Paw Hnadaga a phiyaw seh u.” “Kei Mosi käh thung la Hnadaga Sidawng hiyawktih käh kheu khäl hiyänalai äng kolo saw ting khinai chu. Kei thung khäl hiyänalai äng lo nga, äini thung hluh yalai äng dä kolo saw. Kei nangnih a ihisaw kanang tak, luhdül la hawn kroka saw sawgraw, Mosi käh thung lung ngak ha krokal hnawh. Ibang yoei äm ükütni thäneyeih saw. Äi koong ni khäl kheu lekchaw sum thän, ulabang thung chalh äm awlaw khrawng khäla chalh aih saw chok äm, äiya hawna käh Mawng pre a üküt thawka elekchaw poh hmuyeih saw. Äini ulabang äi thung khäl ngei äm awlaw khrawng khäla chok äm, äiya hlen hmueyei. Kei nangnih a ihisaw kanang tak, Mosi käh thung choktih la Pherasai khäl thawka nangnih a konghmuh mäyah khaw, nangnih hawna käh Mawng pre a vawngal lah hnawh chu.” Nangnih nuchen paw sawk la ini hawu hüt saw nini hmawt khäh, “Khrawng sawk tuaichu. Ulabang khrawng sawk tukäm äi tara äng kraw ai.” Äini kei nangnih a kanang tak, ulabang ani ta nawu äng aman pok äm, äi Yudi khäl käh hngawsaw hmawi mawh a tara äng kraw aih lah saw. Awlaw ula bang ani ta nawu ämäk ting takäm awlaw ekeleih äm, äi ngulai mei äng kraw aih saw. “Äi koong nang Hnadaga khäka hlu dün laa nuhlu khaw a, nang lukhrunga nang nawu la ätängeiyeih saw mäi khäh ting täk ting nulung äng kawi hi, nang käh uhlu khäl hlu dün laa tawtila äi khrawng äng asakeiyal. Äi pänäng awlaw lo al tila ahlu al bäi.” “Losulapei nang ming äng tara poh ei khaw awlaw tara päiya anang khawi khaw, ani äng ayang lawma khanbawn hmateyal bäi. Äi huih nang po eiti khaw, nanga tara bitih khäka anang awpai, awlaw tara bitih la othong im mawh kutong ini awpai awlaw othong im mawh la nanga othong im äng anang heng nawkai. Kei nangnih a ihisaw kanang tak, nang awmawn khiyalti saw sawgraw äi känäng asang bang lätal hnawh ti.” Ni khäl hawu hmuei saw nangnih nini yawk käh, “Nangnih nini mik sawuveyei chu.” Äini Kei nangnih a kanang tak, ubang ha che awhngaw hmutaw a hmu bala a krakaih khiyang äm, äi ha ulung äng imik sawuvei saw dä. Nang käh setpawt mik la dä ngulai pawtäng anang chih khaw, äi setpawt nimik thaw teyal. Nang kantha khäl ngulai mei äng kraw ai chaw a, nimik hngat nawthawteyal saw pawi khäh. Setpawt kut la dä ngulai pawtäng anang chih khaw, äi kut bängeyal. Nakantha brat ngulai mei äng kraw ai chaw a, äi näbängeyal saw pawi khäh. Niha hawu hmuei, “Ulabang ani phiya khaveyal äm, äila khaveyal saw äng käh chaw pekal seh.” Äini kei nangnih a kanang tak, “Pawtaw hngat la iphiya awhngaw äng eyei saw epret bün pänäng dä khaveyalaih hnäng saw, awhngaw krong äng khaveyal hnäng hnawh. Epret mäyah pak khaveyal khaw, äi hmutaw a epret pawtäng chih. Äi hmutaw a nawal tih la ha epret biyal.” “Hnadaga la nangnih nupaw changlena hawu pek saw nini yawk däk, ‘Nangnih Boi Hnadaga ming lawei chula ohong chaw jengai chu, i koong nini jeng äm äi huih po bäichu.’” Kei nangnih a kanang tak, “Nangnih i äng ha jengai chu.” Hawn pre ming äng ha jengai chu. Iyaäm hawnpre che Hnadaga käh mawng nawn. Luhdül che Hnadaga la okhonih khrawkei dün la dä. Äi koong luhdül ming lawei chula jengai chu. Yĕlusalem ming äng ha jengai chu. Iyaäm äiche ming tawng mawng käh mräh dä. Awlaw nini luki äng ha jengai chu, iyaäm nulu sawm obok la ohom nopoh alaih saw tha nangnih a mäyah. Nangnih nini jeng khaw a ihisaw ihi awlaw hiyah saw hiyah hawu khäl. Äi prang äng thok saw che mannat känäng käh dä. “Hnadaga la nangnih a anang taksaw nini yawk khäh, ulabang nimik hngat anang mü sawkäm, ani mik ha che müa laih saw. Awlaw ulabang nini haw anang louh äm, äi khrawng haw ha louh hmueyalaih saw.” Äini Kei nangnih a kanang tak, nangnih pawyahtih khrawnga nga ai chu! Awlaw bang ula setpawt beng anang beh äm, ani a setong pawt beng ha täuveiyal. Ulabang nang käh bayu büniyeih khiyang saw koong tara poei äm, ani a nang käh ihl chaw ha pekal bäi. Ulabang tha thak tha melak chetai saw ini takäm, ani ängtu mel hnih chet bäi. Khrawng la nang känäng ibang anang hawuvei äm, äi anih a pek awlaw ulabang upu anang hawuvei äm, anih a ohong krawnal sawkaichu. “Nangnih ni hawu hmuei saw nini iyawk khäh, ‘Nang im cheng saw a khetnaw bäichu awlaw nang lansu khäla mum bäichu.’” Äini kei nangnih a kanang tak, lansu khäla ha nangnih khetnaw bäichu. Ulabang nangnih a anang kuluh nawk äm, anih koong suh tong bäichu. Äihi nangnih hawna käh Paw Hnadaga chaw nini thäneyei. Ani la awpawi la ese saw kheni äng Ani käh khoni khrawk khäh awlaw konghmuh sang la konghmuh sang hiyahtih lukhrunga kho pek khäh. Ula nangnih a anang khetnawk äm äiya jiji nini khet nawk khaw, iba phiyaw phoih nini bünaih saw äm? Phawndaw koktih la ha ni huih dä ini bi kawi saw. Nang nakhanbawn jiji äng dä näkräu khaw, awhngaw khäl thawka i usum vawng saw bi nibisaw äm? Awhngaw yapsaw la ha ni huih ini poh ei saw hiye ei? Äi koong kanang tak, hawna käh Paw Hnadaga ihuih ekejet äm, nangnih ha äi huih ekejet thänei khäl. Sidih äng mäi khäl! Khrawnga nawdawneiyeih saw koong konghmuh biyeiti. Äi huih nopoh khaw Paw Hnadaga la hawn pre a phiyaw phoih anang pek hnawh. Nang mäyahtih sanglaisu a ibang nepek äm, äi khaw a lupsong tih huih poeiyeiti. Anih la che khrawng khäl känäng hmawi ini büniyeih koong Yudi ini lumeidün im awlaw lawm täng bawh tum ula ini hlu. Kei nangnih a ihisaw kanang tak, anih la anih käh phiyaw phoih ini bünei däk. Äini nang sanglaisu a ibang nepek äm, äi khaw a nang käh set kutla ibang poh äm äi setong pawt kuta hmawt sawkaiti. Äi koong, nang nuhlusaw khäl kheni umuchaw äng mäiseh. Äihi hawna käh Paw Hnadaga la umu chaw äng ükütni sot khäh. Ani la nanga phiyaw phoih anang pekaih saw dä. “Nangnih suh nini tongei khaw a, lupsong huih suh tongei yeichu. Iyaäm anih la Yudi ini lumeidün im awlaw lawm kiuva ja ula khrawng la hmu ong suh tongei ini lawphah. Kei nangnih a ihisaw kanang tak, anih la anih käh phiyaw phoih ini bünei däk. Äini nang suh notongei khaw a, nang käh ätäk hngata chet awlaw sät khaei tila mäi. Hawna käh Paw khäka lung khiyang la umu chaw äng suh tongei. Ani la uthupei saw kheni hmuh chak khäh, nang käh Paw la nanga phiyaw phoih anang pekai.” “Nangnih suh nini tongei khaw a, Yudi hiyahtih huih äkräng kräng usum vawngah saw kheu khäl sumeyei chu. Iyaäm anih la ini khin, suh tong sawu khaw hngat la khat khinai. Anih huih thäneyei chu. Iyaäm nangnih Paw la hmawt chak khäh, nangnih ibang nini hlüei saw äm.” Äi koong nangnih ni huih suh tongei bäichu, O keinih käh hawna käh Paw, Nang käh ming asanh chang ting phu seh u, Nang käh Mawng pre loseh, hawna ihuih thänei äm luhdül äng ha nang sitha huih thänei seh. Hnüpak kiyawnah eisaw keinih a khrawng pek. Keinih khäka epret thäneitih ähläh kinipekal saw huih, keinih käh epret khäl khrawng hlätäl. Keinih a chawmsi äng khrawng khraw ai ti, äini Mannat känäng dä khrawng kak bäi. Iyaäm nangnih awhngaw käh epret ähläh nini pekal khaw, hawna käh Paw la nangnih käh epret ähläh anang pekalai. Äini nangnih khrawng käh epret dä ähläh pekalchu khaw, nangnih käh Paw la nangnih a ha ähläh anang pekal hnawh. Nangnih ümüt nini mäi khaw a, lupsongeitih khrawng huih nini hmawi nuk chula mäiyei chu. Äi lupsongeitih khrawng khälla khrawnga ini dawneyeih saw koong dä ümüt ini mäi saw. Kei nangnih a ihisaw kanang tak, anih la anih käh phiyaw phoih ini bünei däk. Nang ei oa pak nämäi khaw a, nuluki äng si hmakei bäi awlaw nawhmawi hlawei bäi. Äihi nang ei oa pak nämäi saw awhngaw khrawng la hmawtah pak. Äini nang hmuti saw Paw la che hmawt khäh. Awlaw nang Paw la umuchaw äng ükütni sot khäh, Ani la nanga phiyaw phoih anang pekaih saw dä. “Luhdül äng nupum koong kähkän chungiyei chu. Luhdül äng kähkän kha la ei, grang e. Awlaw sukhä la da bala mukai. Äini nupum koong hawn pre a kähkän chungei, äiya kha la grang la ei hnawh awlaw sukhä la da bala a muei hnawh. Iyaäm mawnga bang näkähkän mäi äm, äiya dä nulung ha mäiyeih saw.” “Nimik che nakantha äng käh simiya. Äi koong nimik dä pawi khaw, nakantha brat wa chak bala mäiyei. Äini nimik dä pawyah khaw, nakantha brat kheni uhiyungaih chak saw. Äi uhiyung che ihuih hiyung prim maih saw äm.” “Hngat ha awmawh pochong hnih käh hngasaw thänei hnängah. Iyaäm hngata khet nawkaih saw awlaw hngata umumai. Hngata che hmawi pekai awlaw hngata che pek hnawh. Nang Hnadaga la kähkän a utu khetnaw hnäng hnawh ti.” Äi koong Kei nangnih a kanang tak, “Ibang keeiyeih saw äm, ibang kookaih sawäm awlaw ibang kawataih saw äm ting, äi nupum kantha koong nang konggrah ai ti. Nawsawk kantha che ne eiok sawla awat cha thawka alang gong hiyah ei?” Hawna käh haw khäla soei khäl. Anih la iha chäh khaih u, lĕng äng ha chawng tawei u. Äini nang käh Hawna käh Paw la anih a suihsong bala tawk khäh. Nangnih haw thawka Hnadaga khäka nini len khäh hiyeh ei? Nangnih dukäng hngat la bang konggrah chula bitchaw bang nini sawk nini sawuhwei hnängai ei? “Awatcha koong iya nini konggrah saw äm? Düläng käh kheipa khäl sokhäl. Anih ihuih ini chomsaw äm. Anih la bi kawi u awlaw phawi hnuh u. Äini kei nangnih a kanang tak, Solomon mawng la awbawng kähkän tawei bala ha ani la kheipa huih sahngei hnäng hütah. Hnadaga la düläng käh bel la sangh bala bi. Äini tühnüp hngätäh a äi khawng äng hiyän hmuyalai. Hnadaga la äi thawka nangnih a awat cha anang pek hnawh ei. Iya nangnih nini yum leu saw äm?” Äi koong konggrah chula ni huih hawuvai chu, ‘I kini ei eih saw äm?’ ‘I kini okaih saw äm?’ Awlaw ‘I kini wataih saw äm?’ Yudi hiyahtih khälla dä ei okaih saw la wataih saw koong ini chon saw. Hawna käh Paw la nühlü ei saw khäl kheni Anila hmawt chak khäh. Täkchah Mawng Hnadaga pre la ini khiyupaih saw awlaw konghmuh dä sui khäl. Äihi ni khäl kheni nanga pek hmueiyei. Hngätäh koong kong grah ai chu. Hngätäh a koong hngätäh a konggrah bäichu. Tü hnüpa käh konggrah, tü hnüpa nokonggrah saw dä pawi. “Nangnih khrawng käh tara biyei chu, äihi nangnih käh tara ha Hnadaga la bi hnawh. Nangnih khrawnga ihuih tara nini bi äm, äi huih Hnadaga la nangnih käh tara biyeih saw. Nangnih khrawnga ihuih nini tünäm, äi huih Hnadaga la nangnih a anang tünaih saw.” Nang nawu mik äng käh obo nuhmuh, äini nang mik äng käh obo iya nang hmueiti saw äm? Iba nang nata nawu a natak datäm, “Lo! Nimik äng käh obo kolouh walaih.” Nupum kantha äng käh obo hmueiti ei? Lupsong khrawng khälo! Nang ayang nimikäng käh obo soei maw. Äi pänäng nang nata naw nawu käh obo nuhmuh ai. “Asanh chang vawn ui a pekai chu, ani la anang cho bala anang pil chakai. Awlaw nangnih käh amiyak wok khäl hmawi mawh a hiyänai chu, anih la lih ula ini chelh chakai.” “Hawuvei! Nangnih nini büniyei. Sui! Nangnih nini bünai. Sätäng khek, nangnih koong sät hong hmueyei. Iyaäm ulabang hawuvei äm, ükütnilani ini büneyei. Ulabang sui äm äila ha bünai. Awlaw ulabang sätäng khekäm, äi khäl koong sät hong hmueyei. Awchaw la ha hawuvei khaw lungpel pekaihtih äi huih paw, nangnih dukäng mäiyei? Hiyah thän ngaw hawuvei düna phol pekaiyei? Nangnih pawyahtih khrawng thänei chula nini chaw a pektawn sawla pek tawnah saw nini hmawt khäh. Äihi nang käh hawna käh Paw khäka ula bang hawuvei äm äi thawka anih a vawn pawi pek hmueyei.” Nangnih khrawng känäng ihuih awpawi nini hlü ei äm, khrawng äng äi huih awpawi poei khäl. Iyaäm nidä Mosi käh thung awlaw Hnadaga sidawng hiyawktih khäl käh elensum chok nawk kheu. “Cheketih tamkha dükäng vawng. Iyaäm nakrak nawk saw tamkha la lawm che mawt len. Äi äng mawt chetei pha awlaw awbawng khrawng äi äng ini chetei. Äini nawsawk mäi nawk saw tamkha che echeket, lawm ha dukhah mäi. Khrawng bitchaw la dä äi lawm che sui ula ini bünsaw.” “Hiyah saw sidawng hiyawktih khäl känäng sidih äng mäi khäl. Anih nangnih khäkä aprang äng che samphomah hmawi äng dä ini loaih saw. Äini udukäng che nget tih toui chaw huih dä. Anih käh bi khrang äng nangnih anih a nini helh hnängai. Nang ihling khak täu a grĕp theih bünti. Awlaw ihling khak känäng khĕu theih bünti. Äi huih thing pawi äng dä theih pawi theisaw awlaw pawyahti thing äng dä pawyahtih theih thei saw. Thing pawi äng pawyahtih thei awlaw pawyahtih thing äng awpawi theih thei hnängah. Mawng thing äng theih pawi theiyah äm, äi thing khru al tila mei äng nawchawh al saw pawi. Äi koong, nangnih anih käh bi khrang hmuh chula hiyah saw sidawng hiyawktih khrawng khäl nini helh hnängai.” “Kei a hang hang la sawkbrat ‘Boi, Boi’ ting khrawng panei thän, awvawng che hawna käh Mawng pre a vawngal hnäng hnawh u. Äini ula bang hawna käh Paw kheu khin äm, äi khäl dä hawna käh Mawng pre a ini chetalaih hnäng saw. Äi tara khomhnüp äng awbawng khrawng la Kei a khrawng takai, ‘Boi o, Boi o, Nang ming äng kei khrawng khäl khäka Hnadaga käh sidawng hawu pek ngaei? Awlaw nang ming äng khrawse thouwal ngaei?’ Kei nang ming äng awbawng nawmaw nawkaih saw po ngaei?” Äi khaw a Kei anih a tandan katakai, “Kei nangnih a krängak ha kanang hmawt hüt nga. O thung khrak tih khäl. Nangnih Kei känäng chetal khäl.” “Äi koong ula Kei kochok saw khäl khin äm awlaw äi täng chetchonei äm, ani che hngat prengiya mawh huih. Äi prengiya mawh la lung khruäng im sawkei. Äi pänäng kho lo, tui thok awlaw khri ha lo, äini äi im japah. Iyaäm äi im lung chang khruäng sawkei. Äini ula äi kochok saw khinah äm awlaw äi täng chet choneiyah äm, äiche mäktih huih. Äi mäktih la de khruäng im sawkei. Äidä kho la khri hnäkei, tui len, khri la äi im bop. Äiche äi im akrak chak.” Yĕsu la chok pän ni äiya mäitih khrawng khäl ini mawchak. Iyaäm Ani la chok saw che dogo mawh huih dä, Mosi käh thung choktih khäl huih chokah. Yĕsu khuyung känäng komal khaw a, awbawng khrawng la Ani hnung äng ini täm. Äi khaw a unu kopeitih khrawng hngat lo bala khokgru düläng äkhäh. Äi unu kopeitih la tak, “Choktih o, Nang dä nühlü khaw, kei a awpawi opo al tila asahnal sawk.” Yĕsu la ukut tävei bala sin bala tak, “Kei kühlü, nang sahnal!” Äi äng tutu äi unu sahnal chak. Yĕsu la ani a takal, “Ni khäl hngata ha hawu pekaiti. Äini pujawtih khäl khäka chetal tila nakantha adawneyal awlaw Mosi käh thung huih ahlu al. Äi äng nang nawpawiyal däk ting khrawng khälla ini hmawtai.” Yĕsu Kawpalnahum mräh a vawng khaw a, Roma käh soloi gong hngat Ani khäka lo. Äi soloi gong la khawh ei bala hawu, “Choktih o, kei hngasaw hngat opah saw ima mäi saw, ani ala känäng chakei hnäng tiyah. Ani la mawt dukhah büntun.” Yĕsu la ani a tak, “Kei chet ngala ani a awpawi kapoh alai.” Äini äi soloi gong la Yĕsu a tak, “Choktih o, Nang kei im teh khrung kawla noloaih saw, äi kei tawn nga. Nang ni känäng hawu, kei hngasaw pawiyal khäh ai. Kei kaw hmawt khäh. Kei ha hngat elenchaw dawäng dä kämäi saw. Kei dawäng ha soloi ini mäi khäh. Kei kei käh soloi khäla ana kepek hi, anih ini chet. Kei anih a lo äng ting katak hi anih ini lo. Kei hngasaw khäla po khäl ting katak khaw ini poh la khäh.” Soloi gong käh kheu yaw bala Yĕsu awmaw. Äidä Ani hnuäng tämtih khrawng khäla tak, “Kei nangnih a ihisaw kanang tak, Isawlael yapsaw dukäng ni huih uyum len hngatäng ha hmunga. Kei nangnih a kanang tak, Yudi hiyahtih khäl luhdül kheni känäng ini loaih saw. Awlaw anih Awbraham, Aijak awlaw Yakub tih ängtu hawna käh mawng pre a ini eiok düna ini omai. Äini Mawng pre a ukhäl ini mäiyeih saw kheu äm, äi khäla awhlawm hlaw a uhiyung dukäng hiyän hmueyalai. Äiya khrawng khäl ini kapaih saw awlaw ini haw ini chieiyeih saw.” Äi pänäng Yĕsu la äi soloi gonga tak, “Nang ima chetal. Nang käh yum la nang hngasaw a awpawi poh alaih saw dä.” Äi äng tutu äi ahngasaw pawiyal. Yĕsu Pitol ima chet. Pitol pui kawl bala awhiyawl saw Yĕsu la hmuh. Yĕsu la Pitol pui kut sin, äi äng tutu Pitol pui awkawl saw pawiyal. Äidä thou al bala anih koong eiok opoh pekal. Khomüni, khrawng khälla khrawse la mawnsaw awbawng khrawnga Yĕsu khäka ini lo. Yĕsu la omong khokäng ta bala pawyahti khrawse khäl kheni thoh al chak awlaw opahtih khäl kheni awpawi poh al. Ni khäl Hnadaga la khawmei hüt saw, tua äi khäl ihisaw a thänei. Hnadaga sidawng hiyawktih Aijaya la hawu hüt, “Ani la nangkei käh ini ngiyaw saw la lawga awpawi poal.” Yĕsu la awbawng khrawng la ini wanei nawk chak saw hmuh ni etebeih tih a Galil guda chupawt jala ini kawtaih saw tak. Äi khaw a Mosi käh thung choktih hngat Yĕsu khäka lo bala hawu, “Chokti o! Nang mawnga nechet äm kei ha äiya kechetaih saw dä.” Yĕsu la ani a takal, “Khewa a vawm mäi khäh awlaw haw a ubuh mäi khäh. Äini Luhchaw Chaw a uluki tuh ei dün ala mäyah.” Yĕsu tebeih hngat la lo bala tak, “Choktih o, kei nang ängtu kolo ai, äini kei chetal maw ngala kawpaw a kaphulalaih maw.” Yĕsu la ani a tak, “Kei ängtu lo, awkhraw lawm äng dütih khälla awhngaw dütih khäla phulal seh u.” Äi pänäng Yĕsu ani tebeih tih ängtu long hngat äng kawi. Täkting mret äng khri lo awlaw läng kawi bala long äng kraw. Äini Yĕsu äi khaw a ip tunsaw. Äi khaw a tebeih tih khäl Yĕsu khäka ini chet äidä ini khak, “Boi o, Boi o, keinih kini dü chak nu. Khrawng hlätale.” Äi khaw a Ani la anih a tak, “Uyum leutih khälo, iya nangnih nini ke saw äm?” Ani thou bala khri la mreta hekei. Äidä hang hang jelal chak. Hang hang ni mawchak ula ini hawu, “Ni u äm? Khri la läng la ha Ani kheu ihnih khin saw!” Äi pänäng Yĕsu Galil guda kawt bala awhngaw jala aphaw. Äi la ming che Gadalin. Äi düna khrawng pai hnih cho känäng ihnih lo. Ahnih a khrawse la mawn saw. Ahnih che ihnih kehse saw koong hngat ha äi lawm ken känäng chetei vawp chi u. Täk ting ahnih ihni hek, “Yĕsu, Hnadaga Chaw, Nang kei hnih äng ibang nühlü mäi saw äm? Ikhin lo khawngah kei hnih a damäng anang khrawkaih koong nolo saw ei?” Wok sawngak la awhlawm hlaw a chawk ini eitun hüt saw. Khrawse häih la Yĕsu a ihni hnih ei, “Nang kei hnih a anang tämalaih khaw che, keinih a Wok sawng äng khrawng teal.” Yĕsu la ahnih a tak, “Chetal hnih!” Äidä äi khrawse khäl khrawng känäng ini thokal. Anih wok khäl duka ana vawngal. Äi pänäng wok khäl kheni athak chon ula mretäng ana chu al. Wok khäl tui äng nek ula ini dü al. Äi wok sawng kiyongtih khäl jotjota chonal ula nama sidawng ana hawu pekal. Anih la khrawse la mawnti krong khrawng khäla hang hang ini hawu pekal. Äi khaw a nam bratsaw khäl kheni Yĕsu äng khomeyei äng ini chet. Namsaw la Yĕsu a ini khom pänäng äila känäng echetalaih saw koong ini khawh ei. Yĕsu long äng Galil guda kawt bala upum mräh a krawnal. Äi khaw a pochongak hnih khrawng khälla kutkho chĕktih khrawng hngata phawk äng kün ula Yĕsu khäka ini lo. Yĕsu la anih käh uyum hmu bala anih a tak, “Chaw o piyaw e, nang ngulai känäng ähläh nübüniyal däk.” Äini Mosi käh thung choktih hngat pai hnih la ini lung äng ini hawu, “Ani la khrawng käh ngulai ähläh al hnäng ting awkhawmei. Ni kheu äthänei saw che Ani la upuma Hnadaga äng titih pohei bala Hnadaga a ekeleih saw.” Anih la ibang ini tawkäm äi Yĕsu la awhmawt chak. Äi koong Yĕsu la anih a tak, “Iya nangnih nini lung äng äi huih esĕ kheu nini tawk saw äm?” Mawng nini hawuvaih saw loigra äm, “Nang ngulai ähläh nübüniyal däk tingei” hiyah khaw, “Nang thoutila cheteyal tingei?” “Äini luhdül äng ngulai ähläh pekaih saw thayung Luhchaw Chaw la tawkei khäh ting nangnih a kei kanang hmawtaih sawk khiyang.” Äi khaw a kutkho chĕktih pawta hlĕyei bala Yĕsu la tak, “Kei nanga kini tak, ‘Thou, nang käh phawk hlok tila ima chetal!’” Äi kheu hawu saw äng tutu äi khrawng thou bala ani käh phawk hlokiyal bala ima echetal! Khrawng kheni la äi hmu ula ini maw chak. Awlaw Hnadaga la khrawnga äi huih thayung pek saw koong khrawng khälla Hnadaga a awpiyaw ini pekal. Yĕsu äi la känäng chetal khaw a, Mathi ting mingei nawtih khrawng hngat phawndaw kok dün ima om bala mäi saw hmuh. Yĕsu la ani a tak, “Kei känäng lo.” Äidä Mathi thou bala Ani ängtu chet. Äi pänäng Yĕsu Mathi ima eisaw ei tun khaw a, awbawng phawndaw koktih, ngulaisu khäl awlaw etebeih ha anih ängtu ei okaih koong ini om hüt. Äini hngat pai hnih Pherasai khälla äi hmu ula che Ani käh etebeih tih a ini tak, “Iya nangnih käh choktih la phawndaw koktih awlaw awhngaw ngulaisu khäl äng eiok saw äm?” Ni kheu khäl yaw bala Yĕsu la äi khäla tak, “Optih khrawng koong tosotih hlüah, äini opatih khrawng khäl koong dä ühlü saw.” Ani la dümapak awhawu, “Kei khäka mäksetdava bät chula hlu a pak, awhngaw khrawng khäla nini jeneiyeih saw kei kühlüyei.” Ni kheu kiyam duk känäng Hnadaga la i hawuvaih khiyang saw äm chet chula choknawal khäl ting Yĕsu la tak. “Iyaäm u khälla konghmuh sang ting ini khinei äm, anih a kokonäng ini loaih koong Kei paneinga. Äini ula ngulai känäng ulung ini hlĕyeiyal äm, äi ngulaisu khäla dä paneiya kolo saw.” Krängak Tuilüh pektih Yohan käh tebeihtih lo ula Yĕsu a ini hi, “Iya keinih huih awlaw Pherasai khäl käh tebeih khäl huih nang tebeih khälla ei oa pak ümüt mäi u saw äm?” Yĕsu la krawn bala takal, “Omnaweitih pawtaw ängtu mäitih phäu khälla ani ämäi saw kra äng iba ini kapaih saw äm? Äini ikhin olo tun itikhaw a awpawtaw a anih känäng chi hmuh eiyalaih saw äm, äi khaw a anih ei oa pak ini mäiyei.” Yĕsu la awlaw hawu, “Hngat la ha awat phem äng awat tha pha al u. Napha al khaw äi awat phem äng awat tha pha saw atakal. Äihi äi ataksaw la ni ayang äng käh thawka unung takal. Awnvun äng käh khoila phem äng hngat la ha atha alak taw ah. Nawtawk hi alak tha äng odok mäi saw koong awnvun äng käh khoila tak bala alak la awnvun, pai hnih ni akrak chakai. Alak awnvun äng käh khoila tha äng dä nawtawk lah. Äi äng pai hnih ni krakah pak mäi.” Äi khaw a Yudi ini lumeidün ima käh elenchaw hngat lo bala Yĕsu a hmuh ni okho chouwa bok hnäh. Äiche ani la Yĕsu a tak, “Kei chuhnu üdüsaw, nang lotila ani lukhrunga nukut ataweiye. Äi äng ani hengalai.” Äiche Yĕsu la etebeihtih khäl thou ula ani ängtu ini chet. Äi chuh dükäng kumlei hnih thi bosaw lawga kopeitih hmutaw hngat mäi hüt. Yĕsu käh wat phaichaw khakhat hnäng hi kawpawiyalaih saw ting Ani la ulung dukäng tawk. Äi hmutaw la Yĕsu hnung äng lo bala Yĕsu käh wat phaichaw sin. Äi khaw a Yĕsu uhnung pawta hleyei bala ekensetsei osot. Äi hmutaw a uhmuh ni Ani la tak, “Su o, kei nanga awpawi kini poh al hnängai ting nuyumei koong nawpawiyal.” Äi khawthouh äi hmutaw awpawiyal. Yĕsu Yudi ini lumeidün ima käh elenchaw ima lo ni, khrawng khäl ini hehevei saw la krei tumtih khäla hmuh. Yĕsu la anih a tak, “Apranga thokal khäl. Ni hmutaw chaw düah, i ip saw dä.” Äi kheu yaw ula khrawng khälla Yĕsu a ini nui nawk. Iyaäm äi hmutawchaw düsaw khrawng khälla ini hmawt khäh. Khrawng khäl apranga ini thokal pänäng, hmutawchaw ini tawk dün täka Yĕsu awvawng. Yĕsu la äi hmutawchaw käh kut sin ni äi hmutawchaw düsaw känäng ehengal bala othouwal. Ni thänei saw kheu khäl äi laa käh hang hang la ini yawk chak. Äi pänäng Yĕsu äi hmutawchaw käh im känäng thokal bala chetal tun khaw a mik mütih pochong hnih Ani hnung äng ini chet. Ahnih hek häih la ihni hawu, “Dawut chen äng käh Yĕsu o, keihnih a khrawng jenei e.” Yĕsu mawng ima mäi hütäm äi ima echetal pänäng mik mütih pochong hnih äi ima ihni vawng. Yĕsu la ahnih a tak, “Kei nang hnih mik awpawi kanang poh al hnäng ting nihni yumeiyei?” Ahnih la Ani a ihni tak, “Ä, Boi o!” Äiche Yĕsu la ahnih käh imik bin bala tak, “Nang hnih nihni yum koong, ni hni pawiyal.” Äi pänäng ahnih la ihni mik äng ihni hmuh eiyal. Yĕsu la ahnih a tha thaktha tak, “Hngat la ha ni kheu hmawtah pak.” Äini ahnih apranga chet häih la äi kheu khäl äi laa käh hang hang khrawnga ihni hawu pekal chak. Yĕsu la etebeih tih im känäng ini thokal tun khaw a, khrawng khälla kräu hnängah tih khrawng hngata Ani khäka ini lo. Iyaäm pawyah saw khraw äi khrawng duka ämäi hüt. Yĕsu la äi khrawse a ani duk känäng othoh al ni, äi khrawng äkräuval. Äi äng awbawng khrawng maw ula che ini hawuvaih saw ini chah, “Ni huih krängak ha Isawlael pre äng hmu unga.” Äini Pherasai khälla ini tak, “Khrawse khäl käh mawng tha äng ani la khrawse khäl otho al.” Yĕsu hang hang mräh la nama chet bala Yudi ini lumeidün ima ochok awlaw Hnadaga la khrawng khäla iba ikhiyupaih saw äm äi sidawng pawi ha hiyawk. Ani la lawgase kheni a awpawi opoh al. Yĕsu la khrawng awbawng uhmuh ni ejenei. Iyaäm äi khrawng khäl che samphomah kiyongtih kaw samphomah huih dä, lawm hmaw tih huih khrih ei chak ula ini mäi hüt. Ani la etebeih tih a tak, “Etheih pa unung, äini bi biyeihtih khrawng ini leu. Äi koong lai äng käh etheih pa mawh khäka suh tongei khäl. Bi biyeihtih khrawng awbawng eteh eih koong Ani khäka hawuvei khäl.” Yĕsu la tebeih pochong lei hnih a utu panei bala khrawng khäl duk känäng khrawse khäl ini thoh alaih saw awlaw yapyap lawga khäla pawi ini poh alaih saw thayung pek. Ani la ayang heh lei saw pochong leihnih teh hmueitih khäl käh ming che, täkchah che Simon, ani a Yĕsu la Pitol ting usuiyei. Awlaw ani nawu Endu, Jebidi chaw Yakub, awlaw ani nawu Yohan. Philip, Bawthawlmawi, Thoma, phawndaw koktih Mathi, Alphaya chaw Yakub, Thadiya, awlaw pre thasa khetnawtih Simon, awlaw Ikariyo Yuda. Ni Yuda la dä uhnung sumäng Yĕsu a lansu khäl kutäng awmawnal sawk saw. Yĕsu la pochong leihnih teh hmueitih a ni kheu chok bala che teh. “Mawnga Yudi hiyahtih khrawng ini mäi äm awlaw Samali khrawng ini mäi saw mräh khäla chetaichu. Äini Isawlael khäl khäka dä chet khäl. Anih che kroktih samphomah khäl dä. Awlaw anih khäka nini chet khaw a, hawna käh mawng pre che anih khäka olo däk ting sidawng hiyawk bäichu, opahtih khäla pawi po al bäichu, dütih khäla hengal sawk bäichu, unu lawga a asanh po al bäichu, awlaw khrawse a khrawng khäl duk känäng thouhwal bäichu. Khrawng khäla nini kusaw koong awmawn laweiyei chu. Iyaäm Hnadaga la nangnih a awmawn kaw dä anang peksaw. Nangnih cheng khonei dün khabaih dukäng ha, hen, hiyah khaw kri poisa nini konäng chi eiyei chu. Awlaw choneiya nini chet khaw a khoila, saklai, thanap chaw, kompum chaw chieiyei chu. Iyaäm bitih khrawng la eiok saw bünei tawn khäh.” “Nangnih mräh a awlaw nama nini vawng khaw a, khrawng khälla mawng khrawnga hmawi ini pekäm äi khrawnga sui chula che äi ima kawi bäichu awlaw äi la hlät chula lo al chu saw sawgraw äi ima mäi bäichu. Nangnih khrawng ima nini chet khaw a jelkhiyamsa äng käh pisih pek bäichu. Jelkhiyamsa bünei tawntih ini mäi hi, äi düna nangnih käh jelkhiyamsa äi imsaw khrung äng lo seh. Äini äi huih dä hngat bang mäi u hi, nangnih käh jelkhiyamsa awlaw krawnak nangnih khäka lo al seh. Awlaw khrawng khälla nangnih a anang lawei u khaw awlaw nangnih kheu khin do u khaw, äi im hiyah khaw äi mräh hlät chula ini lo al khaw a, nangnih nini kho phaw äng käh de hnui phawpeyal bäichu.” Kei nangnih a ihisaw kanang tak, tara hnüpäng ni khrang laweiyah tih mräh a käh khrawng khäl khrung äng Sawdom la Gomola mräh a käh khrawng khäl thawka mawt waih lo ai. “Khin khäl, kei nangnih a hni khäl huih kehse saw khrawng khäl dukäng ei hmueyeihtih samphomah huih kanang tehtun. Äi koong ngen mawh khrawng huih äi khrawng khäl äng mäi khäl, phol huih sidih äng mäi khäl awlaw epret mäyah pak khongkho huih asanh mäi khäl. Äini khrawng khäl känäng sidih äng mäi bäichu! Anih la nangnih a anang mawn ula hngawsaw khäka chi ula tara ini biyei awlaw nangnih kei tebeih koong dam äng anang khrawkai. Awlaw khrawng khälla nangnih a Yudi ini lumeidün ima bop dün jäi äng anang bopai. Awlaw Kei koong anang lah ula che khiyuptih khälla mawng khäl khäka anang chih ei. Äini ni huih äng nangnih khiyuptih la mawng khäl awlaw Yudi hiyahtih khäl khäka sawksi nini thokai. Khrawng khälla anang heng nawk khaw a, iba nini kräuvaih saw äm ting ke ei chu. Iyaäm Asanh chang Khraw la i nini kräuvaih saw äm äi kheu khäl nangnih a anang hawu pekai. Iyaäm nangnih nini kräuvaih saw hiyah, äini nangnih Paw Hnadaga käh Khraw la dä i nini hawuvaih lah saw äm äi anang hawu pekai. “Awnawu la nawuwa awlaw paw la ani chaw a khrawng tutih kutäng aw awpai. Chaw chuhnu, nupaw pawtäng ja hnawh u awlaw ini tuk sawkai. Kei ming koong khrawng kheni la anang hmukhih thawnawh u. Äini ujum tumak ula chunei hnäng äm, äila khiyawt tara büneyei.” Mräh a käh khrawng khälla nangnih a anang kuluh nawk khaw a, awhngaw mräh a chen bäichu. Kei nangnih a ihisaw kanang tak, Luhchaw chaw krawnalah saw sawgraw Isawlael la käh mräh kheni a nangnih käh bi phäih hnawh. “Choktih thawka etebeih lenah, awlaw awmawh thawka hngasaw lenah. Etebeih ani käh choktih huih awlaw hngasaw ani mawh paw huih thänei saw äng thänei khäh. Khrawng khälla dä im mawh paw a Biljibul ting ini panei khaw, äi im äng käh awhngaw khrawng khäla iba ini takaih saw äm?” “Äihi anih a keh ei chu. Iyaäm umuchaw äng mäi saw khäl kheni awdawngal chakai. Awlaw thupei bala mäi saw khäl kheni anang hmawt sawkai. Uhiyung äng Kei känäng nini yawk saw kheu khäl khrawng khäla nangnih awa äng hawu pek khäl. Awlaw nini hnaw äng kanang taksaw kheu khäl, tĕh khrung känäng hĕk chula khrawng kheni la yaw hmawna hiyawk khäl. Nangnih kantha a tuk hnängai äini nini khraw a tu hnängah tih khäla ke ei chu. Nangnih khraw la nini kantha a ngulai vawm äng hiyän hnäng tih a dä keh bäichu. Lingkawpcha pai hnih ting ni poisa hnih äng chomah ei? Nangnih käh Paw Hnadaga la hmawta pak Lingkawpcha hngat bang dekäng kraw la ah. Nangnih käh lusawm bang sühchän mäi khäh. Äi koong keh eichu. Lingkawpcha haw thawka nangnih Hnadaga khäka awbawng usum nini vawng khäh.” Ula Kei a khrawng khäl hmawi mawh a awhmawt ting awkhawmei äm, hawn pre a kei Paw hmawi mawh a Kei ha anih a kawhmawt ting kaw khawmeyei. Äini ula khrawng khäl hmawi mawh a Kei a hmawtah ting khawmei äm, hawn pre a Kei Paw hmawi mawh a anih a ha hmawt nga ting kaw khawmeyei. Kei luhdül äng jelkhiyamsa peka kolo saw ting nangnih khinai chu. Kei jelkhiyamsa peka hiyah äini chimsawu dä peka kolo saw. Awchaw la paw äng, uchuhnu la unu äng, awlaw ukhrumah la ichi changa kakhavaih koong kolo saw. Nang käh imsaw dä nang käh lansu a äthäneyeih saw. “Kei thawka ula unu paw a khet nawkäm, äi Kei tebeih thäneyeih saw tawnah. Awlaw Kei thawka ula awchaw chuhnu a khetnawk äm, äi Kei tebeih thäneyeih saw tawnah.” Awlaw nangnih käh krut nangnih laweichu la Kei känäng lo chu saw sawgraw nangnih Kei käh tebeih tawnchu. Ula awsawk heneyeih koong o hno äm, ani la ihisaw sawk uhiyumeyei. Awlaw ula kei ming koong awsawk uhiyumei äm, ani la ihisaw sawk henei hnängai. “Ula nangnih a anang lawkei äm, anih la Kei a khrawng lawkei. Awlaw ula Kei a awlawkei äm, anih la Kei a ete tih a dä lawkei saw. Ula Hnadaga sidawng hiyawktih a Hnadaga käh sidawng hiyawktih ting awlawkei äm, anih la ha Hnadaga sidawng hiyawktih la Hnadaga känäng büneyeih saw huih lup khiyang phiyaw phoih ini büneyei. Awlaw ula konghmuh sanga konghmuh sang ting awlawkei äm, anih la ha konghmuh sang la büneyeih saw huih lup khiyang phiyaw phoih übüneyei. Awlaw ula kei känäng tämtih a, kei a tämtih ting tui jel khawpak pekäm, kei kheu kanang pek, äi pektih khrawng la phiyaw phoih büneyeih saw dä.” Yĕsu la pochong lei hnih tebeih tih a i ini poh aih lah saw äm hawu pek pänäng nam täng nam täng eteh. Ani ha etebeih tih a hlät bala Galila käh awhngaw mräh khäla ochokaih koong awlaw tara hawuvaih koong chet. Tuilüh pektih Yohan othong ima mäi khaw a, Krito la bisaw khäl kheni sidawng bün. Äidä Ani tebeih khälla Yĕsu Krito ini hiyeih saw koong ani la etebeih hngat pai hnih Yĕsu khäka teh. Anih la Yĕsu a ini hi, “Hnadaga sidawng hiyawktih khälla ini hawu hüt saw Nang äi Mesaya ei? Hiyah khaw awhngaw hngat olo aih koong keinih kini chongaih lah saw ei?” Yĕsu la krawn bala takal, “Chetal chula ibang nini yawkäm awlaw nini hmuh äm, Yohan a hawu pekal khäl. Mik mütih khälla ini hmuheyal, awlaw okho chektih khrawng khäl ini cheteyal. Unu lawga kopeitih khrawng khäl ini sahnal, awlaw awhnaw pawngtih la ini yawkal. Dütih khäl ini hengal awlaw sanglaisu khäl khäka sidawng pawi hiyawk hmuyei. Awlaw Kei känäng awhngaw lawm äng u chetalah äm äi khrawng khäl kheni pisih mawh.” A hnih ihni chetal tun khaw a, Yĕsu la Yohan käh kheu khrawng khäla a tak: “Nangnih täu lungchinga Yohana sota nini chet khaw a, ihuih khrawng nini hmuh ai ting nini khin hüt saw äm? Ohlong kawma käh khri äng chakei tih bel sawu ei? Ihuih khrawnga nangnih sota nini chet hüt saw äm? Khawk saw wat wattih khrawnga ei? Ula äi huih awkhawk saw wat watäm, äi khrawng che mawng ima dä mäi saw. Bakhaw nangnih i sota nini chet hüt saw äm? Hnadaga sidawng hiyawktih khrawng hngata ei? Ä, kei nangnih a kanang tak tun, nangnih u a nini hmuh äm ani che awhngaw Hnadaga sidawng hiyawktih khäl thawka unung alang gong dä.” Hnadaga sidawng hiyawktih Aijaya la oyok saw, So e, nang hmawi mawh a Kei käh sidawng hiyawktih kei keteh. Ani la nang käh lawm poh bala tawkai. Yohan dä äi khrawng u käh kheu kiyam äng yoei bala mäi saw äm. Kei nangnih a ihisaw kheu kanang tak, khrawng khäl dukäng hngat ha che tuilüh pektih Yohan thawka alang gong hi u. Äini Hawna käh mawng pre a üküt thawka lektih ha, tuilüh pektih Yohan thawka alang gong. Tuilüh pektih Yohan la bi chah saw khaw thouh tutäh si äng pawiyatih khrawng khälla hawna käh Mawng pre mawn ula tha thak tha ini lawkeyalaih khiyang. Hnadaga sidawng hiyawktih käh hang hang kiyam äng awlaw Mosi käh thung äng tuilüh pektih Yohan käh khin täh Mawng pre kheu ini yok hüt. Nangnih dä anih la ini hawu hüt saw kheu khäl nini yumei hi, mawng khrawng olo aih saw ting Hnadaga sidawng hiyawktih khälla ini hawu hüt saw äm, ni Yohan ni äi Elija. U a khinaih saw hnaw mäi äm äila khin seh. Bakhaw che ni katäng käh khrawng khäla kei i äng kuchutaih saw äm? Ni khrawng khäl che jia omtih sämäichaw huih. Anih la hngat la hngata panei ula ini hawu, “Keinih nangnih koong krei kini tum äini nangnih lawm chu! Keinih dukhah äng käh awi kini awi äini nangnih kap chu.” Tuilüh pektih Yohan lo bala ei saw vawn la alak chi ei oah koong nangnih nini hawu, “Ani a khrawse la mawn.” Äini Luhchaw Chaw lo bala che ei ok ni nangnih nini hawu, “So khäl, ni khrawng che philu awlaw alak äng moitih awlaw phawndaw koktih la ngulaisu khäl käh phäu. Äini ua bang engen mäi äm, ani käh bikawi la ani ngen mawh ting dawn.” Yĕsu la unung chaw nawmaw nawkaih saw bi bi dün mräh a käh khrawng khäla asayei hnäh. Iyaäm äi mräh a mäitih khälla ini lung hleyeyal do u. Ani la anih a tak, “Lumchawl se Kolasin mräh a mäitih khrawng khäl o. Lumchawl se Betsida mräh a mäitih khrawng khäl o. Ibang ha che nangnih dukäng nawmaw nawkaih saw bi khäl thänei hütäm äidä Tayal la Sidon mräh a thänei hi che, ayang khaw khawthou anih la alanda bawtta wat ula awlaw kuk hmakei ula che ngulai känäng ini lung ini hleyeyalaih hü.” Kei nangnih a kanang tak, tara hnüp äng nangnih thawka Tayal la Sidon mräh a käh khrawng khäl käh tara awbawng hiyawngai saw. Kawpalnahum mräh a mäitih khrawng khäl o, nangnih a Kei kheu bitchaw kanang takaih khiyang. Nangnih hawn pre a hmawi nini büneyei ting khinaichu. Nangnih nini dü pänäng ngulaisu khrawng khäla sawkbrat dam ini büneyeih saw laa nangnih a teh hmueyei. Khrawng khälla ngulai ini bi koong Hnadaga la Sawdom mräh akhrah saw. Kei nangnih mräh a ni nawmaw nawkaih saw bi kibisaw huih Sawdom mräh a kibi khaw äiya käh khrawng khälla ngulai känäng ini lung ini hleyeyalai hü awlaw anih käh mräh tua ha mäiyei hü. Äini nangnih mräh a kei ni nawmaw nawkaih saw bi kibi thän ha nangnih ngulai känäng nini lung hleyealchu. Kei nangnih a kanang tak, tara hnüp äng Sawdom mräh a mäitih khäla Hnadaga la dam äng khrawkai, äini Sawdom mräh thawka nangnih a thasa dam äng anang khrawkai. Äi khaw a Yĕsu la tak, “Paw o, nang hawn pre la luhdül äng käh Boi. Kei nanga awpiyaw kini pek, iyaäm nang ni khäl kheni ngen la prengya mawh khäl khäka thuptila nawtawk. Äini sämäichaw khäl huih nanga anang yumei tih khrawng khäl khäka dä Nang naw dawn. Ä, Paw o, nang hlü huih dä ni khäl thänei seh. Kei Paw la kei kutäng hang hang ni aw awp chak däk. Awpaw hiyapak Awchaw a hngat la ha hmawt u, awlaw Awchaw hiyapak Awpaw a hngat la ha hmawt u. Awlaw Awchaw la ua bang Paw a dawnaih khiyang äm, äila dä awpaw a hmawt lah. Phün tih la ngiyaw tih kheni Kei khäka lo khäl. Kei nangnih a düm dün kanang pekai. Kei käh nagol lawei khäl awlaw kei känäng chok naw khäl. Iyaäm Kei kejelei awlaw kulung näuvei awlaw kei khäka nangnih lung duk la düm büneyei. Kei käh nagol che aw hiyawng khäh, awlaw kei käh vawn ha jeh ah.” Äi khaw a Yĕsu düm khomhnüp äng püm khang lai känäng chetei bala chet. Ani tebeih tih ini düyei koong püm käi yun ula ini thawt äiche ini ei. Äini hngat pai hnih Pherasai khälla äi hmu ula Yĕsu a ini tak, “So e, düm khomhnüp äng püm käi sik ula iya nang käh tebeih khälla thung ini khrah saw äm?” Yĕsu la anih a tak, “Dawut la äphäutih khäl buh ini düyei khaw a, anih la ihuih ini poh ei äm? Nangnih äi kiyam äng yoei saw krängak ha phawt chu ei? Dawut mawng Hnadaga rosi dün tambu im dukäng vawng bala pujawtih hiyah pak ei hnäng u saw asanh chang ha law bala eei awlaw äphäutih a ha pek. Düm khomhnüp äng sidawng ima pujawtih khälla bi bi ula thung ini khrah thän anih a epret thäneyah. Ni krong Mosi käh thung äng yoei bala mäi saw phawt chu ei? Kei nangnih a kanang tak, niya Hnadaga rosi dün sidawng im thawka elenchaw hngat mäi khäh. ‘Kei khäka mäksetdava bät chula hlu ah pak, awhngaw khrawng khäla nini jeneiyeih saw kei kühlüyei.’ Ni kheu kiyam duk känäng Hnadaga la i hawuvaih khiyang saw äm nini yawkchu khaw, kei käh tebeih khäla epret mawn hnawh chu saw. Äi koong Luhchaw Chaw düm khomhnüp äng käh Boi.” Äi pänäng Yĕsu Yudi ini lumeidün ima chet. Ani la ukut hitih khrawng hngat hmuh. Hngat pai hnih Pherasai khälla epret ini mawnaih koong Yĕsu la düm khomhnüp äng khrawnga awpawi poh a lei ting ini sotaih koong khiyong ula ini mäi. Äi koong anih äng käh pochongak la Ani a hi, “Düm khomhnüp äng opah tih awpawi poh alaih saw Mosi käh thung äng mäi ei?” Yĕsu la takal, “Nangnih dukäng hngat käh samphomah düm khomhnüp äng vawm duka kraw khaw, äi nang law eyal hnawh ti ei? Samphomah thawka khrawng lenah ei! Ä, düm khomhnüp äng bi pawi ni biyeih saw thung la hawu khäh.” Äi pänäng Ani la äi khrawnga tak, “Nukut phrah nei.” Äi khrawng la ukut phrah nei ni awhngaw kut huih äi kut ha awpawiyal. Pherasai khäl äi la känäng chetal ula Yĕsu a iba ini tukaih saw äm äi ini kräuveiyal. Äini anih kräuvei ula ini lung äng ibang ini tawkei saw äm Yĕsu la äi hmawt khäh. Äi koong Ani la äi la hlätal bala chetal. Awbawng khrawng la Ani känäng ini täm. Ani la äi khrawng dukäng käh lawgase khäl kheni a awpawi poh al. Äini hngata ha Ani kheu hawuvaih u saw koong sidih pek. Äi äng Hnadaga sidawng hiyawktih Aijaya la oyok saw ihisaw a thänei. “Kei keheh lei saw hngasaw so khäl! Ani a Kei kekhet nawk khäh, awlaw Ani la Kei a awphiyaw khäh. Kei käh khraw Ani lukhrunga kepekai, awlaw Ani la Kei käh sidawng Yudi hiyahtih khäl khäka aw hiyawkai. Ani khrawng äng si ei hnawh, awlaw athak ha hek hnawh. Ani käh sam lawm äng, hngat la ha yaw hnawh u. Tara äng ongah pak, Ani la kolek tih bak ha bängal hnawh, awlaw yupaih däktih simiya ha, Ani la hiyup thaw hnawh. Yudi hiyahtih khälla Ani ming äng ini ümai.” Äi khaw a khrawng khälla kräu hnängah tih awlaw imik ha mütih khrawng hngata Yĕsu khäka ini lo. Iyaäm khrawse äi khrawng duka ämäi hüt. Yĕsu la äi khrawse a ani duk känäng othoh al ni, äi khrawng awpawiyal. Äidä ani äkräuval hnäng awlaw uhmuh eiyal. Khrawng khälla ni nawmaw nawkaih saw bi hmu ula hngat la hngatäng ini kräuwei, “Ani Dawut mawng käh chaw ei?” Äini Pherasai khälla ini yawk ni ini hawu, “Ani la pawyahtih khrawse khäla khiyuptih Biljibul käh tha hiyah pak pawyah saw khrawse a tämal hnängah!” Anih käh tawk hmawt bala Yĕsu la tak, “Pre dukäng siyei ula ini pheyei hi, äi pre che krakaih saw. Awlaw imsaw hiyah thän mräh dukäng ini siyei hi, äi imsaw la mräh ini kauwai. Äihi Mannat la Mannata dä ätämal khaw, ani che upum äng dä siyei. Äi huih äng ani käh mawng pre epheyeyei awlaw ani che khawm ti hnawh? Kei dä Biljibul käh tha äng khrawse khäl kätämal khaw, nangnih känäng lotih khälla u käh tha äng pawyahtih khrawse khäl nini tämal äm? Äi koong nangnih känäng lotih khälla nangnih a epret anang mawnalai. Äini kei Hnadaga käh Khraw äng khrawse khäl kätämal hi, sanh sanh nini yawkchu, Mawng Hnadaga pre nangnih khäka lo däk. Tha mawh hngata khonah pak, hngat la ha ani ima vawng bala amuk hnängei? Ani a nokhon pänäng dä ani ima numukaih hnäng saw. Kei pawta mäyahtih che Kei äng sängeitih. Awlaw Kei ängtu ula lumah äm, äila i ikhrih. Äi koong nangnih a kanang tak, ngulai kheni awlaw Hnadaga a nekeleih saw kheni ähläh nübüneyalai. Äini Asanh chang khraw be u kräu äm, äila ähläh büneyal hnawh. Losupei Luhchaw Chaw be kräutih che ähläh büneyelai. Äini Asanh chang Khraw be u kräu äm äila ähläh büneyal thaw hnawh. Ni katäng hiyah thän awhngaw katäng ha ähläh büneyal hnawh.” Thing pawi äng etheih pawi dä thei awlaw pawyah saw thing äng pawyah saw theih dä thei saw. Etheih hmu tila thing nehelh hnäng. Nangnih pawyahtih phol sawng khäl o! Nangnih iba kheu pawi nini kräuvaih saw äm? Nangnih käh kheu äng nangnih lung dukäng i mäiyäm äi dawng. Khrawng pawi la ulung duk känäng vawn pawi dä thoh. Awlaw pawiyatih khrawng la ulung duk känäng vawn se dä thoh. Kei nangnih a kanang takaih, Hnadaga la tara bi al khaw a, khrawng khälla ibang usum vawngah saw ini kräu äm, äi kräu saw khäl kheni tara hnüp äng üsüh pekalaih lah saw. Nang käh kheu khälla dä nang epret mawh ei awlaw epret mawh hiyah ei awdawnalai. Hngat pai hnih Pherasai awlaw Mosi käh thung choktih khälla Yĕsu a ini tak, “Choktih o, nang känäng nawmaw nawkaih saw hmat la kini hmuh aih khiyang.” Äini Yĕsu la anih a tak, “Ni kat äng käh soutih la uyum mäyahtih khrawng khälla hmat la dä ini sui. Äini Hnadaga sidawng hiyawktih Yona käh hmat la hiyah pak awhngaw hmat la anih a dawn hmuei hnawh. Yona ihuih ühnüp hnüp thum la awyawn yawn thum ngaw lenpaw hän näng mäi hütäm, äi huih Luhchaw Chaw ha nat phunga hnüp thum mäiyei. Tara hnüp äng Ninobi mräh a käh khrawng khäl ja ula che nangnih käh pret anang mawnai. Iyaäm Ninobi mräh a käh khrawng khälla Yona la awhiyawk saw sidawng yaw ula ngulai känäng ini lung ini hleyeyal. Awlaw Kei kanang takaih, Yona thawka lentih sum hngat niya mäi khäh. Isawlael pre känäng mrok phak pawta käh Siba pre a käh mawng nu nangnih ängtu äiya aja ai awlaw nangnih käh pret mawnai. Ani awbawng hlawm hlaw känäng Solomon mawng käh ngen kheu khinaih koong lo hüt saw. Awlaw Solomon thawka lentih sum hngat niya mäi khäh. “Khrawng hngat känäng khrawse thokal khaw a, äi khrawse la üdümaih koong uhul saw la usui thän dümdün la bünah. Ani la awlaw hawu, ‘Kei mawng im känäng kothokäm äi ima kechetalai.’ Äi khrawse ima krawnal ni, äi im sanh sanh, pämbäb chaw awlaw ohong hmuh al. Äidä äi khrawse chet bala üküt thawka pawyahtih khrawse paiseh a law bala äi khrawng dukäng vawng ula ini mäiyal. Äi koong äi khrawnga achah saw dukhah thawka ujumtum äng käh dukhah unung esĕyei. Äi huih ni katäng käh soutih khrawng khälla ha ini khawmai.” Yĕsu la khrawng khäla ochok tun khaw a, Ani nu la nawutih khäl Ani äng khomeiya ini lo. Anih apranga ini mäi awlaw anih Yĕsu ängtu ini kräuvaih khiyang hüt. Khrawng hngat la Yĕsu a tak, “Nang nu la naw nawutih khäl nang äng ini kräuvaih khiyang koong apranga ja ula ini mäi.” Yĕsu la krawn bala tak, “Kei nu la Kei nawutih khäl u äm?” Äiche Ani la etebeih tih a khiu bala tak, “Nia so khäl. Nidä kei nu la kaw nawutih khäl. Iyaäm u bang hawna käh Paw lung hlü huih mäi äm, anih dä Kei tanawu la kunu.” Äi hnüp äng Yĕsu la im hlät bala Galil guda kawma khrawng khäla ochokaih koong oom. Tanakra äng eken setsei awbawng khrawng ini chumei chak ni, Ani long hngat äng kawi bala om. Awlaw khrawng khäl kawma ja ula ini mäi. Ani la anih a pümchut khäl känäng yapyap khrang khäl chok. Ani la hawu, “Lai bitih pochongak la ichih phulaih koong laiya chet. Ichih phulh khaw a ichih bitchaw lawm äng kraw. Äidä haw khäl lo ula äi ini eiyal chak. Awlaw awvawng chih che lung bälei tih dekäng kraw. Äi äng dek unung mäyah. Dek thukah koong ichih che alanda chät. Äini khoni thok ni ächät saw khäl ni awjawiyal chak. Uyungpa dek dukäng mawmawt chaw vawngah koong acha al chak. Awvawng chih che ihling khak kawla kraw. Ihling khak la ichih chät saw khäl kheni kepnaw bala tawk. Awlaw awvawng chih che dek pawi saw lai äng kraw. Äi chih chät bala ochom awlaw etheih thei. Äi ichih känäng awvawng che äkräng thunggip, awvawng che äkräng sokgip, awlaw awvawng äkräng khra ak etheih thei.” Äiche Yĕsu la hawu, “Ua khinaih saw hnaw mäi äm äila khin seh.” Yĕsu tebeih tih Ani khäka lo ula che ini hi, “Nang khrawng khäl äng näkräu khaw a, iya pümchut tila näkräu saw äm?” Ani la krawn bala takal, “Hawna käh mawng pre äng käh thupei saw kheu khäl nangnih nini hmawt lah. Äini awhngaw khrawng khäla hmawt sawk hmueiyah. Kei kawhawu saw kheu khäl ula tawk bala che awyawk chu äm, ani a awbawng yawk chuaih saw lung Hnadaga la pekai. Äini Kei kawhawu saw kheu khäl ula sidih äng tawkah äm, anih la bitchaw yawk chu saw bang lawk hmueiyalai.” Äi koong khrawng khäla katak khaw a, Kei pümchut äng katak. Iyaäm ini hmuh thän ha hmu u saw huih, awlaw ini khin thän ha khin u saw huih awlaw anih la yawchu u. Awlaw Hnadaga sidawng hiyawktih Aijaya la oyok saw nangnih dukäng lälä äthänei, “Nangnih nini khin thän ha, iha yawchu hnawh chu. Nangnih nini hmu thän ha, iha hmu hnawh chu. Ni khrawng khäl lung thasa chang! Awlaw anih la ini hnaw äng yaw u, awlaw anih la ini mik hmü ei ula ini tawkei. Äi koong ini mik la hmu ah awlaw ini hnaw la yaw ah, awlaw anih käh lung la yawchu ah, awlaw anih kei khäka lo al hnäng u, äihi kei anih a awpawi po al hnäng nga.” Äini nangnih pisih mawh, iyaäm nini mik la hmuh awlaw nini hnaw la yawk. Kei nangnih a lälä kanang tak, nangnih ibang nini hmuh lah äm, awbawng Hnadaga sidawng hiyawktih awlaw konghmuh sang khälla mawt ini hmu aih khiyang hüt thän hmu lah hüt u. Awlaw nangnih ibang nini yawk lah äm, äi mawt ini yawkaih khiyang hüt thän yaw lah hüt u. “Lai bitih käh pümchut tua kanang phawng pekalaih, khin khäl: Lawm äng kraw saw ichih che, äi huih khrawng khäl kheu hawu hmuei saw, anih la Mawng pre kheu ini khin, äini yaw chu u. Äidä Mannat lo bala anih lung äng ini tawkei saw kheu khäl lawkeyal chak. Lungpel bälei saw la äng kraw saw ichih che, äi huih khrawng khäl kheu hawu pek hmuei, anih la tana kra äng äi kheu khäl awpiyaw äng ini lawkei. Äini äi kheu anih lung dukäng mäyah, äi Hnadaga kheu kraw ak koong anih lung äng mäi. Iyaäm anih che äi yungpa dek dukäng chet hnängah tih huih dä. Hnadaga kheu ini yumei koong dukhah la kuluh nawk ini hmuei khaw a, äi khrawng khälla Hnadaga a ini yumei saw alanda ini dümal. Ihling khrak dukäng kraw saw ichih che, äi huih khrawng khäl kheu hawu pek hmuei saw, anih la Hnadaga kheu ini khin, äini lawgah khrang äng kongrah ula awlaw kähkän ini khetnawk saw äng kramei ini hmuei. Äi koong kongrah ula äi kheu khäl ekepei nawal awlaw thei hnäng u. Äini dek pawi äng kraw saw chih che, äi huih khrawng khäl kheu hawu pek hmuei saw, anih la äi Hnadaga kheu khin ula ini yawk chu. Anih chät pawitih ichih huih thunggip, sokgip, khra ak theih theitih äng ini tu.” Äi pänäng Yĕsu la awlaw hngat püm anih a uchut pek. “Hawna käh mawng pre che lai bitih huih, Ani la ichih pawi lai äng phulh. Äini khrawng kheni ini ip chak dukäng lansu lo bala püm khang äng bel chih aphul bala äi känäng chetal. Äi ichih chät bala äkäi thänei khaw a, äi äng bel ha hngasaw khälla ini hmuh. Hngasaw khäl awmawh khäka lo ula ini tak, ‘Awmawh paw o, nang lai äng ichih pawi phulh tih ei? Äi khaw ni bel khäl mawng känäng lo saw äm?’ Awmawh paw la takal, ‘Lansu la uphulh saw thäneyei.’ Äiche a hngasaw khälla ini hi, ‘Keinih chet u ngala bel kini phukalaih saw nang nühlüeyei?’ Ani la takal, ‘Kei hlüei nga, nangnih bel nini phukal khaw, püm ha nini phuk phih ei. Tan hmueiyah saw sawgraw bel la püm utu chom sawk khäl. Tan khin thänei khaw, ayang bel lum chula mei äng ini chawh aih koong echeng chaw khon khäl ting tantih a katakai. Äi pänäng etheih ini lumalaih saw katakai.’ ” Yĕsu la awlaw hngat pümchut anih a tak. “Hawna käh mawng pre che monniyang chih dekäng ini chäh saw huih dä. Ni monniyang chih awhngaw chih khäl thawka awbawng elek khäh. Äini ichih ächät pänäng khang äng käh awhngaw thing chaw khäl thawka awbawng len awlaw abak sawu thok. Haw khäl lo ula bakäng ubuh ini sekei.” Yĕsu la awlaw ni pümchut hawu: “Hawna käh mawng pre che is huih dä, hmutaw pochongak la is law bala awbawng ha hnui äng is bälh ni, äi ha hnui äng is bälei koong posoh so a kawi.” Khrawng khäla chokaih koong Yĕsu la pümchut khäl hawu saw. Pümchut hiyah pak anih a iha ta ah. Hnadaga la sidawng hiyawktih kaw känäng awhawu saw kheu khäl lälä thänei: “Kei pümchut äng käkräuvai. Luhdül bisaw chah saw täh känäng uthupei saw khäl kheni, kei kawhawuvalai.” Äi pänäng Yĕsu khrawng khäla hlät bala im duka awvawngal. Äiche etebeih tih lo ula Ani a ini hi, “Keinih a lai äng bel chät saw äng käh pümchut khrawng phawng pekale.” Ani la krawn bala takal, “Ichih pawi chäh tih che Luhchaw Chaw. Lai che ni luhdül. Ichih pawi tih che Mawng pre a käh khrawng khäl. Bel che Mannat käh khrawng khäl. Bel chih phul tih lansu che Mannat. Awlaw ini tan saw khin che luhdül äpäih yeih saw ikhin. Tanaih tih che Hawn natchaw khäl. Bel khäl lumal ula mei äng ini chawh al saw huih luhdül päiyeih khaw a, äi huih thäneyei. Luhchaw Chaw la upum käh hawn natchaw khälla eteh ei. Ula awhngaw a ngulai bi sawk äm, awlaw ani kädäng la ha ngulai bi äm, äi khäla hawn natchaw khälla Ani käh mawng pre känäng ini lumalai. Äiche hawn natchaw khälla mei choisaw khawng äng anih a ini hiyänalai. Äiya khrawng khäl thasa ini kapai awlaw ini haw la ini haw ini eiyei yei. Äini konghmuh sang khäl khoni huih anih Paw käh mawng pre a wachawi chawiya ini choyei. Ua awhnaw mäi äm ani la khin seh.” “Hawna käh mawng pre che lai äng ini thuh saw kähkän huih dä. Khrawng hngat la äi bün pänäng awlaw thup bala awtawkal. Äi pänäng äi khrawng thasa piyaw bala äi lai ehleye yeih koong ani a mäi saw hang hang vawn khäl jeal chak bala äi lai a hleye al.” “Awlaw hawna käh mawng pre che kun potih hngat la amiyak khäl sui saw huih dä. Ani la khawktih sum amiyak hngat übün ni, chetal bala ani a mäi saw khäl kheni jeal bala äi khawktih sum amiyak ehlehyei yal.” “Awlaw, hawna käh Mawng pre che dum käh kawn huih. Hngat pai hnih dum la guda a kawn ini chawnh äidä ayapyap ngaw ini paw. Kawn äng awbawng ngaw okei ni, kawn kawma ini lah al. Äidä om ula ngaw pawi khäl awhngaw chaw po al ula tong chaw khäl äng ini tawkal. Äini pawyahtih ngaw khäl che ini tongal. Päih saw khin ha ni huih thäneyeih saw. Hawn natchaw khäl lo ula konghmuh sang känäng pawyahtih khrawng khäla awhngaw chaw ini poh a lai. Awlaw pawyahtih khäla mei choisaw khawng äng ini hiyänai. Äiya anih thasa ini kapai awlaw ini haw la ini haw ini eiyei yei.” Äi pänäng Yĕsu la anih a ihi, “Kei kanang taksaw pümchut khäl nangnih nini yawk chu ei?” Anih la ini tak, “Ä, keinih kini yawkchu khäh.” Äiche Ani la anih a tak, “Hawna käh mawng pre krong khäl chok nawtih Mosi käh thung choktih khäl che im mawh huih dä. Anih la atha la ephem vawn anih käh vächäm känäng ini thoh.” Pümchut awhawu saw phäih pänäng Yĕsu äi la känäng chetal bala upum nama awkrawnal. Ani la Yudi ini lumeidün ima chok, awlaw khrawng khäl maw ula ini kräuvei, “Mawng känäng äi hiyawh ngen la nawmaw nawkaih saw bi biyeih saw tha bünei saw äm? Ani che thing äng käh vawn bitih chaw hiyah ei? Ani nu Meri, awlaw Yakub, Yosep, Simon, awlaw Yuda ani nawu hiyah ei? Ani betih khäl nangkei ängtu ni mräh a mäi u ei? Ni khäl mawng känäng Ani la übün saw äm?” Äi koong anih la mawt ini lung dukhah ini pi ei awlaw Ani a lawei hnäng u. Yĕsu la anih a tak, “Hnadaga sidawng hiyawktih la upum nam awlaw upum imsaw khäl hawuvah üküt laa hmawi übünei khäh.” Yĕsu la äiya nawmaw nawkaih saw bi hnahnah biyah. Iyaäm khrawng khälla Ani a yumei hnäng u. Galil pre lekchaw khiyuptih Herawt Antipas mawng awmawngei khaw a, Yĕsu la nawmaw nawkaih bisaw sidawng kheni awyawk chak. Ani la a hngasaw khäla tak, “Yĕsu che tuilüh pektih Yohan dä. Yohan düsaw känäng othouwal saw! Äi koong dä Yĕsu la nawmaw nawkaih saw bi ibi hnäng saw.” Herawt mawng la Yohan a mawnaih koong ayang khaw thouh ana thoh saw koong ani la Yohan a siyol äng khon bala othong ima heng nawk. Ani la ni huih ibisaw krong che ani nawu Philip käh phiya Herawdia koong. Iyaäm tuilüh pektih Yohan la Herawt mawnga atak chi hüt, “Herawdia a niphiya huih naw tawkei saw Hnadaga käh thung äng mäyah. Herawt mawng la Yohan a utukaih khiyang hüt. Äini khrawng khäla ekeh, iyaäm khrawng khälla Yohan a Hnadaga sidawng hiyawktih ting ini yumei hüt.” “Herawt mawng la ani luhdül äng lo saw khomhnüp päi opoh ei saw hnüp äng, Herawdia käh chuhnu äiya lotih khrawng khäl hmawi maw a lawm bala che Herawt a awphiyaw. Äi koong Herawdia chuhnu la ibang awhawu ei äm, Herawt mawng la äi epekai ting ejeng.” Äi hmutaw chaw a unu la awhawu pek saw huih ani la tak, “Kei a pawngkawn hngat äng tuilüh pektih Yohan luki tuni tua khrawng pek khäl!” Äi yaw bala mawng la ulung äng thasa dukhah bünei. Äini päi a lotih gawlba khäl hmawi mawh a ejeng koong, äi hmutaw chaw käh kheu hiyän hnängah. Äi koong ani la äi peke ting tak. Khrawng teh bala Yohan a thong ima äbät sawk. Äiche pawngkawn hngat äng uluki law bala che, äi hmutaw chaw a pek. Äi hmutaw chaw la unu khäka ichih al. Äi pänäng Yohan käh tebeih khälla lo ula Yohan yok law ula cho a ana phulal. Awlaw äi sidawng Yĕsu a ha chet ula ana hawu pekal chak. Yĕsu la Yohan käh sidawng yawk saw äng tutu long äng kawi bala khrawng mäi u saw laa lungkhiyang chaw chet. Äini khrawng khälla äi yaw ula yapyap mräh känäng lo ula ini kho äng Ani hnung äng ini chet. Yĕsu long känäng kom bala awbawng khrawng hmuh. Khrawng khäla hmuh bala thasa ejenei awlaw lawgase khäla awpawi poh al. Ümülawma tebeih tih Yĕsu khäka lo ula ini tak, “Ni laa che khrawng mäi u awlaw khoni ha kraw aih däk. Khrawng khäl nama chet ula eisaw hleyei hnäng hmawna anih a teh a le.” Yĕsu la krawn bala tak, “Khrawng khäl ini chetalaih saw hlü ah. Nangnih dä anih a eisaw pek khäl.” Äini tebeih tih la ini tak, “Keinih khäka ha hlem hngaw la ngaw tek hnih dä mäi saw!” Ani la tak, “Äi khäl Kei khäka lo khäl.” Äi pänäng Ani la khrawng khäla bel khrung äng ini omaih koong tak. Awlaw Yĕsu la ha hlem hngaw awlaw ngaw tek hnih law bala hawn pawta so bala Hnadaga a äkiyä tawngei. Äiche Ani la ha hlem pil bala tebeih khäl kutäng pek, äidä etebeih tih la khrawng khälla ini pheih pek. Khrawng khälla ini hän luih yak ini ei. Äi pänäng tebeih khälla amratal saw tong lei hnih ini koh lal. Äiya hmutaw la sämäichaw hiya pak eitih pawtaw jiji khrawng thong ngaw ini mäi hüt. Ni khäl pänäng Yĕsu la etebeih tih a long äng kawiyal ula Ani khawngah guda kawt ula awhngaw kawpa ini chetaih saw tak. Äi kra äng Ani la khrawng khälla eteh al. Khrawng khäla eteh al pänäng suh tongeiya Ani khuyunga kawi. Awyawna Yĕsu lung khiyang khuyunga ämäi hüt. Äi khaw a etebeih tih käh long che guda kawm känäng awhlawm hlaw a mäi hüt. Khri sang koong tui läng äng long thasa ühlünei. Akhon äng Yĕsu tui äng chetei bala che anih pawta chet. Yĕsu a tui äng chetei saw etebeih tih ini hmuh ni, nat ting ini khin. Ani a hmu ula che ini keh awlaw chüchün chak ula che ini hek. Äini Yĕsu la anih a tak, “Ke ei chu! Sengkhri tawei khäl! Kei Yĕsu dä.” Pitol la krawn bala takal, “Boi o, nang dä kawchawng chawng khaw, tui khrung äng chetei ngala nang khäka koloaih saw kei a ata e.” Yĕsu la tak, “Lo e!” Äi äng Pitol long känäng okom awlaw tui khrung äng chetei bala Yĕsu khäka chet. Äini Pitol la khri thasa olo saw awlaw tui läng hmu bala keh, äidä enekaih saw chah. Pitol la hek bala tak, “Boi o, kei a ahlätal e!” Äi äng tutu Yĕsu la ukut dowei bala ani a ibin awlaw tak, “Uyum leu tih o! Iya nang ini ütei nawk saw äm?” Yĕsu la Pitol long äng ihni kawiyal ni, khri ha dümal. Long äng mäitih etebeih khälla Yĕsu a rosi ula ini tak, “Ihi khäh, nang dä Hnadaga Chaw!” Yĕsu la etebeih tih long äng guda kawt ula che Ginisaret mräh kawma ini lo. Äiya mäitih khrawng khälla Ani a ini hmawt ni, äi bam äng käh hang hang khrawnga sidawng ini pek. Äiche khrawng khälla lawgase khäla Yĕsu khäka ini lo. Äi lawgase khälla Yĕsu a ekhet äng Ani käh wat chän chaw ini binaih koong ini tak. Yĕsu käh awat chän chaw bin lah tih kheni ini pawiyal chak. Hnüpak khaw a pochongak hnih Pherasai khäl awlaw Mosi käh thung choktih khäl Yĕlusalem kän lo ula Yĕsu a ini hi, “Nang käh tebeih khälla nuchen paw sawk käh thung iya ini khrah saw äm? Anih la ini ei okaih saw yang ini kut botei u.” Yĕsu la krawn bala takal, “Nangnih nini pum käh thung sumei chula iya Hnadaga käh thung sumei chu saw äm? Hnadaga la hawu saw, ‘Nupaw a kehken po bäichu.’ Awlaw ni huih ha hawu, Ula bang nupaw a saei äm, äi khrawng che nutuk tawn khäh.’” Äini nangnih nini hawu chi losulapei unupaw a tak hi, kei käh mawng vawn nangnih a usum vawngaih saw äm, äiche Hnadaga khäka hlu hmuei däk. Ni huih dä nangnih nini nupaw a kehken pochu saw. Nangnih nini poh saw thung khrawng khäla chok chula, Hnadaga kheu nini hiyänal chak. Nangnih lupsongeitih khälo. Hnadaga sidawng hiyawktih Aijaya la nangnih kheu ihisaw hawu hüt saw dä. Ani la yok saw, “Ni khrawng khälla ini mongkhok kän dä kei a kehken khrawng poh saw. Äini anih lung che kei känäng awhlawm hlaw a dä mäi saw. Anih la Kei a äiba dä khrawng rosi saw. Awlaw khrawng khälla ini poh saw thung dä anih la ini chok saw.” Äi pänäng Yĕsu la awlaw khrawng khäl ekena panei bala tak, “Kei kheu khin khäl awlaw yawchu khäl. Nawkaw dukäng ibang vawng äm, äila khrawnga sanhnah hmawna po hnängah. Äini nawkaw duk känäng ibang thok äm äila dä khrawnga sanh nah hmawna poh saw.” Äi pänäng Ani käh etebeih khälla lo ula Ani a ini tak, “Pherasai khälla nang käh kheu yaw ula che nekeleih saw huih ini piei khäh äi nang naw hmawteiyei?” Yĕsu la krawn bala takal, “Mawng thing chaw bang hawna käh Paw la chä ah äm, äi thing chaw hang hang phuk hmuei laih saw. Pheresai khäl känäng kakei chula mäi khäl! Anih la mik mütih khrawng khäla lawm ini dawnaih saw kheu. Äini anih dä imik mütih. Imik mütih la mütih a lawm dawn khaw, pochong hnih ni vawm äng ini kraw ai.” Äi khaw a Pitol la Yĕsu a tak, “Nang pümchut nawhawu saw keinih a khrawng phawng pekale.” Yĕsu la anih a takal, “Kei tua i pümchut äng käh kheu kawhawu saw äm, nangnih iha yawchu chuei? Nangnih hmawt chu ei, nawkaw duk känäng ibang ei saw vawng äm, äi nähän dukäng vawng. Äidä nakantha känäng thokal. Äini ibang khrawng mongkhok känäng thokäm, äi ulung duk känäng dä thok saw. Äi thok saw khälla dä khrawnga sanh nah hmawna poh saw. Iyaäm khrawng lung duk känäng dä awtawk se, tukaih saw, ini mik sawuvei saw, mukaih saw, eheng sawksi awlaw khrawng be ese näkräu saw thok saw. Äila dä khrawnga sahnah hmawna poh saw. Äini nukut boteyah pak neeisaw la che sanh hmawna po ah.” Äi pänäng Yĕsu Galil hlät bala Tayal la Sidon mräh pawta chet. Äiya Kawnana käh hmutaw hngat hek hlänga hawu, “Boi o. Dawut chen äng käh chaw, kei a ejenei ei. Awkhrawse la mawn koong kei chuhnu la thasa dukhah bün tun.” Äini Yĕsu la ani a iha kheu krawn pekalah. Äi khaw a tebeih tih Ani khäka lo ula khawh ei ula ini tak, “Ani a hlätal. Iyaäm nangkei hnuäng ani hĕk bala lo käh.” Yĕsu la krawn bala takal, “Isawlael khäl khäka dä Kei teh kuhmuei saw. Anih che kroktih samphomah huih dä.” Äini äi hmutaw lo bala Ani a khäh bala che tak, “Boi o, kei a khrawng kue.” Yĕsu la tak, “Sämäichaw khäl käh eiok saw ui hmawi mawh a nähiyän saw pawyah.” Äini hmutaw la takal, “Ä, Boi o, ihi khäh. Äini awmawh paw käh pawng kawn känäng krawsaw eisaw dä ui la eiyal saw.” Äi khaw a Yĕsu la ani a krawn bala takal, “Hmutaw o! Nang mawt nuyum chang khäh. Nang ibang nulung hlü äm, äi huih thänei sĕh.” Äi äng tutu ani chuhnu awpawiyal. Äi pänäng Yĕsu äi la hlät bala Galil guda kawm äng echetei. Äidä Ani khuyung hngata kawi bala che äiya om. Äi khaw a awbawng khrawng khälla kut chek, kho chek, mik mü la kräu hnängah tih awlaw awhngaw lawgase khäl Ani khäka ini lo. Anih la äi khrawng khäla Ani kho chowa ini tawk. Äidä Ani la ai khäla awpawi poh al. Khrawng khälla ni hmuh ula awlaw yaw ula ini maw. Kräu hnängah tih kräuval hnäng, kut chek, kho chek, ini cheteyal, mik mü khälla ini hmuh eiyal ni, Isawlael khäl käh Hnadaga a awpiyaw ini pekal. Yĕsu la Ani tebeih khäla panei bala tak, “Ni khrawng khäl jeneise däk. Iyaäm anih Kei äng tutu ini mäi saw tühnüp äng hnüp thum thänei däk. Anih khäka eisaw ha mäyah. Anih buh ini düei saw läktäng ima keteh al khaw, lawma ini hiyamaih saw dä.” Etebeih tih la krawn ula ini takal, “Ni huih khrawng mäi u saw laa khrawng khäla pekaih koong äi hiyawh ha mawng känäng kini bünaih saw äm?” Yĕsu la anih a takal, “Nangnih khäka pai hiyawh ha mäi saw äm?” Tebeih khälla krawn ula ini takal, “Ha paiseh la ngaw lekchaw hngat pai hnih dä mäi saw.” Äi khaw a Yĕsu la khrawng khäl kheni dekäng ini omaih chak saw tak. Äi pänäng Ani la ha paiseh la ngaw hngat pai hnih law bala Hnadaga a äkiyä tawngei bala ipilchaw ipilchaw poh. Khrawng khäla ini pheih pekaih saw koong etebeih tih kutäng awp. Äidä etebeih tih la khrawng khäla ini pheih pek. Khrawng khälla ini hän luih yak ini ei pänäng etebeih khälla ipil khäl kraw saw ini lumal ni tongseh mratal. Eleu sum äng hmutaw sämäichaw hiyapak pawtaw jiji khrawng thong hli ini mäi hüt. Ini ei ok pänäng Yĕsu la khrawng khäla nanga nang ima teh al. Äidä Ani tebeih tih ängtu long äng kawi bala Mawkdawn Pre lekchaw a chetal. Äi pänäng Pherasai khäl awlaw Suduki khäl chawmaih saw koong Yĕsu khäka ini lo. Anih la Yĕsu a hawn känäng käh hmat la dawnaih saw ini tak. Yĕsu la anih a krawn bala tak, “Khoni kraw chihi nangnih nini hawu, ‘Hawn sen bala mäih khäh, khri kho lo hnawh.’ Äini ongo a chi nini hawu, ‘Tühnüpa kho lo aih saw dä. Iyaäm hawn sen khäh awlaw khoyung hawn äng mäi khäh.’ Nangnih hawn so chula nini mawt khäh, äini tua i thäneyeih saw äm nangnih yawchu chu. Ni katäng käh soutih khrawng khäl awlaw yumeyah tih khälla dä hmat la ini sui saw. Äini Yona käh hmat la hiyah pak hngat käh ahmat la ha dawn hmuei hnawh.” Äi hawu pänäng Yĕsu anih a hlät bala chetal. Etebeih tih khäl chupawh kawma ini chet khaw a, eisaw ini chih eiyeih saw ini hngilh hüt. Yĕsu la anih a tak, “Nangnih Pherasai la Suduki khäl käh is känäng sidih äng dä mäi bäichu.” Äi koong etebeih tih anih dukäng ini kräuvei, “Nang kei khäka eisaw mäyah koong Ani la ni kheu kräu saw dä hipai.” Yĕsu la yawchu bala anih a takal, “Uyum leutih khrawng khälo, nangnih iya ha mäyah ting kheu kräu chu la nini chokchakei saw äm? Nangnih tua ha hmawt chu saw ei, Iha nini lung äng mäitiyah ei, khrawng thong hngaw a ha pai hngaw äng eisaw kepek khaw a, tong hiyawh mratal saw nini bünal hütäm? Awlaw khrawng thong hli a ha paiseh äng eisaw kepek khaw a, tong hiyawh mratal saw nini bünal hütäm? Nangnih iya yawchu chu saw äm, Kei nangnih khäka ha äng käh kheu hawu nga. Äini nangnih Pherasai la suduki khäl käh is känäng dä sidih äng mäi bäichu.” Yĕsu la ha äng käh kheu hawu ah saw ting äi khaw a etebeih khälla ini yawk chu. Äini Pherasai la Suduki khälla ini chok saw känäng dä sidih äng mäiyeih saw kheu hawu saw. Äi pänäng Yĕsu etebeih tih äng Koisoria Philipi mräh khäl känäng käh nama ini chetun khaw a, Ani la etebeih tih a ihi, “Luhchaw Chaw u äm, khrawng khälla Ani be i ini hawu äm?” Etebeih tih la ini takal, “Awbawng la ini hawu tuilüh pektih Yohan, awbawng la Elija ting ini hawu. Awlaw awbawng la Jirimi hiyah thän Hnadaga käh sidawng hiyawktih hngat ting ini hawu.” Äidä Ani la anih a ihiyal, “Äiche nangnih i nini hawu äm, Kei u äm?” Simon Pitol la takal, “Nang äi Krito, hengtih Hnadaga käh Chaw.” Yĕsu la krawn bala tak, “O Yona chaw Simon, nang pisih mawh! Iyaäm Kei Mesaya ting khrawng la anang ta u. Äini Kei käh hawna käh Paw la dä hawu saw.” Kei nangnga kini tak, “Nang dä Pitol. Ni lung khru äng dä kei kah sidawng im kawsawkaih saw. Nat phunga käh tha la bang äi düna mawngei hnäng hnawh. Kei nanga hawna käh mawng pre a käh awi hong dün khäl kanang pekai. Awlaw nang luhdül äng ibang nokhon äm, äi Hawn pre a khon hmueiyeih saw. Awlaw nang ibang luhdül äng nohong äm, äi Hawn pre a ha hong hmueiyeih saw.” Äi khaw a Yĕsu la Ani Mesaya ting hngata ha hawu pekaih u saw etebeih tih a tak. Äi khaw känäng Yĕsu la etebeih tih a tak, “Kei Yĕlusalem a kechetaih lah saw dä. Äiya gongsong khälla, Pujawtih elenchaw khälla, awlaw Mosi käh thung choktih khälla khrawng tukaih saw. Äini hnüp thum düna düsaw känäng kothouwalaih saw.” Äi khaw a Pitol la Yĕsu a chah ak pawta chipui naw bala bäunaw bala tak, “Boi o, äi khäl nang känäng awhlawm hlaw a mäiseh. Nang lukhrunga äi khäl asang ha thänei hnawh.” Äini Yĕsu la awhmawi häyeyal bala Pitola tak, “Mannat o. Kei känäng awhlawm hlaw a chetal. Nang Kei lawm katila nämäi saw huih dä. Iyaäm nang Hnadaga la hlü eisaw huih tawk ti, luhchaw khälla ini hlüei saw huih dä nawtawk.” Äi pänäng Yĕsu la Ani etebeih tih a tak, “U bang Kei lawm äng lo aih khiyang äm, äi upum hlü huih cheteyah seh. Nang käh krut nang lawei tila Kei a ätäm. Ula bang upum sawk hläh eiyeih khiyang äm, äila awsawk hiyumiyeih saw. Äini ula bang Kei koong upum sawk hiyumei äm, äila awsawk büneyalaih saw. Nang luhdül äng käh vawn bünei chak tila naw sawk nuhiyumei khaw, nang äi äng i nübünei äm? Nang käh khraw krawnak nübüneyalaih koong nang i nepekalaih saw äm? Luhchaw Chaw hawn natchaw khäl ängtu Paw Hnadaga käh thayung la a wachang äng olo tun. Ani la ükütni a ni nanga nang käh bi kawi huih phiyaw phoih pekalai.” Kei nangnih a ihisaw kanang tak, “Luhchaw Chaw khiyupaih saw koong lo aih saw, äi hmuchu saw sawgraw niya mäitih ükütche dü hnawh chu.” Hnüp sok pänäng Yĕsu la Pitol, Yakub, awlaw Yakub nawu Yohan a chipui naw bala hlüng tih khuyung hngata ini chet. Äi tebeih khäl hmawi mawh a Ani lup hleyeal. Ani hmawi khoni long awa saw huih awa. Awlaw Ani käh wat bokphong phongah thänei. Äiya Mosi la Elija äng Yĕsu kräu saw etebeih tih la ini hmuh. Äi khaw a Pitol la Yĕsu a tak, “Boi o, nangkei niya ini mäyeih saw pawi khäh! Nang dä nühlü ei hi, kei niya songthum imchaw kawsaw kai. Songak che nang käh, songak che Mosi käh awlaw songak che Elija käh.” Pitol la äkräu tun khaw a wachawi chawi khohiyung la anih a ükün chak. Äidä khohiyung duk känäng ni sam ini yawk, “Nidä Kei kekhet saw chaw, Ani lukhrunga Kei thasa kawpiyaw, nangnih Ani käh kheu khin bäichu.” Äi kheu tebeih khälla yaw ula ini keh äidä dekäng ini bok. Äini Yĕsu anih khäka lo al bala sin bala tak, “Thou al khäl, keh ei chu.” Äi khaw a anih la ädäm paw ini sot ni Yĕsu hawvah hngat ha hmu u. Anih khuyung känäng ini komal tun khaw a, Yĕsu la etebeih tih a sinmawn, “Äthänei saw nini hmuh saw khäl hngata ha hawu pekaih chu. Luhchaw Chaw üdüsaw känäng heng bala thouwalah saw sawgraw nangnih hngata ha hawu pekai chu.” Äi khaw a etebeih tih la Yĕsu a ini hi, “Bakhaw Mosi käh thung choktih khälla Krito lo khawngah Elija loaih saw ting iya ini hawu saw äm?” Yĕsu la krawn bala anih a takal, “Ihi khäh, Elija loaih saw dä awlaw khrawng khäl käh lungko po bala tawkalai.” Äini Kei nangnih a kanang tak, “Elija lo al däk äini khrawng khälla ani a hmawtal u. Anih la ini sitha huih Elija äng ini poh ei. Äi huih Luhchaw Chaw la ha che khrawng khäl kutäng dukhah khawmaih lah saw.” Äi khaw a tebeih tih la ini yawk chu, Yĕsu la anih a tuilüh pektih Yohan krong hawu saw. Yĕsu ani tebeih tih äng khrawng khäl khäka krawnal. Äi khaw a khrawng hngat Ani hmawi hmaw a khokgru düläng mäi bala hawu, “Boi o, kei chaw a jeneiye. Ani la vok lu lawga äng mawt dukhah bün saw. Üküt khaw a ani mei la tui äng chi kraw. Kei ani a nang tebeih khäl khäka kichih hüt saw. Äini anih la awpawi po al hnäng u.” Yĕsu la tak, “Uyum mäyahtih soutih khrawng khälo! Awlaw hnüp hiyawh Kei nangnih äng kämäiyeih saw äm? Awlaw hnüp hiyawh Kei nangnih a kanang chongaih saw äm? Pawtaw chaw a Kei khäka alaw khäl.” Äi pänäng Yĕsu la khrawse a hekei. Äidä ani duk kän khrawse thokal. Äi khaw a pawtaw chaw awpawiyal. Äi pänäng etebeih tih la umuchaw äng Yĕsu khäka lo ula che ini hi, “Keinih äi pawtaw chaw kän khrawse a iya thoh al hnäng unga saw äm?” Yĕsu la krawn bala takal, “Nangnih bitchaw nini yumei saw koong hnäng chusaw. Kei nangnih a ihisaw kanang tak, ‘Nangnih monniyang chih hngat hiyawh dä nini yum mäi khaw, nangnih khuyung hngata ngat la känäng awlaw hngat laa chetale ting nini tak hi, äi khuyung hlaeiya laih saw dä. Nangnih khäka thänei hnängah saw iha mäitiyah.’” Suhtong la ümüt mäitih saw sawgraw ni huih khrawse khrawng känäng thokalah. Äi pänäng Yĕsu la etebeih tih khäl Galil pre chaw a ini lo al khaw a, Ani la etebeih tih a tak, “Luhchaw Chaw a khrawng kutäng awp hmuyeih saw. Anih la Ani a ini tukaih saw. Äini Ani hnüp thum düna hengal bala thouwalai.” Äi koong etebeih tih khäl thasa ini lung se. Äi pänäng Yĕsu etebeih tih äng kawpalnahum a ini lo. Hnadaga ima käh phawndaw koktih khäl Pitol khäka lo ula ini tak, “Nangnih käh choktih la Hnadaga im koong phawndaw pek hnawh ei?” Pitol la tak, “Ä, Ani la epekaih saw dä.” Äi pänäng Pitol im duka lo al bala iha hawu khawngah Yĕsu la ani a tak, “Simon o, nang lung la ikhinäm? Ni luhdül äng käh mawng khälla u khäl känäng phawndaw ini lokei äm, ani sangsaw känäng ei, hiyah khaw awhngaw presaw khäl känängei?.” Pitol la takal, “Awhngaw presaw khrawng khäl känäng.” Äi khaw a Yĕsu la ani a tak, “Bakhaw Ani sangsaw khäl che ini lätei. Äini nangkei khrang koong phawndaw koktih khälla hiyawh ei büniyah pak, nang mreta chet tila kha ahiyän. Äidä täkchah nubün saw ngaw awkaw nohong hi, hngat hĕn poisa nübünai. Äi chitila nang käh la Kei käh phawndaw pek tila lo al.” Anih ini lumei khaw a, etebeih tih la Yĕsu khäka lo ula che ini hi, “Bakhaw hawna käh Mawng pre a elensum u äm?” Äi khaw a Yĕsu la sämäichaw hngat panei bala anih hmawi mawh a hiya bala tak, “Kei nangnih a lälä kanang tak, Nangnih dä nini khrang hleeiyal chula sämäichaw huih thäneyal chu khaw, Hawna käh mawng pre a krängak ha vawngal hnäng hnawh chu. Ula bang ni sämäichaw huih ini puma nävei sawk äm, ani Hawna käh mawng pre a üküt thawka elensum. Awlaw ula bang Kei ming äng ni sämäichaw huih lawkei äm, anih la Kei a dä khrawng lawkei saw.” “Kei a uyumeitih sämäichaw khäl äng käh Pochongaka losulapei ngulai lawm äng ichih hi, äi chihpui nawtih hngäl äng lungpel len hngat khon tila mret äng nehenaih saw bang ani koong pawi. Khrawng khäl käh uyum krak hmawna luhdül äng yapyap vawn khäl mäi khäh. Awlaw äi huih sawkbrat ni äthänei. Äini äi huih ngulai pawt äng chitih khrawng koong che mawmawt dukhah mäiyei.” “Nang kut la hiyah khaw nokho la dä nanga ngulai pawh äng anang chih hi, äi pai hnih ni awt tila hiyänal. Nukut vawng hnih la nokho vawng hnih chiyei tila sawkak ngulai mei äng nawkraw aih saw thawka, nukut la nokho chek tila heng dün sawk pawta naw vawngal saw bang pawi khäh. Nimik vawngak la dä ngulai pawtäng anang chih khaw, äi mik thawteyal. Nimik vawng hnih äng ngulai vawm äng nawkraw aih saw thawka, nimik vawngak äng heng dün lawm pawtäng nawvawngal saw bang pawi.” “Khin khäl, nangnih ni sämäichaw khäl äng käh hngata ha süpah pak mäiyei chu. Kei nangnih a kanang tak, äi sämäichaw khäl käh Hawn natchaw khäl sawkbratni Kei paw ängtu Hawn pre a ini mäi khäh.” “Ukhäl bang ini krok äm äi khäla hläh a laih saw koong Luhchaw Chaw lo saw dä. Nangnih lung la i khin äm? Tawk chawm khäl, nangnih äng käh khrawng pochongaka samphomah khra ak mäi, äi känäng pumak krok, äihi ani la kohgib gäl paikoh khuyunga taw bala äi kroktih samphomah bünalah saw sawgraw suyalah ei? Kei nangnih a ihisaw kanang tak, ani la äi bünal hi che, kohgib gäl paikoh krokah tih khäl thawka kroktih pumak koong unung awpiyaw. Äi huih ni, nangnih käh hawna käh Paw la ni sämäichaw khäl äng käh hngata ha krakaih saw hlü ah.” “Nang nawu dä nang lukhrunga epret thänei hi, hngat ha mäi u khaw a ani khäka chet tila ani käh epret adawn. Ani la nang kheu khin hi, ani a nübüneyalai. Äini ani la äi khinah hi, nang awlaw pochongak hnih nokonäng chi puinaw bäi.” Iyaäm Kiyam la hawu, “Hngat la hngata dä epret ini mawnei hi, pochong hnih thum sawksi thoh eyeih lah saw dä.” Awlaw ani la dä äi kheu khäl khinah hi che yumtih sawnga hawu pek. Äini ani la dä yumtih sawng käh kheu khäl khinah hi, ani nang khäka yumah tih khrawng la Phawndaw koktih huih thänei. Kei nangnih a ihisaw kanang tak, “Luhdül äng yumtih sawng la nangnih a ibang poh aih saw anang nga äm, Hawna käh Hnadaga la ha äi nga khäh. Awlaw luhdül äng yumtih sawng la ibang poh aih saw anang takäm, hawna käh Hnadaga la ha äi äng ingi khäh.” “Kei nangnih a awlaw kanang tak, Nangnih dukäng käh pochong hnih la dä ngi häih la suh ihnih tongei hi, Kei käh hawna käh Paw la nangnih koong äi poh ai. Iyaäm mawnga bang Kei ming äng pochong hnih thum ini chumei äm, äi düna Kei anih dukäng kämäi khäh.” Äi khaw a Pitol la Ani khäka lo bala ihi, “Boi o, Kei nawu la dä kei khäka epret bi hi, ani a kei kräng hiyawh ähläh kepekalaih saw äm? Kräng seh ähläh kepekalaih lah saw ei?” Yĕsu la ani a takal, “Kräng seh krawn täh hiyah, äini sĕhgib krawn kräng seh täh dä.” “Hawna käh mawng pre che ni huih hngat mawng huih dä, ani la ani käh hngasaw khäl känäng üsüh lawkeyalaih khiyang saw. Ani la üsüh lawkeyalaih saw chah ni, unung chaw ichi lawei tih hngata khrawng khälla ani khäka ini lo. Äini ikhiyalaih saw koong ani a awmawn mäyah. Äidä akantha, iphiya, awchaw chuhnu awlaw ani a mäi saw kheni je bala, awmawn khiyalaih saw koong mawng la sidawng sin. Äi pänäng äi hngasaw la mawng khochou a bok bala awlaw okho sin bala khawh ei bala tak, ‘Kei a ejenei e, kei nang käh ükütni kini khiyalai.’” Äi khaw a mawng la hngasaw a ejenei lung kawi awlaw ani käh awmawn kheni ähläh pekal bala teh al. “Äi pänäng äi hngasaw apranga thokal bala awlaw hngasaw hngata hmuh. Ani la äi hngasaw känäng bitchaw awmawn büneyalaih saw mäi. Ani la äi hngasaw loko äng mawn bala tak, ‘Nang awmawn nupu ei hütsaw äi ikhi al.’” “Äi hngasaw la ani khochou a bok bala ekhet äng tak, ‘Kei lukhrunga ejenei e, kei ükütni kini khiyalai.’” Äini ani lung prohngah. Äi koong ani la lei khiyal hnängah saw sawgraw ani a thong im duka heng naw bala tawk. “Äi khäl kheni hmu ula che awhngaw hngasaw khäl ini man pok. Anih la chetal ula anih käh mawng khäka hang hang kheu ini hawu pekal. Äi khaw a mawng la äi ähläh pekal saw hngasaw a panei bala tak, ‘Sou tih hngasaw! Nang kei khäka ekhet äng ähläh nawhawuvei saw koong dä, kei nang käh lei kheni kini hläh al saw. Kei nanga ihuih kini jenei hütäm, äi huih awhngaw hngasaw khäla nang nejeneyeih saw sangah ei?’ Äi pänäng äi mawng aman pok. Äidä lei kheni khiyalah saw sawgraw ähläh büneyal tih hngasaw a dukhah pekaih koong othong ima khrawk.” Äpäih sum äng Yĕsu la ni huih hawuwal, “Nangnih hang hang la ni nangnih nawu a dä nini lung känäng ähläh pekal chu hi, hawna käh Paw la ha che nangnih khruäng äi huih poh aih saw.” Yĕsu la äi kheu khäl hawu pänäng Galil pre lekchaw känäng chetal. Äi pänäng Yudia pre lekchaw a echet awlaw Ani Yawldan hlong chupawt kawma chet. Awbawng la Ani a miknaw ula ini tawk, awlaw Ani la äi düna awbawng khrawng khäla awpawi poh al. Äi khaw a hngat pai hnih Pherasai khäl Yĕsu khäka ini lo. Yĕsu a kawl äng ini khrawkaih khiyang koong anih la ini hi, “Khrawng hngat la lala krong äng pei, iphiya khaveyalaih hnäng saw äng Mosi käh thung la pekei?” Yĕsu la takal, “Nangnih Kiyam phawt chu ei, luhdül chah saw khaw thouh bang Hnadaga la hmutaw la pawtaw a bi bala che tawk hüt khäh. ‘Äi koong pawtaw hngat la unupaw hlät bala phiya nawkai, awlaw ahnih kantha ak ihni thäneyei.’ Äi koong ahnih kantha hnih hiti häih äini kantha ak dä. Äi koong Hnadaga la opong saw a khrawng khälla khavah seh u.” Äi khaw a Pheresai khälla Ani a ini hi, “Bakhaw che chaw pek tila phiya nakhaveiyal laih saw Mosi käh thung äng iya mäi saw äm?” Yĕsu la anih a takal, “Nini lung chang saw koong äng dä, phiya nini khaveiyalaih ana Mosi la nangnih a anang pek hüt saw. Äini achah khaw thouh äi huih mäi hütah. Kei nangnih a kanang tak, losulapei iphiya imik sawuvei saw epret bünah pak khaveyal bala awhngaw hmutaw a nawkal hi, ani imik sawuvei saw thän.” Äi khaw a Ani käh tebeih khälla ini hawu, “Yangmala dukäng dä, äi huih thänei khaw, phiya nawti saw bang pawi khäh.” Yĕsu la anih a tak, “Ni kheu che ükütla lawei hnäng u. Hnadaga la peksaw khrawng la dä ini lawkei hnäng saw. Ükütche aphat thänei ula luhdül äng ini lo, awlaw üküt khrawnga che khrawng la dä ini phatal saw. Awlaw üküt che Hawna käh mawng pre koong phiya naw ah pak ini mäi. Ni chok hawu khäl ula lawkei hnäng äm, äi khälla lawei seh u.” Äi khaw a Yĕsu la sämäichaw luki äng ukut tawei bala pisih pek hnäng hmawna, khrawng khälla sämäichaw khäla Yĕsu khäka ini lo. Äini tebeih khälla äi khrawng khäla ini bäunawk. Äini Yĕsu la tak, “Sämäichaw khäla Kei khäka lo sawk khäl, nga ai chu. Iyaäm hawna käh mawng pre che äi sämäichaw huih khrawng khäl koong dä.” Äi pänäng Yĕsu la sämäichaw khäl luki äng ukut tawei bala pisih pek. Äidä äi la känäng chetal. Äi pänäng khrawng hngat la lo bala Yĕsu a tak, “Choktih o, päihyah saw sawk kübüneyeih saw koong kei i bi pawi kibiyeih lah saw äm?” Yĕsu la ani a takal, “Mawng che bi pawi äm ting Kei a iya ini hi saw äm? Pawitih che hngat pätpät dä mäi saw. Äini nang dä päihyah saw sawk nübüneyeih khiyang hi, thung khäl tämbäi.” Äi khrawng la takal, “Mawng thung khäl äm?” Yĕsu la takal, “Tuai ti, nimik sawuvei yeiti, mu ai ti, eheng sawksi thokai ti, nupaw kenkeh pobäi, awlaw awhngaw khrawng khälla ha nupum huih khetnaw bäi.” Äi khrawng la Ani a tak, “Äi khäl kheni sumei ngala kolo däk, awlaw tua kei i kopoh aih lah saw äm?” Yĕsu la ani a takal, “Nang dä ekejet näthäneiyeih khiyang hi, nang chetal tila ämäi saw kähkän kheni jeyal tila nübün saw mawn kheni sanglaisu a apekal. Äihi nang koong hawn pre a kähkän chungei bala mäiyei. Äi pänäng loal tila Kei käh tebeih thäneyal.” Äini äi kheu khäl yaw bala che äi khrawng la ulung dukhah bünei bala chetal. Iyaäm ani a awbawng kähkän mäi hüt. Äi khaw a Yĕsu la Ani etebeih tih a tak, “Kei nangnih a ihisaw kanang tak, hawna käh mawng pre a mäichawtih khäl ini vawngaih saw mawmawt khawk khei.” Kei nangnih a awlaw kanang tak, “Hawna käh mawng Hnadaga pre a mäichawtih ini vawngaih saw thawka, phem kho äng ut ting ini taksaw mäksetdava len hngat vawngaih saw loigra khäh.” Äi kheu yaw ula etebeih tih ini maw chak, anih la ini hawu, “Bakhaw che Hnadaga la u khäla khiyawtalaih saw äm?” Yĕsu la anih pawta so ei bala tak, “Khrawng khälla ibang poh hnäng u äm, äi Hnadaga la ükütni poh hnäng.” Äi khaw a Pitol la Ani a tak, “So, keinih che ükütni hiyän chak ungala nang käh tebeih kini thänei, bakhaw keinih i kini büneyeih saw äm?” Yĕsu la anih a takal, “Kei nangnih a ihisaw kanang tak, luhdül atha thäneyal bala a wachang mawh nawn äng Luhchaw Chaw omal khaw a, nangnih Kei äng mäitih pochong leihnih ha pailei hnih mawng nawn äng nini omai. Äidä nangnih Isawlael jap leihnih saw käh tara nini biyalai. Ula bang Kei koong im lou hiyah thän nube tanawu, unupaw, chawchuhnu awlaw ala long hiyän äm, ani la äkräng khra ak thawka bang pisih büneyalai awlaw päihyah saw sawk büniyalai. Äini u khäl bang awmaw äng ini mäi äm, äi khäl dukäng käh awvawng che uhnung äng ini mäiyalai. Awlaw u khäl bang uhnung äng ini mäi äm, äi khäl dukäng käh awvawng che awmaw äng ini mäiyalai.” Yĕsu la hawu, “Hawna käh mawng pre che ni huih dä. Hnüpak khaw a khrawng hngat awmawt jawn grĕp khanga biyeitih hnga aih koong apranga chet. Ani la hngasaw khäla khomhnüp mawn hen poisa lawpak pekaih saw khawmei. Äidä anih a grĕp khanga ini biyeih saw koong teh. Ani ongo a paiko thänei khaw a jia chet, awlaw ani la äiya pochongak hnih khrawng iha poh a pak ini ja saw hmu. Äidä ani la anih a tak, ‘Nangnih chet khäl awlaw kei käh grĕp khanga abi khäl, kei nangnih a awmawn tawn saw huih kanang pekai.’ Äidä anih la chet ula che grĕp khanga ana bi. Äidä khosuna pai thum äng jia chet tüni äi thawka bang khrawng khom. Äidä anih äng ha äi huih kräuvei bala teh. Äi pänäng ämü lawm paihngaw thänei khaw a, ani jia chet tüni, äiya pochongak hnih ja ula ini mäi saw hmuh. Ani la tak, ‘Nangnih hnüp thiya iha poh a pak iya nini mäi saw äm?’” Anih la ani a ini takal, “Hngat la ha keinih a bi äng khrawng sumei u.” Ani la äi khrawng khäla ha tak, “Nangnih kei käh grĕp khanga bi a chet khäl.” “Khomü ni grĕp khang mawh la ani käh grĕp khang sotih a tak, ‘U hnung sum äng lotih a ayang awmawn pek maw tila, äi pänäng käh khäla hngat pänäng hngata pek.’ U khälla ümü lawm pai hngaw äng bi ini kopei äm, anih hang hang la hngat chi hen poisa ini bünei. Ayang lo bala bi akopeitih khälla awbawng kini büneyeih saw ting ini khinei. Äini anih la ha äi huih hngat chi dä hen poisa ini bünei. Anih ini mawh paw äng ini lung naw ula awmawn ini lawkei. Ikhin päiyeih khaw a, anih la khinak dä ini bisaw. Äini keinih che hnüp thiya khom leng khawmei ungala kini bisaw. Äini äi khäl äng tihtih dä keinih a awmawn anang pek saw.” Ani la äi khäl dukäng käh hngata panei bala tak, “Khanbawn o, Kei nang lukhrunga epret bi nga nu. Nang hen poisa hngat äng nibiyeih saw hawuvei hüt tiei? Nang nübüneyeih saw si chiei tila ima chetal. Nanga ihuih kanang pek äm, uhnung sum äng käh a ha äi huih kepekaih saw kei sitha dä. Kei käh awmawn kei sitha huih kusum meyeih saw kei tawn nga ei? Hiyah khaw kei awhngaw khrawng khäla jenei ngala kepek sotsaw koong neselei saw ei?” Yĕsu la äpäih pänäng ni hawu, “U khäl uhnung äng ini mäi äm, anih awmaw äng ini kraw a lai, awlaw u khäl awmaw äng ini mäi äm, anih uhnung äng ini kraw a lai.” Äi pänäng Yĕsu lawm äng chetei bala Yĕlusalema chet tün khaw a, Ani käh pochong lei hnih tebeihtih a chah ak pawta panei bala tak, “Khin khäl, Nangkei Yĕlusalema ini chet tün. Äi düna khrawng khälla pujawtih elenchaw khäl awlaw Mosi käh thung choktih khäl kutäng Luhchaw Chaw a ini awpai. Awlaw anih la Ani käh tara bi ula che, Ani a tuk hmuei sang khäh ting tara ini khraw kai. Anih la Yudi hiyahtih khäl kutäng ini awpai. Ani a ini keleih yei awlaw bop dün jäi äng ini bopai, awlaw krut äng ini thawnai. Äini hnüp thum pänäng Ani heng bala thouwalai.” Äi pänäng Jebidi phiya awchaw pochong hnih Yĕsu khäka lo bala Yĕsu känäng bok bala uak hawuvei. Yĕsu la ani a tak, “Nang i nühlüyei saw äm?” Ani la takal, “Nang mawng thänei tila noloal khaw a, kei chaw häihya set la setäng pawtäng no omalaih koong kheu epek.” Äini Yĕsu la awchaw häihya tak, “Nang hnih i ni hni hawuvei saw äm, äi nanghnih hmawtei hnih ti. Kei mawng dukhah kaw khawmaih saw äm, äi nanghnih ni hnih khawm hnänga yei?” Ahnih la i hnih tak, “Ä, ki hnih hnängai.” Yĕsu la a hnih a takal, “Nang hnih Kei huih dukhah nihnih khawmaih hnäng thän, äini set la setong pawtäng kanang omalaih koong Kei pängei nga. Kei paw la hel bala tawk saw khrawng la dä äi ala ini büneyalaih saw.” Awlaw awhngaw pochong ha tebeih khälla ni kheu yaw ula ahnih tanawu pai hnih khrung äng ini man pok. Yĕsu la tebeih tih kheni a Ani kena panei bala tak, “Nangnih nini hmawt khäh, luhdül äng käh khrawng khäla mawng khälla ini khiyup. Anih la khrawng khäla ini sitha huih ini poh. Äini nangnih dukäng äi huih thäneyeih saw sangah. Nangnih dukäng ubang elenchaw thäneyeih khiyang äm, ani nangnih käh chetchaw tih thäneiyeih la saw. Awlaw ubang yangaih khiyang äm, ani nangnih käh hngasaw thäneiyeih lah saw. Äi huih kawchawng chawng, Luhchaw Chaw khrawng chetchaw büneyeih koong loah, äini chetchaw aih koong dä lo saw. Awlaw khrawng khäl khiyawtal saw khawh huih awsawk pekal bala khiyawtalaih koong Ani luhdül äng lo saw.” Yĕsu awlaw ani tebeih tih Jeliko mräh hlät ula ini chetal tün khaw a, awbawng khrawng khäl Yĕsu hnung hnung äng ini chetei. Lawm kena imik mütih häih pai hnih ihni om hütsaw. Äi lawm äng Yĕsu chetsaw ting ihni yawk ni, ahnih la hek häih la ihni hawu, “Boi o, Dawut chen äng käh, kei hnih a khrawng jenei e.” Khrawng khälla ahnih a hekei ula ektiya pak mäi ei saw ini tak. Äini ahnih la awlaw hek häih la ihni hawu, “Boi o, Dawut chen äng käh, kei hnih a khrawng jenei e.” Äi khaw a Yĕsu la düm bala a hnih a panei bala tak, “Nang hnih i ni hnih hlüei saw äm? Kei nang hnih koong i kopoh ai saw äm?” Ahnih la Ani a i hnih tak, “Boi o, Keihnih kihni hmuh eiyalaih khiyang.” Äi khaw a Yĕsu a ahnih koong ekhet kawi awlaw ahnih mik sin. Äi äng tutu ahnih la ihnih hmueiyal awlaw Ani hnung hnuäng ihni chetal. Yĕsu la etebeih tih Yĕlusalem pawh a ini chet tun khaw a, Olip khuyung khrung äng käh Betphagi nam kena ini lo. Äi khaw a Yĕsu la ni kheu sin bala etebeih pochong hnih teh. “Nang hnih äi awhmawi mawh nama chet hnih. Äiya ni hni chet hi, se lekchaw hngat hen ula ini tawk saw ni hni hmuh ai. Unu ängtu awchaw ha mäi khäh. Äi sut hnih tila niya lo bäi hnih. Losulapei anang hi khaw Boi la hlüei maw khäh ting ta bäi hnih. Äihi anang pek khäh ai.” Ni kheu äng Hnadaga sidawng hiyawktih la ini hawu hüt saw kheu ihisaw a thänei. “Nangnih Yĕlusalem khrawng khäla ni kheu ahawu pek khäl, nangnih käh mawng nangnih khäka olo tun. Ani näuvei tih dä, Ani se lekchaw khrung äng kawi bala olo tun.” Äi etebeih pochong hnih a Yĕsu la ihuih sinäm, äi huih ahnih la a hna poh. Ahnih la se lekchaw nu la awchaw lo häih la äi se lekchaw nu khrung äng ahnih käh ilhchaw ihni pawh pek. Äidä Yĕsu äi ilhchaw khrung äng o om. Awbawng khrawng la ini pum äng käh ilhchaw lawm äng ini phawh pek. Awlaw awbawng khrawng khälla che thing bakchaw khäl lawm äng ini khrih pek. Yĕsu hnung la awmaw äng chetei tih khälla he hek ula ini hawu, “Dawut chaw che awpiyaw äng mäiseh! Boi ming äng lotih a che, Hnadaga la pisih pek seh. Hnadaga ming ha awpiyaw äng luih seh!” Ani Yĕlusalem mräh duka aphaw ni khrawng kheni la gurumuru thänei ula ini hi, “Ni khrawng che u äm?” Khrawng chuh khälla ini hawu, “Ni khrawng che Yĕsu, Hnadaga sidawng hiyawktih. Ani Galil pre lekchaw Nazaret nam känäng olo saw.” Äi pänäng Yĕsu sidawng ima vawng. Äiya vawn jetih hang hanga ni äi känäng tämal. Ani la awmawn ini thulei dün la awlaw khü khäl jetih ini om dün kheni krawn pek chak bala tak, “Asanh chang saw kiyam äng Hnadaga la hawu, ‘Kei ima suh tongei dün im ting tak hmueiyei.’ Äini nangnih ni la tamdah khäl ini vingei dün ima nini poh.” Äi pänäng khrawng khälla mikmü la chektih khäla Hnadaga ima Yĕsu khäka ini lo. Ani la anih a awpawi poh al. Äi nawmaw nawkaih saw bi bisaw khäl awlaw sämäichaw khälla Hosana, Dawut käh chaw ting hek ula ini hawu saw khäl yaw ula, pujawtih elenchaw khäl awlaw Mosi käh thung choktih khäl mawt ini man pok hnäh. Äi khäl yaw ula khrawng khälla ini tak hnäh, “Äi sämäichaw khälla i ini hawu saw äm nang yawtiyei?” Yĕsu la takal, “Ä, kawyawk khäh. Kiyam äng nangnih sätak ha phawt chuei, sämäichaw khälla chi otih sämäichaw khäl kheu äng nang awpiaw nübünei yei?” Äi pänäng Yĕsu anih hlät bala mräh pranga Betani nama chetal. Äidä äiya awyawn ip. Äi ngo kawthawiya mräh a krawnal khaw a Yĕsu üdüei. Äi khaw a awhlawm hlaw känäng esei äng künei bala mäitih khĕu thing hmu bala etheih mäiyei ting sotaih koong chet. Esei hawuvah Ani la iha hmu ah. Äi koong äi khĕu thing a sayei bala tak, “Krängak ha nang thei hnäng tiei ti.” Etebeih tih la äi hmu ula maw ula ini hawu, “Ni khĕu thing che äi hiyawh alanda iba cha al chakäm?” Yĕsu la krawn bala takal, “Kei nangnih a ihisaw kanang tak, nangnih ha muyumchi hnang mäyah pak dä nini yumei khaw, khĕu thinga Kei ihuih kopoh äm, äi huih nangnih ha nini poh hnängai. Awlaw bang äi jiji hiyah, ni khuyunga thou tila mret äng akraw ting nini tak khaw äi huih ha thäneyeih saw. Nangnih dä yumei chula suh nini tongei khaw, ibang nini hlüei äm, äi nini büneyei.” Äi pänäng Yĕsu sidawng ima chet. Ani la äiya khrawng khäla ochok tuna pujawtih elenchaw khälla awlaw Yudi äng käh chang gongsong khäl Ani khäka lo ula Ani a ini hi, “Nang mawng päng äng ni khäl nibisaw äm? Ni nibiyeih saw koong ula dogo ini pek saw äm?” Yĕsu la anih a takal, “Kei nangnih a kheu hngat kanang hiyeih. Nangnih dä anang hawu pekal hnäng hi kei ha kanang hawu pekalai u käh dogo äng Kei ni khäl kibisaw äm. Hawu khäl chaw, tuilüh pekaih koong tuilüh pektih Yohan la Hnadaga känäng dogo bünei hüt saw ei, hiyah khaw khrawng känäng bünei hüt saw ei?” Äi khaw a anih la anih dukäng ini kräuvei, “Nangkei ni huih ini hawu hi, ‘Hnadaga känäng ting,’ Ani la hawuvalai, ‘Bahi nangnih Ani a iya yumei chu saw äm?’ Awlaw ni huih ini hawu hi, ‘khrawng känäng ting,’ äi ha phi dä.” Anih la ni kheu ini hawu saw che iyaäm anih la khrawng khäl ha ini keh awlaw Yohan a kawchawng chawng Hnadaga sidawng hiyawktih mäi hüt saw ting khrawng khälla ini khin hüt. Äi koong pujawtih gong khälla ini takal, “Keinih hmawt unga.” Äi khaw a Yĕsu la takal, “Bakhaw che Kei ha nangnih a kanang hawu pekalaih nga, Kei u käh dogo äng ni khäl kopoh saw äm.” Äi pänäng Yĕsu la hawu, “Bahi nangnih i nini khinäm? Khrawng hngata awchaw pai hnih mäi hüt. Äi khrawng la ni awchaw changchaw khäka chet bala tak, ‘Chaw o tühnüpa nang grĕp khanga chet tila abi bäi.’ Awchaw la krawn bala kei chetaih nga ting takal. Äini awchaw la ulung hleyeyal bala biya chetal. Awlaw hngat awchaw khäka ha chet bala lup khiyang kheu atak tü. Äi chawla kechetai ting tak, äini ani chetapak mäi. Ni pochong hnih äng ula awpaw lung hlü huih biäm?” Äi khaw a Mosi käh thung choktih khälla krawn ula ini takal, “Ani kheu khintih täkchah täh ei saw chaw la.” Yĕsu la anih a tak, “Kei nangnih a ihisaw kanang tak, phawndaw koktih khälla chawgraw hmutaw khäl dä nangnih khawngah Mawng Hnadaga pre a ini vawngaih saw. Iyaäm tuilüh pektih Yohan Hnadaga sitha huih ini mäiyeih saw koong lawm dawnaih koong nangnih khäka olo hüt. Nangnih ani a yumei chu. Phawndaw koktih la chawgraw hmutaw khälla ani a ini yumei hüt. Äi hmu chula ha nangnih nini lung hleyeyal chula yumeiyal chu.” Yĕsu la tak, “Awlaw hngat pümchut kanang hawu pekaih khin khäl. Khrawng hngata ni lai mäi hüt. Ani la grĕp khang hngat poei bala patchi wang wongei. Äi pänäng ani la grĕp theih nawmaih koong awlaw awhawng lawkaih koong lung len khrungäng vawm hngat chouh awlaw akhang chongaih koong hlüngtih pĕng hngat sawk. Äi pänäng ani la pochong hnih thum lai bitih khäl khäka baga pek bala awhlawm hlawh a chet. Äi etheih hmin bala sih khin lo ni, ani la äi grĕp theih phüh lawkeyeih koong pochongak hnih hngasaw khäl teh. Akhang baga laweitih khälla awmawh paw käh hngasaw khäla ini mawn. Hngata che mawn ula ini bop, awlaw hngata che ini tuk, awlaw hngata lung pel äng ini khong nawk. Äi pänäng awmawh paw la ayang teh saw thawka unung hngasaw khäl teh. Äini äi baga laweitih khälla äi hngasaw khäl äng ha lupkhiyang ini poh ei pek. Awchaw a khat che kenkeh ini poh khäh ai ting ani la tawk bala, u hnung sumäng awmawh paw la awchaw teh. Äini äi baga laweitih khälla äi awmawh paw chaw a hmu ula anih dukäng ni huih ini kräuvei, ‘Nidä uhnung sumäng kähkän mawh thäneiyalaih tih. Ni khrawnga dä tu hnäh ai saw. Äihi nangkei dä awmawh ini thäneiyalai.’” Äi huih kräuvei ula anih la äi pawtaw chaw a grĕp khang känäng thoh ula ini tuk. Yĕsu la anih a takal, “Äi khaw sokhäl, grĕp khang mawh kädäng loal khaw a ani la äi lai bitih khäla i poh alai äm?” Äi thung choktih khälla Yĕsu a ini takal, “Grĕp khang mawh paw la äi soutih khrawng khäla utukal chakai awlaw awhngaw pawitih lai bitih, ikhin täng etheih äng käh epheih pekaih tih a lai baga pekalai.” Äi khaw a Yĕsu la anih a takal, “Nangnih krängak ha kiyam äng phawt chuei? “Lung im bitih khälla mawng lung bang usum vawngah ting ini hiyänal hütäm, äi lung dä unung usum vawng tih a thäneiyal hüt saw. Niche Boi la bisaw ihuih nangkei mikäng sopha nawsaw äm.” Äi koong Kei nangnih a kanang tak, “Mawng Hnadaga pre nangnih känäng lawk hmueyalai. Äidä Hnadaga pawtäng kräuvaih tih tawntih kutäng awp hmueiyalai.” “(Äi lung khrung äng ubang mawpäm äiche pileyei awlaw äi lung la ubang krawk nawkäm äiche epe ei.)” Pujawtih elenchaw khäl awlaw Pherasai khälla Yĕsu käh pümchaw khäl choknawk saw kheu äng luih saw yaw ula anih a taksaw dä ting ini yawk chuei. Äidä anih la Yĕsu a ini mawnaih khiyang hnäh. Äini khrawng khälla Ani a Hnadaga sidawng hiyawktih ting ini hmawt saw koong äi khrawng khäl ke ula iha po dat u. Yĕsu la chokaih koong awlaw ni pümchut hngat hawu pek. Ani la ni huih hawu, “Hawna käh mawng pre che nilup mawng hngat huih, awchaw a phiya pekeiyeih koong päi len hngat poh. Äi päiya panei hmueitih gawlba khäla bekeyeih koong ani käh hngasaw khäl teh. Äini gawlba khäl chet do u. Äidä awlaw krawnak awlaw awhngaw hngasaw khäla ni kheu huih ta bäichu ting ta bala panei hmuyei tih äi gawlba khäla a bekei sawk tü, ‘So khäl, kei mawh paw la sel heupaw la thawutih selchaw khäl bät bala päi ächän taw däk. Tua ükütni ächän mäi chak däk, eiyeih koong lo hnäh äng.’ “Äini panei hmueitih gawlba khälla päi mawh paw käh hngasaw kheu khin pekah pak hngat che upum käh khanga chet awlaw hngat che upum käh bi äng chet. Awhngaw khälla che mawng käh hngasaw khäla ini siri khrak ula ini tuk. Äidä mawng mawmawt aman pok bala osoloi te bala äi hngasaw khäla tupektih khäl kheni atukal awlaw anih käh mräh kheni achawh pekal chak. Äiche ani hngasaw khäla tak, ‘Päi che ächän mäi, äini päi eiyeih koong u aw panei hmuei äm anih che päi ei tawn u. Äichaw a nangnih tua lawm täng lawm täng chet khäl awlaw pochong hiyawh a nini khom äm, äi khäl kheni phiya chawnawk päiya a panei khäl.’ A hngasaw khälla lawm tänga chet ula awpawi ese hang hanga ni beyei ula ini lophui nawk. Äi äng äi phiya chawnawk päi im gawlba äng ini luih yal chak. “Äi pänäng mawng la gawlba khäl sotaih koong uduka vawng ni, phiya chawnawk päi awat watah tih hngata hmu. Mawng la ihi hnäh, ‘Khanbawn o, phiya chawnawk päiya awat pawi watah pak iya nolo saw äm?’ Äi khrawng la ni äng käh iha kheu krawn pekal hnängah. Äi khaw a mawng la ahngasaw khäla tak, ‘Ni khrawng ukut la okho hen chula uhiyung duka ahen khäl. Äi laa khrawng ini kapai awlaw khih u saw äng ini haw la ini haw ini eiyei.’” Khui päih äng Yĕsu la hawu, “Äi äng Kei kawhawu, awbawng khrawng a panei hmuei, äini khrawng bitchaw a dä helh hmueyeih saw.” Äidä pherasai khäl chetal ula iba Yĕsu a kawl äng ini khrawk hnängai äm, äi ini täng bawngal. Anih la Herawt mawng käh khrawng khäl ängtu Pherasai khälla ini pum sawng äng käh pochongak hnih khrawng Yĕsu khäka ini teh. Äi khrawng khälla ini tak hnäh, “Choktih o, keinih kini hmawt khäh nang khrawng prongh dä. Hnadaga lawm äng käh kheu nang hi hmawna nochok. Khrawng la i ini khinai äm nang äi chäkti. Iyaäm nang hngat hmawi ha sotila iha biti. Bahi nang hawu, Mosi käh thung täng Rom käh mawng lena keinih phawndaw kini pekaih saw kini tawnei? Nang i nawtawkäm?” Anih käh akhrang se yawchu bala Yĕsu la tak, “Khrawng lupsong khälo, iya Kei a anang chawm saw äm? Phawndaw nini pekchi saw hen poisa Kei a hngat awdawn khäl.” Äi khaw a anih la dinar hngat Yĕsu khäka ini lo. Äi khaw a Yĕsu la anih a tak, “Ni poisa khrung äng u käh ulupchaw la iming mäi äm?” Anih la Rom mawng len käh ting ini takal. Yĕsu la anih a takal, “Bahi ibang Khiyuptih käh äm äi khiyuptih a pek khäl. Awlaw ibang Hnadaga käh äm äi Hnadaga a pek khäl.” Äi kheu yaw ula ini maw awlaw Ani a hlät ula ini chetal. Äi hnüp äng hnüp khiyang pochongak hnih Suduki khäl Yĕsu khäka ini lo. (Suduki khälla ini yumei saw che düsaw känäng thouwalaih saw taksaw iha mäyah.) Äi äng anih la Yĕsu a ini hi, “Choktih o, khrawng hngat dä awchaw hmueiyah saw läktäng üdü hi, äi hmeinu a awnawu la naw al bala äi dütih ata käh chen tawkal hnäng khäh ting Mosi la che hawu. Keinih dukäng tanawu seh ini mäi hüt saw. Achang chaw la phiya naw bala dü khaw a, upuma awchaw chuhnu mäi hütah saw koong ani phiya awnawu la nawkal. Äi huih hngat pänäng hngat la äi hmeinu a ini nawkal. Uhnung sumäng äi hnutaw ha üdüal phih. Bahi che, dütih khäl heng ula ini thouwal khaw a äi pochong seh tanawu dukäng mawng pawtaw la äi hmutaw i ĕphiya lup büneyalaih saw äm? Iyaäm anih kheni la ni äi hmutaw a ini nawk hüt khä nu?” Yĕsu la anih a takal, “Nangnih nini hmaw khäh. Iyaäm nangnih kiyam la i chokäm, äi hmawt chu, awlaw Hnadaga dogo ihuih äm äi ha hmawt chu. Dütih khäl heng ula ini thouwal pänäng phiya naw al hnawh u awlaw anih a phiya ha pekei hmueiyal hnawh. Anih hawn natchaw khäl huih dä ini mäiyalaih saw. Dütih khäl heng ula ini thouwalaih saw kheu Hnadaga la anang chok saw kheu nangnih kiyam äng phawt chuei? Äiya yoei bala mäi, ‘Kei Awbraham käh Hnadaga, Aijak käh Hnadaga awlaw Yakub käh Hnadaga.’ Äini Hnadaga che dütih khäl käh Hnadaga hiyah, Ani heng tih khäl käh Hnadaga dä.” Ani la chok saw kheu khäl yaw ula khrawng khäl mawmawt ini maw hnäh. Yĕsu la Suduki khäla ini kräu saw tipal sawk ni, pherasai khäl ini lumei hnäh. Anih khäl äng käh Mosi käh thung choktih hngat la Yĕsu a achawmaih khiyang koong ihi, “Choktih o, Mosi käh thung khäl kheni äng mawng kini poh aih saw unung alang gong äm?” Yĕsu la ani a takal, “Üküt thawka alang gong nopoh aih lah saw che ni, ‘Nangnih hang hang la nini lung, nini sawk, nini kantha äng nangnih käh Boi Hnadaga a khetnaw bäichu.’ Nidä mawt alang gong ühlü saw sum la elensum kheu. Äi pänäng käh ühlü saw kheu che, ‘Nang imcheng saw kheni a nupum kantha huih khetnaw bäi.’ Mosi käh thung kheni awlaw Hnadaga sidawng hiyawktih käh choknawk saw kheu khäl kheni ni pai hnih bi äng dä üm bala mäi saw.” Pherasai khäl utu ini mäi khaw a Yĕsu la anih a hi, “Nangnih Mesaya a u ting nini khinäm? Ani u chen äm?” Anih la Dawut käh chen dä ting Yĕsu a ini takal. Äi khaw a Yĕsu la anih a takal, “Bahi Dawut la iba Mesaya a awkhraw tha äng Boi ting panei hütäm? Ani la hawu hüt, ‘Boi la kei käh Boi a tak, Nang käh lansu khäla nang khochouwa kawtawk saw sawgraw Kei set pawta om.’” Äihi Dawut la Mesaya a Boi ting panei hi, Mesaya iba Dawut käh chen thänei äm? Hngat la äi kheu krawneyal hnäng u. Awlaw äi hnüp täh kän hngat la ha Ani a iha ini hiyeih saw sengkhri büneiti u. Äi pänäng Yĕsu la khrawng khälla awlaw Ani tebeih tih a tak, “Mosi käh thung anang chokaih saw koong Mosi käh thung choktih khäl awlaw pherasai khäla Hnadaga la tawk khäh. Äi koong anih la ini hawu saw kheni khin bäichu awlaw sumei bäichu. Äini anih la ini poh ei saw huih dä poeyei yeichu. Iyaäm anih la ini mongkhok äng ini hawu saw huih bi bi u. Niche ni huih dä, jehtih vawn khäl anih la khrawng pa äng ini tawng nawk, äini äi vawn khäl ini hlayalaih saw koong, anih la ini kutpem chaw pemak bang chakei sawk do u.” Khrawng khäla ini dawneyeih koong dä anih la bi kheni ini bisaw. Asanh chang saw kiyam äng yoei saw kheu khäl, anih la ini bawn äng awlaw ini lumchawl äng ini khonei. Awlaw anih la ini puma konghmuh sang ini dawneyeih koong apai sawutih ilhchaw len ini wat. Päiya ming mawh laa awlaw Yudi ini lumeidün ima, khrawng len ini omdün laa ini omaih saw awpawi ini pi. Anih la jia naa kenkeh ini hlüei, awlaw khrawng khälla khäkhät ula anih a choktih o ting ini paneiyeih saw ini hlüei. “Khrawng la choktih ting anang bekeyeih saw hlüeyei chu. Iyaäm choktih che nangnih a hngat dä mäi saw, awlaw nangnih a nangnih che tanawu dä. Ni luhdül äng käh hngata ha paw ting paneyei chu. Iyaäm nangnih Paw che hngat dä mäi saw, awlaw Ani che hawn pre a dä mäi saw. Khrawng la elenchaw ting anang takaih saw hlüeyei chu. Iyaäm nangnih käh elenchaw che hngat dä mäi saw. Ani che Mesaya. Nangnih dukäng ubang khrawng thawka lenei äm, ani che anang chetchaw tih thäneyeih lah saw. Ula upuma hlenei äm, ani a hnem hmueyalai, awlaw ula upuma hnemei äm, ani a hlen hmueyalai.” “Lupsongeitih Mosi käh thung choktih khälla pherasai khälo, nangnih koong dukhah mäi. Nangnih khrawng khäl hmawi mawh a hawna käh Mawng pre a käh sät kha chula nini tawk. Äi äng nangnih ha vawng chu, awlaw ini vawngaih saw hnoei tih khäla ha vawng sawk chu.” (“Lupsongeitih thung choktih khälla pherasai khälo, dukhah mäi. Chah ak pawta nangnih khrawng khäla nini dawneyeih koong suh tong sawu nini tongei. Awlaw awhngaw pawta hmeinu khäl käh im thong vawn nini huh eiyal. Äi koong nangnih awbawng damäng nini kraw a lai)” “Lupsongeitih Mosi käh thung choktih khälla pherasai khälo, dukhah mäi. Khrawng hngata nangnih käh thung pawt äng nini loa laih saw koong, mret kawt chula prebrata ni nini chet. Äini nangnih käh thung pawh äng ini loal hi, nangnih äi khrawnga krawn hnih nangnih thawka bang ngulai lawm äng chet tawn nini poh al.” “Dukhah mäi nangnih koong! Nangnih bang nini mik mü, äipe khrawnga lawm nini dawn. Nangnih nini hawu chi, Hnadaga im ming äng losupei ini jeng thän, ini pum okeiyah. Äini losupei suhtong ima käh ha ming äng dä ini jeng hi, ani äi jeng äng ookei. Mäktih la mütih khäl o, mawng lenäm? Ha ei, hiyah khaw ha echet potih Hnadaga imei? Ni huih kheu ha nangnih nini hawu chi, hlu dün la ming äng losupei ini jeng hi, iha thäneyah. Äini ubang äi hlu dün la khrung äng mäi saw vawn äng jeng äm, äi khrawng che ejeng saw äng okei. Mikmü sawng o, mawng lenäm? Äi hlu dün laa hlu hmuei saw vawnei, ‘hiyah khaw’ hlusaw vawn a asanh potih hlu dün la ei? Äi koong ubang hlu dün la äng jeng äm, äi hlu dün la awlaw äi hlu dün äng ini hlusaw vawn ükütni ming äng jeng saw dä. Awlaw Hnadaga im ming äng ubang jeng äm, ani äi Hnadaga im, awlaw äi ima mäitih Hnadaga ming äng ejeng saw dä. Ubang hawn pre ming äng jeng äm, ani Hnadaga käh nawn awlaw äi khrung äng omtih Hnadaga ming äng dä jeng saw.” “Lupsongeitih Mosi käh thung choktih khälla pherasai khäl, dukhah mäi. Nangnih elekchaw vawn mosolla pai ha känäng bang ha hngat chi nini heh lal. Äini Hnadaga käh alang gong thung khäl che täm chu. Äi khäl che ni huih, matara hiyah saw, jenei awlaw konghmuh, nangnih ni khäl nini poh aih lah saw awhngaw vawn khäl usum vawngah hmawna po ah pak. Nangnih bang nini mikmü awlaw khrawng khäla lawm nini dawn. Nini ok saw tui känäng pil hngat bang nini chiyei. Äini ut ting ini taksaw mäksetdava che nini delh khäh.” “Lupsongeitih Mosi käh thung choktih khälla pherasai khäl, dukhah mäi. Nangnih pawngkawn la khok khäl aprang pawt che nini sahnei sawk. Äini äi khäl kheni tha äng nini lawkei saw la lawphah äng käh theih äng luih. Mikmü pherasai khäl o, ayang äi vawn khäl uduk pawh dä asanh poei maw khäl, äihi aprang pawh ha asanh nai.” “Lupsongeitih Mosi käh thung choktih la pherasai khäl, dukhah mäi. Nangnih che jilh hmueitih cho huih dä. Ukhrung che pawyei äini uduk che khrawng yok thu, oyoh la ajap jap teh se saw vawn äng luih. Äi lup kawchawng chawng, nangnih aprang pawt che khrawng khäl mikäng konghmuh sang. Äini uduk che ulup nini songei saw la ngulai äng luih.” “Lupsongeitih Mosi käh thung choktih la pherasai khäl, dukhah mäi. Nangnih Hnadaga sidawng hiyawktih khäl käh cho atha nini poh al, awlaw Hnadaga khrawng khäl käh cho nini pawiyei sawk. Nangnih nini hawu, ‘Keinih nuchen pawsawk khin äng kini mäi hüt khaw, Hnadaga sidawng hiyawktih tukaih saw pawh äng mäi hüt hnawh unga.’ Äi nini hawu saw äng nangnih Hnadaga sidawng hiyawktih khäl tutih chen ting nini khawmei. Äi huih hi nangnih nuchen pawsawk la ini chah hütsaw, äi nangnih tua phäih yal khäl. “Phol sawng khälla phol chen khäl o! Nangnih ngulai vawm känäng iba kini kiyawtalai ting nini khin saw äm? Äi koong Kei nangnih khäka Hnadaga sidawng hiyawktih, ngen mawh awlaw Mosi käh thung choktih khäla keteh ei. Nangnih äi khäl äng käh pochongak hnih a nini tukai, awlaw pochongak hnih a krut äng nini thawnai. Pochongak hnih a bop dün jäi äng Yudi ini lumeidün ima nini bopai, awlaw namak känäng namaka tätäm chula nini tawkai. Äi koong epret mäyahtih Abel täh kän chah bala Hnadaga im duka hlu dün la kena Balakhi chaw Zakalia a nini tuk saw täh, Hnadaga la nangnih a ni nini tuksaw khäl kheni koong dam anang pekalai. Kei nangnih a ihisaw kanang tak, äi tuk hmueitih khrawng kheni koong Hnadaga la tua käh khrawng khäla dä dam äng khrawkalaih saw.” Yĕsu la awlaw hawu, “Yĕlusalem, O Yĕlusalem. Nang Hnadaga sidawng hiyawktih khäla nutuk chi, awlaw nang khäka Hnadaga la tehsaw kheni a ha lungpel äng novoh nawk chi. Anu la ihuih akhra kawla awchawtih oei bala tawkei äm, äi huih Kei ha nanga kanang oaih khiyang, äini nang hlüyeiti.” Yĕlusalema käh khrawng khälo, nangnih käh Hnadaga im nangnih hmawi mawh a ohong mäiyei. Kei nangnih a kanang tak, “Nangnih ni Boi ming äng lotih che pisih mawh ting hawu chusaw sawgraw nangnih kei a uhmu lah ti hnawh chu.” Yĕsu Hnadaga im kän thokal khaw a, etebeih tih pawh a ulung pek hmawna, etebeih khälla Yĕsu a Hnadaga im äng käh lung ini dawn. Äi khaw a Yĕsu la anih a tak, “Nangnih ni khäl nini hmuh khäh, äini Kei nangnih a ihisaw kanang tak, ni huih khin loai, niya lung khrung äng lung thawpei bala mäiti hnawh. Ükütni khrah chak hmueyalai.” Äi pänäng Yĕsu Olip khuyunga om bala mäi khaw a, etebeih tih chah ak pawta Ani khäka chet ula ini hi, “Itia ni huih khäl thäneyeih saw äm? I hmat la hmu ungala nang nolo alaih saw kini hmawtaih saw äm? Awlaw i hmu ungala luhdül krakaih saw kini hmawtaih saw äm?” Yĕsu la krawn bala takal, “Songei bäichu. Hngat la ha anang kramei hnängah hmawna. Iyaäm Kei dä Mesaya ting awbawng khrawng Kei ming äng lo ula ini hawuvaih saw dä. Awlaw awbawng khrawnga ini krameyei. Nangnih nini kena käh jal sam la awhlawm hlaw a käh jal sidawng nini yawkai. Äini ke ei chu. Iyaäm ni khäl thäneyeih saw dä. Äi khaw a ha äpäih hawm saw hiyah. Pre la pre jal ini täkeyei awlaw yapsaw la yapsaw ini jayei yei. Awbawng la a ekenai awlaw liuh loai. Äini ni dukhah khäl che, hmutaw ini mäiyei yeih khaw a dukhah chah saw huih chah saw dä.” “Äi khaw a khrawng khälla nangnih a dukhah anang pekaih koong, anang mawnai awlaw anang tukai. Kei koong luhdül äng käh khrawng khäl kheni la nangnih a anang mumai. Äi khaw a awvawng che Kei pawt känäng hnung ini suteyalai, hngat la hngat ini krameyei awlaw ini somawei yalai. Awbawng hiyah saw sidawng hiyawktih lo ula üküt käh lung ana khrah ai. Akrak nungaih saw koong khrawng khäl käh khet leuwai. Äini ubang uyumak uyum äng chunei bala mäi äm, Hnadaga la ähläh pekalai. Khrawng khälla luhdül kheni a hawna käh mawng pre a käh sidawng pawi ini hiyawkai. Äi khaw a dä äpäih saw khin loaih saw.” “Hnadaga sidawng hiyawktih Daniel la mawt kese saw vawn be hawu hüt. Nangnih äi vawn asanh chang ima nini hmuh ai.” (Ni phawt tih la che awyawk chu aih saw tawn khäh.) Ni khäl thänei khaw a Yudia a mäitih khäl tong düla chen seh u. U khäl tĕh khrung äng ini mäi äm, anih komal ula im duka vawn lawkeyala vawngal tiyapak tong düla chen seh u. Akhanga ubang mäi äm ani upumäng käh ilh chaw lawkeyala krawnalah seh. Äi khaw a upungvawn mawh la awchaw chih o mäitih khäl koong che ihuih dukhah mäyeih saw äm! Suh tongei bäichu isik khaw la düm khomhnüp äng chen lah ah pak. Äi khaw a dukhah mäiyeih saw huih che, luhdül chah saw tähkän tutäh siäng äi huih dukhah mäi hawmah awlaw äi huih dukhah ha mäiti hnawh. Äi dukhah khomhnüp dä Hnadaga la khrawng hiut pekah hi, hngat ha heng hnawh u saw. Äini Ani la heh leisaw khrawng khäl koong äi khomhnüp khäl hiut pekai. “Äi khaw a dä losulapei nangnih a anang tak hi, ‘So, niya dä Mesaya’ hiyah khaw ‘So, äiya dä Mesaya ting äini äi khäl yumeyei chu. Iyaäm äi khaw a awbawng hleitih Mesaya la hiyahtih Hnadaga sidawng hiyawktih ini loaih saw dä. Awlaw anih la nawmaw nawkaih saw bi len la hmat la khäl ini biyeih saw dä. Anih la ini nängsaw huih ni Hnadaga la heh leisaw khrawng khäla ha ini krameyeih saw dä.” So khäl, ni khäl hang hang ni nangnih a kanang hawu pek lawk saw hnäh. Äi koong khrawng khälla dä Ani täu lungchinga mäi khäh ting nangnih a anang tak hi, nangnih äiya chetai chu. Uduka vingei khäh ting anang tak thän yumeiyei chu. Khaih khra ihuih hni thouh känäng hni krawk pawta liliuh wei äm, Luhchaw Chaw losaw ha äi huih dä thäneiyeih saw. Mawnga oyok mäi äm äiya dä langdah khäl ha utu ini chuh eiyeih saw. “Äi huih dukhah khäl pänäng uhyung chakai, khraw la ha awa pektih hnawh, ase khäl hawn kän ini kraw ai, awlaw Hnadaga la hawn khäl kheni hlün chakai. Äi pänäng hawna khrawng khälla Luhchaw Chaw lotun saw äng käh hmat la ini hmuh ai. Äi khaw a luhdül äng käh khrawng kheni la kongrah ula ini kangchang ini beh eiyei. Anih la Luhchaw Chaw a thayung la wachang äng khohyung äng loal saw ini hmuh ai. Hawn natchaw la athak bawh tumai, äi ängtu Luhchaw Chaw la Ani käh hawn natchaw khäla luhdül khäl kheni a eteh ei. Äidä anih la Hnadaga la heh leisaw khrawng khäla ini lumalai.” “Khĕu thing so chula choknaw khäl. Khĕu thing bakäng esei hnäuwal khaw, nanyung khraw lo däk ting nangnih nini hmawt. Äi huih kawchawng chawng, ni khrang khäl nini hmuh hi, nini yawk chuaih saw, Luhchaw Chaw nini kena lo däk, sät ken kawchawng chawnga lo däk. Kei nangnih a ihisaw kanang tak, ni huih khäl thäneyah saw sawgraw tukatäng käh khrawng ini hengaih pesaw dä. Hawn la luhdül kheni äpäih chakai, äini Kei kheu khäl asang ha krokal hnawh.” “Luhchaw Chaw loa laih saw hnüp la ikhin hngat la ha hmawt u. Hawn natchaw la ha hiyah, awchaw la ha hiyah. Luhchaw Chaw olo alaih saw Awpaw la jiji dä hmawt saw.” “Noha khin äng ihuih thänei hüt saw äm, Luhchaw Chaw loa laih khaw a äi huih kawchawng chawng thäneyei. Tui len khawngah Noha long len äng vawngah saw sawgraw, khrawng khäl eiok saw la phiya pekei la phiya nawk äng dä ini mäi hüt saw. Khrawng khäl tui len la jänah saw sawgraw, iha yawchu hüt u. Luhchaw Chaw loaih saw ha äi lup kawchawng chawg hngat la ha hmawt khawngah pak thäneyeih saw. Äi khaw a khrawng pochong hnih la lai äng ihni bi tuna, pochongak a lawk hmueyalai awlaw pochongaka hiyän hüt hmueyalai. Hmutaw pochong hnih la sum äng ihni suk tuna, pochongaka lawk hmueyalai, awlaw pochongaka tawk hüt hmueyalai.” “Äi äng Kei kanang tak, nangnih sidih äng mäi khäl, iyaäm nangnih käh Boi i hnüp äng lo alaih saw äm nangnih hmawt chu. Äini ni kheu khäl hmawt bäichu, im mawh paw la dä sukhä vawngaih saw khin hmawt hi, ani khak bala dä mäyei hü, ani im duka sukhä avawng sawkai hü hnawh. Äi äng ächän mäi khäl, mawng khin bang nangnih tawk chuäm, äi khaw a dä Luhchaw Chaw lo alaih saw.” Yĕsu la tak, “Äi uyum mawh la prengiya mawh hngasaw u äm? Awmawh paw la u a awhngaw hngasaw khäla ikhin täng eisaw pekaih saw koong awpäm. Awmawh paw la lo bala uyum äng bi bi tun saw u a bang hmuh äm, äi hngasaw che pisih mawh. Kei nangnih a ihisaw kanang tak, ani la äi hngasaw a dä ani käh kähkän kheni soaih tih tawkalaih saw. Äini tawkchawm khäl, äi hngasaw dä pawyah hi, awlaw ulung dukäng hawu hi, ‘Kei käh mawh paw che loaih saw awbawng kraw pe khäh.’ Äi khin äng ani käh awhngaw hngasaw khäla bop, awlaw moitih khäl äng ei o bala alak dä oktun. Äini hngasaw la tawkah saw hnüp la khin äng dä awmawh paw lo alaih saw. Äi khaw a ani la äi hngasaw a dam pekalai awlaw awmawh paw la ani a lupsongeitih pawta ala helh pekalai. Äiya khrawng khäl kap ula ini mäiyei awlaw khih u saw äng ini haw e eyei ula ini mäyei. “Äi khaw a hawna käh mawng pre che ni huih thäneyeih saw, hngawk hnguchaw pochong ha la ini khanbawn la omeiyeih saw pawtaw lawkaiäng, simiya äng si luih luih chiyei ula chet tih khäl huih. Anih khäl äng käh pochong hngaw che prengiya mawh. Awlaw pochong hngaw che mäktih. Mäktih hmutaw chaw khälla che simiya ini chih ei, äini awhngaw chaw si chiyei u. Prengiya mawh hmutaw khälla che simiya chaw ängtu, bung chaw äng si ha ini chih ei. Phiya naw aihtih losaw kraw ni anih kheni ngiyaw ula ini ip chak. “Äidä khomyawn chinga ini heksaw sam ini yawk, ‘So khäl, phiya nawaih tih lo däk! Ani äng khomeiya lo khäl.’ Äi khaw a äi hngawk hnguchaw khäl ip känäng thou ula anih käh simiya ächän ini tawkei. Prengiya mäyahtih khälla prengiya mawh khäla ini tak, ‘Nangnih känäng keinih a si bitchaw khrawng peke, iyaäm keinih käh simiya yupaih däk.’ Äi khaw a prengiya mawh khälla ini tak, ‘Ä häh, si kini tawkei saw äng che nangnih käh la keinih käh lok hnawh. Nangnih vawn ini jeh dün kän a hleyei khäl.’ Prengiya mäyahtih khälla si hleh eiya ini chet dukäng phiya nawaih tih lo. Äi khaw a ächän ini mäi hüttih hmutaw khäl kheni phiya nawaih tih ängtu päiya ini chet. Hang hang ni im duka ini vawng chak pänni sät khah hmueyal. “Äi pänäng mäktih hngawk hngu khäl loal ula ini takal, ‘Boi o, Boi o, sät khrawng hong peke.’ Äi khaw a phiya nawaih tih la tak, ‘Lälä kei nangnih a kanang hmawt nga.’” Khui päih äng Yĕsu la takal, “Äi koong sidih äng mäi khäl, iyaäm Luhchaw Chaw lo alaih saw hnüp la khin hngat la ha hmawt u.” Yĕsu la awlaw hawu, “Hawna käh Mawng pre che ni huih dä. Khrawng hngat awhngaw pre a chet khawngah ani hngasaw khäla bekei. Ani käh kähkän kheni sotaih koong ahngasaw khäla awp hüt. Ani käh hngasaw khäl ua ihuih tawn äm, so bala hngata thong hngaw ha poisa, hngata thong hnih ha poisa awlaw hngata thongak ha poisa pek hüt. Äi pänäng ani awhngaw pre a chet. Ua ha poisa thong hngaw pek hütäm, ani la kun po bala awlaw thong hngaw ha poisa amrat thoh al. Ua ha poisa thong hnih pek hütäm, ani laha kun po bala ha poisa thong hnih amrat thoh al. Äini ha poisa thongak büneitih hngasaw la dek chou bala, ani mawh paw käh poisa thup bala tawkal.” Awbawng hnüp pänäng awmawh paw loal bala ani hngasaw khäl känäng üsüh hawuvei al. Ula ha poisa thong hngaw lawkei hütäm, ani la thong hngaw loal bala takal, “Boi o, nang kei a thong hngaw ini pek hüt saw. So e, kei awlaw ha poisa thong hngaw amrat kothoh al.” Ai khaw a ani mawh paw la ani a tak, “Awpawi nopoh khäh. Nang khrawng pawi awlaw uyum mawh hngasaw. Nang bitchaw vawn äng uyum nawtawkei koong, kei nanga awbawng alang gong vawn äng sotih kini poh ai. Lo, kei käh piyaw äng nang ha piyaw.” “Ula thong hnih ha poisa bünei hütäm, ani la lo bala atak, ‘Boi o, so e, kei a nang thong hnih ini awp hütsaw äi äng awlaw thong hnih amrat kothoh al.’ Äi khaw a ani mawh paw la ani a ha tak, ‘Awpawi nopoh khäh. Nang khrawng pawi awlaw uyum mawh khrawng. Nang bitchaw vawn äng uyum nawtawkei koong, nanga awbawng alang gong vawn äng sotih kini poh ai. Lo, kei käh awpiyaw äng nang ha piyaw.’” “Äini ula ha poisa thongak lawkei hütäm, ani lo bala atak, ‘Boi o, so, kei kawhmawt khäh, nang kehse saw khrawng lung changtih dä. Nang mawnga ichih chäti äm, äi känäng natan awlaw mawnga ichih phul ti äm, äi känäng nulumal. Äi koong kepe apranga chetal nga la nang käh ha poisa thongak dek duka phul ngala kuthuh al. Soei, nang käh ha poisa thongak nang käh huih mäyal khäh.’” Awmawh paw la krawn bala takal, “Nang khrawng mäktih la dawmtih hngasaw. Nang nawhmawt khäh, mawnga kei ichih chänga äm, äiya katan awlaw mawnga ichih khrih nga äm, äi kän kulum. Bahi ichi khawyeih hnäng tih krawnga äi ha poisa thongak iya upu pekti saw äm? Äi huih nopoh hüt hi, kei awmawn ha kübüneyeih saw awlaw äi ängtu amrat ha kübüneyei hü.” Äi khaw a ani la awhngaw khäla tak, Nangnih ni khrawng känäng ha poisa thongak lawal chula, ha poisa thong ha mäitih a pekal khäl. Ua mäi äm ani a awlaw pek hmueyalai, äi äng ani a awbawng mäiyalai. Äini ua mäyah äm, ani känäng mäi saw si bang lawk hmueyalai. Äi usum vawngah tih hngasaw a apranga uhiyung äng ahen khäl. Äiya ani kap bala mäiyei awlaw khih ah saw äng awhaw la awhaw eeiyei yei. Luhchaw Chaw hawn natchaw khäl äng loal khaw a che, Ani käh dogo äng dä loa laih saw. Äi khaw a Ani mawng huih Ani käh wachang mawh mawng nawn äng omalaih saw. Äi khaw a üküt yapsaw khäl kheni Ani hmawi mawh a utu tawkalai. Kiyong tih la samphomah la mahchaw ihuih awhngaw chi heh lal äm, Ani la ha äi huih khrawng khäl kheni a phüh hnih a heh la lai. Ani la set pawta che konghmuh sang khäla tawkalai, awlaw setong pawta che awhngaw a tawkalai. Äi pänäng mawng la Ani set pawt äng käh khrawng khäla takai, “Paw käh pisih bünei tih khäl, lo khäl. Luhdül chah khawngah nangnih koong Hnadaga la ächän tawk saw hawn pre a avawngal khäl. Iyaäm Kei küdüei khaw a eisaw anang pek hüt. Tui kahalei khaw a tui anang pek hüt. Ki im lou mäyah khaw a kämäidün anang pek hüt. Ikil kämäi khaw a awat anang wat sawk hüt, opah käthänei khaw a Kei a anang sot khrei hüt awlaw othong ima keheng nawei khaw a, Kei a sota nini lo hüt.” Äi khaw a konghmuh sang khälla krawn ula Ani a ini takai, “Boi o, itia nüdüei saw hmu ungala eisaw kanang pek hüt saw äm? Awlaw itia tui nahalei saw hmu ungala tui kanang pek hüt saw äm? Itia ni im lou mäyah saw kanang hmu ungala mäidün kanang pek hüt saw äm? Awlaw itia ikil nämäi saw hmu ungala awat kanang pek hüt saw äm? Awlaw itia optisaw la othong ima nämäi hüt saw hmawt ungala Nang khäka kini lo hüt saw äm?” Mawng la äihi krawn bala takalai, “Kei nangnih a ihisaw kanang tak, nangnih iti khaw a bang, ni kata nawu khäl äng käh näveitih pochongak koong khat nini poh hütäm, äi khaw a Kei koong dä nini poh hüt saw.” “Äi pänäng Ani la Ani setong pawt äng käh khäla takai, ‘Sayei hmueitih khrawng khälo, Kei känäng awhlawm hlawa chetal khäl. Hnadaga la krängak ha yupahtih mei mannat la ani käh natchaw khäl koong tawk saw mei pawta chet khäl. Kei küdüei hüt khaw a eisaw epek hütchu, tui kahalei khawa tui epek hütchu. Ki im lou mäi hütah khaw a kämäidün khrawng pek hütchu, ikil kämäi khaw a awat khrawng pek hüt chu, opah käthänei hüt khaw a, awlaw othong ima keheng nawei khaw a, Kei a osot khrei hütchu.’” “Äi khaw a anih la ini takalai, ‘Boi o, iti khawa nüdüei saw, tui nahalei saw, im lou kaw nämäi saw, ikil nämäi saw, opah näthänei saw, thong ima nämäi saw hmu pe kanang kunga saw äm?’” “Ani la krawn bala takalai, ‘Kei nangnih a ihisaw kanang tak, itia bang ni khäl dukäng käh näveitih hngata ha kuchu äm, äi khaw a Kei a ha khrawng ku hütchu.’ ” Äi khaw a Yĕsu la anih a takal, “Ni khrawng khälla sawkak dam ini büneyei, äini äi konghmuh sang khälla che päihyah saw sawk ini büneyalai.” Äi kheu khäl kräu pänni, Yĕsu la Ani tebeih tih a takal, “Nangnih nini hmawt khäh hnüp hnih pänäng lätal päi, awlaw Luhchaw Chaw a krut äng ini thawnaih saw koong ini mawnai.” Äi khaw a pujawtih gong Kayapha im dülmawh a pujawtih elenchaw khäl awlaw Yudi äng käh chang gongsong khäl tänaka ini lumei. Äiya Yĕsu a umuchaw äng ini mawnaih saw ini kram. Awlaw tukaih saw ini sot. Äini anih la ini hawu, “Nangkei Ani a päi tuna ini mawnaih saw pawi hnawh, ini mawn hi khrawng khälla khrawng khru saw kai.” Yĕsu Betani nama unu lawga mawh Simon ima lo. Äi khaw a hmutaw hngat Yĕsu khäka lo. Äi hmutaw la khawk tih bung bok hngat äng mawmawt khawk saw otih si olo. Yĕsu la ei okaih koong om khaw a äi hmutaw la Ani luki äng äi si äläi. Etebeih tih la äi hmu ula mawt ini pawmei. Anih ini man pok ula ini tak, “Ni vawn iya nakhrah saw äm? Ni huih dä khrak ti khaw che awkhawk äng jeyal pula, äi mawn khäl sanglaisu khäla ini pek hnängai hü.” Yĕsu la anih kheu yawchu bala anih a tak, “Ni hmutaw a nangnih iya ulung dukhah nini pek saw äm? Ani la Kei lukhrunga mawt awpawi la awpawyei dä poh saw. Sanglaisu khäl che sawkbrat nangnih äng ini mäi khäh ai, äini Kei a che nangnih sawkbrat übün hnawh chu. Khrawng khälla khrawng phulaih saw koong ni hmutaw la kakantha äng otih si läi bala ächän opoh lawk saw dä. Kei nangnih a ihisaw kanang tak, khrawng khälla luhdül äng lala a pei sidawng pawi ini hiyawk düna, ni hmutaw la bisaw ha ini lung äng ini khaweiyalai.” Äi khaw a etebeih pochong lei hnih äng käh hngat Ikariyo Yuda pujawtih elenchaw khäl khäka chet. Äidä anih a tak, “Yĕsu a nangnih kutäng kanang awp hi, ke a i hiyawh anang pekaih saw äm?” Pujawtih khälla hĕn tah a thunggip ani a ini pek. Äi täh känäng Yuda la Yĕsu a mawnaih sawk saw koong khiyong bala mäi. Lätal päi ini poh eiyeh saw koong ächän ini mäiyeih saw hnüp äng, etebeih tih Yĕsu khäka lo ula ini hi, “Mawnga Nang lätal päi ne eiyeih saw vawn khäl ächän kini tawkaih saw äm?” Yĕsu la takal, “Mräh duka chet chula khrawng hngata a ta khäl, ‘Kei käh ikhin lo däk. Kei tebeih tih äng nang ima lätal päi ke eyeih khiyang.’ ” Yĕsu la ihuih etebeih tih a tak äm, äi huih kawchawng chawng anih la lätal päi koong vawn khäl ächän ini tawk. Khomüni Yĕsu Ani käh tebeih pochong lei hnih äng e eiyeih saw koong om. Ini ei ok tuna Ani la tak, “Kei nangnih a ihisaw kanang tak, nangnih dukäng käh hngat la Kei a lansu kutäng aw awpai.” Äi äng etebeih tih khälla ini lung dukhah piei ula hngat pänäng hngat la Yĕsu a ini hi, “Boi o, äi khrawng kei ei?” Ani la krawn bala anih a takal, “Ula Kei ängtu bol äng ukut sumei bala ei tun äm, ani la dä Kei a khrawng mawnaih sawk saw. Kiyam äng yoei bala mäi, Luhchaw Chaw üdüaih lah saw. Äini Ani äng uyum khrakei tih khrawnga mawmawt dukhah mäiyei. Ani luhdül äng lo ah saw bang pawyei hü.” Yĕsu a lansu kutäng awpaih tih Yuda la tak, “Choktih o, äi khrawng kei ei?” Yĕsu la ani a takal, “Nang nawhawuvei däk.” Ini ei ok tuna Yĕsu la ha law bala Hnadaga a äkiyä tawngei. Äi pänäng Ani la ha law bala pil. Äidä etebeih tih a pek bala tak, “Lawei chu la ei khäl, ni che Kakantha.” Äi pänäng Ani la khawp law bala Hnadaga a äkiyä tawngei. Äidä etebeih tih a tak, “Khawp äng käh ni o khäl. Iyaäm nidä Kei thi, Hnadaga la luhchaw käh atha kheu ini tawei saw. Ni Kei thi äng dä Hnadaga la awbawng khrawnga ngulai khäl känäng ähläh pekalaih saw.” Kei nangnih a kanang tak, “Tühnüp täh kän Kei Paw pre a nangnih ängtu oal ngasaw sawgraw Kei ni grĕp hawng oti hnawh nga.” Äi pänäng anih awi ula ini thokal. Äidä Olip khuyunga ini chetal. Äi pänäng Yĕsu la Ani tebeih tih a tak, “Tüyawna nangnih ükütni Kei a ählät chula nini chetalai. Kiyam äng yoei bala mäi khäh, ‘Kei, kiyongtih a kutukai, äi äng samphomah sawng khäl ini khrih ei chakai.’ Äini Hnadaga la Kei a küdüsaw känäng okothouwal pänäng, Kei nangnih khawngah Galila kechetalai.” Äi khawa Pitol la Ani a tak, “Hang hang la anang hlät ula ini chetal thän, kei sätak ha kini hlät ngala chetal hnawh nga.” Yĕsu la ani a takal, “Äini Kei nanga ihisaw kanang tak, tüyawna ahluipaw akhonäng khong khawngah sät thum Kei a ini thuh nawkai.” Pitol la Yĕsu a tak, “Nang ängtu küdü aih lah saw kraw thän, kei sätak ha Nanga kini thuh naw hnawh nga.” Awhngaw tebeih tih la ha äi huih ini hawu chak. Äi pänäng Yĕsu etebeih tih äng Getsimani ting mingei nawk saw la hngata ini chet. Äidä etebeih tih a tak, “Äiya chet ngala suh katongei saw kra nangnih niya om chula mäi khäl.” Äi huih hawu bala Pitol awlaw Jebidi chaw Yakup la Yohana, Ani ängtu chih puinawk. Ani lung kongrah la ulung dukhah äng luih bala mäi. Ani la anih a tak, “Dukhah äng kawsawk thokaih saw huih kipiyei däk. Nangnih niya mäi khäl awlaw Kei ängtu khak chula mäi khäl.” Äi pänäng Ani bitchaw awhlawm hlaw a chet bala, dekäng uluki chukei bala khogru dül äng suh tongei, “Paw o, nänäng khaw ni dukhah khawp Kei känäng awhlawm hlaw a hlayal. Äini Kei sitha huih thäneyah seh, nang sitha huih dä thänei seh.” Äi pänäng Ani etebeih tih khäka loal bala, äi pochong thum ni ini ipchak saw uhmuh al. Ani la Pitola tak, “Nangnih Kei ängtu gonda ak bang khak chula mäi hnäng chu ei? Khak chula mäi khäl, suh tongei khäl chawmsi äng kraw ah pak. Nulung la che hlüei, äini nakantha ngiyaw.” Yĕsu la awlaw sätak krawnal bala suh a tongeiyal tü, “Paw o, Kei onga saw sawgraw ni dukhah khawp chiyal hnäng ti hi, nang sitha huih thänei seh.” Ani krawn bala loal tü ni, anih ini ip lawk saw okhomal tü, iyaäm anih ini ipaih khiyang saw äng ini mik kraw dü. Ani awlaw krawnak anih hlät bala chetal. Sät thum äng ha äi huih suh tongei. Äi pänäng Ani tebeih tih khäka loal bala tak, “Tua ha nangnih nini ip pe khäh awlaw nini düm pe khäh. So khäl, ikhin lo däk. Anih la Luhchaw Chaw a ngulaisu khäl kutäng ini awpaih saw. Thou khäl, che nangkei chetäng khä. Kei a ngulaisu kutäng aw awpaih tih lo däk.” Yĕsu kräu tuna Yuda äiya olo. Ani ha etebeih pochong lei hnih khäl äng käh hngat mäi hüt saw. Ani ängtu awbawng khrawng chimsawu la kompum loyei ula ini lo. Pujawtih elenchaw khäl awlaw chang gongsong khälla anih a ini teh saw. Yĕsu a lansu khäl kutäng awpti uyum khrakeitih Yuda la äi khrawng khäl äng hngat ahmat la tawkei. Ani la tak hüt, “Ua kei kawhnawmäm, äi khrawnga dä mawn bäichu.” Äi äng Yuda chäjä Yĕsu khäka chet bala tak, “Choktih o, khotawh ei?” Äi kheu ta bala Yĕsu a hnawm. Yĕsu la ani a tak, “Khanbawno, ipoh a nolosaw äm äi nopoh hnäng khäh.” Äi äng tutu khrawng khälla Yĕsu a ini mawn. Yĕsu ängtu mäitih khäl äng käh hngat la chimchaw othoh ei, äidä pujawtih gong khäl äng käh ahngasaw pochongak käh hnaw vawngak awh pek. Äi khaw a Yĕsu la ani a tak, “Nangnih chimsawu ubuh äng thawneiyal khäl. Ula chimsawu sinäm ani chimsawu äng dä düsaw. Nangnih i nini khin saw äm, Kei Paw a kebekei khaw Ani la awsawng sawng hawn natchaw khrawng te pek hnawh ei? Äini äi huih Ani la teh hi, Asanh chang Kiyam äng käh kheu luih hnawh.” Äi pänäng Yĕsu la äi khrawng khäla tak, “Kei tamdah dä ei, nangnih chimsawu la kompum khäl äng Kei a mawna nini lo saw? Kei hnüpak kiyawnah Hnadaga ima chi om ngala kochok hüt chi khäh. Äi khaw a che Kei a khrawng mawn chu nu. Äini ni thänei saw khäl kheni äng Hnadaga sidawng hiyawktih khälla Kiyam äng i ini yok hütäm, äi luih däk.” Äi khaw a etebeih tih kheni Yĕsu a hiyän ula ini chenal. Yĕsu a mawntih khälla pujawtih gong Kayapha ima ini lo. Äiya Mosi käh thung choktih la chang gongsong khäl utu ini lumei hüt. Pitol awhlawm hlaw känäng Yĕsu hnüng äng pujawtih gong im dülmawh täh echet. Äidä uhung äng i thänei äm äi sotaih koong chongtih khäl ängtu a om. Yĕsu a tukaih saw lawm bün hmawna, pujawtih elenchaw khäl awlaw Yudi khäl käh hngawsaw khälla eheng sawksi ini sui. Awbawng hiyah saw sawksi ini thok, äithän hngat la ha epret kraw hnäng ong sawksi pek hnäng u. Äi pänäng khrawng pochong hnih lo häih la ihni tak. “Ni khrawng la awhawu hüt, Ani la Hnadaga im khrakal bala hnüp thum dukäng awlaw sawkal hnäng ting.” Äi khaw a pujawtih gong ja bala Yĕsu a tak, “Nang iha kheu krawn pekalaih tiei? Ni khälla nang ming äng i aw sawksi ini thoh saw äm?” Yĕsu äi khaw a ektiya pak mäi. Pujawtih gong la awlaw tak, “Nang sawk mawh Hnadaga ming äng jeng tila anang takaih lah saw, Nang dä äi Mesaya, Hnadaga chaw.” Äi khaw a Yĕsu la ani a tak, “Nang ihisaw kheu nawhawu saw dä. Äini Kei ni kheu ha kanang tak, ni pänäng Luhchaw Chaw a tha mawh Hnadaga kena set pawta ha om saw la kho hiyung äng loal saw nini hmuh ai.” Äi khaw a pujawtih gong la Yĕsu käh wat tai bala tak, “Ni khrawng la Hnadaga a keleih däk. Nangkei a awlaw i sawksi hlüpe saw äm? Tua dä nangnih nini yawk chak saw, nila Hnadaga a keleih saw. Nangnih i nini khinäm?” Anih la krawn ula ini takal, “Nila Hnadaga a keleih bala epret thänei däk, üdü tawn khäh.” Äidä khrawng khälla Yĕsu hmawi äng chilh tui ini soh ei nawk, awlaw suk ha ini suk, beh ha ini beh. Anih la ini tak, “Nang dä Mesaya khaw hawuvei, ula nanga anang bop saw äm?” Äi khaw a Pitol dülmawh a om bala mäi hüt. Hngasaw nu hngat la ani khäka lo bala tak, “Galil känäng lotih Yĕsu ängtu nang ha nämäi hüt khäh hiyei?” Äini Pitol la hang hang hmawi mawh a thuh naw bala tak, “Nang i nawhawu saw äm kei iha yawchu nga.” Äi pänäng Pitol tamkha kena chet. Ani a hmu bala awlaw hngat hngasaw nu la khrawng khäla tak tü, “Ni khrawng che Nazarina käh Yĕsu ängtu mäi hüt khäh.” Äi khaw a Pitol jeng bala awlaw thuh naw bala hawu tü, “Ni khrawnga kei hmawtnga.” Äiya jatih khrawng khälla tana mäi ni Pitol khäka lo ula ini tak, “Kawchawng chawng nang ha Ani ängtu mäi hüttih dä. Iyaäm nang näkräu saw khrang la bang nanga anang mawn däk.” Kei dä ke hlei khaw Hnadaga la dam epek seh ting hawu bala Pitol jeng. Äiche ani la hawu, “Kei ni khrawng a asang hmawt nga.” Äi khaw a ahluipaw khong saw chah saw hnäh. Äi khaw a Pitol ulung äng kawiyal Yĕsu la taksaw kheu, “Ahluipaw khong khawngah sät thum Kei a ini thuh nawkai ting.” Äidä Pitol apranga thokal awlaw disa dukhah piyei bala akapal. Awmawt jawn pujawtih elenchaw khälla chang gongsong khäl ükütni la Yĕsu a iba ini tukaih saw äm äi ini kram. Äidä anih la Yĕsu a khon ula Rom khiyuptih la heh leisaw gong Pilat khäka ana awp. Yĕsu a lansu kutäng awptih Yuda la, Yĕsu a tara a tukaih saw ini khrawk ni epret bi huih piyeiyal. Äidä Pujawtih elenchaw khälla chang gongsong khäl khäka äi hen poisa thunggip akrawnal bala tak, “Kei epret mäyahtih hngata tukaih koong mawn sawk ngala epret käthänei däk.” Äi äng anih la ini takal, “Keinih a i äm? Äiche nang naw hmawtei nawk.” Äi khaw a Yuda la äi hĕn poisa khäl Hnadaga ima tongal chak bala chetal, äidä jäi äng awsawk tukeiyal. Pujawtih elenchaw khälla äi hĕn poisa lawyeyal ula ini tak, “Ni poisa che Hnadaga ima nawtawkaih saw thung äng mäyah, iyaäm niche thi mawn dä.” Äidä anih kräuvei ula chokong hngat khrawng presaw khäl koong dek vawn bitih känäng lai hngat ini hleh yal. Äi koong äi lai a tua ha ‘Thi äng käh lai’ ting ini takpe. Ni äng Hnadaga sidawng hiyawktih Jirimi la hawu hüt saw kheu luih hüt, “Anih la hĕn poisa thungip ini lawkei. Äini Ani ini jeh saw mawn hnäh, Isawlael khälla Ani koong ni huih u hnun ini khrawk. Boi la ihuih tak hütäm, äi huih anih la äi mawn äng dek vawn bitih käh lai ini hleh yal.” Yĕsu äi khaw a khiyuptih Pilat hmawi mawh a ja bala mäi. Äiche khiyuptih la Ani a hi, “Nang Yudi khäl käh mawng ei?” Yĕsu la krawn bala takal, “Äiche nang bang nawhawu däk.” Pujawtih elenchaw khäl awlaw chang gongsong khälla Yĕsu a ajap jap epret ini tawng, äini Yĕsu la iha krawnei nawalah. Äi khaw a Pilat la Ani a tak, “Äi khälla nanga äi hiyawh epret anang tawng saw yawei tiei?” Äini Yĕsu la kheu khaw ak ha krawnei nawalah. Äi äng Pilat mawt maw hnäh. Äi khin äng anih käh thung täng lätal päi äng khrawng khälla ini heh lei saw othong ima mäitih khäl äng käh hngata chi Pilat la hläh al. Äi khaw a Balabba ting mingei nawtih khrawng khela ini hmawt chak saw khrawng hngat othong ima mäi hüt. Khrawng khäl tänaka ini lumei ni, Pilat la anih a hi, “Nangnih i nini hlüei äm? Nangnih koong u a kei kähläh a laih saw äm, Balabba a ei hiyah khaw Mesaya ting panei hmueitih Yĕsu a ei?” Pilat la ni huih hawu saw iyaäm ani la hmawt hüt khäh, Yudi lenchaw khäl ini selei saw koong Yĕsu a ini mawn saw. Pilat la tara bi dün laa om khaw a, iphiya la ni kheu sin bala teh, “Äi epret mäyahtih khrawnga nang iha poaiti, iyaäm kei tüyawna kawmawng se hmu ngala Ani koong mawt dukhah kübün hüt khäh.” Äini Pujawtih elenchaw khäl awlaw chang gongsong khälla khrawng khäla ini hawu sawk Pilat la Balabba a hlätal hmawna awlaw Yĕsu a tu hmawna. Äiche khiyuptih Pilat la hi, “Ni pochong hnih äng ua nangnih khäka kähläh alaih saw äm?” Anih la ini takal, “Balabba a.” Äidä Pilat la anih a tak, “Bahi kei ni Mesaya ting panei hmueitih Yĕsu a i kopoh aih saw äm?” Anih la ini takal, “Ani a krut äng thawn khäl.” Pilat la hiyal, “Iya, Ani la i epret bisaw äm?” Äi äng awlaw unung dä hek ula ini hawu, “Ani a krut äng thawn khäl.” Pilat la iha poh aih saw hmuei tiyah. Awlaw bang khru dä khru li saw hmuh ni, ani la tui lawk. Khrawng khäl hmawi mawh a ukut boteyal bala hawu, “Ni khrawng käh thi koong kei khawm hnäng hnawh nga. Nangnih dä nini khawmaih lah saw.” Krawn ula khrawng khälla ini takal, “Keinih awlaw kini chaw chuhnu Ani thi koong kini khawmai.” Äidä Pilat la Balabba a khrawng khäl khäka ähläh al, äini Yĕsu a che bop dün jäi äng bop ula krut äng ini thawnaih saw koong anih a awpal. Äi pänäng khiyuptih Pilat käh soloi khälla Yĕsu a mawng ima hawn ula äiya wan ula ini tawk. Anih la Yĕsu käh wat sut ula khawk tih ilhchaw sen upum äng ini letal. Awlaw Ani luki äng ihling mawh hiyun äng käh tokkiya po ula ini thawn. Äidä Ani a set pawt kutäng kompum pek ula Ani hmawi mawh a khogru dül äng ini om. Äidä keleih ula ini tak, “Yudi khäl käh mawng o, Nang nawsawk sawu seh!” Anih la Ani pumäng chilh tui ini soh ei nawk awlaw Ani kutäng käh kompum lawyeiyal ula äi äng uluki äkräng kräng ini bop. Ani a ini kekeleih pänäng äi wat sutal ula Ani käh wat ini watal sawk. Äidä Ani a krut äng ini thawnaih koong ini chih al. Äi känäng ini thokal khaw a, Kurini mräh a käh Simon ting mingei nawtih khrawng hngat lawma ini khom. Soloi khälla ani a Yĕsu käh krut käh bala chih ni ini chih eih sawk saw ini khrawk. Äi pänäng anih la Gawlgawta ting mingei nawk saw la hngata ini chih. Äi la ming che nawkrawnal hi ini lukong la ting ini tak. Äiya anih la khawtih vawn alak äng bäl ula ini ok sawk. Äini awkaw äng thawnei ni, Ani la o do ah. Soloi khälla Yĕsu a krut äng ini thawn pän ni, anih lumchawl chawm äng chawmei ula Ani käh wat cha ini pheh eiyal. Awlaw anih la äiya om ula Ani a ini chong. Anih la krut äng Yĕsu ludäma ni huih epret yo ula ini khoh pek, ‘Ni khrawng che Yĕsu, Yudi khäl käh Mawng.’ Anih la Yĕsu ängtu tamdah pochong hnih a ha krut pai hnih äng ini thawn, pochongaka che set pawta awlaw pochongaka che setong pawta. “Äi lawm äng chetei tih khrawng kheni ini luki hlünei pek ula Yĕsu a ini keleih. Awlaw Ani a ini tak, ‘Nang hieyei Hnadaga im khrakal chak tila hnüp thum dukäng poh a laih hnäng tih. Bakhaw tua Nang nupuma hläteyal. Awlaw Nang dä Hnadaga chaw näthän hi, krut känäng komal.’” Pujawtih elenchaw la Mosi käh thung choktih khäl awlaw chang gongsong khälla Ani a keleih ula ini tak, “Ani la awhngaw khäla ähläh al hüt hnäng, äini upuma che hläteyal hnängah. Ani Isawlael khäl käh Mawng ei? Tua krut känäng komal heh, äihi Ani ini yumeyei. Ani la Hnadaga a üm khäh. Awlaw Ani la Hnadaga chaw ting hawuvei khäh. Awpawi khäh, so äng khä Hnadaga la Ani a hlätal te ei.” Tamdah pai hnih Yĕsu ängtu krut äng thawn hmueitih häih la ha lup khiyang kheu ta häih la i hni keleih. Äi hnüpa khosun pailei hnih täh kän ümülawm paithum täh pre kheni hiyung chak bala mäi. Ümülawm pai thum bawng äng Yĕsu la athak hek bala hawu, “Eli, Eli, lama sawbawktani.” Ni kheu nawkrawnal hi, ni huih thänei, “Kei käh Hnadaga, Kei käh Hnadaga, iya Kei a hlät tila nechetal äm?” Äiya jatih khäl äng käh pochongak hnih la äi kheu hawu saw yaw ula ini hawu, “Ani la Elija a bekei saw dä.” Äi äng tutu anih dukäng käh hngat chon bala, kompum sawu äng solo hum khon. Äidä äi thotih alak äng sum bala pekaih saw ini sot. Awhngaw khälla ini tak, “Mäi seh, so äng khä Elija la hläh a la lote yei.” Yĕsu awlaw krängak athak hek pänäng awsawk thok. Äidä Hnadaga ima käh ilhchaw ädäm täh kän awdawng täh tak bala phawl hnih a phawlei. Liuh ha lo awlaw lung len lung len ha ekek hnäh. Awlaw cho khäl ha hongei, Hnadaga käh asanh chang khrawng dütih khäl üküt che heng ula ini thouwal. Anih cho känäng thouwal ula ini lo al. Yĕsu düsaw känäng heng bala thouwal ni, äi khrawng khäl asanh chang tih mräh Yĕlusalema ini chetal. Äiya awbawnga khrawng la anih a ini hmuh. Soloi gong la ani ängtu mäitih osoloi khälla Yĕsu ini chongtun khaw a liuh lo saw khäl awlaw awhngaw thänei saw khäl hmu ula mawt ke ula ini hawu, “Ihi khäh, Ani Hnadaga Chaw dä.” Awbawng hmutaw khäl ha äiya ja ula awhlawm hlaw kän ükütni ini sot. Yĕsu a ini chetchaw aih koong äi hmutaw khäl Galil känäng Ani äng tutu ini lo hüt. Anih äng Meri Makdalin, Yakub la Yosep nu Meri, awlaw Jebidi phiya Yakub la Yohan nu ha mäi hüt. Khomüni Awlimathia nama käh Yosep ting mingei nawtih mäichawtih hngat äiya lo. Ani Yĕsu käh tebeih mäi hüt. Ani la Pilat khäka lo bala Yĕsu yok awhawvei al. Pilat la Yosep a äi oyok pekalaih saw tak. Yosep la Yĕsu yok law al bala sanh tih a watsaw tha äng tomal. Äidä upum koong chouhwei hüt saw cho äng äi yok tawkal. Äidä äi cho tamkha lungpel len hngat äng kha bala chetal. Äini Makdalin Meri la awhngaw Meri äiya äi cho hmawi mawh pawta om häih la i hni mäi. Äi ngo kawthawya dümsaw khomhnüp äng Pujawtih elenchaw awlaw Pherasai khälla Pilat khäka lumei ula ana tak, “Mawng o, hnüp thum pänäng kothouwalaih saw ting ni hleitih la eheng hüt khaw a awhawu hüt khäh.” Äi koong hnüp thum täh cho ini chongaih saw koong ana khraw. Hiyah khaw Ani tebeih tih la oyok mual ula thän Ani düsaw kän thouwal däk ting khrawng khäla ini takaih saw dä. Äi täkchah hlek nawk saw thawka uhnung äng hlek nawk saw unung se yeih saw. Pilat la anih a takal, “Cho a chet khäl, soloi khäl chiyei chula nini näng saw huih a chongei khäl.” Äidä anih chet ula khrawng la hong hnäng ngah hmawna cho tamkha ini khah. Äidä anih la cho ini chongaih saw koong chongtih khäla äiya taw hüt ula ini chetal. Düm khomhnüp pänäng käh hnüp äng sapta chah saw ngo a, mawt jawn Makdalin Meri la awhngaw Meri äi cho sota ihni chet. Äidä athikiya liuh len lo, äi pänäng Boi käh hawn natchaw hawn pre känäng kom. Äidä cho khrung äng käh lung pel hlayal bala äi lung khrung äng omal. Äi hawn natchaw hmawi che wachawi chawiya huih dawng awlaw ani käh awat bok phong phonga dawng. Ani ini ke saw äng chongtih khäl chün chüna thänei ula ini hiyam. Hawn natchaw la äi hmutaw khäla tak, “Nangnih ke ei chu, iyaäm kei kawhmawt khäh, krut äng thawn hmuei bala tuk hmueitih Yĕsu a nini suiyal saw dä. Ani niya mäitiyah. Yĕsu la hawuvei hüt saw huih Hnadaga la Ani a thouwal däk. Lo khäl, Ani hiyawl hütsaw la aso khäl. Nangnih jotjota chet chula etebeih tih a ahawu pek khäl, Hnadaga la Yĕsu a düsaw känäng thouwal däk. Awlaw Ani anih khawngah Galil guda pawh a chetal tun. Anih la äiya Ani a ini khomai. So khäl, kei nangnih a ni kheu kanang hawupek saw thän.” Äidä äi hmutaw khäl cho känäng jotjota ini chetal. Anih ini ke hüt thän ini piyaw. Awlaw anih la etebeih tih a ini hawpekaih koong ini chonal. Äi huih khaw a Yĕsu täkting äi hmutaw khäl hmawi mawh a lo bala hawu, “Khotawh nini mäiyei?” Äiche äi hmutaw khäl Ani khäka ini chet, okho sin ula ana rosi. Yĕsu la anih a tak, “Ke ei chu. Nangnih chet chula Kei ta nawu khäla Galil guda khäka ini chetaih saw ata khäl. Anih la Kei a äiya khrawng khom khäh ai.” Hmutaw khäl ini chetal ni äi chongtih khäl äng käh pochongak hnih mräh pawh a ini chet. Äthänei saw khäl kheni pujawtih elenchaw khäla ana hawupekal chak. Äidä Pujawtih elen awlaw chang gongsong khäl pochongak hnih tänaka lumei ula kram ini poh ei. Awlaw anih la soloi khäla awbawng awmawn pek ula ini tak, “Keinih awyawna kini ip tuna, Ani tebeih tih la mu ula Yĕsu yok ini chiyeyal saw ting nangnih hawu bäichu.’ Ni kheu dä khiyuptih la yawk hi, keinih ani a kini hiyelai awlaw dam nini büneyeih saw känäng nangnih a keinih kanang kakai.” Chongtih khälla awmawn lawyei ula anih a hawu pek hmuei saw huih ini hawupek. Tua ha äi kheu Yudi khäl khäka khrih ei bala mäipe khäh. Yĕsu la Galil a käh mawng khuyunga chetaih saw tak hütäm, äi khuyunga etetebeih pochong leiyak ini chet. Äiya Yĕsu a ini hmuh ni Ani a khät ula ini rosi, äini ükütla che yumei hek u. Äi khaw a Yĕsu anih kena lo bala ni kheu tak, ‘Hawn pre la luhdül äng käh üküt dogo ni Hnadaga la Kei a aw awp chak däk. Äi äng nangnih hang hang yapsaw khäka chet chula Kei uyumtih a po khäl. Äidä Awpaw, Awchaw awlaw Asanh chang khraw ming äng tuilüh apek khäl. Kei nangnih a i aw kanang chok hütäm, äi khäl anih a achok khäl. So khäl, Kei nangnih ängtu luhdül tumak kämäi khäh.” Ni sidawng pawi che Mesaya Yĕsu käh, Ani Hnadaga chaw. Hnadaga sidawng hiyawktih Aijaya la oyok hüt, “So e, nang hmawi mawh a Kei käh sidawng hiyawktih kei keteh. Ani la nang käh lawm poh bala awtawkai. Täulung chinga pochongak käh asam la hek bala che awhawu, ‘Boi koong lawm po chula ächän taw khäl! Ani koong lawm chokchok po khäl!’” Awlaw ni kheu khäl ihisaw a thänei. Tuilüh pektih Yohan ala honga ämäi hüt, awlaw ani kheu khina lotih khäl khäka tara haw hüt. Khrawng khälla ngulai känäng ini lung hleyeyal ula awlaw anih käh ngulai Hnadaga la ähläh pekal hmawna tuilüh ini lawkeyeih saw tak. Äi khaw a Yudia pre lekchaw la Yĕlusalem mräh äng käh khrawng kheni thok ula Yohan äng ini khomeyeih koong awlaw kheu ini khinaih koong ani khäka ini chet. Khrawng khälla ngulai ini poh ting ini khawmeiyal ni, Yohan la anih a Yawldan hlonga tuilüh epek. Yohan la ut ting ini taksaw mäksetdava hmul äng käh wat awat hüt awlaw awnvun äng käh khabaih äng ani la echeng khonei hüt. Ani la khawng khäu pü la khoitui eei ok hüt. Ani la ni huih sidawng hiyawk, “Kei pänäng pochongak khrawng olo tun. Ani che kei thawka tha mawh dä. Kei hngasaw huih bok ngala Ani käh thanap jäi kusuh aih saw bang tawn nga. Kei nangnih a tui äng tuilüh kanang pek, äini Ani la Asanh chang Khraw äng tuilüh anang pekai.” Hnüpak khaw a Galil pre a käh Nazaret känäng Yĕsu olo, awlaw Yawldan hlong äng Yohan la Ani a tuilüh pek. Yĕsu tui duk känäng othowal ni, hawn phawl hnih a phawlei bala ohongei saw awlaw Asanh chang Khraw khü huih ani khäka o kom saw hmuh. Äi khaw a hawn pre känäng asam hngat la hawu, “Nang dä Kei kekhetsaw chaw, nang koong Kei mawmawt kawpiyaw.” Äi pänäng Asanh chang Khraw la Yĕsu a täu lungchinga eteh. Äiya Ani khomhnüp hligip ämäi. Äi khaw a, Mannat la Ani a awchawm. Äiya mäksetdava khäl ha ini mäi hüt. Äini hawn natchaw khälla Ani a sokhre ula ini tawk hüt. Yohan thong im äng heng nawk hmuei pänäng Galil pre lekchaw a Yĕsu echet. Äiya Ani la Hnadaga käh sidawng pawi kheu awhiyawk. Ani la atak, “Khin thänei, Mawng Hnadaga pre kena lo däk. Äi koong ngulai känäng nini lung hleyeyal khäl awlaw sidawng pawi yumei khäl!” Hnüpak khaw a Galil guda kawm äng Yĕsu chetei khaw a, Simon la ani nawu Endu la kawn ihni chawnh saw hmuh. A hnih che dum ihni mäi hüt. Yĕsu la a hnih a panei bala a tak, “Kei ängtu lo hnih. Khrawng khäla iba kei käh tebeih nihni poh aih lah saw äm, kei nang hnih a kanang chokai.” Äi khaw a kawn hiyänal häih la Yĕsu ängtu ahnih ihni chet. Äiche äi känäng bitchaw hlawm hlaw a echet ni, Jebidi chaw Yakub la Yohana Yĕsu la hmuh. A hnih long äng om häih la kawn ihni khoiyal tunsaw. A hnih a uhmuh saw ängtu Yĕsu la a hnih a apanei. Äidä ahnih la ahnih paw Jebidi a ahngasaw khäl ängtu long äng taw hüt häih la Yĕsu ängtu ihni chet. Yĕsu tebeih tih äng Kawpalnahum mräh a chet. Äiche düm khomhnüp äng Ani Yudi ini lumeidün ima chet bala chokaih saw chah. Ani la chok saw äng khrawng khäl ini maw chak. Iyaäm Mosi käh thung choktih khäl huih chok saw hiyah äini päng tih huih dä Ani la chok saw. Yĕsu la ochok tun khaw a täk ting, Yudi ini lumeidün ima khrawse la mawn saw khrawng hngat la hek bala che awhawu, “Nazarina käh Yĕsu o, keinih khäka iya nolo saw äm? Keinih a khraka nang nolo saw ei? Kei kaw hmawt khäh nang u äm. Nang Hnadaga käh äi Asanh chang Hngat dä!” Äini Yĕsu la pawyahtih khraw a hekei bala tak, “Kräuvai ti, ani duk känäng thokal!” Äi pawyahtih khraw la äi khrawnga atha mäiyak säkei sawk bala äi khrawng duk känäng athak hek bala che othokal. Äiya mäitih khrawng kheni ini maw chak, awlaw hngat la hngat ini kräuvei, “Niche i äm? Nangkei a kheu tha khrawng chok saw ei? Ani kräu saw che päng tih huih, pawyahtih khraw khäla ha atak chi hi, pawyahtih khraw la ani kheu ini ngei!” Äidä Galil pre lekchaw a käh üküt laa Yĕsu kheu alanda i khrih ei chak. Äi pänäng Yudi ini lumeidün im känäng thokal häih la Simon la Endu ima Yakub la Yohan ha Yĕsu ängtu ihni chet hüt. Simon pui kawl koong hiyawl bala mäi hüt. Yĕsu aphaw saw ängtu Yĕsu a awkawl saw hawuvei pek. Äi khaw a Yĕsu ani kena echet, äidä thouh waih koong ani kut bin bala äjäh. Äi äng ani awkawl saw awpawiyal, awlaw ani la anih koong eiok opoh pekal. Äi hnüpa khoni kraw al pänäng khrawng khälla awbawng lawgase la khrawse la mawnsaw khrawng khäla Yĕsu khäka ini lo. Äi khaw a mräh a käh khrawng kheni im tamkha khäka lo ula ini chuh ei. Yĕsu la awbawng lawgase khäla awpawi poh al awlaw awbawng khrawse othoh al. Äini pawiyatih khraw khäla Ani la kräu saw kah. Iyaäm Ani che u äm, äi khrawse khälla ini hmawt khäh. Hnüpak pänäng Yĕsu akhonäng othou awlaw im hlät bala suh tongei a täu lungchinga chet. Hnung äng Ani a suiyala Simon la awnghaw khrawng khäl ini chet. Ani a sui ula ini bünal pänäng ini tak, “Khrawng kheni la nanga anang suiyal.” Äini Yĕsu la krawn bala tak, “Che khäl, kei tara haw hnäng hmawna, nangkei kena käh nam khäla chet äng khä. Äi koong dä kei kolo saw.” Äi huih Galil a käh üküt laa Yĕsu chet bala Yudi ini lumeidün ima tara haw awlaw khrawse khäl ha otho al. Hnüpak khaw a unu lawga kopeitih khrawng hngat Yĕsu khäka lo bala khokgru dül äng ani hmawi mawh a om bala tak, “Nang dä nühlü ei khaw, kei a asanh nopoh al hnäng.” Äi khrawng lukhrunga Yĕsu a mawmawt khetjen kawi. Ani la ukut phranei bala ani a bin. Yĕsu la tak, “Kei kühlü, nang asanh thäneiyal!” Äi awhawu saw äng tutu ani käh unu lawga awpawiyal. Äi khaw a Yĕsu la ani a eteh al, äini ayang sidih kheu hngat tak, “So e, ni kheu hngata ha hawupekaiti. Äini pujawtih hngat khäka chet tila naw pawiyal saw a dawneiyal. Äi pänäng Mosi la hawu hüt saw huih ahlu al. Äi khaw nang nasahnal däk ting khrawng khälla ini hmawtai.” Äini äi khrawng la apranga chet bala che äi kheu i khrih chak. Äi koong Yĕsu a awbawng khrawng khälla ana vaneinawk chak ni, hngat nama ha khrawng khälla hmu hmawna Yĕsu chet hnäng tiyah. Ani täu lung chinga dä ämäi lah. Äi thän ha yapyap la känäng khrawng khäl Ani khäka ini lo. Hnüpak hnüp hnih pänäng Yĕsu awlaw Kawpalnahum a awkrawnal. Ani ima mäi khä ting sidawng khriyei chak. Tana kra äng khrawng ini luih chak ni, im duka käh khan khäl awlaw pranga käh tamkha äng bang ala mäitiyah. Äi khaw a Yĕsu la anih khäka tara haw. Kut kho chektih khrawng hngata khrawng pochong hli la phawk äng kün ula ini lo. Äini khrawng thĕt thĕt koong Yĕsu khäka lo hnäng u, äi koong ädämäng käh teh khrung hlai ula che äpäk len ini poh. Äi äpäk len känäng phawk la ilh äng äi kut kho chektih khrawnga ini khom. Yĕsu la anih käh yum hmu bala che kut kho chektih khrawnga tak, “Chaw o, nang käh ngulai ähläh nübüneyal däk.” Äini Mosi käh thung choktih hngat pai hnih choktih khäl äiya om ula ini mäi hüt. Anih la ini lung dukäng ini tawk, “Iya ni khrawng äi huih äkräu saw äm? Ani la upuma Hnadaga äng titih a opoh ei. Ngulai ähläh pekal hnäng tih che Hnadaga dä hngat.” Anih la i aw ini tawk äm tana kra äng Yĕsu la awhmawt chak. Äi koong Yĕsu la anih a ihi, “Iya nangnih nini lung äng äi huih nini tawk saw äm? Ni kut kho chektih khrawnga mawng natakaih saw unung loigra äm, nang ngulai ähläh nübüneyal däk tingei, ‘hiyah khaw’ ‘Thou tila nang käh phawk hlokeyal tingei?’ Äihi nangnih a kei kanang dawnai, luhdül äng ngulai ähläh pekalaih saw thayung Luhchaw Chaw la tawkei khäh.” Äi khaw a kut kho chektih a Ani la tak, “Kei nanga kini tak, thou, nang käh phawk hlokeyal tila ima chetal!” Äi pänäng äi khrawng thouwal äidä ani käh phawk hlok bala khrawng khäl hmawi maw känäng apranga chetal. Äi äng khrawng kheni maw chak ula Hnadaga a phiyaw ula ini hawu, “Ni huih krängak ha hmuh hawm unga!” Äi pänäng awlaw krängak Yĕsu guda kawma chet. Äi khaw a awbawng khrawng Ani khäka ini lo, awlaw Ani la anih a chok. Ani lawm äng chetei khaw a, Alphaya chaw Lebi a phawndaw kok dün ima om bala mäi saw hmuh. Yĕsu la ani a tak, “Kei hnung äng lo awlaw kei käh tebeih a thänei.” Äidä Lebi thou bala ani ängtu chet. Äi pänäng Yĕsu awlaw etebeih tih khäl awyawna ini ei okaih koong Lebi ima ini chet. Äi khaw a awbawng phawndaw koktih la awhngaw ngulaisu khäl ha anih ängtu ini ei okaih koong ini om hüt. Äini Pherasai sawng känäng käh Mosi käh thung choktih khälla Yĕsu a phawndaw koktih la awhngaw ngulaisu khäl äng eiok saw hmu ula tebeih khäla ini hi, “Iya Ani la äi huih khrawng khäl äng ini eiok saw äm?” Ni kheu khäl yaw bala Yĕsu la äi khäla tak, “Optih khrawng koong to sotih hlü ah, äichaw a opatih khrawng khäl koong dä ühlü saw. U khälla konghmuh sang ting ini khinei äm anih a kua Kei lo nga, äini u khälla ngulai känäng ini lung ini hlĕheiyal äm, äi ngulaisu khäla dä kua kolo saw.” Krängak Tuilüh pektih Yohan käh tebeih khäl awlaw Pherasai khäl ei oa pak ini mäi hüt. Äi hmu ula hngat pai hnih khrawng la Yĕsu khäka lo ula ini hi, “Iya Yohan käh tebeih la Pherasai khäl käh tebeih khäl huih nang käh tebeih khälla ei oa pak mäi u saw äm?” Yĕsu la krawn bala takal, “Khrawng hngat la phiya nawk khaw a, omnaweitih pawtaw ängtu mäitih gawrba khälla ani ämäi saw kra äng ei o ah pak ini mäi ei? Mäi u. Anih ängtu omnaweyeih tih pawtaw mäi saw kra che anih la ei oa pak mäi u. Äini ikhin olo tun, pawtaw a anih känäng chih hmueiyal khaw a, anih ei oa pak ini mäiyei.” Yĕsu la awlaw hawu, “Hngat la ha awat phem äng awat tha pha u. Äi huih ini pha khaw, äi awat phem äng awat tha ini pha saw la atakal. Äihi äi ataksaw ala ni ayang thawka unung atakal. Awnvun äng käh khoila phem äng hngat la ha grĕp hawng tha taw ah. Awtawk hi atha grĕp hawng odok mäi saw koong awnvun äng käh khoila tak bala grĕp hawng la awnvun pai hnih ni akrak chakai. Awnvun äng käh khoila tha äng dä grĕp hawng tha nawtawk lah saw.” Düm khomhnüp hngat äng Yĕsu püm khang dukäng chetei bala echet. Ani käh etebeih khälla püm käi sik ula ini kutäng yun ula ini ei. Äini Pherasai khälla Yĕsu a ini tak, “So e, düm khomhnüp äng püm käi sik ula anih la iya thung ini khrah saw äm?” Yĕsu la anih a tak, “Dawut la äphäutih khäl buh ini düei khaw a, anih la ihuih ini poh ei hütäm? Nangnih äi kiyam äng yoei saw krängak ha phawt chu ei? Abiyathal pujawtih gong mäi hüt khaw a, Hnadaga ima Dawut vawng bala pujawtih gong hiyah pak ei hnäng u saw asanh chang ha law bala eei awlaw äphäutih a ha pek.” Yĕsu la khrawng khäla awlaw tak, “Khrawng koong dä düm khomhnüp Hnadaga la bisaw! Düm khomhnüp äng käh thung khäl ngei ula ini mäiyeih koong Hnadaga la khrawnga biyah! Äi koong Luhchaw Chaw che Yudi düm khomhnüp äng käh Boi.” Yĕsu Yudi ini lumeidün ima awlaw chet. Äiya ukut hitih khrawng pochongak ämäi hüt. Düm khomhnüp äng äi khrawnga Yĕsu la awpawi poh a lei ting hngat pai hnih Pherasai khälla epret ini mawnaih koong khiyong ula ini mäi. Yĕsu la ukut hitih khrawnga tak, “Üküt hmawi mawh a lo tila aja.” Äi pänäng Ani la Pherasai khäla ihi, “Düm khomhnüp äng Mosi käh thung la i poh aih koong atak äm? Bi pawi biyeih koong ei, ‘hiyah khaw’ bi se biyeih koong ei? Khrawng käh sawk khiyawtalaih koong ei, ‘hiyah khaw’ khrawnga tukaih koong ei? Äini anih la Ani a iha hawu pek u. Ani la aman äng eken setsei anih pawta soyei bala ini lung chang koong thasa ulung dukhah piyei. Äiche äi khrawnga tak, “Nukut wawngak phranh nei.” Äi khrawng la ukut phranh nei ni ukut awpawiyal. Äi khaw a Pherasai khäl thokal ula Yĕsu a iba ini tukaih saw äm ting ana täng bawngal awlaw mawng Herawt phak khäl äng ana khomeyal. Äi pänäng Yĕsu etebeih tih ängtu Galil a käh guda kawma echet awlaw awbawng khrawng la ha Ani känäng ini täm. Yĕsu la nawmaw nawk saw bi bisaw yaw ula Yudia, Yĕlusalem, Idom bam känäng käh, Yawldan hlong chupawt kawma käh awlaw Tayal la Sidon a käh eken setsei ala känäng Ani khäka ini lo. Khrawng ini nung saw koong netei ula Yĕsu khrung äng ini kraw ai ting Ani la long lekchaw ini tawkaih lawk saw koong etebeih tih a tak. Ani la awbawng khrawnga awpawi poh al koong lawgase khälla Ani a ana sinaih koong ini netei. Pawiyah tih khraw la mawn bala tawk saw khrawng khälla Yĕsu a ini hmuh khaw a, Ani hmawi mawh a kru ula awlaw hek ula ini tak chi, “Nang dä Hnadaga Chaw!” Äini Yĕsu la kheu chang äng pawyahtih khraw khäla Ani u äm, äi kheu hngata ha hawu pekaih u saw a tak. Yĕsu che u äm äi khrawng khäla hawupekaih u saw koong khrawse khäla Yĕsu la tha tawng bala tak. Äi pänäng Yĕsu khuyunga kawi bala Ani la heh lei saw khrawng khäla panei ni, Ani khäka ini lo. Ani la khrawng pochong lei hnih a eheh leih awlaw anih a teh hmueitih khrawng ting iming usuiyei. Ani la tak, “Kei nangnih a kanang heh lei saw kei ängtu nini mäiyei koong awlaw apranga sidawng hiyawka ha kanang tehyeih koong.” Khrawse khrawng khäl känäng thoh al hnäng hmawna anih a thayung epek. Ani la heh lei saw khrawng pochong lei hnih ming che Simon, (u a Yĕsu la Pitol ting ming usuiyei äm), Jebidi chaw Yakub la Yohan, äini Yĕsu la a hnih a iming suiyei Bunaji ting (ni naw phawngal khaw kek ting äthänei), awlaw Endu, Philip, Bawthawlmawi, Mathi, Thoma, Alphaya chaw Yakub, Thadiya, awlaw pre thasa khetnawtih Simon, awlaw Ikariyo Yuda. Ni Ikariyo Yuda la hnung sumäng Yĕsu a lansu khäl kutäng awmawnal sawkäm. Yĕsu ima olo al. Äidä Ani khäka awbawng khrawng awlaw ini chumei tü ni, Ani la etebeih tih äng ei okaih saw khin bang büneyah. Yĕsu imsaw khälla äi sidawng yaw ula ani a lawkai äng ini lo. Anih la ini hawu, “Ani ulu däk.” Yĕlusalem känäng lotih Mosi käh thung choktih khälla ini tak, “Ani a Biljibul la mawn khäh. Khrawse mawng khäl käh tha äng Ani la khrawse khäl otho al chi.” Yĕsu la äi Mosi käh thung choktih khäla panei bala pümchut bala anih a atak, “Mannat la iba Mannata ätämalaih saw äm? Mawng pre hngat äng käh khrawng khäl hngat la hngat äng jal täkei ula pre pheyei khaw, äi pre khawmah. Awlaw imak saw hngat la hngat äng bopei ula ini pheyei khaw, äi im thong ha khawmah. Äi huih, Mannat la ani käh pawyahtih khraw khäl hngat la hngat äng bopei ula ini pheyei khaw, anih khawm hnawh u. Anih ini krak chakai. Awlaw tha mawh khrawng hngata khonah pak im duka vawng bala hngat la ha tamdah satei hnängah. Ani a ini khon pänäng dä ani im thamdah ini satei hnäng saw.” Yĕsu la awlaw tak, “Sidih äng khin bäichu, khrawng khälla yapyap lawm äng ngulai ini poh nawk hnäng awlaw Hnadaga ming äng kheu se ini hawu nawk hnäng. Äi thän ha Hnadaga la anih a ähläh pekalai. Äini losulapei Asanh chang Khraw a keleih khaw, Hnadaga la sätak ha ähläh pekal hnawh. Äi khrawng käh ngulai che sawkbrat koong mäiyei.” Mosi käh thung choktih khälla ini hawu hüt, “Ani a pawyahtih khraw la mawn khäh.” Äi huih ini kräu koong Yĕsu la ni kheu khäl awhawu pek. Äi pänäng Yĕsu nu la awnawu tih khäl Ani äng khomeya äiya ini lo. Anih pranga ja ula Yĕsu pranga lo seh ting pochongaka uduka teh ula ana panei sawk. Yĕsu ken setsei awbawng khrawng om ula ini mäi hüt. Anih la Yĕsu a ini tak, “Nang nu la nawnawu tih khäl nang äng ini khomeyeih koong pranga ini mäi.” Yĕsu la takal, “Kei nu u äm? Kei nawu tih khäl u äm?” Ani a wan ula om hüttih khäl pawta so ei bala tak, “Niya so khäl. Ninu cho kei nu la kawnawu tih khäl. Hnadaga lung hlü huih mäitih dä Kei käh nawu la Kei be awlaw kunu.” Yĕsu la awlaw Galil guda kawma khrawng khäla ochokai saw achah. Eken setsei awbawng khrawng ini chumei chak ni, Ani long hngat äng kawi bala oom awlaw khrawng khäl kawma ini mäi. Ani la anih a pümchut bala yapyap khrang chok. Ani la hawu. “Khin khäl. Lai bitih pochongak la ichih phulaih koong chet. Ichih phuhl khaw a, ichih bitchaw lawm kena kraw äidä haw khäl lo ula äi ini eiyal chak. Awlaw awvawng chih che lung bälei tih dekäng kraw. Äiya dek unung mäyah. Dek thukah koong ichih che alanda ächät. Khoni kawi ni äi khäl awjawiyal chak awlaw uyungpa dek dukäng mawmawt chaw vawngah koong acha al chak. Awlaw awvawng chih che ihling thing mawh laa kraw. Äi chih chät bala elen awlaw ihling thing ha len. Äini ihling thing khäl alanda len bala che äi thing chaw khäl khiyup bala tawk koong etheih thei hnängah. Awlaw awvawng chih che dek pawi saw lai äng kraw. Äi chih chät bala elen awlaw etheih thei. Awvawng thing äng äkräng thunggip, awvawng äng äkräng sĕtgip, awlaw awvawng äng äkräng khra ak etheih thei.” Äiche Yĕsu la awhawu, “Ua ikhin hnängai saw huih awhnaw mäi äm, äi khrawng la khin seh awlaw yawchu seh.” Khrawng ini lewal pänäng Yĕsu ken setsei khrawng khälla awlaw etebeih pochong lei hnih la püm äng käh akhrang i äm ting Yĕsu a ini hi. Ani la anih a tak, “Mawng Hnadaga pre äng käh thupei saw kheu khäl nangnih nini hmawt lah. Äini awhngaw khäla che pümchut äng dä hawu pek hmuei saw. Äi koong Hnadaga sidawng hiyawktih la oyok saw ihi khäh, “Kei kibisaw khäl anih la ini hmuh thän ha iha chok naw hnäng hnawh u. Kei kawhawu saw khäl ini khin thän ha, yawchu hnawh u. Äi huih hiyah hi Hnadaga pawta anih ini lo a laih hü awlaw ähläh ini büneyalai hü.” Äi khaw a Yĕsu la anih a tak, “Nangnih dä ni pümchut yawchu chu khaw, awhngaw pümchut khäl iba nini yawkchu aih saw äm? Kei kaw hawu saw pümchut che ni huih, ichih phul tih khrawng che Hnadaga kheu hiyawktih. Lawm äng kraw saw ichih che äi khrawng khäl kheu hawu hmuei saw, u khälla äi kheu ini khin äm, äini Mannat lo bala che anih la ini khin hüt saw kheu khäl i hngilal sawk. Lungpel bälei saw la äng awkraw saw ichih che äi khrawng khäl kheu hawu hmuei saw, u khälla äi kheu khäl khin ula tana kra äng awpiyaw äng ini lawkei äm. Äini äi kheu anih lung dukäng mäyah, äi Hnadaga kheu kraw ak chaw koong anih la ini yumei. Anih che uyungpa dek dukäng chet hnäng ngah tih äi thing chaw huih dä. Hnadaga kheu ini yumei koong waih ‘hiyah khaw’ kulu nawk saw äng ini kraw khaw a, äi khrawng khälla Hnadaga a ini yumei saw ini dümal. Ihling khrak dukäng awkraw saw ichih che, äi khrawng khäl u khälla Hnadaga kheu ini khin äm. Äini anih mäi chawtih ini thäneyeih khiyang awlaw ajap jap vawn ini büneyeih khiyang awlaw anih luhdül äng käh kähkän koong dä ini konggrah. Äihi che Hnadaga kheu anih la ini hngilal awlaw Hnadaga la hlüei saw huih ha anih mäi u. Äini ala pawi äng kraw saw chih che äi khrawng khäl dä, u khälla Hnadaga kheu khin ula ini sumei äm awlaw ini yumei äm awlaw Hnadaga la hlüei saw huih ini mäi äm. Anih che ächät pawitih ichih huih thunggip, sokgip, kra ak etheih theitih äng ini tuei.” Äiche Yĕsu la anih a ihi, “Hngat la ha simiya choi bala tong chaw dukäng ‘hiyah khaw’ khat kawla awtawkei? Taw ah! Simiya tawk dün ala a dä tawk saw. Äi huih, hmuphu chu saw iha dawngala pak mäi thaw hnawh. Awlaw uthupei saw kheu iha yawchu a pak mäi thaw hnawh chu. Ua bang khinaih saw awhnaw mäi äm, äila khin seh.” Äi pänäng Yĕsu la tak, “Nangnih i nini yawkäm äi pawh a nini lung pekei khäl. Nangnih ihuih nini tün pekäm, nangnih a ha äi huih tün pek hmueyalai. Awlaw bang, äi thawka unung anang pekalai. Ula kei kochok saw khin äm, ani a awbawng yawkchu aih saw lung pek hmueyei. Äini ula khinah äm, anih la bitchaw yawkchu saw bang ani känäng lawk hmueiyalai.” Yĕsu la awlaw hawu, “Mawng Hnadaga pre che lai bitih hngat la lai äng ichih phul saw huih dä. Äidä awyawna ip bala awlaw ühnüpa khak bala ikhin chih. Äi dukäng ichih chät bala chom, äini mawng kra äng ichih chät bala lenäm ani la hmawt khawngah. Chawng chaw lenaih saw la etheih theyeih saw koong dek la thing chaw a bi ibi pek. Ayang esei chaw othok, äiche äkäi, äi pänäng chawnga äthänei. Chawng hmin pänäng lai bitih lo bala bin äng chawng atan, iyaäm chawng ini tanaih saw khin äthänei däk saw.” Yĕsu la atak, “Kei i äng Mawng Hnadaga pre kuchutaih saw äm? Mawng pümchut äng kanang phawng pekaih saw äm? Äi Mawng Hnadaga pre che monniyang chih dekäng ini chäh saw huih dä. Ni monniyang chih awhngaw chih khäl thawka thasa elek khäh. Äini ichih ächät pänäng akhang äng käh awhngaw thing chaw khäl thawka thasa len awlaw abak sawu othok, haw khälla ilip mäidüna käh bak äng ubuh ini sekei.” Äi huih awbawng khui äng awlaw pümchut äng Hnadaga kheu Yĕsu la khrawng khäla awhawu pek chi. Khrawng khälla ini yawkchu saw si Ani la awhawu pek chi. Ani la pümchut kaw anih a chokah, äini tebeih khäl awhngaw chaw ani ängtu ini mäiyal khaw a, Ani la ükütni awphawngh pekal chi. Äi hnüpäng ümülawma Yĕsu la etebeih khäla tak, “Che, nangkei guda awhngaw pawt kawma chetäng khä.” Äidä khrawng khäla taw hüt ula tebeih khälla Yĕsu a long äng khawi ula utu ini chet. Äiya awhngaw long khäl ha anih hnung äng ämäi hüt. Long kawt tuna thasa khri lo awlaw long khrung äng läng athak kraw ni, long äng tui awvawng chak. Äini long ho pawh a Yĕsu la khum äng uluki tawei bala iip hüt. Etebeih tih la Ani a khak ula che ini tak, “Choktih o, keinih kini dü aih chak nu, nang bitchaw bang tawk ti ei?” Yĕsu thou bala khri a ĕhĕkei awlaw länga tak, “Dümal! Khiyamsaal hnawh!” Äi äng khri dümal awlaw ükütni khiyamsaal chak. Äi khaw a Ani la anih a ihi, “Iya nangnih nini ke saw äm? Kei nangnih a kanang ka hnäng khäh ting nangnih tua ha yumei hawm chuei?” Äidä etebeih khäl thasa ke ula hngat la hngat ini kräuvei, “Niche u äm, khri la läng la ha Ani kheu ini khin?” Äi pänäng Yĕsu la etebeih tih Galil guda kawt ula Gerasin khäl käh pre a ini chet. Yĕsu long kän thokni khrawse la mawntih khrawng hngat täkting chokong känäng ani äng khomeyeih saw koong ani hmawi mawh a lo. Äi khrawng cho a chi mäi. Awlaw ani a hngat la ha thi siyol äng bang hen ula taw hnäng chi u. Ani kut kho thi siyol äng chi hen ula ini tawk thän ani la uphukeyal chak chi. Ani a hngat la ha nga hnäng ti u. Ühnüp awyawn khuyung äng käh cho a hehek bala kakap bala ämäi chi awlaw upum kantha lung pel äng awh ei chi. Awhlawm hlaw kän Yĕsu lo saw hmuh ni chon bala ani äng akhomei awlaw bok bala äkhäh. Äidä hek bala hawu, “Üküt thawka hlüngtih Hnadaga chaw Yĕsu o, kei äng nanga i nühlü mäi saw äm? Hnadaga ming äng nang känäng uhlu kini hawuvei. Kei a khrawng kuluh naw ai ti.” Yĕsu la khrawse a ni khrawng duk känäng thokale ting täkchah tak däk koong khrawse la ni kheu hawu saw. Yĕsu la ani a hi, “Nang ming i äm?” Ani la tak, “Kei ming Lizian (awsawng), iyaäm keinih ni khrawng dukäng awbawng kini mäi khäh.” Äi pänäng äi la känäng tämalah hmawna khrawse khälla Ani khäka äkräng kräng ini hnih ei. Äi khaw a äi la kena käh khuyung äng wok sawngak chonei ula chawk ei ula ini mäi hüt. Khrawse khälla khawh ei ula Yĕsu a ini takei, “Äi wok sawng pawta keinih a khrawng teh ale, anih dukäng keinih a khrawng vawngal sawk.” Yĕsu la äi khrawng känäng khrawse khäla ätämal ni, thokal ula wok sawng äng ana vawngal chak. Äiche wok sawng khuyung känäng chon ula ini komal. Äidä mretäng käh tui äng chu ula ini dü chak. Äi sawng äng wok thong hnih bawng mäi hüt. Äi khaw a wok kiyongtih khäl chenal ula anih kena käh nam kheni a, äi thänei saw khäl ana hawu pekal. Khrawng khäl ha ithänei saw äm ting sotai äng ini lo. Khrawng khälla Yĕsu khäka lo ula ana sot, awbawng khrawse la mawn hüttih khrawng la awat watal bala lung pawi äng omal saw hmu ula khrawng kheni ini maw. Äi thänei saw khäl u aw la ini hmuh hütäm, anih la äi khrawse la mawn tih khrawng kheu awlaw äi wok sawng kheu khäl kheni khrawng a ini hawu pekal chak. Äi khaw a khrawng khälla anih la hlät bala chetalaih saw koong Yĕsu a ana hnih ei. Yĕsu long äng awkawiyal tuna khrawse la mawntih khrawng la ani kän chetaih koong ihnih ei. Äini Yĕsu la ni kheu ta bala äi khrawnga teh al, “Nang nupum ima chetal awlaw Boi la nang koong ihuih bi len bisaw äm, nang lukhrunga ihuih ekhet ini dawnei saw äm, äi kheu khäl nupum ima käh khrawng khäla a hawu pekal.” Äi khrawng chetal bala Yĕsu la ani koong i aw poh äm, äi kheu kheni ani la Dikapoli laa ahawuval. Äi äng khrawng khäl thasa ini maw. Yĕsu long äng kawt bala awlaw awhngaw kawm pawta echet ni, ani kenäng awbawng khrawng ini chuh ei. Äi khaw a ha Ani mret kawma mäi hüt. Äi khaw a Yudi ini lumeidün ima käh elenchaw Jairas ting mingei nawtih khrawng hngat lo bala Yĕsu a hmuh ni okho chowa bok. Ani la khawh ei bala Yĕsu a tak, “Kei chuhnu üdü aih wawaih thänei däk, nang lo tila ani lukhrunga nukut atawei. Äi äng khat ani pawiyalai awlaw ehengalai.” Äidä Yĕsu ani ängtu chet. Awbawng khrawng nenetei ula Yĕsu ängtu ini chetei. Äi chuh dukäng kumlei hnih thi bo saw lawga kopeitih hmutaw hngat mäi hüt. Awbawng tosotih khäl khäka chechet bala tosotei saw koong ani la awbawng dukhah bün hüt. Awlaw ani a ämäi saw sini tosotei saw äng usum chak hüt. Äini awpawyalaih saw chaw a hnüpak thawka hnüpak dä ese pawh äng chet hüt. Yĕsu kheu yaw bala khrawng chuh dukäng Yĕsu hnung kawchawng chawnga lo bala ani käh awat sin. Iyaäm Yĕsu käh wat phai chaw khat sin hnäng hi, kawpawyalaih saw ting ani la tawk saw. Yĕsu käh ilh chaw isin saw äng tutu ani thi bo saw üdümal awlaw ani kantha la ha awpawyal saw piyei. Yĕsu la Ani känäng tha chet saw awhmawtei, äi koong ini chuh ei saw pawt äng soei bala ihi, “Ula Kei käh awat sin saw äm?” Ani tebeih tih la ini tak, “Nang nuhmuh khäh neken äng khrawng ini neteisaw, awlaw nang naw hawu ula nanga anang sin saw äm?” Äi bi ula bisaw äm, äi sotaih koong Yĕsu la awlaw krawnak eken setsei soteiyal. Chün chüna ke bala äi hmutaw Yĕsu khochouwa bok bala ani äthänei saw kheni awhawu pekal. Yĕsu la takal, “Su o, nang nuyumei koong nawpawiyal, awpiyaw äng chetal. Ni huih dukhah nanga mäitiyah seh.” Yĕsu kräu tuna Yudi ini lumeidün ima käh elenchaw Jairas im kän khrawng pochongak hnih lo ula Jairas a ana tak, “Nang chuhnu dü däk, choktih a älä lächaw dukhah pektiyei ti.” Khrawng khäl kheu yaw bala Yĕsu la Jairas a tak, “Ke ei ti, yum dä yumei.” Yĕsu la äi khrawng chuh khäla loaih u saw ta bala ani äng tu Pitol, Yakub awlaw Yakub nawu Yohan a chih pui nawk. Yĕsu Yudi ini lumeidün ima käh elenchaw Jairas ima lo khaw a, khrawng khäl ini pusa saw la hehek ula ini kap saw khäl uhmuh. Yĕsu im duka vawng bala khrawng khäla tak, “Nangnih heuheuwa iya nini poh ei saw äm awlaw iya nini kap saw äm? Ni hmutaw chaw dü ah, i ip saw dä.” Äi kheu yaw ula khrawng khäl ini nui. Äidä khrawng kheni a Yĕsu la apranga ini thokaih saw tak. Äi pänäng Ani la hmutaw chaw nupaw la ani tebeih tih beyei bala hmutaw chaw ini tawk dün täka aw vawng. Yĕsu la äi hmutaw chaw kut sin bala tak, “Talitha kum.” Ni kheu naw krawnal hi nihuih thänei, “Su o, nanga kini tak thouwal.” Äi äng tutu äi hmutaw chaw hlok ting thouwal bala ochoneyal. Äi hmutaw chaw kumlei hni dä mäi hawm saw. Äi hmu ula awbawng khrawng thasa ini maw. Ni äthänei saw kheu khäl hngata ha hawu pekaih u saw koong Yĕsu la anga awlaw hmutaw chaw a ei saw ini pekalaih saw tak. Äi pänäng Yĕsu la äi ala hlät bala upum nam Nazarata awkrawnal. Awlaw etebeih tih ha Ani ängtu ini krawnal. Düm khomhnüp äng Yĕsu Yudi ini lumeidün ima chet bala ochokaih saw chah. Awbawng khrawng la Ani kheu yaw ula ini maw chak. Anih ini kräuvei, “Mawng känäng Ani la ni ngen khäl awlaw nawmaw nawkaih saw bi biyeih saw thayung khäl bünei saw äm? Ani thing äng käh vawn bitih hiye ei? Meri chaw awlaw Yakub, Yose, Yuda la Simon tih tanawu hiye ei? Ebetih nangkei ängtu niya ini mäi khäh hiye ei?” Äi huih khrawng khälla ini tawk koong khrawng khäl Ani pawta mäi u. Äi khaw a Yĕsu la anih a tak, “Hnadaga sidawng hiyawktih la upum nam, upum käisang awlaw upum im hiyah pak üküt laa hmawi ini bünei.” Äi pänäng Ani la hngat pai hnih khrawng khäla bin bala che awpawi poh al. Äini Nazareta käh khrawng khälla ani a Mesaya ting yumei u koong äiya awbawng nawmaw nawkaih saw bi biti ah. Khrawng khälla Ani a yumei u saw hmu bala ani mawmawt awmaw. Äi pänäng Yĕsu nam täng nam täng chet bala che khrawng khäla ochok. Ani la tebeih pochong lei hnih a utu panei bala che pochong hnih chi nam täng nam täng chokaih koong eteh aih saw chah. Awlaw khrawse khäl khrung äng pängaih saw thayung anih a pek. Ani la anih a tak, “Choneya nini chet khaw a kompum chaw nini chih ei hnäng. Äini khoila, ei saw awlaw awmawn chieiyei chu. Awlaw thanap chaw nini chum hnäng, äini awat nini sakeyalaih koong awhngaw chaw saklai chieiyei chu.” Ani la awlaw tak, “Mräh a nini vawng pänäng, khrawng khälla ima nini mäiyeih koong anang panei khaw, äi mräh hlät chula lo al chu saw sawgraw äi ima mäi bäichu. Awlaw khrawng khälla nangnih a anang lawei u khaw awlaw nangnih kheu khin do u khaw, äi la hlät chula nini lo al khaw a nini kho phaw äng käh de hnui phawpeyal chula che Hnadaga la dam äng krawkaih saw ting anih a sidih pek bäichu.” Äidä khrawng khälla ngulai känäng ini lung hleyeyal se u ting tebeih tih chet ula sidawng ini hiyawkaih saw ini chah. Anih la awbawng khrawse ini thoh al awlaw lawgase khäl luki äng olip si hmak ula che awbawng lawgase a pawi ini poh al. Yĕsu che ming tawng äthänei koong Ani la ibih saw sidawng khäl Herawt Antipas mawng la awyawk. Hngat pai hnih khrawng khälla ini hawu, “Yĕsu che tuilüh pektih Yohan ting. Yohan düsaw känäng othouwal saw. Iyaäm Hnadaga la Ani käh thayung pek koong Yĕsu la nawmaw nawkaih saw bi bi hnäng saw.” Awhngaw khrawng khälla ini hawu, “Ani che Hnadaga sidawng hiyawktih Elija, u a Hnadaga la luhdül äng awlaw eteh a lai ting awkhawmei hütäm.” Awlaw awhngaw khrawng khälla ini tawk, “Ani che ayang khaw a käh Hnadaga sidawng hiyawktih huih.” Äini Herawt la awyawk ni awhawu, “U käh hngäl kei käbät sawk äm, äi Yohan dä hipai düsaw känäng othouwal saw.” Herawt mawng la Herawdia a awphiyawaih koong Yohan a mawn sawk bala che thong ima eheng nawk hüt. Iyaäm Herawdiya che ani nawu Philip käh phiya mäi hüt. Äini Herawt mawng la ‍ani nawu phiya Herawdia a awnawkal. Äi koong Yohan la Herawt mawnga äkräng kräng tak, “Nang nawu heng bala mäi saw kra, nawnawu phiya a naw nawkalaih saw Mosi käh thung äng mäyah.” Äi koong Herawdia la Yohana hmu khih ah awlaw utukaih koong achah sui bala ämäi hüt. Äini Herawt käh kheu kaw ani la iha po hnängah. Iyaäm Herawt mawng la Yohan che konghmuh sang awlaw asanh chang khrawng dä ting awhmawt khäh. Äi koong ani la Yohana hmawi epekchi awlaw ka bala awtawkchi. Yohan käh kheu äng ulungchi puthän ha, Herawt mawng la ani kheu khinaih saw pawi ipichi. Äini krängak Herawdia la Yohana utukaih koong ikhin pawi chaw hngat übünei. Äi khaw a Herawt mawng la ani luhdül äng losaw khomhnüp päi opoh eyeih koong päi len hngat opoh. Äi päi äng ei okaih koong ani ängtu bitih elenchaw khäl, soloi khäl käh elenchaw khäl awlaw Galila käh khrawng khäl käh elenchaw khäla a panei. Päi ini ei tun khaw a Herawdia chuhnu lo bala che Herawt mawng la gawlba khäl hmawi mawh lawm bala anih a awphiyaw. Äi khaw a mawng la äi hmutaw chaw a atak, “Nang ibang nühlü ei äm kei känäng awhawuvei, kei nanga kini pekai.” Awlaw kei kejeng, “Pre phawlak ini hawuvei thän kei nanga kini pekai.” Äi hmutaw chaw äi känäng thokal bala che unu a ihi al, “Nu o, kei i kawhawuveiyeih saw äm?” Unu la tak, “Tuilüh pektih Yohan käh uluki hawuvei.” Uchu hnu la Herawt mawng khäka alanda lo al bala che atak, “Kei tu ni tua pawngkawn hngat äng tuilüh pektih Yohan käh uluki kühlü ei!” Äi yaw bala mawng la ulung äng thasa dukhah übünei. Äini päi a lotih gawlba khäl hmawi mawh a ejeng koong äi hmutaw chaw käh kheu hiyän hnängah. Äi koong ani la soloi hngata alanda teh bala Yohan a bät bala uluki a lawk sawk. Äi soloi chet bala che thong im dukäng Yohan a bät pänäng pawngkawn hngat äng uluki law bala che awkrawnal awlaw Herawdiya chuhnu a awawpal. Äi hmutaw chaw la ha unu a awawpal. Yohan üdü däk ting etebeih tih la ini yawk ni, lo ula Yohan käh upum law ula che khuyung äng okho mäi saw cho a ini phulal. Äi pänäng teh hmueitih khälla ibang ini bi äm awlaw ini chok äm ükütni Yĕsu khäka loal ula che ini hawu pekal chak. Äini awbawng khrawng ini ling longei saw koong Yĕsu awlaw teh hmueitih khäla ini ei okaih saw ikhin bang bünei u. Äi koong Yĕsu la tak, “Che khäl khrawng mäi u saw laa chet pula che bitchaw adüm äng khäh.” Anih long äng kawi ula che khrawng mäi u saw laa ini chet. Äini khrawng khälla anih ini chet saw ini hmuh. Awlaw mawng laa anih ini chet tun saw äm, äi ha khrawng khälla ini hmawt. Äi koong khrawng kheni ini kho äng chetei ula anih yang äi laa ini phaw. Yĕsu long känäng kom ni awbawng khrawng uhmuh. Äi khrawng khäl che samphomah kiyongtih kaw samphomah huih dä Yĕsu la hmuh. Yĕsu la anih a hmuh bala ejenei awlaw ochokaih saw achah. Äi mülawma etebeih tih Yĕsu khäka lo ula ini tak, “Niche khrawng mäi u saw la dä awlaw khoni ha kraw ai däk. Anih kena käh nama chet ula ini ei okaih saw hleyei hnäng mawna ni khrawng khäla te a le.” Yĕsu la krawn bala takal, “Nangnih dä anih a ei saw pek khäl.” Äini anih la ini tak, “Keinih iba kawla kini pekaih saw äm? Äi hiyawh khrawnga ei saw kini pekaih khaw, kumak bi ungala kini büneyeih saw mawn äng kini hleih pek thän ha lok thaw hnawh?” Yĕsu la ihi, “Pai hiyawh ha nangnih khäka mäiyäm? Chet chula sui khäl.” Anih la sui ula ini bün pänäng ini takal, “Keinih khäka pai ngaw ha la thek hnih ngaw mäi.” Khrawng khäla bel khrung äng echen chaw ini omaih koong Yĕsu la etebeih tih a tak. Äiche khrawng khäl khra ak khra ak awlaw ngaw gip ngaw gip chi echen chaw ini om. Yĕsu la ha pai ngaw awlaw ngaw thek hnih awlawk. Ani la hawn pawta so bala che ei saw a pisih epek. Äi pänäng ha pil bala khrawng khäla pekaih koong Ani la etebeih tih a epek. Äi huih ngaw ha bäng hnih a poh bala pheyeih saw koong etebeih tih a epek. Khrawng khälla ni hän luihyak ini ei. Äi pänäng ha la ngaw amratal saw tong len pailei hnih äng tebeih tih la ini lumal. Äiya hmutaw la sämäi chaw hiya pak ei tih pawtaw jiji khrawng thong ngaw ini mäi hüt. Ni khäl pänäng etebeih tih long äng kawyal ula che alanda Ani yang Betsida mräh a ini krawnalaih koong Yĕsu la tak. Äini Ani che khrawng khäla ima eteh alaih koong äi laa ämäiyal. Khrawng khäla eteh al pänäng suh tongeya Ani khuyunga awkawi. Awyawna Yĕsu lungkhiyang khuyunga ämäi hüt. Äi khaw a etebeih tih käh long che guda laiya ämäi hüt. Khri hmawi mawh khiyang lo koong etebeih tih la thasa dukhah poh ula che long ini hawih saw Yĕsu la hmuh. Akhon äng Yĕsu tui äng chetei bala che anih pawta echet. Yĕsu la anih a taw bala che hmawi maw a chet. Äini Yĕsu a tui äng chetei saw ini hmuh ni, nat ting khin ula ini hek chak. Iyaäm hang hang la Ani a hmu ula che ini ke chak. Äini Yĕsu la tak, “Ke ei chu! Sengkhri tawei khäl! Kei Yĕsu dä.” Äiche Ani long äng awkawiyal ni khri üdümal. Anih thasa ini maw chak, awlaw etebeih tih käh lung chang bala mäi koong Yĕsu la khrawng khäla iya ha phei pek bala epek saw äm, etebeih tih la äi thuk kheu yawchu u. Äi pänäng Yĕsu awlaw etebeih tih long äng guda kawt ula che Ginisaret mräh kena ana phaw pänäng guda kawma long ini khon. Long känäng ini kom saw äng tutu khrawng khälla Yĕsu a ini hmawt. Yĕsu khäka lawgase khäla ini lo aih koong khrawng khäl chon ula che äi mräh kena käh ala khäla ini chetal. Ani mäidün la khrawng khälla ini hmawt ni, lawgase khäla phawk äng kün ula Ani khäka ini lo. Awlaw nama, louwa, jia mawnga bang Yĕsu echetäm khrawng khälla lawgase khäla Ani khäka ini lo chi. Khrawng khälla Ani wat chän äng ini khomeyeih koong Ani a ekhet äng ini takchi awlaw Ani wat chän äng ubang khomei äm, äi lawgase khäl ini pawiyal. Hnüpak khaw a Yĕlusalema pochongak hnih Pherasai khäl awlaw pochongak hnih Mosi käh thung choktih khäl Yĕsu khäka ana chumei. Anih la ini hmuh, Yĕsu käh tebeih tih khäl äng käh üküt che ini kut boteya pak sahnah pe ini eyeih koong ini om saw. Yudi khäl awlaw pherasai khälla ayang khaw a käh thung täng anih la ini kut boteyah pak ei okaih koong om u. Ji känäng loal ula ha ini kut kho boteya lah pak iha ei o al u. Äi hawuvah ha anih la awlaw awbawng thung khäl ini täm. Khawp, pawngkawn, khok khäl ha ini boh ei lah. Äi koong pherasai awlaw Mosi käh thung choktih khälla Yĕsu a ini hi, “Ayang khaw känäng yumtih gongsong khälla ini thoh hüt saw thung khäl nang tebeih tih khälla iya täm u saw äm? Anih la che ini kut boteya pak dä ini ei.” Yĕsu la krawn bala takal, “Nangnih che lupsongeitih khäl, Hnadaga sidawng hiyawktih Aijaya la nangnih kheu ihisaw hawu hüt saw dä. Ani käh boih hiyol äng yoei bala mäi khäh, ‘Ni khrawng khälla ini mongkhok äng dä, Kei a kenkeh khrawng poh saw.’ ‘Äini anih lung che kei känäng awhlawm hlaw a dä. Anih la Kei a äiba dä khrawng rosi saw, anih la khrawng käh chok hawu ni Hnadaga käh chok hawu ting ini khin.’” Nangnih Hnadaga la pek saw kheu khäl hiyänal chula khrawng la chok saw khäl dä nini sumei. Yĕsu la awlaw tak, “Hnadaga käh chok hawu hiyän chula nini sumei ngap saw thung nini tämaih hnäng saw lawm nangnih mawmawt nini hmawt khäh. Ni huih Mosi la hawu, ‘Nupaw a kenkeh po bäichu. Awlaw u kheu äng nupaw a kenkeh mäyah saw kheu huih mäi äm, ani a che lälä nutuk tawn khäh.’ Äini nangnih nini hawu chi, losulapei unu hiyah thän awpaw a tak hi, kei käh mawng vawn äng nang a uku thäneyeih hüt hnäng saw äm, äiche Hnadaga khäka hlu hmuei däk. Äini nupaw koong che iha po hlütiyah. Ni huih nangnih nini poh saw thung khrawng khäla chok chula Hnadaga kheu nini hiyänal sawk. Awlaw ni hawuvah ha nangnih ni huih bi awbawng nini bi.” Äi pänäng Yĕsu la awlaw khrawng khäla ekena be ei bala tak, “Nangnih kei kheu khin khäl awlaw yawchu khäl. Aprang känäng ibang khrawng dukäng vawng äm äi la khrawng a sanh nah hmawna po hnängah, äini khrawng duk känäng ibang thokäm äila dä khrawng a sanh nah hmawna poh saw.” Äi pänäng Yĕsu la khrawng khäl taw hüt bala im duka vawng. Äi khaw a etebeih tih la äi hawu saw kheu äng i hawuvaih khiyang saw äm ini hiyal. Yĕsu la anih a takal, “Nangnih ni äi hiyawh yawchu ah tih ei? Nangnih ni kheu ni yawchu chuei? Aprang kän khrawng duka vawng saw eisaw vawn la khrawnga sanh nah hmawna po hnängah. Iyaäm äi eisaw vawn che nulung dukäng vawng hnängah, äini nähän äng che vawng. Äi pänäng nakantha känäng awlaw apranga thokal.” Ni kheu äng Yĕsu la lala eisawpei asanh khäh ting awyawk chual sawk. Yĕsu la awlaw tak, “Khrawng duk känäng ibang thokäm äila dä khrawng a sanh nah hmawna po saw. Iyaäm khrawng lung duk känäng dä awtawk se, khrawnga ese poaih saw, mukaih saw, tukaih saw, awlawpha, imik sawuvei saw, krameyeih saw, osowaih khiyang saw, keleih saw, umum saw, awbawriei saw, awlaw ämäk saw thok. Ni setih vawn kheni khrawng duk känäng dä thok saw awlaw khrawng a sanh nah hmawna poh saw.” Äi pänäng Yĕsu Galil hlät bala Tayal awlaw Sidon pawh a chet. Ani mawng ima mäi saw äm hngata ha hmawtei sawk do ah, äini Ani la thuh ei hnängah. Äiya hmutaw hngat mäi. Ani chuhnu a khrawse la mawn saw. Äi hmutaw la Yĕsu kheu yawksaw äng tutu Yĕsu kho chouwa bok. Ni hmutaw Grik mäihüt awlaw Siriya pre äng käh Phonisi laa käh mäi hüt. Ani la Yĕsu khäka khawh ei bala uchuhnu kän khrawse thoh alaih koong atakei. Yĕsu la äi hmutaw a tak, “Täkchah sämäichaw khälla ini hän luihyak ei maw seh u. Iyaäm sämäichaw khäl käh eiok ui khäl hmawi mawh a nehen saw pawyah.” Äini hmutaw la takal, “Boi o, nang ihisaw nawhawu saw dä. Äini sämäichaw khäl käh pawngkawn kän eisaw pil khung kawla kraw saw khäl dä ui khälla ini eisaw.” Yĕsu la ani a takal, “Nang tua ima chetal hnäh, khrawse la nuchuhnu a hlät bala chetal däk.” Äi hmutaw ima aphaw al khaw a, ani la uchuhnu khrawse la hlätal bala mawmawt chaw ip dün äng hiyawl naw al saw hmuh eiyal. Yĕsu la Tayal ala hlät bala Sidon mräh ken kän Galil guda pawh a echet. Äi pänäng Dikapoli kena käh nam khäla echet. Äiya pochongak hnih khrawng khälla awhnaw pawng tih awlaw kräu kemtih khrawng hngata Yĕsu khäka ini chih. Anih la thasa khawh ei ula ani lukhrunga ukut tawei bala awpawi poh alaih koong Yĕsu a ini tak. Yĕsu la khrawng chuh duk känäng äi khrawnga awhngaw pawta chipui naw bala hnaw vawng hnih äng ni ani kutpem thawnei. Äi pänäng chilh tui soh bala äi khrawng käh lei sin. Äi pänäng Ani la hawn pawh so bala ihil se khrawei bala äi hnaw pawngtih a tak, “Ephatha.” Äi nawkrawnal hi “hongeyal hnäh.” Äiche äi khrawng hnaw hongeyal, elei ha näuwal awlaw mawmawt chaw kräu ha kräuwal. Yĕsu la äi hnaw pawnga awpawi poh al saw kheu hngata ha hawuvaih u saw koong tak. Äini ani la i hiyawh nga äm, äi hiyawh dä äi kheu ini kräuwei. Ni huih khrang thänei saw äng khrawng khäl mawmawt maw ula ini hawu, “Ni khrawng la ibisaw khäl kheni chim jim bi. Ni khrawng la hnaw pawnga yaw kalaih saw tha pek, awlaw kräu hnängah tih a äkräuwalaih saw tha pek.” Awlaw hnüpak khaw a awbawng khrawng ini lumei tü. Äi khrawng khäl khäka eisaw mäyah koong Yĕsu la etebeih tih a beyei bala tak, “Ni khrawng khäl jenei se däk. Iyaäm anih kei äng tutu ini mäi saw tühnüp äng hnüp thum thänei däk. Anih khäka eisaw ha mäyah. Anih a dä kei buh ni düei saw läk täng ima keteh al khaw, lawma ini hiyamaih saw dä. Iyaäm üküt che awbawng hlawm hlaw känäng ini lo saw.” Etebeih tih la ini takal, “Äini ni huih khrawng mäi u dün laa ula mawng känäng ni hiyawh khrawng koong eisaw alawkaih saw äm?” Yĕsu la anih a ihi, “Nangnih khäka pai hiyawh ha mäi saw äm?” Anih la ini takal, “Paiseh mäi.” Äidä Yĕsu la khrawng khäla dekäng ini omaih chak saw koong tak. Äi pänäng äi ha paiseh law bala Hnadaga a äkiyä tawngei bala ipilchaw ipilchaw poh. Khrawng khäla pheih pekaih saw koong etebeih tih kutäng pek. Äidä etebeih tih la khrawng khäla ini pheih pek. Awlaw ngaw lekchaw ha bitchaw mäi, äi ha law bala Yĕsu la äkiyä tawngei. Äiche etebeih tih a pheih pekaih saw tak. Khrawng khälla ini hlüei saw hiyawh ei ula etebeih tih la ini lumal ni tongseh mratal. Eleusum äng äiya pawtaw jiji khrawng thong hli ini mäi hüt. Ini ei ok pän ni, Yĕsu la khrawng khäla nanga nang ima teh al. Äi pänäng Ani tebeih tih ängtu long äng kawi ula Dawlmonutha laa ini chet. Yĕsu aphaw saw ini yawk ni pherasai khäl chet ula Ani äng kheu ana toksakei. Anih la ini chawmaih koong Ani kän nawmaw nawkaih saw hawn känäng käh hmat la dawneyeih saw ini tak. Äi koong Yĕsu la dukhah piei bala ihil se khrawei äidä Ani la tak, “Ni katäng käh khrawng khälla iya ahmat la ini hlüei saw äm? Kei nangnih a ihisaw kanang tak, ahmat la iha ni khäla dawn hmuei hnawh.” Äi pänäng ani long äng kawiyal bala anih a hlät bala mret äng käh awhngaw kawm pawta chetal. Etebeih tih la ei saw chih eyeih saw ini hngilh hüt. Long äng anih khäka ha hngat dä mäi hüt saw. Long äng ini kawt tuna Yĕsu la anih a tak, “Nangnih pherasai khälla Herawt khäl käh is känäng sidih äng dä mäi bäichu.” Äi koong etebeih tih anih dukäng ini kräuvei, “Nangkei khäka eisaw mäyah koong Ani ni kheu kräu saw dä hipai.” Etebeih tih la i kheu hawu ula ini kräuvei saw äm äi yawchu bala Yĕsu la anih a tak, “Nangnih ha mäyah ting iya nini hawu saw äm? Nangnih tua bang hmawtchu saw ei ‘hiyah khaw’ yawchu chu saw ei? Nangnih lung disa chang däk saw ei? Nangnih a nini mik mäipe hmuchu ei? Nini hnaw mäipe yawchu ei? Iha nini lung äng mäitiyah ei? Khrawng thong hngaw a ha pai hngaw äng eisaw kepek hüt khaw a tong hiyawh mratal saw nini bünal hütäm?” Etebeih tih la ini tak, “Tong lei hnih.” Yĕsu la hi, “Awlaw khrawng thong hli a ha paiseh äng eisaw kepek khaw a tong hiyawh mratal saw nini bünal hütäm?” Etebeih tih la ini tak, “Tong sĕh.” Äi khaw a Ani la anih a takal, “Bahi nangnih tua ha yawchu hawm chu ei?” Yĕsu ani tebeih tih äng Betsida nama chet. Äiya käh khrawng pochongak hnih la mik mü hngata Yĕsu khäka lo ula khawh ei ula, äi mik mütih a ekhet äng sin bala awpawi poh alaih koong ini hawu pek. Yĕsu la äi mik mütih khrawnga ukut äng bin bala nam pranga chih pui nawk. Äidä imik mütih mik äng chilh tui hmak bala upum äng ukut tawei bala ihi, “Nang iha nuhmuh alei?” Mik mütih la soal bala tak, “Ä” “Kei khrawng kuhmuh. Anih thing huih dä, awlaw chet ha ini chetei khäh.” Yĕsu la awlaw krawnak mik mütih mik äng ukut tawkei. Äi khaw a äi khrawng käh imik hongeyal, awlaw hmuh alaih saw tha büneyal. Hang hang ni sanh sanh uhmuh al. Yĕsu la ani a upum ima chetalaih saw ta bala tak, “Ni nam pawta krawnal tiei ti.” Äi pänäng Yĕsu etebeih tih ängtu Koisoria Philipi mräh khäl ken äng käh nama ini chet. Ini chetei tuna Ani la etebeih tih a ihi, “Kei u äm, khrawng khälla Kei be i ini hawu äm?” Etebeih tih la ini takal, “Awvawng la ini hawu tuilüh pektih Yohan, awvawng la Elija ting ini hawu, awlaw awvawng la che awhngaw huih ani ha Hnadaga sidawng hiyawktih hngat ting.” Äidä Ani la anih a ihial, “Äi che nangnih i nini hawu äm, Kei u äm?” Pitol la takal, “Nang äi Mesaya.” Äini Yĕsu la sidih pek bala äi kheu hawuvaih u saw koong tak. Äi pänäng Yĕsu la etebeih tih a ni huih chokaih saw chah, “Luhchaw Chaw la thasa dukhah khawmaih lah saw dä. Chang gongsong khälla, pujawtih elenchaw khälla awlaw Mosi käh thung choktih khälla Ani a lawei hnawh u. Ani tuk hmueyei awlaw hnüp thum düna düsaw känäng thouwalai.” Ni kheu khäl Ani la mawmawt chaw anih a hawu pek. Äidä Pitol la Yĕsu a chah ak pawh a chi bala äi kheu hawu saw khäl nga hnäh. Yĕsu la awhmawi häyeiyal bala etebeih tih pawtäng so al bala Pitol a hekei bala tak, “Mannat o. Kei känäng awhlawm hlaw a chetal. Nang tawk che Hnadaga känäng lo ah, luhchaw kiyangh känäng dä lo saw.” Äi pänäng Ani la etebeih tih awlaw khrawng khäla ekena beyei bala tak, “Kei lawm äng loaih khiyangtih la che upuma hngilei heh awlaw upum käh krut upum la kätei seh. Upum koong hengaih khiyang tih la che ihisaw sawk hiyumeyei. Äini Kei koong awlaw Hnadaga käh sidawng pawi koong ani la awsawk hiyumei hi che awsawk hĕnei hnängai. Luhdül khe bünei chak bala ihisaw sawk dä hiyumei hi, ani koong i ha äkiyä mäiyei? Iyaäm ihisaw sawk büneyalaih koong ani a epekaih phüh i ha mäyah. Ni katäng käh imik sawuvei tih la ngulaisu khrawng khälla dä Kei la Kei kheu a khrawng hiyawh ei nawk hi, asanh chang hawn natchaw khäl äng Luhchaw Chaw Awpaw käh wachang äng loal khaw a, Ani la ha äi khrawng khäla hiyawh ei nawkalai.” Äi pänäng Yĕsu la anih a tak, “Kei nangnih a lälä kanang tak, niya mäitih khäl äng käh üküt che Hnadaga lo bala Ani tha äng mawngeyal saw hmu ah pak dü hnawh u.” Hnüp sok pänäng Yĕsu la Pitol, Yakub awlaw Yohan a hlüng tih khuyung hngata chihpui nawk. Äi tebeih khäl hmawi mawh a Ani ulup hleyal. Ani käh wat äi hiyawh bokphong saw luhdül äng käh hngat la ha i äng ha äi lup bokphong sawk hnäng hnawh u. Äiya Elija la Mosi, Yĕsu äng ihni kräu saw etebeih tih la ini hmuh. Äi khaw a Pitol la Yĕsu a tak, “Choktih o, nangkei niya ini mäiyeih saw pawi khäh. Nangkei niya imchaw songthum saw äng khä. Songak che nang käh, awlaw songak che Mosi käh awlaw songak che Elija käh.” Mawmawt ini ke saw äng Pitol la i hawuvaih saw äm hmawteyah. Äi khaw a khohyung lo bala anih a ükün chak, äidä khohyung duk känäng ni kheu thok sam ini yawk, “Nidä Kei kekhet saw chaw, nangnih Ani käh kheu khin bäichu.” Äi äng tutu etebeih tih la ini ken setsei ini sotei, äini Yĕsu hawuvah u ha hmu u. Äi pänäng khuyung känäng ini komal tuna Yĕsu la tha äng ni kheu tak, “Luhchaw Chaw üdüsaw känäng heng bala thouwal hawmah saw sawgraw, nangnih i aw nini hmuh hütäm hngata ha iha hawu pekai chu.” Etebeih khäla Yĕsu la ana pek bala taksaw kheu ini khin. Äini üdüsaw känäng hengal bala thouwalaih saw che i äm, äi anih ini dukäng kräuvei ula ini tawkal. Äi pänäng anih la Yĕsu a ini hi, “Mosi käh thung choktih khälla iya täkchah Mesaya khawngah Elija loaih saw hlü ting ini hawu saw äm?” Yĕsu la anih a takal, “Ni kheu che ihi khäh, täkchah Elija lo bala ükütni ächän poh aih saw. Äini iya kiyam la Luhchaw Chaw la mawt dukhah khawmaih lah saw awlaw khrawng khälla lawei hnawh u ting hawu saw äm? Äini Kei nangnih a kanang tak, Elija kheu kiyam äng ihuih yoei äm, äi huih kawchawng chawng ani lo hüt khäh, awlaw khrawng khälla ani khrung äng ini sitha huih ini poh hüt.” Yĕsu etebeih pochong thum äng krawnal bala awhngaw tebeih tih khäka loal. Awhngaw tebeih tih khäla awbawng khrawng la wanei naw ula ini mäi saw awlaw Mosi käh thung choktih khäl äng käh pochongak hnih äi tebeih tih khäl äng kheu ini toksakei saw anih la ini hmuh. Khrawng khälla Yĕsu a hmu ula mawmawt ini maw hnäh, äidä Ani äng ini khomeiyeih koong ini chon. Yĕsu la anih a hi, “Nangnih äi khäl äng ikheu lawchu la nini toksakei saw äm?” Khrawng chu duk känäng khrawng hngat la tak, “Choktih o, kawchaw a nang khäka kolo saw. Ani a kräu hnäng ah tih khrawse la mawn saw. Äi khrawse la ani a mawn chi khaw säk bala dekäng pon. Ani kaw känäng ovon thok. Awhaw eei chi awlaw uchung chak chi. Kei nang tebeih khäla äi khraw a ini thoh alaih koong katakei saw, äini anih la hnäng u.” Yĕsu la äi khaw a tak, “Uyum mäyahtih khrawng khäl o! Awlaw hnüp hiyawh Kei nangnih äng kämäyeih saw äm? Awlaw hnüp hiyawh Kei nangnih a kanang chuneyeih saw äm? Äi sämäichaw a Kei khäka lo khäl.” Khrawng khälla äi khaw a Yĕsu khäka äi sämäichaw a ini lo. Yĕsu a hmu bala äi khrawse la äi sämäichaw a athak säsäk bala tawk. Sämäichaw kaw känäng ovon thok pe thokpe dekäng ulumläuwei. Yĕsu la pawtaw chaw paw a ihi, “Ni huih thänei saw hnüp hiyawh mäi däk äm?” Äi khrawng la takal, “Äsämäichaw saw täh kän. Ni khrawse la ani a tukaih koong mei la tui äng chi ähiyän ngap. Nang dä keinih a anang kuaih hnäng khaw, ekhet äng khrawng ku e.” Yĕsu la ani a takal, “‘Anang kuaih hnäng khaw.’ Niche i kheu äm? Ula yumei äm ani koong thäneiyeih hnängah saw iha mäyah.” Äi khaw äi pawtawchaw paw la kap bala hawu, “Kei kuyumei khäh. Äini kuyum awlaw nung hmawna kei a uku e.” Awbawng khrawng chon ula ini lo saw hmu bala Yĕsu la äi khrawse a hekei bala tak, “Hnawpawng la kräu hnäng ah tih khraw o, nanga Kei tha äng kini tak, ni khrawng duk känäng thokal, sätak ha ni khrawng dukäng naw vawngaih pe saw hiyah.” Äi khaw äi khrawse hek bala äi pawtaw chaw a athak säk bala che tawk, äidä ani duk kän thokal. Äi äng pawtaw chaw üdüsaw huih mäiyal. Äi hmu ula ükütla ini hawu, “Ani dü däk.” Äini Yĕsu la äi pawtaw chaw kut sin bala thouhwal ni aja al. Ai pänäng Yĕsu im duka vawngal. Yĕsu lung khiyang chaw mäiyal khaw a etebeih tih la ini hiyal, “Keinih äi pawtaw chaw kän khrawse a iya thoh al hnäng unga saw äm?” Yĕsu la takal, “Suh tong hiyah pak che nilup khrawse thoh al hnäng ti.” Äi pänäng Ani la etebeih tih äi la hlät ula Galil pre lekchaw dukäng ini chetal. Ani mawng laa chet saw äm hngata ha hmawtei sawk do hütah. Iyaäm äi khaw a Ani la etebeih tih a chok hüt, “Luhchaw Chaw a khrawng khäl kutäng ini mawn sawkai. Ani a ini tukai awlaw hnüp thum düna düsaw känäng heng bala thouwalai.” Äini etebeih tih la Yĕsu la hawu saw kheu yawchu u awlaw ini keh saw koong i kheu hawu saw äm iha hiyal vawp u. Äi pänäng Yĕsu la etebeih tih kawpalnahum a ini chet. Yĕsu im duka vawng bala etebeih tih a ihi, “Nangnih lawma i krong äng kheu nini toksakei hüt saw äm?” Etebeih tih ektiya pak ini mäi, iyaäm anih lawma üküt thawka u lenäm ting hawu ula ini thoksakei hüt saw. Yĕsu om bala etebeih tih a ekena be ei bala tak, “Losupei elensum thäneyeih khiyang hi, ani üküt thawka uhnung sum äng dä mäiyeih lah saw awlaw üküt khrawng käh hngasaw thäneyeih lah saw.” Äi pänäng Ani la sämäichaw hngata etebeih khäl hmawi hmawh a ahiya. Äi sämäichawa o oa lawei bala Ani la hawu, “Ula Kei koong ni huih sämäichaw hngata lawkei äm, ani la Kei a awlawkei. Awlaw ula Kei a awlaw kei äm ani la Kei jiji a awlawkei saw hiyah, äini Kei a etetih a ha awlawkei saw thän.” Yohan la Yĕsu a tak, “Choktih o, nang ming äng khrawng hngat la khrawse a thoh al saw hmu ungala kini nga hüt khäh. Iyaäm ani nangkei sawng äng käh hiyah.” Yĕsu la anih a takal, “Ani a nga ai chu. Iyaäm Kei ming äng nawmaw nawkaih saw bi bi pänäng hngat la ha krawn ula ekeleih yal hnäng u. Iyaäm u bang nangkei pawh äng mäi äm, ani che nangkei äng mäi khäh. Kei nangnih a lälä kanang tak, nangnih a ula bang Krito käh khrawng ting anang khin bala Kei ming äng tui khawpak anang pekäm, anih la sätak ha phiyaw phoih hiyumei hnawh u. “Ini yum chang hawmah tih khäl äng käh losua pei ngulai pawh a chipui nawtih a che ähngäl äng lungpel len bawt tila mretäng nähiyän saw bang pawi. Nukut vawngak la dä nanga ngulai pawh äng anang chih hi, äi kut awt tila hiyänal. Nukut vawng hnih äng ngulai vawm äng nechetaih saw thawka, nukut chek tila heng dün sawk pawta nawvawngal saw bang pawi. Äi ngulai vawm äng käh mei che krängak ha yupah. Nokho vawngak la dä nanga ngulai pawtäng anang chih khaw, äi kho bäng tila hiyänal. Nokho vawng hnih äng ngulai vawm äng nechetaih saw thawka, nokho chektila heng dün sawk pawta naw vawngal saw pawi. Nimik vawngak la dä ngulai pawtäng anang chih khaw, äi mik thawteyal. Nimik vawng hnih äng ngulai pawtäng nechetaih saw thawka, mik mütila Hnadaga käh hawn pre a nawvawngal saw bang pawi. Äi ngulai vawm äng käh pü khäl krängak ha dü u, awlaw äiya käh mei krängak ha yupah. “Mäksetdava bät ula chi äng asanh ini poh saw huih khrawng khäl ha mei äng asanh ini thänaih lah saw. “Chi vawn pawi dä, äini chi ngan saw dä krak chak hi, iba nanga nalaih sawk hnäng saw äm? Nini lung dukäng chi tawei khäl awlaw nangnih hngala hngat äng jelkhiyamsa tawei khäl.” Äi pänäng Yĕsu la Kawpalnahum ala hlät bala Yudia pre lekchaw a echet. Awlaw ani Yawldan hlong chupawt jal a echet. Awlaw awbawng khrawng Ani khäkä lo ula ini lumei. Äi khaw ayang äng chok saw huih anih a Ani la ochok. Äi khaw a hngat pai hnih pherasai khäl Yĕsu khäka ini lo. Yĕsu a ini chawmai koong anih la ini hi, “Khrawng hngat la phiya khaveyalaih saw Mosi käh thung la i hawu äm?” Yĕsu la krawn bala takal, “Mosi la nangnih a ayang äng i anang chok hütäm?” Anih la ini hawu, “Mosi käh thung äng phiya nakhaveyalaih koong chaw nopoh yei lah saw ting yoei bala mäi.” Yĕsu la tak, “Nangnih käh lung chang saw koong dä Mosi la ni thung yo bala tawk hüt saw. Äini Luhdül chah khaw thouh bang Hnadaga la anih a hmutaw hngat awlaw pawtaw hngat po bala che tawk. Äi koong Khrawng hngat la unu paw hlät bala phiya ängtu mäiyeih lah saw, awlaw ahnih kantha ak ihni thäneyeih saw. Äi koong ahnih kantha hnih hiti häih, äini ahnih kantha ak dä. Äi koong Hnadaga la ibang opong äm khrawng khälla äi khavah seh u.” Äi pänäng anih im duka ini wongal. Etebeih khälla Yĕsu a äi kheu awlaw ini hiyal. Äi khaw a Ani la anih a tak, “Ula bang ani phiya khaveyal bala awhngaw hmutaw awnawkal äm, ani la iphiya lukhrunga matara bi bi. Awlaw phiya la ha awpawtaw hlätal bala awhngaw a dä omeyal khaw, ani la ha akrak bih bi.” Hnüpak khaw a khrawng khälla sämaichaw lekchaw khäl Yĕsu khäka ini lo saw, Yĕsu la anih ludäma ukut tawei bala pisih pek hmawna. Äini tebeih khälla äi khrawng khäl ini bäunawk. Yĕsu la äi hmuh ni aman pok bala che tebeih khäla tak, “Sämaichaw khäl kei khäka lo sawk khäl, nga ai chu. Iyaäm Mawng Hnadaga pre che äi sämäichaw khäl huih khrawng koong dä. Kei lälä kanang tak, sämäichaw lekchaw khäl huih dä Mawng Hnadaga pre a lawei u khaw, hngat ha che Mawng Hnadaga pre a wongal hnäng hnawh u.” Äi pänäng Yĕsu la äi sämäichaw khäla hngat pänäng hngat lawei bala äi khäl ludäma ukut tawei bala pisih pek. Yĕsu lawm äng chetei khaw a khrawng hngat chon bala ani khäka olo awlaw ani hmawi mawh a khoklu dül äng om bala che Ani a ihi, “Choktih o, nang che khrawng pawi hngat dä. Kei a hawu pek, kei i kopoh hi päihyah saw sawk kübünei hnängaih saw äm?” Yĕsu la ani a tak, “Kei a nang khrawng pawi ting iya ini tak äm? Hnadaga hiyah pak che u ha pawi u. Nang che thung kheni naw hmawt khäh, tu ai ti, nimik sawuveyei ti, mu ai ti, eheng sawksi thokai ti, khrawng khäl krameyei ti, nunu paw kenkeh bäi.” Äi khrawng la Yĕsu a tak, “Choktih o, kei kelekchaw khaw thouh äi khäl kheni ngei ngala kolo khäh.” Äini Yĕsu la äi khrawng pawta sotei awlaw khetjen kawi bala ani a tak, “Tua nanga bi hngat kol pe khäh. Chetal tila che nanga mäi saw khäl jeal tila sanglaisu khäla hlu bäi. Äihi che nang koong hawn pre a kähkän chungei bala mäiyei. Äi pänäng lo al tila che kei käh tebeih thäneyal bäi.” Äi kheu khäl yaw bala che äi khrawng awhmawi nuk. Ani a kähkän awbawng mäi saw koong ani ulung dukhah bünei bala echetal. Äi khaw a Yĕsu la eken setsei kheni so ei bala Ani tebeih khäla tak, “Mawng Hnadaga pre a mäichawtih khäl ini vawgaih saw ihuih khawk kheiyei äm.” Tebeih khäl Yĕsu kheu yaw ula che ini maw chak. Yĕsu la awlaw tak, “Khetsu chaw nawu khäl o, Mawng Hnadaga pre a ini vawngaih saw ihuih khawk khei äm. Mawng Hnadaga pre a mäichawtih ini vawngaih saw thawka hi phem kho äng ut ting ini taksaw mäksetdava vawngaih saw bang loigra khäh.” Äi äng tebeih khäl mawchak ula che hngat la hngat ini hi ei awlaw anih khäl dukäng ini kräuvei, “Bakhaw che u khälla khiyawt bünei ula Mawng Hnadaga pre a ini vawngalaih hnäng saw äm?” Yĕsu la anih pawh äng so ei bala tak, “Khrawng khälla ibang po hnäng u äm, äi Hnadaga la opoh hnäng; Ani la ükütni poh hnäng.” Pitol la tak, “So, keinih che ükütni hiyän chak ungala che nang käh tebeih kini thänei.” Yĕsu la krawn bala takal, “Ä, Kei nangnih a sidih kanang pek, ula bang Kei koong awlaw sidawng pawi hiyawkaih koong i im lou, iphiya, nube tanawu, unu paw, chaw chuhnu awlaw ala long hiyän bala kei khäka lo äm, ani la ni katäng äkräng khra ak unung im lou, nube tanawu, unu paw, chaw chuhnu awlaw ala olong büneyalai. Awlaw ani la kuluh nawk ha hmueyei. Äidä awhmawi mawh äng ha che päihyah saw sawk büneyalai. Äini awhmawi maw äng maw tih khäl uhnung äng ini kraw a lai, awlaw uhnung äng mäitih khäl awmawh äng ini mäiyalai.” Äi pänäng Yĕsu etebeih khäl äng Yĕlusalem lawm äng echetei. Yĕsu che äi khäl khawngah awmaw äng echetei. Tebeih khälla äi hmu ula che ini maw chak awlaw Ani hnung äng lotih khäl che keke ula ini chetei. Äi pänäng awlaw Yĕsu la Ani käh pochong leihnih tebeih khäl chaak pawta panei bala che Ani äng i thäneyeih saw äm äi anih a awhawu pek. Ani la tak, “So khäl, nangkei Yĕlusalema ini chet tun saw. Äi düna pujawtih elenchaw khäl awlaw Mosi käh thung choktih khäl kutäng Luhchaw Chaw a ini mawnaih sawk saw. Äi khälla Ani a tuk hmuei tawn khäh ting tara ini khrawkai awlaw Ani a Yudi hiyahtih khäl kutäng ini awpai. Anih la Ani a ini kelehyei, ani pum äng chilh tui ini so hnawkai, Ani a bop dün jäi äng thasa ini bopai awlaw äi pänäng Ani a ini tukai. Äini hnüp thum düna ani heng bala thouwalai.” Äi pänäng Jebidi chaw Yakub la Yohan Yĕsu khäka lo häih la ihni tak, “Choktih o, Keinih käh hlü che ni, keinih ibang kanang hawu ei äm keinih koong nang äi nopoh aih saw.” Yĕsu la tak, “Nangnih koong i kopoh aih saw nini hlüei äm?” Ahnih la ihni tak, “Nang käh a wachang mawh mawng nawna noomal khaw a kei hnih äng käh hngata nang käh set pawta awlaw hngata setong pawta khrawng omal sawke.” Äini Yĕsu la a hnih a tak, “Nang hnih i anang hawuei saw äm hmawt hnih ti. Kei ko okaih saw sip mawh khawp äng nang hnih ni nini ok hnängayei? Hiyah thän, Kei tuilüh kawlawkei saw äng nang hnih nini lawkei hnängaiyei?” Ahnih la ihni tak, “Ä, kihnih kihni hnängaih saw dä.” Äi khaw a Yĕsu la a hnih a tak, “Kei ko ok dün sip mawh khawp äng nang hnih nini okai, awlaw Kei tuilüh kawlawkei saw äng nang hnih nini lawkeyei. Äini Kei käh setpawh la setong pawh äng hngata ha ko omaih saw tha tawei nga. Hnadaga la äi la u khäl koong hel bala awtawk äm, äi khäl dä äi la äng ini omaih saw.” Awlaw awhngaw tebeih pochong ha la äi kheu yaw ula che Yakub la Yohan khrung äng ini man pok. Äidä Yĕsu la tebeih khäla ekena panei bala tak, “Nangnih nini hmawt khäh, ni luhdül äng khiyuptih khälla ini tha äng khrawnga ini khiyup awlaw ini tha ini dawnei saw pawi ini pi. Äini nangnih dukäng äi huih thänei tawnah. Äichaw a nangnih dukäng ubang elenchaw thäneyeih khiyang äm, äi hngasaw thäneyeih lah saw. Awlaw ayang maiyeih khiyang tih la che hang hanga chetchaw aih lah saw. Nini lung äng tawei khäl, Luhchaw Chaw chetchaw bünei eih koong lo ah äini chetchaw aih koong dä lo saw awlaw nangkei a ngulai känäng khrawng khiyawtalaih koong Ani la awsawk pekei bala awkhawh pekal.” Äi pänäng Yĕsu ani käh tebeih khäl äng Jeliko mräh a echet. Yĕsu ani käh tebeih khäl awlaw awbawng khrawng khäl äng mräh känäng chet tun khaw a Timawi chaw Bawtimawi ting mingeih nawtih imikmü la lawm kena om bala che hlu khawmei hüt. Bawtimawi la Nazarina käh Yĕsu nam kena olo däk ting awyawk ni hek bala che awhawu, “Dawut chen äng käh Yĕsu o, kei a ejenei e.” Äini awbawng khrawng la ani a hekei ula ektiapak mäi ei saw ini tak, äini ani la awlaw hek bala awhawu, “Dawut chen äng käh chaw, nangkei a ejenei e.” Yĕsu la düm bala tak, “Ani a panei khäl.” Khrawng khälla äi mik mütih a panei ula che ini tak, “Kĕ ei tih, thou. Ani la nanga ini panei.” Äi khaw a ani la pumäng käh ilh chaw hiän bala epek awlaw Yĕsu khäka echet. Yĕsu la ani a ihi, “Nang koong i kopoh ai saw nühlüyei äm?” Mik mütih la tak, “Choktih o, kei kuhmuh eiyalaih khiyang.” Yĕsu la tak, “Chetal, nang kei a ini yumei koong awpawi näthäneyal.” Äi äng tutu äi khrawng la uhmuh ei al, awlaw Yĕsu hnung hnung äng echetal. Yĕsu la Ani tebeih tih Yĕlusalem kena ana phaw ni Olip khuyung a käh Betphagi la Betani nam kena ini lo. Äiya ana phawni Ani tebeih pochong hnih a ni kheu sin bala teh, “Nang hnih äi awmaw a käh nama chet hnih. Nama nihni vawng khaw a nihni hmuh ai se chaw khon ula ini tawk saw. Äi hngat la ha chum hawm u. Nang hnih äi sut hnih tila alaw hnih. Nang hnih a dä losulapei i hnih poh saw äm ting anang hi khaw, Boi la hlüei saw ting ta bäi hnih. Ani la alanda anang lo pekalai.” Äi khaw a ahnih chet häih la ihni hmuh se chaw hngat lawm däma käh sät kena henei bala tawk hmuei saw. Ihni suh hiyunga äiya mäitih khälla ini tak, “Nang hnih i nihni poh saw äm? Se chaw iya nihni suh saw äm?” Yĕsu la i takaih saw takäm, äi khäla etebeih häih la ihni tak. Äi pänäng se chaw ini suh ei sawk. Ahnih la äi se chaw Yĕsu khäka lo häih la äi khrung äng anih käh ihl chaw ini phawh pek. Yĕsu äi khrung äng oom. Awbawng khrawng la ini pum äng käh ihl chaw lawm äng ana phawh pek awlaw awhngaw khälla ha sing sei khäl ila thing bakchaw khäl lo ula lawm äng ana phawh pek. Yĕsu khrawng khäl lai äng chetei khaw a anih la hek ula ini hawu, “Hnadaga a phiyaw khäl, Hnadaga ming äng lotih ming che awpyiaw äng mäiseh. Nangkei käh paw Dawut käh loaih saw pre che awpiyaw äng luih seh, hawn pre a mäitih Hnadaga a phiyaw!” Yĕsu Yĕlusalem a chet bala Hnadaga im duka vawng, awlaw hang hang ni sot chak. Äini kho mü däk saw koong ani tebeih pochong leihnih äng Betani a chet. Äi ngo kawthawiya Betani hlät ula ini chetal khaw a Yĕsu üdü ei. Äi khaw a awhlawm hlaw kän esei äng künei bala mäitih khĕu thing hmu bala etheih mäi ei ting sotaih koong chet. Esei hawvah Ani la iha hmu ah. Iyaäm äi khaw a khĕu theih khin hiyah. Äi koong äi thing a tak hüt, “Krängak ha nang thei hnäng tiei ti.” Etebeih tih la Yĕsu käh ni kheu ini yawk. Yĕlusalem a aphaw ni Yĕsu Hnadaga ima vawng. Äiche äiya kun potih khäla äi kän tämal. Ani la awmawn ini thulei dün khung awlaw khü jetih ini om dün kheni awkrawn pek chak. Hnadaga im duka Ani la iha jeh tuk vawn hawn saw kah. Ani la khrawng khäla tak, “Kiyam äng yoei bala mäyah ei? Kei im hang hang presaw käh suh tong dün im ting ini takai. Äini nangnih ni ima tamdah käh piyaw dün laa nini poh.” Äidä pujawtih elenchaw khäl awlaw Mosi käh thung choktih khälla ni kheu ini yawk ni Yĕsu ini tukaih koong kram ini kram. Khrawng khälla Yĕsu la chok saw äng mawt ini maw hüt saw koong anih la Yĕsu a ini keh. Äi mülawma etebeih tih äng Ani mräh pranga chetal. Ongo lawma äi lawm äng ini loal khaw a etebeih tih la äi khĕu thing uyungkung lah chaal chak saw ini hmuh. Yĕsu la hawu saw kheu ulung äng kawyal bala Pitol la Yĕsu a takal, “Choktih o, so chawm, nang nasayei hüt saw khĕu thing chaal chak däk.” Äi khaw a Yĕsu la tak, “Hnadaga khrung äng uyum tawei khäl. Kei nangnih a ihisaw kanang tak. Ulung äng ütei naw a pak läsulapei ni khuyunga tak hi, ‘Thou tila mret äng a kraw.’ Äini awhawu saw thäneyeih saw dä ting yumei hi, ani la ibang hawu äm äi huih thäneyei. Äi koong Kei nangnih a kanang tak, suh tongei chula nangnih lalapei hawuvei khäl, kübünei däk ting nini yumei hi, nangnih koong äi huih thäneyei. Nangnih suh nini tongeyeih saw koong nini ja khaw a, nangnih khrung äng epret bitih dä mäi hi, nangnih ani a ähläh pekal bäichu. Äihi hawna käh Paw Hnadaga la ha nangnih a ähläh anang pekalai.” Äi pänäng Yĕsu awlaw Ani etebeih tih Yĕlusalema ini krawnal. Ani Hnadaga ima cheteitun khaw a pujawtih elenchaw khäl, Mosi käh thung choktih lenchaw khäl, awlaw chang len khäl, Ani khäka ini lo. Anih la ini hi, “Nang i pängäm ni khäl nibisaw äm? Ni nibiyeih saw koong ula tha ini pek saw äm?” Yĕsu la krawn bala takal, “Kei nangnih a kheu hngat kanang hi yeih. Nangnih dä anang krawneyal nawk hnäng hi mawng tha äng kei ni khäl kibisaw äm äi Kei kanang hawu pekalai. Hawu khäl chaw, tuilüh pektih Yohan la tuilüh pekaih saw päng Hnadaga kän bünei saw ei hiyah khaw khrawng känäng bünei hüt saw ei?” Äi khaw a anih dukäng ini kräuvei, “Nangkei hawn pre känäng ting ini hawu hi, Bahi nangnih iya Yohana yumeichu saw äm ting Ani la hawuvalai. Awlaw khrawng känäng ting ini hawu hi, äi huih ha nangkei koong phi dä.” (Anih la ni huih ini hawu saw anih la khrawng khäl ha ini keh saw koong. Iyaäm khrawng khälla Yohana ha Hnadaga sidawng hiyawktih mäi hüt saw ting ini khin hüt.) Äi khaw a anih la Yĕsu a ini takal, “Keinih hmawt unga.” Äidä Yĕsu la anih a takal, “Bakhaw che Kei ha nangnih a kanang hawu pekaih nga, Kei i pängäng ni khäl kopoh saw äm.” Äi pänäng Yĕsu la pümchut bala anih a tak, “Khrawng hngat la grĕp khang hngat poh ei bala patchi wang vongei. Äi pänäng ani la grĕp theih nawmaih koong vawm hngat chouh. Awlaw akhang sotaih saw koong äkäh im hlüngtih hngat sawk. Äi pänäng ani la pochong hni thum lai bitih khäl khäka a hnga pek bala awhlawm hlawh a chet. Äi Grĕp theih sikai saw khin lo ni, ani la äi grĕp theih phü ak lawkeyeih saw koong hngasaw hngat äi lai bitih khäl khäka eteh. Äini äi lai bitih khälla ani hngasaw a mawn ula ini bop äidä anih la ohong ini teh al. Äi pänäng äi grĕp khang mawh la awlaw hngasaw hngat anih khäka teh. Lai bitih khälla ani luki tĕk sawk ula hiyawh ei ini pek. Äidä grĕp khang mawh la awlaw krängak hngasaw teh. Äini lai bitih khälla ani a ha ini tuk. Ani la awlaw awbawng hngasaw khäl teh. Äini äi khäl äng käh pochongak hnih che ini bop awlaw pochongak hnih che ini tuk. Grĕp khang mawh a eteyeih saw koong ekhetei nawk saw hngat pätpät chaw dä mäitih. Uhnung sumäng ani la awchaw teh. Ani la tawk, ‘Anih la kei chaw a hmawi ini pekaih saw dä.’ Äini äi lai bitih khäl hngat la hngat ini kräuvei, ‘Nila dä uhnung äng kähkän pängeiyalaih saw. Che khäl, ani a tu äng khä, äihi che nangkei kähkän mawh a ini thäneyalai.’ Anih la ani a mawn ula che ini tuk awlaw oyok grĕp khang känäng apranga ini hiyänal.” Yĕsu la tak, “Bakhaw che nangnih hawu khäl chaw, grĕp khang mawh la i poh aih saw äm? Ani lo al bala che äi lai bitih khäl tukalaih saw ei awlaw grĕp khang awhngaw khrawng khäl kutäng awpalaih saw ei” Nangnih asanh chang saw kiyam äng phawt chu ei, ‘Lung bitih la mawng lung pel bang ini hiyän äm, äi üküt thawka usum vawngal. Boi la ni dä poh saw, awlaw ni hmuh ungala keinih kini maw.’ Äi khrawng khälla ini hmawtei Yĕsu la pümchut bala anih pawyah saw kheu awhawu pek saw, äi koong Ani a ini mawnaih khiyang. Äini anih la khrawng khäl ini keh a Yĕsu a hlätal ula che ini chetal. Äi pänäng Yĕsu a kheu äng okei sawk ula che ini mawnaih koong elenchaw khälla hngat pai hnih Pherasai la Herawt pawta mäitih khäla ini teh. Anih la Yĕsu khäka lo ula che ini hawu, “Choktih o, keinih kini hmawt khäh nang che ihisaw dä näkräu saw, nang che khrawng hmawi so tila che kräuti, nang che khrawng kheni a tihtih a dä nosot. Hnadaga la khrawng khäla ibang pohaih saw tak äm, äi ihisaw dä nang nochok saw. Nang tua hawu, keinih Rom mawng lena phawndaw kini pekaih saw ei, pekaih unga saw ei? Mosi käh thung la i hawu äm?” Yĕsu la anih käh ini lupsongei saw hmawt bala che tak, “Nangnih kei a iya anang chawm saw äm? Rom käh poisa hngat lo khäl kei kosotaih.” Anih la Rom käh poisa hngat ini lo pänäng Yĕsu la anih a ihi, “Ni äng u käh lupchaw la u ming nini hmuh äm?” Anih la krawn ula ini hawu, “Rom pre khiyuptih käh.” Yĕsu la anih a tak, “Ibang Rom pre khiyuptih käh äm äi khiyuptih a pek khäl, awlaw ibang Hnadaga käh äm äi Hnadaga a pek khäl.” Yĕsu käh kheu yaw ula che anih ini maw chak. Hngat pai hnih Suduki sawng äng käh u khälla düsaw känäng krawnak thouwal hnawh u ting ini hawu äm äi Suduki khäl Yĕsu khäka lo ula che ini tak, “Choktih o, Mosi la nangkei koong ni kheu yo bala tawk hüt. Khrawng hngat dä chaw chuhnu kaw iphiya taw hüt bala üdü hi, äi dütih nawu la ata phiya naw al bala ata käh chen tawkalai. Tawk chawm khäl, anih tanawu seh ini mäi. Changchaw sum la phiya naw bala awchaw nawu mäyah pak üdü. Äi pänäng käh awnawu la äi hmeinu a awnawkal awlaw äiya ha awchaw nawu mäyah pak üdü. Äi pänäng käh awnawu ha che awchaw nawu mäyah pak äi huih thänei. Äi huih ni äi tanawu seh khälla hngat pänäng hngat äi hmeinu a ini nawk, awlaw chaw nawu mäyah pak ini düal. Äi pänäng äi hmeinu ha dü. Awhmawi mawh äng dütih khäl düsaw känäng hengal ula ini thouwal khaw a, ani u phiya thäneiyalaih saw äm? Iyaäm tanawu seh la ni ani a ini nawk hüt.” Yĕsu la khrawn bala takal, “Nangnih nini hmaw khäh. Nangnih asanh chang kiyam ha hmawt chu awlaw Hnadaga käh tha ha hmawt chu. Dütih khäl hengal ula ini thouwal khaw a anih la phiya naw al nawh u awlaw hmutaw la ha pawtaw omei nawh u. Anih hawn natchaw huih dä ini thäneiyalaih saw. Tua dütih khäl hengal ula ini thouwalaih saw kheu kanang takaih. Täu äng mei choi bala mäi saw khui Mosi käh boih hiyol äng yoei bala mäi saw krängak ha nangnih phawt chu ei?” Awbawng yang Awbraham, Isak, Yakub ini dü, Hnadaga la Mosi a tak, “Kei Awbraham käh Hnadaga, Aijak käh Hnadaga awlaw Yakub käh Hnadaga? Ani che dütih käh Hnadaga hiyah, Ani che hengtih käh Hnadaga dä. Äi koong nangnih mawmawt nini hmaw khäh!” Mosi käh thung choktih pochongak äi düna ja bala Yĕsu suduki sawng äng käh khrawng khäl äng ochok chakei saw ikhin. Yĕsu la awpawi hawu pek saw yaw bala ani la Yĕsu a ihi, “Hnadaga la kheu pek saw äng käh üküt thawka lensum kheu mawng äm?” Yĕsu la krawn bala takal, “Üküt thawka elensum kheu che ni, Isawlael khäl o, nangnih a hngat dä Boi mäi saw, Ani che Boi Hnadaga awlaw Ani a dä nangkei ini rosi saw. Nang käh nulung, nawtawk, nawsawk awlaw natha kheni pekei tila nang Boi Hnadaga a khetnaw bäi. Äi pänäng käh üküt thawka elensum kheu che ni, ‘Nangnih nini puma ihuih nini khetei nawk äm, awnghaw khrawnga ha äi huih khet naw bäichu.’ Ni kheu pai hnih thawka elensum kheu iha mäyah.” Äi Mosi käh thung choktih la tak, “Choktih o, nang nawhawu saw krawei khäh. Hnadaga che hngat dä awlaw Ani hiyah pak che Hnadaga hngat ha mäyah. Nang käh nulung, prengiya, awlaw natha kheni äng Hnadaga a khetnaw bäi. Awlaw nangnih nini puma ihuih nini khetei nawkäm äi huih awhngaw khrawng khäla ha khet naw bäichu. Mäksetdava la awhngaw khäl nini hlusaw thawka ni pai hnih kheu dä üküt thawka alang gong thung.” Äi thung choktih la engen äng kheu krawn pekal saw hmawt bala Yĕsu la ani a tak, “Mawng Hnadaga pre känäng nang awhlawm hlaw a mäi titi.” Äi khaw thouh Yĕsu a awlaw chawm ula che ini hiyeih saw hngata ha sengkhri mäi ti ah. Yĕsu la khrawng khäla Hnadaga im dülmawh a ochok tun khaw a Ani la ihi, “Mosi käh thung choktih khälla Mesaya che Dawut chen känäng käh dä ting iba ini hawu hnäng saw äm? Iyaäm Dawut kädäng la Asanh chang Khraw äng luih bala che ni hawu, “Boi la kei käh Boi a tak, Kei nang käh lansu khäl nang kho chouwa tawnga saw sawgraw, nang kei käh set pawta om bäi.” “Dawut la bang Ani a Boi o ting tak, bakhaw che iba Mesaya ani chen thänei hnäng saw äm?” Awbawng khrawng la awpiyaw lung äng Yĕsu kheu ini khin. Yĕsu la chokpe chokpe tak, “Mosi käh thung choktih khäl kheu känäng nangnih sidih äng mäi khäl. Anih la awat sawu wawat ula che khrawnga ini dawneyeih koong ini chonei awlaw ji khäla ha che anih la hmawi ini büneyeih khiyang. Anih la Yudi ini lumeidün ima elensum la khäla ini omaih khiyang awlaw päi khaw a ha che hmawi büneitih ini om dün laa ini omai khiyang. Anih la hmeinu khäla kramei ula kähkän ini lawkei, awlaw khrawng khäla ini dawneyeih khiyang koong awsawu suh ini tongei. Äi khrawng khälla thasa dam ini büneyalai.” Yĕsu Hnadaga ima awmawn thawn dün ala kena om bala che khrawng khälla awmawn la poisa ini thawn tun saw osot hüt. Mäichaw tih khälla awbawng mawn ini thawn. Äi pänäng sanglaisu hmeinu hngat lo bala che sawih poisa pai hnih awmawn thän dün laa awthawn. Äi khaw a Yĕsu la Ani käh tebeih khäl panei bala tak, “Kei nangnih a ihisaw kanang tak, ni sanglaisu hmeinu la awhngaw khäl thawka awbawng epek. Äi khrawng khälla amrat saw kähkän känäng dä ini pek saw. Äini ni hmeinu asanglai thän ehengaih koong ani a ibang mäi äm hang hang pekal.” Yĕsu Hnadaga im känäng thokal tun khaw a, Ani käh hngat tebeih la Ani a tak, “Choktih o, so, lung len lung len la pawyeitih pawyeitih lung im.” Yĕsu la ani a tak, “Ä, nang äi elen elen lung im nuhmuh tun. Äini ni lung im äng käh lung, hngat la hngat khrung äng mäiti hnawh, ükütni khrah hmuyealaih saw dä.” Äi pänäng Yĕsu Hnadaga im krawnak hnih a käh Olip khuyung a om bala mäi hüt. Äi khaw a Pitol, Yakub, Yohan awlaw Endu la Ani a umuchaw äng ana hi, “Nang keinih a khrawng hawu pek, ni khäl iti khaw a thäneyeih saw äm? I hmat la hmu ungala äi khäl ihisaw a äthäneyeih saw ting kini hmawtaih saw äm?” Yĕsu la anih a tak, “Hngat la ha anang kramei hnäng ngah hmawna sidih äng mäi bäichu. Awbawng khrawng la kei ming jeyei ula ini lo ai. Anih la kei Mesaya ting ini hawuvai awlaw awbawng khrawng a anang krameyei. Nangnih jal kheu la khri äng payei saw jal kheu nini yawk khaw a ke ei chu, äi khäl thäneyeih saw dä äini äi khaw a ha äpäih hawm saw hiyah. Hngat japsaw awhngaw japsaw äng, presaw la presaw äng jal ini täkeyei. Ätän täna liuh lo ai awlaw ekenai. Ni dukhah khäl che hmutaw ini mäiyeyeih khaw a dukhah chah saw huih chah saw dä.” “Sidih äng mäi bäichu. Iyaäm khrawng khälla nangnih a hngawsaw khäl kut äng anang mawn sawkai awlaw Yudi ini lumeidün ima khrawnga bop dün jäi äng anang bop sawkai. Nangnih kei tebeih koong pre khiyuptih khäl awlaw mawng khäl hmawi mawh a nangnih Kei käh sawksi nini thäneyei. Äini täkchah sidawng pawi üküt yapsaw khäl khäka hawu pek hmueyei. Khrawng khälla nangnih a mawn ula tara düna anang chih khaw a i kini hawuvaih saw äm ting kongrah ai chu. Äi khaw a Hnadaga la nangnih lung äng i anang khawi äm äidä hawu bäichu, iyaäm äi khaw a nangnih hiyah, Asanh chang Khraw dä nangnih kaw känäng kräuvaih saw. Äi khaw a ata la awnawu a, awpaw la chaw a mawn sawk bala utuk sawkai. Chaw chuhnu khäl ini nu paw käh awhngaw phak ini mäiyei awlaw ini tuk sawkai. Kei koong khrawng kheni la anang hmu khih thaw hnawh u, äini ula ujumak chunei hnäng äm ani kiyawtalai.” Hnüpak nangnih nini hmuh ai, mäi tawnah saw laa keh se saw vawn la sahnah hmawna poh ai. Äi koong khrawng khälla äi la ini hläh alai. (Ni phawt tih khälla yawchu seh u!) “Äi khaw a Yudia a mäitih khäl khuyung a chen seh u. Im tĕh khrunga mäitih khrawng khäl chen khawngah vawn ini lawkeyalaih saw koong im duka wangalah seh u. Lai a bitih khälla ilh chaw lawkeyala ima krawnalah seh u. Äi khin che pungvawn mawh la chih o sämäichaw mäitih hmutaw khäla dä dukhah khin. Suh tongei khäl ni khäl isik khaw a thäneyah hmawna. Iyaäm äi khaw a dukhah mäiyeih saw huih Hnadaga la luhdül bisaw täh känäng tu täh siyäng ha mäi hawmah awlaw äi pänäng ha mäiti hnawh. Boi la dä äi khin khäl hleu sawkah khaw hngat ha heng thaw hnawh u saw. Äini Boi la eheh leisaw khrawng khäl koong Hnadaga la äi khin khäl ehleu pek khäh. Äi khaw a hngat la ha nangnih a anang tak khaw, ‘So, Mesaya niya dä ting,’ yumeiyei chu. Iyaäm Mesaya la Hnadaga sidawng hiyawktih khäl huih po ei ula awbawng nawmaw nawkaih saw hmat ini bi ei. Hnadaga la eheh leisaw khrawng khäla ini khrameyeih saw ini sotai. Äini sidih äng dä mäi bäichu. Kei äi khäl thänei khawngah ayang khaw thouh nangnih a kanang tak lawk khäh. “Äini dukhah khin päih pänäng khoni hiyungai, khraw ha wa ti thaw hnawh, asĕ khäl ha hawn känäng kraw chakai awlaw khoni, khraw, asĕ kheni hlünei chakai. Äi khaw a khrawng khälla Luhchaw Chaw a tha la wachang äng khohiyung äng luhdül äng lo aih saw ini hmuh ai. Äi pänäng Hawn natchaw khäla te bala luhdül äng käh ätän tän la känäng ani la eheh leisaw khrawng khäla lumalai. “Khĕu thing so chula chok naw khäl. Khĕu thing bak khäl hnäuwal bala odong thok khaw a, nanyung khin lo tun ting nangnih nini hmawtai. Äi huih ni thäneyeih saw khäl nini hmuh khaw a Luhchaw Chaw kena lo däk, sät khäka bang lo däk ting nini yawkchu ai. Kei nangnih a lälä kanang tak tun, ni khäl hang hang thänei khaw a ha pochongak hnih ini hengaih pe saw dä. Hawn la luhdül äpäih yei, äini Kei käh kheu sawkbrat mäiyeih saw dä. “Äi hnüp la ikhin hngat la ha hmawt u. Hawn natchaw khälla bang hmawt u, Awchaw la ha hmawtah, Awpaw la jiji dä hmawt saw. Nangnih sidih äng mäi khäl awlaw khiyong chula mäi khäl, iyaäm itih khaw a äi khin lo ai äm nangnih hmawt chu. Awhngaw pre a chetaih tih khrawng huih dä äi khin nangnih khäka loaih saw. Im hlät bala chet khawngah ani la a hngasaw khäl kut äng ükütni awp chak hüt. Ani la üküt hngasaw a ni sin mawn hüt awlaw im chong tih a khiyong bala mäiyeih saw tak. Nangnih ha äi huih sidih äng mäi khäl. Iyaäm im mawh paw khoni kraw khina ei, awyawn chinga ei, akhon prak äng ei, ‘hiyah thän’ ongo a ei, itih khaw a loaih saw äm nangnih hmawt chu. Täk ting Ani lo al bala nini ip saw anang khomah pak. Ni nangnih a jiji kanang taksaw hiyah ükütni a kataksaw dä, khiyong chula mäi khäl.” Äi khaw a lätal päi la tokaw ha päi thäneyeh saw hnüp hnih khawngah pujawtih elenchaw la Mosi käh thung choktih khälla Yĕsu a umuchaw äng ini mawnaih saw ini sui. Anih la tukaih saw ini kram. Anih la ini hawu, “Päi thänei tuna hiyah! Päi dukäng khaw, khrawng khäl ini manpokaih saw dä.” Äi khaw a Yĕsu Betani nama unu kopeitih Simon ima mäi hüt. Yĕsu la eisaw eitun khaw a, hmutaw hngat la bung bok hngat äng mawmawt khawk tih ootih echet si olo. (Ni otih si che Nard ting ini taksaw thing känäng thänei saw). Ani la äi bung khoi bala otih si Yĕsu luki äng äläi. Äini äiya mäitih ükütla che ini manpok ula ini hawu, “Iya ni khawk tih otih si akhrah saw äm? Ni otih si nejeh khaw khrawng pochongak käh kumak a hnga mawn täneyei saw awlaw sanglaisu khäla nepek hnängai!” Anih la äi hmutaw a ini hekei. Äini Yĕsu la hawu, “Ani a po sawk khäl, iya dukhah nini pek saw äm? Ani la Kei koong awpawi pohsaw dä. Sanglaisu khäl sawkbrat nangnih ängtu ini mäi khäh. Nini hlü khaw a ni äi sanglaisu khäla nini ku hnängai. Äini kei a nangnih sawkbrat übün hnawh chu. Ani la ibang näng äm äi poh saw. Ani la kei kantha äng otih si läisaw awhmawi mawh äng kei a khrawng phulaih saw koong dä. Kei ihisaw kanang tak, luhdül äng mawnga bang ni sidawng pawi hawu hmuyei äm, ni hmutaw la ibang pohsaw äm, äi hawu hmueyei, ini lung äng ini khaweiyei.” Äi pänäng pochong leinih tebeih äng käh hngat Ikariyo Yuda la pujawtih elenchaw khäl khäka Yĕsu mawnaih sawk saw koong echet. Anih la äi yaw ula ini piyaw awlaw awmawn pekaih saw ini khawmei. Äidä Ikariyo Yuda la anih kutäng awpaih saw ikhin khiyong. Lätal päi chahsaw hnüp äng samphomah ini bät chi. Tebeih tih khälla Yĕsu a ini hi, “Keinih nang koong mawnga lätal päi neeiyeih saw ala kini poh aih saw äm?” Äi khaw a Ani la tebeih pai hnih teh. Äidä tak, “Mräh duka ni hni chet hi khrawng hngat tui meng äng nihni khomai. Ani ängtu chet bäi hnih. Ani mawng ima vawng äm, äi im mawh a Kei tebeih tih äng lätal päi keei dün gawrba ini mäidün ätäk mawnga äm ting Boi la hawu khäh ting ta bäi hnih? Ani la nang hnih a ädäm a poh chän elen täk hngat anang dawnai. Nangkei koong äiya päi ini ei dün la pobäi hnih.” Äidä tebeih häih mräh duka ahna vawng awlaw Yĕsu la ihuih hawu äm äi huih ihni khom. Ahnih la lätal päi koong eisaw ächän ihni tawk. Äi khaw a khomü däk saw, Yĕsu pochong leinih tebeih tih äng äi ima echet. Anih la om ula ini eitun khaw a Yĕsu la hawu, “Kei nangnih a ihisaw kanang tak, kei ängtu tua eitih nangnih dukäng käh pochongak la kei a khrawng mawn sawkai saw.” Tebeih khälla ini lung dukhah ini piyei. Hngat pänäng hngat la ini hi, “Äi khrawng ni kei ei, kei khäl hi nga?” Yĕsu la krawn bala tak, “Ani che nangnih pochong lei hinh äng käh hngat, ula bang kei ängtu khawp äng ha sumei bala eei tun äm. Ayang känäng kiyam äng ihuih yoei bala mäi äm, Luhchaw Chaw äi huih dü aih saw. Äini ula bang lansu kut äng awp äm, ani a ha dukhah mäyeih saw. Äi khrawng luhdül äng lo ah saw bang pawiyeih saw.” Anih la ini ei tuna Yĕsu la ha lawk awlaw Hnadaga a äkiyä tawngei, äidä Ani la pil bala etebeih khäla pek bala hawu, “Ni lawyei khäl, ni ha che kei kantha.” Äi pänäng Ani la grĕp hawng khawpak law bala äkiyä tawngei. Äidä Anih a pek awlaw hang hang la äi äng ini ok. Yĕsu la anih a tak, “Ni grĕp hawng che kei thi, ni thi kakantha känäng awbawng khrawng khäl koong bo aih saw. Nidä Hnadaga la khrawng khäl äng atha kheu ini poyei saw. Kei nangnih a ihisaw kanang tak, Kei Mawng Hnadaga pre a grĕp hawng atha otih ngasaw sawgraw kei ni grĕp hawng oti hnawh nga.” Äi pänäng anih awi hngat ini awi. Anih Olip khuyunga ini chetal. Anih ini chet tun khaw a Yĕsu la anih a tak, “Kei khrawng hlät chula nangnih hang hang nini chetalaih chak saw. Kiyam äng mäi khäh, ‘Kei samphomah kiyongtih a kutukaih saw, ani käh samphomah khäl ini khrih eyeih chak saw.’ Äini Kei cho känäng kothouwal pänäng nangnih khawngah ayang Kei Galil la kechetai, äiya anang khomalai.” Pitol la Yĕsu a tak, “Anih khäl kheni la anang hiyän hüt ula ini chetal thän, kei asang kini hiyän hüt hnawh nga.” Yĕsu la krawn bala takal, “Kei nanga ihisaw kini tak, tühnüpa! Tüyawna ahluipaw krängnih khong khawngah kei a awhmawt ti ting krängthum nehleiyeih saw.” Äini Pitol la tangdang tak, “Kei nang ängtu küdüaih saw kraw thän, kei nanga kini thuh naw hnawh nga.” Awhngaw tebeih khälla ha äi huih ini hawu. Äi pänäng Getsimani ting mingei nawk saw laa ini chet. Yĕsu la Ani tebeih khälä tak, “Kei suh katongei kra niya om khäl.” Yĕsu la Ani ängtu Pitol, Yakub, Yohan a chihphui nawk. Ani la ulung dukäng mawt ukhru la dukhah piyei. Ani la äi khäla tak, “Dukhah äng Kei sawk thokaih däk. Nangnih niya mäi khäl awlaw khak chula mäi bäichu.” Ani bitchaw awhlawm hlaw chet, äidä dek äng khokgru dülei bala suh tongei. Ani la suh tongei bala hawu, “Kei dukhah kaw khawmaih saw ikhin kei känäng nänäng khaw chiyal.” Yĕsu la hawu, “Paw o, nang ükütni nähnäng chak khäh, dukhah bünapak kei a ählätal. Äini Kei sitha huih hiyah, nang sitha huih dä thänei seh.” Äi pänäng Ani suhtongei kän krawnal ni etebeih khäl ini ipsaw khom. Ani la Pitol a tak, “Simon nangnih nini ipsaw ei? Nang gonda ak bang ipapak mäi hnäng tiyei? Nangnih khak chula mäi khäl awlaw suh tongei khäl äihi chawmsi äng kraw hnawh chu. Nangnih ihisaw nini poh aih khiyang, äini nini poh aih saw koong nini kantha ma ah.” Äi pänäng Yĕsu krawnal bala ihuih suh tongei hütsaw äm äi huih atongeyal tü. Äi pänäng Ani krawnal bala anih ini ipsaw dä khomal. Etebeih khäl mawt ini ipaih khiyang saw koong ini mik bang hongei hnäng ti u. Anih la ini hawuvaih saw iha hmawt ti u. Yĕsu kräng thum lo bala äi huih ini ipsaw khomal pänäng tak, “Tua ha che nangnih nini ipsaw awlaw nini dümal saw ei? Thänei däk. So khäl, Luhchaw Chaw a ngulaisu kut äng awp hmuyei saw ikhin lo däk. Che khäl. Thou khäl. Kei a lansu kutäng khrawng awpaih tih lo däk.” Ani äi huih kräu tuna Ikariyo Yuda äiya olo. Ani che pochong leinih äng käh hngat etebeih. Ani ängtu awbawng khrawng kompum la chimsawu äng ini lo. Äi khrawng khäla pujawtih elenchaw khäl, Mosi käh thung choktih awlaw achang chaw khälla ini teh saw. Yĕsu a mawn sawktih äng Yuda la ni kheu ini tawyei hütsaw, “Kei kawhnawmaih saw khrawng dä äi khrawng. Ani a mawn bäichu awlaw sidih äng chong chula chi bäichu.” Yuda äiya aphaw pänäng Yĕsu khäka chet. Äidä ani la hawu, “Choktih o.” Ni huih hawu bala ani la Yĕsu a hnawm. Äi khaw a khrawng khälla Yĕsu a jotjota ana mawn. Yĕsu kena jatih etebeih äng käh hngat la chimchaw lawkei. Ani la pujawtih gong käh hngasaw hngat käh hnawku awt. Yĕsu la äi khrawng khäla tak, “Kei tamdah dä ei nangnih tamdah mawna lotih huih kompum la chimsawu äng nini losaw? Kei nangnih ängtu hnüpak kiyawnah kämäi hüt khäh, Hnadaga im hmawi mawh a kochok hüt khäh. Nangnih äi khaw a khrawng mawn chu. Äini ni khäl thänei saw kiyam äng käh kheu khäl luih hmawna.” Äi khaw a etebeih khäl hang hang ini chenal chak. Chongkrawng hngat a watsaw äng käh ilh chaw jiji dokei bala Yĕsu hnung äng chet. Khrawng khälla ani a ha ini mawnai saw ini sot. Khrawng khälla ini mawn khaw a äi a watsaw äng käh ilh chaw hiyän hüt bala ikil chonal. Khrawng khälla Yĕsu a pujawtih gong khäka ini chih. Äi düna pujawtih elenchaw, Mosi käh thung choktih awlaw changlen khäl ana chumei. Pitol la awhlawm hlaw a mäi bala Yĕsu hnung äng ätäm. Ani pujawtih gong im dülmawh a aphaw. Äiya chongtih khäl äng om bala mei oom. Pujawtih elenchaw khälla awlaw Yudi äng käh Yudi khäl käh hngawsaw khälla Yĕsu a ini tukai saw koong ani ming äng eheng sawksi ini sui. Äini anih la hngat ha bün u. Yĕsu ming äng awbawng khrawng eheng sawksi ini tok äini hngat käh sawksi ha che hngat äng tueiyah. Uyum tumäng hngat painih thou ula eheng sawksi thok ula ini hawu, “Luhchaw la ini bisaw Hnadaga im Kei kakhrah aih saw awlaw hnüp thum dukäng kei awlaw hngat kopoh alaih saw, awlaw Kei kopoh alaih saw che luhchaw la ini poh saw huih hi hnawh ting keinih ni huih kräusaw kini yawk.” Äini anih käh hngat käh sawksi ha tueiyah. Äi khaw a pujawtih gong awhmawi mawh a ja bala Yĕsu a ihi, “Nang iha hawuvaiti ei? Nang ming äng khrawng khälla sawksi ini thoksaw nanga iha naw hawuvaih phü mäyah ei?” Äini Yĕsu iha hawuvah pak ektiyapak mäi. Pujawtih gong la awlaw ihi, “Nang äi Krito, pisih mawh Hnadaga Chaw ei?” Yĕsu la tak, “Ä kei dä. Awlaw nangnih nini hmuh ai Luhchaw Chaw üküt thawka Dogo Mawh kena set pawta ming mawh la a om bala mäiyalaih saw. Ani a hawn äng käh khohiyung ängtu olo aih saw nini hmuh ai.” Äi yawbala pujawtih gong la awat tayei bala hawu, “Nangkei sawksi iya ini hlüei pe saw äm? Iyaäm nangnih nini yawk khäh Ani la Hnadaga äng titih a poh ei saw. Nangnih iba nini tawkäm?” Anih la Yĕsu a ini tuk tawn khäh ting ini khin. Äi khaw a hngat painih la chilh tui ini soh ei nawk awlaw awhmawi kün ula ini suk. Ani a ini tak, “Nang hngat Hnadaga sidawng hiyawktih näthänei khaw ula ini suk saw äm hawuvei!” Chongtih khälla ha Ani a bop ula ini chih al. Pitol dülmawh a mäi khaw a, pujawtih gong hngat hngasaw nu Pitol khäka lo. Pitol la mei omsaw hmuh. Ani la Pitol pawt mawmawt chaw soei bala tak, “Nang ha Nazarina käh Yĕsu äng nämäi saw hiyei?” Äini Pitol la chal bala hawu, “Nang ibang nawhawu saw äm, kei iha yawchu nga!” Äi pänäng apranga sät khäka chetal. Äi khaw a ahluipaw khong. Äini äi hngasaw nu la äiya Pitol a uhmuh ni, äiya jatih khäla tak, “Ni khrawng Ani äng käh hngat dä.” Äini Pitol la awlaw a chal tü. Tana mäini äiya jatih la Pitol a ini tak tü, “Kawchawng chawng nang ani äng käh hngat. Nang Galila käh dä.” Pitol la upuma sayei awlaw jeng bala hawu, “Kei dä ehlei käkräu khaw Hnadaga la damäng awkhraw seh. Kei Ani a hmawt nga nangnih ube nini kräu saw äm.” Äi ängtu ahluipaw awlaw krängak khongal tü. Yĕsu la taksaw kheu Pitol a ulung äng kawyal. “Ahluipaw krängnih khong khawngah krängthum awhmawt ti ting nachalaih saw.” Äidä Pitol ulung se bala akapal. Akhonäng pujawtih elenchaw khälla chang len khäl, Mosi käh thung choktih khäl awlaw Yudi khäl käh hngawsaw äng käh khrawng kheni a lum chak ula che ini täng bawng. Äi pänäng anih la Yĕsu a khon ula che ini chih awlaw Ani a Romio khiyuptih Pilat kutäng ana awp. Äi khaw a Pilat la Yĕsu a ihi, “Nang Yudi khäl käh mawngei?” Yĕsu la krawn bala takal, “Nang ihisaw nawhawu khäh.” Pujawtih elenchaw khälla Yĕsu a epret ini tawng. Äi pänäng Pilat la awlaw Yĕsu a ihi, “Nang kheu krawn pekalaih ti ei? So yei chaw anih la nanga ihiyawh pawyah saw anang taksaw äm?” Äini Yĕsu la iha kheu krawn pekalah. Äi äng Pilat awmaw. Pilat la thung huih lätal päi hnüp äng thong äng krawtih khrawng pochongaka u a bang anih la hlätaläih saw koong ini hawuvei äm äiya ähläh al. Äi khaw a Balabba ting mingei nawtih khrawng hngata awhngaw pre sängeitih ängtu othong im duka ini heng nawk hüt. Rom mawng la pre khiyup khaw a, pre sängeitih ängtu mäi bala pre khiyuptih a jal ini täk awlaw khrawng ha ini tuk. Khrawng khälla Pilat khäka lo ula che ini tak, “Nang thung huih kumak kiyawnah ibang nopoh äm tu a ha äi poh e.” Pilat la anih a tak, “Nangnih ihuih nini hlü ei saw äm, Kei Yudi khäl käh mawnga kähläh alaih saw ei?” Pujawtih elenchaw khälla Yĕsu a ini sot mawh saw koong Pilat kutäng ana awp saw ting Pilat la awhmawt khäh. Äini pujawtih elenchaw khälla khrawng khäla tha ini pek. Iyaäm Yĕsu chaw a Balabba a ini hläh alaih saw koong khrawng la ini tak. Pilat la awlaw khrawng khäla ihi, “Nangnih u a bang Yudi mawng ting nini tak äm kei ani a law ngala i kopoh aih saw äm?” Khrawng khälla Ani a krut äng thawn ting hek ula che ini hawu. Pilat la ihi, “Ani la i epret bisaw äm?” Äi khaw a äi khrawnga krut äng thawn äng ting khrawng khälla hek ula ini hawu. Äi khaw a Pilat la khrawng khäl ini chip priyeih saw koong Balabba a hlät pekal, awlaw Yĕsu a bop dün jäi äng bop ula krut äng ini thawnaih saw koong a tak. Äi khaw a soloi khälla Yĕsu a khiyuptih elen im duka ini chi. Äi düna anih la soloi khäl kheni ini lumal chak. Äi khaw a awnchäh thi rong wat ini wat sawk, awlaw Ani a ihling mawh hiyun äng käh tokkiya uluki äng ini song. Äi pänäng anih la Yĕsu a ini tak, “Yudi mawng o, naw sawk sawu seh!” Äkräng kräng anih la kompum äng Yĕsu luki ini bop, Ani pum äng chilh tui ini sohnawk, awlaw khokgru düläng om ula che Ani a hmawi ini pek saw huih ini kelei. Äi huih ani a ini bop pänäng anih la äi awnchäh thi rong wat sut ula che ani käh wat ini watal sawk awlaw krut äng ini thawnaih koong ini chih. Äi khaw a Simon ting mingei nawtih khrawng hngat mäi hüt. Ani che Kurini mräh a käh. Ani che Alekzandal la Lupu käh paw mäi hüt. Ani Yĕlusalem pawta chetei bala echet tun khaw a soloi khälla Yĕsu käh krut ichi aih koong tha ini poh. Anih la Yĕsu a Gawlgawta ting mingei nawtih ala hngata ini chi (Ni Gawlgawta ming nawphawngal khaw Lukong äng käh ala thänei.) Äi pänäng anih la Yĕsu a oosaw hawng la alak bäl ula ini pek, äini Ani la o ah. Äi pänäng anih la Yĕsu a krut äng ini thawn. Yĕsu käh wat anih dukäng ini pheh eyeih koong soloi khälla ini lumchawl ini chawmei. Ongo lawm paikoh äng anih la Yĕsu a krut äng ini thawn. Awlaw Ani ludäma Yudi khäl käh mawng ting epret hngat yo ula ini tawk. Anih la tamdah paw pochong hnih äng Yĕsu a krut äng ini thawn, pochongak che set pawh äng awlaw pochongak che setong pawtäng. Äi khaw a asanh chang kiyam boih äng käh kheu ihisaw a thänei. “Ani a epret mawh khäl ängtu süh hmuei.” Äi lawm äng cheteitih kheni la ini luki hlünei ula ini tak, “Ä, Nang dä hiyah ei, Hnadaga im khraktih la hnüp thum dukäng nawsawkalaih saw ting naw hawu hüt saw. Tua krut känäng komal tila nang nawsawk hläteal.” Pujawtih elenchaw khälla awlaw mosi käh thung choktih khälla Yĕsu a ini keleih yeih khiyang koong anih dukäng ini kräuvei, “Äila khrawng che hläh al hnäng, upum kantha che hläh teyal hnängah. Äi nucho Mesaya, Isawlael khäl käh mawng. Krut känäng komale, äi hmu al ungala kanang yumei hmawna.” Yĕsu ängtu krut äng thawn hmueitih häih la ha, Ani a ihni keleih. Äi pänäng khosun pailei hnih kän ümü lawm paithum täh ni khohiyung bala mäi. Ümü lawma paithum thänei khaw a Yĕsu la athak hek bala awhawu, “Elawi, Elawi, lama sabaktani.” Ni kheu krawn che “Kei käh Hnadaga, Kei käh Hnadaga, nang kei a ählät tila iya nechetal saw äm?” Äi khaw a Ani kena ja tih khäl pochongak hnih la äi kheu yaw ula che ini hawu, “Khin khäl, ani la Elija a apanei saw.” Äi khaw a khrawng hngat chon bala solo hum hngat hiyul bala kompum hngat äng khon. Äidä Yĕsu a aba. Äi pänäng ani la hawu, “Beh maw, Ani a khomala Elija lo teyei kosotaih maw!” Äi pänäng Yĕsu athak hek pänäng awsawk thok. Äi khaw a Hnadaga ima käh wat ädäm täh kän awdawng täh phawlei bala phüh hnih a thänei. Yĕsu hmawi mawh a ja bala mäi hüttih soloi khäl käh elenchaw la Yĕsu äi huih düsaw hmu bala che awhawu, “Ihi khäh ni che Hnadaga chaw mäi hüt saw.” Pochongak hnih hmutaw khäl hlawm hlaw a ja ula ini sot. Anih Yĕsu ängtu Yĕlusalema ini lo hüt saw. Anih ha Yĕsu a yumeitih awlaw suisong tih ini mäi hüt. Äi khäl dukäng käh Meri Makdalin, elekchaw Yakub la Josi nu Meri awlaw Salomi. Yĕsu Galil a mäi hüt khaw a, ni hmutaw khäl Ani ängtu üküt laa ini chet awlaw Ani a ini chetchaw chi. Awbawng hmutaw khäl äi düna ini mäi hüt. Anih che Yĕsu ängtu Yĕlusalem a ini lo hüt. Äi hnüp che düm khomhnüp khawngah khrawng khälla ächän poh ei ula ini mäiyeih saw hnüp. Äi khaw a Awlimathia nama käh Yosep la khoni kraw pänäng Pilat khäka chet bala che Yĕsu yok a hawu weiyal. Ani che elenchaw khäl ini lumeidün ala a käh lang gong hngat mäi hüt. Ani la ha Mawng Hnadaga pre olo aih koong chongei bala mäi hüt. Yĕsu alanda düsaw koong Pilat thasa awmaw. Äi koong ani la soloi khäl käh elenchaw a panei bala che Yĕsu üdüsaw ihi ei ting ihi. Pilat la soloi khäl käh elenchaw känäng Yĕsu dü däk ting hmawt ni, ani la Yosep a Yĕsu yok pekal. Yosep chetal bala che khawktih a watsaw wat hleih. Äidä Yĕsu yok khomal bala äi wat äng tomal awlaw cho a awtawkal. Äi pänäng cho wah lung hngat äng künal. Makdalin Meri awlaw Yĕsu nu Meri la Yĕsu yok mawng düna ini tawk saw äm äi ihnih hmuh. Düm khomhnüp päih pänäng Makdalin Meri, Yakub nu Meri awlaw Salomi la Yĕsu yok äng ini hmakaih koong oosaw si hlei ula ini lo. Sapta chah saw khomhnüp äng mawtjawn anih cho a ini chet khaw a, anih hngat la hngata ini hi ei, “Cho wah khah hmuyei saw lung len ni ula hlayeih saw äm?” Äini äiya chet ula äi lung hlayei chän ini hmuh. Äi lung che mawmawt len hüt. Anih cho duka ini vawng ni awat sawu bok wat bala pawtaw hngat set pawta om bala mäi saw ini hmuh. Äi hmu ula anih mawmawt näk ula ini maw. Äi pawtaw la anih a tak, “Maw ai chu. Krut äng tuk hmuyeitih Nazarina käh Yĕsu a nini suisaw ei? Ani ni a mäiti yah. Düsaw känäng thouwal däk. Ani a tawk hmuyei saw la aso khäl. Tua nangnih chetal chula Yĕsu anih khawngah Galil a chetaih saw dä ting, Ani tebeih khäl awlaw Pitol a ata al khäl. Ani la hawu hüt saw huih anih la ani a ini khomaih saw dä.” Äi hmutaw khälla iha yawchu chak u, chün chüna ini ke chak awlaw äi cho känäng ini chonal. Anih äi hiyawh lokong ini ke saw hngata ha iha hawu pek hnäng ti u. Sapta chah saw khomhnüp äng a khon prak äng Yĕsu düsaw känäng thouwal. Äi pänäng Ani la Makdalin Meri a ayang a dawnei. Ni Meri duk känäng Ani la paiseh khrawse thoh al hüt. Yĕsu a hmuh ni Meri la chet bala Yĕsu äng mäi hüttih tebeih khäla a takal. Äi khaw a anih ini lung dukhah äng ini kap hüt tun saw. Yĕsu düsaw känäng hengal däk awlaw Meri la äi hmuh khäh ting yaw ula anih la äi yumei u. Äi pänäng Ani tebeih pochong hnih chetei häih la mräh prang pawta ihni chettun khaw a, Yĕsu la ulup hleyei bala a hnih a adawnei. Ahnih chetal häih la awhngaw tebeih khäla äi khäl ahna hawu pekal. Äini ahnih kheu ha äi khälla yumei u. Äi pänäng Yĕsu la ani käh pochong leiyak tebeih a adawnei. Äi khaw a anih la ini ei ok tun hüt saw. Yĕsu la anih a ini yum leu saw koong ehekei, iyaäm Ani düsaw känäng thouwal pänäng hmuh tih khrawng khäl käh kheu anih la yumei u. Yĕsu la anih a tak, “Nangnih luhdül äng käh hang hang laa chet khäl awlaw khrawng kheni khäka sidawng pawi hiyawk khäl. Ula yumei äm awlaw tuilüh lawkei äm, ani ngulai känäng kiyawtalai. Äini ula yumah äm ani epret mawh äthäneyei. U khälla kei a khrawng yumei äm anih la nawmaw nawkaih saw bi ini bi hnängai. Kei ming äng anih la khrawse khäl ini thoh al hnängai awlaw anih atha tha be äng ini kräuvai. Anih la ini kut äng bin ula phol ini jäh hnängai. Mawt sip mawh ini ok thän iha thänei thaw hnawh u. Awlaw lawgase khäl kantha äng ini kut ini tawkei thän ini pawiyalai.” Tebeih khäla ni khäl tak pänäng Boi Yĕsu a hawn pre a khawi hmuyeal. Äiya Ani Hnadaga käh set pawta oom. Äi pänäng tebeih khäl chet ula üküt laa ni sidawng pawi ana hiyawk. Boi la anih duk känäng ibi awlaw anih la nawmaw nawkaih saw bi ini bisaw äng, anih la sidawng pawi ini hiyawk saw khäl ihisaw dä ting khrawng la ini hmawt. Khetsu Thiophil, awbawng khrawng la nangkei dukäng äthänei hüt saw khrang khäl, yo ula ini tawkaih koong ini hno hüt. Yĕsu la bi chah saw khaw thouh hmutih, awlaw Hnadaga kheu hiyawktih khälla keinih a ibang khrawng hiyawk hütäm, äi khäl anih la ini yok. Elenchaw Thiophil o, kei äi khrang khäl ükütni täkchah khaw thouh hngat pänäng hngat sidih äng pawyei sese a kosot, äi khäl nang khäka koyokaih saw pawyei ting kakhant. Äi khaw mawng khrang khäl nanga chok hmuei hütäm, äi khäl ihi khäh ting nang naw hmawtai. Yudia pre lekchaw a Herawt mawng mawngei hüt khaw a, Zakalia ting mingei nawtih pujawtih pochongak mäi hüt. Ani che Abija ting mingei nawtih pujawtih sawng äng käh pochongak mäi hüt. Ani phiya Elijabet ha Arawn chen äng mäi hüt. A hnih pai hnih Hnadaga khäka konghmuh sang ihni mäi hüt. ‍Awlaw Boi Hnadaga käh kheu la thung khäl kola pak ini sumei hüt. Äini a hnih a sämäichaw mäi hütah. Iyaäm Elijabet la chaw hmuei hnäng hütah. Awlaw a hnih pochong hnih ni awbawng ihni chang hüt. Hnüpak khaw a Zakalia käh sawng khäl anih hleh äng bi bi ula ini mäi hüt. Awlaw Zakalia la Hnadaga hmawi mawh a pujaw bi khäl ibi hüt. Ani a Boi Hnadaga im duka vawngaih koong awlaw ootih meikhu choiyeih koong lumchawl chawm äng ini heh lei hüt. Niche pujawtih khälla ini pujawaih koong khrawng ini heh lei saw thung. Awlaw Zakalia la ootih meikhu ochoi khaw a, awbawng rositih khäl apranga lumei ula che suh ini tongei hüt. Äi khaw a Boi käh hawn natchaw hngat la täk ting Zakalia a adawnei. Äi hawn natchaw ootih meikhu ini choisaw hlu dün la kena käh set pawta aja. Zakalia la ani a uhmuh ni änäk awlaw eke. Äini hawn natchaw la ani a tak, “Zakalia o, ke ei ti. Hnadaga la nang käh suh tong ikhin khäh. Nang phiya Elijabet la nang koong pawtaw chaw u hmuh eyei, awlaw nang ani ming Yohan ting suyei bäi. Ani nang koong piyaw la jelkhiamsa thäneyei, ani luhdül äng a thäneyeih saw koong awbawng khrawng ini piyawai. Awlaw Yohan che Boi käh alang gong khrawng äthäneyei. Ani la krängak ha alak la zu khäl sumei thaw hnawh, awlaw ani luhdül äng äthänei saw khin khaw thouh Asanh chang Khraw la khiyup bala tawkai. Yohan la Isawlael a käh awbawng khrawnga anih käh Boi Hnadaga pawta olo alai. Awlaw Elija a Asanh chang Khraw la thayung pek hüt saw huih thayung la khraw äng Boi käh hmawi mawh a ani echeteyei. Awlaw ani la Paw khäl käh lung chawchu hnu khäl äng opongalai awlaw Hnadaga lawm äng mäyahtih khäla konghmuh sang mäi khrang ngen lawm äng olo alai. Äi huih khrawng khäla Boi koong ächän awtawkalai.” Zakalia la hawn natchaw a ihi, “Kei ni kheu khäl ihi khäh ting iba kaw hmawtaih saw äm? Kei hnih che awbawng ki hnih chang däk awlaw kiphiya la ha chaw hmueiti hnawh.” Hawn natchaw la tak, “Kei Gabiyel dä. Kei Hnadaga hmawi mawh a ja ngala che kämäi chi. Kei a Hnadaga la eteh saw nang äng käkräuwaih koong awlaw ni sidawng pawi nanga kini hawu pekaih koong. Kei käh ni kheu khäl ikhin luih khaw a ihisaw a äthäneyei. Äini nang kei kheu yumei ti koong kräu hnäng hnawh ti. Awlaw ni kheu khäl ikhin luihyah saw sawgraw nang nasam thokapak nämäyei.” Äi khin äng apranga khrawng khälla Zakalia koong chong ula che ini mäi hüt. Awlaw Hnadaga ima iya awkraw saw äm ting tawk ula che anih ini mawchak. Äidä Zakalia apranga thokal ni khrawng khäl äng kräuval hnängah. Äi äng khrawng khälla ini yawkchu Hnadaga im duka käh asanh chang la a ani la Hnadaga a uhmuh. Awlaw ani la khrawng khäla i hawu pekaih khiyang saw äm äi kheu akhan äng awhawu pek, äini asam thokah. Äiche Zakalia la pujawaih saw bi äphäih pänäng ima awkrawnal. Äi pänäng ani phiya Elijabet pungvawn äthänei awlaw ani khraw hngaw khrawng khäl hmawi mawh a lo a pak ima lungkhiyang ämäi. Elijabet la hawu, “Boi la kei koong ni ibi. Ni khin äng Ani la kei a ejenei awlaw khrawng khäl hmawi mawh a kei a hiyawh ei mäi hüt saw khäl olouhwal.” Elijabet khraw sok pungvawn mäi khaw a, Hnadaga la hawn natchaw Gabiyel la Galil pre lekchaw a käh Nazaret ting mingei nawk saw mräh a asanh chang mäitih hngawk hnguchaw khäka eteh. Äi hngawk hnguchaw ming che Meri. Ani a Dawut mawng chen känäng käh Yosep la hiei bala tawkei hüt saw. Hawn natchaw ani khäka chet bala che atak, “Pisih bünei bäi ti, Boi nang khrung äng awpiyaw, Ani nang ängtu mäi khäh.” Äi kheu yaw bala Meri a awtawk tum, awlaw maw bala che, ni khäl ihuih hnuk sakäm ting ulung äng kawi. Äini hawn natchaw la ani a tak, “Meri o, ke eiti, iyaäm Hnadaga nang khrung äng awpiyaw khäh. Awlaw khin chawm! Nang nupungvawn mäitila che pawtaw chaw nuhmuh eyei awlaw nang ani ming Yĕsu suyei bäi. Ani elensum thäneyei awlaw Ani a Hnadaga käh Ühlüngsumtih chaw ini takai. Awlaw Boi Hnadaga la paw chang paw Dawut käh nawn Ani a pekalai. Awlaw ani la Yakub chen khruäng sawkbrat mawngei bala mäiyei. Awlaw Ani käh mawng pre sätak ha päih thaw hnawh.” Äi khaw a Meri la hawn natchaw a tak, “Äi lup iba jak kraw aih saw äm? Iyaäm kei che hngawk hnguchaw.” Äi yaw bala hawn natchaw la krawnak takal, “Asanh chang Khraw käh thayung nang lukhrunga lo bala bi biyei awlaw Ühlüng sumtih Hnadaga käh tha la ini ka ai. Äihi asanh chang saw sämäichaw nuhmuh eyei, äiya khrawng khälla Hnadaga chaw ting ini takai. Awlaw khin chawm, nang käisang Elijabet achang pänäng pawtaw chaw hän nawk däk. Ani a Khrawng khälla banja ting ini taksaw, tua ani khraw sok mäi däk. Iyaäm Hnadaga la nängah saw iha mäyah!” Meri la tak, “Kei Boi käh hngasaw nu dä. Nang nawhawu saw huih kei äng thänei seh.” Äi pänäng hawn natchaw la Meri a hlät bala chetal. Äi pänäng Meri pakhat hnikhat thou bala tong dül pawta Yudia pre a käh mräh hngata echet. Ani Zakalia ima chet bala Elijabeta hnuk asak. Meri la hnuk sak saw sam Elijabet la yawkni, ani hän duka käh awchaw odongei awlaw Elijabet Asanh chang Khraw äng luih bala ämäi. Äi pänäng ani la hek bala che hawu, “Nang hmutaw khäl khe thawka pisih nübünei awlaw nähän nawk saw chaw ha pisih mawh dä! Äini iba äi hiyawh pisih kübünei saw äm. Boi käh nu kei khäka olo saw? Iyaäm nang sam kawyawk saw ängtu, kähän duka käh sämäichaw piyaw bala odongei. Awlaw nang dä pisih mawh, iyaäm Boi la nanga i ini hawupek äm, äi kheu khäl nang nuyumei, äi khäl ihisaw a äthäneyei!” Äiche Meri la tak, “Kei lung la Boi a awphiyaw. Awlaw Hnadaga che kei a awkhiyawtal tih, äi koong kei lung piyaw. Iyaäm ani la kei huih usum vawngahtih hngasaw nu koong awtawk. Tu khawthouh kei a pisih mawh ting khrawng khälla ini hawuvai. Iyaäm üküt thawka ani tha mawh sum, ani la kei koong üküt thawka elensum bi khäl bi. Ani ming che asanh chang. Ula Ani a kenkeh äm, äi khäl koong ani käh jenei che, chen känäng chen täh awsawkak echet. Ani la awbawn äng tha bi dawnei khäh. Ula ulung dukäng awbawriyei äm ani la äi khäla ikhrih chak. Ani la suih songtih a nawn känäng okhomal, äini ngiyaw brabra khrawnga ädäma awkhawiyal. Ani la düyeitih khrawng khäla vawn pawi äng ähän hluih. Äini mäichawtih a ukut hong äng eteh al. Nangkei nuchen paw sawk lawkthawk känäng Ani la khawmei hütsaw huih hngasaw Isawlael khäla kubawm hüt. Ani la Awbraham awlaw ani chen khäla sawkbrat jeneyeih saw kheu ulung äng awtawkei.” Elijabet ima Meri khraw thum bawng mäi pänäng im pawh a krawnal. Elijabet mäyei khin loni pawtaw chaw hmuh ei. Ani la Boi käh khet bünei ting imchengsaw awlaw käisang khälla ini yawk ni, ani ängtu ini piyaw. Hnüp sĕt düna sämäichaw käh vun awh taih saw koong ini lo awlaw iming che awpaw ming huih Zakalia sueyeih saw koong ini tawk. Äini unu la anih a tak, “Hiyah! Ani a Yohan ting panei hmueyeih saw.” Anih la ani a ini tak, “Nang käisang dukäng che hngat ming ha äi huih mäyah.” Äi pänäng anih la ini kutäng dawnei ula sämäichaw paw a iming i suyeyeih khiyang äm ting ini hi. Äi khaw a, Ani la sangbung hawuvei bala ani ming che Yohan ting oyok. Äi äng Anih ini mawchak. Äi äng tutu ani kaw ohongeyal bala elei yawh al, awlaw ani kräuval bala che Hnadaga a phiyaw pekaih saw chah. Ani imchengsaw khälla äi khäl hmu ula che ini ke chak, awlaw Yudia pre lekchaw a käh khuyunga käh khrawng khälla äi krong law ula che ini kräuvei. Ni krong yawtih khela ni mawchak ula ini lung äng ini hawu, “Ni sämäichaw che ihuih thäneyeih saw äm? Iyaäm Boi käh tha ani ängtu mäi khäh.” Äi khaw a, äi sämäichaw paw Zakalia che Asanh chang Khraw äng luih bala Hnadaga la ibang kheu epekäm äi hawu, “Lo khäl Boi a phiyaw äng khä. Boi che Isawlael käh Hnadaga. Upum khrawnga kubawmaih koong Ani olo awlaw Ani käh khrawnga awkhiyawtal. Ani käh asanh chang Hnadaga sidawng hiyawktih khäl mongkhok känäng, Ani la ayang khaw thouh awhawu saw huih, khiyawtal tih tha mawh hngata, hngasaw Dawut käh imsaw känäng nangkei a khrawng pek. Äihi nangkei käh lansu khäl awlaw nangkei a khrawng mumtih khäl kut känäng khrawng khiyawtal. Hnadaga la nangkei käh nuchen pawsawk khäla ejenei saw dawneyeih koong, awlaw asanh chang khidih epek saw ulung äng awkhawiyalaih koong, nangkei paw Awbraham khäka awkhawmei hüt saw huih, Ani la lansu khäl kut känäng nangkei a khrawng khiyawtalai. Awlaw iha keh a pak Ani a nangkei ini rosi hnängai. Asanh näng awlaw konghmuh äng, ani hmawi mawh a sawkbrat ini mäiyei. Awlaw kawchaw o, nanga Ühlüng sumtih Hnadaga käh Hnadaga sidawng hiyawktih hngat anang takai. Iyaäm nang lawm poh ai äng Boi hmawi mawh a nechetai. Ani khrawng khälla ngulai känäng khiyawt tara ini büneyal saw kheu hawu pekbäi. Awlaw ähläh büneyalaih saw ngen pekbäi. Nangkei Hnadaga käh jen koong, Boi hawn pre känäng khoni rong huih nangkei lukhrunga olo ai. Uhiyung la düdün mawng käh ilipa, u bang om bala mäiyäm, äi khrawng khäl lukhrung awa rong awkraw ai. Awlaw nangkei kho jelkhiyamsa lawm pawta chih ei.” Äi sämäichaw Yohan Asanh chang Khraw tha äng ochom. Awlaw ani Isawlael chaw tih khäka adawngah saw sawgraw täu lung chinga ämäi hüt. Äi khaw a Rom pre la khiyup saw laa käh khrawng kheni a süh hmueiyeih saw ting Agosta mawng len la ana thoh. Nidä täkchah khrawng süh ini chah saw. Äi khaw a Kurini che Siriya a khiyuptih mäi hüt. Äi khaw a khrawng kheni la ini ming ini tawngeyeih saw koong nanga nang mräh a ini chetal. Yosep thänei che Dawut Mawng chen känäng käh. Äi koong ani Galil pre lekchaw a käh Nazaret mräh känäng Yudia laa käh Dawut Mawng mäi hüt dün la Betlehem nama chet. Ani la hmatei saw phiya Meri äng ihni ming ihni yokeiyeih koong ihni chet. Äi khaw a Meri che upungvawn mäi hüt. Äiya a hnih ihnih mäi khaw a Meri ämäei yeih saw khin äthänei. Awlaw ani la chaw u chaw pawtaw chaw hmuh ei. Ani la hmuh ei saw chawni ilhse chaw äng tom bala sel longko hngat äng hiyawlh bala tawk. Iyaäm äi khaw a che äi mräh a gawlba tawi düna anih koong ala mäi hütah. Äi Betlehem kena käh phüma samphomah kiyongtih khälla samphomah sawng awyawna ini chong hüt. Anih hmawi mawh a Boi käh hawn natchaw hngat täk ting lo. Äi khaw a Boi käh a wachang anih ken setsei waleu leuwa wachak bala anih a sü. Äidä samphomah kiyongtih khälla ini hmuh ni mawmawt ini ke. Äini hawn natchaw la anih a tak, “Ke ei chu, khin khäl! Kei nangnih koong sidawng pawi kolo, ni sidawng pawi üküt khrawng koong ni mawmawt piyaw kheu dä. Iyaäm Mawng Dawut käh mräh Betlehema tühnüpa nangnih käh ngulai Khiyawtalaih tih luhdül äng athän. Ani che Krito, nangkei käh Boi. Nangnih ni ahmat la hmu chu la che Ani a nini hmawtai. Sämäichaw hngat awat äng tom bala sel la chawk ei dün longko äng hiyawlh bala tawk hmuei khäh.” Hawn pre a käh hawn natchaw sawng äi hawn natchaw äng täk ting bälei ula Hnadaga a awpiyaw pek ula ini hawu, “Hawn pre a Hnadaga khäka a wachang lo seh, awlaw luhdül äng mawng khrawng khäl lukhrunga Ani piyaw äm, äi khrawng khäl lukhrunga jelkhiyamsa lo seh.” Hawn natchaw khäl anih känäng Hawn pre a ini chetal ni, samphomah kiyongtih khälla hngat la hngat äng ini kräuvei, “Che khäl nangkei Betlehem a chetäng khä, Boi la nangkei a ibang thänei saw kheu khrawng hawu pek äm, äiya chet pula aso äng khä.” Äi pänäng anih äiya pakhath hnikhat ini chet ni Meri, Yosep awlaw äi sämäichaw a sel longko hngat äng hiyawl bala mäi saw ini hmuh. Äi sämäichaw a ini hmuh pänäng samphomah kiyongtih khälla äi sämäichaw krong äng ibang hawn natchaw la hawu pekäm, äi kheu ni hang hang ni khrawng khäla ini hawu pek. Awlaw anih mong khok kän äi kheu khäl ula bang yawk äm anih kheni ini maw chak. Äini Meri la thänei saw khäl kheni ulung äng tawkeyal chak. Awlaw ni krong äng thasa tawk bala mäiyal. Äi pänäng hawn natchaw la hawu pek saw huih samphomah kiyongtih khälla hang hang ini hmuh chak awlaw ini yawk chak ni, Hnadaga a phiyaw ula phüma ini krawnal. Khomhnüp hnüp set luih ni thung täng äi sämäichaw käh vun ini awh khaw a, äi sämäichaw ming Yĕsu ting ini suyei. Ni ming dä hawn natchaw la ini suyeiyeih saw koong unu hän dukäng te khawngah khaw thouh tak hüt. Mosi käh thung täng Yosep la Meri asanh chang ihnih thäneyeih saw ikhin lo ni, a hnih Yĕlusalem a ini chet. Boi käh thung la hawu saw huih, khongkho chumak hiyah thän khü chumak bät häih la ihni hlu aih koong ihni chih. Boi khäka ihni awpaih koong Yĕsu a ha ahnih ängtu ihni chih. Iyaäm Boi käh thung la awlaw hawu, “Hmutaw hngat la chaw u chaw pawtaw chaw hmuh ei hi, äi sämäichaw a Hnadaga khäka ana awplah.” Äi khaw a Yĕlusalema Hnadaga rositih Simiyon ting mingei nawtih konghmuh sang hngat mäi hüt. Ani la Isawlael yapsaw khiyawtal tih loaih koong chong hüt, awlaw Asanh chang Khraw ani ängtu mäi hüt. Boi la teh saw Krito a hmuah saw sawgraw ani dü hnawh ting Asanh chang Khraw la ani a hmawt sawk hüt. Asanh chang Khraw la Simiyon lung äng bi bi ni, äi hnüpa Hnadaga ima chet. Yĕsu nupaw ha Mosi thung la ibang hawu äm äi huih poh a sämäichaw Yĕsu a äiya ihnih lo. Äi khaw a Simiyon la Yĕsu a pämei, äiche Hnadaga a äkiyä tawngei bala hawu, “Boi o! Nang nawkhawmei saw huih kheu nawtawkei, tua nang käh hngasaw a jelkhiyamsa äng luhdül känäng nichih al hnäng däk. Iyaäm nang neteh saw khiyawtal tih a kimik la hmuh, khrawng kheni la hmu hmawna ni po tila nawtawk. Ani Yudi hiyahtih khrawng khäl khäka awa huih dawngaih saw, awlaw nang käh khrawng Isawlael khäl käh hmawi lamaih sawk saw.” Äi sämäichaw krong hawu saw yaw häih la ani nupaw ihni maw. Äi pänäng Simiyon la ahnih a pisih pek. Äiche Yĕsu nu Meri a tak, “Hnadaga la ni huih dä bi ibiyeih saw khrawk saw. Ni sämäichaw koong Isawlael khäl äng käh üküt che ini krakai awlaw ükütla che awkhiyawt ini büneyalai. Ani a Hnadaga känäng hmat la huih teh hmuei saw, äini awbawng khrawng la Ani a lawei hnawh u. Awlaw äi äng anih lung duka käh kheu khäl khrawng la ini hmawt chakai. Awlaw nang Meri, nanga chimchaw äng ini sun saw huih thasa dukhah nipieyei!” Äiya Anna ting mingei nawtih Hnadaga sidawng hiyawktih hmutaw pochongak mäi hüt. Ani che Aser chen äng käh Ponuel chuhnu. Ani awbawng awsawk chang hüt. Ihnih om nawei pänäng khokum kumsĕh awpawtaw äng im thong ihnih ei hüt. Äi pänäng ani sĕtgip gala kum hli sawk täh hmeinu mäi. Ani Hnadaga im hlät bala hngata ha chet chi hütah. Ikhi kha ümüt mäi bala awlaw suh tongei bala Hnadaga a chetchaw chi. Äi khin äng, Anna Yĕsu nupaw kena chet bala Hnadaga a äkiyä tawngei, awlaw Hnadaga la Yĕlusalema käh khrawng khäla hlähtalaih saw koong chong ula mäi hüttih khrawng khäla, ni sämäichaw käh kheu awhawu pek. Boi käh thung huih bi kheni ihni khiei pän ni, Yosep la Meri Galil a käh ihnih pum nam Nazareta i hnih krawnal. Äi sämäichaw Hnadaga käh khetjen bünei bala awsawk äng, tha äng awlaw ngen äng ochom prangaih saw chah. Lätal päi poh ei a Yĕsu nupaw kumak kiyawnah Yĕlusalema ihni chet chi. Yĕsu kumlei hnih khaw a anih käh thung täng unupaw ängtu äi lätal päi poh ei a ini chet. Äi päi poi pänäng anih ima ini krawnal khaw a Yĕsu Yĕlusalema ämäiyal hüt, äini Yĕsu nupaw la hmawt häih. Yĕsu khrawng sawng dukäng ämäi khäh ting khin häih la, Ani nupaw hnüp thiya lawm ihnih cheteyal. Äi pänäng äkäisang la äphäwu khäl dukäng suiyalaih saw i hni chah. Äini Yĕsu a bünal häih, äi koong khrawnak Yĕlusalema suyala ihni chetal. Äiche hnüp thum pänäng Hnadaga ima Yĕsu a ihni bünal. Äidüna Ani choktih khäl äng om bala choktih khäl käh kheu ikhin tun khaw a ayapyap kheu ihi. Ekheu khin tih kheni la Ani käh ngen la ini hisaw kheu krawn pekal hnäng saw hmu ula ini maw chak. Ani nupaw la Yĕsu a ihni hmuh ni thasa ihni maw. Ani nu la Ani a tak, “Chaw o, kei hnih äng iya ni huih nopoh ei saw äm? Nawpaw äng kanang susuiyal hnih ngala mawmawt kihnih kongrah saw.” Yĕsu la a hnih a tak, “Nang hnih iya kei a anang suiyal saw äm? Nang hnih hmawt hnih tih ei Kei paw ima Kei kibiyeih lah saw?” Ani la i hawu äm äi unupaw la yawchu häih. Äi pänäng Yĕsu Ani nu paw äng Nazaret a echetal awlaw a hnih kheu ngei bala mäiyal. Ani nu la ibang äthänei hütäm äi khäl ulung dukäng tawkeyal. Äi huih mäipe mäipe Yĕsu chom awlaw engen ha paw awlaw Hnadaga la khrawng käh ekhet bünei. Rom pre a käh Mawng len Tiberi kumlei hngaw pre äng mawngei khaw a, Pontio Pilat che Yudia pre lekchaw khiyup bala taw hüttih mäi hüt. Awlaw Herawt Entipas Galila käh khiyuptih, ani nawu Philip che Ituria la Trakoni laa käh khiyuptih, awlaw Lusan che Abila a käh khiyuptih mäi hüt. Awlaw Anna la Kayapha Yudi khäl käh pujawtih gong khäl ihni mäi hüt. Äi khaw a Zakalia chaw Yohan täu lung chinga mäi khaw a Hnadaga la ulung äng käh kheu Yohan a hawu pek. Äi khaw a ani Yawldan hlong jiljal a chet bala khrawng khäla ngulai känäng ähläh ini büneyalaih saw koong, ini lung hleyeyal ula tuilüh ini lawkeyalaih koong sidawng hiyawk. Hnadaga sidawng hiyawktih Aijaya käh boih hiyol äng ni huih yoei. Ani la hawu, “Täu lung chinga asam hngat la hĕk bala hawu tun, ‘Nangnih Boi käh lawm pochula che taw khäl, awlaw hlüng nemeitih lawm hngiyal khäl. Khuyung khochawu kheni dekäng uhluhyalaih saw, khuyung len la elekchaw kheni tihtih a hngiyal hmueiyalaih saw, awlaw kolek tih lawm khäl phrongh hmuyalaih saw, awlaw hlüng nemeitih lawm khäl hngiyal hmuyalaih saw, awlaw ngulai känäng Hnadaga la khrawnga ähläh pekalaih koong ibisaw khäl khrawng kheni la ini hmuh ai.’” Yohan khäka tuilüh ini lawkeyeih saw koong awbawng khrawng ini lo. Äi khrawng khäla ani la tak, “Phol chen khäl o! Hnadaga känäng olo tunsaw dam känäng nini chenaih koong ula nangnih a kram anang pek saw äm? Nangnih dä ngulai lawm känäng nini lung nini hleyeyal khaw, nangnih nini mäi saw khrang äng theih pawi dawnei khäl. Awlaw nini puma hawuveyeih saw chah ai chu, ‘Keinih Awbraham chen dä.’ Kei nangnih a kanang tak, ni lung khäl känäng ha Hnadaga la Awbraham chena ibih hnäng khäh. Thing yungkung awtaih koong hĕi che ächän tawk hmuyei khäh. Mawng thing äng etheih pawi theiyah äm, äi thing che khruk hmueyei awlaw mei äng chawh hmueiyalai.” Äi khaw a khrawng khälla ani a ini hi, “Bakhaw che keinih i kini poh aih lah saw äm?” Yohan la anih a tak, “U a bang awat thĕ hnih mäi äm, ani la u a bang mäyah äm äiya pek seh, awlaw u a bang ei saw mäi äm äi khrawng la ha äi huih bi bi seh.” Phawndaw koktih khäl ha ani khäka tuilüh ini lawkeyeih koong ini lo. Anih la Yohana ini hi, “Chok tih o, keinih i kini poh aih saw äm?” Ani la anih a tak, “Nangnih a awmawn i hiyawh kokaih saw koong tak hmuei äm, äi thawka khrawng khäl känäng unung awmawn kokai chu.” Äi khaw a pochongak hnih soloi khälla Yohana ini hi, “Äi khaw keinih i kini poh aih lah saw äm?” Ani la hawu, “Tha äng, älälä chaw epret khraw chu la khrawng khäl känäng awmawn laweiyei chu awlaw khraw ak kiyawnah nini bünei saw mawn äng nangnih nini lung hlüih ei chula che mäi bäichu.” Khrawng khälla awbawng lawphah äng chong ula che ini mäi. Awlaw Yohan ni khiyawtalaih tih Krito ei ting ini lung tara ei ula ini tawk. Yohan la äi khrawng khäla tak, “Kei nangnih a tui äng tuilüh kanang pek. Äini kei thawka bang tha mawh pochongak olo tun. Kei ani käh thanap jäi kusuh aih saw bang tawn nga. Ani la Asanh chang Khraw la mei äng nangnih a tuilüh anang pekai. Ani kut äng che chawngkou mäi khäh. Äi chawngkou äng chawng chelh dün la ho bala asanh poh ai. Äidä chawng leng äng chawng taktih kheni chung bala tawkalai. Äini chawng hitih kheche sätak ha yupah tih mei äng chawh hmueyei.” Awlaw ha Yohan la awhngaw kheu khäl äng khrawng khäla sidih pek awlaw ulyah pek bala khrawng khäl khäka Hnadaga sidawng pawi kheu awhawu pek. Yohan la Galila käh khiyuptih Herawt a khrawng hmawi mawh a umum saw kheu tak. Iyaäm ani la ani nawu phiya Herawdia a awnawkal awlaw awhngaw epret ha che awbawng ibi hüt. Äi äng Herawt la Yohan a othong im äng heng naw bala che unung epret bi. Yohan thong äng kraw khawngah khrawng kheni a tuilüh pek hüt, äi khaw a Yĕsu la ha tuilüh lawkei. Tuilüh lawkei pänäng Yĕsu la suh tongei ni hawn hongei. Awlaw Asanh chang Khraw hawn känäng khü huih kom bala Ani khrung äng adüm. Äi khaw a hawn känäng asam hngat thawng, “Nang dä Kei käh kekhet nawksaw chaw, nang koong kei awbawng kawpiyaw khäh.” Yĕsu khokum thungip luih yeih khaw a Ani la bi chah. Yĕsu che Yosep chaw ting khrawng khälla ini tawk. Yĕsu che Heli käh tu. Heli che Mathat chaw, Mathat che Lebi chaw, Lebi che Melki chaw, Melki che Janai chaw, Janai che Yosep chaw, Yosep che Matathia chaw, Matathia che Amos chaw, Amos che Nahum chaw, Nahum che Esli chaw, Esli che Naggai chaw, Naggai che Math chaw, Math che Matathia chaw, Matathia che Semei chaw, Semei che Josek chaw, Josek che Yuda chaw, Yuda che Yoana chaw, Yoana che Risa chaw, Risha che Zirubabel chaw, Yirubabel che Salatiel chaw, Salatiel che Neri chaw, Neri che Melki chaw, Melki che Adi chaw, Adi che Kosam chaw, Kosam che Elmadam chaw, Elmadam che Er chaw, Er che Yosua chaw, Yosua che Eliyazar chaw, Eliyazar che Jolim chaw, Jolim che Mathat chaw, Mathat che Lebi chaw, Lebi che Simiyon chaw, Simiyon che Yuda chaw, Yuda che Yosep chaw, Yosep che Yonam chaw, Yonam che Iliakim chaw, Iliakim che Miliya chaw, Miliya che Mena chaw, Mena che Matatha chaw, Matatha che Nathan chaw, Nathan che Dawut chaw, Dawut che Yesi chaw, Yesai che Obet chaw, Obet che Boat chaw, Boa che Salmon chaw, Salmon che Nasawn chaw, Nasawn che Aminadab chaw, Aminadab che Ram chaw, Ram che Hisron chaw, Hisron che Peret chaw, Peret che Yuda chaw, Yuda che Yakub chaw, Yakub che Aijak chaw, Aijak che Awbraham chaw, Awbraham che Tera chaw, Tera che Nahor chaw, Nahor che Serug chaw, Serug che Riu chaw, Riyu che Peleg chaw, Peleg che Ebawr chaw, Ebawr che Sala chaw, Sala che Kainam chaw, Kainam che Awlpaksad chaw, Awlpaksad che Sem chaw, Sem che Noha chaw, Noha che Lamek chaw, Lamek che Mithusela chaw, Mithusela che Inok chaw, Inok che Jared chaw, Jared che Mahalalel chaw, Mahalalel che Kenan chaw, Kenan che Enos chaw, Enos che Set chaw, Set che Adam chaw, Adam che Hnadaga chaw. Yĕsu Asanh chang Khraw äng luih bala Yawldan hlong känäng krawnal. Äi Asanh chang Khraw tha la Ani a täu lungchinga chih. Äiya Ani a Mannat la khomhnüp hligip täh awchawm. Äi khaw a Ani la iha ei o ah pak mäi awlaw ikhin luih ni Ani üdüei. Mannat la Ani a tak, “Nang dä Hnadaga chaw näthänei khaw, ni lungpel a ha thäneyeih saw ta.” Yĕsu la Mannat a tak, “Kiyam äng yoei bala mäi khäh, luhchaw eisaw jiji äng heng u.” Äi pänäng Mannat la Yĕsu a ala hlünga chi puinaw bala luhdül äng käh mawng pre khäl kheni tanakra äng dawn. Awlaw Mannat la Yĕsu a tak, “Kei luhdül äng käh thayung la kähkän kheni nanga kini awpal chakai. Iyaäm ni khäl kheni kei kutäng dä, kisitha saw khrawnga ni kei kepekal hnäng khäh. Nang dä kei a ini rosi khaw, hang hang ni nang käh thäneyei.” Yĕsu la krawn bala takal, “Asanh chang kiyam äng yoei bala mäi khäh, ‘Nang käh Boi Hnadaga a dä rosi bäi awlaw chetchaw bäi.’” Mannat la Yĕsu a Yĕlusalem a chih puinawk awlaw Hnadaga im teh phaiya khawi pui naw bala Ani a tak, “Nang dä Hnadaga chaw näthänei khaw, ni la känäng chu. Iyaäm kiyam äng yoei bala mäi khäh, ‘Nanga anang ka aih koong Hnadaga la Ani käh hawn natchaw khäla takai.’ Awlaw ni huih ha yoei, ‘Anih la nanga ini kut äng anang mawnalai, lungpel äng nokho chäng bang naw hnawh.’” Äini Yĕsu la krawn bala takal, “Kiyam äng ni ha yoei bala mäi, ‘Nang käh Boi Hnadaga a chawmai chu.’” Mannat la Yĕsu a üküt lawm äng ni chawm chak pänäng, Yĕsu a hlät bala chetal. Äidä uhnung äng chawmaih koong ikhin chong bala mäi. Yĕsu Asanh chang Khraw tha äng Galil pre lekchaw a krawnal, awlaw Ani krawnal saw sidawng hang hang la a khrih ei chak. Ani la ätän täna käh Yudi ini lumeidün ima ha chok, äi koong khrawng kheni la Ani a ini phiyaw. Äi pänäng Yĕsu Nazaret nama chet. Ni a dä Ani ochom saw. Awlaw Ani thung täng düm khomhnüp äng Yudi ini lumeidün ima chet. Äiya kiyam boih phawtaih saw koong Ani aja. Ani kut äng Hnadaga sidawng hiyawktih Aijaya la yok saw boih hiyol pek hmuei. Ani la boih hiyol hongni äiya yoei saw ni kheu sui bala bün. “Boi käh khraw Kei äng tutu mäi khäh. Sanglaisu khäl khäka sidawng pawi kawhawu pekaih koong Ani la kei a khrawng heh lei saw. Awlaw hengnaw hmueitih khrawng khäl khäka ini lätalaih saw äng käh sidawng kaw hawuvaih koong, awlaw mikmü khälla ini hmuh eyalaih hnäng saw äng käh kheu kawhawu pekaih saw koong awlaw kulu naw hmueitih khäla kähläh alaih koong, awlaw Boi käh khetjen pekaih saw äng käh kheu kawhawu pekaih saw ikhin lo däk ting kaw hawuvaih koong kei a eteh saw.” Äi pänäng Ani la boih hiyol tomal bala äiya käh bitih khäl kut äng pekal bala o omal. Äi khaw a Yudi ini lumeidün ima mäitih khälla Ani a soei ula ini mäi. Äi dä Ani la anih a tak, “Tü hnüpa kiyam boih äng käh mawng kheu khäl nini yawkäm äi kheu khäl ihisaw a thänei däk.” Ani mongkhok känäng kheu pawi yaw ula ükütni ini mawchak. Anih la ini hawu, “Nini Yosep chaw hiyah ei?” Awlaw Yĕsu la anih a tak, “Nangnih ni kheu pümchut chula lälä kei a anang takai, ‘Tosotih la upuma awpawi po eiyal seh.’ Awlaw nini hawuvai, ‘Kawpalnahum mräh a mawng bi khäl nang nibi hüt saw ting kini yawkäm äi huih tua ni nama ha bitila keinih a khrawng dawnei.’” “Äini ihisaw kheu Kei nangnih a kanang takaih, Hnadaga sidawng hiyawktih khrawnga upum nama käh upum namsaw khälla hlüei u. Niche ihisaw dä, Elija khaw a Isawlael pre äng awbawng sanglaisu hmeinu ini mäi hüt. Äi khaw a kumthum gala phawl kho lo ah pak mäi hüt awlaw thasa ken hüt. Äi khaw a Isawlaela käh hngat hmeinu khäka ha Elija a teh hmuh eiyah. Äini Sidon laa käh Zaraphat nama käh hmeinu khäka dä Hnadaga la teh hüt saw. Awlaw Hnadaga sidawng hiyawktih Elisa khaw a Isawlael pre a unu kopeitih awbawng ini mäi hüt. Äini Siriya pre a käh Namana dä asanh poh hmueiyal saw. Äi hawuva hngata ha asanh poh hmueiyalah.” Äi khäl yaw ula che Yudi ini lumeidün ima käh khrawng khäl thasa ini man pok. Anih thou ula Yĕsu a nam pranga tun ula ini chih. Äidä anih la nam mäi saw talh hlang känäng Ani a ini hiyänaih koong ini chih. Äini Ani khrawng khäl duk känäng chäjä chetei bala Ani lawm äng chetal. Äi pänäng Ani Galila käh Kawpalnahum mräh a okomal, awlaw düm khomhnüp äng khrawng khäla ochokaih saw chah. Ani la choksaw äng khrawng khäl ini maw, iyaäm Ani käh kheu che thayung mawh khrawng kräu saw huih dä. Äi Yudi ini lumeidün ima khrawse la mawn saw khrawng hngat mäi hüt. Äi khrawng la athak hek bala che hawu, “Nazarina käh Yĕsu, keinih khäka nang i nühlüyei saw äm? Nang keinih a anang khrah aih saw koong nolo saw ei? Nang u äm äi keinih kini hmawt khäh. Nang Hnadaga käh äi Asanh chang Khrawng!” Yĕsu la hekei bala che tak, “Ektiapak mäi! Ani duk känäng thokal!” Äi khaw a khrawng khäl hmawi mawh a khrawse la äi khrawnga hiyän bala che iha naw pekah pak ani duk känäng thokal. Khrawng khäl kheni maw ula che hngat la hngat äng ini kräuvei, “Ani käh kheu che thayung mawh khrawng kräu saw huih dä. Khrawse khälla bang Ani kheu ngei ula ini chetal.” Ani sidawng üküt laa ni khrih ei chak. Yĕsu Yudi ini lumeidün im känäng thokal bala Simon ima chet. Äi khaw a Simon pui thasa kawl hüt. Äi koong anih la Simon pui a awpawi poh alaih koong Yĕsu känäng uku ini hawuvei. Äi khaw a Yĕsu ani kena ja bala kawla hekei, äi äng ani awkawl saw pawiyal. Äidä ani thouwal bala che anih koong eiok opoh pekal. Khoni kraw aih khaw a ayapyap lawga khomei hüttih käisang khäla khrawng khälla Yĕsu khäka ini lo. Yĕsu la hngat pänäng hngat khrawng khrung äng ukut tawei bala awpawi poh al. Yĕsu kheu äng awbawng khrawng duk känäng khrawse ini thokal. Äi khaw a khrawse khälla hek ula ini hawu, “Nang dä Hnadaga Chaw.” Äini Yĕsu la khrawse khäla kräuvaih u saw tak. Iyaäm khrawse khälla Yĕsu che Krito dä ting ini hmawt khäh. Akhon äng Yĕsu täu lung chinga chetal. Äi khaw a khrawng khälla Ani a ini suiyal. Äidä Ani mawnga mäi äm, äi laa chet ula ini khomal. Anih känäng Yĕsu chetalah pak, khrawng khälla Ani a oh ula ini tawkaih saw ini sot. Äini Yĕsu la anih a tak, “Mawng Hnadaga pre äng käh sidawng pawi awhngaw mräh khäla ha kawhawu pekaih lah saw. Iyaäm äi koong dä kei a teh hmuei saw.” Äi pänäng Yudia pre lekchaw a käh awhngaw awhngaw Yudi ini lumeidün ima ha chet bala Ani tara awhaw. Hnüpak khaw a Yĕsu Ginisaret hlong kawma aja. Äi khaw a awbawng khrawng Hnadaga kheu ini khinaih saw koong netei ula Yĕsu pawta ini sipei. Äi khaw a Ani la kawma long pai hnih hmuh. Awlaw dum khäl long känäng komal ula kawn ini boh eiyal tun saw hmuh. Äi khaw a Ani Simon käh long äng kawi. Awlaw Ani la Simon a kawm känäng bitchaw awhlawm hlaw a long chih eih koong tak. Äi pänäng long äng om bala äi khrawng khäla chok. Khrawnga ochok saw päih ni Simona tak, “Thuk saw pawh a long chiyal tila näphäutih äng ngaw nawmawnaih koong nangnih kawn chawnh khäl hnäh.” Simon la tak, “Choktih o, keinih awyawn tün dukhah po ungala nuak ha bün unga. Äi thän nang kheu äng kawn kini chawnh naih.” Äi khälla ini chawnh ni ngaw phaw saw koong kawn takaih saw huih thänei. Äi äng awhngaw long äng mäitih phäu khäla kuaih saw koong ini panei. Anih lo ula che long pai hnih ngaw äng ini hluih ni enekaih huih thänei. Äi hmu bala Simon Pitol la Yĕsu kho chouwa bok bala tak, “Boi o, kei kena mäitiyeiti, chetal hnäh. Kei ngulaisu dä.” Simon Pitol awlaw ani phäu khäl kawn äng awbawng ngaw paw saw hmu ula ini maw chak. Jebidi chaw Yakub la Yohan ha mawmawt ihni maw. Äi khaw a Yĕsu la Simon Pitol a tak, “Ke eiti, tutäh känäng nang khrawng nawmawnaih saw.” Äi pänäng anih la long khäl kawma loal ula, ükütni hiyän chak ula Yĕsu hnung äng ini chet. Yĕsu krängak namaka chet hüt. Äi düna upum kheni äng unu lawga kopeitih khrawng hngat mäi hüt. Ani la Yĕsu a hmuh ni Ani kho khäka bok bala che khawh ei bala tak, “Choktih o, nang dä nühlüei khaw kei a nang sanh sanh ini poh al hnäng.” Yĕsu la ukut dowei bala ani a bin, äidä ani a tak, “Nang sanh sanh näthäneyalaih saw Kei kühlü.” Äi kheu äng tutu ani känäng unu lawga echetal. Äiche Yĕsu la ani a takal, “Ni kheu hngata ha hawu pekaiti. Äini chetaltila pujawtih a dä adawnei. Äiche Mosi la asanh ini thäneyal pänäng ini hlu aih lah saw ting awhawu saw huih ahlu al. Äi äng nang asanh näthäneyal däk ting khrawng khälla ini hmawtai.” Äithän Yĕsu kheu khrih ei chak. Ani kheu ini khinaih koong awlaw lawga känäng ini pawiyalaih saw koong awbawng khrawng Ani khäka ini lo. Äini Yĕsu la khrawng khäla hlät bala täu lung chinga umuchaw äng chet bala ikhikha suh atongei chi. Hnüpak Yĕsu la ochok khaw a hngat pai hnih Pherasai awlaw Mosi käh thung choktih khäl äiya om ula ini mäi hüt. Anih Galil mräh a käh ayapyap nam awlaw Yudia a käh nam la Yĕlusalem mräh känäng ini lo hüt. Opah tih awpawi poh a laih koong Hnadaga käh thayung Yĕsu ängtu mäi hüt. Äi khaw a pochongak hnih pawtaw khälla chetei hnängah tih pawtaw hngata phawkäng kün ula ini lo. Äi khälla im duka chi ula Yĕsu hmawi hmawh a ini tawkaih saw koong ini sot hnäh. Äini khrawng jiji koong uduka ini vawngaih saw lawm bünei u. Äi khaw a anih tĕh khrung äng ini kawi, awlaw tĕh khrung hong ula äi chetei hnängah tih pawtaw a ip dün lah ilah khrawng khäl laiya Yĕsu hmawi hmawh a ini khom. Yĕsu la anih käh yum hmu bala che tak hnäh, “Khanbawn o, nang käh ngulai kheni hläh hmuyeyal däk.” Äi khaw a Mosi käh thung choktih la pherasai khäl ini lung lung äng ini kräuvei, “Hnadaga ming khrah tih ni khrawng che u äm? Hnadaga hngat battih che ula ngulai känäng ähläh pekal hnäng äm?” Yĕsu la anih ini lung lung äng ini kräuvei saw awhmawt ni, anih a iya nini lung dukäng nini tarayei saw äm ting tak? Mawng hawuvei pha äm, “Nang ngulai hläh nübüneyal däk tingei ‘hiyah khaw’ thou tila nokho äng cheteiyal hnäh tingei? Luhchaw Chaw la ngulai ähläh pekal hngängaih saw pängei khäh ting anih la hmawt ong.” Ani la chetei hnängah tih a tak, “Nang thou al tila phawk laweiyal tila ima chetal.” Äi äng tutu äi chetei hnängah tih thou bala phawk hlokeyal bala Hnadaga phiyaw hlänga im pawh a chetal. Äi khaw a ükütni ini maw chak. Äiche Hnadaga phiyaw ula tühnüpa uthu brasaw kini hmuh ting hawu ula mawmawt ini ke. Äi pänäng Yĕsu apranga thok bala phawndaw kok dün laa phawndaw koktih Lebi a hmuh ni kei kän lo hnäh ting tak. Äi kheu yawk ni ükütni tawchak hüt bala Ani hnung kän tämei. Äi pänäng Lebi la ani ima Yĕsu koong päi poh. Äi khaw a phawndaw koktih la awbawng khrawng la anih ängtu ini ei ok hüt. Äi khaw a Pherasai la Mosi käh thung choktih khälla awpawi pi u koong Yĕsu tebeih khäla ini tak, nangnih phawndaw koktih la khrawng krak tih khäl äng iya utu nini eiok saw äm? Äi khaw a Yĕsu la anih a tak, optih la che to sotih hlüeiyah, äini opah tih khäla dä ühlü saw. Kei konghmuh sang khäl koong kolo saw hiyah, khrawng krak khäl koong kolo saw dä. Iyaäm anih la ini lung ini hleyeyalaih saw koong. Äi khaw a khrawng hngat pai hnih la Yĕsu a ini tak, “Yohan käh tebeih tih khälla ümüt mäi ula suh ini tongeichi awlaw Pherasai khäl käh tebeih khälla ha äi huih kawchawng chawng ini poh ei chi. Äini nang tebeih tih khälla ini eiok chi.” Yĕsu la anih a tak, “Omnaweitih pawtaw mäi khaw a ani ängtu mäitih gawrba khäla ümüt ini tawk hnäng ei? Taw hnäng ti. Äini anih känäng omnaweitih a lawk hmuyeyalaih saw ikhin lo tun. Äi khaw a anih ümüt ini mäiyei.” Yĕsu la awlaw anih khäka ni pümchut kheu tak, “Hngat la ha che awat tha tai bala awat phem äng pha a lah. Äidä napha al hiche thatih ha atakalai. Äi phem tih wat ha atha äng tueiyal thaw hnawh. Hngat la ha che grĕp hawng äng käh alak tha awnvun bung phem äng thawn phu u. Ini thawn khaw che, äi awnvun bung tak bala grĕp hawng obo ai, awnvun bung ha akrakai. Äini grĕp hawng äng käh alak tha che, awnvun bung tha äng nawthawn lah. Awlaw grĕp hawng äng käh alak phem otih la che atha tih hlüeiyah. Iyaäm äi alak phem otih la alak phem dä pawi ting hawu.” Hnüpak khaw a Yudi khäl käh düm khomhnüp äng Yĕsu püm khang lai äng chetei, äi khaw a ani tebeih khälla püm käi sik ula ini kutäng yun ula ini ei. Äi hmu ula pherasai hngat pai hnih la ini tak, düm khomhnüpa bi tawnchu saw bi iya nini bi äm? Nangnih iya Yudi khäl käh düm khomhnüp äng nini bisaw äm? Yĕsu la anih a krawnak takal, Dawut la äphäutih khäl buh ini düei khaw a, anih la i ini poh ei äm? Nangnih äi phawt chu ei? Ani Hnadaga rosi dün ima vawng bala pujawtih hawuvah hngat la ha ei hnäng u saw asanh chang ha law bala äphäutih a pek. Yĕsu la anih a krawnak tak, “Luhchaw Chaw che Yudi khäl käh düm khomhnüp äng käh Boi.” Awlaw Yudi khäl käh düm khomhnüpa ani la, Yudi ini lumeidün ima chet bala a chok. Äiya set pawh kut hitih khrawng hngat mäi hüt. Awlaw Mosi käh thung choktih la Pherasai khälla Yudi khäl käh düm khomhnüp äng Yĕsu la awpawi poh a lei, äi ini sotaih koong khiyong ula ini mäi. Ani ming äng epret ini bünaih khiyang koong. Äini Ani la anih käh tawk hmawt khäh. Äi koong äi ukut hitih a thou tila alaya jae ting tak. Äi khaw a ukut hitih thou bala alaiya ja. Äi khaw a Yĕsu la anih a tak, “Nangnih a kheu hngat kanang hiyeih, Yudi khäl käh düm khomhnüpa i nopoh aih lah saw thung mäi äm? Awpawi haei awlaw ese haei? Khrawng sawk nehenalaih saw pawi ei bahi nutukaih saw pawi ei?” Äi pänäng Yĕsu la anih pawh a soei bala ukut hitih a tak, “Nukut odowei.” Ani la ukut dowei ni awpawyal. Äi khaw a anih kheni ini manäng ini mäi. Yĕsu a iba ini poh ai äm ting hngat la hngat ini täng bawng. Hnüpak khaw a Yĕsu suh tongeiyeih saw koong khuyunga chet. Awlaw Hnadaga khäka suh tongei bala awyawn tün mäi. Äi pänäng khowani, Ani la etebeih khäl kheni a Ani khäka apanei. Awlaw anih duk känäng pochong lei hnih khrawng heh lei bala anih kheni a bi awp. Anih ming che, Simon ting ua Yĕsu la panei äm, ani ming Pitol ting thawnal. Awlaw Simon nawu Endu, awlaw Yakub, Yohan, Philip awlaw Bawrthawlawmawi, Mathi, Thoma, Alphaya chaw Yakub, awlaw Simon (Ani che pre khet nawtih sawng äng käh pochongak mäi hüt). Yakub chaw Yuda, awlaw Ikariyo Yuda, ani hnung sum äng uyum khrakei tih a thänei. Äi pänäng Yĕsu etebeih tih ängtu khuyung kän komal bala ala ngi düna ja. Äiya etebeih tih äng ini chumei düna Yudia, Yĕlusalem awlaw mret kawma käh mräh paihnih Tayal la Sidon ting ini taksaw känäng khrawng awbawng ini lo. Yĕsu kheu ini khinaih koong awlaw lawga känäng ini pawiyalaih koong anih Ani khäka ini lo. Khrawse äng dukhah büntih khäl ini pawyal. Äi khaw a khrawng kheni la Ani a ini sinaih khiyang hüt. Iyaäm Ani thayung äng khrawng kheni ini pawyal chak. Äi pänäng Yĕsu la etebeih tih pawh a soei bala che awhawu, “Sanglaisu khäl che pisih mawh. Iyaäm Mawng Hnadaga pre che nangnih käh dä. Düei bala mäitih pisih mawh, iyaäm nangnih nini hngawh ai. Tua kaptih khäl pisih mawh, iyaäm anih ini nuiyalai.” “Awlaw Luhchaw Chaw koong nangnih a khrawng khälla anang mum äm, ayap känäng anang thoh äm, anang keleih äm, awlaw nangnih ming yawula chilh tui ini soh äm, nangnih ming äng ese ini hawu äm, äi khaw a nangnih piyaw khäl. Äi khin äng nangnih piyaw chula pĕkei bäichu. Iyaäm nangnih koong hawna awmawn tawn saw awpiyaw len mäi khäh. Äi khrawng khäl nuchen pawsawk khälla ha Hnadaga sidawng hiyawktih khäl lukhrunga äi huih ini poh hüt khäh.” Äini mäichawtih khäl o, “Nangnih koong khrusaw olo, äiti thän ha nangnih nini piyaw khäh. Hngawh tih khälo, nangnih koong kehse saw olo tun, nangnih nini düeyei. Nuitih khäl o, nangnih koong dukhah olo tun, nangnih kronggrah chu la nini kapalai. Khrawng la nangnih a anang phiyaw khaw a nini khruai. Äi khrawng khäl nuchen pawsawk khälla ha pawyahtih pujawtih khäla ini phiyaw hüt.” Äini Kei kheu khintih khäla kanang tak, “Nangnih nini lansu khäla khetnaw bäichu awlaw anang mumtih a awpawi po bäichu. Ula nangnih a anang sayei äm, anih a pisih pek bäichu. Awlaw nangnih a ula ese anang poh äm, anih koong suh tong pek bäichu. Losulapei hngat pawh beng anang bĕh hi, ani a awlaw hngat pawh beng ha täuveiyal bäichu. Ula nang käh ilh chaw lawkei äm, ani a nang käh bayu ha pekal bäi. Ula nang khäka anang hawuvei äm, ani a pekbäi. Losulapei nang käh vawn ini lawkei hi, krawnak hawuveiyalaichu. Khrawng känäng nangnih ilup akhrang nini büneyeih khiyang äm, nangnih ha anih äng äi lup khrang poei bäichu. Ula nangnih a anang khet nawkäm, äiya nangnih nini khet nawk hi, äi äng i äkiyä anang tawngei äm? Krak khälla ha äi huih che ini khetnawk khäh. Ula nangnih a kenju anang poh äm, äi khäla nangnih kenju nini poh hi, äi äng i äkiyä mäi äm? Krak tih khälla ha äi huih ini poh ei khäh. Nübüneyalaih saw nakhahnei saw khäka jiji dä upu nepek hi, äi äng i äkiyä mäi äm? Khrawng krak khälla ha ini büneyalaih saw khah nei ula, hngat la hngat ini puei khäh. Äini nangnih käh lansu khäla khetnaw bäichu, awlaw anih a kenju po bäichu. Iha nübüneyalaih saw ümah pak pu bäichu. Äihi nang koong elen saw khawh ämäyei awlaw nangnih elensum Hnadaga chaw nini thäneyei. Anih käh ekhet che äkiyä mäyahtih koong awlaw soutih koong ha. Nangnih Paw ihuih ekhet mawh äm, nangnih ha äi huih ekhet mawh thänei khäl.” “Khrawng käh epret mawnai chu, Hnadaga la ha nangnih käh epret mawn hnawh. Khrawng khäla dam bünei tawn poaichu. Hnadaga la ha nangnih a dam bünei tawn anang poh hnawh. Khrawnga ähläh pek khäl, äihi nangnih ha ähläh nini büneyalai. Pek khäl, äihi Hnadaga la nangnih a ha anang pekai. Nangnih nini peksaw thawka Hnadaga la hno hnom bala priu hmawna, awbawng nangnih a ha anang pekalai. Iyaäm nangnih ihuih nini tün pekäm, äi huih nangnih a ha tünpek hmueyalai. Äi pänäng Ani la pümchut hngat anih a hawu pek, mik mütih la mikmü a lawm dawn hnängei? Äihi a hnih vawm äng kraw aih häih ei? Etebeih che choktih thawka hlüngah, äini uchum chak saw prengiya büneitih che ani käh choktih lup thäneyalai. Nang nawu mik äng obo mäi saw che nuhmuh khäh, nang mik äng obo mäisaw iba hmueiti saw äm? Nimikäng käh obo mäi saw hmueiti saw huih ni, nang nata nawu a iba natak äm, nawu o, lo kei nimik äng käh obo kini louh walaih. Nang mikäng obo mäi saw nang iba hmueiti äm? Lupsongeitih o, nang ayang nimikäng käh obo louweyal, äihi nang nata naw nawu mikäng käh obo mäi saw nolouh walaih saw koong sanh sanh nuhmu ai. Äi koong thing pawi äng pawyahtih theih theyah awlaw pawyahtih thing äng pawitih theih theyah. Etheih so tila thing naw hmawt, khrawng la ihling mawh chompo känäng khĕu theih sikei u hiyah thän täu chompo känäng grĕp lawei u. Khrawng pawi la ani lung känäng kheu pawi thoh, awlaw pawyahtih khrawng la ani lung känäng pawyah saw kheu dä othoh. Khrawng lung äng i luih bala mäi äm, äi huih awkaw känäng ha thok. Iya Kei a nangnih o koboi, o koboi, ting anang panei saw äm. Äini Kei ibang kawhawu äm, äiche poh chu? U Kei khäka olo äm, Kei kheu khin äm awlaw ngei äm, äiche ihuih khrawng äm, Kei nangnih a kanang takai khin khäl. Ula im sawk khaw a vawm thuk chou bala lung khrung äng täng sät äm, äi khrawng äng dä ani tusaw. Äihi tuilen ni, äi im äng läng lo bala äi im äng a bopei. Äini äi im che hlün hnängah. Iyaäm äi im chou che chang hüt. Äini ula Kei kheu khin bala sumeyah pak mäi äm, äi khrawng che dek khrung äng täng sätah pak im sawkei tih huih khrawng hngat äng dä utu saw. Äidä tuilen bala äi im äng a bopei ni, äi im che yap bala akrakal chak.” Yĕsu la khintih khrawng khäla hawu pek pänäng Ani Kawpalnahum mräh a vawng. Äiya Rom soloi gong pochongak käh hngasaw hngat thasa lawga khomei bala dü aih saw huih thänei hüt. Ni hngasaw a soloi gong la thasa ekhet nawk hüt. Ani la Yĕsu sidawng yawk ni, ani hngasaw a awpawi po pekal hmawna Yudi khäl käh elenchaw pochong hnih thuma Yĕsu khäka teh. Äi elen khäl Yĕsu khäka lo ula Ani a khawh ei ula ini tak, “Ni soloi gong la Nang käh kubawm büneyeih saw tawn. Iyaäm ani la Yudi khäla ekhet nawk awlaw Yudi ini lumeidün im ani la dä khrawng poh pek saw.” Äi khaw a anih ängtu Yĕsu chet. Ani äi im kentäh aphaw ni Rom soloi gong la ani phäutih a sidawng pek bala che taksawk, “Boi o, dukhah po tiyeiti. Iyaäm kei im teh khrung kawla Nang noloaih saw kei tawn nga. Awlaw kei ha nang khäka kolo aih saw kawtawn ting kupuma khineinga. Nang nomong khokäng nawhawu hi, kei hngasaw pawyalaih saw dä. Kei kawhawmt khäh, iyaäm kei ha kei dämäng käh elenchaw sitha äng kämäi lah awlaw kei käh soloi khälla ha kei kheu ini khin lah. Kei chete ting katak hi anih ini chet awlaw lo ting katak hi, anih ini lo. Awlaw kei hngasaw khäla ha ni poh e ting katak hi, anih la ini poh.” Ni kheu yaw bala Yĕsu awmaw. Yĕsu hnung äng lo hütih khrawng khäl pawta hleh ei bala Yĕsu la tak, “Kei nangnih a kanang tak, Isawlael khäl dukäng ni huih uyum len tih kei hmu hawm nga.” Soloi gong la teh hüt saw khrawng khäl soloi gong ima ini khrawnal ni, äi hngasaw pawyal saw ini hmu al. Äi pänäng Yĕsu Nayin ting ini taksaw mräh pawta chet. Ani tebeih khäl awlaw che awngawh khrawng khäl ha Ani äng tutu ini chet. Ani mräh tamkha a aphaw khaw a khrawng khälla dütih khrawng hngata phula ini chih hüt saw. Äi dütih che hmeinu käh hngat pätpät chaw mäi hüt. Nama käh awbawng khrawng äi hmeinu ängtu ini mäi hüt. Äi hmeinu a hmu bala Boi Yĕsu la jenei bala che tak, “Kapaiti.” Äi pänäng Yĕsu ekena chet bala tungkhong ibin. Awlaw oyok küntih khäl ha ini düm. Äi khaw a Yĕsu la tak, “Chongkrawng o, nanga kini tak thouwal.” Äi khaw a äi dütih khrawng thou bala omal awlaw äkräuwal. Äidä Yĕsu la unu a epekal. Ni hmu ula khrawng kheni lung äng kehken thänei. Anih la Hnadaga phiyaw ula ini hawu, “Nangkei dukäng Hnadaga sidawng hiyawktih gong hngat lo.” Äi khrawng khälla awlaw ini hawu, “Hnadaga la Ani käh khrawng khäla kuaih koong olo saw.” Yĕsu käh ni sidawng khäl Yudia awlaw che ekena käh la kheni a khrihyei chak. Tuilüh pektih Yohan käh tebeih khälla ni kheu khäl Yohan a ini hawu pekal. Äi koong Yohan la ani käh tebeih paihnih a panei. Awlaw a hnih a Boi khäka te bala che ni huih ihni hiyeih saw tak, “Loaih saw kheu mäi hüttih khrawng che nangei? Hiyah khaw keinih awhngaw koong kini chongaih saw ei?” Äi khrawng häih Yĕsu khäka lo häih la ihni tak, “Tuilüh pektih Yohan la Nanga kanang hiyeih koong kei hnih a khrawng teh saw, ‘Loaih saw kheu mäi hüttih äi khrawng che nangei? Hiyah khaw keinih awhngaw koong kini chongaih sawei?’” Äi khaw a Yĕsu la awbawng khrawng khäla lawga känäng awlaw thasa waih känäng awpawi poh al awlaw che khrawse la mawn tih khrawng khäla ha awpawi poh al. Awlaw awbawng mikmü tih khrawng khälla ini hmuh eiyalaih koong awpawi poh al. Äi khaw a Ani la anih a tak, “Nangnih i nini hmuh äm awlaw nini yawkäm äi khäl chet chula Yohan a hawu pekal khäl. Mik müla uhmuh eiyal, chektih cheteal, unu lawga asanh nal, hnaw pawng la yawkal, dütih hengal awlaw sanglaisu khälla sidawng pawi ini yawk lah. Mawng khrawng la Kei a üüt nawah äm, äi khrawnga Hnadaga la pisih pekai.” Yohan käh tebeih pochong hnih ihni chetal pänäng Yĕsu la khrawng khäla Yohan kheu awhawu pek, “Nangnih täu lungchinga i nini hmuh hütäm? Khri äng chakei saw kong thing ei? Hiyah khaw i sota nini chet hüt saw äm? Liuh liuhwa awat wattih khrawnga sota nini chet saw ei? Äi huih khawktih awat wattih awlaw awpiyaw äng mäitih khrawng che mawng ima dä ini mäi saw. Bakhaw nangnih i sota nini chet hüt saw äm? Hngat pujawtih gonga ei? Ihi khäh, kei nangnih a kanang tak, nangnih u a nini hmuh äm, äiche Hnadaga sidawng hiyawktih thawka ha len khäh. Äi khrawng che Yohan, ani kheu kiyam äng ni huih yoei hüt saw, ‘So, kei nang khawngah hngat sidawng hiyawktih keteh tun. Äila nang khawngah chet bala nang käh lawm anang poh pekai.’” Kei nangnih a kanang tak, “Khrawng khäl dukäng hngat ha che Yohan thawka len tih mäi u. Äini Mawng Hnadaga pre a üküt thawka lektih bang Yohan thawka len khäh.” Awbawng khrawng khäl awlaw phawndaw koktih khälla ha Yohan khäka tuilüh ini lawkei. Iyaäm Yĕsu käh kheu ini yawk ni anih la ngulai ähläh hawuveyal ula ini hawu, Hnadaga käh lawm dä ihisaw lawm. Äini Pherasai la Mosi käh thung choktih khäl Yohan khäka lo ula tuilüh ini lawkeiyeih saw hlüei u. Iyaäm anih la Hnadaga käh sitha hlüei u. Yĕsu la awlaw hawu, “Bakhaw ni katäng käh khrawng khäla Kei i äng kuchutaih saw äm? Anih i lupäm? Anih che jia om ula mäitih sämäichaw huih dä. Anih la hngat la hngata panei ula ini hawu chi, ‘Keinih nangnih koong krei kini tum äini nangnih lawm chu. Keinih dukhah äng käh awi kini awi äini nangnih kap chu.’ Tuilüh pektih Yohan lo bala ha eiyah saw la awlaw alak oah koong ani a khrawse la mawn ting nini hawu. Awlaw Luhchaw Chaw lo bala che eei, ook ni nangnih nini hawu, ‘So ni khrawng che philu, moitih, phawndaw koktih awlaw ngulaisu khäl käh phäu.’ Äini ngen äng chet choneitih käh bikawi la ngen dä achang ting awdawnai.” Hnüpak khaw a Pherasai hngat la Yĕsu a eei okaih saw koong ani ima panei. Äi khaw a Yĕsu äi ima chet bala eei ok. Äi mräh a ngulaisu hmutaw hngat mäi hüt. Ӓi Pherasai ima Yĕsu ei oka lo ting yawk ni, äi hmutaw la lung äng käh bung bok äng otih si lo bala olo. Äi pänäng Yĕsu hnunga okho khäka chet bala aja. Awlaw kappe kappe imik khri äng Ani kho uhiyul. Äidä ani la ulusawm äng opotal. Awlaw Ani kho khrung hnawm bala äi otih si hmak. Yĕsu a ei okaih saw koong paneitih Pherasai la äi khäl hmu bala ulung dukäng tawk, “Ni khrawng dä Hnadaga sidawng hiyawktih thänei hi che, ani kho bin tih u äm awlaw ihuih hmutaw äm äi awhmawtai hü. Awlaw ni hmutaw ihuih ngulaisu äm äi hmawtai hü.” Yĕsu la äi Pherasai a tak, “Simon o, nanga kini takaih saw kheu mäi khäh.” Simon la takal, “Choktih o hawuve.” Yĕsu la hawu, “Khrawng pai hnih la awmawn upu pektih känäng awmawn upu ihni lawkei. Hngat la hen poisa khra hngaw awlaw hngat la hĕn poisa hngawgip. Äini äi pai hnih la awmawn thungal hnäng häih saw koong upu pektih la ähläh al. Tua nangnih i nini khin äm, äi häih äng ula awmawn upu pektih a unung khet nawkai äm?” Simon la tak, “Kei che ni huih ka khanh, ula awmawn nung ähläh büneyal äm, äila unung khet nawkai.” Yĕsu la hawu, “Nang ihisaw nawhawu.” Äi pänäng Yĕsu la äi hmutaw pawta hleh ei bala Simona tak, “Nang ni hmutaw a nu hmuh ei? Kei nang ima kolo saw nang kei a kokho koboh eiyeih phüh tui bang epekti. Äini ni hmutaw la imik khri äng Kei kho uhiyul bala ani sawm äng opotal. Nang Kei a awhnawm ti. Äini kei kolo saw khaw thouh ani la kei kho hnawm bala che mäi. Nang kei luki äng olip si ahmakti, äini nila Kei kho äng ootih si läi. Kei nanga kini tak, ani a ngulai awbawng mäi thän hläh büneyal däk. Iyaäm ani la awbawng ekhet nawk saw awdawnei. Äini ula bitchaw ähläh bünei äm, äila bitchaw dä ekhet dawnei saw.” Äi pänäng Yĕsu la äi hmutaw a tak, “Nang käh ngulai hläh hmueyal.” Ani ängtu äiya omtih awhngaw khrawng khäl hngat la hngat ini kräuwei, “Ngulai bang ähläh pekal hnäng tih niche u äm.” Äini Yĕsu la äi hmutaw a tak, “Nang käh yumla nanga ähläh ini pekal. Nang jelkhiyamsa äng chetal hnäh.” Äi pänäng Yĕsu la nam täng nam täng awlaw mräh täng mräh täng chonei bala Mawng Hnadaga pre äng käh sidawng pawi hiyawk hnäh. Ani ängtu pochong lei hnih tebeih khäl ha ini mäi. Awlaw äiya ajap jap khrawse la lawga känäng pawiyal tih hmutaw hngat paihnih ini mäi hüt. Äi khäl äng Makdalin Meri ha mäi. Ni Meri känäng khrawse paiseh thoh al hmuei hüt saw. Mawng Herawt käh im la kähkän sotih Kuza phiya Yohana ängtu Susana la awhngaw hmutaw khäl ha ini mäi hüt. Ni hmutaw khälla ibang ini tawkei äm äi äng Yĕsu la Ani tebeih khäla ini pek sot chi. Äi khaw a ayapyap nam känäng awbawng khrawng Yĕsu kh‍äka lo ula ini lumei. Äidä Yĕsu la ni pümchaw awhawu pek. “Lai bitih hngat ichih phulaih koong echet. Ani la ichih phulh khaw a ichih bitchaw lawm kena kraw. Äidä khrawng la ini lih al awlaw haw khäl lo ula ini eiyal. Awvawng chih che lung mäi saw laiya kraw. Äi lung äng krawtih chih khäl chät ni tui büneyah saw koong uyungpa hulal. Awvawng chih che ihling khak duka kraw. Ihling khak laa ichih chät saw khäl kheni kepnaw bala tawk. Awlaw awvawng chih che dek pawi dün laa kraw bala chät. Äi chät saw chih känäng awkrawn khra ak etheih thänei.” Ni khäl hawu pänäng Yĕsu la athak hawu, “Ua bang khinaih saw awhnaw mäi äm, äi khrawng la khin seh.” Ani tebeih khälla ni pümchaw äng käh krong iäm ting Yĕsu a ini hi. Äi khaw a Yĕsu la tak, “Mawng Hnadaga pre äng käh uthupei saw ngen khäl nangnih nini hmawtaih koong awbawng khin pek hmuei. Äini awvawng khrawng khäla che pümchut äng dä hawu pek hmuei saw. Äi koong anih la ini sot thän hmu u saw huih awlaw ini khin thän ha yawchu u saw huih ini mäi.” “Ni pümchut äng kawhawuvaih khiyang saw che ni, ichih che Hnadaga käh kheu. Lawm kena kraw saw chih che ni huih khrawng be hawu hmuei saw. Anih la Hnadaga kheu ini khin äini mannat lo bala anih lung känäng Hnadaga kheu khäl hang hang awlawkeyal. Anih la yumei hnäng u koong ähläh büneyal u. Lung mawh lai äng kraw saw chih che ni huih khrawng be hawu hmuei saw. Anih Hnadaga kheu khin ula awpiyaw äng ini lawkei äini anih a uyungpa mäyah. Anih la krawak koong dä ini yumei. Äidä anih chawmsi äng ini kraw hi ini kakeyal. Ihling khak dukäng kraw saw chih che ni huih khrawng be hawu hmuei saw. Anih la Hnadaga kheu ini khin äini im thong äng käh tawk, kähkän awlaw awpiyaw saw la anih a kepnaw bala tawk chak. Äi koong anih käh theih che chang hnängah. Äini dek pawiya kraw saw chih che ni huih khrawng be hawu hmuei saw. Anih la u lung pawi äng awlaw lung prongh äng äi Hnadaga kheu khin ula mama ini tawkei. Awlaw äi äng mama mäi ula anih sawk äng awbawng etheih thei. Hngat la ha simiya choi bala bol äng kün bala tawah awlaw ip dün kawla ha tawah. Ani la simiya tawk düna dä tawk saw. Iyaäm uduka u bang vawng äm äi khrawng khela awa bünei hmawna. Iha dawngah pak künei bala krängak ha mäyah. Awlaw iha hmawtaih ti saw uthupei saw mäyah. I huih nini yawk äm äi krong äng nini lung khrawei bäichu. Iyaäm u a mäi äm, äiya awlaw pek hmueyei. Awlaw ua mäyah äm ani a ämäi ting ulung äng khinei saw ha ani känäng lawk hmueyelai.” Äi pänäng Yĕsu nu la ani nawutih khäl Yĕsu khäka ini lo, äini khrawng awbawng ini mäi saw koong Ani äng khomei hnäng u. Äi khaw a khrawng hngat la Ani a tak, “Nunu la naw nawu tih Nang äng khomeyei äng apranga ja ula ini mäi khäh.” Äidä Yĕsu la khrawng khäla tak, “Ula Boi Hnadaga kheu khin äm awlaw äi huih bi kawi äm, äi khäl dä Kei nu la kawnawu.” Hnüpak khaw a Yĕsu la Ani tebeih tih long hngat äng ini kawi. Ani la etebeih tih a tak, “Che nangkei mret chu pawt jala chetäng khä.” Äiche etebeih tih la long ini hläh. Long äng chetpe chetpe Yĕsu long äng iip. Äi khaw a täk ting mret äng khri la kho hnäkei awlaw long duka tui luih chak. Äi äng anih mawmawt phiäng ini kraw. Anih Yĕsu khäka chet ula Ani a thouh ula ini tak, “Choktih o, Choktih o, keinih kini dünu.” Äi khaw a Yĕsu thou bala khri la khoa ĕhĕkei. Äi äng tutu ni khri la kho dümal awlaw ükütni jelal chak. Ani la etebeih khäla tak, “Nangnih käh yum mawnga äm?” Tebeih khälla ke ula awlaw maw ula hngat la hngat ini täng bawng, “Niche u äm, khri la kho la ha che Ani kheu ini khin saw?” Äi pänäng Yĕsu la etebeih tih guda kawt ula Galil pre lekchaw känäng Gerasin pawta käh laa ini chet. Ani long känäng kawma komal khaw a äi nama käh khrawng hngat Ani khäka olo. Äi khrawng äng awbawng khrawse mäi hüt. Ani la awbawng hnüp awat watah pak mäi hüt awlaw ima mäiya pak cho a mäi hüt. Yĕsu a hmuh ni äi khrawng hek bala ani hmawi mawh a bok bala hawu, “Üküt thawka ühlüng sumtih Hnadaga chaw Yĕsu, kei äng nanga i bi mäi saw äm? Keiya ekhetäng dukhah epekaiti.” Yĕsu la äi khrawse a ani kantha känäng thokalaih saw tak koong äi khrawng la ni kheu hawu saw. Khrawse la äi khrawnga awkrawn awkrawn mawn bala tawk hüt. Ani a thi siyol la jäi äng khon ula ini tawk thän khrawse la asah al chak chi. Khrawng khälla ani a chong ula ini tawk chi thän, khrawse la ani a täu lung chinga ichih al chi. Äi khaw a Yĕsu la ani a ihi, “Nang ming i äm?” Ani la hawuvei, “Soloi sawng.” Iyaäm ani kantha dukäng awbawng khrawse mäi hüt. Äidä khrawse khälla anih a thuktih vawm äng hiyänaih hiyah saw Yĕsu khäka khawh ei ula ini tak. Äi khina äi laa wok sawng ini chonei tun hüt. Äidä khrawse khälla wok sawng duka ini vawngaih hnäng saw koong Yĕsu a ini hnih ei. Yĕsu la anih a ini vawngaih hnäng saw tak. Yĕsu la anih a tak pänäng äi khrawse khäl thokal ula che wok duka ana vawngal. Äi pänäng wok khäl mret kawmäng chon ula tui äng nek ula ini düal chak. Wok kiyongtih khälla ni khäl hmu ula ini chonal. Äidä anih la nama awlaw äi kena käh la khäl khenia ni sidawng ini hawu pekal. I thänei saw äm äi khäl ini sotaih koong khrawng khäl ini thok. Anih Yĕsu khäka ini lo ni khrawse la mawn saw khrawng awat watal bala che awpawi lung äng Yĕsu kho chouwa om bala mäi saw ini hmuh. Äi khäl hmu ula che anih mawt ini ke. Ni khrawng awpawiyal saw khrang hmutih khälla äi lotih khrawng khäl khäka iba kawla pawiyal saw äm äi ini hawupekal. Äi khaw a Gerasina käh khrawng kheni la Yĕsu a anih känäng chetalaih saw koong khawh ei ula ini tak. Iyaäm anih mawt ini ke hüt. Äidä Yĕsu krawnalaih saw koong long äng kawiyal. Äi khaw a, khrawse thoh hmueiyal tih khrawng la Yĕsu ängtu chetaih hnäng saw koong ihnih ei. Äini Yĕsu la ani a ni kheu ta bala ima teh al, “Nang ima chetal tila Hnadaga la nang koong i bi bisaw äm, äi khrawnga a hawu pek.” Äi khrawng nama chetal bala Yĕsu la ani koong i hiyawh bi len bisaw äm äi hang hang laa hawu bala chonei. Yĕsu krawnal pänäng äiya käh khrawng khälla awpiyaw lung äng Yĕsu a ini lawkei, iyaäm anih la Yĕsu a chong ula ini mäi hüt. Äi pänäng Jairas ting mingei nawtih Yudi ini lumeidün ima käh elenchaw hngat Yĕsu khäka olo. Ani Yĕsu kho chouwa bok bala Yĕsu a ani ima loaih saw koong i hnih ei. Iyaäm kumlei hnih mäi däktih ani käh hngat chaw pätpät chuhnu düaih saw huih thänei. Yĕsu äiya chet khaw a khrawng khäl Ani pawta chuh ei chak ula ini netei. Äi khrawng khäl chuh dukäng hmutaw hngat kumlei hnih daraih thi bo saw lawga äng krawtih hmutaw hngat mäi hüt. Äi hmutaw la tosotih khäl hnuäng ani käh awmawn kheni sum chak. Äini ani a tosotih hngat la ha pawiyal sawk hnäng hüt u. Ani Yĕsu hnung pawt känäng lo bala Yĕsu käh ilh chaw phai sin. Äi äng tutu thi bo saw dümal. Äi khaw a Yĕsu la ihi, “Ula Kei a isin saw äm?” Hang hang ini chal ni, Pitol awlaw ani phäutih khälla Yĕsu a ini tak, “Boi o, khrawng khäl ini tunei saw äng Nanga anang hman phih saw dä.” Äini Yĕsu la hawu, “Hngat hiyah khaw hngat la Kei a isin khäh. Iyaäm Kei kantha känäng tha thok saw Kei kipiyei.” Äi hmutaw la mawn hmuei saw hmawtei ni, ani letleta thänei bala Yĕsu hmawi hmawh a bok. Äi pänäng ani la Yĕsu a iya sin saw äm, awlaw iba kawla awpawyal saw äm hang hang hmawi hmawh a Yĕsu a hawu pek. Äi khaw a Yĕsu la äi hmutaw a tak, “Nang käh yum la nanga awpawi ini poh al. Nanga jelkhiyamsa mäiseh.” Yĕsu kräupe tun khaw a Jairas im känäng khrawng hngat lo bala hawu, “Nang chuhnu dü däk! Boi a dukhah pektiyei ti.” Ni Jalus che Yudi ini lumeidün ima käh elenchaw hngat mäi hüt. Yĕsu la ni kheu yaw bala che Jalus a tak, “Ke ei ti. Yum dä yumei, ani pawiyalaih saw dä.” Yĕsu äi ima awphaw ni Pitol, Yakub, Yohan awlaw hmutaw chaw nupaw batti hngata ha im duka Yĕsu la vawng sawkah. Äi düna awbawng khrawng la hmutaw chaw koong dukhah ini piyei awlaw ini kap. Yĕsu la anih a tak, “Kaptiyeichu, iyaäm ani dü ah, ani i ip saw dä.” Ani kheu yaw ula khrawng khäl ini nui. Iyaäm äi hmutaw chaw düsaw anih la ini hmawt khäh. Yĕsu la äi hmutaw chaw kut sin bala che panei hnäh, “Boh su o, thou.” Äi äng tutu ani khraw loal, ani thou al bala che aja. Yĕsu la anih a tak, “Ani a bit chaw ei saw pekal khäl.” Hmutaw nupaw mawt ihni maw chak. Äini Yĕsu la ni äthänei saw kheu khäl hngata ha hawu pekaih u saw koong anih a tak. Äi pänäng Yĕsu la pochong lei hnih tebeih khäla lum. Ani la khrawse khäl thoh alaih saw la lawga khäl awpawi ini poh alaih hnäng saw thayung anih a pek. Äi pänäng Mawng Hnadaga pre sidawng ini hiyawkaih saw la lawgase khäla awpawi ini poh a laih koong anih a teh. Ani la anih a tak, “Ni bi äng khili nini komei khaw a kompum, khoila, eisaw, awmawn awlaw awat saklai nini konäng iha chieiyei chu. Nini kawi dün ima käh nam hlät chula loal chu saw sawgraw äi ima mäi bäichu. Awlaw khrawng khälla dä nangnih a anang laweiyah khaw, anih nam hlät chula nini chetal khaw a, anih ming äng sawksi nini thokaih koong, nini kho äng käh de hnui phawpeyal khäl bäichu.” Äidä Yĕsu tebeih khäl nam täng nam täng chet ula sidawng pawi ini hiyawk awlaw ätän täna khrawng khäla lawga känäng awpawi ini poh al. Galil mräh khiyuptih Herawt la Yĕsu la ibang bi äm äi sidawng kheni yawk. Äini ani käh awtawk tum. Iyaäm hngat pai hnih la tuilüh pektih Yohan düsaw känäng thouwal däk ting ini hawu. Üküt küt la Elija la adawnei saw ting ini hawu. Awlaw üküt küt la Hnadaga sidawng hiyawktih känäng käh hngat düsaw känäng othowal saw ting ini hawu. Äini Herawt la hawu, “Kei dä Yohan luki bängtih. Bahi kei kawyawk saw khrawng che u äm?” Äi koong Herawt la Yĕsu a uhmuh aih khiyang koong ohno. Teh hmueitih khäl ini krawnal pänäng i aw ini bi äm äi khäl kheni Yĕsu a ini hawu pekal. Äidä Yĕsu la Ani tebeih khäla Betsida mräh a chih phuinawk. Äini Yĕsu chetsaw sidawng khrawng khälla ini hmawt ni, Ani hnung hnung äng ini chet. Ani la äi khrawng khäla lawkei. Äidä Mawng Hnadaga pre sidawng anih a chok awlaw lawga mawh khäla awpawi poh al. Khoni kraw aih däk khaw a, tebeih pochong lei hnih Yĕsu khäka lo ula ini tak, “Ni khrawng khäl hläta le. Anih ekena käh nama chet ula eisaw la ini mäiyeih dün la suyei seh u. Iyaäm niche himsim sim la dä.” Yĕsu la tak, “Nangnih dä anih a eisaw pek khäl.” Etebeih tih la ini takal, “Keinih khäka ha pai hngaw la ngaw thek hnih dä mäi saw. Keinih chet ungala ühlü saw si eisaw khrawng khäl koong kini hleyeih saw Nang nühlü saw ei?” Äiya pawtaw thong hngaw ini mäi hüt. Yĕsu la krawnak etebeih khäla tak, “Echen chaw chi chenak äng hngaw gip chi ini omaih saw ta khäl.” Tebeih khälla äi huih ükütni a ini om. Yĕsu la ha hlem hngaw la ngaw thek hnih law bala hawn pre pawta so bala eisaw koong Hnadaga a äkiyä tawngei. Äi pänäng ha la ngaw khäl pil bala khrawng khäla ini pheih pekaih koong tebeih khäla awp. Khrawng khälla ini hän luihyak ini ei. Äidä tebeih khälla ha la ngaw pil khäl mratal saw ini lumal ni tong lei hnih thäneyal. Krängak Yĕsu la lung khiyang suh atongei awlaw etebeih tih khäl ha Ani ängtu ini mäi hüt. Ani la etebeih khäla ihi, “Khrawng khälla kei u äm ting ini hawu äm?” Etebeih dukäng ükütla tuilüh pektih Yohan awlaw ükütla Elija ting ini tak. Awvawng la Hnadaga sidawng hiyawktih khäl äng käh hngat düsaw känäng thouwal tih ting ini tak. Äi khaw Ani la anih a tak, “Bakhaw che nangnih Kei u ting anang khinäm?” Pitol la krawn bala hawu pek, “Hnadaga käh äi Krito.” Äi khaw a Yĕsu la anih a sidih pek awlaw hngata ha hawu pekaih u saw koong ana pek. Ani la tak, “Luhchaw Chaw la awbawng dukhah khawmaih lah saw. Awlaw gongsong khälla, pujawtih gong khälla, awlaw Mosi käh thung choktih khälla Ani üsüh äng hawn hnawh u saw. Anih la Ani a ini tukaih saw awlaw hnüp thum pänäng düsaw känäng thouwalaih saw.” Äidä Ani la hang hanga tak, “Losupei Kei hnung äng dä loaih khiyang hi, upum la hlüei saw huih biyah seh. Hnüpak khiyawnah upum käh krut kätei bala Kei hnung äng lo seh. Ulabang awsawk heneyeih khiyang äm, äila awsawk hiyumeyei. Äini ulabang Kei koong awsawk pekei äm, äila awsawk hiyumei hnawh. Iyaäm luhdül brat pängei bala ha ihisaw sawk dä hiyumei khaw äi äng ani a i amrat mäi saw äm? Losulapei Kei a awlaw Kei kheuwa hiyawh ei nawk hi, Luhchaw Chaw upum käh wachang äng awlaw Paw la asanh chang hawn natchaw khäl käh a wachang äng loal khaw a hiyawkei hnawh. Äini Kei nangnih a ihisaw kanang tak, niya ja bala mäitih awvawng che Mawng Hnadaga pre hmu lah u saw sawgraw dü hnawh u.” Ni kheu khäl hawu chak saw sapta ak pänäng Yĕsu suh tongeyeih saw koong Pitol, Yohan awlaw Yakub tih äng khuyung hngata ini chet. Suh tongei khina Yĕsu ulup waleu leuwa hleyal awlaw Ani wat che bok phong phonga thänei. Awlaw khrawng paihnih Ani ängtu ihni dawng. Äi khrawng paihnih che Mosi la Elija. Ahnih Yĕsu ängtu kräuvaih saw ihni chah. Ahnih la a wachang äng dawnei häih la Yĕsu chetalaih saw la Yĕlusalema düaih saw krong äng Anih ini kräuwei. Pitol la ani phäutih khäl äi khaw a ini ip. Äini anih ini khak ni Yĕsu käh wachang la äi khrawng paihnih a ja häih la ihni mäi saw ini hmuh. Äi khrawng paihnih Yĕsu hlät häih la ihni chetalaih khaw a Pitol la Yĕsu a tak, “Choktih o, nangkei niya ini mäiyeih saw mawt pawyei. Che, nangkei niya imchaw songthum saw äng khä. Hngat che nang koong awlaw hngat che Mosi koong awlaw hngat che Elija koong.” Äini Pitol la i hawu saw äm upum la yawei chu ah. Pitol la ni kheu khäl hawu tun khaw a khose bok hngat lo bala anih a akün. Anih a khose bok la akün ni ini ke chak. Äi khose bok duk känäng asam hngat la ni huih hawu, “Nidä Kei chaw, Kei keheh lei saw chaw. Ani kheu khin khäl.” Äi asam hngat la hawu saw päih pänäng Yĕsu jiji dä lung khiyang dawngal. Tebeih khälla äi khin äng ibang äiya ini hmuh äm hngata ha iha hawu pekal u. Äi hnüp pänäng Yĕsu la Ani tebeih khäl khuyung känäng ini komal khaw a, awbawng khrawng Ani äng ini khomei. Äi khaw a khrawng khäl duk känäng pochongak la hek bala hawu, “Choktih o, kei ekhet äng kini tak, kei chaw a bitchaw soeiye. Ani che kei käh hngat chaw pätpät chaw dä. Khrawse hngat la ani a mawn saw awlaw täkting ani ehek chi. Ni khrawse la ani a hlün chi khaw a awkaw känäng owon thokchi. Ani a asang hlätäl do khiyangah awlaw ani a awpawi chi taw ah. Kei Nang käh tebeih khäla ekhet äng äi khrawse ini thoh a laih saw katak hüt äini anih la hnäng u.” Yĕsu la krawn bala takal, “Uyum khrakeitih la pawyahtih lawm äng chetei tih khrawng khälo. Kei hnüp hiyawh nangnih ängtu kämäyeih saw äm awlaw nangnih kanang chuniyeih saw äm? Nang chaw niya lo.” Pawtaw chaw ekena olo ni khrawse la dekäng khrawk awlaw ani dekäng ähläwei. Äini Yĕsu la khrawse a ehekei ni äi pawtaw chaw pawiyal. Äidä ani paw khäka ani a awpal. Hnadaga käh tha hmu ula hang hang ni ini maw chak. Yĕsu la ibisaw khäl khrawng kheni la hmu ula ini maw khaw a tebeih khäla Ani la tak, “Kei ibang kanang takaih saw äm nini lung pekei chula mawt chaw khin khäl. Luhchaw Chaw äng lan poei ula lansu khäl kutäng ini awpai.” Äini ni hawu saw krong äng tebeih khälla iha hmawt u. Ni kheu khäl anih khäka thupei bala mäiyal. Tebeih khälla iha yawchu u, awlaw Yĕsu a ini hiyeih saw ha ini keh. Tebeih khäl dukäng elensum u äm ting kheu hawu ula Tebeih khäl ini chah lei. Yĕsu la anih lung äng käh tawk yawkchu ni sämäichaw hngata Ani kena aja sawk. Ani la anih a tak, “Ula ni sämäichaw a kei ming äng lawkei äm, äi khälla Kei a dä khrawng lawkei saw. Awlaw ula Kei a khrawng lawkei äm, Kei a etetih a dä anih la ini lawkei saw. Nangnih äng üküt thawka u elek chawsum äm, ani dä üküt thawka elensum.” Yohan la Yĕsu a tak, “Choktih o, pochongak la Nang ming äng khrawng hngat känäng khrawse othoh al saw kini hmuh. Äini keinih ani a kini nga. Iyaäm ani nangkei sawng äng käh hiyah.” Äini Yĕsu la tak, “Ani a nga ai chu! U bang nangnih lansu hiyah äm, ani che nangnih sawng äng käh dä.” Yĕsu hawn pre a awkawyalaih saw ikhin ekena lo ni, Ani la Yĕlusalema chetaih koong ulung äng poei bala tawkei. Ani la Samali a käh nam hngata echetaih koong, Ani mäyeih phüh ala ächän taw hnäng hmawna Ani la sidawng pektih a ayang teh lawk. Äini Yĕsu Yĕlusalema chetaih koong tamai ulung la poei bala tawkei koong Samali a käh khälla Ani a lawei u. Yĕsu tebeih Yakub la Yohan la ni khäl hmu häih la ini hawu, “Boi o, anih a khrah aih saw koong hawn känäng mei kom ong kini paneyeih saw Nang nühlü ei?” Äini Yĕsu la anih pawta hleh ei bala che ehekei. Äidä Yĕsu awlaw Ani tebeih khäl awhngaw hngat nama ini chetal. Anih lawm äng ini chetei khaw a khrawng hngat la Yĕsu a tak, “Nang mawnga bang nechet äm, kei nang äng tutu kechetai.” Yĕsu la ani a takal, “Khewa a okho mäi awlaw haw a ubuh mäi. Äini Luhchaw Chaw la uluki tawkeiyeih dün ala mäyah.” Yĕsu la awlaw hngat khrawnga tak, “Kei hnung äng lo e.” Äini äi khrawng la krawn bala takal, “Boi o, kechetalaih maw awlaw kei paw a ayang kaphulalaih maw.” Yĕsu la ani a tak, “Dütih la dütih phulei seh u. Äini nang chet tila Mawng Hnadaga pre sidawng kheu ahiyawk.” Äi khaw a awlaw hngat la Yĕsu a tak, “Boi o, kei nang ängtu kolo ai. Äini chetal ngala ki imsaw äng kakhomeyalaih hüt.” Äini Yĕsu la ani a takal, “Nagol äng ukut tawyei bala u uhnung pawtäng suteyal äm, ani Mawng Hnadaga pre koong tawnah.” Äi pänäng Boi Yĕsu la awhngaw etebeih sĕhgib gala pochong hnih a panei bala sidawng pawi ini hiyawkaih koong heh lei. Sidawng pawi hiyawkaih lah saw ting ulung äng tawei bala mäi saw mräh la nama etebeih khäla pochong hnih chi phei bala teh. Ani la etebeih tih a tak, “Ihi khäh, etheih pa nung, äini bi biyeihtih khrawng che ini leu. Äi koong lai äng käh etheih pa mawh Boi khäka a khawh ei khäl. Ani la ani käh theih pa atanaih saw koong khrawng te hmawna. Nangnih chet khäl. Hni khäl dukäng samphomah chaw huih, Kei nangnih a kanang teh tun. Awmawn khoila, loi khoila awlaw thanap nini konäng chieyei chu. Awlaw lawma hngata ha hnuk sakai chu. Nangnih losu ima pei nini vawng saw ängtu täkchah hawu bäichu, ‘Ni imsaw khrung äng jelkhiyamsa lo seh.’ Äi düna jelkhiyamsa hlüeitih dä ini mäi hi, nangnih käh jelkhiyamsa anih lukhrung äng kraw seh. Äini äi düna jelkhiyamsa hlüeitih hngat bang mäi u hi, nangnih käh jelkhiyamsa nangnih khäka loa lai. Äi ima mäi bäichu, im mawh la ibang anang pekäm äi ei o bäichu. Iyaäm ula bang bi äm, ani la bisaw mawn bünei tawn. Hngat im hlät chula awhngaw ima chetai chu. Awlaw mräh a nana phaw khaw a äi düna käh khrawng khälla nangnih a anang lawkei hi, anih la eisaw ibang anang pekäm äidä ei bäichu. Äi mräh a käh opahtih khäla awpawi poal bäichu awlaw anih a Mawng Hnadaga pre nangnih khäka lo däk ting ta bäichu. Äini nangnih nana phaw saw mräh a käh khrawng khälla nangnih ‍a anang lawei u khaw, äi mräh a käh lawm täng lawm täng chet chula ni kheu hawu bäichu, Nangnih mräh a käh kini kho äng lokei saw dek hnui, nangnih ming äng kini phawpeyal. Äini nangnih hmawtei bäichu, Mawng Hnadaga pre nini kena lo däk.” Kei nangnih a kanang tak, tara hnüp äng äi mräh thawka Sawdom mräh a käh khrawng khäla Hnadaga la awbawng ejeneyeih saw dä. Kolasin mräh o nanga phi lo tun. Betsida mräh o nanga ha phi lo tun. Mawng khäl nangnih dukäng nawmaw nawkaih saw bi thänei äm, äidä Tayal la Sidon mräh a thänei hi che, ayang khawthouh anih la alanda bawtta wat ula che kuk äng om ula ngulai känäng ini lung ini hleyeyalai hü. Ihi khäh, tara hnüp äng Hnadaga la nangnih thawka Tayal la Sidona käh khrawng khäla awbawng khetjen dawneiyei. Awlaw Kawpalnahuma käh khrawng khäl o, nangnih ädäma hawn pre a khawi nini hmueiyalai ei? Krängak ha hiyah, nangnih ngulai vawm äng hiyän nini hmueiyei. Yĕsu la ani tebeih khäla awlaw tak, “Ula nangnih kheu ini khin äm, äi khälla kei kheu ini khin. Ula nangnih a anang süpah äm, äi khälla kei a khrawng süpah. Awlaw ula kei a üsüpah äm, anih la kei a etetih a süp u.” Äi sĕhgib gala pochong hnih teh hmueitih tebeih khäl awpiyaw äng krawnal ula ini hawuval, “Boi o, Nang ming äng dä kini hawu hi, khrawse khälla bang keinih kheu ini khin khäh.” Yĕsu la anih a tak, “Khaih khra liliuhwei saw huih hawn pre känäng Mannat kraw al saw kuhmuh khäh. So khäl, Kei nangnih a phol la chel awi nini kho äng nini chehlaih hnäng saw thayung kanang pek khäh. Awlaw nangnih anang so mawtih mannat khäl khe dämäng thayung kanang pek khäh. Hngat la ha nangnih a ese anang po hnäng hnawh. Äini khrawse la nangnih kheu khin ting piyaw ai chu. Äichaw a nangnih ming hawn pre a yoei saw koong dä piyaw bäichu.” Äi khaw a Yĕsu Asanh chang Khraw la pek saw piyaw äng piyaw bala che hawu, “Paw o, nang che hawn pre la luhdül äng käh Boi. Kei nanga awpiyaw kini pek, iyaäm nang ni khäl kheni ngen mawh la akram mawh khäl khäka thuptila nawtawk. Äini sämäichaw khäl huih khrawng khäl khäka nawhawu pek. Ä, Paw o, nang hlü huih dä ni thänei saw. Kei Paw la kei kutäng hang hang ni aw awp chak däk. Awpaw hiyah pak, Awchaw u äm hngat la ha hmawt u. Awlaw Awchaw hiyah pak Awpaw u äm hngat la ha hmawt u. Awlaw Awchaw la u khäl khäka Awpaw a dawnaih khiyang äm, äila dä hmawt lah.” Äi pänäng Ani la etebeih tih pawh a hleh ei bala che awhngaw chaw kheu tak, “Nangnih ibang nini hmuh lah äm, äi khäl kheni hmulah tih dä pisih mawh.” Kei nangnih a kanang tak, “Nangnih ibang nini hmuh lah äm awbawng Hnadaga sidawng hiyawktih la mawng la hmu lah u. Awlaw nangnih ibang nini yawk lah äm, yaw aih khiyang ula bang yaw lah u.” Sätak khaw a, Mosi käh thung choktih hngat Yĕsu khäka olo. Yĕsu a chawmaih saw koong thung choktih la hi, “Choktih o, i kopoh ei hi kei päihyah saw sawk kübünei hnängai äm?” Yĕsu la ani a tak, “Mosi käh thung äng i yoei bala mäi äm? Nang äiya i nawphawt äm?” Äi Mosi käh thung choktih la Yĕsu a krawn bala takal, “Nang nawsawk, nakantha, nulungko awlaw natha pekei tila nang käh Hnadaga a khetnaw bäi awlaw imcheng saw a nupum kantha huih khetnaw bäi.” Yĕsu la ani a takal, “Nang nawhawu saw ihi khäh. Nang dä äi huih nopoh ei hi, nang äi sawk nübüneyei.” Äi thung choktih la upuma awpawi dawneyeih khiyang koong Yĕsu a tak, “Kei imcheng saw u äm?” Yĕsu la krawn bala takal, “Khrawng hngat Yĕlusalem kän Jeliko mräh a chet khaw a tamdah khäl kut äng kraw. Tamdah khälla äi khrawng käh awat sut ula awlaw bop ula düaih wavaih taw hüt ula ini chetal. Äi pänäng pujawtih khrawng hngat äi lawm äng chetei bala lo. Ani la äi khrawng hmuh ni kakei bala chetal. Äi huih äi düna Lebi hngat äi laa lo. Äi khrawnga hmu bala Ani ha awhngaw pawta kakei bala chetal. Äini Samali mräh a käh khrawng hngat äi lawm äng chetpe chetpe äi khrawng kena lo. Ani a hmu bala che ekhet lung kawi. Äi khrawng khäka chet bala awhmaw äng olip si la grĕp hawng läi bala otomal. Äi pänäng ani käh se lekchaw khrung äng om bala hngat tawi dün laa chi bala ani a sokhreyal. Äi hnüp pänäng äi samari la hen poisa paihnih thoh bala tawi dün mawh a tak, ‘Ni khrawng sokhrei bäi. Ni thawka dä unung lo hi, kei lo al ngala kini khiyalai.’” Äi pänäng Yĕsu la hawu, “Tua nang nulung la ihuih tawk äm? Ni pochong thum dükäng äi tamdah kutäng krawtih khrawng käh imcheng saw u äm?” Äi Mosi käh thung choktih la hawuval, “Ani a ula khetnawk äm äidä äi khrawng.” Äi khaw a Yĕsu la ani a tak, “Bahi che nang ha äi huih apo.” Äi pänäng Yĕsu la Ani tebeih tih khäl lawm äng chetpe chetpe nam hngata ini vawng. Äi düna Martha ting mingei nawtih hmutaw hngat la ani ima Yĕsu a panei. Martha a Meri ting mingei nawtih awnawu hmutaw chaw hngat mäi hüt. Ani la Boi kena om bala Ani kheu ikhin. Äini Martha la ei oksaw khäl poh aih koong kawmah. Äi koong ani lo bala tak, “Boi o, kawnawu la bi khäl kheni kei lukhrung äng dä awkhrawk chak saw nang hmutiei? Kei a uku aih saw koong ani a tae.” Äi khaw a Boi la Martha a tak, “Martha o, Martha o, nang ayapyap bi nibiyeih saw koong nokrong grah awlaw kawmtih. Äini hngat dä biyeih lah saw hlü mawsaw. Meri la äi bi pawi ni heh lei bala lawkei. Äiche ani känäng lawal hmuei hnawh.” Yĕsu la ala hngata suh tongei. Suh tongei saw päih ni Ani etebeih pochongak la Ani a tak, “Boi o, Yohan la ani tebeih tih a suh tongei khrang chok hüt saw huih, keinih a ha suh tongei khrang khrawng choke.” Yĕsu la äi khaw a anih a tak, “Nangnih suh nini tongei khaw a ni huih hawu bäichu, ‘Paw o, nang ming che asanh chang ting hmawi bünei seh, Nang käh Mawng pre lo seh. Hnüpak kiyawnah ühlü saw huih eisaw khrawng pekbäi. Keinih käh ngulai khäl ähläh khrawng pek bäi. Iyaäm keinih lukhrunga ngulai bitih khäla keinih ähläh kini pekal khäh. Awlaw keinih a chawmsi äng khrawng khraw aiti.’” Äi pänäng Yĕsu la etebeih tih a tak, “Tawkei chawm khäl, nangnih dukäng hngata khanbawn mäi. Ӓi khomyawn chinga ani khäka chet bala atak, ‘Khanbawn o, kei a ha paithum upu maw e. Iyaäm kei khanbawn hngat lawm äng cheteipe cheteipe kei ima lo, ani a kepekaih saw huih eisaw iha mäyah.’” “Äi khrawng la im duk känäng akhanbawna tak hnäh, ‘Kei a ukhru sawkai ti. Tua sät khaei däk awlaw kei chaw chuhnu ha alanda ini ip däk awlaw kei ha kawhiyawlal däk. Kei tua nanga eisaw kini pekaih saw koong thou hnängti hnawh nga.’” Kei nangnih a kanang tak, “Äi khanbawn thou bala iha pekah thän, äi khrawng la awkrawn krawn awhawuvei saw koong othouwaih saw tawn awlaw ibang hlüei äm äi pekaih saw tawn. Äi koong nangnih a kanang tak, nangnih hawvei khäl, nangnih a pek hmueyei, sui khäl nini bünai. Sät khek khӓl, nangnih koong hong hmueyei. Iyaäm ula hawuvei äm, anih la ini bünei. Ula sui äm anih la ini bün awlaw ula sät khek äm, anih koong sät hong hmuei.” “Nangnih dukäng äi huih paw u mäi äm, awchaw la ngaw hawuvei hi ngaw chaw a phol pektih? Hiyah thän awchaw la atoi hawuvei hi, äichaw a chel awi pektih? Äihi nangnih ngiyawtih la khrawng krak thänei chula bang nini chaw a vawn pawi vawn pawi pek khrang nini mawt hi, hawna käh Paw Hnadaga khäka ula hawuvei äm, Ani la anih a awpawi hnäng simyah Asanh chang Khraw pekai.” Sätak khaw a Yĕsu la khrawng hngat känäng kräu hnängah tih khrawse othoh al. Äi khrawse thokal saw äng tutu äi khrawng äkräuval saw chah. Äi hmu ula khrawng khäl mawt ini maw. Äini anih dukäng üküt küt la ini hawu, “Biljibul mawng käh tha äng Ani la khrawse khäl tämal!” Awlaw üküt küt la Yĕsu a chawmsi äng ini khrawkaih khiyang koong hawn pre känäng nawmaw nawkaih saw a hmat la khrawng dawne ting ini tak. Äini anih lung äng käh kheu hmawt bala che Yĕsu la tak, “Siyei ula mawng pre bang anih la anih dukäng pheyei äm, äi pre krakaih saw. Awlaw losu im thongpei anih dukäng ini siyei khaw, äi im thong akauwal. Äi koong Mannat la awkhrawse khäl anih dukäng jal ini täkei hi, iba anih käh mawng pre khawmaih saw äm? Kei ni khäl kanang hi saw, Biljibul käh tha äng khrawse khäl Kei kätämal ting nangnih nini hawu saw koong. Äini Kei dä Biljibul käh tha äng khrawse kätämal khaw, nangnih a anang tämtih khälla u käh tha äng khrawse khäl ini tämal saw äm? Äi koong nangnih a anang tämtih khälla nangnih käh tara bi seh u. Äini Kei dä Hnadaga käh tha äng khrawse khäl kätämal khaw, nangnih asanh sanh nini yawkchu, Mawng Hnadaga pre nangnih khäka lo däk.” “Tha mawh khrawng hngat la dä täkei dün äng ani im chongei hi, ani käh im thong vawn khäl suih songei bala mäi. Äini ani thawka thamawh hngat la ani a täk bala hiyum sawk khaw, ani mawng täkdün khrung äng üüm hütäm äi khäl ani thawka tha mawh la lawkeyal chak. Awlaw huh ei peksaw vawn khäl ani phäutih a pheih pekal chak.” U kei pawta mäyah äm äiche kei känäng awhngaw pawta ämäi. Ula kei ängtu etheih pa kolah äm äila khrih chak. “Khrawng hngat känäng khrawse thokal khaw a üdümaih saw koong hultih laa chonei bala üdümaih saw ala sui. Ani la dümaih saw ala bünah ni awhawu, ‘Kei mawng im känäng kothok äm äi ima kechetalai.’ Äini äi ima krawnal pänäng ani la äi im che sanh sanh awlaw pämh bämh chaw uhmuh al. Äidä äi khrawse chet bala che upum thawka pawiyah tih paiseh khrawse a law bala äi ima ana mäiyal. Äi koong äi khrawnga achah saw dukhah thawka ujumtum äng käh dukhah unung sĕyeih saw.” Yĕsu la ni kheu hawu tuna, khrawng chuh känäng hmutaw hngat hek bala awhawu, “Äi nu dä pisih mawh, nanga ula ini hän nawk äm, awlaw chih ini pekäm.” Äini Yĕsu la tak, “Ula Hnadaga kheu khin äm awlaw äi läk chetei äm, äi khrawng khäl dä äi thawka pisih mawh.” Äi pänäng khrawng khäl ini chuh ei hnäh. Äi khaw a Yĕsu la tak, “Tukatäng käh khrawng khäl mawt pawi u. Anih la nawmaw nawkaih saw la hmat la dä ini sui saw. Äini ayang khaw a Hnadaga sidawng hiyawktih Yona äng ibang thänei hütäm, äi hmat la hawuvah awhngaw a hmat la dawn hmuei hnawh. Ninobi mräh a käh khrawng khäl khäka Yona ihuih a hmat la thӓnei hüt saw äm, äi huih ni katäng käh khrawng khäl khäka Luhchaw Chaw ha hmat la huih äthäneyeih saw. Mawng nu Siba tara khomhnüp äng thou bala tukatäng käh khrawng khäla epret khrawkai, iyaäm Solomon käh ngen kheu khäl khinaih koong ani luhdül jum känäng olo hüt. Awlaw so khäl, Solomon thawka elenchaw khrawng hngat niya mäi khäh. Tara khomhnüp äng Ninobi mräh a käh khrawng khäl thou ula tukatäng käh khrawng khäla epret ini dawnai. Iyaäm Yona la tara haw saw yaw ula Ninobi a käh khrawng khälla ngulai känäng ini lung ini hleyeyal hüt. Awlaw so khäl, Yona thawka elenchaw khrawng hngat niya mäi khäh.” “Simiya choi bala hngat la ha thup bala tawah awlaw tong chaw äng ha khiyup bala tawah. Awlaw bang äi simiya tawk düna dä tawk saw, äi khaw im duka chet tih kheni la awa hmuei hmawna. Nang mik dä nang käh simiya. Nang mik dä pawi khaw, nang kantha brat awa äng luihyei. Äini nimik dä pawyah khaw nang kantha ha uhiyung äng luihyei. Äi koong so khäl, nangnih dukäng awa mäi saw hiyunga pak. Äihi nang kantha brat dä awa äng luih khaw, uhiyung äng bitchaw bang mäyah pak awa ai. Äi huih kawchawng chawng simiya awa nang lukhrunga kraw hi, nang kantha awa chawi chawiya thäneyei.” Äi kheu päih pänäng Pherasai hngat la ani ima Yĕsu a eisaw eyeih koong panei. Äi khaw a Yĕsu äi ima chet bala che eisaw eyeih koong o om. Äini ei khawngah Yĕsu la ukut boteyah saw, äi Pherasai la uhmuh. Äi koong ani awmaw. Äi khaw a Boi la ani a tak, “Nangnih Pherasai khälla pawngkawn, khok aprang pawt dä nini boh ei saw. Äini uduk pawt che nangnih pawiyah saw la lawphah äng dä nini luih saw. Nangnih mäktih khäl! Nangnih hmawtei chuei, aprang pawt bitih la uduk pawt ha bisaw? Äi koong nangnih käh pawngkawn la khok dukäng ibang mäi äm, äi sanglaisu a pekal khäl. Ӓi khaw che ükütni nangnih koong asanh chang poh hmueyei. “Äini Pherasai khälo, nangnih koong ihuih khruaih saw äm. Nangnih Hnadaga a pudina, tekpaksei awlaw akhang khe äng käh theih pa khäl äng käh paiha lukhrunga hngat nini pek chi. Äini nangnih tara pawi la Hnadaga käh khet süp chu. Äi äng nangnih ni khäl nini sumeyeih saw ängtu awhngaw khäl ha nini sumeyeih lah saw. “Pherasai khäl o, nangnih koong dukhah mäi. Iyaäm nangnih Yudi ini lumeidün ima elenchaw omaih saw laa dä nini omaih khiyang awlaw khrawng khäl ini chumei dün laa nangnih hmawi nini büneyeih khiyang. “Pherasai khäl o, nangnih koong ihuih dukhah mäiyeih saw äm. Nangnih chokonga käh hmat la mäyahtih cho khäl huih dä. Khrawng khälla hmawta pak äi khrung äng ini chetei.” Mosi käh thung choktih pochongak la Yĕsu a krawn bala takal, “Choktih o, ni kheu hawutila keinih a ha hiyawh ei anang pek saw dä.” Äiche Yĕsu la tak, “Mosi käh thung choktih khäl o, nangnih ihuih nini khruaih saw äm. Iyaäm nangnih khrawng khäl khrung äng jäh aih hnäng tisaw vawn jĕh tih nini tawng nawk. Äini äi jĕh tih vawn nini kut pem chaw äng bang jäk dochu. Nangnih ihuih nini khruaih saw äm. Iyaäm nangnih Hnadaga sidawng hiyawktih khäl koong chokong nini bi. Äini äi Hnadaga sidawng hiyawktih khäla nangnih nuchen pawsawk khälla ini tuk hüt. Äi koong ni bi chula che nangnih sawksi nini pek, nangnih käh nuchen pawsawk khälla i ini bi hütäm äi kheni nangnih ha nini bi. Anih la Hnadaga sidawng hiyawktih khäla ini tuk awlaw anih koong nangnih chokong nini bi. Äi koong Hnadaga ngen la hawu, ‘Kei anih khäka Hnadaga sidawng hiyawktih awlaw teh hmueitih khäl keteh ei. Anih la hngat paihnih a ini tukai awlaw hngat paihnih a ini kuluh nawkai. Äi koong luhdül chah saw khaw thouh tutäh siäng ihiyawh Hnadaga sidawng hiyawktih khäl tuk ini hmuyei däkäm, anih hang hang tuk ini hmuyei saw koong tukatäng käh khrawng khäla dam äng khrawk ini hmueyalai. Ihi khäh, kei nangnih a kanang tak, Abel käh thi bosaw thouh chah bala hlu dün laa awlaw sidawng im laiya tuk hmuyei hüttih Zakalia täh, tukatäng käh khrawng khäl dä dam ini büneyeih saw.’” “Mosi käh thung choktih khäl o, nangnih koong ihuih khruaih saw äm. Iyaäm nangnih prengya mawh awi hong dün sin chula nini mäi. Nangnih ha che vawngchu awlaw vawngaih khiyang tih a ha nini nga.” Äi la hlätal bala che Yĕsu chetal khaw a, äi Mosi käh thung choktih la Pherasai khälla Ani a mawt lansu huih ini khinei hnäh. Äi pänäng ayapyap kheu ini hi hnäh. Yĕsu la awhmaw saw kheu hawu khaw mawn hnäng hmawna khiyong ula ini mäi hnäh. Äi khaw a othong thong khrawng äiya ini lumei, netei ula hngat la hngat khrung äng ini kraw nawk tälh. Äi khaw a Yĕsu la awhngaw khrawng khäla ta khawngah Ani tebeih khäla tak, “Pherasai khäl käh is bälei saw ha känäng sidih äng mäi bäichu. Äi is che anih käh lupsong. Uthupei saw ngulai kheni dawngeyeih saw dä. Umuchaw äng käh kheni ini hmawtai saw dä. Nangnih uhiyung äng nini hawu saw kheu khäl khrawng la awa äng ini yawkalai. Im duka umuchaw äng nini kräusaw kheu khäl tĕh khrung känäng hek ula ini hawuvai.” Khanbawn khäl o, kei nangnih a kanang tak, “Ula nangnih anang tukaih saw hawuvah iha po hnängah äm, anih a ke ei chu. Nangnih a anang tuk pänäng ngulai vawm äng anang hiyawn hnäng tih a dä ke bäichu. Ä, kei kanang tak, ani a dä keh bäichu. Lingkawpcha lu hngaw ting ni poisa hnih äng chomah ei? Äi thän Hnadaga la Lingkawpcha hngata bang hngilah. Nangnih käh lusawm bang sühchän mäi khäh. Ke eichu, Lingkawpcha haw thawka nangnih awbawng usum nini vawng khäh.” Äini Kei nangnih a kanang tak, ula Kei a khrawng hmawi maw a awkhawmei äm, Luhchaw Chaw la ha Hnadaga käh hawn natchaw khäl hmawi mawh a awkhawmeyei. Ula kei a khrawng hmawi mawh a khawmeyah äm, Luhchaw Chaw la ha Hnadaga käh hawn natchaw khäl hmawi mawh a khawmei thaw hnawh. Luhchaw Chaw ming äng pawiyah saw kheu hawu tih la ähläh übüneyalai. Äini Asanh chang Khraw a keleih tih la ähläh büneyal thaw hnawh. Khrawng khälla nangnih a Yudi ini lumeidün ima awlaw pre khiyuptih la tha mawh gong khäl hmawi mawh a anang chih pui nawk khaw a, iba krawn chula nini kräuvaih lah saw äm ting nini lung puai chu. I nini khrawnei nawkalaih saw äm, äi khina Asanh chang Khraw la anang hawu pekai. Khrawng chuh duk känäng khrawng hngat la Yĕsu a tak, “Choktih o, kei hnih paw la kei hnih koong khrawng tawk pek hüt saw kähkän, kei talena epheihyeih saw ta e.” Yĕsu la ani a tak, “Tara biyeih saw hiyah khaw, nangnih käh kähkän pheihyeih saw ana kei a mawng khrawng la epek saw äm?” Äi pänäng Yĕsu la khrawng khäla tak, “Sidih äng mäi bäichu, üküt lawpah känäng nini pum songei khäl bäichu. Iyaäm khrawng hengaih saw koong kähkän awbawng lenah.” Äi khaw a Yĕsu la khrawng khäla chokaih saw koong ni pümchut hawu, “Mäichawtih khrawng hngata lai äng awbawng khut thänei. Ani la ulung äng tawk hnäh, ‘Äi hiyawh theih pa kaw tawkaih saw ala che kei a mäyah nu, tua kei i kopoh aih saw äm? Bakhaw che kei bi hngat kibi hnäng. Kei käh chawng leng khrakal ngala chawng leng len kawsawkalai awlaw kei käh theih pa la kähkän kheni äiya kawtawkai. U hnung äng kupuma katakeyei, nanga awbawng khomhnüp koong awbawng vawn pawi chungei bala mäi khäh. Ei o tila düme awlaw awpiyaw äng khomhnüp chiyei.’ Äini Hnadaga la ani a tak, ‘Mäktih o, tüyawna che nang nüdüaih. Äihi nang nuchungei saw vawn khäl ula sumeyalaih saw äm?’” Uyumtum äng Yĕsu la krawn bala tak, “Upum koong kähkän chungei bala tawei tih khrawng che Hnadaga mik äng khrawng len hiyah, ani khrang che äi huih dä thänei.” Äi pänäng Yĕsu la etebeih tih a tak, “Äi koong kei nangnih a kanang taktun, i nini eyeih saw äm, i nini wataih saw äm ting nini kantha koong tawkai chu. Nawsawk che ei oksaw koong hiyah awlaw nakantha ha che awat cha koong hiyah. Awngaw khäl pawta so khäl, anih la ichih ha chäh u, khut ha jan u. Anih a chawng leng ha mäyah, äithän Hnadaga la anih a eisaw pek khäh. Nangnih dükäng ula konggrah bala awsawk sawuh veyal hnäng äm? Bakhaw ni bi lekchaw khäl bang nini konggrah saw äng bi hnäng chu khaw, awhngaw vawn khäl koong iya nini konggrah saw äm? Tawk khäl, kheipa ihuih chomsaw äm? Anih la bi bi u, ini tha ha phäihyei u. Äini kei nangnih a kanang tak, ayang äng Solomon mawng awpiyaw äng mäi bala ha che äi khäl äng käh hngat lup ha che ani kantha sahngei hnäng hütah. Tühnüpa apa äng pawyei sese a mäitih bel, hngätäh a khawng duka thawn hmuyealai. Hnadaga la äi khe bang pawyei sese a awtawk. Uyum leutih khäl o, Hnadaga la nangnih a äi khäl thawka bang anang suih songah ei? I neei okaih saw äm ting tawk tila che hlä hläuvei chu. Ni luhdül äng käh awhngaw yapsaw khälla äi krong khäl äng ini hlä hläuvei. Äini nangnih Paw la hmawt khäh, nangnih ni khäl nini hlü ei saw. Äichaw a Hnadaga la anang khiyupaih koong nini puma awpei khäl, äihi äi khäl kheni nangnih nini büneyei. Kei käh samphomah sawng lekchaw khäl o, ke ei chu. Iyaäm Paw Hnadaga la Ani käh Mawng Hnadaga pre anang pekaih saw piyaw khäh. Nangnih kähkän jeal chula Sanglaisu a pekal khäl. Äi huih je chula phemaih hiyahtih awmawn khoila dä nangnih koong khoyei khäl. Mawng kähkän päihyah äm äidä hawn pre a chungei khäl. Äiya che sukhä la ha mu hnängah awlaw kha la ha sou hnängah. Nangnih käh kähkän maw a mäi äm, nangnih lung ha äiya dä mäiyeih saw.” Nini cheng äng awat hĕnei chula awlaw nangnih käh simiya choyei chula mäi lawk khäl. Ini omnawyei saw päi känäng awmawh paw olo a laih saw koong awmawh la sät khek saw äng tutu hong hnäng hmawna chong bala mäitih hngasaw khäl huih thänei bäichu. Awmawh paw la u khäla ipah pak ini mäi saw khomäm anih dä lumchawl mawh. Kei nangnih a ihisaw kanang tak tun, äi awmawh paw la echeng äng awat khonei bala anih a o omalai awlaw upum la eisaw pekai. Awyawn chinga thän ongo prak äng thän awmawh paw la u khäla ip u saw khomal äm, äi hngasaw khäl che pisih mawh. Ni kheu nini lung äng tawyei bäichu, sukhä iti khaw a loaih saw äm äidä im mawh paw la hmawt khaw, ani ipah pak mäiyei hü awlaw äi sukhä a ha im duka vawng sawkai hü hnawh. Äi koong nangnih ächän mäi lawk bäichu. Iyaäm mawng khin nangnih tawk thaw hnawh chu äm, äi khin äng dä Luhchaw Chaw lo alaih saw. Äi khaw a Pitol la tak, “Boi o, ni pümchut keinih koong anang hawu pek saw ei hiyah khaw hang hang koong ei?” Boi la hawu, “Äi huih prengiya mawh la uyumlah mäitih awmawn tawtih hngasaw u äm? Awhngaw hngasaw khäla ikhin täng eisaw pheih pekaih koong awmawh paw la u a bi awp äm. Awmawh paw la loal bala mawng hngasaw a ulung khrawyei bala bisaw khomaläm, äiche pisih mawh. Kei nangnih a ihisaw kanang tak, awmawh paw la äi hngasaw a dä, ani käh kähkän sotaih sawk saw. Äini äi hngasaw nu la kei mawh paw che olo alaih saw kraw pe khäh ting ulung äng hawu bala awhngaw hngasaw khäla bop awlaw ei ok pänäng omoiyak alak o bala mäiyal. Ani la tawkah saw khin la khomhnüp äng dä ani käh mawh paw lo a laih saw. Awmawh paw la ani a thasa dam äng khrawkai. Äiche yumah tih khäl koong tawk saw laa ani a awtawkalai. Awlaw awmawh paw la hlüei saw hmawt bala ha hngasaw ächän mäyah hi awlaw ühlü ei saw huih biyah hi, hngasaw la thasa dam übüneyei. Äini hmawtah pak hngasaw hngat la dä epret bi bi hi, ani la dam leu büneyei. Ua sokhreyeih koong unung awp hmuei äm, ani känäng awbawng vawn ini hawuvalai. Awlaw u lukhrung äng unung bi awp hmuyei äm, ani känäng unung ini hawuvalai.” Kei luhdül äng mei choiya kolo saw dä, ni mei ayang choi khaw i hiyawh bawng pawyeih saw äm! Kei hmawi mawh a dukhah len äng käh tuilüh ämäi awlaw äi bi khäl phäih ngasaw sawgraw kei ukhru äng kämäi khäh. Nangnih i nini khin äm, kei ni luhdül äng jelkhiyamsa peka kolosaw ei? Hiyah, kei nangnih a ihisaw kanang tak, Kei khrusawka dä kolo saw. Tukhaw thouh ima pochong hngaw ini mäi khaw pochong thum ni pochong hnih äng sangei thaw hnawh u, pochong hnih la pochong thum äng sangei thaw hnawh u. Awpaw la awchaw ihni somaweyei, unu la uchuhnu ihni somaweyei, ichi chang la ukhrumah ihni somaweyei. Äi pänäng Yĕsu la khrawng khäla tak, “Nangnih hni krawk pawh a khohiyung nini hmuh khaw kri loaih ting nini hawu, äiche äi huih thänei. Awlaw mrok phak känäng khri lo saw nini hmuh khaw, thasa lengai ting nini hawu chi, äiche äi huih äthänei. Nangnih lupsongeitih khrawng. Nangnih luhdül la hawn so chula nini hawu hnäng, äini nangnih tua käh ikhin iya yawchu chu saw äm? Ibang ihi äm äi tawk chula iya bi bichu saw äm? Nang phak hiyahtih ängtu tara bitih khäka nini chet khaw a, lawma iba kheu nini phrieiyalaih sawäm äi hno bäichu. Hnochu khaw che, äi khrawng la nanga tara bitih khäka ini chih ei. Awlaw tara bitih la othong im mawh khäka anang awpai. Othong im mawh la ha nanga thong äng anang heng nawkai. Kei nangnih a kanang tak, tara bitih a hang hang awmawn pekchu saw sawgraw nangnih thong im känäng thokal hnäng hnawh chu.” Äi khaw a äiya mäitih khrawng hngat pai hnih la Yĕsu a ana hawu pek, Galil a käh khrawng khälla Hnadaga käh sidawng ima mäksetdava bät ula Hnadaga khäka ini tawng khaw a Pilat mawng la äi khrawng khäla utuk sawk. Yĕsu la krawn bala anih a tak, “Nangnih i nini khinäm? Äi Galila käh tuk hmueitih khrawng khäl awhngaw Galil khrawng khe thawka awbawng ngulaisu ini mäi hüt saw ei? Kei nangnih a kanang tak, äi huih hiyah! Äini nangnih ngulai känäng nini lung hleyeyal chu khaw, nini krakaih chak saw dä. Silawma käh hlüngtih im la krawnaw bala pochong leisĕt khrawng ini dü hüt. Nangnih i nini khinäm, Yĕlusalem a mäitih awhngaw khrawng khe thawka äi pochong leisĕt khrawnga awbawng epret mäi hüt sawei? Kei nangnih a kanang tak, äi huih hiyah! Äini nangnih ngulai känäng nini lung hleyeyal chu khaw, nangnih ha äi khrawng khäl huih nini krakaih chak saw dä.” Äi pänäng Yĕsu la anih a ni pümchaw hngat hawu pek. “Khrawng pochongak la ani käh grĕp khanga khĕu thing hngat chäh hüt. Äidä ani la etheih sotaih koong akhanga lo, äini ani la iha bünah. Äidä grĕp khang sokhretih a ani la tak, ‘Kei ni khĕu thing äng etheih kusui saw kumthum thänei däk. Äini Kei iha bün chi nga. Äi koong ni khĕu thing khrual! Iya ni thing la dekäng ala chakei nawkaih saw äm?’ Äini äi sokhretih la ani a tak, ‘Choktih o, ni thing tukumak mäi maw seh awlaw kei eken setsei choungala phat kawthawnalai. Sengkuma dä etheih thei hi mawt pawyei. Äini theiyah hi, ni thing khrual bäi.’” Düm khomhnüp äng Yudi ini lumeidün im hngata Yĕsu la ochok, äi khaw a hmutaw pochongak äi Yudi ini lumeidün ima mäi hüt. Ani a pawiyah saw khraw hngat la khokum leisĕt uyung kuksawk bala awtawk koong chokjok ja hnängah. Yĕsu la äi hmutaw a hmuh ni ekena panei bala che tak, “Hmutaw o, nang käh lawga känäng nang nälätal däk.” Äidä Ani la äi hmutaw khrung äng ukut tawkei, äi äng tutu ani chokjok ja al hnäng awlaw Hnadaga a phiyaw al. Yĕsu la düm khomhnüp äng lawga awpawi poh al saw koong Yudi ini lumeidün ima käh elenchaw aman pok. Äila khrawng khäla tak, “Ini biyeih koong khomhnüp hnüpsok mäi khäh! Äi äng äi hnüp sok dukäng lo chula apawyal khäl. Düm khomhnüp äng hiyah.” Äidä Boi la äi lenchaw a krawnei nawkal, “Nangnih lupsongeitih! Düm khomhnüp äng sel lum känäng seleu paw la se lekchaw hlät chula tui peka nangnih chichu ei? Äi khaw, Awbraham chenäng käh ni hmutaw pawta so khäl. Ni hmutaw a Mannat la khokum leisĕt khon bala tawk saw, äi khon hmuei saw känäng düm khomhnüp äng ani a hlätalaih saw sangah ei?” Yĕsu la ni kheu hawu saw äng Ani pawtäng mäyahtih khälla hiyawh ei ini bünei. Äini awhngaw khrawng khäl Ani käh nawmaw nawk saw bi hmuh ula che ini piyaw. Äidä Yĕsu la ihi, “Mawng Hnadaga pre che ihuih äm? Kei i äng kuchutaih saw äm? Mawng Hnadaga pre che hngat monniyang chih huih dä. Khrawng pochongak la äi monniyang chih hngat law bala ani käh khang äng ächäh. Äi chät bala thinga thänei. Äi pänäng haw khäl lo ula che thing bakäng ubuh ini sekei.” Yĕsu la awlaw hawu, “Kei i äng Mawng Hnadaga pre a kuchutaih saw äm? Mawng Hnadaga käh pre che is huih dä. Hmutaw hngat la äi is law bala awbawng ha hnui äng bälh ni, äi ha hnui äng is bälei koong posoh soh a kawi.” Yĕsu la awlaw mräh khäl, nam khäla chochok hlänga Yĕlusalem pawta chet. Khrawng pochongak la Ani a ihi, “Boi o, ngulai känäng khrawng bitchaw dä ini kiyawtalaih saw ei?” Äi khaw a Ani la anih a takal, “Sät wah lekchaw känäng nini vawngaih saw tha po ei khäl. Iyaäm kei nangnih a kanang takaih, awbawng khrawng la ini vawngaih koong ini hnoai äini vawng hnäng hnawh u. Im mawh paw la thou bala sät khah al hi, apranga ja chula sät khek chula nini hawuvai, ‘Boi o, sät khrawng hong pek.’ Äini im mawh paw la hawuvai, ‘Nangnih mawng känäng nini lo saw äm kei kanang hmawt nga.’ Äidä nangnih hawuvaih saw nini chah ai, ‘Keinih nang ängtu kini ei ok hüt, awlaw nang keinih a lawm täng lawm täng anang chok hüt.’ Äini Ani la awlaw hawuvai, ‘Nangnih mawng känäng nini lo saw äm kei kanang hmawt nga. Soutih khäl o, kei känäng chetal khäl.’ Awbraham, Aijak, Yakub awlaw Hnadaga sidawng hiyawktih khäl Mawng Hnadaga pre a ini mäi saw nini hmuh hi, awlaw nangnih apranga tong nini hmuyeyeih saw nini hmawtei hi, kakap chula nini haw nini chieiyei. Äi pänäng hni thoh, hni krawk, tong phak, mrok phak pawt känäng khrawng khäl lo ula che Hnadaga käh mawng pre a päi lena eioka ana omai. Äini ihi khäh, ubang uhnung sum äng kraw äm, ani awmaw alai awlaw ubang awmaw äm, ani uhnung sum äng kraw alai.” Äi khaw a pochongak hnih Pherasai khäl lo ula Yĕsu a ini tak, “Ni känäng chetal, iyaäm Herawt la nanga anang tukaih khiyang khäh.” Äini Yĕsu la anih a tak, “Chet khäl, äi khewa a ata khäl. So khäl, kei khrawse khäl kothoh alai awlaw khrawng khäla tü hnüpa awlaw hngätäh a awpawi kopoh alai, awlaw hnüp thum äng kei käh bi käphäih yalai. Kei käh lawm äng tühnüp, hngätäh awlaw hngätäh titu a kechetalaih lah saw dä. Iyaäm Yĕlusalem pranga Hnadaga sidawng hiyawktih khäl ini dü aih saw sang u. Yĕlusalem, o Yĕlusalem, Hnadaga sidawng hiyawktih khäla nang nutuk. Hnadaga la nang khäka u a bang tĕh äm, anih a lung äng khong naw tila che nutuk. Anu la awchaw o oyei saw huih, kei ha nang khrawng khäla awbawng ko oeyeih khiyang hüt. Äini nang hlüeiti. So khäl, nangnih käh im ohongai! Awlaw Kei kanang takaih, nangnih kei a awlaw u hmuti hnawh chu. Äini ikhin lo khaw Kei a anang hmuh alai awlaw nangnih nini hawuvai, ‘Boi ming äng lo tuntih ni pisih mawh.’” Sätak düm khomhnüp äng Pherasai khäl äng käh gongsong pochongak ima ei okaih saw koong Yĕsu chet khaw a, äiya mäitih khrawng khälla Yĕsu a miknaw ula ini tawk. Äi khaw a Ani hmawi mawh a opahtih khringtih khrawng hngat ämäi hüt. Äi khaw a Yĕsu la Mosi käh thung choktih khäl awlaw Pherasai khäla ihi, “Mosi käh thung äng düm khomhnüp äng opah tih khrawnga awpawi nopoh alaih saw tawnei?” Äini anih kheni ekteyah pak ini mäi chak. Äidä Yĕsu la äi opah tih a bin bala che awpawi poh al bala eteh al. Äi pänäng anih a ihi, “Nini chaw pei, hiyah thän selheu paw pei, düm khomhnüp äng tui vum äng kraw hi, akraw sawng tutu düm khomhnüp ting songah pak khawyal hnawh chuei?” Anih hngat la ha krawn ula hawu pekal hnäng u. Ei oka panei hmueitih khrawng khälla ming mawh om dün ala pawi khäl heh lei ula ana om chak saw Yĕsu la hmuh. Äi hmu bala Yĕsu la anih a ni püm hawu pek, “Phiya chawnawk päiya hngat la ha anang pamh hi, ming mawh khäl ini om dün ala khäl äng nini omaih koong heleyei chu. Iyaäm ula hawu hnäng äm, nupum thawka ming mawh khrawng ha pamh ini hmuei nawtheih. Äi khaw a nanga anang pamh tih päi mawh lo bala awhawuvai, ‘Ni la ani koong hlät pekal.’ Äi khaw a hiyawh ei bünei tila uhnung suma käh ala a na omal lah ai. Äi koong nang iti a bang pamh nuhmuei äm, äi khaw a uhnung suma dä a om bäi. Iyaäm nanga anang pamh tih la anang panei bala anang takai, ‘Khanbawn o, ming mawh laa dä om.’ Äi khaw a nang ängtu pamh hmueitih khäl hmawi mawh a nang hmawi nübüneyei. Ula bang upuma hlenei äm, ani a hlek hmueiyalaih saw dä. Awlaw ula bang upuma hlekei äm, ani a hlen hmueiyalaih saw dä.” Pamhtih a ha Yĕsu la takal, “Nang päi nepekei khaw a nakhanbawn khäl, näkäisang khäl, mäichawtih im cheng saw khäl awlaw ming mawh khäla paneyei ti. Äi huih napanei hi, anih la uhmu ini khiyeiyal saw huih awlaw krawnak nanga anang paneyelaih saw dä. Äini nang päi nopoh khaw a sanglaisu khäl, kut chek, kho chek, awlaw mikmü khäl dä panei bäi. Äi äng nang Hnadaga pisih nübüneyei. Iyaäm anih la nanga krawn ula anang paneyal hnäng hnawh u. Äini konghmuh sang khäl heng ula ini thouwal khaw a, Hnadaga la nanga äi khawh ini pekalai.” Päiya eiyeih saw koong omtih khäl äng käh khrawng hngat la Yĕsu la hawu saw kheu khäl yaw bala che hawu, “Ula bang Mawng Hnadaga pre a ei okaih koong ala bünei äm, äi khrawng che pisih mawh.” Yĕsu la tak, “Khrawng hngat la päi len hngat poh ei hüt. Khrawng awbawnga äi päiya panei hüt. Ei ok khin lo ni päi mawh paw la panei hmueitih khrawng khäla sidawng pekaih koong a hngasaw a te bala che ataksawk, ‘Lo khäl hnäh, ükütni ächän mäi däk.’ Äini panei hmueitih khrawng khela ni bi mäi saw jiji ini dawnei awlaw kawmaih u ting ini tak. Täk chah khom saw khrawng la tak, ‘Kei lai bitchaw ke hlehyei saw, äi ka sotaih lah saw dä, ekhetäng kei a ählät nawbäi.’ Awlaw pochongak la tak, ‘Kei selheu paw chum hngaw ke hlehyei saw äi khäl chäkeya kechetaih lah saw dä. Ekhetäng ählät nawbäi.’ Awlaw hngat la tak, ‘Kei phiya kawnawk tha dä. Kei lo hnäng hawm hnawh nga.’ Päi mawh paw käh a hngasaw krawnal bala awmawh pawa a hawu pekal. Äidä awmawh paw aman pok bala che ani käh a hngasaw a tak hnäh, ‘Nang jotjota chet tila mräh lawmäng awlaw ikiu täng mäitih sanglaisu khäl, kutchek, kho chek, awlaw mikmü khäla niya alaw.’ Awmawh paw la hawu saw huih bi chak bala a hngasaw la tak, ‘Kawmawh paw o, nang ihuih nawhawu äm, äi huih poh hmuei däk. Äi thän ha awlaw ala mäipe khäh.’ Äidä awmawh paw la hngasaw a tak, ‘Mräh pranga lawm täng lawm täng chet, kei im luih chak hmawna anih a tha äng niya apanei. Kei nangnih a kanang tak, täkchah panei hmueitih khäl äng käh hngat ha Kei käh päiya ei o lah hnawh u.’” Hnüpak khaw a khrawng awbawng Yĕsu äng tutu ini chetei tunsaw. Äi khaw a Yĕsu la khrawng khäl pawta soei bala hawu, “Ubang kei khäka olo äm, äila unupaw, iphiya, awchaw chuhnu, ata awnawu awlaw upum kantha a kei thawka khetei nawk hi, ani Kei tebeih thänei hnäng hnawh. Upum käh krut kät bala ubang kei hnung äng loah äm, äi khrawng Kei tebeih thänei hnängah. Nangnih dukäng losulapei im hlüngtih sawkeiyeih khiyang hi, awmawn ihiyawh bawng vawngai äm ting, im saw khawngah ani la tawkah ei? Äi huih tawkah hi che, ani la im täng sät chak pänäng imsawk saw phäih yal hnängah hi, ani a hmutih kheni la ini keleihyei. Hmutih la ini hawuvai, ‘Ni khrawng la im che chat bah hüt, äini imsawk saw phäih yal hnängah.’” “Äi huih kawchawng chawng, mawng hngat awlaw mawng hngat äng jal täkeyeih hi, täkchah ani la om bala ni huih tawkmaw hnawh ei, ‘Othong kul soloi äng kei äsängtih jal täka lo hi, kei thong ha soloi äng jal kakhawm hnängaiyei?’ Äi huih dä nängeyeih hiyah hi che, jal thou khawngah soloi khäl awhlawm hlaw a ini mäi khaw a bang ani la sidawng hiyawktih a te bala jal täkeiyah pak chaw äng kheu ini taweiyei.” Uyum tumäng Yĕsu la hawuval, “Äi huih kawchawng chawng, nangnih a mäi saw khäl kheni hlät chak chu hi, Kei tebeih thänei hnäng hnawh chu.” “Chi che vawn pawi dä. Äini chi ngan saw dä akrak chak hi, iba awlaw nukhrumalaih sawk hnäng pe saw äm? Äi chi lai äng awlaw phat äng sumaih saw bang pawi tiyah. Khrawng la äi hiyän dä ini hiyänal. Ua ikhinaih saw koong awhnawh mäi äm äila khin seh.” Hnüpak khaw a phawndaw koktih la ngulaisu khäl kheni Yĕsu kheu ini khinaih koong Ani khäka ini lo hüt. Äi koong Pherasai khäl awlaw Mosi käh thung choktih khälla epret khoh ula ini hawu, “Ni khrawng che ngulaisu khäl äng dä upuyei awlaw eei ok.” Äidä Yĕsu la anih a ni püm hawu pek. “Tawk chawm khäl, nangnih äng käh pochongaka samphomah khra ak mäi. Äidä äi känäng pumak krok. Äihi ani la kogibgäl paiko samphomah khäla bel mäidüna taw bala äi kroktih samphomah bünalah saw sawgraw suyal hnawh ei? Ani la übünal pänäng, ani piyaw bala apa äng tawngeyal. Äi pänäng ima loal bala akhanbawn, awlaw imcheng saw khäla panei bala tak, ‘Kei ängtu piyaw khäl. Iyaäm kei käh kroktih samphomah kübüneyal däk.’ Äi huih kawchawng chawng Kei nangnih a kanang tak, ulung hleyeyalaih saw hlüahtih kohgib gala pochongkoh konghmuh sang thawka, äi ngulaisu hngat la dä ulung hleyeyal hi, hawn pre a unung awpiyaw mäi khäh. “Awlaw tawk chawm khäl, hmutaw pochongaka hen poisa paiha mäi. Ani la äi känäng käh poisa hngat khrokei hi simiya choi bala, im phei bala äi bünalah saw sawgraw mawtchaw suyal hnawh ei? Ani la übünal pänäng, akhanbawn la imcheng saw khäl panei bala ulum awlaw atak, ‘Kei ängtu piyaw khäl. Iyaäm kei äi kroktih hen poisa kübüneyal däk.’ Äi huih, kei nangnih a kanang tak, ngulaisu pochongak la ulung hleyeyal hi Hnadaga käh hawn natchaw khäl hmawi mawh a awpiyaw mäi.” Äidä Yĕsu la awlaw hawu, “Khrawng pochongaka awchaw pochong hnih mäi hüt. A hnih äng käh änäuchaw la awpaw a tak, ‘Paw o, kei wui äng käh kähkän kheni kei a epek.’ Äidä awpaw la awchaw pai hnih a kähkän pheih pekchak. Hnüpak hnih pänäng, äi awchaw näuchaw la äpängei saw siäng awhlawm hlaw pre pawta chet. Äi düna ani käh kähkän pawyah saw lawm äng akhrah chak. Ani la ükütni usum chak pänäng, äi pre a mawmawt eisaw ken hnäh. Äidä ani ha apangma saw chah hnäh. Äi khaw a äi pre a käh khrawng hngat ima bi asuyei. Äidä im mawh la wok chawk pekaih sawk saw koong phüma teh. Äi khaw a wok chawk äng ani la ähän hluh eiyeih khiyang hüt chi. Äini ani a hngat la ha äi bang pek do chi u. Äidä ani a awtawk loal bala awhawu, kei paw käh ahnga khälla ei ula päihyah. Äini niya kei kümüt saw äng küdü aih. Kei paw khäka chetal ngala katakalai, ‘Paw o, hawna käh Hnadaga lukhrunga awlaw nang lukhrungnga kei ngulai kibi. Nang chaw ting khrawng paneyeih saw kei tawn tinga. Nang käh ahnga huih kei a awtaweiyal.’ Äi pänäng ani thou bala awpaw khäka chetal. Ani lo al saw awhlawm hlaw kän awpaw la hmuh, äidä ejenei. Ani awchaw khäka chon bala äp bala aw hnawmal. Äi khaw a awchaw la awpaw a tak, ‘Paw o, hawna käh Hnadaga lukhrunga awlaw nang lukhrunga kei ngulai kibi. Nang chaw ting khrawng paneiyeih saw kei tawn tinga.’ Äini awpaw la ani hngasaw khäla tak, ‘Chet hiyawng chula awat pawichaw lo khäl awlaw ani a watal sawk khäl. Ukut pemäng khoichip thawn khäl awlaw okho äng thanap chumal sawk khäl. Thawu thuthu tih sel chaw pumak law chula bät khäl. Nangkei päi ei pula piyaw äng khä. Iyaäm kei käh ni chaw üdü hüt, tua ani hengal. Ani okrok hüt, tua kübünal.’ Äidä ükütni ini piyaw hnäh. “Äi khaw a awchaw changchaw laiya mäi hüt. Ani ima ahiyäuwal ni, ani la ini tumsaw la ini lawmsaw sam yawk. Ani la hngasaw hngat panei bala ihi, ‘Ithänei tun saw äm?’ Hngasaw la ani a tak, ‘Nawnawu loal saw koong nawpaw la thawu thuthu tih sel chaw hngat bät saw. Iyaäm nawpaw la nawnawu a khotong khotawh büneyal saw.’ Äidä awchaw changchaw aman pok hnäh. Ani im duka vawngal do khiyangah. Äi khaw a awpaw apranga thok bala im duka vawngalaih saw koong a khawh ei. Äini ani la krawn bala awpaw a tak, ‘So e! Äi hiyawh khokum ahngasaw huih kei nanga kini chetchaw. Sätak ha nang kheu kei chalh nga. Äini kei khanbawn tih äng piyaw hnäng hmawna, kei a krängak bang mahchaw pumak epekti. Äini nang käh ni chaw la chawgraw khäl äng puei bala nang käh kähkän akhrah chak. Ani loal ni, ani koong thawu thuthu tih sel chaw näbätal.’ Äiche awpaw la ani a tak, ‘Chaw o, nang che sawkbrat kei ängtu nämäi. Awlaw kei a mäi saw khäl kheni nang käh dä. Äini nangkei ini piyaw aih saw tawn, iyaäm nawnawu üdü hüt, tua ani hengal. Ani okrok hüt, tua ani a ini bünal.’” Yĕsu la etebeih khäla tak, “Mäichawtih khrawng hngata kähkän sokhretih hngasaw hngat mäi hüt. Hnüpak khaw a äi hngasaw la kähkän akhrah saw ting mäichawtih khäka sidawng lo. Äi khaw a mäichawtih la hngasaw gonga panei bala che tak, ‘Nang ming äng i kawyawk saw äm? Nang nibi kawi saw khäl üsüh epekal. Iyaäm nang kei käh hngasaw gong mäilah ti hnawh ti.’ Äi khaw a hngasaw gong la ulung dukäng hawu, ‘Tua kei i kopoh aih saw äm? Kei mawh paw la che kei a bi uphrutalaih saw hnäh. Kei dek kopokaih saw tha ha taweinga awlaw hlu kawkhawmaih saw ha kawhiyawkei. Kei a bi khrawng phrutal pänäng khrawng khälla anih ima khrawng tawei do khiyang hmawna iba kämäiyeih lah saw äm kawhmawt däk.’” Äi pänäng ani käh awmawh paw känäng lei laweitih khäla hngat pänäng hngata panei. Ani la täkchah lei laweitih a kawmawh paw känäng nang i hiyawh lei nawlawkei saw äm ting ihi? Ani la tak, ‘Sĕt hngaw jelh bung äng ubung khra sok olip si kawlawkei saw.’ Äidä ahngasaw gong la ani a tak, ‘Nang lei ne eisaw chaw laweiyaltila niya bung hngawngip yoal. Äidä hngasaw gong la awlaw hngata tak, ‘Nang i hiyawh nupuei saw äm?’ Äi pueitih la hawu, ‘Tong len äng otong khra ak püm kupuei saw.’ Hngasaw gong la taktü, ‘Nang käh leichaw laweitila omon sĕtgip yoei.’ Äi uyumlah mäyahtih hngasaw gong la ngen mawh huih ibi koong awmawh paw la ani a awpiyaw pek. Iyaäm awa äng käh khrawng khäl thawka ni luhdül äng käh khrawng khälla ini pum huih khrawng khäl äng iba ini biyeih lah saw äm äi huih ngen ini tawkei. “Kei nangnih a kanang tak, luhdül äng käh kähkän awpawi lawm äng sumei chula khrawng khäl äng khanbawn hmatei bäichu. Iyaäm äi kähkän päih pänäng sawkak nini mäiyeih saw äi alaa Hnadaga la nangnih a anang lawkeyal hmawna. Ubang bi lekchaw äng uyumlah mäi äm, äi bi nung äng ha uyumlah mäiyei. Awlaw ubang bi lekchaw äng uyumlah mäyah äm, äi awbawng bilen äng ha uyumlah mäi hnawh. Ni luhdül äng käh kähkän äng dä nangnih a anang yumei hnängah hi, ula nangnih a anang yumei bala ihisaw kähkän anang pekaih saw äm? Awlaw nanga khrawng la anang awp saw kähkän äng dä uyumlah mäiti khaw, ula nang käh kähkän nukutäng anang awpaih saw äm? Hngasaw hngat la awmawh pochong hnih a chetchaw hnängah. Iyaäm ani la pochongaka umumai awlaw awhngaw a khet nawkai. Hiyah thän pochongaka ächäm po ai awlaw awhngaw a chäkah pak mäiyei. Nangnih Hnadaga la kähkän utu chetchaw hnäng hnawh chu.” Ni kheu khäl yaw ula awmawn khetnawtih hngat pai hnih Pherasai khälla Yĕsu a ini keleih. Äi khaw a Yĕsu la anih a tak, “Nangnih khrawng khäl hmawi mawh a nini puma konghmuh sang huih nini dawnei. Äini Hnadaga la nangnih lung äng käh kheu hmawt khäh. Luhchaw khäl mikäng ibang alang gong äm, Hnadaga mikäng che äi umum saw. Mosi käh thung la Hnadaga sidawng hiyawktih khäl käh kheu khrawng khäla tuilüh pektih Yohan käh kat täh ini sumei hüt. Äitäh kän Mawng Hnadaga pre a käh sidawng pawi ini hiyawkaih saw ini chah. Awlaw khrawng kheni la äi mawng Hnadaga käh pre a ini vawngaih koong mawt ini hno.” Äini thung äng käh kheu lungak kolaih saw thawka hawn la luhdül akrakai saw loigra khäh. Äi huih, ula bang iphiya khaweiyal bala awlaw hngat nawkal äm ani la imik sawuvei saw bi ibi. Awlaw awpawtaw la khaweiyal saw hmutaw a ula nawkaläm äila ha imik sawuvei saw bi ibi. Mäichawtih pochongak mäi hüt. Ani la awnchäh thi rong äng käh muihtih wat la awkhawk tih wat awat hüt. Awlaw hnüpak kiyawnah eiok saw äng piyaw piyaw hlaw hlaw äng mäi hüt. Äi Mäichawtih käh tamkha khäka Lasar ting mingei nawtih hlu khawmeitih pochongak mäi hüt. Ani pum kheni äng awhmaw mäi hüt. Awlaw mäichawtih la eei dün känäng krawsaw eisaw ei bala ani la ähän hluh eiyeih saw sot chi. Ui khäl bang lo ula ani hmaw ini leh ei chi. Hnüpak khaw a Lasar dü. Äi khaw a hawn natchaw khäl lo ula ani a Awbraham kena ini omal. Äi pänäng äi mäichawtih ha üdü. Äidä ani a ini phul al. Äi mäichawtih nat phung äng thasa dukhah bünal,. Ani la ädäm pawh a sotni awhlawm hlaw a Awbraham awlaw ani kena Lasar a hmuh. Äi khaw a mäichawtih la hek bala hawu, ‘Paw Awbraham o, kei a ejenei e. Tui äng ukutpem sumei bala kelei jel sawkaih saw koong Lasar a kei khäka te e. Iyaäm ni mei äng kei mawmawt dukhah kubün tun.’ Äini Awbraham la tak, ‘Chaw o, tawkeyal chawm, nang nawsawk mäi hüt khaw a ihiyawh awpiyaw äng nämäi hütäm, awlaw Lasar ihiyawh dukhah äng mäi hütäm. Äini ani tua awpiyaw äng niya mäiyal awlaw äiya nang dukhah äng nämäiyal. Awlaw nangnih la keinih awbawng ini kavei khäh. Äi känäng niya ini lo aih khiyang thän hngat ha lo hnäng u. Ni känäng ha hngat ha äiya chet hnäng u. Äi khaw a äi mäichawtih la tak, ‘Bakhaw paw o, ekhet äng Lasar a kei paw ima te. Iyaäm ima kawnawu pochong hngaw ini mäi khäh. Anih ni dukhah laa lo lah a pak ani la anih a sidih apek seh. Äini Awbraham la tak, ‘Anih koong Mosi awlaw Hnadaga sidawng hiyawktih khäl ini mäi khäh. Anih la anih käh kheu khäl khin seh u.’ Äi khaw a mäichawtih la tak, ‘Hiyah, paw Awbraham o, anih la äi khin hnawh u äini dütih äng käh pochongak hengal bala anih khäka chet khaw, anih la ngulai känäng ini lung ini hleyeyal khäh ai.’ Awbraham la ani a tak, ‘Mosi la Hnadaga sidawng hiyawktih khäl käh kheu dä anih la khin u khaw, dütih khäl känäng ini hengal thän äi khäl käh kheu ha khin hnawh u.’” Hnüpak khaw a Yĕsu la etebeih tih khäla tak, “Ngulai äng nawkraw nawkaih saw äng käh lawphah lo aih saw dä. Awlaw äi huih lawphah lotih khrawng koong che awbawng khrusaw mäyei. Äi yawchu ah tih khrawng khäl dukäng käh hngata ngulai lawm äng nichih puinawk saw thawka, ähngäl äng lung len khontila mretäng nähiyän saw bang pawi khäh. Äi äng nini bi kawi saw äng sidih äng mäi khäl! Nata nawu khälla ngulai ini bi hi, anih a bäunaw bäichu. Ngulai känäng ini lung ini hleyeyal khaw, anih a ähläh pekal bäichu. Awlaw, hnüpak äng kräng seh nang lukhrunga epret thänei bala, kei kulung ke hleyeyal däk ting kräng seh krawnal bala ana takal hi, anih a ähläh pekal bäi.” Äi pänäng teh hmueitih khälla Boi a ini tak, “Kini yum khrawng chang sawke.” Boi la takal, “Monniyang chih chaw tih dä nangnih a nini yum mäi hi, hut thinga nuyung kung läktäng thou tila mret äng achätal ting nini tak hi äila ha nangnih kheu khinai.” Tawk chawm khäl, hngasaw hngat samphomah kiyong kän hiyah thän laithän kän loal hi, ne eiyeih saw koong omal hnäh ting awmawh paw la paneyal ei? Paneyal hnawh! Äichaw a, ani la krawn bala dä takai, “Eisaw ächän ataw. Kei ei pän ngasaw sawgraw necheng äng awat khonei tila tawei awlaw kei a ete long. Äi pänäng nang eiyal bäi. Awmawh paw la hawu saw huih hngasaw la ükütni bi chak koong awmawh paw la äkiyä tawngeiyalei? Äi huih kawchawng chawng, Kei kanang taksaw huih nini thänei hi nini hawuvai, ‘Keinih usum vawngah tih hngasaw khäl dä awlaw Keinih a khrawng awp saw bi khäl dä kini bisaw.’” Yĕsu Yĕlusalema echet lawma Samali la Galil mräh je äng echetei tun saw. Äi khaw a Ani nam hngata vawng. Unu lawga mawh pochong ha awhlawm hlaw a ja ula ini mäi saw khom. Anih hek ula ini hawu, “Yĕsu, Boi o! Keinih a khrawng jenei.” Yĕsu la anih pawta soei bala hawu, “Chet khäl, nini kantha pujawtih khäla adawneyal khäl” Anih chetpe chetpe unu lawga lawma ini pawiyal chak. Anih dukäng käh pochongak la awpawiyal saw hmuh ei ni, ani krawnal bala athak hehek bala Hnadaga a awphiyaw. Ani Yĕsu khochouwa khogru düläng mäi bala awpawiyal saw koong äkiyä tawngeyal. Ni khrawng che Samali pre a käh khrawng mäihüt saw. Yĕsu la hi, “Kei pochong ha khrawnga awpawi poal nga ei awlaw pochong koh mawnga äm?” Awhngaw yapsaw hngat Hnadaga a äkiyä tawngei a krawnal. Äini kei yapsaw che Hnadaga a äkiyä tawngeyala krawnal u. Äi pänäng Yĕsu la äi khrawnga takal, “Thouwal tila chetal nang käh yum la nanga awpawi ini poh al däk.” Hnüpak khaw a Pherasai hngat pai hnih la Yĕsu a ini hi, “Mawng Hnadaga pre itih khaw a loalaih saw äm?” Yĕsu la anih a krawn bala takal, “Mawng Hnadaga pre loalaih saw che awhngaw ei khäh, äi nini mik äng nini hmuaih saw yap hiyah. Mawng Hnadaga pre che niya dä hiyah thän äiya dä ting hngat la ha hawu hnäng hnawh u. Iyaäm Hnadaga la nangnih a anang khiyup däk.” Äi pänäng Ani la etebeih tih a tak, “Hnüpak ni huih ikhin loai, nangnih luhchaw chaw mawngei saw khin nini hmu aih khiyangai. Äini nangnih äi hmuh lah hnawh chu. Khrawng khälla nangnih a anang takai, ‘So khäl, niya dä luhchaw chaw awlaw äiya dä Luhchaw chaw.’ Äini äi khaw a chetai chu awlaw täm ha tämai chu. Khraih kha liliuh wei hi hawn chah känäng uyummak ihuih awa pütchak äm, Luhchaw Chaw loalaih saw khaw a äi huih ükütni la ini hmuh ai. Äini Luhchaw chaw la täkchah awbawng dukhah khawmaih mawsaw. Awlaw tukatäng käh khrawng khälla Ani a lawei hnawh u. Noha katäng ihuih thänei äm, Luhchaw Chaw käh khin khaw a ha äi huih dä thäneyeih saw. Noha long äng kawiyah saw awlaw tuilen äng hang hang krakah saw sawgraw, khrawng khäl eiok saw äng, phiya ini nawk saw la ini pekei saw äng ini mäi hüt.” Awlaw Lot khaw a äi huih kawchawng chawng thänei hüt. Äi khaw a khrawng khälla ei ok, jeh tuk, chäh khaih awlaw im pawi im pawi tunaih saw khäl äng dä ini lung pek ula ini mäihüt saw. Äini Lot la Sawdom nam hlät bala chetal khaw a, äi hnüpa hawn känäng mei la salphar äng käh kho kraw bala khrawng khäl kheni ini düchak. Äi huih kawchawng chawng Luhchaw Chaw loal khawngah khrawng khäl piyaw ula ini mäiyei. Äi hnüpa ubang tĕh khrung äng mäi äm äi khrawng im duk känäng vawn lawkeyala awdawnga komalah seh. Äi huih ubang akhanga mäi äm, ani krawn bala ima loalah seh. Lot phiya iba thänei hüt saw äm nini lung äng khawyeiyal chawm khäl. Ula awsawk heneyeih koong ohno ei äm, ani la päiyah saw sawk uhiyumeyei. Awlaw ula awsawk hiyumei äm, ani la awsawk henei hnängai. Kei nangnih a kanang tak, äi yawna khrawng pochong hnih phawk hngat äng utu ihni ipai. Äi häih känäng pochongaka lawk hmueyalai awlaw pochongaka che tawk hmueiyalai. Äi khaw a, hmutaw pochong hnih la utula mong ihni nangai. Pochongaka che lawk hmueiyalai awlaw pochongak che tawkal hmueiyei. Äidä etebeih tih la ini hi, “Boi o, ni khäl mawnga thäneyeih saw äm?” Yĕsu la takal, “Mawnga bang oyok mäi äm, äiya langdah ini chuh ei.” Tebeih tih la sawkbrat suh tongei hmawna awlaw sätak ha phruteyah hmawna, Yĕsu la tebeih tih khäla ni pümchut hawu pek. Yĕsu la tak, “Mräh hngata tara bitih hngat mäi hüt. Äi tara bitih la Hnadaga a keh hütah awlaw khrawng khäla ha süp hütah. Äi mräh a hmeinu ha hngat mäi hüt. Äi hmeinu la sawkbrat tara bitih khäka lo bala tak chi, ‘Kei käh lansu äng kataraeiyeih saw kei a ihisaw tara ibi pek.’ Äi tara bitih la hnüpak hnih che iha tara bi pekapak mäi hüt. Äini tara bitih la tawk, ‘Kei Hnadaga keh nga awlaw khrawng khäla süpnga thän, kei a ni hmeinu la ukhru sawk saw koong ani a kei ihisaw tara kibi pekaih lah saw. Hiyah khaw che ani awkrawn krawn loai awlaw kei a ukhru sawkai.’” Äi pänang Boi la awlaw hawu, “Äi matara bitih la i hawu äm khin chawm khäl. Äi huih hi ukhälla ühnüp awyawn Hnadaga a ini panei äm, Hnadaga la äi heh leisaw khrawng khäl koong ihisaw tara bi hnawh ei? Ani la äi biyeih saw kraw a yei? Kei nangnih a kanang tak, Ani la äi khäl koong ihisaw tara bi pekaih saw kraw hnawh. Äini Luhchaw Chaw loal khaw a, Ani la luhdül äng uyum mawh khrawng bünaiyei?” Ini puma konghmuh sang ting khineitih awlaw khrawng süpah tih khäla Yĕsu la ni pümchut hawupek, “Khrawng pai hnih suh tongeiyeh koong Hnadaga ima ihni chet. Äi äng käh hngat che pherasai awlaw hngat che phawndaw koktih. Äi pherasai ja bala akantha krong äng ni huih hawu bala suh tongei, ‘Hnadaga o, kei nanga äkiyä kini tawngei. Kei awnghaw khrawng huih hinga. Kei krameitih, soutih, kraktih awlaw ni phawndaw koktih huih ha hinga. Kei sapta ak äng nap hnih chi ei oa pak kämäi awlaw kübün bawk saw kheni äng käh phüh ha äng käh phüh ak nanga kini pek.’ Äi khaw a äi phawndaw koktih awhlawm hlaw a ja bala mäi hüt. Ädäm pawh sotaih saw koong esĕng khri mäi hütah. Ani la akang chang beyei bala awhawu, ‘Hnadaga o! Kei ngulaisu, kei a ejenei.’” “Kei nangnih a kanang tak, äi phawndaw koktih Hnadaga hmawi maw a pret mäyahtih thänei bala ima krawnal. Äini äi pheresai konghmuh sang thänei hnängah. Ula bang upuma ehlenei äm, ani a hnem hmueyalaih saw dä. Awlaw ula bang upuma ehlekei äm, ani a ehlen hmueyalaih saw.” Khrawng khälla sämäichaw khäla Yĕsu khäka ini lo. Yĕsu la sämäichaw khäl däma ukut tawei bala pisih pek. Etebeih khälla äi hmu ula khrawng khäla ini bäunawk. Äini Yĕsu la äi sämäichaw khäla Ani khäka panei. Äi pänäng Ani la tebeih khäla tak, “Sämäichaw khäl kei khäka lo seh u. Anih a nga ai chu. Iyaäm Mawng Hnadaga pre che ni sämaichaw huih khrawng khäl koong dä. Kei nangnih a lälä kanang tak, Mawng Hnadaga pre a sämäichaw huih lungei naw bala ula bang laweiyah äm, äi khäl Mawng Hnadaga pre a sätak ha vawngal hnäng hnawh u.” Yudi khäl käh elenchaw hngat la Yĕsu a ihi, “Choktih o, nang che khrawng pawi hngat dä. Kei a awhawu pek, kei i kopoh hi päihyah saw sawk kübünei hnängaih saw äm?” Yĕsu la ani a tak, “Kei a nang khrawng pawi ting iya ini taksaw äm? Hnadaga battih hngat ha khrawng pawi mäi u. Nang Mosi käh thung kheni naw hmawt khäh. Nimik sawuveiyei ti, khrawng sawk tuai ti, muai ti, eheng sawksi thokaiti awlaw nang nupaw kenkeh bäi.” Äi elenchaw la takal, “Kelekchaw khaw thouh äi khäl kheni kei ngei ngala kolo saw.” Äi kheu khäl yaw bala che Yĕsu la ani a takal, “Tua ha nanga nibiyeih saw bi hngat mäipe khäh. Nanga ibang mäi äm, äi jeei tila sanglaisu khäla pheipek chak. Äi khaw, nang hawn pre a käh kähkän nübüneyei. Äi pänäng loal tila che Kei tebeih thäneyal.” Äi kheu yaw bala che äi elenchaw la thasa ulung dukhah piyei. Iyaäm ani che mawt mäi chawtih mäi hüt. Yĕsu la äi elenchaw pawtäng so bala tak, “Mäichawtih khäl koong Mawng Hnadaga pre a ini vawngaih saw thasa khawk khei! Mawng Hnadaga pre a mäichawtih ini vawngaih saw thawka phem kho äng ut ting ini taksaw mäksetdava vawngaih saw loigra khäh.” Ni kheu yawtih khälla ini hawu, “Bakhaw ula kiyawt büneyalaih saw äm?” Yĕsu la hawu, “Khrawng la ibang näng u äm, Hnadaga la äi khäl näng chak.” Äi khaw a Pitol la tak, “Keinih che ükütni hiyän chak ungala nang käh tebeih kini thänei.” Yĕsu la etebeih khäla tak, “Kei nangnih a lälä kanang tak, ula bang Mawng Hnadaga pre koong im, iphiya, nube tanawu, nupaw awlaw chaw chuhnu hiyän bala lo äm, Hnadaga la anih kheni a ni katäng awkrawn krawn awbawng epekalai awlaw awmaw äng päihyah saw sawk ha epekai.” Yĕsu la äi pochong lei hnih tebeih khäl chah ak pawta chipui naw bala tak, “So khäl, nangkei Yĕlusalema ini chetaih saw. Hnadaga sidawng hiyawktih khälla Luhchaw Chaw kheu ibang ini yok hütäm äi hang hang äthäneyalai. Iyaäm Yudi hiyahtih khäl kutäng Ani a awp hmueiyei awlaw khrawng khälla Ani a ini keleihyei, siri ini pekai, Ani pum äng chiltui ini so nawkai. Anih la bop dün jäi äng thasa ini bop pänäng Ani a ini tukai. Äini hnüp thum düna Ani dü saw känäng hengal bala thouwalai.” Äini tebeih khälla äi kheu khäl iha yawchu u. Iyaäm uthuk kheu khäl anih khäka thuh hmuei. Yĕsu la i hawu äm anih la äi yawchu u. Yĕsu Jeliko mräh kena aphaw khaw a imik mütih khrawng hngat la lawm kena om bala hlu khawmei hüt saw. Awbawng khrawng eken äng ini chetei saw sam yaw bala i thänei saw äm ting äi hlukhawmeitih la ihi. Khrawng khälla ani a ini tak, “Nazareta käh Yĕsu ni lawm äng chetei bala echet tunsaw.” Äi khaw a ani la hek bala hawu, “Dawut chen äng käh Yĕsu o, kei a ejenei e.” Awmaw äng chet tun tih khrawng khälla ani a dikdik mäyeih saw ini tak. Äini ani äi thawka athak hek bala che hawu, “Dawut käh chen o, kei a ejenei e.” Äi khaw a Yĕsu düm bala che äi imik mütih a Ani khäka ini loaih saw tak. Imik hmütih ekena lo pänäng Yĕsu la ihi, “Nang i nühlüei saw äm? Nang koong kei i kopoh aih saw äm?” Mik hmütih la hawu, “Boi o, kei kuhmuh eiyalaih khiyang.” Yĕsu la ani a tak, “Äihi nang hmueiyal. Nang käh uyum la nanga awpawi anang poh al.” Äi äng tutu äi khrawng la uhmuh eiyal awlaw Hnadaga a phiyawpe phiyawpe Yĕsu hnung hnung äng echeteiyal. Äi hmu ula khrawng kheni la Hnadaga a ini phiyaw al. Yĕsu Jeliko mräh dukäng chet tunsaw. Äi khaw a Zakias ting ini taksaw khrawng hngat mäi hüt. Ani che phawndaw koktih gong awlaw mäi chawtih mäi hüt. Yĕsu che ilupäm, äi ani la mawmawt hmuh aih khiyang hüt. Äini üdüng toi saw koong awlaw khrawng ini nung saw koong hmulah ah. Äi khaw a ani chon hiyawng bala che Yĕsu a hmuh aih saw koong khĕu thing äng akawi. Iyaäm Yĕsu äi lawm äng lo aih saw. Äi khaw a Yĕsu äi lawm äng lo bala ädäm pawh sot ni Zakias a hmuh. Äidä Ani la tak, “Zakias o, jotjota komal hiyawng. Kei tühnüpa nang ima kolo aih saw dä.” Äi khaw a Zakias piyaw bala ayang lawma komal äidä Ani im pawh a chih pui nawkal. Äi düna mäitih khrawng khälla äi hmu ula keleih ula ini kräuwei, “Ani ngulaisu ima gawlba thänei bala chetsaw.” Äi khaw a Zakias la ja bala Boi a tak, “Boi o so, kei kähkän kawtawkei saw äng käh tihtih a sanglaisu khäla kepheih pekalai. Awlaw khrawnga kakramei saw mäi khaw, krawn hli kepekalai.” Äi khaw a Yĕsu la ani a tak, “Tühnüpa ni ima khiyawtara lo. Iyaäm ni khrawng ha Awbraham chen känäng käh khrawng hngat dä. Luhchaw Chaw olo saw che kroktih khrawng khäl suiyala awlaw ngulai känäng khiyawtala.” Yĕsu Yĕlusalem mräh kena aphaw ni Mawng Hnadaga pre ekena lo däk ting khrawng khälla ini khin. Äi koong Yĕsu la anih a pümchut hngat hawu pek. Yĕsu la hawu, “Ming mawh chen äng käh khrawng hngat mawng thänei bala loalaih saw koong, awhlawm hlaw pre a chet. Ani chet khawngah ahngasaw pochong ha a panei bala ha poisa paiha hngata hngatchi pek bala che tak, ‘Kei loal ngasaw sawgraw ni äng kun poei naw bäichu.’ Äini ani presaw khälla ani a awpawi pi hüt u. Äi koong ani hnüng äng mawng len khäka khrawng ini teh. Äi khälla ini hawu, ‘Ni khrawng keinih käh mawng thäneyeih saw hlüei unga.’ Ani mawng thänei bala krawnal awlaw awmawn pek hütsaw hngasaw khäla ani khäka ini loaih saw tak. Hngasaw khälla kun po ula ihiyawh awmawn ini mratäm äi hmawtalaih khiyang. Täkchah hngat lo bala hawu, ‘Boi o, nang käh ha poisa äng kei krawn ha dä kamrat saw. Mawng la hngasaw a takal, ‘Mawmawt awpawi nopoh. Nang bitchaw krong äng uyumlah nämäi saw koong mräh paiha äng käh gongsong kini poh. Äi pänäng käh hngasaw lo bala tak, ‘Boi o, nang käh ha poisa äng kei krawn hngaw dä kamrat saw.’ Ani käh boi la atak, ‘Nanga mräh pai hngaw äng käh gongsong kini poh. Äi pänäng awhngaw hngasaw hngat lo bala tak, ‘Boi o, nang käh ha poisa kei awat pilchaw äng chun ngala kuthuh al. Ninu nang käh ha poisa.’ Kei nanga mawt kini keh. Iyaäm nang che thasa ngĕt tih khrawng dä. Nang ibang chungti äm, äiha nawlawkeiyal awlaw nang chäti düna ha, nataneiyal.’ “Äi khaw a ani käh boi la tak, ‘Sawu tih hngasaw o! Nang käh kheu äng dä kei nanga tara kibiyeih saw. Nang hmawtiyei, kei che ngĕt tih khrawng dä. Ibang chung nga äm äi kawlawkeiyal. Awlaw ibang chänga äm äi katan. Kun potih khäka iya kei käh awmawn atawti saw äm? Äi huih hi, ochou ängtu kei ichi ha kübüneyalai hü.’ “Äi khaw a mawng kena ja bala mäitih awhngaw hngasaw khäla mawng la tak, ‘Ani känäng ha poisa law al khäl. Awlaw ula lawp ha ha poisa tawkei äm äi khrawnga pekal khäl.’” Äi khaw a äi khrawng khälla mawnga ini tak, ‘Choktih o, ani a che lawpha ha poisa mäi khäh!’ Äi Mawng la hawu, ‘Kei nangnih a kanang tak, ua bang mäi äm, ani a awlaw pek hmueyei. Äini ua bang mäyah äm, ani a ibang mäi äm, äi kheni lawk hmueiyalaih saw. Kei mawng käthäneiyeih saw hlü ah tih kei lansu khäla niya lo khäl. Anih a kei hmawi mawh a tu khäl.’” Äi kheu khäl hawu saw phäih pänäng Yĕsu anih maw äng ayang ayang Yĕlusalem pawh äng chet. Äi düna olip khuyung ting ini taksaw kena käh Betphagi la Betani nam kena lo ni, Ani tebeih pai hnih a teh. Yĕsu la tak, “Awhmawi mawh a käh nama chet hnih, äi düna ni hni wang saw ängtu hngat la ha chum hawm u saw se lekchaw ini khon saw ni hni hmuh ai. Äi sut hni tila niya lo bäi hnih. Khonei tih sĕ lekchaw iya ni hni suh saw äm ting losulapei anang hi khaw, Boi la lhüei khäh ting ta bäi hnih.” Äi teh hmueitih häih la Yĕsu la hawu saw huih se lekchaw ihni khom. Äi se lekchaw a hna suh ni, awmawh la a hnih a hi, “Iya ni khonei tih se lekchaw ni hnih suh saw äm?” A hnih la ihni tak, “Ni Boi la hlüei saw.” A hnih la äi se lekchaw Yĕsu khäka ihni lo. Äidä se khrung äng awat phawh häih la, Yĕsu a ihni chum sawk. Äi pänäng Yĕsu chetaih saw lawm äng khrawng khälla ilhchaw khäl ini phawh. Olip khuyung pawta nechetaih saw lawm wah a Yĕsu aphaw. Äi khaw a Ani hnung äng lotih khrawng khälla piyaw ula che Hnadaga a ini phiyaw. Iyaäm Yĕsu la bisaw nawmaw nawkaih saw bi khäl anih la ini hmuh hüt. Ni khrawng khälla ini hawu, “Boi ming äng lotih äi mawng che pisih mawh!” “Hawna jelkhiyamsa awlaw Hnadaga awpiyaw äng mäiseh!” Äi khrawng sawng duk känäng Pherasai khälla Yĕsu a ini tak, “Choktih o, netebeih tih a bäunaw!” Yĕsu la krawn bala takal, “Kei nangnih a kanang tak, anih dä dikdik ini mäi khaw, lung khäl ini hekai.” Yĕsu Yĕlusalem mräh kena lo ni, äi mräh hmu bala che akap. Awlaw Ani la hawu, “Mräh o, jelkhiyamsa koong i hlü aih saw äm äi jiji dä tühnüpa nang nawhmawteyeih saw kei kü hlüei! Äini nang tua äi khäl nimik äng hmuti. Ikhin lo tun, nalansu khälla lung pawng ini poh ai, nanga anang wanchakai, üküt lawm äng ni nanga anang siyei. Anih la nanga awlaw nang chaw chuhnu kheni a dek hnuiya anang poh ai. Nang käh lung pawngäng käh lung hngat khrung äng hngat thawpei saw tawti hnawh u. Iyaäm nanga anang khiyawtalaih saw koong Hnadaga lo hüt saw nang hmawtei hüt ti.” Äi pänäng Yĕsu Hnadaga ima vawng ni äi duka vawn jetih khäl kheni tämal chak. Ani la äi khäla tak, “Kiyam äng yoei bala mäi khäh, ‘Kei im che suh tongei dün im.’ Äini nangnih che tamdah sattih ima dä nini poh nu.” Yĕsu la hnüpak kiyawnah Hnadaga ima ochok chi. Äini pujawtih elenchaw la Mosi käh thung choktih khäl awlaw äi khrawng khäl äng käh elenchaw khälla Ani a ini tukaih saw ini kram. Äini anih la ini tukaih saw lawm iha sui ula bün u. Iyaäm khrawng khälla chih jih ini lung khrawei ula Ani kheu ini khin hüt. Hnüpak khaw a Yĕsu la Hnadaga ima khrawng khäla ochok hüt awlaw sidawng pawi awhiyawk hüt. Äi khaw a gongsong khäl ängtu pujawtih elenchaw la Mosi käh thung choktih khäl äiya ini lo. Awlaw Yĕsu a ini tak, “Mawng dogo äng nang nihuih nibisaw äm, awlaw ula nanga äi tha khäl ini pek saw äm, äi keinih a khrawng hawu pek.” Yĕsu la anih a tak, “Kei nangnih a kheu hngat kanang hiyeih, hawu khäl chaw. Tuilüh pekaih koong Yohan la hawn pre känäng tha bünei saw ei, hiyah hi khrawng känäng bünei saw ei?” Äi khaw a anih hngat la hngat äng ini kräuvei, “Hnadaga känäng ting nangkei dä ini tak khaw, Yohan a iya yumei hüt chu saw äm ting Ani la hawuvai. Äini khrawng känäng ting nangkei dä ni hawu khaw, khrawng khälla lung pel khrawng khong nawkai. Iyaäm khrawng khälla Hnadaga sidawng hiyawktih ting Yohan a ini yumei.” Äi koong anih la ini tak, “Yohan la tuilüh pek saw tha, mawng känäng bünei hüt saw äm keinih hmawt unga.” Yĕsu la anih a takal, “Äihi mawng tha äng äi khäl kibisaw äm kei ha hawu donga.” Äiche Yĕsu la khrawng khäla ni pümchut hawu pekaih saw a chah, “Khrawng pochongak la grĕp khang hngat ibi. Äini ani la bitih khäla baga pek bala awhlawm hlaw pre a echetal. Äi pänäng ani la grĕp khang äng käh uvui büneyeih koong a hngasaw hngat eteh. Äini bitih khälla ani a bop ula che kut hong äng ini teh al. Äidä ani la awlaw hngat hngasaw a teh, äini bitih khälla ani a ha ini bop awlaw isiri khrak ula ukut hong äng ini teh al. Äi pänäng ani la u hnung sum äng käh hngasaw a eteh, äini bitih khälla ani a ha thasa bop ula che ini tämal. Äiche grĕp khang mawh paw la hawu, ‘Kei i kopoh ai äm? Kei kekhet saw sum kawchaw a thän keteh ei. Anih la ani a khat hmawi ini pekai.’ Äini bitih khälla ini hmuh ni ini hawu, ‘Kähkän kheni nangkei käh a thänei hmawna, lo khäl, ani a tuäng khä.’” Äi huih hawu ula anih la akhang pranga chih ula che ini tuk. Äidä Yĕsu la anih a hi, “Grĕp khang mawh la äi bitih khäla tua ipoh aih saw äm? Ani lo bala äi khäla utukalai awlaw awhngaw khrawng khäla äi grĕp khang baga pekalai.” Khrawng khälla Yĕsu kheu yaw ula ini hawu, “Äi huih thäneyah sĕh.” Äi khaw a Yĕsu la anih hmawi mawh khiyang soyei bala tak, “Bahi, kiyam äng ni kheu yoei saw khäl che i äm? ‘Lung im bitih la mawng lung bang ini hiyänal hütäm, äi hang hang thawka alang gong lunga thäneyal.’ Ubang äi lung khrung äng kru äm, ani che bängei bala pilei chakai. Awlaw u khrung äng bang äi lung awkraw äm, äiche ikrichakai. Äi khaw a Mosi käh thung choktih khälla awlaw pujawtih elenchaw khälla Yĕsu a äkräu dün la a ini mawnaih saw ini hno. Iyaäm Yĕsu la äi pümchut anih krong äng hawu saw ting, anih la ini hmawtei. Äini anih la khrawng ini keh. Mosi käh thung choktih khälla awlaw pujawtih äng käh elenchaw khälla Yĕsu a miknaw ula ini tawk. Awlaw Yĕsu a ekheu äng epret mawn ula che, dogo mawh khiyuptih khäka tara äng ini khrawkaih koong, kheu hling hlongtih khäla umuchaw äng ini teh. Äi kheu hling hlongtih khälla Yĕsu a ini tak, “Choktih o, keinih kini hmawt khäh, nang nawhawu saw la nochok saw ihi khäh. Nang hang hanga mikak äng nosot awlaw Hnadaga kheu, ihisaw lawm äng khrawng khäla nochok. Bahi, Mosi käh thung äng mäi saw huih Rom käh mawng lena phawndaw ini pekaih saw tawnei?” Yĕsu la anih kram yawchu bala che anih a tak, “Kei a hen poisa hngat awdawn khäl. Ni khrung äng u käh lupchaw la ming mäi äm?” Anih la ini hawu, “Mawng len käh.” Yĕsu la anih a tak, “Äihi, mawng bang Mawng len käh äm, äi Mawng lena pek khäl. Awlaw mawng Hnadaga käh äm, äi Hnadaga a pek khäl.” Khrawng khäl hmawi mawh a Yĕsu la ibang hawu hütäm, äi äng kheu hling hlongtih khälla iha epret bün u. Ani kheu äng maw ula äi khäl dik dik ini mäiyal. Äi khaw a Suduki khäl äng käh pochongak hnih Yĕsu khäka ini lo. Suduki khäl käh tawk äng che dütih khäl heng ula ini thouwal saw mäyah. Anih la Yĕsu a ini hi, “Choktih o, Mosi la keinih koong ni kheu oyok hüt. Losupei chaw chuhnu mäi hütapak iphiya taw hüt bala dü hi, äi dütih phiya a dütih nawu la nawal bala ani chen tawkal hnängai. Äihi tanawu seh ini mäihüt. Äi khäl äng käh achang chaw la phiya naw bala chaw chuhnu hmueyah pak üdü. Äi pänäng nombor hnih nawu la awnawkal. Awlaw äi pänäng nombor thum nawu la äi dütih phiya a awnawkal. Äi huih, äi huih tanawu seh kheni la ni hngat pänäng hngat la äi dütih käh phiya a ini nawk. Äiche chaw chuhnu hmueyah pak ini düal chak. U hnungsum äng äi hmutaw ha düal. Bakhaw che, dütih khäl ini thouwal hnüpa äi hmutaw u phiya thäneyalaih saw äm? Iyaäm pochong sĕh la ni äi hmutaw a ini nawk hüt.” Yĕsu la anih a tak, “Tu katäng käh khrawng khäl dä ini om nawei saw. Äini düsaw känäng thouwal ula uhnung katäng che tawn tih ting u khäla süh hmueyal äm, anih om nawei tih hnawh u. Anih düti hnawh u awlaw hawn natchaw huih ini thäneyalai. Anih düsaw känäng ini thouwal däk koong Hnadaga chaw a ini thäneyal. Awlaw choitih chompo krong äng yoei düna Mosi la sanh sanh dawn, dütih khäl hengal ula ini thowal. Äi düna Mosi la Boi Hnadaga a, ‘Awbraham käh Hnadaga, Aijak käh Hnadaga awlaw Yakub käh Hnadaga ting panei.’ Hnadaga che dütih käh Hnadaga hiyah, äini hengtih käh Hnadaga dä. Iyaäm Hnadaga äng dä hang hang ni heng ula ini mäisaw.” Äi khaw a pochongak hnih Mosi käh thung choktih khälla ini hawu, “Choktih o, nang ihisaw nawhawu khäh.” Äi pänäng anih la Yĕsu a iha hi dat ti u. Äiche Yĕsu la anih a hi, “Bakhaw che, khrawng khälla Krito a Dawut käh chen ting iba ini hawu äm?” Dawut la Sam boih hiyol äng hawu, ‘Boi la kei käh Boi a tak, Kei nang käh lansu khäla nang kho chouwa tawnga saw sawgraw, Kei käh set pawta om.’ Dawut la Mesaya a Boi ting panei hüt. Äihi Mesaya iba Dawut chen äng käh thänei saw äm?” Khrawng khälla Yĕsu kheu ini khin tun khaw a, Yĕsu la tebeih khäla tak, “Mosi käh thung choktih khäl känäng nangnih sidih äng mäi khäl. Äi khälla awat sawu wat ula ini choneyeih saw pawi ini pi. Awlaw ji khäla hmawi ini büneyeih saw pawi ini pi. Anih la Yudi ini lumeidün ima awlaw päiya ha ming mawh ini om dün laa ini omaih saw pawi ini pi. Anih la hmeinu khäla kramei ula kähkän ini lawkeyal awlaw khrawnga ini dawneyeih khiyang koong suh tong sawu ini tongei. Ni huih khrawng khäl käh dam che mawt keh seyeih saw dä.” Yĕsu la osotni u hmuh, mäichawtih khälla ini hlu dün tawbala äng anih käh hlu ini thawn tun saw. Awlaw sanglaisu hmeinu hngat la elekchaw sawih poisa paihnih thawn tun saw ha Ani la hmuh. Ani la awhawu, “Kei nangnih a ihisaw kheu kanang takaih, äi sanglaisu hmeinu la awnghaw khäl thawka bang awbawng hlu khäh. Iyaäm ni khrawng khälla che anih käh kähkän känäng amrat saw dä ini hlusaw. Äini ni hmeinu asanglai thän ha che ehengaih koong tawkei saw kheni uhlu chak.” Pochong hnih thum tebeih khälla Hnadaga im krong law ula che ini kräuvei. Anih ini kräuvei, Hnadaga im ihuih pawei saw lung äng ini bisaw äm. Awlaw Hnadaga khäka phiyaw phoih ini hlusaw äng ha pawei sese a ini bi. Äini Yĕsu la awhawu, “Ni nini hmuh saw hang hang ni ikhin lo khaw a, khrak hmueyalaih saw dä. Hngat dämäng hngat lung mäiti hnawh.” Anih la Yĕsu a ini hi, “Choktih o, ni khäl itih khaw a thäneyeih saw äm, awlaw i hmat la hmu ungala che äi khin lo däk ting kini hmawtaih saw äm?” Ani la krawn bala takal, “Sidih kanang pek. Hngat la ha anang kramei hnängah pak. Iyaäm Kei ming lawei ula che awbawng khrawng ini lo aih saw awlaw Kei dä ani ting äi khälla ini hawuveiyeih saw. Awlaw ikhin hiyäu däk ting ini hawuvai. Äini äi khrawng khäl hnung äng chetaichu. Nangnih jal kom saw la ini pungkanei saw sidawng nini yawk khaw a ke ei chu. Iyaäm ni khäl täkchah thän ni thäneyeih maw saw dä, äini luhdül krakhawm hnawh.” Äi khaw a Yĕsu la anih a tak, “Yapsaw la yapsaw khrung äng, awlaw presaw la presaw jal ini thäkeyei. Liuh len loai, ätän tän la a eisaw kenai, leh lo ai, keh sese a dawngai, awlaw hawnäng elen hmat la dawngai. Äini ni khäl thänei khawngah khrawng khälla nangnih a anang mawnai awlaw anang kuluh nawkai. Anih la nangnih a Yudi ini lumeidün ima anang chih ei awlaw othong im äng anang heng nawkai. Kei ming koong mawng khäka awlaw pre pängtih hmawi mawh a chih ini hmueyei. Nidä Kei ming äng sawksi nini thokaih saw koong ikhin nini büneyeih saw. Äi koong epret anang khrawtih khäla iba nini krawnei nawkalaih saw äm ting yang khaw thouh kongrah chula mäyei chu. Iyaäm Kei nangnih a kheu la ngen kanang pekai. Äi koong nangnih lansu hngat la ha nangnih a kheu äng anang nängei hnawh awlaw anang chahlei hnäng hnawh. Nini nupaw, nini nube, käisang awlaw nini phäu khälla pre pängtih kut äng anang awpai. Nangnih dukäng pochongak hnih a ha anang tukai. Awlaw Kei ming koong hang hang la anang mumai. Äini nangnih käh lusawm kangak ha anang phu hnäng hnawh. Nangnih dä nini yum äng tindin nini mäi hi nini sawk lätai.” “Nangnih Yĕlusalem soloi la wan ula ini tawk saw nini hmuh hi, Yĕlusalem krakaih saw ikhin hiyäu däk ting hmawt bäichu. Äi khaw a Yudia a mäitih kheni khuyunga chenseh u. Awlaw Yĕlusalem mräh dukäng mäitih kheni mräh pranga chetseh u. Awlaw nama mäitih kheni mräh duka loalah seh u. Äi hnüp khäl che dam pekalaih saw hnüp dä. Iyaäm kiyam äng yoei saw huih ükütni thäneyeih saw dä. Äi khaw a mäyeyeih hiyäutih awlaw chih pekei petih nu khälla mawt dukhah ini bünai. Iyaäm äi khaw a pre äng thasa upuai awlaw khrawng khäl lukhrunga Hnadaga käh dam awkraw ai. Pochongak hnih thum che hattih chimsawu äng tuk ini hmueyei. Awlaw awvawng che ayapyap japsaw dukäng heng naw hmuyei ula chih ini hmueyei. Awlaw i hiyawh hnüp täh Yudi hiyahtih khäl käh khin luihyah äm, äi hiyawh hnüp täh anih la Yĕlusalema ini kho äng ini chehlai. “Äi khaw a khoni, khraw awlaw asĕ khäl äng nawmaw aih saw awbawng hmat la awdawngai. Awlaw luhdül äng käh presaw kheni dukhah len äng ini kraw ai. Awlaw mret äng läng kawisaw la mret sou saw asam äng ini lung puai. Luhdül äng i thänei tun äm ting kongrah äng ke ula khrawng khäl ini hiyamai. Iyaäm hawna awdawng saw ükütni üdümchaw mäiti hnawh. Äi pänäng dogo len la a wachang ängtu Luhchaw Chaw a khose bok äng olo saw ini hmuh ai. Ni khäl thäneyeih saw chah khaw a ja bäichu awlaw nini luki jäkei bäichu, iyaäm nini lätalaih saw ikhin ekena lo däk.” Äi khaw a Yĕsu la anih a pümchut hngat hawu pek, “Khĕu thing la awhngaw thing khäl pawta so khäl. Thing äng singsei tha hnäuwal saw nini hmuh hi, khawran khaw lo däk ting nini hmawt. Äi huih kawchawng chawng äi ahmat la khäl thänei saw nini hmuh khaw, Mawng Hnadaga pre ekena lo däk ting nini hmawtai. Kei nangnih a ihisaw kheu kanang takaih, äi hmat la khäl thäneyah saw sawgraw ni chen khäl dü hnawh u. Hawna käh la luhdül äng käh ükütni okrokchakai, äini Kei kheu khäl sawkbratni ämäyei. Nangnih sidih tawei bäichu. Nangnih lung sousaw äng, nini moisaw äng awlaw lawgah krong äng luihyah pak. Äi hnüp nangnih khäka choh huih loah pak. Iyaäm Luhdül bratsaw lukhrunga äi khomhnüp choh huih oloaih saw dä. Äi koong sawkbrat sidih äng mäi bäichu awlaw suh tongei bäichu. Lalapei thänei seh äi nini lätaih saw la Luhchaw Chaw hmawi mawh a nini ja hnängaih saw tha bünei hmawna.” Hnüpak kiyawnah Yĕsu la Hnadaga ima khrawnga ochok chi, awlaw awyawna apranga thok bala che Olip Khuyunga chet bala che ämäi chi. Awlaw khrawng khälla Ani kheu ini khinaih koong mawtjawn Hnadaga ima ini chetchi. Äi khaw a is kaw ha päi thäneyeih saw kena olo tundäk. Ni is kaw ha päi che lätal päi ting ini tak. Pujawtih elenchaw awlaw Mosi käh thung choktih khälla khrawnga ini keh hüt saw koong, Yĕsu a umuchaw äng ini tukaih saw lawm ini sui hüt. Äi pänäng Ikariyo Yuda ting mingei nawtih dukäng Mannat awvawng. Ani che pochong leihnih tebeih khäl äng käh pochongak mäi hüt. Ani chetal bala pujawtih elenchaw la sidawng im chongtih elenchaw khäl äng iba Yĕsu a kramei bala awmawn sawkai sawäm äi krong äng anih äng akräuvei. Äi yaw ula anih ini piyaw chak awlaw ani a awmawn ini pekaih koong ini ngi chak. Äidä Yuda ha ngi. Awlaw khrawng mäi u khaw a Yĕsu a mawn sawkaih koong khiyong bala mäi. Is kaw ha neyeih saw päi khomhnüp lo hi, samphomah chaw bät ula lätal päi ini poh ei chi. Äi koong Pitol la Yohan a Yĕsu Krito la tak, “Chet hnih Keinih ei hnäng hmawna lätal päi koong ächän apo hnih.” A hnih la Yĕsu a ini hi, “Nang mawnga nühlü ei äm, awlaw mawnga ächän ki hni tawkaih saw äm?” Yĕsu la a hnih a tak, “Khin hnih, nang hnih mräh duka ni hni vawng khaw a, khrawng hngat la tui mengak law bala chet tun saw ni hni khomai. Ani hnung äng chet hnih tila ani mawnga vawng äm, äi ima vawng bäi hnih. Awlaw ketebeih khäl äng Kei om ngala lätal päi ke eiyeih saw koong gawrba mäidün täk mawnga äm ting Choktih la anang hi khäh ting, im mawh paw a ta bäi hnih. Äi pänäng äi im mawh paw la nang hnih a ädäma pawyei sese a ini tawk saw ätäk len anang dawnai. Äiya nangkei koong päi khraw bäi hnih.” Äidä a hnih ihni chet awlaw Yĕsu la ahnih a ihui tak hütäm, äi huih ihni khom. Ahnih la äiya lätal päi ihni poh. Ikhin thänei ni Yĕsu awlaw teh hmueitih khäl Ani ängtu ini om. Yĕsu la anih a tak, “Kei dukhah äng kraw khawngah nangnih ängtu ni lätal päi mawt keei yeih khiyang hüt. Kei nangnih a kanang tak, Kei kawhawu saw kheu khäl Mawng Hnadaga pre a ihisaw a thäneiyah saw sawgraw Kei ni päi eiti hnawh nga.” Äi pänäng Ani la khawp hngat law bala Hnadaga a äkiyä tawngei pänäng Ani la hawu, “Ni lawei khäl awlaw pheyei khäl. Iyaäm Kei nangnih a kanang tak, Mawng Hnadaga pre loah saw sawgraw, Kei ni grĕp hawng tühnüp khaw thouh oti hnawh nga.” Äi pänäng ha law bala Hnadaga a äkiyä tawngei. Äidä Ani la ha pil bala Ani tebeih khäla pek bala tak, “Ni Kei kantha, ni nangnih koong pek hmuei. Kei a nini lung äng awkhawyei chula ni huih poei bäichu.” Awlaw ini ei pänäng äi huih Ani la khawp law bala hawu, “Kei thi äng Hnadaga la Ani käh khrawng äng kheu tha ini tawei saw hmat la che ni khawp. Ni Kei thi nangnih hang hang koong läi hmueyeih saw. Äini so khäl, Kei äng uyum khrakeyeih tih Kei ängtu mäi khäh awlaw ani kut ni khung khrung äng mäi khäh. Iyaäm Hnadaga la khrawk saw huih dä Luhchaw Chaw dü aih saw. Äini Ani äng uyum khrakei tih che mawt khruaih saw.” Äi pänäng ula ni huih bi biyeih saw äm ting tebeih tih dukäng hngat la hngat ini hiyei. Äidä tebeih khäl dukäng elensum u äm ting hawu ula anih ini chahlei. Äini Yĕsu la anih a tak, “Yudi hiyahtih khäl käh mawng khälla dä anih sangsaw khäl khrung äng ngettih mawng ini thänei saw. Awlaw sangsaw khäl khrung äng mawngeitih a anih käh kubawm pektih ting ini takei. Äini nangnih dukäng äi huih thäneyeih saw sangah. Losupei nangnih dukäng elen thäneyeih khiyang tih che üküt thawka elekchaw thänei seh. Awlaw gongsong che chetchawtih a thänei seh. Äihi u len äm? Ei okaih koong khung äng omtih ei, hiyah khaw te long tih ei? Ei oka omtih ni lenei tih hiyah ei? Äini Kei nangnih dukäng hngat chetchawtih huih käthänei. Kei chawmsi äng kawkraw khaw a nangnih dä Kei kena sawkbrat nini mäi saw. Kei Paw la Kei a mawngeyeih saw tha epek saw huih, Kei ha nangnih a äi huih nini mawngeyeih saw tha kanang pek. Äi khaw Kei käh mawng pre a nangnih Kei ängtu om chula che nini ei ok hnängai. Awlaw nangnih nawn khrung äng om chula che Isawlael khäl käh chen leihnih a tara nini biyalai.” Simon, Simon, khinchawm, lai bitih la chawng känäng khap bala wangkou awhngaw poh saw huih, Mannat la nangnih a awhngaw chaw anang poh aih saw koong anang hawuvei däk. Äini nang nuyumsaw khrokeiya pak Kei nang koong suh kini tong pek. Awlaw nang Kei pawta nawkrawnal khaw a, nang nawutih khäl käh yum ma sawk bäi. Pitol la Yĕsu a tak, “Boi o, Kei nang ängtu othong ima kechetaih saw awlaw küdü aih saw ha ächän kämäi khäh.” Yĕsu la krawn bala takal, “Pitol o, Kei nanga kini tak tun, tüyawna ahluipaw khong khawngah nang Kei a krängthum awhmawt ti ting ini thuh nawkai.” Yĕsu la etebeih tih a tak, “Kei nangnih a awmawn khoila la thanap mäyah saw läktäng kanang tĕh khaw a, nini lai hüt khäh ei?” Äiche etebeih tih la lai hüt unga ting ini takal. Etebeih tih a Yĕsu la awlaw tak, “Tua kei kanang hawupek, awmawn khoila tawei tih la, awmawn khoila chiyei seh. Awlaw chimsawu taweiyahtih la ilh chaw jeei bala chimsawu hleyei seh. Kiyam äng yoei bala mäi khäh, ‘Ani ngulaisu khäl äng süh hmuei.’” Kei nangnih a kanang hawupek, “Ni kheu khäl kheni kei lukhrung äng luhyeih chak lah saw dä. Iyaäm Kei kheu ibang yoei bala mäi äm, äi khäl kheni kulu khrung äng kraw aih saw chah saw hnäh.” Äi khaw a etebeih tih la ini tak, “Boi o, so chawme, niya paihnih chimsawu mäi khäh.” Yĕsu la krawn bala takal, “Khäk däk, düm khäl hnäh.” Äi pänäng Yĕsu thokal bala Ani thung täng Olip khuyunga chet. Etebeih tih ha Ani hnung äng ini chet. Äi laa aphaw ni, Ani la etebeih tih a tak, “Suh tongei khäl, chawmsi äng kraw ah pak.” Äidä Yĕsu etebeih tih känäng bitchaw awhlawm hlawa chet bala khogru düläng suh tongeyeih saw chah. “Paw o, nulung hlü dä mäi hi, ni isip mawh khawp Kei känäng awhlawm hlaw a chiyal bäi. Äi thän ha che Kei sitha huih thäneyah seh, nang sitha huih dä thänei seh.” Suh tongei hiyunga hawn pre känäng hawn natchaw hngat lo bala Yĕsu a thayung pek. Ulung konggrah äng Yĕsu la thasa lung nävei bala suh tongei hnäh. Äi khaw a Ani khrawn akantha känäng thi huih üdüp chaw üdüp chaw dekäng kraw. Suh tongei pänäng Ani thou al bala etebeih tih khäka olo al. Äini etebeih tih ini lung dukhah äng ngiyaw ula che ini ip lawk. Äi khaw a anih a tak, “Iya nini ip saw äm? Thou khäl, suh tongei khäl, chawmsi äng kraw ah pak.” Yĕsu äkräu tuna awbawng khrawng ini lo. Awlaw Ani tebeih pochong lei hnih dukäng käh Yuda ting mingei nawtih che khrawng khe maw äng lo bala Yĕsu kena aja. Äidä ani la Yĕsu a hnawm. Äini Yĕsu la Yuda a tak, “Yuda o, nang hnawm tila Luhchaw Chaw äng nuyum nakhrah ei saw ei?” Etebeih khälla äthänei saw khäl ini hmawt ni Yĕsu a ini tak, “Boi o, keinih käh chimsawu äng kini jamaih chak saw ei?” Tebeih tih dukäng käh pochongak la pujawtih gong käh hngasaw hngat käh hnawku set pawt awh. Äini Yĕsu la hawu “Khäk däk.” Äi huih hawu bala äi awhnawku awt hmueitih käh hnaw bin bala awpawi poh al. Äi pänäng Yĕsu a mawna lotih pujawtih gong khäl, Hnadaga ima chongtih khäl käh elenchaw khäla awlaw chang gongsong khäla Yĕsu la tak, “Nangnih chimsawu la kompum äng Kei a mawna nini lo saw, Kei tamdah paw dängei? Kei nangnih ängtu ühnüp hnüp Hnadaga ima kämäi hüt khäh, äi khaw a nangnih Kei a awmawn chu. Äi bache, tua nangnih käh khin dä, uhiyung käh tha tua mawngei.” Äi khaw a anih la Yĕsu a mawn ula che Pujawtih gong ima ini chih. Awlaw Pitol awhlawm hlaw a mäi bala Ani hnung hnung äng chet. Khrawng khälla dülmawh a mei ini om hüt. Äiya Pitol ha che anih ängtu a om. Hngasaw nu hngat la mei wa äng Pitol a hmuh. Äidä mawmawt chaw so ei bala Ani la hawu, “Ni khrawng ha Yĕsu ängtu mäi hüttih dä.” Äini Pitol la chal bala hawu, “Hmutaw o, kei Ani a hmawt nga.” Awlaw tana pänäng khrawng hngat la Pitol a soei bala taktü, “Nang ha anih dukäng käh hngat dänu.” Äini Pitol la krawn bala takal, “Khanbawn o, kei hi nga!” Gondaak pänäng awlaw khrawng hngat la awhmawt saw huih Pitol pawh soei bala tak, “Kawchawng chawng, ni khrawng che äi khrawng ängtu mäi hüt khäh, iyaäm ani ha che Galil mräh a käh dä.” Äini Pitol la takal, “Khanbawn o, i khäl nawhawu saw äm, kei iha yawchunga.” Pitol kräu tun khaw a ahluipaw khong saw chah. Äi äng tutu Boi Yĕsu la Pitol pawh a hleyei bala sotei ni, ahluipaw khong khawngah sät thum Kei a ini thuh nawkaih saw dä ting Boi la tak hüt saw kheu Pitol lung äng kawiyal. Äiche apranga thokal bala Pitol thasa kapal. Chong hüttih khälla Yĕsu a ini keleyeih saw la ini bop saw ini chah. Anih la Yĕsu käh mik kün ula ini hi, “Hnadaga sidawng hiyawktih o, ula nanga ini bop saw äm hawu chaw?” Äi huih anih la ayapyap kheu ta ula che Yĕsu a ini keleih. Khowa ni, Yudi khäl käh hngawsaw äng käh elenchaw khäl, pujawtih elenchaw khäl awlaw Mosi käh thung choktih khäl utu chumei ula Yĕsu a Yudi khäl käh hngawsaw hmawi mawh a ini lo. Anih la ini tak, “Nang dä Krito näthänei hi, keinih a khrawng ta.” Yĕsu la krawn bala takal, “Kei kaw hawuvei thän, nangnih Kei a uyumei hnawh chu. Awlaw kanang hi thän nangnih krawn chula hawuval hnawh chu. Äini tutäh känäng tha mawh Hnadaga käh set pawta Luhchaw Chaw om bala mäyalai.” Äiche hang hang la Ani a ini hi, “Bakhaw che Nang Hnadaga chaw ei?” Ani la krawn bala anih a takal, “Nangnih ihisaw nini hawu khäh, Kei dä Ani.” Äiche anih la ini tak, “Iya nangkei a sawksi hlüaih pe saw äm? Nangkei Ani mong khok känäng ini yawk däk.” Äi pänäng Yudi lenchaw khäl thou ula Yĕsu a Rom pre äng käh khiyuptih Pilat khäkä ini chih. Anih la Yĕsu a hiyah saw epret khraw ula ini hawu, “Keinih kini hmuh ni khrawng la nangkei khrawng khäla pre pängtih pawta chi a pak, awhngaw pawta dä chih pui nawk. Roma käh Mawng lena phawndaw pekaih saw a nga. Awlaw Ani dä Krito, hngat mawng dä ting hawuvei bala chonei.” Äi pänäng Pilat la Yĕsu a ihi, “Nang Yudi khäl käh mawngei?” Yĕsu la hawu, “Nang dä nawhawu.” Äi pänäng Pilat la pujawtih elenchaw khäla awlaw khrawng khäla tak, “Ni khrawng käh epret iha kei bün nga.” Äini anih la ini man pok ula thathak tha ini hawu, “Ni khrawng la Yudia a käh hang hang laa chok bala khrawng kheni a man thouh chak. Galil känäng chah bala che Ani tua niya losaw.” Äi kheu yaw bala ni khrawng ni Galil pre lekchaw a käh ei ting Pilat la hi. Herawt la khiyup saw pre lekchaw dukäng käh khrawng ting Pilat la hmawt ni, ani la Yĕsu a Herawt mawng khäka teh. Iyaäm Herawt äi khaw a Yĕlusalema dä mäi hüt saw. Herawt la Yĕsu a hmuh ni mawmawt piyaw. Iyaäm ani la ayang khaw thouh Yĕsu krong awbawng yawk hüt koong hmuh aih khiyang hüt. Yĕsu la nawmaw nawkaih saw bi bi bala dawnai ting Herawt la khah nei hüt. Ani la Yĕsu a awbawng kheu hi, äini Yĕsu la iha krawnei nawalah. Pujawtih elenchaw khäl awlaw Mosi käh thung choktih khälla äiya ja ula thathak tha Yĕsu a epret ini khrawk. Herawt awlaw mawng soloi khälla Yĕsu a hiyawh ei ini pek awlaw ini keleih. Äi pänäng anih la Ani a mawng wat huih sophatih awat wat sawk ula Pilat khäka ini teh al. Äi hnüpa Herawt la Pilat khanbawn ihni thäneyal. Äi khawngah a hnih pai hnih lan ihni mäi hüt saw. Äi pänäng pujawtih elenchaw khäla, khiyuptih khäla awlaw khrawng khäla Pilat la tänaka panei bala tak, “Ni khrawng la presaw khäla awhngaw lawm pawt äng chih ting epret khraw chula nini lo. Äini Kei nangnih hmawi mawh a Ani a kächäng saw. Nangnih Ani ming äng nini täng saw khäl äng kei iha epret bünnga. Herawt mawng la bang Ani käh epret iha bünah koong ani la niya awlaw krawnak kei khäka eteh al. Awlaw ni khrawng tuk hmuei lah lokong iha epret thäneyah. Äi koong kei Ani a bop dün jäi äng bop ngala kähläh alai.” Lätäl päi hnüp äng thong äng krawtih pochongaka khrawng khälla ubang ini hlüei äm, mawng la äi khrawnga hläh al lah chi. Äi koong Pilat mawng la ni kheu hawu saw. Äini khrawng kheni utu hek ula ini hawu, “Ni khrawnga tu khäl, keinih koong Balabba a hlätal khäl.” Ni Balabba la mräh pusawk saw awlaw khrawng tuksaw khäl koong othong im äng ini thawn hüt. Äini Pilat la Yĕsu a ähläh alaih khiyang hüt. Äi koong ani la awlaw krawnak khrawng khäl äng kräu. Äini khrawng khälla hek ula ini hawu, “Ani a krut äng thawn khäl, Ani a krut äng thawn khäl.” Pilat la awlaw kräng thum anih a ihi, “Ni khrawng la i epret poh saw äm? Tuk hmueyeih saw huih epret iha kei ni khrawng dukäng hmunga. Äi koong Ani a kei bop dün jäi äng bop ngala kähläh alai.” Äini Yĕsu a krut äng thawn hmawna khrawng khäl ini tha mäiyak hehek ula ini mäi. Äidä Pilat la Yĕsu a krut äng thawnaih koong khrawng khäl kheu ängtu ingi lah. Khrawng pusawk saw awlaw khrawng tuk saw epret äng othong im äng heng naw hmuei hüttih lätalaih saw koong khrawng khälla ini hlüei hüt. Äi koong Pilat la äi khrawng a ähläh al. Awlaw khrawng khälla ini sitha huih poh hnäng hmawna Yĕsu a anih kutäng aw awpal. Anih la Yĕsu a ini chih khaw a Simon ting mingei nawtih kurini mräh a käh pochongak khrawng nam känäng olo tun hüt saw. Ani la Yĕsu hnung äng krut käh bala chih hmawna soloi khälla ani a ini mawn. Awlaw ani a tha tawng ula krut ini käh sawk. Awbawng khrawng Yĕsu hnung äng ini chet hüt. Äi khrawng khäl dukäng hmutaw ha hngat pai hnih ini mäi hüt. Äi hmutaw khäl Yĕsu koong hehek ula ini kap. Yĕsu la anih pawta hleh yei bala tak, “Yĕlusalem a käh hmutaw khäl o, nangnih Kei koong kapaichu. Äi chaw a nini pum koong awlaw nini chaw chuhnu khäl koong dä kap khäl. Iyaäm awhmawi mawh äng ni mräh a käh khrawng khälla thasa dukhah ini bünai. Äi khaw a khrawng khälla ini hawuvai, chaw chuhnu hmueyah tih, chaw chuhnu khäla ichih pekei phu ah tih, hmutaw khäl pisih mawh. Äi khaw a khrawng khälla khuyung len khäl keinih khrung äng kraw khaw pawyei hü awlaw khuyung lekchaw la kün bala khrawng tawk khaw pawyei hü ting ini hawuvai. Iyaäm khrawng khälla thing heng äng dä ni huih ini poh ei hi, thing chaal pänäng ihuih ini poheyeih saw äm?” Soloi khälla epret bitih pochong hnih a ha ini tukaih koong Yĕsu ängtu ini chih. ‘Lukong’ ting mingei nawksaw laa ini phaw pänäng anih la Yĕsu a hmä äng the ula krut äng ini thawn. Epret bitih häihya hngata Yĕsu käh set pawh a käh krut äng awlaw hngata setong paw a käh krut äng hmä the ula ini bawh. Äi khaw a Yĕsu la hawu, “Paw o, ni khäla ähläh pek bäi. Iyaäm ni khälla i ini poh tun saw äm anih la hmawtei u.” Äi pänäng soloi khälla ini lumchawl chawmei ula Yĕsu käh awat khäl anih dukäng ini pheih yei. Khrawng khälla äiya ja ula ini sot. Yudi lenchaw khälla Yĕsu a keleih ula ini tak, “Ni khrawng la khrawng khäla ähläh al hnäng. Ani dä Hnadaga la heh leisaw Mesaya hi, upuma hläteyal seh.” Soloi khälla ha anih ängtu ini keleih. Yĕsu la okaih saw koong thotih alak täuh ula ini tak, “Nang dä Yudi khäl käh mawng näthänei hi, nupuma hläteiyal.” Ni khrawng Yudi khäl käh mawng ting uludäma yo ula hmat la huih ini bawh. Yĕsu krut kena bawh hmueitih pret mawh pochong hnih äng käh hngat la keleih bala tak, “Nang Mesaya dä ti nu? Äihi nupuma ha hläteiyal awlaw kei hnih a ha khrawng hlätal.” Äi khaw a awlaw hngat pawtäng käh la ngotei bala tak, “Nang ha che lup khiyang dam nübünei tun saw. Nang Hnadaga a keh tiyei? Ni hnih che ihni tawn saw huih dam ihni bünei. Äini ni khrawng la iha epret biyah.” Äi pänäng ani la hawu, “Yĕsu o, nang käh mawng pre a nolo al khaw a, kei a nulung äng awkhawei bäi.” Yĕsu la anih a tak, “Kei nanga ihisaw kanang tak, nang tühnüpa Kei ängtu Hnadaga käh piyaw dün laa nämäyalai.” Äi khaw a khosun paileinih mengaih däk saw huih thänei. Äi khin täh känäng ümülawm paithum täh pre kheni uhiyung chak bala mäi. Khoni rong ha dawng hüt tah. Awlaw Hnadaga ima käh asanh changsum laa käh awat alai äng tihtih a phawl hnih a phawlei. Yĕsu la asam thokak hek bala hawu, “Paw o, nang kutäng Kei khraw kini awpeyal.” Ni kheu hawu bala Yĕsu awsawk thok. Äi hmu bala Rom soloi gong la Hnadaga a äkiyä tawngei bala hawu, “Ihi khäh, ni konghmuh sang dä.” Äiya mäi bala äthänei saw khäl hmutih khälla ini kangchang bebe ei ula äi la känäng ini chetal. Yĕsu a hmawt tih khälla awlaw Galil känäng Ani ängtu lotih hmutaw khälla awhlawm hlaw känäng ja ula ni thänei saw khäl ini sot. Yosep ting mingei nawtih konghmuh sang la khrawng pawi chaw hngat Yudi khäl käh hngawsaw sawng äng käh mäi hüt. Ani Arimathiya ting ini taksaw Yudia pre lekchaw a käh khrawng. Ani Yudi khäl käh hngawsaw sawng äng käh khrawng khäl äng Yĕsu krong äng hawu hmuei saw kheu äng ngi hütah. Ani la Mawng Hnadaga pre koong chong bala mäi hüt. Pilat khäka Yosep chet bala Yĕsu yok ahawuveyal. Äidä oyok krut känäng khomal bala a watsaw äng otomal. Äiche lung chou ula ini poh saw cho kho hngat äng oyok ini tawkal. Äi cho kho äng hngata ha taw hmuyei hüt hawmah. Äi hnüp che düm khomhnüp ini chah aih saw khawngah ächän poh ei ula ini mäiyeih saw hnüp mäi hüt. Awlaw düm khomhnüp ha chah aih saw ikhin äthänei tun hüt. Yĕsu ängtu Galil pre lekchaw känäng lotih hmutaw khäl Yosep hnung äng chet ula cho ana sot. Awlaw Yĕsu yok cho duka iba tawk hmuei saw äm äi ha ini sot. Äi pänäng anih ima chetal ula otih vawn la otih si ini poh al. Äidä Mosi käh thung täng düm khomhnüp äng ini dümal. Sapta chah saw khomhnüp äng akhon prakäng äi hmutaw khälla ächän ini tawk hüt saw otih vawn la otih si äng choa ini chet. Anih la cho wah känäng lung hlai hmueyal saw ini hmuh. Äini anih chou duka ini vawng ni Boi Yĕsu yok hmu u. Anih la maw ula äi krong äng ini tawk tun khaw a, tük ting khrawng pai hnih wat bok phong phonga wat häih la anih kena ahna ja. Äi khaw a anih ke ula ini luki hnemei ula khokgru dül äng ini mäi. Khrawng paihnih la anih a ini tak, “Hengtih a dütih dukäng iya nini suiyal sawäm? Ani niya mäi tiyah. Ani heng bala thouwal däk. Ani Galila mäi khaw a nangnih a i anang tak hüt saw äm, äi nini lung äng khaweyal khäl? Ani la hawu hüt, ‘Luhchaw Chaw a ngulaisu khäl kutäng awp hmueyeih saw. Äi pänäng Ani a krut äng thawn hmueyeih saw. Hnüp thum düna awlaw heng bala thouwalaih saw.’” Äi khaw a Yĕsu la hawu hüt saw kheu khäl ini lung äng kawyal. Anih cho kho känäng chetal ula Yĕsu käh pochong leyak tebeih khäla awlaw awhngaw khrawng khäla ni sidawng ini hawu pekal. Äi hmutaw khäl che Makdalin Meri, Yohana, Yakub nu Meri. Anih ängtu awhngaw hmutaw khälla teh hmueitih khäla ni sidawng ini hawu pekal. Äini teh hmueitih khälla ni sidawng khäl khui ini hnuh saw huih dä ini pi. Anih la äi hmutaw khäl käh kheu yumei u. Äi thän ha Pitol thou bala cho pawta chon. Ani cho duk pawta sot ni Yĕsu a ini tom nawk dün awat battih iha hmutiyah. Ni khäl hmu bala ani maw bala ima krawnal. Äi hnüpa tebeih pai hnih Yĕlusalem känäng Imayu nama ihni chet. Ni Imayu nam che Yĕlusalem känäng melseh mäi hüt. Äi khaw a, a hnih äthänei saw krong khäl äng täng bawng häih la ihni chetei saw. Ahnih ihni täng bawngei tun khaw a, Yĕsu ahnih ängtu achetei. Ahnih la Yĕsu a ihni hmuh äini hmawtal häih. Yĕsu la ahnih a tak, “Nang hnih i krong äng ni hni tängbawng saw äm?” Äi khaw a ahnih ihni hmawi nuk häih la ihni ja. Äi khaw a Kliopa ting mingei nawtih hngat la Yĕsu a ihi, “Yĕlusalema mäitih kheäng nang lung khiyang dä ni hnüpak hni äng äthänei saw khäl iha mawttih saw.” Yĕsu la ahnih a hi, “I aw thänei saw äm?” Ahnih la ihni tak, “Nazarina nama käh Yĕsu krong kihni hawu saw. Ani Hnadaga sidawng hiyawktih mäi hut. Awlaw Hnadaga la khrawng khäl hmawi mawh a bi la kheu äng üküt lawm äng ni Ani thayung mawh mäi hüt. Äini nangkei käh pujawtih elenchaw awlaw khiyuptih khälla Yĕsu a ini tukaih koong Rom pre dukäng khiyuptih khäka dam pekaih koong ana awp. Äi pänäng anih la Ani a krut äng ini thawn. Äini Ani la dä Isawlael yapsaw khiyawtalaih saw ting keinih kini khinei. Ni khäl thänei saw tühnüpäng hnüp thum thänei däk. Awlaw Yĕsu a yumeitih keinih sawng äng käh hmutaw khälla keinih a mawmawt nawmaw nawkaih saw khrang khrawng hawu pekal. Anih akhon prakäng cho kho a ini chet hüt saw. Äini anih la Yĕsu yok cho kho äng hmu u. Äidä anih cho kho känäng krawnal ula hawn natchaw a kini hmuh awlaw hawn natchaw la Yĕsu thouwal däk ting hawu pek saw ini hawuval. Awlaw keinih äng käh hngat pai hnih cho kho a ini chet. Hmutaw khälla ihuih ini hawuval äm, äi huih cho kho hong ini khomal. Äiya Yĕsu a hmu al u.” Äi khaw a Yĕsu la ahnih a tak, “Mäktih khrawng khälo! Nangnih lung äng iya iha mäyah saw äm? Hnadaga sidawng hiyawktih khälla ini hawu hüt saw kheu khäl iya yumei chu saw äm? Hnadaga sidawng hiyawktih khälla ini hawu hüt saw huih, Mesaya la dukhah khawm bala Ani käh wachang laa krawnalaih saw nangnih hmawt chuei?” Äi pänäng Ani la Mosi awlaw Hnadaga sidawng hiyawktih khäl känäng chah bala kiyam äng Ani krong äng mäi saw khäl kheni awphawng pekal chak. Äidä anih ini chettun saw nam kena ana phaw ni, Yĕsu la awhlawm hlaw a chetaih saw huih awdawnei. Äi khaw a ahnih la Ani a mawt khawh ei häih la ihni tak, “Tua khoni kraw aih däk. Nang keihnih ängtu mäi bäi.” Äidä Ani äi häih äng mäiyeih saw koong echet. Äi pänäng Ani ahnih ängtu eiokaih koong oom ni Hnadaga a ha koong äkiyä tawngei. Awlaw äi ha pil bala che ahnih a pek. Äi khaw a ahnih mik hongeyal. Ahnih la Yĕsu a ihnih hmawtal. Äi äng tutu ahnih la Yĕsu a hmual ti häih. Äi khaw a ahnih ihni kheuveal, “Lawma Ani nihnih äng kräu khaw a awlaw kiyam känäng khrawng phawngh pek khaw a nangkei lung awpiyaw äng luih hütah ei?” Äi khaw a äi pochong hnih Yĕlusalema ihni krawnal. Awlaw tebeih pochong leyak la awhngaw khrawng khäla ha tänaka ihni khomal. Boi lälä thouwal saw awlaw Simon a dawneyal saw krong äng anih ini täng bawng. Äi khaw a äi pochong hnih la lawma thänei hütsaw khäl kheni anih a ihni hawu pekal. Yĕsu la ha pil khaw a iba ihni hmawtal saw äm äi ha ihnih hawu pekal. Tebeih tih khälla Yĕsu kheu ini täng bawng khaw a, tük ting Yĕsu anih khäka aja bala tak, “Nangnih khrung äng jelkhiyamsa kraw seh.” Anih la nat ini hmuh ting khin ula ini ke. Äini Yĕsu la anih a tak, “Iya nangnih nini ke saw äm? Iya nangnih Kei a khrawng yumei chusaw äm? Kei Yĕsu dä. Kei kut kho so khäl, Kei dä. Kei a khrawng sin khäl. Iyaäm nata che Kei huih oyoh la awsaw mäyah.” Äi khäl hawu bala Yĕsu la anih a ukut kho dawnei. Äini anih mawmawt ini maw saw awlaw ini piyaw saw koong lälä Yĕsu ei ting yumei hnäng u. Äi khaw a Yĕsu la anih a tak, “Nangnih khäka eisaw mäiyei?” Anih la ngaw hlawuh pelak Ani a ini pek. Ani la äi lawei bala anih hmawi mawh a eei. Eei pänäng Ani la anih a tak, “Nangnih ängtu kämäi hüt khaw a Mosi käh thung äng, Hnadaga sidawng hiyawktih khäl käh boih äng awlaw sam boih äng yoei saw kheu khäl ihisaw a thäneiyeih lah saw ting kanang tak hüt.” Äidä kiyam äng yoei saw kheu khäl yawchu hmawna tebeih tih a prengiya pek. Äiche anih a tak, “Kiyam äng yoei saw, Mesaya la dukhah bünaih lah saw awlaw düaih lah saw. Äi pänäng khohnüp thum düna düsaw känäng hengalaih saw. Awlaw Mesaya käh thayung äng khrawng khälla ngulai känäng ini lung ini hleyeyal khaw, epret hläh ini büneyei ting Yĕlusalem känäng chah bala hang hang yapsaw khäl khäka hiyawk hmueyei. Nangnih nini mik äng nini hmuh koong hang hang ni awhngaw khrawng khäl khäka nini hawu pekaih saw. Kei Paw la Asanh chang Khraw anang pekai ting amah khawmei hüt saw, äi Kei nangnih koong kanang teh pekai. Äini hawn pre känäng Asanh chang Khraw tha büneichu saw sawgraw nangnih ni mräh a dä mäi bäichu.” Äi pänäng Yĕsu la etebeih tih a Betani nam täh ichih. Äiya Ani la ukut jäkei bala anih a pisih pek. Pisih pekpe pekpe anih a taw hüt bala hawn pre pawta awkawiyal. Äiche tebeih khälla Yĕsu a ini khäh pänäng piyaw ula Yĕlusalema ini krawnal. Äi pänäng Anih Hnadaga ima mäi ula hnüpak kiyawnah Boi Hnadaga a phiyaw ula äkiyä ini tawngei chi. Achah täh känäng Kheu mäi chän hüt, awlaw Kheu che Hnadaga ängtu mäi hüt, awlaw Kheu che Hnadaga mäi hüt. Achah täh känäng Kheu che Hnadaga ängtu mäi hüt. Ani ängtu Hnadaga la ükütni ibi hüt. Awlaw bi hmuei saw khäl kheni Ani kaw iha bi hmueyah. Äi kheu äng awsawk mäi hüt awlaw äi sawk la luhchaw khäl khäka awa lo hüt. Äi awa che uhiyung äng choi bala mäi, awlaw awa khrung äng u hiyung che ong hnängah. Hnadaga la khrawng hngata teh, ani ming che Yohan. Ani lo saw che khrawng khäl khäka awa krong äng sawksi thoka. Äihi awa kheu yaw ula khrawng khälla awa a yumei hmawna. Yohan äi awa mäi hütah, äini ani olo hüt saw che äi awa krong äng sawksi thoka. Äi awa dä ihisaw awa. Äi awa la hang hang khrawnga awa pekai. Ni awa luhdül äng olo tun. Ani luhdül äng ämäi hüt, Hnadaga la Ani ängtu luhdül bi hüt thän khrawng khälla Ani a hmawt hüt u. Ani upum khrawng khäl khäka lo, äini upum khrawng khälla Ani a lawei u. Äini äi khäl dukäng käh ula bang Ani a ini lawkei äm awlaw Ani ming ini yumei äm, anih kheni la Hnadaga chaw chuhnu ini thäneyeih saw ini pängei. Ni khrawng khäl luhdül äng ini lo saw äng Hnadaga chaw chuhnu ini thänei saw hiyah. Äini anih la ini yumei saw koong dä, Hnadaga kädäng dä anih Paw thänei saw. Äi Kheu khrawnga thänei, äidä nangkei ängtu mäi. Äi Khrawng ihisaw la khetjen äng luih. Paw Hnadaga käh hngat pätpät Chaw thänei bala, i a wachang bang mäi äm, äi wachang keinih kini hmuh. Yohan la Ani krong äng athak hek bala sawksi thok, “Nidä äi khrawng, u käh kheu kei kawhawu hüt saw äm. Ani kei pänäng lo aih saw, äini Ani kei thawka elen khäh. Iyaäm kei khawngah Ani sawkbrat mäi hüt.” Iyaäm Ani khetjen äng luih hüt, äidä äi khetjen känäng Ani la nangkei a hngat pänäng hngat ajap jap pisih khrawng pek. Hnadaga la Mosi a sumei bala nangkei käh nuchen pawsawk khäla thung pek hüt. Äini khetjen la ihisaw che Yĕsu Krito känäng dä lo saw. Hnadaga a hngat la ha krängak ha hmu u. Ani ängtu mäitih hngat pätpät chaw, Ani kädäng Hnadaga, Ani la dä nangkei a Hnadaga a khrawng dawn saw. Yĕlusalema käh Yudi lenchaw khälla Yohan khäka pujawtih khäl awlaw Lebi khäla ini teh. Anih la ini hi, “Nang u äm?” Yohan la iha thuh eiyah pak prongh brongh atak, “Kei Mesaya hi nga.” Äidä anih la ini hi, “Bahi nang u äm? Nang Elija ei?” Yohan la krawn bala takal, “Ä häh, kei hinga.” Anih la awlaw ini hi, “Bahi nang äi Hnadaga sidawng hiyawktih ei?” Ani la krawn bala takal, “Ä häh.” Äi khaw a anih la ani a ini tak, “Bahi nang u äm? Keinih a nang khäka khrawng te tih khäla i kana takalaih saw äm? Nang nupuma khrawng khäl khäka iba ting natakei äm?” Yohan la anih a tak, “Kei dä äi khrawng, u käh kheu Hnadaga sidawng hiyawktih Aijaya la awhawu hüt saw äm.” “Ala honga asam hngat la hek bala awhawu tun, nangnih Boi käh lawm phrongh khäl.” Ayang teh hmuei hüt däktih pujawtih la Lebi khäla Pherasai khälla Yohan a hi ya ini teh hüt. Anih la ini hi, “Nang dä Krito hiti hi, Elija ha hiti hi awlaw äi Hnadaga sidawng hiyawktih ha hiti hi, iya nang khrawnga tuilüh nepek saw äm?” Yohan la krawn bala atakal, “Kei tui äng khrawng khäla tuilüh kepek tun, äini nangnih dukäng pochongak mäi khäh, Ani a nangnih hmawt chu. Ani kei pänäng olo tun, kei Ani käh thanap jäi kusuh aih saw bang tawn nga.” Ni khäl Betani nama thänei hüt, äi Betani nam che Yawldan hlong chupawt kawma mäi hüt. Ni Yawldan hlong a Yohan la tuilüh chi epek hüt. Hnüpak pänäng Yohan la ani pawta Yĕsu olo tun saw hmu bala tak, “Luhdül äng käh ngulai kheni awhlawm hlaw a chiyalaih tih Hnadaga käh Samphomah chaw che ni. Ni hnäh äi khrawng, u käh kheu kei pänäng olo tun ting kawhawu hütäm. Ani kei thawka elen khäh. Iyaäm kei luhdül äng lo khawngah bang Ani che sawkbrat mäi chän. Ani u äm Kei hmawt hüt nga, äini kei khrawng khäla tuilüh kepek saw Isawlael yapsaw khälla Ani u äm äi hmawt hmawna.” Awlaw Yohan sawksi thok, “Kei Hnadaga käh Asanh chang Khraw a Hawn pre känäng khongkho huih Ani ludäma olo saw la üdüm saw kuhmuh. Awlaw kei Ani a hmawt hüt nga, äini Hnadaga la kei a tuilüh peka eteh khaw a, Hnadaga la kei a atak, ‘U khrung äng Asanh chang Khraw kom bala olo saw la üdümsaw nini hmuh äm, Ani dä äi khrawng, Ani la khrawng khäla Asanh chang Khraw äng tuilüh epekai.’ Kei äi kuhmuh awlaw sawksi kothok, Ani dä Hnadaga Chaw.” Awlaw hnüpak pänäng Yohan ani tebeih pochong hnih äng äiya ja bala mäi. Äi khaw a Yĕsu a chonei tun saw hmu bala che Yohan la tak, “So hnih, nidä hngat, Hnadaga käh Samphomah Chaw huih.” Äi tebeih pochong hnih la Yohan käh kheu yaw häih la Yĕsu hnung äng i hni chet. Yĕsu u hnung pawta hlĕyei bala a hnih i hni lo tun saw hmuh ni ihi, “Nang hnih i nihni sui saw äm?” A hnih la krawn häih la i hni tak, “Rabi” (ni kheu naw krawnal hi “Choktih.”) “Nang mawnga nämäi saw äm?” Ani la tak, “Lo hnih tila aso hnih.” Ani mäi chi saw la sota i hni chet khaw a, ümülawm pai hli meng. A hnih la Ani käh la i hni hmuh, äi hnüpak Ani ängtu i hni mäiyal cha hnäh. Yohan käh kheu yaw häih la Yĕsu hnung äng chet hüttih äng käh pochongak ming che Endu. Ani che Simon Pitol nawu. Endu la awnawu Simon a suiyal hiyawng bala tak, “Kei hnih Mesaya a kihni khom.” (Mesaya naw krawnal hi, Krito ting thänei) Äi khaw a Endu la Simon a Yĕsu khäka olo. Äi khaw a Yĕsu la Simon pawta so ei bala tak, “Nang Yohan chaw Simon, khrawng khälla nanga Koipha ting anang paneyei.” Äi ming naw krawnal khaw Pitol ting thänei. (Pitol naw krawnal hi, lung). Äi ngo kawthawiya Yĕsu Galila chetaih koong po ei bala mäi. Ani la Philip a sui bala bün ni tak, “Kei ängtu lo.” Philip Betsida mräh a käh khrawng mäi hüt, Endu la Pitol ha äi mräh a käh khrawng ihni mäi hüt. Philip la Nathaniel ting mingei nawtih khrawng hngata sui bala bün. Äiche ani a tak, “U kheu Mosi la thung boih hiyol äng oyok hütäm awlaw u kheu Hnadaga sidawng hiyawktih khälla ini yok hütäm, Ani äng keinih kini khomei. Ani Yosep chaw Yĕsu, Nazareta käh khrawng.” Nathaniel la tak, “Nazaret känäng iha awpawi olo hnäng ei?” Philip la krawn bala takal, “Lotila aso e.” Nathaniel a Ani pawh a olo tun saw Yĕsu la hmuh ni tak, “Ninu ekejet Isawlael chaw. Ani che hngat achang khrawng.” Nathaniel la Yĕsu a ihi, “Nang iba kei a ini hmawt äm?” Yĕsu la krawn bala takal, “Philip la nanga ini panei khawngah khĕu thing kawla nämäi hüt khaw a, Kei nanga kini hmuh hüt.” Nathaniel la krawn bala Ani a takal, “Rabi, nang dä Hnadaga Chaw. Nang dä Isawlael khäl käh mawng!” Yĕsu la ani a tak, “Kei nanga khĕu thing kawla kini hmuh ting kini tak koong nang Kei a ini yumei saw ei? Nang ni thawka thasa lentih bi nu hmuh ai.” Yĕsu la tak, “Kei nangnih a lälä kanang tak, nangnih hawn pre hongeyeih saw nini hmuh ai, Luhchaw chaw che luhdül la hawn sakei dün hlawk. Hnadaga käh hawn natchaw khäl Luhchaw chaw khrung äng ini kom kawyei.” Hnüp hnih pänäng Galil pre lekchaw a käh Kana nama phiya chaw nawk päi hngat äthänei. Äiya Yĕsu nu ha ämäi hüt. Äi phiya chaw nawk päi a Yĕsu la etebeih tih ‍a ha panei ini hmuei hüt. Äi phiya chaw nawk päi a käh grĕp hawng hang hang päih chak ni, unu la Yĕsu a tak, “Anih käh grĕp hawng päih chak däk.” Äi khaw a Yĕsu la unu a tak, “Ni kheu Kei a iya ini taksaw äm? Kei käh khin tua ha lo hawmah!” Äidä Ani nu la hngasaw khäla tak, “Ani la ibang anang takäm äi huih bi khäl.” Botei ula asanh ini thäneyeih koong Yudi khäla ayapyap thung mäi. Äi koong äi laa lung äng käh daw len pum sok ächän om ula ini tawk hüt saw mäi. Hngat hngatäng eleu sumäng eset khra ak tui jelh hüt. Yĕsu la ahngasaw khäla tak, “Äi daw khäl äng tui hluih khäl.” Äidä hngasaw khälla daw khäl äng priu priu tui ini hluih. Äiche Yĕsu la anih a tak, “Tua daw känäng tui bitchaw law chula päi sokhretih lenchaw a apek khäl.” Ani kheu huih a hngasaw khälla ini bi. Tui ni grĕp hawnga thänei, äi päi sokhretih lenchaw la chawm. Äini äi grĕp hawng mawng känäng lo saw äm äi päi sokhreitih lenchaw la hmawtah. Äini tui hluih tih hngasaw khälla ini hmawt khäh. Äi koong päi sokhretih lenchaw la omnaweitih pawtaw a panei bala tak, “Khrawng la grĕp hawng pawi dä ayang ini pek chi. Khrawng khälla ini sitha huih ini ok saw päih pänäng uhnung äng ini pekal saw grĕp hawng che ayang ini peksaw thawka bitchaw khat ese khäh. Äini nang tua ha üküt thawka pawitih grĕp hawng naw tawkei pe.” Yĕsu la Galil pre lekchaw a käh ni Kana nama dä täkchah nawmaw nawkaih saw bi achah saw. Äiya Ani la upum käh a wachang awdawnei, äi koong Ani käh etebeih khälla Ani khrung äng ini yumei. Äi pänäng Yĕsu, unu, awnawu tih khäl awlaw tebeih tih khäl Kawpalnahum mräh a ini chet awlaw äiya hnüpak hnüp hnih ini mäi. Yudi khäl käh ini lätal päi khin hiyäu ni, Yĕsu Yĕlusalema chet. Ani la äiya khrawng khälla sel, samphomah, awlaw khü khäl Hnadaga im dülmawh a ini jeh tun saw hmuh. Awlaw Ani la awmawn thul pekal tih khäl ha nanga nang käh khung kena om ula ini mäi saw hmuh. Äi khäl hmu bala Ani la bop dün jäi hngat eveh. Äi äng hang hang sel khäl, samphomah khäl Hnadaga im dülmawh känäng othoh al. Äiya awmawn thul pekal tih khäl käh poisa khäl ikhrih pek chak awlaw khung khäl krawn pek chak. Awlaw äiya khü jetih khäla Yĕsu la tak, “Ni khäl law chula ni la känäng chetal khäl. Kei Paw käh ima kun poh dün ima po ai chu.” Kiyam äng yoei saw ni kheu khäl tebeih khäl lung äng kawiyal, “Nang käh im koong Kei käh ekhet len la Kei lunga mei huih o sawk chak.” Äi khaw a Yudi lenchaw khälla Yĕsu a ini hi, “Nang mawng dogo äng ni khäl ni bisaw äm, äi nawmaw nawkaih saw hngat keinih a anang dawn hnängai ei?.” Yĕsu la krawn bala takal, “Nangnih ni Hnadaga im khrak khäl, Kei hnüp thum dukäng awlaw kaw khawyalai!” Ni kheu yaw ula Yudi lenchaw khälla Yĕsu a ini hi, “Nang hnüp thum dukäng nawsawkaih hnäng saw ting nikhin saw ei? Ni Hnadaga im sawkaih koong kho kum hligip gala kum sok ühlü hüt.” Äini Yĕsu la upum kantha a dä Hnadaga im ting hawuvei hüt saw. Ani düsaw känäng heng bala thouwal pänäng Ani la hawu hüt saw ni kheu etebeihtih lung äng kawiyal. Äi khaw a anih la kiyam äng käh kheu la Yĕsu la awhawu hüt saw kheu khäl ini yumeyal. Yĕlusalema lätal päi thänei tuna Yĕsu la nawmaw nawkaih saw bi khäl bi hüt. Äi hmu ula awbawng khrawng la Ani a ini yumeyal. Äini Yĕsu upum kädäng la anih a yum hütah, iyaäm anih khrang Ani la hmawt hüt khäh. Äi khäl käh kheu hngat la ha Ani a hawu pekaih saw hlü ah, iyaäm khrawng lung äng i mäi äm, Ani la awhmawt khäh. Nikodim ting mingei nawtih Yudi khäl käh elenchaw hngat mäi hüt. Ani che Pherasai sawng äng käh khrawng hngat mäi hüt. Yawnak khaw a ani Yĕsu khäka lo bala che tak, “Choktih o, keinih kini hmawt khäh nang Hnadaga känäng lotih hngat choktih dä. Iyaäm nang nawmaw nawkaih saw bi nibisaw khäl äng Hnadaga utu mäyah khaw, hngat la ha äi bi hnäng u.” Yĕsu la tak, “Kei nangnih a lälä kanang taktun, awlaw khrawnak luhdül äng lo a lah pak hngat la ha, Mawng Hnadaga pre hmu lah thawnawh u.” Äi khaw a Nikodim la Ani a hi, “Khrawng ini chom pänäng awlaw krawnak iba luhdül äng ini lo a laih saw äm? Ani unu hän duka vawngal bala awlaw krawnak iba luhdül äng lo al hnängaih saw äm?” Yĕsu la tak, “Kei nangnih a lälä kanang taktun, tui la Asanh chang Khraw äng ubang luhdül äng lo ah äm, äi Mawng Hnadaga pre a vawngal hnäng hnawh. Luhchaw a luhchaw la dä chaw nawk, äini Asanh Chang Khraw la dä khrawng a awkhraw äng sawk tha pekal saw. Awlaw krawnak luhdül äng nini lo a laih lah saw ting kanang taksaw äng nangnih maw ai chu. Khri isitha pawta ni lo awlaw äi khri sam nang nawyawk. Äini mawng pawt känäng olo äm awlaw mawng pawta chetal äm äi nang hmawt ti. Äi huih, Asanh Chang Khraw äng khrawng khäl ha ini hleyal. Äini äi Asanh Chang khraw la bisaw nangkei hmupu.” Nikodim la Ani a hi, “Ni ibani thäneyeih hnäng saw äm?” Äi khaw a Yĕsu la ani a tak, “Nang Isawlael khäl käh choktih thänei tila ni iba yawchuti saw äm? Kei nanga lälä kini taktun, keinih i kini hmawt äm, äidä kini hawu saw awlaw i kini hmuh äm äi äng dä sawksi kini thok saw. Äini nangnih keinih a khrawng yumei chu. Kei nangnih khäka ni luhdül kheu kanang taksaw bang uyumei chu khaw, hawn pre a käh vawn kheu kanang taksaw iba nini yumeyeih saw äm? Hawn pre känäng kom bala lotih Luhchaw Chaw hawuvah hngat ha sätak ha hawn pre a chet hawm u.” Mosi la täu lung chinga hĕn phol kompum sawu äng jäh saw huih Luhchaw Chaw a ha jäh hmueyei. Äihi ula bang Ani äng yum äm äila päihyah saw sawk büneyei. Hnadaga la ni luhdül äng käh khrawng khäla mawmawt khet nawk saw koong Ani käh hngat chaw pätpät chaw a teh. Ula bang Ani a yumei äm, ani krak thaw hnawh äini päihyah saw sawk büneyei. Hnadaga la luhdüla epret khrawkaih koong Awchaw a luhdül äng te ah, äini Ani äng luhdüla khiyawtalaih koong dä Awchaw a teh saw. Ula bang äi Hnadaga Chaw äng yum äm, ani epret mawh a thänei hnawh. Äini Ani äng ula yumah äm, ani che ayang bang epret mawh a thänei däk. Iyaäm ani la Hnadaga käh hngat pätpät Chaw a yumeyah. Tara la ni huih dä bisaw. Awa luhdül äng lo däk. Äini khrawng khälla awa thawka uhiyung dä ini khet nawk saw. Iyaäm anih käh bi kawi khe che ese khäh. Ula pawyah saw bi bi äm ani la awa umum awlaw awa khäka ha lo ah. Iyaäm ani käh pawyah saw bi kheni awa äng dawngeyei. Äini u bang ihisaw lawm äng mäi äm, ani awa khäka lo. Iyaäm ani la bi bisaw kheni Hnadaga sitha huih dä ting awhngaw khrawng la ha hmawt hmawna. Äi pänäng Yĕsu la ani tebeih khäl Yudia pre lekchaw a ini chet. Äiya Ani tebeih tih äng hnüpak hnih ämäi awlaw khrawng khäla tuilüh pek. Äi khaw a Yohan la Salim ting mingei nawk saw nam hngat kena Ainon la a tuilüh pek hüt. Iyaäm äiya awbawng tui mäi hüt. Khrawng khälla ani khäka tuilüh lawkeya ini lo hüt awlaw ani la ha tuilüh pek hüt. (Äi khaw a ha Yohan a thong ima hawn hmuei hüt hawmah.) Äi khaw a Yohan käh tebeih khäl Yudi thung äng mäi saw asanh ini thäneyalaih saw kheu äng Yudi khrawng hngat äng ini chok chakei. Äi pänäng anih Yohan khäka lo ula ini tak, “Rabi, nang nulung a mäi ei, Yawldan hlong chupawt kawpa nang ängtu mäi hüt saw awlaw Ani krong äng sawksi nothok hüt saw? So, Ani la tua khrawng khäla tuilüh pektun awlaw khrawng kheni ani khäka ini chet tun.” Yohan la anih a tak, “Hnadaga la pekah saw sawgraw hngat la ha iha bünei u. Kei Mesaya hinga ting kawhawu saw yawtih nangnih dä sawksi. Äini Ani khawngah kei ayang teh ku hmuei. Mawng khrawng kutäng omeyeih tih hmutaw a awp hmuei äm, äiche omnaweitih pawtaw. Äini omnaweitih pawtaw phäu ekena ja bala ani kheu khin awlaw ani sam yaw bala mawmawt piyaw. Äi huih kei käh piyaw ha tü hnüpa uluih. Yĕsu kei thawka alang gong thän ni thäneyei, äini kei äi hiyawh alang gong mäi ti hnawh nga.” Hnadaga chaw, hawn pre känäng lotih, äiche üküt thawka elensum. Ubang luhdül känäng lo äm, äiche luhdül käh awlaw ani la luhdül krong hawu. Äini u hawn pre känäng lo äm, Ani üküt thawka elensum. Ani la i hmuh äm awlaw i yawk äm, äi krong äng dä sawksi thoksaw. Äini hngat la ha Ani kheu khin u. Ula bang Ani a yumei äm Hnadaga che ihisaw dä ting ani la awlawkei. Hnadaga la u a teh äm äila che Hnadaga kheu khäl dä kräu saw. Iyaäm äiya Hnadaga la Ani käh Awkhraw kheni u hluih pek. Paw Hnadaga la awchaw a khet nawk awlaw Ani la ükütni khiyupaih saw dogo pek. Ula bang awchaw äng yum äm ani la päihyah saw sawk bünei. Äini ula Ani kheu khinah äm, ani la äi sawk bünei thaw hnawh awlaw Hnadaga käh man sawkbrat ani lukhrung äng mäi yei. Yĕsu la Yohan thawka awbawng tebeih poh ei saw la awbawng tuilüh pek saw ting Pherasai khälla ini yawk saw Yĕsu la hmawt. (Ni bache, Yĕsu la upum kädäng la hngata ha tuilüh pekah, äini Ani tebeih khälla dä khrawng khäla tuilüh ini pek chi saw.) Äi koong Yĕsu la Yudia hlätal bala awlaw krängak Galila chetal. Galil a chet khaw a, Ani Samali pre lekchaw duk känäng chet lah. Ani Sukhawl ting mingei nawk saw Samali a käh nam hngata lo. Yakub la ani chaw Yosep a epek hüt saw lai kena ni nam mäi hüt. Yakub la chouh hüt saw vum chaw äi khaw a ha äi laa mäi hüt khäh. Chetei pe chetei pe awngiyaw ni Yĕsu äi kena o om. Äi khaw a khosunaih huih. Äi khaw a Samali hmutaw hngat tui khawi ya äi wum khäka olo. Yĕsu la ani a tak, “Kei a ko okaih saw koong tui bitchaw epek.” (Yĕsu tebeih khäl eisaw ini hleheyeih koong mräh duka ini vawng.) Ani la tak, “Nang che Yudi, kei che Samali hmutaw. Nang Yudi hngat thänei tila iba kei känäng tui ini hawuvei saw äm?” (Samali khälla ini sumei saw vawng khäl Yudi khälla sumei u.) Yĕsu la tak, “Hnadaga la nanga i ini pekaih khiyang saw äm, äi nang hmawt ti awlaw ula nang känäng tui ini hawuvei saw äm, nang hmawt ti. Nang dä naw hmawt hi che, kei känäng dä ini hawuveyei hü. Äihi Kei nanga sawk mawh tui kini pekai hü.” Äi hmutaw la tak, “Choktih o, tui nawlaw keyeih saw koong nang khäka che yokchaw ha mäyah, vum ha awbawng thuk khäh. Bahi äi sawk pektih tui nang mawng känäng nübün äm? Keinih nu chen paw sawk Yakub la ni wum chouh hüt, ani imsaw khäl awlaw mäksetdava la ni känäng dä tui ini bünei hüt saw. Nang ni Yakub thawka nelen saw ei?” Yĕsu la tak, “Ula ni tui ok äm, ani awlaw tui haleyalaih saw dä. Äini kei kepekaih saw tui ula ok äm, ani krängak ha awlaw krawnak tui halei ti hnawh. Kei anih a kepekaih saw tui che betahtih tui kraw huih thäneyeih saw. Äi tui la päihyah saw sawk pekai.” Äi hmutaw la tak, “Choktih o, bakhaw kei a äi tui epek, kei tui halei tiah hmawna awlaw tui khawi a ni laa lo hlütiyah hmawna.” Yĕsu la ani a tak, “Bakhaw chet tila nawpawtaw a abe ei tila lo al hnih.” Äi hmutaw la tak, “Kei a kawpawtaw mäyah.” Yĕsu la tak, “Nang ihisaw nawhawu saw dä. Nanga nawpawtaw mäyah. Nang pawtaw kräng hngaw no omei däk awlaw nang tua mawng pawtaw äng nämäi äm, ani ha nang pawtaw hiyah. Nang ihisaw nawhawu saw dä.” Äi hmutaw la tak, “Choktih o, tua dä kei kawyawk chu, nang Hnadaga sidawng hiyawktih. Keinih Samali chen khälla ni khuyunga dä Hnadaga a ini rosi hüt saw. Äini nangnih Yudi khälla nini hawu Yĕlusalem dä rosi dün la.” Yĕsu la äi hmutaw a tak, “Hmutaw o, Kei a uyumei. Ni huih ikhin lo tun, Paw Hnadaga a nangnih ni khuyunga ha rosi ti hnawh chu. Awlaw Yĕlusalem a ha rosi ti hnawh chu. Nangnih Samali khrawng khälla u a nini rosi saw äm hmawt chu. Äini keinih Yudi khälla kini hmawt khäh mawng Hnadaga a kini rosi saw äm. Iyaäm keinih Yudi khäla sumei bala dä Hnadaga la ni luhdül a anih käh ngulai känäng awkhiyawtalai. Äini ikhin lo tun, lo bang lo däk, ekejet rositih khälla awkhraw la ihisaw äng Paw a ini rosi ei. Iyaäm Paw la ni huih ekejet rositih khäla dä sui saw. Hnadaga che awkhraw. Ula Ani a rosi äm, äi la che awkhraw la ihisaw äng rosiyeih lah saw.” Äidä äi hmutaw la tak, “Kei kaw hmawt khäh, Mesaya lo tun. Ani lo khaw a ükütni keinih a khrawng hawu pekaih saw dä.” Ni Mesaya a Krito ting panei hmuei. Yĕsu la ani a tak, “Kei dä äi khrawng, Kei nang äng tua kä kräu tun saw.” Äi khaw a Yĕsu tebeih khäl ini lo al. Yĕsu äi hmutaw hngat äng kräu tun saw hmu ula ini maw. Äini anih la hngat la ha iha hi u, äi hmutaw la i hlü ei saw äm? Awlaw Yĕsu ha iya äi hmutaw äng kräu saw äm? Äi hmutaw la ani käh meng hiyän hüt bala che chon bala ani nama chetal. Äidä khrawng khäla atakal, “Lo khäl, khrawng hngata aso khäl, ani la kei kopoh chak däksaw kheni awhawu pekal hnäng khäh! Khathi Ani äi Mesaya dä?” Äidä nama käh khrawng kheni Yĕsu sota ini chet. Ni khäl thänei tun khaw a tebeih khälla Yĕsu a ini tak, “Choktih o, ekhet äng bitchaw ei.” Yĕsu la anih a tak, “Nangnih hmawt chu saw dä, Kei khäka eisaw mäi khäh.” Äiche tebeih khäl anih dukäng ini kräuvei, “Ani koong hngat la eisaw lo pek khäh hi pai.” Yĕsu la anih a tak, “Kei käh eisaw che Kei a ula eteh äm, Ani sitha huih bi kibiyeih saw awlaw Ani bi käphäyeih saw. Nangnih hawu chu ei, ‘Chawng tanaih saw koong khraw hli mäi pe khäh, äi pänäng dä chawng tanaih saw khin lo aih saw.’” Äini kei nangnih a kanang taktun, “Lai pawta so khäl, chawng hmin däk awlaw chawng tanaih saw khin ha olo däk. Ula chawng tanäm äila awmawn bünei. Awlaw päihyah saw sawk koong chawng chungei. Chawng chätih la chawng tantih pochong hnih ni ihni piyaw. Kheu äng bang mäi khäh, ‘Hngat la chäh awlaw hngat la tan.’ Mawng nangnih chä chu äm, äi chawng tana kei nangnih a kanang teh. Awhngaw la ayang bang ni bi ini bi däk, tua nangnih ni chawng nini lumalai.” Samali hmutaw la kibisaw kheni hawu chak hnäng khäh ting hawuwal chak saw koong Awbawng Samali mräh a käh khälla Yĕsu a ini yumei. Anih la Yĕsu khäka chet ula Yĕsu a anih äng mäyeih saw koong hnih ei ula ini tak. Äi koong Yĕsu äiya hnüp hnih mäi. Äi khaw a Yĕsu kheu khin ula awbawng khrawng la Yĕsu a ini yumei. Äi khrawng khälla äi hmutaw a ini tak, “Tua che nang kheu yaw ungala Yĕsu a kini yumei saw hiyah, keinih kini pum kädäng la Ani kheu khin ungala kini yawk chu, Ani dä luhdül äng käh khrawng khäl kheni a khiyawtal tih.” Hnüp hnih pänäng Yĕsu la äi la hlät bala Galil a chetal. Iyaäm Yĕsu la hawu hüt, Hnadaga sidawng hiyawktih la upum la hawuvah üküt laa ni hmawi ini bünei khäh. Yĕsu Galil a aphaw ni äiya käh khrawng khälla Ani a ini lawkei. Iyaäm anih Yĕlusalem a käh lätal päi a ini chet hüt. Awlaw lätal päi thänei tun khaw a Yĕsu la bisaw khäl kheni anih la ini hmuh. Äi pänäng Yĕsu Galil a käh Kana nama krawnal. Äiya Ani la tui a grĕp hawng poh al hüt saw. Äiya yunga bitih hngat ämäi hüt. Ani chaw lawga khomei bala kawpalnahum a mäi hüt. Yĕsu Yudia känäng Galila lo saw yawk ni, äi yunga bitih Ani khäka chet. Awlaw Kawpalnahum a chet bala ani chaw a awpawi poh pekalaih saw koong Yĕsu a ekhet äng ebekei. Ani chaw äi khaw a dü aih däk saw huih thänei. Yĕsu la ani a tak, “Ahmat la hiyah thän nawmaw nawkaih saw bi hmu chu khaw, nangnih yumei hnawh chu.” Äi khaw a yunga bitih la tak, “Boi o, kei chaw dü khawngah bitchaw ekhet äng lo e.” Yĕsu la ani a tak, “Nang chetal, nang chaw dü hnawh.” Ani la Yĕsu kheu yumei bala äi känäng chetal. Äi yunga bitih im pawta chetal tun khaw a lawma ani hngasaw khäl lo ula nang chaw pawyal däk ting ini tak. Ani la a hngasaw khäla hi, “Iti khaw a ani pawyal saw äm?” Anih la ini tak, “Yawn täh khosuna hngat meng khaw a, ani kawl saw pawyal.” Äi äng ani la awyawk chu, nang chaw pawyal däk ting Yĕsu la äi khin äng dä ani a tak hüt saw. Äi khaw a ani la awlaw ani imsaw kheni la Yĕsu a ini yumeyal. Yudia känäng Galil a lo al pänäng Yĕsu la ni äng sät hnih nawmaw nawkaih saw bi ibi. Ni pänäng Yĕsu Yĕlusalem mräh a chetal, äiya Yudi khäl käh päi hngat mäi hüt. Yĕlusalem a samphomah ini vawng dün tamkha kena kawn hngat mäi hüt. Äi kawn patchih ini om nawaih koong pai hngaw ala mäi hüt. Äi kawna Hibru be äng Betzata ting ini tak. Awbawng opahtih, imik mütih, chektih awlaw akantha phawlak dütih khrawng khäl äi ini om naw düna hiyawl ula chi ini mäi hüt chi. Üküt khaw a hawn natchaw äi kawn äng kom bala tui ahlün chi. Äi khaw a ubang äi tui äng ayang kom hngäng äm, äi awpawyal chi. Äi lawga se khälla äi tui hlüneyeih saw chong ula chi ini mäi. Äi kawn kawma thung gip gala kumset lawga khomei tih hngat khrawng mäi hüt. Yĕsu la äi khrawnga hiyawl bala mäi saw hmuh. Äi khrawng awbawng khokum lawga äng mäi saw, Yĕsu la äi hmawt khäh. Yĕsu la ani a hi, “Nang naw pawiyalaih khiyangei?” Äi lawga mawh la hawu, “Choktih o, tui hlünei khaw a kawn pawta kei a khrawng chipui nawaih tih niya hngat ha mäi u. Kei tui äng kokomaih saw kopo ei khaw a che, kei thawka ayang hngat ini komal chi.” Yĕsu la ani a takal, “Thou al! Nang käh phawk hlokeyal tila cheteyal!” Äiyäng tutu äi khrawng awpawyal. Ani phawk hlokeyal bala cheteyal. Äi khomhnüp che düm khomhnüp mäi hüt. Yudi elenchaw khälla äi pawyal tih khrawnga hmu ula ini tak, “Ula nanga awpawi ini poh al saw. Tühnüp che düm khomhnüp. Ni hnüp äng phawk hlokei tila cheteyal tawnti.” Ani la takal, “Phawk hlokeyal tila cheteyal ting Kei a awpawi opoal tih la ataksaw.” Yudi elenchaw khälla ani a ini hi, “Mawng khrawng la nanga phawk hlokeyal tila necheteya laih saw anang taksaw äm?” Äini äi lawga pawyaltih khrawng la Yĕsu a hmawt hütah. Iyaäm khrawng ini nung koong Yĕsu mawng pawta chetal äm hmawt tiyah. Äi pänäng Yĕsu la Hnadaga im dülmawh a äi khrawnga khomal. Yĕsu la ani a tak, “Khin! Nang tua nawpawyal däk. Ngulai bitiyei ti, hiyah khaw äi thawka ese nanga thänei naw theih.” Äi khrawng Yudi elenchaw khäl khäka chetal bala anih a takal, Yĕsu la dä kei a awpawi opoh al saw. Äidä, Yudi elenchaw khälla Yĕsu a ini kuluh nawkaih saw ini chah. Iyaäm Yĕsu la düm khomhnüp äng äi khrawnga awpawi poh al. Äini Yĕsu la anih a tak, “Kei Paw la sawkbrat ni bi tun saw dä, äihi Kei ha kibi eih lah saw.” Ni kheu yaw ula awlaw bang unung Yudi elenchaw khälla Yĕsu a ini tukaih saw ini kram. Ayang che Ani la düm khomhnüp thung khrah saw. Awlaw hngat che Hnadaga a Paw o ting panei saw, upuma Hnadaga äng tihtih a poh saw. Äi äng Yĕsu la takal, “Kei ihisaw kanang tak, Awchaw la ani kädäng känäng iha poh hngängah. Awpaw la ibang poh saw hmuh äm äidä poh saw. Awpaw la ibang poh äm Awchaw la äidä poh saw. Awpaw la Awchaw a khet nawk saw koong Awpaw la ibang poh äm, äi ükütni ani a dawn chak. Awpaw la ni thawka bang lentih bi ibi eih lah saw ani a dawnai, nangnih hang hang nini maw chakai. Awpaw la düsaw känäng awsawk pekal bala thouhwal saw huih, Awchaw la ha isitha saw khrawnga awsawk pek. Paw la hngat käh tara ha biyah, äini Awchaw a dä hang hang tara biyeih saw ana peksaw, äi äng Paw a hang hang khrawng la kenkeh ini poh saw huih, Awchaw a ha kenkeh ini poh aih saw Paw la hlüei. Ula bang Awchaw a kenkeh po ah äm, äila Awchaw a tetih Paw a ha che kenkeh po ah.” “Kei nangnih a lälä kanang tak, ula bang kei käh sidawng pawi yaw bala Kei etetih Paw a yumei äm, äila päihyah saw sawk büneyei. Anih tara äng kraw hnawh u. Anih la päihyah saw sawk ini bünei däk.” Kei ihisaw kanang tak. Äi huih ikhin lo aih saw, awlaw lo bang niya lo däk, dütih khrawng kheni la Hnadaga Chaw sam ini yawkaih saw. Äi asam yawtih khäl kheni ini hengal chakai. Paw a sawk henalaih saw tha mäi saw huih, Ani la Awchaw a ha sawk henalaih saw tha pek. Paw la Awchaw a khrawng khäl tara biyeih saw dogo pek khäh, iyaäm Ani che Luhchaw Chaw. Ni khäl yawchula maw ai chu, iyaäm ni huih ikhin hngat lo ai. Cho duka käh khrawng khäl kheni la luhchaw Chaw käh asam ini yawkai. Anih cho känäng awlaw krawnak ini thouwalai. Ula bikawi pawi bi hütäm, äi khälla päihyah saw sawk ini büneyalai. Äini ulabang pawyah saw bikawi hütäm, äi khäl damäng ini kraw ai. “Kei kupum tha äng iha po hngänga. Paw la ataksaw huih dä kei ihisaw tara kibisaw. Kei tara kibisaw che ihi khäh. Iyaäm Kei kisitha saw huih kibisaw hiyah, äini Kei a etetih sitha huih kibisaw dä.” Yĕsu la hawu, “Kei dä kupum krong äng sawksi kothok khaw, kei käh pum sawk kheu ihisaw hiyah. Äini kei krong äng pum sawk kheu hawu tih khrawng hngat mäi käh. Äi hawu tih che kei Paw. Awlaw Kei kawhmawt Ani la hawu saw äi kheu ihi khäh. Nangnih Yohan khäka sidawng hiyawktih nini teh. Yohan la kei kheu ihisaw dä hawu saw. Khrawng khälla Kei pum sawk kheu ini hawu aih saw äi Kei üm nga. Kei ni khäl kawhawu saw nangnih khiyawt tara büneyal hmawna. Yohan la Kei krong äng sawksi thok saw che choi bala awlaw wa bala mäitih simiya huih mäi hüt. Nangnih ani käh awa äng tanakra chaw nini piyaw aih saw koong nini hlüei saw. Äini Yohan käh pum sawk kheu thawka Kei a elen pum sawk kheu mäi khäh. Iyaäm Paw la ibang biyeih saw atak äm, äi bi khäl kei kopoh däk. Kei tua kibisaw bi khälla Paw la Kei a eteh saw ting sawksi pek. Awlaw Kei a etetih Paw la ha Kei krong äng sawksi thok. Nangnih krängak ha Ani sam yaw chu awlaw Ani hmawi hmu chu. Nangnih ni sidawng nini lung äng tawei chu. Iyaäm Ani la teh saw khrawnga nangnih yumei chu. Nangnih kiyam nini lung khraw chula nini phawt, iyaäm nangnih nini khin äi äng dä nangnih päihyah saw sawk nini büneyei ting. Äini äi kiyam dä Kei krong äng sawksi thok saw. Äi thän nangnih päihyah saw sawk nini büneyeih saw koong Kei khäka lodo chu.” “Khrawng la Kei a khrawng phiyaw aih saw hlüei nga. Äini nangnih ihuih khrawng äm, Kei kanang hmawt chak khäh. Hnadaga koong nangnih lung äng ekhet mäyah saw äi ha kawhmawt chak khäh. Kei kaw Paw ming äng dä kolo saw äini Kei a khrawng lawyei chu. Äini upum ming äng lotih khrawng che nini lawkeyei. Nangnih hngala hngat känäng awphiyaw nini büneyeih khiyang äini Hnadaga känäng awphiyaw nini büneyeih saw hno chu. Äihi iba Kei a anang yumeyeih saw äm? Nangnih khinai chu kaw Paw khäka nangnih ming äng Kei katängai. Äini nangnih nini üm saw Mosi la dä nangnih ming äng atängaih saw. Mosi la Kei krong yok hüt khäh. Nangnih Mosi a dä nini yumei khaw, Kei a ha anang yumei hü. Äini nangnih Mosi la yoksaw kheu yumei chu khaw, Kei kawhawu saw kheu iba nini yumeyeih saw äm?” Äi pänäng Yĕsu Galil guda chupawt jal kawtal. Ni mreta Tibiria mret ting ha ini tak. Awbawng khrawng Yĕsu hnüng äng ini chet, iyaäm Yĕsu la opahtih khrawng khäl awpawi poh al saw anih la ini hmuh chak. Yĕsu etebeih tih äng khuyung hngata kawi bala o om. Äi khaw a Yudi khäl käh lätal päi ekena lo hüt. Yĕsu la awbawng khrawng Ani khäka ini losaw hmuh. Äidä Yĕsu la Philip a tak, “Ni khrawng khäla pekaih phüh eisaw mawnga kübünaih saw äm?” Yĕsu la Philip a chawmaih saw koong ihi. Äini Ani la ipoh aih saw äm, äi ani la ayang khaw thouh hmawt khäh. Philip la krawnal bala takal, “Hang hanga bitchaw chi küt ong nepek thän, hen tah a thong hnih phu ha la bang lok hnawh.” Endu ting mingei nawtih tebeih hngat mäi. Ani che Simon Pitol nawu. Ani la Yĕsu a tak, “Niya pawtawchaw hngata püm äng käh ha pai hngaw awlaw ngaw thek hnih mäi khäh. Äini ni hiyawh khrawng koong äi lok hnawh.” Yĕsu la hawu, “Khrawng khäla om khäl.” Äiya awbawng bel mäi hüt. Hang hang ni bel khruäng ini om. Äiya pawtaw jiji thong hngaw huih ini thänei. Äi pänäng Yĕsu la ha law bala Hnadaga a äkiyä tawngei, äidä omtih khrawng khäla odou. Äi huih kawchawng chawng Ani la ngaw koong ha äkiyä tawngei bala khrawng khäla dou. Üküt nila ini hlüei yak ini bünei. Khrawng khälla ini hän luih ak ini ei pänäng Yĕsu la etebeih tih a tak, “Amrat saw khäl kheni lumal khäl, bitchaw ha kraka pak.” Khrawng khälla püm äng käh ha ini ei pänäng amrat saw lumal ula tong lei hnih äng ini hlüihyal. Yĕsu la nawmaw nawkaih saw bi bisaw hmu ula khrawng khälla ini hawu, “Nidä äi Hnadaga sidawng hiyawktih ubang luhdül äng loaih saw kheu mäi hütäm.” Khrawng khälla tha po ula Ani a anih käh mawng ini poh aih khiyang saw Yĕsu la yawkchu. Äi koong Ani lung khiyang awlaw krawnak khuyunga kawyal. Khomüni etebeih khäl guda kawma ini chetal. Anih long äng kawi ula kawpalnahum mräh a ini chetaih saw koong guda ini kawt. Äi khaw a khomü däk, äini Yĕsu anih khäka loal hawmah. Khri nung saw koong mretäng läng elen elen kawi tun hüt. Tebeih khäl mel thum hli long hawi ula ini chet pänäng anih la Yĕsu tui khruäng chetei bala long khäka lo al saw ini hmuh. Ni hmu ula anih ini ke hnäh. Äini Yĕsu la tak, “Kei dä! Keyei chu!” Tebeih khälla Ani a long äng ini khawyalaih khiyang ni anih ini chetaih dün kawma täk ting ana phaw. Äi hnüp pänäng guda chupawt kawma mäitih khrawng khälla ini hmawt long hngat pätpät dä mäitih saw. Anih la Yĕsu etebeih tih ängtu chetalah saw ini hmawt. Etebeih tih jiji dä ini chetal saw. Boi la ngaw la ha a pisih pek dün la kena awhngaw känäng long khäl lo. Äi long khäl che Tiberi a känäng lo saw. Khrawng khälla ini hmuh Yĕsu awlaw Ani tebeih tih khäl äiya mäiti u saw. Äi khaw a khrawng khäl Yĕsu a suiya äi long khäl äng kawi ula Kawpalnahum a ini chet. Khrawng khälla Yĕsu a guda awhngaw pawt kawma ini khomal. Khrawng khälla Yĕsu a ini hi, “Choktih o, nang itih khaw a niya nolo äm?” Yĕsu la anih a krawn bala takal, “Kei nangnih a lälä kanang tak, nangnih kei a anang suisaw nangnih nawmaw nawkaih saw bi nini hmuh saw koong hiyah. Äini äi ha ei chula nini hän luih saw koong dä. Krakalaih tih eisaw koong bi biyei chu. Äichaw a päihyah saw sawk täh mäyeih tih eisaw koong dä bi khäl. Luhchaw Chaw la äi eisaw anang pekai. Iyaäm Awchaw la ni khäl biyeih saw päng chak khäh ting Awpaw Hnadaga la dawn.” Äidä khrawng khälla ini hi, “Hnadaga käh bi kini biyeih saw koong i kini poh aih lah saw äm?” Yĕsu la anih a takal, “Awpaw la teh saw Chaw a nuyumei saw ni Hnadaga käh bi kawi.” Khrawng khälla ini takal, “Keinih hmawi mawh a awlaw nawmaw nawkaih saw bi hngat khrawng dawn, äi hmu ungala keinih nanga kanang yumei hnäng hmawna. Nang i nopoh aih saw äm? Keinih käh nuchen paw sawk khälla ala honga manna ini ei hüt. Kiyam äng yoei bala mäi, ‘Ani la hawn pre känäng ini eiyeih saw koong ha pek.’” Yĕsu la anih a takal, “Kei ihisaw kanang tak, Mosi la nangnih a hawn pre känäng ha anang pek hüt saw hiyah, Kei Paw la dä anang pek hüt saw. Tua Ani la ihisaw ha hawn pre känäng anang pektun. Hawn pre känäng lo saw mawng ha la luhdül äng käh khrawng khäla awsawk pekäm, äi ha dä Hnadaga la anang pek saw ha.” Khrawng khälla ini tak, “Choktih o, keinih a sawkbrat äi ha khrawng pek.” Yĕsu la anih a tak, “Kei dä äi sawk pektih ha! Ubang Kei khäka lo äm, äi asang düei hnawh. Ula Kei a uyumei äm, asang ha tui halei hnawh. Äini kei nangnih a kanang tak, Kei a anang hmuh däk, äini tua ha khrawng yumei hawmchu. Kei Paw la epek saw khrawng khäl kheni Kei khäka dä ini lo aih saw, Kei khäka lotih hngata ha tämal hnawh nga. Kei hawn pre känäng kisitha huih kopoh aih saw koong lo nga. Äini kei a etetih käh sitha huih kopoh aih saw koong kolo saw dä. Kei a etetih Paw sitha che ni huih, Kei a epek saw hngat khrawng ha Kei khrokei yah pak. Äini äpäiyeih saw khin äng anih a awsawk pekal hngäng hmawna. Awlaw Kei a etetih Paw lung hlü che ni huih, u khälla Awchaw a hmu ula Ani äng ini yumei äm, äi khäla päihyah saw sawk mäiyei. Kei dä anih a äpäih saw khomhnüp äng ini sawk kehenalaih saw.” Äi khaw a Yudi khälla belh belh la ini poh ei. Iyaäm Yĕsu la hawu hüt, “Kei dä äi hawn pre känäng käh ha.” Anih la ini hawu, “Ni Yosep chaw Yĕsu hiyah ei? Nangkei Ani nu la paw a ini hmawt khäh. Tua Ani la Kei hawn pre känäng kolo saw ting iba hawu äm?” Yĕsu la anih a tak, “Nangnih a nangnih dukäng belh belh la kräuwai chu.” Kei etetih Paw la Kei khäka loah hi, hngat ha Kei khäka lo hnäng hnawh u. Awlaw Kei anih a äpäih saw khomhnüp äng düsaw känäng kothouh walai. Hnadaga sidawng hiyawktih khälla ini yok, “Hnadaga la hang hanga chokai.” U khälla Paw kheu ini khin äm awlaw Ani känäng ini chok nawk äm, äi khäl Kei khäka ini lo. Hngat la ha Paw Hnadaga a hmu phu u, äini Paw Hnadaga känäng lotih Chaw la dä Ani a hmuh phu saw. Kei nangnih a lälä kanang tak, ula uyumei äm äiya päihyah saw sawk mäiyei. “Kei dä äi sawk pektih ha. Nangnih käh nu chen paw sawk khrawng khälla ala honga manna ini ei hüt, äini anih ini dü khäh. Äini ni hawn pre känäng losaw ha ulabang ei äm, ani dü hnawh. Kei dä äi hawn pre känäng losaw hengtih ha. Ula bang ni ha eiäm ani sawkbrat hengai. Nangnih a kanang pekaih saw ni ha che Kei saw. Luhdül äng käh khrawng khälla sawk bünei hmawna kei nangnih a ni kanang peksaw.” Ni kheu khäl yaw ula Yudi khäl anih dukäng ini toksakei. Anih la ini hawu, “Iba ni khrawng la Ani saw khrawng ei sawk saw äm?” Yĕsu la anih a takal, “Kei nangnih a ihisaw kanang tak, Luhchaw Chaw käh saw eichu saw awlaw thi ochu saw sawgraw nangnih a päiyah saw sawk mäi hnawh. Ula bang Kei saw ei äm awlaw thi ok äm, äila päihyah saw sawk büneyei. Kei anih a äpäih saw khomhnüp äng kothouh walai. Kei saw dä ihi tih eisaw awlaw Kei thi dä ihi tih tui. U khälla Kei saw ini ei äm awlaw kithi ini ok äm, Kei anih äng mäini kämäi awlaw anih ha kei äng ini mäi. Sawk mawh Paw la Kei a eteh saw, Ani koong dä Kei heng ngala kämäi saw. Äi huih kawchawng chawng ula Kei a eei äm, Kei koong anih ini hengai. Ni ha dä hawn pre känäng lo hmueitih ha. Nangnih nuchen paw sawk la ini ei hüt saw manna ha huih, ni ha hiyah äini anih che ini dü khäh. Ula ni ha ei äm, ani sawkbrat heng bala mäiyei.” Yĕsu la ni kheu khäl Kawpalnahum a Yudi ini lumeidün ima hawu. Ani tebeih tih khälla ni kheu khäl yaw ula ini hawu, “Ni choknawk saw kheu khäl mawt thuk. Ula ni kheu khäl yawk chu hnängai äm?” Etebeih tih khäl ni kheu khäl äng ini täng bawng saw Yĕsu la yawkchu. Äi koong Ani la anih a tak, “Nangnih ni koong nini khru khäh ei? Luhchaw Chaw ayang mäidün la hawn pre a kawyal saw nuhmuh khaw, nang i naw tawkai äm? Awkhraw la dä sawk pek hnäng saw! Luhchaw tha la iha po hngängah. Kei nangnih khäka käkräu saw kheu khäl che awkhraw la sawk äng luih. Äini nangnih dukäng ükütla che Kei a khrawng yumei u.” Yĕsu la ayang täh kän hmawt khäh, ula Ani a yumeyah saw äm awlaw ula Ani äng uyum khrah eyeih saw äm. Äidä Ani la awlaw hawu, “Kei nangnih a kanang tak, Paw la hlü eyah khaw, hngat ha Kei khäka lo hnäng u.” Yĕsu la ni huih kräu saw koong Ani tämtih awbawng khrawng ini krawnal. Ani ängtu anih chetei ti u. Äi koong Yĕsu la pochonglei hnih tebeih khäla tak, “Nangnih ha ählät chula nini chetalaih khiyang ngei?.” Simon Pitol la Ani a krawn bala takal, “Boi o, keinih u khäka kini chetalaih saw äm? Nang khäkä dä päihyah saw sawk kheu mäi saw. Keinih kini yum awlaw kini hmawt, Nang dä Hnadaga känäng lotih Asanh chang Hngat.” Äi khaw a Yĕsu la anih a takal, “Kei nangnih pochonglei hnih a kanang heh lei nga ei? Äi thän nangnih hngat dukäng mannat mäi khäh.” Yĕsu la Simon Ikariyo chaw Yuda be kräu saw. Ani pochonglei hnih äng käh hngat. Ani dä Yĕsu a Yudi khäl käh elenchaw khäl kutäng awpaih tih. Äi pänäng Yĕsu Galil pre lekchaw dukäng chonei bala mäi. Ani Yudia pre lekchaw a chet do hütah. Iyaäm Ani a Yudi lenchaw khälla ini tukaih khiyang saw koong. Äi khaw a Yudi khäl käh tambu päi khin hiyäu hüt. Äi koong Yĕsu a awnawu tih la ini tak, “Nang nibisaw khäl netebeih tih la hmu hmawna ni la hlät tila Yudia pre lekchaw a chet. Khrawng khäl ming mawh ini thäneyeih khiyang hi, anih la ini bisaw khäl thupei u. Nang ni khäl nibisaw koong nupuma luhdül a dawnei.” Ani nawutih la bang Ani a yumei u. Äi khaw a Yĕsu la anih a takal, “Kei käh ihisaw ikhin che tua ha lo hawmah. Äini nangnih käh khin che lala khaw a pei mäi khäh. Luhdül la nangnih a anang mum hnäng hnawh, äini Kei a dä khrawng mum saw. Iyaäm anih käh bi kawi ese khäh ting Kei kawhawu. Nangnih päi a chet khäl, Kei päiya chetaih nga. Iyaäm Kei käh ihisaw khin tua ha lo hawmah.” Äi kheu khäl hawu pänäng Yĕsu Galila mäyal. Yĕsu nawutih päi a ini chet pänäng Ani ha äi päi a chet. Äini Ani prangbaw chetah pak umu äng dä chet saw. Päi thänei tun khaw a, Yudi lenchaw khälla Yĕsu mawnga äm ting ini sui. Khrawng chuh duk känäng Ani krong äng awbawng la hau hauwa a ini hawu. Awvawng la ini hawu, “Ani che khrawng pawi chaw dä.” Awlaw awvawng la ini hawu, “Hiyah, Ani la khrawng khäla kramei chak.” Äini hngat la ha Ani krong prangbaw iha hawu u. Iyaäm anih la Yudi lenchaw khäl ini keh. Yĕsu la Hnadaga ima chet bala chok saw chah khaw a, päi sapta lai chet däk saw. Yudi elenchaw khäl mawt maw ula ini hawu, “Hngat la ha chokah pak ni khrawng la äi hiyawh iba hmawt saw äm?” Yĕsu la anih a krawn bala takal, “Kei ibang kochok äm, äi Kei kupum käh hiyah, äini Kei a ete tih Hnadaga känäng dä lo saw. Ula Hnadaga käh hlü ngeyeih khiyang äm, ani la hmawtai, Kei kochok saw khäl Hnadaga känäng losaw ei, hiyah khaw Kei kupum dogo känäng kawhawu saw ei. U bang upum dogo äng kräu äm, ani la upum käh dä awpiyaw poh eyeih khiyang. Äini Ani a ula teh äm, äiya dä hmawi pekaih khiyang hi, ani che khrawng pawi. Ani la ihisaw dä hawu saw, hiyah saw hawuvah. Mosi la nangnih a thung anang pek hütah ei? Äini nangnih hngat la ha thung ngei chu. Bakhaw nangnih Kei a iya anang tukaih khiyang saw äm?” Äi khrawng khälla ini tak, “Nanga khrawse la ini mawn saw hipai, ula nanga ini tukaih khiyang saw äm?” Yĕsu la anih a takal, “Kei nini mawnawkaih saw hngat kibi, äi koong nangnih maw chula nini mäi. Mosi la nangnih a nini chaw vun nini awh eiyeih saw ana anang pek hüt. Äini Mosi känäng äi huih thung lo ah. (Äibache ni nangnih nuchen pawsawk känäng dä losaw. Nangnih tua ha düm khomhnüp äng sämäichaw vun nini awh.) Sämäichaw hngat düm khomhnüp äng vun naw awh saw äng Mosi käh thung krakah hi, Kei düm khomhnüp äng khrawng hngata awpawi kopoh al saw koong nangnih iya Kei khruäng nini man pok saw äm? Aprang pawt so chula tara nini bisaw dümal khäl. Ihisaw tara dä bi khäl.” Äi khaw a pochongak hnih Yĕlusalema käh khrawng khälla ini hawu, “Elenchaw khälla ini tukaih khiyang saw ni khrawng hiyah ei? So khäl! Ani prangbaw dä kräu tun saw, anih la Ani a iha ta u. Bakhaw Ani Mesaya ting anih la lälä ini hmawt saw ei? Äini Mesaya loal khaw a mawng känäng loal saw äm, hngat la ha hmawt hnawh u. Äini ni khrawng mawng känäng lo saw äm, nangkei ini hmawt khäh.” Yĕsu la Hnadaga ima chok tun khaw a Ani la hek bala hawu, “Nangnih Kei a lälä anang hmawt saw ei awlaw Kei mawng känäng kolo saw äm, äi nini hmawt saw ei? Kei kupum dogo äng lo nga. Kei a ete tih che ihisaw. Nangnih Ani a hmawt chu. Äini Kei che Ani a kawhmawt khäh, iyaäm Kei che Ani känäng dä kolo saw awlaw Ani la Kei a eteh saw.” Äi khaw a anih la Ani a ini mawnaih khiyang, äini hngat la ha Ani pumäng ukut tawng u. Iyaäm äi khaw a ha Ani käh khin lo hawm hütah. Äini Khrawng khäl dukäng awbawng la Ani khrung äng yumei ula ini hawu, “Iti khaw a Mesaya lo alai äm, äi khaw a Ani la ni khrawng thawka awbawng nawmaw nawkaih saw bi biyei ei?” Khrawng chuh la Yĕsu krong äng ni kheu khäl hau hauwa ini kräuvei saw Pherasai khälla ini yawk. Äi koong anih awlaw pujawtih elenchaw khälla Hnadaga im chongtih khäla Yĕsu a mawnaih koong ini teh. Yĕsu la khrawng khäla tak, “Kei tana krachaw dä nangnih äng kämäyeih saw. Äi pänäng Kei a etetih khäka kechetalaih saw dä. Nangnih Kei a anang suyalai äini nangnih Kei a usuyal chula übünal hnawh chu. Iyaäm Kei kechet tun saw la a nangnih chet hnäng hnawh chu.” Yudi khäl anih dukäng kräuvei ula ini mäi, “Ani mawnga chet hnaw theih äm nangkei suyal pula bünalaih pu? Ani Grik mräh khäla chetaih saw hipai, nangkei käh awvawng khrawng che äiya dä. Ani la äiya käh khrawng la Grik khäla chokaih saw ei? Ani la hawu, ‘Nangnih Kei a anang suyalai, äini nangnih Kei a übünal hnawh chu, awlaw Kei mawnga kechet äm äiya nangnih chet hnäng hnawh chu.’ Äi kheu krawn che Ani la i hawu aih khiyang saw äm?” Äi päi len päih saw alang gong hnüp äng, Yĕsu la äiya ja bala athak hawu, “U bang tui halei äm, ani Kei khäka lo seh awlaw lo bala tui o seh. Ula Kei a uyumei äm, kiyam la hawu saw huih ani lung duk känäng awsawk tui long bala mäi yei.” Yĕsu la Asanh chang Khraw krong äng käh ni kheu hawu, “Ula Ani khruäng yumei äm, ani la äi Asanh chang Khraw büneyei. Äi khaw a Asanh chang Khraw pek hmuei hawmah. Iyaäm Yĕsu a wachang äng thouval hawmah.” Khrawng chuh duk känäng pochong hnih tum la ni kheu yaw ula ini hawu, “Ihi khäh, ni khrawng dä Hnadaga sidawng hiyawktih.” Awhngaw la ini hawu, “Ani dä Mesaya.” Äini awhngaw la ini hawu, “Mesaya Galil känäng lo ai saw ei? Kiyam la hawu wah ei, Mesaya che Dawut chen äng käh awlaw Dawut luhdül äng lo hüt saw la Betlehem känäng dä lo aih saw.” Awlaw Yĕsu koong khrawng khäl ini kheu tueyah. Awvawng la Yĕsu a ini mawnaih khiyang, äini hngat la ha Ani äng ini kut tawng u. Teh hmueitih chongtih khäl ini krawnal ni Pujawtih elenchaw khäl awlaw Pherasai khäla nangnih Ani a iya lo chu saw äm ting anih a ini hiyal. Äi chongtih khälla ini takal, “Äi khrawng kräu saw huih sätak ha hngat ha kräu u.” Pherasai khälla anih a ini takal, “Nangnih a ha anang mäk sawk saw ei? Khiyup tih khälla awlaw Pherasai khälla Ani khruäng yumei u. Äi khrawng chuh khälla Mosi käh thung khäl hmawt u. Anih lukhrunga Hnadaga käh sayei mäi.” Nikodim ting mingei nawtih Pherasai khäl äng käh hngat mäi. Ani la Yĕsu a sotai äng ayang krängak chet hüt. Ani la awhngaw khäla tak, “Khrawng hngat känäng iha khinah pak awlaw i poh saw äm äi epret bünah pak epret naw khrawkaih saw nangkei thung äng mäyah.” Anih la ini takal, “Nang ha Galil känäng dä nolo saw ei? Kiyam phawt bäi awlaw chok naw bäi. Hnadaga sidawng hiyawktih hngat ha Galil la a luhdül äng lo u.” Äi khaw a anih hang hang ni nanga nang ima ini chetal. Äini Yĕsu Olip khuyunga chet. Äi hnüp pänäng awmawt jawn Ani Hnadaga ima chet khaw a, khrawng kheni Ani khäka ini chuh ei. Äi pänäng Ani la äiya om bala anih a chokaih saw chah. Äi khaw a Mosi thung choktih khäl awlaw Pherasai khälla akrak bi bi khaw a mawn hmueitih hmutaw hngata mawn ula ini lo. Anih la äi hmutaw a alaya hiya ula ini tawk. Anih la Yĕsu a ini tak, “Choktih o, ni hmutaw la akrak bi bi khaw a mawn hmuei saw. Nangkei käh thung äng Mosi la ana khrawng pek hüt. Ni huih hmutaw a lungpel äng khongnaw tila nutukaih saw. Tua, Nang i nawhawu äm?” Anih la Yĕsu a kawl äng ini khraw kaih koong äi kheu ini hawu, anih la Ani ming äng täng hnäng ong. Äini Yĕsu la kun bala dek äng ukut pem äng yok hnäh. Yudi lenchaw khälla Ani a äkräng kräng ini hi ni, äi khaw a Ani la ja al bala anih a tak, “Nangnih dukäng u a ngulai mäyah äm, ani la täkchah lungpel äng khong naw seh.” Äi pänäng Ani awlaw kunal bala ukut pem äng dek äng yok tü. Anih la ni kheu ini yawk ni hngat pänäng hngat ükütni ini chetal chak. Changchaw khäl dä ayang awmaw äng ini chetal saw. Yĕsu lung khiyang dä äiya mäiyal tih awlaw äi hmutaw Ani hmawi mawh a ja bala mäi. Äi khaw a Yĕsu la ja al bala äi hmutaw a tak, “Hmutaw o, Anih mawnga äm? Nanga hngat la ha epret anang khraw ah ei?” Äi hmutaw la krawn bala takal, “Ä häh, Boi o, hngat la ha hiyah.” Äi khaw a Yĕsu la tak, “Kei ha nanga epret kini khraw nga. Chetal, tutäh känäng nang ngulai bi tiyei ti.” Yĕsu khrawng khäl äng awlaw kräu tü. Ani la hawu, “Kei dä ni luhdül äng käh awa. U khäl Kei hnung äng ini lo äm, anih krängak ha uhiyung äng mäi hnawh u. Äini awa äng käh sawk ini büneyei.” Pherasai khälla Ani a ini tak, “Nang nupum krong äng sawksi nothok, nang käh sawksi khäl ihisaw hiyah.” Yĕsu la anih a krawn bala takal, “Kei kupum krong äng sawksi kepekei thän, Kei käh sawksi krong ihi khäh. Iyaäm Kei kaw hmawtei khäh, Kei mawng känäng kolo saw äm awlaw mawnga kechetaih saw äm. Äini Kei mawng känäng kolo saw äm awlaw mawnga kechetaih saw äm äi nangnih hmawt chu. Nangnih luhchaw käh tawkäng dä tara nini bisaw. Äini Kei hngat käh tara ha bi nga. Kei dä tara ki bi hi, Kei käh tara che ihi khäh. Iyaäm Kei lung khiyang la tara bi nga, Kei ängtu Kei a etetih Kei paw ha mäi khäh. Nangnih käh thung äng yoei bala mäi khäh, pochong hnih la dä khaw khiyang sawksi ihni pek khaw, äi ihisaw a thänei. Kei kupum krong äng sawksi kepekei awlaw Kei a etetih Paw la Kei krong äng sawksi pek.” Anih la Ani a ini hi, “Nang paw mawnga äm?” Yĕsu la krawn bala takal, “Nangnih Kei a awhmawt chu awlaw Kei Paw a ha hmawt chu. Nangnih dä Kei a anang hmawt khaw, Kei Paw a ha nini hmawtai hü.” Yĕsu la Hnadaga im dülmawh a ini hlu dün laa choktun khaw a äi kheu khäl hawu, äini Ani a hngat la ha mawn u. Iyaäm Ani käh khin lo hawmah saw koong. Yĕsu la awlaw anih a tak, “Kei kechetal tun, nangnih Kei a anang suyalai. Äini nangnih ngulai äng nini dü ai. Kei kechetal tun saw alaa nangnih lo hnäng hnawh chu.” Yudi lenchaw khälla ini tak, “Ani la awsawk tukeyeih saw ei? Iyaäm Ani la hawu khäh, ‘Kei mawnga bang kechet tun äm, äiya nangnih lo hnäng hnawh chu.’” Yĕsu la anih a krawn bala takal, “Nangnih che awdawng känäng dä nini lo saw äini Kei che ädäm känäng dä kolo saw. Nangnih che ni luhdül känäng käh, äini Kei che ni luhdül känäng käh hinga. Äi koong Kei nangnih a kanang tak, Nangnih käh ngulai äng nangnih nini dü aih saw. Nangnih yumei chu hi ‘Kei dä äi Kei’ nangnih käh ngulai äng nangnih nini düai.” Äi koong Anih la Ani a ini hi, “Nang u äm?” Yĕsu la anih a tak, “Achah täh kän Kei nangnih a ibang kanang tak äm Kei äi. Nangnih kheu kawhawuvaih saw la tara kibiyeih saw Kei a awbawng mäi khäh. Äini Kei äi huih po nga. Iyaäm Kei a etetih känäng Kei ibang kawyawk äm, äidä ni luhdül a kataksaw awlaw Ani che yum phoih.” Ani la Awpaw käh krong hawu pek saw, äi anih la yawchu u. Äi khaw a Yĕsu la hawu, “Nangnih Luhchaw Chaw a krut äng nini thawn khaw a, nangnih nini hmawtai, ‘Kei dä äi Kei’. Awlaw ni ha nini hmawtai Kei kupum dogo äng iha po nga, äini Kei Paw la ihuih ochok äm äi huih kheu dä kawhawu saw. Awlaw Kei a ete tih Kei äng tu mäi khäh. Ani la Kei a lung khiyang ählä tah. Iyaäm Ani mawng bi äng awpiyaw äm, Kei äi bi dä sawkbrat kibisaw.” Yĕsu la äi kheu khäl hawu pänäng awbawng khrawng khälla Ani khruäng ini yumei. Yĕsu a yumei hüttih Yudi khäla Yĕsu la tak, “Nangnih a Kei kanang chok saw huih nini chet chonei hi, nangnih Kei käh ihisaw tebeih a nini thänei. Awlaw nangnih ihisaw nini hmawtai, awlaw äi ihisaw la nangnih a anang hläh a lai.” Anih la Yĕsu a ini tak, “Keinih che paw Awbraham chen äng käh khrawng. Keinih sätak ha khrawng käh hngasaw thänei unga. Keinih a ähläh pek hmuyalaih saw ting Nang iba nawhawu saw äm?” Yĕsu la anih a takal, “Kei nangnih a ihisaw kanang taktun, ula ngulai bi äm, ani ngulai käh hngasaw a thänei. Hngasaw hngat ha sawkak ibi dün imsaw ängtu mäyah, äini im mawh chaw che sawkak ima mäi khäh. Awchaw la dä nangnih a anang hläh al khaw nangnih lälä nini lätalai. Kei kaw hmawt khäh nangnih Awbraham chen. Äi thän nangnih Kei a anang tukaih khiyang saw. Iyaäm Kei kochok saw kheu khälla nangnih lung äng ala büneyah. Kei Paw la Kei a ibang awdawn äm, Kei äi krong dä kawhawu saw. Äini nangnih nini paw la i anang tak äm äidä nini poh saw.” Anih la ini takal, “Awbraham keinih käh paw.” Yĕsu la krawn bala takal, “Nangnih dä Awbraham käh chaw chuhnu nini thänei khaw, Awbraham huih nini bi khäh ai hü. Äini Hnadaga känäng ibang ihisaw Kei kaw yawk äm, äidä nangnih a kanang taksaw. Äi thän nangnih Kei a anang tukaih saw nini sot. Äini paw Awbraham la ni huih po hütah. Nangnih paw la ibang poh hütäm, äidä nangnih tua ha nini poh tun saw.” Anih la Yĕsu a ini tak, “Keinih pre chaw chuhnu hi unga. Keinih a kini paw mäi khäh. Hnadaga che keinih käh Paw.” Yĕsu la anih a tak, “Hnadaga dä lälä nangnih käh paw hi, nangnih Kei a anang khet nawkai hü. Iyaäm Kei che Hnadaga känäng dä kolo saw, äi koong Kei niya kämäi saw. Kei kupum dogo äng lo nga, äini Ani la dä Kei a eteh saw. Nangnih Kei käh kheu khäl iya yawchu chu saw äm? Iyaäm Kei kochok saw kheu khäl che nangnih law ei hnäng chu. Mannat dä nangnih käh paw awlaw nangnih che ani käh chaw chuhnu. Äi koong nangnih ani sitha luih ong nini mäichoh aih khiyang. Mannat che täkchah khaw thouh bang tutih. Ani sätak ha ihisaw ängtu mäyah. Iyaäm ani dukäng ihisaw mäyah. Ani e hlei khaw a, ani mäichoh khrang känäng dä kräu saw. Iyaäm ani che hlei tih awlaw e hlei khe khäl käh paw. Äini Kei che ihisaw käkräu, äi koong nangnih Kei a uyumei chu. Nangnih dukäng ula Kei a ngulaisu ting khrawng dawnaih hnäng saw äm? Kei dä ihisaw käkräu hi che, nangnih Kei a iya uyumei chu saw äm? Ubang Hnadaga käh khrawng äm, äi khälla Hnadaga kheu ini khin. Nangnih che Hnadaga käh hichu saw koong Hnadaga käh kheu khin chu saw.” Äi khaw a Yudi lenchaw khälla Yĕsu a ini tak, “Keinih ihisaw kräu unga ei? Nang che hngat Samali dä awlaw nang dukäng khrawse hngat mäi saw.” Yĕsu la krawn bala takal, “Kei äng khrawse mäyah, Kei che Paw a dä hmawi kepek saw. Äini nangnih Kawhmawi anang khrah. Kei kupum la hmawi kübüneyeih koong suyei nga. Äini Kei hmawi kübüneyeih saw koong hlü tih hngat mäi khäh, Ani la ihisaw tara bi. Kei nangnih a ihisaw kanang tak, Kei kochok saw ngeitih khäl che sätak ha dü hnawh u.” Khrawng khälla Ani a ini tak, “Tua keinih lälä kini hmawt däk, Nang dukäng khrawse hngat mäi saw dä. Iyaäm Awbraham awlaw Hnadaga sidawng hiyawktih khäl bang ini dü khäh. Äini Nang nawhawu, ‘Nang nochok saw ngeitih khäl che sätak ha dü hnawh u.’ Nang keinih käh paw Awbraham thawka nelen saw ei? Ani dü khäh awlaw Hnadaga sidawng hiyawktih khäl ha ini dü khäh. Nang nupuma i nikhinei saw äm?” Yĕsu la anih a krawn bala takal, “Bakhaw Kei dä kupuma hmawi kepekei hüt hi, äi hmawi kepekei saw iha hiyah. Kei a hmawi epektih che Kei Paw awlaw nangnih che Ani a nangnih käh Hnadaga ting nini tak. Nangnih Ani a sätak ha hmawt chu, äini Kei Ani a kaw hmawt. Kei dä Ani a hmawt nga ting kawhawu khaw Kei ha nangnih huih hlei tih a käthäneyei. Äini Kei Ani a kaw hmawt khäh awlaw Ani la hawu saw huih kopoh khäh. Nangnih käh paw Awbraham la Kei käh khomhnüp sotaih saw koong awpiyaw hüt. Ani la äi hmuh hüt awlaw ani awpiyaw hüt.” Yudi elenchaw khälla ini tak, “Nang che tua ha khokum hngawgip mäi hawm ti, nang Awbraham a iba nuhmuh saw äm?” Yĕsu la anih a takal, “Kei nangnih a lälä kanang tak, Awbraham luhdül äng lo khawngah bang Kei kämäi.” Äi khaw a anih la Ani a ini khong nawkaih koong lungpel ini koh lei. Äini Yĕsu thupeal, äiche Hnadaga im dülmawh känäng apranga thokal. Yĕsu lawm äng chetei tun khaw a imik mütih pochongak hmuh. Ani imik mü bala luhdül äng lo. Äi khaw a Yĕsu a etebeih tih la ini hi, “Choktih o, ani mik mü bala luhdül äng lo saw u käh ngulai koong äm? Upum käh ngulai koong ei, hiyah khaw ani nu paw käh ngulai koong ei?” Yĕsu la krawn bala takal, “Ani mik mü saw ani käh awlaw nu paw käh ngulai koong hiyah. Ani mik mü saw che, Hnadaga käh bi ani duk känäng dawng hmawna. Khomhnüp mäipe khaw a Kei a eteh tih käh bi nangkei ini poh aih lah saw. Khom yawn lo tun, äi khaw a hngat la ha bi hnäng hnawh u. Kei ni luhdül äng kämäyak ni, Kei ni luhdül äng käh a awa.” Ani la äi huih hawu pänäng, Yĕsu la dek äng chilh tui soh bala che kiyup bitchaw poh. Ani la äi kiyup äi khrawng mik äng a hmak bala hawu, “Chet tila Silawm kawna hmawi ahlaweyal.” (Ni Silawm ming naw krawnal khaw thänei ‘Teh hmueitih.’) Äi khaw a ani chet bala hmawi hlaweiyal awlaw sope sope lo al. Ani imcheng saw awlaw ani a hlu khawmei chi saw hmu chi tih khälla ini hawu, “Ni om bala hlu khawmei chi tih khrawng hiyeh ei?” Hngat pai hnih la ini hawu, “Ani dä äi khrawng” äini awhngaw khrawng khälla ini hawu, “Ani hiyah, ani äng ulup tuei saw.” Äini ani la awhawuvei, “Kei dä äi khrawng.” Anih la ini hi, “Nang iba nimik äng nuhmueyal saw äm?” Ani la krawn bala takal, “Yĕsu ting ini taksaw äi khrawng la kiyup po bala che kimik äng hmak bala hawu, ‘Silawma chet tila che hmawi a hlawyeiyal.’ Äidä kei ka hlaweyal ni kuhmuh eyal.” Anih la ini hi, “Äi khrawng che tua mawnga äm?” Ani la hawu, “Kei hmawt nga.” Äi pänäng äi imik mü hüttih khrawnga anih la Pherasai khäl khäka ini chih. Yĕsu la kiyup poh bala äi khrawnga awpawi poh al saw khomhnüp che düm khomhnüp mäi hüt. Äidä Pherasai khälla ani a ini hi, “Nang iba nimik äng nuhmueyal saw äm?” Ani la anih a tak, “Ani la ki mik äng kiyup hmak. Äidä kawhmawi kaw hlaweyal ni kuhmuh al.” Hngat pai hnih Pherasai khälla ini tak, “Ni khrawng la düm khomhnüp äng bi bi khäh, äi koong ni khrawng Hnadaga känäng lo ah.” Awhngaw Pherasai khälla ini tak, “Ngulaisu khrawng hngat la iba nawmaw nawkaih saw bi bi hnäng saw äm? Äi huih anih ini kheu ngieiu.” Äi khaw a Pherasai khälla awlaw krawnak äi khrawnga ini hiyal, “Ani la nang mik ini hong pekal koong nang Ani a i lup khrawng ting ni khin äm?” Ani la takal, “Ani Hnadaga sidawng hiyawktih.” Yudi lenchaw khälla ani mik mü hütsaw awlaw tua u hmuh eyal ting yumei u. Anih la khrawng te ula äi imikäng hmueyal tih nu paw a ini panei. Anih la ani nu paw a ini hi, “Luhdül äng imik mü bala lotih, ni nang hnih chaw ei? Äihi ani la tua iba hmuheiyal saw äm?” Ani nu paw la krawn häih la ihnih takal, “Kei hnih kihni hmawt khäh ni kei hnih chaw awlaw ani imik mü bala dä luhdül äng lo hüt saw. Äini iba hmueyal saw äm, äi hmawt hnih nga. Awlaw ula ani mik hongal saw äm, äi ha hmawt hnih nga. Ani a hi khäl, ani la yawchu däk. Ani pum krong ani la hawuwei seh” A hnih la Yudi lenchaw khäla ihni keh koong äi huih ihni hawu hüt. Iyaäm ula Yĕsu a Mesaya ting khawmei äm, äi khrawnga Yudi ini lumeidün la känäng thoh hmueyalaih saw ting elenchaw khälla ayang bang kheu ini poh hüt. Äi koong ani nu paw la i hnih hawu, “Ani la yawchu däk. Ani a hi khäl!” Yudi lenchaw khälla äi imik mütih a krawnak paneyal ula ini tak, “Hnadaga la ni koong awphiyaw bünei tawn. Iyaäm keinih kini hmawt khäh ni Yĕsu che ngulaisu dä.” Äi khrawng la krawn bala takal, “Ani ngulaisu ei kei hmawt nga. Äini Kei hngat kaw hmawt, kei kimik mü hüt, äini tua kei kuhmuh al.” Äiche anih la ani a ini hi, “Ani la nanga i ini poh hüt saw äm? Ani la iba nang mik hongal saw äm?” Ani la krawn bala takal, “Kei nangnih a ayang bang kanang tak däk äini nangnih khin chu. Nangnih awlaw krängak iya nini khinalaih khiyang saw äm? Nangnih ha ani käh tebeih nini thäneyeih khiyang saw ei?” Äi khaw a anih la bäunaw ula ini tak, “Nang dä Ani käh etebeih, keinih che Mosi käh etebeih dä. Keinih kini hmawt khäh Mosi äng Hnadaga äkräu hüt khäh. Äini äi khrawng mawng känäng lo saw äm keinih hmawt unga.” Äi khaw a äi khrawng la anih a krawn bala takal, “Mawt nawmaw aih saw krong! Ani mawng känäng olo saw äm Nangnih hmawt chu saw! Äini Ani la kei mik awpawi poh al. Nangkei ini hmawt khäh Hnadaga la ngulaisu käh kheu khinah. Äini Ani a kenkeh potih awlaw Ani sitha huih bi bitih käh kheu dä Hnadaga la khin saw. Luhdül chah saw khaw thouh krängak ha hngat la ha yaw hawm u, imik mü bala luhdül äng lotih khrawng käh mik hngat la ha ohong pekal ting. Ni khrawng dä Hnadaga känäng lo ah hi Ani la iha poh hnäng hnawh.” Anih la krawn ula ini takal, “Nang luhdül äng nolo saw awlaw nochom saw ngulai äng dä! Nang keinih a anang choksaw ei?” Ni huih hawu ula Yudi elenchaw khälla Yudi ini lumeidün im känäng Ani a ini thoh al. Yudi elenchaw khälla ani a Yudi ini lumeidün im känäng ini thoh al saw Yĕsu la yawk. Äi pänäng Yĕsu la äi khrawnga sui bala bünal ni ihi, “Nang Luhchaw Chaw a nuyumeyei?” Äi khrawng la krawn bala takal, “Choktih o, äi khrawng che u äm kei a awhawu pek. Kei Ani a yumei hnäng hmawna.” Yĕsu la ani a tak, “Nang Ani a nuhmuh däk awlaw Ani nang ängtu äkräu tun saw.” Äi khrawng la hawu, “Boi o, kei kuyum khäh!” Äidä ani la okhogru dülei bala Yĕsu a rosi. Yĕsu la äi khrawnga tak, “Kei tara bi a luhdül äng kolo saw. Imik mütih la hmueyal hmawna awlaw imik müah tih khäl käh mik mü hmawna.” Ani kena ja ula mäitih hngat pai hnih Pherasai khälla Ani la hawu saw ini yawk ni Ani a ini hi, “Keinih ha kini mik mütih ting nang naw hawuvaih khiyang saw ei?” Yĕsu la anih a tak, “Nangnih nini mik mü khaw nangnih a epret mäi hnawh saw. Äini keinih kini hmuh khäh ting nangnih nini hawu. Äi koong tua ha nangnih a epret mäi khäh.” “Kei lälä kanang tak, lusupei samphomah kheng tamkha känäng vawngah pak awhngaw lawm känäng vawng hi, äi khrawng che sukhä hiyah thän tamdah. Äini tamkha känäng vawng tih che samphomah khäl käh kiyongtih. Tamkha chong tih la ani koong tamkha ohong pek. Samphomah khälla kiyongtih sam ini khin. Ani la samphomah khäla ini ming äng panei chi awlaw apranga ini chetaih saw koong lawm dawn chi. Ani la upum käh samphomah khäl kheni apranga thoh pänäng ani awmaw äng chetei, awlaw samphomah khäl ha ani hnung äng ini chet. Iyaäm ani sam anih la ini hmawt khäh. Anih la hmawt u saw khrawng hnung äng chet u. Hmawt u saw khrawng känäng anih ini chenal. Iyaäm anih la ani käh sam hmawt u.” Yĕsu la anih a ni pümchut bala awhawu pek. Äini Ani la i hawuvaih khiyang saw äm anih la yawchu u. Äi koong Yĕsu la awlaw tak, “Kei ihisaw kanang tak, Kei dä samphomah khäl käh tamkha. Kei khawngah lotih khäl che sukhä la tamdah. Äini samphomah khälla anih käh sam khin u. Kei dä tamkha. Kei duk känäng u bang aw vawng äm ani awkiyawtalai. Ani uduka olo hnängai awlaw apranga echet hnängai awlaw ei dün phüm ini büneyei. Sukhä lo saw che mukaih koong awlaw utukaih koong awlaw akhrah aih koong. Äini Kei kolo saw che anih la ihisaw sawk bünei hmawna awlaw ini hlüei saw kheni bünei hmawna. Kei dä pawitih sum samphomah kiyongtih. Pawitih samphomah kiyongtih la upum käh samphomah koong awsawk pekei. Ubang samphomah kiyongtih hiyah äm, awlaw samphomah upum la taweiyah äm, äi hnga hmueitih khrawng la hni lo saw uhmuh khaw samphomah hiyän bala chonal. Äihi äi hni la samphomah mawn bala ichih ei awlaw samphomah khäl ini khrih ei chak. Hnga hmueitih khrawng chenal. Iyaäm ani hnga hmuei saw awlaw samphomah khäl koong tawkah. Kei dä pawitih samphomah kiyongtih. Kei käh khäla kei kawhmawt khäh awlaw Kei käh khälla Kei a khrawng hmawt khäh. Äi huih kawchawng chawng Paw la Kei a awhmawt khäh awlaw Paw a Kei ha kawhmawt khäh, awlaw Kei samphomah koong kawsawk kepekei hnäng khäh. Kei a awlaw samphomah sawng mäi khäh, äi khäl che ni samphomah kheng äng mäi u. Äi khäla Kei kolo a laih lah saw dä. Anih la Kei käh sam ini khinai. Anih sawngaka ini thäneyalai awlaw anih a kiyongtih hngat dä thäneyeih saw. Paw la Kei a ekhet nawk khäh, iyaäm Kei kawsawk kisitha äng kepekei hnäng awlaw Kei kawlaw keyal hnäng. Hngat la ha Kei känäng kawsawk lawei hnäng u. Kei kisitha äng dä kepekei saw. Sawk kepekeyeih saw thayung Kei a mäi khäh awlaw sawk kawlaw keyalaih saw thayung ha Kei a mäi khäh. Ni bikhäl Paw la Kei kibiyeih koong ana epek saw.” Ani käh ni kheu koong Yudi khäl ini koyei. Anih dukäng käh hngat pai hnih la ini hawu, “Ani a khrawse mawn khäh! Ani lu däk! Iya nangnih Ani kheu nini khin saw äm?” Äini awhngaw khrawng khälla ini hawu, “Khrawse la mawn saw khrawng ni huih kräu hnäng ngah! Khrawse la iba imik mütih khrawng käh mik ohong pekalaih hnäng saw äm?” Äi khaw a isik khaw mäi hüt. Awlaw Yĕsu ha Yĕlusalema Hanukka päi khin äng mäi hüt. Yĕsu Hnadaga ima Solomon käh dülmawh a chonei bala mäi hüt. Äi khaw a khrawng khäl Ani ken setsei wanei chak ula ini hi, “Hnüp hiyawh nang keinih a khrawng ütei nawtila anang tawkaih saw äm? Nang Mesaya ei, keinih a prangbaw khrawng hawupek.” Yĕsu la krawn bala takal, “Kei ayang bang kanang tak däk, äini nangnih Kei a khrawng yumei chu. Kei Paw käh thayung äng i aw kibi äm, äi bi khälla Kei krong äng sawksi ini pek. Äini nangnih yumei chu, iyaäm nangnih Kei käh samphomah hi chu. Kei käh samphomah la kei sam khin khäh. Kei anih a kaw hmawt awlaw anih Kei hnüng äng ini lo. Kei anih a päihyah saw sawk kepek. Anih krängak ha dü hnawh u. Hngat la ha Kei kut känäng anih a u huh ei hnäng hnawh u. Kei Paw la dä Kei a äi khäl epek saw. Paw che üküt thawka elensum. Hngat la ha Paw kut känäng anih a huh ei hnäng hnawh u. Paw la Kei lup khiyang.” Äi khaw a khrawng khälla Ani a lung äng ini khong nawkaih koong awlaw lung ini koh lei. Yĕsu la anih a tak, “Paw känäng käh awbawng bi pawi Kei nangnih hmawi mawh a kibi, äi bi khäl äng käh mawng bi koong Kei a lung anang khong nawkaih khiyang saw äm?” Anih la krawn ula ini takal, “Bi awpawi khäl koong keinih nanga lung kanang khong nawkaih khiyang unga, äini nang Hnadaga krong äng ne hlei koong dä kanang khong nawkaih saw! Nang khrawng thänei tila nupuma Hnadaga äng tihtih a nopoh ei.” Yĕsu la krawn bala takal, “Nangnih käh thung äng yoei bala mäyah ei, Kei kawhawu, ‘Nangnih kheni hnadaga.’ Nangkei ini hmawt khäh kiyam che sawkbrat ihi khäh, awlaw Hnadaga la mawng khrawng khäla sidawng pek äm, Hnadaga la äi khrawng khäla hnadaga khäl ting a panei. Paw Hnadaga la Kei a eheh lei awlaw ni luhdül äng eteh. Bakhaw Kei Hnadaga chaw ting kaw hawuvei saw äng Kei Hnadaga a kekeleih saw ting iba nini hawu hnäng saw äm? Kei Paw käh bi dä Kei bi nga khaw nangnih Kei a khrawng yumeyei hnawh chu. Äini Kei äi bi khäl kopoh khaw, nangnih Kei a khrawng yumei chu thän Kei käh bi yumei khäl. Äihi nangnih krängak nini hmawtaih awlaw nini yawk chu ai, Paw Kei äng ämäi awlaw Kei ha Paw äng kämäi.” Awlaw krawnak Yĕsu a ini mawnaih koong ini hno. Äini Ani anih känäng awhngaw a chetal. Äi pänäng Ani Yawldan hlong awhngaw pawt jala chet bala ämäi. Äiya Yohan la täkchah tuilüh pek hüt. Awbawng khrawng Ani khäka ini lo. Anih la ini hawu, “Yohan la nawmaw nawkaih saw bi iha bi hütah, äini ani la äi khrawng krong awhawu saw khäl ihi khäh.” Äi la a Awbawng khrawng la Yĕsu khrung äng ini yumei. Lasar ting mingei nawtih Betani nama käh khrawng hngat opah thänei hüt. Meri la ani nawu Martha äi nama i hnih mäi. Äi Meri la Boi Yĕsu kho äng otih si läi bala ulusawm äng potal hüt. Opah tih Lasar che Meri nawu mäi hüt. Äi koong ani nawu hmutaw chaw häih la Yĕsu a sidawng pek häih la ihni hawu, “Boi o, Nang nekhet nawk saw khrawng opah thänei khäh.” Äi kheu yaw bala Yĕsu la hawu, “Ni lawga la Lasar sawk tu hnawh. Äini nila Hnadaga käh phiyaw dä loaih saw. Ni äng Hnadaga chaw la ha phiyaw büneyei” Martha, ani nawu awlaw Lasar a Yĕsu la ekhet nawk hüt. Yĕsu la Lasar opah saw ting yawk ni, Ani mawng la a mäi hütäm äiya awlaw hnüp hnih mäyal pe. Äi pänäng Ani la etebeih khäla tak, “Che, nangkei awlaw Yudia a chetäng khä.” Etebeih khälla Ani a ini tak, “Choktih o, chün yawn täh a dä elenchaw khälla nanga lung pel äng anang khong naw bala anang tukaih khiyang, äiya iya nechetaih khiyang saw äm?” Yĕsu la anih a takal, “Kho hnüpak äng gonda lei hnih awa mäyah ei? Ubang awa äng chetei äm, ani thäi bala kru hnawh. Iyaäm ani la luhdül äng käh wa äng lawn hmuh ei khäh. Äini awyawna cheteitih che äthäi khäh, iyaäm ani ängtu awa mäyah.” Äi pänäng Yĕsu la anih a tak, “Nangkei käh khanbawn Lasar ipsaw dä äini Kei tua ania kakhakaih koong kechet tun.” Äi khaw a etebeih khälla ini tak, “Boi o, ani dä i ip khaw ani awpawyalai.” Anih la ini khin Yĕsu la Lasar i ip saw be hawu saw. Äini Ani la che Lasar düsaw be hawu saw dä. Äi koong Yĕsu la anih a prangbaw tak, “Lasar dü däk! Äini nangnih pawyeih saw koong Kei äiya mäi hüt nga saw äng kaw piyaw. Iyaäm tua dä nangnih Kei a anang yumeyei. Che, nangkei tua chetäng khäh.” Thoma, (phetih ting panei hmuyei äm) ani la awhngaw tebeih khäla tak, “Che khäl, nangkei ha Ani ängtu ini dü hnängai hü.” Yĕsu Boithonia a phaw ni Lasar a cho kho äng phul hmuei saw kho hnüp hli thänei däk ting yawk. Yĕlusalem känäng Betani a mel hnih lawm mäi. Yudia a käh awvawng Yudi khäl Martha la Meri ta düsaw koong ihni lung ini hiyelaih koong ini lo hüt. Yĕsu lo tun ting yaw bala Martha Ani äng khomeiya chet äini Meri che ima mäi. Martha la Yĕsu a tak, “Boi o, nang nia nämäi khaw kei nawu dü thawnawh saw. Äini kei tua kawhmawt khäh, Nang Hnadaga känäng i nawhawuvei äm Hnadaga la ini pekaih saw dä.” Yĕsu la ani a tak, “Nang nawu awlaw thowalaih saw dä.” Äi khaw a Martha la Ani a tak, “Äpäihyeih saw hnüpa dütih khrawng khäl ini thouwal khaw a ani ha thouwalai.” Yĕsu la Martha a tak, “Kei dä thouwal tih awlaw sawk. Ula Kei a uyumei äm ani dü thän hengalai. Awlaw u khäl heng ula ini mäi äm awlaw Kei a khrawng yumei äm ani sätak ha dü thaw hnawh. Nang ni kheu nuyumeyei?” Martha la Ani a tak, “Ä, Boi o, Kei kuyumei khäh, ni luhdül äng u loaih saw kheu mäi hütäm, Nang che äi Mesaya, Hnadaga chaw.” Ni kheu kräu bala Martha äi känäng chetal awlaw ani nawu Meri a umuchaw äng atakal, “Choktih niya mäi khäh awlaw Ani la nanga ini bekei khäh.” Meri la äi kheu yaw bala jotjota Yĕsu khäka chet. Yĕsu äi khaw a ha nama aphaw hawmah. Martha Ani äng khomeyeih saw koong mawnga lo hütäm Yĕsu äi khaw a ha äiya dä mäi pe hüt. Meri ima mäi ula a hnih lung hiyel tih Yudi khäl, Meri jot ting thou bala apranga thoksaw ini hmuh ni anih Meri hnung äng ini chet. Meri Lasar cho a kapa chet saw ting anih la ini khin. Meri Yĕsu mäidün laa aphaw. Äidä Yĕsu a hmuh ni okho chouwa bok bala tak, “Boi o, Nang nia nämäi hüt khaw kei nawu dü thaw hnawh saw.” Yĕsu la Meri akap saw awlaw ani känäng lotih Yudi khäl ha ini kap chaksaw hmuh. Äi äng Yĕsu la ulung dukhah piei awlaw ulung pu piei. Ani la anih a tak, “Lasar a mawnga nini phul äm?” Anih la ini hawu, “Boi o, lo tila aso.” Äi khaw a Yĕsu akap. Äi äng Yudi khälla ini hawu, “So khäl, Ani la Lasar a i hiyawh khet nawk hüt saw äm.” Äini Yudi khäl äng käh üküt kütla ini hawu, “Ni khrawng la imik mütih a awpawi poh al khaw Ani la Lasar a düah pak po hnängah ei?” Äi äng Yĕsu la ulung äng dukhah bünei bala Lasar ini tawk dün cho a chet. Äi cho che okho hngat mäi hüt. Äi cho kho wah lung pel hlaw hngat äng kün hmuei hüt. Yĕsu la hawu, “Ni lung pel hlai khäl.” Dütih chi Martha la Yĕsu a tak, “Boi o, uthu hu bang lo däkai, iyaäm üdüsaw hnüp hli mäi däk.” Yĕsu la Martha a tak, “Nang dä nuyum khaw Hnadaga käh wachang nu hmuh ai ting Kei nanga kanang ta nga ei?” Äi khaw a khrawng khälla äi lung pel ini hlayal. Yĕsu la ädäm pawta so bala tak, “Paw o, Kei nanga äkiyä kini tawngei, iyaäm Nang Kei kheu ni khin. Kei kawhmawt khäh sawkbrat nang Kei kheu ni khin. Äini keken setsei ja ula mäitih khrawng khäl koong Kei ni kheu kawhawu saw. Äihi nang Kei a ini teh saw ting anih la khrawng yumeyei.” Ni kheu hawu pänäng Yĕsu la hek bala hawu, “Lasar, apranga thokal!” Äi dütih khrawng äi khaw a cho känäng thok bala lo al. Ani ukut kho wat äng tomei bala mäipe. Awlaw Awhmawi che wat pilchaw äng künei bala mäi hüt. Yĕsu la khrawng khälla tak, “Ani tom hmuei saw wat khäl hongal khäl awlaw ani a chetal sawk khäl.” Meri khäka lo hüttih Yudi khäl äng käh awbawng la Yĕsu käh ni bi hmu ula Ani a ini yumei. Äini anih dukäng üküt küt la Pherasai khäl khäka chet ula Yĕsu la poh hüt saw kheni ini hawu pek. Äi khaw a pujawtih elenchaw khäl awlaw Pherasai khäl lumei ula Yudi khäl käh hngawsaw khäl äng ana khomei. Anih la ini hawu, “Nangkei tua i ini poh aih saw äm? Ni khrawng la che awbawng nawmaw nawkaih saw bi ibi khäh. Nangkei dä Ani a nga pu khaw ükütnila Ani a dä ini yumeyeih saw. Awlaw Rom presaw khäl lo ula nangkei käh Hnadaga im la nangkei yapsaw a ini khrah chakai.” Anih dukäng Kayapha ting mingei nawtih hngat äi khokum äng pujawtih gong mäi hüt. Ani la anih a tak, “Nangnih hmawt chu ei, hngat yapsaw äng käh khrawng kheni ini krakaih saw chaw a pochongak khrawng krak saw bang pawi khäh.” Kayapha la upum kädäng känäng ni kheu hawu saw hiyah, äini ani äi khokum äng käh pujawtih gong mäi hüt saw. Äi koong awhmawi mawh äng käh kheu hawu hüt saw, Yudi yapsaw koong Yĕsu dä düaih saw. Yudi yapsaw jiji koong hiyah, krih ei ula mäitih Hnadaga chaw khäl utu pongal bala kantha aka poh alaih koong dä Ani düaih saw. Äi hnüp khaw thouh Yudi lenchaw khälla Yĕsu ini tukaih saw ini kram. Äi koong Yĕsu Yudi khäl hmawi mawh a prangbaw chonei tiyah awlaw äi la hlät bala ala hong kena käh Ipharim nama chetal. Äiya Ani etebeih tih ängtu ämäi. Äi khaw a Yudi khäl käh ini lätal päi ähiyäu hüt. Äi päi khawngah ini puma asanh chang ini poh eyeih koong awbawng khrawng ini nam hlät ula Yĕlusalema ini chet hüt. Khrawng khälla Yĕsu a ini sui. Anih Hnadaga ima ja ula hngat la hngat ini hi ei, “Nangnih i nini khin äm? Ani päi a lo aih hiyah ei?” Pujawtih elenchaw khälla awlaw Pherasai khälla ini tak hüt, Yĕsu maw a mäi äm, äi ula hmawt äm anih a ini takaih saw. Äihi Yĕsu a anih la mawn hnäng hmawna. Lätal päi chah aih saw hnüp sok khawngah Yĕsu Betani a chet hüt. Yĕsu la düsaw känäng thouwal hüttih Lasar käh nam Betani a mäi hüt. Äiya anih la Yĕsu koong ei ok pawi po ula ini tawk. Martha la ete long hüt. Lasar ha anih äng ei okaih koong tebil kena om hüt. Äi khaw a Meri la thing chaw känäng ini poh saw mawmawt o osum la awkhawk sum echet otih si bungak lo. Äiche Yĕsu kho äng äi si läi bala che ulusawm äng opotal. Im kheni äi otih si hu hün hüna lo chak. Yĕsu a lansu khäl kutäng mawn sawkaih tih etebeih khäl dukäng käh Yuda Ikariyo ting mingei nawtih pochongak la hawu, “Ni otih si hen ta ah 300 äng je pula sanglaisu a ini pekaih hnäng saw. Iya äi po hmuei yah saw äm?” Yuda la sanglaisu khäl be tawk bala ni khäl hawu saw hiyah. Ani che sukhä. Ani khäka tawk hmuei saw tebeih khäl käh awmawn khoila äng käh mawn umu chaw äng umukei chi hüt. Yĕsu la ani a tak, “Ani lung naw sawkai chu, Kei a khrawng phulaih saw koong ni huih po bala ani la ächän tawk lawk saw. Sanglaisu khäl che sawkbrat ni nangnih ängtu ini mäi khäh, äini Kei a nangnih sawkbrat übün thaw hnawh chu.” Yĕsu Betani nama mäi ting yaw ula awbawng Yudi khrawng khäl Ani khäka ini lo. Anih Yĕsu a jiji sota ini lo saw hiyah, äini Yĕsu la üdüsaw känäng thouwal tih khrawng Lasar a ha sota ini lo. Äi khaw a pujawtih elenchaw khälla Lasar a ha ini tukaih saw ini kram, iyaäm Lasar koong Yudi dukäng käh awbawng la elenchaw khäla hlät ula Yĕsu a ini yumei hüt. Äi hnüp pänäng awbawng khrawng äi päi a ini lo hüt. Äi khaw Yĕsu ha Yĕlusalema äi päiya lo tun khäh ting a anih la ini yawk. Äi khaw a anih la khuyu sei law ula Ani äng khomei a ini chet. Anih la hek ula ini hawu, “Hosana! Boi ming äng lotih a Hnadaga la pisih pek khäh! Hnadaga la Isawlael käh mawnga pisih pek.” Kiyam äng yoei saw huih Yĕsu la sĕ lekchaw hngat bün ni äi äng kawi bala om. Kiyam äng yoei bala mäi, “Yĕlusalema käh khrawng khälo, ke ei chu, so khäl, nangnih käh mawng se lekchaw alawchaw äng kawi bala lo tun.” Ayang Yĕsu tebeih khälla ni yawchu u. Äini Yĕsu a phiyaw hmuei saw ini hmuh ni kiyam äng yoei saw kheu khäl anih ini lung äng kawiyal. Anih a awlaw ini lung äng kawiyal khrawng khälla Yĕsu koong dä ni khäl ini poh saw. Yĕsu la dütih Lasar a cho kho känäng thouwalaih saw tak khaw a, hmutih khrawng khälla awhngaw khäl khäka sawksi thok ula ini mäiyal. Äi koong awbawng khrawng Ani ängtu khomeya ini chet, iyaäm Yĕsu la ni nawmaw nawkaih saw bi bi ting anih la ini yawk. Ni hmu ula Pherasai khäl hngat la hngat ini khräuvei, “Nangkei iha po hnäng hnawh pu. So khäl, luhdül äng käh khrawng kheni Ani hnung äng ini chet tun.” Äi päiya rosi a lotih khäl dukäng pochongak hnih Grik khrawng khäl ha ini mäi hüt. Äi päiya Galil pre lekchaw a käh Betsida mräh känäng Philip ting mingei nawtih khrawng hngat lo hüt. Äi Grik khrawng khälla Philip a ini hi, “Choktih o, keinih Yĕsu a kini hmuh aih khiyang.” Philip la chet bala Endu a atak. Äi pänäng Endu la Philip chet häih la Yĕsu a ahna takal. Äi khaw a Yĕsu la ahnih a tak, “Luhchaw Chaw la a wachang büneyeih saw ikhin lo däk. Kei nangnih a ihisaw kanang tak tun, püm lung hngat dekäng kraw bala düalah khaw, äi känäng ichih hngat dä thänei saw. Äini üdüal khaw che, äi känäng awbawng ichih thänei. Ula upum sawka khet nawk äm, ani la aw sawk khrokeyei. Äini ula bang ni luhdül äng upum sawk mum äm, ani la päihyah saw sawk büneyei. Ula Kei a echetchaw aih khiyang äm, Kei hnung äng ani lo aih lah saw. Awlaw Kei mawnga kämäi äm Kei hngasaw ha äiya mäiyei. Ula Kei echetchaw äm Paw la ani a hmawi pekai. “Kei kulung dukhah äng kämäi khäh. Kei i kaw hawuvaih saw tawnäm? Paw o, ni huih dukhah känäng Kei a ählät bäi? Äini Kei ni huih hawu hnäng nga. Iyaäm Kei dukhah khawmai äng dä ni luhdül äng kolo saw. Paw o, Nang niming phiyaw ei.” Äi khaw a hawn pre känäng asam hngat lo, “Kei käh ming kaw phiyaw ei däk, Kei awlaw kaw phiyawyei ei.” Äiya ja ula mäitih khrawng khälla äi sam ini yawk. Awvawng vawng la ini khin, ni sam che hum meng saw sam ting awlaw Hawn natchaw Ani äng kräwu saw ting awvawng vawng la ini hawu. Äi pänäng Yĕsu la hawu, “Ni kheu Kei koong hawu hmuei yah nangnih koong dä hawu hmuei saw. Luhdül a tara bi hmueyeih saw awlaw ni luhdül khiyuptih Mannat täm hmueiyalaih saw. Kei luhdül känäng ädäma khawi ku hmueyal khaw a ükütni a ni Kei pawta kalah eyei.” Ani ihuih dü aih saw äm, äi awyawk chu sawkaih koong Yĕsu la ni kheu hawu saw. Äi khaw a khrawng khälla Ani a ini tak, “Keinih kiyam äm kini yawk saw Mesaya sawkbrat ni mäiyeih saw dä. Bakhaw che nang iba nawhawu äm, Luhchaw chaw a ädäma khawi hmuyei ting? Bahi ni Luhchaw Chaw ü äm?” Yĕsu la anih a tak, “Awlaw tana krachaw koong dä ni awa nangnih ängtu mäi saw. Awa mäi pe khaw a dä nangnih chetei khäl, uhiyung la nangnih a anang nängeiyah hmawna. Uhiyung äng chetei tih la che ani mawnga chet tun saw äm hmawtah. Awa nangnih ängtu mäi pe khaw a awa a yumei khäl, nangnih äi awa äng käh khrawng thänei hnäng hmawna.” Yĕsu la äi huih hawu pänäng Ani äi känäng chetal awlaw upum thuh eyal. Khrawng khäl hmawi mawh a Yĕsu la awbawng nawmaw nawkaih saw bi bi thän anih la Ani khrung äng yumei u. Ni khäl thänei hüt saw che Hnadaga sidawng hiyawktih Aijaya la ni kheu khäl hawu hüt saw uluih yeih saw koong. Boi o, keinih kini pek saw sidawng pawi ula yumei äm? Ula Boi käh dogo mawh kut hmuh äm? Awlaw anih la iya yumei u saw äm äi krong Aijaya la ni huih hawu, “Boi la khrawng khäl käh mik mü sawk awlaw ini lung ha chang sawk, anih la ini mik äng hmu ah pak awlaw Anih lung la ha iha yawchu ah pak. Awlaw ini pawyalaih saw koong Kei pawta lo ah pak.” Aijaya la Yĕsu käh wachang hmuh hüt awlaw Ani krong hawu hüt koong ni kheu hawu hüt saw. Äi thän awbawng elenchaw khälla Ani a ini yumei hüt. Äini Pherasai khälla anih a Yudi ini lumeidün im känäng ini thoh alai ting ini keh saw koong iha hawu u. Anih la Hnadaga känäng phiyaw ini büneyeih saw thawka khrawng känäng phiyaw ini bünei saw dä unung awpawi ini pi. Äi pänäng Yĕsu la hek bala hawu, “Ula Kei a uyumei äm ani la Kei jiji uyumei saw hiyah, äini ula Kei a eteh äm, äiya ha yumei saw dä. Kei a ula uhmuh äm äila che Kei a etetih a ha hmuh. Kei ni luhdül äng awa thäneiya kolo. Ula Kei a uyumei äm ani uhiyung äng mäyah pak. Ula Kei kheu khin bala äi huih mäyah äm, anih käh tara kei bi nga. Iyaäm Kei luhdül äng käh khrawnga tara bi a lo nga. Äini khrawnga ngulai känäng kiyawtala dä kolo saw. Ula Kei a awlaweyah äm awlaw Kei kheu ha laweyah äm ani koong tara bitih mäi khäh. Kei käh ni kheu la dä äpäih saw hnüp äng ani käh tara biyeih saw. Kei kupum dogo äng ni kawhawu saw hiyah. Äini Kei a ete tih Paw la i kaw hawuvaih saw äm awlaw iba kawhawuvaih saw äm äi ana epek. Kei kaw hmawt khäh Ani käh ana la dä päihyah saw sawk ini pek saw. Äi koong Paw la ibang hawuvaih saw khrawng takäm äidä kawhawu saw.” Ni che lätal päi khawngah thänei hütsaw. Yĕsu la hmawt khäh Ani luhdül hlät bala Awpaw khäka krawnalaih saw ikhin lo däk. Ani la ni luhdül äng Ani a yumtih a sawkbrat khet nawk hüt, awlaw Ani la äpäih yak ni khet nawk khäh. Ümü buh ini ei tuna, Mannat la Simon chaw Ikariyo Yuda lung äng Yĕsu a lansu kutäng awpaih saw tawk thawn lawk. Yĕsu la hmawt khäh Awpaw la Ani a üküt dogo pekchak saw. Paw Hnadaga känäng Ani losaw awlaw Hnadaga khäka krawnalaih saw ha hmawtei khäh. Äihi ini ei ok tuna Yĕsu othou äidä awat saw bayu sutei bala gamsa hngat echeng äng henei. Äi pänäng bol äng tui läi bala etebeih tih kho boh aih saw chah. Ani la echeng äng käh gamsa äng opotal. Äi huih Yĕsu Simon Pitol khäka loni Pitol la ihi, “Boi o, nang kei kho noboh aih saw ei?” Yĕsu la krawn bala takal, “Kei ibang kopoh tun saw äm nang tua yawchu hnawh tih, äini u hnung äng nawyawk chu a laih saw dä.” Pitol la Yĕsu a takal, “Nang kei kho asang bang bot lah hnawh ti.” Yĕsu la Pitol a takal, “Kei nang kho botnga khaw, nang kei tebeih mäiti hnawh ti.” Äi khaw a Simon Pitol la Yĕsu a takal, “Boi o, bakhaw kokho jiji hiyah, kukut la kuluki ha obot phih bäi.” Yĕsu la krawn bala takal, “Ulabang tui hlok däk äm, äiche sahnal däk, äiya okho noboh khaw thänei khäh, iyaäm ani ükütni sanh chak khäh. Awlaw pochongak hawuvah, nangnih hang hang ni nini sanh chak khäh.” (Iyaäm Yĕsu la hmawt khäh ula Ani a lansu kutäng awpaih saw äm. Äi koong Ani la hawu saw, “Pochongak hawvah, nangnih hang hang ni nini sanh chak khäh.”) Tebeih tih khäl käh kho boh chak pänäng Yĕsu la bayu dokeyal bala omal. Ani la anih a ihi, “Kei i kopoh saw äm äi nangnih nini yawk chu ei?” Nangnih Kei a Choktih o awlaw Boi o ting anang panei. Äi ihi khäh, Kei äidä. Äini Kei choktih la Boi thänei ngala ha nangnih kho kanang boh, nangnih ha che hngala hngat kho nini boh eyeih lah saw dä. Kei nangnih koong pümchut huih hngat kanang dawn saw, nangnih ha äi huih po hmawna. Kei nangnih a ihisaw kanang tak, a hngasaw awmawh thawka lenah. Teh hmueitih ha tetih thawka lenah. Ni khäl hmawt chula dä nini poh khaw nangnih a pisih mäi yei. “Kei nangnih hang hang be käkräu saw hiyah. Kei ke heh lei saw khrawng khäla kawhmawt khäh. Äini kiyam la ibang hawu äm äi luih yeih saw dä. “Kei äng ha pheyei tih, awhngaw phak thäneyei.” Ni khäl thänei khawngah Kei nangnih a kanang taksaw. Äi thänei khaw a nangnih nini yumai, Kei dä Mesaya. Kei nangnih a ihisaw kanang tak, ‘Kei keteh saw khrawnga ula bang lawkei äm, äila Kei a ha awlawkei saw dä. Awlaw ula Kei a lawkei äm äila Kei a etehtih a awlawkei.’ Ni khäl hawu pänäng Yĕsu la ulung äng mawt ukhru piyei, Ani la tebeih tih a tak, “Kei nangnih a ihisaw kanang tak, nangnih äng käh khrawng hngat la lansu kutäng aw awpai.” Tebeih khäl hngala hngat ini so ei. Yĕsu la u krong hawu saw äm anih la awtdara bün u. Äi khaw a Yĕsu la etebeih khäl äng käh unung sum khetnawk saw tebeih hngat Yĕsu äng hngawng bala om. Simon Pitol la äi Yĕsu kena omtih a imik äng tak, “Ani la ube hawu saw äm hi e?” Äi tebeih Yĕsu kena awlaw bitchaw sipei bala ihi, “Boi o, ube nawhawu saw äm?” Yĕsu la krawn bala takal, “Kei ni ha pilchaw awhawng äng sum ngala ube kawhawu saw äm äiya kepekaih saw dä.” Äidä Yĕsu la ha awhawng äng sum bala Simon chaw Ikariyo Yuda a pek. Yĕsu la ha pilchaw pek saw äng tutu Mannat la Ikariyo lung duka vawng. Äidä Yĕsu la ani a tak, “Nang ibang nibiyeih saw äm äi jotjota bi.” Äini ei oka omtih hngat la ha yawchu u Yĕsu la ani a iya äi taksaw äm. Üküt tebeih khälla ini tawk, Yĕsu la Yuda a päi koong ühlü saw hleih yeih sawk saw hiyah thän sanglaisu khäla awmawn pekai sawk saw. Iyaäm Yuda awmawn khoila tawtih mäi hüt. Yuda la ha pilchaw lawkei saw äng tutu apranga thokal. Äi khaw a kho mü däk. Yuda apranga chetal pänäng Yĕsu la hawu, “Hnadaga la Luhchaw Chaw käh wachang dawnai awlaw Ani äng tua Hnadaga käh wachang ha dawngai. Hnadaga la dä Ani äng wachang bünei hi, Hnadaga la ha upum kädäng känäng Luhchaw Chaw a wachang poh ai. Ani la äi alanda poh ai. Chawtih khälo, Kei nangnih ängtu tanakra chaw dä kämäyeih tih saw. Kei a anang suyalai. Kei Yudi elenchaw khäla katak hüt saw huih tua nangnih a ha kanang tak. Kei kechetalaih düna nangnih lo hnäng hnawh chu. Äi koong Kei nangnih koong thung tha hngat kanang pekal. Kei nangnih a kanang khet nawk hüt saw huih nangnih ha hngala hngat nini kheteyeih lah saw. Nangnih hngat la hngat nini khetei khaw hang hang la ini hmawtai nangnih Kei tebeih.” Simon Pitol la Yĕsu a ihi, “Boi o, Nang mawnga nechetaih saw äm?” Yĕsu la krawn bala takal, “Kei mawnga kechetalaih saw äm, äiya Kei a ätäm hnäng hawm hnawh ti. Äini u hnung äng anang tämäih hnäng saw dä.” Pitol la takal, “Boi o, iya tua kei kanang tämäih hnäng nga saw äm? Nang koong kawsawk bang kepekei hnäng khäh.” Äi khaw a Yĕsu la takal, “Ihi kawchaw ngei nang Kei koong nawsawk nepeke yeih hnäng saw ei? Kei nanga ihisaw kini tak, ahluipaw khong khaw ngah Kei a nang kräng thum ini thuh nawkai.” Yĕsu la hawu, “Nangnih nini lung khru ai ya. Hnadaga äng yum khäl awlaw Kei a khrawng yum khäl. Kei Paw ima awbawng mäidün ala mäi khäh. Mäiyah khaw Kei nangnih a kanang tak khäh ai hü. Kei nangnih koong ala ächän poh ala kechetal tun. Kei kechetal pänäng nangnih koong ala po al ngala awlaw kaw krawnalai. Äidä Kei ängtu nangnih a kanang chih pui nawkalai. Kei kämäidüna nangnih ha mäi hnäng hmawna. Kei mawnga kechetalaih saw äm äi lawm nangnih nini hmawt khäh.” Thoma la Yĕsu a tak, “Boi o, nang mawnga nechetalaih saw äm, äi hmawt unga hi äiya kini phaw dün lawm iba kini hmawtaih saw äm?” Yĕsu la Thoma a tak, “Kei dä lawm, ihisaw awlaw sawk. Kei kawche hngat ha Kei Paw khäka chetal hnäng hnawh u. Kei a dä kawchawng chawng anang hmawt khaw, Kei Paw a ha nini hmawtaih saw dä. Tutäh känäng Ani a nini hmawt däk awlaw Ani a nini hmuh däk.” Philip la Yĕsu a tak, “Boi o, Paw a keinih a khrawng dawne, äihi keinih kini lung nümai.” Yĕsu la takal, “Philip o, äi hiyawh hnüp nangnih äng kämäi hütsaw, äi thän Kei a awhmawt tiei? Ulabang Kei a u hmuh äm, äila Kei Paw a ha hmuh däk. Paw a khrawng dawne ting iba bang nawhawu dat äm? Nangnih khrawng yumei chuei Kei Paw ängtu kämäi awlaw Paw ha Kei ängtu mäi? Kei kanang taksaw kheu khäl Kei käh dogo äng käkräu saw hiyah. Kei ängtu mäitih Kei Paw la Ani käh bi bisaw dä. Kei Paw dekäng kämäi awlaw Paw ha Kei dukäng mäi khäh ting kawhawu saw koong Kei a uyumei khäl. Äi huih hiyah thän, ni kibisaw khäl yumei khäl. Kei nangnih a ihisaw kanang tak, Ula Kei a uyumei äm äila Kei kibisaw huih biyeih hnäng saw. Kei thawka bang elen bi biyeih hnäng saw. Iyaäm Kei Paw khäka kechetalaih khäh. Kei ming äng ibang nini hawuvei äm, äi khäl Kei kopoh ai. Äi khaw che Paw käh wachang Awchaw känäng dawngai. Kei ming äng lalapei khrawng hawuvei khäl Kei tamai kopoh ai.” Kei a anang khet nawk khaw Kei kheu khäl nini ngeyei. Kei Paw khäka suh kotongai. Ani la nangnih koong anang Kuaih tih hngat anang pek khäh ai. Äihi ani dä sawkak nangnih ängtu mäiyeih saw. Ani che Hnadaga käh ihisaw dawn tih Khraw. Luhdül äng käh khrawng khälla ani a lawei hnäng u. Iyaäm luhdül la ani a hmu phu ah awlaw ani a hmawtah. Äini nangnih äi khraw a nini hmawt khäh, äi nangnih ängtu mäi khäh, nangnih lung äng mäi khäh. “Kei kechetal khaw a nangnih a ngawkah chaw huih kanang taw hüt hnawh nga. Kei nangnih khäka kolo a laih saw dä. Tana a che luhdül äng käh khrawng la Kei a khrawng hmu ti hnawh u. Äini nangnih anang hmuh khäh ai. Iyaäm Kei heng ngala kämäi saw huih nangnih ha heng chula nini mäyei. Äi hnüp äng nangnih nini hmawtai, Kei Paw dukäng kämäi awlaw nangnih ha Kei dukäng nini mäi saw huih Kei ha nangnih dukäng kämäi. U khälla Kei kheu ini khin äm awlaw äi täng ini mäi äm, anih la Kei a khrawng khet nawk. U khälla Kei a khrawng khet nawk äm, äi khäla Kei Paw la ha khet nawkai. Kei ha anih a kekhet nawkai awlaw anih a kadawneyei.” Äidä Ikariyo Yuda hiyahtih Yuda la Yĕsu a tak, “Boi o, iya keinih a jiji dä anang dawneyeih saw äm, luhdül äng käh khrawng khäla iya dawneyeih ti saw äm?” Yĕsu la ani a takal, “Ula Kei a ekhet nawkäm äila Kei kheu ngeyeih saw dä. Kei Paw la ha anih a khet nawkaih saw dä. Kei Paw äng ani khäka kihni chetai awlaw ani ängtu kihni mäiyei. Ula Kei a ekhet naw ah äm äila Kei kheu ngei hnawh. Nangnih nini yawk tunsaw kheu khäl, Kei kädäng käh hiyah. Kei a etetih Paw käh kheu khäl dä. Nangnih ängtu mäipe Kei ni kheu khäl kawhawu.” U hnung äng anang kuaih tih Asanh chang Khraw a Kei Paw la nangnih koong Kei ming äng anang teh pekai. Äila dä nangnih a ükütni anang chokaih saw. Kei nangnih a ibang kanang tak hütäm äi nini lung äng anang khawyalai. “Kei nangnih koong jelkhiyamsa kanang tawk pekalai. Kei käh jelkhiyamsa kanang pek. Luhdül la anang peksaw jelkhiyamsa huih Kei kanang pek hnawh nga. Nini lung khruei sawkai chu awlaw ke ei chu.” Nangnih a ni kheu kanang taksaw nini yawk khäh, “Kei kechetalaih saw äini Kei kawkrawnalaih saw dä. Kei a dä anang khet nawk khaw, kawpaw khäka kechetalaih koong nangnih nini piyaw tawn khäh. Paw che Kei thawka bang len khäh. Nikhäl thänei khawngah Kei nangnih a kanang hawu pek saw, nikhäl thänei khaw a nangnih yumei hmawna. Nangnih äng käkräuvaih saw äi hiyawh ikhin mäitiyah. Iyaäm luhdül khiyupaihtih Mannat lo tun. Kei lukhrunga ani a dogo mäyah. Äini Kei Paw la ühlü saw huih dä Kei kopoh saw, Kei Paw a ihiyawh bawng kekhet nawk äm, äi luhdül la hmawt hmawna. Lo khäl, ni känäng chetal äng khäh.” “Kei dä ekejet grĕp yong awlaw Kei Paw che äi grĕp khanga bitih. Kei käh mawng grĕp yong äng etheih theiyah äm, äi grĕp yong khäl Ani la sah alchakai. Awlaw mawng grĕp yong äng etheih thei äm, äi yong khäl sasat bala asanh poh äi, uhnung äng unung theyal hnäng hmawna. Kei mawng kheu nangnih a kanang tak äm, äi koong nangnih ayang bang asanh nini thänei däk. Kei äng dä sakei chula mäi khäl, Kei ha nangnih äng sakei ngala kämäiyei. Grĕp yong äng oyong soeiyah pak etheih thei hnängah saw huih, nangnih ha Kei äng soei chu hi nini theih theh yei sawk hnäng hnawh chu.” “Kei dä grĕp yong, awlaw nangnih äi grĕp yong äng käh oyong. Kei äng u sakei äm awlaw u äng Kei kasakei äm, anih sawk äng awbawng theih theyei. Iyaäm Kei kaw che nangnih iha po hnäng hnawh chu. Kei äng sakeyah tih che sah hmueyal tih yong huih, apranga hiyän hmueyalai awlaw äi acha al chakai. Äi yong lumal ula che mei äng tong ula ini chawh alai. Kei äng nangnih nini sakei khaw awlaw Kei käh kheu nini lung äng nini tawkei khaw lala pei nini hlüei saw ni hawuvei bäichu. Nangnih koong äi huih poh hmueyei. Nangnih sawk äng dä awbawng theih thei hi awlaw Kei tebeih ting nini dawnei hnäng hi Kei Paw la hmawi büneyei. Paw la Kei a ihuih ekhet nawk äm, äi huih Kei ha nangnih a kanang khet nawk khäh. Kei käh khet äng dä mäi khäl. Kei Paw käh kheu ngei ngala ihuih Ani khet äng kämäi äm, äi huih nangnih ha Kei kheu nini ngei hi nangnih ha Kei käh khet äng nini mäiyei.” “Ni kheu khäl kanang taksaw Kei käh awpiyaw nangnih lung äng mäi hmawna awlaw nangnih lung awpiyaw äng luih hmawna. Kei ni ana kanang pek, Kei ihuih nangnih a kanang khet nawk äm, äi huih nangnih ha hngat la hngat khetei bäichu. Losulapei ani khanbawn koong awsawk pekei hi, äi thawka che ekhet len mäi tiyah. Kei ana kanang pek saw khäl dä nini ngei hi nangnih Kei käh khanbawn. Nangnih a Kei hngasaw ting kanang tatinga, iyaäm ani käh awmawh la i poh äm, a hngasaw la äi hmawtah. Äini Kei nangnih a khanbawn ting kanang tak, iyaäm Paw känäng i aw kawyawk äm äi khäl kanang hawu pek khäh. Nangnih Kei a eheh lei hüt chu, äini Kei dä kanang heh lei saw. Kei nangnih a bi kanang khrawk saw nangnih chet hmawna awlaw unung theih thei hnäng hmawna awlaw khawm hmawna. Äihi Kei ming äng Paw känäng ibang nini hawuvei äm äi khäl Ani la anang pekai. Kei nangnih a ni ana kanang pek, nangnih hngat la hngat khetei bäichu.” “Luhdül äng käh khrawng khälla dä nangnih a anang mum hi, nini lung äng tawei bäichu, äi khawngah anih la Kei a ayang khrawng mum. Nangnih dä luhdül käh nini thän khaw khrawng khälla ini pum khrawng huih anang khet nawkai hü. Äini nangnih luhdül käh hichu. Kei nangnih a luhdül känäng kanang heh lei saw koong luhdül äng käh khrawng khälla anang mum saw.” Kei käh ni kheu nangnih hngilai chu, a hngasaw ani mawh thawka lenah. Äi koong khrawng khälla dä Kei a khrawng kuluh nawk khaw, nangnih a ha anang kuluh nawkaih saw dä. Anih la dä Kei kheu ini ngei hi nangnih kheu ha ini ngeiyeih saw dä. Kei äng nini mäi saw koong anih la nangnih äng ni huih ese ini poh ei yei. Iyaäm ula Kei a eteh saw äm äiya anih la hmawt u. “Kei dä longa hi awlaw anih khäka kheu, a hawu nga hi anih epret mäiyei hü hnawh. Äini tua Kei kolo a anih la ngulai thupei ula tawei hnäng tih hnawh u. U khälla khrawng mum äm anih la Kei Paw a ha ini mum. Hngat la ha bi hawm u saw bi khäl dä anih khäka a bi hüt nga khaw, anih epret mawh thäneyei hüt hnawh u. Äini Kei kibisaw khäl anih la hmupe ha Kei la Paw a khrawng mum. Ni huih thänei saw che anih käh thung äng yoei saw luih hmawna. ‘Anih la älälä chaw Kei a khrawng mum däk.’” “Kei Paw känäng nangnih koong anang kuaih tih hngat keteh ei. Ani che ihisaw Khraw. Ani Paw känäng nangnih khäka lo khaw a Kei krong äng sawksi thokai. Awlaw nangnih ha Kei koong sawksi nini thokai. Iyaäm täkchah känäng nangnih Kei äng tu nini mäi khäh.” Kei ni kheu khäl kanang taksaw, nangnih käh yum khra keyah pak. Khrawng khälla nangnih a Yudi ini lumei im känäng anang thoh a lai. Ni huih khin lo tun, Hnadaga käh bi ini bi ting khinei ula nangnih a anang tukai. Ni huih khäl anih la ini biyei, iyaäm anih la Kei Paw awlaw Kei a khrawng hmawt u. Kei ni kheu khäl kanang taksaw che äi khin khäl lo hi, nangnih a kanang tak hütsaw kheu khäl nini lung äng kawyal hmawna. Kei ayang khaw kän kanang ta nga saw che nangnih äng tutu Kei kämäi hüt koong. Kei a ete tih khäka Kei kechetal tun. Awlaw nangnih dukäng hngat la ha Kei a ihi chu, ‘Kei mawnga kechetaih saw äm?’ Tua Kei nangnih a ni kheu khäl kanang taka awlaw bang nini lung dukhah äng dä luih. Äi thän ha Kei nangnih a ihisaw kanang tak, Kei kechetal saw nangnih koong pawi khäh. Iyaäm Kei chetal nga hi äi anang kuaih tih nangnih khäka lo hnawh. Kei kechetal hi nangnih koong Ani a kanang teh pekai. Ani lo bala luhdül äng käh khrawng khäla ngulai khäl awdawnai. Awlaw konghmuh lawm la Hnadaga la tara biyeih saw awdawnai. Ani la ngulai ini bisaw khäl hawuvai, iyaäm khrawng khälla Kei a khrawng yumei u. Ani la konghmuh lawm kheu hawuvai, iyaäm Kei Paw khäka kechet tun awlaw nangnih Kei a khrawng hmulah ti hnawh chu. Ani la Hnadaga käh tara kheu hawuvai, iyaäm Hnadaga la luhdül khiyuptih Mannat käh tara bi däk. “Nangnih khäka awbawng kheu Kei kaw hawuvaih saw mäi khäh, äini nangnih äi khäl unung nini khinaih saw tua khih hnawh chu. Äini Hnadaga käh ihisaw dawnaih tih Khraw lo khaw a Ani la nangnih a ihisaw lawm äng anang chih ei. Ani upum dogo känäng kräu hnawh, äini Ani la awyawk saw dä hawuvaih saw. Awlaw awhmawi mawh äng lo aih saw krong khäl dä hawuvaih saw. Äi ihisaw Khraw la Kei käh a wachang dawnai, iyaäm i kawhawu äm Ani la äidä nangnih khäka anang dawnaih saw. Paw a ibang mäi äm, äi khäl hang hang ni Kei käh dä. Äi koong Kei kawhawu saw Kei ibang ko poh äm awlaw kawhawu äm äidä Ani la nangnih khäka anang dawnaih saw.” Yĕsu la awlaw hawu, “Hnüpak hnih pänäng nangnih Kei a khrawng hmu ti hnawh chu. Awlaw hnüpak hnih pänäng anang hmuh alai.” Ni kheu yaw ula Yĕsu tebeih tih khäl pochongak hnih anih dukäng ini kräuvei hnäh, “Nangkei a Ani la i khrawng taksaw äm, ‘Hnüpak hnih pänäng nangnih Kei a u hmu ti hnawh chu awlaw hnüpak hnih pänäng anang hmuh alai?’ Awlaw Ani la hawu, ‘Kei Paw khäka kechet tun.’ Hnüpak hnih ting hawu saw, ‘Äi i äm? Keinih yaw chu unga.” Etebeih tih khälla ni krong äng i ini hiyeh khyang saw äm äi yawchu bala Yĕsu la anih a tak, “Kei a hnüpak hnih pänäng u hmu ti hnawh chu awlaw hnüpak hnih pänäng anang hmuh alai ting kawhawu saw krong äng ei, nangnih dukäng nini kräuvei saw? Kei nangnih a ihisaw kanang tak, nangnih nini kapai awlaw dukhah äng nini mäiyei. Äini Luhdül äng käh khrawng khäl ini piyaw ai. Nangnih dukhah nini bünai, äini nangnih käh dukhah awpiyaw a thäneyalai. Chaw hmuh ei khaw a hmutaw la dukhah ini bün, iyaäm ani ämäyeyeih saw äng awkhawmaih saw khin lo saw koong. Äini ani ämäiyei pän hi luhdül äng khrawng tha hngat losaw äng awpiyaw saw koong äi dukhah khäl kheni ihngih lal chak. Äi huih kawchawng chawng nangnih ha tua dukhah nini bün. Äini nangnih äng awlaw kokhomeiyalai. Äi khaw a nangnih lung awpiyaw äng luih yalai. Äi awpiyaw nangnih känäng hngat la ha anang lawei pekal hnäng ti hnawh.” “Äi hnüp äng nangnih Kei a iha khrawng hiti hnawh chu. Kei nangnih a ihisaw kanang tak, nangnih Kei ming äng Paw khäka lalapei hawuvei bäichu Ani la anang pekai. Tutäh siäng nangnih Kei ming äng iha hawuvei hawm chu. Hawuvei khäl nangnih käh piyaw luih hmawna nangnih nini büneyei.” “Ni kheu khäl nangnih a pümchut huih kanang hawupek. Äini ni huih khin loai nangnih khäka Kei pümchut huih hawuti hnawh nga. Äini Paw kheu prangbaw nangnih khäka kawhawuvai. Äi hnüpa nangnih Kei ming äng nini hawuveyei. Nangnih chaw a Paw känäng kawhawuvai ting Kei hawu hnawh nga. Iyaäm Paw kädäng la nangnih a anang khetnawk khäh. Ani la nangnih a anang khetnawk saw che Kei a nangnih anang khetnawk koong awlaw Boi känäng kolo saw ting anang yumei saw koong. Kei Paw känäng luhdül äng kolo. Tua Kei luhdül hlät ngala Paw khäka kechetalaih saw.” Äi khaw a Ani tebeih tih la Ani a ini tak, “So, tua che nang keinih äng prangbaw näkräu, pümchut tila kräu titi. Tua keinih kini yawk chu däk, nang hmawt ti saw iha mäyah. Nanga anang hiyeih koong Nang hngat ha hlüeititi. Äi äng keinih kini yumei, nang Hnadaga känäng nolosaw.” Yĕsu la Ani tebeih tih a krawn bala takal, “Tu a che anang yumeiyal däk i? So, äi khin lo tun, awlaw bang lo cha däk. Nangnih khrih ei chakchula nanga nang ima nini chetal chakai. Awlaw Kei a lung khiyang anang tawk hütai. Äi thän Kei lung khiyang hinga, iyaäm Paw Kei äng tutu mäi khäh. Kei nangnih a ni kheu khäl kanang taksaw Kei dukäng mäichula jelkhiyamsa bünei hmawna. Luhdül äng käh khrawng khälla nangnih a dukhah anang pekai, äini nangnih sengkhri tawei khäl. Iyaäm Kei luhdül äng käh khrawng khäla kuhiyum sawk däk.” Yĕsu la äi kheu khäl hawu pänäng Ani la hawn pawt so bala awhawu, “Paw o, Kei käh ikhin lo däk. Kei nang Chaw, Kei hmawi lam hmawna opo e. Kei ha nawhmawi lam saw khrawnga dawn hnäng hmawna. Iyaäm Kei käh khrawng khe lukhrunga Nang dogo ini pek. Nang ini pek saw Khrawng khäla päihyah saw sawk pekal hnäng hmawna. Päihyah saw sawk che ni. Nanga ihisaw hngat pätpät Hnadaga ting anang hmawtai awlaw Nang neteh saw Kei äi Yĕsu Krito ting khrawng la ini hmawtai. Kei ni luhdül äng Nang hmawi kalam sawk däk. Iyaäm Nang ini khrawk saw bi khäl Kei käphäih chak däk. Paw o, luhdül bi hmuei khawngah a wachang Nang ängtu Kei a mäi hüt. Äi lup khiyang wachang Nang hmawi mawh a Kei a tua epeke.” “Ni luhdül äng käh mawng tebeih tih khäla nang ini pek hütäm, nang ihuih äm äi anih a kawdawn däk. Anih che nang käh dä ini mäi hüt saw. Äini nang anih a ini pek awlaw anih la nang kheu ini ngei. Awlaw Nang ibang Kei a ini pek äm, äi nang känäng lo saw tua anih la ini hmawt khäh. Nang Kei a i kheu ini tak hütäm, äi kheu Kei anih a katak khäh. Awlaw anih la äi ini lawkei khäh. Nang känäng Kei kolo saw ihi khäh ting anih la ini hmawt awlaw Nang Kei a ini teh saw ting Anih la ini yumei.” “Kei ketebeih khäl koong suh kotong khäh. Kei luhdül äng käh khrawng khäl koong suh tong nga. Äini Nang Kei a ini peksaw khrawng khäl koong dä suh kotong saw. Iyaäm anih che Nang käh dä. Kei a ibang mäi äm, äi nang käh. Awlaw Nanga ibang mäi äm, äi Kei käh. Awlaw anih känäng dä Kei käh a wachang dawngei saw. Tua Kei nang khäka kolo al tun, ni luhdül äng Kei mäiti hnawh nga. Äini anih che ni luhdül äng ini mäi khäh. Asanh chang Paw o, Nang mawng ming Kei a ini pek äm äi ming tha äng anih a ka tila taw bäi. Äihi ni hnih phak khiyang ihni mäi saw huih anih ha phak khiyang mäi hmawna. Kei anih ängtu kämäi hüt khaw a, Nang ini pek saw ming tha äng anih a ka ngala kawtawk hüt. Kei anih a ka ngala kawtawk khaw a, pochongak batti hngat ha krok u. Kiyam äng käh kheu luih yeih saw koong dä äi krokaih tih chaw pochongak krok saw.” “Kei tua Nang khäka kolo al tun. Äini Kei ni luhdül äng kämäi pe khaw a, ni kheu kawhawu anih Kei ängtu awpiyaw äng luih hnäng hmawna. Kei anih khäka Nang käh sidawng kawhawu pek hüt khäh. Kei ihuih ni luhdül käh hinga äm, anih ha che luhdül käh hi u. Äi koong luhdül äng käh khrawng khälla anih a ini mum. Anih a ni luhdül känäng chiyal bäi ting Nang khäka Kei suh tong nga. Äini Nang khäka Kei suh kotong, anih a Mannat kut känäng ka tila taw bäi. Kei ihuih ni luhdül käh hinga äm, anih ha ni luhdül käh hi u.” “Nang käh ihisaw äng anih a asanh po bäi, Nang käh kheu che ihi khäh. Nang ihuih Kei a luhdül äng ini teh äm, äi huih Kei ha anih a luhdül äng keteh al. Anih ini pawyeih koong Kupuma aw hngawchaw kopoh ei, anih Nang käh ihisaw äng asanh thänei hmawna.” “Kei ketebeih tih koong jiji suh kotong saw hiyah. Äini anih la ini hawu saw sidawng yaw ula yumeyeih tih khäl koong ha suh kotong. Anih phak khiyang mäi hmawna Kei suh kotong. Paw o! Nang Kei dukäng awlaw Kei Nang dukäng kämäi saw huih ni hnih dukäng anih phak khiyang mäiseh u. Awlaw anih hngat la hngat phak khiyang mäiseh u, äihi Nang ini teh saw ting luhdül äng käh khrawng khälla ini yumeyei. Nang ihuih Kei a hmawi ini pek äm, Kei anih a ha kepek khäh. Iyaäm ni hnih ihuih utu ihni mäi äm, anih ha äi huih utu mäi hnäng hmawna. Kei anih dukäng awlaw Nang Kei dukäng nämäi. Äi huih anih hang hang ni phak khiyang mäi hmawna. Äihi Nang Kei a ini teh saw ting luhdül äng käh khrawng khälla ini hmawtai. Awlaw Nang Kei a ini khet nawk saw huih, anih a ha Nang nekhet nawk. “Paw o, Nang ni tebeih khäla Kei a ini pek. Kei kämäidüna ni anih a kü hlüei. Äihi nang ini pek saw a wachang anih la ini hmuh ai. Iyaäm luhdül bi hmuei khawngah bang nang Kei a ini khet nawk. Konghmuh sang Paw o, luhdül äng käh khrawng khälla anang hmawtah, äini Kei che Nanga kini hmawt khäh. Awlaw Nang Kei a ini teh saw ketebeih khälla ini hmawt khäh. Kei anih khäka nanga kini hmawt sawk khäh awlaw unung kanang hmawt sawkai. Äihi Nang käh khet Kei dukäng mäi saw huih anih dukäng ha mäiseh. Awlaw Kei ha anih dukäng mäi hmawna.” Yĕsu la suh tongei pänäng Ani tebeih khäl chipui naw al bala chetal. Äidä anih Kidron ting ini taksaw phüm ini lüm. Äi düna akhang hngat mäi hüt. Yĕsu Ani käh tebeih khäl äng äiya vawng. Uyum khrakei tih Yuda la äi ala awhmawt, iyaäm Yĕsu ikhi kha Ani käh tebeih tih äng äiya chi chet. Rom soloi khäl ängtu awlaw Pujawtih elenchaw la Pherasai khälla ini teh saw sidawng im chongtih khäl ängtu Yuda äi khanga lo. Anih kutäng meisong, simiya awlaw jal täkdün vawn khäl äng ini lo. Yĕsu la Ani khrung äng i aw thäneyei saw äm, äi ükütni hmawtei chak. Äi koong Ani hmawi mawh a chet bala anih a ihi, “Nangnih u a nini sui sawäm?” Anih la ini tak, “Nazareta käh Yĕsu a.” Yĕsu la anih a takal, “Äini Kei dä.” Uyum khrakei tih Yuda anih ängtu ja bala mäi. ‘Kei dä Ani’ ting Yĕsu la tak khaw a, anih ini hnung ini suteyal ni dekäng ini kru. Yĕsu la awlaw anih a ihi, “Nangnih u a nini sui saw äm?” Anih la ini takal, “Nazaret ta käh Yĕsu a.” Yĕsu la anih a takal, “Kei che nangnih a kanang tak khäh, ‘Kei dä Ani.’ Nangnih dä Kei a anang sui khaw ni tebeih khäla chetal sawk khäl.” Ni kheu hawu saw krong che Ani la ayang hawu hütsaw kheu khäl luih hmawna. Ani la ni huih hawu hüt, “Nang u khäla Kei a ini pek hütäm, äi khälla Kei hngata ha khrok nga.” Simon Pitol khäka chimsawu hngat mäi hüt. Äi chimsawu ubuh känäng yuh ei bala Pitol la Pujawtih gong käh hngasaw käh set paw hnawku awh. Äi hngasaw ming che Molko. Äi khaw a Yĕsu la Pitol a tak, “Nang käh chimsawu ubuh thawneyal. Kei Paw la epek saw dukhah äng käh khawp äng Kei ko okaih lah saw dä.” Äi pänäng Rom soloi gong la osoloi khäl awlaw Hnadaga im chongtih khälla Yĕsu a mawn ula ini khon. Täkchah Ani a Anna khäka ini chih. Anna che Kayapa pusel mäi hüt. Kayapha che äi khokumäng Pujawtih gong mäi hüt. Kayapha la Yudi elenchaw khäla tak hüt, khrawng kheni ini düaih chaw a pochongak düsaw pawi khäh. Simon Pitol awlaw awhngaw tebeih hngat Yĕsu hnung äng i hnih chet. Äi awhngaw tebeih hngat che Pujawtih gong äng i hni hmawtei. Ani Yĕsu ängtu Pujawtih gong im dül mawh a vawng. Äini Pitol che apranga käh tamkha kena ja bala mäi hüt. Äi khaw a pujawtih gong äng hmawteitih äi tebeih othokal. Äidä tamkha chongtih hmutaw hngat äng kräuvei bala Pitol a im duka chih pui nawkal. Tamkha chongtih äi hmutaw la Pitol a tak, “Nang ha äi khrawng käh tebeih hngat nämäi hüt saw hiyeh ei?” Pitol la takal, “Kei hiyah.” Äi khaw a isik khaw. Äi koong hngasaw khäl awlaw chongtih khäl, mei phü ula wanei chak ula mei ini om. Pitol la ha anih ängtu äiya ja bala mei om. Äi khaw a Pujawtih gong la Yĕsu a etebeih tih krong awlaw ochok saw krong ihi. Yĕsu la krawn bala takal, “Kei sawkbrat prangbaw khrawng khäl hmawi mawh a käkräu hüt. Yudi ini lumeidün ima awlaw Hnadaga ima mawnga khrawng khe ini chumei chi äm äiya kochok hüt chi. Kei sätak ha umu chaw äng iha hawunga. Äihi nangnih ni krong äng Kei a iya anang hi sawäm? Kei kheu yawtih khäla hi khäl. Kei i kawhawu hütäm äi anih la ini hmawt khäh.” Yĕsu la äi kheu hawu ni ekena ja tih Hnadaga im chongtih hngat la Yĕsu beng bĕ bala tak, “Nang Pujawtih gong äng äi huih iba nawkräu datäm?” Yĕsu la ani a takal, “Kei dä eseh käkräu khaw, i ese käkräu saw äm äi khrawng ta. Äini Kei dä ihisaw kawhawu khaw iya Kei a ini bĕh sawäm?” Äi pänäng Anna la Yĕsu a ini hensaw läktäng pujawtih gong Kayapha khäka eteh al. Pitol la mei phüma ja bala mei om pe hüt. Äi khaw a khrawng khälla ani a ini tak, “Nang ha äi khrawng käh pochongak tebeih hiti ei?” Pitol la chal bala tak, “Kei hiyah.” Äi khaw a pujawtih gong käh hngasaw hngat kräu. Ani che Pitol la aw hnawku awt hüttih käh käisang. Äila Pitol a tak, “Kei nanga Ani ängtu akhanga kini hmuh saw hiyeh ei?” Pitol la awlaw chal bala hawu, ‘Hiyah’. Äi äng tutu ahluipaw khong. Awmawt jawn Yudi lenchaw khälla Yĕsu a Kayapha känäng chiyal ula che Yuda pre lekchaw khiyuptih ima ini chih. Äini Yudi elenchaw khäl äi khiyuptih im duka vawng u. Iyaäm Anih la lätal päi ei hnäng hmawna ini puma Hnadaga hmawi mawh a asanh ini tawkeyeih khiyang hüt. Äihi Pilat apranga thok bala anih a tak, “Nangnih ni khrawng lukhrunga i epret nini lo saw äm?” Yudi elenchaw khälla ini takal, “Ni khrawng la dä epret biyah khaw keinih Ani a nang khäka iya kini lo aih saw äm?” Pilat la anih a takal, “Nangnih Ani a chiyal chula nangnih käh thung täng tara bi al khäl.” Äidä Yudi lenchaw khälla Pilat a ini tak, “Khrawng tu hnäng lo kong tara kini biyeih saw keinih pängei unga.” (Ni khäl thänei hüt saw che Yĕsu iba düaih saw äm äi hawuvei hüt saw luih hmawna.) Äi khaw a Pilat im duka vawngal äidä Yĕsu a panei bala tak, “Nang Yudi khäl käh mawng ei?” Yĕsu la takal, “Nang nupum känäng ni kheu ini hi saw ei? Hiyah khaw awhngaw khälla Kei krong äng anang hawu pek saw ei?” Pilat la krawn bala takal, “Nang Kei a Yudi ting ini khin saw ei? Kei hinga. Nupum yapsaw awlaw Pujawtih elenchaw khälla dä Nanga kei kutäng khrawng awp saw. Nang i nopoh saw äm?” Yĕsu la tak, “Kei käh mawng pre che ni luhdül äng käh hiyah. Kei käh pre dä ni luhdül äng khaw, Kei Yudi elenchaw khäl kut äng kraw a pak Kei tebeih khälla jal ini täkeyei hü. Kei käh mawng pre che luhdül äng käh hiyah.” Pilat la Yĕsu a ihi, “Bakhaw nang mawng ei?” Yĕsu la takal, “Nang ihisaw nawhawu khäh, Kei dä mawng. Ihisaw pawtäng sawksi kothokaih koong Kei luhdül äng kolo saw. Ihisaw äng mäitih khrawng khälla Kei kheu ini khinai.” Pilat la Ani a ihi, “Ihisaw che i äm?” Äi kheu Pilat la hi pänäng ani pranga chetal bala che Yudi lenchaw khäla atakal, “Kei Ani a epret hmu nga. Äini nangnih käh thung täng lätal päi khaw a thong im äng hengei nawtih pochongaka kä hläh al chi. Nangnih Yudi khäl käh mawnga kä hläh alaih saw nini hlüei ei?” Khrawng khälla athak hek ula ini hawu, “Ani a hiyah, Balabba a dä hlätal.” (Äi Balabba che tamdah sateitih la khrawng tu tih mäi hüt.) Pilat la Yĕsu a law bala bop dün jäi äng thasa obop sawk. Soloi khälla ihling mawh tokkiya po ula Ani luki äng ini song. Äidä awnchäh thi long wat ini wat sawk. Ani khäka lo ula che ini tak, “Yudi khäl käh Mawng sawk sawu seh!” Awlaw Ani kena chet ula che Ani a ini beh. Pilat la awlaw apranga thok bala che khrawng khäla tak, “So khäl, kei Ani a nangnih khäka apranga kolo tun, äihi nangnih nini yawk chu ai Ani käh epret kei i ha bün nga.” Äi pänäng Yĕsu apranga lo. Äi khaw a Ani uluki äng ihling tokkiya la, a kantha äng awnchäh thi long wat ämäi hüt. Pilat la anih a tak, “So khäl, ninu äi khrawng!” Yĕsu a hmu ula pujawtih elenchaw khäl awlaw Hnadaga im chong tih khälla hek ula ini hawu, “Ani a krut äng thawn! Ani a krut äng thawn!” Pilat la anih a tak, “Ani a chi chula nangnih dä krut äng thĕ khäl, iyaäm kei Ani käh iha epret bünnga.” Khrawng khälla krawn ula ini takal, “Keinih a thung hngat mäi khäh, äi thung huih Ani dü aih lah saw. Iyaäm Hnadaga Chaw ting Ani la awkhawmei.” Pilat la äi kheu yaw bala äi thawka eke. Ani ima krawnal bala Yĕsu a ihi, “Nang mawng känäng nolo saw äm?” Äini Yĕsu la iha hawuvah. Pilat la Ani a tak, “Nang kei äng kräuvaih tih ei? Tawk chawm, Nanga kini hlätalaih saw awlaw krut äng kini thawnaih saw thayung kei a mäi khäh.” Yĕsu la krawn bala takal, “Hnadaga la nanga thayung ini pekah khaw Kei khrung äng nanga iha thayung mäi thaw hnawh. Äi koong Kei a nang kut äng khrawng awp tih dä thasa ngulaisu.” Pilat la äi kheu yawk ni, Yĕsu a ähläh alaih saw lawm sui. Äini khrawng khälla hek ula ini hawu, “Nang dä Ani a nähläh al khaw, nang Rom mawng len käh khanbawn hi ti! Upuma mawng ting khawmei tih che Rom mawng len käh lansu!” Pilat la äi kheu yawk ni, ani la Yĕsu a apranga chih awlaw ani tara bi dün laa om. Äi tara bi dün la che lung äng bi hmuei. (Hibru be äng äi la a Gabatha ting ini tak.) Äi hnüp che lätal päi khawngah ächän po ei ula ini mäiyeih saw khomhnüp mäi hüt. Äi khaw a khosunaih däk. Pilat la khrawng khäla tak, “So khäl, nangnih käh mawng niya dä.” Anih awlaw ini hek, “Ani a tu khäl! Ani a tu khäl! Ani a krut äng thawn khäl!” Pilat la anih a ihi, “Nangnih käh mawnga krut äng anang thawnaih sawk khiyang saw ei?” Pujawtih elenchaw khälla krawn ula ini takal, “Keinih a mawng hngat dä mäi saw, ani che nangkei käh Rom mawng len!” Äi khaw a Pilat la Yĕsu a krut äng ini thawnaih koong anih kut äng awp. Äidä anih la Yĕsu a ini chih. Yĕsu la krut käh bala ulukong ting mingei nawtih ala a lo. Äi ala ming che Hibru be äng Gawlgawta. Äiya anih la Yĕsu a krut äng ini thawn. Awlaw Ani ken äng pai hnih pawta pochong hnih khrawnga krut äng ini thawn. Pilat la kheu hngat yo bala Yĕsu krut äng uludüma khoh. Äi äng yo ei saw, “Nazaret a käh Yĕsu, Yudi khäl käh Mawng.” Awbawng khrawng la äi oyoei saw ini phawt. Iyaäm Yĕsu a krut äng ini thawn saw ala che mräh känäng awhlawm hlaw a mäi hütah. Äi Hibru, Latin la Grik be äng yoei hüt. Äi khaw a pujawtih elenchaw khälla Pilat a ini tak, “Yudi khäl käh Mawng ting yo ai ti. Äichaw, ni khrawng la Kei Yudi khäl käh Mawng ting hawuvei ting yo.” Pilat la tak, “Kei koyokaih saw che koyok däk.” Soloi khälla Yĕsu a krut äng ini thawn pänäng Ani käh wat law ula phüh hli a ini pheh ei. Äidä phüh ak chi ini lawkei. Äi pänäng Yĕsu käh wat sawu anih la ini lawkeyal. Äi awat sawu che khoi kaw mäi hüt. Äi che tawh saw wat mäi hüt. Soloi khäl hngat la hngat ini khewei, “Tayei pu, ini lumchawl chawmei pula so ei äng khäh ula bünei teäm.” Ni thänei saw krong che kiyam äng käh kheu lälä thänei hmawna. “Anih la Kei käh wat ini pheh ei awlaw Kei käh tawh saw bayu lumchawl chawm äng ini pheh yei.” Awlaw soloi khälla lälä ni khäl ini poh ei hüt. Yĕsu nu, unu käh be, Klopa käh i phi a Meri awlaw Meri Makdalin Yĕsu käh krut kena ja ula ini mäi hüt. Yĕsu la Ani nu awlaw ekhet nawk hüt saw tebeih a ja bala mäi saw hmuh. Ani la unu a tak, “Nu o, niya dä nawchaw.” Äi pänäng etebeih a tak, “So e, ni che nang nu.” Äi täh kän äi tebeih la ani äng mäyeih saw koong Yĕsu nu a ima chih eiyal. Äi pänäng bi kheni päih saw Yĕsu la hmawt ni, kiyam äng käh kheu ihisaw a thänei hmawna Ani la tak, “Kei tui kahalei.” Äiya khok hngat äng awtawn äng käh alak luih ak mäi hüt, äi khaw a solo hum hngat äi alak äng ini sum. Äi che hisawp ting ini taksaw thing bak lekchaw hngat äng äi solo hum khon ula Yĕsu a ini ba. Yĕsu a ini ba saw alak awkaw äng kraw ni awhawu, “Päih däk!” Äiche Ani la uluki hnemei bala üdü. Äi khaw a Yudi elenchaw khälla Pilat khäka chet ula ini tak, “Ni krutäng thawn hmueitih khäl ini kho khrek ungala kini komalaih saw ana khrawng pek.” Anih la ni huih ana ini hawuveiyal saw krong che ni, äi hnüp che lätal saw päi äng käh düm khomhnüp koong ächän ini mäyeih saw khomhnüp mäi hüt. Iyaäm anih la äi düm khomhnüp äng krut äng oyok mäyeih saw hlüei u. Äi khaw a soloi khäl lo ula Yĕsu ängtu krut äng thawn hmueitih häih käh kho ini khreh. Äini Yĕsu khäka ini lo ni anih la ini hmuh Ani üdü däk äi koong anih la Ani kho khrek ti u. Äini soloi hngat la Ani pawng, sĕ äng sun ni äi känäng thi la tui thok. (Ni khäl thänei saw hmuh tih la sawksi pek saw che nangnih ha yumei hnäng hmawna. Ni hmutih la sawksi pek saw che ihi khäh.) Ni khäl äthänei saw kiyam äng käh kheu ihisaw a thänei hmawna. “Ani yoh hngat ha khrek hmuei hnawh.” Kiyam la awlaw hawu, “Ani a sun hüttih khrawng khälla Ani a ini hmuh ai.” Äi pänäng Awlimathia mräh a käh Yosep la Yĕsu yok lawkalaih saw koong Pilat känäng a hawuvei. (Ni Yosep che Yĕsu a umu chaw äng tämtih hngat mäi hüt. Iyaäm ani la Yudi lenchaw khäla keh hüt.) Ani la oyok lawkei hnängai ting Pilat la tak. Äi koong Yosep chet bala Yĕsu yok lawkeyal. Awlaw Yĕsu äng awyawna krängak a khomei hüttih Nikodim ha eset thung gip mür si awlaw elobela lo bala Yosep ängtu chet. Äi pänäng a hnih la Yĕsu yok khomal häihla Yudi khäl käh thung huih äi mür si la elobela awat saw äng hmak häih la Yĕsu kantha i hni tom. Yĕsu a krut äng ini thawn dün laa akhang hngat mäihüt. Äi khanga cho kho tha mäihüt. Äi cho kho äng krängak ha hngata ha taw hmuei hüt hawmah. Äi hnüp che Yudi khäl käh düm khomhnüp khawngah käh khomhnüp mäihüt. Awlaw cho kho ha ini kena mäi hüt koong anih la Yĕsu a äi cho kho a ini tawkal. Sapta chah saw ngo a, ling lang äng, Makdalin Meri äi cho khäka chet. Ani la cho kho känäng lung hlaeiyal bala ämäi saw hmuh. Simon Pitol awlaw Yĕsu la thasa khet nawk saw tebeih khäka ani chet bala tak, “Khrawng khälla Boi Yĕsu a cho känäng ini chih eiyal awlaw keinih hmawt unga anih la Ani a mawnga ini tawk äm!” Äiche Pitol la awhngaw tebeih cho kho a i hni chet. Pochong hnih ni utu ihni chon. Äini awhngaw tebeih Pitol thawka ayang chon bala cho kho a aphaw. Ani la ukun ni u hmuh, Yĕsu yok tom ula ini tawk hüt saw wat khäl kraw bala ämäi saw. Äini ani uduka vawngah. Ani hnung äng Simon Pitol ha chon bala che cho duka vawng. Ani la ini tom hüt saw wat khäl äiya kraw bala ämäi saw hmuh. Awlaw Yĕsu uluki äng tom ula ini let hüt saw wat ha hmuh. Ni wat che oyok tom ula ini tawk saw wat ängtu kraw bala mäi hütah. Äini hngat pawta hiyolei bala awhngawchaw mäiyal saw uhmuh. Äiche äiya a yang phaw tih tebeih ha cho a vawng. Ani la hmuh ni uyumei. Yĕsu düsaw känäng heng bala thouwalaih lah saw kiyam la hawu saw kheu, a hnih la äi khaw a ha yaw chu häih. Äi pänäng tebeih häih ima ihni krawnal. Meri cho pranga ja bala che kap. Ani kappe kappe kun bala che cho kho duka äät. Äidä awat bok wat bala hawn natchaw pai hnih Yĕsu yok tawk hmuei saw laa om häih la ihni mäi saw hmuh. Hngat che uludäm pawta awlaw hngat che okho pawta. A hnih la Meri a ihni hi, “Iya nang nakap saw äm?” Meri la a hnih a tak, “Khrawng khälla kei käh Boi a ini chih ei awlaw Ani a mawnga ini tawk äm kei hmawt nga!” Äiche ani u hnung pawta ehleh yei ni Yĕsu ja bala mäi saw hmuh, äini ani la Yĕsu ting hmawt hütah. Yĕsu la ani a ihi, “Nawu o, iya nakap saw äm? U a nang nusui saw äm?” Yĕsu a akhang sotih ting khin bala ani a ihi, “Nang dä ani a lawtila awhngaw a nawtawk khaw kei a awhawu pek, nang mawnga nawtawk saw äm. Kei chet ngala Ani a kaw lawkeyalai.” Yĕsu la ani a tak, “Meri!” Ani hleh ei bala Hibru be äng Ani a tak, “Raboni.” (Ni kheu naw krawnal hi “Chok tih”.) Yĕsu la ani a tak, “Kei a mawn tila awtaw ai ti, iyaäm kei tua ha Paw khäka ädäma chetal hawm nga. Äini Kei nawutih khäl khäka chetal, anih a a hawu pekal Kei Paw la nangnih Paw awlaw Kei käh Hnadaga la nangnih käh Hnadaga khäka ädäma Kei kechetalaih saw dä.” Äihi Makdalin Meri tebeih khäl khäka chetal bala anih a tak, “Kei Boi a kuhmuh.” Äidä ani la Boi la taksaw kheu kheni anih a hawu pekal chak. Äi sapta chah saw hnüpäng ümülawma tebeih khäl hngat la a lumei ula sät kiyawh ei ula ini mäi. Iyaäm anih la Yudi lenchaw khäla ini keh hüt. Äi khaw a Yĕsu lo bala anih laya ja bala hawu, “Jelkhiyamsa nangnih ängtu mäiseh.” Ni hawu pänäng Ani la ukut jaw awlaw awpawng dawnei. Boi a hmu ula tebeih khäl awbawng ini phiyaw. Yĕsu la anih a awlaw tak, “Jelkhiyamsa nangnih ängtu mäiseh. Paw la Kei a eteh saw huih Kei ha nangnih a khrawng khäl khäka kanang teh tun.” Äi pänäng Ani la tebeih khäl dämäng ihil khrawei naw bala tak, “Asanh chang Khraw law ei khäl. Nangnih dä khrawng khäl käh ngulai khäl ähläh nini pek khaw Hnadaga la ha anih käh ngulai khäl ähläh pekai. Awlaw nangnih dä anih käh ngulai khäl ähläh pekchu khaw Hnadaga la ha anih käh ngulai ähläh pek hnawh.” Yĕsu la upuma awdawnei khaw a etebeih pochong lei hnih äng käh pochongak mäi hütah. Äi mäi hütah tih ming che Thoma. Ani käh awlaw hngat ming che Phetih. Awhngaw tebeih khälla ani a ini takal, “Keinih Boi a kini hmuh!” Thoma la anih a tak, “Kei ani kutjaw pai hnih äng hmä ini theh saw hmat la hmu nga khaw, awlaw äi hmat la äng kukut pem thawneinga khaw, awlaw ani pawng äng kukut taweinga khaw, kei yumei hnawh nga.” Sapta ak pänäng tebeih khäl äi ima ini lumei tü. Äi khaw a Thoma anih ängtu mäi hüt. Sät khäl kiyawh ei thän Yĕsu täkting anih laiya lo bala ja bala hawu, “Nangnih äng jelkhiyamsa mäiseh.” Äi pänäng Ani la Thoma a tak, “Nukut pem niya thawnei tila kei kutjaw so, äiche nang kut täuh wei tila kei pawng äng nukut tawei. Ü üt naw ah pak Kei a uyumei!” Äi khaw a Thoma la tak, “Kei käh Boi, kei käh Hnadaga!” Yĕsu la ani a tak, “Thoma o, nang kei a ini hmuh koong ini yumei? Kei a u hmu ah pak uyumeitih khäla che Hnadaga la pisih pekai.” Tebeih khäl hmawi hmawh a Yĕsu la awhngaw nawmaw nawkaih saw bi awbawng bi hüt. Äi khäl kheni kei ni boih hiyol äng yo chak nga. Äini Yĕsu dä Mesaya, Hnadaga Chaw ting nangnih yumei hmawna awlaw Ani äng yumei chula päiyah saw sawk bünei hmawna ni khäl koyok saw. Äi pänäng Yĕsu la awlaw krängak Tibiri guda kawma etebeih tih a adawnei. Ni khäl che ni huih thänei hüt. Simon Pitol, Thoma (Phetih ting ini panei saw), Nathaniel (ani che Galila käh Kana nam känäng), Jebidi chaw häih awlaw Yĕsu käh aw hngaw pochong hnih etebeih, anih kheni äi la a utu ini mäi hüt. Simon Pitol la anih a tak, “Kei ngaw mawna kechetaih saw.” Anih la ini tak, “Keinih ha nang ängtu kini lo aih saw dä.” Äihi anih apranga thok ula long äng ini kawi. Äini yawn thiya äng anih la hngaw thekak ha bün u. Khoni thok tun khaw a Yĕsu guda kawma aja. Äini etebeih khälla ani Yĕsu ting hmawt u. Äi khaw a Ani la anih a hi, “Khanbawn khälo, ngaw nini bünei?” Anih la ini hawu, “Iha bün unga.” Ani la anih a tak, “Long set pawta nangnih käh kawn hiyän khäl äihi nini bünai.” Äidä anih la kawn ini hiyän ni latal hnäng ti u. Iyaäm kawn äng awbawng ngaw ini okei hüt. Yĕsu la khetnawk saw tebeih la Pitol a tak, “Ani che Boi dä!” Pitol la äi Boi dä ting yawk ni awat echeng äng khoneyal hiyawng bala tui äng chu. (Iyaäm ani la ukhaw wat bala dä mäihüt saw.) Awhngaw tebeih khälla ngaw luih saw kawn lalat ula long äng kawm pawta ini lo al. Anih kawm känäng umuk khra hnih huih dä ini hlawm hlaw ei saw. Kawma ana phaw al pänäng anih la mei alh choisaw ini hmuh awlaw hngat pai hnih ngaw mei alh dämäng ini hmuh, äiya ha mäi saw ha ini hmuh. Äi khaw a Yĕsu la anih a tak, “Tua nini mawn saw hngat pai hnih ngaw Kei khäka lo khäl.” Simon Pitol long äng chet bala äi kawn kawma olo al. Äi kawn äng khra ak gäl hngawgip gäl thek thum (153) ngaw len okei. Äi hiyawh ngaw kawn äng okei pänäng ha kawn takah. Yĕsu la anih a tak, “Lo chula ei khäl.” Tebeih khäl äng käh hngat la ha Ani a ini hiyeih saw sengkrih tawei u, “Nang che u äm?” Iyaäm Ani che Boi dä ting anih la ini hmawt khäh. Äidä Yĕsu äiya chet bala ha law bala anih a pek. Äi huih ngaw ha Ani la pek. Düsaw känäng thouwal pänäng Yĕsu la ni äng kräng thum etebeih tih a awdawnei. Anih la ini ei ok pänäng Yĕsu la Simon Pitol a ihi, “Yohan käh chaw Simon o, awhngaw la khrawng khet nawk saw thawka nang Kei a unung ni khet nawkei?” Pitol la krawn bala takal, “Ä, Boi o,” “Nang naw hmawt khäh Kei nanga kini khet nawk khäh.” Yĕsu la ani a tak, “Kei käh samphomah chaw khäla sokhrei bäi.” Awlaw krängak Yĕsu la ani a hi, “Yohan käh chaw Simon o, nang Kei a ini khet nawkei?” “Ä, Boi o,” ani la krawn bala takal, “Nang naw hmawt khäh kei nanga kini khet nawk saw.” Yĕsu la ani a tak, “Kei käh samphomah khäla sokhrei bäi.” Awlaw krängak Yĕsu la ihi, “Yohan chaw Simon o, nang Kei a ini khet nawkei?” Pitol la ulung dukhah piei. Iyaäm nang Kei a ini khet nawkei ting Yĕsu la ani a kräng thum ihisaw koong. Äidä Pitol la Ani a tak, “Boi o, nang ükütni naw hmawt khäh, nang naw hmawt khäh kei nanga kini khet nawk saw!” Yĕsu la ani a tak, “Kei käh samphomah khäla sokhrei bäi.” Kei nang‍a lälä kini tak tun, nang nochong khrawngei khaw a awatcha sah ngei tila lala apei nechetaih khiyang dün laa nechet hnäng. Äini nang nachang khaw a nukut nodouweyei. Äidä pochongak la anang khonai awlaw chet do khiyang ti saw düna anang chih ei. (Ni kheu äng Yĕsu la hawu, Pitol ihuih dü aih lah saw äm awlaw Hnadaga a iba phiyaw aih saw äm.) Äi pänäng Yĕsu la ani a tak, “Kei ängtu lo!” Pitol la uhnung pawtäng hleh ei bala sot ni, Yĕsu la ekhet nawk saw tebeih a hmuh. Ni tebeih dä lätal päi ini ei khaw a Yĕsu pum äng hngawng bala hawu hüttih, “Boi o, ula nanga lansu khäl kut äng anang awpaih saw äm?” Ani a hmu bala Pitol la Yĕsu a tak, “Boi o, ani iba thäneyei äm?” Yĕsu la Pitol a tak, “Kei krawnal nga saw sawgraw dä ani heng bala mäyeih saw kü hlüei khaw, nanga i äm? Nang Kei ängtu lo!” Äi koong ni tebeih dü hnawh ting Yĕsu a tämtih khäl khäka ni kheu khrih ei chak. Äini ni tebeih dü hnawh ting Yĕsu la hawu saw hiyah. Ani la hawu saw che, “Kei lo al ngasaw sawgraw ani heng bala mäiyeih saw Kei dä kühlü ei khaw, nanga i äm? Ni hnäh äi tebeih, ula ni khäl awhawu saw äm awlaw oyok saw äm, awlaw keinih kini hmawt khäh ani la sawksi pek saw khäl ihi khäh.” Yĕsu la awlaw awbawng namaw nawkaih saw bi khäl ibi hüt. Äi khäl kheni dä khrawng khälla yo ula ini tawk khaw luhdül äng äi boih khäl jelh thaw hnawh. Khetsu Thiophil, Yĕsu a hawn pre a law hmueyalah saw sawgraw Ani la i aw poh hütäm awlaw i aw chok hütäm, äi khäl kheni kei käh ayang boih äng koyok hüt khäh. Hawn pre a kawyal khawngah Yĕsu la Asanh chang Khraw tha äng Ani la eheh lei saw teh hmueitih khäla i ini poh aih lah saw äm äi sin hüt. Yĕsu la dukhah khawm bala dü pänäng, Ani la tebeih khäla awdawnei awlaw tebeih khäla Ani eheng pe khäh ting awbawng ahmat la dawn. Khomhnüp hligip täh Ani la tebeih khäla äkräng kräng dawnei bala Mawng Hnadaga pre kheu tak. Hnüpak khaw a, Yĕsu la Ani tebeih tih ängtu ei ok tuna Anih a tak hüt, “Nangnih Yĕlusalem hlät chula chetai chu. Kei mongkhok känäng, Kei Paw la khawmei saw i nini yawkäm äidä chongei chula mäi khäl. Iyaäm Yohan la tuilüh pek hüt, äini hnüpak hnih pänäng pawla khawmei saw huih nangnih Asanh chang Khraw äng tuilüh nini büneyei.” Äi pänäng teh hmueitih khälla chumei ula Yĕsu a ini hi, “Boi o, tua Nang Isawlael khäl kut äng awlaw ni Mawng pre naw awpa laih saw ei?” Yĕsu la anih a tak, “Paw kädäng la Ani tha äng ikhin la khomhnüp po bala loaih saw. Äi hngata ha hawu pek hmuei yah. Äini Asanh chang Khraw nangnih lukhru äng lo khaw a nangnih thayung nini büneyei awlaw Yĕlusalem, Yudia brat awlaw Samali a ha awlaw luhdül äng käh ujumtum täh nangnih Kei käh sawksi nini thäneyei.” Äi kheu hawu pänäng Yĕsu a teh hmueitih hmawi mawh a hawna khawi hmueyal awlaw kho hiyung hngat la Ani a ukhuih yal. Yĕsu hawna kawyal tun khaw a teh hmueitih khälla tana hawn pawta so ula ini mäi. Äi khaw a täk ting awat bok wat tih khrawng pai hnih teh hmueitih kena aja häih la ihni tak, “Galil pre lekchaw a käh khrawng khälo, niya ja chula hawn pawta so chula iya nini mäi saw äm? Yĕsu ihuih hawn pre a kawyal äm, äi huih ani awlaw oloalai.” Äi pänäng teh hmueitih khäl Olip khuyung känäng komal ula Yĕlusalema ini chetal. Yĕlusalem mräh känäng ni khuyung melak huih awhlawm hlaw. Mräh a ini phaw ni anih mawng ima ini mäi hütäm, äi ima käh ädäma käh täka ini chet. Äi teh hmueitih khäl ming che Pitol, Yohan, Yakub la Endu, Philip la Thoma, Bawthawlmawi la Mathi, Alphaya chaw Yakub la Simon awlaw Yakub chaw Yuda. Teh hmueitih khäl kheni la äiya hnüpak kiyawnah ini lung khrawei ula suh ini tongei. Anih Yĕsu nu Meri awlaw pochongak hnih hmutaw la Yĕsu nawutih äng utu suh ini tongei hüt. Äi hnüp äng Krito yumeitih khäla utu ini chumei khawa, äiya khra akgäl kul huih khrawng ini mäi hüt. Äi khaw a Pitol la ja bala hawu, “Nube tanawu khälo, Asanh chang Khraw la Dawut mawng mongkhok känäng Yuda be i hawu hütäm kiyam äng äi kheu luihyeih saw ühlü hüt. Yĕsu a mawntih khäla ni Yuda la dä lawm dawn hütsaw. Ani keinih sawng äng käh pochongak mäi hüt awlaw keinih ängtu biyeihsaw koong ania helh hmuyei hüt.” Pawyah saw bi bi bala Yuda la awmawn bünei hüt saw äng ani la lai pilchaw ak hleh ei, äiya ani kru bala ähän pok bala ekhel thok chak. Yĕlusalema käh khrawng kheni la Yuda i thänei hüt saw äm äi kheu ini yawk. Äi koong anih beäng äi lai ming che Akeldäma ting ini takal. Äi nawphawh ngal khaw thänei “Thi lai”. Äi pänäng Pitol la awlaw hawu, “Kiyam Sam boih hiyol äng yoei bala mäi, ‘Ani im ohong mäiseh, äiya hngat ha mäyah heh u.’” Awlaw ha yoei bala mäi, “Ani käh la awhngaw la lawei yal heh u.” “Äi koong Yohan la tuilüh pek saw bi chah saw khaw thouh Boi Yĕsu a hawna khawi hmueiyah lah saw sawgraw, u bang nangkei ängtu mäi hütäm äi khrawnga nangkei sawng äng ni lawkeyeih lah saw. Äi khrawng Yĕsu dü bala thouwal däk ting nangkei ängtu sawksi thokaih lah saw. Äi khaw a tebeih khälla Yosep, Yoto la Basaba ting panei hmueitih la Mattiya, ni pai hnih ming hawu hmuei.” Äi pänäng anih la suh ini tongei, “Boi o, Nang hang hang käh lung nawhmawt khäh. Yuda la ani käh dam büneyeih saw koong tebeih bi ähläh al. Tua ni pai hnih dukäng Yuda laa nang u a neheh läm, ani a khrawng dawn. A hnih la ihni lumchawl ini chawmei ni Mattiya ming pou. Äi koong Mattiya äi pochong leyak tebeih ängtu vawngei.” Äi pänäng Yudi khäl käh Pentikaws päi hnüpa yumtih khäl hngata ini lumei. Täk ting hawn känäng athak khri lo saw huih asam hngat thawng awlaw äiya mäitih khrawng kheni la äi asam ini yawk. Anih la meilei huih thänei bala khrih ei chak saw ini hmuh. Awlaw äi mei anih kheni lukhrung äng lo. Äi äng anih Asanh chang Khraw äng ini luih awlaw äi Asanh chang Khraw la u a ihuih kräuvaih saw tha pekäm äi huih anih ayapyap be äng ini kräu. Äi khaw a luhdül äng käh ala la känäng Hnadaga yumeitih Yudi khäl lo ula Yĕlusalema ini mäi. Ni sam yaw ula awbawng khrawng utu ini chumei. Khintih kheni la ini pum be äng yumtih khäl ini kräu saw yaw ula ini mawchak. Anih kheni la maw ula ini hawu, “Ni kräu tun tih khrawng khäl Galila käh khrawng hiyah ei? Bakhaw anih mongkhok känäng nangkei iba ini nu be ini yaw kei äm? Niya mäitih khrawng kheni ätäntän la känäng, Pathiya, Madiya, Ĕlam awlaw awhngaw khäl Mesopotami, Yudia, Kapadoki, Panto, Esia pre känäng, Phorugi, Pampiliya, Aigup, Sairin kena käh Libiya, Rom presaw, Krit la Arabiya Pochong hnih thum che Yudi yapsaw awlaw awhngaw khäl che Yudi yapsaw ting heh lei hmueitih. Tua nangkei ükütni ni Hnadaga la naw mawnawkaih saw bi poh saw khäl nangkei ini pum be äng ini hawu.” Anih maw ula awlaw ini tawk tum ula hngala hngat ini hi ei, “Niche iyäm?” Äini awhngaw khrawng khälla yumtih khäla keleih ula ini tak, “Anih la alak o ula ini moi saw.” Äi khaw a äi pochong leyak ängtu ja bala Pitol la athak hawu, “Yudi khälla Yĕlusalema mäitih khrawng khälo, kei kawhawu waih saw khäl sidih äng khin khäl! Nangnih i nini tawk saw äm äi hiyah, ni khrawng khäl hngat ha moi u, iyaäm tua ongo paikoh dä hawm. Äini Hnadaga käh sidawng hiyawktih Joel la ni be awhawu hüt, ‘Hnadaga la hawu, “Ikhin päih yeih saw hnüp khäl äng ni huih dä thäneyeih saw, kei üküt lukhrung äng, Kei käh Asanh chang Khraw kepekai, äi äng nangnih chaw chuhnu khäla Hnadaga la hawu pek saw khäl awhngaw a ini hawu pekai, awlaw chong krawng khälla akrai a ini hmuaih, nangnih achang paw khälla mawng nini hmuh ai. Kei käh hngasaw hmutaw pawtaw üküt lukhrung äng Asanh chang Khraw kepekai awlaw anih la Hnadaga kheu ini hawuvai. Kei hawn äng nawmaw nawkaih saw kanang dawnai awlaw luhdül äng kei jal kothouwai, äi koong khrawng khäl käh thi bo ai awlaw ini dü äi awlaw mei la meikhu mäiyei. Boi käh äi elensum awlaw wachang khomhnüp lo khawngah khoni uhiyungai, asĕ thi lup senai. Ngulai känäng ini lätalaih saw koong ula bang Boi a bekei äm äi lätalai.’ “Isawlael saw khälo, ni kheu khin khäl. Yĕsu la nawmaw nawkaih saw bi awlaw a hmat la dawn saw khäl äng Hnadaga la khawmei khäh, Ani la dä Yĕsu a eteh saw. Nangnih kheni la ni khäl nini hmawt. Äini ibang thäneyeih saw äm äi Hnadaga la hmawt khäh, awlaw Yĕsu a nangnih kutäng itih khaw a awp hmuei äm, äi äng Ani la tawk bala tawk hüt saw khäl ihisaw a thänei. Nangnih Yĕsu a law chula che ngulaisu khrawng khäl kutäng nini awp. Ani a hmä the chula che krut äng nini tuk sawk. Äini Hnadaga la Ani a düsaw känäng thouh al, äi tha känäng Ani a hlätal, iyaäm düsaw la Ani a heng naw bala taw hnängah.” Iyaäm Yĕsu kheu Dawut la awhawu, Kei üküt khaw a ni kawhmawi mawh a Boi a kuhmuh, Ani kei set pawh a ämäi koong kei keh nga. ‘Äi koong kei mawmawt kawpiyaw, kei lei ha awpiyaw be kräu, kei kantha ha ü üm äng heng. ‘Iyaäm Nang cho a hiyäntila kei a awtaw hnawh tih, Nang käh Hngasaw kantha nang thu sawk thaw hnawh ti. Düsaw känäng ini henalaih saw Nang kei a ini hawu pek. Nang sawkbrat kei äng nämäyeih saw koong thasa kawpiyaw.’ Nube tanawu khälo, ni kheu kei thathak tha äng kawhawu, nangkei nuchen paw sawk Mawng Dawut üdü, ani a phül hmueyal awlaw ani käh cho tua ha niya mäi khäh. Äini ani Hnadaga sidawng hiyawktih hngat mäi hüt awlaw Hnadaga la ibang khawmei hütäm ani la awhmawt. Hnadaga la khawmei saw Ani chen äng käh pochongak nawn äng o omalai ting. Awhmawi mawh äng Hnadaga la i poh aih saw äm Dawut la äi awhmawt khäh. Awlaw Krito düsaw känäng thouwal saw kheu ani la awhawu. Nang cho a hiyäntila ani a taw thaw hnawh ti. Ani kantha nang thusawk thaw hnawh ti. Äini Yĕsu dü pänäng Hnadaga la Ani a dä saw känäng thouhwal saw, awlaw nangkei kheni la äi ini hmuh. Yĕsu a hawn pre a khawi hmueiyal, tua Ani a Hnadaga set pawta ühlüng sum laa om hmueyal. Paw la khawmei saw Asanh chang Khraw Ani la bünei bala nangkei khäka eteh, nangnih tua äi nini yawk tun awlaw nini hmuh tun. Dawut hawn pre a chetalah thän ani la ni hawu, “Boi Hnadaga la kei Boi a tak, ‘Kei nang käh lansu khäla hiyum sawk hngasaw sawgraw nang kei käh set pawta ühlüng sum laa om.’” Äi koong Isawlael pre brat saw la mawtchaw hmawt seh u, äi Yĕsu a dä Hnadaga la Boi awlaw Mesaya ni pai hnih opoh saw, u a nangnih hmä äng the chula che krut äng nini tuk hütäm. Ni kheu yaw ula khrawng khäl mawmawt ini lung se. Pitol la awhngaw tebeih khäla anih la ini tak, “Keinih ngulai känäng ähläh kini büneyalaih koong i kini poaih lah saw äm?” Pitol la anih a tak, “Nangnih ngulai känäng nini lung hleyeyal chula Hnadaga pawta krawnal khäl, ükütla ni Yĕsu Krito dä Boi ting hmawt chula tuilüh lawei khäl. Hnadaga la ngulai ähläh anang pekalai awlaw nangnih Asanh chang Khraw nini büneyei. Iyaäm ni khawmei hmuei saw nangnih koong, nangnih chaw chuhnu koong awlaw ukhäl awhlawm hlaw a ini mäi äm äi khäl koong ha. Nangkei Boi Hnadaga la ani khäka u khäla panei äm, äi khäl kheni koong ni Ani la khawmei saw.” Pitol la anih a awlaw ayapyap chok. Anih a tak, “Kei äkräng kräng pawyah saw khrawng khäl koong olo tun saw dam känäng nini puma nini hläh eyalaih saw sidih kanang tak.” Ani kheu yumei tih khälla tuilüh ini lawkei awlaw äi hnüp anih sawng äng eleu sum äng thong thum khrawng ini vawngei. Anih la ini lung khraw ei ula tebeih tih la ini choksaw ini khin hüt, utu ini ei ok, Boi düsaw ini lung äng ini khawei yeih saw koong utu la ha chi ini pil awlaw suh ini tongei. Hnadaga la teh hmueitih khäla sumei bala thänei phuah saw bi awlaw nawmaw nawkaih saw bi i bi. Äi hmu ula khrawng khäl thasa ini maw chak. Yumtih kheni ala tänaka ini lumei chi awlaw anih la ämäi saw khäl ini pheh yei chi. Anih la ini pum käh kähkän je ula u a ihuih hlü äm äi huih ini pek. Anih la hnüpak kiyawnah Hnadaga ima ini lumei chi. Im täng im täng utu la ha pil ula Boi düsaw ini lung äng ini khawei awlaw piyaw ula ini ei ok. Anih la üküt khaw a ni Hnadaga a awpiyaw ini pek awlaw üküt khrawng la ni anih a ini khet nawk. Hnüpak kiyawnah Hnadaga la awbawng khrawnga ngulai känäng ä hläh pekal awlaw anih kheni a anih sawng äng awhawnal. Hnüpak khaw a ikhin paithum äng suh tong khin khaw a Pitol la Yohan Hnadaga ima ihnih chet. Khrawng khälla hnüpak kiyawnah ni khrawng hngata Hnadaga ima pawyeitih ting mingei nawk saw tamkha khäka ini lo chih. Ani luhdül äng olo khaw thouh ni okho chek khäh. Hnadaga ima chet tih khrawng khäl känäng hlukhawmei yeih koong ani a äiya chih hmuyei chi. Pitol la Yohan Hnadaga ima ihni vawng tun saw hmu bala äi hlukhawmei tih la ahnih känäng awmawn hawuwei. Pitol la Yohan la chok chok ani pawta ihnih sot. Äi pänäng pitol la hawu, “Kei hnih pawta so” Äi khaw a äi hlukhawmei tih la ahnih känäng lala pei bünei yeih saw khahnei bala ahnih pawta sot. Äi khaw a Pitol la tak, “Kei khäkä ha, hen iha mäyah, äini i mäi äm äidä nanga kini pektun. Nazaret a käh Yĕsu Krito ming äng ja awlaw cheteyal.” Äi pänäng Pitol la äi hlukhawmei tih käh set pawt kut bin bala che othouh awlaw äi khaw a ani käh okho la okhomchu achangal. Ani pek bala thou awlaw echeteyal. Äi pänäng ani cheteipe cheteipe, pĕkeipe pĕkeipe awlaw Hnadaga a phiyaw pe phiyaw pe ahnih ängtu Hnadaga ima awvawng. Khrawng kheni la ani a echetei saw la Hnadaga phiyaw al saw ini hmuh. Nidä pawyei ting mingei nawk saw sät khäkä käh hlukhawmei tih ting khrawng khälla ha ini hmawtal. Ani äng thänei saw khäl hmu ula anih kheni mawmawt ini maw chak. Äini hlu khawmei tih la Pitola Yohan hnung hlätalah. Khrawng khälla Pitol käh äi biäng maw ula teh khrung mäi saw mawh lawm äng ahnih khäkä chon ula ini lo. Ni khrang hmu bala Pitol la khrawng khäla tak, “Isawlael saw khälo, ni äng nangnih iya nini mawsaw äm? Keihnih kihnih pum tha äng hiyah khaw Hnadaga a kihnih rosi saw tha äng ni khrawng a cheteyalaih saw tha kihnih pek ting khin chula iya kei hnih pawta so chula nini mäi saw äm? Awbraham, Aijak awlaw Yakub käh Hnadaga la ani hngasaw Yĕsu a ehlen. Nangnih che Yĕsu a nini tukaih koong nini mawn sawk. Pilat la Ani a ählä alaih khiyang hüt khäh, äini nangnih Pilat hmawi mawh a Ani a hlüei chu ting nini tak. Nangnih äi Asanh tih la Pawitih Hngat a hlüei chu. Ani chaw a khrawng tutih hngata dä hlätalaih saw nini tak. Sawk pek hnäng tih a dä nangnih nini tuk hüt, äini Hnadaga la Ani a düsaw känäng awsawk pekal awlaw keihnih äi sawksi. Iyaäm Yĕsu la bi hnäng saw kini yumei koong, Ani la ni khrawnga tha pekal. Ä, ni nangnih nini hmawt saw la nini hmuh saw khrawng. Yĕsu känäng olo saw yum la dä nangnih kheni hmawi mawh a ani a hang hang awpawi poh al saw.” “Nawu khälo, kei kawhmawt khäh nangnih käh elenchaw khäl huih nangnih ha yawchu ah pak Yĕsu a nini tuk, iyaäm nangnih hmawt hüt chu Ani a che Hnadaga la tehsaw hngat. Äini Hnadaga la awbwang yang khaw thouh bang Krito la dukhah khawmaih lah saw ting Hnadaga sidawng hiyawktih khäla hawu sawk hüt khäh. Awlaw äi kheu Hnadaga la äi huih u hluih yal. Äi koong nangnih ngulai känäng nini lung hleyeyal chula Hnadaga pawta hle eiyal khäl, nangnih käh ngulai känäng ähläh büneyal hmawna. Awlaw nangnih ni huih dä nini bi khaw Boi känäng awkhraw lawm äng käh thayung loaih saw khin loai. Hnadaga la nangnih koong helbala tawk saw, Yĕsu ting ini taksaw Mesaya a eteh yei. Awbawng ayang khaw thouh bang Hnadaga la asanh chang tih sidawng hiyawktih khäla awhawu sawk hüt khäh, Hnadaga la ükütni ayang khaw a käh huih atha poh a laih saw. Ani käh äi kheu luih yah saw sawgraw Yĕsu hawn pre a mäyeih lah saw. Mosi la hawu hüt, ‘Nangnih käh Boi Hnadaga la nang duk känäng dä nangnih koong hngat Hnadaga sidawng hiyawktih a eteh ei. Ani kheu hang hang ni nini ngei yeih lah saw. Ula ani kheu khinah äm ani a ani khrawng khäl känäng khrah hmueyalai awlaw sikhra hmueyalai.’ Awlaw Somuel känäng chah bala Hnadaga sidawng hiyawktih khälla i aw ini hawu hütäm, anih la ha tukatäng i aw thäneyeih saw äm, äi khin äng käh kheu ayang bang ini hawu hüt. Awlaw nangnih che äi Hnadaga sidawng hiyawktih khäl käh chen. Nangnih käh nuchen paw sawk koong Hnadaga la i pekaih saw khawmei hütäm, äi nangnih ha nini büneyei. Hnadaga la Awbrahama tak hüt, ‘Nang käh chen duk känäng dä luhdül äng käh üküt japsaw kheni la pisih ini büneyeih saw.’ Nangnih khe a ni pawyah saw lawm känäng anang loal bala pisih pekalaih saw koong dä Hnadaga la ani käh hngasaw Yĕsu a täk chäh nangnih khäka teh saw.” Pitol la Yohan khrawng khäl äng sidawng im dülmawh a i hnih kräu tuna pujawtih, sidawng ima chongtih gong awlaw Suduki khäl ahnih khäka ini lo. Anih la mawt ukhru ini piyei, iyaäm Pitol la Yohan la khrawng khäla chok häih la che ihnih hawu, Yĕsu düsaw känäng thouwal däk äihi nangkei ha düsaw känäng ini thouwalai. Anih la mawn ula Pitol la Yohana thong ima ini chih. Äi khaw a kho mü däk koong khowa ak ahnih a ini heng nawk. Äini awbawng khrawng la Pitol la awhawu saw kheu ini yumei, äi düna hmutaw la sämäichaw süpahpak pawtaw jiji thong hngaw ini mäi hüt. Äi hnüp pänäng Yudi elenchaw khäl, changchaw khäl, Mosi käh thung choktih khäl Yĕlusalema tänaka ini chumei. Äi düna pujawtih gong Anna ängtu Kayapha, Yohan, Alekzandal awlaw pujawtih gong khäl äng käh im saw ha ini mäi hüt. Anih la Pitol la Yohana alaiya hiya ula che ini hi hnäh, “U käh tha la u käh ming äng nang hnih ni okho chektih awpawi ni hnih poh al saw äm?” Äi pänäng Pitol Asanh chang Khraw äng luih bala che hawu, “Khrawng khäl käh thung pängtih awlaw changchaw khälo, Okho chektih khrawng hngata awpawi kinih poh al saw koong, tühnüpa ni khrawng iba kawla pawyal saw äm ting nangnih chih jih popok anang hi. Äihi hang hang la awlaw Isawlael khrawng khälla hmawt bäichu, u a bang nangnih krut täng nini tuk hütäm, Hnadaga la u a bang düsaw känäng khrawnak thouwal hütäm, äi Nazarina käh Boi Yĕsu Krito ming äng ni okho chektih nangnih hmawi mawh a ja al saw.” Kiyam la hawu, “Yĕsu dä äi krung täng huih, Äi krung täng nangnih bitih la sumei chu saw, äini äidä üküt thawka usum vawngal saw.” Yĕsu hawuvah ni luhdül äng awkhiyawt pekal hnäng tih pochongak ha mäyah. Äi khaw a Pitol la Yohan käh sengkhri hmu ula, awlaw ahnih che chaw hmawtah tih awlaw niba khrawng ting hmawt ula, Yĕsu ängtu ihnih mäi hüt saw ting ini hmawtal. Äi lawga pawyal tih anih ängtu ja bala mäi saw koong ani lukrunga iha hawu aih saw bünti u. Äidä Pitol la Yohana ini Yudi khäl käh hngawsaw khäl kän täk känäng teal ula anih ini täng bawngal. Anih la ini hawu, “Äi khrawng häih a nangkei iba ini pohaih saw äm? Yĕlusalema mäitih khrawng khela ni ini hmawt chak ahnih la ibang nawmaw nawkaih saw i hni bisaw äm, nangkei äi chal hnäng hnawh pu. Äini khrawng khäl khäka ni kheu khrih ei tiah pak nangkei ini kheh eiyeih lah saw dä, hngat la ha che Yĕsu ming äng iha hawu lah tiah pak.” Anih la awlaw krawnak Pitol la Yohana ini paneyal äidä ini tak, “Nang hnih Yĕsu kheu awlaw Ani käh choknawk saw kheu khrawng khäl khäka asang bang hawu lah tih hnawh hnih ti.” Äini Pitol la Yohan la krawn häih la ihni tak, “Nangnih nini pum kantha a tara khrawyei khäl, kei hnih Hnadaga thawka nangnih kheu iba kihni khinaih saw äm? Keihnih ibang ha kihni yawk äm awlaw ibang kihnih hmuh äm, äi hawuvalah pak mäi hnäng hnawh hnih nga.” Äi pänäng elenchaw khälla Pitol la Yohan a unung chaw kheh ei ula ini hläh al. Khrawng khäl ini man pokai ting anih la Pitol la Yohana dam äng khrawkaih saw lawm hmu u. Äi nawmaw nawkaih saw bi hmu ula hang hang la ni Hnadaga a awpiyaw ini pek. Äi nawmaw nawkaih saw biäng pawyal tih khrawng khokum hligib thawka mäi hüt. Pitol la Yohan äi känäng ihnih lätal ni awhngaw yumtih khäl khäka ihni chetal. Äidä pujawtih elenchaw khäl awlaw gongsong khälla ahnih a ibang ini takäm äi ihnih hawu pekal. Äi khäl yaw ula che khrawng la utu sam thokäng suh tongei ula ini hawu, “Boi o, hawn, luhdül awlaw mret äng ibang mäi äm ükütni nang nibisaw. Nangkäh Asanh chang Khraw äng nang hngasaw mongkhok känäng keinih pawchang paw Dawut la ni kheu hawu hüt saw, ‘Iya koong presaw älälä chaw ini man pok saw äm? Awlaw iya koong khrawng khäl älälä chaw kheu ini sunhlek saw äm?’ Luhdül äng käh mawng khäl kheni awlaw khiyuptih khäl phakei chak ula Boi Hnadaga a ini sängaih saw awlaw Boi Yĕsu lukhrunga ini ja aih saw.” “Nangkäh asanh chang hngasaw Yĕsu, u a nang Mesaya ting heltila nawtawk sawäm, mawng Herawt la Pontio, Pilat la ni mräh pawh äng phakei häih la Yudi hiyahtih awlaw Isawlael khäl äng kawchawng chawng ini kut ini sakei hüt. Nang käh tha la nang sitha äng ibang ha che ayang khaw känäng äthäneyeih saw ting potila nawtawk hütäm anih la äidä ini poh hüt saw. Awlaw tua, Boi o, ni khälla keinih a ihuih khrawng kheh ei saw äm äi so chawm. Nang käh hngasaw khäla ni huih tha pek, sengkri äng Nang kheu hawu hnäng ong. Nang käh kut khrawng tähwei pek iyaäm Nang käh asanh chang hngasaw Yĕsu ming äng anih la khrawng khäla awpawi poal hnäng ong. Awlaw Yĕsu ming äng nawmaw nawkaih saw bi la nawmaw nawkaih saw hmat la thänei ong.” Mawng la a bang anih ini chumei hüt sawäm, suh ini tongei pänäng äila ülhünei. Äidä anih Asanh chang Khraw äng luih ula ini sengkhri äng Hnadaga kheu hawuvaih saw ini chah. Yĕsu Krito a yumeitih khäl lungnak koak äng ini ngi hüt. Iha che anih la kei käh ting khawmei hüt u awlaw bang hang hang ni nanga nang hlü huih ini sumei chi. Teh hmueitih khälla sengkhri lenäng ni sawksi thok ini chah, Boi Yĕsu düsaw känäng thouwal saw, awlaw hang hang lukhru äng Hnadaga käh awbawng ekhet mäi hüt. Anih dukäng laitih pochongak ha mäi hüt u. Iyaäm u a bang lai long hiyah thän im mäi hütäm anih la äi khäl ini jeh hüt. Je ula awmawn teh hmueitih khäl khäka ini lo chi hüt. Äi pänäng ula ihiyawh hlüei äm, äiya äi huih pek hmueyal chi. Yosep ting mingei nawtih Lebi chen äng käh khrawng pochongak mäi hüt. Song kawi saw Saipru laa ani im mäi hüt. Ani a teh hmueitih khälla Banaba ting ini panei chi äi nawkrawnal hi, “Jaw khawitih chaw.” Ani a lai al chawak ämäi hüt. Ani la äi je bala awmawn teh hmueitih khäl khäka a tawk. Anania ting mingei nawtih khrawng hngat mäi hüt, ani phiya ming che Saphira. A hnih la lai hngat ihni jeh. Anania la awmawn phüh ak tawkei hüt. Awlaw awmawn phüh ak che teh hmueitih khäl khäka chih. Äi ani phiya la ha hmawt. Äi khaw a Pitol la tak, “Anania o, iya nang lung äng Mannat a bi ni biei sawk saw äm? Asanh chang Khraw khäka iya nehlei saw äm? Lai nejeh saw äng käh phüh ak nawtaw kei hüt. Äi lai je khawngah nang käh mäi hütah ei? Awlaw nejeh pänäng ha awmawn khäl nang kutäng mäi hüt tah ei? Äi thän nang ni huih bi nibiyeih saw iba nawtawk datäm? Nang keinih khäka hlei ti, äini Hnadaga khäka nehlei saw dä.” Äi kheu yawk saw äng tutu Anania dekäng kru bala che üdü. Ni sidawng yawtih kheni ini ke chak. Äi pänäng chong krawng khäl lo ula awat äng ini hlomal, äidä apranga chi ula ana phulal. Äi pänäng gonda thum huih düna ani phiya lo, äini i thänei saw äm anila hmawt hütah. Äi khaw a Pitol la ani a ihi, “Hawu chaw, nang hnih Anania äng ni hiyawh mawn äng dä lai ni hnih jeh saw ei?” Ani la tak, “Ä! Ni hiyawh mawn äng dä.” Pitol la ani a tak, “Boi käh Asanh chang Khraw ni hni chawmaih koong iya nang hnih khaw khiyang nihnih thänei saw äm? So! Mawng khrawng khälla nang pawtaw a ana phul äm äi khrawng khäl sät khäka ana phaw al däk, anih la nanga ha apranga anang chih eih saw.” Saphira äi khaw a Pitol hmawi mawh a kru bala üdü. Äi chong krawng khäl uduka ini lo ni ani yok ini hmuh, anih la apranga thoh al ula apawtaw kena ana phulal. Äi khaw a yumtih sawng kheni awlaw awhngaw khrawng khälla äi kheu yaw ula mawt ini ke. Teh hmueitih khälla khrawng khäl dukäng mawt nawmaw nawkaih saw bi awlaw ahmat la ini bi hüt, Yĕsu a yumeitih khäl hang hang Solomon käh dülmawh a ini lumei chi. Yĕsu a yumei hawmahtih khrawng khäl yumtih ängtu ana chumei saw koong ini ke ei. Äi thän ha anih la yumtih khälla kehken ini poh käh. Äi thän awbawng hmutawlah pawtawlah la Boi Yĕsu a yumei ula ana chumei. Teh hmueitih khälla ini bisaw khäl hmu ula che khrawng khälla phawk khruäng awlaw samphru khruäng lawgase lo ula lawm täng lawm täng ini tawkchi, lawm äng chetei khaw a Pitol käh lip hngat hiyah hngat khruäng khraw heh ting. Yĕlusalem mräh ken känäng awbawng khrawng la lawgase awlaw khrawse la mawn tih khrawng khäl lo ula che ana chuh ei. Äidä anih hang hang ini pawyal chak. Äi khaw a pujawtih gong awlaw anih pawtäng mäitih Suduki khäl selei ula ini manpok. Äidä, anih la Teh hmueitih khäla mawn ula che thong ima ana heng nawk. Äini khom yawn chinga Boi la teh saw hawn natchaw hngat la othong ima käh sät hong bala anih a apranga thoh al bala tak, “Chet khäl, ini pujawdün ima ja chula che khrawng khäl khäka ni sawk tha sidawng apek khäl.” Anih la äi hawu hmueyeih saw huih awmawt jawn sidawng ima vawng ula khrawng khäla ana chok hnäh. Pujawtih gong awlaw ani pawta phakei tih khäl chumei ula Yudi yapsaw äng käh chang khäl ini panei. Äi pänäng anih la teh hmueitih khäla ana lawkaih koong Hnadaga im chongtih khäla ini teh. Äini äi Hnadaga im chongtih khälla othong im duka teh hmueitih khäla hmu u. Äidä anih a hawu pekalai äng ini krawnal. Äi khaw krawnal ula ni sidawng ini pekal, “Keinih kini hmuh othong im sät awi äng chĕt chĕt khah hmuyei khäh, awlaw sät khäka chongtih ini ja khäh, äini sät kini hong ni uduka hngata ha hmu u nga.” Ni kheu khäl yaw ula pujawtih elenchaw khäl awlaw Hnadaga im chongtih khäl käh gong maw chak ula äi pänäng iba thänei te äm ting ini tawk hnäh. Äi pänäng khrawng hngat lo bala hawu, “So khäl, u khäla nangnih othong ima nini thawnsaw äm anih la sidawng ima ja ula khrawng khäla ini chok tun khäh.” Äi khaw a sidawng ima chongtih gong la ani dawäng bitih khäl chipui naw bala Teh hmueitih khäla ana mawn. Äini khrawng khälla anih a lungpel äng khong naw ula ini tukai ting ini keh koong Teh hmueitih khäla tha tawng ula mawn u. Mawn ula ini lo pänäng Teh hmueitih khäla Yudi khäl käh hngawsaw hmawi mawh a ini hiya. Äi khaw a pujawtih gong la ächäng hnäh, “Äi Yĕsu ming äng chokaih chu saw nangnih a kanang tak khäh, äini Ani käh kheu Yĕlusalem a nini khrih chak awlaw äi Yĕsu düsaw koong keinih a dä epret anang khrawk.” Äi khaw a Pitol awlaw awhngaw Teh hmueitih khälla krawn ula ini tak, “Khrawng käh kheu nikhin saw thawka Hnadaga kheu ne ngei yeih saw tawn khäh. Ua nangnih krutäng nini tuk hüt saw äm, äi nangkei chen käh Hnadaga la Yĕsu a düsaw känäng thouhwal. Hnadaga la Ani a dä khiyuptih awlaw khiyawtal tih ting set pawta ming mawh om dun ala pek saw. Hnadaga la ni huih poh saw Isawlael yapsaw khälla ngulai känäng krawnalaih saw ikhin bünei hmawna awlaw anih a ähläh pekal hnäng hmawna. Keinih awlaw Asanh chang Khraw dä ni khäl äng sawksi. Awlaw Asanh chang Khraw che Hnadaga la pek saw, ula Ani kheu ngei äm anih koong.” Ni kheu khäl yaw ula elenchaw khäl mawt ini man pok, äidä Teh hmueitih khäla ini tukaih khiyang. Äini Gawmawliyel aja awlaw Teh hmueitih khäla krawak koong apranga ini chih ei saw tak. Gawmawliyel che hngat Pherasai. Ani hngasaw äng käh hngat mäi hüt. Ani Mosi käh thung choktih hngat mäi hüt, ani a ükütla ni kenkeh ini poh hüt. Äi pänäng ani la hngaw khäla tak, “Kei äng mäitih Isawlael chen khälo, ni khrawng khäl lukhrunga i nini poh sawäm äi koong sidih äng mäi bäichu. Kumak hnih khawngah Thuda ting mingei nawtih khrawng hngat la lo bala upuma hngat nängtih pängtih ting takei, eleu sumäng khrawng khrahli ani ängtu ana vawngei. Ani a tuk hmuyeisaw awlaw ani ängtu chettih khrawng khäl ini phuliyal chak. Ani käh bisaw khäl kheni usum vawngah pak thänei chak. Äi pänäng, Khrawng ini süh tuna Galila käh Yuda lo bala che khrawng khäla ani pawtäng lumei bala othouh. Ani ha üdü, awlaw ani käh khrawng khäl ha ini phuliyal chak. Äi koong nangnih a kanang tak, nangnih ni khrawng khäla iha poai chu. Ni khäla hlätal khäl, iyaäm ni khäl käh krong awlaw bisaw kawisaw luhchaw känäng dä thänei khaw äi krakaih saw dä. Äini Hnadaga känäng dä thänei khaw che nangnih ni khäla düm sawk hnäng hnawh chu. Hiyah khaw nini hmuh ai nangnih Hnadaga äng dä jal nini täksaw.” Äi khaw a Gawmawliyel kheu äng elenchaw khäl ini ngi. Anih la teh hmueitih khäla uduka panei ula bop dün jäi äng bopaih saw ini tak. Äi pänäng anih la anih a ini hläh al awlaw ini tak, Yĕsu be khrawng khäl khäka iha hawu tiyei chu ting. Teh hmueitih khälla Yĕsu ming äng mawt siri ini bünei hnäng saw koong anih piyaw ula che äi tängbawng dün la känäng ini chetal. Anih la hnüpak kiyawnah sidawng ima awlaw imtäng imtäng ini chok hnäh. Awlaw Yĕsu dä Mesaya ni sidawng pawi ini hawu pek. Äi khin äng, Yĕsu a yumei ula awbawng etebeih ini paw tun. Äi khaw a Grik be kräutih yumtih Yudi khälla yumtih Hibru kräutih khäl lukhrunga epret khraw ula ini hawu, hmeinu khälla hnüpak kiyawnah käh eisaw bünei chi u. Äi khaw a pochong leihnih tebeih khälla hang hang yumtih khälla tänaka panei ula ini tak, “Hnadaga käh sidawng hawu aih saw hlätal ungala eisaw kini pheyeih saw äng kini khruaih saw che thänei hnawh. Nube tanawu khälo, nangnih känäng khrawng pochong sĕh helei khäl. U a bang üküt nila ini kenkeh äm awlaw Asanh chang Khraw la ngen äng luih äm, keinih anih a ni khäl kini awpal chakai. Keinih suh tong äng kini lung kini pekei hnängai awlaw kini chok hnängai.” Teh hmueitih khäl käh kheu äng hang hang ni ini piyaw chak. Anih la Istiphen a ini heh lei, ani uyum äng awlaw Asanh chang Khraw äng luih khäh. Awlaw Philip, Prawkhor, Nikanor, Timon, Parnima awlaw Nikolai a ha hleh hmuei. Nikolai che Yudi hiyah, äithän ani Yudi yumtih a thänei. Äi pänäng yumtih khälla teh hmueitih khäl khäka helh hmueitih khäla ini lo. Teh hmueitih khälla suh ini tong awlaw anih lukhrunga ini ukut ini tawkei. Äidä Hnadaga kheu khrih ei chak. Yĕlusalema yumtih sawng khäl tana äng ini paw. Awbawng pujawtih khälla ini yumei awlaw anih la Ani käh chok hawu ini ngei. Istiphen Hnadaga käh ekhet la tha äng luih bala awbawng nawmaw nawkaih saw bila hmat la poh hnäh. Äini äiya käh khrawng khäl Istiphen awhngaw phak pawtäng ini mäi hüt. Äi khrawng khäl che Kurini, Alekzandria, Kiliki awlaw Esia la khäl känäng käh Yudi. Anih che hngasaw hlätal chitih sawng äng käh khrawng ini mäi hüt. Anih Istiphen äng ana tok sakei. Äini Asanh chang Khraw la ani a uku awlaw ngen äng ani la kheu khrawnei nawkal. Äi koong hiyum sawk hnäng u. Äidä äi Yudi khälla umuchaw äng khrawng khäla suk hlek ula ini tak, “Istiphen la Mosi awlaw Hnadaga lukhrunga ekeleih saw huih kräu saw kini yawk.” Anih la khrawng khäl käh, changchaw lenchaw khälla Mosi käh thung choktih khäl käh man ini khawi, äidä Istiphena mawn ula Yudi khäl käh hngawsaw khäl khäka ini lo. Äi pänäng pochongak hnih khrawng khäl eheng sawksi thokaih koong ini lo. Äi sawksi khälla ini hawu, “Ni khrawng la asanh chang Hnadaga im awlaw Mosi käh thung lukhrunga kräu saw dümah.” Keinih ni huih kräu saw kini yawk, “Nazarina käh Yĕsu la sidawng im khrakalaih saw awlaw Mosi la khrawng pek saw thung khäl kheni hang hang ehleyalaih saw.” Äi khaw a Yudi khäl käh hngawsaw khäl khäka chumei tih khrawng khäl kheni la Istiphena ini sotei chak, iyaäm ani hmawi hawn natchaw huih awa hüt. Pujawtih gong la Istiphen a ihi, “Ni khrawng khälla epret anang khrawk saw ni ihi ei?” Istiphen la tak, “Tanawu khälla paw khälo, khin khäl, nangkei nuchen paw sawk Awbraham Haron mräh a mäi khawngah Mesopotami a mäi khaw a, a wachang äng käh Hnadaga la ani a dawnei bala tak hüt, nang nupum khrawng khäl awlaw nupum pre hlät tila Kei kini dawnaih saw laa chet.” Äi koong ani la ani pre hlät bala Haron laa ämäiyal. Tua nangnih nini mäidün pre a Awbrahama awpaw dü pänäng Hnadaga la ani a eteh al hüt saw. Hnadaga la Awbrahama iha pekah, okho phaw hngat tawkei yeih saw la tih bang pekah. Äini Hnadaga la ani khäka awkhawmei hüt, Ani la ani pänäng käh chen khäla äi pre pängei ong pekalai. Äi khaw a Awbrahama awchaw chuhnu mäi hawm hütah. Hnadaga la ani a tak, “Nang käh chen khäl khrawng pre a ini mäyei. Khrawng khälla anih a ini hngasaw a ini poh eyei awlaw khokum khra hli anih a ini kuluh nawkai.” Hnadaga la awlaw hawu pek, “Mawng presaw la anih a hngasaw a ini poheyeih äm, äi presaw khäla Kei dam kepekai. Äi pänäng anih äi pre känäng thokal ula ni la a Kei a khrawng rosi ei.” Äi pänäng Hnadaga la khawmei saw huih ini vun ini awh ei yeih saw thung pek. Äi pänäng Awbraham chaw Aijak luhdül äng lo. Kho hnüp set pänäng Awbraham la ani vun awh. Äi pänäng Aijak chaw Yakub thänei. Yakub la pochong leihnih awchaw hmuh ei, äi pochong leihnih che echen paw sawk tih. Yakub käh äi chaw tih khälla ini nawu Yosep äng selei ula ahnga mäiyeih saw koong Aigup pre a ini jeh ei. Äini Hnadaga ani ängtu mäi hüt. Awlaw Hnadaga la ani a dukhah khin khäl äng ha suih song bala tawk hüt. Awlaw Aigup pre a käh mawng Phoron hmawi mawh a lo khaw a, Hnadaga la ani a khrawng lung lawei hnäng ong awlaw engen pek. Äi koong Phoron la ani a Aigup pre sokhretih la mawng im sokhretih äng käh gong poh. Äi pänäng Aigup pre la Kanan pre a eken chak, äi äng dukhah ini bün hüt. Awlaw nangkei käh nuchen paw sawk khäl ini müt hüt. Äini Aigup pre a eisaw mäi khäh ting yaw bala Yakub la nangkei nu chen paw sawka täkchah krängak äiya eteh hüt. Sät hnih ini chet khaw a Yosep la ata tih a ani u äm atakei. Äi khaw a dä Phoron la ani imsaw krong hmawt. Äi pänäng Yosep la ani paw Yakub awlaw i imsaw khäla ini lo aih chak saw koong sidawng pek. Anih ükütni seh gip gala pochong hngaw ini mäi hüt. Yakub Aigup pre a echet, awbawng pänäng äiya ani dü. Awlaw awbawng pänäng äi pochong lei hnih hngat pänäng hngat ini düal. Anih yok Sikhim mräh a lo hmueyal bala phul hmueyal. Ni cho la che Awbraham la Sikhim mräh a käh Hawmor chaw känäng hĕn poisa äng hleh yei hüt saw. “Awbawng khokum pänäng itih khawa Awbraham khäka Hnadaga la khawmei hüt saw ikhin luih hütäm, äi khaw a ni Aigup pre a nangkei khrawng mawmawt ini paw. Äi pänäng Aigup pre a awlaw hngat mawng thänei. Ani la Yosep krong iha hmawt hütah. Äi mawng la khrawng khäla kramei hüt. Äi kramei hmueitih khrawng khäl che nangkei nuchen paw sawk. Anih käh luhdül äng lotha tih chaw chuhnu kheni dü hmawna apranga chi tawk sawk.” Äi khin äng Mosi luhdül äng lo hüt. Ani mawmawt pawyei hüt. Kho khraw thum ani a im duka tawk hmuei. Äi pänäng ani a apranga tawk hmuei ni Phoron chuhnu la ani a chanei bala awchaw huih khrawnga poh. Mosi la Aigup khäl käh chok khrang kheni chok nawk awlaw ani ekheu la bi kawi äng ama hüt. “Mosi khokum hligip khaw a, ani Isawlael saw khäl äng akhomeyeih khiyang. Aigup saw hngat la Isawlael saw hngat äng übünak poh ei saw hmu bala ani la äi Isawlael saw a kuaih khiyang. Awlaw äi Aigup saw a tu bala hum thungeyal. Mosi la khin hüt, Hnadaga la ani sumei bala anih a khiyawtalaih saw ting ani khrawng khälla ini yawkchu ai. Äini anih la äi yawchu hüt u. Äi hnüp pänäng Mosi la Isawlael saw pai hnih ihnih bopeisaw uhmuh.” Äi khaw a ahnih a ihngia laih koong ani la tak, “Khin hnih, nang hnih che Isawlael ta nawu häih. Iya nang hnih ni huih ihnih bopei saw äm?” Äini anih dukäng käh sĕ hlütih la Mosi a chah ak pawta tun bala tak, “Keinih lukhrung äng ula nanga khiyuptih la tara bitih ini poh saw äm? Yawn täh a Aigup presaw hngata nutuk saw huih kei a ha ini tukaih khiyang saw ei?” Ni kheu yawk ni Mosi chenal bala Midiyawn pre a amäi yal. Äiya ani a awchaw pai hnih thänei. Äi pänäng khokum hligip lüm. Hnüpak khaw a Sinai khuyung kena käh täu lung ching a choi bala mäitih chompo äng Mosi la Hawn natchaw hngata hmuh. Ni hmu bala Mosi awmaw. Mawtchaw sotaih koong ekena chet ni ani la Boi käh sam yawk, “Kei nang nuchen paw sawk käh Hnadaga, Awbraham, Aijak la Yakub käh Hnadaga. Äi khaw a Mosi chün chüna ke awlaw äi pawta sotaih saw bang eseng khri tawei tiah.” Hnadaga la ani a tak, “Nathanap sutei, iyaäm nang naja dün la che asanh chang saw la dä. Aigup pre a Kei käh khrawng khäl kuluh nawk ini hmuei saw Kei kuhmuh khäh. Anih ini kapsaw Kei kawyawk khäh. Äi koong Kei anih a kähläh alaih saw kolo saw. Kei tua nanga Aigup pre a kini teh alaih saw.” Istiphen la awlaw hawu, “Ni Mosi ni äi khrawng, u a Isawlael saw khälla lawei ah pak ni huih ini tak hütäm, ‘Hngat la ha nanga pre khiyuptih la tara bitih anang poh khäh ei?’ Choi bala mäitih chompo äng Mosi a adawneyeih saw koong Hnadaga la hawn natchaw hngata teh. Hnadaga la upum kädäng la, ni Mosi a Isawlael khiyuptih la hlätal tih huih po bala Aigup a teh hütsaw. Ni Mosi la dä Aigup pre känäng Isawlael saw khäla thoh bala loal hüt saw. Awlaw Aigup pre, mret sen la täu lung chinga khokum hligip daraih awbawng nawmaw nawkaih saw bi bi hüt awlaw a hmat la dawn hüt. Ni Mosi la dä Isawlael saw khäla tak hüt saw, ‘Nangnih käh Hnadaga la nangnih Isawlael saw duk känäng dä kei huih Hnadaga sidawng hiyawktih hngat poaih saw. Ni Mosi dä täu lung chinga Isawlael sawng äng nangkei nuchen paw sawk khäl äng mäi hüttih. Mawng hawn natchaw la Sinai khuyunga kräu pui nawk hütäm, ni Mosi dä äi hawn natchaw ängtu äiya mäi hütsaw. Awlaw nangkei a khrawng pekaih saw koong Hnadaga känäng heng dün kheu ni Mosi la dä äiya bün hüt saw.’” “Äini nangkei nuchen paw sawk la Mosi kheu khin u, ani a ha lawei u. Awlaw bang anih Aigup pre a ini krawnalaih saw dä ini hlü.” Äi koong anih la Arawn a ini tak, “Keinih a lawm khrawng dawnaih tih ulupchaw khäl khrawng popek. Iyaäm keinih a Aigup pre känäng khrawng thoh al tih Mosi i thänei saw äm keinih hmawt unga.” Äi khaw a anih la sel heu chaw huih lupchaw hngat ini poh. Äi hmawi mawh a ini hlu awlaw anih la äi ini poh saw koong päi hngat ini poh ei. Äini Hnadaga la anih pawt känäng awhmawi hleh eyal awlaw anih la hawna käh asĕ, khoni la khraw a ini rosi saw läktäng anih a tawk. Ni huih kawchawng chawng dä Hnadaga sidawng hiyawktih khäl käh boih hiyol äng yoei bala mäi saw, ‘Isawlael saw khälo, täu lung chinga khokum hligip nini mäi khaw a, nangnih kei koong mäksetdava hiyah khaw awhngaw vawn hlu hüt chu. Awlaw bang nini rosiyeih saw koong mawng lupchaw bang nini poh hütäm, äi Molok phawrajang kün chula nini chih, Awlaw Riphawn asĕ phawra lupchaw a che nini khäh hüt. Äi koong Kei nangnih a Babil pre känäng awhlawm hlaw a kanang teh a laih saw.’ Hnadaga käh thung tawk dün Hnadaga rosi dün tambu täu lung chinga nangkei nuchen paw sawk khäl äng tutu mäi hüt. Hnadaga la Mosi a tak hüt saw huih awlaw awdawn saw huih dä anih la äi Hnadaga rosi dün tambu opoh hüt saw. Hnadaga la awhngaw yapsaw khäla tämal bala anih a äpängeyal sawk. Äi pänäng, Yosua la nangkei nuchen paw sawk khäl Mosi la khin ni pre a ini loal. Äi khaw a anih ängtu äi Hnadaga rosi dün tambu ini känäng ini loeiyal. Äi khaw a Hnadaga rosi dün tambu Dawut mawng khin täh äi pre a mäi hüt. Dawut lukhrunga Hnadaga piyaw. Äidä Dawut la Yakub käh Hnadaga mäidün im sawk pekaih saw koong awhawuvei hüt. Äini Solomon la dä Hnadaga koong im sawk pek hüt saw. “Äini khrawng khälla ini sawk pek saw im äng elensum Hnadaga mäyah. Hnadaga sidawng hiyawktih la hawu hüt, Boi la hawu, “Hawn pre che Kei käh nawn, luhdül che Kei käh kokho kawtawkei dün la. Kei koong nang mawnga im nawsaw kaih saw äm? Kei küdüm dün la maw a äm? Ni vawn khäl Kei kupum kädäng la bi hüt nga ei? “Deng mawh khrawng khälo!” “Nangnih nini hnaw la nini lung che Yudi hiyahtih khäl huih dä. Awlaw nangnih ha nangnih nu chen paw sawk huih kawchawng chawng. Nangnih sawkbrat Asanh chang Khraw a kakei chula nini mäi. Nangnih nuchen paw sawk la kuluh naw u saw Hnadaga sidawng hiyawktih hngat ha mäi ei? Ayang äng konghmuh sang hngasaw hngat loaih saw ting hawu tih Hnadaga sidawng hiyawktih khäla bang anih la ini tuk hüt. Tua nangnih Ani a kramei chula nini tuk. Hnadaga la hawn natchaw kutäng nangnih koong dä thung khäl aw awp hüt saw. Äini nangnih dä äi Hnadaga thung khäl bünei chula laweyah tih.” Ni kheu khäl yaw ula hngasaw elenchaw khäl mawmawt ini man pok awlaw Istiphen käh awhngaw phak mäi ula ini haw la ini haw ini ei yei. Äini Istiphen Asanh chang Khraw äng luih bala hawn pre pawta sot ni Hnadaga käh a wachang hmuh. Awlaw Yĕsu Hnadaga set pawta ja bala mäi saw hmuh. Ani la hawu, “So khäl! Kei hawn pre hongei bala mäi saw awlaw Luhchaw Chaw Hnadaga käh set pawta ja bala mäi saw ku hmuh.” Äi äng khrawng khälla athak hek ula ini kut äng ini hnaw ini bingei. Äiche anih kheni la utu Istiphena ini chuk nawk. Ani a mräh känäng thoh al ula lungpel ini khong nawkaih saw ini chah. Awlaw sawksi khälla anih käh bayu sutei ula Sol ting mingei nawtih hngat chong krawng chaw kho chou a ini tawk. Istiphen a lungpel ini khong nawk khaw a, ani la suh tongei bala hawu “Boi Yĕsu o, kei khraw a laweyal.” Äi pänäng ani khogru dül äng om bala hawu, “Boi o, ni epret koong anih a dam äng khraw ai ti.” Ni kheu hawu bala che ani dü. Sol la ha Istiphena ini tukaih saw hlü hüt. Äi khin khäl äng khrawng khälla Yĕlusalema käh yumtih sawng khäl kuluh nawkaih saw ini chah. Teh hmueitih hawuah yumtih kheni Yudia la Samali pre lekchaw a ini khrih ei chak. Hnadaga rositih pochong hnih thum la Istiphen käh yok ini phulal awlaw äi koong mawt ini kap o ei. Äini Sol la äi yumtih sawng khäla akhrah aih saw sot. Im täng im täng chet bala Yĕsu yumtih hmutaw pawtaw khäla lat bala thong ima thawn. Khriyei chak tih yumtih khälla ätän täna chet ula Krito käh sidawng pawi ini hiyawk. Äi khaw a Philip la Samali a käh mräh len hngata chet bala che Mesaya käh sidawng hiyawk. Khrawng khälla ani kheu yaw ula awlaw ani käh nawmaw nawkaih saw bi bisaw hmu ula, ani kheu ini lung khrawei ula ini khin. Awbawng khrawng känäng khrawse khäl hek ula ini thokal awlaw chakei hnängah tih la chektih lawgase khäl ha ini pawyal. Äi äng äi mräh a käh khrawng khäl mawmawt ini piyaw. Simon ting mingei nawtih khrawng hngat äiya mäi hüt. Ani la ayang khaw känäng bang äiya hmäng dawn hüt. Ani la ikhi kha Samali saw khäl a hmäng dawn bala maw sawk chi hüt. Awlaw upuma elenchaw hngat ting chi takei. Awlaw äi mräh a käh sanglaisu, mäitih üküt nila ni ani kheu ini khin hüt. Khrawng khälla ini hawu hüt, “Ani dä Hnadaga käh äi tha, mawng tha a elensum tha ting khrawng khälla ini hmawt äm.” Khrawng khälla ani kheu ini khin hüt. Iyaäm awbawng hnüp khaw thouh ani la anih a hmäng dawdawn bala awmaw sawk hüt. Äini Philip lo ni ani la hawu saw Mawng Hnadaga käh hawn pre la Yĕsu Krito käh sidawng pawi krong anih la ini yumei. Äi khaw a hmutaw pawtaw hang hang la tuilüh ini lawkei. Äi Simon la ha yumei bala che tuilüh lawkei. Äi pänäng ani Philip äng tutu mäi awlaw a hmat bi la elen elen nawmaw nawkaih saw bi khäl hmu bala che awmaw. Samali khrawng khälla Hnadaga kheu ini yumei ting Yĕlusalema käh teh hmueitih khälla ini yawk ni, Pitol la Yohana anih la äi khrawng khäl khäka ini teh. Pitol la Yohan äiya ihni phaw ni, anih la Asanh chang Khraw bünei hnäng hmawna a hnih la yumtih khäl koong suh i hni tong. Iyaäm äi khaw a anih hngat äng ha Asanh chang Khraw lo hütah. Anih la Boi Yĕsu Krito ming äng tuilüh ini lawkei hüt. Äi khaw a Pitol awlaw Yohan la anih khrung äng ihni kut ihni tawkei, äiche anih la Asanh chang Khraw ini bünei. Pitol awlaw Yohan la yumtih sawng khäl khrung äng ihni kut ihni tawkei ni, Asanh chang Khraw anih la ini bünei. Simon la äi hmuh ni awhawu, “Kei nang hnih a awmawn kanang pekai, nangnih a ni huih tha anang pek khaw. Kei ha khrawng khäl khrung äng kukut kawtawkei hi anih la Asanh chang Khraw bünei hmawna.” Äini Pitol la ani a tak, “Hnadaga la nangkäh awmawn khrak chak heh, iyaäm nang nikhin Hnadaga käh pisih awmawn äng hleih nübün! Keinih käh ni bi äng nanga nuwui la näpäng saw mäyah, iyaäm nang lung Hnadaga mik äng prongah. Nangkäh ni pawyah saw tawk känäng nulung hleyeyal awlaw Boi khäka suh tongei. Äihi nulung äng käh ni huih pawyah saw tawk khäl koong Ani la ähläh anang pekal nawk theih. Kei kuhmuh tun, nangkäh lung lawphah äng luih awlaw nang ngulai äng heng nawei tila nämäi.” Simon la Pitol awlaw Yohana tak, “Nang hnih kei koong Boi khäka suh khrawng tong pek hnih, nang hnih nihni hawu saw iha kei äng khraw ah hmawna.” Äi pänäng Pitol awlaw Yohan la Boi kheu ihni hawu awlaw Boi Yĕsu krong äng sawksi ihni thok. A hnih Yĕlusalema ihni krawnal lawma Samali a käh awbawng nama sidawng pawi ihni hiyawk. Boi käh hngat hawn natchaw la Philip a tak, “Ächän poei tila mrongh phak pawta käh Yĕlusalem känäng Gaza mräh pawta chettih lawm äng chet.” Äi khaw a Philip äi pawta echet. Lawma Ithiopia pre a käh alang gong mawng bi bitih hngata okhom. Ani che hngat bungsiri, Ithiopia a käh mawng nu käh awmawn sotaih saw ani lukhrung äng mäi hüt. Hnadaga a rosiyeih koong äi bitih Yĕlusalema lo hüt saw awlaw ani pre pawta krawnal tün hüt saw. Im pawta krawnal khaw a ani la ani käh se chondün äng om bala Hnadaga sidawng hiyawktih Aijaya käh Kiyam phem boih phawt tün hüt. Äi khaw a Asanh chang Khraw la Philip a tak, “Äi se chondün khäka chet awlaw äi äng tutu chetei.” Philip chon bala äi khäka chet awlaw Hnadaga sidawng hiyawktih Aijaya käh boih känäng awphawt saw yawk. Philip la ani a ihi, “Nang naw phawt tün saw nawyawk chuei?” Äi bitih la hawu, “Hngat la ha khrawng phawngh pekal u khaw iba kawyawk chu aih saw äm?” Ani la Philipa se chondün äng kawi bala ani äng omaih saw koong panei. Äi hngasaw la Kiyam känäng phawt saw che ni, “Ini bätaih saw koong samphomah lawk hmuei saw huih Ani a ha lawk hmuei. Uhmul ni awtaih khaw a samphomah chaw ihuih mengah pak mäi äm, Ani ha äi huih ektiyapak mäi. Ani a siri pek hmuei, Ani la hisaw tara bünei ah. Hngat la ha ani chen be hawu hnäng thaw hnawh u, iyaäm ni luhdül äng ani sawk päih hüt tün.” Äi hngasaw la Philipa tak, “Hnadaga sidawng hiyawktih la ni u krong hawu sawäm, äi kei a ata? Ani upum krong hawu sawvei, hiyah khaw awhngaw käh krong hawu saw ei?” Äi khaw a Philip la Kiyam känäng phawt pek bala che Yĕsu käh sidawng pawi ani a hawu pek. A hnih lawm äng chetpe chetpe tui mäidün la hngata ihni lo. Äi khaw a äi bitih la tak, “So! Niya tui mäi khäh, iya kei tuilüh laweyeih nga sawäm?” Philip la ani a tak, “Nulung känäng nuyumei hi nang tuilüh nawlawkei hnäng.” Äila takal, “Ä, Yĕsu che Hnadaga chaw ting kei kuyumei khäh.” Äi bitih la se chondün dümaih saw tak, äiche a hnih pochong hnih ni tui äng ihni kom. Äidä Philip la äi bitih a tuilüh pek. Anih tui känäng ihni thouwal khaw a Boi käh khraw la täk ting Philipa chih al. Äi bitih la ani a hmual tiah. Äi khaw ani piyaw piyaw bala ima chetal. Philipa Ajota mräh a ini hmuh al. Ani Koisoriya a phaw ah saw sawgraw mräh täng mräh täng sidawng pawi hiyaw hiyawk bala mäi. Äi khaw a Sol la Boi Yĕsu a yumeitih khäla utukaih saw ting awtawk. Ani pujawtih gong khäka chet. Damaska mräh dukäng ätän tän la a käh Yudi ini lumeidün ima käh elenchaw khäla pekaih saw koong ani la pujawtih gong känäng chaw khäl lawkei. Yĕsu lawm äng mäitih hmutaw pawtaw üküta ni übün khaw khon bala che Yĕlusalema lo hnäng hmawna chaw hawuvei. Sol Damaska mräh ken täh a lo khaw a täk ting hawn känäng hngat awa lo bala eken kheni awa chak. Ani dekäng kru awlaw asam hngat la ani a taksaw yawk, “Sol, Sol, nang keiya iya ini kuluh nawk saw äm?” Sol la hi, “Boi o, nang u äm?” Äi asam la tak, “Kei Yĕsu, nang nukuluh nawk saw khrawng.” “Nang thou tila mräh a chet, i nopoh aih lah saw äm äi nanga tak hmueyei.” Ani äng mäitih äi hiyawh lokong ini kesaw kräu hnäng tih u. Awlaw äiya ja ula ini mäi. Anih la äi asam ini yawk, äini hngata ha hmu hüt u. Äiche Sol dek känäng thouwal, äini imik äng hmuei tiah. Äi khaw a ani phäutih la ani a sin ula Damaska a ini chih al. Hnüp thum Sol la imik äng hmueiyah awlaw iha ei o ah. Damaska a Anania ting mingei nawtih yumtih hngat mäi hüt. Boi la ani a akraya dawnei bala che tak, “Anania!” Ani la tak, “Boi o, kei niya dä.” Boi la ani a tak, “Oprongh ting mingei nawk saw lawm äng chet. Äiya Yuda ima Sol ting mingei nawtih Tarso a käh khrawng hngata asui. Ani la suh tongei tun. Sol la akraya hmuh, Anania ting mingei nawtih khrawng hngat lo bala ani pumäng ukut tawkei ni u hmuh eyal saw.” Anania la tak, “Boi o, kei awbawng khrawng känäng ni khrawng käh krong kawyawk khäh, ihuih Yĕlusalema käh Nang asanh chang khrawng khäla kuluh nawk saw. Awlaw Nang ming äng suh tongeitih khäla mawnaih saw koong pujawtih gong khäl känäng ana lawei bala ani niya lo.” Boi la Anania a tak, “Chet, iyaäm Yudi hiyahtih khäl, awlaw anih käh mawng khäl khäkä awlaw Isawlael khäl khäka Kei kheu hawu aih saw koong Kei ani a keheh lei. Awlaw Kei koong ani la i hiyawh bawng waih khawmaih lah saw äm, äi Kei ani a kawdawnai.” Äi khaw a Anania im duka wang awlaw Sol kantha äng ukut tawei bala che tak, “Kawnawu Sol o, nia noloaih khaw a lawma anang dawnei hüttih che Boi Yĕsu. Ani kädäng la kei a nia eteh saw dä. Nang nimik äng nu hmueh eyalaih saw tha awlaw Asanh chang Khraw äng luih hmawna.” Äi äng tutu Sol mik känäng ilip huih hngat awkraw al ni, ani la imik äng hmuh eiyal. Äi pänäng ani thouwal. Anania la ani a tuilüh pekal. Awlaw ani la eei okal ni atha büneyal. Sol Damaska a yumtih khäl ängtu hnüp hnih thum mäi. Äi äng tutu ani chäjä Yudi ini lumeidün im khäla chet bala tara haw. Ani la hawu, “Yĕsu dä Hnadaga chaw.” Ani kheu khintih khälla maw ula ini hi chi, “Ni khrawng Yĕlusalema Yĕsu ming äng suh tongeitih khäla kuluh naw hüttih hiyah ei? Niya ha Yĕsu yumeitih khäla mawnaih saw koong lo. Awlaw Yĕlusalema pujawtih gong khäl khäka chih yeih saw koong lo.” Äini Sol tara haw saw mawmawt ma ma a thänei. Awlaw Yĕsu dä Mesaya ting awkhrawk. Äi äng Damaska a käh Yudi hiyahtih khäl iha kräu hnäng tiu. Awbawng khomhnüp pänäng Yudi khäl lumei ula Sola ini tukaih saw koong ini kram, Äini Sol la anih käh kram awhmawt. Ani a ini tukaih koong Yudi khälla mräh a käh tamkha khäl äng ü hnüp awyawn chong ula ini mäi. Äini yawnak khaw a Sol käh tebeih khälla ani a tong chaw hngat äng jäi äng khon ula mräh lung pawng känäng ini khomal. Sol Yĕlusalema loal bala Yĕsu a yumeitih khäl ängtu aw vawngeyalaih saw sot, äini anih la ani a ini keh. Iyaäm Sol lälä Yĕsu yumtih hngat dä ting anih la yumei hnäng u. Äi pänäng Banaba ani ku a lo awlaw teh hmueitih khäka chih pui nawk. Sol la iba Boi Yĕsu a lawma hmuh saw äm, awlaw äi Hnadaga la ani a ihuih kräu puinawk saw äm, äi Banaba la teh hmueitih khäla hawu pek. Ani la awlaw hawu pek Sol la Damaska a ihuih Yĕsu ming äng keyah pak tara haw hüt saw äm. Äi pänäng Sol Yĕlusalema teh hmueitih khäl ängtu mäi awlaw ani chet chonei. Awlaw esengkhri äng Boi krong äng tara haw. Mawng Yudi khäl Grik be äng ini kräu äm, äi khäl äng ani ha Grik be äng kräu awlaw ini toksakei. Äini äi Yudi khälla ani a ini tukaih saw ini hno. Yumtih khälla ni kheu ini yawk ni ani a Koisoriya mräh a ini chih, äi pänäng Tarso mräh a ini teh al. Äi khaw a Yudia, Galil awlaw Samali pre lekchaw a yumtih sawng khäl äng jelkhiyamsa mäi hüt. Asanh chang Khraw tha äng Boi a kenkeh ini poh. Awlaw ulyah äng yumtih sawng nung li äng ini nung hüt. Pitol ätän täna cho chonei bala Ludda nama mäitih Hnadaga khrawng khäl khäka olo. Äi nama Anias ting mingei nawtih khrawng hngat mäi hüt. Ani khokum set daraih chakei hnängah pak phawk äng hiyawl bala mäi hüt. Pitol la ani a hmu bala che tak, “Anias o, Yĕsu Krito la nanga awpawi ini poh al. Thou, nang käh phawk hlokeal.” Äi äng tutu ani thou bala ja al. Äi khaw a Anani a hmu ula Ludda la Saron nam saw khäl Boi Yĕsu lawm äng ini loal. Jopa mräh a Tabita ting mingei nawtih tebeih hngat mäi hüt. Grik be äng ani ming che Dawrkas. Ni nawphawngal khaw sawki. Ani la awsawk mäyak ni bi pawi bi hüt awlaw sanglaisu khäla uku hüt. Ani opah thänei bala düni ani khrawng khälla ani a tui hlok sawk ula ädäma käh täka ini tawk. Jopa känäng Ludda hna hnak hlawm hlaw ah. Pitol Ludda a dä ting Jopa a käh yumtih khälla ini yawk ni, anih la khrawng pai hnih a ani khäka ni sidawng hiyawkaih saw koong ini teh, “Nang jotjota keinih khäka lo e.” Äi khaw a Pitol la poei bala a hnih ängtu chet. Anih ana phaw ni ani a ädäma käh täka ini khawi. Äi khaw a hmeinu kheni Pitol wan chek ja ula ini kap. Awlaw Dawrkas sawk mäi hüt khaw a awtawk hüt saw bayu la ilh chaw khäl ani a ini dawn. Äi khaw a Pitol la anih kheni a äi känäng thoh al chak bala ani la khogru düläng suh tongei. Äi pänäng äi hmutaw yok pawta hleh ei bala che tak, “Tabita, thou!”. Äi äng ani la imik hongeal awlaw Pitol a hmuh ni thou bala omal. Äi khaw a Pitol la ani a ukut bin bala thou waih saw koong uku. Äi pänäng ani la yumtih khäl awlaw hmeinu khäla bekei bala Darkas eheng khäh ting dawn. Ni kheu Jopa mräh a käh üküt laa ni ikhrih ei chak awlaw awbawng la Boi Yĕsu a ini yumei. Pitol Jopa a Simon ting mingei nawtih khrawng hngat ima awbawng hnüp mäi hüt. Ni Simon la che awn vun bi bi hüt. Koisoriya mräh a Kawlnelio ting mingei nawtih hngat khrawng mäi hüt. Ani che Itali sawng äng käh Rom soloi gong hngat mäi hüt. Ani la Hnadaga a rosi hüt. Ani awlaw ani imsaw la Hnadaga kenkeh ini poh hüt. Ani la ulung prongh bala Yudi sanglaisu khrawng khäla awmawn pek chi. Awlaw sawkbrat Hnadaga khäka suh tongei chi. Hnüpak khaw a ümülawm paithum huih äng ani la akraya hngat hmuh. Hnadaga käh hawn natchaw hngat lo bala tak, “Kawlnelio!” Kawlnawlio la ke bala ihi, “Boi o i äm?” Hawn natchaw la krawn bala takal, “Nangkäh suh tong la sanglaisu khäla nepek saw khäl Hnadaga la hmawt khäh. Nang suh tong krawn nübünei yeih saw ächän mäi khäh. Nang tua Jopa mräh a khrawng te, Simon Pitol ting mingei nawtih apanei. Ani che awn vun bi bitih Simon ima gawlba mäi saw. Ani im che mret kawma dä.” Ni huih hawu bala hawn natchaw chetal. Kawlnawlio la a hngasaw pochong hnih awlaw Hnadaga a chetchaw tih konghmuh sang soloi hngata panei. Ni soloi che Kawlnawlio chetchaw tih. Ani la ükütni anih a hawu pek chak bala anih a Jopa mräh a teh. Äi hnüp pänäng äi khrawng khäl Jopha mräh kena ana phaw. Äi khin äng khosun huih a Pitolla suh tongeyeih saw koong tĕh khrunga kawi. Äi khaw a Pitol mawt buh dü ei awlaw eisaw eyeih khiyang. Khrawng khälla eisaw ini buh tun khaw a Pitol la hngat akraya hmuh. Ani la hawn hongei saw hmuh. Äidä awat saw äng käh ilh len kiu hli äng sin ula luhdül äng ini khom saw hmuh. Äi ilh äng ayapyap mäksetdava, dekäng yoeitih awlaw haw khäl ini mäi. Äidä asam hngat la Pitol a tak, “Pitol o thou! Tu tila ei.” Äini Pitol la hawu, “Boi o, ä häh! Kei krängak ha Yudi thung äng käh ei tawn unga saw vawn ei nga.” Äi khaw äi asam la awlaw krawn bala takal, “Hnadaga la ibang achang poh äm äiya nang sanh nah ting ta ai ti.” Ni khäl kräng thum thänei pänäng ilh hawna khawi hmuei yal. Pitol la akraya hmuh saw i thäneyeih saw äm ting tawk tun khaw a, Kawlnelio la teh saw khrawng khälla Simon im sui ula ini bün. Anih tamkha khäka ja ula ini mäi. Anih la Simon a panei ula ini hi, “Simon Pitol ting mingei nawtih gawlba niya mäi ei?” Pitol la äi khaw a akraya hmuh saw be tawkpe tun, äi huih khaw a Asanh chang khraw la ani a tak, “So, khrawng paithum la nanga suiya ini lo khäh. Thou! Awdawnga komal. Ütei naw ah pak anih ängtu chet, iyaäm anih a kei keteh saw dä.” Pitol la komal bala anih a tak, “Nangnih nini sui saw khrawng kei dä. Iya nangnih nini lo saw äm?” Anih la ini hawu, “Jal gong Kawlnelio la khrawng teh saw. Ani che konghmuh sang la Hnadaga kenkeh tih khrawng. Yudi yapsaw kheni la ani a hmawi ini pek. Asanh chang saw hawn natchaw hngat la nanga ani ima anang paneyeih saw tak, ani la nang kheu khin hnäng hmawna.” Pitol la anih a im duka hawn bala yawnak ini mäiyeih saw tak. Äi hnüp pänäng Pitol äi khäl ängtu Kawlnawlio ima chetaih saw ini chah. Jopa mräh a käh yumtih hngat pai hnih ha Pitol ängtu ini chet. Äi hnüp pänäng anih Koisoriya a ana phaw. Äi khaw a Kawlnelio la ani khanbawn awlaw äkäisang khäl äng anih a chong bala mäi. Äidä Pitol Kawlnelio ima a phaw ni Kawlnelio Pitol äng khomei. Ani la khokgru dül äng Pitol a khäh. Äini Pitol la thouh wal bala tak, “Thou! Kei ha khrawng hngat dä.” Kawlnawlio äng kräupe kräupe Pitol im duka vawng. Äiya ani la awbawng khrawng ini chuh ei saw hmuh. Pitol la anih a tak, “Nangnih nini hmawt khäh, Yudi hngat Yudi hiyahtih äng mäichoh aih hiyah saw thung mäi khäh. Äini Hnadaga la kei a awdawn hngata ha sahnah tih ting hawu tawn nga. Äi koong Kei a anang bekei ni, kei kulung hlü äng kolo saw. Kei tua nangnih a kanang hi, iya kei a anang a panei sawk saw äm?” Äidä Kawlnelio la takal, “Kho hnüp hli khawngah ümülawm paithum huih äng ima suh kotongei khaw a, täkting khrawng hngat wa chawi chawi wat wat bala kei hmawi hmawh a aja. Ani la hawu, Kawlnelio o! Hnadaga la nang käh suh tong khin khäh awlaw nang sanglaisu khäla nepek sot saw ulung äng mäi khäh. Tua nang Jopa a Simon Pitol ting mingei nawtih khäka khrawng te. Ani mret kawma awn vun bi bitih Simon ima gawlba mäi khäh. Äi koong kei nang khäka khrawng keteh saw. Nang nolo saw mawt pawi khäh. Tua nangkei ükütni Hnadaga hmawi hmawh a ini mäi. Boi la ibang nawhawu aih saw anang takäm äi kini khinaih saw.” Äidä Pitol la kräuwaih saw chah, “Ihi khäh, kei kawyawk chu däk Hnadaga la khrawng kheni a lupkhiyang dä sot saw. Üküt yapsaw känäng ni ula bang Ani a rosi äm awlaw ihisaw ini bi bi kawi äm, Ani la anih a lawkei. Nangnih ni sidawng nini hmawt khäh, Isawlael yapsaw khäl koong Hnadaga la teh saw. Hnadaga käh jelkhiyamsa sidawng pawi Yĕsu Krito känäng dä lo saw. Ani ükütni käh Boi. Tuilüh pektih Yohan la tuilüh pek pänäng Galil täh kän chah bala Yudia täh a i thänei saw äm, nangnih ükütla ni äi sidawng nini hmawt chak khäh. Nangnih ni ha nini hmawt khäh, Hnadaga la Nazareta käh Yĕsu a ihuih Asanh chang Khraw la tha pek saw äm. Hnadaga Yĕsu ängtu mäi hüt koong, Yĕsu la bi pawi bi bala chet chonei hüt. Mannat tha la khiyup bala tawk saw khäl kheni a awpawi poh al hüt.” Ani la Isawlael pre la Yĕlusalem mräh a ibi hüt saw kheni äng nangkei sawksi ini mäi. Äini Ani a anih la krut äng bawt ula ini tuk. Äini Hnadaga la hnüp thum düna düsaw känäng thouwal awlaw khrawng khäla dawneyeih saw koong tak. Hang hang la Ani a hmu lah u. Äini Hnadaga la ayang känäng heh lei saw khälla dä ini hmuh lah saw. Düsaw känäng hengal bala thouwal pänäng u khälla Ani ängtu ini ei okaläm äi khäl che keinih. Ani la khrawng khäl khäka sidawng pawi hawu aih koong ana khrawng pek. Awlaw ha Ani a dä Hnadaga la dütih la hengtih äng käh tara bitih ting hngat pätpät heh leisaw. Äi krong äng sawksi thokaih saw ana khrawng pek. Hnadaga sidawng hiyawktih hang hang la Ani krong äng ni ini hawu hüt. Ula Ani a yumei äm, Yĕsu ming tha äng Hnadaga la ani a ngulai känäng hläh pekalai. Pitol kräu tun khaw a äiya ekheu khintih khäl kheni lukhrunga Asanh chang Khraw olo. Jopha känäng Pitol ängtu lotih Yudi yumtih khälla äi hmu ula mawt ini maw. Iyaäm Yudi hiyahtih khäl khäka ha Asanh chang Khraw lo saw. Yudi hiyahtih khälla ayapyap be äng kräu ula Hnadaga ini phiyaw awlaw ini rosi saw Pitol äng lotih khälla ini yawk. Äidä Pitol la hawu, “Ni khrawng khälla keinih huih Asanh chang Khraw ini bünei. Tuilüh nepekaih saw koong ula nga hnängai äm? Äidä Pitol la anih a Yĕsu Krito ming äng tuilüh ini pekaih saw tak. Äi pänäng khrawng khälla awlaw hnüpak hnih mäyeih saw koong ini khawh ei.” Yudi hiyahtih khälla Hnadaga käh kheu ini lawkei saw äi sidawng teh hmueitih awlaw hang hang Yudia a käh yumtih nawu khälla ini yawk. Äi pänäng Pitol Yĕlusalema krawnal khaw a, Yudi yumtih khäl äng käh pochongah hnih la ani a epret ini khrawk. Anih la ini hawu, “Nang Yudi hiyahtih ima vawng tila anih ängtu neei ok.” Äi khaw a Pitol la achah täh kän ibang thänei hütäm anih a äi thänei hüt saw kheni hawu pekal. “Kei Jopa mräh a suh kotongei hüt khaw a kakraya hngat ku hmuh. Ilh len huih hngat ikiu kiu hli äng sin ula hawn känäng ini khomsaw awlaw kei kena ini losaw kei ku hmuh. Kei mawmawt chaw ilh duk pawta kosot ni, äi äng ayapyap ini chanei saw mäksetdava, täupeche, dekäng yoeitih sawk mawh awlaw haw khäl ini mäi saw kuhmuh. Äi pänäng asam hngat la ataksaw kaw yawk, ‘Pitol thou! Tu tila ei.’ Kei katak, ‘Ä häh, Boi o, Kei krängak ha Yudi thung äng käh ei tawn unga saw vawn ei nga.’ Äini hawn känäng asam hngat la kei a krawnak a takal, ‘Hnadaga la ibang asanh poh äm, äiya nang sahnah ting ta ai ti.’ Ni huih kräng thum thänei, äi pänäng hawna awlaw krawnak khawi hmueyal.” Äi äng tutu, Khrawng pai thum kei mawng ima kämäi hütäm äi im sot kena ana ja. Anih che Koisoriya känäng teh ini hmuei hüt. Asanh chang Khraw la ütei naw ah pak anih a äphäu pekaih saw atak. Ni pochong sok nawutih khäl ha kei ängtu Kawlnawlio ima ini chet hüt. Äi pänäng keinih ani ima kana vawng. Hawn natchaw a ani la ima iba hmuh saw äm, äi keinih a khrawng hawu pek. Hawn natchaw la ani a tak hüt, “Jopa mräh a khrawng te tila Simon Pitol ting ini taksaw apanei.” Ani la kheu anang hawu pekai, äi kheu äng Hnadaga la nanga awlaw nang imsaw khäla ngulai känäng anang khiyawta lai. Äi pänäng kei kräu aih saw kachah ni, nangkei khrung äng täkchah Asanh chang Khraw lo saw huih anih khrung äng ha olo. Äidä Boi Yĕsu la i hawu hütäm äi kheu kulunga kawyal, “Tuilüh pektih Yohan la tui äng tuilüh pek hüt, äini Hnadaga la nangnih a Asanh chang Khraw äng tuilüh anang pekai.” Nangkei Yĕsu Krito a yumei pula Asanh chang Khraw ihuih ini bünei hütäm, tua äi huih Hnadaga la Yudi hiyahtih khäla ha Asanh chang Khraw epek. Äihi Hnadaga käh bi nga aih tih kei u äm? Anih la ni khäl ini yawk ni keleih tiya pak Hnadaga a phiyaw al ula ni kheu ini hawu, “Hnadaga la Yudi hiyahtih khäla ha ini lung hleyeyalaih saw la päiyah saw sawk büneyalaih saw koong ikhin pek khäh.” Äi khaw a Istiphen tuk hmuei ni Yumtih sawng khäl kuluh nawk ini hmuei. Äidä Anih Yĕlusalem känäng Phonisi, Saipru, Siriya pre a käh Antokia a ükütni a ini khrih ei chak. Awvawng che Phonikiya, Saipru awlaw Antokia a chet ula Yudi khäl khäka jiji sidawng pawi ana hiyawk. Awlaw awvawng che Saipru la Kurini a käh, anih Antokia a chet ula Yudi khäl awlaw Yudi hiyahtih khäla Boi Yĕsu käh sidawng pawi ana hiyawk. Boi käh tha anih lukhrunga mäi hüt. Äi koong awbawng khrawng la ini yumeyal awlaw ini lung hleyal ula Boi Yĕsu pawh a ini loal. Ni sidawng Yĕlusalema käh yumtih sawng khälla ini yawk. Äi koong anih la Banaba la Antokia a ini teh. Banaba äiya a phaw ni ani la hmuh, Hnadaga la khrawng khäla ihuih pisih peksaw äm. Ani la äi hmu bala mawt piyaw. Ani la anih a ini lung duk känäng Boi Yĕsu a yumei ula ini mäi yeih saw koong ekhet äng tak. Iyaäm Banaba che mawt khrawng pawi. Ani Asanh chang Khraw äng luih bala Yĕsu a mawmawt yum. Awlaw awbawng khrawng la Boi Yĕsu a ini yumeiyal. Äi pänäng Banaba la Sola sui a Tarso mräh a chet. Banaba la Sola bünal ni ani a Anitokia a ichih al. Banaba la Sol la kumthiya yumtih khäl äng lumei chi häih la awbawng khrawnga i hni chok. Antokia a käh yumtih sawng khäla dä täkchah “Khristan” ting panei ini hmuei saw. Äi khaw a hngat pai hnih Hnadaga sidawng hiyawktih Yĕlusalem känäng Antokia a ini lo. Äi khäl äng käh hngat Hnadaga sidawng hiyawktih Agabas la Asanh chang Khraw tha äng ja bala hawu, “Luhdül kheni a kenai.” (Ni kheu mawng len Kolodio kat äng ihisaw a thänei.) Äi khaw a yumtih khälla Yudia pre lekchaw a käh yumtih khäl koong nanga nang ini näng saw huih kumei ula awmawn ini sanaih saw ini kräuwei. Anih la Banaba la Sol kutäng Yudia a käh yumtih sawng äng käh elenchaw khäl koong awmawn ini san. Äi khaw a Mawng Herawt la yumtih sawng khäl äng käh hngat pai hnih a kuluh nawkaih saw chah. Ani la Yohan nawu Yakub a chimsawu äng tuk sawk. Äihi Herawt Mawng la Yudi khäl ini piyaw saw hmuh ni ani la Pitola ha a mawn sawk. (Ni thänei saw khäl is kaw ha päi thänei tun khaw a.) Äi pänäng Pitola thong ima a thawn. Soloi pochong hli la chi tän hli a chong ula ini mäi. Herawt la lätal päi pänäng Pitol käh tara biyeih saw koong khrawng hmawi mawh a loaih saw kram. Äi koong Pitola thong ima heng naw ula ini tawk. Äini yumtih sawng khälla kap oipe Hnadaga khäka Pitol koong suh ini tongpek. Herawt la Pitola Khrawng hmawi mawh a tara a lo khawngah käh yawna, Pitol soloi pai hnih kra a ip. Ani a siyol pai hnih äng soloi pochong hnih ängtu hen hmuei hüt. Äiya othong im tamkha a ha chongtih i hni mäi. Äi khaw a täk ting, Boi käh hngat hawn natchaw anih kena aja. Äidä othong im täk kheni wa chak. Hawn natchaw la Pitola hlün bala khak äiche tak, “Jot jota thou! Äi äng tutu Pitol kutäng käh siyol suteyal.” Äi pänäng hawn natchaw la Pitol la tak, “Khabaih watal awlaw thanap chumal.” Pitol la äi huih poh ei. Hawn natchaw la awlaw tak, “Ilh chaw watal tila kei hnüng äng lo.” Pitol ani hnung hnung äng othong täk känäng apranga thokal. Äini hawn natchaw la i poh saw äm, äi ihiyei hiyah ei, i ha hmawt khawng hütah. Ani la tawk ani la awmawng hmuh saw ting. A hnih täkchah chongtih awlaw äi pänäng käh chongtih lüm häih la mräh pawh a nechet hnäng saw thi tamkha kena i hni lo. Äi thi tamkha ani a ani hongei. Äidä a hnih thokal häih la lawm yumak i hni chetei. Äidä täk ting hawn natchaw la Pitol a hlät bala chetal. Äi khaw a Pitol la i thänei saw äm äi hmawtal. Äidä Ani la hawu, “Kei kawyawk chu ni lälä thänei saw dä! Boi la keiya Herawt mawng la Yudi yapsaw elenchaw khälla ini kram saw känäng ähläh a laih saw koong hawn natchaw teh saw dä.” Pitol la hmawteyal pänäng ani Yohan nu Meri ima chet. Äi Yohana Mak ting ha ini panei. Äi ima awbawng khrawng lumei ula suh ini tongei. Pitol la tamkha khek ni Roda ting mingei nawtih hngasaw nu hngat la tamkha honga lo. Ani la Pitol sam helh hnäng ni piyaw bala che tamkha hongah pak im duka chon bala sidawng hawu peka vawngal. Ani la hawu, “Pitol tamkha khäka ja bala mäi khäh.” Äi khaw a khrawng khälla äi hmutaw chaw a ini tak, “Nang nuluki krak saw ei!” Äini ani la awkrawn krawn tha äng hawu saw äng khrawng khälla ini hawu, “Khathi äi ani käh hawn natchaw dä!” Äini Pitol la sätäng khekhek bala mäi. Äi khaw a uyumtum äng sät ini hong ni Pitola ini hmuh. Anih mawt ini maw. Pitol la anih a ektiyapak ini mäyeih saw tak. Boi la iba ani a othong im känäng hläh al saw äm äi hawu pekal. Ani la tak, “Yakub awlaw awhngaw yumtih khäla ni sidawng hawu pek khäl. Äi pänäng ani äi känäng thokal bala awhngaw laa chetal.” Kho wa pänäng soloi khäl Pitol iba thänei äm, mawnga äm ting kawsaw gawraw ini thänei chak. Äi pänäng Herawt mawng la Pitola suiyalaih saw koong ana thoh. Äini chongtih khälla ani a bünal u. Herawt la chongtih khäla chäng sawk, äidä tukaih saw koong ana thoh. Ni khäl pänäng Herawt Yudia känäng chetal bala Koisoriya a hnüpak hnih mäi. Herawt mawng Tire la Sidon mräh a käh khrawng khäl lukhrunga mawt aman pok. Äidä äiya käh khrawng sawngak ini phrieyeih saw koong Herawt äng khomei a ini chet. Mawng im sotih Blastas a anih phak ini poh ei maw, ani la anih a ku hnäng ong. Äi pänäng anih jelkhiyamsaaih koong Herawt khäka ini chet. Iyaäm anih presaw käh eisaw che Herawt mawng pre känäng dä chet saw. Kheu ini tawei saw hnüp äng Herawt la mawng wat wat bala mawng nawn äng om bala khrawng khäl äng kräu. Äini khrawng khälla athak hek ula ini hawu, “Ni che hnadaga kräu saw huih dä, luhchaw kräu saw hiyah.” Äi äng tutu Boi käh hngat hawn natchaw lo bala Herawta opah hmawna poh. Iyaäm ani la Hnadaga kenkeh po ah. Ani a phol chaw la ini ei, äidä üdü. Hnadaga käh kheu üküt niya ni i khrih ei chak. Äidä awbawng khrawng la Yĕsu a ini yumei hnäh. Äidä Banaba la Sol käh bi päih ni Yohan chipuinaw häih la Yĕlusalem känäng Anitokia a ini krawnal. Ni Yohana Mak ting ha ini panei. Antokia a käh yumtih sawng äng pochongak hnih che Hnadaga sidawng hiyawktih awlaw pochongak hnih che chokti ini mäi hüt. Anih ming che ni khäl, Banaba la homtih Simiyon awlaw Kurini mräh a mäitih Lukias. Awlaw khiyuptih Herawt äng tu chom prang hüttih Mawnhem awlaw Sol. Hnüpak khaw a anih ümüt mäi ula Boi a ini rosi tun khaw a Asanh chang Khraw la anih a tak, “Banaba la Sola kei mawng bi koong kapanei tunäm, äi bi ihni biyeih saw koong nangnih käh bi känäng a hnih a hlätal khäl.” Äidä anih ümüt mäi ula awlaw suh tongei ula a hnih lukhrunga ini kut ini tawkei. Äiche a hnih a ini teh. Asanh chang Khraw la Banaba la Sola teh ni ahnih Selukia mräh a i hnih chet. Äi känäng tuisampho äng kawi häih la Saipru songkawi saw laa i hni chet. A hnih Salami mräh a ahna phaw ni Yudi ini lumeidün im khäla Hnadaga käh sidawng i hni hiyawk. Äi khaw a Yohan Mak ha a hnih kuaih koong mäi hüt. Banaba la Sol songkawi saw la lüm chak häih la utuma käh Papho mräh a i hni lo. Äiya a hnih la bar Yĕsu ting mingei nawtih hmawndawraw hmawt tih Yudi hngata i hni khom. Ani la upuma Hnadaga sidawng hiyawktih ting khawmei chi. Äi hmawndawraw hmawt tih a Eluma ting ha ini tak. Ni khrawng che songkawisaw laa Khiyuptih Sergi Polas käh khanbawn hngat mäi hüt. Awlaw äi khyuptih che prengiya mawh mäi hüt. Sergi Pol la Hnadaga kheu khinaih khiyang koong Banaba la Sola ebekei sawk. Äini Banaba la Sol la i hni hawu saw khinah hmawna, Eluma ting panei hmueitih bar Yĕsu la Khiyuptih a nga. Awlaw Krito a yumei saw känäng khiyuptih a loa laih saw sot. Äidä Sol, ua Pol ting panei hmuei äm, ani la Asanh chang Khraw tha äng Eluma pawh a chok jok soei bala tak, “Nang Mannat käh chaw awlaw pawitih khäl khe käh lansu. Nang dukäng kramei la hlei nawk jiji dä mäi. Nang sawkbrat ni Boi käh ihisaw lawtila hiyah saw a nopoh aih saw nosot. So, Boi la nanga damäng anang khrawkaih saw hnäh. Tana bawng chaw koong nang mik müaih saw hnäh. Äi äng tutu hnawng la uhiyung la ani a kün ula ini tawk. Ani la jäjä bala ichih eya laih sawk saw koong khrawng sui hnäh. Ni thänei saw khäl khiyuptih la hmuh bala ani la Yĕsu a yumeyal. Boi käh chok hawu äng ani mawmawt awmaw.” Äi pänäng Pol la ani phäutih khäl Papho la hlät ula tuisampho äng Pampiliya pre lekchaw a käh Pawlga mräh a ini chet. Yohan Mak äi khaw a anih hlät bala Yĕlusalema krawnal. Äi pänäng Pawlga mräh känäng Pisidiya pre lekchaw a käh Antokia mräh a ini chet, Äidä düm khomhnüp loni anih Yudi ini lumeidün ima ana om. Khrawng khälla Kiyam känäng käh Mosi käh thung la Hnadaga sidawng hiyawktih khäl käh kheu ini phawt pän. Äidä Yudi ini lumeidün ima käh elenchaw khälla Pol la Banaba a ni huih kheu ini sin, “Nawutih khälo, Khrawng khäla ulyah nini pekaih saw kheu huih dä awlaw mäi pe hi, hawu khäl.” Äi khaw a Pol la ja bala ukut tunei bala hawu, “Niya Hnadaga rositih Isawlael khälla Yudi hiyahtih khrawng khälo, nangnih khin khäl! Isawlael yapsaw khäl käh Hnadaga la keinih nuchen paw sawk khäla helh hüt. Anih Aigup pre a ini mäi hüt khaw a ajap lensaw poh. Hnadaga la Ani käh tha äng äi pre känäng othoh al. Awlaw Ani la khokum hligip daraih ala honga anih käh chak chunei hüt. Äidä Ani la Kanan pre a käh jap seh saw a krakal hmawna poh. Äidä upum khrawng khäla äi pre awpal. Ni khrang khäl hang hang thäneyeih saw koong 450 khokum hlü hüt.” “Äi pänäng Hnadaga sidawng hiyawktih Somuel khin täh Hnadaga la pochongak hnih khiyuptih epek hüt. Äidä khrawng khälla mawng ini hawuvei. Äi khaw a Ani la Binnamin chen känäng käh Kis chaw Sola mawng poh. Sol la khokum hligip khiyup hüt. Äi pänäng Hnadaga la Sola hlayal bala Dawut a mawng poh al.” Ani la Dawut kheu ni huih hawu hüt, “Kei Yesi chaw Dawuta Kei lung hlü huih kübün khäh. Kei ibang kühlüei äm ani la äi huih poh aih saw dä.” Hnadaga la Ani la khawmei saw huih ni Dawut chen känäng dä khiyawtal tih Yĕsu a Isawlael khäl khäka eteh hüt saw. Yĕsu la bi chah khawngah tuilüh pektih Yohan la Isawlael yapsaw khäl khäka ni sidawng hawu pek hüt. Khrawng khälla ngulai känäng ini lung ini hleyeyal, äidä Yohan la khrawng khäla tuilüh pekal. Yohan la bi äphäyeih huih khawngah ni huih hawu, ‘Kei u äm, nangnih u ting anang khinäm? Kei Mesaya hinga. Ani kei pänäng dä lo aih saw awlaw kei che Ani käh thanap jäi bang kusuh aih saw tawn nga.’ “Nube tanawu khäl, Awbraham chen Isawlael khäl awlaw Yudi hiyahtih khrawng khälo, ngulai känäng awkiyawt ini büneyalaih saw äng käh sidawng nangkei khäka dä teh hmuei saw. Yĕlusalema käh khrawng khälla awlaw anih käh elenchaw khälla Yĕsu a khiyawt tih ting hmawt hüt u. Düm khomhnüp äng khrawng khälla Hnadaga sidawng hiyawktih la ini yok hütsaw khäl ini phawt chi hüt saw ha yawchu hüt u. Äi äng anih la Yĕsu a epret khraw ula Hnadaga sidawng hiyawktih la ini hawu hüt saw kheu khäl ini hluih. Yĕsu a krut äng thawn lokong epret bün hüt u. Äi thän Pilata ini tak Ani a krut äng ini thawnaih saw koong. Ani krong äng Kiyam äng i aw yoei hütäm, ükütni luih chak pän ni anih la Ani a krut känäng khomal ula choa ini phulal. Äini Hnadaga la Ani a düsaw känäng othouhwal. Galil känäng Yĕlusalema Ani ängtu lotih khälla awbawng hnüp täh Ani a ini hmuh hüt. Anih dä tua Isawlael khrawng khäl khäka Ani krong sawksi ini thoksaw.” “Hnadaga la nangkei nuchen pawsawk khäl khäka i khawmei hütäm äi tua nangkei katäng ihisaw a thänei. Awlaw keinih tua nangnih khäka äi sidawng pawi kanang hawu pektun.” Hnadaga la Yĕsu a düsaw känäng thouh wal bala Ani la äi chen khäl khäka khawmei saw u hluih ei. Sam ulung len pai hnih äng ni kheu yoei khäh, “Nang dä Kei chaw, tü hnüpa Kei Nang Paw a käthänei.” Awlaw Hnadaga la üdüsaw känäng Ani a othouh wal. Ani kantha krängak ha krakti hnawh. Äi krong äng Hnadaga la ni huih hawu, “Kei nanga asanh chang la Dawut khäka kaw khawmei saw bün ni nübüneyeih saw pisih kini pekai.” Ni krong äng awlaw tänaka Sam äng yoei bala mäi, “Nanga kenkeh anang potih käh kantha a thu sawk hnawh ti.” “Dawut la ani khin äng Hnadaga lung hlü huih chetchaw hüt. Ani dü pänäng ani käh nuchen paw sawk käh cho a ini phulal. Ani käh kantha okroih yal chak. Äini Hnadaga la u a düsaw känäng thouhwal hütäm Ani kantha kroih yah.” Äi koong kei käh phäu Yudi khälo, nangnih nini hmawtaih saw tawn khäh, Yĕsu känäng dä nangnih käh ngulai hläh hmueyalaih saw. Äi sidawng nangnih a tua hiyawk hmuei tun saw. Mosi käh thung la nangnih a ngulai dam känäng anang hlätal hnäng hnawh. Äini Yĕsu a ula yumei äm, ani ngulai bisaw dam känäng lät. Äi koong nangnih sidih äng mäi khäl hnäh! Hnadaga sidawng hiyawktih la ini hawu hüt saw ni huih khäl nangnih lukhrunga thäneyah pak. “Nangnih Hnadaga äng kelkrongtih khälo khin khäl! Nangnih nini maw ai awlaw nini krak chakai. Iyaäm ni huih bi hngat tühnüpa kibiyeih saw nangnih asang bang yumei hnawh chu, Losulapei anang hawu pekal thän.” Pol la Banaba Yudi ini lumeidün im känäng i hni chetal khaw a khrawng khälla khawh ei ula ini takei, u hnung äng käh düm khomhnüp äng ha lo häih la ni krong äng awlaw i hni hawuvaih koong. Khrawng khäl Yudi ini lumeidün im känäng ini chetal pänäng awbawng Yudi äng käh khäl awlaw Hnadaga yumtih Yudi hiyahtih khäl Pol la Banaba ängtu ini chet. Äi khaw a Pol la Banaba ni khrawng khäl äng i hni kräu. Hnadaga käh khetjen äng nümchawng chawnga mäi hnäng hmawna ulyah i hni pek. Äi pänäng käh düm khomhnüp äng mräh äng käh hang hang khrawng huih Hnadaga kheu khinai äng ini chumei. Äini äi hiyawh khrawng ini lumei saw hmu ula Yudi khäl mawt ini selei hnäh. Awlaw Pol la hawu saw kheu sawkei ula ani a ini keleih hnäh. Äi khaw a Pol la Banaba la sengkhri khawiyei häih la i hni takal, “Hnadaga sidawng nangnih khäka dä täkchah hawu tawn hüt saw. Äini nangnih dä hlüei chu awlaw päihyah saw sawk bünei tawn ting khinei chu. Äi koong Yudi hiyahtih pawh äng kini chetaih saw hnäh.” Iyaäm Boi la nangkei a ni huih khrawng tak, “Kei nanga Yudi hiyahtih khäl khäka awa kini poh saw, Äihi luhdül bratsaw kheni ngulai känäng ini kiyawtai.” Yudi hiyahtih khälla ni kheu khäl yaw ula ini piyaw awlaw Boi käh kheu a ini phiyaw. Awlaw päihyah saw sawk ini bünei yalaih saw koong Hnadaga la u khäla heh lei äm äi khäl yumtih a ini thäneyal. Boi käh kheu äi laa käh üküta ni i khrih ei chak. Äini mräh äng käh gong khäl awlaw Hnadaga rositih Yudi hiyahtih mäichawtih hmutaw khäla, Yudi khrawng khälla Pol la Banaba krong äng ini suk hlek. Äi lup anih la Pol la Banaba kuluh naw ula anih käh pre lekchaw känäng ini thoh al. Äi khaw a Pol la Banaba la äi khrawng khäla lawei häih saw a hmat huih i hni kho äng käh de hnui i hni phawpei yal. Äidä a hnih Ikonio mräh a ihni chetal. Äidä Anitokia a käh yumtih khäl awpiyaw la Asanh chang Khraw äng ini luih yal. Ikonio mräh a ha äi huih thänei, Pol la Banaba Yudi ini lumeidün ima chet häih la sidawng pawi i hni hawu. Äi äng Yudi awlaw Yudi hiyahtih khäl awbawng khrawng yumtih a ini thäneyal. Äini yumah tih Yudi khälla Yudi hiyahtih khäla ini suk hlek. Äidä anih a yumtih khäl käh aw hngaw phaka ini poh al. Pol la Banaba äi mräh a awbawng i hni mäi hüt, awlaw sengkhri khawyei häih la Boi käh kheu i hni hawu. Boi khet kheu i hni kräu saw kheni yum phoih thänei hmawna i hni dawnaih koong nawmaw nawkaih saw bi bi hnäng hmawna tha pek. Äi äng mräh äng käh khrawng khäl ini koyeal. Awvawng che Yudi khäl pawtäng awlaw awvawng che teh hmueitih khäl pawtäng ini chetal. Äidä Yudi hiyahtih khälla Yudi khäl anih käh elenchaw khäl äng pongei ula Pol la Banaba ini kuluh nawkaih saw la lung pel äng khong naw ula ini tukaih saw ini kram. Äini Pol la Banaba la äi hmawtei häih la Lukainia pre lekchaw dukäng Lustra mräh la Dolbi mräh a awlaw äi patchih awhngaw la khäla chen häila i hni mäi. Äi la khäl khe a ha ahnih la sidawng pawi i hni hawu. Lustra mräh a okho chektih hngat om bala mäi hüt. Ani luhdül äng lo khaw känäng okho chek hüt awlaw chet ha chetei hüt hnängah. Ani la Pol käh kheu ikhin tun khaw a Pol la hmu okho chektih a awpawya laih saw äng uyum mäi khäh. Pol la ani pawta chok chok sotei. Äidä Pol la athak hek bala bekei, “Nang nokho äng nili khrawei tila jaal.” Äidä äi khrawng pĕkei bala thouwal awlaw chetei bala choneiyal. Pol la poh saw hmu ula khrawng khälla Lukainia be äng hek ula ini hawu hnäh, “Ulupchaw khäl khrawnga thäneiyal ula keinih khäka ini kom däk!” Äi koong khrawng khälla Banaba ming ini sueyal Jeus awlaw Pol che äkräu saw koong iming ini sueyal Harmas. Iyaäm Pol che kräutih äng käh elenchaw. Jeus lupchaw käh kiyong im mäi saw che mräh pranga. Jeus lupchaw chetchaw tih la sel heupaw khälla kheipa äng mräh tamkha a olo. Iyaäm äi chetchawtih la awlaw khrawng khälla Pol la Banaba a sel heupaw khäl ini hluaih khiyang. Banaba la Pol la äi kheu i hni yawk ni i hni wat tayei häih la khrawng laya i hni chon. Äidä hek häih la i hni hawu, “Khrawng khälo, iya ni huih nini poh saw äm? Keihnih che nangnih huih khrawng dä. Keinih che nangnih khäka sidawng pawi kini hawu saw, nangnih usum vawngah saw bi henal chula hengtih Hnadaga pawta krawnal hmawna. Ani la dä hawn, luhdül, mret awlaw äi khäl äng i aw mäi äm äi khäl kheni bi chak saw. Ayang äng käh khin äng ayapyap yapsaw a ni Ani la anih sitha huih chet chonei sawk. Äini Ani la bi pawi bisaw äng awdawnei, Ani äiya mäi khäh. Ani la hawn känäng kho pek bala ikhin täng etheih pa anang pek bala Ani käh khet anang dawnei. Ani la ühlü saw hiyawh ei ok anang pek bala nangnih käh lung awpiyaw äng hluih.” Ni huih kheu khäl hawupe bang khrawng khälla mäksetdava ini hlu aih saw awbawng i hni nga kem. Äi pänäng Pisidia pre lekchaw a käh Antokia la Ikonio mräh känäng pochongak hnih Yudi ini lo. Anih la Pol la Banaba kheu hawu pek ula khrawng khäla ini suk hlek. Äi khaw a khrawng khälla Pola lung äng ini woh nawk. Ani dü däk ting khin ula lalat ula mräh pranga ini chih al. Äini Krito yumtih khälla ani kena lo ula ana vumeinawk ni ani thouwal bala mräh pawta krawnal. Äi ngo kawthawiya ani la Banaba Dolbi mräh a i hni chetal. Dolbi mräh a sidawng pawi hawu häih la Pol awlaw Banaba la awbawnga tebeih i hni poh. Äi pänäng a hnih Lustra, Ikonio awlaw Pisidiya pre lekchaw a käh Antokia a i hni krawnal. Awlaw uyum äng chang hmawna ini mäiyeih saw koong yumtih khäla ulyah i hni khawi pek. A hnih la i hnih tak, “Mawng Hnadaga käh pre a vawng khawngah awbawng dukhah nangkei ini khawmaih lah saw.” A hnih la yumtih sawng ini mäidün kheni a elenchaw i hnih awp. Awlaw mawng Boi a ini yum äm, suh tong la ümüt mäi ula äi Boi kut äng a hni la äi elenchaw khäla i hni awp. Äi pänäng Pol la Banaba Pisidiya pre lekchaw dukäng Pampiliya pre lekchaw a i hni lo al. A hnih la Pawlga mräh a Hnadaga kheu hawu häih la Awttalia mräh a i hni chet. Äi pänäng Awttalia känäng tuisampho äng Siria pre a käh Antokia a i hni krawnal. A hnih la tua bi i hni phäih däk saw koong Hnadaga käh khetjen äng käh äkiyä i hni bünei. Anitokia a ahna phaw ni yumtih sawng khäla hang hanga ni tänaka i hni chumei sawk. Äidä Hnadaga la a hnih sumei bala i aw poh hütäm äi i hni hawu pekal. Hnadaga la ihuih Yudi hiyahtih khäla lawm hong pek saw äm Krito khrung äng uyum tawei hnäng hmawna äi ha i hni hawu pek. Äi pänäng Pol la Banaba yumtih khäl äng äiya awbawng hnüp i hni mäi. Yudia pre lekchaw känäng pochongak hnih khrawng Anitokia a ini lo. Äidä yumtih ta nawu khäla ni huih ana chok hawu, “Mosi käh thung täng nangnih dä khrawnga nini vun awh ei sawk chu khaw asang ha Hnadaga la ngulai känäng anang khiyawtal hnawh.” Äi äng Pol la Banaba äi khrawng khäl äng mawt i hni toksakeilah. Äi pänäng ini khraw ei, Pol la Banaba Anitokia a käh pochongak hnih yumtih i hni konäng chiyei puinaw häih la Yĕlusalema ini chetal. Äi che äiya anih teh hmueitih khälla yumtih khäl äng käh elenchaw khäl äng ni krong ini kräuvei. Anitokia a käh yumtih sawng la a hnih i hni chetaih saw ini khrawk pek. Phonisi la Samali pre lekchaw äng ini chet khaw a Pol la Banaba la khrawng khäla i hni hawu pek hüt, Yudi hiyahtih khäl iba Hnadaga pawta ini krawnal saw äm. Ni kheu khäl yaw ula yumtih tanawu khäl mawt ini piyaw hnäh. Pol la Banaba Yĕlusalema i hni lo ni äiya käh yumtih sawng khäl, elenchaw khäl, awlaw teh hmueitih khälla lung pawi äng ini teh long. A hnih äng Hnadaga la i aw poh hütäm, äi ahnih la hang hanga ni ihni hawu pek. Äini yumtih pochongak hnih Pherasai la ja ula ini hawu, “Yudi hiyahtih khälla khrawnga ini vun ini awh ei sawk saw tawn khäh. Awlaw anih la Mosi käh thung ini sumeyeih saw ha anih a ini takaih saw tawn khäh.” Äi khaw a teh hmueitih khälla yumtih äng käh elenchaw khäl ni krong ini kräuvaih koong tänaka ana chumei. Awbawng ini kräu däk pänäng Pitol la ja bala anih a tak, “Tanawu khälo, nangnih che nini hmawt khäh, awbawng ayang täh kän Hnadaga la nangnih duk känäng kei a eheh lei hüt, Yudi hiyahtih khäla kei mong khok känäng sidawng pawi yaw ula yumei hnäng hmawna. Hnadaga la ükütni käh lung hmawt khäh. Ani la i huih nangkei a Asanh chang Khraw khrawng pek hütäm, äi huih Asanh chang Khraw pek bala Yudi hiyahtih khäla ha lawkei khäh ting awdawn. Nangkei la anih dukäng Hnadaga la iha awhngaw tawah. Iyaäm anih la ini yumei koong Ani la anih käh ngulai ähläh pekal. Äihi nangkei awlaw nangkei käh nuchen pawsawk la pho hnäng u saw jeh tih thung Yudi hiyahtih khäla pho sawk chula iya Hnadaga a nini chawm saw äm? Nangkei ini yum, Boi Yĕsu käh khetjen äng i huih nangkei awkiyawt ini büneyal äm äi huih Yudi hiyahtih khälla ha ini büneyal.” Pol la Banaba kheu ini khin tun khaw a äiya khin tih kheni ektiyapak ini mäi. Pol la Banaba sumei bala Hnadaga la Yudi hiyahtih khäl khäka nawmaw nawkaih saw bi ihuih bi hütäm, äi ahnih la i hni hawu pek. Pol la Banaba i hni kräu saw päih ni Yakub la tak, “Tanawu khäl o, khin khäl, Hnadaga Yudi hiyahtih khäl khäka täkchah iba lo saw äm awlaw iba üküta Ani käh khrawng poh ei hüt saw äm, äi Simon Pitol la awhawu hüt khäh. Ni kheu khäl che Hnadaga sidawng hiyawktih khäl käh kheu ha tuei.” Iyaäm Kiyam äng yoei bala mäi. “Boi la hawu, äi pänäng Kei kaw krawnalai. Dawut käh jaldäktih im awlaw kibi alai. Krak däktih kheni awlaw kibialai, awlaw äi ma hmawna kopoh alai. Äi koong awhngaw japsaw khäl Boi suya ini lo nawtheih, Kei käh khrawng ting kapanei saw Yudi hiyahtih khäl kheni ha Kei khäka ini lo nawtheih. Nidä Boi la hawu saw, awbawng hnüp ayang nidä Ani lung dukäng mäi hüt saw.” Yakub la awlaw hawu, “Äi äng kei tawk äng che mawng Yudi hiyahtih khäl Hnadaga pawt äng ini krawnal äm anih a nangkei dukhah ini pekaih saw tawnah. Äichaw a nangkei anih a ni krong khäl äng chaw ini sanaih saw tawn. Anih la ei tawn ti saw ulupchaw hmawi mawh a ini hlusaw sahnah tih vawn ei lah hnawh u saw, ini mik sawuveiyeih u saw, hak tila nutuk saw mäksetdava saw la thi ei oaih u saw. Iyaäm awbawng hnüp khaw kän bang Mosi käh thung khäl Yudi ini lumeidün ima düm khomhnüp chi äng phawt hmuei. Awlaw mräh täng mräh täng ha Mosi käh thung äng khrawng khäl tara ini haw chi.” Äi khaw a teh hmueitih khäl, yumtih äng käh elenchaw khäl awlaw awhngaw yumtih khrawng kheni la anih dukäng käh pochongak hnih ini helh. Äiche anih a Pol la Banaba ängtu Antokia a ini teh eih saw ini khrawk. Anih la Yuda la Sila ini helh. Ni Yuda a che Balsaba ting ini bekei. Ni pochong hnih a dä yumtih khälla mawt kenkeh ini poh hüt saw. Anih la a hnih ängtu ni huih hawu ula chaw ini san. Keinih teh hmueitih la elenchaw khäl awlaw uyumäng käh ta nawu khälla ni chaw äng nangnih a kanang khäh ei chak. Ni chaw che Antokia, Siriya la Kilikia a käh Yudi hiyahtih yumtih khäl koong. “Keinih kini yawk, keinih dukäng käh pochongak hnih khrawng äiya nangnih khäka ini lo. Anih la nangnih käh lung kru sawk ula dukhah anang pek. Äini anih a keinih ni huih ini biyeih saw ta unga. Äi koong keinih ükütni kini lumei awlaw ngiyei ungala pochongak hnih nangnih khäkä kini teh. Anih keinih käh khetsu khanbawn Banaba la Pol ängtu ini chetai. Banaba la Pol la nangkei käh Boi Yĕsu Krito koong i hni düaih wa waih dukhah i hni khawm hüt. Keinih i aw kini yokäm, äi khäl i hni mong khok äng ha anang hawu pek hnäng hmawna Yuda la Sila kini teh. Asanh chang Khraw la keinih kini khrawei, ühlü aih saw thung battih hlü aih hiyah saw thung nangnih äng kanang tawng naw hnawh unga. Äi ühlü aih saw thung khäl che ni khäl, ulupchaw khäla nini hlusaw vawn eiyei chu, thi o aih chu, hak tila nutuk saw mäksetdava saw eiyei chu awlaw nini mik sawuveiyei chu. Ni khäl känäng awhlawm hlaw a nini mäi khaw nangnih awpawi nini mäi yei. Khotawh mäi bäichu.” Ini chetaih koong helh mueitih khrawng khäl Antokia a ini chet. Äiya yumtih sawng khäla utu lum ula äi chaw ini awp. Khrawng khälla äi chaw ini phawt awlaw chaw äng ulyah pek hmuei saw kheu mäi saw äng ini piyaw. Yuda la Sil ha Hnadaga sidawng hiyawktih i hni mäi hüt. A hnih yumtih khäl äng awbawng kheu i hni kräu. Äiya mäitih yumtih a uyum äng ulyah la tha mäi ong tha i hni khawi. Anitokia a anih hnüpak hnih i hni mäi. Äidä Anitokia a käh yumtih tanawu khälla Yuda la Sila äkiyä tawngei ula Yĕlusalema awlaw krawnak ini teh al. (Äini Sil che Anitokia a mäyal hüt) Äini Pol la Banaba che Antokia a dä i hni mäiyal. Äiya a hnih la awbawng khrawng khäl ängtu Boi käh kheu i hni chok awlaw sidawng ihni hiyawk. Hnüpak hnih pänäng Pol la Banaba a tak, “Che, mawng la khäla ni hnih Boi käh sidawng hni hawu däk äm, äi la khäla krawnal pula yumtih tanawu khäl äng a khomeyal khä. Awlaw anih ihuih ini mäi äm a so al khäh.” Äi khaw a Banaba la Yohan Maka i hni konäng chih pui nawkaih khiyang. Äini Pol la ani a ihni chih pui nawkaih saw pawi hnawh ting tawk. Iyaäm Mak la Pampiliya a hnih ängtu bi phäih yah pak hlät bala chetal hüt saw. A hnih ängtu bi bitih ah saw. Äi khaw a Pol la Banaba i hni kheu tuei ti häih. Äidä a hnih awhngaw chaw chi i hni thäneyal. Banaba che Mak ängtu tuisampho äng Saipru songkawi saw laa ihni chet. Äini Pol la che Sil a heh lei. Anitokia käh yumtih khälla Boi käh khetjen äng Pol la Sila ini teh al. Pol la Sil Siriya pre lekchaw awlaw Kilikia pre lekchaw khäl äng chet häih la yumtih sawng khäl käh yum awlaw chang hmawna i hni poh. Äi pänäng Pol Dolbi la Lustra mräh a chet. Äidüna Timothi ting mingei nawtih tebeih hngat mäi hüt. Ani nu che yumtih hngat Yudi hmutaw. Äini ani paw che Grik yapsaw mäi hüt. Lustra la Ikonio mräh a käh yumtih khälla Timothi käh kheu awpawi ini hawu hüt. Pol la Timothi a ani ängtu chih pui nawkaih khiyang saw koong ani vun awh pek hüt. Ani la äi poh hüt saw, iyaäm äi la a mäitih Yudi khälla Timothi paw che Grik khrawng hngat ting ini hmawt hüt. Äi pänäng Pol, Sil awlaw Timothi mräh khäl dukäng ini chet. Äidä Yĕlusalema käh teh hmueitih khälla awlaw elenchaw khälla thung ini poh hüt saw khäl ini ngeiyeih saw koong, anih la yumtih sawng khäla ini hawu pek. Äi huih yumtih sawng äng käh khrawng khälla Krito ini yumsaw äng ma ula ini mäi. Awlaw anih hnüpak thawka hnüpak ini paw. Äidä Anih Phorugi la Galati pre lekchaw dukäng ini chet. Äini Asanh chang Khraw la anih a Esia pre lekchaw a sidawng ini hiyawkaih saw nga. Äi pänäng Musiya bam chah a lo ula anih Bithuni pre lekchaw a chetaih saw ini hno. Äini Yĕsu käh khraw la anih a chet sawkah. Äi koong anih Musiya pre lekchaw duk känäng Troa mräh a ini chetal. Äi yawna Pola Hnadaga la akraya dawn. Mesidoniya pre lekchaw a käh khrawng hngat la ja bala ani a khawh ei bala tak, “Mesidoniya a lo tila keinih a khrawng a ku e.” Pol la ni akraya hmuh pän ni keinih Mesidoniya a kini chetaih saw koong ächän kini poh ei. Iyaäm keinih kini yawkchu, Mesidoniya a käh khrawng khäl khäka Krito krong äng sidawng pawi kana hawuvaih koong dä Hnadaga la khrawng bekei saw. Äi pänäng keinih Troa hlät ungala tuisampho äng Samothraki songkawi saw la a kini chet awlaw äi ngo a Niyapoli mräh a tuisampho äng kini chet. Äi känäng keinih Philipi mräh a kini chet. Ni Philipi dä Mesidoniya la a käh äng mräh len. Äi mräh che Rom pre ängtu paw hüt. Keinih hnüpak hnih äi mräh a kini mäi hüt. Düm khomhnüp äng keinih mräh tamkha pranga käh hlong kena kini chet. Keinih kini khin hüt, äiya Yudi khälla lumei ula suh ini tongei dün im mäi khäh ting. Äiya chumei hüttih hmutaw khäl äng om ungala kini kräu. Keinih kheu khin tih dukäng Thuatila mräh känäng käh Ludiya ming äng hmutaw hngat mäi hüt. Ani la khawktih awnchäh thi long äng käh wat kun poh hüt. Ani hmutaw thän Hnadaga a rosi hüt. Boi la Ludia käh lung ni huih ohong pek saw Pol käh kheu ulung khraw ei bala khin hmawna awlaw yumeiyal hmawna. Äi äng ani la awlaw i imsaw khälla tuilüh ini lawkei. Äi pänäng ani ni huih kheu ta bala anih a ebekei, “Kei a dä Boi Yĕsu khrung äng yumtih ting anang khin khaw kei ima lo chu la amäi khäl.” Ani la mawmawt khawh ei bala khrawng tak ni ani ima kini chet. Hnüpak khaw a äi suh tong la a kini chet tuna hngasaw hmutawchaw pochongak äng kini khomei. Ani a pawyah saw khraw la mawn hüt, äi koong awhmawi mawh äng käh kheu hawu hnäng hüt chi. Ani la khrawng khäl käh hawra sot pek chi. Äiche khrawng khälla awmawh a awmawn chi ini pek. Äi koong ani mawh paw mrat chi. Äi hmutaw keinih Pol tih hnung äng chi lope lope hek bala chi awhawu, “Ni khrawng khäl che üküt thawka hlüngtih Hnadaga käh hngasaw. Ngulai känäng Hnadaga la i ba ähläh anang pekalaih saw äm, ni khälla äidä nangnih a anang hawu pek saw.” Ani la awbawng hnüp täh ni huih poh ei hüt. U hnung äng Pol la khih ei ti ah, äidä u hnung pawh soei bala äi pawyahtih khraw a atak, “Yĕsu Krito ming äng kei nanga tha äng kini tak, ni hmutaw känäng thokal.” Äi äng tutu äi pawyahtih khraw othokal. Awmawh khälla awmawn büneyeih ti u saw ini hmuh ni anih la Pol la Sil a mräh a käh khrawng ini lumeidün la a käh elenchaw khäl khäka la lat ula ini chih. Äi pänäng anih la äi laa käh elenchaw khäl khäka a hnih a chi ula ini hawu pek, “Ni khrawng khäl che Yudi dä, ni khrawng khälla keinih käh mräh a lo ula ini khru sawk khäh. Anih la kini poh tawn ting khrawng chok saw khäl che keinih Rom presaw käh thung äng mäyah. Awlaw keinih che Rom pre a käh khrawng, anih la khrawng chok saw khäl keinih täm hnäng hnawh unga.” Awlaw Pol la Sil ana mawnaih koong awhngaw khrawng khäl ha anih pawh äng ana phakei. Äi khaw a äi laa käh elenchaw khälla ana ini pek, äi häih käh awat sut ula ini bopaih koong. Thasa ini bop pän ni a hnih a thonga ana tawkal, äidä mawmawt chaw chongaih koong thong im chongtih khäl äng käh elenchawsuma ini tak. Thong im chongtih äi elenchaw a ini tak pän ni ani la Pol la Sila thong im duksuma käh täka chih al awlaw äiya jeh tih thing pil äng käh siyol äng i hni kho hen bala tawkal. Awyawn chinga Pol la Sil la suh i hni tongei awlaw Hnadaga awi khäl i hni awi. Äi khaw a awhngaw thong äng heng naweitih khälla ini khin. Äi huih khaw a täk ting liuh len lo hnäh awlaw othong im chou khe chakei chak hnäh. Äi khaw a othong imäng käh sät khe hongeyal chak awlaw othong imäng hengei nawtih khrawng khäl käh siol kheni prut bala kraw al chak. Thong im chongtih khak bala sot ni thong im sät kheni hongei chak saw hmuh. Äi thong äng hengei nawtih khrawng khäl ini chenal chak däk ting khin bala chimsawu thoh ei bala awsawk tukeyeih khiyang. Äi khaw a Pol la hek bala hawu, “Nupuma khrakeyei ti! Keinih hang hang ni niya kini mäi chak khäh.” Äidä thong im chongtih äng käh lenchaw la pochongaka simiya lo aih saw ta bala ani pakhat hnikat uduka vawng. Awlaw kepe chüchüna thänei bala Pol la Sil kho chouwa bok. Äi pänäng ani la Pol la Sil a apranga chi bala ihi, “Hawu hnih, Hnadaga la ngulai känäng ähläh epekalaih saw koong kei i kopoh aih lah saw äm?” A hnih la i hni takal, “Nang Boi Yĕsu a yumei, äihi nang la ni im saw ngulai känäng ähläh nini büneyalai.” Pol la Sil la äi khaw a thong im chongtih la anih im saw äng käh hang hanga ni Boi käh kheu i hni hawu pek. Thong im chong tih la äi yawna Pol la Sila chi pui naw bala a hnih i hni nawsaw la khäl boh pekal. Äi äng tutu a hnih la äi thong im chongtih äng käh elenchaw awlaw i imsaw a tuilüh i hnih pekal. Äi pänäng ani la Pol la Sila i ima chi puinaw bala eisaw pekal. Hnadaga khrung äng yumei ula ani la ani im saw hang hang ni ini piyaw. Äi ngo a äi laa käh elenchaw khälla siphei a ni kheu sin ula ini teh, “Äi khrawng khäla hlätal.” Äi khaw a thong im chongtih la Pola tak, “Nang la Sila kanang hläh alaih saw koong elenchaw khälla kheu khrawng sin khäh. Nang la Sil tua thokal hnih tila jelkhiyamsa äng chetal hnih.” Äi khaw a Pol la siphei khäla tak, “Keinih Rom presaw dä, keinih käh tara chäkah pak dä hang hang hmawi mawh a bop kini hmuei saw awlaw othong ima khrawk kihni hmuei saw. Tua elenchaw khälla umuchaw äng khrawng hläh alaih khiyang saw ei? Äi huih thänei hnawh. Anih kädäng lo ula khrawng thoh al seh.” Äi kheu siphei khälla elenchaw khäla ana hawu pekal. Elenchaw khälla Pol la Sil Rom presaw dä ting ini hmawt ni mawt ini ke hnäh. Anih la Pol la Sil khäka chet ula ähläh ana hawuveyal awlaw a hnih a thong kän apranga lo al ula mräh hlät ula i hni chetalaih koong khawh ei ula ini tak. Pol la Sil othong im kän apranga thokal häih la Ludiya mäidün ima i hni chetal. Äiya yumtih tanawu khäl äng i hni khomei. Äidä äiya yumtih khäla ulyah i hni pek pän ni äi la känäng i hni chetal. Äi pänäng Pol la Sil Amphipoli la Apawllonia känäng Thisaloni mräh a i hni chet. Äi mräh a Yudi ini lumeidün im hngat mäi hüt. Pol sawkbrat chet ngap chi saw huih ani yudi ini lumeidün ima chet. Awlaw sapta thum düm khomhnüp chi äng khrawng khäla kiyam känäng phawt pek. Ani la khrawng khäla awyawk chu sawk awlaw awdawn, Mesaya la dukhah khawmaih hüt saw la ini tukaih hüt saw awlaw düsaw känäng othouwalaih hüt saw ühlü hüt. Ani la hawu, “Mawng Yĕsu kheu kei nangnih a kanang hiyawk äm äi Yĕsu Mesaya dä.” Ni kheu yaw ula pochongak hnih Yudi khälla ini yumeyal. Awlaw awbawng Hnadaga kenkeh tih Grik khälla awbawng ming mawh hmutaw khäl ha anih äng ini vawngei. Pochongak hnih Yudi khälla selei ula lawm täng lawm täng chochonei ula mäitih khrawng lum ula ana chuh ei. Äidä mräh ini hmungaih saw ini chah. Äi pänäng Pol la Sila sui ula apranga käh khrawng khäl khäka ini chih eih koong Jason ima ini lo. Äini äiya anih la a hnih a bün u. Äi khaw a Jason awlaw pochongak hnih yumtih khrawng khäla lalat ula mräh khiyuptih khäka ini chet. Awlaw hek ula ni huih ini hawu, “Mawng khrawng khälla luhdül kheni awpawi chai tawti u äm äi khäl tua ni a ha ini lo däk. Awlaw Jason la anih khäla mäidün ha epek. Awlaw khiyuptih Mawng len käh tha äng käh kheu chalh ula ni huih ini hawu, ani kaw Yĕsu ting mingei nawtih khrawng pochongak mäi khäh.” Ni kheu khäl hawu ula äi Yudi khiyuptih khäla awlaw khrawng khäla ini khrusawk. Äini Jason la awhngaw khälla ini khawmei saw huih awmawn ini pek äidä anih ini lätal. Khomü ni Yumtih khälla Pol la Sila Biriya a ini teh al. Äiya aphaw häih la a hnih Yudi ini lumeidün ima i hni chet. Thisaloni a käh Yudi khäl thawka Biriya mräh a käh Yudi khäl lung unung hiyawng. Anih la mawt ini lung khrawei ula Pol la Sil käh kheu ini khin. Awlaw Pol la hawu saw khäl ihiyei hiyah ei ini sotaih koong hnüpak kiyawnah Kiyam phawt ula äi kheu khäl ini sui chi. Awbawng Yudi khälla Yĕsu a ini yumeyal, awlaw äi hawuvah ha ming mawh Grik hmutaw la pawtaw khälla ha ini yumeyal. Pol la Biriya a Hnadaga sidawng hiyawk saw Thisaloni a käh Yudi khälla ini yawk. Äiche anih äiya ini chet awlaw khrawng khäla säm chäh ula ini hmung. Yumtih khälla äi khaw a Pola mret kawm kena ini teh al, äini Sil la Timothi che Biriya a i hni mäiyal. Mawng khrawng khälla Pola ini konäng ini lo hütäm, äi khälla ani a Ethen mräh a ini loal. Äi pänäng Sil la Timothi a Biriya känäng alanda loal häih la ani ängtu i hni mäiyalaih saw koong Pol la äi khrawng khäl känäng sidawng pek. Pol la Ethen mräh a Sil la Timothi a chong khaw a, äi mräh ulupchaw äng luih chak saw hmuh. Äi äng ani la ulung dukhah piyei. Ani Yudi ini lumeidün ima chet bala Yudi khäl äng awlaw Grik khäl äng käh Hnadaga yumeitih khäl äng äkräu sang. Awlaw khrawng ini lumeidün laa lotih khäl äng ha hnüp thum pänäng äkräu sang. Ipikorio la Ostikio sawng hnih äng käh pochongak hnih choktih khäl äng Pol mawt toksakei. Anih dukäng käh pochongak hnih la ini tak, “Ni bawrise paw la i hawvaih khiyang saw äm?” Awlaw awhngaw la ha ini hawu, “Ani la awhngaw yapsaw khäl käh phawra kheu hawu saw dä hipai.” Anih la ni kheu ini hawu saw che Pol la Yĕsu kheu dü bala thouwal saw sidawng hiyawk saw koong. Äi äng choktih khälla Pola mräh a käh khrawng ini lumeidün la Eropega a ini lo. Äiya anih la Pola ini hi, “Atha nochok saw i äm, keinih kini hmawt hnängayei? Iyaäm nang üküt kheu khäl nawhawu saw kini hnaw äng losaw mawt khawk khei sam kini yawk. Äi koong äi kheu khäl äng käh awkrawn i äm kini yawkalaih khiyang.” (Anih la ni kheu khäl ini hawu, iyaäm Ethen laa käh khrawng khälla awlaw äi mräh a mäitih awhngaw khrawng pre a käh khrawng khälla kheu tha khäl ini hawu saw la kheu tha khäl ini khin saw äng dä khin ini chih ei.) Äi khaw a Pol mräh a käh khrawng ini lumeidün la Eropega a ja bala hawu “Ethen mräh a käh khrawng khälla khin khäl, ‘Kei ku hmuh khäh, nangnih ükütla ni ayapyap lupchaw pujaw chula ikhin nini khrah. Iyaäm kei chonei ngala kosot khaw a nangnih käh nini rosi dün im khäl ku hmuh.’” Äiya tänaka yoei bala ädäma mäi saw kuhmuh, “Hmawt ti saw ulupchaw käh koong.” Nangnih hmawtah pak u a nini rosi äm, äi khäl sidawng dä kanang hiyawk saw. “Hnadaga la dä ni luhdül la äi dukäng mäi saw kheni bisaw. Ani dä Hawn pre la luhdül äng käh Boi. Khrawng khälla ini kut äng ini bisaw imäng Ani mäyah. Ani i ha layah, äi koong khrawng kut känäng ini pujaw saw lawkeyeih saw ha hlü ah. Iyaäm Ani la dä üküt khrawnga ni awsawk la ihil dün khri awlaw awhngaw khäl ha ükütni pek saw. Ani la khrawng pochongak känäng ajapjap khrawng khäl bisaw luhdül äng hang hang laa mäi hnäng hmawna. Anih itia mawnga ini mäyeih saw äm Ani la dä awkhrawk chak saw. Hnadaga la ni huih bisaw che Ani a sui hmawna. Awlaw ini sui saw äng ikhi kha Ani a bün hmawna. Äini lälä che Ani nangkei hngat känäng ha awhlawm hlaw a mäyah.” Pochongak la hawu, “Nangkei Ani tha äng dä ini heng, ini chet chonei awlaw ini sawk mäi saw. Nangnih äng käh pochongak hnih yotih khälla ha ini hawu, Keinih ha Ani chaw chuhnu.” “Hnadaga che khrawng la ini bisaw ha, hĕn äng käh awlaw lung äng käh ulupchaw hiyah. Khrawng la ini poh saw lupchaw khäl che Hnadaga thänei hnängah. Nangkei Hnadaga chaw chuhnu ini thänei däk. Äi koong äi huih tua nangkei ini tawkaih saw tawn tiyah. Ayang khaw a käh khrawng khälla Ani a hmawt hüt u koong Hnadaga la anih käh tara bi hütah. Äini tua Ani la üküt laa käh khrawng khäla ni ngulai kän ini lung ini hleyeyalaih saw tha äng ta däk. Iyaäm Ani la khrawng khäl khe käh tara biyeih saw khomhnüp hngat po bala taw däk. Äi hnüp äng Ani la heh lei saw khrawng äng Ani la ihisaw tara biyalai. Ani la äi khrawnga düsaw känäng thouhwal bala eheh lei saw khrawng hang hang khäka dawn däk.” Üdüsaw känäng thouwal saw kheu yaw ula khrawng khäl äng käh pochongak hnih la ini keleih. Äini awhngaw la ini tak, “Ni krong äng nang kheu awlaw keinih kini khinai.” Äi khaw a Pol äi khrawng ini lumeidün la Eropega känäng chetal. Pochongak hnih pawtaw Pol äng ana vawngei awlaw ini yumei. Äi ini lumeidüna la Eropega a khrawng hngat mäi. Ani ming che Dayonomis. Ani che Yudi khäl käh hngawsaw khäl äng käh pochongak mäi hüt. Äi düna Damaris ming äng hmutaw hngat mäi hüt. Anih ängtu ha pochongak hnih ini mäi hüt. Äi pänäng Pol la Ethen hlät bala Korin mräh a lo. Äi düna Akila ting mingei nawtih hngat Yudi äng khomei. Ani Pontio pre a luhdül äng olo hüt. Äi khaw a mawng len Kolodio la Yudi khäl kheni a Rom pre hlätal ula ini chetalaih saw ana pek. Akila la iphiya Piskila äi khaw a Itali pre a khäh Rom mräh a i hni mäi hüt. Äi khaw a äi pre känäng Korin mräh a i hni loal. Pol a hnih äng khomeya chet. A hnih tambu khoitih awlaw Pol ha tambu khoitih mäi hüt. Äi koong ani la a hnih ängtu bi bi hüt. Sapta ak kiyawnah düm khomhnüp äng Pol la Yudi ini lumeidün ima Yĕsu krong äng äkräu chi. Awlaw Grik khälla Yudi khäla Yĕsu lawm äng olo a laih saw koong hno hüt. Sil la Timothi Mesidoniya känäng lo häih la a hna phaw. Äidä Pol la Yĕsu käh sidawng pawi hiyawk bala che ikhin khäl kheni chi. Ani la Yudi khäl khäka hawu pek, Yĕsu dä Mesaya ting. Äini Yudi khälla Pol käh chok kheu so maw ula ani a ini keleih. Äi khaw a Pol la ani käh wat cha phaw pei bala tak, “Nangnih dä ä hläh büneyal chu khaw äi thi koong nangnih dä khawmaih tih, Kei hiyah. Tu khaw kän che kei Yudi hiyahtih khäl khäka dä kechetaih saw.” Äi pänäng Pol la ini lumeidün im hlätal bala Titio Jutho ting mingei nawtih Yudi hiyahtih khrawng hngat ima chet. Äi khrawng käh im che Yudi ini lumeidün im kena mäi hüt. Ani la Yudi hiyah thän Hnadaga a rosi. Yudi ini lumeidün ima käh elenchaw Kripas la ani im saw khälla Boi Yĕsu khrung äng ini yumei. Awlaw Korin khrawng khälla Pol käh sidawng yaw ula ini yumei. Äidä awbawng khrawng khälla tuilüh ini lawkei. Hnüpak khaw a awyawn chinga Pol akraya Boi la ni kheu tak, “Ke ei tih, kräutila mäi, dikdik mäiyei ti. Iyaäm Kei nang äng tutu kämäi khäh. Nanga ula ha ese anang po hnäng hnawh, ni mräh a Kei käh khrawng awbawng ini mäi khäh.” Äidä Pol äi mräh a kumak gäl phawl mäi bala khrawng khäla Hnadaga käh sidawng pawi chok. Galio äi Akhaiya pre a khiyuptih thäneyal khaw a Yudi khälla Pol a mawn ula che tara äng ini khrawkaih koong tara ima ini lo. Anih la ini hawu, “Ni khrawng la nangkei käh thung pawh äng mäyah saw Hnadaga a rosi khrang khrawng khäla chok.” Pol la kräuvaih saw poh ei ni Galio la Yudi khäla tak, “Yudi khälo, ni khrawng la dä epret bi khaw hiyah thän pawyah saw bi bi khaw, kei nangnih kheu kikhinai hü. Äini nangnih nini kheu, nini ming awlaw nangnih käh thung krong khäl äng iti khaw a nini toksakei äm, äi khaw a nangnih a nangnih dä nini phriye yalaih lah saw. Kei äi huih krong khäl äng tara khraw hnäng hnawh nga.” Äi kheu khäl hawu bala ani la tara im duk känäng anih a ini thokalaih saw tak. Äi khaw a khrawng khäl chumei ula Yudi ini lumeidün ima käh elenchaw Sotthini a mawn ula tara im hmawi mawh a ini bop. Äini Galio la chäk bang chäkah. Pol awbawng hnüp Korin mräh a mäi pänäng yumtih nawu khäl känäng chetal. Akila la Piskila ängtu tuisampho äng mret lawm äng Siriya pre a loal. Pol tuisampho äng kawiyal khawngah Hnadaga khäka khawmei hüt saw a hmat la huih ani la ulusawm khah ei. Anih Iphis mräh a ana phaw al. Ani la Priskila la Akila a hlät bala chetal. Äi pänäng ani Yudi ini lumeidün ima chet bala Yudi khäla Yĕsu krong hawu pek. Yudi khälla anih ängtu ühnüp hnüp mäiyeih koong ini tak, äini ani mäyah. Äidä äi känäng chetal khaw a ani la anih a tak, “Hnadaga lung hlü mäi hi kei awlaw kolo alai.” Äi pänäng ani Iphis känäng tuisampho äng kawiyal bala chetal. Ani Koisoriya mräh a a phawal. Awlaw tuisampho kän komal bala Yĕlusalem a chetal. Äi düna yumtih khrawng khäla äkiyä pek pänäng ani Antokia a chetal. Pol Anitoki a hnüp pak hnih mäi. Äi pänäng ani äi känäng chetal. Ani la Galati la Phorugi pre lekchaw a käh ätän täna chonei bala yumtih khäla ulyah pek. Äi khaw a Apolo ting mingeinawtih hngat Yudi Iphisa lo. Ani che Alekzandria mräh a luhdül äng lo hüt. Ani chaw hmawt tih mäi hüt awlaw kiyam phem mawmawt chaw hmawt hüt. Ani a Boi Yĕsu käh lawm krong khrawng la ini chok hüt. Ani la ulung duk känäng mawt lawphah bala kheu kräu hüt awlaw Yĕsu krong äng käh ihisaw chok hüt. Äini ani la Yohan käh tuilüh hiyah pak u käh tuilüh kheu a hmawt hütah. Ani la mawt esengkhri khawei bala Yudi ini lumeidün ima chok saw chah. Äi khaw a Piskila awlaw Akila la Apolo la chok saw i hni khin. A hnih la ani a ima i hni panei. Awlaw Hnadaga käh krong mawt chaw i hnih hawu pekal. Äi pänäng Apolo Akhaiya a chetaih khiyang ni, Iphis a käh yumtih khrawng khälla ani a ulyah ini pek. Akhaiya a käh yumtih khälla Apolo a lawei hmawna awlaw kubawm hmawna anih la Akhaiya a käh khrawng khäla chaw ini yok. Hnadaga käh pisih äng Akhaiya laa u khäl bang yumtih ini thänei hütäm, Apolo la äi düna aphaw bala anih a thasa kubawm. Ani la Yĕsu dä Mesaya ting kiyam phem känäng dawn bala toksakei äng Yudi khäla u hyumsawk. Apolo Korin a mäi hüt khaw a Pol pre lekchaw lüm bala Iphis mräh a lo. Äiya ani la pochongak hnih tebeih tih a khom. Ani la anih a tak, “Nangnih yumtih a nini thänei khaw a Asanh chang Khraw a nini büneyei?” Anih la ani a ini takal, “Asanh chang Khraw mäi saw keinih yaw unga.” Äi khaw a Pol la takal, “Bahi nangnih mawng tuilüh nini bünei hüt saw äm?” Anih la ini takal, “Yohan la tuilüh pek saw khrang huih kini lawkei.” Pol la takal, “Khrawng khälla ini lung ini hleyealaih koong Yohan la tuilüh pek. Awlaw khrawng khäla ha tak hüt, kei pänäng u bang lo tun äm, äi Yĕsu krito khrung äng yumei khäl.” Äi kheu khäl yaw ula che äi khrawng khälla Boi Yĕsu ming äng tuilüh ini lawkeyal. Äi khaw a Pol la anih khrung äng ukut tawkei, äidä anih khrunga Asanh chang Khraw lo, äi pänäng anih ayapyap be äng kräu ula che ini mäi awlaw Hnadaga sidawng hiyawktih huih ini kräu. Anih ükütni pochong leihnih pawtaw ini mäi hüt. Äi pänäng Pol Yudi ini lumeidün ima chet. Äi düna Ani la khraw thum esengkhiri khawei bala kräu. Ani la Hnadaga pre äng käh kheu äng toksakei bala uyumaih sawk saw koong o hno hüt. Äini äi khrawng khäl dukäng käh pochongak hnih la che deng poei ula äi kheu yumei u. Awlaw Yĕsu lawm krong äng käh kheu awbawng khrawng khäl hmawi hmawh a ini keleih. Äi khaw a Pol la anih a hlätal bala chetal. Awlaw ani tebeih khäl chih pui nawkal. Äidä hnüpak kiyawnah Turana ting mingei nawtih choktih käh im lena ani la Boi Yĕsu lawm krong chi chok. Äi huih jiji Khokum hnih chet. Äidä Esia pre lekchaw a mäitih Yudi awlaw Grik khäl kheni la Boi käh sidawng ini yawk. Hnadaga la Pol a sumei bala mawmawt nawmaw nawkaih saw bi bi. Pol la sumei saw rumal hiyah thän awat lawgase khäl äng khrawng la ini khomei sawk khaw ini pawiyal chi. Awlaw pawyah saw khrawse khäl thokal ula ini chetal. Äi khaw a pochongak hnih Yudi khälla ha pawyah saw khrawse thoh al ula ini chonei. Anih la Boi Yĕsu ming sumei ula che pawyah saw khrawse la mawn saw khrawng khäla awpawi ini poh alaih saw ini hno. Anih la pawyah saw khraw a ini tak, “Pol la hawu saw Boi Yĕsu ming äng nangnih nini thokalaih saw ana kanang pek.” Anih dukäng Iskiba ting mingei nawtih Yudi gong hngata awchaw pochong seh mäi. Äi chaw khälla ha äi huih ini poh hüt chi. Hnüpak khaw a äi pawyah tih khrawse la anih a tak, “Kei Yĕsu a kaw hmawt awlaw Pol la ha kawhmawt, äini nangnih che u khäl äm?” Äi pänäng äi pawyahtih khrawse la mawntih la, äi khrawng khäla ĕpĕk nawk. Äidä äi khrawng la anih a thasa naw pek. Äidä anih naw bünei chak ula äi im känäng ikil ini chenal. Äi kheu khäl Iphis a mäitih Yudi awlaw Grik khälla ini yawk, äi khaw a anih mawmawt ini ke. Awlaw Boi Yĕsu minga ini hlen. Awbawng yumtih khälla ini pum käh pawyah saw bi khäl thupei ti ah pak nanga nang käh ini khawmeyal. Awlaw u khälla hmäng ini dawn hütäm, anih la ha Boih hiyol kheni tänaka lumal ula khrawng hmawi mawh a ini chawh al. Äi Boih hiyol mawn khäl ini süh al chak ni othong hngawngip phu hĕn poisa mäi. Ni huih Boi käh sidawng pawi khrih ei chak awlaw khrawng khäl lung dukäng tha pek bala unung bi bi. Äi huih thänei pänäng Pol la Mesidoniya la Akhaiya lüm bala Yĕlusalema chetalaih saw poh ei. Ani la hawu, “Kei Yĕlusalema kechet pänäng Rom mräh a ha kechetalaih saw.” Äi pänäng ani a kubawm tih Timothi la Erasto a Mesidoniya a eteh al, awlaw ani che hnüpak hnih Esia pre lekchaw a mäiyal. Äi khaw a Iphis a khrawng khälla Boi Yĕsu lawm pawh äng ini chetal koong ini khru saw chah. Dimitrio ting mingei nawtih hĕn bitih hngat la ulupchaw Altemis käh kiyong im huih elekchaw elekchaw hĕn äng poh hüt. Ani awlaw bitih khäl äi äng awbawng ini mrat chi. Ani ängtu bitih khäl awlaw awhngaw hĕn bitih khäla chah ak pawta panei bala tak, “Khanbawn khälo, nangnih nini hmawt khäh, ni bi äng che nangkei käh awmawn awpawi lo khäh. Äini nangnih tua nini hmuh awlaw nini yawk khäh, Pol la bisaw khäl nini hmuh khäh. Ani la hawu, khrawng khälla ini kut äng ini bisaw khäl che iha hiyah. Ani la Iphis la nangkei käh pre lekchaw a käh awbawng khrawnga ani pawta chiyeal däk. Äi koong nangkei käh kun jiji ha krak hnawh, awlaw nangkei käh lentih Altemis lupchaw ha khrawng khälla pujawti hnawh u. Awlaw Esia pre lekchaw a käh khrawng kheni la, luhdül äng käh khrawng khälla mawng u lupchaw a ini rosi hütäm, äi ulupchaw ha hlenti thaw hnawh.” Äi kheu yaw ula che khrawng khäl ini man pok. Awlaw anih la hek ula ini hawu, “Iphisi a käh Altemis lupchaw dä lensaw.” Äi äng äi mräh kheni pu bala mäi. Khrawng khälla Pol ängtu chet hüttih Mesidoniya a käh Gai la Arista a ini mawn. Äidä anih la khrawng ini chumei düna ini chih. Äi khaw a Pol khrawng khäl ini chuh ei düna chetaih khiyang, äini etebeih tih la ani a chet sawk u. Äi pre lekchaw dukäng käh pochongak hnih elenchaw khäl Pol käh khanbawn ini mäi hüt. Anih la Pol khäka khrawng te ula che ekhet äng kheu ini sin, anih ini chok chakei düna chetah hmawna. Äidä khrawng khäl ini lumeidüna ini khru chak. Pochongak hnih khrawng la hngat krong äng ini hek, awlaw pochongak hnih khrawng awhngaw krong äng ini hek. Iyaäm awbawng khrawng khälla che hmawt u äiya khrawng khäl iya ini lumei saw äm. Pochongak hnih Yudi khälla Alekzandal ting mingei nawtih awhmawi mawh a ini tun. Khrawng khälla ani dä ini khrusaw äng käh krong ting ini khin. Ani la ukut hawyei pek bala ini dikaih saw koong tak. Äidä äkräuvaih saw sot. Äini khrawng khälla iti khaw a ani Yudi ting ini hmawt äm, äi khaw a anih gonda hnih daraih ni hawu ula ini hek, “Iphisi khäl käh Altemis lupchaw dä elen saw.” Uyum tum äng mräh a käh elenchaw la khrawng khäla dikal sawk bala hawu, “Iphisi saw khälo, mawng lupchaw bang nangkei khäka lung pel huih hawn känäng kraw saw äm, nangnih ni kheu hang hang la nini hmawt khäh. Iphis mräh thän saw che lentih ulupchaw Altemis käh kiyong im sokhretih. Hngat la ha ni hiyah ting hawu hnäng hnawh u. Äi koong sidih äng mäi khäl, pakhat hni khat iha ämäk bi biyei chu. Iyaäm nangnih ni khrawng khäla nia nini losaw, anih la iha kiyong im känäng mu u awlaw nangkei käh ulupchaw a ha che keleih u. Äi thän Dimitrio awlaw ani käh ulupchaw bitih khälla dä losu ming äng pei ini tängeyeih khiyang khaw tara chäk dün im hongei bala mäi khäh awlaw tara chäktih ha ini mäi khäh. Anih la tara ini poh ei hnäng khäh. Äini nangnih a dä awlaw nini hawuvaih khiyang saw mäi pe hi, äi khäl sawkbrat ini lumei ngap chi düna nini phriyeyal hnäng khäh. Iyaäm tü hnüpa ini phungkanei saw khäl krong äng nangkei dä epret ini kraw aih chaksaw. Ni khäl koong i ha ähläh büneyal hnawh pu. Ni thänei saw khäl koong nangkei i ha okrong dawnal hnäng hnawh pu.” Ni kheu hawu pänäng ani la ini lumei saw phäih yal. Äi ukhru saw dümal pänäng Pol la yumtih sawng apaneyal sawk. Ani la anih a ulyah pek bala awlaw äkiyä tawngei bala Mesidoniya mräh a chet. Äi pänäng ani äi pre lekchaw dukäng chetpe chetpe yumtih khäla ayapyap ulyah pek bala ani Grik pre a aphaw. Äiya ani kho khraw thum mäi hüt. Ani la tui lawm äng Siriya pre a chetaih saw poh ei hüt khaw a Yudi khälla ani a ini suk hlek saw hmawtei. Äidä ani la Mesidoniya a krawnalaih saw khrawkei. Pochongak hnih khrawng ani ängtu ini chet hüt. Äi khrawng khäl che, Biria pre a käh Puhel chaw Sopanto awlaw Arista la Sikundu che Thisaloni a käh, Dapbi pre a käh Gai, Timothi awlaw Esia a käh Tukhik la Trophim. Anih awmaw äng chet ula Troa mräh a keinih koong khrawng chong ula ini mäi hüt. Äi pänäng is kaw ha päi poi pänäng keinih Philipi kän tuisampho äng kini chetal. Awlaw hnüp hngaw pänäng Troa mräh a chet lawktih äng kini khomeyal. Troa mräh a keinih hnüp seh kini mäi hüt. Sapta chah saw hnüp äng ümülawma Boi käh päi kini eyeih saw koong kini lumei. Äi khaw Pol khomyawn chingak khrawng khäl äng kräu. Iyaäm äi hnüp pänäng ani chetalaih saw. Keinih kini chumei hüt dün ädäma käh täka awbawng simiya choi bala mäi hüt. Utikas ting mingei nawtih chong krawng chaw hngat laktang äng om hüt. Pol la yawn thiya chok saw khäl khinpe khinpe ani i ip hmawi poh ei. Äi pänäng ani ip phih bala tala thum känäng awdawnga kraw. Khrawng khälla ani a oyok dä ini khawyal lah. Äi khaw a Pol awdawnga komal. Awlaw ani la äi chong krawng chaw a pawng bala hawu, “Nangnih ke ei chu, ani heng pe khäh.” Äi pänäng Pol ädäm tala a kawyal bala che ei saw eiyal, äidä yawn thiya khowa ak anih äng kräu bala mäi. Äi pänäng ani äi kän chetal. Khrawng khälla äi chong krawng chaw a eheng ima ini chih al awlaw anih mawt ini piyaw. Keinih awmaw äng chetal ungala tuisampho äng kini kawyal, äidä Aser pawtäng kini chetal. Äi düna Pol a tuisampho äng kini khawyalaih saw kheu mäi hüt. Ani a kini khawyalaih saw keinih a khrawng tak hüt. Iyaäm ani che tong grong lawm äng chetaih khiyang hüt saw. Asera ani a kini hmuh ni keinih ani a tuisampho äng kini kawyal awlaw Mitulini a kini chetal. Äi hnüp pänäng keinih äi la känäng chetal ungala Kios songkawi düna kana phaw. Äi hnüp pänäng keinih mret kawt ungala Samos song kawi düna kana phaw. Äi hnüp pänäng keinih Milito a kana phaw. Pol la Iphis a dümah pak lüm bala chetaih saw khrawkei. Iyaäm ani la Esia pre lekchaw a hna hnah ikhin chi do khiyang hütah. Ani ayangei hüt saw khet tha päi khawngah Yĕlusalema a phaw al hmawna. Milito känäng Pol la Iphis a mäitih yumtih sawng äng käh gongsong khäl ani äng khomei hmawna sidawng pek. Anih äiya ana phaw ni Pol la anih a tak, “Esia pre lekchaw a ka phaw saw hnüp täh känäng sawkbrat nangnih ängtu kei ihuih kämäi hütäm, äi nangnih nini hmawt khäh. Yudi khälla ayapyap kei a khrawng suk hlek saw koong mawt kukhru hüt. Kei nävei ngala kimik khri läktäng kukhru saw khin äng ha Boi käh hngasaw huih bi kibi hüt. Kei nangnih a ima awlaw khrawng khäl hmawi mawh a sidawng pawi kanang hiyawk khaw a iha thupah pak ihisaw kanang chok. Yudi awlaw Yudi hiyahtih khäl khäka tha äng kei kawhawu pek hüt, ngulai känäng nini lung hleyeyal chula Hnadaga pawtäng nini krawnalaih lah saw. Awlaw nangkei käh Boi Yĕsu Krito khrung äng nini yumeyeih lah saw. Tua kei Asanh chang Khraw kheu ngei ngala Yĕlusalema kechet tun. Äiya kei äng i thäneyeih saw äm hmawtei nga. Kei ni kheu dä kaw hmawt saw, Asanh chang Khraw la mräh kheni a ni kheu kei a awhawu pek saw, kei othong im duka kaw kraw aih lah saw awlaw dukhah kübünaih lah saw. Äini kei khäka kei sawk che iha hiyah. Kei a kulung hlü mäi saw che, kei a Boi Yĕsu la epek saw bi phäih hnäng hmawna. Äi biche khrawng khäla Hnadaga käh khetjen sidawng pawi krong hiyawkaih saw. “Kei nangnih khäka Mawng Hnadaga käh pre kheu hawu a kolo khäh, äini tua nangnih hngat la ha awlaw krawnak kei a khrawng u hmu lah ti hnawh chu. Äi koong kei tühnüpa nangnih a sanh sanh kanang tak, Hnadaga lawm känäng hngat khat nini krokal khaw, äi thi koong kei khawm hnawh nga. Iyaäm kei nangnih a Hnadaga la i anang hawu pekaih khiyang äm, äi kheu kanang hawu pek chak hüt däk. Nangnih sidih äng mäi khäl, awlaw Asanh chang Khraw la nangnih a yumtih sawng khäl sokhreyeih tih anang awp. Äi khäl krong äng ha sidih äng mäi khäl. Kiyongtih la ihuih ani käh samphomah sawng khäl so khre äm, äi huih kawchawng chawng nangnih ha gong huih Hnadaga käh yumtih sawng so khre khäl. Hnadaga la äi yumtih sawnga Ani Chaw käh thi äng upum käh poeiyal däk. Kei kaw hmawt khäh, kei kechetal pänäng khrawng khäl nangnih khäka ngĕt tih hni huih ini loai. Awlaw samphomah sawnga ini khrah saw huih yumtih sawnga ini khrah ai. Ni huih khin loai yumtih sawnga ehlei chok ula ini pum pawtäng ini loeiyalaih saw soaih tih nangnih duk känäng ini thokai. Äi koong nangnih sidih äng mäi khäl, nini lung äng tawei bäichu, kei kumthum daraih ü hnüp awyawn kimik khri khrawei ngala hang hanga ni kanang chok hüt. “Tua anang so khre eih koong nangnih a Hnadaga kutäng kanang awp. Ani käh kheu la nangnih a anang kuai awlaw Hnadaga käh khrawng la ini pängei saw kheni anang pekai. Kei ha, hĕn awlaw awat cha hngat käh ha lawphah hüt nga. Nangnih kädäng la nini hmawt khäh, kei kut vawng hnih la kei la käphäutih khäl käh hlüsaw khäl kheni hluih hüt. Kei nangnih a kanang dawn hüt, iba tha potila nibisaw äng ngiyaw tih khäla nukuaih saw äm awlaw Boi Yĕsu la hawu saw ni kheu nini lung äng tawyei bäichu, ‘Nübünei saw thawka nepek saw äng dä pisih unung mäi saw.’” Äi kheu khäl hawu pänäng Pol la hang hang ängtu khoklu dül äng suh tongei. Äi pänäng hang hang ni mawt ini kap awlaw Pola äp ula ini hnawm. Anih la krängak ha Pola hmuh lah ti hnawh u saw koong mawt unung dukhah ini piei. Äi pänäng anih Pol ängtu tuisampho täh ini chet. Iphis a käh elenchaw khäl känäng keinih kini kaveyal pänäng tuisampho äng kini kawi. Äidä chäjä lüm ungala song pou saw la Kaws a kini chet. Äi hnüp pänäng keinih song pou saw la Rawda kini lo. Äi känäng keinih Patara mräh a kini chet. Äiya keinih Phonisi a chetaih tih tuisampho hngat kini bün. Äi tuisampho äng kawi ungala keinih kini chet. Äi pänäng song pou saw la Saipru kini hmuh. Äidä tong phak wüyei ungala keinih Siriya pre a käh Tayal mräh a kana phaw. Keinih Tayal a käh tuisampho dümdüna kini chet, Äiya tuisampho äng käh vawn khäl ini khomal. Äiya käh yumtih sawng khäl äng khomeyal ungala keinih anih ängtu hnüp seh kini mäi hüt. Asanh chang Khraw la khrawng khäla tak, Pol äi la känäng Yĕlusalema chetalaih hiyah saw. Äini keinih hnüpak hnih äiya kini mäi pänäng anih a hlätal ungala keinih käh lawm äng kini chetal. Yumtih kheni awlaw anih phiyatih la ini chaw chuhnu khäl kheni mräh pranga käh mret kawm täh keinih ängtu ini lo. Äi pänäng mret kawma khokru düläng suh kini tongei. Äi pänäng hngat la hngat hläteyal ungala tuisampho äng kini kawyal awlaw anih ima ini krawnal. Tayal känäng keinih chah ungala Tolimai a kana phaw. Äiya yumtih sawng khäla äkiyä tawngei ungala anih ängtu hnüpak kini mäi hüt. Äi hnüp pänäng keinih chah ungala Koisoriya a kana phaw awlaw Sidawng pawi hiyawktih Philip ima kini mäi. Ani che Yĕlusalema käh yumtih sawng chetchaw tih äng käh pochong seh dukäng käh hngat mäi hüt. Ani a pochong hli pawtaw omei hawmah tih hngawk hnguchaw mäi hüt. Anih la khrawng khäl khäka Hnadaga käh sidawng ini hawu hüt. Keinih äiya hnüpak hnih kini mäi pänäng Yudia känäng Agabas ting mingei nawtih pochongak Hnadaga sidawng hiyawktih lo. Ani keinih khäka lo bala Pol käh khabaih suh. Äi äng ani la ukut kho henei bala hawu, “Asanh chang Khraw la hawu, Yĕlusalema käh Yudi khälla ni khabaih mawh a ni huih ini henai awlaw Yudi hiyahtih khäl kut äng ini awpai.” Äi kheu khäl yaw ula äiya käh khrawng khälla awlaw keinih Pola ekhet äng Yĕlusalema chetaih hiyah saw kini tak. Äi khaw a Pol la hawu, “Nangnih kap chula kei lunga iya dukhah anang pek saw äm? Boi Yĕsu koong Yĕlusalema kei hengnaw ei hiyah, küdüaih saw koong ha ächän kämäi khäh.” Ani a nga hnäng ti unga ni keinih dikdik kini mäiyal awlaw äi pänäng keinih kini hawu, “Boi käh lung hlü huih thänei seh.” Äi pänäng keinih hnüpak hnih mäi ungala vawn khäl kheni lumeyal ungala Yĕlusalema kini chetal. Koisoriya a käh pochongak hnih yumtih khäl keinih ängtu ini lo awlaw songkawi la Saipru a käh Mrason ting mingei nawtih ima kini chet. Ani ima keinih kini mäyeih saw kheu mäi hüt. Ani che täkchah yumtih khäl äng käh pochongak mäi hüt. Yĕlusalema kana phaw ni yumtih nawu khälla piyaw ula che keinih a khrawng lawkei. Äi hnüp pänäng Pol keinih ängtu Yakuba sota olo. Äiya yumtih sawng äng käh elenchaw khäl ükütni ini chum hüt. Pol la anih a äkiyä tawngei. Awlaw ani la sidawng hiyawk saw äng iba Hnadaga la Yudi hiyahtih khäl dukäng bi bisaw äm, äi hngat pänäng hngat anih a hawu pek. Äi kheu khäl yaw ula che elenchaw khälla Hnadaga a ini phiyaw awlaw Pola ini tak, “Kawnawu Polo, nang che nu hmuh khäh, Othong thong Yudi khäl yumtih a ini thänei awlaw ihuih hang hang lani Mosi käh thung ini khet nawk saw äm.” Anih la ini hawu, Yudi hiyahtih khäl äng mäitih Yudi khäla nang Mosi käh thung hiyänalaih saw nochok. Anih la ini chaw khäla vun awtei sawkah pak awlaw ini sumei tun saw thung ngeiyeih u saw na nga. Anih la che nang nolo saw lälä ini yawkaih saw dä. Tua i thäneyeih saw äm? Nanga tua keinih ibang poaih saw kanang takäm äi huih ekhet äng po. Keinih dukäng awhngaw chaw Hnadaga khäka khawmeitih pawtaw pochong hli ini mäi khäh. Ni khrawng khäla nang ängtu chi puinaw awlaw anih ängtu nang ha asanh chang thäneyal. Anih achang ini thäneyalaih saw koong ini luki ini khah eyalaih saw la päi koong awmawn pek. Nang krong i sidawng ini yawk äm äi hiyah saw ting awlaw nang Mosi käh thung nusumei khäh ting ükütla ni ini hmawtai. Äini mawng Yudi hiyahtih khäl yumtih a ini thäneyal äm anih a ni kheu khäl yo ungala kini hawu pek, ulupchaw hmawi mawh a ini hlusaw eisaw vawn ei yeih usaw, thi oaih u saw, hak ula ini tuk saw mäksetdava saw eiyeih u saw awlaw ini mik sawuveiyeih u saw. Pol äi khrawng khäl ängtu päi äng ani ha asanh thäneyal phih. Äi hnüp pänäng ani Hnadaga ima chetal, awlaw anih achang ini thäneyal saw bi iti khaw a päiyeh saw äm awlaw üküt koong ni iti khaw a mäksetdava ini hluaih saw äm, äi kheu pujawtih a hawu pek hüt. Asanh ini thäneyal saw hnüp seh tawng äng Esia pre lekchaw a käh pochongak hnih Yudi khälla Pol a Hnadaga ima ini hmuh. Anih la khrawng khea ni ini suk hlek awlaw Pola ini mawn. Äi pänäng anih la hek ula ini hawu, “Isawlael khäl o, Ni khrawng che ükütni laa chet bala Isawlael khrawng khäl be kräu, Mosi käh thung be kräu awlaw ni Hnadaga im be kräu. Tua ani la Yudi hiyahtih pochongak hnih a Hnadaga ima lo puinaw bala sanh tih laa sahnah hmawna poh.” (Anih la ni kheu ini hawu saw che iyaäm anih la ayang äng Iphisi presaw Trophim a Pol ängtu mräh äng ini hmuh hüt. Äi koong anih la ini khin saw che, Pol la Trophim a sidawng ima olo ting.) Äi khaw a mräh kheni pusong pusa ini thänei chak. Khrawng khäl utu chon chak ula Pola mawn ula Hnadaga im känäng lat hlänga thoh ula ini lo awlaw äi äng tutu Hnadaga ima käh sät khäl kheni ini khah al chak. Khrawng khälla Pola ini tukaih saw ini sot. Äi khaw a Yĕlusalem mräh a pusong pusa ini thänei saw sidawng Rom soloi gong khäka lo. Äi khaw a äi soloi gong la pochongak hnih soloi khäl käh elenchaw khäl awlaw soloi khäl chi pui naw bala khrawng chuh a chon ula ini chet. Khrawng khälla soloi gong la soloi khäla hmu ula Pola ini bop saw ini dümal. Äi khaw a soloi gong lo bala Pola mawn. Awlaw thi siyol pai hnih äng ini khonaih saw ana pek. Äi pänäng ani la ihi, “Ni khrawng che u äm? Ani la i epret poh saw äm?” Äi khaw a khrawng khäl duk känäng pochongak hnih la hek ula khawak ini hawu, awlaw pochongak hnih la ayapyap kheu ini hawu. Äi äng soloi gong pusong pusa koong lo. Äini i thänei saw äm iha hmawtah. Äidä Pola matih im sawu a ini chih eih saw koong ana pek. Pola ini chih saw hlawk täh ana phaw ni khrawng khäl man känäng ini hläh aih khiyang koong soloi khälla jäk ula ini chih lah. Khrawng khälla ani hnung hnung äng hek ula ini hawu, “Ani a tu khäl.” Soloi khälla Pol äng matih im sawu a ana vawngaih khaw a Pol la soloi gonga tak, “Nanga i ha kanang tak hnängai yei?” Soloi gong la tak, “Nang che Grik be ha nawhmawt khäh nu! Äihi nang Aigup presaw hiti nu. Hnüpak hnih khawngah Rom pre äng phungkanei bala khrawng chi tutih thong hli a täu lung chinga chi pui nawtih?” Äi khaw a Pol la krawn bala takal, “Kei Yudi, Kilikia pre lekchaw a käh Tarso mräh a käh khrawng. Kei alang gong mräh a käh khrawng dä. Kei a ekhet äng ni khrawng khäl äng äkräu sawk.” Soloi gong käh ana bünei bala Pol hlawk khrung äng ja bala khrawng khäla dikdik ini mäyeih saw koong ukut hawh yei pek. Khrawng dikdik ini mäi ni Pol Hibru be äng äkräu. “Pawtih la kata nawutih Yudi khälo, tua kupum pawh äng kei käkräu aih, khin khäl!” Khrawng khälla Pol Hibru be äng kräu saw ini yawk ni äi thawka dikdik ini mäyal. Äi khaw a Pol la tak, “Kei hngat Yudi, Kiliki pre lekchaw a käh Tarso mräh a kei luhdül äng kolo, kei ni mräh a dä kochom saw. Gawmawliyel känäng kei thung kheni kochoknawk hüt khäh. Kei nangkei nu chen paw sawk käh thung chip chip kochok nawk. Nangnih ihuih Hnadaga kheu nini ngei äm äi huih kei ha ke ngeyeih saw ko hno. Yĕsu pawh äng mäi hüttih khäla kei kuluh naw ngala kutuk hüt chi awlaw hmutaw pawtaw khäla mawn ngala othong ima kaw thawn chi hüt. Ni kheu ihisaw kawhawu saw che pujawtih gong la Yudi khäl käh hngawsaw khäl kheni la ini hmawt khäh. Awlaw kei anih känäng chaw lawei ngala Damaska mräh a kechet hüt. Kei äiya kechet saw khrawng khäla mawn ngala Yĕlusalema loal ngala dam pek hnäng ong.” “Kei Damaska ken täh kolo däk khaw a, khosun huih ya täk ting hawn känäng awa hngat lo bala kei ken set sei awa chak. Kei dek äng kawkraw awlaw asam hngat la kei a ataksaw kawyawk, ‘Sol, Sol! Nang kei a iya ini kuluh nawk saw äm?’ ‘Kei kihi, Boi o, Nang u äm?’ Ani la hawu, ‘Kei Nazarina käh Yĕsu, ua nang nukuluh nawk chi hütäm.’ Kei ängtu mäitih khrawng khälla äi awa ini hmuh, äini kei äng kräutih käh kheu yaw u. ‘Kei kihi, Boi o, kei i kopoh aih saw äm?’ Boi la kei a atakal, ‘Thou awlaw Damaska a chet. I nopoh aih lah saw äm Hnadaga la äiya ini hawu pekai.’ Äi awa long äng kei mik hmü hüt. Kei phäutih la kei a khrawng sin ula Damaska a khrawng chih al.” Äi mräh a Anania ting mingei nawtih khrawng hngat mäi hüt. Ani la Mosi käh thung khäl mawmawt chaw ngei hüt. Äiya käh Yudi khäl kheni la ani a mawt hmawi ini pek hüt. Ani kei kena lo bala ja bala hawu, ‘Nawu Sol o, nimik äng hmueyal heh ti.’ Äi äng tutu kei kimik äng kuhmueyal awlaw ani a kuhmuh. Ani la hawu, ‘Nangkei käh nuchen paw sawk khäl käh Hnadaga la Ani käh sitha naw hmawtaih koong, Ani käh konghmuh sang hngasaw a nu hmuh aih koong awlaw Ani kräu saw ni khinaih koong nanga anang heh lei.’ Nang Ani käh sawksi näthäneyei awlaw i nu hmuh äm, i nawyawk äm khrawng kheni a äi nawhawu pekaih saw. Äi khaw tua nang i nochong pe saw äm? Thou hnäh, tuilüh a lawei awlaw Ani khäka suh notongei khaw nang käh ngulai kheni changal chakai. “Äi pänäng kei Yĕlusalema lo al ngala hnüpak Hnadaga ima suh kotongei hüt tun khaw a kakraya hngat kuhmuh. Äi äng kei kuhmuh, Boi kei äng kräu tun saw. Ani la hawu, ‘Jot jota poei, tunitua Yĕlusalem hlät tila chetal, iyaäm Kei krong äng sawksi nothok saw äng khrawng khälla nanga anang lawei thaw hnawh.’ Kei katak, ‘Boi o, anih la ini hmawt khäh, nanga anang yumeitih khäla mawn ngala kobop chi awlaw thong ima keheng nawkaih saw koong kei Yudi ini lumeidün im täng im täng kechet chi hüt. Nang käh sawksi Istiphen a tuk hmuei khaw a äiya kei kämäi hüt khäh. Kei ha anih äng kingi hüt khäh awlaw ani a tu hüttih khäl käh ilhchaw kochong hüt.” Äi khaw a Boi la kei a atak, “Chet! Kei nanga awhlawm hlaw a Yudi hiyahtih khäl khäka kini teh ei.” Pol la ni kheu hawu saw täh khrawng khälla ini khin. Äini ani la Yudi hiyahtih käh kheu hawu ni khrawng khälla athak hek ula ini hawu, “Ni khrawnga tu khäl! Ani luhdül äng hengaih saw tawnah. Äi khaw a anih ini hek. Äidä awat sutei ula ini tong awlaw de hnui ädäm pawh äng ini phulh. Äi khaw a Rom soloi gong la ani käh matih im sawu a Pola chih yeih saw tak. Yudi khälla iya hek ula Pol ming äng epret ini tawng saw äm, äi bop ula ini chängaih saw tak.” Pola jäi äng ini bopaih saw koong ini hen khaw a, äiya ja bala mäitih soloi gong la Pol la tak, “Epret bi ei, biyah ei khraw hnäng hawm chusaw Rom presaw a nini bopaih saw Rom pre thung äng mäyei?” Ni kheu yaw bala soloi äng käh elenchaw soloi gong khäka chet bala awhawu pek, “Nang i nopoh saw äm? Ni khrawng che Rom presaw dä.” Äi khaw a soloi gong Pol khäka chet bala a hi, “Kei a awhawu pek, nang Rom presaw ei?” Pol la takal, “Ä.” Soloi gong la tak, “Awbawng awmawn Rom pre khiyuptih a pek ngala kei Rom presaw käthäneyeih saw kehleh yei.” Pol la tak, “Äini kei Rom thänei ngala dä luhdül äng kolo saw.” Ni kheu ini yawk saw äng tutu ani a ini hiyeih koong lotih khäl ini hnung ini suteiyal. Pol Rom presaw dä ting awlaw ani la Rom presaw a khon ting soloi khäl käh gong la yawk ni eke. Yudi khälla Pol käh i epret mäisaw äm, äi awhmawtaih khiyang. Äi hnüp pänäng soloi gong la Pol käh siyol phrutal sawk. Awlaw pujawtih gong khälla Yudi khäl käh hngawsaw khäl tänaka ini lumeyeih saw tak. Äi pänäng ani la Pola lo bala anih hmawi mawh a a hiya. Pol la Yudi khäl käh hngawsaw khäl pawta chok jok so bala che hawu, “Kei käh Isawlael ta nawu khäl o, Tutäh si äng kei kawtawk sanh äng Hnadaga ngei ngala kämäi.” Äi yaw bala pujawtih gong Ananiyo la Pol kena ja bala mäitih khrawng khäla Pol hmawi beh eih saw tak. Äi khawa Pol la Awnonio a tak, “Lupsongeitih o, Hnadaga la nanga ha ini bopai. Thung mäi saw huih tara ni biyeih saw koong nang äiya noom, äini kei a khrawng bopaih saw nataksaw äng nang äi thung nakhrah.” Pol kena jatih khrawng khälla Pola ini tak, “Nang Hnadaga käh pujawtih gonga siri nepek!” Äi khaw a Pol la tak, “Nawu khäl o, kei ani pujawtih gong ting hmawt nga saw dä. Kawhmawt khaw äi huih hawu thaw nawh nga saw.” Iyaäm kiyam äng yoei bala mäi khäh, “Nangnih yapsaw khäl käh elenchaw khäl a siri pekai chu.” Äi Yudi elenchaw khäl äng phakak che Suduki awlaw phakak che Pherasai ting hmawt bala Pol la hek bala che hawu, “Kei hngat Pherasai awlaw Pherasai khäl käh chaw. Dütih khäl awlaw krawnak ini hengalaih saw dä ting kuyuma kei käh tara thänei tun saw dä. Ani käh ni kheu äng Pherasai la Suduki khäl ini siyei saw ini chah. Äi äng Yudi elenchaw khäl sawng hnih ini koyeyal.” (Iyaäm Suduki khälla ini hawu saw che, “Düdäktih khrawng khäl hengal ula thouwal ti hnawh u.” Anih la awlaw ini hawu, hawn natchaw khäl awlaw awkhraw khäl ha mäi u, äini Pherasai khälla che äi paithum kheni ini yumei.) Äi khaw a anih athak ini hek awlaw Pherasai khäl äng käh pochongak hnih thung choktih thou ula ini chok chakei. Anih la ini hawu, “Keinih ni khrawnga iha epret hmuh unga. Hawn natchaw hiyah khaw awkhraw ani äng kräu saw dä hipai.” Anih mawmawt ke sese a ini siei saw hmu bala soloi gong la Pola ini khri chakai ting mawt eke. Ani la soloi khäla Pola khrawng khäl kut känäng loal ula matih im sawu a ini chih alaih saw tak. Äi yawna Boi Pol kena ja bala che tak, “Neseng khri tawei! Yĕlusalema kei krong äng sawksi nothok saw huih Roma ha nothokaih lah saw dä.” Äi ngo kawthawiya pochongak hnih Yudi khäl lumei ula uak ini kram. Pola tu hnäng u saw sawgraw i ha ei o hnawh u ting ini jeng. Äiya kramtih khäl hligip thawk chaw a ini mäi hüt. Anih la chet ula pujawtih gong la Yudi gongsong khäla ana tak, “Pola tu hnäng unga saw sawgraw keinih i ha ei o hnawh unga ting kini jeng. Tua nangnih awlaw awhngaw elenchaw khälla Pola nangnih khäka ini loa laih saw koong soloi gong khäka sidawng san khäl. Nangnih mawmawt chaw nini chängalaih saw ting hleinaw bäichu. Ani niya a phawal khawngah keinih ani a kini tukaih koong ächän kini mäyei.” Äini Pol besu chaw la ni ini kram saw yaw bala matih im sawu a chet bala Pola sidawng a hiyawk. Äi khaw a Pol la soloi elenchaw hngata be ei bala che tak, “Ni chong krawng chaw a soloi gong khäka chi. Ni la ani a kheu hngat hawu pekaih saw mäi khäh.” Äi khaw a äi soloi khäl käh elenchaw la ani a soloi gong khäka chih puinawk, äidä atak, “Heng naw hmueitih Pol la kei a ebe ei bala ni chong krawng chaw a nang khäka lo aih saw atak, iyaäm nila nanga kheu hngat anang hawu pekaih saw mäi.” Äi khaw a soloi gong la äi chong krawng chaw ukut äng sin bala hngat pawta chih, äiche ihi, “Nang kei a i ini takaih khiyang saw äm?” Äi chong krawng chaw la tak, “Yudi elenchaw khälla ongo a Pol a Yudi khäl käh hngawsaw hmawi mawh a ini loaih saw koong nang känäng ana anang a hawuveyeih saw ini kram khäh. Anih la Pol krong äng awlaw mawmawt chaw kini chängaih khiyang ting ini hle yei. Äini nang anih kheu khinai ti, iyaäm khrawng hligip huih thupei ula Pol koong chong ula ini mäyeih saw dä. Pola tu hnäng u saw sawgraw anih la i ha ei o thaw hnawh u saw ting ini jeng khäh. Anih la tua äi huih ini poh aih saw dä chong ula ini mäi saw awlaw nang käh kheu ini büneyeih saw koong dä chong ula ini mäi saw.” Äi chong krawng chaw a te al khawngah soloi gong la ani a ni kheu sin hüt, “Ni kheu nang kei a ini hawu pek saw hngata ha hawu pekalai ti.” Äi pänäng soloi gong la ani käh soloi elenchaw pochong hnih a panei bala tak, “Soloi khrahnih, se chumtih soloi sĕhgip awlaw khrahnih sĕ sineitih soloi tüyawna paikoh äng Koisoriya a ini chetaih koong ächän tawhnih. Awlaw Pol koong ha se hngat pai hnih taw bäi hni ani mawmawt chaw pre khiuptih Philik khäka chi hnäng hmawna.” Soloi gong la ni huih chaw yok, “Kei, Kolodio Luis, pre khiyuptih elenchaw Philik o, kei nanga kini khäh.” “Yudi khälla ni khrawnga mawn ula ini tukaih saw ini poh hüt, äini kei käh soloi khäl chi ngala ani a ka hläh al. Iyaäm ani Rom presaw ting kei kawyawk. Äi pänäng kei kaw hmawtaih khiyang khrawng khälla iya ani a epret ini khrawk saw äm. Äi koong kei ani a Yudi khäl käh hngawsaw khäl hmawi mawh a kichih. Awlaw kei kawyawk chu, ani la Yudi khäl käh thung krong ihisaw khäl koong epret khrawk hmuei. Äini ani a tukaih saw la thong im äng thawnaih saw huih iha epret bün nga. Khrawng khälla ani a ini tukaih saw koong pawyah saw ini kramtun saw kawyawk saw äng tutu kei ani a nang khäka keteh. Ani a epret khrawtih khälla ha ani ming äng nang khäka ana tängeyeih saw katak.” Äi khaw a soloi gong käh kheu huih soloi khälla äi yawna Pola Antipati mräh täh ini chih pui nawk. Äi hnüp pänäng se chumtih soloi khäl ängtu Pola te ula awhngaw matih im sawu a ini krawnal. Se chumtih soloi khäl Koisoriya a ini phaw ni chaw awlaw Pola pre khiuptih Philik kutäng ini awp. Pre khiuptih Philik la äi chaw phawt bala Pol mawng la a käh äm ting ihi. Pol Kiliki pre lekchaw a käh dä ting ini tak, “Nanga epret anang khrawtih khrawng khäl niya ini phaw pänäng kei nang käh kheu kikhinai.” Äi pänäng ani la Herawt mawng im ting ini tak düna Pola chong ula ini tawkaih saw tak. Hnüp hngaw pänäng pujawtih gong Ananiyo la pochong hnih thum Yudi gongsong la Tatulas ting mingei nawtih kheu hmawt tih hngat lo bala Koisoriya a chet. Äidä anih la khiyuptih Philik khäka Pol ming äng tara tawnga ini lo. Pola panei hmuei ni Tatulas la Pol käh epret khoh bala che hawu, “Kenju mawh Philik o, nang sitha äng awbawng hnüp keinih jelkhiyamsa äng kini mäi khäh. Nang ni pre pawiyeih saw koong awbawng alang gong bi nibi tun khäh. Äi koong sawkbrat keinih ükütla ni nanga äkiyä kanang tawngei awlaw kenju kanang tawngei. Äini nang käh khin khrakti ah pak ekhet äng kei käh kheu bitchaw nikhi naih saw kini tak. Keinih otoi chaw lawm äng ükütni kanang hawu pekai.” “Keinih kini hmuh, ni khrawng hngat che phi potih. Luhdül äng käh Yudi khäl kheni a nila khru sawk. Ani Nazarin ting mingei nawtih sawng äng käh elenchaw hngat. Hnadaga ima bang ani la meseih machang poh aih saw sota keinih ania kini mawn saw dä. Keinih käh thung huih ani käh tara kini biyeih saw kini sot. (Soloi gong Lusias lo bala keinih känäng soloi sawng äng chih al. Äidä nang khäka ni khrawng ming äng tara kanang a tawngaih saw khrawng tak.) Keinih ani a epret kini mawn tun saw khäl kheni nang kädäng la ani a nihi khaw naw hmawtai saw dä.” Ni kheu khäl ihi khäh ting Yudi khäl ha ini ngi. Äi khaw a pre khiyuptih la Pola äkräu aih saw ukut äng dawnei ni Pol la hawu, “Kei kaw hmawt khäh, awbawng khokum nang ni Yudi yapsaw khäl tara nibisaw. Äi koong kei piyaw ngala dä kei kupum prak äng nang hmawi mawh a käkräu saw. Nang sidawng nolouh sawk khaw naw hmawt khäh ai, hnüp lei hnih thawka thänei hawmah kei rosi ei äng Hnadaga ima Yĕlusalema kechet saw. Kei a epret khrawng khrawtih la Hnadaga ima hngat äng ha kochok chakei saw hmu u. Awlaw anih la mräh dukäng awlaw Yudi ini lumeidün ima khrawng khäla kusuk hlek saw bün u. Kei khrung äng khrawng thawn saw epret khäl anih la tua nang hmawi mawh a khraw hnäng nawh u. Kei kaw khawmei, Kei käh nuchen paw sawk khäl käh Hnadaga a kei korosi. Kei äi korosi saw Lawm ni Yudi khälla hiyah ting ini hawu. Äini kei kuyum Mosi käh thung äng ükütni yoei bala mäi khäh. Awlaw Hnadaga sidawng hiyawktih khälla ini yok hüt saw kheni ha kuyumei khäh. Anih la ini ümsaw huih kei ha kü üm khäh, Hnadaga la pawitih la pawyahtih khrawng kheni a düsaw känäng henalai. Äi koong kei üküt khaw a ni Hnadaga awlaw khrawng khäka kawtawk sanh kaw tawkeyeih saw ko hno.” “Awbawng khokum pänäng kei Yĕlusalema kechet hüt kei yapsaw khäla bitchaw awmawn pek hnäng hmawna awlaw Hnadaga khäka mäksetdava hlu hnäng hmawna. Kupuma asanh kopoh eyal saw päi pänäng kei äi bi kibi khaw a anih la Hnadaga ima khrawng hmuh saw. Kei khäka khrawng ha lumei u awlaw kei koong ha khru u. Äini Esia pre lekchaw a käh pochong hnih thum Yudi äiya ini mäi hüt. Äi Yudi khäl dä nang khäka ini lo tawn saw awlaw kei a epret khrawng thawnaih saw mäi khaw anih la dä niya lo ula nang khäka epret ini tawngaih saw tawn. Hiyah hi niya mäitih khrawng khälla hawu khäl chaw, kei Yudi khäl käh hngawsaw khäl hmawi mawh a kaja hüt khaw a, anih la kei käh i epret ini bün hütäm?” Anih la ni krong äng dä kei a epret khrawng mawn hnäng saw, kei anih hmawi mawh a atak hek ngala kawhawu hüt, “Dütih khäl awlaw ini hengalaih saw kuyum saw krong äng nangnih hmawi mawh a kei käh tara bi hmuei.” Yĕsu käh lawm krong Philik la mawmawt chaw hmawt hüt khäh. Ani la tara dümal bala hawu, “Soloi gong Luis lo pänäng dä kei nang käh tara kibi eih saw.” Pol a chongaih saw koong ani la soloi khäl käh elenchaw a tak. Äini ani a bitchaw i sitha huih tawkaih saw ha tak. Pol phäu khäl lo ula ü hlüei saw huih ini pek hnäng khäh ai ting ha tak. Hnüpak hnih pänäng Philik ani phiya Dusila äng i hni lo. Dusila che Yudi mäi hüt. A hnih la Pol a panei häih la ani känäng Yĕsu Krito a yumei saw krong i hni khin. Äini Pol la ihisaw bi, kantha songei khrang awlaw awhmawi mawh a Hnadaga la tara biyalaih saw krong hawupek ni Philik la ke bala hawu, “Tua nang nechetal hnäng däk. Kei ikhin kübünei khaw a kini bekeyei.” Äi khaw a Pol la ani a awmawn bitchaw pekaih ting khinei hüt. Äi koong ikhi kha Pol a panei sawk bala ani äng kräu chi hüt. Khokum hnih lüm pänäng Philik la a Porkiyo Phetas khiyuptih thäneyal. Philik la Yudi khäl phiyaw aih koong Pol a thong ima tawk hüt. Phetas äi pre lekchaw a a phawsaw hnüp thum pänäng Koisoriya känäng Yĕlusalema chet. Äi khaw a pujawtih gong khäl awlaw Yudi elenchaw khäl ani khäka chet ula Pol be ini sämchäh. Anih la mawmawt khawh ei ula Pola Yĕlusalema teh alaih saw koong Phetasa ini tak. Iyaäm anih la lawma thupei ula Pola ini tukaih saw ini kram hüt. Äi khaw a Phetas la hawu, “Pola Koisoriya a heng nawk hmuei khäh, kei alanda äiya kechetalaih saw dä. Nangnih dukäng käh pochongak hnih elenchaw kei ängtu lo seh u. Ani la dä epret poh khaw, kei a khrawng khin sawk bäichu.” Phetas anih ängtu hnüp set hnüp ha bawng mäi bala Koisoriya a krawnal. Äi hnüp pänäng ani tara bi dün laa Pola ani khäka ini loaih saw tak. Pol aphaw ni, Yĕlusalem känäng lotih Yudi elenchaw khälla ania vanei naw ula ini ja. Äidä anih la khrawaih hnäng u saw ayapyap epret ini khoh. Äini Pol la upum pawtäng khawmei bala ni huih hawu, “Kei Yudi khäl käh thung, Hnadaga im awlaw Rom äng käh mawng len Koisor khäka ha epret thänei nga.” Phetas la Yudi khäl käh lung phiyawaih khiyang saw koong Pola tak, “Ni epret khäl äng nang käh tara kibiyeih saw koong nang Yĕlusalema nolo doayei?” Pol la krawn bala takal, “Kei tua Rom khäl käh tara ima ja ngala kämäi. Awlaw Rom pre khiyuptih mawng len khäka dä kei käh tara thäneyeih saw tawn. Nang nawhmawt khäh kei Yudi khäl lukhrunga iha epret po nga. Kei dä dü tawn huih epret kopoh hi, dü seh nga. Kei kälätalaih saw koong kanang hawuvei hnawh nga. Äini ni Yudi khälla khrawng khoh saw epret hiyah saw dä thänei khaw, anih kutäng kei a khrawng awpaih saw tha hngata ha mäyah. Kei mawng len khäka tara kübüneyeih saw koong chaw kawtawngei.” Phetas la ani käh kheu hngawsaw khäl äng kräu ei bala hawu, “Nang mawng len khäka chaw nawtaw ngei däk, äi koong nang mawng len khäka nechetai.” Hnüp hnih thum pänäng Yudia a käh mawng Agripa la ani phiya Barniki Phetasa kenju tawngei a Koisoriya a i hni lo. A hnih hnüpak hnih äiya ihni mäi ni Phetas la a hnih a Pol be hawu pek. Ani la tak, “Philik la khrawng hngata niya hengnaw bala tawk hüt. Awlaw kei Yĕlusalema kechet khaw a Yudi khäl käh pujawtih gong khälla awlaw chang gongsong khälla ni khrawng epret ini khrawk. Anih la ni khrawng käh tara bi ngala dam kepekaih saw khrawng tak. Kei anih a katakal, ‘Tara biyah pak dam äng nawkhraw kaih saw Rom presaw thung äng mäyah. Epret khraw hmueitih la epret khrawtih hmawi mawh a upum kheu kräuwaih saw khin büneyeih lah saw dä.’” “Äi Yudi khäl kei ängtu ini lo ni, ikhin kraw sawk tiah pak äi ngo a kei tara äng ko om. Äi khrawnga tara ima ini loaih saw ana kothoh hüt. Epret khrawtih khrawng khäl ini kräuvaih saw koong ini ja äini kei kawtawk saw hiyawh pawyah saw epret hngat la ha thouh ula epret khraw hnäng u. Äichaw a, anih käh ini yumsaw krong la Yĕsu ting mingei nawtih khrawng hngat be äng dä epret ni khrawk. Äi dütih Yĕsu e heng pe khäh ting Pol la hawu. Ni krong sidawng khäl iba kolouh waih saw äm hmawt nga koong kei Pola kihi, äi tara khäl bi hnäng hmawna Yĕlusalema chetdo ayei. Kei äiya ani käh tara kibi hnängai. Äini Pol la mawng len käh tara chongeyeih saw koong kei khäka chaw hiyänei. Ani a mawng len khäka tenga saw sawgraw kei ania chong ula ini tawkaih saw katak.” Äi khaw a Agripa la Phetas a tak, “Kei kupum la ni khrawng käh kheu ki khinaih khiyang.” Phetas la tak, “Hngätäh a ni khin lah ai.” Äi hnüp pänäng Agripa mawng la iphiya Barniki soloi gong khäl äng khrawng la mawmawt hmawi pek ula mräh äng käh elenchaw khäl ängtu ini lumeidün im lena ana pamp. Phetas käh ana äng Pola äiya lo hmuei. Äi khaw a Phetas la hawu, “Agripa mawng la niya mäitih khrawng khela, ni khrawnga ini hmuh khäh. Yĕlusalem la Koisoriya a käh Yudi khäl kheni la, ni khrawng ming äng kei khäka tara ini lo. Anih la hek ula ini hawu, ni khrawng düaih saw tawn khäh. Äini ani la bisaw äng nutuk tawn saw huih epret kei iha bün nga. Awlaw ani la mawng len khäka tara koong chaw tawngei. Äi koong kei ani a mawng len khäka keteh eih saw kaw khrawk, Äini mawng len khäka ani krong äng koyokaih saw huih kei iha bün nga. Äi koong kei nangnih kheni hmawi mawh a awlaw unung chaw che mawng Agripa hmawi mawh a ania kei kolo. Ania chäng tila uak khat koyo kaih phüh bün ong. Iyaäm lälä ihisaw epret bünah pak epret mawh hngata mawng len khäka kü hlümaih saw pawi hnawh ting ki khin.” Agripa la Pola tak, “Nanga näkräuvaih saw koong ikhin pek hmuei.” Äidä Pol la ukut tunei bala ni kheu hawu. “Mawng Agripa o, tü hnüpa kei mawt kulumchawl pawi ting ki khinei. Iyaäm unung chaw nang naw hmawt khäh Yudi khäl käh thung khäl awlaw anih käh toksakei khäl. Yudi khälla kei ming äng epret khrawng tawng saw krong äng nang khäka käkräwaih saw ikhin kübünei. Äi koong nang chuneitila kekheu ni khinaih koong nang khäka kaw khawh ei.” “Sämäichaw khaw thouh kei kämäichoh saw khrang Yudi khälla ini hmawt hüt khäh. Kei presaw la ini hmawt hüt khäh kei iba kämäi hütäm awlaw Yĕlusalem saw la ha kei ihuih khrang äng kämäi hütäm ini hmawt khäh. Anih la sawkbrat ini hmawt khäh, kei ngettih Pherasai sawng äng käh pochongak kämäi hüt. Anih mawt thung khäl äng ini nget hüt. Anih la ini lung hlü mäi khaw äi ini hawu hnäng khäh äi hü. Nangkei nuchen pawsawk khäl khäka Hnadaga la khawmei saw khäl kuyum saw koong tua kei käh tara thänei tunsaw. Nangkei yap leihnih äng käh khrawng khälla ü hnüp awyawn ini lung pekei ula Hnadaga a rosi ula äi khawmei hüt saw kheu u luihyeih saw ini chongtun saw. Mawng o, äi kuyum saw koong dä Yudi khälla kei ming äng epret khrawng tawng saw. Hnadaga la dütih khäla e hengal sawk saw kheu yumphoih hiyah ting iya nangnih nini khin saw äm?” “Nazarina käh Yĕsu ming äng i aw pawyah saw bi mäi äm, äi khäl kheni kibi tawn khäh ting kei kädäng la kawtawk hüt. Kei Yĕlusalema äi huih kopoh hüt. Kei pujawtih gong khäl känäng dogo bünei ngala Krito a yumeitih khäla othong ima kawthawn hüt. Awlaw anih a tuk tawnah saw ini tukaih khaw a ha kingi hüt chi. Anih a Yudi ini lumeidün im khäla chet ngala dam äng kaw khrawk chi. Awlaw tha tawng ngala Yĕsu a yumeyeih u saw koong ko hno hüt chi. Anih khrung äng kei mawt kaman pok ngala awhngaw pre a bang kuluh nawkaih äng kechet hüt.” “Ai huih krong äng kei hnüpak khaw a Pujawtih gong känäng dogo la ana bünei ngala kei Damaska kechet hüt. Mawng o, khosun hüt khaw a lawm äng khoni long thawka watih wa hngat hawn känäng kei la käphäutih khäl khrung äng awkraw.” Keinih dekäng kini krawchak awlaw Hibru be äng asam hngat la kei a ataksaw kawyawk, “Sol, Sol, nang kei a iya ini kuluh nawk saw äm? I hling mawh kompuma säih tila nang nupuma naw nepekei.” “Äidä kei kihi, ‘Boi o, nang u äm?’ Boi la awhawu, ‘Kei Yĕsu, ua nang nukuluh nawk tunäm. Tua nang thou tila jaal. Kei nang khäka kanang dawneisaw, iyaäm nang kei hngasaw näthäniyeih saw koong kanang heh lei. Nang kei a ihuih ini hmuh äm awlaw nanga awmaw äng ibang kini dawnaih saw äm äi khäl khrawng khälla hawu pek bäi. Nanga kini teh eih saw Isawlael khrawng la Yudi hiyahtih khäl känäng kei nanga kini ka ai. Nang anih mik hong pek bäi. Awlaw uhiyung känäng awa äng loal bäi. Mannat käh tha känäng Hnadaga pawta nolo alaih koong kei nanga kini teh. Äi khaw anih la kei a khrawng yumei saw koong anih käh ngulai hläh hmuei yalai. Äihi Hnadaga la heh lei saw khrawng khäl ängtu ala ini bünei yalai.’” “Agripa Mawng o, hawn känäng kei a asam la khrawng taksaw ngeiyah pak mäi hüt hnäng nga. Täkchah kei Damaska a, äi pänäng Yĕlusalem la Yudia pre lekchaw a käh üküt laa ni sidawng kaw hiyawk. Äi pänäng kei Yudi hiyahtih khäl khäka ha chet ngala hang hang khäka tara kawhawu. Kei kawhawu peksaw che ni, ngulai känäng nini lung hleyeyal chula Hnadaga pawta loal khäl awlaw äi huih bi bi khäl nangnih lung nini hle eiyal saw dawng hmawna. Äi koong Yudi khälla Hnadaga ima kämäi khaw a khrawng mawn. Äidä khrawng tukaih saw khrawng poh. Äini tutäh si äng Hnadaga la kei a uku. Äi koong kei niya ja ngala alang gong la langongah tih khrawng khäl khe khäka ni kheu kawhawu. Hnadaga sidawng hiyawktih khälla awlaw Mosi la i thäneyeih saw ting hawu hütäm, äidä kawhawu saw. Mesaya la waih khawmaih lah saw. Ani a dä täkchah Hnadaga la düsaw känäng thouwalaih saw, Yudi la Yudi hiyahtih khäl khäka awa äng käh khiyawt tara hawvaih koong.” Pol ni huih kräu tun khaw a Phetas la hek bala che tak, “Pol, nang nulu däk! Nang awbawng chaw nawphawt koong chaw la nanga ini luei däk.” Äini Pol la takal, “Ming maw Phetas o, kei lunga. Kei lu ah pak ni ihisaw khälla awmawn tawn saw kawhawu saw dä.” “Agripa Mawng o! Ni käkräu saw krong khäl che nang naw hmawt chak khäh. Iyaäm kei kaw hmawt khäh äi thänei saw khäl che ikiuwa thupei dün laa hiyah. Äi koong kei kesengkhri khawei ngala käkräu saw. Agripa Mawng o, Hnadaga sidawng hiyawktih khäl käh kheu nang nuyumeyei? Kei kaw hmawt khäh nang anih a nuyumei khäh!” Äidä Agripa la Pola tak, “Ni i khin bitchaw äng nang kei a yumtih a ini poh aih khiyang saw ei?” Pol la takal, “Ikhin toi äng pei ikhin sawu äng pei Hnadaga khäka kei ni dä suh kotong saw, Agripa mawng la niya kekheu khintih kheni kei huih yumtih a thäneyal heh chu. Keih huih thi siol äng hen nini hmueyeih saw hlünga.” Äidä mawng thouwal ni ani ängtu khiyuptih Phetas, Barniki awlaw anih ängtu äiya omtih kheni ini thouwal. Äi pänäng anih äi im hlät ula ini chetal. Anih hngala hngat ini kräu ei, “Ni khrawng la dü aih lah saw huih la o thong äng naw khrawkaih saw huih epret i ha poh ah.” Agripa la Phetasa tak, “Ni khrawng la mawng len khäka tara koong chaw tawngeyah khaw nangkei ini hläh al hnängai hü.” Keinih tuisampho äng Itali a kini chetaih saw khrawk hmuei. Äi khaw a Pol awlaw awhngaw hengnaw hmueitih khäla Zulias ting mingei nawtih soloi gong kutäng awp hmuei. Ani soloi sawng äng käh hngat mäi hüt. Äi sawng ming che Rom mawng sawng. Keinih tuisampho dümdün Adramutin känäng lotih tuisampho hngat äng kawi ungala kini chet. Esia pre lekchaw a ätäntän tuisampho dümdün laa chetaih koong tuisampho ächän mäi hüt. Keinih kini düm, äidä ächän mäi hüt ungala kini kawiyal. Mesidoniya pre lekchaw a käh Thisaloni mräh a käh Arista ha keinih ängtu mäi hüt. Äi hnüp pänäng keinih käh tuisampho Sidona aphaw. Soloi gong Zulias la Pol äng mawmawt chaw akhrang poh ei. Zulias la Pol äphäutih khäka chet bala khomeyeih saw ikhin pek, äphäutih la ühlüh ei saw vawn ani a pek hnäng ong. Keinih Sidon hlät ungala tuisampho äng kini kawyal. Iyaäm khri awkrawn lawma losaw koong keinih Saipru song pou saw duk känäng eken eken äng kini chet. Äi pänäng keinih Kiliki awlaw Pampiliya kena käh mret kawt ungala Lukia pre lekchaw a käh Mura mräh a kana phaw. Aidä tuisampho känäng keinih kini kom. Äiya Rom soloi gong la Alekzandiya känäng käh tuisampho hngat bün. Äi tuisampho che Itali pre a chetaih saw. Keinih hang hang ni äi tuisampho äng kini kawi. Keinih käh tuisampho khri nung saw äng awbawng jai saw koong awbawng hnüp pänäng dukhah äng Kidon mräh kena kana phaw. Khri koong keinih awmaw äng chet hnäng ti unga. Äi khaw a khri mäyah saw pawtäng Krit song pou saw ala pawta Salmoni ken känäng kini lüm. Keinih kawm äng kawm äng kini chet. Awlaw awbawng dukhah äng hawn pawi ting ini taksaw la a kana phaw. Äi kena Lasia mräh mäi hüt. Keinih äiya awbawng hnüp kini mäi hüt. Äi khaw a tuisampho chonaih saw mawt keh se. Iyaäm Hnadaga la ngulai känäng ähläh pekal saw päi poi bala sik khaw olo saw. Pol la tuisampho äng käh khrawng khäla sidih pek bala che tak, “Khrawng khälo, kei kuhmuh tun, nangkei a ni ini chetaih saw äng thasa phi mäiyeih saw dä. Äi äng tuisampho äng käh vawn jiji hiyah, khrawng khäla ini sawk ini hiyumei naw theih.” Äini Rom soloi gong la Pol kheu khinah pak tuisampho äng käh lenchaw la tuisampho mawh kheu dä khin. Awbawng khrawng la äi tuisampho dümdün laa isik khaw a nämäyeih saw pawi hnawh ting ini hawu. Äi koong awbawng khrawng che Phonik a isik hläh a ini chetaih khiyang hüt. Phonik che Krit song pou saw laa käh tuisampho dümdün. Äila che tong phak la khoni krawk awlaw mräh phak la khoni krawk pawtawng awhmawi pek. Äi pänäng ekreng ekrenga mrok phak känäng khri olo. Äi khaw a anih la ini tawk, anih la ini hlüei saw huih thänei ting ini tawk. Äi koong anih la tuisampho äng käh thi khak khawyal ula Krit song pou saw awkawm äng eken kän kini chet. Äini tana mäini äi song pou saw laa tongphak la khoniphak ting ini taksaw khrilen hngat lo. Äi khri len tuisampho äng kraw. Khri len awmaw pawt känäng lo saw koong keinih awhmawi mawh pawta chet hnäng ti unga. Keinih chet hnäng ti unga saw koong tuisampho a khri isitha huih kini chet sawk. Äiche Koda ting mingei nawtih ala lekchaw song pou saw ken känäng keinih kini lüm. Kini lüm khaw a äiya khrila thasah bopah saw la hngat kini bün. Äi äng keinih tuisampho äng long lekchaw mäi saw khäl awbawng dukhah äng kini khawiyal hüt hnäng. Khrawng khälla tuisampho äng long lat ula ini khon. Awlaw tuisampho krakah pak jäi äng tuisampho patchih ini henchak. Anih la Suti mret äng dechang pou düna tuisampho okeyei ting ini ke. Äi koong anih la khri mawn dün wat ini hnemal. Äidä khri sithah huih tuisampho a ini chet sawk. Thasa kho äng tuisampho bopei bala säkei saw koong hnüpak pänäng tuisampho äng käh vawn awvawng tui äng ini hiyänal. Äi hnüp pänäng anih la tuisampho äng hlüsaw vawn awvawng ini hiyänal. Awbawng hnüp khoni la asĕ iha dawngah awlaw khri ha thasa olo hüt. U hnung sum äng kini hengaih saw bang khah neiti unga. Khrawng khälla awbawng hnüp i ha ei ah pak ini mäi koong Pol la anih hmawi mawh a ja bala che tak, “Nangnih kei kheu nini khinaih saw tawn hüt saw. Krit song pousaw känäng tusampho hlätaih chusaw tawn hüt saw. Nini khin khaw ni hiyaw phi äng kraw hnawh chu saw awlaw ni hiyaw ha hiyumeyeih chu saw. Äini tua kei nangnih a khawh ei ngala kanang tak, nini sengkhri tawei khäl. Iyaäm nangnih hngat ha dü hnawh chu. Ni tuisampho jiji dä krakaih saw. Iyaäm kei u äng kämäi äm awlaw u a korosi äm äi Hnadaga käh hawn natchaw hngat la tüyawna kei kena lo. Hawn nat chaw la hawu, ‘Pol o, ke ei ti. Mawng len hmawi mawh a nang najaih lah saw. Hnadaga la nanga ekhet anang dawnei äi koong nang la nang ängtu tuisampho äng mäitih hngat ha dü hnawh chu.’ Äi koong nangnih sengkhri tawei khäl. Hnadaga khrung äng kei kuyum khäh Ani la ibang awhawu äm äi thäneyeih saw dä. Äini khathi tänaka song pou saw pawh a phaw hmawna ini tunaih lah saw.” Hnüp lei hli tawng äng ha keinih Meditroniya mret khrung khri äng kini mäi. Äini äi yawn chinga tuisampho chontih khälla kawm hngat kena kana phaw ting ini tawk. Anih la tui ini tün ni umuk khrak gäl kul thuk saw ini bün. Äi tana pänäng awlaw tui ini tün ni umuk kohgib thuk saw ini bün. Tui chülai ting ini ke. Äi koong anih la lung äng phomai ting long ho pawt känäng thi khak pai hli ini hiyän. Awlaw khowa aih koong suh ini tongei. Tuisampho chontih khäl tuisampho känäng ini chena laih khiyang. Äi koong anih la awmaw pawh känäng thi khak ini hen saw huih poei ula long lekchaw khäl ini hen. Äi khaw a Pol la soloi gong awlaw soloi khäla tak, “Ni tuisampho chontih khäl mäi u khaw nangnih lät hnawh chu.” Äidä soloi khälla long jän hmawna long lekchaw khoneidün jäi ini sah al. Khowa khawngah ei saw ini ei yeih saw koong Pol la hang hanga ekhet äng tak, “Iba nini thäneyeih saw äm ting tawk chula iha ei ah pak nini mäi saw tühnüp si äng hnüp lei hli thänei. Tua eisaw nini eiyeih koong kei nangnih khäka kaw khawh ei. Heng chula nini mäiyeih koong eisaw nini eiyeih saw tawn. Iyaäm nangnih lusawm kangak bang krak thaw hnawh.” Ni kheu hawu pänäng Pol la, ha lawei bala Hnadaga a äkiyä tawngei bala ha pil bala ei. Äidä hanghang la ini eiyeih koong seng khri ini bünei. Keinih tuisampho äng khra hnih gala sehgip gäl pochong sok (276) kini mäi hüt. Hanghang la ini hän luih ak ini ei pänäng tuisampho hiyawng hmawna püm khäl mret äng ini hiyänal chak. Khowa ni tuisampho chontih khälla äi laa hmawt u. Äini anih la ngitih la hngat ini hmuh. Äi khaw a anih la äi ingi dün laa tuisampho ini chonaih saw ini khevei. Äi koong tuisampho äng käh thi khak khäl satal ula mret äng ini hnekal awlaw äi tuisampho a lawm dawntih täng äng khonei saw jäi ini phrutal. Äiche anih la khri chet saw pawta khri mawn dün wat hiyan ula tuisampho maw pawtäng ini khon tuisampho a khrila chi hmawna. Äini de kawmäng tuisampho a tokei ni uluki okei bala chakei hnäng ah pak mäi. Awlaw läng len äng oho pawt thasa bopei bala pil chaw pil chaw äthänei. Äi khaw a soloi khälla hengnaw hmueitih khäl kheni a ini tukaih saw ini kram, anih tui jäu ula chenal hnängah pak. Äini soloi gong la Pola tu aih khiyang nga saw koong soloi khäla anih sitha huih poh ei sawkah. Äichaw a ani la tak, ula tui jäuh hmawt äm, äi ayang tui äng chu ula kawma kawi seh u. Awlaw awvawng khälla tuisampho äng käh pen ipil chaw ipil chaw thänei saw vawn bin ula kawma kawyal seh u. Äi huih ükütni phi känäng ini lätäl. Keinih mawmawt chaw kana phaw ni, song pousaw la Milita ting ini taksaw kini bün. Äi song pou saw laa käh khrawng khälla keinih äng mawmawt chaw ini poh ei. Äi khaw a kholo tun awlaw ejel koong anih la mei phü ula keinih üküta ni mei kena khrawng panei. Pol la heu cha lum bala che mei äng thawnaih khaw a, phol hngat mei dam äng heu känäng thok bala Pol kut doh. Pol kut äng phol bawtei saw hmuh ula äi song pou saw laa käh khrawng khäl hngala hngat ini kräuvei, “Ni che khrawng tutih, mret känäng lätal thän ani ihisaw tara bitih nat känäng lätal hnängah.” Äini Pol la ukut phawpei bala phol mei äng ä hiyän ni ani iha thäneyah. Khrawng khälla ikhringai hiyah khaw täk ting düai ting ini tawk. Äini awbawng so ula ini mäi ni iha thäneyah saw hmu ula anih la ini tawk saw hleyal ula ini hawuval, “Ani che hnadaga hngat.” Keinih kini mäidün song pou düna Publio ting mingei nawtih khrawng hngata laibit chaw mäi hüt. Ani äi laa käh gongsong hngat mäi hüt. Publio la keinih a ani ima khrawng panei awlaw khohnüp thum keinih a mawmawt chaw khrawng so khrei hüt. Äi khin äng Publio paw kawl awlaw ba hnang nih saw lawga kopei bala che khat äng hiyawl bala mäi hüt. Pol uduka vawng bala che ani koong suh otong pek awlaw akantha äng ukut tawei bala che ani a awpawi poh al. Awlaw ni khäl äthänei pänäng äi song pou saw ala a käh awhngaw lawga se khäl ani khäka lo ula che awpawi ini thäneyal. Anih la keinih a awbawng hmawi khrawng pek awlaw tuisampho hlät khawngah keinih a ü lüh saw vawn khäl tuisampho äng khrawnglum pek. Khraw thum pänäng keinih Alekzandiya känäng tuisampho hngat äng kini chet. Äi tuisampho isik khaw a äiya mäi hüt. Äi tuisampho a che phetih lupchaw ting ini tak. Keinih Surakusa mräh a kini phaw awlaw kho hnüp thum äiya kini mäi. Äi pänäng keinih käh tuisampho Regiama phaw. Äi hnüp pänäng mret phak känäng khri olo awlaw äi hnüp hnih Regiam pänäng keinih Putioli mräh a kana phaw. Äiya keinih hngat pai hnih yumtih nawu khäl äng kini khomei. Anih äng sapta ak kini mäyeih koong ani la khrawng hnih ei. Äi huih keinih Roma kini phaw. Roma käh yumtih khälla keinih kini lo saw sidawng ini yawk hüt. Lawma äphäu ini pekaih koong anih äng käh awvawng Apiya ji täh awlaw awvawng tawi dün paithum namtäh lo ula keinih äng khomeya ini lo. Äi khrawng khäla hmu bala Pol la Hnadaga a äkiyä awtawngei awlaw upum la ha ulyah bünei. Keinih Roma kana phaw pänäng Rom pre khiyuptih la Pola im chaw äng soloi hngat äng mäyeih saw pek. Hnüp thum pänäng Pol la äiya käh Yudi lenchaw khäla panei bala che lum. Anih ini lumei chak pänäng Pol la anih a tak, “Kei käh nawutih khälo, kei kupum khrawng khäl khäka epret thänei nga awlaw nuchen paw sawk khälla thung khäl ha khrak unga. Äi thän ha Yĕlusalema khrawng mawn ula Rom presaw kutäng awp kuhmuei. Kei a khrawng chäng pänäng Roman khälla kei a khrawng hlätalaih khiyang hüt. Iyaäm khrawng tukaih hnäng saw huih anih la iha epret khrawng bün u. Äini Yudi khälla ini ka koong kei mawng len khäka chaw kä hiyänei lah. Äi thän ha kei upum khrawng khäl ming äng epret tawng hüt nga. Äi koong kei nangnih äng khomei ngala che käkräuweih khiyang. Nangkei Isawlael yapsaw la ibang ini üm äng äi koong ni siyol äng hen ku hmuei saw.” Anih la ani a ini tak, “Keinih Yudia känäng nang ming äng iha chaw bün unga. Äi känäng lotih nawutih khälla ha nang kheu iha keinih khrawng hawu pekal u. Awlaw nang ming äng ese i ha hawu u. Äini keinih nang lung äng käh kheu kini khinaih khiyang iyaäm keinih kini hmawt khäh, ükütla nang sawng ming äng ese ini hawu khäh.” Pol äng ini khomeyeih koong anih la ikhin hngat ini poh ei. Pol mäi hüt saw laa anih hiyah pak awhngaw khrawng khäl ha ini lo hüt. Äi khaw a Poll a ongo känäng mülawm täh Mawng Hnadaga käh pre kheu anih a phawng pek. Mosi käh thung la Hnadaga sidawng hiyawktih khälla Yĕsu käh kheu ini yok saw dawn bala anih a yumaih sawk saw osot. Ani la hawu saw kheu khäl hngat pai hnih la ini yum awlaw hngat pai hnih la yumei u. Pol kheu äng anih ngi u saw koong äila känäng ini chetal. Anih ini chetalaih saw yang Pol la tak, “Asanh chang Khraw la Hnadaga sidawng hiyawktih Aijaya a sumei bala nangkei käh nuchen paw sawk khäl khäka ihisaw kheu awhawu pek hüt. Äi khrawng khäl khäka chet tila che ata, ‘Nangnih nini yawkai äini chiak ha yawchu hnawh chu. So chula nini mäyei äini iha hmawt hnawh chu. Äi khrawng khäl käh lung chang awlaw ini hnaw ini bingei, awlaw i mik ha ini bingei. Äi huih hiyah khaw anih mik la hmuh eyei, anih hnaw la yawkai, awlaw anih la ini yawk chu alai. Awlaw Hnadaga la hawu, Kei khäka anih ini loai awlaw Kei anih a awpawi kopoh alai.’” Pol la ni kheu hawu bala phähiyal, “Äi koong nangnih nini hmawtai, Hnadaga la khrawng khäla iba ngulai känäng awkhiawtal saw äm äi kheu Yudi hiyahtih khäl khäka hawu hmuei hüt, awlaw anih la dä äi kheu ini yawk chu ai.” (Pol la ni huih hawu pänäng Yudi khäl ini chetal. Äidä anih hngat la hngat äng ini toksakei.) Pol khokum hnih hngaei saw ima ämäi hüt. Awlaw awbawng khrawng khäl ani äng khomei a ini lo hüt chi. Awlaw ani la anih a awlawkei chi. Ani la iha keh ah pak Mawng Hnadaga pre sidawng kheu awhiyawk chi. Awlaw Boi Yĕsu Krito käh kheu prangbaw ochok chi. Kei Pol, Yĕsu Krito käh hngat hngasaw. Sidawng pawi kaw hiyawkaih saw koong Hnadaga la kei a apanei awlaw teh hmueitih ting kei a khrawng heh lei. Ayang khaw thouh Hnadaga la khawmei hüt saw sidawng pawi, Hnadaga sidawng hiyawktih khälla asanh chang kiyam äng yo ula ini tawk. Ni sidawng pawi che Ani chaw nangkei käh Boi Yĕsu Krito krong. Luchaw thi saw kantha huih Ani Dawut chen känäng luhdül äng a thän. Äini Yĕsu a Hnadaga käh tha mawh chaw ting Asanh chang Khraw la khrawng dawn. Iyaäm Hnadaga la Ani a düsaw känäng thouhwal. Yĕsu Krito che nangkei käh Boi. Presaw khäl kheni a uyum la ini ngeyeih saw lawm äng kei chi hnäng hmawna, Krito a sumei bala Hnadaga la kei a teh hmueitih käh ni alang gong bi khrawng awp. Yĕsu Krito käh tebeih ini thäneyeih koong panei hmueitih khäl ängtu nangnih ha nini mäi khäh. Rom mräh a Hnadaga la mawng khrawng khäla khet nawk äm awlaw upum käh khrawng ini thäneyei koong panei äm, kei nangnih khäka ni chaw koyok tun. Nangkei käh Paw Hnadaga awlaw Boi Yĕsu Krito känäng nangnih lukhrunga khetjen la jelkhiyamsa kraw seh. Täkchah kei nangnih khäl koong Yĕsu Krito ming äng kei käh Hnadaga a äkiyä kawtawngei. Iyaäm nangnih nini yum saw sidawng luhdül äng khriyei chak däk. Kei nangnih koong sawkbrat ihuih suh kotong saw äm Hnadaga sawksi mäi khäh. Kei Ani Chaw krong äng sidawng pawi hiyawk ngala ni Hnadaga a korosi. Hnadaga sitha äng kei lala lawma pei nangnih khäka chet hnäng hmawna kei sawkbrat suh chi kotongei. Iyaäm kei nangnih a thasa kanang hmuaih khiyang. Kei nangnih a mama kanang tawkaih koong bitchaw awkhraw pisih kanang pekaih khiyang. Kei kawhawuvaih khiyang saw che, nangkei a ämäi saw uyum äng hngat la hngata ulyah pekei hnäng hmawna. Nube tanawu khälo, nangnih a kanang hmawtaih sawk khiyang, kei nangnih khäka koloaih koong äkräng kräng kakram hüt saw. Äini kei a sätak kiyawnah hngat hiyah thän hngat la aka. Awhngaw Yudi hiyahtih khäl dukäng Awkhraw theih kuhmuh saw huih nangnih dukäng ha kuhmuh aih khiyang. Kei üküt niya kechetchaw aih saw tawn khäh. Anih sawp pei awlaw sawpah pei. Awlaw ngen mawh pei awlaw mäktih pei. Äi koong nangnih Rom mräh a mäitih khäka sidawng pawi kaw hiyawkaih koong thasa kulung la hawu. Kei sidawng pawi koong hiyawkei nga. Sidawng pawi thänei saw che äi tha, ni tha äng Hnadaga la Ani yumtih khäl kheni a khiyawtal. Hnadaga la täkchah Yudi khäla awlaw Yudi hiyahtih khäla ha khiyawtalai. Hnadaga la khrawng khäla ihuih epret mäyahtih ting lawkei saw äm, ni sidawng pawi äng dawn hmuei. Iyaäm khrawng khäl käh yum koong dä Hnadaga la achah tähkän äpäih saw täh epret mäyahtih ting lawkei saw. Kiyam la hawu, “Uyum äng Hnadaga hmawi hmawh a u konghmuh sang thänei äm äi hengalai.” Khrawng la ini pum käh ese äng Hnadaga käh ihisaw a ini thuh. Äi koong hang hang ngulai koong awlaw khrawng la pawyah saw ini bisaw khäl koong hawn pre känäng Hnadaga käh man khrawng khäl khrung äng adawngei. Iyaäm Hnadaga krong äng ibang naw hmawtaih saw mäi äm, Ani la sanh sanh awhawu pek däk. Hnadaga käh ayapyap krong nimik äng hmuti. Ani käh sawkak tha la Ani käh khrang luhdül chah saw khaw thou sanh sanh awdawnei. Ani la bisaw khäl hmu ula khrawng khälla ini yawk chu. Äi koong khrawng khäl ini hlätaih saw lawm mäitiyah. Khrawng khälla Hnadaga a hmawt pe ha hmawi pek u ‘hiyah thän’ äkiyä tawngei u. Äi koong anih käh tawk che usum vawngah, awlaw ämäk lung uhiyung äng luih bala mäi. Anih la ini puma ngen mawh ting ini hawuvei thän, anih mäktih khäl dä. Anih la sawkak hengtih Hnadaga a awpiyaw ini pekaih saw chaw a luhchaw huih ini bisaw lupchaw khäla, haw khäla, mäksetdava khäla, awlaw akangchang äng yoeitih lupchaw khäla dä rosi ula awpiyaw ini pek. Äi äng Hnadaga la khrawng khäla ini lung sitha huih ini biyeih saw koong ähläh. Awlaw anih hngat la hngat äng hiyawh ei nawk saw bi bi ula ini kantha ini khrah ei. Hnadaga käh ihisaw hiyänal ula anih la hlei saw a ini lawkei. Awlaw luhdül bitih a hlät ula Ani la bisaw vawn khäla dä khrawng khälla ini rosi. Hnadaga jiji a dä sawkbrat ini phiyawaih saw tawn. Amen. Khrawng khäl äi pawyah saw bi äng ini mäi koong Hnadaga la anih a hiyawh ei mäi saw lawm äng ähläh. Awlaw bang hmutaw la hmutaw ini krak. Äi huih pawtaw khäl hmutaw äng bang ini krakaih saw sotih a pak pawtaw la pawtaw ini krak. Ni ngulai bi äng käh dam anih la ini kantha äng ini bünei däk. Iyaäm Hnadaga käh ihisaw ngen mäiyeih saw alang gong ting anih la khin u. Äi koong Hnadaga la anih a usum vawngah saw tawk ini tawkaih saw koong ähläh. Awlaw bi tawn usaw bi anih la ini bi. Anih ayapyap ngulai äng, konghmuh sang hiyah saw äng, upum käh jiji ini sotei saw äng awlaw keleih äng ini luih. Anih käh sawk che lawpha äng, khrawng tuk saw äng, siyei saw äng, hlei saw äng, kramei saw la man äng luih. Anih la khrawng be ini kräu, awlaw hngat la hngat ming äng ese ini kräu, Hnadaga a ini mum, anih ini chip pawyah, ini bawriyei, awhngaw lawm äng ese ini biyeih saw koong lawm ini sui awlaw nupaw a ngei u. Anih a prengiya mäyah, anih yumphoih hiyah, anih äng khet la jen mäyah. Hnadaga käh ni tara kheu anih la maw hmawt chaw ini hmawt khäh. Äi huih bi ula bi äm, anih ini düaih saw tawn khäh. Äi kheu ini hmawt thän, anih jiji la ini bisaw äng kiyah awhngaw khrawng khälla ha bi hmawna ini poh ei puinawk. Khanbawn khälo, nulung la dä khinei khaw kei äi khrawng khäl käh tara kibi hnäng ting, äihi nang nawhmaw saw dä. Iyaäm nang awhngaw käh tara nibi khaw awlaw anih la ini bisaw huih nibi khaw nupuma dä epret nopoh ei saw. Nangkei ini hmawt khäh, ula bi se bi äm Hnadaga la anih käh tara bi. Ani käh tara che ihisaw tara. Äini nang anih käh tara ha nibi, anih la ini bisaw huih ha nibi, äipe ha nang Hnadaga käh tara känäng nälätai ting ni khineyei? Nang Hnadaga käh päihyah tih jenei, khih ei awlaw chunei khäl leih po a pak mäiti ei? Nang hmawt tiei Hnadaga che jenei tih, iyaäm Ani la nanga ngulai känäng nulung nehleyalaih saw lawm äng ini chihyeih saw hno tun. Äini nang nulung chang tih awlaw nupuma hleyal do khiyangah tih. Hnadaga käh dam la ihisaw tara dawngalai saw hnüp koong nang lukhrunga Hnadaga käh dam chung liäng nuchungei. Hnadaga la üküta ni anih käh bi äng awtawn saw huih awkhawh pekalai. U khälla chunei ula bi pawi ini bi äm anih la Hnadaga känäng a wachang, hmawi awlaw päihyah saw sawk ini büneyei. Äini u khälla ini pum käh jiji ini sotei äm awlaw ihisaw a laweya pak ese a ini lawkei äm, äi huih khrawng khäla Hnadaga la thasa dam pekalai. U khälla bi se ini bi äm Hnadaga känäng dukhah la waih ini büneyalai. Täkchah Yudi khälla awlaw Yudi hiyahtih khälla ha ini büneyalai. Äini u khälla bi pawi ini bi äm Ani la anih a a wachang, hmawi awlaw jelkhiyamsa pekai. Täkchah Yudi khäla pekai äi pänäng Yudi hiyahtih khäla ha pekai. Hnadaga la khrawng kheni käh tara tihtih dä bisaw. Mosi käh thung hmawtah pak ngulai bitih khäl che Mosi käh thung kaw ini krak chakai. Awlaw Mosi käh thung hmawt pe ngulai bitih khäl che Mosi käh thung huih tara bi hmueyei. Thung kheu jiji khin tila Hnadaga hmawi mawh a konghmuh sang thänei hnäng ti. Äini thung la ibang hawu äm äi sawkbrat sumei tila dä Hnadaga khäka konghmuh sang näthänei hnäng saw. Yudi hiyahtih khälla iha Mosi käh thung bünei hüt u. Äini thung äng mäi saw huih ini mäichoh saw äng mawng poh tawnäm awlaw mawng poh tawnah äm äi anih la ini hmawt ting ini dawnei. Äi äng anih la ini dawnei, thung huih ibang poh aih saw tawnäm, äi anih lung äng yoei khäh. Anih la ni ihi khäh ting ini dawn, iyaäm anih käh tawk la ikhi kha anih käh epret mawn awlaw ikhi kha anih pawtäng khawm. Hnadaga la Yĕsu Krito sumei bala khrawng khäl käh lung duka thupei saw tawk kheni tara biyeih khaw a, äi huih thäneyei. Kei kawhiyawk saw sidawng pawi la äi huih hawu. Nang ihuih khrawng äm? Nang nupuma Yudi ting nawhawuvei awlaw nang Mosi käh thung khäl üm tila nämäi. Awlaw Hnadaga khrawng ting naw bawriyei. Nang naw hmawt khäh Hnadaga la nang känäng i hlüei äm awlaw mawng ihi äm äi nang naw hmawt khäh. Iyaäm nang Mosi käh thung khäl nochok nawk khäh. Nang nikhinei, nang mik mü khäla lawm dawn tih. Awlaw uhiyung äng mäitih khäla awa pektih. Awlaw nang nikhinei, nang mäktih la hmawtah tih khäl käh choktih. Nang nikhinei, nang käh thung äng üküt ngen la ihisaw khäl kheni mäi chak. Nang awhngaw khäla nochok chi. Äini nang nupuma nochokeyei? Nang awhngaw khäla muaichu ting nawhiyawk. Äini nang numukei? Nang nawhawu, nini mik sawuveyei chu, äini nang nimik sawuvei ei? Nang ulupchaw khäla numum, äini nang kiyong im tamdah nasatei. Nang Hnadaga käh thung kawtawkei khäh ting naw bawriyei chi, äini nang Hnadaga käh thung khrak tila Ani a siri khrakti ei? Kiyam äng yoei bala mäi, “Nangnih Yudi khäl koong dä Yudi hiyahtih khälla Hnadaga ming ini khrah saw.” Nang dä Mosi käh thung nengei khaw vun naw awh ei saw usum vawng khäh. Äini nang dä Mosi käh thung ngei ti khaw Hnadaga khäka nang vun awteyah tih khrawng huih dä. Yudi hiyahtih khälla ini vun awtei u. Äini ini vun awteyah pak dä Mosi käh thung ini ngei khaw, anih la ini vun ini awtei saw huih thänei hnawh u ei? Yudi khälo, nangnih a thung yok chän mäi khäh awlaw nini vun nini awtei khäh. Äini nangnih thung nini khrah a Yudi hiyahtih khälla ini vun awtei u thän anih la nangnih a epret anang khrawk. Äi koong aprang känäng dawnei tih Yudi khäl che echet Yudi hi u. Iyaäm aprang vun naw awtei saw che echet naw awtei saw hiyah. Äini u khäl ini lung känäng Yudi ini thänei äm anih dä echet Yudi. Anih lung duk känäng vun ini awt saw huih äthänei. Niche Hnadaga khraw käh bi dä, thung äng yoei saw bi khäl hiyah. Äi khrawng che luhchaw khäl känäng hiyah äini Hnadaga känäng dä awpiyaw ini bünei saw. Bakhaw Yudi khäla i alang gong amrat mäi saw äm? Ini vun ini awh ei saw i usum vawng saw äm? Yudi khäla awbawng lawm äng amrat mäi hüt. Hnadaga la Ani käh sidawng mawmawt chaw ini chetchaw aih saw koong täkchah Yudi khäla pek. Üküt küt Yudi khäl Hnadaga khäka uyum lah mäi hüt u. Äini äi äng i äm? Äi äng ni Hnadaga uyumlah mäi hnawh ting nikhin saw ei? Asang bang hiyah. Khrawng khäl kheni ini hlei thän, Hnadaga che sawkbrat ni ihi khäh. Kiyam äng yoei, “Nang nupum käh kheu äng konghmuh sang ting näthänei awlaw tara khaw a nang no ongai.” Äini nangkei käh ini hmawh saw bila Hnadaga käh ihisaw bi sanh sanh dawn hi, nangkei a i ini hawuvaih saw mäi äm? Hnadaga la nangkei a dam äng khrawng khrawk khaw a Ani awhmaw ting nangkei ini tak hnäng ei? (Kei mäktih khrawng huih kihi tun saw.) Asang bang hiyah! Hnadaga la dä epret bi khaw ni luhdül äng käh khrawng khäla iba tara biyeih hnäng saw äm? Awlaw ükütla ini hawu nawk theih, “Kei kehlei saw äng dä Hnadaga käh a wachang dawng hi, ngulaisu huih kei käh tara iya poh hmuyeih saw äm?” Iya ni huih hawuvaih hnäng pusaw äm, “Lo khäl nangkei ese bi biäng khä, äi känäng awpawi bünei hnäng hmawna.” Awbawng khrawng la nangkei a khrawng keleih ula ini kräuvei, nangkei ini chok saw che ni huih dä ting. Ni huih kräutih khrawng khäl ini hmaw saw dä awlaw anih a dam pek hmuei. Bakhaw nangkei Yudi khäl awhngaw khäl thawka ini pawi saw ei? Asang bang hiyah, iyaäm keinih ayang ha kini hawu khäh, Yudi awlaw Yudi hiyahtih ükütni tihtih dä. Anih ükütni ngulai tha kawla dä ini mäi saw. Kiyam äng yoei, “Konghmuh sang hngat ha mäi u hngat bang mäi u. Hngat ha yawchu tih mäi u. Hngat la ha Hnadaga a ini tämaih saw hno ti u.” “Anih ükütni hiyah saw lawm äng ini chet, anih ükütni usum vawngah pak ini thänei chak däk, bi pawi bitih che hngat ha mäiti u, Pochongak ha mäiti u. Anih kheu che cho hong huih dä, anih ini lei äng ehlei ini kräu. Anih kheu che phol sip huih. Anih mongkhok che sayei saw la awkhaw äng dä luih saw. Anih la ini tukaih saw koong ini yangei. Anih ini chet dün la kheni a ni akrak la pawyah saw bi ini bi. Anih la jelkhiyamsa lawm hmawt u, anih la Hnadaga a bang keh u.” Nangkei ini hmawt khäh Mosi käh thung che äi thung äng mäitih khäl koong dä. Äi äng khrawng kheni la ini puma epret mäyahtih ting hawuvei hnäng tiyah hmawna, awlaw luhdül äng käh khrawng khäl kheni a Hnadaga käh tara dawnga chi hnäng hmawna. Thung ini ngei saw äng Hnadaga la hngata ha konghmuh sang ting hawuvah. Iyaäm thung la dä nangkei a epret mawh ting khrawng hmawtei sawk saw. Mosi käh thung la Hnadaga sidawng hiyawktih khälla äi krong äng sawksi ini thok däk thän, tua Mosi käh thung kaw khrawng khäla konghmuh sang ting iba Hnadaga la lawkei saw äm, äi dawng däk. Yĕsu Krito a ini yumei saw jiji äng dä khrawng khäl Hnadaga hmawi mawh a konghmuh sang ini thänei saw. Krito a yumei tih khrawng khäl khe koong dä Hnadaga la ni bi bisaw. Iyaäm Yudi awlaw Yudi hiyahtih dukäng iha okhoih mäyah. Iyaäm üküt nila ngulai ini bi awlaw Hnadaga käh a wachang känäng awhlawm hlaw a ini mäi. Äini Hnadaga käh khetjen äng Yĕsu Krito äng ngulai känäng anih la ähläh büneyal ula Hnadaga khäka konghmuh sang ini thänei. Hnadaga la nangkei koong Yĕsu Krito a hlu. Ula Yĕsu Krito a yumei äm, äi uyum äng dä anih käh ngulai khäl kheni ähläh ini büneyal. Hnadaga la ni bi äng sawkbrat Ani konghmuh sang ting dawnei. Iyaäm ayang äng Ani la chunei hüt awlaw khrawng khäla ini tawn saw huih dam äng khraw hütah. Ani chaw Yĕsu a hlusaw äng Hnadaga la upuma konghmuh sang ting äi khaw a dawnei. Äi äng Ani che ihisaw tara bitih awlaw Yĕsu a yumei tih khäla konghmuh sang ting tak hnäng saw Ani la dawnei. Äi koong khrawng khäl ini bawriyeih saw i mäipe äm? Iha mäitiyah! Äini i koong mäyah sawäm? Nangkei Mosi käh thung ini ngei saw koong ei? Ähäh, ni che uyum äng käh thung koong dä. Iyaäm nangkei ini hmawt, Hnadaga la khrawng khäla uyum koong dä epret mäyahtih ting lawkei saw, thung khäl ini ngei saw koong hiyah. Hnadaga che Yudi khäl käh Hnadaga jiji ei? Yudi hiyahtih khäl käh Hnadaga hiyah ei? “Ä, Ani che Yudi hiyahtih khäl käh ha Hnadaga. Iyaäm Hnadaga che hngat pätpät dä, Ani la Yudi khäla ihuih uyum äng epret mäyahtih ting lawkei äm, äi huih Yudi hiyahtih khäla ha lawkei. Bakhaw nangkei ini yum äng thung khäl ini hiyänal saw hiye ei? Asang bang hiyah, äini nangkei ni äng thung alang gong ting ini dawn saw.” Bakhaw nangkei käh nuchen paw sawk Awbraham krong äng nangkei i ini hawuvaih saw äm? Ani la i chok nawk hütäm? Ani upum käh bi koong konghmuh sang thänei khaw, äihi ani a awbawriyei yeih saw krong mäyei hü. Äini Hnadaga hmawi mawh a ani bawriyei hnängah. Kiyam la hawu, “Awbraham la Hnadaga a uyumei hüt, äi uyum koong dä Hnadaga la ani a konghmuh sang ting lawkei.” Ula bi biäm, äila bi khawh bünei. Äini äi khawh che ini hlu mawn huih hiyah, äi ani la bünei tawn. Ula bi biyah äm, äini khrawng khäl käh epret hläh hnäng tih Hnadaga a yumei äm, anih käh yum äng dä konghmuh sang ting süh ini hmueyei. Bi saw koong hiyah äini uyum saw koong dä Hnadaga la konghmuh sang ting süh saw. Dawut la ha äi khrawng a pisi mawh ting tak. “Bise khäl ähläh büneyal tih, awlaw u käh ngulai kün hmueyal äm, äiche pisih mawh. U käh ngulai Boi la süpah äm, äi khrawng che pisih mawh.” Ni pisih ini vun awtei tih khrawng khäl koong jiji ei? Hiyah, awteyah tih khrawng khäl koong ha. Iyaäm keinih kini hawu, “Uyum äng dä Awbraham konghmuh sang ting sü hmuei.” Awbraham a iti khaw a konghmuh sang ting süh hmuei saw äm? Vun awtei pänäng ei ‘hiyah khaw’ awtei khaw ngah ei? Vun awtei pänäng hiyah äi vun awtei khaw ngah dä. Uyum koong dä Hnadaga la Awbraham a konghmuh sang ting üsü. Äi pänäng dä Hnadaga la ani a hmat la huih vun awteyal sawk saw. Äi koong ini vun awtei u thän Hnadaga a yumei tih khäl kheni käh awkhraw lawm äng käh paw che Awbraham. Äi khrawng khäla ha Hnadaga hmawi mawh a konghmuh sang ting süh hmuei. Awbraham che ini vun awtei tih khäl käh paw ha thänei. Äini anih käh yum dä Awbraham la vun awtei khaw ngah yum hüt saw huih ämäi khaw, anih Awbraham chaw a ini thäneyei. Awbraham awlaw ani chena luhdül pängei sawkaih saw Hnadaga la khawmei hüt. Awbraham la thung ngei saw koong hiyah, äini ani la uyum hüt awlaw Hnadaga la ani a konghmuh sang ting lawkei hüt koong dä Hnadaga la khawmei hüt saw. Thung ini ngei saw äng Hnadaga la khawmei saw dä ini bünei hi, uyum che usum vawngah thänei awlaw Hnadaga la awkhawmei saw ha usum vawngah thänei. Iyaäm thung la Hnadaga käh man olo. Äini mawnga thung mäyah äm, äiya thung ngeyeih ti saw ha mäyah. Äi koong khawmei saw che uyum känäng dä losaw, Hnadaga känäng awphiyaw phoih huih thänei hmawna. Ni huih äng Hnadaga la khawmei saw Awbraham nuchen paw sawk khäl kheni la bün ni ini büneyeih saw ting ini khinei. Niche thung äng mäiti khäl jiji koong hiyah, äini Awbraham huih uyum tawei tih khäl koong ha. Ani dä nangkei ükütni käh paw. Iyaäm kiyam la hawu, “Kei nanga awbawng yapsaw khäl käh paw kini poh.” Äihi Hnadaga mik äng Awbraham che nangkei käh paw. Awbraham la uyum saw, Hnadaga la dä dütih a awsawk pekal hnäng awlaw iha mäyah saw känäng atha poh hnäng. Awbraham la awchaw mäyeih saw ting khah nei hütah. Äini ani la Hnadaga khrung äng uyum tawkei hüt. Äi koong ani awbawng yapsaw käh paw thänei. Hnadaga la hawu hüt, “Nang käh chen khäl hawna käh asĕ huih ini thäneyei.” Äi khaw a Awbraham sawk khra ak thänei. Ani thasa chang däk koong chaw pek hnäng tiyah. Ani phiya Sara ha che chang däk koong chaw hmuyei hnäng hüt tiyah. Ani la äi khäl tawk bala mäi hüt, äini ani käh uyum ngiyaw hütah. Hnadaga la khawmei saw krong äng ani la ütei naw hütah. Äichaw a ani la uyum äng chang bala Hnadaga a awpiyaw pek. Hnadaga la ibang khawmei hütäm, äi kheni thän ni thäneyeih hnäng saw ting ani la hmawt hüt khäh. Äi koong, “Äi uyum la ani a Hnadaga hmawi mawh a konghmuh sang poh.” Ni kheu ani koong jiji kiyam äng yoei saw hiyah, nangkei koong ha yoei. Nangkei ha konghmuh sang ting lawkei ini hmueyei. Iyaäm düsaw känäng Boi Yĕsu a thouwal tih Hnadaga a nangkei ini yumei. Nangkei käh ngulai koong Yĕsu a düsaw kutäng awp hmuei hüt. Awlaw nangkei a Hnadaga hmawi mawh a konghmuh sang ting süh hmueyeih koong Yĕsu düsaw känäng thouwal. Nangkei ini yum koong dä nangkei a epret mäyahtih ting Hnadaga la khrawng lawkei saw. Awlaw äi koong dä Boi Yĕsu Krito äng sakei pula nangkei la Hnadaga dukäng jelkhiyamsa mäi saw. Nangkei Krito a ini yum saw koong dä Hnadaga käh khetjen äng nangkei ini mäi saw. Hnadaga käh a wachang ini büneyeih saw khanh äng nangkei ini bawriyei. Awlaw äi jiji äng hiyah, dukhah äng ha nangkei ini bawriyei. Iyaäm nangkei ini hmawt, dukhah nawkhawm saw khawh che chunei khrang, chunei khrang äng käh khawh che kiyangk pawi awlaw kiyangk pawi äng käh khawh che nakhah nei saw. Ni khanh la nangkei a hiyawh ei khrawng pekah. Iyaäm Hnadaga la khrawng pek saw Asanh chang Khraw äng nangkei käh lung Ani käh ekhet äng khrawng hluih. Nangkei a tha mäi hütah khaw a awlaw nangkei ngulai äng ini luih hüt khaw a Hnadaga la eheh lei hüt saw khin äng Krito nangkei koong dü hüt. Konghmuh sang hngat koong khrawng hngat la awsawk pekeyeih saw che mawmawt khawk khei saw dä. Äini khrawng pawi hngat koong ini sengkhri äng dü khaw ini dü naw theih. Äini Hnadaga la nangkei a khrawng khet nawk saw hmat che ni, nangkei ngulaisu ini mäi khaw a bang Krito nangkei koong dü hüt. Äi äng Krito thi äng nangkei a epret mäyahtih ting lawkei ini hmueya, nangkei Krito äng sakei pula Hnadaga käh man len känäng ini lätai. Nangkei Hnadaga käh lansu ini mäi hüt khaw a Ani chaw düsaw äng nangkei Hnadaga äng awlaw krawnak ini sakeyal. Hnadaga la nangkei a tua ani äng awlaw krawnak khrawng sakal saw äng, Krito käh sawk äng awlaw ihiyawh ähläh ini büneyalaih saw äm. Awlaw ni jiji hiyah, u koong nangkei Hnadaga äng awlaw krawnak ini sakeyal äm, äi Boi Yĕsu Krito äng dä nangkei Hnadaga äng mawmawt ini piyaw. Khrawng hngat känäng ngulai luhdül äng lo hüt. Awlaw äi ngulai känäng düsaw ha lo saw. Khrawng kheni la ngulai ini poh koong dä hang hang khäka ni düsaw lo saw. Mosi la thung pek khawngah bang ni luhdül äng ngulai mäi hüt. Äini thung mäyah khaw a Hnadaga la ngulai a ngulai ting süpah. Äini Adam khin täh kän chah bala Mosi käh khin täh Adam la ngulai bisaw huih ngulai biyah tih khäl kheni a bang düsaw la khiyup hüt. Üküt küt lawm äng che Adam, uhnung äng loaih tih Krito huih. Äini Hnadaga la khemeih peksaw phiyaw phoih la Adam käh ngulai tueiyah. Iyaäm äi khrawng pochongak käh ngulai koong awbawng khrawng ini dü. Äini Hnadaga käh khetjen la phiyaw phoih che äi thawka elen. Hnadaga käh khetjen la Yĕsu Krito käh khetjen känäng lo saw phiyaw phoih awbawng khrawng lukhruäng priu bala kraw. Hnadaga käh phiyaw phoih la khrawng hngat känäng lo saw ngulai che koyei khäh. Iyaäm Adam käh ngulai la ani a Hnadaga hmawi mawh a epret mawh a poh. Äini awbawng ngulai mäi thän Hnadaga käh khemeih phiyaw phoih la nangkei Ani hmawi mawh a epret mäyahtih a khrawng poh. Adam la ngulai poh saw äng düsaw mawngei. Äini Yĕsu Krito la bi hüt saw khawh che ihiyawh len saw äm. Hnadaga käh awbawng khetjen la konghmuh äng käh phiyaw phoih bünei tih khela ni Boi Yĕsu äng ini mawngeyei. Äihi hngat käh ngulai koong khrawng kheni epret mawh a ini thänei. Äi huih hngat käh konghmuh koong ha khrawng kheni a konghmuh sang ting lawkei hmuei awlaw sawk pek hmuei. Awlaw pochongak la kheu khinah saw äng ihuih awbawnga ngulaisu ting süh hmuei äm, äi huih pochongak la kheu khin saw äng awbawnga konghmuh sanga poh hmueyei. Thung pek hmuei saw ngulai nung hmawna. Äini mawnga ngulai nung äm äiya Hnadaga käh khetjen ha awlaw bang nung. Äi äng ngulai la düsaw a ihuih khiyup äm, äi huih Hnadaga khetjen la konghmuh a khiyup. Ni äng käh khawh che nangkei käh Boi Yĕsu Krito äng Päihyah saw sawk. Bakhaw nangkei i ini hawuvai saw äm? Hnadaga käh khetjen nung hmawna nangkei ngulai ini biyeih hläng saw ei? Asang bang hiyah! Ngulai khäka nangkei ini dü däk. Äithän iba nangkei tua ha ngulai lawm äng ini cheteipe saw äm? Nangnih ni mawmawt chaw nini hmawt khäh, Krito Yĕsu äng sakei pula nangkei tuilüh ini lawkei saw äng nangkei ani düsaw äng ha ini sakei. Paw Hnadaga la Ani käh a wachang äng Krito a düsaw känäng thouwal saw huih nangkei ha atha sawk lawm äng chetei hmawna, nangkei tuilüh ini lawkei saw äng Krito ängtu ini dü awlaw phul ini hmuei. Ani äng sakei pula Ani huih ini dü huih ni, nangkei ha Ani ängtu ini thouwalai. Nangkei ini hmawt khäh, nangkei käh ngulai kiyangk käh tha krak chak hmawna kiyangk phema Krito Yĕsi ängtu krut äng thawn hmueitih, nangkei ngulai käh hngasaw mäitiya pak. Iyaäm u bang dü äm ani la ngulai tha känäng ähläh büneyal. Nangkei dä Krito ängtu ini dü khaw, äihi nangkei ini yumei Ani ängtu heng pula ini mäi. Nangkei ini hmawt khäh, Krito düsaw känäng hengal bala thouwal koong Ani düti hnawh. Ani lukhrunga üdü aih saw iha päng mäitiyah. Ani krängak äng khrawng khe koong dü a Ani lukhrunga ngulai tha mäitiyah. Awlaw tua Ani heng bala mäi saw che Hnadaga koong dä. Äi huih nangnih ha ngulai khäka nini puma üdü ting khinei khäl. Awlaw Krito äng nangnih sakei chula Hnadaga ängtu heng chula nini mäi. Nangnih käh krakaih tih kantha a ngulai a pängei sawkai chu, nini pängei sawk hi ese saw lawpha khäl nini ngeyeih saw dä. Nakantha äng käh iha ngulai vawna thäneyeih koong ngulai kut äng awpaiti. Äini düsaw känäng thouwal tih khrawng koong dä nupuma Hnadaga khäka awpei. Awlaw nakantha äng käh kheni konghmuh vawna thäneyeih saw koong Hnadaga khäka awpei. Nangnih ngulai käh hngasaw hi chu. Iyaäm nangnih che thung kawla hiyah äini Hnadaga käh khetjen kawla dä nini mäi saw. Nangkei thung kawla mäyah pak khetjen kawla ini mäi saw koong ngulai ini biyeih saw ei? Asang bang hiyah! Nangnih hmawt chu ei, hngasaw huih nangnih nini puma pochongak kutäng nini awpei khaw awlaw ani kheu nini khin khaw, nangnih ani käh hngasaw a nini thänei saw? Äi huih nangnih ngulai käh hngasaw thänei chula nini dü hnäng hiyah thän konghmuh sanga thänei hmawna Hnadaga käh ngeitih hngasaw a nini thänei hnäng. Äini Hnadaga a äkiyä kawtawngei, iyaäm nangnih ngulai käh hngasaw nini mäi hüt thän, nangnih a chok hmuei saw kheu khäl nini lung ko pekei chula nini ngei khäh. Ngulai känäng nini lätal däk awlaw konghmuh käh hngasaw nini thäneyal däk. Khrawng ini ngiyaw saw koong khrawng la yawchu hmawna dä khrawng ini mäichoh khrang äng käh püm kei kakhang saw. Ayang ihuih nangnih ngulai nini biyeih saw koong nini kantha a sahnah saw la pawyah saw kutäng nini awpei saw la awlaw bang unung ngulai anang poh sawk. Äi huih tua nangnih käh kantha awpawi bi nini biyeih koong awpei khäl. Nangnih ngulai käh hngasaw nini mäi hüt khaw a, konghmuh känäng nini lät hüt. Ayang äng nini bisaw bi khäl koong tua nangnih nini hiyawkeyal. Äi bi khäl äng nangnih i nini mrat hüt chi äm? Äpäih sumäng äi bi khäl känäng düsaw dä nini büneyei. Äini tua nangnih ngulai känäng lätal chula Hnadaga käh hngasaw a nini thänei. Äi äng nini mrat saw la nangnih a asanh chang lawm äng anang chih awlaw päihyah saw sawk nini bünei. Ngulai la anang pek saw khawh che düsaw, äini Hnadaga la khemeih peksaw phiyaw phoih che Boi Krito Yĕsu äng päihyah saw sawk. Khanbawn khälo, nangnih Mosi käh thung nini hmawt saw äng ni ha nini hmawt khäh, khrawng ihiyawh hnüp ini heng äm, äi hiyawh hnüp thung äng ini mäyeih lah saw. Awpawtaw düah saw sawgraw iphiyah che awpawtaw khäka thung täng okei bala mäi. Äini awpawtaw dü khaw omnawei saw thung känäng älät. Äi hmutaw la awpawtaw hengpe dä awhngaw pawtaw äng krak khaw, ani chawgrawei. Äini awpawtaw dü hi, ani thung känäng lät. Ani la pawtaw omeyal thän awchawgrawei saw a thänei hnawh. Äi koong khanbawn khälo, Krito düsaw äng thung khäka nini dü däk. Äihi Hnadaga koong bi pawi bi hnäng hmawna nangnih düsaw känäng thouwal tih Krito äng nini sakeyal hnäng däkai. Iyaäm nangkei ngulai äng käh luhchaw mäichoh khrang äng ini mäi hüt khaw a, thung la nangkei käh ngulai hlü khäla thouh. Ni ngulai hlü khälla nangkei kantha äng bi bala düsaw a olo hüt. Äini tua nangkei thung känäng ini lät. Iyaäm nangkei a heng naw bala khrawng tawtih thung khäka ini dü däk. Yok hmuei saw thung phem huih keinih chetchaw tih unga, äini awkhraw käh atha lawm äng dä kini chetchaw saw. Äihi tua nangkei i ini hawuvaih saw äm? Mosi käh thung ni ngulai ei? Asang bang hiyah! Awlaw bang Mosi käh thung mäyah hi ngulai i äm hmawtai hü hnawh nga. Iyaäm Mosi käh thung la dä hawuvah hi, “Khrawng vawn lawphah ai ti,” äihi khrawng vawn lawphah ni i äm hmawtai hü hnawh nga. Äini ngulai la äi sin mawn kheu sumei bala kei lung äng ayapyap lawphah saw bi ibi. Iyaäm thung kaw ngulai che dü khäh. Kei kupum kädäng ha krängak thung kaw keheng hüt khäh. Äini ana loni ngulai hengal awlaw kei küdü. Äi ana la sawk lo aih saw dä kheu mäi hüt saw äini äi chaw a kei khäka düsaw dä olo. Iyaäm ngulai la awkawm lawei bala Hnadaga käh ana äng kei a akramei. Awlaw äi ana äng kei a utuk. Äi koong thung kädäng che asanh chang. Awlaw ana ha che asanh chang, konghmuh awlaw awpawi. Bakhaw Hnadaga käh thung pawi la kei käh düsaw lo saw ei? Asang bang hiyah! Ngulai la dä lo saw. Äichaw a ngulai a ngulai ting khoi hnäng hmawna ngulai la awpawi sumei bala kei khäka düsaw a lo. Äi äng äi thung pai ha äng ngulai a mawmawt hngiyak ting hmawt hmuei. Nangkei ini hmawt khäh, thung che awkhraw lawm äng käh, äini kei che thi saw kantha äng käh. Kei ngulai khäka hngasaw huih jeh kuhmuei däk. Kei i kopoh saw äm kei yawchunga. Kei i kopoh aih khiyang äm, äi ponga. Äichaw a kei i kumum äm, äidä kopoh. Kei i po do khiyang nga äm äidä kopoh a, thung pawi khäh ting kei kaw khawmei saw dawngei. Äi koong äi poh tih che lällä kei hi ti nga, äini ngulai dä kei dukäng mäi bala ni khäl potih. Kei kawhmawt khäh, kei dukäng iha awpawi mäyah. Niche kei käh ngulai äng käh luhchaw mäichoh khrang hlü. Iyaäm kei awpawi kopoh aih khiyang thän kei po hnäng nga. Awpawi kopoh aih khiyang saw huih kei ponga. Äichaw a kei po aih khiyang nga saw pawyah saw bi dä kei kopoh. Kei podonga saw dä kopoh hi, äi potih che kei hitinga, äini kei dukäng mäitih ngulai la dä poh saw. Äi äng kei dukäng hngat thung la bisaw kuhmuh. Äi thung che ni, kei bi pawi kibiyeih khiyang khaw a pawyah saw jiji dä kei keheh leyeih saw mäisaw. Kei kulung duk che Hnadaga käh thung äng piyaw. Äini kei kupum äng awhngaw thung la bisaw kuhmuh ei. Äi thung kei lung duka käh thung ängtu jal täkei. Awlaw ngulai äng käh thung khäka kei heng naw kuhmuei, äila kakantha äng bi ibi. Kei ihuih dukhah se äm! Dü saw pawta ichi tih ni kantha känäng ula kei a ähläh epekalaih saw äm? Hnadaga a äkiyä kawtawngei. Ani la keinih käh Boi Yĕsu Krito a sumei bala ni awkhiyawtalaih saw bi bi. Äi koong kei kädäng kulung äng Hnadaga thung käh hngasaw. Äini kei käh ngulai mäichoh khrang äng kei ngulai thung käh hngasaw. Äi koong tua, Krito Yĕsu äng mäitih khäl koong che iha epret mäitiyah. Iyaäm awsawk mawh Khraw äng käh thung la Krito Yĕsu äng kei a ngulai awlaw düsaw käh thung känäng ähläh al. Mosi käh thung la i po hnängah äm, äi Hnadaga la poh. Iyaäm keinih käh ngulai äng käh luhchaw mäichoh khrang che ngiyaw khäh. Äi koong khrawng käh ngulai koong dü hmawna, Ani la Awchaw a nangkei ngulai äng käh luhchaw mäichoh khrang huih poh bala teh. Nangkei a khrawng khiyuptih ngulai käh tha a Hnadaga la ichih al. Äihi thung la hlüei saw konghmuh nangkei dukäng uhluih. Iyaäm nangkei käh mäichoh khrang ngulai äng käh luhchaw mäichoh khrang huih hiyah äini Awkhraw äng mäichoh khrang huih dä. Iyaäm ngulai äng käh luhchaw mäichoh khrang la ukhäla khiyup äm, anih tawk la che ngulai äng käh luhchaw mäichoh khrang dä tawk saw. Äini Awkhraw la ukhäla khiyup äm, anih la Asanh chang Khraw la ihuih hlü äm äi huih dä tawk saw. Nangkei käh tawk dä ngulai äng käh luhchaw mäichoh khrang la khiyup khaw äpäih sum äng nübünei saw che düsaw dä. Äini ini tawk dä Asanh chang Khraw la khiyup hi äi phiyaw phoih che sawk la jelkhiyamsa. Iyaäm ngulai äng käh luhchaw mäichoh khrang la khrawng tawka ukhiyup khaw nangkei Hnadaga käh lansu a ini thänei. Iyaäm äila Hnadaga käh thung khäka awpeyah. Ihi khäh awpei hnängah. Awlaw ngulai äng käh luhchaw mäichoh khrang äng mäitih khälla che Hnadaga a phiyaw hnängah. Nangnih che ngulai äng käh luhchaw mäichoh khrang äng mäichu, äini Awkhraw käh hlü äng dä nini mäi saw. Äibache Hnadaga käh khraw dä nangnih lung duka mäi khaw, nangnih khraw lawm äng nini mäi. Äini u dukäng Krito käh khraw mäyah äm, ani Krito käh hiyah. Äini Krito dä nang ängtu mäi khaw Awkhraw che nang koong awsawk thäneyei. Iyaäm ngulai koong nang kantha dü aih thän Hnadaga hmawi mawh a nanga konghmuh sang ting tawk hmuei däk. Awlaw Yĕsu Krito a düsaw känäng thouwal tih Hnadaga käh Khraw dä nangnih äng mäi hi, äi Krito Yĕsu a düsaw känäng thouwal tih la nangnih käh düaih tih kantha a ha awsawk pekalai. Iyaäm Awkhraw nangnih dukäng mäi saw koong. Äi koong, khanbawn khälo, ngulai äng käh luhchaw mäichoh khrang äng ini mäichoh aih koong nangkei ngulai äng käh luhchaw mäichoh khrang khäka okeipu. Iyaäm nangnih dä ngulai äng käh luhchaw mäichoh khrang huih ini mäichoh hi nangnih düni nini dü aih saw. Äini Awkhraw tha äng dä nini kantha äng käh pawyah saw bi khäl nini tukal chak hnäng khaw heng chula nini mäiyei. Hnadaga käh khraw tha äng chet chonei tih khäl che Hnadaga käh chaw chuhnu khäl. Iyaäm Hnadaga la nangnih a anang pek saw khraw la che nangnih a hngasaw a ha anang po ah awlaw ke hmawna ha anang po ah. Awlaw bang äi khraw la nangnih a Hnadaga chaw chuhnu a anang poh awlaw Khraw tha äng nangkei Hnadaga khäka hek pula ini hawu, “Paw o! Kei Paw o! Hnadaga käh khraw ängtu nangkei käh khraw la hawu nangkei Hnadaga käh chaw chuhnu. Nangkei dä Ani chaw chuhnu ini thänei hi Hnadaga la Ani chaw chuhnu tih a i pekaih saw khawmei äm, nangkei ha äi ini büneyei. Awlaw Krito la Hnadaga känäng i büneyei äm äi nangkei ha Ani ängtu ini phe eyei. Iyaäm nangkei dä Krito ängtu dukhah ini khawm hi Ani ängtu a wachang ha ini büneyalai.” Kei kawtawk nangkei tua ini khawm tun saw waih khäl äng nangkei koong awhmawi mawh a dawngaih saw piyaw iha tuei hnäng hnawh. Hnadaga käh chaw chuhnu khäl itih khaw a ini dawngaih saw äm, äi koong bi hmuei saw kheni la nahei ula äi khin koong chong ula ini mäi. Iyaäm bi hmuei saw kheni hleyal chak däk äi koong äi dukäng thänei däk saw vawn khäl usum vawng tiyah. Äi upum sitha äng thänei saw hiyah, Hnadaga la äi huih thänei seh ting poh saw dä. Äini äi äng tutu Hnadaga la khanh ha pek. Ni khanh äthänei saw che, bi hmuei saw vawn kheni, ini dü aih saw ahnga ini mäi saw känäng ini lätalai awlaw Hnadaga chaw chuhnu khäl käh a wachang phüh ini büneyelai. Iyaäm tutäh si äng ha bi hmuei saw vawn kheni pung vawn mawh mäeiyeih khaw a ähän choh ei saw äng okou saw huih ini koupe khäh. Äi jiji hiyah, äini Asanh chang Khraw la nangkei a khrawng pekaih saw vawn pawi äng käh täkchah phüh nangkei a mäi khäh. Nangkei ha äi huih ini lung dukäng asachaw kou pula Hnadaga käh chaw chuhnu ini thäneyeih koong awlaw ini kantha lätalai koong nahei pula chongei pula ini mäi. Itih khaw thou nangkei awkhiyawt ini büneyal äm, äi khaw thou nangkei ini khanei. Äini nangkei ini hmuh saw khanh che ihisaw khanh hiyah. Nangkei a dä mäi chän däk hi, nangkei ini khaneyeih saw hlütiyah. Äini nangkei hmupu hawmpu saw äng ini khanei hi nangkei chunei pula ini chongeyei. Nangkei ini ngiyaw khaw a Awkhraw la dä nangkei a khrawng ku saw. Iyaäm nangkei ihuih suh ini tongei tawn äm äi hmawt pu. Äini ebe äng bang hawu hnäng ti saw kheu äng Awkhraw la Hnadaga khäka nangkei koong awkhawh ei. Nangkei lung duka i mäi äm äi Hnadaga la hmuh khäh awlaw khraw la i hlü äm äi ha hmawt khäh. Iyaäm khraw la Hnadaga käh khrawng khäl koong Hnadaga sitha huih ani khäka hnih ei. Nangkei ini hmawt khäh, Hnadaga a ula khet nawk äm awlaw Ani sitha huih u khäl panei ini hmuei äm, hang hang ni utu anih pawyei phüh dä bi pawi bi chak saw. Ayang bang ukhäla Hnadaga la heh lei däk äm, äi khäl ha Ani Chaw huih ini thäneyeih koong hel hmuei, awbawng yumtih khäl dukäng Awchaw dä täkchah luhdül äng lotih thänei hmawna. Äi koong u khäla Hnadaga la helei bala tawkäm äi khäla Ani la bekei. U khäla Ani la bekei äm äi khäla Ani la konghmuh sang ting üsüh äng hawn däk awlaw Ani la anih ängtu a wachang ini pheh yei däk. Ni krong khäl äng keinih i kini hawu aih saw äm? Hnadaga dä nangkei phak mäi hi, nangkei awhngaw phak u mäyeih saw äm? Hnadaga la Awchaw a bang hlätah. Ani la nangkei khe koong Awchaw a uhlu hüt. Awchaw a bang nangkei koong pektih la ichip phranh bala ükütni nangkei a khrawng pekaih hiyah ei? Hnadaga la heh lei saw khrawng khäla ula epret kho aih saw äm? Hnadaga upum kädäng la bang anih a epret mäyahtih ting tak. Bakhaw nangkei dam ini bünei tawn ting ula hawuvaih saw äm? U üdü hütäm awlaw dütih khrawng khäl känäng thou al äm, äi Krito Yĕsu Hnadaga käh set pawta om bala mäi. Awlaw nangkei koong Hnadaga a ihnih ei tun. Ula nangkei a Krito käh khet känäng khrawng khau hnängaih saw äm? Khru saw la ei? ‘Hiyah thän’ waih la ei? Kuluh nawk saw la ei? ‘Hiyah thän’ ini ken saw la ei? Sanglai saw la ei? ‘Hiyah thän’ phi la ei? ‘Hiyah thän’ düsaw la ei? Kiyam la hawu, “Nang koong keinih üküt khaw a ni kini dü lah bät hmu eyeih tih samphomah huih dä keinih a khrawng poh.” Äini nangkei a khrawng khetnawtih Hnadaga äng nangkei äi hang hang äng ni ini ong chak. Iyaäm kei kawhmawt khäh ila ha nangkei a Ani käh khet känäng khrawng khau hnängah: düsaw la hiyah khaw sawk la, hawn natchaw hiyah khaw hawn khiyuptih hiyah thän tha la, tua käh hiyah thän awhmawi maw a käh ila ha hiyah. Ühlüngtih ala la ha, thuktih ala la ha, ‘hiyah thän’ bi hmuei saw awhngaw vawn khälla ha, ila ha nangkei Boi Krito Yĕsu äng ini mäi saw koong Hnadaga käh khet känäng nangkei a khrawng khau hnäng hnawh. Kei ihisaw kawhawu, kei Krito ängtu kämäi, kei hleinga. Asanh chang Khraw äng kei tawk sanh la ha hawu kei hleinga. Kei kulung naw awlaw mawt dukhah kipiyei tun. Kei thi äng tuei tih kei khrawng khälo, känäng hi che kei Krito känäng ini kawal saw äng käh pathamah kawlaw keyei hü. Anih che Isawlael yapsaw. Hnadaga la anih a chaw chuhnu huih a chaneyal, upum käh a wachang dawnei, kheu ini tawei, thung epek, rosi khrang hawu pek awlaw anih käh nuchen pawsawk khäl khäka Hnadaga la awkhawmei hüt. Ni khrawng khäl dä Yudi, nangkei käh lentih nuchen paw sawk khäl käh chen. Awlaw ni chen känäng dä Krito ni luhdül äng lo hüt saw. Ani Hnadaga, hang hang dämäng käh. Ani käh a wachang sawkak mäi. Amen. Hnadaga la anih khäka amah khawmei hütsaw khäl luih hütah ting kei äi khäl kawhawu saw hiyah. Äini Isawlael khäl käh khrawng khäl kheni Hnadaga käh khrawng hi u. Awbraham chen äng käh koong anih kheni ani chaw chuhnu hiyah. Äini kiyam la hawu, “Aijak käh chena dä nang käh chen ting mawn hmueyei.” Ni kheu che ni huih, thi saw äng käh chaw chuhnu kheni Hnadaga käh chaw chuhnu hiyah. Hnadaga la khawmei saw huih luhdül äng lotih che Awbraham käh ekejet chen. Hnadaga la khawmei hütsaw che ni, “Ihisaw khin äng Kei kolo alaih saw dä, awlaw Sara a pawtaw chaw hngat thäneyei.” Awlaw äi jiji hiyah, Ribika käh phetih chaw häih ha nangkei käh nuchen paw sawk Aijak känäng dä thänei saw. Äini awchaw hngata heh lei hüt saw äng Hnadaga käh isitha chumchak. Hnadaga la Ribika a tak, “Achang chaw la änäu chaw a chetchaw aih saw.” Hnadaga la ni kheu awhawu hüt saw äi phetih häih luhdül äng lo hawm häih khawngah awlaw äi häih la awpawi la ese bi hawm häih khawngah. Äi koong Hnadaga la helei saw a dä ebekei saw. Ahnih käh bi kawi koong ha hiyah. Kiyam äng yoei bala mäi, “Kei Yakub a kekhet nawk, äini Eso a kumum.” Äihi Hnadaga la matara bi khäh ting nangkei ini hawuvaih saw ei? Asang bang hiyah. Iyaäm Hnadaga la Mosi a tak hüt, “Kei ua kulung hlü mäi äm, äiya kejeneyei, ua kulung hlü mäyäm äiya awpawi kopoh ai.” Äihi niche luhchaw käh sitha ‘hiyah thän’ ini hnosaw khrung äng üm hmueyah, äini khetjen che Hnadaga khrung äng dä ini üm lah saw. Kiyam la Aigup pre a käh mawng Phorona ni kheu tak, “Kei nanga mawng kini poh saw, Kei nang khrung äng Kei käh dogo dawnei hnäng hmawna awlaw luhdül kheni a Kei ming hiyawk chak hmuei hmawna.” Äihi ini hmuh, Hnadaga la isitha huih läsua pei ejenei awlaw Ani sitha huih läsua pei ulung chang poh. Nangnih dukäng ükütla anang hi nawk theih, “Äihi che Hnadaga la khrawng käh pret iya mawn saw äm? Hnadaga käh lung hlü ula ka hnängai äm?” Luhchaw o, Hnadaga kheu khrung äng kräuvaih tih nang u äm? Dek am la krängak ha dek am bitih a hi hnängah, “Nang kei a iya ni huih ini bisaw äm?” Dek vawn bitih la lup khiyang kiyup känäng isitha huih yapyap dek vawn biyeih saw dogo tawkeyei? Ani la üküt che päi koong awlaw üküt che sawkbrat ini sumeyeih saw koong ibi. Äihi Hnadaga krong ha lup khiyang dä. Ani la aman awlaw dogo awdawneyeih khiyang hüt. Äini mawng khrawng khrung äng Ani a aman mäi hütäm, u khäl ini khrak hütäm anih khrung äng uchunei hüt. Awlaw mawng bang nangkei khrung äng läi hmuei hütäm, ukhäla Ani käh jenei büneyeih koong po lawk bala tawk äm, nangkei dukäng ukhäla Ani la Ani käh a wachang ini lawkeyeih koong ächän poh äm. Äi khäla Ani la Ani käh priu tih a wachang dawnaih khiyang hüt. Hnadaga la panei saw äi khrawng khäl che nangkei dä. Yudi jiji kän hiyah Yudi hiyahtih khäl känäng ha nangkei a khrawng panei khäh. Hnadaga sidawng hiyawktih Hoseo boih äng yoei, “Kei käh khrawng hiyahtih khäla ha, Kei khrawng ting katakai, awlaw Kei khet nawh hütnga saw khäl, Kei käh khetsu ting katakai.” Mawng la a bang anih a tak hmuei hütäm, “Nangnih kei khrawng hichu, äila a anih a tak hmueyei, ‘Sawk mawh Hnadaga käh chaw khäl.’” Hnadaga sidawng hiyawktih Aijaya la Isawlael krong äng hek bala hawu hüt, “Isawlael khäl mret kawm äng käh delung huih ini nung thän äi dukäng käh awvawng la dä kiyawt ini büneyalaih saw. Iyaäm Boi la ni luhdül äng alanda awlaw kraw a pak Ani käh tara awkhrawkai.” Aijaya la ni huih kheu awhngaw laa ha hawu hüt, “Dogo mawh Boi la nangkei koong bitchaw ini chen khrawng tawpek hütah hi, äihi nangkei Sawdom la Gomola mräh huih ini thäneyei hü.” Äihi nangkei ni kheu ini hawuvai, Yudi hiyahtih khälla Hnadaga hmawi mawh a konghmuh sang ini thäneyeih koong hno ei hüt u. Hnadaga la dä anih a konghmuh sang ting lawkei. Anih käh uyum koong dä anih konghmuh sang ini thänei hüt saw. Awlaw Isawlael khälla thung khäl ini ngei saw äng Hnadaga khäka konghmuh sang ini thäneyeih saw ini hno. Äini anih thänei hnäng u. Iya anih thänei hnäng hüt u saw äm? Iyaäm anih la uyum äng ümah pak bi äng ini üm hüt. Awlaw mawng lung la khrawnga mawp sawk äm, Anih äi lung khrung äng ini mawp hüt. Kiyam äng yoei saw huih, “So khäl! Kei Sinai a lung hngat kawtawk khäh, äi äng khrawng khäl ini mawp awlaw ini kru. Äini ula Ani khrung äng uyumei äm anih la krängak ha hiyawh ei bün hnawh u.” Nawutih khälo, Isawlael khäl koong kulung dukäng mawt kulung hlü mäi awlaw Hnadaga khäka kei ni huih suh kotong, anih la ngulai känäng ähläh büneyal hnäng hmawna. Anih krong äng kei ni sawksi kepek, Hnadaga krong äng anih a mawmawt ini nah ei mäi khäh, äini ni ngen känäng hiyah. Mawng lawm äng Hnadaga la khrawng khäla konghmuh sang ting tak äm anih la äi lawm hmawt u. Anih la Hnadaga hmawi mawh a konghmuh sang ini thäneyeih koong anih la anih käh lawm dä poh eyeih saw ini hno ei. Äi koong Hnadaga la iba hi khrawnga konghmuh sang ting lawkei äm, äi lawm anih la ngei u. Krito la konghmuh sang ini thäneyeih koong Mosi käh thung hluih däk. Äihi tua Ani a ula yumei äm äi khäl dä Hnadaga hmawi mawh a konghmuh sang ini thäneyeih saw. Thung sumei tila konghmuh sang näthänei saw khrang Mosi la ni yok hüt, “Mawng khrawng thung läk chetei äm, äi khrawng la äi thung äng sawk büneyei.” Äini uyum äng iba Hnadaga hmawi mawh a konghmuh sang näthänei äm, äi krong kiyam la ni huih hawu, Nini lung äng ni huih hawuvai chu, “U hawn pre a chetai äm? Ni kheu nawphawh ngal khaw ni, Hawn pre känäng Krito a khomalaih koong u hawn pre a chetaih saw äm?” “Hiyah thän hawuvai chu, ‘U luhdül äng käh thuktih vawm äng komaih saw äm?’” Äi kheu nawkrawnal khaw ni thänei, dütih khäl duk känäng ula Krito a ädäma olo alaih saw äm? Äini ni krong la i hawu äm? “Äi chok hawu nang kena nang mongkhok la nang lung äng mäi khäh.” Äi chok hawu che yumsaw khrang, äi keinih khrawng khäla kinihiyawk tun. Äi kheu che ni, nang dä Yĕsu a Boi ting nomong khok äng nawkhawmei khaw awlaw nulung dukäng Hnadaga la Ani a düsaw känäng henal ting nuyumei khaw, äihi nang ngulai känäng awkhiyawt nübüneyalai. Iyaäm khrawng la ulung dukäng ini yumsaw äng dä Hnadaga la konghmuh sang ting lawkei saw awlaw omong khok äng awkhawmei saw äng dä ngulai känäng awkhiyawtal saw. Kiyam la hawu, “Ula Krito khrung äng yum äm äila che hiyawh ei bünei hnawh.” Yudi awlaw Yudi hiyahtih äng iha okhoih mäyah, iyaäm hang hang käh Boi che hngat dä. Ani a panei tih khäl kheni a Ani la anih khrung äng awbawng pisih läi pek. Kiyam äng mäi khäh, “Awkhiyawt büneyalaih koong u khälla Boi a ini panei äm, äi khälla awkhiyawt ini büneyei.” Äini Ani khrung äng uyum tawei hawmah tih la Ani a iba ini paneiyeih saw äm? Awlaw u khälla Ani kheu yaw hawm u äm, iba anih la Ani a ini yumeyeih saw äm? Awlaw sidawng hiyawktih mäyah khaw, anih la iba ini yawkaih saw äm? Awlaw anih a hngat la ha te u hi, iba sidawng hiyawktih khälla sidawng ini hiyawkaih saw äm? Kiyam äng yoei bala mäi, “Utih la awpiyaw sidawng pawi ini hiyawkäm anih käh kho mawt sopha khäh.” Äini hang hang la äi sidawng pawi äng ngei hüt u. Hnadaga sidawng hiyawktih Aijaya la hawu, “Boi o, keinih kini hiyawk hüt saw sidawng pawi ula yumei hütäm?” Äihi ini hmuh, Hnadaga kheu ni khin saw äng dä uyum lo saw. Awlaw Krito krong sidawng hiyawk hmuei saw äng dä äi kheu nini khin lah saw. Äini kei kawhawu, Isawlael khälla sidawng yaw hüt u ei? Ä, anih la ini yawk lah hüt khäh. Kiyam la äi krong äng hawu, “Anih käh kheu luhdül khe a khrih ei chak khäh. Anih käh kheu luhdül atum saw täh chet.” Kei awlaw kawhawu, “Isawlael khälla äi kheu yawchu hüt u ei? Mosi la täkchah hawu hüt: Yapsaw ting süp chu saw yapa sumeingala, kei nangnih a kanang selei sawkai. Awlaw mäktih yapsaw sumeingala nangnih nini man kanang thouhwai” Äi pänäng Aijaya la sengkhri äng hawu, “Kei a usuiyah tih khälla kei a khrawng bün hüt. Kei krong ihiyahtih khäl khäka Kei a khrawng awhmawt hmawna anih khäka kopoh ei.” Äini Isawlael khäl krong äng Hnadaga la hawu, “Ngeiyahtih la deng mäitih khrawng khäl pawta Kei hnüp thiya kukut phrah nei ngala kämäi.” Äihi kei kihi, Hnadaga la Ani käh khrawng Isawlael khäla ähiyänalei? Asang bang hiyah! Kei kädäng bang hngat Isawlael saw, Awbraham käh chen awlaw Binnamin thongsaw. Hnadaga la kupum khrawng ting achah khawthouh heh lei saw khäla laweyah pak mäi hütah. Hnadaga sidawng hiyawktih Elija krong äng kiyam la i hawu äm, äi nangnih hmawt chuei? Ani la Isawlael khäl ming äng Hnadaga khäka ätängei hüt, “Boi o, ni khälla nang käh sidawng hiyawktih khäla ini tuk däk. Awlaw nang käh hlu dün la khäl ha ini khoih yal chak däk. Kei lung khiyang dä kämäitih saw, awlaw kei a ha anih la khrawng tukaih saw ini kram.” Äini Hnadaga la Elija a i kheu krawn pekal hütäm? Hnadaga la hawu hüt, “Khrawng thong seh a Kei koong kaw tawkeyal khäh, anih la ini bisaw Bal ting ini taksaw ulupchaw khäka ini khokgru dülei u.” Hnadaga la äi huih tua ha khetjen bala Isawlael äng käh awvawng khrawnga eheh lei. Hnadaga la dä khrawng khäla khetjen bala heh lei hüt hi, äiche ni bisaw äng thänei saw hiyah. Äi huih hi che, Hnadaga käh khetjen che khetjen a thänei ti hnawh. Äihi ini yawkchu, Isawlael khälla ibang ini büneyeih saw koong ini hno hütäm äi anih la bünei u. Äini Hnadaga la u khäla heh lei hütäm äi khälla dä äi ini bünei saw. Äini awhngaw khäl käh lung lungpel huih chang chak däk. Kiyam äng yoei bala mäi, “Hnadaga la anih a sanh sanh tawk hnängah pak poh.” “Tü hnüp täh si äng, Ani la anih käh mik ümü sawk anih la hmueyah pak awlaw yaw ah hmawna ini hnaw pawng sawk.” Mawng Dawut la hawu, anih käh päi prang khäl choh awlaw kawn huih thänei seh, awlaw ini kru dün ala dam ini bünei dün thänei seh. Anih la hmuah hmawna anih mik hmü seh. Awlaw ini khrusaw äng sawkbrat anih yung kuk bala mäiseh. Äihi Yudi khäl mawp ula sawkak koong ini krak saw ei? Asang bang hiyah, awlaw bang Yudi khäl käh ngulai koong Yudi hiyahtih khälla khiyawt tara ini bünei saw. Ni Yudi khäl selei ong thänei saw. Yudi khäl käh ngulai la luhdül khäka pisih len olo hüt. Awlaw anih awkhraw lawm äng ini sanglai saw la Yudi hiyahtih khäl khäka pisih len olo hüt. Äihi, Yudi khäl Hnadaga khäka ini krawnal khaw a pisih len lo ai! Tua äi kheu khäl kei unung chaw nangnih Yudi hiyahtih khäl khäka kawhawu tun saw. Kei nangnih käh teh hmueitih käthänei saw khaw thouh kei käh bi koong mawt kawhmawi lam. Äi koong kei yapsaw khäl keselei sawk hnäng hi, anih dukäng käh pochongak hnih khat kawkhiyawt hnängai. Yudi khäl hiyänal ini hmuei saw äng Hnadaga la luhdül äng käh khrawng kheni äng khanbawn poh ei khaw, Hnadaga la Yudi khäla awlaw krawnak lawkeyal khaw äi i thäneyeih saw äm? Äiche dütih la awsawk büneyal saw huih thäneyeih saw. Hnäk chän ha hnui känäng poh hmuei saw ha uu dä Hnadaga a nepek hi, ha hnui khäl kheni asanh nai. Awlaw thing hngat äng käh uyungkung dä asanh hi, abak khäl kheni asanh nai. Olip thing äng käh bakak hnih bun däktih bak khäl äng täuwa käh olip bak khoh hmuei khaw, nangnih Yudi hiyahtih khäl äi täuwa käh olip bak khäl huih. Nangnih tua äi thing äng nini sakei däk awlaw äi thing äng käh yungkung äng pisih nini bünei tun. Äi koong nang äi bun däktih bak khäl thawka nupuma elen ting khinei tila bawriyeiti. Äini naw bawriyei khaw nulung äng tawei bäi, nang nuyungkung mawntih hiti, nuyungkung la dä nanga anang mawn saw. Nang nawhawu nawk theih, “Abak bäng hmueyal saw che äi thing äng kei a khrawng khoh al hnäng hmawna.” Ä, ihi khäh, Hnadaga a yumei u koong dä anih a bäng hmuei hüt saw. Awlaw nanga uyum mäi hüt koong dä nang äi thing äng käh üphüh näthänei saw. Äini bawriyeichu äi chaw a ke bäichu. Iyaäm Hnadaga la äi täkchah bun hüttih baka bang hlätalah khaw nanga anang hlätal hnawh. Äi koong tawk chawm, Hnadaga ihuih khetjen mawh äm awlaw ihuih lung changtih äm. Hnadaga a yum ti ah pak mäitih lukhrunga Ani nget khäh. Äini Ani khetjen äng nämäi khaw nang koong Ani khetjen mawh. Äi huih mäiti khaw nang ha äi thing bak huih bäng nu hmueyalai. Awlaw anih dä yum u saw känäng ini krawnal khaw, anih ini pum käh thing ängtu awlaw krawnak khoh ini hmueyalai. Iyaäm ni khoh saw bi Hnadaga la poh hnäng. Nangnih Yudi hiyahtih khäl bäng hmuei däktih täuwa käh olip thing bak huih awlaw nangnih äng tueiyah tih chäh hmuei chän olip thing äng khoh nini hmueyal. Yudi khäl che äi chäh hmueitih olip thing huih. Äi bäng hmueitih bak khäla awlaw krawnak anih käh thing äng Hnadaga la khoh alaih saw ihuih oloigra aih saw äm. Iyaäm nube tanawu khälo, nangnih nini pumäng bawriyei hnängah pak, ni thupei bala mäi saw hmawtah pak nini mäiyeih saw kei hlüei nga. Äi ihisaw che ni, Yudi hiyahtih khäl Hnadaga khäka ini lo saw luih hawmah saw sawgraw awvawng Isawlael khäl käh lung chang bala dä mäiyeih saw. Ni huih dä Isawlael khäl khenila awkiyawt ini büneyalaih saw. Kiyam äng yoei bala mäi, Sinai känäng kiyawtalaih tih lo ai. Ani la Yakub chen khäl äng käh pawyah saw khäl olouhvalai. Anih käh ngulai awhlawm hlaw a kichih alaih khaw a, nidä anih ängtu kheu kaw taweyeih saw. Iyaäm sidawng pawi lawei u saw koong Yudi khäl tua Hnadaga käh lansu khäl awlaw Yudi hiyahtih khäl nangnih koong che usum vawng. Iyaäm Hnadaga la anih nuchen pawsawk khäla eheh lei saw koong anih a Hnadaga la khet nawk. Hnadaga käh phiyaw phoih khäl awlaw Hnadaga käh panei krängak ha louwal hnäng ti. Nangnih ayang äng Hnadaga a ngeiyah pak nini mäi hüt. Äini Yudi khäla ngei u saw koong tua nangnih Hnadaga käh jen nini bünei. Äi huih kawchawng chawng nangnih ejen nini bünei saw äng anih ha tua ngeiyah pak ini mäi anih la tua khetjen bünei hnäng hmawna. Hnadaga la hang hanga ni jenei hnäng hmaw na Ani la üküta ni ngei u saw dukäng heng naw bala tawk. Ihi khäh, Hnadaga käh elentih la vawn pawi, Ani käh ngen äng käh tawk awlaw Ani käh prengiya che unung khäh! Ani la tara bisaw khäl yawchu chak ti! Ani la i poh saw äm awlaw iya poh saw äm khrawng khälla yawchu u! Kiyam la hawu, “Ula Boi käh lung hmawt däkäm? Awlaw u Ani käh chok hawuveitih ini thänei däkäm? Hnadaga la pekalah hmawna, Hnadaga a krängak hngat la ha iha pekei?” Ükütni Ani la dä, Ani a sumei bala dä awlaw Ani koong dä ni khäl bi hmuei chak saw. Wachang kheni sawkbrat Ani la bünei seh. Amen. Äihi nube tanawu khälo, Hnadaga la khrawng jenei saw koong kei nangnih khäka thasa kawkhawh ei. Nangnih nini kantha a hengtih, asanh chang awlaw Hnadaga phiyaw lokong hluei khäl. Ni hnäh ihisaw lawma Hnadaga a norosi saw. Ni luhdül äng käh mäichoh khrang la thung khäl kolai chu, äichaw a Hnadaga a nangnih käh lunga atha poeiyal sawk chula hang hang atha thäneiyal khäl. Äihi nangnih Hnadaga sitha iyäm awlaw mawng che pawi äm awlaw mawng la che Hnadaga a phiyaw äm awlaw mawng che kraweiyah äm, äi nini hmawtai. Kei Hnadaga känäng kübünei saw khetjen äng kei nangnih a kanang tak, nini puma nini tawk saw thawka awpawisum ting khahneyeih chu. Äichaw a nangnih i lup äm, äi lup dä tawkei bäichu. Hnadaga la anih a i hiyawh uyum pekäm, hang hang la ni upuma äi hiyawh khahnei seh u. Nangkei üküta ni ini kantha äng angga chumchak khäh, äini äi angga chumchak saw la awhngaw hngaw bi ibi. Äi huih kawchawng chawng nangkei üsüh äng ini nung thän ha Krito äng sakei pula kantha hngat ini thänei däk. Ükütni hngat la hngat äng ini soei chak khäh. Hnadaga käh khetjen bünei pula nangkei awhngaw awhngaw chi uhlu ini bünei. Äi phiyaw phoih dä Hnadaga sidawng hiyawktih huih Hnadaga käh kheu ini hawu hnängaih saw dogo thänei khaw uyum saw läk äi khrawng la Hnadaga sidawng hiyawktih huih Hnadaga käh ihisaw kheu hawu seh. Ula chetchaw äm äila chetchaw seh. Ula chok äm äila chok seh. Ula ulyah pek äm äila ulyah pek seh. Ula pek äm äila ulung prahnei bala pek seh. Ula gongsong äm äila tha po bala gongsong seh. Ula awhngaw a jenei äm äila awpiyaw lung äng jenei seh. Ekhet äng kramei mäyah seh. Ibang ese äm äi a mum khäl. Ibang pawi äm äi chetchet mawn chula taw khäl. Hngat la hngata tanawu huih mawt chaw khetei khäl. Nini pum thawka bang awhngaw a unung chaw hmawi pek khäl. Tha poh khäl, dawmai chu. Äichaw a tha potila nulung känäng Boi Hnadaga a chetchaw khäl. Üm saw äng piyaw khäl, dukhah äng chunei chula mäi khäl. Sawkbrat suh tongei chula mäi khäl. Hnadaga käh khrawng khäl ini lai khaw a ku khäl. Gawlba khäla nangnih ima panei chula teh long khäl. Nangnih a ula anang kuluh nawkäm, anih a nangnih pisih pek khäl. Anih a sayeyei chu. Utih ini piyaw äm anih ängtu piyaw bäichu, utih ini kapäm anih ängtu kap bäichu. Nangnih hngat la hngat pongei chula mäi khäl, bawriyei chu. Khrawng la awhmawi pek u saw khrawng khäl äng khanbawn hmatei khäl. Nangnih nini puma ngen mawh ting khineyei chu. Nang äng hngat la ha ese poh ei khaw, ani äng ese poeyeiti. Khrawng khe mik äng i pawi äm, äi khäl nini poh aih saw hno khäl. Nangnih nini hnäng saw huih ni khrawng kheni äng jelkhiyamsa äng mäichoh bäichu. Khetsu nube tanawu khälo, nangnih kädäng la krängak ha hum thungei nawkalai chu, äini Hnadaga la dä hum thungei nawkalai. Iyaäm kiyam äng Boi la hawu, “Hum thungei nawkalai saw che Kei käh bi dä. Ua ihuih tawnäm Kei ani a kepekalai.” Kiyam kheu huih, “Nangkäh lansu dä üdüei hi, ani a eisaw pek. Ani tui halei hi tui pek. Ni huih dä nopoh khaw nang ani luki äng choitih mei alh püm tila nawtawkai.” Pawyah saw khäka hiyumai chu, awlaw bang awpawi äng dä ese a hiyum sawk khäl. Khrawng kheni ni pre khiyuptih khäla ngei seh u. Iyaäm pre khiyupaih koong Hnadaga la anih a thayung pek saw. Khiyuptih khäl kheni a Hnadaga la heh lei. Äihi khiyuptih äng sängeitih che äi khiyuptih a bi pektih Hnadaga äng dä sängei saw. Äi huih sängeitih la che upuma dam äng khrawkeyei. Iyaäm ula bi pawi bi äm anih la khiyuptih a ini keh ei saw tawn. Äini ula ese bi bi äm, äi khälla ini keh ei lah saw. Nang khiyuptih a ke ah pak nämäiyeih khiyang ei? Ibang pawi äm, äi ni bi khaw khiyuptih khäla keh lah hnawh ti. Anih la nanga anang phiyaw ai. Äini nang dä pawyah saw bi nibi khaw keh bäi. Iyaäm anih la dam ini pekaih saw thayung tawkei khäh. Khiyuptih khäl che Hnadaga käh hngasaw, anih a Hnadaga la sumei bala pawyah saw bi bitih a dam epekai. Äi koong nangnih khiyuptih khäla ngei bäichu. Nangkei ini ngeyeih lah saw, dam jiji nini keh saw koong hiyah, äini nangnih käh tawk sanh koong ha hlü. Ni koong dä nangnih phawndaw nini pek saw. Iyaäm äi khiyuptih khäl che Hnadaga käh hngasaw. Anih la äi bi bi ula ini mäi. Nangnih anih a ibang nini pekalaih saw tawn äm pek khäl. Nang käh ihisaw phawndaw pek awlaw ua hmawi nepek tawn äm hmawi pek. Nangnih hngat känäng ha iha pueyei chu, ekhet jiji dä hngat känäng hngat pueyei bäichu. Iyaäm ula awhngaw a khet nawkäm, äila thung khäl kheni ngei chak. Thung äng mäi, “Nimik sawuveyei ti. Luhchaw sawk tuai ti. Muai ti, awlaw lawphah ai ti.” Ni khäl pongeyal chak bala otoi chaw lawm äng ni kheu hawu hmuei, “Nang imcheng saw a nupum huih khetnaw bäi.” Ekhet la imcheng saw a naw pekah. Äi koong nangkei ini hmuh ekhet äng dä thung khäl uluih saw. Nangnih ni huih nini poh aih lah saw. Iyaäm nangnih nini hmawt khäh nini ip saw känäng nini khakaih saw ikhin lo däk. Iyaäm nangkei täkchah ini yumei khaw a käh khin thawka nangkei ini khiyawtalaih saw ikhin hiyäu däk. Awyawn päyeih däk, hnüp thäneyeih däk. Khrawng khälla uhiyung äng ini bi tunsaw bise khäl, nangkei ini dümalaih lah saw. Lo khäl awa äng käh jal khawm dün awat wat äng khä. Äiche, Hnadaga la nangkei a awkhraw äng jal ini täkaih koong khrawng pek saw. Lo khäl, moi ula ini piyaw saw düna chetai pu, yangmala hiyah pak awhngaw äng krakai pu, sieyei pu awlaw seleiyei pu. Äini ühnüp äng ini chetei saw huih mawmawt chaw poyei äng khä. Äi bise khäl biyah pak, äi chaw a, Boi Yĕsu Krito huih nini tawk saw la nini mäi saw khrang khäl poei khäl. Awlaw ngulai kiyangk äng nini poh ai khiyang saw khäl poh ai chu. Nangnih uyum äng ngiyaw tih khäla lawei khäl. Äini anih la ihisaw la hiyah saw ini hawusaw koong anih äng toksakeyei chu. Ükütla che ini yum, ükütni ke eiyeih hnäng saw dä. Äini u khäl bang uyum äng ini ngiyaw äm äi khälla awnse jiji dä ei seh u. U khälla ükütni ini ei äm, äi khälla awn se jiji eitih a keleihyah pak. Awn se eitih la ükütni ei chaktih a tara biyeiya. Iyaäm Hnadaga la anih a ha awlawkei. Khrawng hngat käh hngasaw a tara biyeih tih nang u äm? Äi hngasaw oongei, uhiyumei ani mawh la hmawt nawkai. Ani ongaih saw dä, iyaäm Boi la ani a ong sawkai. Üküt khrawng la ini khin awhngaw hnüp khäl thawka khohnüpak mawt alang gong. Awlaw üküt khrawng la che khomhnüp kheni lup khiyang ting ini khin. Nangnih ükütni nanga nang tawkäng mäi khäl. Ula khomhnüp hngata alang gong ting khin äm, äila ha Boi a hmawi pekaih koong dä poh saw. Ula ükütni ei äm äila Boi a hmawi pekaih koong dä poh saw. Iyaäm äi eisaw koong Hnadaga a äkiyä tawngei. Ula awn se jiji ei äm, ani la Hnadaga a hmawi pekaih koong dä song saw. Ani la ha Hnadaga a äkiyä tawngei. Nangkei dukäng hngat ha upum jiji koong hengah awlaw upum jiji koong ha dü ah. Nangkei ini heng hi, Boi koong dä heng pula ini mäi saw. Nangkei ini dü hi, Boi koong dä ini düsaw. Äihi nangkei heng pei awlaw dü pei nangkei Boi käh dä. Äi äng, dütih la hengtih käh Boi a thäneyeih koong Krito dü hütsaw awlaw krawnak heng bala thouwal saw. Äihi iya nang nata naw nawu käh tara nibisaw äm? Iya nang nata naw nawu la piei hmawna nekeleih saw äm? Hnadaga hmawi mawh a nangkei ükütni tara ima ini ja aih lah saw. Kiyam äng yoei bala mäi, “Boi la hawu, ‘Kei lälä sawk mawh Hnadaga dä, ükütlani lälä Kei hmawi mawh a ini khokgru ini düliyeih saw awlaw Kei a Hnadaga ting khrawng khawmeyeih saw.’” Äihi, nangkei hngat mawkrawng la Hnadaga hmawi mawh a ja pula i aw ini bi hütäm ini hawu pekalaih lah saw. Äihi, nangkei hngat la hngat käh tara biyei pu. Äichaw a, nangnih nini lung äng tawei bäichu, nangkei hngat käh yum ha khru sawkah pak awlaw ngulai äng kraw ah pak. Boi Yĕsu äng sakei ngala kei kawyawk chu awlaw kawchawng chawng kawhmawt, eisaw kheni sanh chak khäh. Äini ula eisaw hngata sahnah ting khinäm, äi ani khäka dä sahnah saw. Neeisaw krong dä nang nawu ulung naw khaw, nang ekhet lawm äng mäiti. Krito u koong dü äm nang neeisaw la äiya khrakaiya. Äihi nang ibang pawi ting naw tawk äm, äi khrawng khälla ese hawuvah seh u. Mawng Hnadaga käh pre che eiok saw äng käh kheu hiyah. Äini konghmuh, jelkhiyamsa la Asanh chang Khraw äng käh piyaw dä. Ula ni huih Krito a chetchaw äm, äila Hnadaga ha phiyaw awlaw khrawng khälla ha ani a khrawng pawi ting hmawi ini pekai. Äi koong, lo khäl nangkei ükütni jel äng mäi hnäng hmawna bi bi äng khä. Awlaw hngala hngat käh uyum chang hmawna kuei äng khä. Eisaw koong Hnadaga käh bi khrakai pu. Eisaw kheni asanh khäh. Keei saw la dä hngata ngulai äng khrawk hi, äi eisaw eiti saw bang pawi. Awsaw neeisaw, alak nook saw ‘hiyah thän’ yapyap nibisaw la naw nawu a ngulai äng khrawk hi, äi huih nopoh eyeih saw tawnah. Nang nuyumei saw nang khäka awlaw Hnadaga khäka mäiseh. Nang lalapei ihi khäh ting tawk tila nibi khaw a epret piyei ti khaw, nang pisih mawh. Äini lusulapei ütei naw bala dä ei khaw äila epret bi. Iyaäm ani la yumei saw huih ani la po ah. Uyum mäyah pak nibisaw khäl kheni ngulai dä. Nangkei uyum äng chang däktih khälla nini pum jiji a phiyaweyah pak uyum äng näutih khäla ini ku aih saw tawn. Awhngaw yumtih khäl pawiyeih saw koong nangkei anih a phiyaw äng khä. Anih uyum äng chang hmawna nangkei bi bi äng khä. Iyaäm Krito la ha upum käh lung hluih ei hütah. Kiyam äng mäi, “Ula nanga anang keleih äm, äi khälla Kei a dä khrawng keleih saw.” Kiyam äng chet däk saw khin äng ibang yoei hütäm, äi nangkei a chokaih saw koong dä yoei hüt saw. Äihi kiyam känäng ini bünei saw chunei khrang la ulyah la nangkei a khanh khrawng pek. Chunei khrang la ulyah pektih Hnadaga la Krito Yĕsu huih hngat la hngat äng lungak nini mäyeih saw lung anang pekseh. Äihi nangnih nini lung khäl äng awlaw nini mongkhok khäl äng utu mäichula nangkei Boi Yĕsu Krito käh Hnadaga la Paw a nini phiyaw hnängai. Hnadaga käh a wachang koong Krito la nangnih a anang lawkei saw huih nangnih ha hngala hngata lawei khäl. Hnadaga la Yudi khäl käh nuchen paw sawk khäl khäka khawmei hütsaw amah hluih yeih koong awlaw Ani che yum phoih mawh ting dawnaih koong Krito Yudi khäl käh chetchaw tih a äthänei hüt. Krito la ni huih thänei saw Yudi hiyahtih khälla Hnadaga käh khetjen koong phiyaw ong. Kiyam äng yoei, “Äi koong üküt Yudi hiyahtih khäl dukäng kei nanga kini phiyaw ai. Kei nang ming äng phiyaw awi kaw awyei.” Kiyam äng awlaw hawu hmuei, “Yudi hiyahtih khälo, nangnih Hnadaga käh khrawng khäl ängtu piyaw khäl.” Awlaw yoei bala mäi, “Yudi hiyahtih kheni la Boi a phiyaw khäl, khrawng khäl kheni la Ani a phiyaw seh u.” Aijaya la hawu hüt, “Yesi käh chen khäl känäng khrawng hngat lo ai. Ani la Yudi hiyahtih khäla khiyupai, anih la Ani äng khanh ini tawkeyei.” Nangnih a khanh anang pektih Hnadaga la nangnih käh yuma awpiyaw la jelkhiyamsa äng anang hluih seh. Äihi Asanh chang Khraw tha la nangnih nini khahnei saw priu sawkai. Kei khanbawn khälo, kei lälä kawhmawt khäh, nangnih awpawi äng awlaw prengiya äng nini luih chak. Äi koong nangnih hngala hngata nini chok nawkei hnäng. Äini hngat pai hnih krong nini lung äng kanang khawyalaih koong sengkhri khawiyei ngala koyok saw. Iyaäm Hnadaga la dä kei a khetjen epek saw. Kei Yudi hiyahtih khäl khäka bi kibiyeih koong Yĕsu Krito käh hngasaw käthänei. Asanh chang Khraw äng sanh tih Yudi hiyahtih khäla Hnadaga khäka usum vawng tih hlu thänei hmawna kei pujawtih huih Hnadaga käh sidawng pawi anih a kawhiyawk. Yĕsu Krito äng sakei ngala Hnadaga bi kibisaw koong kei kawbawriyei hnäng khäh. Awhngaw krong khäl äng käkräuvaih saw ulyah kei a mäyah. Äini kei a usumei bala Krito la ibang poh äm, äidä käkräuvaih saw kei a ulyah mäi saw. Kei kawhawu saw la kibisaw äng Ani la kei a usumei bala Yudi hiyahtih khälla Hnadaga a ngeiyal hmawna lawm dawn. Äi äng a hmat la, nawmaw nawkaih saw bi, awlaw Hnadaga käh khraw tha äng Yĕlusalem känäng chah ngala Ilkuria täh Krito krong äng hang hang sidawng pawi kawhiyawk hüt. Mawnga bang Krito ming hiyawk hmuei hawmah äm, äiya sidawng pawi hiyawkaih saw kei käh lung hlü. Äihi khrawng hngat la sätchän chou äng kei asätaih khiyang nga. Kiyam äng yoei bala mäi, “Ukhäl khäka Ani krong hawu hmuei hawmah äm, äi khälla ini hmuh ai, u khälla yawhawm u äm, äi khälla ini yawk chu ai.” Ni khäl koong nangnih khäka kei lo lah nga saw. Äini äi la khäla kei bi käphäih däk. Awbawng khokum khaw känäng nangnih kheni khäka kechetaih khiyang hüt. Kei küüm, kei Espen pre a kechet lawma nangnih ängtu kämäyei awlaw Espen pre a kechetaih saw äng anang ku ai. Kei nangnih ängtu tana krachaw koong kawpiyaw ai. Äini tua kei Hnadaga käh khrawng khäla ku ai äng Yĕlusalema kechet tun. Iyaäm Yĕlusalema käh yumtih sanglaisu khäl koong Mesidoniya la Akhaiya presaw khälla awpiyaw äng uhlu ini pek. Anih äi bi äng ini piyaw hüt awlaw ni bi anih la ini biyeih saw tawn hüt khäh. Anih Yudi hi u thän Yudi khäl känäng awkhraw pisih äng käh üphüh ini bünei. Ni khäl koong Yudi khäl ini hengaih koong ühlü saw vawn uku krawn huih pekalaih saw che anih käh bi dä. Äihi, kei ni bi phäih ngala uhlu mawmawt chaw aphaw khäh ting kaw hmawt pänäng kei nangnih ängtu tana mäi ngala Espena kechetai. Kei kawhmawt khäh nangnih khäka kolo aih khaw a, Krito käh pisih luih äng dä kolo aih saw. Khanbawn khälo, Boi Yĕsu Krito käh tha äng awlaw awkhraw la khrawng pek saw khet äng kei khawh ei ngala kanang hnih ei, nangnih kei ängtu Hnadaga khäka kei koong suh tong khäl. Yudia a käh yumah tih khäl känäng Hnadaga la kei a aka hmawna awlaw Yĕlusalema käh yumtih khälla kei kolo saw ni awmawn awpiyaw äng lawei hmawna, nangnih suh tong bäichu. Äi khaw a Hnadaga sitha äng kei awpiyaw lung äng nangnih khäka kolo hnängai awlaw nangnih a käphäu chaw bünei ngala kulung awpiyaw äng uluih ei. Jelkhiyamsa pektih Hnadaga nangnih ängtu mäiseh. Amen. Hmutaw hngat krong nangnih a kanang hawu pekaih. Ani ming che Phobe. Ani che Kingkri mräh a käh yumtih sawng khäl äng käh yumphoih mawh chetchaw tih hngat. Hnadaga khrawng khälla lawkei tawnsaw huih ani a Boi ming äng lawei khäl. Ühlü saw huih ani a ku bäichu. Iyaäm ani la awbawng khrawnga uku hüt awlaw kei a ha uku hüt. Yĕsu Krito a kechetchaw aih koong kei a ibi phui tih häih Piskila la Akila a kei käkhäh ei. Kei sawk khrawng henalaih saw koong a hnih la ihni sawk phi äng ihni khrawkei. Kei jiji hiyah, Yudi hiyahtih yumtih sawng khäl kheni ha ahnih khäka äkiyä ini mäi chak. Ahnih ima lumei chitih yumtih sawnga ha käkhäh ei. Esia pre lekchaw a käh täkchah Krito a yumeitih kei khanbawn Ipenita ha käkhäh ei. Nangnih koong awbawng dukhah po bala bi kawitih Meri a ha käkhäh ei. Kei ängtu othong ima heng naw hmueitih kupum yapsaw häih Adrik la Juniya ha käkhäh ei. Ahnih teh hmueitih khäl äng hmawi mawt ihni mäi hüt. Ahnih la kei khawngah Krito a ihnih yumei hüt. Boi ming äng Kei khetsu khanbawn Amplitas a käkhäh ei. Nangkei äng Yĕsu Krito koong ibi phui tih Urbana käkhäh ei awlaw kei khetsu khanbawn Tasku a ha käkhäh ei. Krito käh yumphoih hngasaw Apili a käkhäh ei. Aritobulas awlaw ani imsaw khäla ha käkhäh ei. Kei Herodion a käkhäh ei. Ani che kei huih Yudi hngat. Narkis imsaw khäl äng käh Hnadaga käh khrawng khäla ha kei käkhäh ei. Triphena la Triphosa a kei käkhäh ei. Ni hmutaw häih la Boi koong tha ihni poh. Kei khetsu khanbawn Porsi a käkhäh ei. Ani la Boi koong awbawng tha poh khäh. Rupus a käkhäh ei. Ani Boi käh hngat alang gong khrawng. Ani nu a ha käkhäh ei. Ani kunu huih dä. Asungkrit, Phrigon, Harmes, Patrobas, Harmas awlaw anih ängtu Krito a yumeitih nawu khälla käkhäh ei. Philawlawk, Julia, Niriyo awlaw ani besu, Olimpas awlaw anih ängtu mäitih Hnadaga khrawng khäla käkhäh ei. Ekhet lung äng nangnih hngala hngata khätei bäichu. Krito käh yumtih sawng kheni la nangnih a anang khäh ei chak. Nube tanawu khälo, kei nangnih a hniei ngala kanang tak, nangnih nini chok nawk saw hawuvah nangnih a anang khau tih la nini yum anang khrah tih hmat chula taw khäl awlaw äi khäl känäng awhlawm hlaw a mäi khäl. Iyaäm ni khrawng khälla nangkei käh Boi Krito a chetchaw a pak upum hlü jiji dä ini sotei. Anih la ulung prongh tih khäla kheu tui äng awlaw kheu pawi äng ini kramei. Nangnih käh uyumlah kheu üküt nila ini yawk khäh. Äi koong kei nangnih khruäng mawt kawpiyaw. Kei kühlü nangnih awpawi a hmawt chula nini lawkeiyeih saw awlaw ese känäng nini kakeyeih saw. Jelkhiyamsa mawh Hnadaga la alanda nangnih kho kawla Mannata chelh khäh ai. Nangkei käh Boi käh khetjen nangnih ängtu mäiseh. Kei käh bi phäu Timothi la ha nangnih a anang khäh ei. Kei yapsaw Lukias, Jason awlaw Sosipata la nangnih a anang khäh ei. Kei Tortiyo, kei Pol kheu äng ni chaw koyok saw. Boi ming äng kei ha nangnih a kanang khäh ei. Kei la yumtih sawng khäla teh long chitih Gai la nangnih a anang khäh ei. Ni mräh a käh awmawn tawtih Irasto awlaw nangkei nawu Karto la ha nangnih a anang khäh ei. (Nangkei käh Boi Yĕsu Krito käh khetjen nangkei ängtu mäiseh. Amen.) Nangnih khäka kawhiyawk saw Yĕsu Krito käh sidawng pawi la nangnih a mama anang tawkaih saw dogo Hnadaga a mäi khäh. Awbawng hnüp äi uthupei saw kheu khäl Hnadaga la hngata ha hawu pek hütah. Äini tua, Hnadaga sidawng hiyawktih khälla kiyam äng ini yok hüt saw äi ihisaw khäl dawn hmuei. Äidä hang hang la yum hmawna awlaw ngei hmawna, sawkbrat mäitih Hnadaga la ana pek saw huih hang hang yapsaw khäl khäka hawu hmuei. Yĕsu Krito känäng ngen mawh Hnadaga jiji la dä sawkbrat ni hang hang a wachang bünei seh! Amen. Kei Pol, Hnadaga la Ani sitha äng Krito Yĕsu käh teh hmueitih käthäneyeih koong panei hmueitih. Kei la nangkei käh nawu Sotini äng ni chaw kihni yoktun. Korin mräh a lumei ula Hnadaga a rositih khrawng khäl khäka ni chaw kanang san tun. Krito Yĕsu äng anang sak bala Hnadaga la nangnih a upum käh khrawng ting anang poh ei. Awlaw nangkei käh Boi Yĕsu Krito a üküt laa rositih awhngaw khrawng khäla heh lei saw huih, Ani la nangnih a ha upum khrawng ting anang heh lei. Ani che anih käh Boi awlaw nangkei käh Boi ha. Keinih käh paw Hnadaga awlaw Boi Yĕsu Krito la nangnih a khetjen la jelkhiyamsa anang pek seh. Kei üküt khaw a ni nangnih koong kei käh Hnadaga a äkiyä kaw tawngei chi. Iyaäm Krito Yĕsu koong nangnih a Hnadaga käh khetjen pek hmuei. Nangnih Krito äng nini sakei koong Hnadaga la kräu khrang, ngen awlaw ühlü saw kheni anang pek chak. Krito krong äng käh sidawng nangnih dukäng mama mäi däk. Äi koong Boi Yĕsu Krito awlaw krängak lo alaih saw koong ihuih chong chula nini mäi äm, äi huih nangnih Hnadaga käh pisih hngat mawkrawng nini bünei chak khäh. Ani la nangnih a ujumak mama anang tawkai. Äihi nangkei käh Boi Yĕsu Krito loal hnüp äng nangnih epret mäyahtih nini thäneyei. Hnadaga che yumphoih mäi khäh. Ani chaw nangkei käh Boi Yĕsu Krito ängtu sakei hnäng hmawna, Hnadaga la dä nangnih a anang bekei saw. Nawu tih khälo, Boi Yĕsu Krito ming äng kei nangnih a hnih ei ngala kanang tak, nangnih kheu khawak äng mäi khäl. Äihi nangnih dukäng okhoih mäi thaw hnawh. Nini tawk saw la nini lung hlü äng pongei khäl. Nawu tih khälo, nangnih dukäng nini siei saw kheu Koloi imsaw khälla khrawng hawu pek. Kei kawyawk saw che ni huih, nangnih dukäng ükütla nini hawu, “Kei Pol käh sawng” awlaw ükütla nini hawuvei, “Kei Apolo käh sawng” awlaw ükütla nini hawuvei, “Kei Pitol käh sawng” awlaw ükütla nini hawuvei, “Kei Krito käh sawng.” Krito a ni pheih hmuei khäh ei? Kei Pol, nangnih koong krut äng dütih dängei? Khrawng khälla Pol ming äng tuilüh ini lawkei saw ei? Kei Hnadaga a äkiyä kawtawngei, Kripas la Gai hiyah pak nangnih hngata ha tuilüh kanang pek nga. Kei ming äng tuilüh nini lawkei ting hngat la ha hawu hnäng hnawh chu. (Nibache Istiphen la ani imsaw a ha kei dä tuilüh kepek hüt saw. Äi battih hngata ha tuilüh kepekei kulung äng mäyah.) Krito la kei a tuilüh kepekaih saw koong eteah. Ani la sidawng pawi kaw hiyawkaih koong dä eteh saw. Äini ngen mawh khäl käh be äng kaw hiyawkaih koong eteah. Äihi Krito krut äng düsaw usum vawngah pak thäneyalah hmawna. Awkhiyawt büneyalah tih khäl khäka che Krito krut äng düsaw sidawng mäktih khäl käh kheu huih thawng. Äini nangkei awkhiyawt büneyal tih khäl koong che Hnadaga käh dogo. Kiyam la hawu, “Kei ngen mawh khäl käh ngen kakhrah ai, prengya mäitih khäl käh prengya kakhrah ai.” Äini ngen mawh mawnga äm? Awlaw prengya mäitih khäl ha mawnga äm? Awlaw ni luhdül äng käh kheu toksakei hnäng tih khrawng ha mawnga äm? Luhdül äng käh ngen che mäk saw dä ting Hnadaga la dawn däk. Iyaäm khrawng khälla ini pum ngen äng Hnadaga a hmawt hnäng hüt u. Äi koong Hnadaga käh ngen äng sidawng pawi kini hiyawk saw äi mäk saw sidawng pawi Hnadaga la sum bala dä yumtih khäla ngulai känäng awkhiyawt büneyal sawk saw. Yudi khälla ahmat la koong nawmaw nawkaih saw bi ini sotaih khiyang, Grik khäla che ngen ini sui. Äini krut äng tuk hmueitih Krito kheu nangkei ini hiyawk. Äi kheu Yudi khäl khäka aka dä awlaw Yudi hiyahtih khäl khäka mäk saw kheu dä. Äini Hnadaga la u khäla panei äm, äi Yudi pei Grik pei, äi khäl khäka che Krito dä Hnadaga käh tha la Hnadaga käh ngen. Iyaäm Khrawng khälla Hnadaga käh mawng ngena ämäk ngen ting ini tawk äm, äi ngen luhchaw ngen thawka bang ngen mawh. Awlaw khrawng khälla mawnga Hnadaga käh ngiyaw saw ting ini tawk äm, äi luhchaw tha thawka awbawng tha mawh. Khanbawn khälo, Hnadaga la anang panei hüt khaw a nangnih ihuih nini mäi hüt saw äm, äi nini lung äng khaweyal khäl. Khrawng mik äng che nangnih üküt küt dä ngen mawh, dogo mawh, awlaw ming mawh khrawng nini mäi hüt saw. Äini Hnadaga la luhdül äng käh ngen mawh khäla hiyawhei pekaih saw koong, mäktih khäla heh lei saw. Awlaw tha mawh khäla hiyawhei pekaih saw koong, ngiyaw tih khäla heh lei saw. Luhdül la ua enemchaw äng sot äm awlaw süpah äm awlaw iha hiyah ting tawk äm, äiya dä Hnadaga la heh lei saw. Akhrah alaih chak koong dä luhdül la alang gong ting tawk saw khäla Hnadaga la heh lei saw. Ni äng ini yawk chu, Hnadaga hmawi mawh a hngat ha bawriyei hnäng u. Äini Hnadaga la dä Krito Yĕsu äng anang sakei sawk saw. Awlaw Hnadaga la Yĕsu Krito a nangkei käh ngena poh. Ani koong nangkei Hnadaga khäka konghmuh sang ini thänei, asanh chang ini thänei, awlaw ini lätal. Äi koong kiyam la hawu, “U bang bawrieyeih khiyang äm, Boi la bisaw khäl äng bawriyei seh.” Khanbawn khälo, kei nangnih khäka Hnadaga käh thupei saw ihisaw hiyawka kolo hüt khaw a, kei uthuk saw kheu la khawk khei tih kheu hawu hüt nga. Äi koong kei nangnih äng kämäi hüt khaw a, Yĕsu Krito awlaw Ani krut äng düsaw battih iha kulung äng khaw ei tih hnawh nga ting kawtawk. Nangnih khäka kolo khaw a kei mawt kaw ngiyaw hüt awlaw ke ngala küchü chün hüt. Kei kochok hawu saw la sidawng kaw hiyawk saw luhchaw ngen äng ini näng saw kheu hiyah. Äini Hnadaga käh Khraw tha dä äi äng dawng hüt saw. Äihi, nangnih käh yum khrawng käh ngen äng ümah pak Hnadaga käh tha äng üm hmawna. Tua keinih awkhraw lawm äng yawchu chak däktih khäka dä ngen kheu kini kräu saw. Äini äi ngen luhdül äng käh ngen huih hiyah awlaw luhdül pängtih tha khäl huih ha hiyah. Iyaäm anih la dogo ini khrokeyal tun. Keinih kini hiyawk saw ngen che Hnadaga käh thupei bala mäitih ngen dä. Äi che luhchaw khäl känäng thup hmuei. Äini ni ngen luhdül bi hmuyei khawngah Hnadaga la nangkei käh a wachang koong hel bala tawk. Ni luhdül khiyuptih khälla hngat la ha ni ngen hmawt hüt u. Ini yawkchu hüt khaw anih la a wachang mawh Boi a krut äng thawn hüt hnawh u saw. Kiyam la ha hawu, “Ibang hngat la ha hmu hawm u äm, hiyah thän yaw hawm u äm, ibang äthäneyei ting hngat la tawk u äm, Ula Hnadaga a khet nawkäm anih koong Ani la äi khäl ächän po bala tawk.” Äini Hnadaga la Ani käh khraw äng äi uthupei saw khäl nangkei a khrawng dawn. Asanh chang Khraw la ükütni sui khäh awlaw Hnadaga la poh aih khiyang saw uthuk kheu khäl bang hmawt khäh. Nanga nang käh khraw la dä nanga nang käh khrang hmawt chak saw. Äi huih than than Hnadaga käh khraw la dä Hnadaga käh khrang kheni hmawt chak saw. Nangkei luhdül käh khraw bünei hüt pu, äichaw a Hnadaga la khrawng pek saw kheni hmawt hmawna Ani la teh saw khraw dä ini bünei hüt. Äi koong keinih luhchaw ngen la khrawng chok saw kheu äng kräu unga. Äini awkhraw la khrawng chok saw kheu äng dä kini chok saw. Ua bang Awkhraw mäi äm, äi khäla keinih Awkhraw lawm äng käh ihisaw kini phawngh pek. Ua äi awkhraw mäyah äm, ani la Hnadaga käh Khraw känäng lo saw phiyaw phoih lawei hnäng hnawh. Iyaäm äiche anih khäka ämäk kheu huih. Äi huih khrawng la che lälä äi yawchu ah. Iyaäm anih käh tara che Awkhraw lawm äng dä nibi hnäng saw. Ua bang Awkhraw mäi äm, ani la ükütni chawm hnäng khäh, äini hngat la ha Ani a chawm hnängah. Kiyam äng mäi, “Ula Boi käh lung hmawt äm? Ula Ani a chokei hnäng äm?” Äini Krito käh tawk nangkei dukäng mäi khäh. Khanbawn khälo, Awkhraw mäitih khrawng khäl khäka kei ihuih käkräu äm, nangnih khäka äi huih kräu hnäng nga. Äichaw a Hnadaga lawm äng tua ha u khäl sämäichaw huih äm, anih äng ihuih kräu tawn äm, äi huih dä käkräu hüt saw. Uyum äng nangnih che sämäichaw huih dä, äi koong nangnih khäka äi huih käkräu hüt saw. Achang tih eisaw kanang pekah pak kei nangnih a chih tui kanang pek hüt. Iyaäm äi khaw a nangnih achang saw nini eyeih saw huih thänei hawm chu. Awlaw tua ha nangnih äi chang tih nini eyeih saw ächän mäi hawm chu. Iyaäm nangnih tua ha ni luhdül äng käh khrawng khäl huih dä. Nangnih dukäng nini selei saw la nini si ei saw mäi pe hi, nangnih käh mäichoh khrang la nangnih tua ha luhdül äng käh khrawng huih dawn saw hiyeh ei? Nangnih dukäng käh pochongak la kei Pol sawng dä ting hawuvei khaw, awlaw pochongak la kei Apolo sawng dä ting hawuvei khaw nangnih ha luhdül äng käh khrawng khäl huih nini poh ei saw hiyeh ei? Nibache, Apolo u äm? Awlaw kei Pol ha u äm? U khäl äng nangnih uyum lawm äng nini lo äm, keinih che Hnadaga chetchaw tih dä. Boi la keihnih a nanga nang käh bi khrawng pek hüt. Kei ichih kächäh hüt, Apolo la äi äng tui bo hüt, äini Hnadaga la dä äi ehlen saw. Äi koong ichih chätih la tui botih iha hiyah. Äini Hnadaga dä ükütni hlen sawk tih. Ichih chätih la tui botih käh tawk okhoih mäyah. Hnadaga la ükütni a ni anih bi kawi huih phiyaw phoih pekai. Iyaäm kei hnih pochong hnih la ni Hnadaga ängtu kihni bi tun. Nangnih Hnadaga käh akhang la Hnadaga käh lung im huih. Hnadaga känäng kübünei saw pisih äng dä kei lung im khawi yung tih huih ochou käsät awlaw awhngaw la äi khrung äng im khäl ini khawyal. Äini ula ihuih khawi äm, äi krong äng ani sidih äng mäiseh. Iyaäm Hnadaga la ayang khawthou Yĕsu Krito a ochou huih sät däk, hngat la ha awhngaw ochou sät hnäng ti hnawh u. Üküt küt la äi ochou khrung äng im sawkaih koong ha, hen ‘hiyah thän’ khawk tih lung usumei, awlaw üküt küt la pĕn, bel ‘hiyah thän’ chawng paw usumei. Äini ula i huih bisaw äm Krito olo al khaw a äi dawngeyei. Iyaäm äi khomhnüp äng anih la ini bisaw awpawyei, eseyei mei la dä awdanaih saw. Ochou khrung äng bi hmuei saw im dä krakah pak mäi khaw, äi bitih la phiyaw phoih büneyei. Äini nang käh bi dä ochak hi, äi phiyaw phoih nokhrokeyei. Äini nang mei känäng lätal tih khrawng huih nälätalai. Nangnih hmawt chuei nangnih che Hnadaga im awlaw Hnadaga käh khraw nangnih äng mäi saw? Hnadaga im khraktih a che Hnadaga la khrakai. Iyaäm Hnadaga im che asanh chang dä awlaw nangnih dä äi im. Nangnih nini puma mäkei sawkai chu. Nangnih dukäng hngat la ha upuma luhdül äng ngen mawh ting khahnei hi, täkchah mäktih a thäneyeih lah mawh saw. Äi huih hi dä ani ihisaw ngen mawh a thäneyeih saw. Iyaäm ni luhdül äng käh khrawng la ua ngen mawh ting ini tawk äm Hnadaga mikäng che anih mäktih dä. Kiyam äng mäi khäh, “Hnadaga la ngen mawh khäla anih käh kram äng ooh.” Awlaw yoei bala mäi, “Ngen mawh khäl käh tawk khe che usum vawngah saw Hnadaga la hmawt khäh.” Äi koong nangnih hngat khrawng äng ha bawriyei chu. Iyaäm ükütni nangnih käh dä. Pol, Apolo, Pitol, ni luhdül, sawk, düsaw, tukat la awhmawi maw a käh kheni nangnih käh dä. Nangnih Krito käh awlaw Krito Hnadaga käh. Nangnih kheni a Hnadaga käh thupei saw ihisaw hawuvaih saw bi awp hmueitih Krito hngasaw ting anang tawkaih lah saw. Bi awp hmueitih khälla anih che yumphoih dä ting awmawh paw a ini dawneyeih lah saw. Kei käh tara nangnih pei, tara päi a pei, läsu la pei bi seh u, kei a iha säyah. Kei kupum kädäng la bang kupum käh tara biei nga. Kei käh tawk che sanh, äini kei epret mäyahtih äi äng dawngeyah. Boi dä kei käh tara bitih. Äi koong äi tara khin lo khawngah, nangnih hngat käh ha tara biei chu. Boi loalah saw sawgraw äpäihsum tara ini chongaih lah saw. Ani la uhiyung äng uthupei saw khäl awa äng oloalai awlaw khrawng lung äng thupei bala mäi saw khäl awdawngalai. Äi khaw a dä khrawng khälla ini bünei tawn saw phiyaw Hnadaga känäng ini büneyalai. Nube tanawu khälo, Apolo la kupuma chutei hnih ngala nangnih yawchu hnäng hmawna ni kheu kihni hawu, “Kiyam äng yoei saw battih nangnih thäneyei chu.” Nangnih hngata hnem chula awlaw hngat äng bawriyei chu. Ula nanga khrawng khäl thawka nängtih a ini poh saw äm? Awlaw Hnadaga känäng büneiti saw nanga iha mäyah. Äihi nang iya nawbawriyeih saw äm? Nangnih nini hlüei saw kheni nangnih nini bünei däk saw ei? Nangnih mäichawtih a nini thänei däk saw ei? Keinih mawng hi unga thän nangnih mawnga nini thänei däk saw ei? Nangnih mawng nini thäneyeih saw keinih kini hlü äihi nangnih ängtu mawng kini thänei hnängai. Äini kei kipiyei, Hnadaga la keinih teh hmueitih khäla uhnunga khrawng tawk. Niche keinih kini thänei saw luhdülla, khrawng khälla awlaw hawn natchaw khälla hmuchak hmawna tuk hmueyeih tih khäl huih. Keinih Krito koong mäktih a kini thänei äini nangnih che Krito äng sakei chula ngen mawh a nini thänei. Keinih che ngiyaw tih äini nangnih che tha mäitih. Awlaw nangnih hmawi bünei tih äini keinih che siri khrah hmueitih. Keinih tua ha eiok äng dukhah kini bün tun. Keinih a kini wataih saw mäyah. Keinih bop kini hmuei. Keinih a im lou mäyah. Keinih disa kini bi lah. Khrawng khälla keinih a khrawng sayei khaw a keinih pisih kini pek. Anih la dukhah khrawng pek khaw a kini chunei. Keinih a khrawng keleih khaw a ejelchaw äng kini krawnei nawkal. Tutäh si äng ha keinih luhdül äng käh obo huih dä. Keinih luhdül äng käh chomcham thänei ungala dä kini mäi saw. Kei nangnih a siri kanang pekaih koong ni khäl koyok tun saw hiyah awlaw bang kei käh khetsu chaw chuhnu huih kanang chokaih koong koyok tun saw dä. Krito krong anang chokaih tih othong thong ini mäi thän Paw che nangnih a hngat dä mäi saw. Iyaäm Krito käh sidawng pawi nangnih khäka kanang hiyawk ngala Krito khäka kanang lo hüt. Kei hnih ei ngala nangnih a kanang tak, kei kopoh saw huih nangnih ha po khäl. Äi koong uyum lawm äng käh kei käh khetsu la yumphoih chaw Timothi a nangnih khäka keteh ei. Kei Krito äng sakei ngala ihuih kämäichoh äm awlaw ätän täna yumtih sawng khäla ihuih kochok äm äi khäl nini lung äng anang khawyalai. Kei nangnih khäka lo hnawh nga ting khin chula nangnih üküt küt la che nini sitha huih nini poh ei. Äini Boi sitha mäi khaw kei alanda nangnih khäka koloai. Äi khaw a kei kosotai äi khrawng khälla mawng tha äng äi kheu khäl ini hawu saw äm. Iyaäm Hnadaga käh mawng pre che kheu äng käh hiyah, tha äng käh dä. Nangnih i nini hlüei äm? Kei nangnih khäka bop dün jäi äng koloaih saw ei ‘hiyah khaw’ ekhet la lung näu äng koloaih saw ei? Kei kawyawk, nangnih dukäng mawt nini mik sawuvei saw ngulai mäi khäh. Ni huih ini mik sawuvei saw Hnadaga yumahtih khäla bang mäyah. Awlaw nangnih dukäng hngat unu dikäng iming krak saw sidawng lo. Äi thän nangnih iba nini bawriyei dat äm? Äichaw a nangnih dukhah nini pieiyeih saw tawn awlaw äi huih bitih a nangnih duk känäng nini thoh a laih saw tawnah ei? Kakantha mäyah thän kawkhraw che nangnih ängtu mäi khäh. Äi koong ula äi huih epret bi äm nangnih äng uchum mäi nga thän awkhraw äng uchum mäi ngala Boi Yĕsu ming äng kei ani käh tara kibi däk. Boi Yĕsu ming äng nangnih nini lumei khaw a, äi düna kei awkhraw äng uchum kämäyei. Awlaw Boi Yĕsu käh tha nangnih äng mäyei. Äi khaw a äi khrawng käh ngulai kantha krak hmawna dam büneyeih saw koong mannat kutäng awp bäichu. Äihi Boi loal saw hnüp äng ani käh khraw la awkiyawt büneyalai. Nini bawrieyeih saw nangnih koong pawyah! Nangnih hmawt chuei, “Bitchaw is la hnäk chän ha hnui kheni opo sawk chak hnäng.” Nangnih atha ha hnui nini thäneyeih saw koong ngulai a phemtih is huih hiyänal khäl. Ihi kawchawng nangnih äidä. Iyaäm lätal päi äng samphomah hlu hmuei saw huih nangkei koong Krito a hlu hmuei däk. Äi koong lo khäl, mawng ha äng is phem mäyah äm äi ha äng dä nangkei lätal päi khraw äng khä. Äi is phem che ngulai la pawyah saw huih. Äini lo khäl nangkei is mäyahtih ha dä ei äng khä. Äi is mäyahtih ha che ekhet la ihisaw ha. Kei ayang chaw äng kanang yok hüt saw, nangnih imik sawuvei tih khrawng äng pueyei chu. Äini kei tua Hnadaga yumah tih khäl krong hawu nga. Anih che imik sawuvei tih, lawphah mawh, sukhä awlaw ulupchaw pujawtih khäl krong hawu nga. Iyaäm ni lup khrawng khäla dä nini kakeyeih khiyang khaw nangnih ni luhdül pranga nini chetalaih lah saw. Kei kawhawuvaih khiyang saw che ni, ula bang yumtih ting khawmei bala imik sawuvei äm ‘hiyah thän’ awlawphah mäi äm ‘hiyah thän’ ulupchaw pujaw äm ‘hiyah thän’ khrawng ming äng ese hawu äm ‘hiyah thän’ omoi äm ‘hiyah thän’ umuyei äm anih äng nangnih puyei ei chu. Äi huih khrawng äng ei oeyei chu. Yumah tih khäl käh tara kibiyeih saw kei i käsäi äm? Hnadaga la anih käh tara bi ei. Äini nupum yumtih sawng khäl käh tara nibiyeih saw tawn khäh. Kiyam la hawu, “Nangnih duk känäng äi pawyahtih khrawng khäla thoh al khäl.” Nangnih dukäng hngat la ha yumtih hngat ming äng ätängaih saw mäi khaw, äi khrawng la mawng sengkhri äng Hnadaga yumtih khäl khäka chetah pak Hnadaga yumah tih khäl khäka tara poeiya chet saw äm? Nangnih hmawt chuei, Hnadaga khrawng khälla luhdül äng käh khrawng khäl käh tara ini biyeih saw? Nangnih luhdül äng käh khrawng khäl käh tara nini biyeih hnäng khaw, äi oloigra saw tara iya tua biyeih hnäng hnawh chusaw äm? Nangnih hmawt chuei nangkei hawn natchaw khäla bang tara ini biyeih saw? Äihi ihiyawh bawng ni sawk äng käh tara khäl nini biyeih hnäng saw äm! Äihi nangnih dukäng dä nini tängaih saw mäi khaw, nangkei yumtih sawng dukäng mäyahtih khäla nangnih tara nini biyeih sawk saw ei? Nangnih a hiyawh ei kanang pekaih saw koong kei ni kawhawu saw. Yumtih khäl käh ini siei saw khäl hngiyeih hnäng tih ngen mawh lälä nangnih dukäng hngat ha mäi u ei? Äichaw a, yumtih hngat la awhngaw yumtih hngat ming äng tara poh eya yumah tih khäl käh tara yunga chet! Nangnih hngat la hngat ming äng tara nini poei saw äng nini hiyum saw dawngei däk. Nangnih iya matara anang poh saw chunei chula mäichu saw äm? Iya anang kramei saw chunei chusaw äm? Äichaw a, nangnih matara nini bi awlaw hngat la hngat käh nini muyei. Awhngaw yumtih khäl äng bang äi huih nini poh ei! Nangnih nini hmawt khäh pawyahtih khrawng khälla Mawng Hnadaga käh pre pängeyal hnawh u. Nangnih nini puma krameyei chu. U akhrang pawyah äm, lupchaw pujaw äm, imik sawuvei äm, u chawgrawyei äm, ula mukäm, ula lawpha äm, u alak äng moi äm, ula khrawng ming äng ese hawu äm awlaw sukhä khäl Mawng Hnadaga pre pängeyal hnawh u. Nangnih dukäng üküt che äi huih khrawng ini mäi hüt khäh, äini nangnih a ngulai känäng asanh poh hmueiyal däk. Nangnih a Hnadaga khäka awp hmueiyal. Boi Yĕsu Krito äng awlaw Hnadaga käh Khraw äng nangnih Hnadaga khäka konghmuh sang nini thänei. Üküt la nini hawu, “Kei ükütni kopoh aih saw kisitha mäi khäh.” Ihi khäh, äini ükütni nang koong awpawi saw hiyah. “Ükütni kopoh aih saw thung la pek khäh. Äini ila ha kei a ochoi hnäng hmawna bi hnawh nga.” Awlaw ükütla ini hawu, “Eisaw che nähän koong dä awlaw nähän che eisaw koong dä. Awpawi saw kheu dä, äini ni pai hnih ni Hnadaga la akhrah alai. Nakantha che nimik sawuveiyeih saw koong hiyah äini Boi nechetchaw aih saw koong dä. Awlaw nakantha la hlüei saw khe che Boi la dä hluih saw. Hnadaga la Boi a düsaw känäng henal. Awlaw Ani käh dogo äng nangkei a ha khrawng henalai. Nangnih hmawtei chuei, nangnih kantha che Krito käh kantha phü ak dä? Äihi kei Krito kantha phü aka chawgraw kantha äng käbälaih saw ei? Khrängak ha hiyah. Nangnih nini hmawtei, ubang chawgraw äng bälei äm, äi kantha ak thäneyal? Iyaäm kiyam äng yoei khäh, “A hnih pai hnih kantha ak i hnih thäneyei.” Äini ubang Boi äng sakei äm, äi Awkhraw äng sakei. Nangnih nini mik sawuvei saw khäl känäng kakei chula mäi khäl. Khrawng hngat la yapyap ngulai khäl bi thän, akantha khrakah. Äini u chawgraw ei äm, ani la che akantha khrah ei. Nangnih hmawt chuei, nangnih kantha che Asanh chang Khraw käh im. Ani nangnih ängtu mäi. Ani a Hnadaga la nangnih a anang pek saw. Nangnih che nini pum käh hiti chu, Hnadaga käh dä. Ani la nangnih a anang hlehyei däk. Äi koong Hnadaga a nini phiyaw aih koong nini kantha sumei khäl. Nangnih kei khäka nini yoksaw krong khäl phou ngala tua käkräuvai. Pawtaw hngat la phiya naw ah pak mäi hnäng hi awpawi khäh. Äini üküt küt che mawt ini mik sawuvei tun. Äi koong pawtaw kheni a iphiya mäiyeih saw awlaw hmutaw kheni a awpawtaw mäiyeih saw tawn. Iphiya la awpawtaw kantha pängei seh. Äi huih awpawtaw la iphiya kantha pängei seh. Äihi hngat la hngat lung hlü luih ei. Iphiya kantha upum käh hiyah, awpawtaw käh dä. Äi huih awpawtaw käh kantha ha ani käh hiyah, iphiya käh dä. Yangmala utu nini mäiyeih saw ngaeyei chu. Äini suh nihni tongeyeih koong ngiyei hnih tila hnüpak hnih awhngaw chaw nihni mäi hnäng. Äi pänäng utu nini mäiyal hnäng khäh, iyaäm upum hlupei hnängah saw koong mannat la ngulai pawtäng chi hnängah pak. Ni kheu nangnih a ana kanang pek saw hiyah äini kei kheu kanang pek saw dä. Kei lung hlü che, nangnih kheni kei huih phiya pawtaw om naweyah pak mäi khäl. Äini nangnih kheni a Hnadaga la hngat hngat chi a yapyap phiyaw phoih anang pek khäh. Kei tua phiya pawtaw omeiyah tih awlaw hmeinu khäla katak, kei lung khiyang kämäi saw huih dä nini mäi hnäng khaw nangnih koong äi pawi khäh. Äini nangnih dä nini pum songei hnäng chu khaw omnawei khäl. Iyaäm nakantha la hlüei saw dukhah thawka no omnawei saw bang pawi khäh. Omnawei däktih khäla kei ana hngat kepek. Ni ana che Boi känäng lo saw dä kei känäng hiyah. Iphiya la awpawtaw hlät bala chetal lah hnawh. Hlät bala chetal phät thän pawtaw omeyalah pak mäiseh ‘hiyah thän’ awpawtaw äng krawnak mäyal seh. Pawtaw la ha iphiya a khaveyalah seh. Awhngaw khäla kei ni katak. Niche Boi la hawu saw hiyah, kei kawhawu saw dä. Yumtih nawu hngata yumah tih iphiya mäi khaw, äi iphiya ani äng im thong ei bala mäyeih khiyang hi, ani la iphiya a khaveyal lah hnawh. Awlaw yumtih hmutaw hngata dä yumah tih awpawtaw mäi hi, äi pawtaw la dä ani äng im thong ei bala mäyeih khiyang hi, äi hmutaw la ani a khaveyal lah hnawh. Iyaäm yumtih phiya äng äi yumah tih pawtaw imthong eisaw koong Hnadaga la äi yumahtih pawtaw a lawkeyei. Äi huih kawchawng chawng, yumtih pawtaw äng äi yumah tih phiya la imthong eisaw koong Hnadaga la äi yumahtih phiya a lawkeyei. Äi huih hiyah khaw anih chaw chuhnu meseih machang ini thäneyei hü. Äini tua anih asanh chang dä. Äini yumah tih la dä yumtih a hlät bala chetalaih khiyang hi che chetal seh. Äi huih äng anih la ini sitha huih ini poh ei hnäng khäh. Hnadaga la che nangkei a jelkhiyamsa äng ini mäyeih saw koong dä khrawng bekei saw. Yumtih hmutaw o, nang koong nawpawtaw ngulai känäng naw khiyawtalaih hnäng saw huih khahnei tiei? Yumtih pawtaw o, nang koong niphiya ngulai känäng naw khiyawtalaih hnäng saw huih khahnei tiei? Boi la nangnih a phiyaw phoih anang pek saw huih mäi khäl. Awlaw nangnih kheni a anang panei khaw a ilup läktäng nini mäi hütäm äi lup läktäng dä mäi khäl. Ni thung dä yumtih sawng khäl kheni a kochok saw. Ua uvun awtei chän mäi khaw a panei hmuei äm, ani äi täng mäiseh. Ani la vun khoyalah seh. Awlaw ua uvun awtei hawmah khaw a panei hmuei äm, ani la vun awteyal tiyah seh. Nuvun naw awtei thän i äm awlaw awteiti thän i äm, Hnadaga kheu nengei saw dä alang gong. Hnadaga la nangnih a anang panei khaw a nangnih ihuih nini mäi hütäm, äi huih dä mäi khäl. Hnadaga la nanga ini panei khaw a, nang a hngasaw nämäi hütei? Äi koong tawkaiti. Äini nang nälätaih saw achah nübünei khaw, äi ikhin sumei bäi. Iyaäm a hngasaw mäi saw läktäng Boi la ua bekei äm, ani che Boi mik äng lätal däk. Awlaw älätsaw läktäng mäi khaw a Krito la ua bekei äm ani che Krito käh hngasaw. Hnadaga la nangnih a uhnun pek bala anang hlehyei däk, äi koong nangnih luhchaw käh hngasaw thänei tiei chu. Khanbawn khälo, Hnadaga la anang panei khaw a ihuih nini mäi hütäm, äi huih läktäng nangnih hang hang ni Hnadaga äng sakei chula mäi khäl. Kei tua omnawei hawmah tih krong äng käkräuvaih khiyang. Kei om nawei hawmah tih khäl krong äng Boi känäng iha ana bün nga. Äini Boi käh jen bünei tih yumphoih mawh khrawng huih kei käh kheu kawhawu. Kei kawtawk, mawmawt dukhah khin lo koong nangnih tua ihuih nini mäi äm, äi huih dä nini mäiyeih saw tawn. Nanga niphiya mäi ei? Äihi niphiya nählätalaih saw soai ti. Nang phiya naw hawmah tih ei? Äihi phiya naw nawkaih saw soeiyei ti. Äini phiya naw nawk thän ngulai nibisaw hiyah. Hngawk hnguchaw la pawtaw omei khaw äi ngulai hiyah. Äini ula bang phiya pawtaw omei äm, äila dukhah bünai. Kei nangnih a ni dukhah känäng kanang hläh aih khiyang. Khanbawn khälo, kei nangnih a kanang takaih khiyang saw che ni, ikhin leu khäh. Iphiya mäitih khäl iphiya mäyahtih huih mäichoh seh u. Ukhäl ini kapäm, anih dukhah äng mäi u saw huih, u khäl ini nui äm, anih piyaw u saw huih, u khälla ini hlehyei äm, äi khäl anih la pängei u saw ting khinei seh u. Ula kun poh äm, äila äi krong äng nahnah ikhin khrah eyah seh. Iyaäm ni luhdül äi hiyawh khawmti hnawh, krak tun däk. Kei kühlü nangnih nini kongrah saw känäng lät khäl. Phiya nawah tih yumtih la Boi krong tawk khäh. Iyaäm ani la Boi a phiyaw aih saw sot khäh. Im thong eitih la im thong krong dä tawk saw. Ani la iphiya lung iba hluh yeih saw äm, äidä tawk saw. Äi huih ani la lawm pai hnih pawh lah. Yumtih pawtaw omeyah tih ‘hiyah thän’ yumtih hngawk hnguchaw la Boi krong tawk khäh. Iyaäm ani kantha la ulung Boi a chetchaw aih koong awpeyeih khiyang. Äini pawtaw omeitih la im thong krong dä tawk saw. Iyaäm Ani la awpawtaw a phiyawaih khiyang. Kei nangnih a kanang kuaih khiyang koong dä ni kawhawu saw. Kei nangnih a kanang nga aih saw kosot saw hiyah. Äichaw a, ibang ihi äm äi nini poaih saw kei kühlü. Äihi nangnih nini lung pekei chak chula Boi a chetchaw hnäng hmawna. Pawtaw la hmutaw khidih ihni tawei pänäng omnawei tih hnawh hnih nga ting ihni khinei hi, awlaw pawtaw la äi hmutaw äng poh eisaw khrang pawyah ting khanei hi, awlaw pawtaw la dä nawkaih khiyang hi, ani la tawk saw huih nawal seh. Äi äng ngulai mäyah. Äini khrawng hngat la dä, naw aih tinga ting mäi hi, awlaw ulung dä songei bala tawkei hnäng hi, awlaw ani la naw ah pak mäi hi awpawyei. Äihi ula äi hmutaw a nawkäm, äila awpawi poh awlaw ula äi hmutaw a naw ah äm, äila unungchaw awpawi poh. Hmutaw hngat awpawtaw dü ah saw sawgraw lätah. Äini awpawtaw dü pänäng isitha saw a ni Hnadaga yumtih a omeyal hnäng khäh. Äini kei kheu che, ani ihuih mäi äm äi huih mäi khaw ani unung chaw awpawi mäyei. Kei kawtawk, kei ni khäl Hnadaga khraw känäng käkräu saw. Ulupchaw khäl khäka eisaw ini hlusaw krong nangnih anang hisaw krong äng kawhawu tun. Nangkei ini hmawt khäh, ‘Nangkei ükütni a ni ngen mäi khäh.’ Üküt ngen la luhchaw a bawriyei sawk. Äini ekhet la luhchaw a äi thawka awpawi poh. U khälla bitchaw kini hmawt khäh ting ini tawk äm, äi khälla ini tawk saw huih iha hmawt hawm u. Äini ula Hnadaga a khet nawk äm äiya Hnadaga la hmawt khäh. Äihi, niche ulupchaw khäka sawm tawng saw vawn eiok krong. Nangkei ini hmawt khäh ni luhdül äng käh hngat lupchaw äng ha awsawk mäyah. Awlaw nangkei ni ha ini hmawt khäh Hnadaga che hngat dä mäi saw. Iyaäm hawna pei awlaw luhdül äng pei, hnadaga awbawng mäi khäh ting khrawng khälla ini hawu. Äini nangkei koong che Hnadaga hngat dä mäi saw awlaw Ani che Paw. Ani la ükütni bi chak saw awlaw nangkei Ani koong ini heng saw. Awlaw nangkei koong Boi ha hngat dä mäi saw. Ani che Yĕsu Krito. Ani la ükütni bi chak saw awlaw Ani koong nangkei ini heng saw. Äini hang hang la ni ihisaw hmawt u. Yumtih a thänei khawngah, chet däk saw khin äng üküt yumtih khälla ulupchaw khäka sawm ini pek hüt. Äi koong tua ha ulupchaw hmawi mawh a uhlu ini tawng saw ini eiok hi äi ulupchaw khäl koong anih käh tawk che awngiyaw awlaw sanah saw ini pi ei. Äini eisaw vawn koong nangkei a Hnadaga la khrawng laweiyah. Nangkei ei pu thän iha hiyumei hnawh pu awlaw nangkei ini ei thän iha mrat hnawh pu. Äini sidih äng mäi khäl! Nangnih nini sitha huih nini eiok saw khrangla uyum leutih khäla ngulai äng khraw hnängah pak. Kheu la kheu, uyum leutih khrawng hngat la kiyong ima sawm ini tawng saw äng käh ne ei saw hmuh. Äihi ani la äi sawm eyeih saw ulyah bünei hnawh ei? Krito ani koong ha dü hüt khäh. Nang käh ni prengiya koong äi uyum näutih naw nawu akrakai. Ni huih dä nang nopoh khaw, Krito lukhrunga awlaw yumtih nube tanawu khäl lukhrunga ngulai nibi. Nang anih yuma naw nepek. Äihi, äi eisaw la dä yumtih nube tanawu khäla naw pek hi, kei äi awsaw asang ha eiti hnawh nga. Kei koong yumtih hngat ha ngulai äng kraw ah pak. Kei kulung sitha äng mäitih khrawng hinga ei? Kei teh hmueitih khrawng hinga ei? Nangkei käh Boi Yĕsu a kei hmu hüt nga ei? Kei Boi käh bi kibisaw äng nangnih Boi a nini yumei saw hiye ei? Awhngaw khälla kei a teh hmueitih ting khrawng lawei u thän, nangnih kei a khrawng ütei naw ah pak teh hmueitih ting anang lawkei. Iyaäm nangnih Boi äng sakei chula nini mäichoh khrang la kei teh hmueitih ting dawn däk. Khrawng khälla kei be ini kräuvei khaw a, kei kupuma ni huih kaka ei. Kei käh bi koong ke eiokaih saw koong khrawng känäng kawhawuveyeih saw tawn nga ei? Awlaw awhngaw teh hmueitih khälla, Boi käh nawu khälla awlaw Pitol tih la ini chih ei saw huih, kei ha yumtih phiya a kokon äng kichieyeih saw tawn nga ei? Keihnih Banaba jiji dä kihni hengaih saw koong kihni biyeih lah saw ei? Soloi hngat la ha upum käh mawn pekei ula sipei äng bi u. Awlaw grĕp khang bitih la ani käh etheih eiyah ei? Awlaw samphomah sawng kiyongtih la samphomah käh chih o ah ei? Kei khrawng prengiya jiji äng ni kheu käkräu saw hiyah. Awlaw Boi la ha Mosi käh thung äng hawuvah ei? Mosi käh thung äng ni huih mäi khäh, “Chawng chel tih sel hĕu mongkhok äng mongkhok khiyup thawnai chu.” Hnadaga la sel hĕu paw kheu jiji tawk bala ni kheu hawu saw ei? Äini Ani la mäksetdava krong jiji tawk bala hiyah khaw nangkei kheu tawk bala ha hawu saw ei? Ihi khäh nangkei koong yok hmuei hüt saw dä. Ula chäh äm awlaw ula chelh äm äila chawng phüh büneyeih saw tawn khäh. Keinih nangnih dukäng sidawng pawi äng käh ichih kini chäh. Äihi nangnih känäng vawn kini büneyeih saw unung kini hawuvei saw ei? Awhngaw khrawng khälla nangnih känäng ini büneyeih saw ini pängei hi, keinih äi thawka iya pängeyeih unga saw äm? Äini keinih äi huih poeyah pak ükütni kini chunei. Iyaäm Krito käh sidawng pawi hiyawkaih saw bi ila ha dümalah pak. Nangnih nini hmawt khäh, ula Kiyong ima bi biäm, äila Kiyong im kän eisaw bünei. Awlaw mäksetdava bät bala ula sawkbrat hlu äm, äila hlu dün laa ini hlusaw känäng üphüh bünei. Äi huih kawchawng chawng Boi la ana pek, ula sidawng pawi hiyawk äm, anih la äi känäng eisaw khäl ini bünei tawn khäh. Äini kei äi khäl kanang hawuveyeih saw tawn thän iha kubawm kanang hawuvei hüt nga awlaw kanang hawuvei hnawh nga. Kei ni kawbawriyei saw khäl dä hngat la ha khrawng lawkei pekal hi, kubawm kanang hawuvei saw chaw a küdüsaw bang pawi. Kei sidawng kaw hiyawk koong kawbawriyei saw tawn nga. Iyaäm sidawng kaw hiyawkaih saw biche Hnadaga la dä kei a epek saw. Kei dä sidawng hiyawk nga hi, kei koong ihuih kehse yeih saw äm! Kei dä kisitha äng sidawng pawi kaw hiyawk hüt khaw, kei khrawng känäng awmawn kübüneyeih saw kakhahneyei hü. Äini Hnadaga la kei a ni bi aw awp saw dä. Äihi kei käh phiyaw phoih che iyäm? Hang hang khäka awmawn kaw sidawng kaw hiyawk saw ni kei käh phiyaw phoih. Äi koong sidawng pawi kaw hiyawk khaw a awmawn kübüneyeih saw tawn thän äi kei hawuvei nga. Kei kisitha huih mäitih khrawng, hngat käh hngasaw hinga. Äini awbawng khrawnga Krito pawtäng kübünaih koong kei hang hang käh hngasaw käthänei. Yudi khäla Krito pawtäng kübünaih koong kei anih khäka Yudi huih kopoh ei. Awlaw Mosi käh thung äng mäitih khäla Krito pawtäng kübünaih koong kei thung sumei nga thän Mosi käh thung sumei tih huih kopoh ei. Äi huih kawchawng chawng, Yudi hiyahtih khäla Krito pawtäng kübünaih koong Yudi hiyahtih khäl huih kopoh ei. Äi koong mawng khrawng khäl thung pranga ini mäi äm, anih a kübünaih koong anih huih kopoh ei. Ni kheu khäl äng Hnadaga käh thung ngei nga ting kawhawu saw hiyah. Kei lälä Krito käh thung äng kämäi khäh. Uyum äng u khäl ini ngiyaw äm, anih a Krito pawtäng kolo a laih koong kei anih huih kaw ngiyaw. Äihi anih kheni käh lung hlü huih käthänei. Iyaäm anih a kei hlätal hnäng hmawna. Äi khäl kei sidawng pawi kaw hiyawkaih koong dä kopoh saw. Üküt nila Hnadaga känäng pisih phüh bünei hnäng hmawna. Nangnih nini hmawt khäh, chonsaw läkei khaw a hngat pai hinh ini chon. Äini hngat la dä ong bala phiyaw phoih bünei? Phiyaw phoih bünei hnäng hmawna nangnih äi huih chon khäl. Awlaw chon saw äng u läkei äm, pochongak mawkrawng la upum kantha songei lah awlaw ma hmawna poh ei lah. Anih la khawmah saw phiyaw phoih koong dä ini chon saw. Äini keinih che sawkbrat khawmaih tih phiyaw phoih koong dä kini poh saw. Äi koong kei ohong chaw chon nga. Sukei tih la khri äng suksaw huih kei suk nga. Kei chetchaw äng mäi ngala kupuma kosongei. Iyaäm kei khrawng khäla tawmei saw koong kebekei pänäng usum vawngah tih a thäneyah pak. Khanbawn khälo, nangnih nini lung äng khaweiyal khäl, Mosi hnung äng tämtih nangkei nuchen paw sawk khäl ihuih ini thänei hütsaw äm. Anih kheni a kho hiyung la ka bala tawk hüt awlaw ükütni khotong khotawh mäi ula mret sen ini kawt hüt. Anih kheni la Mosi a täm ula kho hiyung la mret äng tuilüh ini lawkei. Anih ükütla ni lup khiyang awkhraw eisaw ini ei. Awlaw anih la lup khiyang awkhraw tui ini ok hüt. Anih la awkhraw lung hngat känäng äi tui ini ok hüt. Äi lung anih äng tutu chet hüt. Äi lung che Krito mäi hüt. Äini anih dukäng käh üküt khrawng khäl khrung äng Hnadaga piyaw hütah. Äi koong anih yok ala honga kraw bala mäi hüt. Ni khäl äthänei saw nangkei koong hmat la huih. Anih la ese ini lawpha saw huih nangkei ese lawpha a pak nangkei a sidih pek hmuei. Anih dukäng pochongak hnih la ulupchaw ini pujaw saw huih, nangnih pujaw ai chu. Kiyam äng yoei, “Khrawng khälla ini eiokaih saw koong ini om awlaw thou ula ini lawm, ini krak.” Anih dukäng awvawng che krak ula ngulai ini poh. Awlaw äi hnüp äng kul gala thong thum khrawng äi ngulai äng ini dü. Anih dukäng awvawng che Hnadaga a ini chawm saw koong phol la do bala ini dü. Nangkei anih huih Hnadaga a chawmai pu. Awlaw anih dukäng käh awvawng khrawng la Hnadaga ming äng ese ini kräu saw koong khrawng sawk loutih hawn natchaw kutäng ini dü. Nangnih äi huih Hnadaga ming äng ese hawuvaih chu. Ni khäl nangkei choknaw hnäng hmawna anih khäka thänei saw dä. Nangkei a sidih pekaih koong äi khäl yok hmuei saw. Iyaäm nangkei äpäih yeih saw na hnah mäitiyah saw khin äng ini mäi däk. Äi koong ula chetchet kaja däk ting khinei äm, ani khru a pak sidih äng mäiseh. Nangkei khäka chawmsi kheni ilup lo äm khrawng khäl khäka ha äi chawmsi dä olo saw. Äini nangkei khäka Hnadaga yumphoih mäi khäh. Khih eiyeih hnäng chusaw huih chawmsi äng Ani la nangnih a anang khraw hnawh. Äini chawmsi lo hi äi känäng nini lätalaih saw lawm ha Ani la anang poh pekaih. Khetsu khanbawn khälo, nangnih ulupchaw nini pujaw saw känäng awhlawm hlaw a mäi khäl. Kei nangnih a tawk pawi nini tawk hnäng saw hmawt ngala dä ni kheu kawhawu saw. Kei kawhawu saw khäl nangnih tawk chula so khäl. Mawng khawp hngat nangkei Boi käh päi khaw a ini sumei äm awlaw mawng khawp koong nangkei Hnadaga a äkiyä ini tawngei äm, äi khawp känäng nangkei ini ok khaw a Krito käh thi äng ini phakei. Awlaw mawng ha nangkei ini phil äm, äi nangkei ini ei khaw a Krito kantha äng ini phakei. Iyaäm ha che hngat dä äini nangkei ükütla ni äi ha känäng pilak ini lawkei. Äi koong nangkei awbawng ini mäi thän kantha ak dä iyaäm nangkei ha hngat dä ini pheh yei saw. Isawlael yapsaw khäl käh kheu tawk khäl. U khälla mäksetdava bät ula ini hlusaw ini ei äm, anih kheni la äi hlusaw äng ini phakei. Äihi kei kawhawu saw kheu che i äm? Kei ni huih kawhawu saw ei, ulupchaw khäka ini hlusaw vawn lang gong mäi ting, ‘hiya khaw’ ulupchaw che ihisaw ei? Ä häh! Kei kawhawuvai khiyang saw che ulupchaw rositih khälla ini hlusaw Hnadaga khäka hiyah, khrawse khäl khäka dä. Kei khrawse khäl äng sakeyeih chu saw kühlüei. Boi käh khawp la khrawse khäl käh khawp äng utu o hnäng chu. Awlaw nangnih Boi käh päi la khrawse khäl käh päi äng utu ei hnäng chu. Nangnih Boi a nini seleyeih khiyang saw ei? Ani thawka nangkei tha mawh ei? Ükütla ini hawu, “Nangkei ükütni ini poh aih saw ini sitha mäi khäh.” Ihi khäh, äini ükütni awpawi saw hiyah. “Nangkei lalapei ini sitha huih ini poh aih saw sitha khrawng pek khäh.” Äini üküt ha che usum vawngah. Hngat la ha upum pawiyeih saw koong jiji tawkai u. Äichaw a ükütni a ni awpawi poh seh u. Khrawng khäla iha hiyah pak nini lung sanh äng jia awsaw ini jehsaw kheni ei khäl. Iyaäm kiyam la hawu, “Luhdül la luhdül äng käh ükütni Boi käh.” Yumah tih hngat la nangnih a eioka ini bekei khaw nechetaih saw naw khrawkei hi, nangnih hmawi mawh a ini telong saw khäl kheni iha tawkah pak ei bäi. Äini lusulapei nangnih a anang tak khaw, “Ni eisaw lupchaw khäl khäka hlu hmuei hüt khäh.” Äihi äi anang pek saw eiyeiti. Iyaäm ni tawk che nang käh hiyah anang pektih käh dä. Kei nangnih nini lung la tawk saw kheu kawhawu saw hiyah, äini awhngaw khrawng la ulung äng tawk saw kheu kawhawu saw dä. Iyaäm kei sitha huih kämäi saw ni awhngaw käh mikäng iya kraw aih lah saw äm? Kei dä äkiyä tawngei ngala ke ei khaw, awhngaw la iya äi äkiyä tawngei ngala eisaw ke eiyeih saw koong ini kräuvaih lah saw äm? Äi koong nangnih lalapei eio khäl awlaw lalapei po khäl, ükütni Hnadaga a nini phiyaw aih saw koong dä po khäl. Yudi pei, Grik pei awlaw Hnadaga yumtih sawng pei, hngat käh ha aka a thäneyei chu. Kei kopoh saw huih dä po khäl. Kei kibisaw kheni äng khrawng lung kaw phiyaw aih saw kosot. Kei kupum pawyeih saw koong tawk nga. Äini Hnadaga la anih a awkhiyawt pek hmawna, kei ni khäl kopoh saw dä. Kei ihuih Krito käh khrang kokoh läm, nangnih ha kei huih kol bäichu. Nangnih sawkbrat ni kei a nini lung äng anang khawyei awlaw kanang chok hawu saw thung kheni ha nini sumei. Äi koong kei nangnih a awpiyaw kanang pek. Äini kei kühlü nangnih ni hmawt seh chu, pawtaw khäl käh luki che Krito. Phiya khäl käh luki che ini pawtaw awlaw Krito käh luki che Hnadaga. Chuh ei ula ini rosi düna pawtaw hngat la uluki khiyupei bala suh tongei khaw, ‘hiyah thän’ Hnadaga kheu hawu khaw, äila upuma ehlekei. Awlaw chuh ei ula ini rosi düna hmutaw hngat la uluki khiyupeyah pak suh tongei khaw, ‘hiyah thän’ Hnadaga kheu hawu khaw, äila awpawtaw käh hmawi hnem. Äihi ulusawm khah ei tih hmutaw la ani äng iha koeyah. Hmutaw la dä ini luki khiyupei u khaw, ini lusawm ini taneyalaih saw tawn. Äini ini lusawm ini tanei saw hiyah khaw ini lu hok ini poh ei saw äng dä hmutaw khäl ini hiyawkei khaw anih la ini luki khiyupei ula tawei seh u. Pawtaw la ini luki ini khiyupeyeih saw tawnah, iyaäm Hnadaga käh ulup la wachang ani äng awdawngei. Awlaw hmutaw äng pawtaw käh wachang awdawngei. Pawtaw khäl hmutaw känäng thänei u, äini hmutaw khäl pawtaw känäng dä ini thänei saw. Hmutaw khäl koong pawtaw thänei u, äini pawtaw khäl koong dä hmutaw khäl ini thänei saw. Äi koong awlaw hawn natchaw khäl koong hmutaw khälla ini luki khiyupei ula ini tawkeyeih lah saw. Äi thän ha Boi äng sakei saw koong hmutaw pawtaw känäng hlätah awlaw pawtaw ha hmutaw känäng hlätah. Awlaw pawtaw la ha iphiya khrung äng üüm Iyaäm pawtaw känäng ihuih hmutaw a bi hmuei äm, äi huih hmutaw la ni pawtaw a awchaw nawk. Äini ükütni Hnadaga la dä bisaw. Nangnih nini puma tara biei khäl. Hmutaw hngat uluki äng awat khiyupeyah pak Hnadaga khäka suh tongei khaw äi sopha ei? Awlaw niba ini sot khaw ini yawk chu, pawtaw la ini lusawm awsawu ini tawkei khaw isiri khrah ei. Äini hmutaw la ulusawm sawu tawkei khaw, ani awpawiyei dawngah ei? Uluki khiyupeyeih saw koong dä hmutaw a ulusawm sawu pek hmuei saw. Üküt che ni krong äng ini toksakei naw theih, äini keinih awlaw Hnadaga käh yumtih sawng khäla ni hawuva awhngaw mäyah. Äini kei tua mawng krong äng kanang chokaih saw äm äi koong nangnih a kei kanang phiyaw hnäng nga. Iyaäm nangnih Hnadaga a nini rosiyeih koong utu nini lumei khaw a, awpawi thawka ese dä äthänei. Täkchah äng kei kawyawk, nangnih yumtih sawng nini lumei chi khaw a nangnih dukäng toksakei chula awsawng sawng nini pheyei. Awlaw kei ni krong äng bitchaw chi kuyum khäh. (Äiba che nangnih dukäng käh ihisaw khrawng khäl dawngei hmawna, nangnih dukäng okhoih mäiyeih saw dä.) Nangnih tänaka nini lumei khaw a, Boi käh päi lälä nini eisaw hiyah. Iyaäm nini ei khaw a nanga nang käh eisaw nini ei, äi äng pochongak hnih che buh düei ula ini mäi, awlaw pochongak hnih che hna hnah o ula ini moi. Nini eiokaih saw koong nangnih a nini im lou mäyah ei? Nangnih Hnadaga yumtih sawnga hmawi pek chu. Awlaw sanglaisu khäla hiyawh ei nini pek. Kei nangnih a i kanang tak tawn äm? Ni huih bi nini bisaw koong kei nangnih a kanang phiyaw aih saw ei? Ni khäl krong äng kei nangnih a asang ha kanang phiyaw hnawh nga. Kei Boi Yĕsu känäng kübün saw chok hawu nangnih a äi kanang pek khäh. Mawng yawna Boi Yĕsu a lansu khäl kutäng ini tukaih saw koong ini awp äm, äi yawna Ani la ha hngat law bala, äkiyä tawngei awlaw pil bala hawu, “Ni kei käh kantha, ni nangnih koong, Kei a nini lung äng khawyei chula ni poh bäichu.” Ini ei pänäng Ani la khawp law bala hawu, “Ni khawp che Kei thi äng käh thung tha Hnadaga äng kheu ini tawei saw awdawn. Nangnih ni khawp äng nini okak kiyawnah ni, Kei a nini lung äng khrawng khawyei chula o bäichu.” Iyaäm nangnih ni ha nini eiyak kiyawnah awlaw ni khawp äng nini okak kiyawnah, Boi lo alah saw sawgraw Ani düsaw kheu hiyaw hiyawk chula mäi bäichu. Äi koong hngat la ha tawna pak Boi käh ni ha ei hi ‘hiyah thän’ ni khawp äng ook hi, ani Boi käh kantha la thi koong epret mawh thäneyei. Äi ha la khawp känäng eio khawngah ükütni la ni ini puma chawmei seh u. Iyaäm ula tawnah pak ni ha ei äm awlaw ni khawp äng ook äm, ani la Boi käh kantha yawchu ah khaw, äi eiok saw äng Hnadaga käh tara äng kraw. Äi koong nangnih dukäng awvawng che ini ngiyaw awlaw op u. Awvawng che dü ha ini dü. Äini täkchah ini puma dä mawt chaw ini chawmei khaw, Hnadaga la nangkei käh tara bi lah hnawh saw. Äini Boi la nangkei käh tara ha bi awlaw dam äng ha khrawng khrawk. Iyaäm awmaw äng Boi la tara bi al khaw a, luhdül äng käh khrawng khäl ängtu tara khrawng biyalah hmawna. Äi koong kei käh khawnbawn khälo, nangnih Boi käh päi nini eiokaih saw koong utu nini lumei khaw a, hngala hngat koong chongei bäichu. U buh düei äm, Boi käh päi a lo khawngah ani la ima ei hüt seh. Äi huih nini poh ei hüt khaw, Hnadaga la tara anang bi hnawh. Awlaw kei kolo khaw a nini yoksaw awhngaw krong khäl ki hngiyalai. Kei khanbawn khälo, Asanh chang Khraw la phiyaw phoih peksaw krong äng nangnih nini yoksaw, äi ihisaw phiyaw phoih nini hmawtaih saw kei kühlü. Nangnih nini hmawtei khäh, nangnih yumahtih nini mäi hüt khaw a, nangnih awsawk mäyahtih ulupchaw khäla nini pujaw hüt saw. Äi koong kei nangnih a kanang tak, Hnadaga käh Khraw tha äng khräu ula hngat la ha hawu hnäng u, “Yĕsu che pathama büneitih.” Awlaw Asanh chang Khraw büneyah saw sawgraw hngat la ha hawu hnäng u, “Yĕsu dä Boi.” Ayapyap phiyaw phoih mäi khäh. Äini äi awkhraw hngat la dä äi khäl pek saw. Awlaw ayapyap nechetchaw saw lawm mäi khäh, äini hang hang la ni Boi hngata dä ini chetchaw saw. Nangkei ini biyei koong ayapyap lawm mäi khäh. Äini Hnadaga hngat la dä äi ayapyap bi khäl kheni ini biyeih saw koong tha peksaw. Yumtih sawng khäla awpawyei koong dä ni awkhraw pek hmuei saw. Äi Asanh chang Khraw la hngata ngen äng uluih awlaw awhngaw hngata kräu hnängaih saw preng ngiya äng uluih. Awlaw hngata äi Khraw la Krito a unung chaw yumaih saw thayung pek, awlaw hngata opahtih khäla awpawi poh alaih saw tha pek. Awlaw hngata nawmaw nawkaih saw bi biyeih saw tha pek awlaw hngata Hnadaga sidawng hiyawkaih saw thayung pek awlaw hngata Hnadaga känäng lo saw Khraw la Hnadaga känäng lo ah saw khraw hmawtaih saw thayung pek awlaw hngata hawn pre be äng kräuvei saw thayung pek awlaw hngata äi hawn pre be krawn pekalaih saw thayung pek. Äini ni bi khäl äi Khraw hngat la dä bi chaksaw. Awlaw ua ihuih thayung pekaih saw äm Ani la dä awkhrawk saw. Nangkei käh kantha ayapyap angga äng koyei thän ini pum che hngat dä. Äi huih kawchawng chawng Krito ha kantha ak thän Ani che yapyap koyei khäh. Nangkei dukäng üküt che Yudi, üküt che Yudi hiyahtih, üküt che hngasaw, awlaw üküt che ini sitha huih ini mäi. Äini ükütni kantha ak äng ini mäyeih koong Awkhraw hngat äng dä tuilüh ini lawkei saw. Awlaw nangkei hang hangani lup khiyang Awkhraw pek hmuei saw. Pochongak kantha äng che vawn hngat hiyah awbawng vawn mäi khäh. Nokho la dä hawu khaw, “Kei che ukut hinga, äi koong kei kantha äng käh vawn hinga.” Äihi äi kantha äng vawn thänei nawh ei? Naw hnaw la dä hawu khaw, “Kei che imik hinga, äi koong kei kantha äng käh vawn hinga,” äi huih hawu thän ani akantha äng käh vawn dä? Nakantha kheni dä nimik thänei khaw, iba nawyawkaih saw äm? Awlaw naw hnaw jiji dä mäi khaw, naw hnawk tho mawnga mäyeih saw äm? Äini Hnadaga la luhchaw kantha äng vawn kheni a isitha huih poh chak. Äi huih thäneyah pak kantha äng käh vawn kheni lup khiyang dä thänei chak hi, kantha ting iha mäiyeih yah saw. Äini kantha äng käh vawn khäl awbawng mäi thän, kantha che hngat dä. Nimik la nukuta ta hnängah, “Nanga kei kini hlüei nga!” Awlaw nuluki la nokho pai hnih a ta hnängah, “Nang hnih a kanang hlüei nga.” Awlaw bang nakantha äng mawng bang ngiyaw tih sum ting ni khin äm äi kaw iha bi hnäng ti. Ini kantha äng käh mawng vawn nangkei tawk pu äm, äi khäl dä nangkei unung ini chetchaw aih lah saw. Nangkei kantha äng käh mawng vawn bang dawnaih hnäng ti saw äm, äi sidih äng kün tila tawei. Nangkei kantha äng käh mawng vawn pawiyei äm, äi khäl ini chetchaw aih saw hna hnah langgong hiyah. Nangkei kantha äng hlü ah saw vawn khäl, Hnadaga la unung alang gonga poh. Nangkei kantha äng okoyei saw iha mäyah, äini hang hang vawn la ni hngata hngat koong ini tawk. Awlaw nakantha äng vawn hngat la dä naw bünei khaw, nakantha äng käh awhngaw vawn khälla dukhah ini piyei. Awlaw nakantha äng käh vawn hngat dä piyaw khaw, hang hang ni ini piyaw. Nangnih Krito käh kantha awlaw hngat hngat che kantha äng käh vawn. Hnadaga la yumtih sawng äng täkchah teh hmueitih khäl, äi pänäng Hnadaga sidawng hiyawktih khäl, äi pänäng choktih khäl ächän tawk. Äi pänäng Hnadaga la ayapyap nawmaw nawkaih saw bi tha, opah tih awpawi nopoh alaih saw tha, nuku aih saw tha, khrawng nulumaih saw tha awlaw hawn pre be äng näkräuvaih saw tha pek. Hang hang ni teh hmueitih ei? Hang hang ni Hnadaga sidawng hiyawktih ei? Hang hang ni choktih ei? Hang hang ni nawmaw nawkaih saw bi bi hnäng tih ei? Hang hanga ni opatih awpawi ini poh alaih saw tha mäi ei? Hang hang ni hawn pre be äng ini kräu hnäng ei? Hang hang la ni hawn pre be ini phawngh pekal hnäng ei? Hiyah, hang hang la hnäng u. Nangnih unung alang gong vawn khäl nini büneyeih saw so khäl. Kei nangnih a üküt thawka alang gong lawm pawisum hngat kanang dawnai. Kei yapyap be äng awlaw hawn natchaw be äng käkräu hnäng thän, kei äng dä ekhet mäyah khaw, kei sam che athak ini hmen saw mong huih ‘hiyah thän’ jeu jeuwa mengtih sengleng huih käthänei. Kei Hnadaga sidawng kawhiyawk hnäng nawk theih. Kei a kengen mäi naw theih awlaw uthupei saw krong kheni kawyawk chu nawk theih awlaw khuyung hlai hnäng hmawna uyum kheni kawtawkei nawk theih, äini kei äng dä ekhet mäyah hi, kei iha hinga. Kei a mäi saw kheni kepek chak thän awlaw kakantha pekei ngala kawchawh ei sawk thän, äini kei äng dä ekhet mäyah hi äila kei a iha awpawi opo ah. Ekhet che chunei hnäng saw awlaw jenei. Ekhet la che seleyah ‘hiyah thän’ khrawnga dawneyah awlaw bawriyei yah. Ekhet la akhrang se po eyah ‘hiyah thän’ upum käh jiji soeiyah, ‘hiyah thän’ aman pokah. Ekhet la khrawng ini hmaw saw kheu khäl süp bala tawah. Ekhet pawyah saw äng piyaw ah, äini ihisaw äng dä piyaw saw. Ekhet la khekhet bala dä mäi saw. Awlaw ekhet la yumei bala mäi, khanh nei bala mäi, awlaw chunei bala mäi awlaw ni khäl krängak ha dümalah. Ekhet krängak ha päihyah. Äi äng ulyah kheu khäl mäi. Äini äi khäl che tana krachaw koong dä. Äi äng hawn pre be äng kräu hnäng saw tha khäl mäi khäh, äini äi khäl chetalai. Khrawng khäla preng ngiya ämäyei, äini äi khäl ha päihyal chakai. Iyaäm nangkei a Hnadaga känäng ini bünei saw ngen la ulyah kheu khäl luih chakah. Äini itih a luih chak äm, äi khaw a äi luih chakah saw okrokalai. Kei sämäichaw khaw a sämäichaw huih käkräu sang hüt, sämäichaw huih kawtawk hüt awlaw sämäichaw huih tara ha kibi hüt. Tua kei kawsawk thänei däk, äi koong sämäichaw käh mäichoh khrang kokhoh lal däk. Tua nangkei hmrang äng ulupchaw khäl ilip ini hmuh däk, äini äi khin lo khaw a hmawi mawh khiyang ini hmuh lah ai. Kei tua awvawng dä kaw hmawt saw, äini Hnadaga la kei a ihuih hang hang aw hmawt äm, kei äi huih hnüpak hang hang kaw hmawt lah ai. Tua uh thum dä mäitih saw. Ni khäl che, Hnadaga a nuyum saw, Hnadaga khrung äng akhahnei saw awlaw Hnadaga a nekhet nawk saw la khrawnga nekhet nawk saw. Äini ni khäl äng käh ekhet dä üküt thawka elensum. Äihi nangnih ekhet koong unung chaw hno khäl. Awlaw nangnih awkhraw lawm äng käh phiyaw phoih khäl nini büneyeih saw lawphah khäl, unung chaw Hnadaga sidawng nini hiyawkaih saw phiyaw phoih lawphah khäl. Hawn pre be äng u kräu äm ani che khrawng khäka kräu saw hiyah äini Hnadaga khäka kräu saw dä. Iyaäm anih la i ini hawu saw äm hngat la ha yawchu u. Ani awkhraw äng uthupei saw ihisaw kheu kräu. Äini ula Hnadaga sidawng khrawnga hiyawk äm, äila khrawng khälla uku, ulyah pek awlaw lung hiyelal. Hawn pre be äng u kräu äm anih la ini puma ini kuei, äini Hnadaga sidawng ula hiyawk äm äi khälla yumtih sawng khäla uku. Nangnih ayapyap be äng nini kräu hnängaih saw kei kühlü. Äini awhmawi mawh äng käh kheu nini hawu hnängaih saw unung chaw kei kühlü. Iyaäm ayapyap be äng kräu hnäng tila yumtih sawng dä nung sawk hnäng ti hi, awhmawi mawh äng käh kheu hawutih bang len khäh. Nube tanawu khälo, nangnih khäka ayapyap be äng kräu ngala äini Hnadaga käh ihisaw kheu, ngen kheu awlaw Hnadaga käh chok hawu dä hawu nga hi, kei nangnih koong i awpawi kopoh saw äm? Khrawng hngat la krei chaw ‘hiyah thän’ chong dä awi äng läk tumah hi, äi kreichaw la chong känäng i awi sam thok saw äm iba nini hmawtaih saw äm? Jal a ini komaih khaw a ini hmen saw bawh dä sanh sanh mengah hi jala chetaih tih la iba upuma ächän ini tawkeyeih saw äm? Äi huih kawchawng chawng, nangnih hawn pre be äng nini kräu hi, nini kräu saw be awhngaw la iba ini yawkchu aih saw äm? Äi khaw a nangnih käh kheu che khri äng dä payalaih saw. Ni luhdül äng awbawng ebe mäi khäh, khrawng khälla nanga nang käh be ini yawkei chu chak khäh. Äi koong kei dä ebe yawchu nga hi, kräutih khäka kei awhngaw yapsaw käthänei. Awlaw ani ha kei khäka awhngaw yapsaw thänei. Nangnih khäka ha ni huih thänei. Äi koong nangnih awkhraw lawm äng käh phiyaw phoih nini büneyeih saw lawphah khäl, äihi äi awkhraw lawm äng käh phiyaw phoih sumei chula äi yumtih sawng khäla ulyah pek khäl. Äi koong hawn pre be äng u kräu hnäng äm anih la äi kräu saw krong phawngh pekalaih hnäng saw koong Hnadaga khäka suh tongei seh. Kei dä hawn pre be äng suh kotongei khaw, kei käh khraw la dä suh tongei saw. Äini kei tawk la iha bi biyah. Äihi kei i kopoh aih saw tawn äm? Kei kawkhraw äng suh kotongeyei, äi ängtu kulung äng ha suh kotongeyei. Kei kawkhraw äng kaw awi yei, äi ängtu kulung äng ha kaw awi ei. Nang awkhraw äng jiji Hnadaga a äkiyä nawtawngei hi, awhngaw khrawng khälla nang nawhawu saw yawchu ah pak iba “Amen” ting ini hawu aih saw äm? Nang mawt chaw Hnadaga a äkiyä nawtawngei nawk theih, äini awhngaw khrawng khälla nang suh notong saw känäng iha uku bünei hnawh u. Kei nangnih kheni khäl thawka hawn pre be äng unung käkräu hnänga Hnadaga a äkiyä kawtawngei. Äini yumtih sawng khäla kochokaih saw koong hawn pre be äng, othong thong kheu käkräuvaih saw chaw a, kei kheu khaw hngaw khrawng la yawchu hmawna käkräuvaih saw kühlüei. Khanbawn khälo, sämäichaw huih tawk tiyei chu. Ese krong äng nangnih käh lung chih otih huih thänei seh. Äini nini tawk saw äng che chang huih dä thänei khäl. Kiyam äng yoei bala mäi, “Awhngaw presaw be äng awlaw aw hngaw presaw khäl käh mong khok känäng kei ni yapsaw khäl äng käkräuvai. Äi thän anih la Kei kheu khin hnawh u.” Äihi hawn pre be äng ini kräu saw yumtih sawng khäl käh hmat la hiyah, yumah tih khäl käh hmat la dä. Äini Hnadaga sidawng che yumah tih khäl koong hiyah, yumtih khäl koong dä. Yumtih sawng äng käh ükütni tänaka chumei ula hawn pre be äng ini kräu hi, awlaw äiya awhngaw khrawng la yumahtih khrawng ini lo hi, anih la nangnih a ulu ting anang ta hnawh u ei? Äini yumah tih ‘hiyah thän’ awhngaw khrawng khäl ini lo khaw a, ükütla ni Hnadaga sidawng ini hiyawk hi, äi khrawng la ini yawk saw khäl äng upum käh ngulai hmuh eyal bala upum käh tara biyei ei. Äi äng anih lung dukäng uthupei bala mäi saw tawk khäl dawngei chakai. Äi khaw a anih dek äng bok ula Hnadaga a ini phiyaw ai awlaw ini hawuvai, “Ihi khäh, Hnadaga nangnih äng mäi khäh.” Khanbawn khälo, kei ni kanang yawkchu aih sawk khiyang. Nangnih nini rosiyeih koong tänaka nini chumei khaw a, nangnih äng pochongak la awi chah ai, pochongak la chokai, pochongak la Hnadaga sidawng hawuvai, pochongak la hawn pre be äng kräu ai, awlaw pochongak la äi hawn pre be kheu krawn pekalai. Läsula lalapei poei seh u hang hang ni yumtih sawng käh kubawma thäneyeih lah saw. Hawn pre be äng ini kräu hi, hngat pänäng hngat pochong hnih thum dä kräu seh u, awlaw hngat la che äi kheu phawngh pekal seh. Hngat ha kheu phawngh pekalaih tih mäi u khaw, äi hawn pre be äng kräutih yumtih sawng khäl khäka ektiya pak mäyalaih lah saw. Ani upum lala awlaw Hnadaga äng kräuvei seh. Hnadaga käh kheu pek hmueitih pochong hnih thum ini kräuvaih lah saw. Äi khaw a awhngaw khälla anih ini kräu saw kheu khäl mawmawt chaw ini chäkaih lah saw. Äi la a om bala mäitih pochongak khäka dä Hnadaga käh sidawng lo hi, äi khaw a kräutih dümal seh. Iyaäm nangnih kheni la hngat pänäng hngat la Hnadaga sidawng hiyawk hnäng hmawna. Äihi hang hang la ini choknawkai awlaw ulyah ini büneyei. Hnadaga sidawng hawuvaih saw koong ua thayung pek hmuei äm, äila Awkhraw a isitha äng tawkeyeih hnäng saw. Iyaäm Hnadaga la nangkei kochok kabat ini mäyeih saw hlüeiyah. Nangkei bälei pula awlaw jelkhiyamsa äng ini mäyeh saw hlü. Awhngaw yumtih sawng ini chumei düna käh huih, hmutaw khäl yumtih sawng ini chumei düna kräuvah pak mäiseh u. Anih ini kräuvaih saw sang u. Yudi khäl käh thung la hawu, anih yumtih sawng dukäng elenchaw thänei lah hnawh u. Anih la lalapei ini hmawtaih khiyang khaw ima ini pawtaw a hiyal seh u. Iyaäm yumtih sawng khäka äkräu saw hmutaw hngata hiyawh ei kheu dä. Hnadaga kheu nangnih duk känäng thok hüt saw ei? ‘Hiyah thän’ äi nangnih jiji khäka lo saw ei? Läsula pei upuma Hnadaga sidawng hiyawktih ting khinei hi, ‘hiyah thän’ ani a awkhraw äng käh phiyaw phoih mäi khäh ting khinei hi, ani la yawk chuaih lah saw kei nangnih a kanang yoksaw khe che Boi käh sin mawn kheu. Äini ani la äi äng ulung khraw eyah hi, ani pawta nini lung khraweyei chu. Äi koong kei khanbawn khälo, Hnadaga sidawng nini hiyawkaih koong nini lung khraw ei khäl. Äini hawn pre be äng ini kräuvaih saw nga ai chu. Ükütni awtawn saw huih awlaw pämh bämh chaw thänei seh. Khanbawn khälo, nangnih a kanang hiyawk hüt saw sidawng pawi, kei nini lung äng kanang khawyalaih khiyang. Nangnih äi nini lawkei awlaw äi äng nümchawng chawnga nini mäi. Nangnih khäka mawng kheu kawhiyawk äm, äiche sidawng pawi. Äi sidawng pawi nangnih dä chetchet mawn chula nini tawk khaw, Hnadaga la nangnih a anang khiyawt. Nangnih dä mawn chula tawchu khaw, nangnih käh äi uyum che iha hiyah. Kei a khrawng hawu pek saw kheu mawt alang gong ting khin ngala, nangnih a ha kanang hawu pek. Äi krong che ni, kiyam äng yoei saw huih, Krito nangkei ngulai koong üdü hüt. Anih la Krito a ini phul hüt. Kiyam äng yoei saw huih Hnadaga la hnüp thum äng Ani a düsaw känäng thouhwal. Awlaw Ani la Pitol a äi pänäng Ani käh pochong lei hnih teh hmueitih khäla dawneyal hüt. Äi pänäng, Ani la kräng khiyang äng khrawng khra hngaw dämäng, Ani hnung äng tämtih khäla awdawnei. Äi khäl dukäng käh üküt che ini dü däk, awvawng che tua ha heng ula ini mäipe khäh. Äi pänäng Ani la Yakub awlaw u hnung äng teh hmueitih khäl kheni a awlaw krawnak dawneyal hüt. Kei ikhin mäitih a khaw a luhdül äng kolo saw huih, Ani la kei a khrawng khe hnung äng awdawneyal. Teh hmueitih khe äng kei ni nemtih sum. Awlaw kei a teh hmueitih ting khrawng paneyeih saw bang tawntih hinga. Iyaäm Hnadaga käh yumtih sawnga kei kukuluh nawk hüt. Äini tua kei i käthänei däk äm, äi Hnadaga käh khetjen äng dä käthänei saw. Awlaw Ani la kei a epek saw khetjen che tha po ngala kübünei hüt saw. Äini kei awhngaw teh hmueitih khäl thawka unung chaw tha kopoh khäh. Äi tha kopoh saw kei käh tha äng hiyah, äini Hnadaga käh khetjen la dä kei dukäng bi bisaw. Äi koong kei thän awlaw awhngaw teh hmueitih thän, keinih ni huih dä tara kini haw saw awlaw nangnih ni huih nini yumei saw. Krito a düsaw känäng thouh hmuei däk ting sidawng hiyawk hmuei khaw, nangnih dukäng ükütla dütih thouwal u ting iba ini hawu datäm? Dütih khäl dä heng ula thouwal u khaw, ni äng ini yawk chu, Krito a ha thouh hmueyal hütah. Awlaw Krito a dä düsaw känäng thouh hmueiyalah khaw, keinih käh sidawng ha usum vawngah. Awlaw nangnih käh uyum ha usum vawngah. Awlaw äi äng ni kheu dawngei, Hnadaga krong äng keinih ehlei sawksi kini thok. Iyaäm keinih käh sawksi che ni, Hnadaga la Krito a hengal sawk bala thouh al. Äini dütih a dä hen bala thouhwalah khaw Ani la Krito a ha hen bala thouwal hütah. Iyaäm dütih khäla dä hen bala thouhwal hmueyah khaw, Krito a ha henal bala thouhwal hmuei hütah. Krito a dä henal hmuei hütah khaw nangnih käh yum ha che usum vawngah awlaw tua ha nangnih ngulai äng dä nini mäipe saw. Äihi Krito äng yum ula düdäktih khäl che ini krak däk. Krito khrung äng nangkei ini khanh nei saw ni sawk koong jiji dä hi, luhdül äng käh khrawng kheni khäka nangkei ni khrawng jenei phoih. Äini ihisaw kheu che ni, Hnadaga la Krito a düsaw känäng henal bala thouhwal däk. Äi huih kawchawng chawng, dü bala iptih khäl kheni a Hnadaga la henal bala thouhwal chakai. Khrawng hngat känäng düsaw ihuih lo hütäm, äi huih düsaw känäng thouwal saw ha khrawng hngat känäng lo. Adam äng ini sakei saw koong khrawng kheni ihuih ini dü äm, äi huih Krito äng sakeitih kheni a düsaw känäng thouh hmueyalai. Äini hngat pänäng hngat echen chaw ini thouhwalai. Täk chah che Krito, äi pänäng Krito loal khaw a Ani ängtu mäitih khäl ini thouhwalai. Äi pänäng äpäih saw khin lo ai. Krito la thung pängtih khäl, khiyuptih khäl awlaw tha mawh khäla khrah al chakai. Krito la Paw Hnadaga kut äng ükütni awpalai. Hnadaga la Krito käh lansu khäla Ani kho chouwa taw ah saw sawgraw Krito la khiyupai. Äpäih sum lansu che düsaw, äi ha khrah hmueiyalai. Iyaäm Kiyam la hawu, “Hnadaga la vawn kheni Ani kho chouwa tawdäk.” Ihi khäh, niche sanh sanh dä, Yĕsu Krito a vawn kheni awawp saw ting awhawu saw äng Hnadaga la upuma ha süpei phih saw hiyah. Krito sitha äng ükütni tawk hmueiyal pänäng Krito ha Hnadaga sitha äng mäyalai. Äi khaw a Hnadaga la ükütni päng chakalai. Äini dütih koong tuilüh lawei tih khäl i ini thäneyeih saw äm? Dütih khäla dä thouhwal hmueiyah khaw, anih la dütih koong tuilüh ini lawkei saw i usum vawngaih saw äm? Awlaw iya keinih sawkbrat dukhah äng kini kraw saw äm? Khanbawn khälo, keinih käh Boi Krito Yĕsu khäka nangnih a kanang lo saw koong kei bawriyei ngala ni kawhawu, hnüpak kiyawnah ni kei düaih wavaih käthänei. Iphis mräh a mäksetdava huih mäichoh tih khrawng khäl äng kei jal kätäkei khaw a, kei i kamrat äm? Äi dütih khäl dä hengal u khaw, “Lo khäl, eio äng khä, iyaäm hngätäh a nangkei ini düaih saw.” Nangnih mäkai chu, “Pawiyah tih khrawng la pawitih khrawnga khrah.” Äi koong nini lung thawi eyal sawk khäl awlaw ngulai bitiyei chu. Nangnih dukäng ükütla che Hnadaga a hmawt chu. Nangnih a hiyawh ei kanang pekaih koong kei ni kheu kawhawu saw. Ükütla ini hawu nawk theih, “Dütih khäl iba thouh ini hmueiyalaih saw äm? I huih kantha äng anih ini thouwalaih saw äm?” Mäktih o! Nang nächäh saw ichih dü ah sawgraw chät hnängah. Nang nächäh khaw a awchaw chäti, ichih dä nächäh saw. Nang püm thän chä ‘hiyah thän’ awhngaw thän chä. Äini Hnadaga la upum kädäng la isitha huih äi ichih a ulup pek. Ani la ichih kheni a awtawn saw huih ini kantha pek. Sawk mawh kantha kheni lup khiyang hiyah. Luhchaw kantha yapak, mäksetdava kantha yapak, haw la ngaw käh kantha yapak. Hawn pre a käh kantha ha mäi awlaw luhphung äng käh kantha ha mäi. Hawn pre käh kantha pawyei saw hngaw awlaw luhphung äng käh kantha pawyei saw hngaw. Khoni pawyei saw yapak, khraw pawyei saw yapak awlaw asĕ khäl ini pawyei saw yapak. Asĕ khäl äng ha ini pawyei saw yapyap mäi. Dütih khäl ini thouwal saw ha äi huih kawchawng chawng. Kantha phul hmuei khaw a, äi kantha che krakai, awlaw äi kantha thouh hmueyal khaw a kraktiyah pak mäyei. Äi kantha nuphul khaw a sose awlaw änäu. Äini äi kantha thouwal khaw a awpawyei yeih saw awlaw ama aih saw. Niba kantha che dekäng phul hmuei. Äini thouh hmueyalaih saw kantha che awkhraw kantha. Niba kantha ha mäi awlaw awkhraw kantha ha mäi. Kiyam äng ni huih yoei bala mäi khäh, “Täk chah khrawng, Adam, sawk mawh a thänei.” Äini Yĕsu Krito che äpäih saw Adam huih. Ani che khrawng kheni a sawk pektih khraw. Luhchaw kantha dä ayang lo saw äi pänäng dä awkhraw kantha lo saw. Täkchah Adam che luhdül känäng lo. Äi pänäng käh Adam che hawn pre känäng lo. Luhdül äng mäitih khäl che, luhdül äng bi hmueitih Adam huih. Awlaw Hawn pre a mäitih khäl che hawn pre känäng lotih Adam huih. Nangkei ihuih äi luhdül känäng bi hmueitih khrawng huih äm, äi huih kawchawng chawng äi hawn pre a käh khrawng huih ini thäneyei. Khanbawn khälo, kei kawhawu saw che ni, nangkei thi saw kantha äng Hnadaga käh hawn pre a vawngal hnäng hnawh pu. Kraktih kantha hawn pre a vawngal hnäng hnawh. Khin khäl, kei nangnih a thupei saw ihisaw kheu hngat kanang hawu pekaih. Nangkei hang hang ni dü hnawh pu. Äini nangkei dä heng pula ini mäi hi, hawn natchaw khälla äpäih saw khin äng käh bawh ini tumsaw ängtu ini mik khepak äng ini hleyalai. Dütih khrawng khäl ha bawh meng saw ängtu ini hengalai. Anih düti hnawh u awlaw nangkei ha ini hleyalai. Kraktih che hleyeal bala krakah tih a thäneyalaih lah saw. Awlaw düti ha che düah tih a hleyalaih lah saw. Äi khäl thänei khaw, kraktih che hleyeal bala krakah tih a thäneyalai. Äi khaw a kiyam äng käh ni kheu luih yei, “Hnadaga la düsaw a krak däk, awlaw Ani düsaw khrung äng oong.” “Düsaw o, nang noong saw mawnga äm? Düsaw o, dukhah nepek saw sip mawnga äm? Düsaw la naw pekaih koong ngulai känäng thayung bünei awlaw ngulai la naw pekaih koong thung känäng bünei. Äini Hnadaga a äkiyä kawtawngei, nangkei käh Boi Yĕsu Krito äng Ani la nangkei a khrawng ong sawk.” Äi koong khanbawn khälo, chang chula, ja chula mäi khäl, chakeyei chu. Sawkbrat Boi käh bi koong khru khäl. Iyaäm nangnih nini hmawt khäh, Boi koong nini bisaw khe che usum vawngaih saw dä. Tua kei Yudia a käh Hnadaga khrawng khäla ini kuaih saw koong awmawn kokaih saw krong kawhawu. Galati pre lekchaw a käh yumtih sawng khäla kei i kochok äm nangnih ha äi huih nini poh aih lah saw. Nangnih kheni la nini bisaw khawh nini bünei saw äng läk sapta chah saw hnüp äng aw hngaw chaw taw bäichu. Äihi kei kolo khaw a awmawn kok chän mäi hmawna. Kei nangnih khäka kolo pänäng, nangnih helei chula nini tawkei saw khrawng khäl kutäng chaw kawawpai. Awlaw kok hmuei saw mawn Yĕlusalema ini chih eih koong keteh ei. Kei ha kechetaih saw kawkhrawkei hi, kei ängtu anih ha ini chet hnäng khäh. Mesidoniya pre lekchaw känäng dä kei nangnih khäka kolo aih saw, iyaäm kei Mesidoniya dukäng dä koloaih lah saw. Nangnih khäka hnüpak hnih kämäi nawtheih, isik kra ha nangnih äng kämäi nawtheih. Kei lala a pei chet seh nga kei kechetaih saw lawm äng nangnih kei a anang ku hnängai. Kei nangnih äng jot ting khomei ngala krawnal do khiyang nga. Kei kawtawk, Boi la dä hlü hi, kei nangnih äng awbawng hnüp kämäyeih saw dä. Kei Iphis mräh a Pentikaws päi hnüp täh kämäyei. Iyaäm kei a awbawng khrawng khälla khrawng nga thän, kei a bi len hngat kibiyeih saw awkawm mäi khäh. Timothi dä lo khaw nangnih äng pawyei sese a mäi lah hmawna so bäichu. Iyaäm kei ihuih Boi bi kibi äm, ani la ha äi huih bi khäh. Äi koong hngat la ha ani a enemchaw äng soa pak. Kei khäka ani krawnal hnäng hmawna, nangnih ani a jelkhiyamsa äng teal bäichu. Ani yumtih khäl äng krawnalai ting kei chong ngala kämäi khäh. Kei tua nawu Apolo krong kawhawu. Ani yumtih khäl ängtu nangnih khäka chet hmawna, ani a awbawng ulyah kepek hüt. Äini tua ani asang ha chet do ah. U hnung äng ikhin bünei hi ani chetai. Nangnih sidih mäi khäl, uyum äng changchula mäi khäl, sengkhri mawh la tha mawh thänei khäl. Nangnih lalapei po seh chu ekhet lung äng dä po bäichu. Nawutih khälo, nangnih che nini hmawt khäh, Istiphen tih imsaw khäl dä Akhaiya pre lekchaw a käh täkchah yumtih sawng. Hnadaga käh khrawng khäl ini chetchaw aih saw koong anih la ini puma ini hluei. Äi koong mawng khrawng khäla Boi a ini chetchaw aih koong bi awp hmuyei äm, äi huih khrawng khäla elenchaw ting ngei bäichu. Istiphen, Photunat awlaw Akhayak tih kei khäka ini lo saw koong kei mawt kaw piyaw. Iyaäm nangnih mäi chusaw la anih la dä ini hluih saw. Iyaäm Anih la nangnih a nini lung anang phiyaw hüt saw huih, kei lung ha khrawng phiyaw hüt. Nangnih ni huih khrawng khäla hmawi pek bäichu. Esia pre lekchaw a käh yumtih sawng khälla nangnih a anang khäh ei khäh. Akila, Piskila awlaw anih ima lumeitih yumtih sawng khälla Boi ming äng nangnih a anang khäh ei. Yumtih nube tanawu khälla ha nangnih a anang khäh ei khäh. Ekhet lung äng dä nangnih hngat la hngat khätei bäichu. “Pol känäng khäh’ ni kheu kei kut äng lungak hnih koyok. Losulapei Boi a khet naw ah khaw, ani lukhrunga pathamah kraw seh. Nangkei käh Boi lo ‍seh. Boi Yĕsu käh khetjen nangnih ängtu mäiseh. Krito Yĕsu äng kei käh khet nangnih kheni ängtu mäiseh. Amen. Kei Pol, Hnadaga sitha äng kei Krito Yĕsu käh tebeih hngat käthänei. Kei awlaw keinih nawu Timothi la Korin mräh a käh yumtih sawng, awlaw Akhaiya pre lekchaw a käh Hnadaga khrawng khäl kheni a, ni chaw koyok. Keinih käh Paw Hnadaga awlaw Boi Yĕsu Krito la nangnih a khetjen la jelkhiyamsa anang pekseh. Lo khäl, nangkei käh Hnadaga la Boi Yĕsu Krito käh Paw a äkiyä tawngei äng khä. Ani che jeneitih Paw awlaw hang hang ku khäl Ani känäng dä lo saw. Ani la dukhah khäl kheni känäng khrawng ku. Äihi Ani känäng ini bünei saw kubawm sumei pula, nangkei ha yapyap dukhah äng mäitih khäl kheni a ini ku hnängai. Iyaäm Krito la dukhah khawm saw huih nangkei ha dukhah ini khawm, äi huih Hnadaga käh uku Krito känäng nangkei ini bünei. Äini nangkei dukhah ini khawm hi, ni che nangnih koong uku la awkhiyawt äthänei. Keinih a dä Hnadaga la khrawng ku hi, nangnih ha uku nini büneyei. Awlaw keinih dukhah kini khih saw huih, nangnih a ha dukhah nini khih yeih saw tha pek hmueyei. Äi koong nangnih lukhrunga keinih mawt kini üm khäh. Keinih kini hmawt khäh keinih huih dukhah ha nini khawm, awlaw Hnadaga käh uku ha nini bünei. Khanbawn khälo, Esia pre lekchaw a ihuih dukhah kini khawm hüt saw äm, äi nini lung äng kanang khawyalaih khiyang. Äiya keinih ihuih dukhah kini khawm hütsaw äm, äi khaw a kini heng pe ei ting khahnei ti unga. Keinih lälä kini dü aih saw hnäh ting kini khinei hüt. Äini ni huih keinih äng thänei saw keinih kini pum äng üma pak, dütih a düsaw känäng henal tih Hnadaga äng üm hmawna. Ani la kese saw düaih saw känäng keinih a khrawng khiyawtal hüt, awlaw Ani la awhmawi mawh a ha khrawng khiyawtalai ting kini yum. Nangnih ha keinih koong suh tong chula anang ku hnängai. Äihi awbawng khrawng la suh ini tong saw äng, Hnadaga la suh tong krawn khrawng pekalai. Awlaw Hnadaga la pisi khrawng pekai. Awlaw awbawng la keinih koong Hnadaga a äkiyä ini tawngeyei. Tua keinih ni krong äng kini bawriyei. Keinih käh tawk sanh la ni sawksi pek. Keinih sawkbrat prongh brongh awlaw sidih äng kini mäi hüt. Unung chaw nangnih äng kini mäi hüt khaw a, äi huih kini poei hüt. Keinih Hnadaga käh ngen la khetjen äng dä kini mäichoh hüt saw. Nangnih phawt hnäng ong awlaw yawchu ong dä keinih nangnih khäka kini yok saw. Keinih krong äng tua nangnih bitchaw dä nini yawkchu saw. Kei kuyum, nangnih hang hang ni uhnung äng nini yawkchu khäh ai. Boi Yĕsu lo a laih saw hnüp äng nangnih a ihuih kanang bawriyei nawkai äm, äi huih nangnih ha keinih a anang bawriyei nawkai. Kei a ni khäl äng küüm mäi hüt saw koong, täkchah nangnih khäka kechetai ting kopoh ei hüt, nangnih awlaw krawnak pisi bünei hmawna. Kei kulung hlü mäi hüt saw che ni, Mesidoniya a kechet khaw a nangnih äng ko khomei hütai, awlaw kawkrawnal khaw a ha nangnih khäka dä kolo a laih saw. Äihi Yudia a kechet lawma nangnih kei a anang ku hnängai. Kei ni huih kakram khaw a kei ihisaw tawk hüt nga ei? ‘Hiyah thän’ kei kakram khaw a kupum jiji soei ngala kakram hüt saw ei? “Ä” la “Ähäh” ini hawuwaih saw koong kopoh khäh ei? Hnadaga che yum phoih dä. Ni kheu ihuih ihi äm, ni ha ihi khäh, nangnih khäka keinih käh kheu ‘Ä’ khaw’ ‘Ä’, ‘Hiyah’ khaw ‘hiyah.’ Kei, Silban awlaw Timothi la Hnadaga Chaw Yĕsu Krito kheu nangnih khäka kini hawu hüt. Äi Yĕsu che khin khiyang äng ‘Ä’ la ‘Ähäh’ hiyah. Ani che sawkbrat ‘Ä’ dä. Iyaäm Hnadaga la khawmei saw khäl kheni Yĕsu äng “Ä” a thänei. Äi koong Hnadaga a ini phiyaw aih koong Yĕsu Krito ming äng nangkei “Amen” ting ini hawu. Awlaw Hnadaga pum kädäng la keinih awlaw nangnih Krito ängtu chetchet khrawng sak. Ani la nangkei a Ani koong khrawng hmatei. Ani la nangkei a khrawng hmatei bala upum käh khrawnga khrawng poh ei. Awlaw Ani la nangkei koong ächän tawksaw kepekai ting, khawmei saw huih Asanh chang Khraw nangkei lung äng khrawng pek. Kei Hnadaga a sawksi tawei ngala kawhawu, nangnih a dam kanang pekaih khiyang nga koong, tutäh si äng nangnih khäka Korina krawnal hawm nga. Keinih kini hawu saw khäl kheni yumni nini yumaih lah saw ting kanang tanga. Keinih kini hmawt khäh nangnih uyum äng mawt nini ma. Äichaw a nangnih piyaw ong keinih nangnih ängtu kini bi kawi saw. Äihi nangnih a dukhah pekai äng nangnih khäka awlaw krawnak loaih nga saw kawtawk. Iyaäm kei dä nangnih a dukhah kanang pek hi, ula kei a awpiyaw epekaih saw äm? Nangnih jiji la dä kei känäng dukhah nini bünei saw. Ni koong kei nangnih a äi chaw kanang yok hüt. Kei lo ngala nangnih a dukhah kanang pekaih saw hlüei nga. Iyaäm nangnih dä kei a awpiyaw anang pekaih saw tawn. Äi koong kei itia kawpiyaw äm, äi khaw a nangnih hang hang ni nini piyaw. Kei awbawng dukhah la kulung naw ngala awlaw awbawng kimik khri boyei sawk ngala nangnih a kanang yok hüt saw. Äini nangnih nini lung dukhah pi ei hmawna hiyah, nangnih a i hiyawh kanang khet nawkäm, äi hmawtei ong dä. Läsulapei hngata ha dukhah pek hi, äila kei a dukhah epek saw hiyah. Äini nangnih kheni a ha dukhah anang pek saw dä. (Kei ni kawhawu saw che ani khrung äng kei kenget saw dawngeyah pak.) Nangnih dukäng käh khrawng la ibang dam ini khrawk äm, äi ani koong khäk däk. Ani la hna hnah lung dukhah piei bala konghmuh lawm hlähtalah pak, nangnih ani a ähläh nini pekalaih saw tawn awlaw ulyah nini pekaih saw tawn. Awlaw kei nangnih a kanang hnih ei, ani a kawchawng chawng nini khet nawk saw hmawtei sawk khäl. Nangnih üküt krong ni nini ngeyei ting kosotaih khiyang koong kei nangnih khäka äi chaw koyok. Nangnih läsuapei ähläh nini pekal khaw kei ha ani a ähläh kepekal. Iyaäm ähläh kepekalaih saw huih dä mäi khaw, äi kei Krito hmawi mawh a nangnih koong dä kopoh saw. Kei ni huih kopoh saw Mannat la nangkei khrung äng tha büneyah pak. Mannat käh lung hlü che nangkei ini hmawt chak khäh. Kei Krito käh sidawng pawi hiyawka Troa mräh a kaphaw khaw a Boi la kibiyeih koong lawm hngat ohong pek hüt. Äini kei bi phäu Tit a äiya bünal nga saw koong kei kokong grah hüt. Äi koong Troa mräh hlätal ngala che kei Mesidoniya a kechetal. Hnadaga a äkiyä kepek, iyaäm Krito koong keinih heng nawk kini hmuei. Ini piyaw saw misil a Hnadaga la nangkei a lawm khrawng dawn. Awlaw Hnadaga la hang hang laa otih hu huih Krito käh ngen khrih eyeih saw koong nangkei a khrawng sumei. Iyaäm kiyawt büneitih awlaw krokaih tih khäl khäka nangkei Krito käh otih hu huih. Äini Hnadaga känäng kiyawt büneyalah tih khäl khäka che nangkei käh otih hu che isip bälei saw hu huih dä. Awlaw kiyawt büneyalaih tih khäl khäka nangkei käh otih hu che sawk pektih otih hu huih. Ni bi khäl biyeih koong u tawn äm? Upum mrataih saw koong ula Hnadaga kheu äng kun poh äm keinih äi khrawng khäl huih hi unga. Iyaäm keinih a Hnadaga la khrawng teh saw koong, nangkei ini lung hongei pula Krito käh hngasaw huih Ani hmawi mawh a ini kräu. Keinih ni khäl hawu ungala kini pum a kini bawriyei nawk saw huih thawngei? Nangnih koong hmawi hmawt chaw kanang pekaih lah saw ei? Awlaw nangnih känäng keinih ha hmawi hmawt chaw kini lawkeyeih lah saw ei? Keinih lung dukäng yo hmueitih hmawi hmawt chaw che nangnih dä. Ni chaw üküt nila ini hmawt awlaw ini phawt hnäng. Niche sanh sanh dawngei, ni chaw Krito kädäng la yok saw awlaw keinih kini lo saw. Ni chaw kolom si äng yo hmuyeiyah, äini sawk mawh Hnadaga käh khraw la dä yok saw. Awlaw ni chaw che lungpel khrung äng yo hmuyeiyah, äini luhchaw lung äng dä yok hmuei saw. Keinih ni huih kini hawu saw che iyaäm Krito koong Hnadaga khrunga kini üm. Äini keinih käh dogo äng ni khäl kini poh hnäng ting kini hawuveyeih saw päng unga. Keinih käh päng khäl Hnadaga känäng dä lo saw. Ani la dä keinih a kheu tha ini tawei saw äng käh chetchaw tih a khrawng poh saw. Ni kheu tha ini tawei saw chaw che yoei saw thung känäng lo ah, äini Asanh chang Khraw känäng dä lo saw. Iyaäm chaw äng yoei saw thung äng che nüdü nawk, äini Asanh chawng Khraw la che sawk ini pek. Hnadaga la Mosi a lungpel äng thung yo bala pek hüt khaw a, Hnadaga käh a wachang dawng hüt. Mosi hmawi ha Hnadaga käh a wachang äng awa hüt. Äi awa a odok mäi hüt saw ekrenga leuwal hüt thän, Isawlael khälla Mosi hmawi pawta tinah so hnäng hüt u. Äi Mosi käh thung la düsaw lo hüt thän, äi thung la Hnadaga käh wachang dawn hüt. Äihi thung käh bi dä a wachang äng luih hüt hi, Asanh chang Khraw käh bi äi thawka a wachang äng luih hnawh ei? Mawng thung la epret mawn äm, äi thung käh bi dä a wachang äng luih hi, ihiyawh bawng khrawng khiyawtalaih tih käh bi a wachang äng luihyeih saw äm. Ayang äng mawng a wachang mäi hütäm, tua äi a wachang mäitiyah. Iyaäm äi ayang äng käh wachang thawka tua käh a wachang mawt luih. Iyaäm päihyeih däktih a bang äi hiyawh a wachang mäi hi, sawkak mäitih i hiyawh a wachang mäiyeih saw äm! Keinih a ni kini khanh mäi a dä, keinih a mawmawt kini sengkhri mäi saw. Keinih Mosi huih hi unga. Isawlael khälla Mosi hmawi awa saw dok leuwal saw hmu aih u saw koong, Mosi la awhmawi künei bala chi tawkei hüt. Khrawng khäl käh lung tua ha khaei bala mäi. Awlaw äi thung phem ini phawt hi, anih käh lung äi awatchaw la tua ha kün bala tawk. Äihi khrawng hngat Krito äng jiji sakei pänäng dä, äi awatchaw hlai hmueyal saw. Äini tua ha Isawlael khälla Mosi käh thung ini phawt hi, anih käh lung äi watchaw la kün bala tawk. Äini Kiyam la Mosi be hawu saw huih äi watchaw nahlayal hnängai. “Ani Boi pawtäng hleh ei pänäng ani la a watchaw ahlaeyal.” Ni Boi dä Asanh chang Khraw. Boi käh khraw mäidüna äi düna nulung sitha mäi. Keinih hmawi äng ükün mäitiyah. Hmrang äng dawng saw huih Boi käh a wachang awlaw wa chawi chawi a dawngei. Ni bi che Asanh chang Khraw la dä bisaw, awlaw ekrenga Boi käh lup huih ini thänei awlaw nangkei a wachang äng hnüp känäng hnüp ini luih. Hnadaga la Ani käh jen äng ni bi khrawng awp saw. Keinih äi koong kini lung thumah. Keinih umuchaw äng nawtawkaih lah saw hiyawhyei nawk saw bi bi unga. Keinih khrawng ha kramei unga awlaw Hnadaga käh kheu a hleyal ungala hawu al unga. Keinih ihisaw kini hawu saw äng Hnadaga che keinih käh sawksi. Äihi awhngaw khrawng khäl khäka sawkbrat yumphoih a kini thäneyei. Äini keinih kini hiyawk saw sidawng pawi dä thupei bala mäi hi, ubang kroktun äm anih koong dä thupei bala mäi. Ni luhdül äng käh mannat la yumahtih khäl käh mik sidawng pawi äng käh awa hmulah a pak kha bala tawk. Ni sidawng pawi Krito käh a wachang dawng awlaw ni Krito dä Hnadaga i huih äm äi huih dawng saw. Keinih kini pum kheu tara kini hiyawk saw hiyah. Äichaw a Yĕsu Krito dä Boi ting tara kini haw. Awlaw keinih Yĕsu a tämtih koong kini puma Yĕsu käh hngasaw ting kini dawnei. Iyaäm Hnadaga la hawu, “Uhiyung känäng awa thänei seh.” Ni Hnadaga la dä Ani käh a wachang yawchu hmawna nangkei lung äng awa pek saw. Ni a wachang Yĕsu Krito hmawi äng mäi. Ni awkhraw äng käh kähkän nangkei ukhäla mäi äm, nangkei khe che dek am huih dä. Äihi dogo che nangkei käh hiyah Hnadaga käh dä ting dawngeyei. Keinih üküt khaw a dukhah kini khawm äini kini lung krakah. Üküt khaw a i kini poh aih saw äm hmawtei unga, äithän kini lung tumah. Keinih a lansu mäi thän khanbawn kaw che mäi unga. Awlaw keinih mawt naw kini bünei thän tuk hmuei unga. Keinih sawkbrat Yĕsu koong düaih wavaih kini thänei. Äihi keinih kantha äng Ani ihuih dü hüt saw äm dawngai. Yĕsu koong keinih sawkbrat düaih wavaih phi äng kini kraw chih. Iyaäm keinih Yĕsu a kini chetchaw. Ni huih düsaw la keinih äng bi bi äini awsawk la nangnih äng bi bi. Kiyam äng yoei, “Kei kuyum äi koong dä käkräu saw.” Lup khiyang yum äng käh khraw äng dä Keinih ha kini kräu saw. Iyaäm keinih kini yum. Keinih kini hmawt khäh, Boi Yĕsu a düsaw känäng thouhwal tih la keinih a ha Yĕsu ängtu khrawng thouwalai. Awlaw Ani hmawi mawh a nangnih ängtu keinih a ha khrawng tawkai. Ni khäl kheni nangnih koong dä thänei saw. Awbawng khrawng la Hnadaga käh khetjen bünei ula Hnadaga a ini phiyaw ai awlaw awbawng suh tongei ula che äkiyä ini tawngeyei. Iyaäm ni khäl koong keinih käh lung tumah. Keinih kantha ekrenga ekrenga akraktun thän, kini khraw che hnüpak thawka hnüpak atha tun khäh. Keinih tana kra dukhah bitchaw kini khawm saw koong keinih sawkak Hnadaga käh a wachang kini büneyei. Äi päihyah saw a wachang che dukhah thawka awbawng elen khäh. Iyaäm keinih ibang dawngah äm, äi pawta dä kini lung kini khrawk saw. Dawngah tih pawta kini lung kraw unga. Ibang dawng äm äiche tana koong dä, äini ibang dawngah äm äiche sawkak koong. Nangkei ni kheu ini hmawt khäh, ni luhdül äng nangkei käh tambu huih kantha krak chakai. Äini Hnadaga la bisaw nangkei koong im hngat mäi khäh. Äi im che khrawng la ukut äng bisaw im hiyah, äini hawn pre a äi im sawkak mäi chän dä. Ni kantha äng kini mäi khaw a keinih dukhah äng kini kou. Iyaäm keinih kini hlüei, hawn pre a käh äi atha kantha äng khrawng künal hmawna. Iyaäm keinih äi hawn pre a käh kantha awat huih kini watai. Keinih käh kantha awkhraw kaw mäiti hnawh. Ni tambu lup kantha äng kini mäi khaw a, keinih dukhah äng kini kou. Keinih kini kantha kaw kini mäiyeih khiyang saw hiyah, awlaw bang äi hawn pre a käh kantha äng kini küneyalaih khiyang, äi koong düsaw kantha ni sawk mawh kantha a hleyalai. Ni koong dä Hnadaga la keinih a khrawng bisaw awlaw Ani la khrawng tawk peksaw bün ni kini büneyeih saw ting, Ani la keinih a Awkhraw khrawng pek. Äi koong keinih sawkbrat ni ulyah äng kini luih. Awlaw keinih kini hmawt, ni kantha äng kini mäyak ni keinih Boi känäng awhlawm hlaw a kini mäyei. Iyaäm kini hmuh saw äng keinih chetchonei unga, uyum äng dä kini chet chonei saw. Keinih a sengkhri mäi khäh awlaw ni kantha hlät ungala Boi äng kini mäyalaih saw dä awpawi ting kini khin. Äi koong keinih luhdül äng käh kantha äng mäi pei awlaw hawn pre a käh kantha äng mäyah pei, Hnadaga lung kini phiyaw aih saw dä kini sot saw. Iyaäm Krito käh tara im hmawi mawh a nangkei hang hang ni ini jaa laih lah saw. Nangkei ni luhdül äng awpawi ese ibang ini bi äm, äi äng ini bünei tawn saw huih ükütla ni ini büneyalai. Keinih kini hmawt khäh Boi a nekeh saw i äm. Äi keinih khrawng khäla kini yawkchu sawkaih saw kini hno. Hnadaga la keinih a mawmawt chaw khrawng hmawt chak khäh. Kei kakhanh nangnih ha nini lung känäng kei a mawmawt chaw anang hmawt khäh. Awlaw keinih kini pum a nangnih khäka kini hlenei tun saw hiyah. Äichaw a keinih a bawriyei naw hnäng ong nangnih a awpawi krong hngat kanang pek. Äihi khrawng lung duk so a pak aprang so ula bawriyei tih khäla nangnih krawneyal naw hnäng hmawna. Keinih kini lu khaw Hnadaga koong dä kini lu saw. Awlaw keinih lu unga khaw, nangnih koong dä lu unga saw. Krito käh khet la dä keinih a khrawng khiyup saw. Iyaäm keinih kini hmawt khäh, üküt koong ni pochongak dü. Äi äng ini yawkchu nangkei Ani ängtu ükütni ini dü. Ani hang hang koong üdü. Äi koong hengtih khäl che anih pum koong hengtih u, äini nangkei koong dütih awlaw nangkei koong sawk pekal hmueitih koong ini heng. Äi koong tühnüp kän nangkei khrawng a aprang so pula tara bi ei pu. Äi bache, Krito a nangkei ayang äi huih aprang so pula dä tara ini bi hüt saw. Äini tua äi huih poti pu. U bang ha Krito äng sakei bala che mäi äm, anih che atha ini thäneyal. Anih käh ephem kheni krokal bala che atha ini thäneyal. Ni khäl Hnadaga känäng dä thänei saw. Ani la Krito a sumei bala Ani ängtu nangkei a khrawng sak, awlaw awhngaw khrawng khäla Ani äng sakaih saw bi nangkei a khrawng awp. Ni che Keinih käh sidawng. Hnadaga la luhchaw khäl kheni a Krito sumei bala Ani käh khanbawn poh ei. Hnadaga la anih käh ngulai süpah. Hnadaga la iba anih a khanbawn a poh ei äm, äi sidawng Ani la nangkei a khrawng pek. Äi koong keinih Krito käh khrawng thänei ungala Ani käh sidawng kini hawu. Hnadaga la keinih a khrawng sumei bala upum kädäng la dä khrawng hnih ei saw. Äi koong Krito käh khrawng thänei ungala keinih ni kanang tak, “Hnadaga la nangnih a lansu känäng khanbawna anang poeyal seh.” Yĕsu Krito äng ngulai mäi hütah. Äini Hnadaga la nangkei käh ngulai Ani khrung äng tawng bala Ani a ngulai düna a hiya. Äihi Krito äng sakei pula nangkei Hnadaga käh kong hmuh pheyei hnäng hmawna. Hnadaga ängtu bitih thänei ungala keinih nangnih a hnih ei ungala kanang tak, Hnadaga känäng nini bünei saw ekhetjen usum vawnga pak po ai chu. Hnadaga la Kiyam äng hawu, “Ihisaw khin lo khaw a, Kei nang kheu kikhin. Ngulai känäng awkhiyawt nübüneyalaih saw khomhnüp lo ni, Kei nanga kini ku hüt.” Khin khäl! Tua ni äi ikhin, tühnüp ni Hnadaga la anang khiyawtalaih saw khomhnüp! Keinih a kini lung hlü mäisaw che ni, hngat la ha keinih bi äng ese khrawng dawng hnänga pak. Awlaw hngat la ha ini lung äng iha naw büneya pak. Äichaw a, üküt bi äng ni Hnadaga käh chetchaw tih ting kini dawnei. Kuluhnawk kini hmuei khaw a, phi äng kini khraw khaw a, awlaw dukhah äng kini mäi khaw a ha, keinih ni kini dawnei. Keinih bop kini hmuei, thong äng kini kraw, awlaw man mawh khrawng khäl hmawi mawh a kini khraw, ikhin pada mäyah pak kini bi lah, awbawng hnüp ipah pak awlaw eio ah pak kini mäi. Keinih asanh äng, kini prengngiya äng, kini chunei saw äng, jen äng, Asanh chang Khraw äng, keinih käh ihisaw khet äng, ihisaw sidawng äng awlaw Hnadaga tha äng Hnadaga chetchaw tih ting kini dawnei. Konghmuh a che keinih chimsawu huih a kini pohei, äila jal ha täk, ka ha ka. Keinih a üküt khrawng la hmawi khrawng pek awlaw üküt khrawng la siri ha khrawng pek. Keinih a ükütla khrawng keleih awlaw ükütla awpiyaw ha khrawng pek. Keinih ihisaw kini hawu thän ükütla hlei tih a khrawng poh. Khrawng khälla keinih a khrawng hmawt do khiyang u thän, ükütla ni keinih a khrawng hmawt khäh. Ükütla kini dü däk ting ini khin. Äini keinih tua ha kini heng pe khäh. Keinih a khrawng la dam khrawng pek thän khrawng tu u. Keinih ikhikha kini konggrah thän keinih sawkbrat kini piyaw. Keinih che sanglaisu äini awbawng a mäitih a kini poh. Keinih a iha mäyah thän keinih a lälä awbawng mäi khäh. Korin a käh khanbawn khälo! Keinih nangnih a prang baw kanang hawu pek awlaw kini lung nangnih koong hongei bala mäi khäh. Keinih käh lung nangnih koong hong ungala kini tawk. Äini nangnih che keinih käh awhngaw phak mäi chula nini lung khaei chula nini tawkei. Kei chawchuhnu huih kanang khahnei ngala kei nangnih a kanang tak tun, keinih nangnih koong kini lung hongei ungala kini tawkei saw huih, nangnih ha hongei khäl. Yumah tih khäl ängtu nini biyeih saw hno ai chu. Iyaäm äi bi thänei hnäng hnawh. Ihisaw la hiyah saw iba aphak i hni thäneyei äm? Awa la uhiyung iba utu i hni mäyeih äm? Krito la Mannat iba ihni ngiyeyeih saw äm? Ngiyei hnäng hnawh häih. Yumtih la yumah tih iba aphak i hni thäneyeih hnäng saw äm? Awlaw Hnadaga käh im ni, ulupchaw mäidün ima iba thäneyeih hnäng saw äm? Nangkei che hengtih Hnadaga mäidün im. Kiyam äng Hnadaga la hawu, “Kei, Kei käh khrawng khäl ängtu im kopoh ai, awlaw anih ängtu kämäiyei. Kei anih käh Hnadaga a käthäneyei, awlaw anih Kei käh khrawng a ini thäneyei.” Hnadaga la awlaw awhawu, “Nangnih yumah tih khäla hlät chula loal khäl awlaw awhngaw chaw mäyal khäl. Sahnah saw vawn iha binai chu, äihi kei nangnih a kanang lawkeyalai. Kei nangnih käh paw käthäneyei awlaw nangnih kei chaw chuhnu nini thäneyei. Ni kheu khäl tha mawh Boi la hawu.” Khetsu khanbawn khälo, nangkei koong ni khäl khawmei hmuei khäh. Äi koong lo khäl, nangkei ini kantha la ini khraw äng käh sahnah saw kheni asanh poeiyal äng khä. Hnadaga a kenkeh po pula asanh lawm äng chetei äng khä. Nangnih keinih koong nini lung äng ala taw khäl. Keinih che hngata ha matara po hüt unga, hngata ha khrak hüt unga awlaw hngat känäng ha kini mrataih saw so hüt unga. Nangnih a epret kanang khrawkaih koong ni kheu kawhawu saw hiyah. Kei che nangnih a ayang bang kanang tak khäh, nangnih kei käh mawt khetsu. Keinih kini dü thän kini heng thän keinih che nangnih äng utu dä. Kei a nangnih äng mawt kuyum mäi awlaw nangnih koong kei mawt kawbawriyei. Keinih käh dukhah kheni äng nangnih känäng mawt ulyah kini bünei. Äi koong kei lung mawt piyaw. Mesidoniya a kana phaw pänäng ha keinih düm lah unga. Üküt känäng ni dukhah kini bün iyaäm khrawng khäl ini siei saw. Awlaw keinih kini ke hüt. Äini ulung lekei tih khäla ulyah pektih Hnadaga la Tit lo saw äng keinih a ulyah khrawng pek. Ani lo saw jiji äng kini piyaw saw hiyah, äini nangnih ani a ulyah nini peksaw äng ha kini piyaw. Ani la kei a atak nangnih kei a i hiyawh anang hmuh aih khiyang saw äm awlaw i hiyawh bawng epret nini piyeyal saw äm. Awlaw kei pawtäng anang khawmaih koong ihiyawh ächän nini mäi saw äm äi khäl ha ani la kei a awhawu pek. Äi äng kei awlaw bang kaw piyaw. Kei käh ayang chaw äng nangnih a dukhah kanang pek thän, äi koong kei tua dukhah piyei nga. Iyaäm nangnih käh tana krachaw dukhah nini piei saw hmu ngala kei a dukhah kipieyei hü. Nangnih a dukhah kanang peka kei kawpiyaw saw hiyah. Äini nangnih nini lung dukhah piei chula nini mäichoh khrang nini hleyeal saw äng, kei mawmawt kawpiyaw. Hnadaga sitha äng dä nangnih dukhah nini bünei hüt saw. Äi äng nangnih keinih koong iha naw büneichu. Iyaäm Hnadaga lung hlü huih dukhah nübün saw la che, ngulai känäng ini krawnal sawk bala awkiyawt pawtäng ini chih. Äi äng nulung dukhah pieyeih saw mäyah. Äini luhdül äng käh dukhah la che dü dün pawta ini chih. So khäl, nangnih käh dukhah khäl äng Hnadaga la ihuih bi bisaw äm. Äi khälla nangnih a ihuih mama anang poh saw äm. Nangnih a ihuih epret mäyahtih a nini thäneyeih saw nah ei hmawna anang poh saw äm. Nangnih lung äng i hiyawh man la keh saw mäi hüt saw äm. Keinih a anang hmuh aih koong nangnih a ihuih ulyah mäi hüt saw äm. Nangnih lung äng i hiyawh jenei lo hüt saw äm. Nangnih epret mawh a dam nini pekaih koong i hiyaw nini hlüei hüt saw äm. Üküt krong äng ni nangnih epret mawh hi chu ting nini dawnei. Kei äi chaw koyok thän, äini ula matara bi äm ‘hiyah thän’ u a matara poh hmuei äm, äi khäl krong jiji koyok saw hiyah. Äichaw a, kei koyok saw che, ihiyawh bawng keinih kheu nini ngei saw äm äi Hnadaga hmawi mawh a nangnih hmuei hmawna. Ni koong dä keinih ulyah kini bünei saw. Äi ulyah äng Tit käh piyaw hmu ungala keinih ha kini piyaw. Iyaäm hang hang la ni ani lung nini phiyaw. Kei Tit khäka nangnih krong äng kawbawriyei. Awlaw nangnih kei lung tumsawk chu. Keinih ihuih nangnih khäka üküt khaw a ni ihisaw kanang tak äm, äi huih Tit khäka kini bawriei saw ha ihisaw a thänei. Nangnih khela ani a ihuih nini ngei hütäm, awlaw ihuih kenkeh la hmawi pek chula nini lawkei hütäm, äi khäl ulung äng khawyei bala nangnih lukhrunga ani käh ekhet changal. Ai koong kei mawmawt kaw piyaw. Iyaäm kei nangnih khrung äng mama küüm hnäng. Kei khanbawn khälo, Hnadaga la Mesidoniya a käh yumtih sawng khäla khetjen pek saw kheu, nangnih a kanang hmawtaih sawk khiyang. Awbawng vaih khawm ula anih chawmsi äng ini kraw hüt thän anih awpiyaw äng ini mäi hüt. Anih ini sanglai hüt thän ini lung phranei ula hlu ini pek hüt. Kei sawksi kepek, anih la ini näng saw huih ini pek hüt khäh. Awlaw bang anih sitha äng ini näng saw thawka ini pek hüt khäh. Anih la Yudia a käh Hnadaga khrawng khäla ini kuaih saw koong thasa khawh ei ula khrawng hnih ei. Äi che, Keinih kini khanh saw thawka bang unung mäi hüt. Täkchah anih la ini puma Boi khäka ini hluei hüt. Äi pänäng Hnadaga sitha äng anih la ini puma keinih khäka ha khrawng awpei. Äi koong ni bi pawi nangnih khäka chah tih Tit a khawh ei ungala kini tak, ni huih bi pawi bi bala mäiyeih koong. Awlaw ni ekhet äng käh bi nini phäih yeih koong Tit la nangnih a anang ku hmawna. Nangnih uyum äng, kräu sang äng, prengiya äng, khrawnga nini ku aih khiyang saw äng awlaw keinih a anang khet nawk saw äng awlaw ibang mäi äm äi khäl kheni äng nangnih ni, kähkän mawh. Ni huih khäl äng khrawnga nini chip phranh chula nini pekaih saw keinih kini hlüei. Kei nopoh aih lah saw ting thung kini poh peksaw hiyah. Äini äi äng awhngaw la ini kuaih saw koong ini nah eisaw khrang kini dawn saw dä. Khrawng koong i hiyawh bawng nekhet mäi äm äi kosotaih saw ko hno saw dä. Nangkei Boi Yĕsu Krito käh khetjen nangnih nini hmawt khäh. Ani mäichawtih thänei hüt pe ha nangnih koong upuma sanglaisu a poh ei hüt. Ani sanglaisu thänei saw äng nangnih mäichawtih thänei hnäng hmawna. Kei kheu che ni, yawng kuma nini chah saw bi tua nini phäyalaih saw nangnih koong pawi. Äi bi nangnih yumtih sawng la dä täkchah nini biyeih khiyang hüt saw ting nini hawu hüt. Tua nangnih ni bi phäih khäl hnäh. Nangnih nini kram khaw a i huih nini nah ei hütäm äi bi nini phäih eih saw koong nah ei khäl. Nangnih nini bün saw huih hlu khäl. Äi äng Hnadaga la nang käh äi phiyaw phoih lawkeyei. Mäyah saw vawn Hnadaga la nangnih känäng hawuveyah. Iyaäm kei lung hlü che ni hiyah. Awngaw khrawng khäl om ula ini eiyei, äini nangnih dukhah nini bünai. Kei kühlü, ükütni ngingi mäiseh. Tua nangnih a ühlü saw si mäi khäh. Äi känäng anih a ühlü saw si nini pek hnäng khäh ai. Awlaw uhnung äng nini ühlü ei hi, anih a ibang unung mäi äm, äi äng nangnih nini lai saw luih ei. Ni huih ükütni a ni ngingi thänei seh. Kiyam la hawu, “U la unung lum hütäm, äiya mratal hütah. Awlaw u la eleu lum hütäm, ani a ha lokah pak thänei hütah.” Hnadaga a äkiyä kini tawngei, iyaäm Ani la keinih huih Tit lung äng ha nangnih anang ku aih saw koong ulyah pek. Keinih Tit a nangnih khäka lo aih saw koong kini hnih ei. Äini äi thawka lensaw kheu che ni, Ani upum sitha äng nah ei bala nangnih khäka krawnalaih saw khrawkei. Tit ängtu awlaw hngat nawu a ha keteh tun. Äi khrawng che sidawng pawi hiyawk saw bi äng yumtih sawng khäl kheni khäka mawt hmawi mawh dä. Ni ha ihi khäh, yumtih sawng khälla keinih ängtu loaih koong ani a ini heh lei saw. Keinih täkchah awmawn kok ungala Boi käh wachang koong kini pheih. Khrawng khäla kini kusaw kini dawneyeih koong keinih ni khäl kini bisaw. Ni ini hlusaw mawn kini pheih saw krong äng keinih a hngat la ha ese khrawng ta hnängah pak äi koong keinih mawt sidih äng kini mäi. Keinih ibang ihi äm äidä kini bisaw. Äini Boi hmawi mawh a jiji hiyah, khrawng hmawi mawh a ha. Äi hawuvah anih ängtu keinih awhngaw nawu hngata kini teh. Keinih ani a ayapyap äng awbawng chawm ungala ni bi khäl äng ulung mäi saw kini hmuh. Awlaw nangnih khrung äng ani a uyum chang saw koong, tua ani a unung chaw anang ku aih saw ulung hlü mäi saw kuhmuh. Tit krong äng kei kawhawuvaih saw che ni. Ani che kei bi phäu awlaw nangnih a anang kuaih koong kei ängtu bi. Aw hngaw nawutih khäl ha Tit ängtu ini lo aih saw dä. Yumtih sawng khälla anih a hel ula ini teh saw dä. Anih la Krito pawtäng wachang ini lo. Anih nangnih khäka ana phaw hi ekhet dawnei bäichu. Yumtih sawng khäl khäka nangnih krong äng kawbawriyei saw usum vawngah pak thäneyah hmawna. Yudia a Hnadaga käh khrawng khäl koong, san hmuyeih saw awmawn krong äng nangnih khäka koyokaih saw iha hlütiyah. Kei kawhmawt khäh nangnih a nini kuaih saw nini lung mäi khäh. Awlaw Mesidoniya a käh khrawng khäl khäka nangnih koong kei kawbawriyei. Kei kawhawu, “Akhaiya käh yumtih khälo, “Yawng kum tähkän bang, anih la anang kuaih saw koong ächän ini mäi hüt.” Nangnih käh lung hlü la khrawng khäla ulyah pek. Tua kei äi yumtih khäla keteh tun, nangnih kanang bawriyei nawk saw usum vawngah pak thäneyah hmawna. Kei ihuih kawhawu äm, nangnih nini kuaih saw koong ächän mäi khäl. Kei kuyum nangnih ächän nini mäyeih saw dä. Äini Mesidoniya a käh khrawng khäl kei ängtu lo ula nangnih ächän mäi chu saw anang hmuh khaw, äi keinih koong ihuih hiyawh ei äm. Äini keinih thawka nangnih unung hiyawh ei nini büneyei. Äi koong ni yumtih khäla nangnih khäka kei khawngah ini chetaih saw, hnih ei ngala katakaih saw hlü ting kawtawk. Awlaw nini hlu aih saw ting nini khawmei saw kok chula ächän mäi hnäng hmawna. Äi uhlu nini lung känäng dä pek bäichu, khrawng khälla tha äng ini lawk saw huih thäneyah hmawna. Nini lung äng tawei bäichu, ula ichih leu chäh äm ani la etheih pa leu bünai awlaw ula ichih nung chäh äm ani la etheih pa nung bünai. Hang hang la ni ini lung äng ibang ini pekaih saw ting poei ula ini tawkei äm äidä ani la pekseh. Hngat la ha ini lung dukhah äng pekah pak ‘hiyah thän’ ini pekaih lah saw ting khin ula pekah seh u. Iyaäm ula awpiyaw lung äng pekäm Hnadaga la ani a khet nawk. Nangnih nini hlüei saw kheni sawkbrat mäi hmawna, Hnadaga la nangnih a ühlü saw thawka awbawng anang pek hnäng khäh. Awlaw khrawng khäla nini ku aih saw koong nangnih a sawkbrat ni, ühlü saw thawka unung mäi hmawna. Kiyam äng yoei bala mäi, “Ani la sanglaisu khäla ichip pranh äng uhlu pek khäh. Ani käh khet che sawkbrat ni mäi.” Hnadaga dä chäh aih koong ichih pektih awlaw eisaw hluih tih. Ni Hnadaga la nangnih a ha nini chäh aih koong, ühlü saw huih ichih anang pekai. Ni chih chät bala nini lung phranh chula nini pekaih saw koong unung etheih pa paw ai. Sawkbrat nangnih käh chip pranh hmawna, Ani la üküt lawma ni nangnih a anang hluih yei. Nangnih käh hlu keinih sanglaisu khäla kini pek khaw a, anih la piyaw ula Hnadaga a äkiyä ini tawngeyei. Nangnih käh ni bi koong Hnadaga khrawng khäl ini laisaw jiji ini luih yei ting hiyah. Äini nangnih käh ni bi koong Hnadaga khrung äng awbawng khrawng la piyaw ula äkiyä ini tawngeyei. Nangnih ni huih awmawn pek chula nini chetchaw saw äng awbawng khrawng la Hnadaga a ini phiyaw ai. Awlaw nangnih sidawng pawi nini hiyawk saw äng ha, awbawng khrawng la Hnadaga a ini phiyaw ai. Nangnih nini lung phrah nei chula anih a ha nini pek, awlaw awhngaw khrawnga ha nini pek saw äng Hnadaga a ini phiyaw ai. Anih la nangnih koong ini lung khraw ula ekhet äng suh ini tongai. Iyaäm Hnadaga käh khetjen nangnih lukhrunga lo däk. Lo khäl, i äng ha chutaih hnäng ti saw üküt thawka lentih phiyaw phoih khrawng pek saw koong, nangkei Hnadaga a äkiyä tawngei äng khä. Kei Pol, kupum kädäng la Krito käh nävei saw la jen lung äng nangnih a kanang hnih ei. (Khrawng la ini hawu, kei nangnih ängtu kämäi khaw a näuei ngala kämäi, awlaw nangnih mäi chu khaw a kenget.) Kei kanang hnih ei, kei nangnih khäka kolo khaw a nangnih khrung äng kaman opok sawkai chu. Iyaäm keinih luhdül hlü koong dä kini bisaw ting hawu tih khäl äng, kei kenget hnäng khäh ting, kei kaw hmawt khäh. Ni ihi khäh keinih lühdül äng dä kini mäi saw. Äini nangkei luhdül äng käh thi saw kantha koong jal täkei pu. Keinih jal kini täkei khaw a, kini sumei saw jal täk dün vawn khäl che luhdül äng käh vawn hiyah. Hnadaga käh tha mawh jal täkdün vawn khäl dä. Lansu khälla jal täk dün vawn ini tawkei dün im keinih kini khrah. Hiyah saw ini toksawkei saw khäl kheni keinih kini khrah. Hnadaga ngen pawtäng mäyahtih khäl kheni a keinih kini khrah. Awlaw ini tawk saw khäl kheni a khiyup ungala Krito ngeitih a kini poh. Nangnih lälä nini ngei chak pänäng, ngeiyah tih ini mäi hi keinih ani a dam kini pekalai. Nangnih che aprang pawt dawng saw dä nini hmuh saw. Läsulapei upuma Krito käh khrawng ting khinei hi, ani la tawk seh, keinih ha anih huih Krito käh khrawng dä. Boi la khrawng pek saw dogo äng kei bitchaw kawbawriyei thän, kei hiyawkei nga. Nangnih a krakaih koong hiyah, äini nini paw aih koong dä Hnadaga la keinih a äi tha khrawng pek saw. Kei ni chaw khäl yo ngala nangnih a kanang kheh ei ting khinai chu. Üküt khrawng la ini hawu, “Pol käh chaw khäl ahat awlaw ama khäh. Äini ani keinih äng mäi hüt khaw a, ani awngiyaw awlaw ani käh kheu khäl che iha hiyah!” Ni huih khrawng la yawchu seh u, keinih awhlawm hlaw a kini mäi khaw a chaw khäl äng ihuih kini yok äm, awlaw nangnih äng kini mäi khaw a i huih kini poh ei äm, äi koeyah. Nangnih dukäng üküt kütla ini puma ini hlenei chi. Keinih äi huih khrawng äng kini chutiyeih saw sengkhri tawei unga. Anih ihuih ini mäk saw äm, anih ini pum la ini puma ini tünei saw. Awlaw ini chutei saw. Äini Hnadaga la khrawng pek saw bi äng ini tawn saw täh dä ini bawriyei hnäng. Nangnih ha äi bawriyei tawn ting hmat la khrawng pek saw dukäng nini mäi khäh. Nangnih khäka sidawng pawi hiyawka kini lo khaw a, Hnadaga la tawk saw bam pranga chet unga. Iyaäm Krito käh sidawng pawi äng keinih dä täkchah nangnih khäka kini lo hüt saw. Hnadaga la poh saw je prang äng aw hngaw khäl käh bi äng ha bawriyei hnawh unga. Nangnih käh yum pawsaw äng tutu keinih nangnih dukäng awlaw awbawng bi kini bi hnängai. Äini Hnadaga la je khoih bala tawk hüt saw täh dä kini biyeih saw. Nangnih känäng awlaw awhlawm hlaw a mäitih khäla ha sidawng pawi kini hiyawk hnängai. Äihi khrawng la ini bi chän laa bi ungala kini bawriyei ting hngat la ha hawu hnäng hnawh u. Äini kiyam la hawu, “U bawriei äm ani la Boi la i poh äm äi krong äng dä bawriei seh.” Iyaäm khrawng hngat upum käh bi äng bawriei khaw, ani käh phiyaw phoih Hnadaga la pekah. Äichaw a Hnadaga la ua phiyaw äm, äiya dä Hnadaga la phiyaw phoih pek. Kei bitchaw mäktih huih käkräu thän nangnih anang chuneyeih saw kühlü ei. Hnadaga selei saw huih nangnih koong kei ha kulung selei bala mäi. Niche Kei sanh tih hngawk hngu hngat äng pawtaw kepekeyeih koong khawmei ngala kawtawk hüt. Ani che Krito. Äini kei keke saw che, Iva a pholla kramei bala kawl äng kraw saw huih nangnih ha kawl äng nini kraw ai. Awlaw kei keke saw che, khrawng la anang kramei bala ini lung sanh chula Krito a nini khetnawk saw känäng anang lawkalai ting. Iyaäm läsupei nangnih khäka olo khaw, awlaw nangnih mawng Yĕsu käh sidawng nini yawkäm, äila dä awhngaw Yĕsu krong anang hawu pek hi äi nini lawkei. Awlaw nangnih tua ni awkhraw la sidawng pawi nini lawkei saw äng keinih känäng nini bünei saw khraw la sidawng pawi hang hang awhngaw eyal chak. Nangnih teh hmueitih ting khin chula ua elen ting nini khinei äm, äi khäl thawka kei kenem ting khinei nga. Kei mawmawt chaw kräu hnäng nga ting nini khin thän, kei a keprengiya mäi khäh. Äi nangnih a ükütni sanh sanh kanang dawn khäh. Kei nangnih khäka Hnadaga sidawng pawi kaw hiyawk khaw a, nangnih känäng awmawn law ei nga. Nangnih a alang gong kanang poh aih saw koong kei kupuma kaw hngiyaw ei. Äini kei epret kibisaw ei? Kei nangnih ängtu kibi khaw a awhngaw yumtih sawng khäl känäng dä awmawn kawlawkei saw. Nangnih a kanang kuaih koong dä Kei anih känäng awmawn kawlawk saw. Awlaw nangnih khäka kämai hüt khaw a, kei awmawn kühlü ei thän, anang kuaih koong nangnih a kanang khru sawk nga. Kei kühlü ei saw kheni Mesidoniya känäng lotih yumtih kawnawu khälla dä khrawng lo pek saw. Kei nangnih känäng tua ha awlaw u hnung äng ha uku kanang hawuvei hnawh nga. Krito käh ihisaw kei äng ihuih mäi äm, äi huih nangnih käh pre lekchaw Akhaiya a kawbawriyei saw ha, hngat la ha dümal hnäng hnawh u. Iya? Kei nangnih a kanang khet naw nga saw koong ei? Hnadaga la hmawt khäh, kei nangnih a kanang khet nawk saw. Kei sawkbrat awmawn kanang hawuveyah pak ihuih kibi äm, äi huih dä bi ngala kämäyeih saw. Kei käh ni khrang la äi lupsongeitih teh hmueitih khäl äng kokoyei saw dawnai. Ni khrawng khäl che hlei tih teh hmueitih khäl dä. Anih la khrawng khäla kramei ula Krito käh teh hmueitih ting lup ini songei. Äini äi äng nawmawh aih saw iha mäyah! Iyaäm Mannat la ha upuma hawn natchaw huih wachawi chawi a poyei bala lup songei khäh. Awlaw Mannat hngasaw khälla ha konghmuh sang hngasaw huih ini poh ei khaw, äi äng nawmaw aih saw iha mäyah. U hnung äng anih käh bi khawh huih anih la dam ini büneyalai. Kei awlaw kawhawu, hngat la ha kei a ämäk ting khrawng khinai chu. Äini nangnih dä kei a ämäk ting anang khin khaw, nangnih kei a ämäk huih awlawei khäl. Äi äng kei bitchaw khat kaw bawriyei hnängai. Kei tua ibang kawhawu äm, äi Boi käh ana äng kawhawu saw hiyah. Äini ni kawbawriyei saw äng kei lälä mäktih khrawng huih käkräu. Iyaäm khrawng khäl ini pum kantha krong äng dä ini bawriyei saw. Äi äng anih huih kei ha kawbawriyeih saw. Nangnih nini puma prengiya mawh ting nini khinei. Äi koong nangnih awpiyaw äng mäktih khrawng khäla nini lawkei. Iyaäm läsulapei nangnih a hngasaw anang poh ei, vawn anang lawkei pek chak, anang heng nawk, enem äng anang sot, nini beng anang beh, äi khäl kheni nini chunei. Nangnih khäka ni khäl kibiyeih saw katha mäyah ting, kawhawuveyeih saw kei mawt kawhiyawkei. Awhngaw khäl ini bawriyei hnäng hi, kei ha kaw bawriei yeih hnäng saw dä. Äini ni khäl che mäktih khrawng käh bi huih dä. Anih Hibru ei? Kei ha Hibru dä. Anih Isawlael ei? Kei ha Isawlael dä. Anih Awbraham käh chen ei? Kei ha Awbraham käh chen dä. Anih Krito käh hngasaw ei? Kei ulu huih kawdawng thän, anih thawka che kei hngasaw pawi dä. Kei anih thawka awbawng tha äng bi kibi lah khäh. Khrawng khälla kei a anih thawka äkräng kräng thong ima khrawng khrawk khäh. Kei anih thawka äkräng kräng bop dün jäi äng bop kuhmuei khäh. Awlaw anih thawka äkräng kräng küdüaih saw phi äng kawkraw. Yudi khälla thung gip gala kräng koh chi sät hngaw daraih khrawng bop. Roma käh khrawng khälla thi hiyong äng kräng thum khrawng bop hüt. Awlaw krängak che khrawng khälla khrawng tukaih saw koong lung äng khrawng khong nawk. Awlaw mret äng kräng thum daraih tuisampho neksaw äng chi kawkraw. Äidä ühnüp awyawn tui äng hnüpak kämäi lah hüt. Kei ätän täna kechet chonei hüt khaw a, tui hnäl äng, tamdah kutäng, kupum yapsaw Yudi kutäng awlaw Yudi hiyahtih kutäng phi äng kawkraw hüt. Awlaw Kei mräh a ha, mäksetdava kutäng ha awlaw mretäng, hleitih khanbawn khäl kutäng, ajapjap phi äng kawkraw hüt. Kei Krito a kechetchaw aih saw koong awbawng tha bi kibi hüt. Üküt khaw a ipah pak kämäi lah hüt. Üküt khaw a kei bu küduyei saw la tui kahalei saw äng dukhah kübün hüt. Üküt khaw a iha eio ah pak, awat taweiyah pak, im lou mäyah pak kämäi hüt. Ni dukhah khäl krong kawtawk lah saw hawuvah ha, kei ätän täna käh awhngaw awhngaw yumtih sawng khäl koong hnüpak kiyawnah kokrong grah. Hngat dä ngiyaw khaw, kei ha ani huih kaw ngiyaw kipi ei. Awlaw hngata dä ngulai pawtäng ini chih khaw, kei awbawng dukhah kipi ei. Kei dä kawbawriyei yeih khiyang khaw, mawng bi äng kei kaw ngiyaw äm, äi bi äng dä kawbawriyei yeih saw. Sawkbrat pisih mawh nangkei käh Boi Yĕsu Krito käh Paw Hnadaga la hmawt khäh, kei hlei nga. Kei Damaska mräh a kämäi khaw a mawng Arita la tawksaw khrawng la kei a khrawng mawnaih saw koong mräh tamkha a chongtih tawk. Äini kei khanbawn khälla tongchaw hngat äng oom ula mräh tamkha lung pawng känäng mräh pranga khrawng khomal. Ni huih kei ani känäng kechenal hüt. Nawbawriyei saw pawyah thän kaw bawriyei yeih saw dä. Äini Boi la epek saw mawngla Ani la kei a awdawn saw krong che kawhawuvaih lah saw dä. Kei yumtih hngata kaw hmawt. Ani a khokum lei hli khawngah hlüng tih hawn pre a khawi hmueiyal hüt. Äini ani a khawi hmueiyal saw awmawnga ei ‘hiyah khaw’ akraya ei äi kei hmawt nga, Hnadaga la dä hmawt saw. Hnadaga jiji la dä hmawt saw äi khrawnga akantha läktäng khawi hmueyal saw ei, hiyah khaw kantha kawei. Ani a hawn pre a chih hmueiyal. Äi düna ani la asam hngat yawk, äi asam che i äm phawngal hnäng ti awlaw luhchaw la hawu bünti. Kei ni huih khrawng khäl koong dä kawbawriyei yeih saw. Äini kupum koong bawriyei hnawh nga. Kei che kaw ngiyaw saw koong dä kawbawriyei yeih saw. Äini kei kawbawriyei yeih khiyang thän mäktih a thänei hnawh nga. Iyaäm Kei ihisaw dä käkräuvaih saw. Äini kei bawriyei hnawh nga. Iyaäm kei a hngat la khrawng hmuh saw la kekheu ini yawk saw thawka kei a lentih ting khrawng khinah seh. Kei kawbawriyei saw känäng awhlawm hlaw a awtawkaih koong Hnadaga la ihling huih hngat nujuei nawksaw kakantha äng awthawn. Äila kawbawriyei yeih saw känäng awhlawm hlaw a awtawk. Iyaäm kei ajapjap mawng pawi ku hmuh. Ni hling che mannat khäl käh sidawng huih. Ni ihling kei känäng awhlawm hlaw a chetal hmawna kei Boi khäka krän thum suh kotongei. Äini Boi la kei a atak, “Kei käh khetjen nang koong khäk khäh. Nang nawngiyaw khaw a Kei käh tha ihiyawh lenäm äi nu hmuh ai. Äi äng kei kaw ngiyaw khaw a kawbawriei yeh koong mawt kawpiyaw. Iyaäm äi khaw a Krito käh tha la kei a ka bala awtawk. Äi äng kei Krito koong kaw ngiyaw do, keleih kuhmuei do, dukhah kawkhawm do, kuluh nawk kuhmuei do. Iyaäm kei itih a kaw ngiyaw äm, äi khaw a kei tha mawh.” Kei kupuma mäktih huih kopoh ei thän, nangnih dä kei a tha äng mäktih a anang poh saw. Kei awpawi kibisaw nangnih dä nini dawnaih saw tawn saw. Iyaäm nangnih elen ting nini khinei saw teh hmueitih khäl thawka kei lek nga. Kei teh hmueitih ting kanang dawneyeih koong ayapyap nawmaw nawkaih saw bi la hmat la kanang dawn. Kei nangnih ängtu kämäi hüt khaw a, ükütni chunei ngala kanang dawn. Awhngaw yumtih sawng khälla ihuih pisih ini bünei äm, nangnih ha äi huih pisih nini bünei. Äini okoyei saw che ni, kei anih känäng uku kawhawuvei thän, nangnih känäng uku kanang hawuvei nga. Uku kanang hawuvei ngasaw koong ähläh khrawng pek bäichu! Kei nangnih khäka ni äng kräng thum koloaih koong ächän kämäi. Awlaw nangnih känäng kei iha kanang hawuvei hnawh nga. Nangnih käh awmawn hlüei nga nangnih dä kanang hmuh aih khiyang saw. Chaw chuhnu la nupaw a hluih tawnah, äini nupaw la dä ani chaw chuhnu hluih tawn saw. Nangnih a kanang kuaih koong kei a ibang mäi äm, äi ükütni kusum hnäng saw koong kulung piyaw khäh. Kei nangnih a unung kanang khet nawka nangnih kei a bitchaw anang khet nawk saw ei? Kei nangnih a awmawn koong kanang khru sawk nga ting khaw ak äng nini mäyeih lah saw. Äini üküt kütla ini hawu nawk theih, nangnih a kanang kramei ngala kawl äng kanang khrawk. Äini iba äm? Kei käh sidawng hiyawktih khäl nangnih khäka sidawng hiyawka ini lo khaw a, kei nangnih a kanang kramei saw ei? Kei Tit a nangnih khäka chetaih koong khawh ei ngala katak. Awlaw ani ängtu awhngaw yumtih nawu hngta keteh hüt. Äini Tit la nangnih a anang kramei hütei? Nangnih nini hmawt khäh, kei hnih Tit che lup khiyang lung tawei hnih ngala dä bi kihni bisaw. Awlaw lup khiyang dä kihni kräu sang saw. Kei hnih kihni puma kihni kaeiyeih koong nangnih khäka ni kheu khäl kihni kräu saw ting nini khin saw ei. ‘Hiyah’ Krito la ihuih hawuvaih saw khrawng takäm, äi huih dä Hnadaga hmawi mawh a kihni kräu saw. Khetsu khanbawn khälo, keihnih kihni bisaw khäl kheni nangnih kanang kuaih koong dä. Nangnih khäka kolo aih khaw a, nangnih a akhrang kanang chok saw huih kanang hmu aih nga saw koong kei keke khäh. Awlaw kei käh mäichoh khrang ihuih nini hmu aih khiyang äm, äi huih u hmu naw theih hnawh chu. Kei keke tun, nangnih nini siyei saw, nini seleih yei saw, nini man pok saw, nini pum jiji nini tawkei saw, nini keleih ei saw, hngala hngat be nini kräuvei saw, nini bawriyei saw, kisi giri nini mäi saw kanang khomai. Awlaw kei keke saw che, kei nangnih khäka awlaw kolo khaw a Hnadaga la nangnih hmawi mawh a kei a hiyawh ei epekai. Ngulai bi bala imik sawuvei saw kän ini lung hleyeyalah tih awlaw ajapjap lawma krak tih khäl koong awbawng kakap ooi kämäyeih lah saw. Kei ni äng kräng thum nangnih khäka kolo tun. Kiyam äng yoei khäh, “Pochong hnih thum käh sawksi äng lala epret pei ihisaw a thänei.” Kei nangnih khäka sät hnih kolo hüt khaw a, ngulai bi hüt däktih khäla kei sidih kepek hüt. Tua kei nangnih ängtu mäinga thän awlaw krawnak sidih kanang pek, kei awlaw krawnak kolo al khaw a, ngulai bitih kheni dam känäng lät hnawh u. Iyaäm Krito la lälä kei a usumei bala kräu saw nini hmawtaih khiyang saw kei kanang dawnai. Krito la nangnih äng kheu tawei khaw a Ani ngiyaw ah. Äichaw a, nangnih dukäng Ani che tha mawh. Krito ngiyaw khaw a Ani a krut äng thawn hmuei hüt thän, Hnadaga tha äng Ani hengal. Nangkei Ani ängtu ini sakei saw äng ini ngiyaw. Äini nangkei äi kheu ini tawei saw äng Hnadaga käh tha Krito äng ini pheh yei. Krito äng nini mäi ei, äi nangnih nini puma ini chawmeiyeih saw tawn khäh. Awlaw nini puma tara poyei chula soei khäl. Äihi Yĕsu Krito nang äng mäi saw ei naw hmawteyei. Krito nangnih äng mäyah khaw nangnih yumah tih. Äini kei ka khanh khäh, nangkei hiyum hnawh pu saw nangnih nini hmawtai. Nangnih epret bi biyah hmawna keinih Hnadaga khäka suh kini tong khäh. Keinih suh kini tong saw che khrawng la awpawi khäh ting khrawng khraw kaih saw koong hiyah. Äini nangnih pawyeih saw koong dä suh kini tongsaw. Iyaäm nangkei ihisaw käh awhngaw phak mäi hnäng hnawh pu. Äini ihisaw pawtäng jiji dä ini phakeyeih lah saw. Keinih kini ngiyaw khaw a kini piyaw, äini nangnih che nini ma. Äi äng keinih suh kini tong khäh nangnih ekejet thänei hnäng hmawna. Nangnih känäng kei awhlawm hlaw a kämäi khaw a kei ni chaw kanang yok. Kei nangnih khäka kolo khaw a thi la man sumei ngala Boi la epeksaw dogo khrak lah a pak. Kei äi dogo nangnih nini paw aih saw koong dä kusumaih khiyang, nangnih nini krakaih saw koong sumaih khiyang nga. Kei khanbawn khälo, äpäih sum äng hang hang a kanang khäh ei! Hnadaga mikäng ibang pawi äm äi bi khäl. Kei i kawhawu hütäm äi khin khäl, kheu khawak äng mäi khäl, jelkhiyamsa äng mäi khäl. Awlaw Hnadaga käh khetjen la jelkhiyamsa nangnih ängtu mäiseh. Nangnih hngat la hngata khätei chula chabaih bukei khäl. Awlaw Hnadaga käh khrawng khäl kheni la nangnih a anang khäh ei. Boi Yĕsu Krito käh khetjen la Hnadaga käh khet awlaw Asanh chang Khraw pisih nangnih khrung äng kraw seh. Kei Pol, Krito käh hngat teh hmueitih käthänei. Kei ni käthänei saw khrawng känäng hiyah awlaw khrawng la kei khrawng poh saw ha hiyah. Äini Yĕsu Krito kädäng la awlaw Ani a düsaw känäng hengal sawktih, äi Paw Hnadaga känäng dä kei ni kübünei saw. Kei ängtu yumtih nawu khäl ini mäi. Keinih Galati pre lekchaw a käh yumtih sawng khäl khäka ni chaw kini yoktun. Keinih käh Paw Hnadaga awlaw Boi Yĕsu Krito la nangnih a khetjen la jelkhiyamsa anang pek seh. Nangkei käh Hnadaga awlaw Paw käh sitha huih tukat äng käh ese känäng nangkei a khrawng ka hnäng hmawna Krito la nangkei käh ngulai koong awsawk pekei hüt. Nangkei sawkbrat Hnadaga a ini phiyaw aih saw tawn khäh. Amen. Krito käh khetjen äng nangnih a ula upum käh khrawng poh eiyeih koong anang panei hütäm, Ani a alanda hlätal chula awlaw yapak sidawng pawi pawta nini lung nini pekei saw hmu ngala kei lälä kawmaw. Ihi khäh, ni sidawng pawi hawuvah awhngaw sidawng pawi mäitiyah. Äi thän ha hngat pai hnih khrawng khälla nangnih a üdümchaw anang taw u, awlaw Krito krong äng käh sidawng pawi ini hleyalaih khiyang. Äini mawng sidawng pawi keinih nangnih khäka kini hiyawk hütäm, äi chaw a nangnih khäka awhngaw khrawng khälla awhngaw sidawng pawi ini hiyawk pei, äi keinih kini hiyawk pei, ‘hiyah thän’ hawn natchaw la hiyawk pei, äi hiyawktih khrung äng pathamah kraw seh. Kei ayang äng ha kawhawu hüt tua awlaw kawhawu tun, nangnih nini bünei saw sidawng pawi chaw a awhngaw sidawng pawi ini hiyawk khaw, äi sidawng pawi hiyawktih ngulai mei äng käh dam äng kraw seh. Ni äng kei u käh piyaw kübüneyeih saw kosot tun saw äm, khrawng käh ei, ‘hiyah khaw’ Hnadaga käh ei? Kei khrawnga kawphiyaw aih saw kosot saw ei? Kei khrawnga kawphiyaw aih saw kosot khaw, kei Krito käh hngasaw hinga. Nawutih khälo, kei kanang takaih, kei mawng sidawng pawi kanang hiyawk hütäm, äiche khrawng känäng lo saw hiyah. Khrawng hngat känäng ha kei äi sidawng pawi büneinga. Awlaw hngat la ha kei a ochok u. Äini Yĕsu Krito kädäng la dä äi khäl kei a awdawn saw. Yudi thung kätäm hüt khaw a iba kei kämäichoh hütäm, äi khäl nangnih nini yawk khäh. Awlaw ni ha nangnih nini yawk, Hnadaga a yumtih sawng khäla jeneyah pak kukuluh nawk hüt, awlaw känäng saw si kakhrah aih saw kosot hüt. Yudi konghmuh lawm kätäm saw äng kei säntu khäl thawka kei awbawng awhmawi mawh äng kämäi hüt. Nuchen pawsawk khäl käh thung ini täm saw äng kei a awbawng lawphah mäi hüt. Äini kei luhdül äng lo hawm nga saw khaw känäng bang Hnadaga la eheh lei hüt. Awlaw Ani käh khetjen äng teh hmueitih käthäneyeih koong kei a apanei hüt. Kei Yudi hiyahtih khäl khäka Krito käh sidawng pawi kaw hiyawkaih koong, Hnadaga la isitha äng Ani chaw a kei a awdawn. Äi khaw a kei hngat khäka ha akram lawkeya chet hütnga. Awlaw kei khawngah hel hmueitih Yĕlusalema käh teh hmueitih khäl khäka ha kei chet hütnga. Äichaw a kei Arawb pre a kechetal hüt. Äi pänäng kei Damaska a kawkrawnal. Khokum thum pänäng Koipha äng khomeya Yĕlusalema kechet hüt. Ani ängtu äiya hnüp lei hngaw kämäi hüt. Äi khaw a Boi käh nawu Yakub a dä kokhom hüt saw, awhngaw teh hmueitih khäla kei khom hütnga. Kei nangnih khäka kanang yok saw khäl ihi khäh. Hnadaga la hmawt khäh kei hleinga! Äi pänäng kei Siriya pre la Kiliki pre lekchaw a käh ala khäla kechet hüt. Äi khaw a ha Yudia pre lekchaw a käh yumtih sawng khälla kei ‍a awhmawt hawm hüt u. Awhngaw khrawng la anih a ini hawu pek saw jiji dä ini hmawt hüt. Ula yumtih sawng khäla tukaih khiyang hütäm, äila tua sidawng pawi hiyawk tun. Awlaw kei koong anih la Hnadaga a ini phiyaw hüt. Kei khokum leihli pänäng, Banaba ängtu Yĕlusalema kaw krawnal. Tit a ha kei ängtu kichih pui nawk. Hnadaga la kechetaih lah saw ting atak koong kei kechet. Mawng sidawng pawi kei Yudi hiyahtih khäl khäka kawhiawk chi äm, äi kheu anih a kawphawngh pekal. Äi kheu khäl elenchaw khäl khäka awhngaw chaw kawhawu pek hüt. Iyaäm kei tha po ngala kibisaw khäl usum vawnga saw a äthäneyei ting keke hüt. Kei phäu Tit che Grik yapsaw äthänei hüt thän, ani a uvun awteyeih koong tha tawng hmueyei hütah. Äi thän ükütla che Tit la vun awteyeih saw ini hlüei hüt. Ni khrawng khälla yumtih khäl huih ini poh ei. Umuchaw äng uduk kawl ini sotaih koong keinih sawng äng ini vawng hüt. Krito Yĕsu äng kini sakei saw äng kini sitha mäi saw ini sotaih koong. Anih la keinih a Mosi thung käh hngasaw khrawng po aih khiyang hut. Äini sidawng pawi äng awdawngei saw ihisaw keinih äng mäi hmawna tanakra chaw koong ha keinih lekei unga. Yumtih sawng khäl äng käh alang gong khrawng khälla kei tara kawhaw saw kehleyalaih saw iha khrawng hawu pek u. (Anih ilup khrawng äm kei iha säi nga. Iyaäm Hnadaga la üküta ni titih dä sot saw.) Äichaw a Hnadaga la Pitol a Yudi khäl khäka sidawng pawi hiyawkaih saw bi awp saw huih, Hnadaga la kei a ha Yudi hiyahtih khäl khäka sidawng pawi kaw hiyawkaih saw koong bi aw awp. Hnadaga käh tha äng Yudi khäl khäka Pitol teh hmueitih äthänei saw huih, Yudi hiyahtih khäl khäka kei ha teh hmueitih käthänei. Hnadaga la kei a ni bi aw awp saw sidawng yumtih sawng äng käh elenchaw Yakub, Yohan awlaw Pitol tih la ini hmawt. Keinih phak khiyang kini mäi saw ahmat huih kei la Banaba a chabaih khrawng buk hüt. Anih la Yudi khäl äng ini biyeih saw awlaw kei la Banaba la Yudi hiyahtih khäl äng kihni biyeih saw kini krawei. Yĕlusalema käh sanglaisu khäl krong kihni lung äng kihni tawkeyei saw koong anih la keihni a khrawng hni ei. Ni bi kibiyei saw koong kei a sawkbrat hmawt ulyah mäi. Pitol Antokia lo al khaw a, khrawng khäl hmawi mawh a kei ani kheu kasah pek. Iyaäm ani che hiyah saw lawm pawtäng mäi hüt. Yakub känäng Yudi khäl äng käh yumtih hngat pai hnih niya lo khawngah Pitol la Yudi hiyahtih yumtih sawng khäl äng eiok hüt. Äini äi khrawng khäl ini lo pänäng Yudi hiyahtih yumtih sawng khäl känäng Pitol u hnung sipeyal awlaw anih äng eio tiyah. Iyaäm ani la Yudi khäl äng käh yumtih khäla ekeh. Pitol ängtu awhngaw Yudi yumtih khäl ha ini keh saw huih ini poh ei lawh. Awlaw Banaba la ha anih huih opoh ei. Äini kei kuhmuh sidawng pawi äng ihisaw mäi saw huih anih mäichoh khrang poh ei u. Äi khaw a Pitol a khrawng khäl hmawi mawh a kei kochokei. Kei Pitol a katak, nang Yudi thänei tila Yudi mäichoh khrang huih poeiya pak Yudi hiyahtih huih iya nämäichoh saw äm? Äihi nang iya Yudi hiyahtih khäla Yudi thung ini sumeyeih koong tha nopoh saw äm? Ihi khäh, keinih Yudi thänei ungala luhdül äng kini lo. Keinih Yudi hiyahtih huih ngulaisu hi unga. Tua keinih kini hmawt, Yĕsu Krito a yumei bala khrawng hngat konghmuh sang äthänei hnäng, Mosi käh thung la hawu saw huih bi kawi äng krängak ha khrawng hngat konghmuh sang thänei hnängah. Äi koong keinih Yĕsu Krito a yumei ungala dä konghmuh sanga kini thänei saw, thung la hawu saw bi kawi äng hiyah. Iyaäm thung la hawu saw bi kawi äng hngat ha konghmuh sang thänei hnängah. Krito äng epret mäyahtih ting Hnadaga la lawei hmawna nangkei ini hno khaw a, Yudi hiyahtih khäl huih nangkei ha ini puma ngulaisu ting ini hmuei khaw, Krito la ngulai dä orosi saw ting nangkei ini yawk chuaih saw ei? Hiyah, krängak ha hiyah! Kei kakhrah hüt saw thung dä awlaw kopoh ngalaih saw kachah hi, kei thung khrak tih a käthänei. Kei Hnadaga koong heng hnäng hmawna thung äng küdü däk. Kei Krito Yĕsu ängtu krut äng theh kuhmuei. Äi koong kei hengti nga, Krito dä kei äng heng bala mäi saw. Tua kei heng ngala kämäi saw ha Hnadaga chaw khrung äng yum ngala dä. Ani la kei a ekhet naw bala kei koong sawk epekei. Hnadaga käh äi khetjen a kei hiyum sawk nga. Thung ngei tila dä konghmuh sang ini thänei hnäng hi, Krito düaih saw hlü thaw hnawh saw. Mäktih Galati sawng khälo! Nangnih a ula to anang poh saw äm? Yĕsu Krito krut äng ihuih üdüsaw äm, äi kheu nangnih a sanh sanh hawu pek hmuyei hütah ei? Nangnih känäng ni kheu hngat jiji dä kaw hmawtaih khiyang, nangnih Mosi käh thung ngei chula Asanh chang Khraw a nini bünei hüt saw ei? ‘Hiyah khaw’ sidawng pawi yumei chula nini bünei hüt saw ei? Nangnih äi hiyawh iya nini mäk saw äm? Nang Hnadaga Khraw äng chah tila nupum tha äng tua näphähyalaih saw nosot. Nangnih äi hiyawh dukhah älälä chaw dä nini khawm saw ei? Älälä chaw nini khawm saw hiyah. Hnadaga la Ani Khraw anang pek saw awlaw nangnih dukäng nawmaw nawkaih saw bi ha ibisaw, nangnih thung nini ngei koong ei ‘hiyah khaw’ sidawng pawi nini khin saw la nini yumei saw koong ei? Kiyam la hawu saw huih Awbraham kheu tawk chawm khäl. “Awbraham la Hnadaga kheu uyumei hüt, äi uyum la dä ani a konghmuh sanga opoh.” Äihi nini lung äng tawei bäichu, Hnadaga a ‍yumtih dä Awbraham käh chawchuhnu. Kiyam äng ayang känäng bang yoei bala mäi. Uyum koong dä Hnadaga la Yudi hiyahtih khäla konghmuh sang ting üsüh ai. “Awbraham khäka ni kheu hawu hmuei.” “Nang känäng hang hang yapsaw la pisih ini büneyei.” Awbraham la yumei awlaw pisih bünei. Äi koong Awbraham huih uyum taweitih khälla Hnadaga käh pisih ini bünei. Iyaäm kiyam äng yoei, “Mosi käh thung boih hiyol äng yoei saw hang hang ngeyahtih la pathamah büneyei.” Äi koong thung sumei bala ula Hnadaga a awphiyaw aih saw osot äm, äi khäl khrung äng pathama kraw ai. Äini thung ngei ula hngat ha Hnadaga hmawi maw a konghmuh sang thänei hnäng u. Kiyam la hawu, “Hnadaga a ini yumei saw äng dä konghmuh sang ehengaih saw.” Äini uyum kaw thung la iha poh hnängah. Äi koong kiyam la hawu, “Hnadaga käh thung kolah pak ngeitih khrawng dä ehengaih saw.” Thung ngei pusaw koong ini bünei saw pathamah Krito la upum äng lawei bala nangkei a khrawng khiyawtal. Äi koong kiyam äng yoei saw, “Ua krut äng bawt hmuei äm, ani che pathamah büneitih.” Krito la äi pathamah upum äng lawkei saw Hnadaga la Awbraham a i pisih pek äm, äi pisih Yudi hiyahtih khälla Yĕsu känäng bünei hmawna. Awlaw ini yum äng Hnadaga la khawmei saw Asanh chang Khraw bünei hmawna. Khanbawn khälo, kei nangnih a püm hngat kanang chut pekaih. Khrawng pai hnih chaw yoei häih la kheu ihni tawei pänäng a hnih dukäng hngat la ha äi kheu khrak hnäng hnawh awlaw kheu tha ha pong hnäng hnawh häih. Äi huih Hnadaga la Awbraham awlaw ani chen khäka awkhawmei hüt. Kiyam äng che awbawng chen khäla epekai ting hawu hmueiyah. Äichaw a nang chena dä pek hmuei ting hawu hmuei. Äi chen che Krito. Kei kawhawuvaih khiyang saw che, Hnadaga la Awbraham äng kheu hngat tawkei hüt, awlaw äi kheu awtawkeyeih saw awkhawmei. Hnadaga la khokum khra hli gala thunggip pänäng thung pek. Ni thung la Hnadaga la Awbraham äng kheu ihni tawei saw khrak hnängah, awlaw khawmei saw ha hiyänal hnängah. Iyaäm Hnadaga käh pisih dä thung khrung äng üm khaw, äi pisih Ani käh awkhawmei saw äng ümah. Hnadaga la khawmei saw koong dä Awbrahama äi pisih pek hütsaw. Äihi thung ühlü pe ei? Epret che i äm äi khrawnga dawnaih koong dä thung pek hmuei saw. Äini Hnadaga la khawmei saw chen loah saw sawgraw äi thung mäi. Hawn natchaw khälla Mosi kutäng äi thung ini awp hütsaw. Hnadaga che hngat dä. Mawnga khrawng hngat mäi äm äiya eche hlü ah. Äihi thung ni Hnadaga la awkhawmei saw awhngaw phak pawtei? Hiyah! Thung äng dä khrawng la sawk ini büneyeih hi, khrawng khälla äi thung ngei ula che konghmuh sanga ini thäneyei hü. Äini kiyam la hawu ükütni ngulaisu. Äi koong Yĕsu Krito a yumeitih khäla Hnadaga la äi awkhawmei saw khäl epekai. Krito a yumei khawngah thung la nangkei a heng naw hmueitih huih khrawng tawk hüt. Nangkei uyum äng konghmuh sang thänei hnäng hmawna, thung la Krito khäka ini loaih saw lawm khrawng dawn. Äini uyum lo pänäng nangkei thung äng käh khrawng hiti pu. Iyaäm nangnih ükütni a Krito äng nini yum mäi saw koong Hnadaga chaw chuhnuh a nini thänei. Nangnih Krito ming äng tuilüh lawyeitih khäl kheni Krito a awat tha huih nini wat. Äi koong Yudi ‘hiyah thän’ yudi hiyahtih, lung hlü äng mäitih awlaw lung hlü äng mäyahtih, pawtaw la hmutaw äng koeyah. Krito äng nangnih hang hang ni lup khiyang. Awlaw nangnih dä Krito käh nini thänei hi, nangnih Awbraham käh chen awlaw Hnadaga la khawmei saw huih nangnih a anang pekai. Äini kei kawhawu, upumchäh pängeyah saw sawgraw nupaw käh kähkän chaw chuhnu la pängeyah. Ani la äi kähkän äpängeyeih thän tua ha ani hngasaw huih dä. Iyaäm ani lenah saw sawgraw ani a chetchaw tih la ani im sokhreitih khäl kheu äng dä mäilah saw. Awpaw la poh pek hüt saw khokum luih pänäng dä ani la äpängeyalaih saw. Äi huih kawchawng chawng, nangkei ini lekchaw khaw a, nangkei ha luhdül äng käh ayapyap thung kawla ini mäi lah. Äini ikhin luih ni, Hnadaga la ani Chaw a eteh. Ani luhdül äng äthän awlaw Yudi thung äng mäitih khäla khiyawtal hnäng hmawna awlaw nangkei Hnadaga chaw chuhnu thänei hnäng hmawna Ani Yudi thung huih ämäi. Hnadaga la ani Chaw käh Khraw nangkei lung dukäng thawn bala Ani chaw chuhnu ting nangkei a khrawng dawn. Äi koong nangkei Hnadaga a “Paw, kei käh Paw ting ini panei.” Äihi nang hngasaw hiti ti, nang Ani chaw chuhnu dä. Äi koong Hnadaga la ani chaw chuhnu koong tawk pek saw kheni nanga ini pekai. Ayang nangnih Hnadaga a hmawt chu khaw a nini chetchaw hüt saw ulupchaw khäl khäka hngasaw huih nini mäi hüt. Äi ulupchaw khäl che hnadaga hiyah. Äini tua nangnih ihisaw Hnadaga a nini hmawt awlaw Hnadaga la ha nangnih a anang hmawt. Äihi awlaw hngasaw nini thäneyeih koong ibakawla luhdül äng käh ngiyaw tih la amrat mäyahtih pawta nini krawnal saw äm? Nangnih alang gong khomhnüp, khokhraw la khokuma nini rosi saw. Nangnih koong kei mawt kokong grah! Nangnih dukäng kibisaw khäl kheni usum vawnga pak thäneyei. Kei khanbawn khälo, nangnih a kei hnih ei ngala kanang tak, nangnih kei huih thänei khäl, iyaäm kei ha nangnih huih. Nangnih kei äng iha pawyah saw khrang poei chu. Nangnih nini hmawt khäh, kei kawkawl hüt koong täkchah nangnih khäka sidawng pawi kaw hiyawkaih saw ikhin kübünei hüt. Kei kawkawl saw la nangnih a dukhah anang pek thän, nangnih kei a ekeleih chu awlaw okhoh lal chu. Äichaw a hawn natchaw huih khin chula awlaw Yĕsu Krito huih khin chula kei a anang lawkei hüt. Nangnih nini piyaw hüt saw äi piyaw tua mawnga äm? Nangnih krong äng ni kheu kawhawu hnäng, nini hnäng khaw nini mik thawtei chula kei a anang pekai hü. Tua kei ihisaw kheu kawhawu koong kei nangnih käh lansu käthänei saw ei? Nangnih koong äi khrawng khäla mawt ini lung mäi. Äini awpawi koong hiyah. Anih la keinih kän nangnih a awhngaw chaw anang tawkaih khiyang. Äihi nangnih anih pawtäng nini lung chetai. Anih käh lung hlü dä pawi hi, nangnih pawtäng ini lung mäi saw pawi khäh. Äini anih käh lung hlü kei nangnih äng kämäi khaw a jiji hiyah, nangnih ängtu mäinga khaw a ha mäiseh. Kei chaw chuhnu khälo, nangnih Krito huih thänei chu saw sawgraw kei nangnih koong mäiyeiyeih tih la dukhah khawm saw huih dukhah kawkhawm tun. Tua kei nangnih khäka kechetai saw mawt kulung hlü mäi, äihi nangkei ayapyap kheu ini kräuvei hnängai. Iyaäm nangnih krong äng kei i kopoh aih saw äm, kei iha yawchu tun nga. Kei a awhawu pek khäl, nangnih dukäng u Mosi käh thung äng mäyeih khiyang äm? Nangnih hmawt chuei thung la i hawu äm? Kiyam la hawu Awbrahama awchaw pochong hnih mäi hüt. Äi häih äng käh awchaw hngat che hngasaw nu äng käh. Awlaw awchaw hngat che ulung hlü äng mäitih unu käh. Äi hngasaw äng käh chaw che awhngaw sämäichaw huih luhdül äng athän. Äini äi ulung hlü äng mäitih unu käh chaw che Hnadaga la khawmei saw känäng dä thänei saw. Kei püm kuchutaih koong dä ni kheu khäl kawhawu saw. Ni hmutaw pai hnih a Hnadaga äng kheu ini tawei saw äng lup hnih a chut hmuei. Hngasaw nu Hagal la che Sinai khuyung a kheu ini tawei saw äng käh phak huih kräu. Äidä ni kheu ini tawei saw la luhchaw a hngasaw ini thäneyeih saw pawtäng chih. Hagal a che Arawb pre a käh Sinai khuyung ängtu awlaw tukat täng käh Yĕlusalema käh ulupchaw huih äng chut hmuei. Iyaäm äi Yĕlusalem che ani khrawng khäl ängtu hngasaw thänei. Äini hawna käh Yĕlusalem che isitha huih mäi. Äi Yĕlusalem che nangkei käh nu. Iyaäm kiyam äng yoei, “Bangja tih hmutaw o, sätäk ha awchaw thäneyah tih, nang awpiyaw äng awi. Sätak ha mäiyeiyeh saw dukhah bünah tih, nang hek tila awi. Iyaäm awpawtaw mäitih thawka ani a unung awchaw mäyeih saw.” Kei khanbawn khälo, nangnih ha äi Aijak huih dä Hnadaga la khawmei saw huih dä luhdül äng nini lo saw. Äini äi khaw a luhdül thung huih luhdül äng lotih la Hnadaga käh khraw äng luhdül äng lotih a kulunawk hüt. Tua ha äi huih thänei. Äini kiyam la i hawu äm? Kiyam la hawu, “Hngasaw nu la awchaw a thoh al khäl. Iyaäm äi hngasaw nu käh chaw la ulung hlü äng mäitih unu käh chaw äng kähkän phehyei hnäng hnawh häih. Ulung hlü äng mäitih unu käh chaw la dä ükütni büneyeih chak saw. Äi koong khanbawn khälo, nangkei äi hngasaw nu chaw huih hiyah, nangkei ulung hlü äng mäitih unu käh chaw huih dä.” Nangkei ini lung hlü äng ini mäiyeih koong dä Krito la nangkei a Mosi käh thung känäng khrawng khiyawtal saw. Ulung hlü äng mäitih khrawng huih mama ja chula mäi khäl. Awlaw a hngasaw a thäneyal tiyeichu. Khin khäl! Kei Pol nangnih a kanang tak tun, nangnih dä uvun nini awtei sawk hi, Krito nangnih koong iha usum vawng tiyah. Kei hang hanga awlaw krawnak ni sidih kepek, ua vun awt hmuei äm, ani la Mosi käh thung khäl kheni rosiyeih lah saw. Nangnih Mosi käh thung rosi chula Hnadaga a nini phiyaw aih khiyang khaw bahi nangnih Krito känäng nini puma nini khauweyal. Awlaw Hnadaga khetjen känäng ha awhlawm hlaw a kakei chula nini mäiyal. Äini nangkei Krito a yumei pula Hnadaga hmawi mawh a epret mäyahtih a ini thäneyeh koong chong pula ini mäi. Iyaäm Yĕsu Krito äng sakeitih a che uvun awtei saw la awteyah saw iha amrat mäyah. Äini alang gong krong che uyum. Äi uyum la che awhngaw khrawng khäla ekhet nawk. Nangnih awpawi nini bi tun khäh! Nangnih a ula ihisaw ngeyeih chusaw anang taksaw äm? Ani la nangnih a iba anang ngei sawk saw äm? Nangnih a anang paneitih Hnadaga känäng ni huih kramei kheu lo ah. Bitchaw is la hnäk chän ha hnui a akrah sawk hnäng khäh! Nangnih kei käh chok hawu hawuvah awhngaw chok hawu pawtäng krawnal hnawh chu ting nangnih koong Boi khäka kuyum mäi khäh. Äini ula nangnih a nüm chawng chawnga anang taw ah äm, anih losupei thänei seh, Hnadaga käh dam ani la büneyeih saw. Kei khanbawn khälo, nuvun naw awteyeih lah saw ting sidawng kaw hiyawk hi, tua ha kei iya kulunawk ku hmuei saw äm? Äidä ihi hüt khaw, Krito krutäng düsaw sidawng kawhiyawk saw la ukhru sawk hnawh saw. Ula nangnih a vun awtei saw krong äng anang toksakei sawk äm, anih la ini puma bungsiri poeyal seh u. Kei khanbawn khälo, nini lung sitha huih nini mäiyeh koong Hnadaga la nangnih a anang panei saw. Äini nangnih käh ulung hlü a ngulai khrang a pängeyei sawkai chu. Äichaw a ekhet lung äng hngat la hngata chetchaw ei khäl. Iyaäm thung kheni pong hmueiyal bala ni kheu hngat hawu hmuei, “Nang im chengsaw khäla nakantha huih khetnaw bäi.” Äini nangnih dä hngat la hngat nini siyei khaw awlaw nini keleyei khaw sidih äng mäi khäl! Äi huih dä nini poyei khaw hngat la hngat nini krah ei chakai. Kei kawhawu saw che ni, nangnih Asanh chang Khraw lawm äng chetchonei khäl. Äi huih nini mäi khaw lawgah kantha la hlüei saw hluih hnawh chu. Lawgah kantha la i hlüei äm, Asanh chang Khraw la äi hlüeyah. Awlaw Asanh chang Khraw la i hlüei äm, lawgah kantha la äi hlüeyah. Lawgah kantha la Asanh chang Khraw käh sitha tueyah koong nangnih ibang nini poh aih khiyang äm äi poai chu. Äini nangnih a dä Asanh chang Khraw la lawm anang dawn khaw, nangnih a Mosi käh thung la anang päng hnäng tiyah. Ngulai äng käh bi khäl che sanh sanh dawngei, äi khäl che ini mik sawuvei saw, sanh u saw, ini krak saw, ulupchaw a ini rosi saw, hmäng ini dawn saw, lan ini thänei saw, ini siyei saw, selei saw, ini man poksaw, upum jiji sotei saw, bälei hnängah saw, awsawng sawng ini pheyei saw, ini keleh ei saw, ini moi saw, hĕu hĕu a poyei ula alak ini ok saw awlaw anih la ini bisaw ni huih awbawng mäi. Kei ayang ha nangnih a sidih kanang pek hüt, tua ha sidih kanang pek ngala kawhawu, ni huih poei tih khäl che mawng Hnadaga käh pre a vawngal lah hnawh u. Äini awkhraw äng käh theih che ekhet, awpiyaw, jelkhiyamsa, chunei khrang, ekhet khrang, awpawi khrang, yumphoih, nümchawng chawng, awlaw nupum hlupei khrang. Ni khäl po hnäng hnawh ti ting iha thung mäyah. Ubang Yĕsu Krito ängtu mäi äm, anih la anih käh lawgah kantha hlü khäl kheni krut äng ini thawnal. Äini nangkei dä Asanh chang Khraw äng ini sawk ini bünei khaw, lo khäl nangkei awkhraw sitha äng chetchonei äng khäh. Nangkei bawriyei pu, hngat la hngata man thouhvei ei pu awlaw keleh eyei pu. Khanbawn khälo, pochongak la dä epret bi khaw, Awkhraw lawm äng mäitih khälla ani a ekhet äng epret lawm känäng lawm pawi äng loal bäichu. Äini ulung näu äng awlaw sidih äng dä äi bi bi bäichu. Äihi nangnih ngulai äng kraw hnawh chu. Nangnih hngala hngat käh dukhah kuei bäichu. Ni huih äng nangnih Krito käh thung nini ngei hnäng saw. Iyaäm läsulapei upuma alang gong hiyah pak alang gong ting khinei hi, äi khrawng la upuma akramei. Äini hang hang nanga nang käh bi chawmei seh u. Äihi äila awhngaw äng upuma chuteyapak upum biäng bawriyei hnängai. Iyaäm hang hang la nanga nang käh bi ini biyeih lah saw. Hnadaga käh kheu u a chok hmuei äm, äila ani a choktih a ani käh üküt vawn pawi äng üphüh pek seh. Nangnih nini puma krameyei chu, Hnadaga a hngat la ha kramei hnängah. Iyaäm khrawng la ihuih chäh äm, äi huih dä chawng tanalaih saw. Ula lawgah kantha la hlüei saw huih ichih chäh äm, äi känäng krakaih saw theih loai. Äini Asanh chang Khraw äng käh ichih chäh hi, äi känäng päihyah saw sawk äng käh etheih loai. Awlaw lo khäl, nangkei bi pawi bi pula ngiyaw ai pu. Iyaäm nangkei ngiyaw pu khaw ihisaw khin äng etheih pa ini bünai. Äihi ikhin mäi pe saw si, lo khäl, ükütani awpawi po äng khä, unung chaw nangkei huih Krito a yumeitih khäla awpawi po äng khä. So khäl, kei ku kutäng nangnih khäka chaw lung len äng kanang yok tun. Aprang äng ini puma awpawi dawneyeih khiyang tih khälla dä, nangnih a nini vun nini awteyeih saw koong ini hno saw. Krito käh krut krong ini chok saw äng khrawng la anih a kulunaw ah pak anih la khrawnga äi huih ini poh saw. Yawng vun awt hmueitih khälla ha thung mawmawt chaw ngei u. Äini anih bawriyei hnäng hmawna awlaw anih käh tebeih ting anang takei hnäng hmawna anih la nangnih a nini vun anang awteyeih sawk khiyang. Boi Yĕsu Krito käh krut hiyah pak, kei i krong äng ha bawriyei hnawh nga. Ni krut koong luhdül che kei khäka alang gong hitiyah. Awlaw kei ha luhdül khäka alang gong hiti nga. Iyaäm vun awtei pei awteyah pei äiche alang gong hiyah. Krito äng atha näthäneyal saw dä alang gong kheu. Ni thung ula ngei äm, anih khrung äng jelkhiyamsa la jen kraw seh. Awlaw Hnadaga käh khrawng khäl khrung äng ha kraw seh. Chaw päih khawngah kei kanang hnih ei, hngat la ha kei a dukhah khrawng pektiyah seh. Iyaäm Krito käh tebeih ting kakantha äng kronei saw la dawn. Khanbawn khälo, nangkei käh Boi Yĕsu Krito käh khetjen nangkei lung dukäng sawkbrat mäiseh. Amen. Kei Pol, Hnadaga sitha äng Krito Yĕsu käh hngat teh hmueitih. Iphis mräh a käh Hnadaga khrawng awlaw Krito Yĕsu a yumtih khäl khäka kei ni chaw koyok tun. Nangkei Paw Hnadaga awlaw Boi Yĕsu Krito la nangnih a khetjen la jelkhiyamsa anang pek seh. Lo khäl, nangkei käh Boi Yĕsu Krito käh Paw Hnadaga a äkiyä tawngei äng khä. Iyaäm Krito äng ini sakeya hawn pre a käh hngat mawkrawng pisih Ani la nangkei a khrawng pek. Luhdül bi khawngah bang Hnadaga la Ani käh achang, epret mäyahtih awlaw khetsu khrawnga ini thäneyeih saw koong nangkei a Krito äng ini sakei saw äng khrawng heh lei. Nangkei a Yĕsu Krito äng khrawng sak bala Hnadaga la upum chaw ting khrawng poeiyeih saw ayang bang tawk bala mäi. Awlaw ayang bang ikhin po bala tawk hüt. Lo khäl, Hnadaga käh wachang khetjen la khemeih khrawng pek saw phiyaw phoih Ani khetsu Chaw a khrawng pek saw koong Ani a äkiyä tawngei äng khä. Krito käh thi äng nangkei ini lätal. Hnadaga käh jen äng nangkei ngulai känäng ähläh ini büneyal. Hnadaga la Ani käh hang hang ngen la kram äng nangkei lukhrung äng ühlüsaw hiyawh khrawng pek khäh. Upum käh thupei saw kram saw nangkei a khrawng dawn. Nidä Hnadaga sitha awlaw Ani la ni Krito äng poh aih saw kram bala tawk. Ihisaw khin lo khaw a Hnadaga la Ani la kram bala tawk hüt saw khäl kheni päihyei. Ani la hawn la luhdül äng mäi saw khäl kheni Krito khochouwa awtawkai. Hnadaga käh kram la sitha äng dä hang hang ni thänei hüt saw. Krito äng khrawng sak bala Ani sitha äng Ani la Ani käh khrawng ini thäneyeih saw koong nangkei a khrawng heh lei. Ani la täkchah khaw känäng bang ni huih tawk bala tawk saw dä. Äi koong, nangkei ochou tähkän Krito khrung äng ümtih khäl dukäng Hnadaga käh phiyaw phoih dawng hmawna Ani la nangkei a khrawng heh lei saw. Ihisaw sidawng pawi nini yawk khaw a, nangnih ha Hnadaga khrawng nini thänei hüt. Awlaw äi sidawng pawi koong Hnadaga la nangnih a anang khiyawtal. Nangnih Krito nini yumei awlaw Hnadaga la awkhawmei hüt saw Asanh chang Khraw khrawng pek bala nangnih anang päng saw hmat laa anang poh ei. Hnadaga la Ani käh khrawng khäla i pekaih saw khawmei hütäm, Asanh chang Khraw che äi awkhawmei saw hmat la. Äi nangkei ini büneyalaih saw. Ni äng Hnadaga la Ani käh khrawng khäla ini lung hlü huih ini mäyeih saw poh pekai. Lo khäl, nangkei Hnadaga käh wachang phiyaw äng khä. Äi koong Boi Yĕsu khrung äng nangnih käh yum la Hnadaga käh khrawng khäl koong nangnih käh ekhet be kawyawk saw khaw thouh, nangnih koong Hnadaga a äkiyä kawtawng saw dümnga. Kei suh kotongeyak kiyawnah ni nangnih a kulunga kaw khawyei chi. Awlaw nangnih a ngen khraw anang pekaih koong nangkei käh Boi Yĕsu Krito käh wachang Paw känäng kawhawu. Äi khraw la nangnih a ngen mawh a anang poh ai awlaw Hnadaga che u äm anang hmawt sawkai. Ani käh wa nini hmuh aih saw koong nangnih käh nini lungduk mik hongei hmawna Kei Ani khäka kawhawuvei. Äi äng nangnih nini hmawtai mawng khanh koong Ani la nangnih a anang bekei saw äm. Awlaw nini hmawtai Hnadaga la Ani khrawng khäl koong khawmei saw ihiyawh bawng pisih len äm. Awlaw nini hmawtai nangkei yumtih khäl äng Hnadaga käh tha la i huih bisaw äm. Ni tha la che Hnadaga thalen huih dä nangkei äng bisaw. Ni thalen che Ani la Krito a düsaw känäng thouhwal khaw a awlaw Krito a hawn pre a Ani käh set pawta omeyal khaw a sumei hüt. Krito la hawna käh khiyuptih khäl, pängtih khäl, tha mawh khäl awlaw boi khäla khiyup. Ani a tukat äng käh jiji hiyah awhmawi mawh kat kheni koong ni tha mawh suma poh. Hnadaga la ükütni Krito khochouwa tawk awlaw Ani a üküt luki huih poh bala yumtih sawng khäl khäka pek. Yumtih sawng khäl kheni che Krito kantha. Hang hang pawt känäng ükütni hluih tih Krito che yumtih sawng äng uluih. Ayang äng nangnih Hnadaga kheu ngei hüt chu koong awlaw ngulai nini bi hüt koong awkhraw lawm äng nini dü hüt. Äi khaw a nangnih luhdül äng käh pawyah saw khäl nini poh hüt. Nangnih nat phunga mäitih käh pawyah saw lawm nini ngei hüt. Äi khraw la tua Hnadaga kheu ngeiyatih khrawng khäla khiyup. Äi bache nangkei kheni ha äi khrawng khäl huih ini kantha hlü äng dä ini mäichoh saw. Nangkei anih huih ini kantha la ini lung hlü äng ini hluh ei hüt chi awlaw nangkei ha awhngaw khrawng khäl huih dam ini bünei hüt. Äini Hnadaga käh jenei päiyah. Ani la ekhet len äng nangkei a khrawng khet nawk. Hnadaga lukhrunga ngulai ini bi a nangkei kantha awkhraw lawm äng dü hüt. Äini Hnadaga la Krito Yĕsu äng nangkei a atha sawk khrawng pek. Hnadaga la Ani käh khetjen äng nangnih a ähläh anang pek. Hnadaga la Yĕsu Krito ängtu nangkei a sawk khrawng pekal bala hawn pre a Yĕsu kena khrawng omal. Tua awlaw awhmawi mawh äng Ani käh elensum khetjen nangkei a khrawng dawnaih koong Hnadaga la ni poh hüt. Krito Yĕsu käh bi kawi äng Ani käh khetjen nangkei a khrawng dawn. Iyaäm Hnadaga käh khetjen äng Yĕsu Krito äng yum pula nangkei ähläh ini bünei. Ni ähläh nangkei lala la ini bünei saw hiyah, Hnadaga la khrawng pek saw dä. Hnadaga la nangnih käh bi koong ähläh anang pek saw hiyah. Ni äng hngat ha bawrieyei hnäng chu. Iyaäm Hnadaga la dä nangkei a khrawng bisaw. Hang hang bi pawi kheni po hnäng hmawna, Yĕsu Krito äng Hnadaga la nangkei a khrawng bisaw. Nangkei äi lawm äng chetei hnäng hmawna, äi bi khäl Hnadaga la ayang bang ächän po bala tawk hüt. Nangnih che Yudi hiyahtih a thänei chula luhdül äng nini lo. Vun awtei tih Yudi khälla vun awteyah tih ting anang tak. (Vun ini awtei saw taksaw che pawtaw pum bitchaw ini awh saw a ini tak.) Äi khaw a nangnih Krito känäng awhngaw chaw nini mäi hüt. Nangnih Isawlael presaw hi hüt chu. Hnadaga la Ani khrawng khäl äng i aw kheu tawkei hütäm, nangnih äi kheu ini tawei saw pranga nini mäi hüt. Nangnih a akhanh mäi hütah, nangnih ni luhdül äng Hnadaga kaw nini mäi hüt. Ayang nangnih Krito Yĕsu känäng awhlawm hlaw a nini mäi hüt. Äini tua Yĕsu Krito thi äng nangnih Hnadaga khäka nini lo. Iyaäm Krito upum kädäng la Yudi la Yudi hiyahtih khäla hngata poh bala jelkhiyamsa lo. Anih a khau bala tawtih pawnga Krito la ahiyalal awlaw anih a lansu a poh bala tawk. Yudi khäla ayapyap thung lei mäi hüt. Äini Krito la äi thung lei khäl okhrokal. Krito la hlü hüt saw che äi sawng hnih a jelkhiyamsa pekal bala khrawng tha hngata poh alaih saw. Awlaw Krito düsaw äng äi sawng hnih hngala hngat käh lansu mäiti u. Krito krut äng dü bala anih a kantha aka poh al awlaw Hnadaga äng awlaw krawnak sakal. Äi koong Krito lo bala nangnih Hnadaga känäng awhlawm hlaw a chetaltih Yudi hiyahtih khäl jelkhiyamsa äng käh sidawng pawi hiyawk. Awlaw Hnadaga kena mäi hüttih Yudi khäl khäka ha Krito la jelkhiyamsa äng käh sidawng pawi hiyawk. Krito koong nangkei Yudi la Yudi hiyahtih khäl kheni Awkhraw hngat äng dä Paw Hnadaga khäka ini lo hnäng. Äi koong nangnih Yudi hiyahtih khäl awhngaw presaw awlaw hmawt u saw khrawng hiti chu. Nangnih tua Hnadaga käh khrawng la Hnadaga im saw. Nangnih a che teh hmueitih awlaw Hnadaga sidawng hiyawktih khäl käh ochou khrung äng tun hmuei saw. Krito upum kädäng che äi ochou äng käh i kiuwa käh lung. Ani la dä ni lung im kheni mawn bala tawk saw awlaw Boi koong asanh chang Hnadaga ima thänei hmawna elen sawk. Nangnih Krito äng nini sakei a, Hnadaga Khraw mäidün ima nini thäneyeih koong nangnih a ha anih ängtu bi hmuei tun. Kei Pol, kei Hnadaga khäka suh kotong saw. Nangnih Yudi hiyahtih khäl khäka Krito Yĕsu käh sidawng pawi kawhiyawk saw koong hengnawk kuhmuei. Nangnih nini yawk khäh, nangnih pawyeih saw koong Hnadaga la Ani käh khetjen äng ni bi aw awp saw. Ani la uthuh äng biyeih khiyang saw kei a awhawu pek, awlaw ni krong kei nangnih khäka otoichaw lawma kanang yok. Kei kanang yok saw chaw nini phawt hi Krito krong äng Hnadaga käh uthupei saw tawk kawyawk chu khäh ting nini hmawtai. Ayang kat äng käh khrawng khäl khäka äi uthupei saw krong hawu hmuei hütah. Äini tua Hnadaga la Ani khraw äng Ani käh asanh chang teh hmueitih awlaw sidawng hiyawktih khäla äi awdawn. Äi uthupei saw hlü che ni, Yudi hiyahtih khälla Yudi huih sidawng pawi känäng üküt pisih ni ini büneyei. Yudi la Yudi hiyahtih khäl che kantha ak dä. Krito Yĕsu äng Hnadaga la khawmei saw khäl kheni anih la utula ini büneyeih saw dä. Hnadaga käh khetjen äng kei sidawng pawi kaw hiyawkaih saw koong a hngasaw käthänei. Hnadaga la upum kädäng tha äng kei a äi khetjen epek saw. Hnadaga käh khrawng kheni khäl äng kei ni nemeitih sum. Äini Yudi hiyahtih khäl khäka Krito Yĕsu käh tün hnäng ti saw pisih äng käh sidawng pawi kawhawuvaih koong Hnadaga la kei a eheh lei. Hnadaga la Ani käh thupei saw kram khäl iba bi äng vawngaih saw äm, äi kheni khrawng khäla kaw awhawu pekaih saw bi ha awp. Ükütni bitih Hnadaga la Ani käh uthuh kram achah täh kän tutäh si äng thup bala tawk. Nat phung pängtih la hawna käh thayung mawh khäl khäka Ani käh ayapyap ngen dawng ong Hnadaga la ni huih poh saw. Yumtih sawng khäl sumei bala Hnadaga la ni khäl poh tunsaw. Hnadaga la ni khäl sawkbrat kram bala tawk saw huih poh. Awlaw ni kram nangkei käh Boi Krito a sumei bala hluih hüt. Krito äng ini sakei saw äng, ini yum äng, awlaw ini pum ümei naw pula Hnadaga hmawi mawh a sengkhri äng ini lo hnäng. Äi koong kei kanang tak, nangnih a sidawng kanang hiyawka kawkhawm tun saw dukhah koong nini lung tuma pak. Äi khäl che nangnih hmawi nini büneyeih saw koong dä. Ni koong dä kei Paw Hnadaga khäka khoklu dül äng suh kotongei saw. Ani känäng dä hawna käh ‘hiyah thän’ luhdül äng käh khrawng kheni la ihisaw ming ini bünei saw. Hnadaga la Ani käh wachang känäng nangnih a tha anang pekaih saw koong suh kotong. Äihi Ani Khraw tha äng nangnih lung mama thäneiyei. Awlaw nini yumei saw äng Krito nangnih lung duka mäiseh. Awlaw Krito käh ekhet äng nangnih a uyung la ochou mäi hmawna kei suh kotong. Krito käh ekhet che i hiyawh bawng toi äm, i hiyawh bawng sawu äm, i hiyawh bawng thuk äm, awlaw i hiyawh bawng chül äm äi Hnadaga käh khrawng kheni ängtu nangnih ha yawchu hmawna kei suh kotong. Krito käh khet hang hang hmawt chak hnäng ti thän, kei kanang hmawtaih sawk khiyang. Äihi nangnih Hnadaga käh khrang khäl kheni nini hmawt chakai. Nangkei lung äng Hnadaga käh mawng tha la bi bi äm, äi tha huih Ani la nangkei ini hawuvei saw la ini tawk saw thawka awbawng bi hnäng. Krito Yĕsu awlaw yumtih sawng äng Hnadaga la akat kat a wachang bünei seh. Amen. Kei Pol, kei Boi a kechetchaw koong hengnawk kuhmuei. Kei nangnih a hnih ei ngala kanag tak, Hnadaga la i koong nangnih a anang panei äm, äi awtawn saw huih chetchonei khäl. Nangnih sawkbrat nävei khäl, nümchawng chawng mäi khäl awlaw chunei khäl. Ekhet äng hngat la hngata khih ei khäl. Asanh chang Khraw la nangnih a anang pong hüt. Äi anang pong saw khauweiyala pak nini näng saw huih hno khäl. Jelkhiyamsa la nangnih a pong bala anang tawseh. Nangkei kantha ak äng käh vawn hngat chi dä awlaw lup khiyang Khraw dä ini bünei saw. Hnadaga la nangnih a anang panei khaw a, nangnih a akhanh hngat dä mäi hüt saw. Boi hngat dä, uyum hngat dä, tuilüh ha hngat dä mäi hüt saw. Awlaw ükütni koong Hnadaga hngat dä mäi saw. Ani che ükütni käh Paw awlaw ükütni käh Boi. Ani la ükütni äng bi awlaw ükütni lung duka mäi. Krito la epheih saw huih nangkei hngat mawkrawnga ni phiyaw phoih ini bünei khäh. Kiyam äng yoei bala mäi, Ani hawn pre a kawyal khaw a, hengei nawtih khäla chih pui nawkal phih, awlaw Ani la khrawng khäla awbawng phiyaw phoih ha pek. “Ani kawyal.” Ni kheu känäng ni yawchupuei, Krito luhdül dawngah okom hüt saw? Ani hang hang laa mäi hnäng hmawna okom hüt äidä hawna käh ädäm suma awkawyal. Awlaw Ani la pochongak hnih che teh hmueitih, pochongak hnih che Hnadaga sidawng hiyawktih, awlaw pochongak hnih che sidawng pawi hiyawktih, awlaw pochongak hnih che yumtih sawnga sokhretih awlaw choktih khäl käh bi awp. Ani la anih a heh lei saw Hnadaga käh khrawng khäl kheni la Ani a ini chetchaw aih saw koong ächän mäi hnäng ong. Ni huih äng yumtih sawng khäl ini ma. Nangkei ini yum äng pongei pusaw awlaw Hnadaga chaw a yawchu pusaw sawgraw ni huih thäneyei. Äidä nangkei yawchuchak däktih huih thänei pula Krito huih ini thäneyei. Äi khaw a nangkei sämäichaw huih mäiti hnawh pu. Tuisampho läng äng ütülei saw huih nangkei atha chok hawu äng ini la laiti hnawh. Khrawng krameitih la atha hiyah saw chok hawu äng khrawng kramei hnäng ti hnawh. Anih käh kram la khrawng kramei bala hiyah saw lawm patäng chih. Äichaw a nangkei awlaw ekhet lung äng Krito krong äng ihisaw kheu ini kräuvai. Awlaw ni huih äng Krito huih nangkei üküt krong äng ni ini chomaih. Krito che uluki nangkei che kantha. Kantha kheni Krito khrung äng dä ini üm saw. Ni kantha che yumtih sawng äng chut hmuei. Nakantha äng käh vawn kheni che hngat la hngat äng soyei ula dä ini mäi saw. Kantha äng käh vawn kheni la nanga nang käh bi ini biyeih khaw a kantha brat ni chom bala ekhet äng achang awlaw mama thän. Äi koong kei kawhawu awlaw Boi pawh äng mäi ngala sidih kanang pek. Yumahtih khäl ini mäichoh saw huih mäitiyei chu. Ni huih khrawng khäl käh tawk khäl usum vawngah. Anih lung uhiyung äng dä mäi saw. Ini lung duk chang saw koong anih la Hnadaga krong äng iha hmawt u, awlaw Hnadaga la peksaw sawk känäng anih awbawng awhlawm hlaw a ini mäi khäh. Anih lung äng hiyawh ei khrang mäitiyah. Anih la pawyah saw lawm pawtäng ini pum ini chih ei. Iha tawkah pak anih la akrak bi ini bi. Äini Krito krong äng nangnih ni huih nini mäichoh aih saw chok hawu bünei chu. Nangnih Yĕsu krong äng nini yawk hüt khäh, awlaw Yĕsu a nini yumei saw koong Ani äng mäi saw ihisaw khäl nangnih a chok hmuei. Nangnih käh kiyangk phem nini hiyänalaih saw chok hmuei. Ayang äng käh ese saw mäichoh khrang nini hläh alaih saw hawu hmuei. Ni ese saw kiyangk la che hnüpak thawka hnüpak nangnih a anang khrah hüt saw. Äichaw a Hnadaga käh chok hawu äng nini lung la nini tawk atha po al seh. Äi khrawng tha a awat huih nini wataih lah saw dä. Äi khrawng tha che Hnadaga huih thäneyeih saw koong poh hmuei. Äi che lälä konghmuh sang awlaw achang. Äi koong nangnih ehlei hlätal khäl awlaw hngat la hngat khäka ihisaw kräu khäl. Iyaäm nangkei ükütni Krito äng hngat la hngat äng ini sakei. Nang naman pok hi, naman poksaw la nanga ngulai pawtäng anang chiyeiya. Awlaw Khoni kraw pänäng naman poktiyah seh. Awlaw mannata achah pekeyei chu. Nang dä numuk hüt khaw, mutiyah pak nibiyeih saw chah. Äihi awpawi lawm äng nupum koong awmawn nübünai awlaw sanglaisu a nepek hnängai. Nangnih nini mongkhok känäng pawyah saw kheu thokah seh. Awlaw bang ühlüsaw huih awhngaw a ini pahmaih koong i pawi äm, äi huih kheu dä thok heh. Anih la äi kheu ini yawk khaw äi äng anih a uku thänei hmawna. Nangnih Hnadaga käh Asanh chang Khraw a dukhah pekai chu. Iyaäm ni Asanh chang Khraw äng dä Hnadaga la nangnih a anang pängei saw huih anang hmatei. Nangkei ini kiyawtalaih saw hnüpäng äi hmat la koong Hnadaga la nangkei a khrawng khiyawtalaih saw. Khrawng mäi henah poh saw, eleng dawnei saw, aman, hehek chula nini siyei, sawlei saw, awlaw keleih ei kheni nangnih känäng awhlawm hlaw a chiyal khäl. Äichaw a, nangnih hngat la hngat äng khetei khäl, awhngaw käh dukhah äng dukhah piyei khäl. Hnadaga la ihuih Krito sum bala nangnih a ähläh anang pekäm, äi huih nangnih ha hngat la hngat ähläh pekei khäl. Äi koong, nangnih Hnadaga käh khetsu chaw chuhnu nini thänei saw khaw känäng, nangnih Ani huih nini poh eiyeih saw tawn khäh. Krito la nangkei a khrawng khetnawk saw huih nangnih ekhet lawm äng mäi khäl. Ani la nangkei koong Hnadaga khäka otih hlu huih upuma hluei. Äini nangnih äng ini krak saw, changah saw, lawphah saw mäilah hnawh. Iyaäm nangnih che Hnadaga käh asanh chang khrawng dä. Nangnih abiyak kheu, ämäk kheu awlaw pawyah saw sawyei chu. Äichaw a nangnih Hnadaga a äkiyä nini tawngeyeih saw tawn. Nangnih ni khäl lälä nini hmawtaih saw tawn. Imik sawuvei tih, changah tih awlaw lawphah tih khälla Mawng Hnadaga käh pre la Krito käh pre pängei hnawh u. Iyaäm lawphah tih che lupchaw pujawtih dä. Hngat la ha kheu äng nangnih a hiyah saw lawm äng anang chiyah seh. Iyaäm ula bang ngeiyah pak äi bi khäl bi äm, Hnadaga käh dam anih äng dä kraw saw. Äi koong äi huih khrawng khäl äng pueiyei chu. Iyaäm nangnih ayang äng uhiyung äng nini mäi hüt, äini Boi käh khrawng nini thänei saw khaw känäng awa äng nini mäi. Äihi nangnih awa äng käh khrawng huih nini mäichoh aih saw tawn. Iyaäm awa äng mäitih la dä awpawi saw, konghmuh sang awlaw ihisaw theih pek saw. Boi i äng piyaw äm äi nangnih chok nawkaih saw hno khäl. Uhiyung äng mäichoh tih khäl käh bi äng bäleyei chu. Äi bi khäl äng usum vawng saw iha mäyah. Äichaw a anih käh epret dawn khäl. Iyaäm khrawng khälla umuchaw äng ini bisaw bi khäl nawhawuvaih saw hiyawkei se khäh. Äini anih käh bi khäl kheni dä ini dawn hi hang hang ni awa äng dawngai. Iyaäm awa la dä ükütni dawn saw. Äi koong ni huih hawu hmuei, “Iptih o, thou! Düsaw känäng thouval, Krito la nang lukhrunga awa sü ai.” Nang nämäichoh saw khrang äng sidih äng mäi. Mäktih huih mäichoh ah pak ngen mawh huih mäi. Awpawi nopoh aih saw ikhin nübünei khaw äi sumei, iyaäm tukatäng che luhchaw la ese dä ini bisaw. Äi koong nangnih mäkai chu. Äini Boi la i anang biyeih sawk khiyang äm, äi yawchu bäichu. Alak äng moiyei ti, äi äng nakrak nawk khäh. Äichaw a Asanh chang Khraw äng luih tila mäi. Nangnih Sam awi, phiyaw awi awlaw rosi saw awi awichula hngala hngat kräuvei khäl. Nangnih lung äng Boi koong ni awi khäl awi khäl. Sawkbrat ni üküt krong äng nangkei käh Boi Yĕsu Krito ming äng Paw Hnadaga a äkiyä tawngei. Krito a hmawi nini peksaw koong hngala hngat kheu äng nävei chula mäichoh khäl. Pawtaw mawh khälo, Boi kheu nini ngei saw huih nangnih nini pawtaw kheu ha ngei khäl. Iyaäm Krito yumtih sawng khäl äng käh uluki huih pawtaw ha iphiya käh luki. Krito che kantha khiyawtal tih. Äi kantha che yumtih sawng khäl. Yumtih sawng la Krito kheu ini ngei saw huih hmutaw khälla ha ini pawtaw kheu ngei seh u. Pawtaw khälo, Krito la yumtih sawnga khetnawk saw huih, awlaw äi koong awsawk pekei saw huih nangnih ha nini phiya a khetnaw bäichu. Tui äng bot tila asanh nopoh al saw huih Hnadaga käh kheu äng Yumtih sawng khäl ha asanh ini thäneyal. Ani la ni huih poh saw yumtih sawng dukäng iha akrak ‘hiyah thän’ changah saw mäiya pak. Äichaw a asanh chang la achang mäiyei. Pawtaw la ini kantha ini khetei nawk saw huih ini phiya a ha khetnaw seh u. Ula iphiya a khet nawkäm äila upuma khetei nawk saw dä. Hngat la ha upum kantha a mumah. Äichaw a eisaw pek bala upum kantha a chetchaw. Äi huih Krito la ha yumtih sawng khäla chetchaw. Iyaäm nangkei Krito kantha äng käh phüh ak dä. Kiyam äng yoei, “Äi koong pawtaw la ini nupaw a hlät ula ini phiya äng utu ini mäyei, a hnih kantha ak ihni thäneyei.” Ni mawt uthupei saw ihisaw elensum kheu, äini kei Krito la yumtih sawng khäl be käkräu saw dä. Ni kheu khäl nangnih koong ha hawu hmuei saw. Nangnih pawtaw khälla nini phiya a nupum kantha huih khetnaw bäichu, awlaw phiya khälla ha ini pawtaw a hmawi ini pekaih saw tawn. Chaw chuhnu khälo, Boi a nini ngei saw huih nangnih nini nupaw kheu ha ngei bäichu. Niche nangnih nini poaih lah saw. “Nangnih nini nupaw a hmawi pek bäichu.” Niche Hnadaga la täkchah peksaw ana awlaw ni äng khawmei saw ha pongei. Äi huih hi, “Nang koong awpawi thäneyei awlaw nang luhdül äng nawsawk sawuvai.” Awlaw nupaw khälo, nangnih nini chaw chuhnu khäla ini man khawyei chu, äichaw a Boi käh chok hawu awlaw mäichoh äng anih a khrawnga po khäl. Hngasaw khälo, nangnih Krito a ini ngei saw huih kenkeh la hmawi pek chula nini lung känäng nini mawh paw a ngei khäl bäichu. Awpawi nini kraw aih koong nini mawh paw la so bala mäi khaw a jiji hiyah äini anang so ah khaw a ha ngei bäichu. Äi koong Krito käh hngasaw huih Hnadaga lung hlü näthänei saw ting khinei tila naw mawh paw kheu khin. Nang nawmawh a jiji nechetchaw saw ting khina pak Boi a nechetchaw saw ting khin tila hngasaw bi nulung känäng bi. Nulung äng tawei bäi, ükütlani ani käh bi koong Boi känäng phiyaw phoih büneyei. Äi hngasaw thän thänei seh awlaw mawh paw thän thänei seh. Mawh paw khälo, nangnih hngasaw khäl äng äi huih poei bäichu. Anih a bäunaw aih chu. Iyaäm nangnih nini hmawt khäh, nangnih käh la anih käh Boi hngat dä awlaw Ani hawn pre a ämäi. Ani mik äng ükütni tihtih dä. Uyumtum äng kawhawu, nangnih Boi äng sakei chula Ani la anang pek saw elensum tha äng tha mawh a thänei khäl. Mannat käh kram khäl känäng mama ja hnäng ong nangnih Hnadaga la anang peksaw jal täkdün khäl wat khäl. Nangkei käh jal che luhchaw äng hiyah, äini nangkei käh jal che nat phunga käh ese khraw khäl äng, khiyuptih khäl äng, pängtih khäl äng awlaw hawna käh khrawse khäl ängtu dä. Äi koong tua Hnadaga la anang pek saw jal täkdün khäl awat huih wat khäl. Äihi Mannat käh khin lo khaw a nangnih Mannat a nini khawmei hnängai. Awlaw jal päih pänäng ha mama nini mäi hnängai. Awlaw ihisaw a khabaih huih nini cheng äng henei chula mama ja chula mäi khäl. Awlaw nakang chang kündün huih konghmuh äng nakang chang künei. Nangnih thanap nini wat saw la sidawng pawi äng käh jelkhiyamsa nini hiyawkaih saw ächän nini mäi saw dawn. Äi pänäng nangnih uyuma kadong huih lawei khäl, äi äng nangnih mannat känäng choi bala lo saw thawl tam nini hiyupal hnängai. Awlaw kri tokkiya a khiyawt tara huih lawei khäl. Awlaw Hnadaga kheu chimsawu huih lawei khäl. Äiche Asanh chang Khraw la anang peksaw. Suh tongei chula ni khäl po khäl. Hnadaga känäng uku hawuvei khäl. Asanh chang Khraw la lawm anang dawn saw huih sawkbrat suh tongei khäl. Nangnih nini hlüei saw khäl kheni suh tongei chula hawuvei khäl. Ni koong sawkbrat khak chula mäi khäl, sätak ha hlätai chu. Hnadaga käh khrawng khäl kheni koong suh tong khäl. Sidawng pawi kawhiyawk khaw a Hnadaga la ühlü saw kheu epek hmawna kei koong ha suh tong khäl. Äihi kei sengkhri äng sidawng pawi äng käh ihisaw khäl kawhawu hnängai. Kei othong ima siyol äng hen hmueipe thän, Krito käh chängäng bi kibi. Suh tong bäichu, kei ihuih tawn äm, äi huih sidawng pawi sengkhri äng hiyawk hnäng hmawna. Kei ihuih kämäi äm awlaw i kopo äm, äi nangkei käh khetsu nawu awlaw Boi käh bi äng uyumlah mäitih Tukhik la anang hawu pekai. Kei ani a nangnih khäka keteh saw nangnih keinih krong hmawt ong awlaw ani la nangnih a ulyah anang pek hnäng ong. Paw Hnadaga awlaw Boi Yĕsu Krito la nangnih yumtih khäl kheni a jelkhiyamsa awlaw nini yum ängtu ekhet anang pekseh. Boi Yĕsu Krito a sawkbrat khetnawtih khäl kheni koong Hnadaga käh ekhetjen mäiseh. Kei Pol awlaw Timothi, keihnih Yĕsu Krito käh hngasaw. Philipi a Yĕsu Krito ängtu mäitih Hnadaga yumtih awlaw sanh tih khrawng khäl ängtu, chetchaw tih khäl khäka ni chaw ki hni yok. Nangkei käh Paw Hnadaga awlaw Yĕsu Krito la nangnih a khetjen la jelkhiyamsa anang pek seh. Nangnih a kulung äng kanang khawei khaw a, kei sawkbrat Hnadaga a äkiyä kawtawngei. Awlaw nangnih kheni koong suh kotong khaw a, kei sawkbrat awpiyaw äng suh kotongei. Iyaäm nangnih nini yumei saw chah saw täh kän tutäh siäng, ni sidawng pawi kawhiyawk saw äng nangnih kei a anang ku. Kei ni krong äng kuyum khäh, Hnadaga la nangnih lung äng bi pawi chah khäh, äi bi pawi Hnadaga la tua ha bi tun, awlaw Yĕsu Krito loal saw khomhnüp äng äi bi phäihyalai. Awlaw nangnih kheni krong kei tawtawk ngala kämäyeih saw tawn khäh. Iyaäm nangnih kei lung äng sawkak ni nini mäi. Nangnih kei ängtu Hnadaga käh khet epheih nini bünei däk. Kei othong ima kämäi thän, ayang äng lät ngala sidawng pawi kawhiyawk lah hüt thän, nangnih kei a anang ku. Kulung känäng Krito käh khet äng nangnih a ihiyawh bawng kanang khet nawk saw äm, äi äng Hnadaga sawksi mäi khäh. Ihisaw ngen la ihisaw tara nini biyeih hnäng saw pongei bala, nangnih hngat la hngat nini khetei saw paw ong kei suh kotong. Nangnih awpawi la ese yawchu chula, awpawi pawh nini heh lei hnängaih saw koong ha kei suh kotong. Äidä Krito loalaih saw hnüp äng nangnih achang la epret mäyahtih nini thäneyei. Yĕsu Krito känäng nini büneyeih saw konghmuh äng nini luih ei saw koong kei suh kotong. Ni huih Hnadaga a khrawng khälla a wachawng la awpiyaw ini pekai. Nube tanawu khälo, kei lukhrunga ibang äthänei äm, äi äthänei saw äng kei sidawng pawi kaw hiyawkaih saw lawm hongei saw, nangnih a kanang hawu pekaih khiyang. Mawng im chongtih khäl awlaw awhngaw soroi khälla ini hmawt khäh, Krito koong dä kei othong ima heng nawk kuhmuei saw. Awlaw Boi a yumeitih awbawng nawu khäl kei othong ima heng nawk ku hmuei koong, ini yum chang ula Hnadaga sidawng ini hawuvaih saw sengkhri ini bünei. Anih dukäng ükütla ekeleih lung awlaw siyei lung äng Krito käh sidawng pawi ini hiyawk. Awlaw awhngaw la ini lung prongh bala Krito käh sidawng ini hiyawk. Ni khrawng khäl lung äng ekhet mäi saw koong dä anih la Krito krong ini hiyawk saw. Iyaäm anih la ini hmawt khäh, sidawng pawi kaw hiyawkaih koong dä kei a Hnadaga la eheh lei saw. Äini awhngaw khälla che ini lung pek ula sidawng pawi hiyawk u. Anih la ini pum pawt mrataih saw soei ula dä sidawng pawi ini hiyawk saw. Kei othong ima kämäi tuna khrawng khru sawkaih saw ting ini tawk. Äi äng iha thäneyei? Ihisaw kheu che, awpawi krong äng pei, ese krong äng pei Krito krong hiyawk hmuei. Äi äng dä kei kaw piyaw saw. Iyaäm kei kaw hmawt khäh, nangnih käh suh tong la uku äng kälätalai. Äi uku che Yĕsu Krito käh khraw känäng dä losaw. Kei lung hlü la kakhah nei saw che ni, kei käh biäng krängak ha hiyawkei hnawh nga. Äini sawkbrat dawng saw huih tua ha, kei küdü thän keheng thän Krito käh a wachang kawdawneyeih saw sengkhri kübünei. Awsawk che i äm? Äihi kei khäka, neheng saw che Krito, awlaw nüdüsaw che amrat. Äini kei heng ngala kämäi khaw, Boi käh bi bi ngala kämäi hnängai. Äini kei hmawtei nga mawng ke heh leyeih saw äm. Kei lawm hnih pawtäng lah kuhmuei. Kei ni sawk hlät ngala Krito khäka kämäyalaih saw kulung hlü mäi. Äi bang kei koong pawi khäh. Äini nangnih koong kei heng ngala kämäyeih saw unung alang gong khäh. Äi koong kei kehegaih saw kaw hmawtei khäh. Nangnih unung chaw yumei hmawna awlaw nangnih käh yum nung hmawna kei nangnih ängtu kämäyeih lah saw. Äihi nangnih äng khomeyala awlaw krawnak koloal khaw a, Krito koong nangnih kei a anang bawriyei nawk hnängaih saw okrong hngat mäyei. Tua unung alang gong che ni, nangnih nini chet chonei saw Krito käh sidawng pawi la hawu saw huih thänei seh. Kei nangnih a kanang asot thän, kanang asonga thän, nangnih awkhraw hngat äng sidawng pawi äng uyum mäi saw pawtäng mama ja chula nini mäi saw kaw yawkaih khiyang. Awlaw nangnih lungak äng sidawng pawi äng käh yum koong utu la jal nini täksaw kaw yawkaih khiyang. Nangnih käh lansu a ke ei chu. Sawkbrat sengkhri tawei khäl. Äihi anih ini hiyumaih saw awlaw nangnih nini ongaih saw nila dawnai. Iyaäm Hnadaga la dä nanga anang ong sawk saw. Iyaäm Krito a nini chetchaw aih saw ikhin nangnih a pek hmuei saw, Ani a nini yumei saw koong jiji hiyah, äini ani koong dukhah nini khawm saw koong ha. Nangkei ükütni utu dukhah äng ini kraw. Kei dukhah kawkhawm saw nini hmuh hüt khäh. Kei tua ha dukhah äng jal kätäkei tün khäh. Krito la nangnih a ulyah anang pek tun awlaw Ani käh khet la nangnih a anang hiyel tun. Nangnih Asanh chang Khraw äng nini sakei. Nangnih a hngala hngat koong khetjen la jen mäi khäh. Kei nangnih a kanang hnih ei, hngat la hngat tawk khiyang tawk chula, hngala hngat khetei naw chula, awlaw awkhraw la ulung äng hngat mäi chula, kei a khrawng piyaw sawk khäl. Nangnih nini pum käh jiji soeiyei chu awlaw bawriyei chu. Äichaw a hngala hngat koong ngiyaw khäl. Sawkbrat ni nupum thawka anih alang gong ting khin khäl. Nupum pawyeih saw koong tawkah pak khrawng pawyeih saw koong ha tawk bäichu. Krito a ihuih ulung ko mäi hütäm äi lung ko nangnih hngala hngat äng ha mäiseh. Krito ükütni äng ni Hnadaga lup mäi hüt. Äini Ani la Hnadaga äng tihtih, thäneyeih saw ulung äng khawei hütah. Äichaw a, Ani la ahngasaw thänei bala ükütni hiyän chak, Ani luhchaw a thänei hüt. Awlaw luhchaw huih mäichoh hüt. Ani luhchaw huih mäi hüt khaw a, Ani la upuma hnemei hüt. Awlaw Krut äng üdü aih lah saw koong Hnadaga a ngei hüt. Ni khäl koong dä Hnadaga la Ani a üküt thawka hlüng tih la a awkhawyal. Awlaw hang hang ming thawka lentih ming hngat pekal. Äihi hawn pre a mäitih, awlaw luhdül äng mäitih khäl kheni la Yĕsu ming äng ini kunai. Awlaw ükütni la hawu seh u, “Yĕsu Krito dä Boi.” Ni huih äng paw Hnadaga käh a wachang dawngai. Khetsu khanbawn khälo, nangnih ängtu kämäi hüt khaw a, nangnih kei kheu sawkbrat nini khin hüt. Nangnih känäng kei awhlawm hlaw a kämäi thän ha, tua unung chaw nangnih kei kheu ngei chula nini mäyeih lah saw. Hnadaga la nangnih a ngulai känäng anang ähläh saw, nangnih nini rosi saw la kenkeh nini pohsaw äng dawng seh. Iyaäm Hnadaga la upum kädäng la nangnih dukäng bi khäh. Hnadaga käh tha äng Ani la i anang biyeih sawk khiyang äm äi nini bi hnängai. Epret khraw eiyah pak awlaw toksakeyah pak ükütni bi khäl. Äihi nangnih Hnadaga käh ekejet chaw chuhnu huih epret mäyahtih la achang nini thänei naw theih. Äini nangnih luhdül äng krak bala mäitih awlaw ngulaisu khrawng khäl äng dä nini mäi saw. Anih khäka hawna käh asĕ huih choi chula mäi khäl. Nangnih anih a awsawk pektih sidawng ahiyawk khäl. Nangnih dä ni huih nini poh khaw, Krito loalaih khaw a nangnih äng kei kawbawriyei hnängai. Kei kohno saw khäl awlaw kei käh bi khäl krakah saw khrawng khälla ini hmuai. Nangnih käh yum che bät ula Hnadaga khäka ini hlusaw huih. Äi huih dä thänei khaw, kei a khrawng bät ula kei thi long khaw, äi ha bät ula ini hlusaw huih thäneyeih saw dä. Äi huih kei thi long thän kei kawpiyaw aih saw dä. Äi huih nangnih ha kei ängtu nini piyaw aih saw tawn khäh. Boi la dä hlüei hi che, nangnih käh sidawng yaw ngala kei ulyah bünei hmawna Timothi a kei alanda keteh ei. Iyaäm nangnih koong kei huih tawkaih tih Timothi hawuvah hngat ha mäi u. Awhngaw khälla Krito krong tawk u äini ini pum bi dä ini tawkei saw. Timothi che yumphoih mawh äi nangnih nini hmawt khäh. Iyaäm awchaw la awpaw ku saw huih sidawng pawi hiyawkaih saw koong ani la kei a uku. Kei kuyum, kei a i thäneyeih saw äm äi kawhmawtei saw äng tutu kei ani a nangnih khäka keteh ei. Awlaw kei Boi khruäng mawt kuyum khäh, kei nangnih khäka alanda koloal hnäng khäh ai. Ipaphro a nangnih khäka keteh ei lah saw ting kei kikhin. Ani che kei nawu huih awlaw ani la kei bi phäu. Ani la sidawng pawi hiyawk saw bi äng ha kei ängtu jal täk. Kei a uku aih saw koong nangnih ani a nangnih käh sidawng hling hlong tih huih nini teh. Nangnih kheni a anang hmu aih khiyang koong kei ani a keteh eih saw. Awlaw ani opah saw nini yawk saw koong ani mawt okonggrah. Ihi kawchawng, ani üdüaih wavaih opah thänei hüt. Äini Hnadaga la ani a jenei. Hnadaga la ani a jiji jenei saw hiyah kei a ha ejenei khäh. Kei khrung äng kulung dukhah loah pak. Äi koong, nangnih ani a hmu chula piyaw ong kei ani a nangnih khäka keteh ei. Nangnih krong äng kei tawk hlü ti ah. Awpiyaw äng Boi ming äng ani a law ei bäichu. Ni huih khrawng khäla nangnih hmawi pek bäichu. Ani a hmawi nepekaih saw tawn khäh, iyaäm Krito käh bi koong ani üdü aih wavaih thänei saw känäng älätal. Nangnih nini san saw vawn athaw aih saw koong, lawma awsawk hiyumeyeih wavaih thänei hüt. Ani la ukusaw huih nangnih khrawng ku hnäng hnawh chu. Äpäih äng, khanbawn khälo, Boi Yĕsu Krito äng nini sakei sawäng piyaw khäl. Ayang koyok hüt däk saw khäl awlaw koyokalaih saw koong kei iha khinei nga. Awlaw krawnak koyok lah thän nangnih nini lätaih saw koong dä pawi saw. A kantha pilaih khiyang tih nget tih ui huih, biseh bitih khrawng khäl sogei bäichu. Iyaäm nangkei lälä ini vun awteitih khrawng khäl dä. Nangkei Hnadaga käh khraw äng Hnadaga a ini rosi awlaw Yĕsu Krito äng sakei pula nangkei ini piyaw. Nangkei aprang äng käh päi prang khäl äng üm pu. Äi bache, kei kupuma aprang äng käh vawn äng kü ümei nawk hnängai hü, äithän äi huih ponga. Hngat la khat dä upuma aprang äng käh vawn äng, kü üm hnäng ting nini tawkei khaw, kei äi huih kawtawkei saw krong awbawng mäi khäh. Luhdül äng kathän saw sapta ak pänäng kei vun khrawng awh. Kei che Isawlael yapsaw Binnamin chen äng käthän. Kei lälä Hibru dä, kei nu paw ha Hibru. Kei Pherasai khäl huih hngat mawkrawng thung ngeitih kämäi hüt. Kei Yudi thung khäl kengei hüt saw koong, yumtih sawng khäl ini lumeidüna chi ka kuluh nawk hüt chi. Hngat la ha kei a iha ata vawp hüt chi u. Äi bi khäl äng kei sätak amrat mäi ting kikhin hüt. Äini tua kei Yĕsu Krito a kübünei däk. Äi koong äi bi khäl kei kuhiyumei ting tua kikhinal. Äi krong äng jiji hiyah, ükütni kei khäka iha hitiyah ting kei kikhin. Iyaäm kei Boi Yĕsu Krito a kübünei däk. Tua kei äi khäl kheni obo huih dä kakhanh. Nila Krito a kübüneyeih saw koong uku, awlaw kei a Ani äng sak bala awtawk. Krito äng kei epret mäyahtih a käthänei. Thung kengei a kei Hnadaga khäka konghmuh sang thänei ti nga. Äini tua Yĕsu Krito äng uyum kawtawkei saw äng Hnadaga khäka konghmuh sang käthänei. Kei kawhmawtaih khiyang saw che ni khäl, Yĕsu Krito a kawhmawtaih khiyang, düsaw känäng thouwal saw tha kawhmawtaih khiyang, awlaw Anila waih khawm saw huih kawkhawmaih khiyang. Awlaw Ani düsaw huih küdüaih khiyang. Äi koong lalalup pei Ani huih kei düsaw känäng kehengalai. Kei ibang kohno tun äm, äi kübün däk ting awlaw chum chak däk ting kawhawu saw hiyah. Äini Yĕsu Krito la kei a i koong eheh lei äm, äi koong dä kei kochon tun saw. Nube tanawu khälo, ühlüsaw täh kaphaw däk ting kei khinei nga. Awlaw hngat kopoh aih saw che, chet däksaw hngilal ngala kaphaw aih saw koong awmaw äng mäi saw pawtäng kaphaw aih koong kohno aih saw. Kei phiyaw phoih kübüneyeih saw koong awmaw äng utum saw pawtäng kochong tun. Äi phiyaw phoih che Hnadaga la Krito Yĕsu a sumei bala hawn pre a awsawk ini büneyeih saw koong khrawng panei saw. Nangkei awkhraw pawtäng chang tih khäla ni huih ini tawkaih saw tawn. Äini nangnih dukäng hngat la khat awhngaw krong tawk saw mäi hi, Hnadaga la nangnih a äi krong sanh sanh anang dawnai. Lo khäl, nangkei tutäh siäng ibang ini hmawt äm, äi ihisaw nangkei tämäng khä. Nube tanawu khälo, nangnih kei huih mäichoh khäl. Nangnih a ihuih mäichoh aih saw kei kanang dawnäm, äi huih mäichoh tih a täm khäl. Kei ayang ha äkräng kräng kawhawu däk. Awlaw kimik khri äng tua ha kawhawu tun, Krito krutäng düsaw pawtäng lansu poei tih awbawng ini mäi khäh. Anih che mei vawm äng ini kraw aih saw lawm äng dä ini chet tun saw. Iyaäm anih la Hnadaga chetchaw u, ini hän jiji koong dä ini heng saw. Anih la hiyawh ei bi ini bi awlaw äi äng ini bawriyei. Anih la luhdül äng käh vawn jiji dä ini tawk saw. Äini nangkei che hawn pre a käh presaw dä. Nangkei hawn pre känäng nangkei khrawng khiyawtal tih Boi Yĕsu Krito loaih saw chong pula ini mäi. Ani la nangkei käh ngiyaw tih düaih tih kantha hleyalai. Awlaw Ani käh wachang kantha huih khrawng poh alai. Krito la Ani käh dogo äng äi poh hnäng. Ni dogo äng Ani la ükütni khiyup chak hnäng. Nawutih khälo, Kei nangnih a kanang khet nawk khäh awlaw nangnih a kanang khinei khäh. Nangnih dä kei käh piyaw, awlaw nangnih koong dä kei kawbawriyei hnäng saw. Ni huih äng dä nangnih Boi äng sakei chula chetchet nini mäyeih lah saw. Ubodiya la Suntokhi, nang hnih a mawt khawh ei ngala kanang tak, nang hnih Boi ming äng sangeyal hnih. Awlaw kei käh ekejet bi phäu, kei nanga ha khawh ei ngala kini tak, ni hmutaw khäla ku bäi. Anih la sidawng pawi ini hiyawkaih saw koong, keihnih Klimen la awhngaw khrawng khäl ängtu thasa dukhah ini poh hüt. Äi khäl ming Hnadaga käh sawk mawh boih hiyol äng yoei bala mäi khäh. Boi ängtu sakei chula nini mäi saw äng, nangnih sawkbrat piyaw khäl. Kei awlaw kawhawu, nangnih piyaw khäl. Nangnih nini jelei saw khrang khrawng la hmu lah seh u. Boi alanda loal tun. I krong äng ha nini lung tumai ya, awlaw bang nangnih nini hlüei saw krong khäl äkiyä pek chula awlaw suh tongei chula Hnadaga a hawuvei pek khäl. Hnadaga la pek saw jelkhiyamsa khrawng la tawk ula ha yawchu hnäng u. Ni jelkhiyamsa la Krito Yĕsu äng nangnih käh lung awlaw tawka kak bala tawkai. Äpäih äng kawhawu, nube tanawu khälo, ibang ihiäm, awtawn äm, oprongh äm, echet äm, awpawi la awpiyaw nübünei nawkaih saw äm, äi pawta dä nini lung pek khäl. Kei känäng nangnih ibang nini chok nawk äm, awlaw kei känäng ibang nini hmuh äm, kei mong khok känäng ibang nini yawk äm äi khäl poh chula mäi khäl. Äihi jelkhiyamsa khrawng pektih Hnadaga nangkei ängtu mäyei. Boi la kei a mawt awpiyaw epek, iyaäm awbawng hnüp pänäng nangnih kei a anang chetchaw saw anang dawneiyal hnäng. Ihi khäh kei koong sawkbrat nini tawk mäi hüt khäh. Äini äi nangnih anang dawneyeih saw lawm bünei hüt chu. Awlaw kalaisaw khäl koong ha ni kheu kawhawu saw khäl hiyah, iyaäm lalalup kawkraw thän kei kawpiyaw aih hnäng saw kochok nawk khäh. Laise khin äng awlaw awprawm saw khin äng ha piyaw ngala kämäiyeih saw kawhmawtei khäh. Kähän luih äng ha awlaw kähän hongäng ha, awprawm khaw a ha laise khaw a ha, lala lawm äng pei kei iba kämäi tawn äm, äi kochok nawk khäh. Krito la epek saw tha äng kei ükütni kibi chak hnäng khäh. Äini nangnih kei käh dukhah kepheh yei phäu thänei chula mawt kawpiyaw. Philipi a käh yumtih sawng khälo, nangnih nini pum la nini hmawt khäh, kei täkchah sidawng pawi kawhiyawk pänäng kei Mesidoniya känäng kechetal khaw a, nangnih hiyah pak hngat yumtih sawng la ha kei a khrawng kuaih saw so u. Kei Thisaloni a kämäi khaw a nangnih krängak hnih uku khrawng san chula kei kalai saw anang hluih hüt. Kei nangnih känäng vawn kübünei saw jiji äng hiyah. Kei kühlu ei, nangnih Hnadaga käh pisih ha bünei khäl. Nangnih kei a ibang anang sanäm äi kei kübünei däk. Kei a ibang hlü äm äi thawka kei a unung mäi khäh. Ipaphro kutäng nangnih anang san saw vawn bünei ngala tua kei a iha hlütiyah. Ni vawn khäl Hnadaga a ini hlu chisaw otih huih. Awlaw Hnadaga ni äng awpiyaw. Kähkän kheni päng chaktih kei käh Hnadaga la Yĕsu Krito a sumei bala nangnih nini hluei saw huih ükütni anang pekai. Nangkei käh Paw Hnadaga käh wachang akat kat dawng seh. Amen. Krito Yĕsu äng sakei tih Hnadaga käh khrawng khäl khe a kei käh äkhäh pek bäichu. Niya mäitih nube tanawu khälla ha nangnih a anang khäh ei. Hnadaga khrawng khäl kheni la awlaw unung chaw che, Mawng len ima bitih khrawng khälla nangnih a anang khäh ei. Boi Yĕsu Krito käh khetjen nangnih lukhrunga mäiseh. Kei Pol, kei Hnadaga sitha äng Yĕsu Krito käh teh hmueitih hngat käthänei. Ni chaw nangkei käh nawu Timothi ängtu Kawlawsi a käh Krito äng yumphoih tawei tih Hnadaga käh asanh khrawng khäl khäka, kei hnih ni chaw kihnih yok. Paw Hnadaga käh khetjen la jelkhiyamsa nangnih khrung äng kraw seh. Kei hnih nangnih koong suh ki hnih tongei chi khaw a, nangkei käh Boi Yĕsu Krito käh Paw Hnadaga a äkiyä ki hnih tawngei chi. Kei hnih Hnadaga a äkiyä ki hnih tawngei. Iyaäm Krito khrung äng nangnih käh yum mäi khäh. Awlaw Hnadaga käh khrawng kheni koong nangnih käh khet kheu kei hnih kihni yawk khäh. Nangnih khäka täkchah ihisaw sidawng pawi hiyawk hmuei hüt khaw a, nangnih nini ümaih saw kheu nini yawk hüt. Äi koong nangnih käh yum la kheta äi nini ümsaw äng ochouwa nini poh ei. Äi che nangnih koong hawn pre a mawmawt chaw tawk hmuei. Khrawng khälla sidawng pawi luhdül kheni a ini hiyawk. Äi huih kawchawng chawng khrawng khälla ha nangnih a sidawng pawi anang hiyawk. Täkchah äi khaw a nangnih ha Hnadaga käh ihisaw khetjen sidawng nini yawk. Ipapha känäng nangnih Hnadaga käh khetjen kheu nini chok nawk khäh. Ani che kei hnih huih Yĕsu Krito käh hngasaw. Ani che kei hnih pawh känäng käh Krito käh yumphoih mawh bi kawi tih. Asanh chang Khraw la nangnih lung äng mawng ekhet bang anang pekäm, äi ekhet kheu ani la nangkei a khrawng hawu pek khäh. Äi koong, keihnih mawng hnüp täh kän nangnih kheu ki hni yawk äm, äi hnüp täh kän kei hni nangnih koong suh chi ki hni tong. Nangnih Hnadaga sitha hmawt hmawna, Hnadaga käh ngen bünei hmawna, awlaw Asanh chang Khraw la anang taksaw huih mäichoh hnäng hmawna, kei hnih suh chi ki hni tong. Äihi nangnih Boi la hlüei saw huih nini mäichoh hnängai awlaw Ani a sawkbrat nini phiyaw hnängai. Nangnih mäichoh la bi pawi khäl dawnai. Awlaw nangnih Hnadaga a hmawt liäng nini hmawtai. Hnadaga la Ani käh a wachang tha äng nangnih a thamawh a anang poh seh. Äihi nangnih ükütni nini khih ei, awlaw lala pei nini chunei hnängai. Awlaw piyaw chula Paw a äkiyä tawngei. Iyaäm Ani la nangnih a Ani käh asanh chang khrawng ängtu awa äng käh mawng pre a üphüh nini bünei tawn ting anang tak. Ani la nangkei a uhiyung känäng khrawng khiyawtal. Äidä Ani khetsu Chaw käh mawng pre a khrawng loal. Ani Chaw ängtu dä nangkei ini lätal, awlaw nangkei käh ngulai kheni ähläh ini büneyal. Krito dä dawngah tih Hnadaga käh ulupchaw. Awlaw chaw u chaw, üküt thawka elensum. Iyaäm hawn pre la luhdül, nuhmuh saw la hmuti saw, hang hang ni Ani la dä bi chaksaw. Awlaw Awkhraw tha kheni, khiyuptih khäl kheni, boi khäl kheni, Ani koong awlaw Ani kutäng dä bi hmuei saw. Ni khäl khe bi hmuei khawngah täkchah Ani dä mäi hütsaw. Awlaw Ani la dä ükütni nanga nang laa tawk chak saw. Yumtih sawng khäl che Krito käh kantha huih, awlaw Krito che anih käh luki huih. Ani dä düsaw känäng thouwal tih chaw uchaw, awlaw üküt krong äng ni maw tih. Iyaäm Hnadaga la Ani äng mäi saw kiyangh khäl kheni awchaw Krito äng mäyeih saw hlüei. Awlaw Krito la krut äng thi boyei sawk saw äng, Hnadaga la luhdül la hawn pre a käh vawn khäl kheni, Ani khäka loeiyal chak bala jelkhiyamsa loal. Nangnih sätak Hnadaga känäng awhlawm hlaw a nini mäi hüt. Awlaw bise la ese nini tawk saw äng Hnadaga äng lansu huih nini mäi hüt. Äini Krito käh luhchaw kantha düsaw ängtu Hnadaga la upum ängtu anang pongeyal. Hnadaga la anang pongeyal saw Ani hmawi mawh a nangnih asanh chang, echet awlaw epret mäyahtih thäneyal hnäng hmawna. Ni che ihi khäh, nangnih uyum äng uthuk lawma nini sakeyeih lah saw awlaw mama nini mäyeih lah saw. Sidawng pawi nini yawk hüt khaw a nini bünei saw ü üm, krängak ha hlät lah hnawh chu. Ni sidawng pawi luhdül brat khäl kheni a hiyawk hmuei hüt khäh. Kei Pol, ni sidawng pawi kaw hiyawkaih saw koong kei a hngasaw käthänei. Nangnih koong kei dukhah kawkhawm saw äng kei kawpiyaw khäh. Iyaäm Krito la khrawng khäl koong akantha äng dukhah khawm hütsaw huih, kei ha ka kantha äng Ani kantha huih, ni yumtih sawng koong dukhah kaw khawm tun. Hnadaga la Ani käh sidawng pawi kheni nangnih khäka hiyawkaih saw bi, kei a aw awp. Äi koong kei yumtih sawng käh chetchaw tih käthänei. Hnadaga käh mawng uthuh saw kheu ayang äng khrawng khäl khäka ukum kum thuh hmuei hütäm, äi tua khrawng khäl khäka thoh hmueyal däk. Nangnih Yudi hiyahtih khälla äi uthuh kheu äng käh a wachang, yawchu hnäng hmawna Hnadaga la ühlüyei hüt. Awlaw äi uthuh saw kheu che, Krito nangnih dukäng mäi. Awlaw Ani dä Hnadaga käh a wachang nini pheyeih saw äng käh a khanh. Nangkei Krito krong ini hiyawk. Nangkei hang hang khrawnga sidih ini pek. Awlaw ngen äng hang hang khrawnga ini chok. Iyaäm Krito äng sakei ula Hnadaga hmawi mawh a ükütni ini pum chä pangeitih huih lo hnäng hmawna. Äi koong kei tha pongala kibi awlaw Krito la epeksaw thayung kusumei. Kei nangnih koong awlaw Laidiki a käh khrawng khäl koong awlaw kei hmawi hmu hawmah tih khäl koong kei düaih hengaih tha kopoh saw kanang hmawtaih sawk khiyang. Kei ni huih kopoh saw che, anih ulyah äng luih hmawna, awlaw ekhet äng pongei hnäng hmawna, awlaw Hnadaga käh uthupei saw kheu khäl yawchu ula ulyah tawei hmawna. Äi uthupei saw che Krito. Hnadaga käh thupei saw ngen la prengiya kheni Krito la dä khrawng hong pek chak saw. Kei nangnih a ni kheu kanang tak, nangnih a hngat la ha anang kramei bala hiyah saw lawm äng anang chi hnängah pak. Kei kantha nangnih ängtu mäyah thän, kei khraw che nangnih ängtu dä. Nangnih käh mäichoh khrang la Krito äng nini yumsaw hmu ngala kei mawt kawpiyaw. Nangnih Krito Yĕsu a Boi ting nini lawkei däk koong, Ani äng sakei chula mäi khäl. Krito äng nangnih käh uyungkung uthuk äng khoh ei khäl. Nangnih käh sawk Ani äng ochou poei khäl. Awlaw nangnih a chok hmuei saw huih nini yum äng chang khäl. Awlaw äkiyä äng luih khäl. Songei bäichu! Nangnih a khrawng käh hiyah saw chok hawu la anang kramei bala anang hengnaw ah pak. Äi khäl Krito känäng loah, luhchaw käh chok hawu la luhdül äng käh khrawng khäl käh tawk dä. Iyaäm Hnadaga a mäi saw wachang kheni Krito äng mäi khäh. Awlaw nangnih Krito äng nini sakei saw äng nini sawk luihyal chak. Ani che tha la khiyuptih khäl thawka elensum. Nangnih Krito äng nini sakei saw äng dä nini vun awh hmuei saw. Ni che luhchaw känäng hiyah, Krito känäng dä. Ni khäl koong dä nangnih ayang khaw a käh thisaw kantha la lawpha saw ngulai känäng nini lätal. Nangnih tuilüh nini lawkei saw che, Krito ängtu phul nini hmuei saw huih. Awlaw ni tuilüh nini lawkei saw la Yĕsu a düsaw känäng thouwal tih, Hnadaga la Ani käh tha äng Yĕsu ängtu anang thouhwal. Nangnih Yĕsu a nini yumei saw koong dä düsaw känäng thouhwal nini hmuei saw. Nangnih ngulai äng awlaw vun awtei chu saw äng nini dü hüt. Äini Hnadaga la nangnih a Krito ängtu anang thouhwal. Ani la nangkei käh ngulai khäl kheni ähläh khrawng pekal. Mosi käh thung ngei pu koong nangkei khrung äng epret tawng hmuei hütsaw khäl Hnadaga la potal chak. Hnadaga la äi epret law bala krut äng theh al. Krito la krut äng awkhraw lawm äng käh pawyahtih, awlaw dogo mawh khäl kheni a uhiyum sawk. Ani kädäng la dä, anih a hiyum sawk saw Ani la dawn. Tua hang hang la ini hmuh, äi pawyah saw khraw khäla thayung mäyah. Nangnih i nini eiokaih saw äm, hngat la ha anang talah aiya. Awlaw khraw the päi, düm khomhnüp päi hiyah thän awhngaw päi nini poyeih saw ting anang talah aiya. Ni khäl che, awmaw äng thäneyeih saw äng käh ilip huih dä. Äini ihisaw che Krito dä. Nangnih a hngat la ha ini näuvei saw huih poyei ula, awlaw hawn natchaw khäla ini rosi saw huih poyei ula anang kramei hnängai ya. Äi huih yap khrawng la ini khinei, Hnadaga la anih a mawng sawk pek. Äini ni khäl che hang hang ni usum vawngah tih kheu. Iyaäm anih käh lungko che upum jiji sotei saw äng luih. Äi huih khrawng la Krito a uluki ting süh u. Äini äi Krito käh luki äng dä akantha la awsaw pongei bala Hnadaga käh tha äng chom saw. Nangnih Krito ängtu nini dü däk. Awlaw ni luhdül äng käh pawyahtih khraw khälla anang khiyupsaw känäng nini lätal däk. Bahi che iya nangnih tua ha luhdül äng käh thung huih nini mäipe saw äm? “Mawnai chu, chawmai chu, khatai chu ting anang taksaw kheu khäl iya nini khin saw äm.” Ni thung khäl che khrawng khälla ini choksaw usum vawngah tih thung dä. Ni thung khäl che khrawng la sot hi, ngen äng luih saw huih hmuh. Ni thung khälla khrawng khälla iba ini rosiyeih lah saw äm, iba nupuma nehnemeyeih lah saw äm, nupuma iba sidih äng nawtaw keyeih hnäng saw äm äi chok. Äini ni thung la ini mik sawuvei ula ini bisaw ngulai känäng kakal hnängah. Krito ängtu nangnih dütih khäl duk känäng nini hengal. Äi koong hawn pre a käh vawn khäl koong nini lung khraw ei khäl. Äiya Hnadaga käh set pawta Krito om bala mäi. Hawn pre a käh vawn khäl äng dä nini lung khraw ei khäl, ni luhdül äng käh vawn khäl äng nini lung khraw eiyei chu. Iyaäm nangnih che nini düdäk saw huih dä. Awlaw nangnih käh sawk che Krito äng Hnadaga duka thupei bala mäi. Nangnih käh ihisaw sawk che Krito. Ani adawng khaw a nangnih ha Ani äng nini dawngai. Awlaw Ani käh a wachang phüh nini büneyei. Äi koong luhdül äng käh pawyah saw hlü khäl kheni henal chak khäl. Äi khäl che ni huih, ni mik sawuvei saw, sanh ti saw, naw chawgraw ei saw, pawyah saw lung hlü awlaw nawlawphah saw. Nawlawphah saw che ulupchaw nupujaw saw huih dä. Ni khäl ngeiyah tih khäl khrung äng Hnadaga käh man kraw ai. Ayang äng nangnih äi pawyah saw khrang äng nini mäichoh hüt. Äi pawyah saw khrang la nangnih a anang sitha nawk hüt. Äini nangnih ni khäl nini hläh alaih saw tawn. Äi khäl che ni, naman, naman nung lonawk saw, awlaw khrawng ming nawhlawngh saw, khrawng ming äng ese näkräu saw, ehlei nejeng saw khäl kheni hlätal khäl. Hngat la hngata hlei naw aichu. Iyaäm nangnih ephem mäichoh khrang khäl nini hiyänal däk. Nangnih khrawng tha nini thäneyal däk. Hnadaga la nangnih a sawk tha anang pekal däk. Nangnih tua Ani a unung nini hmawtai. Ni sawk tha äng Yudi la Yudi hiyahtih, ini vun awtei tih la awteyah tih, awhngaw presaw la japjuttih, hngasaw la upum pängeitih, iha koyei hnawh. Krito dä yumtih khäl kheni ängtu mäi saw. Ani dä ükütni yumtih khäl khe khrung äng alang gong thän. Äi koong, nangnih che Hnadaga käh khrawng. Ani la nangnih a anang khetnawk awlaw Ani käh khrawng ting anang heh lei. Äi koong nangnih jenei lung, jenei khrang, näuvei khrang, nüm chawng khrang, chunei khrang, awlaw nini pum ini songei khrang tawei khäl. Hngat la hngat khrung äng nini man taweiyei chu. Nang lukhrunga hngat la ha ngulai poh hi, ani a ahläh pekal. Hnadaga la nangnih a ähläh anang pekal saw huih, nangnih ha hngat la hngat ähläh nini pekeyalaih lah saw tawn. Ni khäl che nini poh eyeih lah saw, äini äi khäl thawka alang gong che ekhet. Ni ekhet la dä äi khäl kheni tänaka pongal chaksaw. Krito käh jelkhiyamsa la nangnih lunga khiyup bala taw seh. Nangnih ni ejelkhiyamsa koong dä kantha ak nini thänei saw awlaw nangnih a panei hmuei saw. Äi koong äkiyä tawngei khäl. Krito käh chok hawu nini lung äng luih bala che mäiseh. Hnadaga la anang peksaw ngen äng hngat la hngata chokei khäl. Awlaw äkiyä äng Hnadaga koong Sam awi, phiyaw awi la awkhraw lawm äng käh awi awi khäl. Nini kheu äng awlaw bi äng nini poh saw kheni Boi Yĕsu ming äng dä po khäl. Awlaw Ani äng dä Paw Hnadaga a ha äkiyä tawngei khäl. Phiya khälo, nangnih nini pawtaw sitha äng mäi khäl. Iyaäm Boi käh khrawng khäl koong ni bi dä awtawn saw bi. Pawtaw khälo, nangnih nini phiya a khet naw khäl, anih a kuluh naw ai chu. Sämäichaw khälo, üküt krong äng ni nangnih nini nupaw kheu ngei khäl. Iyaäm äi äng Boi awpiyaw. Paw khälo, nini chaw chuhnu a ulung dukhah pekai chu, anih la ulyah khrokeyalah pak. Hngasaw khälo, nangnih üküt krong äng ni nini mawh kheu ngei khäl. Anih la anang so bala mäi khaw a jiji awpawi nini kraw aih koong tha pochula nini biyeih saw hiyah, anang so ah khaw a ha nini biyeih saw. Iyaäm nangnih khrawng koong bichu, Boi koong dä nini bisaw. Nangnih nini bi kawi saw khäl kheni nini lung khraw ei chula che bi khäl. Khrawng koong nini bisaw ting khin chula hiyah, äini Hnadaga koong dä ting khin chula che bi khäl. Nini lung äng tawei bäichu, Hnadaga la Ani khrawnga pekaih saw ting tawksaw, äi phiyaw phoih huih nangnih a anang pekai. Iyaäm nangnih nini chetchaw saw Krito dä ihisaw mawh paw. Awlaw hngat la dä ngulai bi bi khaw, ani käh äi ngulai bi koong dam büneyeih saw dä. Boi la üküt käh tara ni tihtih a dä bisaw. Awmawh khälo, nangnih nini hngasaw khäl äng ihisaw la akhrang pawi dä poei bäichu. Nini lung äng tawei bäichu, nangnih a ha hawn pre a Boi hngat mäi khäh. Nangnih suh tong phruteyei chu. Suh nini tongei khaw a sidih äng mäi khäl, awlaw Hnadaga a äkiyä tawngei khäl. Awlaw keinih koong ha suh tong bäichu. Krito käh thupeitih sidawng pawi kini hiyawkaih saw koong Hnadaga la keinih a ha ikhin khrawng hong pek hmawna. Äi thupeitih sidawng kaw hiyawk saw koong dä kei a khrawng heng nawk saw. Suh tong bäichu, äi thupei saw sidawng pawi sanh sanh khrawng khäl khäka kei hiyawk hnäng hmawna. Krito a yumeyah tih khrawng khäl äng ngen äng chetchonei bäichu, awlaw ikhin nübünei saw khäl kheni bi pawi äng sumei bäi. Nangnih käh kheu sawkbrat khrawng piyaw hmawna awlaw yaw do hmawna thänei seh. Awlaw u a ihuih kheu krawn nini pekalaih lah saw äm, äi nini hmawtaih lah saw. Kei tua nangnih a Tukhik krong kanang hawu pek. Ani che kei käh khetsu nawu awlaw uyumlah mawh. Awlaw Boi käh bi bisaw äng ani ha hngat hngasaw. Ani lo khaw a kei krong anang hawu pekai. Keinih krong äng nangnih hmawt hmawna awlaw nangnih a ulyah anang pek hnäng hmawna kei nangnih a chaw kanang san. Tukhik ängtu kei nangnih käh uyumlah mawh la khetsu nawu Onisimas ha keteh. Ani ha nangnih huih chen khiyang dä. Anih la niya thänei saw khäl kheni anang hawupekai. Kei ängtu hengnaw hmueitih nawu Arista awlaw Banaba käh käisang Mak la anang khäh ei. (Mak krong äng nangnih a ayang bang kanang hawu pek däk. Ani dä nangnih khäka lo khaw, nangnih ani a ekhet äng lawei bäichu.) Josua ting mingei nawtih, ua khrawng khälla Justo ting ha ini bekei äm, äi Justo la ha nangnih a anang khäh ei khäh. Kei ängtu bitih khäl äng Yudi che ni pochong thum dä ini mäisaw. Anih la Hnadaga käh mawng pre koong kei ängtu ini bisaw. Anih la kei a awbawng ulyah khrawng pek khäh. Ipapha la ha nangnih a anang khäh ei. Ani nangnih khrawng khäl dukäng käh hngat. Awlaw Krito Yĕsu käh hngasaw. Hnadaga sitha huih ngei chula mama, yawchu chak däktih, awlaw hmawt chak däktih thänei hnäng hmawna, ani la sawkbrat nangnih koong tha po bala suh tong. Kei Ani koong sawksi kothok, ani la nangnih koong awlaw Laidiki la Hiyawlapoli a mäitih yumtih sawng khäl koong ani la mawt tha poh. Khetsu tosotih Luk awlaw Dima la ha nangnih a anang khäh ei khäh. Laidiki a käh nube tanawu khäla äkhäh pek bäichu. Awlaw Nimpha la ani ima lumei chitih yumtih khäla ha kei käkhäh ei. Nangnih dukäng ni chaw nini phawt pän hi, Laidiki a käh yumtih sawnga ha phawt sawk khäl bäichu. Awlaw Laidiki a käh yumtih sawnga mawng chaw san hmuei äm, äi chaw ha nangnih phawt bäichu. Akipa a ni kheu ta bäi, “Boi chetchaw aih koong mawng bi nanga awp hmuei äm, äi näphäh yeih lah saw dä.” Kei Pol, kei kanang khäh ei ting ni kheu chaw ku kutäng koyok. Kei hengnawei ngala kämäi saw hngilai chu. Hnadaga käh khetjen nangnih ängtu mäiseh. Kei Pol, Silban awlaw Timothi, Paw Hnadaga la Boi Yĕsu Krito äng sakeitih Thisaloni a käh yumtih sawng khäl khäka ni chaw kini yok. Nangkei käh Paw Hnadaga la Boi Yĕsu Krito la nangnih a ekhetjen la jelkhiyamsa anang pek seh. Keinih sawkbrat ni nangnih koong Hnadaga a äkiyä kini tawngei chi awlaw nangnih ming phouvei ungala keinih sawkbrat suh kini tong chi. Keinih suh kini tongei khaw a, nangnih käh yum äng käh bi awlaw nangkei käh Boi Yĕsu Krito lukhrung äng nini ümsaw äng käh chunei, äi kheu keini sawkbrat nangkei käh Paw Hnadaga hmawi mawh a suh tong äng kanang hawu. Khetsu nube tanawu khälo, keinih kini hmawt khäh Hnadaga la nangnih a anang khet nawk awlaw Ani la Ani käh khrawng nini thäneiyeih koong anang heh lei. Iyaäm nangnih khäka kini hiyawk saw sidawng pawi kheu äng jiji hiyah äini tha äng, Asanh chang Khraw äng awlaw ihisaw bün ni ini büneyeih saw äng dä lo hüt saw. Nangnih ängtu kini mäi hüt khaw a, nangnih nini pawyeih saw koong keinih i huih kini chetchonei hütäm, nangnih nini hmawt khäh. Awbawng kuluh nawk hmueipe ha Asanh chang Khraw la anang pek saw piyaw äng äi sidawng pawi lawei chu la nangnih keinih huih awlaw Boi huih nini chetchonei. Äi äng Mesidoniya la Akhaiya pre lekchaw khäla yumtih kheni khäl khäka pümchut huih hngat nini thänei. Mesidoniya la Akhaiya pre lekchaw jiji a nangnih känäng Hnadaga kheu khrih ei saw hiyah, äini nangnih Hnadaga a nini yumsaw kheu ha hang hang laa ni khrih ei chak. Ni khäl krong äng nangnih a iha hawu hlütiyah. Keinih nangnih khäka kini lo hüt khaw a, nangnih i huih keinih a anang lawkei hütäm awlaw ulupchaw nini khäh hüt saw känäng ihuih krawnal chula ihisaw awlaw sawk mawh Hnadaga pawta nini loal saw äm, äi khrawng kheni la ini hawu. Anih la awlaw ini hawu tun, hawn pre känäng Hnadaga chaw loa laih saw koong nangnih ihuih chongchula nini mäi saw äm. Äi awchaw che Yĕsu, ua Hnadaga la düsaw känäng thouhwal hütäm. Hnadaga känäng lo tun saw dam känäng ni Yĕsu la dä nangkei a khrawng ka. Kei nube tanawu khälo, nangnih nini hmawt khäh, nangnih khäka keinih kini lo hüt saw mawt usum vawng. Nangnih ni ha nini hmawt khäh, ni khawngah Philipi mräh a keinih kulunawk kini hmuei hüt awlaw kini hmawi ha lekei hüt. Äini äiya awbawng awhngaw phak ini mäi thän Hnadaga känäng sengkhri bünei ungala Ani käh sidawng pawi keinih nangnih khäka kanang hawu pek hüt. Keinih nangnih khäka sidawng kanang hiyawk saw khäl hiyah saw hiyah, pawyah saw lung hlü känäng ha hiyah, hiyah thän keinih nangnih a kanang kramei ungala ha ni kheu kanang taksaw hiyah. Äichaw a, Hnadaga la ihuih keinih a kini hawuvaih saw hlüei äm, äi huih dä sawkbrat kini hawu saw. Iyaäm Ani la sidawng pawi hiyawkaih koong keinih a tawntih ting khrawng kanh. Khrawng lung phiyaw ai äng keinih hno unga äini keinih lung chawmtih Hnadaga dä phiyaw ai äng kini hno saw. Nangnih nini hmawt khäh keinih krängak ha nangnih khäka khawh ei ungala kräu unga, awlaw nangnih känäng kini büneyei hü ting ha kanang kramei ungala ha kini kräu saw hiyah. Hnadaga keinih käh sawksi mäi khäh. Keinih hngat känäng ha awphiyaw kini büneyeih saw koong hno unga, nangnih känäng ha hiyah awlaw hngat känäng ha hiyah, Keinih Krito käh teh hmueitih kini thänei koong keinih sitha huih nangnih äng kini poh ei hnäng hüt khäh ai hü. Äini nangnih äng kini mäi hüt khaw a unu la awchaw a chetchaw saw huih kanang chetchaw hüt. Nangnih a kanang khetnaw ngala Hnadaga käh sidawng pawi jiji kini hiyawk saw hiyah, nangnih koong keinih sawk ha kini pekeyeih saw ächän kini mäi hüt khäh. Iyaäm keinih khäka nangnih mawt khetsu. Kei nube tanawu khälo, nangnih nini lung äng mäyah ei? Keinih ihuih dukhah äng tha po ungala nangnih äng kini bi hüt saw äm? Nangnih khäka Hnadaga käh sidawng pawi kini hiyawk hüt khaw a, keinih kini hän koong ühnüp awyawn tha kini poh hüt, keinih nangnih käh pan nawk chaw thäneyah hmawna. Nangnih yumtih khäl koong keinih käh mäichoh khrang ihuih mäi hütäm, äi sawksi nangnih awlaw Hnadaga ha mäi khäh. Nangnih äng keinih mäih khrang ihuih achang, konghmuh sang awlaw epret mäyahtih kini mäi hütäm, äi khäl sawksi nangnih awlaw Hnadaga ha mäi. Nangnih nini hmawt khäh, awpaw la awchaw chuhnu äng i huih poh ei äm keinih ha nangnih ükütäng ni äi huih kini poh ei hüt. Keinih nangnih a ulyah kanang pek hüt, nini lung kanang heyelal hüt. Awlaw Hnadaga a piyaw hmawna nini mäichoh aih saw koong ekhet äng känäng tak hüt. Iyaäm Hnadaga la nangnih a Ani käh mawng pre la a wachang wui anang pekaih saw koong anang bekei. Awlaw hngat koong ha keinih Hnadaga a äkiyä kini tawngei. Nangnih khäka keinih Hnadaga sidawng kini hiyawk khaw a, khrawng käh sidawng ting hiyah äini Hnadaga kheu ting nangnih nini khin hüt awlaw nini lawkei hüt. Awlaw lälä äi Hnadaga käh kheu dä. U aw yumtih nini thänei äm, nangnih lung äng äi kheu la dä bisaw. Nube tanawu khälo, Yudia pre lekchaw a Yĕsu Krito äng sakeitih Hnadaga yumtih sawng khäl ini mäi khäh, nangnih ha anih lup dä. Yudi khäl känäng anih la i huih dukhah ini khawm hütäm, nangnih ha nini pum presaw khäl känäng äi huih dukhah nini khawm hüt. Äi Yudi khälla dä Boi Yĕsu awlaw Hnadaga sidawng hiyawktih khäla ini tuk hüt saw awlaw keinih a khrawng kulunawk hüt. Anih Hnadaga lung hlü thänei hnäng u, anih la khrawng khäl kheni a ini mum hüt. Yudi hiyahtih khäl ngulai känäng ini kiyawtalaih saw koong hawu pek hnängah pak anih la keinih a khrawng nga aih saw khrawng poh hüt. Ni huih äi Yudi khälla sawkbrat ngulai pho hläng nga ini lo. Awlaw tua, Hnadaga käh man kheni anih dämäng kraw chak. Nube tanawu khälo, keinih tana kra koong kini lung kän hiyah thän kini kantha kän nangnih känäng hlawm hlaw a kini mäi hüt. Nangnih äng awlaw krawnak kini khomeyalaih hnäng saw khah nei ungala keinih mawmawt kini hno hüt. Äi koong keinih nangnih khäka kini lo aih khiyang hüt. Unung chaw kei Pol, mawt awkrawn krawn kolo aih saw kosot hüt. Äini mannat la keinih a khrawng ka hüt. Äpäih sum äng, nangkei käh Boi Yĕsu lo al khaw a Ani hmawi mawh a nangnih keinih käh khanh, awpiyaw awlaw phiyaw phoih thänei hnawh chu ei? Ihi khäh, nangnih dä keinih käh a wachang la awpiyaw. Uyumsum äng, keinih nangnih sidawng yaw unga saw hna hnah chunei hnäng hüt ti unga. Äi koong kei hnih Ethen mräh a mäi hnih ngala Timothi a ki hnih teh eih saw kini khrawei. Keinih käh nawu Timothi, ula Krito krong äng sidawng pawi hiyawk bala Hnadaga koong keinih ängtu bi äm, keinih ani a kini teh hüt. Nangnih a tha pekaih koong awlaw uyum äng anang ku aih saw koong keinih ani a kini teh hüt. Ani a teh hmuei saw che hngat ha kuluh naw hmuei bala Krito a uyum saw kän suteyala pak. Nangnih nini pum la bang nini hmawt khäh, ni huih kulunawk ni hmuei saw ha nangkei koong Hnadaga sitha dä. Keinih nangnih äng kini mäi hüt khaw a, keinih kulunawk kini hmueyeih saw ting kanang tak hüt khäh. Awlaw nangnih nini yawk saw huih dä thänei saw. Äi koong kei hna hnah chunei hnäng ti nga ni Timothi a keteh lah hüt saw. Ani keteh hüt saw nangnih käh uyum kawhmawt taih koong. Kei kawtawk hüt, mannat la nangnih a chawmsi äng anang khrawk saw awlaw kei nih käh bi kheni usum vawngah pak thänei saw. Tua Timothi krawnal däk awlaw ani la nangnih käh uyum la ekhet äng käh sidawng olo. Anila hawu, ekhet lung äng nangnih sawkbrat keinih a nini lung äng anang khawyei khäh. Keinih kanang hmuh aih khiyang saw huih nangnih ha keinih a anang hmuh aih khiyang. Äi äng, nube tanawu khälo, Timothi känäng nangnih käh yum kheu yaw ungala keinih waih la dukhah äng mäipe ha ulyah kini bünei. Nangnih käh yum la dä keinih a ulyah khrawng pek saw. Iyaäm Boi khrung äng tua dä nini yum chang khaw, keinih sawk awpiyaw. Tua nangnih koong keinih Hnadaga a äkiyä kini tawngei hnäng. Nangnih koong Hnadaga hmawi mawh a awpiyaw kini bünei saw äng Ani a äkiyä kini tawngei. Keinih ühnüp awyawn nangnih koong kini lung känäng suh kini tong, nangkei awlaw krawnak khomei yal hnäng hmawna. Nangnih uyum koong ibang hlü äm äi kheni kanang pek hnäng hmawna ‍ha suh kini tong. Tua nangkei Paw la Hnadaga awlaw nangkei Boi Yĕsu la nangnih khäka keinih a lawm dawn bala chih heh. Boi la nangnih käh khet hngat la hngat dukäng awlaw khrawng kheni äng nung sawk seh. Nangnih a dissa kanang khet saw huih khrawng khäla ha khet naw bäichu. Ni huih äng Ani la nini lung äng tha anang pekai. Awlaw Boi Yĕsu la Ani käh khrawng khäl kheni a lo bala loal khaw a nangkei käh Hnadaga la Paw hmawi mawh a nangnih achang la epret mäyahtih a nini thäneyei. Äpäih sum äng, nube tanawu khälo, Hnadaga lunga iba nini hluih yeih lah saw äm, äi keinih känäng nini chok nawk däk. Awlaw ihi khäh nangnih äi huih nini chetchonei khäh. Äi thän Boi Yĕsu ming äng nangnih khäka khawh ei awlaw ulyah kanang pek awlaw unung chaw äi lup chetchonei hnäng hmawna. Boi Yĕsu känäng dogo bünei ungala keinih nangnih a ihuih ini mäichoh aih lah saw äm, äi krong kanang chok hüt saw äi nangnih nini hmawt khäh. Nangnih achang nini mäiyeih saw la bitchaw ha nini mik sawuvei yeih chu saw Hnadaga la hlü. Awlaw Hnadaga a hmawtah tih Yudi hiyahtih khäl huih akhantha la hlüei saw huih mäichoh ah pak nangnih hang hang la ni nini kantha a achang awlaw hmawi bünei lokong songei chula nini mäiyeih saw chok naw khäl. Ni krong äng hngat la ha yumtih nube tanawu a kramei bala anih kän iphiya lawei yalah pak. Keinih ayang ha kanang tak awlaw mawt sidih ha kanang pek hüt, ni huih matara bi bitih khäla Boi la dam pekai. Iyaäm Hnadaga la nangkei ini mik sawuvei yeih saw koong khrawng panei saw hiyah, äini achang ini thäneiyeih saw koong dä khrawng panei saw. Äi koong ni chok hawu ula laweiyah äm, äila khrawnga laweiyah saw hiyah, äini Ani käh Asanh chang Khraw anang pektih Hnadaga a dä laweiyah saw. Hngat la hngat kheteyeih saw krong nangnih khäka koyokaih saw iha hlüah. Iyaäm nangnih a hngat la hngat nini kheteyeih saw Hnadaga la anang chok khäh. Awlaw ihi khäh Mesidoniya pre lekchaw a käh yumtih khäla ni huih nini khetnawk khäh. Äini nube tanawu khälo, nangnih a unung khawh ei ungala kanang taksaw nangnih käh ni khet nung hmawna. Nangnih a ayang kanang tak hüt saw huih jel hnim hnim chaw a mäi khäl, nini pum bi äng nini lung khraw ei khäl awlaw nini pum käh bi dä nini pum la bi khäl, nini pum hän nini hluih yeih saw koong dä bi khäl. Ni huih äng nangnih yumah tih khäl känäng hmawi nini büneyei awlaw hngat lukhrunga ha üm chula mäi lah hnawh chu. Nube tanawu khälo, düdäktih khäl iba ini thäneiyeih saw äm, äi krong nangnih nini hmawtaih saw kini hlü. Nangnih dä nini hmawt khaw, akhah nei saw mäyahtih khrawng khäl huih nini lung dukhah mäi hnawh. Nangkei ini yumei Yĕsu dü hüt awlaw düsaw känäng thouwal. Awlaw Yĕsu äng sakei ula dütih khäl kheni a Hnadaga la anih a ha Yĕsu ängtu loa lai. Boi käh chok hawu tua keinih nangnih a kanang tak tun saw, nangkei heng pula mäitih khäl awlaw Boi loal saw täh heng pula ini mäiyei. Nangkei asang ha äi dütih khäl khawngah chetal hnawh pu. Asam len äng, sinmawn kheu äng awlaw hawn natchaw gong apang saw äng awlaw Hnadaga käh hawn natchaw khälla bawh ini tumsaw sam äng Boi kädäng hawn pre känäng komalai. Krito äng sakei ula dütih khäl äi khaw a täkchah heng ula ini thouwalai. Äi pänäng nangkei heng pula mäitih khäl düdäktih khäl ängtu Boi äng hawna ini khomeyeih saw koong kho hiyung äng khawi ini hmueiyalai. Äidä nangkei Boi ängtu sawkbrat ini mäyalai. Äi koong ni huih kheu khäl hawu chula hngat la hngata ulyah pekei khäl. Nube tanawu khälo, mawng khaw la mawng khin äng ni khäl thäneyeih saw äm kei nangnih a äi koyokaih saw hlü ah. Nangnih nini pumla bang mawmawt chaw nini hmawt khäh, awyawna sukhä ihuih lo äm, Boi käh khomhnüp ha äi huih dä loaih saw. Khrawng la iti khaw a bang jelkhiyamsa däk, iha keh eih saw mäitiyah ting ini hawu äm, äi khaw a pung vawn mawh hmutaw täk ting mäeyeih saw koong ähän choh ei saw huih dä äi khrawng khäl ini krakaih saw. Anih äi ini krakaih saw känäng bitchaw ha lät hnawh u. Äini nube tanawu khälo, nangnih che uhiyung äng mäichu, äi khomhnüp che sukhä lo khaw a anang maw sawk saw huih nangnih khäka loa pak. Nangnih che hang hang ni awa la ühnüp äng käh khrawng dä. Nangnih che awyawn hiyah thän uhiyung äng käh khrawng hi chu. Äi koong, nangkei awhngaw khrawng huih ipai pu, äichaw a khak pula awlaw ini puma songei pula mäi äng khä. Iptih khäl che awyawna dä ini ip saw, awlaw moitih khäl ha awyawna dä ini moi saw. Äini nangkei ühnüp äng käh awa khrawng dä, äi koong ini pum ini hlupeyeih saw tawn. Nangkei uyum la ekheta kangchang kayei dün huih ini wataih lah saw. Iyaäm Nangkei ini hmawt khäh Hnadaga che nangkei käh khrawng khiyawtal tih. Niche nangkei käh khrawng katih kri tokkiya huih. Dam ini büneyeih koong hiyah awlaw bang nangkei käh Boi Yĕsu Krito äng khiyawt ini büneyalaih koong Hnadaga la nangkei koong po bala tawk khäh. Krito nangkei koong dü hüt, nangkei ini dü thän ini heng thän Ani loal khaw a Ani ängtu ini hengalai. Äi koong nangnih tua ihuih nini poh äm, äi huih hngat la hngata ulyah pekei khäl awlaw kuei khäl. Nube tanawu khälo, nangnih a khawh ei ungala kanang tak, nangnih dukäng ula tha po bala bi äm, Boi pawh a mäi bala ula chetchaw äm awlaw anang chok hawu äm, anih a hmawi pek bäichu. Anih la ibang ini poh äm äi koong ekhet lung äng anih a unung chaw hmawi pek bäichu. Nangnih dukäng jelkhiyamsa äng mäi bäichu. Nube tanawu khälo, nangnih a ni kanang chok hawu, dawmtih khäla sidih pek bäichu, sengkhri mäyahtih khäla sengkhri pek bäichu, ngiyawtih khäla ku bäichu awlaw hang hanga chunei chula mäi bäichu. So bäichu, epret chaw a hngat la ha epret poa lah pak. Nangnih sawkbrat ni hngat la hngat koong awlaw awhngaw khrawng khe koong awpawi nini poh aih saw hno ei bäichu. Sawkbrat awpiyaw äng mäi bäichu. Sawkbrat suh tongei bäichu. Awlaw lala lup nini mäi khaw a ha Hnadaga a äkiyä tawngei bäichu. Iyaäm Krito Yĕsu äng dä ni khäl Hnadaga käh lung hlü. Nangnih nini sawk äng Asanh chang Khraw käh bi dümai chu. U khälla Hnadaga sidawng hiyawktih huih Hnadaga kheu ini hawu äm anih käh kheu süpah pak mäyei chu, awlaw bang hang hang ni chawm bäichu. Ibang pawi äm äi mawn chula tawei bäichu, awlaw pawyah saw khäl khe känäng awhlawm hlaw a mäi bäichu. Jelkhiyamsa khrawng pektih Hnadaga la hang hang äng ni achang anang po seh awlaw nangkei käh Boi Yĕsu Krito lo alaih khaw a nangnih käh kantha, awkhraw awlaw lung epret mäyah pak po seh. Nini lung äng tawei bäichu, ula nangnih a anang panei äm Ani äng nini üm hnäng khäh. Ani la äi poh khäh ai. Nube tanawu khälo, keinih koong ha suh tong bäichu. Ekhet lung äng ükütni a ni äkhäh pekei bäichu. Kei Boi ming äng nangnih a kanang sinmawn, ni chaw hang hang nube tanawu khäl khäka phawt pek hmuei hmawna. Nangkei käh Boi Yĕsu Krito käh ekhetjen nangkei ängtu mäiseh. Ni chaw che Pol, Silban, Timothi känäng Paw Hnadaga la Yĕsu Krito ängtu sakeitih Thisaloni a käh yumtih sawng khäl koong yok hmuei saw. Paw Hnadaga awlaw Boi Yĕsu Krito la nangnih a ekhetjen la jelkhiyamsa anang pekseh. Nube tanawu khälo, keinih nangnih koong sawkbrat Hnadaga a äkiyä kini tawngeyeih saw tawn khäh. Nangkei ni huih ini poh aih saw tawn, iyaäm nangnih käh yum nung liäng nung awlaw nangnih hngat la hngat nini khetei saw nungtun. Äi koong Hnadaga käh yumtih sawng khäl hmawi mawh a nangnih koong kini bawriyei hnäng. Nangnih kuluh nawk nini hmuei saw la dukhah khawmpe thän nangnih käh chunei la uyum chang bala mäi. Ni khäl dä Hnadaga käh ihisaw tara dawng saw. I koong nangnih dukhah nini khawm äng äi hawn pre koong nangnih dä tawntih nini thäneiyalaih saw. Hnadaga che ihisaw tara bitih. Hnadaga la äi poh ai. Ula nangnih a dukhah anang pekäm, Ani la anih a dukhah pekai. Nangnih dukhah khawm tih khäla Ani la jelkhiyamsa anang pekai awlaw keinih a ha khrawng pekai. Ani la ni khäl poh aih saw Boi Yĕsu Ani käh tha mawh hawn natchaw khäl äng hawn känäng lo a laih khaw a. Ula bang Hnadaga a yumeyah äm awlaw ula bang Boi Yĕsu krong äng käh sidawng pawi khinah äm, Ani a Hnadaga la choi bala mäitih mei äng khrawkai. Anih la ini büneyeih saw dam sawkak ini khawmai. Boi hmawi mawh känäng awlaw Ani käh wachang len känäng ini ka wai. Ani lo al saw khomhnüp äng Ani käh asanh chang khrawng khäl känäng wachang büneyei awlaw Ani a yumtih khälla hmawi ini pekai. Nangnih ha anih ängtu nini mäyeih saw dä, iyaäm keinih kanang taksaw sidawng nangnih nini yumei khäh. Keinih käh Hnadaga la nangnih a anang panei tawn ting anang khin ong keinih nangnih koong sawkbrat suh kini tong. Ani tha äng bi pawi nini biyeih saw nini lung anang khawi hmawna keinih suh kini tong. Nangnih uyum äng ibang nini poh tun äm Ani la äi hluih hmawna. Äihi, nangkei käh Boi Hnadaga la Boi Yĕsu Krito käh khetjen koong nangkei käh Boi Yĕsu Krito käh a wachang nangnih duk känäng awdawngai. Awlaw nangnih ha Ani koong äi a wachang nini büneyei. Nube tanawu khälo, nangkei käh Boi Yĕsu Krito krawnak lo alaih saw dä awlaw nangkei a utu pongal bala Ani khäka khrawng chih a lai. Ni krong äng keinih nangnih a kanang hnih ei. Yĕsu loal däk ting, awhmawi mawh äng käh kheu kini hawu khaw a awlaw tara kini haw khaw a awlaw chaw äng kini yok ting, khrawng khälla äi huih kheu kini hawu ting ini hawu nawk theih. Äi huih khrawng khälla ini hawu saw tawk chula nini lung tarayei sawkai chu. Hngata ha pawyah saw lawm pawtäng anang chi hnängah pak. Iyaäm äi khomhnüp lo khawngah Hnadaga lukhrunga mawt khrawng khäl ini thouwai. Äi kheu khinah tih pawtaw, ua krakaih saw mäi äm, äi dawngai. Khrawng la hnadaga ting ini panei saw awlaw ini rosi saw ükütni thawka upuma elensum ting dawneiyei. Hnadaga ima om bala upuma hnadaga ting khawmeyei. Nangnih nini lung äng mäyah ei? Nangnih ängtu kämäi khaw a, ni khäl kanang tak hüt saw. Äi pawyahtih pawtaw lo alaih saw tua ula mawn bala tawk saw äm, äi nangnih nini hmawt khäh. Äihi ani käh khin äng ani dawngalai. Niha nini hmawt khäh pawyahtih pawtaw käh uthuh bi tua ha thänei tun khäh. Äini ila mawn bala tawkäm äi ani lawm känäng hlai hmueiyalah saw sawgraw äi thäneiyeih saw khäl thänei hawm hnawh. Äi pänäng Boi Yĕsu la Ani kaw känäng thok saw khri äng ani a tukai awlaw Ani dawng saw wachang äng ani tha krakai. Äi pawyahtih pawtaw mannat käh tha äng loai awlaw ajapjap hiyah saw a hmatla la nawmaw nawkaih saw bi biyei. Awlaw ani la akrak lawm äm mäitih khrawng khäla ajapjap lawm äng krameiyei. Ni khrawng khäl ini khrakaih saw. Iyaäm ngulai känäng ini kiyawtalaih koong anih la ihisaw a khet naw u awlaw lawei u. Äi koong Hnadaga la anih khäka hmaw saw bi teh ei. Äi anih hiyah saw a yumei hmawna. Äi äng, ula bang ihisaw yumeyah äm, ani pawyah saw bi äng awpiyaw. Anih kheni a tara äng epret mawh ting khrawk hmuei yei. Khetsu nube tanawu khälo, Boi käh khetsu khälo, nangnih koong Hnadaga a sawkbrat äkiyä kini tawngeyeih saw tawn. Iyaäm ngulai känäng nini kiyawtalaih saw koong Hnadaga la täkchah nangnih a dä anang heh lei saw. Asanh chang Khraw äng Hnadaga koong nangnih a awhngaw chaw tawk hmuei. Awlaw ihisaw sidawng pawi äng, nangnih käh yum äng nangnih ngulai känäng nini kiyawtal saw. Keinih mawng sidawng pawi kini hiyawk käm äi kiyawt nini büneyalaih koong ani la nangnih a anang bekei. Ani la nangnih a anang bekei saw nangnih Boi Yĕsu Krito käh a wachang üphüh bünei hmawna. Äi koong nube tanawu khälo, nangnih nümnüm chaw mäi khäl. Keinih kheu äng awlaw chaw äng ibang ihisaw kanang chokäm, äi mawn chula mäi khäl. Nangkei käh Boi Yĕsu Krito kädäng la nangkei khrawng khet nawtih Paw Hnadaga käh ekhetjen la nangkei a päihyah saw ulyah awlaw achang tih khanh khrawng pek seh. Bi pawi la kheu pawi äng nini lunga ulyah la tha pekei khäl. Uyumtum äng nube tanawu khälo, Hnadaga käh sidawng nangnih dukäng ihuih jotjota khrih ei äm, äi huih jotjota Boi käh kheu khrih ei seh awlaw nangnih nini lawkei saw huih khrawng khälla ha hmawi pek ula lawei seh u. Ni krong äng keinih koong suh tong bäichu. Awlaw suh tong bäichu Hnadaga la hang hang soutih la pawyahtih khrawng khäl känäng khrawng khiyawtal seh. Iyaäm ükütla äi sidawng yum u. Äini Boi che uyum lah mawh dä. Ani la nangnih a tha anang pekai awlaw mannat känäng anang kakai. Hnadaga äng sakei pula nangnih khrung äng keinih a ni uyum mäi khäh. Keinih nangnih a ibang kanang takäm äi huih nangnih nini bi awlaw bi chula nini mäyei. Boi la nangnih käh lung Hnadaga käh ekhet lawm äng awlaw Krito la chunei hnäng saw lawm äng anang chi seh. Nube tanawu khälo, nangkei käh Boi Yĕsu Krito ming äng ni kanang tak. Yumtih dukäng käh dawmtih la keinih kanang chok hawu saw sumeiyah tih khäl känäng kakei chula mäi bäichu. Nangnih äng kini mäi hüt khaw a ihuih kini mäichoh hütäm, äi nangnih nini hmawt khäh. Äi huih nangnih ha nini mäichoh aih lah saw. Nangnih ängtu kini mäi hüt khaw a keinih dawm hüt unga. Awmawn pekah pak hngat käh ha iha ei unga. Äichaw a, keinih ühnüp awyawn dukhah po ungala kini bi khäh. Keinih hngat käh bi chawk ha ei unga. Keinih nangnih käh bichawk kini ei tawn dä. Äini äi huih poei unga. Iyaäm keinih käh mäichoh khrang huih nini mäyeih koong nangnih a kanang dawn saw. Nangnih äng kini mäi khaw a kanang tak hüt, “Ula bi do khiyang ngah äm, äila ei yah seh.” Keinih kini yawk, nangnih dukäng üküt che mawt ini dawm, iha bi kawi u. Khrawng be kräu saw äng dä khawngeiya pak poh ei. Äi koong Boi Yĕsu Krito ming äng äi huih khrawng a keinih kini tak awlaw kini sin mawn. Anih la nümnüm chaw bi kawi ula upum käh eisaw hluih ei ong. Nube tanawu khälo, bi pawi nini bisaw äng ngiyaw ai chu. Ni chaw äng yok hmuei saw keinih käh kheu khäl khinah tih khrawng khäla hmat chula taw khäl. Äihi anih hiyawkei ong anih äng puyeiyei chu. Äini anih a lansu ting ha khinai chu, äi chaw a nini nawu huih khin chula dä sidih pek bäichu. Tua jelkhiyamsa pektih Boi la nangnih a sawkbrat Ani käh jelkhiyamsa anang pek seh. Boi nangnih hang hang ängtu mäiseh. Kei Pol, kanang khäh ei. Ni chaw äng käh kheu bitchaw kei kädäng la kei kut äng koyok tun. Ni huih dä hang hang chaw äng kei doksok kawthawnei saw. Nangkei käh Boi Yĕsu Krito käh ekhetjen nangnih hang hang ängtu mäiseh. Kei Pol, nangkei a khrawng khiyawtal tih Hnadaga la Krito Yĕsu käh kheu äng teh hmueitih a käthänei. Krito Yĕsu äng dä nangkei ükütni ini üm saw. Uyum mäitih kei käh ihisaw chaw Timothi a kei ni chaw koyok tun. Paw Hnadaga awlaw nangkei Boi Yĕsu Krito la nanga anang jenei awlaw khetjen la jelkhiyamsa anang pek seh. Kei Mesidoniya känäng kechetal khaw a, nanga Iphisa nämäiyeih hüt saw koong kini tak hüt. Äiya hiyah saw choktih khrawng khäla nangaaih koong kini sin hüt. Anih a ta bäi, hiyah saw khui la nupaw chen sawk käh päihyah saw iming khäl kräuvei a pak. Ni khäl äng che kheu notoksakei nawk khäh. Äini Hnadaga la Ani bi iba bi äm, äi uyum äng dä nawhmawt saw. Ni kanang hawu pek saw che ekhet mäi hmawna. Ni ekhet che ulung pawi la tawk pawi awlaw ihisaw yum känäng olo saw. Aw vawng khrawng äi khäl känäng hlaei yal ula usum vawngah saw kheu pawtäng ini chet tun däk. Anih ini pum la bang ini kheu yawchu ei u awlaw mawng krong ini hawu äm, äi krong ha yawchu ei u. Äi thän anih Mosi käh thung choktih a ini thäneyeih khiyang. Maw mawtchaw ini sumei khaw thung awpawi khäh ting nangkei ini hmawt. Nangkei ni ha ini hmawt, konghmuh sang koong ni thung pek hmuei yah. Äini thung tämahtih la pawiyah saw hmawt pe ha bi bitih la pawyahtih awlaw Hnadaga a yumeyah tih la ngulaisu khäl koong dä pek hmuei saw. Awlaw ni khäl che soutih la Hnadaga a keh khrang hmawtah tih khäl koong awlaw khrawng tutih la unupaw a bang tutih khrawng khäl koong dä. Awlaw thung che ni huih khrawng khäl koong yok hmuei. Mawng khrawng khäl ini mik sawuvei äm awlaw khrawng krak äm, u khrawng mawntih äm, hlei tih awlaw tara yunga eheng sawksi thoktih awlaw ihisaw ini choksaw pawtäng mäyahtih a dä pek hmuei saw. Ni chok hawu che sidawng pawi äng nini bün. Ni sidawng pawi la che Hnadaga käh piyaw kheu hawu. Ni sidawng pawi hiyawkaih saw bi Ani la kei a aw awp. Kei a tha epektih äi Krito Yĕsu nangkei käh Boi a kei äkiyä kawtawngei. Iyaäm Ani la kei a uyum mawh ting khin bala ani chetchaw aih tih bi äng khrawng khrawk saw. Kei Krito a kekeleih hüt awlaw khrawng khäla kukuluh nawk hüt, thasa man mawh kämäi hüt. Äi thän ha che Ani la kei a ni bi äng eheh lei. Iyaäm kei yumnga saw koong dä hmawta pak äi khäl kibi hüt äini Hnadaga la kei a ejenei. Nangkei käh Boi la kei a khetjen äng uhluih! Ani la kei a Krito Yĕsu känäng olo saw yum la ekhet epek. “Krito Yĕsu la ngulaisu khälla khiyawtalaih koong luhdül äng olo hüt.” Ni kheu khäl ihi khäh awlaw yumaih phüh mäi khäh. Awlaw kei awhngaw ngulaisu khäl thawka ngulaisu len. Äini Hnadaga la kei a ejenei. Äi koong kei ngulaisu len thän ha, Krito Yĕsu la kei a usumei bala üküt thawka chunei hnäng tih sum huih awdawnei. Äihi awhngaw khrawng khälla Ani a ini yumaih saw la päihyah saw sawk ini büneyei ting kei a so ula ini chok nawkai. Üküt thawka kenkeh mawh la awpiyaw äng luih tih Hnadaga, awpiyaw äng sawkbrat luih bala mäiseh! Ani dä sawkbrat Mawng, krängak ha düah tih la dawngah tih Mawng. Ani dä hngat pätpät chaw Hnadaga. Amen. Khetsu chaw Timothi, Nang krong Hnadaga la ihuih kheu hawu hütäm äi huih kawchawng chawng kei nanga kini sin mawn. Ni khäl nulung äng tawei tila Krito koong mawmawt chaw jal khawm tila mäi hnäng hmawna, äi äng tutu nang käh yum Krito äng tawei bäi awlaw nawtawk ha asanh tawei bäi. Hngat pai hnih khrawng la ulung äng käh tawk pawi khinah pak uyum ini khrah ei. Äi khrawng khäl äng mäitih che Humina la Alekzanda. Kei ahnih a yumtih sawng känäng thoh al ngala che mannat kut äng kaw awpal. Äi khaw ahnih la hiyah saw chok hawu chok häih la Hnadaga a ini keleih saw ini dümalai. Äihi täkchah kei kanang tak, hang hang koong Hnadaga khäka a hawuvei, awkhawh ei, suh a tongei awlaw äkiyä atawngei. Äi huih mawng khäl koong awlaw dogo mawh khrawng khe koong suh tong pekbäi. Äihi nangkei Hnadaga a kugoi pula awlaw ihisaw äng mäi pula nümnüm la jelkhiyamsa äng ini mäiyei. Ni khäl pawi khäh, awlaw ni äng nangkei käh khiyawtal tih Hnadaga ha awpiyaw khäh. Ani la hlüei ükütni ngulai känäng ini kiyawtalaih saw awlaw ihisaw kheni ini yawkchu aih saw. Hnadaga che hngat dä mäi saw awlaw Hnadaga la khrawng kra äng eche hngat pätpät mäi. Äi eche che Yĕsu Krito. Ani luhchaw ämäi hüt. Khrawng khäl ini lätalaih saw awkhawh huih Ani la awsawk pekei. Ni sidawng ihisaw khin äng Hnadaga la luhdül a epek. Äi koong kei sidawng hiyawktih la teh hmueitih huih helh ku hmuei. Awlaw Yudi hiyahtih khäla uyum la ihisaw sidawng kawhawu pekaih koong kei choktih huih helh kuhmuei. Kei hleinga ihisaw kanang tak. Äihi kei kühlüei, pawtaw khela aman la si eisaw lung taweiya pak, asanh chang äng ukut vawng hnih tunei ula suh ini tongeiyeih saw. Awlaw ni ha kulung hlü mäi, hmutaw khela nüm chawng chawnga mäi ula khrawng mik äng pawiyei dawng saw wat ini wataih saw. Anih la ini lusawm ayapyap poh ei ula ini mäiyeih saw awlaw ha, amiyak, khawk tih awat wat ula che khrawnga dawneyah seh u. Äichaw a anih la bi pawi äng upuma chetchaw ei seh u. Mawng hmutaw la upuma Hnadaga a rositih ting takei äm, äi hmutaw khäl koong ni bi ni awtawn. Kräuva pak upuma awpei bala hmutaw hngat la chok nawkaih lah saw. Hmutaw hngat la pawtaw a chokaih saw koong awlaw pawtaw khrung äng eleneyeih saw koong kei ana pek nga. Awlaw bang ani kräuvah pak mäiyeih lah saw. Iyaäm täkchah Adam dä bi hmuei hüt saw, äi pänäng dä Iva bi hmuei saw. Awlaw Mannat la kramei saw Adam hiyah. Hmutaw dä kramei hmuei hüt saw awlaw ngulai äng awkraw saw. Äini hmutaw khälla uyum, ekhet la upuma asanh chang ini tawkei hi, awlaw ini nüm chawng hi, chaw hmuei ula che ini kiyawtalai. Ni kheu khäl ihi khäh, “Losupei yumtih sawng äng käh gongsong thäneyeih khiyang khaw, ani la bi pawi biyeih khiyang saw dä.” Hngat la ha ese ta hnänga pak dä gongsong mäyeih lah saw. Ani a iphiya hngat dä mäyeih lah saw. Ani la akantha songeyeih lah saw awlaw ani la ngen pawi tawkeiyeih lah saw. Ani nüm chawng tih thäneyeih lah saw awlaw gawlba teh long awpawi piyeih lah saw. Khrawng khäla chok khrang ha aw hmawtaih lah saw. Ani alak äng moitih la man mawh thänei lah hnawh. Ani jeleyeih lah saw awlaw sĕ hlütih la awmawn lawphah ti thänei lah hnawh. Ani la i imsaw mawtchaw thin khiyong ngeyeih lah saw. Ani a chaw chuhnu la hmawi pek hmawna awlaw ngei hmawna mäiyeih lah saw. Ani la dä i im bang thin khiyongei hnängah hi, iba yumtih sawng khäla so khreyeih saw äm? Yumtih sawng äng käh gongsong atha yumtih thän lah hnawh. Iyaäm ani awbawriyei naw theih awlaw mannat la khawmaih saw tara ni, ani äng kraw naw ai. Yumtih sawng hiyahtih khrawng khäl khäka ha iming pawiyeih lah saw. Äihi ani ming se hnawh awlaw mannat käh kawl äng kraw hnawh. Äi huih kawchawng chawng dikawn khälla ha hmawi bünei hmawna awlaw kheu khaw ak äng käh khrawng thänei hmawna. Anih alak äng moitih la khrawng kramei bala awmawn lawphah tih thänei lah hnawh. Anih la awtawk sanh äng uthuk äng käh ihisaw uyum mawn ula ini tawkeiyeih lah saw. Dikawna bi pek khawngah anih a ayang naw chawmaih lah mawsaw. Äi äng ani la epret mäyah saw awdawnei hnäng hi, dikawn bi ibi hnängai. Äi huih kawchawng chawng anih phiya khäl ha hmawi mawh thänei seh u. Anih la khrawng be hawhawu ula choneyei u awlaw ini puma songei seh u. Lala bi äng pei uyum tawei seh u. Dikawna ha iphiya hngat dä mäyeih lah saw. Ani la mawmawt chaw awchaw chuhnu la im thong thin khiyongei hnäng hmaw na. Mawng Dikawn la mawmawt chaw bi äm, ani la awhngaw khrawng khäl känäng hmawi bünei awlaw Yĕsu Krito khrung äng anih käh yum ha changai. Kei nang khäka alanda koloaih saw kakhanh thän, ni khäl nochokaih koong kini yok tun. Kei dä kawkraw naw hi, nang naw hmawtai Hnadaga khrawng khäl iba ini mäichoh aih lah saw äm. Niche sawk mawh Hnadaga käh yumtih sawng. Ni yumtih sawng dä ihisaw äng käh täng la ochou. Iha ini hiyeih saw taweiyah pak, ni hnäh nangkei käh uthuk äng käh ihisaw yum. Krito luhchaw thänei bala luhdül äng olo, Ani dä ihisaw ting Asanh chang Khraw la sanh sanh awdawn. Hawn natchaw khälla Ani a ini hmuh, üküt yapsaw khäl khäka Ani kheu khrawng khälla ini hawu hüt. Luhdül äng käh khrawng la Ani a ini yumei hüt. Awpiyaw äng Ani a lawk hmueiyal hüt. Asanh chang Khraw la sanh sanh awhawu, u hnung khin äng hngat pai hnih khrawng ihisaw yum känäng awhngaw lawm äng ini chetalai. Anih la kramei tih khraw a ini tämai awlaw khrawse khälla ini choksaw ini khinai. Ni khrawng khäl che lupsongeitih awlaw hlei tih. Anih käh tawk khe che düdäk. Anih la om naweyeih saw ini nga awlaw üküt ei ok saw vawn ei okaih u saw ini nga. Äini yum tawei tih khäl, u khälla ihisaw ini hmawt äm, anih la äkiyä tawngei ula eio seh u. Iyaäm Hnadaga la ei okaih koong dä äi khäl ibisaw. Hnadaga la bisaw kheche pawi khäh. Äkiyä tawngei tila nusum khaw iha nähiyänaih saw mäyah. Iyaäm Hnadaga käh kheu la suh tong äng ükütni achang chak khäh. Timothi o, nang ni khäl nube tanawu khäla naw phawng pek khaw, nang Yĕsu Krito käh pawitih hngasaw näthänai. Mawng ihisaw yum la chok hawu pawi sum tila nolo äm, äi kheu äng chom tila nämäiyei. Hnadaga a piyaw pekah tih khui khäl känäng kakei tila mäibäi. Ni khäl che chang khälla ini poh saw khui huih dä. Äichaw a Hnadaga käh khrawng nini thäneyeih saw koong nini puma chokei khäl. “Nakantha pawiyeih saw koong läkei layei pawi khäh, äini Hnadaga käh khrawng nini thäneyeih saw koong nini puma nini chokei saw thasa pawi. Iyaäm äiche ni sawk la hmawi mawh a käh sawk äng amrat mäi.” Ni kheu khäl ihi khäh awlaw yumaih phüh mäi khäh. Ni koong dä keinih tha kini poh awlaw kini lung khraw ei ungala kini bi. Iyaäm hengtih Hnadaga khrung äng kini üm khäh. Ani dä khrawng khe käh khiyawtal tih, u nung che yumtih khäl käh. Ni krong khäl kheni hawu pekbäi awlaw chok bäi. Nang chong krawng ting hngat la ha anang somaw ah pak. Ne kheu äng, ne chetchonei saw äng, ekhet täng, nuyum äng awlaw asanh chang äng yumtih khälla nanga anang hmu ula chok naw hnäng hmawna mäi bäi. Kei lo nga saw sawgraw, nang kiyam phawt pek tila yumtih khäla ulyah pekbäi awlaw chok bäi. Nulung äng khaweiyal, yumtih elen khälla nang luki äng ini kut ni tawkei hüt. Äi khaw a anih kaw känäng Hnadaga la mawng krong bang hawu hütäm, äi awkhraw phiyaw phoih nang nü bünei hüt. Äi phiyaw phoih usum chetah pak po ai ti. Ni krong khäl äng nulung ko pekei bäi. Nang käh bi khäl äng nakantha hang hang awpei bäi, äihi nang nawpaw saw hang hang la ni hmuh ai. Nupum krong la nochok nawk saw krong äng sidih mäibäi. Ni huih khäl po bäi, äi khaw nu puma naw kiyawteyal hnängai awlaw nang kheu khin tih khäl ha ini kiyawtalai. Changlen khäla krängak ha kheu leng äng kräu puinaw ai ti. Naw paw huih khin tila dä ulyah pekbäi. Chong krawng khäla ha nata la nawnawu lup khinei tila ulyah pekbäi. Achang nu khäla nunu huih khinei tila ulyah pekbäi awlaw nulung sanh äng hngawk hngu chaw khäla nebesu huih khinei tila ulyah pekbäi. Mawng hmeinu khäla soaih tih hngat ha mäyah äm, anih a so khrei bäi. Äini awchaw chuhnu la utu khäl mäitih hmeinu a anih la dä ayang chetchaw ula Hnadaga käh kenkeh dawnei maw seh u. Ni huih äng anih nuchen paw sawk käh ekhet äng käh lei ini thungal hnängai awlaw äi äng Hnadaga ha piyaw ai. Mawng hmeinu a u ha mäyah äm, ani la Hnadaga a üm bala uku büneyeih saw koong ühnüp awyawn suh tongei seh awlaw a khawh ei seh. Äini mawng hmeinu awpiyaw äng luhdül äng mäi äm, äi hmeinu che heng pe ha awkhraw lawm äng üdüsaw äng utu. Ni krong khäl anih a chok bäi anih a khrawng khälla epret khraw hnängah pak. Ula upum käisang khäla awlaw unungsum i im saw a so khreyah äm, ani kräu saw la opoh eisaw khäl tueiyah. Awlaw ani yumah tih thawka bang keih yal. Hmutaw hngata hmeinu ting iming nawtawngaih hi, khokum sokgip thäneyeih lah saw awlaw aw pawtaw äng mäi hüt khaw a uyumlah äng mäi hütei so bäi. Äi hawuvah ha ani käh bi kawi äng iming mäiyei so bäi. Awchaw chuhnu khrawnga poh ei, gawlba chetchaw ei, Hnadaga käh khrawng khäla okho bot pekei, dukhah äng krawtih uku bawmei awlaw awhngaw bi pawi khäl äng ulung khraw keiyei so bäi. Sawk näu hmeinu ming khäl che hmeinu ming äng yoai ti. Iyaäm anih che ini sawk näu pe koong ini lähläh wai awlaw Krito kenkeh leu wal bala pawtaw ini omeyalaih khiyangai. Äi äng anih la ayang äng amah ini khawmei hüt saw hngilal ula upum äng dam ini lo ei. Awlaw anih im täng im täng cho chonei ula dawm ini chok nawk. Anih la dawm ini chok nawk saw hiyah, äini sum vawngah saw kheu ini kräu awlaw khrawng be ini kräu awlaw mawng bang tawnah saw kheu mäi äm, äi khäl ini kräu. Äi äng sawk näu hmeinu khälla pawtaw ini omeyalaih saw kei kulung hlü mäi. Äihi anih unu thäneyal ula nanga nang im thong chäkeyal ula lansu la ini keleih yeih saw achah büneyah pak. Ni dukäng hngat pai hnih hmeinu mannat käh lawm äng ini cheteyal tun däk. Yumtih hmutaw ima dä hmeinu hngat pai hnih ini mäi hi, äi hmutaw a dä chetchaw ei seh u. Yumtih sawng khrung äng bi nawtawng nawkaih saw pawyah, mawng hmeinu a uha mäyah äm, äi khäla yumtih sawng la so seh u. Mawng yumtih sawng äng käh elenchaw khälla mawt chaw awsawng khäla lawm dawn äm, unungsum tha poh bala Hnadaga sidawng hawu äm awlaw ochok hawu äm äi huih a hmawi nepek tawn awlaw awtawn saw huih ibisaw khawh nepek tawn. Asanh chang saw kiyam äng yoei bala mäi khäh, “Chawng ne chelh sawk khaw a sel heu paw mong khok äng mong khok khiyup thawnai ti.” Awlaw yoei bala mäi khäh, “Ula bi äm äila awmawn bünei tawn.” Pochongak hnih sawksi la ini hawu saw hiyah pak yumtih sawng äng käh elenchaw a epret ini tawng saw khäl naw hnaw äng tawngeyei ti. Mawng yumtih sawng äng käh lenchaw khälla ngulai bi ini bi äm, yumtih sawng äng käh hang hang hmawi mawh a anih käh epret dawnal bäi awhngaw lenchaw khälla ha ke hmawna. Hnadaga la Krito Yĕsu awlaw helh hmueitih hawn natchaw khäl sawksi mäipe kei ni kheu kini tak, hngat täng ha phakeyah pak dä ni khäl bi bäi. Phakak pawh mäitila i bi ha biyeiti. Pakhat nikhat hngat luki äng ha nukut tawei tila bi awpai ti. Ni huih dä nibi khaw, aw hngaw elenchaw khälla ngulai ini bisaw äng nawvawng saw thänai. Nupuma achang dä tawei bäi. Tui jiji o ai ti. Nähän koong awlaw opah chi näthänei ngap koong ikhi kha bitchaw grĕp hawng o bäi. Hngat pai hnih khrawng khäl käh ngulai sanh sanh awdawngei koong, anih käh tara ayang bang bi hmuei däk. Awlaw hngat pai hnih khrawng khäl käh ngulai u hnung äng dawngai. Äi huih bi pawi ha sanh sanh dawng. Awlaw umuchaw äng ini bisaw bi pawi ha krängak dawngalai. Awmawh käh yumtih hngasaw khälla awmawh a hmawi ini pekaih lah saw. Äihi Hnadaga ming äng awlaw keinih kini chok saw äng khrawng khälla khrawng keleih hnäng hnawh. Yumtih awmawh käh yumtih hngasaw khälla ta nawu ting khin ula ani a hmawi hleka pak, awlaw bang awhngaw yumah tih hngasaw khäl thawka mawmawt chaw chetchaw seh u. Iyaäm ani käh hngasaw känäng ula so khrei äng kumei übünei äm, ani che yumtih la khetsu. Ni krong khäl anih a chok bäi awlaw hawu pekbäi. Hngat pai hnih khrawng khälla nangkei ni chok saw laweiyah pak awhngaw krong dä ini chok. Äini nangkei ni chok saw dä Boi Yĕsu Krito käh usum vawng saw chok hawu. Ni chok hawu la dä Hnadaga käh lawm pawh a ini chih. Ula hiyah saw chok äm, ani che bawriyei tih awlaw ani la yawkchu saw ha eleu. Ni huih khrawng la chah lei saw la kheu äng siei saw pawi pi. Ni khäl käh theih che selei saw, koi saw, keleih saw awlaw üütei nawk saw. Ni khrawng khälla sawkbrat khawmawsa ini poh. Anih käh lung khäl krak chak awlaw anih la ihisaw pawta hnung ini sung. Anih la konghmuh a kähkän mawh ini thänaih saw lawm dä ting ini khant. Äini ihisaw konghmuh lawm äng nulung nümak nini mäi hi, nini mratai. Iyaäm luhdül äng ini lo khaw a, nangkei iha lo ei pu, awlaw ini chetal khaw a ha, ini kon äng iha chiyei yal hnäng hnawh pu. Äihi nangkei a ühlü saw huih eisaw la awat cha mäi khaw, nangkei käh lung nümai. Äini mawng khrawng mäichawtih äthäneyeih khiyang äm, äi khrawng chawmsi äng kraw. Awlaw ämäkaih saw la upum krakaih saw lung hlü äng käh kawl äng kraw. Äi khälla anih a akhrah awlaw düsaw lawm pawh a ichih. Iyaäm awmawna ini khetnawk saw che üküt üküt pawyah saw bi chou. Aw vawng la awmawn ini lawphah koong konghmuh lawm känäng hlaeiyal ula upuma chimchaw äng sunei hi, ujuei saw huih dukhah len äng ini khraw kei. Äini nang che Hnadaga käh khrawng dä. Äi koong äi khäl känäng kakei tila mäi. Äichaw a konghmuh, kenkeh, uyum, ekhet, chunei khrang awlaw nüm nüm chaw ni khäl nang äng mäiyeih koong tha poh bäi. Hnadaga a nuyum saw koong nawsawk pek tila Ani koong jal khawm bäi. Mawng päihyah saw sawk koong Hnadaga la ini bekei hütäm, äi päihyah saw sawk dä sin tila mäi bäi. Mawng khäl bang nang awbawng khrawng hmawi mawh a yumtih ting mawmawt chaw naw khawmei hütäm. Awlaw üküt niya sawk pektih Hnadaga awlaw Pontio Pilat khäka ula mawmawt chaw aw khawmei hütäm, äi Yĕsu Krito hmawi mawh a kei nanga ni kini tak tun, Boi Yĕsu Krito awlaw krawnak lo a lah saw sawgraw kei kini sin mawn saw kheu khäl sumei bäi, awlaw hngat la ha nanga keleih hnängah pak mäi bäi. Mawng khäl khrung äng käh Mawng, boi khäl khrung äng käh Boi, Pisih mawh awlaw hngat pätpät khiyuptih Hnadaga la ihisaw khin äng Yĕsu Krito a awdawnai. Hnadaga khäka dä päihyah saw sawk ämäi. Ani awa äng mäi saw. Äi koong Ani kena hngat ha chet hnäng u. Luhchaw la Ani ‍a krängak ha hmu hnawh u. Kenkeh la thayung sawkbrat ni Ani käh. Amen. Luhdül äng käh mäi chawtih khäla khawmaih hiyahtih kähkän äng bawriyeih u saw awlaw ümaih u saw hawu pek. Äini Hnadaga khrung äng dä üm seh u. Awlaw Ani la nangkei a ini piyaw aih koong ükütni ichip pranh bala khrawng hlu. Mäi chawtih khäla hawu pekbäi, anih la khrawnga kumei hmawna, bi pawi jiji äng mäi hmawna, ichip pranh bala hlu hmawna awlaw upum käh kähkän känäng aw hngaw a lung hlü äng pek hmawna. Ni huih dä awhmawi mawh äng ochou huih kähkän ini tawkeiyeih lah saw. Äihi che ihisaw sawk mawn bala tawkei hnängai. Timothi o, nochongaih saw koong ibang pek hmuei äm, äi chong tila mäi bäi! Hngat pai hnih khrawng la Hnadaga käh ihisaw ngen chokah pak, hiyah saw ngen ini chok. Ni huih hiyah saw ngen la Hnadaga a phiyaw ah awlaw ihisaw chok hawu känäng ha awhlawm hlaw a mäi. Hngat pai hnih khrawng la ni huih ngen mäi ting hawuvei ula, Krito a ini yumei saw känäng awhlawm hlaw a ini chetal. Hnadaga la nangnih a anang khetjen seh. Kei Pol, Hnadaga sitha äng Krito Yĕsu käh hngat teh hmueitih käthänei. Ani la khawmei hüt saw sawk kheu kaw hiyawkaih koong kei a eteh saw. Ni sawk che Krito Yĕsu ängtu nangkei ini sakei koong nangkei a ämäi saw. Uyum lah mäitih kei käh khetsu chaw Timothi a kei ni chaw koyok tun. Paw Hnadaga awlaw nangkei käh Boi Krito Yĕsu la nanga ekhetjen, jen awlaw jelkhiyamsa anang pekseh. Kei Hnadaga a äkiyä kawtawngei, kei nuchen paw sawk la ihuih ini chetchaw hütäm, äi huih kei ha Hnadaga a kawtawk sanh äng kechetchaw. Nang koong ühnüp awyawn suh kotongak kiyawnah ni, Ani a kei äkiyä kawtaw ngei chi. Nang nakap hüt saw kulunga mäi khäh, kulung awpiyaw äng luih hmawna nanga mawmawt kini hmuh aih khiyang chi. Nang käh ihisaw yum kei kulunga mäi khäh. Ni yum nang chi changnu Luis la nang nu Yunis lung äng mäi hüt saw. Kei mawmawt chaw kawhmawt khäh, ni yum nang lung äng ha mäi khäh. Äi koong nanga awlaw nulung äng kini khawyeih khiyang, nang khrung äng kukut kawtaw ngei saw äng Hnadaga käh i uhlu nanga awp hmuei äm, äi nang mawt chaw sumei tila mäi bäi. Iyaäm Hnadaga la nangkei a ini keh eih saw koong Asanh chang Khraw khrawng pekah. Äini ni Khraw la nangkei a tha, ekhet awlaw upum songei khrang äng khrawng hluih. Äi koong nangkei käh Boi Yĕsu krong äng sawksi nothokaih saw hiyawh ei nawaiti awlaw Boi koong keheng naweisaw äng ha awhiyawh ei nawaiti. Äichaw a Hnadaga la ini peksaw tha äng Ani sidawng pawi naw hiyawkaih koong kei ängtu dukhah khawm. Ani la nangkei a ngulai känäng khrawng khiyawtal awlaw Ani käh asanh chang khrawng ini thäneyeih koong khrawng bekei. Nangkei käh bi koong Ani la ni khäl poh saw hiyah, äini Ani hlü la ekhetjen koong ni khäl poh saw. Ni luhdül chah khawngah bang Ani la ni khetjen Krito Yĕsu äng nangkei a khrawng pek khäh. Äini tua khiyawtal tih Krito Yĕsu luhdül äng losaw äng äi khetjen dawng däk. Krito Yĕsu la düsaw a khrak däk awlaw sidawng pawi äng päihyah saw sawk kheu hawu däk. Hnadaga la ni sidawng pawi kawhawu pekaih saw koong kei a sidawng hiyawktih, teh hmueitih awlaw choktih eheh lei. Äi koong kei ni dukhah khäl kawkhawm tun saw. Äi thän kei hiyawkei nga. Iyaäm kei kawhmawt khäh kei u khrung äng küüm saw äm. Kei kuyum khäh Ani lo a lah saw sawgraw ibang Ani la epek hütäm, äi khäl Ani la ka bala tawkai. Nang kei känäng ibang ihisaw chok hawu nawyawk äm, äi nächämpäh saw huih tawei. Awlaw Krito Yĕsu äng ini sakeiya ini bünei saw khet la yum mawn tila tawei. Hnadaga la katila nawtawkaih koong anang pek saw ihisaw vawn pawi, uyum lah äng nangkei dukäng mäitih Asanh chang Khraw tha äng chong tila taw bäi. Nang nawhmawt khäh Esia pre lekchaw känäng lotih khrawng kheni la kei a khrawng tawkal hüt däk. Anih dukäng Phugillo la Harmogini ha i hnih mäi. Oniphis imsaw a Hnadaga la jenei seh, Oniphis la äkräng kräng kei a ulyah epek khäh awlaw kei othong imsaw ting awhiyawh ei naw hütah. Äini Roma ani aphaw saw äng tutu kei a sui bala übünah saw sawgraw usui. Yĕsu awlaw krawnak lo a laih saw khomhnüp äng ani la Hnadaga känäng jen bünei seh. Nang ni ha nawhmawt khäh, ani la kei koong Iphisi mräh a ihuih poh hüt saw äm. Chaw o! Nangkei ini sakei saw Krito Yĕsu käh jen äng tha mawh a thänei. Awbawng sawksi hmawi hmawh a kei känäng i nochok nawk hütäm, äi khäl awhngaw a chokal hnängai tih uyumlah mäitih khrawng khäla chokal bäi. Krito Yĕsu käh ekejet soloi huih nang kei ängtu dukhah khawm. Soloi hngat bi äng mäi tuna ani a bi pektih käh lung krawk huih äthäneyeih saw koong im thong äng upuma khrawei yah. Läkei äng tawmeitih hngat la thung täng läkeiyah hi, ani la phiyaw phoih büneiyah. Biyeitih lai bitih la täkchah pousaw theih pa wui bünei tawn. Kei i kawhawu tunsaw äm äi tawk chawm, iyaäm Boi la dä nanga üküt krong ni yawkchu aih saw tha ini pekai. Yĕsu Krito a nulung äng tawei bäi, Ani düsaw känäng thouwal awlaw Ani che Dawut chen äng käh khrawng mäi hüt. Kei tara kawhawsaw sidawng pawi äng ni khäl mäi khäh. Ni sidawng pawi kawhawu saw koong dä kei dukhah kawkhawm tun saw awlaw bang, epret mawh huih hen kuhmuyei saw. Äini khrawng khälla Hnadaga käh kheu a che hen hnäng u. Äi äng Hnadaga la heh lei saw khäl koong kei ükütni kuchunei tun saw, anih la ha Krito Yĕsu äng ngulai känäng khiyawt tara büniyal hmawna awlaw päihyah saw awpiyaw bünei hmawna. Ni kheu yum phoih mäi khäh, Krito äng dä nangkei ini dü dä ti khaw, Nangkei ha Ani ängtu ini hengai. Nangkei dä phrutah pak ini chunei hi, Ani ängtu nangkei ha ini khiyupalai. Ani a ini thuh nawk khaw che, Ani la ha nangkei a khrawng thuh naw kai. Nangkei uyum lah mäi pu thän, Ani uyumlah mäiyei, iyaäm Ani la upuma uyum lah mäyahtih huih poei hnäng hnawh. Ni kheu khäl neken setsei mäitih khrawng khäl lung äng khawi bäi. Anih usum vawngah saw kheu äng tok sakeiya pak Hnadaga hmawi mawh a sidih pek. Ni huih khäl äng amrat mäyah, awlaw bang ula yawk äm äi khrawng che ulung dä nawsaw. Upum käh bi äng hiyawkeiyah tih huih Hnadaga mikäng bipawi bitih a näthäneiyeih saw koong nänäng saw huih bi. Ni biti la Hnadaga käh kheu khäl mawmawt chaw chok. Hnadaga a kenkeh poah saw yap kräu sang khinai chu. Iyaäm ni huih la khrawng khäla Hnadaga känäng awhlawm hlaw a chih al. Ni huih kräu sang tih käh chok hawu che, aw hmaw thu pranh saw huih khrih ei. Ni huih khrawng khäl dukäng Humina la Philit ihni mäi. Ni khäl Hnadaga käh ihisaw lawm känäng awhlawm hlaw a ini chetal däk. Anih la ini hawu, yumtih khäl düsaw känäng ayang bang ini thouwal däk. Ni khälla üküt küt yumtih käh yum ini khrah däk Äini Hnadaga käh changtih chou tunei bala mäi khäh, awlaw äi khrung äng a hmat la huih ni kheu khäl yoei bala mäi khäh, “Boi la hmawt khäh, Ani khrawng uäm” awlaw “U khälla bang keinih Boi ängtu kini mäi ting ini hawuvei äm, anih pawyah saw bi känäng awhlawm hlaw a mäiseh u.” Im len hngata ha, hen äng käh eiok dün äng sumei saw vawn thawng jiji mäyah. Äini pen la dek äng käh pawngkawn la gawlang ha mäi khäh. Äi khäl äng käh awvawng che ming mawh bi äng sum hmuei awlaw awvawng che ming mawh hiyahsaw bi äng sum hmuei. U khälla upuma äi pawyah saw bi känäng asanh poh ei äm, Hnadaga la äi khäla alang gong bi äng sum hmueyei. Iyaäm anih käh awmawh khäka anih che awp ini hmuei awlaw usum vawng, awlaw anih bi pawi khäl ini biyeih saw äng ächän ini mäi. Nang nochong krawngei tuna sanda känäng kakei tila mäibäi. Ula ekejet lung äng Boi a panei äm, anih ängtu konghmuh, uyum, ekhet awlaw jelkhiyamsa äng mäiyeih khyang bäi. Äini nämäk nawkaih saw la usum vawngah saw toksakei känäng kakei tila mäi. Iyaäm nang naw hmawt, ni huih äng nisiei nawk khäh. Nang Boi käh hngasaw koong nisieiyeih saw tawnah. Äichaw a ükütni nekhet jenaih lah saw. Nang awpawi la chunei hnäng tih choktih a näthäneyeih lah saw. Nang pawtäng mäyahtih khäla nang näuvei tila nochokaih lah saw. Iyaäm anih a Hnadaga la lung hleyalaih saw ikhin awlaw ihisaw hmawtaih saw ikhin pek nawk theih. Ni khrawng khäla Mannat la ani sitha huih opoh aih koong awmawn, äi ini chok nawk pänäng hmawtei ula mannat käh kawl känäng chon ula ini loal naw theih. Ni kheu khäl nulung äng tawei bäi, äpäih yeih saw khin äng awbawng ukhru loai. Iyaäm khrawng khälla ini pum käh jiji ini tawkeyei, awmawn ini lawphah ai, ini bawriyei, khrawnga süp hnawh u, üküta ni ini keleih yei awlaw nu paw kheu ini chah lai. Anih äkiyä mäyahtih la Hnadaga yumeyah tih ini thäneyei. Anih ekhetjen mäyahtih, ekhet mäyahtih, khrawng keleih tih, ngettih awlaw kehse tih ini thäneyei. Anih la awpawi khe ini mumai. Anih uyum khrakei tih, ütün mäyahtih, awlaw awbawri äng luih tih a ini thäneyei. Hnadaga a khet nawah a pak lawgah a ini khet nawkai. Anih käh aprang pawt nosot hi nikhinai Hnadaga a mawt kenkeh ini poh khäh, äini anih la Ani a yumei u. Ni huih khrawng khäl känäng awhlawm hlaw a kakei chula mäi khäl. Anih dukäng üküt khrawng la che im duka vawng ula ulung nävei tih hmutaw khäla ini sitha huih ini tawkaih saw achah ini bünei. Ni hmutaw khäl che ini pum käh ngulai äng ini jeh däk awlaw ayapyap lung hlü äng ini mäi. Äi hmutaw khälla sawkbrat chok hawu ini khin, äini krängak ha Hnadaga käh ihisaw uthuk äng yawchu u. Janes la Jambris Mosi käh awhngaw pawh äng i ihnih mäi hüt saw huih ni khrawng khäl ha che ni ihisaw pawtäng mäi u. Ni khäl käh lung mawmawt hngiyak awlaw anih Krito ini yum saw äng ong u. Äini anih la äkräng kräng khrawng khäla kramei hnäng hnawh u. Iyaäm Janni la Jambri ihnih mäk hüt saw üküt nila ini hmuh hüt saw huih, anih ini mäksaw ha üküt nila ini hmuh ai. Äini nang, kei käh chok hawu, mäichoh khrang ‍awlaw kei i kopoh aih khiyang äm, äi khäl kheni nopoh khäh. Nang kei käh yum, chunei, ekhet, khihei hnäng khrang, kei kuluh nawk kuhmuei saw la waih kawkhawm saw nu hmuh khäh. Äi hawuvah ha Antokia, Ikonio awlaw Lustra a kei kuluh nawk ku hmuei saw la dukhah kaw khawm hüt saw khäl ha naw hmawt khäh. Äini Boi la ni khäl kheni känäng ka bala awtawk hüt khäh. Ula bang Krito Yĕsu äng sakei bala Hnadaga kenkeh äng awsawk chih ei yeih khiyang äm, khrawng khälla anih a ini kuluh nawkai. Äini pawyahtih khrawng khäl awlaw lupsong khäl hnüpak thawka hnüpak ini krakai. Anih la awhngaw a kramei ula hiyah saw lawm äng ini chih ei awlaw ini puma ha kramei ula hiyah saw lawm äng ini chetai. Äini nang koong khrawng khälla ibang anang chokäm äi ihisaw yumtila mäi. Iyaäm nang ukhäl känäng nochok nawk äm äi nang naw hmawt khäh. Sämäichaw khaw känäng asanh chang saw kiyam nang naw hmawt khäh. Ni asanh chang saw kiyam la dä nanga Krito Yĕsu a nuyum saw äng ngulai känäng nawkiyawta laih saw ngen ini pek hnäng. Asanh chang saw kiyam äng käh khaw ak mawkrawng Hnadaga känäng dä lo saw. Awlaw ni asanh chang saw kiyam la ihisaw chok. Äi hawuvah ha epret dawnal bala chokal, aw hmaw saw phrongh pekal, awlaw ihisaw lawm äng mäichoh khrang chok. Äihi u bang Hnadaga käh äm, ani bi pawi khäl kheni biyeih saw äng ächän mäi awlaw päm bämh mäi. Kei kulung känäng khawh ei ngala kini tak, Krito Yĕsu käh sidawng hiyawk. Kei ni kawhawu saw Hnadaga la Krito Yĕsu hmawi mawh a, ula hengtih la dütih tara biyalaih äm. Ani mawng thänei bala khiyupaih koong olo tun. Hnadaga käh sidawng hiyawk bäi. Ikhin pawi thän, ikhin pawyah thän sawkbrat sidawng nawhiyawkaih koong ächän mäi bäi. Mawt chunei tila khrawng khäla chok bäi, khrawng khäl käh epret dawnal bäi. Anih a sidih pekbäi, chok hawu bäi awlaw ulyah pekbäi. Ni huih ikhin lo ai ihisaw chok hawu khrawng khälla khin do hnawh u. Äichaw a, anih lung hlü huih pawyah saw bi ini bi ei. Awlaw anih la ayapyap choktih ini kenset sei ini tawkeyei. Äi choktih khälla anih hnaw la yawdo hmawna ini lung ini phiyaw saw kheu ini hawu pekai. Anih la Hnadaga käh ihisaw chok hawu khinah pak kakeyal ula changlen la ini poh saw usum vawngah saw khui hnung äng ini chonai. Äini nang lala lup khaw a thän nupuma songei bäi, dukhah khawm bäi awlaw Krito käh sidawng pawi hiyawk tila mäi bäi, awlaw mawng bi Hnadaga la bi eih saw ini pekäm äi bi hang hang ni bi tila mäi bäi. Iyaäm tua kei hlu kuhmuh eyeieih saw ikhin lo däk. Ni sawk hlät ngala kecheta laih saw ikhin lo däk. Krito koong düaih hengaih jal kawkhawm hüt, kei koong tawk hmuei saw lawm täh äpäih yak kochon hüt awlaw kei Krito käh ihisaw yum mawn ngala kawtawk hüt. Tua kei käh konghmuh äng käh awphiyaw phoih tawk hmuei khäh. Tara hnüpäng ihisaw tara bitih Boi la kei a äi phiyaw phoih epekalai. Äini Ani la kei a jiji epekaih saw hiyah, Boi loalaih saw koong lawm so bala mäitih khrawng khe a ni pekai. Timothi o, nang kei khäka alanda nolo aih saw koong soei bäi. Iyaäm Dima la tukat täng käh lawgah a khet naw bala kei a ä hlät bala Thisaloni a chetal däk. Äi hawu ah ha Kriken Galati a awlaw Tit Dalmatiya a chetal. Luk jiji dä kei äng mäi saw. Nang ängtu Mak a lopui naw bäi, ani la kei a bisaw äng uku hnängai. Kei Tukhik ka Iphis mräh a keteh khäh. Nang nolo khaw a Troa a Kalpu khäka kawtaw kei hüt saw ilhchaw olo pekbäi. Awlaw hiyol ngala kawtaw kei hüt saw boih khäl ha lo bäi, awnvün khrung äng yoei saw boih alang gong chaw lo bäi. Kri bi bitih Alekzandal la kei a mawt uhiyumei sawk khäh. Ani la bisaw khawh Boi la pekalai. Nang ha ani känäng sidih äng mäi bäi, iyaäm ani la nangkei käh sidawng hiyawk ‍sidih sawng nga hüt khäh. Täkchah kei tara bitih hmawi mawh a kaja lah khaw a hngat ha kei äng tu mäi hüt u, awlaw bang kei a ä hlät ula hang hang ni ini chetal chak. Äi thän Hnadaga la anih käh epret mawnah heh. Äini Boi kei ängtu mäi hüt awlaw kei a tha epek hüt. Äi koong kei sidawng pawi hang hang kawhawu hüt chak hnäng Yudi hiyahtih khäl hang hang la yaw lah hmaw na. Kawsawk khrawng louh vaih tih khangsi kaw känäng Hnadaga la khrawng hläh al. Boi la kei a pawyah saw bi khäl kheni känäng akakai awlaw khotong khotawh Hawna käh mawng pre a ichih a lai. Awsawk sawk Ani awpiyaw äng mäiseh. Amen! Piskila la Akila awlaw Oniphis tih käh im saw khäla kei käh äkhäh pekbäi. Erasto Korin mräh a mäyal hüt. Awlaw Trophim a kei Milito laa opah saw läktäng kaw tawk hüt Isik kraw khawngah nang niya nolo aih saw soei bäi. Ubul, Pudento, Lin, Kolodio awlaw yumtih ta nawu khälla nang a awpiyaw anang pek. Boi nang khraw ängtu mäiseh. Hnadaga käh khetjen nangnih ängtu mäiseh. Kei Pol, Hnadaga käh hngasaw hngat awlaw Yĕsu Krito käh teh hmueitih hngat käthänei. Hnadaga la eheh leisaw khrawng khäla uyum pawh äng loal hnäng hmawna awlaw Hnadaga a ini rosi saw äng mawng ihisaw sakei bala mäi äm, äi ihisaw ini hmawtaih koong anih a ku hnäng hmawna Hnadaga la kei a eheh lei bala eteh. Mawng ihisaw la, nangkei käh päihyah saw sawk khah nei sawk hnäng äm, äi Hnadaga che hleyahtih. Hnadaga la luhdül chah khawngah äi päihyah saw sawk pekaih saw khawmei hüt däk. Awlaw tua ihisaw khin äng Hnadaga la ni ihisaw Ani käh kheu äng dawn däk. Hnadaga la äi bi kei kutäng aw awp däk. Nangkei khrawng khiyawtal tih Hnadaga käh sin mawn huih dä Kei äi sidawng khrawng khäl khäka kawhiyawk saw. Krito khrung äng uyum äng kei käh ihisaw chaw Tit o, nanga ni chaw kini yok tun. Paw Hnadaga awlaw khiyawtal tih Yĕsu Krito la jenei la jelkhiyamsa anang pek seh. Song kawi saw Krit a mawng bi päih hütah äm, äi khäl ni biyalaih saw koong kei äiya kini tawk hüt. Awlaw mräh kheni a käh yumtih sawng khäl äng käh gongsong khäla helbäi. Kei käh chok hawu nulung äng tawei bäi. Yumtih sawng äng käh gongsong ni huih thäneyeih lah saw, hngat la ha ani a epret mawn hnängah pak. Ani a iphiya hngat dä mäiyeih lah saw. Ani chaw chuhnu yumtih ini thäneyeih lah saw. Anih ini sitha huih chetchoneiya pak awlaw khrawng kheu ngeiyah tih thäneya pak. Hnadaga känäng bünei saw bi ting khinei bala gongsong ni huih mäyeih lah saw. Ani a hngat la ha epret mawn hnängah hmawna. Ani bawri mawh, man mawh, moitih, chip nget tih thäneiya pak awlaw awmawn lawphah a pak. Äichaw a gawlba telong la bi pawi khetnawkaih lah saw. Ani la akantha songeyeih lah saw, matara biyah tih, achang awlaw timtih yei tih thäneiyeih lah saw. Keinih kini chok saw Hnadaga käh yum phoih ihisaw kheu chok hnäng hmawna, ani la chechet memrei mawn bala tawkaih lah saw. Awlaw ni huih ihisaw chok hawu pawtäng mäyahtih khäla ini hmaw saw dawnal hnäng mawna thänei seh. Yudi känäng Krito a yumeyal tih awbawng khrawng ini mäi khäh. Äi khrawng khäl ini phungkanei awlaw khrawng ini kramei. Ni khrawng khäl mongkhok nibi ngaih saw tawn khäh. Iyaäm anih la ibang ini chokaih saw tawnah äm, äi chok ula imsaw khäl kheni a pawyah saw ini poh. Awlaw ni khäl ini poh saw che awmawn ini bünbawkaih khiyang koong. Anih ini pum käh Hnadaga sidawng hiyawktih hngat la bang ni kheu hawu, “Song kawi saw la Krit a käh khrawng khäl sawkbrat ini hlei khäh, nget tih mäksetdava dä, anih ini dawm awlaw ini lokosou.” Ni kheu ihi khäh, äi koong tha äng anih käh epret dawnal, anih käh ihisaw yum chang hnäng hmawna. Äi koong anih a nehekeyeih saw tawn khäh. Äihi optih yum pawi ini tawkeyei. Awlaw Yudi khäl käh usum vawngah saw khui khäl awlaw ihisaw känäng krawnal tih khrawng khäl käh sin mawn khinai chu. U lung sanh äm, ani koong ükütni sanh. Äini ulung nuktih la yumah tih käh iha sahnah. Iyaäm anih käh lung la tawk ha nuk khäh. Anih la ini mongkhok äng ini hawu anih la Hnadaga a ini hmawt ting äini anih la anih käh bi äng che Ani a ini thuh nawkal. Anih mumaih phüh dä awlaw ngeiyah tih khäl dä, anih che hngat bi pawi äng bang tawn u. Äini Tit o, nang ni huih nochokaih lah saw nang käh chok hawu äng ihisaw chok hawu tuei hmawna. Ihisaw yum, ekhet, chunei hnäng khrang mäi hmawna, changpaw khälla ngen pawi, hmawi bünei tawn, ini kantha songei ula ini mäiyeih saw natakaih lah saw. Äi huih kawchawng chawng achang nu khäla natakaih saw, khrawng la anih a hmawi pek hmawna. Anih khrawng be kräuwaih saw, awhngaw a ini keleih yeih saw awlaw alak äng ini moiyeih saw tawn u. Ibang pawi äm äi anih la äi ini chokaih lah saw. Äihi anih la hngawk hngu chaw khäla ini chok hnängai. Äi hngawk hngu chaw khälla ini pawtaw la ini chaw chuhnu a ini khet nawkai. Awlaw hngawk hngu chaw khäl ini puma ini songei, achang ini mäi, im thong äng ulung ini khrawkei, ejen mäi awlaw awpawtaw sitha äng mäi, hngat la ha Hnadaga kheu a kenkeh po ah pak mäyah hmawna. Äi huih chongkrawng chaw khäla ulyah pek, anih la ini kantha songei ula tawei hmawna. Üküt ni äng nang anih khäka nämäih choh khrang pawi äng khrawng jen phoih thänei bäi. Nang käh chok hawu äng nämäih choh khrang tuei hmawna, äi äng nang käh chok hawu la hmawi bünei hmawna. Hngat la ha nekheu äng nang käh epret anang mawn hnängah pak nang pawt äng mäyahtih khrawng khälla siri bünei hmawna äi huih ihisaw dä kräu bäi. Iyaäm nangkei krong äng ese ini hawu aih saw anih a iha mäi hnawh. Aw mawh käh hngasaw a natakaih saw ükütni äng ni anih awmawh sitha äng mäi hmawna. Anih mawh a ini phiyaw aih saw hno hmawna, awmawh a sawkeiyei u. Awlaw awmawh käh vawn muah pak, äi chaw a anih la uyum lah ini dawneyeih lah saw. Äihi anih la ini mäichoh khrang äng nangkei käh khiyawtal tih Hnadaga käh chok hawu ini dawn hnängai. Iyaäm khrawng kheni la ngulai känäng awkhiyawt büneyal hnäng hmawna Hnadaga la Ani käh ekhetjen dawn däk. Ni ekhetjen la nangkei a pawyah saw lawm hläh alaih saw khrang, luhdül äng käh ühlüei saw a mawnaih hiyah saw awlaw ni luhdül äng pum songeyeih saw, ihisaw mäichoh awlaw Hnadaga kenkeh khrang ha khrawng chok. Nangkei käh lentih Hnadaga la khrawng khiyawtal tih Yĕsu Krito dawngaih saw koong iti khaw a chong pula ini mäi äm, äi khaw a nangkei kheni äi huih chong pula ini mäiyeih lah saw. Äi wachang loaih tih che nangkei ini khah nei saw len. Nangkei käh ngulai khäl känäng awkhiyawt büneyal hnäng hmawna awlaw nangkei Ani kädäng käh achang khrawng thänei hmawna awlaw bi pawi biyeih saw nah ei hmawna, Yĕsu Krito la nangkei koong awsawk pekei hüt. Kei Pol, kei känäng nübünei saw dogo kheni äng ni khäl chok bäi, ulyah pekbäi awlaw epret dawnal bäi. Äihi Hngat la ha nanga anang süpah pak anang po hnawh. Nang khrawng khäla khyuptih la dogo mawh käh kheu ini ngeyeih saw ini lung äng khawi bäi. Anih a üküt lawmäng ni bi pawi ini biyeih saw koong ächän ini mäyeih saw tabäi. Anih a hawu pek hngata ha keleih yah pak, äini ini jeleiyeh saw la khanbawn huih ini thäneiyeih saw awlaw sawkbrat hang hang äng ni näuvei hmawna. Iyaäm keinih ha ayang che kini mäk hüt, ngei hüt unga awlaw hiyah saw lawm äng kini mäi hüt. Keinih kini kantha piyaw aih saw la ajapjap hlüei saw la nah eisaw äng käh ama kini mäi hüt. Keinih khrawnga hmukhih hüt unga saw la ese saw äng kini mäi hüt. Keinih a awhngaw khälla khrawng mum hüt awlaw keinih ha awhngaw khäla kini mum hüt. Äini nangkei a khrawng khiyawtal tih Hnadaga käh jen la khet dawng ni, Ani la nangkei a ngulai känäng khrawng khiyawtal. Ani la khrawng khiyawtal saw nangkei käh bi pawi koong hiyah, äini Ani käh khetjen koong dä nangkei a Ani la khrawng khiyawtal saw. Asanh chang Khraw la nangkei a khrawng bot bala khrawng tha khrawng poh al awlaw sawk tha khrawng pekal. Nangkei käh khiyawtal tih Yĕsu Krito äng ichip pranh bala äi Asanh chang khraw khrawng pek, Nangkei Ani käh ekhet äng konghmuh sang ini thenei awlaw päihyah saw sawk ini büneyeih saw ini khah nei. Iyaäm Ani la äi khrawng pekaisaw awkhawmei. Ni kheu yum phoih mäi khäh. Kei kühlü, nang ni khäl krong äng tha po. Hnadaga äng u khälla ini yumei äm, anih la bi pawi ini biyeih saw koong ini tawk awlaw bi pawi ini bisaw kheni usum vawng. Äini mäktih huih toksakei, khrawng chen tawngaih saw, siei saw, Mosi käh thung lei äng kheu toksakei känäng kakei tila mäibäi. Iyaäm ni khäl äng amrat mäyah, ni khäl usum vawngah. Mawng khrawng khälla hiyah saw chok hawu bala awsawng khoih äm, ani a eleusum äng kräng hnih khat sidih pekbäi. Äi äng dä thäneyah hi asang bang anih äng puyei tiyei ti. Nang nawhmawt khäh, ni khrawng khäl pawi u awlaw ngulaisu. Anih käh ngulai la anih käh epret dawn. Kei Altema hiyah thän Tukhik a nang khäka keteh khaw, nang Nikopoli laa kei khäka loni noloaih saw koong hnoei bäi. Iyaäm kei Nikopoli a dä isik kawkhawmaih saw kopoh ei. Tara khawm tih Sina la Apolo käh chetchonei krong äng nänäng saw sini ku bawm bäi, ahnih iha lai yah hmawna. Nangkei käh khrawng khälla bi pawi ini biyeih koong ikhin pekei khrang ini hmawtaih lah saw. Äihi uku hlüeitih khrawng khäla alang gong vawn hlüei saw khäl pek hnäng hmawna. Anih usum vawngah hmawna mäichoh lah hnawh u. Kei ängtu mäitih khäl kheni la nanga anang khäh ei khäh. Krito äng yum ula nangkei a khrawng khet nawtih khäl kheni a kei käkhäh ei. Nangnih khäl khe lukhrunga Hnadaga käh ekhetjen mäiseh. Amen. Kei Pol, Yĕsu Krito koong heng nawk kuhmuei. Kei ni chaw yumtih nawu Timothi ängtu keihnih ki hni bi phäu khetsu Philimon khäka koyok. Awlaw nangkei käh besu Appia la nangkei ängtu jal täktih Akipa khäka, awlaw nangnih ima lumeitih yumtih sawng khäl khäka ni chaw koyok tun. Nangkei käh paw Hnadaga awlaw Boi Yĕsu Krito la nangnih a khetjen la jelkhiyamsa anang pek seh. Kei sawkbrat ni nang kheu kulung äng khawyei ngala, nang koong chi suh tong ngala Hnadaga a äkiyä kawtawngei. Iyaäm Boi Yĕsu khrung äng nang käh uyum, awlaw Hnadaga käh khrawng khe khäl koong nang käh ekhet kheu kei kawyawk tun. Kei käh suh tong che ni, yumtih ini thänei saw äng nangkei dukäng ukubawm mäi saw la pisih khäl kheni äng käh uthuk krong khäl kheni yawk chu sawkai. Äi pisih khäl che Krito äng ini sakei saw äng lo. Nawu o, nang käh khet hmu ngala kei mawmawt kaw piyaw awlaw ulyah kübünei. Iyaäm nang Hnadaga käh khrawng khäl lung äng atha ulyah nothouh. Äi äng, nang ibang nopoh aih saw äm, Krito ming äng äi kini takaih saw sengkhri kawtawkei khäh. Äini äichaw a, kei nanga kini khet nawka, kachang thän awlaw Krito Yĕsu koong othong ima kämäi thän khawh ei ngala kini tak. Äi äng kei nahngasaw Onisimas pawtäng phakei ngala nang khäka kawkhawh ei. Ani la Krito Yĕsu a yumei koong kawchaw lang huih äthänei. Iyaäm kei othong ima kämäi khaw a awkhraw lawm äng ani paw käthänei. Nang ani a ayang süp hüt ti, äini tua ani nihnih khäka usum vawngal däk. Tua kei ani a nang khäka keteh al tun. Kei ani a kaw sawk huih kekhet nawk. Sidawng pawi kaw hiyawk saw koong heng naw kuhmuei khaw a, nang chaw a ani la kei a chetchaw hnäng hmawna, ani a kei khäka kawtawkeyeih khiyang hüt. Äini kei a ini kuaih saw koong nanga tha kini tawng do khiyang nga. Äichaw a nang sitha äng ini kuaih saw kei kühlü. Nang ngiah pak kei iha bi hnawh nga. Ani a nang naw sawkak nübüneyalaih saw koong, ani sapta ak hnih nang känäng awhlawm hlaw a mäi hüt. Äini nang ani a ahngasaw huih jiji hiyah, äi thawka nang Krito äng naw nawu huih ha nübüneyalai. Ani kei khäka mawmawt khetsu. Äini nang khäka unung khetsu, iyaäm ani che nahngasaw thänei pe ha Boi Krito äng nang nube tanawu. Äi koong, nang kei a dä bi phäu ting ini khinei hi, kei a ini lawkeyeih saw huih ani a ha lawei bäi. Ani dä nang khäka epret thänei hüt hi, ‘hiyah thän’ nanga ini krawnalaih saw lei mäi hüt hi, kei ming äng yotila tawal bäi. Kei Pol, kei kädäng la ni chaw koyok tun, kei äi upuei saw khäl kini pekalai. (Äi bache kei ni kawhawuvaih saw hlü ah, Krito a nuyum saw äng nang bang kei khäka upu nämäi khäh.) Boi Yĕsu Krito a yumtih ke khetsu nawu o, ni huih po tila kei a awphiyaw e. Nang kei kheu nengeyeih saw kawhmawta bang kei nanga ni chaw kini yok tun. Äi bache kei kaw hmawt khäh, kei kawhawu saw thawka bang nang unung no poh aih saw dä. Awlaw hngat kheu kawhawu, gawlba ini mäidün khan kei koong potila taw bäi. Iyaäm kei kakhanh khäh, nangnih suh tong krawn Hnadaga la nangnih a anang pekalai. Äihi nangnih khäka kei alanda koloal hnängai. Ipapha la nang a ini khäh ei tun. Krito Yĕsu koong ani ha kei ängtu heng naw ei bala mäi. Äi hawuvah ha, kei bi phäu khäl Mak, Arista, Dima awlaw Luk la anang khäh ei. Nangkei käh Boi Yĕsu Krito käh khetjen nangnih ängtu mäiseh. Awbawng khokum khawngah Hnadaga sidawng hiyawktih khäla Hnadaga la sumei bala Isawlael khäl käh nuchen pawsawk äng ayapyap lawma äkräng kräng äkräu. Äini ni hnüp khäl päih äng Ani chaw sumei bala dä nangkei ängtu äkräu saw. Hnadaga la Ani chaw a ükütni khrung äng pängtih thäneyeih koong awp däk. Awchaw sumei bala dä Ani la ükütni ibi chak saw. Hnadaga käh a wachang ämäi saw kheni äi Awchaw äng mäi chak saw. Awchaw che Ani lup than than. Awchaw la Ani tha äng käh kheu äng ükütni so khrei bala mama tawk. Khrawng khäl käh ngulai hlätal pänäng Awchaw hawn pre a dogo mawh Hnadaga kena set pawta o omal. Ani Paw känäng bünei saw ming i huih hawn natchaw ming khäl thawka len äm, äi huih kawchawng chawng Ani kädäng ha hawn natchaw khäl thawka awbawng elen thänei. Hnadaga la krängak ha hawn natchaw hngata ha ni kheu takei, “Nang Kei chaw, Tühnüpa Kei nang Paw käthänei?” Awlaw ha Ani la awhawuvei, “Kei ani Paw käthäneyei awlaw äi Kei Chaw thäneyei?” Hiyah, Ani la äi huih hawuvah. Hnadaga la Ani käh ni Chaw uchaw a ni luhdül äng eteh khaw a hawu, “Hnadaga käh hawn natchaw khäl kheni la Ani a kun ula rosi seh u.” Hawn natchaw khäl krong äng Hnadaga la hawu, “Ani la Ani käh hawn natchaw khäla khri huih poh. Ani käh hngasaw khäla ha choitih mei huih poh.” Äini awchaw krong äng Hnadaga la hawu, “Hnadaga o, nang käh mawng pre che päiyah tih. Ihisaw tara äng nang khrawng khäla nu khiyupai. Nang konghmuh a nekhet nawk awlaw ngulai a numum. Äi koong Hnadaga, nang käh Hnadaga la nanga anang heh lei. Awlaw nang phäutih khäl thawka nanga awbawng awpiyaw ini pek.” Hnadaga la Awchaw a awlaw tak, “Boi o, nang awbawng ayang bang luhdül äng käh ochou näsät hüt. Hawn pre khäl khe ha nang kut äng dä bi hmuei saw. Äi khäl akrakal chakai, äini nang sawkbrat nämäyei. Äi khäl awat huih ephemal chakai. Awat phema ihuih khrep bala tawk hmueyal äm, äi huih nang luhdül la hawna ha nehleyalai. Äini nang che lup khiyang nämäyalai, awlaw nang sawkbrat hengtila nämäyei.” Hnadaga la krängak ha hawn natchaw khäla ni huih kheu takei, “Nang käh lansu khäla nokho chouwa Kei tawnga saw sawgraw Kei set pawta nang om tila mäi?” Hawn natchaw khäl hang hang ni Hnadaga chetchawtih hi u ei? Ngulai känäng awkhiyawt büneyalaih tih khäla chetchaw aih koong Hnadaga la hawn natchaw khäla teh. Äi koong nangkei i ini yawk äm, äi huih ini mäichoh aih saw koong nangkei sidih äng ini lung ini pekeyeih saw tawn khäh, nangkei äi känäng ekrenga awhlawm hlaw a chetalah pak. Iyaäm hawn natchaw khälla nangkei nuchen pawsawk khäla sidawng ini pek hüt saw khäl bitchaw ha layah. Äi sidawng khäl ula ngeiyah äm anih la awtawn saw huih dam ini bünei däk. Äihi ngulai känäng khiyawtalaih saw koong Hnadaga la khrawng pek saw alang gong lawm dä leih poah pak ini mäi hi, iba nangkei ini lätaih saw äm? Boi Yĕsu la dä täkchah äi kiyawtalaih saw kheu hawu hüt, äidä yawtih kheni la ihi khäh ting nangkei khäka khrawng dawnal. Äi ängtu Hnadaga la ayapyap nawmaw nawkaih saw bi khäl äng awlaw Ani sitha huih Asanh chang Khraw nangkei a phiyaw phoih huih khrawng pek bala sawksi thok. Awmaw äng käh mawng luhdül tha kheu nangkei ini hawu äm, Hnadaga la äi hawn natchaw khäl sitha äng taw ah. Iyaäm kiyam äng tänaka pochongak la ni kheu hawu bala sawksi pek. Khrawng ni i äm, nang anih krong äng nawtawk saw? Luhchaw ni i äm, nang anih a nechetchaw saw? Nang luhchaw khäla hawn natchaw khäl thawka tana kra chaw koong ne hnem. Mawng tokkiya huih nang ani a a wachang la kenkeh nepek. Awlaw ani kho chouwa ükütni nawtawk. Hnadaga la ükütni luhchaw sitha äng tawk chak khaw a, Ani la iha äi känäng hiyänalah. Äini hang hang ni khrawng khälla ini päng saw tua ha nangkei hmu hawm pu. Äini Yĕsu a nangkei ini hmuh. Ani a hawn natchaw khäl thawka tana kra chaw koong hnem hmuei hüt khäh, Hnadaga käh khetjen äng khrawng kheni paw ong Ani kädäng dü hnäng hmawna. Ani waih khawm bala dü hüt koong Ani a mawng tokkiya huih a wachang la hmawi pek hmuei. Ükütni Hnadaga käh dä awlaw ükütni Ani käh tha äng dä bi hmuei saw. Yĕsu a waih khawm sawk bala tawn däktih a poh bala Hnadaga la ihisaw poh saw dä. Yĕsu la awbawng Hnadaga käh chaw chuhnu khäla awkhiyawtal awlaw Ani käh a wachang üphüh ini büneyalaih saw koong lawm dawn. Khrawng khäla asanh potih la asanh thäneyal tih khrawng khäl kheni che imak saw. Äi koong Yĕsu la äi khrawng khäla nawu tih ting bekeyeih saw hiyawkeyah. Kiyam äng Ani la Hnadaga a tak, “Kawnawu tih khäl khäka kei nang ming kawhawuvai. Awlaw ükütni ini lumei khaw a nanga Kei awpiyaw kini pekai.” Yĕsu la awlaw hawu, “Kei Hnadaga khrung äng kü ümai.” Awlaw tänaka Ani la hawu, “So khäl, Hnadaga la kei a khrawng pek saw chaw chuhnu khäl ängtu Kei kämäi khäh.” Äi chawtih khäl che thisaw mawh khrawng. Äi koong Yĕsu kädäng ha thisaw mawh khrawng thänei hüt, düaih saw dogo ukut äng mäiyäm äi Mannata Ani upum düsaw äng atha mäi tiyah pak po hnäng hmawna. Awlaw üdüaih saw keh ei ula sawkak hngasaw huih mäi hüttih kheni a awsawk pekei bala awkhiyawtal. Nangkei niha ini hmawt khäh Yĕsu hawn natchaw khäla kua lo ah, äichaw a Awbraham käh chen khäla dä Ani la kua lo saw. Äi koong Ani la aw nawutih khäl käh dukhah khawm khrang kheni choknawk lah. Äihi Ani khetjen mawh awlaw uyum lah mawh pujawtih gong huih Hnadaga a chetchaw hnäng hmawna. Khrawng khäl käh ngulai awhlawm hlaw a chih alaih saw koong Ani dü hüt. Tua Ani la chawmsi khäl äng krawtih khäla ku hnäng. Iyaäm Ani kädäng ha chawmsi äng awlaw waih äng awkraw hüt. Äihi Hnadaga käh imsaw thänei tih khanbawn khälo, hawn pre känäng nangnih che panei hmueitih, äi koong Yĕsu kheu tawk khäl. Nangkei ibang ini yum ting ini khawmei äm, äi yum äng käh teh hmueitih awlaw pujawtih gong äthäneyeih koong ani a Hnadaga la eteh saw. Mosi Hnadaga ima käh bi äng ihuih uyumlah mäi hütäm, äi huih Yĕsu ha Ani a bi awp tih Hnadaga khäka uyum lah mäihüt. Im sawtih la äi im thawka unung hmawi bünei. Äi huih Mosi thawka Yĕsu la ha unung a wachang bünei. Nangkei ini hmawt khäh, üküt im ni hngat hiyah khaw hngat la sawk, äini Hnadaga dä ükütni bi chak tih. Ihi khäh, Mosi Hnadaga ima hngasaw mäi hüt khaw a uyumlah mäi hüt khäh, Hnadaga la awmaw äng hawuvaih saw kheu khäl krong äng ani sawksi thok däk. Äini Krito che Hnadaga Chaw. Ani dä Hnadaga ima käh elenchaw. Nangkei dä ini sengkhri la ini khah nei saw Ani äng tawei pula ini mäi hi, nangkei ha Ani imsaw. Äi koong Asanh chang Khraw la hawu hüt, “Tü hnüpa dä nangnih Ani kheu nini khin khaw, nangnih käh nuchen paw sawk khäl huih nangnih käh lung changei sawkaih chu saw. Anih täu lung chinga ini mäi khaw a kei äng phungkanei ula khrawng chawm saw huih nangnih kei a khrawng chawmai chu. Nangnih käh nuchen pawsawk khälla khokum hligip daraih Kei käh bi hmu pe ha Kei a khrawng chawm hüt. Äi koong Kei anih lukhrunga mawt kaman pok ngala kawhawu hüt, ‘Ni khrawng khäl käh lung sawkbrat ni Kei känäng awhlawm hlaw a chet. Anih la kei lawm hmawt u.’ Äi koong kei kaman äng jeng ngala kaw hawu hüt, ‘Kei kepek saw düm düna anih chet lah hnawh u.’” Nawutih khälo, sidih äng mäi khäl! Nangnih dukäng hngat lung ha se ah seh awlaw uyumlah kaw mäyah seh. Ni huih lung che sawk mawh Hnadaga känäng awbawng awhlawm hlaw a chetal khäh. Äichaw a ‘Tühnüp’ ting nawhawu hnäng saw hiyawh täh nangnih hngala hngat sawkbrat ulyah pekei chula mäi khäl. Nangnih dukäng ngulai la hngat ha kramei bala nini lung chang sawka pak. Nangkei dä achah täh kän ini yum saw huih ujumak uyum äng chang pula ini mäi khaw nangkei Krito äng äphüh phak ini thänei däk. Kiyam äng ni huih yoei, “Tü hnüpa dä nangnih Hnadaga kheu nini khin khaw, Hnadaga äng phungkanei tih nini nuchen pawsawk khäl huih nini lung changei sawkai chu.” U khäl Hnadaga kheu yaw ula Ani äng ini phungkanei hütäm? Anih äi khrawng khäl hi hüt u ei, utih a Mosi la Aigup pre känäng thoh al hütäm? Awlaw u khäl khrung äng khokum hligip Hnadaga aman pok hüt saw äm? Anih äi huih khrawng khäl hi hüt u ei, u khälla ngulai ini bi hüt saw äm awlaw u khäl käh yok täu lung chinga khrih ei hüt saw äm? Awlaw u khäla Hnadaga la kei käh dümdün la bünei hnawh u ting jeng bala tak hütäm? Ani a ngei hütah tih äi khrawng khäl hi u ei? Ni äng ini hmuh, anih la yumei u saw äng dä Hnadaga la peksaw dümdüna chetal hnäng u saw. Hnadaga la pek saw dümdüna ini chetalaih saw koong ibang khawmei hmuei hütäm, äi nangkei koong tua ha hongei bala mäi khäh. Äi koong nangkei sidih äng ini mäiyeih lah saw, hngat ha che äi khawmei saw büneyeih saw känäng kolah pak. Iyaäm nangkei nuchen paw sawk khäl khäka ihuih sidawng pawi hawu hmuei hütäm, äi huih nangkei khäka ha hawu hmuei khäh. Äini äi sidawng pawi äng nangkei nuchen paw sawk khäl khäka iha che amrat mäi hütah. Iyaäm anih la äi yawpe ini yum äng lawei u. Äini nangkei ini yumei däk awlaw Ani la äi awkhawmei saw dümdüna nangkei ini vawng däk. Ni dümsaw luhdül bi chah saw khaw känäng mäi hüt thän, ni dümsaw krong äng Hnadaga la awhawu hüt, “Äi koong kei kaman äng jeng ngala kawhawu hüt, Kei käh düm düna anih vawngal lah hnawh u.” Kiyam äng tänaka hnüp seh tawng kheu hawu hmuei, “Hnadaga la Ani käh bi bichak pänäng hnüp seh tawng hnüp äng dümal.” Ani la awlaw hawu, “Kei kepek saw dümdüna anih vawngal hnäng hnawh u.” Äihi üküt khrawng che Ani la pek saw dümdüna ini chet hnängai. Äini mawng khrawng khäl khäka ayang sidawng pawi hiyawk hmuei hütäm, anih la ngei u saw koong anih a Hnadaga la pek saw dümdüna chet lah u. Ayang äng awhngaw khäla sumei bala kräu hüttih Hnadaga la awbawng khokum pänäng awlaw krawnak Dawut a sumei bala Isawlael saw khäl äng kräu. “Tü hnüpa dä nangnih Ani kheu nini khin khaw nini lung changei sawkaih chu saw.” Ni kheu hawu pänäng dümdüna ini vawngaih hnäng koong Ani la ikhin hngat pek. Tü hnüp ni äi ikhin. Yosua la dä Isawlael khäla äi dümdüna chih pui nawk hüt hi, Hnadaga la u hnung äng awlaw ikhin hngat kheu hawu hnawh saw. Äihi nangkei ini yawk chu, Hnadaga dümsaw hnüp äng dümsaw huih Hnadaga käh khrawng khäl koong tua ha dümsaw mäi khäh. Iyaäm Hnadaga la ihuih luhdül bisaw phäiyei bala üdümal hütäm, äi huih kawchawng chawng ubang Hnadaga la pek saw dümdün laa chet äm, ani la ha Ani käh bi känäng üdüm bünei khäh. Äihi lo khäl, nangkei äi dümdüna ini chetaih koong tha poäng khä, nangkei nuchen pawsawk khäl Hnadaga kheu ngei u saw äng ini krak saw huih nangkei ha krakah pak. Hnadaga käh kheu che sawk mawh la bi vawng tih dä. Ani käh kheu che thasa hattih chimchaw huih nakantha dukäng vawng bala naw sawk la naw khraw a awhngaw poh. Ni Hnadaga kheu la ini lung äng käh tawk awlaw ini lung hlü tara bi. Hnadaga khäka iha uthuh mäyah. Ua nangkei üsüh ini pekeyalaih lah saw äm Ani mik äng che hang hang hongei awlaw awdawng chak. Äihi lo khäl, nangkei ini khawmei saw khäl uyum äng chetchet mawn pula tawei äng khä. Iyaäm Ani che nangkei käh üküt thawka lentih pujawtih gong. Ani Hngadaga hmawi mawh a mäi. Ani Yĕsu, Hnadaga chaw. Nangkei käh pujawtih gong la nangkei ini ngiyaw saw khäl kheni yawkchu chak khäh. Iyaäm nangkei huih Ani ha ükütni äng ni ngulai äng käh chawmsi äng kraw hüt khäh äini ngulai bi hütah. Äihi sengkri tawei pula phiyaw phoih mäi saw Hnadaga käh nawn khäka chetäng khä. Äiya nangkei jen ini büniyei awlaw ühlü khaw a Hnadaga phiyaw phoih ini büneyei. Pujawtih gong khäl kheni khrawng khäl duk känäng helh hmuei. Äini Ani la üküt khrawng koong Hnadaga chetchaw aih saw la mäksetdava bät bala uhlu aih saw awlaw ngulai koong phiyaw phoih awpaih saw koong ani a bi awp hmuei. Hmawta pak ula ngulai bi äm awlaw phi pawh äng chetäm anih khrung äng Ani a jen mäi khäh. Iyaäm ani dukäng ha awngiyaw saw mäi khäh. Khrawng khäl käh ngulai koong mäksetdava bät bala ihuih hlu lah äm, ani la ha upum käh ngulai koong uhlu lah. Äini pujawtih gong thäneyeih koong Hnadaga la dä Arawn huih paneiyah khaw hngat ha upum sitha äng pujawtih gong thänei saw hmawi bünei hnängah. Ni kheu Krito koong ha tawn khäh. Krito la upum sitha äng pujawtih gong thäneyeih koong upuma hleneiyah. Hnadaga la ni huih ta bala Ani a äi hmawi pek hüt, Nang kei chaw, Tü hnüpa kei nang paw käthänei däk. Äi huih kawchawng chawng Hnadaga la awlaw tänaka hawu hüt, Nang dä sawkbrat koong Molkisedawk huih pujawtih. Yĕsu ni luhdül äng mäi hüt khaw a, athak hek bala kap bala khawh ei bala Hnadaga khäka uhlu hawuvei hüt. Ani a düsaw känäng Hnadaga la ähläh al hüt hnäng khäh ai hü. Ani la kenkeh poh bala Hnadaga a ngei hüt koong Hnadaga la Ani käh suh tong khin hüt. Ani Hnadaga chaw thäneipe ha dukhah khawm bala ngei saw khrang chok nawk lah hüt. Ani a awtawn saw huih poh hmuei chak pän ni, Ani ngeitih kheni koong sawkbrat kiyawtalaih saw lawm thänei, awlaw Hnadaga la Ani a Molkisedawk huih pujawtih gong ting hiyawk chak. Ni krong äng awbawng kheu keinih kini hawuvaih saw mäi, äini äi phrongh ungala kini hawvaih saw mawt khawk khei. Iyaäm nangnih nini yawk chu aih saw so chu. Äi hiyawh hnüpäng nangnih choktih a nini thäneyeih saw tawn däk saw. Äichaw a Hnadaga käh kheu chou anang chokalaih koong choktih a awlaw nini hlüei. Chang tih eisaw vawn chaw a sämäi chaw lekchaw khäl huih nangnih chih nini okalaih pe saw hlü däk. U bang chih o bala heng äm, ani che tua ha sämäichaw dä. Ani la konghmuh i äm äi hmawtah. Äini chang tih eisaw che yawchu chak däktih koong dä. Anih la ini khomdäk saw äng awpawi la ese ini khoih hnäng. Äihi lo khäl awmaw patäng chetäng khä, Krito krong äng täkchah ini chok nawk saw jiji äng mäyeipu. Nangkei käh uyum chang hmawna lo khäl Krito käh uthuk dä chok naw äng khä. Täkchah ini chok nawk däk saw krong äkräng kräng chok nawkaih saw tawnah. Äi krong khäl che ni, nüdü aih saw bi kawi känäng naw krawnalaih saw krong, Hnadaga khrung äng ini yumaih saw krong, awlaw konghmuh lawm äng asanh ini thäneyalaih saw krong, khrawng lukhrung äng nukut tawei tila Hnadaga känäng pisih nawhawu pek saw krong, dütih khäl heng ula ini thouwal saw krong awlaw päyeih hiyah saw tara krong. Hnadaga la kheu khrawng pek hi, äi khäl ini poh ai. Iyaäm ula Hnadaga käh ihisaw yawchu däkäm, ula hawna käh phiyaw phoih bünei däkäm awlaw Asanh chang Khraw bünei däkäm, Hnadaga kheu pawi khäh ting hmawt däkäm, awlaw awhmawi mawh kat äng lo aih saw tha krong khäl hmawt däkäm äi khrawng khäl äipe ha Hnadaga känäng awhlawm hlaw a ini chetal khaw ini lung hleyeyal ula Hnadaga pawtäng lo al hnäng hnawh u. Iyaäm äi khrawng khälla Hnadaga chaw a awlaw krängak Krut äng ini thawn awlaw hanghang hmawi mawh a Ani a hiyawh ei ini pek. Äi huih, mawng dek la äkräng kräng kho tui chepal bala akhang bitih khäl käh ühlü saw awnse thei sawkäm, äi dek la Hnadaga käh pisih bünei. Äini mawng dek la ihling täu awlaw lawng ham thouh äm, äi dek che usum vawngah pak thänei awlaw sayei hmueyei ting keh se. U hnung äng äi chawh hmueiyalai. Khetsu khanbawn khälo, ni kheu khäl kini hawu thän nangkei ini yum khäh, nangnih koong pisi pawi mäi khäh. Ni che nangnih käh khiyawtara pisih. Hnadaga che tara prongh bitih. Nangnih Ani käh yumtih sawng khäla chetchaw chula mawng ekhet la bi nangnih Hnadaga a nini dawnei äm awlaw nini dawnei tun äm, äi khäl Hnadaga la hngilal hnawh. Keinih kini hlüei üküt nila utumak äi huih lawphah dawnei khäl. Äihi nangnih nini khah nei saw lälä luih yei ting nini ümai. Nangnih nini dawmaih saw keinih hlüei unga. Äini keinih kini hlüei uyum la chunei hnäng saw äng aw khawmei saw büneyeih tih khäl huih nangnih ha thänei khäl. Hnadaga la Awbraham khäka aw khawmei hüt khaw a, Ani upum ming äng dä jeng hüt saw. Iyaäm Ani jeng hnäng hmawna Ani ming thawka ejeng dün ming len hngat ha mäyah. Ani la ni huih hawu bala aw khawmei hüt, “Kei nanga pisih pekni kini pekai awlaw nechen kawpaw sawkai.” Awbraham la chunei hüt koong Hnadaga la ibang epekaih saw khawmei äm äi ani la bünei. Ini pum thawka u bang len äm, äi ming äng dä khrawng ini jeng saw. Khrawng hngat jeng hi, äi äng nü ütei nawkaih saw mäitiyah awlaw äi äng ini toksakei saw ha dümal. Äi huih, ula Ani käh khawmei ini büneyeih äm Hnadaga la sanh sanh anih a dawnaih khiyang. Ani la ibang kram bala tawkäm äi hleyal hnawh ting Ani jeng. Hnadaga la khawmei saw la ejeng saw krängak ha hleyalah. Hnadaga che krängak ha hleiyah. Nangkei ini kiyawtaih saw koong Hnadaga khäka ini chon hüt. Tua Ani la mawng khanh khrawng pek äm, äi chetchet mawn pula ini tawkaih saw koong Ani käh khawmei saw la nangkei a mawmawt ulyah khrawng pek. Ni ini khah nei saw nangkei käh sawk äng thi khak huih mama awlaw yum phoih. Ni ini khah nei saw üküt thawka asanh chang la awlaw kadün wat hnunga Hnadaga hmawi mawh täh a phaw. Yĕsu nangkei pawh a phakei bala nangkei khawngah äi la a chet däk. Ani sawkak koong Molkisedawk huih pujawtih gong thänei däk. Ni Molkisedawk Salema käh mawng awlaw ihisaw Hnadaga käh pujawtih hngat mäi hüt. Awbraham la mawng khäla hiyumsawk bala krawnal khaw a Molkisedawk äng khomei. Äi khaw a Molkisedawk la Awbrahama pisih pek hüt. Awlaw Awbraham la jal täk bala bün saw vawn kheni äng käh paiha lukhrunga hngat ani a pek hüt. Molkisedawk ming naw phawhngal hi konghmuh sang mawng. Molkisedawk Salema käh mawng ha mäi hüt. Äi kheu naw phawhngal thän jelkhiyamsa mawng. Molkisedawk a unu la awpaw awlaw echen ming khäl iha yok mäi hütah. Hnadaga Chaw huih ani sawk achah saw la äpäih saw krong iha yok mäi hütah. Ani sawkak koong hngat pujawtih mäi hüt. So, Molkisedawk i hiyawh elen saw äm! Nangkei chen äng käh ming mawh Awbraham la bang jal täk bala bün saw äng käh paiha lukhrunga hngat üphüh pek hüt. Lebi chen äng pujawtih thänei tih khälla Mosi käh thung huih ini yapsaw Isawlael khäl känäng paiha lukhrunga hngat ini lawkeyeih saw thung ini bünei hüt. Ni nawu tih khäl Awbraham chen thän äi huih ini pek lah. Äini ni Molkisedawk Lebi chen hiyah thän Awbraham känäng paiha lukhrunga hngat bünei hüt. Awlaw u khäka Hnadaga la khawmei hütäm äi Awbraham a Molkisedawk la pisih pek hüt. Ni äng iha ini ütei nawkaih saw mäyah. Pisih ula bünei äm, äi thawka ula pisih pek äm ani dä elen saw. Pujawtih khäl düaih tih khrawng thän ini hlusaw äng käh paiha lukhrunga hngat ini bünei. Äini ni düna Molkisedawk heng bala mäyeih tih ting hawu hmuei thän, ani la phüh ha äng käh phüh ak bünei hüt. Ni kheu nawhawu hnäng, Paiha lukhrunga hngat bünei tih Lebi khälla Awbraham a sumei ula paiha lukhrunga hngat ini pek. Iyaäm Molkisedawk Awbraham äng khomei khaw a, Lebi Awbraham kantha dukäng mäi hüt. Lebi chen känäng lotih Pujawtih khäl käh bi känäng dä khrawng khäla Mosi käh thung pek hmuei saw. Ni Lebi sawng khäl äng käh Pujawtih khäl käh bi la hngat käh ngulai ha achang po hnängah. Äini Ani la bisaw pujawtih khäl käh bi che Arawn chen khälla ini bisaw huih hiyah, ani che Molkisedawk pujawtih huih dä. Awlaw pujawtih khäl ini heh lei saw thung hleyal khaw a, thung ha hleyal lah. U krong kei kawhawu äm, äi Yĕsu Lebi chen känäng lo hütah äini awhngaw japsaw känäng dä lo hütsaw. Äi chen äng käh hngat la ha krängak ha pujawtih huih hlu dün la khrung äng mäksetdava hlu hüt u. Ni mawmawt chaw ini hmawt, Yuda chen känäng dä nangkei käh Boi losaw. Ni chen känäng dä pujawtih ini thäneyeih saw ting ni kheu ha Mosi la krängak ha hawu hütah. Molkisedawk huih hngat pujawtih a dawng ni äi thung hleyalaih saw kheu khäl sanh sanh thänei chak. Ani a pujawtih poh hmuei hütsaw luhchaw käh thung äng hiyah. Äini krängak ha päiyeih hiyahtih sawkmawh tha äng dä poh hmuei saw. Kiyam la ni kheu hawu, “Nang sawkbrat koong Molkisedawk huih pujawtih a näthäneyei.” Thung phem khäl kheni chah ak pawta tawkal hmuei. Iyaäm thung phem khäl che ngiyaw hüt awlaw usum vawng hütah. Mosi käh thung la hngata ha ngulai känäng achang po hnäng hütah. Äini nangkei a Hnadaga kena khrawng chih yeih hnäng saw khanh pawi tua pek hmuei däk. Hnadaga la jeng bala Yĕsu a pujawtih bi awp. Äini awhngaw pujawtih khäla bi awp khaw a Ani jeng hütah. Äini Hnadaga la jeng bala Yĕsu a pujawtih gong bi awp hüt. Kiyam äng ni krong yoei, “Boi ni huih jeng, Ani la ulung hleyeyal hnawh, ‘Nang sawkbrat koong pujawtih hngat näthäneiyei.’” Hnadaga la luhchaw dukäng awpawi kheu ini tawei saw Yĕsu la dä bünni bünei hmawna poh pek saw. Lebi käh chen känäng awbawng pujawtih ini mäi hüt. Äini anih ini düsaw koong bi khäl bibi ula mäi hüt hnäng u. Äini Yĕsu che sawkbrat heng bala mäi koong Ani käh pujawtih bi krängak ha awhngaw khäka awp hmueiyalah. Äi koong u khäl Ani a yum ula Hnadaga khäka ini lo äm, anih tua ha awlaw sawkbrat ha ini khiyawtal hnäng. Iyaäm Ani sawkbrat ni anih koong Hnadaga khäka suh tongaih saw koong heng bala mäi. Yĕsu dä nangkei ini hlüei saw huih pujawtih gong. Ani che achang, epret mäyahtih la ngulai mäyahtih. Ani ngulaisu khäl thawka aw hngaw awlaw Ani a hawn pre thawka ühlünga khawi hmuei. Ani awhngaw pujawtih gong khäl huih hiyah. Ani la hnüpak kiyawnah upum käh ngulai koong awlaw khrawng khäl käh ngulai koong mäksetdava hlu hlü ah. Iyaäm Ani la krängak äng awsawk pekei bala bi phäih yei. Mosi käh thung la ngiyaw tih khäla dä pujawtih gong ini thäneyeih saw koong heh lei saw. Äini Hnadaga jeng saw che thung pänäng dä losaw. Ani la awchaw a äi bi awp awlaw sawkbrat koong tawn tih a poh. Keinih kini hawu saw äng käh alang gong kheu che ni, nangkei a pujawtih gong hngat mäi khäh, Ani che hawn pre a lentih Hnadaga käh nawn kena set pawta om bala mäi. Ani Hnadaga rosi dün ihisaw tambu duka üküt thawka asanh sum laa Hnadaga a echetchaw. Äi Hnadaga rosi dün tambu khrawng la po ah, Boi la dä poh saw. Üküt pujawtih gonga ni mäksetdava la awhngaw vawn khäl ini hlu aih saw koong bi awp hmuei. Äi koong äi pujawtih gong la ha lalapei uhlu aih saw hlü. Äini tua dä Ani luhdül äng mäi hi, Ani pujawtih mäyei hü hnawh. Iyaäm ni a thung täng hlu aih tih pujawtih khäl ini mäi khäh. Anih la ini chetchaw saw ala che hawn pre a mäi saw ulupchaw huih dä. Äi koong Mosi la Hnadaga rosi dün tambu poh aih khaw a, Hnadaga la ni huih hawu bala ani a ana pek hüt, “Sinai khuyunga nanga i huih kini dawn äm ükütni äi huih po bäi.” Äini tua nangkei ini hmuh Yĕsu la bünei saw pujawtih käh bi che awhngaw pujawtih käh bi khäl thawka awbawng elen. I huih kheu ini tawei saw äng käh eche Ani thänei saw äm, äi kheu ini tawei saw ayang äng käh kheu ini tawei saw thawka pawi. Iyaäm ini khawmei saw pawi khäl äng käh ochou äng dä ni kheu ini tawei saw poh hmuei. Täk chah kheu ini tawei saw la ühlü saw huih poh hnäng hütah koong awlaw hngat kheu ini tawei saw hlü hüt saw. Äini Hnadaga la Ani khrawng khäl käh epret bün bala kiyam äng ni huih hawu. Boi la hawu, “So khäl, ni huih khin lotun Kei Isawlael khrawng khäl äng awlaw Yuda khrawng khäl äng kheu tha hngat kawtawyei Aigup pre känäng anih käh nu chen paw sawk khäla kei sidih äng lawm dawn ngala kolo al hüt khaw a, anih äng ihuih kheu kini tawei hütäm äi huih tua käh atha kheu kini tawei saw tuei hnawh. Anih äng Kei kheu kawtawei saw äng anih uyum lah mäi hüt u. Äi koong Kei anih a chetchaw tinga.” Ni kheu Boi la hawu. Boi la awlaw hawu, “Kei awmaw äng Isawlael saw khäl äng atha kheu hngat kawtaweyei, Kei käh thung khäl anih tawk äng kawthawnai awlaw anih lung äng yo ngala kawtawkai. Kei anih käh Hnadaga käthäneyei awlaw anih Kei käh khrawng ini thäneyei. Hngat la ha ani imcheng saw awlaw awnawu a ni huih krängak ha chokah heh, ‘Boi a hmawt,’ Iyaäm enemchaw täh känäng ühlüng tih ükütla ni Kei a khrawng hmawtai. Äi koong anih käh ngulai khäl kä hläh alai, thung krak ula epret ini thänei käh ting krängak ha hawu tih hnawh nga.” Hnadaga la ni kheu tawei saw a ‘atha’ ting hawu. Äi koong täkchah kheu ini tawei saw ephema opoh al. Phem tih khe che lalapei usum vawng tiyah awlaw alanda krokalai. Hnadaga nini rosiyeih koong täkchah kheu tawei saw äng thung mäi hüt khäh. Awlaw luhdül äng ha rosiyeih koong hngat ala mäi hüt khäh. Äi huih Hnadaga rosi dün tambu hngat poh hmuei hüt. Äi tambu äng awhmawi mawh täk che simiya tawk dün, khung awlaw Hnadaga a awp hmuei saw asanh chang ha mäi hüt. Äi awhmawi mawh täka che asanh chang saw la ting ini tak. Äi awhmawi mawh täk pänäng ka dün awat hngat ämäi. Äi awat hnunga awlaw täkak mäi. Äi laa che üküt thawka asanh sum la ting ini tak. Äi laa ootih meikhu choyeih koong ha äng käh ini hludün la awlaw kheu ini tawei dün tawbala hngat ämäi hüt. Äi tawbala prang che ha äng jilh hmuei hüt. Äi tawbala dukäng ha khok äng manna mäi hüt, Arawn kut äng käh esei thok saw mawh kompum awlaw thung yoei bala mäi saw lung hlaw ha mäi hüt. Äi tawbala khrung äng cherubim ulupchaw pai hnih mäi hüt, äila Hnadaga mäi saw khrawng dawn. A hnih käh khra tawbala kündün khrung äng phrah nei bala mäi. Äi kündün che ngulai hläh pek hmueyal dün la. Äini tua ükütni khoi bala hawuvaih saw ikhin hiyah. Ni huih äi vawn khäl süsüp hne hnep tawk hmuei hüt khaw a, Pujawtih khälla Hnadaga rosi dün tambu äng käh awhmawi mawh täk äng sawkbrat vawng ula anih käh bi ini biyei chi. Äini äi pänäng käh täka pujawtih gong dä ini vawng hnäng saw. Kumak sätak ani mäksetdava ini hlusaw thi chi bala che vawng chi. Upum käh ngulai koong awlaw khrawng khälla hmawtah pak ini bisaw ngulai khäl koong ani la äi thi chi hlu hüt saw. Ni huih äng Asanh chang Khraw la dawn, täkchah äng käh tambu mäisaw sawgraw, äi üküt thawka asanh sum laa nawvawngaih saw lawm khaei bala mäi. Ni kheni la nangkei a tukatäng käh ikhin krong khrawng dawn. Mäksetdava nuhlusaw awlaw aw hngaw vawn nuhlusaw khälla rositih khäl käh tawk asanh poh hnängah. Äi khäl che nakantha käh eiok la konghmuh äng käh asanh näthänei saw khrang dä. Hnadaga la lawm tha khrawng pekah saw sawgraw äi lawgah thung khäl mäi hüt. Äini Yĕsu Krito che awpawi äng käh pujawtih gonga thänei bala lo däk, äi awpawi che niya mäi lawk däk. Ani vawng saw hawn pre a käh Hnadaga rosi dün ihisaw tambu che mawt alang gong awlaw mawmawt pawi. Äi Hnadaga rosi dün ihisaw tambu che khrawng la poh saw hiyah awlaw luhdül äng käh vawn ha hiyah. Ani upum käh thi lawei bala krängak dä üküt thawka asanh sum laa vawng saw. Mah heu la sel chaw thi law bala äiya vawngah. Ni huih äng Ani la sawkak koong ngulai känäng lätal dün lawm poh. Mosi käh thung täng sahnah tih khrawng khäl pumäng mah heu la sel heu paw thi hiyah thän selchaw ini chawh saw äng käh kuk ini phulh hüt. Äi äng anih käh aprang pawt dä sahnal chi saw. Äihi päihyah saw khraw tha äng angga chumchak tih mäksetdava huih Hnadaga khäka Krito la awpei. Sawkak mäitih Hnadaga a nangkei rosi hnäng ong, Ani käh thi la nangkei käh tawk kheni achang la asanh poh. Äi koong Krito dä äi atha kheu ini tawei saw äng käh eche. Hnadaga la u khäla panei äm, äi khäla Hnadaga la khawmei hütsaw huih päihyah saw pisih pekai. Iyaäm äi täkchah kheu ini tawei saw mäi hüt khaw a ngulai ini poh saw äng käh dam känäng khrawng khäla ähläh alaih koong Krito üdü hüt saw. Ala chaw krong äng, ala chaw hngat dä nusumaih khiyang hi, äi ala chaw pektih dü däk ting nawdawnaih lah saw. Iyaäm äi chaw pektih dä eheng pe hi, äi ala chaw usum vawngah. Äi huih täkchah kheu ini tawei saw ha thi kaw po hnäng ti. Thung äng mäi saw khäl kheni Mosi la khrawng khäla tak chak hüt. Äi pänäng ani la sel heupaw thi la mah heu thi law bala tui ängtu bälh. Awlaw awat sen hisawp thing äng käh bakchaw äng khon bala äi tui äng sum. Äidä ani la äi tui khrawng khäl awlaw thung boih hiyol äng pran nawk. Ani la khrawng khäla tak, niche thi äng käh kheu ini tawei saw. Ni Hnadaga la nini ngeyeih koong ana anang pek. Äi huih, Hnadaga rosi dün tambu la rosi saw bi äng sum hmuei saw vawn kheni äng Mosi la thi phran nawk hüt. Mosi thung äng üküt küt kheni che thi äng dä asanh poh hmuei saw awlaw thi bo ah pak ngulai hläh thäneyah. Äihi sum hmuei hüt saw äi vawn khäl che hawn pre a mäi saw vawn khäl ulupchaw äng käh oyok phou hmuei saw dä. Äi khäl che äi huih dä asanh poh hmuei chi saw. Äini hawn pre a käh ihisaw vawn khäl asanh ini poh alaih koong äi thawka awpawi ini hlu aih saw ühlü. Iyaäm luhchaw la ini bisaw asanh sum laa Krito vawng hütah. Äi luhchaw la ini bisaw ala che hawn pre a käh asanh chang la lupchaw äng käh oyok phou hmuei saw jiji dä. Äini nangkei pawh khawmaih koong hawn pre a kawiyal bala Hnadaga hmawi maw a Ani ämäiyal. Pujawtih gong kumak kiyawnah mäksetdava thi law bala üküt thawka asanh sum laa chet. Äini Krito la upuma hlueyeih saw koong äkräng kräng chet hütah. Äi huih dä poh lah khaw che, luhdül chah saw khaw känäng Ani la äkräng kräng dukhah khawm bala dülah ai hü. Äini tua hang hang kat khe päih saw khin khäl äng ngulai awhlawm hlaw a chiyal hnäng hmawna Ani kräng khiyang äng adawng. Luhchaw kheni krängak ini dü aih lah saw, äi pänäng anih käh tara bi hmuei yei. Hnadaga la äi huih po bala tawk. Äi huih awbawng khrawng khäl käh ngulai awhlawm hlaw a chih alaih saw koong Krito a krängak dä hlu hmuei hüt saw. Ani awlaw krängak lo alai. Äini ngulai krong äng hiyah, awlaw bang ini lung khrawei ula chong bala mäitih khäla khiyawt tara dä lo alaih saw. Mosi käh thung che awhmawi mawh a käh vawn pawi khäl äng käh ilip jiji dä, ihisaw vawn khäl hiyah. Khrawng khälla mäksetdava bät ula ukum kum hlu hlu ula ini lo. Äini äi huih äng Hnadaga khäka lotih khrawng khäla Mosi käh thung la ngulai känäng achang po hnängah. Mäksetdava bät ula ini hlusaw äng dä anih ngulai känäng ini changal hüt khaw, hlu ti hnawh u saw. Iyaäm rositih khäl krängak äng asanh ini thäneyal hnäng khaw ngulai koong anih la epret mawh khah nei hüt hnawh u. Äini ni mäksetdava ini hlusaw khälla dä anih ini pum käh ngulai kumak kiyawnah ini lung äng khawiyal. Iyaäm sel heu paw thi awlaw mah heu thi la krängak ha ngulai awhlawm hlaw a chiyal hnängah. Äi koong Krito ni luhdül äng lo aih khaw a Hnadaga a tak hüt, “Mäksetdava la awhngaw hlu nang hlüeiti. Äini kei koong kantha hngat nang nopoh. Chawh bala hlu hmuei saw la ngulai koong hlu hmuei saw, äi äng nang piyawti. Äi pänäng kei kawhawu hüt, ‘So, niya dä Kei, boih hiyol äng Kei krong yoei bala mäi khäh. Hnadaga o, nang sitha huih thänei a Kei kolo saw.’” Täkchah Ani la hawu, “Mäksetdava ini bätsaw ula ini awpsaw, chawh chula ini awpsaw, awlaw ngulai koong ini awpsaw, ni khäl khe thung täng hlu hmuei hüt thän Nang hlüeiti, äi äng Nang piyawti.” Äi pänäng Ani la hawu, “So, Kei kolo saw Nang sitha huih poh a.” Ani la uhnung äng käh kheu ini tawei saw usum hawnaih koong täkchah kheu ini tawei saw ehenal. Hnadaga käh sitha huih Yĕsu Krito la akantha krängak äng sawkbrat koong hluei hüt. Äi äng nangkei asanh chang ini thänei. Pujawtih kheni la hnüpak kiyawnah ja ula Hnadaga a ini chetchaw chi. Awlaw äkräng kräng lup khiyang ini hlu chi. Ni hlu la ngulai känäng krängak ha khiyawtal hnängah. Äini Krito a sawkbrataih phüh ngulai koong krängak hlu hmuei hüt. Äidä Hnadaga käh set pawta Ani omal. Äitäh kän Ani lansu khäla Hnadaga la Ani dogo kawla taw alah saw sawgraw Ani la chongei bala mäi. Iyaäm Ani la krängak hluei saw äng Hnadaga la u khäla ngulai känäng achang poh äm, äi khrawng khäla sawkbrat koong asanh chang poh al. Asanh chang Khraw la ha ni krong äng nangkei khäka sawksi thok. Täkchah Ani la hawu, “Boi la hawu, ‘Äi hnüp khäl pänäng, Kei anih äng ni kheu kawtawei, Kei käh thung khäl anih lung äng kawtawkai awlaw anih tawk äng yo ngala kawtawkai.’” Äi pänäng Ani la hawu, “Kei anih käh ngulai khäl awlaw ese bi kawi khäl krängak ha kulung äng khawyeiti hnawh nga.” Äi koong Hnadaga la ngulai la epret ähläh pekal däk hi, äihi ngulai koong iha hlu hlütiyah. Äi koong khanbawn khälo, Yĕsu Krito käh thi tha äng keinih a äi üküt thawka asanh sum laa kini vawngaih saw sengkhri mäi khäh. Krito la awsawk pekei bala nangkei koong hngat atha awlaw sawk mawh lawm khrawng hong pek. Nangkei ka dün wat duk känäng üküt thawka asanh sum laa vawng hnäng hmawna. Iyaäm nangkei koong pujawtih elen hngat Hnadaga im so khre tih mäi khäh. Äi koong ni ini yum chang saw äng i ini khahnei saw mäyäm. Lo khäl, äi äng ihisaw lung äng Hnadaga hmawi mawh a chet äng khä. Iyaäm nangkei käh ese saw tawka achang poh hmuei däk awlaw sanh tih tui äng nangkei kantha boh hmuei däk. Lo khäl, nangkei käh ting ini hawuvei saw khahna chetchet mawn pula tawei äng khä. Iyaäm nangkei ini hmawt khäh Hnadaga la awkhawmei hüt saw äng uyum lah mäi khäh ai. Lo khäl, nangkei ekhet la bi pawi äng hngat la hngata iba ulyah ini pekei saw äm äi tawk äng khä. Üküt küt khrawng yumeitih ini lumeidüna chet u saw huih nangnih ha chetah pak mäiyei chu. Äichaw a unung chaw Boi käh tara hnüp lotun saw ni hmuh koong nangkei hngat la hngata ulyah ini pekeyeih saw thawn khäh. Hnadaga käh ihisaw a hmawt pe dä ini sitha äng ngulai bi bi pula ini mäi khaw, nangkei ngulai chiyalaih tih hlusaw mäitiyah. Äichaw a keh sese a lo tun tih Hnadaga käh tara awlaw lansu khäl eiyalaih tih mei lena dä chongei hnäh bäi. Losulapei Mosi käh thung laweiyah hi, jeneyah pak pochong hnih thum käh sawksi äng ani tuk hmuei. Tawk chawm khäl, ula Hnadaga chaw a okho äng chelh äm, awlaw thung äng käh thi äng ngulai känäng asanh thäneyal bala äi khäl usum vawngah pak ula poh äm awlaw ekhetjen Khraw a keleih äm, äi khrawng la i hiyawh bawng dam bünei tawnaih saw äm. Nangkei Hnadaga a ini hmawt khäh, Ani la hawu, “Epret äng käh dam kepekaih saw päng Kei a dä mäi saw. Ula ihuih bünei tawnäm äiya äi huih kepekai.” Ani la awlaw tänaka hawu, “Boi la upum khrawng khäl käh tara biyei.” Sawkmawh Hnadaga la tara biyeih saw i huih keh se yeih saw äm! Ayang äng käh khomhnüp kheu khäl nini lung äng khaweyal khäl. Hnadaga käh ihisaw nangnih nini bünei pänäng nangnih mawt dukhah nini khawm hüt. Äi dukhah la nangnih a anang hiyumsawk hnäng hütah. Üküt küt khaw a nangnih khrawng hmawi mawh a siri khrah nini hmuei awlaw kuluh nawk nini hmuei hüt. Awlaw ula ni huih waih khawm äm, anih äng nangnih nini phakei. Awlaw othong ima khraw tih khäla nini jenei hüt. Nangnih käh vawn anang huh ei pek thän nangnih nini piyaw hüt. Iyaäm nangnih nini hmawt hüt, äi thawka vawn pawi la sawkbrat mäiyeih saw kähkän nangnih koong mäi khäh. Äi koong Hnadaga khruäng nini ümsaw khrokeyei chu, äihi Ani la nangnih koong awpawi poh ai. Hnadaga sitha huih bi hnäng hmawna awlaw Ani la khawmei saw lawei hnäng hmawna nangnih nini chuneyeih lah saw dä. Iyaäm Hnadaga käh kheu huih, “U loa laih saw kheu mäi äm, Ani alanda loa lai. Ani unung krawti hnawh. Anih la ini yumsaw huih dä ini mäichoh hi, Anih a konghmuh sang ting küsüh ai. Äini ula kei pawt hnung sungäm, anih lukhrunga kei piyaw hnawh nga.” Äini krawnal ula kraktih sawng äng nangkei mäipu. Äichaw a yumei ula awkhiyawt büneyal tih sawng äng dä nangkei ini mäi saw. Nangkei ibang ini khah nei äm, äi lälä ini büneyeih saw ting ini khin saw ni uyum. Awlaw ibang hmu pu äm äi ämäi saw ting ini khin saw ni uyum. Uyum koong dä nangkei nuchen paw sawk khälla Hnadaga a ini phiyaw hüt saw. Uyum koong dä nangkei ini yawk chu saw, Hnadaga mongkhok känäng käh kheu thok saw äng dä ni luhdül thänei hüt saw. Äi äng ini yawkchu, nangkei ibang ini hmuh äm, äi awdawng saw vawn känäng bi hmueiyah. Uyum koong dä Koin käh thawka Abel käh hlu Hnadaga khäka mawmawt pawi hüt saw. Ani käh yum koong dä Hnadaga la ani käh hlu lawei bala che ani konghmuh sang mäi hüt ting hawu hüt. Abel dü thän ani käh yum la ani koong tua ha kräu khäh. Uyum koong dä Inok ha dü ah saw. Hnadaga la ani a hawn pre a khawyal hüt koong ani a bünal u saw. Hnadaga la Hawnawka chiyal khawngah Hawnawk la Hnadaga a phiyaw hüt ting kiyam la hawu. Uyum kaw che Hnadaga lung hluih hnäng tih. Iyaäm u khäl Hnadaga khäka ini chet äm, Ani mäi khäh ting ini yumeiyeih lah saw. Hnadaga a u khälla ini sui äm anih a Hnadaga la phiyaw phoih khäl pekai. Ibang äi khaw a ha dawng hawmah äm, äi krong äng Hnadaga la Noha a sidih pek hüt. Noha a uyum mäi saw koong dä Hnadaga kheu ngei bala ani la ani imsaw lät hmawna long hngat bi hüt. Noha la ani yum äng ni luhdül a epret mawh po bala dawn. Awlaw Hnadaga la ani a konghmuh sang ting lawkei, äiche uyum koong dä thänei saw. Hnadaga la Awbraham a panei hüt khaw a, uyum koong dä Hnadaga kheu ngei hüt saw. Hnadaga la ani awlaw ani chen khäla pekaih saw ting khawmei dün laa ani chet hüt. Äi khaw a mawnga chetaih lah saw äm hmawtei hütah thän ani chet. Hnadaga la Awbraham a ala hngat pekaih saw khrawkei hüt. Ani uyum koong dä äiya awhngaw presaw khrawng huih mäi hüt saw. Aijak la Yakub ihni mäi hüt saw huih ani ha tambu äng mäi hüt. Hnadaga la Awbraham khäka khawmei hüt saw huih ahnih khäka ha khawmei. Iyaäm Awbraham la ochou matih mräh koong chong bala mäi. Äi mräh eje phoutih la bitih che Hnadaga. Sara awbawng chang hüt däk saw koong awchaw thäneyeih saw sawk mäi hüt tiyah thän uyum koong dä ani la Awbraham käh chaw awchaw nawk. Iyaäm Hnadaga la khawmei saw che yum phoih dä ting Sara la yumei hüt. Äi koong Awbraham awsawk chang däk thän hawna käh asĕ la mret kawma käh de huih süp hnäng ti saw khrawng khäl käh nuchen paw sawka thänei. Ni khrawng khäl hang hang ni yum hüt ula ini dü chak. Hnadaga la ibang khawmei hütäm, äi anih la bünei hüt u. Äini awhlawm hlaw kän hmu ula ini piyaw hüt. Ni luhdül äng anih hmawt ti saw khrawng la awhngaw presaw ting ini khawmei hüt. U khälla äi ini khawmei hütäm, äi khawmei tih khälla ini pum koong pre hngat ini sui tun saw ini dawnei. Anih ini thokal saw pre krong anih la tawtawk ula mäi u. Äi huih tawk ula dä ini mäi hüt khaw, äi pre a ini krawnalaih saw koong lawm mäi hüt khäh. Äini anih la äi thawka pre pawi ini sui hüt. Äi pre che hawn pre. Äi koong anih la Hnadaga a ini pum käh Hnadaga ting ini panei koong Hnadaga hiyawkei yah. Iyaäm Ani la anih koong mräh hngat ächän tawk hüt. Hnadaga la Awbrahama chawm hüt khaw a, ani a uyum mäi hüt awlaw Aijak a hlu hüt. Hnadaga la khawmei saw Awbraham la lawkei, awchaw a hlu aih koong ächän mäi hüt. Hnadaga la Awbrahama tak hüt khäh, Kei kawkhawmei saw huih Aijak känäng dä nang chen khäl ini paw aih saw. Hnadaga la hawu pek hüt, “Nang chen Aijak känäng dä ini thänaih saw.” Awbraham la ani a u hluaih saw koong ulung ngi hüt. Iyaäm ani la yumei hüt Hnadaga la dütih a henal hnäng. Niche Awbraham la Aijak a üdüsaw känäng büneyal saw huih. Uyum äng awhmawi mawh a käh khin koong Aijak la Yakub awlaw Eso pisih pek hüt. Uyum koong dä Yakub dü aih khaw a Yosep chaw häih a pisih pek hüt saw. Awlaw ani la kompum äng chechetei bala Hnadaga a rosi hüt saw. Yosep üdü aih khaw a Hnadaga la Isawlael khäla Aigup pre känäng thoh al khäh äi ting uyum mäi hüt. Äi koong ani la anih a ani käh yoh khäl anih ängtu ini chih a laih saw tak. Mosi luhdül äng lo pänäng ani nupaw la yumei häih la dä khraw thum i hni thuh hüt saw. Iyaäm a hnih la i hnih hmu i hnih chaw pawyei saw. Awlaw a hnih Aigup pre a käh mawng käh ana keh häih. Mosi uyum äng chom pänäng mawng chuhnu käh chaw ting upuma ini paneyeih saw ani la hlüei hütah. Sawkak mäyeih hiyahtih ngulai äng käh awpiyaw hiyän bala Hnadaga käh khrawng khäl äng dukhah khawmaih saw ani la heh lei. Ani la Aigup pre a käh kähkän thawka Krito koong hiyawh ei nübüneyeih saw awbawng pawi ting khinei, iyaäm ani mik che phiyaw phoih pawh äng mäi hüt. Uyum koong dä Mosi la mawng aman pok saw bang keh a pak Aigup pre ä hläh al hüt saw. Iyaäm imik la hmu ah saw Hnadaga a u hmuh saw huih chunei bala mäi hüt. Uyum koong dä lätal päi la thi ini phran saw thung ngei hüt saw. Iyaäm tuaih tih la Isawlael khäl käh chaw u chaw khäla tua pak. Isawlael khälla Hnadaga a ini yumei koong dä mret sen kawt hnäng hmawna hul phäng phänga lawm poh pek. Äini Aigup presaw khäl anih huih äi mret ini kawtaih khiyang ni nek ula ini dü chak. Uyum koong dä Isawlael khäl hnüp seh daraih Jeliko mräh patchi ini chetei pänäng äi mräh äng käh lung pawng jal chak saw. Uyum koong dä hmutaw chawgraw Rahab Hnadaga kheu ngeiyah tih khäl ängtu krak hütah saw. Iyaäm ani la äi Isawlael käläng käh uduk prang sotih khrawng khäla khanbawn huih lawkei hüt. Ni thawka kei i kawhawuvaih saw äm? Gidion, Barak, Simson, Jipto, Dawut, Somuel la Hnadaga sidawng hiyawktih khäl käh kheu khäl kawhawuvaih saw kei a ikhin mäyah. Ini yum äng dä anih la pre khäl ini pängeiyal saw, ihisaw tara ini bi hüt saw, Hnadaga la khawmei saw ini bünei hüt, khangsi khäl kaw bing hüt saw, mei dam u hiyupal hüt saw, khrawng khälla ini tukaih khiyang khawa anih ini lät saw, ngiyaw pe ha tha mawh a thänei hüt saw, jal khaw a tha dawnei hüt saw awlaw awhngaw presaw soloi khäl ätämal hüt saw. Üküt khrawng che düsaw känäng heng ula ini thouwal awlaw hmutaw khälla ini pawtaw a ini büneyal. Awbawng khrawng kuluh nawk ini hmuei thän ini lätalaih saw hlüei u. Anih la hawn pre a äi thawka awsawk pawi ini büneyalaih khiyang saw koong kulu nawk ini hmuei saw kän lätal do u. Awlaw üküt küt la keleih ini hmuei awlaw bop ini hmuei, üküt che siyol äng hen ula othong ima chih ini hmuei hüt. Khrawng khälla lungpel khong naw hüt ula anih a ini tuk. Anih a hlaw äng phawl hnih a ini poh. Awlaw anih chimsawu äng tuk ini hmuei. Anih kuluh nawk ini hmuei awlaw pawyah saw khrang ini bünei hüt, awlaw ini laisaw koong samphomah vun la mah vun wat ula chochonei ula ini mäi hüt. Anih ala hong täng, khuyung täng, okho täng awlaw vawm täng chochonei ula ini mäidün la ini suyei hüt. Ni khrawng khäla luhdül la bünei tawn hütah. Anih käh yum koong dä anih ini pawi ting hawu hmuei saw. Äini Hnadaga la khawmei hüt saw anih la bünei hüt u. Iyaäm Hnadaga la nangkei koong awlaw bang awpawi kram bala tawk hüt saw. Äi koong nangkei a khrawng hiyän bala ni khrawng khäl luih hnawh u ting Hnadaga la khrawk hüt. Bakhaw ini hmuh, awbawng sawksi nangkei ini ken setsei ini mäi khäh. Äi koong, nangkei a khrawng jai sawktih la mawng ngulai la chetchet mawn bala khrawng tawk äm, äi khäl tongal äng khä. Äihi nangkei sawk mäyak ni uyum äng Yĕsu a chetchaw pula ini mäi hnängai. Iyaäm Ani la dä nangkei a Hnadaga khrung äng täkchah khrawng yum sawk awlaw Ani a mawmawt chaw yumei hngäng hmawna khrawng ku. Äi Yĕsu Krito khrung äng ini lung khraw ei äng khä. Awhmawi hmaw a awpiyaw mäi hüt koong Ani hiyawhei büneyeih saw tawkeyah pak krut äng düsaw chunei hüt. Awlaw tua Hnadaga käh nawna set pawta om bala mäi. Ngulaisu khälla thasa ini mum saw chunei hnäng hüttih Yĕsu khrung äng nini lung khrawei khäl. Äihi nangnih ngiyaw hnawh chu awlaw nini lung tum hnawh. Nangnih tua ha thi thoklah lokong ngulai äng jal täk lah hawm chu. Hnadaga la Ani chaw chuhnu huih nangnih a ulyah anang pek saw kheu khäl nini hngih lal däk. Ani la hawu hüt, “Chaw o, Boi la anang chokeyal khaw a mawmawt chaw khin bäichu. Awlaw Ani la anang bäu nawk khaw a ha nini lung tumai chu. Iyaäm Boi la u a khet nawk äm äiya dä chokei saw, awlaw awchaw huih u khäla lawkei äm, äi khäla dä dam pek saw.” Paw la awchaw a oproh ngal saw huih nangnih ha nini chuneyeih lah saw. Nangnih nini khru saw la dawn Hnadaga la nangnih äng awpaw huih poh ei. Awpaw la chokeyah tih chaw chuhnu hngat ha mäyei? Hnadaga la Ani chaw chuhnu khäla chokei saw huih nangnih a anang chokeyah hi, nangnih yawchuei bäichu nangnih pre chaw dä. Nangnih Ani chaw chuhnu hi chu. Äi hawuvah ha nangkei ini hmuh, lawgah äng käh paw la nangkei a khrawng chokei awlaw nangkei anih a hmawi ini pek. Äihi nangkei ihisaw sawk ini büneyeih saw koong i hiyawh bawng khraw lawm äng käh Paw a ini chokeyeih sawk saw tawn äm. Lawgah äng käh paw khälla awpawi ini tawk saw huih dä tana krachaw koong nangkei a khrawng chokei. Äini Hnadaga käh asanh chang üphüh bünei mawna nangkei pawyeih phüh dä Hnadaga la nangkei a khrawng chokei. Chok hawu khäl kheni dukhah ting ini khin, awpiyaw ting khin pu. Äini äi chok hawu ula lawkei äm, äila jelkhiyamsa la konghmuh äng käh theih bünei. Äi koong nangnih käh khawtih kut la ma ah tih khoklu mama poeyal khäl. Nangnih oprongh saw lawm äng chetei khäl, chektih khrawng käh khrang awlaw pawyah thäneyah pak, awlaw bang ani awpawi thäneiyal hmawna. Nangnih ükütni äng ni jelkhiyamsa äng nini mäyeih saw hno khäl awlaw asanh chang mäi khäl. Asanh chang thäneyah pak che hngat la ha Boi a hmu hnawh. Hngat ha Hnadaga khetjen känäng kolah pak so khäl. Nangnih käh tawka khawtih yungkung huih chom sawkai chu. Äila dukhah äng anang khrawkai awlaw awbawnga anang khrakai. Hngat ha Eso huih imik sawveiyah pak awlaw Hnadaga a kenkeh ah tih thäneyah pak so khäl. Eso la buh napak koong ani käh chang chaw päng awnawu khäka jeh ei hüt. Äi pänäng ani la pängei hütsaw pisih kakap bala hawuweyal thän büneyal tiyah saw nangnih nini hmawt khäh. Iyaäm ani la bi hütsaw khäl hleyeyal hnäng tiyah. Nangnih Isawlael yapsaw huih hi chu. Nangnih nini sin hnäng saw la nini hmuh saw Sinai khuyunga lo chu. Äi khuyunga choi bala mäitih mei mäi hüt, kehse saw uhiyung awlaw khri kho hnäkei hüt. Awlaw ähläu tih bawh sam la ini kräu saw khäka ha lo chu. Äi kheu khäl ula bang yawk äm, anih la Hnadaga hnih ei ula awhngaw kheu hawutiyeih hiyah saw ini tak. Iyaäm anih la ni thung chunei hnäng u “Mäksetdava la pei äi khuyung sin hi, ani a lung pel äng khong nawk hmueyei.” Äi awdawng saw ni i hiyawh keh se saw äm, Mosi la bang hawu hüt, “Kei keke saw äng küchüchün.” Äichaw a, nangnih Sinai khuyunga awlaw sawk mawh Hnadaga käh mräh a nini lo saw. Ni mräh che hawn pre a käh Yĕlusalem. Thong brat dämäng hawn natchaw piyaw ula ini lumeidüna nangnih nini lo. Niya nangnih hawn pre a iming yoei däktih Hnadaga käh chaw uchaw khäla lumei ula ini mäi chi saw nini hmuh. Awlaw üküt käh tara bitih Hnadaga a nini khom. Ngulai känäng achang poh hmueitih konghmuh sang khrawng khäl käh khraw khäl ha nini khom. Kheu tha nini tawei saw äng eche mäitih Yĕsu khäka nangnih nini lo. Abel thi thawka mawng thi la elensum kheu hawu äm, äi ähläh ini pekal tih phranh hmuei saw thi khäka nangnih nini lo. Sidih äng mäi bäichu, ubang kräu äm äi käh kheu khinah pak mäyei chu. Iyaäm lawgah äng käh sidawng hiyawktih Mosi kheu Isawlael khälla khin u khaw a, anih lät hüt u. Äihi hawn känäng kräutih käh kheu dä khin pu khaw, nangkei asang bang lät hnawh pu. Hnadaga täkchah kräu hüt khaw a Ani käh sam la luhdül hlün chak. Äini tua Ani la ni khawmei, “Kei awlaw krängak luhdül kühlünaih saw hiyah, äini hawn ha kühlünai.” “Awlaw krängak,” ni kheu khaw hnih äng ni ini yawk chu, Hnadaga la bisaw vawn khe che ühlüneiyal chakai awlaw okrokal chakai. Äihi hlünei hnängah saw vawn khäl tänaka mäiyei. Lo khäl, nangkei Hnadaga a kenju tawngei äng khä. Iyaäm hlüneyah saw pre nangkei ini bünei. Lo khäl Hnadaga a äkiyä tawngei äng khäh awlaw Ani la lawei ong hmawi pek pula kenkeh äng Ani a rosi äng khäh. Iyaäm nangkei käh Hnadaga che khrak tih mei huih. Nangnih nube tanawu huih hngat la hngat kheteinaw chula mäi khäl. Hmawt chusaw khrawnga ima nini lawkeyeih saw hngilai chu. Üküt küt la hmawtah pak ni huih hawn natchaw khäla ini chetchaw hüt. U khäl bang othong ima ini mäi äm, anih ängtu nangnih ha thong ima nini mäi saw huih anih a nini lung äng khawyei bäichu. U khäl bang kuluh nawk ini hmuei äm, anih ängtu nangnih ha kulunawk nini hmuei saw huih anih a nini lung äng khawyei bäichu. Hang hang la phiya chawnawka hmawi ini pekaih lah saw. Phiya la pawtaw hngat la hngat äng uyumlah ihni mäyeih lah saw. Iyaäm akiyangk ngettih la imik sawuvei tih khäla Hnadaga la tara äng khrawkalai. Nangnih awmawn nini lawphah saw känäng nini kantha a awhlawm hlaw a tawei khäl. Nangnih a ibang mäi äm, äi äng nini lung nüm khäl. Iyaäm Hnadaga la hawu, “Kei nanga krängak ha kini hlät hnawh nga awlaw krängak ha kini hiyänal hnawh nga.” Äi koong nangkei ini sengkhri khawyei phula ini hawu hnäng, “Boi che kei ukutih, Kei keh hnawh nga. Khrawng khälla kei a i khrawng poh aih saw äm?” Nangnih khäka Hnadaga kheu hawu hüttih elenchaw khäla nini lung äng taw ei bäichu. Anih ihuih ini mäi hüt saw äm awlaw iba ini dü hüt saw äm, äi nini lung äng khawyei khäl. Anih huih nini yum lah mäiseh. Yĕsu Krito ayang ihuih mäi hütäm, tua ha äi huih mäi awlaw sawkak ni äi huih täng dä mäyeih saw. Nangnih a ayapyap nawmaw nawkaih saw chok hawu la ihisaw lawm känäng anang chiyalah seh. Nangkei ibang ini eiok äm äi känäng nangkei lung la tha büneya pak Hnadaga käh khetjen äng dä tha bünei hi, mawt pawi. Iyaäm ula eio bala ulung äng tha büneyeih khiyang äm, äiya amrat mäyah. Nangkei a hlu dün la hngat mäi khäh. Yudi khäl käh rosi dün laa bitih pujawtih khälla nangkei käh äi hlu dün la känäng hlusaw vawn ini eiyeih saw pängei u. Yudi khäl käh pujawtih gong ngulai koong mäksetdava hlu hmuei saw thi äng üküt thawka asanh sum laa chet. Äini äi hlu hmuei saw mäksetdava yok khäl ini mäidün pranga chiyal ula ana chawh al. Äi huih Yĕsu ha Yĕlusalem mräh pranga dukhah khawm bala dü lah hüt. Äihi Ani käh thi la khrawng khäl käh ngulai a asanh poh al. Äi äng lo khäl, mräh pranga Ani khäka chet äng khä awlaw Ani käh siri pheyei äng khä. Äini ni luhdül äng nangkei a ini pum kädäng käh pängbäng mräh mäyah. Äini awhmawi mawh a loaih saw mräh koong dä nangkei chongei phula ini mäi saw. Äi koong lo khäl, ini hlusaw huih sawkbrat Hnadaga a phiyaw äng khä. Nangkei ni bät pula ini peksaw che uhlu, nangkei ni pek pula ini hawu Ani nangkei käh Boi. Awlaw bi pawi nini biyeih saw la khrawng ini lai khaw a nini kuaih saw hngilai chu. Iyaäm ni huih hlusaw äng dä Hnadaga lung nüm saw. Nangnih elenchaw khäl käh kheu khin bäichu awlaw anih la ini hawu saw huih po bäichu. Anih la dümah pak nangnih käh khraw chong ula ini mäi. Anih la anih bi kawi äng üsüh ini pekeyalaih saw. Nangnih dä anih kheu nini khin khaw, anih la anih käh bi piyaw ula ini biei. Äini khin chu khaw, anih la äi khäl ini lung se ula ini biei. Äi koong nangnih a iha amrat thänei hnawh. Keinih koong ha suh tong bäichu. Keinih kini hmawt khäh, keinih a kini tawk sanh mäi khäh. Iyaäm keinih sawkbrat ihisaw bi kini biyeih khiyang. Hnadaga la nang khäka awlaw krawnak alanda eteh al hmawna, kei nanga unung chaw ni huih suh notongaih saw kini tak. Yĕsu Krito che elensum samphomah kiyongtih. Ani a düsaw känäng Hnadaga la thouhwal. Awlaw Ani thi äng Hnadaga la luhchaw äng sawkbrat koong kheu tawei hüt. Jelkhiyamsa mawh Hnadaga la Ani käh lung hlü huih nini biyeih koong nangnih a hlüsaw khäl kheni anang pek seh. Hnadaga piyaw hmawna nini biyeih koong Yĕsu Krito la anang ku seh. Üküt wachang khäl kheni sawkbrat Yĕsu Krito koong dä. Amen. Khetsu nube tanawu khälo, ni chaw äng koyok saw ulyah kheu khäl chunei chula nini khinaih saw koong kanang hnih ei. Iyaäm ni chaw che otoi chaw lawma dä koyok saw. Nangkei nawu Timothi othong im känäng lätal däk saw kei nangnih a kanang hmawtaih sawk khiyang. Ani alanda aphaw khaw che, ani ängtu kei nangnih äng khomeiya koloai. Nangnih käh elenchaw khälla awlaw Yumtih khäl kheni a käkhäh eichak. Itali a käh yumtih khälla ha nangnih a anang khäh eichak khäh. Hnadaga käh khetjen nangnih üküt lukhrunga ni mäiseh. Kei Boi Hnadaga la Yĕsu Krito käh hngasaw Yakub. Luhdül äng ayapyap laa khriei bala mäitih Yudi yapsaw chen leinih khenia ni kanang khäh ei chak. Khetsu nube tanawu khälo, nangnih yapyap chawmsi äng nini kraw thän mawt awpiyaw äng dä lawei bäichu. Iyaäm nangnih nini hmawt khäh nangnih käh yum chawm hmuyei saw äng nangnih käh nini chunei hnäng saw tha changai. Äi nini chunei hnäng saw tha a nangnih sawkäng ekejet sumei bäichu. Nangnih ma hnäng mawna awlaw achang thän hnäng hmawna. Nangnih käh mäichoh khrang äng iha nini laisaw mäyah pak. Ua bang engen mäyah äm, äila Hnadaga känäng hawuvei seh, Hnadaga la äiya ulung phranei bala pekaih saw dä. Iyaäm Ani che ekhet hmawh, hawuei tih kheni a Ani la ulung känäng pek khäh. Äini nang nahawu ei khaw a nang nuyumiyeih lah saw awlaw ütei naw lah nawhti. Ula bang ütei nawkäm äiche mretäng käh läng huih dä, khrila ani a ho bala chih. Äi huih khrawng la Boi känäng iha kübüniyei ting khinei yei ya. Ani che ulung pheyei tih khrawng awlaw hang hang bi äng ni ukhru. Mawng uyum mawh sanglaisu la Hnadaga a hlen äm, ani piyaw heh. Awlaw mäichawtih khälo, Hnadaga la nangnih a anang hnem khaw a nangnih piyaw bäichu. Iyaäm nangnih bel pa huih nini jawyalai. Khoni kawi bala mawt kho leng khaw bel cha al, kheipa jawyal awlaw apa pawyei saw krakal. Mäichawtih khäl käh sawk ha khawngei u saw äng äi huih äpäih yei. Pawyah saw bi kawi lung Hnadaga känäng lo ah Chawm hmuyei khaw a ula chunei bala mäi hnäng äm, äiche pisih bünei tih. Iyaäm chunei bala dä mäi hnäng khaw che, ani a Hnadaga la pekaih saw khawmei hüt saw sawk pekai. Hnadaga a khetnawtih khälla ni sawk pekaih saw khawmei. Pawyah saw bi nini biyeih saw nini lung äng kawi khaw a hngat la ha hawu ah heh u, “Hnadaga la kei a ngulai pawh a ichih.” Pawyah saw bi la Hnadaga a ngulai pawtäng chih sawk hnängah, awlaw Hnadaga la hngata ha ngulai pawh a chiyah. Luhchaw la ulung hlü la dä ngulai pawh äng chih saw awlaw kawl äng kraw saw. Upum lung hlü la dä ngulai a luhdül äng athän sawk saw, awlaw ngulai luih pänäng düsaw lo saw. Khetsu nube tanawu khälo, kramei hmuei yeichu. Awpawi la ekejet vawn kheni hawn känäng dä lo saw. Niche hawn äng käh awa bitih Paw Hnadaga känäng lo saw. Ani che hiyungtih ihip huih hleyalah. Ani la bisaw vawn kheni äng nangkei dä alang gong thänei hmawna, Ani la ani käh ihisaw kheu sumei bala nangkei a sawk tha khrawng pek. Kei käh khetsu nube tanawu khälo, ni kheu nini lung äng tawei bäichu, nangnih khenila ayang nini khinaih lah maw saw dä. Sidih äng kräu bäichu awlaw jot ting nini man pokaichu. Iyaäm aman nungtih khrawng la Hnadaga lung hlü huih bi pawi bi hnängah. Äi koong mawng sahnah saw la pawyah saw bi khäl nangnih nini bi äm, äi khäl bitiyei chu. Nangnih lung äng chäh hmuyei däk saw Hnadaga kheu dä ngiyaw ngiyaw chaw lawei khäl. Ngulai känäng naw kiyawtal saw dogo Hnadaga kheu äng dä mäi saw. Hnadaga kheu jiji khin chula ki thaw nawh, äi huih bi ha nini biyeih lah saw dä. Hnadaga kheu jiji khin chula dä ai huih bi kawi chu khaw, nangnih kantha dä nangnih nini kramei tun saw. Hnadaga kheu khin ula äi huih dä bi kawi u khaw, äi khrawng che hmrang äng awhmawi soei tih khrawng huih. Hmrang äng awhmawi soei bala chetal pänäng hngih lal chak. Äini nang dä Hnadaga la chok hüt saw äng nulung nepek khaw che, ngulai känäng ählä nübüneyalai awlaw sawkbrat äi huih nopoh khaw awlaw nawyawk saw hngilal ti khaw awlaw äi huih nopoh khaw, nang käh bi äng pisih nübüneyei. Ula bang upuma konghmuh sang ting tawkei äm, äini omong khok songei hnängah hi, äila upuma akramei tun. Ani la Hnadaga a rosi saw kheni hiyah. Hmeinu la ngawkah chaw khäl dukhah äng ini mäi khaw a, nosot khre saw la awlaw luhdül äng pawyah saw bi nosongei saw ni Paw Hnadaga mikäng ekejet rosi saw. Kei khanbawn khälo, nangnih wachang Boi Yĕsu Krito a nini yumei khaw, üküta ni tihtih a so khäl. Tawk chawm khäl, khrawng hngat wat pawi la ha khoichip thawnei bala nangnih nini chumei dün la lo. Awlaw sanglaisu khrawng hngat che wat nuktih wat bala lo. Nangnih wat pawi wat tih khrawng a hmawi pek chula nini hawu, “Nang ni ala pawi a om.” Awlaw äi sanglaisu khrawng a nini tak, “Nang chu a ja e” hiyah khaw “Niya kei kho kena om.” Nangnih nini pum dukäng elen lekchaw nini helh saw hiyei? Awlaw matara nini bisaw hiyei? Kei käh khetsu khanbawn khälo, Ni luhdül mikäng ukhäl bang sanglaisu äm, uyumäng mäitih ini thäniyeih koong Hnadaga la anih a heh leiyah ei? U khälla Hnadaga a ini khetnawk äm, äi khäla Ani la mawng hawn pre pekaih saw khawmei hütäm äi hawn pre ini büneyei koong ni sanglaisu khrawng khäl Anila helei hütah ei? Äini äi sanglaisu khrawng khäla dä nangnih hmawi pek chu. Mäichawtih khälla dä nangnih a dukhah nang pekah ei? Awlaw tara ini chäk düna tha äng lat ula anang chiyah ei? Nangnih nini panei saw ming len Yĕsu a mäichawtih khälla keleih u ei? Asanh chang saw Kiyam äng yoei bala mäi khäh, “Nangnih nini imcheng saw a nini pum huih khet naw khäl.” Nangnih dä lälä ni alang gong thung nini ngei khaw awpawi nini poh tun. Äini nangnih khrawng khäl nini helh khaw ngulai nini bi. Ni thung la dä nangnih a thung khrak tih ting epret anang khrawkai. Khrawng hngat la thung kheni ngei chak bala bi hngat täng khat dä ngulai poh khaw che, ani la thung kheni ngeiyah ting tak hmueiyei. Hnadaga la hawu, “Nini mik sawuveiyei chu,” Hnadaga la awlaw hawu saw, “Khrawng sawk tuai chu.” Bakhaw che nangnih nini mik sawuyei yah pak khrawng nini tuk khaw thung ngeichu saw hiyei? Mawng thung la bang nangnih a ähläh anang pekäm, äi thung äng dä nangnih käh tara bi hmuei saw. Äi koong nangnih lalapei bi khawngah awlaw kheu kräu khawngah äi khäl nini lung äng khawyei bäichu. Iyaäm ula khetah äm, tara khaw a ani la ha ekhet bünei thaw hnawh. Tara äng ekhetjen ong khäh. Khanbawn khälo, kei a kuyum mäi khäh ting hngat la hawu bala ibi äng äi huih dawneiyah khaw, i usum vawng sawäm? Äi uyum la ni ani a ngulai känäng khiyawtal hnängayei? Kheu la kheu äng, nangnih tanawu nghat ima ei saw ha mäyah, wataih saw wat ha mäyah. Äi huih khaw a nangnih dukäng käh nghat la ani a tak khaw, “Nang a pawi thenei seh, ei otila wat cha äng luih tila mäi,” äini ani laisaw ini kuaih saw koong iha po pek u khaw äi äng ani a i awpawi thäneyeih sawäm? Äi huih uyum ängtu bi kawi mäyah hi, äi yum che düsaw dä. Äini ükütla ini hawu nawk theih, “Nang a uyum mäi awlaw kei a bi pawi mäi. Kheu pawi dä.” Bi kaw yum kei a awdawn awlaw kei bi äng nanga kei käh yum kini dawnai. Awpawi khäh! Nang hngat Hnadaga a nuyumei saw hiyei? Khrawse khälla ha äi ini yumei khäh awlaw keh ula nini chüchün. Ämäk o! Bi kaw yum che iha hiyah, äi dawnaih saw nang nühlü eiyei? Keinih käh nuchen paw sawk Awbraham la Hnadaga la taksaw huih ani chaw Aijaka hlu dün la khruäng uhlu hüt. Äi bisaw koong ani a epret mäyahtih ting lawei hmueyalah ei? Nang che nuhmuh tun khäh, äi khaw a ani käh uyum la bikawi utu ihni bi hüt awlaw ani käh bi la dä ani yum ekejet poh hüt saw. Asanh chang saw kiyam äng ha äi kheu uluih hüt, “Awbraham la Hnadaga kheu yumei awlaw äi koong Hnadaga la ani a epret mäyahtih ting lawkeyal.” Äi koong ani a Hnadaga khanbawn ting panei hmuei. Bakhaw che nangnih nini hmuh, yum saw jiji äng dä Hnadaga la khrawng a epret mäyahtih ting lawkeal saw hiyah, äini yum la bikawi pai hnih ni koong dä Hnadaga la khrawng a epret mäyahtih ting lawkeyal saw. Awlaw chawgraw hmutaw Rahab a iba epret mäyahtih ting lawk hmueiyal hüt sawm? Anila Yudi käh uthup bitih khälla thup bala tawk, äi pänäng awhngaw lawm känäng eteh al, äi bi koong ani a epret mäyahtih ting lawk hmueiyal hüt. Nawsawk kaw kantha ihuih dü äm, äi huih bi kaw uyum ha üdüsaw. Nube tanawu khälo, nangnih dukäng ükütni choktih thäniyei chu. Iyaäm nangnih nini hmawt khäh, nangkei choktih ni thänei koong awhngaw khäl thawka nangkei a ama saw tara thäneyei. Ula bang mongkhok songei bala kräu hnäng äm, äi khrawng la üküt lawmäng upuma songei hnäng khäh. Ani la äi huih songei hnäng khaw, ani pumchä pängeitih khrawnga äthänei. Nangkei se a ini ngenaih sawk saw koong omong khok äng ukhiyup ini thawn, äi khaw a se a nisitha saw laa nini chih hnäng. Awlaw so khäl, long len awbawng len thän khri len la äiya tun bala chih, äithän tak elekchaw hngat äng long len hawih tih la äiya isitha dün pawta ichih hnäng. Khrawng lei ha äi huih. Khrawng kantha äng käh vawn lekchaw thän äi awbawng kheu len kheu len kräu. Awlaw mei he la ilup täu len hngat chawh chak hnäng äm! Äi huih nelei ha mei huih. Nangkei kantha äng mäi saw vawn kheni äng nelei ni pawyahtih sum. Ngulai vawm äng ni nelei la nakantha kheni akhrah chak awlaw awsawk lawm äng mei ochoi. Khrawng la üküt täupeche kheni, akangchang äng yoeitih awlaw mretäng käh sawk mawh a khiyup ula ini tawk hnäng awlaw ini tawk. Äini hngat khrawng la ha ini lei a khiyup ula taw hngäng u. Äi üdüm chaw mäyah, pawyah saw la kehse saw sip äng luih. Nangkei ini mongkhok äng dä Boi Hnadaga a piyaw ni pek, awlaw nini mongkhok äng dä Hnadaga la Ani huih ibisaw khrawnga nangkei ini sayei. Nangkei mongkhok hngat känäng äkiyä la sayei pai hnih ini thoh. Nube tanawu khälo, ni huih ni poh saw tawnah. Tänak känäng long saw tui ni utui la awkhaw thänei hngäng yei? Nube tanawu khälo, khĕu thing äng Olip theih thei hnäng ei? Hiyah khaw grĕp yong äng ni khĕu theih theiyei? Äi huih, angan saw tui äng ha tuitih tui bün hnäng ti. Nangnih dukäng ngen la prengya mawh u äm? Ani käh akhrang pawi sawk la ngen känäng thok bala lo saw oprongh saw bi dawnei seh. Äini nangnih lung dä hmukhih chu saw la awpawi pi chu saw äng luih bala mäi khaw awlaw nangnih nini pum käh jiji nini sotei saw äng dä luih khaw, nangnih ngen äng bawriyei chu. Ihisaw a hiyah saw po a lai chu. Äi huih ngen che hawn pre känäng lo ah, äiche luhdül äng käh, pawyah saw awlaw natse khäl äng dä utu mäi saw. Iyaäm mawnga bang hmukhih chu saw la nini pum jiji nini sotei saw mäi äm äiya ukhru saw la pawyah saw üküt bi ni ämäi. Äini hawn pre känäng lo saw ngen che ekejet la jelkhiyamsa. Äi äng mäisaw chunei hnäng saw la änäuwei saw. Äiche ekhetjen la awpawi bi äng uluih, nüm chawng chawng la pawyah saw khrang mäyah. Ula bang jelkhiyamsa hlüei äm, ani la jelkhiyamsa äng käh ichih chäh awlaw äi ichih äng käh theih che oprongh saw sawk. Nangnih dukäng nini siei saw la bopei saw mawng känäng lo saw äm? Nulung la hlüei saw kakantha äng jal täkei bala dä lo saw hiyeh ei? Nang nühlüei äini büneiti. Nangnih nini tuk awlaw nini lawphah äini nühlüei saw büneiti. Nangnih nini siyei awlaw nini bopei äini nangnih a iha mäyah, iyaäm Hnadaga khäka hawuvei chu. Nangnih nini hawuvei thän bünei chu iyaäm nangnih pawyah saw krong äng dä nini hawuvei saw, nangnih nini nah ei saw luih ong. Uyum mäyahtih khrawng khälo! Nangnih hmawt chuei, ni luhdül dä khanbawn nini hmatei khaw Hnadaga käh lansu nini thänei saw? Äi koong ula ni luhdül a khanbawn hmateyeih khiyang äm ani la upuma Hnadaga äng lansu pohei. Nangnih kiyam la ihisaw hawu ah ting khinai chu. Äini Kiyam la hawu, “Mawng khraw bang Hnadaga la nangkei lung äng khrawng pek äm, Ani la hlü nangkei Ani käh thänei ong. Äini Hnadaga käh khetjen che elen.” Äi koong kiyam äng yoei bala mäi khäh, “Hnadaga che bawriyeitih äng sangeiyah. Äini nümchawng chawnga mäitih a jenei.” Äi koong Hnadaga sitha huih äng dä mäi. Mannat a khawm, äihi che nangnih känäng ani chenalai. Hnadaga pawta chet, äihi che Ani ha nangnih pawta lo ai. Ngulaisu khälo, nangnih nini puma asanh poeiyal khäl. Ulung pheyei tih khrawng khälo, nangnih käh lung echet poei khäl. Dukhah äng ngiyaw khäl awlaw kap khäl. Nangnih nini nuisaw chaw a kap khäl awlaw nini piyaw saw chaw a dukhah poei khäl. Boi hmawi mawh a nini puma hnemei khäl, äihi che Ani la ha nangnih a anang jäh ai. Nube tanawu khälo, nangnih hngat la hngat be kräuvai chu. Awnawu be u kräu äm awlaw awnawu käh epret ula suiäm, ani la thunga epret khrawk. Nang dä tara bitih huih nopoh ei khaw awlaw thung kraweiyah ting nawhawu khaw, nang thung sumeiti awlaw bang thunga tara nibi. Thung pektih hngat dä mäi saw awlaw tara ha bisaw. Ani la khiyawtal hnäng awlaw khrah hnäng. Kei im cheng saw epret suitih nang u äm? Nangnih dukäng ükütla nini hawu, “Tühnüp hngätäh nangkei äi mräh a chet phula kumak ini mäi ei awlaw äiya kun poh pula ni mratai.” Äini hngätäh a i thäneyeih saw äm nangnih äi hmawt chu. Nangnih käh sawk ha i äm? Nangnih che umuih dä, tanakra mäi bala äi pänäng okrokal. Äi thawka nangnih ni huih nini hawu tawn, “Hnadaga la hlü khaw, nangkei ni hengai awlaw äi ini poh ai.” Äichaw a ini hmuh, nangnih mawmawt bawri äng nini luih. Äi huih üküt bawri ni pawyah. Bakhaw che ini hmuh, konghmuh bi hmawt bala ha ula biyah äm äila ngulai bi. Mäichawtih khälo, khin khäl. Nangnih lukhrung äng olo tun saw dukhah koong athak kap khäl. Nangnih käh kähkän khrak chak däk awlaw nangnih käh wat pü la ei chak däk. Nangnih käh ha la hen äng grang e chak däk, äi grang nangnih pawh äng sawksi thokah pak awhngaw pawh äng sawksi thok awlaw mei la ei saw huih nangnih saw ha grang la eiyei. Ni äpäih saw khin khäl äng nangnih kähkän chungei chula nini tawkei. Nangnih käh lai chawng anang tan pektih a awmawn pekal chu. Awlaw so khäl, äi bitih khälla tua hek ula nangnih a epret anang khrawk. Dogo mawh Boi la äi bitih khäl ini hek saw awyawk khäh. Ni luhdül äng nangnih mawmawt awpiyaw äng nini mäi hüt awlaw nini hlü saw läk nini thänei. Bät nini hmuyeih saw khomhnüp koong nangnih nini puma nini thawuvei sawk. Nangnih epret mäyahtih a epret nini khoh awlaw nini tuk awlaw anih la nangnih a anang sawkeiyah. Nube tanawu khälo, äi koong Boi lo alah saw sawgraw ükütni chunei chula mäi khäl. Chawng pawiyeih saw koong lai bitih la i huih chong bala mäi äm awlaw achah saw la äpäih yal saw kho koong ihuih chong bala mäi äm, äi nuhmuh ei? Nangnih ha äi huih chunei chula mäi khäl awlaw nini lung nüm chawng chawnga tawei khäl. Iyaäm Boi alanda lo al tun. Nube tanawu khälo, nangnih hngat la hngat käh epret mawnai chu, Hnadaga la ha nangnih käh tara bi hnawh. So khäl, tara biyeih tih sät kena lo däk. Nube tanawu khälo, Hnadaga sidawng hiyawktih khäl dukhah äng ini kraw thän chunei ula ihuih Boi käh kheu ini hawu hüt saw äm äi känäng chok naw khäl. Chunei ula mäitih khälla keinih awpiyaw kini pek. Yob la chunei bala mäi hüt koong, uhnung sumäng Hnadaga la ani a ihuih kubawm pek hüt saw äm, äi tawk chawm khäl. Yob dukhah äng awkraw pänäng Boi la kubawm epek hüt. Iyaäm Boi käh khet la jenei che mawmawt elen. Nube tanawu khälo, kei nangnih a ni kheu kanang taktun, nangnih hawn pre, luhdül awlaw awhngaw vawn ming äng jengai chu. Nangnih ihisaw ni ihi awlaw hiyah saw ni hiyah ting hawu bäichu. Nangnih dä unung nini hawu khaw tara äng nini kraw ai. Nangnih dukäng dukhah khawmtih ini mäiyei? Äila suh tongei seh. Nangnih dukäng piyawtih ini mäi ei? Äi khälla awpiyaw awi awi seh u. Nangnih dukäng opah tih ini mäiyei? Yumtih sawng äng käh elenchaw la olip si uluki äng hmak bala Boi ming äng suh tong seh. Uyum äng käh suh tong la opatih khrawnga awpawi opoh a lai. Awlaw Boi la ani a awpawi poh a lai. Ani la ngulai bisaw khäl Hnadaga la ähläh pekalai. Äi koong nangnih hngat la hngat khäka ngulai ähläh hawuveiyal khäl ‍awlaw hngat la hngat koong suh tong khäl äihi che nangnih nini pawiyalai. Hnadaga sitha äng u mäi äm suhtong tha äila büneyei. Elija nangkei huih khrawng hngat dä mäi hüt saw. Ani la kap bala kho lo ah pak suh tong, äiche kumthum gala phawl äi pre äng kho lo ah. Äi pänäng ani la awlaw krawnak suh tongal. Äi pänäng kho lo bala dekäng khut thänei. Kei nube tanawu khälo, nangnih dukäng hngat ha ihisaw lawm känäng awhngaw pawta chetal khaw awlaw nangnih dukäng käh hngat la ha ani a ihisaw lawm äng olo al khaw, ni kheu nini lung äng taw ei bäichu, ula bang ngulaisu khrawng hngata pawyah saw lawm pawt känäng awpawi lawm äng lo al khaw, ani la äi khrawnga dü aih saw känäng kakal awlaw awbawng ngulai khui bala tawkal. Kei Pitol, kei Yĕsu Krito käh hngat teh hmueitih. Kei ni chaw Panto, Galati, Kapadoki, Esia awlaw Bithuni pre lekchaw khäla awhngaw presaw huih mäitih Hnadaga khrawng khäl khäka koyok tun. Paw Hnadaga la Ani lung hlü huih anang sumeyeih koong anang heh lei saw. Awlaw Ani käh khraw äng asanh chang khrawnga ha anang poh. Hnadaga la hlü hüt saw nangnih Ani a nini ngeyei awlaw Yĕsu Krito käh thi äng achang nini thäneyeih saw. Hnadaga la nangnih a awbawng khetjen la jelkhiyamsa anang pek seh. Nangkei Hnadaga a awlaw Boi Yĕsu Krito käh Paw a äkiyä tawngei äng khä! Iyaäm Hnadaga käh khetjen la nangkei a sawk tha khrawng pekal. Iyaäm Hnadaga la Yĕsu Krito a düsaw känäng thouwal bala Ani käh jen äng nangkei a sawk tha khrawng pekal. Hnadaga la nangkei koong asang bang krakah tih, thu ah tih, krokalah tih pisih hawna tawk. Uyum äng Hnadaga la Ani käh tha äng nangnih a ka bala anang tawk. Äpäih saw khin äng käh awkhiyawt nini büneyal saw hang hang dawng hawmah saw sawgraw nangnih a suihsong bala anang tawkai. Ni awkhiyawt i khin päyeih khaw a dawngaih saw koong ächän mäi khäh. Nangnih ayapyap lawma tana krachaw koong dukhah nini khawm tun thän, äi pisih khäl koong piyaw khäl. Ni chawmsi la nangnih käh yum chawmai. Ha kraktih thän mei äng chawm hmuei. Äi huih ni, ha thawka bang khawk tih nangnih käh yum ha krängak ha päih tiyah hmawna chawm hmueiyeih saw tawn. Äihi Yĕsu Krito dawngal saw hnüp äng nangnih awpiyaw, a wachang awlaw hmawi nini büneyalai. Nangnih Ani a hmu chu thän nini khet nawk awlaw Ani a hmu ah pak nini yumei. Awlaw nangnih äi hiyawh nini piyaw saw, kheu äng bang nini hawuvaih phüh mäitiyah. Iyaäm Hnadaga a nini yumei saw koong Ani la nangnih a anang khiyawtal. Hnadaga käh khiyawt nini büneyeih saw krong Hnadaga sidawng hiyawktih khälla ini hawu hüt khäh. Nangnih tua nini bünei saw ni kiyawtara krong äi sidawng hiyawktih khälla chetchaw ula ini chäng hüt khäh. Mesaya che i tih a loaih saw äm, awlaw Ani che u äm, äi sidawng hiyawktih khälla ini hmawtaih khiyang hüt. Krito Khraw la sidawng hiyawktih khäla Mesaya la awbawng dukhah khawmaih saw, äi pänäng a wachang büneyei dawn. Hnadaga la ni khäl sidawng hiyawktih khäl ini mrataih saw koong dawn hüt saw hiyah, nangnih nini mrataih saw koong dä. Hawn känäng teh hmuei saw Asanh chang Khraw tha äng, sidawng hiyawktih khälla ini hiyawk saw sidawng nangnih nini yawk. Äi sidawng hawn natchaw khälla ha ini yawk chuaih khiyang. Äi koong, nangnih nini biyeih saw koong nini lunga ächän tawei khäl. Sidih äng mäi khäl awlaw Yĕsu Krito oloal khaw a nangnih a pek hmueiyeih saw pisih khrung äng üm chula mäi bäichu. Hnadaga a ngei khäl. Nangnih ayang äng käh ese saw kiyangh khäl tämaichu. Äi khaw a nangnih Hnadaga a hmawt hüt chu. Äichaw a, nangnih a anang paneitih Hnadaga asanh chang saw huih, nangnih käh bi kawi ha asanh chang seh. Iyaäm Kiyam äng yoei bala mäi khäh “Nangnih asanh chang thänei khäl, iyaäm kei ha kasanh chang khäh.” Nangnih Hnadaga khäka suh nini tongei khaw a, Hnadaga a Paw o ting nini panei. Ani hngat pawtäng ha phakeya pak nanga nang käh bi kawi huih ükütni käh tara bi. Äi koong nangnih nini sawk mäyak Ani a kenkeh poh chula mäichoh khäl. Nangnih nini hmawt khäh, nangnih nuchen pawsawk känäng hiyah saw mäichoh khrang nini chok nawk saw. Awlaw kraktih hen la ha äng nangnih lätal chu. Äini epret mäyahtih la echet samphomah huih Krito thi äng dä nangnih hleih nini hmueiyal saw. Luhdül bi hmuei khawngah bang Krito a Hnadaga la heh lei bala tawkei. Äini ni äpäih saw khin äng nangnih koong dawngei däk. Nangnih Yĕsu äng dä Hnadaga a nini yumei saw. Hnadaga la Ani a düsaw känäng othouwal awlaw a wachang pek. Äi huih koong nangnih käh yum la khanh Hnadaga khrung äng ämäi saw. Tua nangnih ihisaw a ngei chula nini lunga achang nini poh ei. Äi koong yumtih tanawu khäla nangnih lälä nini khet nawk. Äi äng kanang tak, nangnih hngala hngat nini lung känäng khetei naw khäl. Iyaäm nangnih kraktih chih känäng thän chu, äini krängak ha krakah tih chih Hnadaga käh sawk mawh la sawkak mäitih sidawng pawi känäng dä nangnih atha nini thäneyal saw. Iyaäm kiyam la hawu, “Khrawng khäl bel huih dä, ani käh a wachang apa huih dä, bel jawi khaw apa jutal. Äini Boi käh kheu sawkbrat mäi.” Ni sidawng pawi dä nangnih khäka hiyawk hmuei saw. Äi koong nangnih nini sou saw, nini kramei saw, ulup nini songei saw, nini keleih saw awlaw khrawng be nini kräu saw kiyangh khäl hiyänal chak khäl. Chaw senchaw huih thänei khäl. Sawkbrat awkhraw lawm äng käh echet chihtui halei khäl. Äi o chula nangnih awkhiyawt äng ekrenga ekrenga nini chom prangai. Kiyam la hawu, “Boi käh jen che ihuih äm, äi nangnih nini hmawt däk.” Nangnih Boi Yĕsu Krito khäka lo khäl. Ani che luhchaw la lawei do hüt u saw sawk mawh lung huih, äini Hnadaga la Ani a khawk tih sum huih heh lei. Nangnih ha hngat hngat chi sawk mawh lung huih. Asanh chang im nini sawkaih saw koong Hnadaga la nangnih a anang sumei tun. Äihi che nangnih pujawtih huih thänei chula, Yĕsu Krito äng Hnadaga khäka usum vawng saw hlu nini tawng hnängai. Kiyam äng yoei khäh, “So, kei khawk tih la alang gong lung hngat ke heh lei, äi lung Sinai kiuwa kawtawk, ula Ani a yumei äm, sätak ha hiyawh ei bünei hnawh.” Nangnih yumeitih khäl koong che ni lung mawt khawk tih a thänei. Äini yumahtih khäl koong kiyam äng käh ni kheu luih, “Lung im bitih khälla mawng lung ini hiyänal hütäm, äidä üküt thawka alang gong tih lunga thäneyal.” Kiyam la ni ha hawu, “Ni lung la dä luhchaw a mawpaih sawk saw, ni lung la dä luhchaw a ukru aih sawk saw.” Anih ini mawpaih saw, iyaäm anih la sidawng pawi yumei u. Nidä Hnadaga käh sitha mäi hütsaw. Äini nangnih che helh hmueitih chen nini thänei däk. Nangnih mawng käh pujawtih khäl ha nini thänei. Nangnih Hnadaga koong awhngaw poh hmueitih yapsaw awlaw Ani käh upum khrawng. Nangnih Hnadaga käh nawmaw nawkaih saw bi krong nini hiyawkaih saw koong helh nini hmuei. Ani la nangnih a uhiyung duk känäng Ani käh pawyeitih awa a anang bekei. Ayang äng nangnih Hnadaga käh khrawng mäi hüt chu, äini tua Hnadaga käh khrawng nini thänei däk. Awlaw ayang äng nangnih Hnadaga käh jen hmawt hüt chu, äini tua Ani käh jen nini bünei däk. Khetsu khanbawn khälo, ni luhdül äng nangnih khrawng presaw awlaw khrawng pre a tana mäitih ting kei nangnih a khawh ei ngala kanang tak, nakantha käh pawyah saw lung hlü khäl känäng awhlawm hlaw a mäi khäl. Äi kantha äng käh pawyah saw lung hlü la sawkbrat awkhraw äng jal täkei. Nangnih Hnadaga yumahtih khäl äng nini mäi saw, nangnih hiyah saw nini bisaw ting anih la ini hawu nawk theih. Äi koong mawmawt chaw mäi naw khäl, äihi nangnih käh ihisaw bi hmu ula Boi lo alaih saw khomhnüp äng anih la Hnadaga a ini phiyaw ai. Nangnih Boi käh hmawi pawh so chula khrawng la ini poh saw khiyuptih sitha äng mäi khäl. Rom a käh khiyuptih che hang hang thawka elen koong ani sitha äng mäi khäl. Epret bitih a dam pekaih koong awlaw bi pawi bitih khäla awpiyaw pekaih koong, nangnih nini mäidün ala a mawng len la ua bang heh lei bala teh äm, äi käh kheu ngei khäl. Nangnih bi pawi nini biyeih saw Hnadaga la hlüei. Äi bi pawi äng mäktih khrawng khälla nangnih be ini kräu saw ini dümalai. Upum sitha äng mäitih khrawng khäl huih mäichoh khäl. Äini nini pum sitha äng nini mäi saw äng nini pret khäl küneyei chu. Äichaw a, Hnadaga käh hngasaw huih mäi khäl. Khrawng kheni a hmawi pek khäl, yumtih khäl kheni a khetnaw khäl, Hnadaga a kenkeh po khäl. Mawng lena kenkeh poh khäl. Hngasaw khälo, nangnih nini mawh paw a kenkeh po chula ngei khäl. Pawi tih awlaw ulung prongtih mawh paw jiji hiyah, nget tih mawh paw a ha kenkeh chula ngei bäichu. Losulapei epret thäneyah pak dukhah khawm hi, awlaw Hnadaga a ulung äng tawei bala äi chunei hi, Hnadaga la ani a pisih pekai. Epret bi tila bop nuhmuei saw nuchunei hi, iha amrat mäyah. Äini epret biyah pak bop nu hmuei saw nuchunei hi, Hnadaga la nanga pisih anang pekai. Äi koong Hnadaga la nangnih a anang bekei saw. Iyaäm nangnih Krito huih kawchawng chawng chetchonei hnäng hmawna. Krito la nangnih koong dukhah khawm bala nangnih a anang dawnaih phüh tawk hüt. Ani la ngulai bi hütah, awlaw krängak ha omong känäng kramei kheu thok hütah. Khrawng khälla Ani a ini keleih khaw a, Ani la krängak ha krawn bala keleih yalah. Awlaw dukhah khawm khaw a ha, awkrawn dukhah pekalaih saw koong kheh eiyah. Äichaw a, ihisaw tara bitih khrung äng dä upuma awpei hüt. Nangkei ngulai pawtäng dü pula awlaw konghmuh äng ini hengaih saw koong, Ani la nangkei käh ngulai kheni khawmei bala Krut äng dü. Ani naw saw äng dä nangkei ini pawiyal saw. Iyaäm nangnih samphomah huih hiyah saw lawm äng nini chet hüt, äini nangnih anang kiyongtih khäka awlaw nini khraw anang sotih khäka nini krawnal däk. Äi huih, nangnih hmutaw khälla nini pawtaw sitha äng mäi khäl. Äihi üküt pawtaw la Hnadaga kheu yumei u thän, nangnih käh khrang la Krito pawh äng anih a loalai. Iyaäm iha hawulah ah pak nang Hnadaga a i huih kenkeh nopoh äm, awlaw ihuih nämäichoh saw äm, äi hmu bala anih la Hnadaga a ini yumeyalai. Nulusawm ayapyap nawphawnei saw äng, hen la ha nawat saw äng awlaw khawktih awat cha nasahngei saw äng nang nawpawyei saw dawngeya pak. Äichaw a, nangnih äng jelei saw la näuvei saw mäiseh. Nidä Hnadaga mik äng khawktih sum. Iyaäm ayang khaw a, Hnadaga lukhrung äng üm tih asanh chang hmutaw khälla ni huih dä ini puma ini sophayei sawk hütsaw. Awlaw ini pawtaw a ini ngei hütsaw. Sara la Awbraham kheu ngei hüt awlaw ani a choktih o ting panei hüt. Nangnih dä awpawi nini poh hi, awlaw iha ke chu hi, nangnih Sara chuhnu. Äi huih kawchawng chawng pawtaw khälo, nini phiya ini ngiyaw saw koong hngala hngat yawchu ei hmawna nini mäyeih lah saw, awlaw nini phiya a ha hmawi nini pekaih lah saw. Iyaäm anih la ha nangnih ängtu Hnadaga käh sawk phiyaw phoih ini büneyei. Ni huih dä nihnih poh ei khaw, nang hnih käh suh tong ilaha anang ka hnäng hnawh. Kheu khäl päih khawngah ni kawhawuvaih khiyang, nangnih hang hang ni lungaka thänei khäl, hngat käh dukhah äng dukhah piyei khäl, nube tanawu a khetnaw, jenei awlaw chunei khäl. Ese chaw a ese awlaw keleih chaw a keleih eiyei chu. Äichaw a pisih ini büneyeih saw hlüei khäl. Iyaäm pisih nini büneyeih saw koong dä nangnih a panei nini hmuei saw. Kiyam äng yoei bala mäi, “Ula awsawka khet nawk äm awlaw ikhin pawi hmueiyeih khiyang äm, äila pawyah saw kheu kräuvai ya awlaw hleyei ya. Pawiyah saw bi känäng krawnal bala, bi pawi biya laih lah saw. Jelkhiyamsa äng mäyeih saw so, awlaw jelkhiyamsa sui. Iyaäm konghmuh sang khäl pawtäng Boi la sot khäh. Anih käh suh tong khinaih saw koong Ani hnaw hongei bala mäi khäh. Äini pawyahtih khrawng khäl känäng Boi la awhmawi hlayeiyal.” Nangnih dä bi pawi nini biyeih khiyang khaw, nangnih a ula naw anang pekaih saw äm? Hnadaga sitha huih nini chetei saw koong dukhah nini khawm hi, Hnadaga la nangnih a pisih anang pekai. Ula nangnih a dukhah anang pekäm anih a ke ei chu awlaw kongrah aih chu. Awlaw bang Krito a nangnih lung äng Boi ting hmawi pek khäl. Yĕsu a iya nuyumei saw äm ting hngat la khat dä anang hi khaw, ani a nini krawnei nawkalaih saw koong ächän mäi khäl. Äini äi kheu khäl nävei chula awlaw kenkeh po chula dä krawnei nawal bäichu. Nangnih Krito käh mäichoh khrang huih nini mäi saw koong, nangnih a anang keleih tih khälla hiyawh ei bünei hmawna, nini tawk sanh tawei khäl. Ese bi biti la dukhah nübünei saw thawka Hnadaga lung hlü mäi hi, bi pawi bitila dukhah naw khawm saw bang pawi khäh. Ngulai khäl koong dä Krito krängak hang hang koong dü hütsaw. Nangkei konghmuh sang hiyahtih khäl Hnadaga khäka chet hnäng hmawna. Konghmuh sang hngat ngulaisu khäl koong dü. Ani akantha che dü äini awkhraw la Ani a henal. Awlaw awkhraw äng Ani hehngal bala hengnawei tih khraw khäl khäka chet bala sidawng ahiyawkal. Äi othong im äng hengnaw hmueitih khraw khälla Noha katäng Hnadaga a ngei hüt u. Noha la long poh hüt khaw a, Khrawng khäl Hnadaga pawta krawnal seh u ting Hnadaga la chong bala mäi hüt. Äi long äng pochong set dä tui känäng ini krawng hüt saw. Äi tui che tuilüh ini lawkei saw äng käh a hmat la. Tuilüh nawlawkei saw che, nakantha äng käh obo noboyeyal saw hiyah, äini Hnadaga khäka nulung nepekei chak saw awdawn. Yĕsu Krito düsaw känäng thouwal saw äng nangnih nini kiyawtal. Yĕsu hawn pre a chetal awlaw Hnadaga käh set pawta om bala mäi. Hawn natchaw khäl, khiyuptih khäl awlaw dogo mawh khäl Ani la khiyup chak. Äi koong Krito käh lawgah kantha la dukhah chunei saw huih, nangnih ha dukhah nini chuneyeih saw koong ächän mäi khäl. Iyaäm mawng kantha la dukhah chunei äm, äi kantha ngulai känäng awhlawm hlaw a mäi. Äihi luhchaw käh pawyah saw sitha äng hiyah, äini Hnadaga sitha äng dä nini sawk nini lümeyeih lah saw tawn. Iyaäm ayang äng nangnih yumahtih nini mäi hüt khaw a, nangnih nini mik sawuvei hüt, nini krak hüt, nini moi hüt, alak päi poei chula chawgraw äng nini lawm hüt awlaw numum saw ulupchaw a pujaw chula ikhin nini khrah hüt. Äini tua nangnih äi khrawng khäl äng bälei chula ese bi chusaw koong, anih ini maw awlaw nangnih a anang sayei. Äini hengtih la dütih kheni a tara biyeih saw koong ächän mäitih khäka, anih la üsüh ini pekeyalaih lah saw. Ni koong dä dütih khäl khäka ha sidawng pawi hiyawk hmuei hüt saw. Iyaäm dütih khäl khäka sidawng pawi hiyawk hmuei saw che, anih lawgah kantha äng ini dü hüt thän, Hnadaga huih awkhraw äng sawkak hengal hnäng hmawna. Tua hang hang krong äng äpäih saw khin olo tun. Äi koong suh tongei hnäng hmawna, nupum songei tila mäi awlaw sidih äng mäi. Awlaw üküt thawka elensaw kheu che, nangnih nini lung pekei chula hngat la hngata khetei naw bäichu, iyaäm ekhet la awbawng ngulai khäla kün khäh. Übünak kräuwa pak nangnih hngat la hngata gawlba huih lawei khäl. Nangnih Hnadaga känäng nini bünei saw ayapyap phiyaw phoih kheni khrawng ini pawyeih saw koong nini sumeyeih saw tawn. Losulapei sidawng hiyawk hi Hnadaga sidawng hiyawk seh. Losulapei chetchaw hi Hnadaga la pek saw tha äng dä chetchaw seh. Äihi Yĕsu Krito äng ükütni äng ni Hnadaga käh wachang dawngai. Wachang la dogo che sawkbrat ni Ani käh dä. Amen. Khetsu khanbawn khälo, nangnih a chawmaih saw koong dukhah äng käh mei nangnih äng choisaw koong, nawmaw nawkaih saw krong ting nangnih maw ai chu. Äichaw a, nangnih Krito käh dukhah üphüh nini lawkei saw koong piyaw khäl. Äihi Ani käh a wachang dawngal khaw a, nangnih awpiyaw äng luih yal hnäng hmawna. Krito koong khrawng la anang keleih hi nangnih pisih mawh. Iyaäm Hnadaga käh Khraw nangnih ängtu mäi khäh. Nangnih dukäng hngat la ha khrawng sawk tu bala, muei bala, epret bi bala, awhngaw käh krong äng ukut khrawkei saw koong dukhah khawmah seh. Äini losulapei Krito yumtih a thänei saw koong dukhah khawm hi, ani hiyawkeyah seh. Awlaw bang nanga Krito yumtih ting anang panei saw koong Hnadaga a äkiyä tawngei. Tara thäneyeih saw khin loaih däk. Awlaw Hnadaga käh imsaw khrawng khäl känäng dä chah aih saw. Awlaw äi tara nangkei känäng chah hi, ula Hnadaga käh sidawng pawi lawei hüt u äm, anih käh khrang ihuih thäneyei äm? Kiyam äng yoei bala mäi khäh, “Konghmuh sang la awkiyawt büneyalaih saw dä äi hiyawh khawk khei hi, Hnadaga yumeyah tih awlaw ngulaisu khäl iba ini thäneyeih saw äm?” Äi koong Hnadaga sitha huih ula dukhah khawm saw chunei äm, anih la bi pawi bipe anih a bitih Hnadaga khäka ini sawk awpei seh u. Kei ayang khaw a käh chang thänei ngala, Hnadaga ima käh gongsong khäla kihnih ei. Kei Krito la dukhah khawm saw äng käh sawksi. Kei awhmawi mawh äng käh wachang dawngaih saw üphüh kübüneyei. Nangnih dukäng Hnadaga käh khrawng khäl kiyongtih a thänei khäl, awlaw anih a so khre khäl. Äini tha anang tawng saw äng hiyah, nini sitha äng awlaw Hnadaga sitha äng dä nini thäneyeih saw. Ni huih nini thäneyeih saw ese lawm äng awmawn nini büneyeih saw koong hiyah, äini nini sitha äng po khäl. Nang nosot khrei saw khrawnga khiyuptila tawaiti. Äini anih khäka awpawi chaw dawngei hmawna dä mäi. Äi khrawng kiyongtih khäl äng käh gong dawngal hi, nangnih a wachang tokkiya nini büneyei. Äi a wachang tokkiya sätak ha krak hnawh. Äi huih kawchawng chawng, hngawk hngu chongkrawng khälo, nangnih changchaw khälla ini hawu saw kheu khin khäl. Nangnih näuvei chula hngat la hngata chetchaw ei khäl. Iyaäm kiyam la hawu, “Bawriyei tih khrawng pawh äng Hnadaga mäyah, äini näuvei tih a Hnadaga la jenei.” Äi koong Hnadaga käh dogo hmawi mawh a nini puma hnemei sawk khäl, i khin lo khaw a ni, Ani la nangnih a anang hlüngal sawkai. Nangnih käh tawk khäl kheni Ani khrung äng hiyän khäl. Iyaäm Ani la nangnih koong tawk bala mäi khäh. Nangnih sidih äng mäi khäl, khak chula mäi khäl. Iyaäm nangnih käh lansu Mannat, nget tih khangsi huih u a ei hnängai äm äiya sui bala mäi khäh. Nini yum äng chetchet mäi chula Mannat a khawm khäl. Iyaäm nangnih nini hmawt khäh, luhdül äng mäitih nangnih huih yumtih tanawu khäl, nangnih huih ayapyap dukhah ini chunei khäh. Nangnih tanakra chaw dukhah nini khawm pänäng, Hnadaga la nangnih a mama, echet awlaw achang anang poh ai. Ani che khetjen mawh Krito käh päihyah saw a wachang koong anang panei tih. Hnadaga käh thayung sawkak mäiseh. Amen. Kei käh yumphoih mawh nawu Silban la ni chaw koyok saw äng uku khäh. Kei nangnih a ulyah kanang pek awlaw sawksi kepek, nidä Hnadaga käh ihisaw khetjen. Ni äng nangnih chetchet mäi khäl. Babil a nangnih huih heh lei hmueitih yumtih sawng äng käh besu awlaw kei chaw huih kahmatei saw Mak la ha nangnih a anang khäh ei. Ekhet lung äng nangnih hngat la hngata khätei bäichu. Krito ängtu mäitih nangnih khäl kheni lukhrunga jelkhiyamsa mäiseh. Kei che Simon Pitol, Yĕsu Krito käh hngat hngasaw awlaw teh hmueitih. Nangkei käh Hnadaga awlaw khrawng khiyawtal tih Yĕsu Krito käh konghmuh äng, nangkei huih khawk tih uyum büneitih kheni khäka ni chaw koyok tun. Hnadaga awlaw nangkei käh Boi Yĕsu a uthuk lawma hmawt chula, nangnih a awbawng khetjen la jelkhiyamsa mäiseh. Hnadaga phiyaw aih saw koong ühlüsaw vawn khäl kheni nangkei a mäi chak khäh. Ni khäl kheni Hnadaga la Ani tha äng khrawng pek saw. Ni thänei saw che, Hnadaga la Ani käh a wachang khrawng pekaih saw koong khrawng panei. Äi koong Hnadaga la khawmei hüt saw huih, awbawng usum vawngtih la khawktih vawn khäl nangkei a khrawng pek däk. Ni khäl khrawng peksaw che, luhdül äng käh ese khäl känäng ini puma kakei pula tawei hnäng hmawna, awlaw Hnadaga käh asanh chang phüh bünei hnäng hmawna. Äi koong, nini puma uyum äng awpawi kiyangh poyei khäl, awpawi kiyangh ängtu ngen, ngen äng nini puma ngiyaw ei khäl awlaw nini puma ngiyaw ei chula chunei khäl, chunei chula Hnadaga a rosi khäl, rosi saw ängtu nawnawu a khetnaw awlaw äi khet ängtu awlaw awbawng khet lung nini tawkeyeih saw so khäl. Nangnih a ni khäl dä mäi hi awlaw nini dawnei hi, nangkei käh Boi Yĕsu Krito a uthuk lawma nini hmawtai saw koong nangnih nini ongai. Mawng khrawnga ni khäl mäyah äm äila awhlawm hlaw hmu ah, äi mik mü. Äiya ayang ngulai känäng asanh poh hmueiyal saw äi hngih lal. Äi koong nawutih khälo, Hnadaga la ihisaw kawchawng anang panei awlaw anang heh lei ting hmawt ong awlaw awbawng soei khäl. Ni khäl dä nini poh hi krängak ha mawp hnawh chu. Äi äng nangkei käh Boi awlaw khiyawtal tih Yĕsu Krito käh pre a nunui khekheu nawlawkeyeih lah saw. Äi koong kei sawkbrat ni kheu khäl nini lung äng kanang khawyal. Nangnih ni khäl nini hmawt chak khäh, awlaw i ihisaw bang nini lung äng mäi äm, äi tindin mäi khäh. Äini kei kikhin, kei luhdül äng kehengak ni, ni kheu khäl nini lung äng kanang khawyal ngapai. Iyaäm kei kantha hna hnah mäi ti hnawh, Boi Yĕsu Krito la mawmawt chaw awhawu pekal däk. Kei küdü pänäng ha che ni kheu khäl nini lung äng tawei ong, äi kei mawt kosotai. Nangkei käh Boi Yĕsu Krito käh tha la Ani loal laih saw krong, nangnih a kanang hawupek saw khäl khui kuhnuh saw hiyah. Kei Ani käh dogo kimik la hmuh. Ani a Paw Hnadaga la a wachang la hmawi pek hüt khaw a, keinih äiya kini mäi hüt khäh. A wachang mawh Hnadaga la ni huih hawu, “Niche Kei käh khetsu chaw, Ani khrung äng Kei kaw piyaw!” Keinih Ani ängtu äi asanh chang khuyunga kini mäi hüt khaw a, hawn pre känäng ni sam kini yawk hüt. Nangkei ini hmawt khäh, Hnadaga sidawng yotih khälla ini yoksaw che ihi khäh. Nangnih äi kheu khäl nini khinaih lah saw. Iyaäm ni che uhiyung äng simiya la awa pek saw huih dä. Äi kheu khäl kho wa ah saw sawgraw awlaw nini lung äng akhonäng käh asĕ la anang süah saw sawgraw khin chula mäi khäl. Äini täkchah ni kheu nini lung äng tawei bäichu, kiyam äng sidawng hiyawktih khälla ini yok saw kheu khäl hngat la ha upum känäng phawngh pekal hnängah. Hnadaga sidawng hiyawktih khälla ini hawu saw che ini sitha huih luhchaw känäng losaw hiyah. Asanh chang Khraw Ia dä anih a sumei bala Hnadaga känäng olosaw kheu khäl ini hawu peksaw. Ayang äng ha Isawlael yapsaw dukäng hiyah saw sidawng hiyawktih ini mäi hüt. Äi huih kawchawng chawng awmaw äng ha, nangnih dukäng hiyah saw choktih ini loaih saw dä. Anih käh hiyah saw chok hawu äng khrawng ini krak nawkai. Awlaw anih a khiyawtal tih Boi Yĕsu a ha ini thuh nawkai. Ni huih äng anih la bet ting ini puma ini khrah eiyei. Äi thän ha awbawng yumtih sawng khälla anih hnüng ini tämai. Anih la ni huih pawyah saw ini täma, apranga käh awhngaw khrawng khälla ihisaw lawma ni pawyah ting ini takai. Awmawn ini lawphah koong hiyah saw khui khäl hnu hnuk ula che, nangnih känäng awmawn anang lawkei pekai. Anih khrung äng tara loaih saw kraw hnawh awlaw ini krakaih saw känäng anih lät hnawh u. Ngulai bitih hawn natchaw khäla bang Hnadaga la hlätalah. Awlaw bang ngulai vawm äng hiyän. Äiya uhiyung äng anih siyol äng khon hmuei ula che tara hnüp koong ini chongei. Awlaw Ani la äi luhdül phem äng käh khrawng khäla ha hlätalah, awlaw bang Hnadaga a kenkeh poah tih khrawng khäl koong tui len sawk. Äini Noha la awlaw pochong seh khrawnga jiji a dä Hnadaga la awkiyawtal. Ni Noha la Hnadaga hmawi mawh a konghmuh sang ini thäneyeih saw sidawng hiyawk hüt. Sawdom la Gomola mräh äng käh khrawng khäla dam pek bala che, Hnadaga la äi mräh pai hnih ni mei äng chawh. Hnadaga kenkeh ah tih khäl ni huih mei äng ini o aih saw ting Ani la dawn. Äini konghmuh sang Lot a Hnadaga la khiyawtal. Äiya käh khrawng khäl käh pawyah saw bi kawi äng Ani la ulung dukhah piyei hüt. Konghmuh sang Lot äi khrawng khäl ängtu mäi hüt. Hnüpak kiyawnah khrawng khäl käh pawyah saw bi kawi, ani la hmuhmu bala yawyaw bala ulung dukhah chi piyei hüt. Nangnih nini hawu, Ani käh khrawng khäla phi känäng iba khiyawtalaih lah saw äm ting Hnadaga la hmawt khäh. Ani la äpäihyeih saw hnüp äng pawyahtih khrawng khäla tara biyeih koong ächän tawk. Unungchaw ula chawgrawei bala akantha khrah eyeih khiyang äm, awlaw Hnadaga sitha ngeiyah äm, äi khäla Hnadaga la dam pekalai. Äi hiyah saw choktih khäl che mawt ini sengkhri mäi, anih la iha kenkeh po u. Äichaw a anih la hawn natchaw khäla ini keleih. Äi hawn natchaw khäla hiyah saw choktih khäl thawka tha la dogo mäi thän, Boi khäka anih ini lo khaw a anih la ini keleih saw kheu, a hawu pek u. Äini ni khrawng khäl che, bet ting ini lung äng kawi saw huih iha tawk tiah pak bi ula mäksetdava huih ini mäi. Anih che täu peche a mawn tila nutuk saw äng dä ini tusaw. Ni hiyah saw choktih khäl ini düalai. Pawyah saw bi koong anih la dukhah ini khawmalai. Ni khrawng khälla ühnüp kaw chawng chawnga alak o ula bise kheni ini bi. Nangnih äng päi ini ei khaw a, alak o ula heu heu a piyaw ula hiyawh ei la anong ana ini hnekei. Anih la sawkbrat ni pawyahtih hmutaw a sui ula ini mäi, awlaw ngulai ini biyeih saw dümah. Ngiyaw tih khrawng a pawyah saw lawm äng ini chih. Anih la lawpha dä ini dawn hnäng saw. Anih lukhrunga Hnadaga käh pathamah mäi khäh. Anih oprongh saw lawm hiyän ula hiyah saw lawm äng ini chet. Anih la Biyon chaw Balam la bi hüt saw huih ini bi. Balam la pawyah saw bi kawi äng awmawn büneyeih khiyang hüt. Äini ani käh pawyah saw bi koong kräu hnäng ngahtih se lekchaw känäng hekei hmuei. Äi se lekchaw la khrawng huih kräu bala ani käh bi kawi koong anga hüt. Ni khrawng khäl tuiphul saw kawngal saw huih awlaw khri la phai hnäng saw aw aih hiyahtih khohiyung huih. Anih koong hiyung pim pim ala tawk hmuei. Anih la usum vawngah saw kheu ini kräu. Khrawng khäla ini krakaih saw koong ini lung äng ini khawi awlaw ngulai pawtäng ini chih. Ese lawm känäng chenal tha tih khäla awlaw ini paneyal. Ni hiyah saw choktih khälla ini sitha huih khrawng khäla ini mäichoh aih saw ini tak. Äini anih ini pum kädäng bang pawyah saw bi kawi äng käh hngasaw. Ula bang nanga ini sitha nawkäm nang äi käh hngasaw. Boi Yĕsu Krito a hmawt ula luhdül äng käh pawyah saw känäng lätal tih khrawng khäl ha awbawng ini mäi khäh. Äini anih awlaw luhdül äng käh pawyah saw pawta awlaw ini krawnal. Äihi anih la luhdül äng käh pawyah saw khrang dä hiyänal u hi, achah khaw a ini khom saw thawka äpäih khaw a unung ini khomalaih. Iyaäm asanh chang saw lawm hmawt ula äi känäng ini krawnalaih saw thawka, anih la äi asanh chang lawm hmawtaih usaw bang awpawyeih saw dä. Kheu äng bang mäi saw kheu khäl anih koong ihisaw a thänei, “Ui olok saw pawta hle eiyal, awlaw tui nohloh sawk däk saw wok nu kiyup äng ähläweyal.” Khetsu khanbawn khälo, nangnih khäka ni äng sät hnih chaw kanang san. Chaw pai hnih äng ni kei nangnih lung äng tawk pawi kawi hmawna nini lung äng kanang khawyal. Hnadaga sidawng hiyawktih asanh chang khrawng khälla ini hawu hüt saw, nini lung äng nini khaweyalaih saw kei kühlü. Awlaw teh hmueitih khäla sumei bala nangkei khrawng khiyawtal tih Boi la khrawng peksaw ana a, nini lung äng nini khaweyalaih saw ha kei kühlü. Täkchah ni nini lung äng khaweyal khäl, äpäih khaw a keleih tih khäl ini mäyei. Anih la pawyah saw ini sitha huih ini poh eyei. Anih la ini hawuvai, “Loalaih saw khawmei hüttih khrawng che mawnga äm? Nangkei nupaw khäl bang ini düal däk. Luhdül che bitchaw bang hleyei yalah!” Ni khrawng khälla hmawt pe ini hlei. Iyaäm ni khrawng khälla ini hmawt khäh, awbawng hnüp khawngah Hnadaga kheu äng hawn bi hmuei awlaw Hnadaga la tui känäng dül thou. Äi pänäng Hnadaga la luhdüla tui äng khrakal. Äini Hnadaga käh kheu äng tua käh hawn la luhdül mei äng chawh hmueiyeh saw koong tawk hmuei saw. Hnadaga a kenkeh a tih khrawng khälla tara hnüp täh awlaw krakaih saw hnüp täh tawk hmuei. Äini khetsu khanbawn khälo, ni kheu khäl hngilai chu, Hnadaga khäka kohnüpak che khokum thongak huih awlaw khokum thongak che hnüpak huih dä. Üküt khrawng la ini khin, Hnadaga la Ani käh amah luhyeih saw awkrawei, äini äi hiyah. Äichaw a Ani la nangkei koong chunei saw. Iyaäm Ani la läsupei krakseh ting hlüeyah, awlaw bang khrawng khäl ngulai känäng ini krawnalaih saw hlüei. Äini Boi sukhä huih dä loaih saw. Äi hnüp äng athak sam thänei bala hawn krokalai. Awlaw hawna käh ükütni mei äng chawh hmueiyal bala khrah hmueyal chakai. Luhdül äng ämäi saw khäl kheni mei äng o chakai. Ni huih ükütni krakalaih chak hi, tua nangnih i huih khrawng nini thäneyeih lah saw äm? Nangnih Hnadaga käh khomhnüp nah ei chula nini chongei saw huih, asanh chang la Hnadaga kenkeh poh chula nini mäyeih lah saw. Hnadaga käh äi khomhnüp alanda loaih saw koong nini hno saw. Äi hnüp äng hawn o bala krak chakai awlaw hawna käh kheni okro chakai. Äini nangkei Hnadaga la khawmei saw huih hawn tha la luhdül koong chong pula ini mäi. Äiya ükütni Hnadaga sitha huih dä thäneyeih saw. Äi äng, khetsu khanbawn khälo, äi khomhnüp nini chong saw koong Hnadaga mik äng achang la epret mäyahtih thänei hnäng hmawna nini näng saw huih bi pawi bi khäl. Nini lung äng tawei khäl, khrawng khälla ngulai känäng khiyawt tara ini büneyalaih saw koong Hnadaga la chunei bala mäi khäh. Ni kheu khäl Hnadaga la pek saw ngen äng dä nangkei käh khetsu nawu Pol la yok saw. Ani käh chaw äng ha ni kheu khäl dä yoei saw. Ni chaw dukäng käh üküt krong che nawyawk chuaih saw mawt khawk khei. Ni chaw phawt tih üküt che iha yawchu a tih awlaw nüm chawng chawnga mäi hnängah tih. Anih la kiyam äng käh kheu lenak hnih i huih hiyah saw lawma ini krawn äm, äi huih ni chaw ha hiyah saw lawma ini krawn. Äi äng anih la ini puma ini khrah ei. Khetsu khanbawn khälo, ni kheu khäl alanda nini yawk saw koong sidih äng mäi khäl. Nangnih tua nini mäi saw ala pawi känäng khrawng krak la anang kramei bala ala se a anang chiyal hnängah hmawna. Nangkei käh Boi la awkhiyawt khrawng pektih Yĕsu Krito käh khetjen äng awlaw ngen äng chom khäl. Tutäh känäng awlaw luhdül tumak Ani a dä rosi khäl. Amen. Achah täh kän mawng mäi hütäm, mawng kheu nangkei ini hiyawk hütäm, mawnga nangkei ini mik äng ini hmuh äm, mawnga mawmawt chaw ini miknawk äm, mawnga ini kut äng ini bin äm, niya äi sawk kheu dä koyok tun saw. Äi sawk adawng hüt. Keinih ani a kini hmuh awlaw ani krong äng sawksi kini thok. Paw khäka u mäi hütäm awlaw nangkei khäka u dawngei hütäm äi päihyah saw sawk kheu dä nangnih a känäng tak tun saw. Ua bang keinih kini hmuh äm awlaw u kheu keinih kini yawk äm äi krong dä nangnih a kanang tak tun saw. Keinih äi nangnih a kanang hawu pek tun saw nangkei dukäng kubawm mäi hmawna. Ni kubawm che Paw la Ani chaw Yĕsu Krito awlaw nangkei dukäng. Nangkei käh piyaw luih hmawna keinih ni khäl kini yoktun saw. Yĕsu Krito känäng yaw ungala nangnih a kanang taksaw kheu che ni Hnadaga che awa. Ani äng asang ha u hiyung mäyah. Nangkei ini hawu khaw Hnadaga la nangkei dükäng kubawm mäi khäh ting, äini u hiyung äng ini chetei khaw nangkei ini hlei, ihisaw lawm äng chetei phu. Äini Hnadaga awa äng mäi saw huih nangkei ha awa äng ini mäi hi, nangkei hngat la hngat kubawm ini mäi awlaw ani chaw Yĕsu thi la nangkei a ngulai khäl khe kän asanh khrawng poh al. Nangkei a ngulai mäyah ting ini hawuei khaw nangkei ini puma ini kramei. Äi äng ini yawk chu nangkei lung äng Hnadaga käh ihisaw mäyah. Nangkei dä ini pum käh ngulai ini khawmei hi Ani la nangkei käh ngulai khrawng hläh alai awlaw epret khe känäng ni nangkei a asanh khrawng poh alai. Iyaäm Ani che üm tawn awlaw krängak ha ngulai biyah. Nangkei ngulai bi phu ting ini hawuvei khaw nangkei Ani a hlei tih a ini poh. Awlaw Ani käh kheu nangkei lung duka mäyah. Kei käh khetsu chaw chuhnu khälo, nangnih ngulai biyah hmawna dä kei nangnih khäka ni khäl kanang yok saw. Äini hngat la ha ngulai bi phih khaw ani koong Paw khäka khawmaih tih pochongak mäi khäh. Ani che Yĕsu Krito, Ani konghmuh sang. Nangkei käh ngulai khäl koong Krito la awsawk pekei. Äini nangkei koong jiji hiyah, luhdül äng käh khrawng khäl kheni koong. Nangkei dä Ani käh sinmawn kheu kheni ini ngei hi, nangkei ini yawk chuai, nangkei Ani a ini hmawt khäh. Ula bang Kei Ani a kawhmawt khäh ting hawu äm, äini Ani käh sinmawn kheu ngei ah hi, äiche hleitih. Ani dukäng ihisaw mäyah. Äini ula Ani käh sinmawn kheu ngei äm, ani dukäng Hnadaga käh khet lälä luih. Äi äng nangkei ini hmawt Hnadaga äng nangkei ini mäi. Ula bang Hnadaga äng kämäi khäh ting hawu äm, Yĕsu mäichoh saw huih ani ha mäiseh. Khetsu chaw chuhnu khälo, Kei nangnih khäka atha sin mawn kheu kanang yok saw hiyah, täkchah khaw kän mawng kheu mäi hütäm, äi be kanang yok saw dä. Äi kheu phem ayang bang nini yawk däk. Äini tua kanang yok tun saw kheu ephem thän atha. Ni kheu ihisaw che Yĕsu Krito la nangnih sawk äng dawng. Iyaäm uhiyung chetal tun awlaw äi ihisaw awa tua choi tun. Ula bang hawu äm kei awa äng kämäi ting äini awnawu a hmukhih ah hi, ani che uhiyung äng mäi. Ula ani nawu a khet nawk äm ani che awa äng mäi awlaw ani mawpaih dün la hngat ha mäyah. Äini ula ani nawu a hmukhih ah äm, ani uhiyung äng mäi awlaw uhiyung äng chetchonei. Ani la hmawteiyah ani maw a chet tun äm, iyaäm uhiyung la ani mik mü sawk. Sämäichaw khälo, Krito koong nangnih käh ngulai hläh hmueiyala dä kei nangnih khäka ni koyok tun saw. Paw tih o, achah täh kän mäitih a nangnih nini hmawta dä kei nangnih khäka ni koyok tun saw. Chong khrawng chaw khälo, Mannat khrung äng nangnih nini onga dä nangnih khäka kei ni chaw koyoktun saw. Chaw nawu khälo, kei nangnih khäka koyok, iyaäm nangnih Paw Hnadaga a nini hmawt. Paw tih o, kei nangnih khäka koyok, iyaäm achah tähkän mäitih a nangnih nini hmawt. Chong khrawng chaw khälo, kei nangnih khäka koyok, iyaäm nangnih che tha mawh awlaw Hnadaga kheu nangnih nini lung duka mäi, awlaw nangnih Mannat khrung äng nini ong khäh. Nangnih luhdül la luhdül äng käh iha khet naw ai chu. Ula luhdül a khet nawk äm, ani la che Paw a khet naw ah. Iyaäm luhdül äng mäi saw kantha hlü, mik lawphah awlaw imthong vawn äng bawri, ni khäl che Paw känäng lo saw hiyah, luhdül känäng lo saw dä. Luhdül la luhdül äng käh lung hlü khäl äpäih tun, äini Hnadaga hlü huih mäitih sawkak ni mäiyei. Chaw chuhnu khälo, ni dä päih saw khin. Nangnih nini yawk käh Krito käh lansu lotun, äini Ani käh awbawng lansu ini lo däk. Äi koong nangkei ini yawk chu, nidä äpäih saw khin. Krito käh ni lansu khäl nangkei duk känäng ini thokal däk. Anih nangkei khrawng mäi hüt u. Nangkei khrawng dä ini thänei hi, nangkei äng dä ini mäiyei hü, äini anih ini thokal a ini yawk chu, anih äng käh pochongak ha nangkei khrawng hiyah. Äini Krito äng nangnih khrung äng Asanh chang Khraw pek hmuei. Nangnih kheni la ihisaw nini hmawt. Ihisaw hmawt chu a nangnih khäka kei ni koyok saw hiyah. Äini nangnih ihisaw nini hmawt khäh awlaw ni ha nini hmawt, ihisaw känäng hiyah saw lo ah. Awlaw äi koong dä kei nangnih khäka koyok saw. Ula bang hawu äm, Yĕsu Mesaya hiyah, äiche hlei saw hiyah ei? Awpaw la awchaw a ula thuh nawk äm ani che Krito käh lansu. Awchaw a ula thuh nawk äm ani la Awpaw a thuh nawk. Äini awchaw a ula lawkei äm ani la awpaw ha lawkei. Achah tähkän bang nini yawk äm äi nangnih lung äng mäiseh. Äidä nangnih lung äng mäi khaw, nangnih Chaw la Paw äng sakei chula nini mäyei. Nidä päihyah saw sawk, Krito la nangkei a khrawng pekaih saw khawmei saw. Ula bang nangnih a pawyah saw lawm äng anang chih yeih saw anang sot äm, anih krong äng dä kei nangnih khäka koyok saw. Äini nangnih Krito känäng Asanh chang Khraw nini bünei däk. Ani nangnih lung äng mäi. Äi koong awhngaw käh chok hawu nangnih a hlü ah. Üküt krong äng ni Asanh chang Khraw la dä nangnih a anang chokei saw. Ani la ihisaw dä anang chokaih saw, hiyah saw anang chok hnawh. Äi koong Asanh chang Khraw käh chok hawu khin khäl awlaw Krito ängtu mäi khäl. Chaw nawu khälo, äi koong kanang tak, nangnih Krito äng dä mäi khäl, Ani adawngal khaw a, nangnih nini sengkhri mäi hmawna awlaw olo al khaw a Ani hmawi mawh a nangnih hiyaw kei yah pak. Nangnih nini hmawt khäh, Krito che konghmuh sang, ni ha nini hmawtaih lah saw, ula ihisaw bi kawi äm ani Hnadaga chaw. So khäl, Paw Hnadaga la nangkei a ihiyawh khrawng khet nawk saw äm! Ani käh khet ihuih lensaw äm, Ani la nangkei a chaw o ting khrawng panei, nangkei Ani chaw. Äi koong luhdül la nangkei a khrawng hmawtah, iyaäm luhdül la Hnadaga a ha hmawtah. Khetsu chaw nawu khälo, nangkei tua Hnadaga chaw chuhnu, äini uhnung äng i ini thäneyei äm, äi tua ha hmawt hawm phu. Äini nangkei ini hmawt khäh, Hnadaga awlaw loal khaw a nangkei ha Ani huih ini thäneyei. Iyaäm Ani i huih mäi hütäm Ani a äi huih ini hmuh a lai. Ula bang Krito äng üm bala mäi äm, Krito ihuih ekejet äm, äila Krito huih ulung sah nei sawk. Ula bang ngulai bi äm, äila Hnadaga thung khrah saw dä. Ngulai che Hnadaga thung nakrah saw. Äini nangnih nini hmawt khäh, nangkei käh ngulai khiyawtalaih saw koong dä Krito lo saw. Krito äng asang ngulai mäyah. U bang Krito äng sawkbrat mäi äm, äila ngulai biyah. Ula ngulai bi äm äila Krito a hmuphu ah awlaw hmawt phu ah. Chaw nawu khälo, hngat la ha nanga pawyah saw lawm äng anang chi hnängah pak. Krito la matara biyah, ula bang ihisaw bi äm äila matara biyah. Ula ngulai po po bala mäi äm äiche Mannat käh, iyaäm Mannat la dä achah täh kän ni ngulai bi bala lo saw. Mannat käh bi khraka dä Hnadaga chaw lo saw. Hnadaga känäng thänei tih che ngulai äng mäi hnängah, iyaäm Hnadaga kiyangah ani äng mäi khäh. Hnadaga känäng thänei saw koong ani ngulai bi hnängah. Hnadaga chaw chuhnu la Mannat käh chaw chuhnu okoyei khäh. Ula bang ihisaw biyah äm awlaw awngaw a khet naw ah äm, äi Hnadaga chaw hiyah. Achah khaw kän nini yawk saw kheu che ni, nangkei hngat la hngat ini kheteyeih saw tawn. Äi koong nangkei Koin huih thäneyei phu. Koin che Mannat käh khrawng mäi hüt awlaw ani la awnawu a tuk hüt. Iya Koin la awnawu a tuk hüt saw äm? Iyaäm Koin la pawyah saw bi bi hüt awlaw awnawu la che bi pawi bi hüt. Ta nawu khälo, luhdül äng käh khrawng khälla nangnih a anang hmu khih ah hi maw ai chu. Nangkei ta nawu ini khetei koong dä ini yawk chu, nangkei düsaw känäng sawk ini büneyal. Kheteyah tih khäl che düsaw äng ini mäi. Awnawu a hmu khih ah tih che tu tih. Tu tih la che päihyah saw sawk büneiyah, nangkei äi ini hmawt khäh. Krito la nangkei koong awsawk epekei hüt. Äi koong khet i äm nangkei ini hmawt. Bakhaw, awnawu koong sawk ini pekeyeih saw nangkei ha ini tawn. Luhdül äng käh mäichawtih khrawng hngat la khrawng hngat alai saw hmu bala ha hmu ah saw huih mäi hi, Hnadaga koong ani a ekhet mäiyei? Chaw nawu khälo, nangkei ini mong khok äng ini khetei saw dawneiyah pak, bisaw äng dä ihisaw khet dawnei äng khä. Ni äng nangkei ini hmawtai, nangkei ihisaw äng ini mäi khäh. Ni huih äng nangkei Hnadaga hmawi mawh a ini mäiyei. Nangkei käh lung la nangkei a epret khrawng poh hi, nangkei ini hmawtai Hnadaga nangkei lung thawka len khäh, Ani la ükütni hmawt chak khäh. Khetsu khanbawn khälo, nangkei lung la dä nangkei a epret khrawng khraw ah hi, Hnadaga hmawi mawh a nangkei a ini sengkhri mäiyei. Äi koong nangkei Ani känäng ini hawuvei saw kheni ini büneyei. Iyaäm Ani la khrawng pek saw kheu kheni nangkei ini ngei awlaw Ani lung hlü huih ini bi. Ani käh sin mawn kheu che ni, nangkei Ani chaw Yĕsu Krito äng yum ong awlaw hngat la hngat khetei ong. Ni sin mawn kheu dä Ani la khrawng pek saw. Ula bang Hnadaga kheu khin äm ani Hnadaga äng sakei awlaw Hnadaga ha ani äng sakei. Ani la khrawng pek saw Asanh chang Khraw äng nangkei ini hmawt, Ani nangkei lung duka mäi khäh. Khetsu chaw nawu khäl o, awkhraw kheni a nangnih yumeyei chu, äi chaw a chawm chula so chawm khäl anih Hnadaga känäng ini lo saw ei. Iyaäm awbawng hiyahsaw Hnadaga sidawng hiyawktih luhdül äng ini lo khäh. Hnadaga käh khraw a che nangnih ni huih nini helh hnängai, mawng khraw la khawmei äm Yĕsu Krito Luhchaw thänei bala dä lo saw ting, äi khraw dä Hnadaga känäng lo saw; Äini mawng khraw la Yĕsu a thuh nawk äm äiche Hnadaga känäng lo ah. Äidä Yĕsu Krito käh lansu. Äi khraw lo aih saw che nangnih nini yawk khäh, awlaw tua äi khraw ni luhdül äng lo däk. Äini chaw nawu khäl o, nangnih che Hnadaga käh. Nangnih äi hiyahtih Hnadaga sidawng hiyawktih khäl khrung äng nini ong khäh, iyaäm nangnih äng mäitih khraw che ni luhdül äng mäitih khraw khäl thawka len sum. Äi hiyahtih Hnadaga sidawng hiyawktih khäl che ni luhdül äng käh. Äi koong anih la ni luhdül be ini hawu awlaw luhdül la ha anih kheu khin. Nangkei Hnadaga käh. Ula Hnadaga a hmawt äm ani la che keinih kheu khin. Äini u Hnadaga käh hiyah äm äila keinih kheu khinah. Ni äng dä nangkei ihisaw khraw la hiyah saw khraw ini khoih yeih hnäng saw. Khetsu chaw nawu khäl o, nangkei hngat la hngat khetei naw äng khä, iyaäm ekhet che Hnadaga känäng dä lo saw. Ini lung äng ekhet mäitih khrawng khäl che Hnadaga känäng dä ini lo saw awlaw anih la Hnadaga a ini hmawt. Ini lung äng ekhet mäyahtih khälla che Hnadaga a hmawt u. Iyaäm Hnadaga che ekhet. Hnadaga la ani käh hngat pätpät chaw luhdül äng te bala ekhet khrawng dawnei, nangkei Ani chaw känäng nangkei sawk bünei ong. Nangkei Hnadaga a ini khet nawk hüt saw hiyah, äini Ani la nangkei khrawng khet naw bala awchaw a teh saw, awchaw sawk pekei bala nangkei a ngulai kän khrawng khiyawtal bala Hnadaga lung hluih hnäng hmawna. Ni dä ekhet. Khetsu chaw nawu khäl o, Hnadaga la nangkei a ni huih khrawng khet nawk saw äng nangkei ha hngat la hngat ini khetei tawn. Hngat la ha Hnadaga hmu phu u. Äini nangkei hngat la hngat ini khetei khaw Hnadaga nangkei lung äng mäi khäh awlaw Ani käh khet nangkei dukäng lälä a luih. Awlaw ni äng nangkei ini hmawt nangkei ani äng ini mäi awlaw Ani ha nangkei lung äng mäi. Iyaäm Ani la nangkei a awkhraw khrawng pek. Keinih kini hmuh khäh awlaw sawksi kini thok tun, Awpaw la awchaw a luhdül a khiyawtalaih saw koong teh hüt. Ula bang Yĕsu Hnadaga chaw dä ting khawmei äm ani äng Hnadaga mäi awlaw ani ha Hnadaga äng mäi. Nangkei ini hmawt khäh, Hnadaga la nangkei a khrawng khet nawk awlaw Ani käh khet äng nangkei ini yum khäh. Hnadaga che ekhet. Ekhet äng mäitih che Hnadaga äng mäi awlaw Hnadaga ha ani äng mäi. Tara hnüp äng sengkhri ini bünei koong ekhet nangkei dukäng lälä a luih. Iyaäm ni luhdül äng nangkei käh sawk Ani sawk huih dä. Ni khet äng keh se saw mäyah, awlaw bang ekejet khet la keh se saw tämal. Iyaäm keh se saw äng dam mäi khäh. Keh tih che khet äng luih yah. Ani la ayang nangkei a khrawng khet nawka dä nangkei ini khet nawk saw. Ula Hnadaga a ekhet nawk khäh ting hawu äm äini awnawu a hmu khih ah äm, ani che hlei tih; Iyaäm imikäng uhmuh saw awnawu la ebesutih a bang ula khet naw ah äm ani la hmu ah saw Hnadaga a iba khet nawkai äm? Nangkei Ani känäng ni sinmawn kheu ini bünei, Hnadaga a khetnawtih la ini nawu a ha khet nawkaih saw tawn. Yĕsu dä Mesaya ting yumtih khäl Hnadaga kän dä ini thän saw. Paw a khet nawtih khälla Awchaw a ha ini khet nawk khäh. Nangkei itih khaw a bang Hnadaga a ini khet nawk äm awlaw ani käh sin mawn kheu ini khin äm, äi khawa ini hmawt, Hnadaga käh chaw chuhnu khäla ha nangkei ini khet nawk khäh. Hnadaga käh sin mawn kheu khäl ini khin saw ni Hnadaga a ini khet nawk saw. Ani käh sinmawn kheu khäl khawk kheyah. Iyaäm Hnadaga käh hngat mawkrawng chaw chuhnu ni luhdül khrung äng ini ong khäh. Luhdül khrung äng o ong saw che nangkei käh yum. Yĕsu Hnadaga käh chaw ting yumtih khäl dä luhdül khrung äng ini ong. Nidä Yĕsu Krito, tui la thi äng lo hüttih. Tui jiji känäng hiyah, äini tui la thi känäng dä lo hüt saw. Asanh chang Khraw la ni krong äng sawksi thok, iyaäm ani upum kädäng ihisaw. Sawksi pektih paithum ini mäi. Asanh chang Khraw, tui la thi ni pai thum käh sawksi ni tuei chak khäh. Keinih khrawng käh sawksi kini lawkei, äini Hnadaga käh sawksi äi thawka bang len. Awlaw Ani la awchaw krong äng ni sawksi pek. Hnadaga chaw äng ula yum äm ani lung äng äi sawksi mäi khäh. Hnadaga a yumeyah tih la Ani a hleitih a ini poh. Iyaäm Hnadaga awchaw krong äng sawksi thoksaw anih la yumei u. Äi sawksi che ni, Hnadaga la nangkei a päihyah saw sawk khrawng pek awlaw äi sawk Ani chaw äng dä mäi saw. Hnadaga chaw a büneitih la pähyah saw sawk bünei. Äini Hnadaga chaw a büneiyah tih la äi sawk ha büneiyah. Nangnih khäka koyok saw ni hmawt ong, ula bang Hnadaga chaw yumei äm äila päihyah saw sawk bünei däk. Hnadaga khrung äng nangkei a ni ini üm mäi khäh, Ani sitha huih nangkei Ani känäng ini hawuvei khaw Ani la nangkei kheu khin khäh. Nangkei ini hawuvei saw kheni Ani la khin khäh ting nangkei ini hmawt khaw, nangkei Ani känäng ini hawuvei saw ini bünei däk. Nang nube tanawu la ngulai bisaw nu hmuh khaw, äi ngulai nü dü nawkaih saw hiyah thän ani koong suh tong bäi, Hnadaga la ani a awsawk pekalai. Ngulai bipe anih a düsaw pawta chiah tih khrawng khäl kheu dä kei ni a kawhawu tun saw. Äini düsaw pawta chi tih ngulai ha mäi khäh. Äi krong khäl äng nini khawh eyeih saw kheu kei nangnih a känäng ta nga. Üküt matara ni ngulai, äini düsaw pawta chiyahtih ngulai ha mäi khäh. Nangkei ini hmawt khäh Hnadaga känäng thän tih la che ngulai bi bi bala mäyah. Iyaäm Hnadaga chaw la anih a ka bala tawk awlaw Mannat la anih a khat hnäng ngah. Nangkei ini hmawt khäh, nangkei Hnadaga käh awlaw luhdül kheni Mannat tha kawla mäi. Nangkei ni ha ini hmawt, Hnadaga chaw lo bala nangkei a yawkchuaih saw tha khrawng pek hüt, äi äng nangkei ihisaw Hnadaga a ini hmawt. Ihisaw Hnadaga äng nangkei ini sakei, Ani chaw Yĕsu Krito äng tu ha ini sakei. Ani dä ihisaw awlaw Ani dä päihyah saw sawk. Chaw nawu khälo, ulupchaw khäl känäng kakei chula mäi bäichu. Hnadaga la heh lei saw hmutaw la ani chaw chuhnu khäl khäka kei gongsong la ni chaw koyoktun. Kei nangnih a lälä kanang khet nawk. Kei jiji la kanang khet nawk saw hiyah, äini Hnadaga käh ihisaw hmawt tih khe la ni nangnih a anang khet nawk. Äi ihisaw nangkei äng mäi awlaw sawkbrat nangkei äng mäiyei. Paw Hnadaga awlaw Ani Awchaw Yĕsu Krito la nangkei a khetjen, jen awlaw jelkhiyamsa khrawng pek. Ihisaw la ekhet nangkei ängtu mäiseh. Paw la nangkei a khrawng sinmawn saw huih nangnih chaw nawu awvawng Hnadaga käh ihisaw lawm äng ini mäi saw hmu ngala che kei mawmawt kaw piyaw. Khetsu hmutaw o, kei nangnih a kanang hnih ei, nangkei hngat la hngat khetei yäng khä. Kei ni koyok saw atha sinmawn hiyah, nangkei äng achah täh kän ni mäi saw dä. Ekhet che Hnadaga sinmawn kheu huih chetchonei. Ayang khaw kän nini yawk saw huih nangnih ekhet äng mäi khäl. Luhdül äng khrawng krameitih awbawng ini mäi. Yĕsu Krito luhchaw a thänei bala luhdül äng lo saw anih la yumei u. Ni khrawng khäl dä khrawng krameitih la Krito käh lansu. Nangnih sidih äng mäi khäl, nangnih ibang nini poh saw äm äi hiyumeyah pak. Äini phiyaw phoih hang hang büneal ong. U khäl Krito käh chok hawu äng mäyah äm awlaw äi chok hawu lüm ula ini chet äm äi khäl lung äng Hnadaga mäyah. Äini u khäl äi choksaw äng ini mäi äm, anih lung äng Awpaw la Awchaw pochong hnih ni ihin mäi khäh. Läsupei nangnih khäka lo ula äi chok nawk hawu u khaw, ani a ima hawnai chu awlaw khät ha khätai chu. Iyaäm anih a nini khäh khaw anih käh pawyah saw bi phak nini thänei. Nangnih khäka koyokaih saw awbawng mäi thän, chaku la kolom si äng yo do khiyang nga. Äichaw a nangnih khäka lo ngala nangkei käh piyaw luih hmawna hmawi mawh khiyang käkräuvaih saw kakhah nei. Hnadaga la heh lei saw nang besu chaw chuhnu khälla nanga anang khäh ei khäh. Hnadaga käh ihisaw koong kei ua ke khet nawk äm äi kä phäu Gai khäka kei gongsong la ani a ni chaw koyoktun. Khetsu khanbawn o, kei suh kotong, nang käh ükütni mawmawtchaw mäiseh awlaw awkhraw lawm äng nang ihuih mawmawt chaw nämäi äm, äi huih nakantha ha khotong khotawh mäiseh. Pochong hnih thum yumtih nawutih khäl kei khäka ana phaw awlaw ihisaw äng nang sawkbrat nämäi saw huih Hnadaga käh ihisaw äng yum phoih äng nämäi khäh ting kei a khrawng hawu pek ni kei mawmawt kaw piyaw. Kei käh chaw chuhnu khäl Hnadaga ihisaw lawm äng ini chetchonei khäh ting kawyawk saw thawka awpiyaw kei a mäyah. Khetsu khanbawn o, hmawtah pe ha yumtih ta nawu khäl koong nopoh saw khäl mawmawt uyum lah äng nopoh saw dä. Yumtih sawng khäl ini lumeidün laa üküt hmawi mawh a anih la nang käh nekhetei saw kheu ini hawu. Hnadaga hlü huih nang ini chetaih saw nopoh pek hi mawt bi pawi nibiyei. Anih Krito koong dä ini thok saw awlaw yumah tih khäl kän iha law ei u. Äi koong nangkei ni huih khrawng khäla ini ku aih saw tawn khäh, Hnadaga käh ihisaw koong nangkei ha anih bi phäu vawngei hmawna. Kei yumtih sawng khäl khäka chaw hngat koyok hüt khäh. Äini Diotiphes yumtih sawng khäl äng käh gongsong thäneiyeih khiyang a keinih kheu khinah. Äi koong ani la i aw poh saw äm, kei koloal pänäng nangnih a kanang hawu pekai. Ani keinih ming äng awbawng hiyah saw kräu awlaw ehlei. Äi äng ha ulung luih ah bala ani ta nawu tih a laweiyah awlaw laweyeih khiyang tih khäla ha nga awlaw yumtih sawng känäng thoh al. Khetsu phawu o, pawyah saw pawt tämah pak awpawi saw lawm dä täm. Bi pawi bitih che Hnadaga khrawng awlaw ula pawyah saw bi äm, ani la che Hnadaga a hmu ah. Ükütla ni Dimiti pawi saw be ini hawu, Hnadaga käh ihisaw la bang hawu. Keinih ha ani pawi saw be kini hawu tun. Nang che naw hmawt khäh, keinih i kini hawu äm äi ihi khäh. Nanga awbawng kheu kini yokaih saw mäi hüt khäh, äini kolom si äng kei nanga kini yo do khiyang nga. Nanga alanda kini hmuh lah khäh ai ting kakhah nei khäh. Äi khaw a hmawi mawh khiyang i hni kräuvei hnängai. Nang äng jelkhiyamsa lo seh. Niya käh nang phäu khälla nanga anang khäh ei khäh. Äi ya käh phäu khäl hang hanga ni awhngaw awhngaw chi khätei bäi. Kei Yĕsu Krito käh hngasaw la Yakub käh nawu Yuda. Paw Hnadaga la ukhäla bekei äm awlaw khet nawk äm awlaw Yĕsu Krito la ukhäla chetchaw bala tawk äm, anih khäka kei ni chaw koyok tun. Hnadaga la nangnih a jen, jelkhiyamsa awlaw ekhet anang pek seh. Khanbawn khälo, ngulai känäng ini bünei saw khiyawt tara be nangnih khäka mawmawt koyokaih khiyang hüt. Äichaw a, Hnadaga la Ani khrawng khäla sawkbrat peksaw uyuma ka chula nini tawkeyeih saw koong, kei yok ni koyokaih lah saw awlaw hawu ni kawhawuvaih lah saw. Ni hlü khäh, iyaäm nangnih dukäng ini mik sawuvei tih khrawng khäl umuchaw äng ini vawng däk. Äi khälla nangnih dukäng bälei ula Hnadaga käh khetjen ini krawnal däk. Ni huih nangkei käh Boi Yĕsu Krito a, Hnadaga chaw ting laweiyah tih khrawng khälla dam ini büneyeih saw kheu che, ayang bang kiyam äng yoei bala mäi däk. Nangnih ni khäl mawmawt chaw nini hmawt khäh. Äi khäl kei nangnih lung äng kaw khawi yeih khiyang, Aigup pre känäng Isawlael saw khäla hlät hmueiyal pänäng ukhälla yumei hüt u äm, Boi la anih a akhrah chak. Awlaw anih käh dogo la ala hlät ula chetal tih hawn natchaw khäl kheu ha nini lung äng khaweiyal khäl. Äpäih saw hnüp täh tara koong Hnadaga la anih a sawkak uhiyung äng khon bala tawk khäh. Sawdom, Gomola awlaw anih ken setsei khrawng kheni anih huih ini mik sawuvei, mawmawt hngat la hngat äng chawgraw bi kheni ini bi hüt. Hnadaga la äi khrawng khälla hmat la huih sawkbrat choi bala mäitih mei äng khrawk. Äi huih kawchawng chawng ni khrawng khälla i huih ini mawng nawk äm, äi huih mäichoh al ula ini kantha ini khrah eiyal. Anih la Hnadaga käh dogo a lawei u. Awlaw hawn natchaw khäla ini keleih. Mosi käh yok ula lawkeyeih saw äm ting hawn natchaw gong Mikhayel la Mannat ihni chok chakei khaw a bang, Mikhael la Mannata iha keleih saw kheu huih ta bawp hütah. Äini “Boi la nanga dam ini pekai ting dä taksaw.” Äini ni choktih lupsongeitih khälla hmawt usaw dogo a ini keleih. Awlaw anih la täk ting ini lung äng kawisaw huih ni iha tawktiya pak ämäk huih ini puma ini khrah ei. Äi khrawng khäl che ihuih ini lumchawl se saw äm! Anih Koin käh lawm äng ini chetei. Awmawn ini lawphah saw koong Balam huih pawyah saw lawm pawtäng ini chet. Awlaw Kohor huih dogo mawh a khawm ula ini krak. Nangnih utu la nini eiok khaw a ni khrawng khäl che obo huih dä. Anih la ini pum käh jiji dä ini sotei awlaw ini eiok khaw a hiyawh ei naw sese a ini poh ei. Ni khäl che khri la losaw kho aw aih hiyahtih khohiung huih. Awlaw anih che ethei khina theyah saw koong phuk hmueiyal tih thing huih. Tua anih phuk hmueiyal ula ini düal chak däk. Anih che khri len lo khaw a mret äng läng thou saw huih. Anih käh pawyah saw bi khäl ha läng äng käh owon huih pouvei. Ni khäl che lalayei bala mäitih asĕ huih. Hnadaga la anih koong sawkbrat ni uthuk la uhiyung ala poh bala tawk khäh. Inok che Adam chen äng nombor seh äng käh kraw. Ani la ayang bang ni huih hawu hüt khäh, “So, Boi la Ani käh thong thong asanh chang natchaw khäl äng ükütni käh tara bia lotun, awlaw bise bitih la kheu se kräutih khäla epret krawkaih koong Boi lo tun.” Ni huih khrawng khäl sätak ha ini lung luiyah, khrawnga jiji epret ini thawn, awlaw ese lung hlü äng ini mäichoh, ini bawriyei, ini mrataih saw koong khrawnga kheu tui ini hawu pek. Äini khetsu khanbawn khälo, Boi Yĕsu Krito käh täkchah teh hmueitih khälla ini hawu hüt saw kheu khäl nini lung äng khawyei khäl. Anih la nangnih a anang tak hüt, “Äpäih saw khin äng, nangnih a keleyeih tih khäl ini loaih. Anih ese lung hlü huih ini mäichoh aih.” Ni khälla awsawng sawng ini khoih awlaw ini sitha huih ini chetchonei. Anih lung äng Asanh chang Khraw mäyah. Äini khetsu phäu khälo, nangnih nini yuma hnüpak thawka hnüpak nungei sawk khäl. Awlaw Asanh chang Khraw tha äng suh tongei khäl. Hnadaga la anang khet nawk saw hmawtei chula nini puma kaei chula tawei khäl. Päihyah saw sawk nini büneyeih koong nangkei käh Boi Yĕsu Krito käh jen chongei chula mäi khäl. Nangnih dukäng uyum krong äng ütei nawtih khäla jenei khäl. Ngulai mei känäng awhngaw khäla lätal khäl. Ngulai bi äng bang awat tese sea a poeitih khrawng khäl käh wat bang sinaichu. Boi Yĕsu Krito koong wachang kheni, awkhiyawt khrawng pekal tih Hnadaga a nini awpaih saw tawn khäh. Hnadaga la jiji dä nini krueiyeih saw känäng anang mawnalaih hnäng saw. Awlaw Ani käh a wachang hmawi mawh a, nangnih a achang la awpiyaw äng anang tawkalaih saw. Boi Yĕsu Krito äng Hnadaga käh tha, awpiyaw awlaw thayung ayang ihuih mäi äm, tua ha ai huih sawkak ni mäiseh. Amen. Awhmawi mawh äng äthäneyeih saw kheni Yĕsu Krito la awdawn saw khäl ni boih äng oyoei. Yĕsu Krito la ani hngasaw Yohan na alanda thäneyeih saw khäl dawn hnäng hmawna, Hnadaga la Yĕsu a awhawu pek. Yĕsu la ani hngasaw Yohan khäka Ani käh hawn natchaw a teh bala ni khäl awhawupek chak. Hnadaga kheu awlaw Yĕsu Krito la äthäneyeih saw ihisaw dawn saw khäl äng Yohan la sawksi pek. Ni boih äng oyoei saw athak phawt tih, khin tih awlaw hang hang ngeitih khäl che pisih mawh. Iyaäm ni khäl äthäneyeih saw ikhin ekena lo däk. Kei Yohan, Esia pre lekchaw dukäng mäitih yumtih sawng paiseh khäl khäka kei ni chaw koyok tun. Ubang mäi äm, Ubang mäi hütäm awlaw Ubang olo aih saw äm, äi Yĕsu Krito la nangnih a khetjen la jelkhiyamsa anang pek seh. Awlaw Ani käh nawn hmawi mawh a mäitih awkhraw paiseh khälla ha anang pek seh. Yĕsu Krito dä uyumlah mäitih sawksi. Awlaw Ani a dä täkchah Hnadaga la düsaw känäng hen bala thouwal saw. Ani dä luhdül äng käh mawng kheni a khiyup chak tih. Ani la nangkei a khrawng khet nawk awlaw Ani käh thi äng, nangkei a ngulai känäng khrawng khiyawtal. Yĕsu la nangkei ängtu mawng pre hngat poh. Awlaw Ani käh Paw Hnadaga a ini chetchaw aih saw koong nangkei a pujawtih huih khrawng poh. Yĕsu Krito käh wachang la thayung sawkbrat mäiseh! Amen. So, Ani kho hiyung äng olo tun! Äi khaw a hang hang la Ani a ini hmuh ai. Ani a sĕ äng suntih khälla bang ini hmuh ai. Awlaw luhdül äng käh yapsaw kheni Ani koong ini kapai. Ä, ni khäl äthäneyeih saw dä! Amen. Thayung mawh Boi Hnadaga la ni hawu, “Kei dä achah la äphäih saw käthän.” Kei kämäi awlaw Kei kämäi hüt awlaw Kei kolo tun. Kei nangnih käh nawu Yohan. Kei nangnih huih Yĕsu a yumei ngala Hnadaga käh mawng pre krong äng nangnih huih kuluh nawk kuhmuei. Kei Hnadaga kheu kawhiyawk koong, awlaw Yĕsu pawtäng sawksi kothok saw koong epret khrawng khraw ula che, kei a Patmos song pou saw düna tha äng khrawng chih ula khrawng tawk hüt. Boi käh hnüp äng Hnadaga Khraw la kei a üchü bala awtawk. Awlaw kuhnung känäng asam hngat kawyawk. Äi asam che bawh sam huih ähläu. Äi asam la kei a atak, “Nang nuhmuh saw khäl boih hiyol äng yotila taw chak. Äi pänäng Iphis, Simna, Pawrgam, Thuatila, Sardi, Philadelphi awlaw Laidiki, ni paiseh mräh khäl dukäng mäitih yumtih sawng khäl khäka ni hiyol boih san.” Kei ängtu kräutih a kosotaih koong kei kuhnung pawh a kehleh ei ni, ha äng käh simiya tawng dün paiseh äng simiya choisaw kuhmuh. Äi simiya tawng dün khäl laiya khrawng lup pochongaka kuhmuh. Ani la okho täh sawutih wat sawu hngat awat hüt. Awlaw ha äng käh khabaih akang chang äng okhonei hüt. Ani lusawm che ben hmul bok saw huih bok phong phonga bok. Imik che mei huih jawu jawuva ochoi. Ani kho phaw che tho chän la pot chän kri jawjawu saw huih. Awlaw ani sam che tui chu saw sam huih. Ani la set kut äng asĕ paiseh bin bala tawk awlaw awkaw duk känäng phak hnih pawh hattih chimsawu thok. Ani hmawi che kho sou tuna khoni choisaw huih. Ani a kuhmuh ni Ani kho chouwa kei dütih khrawng huih kukru. Äi khaw a set pawh kut kei khrung äng tawei bala kei a atak, “Ke ei ti! Kei dä chah tih awlaw phäih tih.” Kei dä sawk mawh! Kei küdü hüt. Äini so e! Kei tua sawkbrat koong kehengal. Düsaw la dütih ini mäidün käpängaih saw thayung kawtawkei. Äihi nang nuhmuh saw khäl awlaw äthänei tun saw nuhmuh saw khäl yotila taw. Awlaw awmaw äng äthäneyeih saw khäl ha yotila taw bäi. Kei set pawh kutäng kibin saw asĕ paiseh nuhmuh. Awlaw ha äng käh paiseh simiya tawk dün nuhmuh. Kei nanga uthupei saw kheu khäl tua kanang takaih. Äi asĕ paiseh nuhmuh saw che yumtih sawng paiseh khäl äng käh hawn natchaw khäl äng chut hmuei. Awlaw simiya tawng dün paiseh nuhmuh saw che yumtih sawng paiseh äng chut hmuei saw. Awlaw äi khrawng la Iphis a käh yumtih sawng khäl käh hawn natchaw khäl khäka chaw yoe ting kei a atak. “Set pawh kutäng asĕ paiseh sin tih awlaw ha äng käh paiseh simiya tawng dün lai äng chetei tih la ni kheu hawu.” “Nangnih käh bi kawi khäl tha pochula nini bisaw awlaw nini chunei saw khäl kei kawhmawt khäh. Bise bitih khäla nangnih lawyei chu. Awlaw teh hmueitih hiyah pak teh hmueitih ting khawmeitih khäla ha ini hlei ting mawn nini bün. Kei kaw hmawt khäh nangnih nini chunei hnäng awlaw kei ming koong nangnih thasa dukhah nini khawm, awlaw Kei a anang yumei saw dümal chu.” Äini nangnih ming äng kätängeyeih saw mäi khäh. Täkchah anang khet nawk saw huih tua ekhet nawti chu. Äi koong tawk chawm khäl, ihiyawh ühlüng känäng enema nini komal saw äm! Ngulai känäng nini lung hleyeyal khäl awlaw täkchah nini bi hütsaw khäl bi al tü khäl. Ngulai känäng dä nini lung hleyeyal chu khaw, nangnih khäka lo ngala yumtih sawng khäl duk känäng nangnih käh simiya tawng dün ala känäng kahlayalai. Äini nangnih a ni kiyangh pawi mäi khäh. Kei Nikolai khäl käh bi kawi khäl kumum saw huih nangnih ha nini mum khäh. “Awkhraw la yumtih sawng khäla i taksaw äm, awhnaw mäitih la khin seh u. U ong äm, anih a Kei Hnadaga käh khang känäng sawk mawh thing äng käh theih keei sawkai.” Simna mräh a käh yumtih sawng khäl käh hawn natchaw khäka chaw yo. Ni chaw che chah tih la phäih tih känäng san hmuei. Ani che üdü hüt awlaw düsaw känäng othouwal. Ani la ni kheu hawu, “Nangnih dukhah nini khawm saw la nini sanglai saw Kei kawhmawt khäh! Äini nangnih lälä mäichawtih dä! Nangnih ming äng khrawng khälla ese ini kräu saw ha Kei kawhmawt khäh. Äi khrawng khälla Yudi ting ini hawuvei äini anih kawchawng chawng Yudi hi u. Awlaw bang Mannat sawng äng käh khrawng dä. Nangnih dukhah nini khawmaih lah saw koong ke ei chu. Khin khäl, Mannat la nangnih anang chawmaih koong khrawng khälla hngat pai hnih a thong ima anang heng nawkaih saw dä. Awlaw kho hnüp ha täh dukhah nini khawmaih lah saw. Nangnih nini dü aih thän uyumlah mäi khäl. Äihi nangnih nini ong saw äng käh phiyaw phoih huih sawk kanang pekai.” Awkhraw la yumtih sawng khäla i tak tun saw äm, awhnawh mäitih khälla äi khin seh u. Ubang ong äm anih a kräng hnih dü aih saw la khrak hnäng ti hnawh. Pawrgam mräh a käh yumtih sawng khäl käh hawn natchaw khäka chaw yo, “Prak hnih pawh hattih chimsawu sinei tih la ni kheu hawu.” “Nangnih nini mäidün laa, Mannat käh nawn mäi saw Kei kawhmawt khäh. Äithän nangnih Kei khäka uyumlah nini mäi khäh. Antipas ting mingei nawtih Kei käh sawksi hngat tuk hmuei khaw a bang, nangnih nini yum khrah ei chu.” Äithän ha nangnih ming äng kätängeyeih saw mäi khäh. Nangnih dukäng hngat pai hnih la Balam la chok saw lawm nini täm. Isawlael khälla ulupchaw hmawi mawh a ini hlusaw saw khäl ei ula, awlaw ini mik sawuvei ula, ngulai lawm pawta chet hmawna Balak ting mingei nawtih mawnga äi Balam la ochok hüt. Äi huih nangnih dukäng awbawng khrawng la Nikolai khäl käh chok hawu nini täm. Äi koong tua nangnih ngulai känäng nini lung hleyeyal khäl! Nangnih dä nini lung hleyeyal chu khaw che, nangnih khäka Kei alanda kolo ai awlaw Kei kaw äng käh chimsawu äng anih äng jal kätäkai. Asanh chang Khraw la yumtih sawng khäla i takäm awhnaw mäitih la khin seh. “Ong tih a che thupei saw manna känäng manna bitchaw kepekai awlaw lung bok hngat chi hang hanga kepekai. Äi lung bok äng atha ming hngat yoei chän mäi saw hngat la ha hmawt u, äini äi lung bünei tih la dä ini hmawtaih saw. “Thuatila mräh a käh yumtih sawng khäl käh hawn natchaw khäl khäka ni chaw yo. “Ni chaw che Hnadaga käh Chaw känäng. Ani mik che mei huih awlaw okho che liuh liuh a dawng tih kri huih.” Ani la ni kheu hawu, “Nangnih käh bi, nangnih käh khet, nangnih käh yumphoih, nangnih käh chetchaw, awlaw nangnih käh chunei khrang Kei kawhmawt khäh. Kei äi sidawng ha kawhmawt khäh, täkchah nini bisaw bi pawi khäl thawka tua nangnih awbawng bi pawi nini bi khäh.” Äithän ha nangnih ming äng kätängaih saw kheu khäl mäi khäh. Nangnih Jejebel ting mingei nawtih hmutaw a isitha huih nini mäi sawk. Ani la upuma Hnadaga sidawng hiyawktih ting awhawuvei. Ani la Kei khrawng khäla hiyah saw lawm pawta ichih tun. Ani la Kei khrawng khäla imik ini sawuveyeih saw, awlaw lupchaw khäka ini hlusaw saw khäl ini eyeih saw atak. Kei ani a ulung hleyeyalaih koong ikhin kepek hüt, äini ani imik sawuvei saw koong ulung hleyeyal do ah. Äihi ani a Kei lawga äng kawkhrawkai awlaw ani äng imik sawuvei tih khälla ini lung hleyeyal ukhaw, anih a thasa dukhah äng kawkhrawkai. Kei ani a tämtih khäla kutukai, äihi Kei khrawng khäl käh lung la tawk kawhmawt khäh ting yumtih sawng khälla ini hmawtai. Nangnih nini bi kawi saw huih nangnih a awkhawh kanang pekalai. “Äi hiyah saw chok hawu laweiyah tih awlaw Mannat käh uthuk chok hawu khäl hmawtah tih, Thuatila a käh awvawng khrawng khälo, nangnih a kanang tak, nangnih lukhrunga iha bi jeh kanang awp ti hnawh nga. Nangnih a i aw mäi äm, Kei lo al nga saw sawgraw äi khäl chetchet mawn chula che tawei khäl. Awlaw u ong äm awlaw uyumak Kei sitha huih ämäichoh äm, ani a Kei yapsaw khäl khruäng käpäng sawkai. Äihi ani la thi pum äng anih a tara biyei. Awlaw dek vawn okoisaw huih ani la anih a khoih yal chakai. Awlaw ong tih a Kei akhonäng käh asĕ ha kepekai. Asanh chang Khraw la yumtih sawng khäla awhawu peksaw khäl awhnaw mäitih la khin seh.” Sardi mräh a käh yumtih sawng khäl käh hawn natchaw khäka ni chaw yo. “Hnadaga käh awkhraw paiseh awlaw asĕ paiseh tawyei tih la ni kheu hawu. Nangnih käh bi kawi khäl Kei kaw hmawt chak khäh. Khrawng khäl khäka awkhraw lawm äng nini heng khäh ting nini ming mäi thän, awkhraw lawm äng nangnih nini dü khäh! Äi koong nangnih khak khäl. Awkhraw lawm äng nangnih dü khawngah nangnih a bitchaw mäipe saw tha thouhweyal khäl. Iyaäm nangnih nini phäih däksaw bi Hnadaga mik äng che päih hawmah. Äi koong nangnih ibang nini chok nawk äm awlaw ibang nini yawkäm äi khäl nini lung äng tawei bäichu awlaw ngei bäichu. Awlaw ngulai känäng nini lung hleyeyal bäichu. Nangnih dä khak chu khaw, Kei täk ting sukhä huih nangnih khäka kolo ai. Kei itih täh äng kolo aih saw äm äi nangnih hmawt chu. Äini Sardi ting mingei nawti a laa nangnih käh khrawng hngat pai hnih la awat cha sanh sanh ini tawkei. Nangnih awat bok wat chula Kei ängtu nini cheteyei. Iyaäm nangnih äi koong nini tawn. Äi lup wat bok che ong tih la dä awataih saw. Anih ming sawk mawh boih hiyol känäng krängak ha potal hnawh nga. Kei Paw la Ani käh hawn natchaw khäl hmawi mawh a anih che Kei käh khrawng ting kawhawuvai.” “Asanh chang Khraw la yumtih sawng khäla i taktun saw äm awhnaw mäitih la khin seh!” Philadelphi mräh a käh yumtih sawng khäl käh hawn natchaw khäl khäka chaw yo. “Ni sidawng che asanh chang tih la ihi tih känäng. Dawut mawng khäka mäi hüt saw awi hong dün Ani khäka mäi. Ani la tangkhowah hong khaw, hngat la ha kha al hnäng u. Awlaw akhah al khaw hngat la ha hongal hnäng u. Kei nangnih käh üküt bi ni kawhmawt chak khäh. Kei kawhmawt khäh nangnih a thayung bitchaw dä mäi saw. Nangnih Kei käh chok hawu nini täm awlaw Kei khäka yum phoih mawh nini thänei. Kei nangnih hmawi mawh a tangkhowah hngat hong ngala kawtawk, äi tangkhowah hngat la ha kha al hnäng hnawh u. Khin khäl! Mannat sawng äng käh khrawng khälla Yudi yapsaw hiyapak ha Yudi yapsaw ting ini hawuvei, anih a Kei nangnih khochouwa lo ngala che nangnih a kanang khäh sawkai. Awlaw Kei nangnih a kanang khet nawk khäh ting anih a kawhmawt sawkai. Iyaäm kei ana kanang pek saw khäl nangnih chunei chula nini ngei. Ai koong ni luhdül äng käh khrawng khäla chawmaih koong phi olo tun saw kheni känäng kanang ka ai. Kei alanda kolo tun. Nangnih nini ong saw äng käh phiyaw phoih hngat la ha lawei hnängah pak, nangnih a mäi saw khäl mawmawt chaw tawei khäl. Ong tih khäla Kei käh Hnadaga im äng käh täng khäla kopoh ai. Awlaw anih äi Hnadaga im känäng krängak ha apranga chet hnawh u. Anih khrung äng Kei käh Hnadaga ming la Hnadaga käh mräh ming koyokai. Äi mräh che Yĕlusalem tha. Äi mräh che Hnadaga käh hawn pre känäng okomaih saw. Kei ming tha ha äi khrung äng koyokai.” “Asanh chang Khraw la yumtih sawng khäla hawu pek saw khäl awhnaw mäitih la khin seh.” Laidiki mräh a käh yumtih sawng khäl käh hawn natchaw khäka ni chaw yo. “Ni chaw che ihisaw kräutih känäng käh. Ani che yumphoih mawh awlaw ihisaw sawksi thoktih. Ani che Hnadaga la bisaw khäl kheni äng käh ochou. Nangnih nini bikawi saw khäl Kei kawhmawt khäh. Kei kawhmawt khäh nangnih jel ha jel chu, leng ha leng chu. Nangnih ejel hiyah thän eleng nini thänei khaw pawyei hü. Äini nangnih jel ha jel chu, leng ha leng chu. Äi koong Kei nangnih a chilh tui huih kawkaw känäng kanang soh a lai. Nangnih nini hawuvei, ‘Kei mäichawtih, kei kähkän kuchungei, kei iha lainga.’ Äini nangnih hmawtei naw chu, nangnih dä dukhah äng mäitih, jen phoih, sanglai tih khäl, imik mütih awlaw ikil mäitih khäl. Kei nangnih a hngat kanang chokaih, khrawng len nini thäneyeih koong nangnih Kei känäng ha chet hleyei khäl. Nangnih ikil nini mäi saw hiyawkeyah pak Kei känäng awat bok hngat hleyei khäl. Awlaw nini mik äng mawmawt chaw nini hmueyeih koong mik to ha hleyei khäl. Kekhet nawksaw khrawng khäla Kei kophroh ngal awlaw dam kepek. Ngulai känäng nini lung nini hleyeyalaih koong lawpha khäl. Khin khäl! Kei tangkhowah a ja ngala kekhek tun. Läsulapei Kei sam yaw bala sät ohong pek hi, Kei ani ima kawvawngai, ani ängtu keei okai awlaw ani la ha Kei ängtu ei okai.” “Kei ong ngala Paw ängtu nawn äng koom saw huih, ongtih khrawng khäla ha Kei ängtu nawn äng koom sawkai. Asanh chang Khraw la yumtih sawng khäla hawu pek saw khäl awhnawh mäitih la khin seh.” Äi pänäng kakraiya tangkhowah hngat hongei saw kuhmuh ni hawn pre hngat kuhmuh. Bawh sam huih kei äng ayang kräu hüttih la kei a atak, “Kawi tila niya lo. Ni khäl pänäng i aw thän ni thäneyeih saw äm äi khäl Kei kini dawnaih.” Äi äng tutu Asanh chang Khraw äng luih ngala hawn pre a nawn len hngat kuhmuh. Äi nawn len äng pochongak om bala mäi saw kuhmuh. Ani hmawi che jawjawu tih lung heng ching huih awlaw jawjawu tih lung sen huih. Nawn len patchih äng daga hawm huih mäi hüt. Äi daga hawm che jawjawu tih lung heng ching huih mäi hüt. Äi nawn len patchih äng awlaw kul gala pai hli nawn mäi hüt. Äi nawn khäl äng kul gala pochong hli gongsong om ula che ini mäi hüt. Anih kheni la awat bok wat ula che ini mäi hüt awlaw ini luki äng ha äng käh mawng tokkiya mäi hüt. Äi nawn len känäng khaih khra, keh seh saw sam awlaw hum meng saw sam thawng. Awlaw äi nawn len hmawi mawh a meisong paiseh ochoi hüt. Äi meisong paiseh che Hnadaga käh äi awkhraw paiseh huih. Awlaw äi nawn len hmawi mawh a sanh sanh dawng saw yap hmrang äng käh mret hngat mäi hüt. Äi nawn len uhnung la awmaw awlaw awpawng bing beng äng awsawk mawh pai hli ini mäi hüt. Äi sawk mawh khäl ini hmawi mawh pawh la ini hnung pawh che imik äng ini luih chak hüt. Nombor ak sawk mawh che khangsi huih louhwei hüt, nombor hnih sawk mawh che sel heupaw huih louhwei hüt, nombor thum sawk mawh käh hmawi che khrawng hmawi huih louhwei hüt, nombor hli sawk mawh che paitih hmulawng huih louhwei hüt. Äi sawk mawh pai hli a ni akhra pai sok chi mäi hüt. Äi sawk mawh khäl käh khra khäl uduk la aprang ini mik äng luih hüt. Anih la dümah pak ühnüp awyawn ni kheu ini hawu, “Thayung mawh Boi Hnadaga che asanh chang, asanh chang, asanh chang, Ani che ämäi hüt, Ani che ämäi khäh, Ani che olo tun.” Äi nawn len khrung äng omtih awlaw sawkbrat mäitih a, äi sawk mawh pai hli la a wachang, hmawi awlaw äkiyä pek ula ini awi. Anih la itih a äi huih ini awi äm, äi khaw a äi kul gala pochong hli gongsong dek äng bok ula che äi nawn len äng omtih a ini khäh, awlaw sawkbrat mäitih a ini rosi. Anih la ini pum käh mawng tokkiya nawn len hmawi mawh a taw ula che ini hawu, “Keinih käh Boi Hnadaga! ‘Nang che a wachang, hmawi awlaw thayung nübünei tawn khäh. Iyaäm Nang dä ükütni bi chak tih, Nang sitha äng dä ükütni a sawk kantha pek hmuei saw.’” Kei nawn len khrung äng omtih käh set kutäng boih hiyol hngat kuhmuh. Äi boih hiyol uduk la aprang che oyoei saw äng luih chak awlaw hmrang kräng seh bop ula che kha ula ini tawk. Awlaw tha mawh hawn natchaw hngat la athak hek bala che awhawu tunsaw kuhmuh. Äi hawn natchaw la hawu, “Ni hmrang ini bopsaw khoi bala che boih hiyol hongaih hnäng tih u tawnäm?” Äini hawn pre la luhdül äng awlaw dütih khäl ini mäidüna käh hngat la ha äi boih hiyol hong hnäng u. Awlaw udukäng i mäi äm hmawt tih hngat ha mäi hüt u. Äi boih hiyol hongaih tih la udukäng mäi saw so aih tih tawntih khrawng hngata ha bün u saw kuhmuh ni thasa kakap. Äiche äi gongsong khäl äng käh pochongak la kei a atak, “Nang kapai ti. So e! Ani Yuda yapsaw känäng käh khangsi awlaw Dawut käh chen. Ani oong däk. Ani la dä hmrang kräng seh ini bop saw khoi bala boih hiyol hongaih hnäng saw.” Äidä nawn hmawi mawh a käh sawk mawh pai hli khäl äng awlaw gongsong khäl äng Samphomah chaw alaiya ja bala mäi saw kuhmuh. Äi Samphomah chaw che tuk hmuei hüt däktih huih louhwei. Ani a iki paiseh awlaw imik paiseh ämäi hüt. Äi imik khäl che Hnadaga käh awkhraw paiseh. Ni khraw khäla luhdül äng käh hang hang la a teh hmuei. Äi pänäng äi Samphomah chaw lo bala che nawn khrung äng omtih set pawt kut känäng äi boih hiyol lawkei. Äi Samphomah chaw la boih hiyol lawkei ni, äi sawk mawh pai hli awlaw kul gala pochong hli gongsong khälla bok ula che Ani a ini khäh. Ükütni kutäng chong la ha khok äng otih vawn mäi hüt. Äi ootih vawn che Hnadaga khrawng khäl käh suh tong huih. Anih awi tha hngat ini awi, “Nang äi boih hiyol nawlawkeyeih saw la hmrang ini bop saw nohongaih saw nawtawn. Iyaäm Nanga luhchaw la anang tuk hüt, awlaw nang thi äng üküt yapsaw khäla, yapyap ebe äng kräutih khäla, ayapyap khrawng khäla, awlaw ayapyap presaw khäla Hnadaga koong nehlehyei. Hnadaga a ini rosiyeih koong Nang äi khrawng khäla pujawtih a nopoh. Luhdül äng anih la dä ini khiyupaih saw.” Äi pänäng kei kosot, äi nawn len la sawk mawh khäl awlaw gongsong khäl patchih äng awbawng hawn natchaw khäl käh sam kawyawk. Äi hawn natchaw khäl othong dämäng ini mäi hüt. Anih la ini tha mäiyak ni awi ini awi hüt. “Äi tuk hmueitih samphomah chaw la thayung, kähkän, engen, tha, hmawi, a wachang, awlaw awpiyaw übüneyeih saw tawn!” Äi pänäng hawn pre äng, luhdül äng, dütih khrawng ini mäidün la känäng, mret äng awlaw Hnadaga la bi chaksaw sawk mawh khäl känäng ni awi ini awi saw kawyawk hüt, “Nawn khrung äng omtih awlaw Samphomah chaw che awpiyaw, hmawi, a wachang la thayung äng sawkbrat mäiseh.” Äi sawk mawh pochong hli la ini hawu, “Amen!” Äi pänäng äi gongsong khälla ini luki hnemei ula Samphomah chaw a ini khäh awlaw ini rosi. Samphomah chaw la äi hmrang ini bopsaw nombor seh äng käh nombor ak ohong ni, kei äi sawk mawh pai hli äng käh hngata kuhmuh. Äi käh sam la hum meng saw huih athak hawu, “Lo!” Äi pänäng kei hmawi mawh a se bok hngat kuhmuh. Äi se khrung äng omtih kut äng thawl hngat mäi hüt. Ani a mawng tokkiya hngat pek hmuyei. Ani jal äng ong tih huih o ong hlänga chetaih saw koong othok. Äiche Samphomah chaw la hmrang ini bopsaw nombor hnih ohong ni, kei äi sawk mawh pai hli äng käh nombor hnih la hawu saw kawyawk, “Lo!” Äi khaw a mei huih sentih se hngat thok bala olosaw kuhmuh. Khrawng khäl hngat la hngata tuei hmawna äi se khrung äng omtih a luhdül äng jal thouhwaih saw thayung pek hmuei. Ani a awlaw chimsawu len hngat pek hmuei. Samphomah chaw la hmrang ini bopsaw nombor thum ohong ni, äi sawk mawh khäl äng käh nombor thum la hawu, “Lo!” Äiche kei hmawi mawh a se hom hngat ja bala mäi saw kuhmuh. Äi se khrung äng omtih kutäng vawn tündün set hngat mäi hüt. Äi pänäng äi sawk mawh pai hli lai känäng asam hngat kawyawk. Äi asam la hawu, “Ahnga hngat la hnüpak äng gom setak ‘hiyah thän’ püm set thum awkhawh huih bünei. Äini olip si la alak khrakai chu!” Äiche Samphomah chaw la hmrang ini bopsaw nombor hli ohong ni, äi sawk mawh äng käh nombor hli la hawu saw kawyawk, “Lo!” Äiche, bel cha saw long huih louhwei tih se hngat kei hmawi mawh a ja saw kuhmuh. Äi se khrung äng omtih ming che “Dütih.” Ani hnung pawtäng dä dütih ini mäidün la mäi saw. Luhdül äng käh phüh hli äng käh phüh ak khrawng khäla jal äng, ekensaw äng, lawga äng tukaih saw dütih khäla thayung pek hmuei. Awlaw nget tih philu äng tukaih saw thayung ha pek hmueiyei. Äiche Samphomah chaw la hmrang ini bopsaw nombor hngaw ohong ni, ini hlu dün la dawnga tuk hmueitih khäl käh khraw khäla kuhmuh. Anih la Hnadaga kheu ini hiyawk hüt awlaw sawksi ini thoksaw äng yumphoih ini tawkei hüt. Anih atak hek ula che ini hawu, “Asanh chang la ihitih tha mawh Boi o! Ni luhdül äng käh khrawng khäla tara bi a awlaw keinih a khrawng tu tih khäla dam nepekaih koong Nang nolo alaih saw i hiyawh ikhin nawlawkeiyeih saw äm?” Anih kheni la awat sawu boktih hngat chi ini bünei. Hnadaga la uaw tuk ini hmueiyeih saw äm äi hmawt khäh. Äi khrawng khäl tuk hmuei u saw sawgraw, anih a tana kra chaw ini chongaih saw tak hmuei. Äiche äi Samphomah chaw la hmrang ini bopsaw nombor sok ohong saw kuhmuh. Äi khaw a liuh len lo. Khoni che awyawn huih hiyung tutu a äthänei awlaw khraw che thi huih sen kihkih a äthänei. Khri thasa lo khaw a, khĕu thing känäng khĕu theih heng uyut saw huih, hawn känäng asĕ khäl luhdül äng ini kraw. Boih hiyol hiyoleyal saw huih, hawn ha hiyoleyal. Awlaw khuyung khäl kheni awlaw song khawi saw khäl kheni, ala känäng hlai hmuei. Awlaw luhdül äng käh mawng khäl, pängtih khäl, soloi khäl käh lenchaw khäl, mäichawtih khäl, thayung mawh khäl okho dukäng awlaw khuyung khruäng käh lung khäl äng ana wingei. Awlaw ahngasaw la ini sitha äng mäitih khrawng khäl kheni ha okho dukäng awlaw khuyung khruäng käh lung khäl äng ana wingei. Anih la khuyung khäl awlaw lung khäla ini tak, “Keinih khrung äng kraw tila äi nawn khrung äng omtih la Samphomah chaw käh man känäng keinih a khrawng thup! Iyaäm ahnih ihni man pok saw khomhnüp lo däk. Äi khomhnüp che mawt keh se. Äi dukhah ula khawmeyeih hnäng saw äm?” Äi pänäng kei kuhmuh, hawn natchaw pochong hli luhdül kiu hli a ja ula che ini mäi saw. Anih la luhdül i kiu kiu hli a ja ula khri ka ula ini tawk. Iyaäm luhdül a, mret a, thing khäla khri la ho hnängah pak. Äiche, awlaw hngat hawn natchaw a hnithoh känäng olo saw kuhmuh. Ani kutäng sawk mawh Hnadaga käh hmrang ini bop dün mäi hüt. Hnadaga la hawn natchaw pochong hli a luhdül la mret ini khrah aih saw thayung pek hüt. Äi hawn natchaw la äi pai hli hawn natchaw khäla athak hek bala che tak, “Nangkei Hnadaga käh ahngasaw khäl lumchawl äng hmrang bop ngala hmat nga saw sawgraw luhdül, mret, awlaw thing khäl khrakai chu.” Äi pänäng pochong hiyawh lumchawl äng hmrang bop hmuei äm, äi sidawng kawyawk. Anih che khra ak gala othong hligip gala thong hli ini mäi hüt. Äi khrawng khäl che Isawlael käh pochong lei hnih chen känäng, thong lei hnih chi helh ini hmuei. Äi chen khäl che Yuda chen, Ruben chen, Gad chen, Aser chen, Naptali chen, Manasi chen. Simiyon chen, Lebi chen, Isakhar chen. Jabulun chen, Yosep chen, Binnamin chen. Äi pänäng hngat la ha süp hnängaih u saw hiyawh khrawng kuhmu. Äi khrawng khäl che ayapyap saw, ayapyap chen, ayapyap presaw awlaw ayapyap be äng kräutih. Äi khrawng kheni äi nawn len la Samphomah chaw hmawi mawh a lo ula ini ja. Anih la awat sawu boktih ini wat awlaw ini kut äng khajorot bak mäi hüt. Anih kheni la hek ula che ini hawu, “Äi nawn khrung äng omtih nangkei käh Hnadaga la Samphomah chaw la dä nangkei a khrawng khiyawtal saw.” Äi hawn natchaw khälla nawn khäla, gongsong khäla awlaw sawk mawh pai hli a wanchak ula che ini ja hüt. Äiya mäitih hawn natchaw khäl, gongsong khäl awlaw sawk mawh pai hli khäl kheni nawn len hmawi mawh a kun ula Hnadaga a ini khäh awlaw ini rosi. Anih la ini hawu, “Amen! Awpiyaw, a wachang, ngen, äkiyä, hmawi, dogo awlaw thayung sawkbrat ni nangkei Hnadaga käh thänei seh! Amen!” Äi pänäng äi gongsong khäl äng käh pochongak la kei a ihi, “Awat sawu boktih khrawng khäl che u khäl äm, awlaw mawng la känäng anih ini losaw äm?” Ani a kei katak, “Sara o! Kei hmawt nga, nang dä nawhmawt saw.” Ani la kei a atak, “Äi khrawng khälla thasa kuluh nawk hmuei ula che ini losaw. Anih la Samphomah chaw käh thi äng ini pum käh wat botei ula che sanh sanh ini poh ei. Äi koong Hnadaga käh nawn len hmawi mawh a anih ja ula che ini mäisaw. Awlaw Hnadaga ima ühnüp, awyawn Hnadaga a ini chetchaw saw. Nawn len khrung äng omtih la anih a aka ai. Anih krängak ha düei ti hnawh u, hal ha halei ti hnawh u, khoni leng saw ‘hiyah thän’ khih ei ti saw eleng khäl, anih la eleng piyei ti hnawh u. Iyaäm nawn lai äng omtih Samphomah chaw che anih käh samphomah kiyongtih thäneyei. Awlaw sawk mawh tui phul düna Ani la ichih ei. Anih käh mik khri kheni Hnadaga la pot pekai.” Äidä Samphomah chaw la hmrang ini bopsaw nombor seh ohong ni, hawn pre gonda khoi bawng dikdik mäi. Äi pänäng hawn natchaw pochong seh Hnadaga hmawi mawh ja ula ini mäi saw kuhmuh. Anih a hngata hngat chi bawh paiseh pek hmuei. Äiche hawn natchaw awlaw hngat lo bala ini hlu dün la kena aja. Ani kut äng ha äng käh otih vawn choi dün mäi hüt. Ani a ootih meikhu choiyeih koong vawn awbawng pek hmuei. Ani la nawn hmawi mawh a mäi saw ha äng käh hlu dün khrung äng, Hnadaga käh khrawng kheni käh suhtong äng, äi ootih meikhu bälbala che uhlu. Äiche hawn natchaw kutäng käh ootih meikhu ängtu Hnadaga käh khrawng khäl käh suh tong Hnadaga khäka kawi. Äi pänäng hawn natchaw la hlu dün la känäng mei alh law bala che otih vawn choi dün äng hluih bala luhdül äng tong. Äi äng hum meng, keh se saw sam thawng, kraikha lilihwei awlaw liuh lo. Äi khaw a äi hawn natchaw pochong seh la bawh paiseh ini tumaih koong ächän ini mäi. Nombor ak mawh hawn natchaw la bawh utum ni, thi bälei saw jelh la mei luhdül äng kraw. Äi äng luhdül äng phüh thum äng käh phüh ak mei kopei. Awlaw phüh thum äng käh phüh ak thing la bel heng ching kheni oo chak. Nombor hnih mawh hawn natchaw la bawh utum ni, choitih khuyung len huih hngat mret äng tong hmuyei. Äi äng phüh thum äng käh phüh ak mret tui thi a äthänei. Mret äng käh phüh thum äng käh phüh ak sawk mawh khäl kheni ini düchak. Awlaw phüh thum äng käh phüh ak tuisampho akrak chak. Äi pänäng nombor thum mawh hawn natchaw la bawh utum ni, asĕ len hngat tibbati huih choi pe choi pe hawn känäng luhdül äng käh phüh thum äng käh phüh ak ohlong la tui phul saw khäl khrung äng kraw. Äi äng phüh thum äng käh phüh ak tui awkhaw chak awlaw äi awkhaw saw tui koong awbawng khrawng ini dü. Äi asĕ ming che awkhaw. Äi pänäng nombor hli mawh hawn natchaw la bawh utum ni, phüh thum äng käh phüh ak khoni, khraw la asĕ khäl ini hiyung chak. Phüh thum äng käh phüh ak ühnüp la awyawna käh awa iha mäitiyah. Äi pänäng hmulawng hngat hawn äng payei saw kuhmuh. Äi hmu la athak hek bala che hawu, “Awhngaw hawn natchaw pochong thum la bawh ini tum saw ini chah khaw, luhdül äng mäipe tih khrawng khäl khrung äng phi, phi, phi achah ai.” Äi pänäng nombor hngaw hawn natchaw la bawh tum ni, hawn pre känäng luhdül äng asĕ hngat awkraw saw kuhmuh. Luhdül äng käh thuktih vawm hong hnäng hmawna, äi asĕ a awi hong dün awp hmuei. Äi asĕ la thuktih vawm hong. Äida khawng len känäng mei khu thok saw huih, äi vawm känäng mei khu thok. Äi vawm äng käh mei khu äng khoni la hawn uhiyung chak. Äi mei khu duk känäng khawng khäu pü jakbrat thok ula luhdül äng ini lo. Awlaw äi khawng khäu pü khäla chel awi huih isip pek hmuei. Luhdül äng käh bel, thing awlaw thing chaw khäla khrah aih u saw anih a tak hmuei. Ukhäl lumchawl äng Hnadaga käh hmrang bop hmuei saw hmat la mäyah äm, äi khäla jiji dä akhrah aih saw tak hmuei. Khrawng khäla ini tukaih koong äi khawng khäu pü khäla ana pek hmueiyah. Kho khraw hngaw dä khrawnga thasa dukhah ini pekaih koong äi pü khäla ana pek hmuyei saw. Chel awi la ngawh wei hi ihuih khrawng ini juei äm, äi huih khrawng khäla dukhah thäneyei. Äi khaw a khrawng khäl ini dü aih khiyang thän dü hnäng hnawh u. Khrawng khäl ini dü aih khiyangai äini düsaw khrawng khäl känäng awhlawm hlaw a echenalai. Äi khawng khäu pü khäl che jal koong ächän tawk hmuei saw se huih. Anih luki äng ha äng käh mawng tokkiya huih mäi hüt. Anih hmawi che luhchaw hmawi huih louhwei hüt. Anih lusawm che hmutaw khäl käh lusawm huih sawu, awlaw ini haw che khangsi haw huih. Anih la ini kangchang äng thi äng käh kadong huih ini wat. Awlaw jal se chondün khäl ochon khaw a asam äthänei saw huih, ini khra ha asam thänei hüt. Anih homei äng chel awi käh huih doh dün mäi hüt. Kho khraw hngaw täh khrawnga ini juei sawkaih koong, äi ohomei äng isip mäi hüt. Äi thuktih vawm dukäng khawng khäu pü khäl sokhretih che hawn natchaw. Hibru be äng ani ming che “Abadon,” Grik be äng “Apolyon.” (“Ni kheu nawkrawnal hi “Khraktih” äthänei”). Ni nombor ak kehse saw äpäih. Ni pänäng awlaw pai hnih keh se saw olo tun. Äi pänäng nombor sok hawn natchaw la bawh tum ni, Hnadaga hmawi mawh a ha äng käh ini hlu dün la äng iki pai hli lai känäng asam hngat kawyawk. Äi bawh sam la nombor sok hawn natchaw a tak, “Yuphretis ting ini taksaw ohlong len khäka ukut kho khon ula che ini tawk saw hawn natchaw pochong hli a ahlätal.” Äihi äi hawn natchaw pochong hli a hlät hmueyal. Ni gonda, ni hnüp, ni kho khraw la ni khokumaih phüh, äi hawn natchaw khäla tawk hmuei hüt. Äi hawn natchaw khäla luhdül äng käh phüh thum äng käh phüh ak khrawng khäla ini tukaih koong ächän tawk hmuei. Äiche se chumtih soloi khäl koti hnih ini mäi ting kei kawyawk. Kei kakraya äi se khäl awlaw se khrung äng omtih khäla ni huih kuhmuh. Anih käh kang chang ka dün che mei huih sen, hawn rong huih awlaw chawk däldäl aw awi rong mäi hüt. Se khäl luki che khangsi luki huih mäi hüt. Äi se khäl kaw känäng mei, mei khu awlaw salphar thok hüt. Äi mei, mei khu awlaw salphar thok saw äng luhdül äng käh phüh thum äng käh phüh ak khrawng ini dü. Äi se khäl mongkhok la homei äng naw ini pekaih saw tha ämäi hüt. Anih homei che phol huih mäi hüt. Ni äng dä khrawng khäla naw ini pek chi saw. Äini äi akhrak chak saw äng ha dü ah tih khrawng khälla, ini kut äng ini bisaw lupchaw känäng ini lung hleyeyal u. Anih la awkhrawse a ini rosi saw dümal u. Awlaw ha, kri, sawih, lung awlaw thing äng ini bisaw imik mäyahtih, awhnaw mäyahtih, kräu hnängah tih, chetei hnängah tih lupchaw khäl känäng kakeyal u. Awlaw khrawng ini tuk saw, to ini poh saw, ini mik sawuvei saw, awlaw ini muei saw känäng ini lung hleyeyal u. Äi pänäng tha mawh awlaw hngat hawn natchaw, hawn pre känäng okom saw kuhmuh. Ani käh wat che kho hiyung huih awlaw ani ludäma daga hawm chuh. Ani hmawi che khoni huih awlaw okho che mei dong täng huih. Ani kutäng boih hiyol lekchaw hngat hongei bala ämäi hüt. Ani la set pawt kho che mret khrung äng tawkei awlaw setong pawt kho che dül äng tawkei. Awlaw khangsi huih athak hek. Ani athak hek ni, kräng seh kek kom saw sam la kei a atakal. Äi athak kräng seh kek kom saw huih asam kaw yawk khaw a, asam la hawu saw khäl kei koyokaih khiyang hüt. Äini hawn pre känäng asam hngat la hawu, “Nang yoai ti. Kek sam la ibang hawu äm äi thup tila taw.” Äi pänäng kei hawn natchaw mret khrung la dül khrung äng ja saw kuhmuh. Ani la set pawt kut hawn pawtäng utunei saw. Hawn, dül, mret la sawk mawh kheni bi chak tih sawkbrat mäitih Hnadaga ming äng ni hawn natchaw jeng. Äi hawn natchaw la jeng bala hawu, “Hnadaga la tawk saw khäl äthäneyeih saw äi hiyawh krawti hnawh. Äini nombor seh äng käh hawn natchaw la bawh tum hi, Hnadaga la Ani käh uthupei saw tawk khäl kheni äphäihyei. Hnadaga la Ani käh sidawng pawi hiyawktih hngasaw khäla, hawu pek saw huih äthäneyei.” Äi pänäng hawn pre känäng awlaw asam hngat kei kawyawk tü. Äi asam la kei a atak, “Chet, hawn natchaw kut känäng käh hongeitih boih hiyol lekchaw alaw al. Äi hawn natchaw che mret la dül khrung äng ja bala mäi khäh.” Äi khaw a kei äi hawn natchaw khäka chet ngala äi boih hiyol lekchaw kei a epekalaih saw koong katak. Äidä ani la kei a atak, “Ni laweyal tila eiyal. Nila nang hän anang niei sawkai äini nawkaw a che khoitui huih utui sawkai.” Äi khaw a kei äi hawn natchaw kut känäng äi boih hiyol lekchaw law ngala ke eiyal. Kawkaw la che khoitui huih utui pi äini ke ei pänäng kähän kini ei. Hngat la kei a atak, “Nang awlaw krängak Hnadaga sidawng awbawng khrawng khäka, yapsaw khäka, ayapyap be kräutih khäka, awlaw mawng khäl khäka awhmawi mawh äng käh kheu khäl naw hiyawkaih lah saw.” Äi pänäng kei a kompum huih tündün hngat khrawng pek. Äidä pochongak la atak, “Chet, Hnadaga im la mäksetdava ini hlu dün la atün. Awlaw Yĕlusalema käh Hnadaga ima pochong hiyawh la ini rosi äm, äi khäla asüp. Äini Hnadaga im dülmawh prang tünai ti, iyaäm äi Yudi hiyahtih khäla pek hmuyei däk. Anih la hligip gala khraw hnih äi sanh tih mräh a ini kho äng ini cheh lai. Kei käh pochong hnih sawksi thoktih a dogo kepekai. A hnih la sala bawtta wat häih la hligip gala khraw hnih täh, awhmawi mawh äng käh kheu i hni hiyawkai.” Äi pochong hnih sawksi thoktih che pai hnih olip thing awlaw simiya tawng dün äng käh simiya huih. A hnih che luhdül khiyuptih Boi hmawi mawh a ja häih la i hni mäi. Ula bang äi pochong hnih sawksi thoktih a khrah ai khiyang äm, a hnih kaw känäng mei thok bala anih a chawh chakai. Ula bang a hnih a khrah aih khiyang äm, ni huih ini düaih lah saw. Awhmawi mawh äng käh sidawng i hni hiyawk tuna kho loah pak hawn i hni khah aih saw dogo, a hnih a mäi khäh. A hnih la tui phul saw a thi a i hni poalaih hnäng saw dogo i hni tawkei khäh. Luhdül äng i hni sitha huih leh i hni teh eih saw dogo ha i hni tawkei khäh. Äi pochong hnih sawksi thoktih häih la sawksi i hni thok saw päih hi, thuktih vawm känäng philu hngat kawi bala ahnih äng jal täkeyei. Äidä äi philu la ahnih a hiyum sawk bala utu kalai. A hnih yok äi elensum mräh a käh lawm khrung äng kraw bala mäyei. Ni mräh a che Sawdom la Aigup äng chut hmuei. Ni mräh a dä ahnih käh Boi a ha krut äng thĕh hmuei hüt saw. Äi khaw a presaw duk känäng, yapsaw duk känäng, ayapyap be äng kräutih khäl känäng awlaw chen khäl känäng lotih khrawng khälla hnüp thum gala phawl ahnih yok ini hmuai. Ni khrawng khälla awhngaw khrawng khäla ahnih a phul sawk hnawh u. Ni luhdül äng mäitih khäl ini piyaw ai awlaw ini äjaw ai. Anih hngala hngat phiyaw phoih ini saneyei. Iyaäm ni pochong hnih sidawng hiyawktih koong dukhah äng ini kraw hüt. Äini hnüp thum gala phawl pänäng Hnadaga la ahnih a awsawk khri thawnal. Äi äng ahnih i hni ja al. Äi khaw a ahnih a hmutih khäl kheni mawt ini ke. Äi pänäng äi häih la hawn känäng athak sam hngat la ni hawu saw i hni yawk, “Niya lo hnih!” Äi khaw a ahnih kho hiyung dukäng hawna i hnih kawyal. Awlaw a hnih a sotmaw tih khälla ha hawna ihni kawyal saw ini hmuh. Äi khaw a thasa liu len lo, äi mräh phü ha äng käh phü ak krak chak. Äidä khrawng thong seh ini dü. Khrawng khäl kheni la ke ula hawna käh Hnadaga a awpiyaw ini pek. Äi huih nombor hnih phi känäng ini hlätal. Äini äi pänäng käh phi ha alanda lo tün. Äi pänäng nombor seh hawn natchaw la bawh tum ni, hawn känäng athak sam khälla ni kheu ini hawu, “Luhdül äng käh mawng pre khäl che nangkei käh Hnadaga la Krito käh a thänei däk. Krito la akat kat khiyup bala tawkai.” Äi pänäng Hnadaga hmawi mawh a nanga nang käh nawn äng om chitih kul gala pochong hli gongsong khälla kun ula Hnadaga ini khäh. Anih la ini hawu, “Tha mawh Boi Hnadaga, Nang nämäi awlaw, Nang nämäi hüt. Keinih Nanga äkiyä kanang tawngei. Iyaäm Nang nupum käh tha äng khiyup tila nawtawkaih saw nachah tün. Yumahtih khäl kheni nang khrung äng ini man pok tun, äini tua Nang käh man anih khrung äng kraw aih saw khin thändäk. Dütih khrawng khäl käh tara ni biyeih saw ikhin thändäk. Nang sidawng hiyawktih khäl, Nang käh asanh chang khrawng khäl, Nanga anang rosi chi tih elen la lekchaw khäla phiyaw phoih nepekaih saw ikhin thändäk. Awlaw luhdül khraktih khäla nakhrakaih saw ikhin thändäk.” Äi pänäng hawna käh Hnadaga im sät hongei. Äidä Hnadaga im duka käh thung baksu khrawng khälla ini hmuh. Äi khaw a khaih khra dawng, hum meng, khri la kho lo, awlaw liuh la jelh bo. Äi pänäng hmuphu tisaw hmat la hngat hawna dawng. Äiya hmutaw hngat mäi hüt, ani la khoni a awat huih wat awlaw khraw a che okho phaw kawla tawkei. Ani luki äng asĕ pailei hni äng ini holhsaw mawng tokkiya mäi hüt. Ani upum hlät hütah. Ämäeyeih saw ikhin loni thasa ähän choei saw äng ehek awlaw akap. Äi pänäng hmuphu tisaw awlaw hngat hmat la hawna dawng. Äiche hnaga sen elen hngat. Äi hnaga a uluki paiseh awlaw iki paiha mäi hüt. Awlaw uluki paiseh äng tokkiya paiseh mäi hüt. Ani la ohomei äng hawna käh phüh thum äng käh phüh ak asĕ lat bala luhdül khrung äng tong. Awlaw äi mäeiyeih tih hmutaw ämäyei saw äng tutu awchaw a ei hnäng hmawna, äi hnaga hmutaw kena ja hüt. Äi pänäng äi hmutaw la pawtaw chaw hngat hmuei. Äi awchaw la mawng käh thi kompum äng hang hang yapsaw khäla khiyupai. Äi pawtaw chaw a hnaga känäng hup hmueiyal bala Hnadaga la Ani käh nawn khäka chih hmueiyal. Awlaw äi hmutaw ala honga chen. Äiya Hnadaga la ani koong ala hngat ächän popek bala tawk hüt. Äi düna hawn natchaw la äi hmutaw a hligip gala khraw hnih täh ini chetchaw ai. Äi pänäng hawna jal thou. Mikhayel la pawitih hawn natchaw khäl äi hnaga äng jal ini täkei. Awlaw äi hnaga la ani käh pawyahtih hawn natchaw khälla ha jal ini khawm. Äini hnaga len jal äng hiyum. Äi koong hnaga la ani käh pawyahtih hawn natchaw khäl hawn pre a mäilah ti u. Äi hnaga len la ani käh hawn natchaw khäl hawn pre känäng luhdül äng hiyän hmueiyal. Ni hnaga len che phol. Niya Mannat awlaw khrawse khäl käh mawng ting ini tak. Ani la luhdül äng käh khrawng khäla hiyah saw lawm pawtäng ichih. Äi khaw a kei hawn pre känäng athak sam hngat la hawu saw kawyawk, “Hnadaga käh khiyawt tara lo däk. Ani käh thayung la bi bi däk. Ani käh mawng pre lo däk. Krito a tua dogo mäi däk. Äi koong nangkei käh nube tanawu ming äng ühnüp awyawn Hnadaga hmawi mawh a epret khraw tih a dül äng hiyän hmueyal däk. Samphomah chaw käh thi äng awlaw ihisaw sawksi ini thok saw äng äi hnaga lena ini hiyum sawk. Anih la ini pum sawk süpeyah pak Krito koong ini düaih saw ha ächän ini mäi hüt. Äi koong hawn awlaw hawna mäitih khäl piyaw khäl. Äini luhdül la mret äng thasa dukhah loai. Iyaäm Mannat nangnih khäka kom däk. Ani thasa aman pok khäh, iyaäm ani a ikhin mäitiyah saw ani la hmawtei khäh.” Äi pänäng äi hnaga len la luhdül äng tong hmuei saw hmawtei ni, äi chaw hmueitih hmutaw a tämaih saw chah. Äini äi hmutaw a hmulawng khra len pai hnih pek hmuei. Iyaäm ani pai bala ani mäidün la ala honga chetal hnäng hmawna. Äiya hnaga len mik känäng awhlawm hlaw a kumthum gala phawl mawmawt chaw mäiyei. Äi hmutaw a tui la jän hmawna, hnaga len la awkaw känäng tui thoh ei bala o hlong huih hngat poh. Äini luhdül la äi hmutaw a uku. Luhdül la awkaw hongei bala hnaga känäng thok saw tui kheni ookal chak. Äi khaw a hnaga len äi hmutaw khrung äng thasa aman pok. Äidä hnaga len la äi hmutaw chen dukäng käh Hnadaga a rositih khäl äng awlaw Yĕsu a ngeitih khäl äng jal täkeya chet. Awlaw äi hnaga len mret kawma dechang äng ja bala mäi. Äi pänäng mret känäng philu hngat kawi saw kuhmuh. Ani äng iki paiha awlaw uluki paiseh mäi. Äi iki paiha kheni äng mawng tokkiya mäi hüt. Äi mawng tokkiya kheni äng, Hnadaga a keleyeih saw ayapyap ming yoei bala mäi hüt. Kei kuhmuh saw philu che üdüp mawh toh ui huih dä. Ani kho khäl che hom kho huih awlaw awhmawi che khangsi hmawi huih louhwei hüt. Äi hnaga len la upum käh dogo, nawn awlaw tha äi philu a pek. Äi pänäng äi philu uluki hngat äng üdü hnäng nawkaih saw awnaw saw la mäi saw kuhmuh. Äini äi awnaw saw awpawiyal chak hüt. Äidä luhdül äng käh khrawng maw chak ula philu hnung hnung äng ini chet. Äi philu a hnaga len la dogo pek saw koong khrawng khälla hnaga a ini rosi. Anih la äi philu a ha rosi ula ini hawu, “Ni philu huih awlaw u mäipe äm? Ani äng u jal täkeyeih hnäng saw äm.” Hnadaga a kelehyeih saw koong awlaw awbawrieyeih saw koong äi philu a äkräu hnängaih saw ikhin Hnadaga la pek. Ani hligip gala khraw hnih isi tha huih biyeih hnäng saw koong dogo pek hmuei. Äidä philu la Hnadaga a, Hnadaga minga, Ani mäidün laa, awlaw hawn pre a mäitih khäl kheni a sayeiyeih saw chah. Hnadaga käh sanh tih khrawng khäl äng jal täkei bala ongaih saw dogo ni philu a pek hmuei hüt. Äi äng luhdül äng käh ayapsaw a, presaw a, ayapyap be äng kräutih awlaw khrawng kheni a khiyupaih saw dogo pek hmuei. Luhdül äng mäitih kheni la äi philu a ini rosi. Äini luhdül bi hmuei hüt khawngah tuk hmuei hüttih samphomah chaw käh sawk mawh boih hiyol äng iming mäitih khela rosi hnawh u. U a awhnaw mäi äm, ani la khin seh. Ubang hengei naw aih saw mäi äm, äi hengei naw aih saw dä. Awlaw chimsawu äng u a tuk hmueyeih saw mäi äm, ani a äi chimsawu äng tuk hmuei. Ni kheu äng hawuvaih khiyang saw che, Hnadaga käh sanh tih khrawng khälla kuluh nawk ini hmuei khaw a chunei khrang la uyum ini tawkeyeih lah saw. Äi pänäng kei awlaw hngat philu dül känäng kawi bala losaw kuhmuh. Samphomah chaw huih ani a iki pai hnih mäi hüt. Awlaw ani sam che hnaga sam huih mäi hüt. Täkchah mret känäng kawi tih philu huih ni dül känäng kawi tih philu la ha dogo sumei hüt. Äi dogo äng luhdül äng käh khrawng khäl kheni la, äi naw bünei saw pawiyal hüttih philu a ini rosiyeih koong tha poh hüt. Äi pänäng dül känäng kawi tih philu la nawmaw nawkaih saw bi khäl bi hnäh. Ani la hawn känäng khrawng khäl hmawi mawh a mei khom. Awlaw täkchah philu känäng bünei saw tha äng dül känäng kawi tih philu la khrawng khäla hiyah saw lawm pawtäng chih. Äidä dül känäng kawi tih philu la luhdül äng käh khrawng khäla tak, ‘Awnaw saw pawiyal hüttih täkchah philu käh ulupchaw bi khäl.’ Äi dül känäng kawi tih philu la äi ulupchaw a awsawk la äkräuvaih hnäng sawk saw dogo ha pek hmuei. Äihi äi philu lupchaw a ula bang rosiyah äm, ani a tukai. Äi dül känäng kawi tih philu la elen lekchaw khäl, mäichawtih khäl, sanglaisu khäl, isitha äng mäitih khäl awlaw hngasaw khäl, ükütni a anih käh set kutäng hiyah thän lumchawl äng hmat la ini poh eiyeih saw tha tawng. Äi philu käh hmat la hiyah thän iming ulumchawl äng yoei yah äm, äila iha je ei hnäng hnawh awlaw hlĕyei hnäng hnawh. Ni nawyawk chuaih koong nengĕn hlü. Engen mäitih la äi philu khäla süp seh. Iyaäm ni äng khrawng khäla süh hmuei saw. Äi üsüh saw lung che 666. Äi pänäng Sinai khuyunga samphomah chaw hngat ja bala mäi saw kuhmuh. Awlaw khra ak gala hligip gäl thong hli pawtaw ha ani ängtu ini ja. Anih hang hang lumchawl äng samphomah chaw ming awlaw samphomah chaw paw käh ming yoei. Äi pänäng kei hawn känäng athak tui chusaw sam huih kawyawk. Äi tuichu saw sam che kek komsaw sam huih ha thawng. Awlaw khrawng la chong ini tumsaw sam huih ha thawng. Anih hang hang ni äi nawn len, sawk mawh pai hli, awlaw gongsong hmawi mawh a awi tha hngat ini awi. Luhdül känäng hleih hmueitih äi khra ak gala hligip gäl thong hli pawtaw battih hngat la ha, äi awi chok naw hnäng u. Anih hmutaw äng khrängak ha mäyah pak ini puma asanh ini tawkei. Samphomah chaw mawnga bang chet äm, äiya anih ha ini chet. Samphomah chaw koong khrawng duk känäng anih a täkchah Hnadaga la heh lei hütsaw. Anih mongkhok känäng hiyah saw kheu bün hüt ti. Anih a iha epret mäi hütah. Äi pänäng kei hawn natchaw hngata ädäma hawn äng payei saw kuhmuh. Luhdül äng käh khrawng kheni khäl khäka, yapsaw khäl khäka, ayapyap be äng kräutih khäl khäka awlaw presaw khäl khäka sawk mawh sidawng pawi hiyawkaih saw ani khäka mäi khäh. Äi hawn natchaw la athak hek bala hawu, “Hnadaga a kenkeh po khäl awlaw Ani a phiyaw khäl. Iyaäm Ani la khrawng khäl käh tara biyeih saw ikhin lo däk. Ani la hawn, luhdül, mret awlaw tuiphul dün la khäl kheni bi chak. Ani a dä rosi khäl.” Äi pänäng awlaw hngat hawn natchaw ani pänäng lo bala hawu, “Äi elensum Babil mräh krak chak däk. Luhdül äng käh yapsaw khäl kheni alak äng ini moi saw huih äi hmutaw chawgraw äng ini moi.” Äi hawn natchaw häih pänäng awlaw hngat hawn natchaw lo bala hek bala hawu, “Ula bang äi naw bünei bala pawiyal hüttih philu a awlaw ani käh ulupchaw a khäh äm, awlaw ulumchawl äng hiyah thän ukut äng hmatla bopei sawk äm, äi khälla Hnadaga käh amana odok mäitih alak huih ini okaih lah saw. Äi alak che Hnadaga käh man äng chut hmuei saw. Utih la äi huih ini poh ei äm, anih a asanh chang tih hawn natchaw la samphomah chaw hmawi mawh a, mei la salphar äng chawh hmueyalai. Äi mei la khrawng khäla dukhah pekai awlaw äi mei khu sawkbrat khu bala mäyei. Ula bang äi philu awlaw ani lupchaw a khäh äm, awlaw ani ming äng käh hmatla sumei äm, anih la ühnüp awyawn dukhah ini bünai.” Hnadaga ngeitih, Yĕsu a yumtih awlaw Hnadaga käh khrawng khälla kuluh nawk ini hmuei khaw a ha khih ei khrang ini hmawtaih lah saw. Äi pänäng hawn känäng hngat la hawu saw asam kawyawk, “Nang ni kheu yo. Tutäh känäng Boi äng sakei ula ubang dü äm, äini pisih mawh.” Asanh chang Khraw la ha hawu, “Hnadaga käh bi tha po ula ini bisaw känäng ini dümal lah ai. Iyaäm anih käh konghmuh bi khäl anih äng tutu mäi khäh.” Äi pänäng kei kosot ni kawhmawi mawh a khose bok hngat mäi saw kuhmuh. Äi khose bok khrung äng khrawng huih hngat om bala mäi saw. Ani luki äng ha tokkiya awlaw ukut äng bin hattih mäi. Äi pänäng Hnadaga im känäng awlaw hngat hawn natchaw thok. Äi hawn natchaw la khose khrung äng om bala mäitih a athak hek bala tak, “Nang käh bin hattih lawei tila chawng tan. Iyaäm chawng tanaih saw ikhin lo däk. Awlaw luhdül äng käh chawng hmin däk.” Äi khaw a khose khrung äng om bala mäitih la ani käh bin luhdül äng sumei awlaw luhdül äng käh chawng tan. Äi pänäng awlaw hngat hawn natchaw hawna käh Hnadaga im känäng thok. Äi hawn natchaw kutäng ha hattih bin hngat mäi hüt. Awlaw ini hlu dün la känäng hngat hawn natchaw thok bala lo. Ani dä hlu dün laa käh mei choisaw sotih. Nila bin hattih sinei bala mäitih hawn natchaw a athak hek bala tak, “Nang käh hattih bin lo tila luhdül äng käh grĕp khang känäng grĕp theih sik. Iyaäm grĕp theih hmin däk.” Äi khaw a äi hawn natchaw la luhdül äng käh grĕp kheni äi hattih bin äng isih. Awlaw Grĕp thĕih chelh laih koong chelh düna ähiyän. Äi chelh dün la che Hnadaga käh man äng chut hmuei. Mräh pranga chelh düna chelh hmueiyal ni, äi chelh dün känäng thi thok. Äi thi che mel khra hnih täh long awlaw muk hngaw täh thuk hüt. Äi pänäng kei hawna awlaw hngat elensum hmu phu tisaw nawmaw nawkaih saw hmat la hngat kuhmuh. Hawn natchaw pochong seh la leh paiseh ini losaw. Äi khäl che äpäih sumäng käh dukhah. Iyaäm äi khäl äng Hnadaga käh man päihyeih saw. Äi pänäng kei hmrang huih sanh tih mret hngat kuhmu. Äi mret äng mei ha bälei. Awlaw ongtih khrawng khäla ha kuhmuh. Äi ongtih khrawng khäl che äi philu la ani käh lupchaw awlaw äi ming sumei tih a hiyum sawk tih. Äi ongtih khrawng khäl che Hnadaga la peksaw chong sin ula äi hmrang äng käh mret kawma ja ula ini mäi hüt. Anih la Hnadaga käh hngasaw Mosi awlaw äi samphomah chaw käh ni awi ini awi tunsaw, “O Boi Hnadaga lentih tha mawh, Nang nibisaw khäl kheni mawmawt len awlaw nawmaw nawkaih phüh mäi. O üküt yapsaw khäl käh mawng, Nang käh lawm äng konghmuh mäi awlaw ihi khäh. O Boi, ula Nanga anang kenkeh aih hiyah saw äm, awlaw ula Nang ming äng anang phiyaw aih hiyah sawäm? Iyaäm Nang dä hngat pätpät asanh chang tih. Hang hang yapsaw khälla Nang hmawi maw a lo ula anang rosiyei. Iyaäm Nang käh ihisaw tara dawng däk.” Äi pänäng kei hawn pre a Hnadaga im la thung tawk dün tawbala hongei saw kuhmuh. Äi pochong seh hawn natchaw khälla hngata hngat chila paiseh leh lo ula Hnadaga im känäng ini thok. Anih pumäng sanhtih la wachawi tih awat mäi hüt. Awlaw anih kangchang äng ha äng käh khabaih khonei bala mäi hüt. Äi sawk mawh pai hli äng käh hngat la äi pochong seh hawn natchaw khäla hngata hngat chi ha äng käh khok pek. Äi khok khäl sawkbrat mäitih sawk mawh Hnadaga käh man äng luih bala mäi hüt. Awlaw Hnadaga käh wachang la Ani käh tha känäng thok saw meikhu äng asanh chang im luih chak. Äi pochong seh hawn natchaw khäl käh paiseh leh päiyah saw sawgraw hngat ha Hnadaga ima vawngal lah u. Hnadaga im känäng äi hawn natchaw paiseh a asam hngat la hek bala taksaw kei kawyawk. “Nangnih chet chula Hnadaga man luih saw mawh khok paiseh luhdül äng aläi khäl.” Äi khaw a nombor hngat äng käh hawn natchaw la chet bala luhdül khrung äng ani käh khok aläi. Äi äng äi philu käh hmat la lawei tih awlaw ulupchaw khäh tih khäl kantha äng thasa ini juei nawk saw nawse hngat dawng. Äi pänäng nombor hnih äng käh hawn natchaw la ani käh khok mret khrung äng aläi. Äi äng mret äng käh tui düdäktih käh thi unuk sen sensaw huih thäneyal chak. Äidä mret äng mäitih sawk mawh kheni ini dü chak. Äi pänäng nombor thumäng käh hawn natchaw la ani käh khok ohlong la tui phul dün khe a aläi. Äi äng tui kheni thi a thäneyal chak. Tui khäl sokhretih hawn natchaw la hawu saw kawyawk, “O Asanh chang tih Hnadaga, Nang nämäi khäh, nämäi hüt khäh. Nang nibisaw tara che prongh khäh. Iyaäm nang ni khäl krong äng tara nibi. Iyaäm ni khrawng khälla Nang käh asanh chang khrawng khäl awlaw Nang sidawng hiyawktih khäla ini tuk hüt. Äi koong anih la ini okaih koong thi nepek. Nidä anih koong tawn saw.” Äi pänäng ini hlu dün la känäng kei kheu krawn kawyawkal. “Ä, thayung mawh Boi o, hang hang ni khiyuptih, nang käh tara khäl kheni che ihi khäh awlaw oprongh khäh.” Nombor hli äng käh hawn natchaw la ani käh khok khoni khrung äng äläi. Äidä khrawng khälla eleng äng chawh aih saw ana khoni a pek hmuei. Äi khaw a thasa eleng saw äng khrawng khäl chawh ini hmuei chak. Äidä khrawng khälla Hnadaga minga ini sayei. Anih la ngulai känäng ini lung hleyeyal u awlaw Hnadaga a kenkeh u. Äi pänäng nombor hngaw äng käh hawn natchaw la ani käh khok äi philu la päng saw la khäl äng äläi. Äidä äi philu la päng saw la khäl kheni uhiyung chak. Äi philu la päng saw la äng käh khrawng khälla khih u saw äng ini haw ini eiyei. Anih la khih u saw la ini naw saw äng hawn pre a käh Hnadaga a ini sayei. Äini anih la anih käh bi se känäng ini lung hleyeyal u. Äi pänäng nombor sok äng käh hawn natchaw la ani käh khok law bala ohlong len Yuphretis khrung äng äläi. Äidä hni thouh pawt känäng mawng khäl, anih käh soloi äng lo hnäng hmawna ohlong hul bala lawm hongei. Äi pänäng äi hnaga kaw, philu kaw awlaw lup songeitih sidawng hiyawktih kaw känäng upho huih pai thum sahnah tih khraw thok saw kei kuhmuh. Äi sahnah tih khraw khäl che mannat käh khrawse. Äi khälla ayapyap nawmaw nawkaih saw bi ini bi. Awlaw thayung mawh Hnadaga käh tara bisaw khomhnüp äng Hnadaga a täkaih tih luhdül äng käh mawng kheni a tänaka ini lum. Boi la hawu, “Khin khäl! Akhanh chu khaw a dä sukhä ihuih lo äm äi huih Kei kolo alaih saw. Ubang khak bala mäi äm awlaw awat chäkei äm äiche pisih mawh. Äihi ani ikil chonei bala khrawng hmawi mawh a hiyawh ei bünei hnawh.” Anih la mawng khäl kheni a Hibru beäng Armakidon ting ini taksaw ala hngata tänaka ini tawk. Äi pänäng nombor seh äng käh hawn natchaw la ani käh khok hawn khrung äng äläi. Äi khaw a Hnadaga ima käh nawn känäng athak asam hngat la hawu, ‘Ni päih däk.’ Äi khaw a khaihkhra lilihwei saw, athak kek kom awlaw liuh len hngat lo. Luhdül bi hmuei saw khaw känäng äi huih liuh len sätak ha lo hütah. Äi äng mräh len phüh thuma pheh ei awlaw ayapyap yapsaw khäl käh mräh akrak chak. Äi khaw a Hnadaga la äi elensum Babil käh ngulai krong ulung äng khaweiyal. Awlaw Ani käh man äng luih tih khawp äng Babila käh khrawng khäla o ok sawkal. Äidä song pou saw kheni krokal chak. Awlaw khuyung kheni ha dawng tiyah. Awlaw hawn känäng jelh len khrawng khrung äng bo. Äi jelh lung lungak eset hngawngip chi mäi hüt. Äi jelh lung kraw saw äng khrawng ini dü, äi khaw a awvawng la Hnadaga a ini sayei. Iyaäm ni leh che mawt kehse hütsaw. Äi pänäng khok paiseh sinei tih hawn natchaw khäl äng käh hngat la kei a atak, “Lo! Äi iming tawng tih chawgraw hmutaw la ihuih dam büneyeih saw äm aso. Ani a che ohlong khäl kena käh iming tawng tih mräh äng chut hmuei saw.” Luhdül äng käh mawng khäl kheni ani äng ini krak chak. Awlaw luhdül äng käh khrawng khäl kheni alak o ula ini moi saw huih ni chawngraw hmutaw äng ini chawgraw yei saw äng ini lu. Awkhraw la kei a üchü bala awtawk. Äi khaw a hawn natchaw la kei a ala honga ichih. Awlaw sentih hngat philu khrung äng hmutaw hngat om bala mäi saw kuhmuh. Äi sentih philu pumäng Hnadaga a ini keleih saw kheu khäl yoei saw kuhmuh. Äi sentih philu a uluki pumseh awlaw iki pai ha mäi hüt. Äi hmutaw la awnchäh thi rong la awat sen awat hüt. Awlaw ha, mawmawt khawktih lung, amiyak äng akantha sahngei bala mäi hüt. Ani la ukut äng khawp hngat sin bala mäi hüt. Numum saw vawn la ani chawgrawei nawk saw sahnah saw khäl kheni äi khawp äng luih bala mäi hüt. Ani lumchawl äng che uthupei saw ming hngat yoei bala mäi hüt. Äi ming che “Üküt thawka lensum Babil” luhdül äng käh hmutaw chawgraw kheni käh awlaw numum saw vawn äng luih tih nu. Äi hmutaw Hnadaga käh khrawng khäl käh thi äng moi bala mäi saw kuhmuh. Ni Hnadaga käh asanh chang khrawng khälla dä Yĕsu ming äng sawksi ini pek hüt saw. Äi hmutaw a hmu ngala kei mawmawt kawmaw. Äi hawn natchaw la kei a atak, “Nang iya nawmaw saw äm? Äi hmutaw krong awlaw hmutaw a upum äng tawngei bala chitih philu käh uthuh krong khäl kheni kini hawu pekai. Äi philu a uluki paiseh awlaw iki paiha mäihüt. Nang nuhmuh hütsaw philu sen eheng hüt khäh äini tua mäitiyah. Äini äi philu sen thuktih vawm känäng heng bala thouwalai. Äidä sawkak koong Hnadaga la ani a khrah a lai. Awlaw luhdül bisaw chah khawngah, sawk mawh boih hiyol äng iming yoeiyah tih khrawng khäl, ni philu sen hmu ula ini maw ai. Iyaäm ni philu sen eheng hüt, äini tua mäitiyah. Ani awlaw lo a laih tü saw dä.” “Ni nawyawk chuaih koong ngen hlü. Äi philu luki pumseh che khuyung pumseh. Äi khuyung khäl che äi hmutaw la khiyup saw. Ni philu luki pumseh mawng pochong seh äng ha chut hmuei. Anih dukäng käh pochong hngaw che ayang bang ini dü däk. Tua nombor sok la ukhiyup tun. Awlaw nombor seh äng käh che tua ha lo hawmah. Äini ni nombor seh che tana kra chaw koong dä loaih saw. Awlaw heng hüttih philu sen che dü däk. Ani nombor set mawng thäneyalai. Ani äi mawng paiseh huih thäneyei. Awlaw Hnadaga la ani a khrakalai.” Awlaw nang nuhmuh saw iki paiha che mawng pochong ha. Anih la tua ha khiyup lah hawm u. Äini äi philu sen ängtu tana kra koong ini mawngeyeih saw dogo ini büneyei. Äi mawng pochong ha käh tawk che lup khiyang. Awlaw anih käh tha la ini khiyup saw dogo äi philu sena ini pekai. Anih samphomah chaw äng jal ini täkeyei. Äini samphomah chaw la panei saw khäl äng, eheh lei saw khäl äng, awlaw uyumlah mawh khäl ängtu anih a hiyum sawkai. Iyaäm, “Ani boi khäl khrung äng käh Boi, awlaw mawng khäl khrung äng käh Mawng.” Awlaw äi hawn natchaw la kei a atak, “Äi chawgraw hmutaw la oom nawk saw tui che presaw khäl, khrawng khäl, yapsaw khäl, ayapyap be äng kräutih khäl äng chut hmuei. Nang nuhmuh saw äi iki paiha mawh philu sen la äi chawgraw hmutaw a mumai. Awlaw äi chawgraw hmutaw käh ükütni lawei ula ikil ini tawkalai. Ani saw ini eyei awlaw Ani a mei äng ini chawh a lai. Ni philu sen la äi chawgraw hmutaw kuluh naw hmawna, Hnadaga la Ani lung hlü huih äi philu sen äng athawn. Anih käh kheu dä ong hmawna awlaw lung khiyanga thänei hmawna. Hnadaga käh kheu luih yah saw sawgraw, ni khälla nanga nang käh mawng pre ini khiyup saw äi philu a ini pekal.” Awlaw nang nuhmuh hütsaw chawgraw hmutaw che luhdül äng käh mawng khälla ini khiyup hütsaw ming mawh mräh äng chut hmuei. Äi pänäng kei awlaw hngat hawn natchaw a hawn känäng komsaw kuhmuh. Ani a thayung mäihüt awlaw ani käh wachang äng luhdül kheni wasawk chak. Ani la athak hek bala hawu, “Äi ming tawng Babil krakal däk. Äila che khrawse khäl awlaw sahnah tih khraw khäl käh ini mäidün thäneyal. Awlaw äila che hngiyak tih haw khäl ini mäidün la ha thäneyal. Luhdül äng käh presaw khäl kheni alak äng ini moi saw huih äi hmutaw chawgraw äng ini moi. Awlaw luhdül äng käh mawng khäl kheni ani äng ini krak. Ni chawgraw hmutaw la ühlüei saw thawka ehleh yei saw koong, luhdül äng käh kun potih khäl käh mawh a ini thänei.” Äi khaw a kei hawn känäng awlaw hngat sam kawyawk, “O kei käh khrawng khäl, nangnih Babil känäng thokal khäl. O kei käh khrawng khäl, Babil känäng loal khäl. Iyaäm nangnih Babil käh ngulai phüh thänei lah hnawh chu. Awlaw ani ängtu dam bünei lah hnawh chu. Iyaäm ani käh ngulai hawn pre täh hlüng däk, awlaw ani käh ngulai bi khäl Hnadaga la ulung äng khawyei däk. Ani la ihuih awhngaw khäl äng ese poh ei hütäm, nangnih ha ani äng äi huih krawn hnih krawnei naw al khäl. Ani la ihuih dukhah khawp äng bäl bala anang pek äm, nangnih ha äi huih dukhah khawp äng bäl chula krawn hnih pekal khäl. Ani la awbawriyei saw la ehleih hlawmei hnäng saw hiyawh, dukhah la naw pekal khäl. Iyaäm ani la ulung äng tawkei chi, kei mawng nu, kei mawng nu huih nawn äng ko om. Kei hmeinu hinga. Kei krängak ha kap hnawh nga.” “Äi koong hnüpak dukäng ani khrung äng leh kraw ai. Äi khäl che lawga, dukhah awlaw eken saw. Mei äng ani a chawh hmueiyei. Iyäam ani käh tara biyalaih tih che thayung mawh Boi Hnadaga.” Ni chawgraw hmutaw äng krak hüttih awlaw hleih hlawmei hnäng tih luhdül äng käh mawng khälla, ani ini chawh saw meikhu hmu ula ini kapai awlaw dukhah ini pieiyei. Äi khih ah saw hmu ula ini khawm lah ai ting ke ula mawng khäl awhlawm hlaw a ini ja ai. Äidä äi khälla ini hawuvai, “O ihuih dukhah äm! Ni lentih la ming tawng mawh Babil. Gonda ak dukäng Hnadaga la nanga dam ini pek.” Luhdül äng kun potih khäl ha ani koong ini kapai awlaw dukhah ini pieiyei. Iyaäm anih käh vawn khäl hngat la ha hleyei ti hnawh u saw. Anih la ni khäl jeei yeih hnäng ti u saw. Äi khäl che ha, hen, khawktih lung la amiyak, pä wat, khawk tih awnchäh thi rong wat, silk äng käh awat la awat sen. Äi äng tutu awbawng otih thing la muichoi äng bi hmueitih ajapjap vawn, khawktih thing äng käh vawn, kri, thi awlaw maibel lung äng bi hmuei saw ajapjap vawn jeyei hnäng ti u. Awlaw äi kun potih khälla otih thing hok, elach, ootih vawn, mür, phrankinsen, alak, si, ha hnui, püm, sel chaw, samphomah, se la se äng chon dün, hngasaw awlaw hengei nawtih khäl je hnäng ti u. Äi kun potih khälla äi mräh a ini takai, “Nang nawlawphah hütsaw vawn khäl, nang nokhrokeyal chak däk. Nang käh kähkän awlaw nosopha saw krakal chak däk. Ni khäl nang krängak ha büneyal ti hnawh ti.” Ni mräh a äi vawn khäl je ula, kun potih khäl mäichawtih a ini thänei hüt. Ani huih dam büneyeih khiyang u saw koong, kun potih khäl ke ula awhlawm hlaw a ja ula ini mäyei. Anih ini kapai awlaw dukhah piei ula ini hawuvai, “O! Pä wat, awnchäh thi rong awlaw awat sen wat tih, ha, khawktih lung, amiyak äng upuma pawyei sawk hüttih äi ming tawng mräh! O! Gonda ak dukäng nang käh kähkän kheni krakal chak.” Tuisampho äng bitih elenchaw khäl, tuisampho äng kawi tih, tuisampho chontih khäl awlaw tuisampho äng kun potih ükütni awhlawm hlaw a ja ula ini mäi. Äi mräh o khaw a, mei khu hmu ula anih la hek ula ini hawu, “Ni huih ming tawng mawh mräh hngat ha mäitiyah.” Anih la ini luki äng de hnui phulei ula kappe hek ula ini hawu, “Küdü küdü ming tawn mawh mräh! Ni mräh äng kun ini poh a dä tuisampho äng kun potih, awlaw tuisampho mawh khäl mäichawtih a ini thänei saw. Äini ni ming tawng mawh mräh gonda ak dukäng krakal chak.” Äi khaw a hawn natchaw la tak, “Hawn pre o, äi ming tawng mawh mräh krak saw koong piyaw! Hnadaga käh sanh tih khrawng khälo, teh hmueitih khälo, awlaw Hnadaga sidawng hiyawktih khälo piyaw khäl. Iyaäm nangnih äng matara poei hütih a Hnadaga la dam pekal däk.” Äi pänäng tha mawh hawn natchaw hngat la lung len hngat kol bala mret äng tongal bala hawu, “Ni huih dä äi ming tawng Babil mräh a tong hmueiyalaih saw. Krängak ha äi mräh pouwal ti hnawh. Khrawng khälla krängak ha ni ming tawng mawh mräh äng chong sam, awi sam, krei sam awlaw bawh sam yawti hnawh u. Ni mräh äng ayapyap bi bitih käh sam krängak ha yawti hnawh chu. Lung äng ini met saw sam krängak ha thawng ti hnawh. Ni mräh a simiya mei choisaw krängak ha hmu ti hnawh chu. Ni mräh äng ini om nawei saw sam krängak ha thawng ti hnawh. Ni mräh äng kun po hüttih khäl ni luhdül äng ming tawng mawh kun potih ini mäi hüt. Awlaw luhdül äng käh khrawng khäl kheni a nang käh miyakhleh äng nakramei chak hüt.” Hnadaga la ni Babila dam pekal. Iyaäm ni mräh äng Hnadaga sidawng hiyawktih, Hnadaga käh sanh tih khrawng khäl käh thi awlaw luhdül äng tuk hmueitih khrawng khäl käh thi bün hmueyal. Äi pänäng kei hawn pre a awbawng khrawng chuh ei ula heu heuwa ini poh ei saw sam kawyawk. Anih la athak ini hawu, “Hnadaga ming che awpiyaw äng mäiseh! Awkiyawt, a wachang la thayung, hang hang ni nangkei käh Hnadaga käh dä. Iyaäm Ani käh tara che ihi khäh awlaw oprongh khäh. Äi chawgraw hmutaw la imik sawuvei saw äng luhdül la sahnah hmawna poh hüt. Äi koong Hnadaga la ani a epret khrawk. Awlaw Hnadaga käh hngasaw khäla utuk koong äi chawgraw hmutaw a dam pekal.” Anih la awlaw krängak athak hek ula ini hawu, “Hnadaga ming che awpiyaw äng mäiseh! Äi ming tawng mräh o o saw känäng sawkbrat meikhu tho thok bala mäiyei.” Äi pänäng kul gäl pochong hli gongsong awlaw pai hli sawk mawh la ini luki hnemei ula nawn äng omtih Hnadaga a ini rosi ula ini hawu, “Amen. Hnadaga ming awpiyaw äng mäiseh!” Äi pänäng nawn känäng khrawng hngat la hawu, “Hnadaga a kenkeh tih elenchaw pei awlaw elekchaw pei, Hnadaga käh hngasaw khälo, keinih käh Hnadaga a phiyaw khäl.” Äi pänäng kei awbawng khrawng chuh ei ula heu heuwa ini poh ei saw sam kawyawk. Äi sam che tui chu saw sam awlaw athak kek kom saw sam huih thawng. Äi asam la hawu, “Hnadaga ming awpiyaw äng mäiseh! Nangkei käh thayung mawh Boi Hnadaga la ukhiyup tun. Lo khäl, nangkei ini sayawk saw äng piyaw äng khä awlaw Ani a a wachang pekäng khä. Iyaäm samphomah chaw la phiya nawkaih saw khin lo däk awlaw ani a omeyeih tih la ha upuma sahngei tun. Ani a disa sanhtih, boktih awlaw khawk tih wat wataih koong pek hmuei. (Niya khawk tih wat hawu hmuei saw che Hnadaga khrawng khäl käh bi pawi.)” Äi pänäng hawn natchaw la kei a atak, “Nang ni kheu yo, Samphomah chaw käh phiya chawnawk päi äng panei hmueitih khäl kheni pisih mawh.” Äi pänäng hawn natchaw la kei a atak, “Ni khäl Hnadaga kheu dä awlaw ihisaw dä.” Kei ani a korosiyeih koong ani kho chouwa kuluki ke hnemei. Äini hawn natchaw la kei a atak, “Kei a orosi ei ti! Kei che nang huih awlaw Yĕsu Krito ming äng sawksi thoktih nang nawu tih huih hngat hngasaw dä. Hnadaga a dä rosi.” Iyaäm Hnadaga sidawng hiyawktih khäl käh khraw dä Yĕsu käh sawksi. Äi pänäng kei hawn hongei saw kuhmuh. Äiya se bok hngat ja bala mäi saw. Äi se bok khrung äng omtih ming che, “Uyumlah mawh awlaw ihisaw.” Ani la tara bisaw awlaw jal täksaw che oprongh khäh. Ani mik che choitih mei dong huih awlaw ani luki äng awbawng mawng tokkiya mäi khäh. Ani pumäng iming hngat yoei bala mäi. Äi yoei saw ming krong che ani battih hngat la ha hmawt u. Ani la wat saw awat sawu che thi äng sum hmuei hüt. Awlaw Ani ming che “Hnadaga käh kheu.” Äidä hawn pre a käh sawtlei khälla disa muih tih awat bok wat ula se bok chum ula ani hnung äng ini chet tun hüt. Luhdül äng käh presaw khäl kheni a jal äng hiyum sawk hnäng ong, ani kaw känäng hngat hattih chimsawu thok. Ani la thipum äng anih a ochokeyalai. Awlaw grĕp theih ini chelh düna cheh laih koong a hiyänai. Ni grĕp theih ini chelh dün la che thayung mawh Hnadaga käh man äng chut hmuei. Ani käh wat awlaw ephei äng ni ming yoei bala mäi, “Mawng khrung äng käh mawng la Boi khäl käh Boi.” Äi pänäng hawn natchaw hngat khoni khruäng ja bala mäi saw kei kuhmuh. Hawn äng payei tih haw khäla athak hek bala tak, “Lo khäl, Hnadaga käh päi len nini eiyeih saw koong utu chuh ei khäl. Lo khäl, mawng khäl käh, soloi gong käh, soloi khäl käh, se awlaw se chum tih khäl käh, lättih la hngasaw khäl awlaw usum vawng tih la usum vawngah tih khäl awsaw a ei khäl.” Äi pänäng se khrung äng om bala mäi hüttih la ani käh soloi khäl ängtu jal ini täkeyeih koong, philu la luhdül äng käh mawng khäl awlaw anih käh sawtlei khäl tänaka ini lumei saw kuhmuh. Soloi khälla äi philu a ini mawn. Awlaw äi philu ängtu hiyah saw sidawng hiyawktih ha mawn hmuei. Ni hiyah saw sidawng hiyawktih la philu hmawi mawh a naw mawnawkaih saw bi bi hüt chi. Ni hiyah saw sidawng hiyawktih la äi philu käh hmat la lawei tih awlaw ulupchaw rositih khäla kramei hüt chi. Tua äi philu la hiyah saw sidawng hiyawktih a heng chawk daw salpher äng choisaw mei äng hiyawn hmueiyal. Mäi hüt petih khäla che se bok khrung äng om bala mäitih mongkhok känäng thoksaw hattih chimsawu äng tuk hmueiyal chak. Haw khälla anih saw ini eiyal. Awlaw haw kheni anih saw ei ula ini hngawh chak. Äi pänäng kei hawn känäng hawn natchaw hngata kom bala losaw kuhmuh. Ani kutäng thuktih vawm äng käh awi hong dün la thi siyol hngat mäi. Ani la äi hnaga mawn. Äi hnaga che phemtih phol. Ni phemtih phol a Diyabawl ting ini tak. (Ni ming nawkrawnal khaw Mannat) Ani la khokum thongak koong hnaga a hen bala tawk. Hawn natchaw la hnaga a thuktih vawm äng hiyän bala awi äng akhah awlaw hmrang bopal. Khokum thongak luih ah saw sawgraw ani la presaw khäla kramei hnängah hmawna. Äi khokum thongak luih pänäng ani a tana koong hläh hmueiyei. Äi pänäng kei hngat pai hnih nawn kuhmuh. Äi nawn khrung äng omtih khäla khrawnga ini khiyupaih saw dogo Hnadaga la pek hüt. Yĕsu krong äng sawksi thoktih la Hnadaga kheu ini hiyawk saw koong ini luki bäng hmueitih khäl käh khraw kuhmuh. Anih la äi philu la philu käh ulupchaw a rosi hüt u. Awlaw äi philu käh hmat la ha ini lumchawl äng hiyah thän ini kutäng lawei hüt u. Ni khrawng khäl ini hengal awlaw Krito ängtu khokum thongak ini khiyupal. (Äini awhngaw dütih khäl khokum thongak luihyah saw sawgraw hengal hnawh u.) Nidä täkchah düsaw känäng ini thouwal saw. ‍ Täkchah düsaw känäng heng bala thouwal tih khäl che pisih mawh la asanh chang. Anih lukhrunga kräng hnih düaih saw la dogo tawei tiyah. Äini anih Hnadaga la Krito käh pujawtih ini thänei awlaw Krito ängtu othong thong khokum ini khiyupalai. Äi khokum thongak päih hi, hawn natchaw la Mannata thuktih vawm känäng othoh alai. Äi khaw Mannat la luhdül äng khrih ei bala mäitih presaw khäla ulumal chakai. Äi lumal hmueitih khäla che Gog la Magog äng chut hmuei. Äi pänäng Mannat la anih a jal koong ulumai. Anih mret kawma käh de süp hnäng ti saw hiyawh ini thäneyei. Anih luhdül äng hang hang la a ini khrih ei chakai. Äidä Hnadaga käh asanh chang khrawng awlaw Hnadaga la khet nawk saw mräh ini wan chakai. Äini hawn känäng mei kom bala äi khrawng khäl kheni a khrah al chakai. Äi pänäng khrawng kramei hüttih diyabawl a anih la ayang philu la hiyah saw sidawng hiyawktih ini hiyän dün, salphar la mei äng käh äng ini hiyänalai. Äidä anih la äiya ühnüp la awyawn sawkbrat waih ini khawmalai. Äi pänäng kei obok nawn len hngat kuhmuh. Äi nawn khrung äng Hnadaga om bala mäi hütsaw kuhmuh. Ani hmawi mawh känäng luhdül la hawn echenal. Äini ahnih ihni chetaih koong ala mäiti hütah. Äi pänäng dütih khäl, alang gong la alang gongah tih khäl Hnadaga käh nawn hmawi mawh a ja ula ini mäi saw kuhmuh. Hawn natchaw khälla hngat pai hnih boih hiyol ini hong. Äi pänäng awlaw hngat boih hiyol ini hong, äi boih che sawk mawh boih. Dütih la ibang ini bi hütäm äi ayang ini hong saw boih hiyol khäl äng yoei hüt. Äida boih hiyol äng yoei saw läk awtawn saw huih Hnadaga la anih käh tara biyal. Äi pänäng dütih khäl kheni nanga nang ini mäidün känäng ini lo al chak. Üküt che mret känäng, üküt che cho känäng ini lo al. Hang hanga ni nanga nang käh bi huih Hnadaga la tara biyal. Äi pänäng äi düsaw la dütih ini mäidün ala a mei guda äng hiyän ihni hmueiyal. Ni mei guda äng hiyän ihni hmueyal saw dä sät hnih düsaw. Sawk mawh boih hiyol äng iming mäyahtih khäl kheni a mei guda äng hiyän ini hmueiyal. Äi pänäng kei hawn pre tha hngat awlaw luhdül tha hngat kuhmuh. Täkchah chah saw hawn pre awlaw luhdül krokal däk. Awlaw mret ha krokal. Äi pänäng asanh chang atha Yĕlusalem mräh hawna käh Hnadaga känäng komsaw kuhmuh. Äi mräh a pawtaw omeyeih tih hmutaw huih ini wat cha sawk saw. Kei nawn känäng asam hngat la athak hawu saw kawyawk, “Hnadaga che tua khrawng ängtu dä mäi saw. Ani anih ängtu mäyei awlaw anih Ani käh khrawng ini thäneyei. Hnadaga kädäng anih ängtu mäiyei awlaw Ani anih käh Hnadaga thäneyei. Ani la anih käh mik khri potalai. Düsaw, waih, nakapsaw awlaw niniyeisaw mäiti hnawh. Ni ephem khäl kheni krokal chak däk.” Nawn äng om bala mäitih la hawu, “So, Kei ükütni atha a kopoh al!” Ani la ni ha kei a atak, “Ni yo, iyaäm kini taksaw khäl kheni ihi khäh awlaw yumphoih dä.” Nawn äng omtih la ni ha atak, “Ükütni thänei chak däk! Kei dä achah saw la äpäih saw. Awlaw kei dä chah tih la phäih tih. Ubang tui halei äm äiya awsawk mawh tui phul dün känäng ekhemeih tui kepekai. Ubang ong äm äila Kei käh kheni pängeyalai. Kei anih käh Hnadaga käthäneiyei awlaw anih Kei chaw chuhnu ini thäneyei. Äini eseng khri mäyahtih, uyum khrakei tih, akrak bi bitih, khrawng tu tih, imik sawuvei tih, hmäng dawng tih, ulupchaw pujawtih awlaw hlei tih khäl käh la che choitih mei guda la choi bala mäitih salphar düna ini kraw ai. Ni che sät hnih dü.” Äi ayang äng leh mäi hütsaw khok paiseh sintih hawn natchaw khäl känäng käh hngat la lo bala kei a atak, “Niya lo, äi samphomah chaw phiya a kini dawnaih.” Äi pänäng kei awkhraw äng kuluih khaw a äi hawn natchaw la khuyung hlüng tih hngata ichih phui naw bala asanh chang mräh Yĕlusalem awdawn. Äi sanhtih Yĕlusalem mräh Hnadaga känäng kom saw. Äi sanhtih Yĕlusalem mräh Hnadaga käh wachang äng awa. Ni mräh wa saw che disa khawktih lung la hmrang huih sanh tih jespar lung huih. Äi mräh che ühlüng tih lung pawng len hngat la awan. Äi äng pailei hnih tamkha mäihüt. Äi pailei hnih tamkha äng chong tih pochong lei hnih hawn natchaw khäl hngat hngat chi tamkha äng ini mäi hüt. Äi tamkha hngat hngat chi äng ädäma Isawlael khäl käh chen lei hnih ming yoei hüt. Äi mräh tamkha khäl hni thoh pawtäng paithum, hni krawk pawtäng paithum, mrok pawtäng paithum awlaw thong phak pawtäng paithum mäi hüt. Äi mräh äng käh lung pawng äng pailei hnih lung ochou mäi hüt. Awlaw äi lung khrung äng pochong lei hnih teh hmueitih khäl käh ming mäihüt. Kei äng kräutih hawn natchaw kutäng äi mräh lung pawng la tamkha khäl tünaih koong ha äng käh kompum mäihüt. Äi mräh a ikiu kiu hli mäi hüt. Awlaw äi mräh otoi lawma, awsawu lawma, ühlüng lawma tihtih a dä mäihüt. Äi mräh otoi lawma, awsawu lawma awlaw ühlüng lawma ükütni tih tih 1,400 mel mäi hüt. Äi pänäng hawn natchaw la mräh lung pawng bei tün ni umuk 144 übün. Äi hawn natchaw la luhchaw mukäng chut bala tün pänäng tihtih bün hüt. Äi mräh lung pawng che jespar lung äng bi hmuei hüt. Awlaw mräh che hmrang huih sanh tih ha chetäng bi hmuei hüt. Äi mräh äng käh lung pawng chou khäl ayapyap khawktih lung khäl äng bi hmuei hüt. Nombor hngat äng käh ochou che jespar ting ini taksaw komola rong huih lung äng bi hmuei. Nombor hnih äng käh ochou che saphaya ting ini taksaw hawn rong huih lung äng bi hmuei. Nombor thum äng käh ochou che ages ting ini taksaw hawn rong huih lung äng bi hmuei. Nombor hli äng käh ochou che emared ting ini taksaw eheng ching rong huih lung äng bi hmuei. Nombor hngaw äng käh ochou che onik ting ini taksaw ohom la obok bälei tih rong huih lung äng bi hmuei. Nombor sok äng käh ochou che kaneliyan ting ini taksaw esen rong huih lung äng bi hmuei. Normbor seh äng käh ochou che kot ting ini taksaw awawi rong huih lung äng bi hmuei. Nombor set äng käh ochou che berol ting ini taksaw eheng ching la hawn rong bälei saw huih lung äng bi hmuei. Nombor koh äng käh ochou che topas ting ini taksaw hawn rong huih lung äng bi hmuei. Nombor ha äng käh ochou che chelsidoni ting ini taksaw hawn rong huih lung äng bi hmuei. Nombor leyak äng käh ochou che tarkuai ting ini taksaw eheng ching rong huih lung äng bi hmuei. Nombor lei hnih äng käh ochou che emethis ting ini taksaw awnchäh thi rong huih lung äng bi hmuei. Äi mräh tamkha khäl che hngat hngat chi khawktih amiyak len äng bi hmuei hüt. Awlaw äi mräh äng käh pawng che hmrang huih sanhtih echet ha äng bi hmuei hüt. Äi pänäng kei mräh dukäng Hnadaga im hmuti nga. Iyaäm üküt thawka thayung mawh Boi Hnadaga la Samphomah chaw dä äi mräh äng käh Hnadaga im. Äi mräh wa aih saw koong khoni la khraw iha hlütiyah. Iyaäm Hnadaga käh wachang la äi mräh wa sawk khäh awlaw äi samphomah chaw äi mräh äng käh simiya. Ni a wachang äng luhdül äng käh khrawng khäl ini chet choneyei. Awlaw luhdül äng käh mawng khälla anih käh kähkän ini loai. Äi mräh tamkha khäl krängak ha khah hmuei hnawh. Iyaäm äiya krängak ha awyawn mäiti hnawh. Luhdül äng käh ayapyap presaw khälla wachang la hmawi ni mräh a ini lo ai. Sahnah tih, hiyawh ei bi bitih awlaw hlei tih ni mräh a vawng lah hnawh u. Äi samphomah chaw käh sawk mawh boih hiyol äng uming mäi äm äidä vawngaih lah saw. Äi pänäng hawn natchaw la sawk pektih ohlong hngat awdawn. Äi ohlong che hmrang huih lawuh lawuh a mäi hüt. Äi ohlong tui che Hnadaga käh awlaw samphomah chaw käh nawn känäng long tun saw. Äi ohlong tui mräh lai äng olong. Kawm hnih pawtäng hngat chi sawk mawh thing pai hnih mäi hüt. Äi thing kumakäng kräng lei hnih chi thei. Luhdül äng käh yapsaw khäl kheni la ini pawyalaih saw koong äi sawk mawh thing äng käh esei ini sumei hüt. Hnadaga la sayei saw iha ni mräh dukäng mäiti hnawh. Hnadaga käh awlaw samphomah chaw käh nawn äi mräh äng mäiyeih saw. Awlaw Ani hngasaw khälla Ani a ini rosiyei. Anih la Ani hmawi ini hmuh ai awlaw Ani ming anih lumchawl äng yoei bala mäiyei. Äiya awyawn mäitih hnawh. Simiya mei awlaw khoni ha hlüti hnawh. Iyaäm Boi Hnadaga la awa pekaih saw. Anih mawng huih ini mawngeyei. Äi pänäng hawn natchaw la hawu, “Ni kheu khäl ihi khäh awlaw yumphoih dä. Hnadaga sidawng hiyawktih khäla awkhraw pektih Boi Hnadaga la Ani hngasaw khäla ni khäl dawnaih saw koong Ani käh hawn natchaw a äi ayang thäneyeih saw dä ting hawu peka teh.” Yĕsu la hawu, “So, Kei alanda koloal tun. Ni boih hiyol äng yoei saw awmaw äng käh sidawng ngeitih khäl che pisih mawh.” Kei Yohan. Ni khäl hang hang ni kei kuhmuh awlaw kawyawk. Ni khäl kuhmuh kawyawk pänäng kei a awdawntih hawn natchaw a khokgru dül äng mäi ngala korosiyeih saw kopoh ei. Ani la kei a atak, “Kei a orosi yeiti! Kei nang huih awlaw Hnadaga sidawng hiyawktih tanawu tih khäl huih hngasaw hngat dä. Awlaw ni boih hiyol äng käh kheu khäl ngei chaktih khäl huih dä. Hnadaga a dä rosi bäi.” Ani la awlaw atak, “Ni boih hiyol äng käh awhmawi mawh äng käh kheu khäl nang thuh naw ai ti. Iyaäm ni khäl thäneyeih saw ikhin hiyäu däk. Ula bise bi äm äila bise bibi bala mäiseh. Chawgraw ei tih la chawgraw ei bala mäiseh. Konghmuh bi bitih la konghmuh bi bibi bala mäiseh. Awlaw ubang asanh chang äm äi sanh chang bala mäiseh.” Yĕsu la hawu, “So khäl, Kei alanda koloal tun! Phiyaw phoih kepekaih saw koong kei ängtu mäi khäh. Ulabang ihuih bi äm äiya äi huih phiyaw phoih kepekai. Kei dä achah saw la äpäih saw. Awmaw sum la uhnung sum.” Ula nanga nang käh wat boh ei äm äi pisih mawh. Äila sawk mawh thing äng käh theih ei lah ai awlaw mräh tamkha äng käh tamkha kheni känäng vawng lah ai. Akrak bi bitih, hmräng dawntih, imik sawuveitih, khrawng sawk tutih awlaw lupchaw pujawtih, hleitih khäl ui huih mräh pranga ini mäi. Kei Yĕsu, yumtih sawng khäl khäka hawuvaih saw koong Kei käh hawn natchaw keteh. Kei Dawut mawng käh chen awlaw akhon prakäng käh watih asĕ. Asanh chang khraw awlaw pawtaw omeyeih tih la atak, “Lo!” Ni kheu ula bang yawkäm äila ha ‘Lo’ ting hawu seh. Awlaw ubang tui halei äm äi ha lo seh. Ula hlü ei äm äila ekhemeih sawk mawh tui o seh. Ni boih hiyol äng käh awhmawi mawh kheu khäl khin tih khäka kei sidih kepek, ula bang ni boih hiyol äng yoei saw battih kheu pongäm äiya Hnadaga la ni boih hiyol äng yoei saw leh khäl kheni pekai. Awlaw ula bang ni boih äng käh kheu bitchaw khat khoh laläm, Hnadaga la sawk mawh thing äng käh theih ani a pek hnawh awlaw asanh chang mräh a ha vawngal sawk hnawh. Ni khäl ni boih hiyol äng yoei. Ni krong khäl äng sawksi pektih Yĕsu la hawu, “Ni khäl lälä ihi khäh! Kei alanda kolo al tun!” Amen! Boi Yĕsu o, lo al! Boi Yĕsu käh khetjen Ani khrawng khäl kheni lukhrunga mäiseh.