﻿<?xml version="1.0" encoding="UTF-8"?>
<bible translation="Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)" status="© The Bible Society in Taiwan, 2012 © 台灣聖經公會版權所有 2012" site="https://www.bible.com/bible/1806/GEN.2.THV12HDB">
	<testament name="Old">
		<book number="1">
			<chapter number="1">
				<verse number="1">太初，上帝創造天地。</verse>
				<verse number="2">地還係空空，吂有成形；烏暗遮等深淵；上帝个靈在水面上運行。</verse>
				<verse number="3">上帝講：「愛有光。」就有光。</verse>
				<verse number="4">上帝看光係好个，就將光㧯暗分開。</verse>
				<verse number="5">上帝將光安到「日時頭」，將暗安到「暗晡頭」。有暗晡，有朝晨；這係頭一日。</verse>
				<verse number="6">上帝講：「這兜水个中間愛有天空，將水上下分開。」</verse>
				<verse number="7">上帝就造天空，將天空以下个水㧯天空以上个水分開。事就恁樣完成。</verse>
				<verse number="8">上帝將天空安到「天」。有暗晡，有朝晨；這係第二日。</verse>
				<verse number="9">上帝講：「天下个水愛集在一個所在，俾燥地出現。」事就恁樣完成。</verse>
				<verse number="10">上帝將燥地安到「地」，將集水个所在安到「海」。上帝看這係好个。</verse>
				<verse number="11">上帝講：「地愛生出各種各類个植物：有兜出產五榖、有兜結果子，果子底背有核。」事就恁樣完成。</verse>
				<verse number="12">地就生出各種各類个植物：有兜出產五榖、有兜結果子，果子底背有核。上帝看這係好个。</verse>
				<verse number="13">有暗晡，有朝晨；這係第三日。</verse>
				<verse number="14">上帝講：「天頂愛有光體，分別日夜，來做節期㧯年日个記號，</verse>
				<verse number="15">並愛在天頂發光，照亮大地。」事就恁樣完成。</verse>
				<verse number="16">上帝就造出兩個大光體，大个管日時頭，細个管暗晡頭。佢又造盡多星仔。</verse>
				<verse number="17">上帝將光體安在天空，來照亮大地，</verse>
				<verse number="18">管理日夜，分別明暗。上帝看這係好个。</verse>
				<verse number="19">有暗晡，有朝晨；這係第四日。</verse>
				<verse number="20">上帝講：「水中愛繁殖多種動物；天空中愛有多種飛鳥。」</verse>
				<verse number="21">上帝就創造盡大个海獸，水中各種各類有生命个動物，㧯天空各種各類个飛鳥。上帝看這係好个。</verse>
				<verse number="22">上帝賜福給這兜動物講：「魚類愛在海中繁殖，飛鳥也愛在地上增加。」</verse>
				<verse number="23">有暗晡，有朝晨；這係第五日。</verse>
				<verse number="24">上帝講：「大地愛繁殖各種各類有生命个動物：頭牲、爬蟲㧯野獸。」事就恁樣完成。</verse>
				<verse number="25">上帝就造出地上各種各類个野獸、頭牲㧯爬蟲。上帝看這係好个。</verse>
				<verse number="26">上帝講：「𠊎等愛照𠊎等个形像、𠊎等个樣式造人，俾佢等管理海肚个魚、空中个飛鳥、地上个頭牲、各種地上个爬蟲，㧯全地。」</verse>
				<verse number="27">上帝就照自家个形像創造人，佢照上帝个形像創造男人㧯女人。</verse>
				<verse number="28">上帝就賜福佢等，又對佢等講：「愛𫱔多多子女，遍滿世界，來治理大地，也愛管理海肚个魚、空中个飛鳥㧯地上各種動物。」</verse>
				<verse number="29">上帝講：「看啊！𠊎將全地个五榖㧯各種果子賜給你等做食物。</verse>
				<verse number="30">總係，地上个走獸㧯空中个飛鳥，並地上各種動物，𠊎將青个植物賜給它兜做食物。」事就恁樣完成。</verse>
				<verse number="31">上帝看佢一切所造个係非常好。有暗晡，有朝晨；這係第六日。</verse>
			</chapter>
			<chapter number="2">
				<verse number="1">恁樣，天地萬物攏總造齊了。</verse>
				<verse number="2">第七日上帝完成一切个工作，就停工歇睏。</verse>
				<verse number="3">上帝賜福給第七日，將這日分別為聖，因為佢在這日完成一切創造个工作，就停工歇睏。</verse>
				<verse number="4">這就係天地創造个來歷。 主上帝創造天地个時節，</verse>
				<verse number="5">地還吂有草木，菜還吂生出來，因為主上帝還吂落雨在地上，也吂有人耕種；</verse>
				<verse number="6">總係有水對地下湧出，滋潤全地。</verse>
				<verse number="7">後來主上帝用地上个泥造人 ，將生命个氣歕入佢个鼻孔，佢就成做有生命个人。</verse>
				<verse number="8">主上帝在東方設立 伊甸 園，將佢創造个人放在該位。</verse>
				<verse number="9">主上帝使地生出各種靚个樹木，結出好食个果子。在園中央有一頭生命樹，也有一頭能使人分別善惡个樹仔。</verse>
				<verse number="10">有一條大河對 伊甸 流出，滋潤該園，對 伊甸 分做四條河壩。</verse>
				<verse number="11">第一條安到 比遜 河，流過 哈腓拉 全地，在該位有金仔。</verse>
				<verse number="12">該位个金仔盡純，該位又有高貴个香料㧯寶石。</verse>
				<verse number="13">第二條安到 基訓 河，流過 古實 全地。</verse>
				<verse number="14">第三條安到 底格里斯 河，流過 亞述 東部。第四條安到 幼發拉底 河。</verse>
				<verse number="15">主上帝將該人放在 伊甸 園，喊佢去耕種、看守該園。</verse>
				<verse number="16">主上帝吩咐該人講：「園肚各種樹頂个果子，你全部做得食，</verse>
				<verse number="17">總係，該頭能使人分別善惡个樹仔所結个果子，你一定做毋得食；因為你食个時一定會死！」</verse>
				<verse number="18">後來，主上帝講：「該人孤單生活毋好，𠊎愛為佢造一個登對个伴來幫助佢。」</verse>
				<verse number="19">主上帝用泥造地上各種个走獸、㧯空中各種个飛鳥，全部帶到該人面前，看佢樣般安名。該人樣般安各種動物，該就係它个名。</verse>
				<verse number="20">該人就㧯所有个頭牲、空中个飛鳥、野地个走獸安名；總係該人尋毋到登對个伴好幫助佢。</verse>
				<verse number="21">主上帝俾該人當好睡。佢睡掉个時，主上帝拿出佢个一支膁𥯟骨，然後將肉合轉去。</verse>
				<verse number="22">主上帝就用該人身上所拿出該支膁𥯟骨造一個女人，將姖帶到該人面前。</verse>
				<verse number="23">該人講： 「這正係𠊎骨中个骨， 肉中个肉； 姖愛喊做『女人』， 因為姖係對『男人』身上拿出來个。」</verse>
				<verse number="24">因為恁樣，男人愛離開佢个爺𡟓，㧯𡜵娘結合，兩儕成做一體。</verse>
				<verse number="25">該人㧯厥𡜵娘兩儕赤身露體，總係佢等並無看做見笑。</verse>
			</chapter>
			<chapter number="3">
				<verse number="1">蛇係主上帝所創造个動物當中最搞怪个。蛇對該女人講：「上帝敢有影講過你等一定做毋得食園中所有樹頂个果子？」</verse>
				<verse number="2">該女人應講：「園中樹頂个果子𠊎等全部做得食；</verse>
				<verse number="3">只有園中央該頭樹頂个果子，上帝識講：『你等做毋得食，也毋好摸，若毋聽從，你等就會死。』」</verse>
				<verse number="4">蛇對女人講：「你等無一定會死，</verse>
				<verse number="5">因為上帝知你等拿來食，目珠就會變金，你等會像上帝恁樣曉得分別善惡。」</verse>
				<verse number="6">該女人看到該頭樹仔个果子好食、好看、又會給人得到智慧，姖就將果子摘下來食，也拿給厥老公，厥老公也食。</verse>
				<verse number="7">佢兩儕个目珠就金起來，正知自家係赤身露體，就編無花果樹个葉仔來遮身體。</verse>
				<verse number="8">該日臨暗仔，該人㧯厥𡜵娘聽到主上帝在園肚行个聲音，就囥在園肚个樹林中，毋敢見主上帝个面。</verse>
				<verse number="9">主上帝喊該人，對佢講：「你在㖠？」</verse>
				<verse number="10">佢講：「𠊎在園中聽到你个聲，因為𠊎赤身露體，驚到囥起來。」</verse>
				<verse number="11">主上帝講：「麼人㧯你講你赤身露體呢？你敢有食𠊎吩咐你做毋得食該頭樹頂个果子？」</verse>
				<verse number="12">該人講：「你賜給𠊎做伴个女人，姖將該樹頂个果子給𠊎，𠊎就食。」</verse>
				<verse number="13">主上帝問該女人講：「你到底做麼介事呢？」女人講：「蛇引誘𠊎，𠊎就食。」</verse>
				<verse number="14">主上帝對蛇講： 「你既然做這事，就一定受責罰， 會比一切牲畜㧯野獸較衰過。 你愛用肚笥趖， 終身食泥。</verse>
				<verse number="15">𠊎愛使你㧯女人結冤仇； 你个後代㧯女人个後代彼此怨恨。 佢愛打你个頭； 你愛咬佢个腳㬹。」</verse>
				<verse number="16">主上帝又對該女人講： 「𠊎愛大大增加你懷孕个痛苦； 你愛在痛苦中𫱔子女。 你會愛慕若老公； 若老公會管你。」</verse>
				<verse number="17">主上帝又對 亞當 講： 「你既然聽若𡜵娘个話， 食𠊎吩咐你做毋得食該頭樹頂个果子， 土地愛因為你來受咒詛； 你愛一生人勞碌， 正能對土地得到食物。</verse>
				<verse number="18">土地為到你會生竻仔㧯雜草， 你也愛食野生个菜。</verse>
				<verse number="19">你愛汗流脈落正有好食， 直到你歸土， 因為你係對泥出來个。 你本來係泥， 到尾愛歸土。」</verse>
				<verse number="20">亞當 㧯厥𡜵娘安到 夏娃 ，因為姖係人類个阿姆。</verse>
				<verse number="21">主上帝用獸皮做衫褲俾 亞當 㧯厥𡜵娘著。</verse>
				<verse number="22">主上帝講：「看啊！該人已經㧯𠊎等相像，會分別善惡；驚怕佢這下又伸手摘生命樹个果子食，就永遠毋會死。」</verse>
				<verse number="23">所以主上帝將佢逐出 伊甸 園，俾佢去耕種 — 佢本來係對土地出來个。</verse>
				<verse number="24">主上帝逐走該人，又在 伊甸 園東片安設基路伯 㧯四面轉動發火个劍，來掌生命樹个路。</verse>
			</chapter>
			<chapter number="4">
				<verse number="1">亞當 㧯厥𡜵娘 夏娃 同房。 夏娃 有身項，𫱔一個孻仔，講：「因為上主个幫助，𠊎得到一個孻仔。」姖就㧯佢安名 該隱 。</verse>
				<verse number="2">後來，姖𫱔 該隱 个老弟 亞伯 。 亞伯 係牧人； 該隱 係耕種人。</verse>
				<verse number="3">過一站時間， 該隱 拿土地个出產做祭物獻給上主。</verse>
				<verse number="4">亞伯 拿羊群个頭胎、又係盡肥个做祭物獻給上主。上主歡喜 亞伯 ，接納佢个祭物，</verse>
				<verse number="5">總係上主無歡喜 該隱 㧯佢个祭物。 該隱 就變面、大發譴。</verse>
				<verse number="6">上主對 該隱 講：「你做麼介大發譴？做麼介變面呢？</verse>
				<verse number="7">你若係做著，敢毋會受到接納？若係你做毋著，罪就伏在你門口。罪愛得到你，總係你愛制伏罪。」</verse>
				<verse number="8">後來， 該隱 對老弟 亞伯 講：「𠊎等來去田項！」 佢等在田項个時， 該隱 就出手將老弟 亞伯 㓾死。</verse>
				<verse number="9">上主對 該隱 講：「若老弟 亞伯 在㖠位？」佢應講：「𠊎毋知。𠊎敢係掌吾老弟个？」</verse>
				<verse number="10">上主講：「你做麼介呢？若老弟个血對地泥下出聲投𠊎。</verse>
				<verse number="11">因為地開嘴對你个手中吞掉若老弟个血；這下你愛對地來受咒詛。</verse>
				<verse number="12">你耕種，地也無再為你出產。你愛在地上到處流浪。」</verse>
				<verse number="13">該隱 對上主講：「𠊎受个刑罰忒重，超過𠊎所能擔當个。</verse>
				<verse number="14">看啊！今晡日你將𠊎對這地逐出去，𠊎就見毋到你个面；𠊎將會在地上到處流浪，無論麼人堵到𠊎就想愛㓾𠊎。」</verse>
				<verse number="15">上主對佢講：「毋會恁樣，凡係㓾 該隱 个愛受七倍个報應。」上主就給 該隱 一個記號，免得人堵到佢就㓾佢。</verse>
				<verse number="16">該隱 就離開上主面前，住在 伊甸 園東片安到流浪之地个 挪得 。</verse>
				<verse number="17">該隱 㧯厥𡜵娘同房，厥𡜵娘就有身項，𫱔 以諾 。 該隱 起一座城，就用厥孻仔个名將該城喊做 以諾 。</verse>
				<verse number="18">以諾 𫱔 以拿 ； 以拿 𫱔 米戶雅利 ； 米戶雅利 𫱔 瑪土撒利 ； 瑪土撒利 𫱔 拉麥 。</verse>
				<verse number="19">拉麥 討兩個𡜵娘，一個名安到 亞大 ，還一個名喊做 洗拉 。</verse>
				<verse number="20">亞大 𫱔 雅八 ； 雅八 就係住帳篷、畜頭牲个人个先祖。</verse>
				<verse number="21">厥老弟名喊做 猶八 ；佢係彈琴、歕簫个人个先祖。</verse>
				<verse number="22">洗拉 也𫱔 土八‧該隱 ，就係打造各種銅鐵利器个。 土八‧該隱 个老妹就係 拿瑪 。</verse>
				<verse number="23">拉麥 對佢兩個𡜵娘講： 「 亞大 、 洗拉 啊，聽𠊎講！ 拉麥 个𡜵娘啊，愛聽清楚！ 傷害𠊎个人，𠊎㓾死佢； 後生人打傷𠊎，𠊎㓾掉佢。</verse>
				<verse number="24">若係㓾死 該隱 个愛賠七條命， 㓾死 拉麥 个就愛賠七十七條命。」</verse>
				<verse number="25">亞當 又㧯厥𡜵娘同房； 夏娃 就𫱔一個孻仔，將佢安到 塞特 ，講：「上帝另外又給𠊎一個孻仔，來代 該隱 㓾死个 亞伯 。」</verse>
				<verse number="26">塞特 也𫱔一個孻仔，將佢安到 以挪士 。該時，人正開始求喊上主个名。</verse>
			</chapter>
			<chapter number="5">
				<verse number="1">這係 亞當 後代个族譜。 (上帝創造人个時，係照上帝个樣式造佢。</verse>
				<verse number="2">佢創造佢等，有男有女。佢等受造个時，上帝賜福給佢等，將佢等安做「人」。)</verse>
				<verse number="3">亞當 一百三十歲个時，𫱔一個孻仔，形像、樣式㧯佢自家盡相像，就㧯佢安到 塞特 。</verse>
				<verse number="4">亞當 𫱔 塞特 以後，還在世八百年，又生養子女。</verse>
				<verse number="5">亞當 食到九百三十歲正過身。</verse>
				<verse number="6">塞特 一百零五歲个時，𫱔 以挪士 。</verse>
				<verse number="7">塞特 𫱔 以挪士 以後，還在世八百零七年，又生養子女。</verse>
				<verse number="8">塞特 食到九百一十二歲正過身。</verse>
				<verse number="9">以挪士 九十歲个時，𫱔 該南 。</verse>
				<verse number="10">以挪士 𫱔 該南 以後，還在世八百一十五年，又生養子女。</verse>
				<verse number="11">以挪士 食到九百零五歲正過身。</verse>
				<verse number="12">該南 七十歲个時，𫱔 瑪勒列 。</verse>
				<verse number="13">該南 𫱔 瑪勒列 以後，還在世八百四十年，又生養子女。</verse>
				<verse number="14">該南 食到九百一十歲正過身。</verse>
				<verse number="15">瑪勒列 六十五歲个時，𫱔 雅列 。</verse>
				<verse number="16">瑪勒列 𫱔 雅列 以後，還在世八百三十年，又生養子女。</verse>
				<verse number="17">瑪勒列 食到八百九十五歲正過身。</verse>
				<verse number="18">雅列 一百六十二歲个時，𫱔 以諾 。</verse>
				<verse number="19">雅列 𫱔 以諾 以後，還在世八百年，又生養子女。</verse>
				<verse number="20">雅列 食到九百六十二歲正過身。</verse>
				<verse number="21">以諾 六十五歲个時，𫱔 瑪土撒拉 。</verse>
				<verse number="22">以諾 𫱔 瑪土撒拉 以後，㧯上帝同行三百年，又生養子女。</verse>
				<verse number="23">以諾 在世食到三百六十五歲。</verse>
				<verse number="24">以諾 㧯上帝共下行，以後上帝將佢帶走，佢就無在了。</verse>
				<verse number="25">瑪土撒拉 一百八十七歲个時，𫱔 拉麥 。</verse>
				<verse number="26">瑪土撒拉 𫱔 拉麥 以後，還在世七百八十二年，又生養子女。</verse>
				<verse number="27">瑪土撒拉 食到九百六十九歲正過身。</verse>
				<verse number="28">拉麥 一百八十二歲个時，𫱔一個孻仔，</verse>
				<verse number="29">㧯佢安到 挪亞 ，講：「因為上主咒詛土地，俾𠊎等勞碌耕種，這個孻仔會俾𠊎等在辛苦中得到安慰。」</verse>
				<verse number="30">拉麥 𫱔 挪亞 以後，還在世五百九十五年，又生養子女。</verse>
				<verse number="31">拉麥 食到七百七十七歲正過身。</verse>
				<verse number="32">挪亞 五百歲个時，𫱔 閃 、 含 㧯 雅弗 。</verse>
			</chapter>
			<chapter number="6">
				<verse number="1">人類在地上開始增加个時，也有𫱔妹仔。</verse>
				<verse number="2">該兜稱做上帝孻仔个看到人類个妹仔盡靚，就隨意擇去做𡜵娘。</verse>
				<verse number="3">上主講：「人既然屬肉體，𠊎个靈就毋會永遠在佢底背，所以佢个壽命可以到一百二十歲。」</verse>
				<verse number="4">該時以後，在地上有高大个人；佢等係稱做上帝个孻仔㧯人類个妹仔所𫱔个後代，係古時代个英雄㧯名人。</verse>
				<verse number="5">上主看到人類在地上罪惡滿滿，人人心中歸日所想个全係邪惡。</verse>
				<verse number="6">上主道嘆佢造人在地上，心中憂傷。</verse>
				<verse number="7">上主講：「𠊎愛對地上消滅𠊎造个人類，也愛除滅獸類、爬蟲㧯飛鳥，因為𠊎後悔造它兜。」</verse>
				<verse number="8">總係上主歡喜 挪亞 。</verse>
				<verse number="9">挪亞 个後代記在下背： 挪亞 係正直人，係當時一個無好嫌个人；佢㧯上帝有親密个交往。</verse>
				<verse number="10">挪亞 𫱔三個孻仔，就係 閃 、 含 㧯 雅弗 。</verse>
				<verse number="11">其他个人在上帝看來係邪惡个，全地充滿兇暴。</verse>
				<verse number="12">上帝看全世界已經敗壞，所有个人在地上所行个非常邪惡。</verse>
				<verse number="13">上帝對 挪亞 講：「𠊎決定愛滅掉所有个人，因為世界充滿佢等个兇暴；𠊎愛將佢等㧯這世界共下消滅。</verse>
				<verse number="14">你愛擇松柏樹料做一隻大船；底背愛有當多間房，外背、底背全部漆松香。</verse>
				<verse number="15">這大船愛恁樣做：長一百三十三公尺，闊二十二公尺，高十三公尺。</verse>
				<verse number="16">四圍愛做窗門接到船頂，高四十四公分 。門愛安在塍頭。大船愛有上、中、下三層。</verse>
				<verse number="17">看啊！𠊎愛俾大水氾濫大地，消滅天下一切有生命、有血氣个生物；所有在地上个攏總愛滅掉。</verse>
				<verse number="18">總係𠊎㧯你立約。你㧯若𡜵娘、孻仔、心舅愛入去大船。</verse>
				<verse number="19">一切有生命个動物各一對，一公一乸，你愛帶入大船，做得在你該位保全它兜个生命。</verse>
				<verse number="20">各種飛鳥、頭牲、地上个爬蟲，逐樣一對，愛到你該位來保全生命。</verse>
				<verse number="21">你愛積存各種食物，來做你㧯它兜个食物。」</verse>
				<verse number="22">挪亞 就完全照上帝所吩咐个去做。</verse>
			</chapter>
			<chapter number="7">
				<verse number="1">上主對 挪亞 講：「你㧯全家愛入大船去，因為𠊎發現在這世代中，只有你在𠊎面前係正直个人。</verse>
				<verse number="2">宗教禮儀定做淨浰个各種動物，你愛帶七公七乸；各種無淨浰个動物，愛帶一公一乸。</verse>
				<verse number="3">飛鳥也愛帶七公七乸，俾它兜保命留種在全地；</verse>
				<verse number="4">因為再過七日，𠊎愛落大水四十日夜，將𠊎所創造个一切生物攏總對地上除滅。」</verse>
				<verse number="5">挪亞 就照上主所吩咐个去做。</verse>
				<verse number="6">挪亞 六百歲个時，大水氾濫在地上。</verse>
				<verse number="7">挪亞 就㧯厥𡜵娘、孻仔、心舅進入大船閃大水。</verse>
				<verse number="8">淨浰㧯無淨浰个動物、飛鳥、㧯地上一切个爬蟲，</verse>
				<verse number="9">攏總一對一對，有公有乸，跈 挪亞 入大船，係照上帝吩咐 挪亞 个。</verse>
				<verse number="10">七日後，大水氾濫在地上。</verse>
				<verse number="11">挪亞 六百歲該年，二月十七該日，深淵所有个大水源裂開來，天頂个水門也打開來，</verse>
				<verse number="12">大雨落在地上四十日夜。</verse>
				<verse number="13">就在該日， 挪亞 㧯厥𡜵娘、厥孻仔 閃 、 含 、 雅弗 ，並三個心舅攏總進入大船。</verse>
				<verse number="14">佢等㧯各種各類个野獸、頭牲、地上个爬蟲、並飛鳥全部進入大船。</verse>
				<verse number="15">一切有生命、有血氣个生物，攏總一對一對跈 挪亞 進入大船。</verse>
				<verse number="16">該兜入去个動物，全部有公有乸，係照上帝吩咐 挪亞 个。然後上主代 挪亞 關門。</verse>
				<verse number="17">地上做大水四十日。水漲起來，大船在水面上浮起來。</verse>
				<verse number="18">水在地上越漲越高，大船在水面上漂來漂去。</verse>
				<verse number="19">地上个水越來越大，將天下一切个高山沒在水底。</verse>
				<verse number="20">大水超過山頂七公尺，所有高山沒在水底。</verse>
				<verse number="21">地上所有个動物，就係飛鳥、頭牲、野獸、爬蟲，並所有个人攏總死淨淨。</verse>
				<verse number="22">所有在地上鼻孔有氣个生物攏總死掉。</verse>
				<verse number="23">地上所有个生物，對人到頭牲、爬蟲、㧯飛鳥，攏總對地上除滅；只有留下 挪亞 並該兜㧯佢共下在大船肚个。</verse>
				<verse number="24">大水沒掉大地一百五十日。</verse>
			</chapter>
			<chapter number="8">
				<verse number="1">上帝無毋記得 挪亞 㧯大船所有个動物、頭牲。上帝喊風去吹大地，水就退了。</verse>
				<verse number="2">深淵个水源㧯天頂个水門也關起來，天空个大雨乜停下來。</verse>
				<verse number="3">水在地上緊來緊斂；一百五十日後，水就退。</verse>
				<verse number="4">七月十七，大船停在 亞拉臘 山頂。</verse>
				<verse number="5">水又繼續緊退，到十月初一，就看得到山頂。</verse>
				<verse number="6">四十日後， 挪亞 打開大船个窗門，</verse>
				<verse number="7">放一隻烏鴉出去；這隻烏鴉飛來飛去，直到水在地上燥掉。</verse>
				<verse number="8">佢又放一隻月鴿仔出去，愛看水對地上退吂？</verse>
				<verse number="9">總係，因為水還浸等大地，月鴿仔尋毋到停腳个地方，就飛轉大船 挪亞 該位。 挪亞 伸手將月鴿仔接入大船來。</verse>
				<verse number="10">佢又等七日，再一擺將月鴿仔對大船放出去。</verse>
				<verse number="11">到臨暗仔，月鴿仔轉到佢該位，嘴啣等啄下來个新橄欖葉；恁樣， 挪亞 就知水退了。</verse>
				<verse number="12">又等七日，佢又放月鴿仔出去，月鴿仔就無再飛轉來。</verse>
				<verse number="13">挪亞 六百零一歲該年正月初一，地上个水已經燥了。 挪亞 打開船蓋，探頭看，看到地面已經燥了。</verse>
				<verse number="14">到二月二十七，地泥就完全燥了。</verse>
				<verse number="15">上帝對 挪亞 講：</verse>
				<verse number="16">「你㧯若𡜵娘、孻仔、心舅攏總愛對大船出去。</verse>
				<verse number="17">㧯你共下一切有生命个動物，就係飛鳥、頭牲㧯地上个爬蟲，全部愛帶出去，使它兜在地上愛𫱔多多，大大興旺。」</verse>
				<verse number="18">恁樣， 挪亞 就㧯厥𡜵娘、孻仔、心舅共下出來。</verse>
				<verse number="19">各種各類个走獸、爬蟲、飛鳥，所有地上个動物，全部對大船出來。</verse>
				<verse number="20">挪亞 為上主起一座祭壇，取各樣淨浰个頭牲、飛鳥，在祭壇頂獻做燒化祭。</verse>
				<verse number="21">上主鼻到該香氣就歡喜，心肚講：「𠊎一定毋會因為人个行為再咒詛大地；雖然人從細就心思邪惡，𠊎一定毋會像這擺將地上所有个生物再消滅。</verse>
				<verse number="22">只愛大地存留一日，就可以委種收成；有寒熱冬夏、有日時暗晡，永遠無停。」</verse>
			</chapter>
			<chapter number="9">
				<verse number="1">上帝賜福 挪亞 㧯厥孻仔，對佢等講：「愛𫱔多多子女，遍滿世界。</verse>
				<verse number="2">所有地上个獸類、空中个飛鳥、地上个爬蟲，㧯海肚个魚類，全部會驚你等；𠊎愛將這兜交在你等手中。</verse>
				<verse number="3">以前，𠊎將青菜賜給你等做食物；這下𠊎也將這兜動物賜給你等做食物。</verse>
				<verse number="4">總係，你等做毋得食帶血个肉，因為生命在血底背。</verse>
				<verse number="5">無論係人抑係野獸，若係流人个血，害人个命，𠊎一定追討血債；就係害自家个兄弟，也照樣論罪。</verse>
				<verse number="6">流人血个， 別人也愛流佢个血， 因為上帝造人， 係照佢自家个形像造个。</verse>
				<verse number="7">你等愛𫱔多多子女、大大興旺、遍滿世界。」</verse>
				<verse number="8">上帝對 挪亞 㧯佢該兜孻仔講：</verse>
				<verse number="9">「𠊎這下愛㧯你等並你等个子孫立約；</verse>
				<verse number="10">也愛㧯地上所有个生物，就係該兜同你等共下出大船个飛鳥、頭牲、並野獸立約。</verse>
				<verse number="11">𠊎應許你等：凡有血肉个，無再被大水滅掉，毋會再有大水來毀滅大地。」</verse>
				<verse number="12">上帝又講：「這就係𠊎㧯你等並該兜同你等共下各樣个生物，世世代代立約个記號。</verse>
				<verse number="13">𠊎愛將𠊎个天弓放在雲个當中，成做𠊎㧯大地立約个記號。</verse>
				<verse number="14">當𠊎在天空鋪上雲，天弓在雲中出現个時，</verse>
				<verse number="15">𠊎就會紀念𠊎㧯你等並各樣有血肉个生物所立个約；就無再做大水來毀滅所有个生物。</verse>
				<verse number="16">當𠊎看到天弓在雲中出現該時，𠊎就會紀念𠊎㧯地上各樣有血肉个生物所立永遠个約。」</verse>
				<verse number="17">上帝對 挪亞 講：「這就係𠊎㧯地上所有个生物立約个記號。」</verse>
				<verse number="18">挪亞 个孻仔全部對大船出來，佢等係： 閃 、 含 㧯 雅弗 。 ( 含 係 迦南 个阿爸。)</verse>
				<verse number="19">分散在全世間个人類，就係 挪亞 這三個孻仔个子孫。</verse>
				<verse number="20">挪亞 係耕種人，也係最先種葡萄園个人。</verse>
				<verse number="21">佢食葡萄酒，啉到醉醉，脫光衫褲，睡在帳篷肚。</verse>
				<verse number="22">含 ( 迦南 个阿爸) 看到厥爸打赤膊，就出去㧯佢兩個兄弟講。</verse>
				<verse number="23">閃 㧯 雅弗 拿一領長衫袈在兩儕个肩頭項，倒退行入帳篷，去遮阿爸个身體。因為佢等面向外，就無看到阿爸脫光个身體。</verse>
				<verse number="24">挪亞 清醒後，知厥滿子對佢所做个事，</verse>
				<verse number="25">就講： 「 迦南 應當受咒詛！ 佢愛做厥兄弟奴僕个奴僕。」</verse>
				<verse number="26">又講： 「愛頌讚上主， 閃 个上帝！ 迦南 愛做 閃 个奴僕。</verse>
				<verse number="27">願上帝俾 雅弗 興旺， 使佢住在 閃 个帳篷肚； 又願 迦南 做佢个奴僕。」</verse>
				<verse number="28">大水以後， 挪亞 還在世三百五十年。</verse>
				<verse number="29">挪亞 食到九百五十歲正過身。</verse>
			</chapter>
			<chapter number="10">
				<verse number="1">以下係 挪亞 个孻仔 閃 、 含 㧯 雅弗 个後代。大水以後佢等全部有𫱔孻仔。</verse>
				<verse number="2">雅弗 个孻仔係： 歌篾 、 瑪各 、 瑪代 、 雅完 、 土巴 、 米設 、 提拉 。</verse>
				<verse number="3">歌篾 个子孫係 亞實基拿 人、 利法 人、 陀迦瑪 人。</verse>
				<verse number="4">雅完 个子孫係 以利沙 人、 他施 人、 基提 人， 羅德 人。</verse>
				<verse number="5">佢等係住在 地中海 海滣㧯海島民族个祖先。 雅弗 个後代各族在自家个部落、國家住，使用自家个語言。</verse>
				<verse number="6">含 个孻仔係： 古實 、 埃及 、 弗 、 迦南 。</verse>
				<verse number="7">古實 个子孫係 西巴 人、 哈腓拉 人、 撒弗他 人、 拉瑪 人、 撒弗提迦 人。 拉瑪 个子孫係 示巴 人㧯 底但 人。</verse>
				<verse number="8">古實 有一個孻仔名安到 寧錄 ；佢係歷史上第一個英雄。</verse>
				<verse number="9">因為有上主个幫助，佢成做打獵英雄。所以，有俗語講：「願上主俾你成做像 寧錄 恁樣个打獵英雄。」</verse>
				<verse number="10">本來，佢个王國包含 巴比倫 、 以力 、 亞甲 ；這三個地方在 示拿 个所在。</verse>
				<verse number="11">佢對這地方出來，去 亞述 ，起 尼尼微 城、 利河伯 城、 迦拉 城，</verse>
				<verse number="12">又在 尼尼微 㧯 迦拉 大城中間起 利鮮 城。</verse>
				<verse number="13">埃及 个後代係： 路低 人、 亞拿米 人、 利哈比 人、 拿弗土希 人、</verse>
				<verse number="14">帕斯魯細 人、 迦斯路希 人㧯 克里特 人。 非利士 人係 克里特 人个後代。</verse>
				<verse number="15">迦南 𫱔長子 西頓 ，又𫱔 赫 。</verse>
				<verse number="16">迦南 也係 耶布斯 人、 亞摩利 人、 革迦撒 人、</verse>
				<verse number="17">希未 人、 亞基 人、 西尼 人、</verse>
				<verse number="18">亞瓦底 人、 洗瑪利 人、 哈馬 人个祖先。 迦南 人各族分佈盡闊；</verse>
				<verse number="19">佢等个地界對 西頓 向南到 迦薩 附近个 基拉耳 ，向東到 所多瑪 、 蛾摩拉 、 押瑪 㧯 拉沙 附近个 洗扁 。</verse>
				<verse number="20">以上係 含 个子孫，各族在自家个部落、國家住，使用自家个語言。</verse>
				<verse number="21">閃 係 雅弗 个大哥，佢係 希伯 子孫个祖先。</verse>
				<verse number="22">閃 个孻仔係： 以攔 、 亞述 、 亞法撒 、 路得 、 亞蘭 。</verse>
				<verse number="23">亞蘭 个子孫係： 烏斯 人、 戶勒 人、 基帖 人、 瑪施 人。</verse>
				<verse number="24">亞法撒 𫱔 沙拉 ； 沙拉 𫱔 希伯 。</verse>
				<verse number="25">希伯 𫱔兩個孻仔：一個安到 法勒 ，因為在佢个時代，人類係分散來住个；佢个兄弟名喊 約坍 。</verse>
				<verse number="26">約坍 个子孫係： 亞摩答 人、 沙列 人、 哈薩瑪非 人、 耶拉 人、</verse>
				<verse number="27">哈多蘭 人、 烏薩 人、 德拉 人、</verse>
				<verse number="28">俄巴路 人、 亞比瑪利 人、 示巴 人、</verse>
				<verse number="29">阿斐 人、 哈腓拉 人、 約巴 人。這兜人全部係 約坍 个子孫。</verse>
				<verse number="30">這兜人住東片个山地，對 米沙 一直到 西發 。</verse>
				<verse number="31">這兜人係 閃 个子孫，各族在自家个部落、國家住，使用自家个語言。</verse>
				<verse number="32">以上係 挪亞 三個孻仔个宗族，照各支族立國。大水後，地上个國家係對這兜宗族分出來个。</verse>
			</chapter>
			<chapter number="11">
				<verse number="1">一開始，天下人个口音共樣，講共樣个話。</verse>
				<verse number="2">佢等在東片徙來徙去，在 巴比倫 尋到平原，就住在該位。</verse>
				<verse number="3">佢等共下參詳講：「來噢！𫣆等來做磚仔，將磚仔燒硬。」佢等就拿磚仔準石頭，又用馬膠準黏灰。</verse>
				<verse number="4">佢等講：「𫣆來起一座城，底背愛有高到堵天个塔，來傳揚𫣆等个名，免得𫣆等分散到世界各地。」</verse>
				<verse number="5">上主下來，愛看世間人所起个城㧯塔。</verse>
				<verse number="6">上主講：「看哪！佢等係共一個民族，講共樣个話；這下佢等開始做這事，以後佢等想做个事就無麼介做毋到个。</verse>
				<verse number="7">來啊！𫣆等下來去，在該位變亂佢等个口音，俾佢等無法度互相溝通。」</verse>
				<verse number="8">恁樣，上主將佢等對該位分散到全世界；佢等就停工無起該城了。</verse>
				<verse number="9">因為上主在該位打亂人類个口音，將佢等分散到世界各地，所以這座城喊做 巴別 。</verse>
				<verse number="10">以下係 閃 个後代。大水後第二年， 閃 一百歲个時𫱔 亞法撒 。</verse>
				<verse number="11">閃 𫱔 亞法撒 以後，還在世五百年，又生養子女。</verse>
				<verse number="12">亞法撒 三十五歲个時𫱔 沙拉 。</verse>
				<verse number="13">亞法撒 𫱔 沙拉 以後，還在世四百零三年，又生養子女。</verse>
				<verse number="14">沙拉 三十歲个時𫱔 希伯 。</verse>
				<verse number="15">沙拉 𫱔 希伯 以後，還在世四百零三年，又生養子女。</verse>
				<verse number="16">希伯 三十四歲个時𫱔 法勒 。</verse>
				<verse number="17">希伯 𫱔 法勒 以後，還在世四百三十年，又生養子女。</verse>
				<verse number="18">法勒 三十歲个時𫱔 拉吳 。</verse>
				<verse number="19">法勒 𫱔 拉吳 以後，還在世兩百零九年，又生養子女。</verse>
				<verse number="20">拉吳 三十二歲个時𫱔 西鹿 。</verse>
				<verse number="21">拉吳 𫱔 西鹿 以後，還在世兩百零七年，又生養子女。</verse>
				<verse number="22">西鹿 三十歲个時𫱔 拿鶴 。</verse>
				<verse number="23">西鹿 𫱔 拿鶴 以後，還在世兩百年，又生養子女。</verse>
				<verse number="24">拿鶴 二十九歲个時𫱔 他拉 。</verse>
				<verse number="25">拿鶴 𫱔 他拉 以後，還在世一百十九年，又生養子女。</verse>
				<verse number="26">他拉 七十歲个時，已經做 亞伯蘭 、 拿鶴 、 哈蘭 个阿爸。</verse>
				<verse number="27">以下係 他拉 个後代。 他拉 𫱔 亞伯蘭 、 拿鶴 、 哈蘭 。 哈蘭 𫱔 羅得 。</verse>
				<verse number="28">哈蘭 死在故鄉 巴比倫 个 吾珥 个時，厥爸 他拉 還在。</verse>
				<verse number="29">亞伯蘭 㧯 拿鶴 攏討𡜵娘； 亞伯蘭 个𡜵娘名喊 莎萊 ； 拿鶴 个𡜵娘名喊 密迦 ，係 哈蘭 个妹仔； 哈蘭 係 密迦 㧯 亦迦 个阿爸。</verse>
				<verse number="30">莎萊 毋會𫱔，無細人仔。</verse>
				<verse number="31">他拉 帶等孻仔 亞伯蘭 ，㧯厥孫仔 羅得 、就係 哈蘭 个孻仔，並厥心舅 莎萊 、就係 亞伯蘭 个𡜵娘，離開 巴比倫 个 吾珥 ，愛去 迦南 地。佢等到 哈蘭 就住在該位。</verse>
				<verse number="32">他拉 兩百零五歲个時，在 哈蘭 過身。</verse>
			</chapter>
			<chapter number="12">
				<verse number="1">上主對 亞伯蘭 講：「你愛離開你个故鄉、親族、㧯若爸个屋下，到𠊎指示你去个地方。</verse>
				<verse number="2">𠊎愛俾你成做大國；𠊎愛賜福給你，使你大有名望；人愛因為你來得到福氣。</verse>
				<verse number="3">祝福你个，𠊎愛賜福給佢； 咒詛你个，𠊎愛咒詛佢。 𠊎愛因為你賜福給地上个萬民。」</verse>
				<verse number="4">亞伯蘭 七十五歲个時，照上主个指示離開 哈蘭 ； 羅得 也跈等佢。</verse>
				<verse number="5">亞伯蘭 帶𡜵娘 莎萊 、姪仔 羅得 、㧯佢等在 哈蘭 所積存个財產、所得到个人丁向 迦南 出發。 佢等去到 迦南 以後，</verse>
				<verse number="6">亞伯蘭 經過該所在，來到 示劍 个 摩利 橡樹附近。該時 迦南 人還住在該位。</verse>
				<verse number="7">上主向 亞伯蘭 顯現，對佢講：「𠊎愛將這垤土地賜給你个後代。」 亞伯蘭 就在該位為向佢顯現个上主起一座祭壇。</verse>
				<verse number="8">佢對該位徙到 伯特利 東片个山區，在該位搭帳篷；西片係 伯特利 ，東片係 艾 ；在該位佢又為上主起一座祭壇，求喊上主个名。</verse>
				<verse number="9">以後， 亞伯蘭 漸漸向南徙，到 迦南 个南部。</verse>
				<verse number="10">該所在發生飢荒，情況非常嚴重。 亞伯蘭 就下到 埃及 ，愛暫時住在該位。</verse>
				<verse number="11">差毋多會到 埃及 个時， 亞伯蘭 對厥𡜵娘 莎萊 講：「𠊎知你係盡靚个婦人家；</verse>
				<verse number="12">埃及 人看到你，一定會講：『這係厥𡜵娘』。因為恁樣，佢等會㓾死𠊎，留下你。</verse>
				<verse number="13">請你㧯佢等講，你係𠊎个老妹。佢等就會因為你个緣故好款待𠊎，饒𠊎个命。」</verse>
				<verse number="14">亞伯蘭 到 埃及 个時， 埃及 人就看到 莎萊 當靚。</verse>
				<verse number="15">埃及 王 个官員看到 莎萊 ，就去王面前讚美姖； 莎萊 就被人帶入王宮。</verse>
				<verse number="16">王因為這婦人家个緣故，就好款待 亞伯蘭 ； 亞伯蘭 就得到盡多个牛羊、驢仔、駱駝、奴僕㧯奴婢。</verse>
				<verse number="17">總係，上主因為 亞伯蘭 个𡜵娘 莎萊 个緣故，使王㧯佢全家發大病受苦。</verse>
				<verse number="18">所以王就喊 亞伯蘭 來，對佢講：「你做麼介恁樣對待𠊎？做麼介毋㧯𠊎講姖係若𡜵娘？</verse>
				<verse number="19">做麼介講姖係若老妹？害𠊎將姖帶來愛做𠊎个𡜵娘！這下你看，若𡜵娘在這，帶姖走！」</verse>
				<verse number="20">因為恁樣，王就命令人將 亞伯蘭 㧯厥𡜵娘，並佢所有个一切送走。</verse>
			</chapter>
			<chapter number="13">
				<verse number="1">亞伯蘭 帶等厥𡜵娘㧯 羅得 、並一切所有个，對 埃及 向北行倒轉 迦南 个南部。</verse>
				<verse number="2">亞伯蘭 當好額，有盡多个金銀㧯頭牲。</verse>
				<verse number="3">後來佢離開該位，漸漸向北去 伯特利 。佢轉到 伯特利 㧯 艾 个中間，就係佢頭擺搭帳篷、</verse>
				<verse number="4">起祭壇个所在；佢就在該位求喊上主个名。</verse>
				<verse number="5">㧯 亞伯蘭 共下行个 羅得 ，也有牛群、羊群㧯帳篷。</verse>
				<verse number="6">佢兩家个牛群、羊群忒多，該地方無罅大，容納毋下，使佢等無辦法共下住。</verse>
				<verse number="7">(當時， 迦南 人㧯 比利洗 人還住在該位。) 亞伯蘭 个牧人㧯 羅得 个牧人常常爭地盤。</verse>
				<verse number="8">亞伯蘭 就對 羅得 講：「𫣆係骨肉之親；你㧯𠊎毋好相爭，你个牧人㧯𠊎个牧人也毋好相爭。</verse>
				<verse number="9">𫣆來分開！你看，頭前還有一大片个土地；你選右片，𠊎就選左片；你行左片，𠊎就行右片。」</verse>
				<verse number="10">羅得 向四面看，看到 約旦 河一直到 瑣珥 該地方係平原，水源充足，像上主个園 ，又像 埃及 个土地。 (該時，上主還吂消滅 所多瑪 㧯 蛾摩拉 。)</verse>
				<verse number="11">羅得 就擇 約旦 河該片平原，徙向東片去。佢兩儕就恁樣分開。</verse>
				<verse number="12">亞伯蘭 住在 迦南 ； 羅得 住在河該片平原个城鎮，最後將帳篷徙到 所多瑪 附近。</verse>
				<verse number="13">所多瑪 人在上主面前罪大惡極。</verse>
				<verse number="14">羅得 離開 亞伯蘭 以後，上主對 亞伯蘭 講：「你愛在所企个地方，向東西南北看。</verse>
				<verse number="15">𠊎愛將你看到這所有个土地攏總賜給你㧯若子孫；這土地愛永遠歸屬你等。</verse>
				<verse number="16">𠊎愛使你个子孫像地上个泥沙恁多；人若算得出地上个泥沙，正算得出你个子孫有幾多。</verse>
				<verse number="17">䟘起來！去行透這垤地；𠊎愛將這位賜給你。」</verse>
				<verse number="18">亞伯蘭 就將帳篷徙到 希伯崙 ，在 幔利 个橡樹附近住；佢在該位為上主起一座祭壇。</verse>
			</chapter>
			<chapter number="14">
				<verse number="1">巴比倫 王 暗拉非 、 以拉撒 王 亞略 、 以攔 王 基大老瑪 、 戈印 王 提達 這四個王聯合，</verse>
				<verse number="2">㧯 所多瑪 王 比拉 、 蛾摩拉 王 比沙 、 押瑪 王 示納 、 洗扁 王 善以別 、 比拉 王 (又安到 瑣珥 王) 這五個王相㓾。</verse>
				<verse number="3">五王个軍隊在 西訂 山壢會合； 西訂 山壢就係 鹽海 。</verse>
				<verse number="4">佢等識被 基大老瑪 管十二年，到第十三年佢等就造反。</verse>
				<verse number="5">第十四年 基大老瑪 㧯佢同盟國个王帶領軍隊，在 亞斯他錄‧加寧 打贏 利乏音 人，在 哈麥 打贏 蘇西 人，在 基列亭 平原打贏 以米 人，</verse>
				<verse number="6">在 以東 山區打贏 何利 人，一直打到接近曠野个 伊勒‧巴蘭 。</verse>
				<verse number="7">然後佢等又倒轉 安‧密巴 (就係 加低斯 )，佔領 亞瑪力 人全部个土地，打贏住在 哈洗遜‧他瑪 个 亞摩利 人。</verse>
				<verse number="8">所以， 所多瑪 王、 蛾摩拉 王、 押瑪 王、 洗扁 王㧯 比拉 王 (就係 瑣珥 王) 个軍隊全部出來，在 西訂 山壢擺陣㧯佢等相㓾；</verse>
				<verse number="9">就係㧯 以攔 王 基大老瑪 、 戈印 王 提達 、 巴比倫 王 暗拉非 、 以拉撒 王 亞略 相㓾；恁樣，五個王㧯四個王相㓾。</verse>
				<verse number="10">西訂 山壢有當多石油窟。 所多瑪 王㧯 蛾摩拉 王打輸逃走个時，跌落窟肚；其他三個王走到山頂去。</verse>
				<verse number="11">四個王就將 所多瑪 、 蛾摩拉 所有个財產㧯糧食搶淨淨。</verse>
				<verse number="12">該時， 亞伯蘭 个姪仔 羅得 住在 所多瑪 ；佢等也將佢捉去，搶走佢个財產。</verse>
				<verse number="13">有一個逃出來个人來㧯 希伯來 人 亞伯蘭 報告。該時， 亞伯蘭 住在 亞摩利 人 幔利 佢个橡樹附近。 幔利 㧯佢个兄弟 以實各 並 亞乃 全部係㧯 亞伯蘭 結盟个。</verse>
				<verse number="14">亞伯蘭 一聽到厥姪仔被人捉去，就召集家族中精練个壯丁三百一十八人，去追該四個王，一直追到 但 。</verse>
				<verse number="15">佢在該位將壯丁分做幾隊，在暗晡時進攻，打到敵人拚命逃走。佢繼續追到 大馬士革 北片个 何巴 ，</verse>
				<verse number="16">將被人搶走个財產全部搶轉來，又救轉佢个姪仔 羅得 㧯佢所有个財產，還有婦女並其他个人。</verse>
				<verse number="17">亞伯蘭 打贏 基大老瑪 並㧯佢同盟个王轉來个時， 所多瑪 王到 沙微 山壢 (就係 王 山壢) 迎接佢。</verse>
				<verse number="18">至高上帝个祭司 撒冷 王 麥基洗德 也帶等餅㧯酒出來迎接 亞伯蘭 ，</verse>
				<verse number="19">祝福佢，講：「願至高个上帝、天地个創造者，賜福給 亞伯蘭 ！</verse>
				<verse number="20">願使你打贏敵人个至高上帝得到頌讚！」 亞伯蘭 將搶轉來个戰利品中拿出十分之一送給 麥基洗德 。</verse>
				<verse number="21">所多瑪 王對 亞伯蘭 講：「將𠊎个人民還給𠊎，戰利品你做你拿去！」</verse>
				<verse number="22">亞伯蘭 對 所多瑪 王講：「𠊎對上主 — 至高个上帝、天地个創造者發誓：</verse>
				<verse number="23">𠊎絕對毋拿你个東西，就係一條線、一條鞋帶𠊎也無愛，免得你後來講：『𠊎俾 亞伯蘭 發財。』</verse>
				<verse number="24">𠊎个僕人所食个，算係已經還𠊎，其他个東西𠊎無愛；總係㧯𠊎共下來个 亞乃 、 以實各 㧯 幔利 所應該得个，分給佢等。」</verse>
			</chapter>
			<chapter number="15">
				<verse number="1">這事以後， 亞伯蘭 在異象中聽到上主對佢講：「 亞伯蘭 ，毋使驚！𠊎愛保護你，大大賞賜你。」</verse>
				<verse number="2">總係 亞伯蘭 應講：「至高个上主啊！𠊎既然無孻仔，你還愛賞賜麼介呢？𠊎个家業會被 大馬士革 人 以利以謝 繼承。」</verse>
				<verse number="3">亞伯蘭 又講：「你無給𠊎孻仔，所以在𠊎屋下出世个一個奴僕愛繼承𠊎个產業。」</verse>
				<verse number="4">即時，上主又出聲對佢講：「奴僕 以利以謝 毋會做你个繼承人；只有你親生个孻仔正係你个繼承人。」</verse>
				<verse number="5">上主然後帶佢出去外背，講：「你看天頂，算看仔星仔有幾多！你个後代會像星仔恁多。」</verse>
				<verse number="6">亞伯蘭 相信上主，上主就看佢做義人。</verse>
				<verse number="7">上主又對佢講：「𠊎係上主，𠊎帶你離開 巴比倫 个 吾珥 ，為到愛將這垤土地賜給你做你个產業。」</verse>
				<verse number="8">總係 亞伯蘭 問：「至高个上主啊！𠊎樣知一定會得到這垤土地呢？」</verse>
				<verse number="9">上主應講：「你帶一隻三歲大个牛乸、一隻三歲大个山羊乸、一隻三歲大个綿羊牯、還有一隻月鴿仔、一隻班鳩到𠊎這位來。」</verse>
				<verse number="10">亞伯蘭 就將這兜動物帶到上帝該位，一隻一隻剖開，分做兩析，排做兩行；總係鳥仔無剖開。</verse>
				<verse number="11">有鷂婆飛下來，停在該兜肉頂高， 亞伯蘭 就將它兜逐走。</verse>
				<verse number="12">日頭會落山个時， 亞伯蘭 當好睡，有盡得人驚个大烏暗臨到佢身上。</verse>
				<verse number="13">上主對佢講：「你一定愛知，你个子孫會在別人个地方做旅客，後來被人做奴才，被人欺負四百年。</verse>
				<verse number="14">總係，欺負佢等个國家，𠊎一定愛責罰它；你个後代離開該位个時，會帶當多个財產出來。</verse>
				<verse number="15">你自家會享長壽，平平安安轉到若祖宗該位，入土安葬。</verse>
				<verse number="16">到第四代，你个子孫正能轉到這位來，因為𠊎愛等 亞摩利 人罪惡滿滿个時，正逐走佢等。」</verse>
				<verse number="17">日頭落山斷烏个時，忽然有出煙个火爐㧯𤏸等个火把，對該兜肉當中經過。</verse>
				<verse number="18">該日，上主就㧯 亞伯蘭 立約，講：「𠊎將這垤土地賜給你个後代；這垤地對 埃及 河直到 幼發拉底 大河一帶，</verse>
				<verse number="19">就係 基尼 人、 基尼洗 人、 甲摩尼 人、</verse>
				<verse number="20">赫 人、 比利洗 人、 利乏音 人、</verse>
				<verse number="21">亞摩利 人、 迦南 人、 革迦撒 人㧯 耶布斯 人个土地。」</verse>
			</chapter>
			<chapter number="16">
				<verse number="1">亞伯蘭 个𡜵娘 莎萊 無𫱔子女給佢。 莎萊 有一個使女安到 夏甲 ，係 埃及 人。</verse>
				<verse number="2">莎萊 對 亞伯蘭 講：「上主使𠊎毋會𫱔。請你㧯𠊎个使女同房，無定著姖會代𠊎𫱔一個孻仔。」 亞伯蘭 就聽 莎萊 个話。</verse>
				<verse number="3">所以， 亞伯蘭 个𡜵娘 莎萊 就將使女 埃及 人 夏甲 交給厥老公做細姐。 (這件事係 亞伯蘭 在 迦南 住十年以後正發生个。)</verse>
				<verse number="4">亞伯蘭 㧯 夏甲 同房，姖就有身項。姖一知自家有身，就驕傲起來，看毋起頭家娘。</verse>
				<verse number="5">莎萊 對 亞伯蘭 埋怨講：「𠊎被人欺負，係你毋著 。𠊎將𠊎个使女放在你个懷中；姖一知自家有身項，就看毋起𠊎。願上主在你㧯𠊎中間主持公道。」</verse>
				<verse number="6">亞伯蘭 應佢講：「姖係你个使女，係你管个，你做得隨意對待姖！」 莎萊 就苦毒 夏甲 ； 夏甲 忍毋住就偷走。</verse>
				<verse number="7">上主个天使在曠野，愛去 書珥 路上个泉水滣堵到 夏甲 ，</verse>
				<verse number="8">對姖講：「 莎萊 个使女 夏甲 啊，你對㖠位來？愛去㖠位？」姖應講：「𠊎對頭家娘 莎萊 該位偷走出來。」</verse>
				<verse number="9">上主个天使講：「你愛轉去頭家娘該位，完全順從姖。」</verse>
				<verse number="10">上主个天使又講：「𠊎愛使你个子孫極多，多到無人算得出來。」</verse>
				<verse number="11">上主个天使又講：「你已經有身項，會𫱔一個孻仔；你愛㧯佢安到 以實瑪利 ，因為上主聽到你个苦情。</verse>
				<verse number="12">你个孻仔將來會像一隻野驢；佢愛攻打人，人也愛攻打佢。佢愛㧯親族結冤仇，單獨生活。」</verse>
				<verse number="13">夏甲 就講：「𠊎正經在這位看到該看顧𠊎个上帝嗎？𠊎樣般還有命！」所以姖將該㧯姖講話个上主喊做「你係看顧人个上帝」。</verse>
				<verse number="14">因為恁樣，人喊該口井做 庇珥‧拉海‧萊 。這口井係在 加低斯 㧯 巴列 中間。</verse>
				<verse number="15">夏甲 為 亞伯蘭 𫱔一個孻仔； 亞伯蘭 㧯佢安名喊做 以實瑪利 。</verse>
				<verse number="16">夏甲 為 亞伯蘭 𫱔 以實瑪利 个時， 亞伯蘭 八十六歲。</verse>
			</chapter>
			<chapter number="17">
				<verse number="1">亞伯蘭 九十九歲个時，上主向佢顯現，對佢講：「𠊎係全能个上帝。你愛在𠊎面前行事，做一個無好嫌个人。</verse>
				<verse number="2">𠊎愛㧯你立約，俾你有盡多子孫。」</verse>
				<verse number="3">亞伯蘭 面伏到地上；上帝又對佢講：</verse>
				<verse number="4">「𠊎㧯你立个約係恁樣：你愛做盡多國家个阿爸。</verse>
				<verse number="5">對這下開始，你个名毋好再安到 亞伯蘭 ，愛喊做 亞伯拉罕 ，因為𠊎立你做盡多國家个阿爸。</verse>
				<verse number="6">𠊎愛賜給你盡多子孫；你个子孫會建立盡多國家，你个後代會出盡多君王。</verse>
				<verse number="7">「𠊎愛堅定𠊎㧯你並你世世代代子孫立个約，做永遠个約。𠊎愛做你㧯子子孫孫个上帝。</verse>
				<verse number="8">𠊎愛將你這下做旅客所住个地方，就係 迦南 全地，賜給你㧯你个後代，做永遠个產業；𠊎也愛做佢等个上帝。」</verse>
				<verse number="9">上帝對 亞伯拉罕 講：「你㧯你个後代也一定愛世世代代遵守𠊎个約。</verse>
				<verse number="10">你等當中个細孻仔全部愛受割禮；這係𠊎㧯你並你世世代代个子孫所立个約，你等一定愛遵守。</verse>
				<verse number="11">對這下開始，你等所有个細孻仔全部愛受割禮 ；這係𠊎㧯你等立約个證據。</verse>
				<verse number="12">你等世世代代个細孻仔，無論係自家𫱔个、抑係㧯外國人買來个奴僕，出世第八日，全部愛受割禮。</verse>
				<verse number="13">你等屋下每一個細孻仔愛受割禮；留在肉體上這個記號，表示𠊎㧯你等立永遠个約。</verse>
				<verse number="14">男人無受割禮个愛對𠊎个子民中除掉，因為佢無遵守𠊎个約。」</verse>
				<verse number="15">上帝對 亞伯拉罕 講：「你毋好再喊若𡜵娘 莎萊 ；姖个名愛改做 莎拉 。</verse>
				<verse number="16">𠊎愛賜福給姖，使姖為你𫱔一個孻仔。𠊎愛賜福給姖，俾姖成做盡多國家个阿姆；姖个後代會出君王。」</verse>
				<verse number="17">亞伯拉罕 就仆在地上偷笑，心肚講：「一百歲个老人家，敢還會𫱔？ 莎拉 已經九十歲，敢還會𫱔？」</verse>
				<verse number="18">亞伯拉罕 對上帝講：「樣毋俾 以實瑪利 做𠊎个繼承人？」</verse>
				<verse number="19">上帝講：「做毋得！若𡜵娘 莎拉 一定會為你𫱔一個孻仔，你愛㧯佢安名 以撒 。𠊎愛㧯佢並佢个子子孫孫堅定𠊎个約；這係永遠个約。</verse>
				<verse number="20">有關 以實瑪利 ，𠊎也愛聽你个要求。𠊎愛賜福給佢，使佢子孫盡多，代代相傳。佢愛𫱔十二個族長；𠊎愛俾佢个後代成做大國。</verse>
				<verse number="21">總係𠊎愛㧯 以撒 堅定𠊎个約。到明年這時節， 莎拉 會𫱔 以撒 。」</verse>
				<verse number="22">上帝㧯 亞伯拉罕 講完這兜話，就離開佢升天去了。</verse>
				<verse number="23">在該日， 亞伯拉罕 遵守上帝个命令，為佢个孻仔 以實瑪利 㧯屋下出世所有个男人，包含該兜買來个奴僕，全部行割禮。</verse>
				<verse number="24">亞伯拉罕 受割禮个時九十九歲。</verse>
				<verse number="25">厥孻仔 以實瑪利 受割禮个時係十三歲。</verse>
				<verse number="26">在該日， 亞伯拉罕 㧯厥孻仔 以實瑪利 共下受割禮。</verse>
				<verse number="27">所有个男人，無論係屋下出世个，抑係對外國人買來个，攏總㧯佢共下受割禮。</verse>
			</chapter>
			<chapter number="18">
				<verse number="1">上主在 幔利 佢个橡樹該位對 亞伯拉罕 顯現。該時係當晝最熱个時， 亞伯拉罕 坐在帳篷門口。</verse>
				<verse number="2">佢昂頭一看，看到三個人企在對面，就走過去迎接佢等，伏在地上，</verse>
				<verse number="3">講：「𠊎主啊，你若係認為𠊎堪得，請落來歇睏一下，俾若僕人招待正走。</verse>
				<verse number="4">𠊎拿水給你等洗腳，請在樹下坐涼。</verse>
				<verse number="5">𠊎拿一些東西給你等食，你等食飽正有氣力繼續行路。你等既然到𠊎屋下來，當然愛俾若僕人招待。」 佢等應講：「好啊，照你講个去做。」</verse>
				<verse number="6">亞伯拉罕 就趕緊走入帳篷，對 莎拉 講：「遽遽拿二十公升最好个麵粉出來，做兜餅仔。」</verse>
				<verse number="7">佢又走到牛群中，擇一隻又嫩又肥个細牛仔，交給僕人，吩咐佢遽遽準備。</verse>
				<verse number="8">然後，佢將乳油、牛乳㧯牛肉拿來，擺在佢等面前，親身在樹下招待佢等；佢等就食。</verse>
				<verse number="9">佢等問 亞伯拉罕 ：「若𡜵娘 莎拉 在㖠位？」 佢應講：「在帳篷肚。」</verse>
				<verse number="10">其中一儕講：「明年這時節，𠊎愛倒轉來；若𡜵娘 莎拉 會𫱔一個孻仔。」 莎拉 在帳篷門口，在該人後背聽到。</verse>
				<verse number="11">該時， 亞伯拉罕 㧯 莎拉 已經盡多歲， 莎拉 个月經也早就停掉。</verse>
				<verse number="12">所以 莎拉 心肚偷偷仔笑講：「𠊎已經恁老，吾老公也恁老，𠊎敢還會有該種興趣？」</verse>
				<verse number="13">上主問 亞伯拉罕 講：「 莎拉 做麼介偷笑，講：『𠊎恁老了，敢還會𫱔呢？』</verse>
				<verse number="14">上主敢有做毋到个事？明年這時節，𠊎愛倒轉來； 莎拉 會𫱔一個孻仔。」</verse>
				<verse number="15">莎拉 著驚到毋敢承認，講：「𠊎㖠有笑！」 上主講：「有，你確實有笑！」</verse>
				<verse number="16">後來，該三儕離開該位，上到看得到 所多瑪 个地方。 亞伯拉罕 也跈等行，送佢等一站路。</verse>
				<verse number="17">上主講：「𠊎所愛做个事，敢好囥等毋㧯 亞伯拉罕 講。</verse>
				<verse number="18">亞伯拉罕 个後代會成做強大个國家；地上个萬國愛因為佢得福氣。</verse>
				<verse number="19">𠊎揀選佢，係愛佢指示佢个孻仔㧯後代聽從𠊎，主持公道，伸張正義。恁樣，𠊎正做得實現𠊎對 亞伯拉罕 个應許。」</verse>
				<verse number="20">上主講：「𠊎聽到當多指責 所多瑪 㧯 蛾摩拉 个話；佢等个罪惡滿滿。</verse>
				<verse number="21">𠊎一定愛下去，看所聽到个指責係毋係確實。」</verse>
				<verse number="22">其中兩儕就轉身離開該位，去 所多瑪 ；只有 亞伯拉罕 企在上主面前。</verse>
				<verse number="23">亞伯拉罕 進前，對上主講：「你斷真愛將好人㧯壞人共下滅掉係麼？</verse>
				<verse number="24">若係城肚有五十個好人，你還愛消滅全城嗎？做毋得為到這五十個好人饒這城麼？</verse>
				<verse number="25">你一定毋會將好人㧯壞人共下滅掉！俾好人㧯壞人共下受刑罰，你一定毋會恁樣做！世界个審判者行事敢毋係應該當公正。」</verse>
				<verse number="26">上主應講：「若係𠊎在 所多瑪 尋得到五十個好人，𠊎就為到佢等饒全城。」</verse>
				<verse number="27">亞伯拉罕 又講：「主啊！雖然𠊎係泥做个，總係𠊎愛大膽問加一擺，</verse>
				<verse number="28">若係城肚只有四十五個好人，你會因為少五儕，就滅掉全城麼？」 上主應講：「若係尋得到四十五個好人，𠊎也無愛滅掉這城。」</verse>
				<verse number="29">亞伯拉罕 又對主講：「若係只有四十個人呢？」 佢講：「若係尋得到四十個，𠊎也毋滅掉這城。」</verse>
				<verse number="30">亞伯拉罕 講：「主啊！求你毋好受氣，𠊎愛繼續求你。若係只有三十儕呢？」 佢應講：「若係尋得到三十個，𠊎也毋滅這城。」</verse>
				<verse number="31">亞伯拉罕 講：「主啊！請你原諒𠊎，𠊎較好膽求你。若係有二十個呢？」 佢應講：「若係尋得到二十個，𠊎乜毋滅這城。」</verse>
				<verse number="32">最後 亞伯拉罕 講：「主啊！求你毋好受氣，准𠊎再求一擺。若係只有尋到十個呢？」 佢應講：「為到這十儕个緣故，𠊎也毋滅這城。」</verse>
				<verse number="33">上主㧯 亞伯拉罕 講煞，就離開； 亞伯拉罕 也轉屋下去。</verse>
			</chapter>
			<chapter number="19">
				<verse number="1">天暗个時，該兩個天使來到 所多瑪 ； 羅得 坐在城門口。佢一看到該兩儕就企起來迎接佢等，伏在佢等面前，</verse>
				<verse number="2">講：「𠊎主啊，請你等到僕人屋下來，俾𠊎招待。你等洗一下腳，歇一暗晡，天光朝晨正較早兜仔出門。」 總係佢等講：「做毋得，𠊎等愛在街項過夜。」</verse>
				<verse number="3">羅得 盡留佢等，佢等正跈佢入去厥屋下。 羅得 為佢等準備食物、焙無酵餅，佢等就食。</verse>
				<verse number="4">人客還吂睡， 所多瑪 城个男人，無論老嫩大細，攏總來包圍 羅得 个屋。</verse>
				<verse number="5">佢等大聲喊 羅得 ，問佢：「今暗晡住在你屋下該兜人在㖠？將佢等帶出來，由在𠊎等㩢耍！」</verse>
				<verse number="6">羅得 就出來，將門關起來，到眾人該位，</verse>
				<verse number="7">對佢等講：「各位鄉親，求你等毋好做這種壞事！</verse>
				<verse number="8">𠊎㧯你等講，𠊎有兩個妹仔，還係人家女；𠊎將姖等交給你等，由在你等愛樣般對待姖等。總係你等千萬毋好為難這兩儕；佢兩儕來到𠊎屋下，就係𠊎个人客。」</verse>
				<verse number="9">總係眾人應講：「你這個外族人，閃開！你算麼介，想愛指揮𠊎等！若無，𠊎等愛對付你，比對付佢兩儕還較厲害噢！」佢等㩳開 羅得 ，尖等愛撞門入去。</verse>
				<verse number="10">總係，該兩個人伸手將 羅得 拉入屋肚，將門關起來，</verse>
				<verse number="11">又俾外背該兜男人，無分老嫩，全部目珠看毋到，摸來摸去、尋毋到門。</verse>
				<verse number="12">該兩個人對 羅得 講：「城肚還有你个人麼？孻仔、妹仔、婿郎，抑係其他个親人？喊佢等離開！</verse>
				<verse number="13">𠊎等愛毀滅這城；因為這城肚犯罪个聲音，上主已經聽到，所以派𠊎等來滅這城。」</verse>
				<verse number="14">羅得 就出去，尋佢个婿郎，對佢等講：「你等愛遽遽離開，上主愛毀滅這城了。」總係佢等全部恅到佢係講笑。</verse>
				<verse number="15">天光个時，天使盡催 羅得 講：「遽遽帶若𡜵娘㧯兩個妹仔離開這所在，免得同這城共下滅亡。」</verse>
				<verse number="16">羅得 還無想愛走。總係上帝憐憫佢；該兩個人就牽等佢㧯厥𡜵娘个手，並佢兩個妹仔个手，帶佢等離開該城。</verse>
				<verse number="17">到城外，其中一個天使講：「你等逃命要緊，毋好斡頭看，也毋好停留在平原。愛走到山頂，正毋會受毀滅。」</verse>
				<verse number="18">羅得 對佢等講：「𠊎主啊，毋好恁樣啊！</verse>
				<verse number="19">你既然施恩好款待你个僕人，救𠊎个性命，請毋好喊𠊎走恁遠个路。驚怕𠊎吂走到該山，災難就到，𠊎就無命了！</verse>
				<verse number="20">看啊，頭前該座城離這無幾遠，較遽走到該位；乜係細城，求你俾𠊎逃到該細城好來保命。」</verse>
				<verse number="21">天使對佢講：「好，𠊎答應你。𠊎毋滅該細城。</verse>
				<verse number="22">走遽兜仔！你還吂到該位，𠊎毋會出手。」 (所以該細城喊做 瑣珥 。)</verse>
				<verse number="23">日頭出來个時， 羅得 到 瑣珥 。</verse>
				<verse number="24">該時，上主使𤏸等个硫磺火對天頂，就係對上主該位，降在 所多瑪 㧯 蛾摩拉 。</verse>
				<verse number="25">佢滅掉該兩個城㧯全平原、連該兜住在城肚一切个人、㧯地上所有个植物。</verse>
				<verse number="26">羅得 个𡜵娘斡頭看後背，就變做一支鹽柱。</verse>
				<verse number="27">第二日打早， 亞伯拉罕 䟘起來，到佢在上主面前企過个地方，</verse>
				<verse number="28">向 所多瑪 、 蛾摩拉 㧯全平原看。哀喲！看到地面上有火煙衝等上，像大火爐个煙一樣。</verse>
				<verse number="29">上帝毀滅平原該兩座城个時，佢紀念 亞伯拉罕 ；當佢毀滅 羅得 所住个城，佢也帶領 羅得 對毀滅中出來。</verse>
				<verse number="30">羅得 毋敢住在 瑣珥 ；佢就帶兩個妹仔搬到山頂，住在山洞底背。</verse>
				<verse number="31">阿姊㧯老妹講：「阿爸老了！地上也無男人照世俗來㧯𠊎等結婚，俾𠊎等𫱔細人仔。</verse>
				<verse number="32">來！拿酒給阿爸啉到醉醉，𠊎等好㧯佢共下睡，對佢來留後代。」</verse>
				<verse number="33">該暗晡，姖等俾厥爸啉到醉醉，大个妹仔就㧯厥爸共下睡。厥妹仔幾時睡下去，幾時䟘起來，阿爸完全毋知。</verse>
				<verse number="34">第二日，阿姊㧯老妹講：「昨暗晡𠊎㧯阿爸睡；今暗晡𫣆等再拿酒給佢啉，換你去㧯佢共下睡。恁樣，你㧯𠊎都做得對阿爸得到後代。」</verse>
				<verse number="35">所以該暗晡，兩姊妹又俾厥爸啉到醉醉，老妹就㧯佢共下睡。厥妹仔幾時睡下去，幾時䟘起來，阿爸完全毋知。</verse>
				<verse number="36">恁樣， 羅得 這兩個妹仔，對自家个阿爸有娠妊。</verse>
				<verse number="37">阿姊𫱔一個孻仔，㧯佢安名 摩押 ，就係今晡日 摩押 人个祖先。</verse>
				<verse number="38">老妹也𫱔一個孻仔，㧯佢安名 便‧亞米 ，就係今晡日 亞捫 人个祖先。</verse>
			</chapter>
			<chapter number="20">
				<verse number="1">亞伯拉罕 對 幔利 个橡樹徙到 迦南 个南片，住在 加低斯 㧯 書珥 中間。佢暫時住在 基拉耳 个時，</verse>
				<verse number="2">對人講厥𡜵娘 莎拉 係自家个老妹；所以， 基拉耳 王 亞比米勒 派人將 莎拉 接去。</verse>
				<verse number="3">有一暗晡，上帝在 亞比米勒 夢中向佢顯現，講：「你該死了！你搶來這婦人家係別人个𡜵娘啊！」</verse>
				<verse number="4">該時， 亞比米勒 還吂親近 莎拉 ；佢講：「主啊！𠊎係冤枉个！你愛消滅𠊎㧯𠊎个人民嗎？</verse>
				<verse number="5">亞伯拉罕 自家對𠊎講，這婦人家係厥老妹；這婦人家自家也恁樣承認。𠊎做這件事良心清白，雙手潔淨。」</verse>
				<verse number="6">在夢中，上帝應佢講：「無毋著！𠊎知你做這項事良心清白；𠊎自家也阻止你，免得你侵犯姖來得罪𠊎。</verse>
				<verse number="7">這下你愛將這𡜵娘人還厥老公；佢係先知，會代你祈禱，使你毋使死。總係𠊎警告你，若係你無將這𡜵娘人送還厥老公，你㧯你所有个人民全部愛死。」</verse>
				<verse number="8">第二日朝晨， 亞比米勒 召集所有个官員，將所發生个事㧯佢等講，佢等就非常著驚。</verse>
				<verse number="9">亞比米勒 喊 亞伯拉罕 來，責問佢講：「你做麼介恁樣對待𠊎等？𠊎麼介地方得罪你？你將這災難帶給𠊎㧯𠊎个國家，你無應該恁樣做！」</verse>
				<verse number="10">亞比米勒 又問 亞伯拉罕 講：「你樣般愛恁樣做呢？」</verse>
				<verse number="11">亞伯拉罕 應佢講：「𠊎恅到這地方个人全無敬畏上帝，佢等會為到搶𠊎个𡜵娘來㓾𠊎。</verse>
				<verse number="12">其實，姖也係𠊎个老妹；姖㧯𠊎共爺無共𡟓，後來姖㧯𠊎結婚。</verse>
				<verse number="13">所以，在上帝喊𠊎離開故鄉，到別國流浪个時，𠊎㧯姖講：『無論𫣆等到㖠去，你愛講𠊎係若哥；這就係你對𠊎个恩情。』」</verse>
				<verse number="14">亞比米勒 聽到這個解釋，就將羊群、牛群、奴僕㧯奴婢送給 亞伯拉罕 ，又將佢个𡜵娘 莎拉 交還佢。</verse>
				<verse number="15">亞比米勒 對 亞伯拉罕 講：「你看，這係𠊎个土地，你歡喜在㖠位住，就住在該位。」</verse>
				<verse number="16">佢對 莎拉 講：「𠊎將一千隻銀幣給若哥，用來證明你係清白个，俾大家知，你無做對毋起人个事。」</verse>
				<verse number="17">因為 亞伯拉罕 个𡜵娘 莎拉 所堵到个事，上主已經使 亞比米勒 宮內个婦人家全部毋會𫱔。 亞伯拉罕 祈求上帝，上帝就醫好 亞比米勒 、厥𡜵娘㧯佢所有个使女，俾姖等又會𫱔。</verse>
				<verse number="18"></verse>
			</chapter>
			<chapter number="21">
				<verse number="1">上主照自家所講个話賜福給 莎拉 。</verse>
				<verse number="2">莎拉 在 亞伯拉罕 當老个時有身項，照上帝所定个日期𫱔一個孻仔。</verse>
				<verse number="3">亞伯拉罕 㧯佢安名 以撒 。</verse>
				<verse number="4">亞伯拉罕 照上帝个規定，在 以撒 出世後第八日就為佢行割禮。</verse>
				<verse number="5">以撒 出世个時， 亞伯拉罕 一百歲。</verse>
				<verse number="6">莎拉 講：「上帝俾𠊎歡喜到笑；聽到這事个人也愛㧯𠊎共下歡喜。」</verse>
				<verse number="7">姖又講：「麼人會預先對 亞伯拉罕 講，『 莎拉 會俾細人仔食乳』？總係，在佢恁老个時，𠊎還㧯佢𫱔孻仔。」</verse>
				<verse number="8">以撒 漸漸大；在佢斷乳該日， 亞伯拉罕 辦當滂沛个筵席來請人客。</verse>
				<verse number="9">有一日， 埃及 使女 夏甲 為 亞伯拉罕 𫱔个孻仔 以實瑪利 㧯 莎拉 个孻仔 以撒 共下聊 。</verse>
				<verse number="10">莎拉 看到佢等，就對 亞伯拉罕 講：「你愛將這奴婢㧯姖个孻仔逐出去。這奴婢个孻仔做毋得㧯𠊎个孻仔 以撒 共下繼承你个產業。」</verse>
				<verse number="11">這件事俾 亞伯拉罕 非常煩惱，因為 以實瑪利 也係佢个孻仔。</verse>
				<verse number="12">總係上帝對 亞伯拉罕 講：「毋使為到這個孻仔㧯使女 夏甲 來愁。你照 莎拉 㧯你講个去做，因為對 以撒 出个子孫，正係𠊎所愛認定給你个。</verse>
				<verse number="13">該使女个孻仔，𠊎也愛給佢盡多子孫，成做一個國家，因為佢也係你个孻仔。」</verse>
				<verse number="14">第二日打早， 亞伯拉罕 拿兜糧食㧯一皮袋水給 夏甲 ，放在姖个肩頭頂，又將細人仔交給姖，喊姖走。 夏甲 離開該位，來到 別是巴 个曠野，在該地方尋毋到路。</verse>
				<verse number="15">皮袋个水啉淨淨， 夏甲 就將細人仔放在細樹下，</verse>
				<verse number="16">自家行到離細人仔大約射一箭恁遠个地方，面對細人仔坐下來，自家講：「𠊎毋拌得看吾孻仔死。」姖 就坐在該位放聲大噭。</verse>
				<verse number="17">上帝聽到細人仔个噭聲；上帝个天使對天頂向 夏甲 講：「 夏甲 ，你做麼介恁傷心呢？毋使驚，上帝已經聽到細人仔个噭聲了！</verse>
				<verse number="18">䟘起來，將細人仔揇起來，安慰佢；𠊎愛使佢个後代成做大國。」</verse>
				<verse number="19">即時，上帝使 夏甲 个目珠金起來，使姖看到一口井；姖就去將皮袋裝滿水，俾細人仔啉。</verse>
				<verse number="20">上帝㧯細人仔共下；佢漸漸大，住在 巴蘭 个曠野，成做弓箭手。</verse>
				<verse number="21">厥姆為佢討一個 埃及 个細妹仔做𡜵娘。</verse>
				<verse number="22">當時， 亞比米勒 㧯佢个元帥 非各 去見 亞伯拉罕 ，對佢講：「你所做每一件事全部有上帝个同在。</verse>
				<verse number="23">所以你愛在這位、上帝个面前㧯𠊎發誓，絕對毋好欺負𠊎、𠊎个子女、㧯𠊎个後代。𠊎一直好款待你，你也應該好款待𠊎、㧯你暫時住个這個國家。」</verse>
				<verse number="24">亞伯拉罕 應講：「𠊎願意發誓。」</verse>
				<verse number="25">亞伯拉罕 因為 亞比米勒 个僕人霸佔佢一口井，就向 亞比米勒 抗議。</verse>
				<verse number="26">亞比米勒 講：「𠊎毋知麼人做恁樣个事，你也毋識㧯𠊎講；這係𠊎今晡日正聽到个。」</verse>
				<verse number="27">亞伯拉罕 送兜牛羊給 亞比米勒 ，兩儕就立約。</verse>
				<verse number="28">亞伯拉罕 將七隻羊牸仔放在另外一片。</verse>
				<verse number="29">亞比米勒 問 亞伯拉罕 ：「你恁樣做係麼介意思？」</verse>
				<verse number="30">亞伯拉罕 應講：「請你接受這七隻羊牸仔，證明你承認這口井係𠊎挖个。」</verse>
				<verse number="31">所以，該地方喊做 別是巴 ，因為佢兩儕在該位發誓。</verse>
				<verse number="32">佢等在 別是巴 立約以後， 亞比米勒 㧯佢个元帥 非各 轉去 非利士 。</verse>
				<verse number="33">亞伯拉罕 就在 別是巴 種一頭柳樹，在該位敬拜上主 — 永生个上帝。</verse>
				<verse number="34">亞伯拉罕 在 非利士 做旅客盡久。</verse>
			</chapter>
			<chapter number="22">
				<verse number="1">這兜事以後，上帝愛考驗 亞伯拉罕 。上帝喊佢：「 亞伯拉罕 ！」佢應：「𠊎在這位！」</verse>
				<verse number="2">上帝講：「你愛帶若孻仔，就係你所惜个單丁子 以撒 ，到 摩利亞 去，在𠊎指示你个山頂，將佢做燒化祭獻給𠊎。」</verse>
				<verse number="3">第二日打早， 亞伯拉罕 剖好獻祭用个柴，放在驢背頂，帶等兩個僕人㧯厥孻仔 以撒 ，共下去上帝指示个地方。</verse>
				<verse number="4">到第三日， 亞伯拉罕 昂頭遠遠就看到該地方。</verse>
				<verse number="5">佢對僕人講：「你等㧯驢仔留在這位；𠊎㧯細人仔到該片敬拜，然後𠊎等正倒轉來這位。」</verse>
				<verse number="6">亞伯拉罕 將獻祭用个柴放在厥孻仔 以撒 个肩頭頂，自家手拿等火種㧯刀仔；兩子爺共下向前行。</verse>
				<verse number="7">以撒 喊一聲：「阿爸！」 亞伯拉罕 應講：「孻仔，做麼介？」 以撒 問講：「火種㧯柴全部有了，獻祭个羊仔在㖠？」</verse>
				<verse number="8">亞伯拉罕 應講：「孻仔，獻祭个細羊仔，上帝自家會準備好。」兩儕又繼續向前行。</verse>
				<verse number="9">佢等到上帝指示个地方， 亞伯拉罕 開始起祭壇，堆柴在頂高，將自家个孻仔 以撒 捆起來，放在祭壇个柴頂。</verse>
				<verse number="10">然後， 亞伯拉罕 伸手，擎起刀仔，愛㓾厥孻仔。</verse>
				<verse number="11">該時，上主个天使對天頂喊佢：「 亞伯拉罕 ！ 亞伯拉罕 ！」 佢應講：「𠊎在這位！」</verse>
				<verse number="12">天使講：「毋好㓾這細人仔；連一些仔也做毋得傷害佢！這下𠊎確實知你係敬畏上帝个；因為你無將自家个孻仔，就係你个單丁子，留等毋給𠊎。」</verse>
				<verse number="13">亞伯拉罕 四面看一下，看到一隻羊牯，兩隻角被細樹枝纏等。佢行過去將羊牯拉出來，用牠代厥孻仔做燒化祭。</verse>
				<verse number="14">所以， 亞伯拉罕 㧯該地方安到 耶和華以勒 ；直到今晡日大家還講：「在上主个山頂，佢會預備 。」</verse>
				<verse number="15">上主个天使第二擺對天頂喊 亞伯拉罕 講：</verse>
				<verse number="16">「上主講：『你既然做這件事，無將你个單丁子留下來毋給𠊎，所以𠊎指等𠊎自家个名發誓，</verse>
				<verse number="17">𠊎一定會賜福給你，愛給你盡多子孫，像天頂个星仔、海邊个沙恁多；你个後代會征服敵人。</verse>
				<verse number="18">地上萬國會因為你个後代得到福氣，因為你聽從𠊎个命令。』」</verse>
				<verse number="19">亞伯拉罕 轉到厥僕人該位，佢等就共下去 別是巴 ，就係 亞伯拉罕 住个地方。</verse>
				<verse number="20">後來，有人㧯 亞伯拉罕 講：「 密迦 㧯若老弟 拿鶴 𫱔八個孻仔：</verse>
				<verse number="21">長子 烏斯 、厥老弟 布斯 、 基母利 ( 亞蘭 个阿爸)，</verse>
				<verse number="22">還有 基薛 、 哈瑣 、 必達 、 益拉 㧯 彼土利 ( 麗百加 个阿爸)。」</verse>
				<verse number="23">密迦 㧯 亞伯拉罕 个老弟 拿鶴 𫱔這八個孻仔。</verse>
				<verse number="24">拿鶴 个細姐 流瑪 𫱔 提八 、 迦含 、 他轄 㧯 瑪迦 。</verse>
			</chapter>
			<chapter number="23">
				<verse number="1">莎拉 在世享壽一百二十七歲。</verse>
				<verse number="2">莎拉 死在 迦南 个 基列‧亞巴 (就係 希伯崙 )。 亞伯拉罕 為姖悲傷大噭。</verse>
				<verse number="3">亞伯拉罕 離開停 莎拉 屍體个地方，來到 赫 人个所在，講：</verse>
				<verse number="4">「𠊎係暫住在你等當中个外族人；請賣一垤地給𠊎做墓地，好俾𠊎埋吾𡜵娘。」</verse>
				<verse number="5">赫 人應 亞伯拉罕 講：</verse>
				<verse number="6">「先生請聽！你在𠊎等當中係一位尊貴个王子。請在𠊎等最好个墓地，埋葬你个𡜵娘；大家願意給你墓地埋葬姖。」</verse>
				<verse number="7">亞伯拉罕 就䟘起來，跪在該地方个 赫 人面前，</verse>
				<verse number="8">講：「若係你等願意俾𠊎在這位埋葬𠊎个𡜵娘，請你為𠊎求 瑣轄 个孻仔 以弗崙 ，</verse>
				<verse number="9">將田尾个 麥比拉 窿賣給𠊎；請佢在你等面前照實價賣給𠊎做墓地。」</verse>
				<verse number="10">以弗崙 㧯其他 赫 人共下坐在城門口集會个地方；愛俾入城个人也聽得到，佢就大聲對 亞伯拉罕 講：</verse>
				<verse number="11">「先生，毋好恁樣，請聽！𠊎愛將該垤田連田肚个窿送給你；𠊎愛當同胞个面前送給你，俾你埋葬若𡜵娘。」</verse>
				<verse number="12">亞伯拉罕 又跪在 赫 人面前，</verse>
				<verse number="13">也用大家聽得到个聲對 以弗崙 講：「請聽𠊎講，你若肯，該垤田地𠊎愛用買个，求你將錢收起來，𠊎就做得在該位埋葬𠊎个𡜵娘。」</verse>
				<verse number="14">以弗崙 應 亞伯拉罕 講：</verse>
				<verse number="15">「先生請聽，該垤地个價值係四百隻銀幣，你㧯𠊎中間這兜錢算麼介呢？請將你个𡜵娘埋在該位！」</verse>
				<verse number="16">亞伯拉罕 同意，就照 以弗崙 在 赫 人面前講出來个價錢，將該時通用个錢四百隻銀幣交給佢。</verse>
				<verse number="17">恁樣， 以弗崙 在 幔利 東片 麥比拉 个地產權就屬 亞伯拉罕 ；這地產包含田地㧯其中个窿，並所有个樹木。</verse>
				<verse number="18">聚集在城門口該兜 赫 人，全部承認這地產權屬 亞伯拉罕 。</verse>
				<verse number="19">亞伯拉罕 就將𡜵娘 莎拉 埋葬在 迦南 地 幔利 東片 麥比拉 窿肚。 ( 幔利 就係 希伯崙 )。</verse>
				<verse number="20">原來屬 赫 人該垤田地㧯田肚个窿，就恁樣成做 亞伯拉罕 私人个墓地。</verse>
			</chapter>
			<chapter number="24">
				<verse number="1">亞伯拉罕 老了，年紀也大了。佢一生人所做个事全部得到上主賜福。</verse>
				<verse number="2">佢對管理佢个家產、年紀最大个僕人講：「將你个手放在𠊎兩支大腳髀中間來發誓。</verse>
				<verse number="3">𠊎愛你對上主 — 天地个上帝向𠊎發誓，你毋好在 迦南 這地方个細妹仔當中為𠊎尋心舅。</verse>
				<verse number="4">你一定愛轉去𠊎个故鄉，在𠊎个親族當中為𠊎个孻仔 以撒 討一個𡜵娘。」</verse>
				<verse number="5">僕人對佢講：「若係細妹仔毋肯離開故鄉跈𠊎到這地方來，樣般好呢？𠊎敢應該帶你个孻仔轉你个故鄉？」</verse>
				<verse number="6">亞伯拉罕 應佢講：「你絕對毋好將𠊎个孻仔帶轉該地方！</verse>
				<verse number="7">上主 — 天頂个上帝帶𠊎離開故鄉㧯𠊎親族个地方，佢對𠊎宣佈向𠊎發誓講：『𠊎愛將這垤土地賜給你个後代。』佢一定會差派佢个使者先去預備，俾你能在該位為𠊎个孻仔討一個𡜵娘。</verse>
				<verse number="8">若係該細妹仔毋肯跈你來，你對𠊎个發誓就㧯你無關係；總係你絕對做毋得將𠊎个孻仔帶轉該地方去。」</verse>
				<verse number="9">該僕人就將手放在主人个兩支大腳髀中間，發誓愛照 亞伯拉罕 所交帶个去做。</verse>
				<verse number="10">該僕人又對主人个駱駝中選十隻，帶等厥主人个各種財寶，出發向 美索不達米亞 北部、 拿鶴 住个城去。</verse>
				<verse number="11">佢到該地方，就喊駱駝跪在城外个井堘。該時係臨暗仔，就係婦女出來打水个時節。</verse>
				<verse number="12">佢祈禱講：「上主 — 吾主人 亞伯拉罕 个上帝啊！求你今晡日俾𠊎當好運；求你成就你對吾主人 亞伯拉罕 所答應个。</verse>
				<verse number="13">𠊎這下企在井堘，城肚个細妹仔攏總會出來這位打水。</verse>
				<verse number="14">𠊎愛㧯姖等當中个一儕講：『拜託你將水罐仔放下來，給兜水𠊎啉。』若係姖講：『請啉！𠊎也打水給你个駱駝啉。』𠊎希望這細妹仔就係你為你个僕人 以撒 所選个𡜵娘。恁樣，𠊎就會知你施恩給𠊎个主人。」</verse>
				<verse number="15">佢祈禱還吂煞， 麗百加 已經到井堘，肩頭擎等水罐仔。姖係 彼土利 个妹仔； 彼土利 係 亞伯拉罕 个老弟 拿鶴 㧯厥𡜵娘 密迦 个孻仔。</verse>
				<verse number="16">麗百加 係一個盡靚个細妹仔，係無人親近過个人家女。姖下到井堘，將水罐仔裝滿水就上來。</verse>
				<verse number="17">該僕人走到姖个面前，對姖講：「拜託你給兜水𠊎啉。」</verse>
				<verse number="18">姖講：「先生，請啉！」姖趕緊放下肩頭頂个水罐仔，用手托等俾該僕人啉。</verse>
				<verse number="19">該僕人啉罅了， 麗百加 就講：「𠊎也打水給你个駱駝啉到罅。」</verse>
				<verse number="20">姖遽遽將罐肚个水倒到水槽，再走到井堘打水，給所有个駱駝啉。</verse>
				<verse number="21">該人愛知上主係毋係俾佢完成任務，就恬恬緊看 麗百加 。</verse>
				<verse number="22">等到駱駝啉罅擺，該人就拿出一隻半兩重个金鼻環，㧯一對十兩重个金手鈪，給 麗百加 戴。</verse>
				<verse number="23">該人問：「請㧯𠊎講，若爸係麼人？若爸个屋下有地方好借歇麼？」</verse>
				<verse number="24">麗百加 講：「吾爸係 拿鶴 㧯 密迦 个孻仔 彼土利 。</verse>
				<verse number="25">吾屋下有當多草料，也有俾你等歇个地方。」</verse>
				<verse number="26">該人就跪下來敬拜上主。</verse>
				<verse number="27">佢講：「讚美上主 — 𠊎主人 亞伯拉罕 个上帝！佢一直用慈愛㧯誠實對待𠊎个主人；佢將𠊎直接帶到吾主人親族个屋下來。」</verse>
				<verse number="28">該細妹仔走轉屋下去，將所發生个事㧯厥姆並屋下人講。</verse>
				<verse number="29">麗百加 有一個阿哥喊做 拉班 ，佢走出去，到井堘 亞伯拉罕 个僕人該位。</verse>
				<verse number="30">佢看到老妹戴等金鼻環㧯金手鈪，也聽到老妹所講該人㧯姖講个話。該時 亞伯拉罕 个僕人在井堘，企在駱駝旁邊。 拉班 行前去，</verse>
				<verse number="31">對該人講：「請跈𠊎到屋肚來坐。你係上主賜福个人，做麼介企在外背？𠊎已經為你等準備好間房，也為駱駝準備好地方。」</verse>
				<verse number="32">該人就入去屋肚。 拉班 放下駱駝背頂个東西，給它兜草料食。接等，佢㨮水給 亞伯拉罕 个僕人㧯共下來个人洗腳。</verse>
				<verse number="33">飯菜擺好个時，該人講：「等一下，𠊎愛將𠊎个事講清楚，正來食。」 拉班 講：「請你講！」</verse>
				<verse number="34">該人就講：「𠊎係 亞伯拉罕 个僕人。</verse>
				<verse number="35">上主大大賜福給𠊎个主人，俾佢非常好額。上主賜給佢羊群、牛群、金銀、奴僕、奴婢、駱駝㧯驢仔。</verse>
				<verse number="36">吾主人个𡜵娘 莎拉 年老个時正為佢𫱔一個孻仔；𠊎个主人也將所有个財產給這個孻仔。</verse>
				<verse number="37">主人喊𠊎發誓，愛𠊎照佢个吩咐；佢講：『你毋好在 迦南 个細妹仔當中代𠊎尋心舅；</verse>
				<verse number="38">你愛到𠊎个故鄉、𠊎親族該位去，為吾孻仔尋一個𡜵娘。』</verse>
				<verse number="39">𠊎對𠊎个主人講：『驚怕細妹仔毋肯跈𠊎來，樣般好呢？』</verse>
				<verse number="40">佢應𠊎講：『𠊎所敬拜个上主會差派天使㧯你共下去，俾你完成任務。你會在𠊎个故鄉、𠊎个親族家中為吾孻仔討一個𡜵娘。</verse>
				<verse number="41">你去到𠊎親族个屋下，你就算係完成你个責任。𠊎个親族若係無將細妹仔交給你，你个發誓也㧯你無關係。』</verse>
				<verse number="42">「今晡日，𠊎到井堘个時，𠊎恁樣祈禱：『上主 — 吾主人 亞伯拉罕 个上帝啊！求你俾𠊎完成𠊎个任務。</verse>
				<verse number="43">𠊎企在井堘，有細妹仔出來打水个時，𠊎愛求姖俾𠊎啉姖水罐仔个水。</verse>
				<verse number="44">若係姖講：『請你啉，𠊎還愛打水給你个駱駝啉』，𠊎希望姖就係上主為吾主人个孻仔所選个𡜵娘。』</verse>
				<verse number="45">𠊎默禱還吂煞， 麗百加 就出來，肩頭頂擎等水罐仔，到井堘打水。𠊎對姖講：『拜託給兜水𠊎啉。』</verse>
				<verse number="46">姖黏時放下肩頭頂个水罐仔，講：『請啉！𠊎也打兜水給你个駱駝啉！』𠊎就啉，姖也打水給駱駝啉。</verse>
				<verse number="47">𠊎問姖：『你个阿爸係麼人？』姖應講：『𠊎个阿爸係 拿鶴 㧯 密迦 个孻仔 彼土利 。』𠊎就㧯姖戴鼻環㧯手鈪。</verse>
				<verse number="48">𠊎就跪下來敬拜上主，讚美上主 — 吾主人 亞伯拉罕 个上帝；因為佢帶𠊎行正確个路，俾𠊎尋到主人个侄孫女來做厥心舅。</verse>
				<verse number="49">這下，若係你等願意用慈愛㧯誠實對待𠊎个主人，就㧯𠊎講。若毋肯，也㧯𠊎講，𠊎好決定樣般做。」</verse>
				<verse number="50">拉班 㧯 彼土利 應講：「既然這事係出於上主，𠊎等還有麼介好講呢？</verse>
				<verse number="51">麗百加 在這位，你做得帶走，照上主所講个，俾姖做你主人个心舅。」</verse>
				<verse number="52">亞伯拉罕 个僕人聽到這話，就伏在地上敬拜上主。</verse>
				<verse number="53">接等，佢拿金器、銀器㧯衫褲送給 麗百加 ，也送貴重个禮物給厥哥㧯厥姆。</verse>
				<verse number="54">然後， 亞伯拉罕 个僕人㧯跈佢个人正食夜，並歇一暗晡。第二日朝晨䟘起來，僕人就講：「俾𠊎轉去𠊎主人該位。」</verse>
				<verse number="55">麗百加 个阿哥並姖个阿姆講：「俾細妹仔㧯𠊎等住加幾日，至少住十日正去。」</verse>
				<verse number="56">僕人講：「請毋好誤到𠊎个時間。上主既然俾𠊎完成𠊎个任務，請你等俾𠊎轉主人該位去。」</verse>
				<verse number="57">佢等講：「𠊎等喊細妹仔來，看姖樣般講。」</verse>
				<verse number="58">佢等就喊 麗百加 來，問姖：「你愛㧯這個人共下去麼？」姖應講：「𠊎願意去。」</verse>
				<verse number="59">恁樣，佢等俾 麗百加 㧯姖个乳𡟓，跈 亞伯拉罕 个僕人㧯同佢來个人共下去。</verse>
				<verse number="60">佢等祝福 麗百加 講： 「𠊎等个老妹啊！ 願你成做千萬人个阿姆！ 願你个後代得到敵人个城門！」</verse>
				<verse number="61">麗百加 㧯陪嫁个使女準備好，騎上駱駝。 亞伯拉罕 个僕人就帶等 麗百加 出發。</verse>
				<verse number="62">該時， 以撒 已經徙到 庇珥‧拉海‧萊 个曠野，住在 迦南 南部。</verse>
				<verse number="63">臨暗仔，佢在田項散步，昂頭看到駱駝隊行前來。</verse>
				<verse number="64">麗百加 一看到 以撒 ，就對駱駝背頂下來，</verse>
				<verse number="65">問 亞伯拉罕 个僕人：「對田項行過來𠊎等這片个係麼人？」 僕人應姖講：「係𠊎个細主人。」 麗百加 就用面帕遮等自家个面。</verse>
				<verse number="66">該僕人將自家所做个一切全部㧯 以撒 講。</verse>
				<verse number="67">以撒 就帶 麗百加 入去厥姆 莎拉 住過个帳篷，討姖做𡜵娘。 以撒 盡惜 麗百加 ，對厥姆死掉以後，到這時佢正得到安慰。</verse>
			</chapter>
			<chapter number="25">
				<verse number="1">亞伯拉罕 又討一個𡜵娘，名喊 基土拉 。</verse>
				<verse number="2">佢㧯 亞伯拉罕 𫱔 心蘭 、 約珊 、 米但 、 米甸 、 伊施巴 㧯 書亞 。</verse>
				<verse number="3">約珊 𫱔 示巴 㧯 底但 。 底但 个後代係 亞書利 人、 利都是 人㧯 利烏米 人。</verse>
				<verse number="4">米甸 个孻仔係 以法 、 以弗 、 哈諾 、 亞比大 㧯 以勒大 。以上這兜全部係 基土拉 个後代。</verse>
				<verse number="5">亞伯拉罕 將所有个財產給 以撒 。</verse>
				<verse number="6">總係佢趕還生个時，也將一部份分給其他𡜵娘所𫱔个孻仔；過後，佢打發這兜孻仔到東方去，喊佢等遠遠離開佢个孻仔 以撒 。</verse>
				<verse number="7">亞伯拉罕 享長壽，一百七十五歲，盡好命來過身，轉到厥祖宗該位去。</verse>
				<verse number="8"></verse>
				<verse number="9">佢兩個孻仔 以撒 㧯 以實瑪利 將佢埋葬在 麥比拉 窿。這壁窿在 幔利 東片，本來係 赫 人 瑣轄 个孻仔 以弗崙 个田。</verse>
				<verse number="10">這垤田係 亞伯拉罕 向 赫 人買來个。 亞伯拉罕 㧯厥𡜵娘 莎拉 共樣埋在該位。</verse>
				<verse number="11">亞伯拉罕 死後，上帝賜福給厥孻仔 以撒 。 以撒 住在 庇珥‧拉海‧萊 附近。</verse>
				<verse number="12">莎拉 个使女 埃及 人 夏甲 同 亞伯拉罕 𫱔个孻仔 以實瑪利 ，有以下个孻仔。</verse>
				<verse number="13">佢等个名照出世个順序係： 尼拜約 、 基達 、 亞德別 、 米比衫 、</verse>
				<verse number="14">米施瑪 、 度瑪 、 瑪撒 、</verse>
				<verse number="15">哈達 、 提瑪 、 伊突 、 拿非施 、 基底瑪 。</verse>
				<verse number="16">佢等係十二宗族族長。佢等所住个村莊、營地全部係照佢等个名來安名。</verse>
				<verse number="17">以實瑪利 享壽一百三十七歲，過身轉到厥祖宗該位去。</verse>
				<verse number="18">佢个後代住个地方，對 哈腓拉 到 埃及 東片，通到 亞述 个 書珥 。佢等無㧯 亞伯拉罕 其他个後代住共下。</verse>
				<verse number="19">以下係 亞伯拉罕 个孻仔 以撒 後代个記事。 亞伯拉罕 𫱔 以撒 。</verse>
				<verse number="20">以撒 四十歲个時㧯 麗百加 結婚； 麗百加 係 美索不達米亞 个 亞蘭 人 彼土利 个妹仔、 拉班 个老妹。</verse>
				<verse number="21">因為 麗百加 毋會𫱔， 以撒 代𡜵娘向上主祈禱；上主聽佢个祈禱， 麗百加 就有身項。</verse>
				<verse number="22">姖所懷个係雙生仔，出世以前在姖肚笥肚相爭。姖講：「𠊎樣會恁歪命啊！」姖就去求問上主。</verse>
				<verse number="23">上主對姖講： 「兩個國家在你肚笥肚， 你會𫱔出兩個彼此對敵个民族。 一個民族會比另外一個強， 大个會服事細个。」</verse>
				<verse number="24">姖生產个日期到了，斷真𫱔雙生仔。</verse>
				<verse number="25">先𫱔出來个，全身紅紅、渾身生毛，像著皮衫一樣，所以佢等㧯佢安名 以掃 。</verse>
				<verse number="26">第二個揪等 以掃 个腳㬹出來，所以阿爸㧯佢安名 雅各 。佢等出世个時， 以撒 六十歲。</verse>
				<verse number="27">兩個細人仔緊來緊大， 以掃 盡會打獵，長透在野外； 雅各 堵好相反，當恬，常常留在帳篷肚。</verse>
				<verse number="28">以撒 較惜 以掃 ，因為佢當愛食 以掃 打个野味；總係 麗百加 較惜 雅各 。</verse>
				<verse number="29">有一日， 雅各 煮紅豆湯，堵好 以掃 打獵轉來，肚笥盡飢。</verse>
				<verse number="30">以掃 對 雅各 講：「𠊎餓到會死，紅豆湯給兜𠊎食！」 (所以佢也安到 以東 。)</verse>
				<verse number="31">雅各 應講：「你將長子个名份讓給𠊎，𠊎就給你食。」</verse>
				<verse number="32">以掃 講：「好啊！𠊎會死囉！長子个名份對𠊎有麼介用呢？」</verse>
				<verse number="33">雅各 應講：「你愛先發誓給𠊎聽，將長子个名份讓給𠊎。」 以掃 就發誓，將長子个名份讓給 雅各 。</verse>
				<verse number="34">恁樣， 雅各 就拿兜餅仔㧯紅豆湯給 以掃 ， 以掃 食掉啉掉以後就走了。這就係 以掃 看輕佢長子名份个經過。</verse>
			</chapter>
			<chapter number="26">
				<verse number="1">在 亞伯拉罕 个時代，當地識有一擺飢荒；後來又有一擺飢荒。 以撒 就徙到 基拉耳 、 非利士 王 亞比米勒 該位去。</verse>
				<verse number="2">上主向 以撒 顯現，對佢講：「你毋好去 埃及 ，愛留在𠊎所指示你个地方。</verse>
				<verse number="3">你愛暫時住在這位，𠊎愛㧯你共下，賜福給你。𠊎愛將這地方全部賜給你㧯你个後代，遵守𠊎㧯若爸 亞伯拉罕 所立个約。</verse>
				<verse number="4">𠊎愛給你盡多子孫，像天頂个星仔恁多，又愛將這土地全部賜給你个子孫。地上个萬國愛因為你个子孫得到福氣，</verse>
				<verse number="5">因為 亞伯拉罕 聽從𠊎个話，遵守𠊎所有个法律㧯命令。」</verse>
				<verse number="6">以撒 就留下來住在 基拉耳 。</verse>
				<verse number="7">當地人對 以撒 問起厥𡜵娘，佢就講：「姖係𠊎个老妹」，毋敢講：「係𠊎个𡜵娘」；因為 麗百加 非常靚， 以撒 驚當地人會㓾死佢，將 麗百加 搶走。</verse>
				<verse number="8">以撒 在該地方住一駁仔，有一日 非利士 王 亞比米勒 對佢个窗門向外看，看到 以撒 㧯厥𡜵娘 麗百加 有盡熱情个動作。</verse>
				<verse number="9">亞比米勒 喊 以撒 來，問佢：「原來姖就係若𡜵娘，你做麼介講係若老妹呢？」 以撒 應佢：「若係𠊎承認姖係吾𡜵娘，驚怕𠊎會因為姖被人㓾掉！」</verse>
				<verse number="10">亞比米勒 講：「你做麼介恁樣對待𠊎等？若係𠊎个人民中有人㧯你个𡜵娘睡，你就係害𠊎等犯罪。」</verse>
				<verse number="11">亞比米勒 就警告人民：「麼人動到這人㧯厥𡜵娘，就愛處死。」</verse>
				<verse number="12">以撒 在該地方耕種，該年就得到百倍个收成，因為上主賜福給佢。</verse>
				<verse number="13">佢个財產越來越多，成做非常好額个人。</verse>
				<verse number="14">非利士 人看到佢有恁多羊群、牛群㧯奴僕，就盡毋甘願。</verse>
				<verse number="15">佢等將佢所有个井用泥坉掉；這兜井係厥爸 亞伯拉罕 在世个時僕人所挖个。</verse>
				<verse number="16">後來 亞比米勒 對 以撒 講：「你離開𠊎等去！你已經比𠊎等較強了！」</verse>
				<verse number="17">所以， 以撒 離開該地方，到 基拉耳 个坑壢，在該位搭帳篷，就住在該位。</verse>
				<verse number="18">亞伯拉罕 還在个時識挖兜井，總係佢過身後， 非利士 人將該兜井坉掉。 以撒 就重新挖開來，該兜井還係用厥爸當初所安个名。</verse>
				<verse number="19">以撒 个僕人在坑壢中挖一隻井，尋到水源。</verse>
				<verse number="20">基拉耳 个牧人㧯 以撒 个牧人相爭，講：「這係𠊎等个水。」所以 以撒 喊該口井做 埃色 ，因為佢等㧯佢相爭。</verse>
				<verse number="21">以撒 个僕人又挖一口井，佢等又為這口井相吵，所以 以撒 喊這口井做 西提拿 。</verse>
				<verse number="22">佢徙離開該地方，又挖另外一口井。這擺就無相爭，所以佢喊這口井做 利河伯 。佢講：「上主這下給𠊎等盡闊个地方好自由發展，𠊎等一定會在這位興旺起來。」</verse>
				<verse number="23">以撒 離開該位，搬到 別是巴 。</verse>
				<verse number="24">該暗晡，上主向佢顯現，對佢講：「𠊎係若爸 亞伯拉罕 个上帝；因為𠊎㧯你共下，你毋使驚。為到𠊎僕人 亞伯拉罕 个緣故，𠊎愛賜福給你，使你多子多孫。」</verse>
				<verse number="25">以撒 就在該位起祭壇敬拜上主，然後在該位搭帳篷；厥僕人也在該位挖一口井。</verse>
				<verse number="26">亞比米勒 帶佢个軍師 亞戶撒 㧯元帥 非各 ，對 基拉耳 來看 以撒 。</verse>
				<verse number="27">以撒 對佢等講：「你等做麼介來看𠊎？頭擺你等毋係當惱𠊎，將𠊎逐出來嗎？」</verse>
				<verse number="28">佢等應講：「這下，𠊎等清楚知上主㧯你共下。𠊎等希望你㧯𠊎等共下來發誓、立約，好麼？</verse>
				<verse number="29">頭擺𠊎等好款待你，俾你平平安安離開。這下𠊎等知上主賜福給你；請毋好傷害𠊎等，像𠊎等無傷害你共樣。」</verse>
				<verse number="30">以撒 就準備筵席，㧯佢等共下食、共下啉。</verse>
				<verse number="31">第二日，佢等打早䟘起來，互相發誓、立約。 以撒 送佢等，佢等就平平安安離開佢轉去。</verse>
				<verse number="32">就在該日， 以撒 个僕人向佢報告有關挖井个事，講：「𠊎等尋到水源了！」</verse>
				<verse number="33">佢就㧯該口井安名 示巴 ，所以該城喊做 別是巴 ，直到今晡日。</verse>
				<verse number="34">以掃 四十歲个時㧯兩個 赫 人結婚，一個係 比利 个妹仔 猶滴 ，一個係 以倫 个妹仔 芭實抹 。</verse>
				<verse number="35">姖等常常害 以撒 㧯 麗百加 操煩。</verse>
			</chapter>
			<chapter number="27">
				<verse number="1">以撒 年老个時，目珠花花看毋到了；佢喊大孻仔 以掃 來，講：「𠊎个孻仔啊！」 以掃 應講：「𠊎在這！」</verse>
				<verse number="2">以撒 講：「你看，𠊎已經恁老，毋知還食幾久？</verse>
				<verse number="3">你帶弓箭去外背為𠊎打獵，</verse>
				<verse number="4">照𠊎好食个口味煮好，拿來給𠊎食，然後𠊎愛在吂死以前祝福你。」</verse>
				<verse number="5">以撒 㧯厥孻仔 以掃 講話个時， 麗百加 也聽到。 以掃 出去打獵个時，</verse>
				<verse number="6">麗百加 就對厥孻仔 雅各 講：「𠊎聽到若爸對若哥 以掃 講：</verse>
				<verse number="7">『你去將野獸帶來，煮好給𠊎食，然後𠊎愛在吂死以前，在上主面前祝福你。』</verse>
				<verse number="8">𠊎个孻仔啊！你愛注意聽，照𠊎个話去做。</verse>
				<verse number="9">你到羊群中尋兩隻又肥又嫩个細山羊來，𠊎會照若爸好食个口味煮好。</verse>
				<verse number="10">你拿去給若爸食，好使佢吂死以前先祝福你。」</verse>
				<verse number="11">雅各 對厥姆 麗百加 講：「總係你知吾哥 以掃 全身生毛，𠊎渾身光滑。</verse>
				<verse number="12">萬一吾爸摸𠊎，發現𠊎騙佢；𠊎毋單淨得毋到祝福，反轉會為自家帶來咒詛。」</verse>
				<verse number="13">厥姆應講：「吾孻仔啊！𠊎來承擔咒詛！你照𠊎个話去做，牽山羊來！」</verse>
				<verse number="14">雅各 就去將山羊牽來，交給厥姆；厥姆就照厥爸好食个口味煮好。</verse>
				<verse number="15">麗百加 又將長子 以掃 留在屋下最好个衫褲拿出來給細个孻仔 雅各 著，</verse>
				<verse number="16">又用山羊皮包佢个雙手㧯頸筋光滑个部份，</verse>
				<verse number="17">正將煮好个肉㧯餅交給厥孻仔 雅各 。</verse>
				<verse number="18">雅各 到厥爸該位，喊講：「阿爸！」 以撒 問講：「孻仔！你係㖠個？」</verse>
				<verse number="19">雅各 對厥爸講：「係你个長子 以掃 。你吩咐𠊎做个，𠊎做好了！請坐起來，食𠊎為你打來个野味，好祝福𠊎。」</verse>
				<verse number="20">以撒 講：「孻仔！你樣般恁遽就打到！」 雅各 應講：「上主 — 你个上帝俾𠊎當好運！」</verse>
				<verse number="21">以撒 對 雅各 講：「孻仔！過來兜仔，俾𠊎摸看啊，你有影係吾孻仔 以掃 麼？」</verse>
				<verse number="22">雅各 行過去， 以撒 摸摸，就講：「聲係 雅各 个聲，手係 以掃 个手。」</verse>
				<verse number="23">佢認毋出這係 雅各 ，因為摸起來像 以掃 个手共樣有毛。佢愛祝福 雅各 个時，</verse>
				<verse number="24">又問：「你斷真係吾孻仔 以掃 嗎？」 雅各 應佢講：「係！」</verse>
				<verse number="25">以撒 講：「孻仔，肉拿過來！𠊎食掉就祝福你。」 雅各 將肉拿過去俾佢食，又㨮酒俾佢啉。</verse>
				<verse number="26">以撒 對佢講：「孻仔，你行過來唚𠊎！」</verse>
				<verse number="27">雅各 行過去唚佢；佢一鼻到 雅各 身上衫褲个味，就祝福佢，講： 「吾孻仔身上个香氣 就像上主賜福个土地所發出个香氣。</verse>
				<verse number="28">願上帝對天頂賜甘露給你， 俾你个土地盡肥， 俾你五榖豐登、新酒滿槽。</verse>
				<verse number="29">願萬國服事你， 萬民跪拜你。 願你統治所有个兄弟； 願若姆个孻仔跪拜你。 咒詛你个，會受咒詛； 祝福你个，會得到祝福。」</verse>
				<verse number="30">以撒 祝福 雅各 以後， 雅各 對厥爸該位出來，堵好厥哥 以掃 也打獵轉來。</verse>
				<verse number="31">以掃 也將肉煮好，拿到 以撒 面前，講：「阿爸，請坐起來，食若孻仔為你打來个野味，好祝福𠊎。」</verse>
				<verse number="32">厥爸 以撒 問佢講：「你係麼人？」 佢應講：「𠊎係你个長子 以掃 ！」</verse>
				<verse number="33">以撒 全身愊愊掣問佢：「頭先拿野味給𠊎食个係麼人？你入來以前𠊎已經食了。𠊎已經祝福佢，這個祝福會永遠屬佢。」</verse>
				<verse number="34">以掃 聽到厥爸个話，非常艱苦，大聲噭，講：「阿爸！求你也愛祝福𠊎！」</verse>
				<verse number="35">以撒 講：「若老弟先入來騙𠊎，已經將愛給你个祝福搶走。」</verse>
				<verse number="36">以掃 講：「這係佢第二擺欺騙𠊎，難怪佢个名安到 雅各 。佢搶走𠊎長子个名份，這下又搶走𠊎个祝福。你敢無留一項祝福給𠊎？」</verse>
				<verse number="37">以撒 應講：「𠊎已經俾佢做你个主人，俾所有个兄弟服事佢。𠊎也祝福佢，俾佢五榖豐登、新酒滿槽。𠊎个孻仔啊！𠊎還有麼介好給你呢？」</verse>
				<verse number="38">以掃 還係緊哀求厥爸：「阿爸，你無留半項祝福，係麼？阿爸，求你也祝福𠊎啊！」 以掃 就大聲噭。</verse>
				<verse number="39">厥爸 以撒 應佢講： 「天頂个甘露毋降給你； 盡肥个土地你也無份。</verse>
				<verse number="40">你愛靠刀劍生活， 愛服事你个老弟； 到你強盛个時， 你會對若頸項 脫掉佢加个軛。」</verse>
				<verse number="41">以掃 當恨 雅各 ，因為騙走厥爸愛給佢个祝福。 以掃 心肚想：「吾爸會死了，喪事辦了後，𠊎愛將吾老弟 雅各 㓾掉。」</verse>
				<verse number="42">有人將長子 以掃 个計劃㧯 麗百加 講， 麗百加 就喊細个孻仔 雅各 到姖面前來，講：「你聽𠊎講！若哥 以掃 愛尋你輸贏，愛㓾死你。</verse>
				<verse number="43">𠊎个孻仔啊！你愛聽𠊎个話，黏時去 哈蘭 ，去吾哥 拉班 該位，</verse>
				<verse number="44">㧯佢共下住一站時間，等若哥 以掃 个氣消掉。</verse>
				<verse number="45">等到佢毋記得你對佢所做个事該時，𠊎正派人接你轉來。𠊎樣使一日內失掉兩個孻仔呢？」</verse>
				<verse number="46">麗百加 對 以撒 講：「𠊎盡惱 以掃 該兩個 赫 人𡜵娘；若係 雅各 也討 赫 人做𡜵娘，𠊎還係死較好！」</verse>
			</chapter>
			<chapter number="28">
				<verse number="1">以撒 喊 雅各 到面前來，祝福佢，又吩咐佢講：「你毋好㧯 迦南 个細妹仔結婚。</verse>
				<verse number="2">你愛去 美索不達米亞 ，到若姐公 彼土利 个家，對若舅 拉班 个妹仔當中討一個做𡜵娘。</verse>
				<verse number="3">願全能个上帝賜福你，俾你𫱔多多子女，成做盡多民族个祖先！</verse>
				<verse number="4">願佢賜福給你㧯你个子孫，像賜福 亞伯拉罕 一樣。願你會得到你這下做旅客所住个地方，就係上帝賜福給 亞伯拉罕 个土地。」</verse>
				<verse number="5">恁樣， 以撒 喊 雅各 去 美索不達米亞 ，到厥姐公 亞蘭 人 彼土利 个孻仔 拉班 該位。 拉班 係 麗百加 个阿哥， 雅各 㧯 以掃 个母舅。</verse>
				<verse number="6">以掃 聽到 以撒 祝福 雅各 ，送佢到 美索不達米亞 討𡜵娘，也知 以撒 祝福佢个時吩咐佢毋好㧯 迦南 个細妹仔結婚，</verse>
				<verse number="7">又看到 雅各 聽從爺𡟓到 美索不達米亞 去。</verse>
				<verse number="8">以掃 正知厥爸 以撒 無歡喜佢對 迦南 討个𡜵娘。</verse>
				<verse number="9">所以，佢到 亞伯拉罕 个孻仔 以實瑪利 該位，㧯厥妹仔 瑪哈拉 結婚； 瑪哈拉 就係 尼拜約 个老妹。</verse>
				<verse number="10">雅各 離開 別是巴 ，愛去 哈蘭 。</verse>
				<verse number="11">日頭落山个時，佢來到一個地方 ，在該位過夜；佢搬一隻石頭做枕頭，在該位睡目。</verse>
				<verse number="12">佢發夢看到一支梯仔對地上通到天頂，梯仔頂高有上帝个使者上上下下。</verse>
				<verse number="13">佢又看到上主企在佢堘頭 ，對佢講：「𠊎係上主，係若公 亞伯拉罕 个上帝㧯若爸 以撒 个上帝；𠊎愛將你這下睡个土地賜給你㧯你个後代。</verse>
				<verse number="14">佢等愛像地上个沙仔恁多，向東西南北發展。𠊎愛因為你㧯你个後代賜福給世界各國。</verse>
				<verse number="15">𠊎愛㧯你共下；無論你到㖠位，𠊎愛保護你，也愛帶領你轉到這地方。𠊎絕對毋會離開你，一定會實現對你个應許。」</verse>
				<verse number="16">雅各 睡一覺醒，講：「上主確實在這地方，𠊎樣毋知！」</verse>
				<verse number="17">佢就著驚，又講：「這地方神聖可畏，一定係上帝个殿，通到天庭个門。」</verse>
				<verse number="18">第二日打早， 雅各 䟘起來，將佢做枕頭該隻石頭頓起來做紀念碑，在石頭頂淋油獻給上帝。</verse>
				<verse number="19">佢將該地方安到 伯特利 。 (這個城以前喊做 路斯 。)</verse>
				<verse number="20">雅各 許願講：「若係上帝㧯𠊎共下，在路途中保護𠊎，賜給𠊎食个、著个，</verse>
				<verse number="21">俾𠊎平安轉到故鄉，上主確實就係𠊎个上帝。</verse>
				<verse number="22">這隻做紀念碑个石頭，愛成做敬拜上帝个聖所。𠊎愛將你賜給𠊎个一切獻十分之一給你。」</verse>
			</chapter>
			<chapter number="29">
				<verse number="1">雅各 繼續向前行，來到東方人个所在。</verse>
				<verse number="2">佢在田肚看到一口井，有三群羊仔睡在井堘。牧人俾羊群食个水係這口井个；井口揜等一垤大石頭。</verse>
				<verse number="3">羊群到齊个時，牧人正碾開井口个大石頭，俾羊群食水，然後再將石頭揜轉去。</verse>
				<verse number="4">雅各 問該兜人講：「朋友啊！請問你等對㖠位來？」 佢等應講：「𠊎等對 哈蘭 來。」</verse>
				<verse number="5">佢又問佢等講： 「你等認識 拿鶴 个孫仔 拉班 麼？」 佢等應講：「識。」</verse>
				<verse number="6">雅各 又問：「佢平安麼？」 佢等講：「盡平安！你看，厥妹仔 蕾潔 帶等羊群來囉！」</verse>
				<verse number="7">雅各 講：「日頭還恁高，吂到羊仔愛關起來个時，應該俾羊仔食水，再倒轉去食草！」</verse>
				<verse number="8">佢等講：「若無等到羊仔到齊，𠊎等做毋得將井堘个石頭碾開俾羊仔食水。」</verse>
				<verse number="9">雅各 還㧯牧人講話个時， 蕾潔 帶等厥爸个羊仔來到，因為姖係掌羊个。</verse>
				<verse number="10">雅各 一看到 蕾潔 㧯母舅 拉班 个羊群，就去碾開井口該垤石頭俾羊仔食水。</verse>
				<verse number="11">然後佢唚 蕾潔 ，歡喜到開聲噭。</verse>
				<verse number="12">雅各 㧯 蕾潔 講：「𠊎係若爸个外甥，係 麗百加 个孻仔。」 蕾潔 就走轉去㧯厥爸講。</verse>
				<verse number="13">拉班 一聽到外甥 雅各 來，就走出去接佢、揇佢、唚佢，帶佢轉屋下去。 雅各 將一切个經過㧯 拉班 講。</verse>
				<verse number="14">拉班 講：「你確實係𠊎骨肉之親。」 雅各 就在該位住一個月。</verse>
				<verse number="15">有一日， 拉班 對 雅各 講：「雖然你係𠊎个至親，也毋應該代𠊎做白工；㧯𠊎講，你愛幾多工錢？」</verse>
				<verse number="16">拉班 有兩個妹仔，大个安到 麗亞 ，細个安到 蕾潔 。</verse>
				<verse number="17">麗亞 个目珠無神無神， 蕾潔 生來就盡靚。</verse>
				<verse number="18">雅各 盡中意 蕾潔 ，就要求講：「若係你准𠊎㧯若細个妹仔 蕾潔 結婚，𠊎願意為你做七年工。」</verse>
				<verse number="19">拉班 應講：「好，將姖嫁給你，當然比嫁給別人較贏。你做得住在𠊎這位！」</verse>
				<verse number="20">為到愛討 蕾潔 ， 雅各 就做七年工；因為佢盡愛 蕾潔 ，就看這七年像幾日定定。</verse>
				<verse number="21">雅各 對 拉班 講：「期限到了，俾𠊎㧯若妹仔結婚！」</verse>
				<verse number="22">拉班 就準備筵席，邀請當地个人來參加。</verse>
				<verse number="23">到該暗晡， 拉班 將大个妹仔 麗亞 𢱋過去給 雅各 ， 雅各 就㧯姖同房。</verse>
				<verse number="24">( 拉班 也將自家个使女 悉帕 給 麗亞 做使女。)</verse>
				<verse number="25">第二朝晨， 雅各 正發現新娘係 麗亞 ，就尋 拉班 講：「你做麼介恁樣對待𠊎呢？你明知𠊎係為到 蕾潔 服事你；你樣做得騙𠊎？」</verse>
				<verse number="26">拉班 應講：「照𠊎等這位个風俗，大个妹仔吂嫁，做毋得先嫁細个妹仔。</verse>
				<verse number="27">若係你肯再為𠊎做七年工，等七日个新婚慶祝過後，𠊎會將 蕾潔 也給你。」</verse>
				<verse number="28">雅各 同意。七日个慶祝過後， 拉班 就將細个妹仔 蕾潔 給 雅各 做𡜵娘。</verse>
				<verse number="29">( 拉班 也將自家个使女 辟拉 給 蕾潔 做使女。)</verse>
				<verse number="30">雅各 也㧯 蕾潔 同房；佢惜 蕾潔 贏過 麗亞 。恁樣佢又為 拉班 做七年工。</verse>
				<verse number="31">上主看到 麗亞 受冷落，就俾姖會𫱔，總係 蕾潔 毋會𫱔。</verse>
				<verse number="32">麗亞 有身項，𫱔一個孻仔。姖講：「上主看到𠊎个苦情，這下老公一定會惜𠊎。」姖就㧯佢安名 呂便 。</verse>
				<verse number="33">姖又有身項，𫱔第二個孻仔。姖講：「上主聽到𠊎受冷落，又給𠊎𫱔加這個孻仔。」姖就㧯佢安名 西緬 。</verse>
				<verse number="34">姖又有身項，𫱔第三個孻仔。姖講：「這下老公一定會㧯𠊎結合，因為𠊎㧯佢𫱔三個孻仔。」所以佢个名安到 利未 。</verse>
				<verse number="35">姖又有身項，𫱔第四個孻仔。姖講：「這擺𠊎愛頌讚上主。」所以姖㧯佢安名 猶大 。以後姖就無再𫱔。</verse>
			</chapter>
			<chapter number="30">
				<verse number="1">蕾潔 看到自家無為 雅各 𫱔細人仔，就嫉妒厥姊，對 雅各 講：「你俾𠊎𫱔細人仔，若係無，𠊎愛死！」</verse>
				<verse number="2">雅各 對 蕾潔 發譴，講：「俾你毋會𫱔个係上帝，𠊎樣能代理佢呢？」</verse>
				<verse number="3">蕾潔 講：「𠊎个使女 辟拉 在這位，你同姖睡，俾姖代𠊎𫱔細人仔，恁樣𠊎就有子女了。」</verse>
				<verse number="4">蕾潔 就將姖个使女給老公做細姐， 雅各 就同 辟拉 共下睡。</verse>
				<verse number="5">辟拉 就有身項，為 雅各 𫱔一個孻仔。</verse>
				<verse number="6">蕾潔 講：「上帝代𠊎伸冤，也聽𠊎个祈求，賜給𠊎一個孻仔。」所以姖㧯佢安名 但 。</verse>
				<verse number="7">辟拉 又有身項，㧯 雅各 𫱔第二個孻仔。</verse>
				<verse number="8">蕾潔 講：「𠊎㧯吾姊相爭，又爭贏了。」姖就㧯佢安名 拿弗他利 。</verse>
				<verse number="9">麗亞 發現自家毋會𫱔了，也將姖个使女 悉帕 給 雅各 做細姐。</verse>
				<verse number="10">悉帕 就同 雅各 𫱔一個孻仔。</verse>
				<verse number="11">麗亞 講：「𠊎真好運噢！」姖就㧯佢安名 迦得 。</verse>
				<verse number="12">悉帕 㧯 雅各 又𫱔第二個孻仔。</verse>
				<verse number="13">麗亞 講：「𠊎真有福氣噢！所有个婦人家會講𠊎真係有福氣。」姖就㧯佢安名 亞設 。</verse>
				<verse number="14">麥仔收成个時節， 呂便 在麥田尋到催情果，就拿去交給厥姆 麗亞 。 蕾潔 對 麗亞 講：「若孻仔个催情果，拜託給兜𠊎。」</verse>
				<verse number="15">麗亞 應佢：「你搶𠊎个老公還毋罅？這下你又想愛搶吾孻仔个催情果！」 蕾潔 講：「為到若孻仔个催情果，今暗晡讓你同 雅各 共下睡。」</verse>
				<verse number="16">臨暗仔， 雅各 對麥田轉來； 麗亞 出去迎接，對佢講：「今暗晡你一定愛同𠊎睡，因為你係𠊎用吾孻仔个催情果換來个。」該暗晡， 雅各 就同 麗亞 共下睡。</verse>
				<verse number="17">上帝聽 麗亞 个祈求，姖就有身項，為 雅各 𫱔第五個孻仔。</verse>
				<verse number="18">麗亞 講：「上帝報答𠊎，因為𠊎將自家个使女給吾老公。」姖就㧯佢安名 以薩迦 。</verse>
				<verse number="19">麗亞 又有身項，為 雅各 𫱔第六個孻仔。</verse>
				<verse number="20">麗亞 講：「上帝給𠊎貴重个禮物；這下吾老公會好款待𠊎，因為𠊎為佢𫱔六個孻仔。」姖就㧯佢安名 西布倫 。</verse>
				<verse number="21">後來 麗亞 𫱔一個妹仔，㧯姖安到 底拿 。</verse>
				<verse number="22">上帝顧念 蕾潔 ，聽姖个祈求，使姖又會𫱔。</verse>
				<verse number="23">蕾潔 就有身項，𫱔一個孻仔，講：「上帝除掉𠊎个見笑了。」</verse>
				<verse number="24">姖㧯佢安名 約瑟 ，講：「願上主再給𠊎一個孻仔。」</verse>
				<verse number="25">蕾潔 𫱔 約瑟 以後， 雅各 對 拉班 講：「𠊎愛轉𠊎个故鄉；求你俾𠊎離開！</verse>
				<verse number="26">准𠊎帶𡜵娘、細姐㧯子女離開；𠊎識為到佢等服事你。你知𠊎樣般煞猛㧯你工作！」</verse>
				<verse number="27">拉班 對佢講：「你聽𠊎講！上主俾𠊎知！上主係因為你个緣故正賜福給𠊎。若係做得，拜託你繼續住在𠊎這位。</verse>
				<verse number="28">㧯𠊎講，你愛幾多工錢？𠊎一定給你。」</verse>
				<verse number="29">雅各 應講：「你知𠊎樣般㧯你工作，在𠊎个手頭，你个牛群、羊群增加幾多。</verse>
				<verse number="30">𠊎來以前，你个財產有限，這下增加恁多；係因為𠊎个緣故，上主正賜福給你 。這下𠊎愛為𠊎自家个家業來打拚了！」</verse>
				<verse number="31">拉班 問：「𠊎應該樣般報答你呢？」 雅各 講：「你麼介都毋使報答𠊎；只有一件事，若係你同意𠊎个辦法，𠊎就繼續看顧你个羊群。</verse>
				<verse number="32">今晡日，讓𠊎到你个羊群中，將所有有花點、有花浪㧯烏色个綿羊，並有花點、有花浪个山羊全部分出來；將來這種个羊仔正算係𠊎个工錢。</verse>
				<verse number="33">恁樣，下二擺你就會知𠊎係毋係誠實！你來查看𠊎所得个工錢个時，若係在𠊎个羊群中發現無花點、無花浪个山羊，抑係毋係烏色个綿羊，你就知係𠊎偷來。」</verse>
				<verse number="34">拉班 應佢：「好啊，𠊎同意，照你所講个去行。」</verse>
				<verse number="35">總係該日， 拉班 偷偷仔就將有花浪、有斑點个山羊牯，㧯有花浪、有花點、摻雜白色个山羊乸全部分出來，也將烏色个綿羊全部分出來，交給佢自家該兜孻仔來掌，</verse>
				<verse number="36">吩咐佢等㧯 雅各 分開，愛相隔有三日个路程。 雅各 就另外牧養 拉班 其他个羊群。</verse>
				<verse number="37">總係以後， 雅各 拿兜白楊樹、杏樹、㧯梧桐樹个樹桍，削掉一部份樹皮，俾樹桍露出白色个花浪。</verse>
				<verse number="38">佢將這種樹桍插在羊群頭前、羊食水个水槽肚，因為它兜來食水个時會配種。</verse>
				<verse number="39">羊在樹桍前配種，就會𫱔有花浪、有花點个細羊仔。</verse>
				<verse number="40">雅各 將 拉班 羊群中走醒个綿羊㧯山羊分開來，俾它兜同該兜有花浪㧯烏色个羊配種。 雅各 用這種方法來增加自家个羊仔，然後將這兜羊仔對 拉班 个羊群中分出來。</verse>
				<verse number="41">勇健个羊配種个時節， 雅各 就將該兜樹桍插在它兜頭前个水槽肚，它兜就對等該兜樹桍配種。</verse>
				<verse number="42">總係當瘦个羊配種个時，佢就無插該兜樹桍。恁樣瘦个羊全部歸 拉班 ，勇健个羊全部歸 雅各 。</verse>
				<verse number="43">雅各 就越來越發，有當多羊群、奴婢、奴僕、駱駝㧯驢仔。</verse>
			</chapter>
			<chapter number="31">
				<verse number="1">雅各 聽到 拉班 該兜孻仔講：「 雅各 已經搶走𫣆等阿爸个一切；佢所有个財產本來係屬𫣆等阿爸个。」</verse>
				<verse number="2">雅各 也發覺 拉班 對佢無像頭擺恁親切。</verse>
				<verse number="3">這時，上主對 雅各 講：「你愛轉去故鄉，到若祖先㧯親人該位去；𠊎愛㧯你共下。」</verse>
				<verse number="4">雅各 就派人傳話給 蕾潔 㧯 麗亞 ，吩咐姖等到佢掌羊个地方見面。</verse>
				<verse number="5">佢㧯姖等講：「𠊎發現若爸對𠊎無像頭擺恁親切；總係吾爸个上帝一直㧯𠊎共下。</verse>
				<verse number="6">你兩儕知，𠊎有盡全力㧯若爸工作，</verse>
				<verse number="7">總係佢騙𠊎，十擺改𠊎个工錢；好得上帝毋准佢害𠊎。</verse>
				<verse number="8">若係 拉班 講：『有花點个羊仔給你做工錢』，𫱔个羊仔歸群就有花點；若係佢講：『有花浪个羊仔給你做工錢』，𫱔个羊仔歸群就有花浪。</verse>
				<verse number="9">恁樣，上帝將若爸个羊群拿來賜給𠊎。</verse>
				<verse number="10">「有一擺，在羊群配種个時節，𠊎發夢看到打羊乸个羊豭全部係有花點、有花浪个。</verse>
				<verse number="11">上帝个使者在夢中講：『 雅各 啊！』𠊎應講：『𠊎在這位。』</verse>
				<verse number="12">佢講：『你看，所有打羊乸个羊豭全部係有花點、有花浪个。𠊎使這事發生，因為 拉班 向你所做个，𠊎攏總有看到。</verse>
				<verse number="13">𠊎係在 伯特利 向你顯現个上帝。你識在該位頓一隻石頭做紀念碑，在頂高淋橄欖油，又在該位對𠊎發誓。這下你愛準備轉你出世个地方去。』」</verse>
				<verse number="14">蕾潔 㧯 麗亞 應 雅各 講：「𠊎等敢還有可能對吾爸分到財產嗎？</verse>
				<verse number="15">佢敢毋係將𠊎等準做外人嗎？佢出賣𠊎等，又吞掉賣𠊎等个價錢。</verse>
				<verse number="16">上帝對吾爸該位拿走个財富本來係屬𠊎等㧯𠊎等子女个。恁樣，你愛照上帝對你講个話去做。」</verse>
				<verse number="17">雅各 就準備好勢，愛轉 迦南 厥爸 以撒 該位去。佢喊𡜵娘、子女全部騎上駱駝，又帶等佢所有个頭牲㧯在 美索不達米亞 積存个財產離開。</verse>
				<verse number="18"></verse>
				<verse number="19">當 拉班 去外背剪羊毛个時， 蕾潔 偷拿厥爸該兜家族个神像。</verse>
				<verse number="20">雅各 騙 拉班 ，無俾佢知，就偷偷仔走。</verse>
				<verse number="21">佢帶等佢所有个一切逃走，渡過 幼發拉底 河，向 基列 山區去。</verse>
				<verse number="22">到第三日，有人㧯 拉班 講， 雅各 逃走了。</verse>
				<verse number="23">拉班 帶領佢个族人共下去追 雅各 。佢等追七日，正在 基列 山區追到佢。</verse>
				<verse number="24">該暗晡，上帝在 亞蘭 人 拉班 夢中向佢顯現，對佢講：「你愛小心，毋好糮糝對 雅各 講恐嚇个話。」</verse>
				<verse number="25">該時 雅各 在山頂搭帳篷； 拉班 㧯佢个族人也在 基列 山區搭帳篷。</verse>
				<verse number="26">拉班 對 雅各 講：「你做麼介無㧯𠊎講就走？像人擎刀仔將𠊎个妹仔搶走。</verse>
				<verse number="27">做麼介騙𠊎，偷偷仔走，無㧯𠊎講一聲？若係你有㧯𠊎講，𠊎一定會歡歡喜喜唱歌、打鼓、彈琴送你走。</verse>
				<verse number="28">你恁樣做實在忒戇；連俾𠊎唚一下𠊎个外孫㧯妹仔，㧯佢等送別个機會也無。</verse>
				<verse number="29">本來𠊎有辦法傷害你，總係昨暗晡，若爸个上帝警告𠊎，毋準𠊎糮糝欺負你。</verse>
				<verse number="30">𠊎也了解你想若爸屋下个心情，一心想愛轉去；總係做麼介偷𠊎該兜家族个神像呢？」</verse>
				<verse number="31">雅各 應 拉班 講：「因為𠊎驚你會對𠊎這位強強將你个妹仔搶轉去。</verse>
				<verse number="32">總係，你在麼人該位搜出你該兜神像，麼人就該死。在𠊎等親人面前，若係你認出有麼介東西係你个，就拿轉去。」原來 雅各 毋知 蕾潔 偷厥爸个神像。</verse>
				<verse number="33">拉班 就入去 雅各 个帳篷搜查，接等到 麗亞 㧯兩個使女个帳篷，無搜到麼介；出來後，佢又入去 蕾潔 个帳篷。</verse>
				<verse number="34">蕾潔 已經將該兜家族个神像囥在駱駝鞍个袋仔肚，自家坐在頂高。 拉班 在帳篷肚逐位搜，無尋到麼介。</verse>
				<verse number="35">蕾潔 對厥爸講：「請你毋好受氣；𠊎堵好在月經期間，無方便在你面前企起來。」 拉班 逐所在尋透透，無尋到該兜家族个神像。</verse>
				<verse number="36">雅各 就受氣，責備 拉班 講：「𠊎到底犯麼介罪，犯麼介法，你卻來追𠊎？</verse>
				<verse number="37">你已經搜過𠊎所有个包袱，到底有尋到若屋下个東西麼？拿出來，放在你㧯𠊎親人个面前，俾大家決定𠊎兩儕愛樣般做啊！</verse>
				<verse number="38">𠊎在若屋下這二十年間，你个綿羊抑係山羊毋識落胎；你个羊牯𠊎一隻也毋識食過。</verse>
				<verse number="39">俾野獸扯爛个羊，𠊎無帶去俾你看，全部係𠊎自家私下賠掉。無論日時頭、暗晡時，羊仔被人偷走，你全部愛𠊎賠。</verse>
				<verse number="40">𠊎常常日時頭堵到風吹日炙，暗晡時又受到寒霜，歸暗晡無合眼。</verse>
				<verse number="41">𠊎在若屋下做二十年長年：為到討你兩個妹仔，𠊎服事你十四年；為到愛得你个羊群，𠊎服事你六年；你還十擺改𠊎个工錢。</verse>
				<verse number="42">若毋係𠊎个祖先 亞伯拉罕 个上帝、 以撒 所敬畏个上帝㧯𠊎共下，你一定會逐𠊎空手出來。總係上帝看到𠊎个苦情㧯勞碌；佢昨暗晡就責備你。」</verse>
				<verse number="43">拉班 應 雅各 講：「妹仔係𠊎个，外孫也係𠊎个，連羊群也係𠊎个；其實你眼前个一切攏總係𠊎个。𠊎个妹仔㧯姖等所𫱔个子女，𠊎今晡日愛樣般款待佢等呢？</verse>
				<verse number="44">來啊！你㧯𠊎兩儕立約，𠊎等來堆石頭做𠊎等立約个證據。」</verse>
				<verse number="45">雅各 就翻一隻石頭頓起來做紀念碑。</verse>
				<verse number="46">佢喊親人拈兜石頭來堆做一堆，然後大家在石堆堘共下食、共下啉。</verse>
				<verse number="47">拉班 將該石堆安名 伊迦爾‧撒哈杜他 ，總係 雅各 將它安到 迦累得 。</verse>
				<verse number="48">拉班 對 雅各 講：「今晡日，這石堆在你㧯𠊎中間做𠊎等立約个證據。」所以這地方安到 迦累得 。</verse>
				<verse number="49">拉班 又講：「𠊎等分開以後，願上主在你㧯𠊎中間鑒察。」所以這地方又安到 米斯巴 。</verse>
				<verse number="50">拉班 接等對 雅各 講：「你若係壞對待𠊎个妹仔，抑係在𠊎个妹仔以外再討，雖然無人知，你愛記得，上帝在鑒察𫣆等。</verse>
				<verse number="51">你看𠊎在你㧯𠊎中間所立个這石堆㧯紀念碑。</verse>
				<verse number="52">這石堆㧯這個紀念碑做證據來提醒𫣆等：𠊎絕對毋會超過石堆去攻擊你，你也做毋得超過石堆㧯紀念碑來侵犯𠊎。</verse>
				<verse number="53">亞伯拉罕 个上帝㧯 拿鶴 个上帝，就係佢等阿爸个上帝 ，愛在你㧯𠊎中間做判斷。」然後 雅各 就對厥爸 以撒 敬畏个上帝發誓，愛守這約。</verse>
				<verse number="54">佢在山頂㓾頭牲獻祭，邀請親人共下食飯；食飽後，佢等在山頂過夜。</verse>
				<verse number="55">第二日打早， 拉班 就㧯厥外孫㧯妹仔唚嘴祝福，離開該位，轉屋下去。</verse>
			</chapter>
			<chapter number="32">
				<verse number="1">雅各 繼續佢个行程；上帝个使者在路上來見佢。</verse>
				<verse number="2">雅各 看到佢等就講：「這係上帝个軍隊！」佢就將該地方安到 瑪哈念 。</verse>
				<verse number="3">雅各 派幾個人先去 以東 地區見厥哥 以掃 ，</verse>
				<verse number="4">吩咐佢等講：「你等愛對𠊎主 以掃 講：『你个僕人 雅各 講：𠊎㧯 拉班 住一站時間，一直到這下正轉來。</verse>
				<verse number="5">𠊎有牛、驢、羊群、奴僕㧯奴婢。這下𠊎先派人來報告吾主人，希望得到你个歡喜。』」</verse>
				<verse number="6">派去該兜人轉來對 雅各 報告：「𠊎等堵到若哥 以掃 ；佢已經帶等四百儕出來，愛來㧯你見面。」</verse>
				<verse number="7">雅各 當驚又當愁，將㧯佢共下个人分做兩隊，將羊群、牛仔、㧯駱駝也分做兩隊。</verse>
				<verse number="8">佢想：「若係 以掃 攻擊第一隊，另外一隊還有機會逃走。」</verse>
				<verse number="9">雅各 祈禱講：「吾公 亞伯拉罕 个上帝啊！吾爸 以撒 个上帝啊！求你來聽！上主啊，你識吩咐𠊎轉來故鄉，到𠊎家族該位去，又講愛俾𠊎事事順利。</verse>
				<verse number="10">𠊎堪毋得領受你向僕人所做个一切慈愛㧯誠實。頭擺，𠊎个手只有擎等一支柺棍仔過 約旦 河；這下𠊎變做兩隊。</verse>
				<verse number="11">求你救𠊎脫離吾哥 以掃 个手。𠊎驚佢來攻擊𠊎；連𡜵娘子女全部會被佢㓾掉。</verse>
				<verse number="12">其實你識講：『𠊎一定愛俾你事事順利，也愛賜給你多子多孫，像海滣个沙粒，多到無人算得出。』」</verse>
				<verse number="13">雅各 在該位過夜。佢特別擇一部份頭牲做送給厥哥 以掃 个禮物：</verse>
				<verse number="14">山羊乸兩百隻，山羊牯二十隻；綿羊乸兩百隻，綿羊牯二十隻；</verse>
				<verse number="15">帶等細駱駝、餵乳个駱駝乸三十隻；牛乸四十隻，牛牯十隻；驢乸二十隻，驢牯十隻。</verse>
				<verse number="16">佢將這兜頭牲一群一群分開，逐群派一個僕人管理。佢吩咐佢等講：「你等先行，一群㧯一群中間愛離較遠兜仔。」</verse>
				<verse number="17">佢指示帶頭个僕人講：「吾哥 以掃 堵到你个時，若係問你：『你个主人係麼人？你愛去㖠位？你頭前這兜頭牲係麼人个？』</verse>
				<verse number="18">你就應講：『這兜全部係若僕人 雅各 个；佢愛送給厥主人 以掃 做禮物。佢本人就在𠊎等後背。』」</verse>
				<verse number="19">佢也指示第二群、第三群，㧯所有逐頭牲个人講：「你等堵到 以掃 个時也愛㧯佢講共樣个話；</verse>
				<verse number="20">也一定愛講：『若僕人 雅各 就在𠊎等後背。』」 雅各 心肚想：「𠊎愛用這兜禮物來消佢个氣，見面个時，佢就可能會饒赦𠊎。」</verse>
				<verse number="21">恁樣，佢喊送禮物个先行，自家留在帳篷肚過夜。</verse>
				<verse number="22">該暗晡 雅各 䟘起來，帶等兩個𡜵娘、兩個細姐仔，㧯十一個孻仔渡過 雅博 河。</verse>
				<verse number="23">佢等過河以後，佢又將所有个一切送過河，</verse>
				<verse number="24">自家一儕留在後背。 有一個人來㧯 雅各 揇腰跤仔，一直到臨天光。</verse>
				<verse number="25">該儕人看自家毋會贏佢，就打佢个大腳髀个骨輪， 雅各 个腳髀就𢫫腕。</verse>
				<verse number="26">該人講：「會天光了！放𠊎走啊！」 雅各 講：「你若係毋祝福𠊎，𠊎就毋放你走！」</verse>
				<verse number="27">該人問：「你安到麼介名？」 佢應講：「 雅各 。」</verse>
				<verse number="28">該人又講：「從今以後，你毋係安到 雅各 。你㧯上帝並㧯人鬥力，全部贏，恁樣你个名愛改做 以色列 。」</verse>
				<verse number="29">雅各 問：「請你㧯𠊎講，你安到麼介名？」 該人應講：「樣使問𠊎个名呢？」講煞，就㧯 雅各 祝福。</verse>
				<verse number="30">雅各 講：「𠊎面對面看到上帝，總係還生生！」恁樣，佢就將該地方安到 比努伊勒 。</verse>
				<verse number="31">雅各 離開 比努伊勒 个時，日頭堵堵出來。因為大腳髀个骨輪𢫫腕，佢就跛腳。</verse>
				<verse number="32">一直到今晡日， 以色列 个後代全部毋食大腳髀个筋，因為 雅各 大腳髀个筋識扭傷。</verse>
			</chapter>
			<chapter number="33">
				<verse number="1">雅各 昂頭看，就看到 以掃 帶等四百人前來；所以佢將子女分開，交給 麗亞 、 蕾潔 ，㧯兩個細姐。</verse>
				<verse number="2">佢喊兩個細姐㧯姖等个子女行在頭前， 麗亞 㧯姖个子女跈等， 蕾潔 㧯 約瑟 在盡後背。</verse>
				<verse number="3">雅各 親身行到佢等最頭前；佢連連七擺伏在地上，行到厥哥面前。</verse>
				<verse number="4">以掃 走過來迎接佢，將佢揇等來唚佢；兩儕就噭出來。</verse>
				<verse number="5">以掃 昂頭看到婦女㧯細人仔，就問佢：「你這兜人係麼人？」 雅各 應講：「這兜細人仔攏總係上帝施恩賜給若僕人个。」</verse>
				<verse number="6">雅各 兩個細姐帶等姖等个子女行前來跪 以掃 ，</verse>
				<verse number="7">接等係 麗亞 㧯姖个子女，最後 約瑟 㧯 蕾潔 也行前來跪佢。</verse>
				<verse number="8">以掃 又問：「𠊎最先堵到該群頭牲係愛做麼介？」 雅各 講：「係愛送給吾主个等路。」</verse>
				<verse number="9">以掃 講：「老弟！𠊎麼介都有；你自家留等就好了！」</verse>
				<verse number="10">雅各 講：「莫恁樣啊！你若係歡喜看到𠊎，請收下𠊎个禮物。你恁親切接納𠊎，𠊎看到你个面，就像看到上帝个面一樣。</verse>
				<verse number="11">請你接受𠊎帶來个禮物；因為上帝一直用慈愛款待𠊎，賜給𠊎一切所需要个。」 雅各 再三請 以掃 接受禮物，佢正收下來。</verse>
				<verse number="12">以掃 講：「𫣆等共下來去！𠊎在你頭前帶路。」</verse>
				<verse number="13">雅各 應講：「吾主知𠊎這兜細人仔還細，𠊎又愛照顧該兜還食乳个細牛仔、細羊仔。若係再逐佢等行一日路，驚怕牛羊全部會死掉。</verse>
				<verse number="14">請吾主先行！若僕人會在後背跈等，照牛羊㧯細人仔个力量慢慢行，直到 以東 你該位去。」</verse>
				<verse number="15">以掃 講：「若係恁樣，𠊎就留幾儕來保護你。」 總係 雅各 講：「毋使恁樣；吾主恁親切對待𠊎，𠊎就心滿意足。」</verse>
				<verse number="16">恁樣， 以掃 該日就先行轉 以東 去。</verse>
				<verse number="17">總係 雅各 去到 疏割 ，在該位為自家起屋仔，又為頭牲搭寮仔；所以該地方安到 疏割 。</verse>
				<verse number="18">雅各 對 美索不達米亞 一路平安轉到 迦南 地个 示劍 城，在城外搭帳篷。</verse>
				<verse number="19">佢搭帳篷該垤地，係用一百隻銀幣向 示劍 个阿爸、 哈抹 个後代買个。</verse>
				<verse number="20">佢在該位起一座祭壇，名安到 伊利‧伊羅伊‧以色列 。</verse>
			</chapter>
			<chapter number="34">
				<verse number="1">有一日， 雅各 㧯 麗亞 𫱔个妹仔 底拿 出去訪問該地方个細妹仔。</verse>
				<verse number="2">該地个族長 希未 人 哈抹 有一個孻仔安到 示劍 ；佢看到 底拿 ，就拉姖來強姦。</verse>
				<verse number="3">示劍 因為 底拿 恁靚，盡愛姖，就對姖講好話，想得到姖个歡喜 。</verse>
				<verse number="4">示劍 對厥爸 哈抹 求講：「想辦法俾𠊎討這細妹仔做𡜵娘。」</verse>
				<verse number="5">雅各 聽到 示劍 侮辱厥妹仔 底拿 。該時，佢該兜孻仔在野外掌頭牲，所以佢恬恬，等佢等轉來。</verse>
				<verse number="6">示劍 个阿爸 哈抹 來見 雅各 ，代厥孻仔提親。</verse>
				<verse number="7">雅各 該兜孻仔已經聽到消息，對野外轉來。佢等非常痛心、就大發譴，因為 示劍 強姦 雅各 个妹仔係一件侮辱 以色列 家个事，這本來係做毋得个事。</verse>
				<verse number="8">哈抹 㧯佢等講：「吾孻仔 示劍 當合意你等屋下个妹仔，請你等准吾孻仔㧯姖結婚。</verse>
				<verse number="9">𠊎等來同意兩族通婚：𠊎等討你等个細妹仔，你等也討𠊎等个細妹仔。</verse>
				<verse number="10">恁樣你等做得㧯𠊎等共下住在這個所在，隨意尋地方住、自由做生理、買產業。」</verse>
				<verse number="11">接等， 示劍 自家也對 底拿 个阿爸㧯該兜兄弟講：「求你等給𠊎面子；你等要求麼介，𠊎全部答應。</verse>
				<verse number="12">你等若肯𠊎㧯這細妹仔結婚，你等愛麼介聘金㧯禮物，𠊎全部會給你等。」</verse>
				<verse number="13">雅各 該兜孻仔，因為 示劍 侮辱佢等个老妹 底拿 ，就用詭詐个話應 示劍 㧯厥爸 哈抹 ，</verse>
				<verse number="14">對佢等講：「𠊎等做毋得將老妹嫁給無受割禮个人，這對𠊎等來講係非常見笑个事。</verse>
				<verse number="15">若係你等接受這個條件，𠊎等就同意你等个要求：你等愛像𠊎等共樣，逐個細孻仔全部愛受割禮；</verse>
				<verse number="16">恁樣，𠊎等就同意㧯你等通婚，住在你等當中，成做一個民族。</verse>
				<verse number="17">若係你等毋接受𠊎等个條件受割禮，𠊎等就愛將老妹帶走，離開這位。」</verse>
				<verse number="18">哈抹 㧯厥孻仔 示劍 認為這個條件公當。</verse>
				<verse number="19">該後生人係厥屋下最受看重个人；因為佢愛 雅各 个妹仔，黏時就照所提个條件去做。</verse>
				<verse number="20">恁樣， 哈抹 㧯厥孻仔 示劍 到城門聚會个地方，對佢等本城个人講：</verse>
				<verse number="21">「這兜人對𠊎等盡和睦，做得俾佢等住這位、做生理；這地恁闊，罅擺容納佢等。𠊎等做得討佢等个細妹仔，佢等也做得討𠊎等个細妹仔。</verse>
				<verse number="22">總係，這兜人提出一個條件：就係𠊎等个細孻仔，一定愛像佢等个細孻仔共樣受割禮，佢等正肯㧯𠊎等共下住，成做一個民族。</verse>
				<verse number="23">𠊎等同意好麼！俾佢等住在𠊎等當中。恁樣佢等个頭牲㧯一切財產敢毋係全部變做𠊎等个嗎？」</verse>
				<verse number="24">全城个人攏總贊成 哈抹 㧯厥孻仔 示劍 个建議；恁樣，全城个細孻仔就攏總受割禮。</verse>
				<verse number="25">到第三日，當地个細孻仔因為受割禮還當痛个時， 雅各 个兩個孻仔，就係 底拿 个親阿哥 西緬 㧯 利未 ，恬恬帶等刀劍，在佢等全無提防个時，入去城肚，將當地所有个細孻仔㓾淨淨，</verse>
				<verse number="26">又用刀劍㓾掉 哈抹 㧯佢个孻仔 示劍 ，然後將 底拿 對 示劍 个屋下帶走。</verse>
				<verse number="27">雅各 其他个孻仔也來到該位，將該城搶到淨淨，來為佢等个老妹所受个侮辱報仇。</verse>
				<verse number="28">佢等搶走羊群、牛群、驢仔，並城肚㧯田園所有个東西。</verse>
				<verse number="29">佢等搶走一切貴重个東西，將所有个婦女㧯細人仔捉走，甚至搬走屋肚所有个東西。</verse>
				<verse number="30">雅各 對 西緬 㧯 利未 講：「你等會害死𠊎！從今以後， 迦南 人、 比利洗 人，㧯這地方其他个民族全部會恨𠊎。𠊎等人數無多，若係佢等聯合起來攻擊𠊎，𠊎㧯全家穩死了。」</verse>
				<verse number="31">總係佢等應講：「佢㖠做得對𠊎等个老妹像對娼妓一樣啊！」</verse>
			</chapter>
			<chapter number="35">
				<verse number="1">上帝對 雅各 講：「你愛到 伯特利 去，住在該位。你愛在該位為𠊎起一座祭壇。𠊎就係你逃避若哥 以掃 个時，向你顯現个上帝。」</verse>
				<verse number="2">雅各 就對佢个家族㧯所有跈佢共下去个人講：「愛將你等帶來該兜外族神像㧹掉；愛潔淨自家，換淨浰个衫褲。</verse>
				<verse number="3">𠊎等愛離開這位去 伯特利 ；𠊎愛在該所在為上帝起一座祭壇，因為𠊎堵到困難个時，上帝幫助𠊎；𠊎流浪个時，佢㧯𠊎共下。」</verse>
				<verse number="4">佢等就將所有个外族神像㧯自家所戴个耳環交給 雅各 ； 雅各 將這兜東西埋在 示劍 附近个橡樹下。</verse>
				<verse number="5">雅各 㧯佢該兜孻仔出發个時，上帝使四周圍城鎮个人非常著驚，毋敢追佢等。</verse>
				<verse number="6">雅各 㧯歸家人來到 迦南 地个 路斯 ，就係 伯特利 个所在。</verse>
				<verse number="7">佢在該位起一座祭壇，將該地方安到 伊勒伯特利 ，因為佢逃避厥哥个時，上帝在該位親自向佢顯現。</verse>
				<verse number="8">麗百加 个乳𡟓 底波拉 死掉，埋在 伯特利 南部个橡樹下，所以該頭樹仔安到「哀傷个橡樹」。</verse>
				<verse number="9">雅各 對 美索不達米亞 轉來以後，上帝再一擺向佢顯現，賜福給佢。</verse>
				<verse number="10">上帝對佢講：「你个名係 雅各 ，總係從今以後你愛安到 以色列 。」恁樣，上帝就㧯佢改名安到 以色列 。</verse>
				<verse number="11">上帝對佢講：「𠊎係全能个上帝；𠊎愛俾你𫱔多多子女。當多國家愛對你个子孫興起；你愛做盡多君王个祖先。</verse>
				<verse number="12">𠊎愛將𠊎賜給 亞伯拉罕 㧯 以撒 个土地賜給你㧯你个後代。」</verse>
				<verse number="13">這兜話講煞，上帝就離開佢。</verse>
				<verse number="14">雅各 在上帝對佢講話个地方頓一隻石頭做紀念碑，在該頂高淋酒㧯橄欖油。</verse>
				<verse number="15">雅各 將該地方安到 伯特利 ，因為上帝在該位㧯佢講話。</verse>
				<verse number="16">雅各 㧯佢个家族對 伯特利 出發。佢等來到離 以法他 還有一站路个地方， 蕾潔 產期到了，盡難產。</verse>
				<verse number="17">痛到忍毋住个時，產婆㧯姖講：「毋使驚，你又𫱔一個孻仔。」</verse>
				<verse number="18">當 蕾潔 會斷氣个時節，姖㧯孲𤘅仔安名 便‧俄尼 ；總係 雅各 㧯佢安到 便雅憫 。</verse>
				<verse number="19">蕾潔 死掉，埋在愛去 以法他 个路堘； 以法他 就係 伯利恆 。</verse>
				<verse number="20">雅各 在姖个墳墓頓一垤碑石，直到今晡日 蕾潔 个墓碑還在。</verse>
				<verse number="21">以色列 繼續佢个路程，在 以得塔 个南片搭帳篷。</verse>
				<verse number="22">以色列 還住在該地區个時，佢个長子 呂便 㧯厥爸个細姐 辟拉 睡目。 以色列 也聽到這件事 。 雅各 有十二個孻仔。</verse>
				<verse number="23">麗亞 𫱔个孻仔有： 雅各 个長子 呂便 ， 還有 西緬 、 利未 、 猶大 、 以薩迦 、 西布倫 。</verse>
				<verse number="24">蕾潔 𫱔个孻仔有： 約瑟 、 便雅憫 。</verse>
				<verse number="25">蕾潔 个使女 辟拉 𫱔个孻仔有： 但 、 拿弗他利 。</verse>
				<verse number="26">麗亞 个使女 悉帕 𫱔个孻仔有： 迦得 、 亞設 。 雅各 這兜孻仔全部係在 美索不達米亞 出世个。</verse>
				<verse number="27">雅各 來到 幔利 ，到厥爸 以撒 該位； 幔利 就係 希伯崙 ，係 亞伯拉罕 㧯 以撒 住過个地方。</verse>
				<verse number="28">以撒 享壽一百八十歲。</verse>
				<verse number="29">佢食到盡多歲、盡老，正斷氣死掉，轉到厥祖宗該位去。佢个孻仔 以掃 㧯 雅各 將佢埋葬。</verse>
			</chapter>
			<chapter number="36">
				<verse number="1">以掃 个後代記在下背； 以掃 又安到 以東 。</verse>
				<verse number="2">以掃 㧯 迦南 女子結婚；佢討 赫 人 以倫 个妹仔 亞大 ，又討 希未 人 祭便 个孫女 — 亞拿 个妹仔 阿何利巴瑪 ，</verse>
				<verse number="3">又討 以實瑪利 个妹仔 — 尼拜約 个老妹 芭實抹 。</verse>
				<verse number="4">亞大 𫱔 以利法 ； 芭實抹 𫱔 流珥 ；</verse>
				<verse number="5">阿何利巴瑪 𫱔 耶烏斯 、 雅蘭 、 可拉 。 以掃 這兜孻仔全部係在 迦南 出世个。</verse>
				<verse number="6">以掃 帶佢个大婆、細姐、子女㧯佢全家人，並佢所有个牛羊、頭牲㧯在 迦南 得到个財物，離開厥老弟 雅各 ，去別个地方。</verse>
				<verse number="7">因為佢兩家有當多牛羊㧯盡多財產，佢等做旅客个地方毋罅闊，無法度共下住，</verse>
				<verse number="8">以掃 就離開該地方，去住在 以東 山區； 以掃 又安到 以東 。</verse>
				<verse number="9">以下係 以東 人个祖先 以掃 个後代。</verse>
				<verse number="10">以掃 孻仔个名記在下背： 以掃 个𡜵娘 亞大 𫱔一個孻仔安到 以利法 。 以掃 个𡜵娘 芭實抹 𫱔一個孻仔安到 流珥 。</verse>
				<verse number="11">以利法 个孻仔就係： 提幔 、 阿抹 、 洗玻 、 迦坦 、 基納斯 。</verse>
				<verse number="12">以利法 个細姐 亭納 𫱔一個孻仔 亞瑪力 。以上係 以掃 个𡜵娘 亞大 个子孫。</verse>
				<verse number="13">流珥 个孻仔就係： 拿哈 、 謝拉 、 沙瑪 、 米撒 。以上係 以掃 个𡜵娘 芭實抹 个子孫。</verse>
				<verse number="14">以掃 个𡜵娘 阿何利巴瑪 係 祭便 个孫女 — 亞拿 个妹仔；姖㧯 以掃 𫱔个孻仔就係： 耶烏斯 、 雅蘭 、 可拉 。</verse>
				<verse number="15">以下係 以掃 後代个支族。 以掃 个長子 以利法 係 提幔 、 阿抹 、 洗玻 、 基納斯 、</verse>
				<verse number="16">可拉 、 迦坦 、 亞瑪力 各族个祖先。這兜支族住在 以東 ，全部係 以掃 个𡜵娘 亞大 个後代。</verse>
				<verse number="17">以掃 个孻仔 流珥 係 拿哈 、 謝拉 、 沙瑪 、 米撒 各族个祖先。這兜支族住在 以東 ，全部係 以掃 个𡜵娘 芭實抹 个後代。</verse>
				<verse number="18">耶烏斯 、 雅蘭 、 可拉 各族係 以掃 个𡜵娘 — 亞拿 个妹仔 阿何利巴瑪 个後代。</verse>
				<verse number="19">以上這兜支族全部係 以掃 个後代； 以掃 又安到 以東 。</verse>
				<verse number="20">以東 地區原住民个祖先全部係 何利 人 西珥 个後代。佢等係： 羅坍 、 朔巴 、 祭便 、 亞拿 、 底順 、 以察 、 底珊 。</verse>
				<verse number="21"></verse>
				<verse number="22">羅坍 係 何利 、 希幔 兩族个祖先。 ( 羅坍 有一個老妹名安到 亭納 。)</verse>
				<verse number="23">朔巴 係 亞勒文 、 瑪拿轄 、 以巴錄 、 示玻 、 阿南 各族个祖先。</verse>
				<verse number="24">祭便 有兩個孻仔，就係 亞雅 㧯 亞拿 。 (當年在曠野代阿爸掌驢仔、尋到溫泉个，就係這個 亞拿 。)</verse>
				<verse number="25">亞拿 係 底順 个阿爸； 亞拿 有一個妹仔名安到 阿何利巴瑪 。</verse>
				<verse number="26">底順 係 欣但 、 伊是班 、 益蘭 、 基蘭 各族个祖先。</verse>
				<verse number="27">以察 係 辟罕 、 撒番 、 亞干 各族个祖先。</verse>
				<verse number="28">底珊 係 烏斯 㧯 亞蘭 兩族个祖先。</verse>
				<verse number="29">以東 地區 何利 人个各族就係： 羅坍 、 朔巴 、 祭便 、 亞拿 、 底順 、 以察 、 底珊 。</verse>
				<verse number="30"></verse>
				<verse number="31">以色列 人還吂有君王以前，在 以東 做王个，記在下背：</verse>
				<verse number="32">比珥 个孻仔 比拉 在 以東 做王，佢个京城安到 亭哈巴 。</verse>
				<verse number="33">比拉 死後， 波斯拉 人 謝拉 个孻仔 約巴 接等佢做王。</verse>
				<verse number="34">約巴 死後， 提幔 地區个人 戶珊 接等佢做王。</verse>
				<verse number="35">戶珊 死後， 比達 个孻仔 哈達 接等佢做王；這 哈達 就係在 摩押 地打贏 米甸 人个，佢个京城安到 亞未得 。</verse>
				<verse number="36">哈達 死後， 瑪士利加 人 桑拉 接等佢做王。</verse>
				<verse number="37">桑拉 死後，大河壩个 利河伯 人 少羅 接等佢做王。</verse>
				<verse number="38">少羅 死後， 亞革波 个孻仔 巴勒‧哈南 接等佢做王。</verse>
				<verse number="39">亞革波 个孻仔 巴勒‧哈南 死後， 哈達 接等佢做王；佢个京城安到 巴烏 ；佢个𡜵娘安到 米希她別 ，係 瑪特列 个妹仔 — 米‧薩合 个孫女。</verse>
				<verse number="40">以掃 係 亭納 、 亞勒瓦 、 耶帖 、</verse>
				<verse number="41">阿何利巴瑪 、 以拉 、 比嫩 、</verse>
				<verse number="42">基納斯 、 提幔 、 米比薩 、</verse>
				<verse number="43">瑪基疊 㧯 以蘭 這兜 以東 人各族个祖先。各族所住个地區，用各族个名來安名。</verse>
			</chapter>
			<chapter number="37">
				<verse number="1">雅各 繼續住在厥爸做旅客住過个 迦南 地區。</verse>
				<verse number="2">以下記載 雅各 全家个事。 約瑟 十七歲个時就常常跈佢該兜阿哥出去掌羊仔。佢常常幫助厥爸个細姐 辟拉 㧯 悉帕 該兜孻仔掌羊仔；佢也常常㧯厥爸報告該兜阿哥所做个壞事。</verse>
				<verse number="3">以色列 特別惜 約瑟 贏過惜其他个孻仔，因為 約瑟 係佢年老个時𫱔个；佢做一領花色當靚个長衫 給 約瑟 。</verse>
				<verse number="4">約瑟 該兜阿哥看到阿爸特別惜 約瑟 ，心肚盡毋甘願，就怨恨 約瑟 ，㧯佢講話个時常常惡擎擎。</verse>
				<verse number="5">有一擺， 約瑟 發一個夢，將這個夢講給該兜阿哥聽；佢等就還較怨恨佢。</verse>
				<verse number="6">佢講：「𠊎將𠊎發个夢講給你等聽：</verse>
				<verse number="7">𠊎等在田肚紮麥仔，𠊎紮个麥仔企嶝嶝，你等紮个麥仔攏總圍等𠊎紮个麥仔拜。」</verse>
				<verse number="8">佢該兜阿哥問佢講：「你想愛做王管𠊎等係麼？」因為 約瑟 將自家个夢講給該兜阿哥聽，佢等就比頭擺還較怨恨佢。</verse>
				<verse number="9">後來 約瑟 又發一個夢，佢還係㧯該兜阿哥講：「𠊎又發一個夢；𠊎看到日頭、月光㧯十一粒星仔來拜𠊎。」</verse>
				<verse number="10">約瑟 也將這個夢㧯厥爸講；厥爸就責備佢講：「這像麼介夢呢？你想𠊎、若姆㧯若該兜阿哥全部愛來伏在地上拜你係麼？」</verse>
				<verse number="11">約瑟 該兜阿哥非常嫉妒佢，總係厥爸一直將這件事記在心肚。</verse>
				<verse number="12">有一日， 約瑟 該兜阿哥到 示劍 去掌阿爸个羊仔。</verse>
				<verse number="13">以色列 對 約瑟 講：「你該兜阿哥在 示劍 掌羊仔。來啊，𠊎愛派你到該位去看佢等。」 約瑟 應講：「好！𠊎來去！」</verse>
				<verse number="14">厥爸吩咐佢講：「你去看你該兜阿哥有平安麼？羊群安全麼？然後轉來㧯𠊎講。」厥爸就送佢離開 希伯崙 山壢。 約瑟 去到 示劍 ，</verse>
				<verse number="15">在野外迷路。有一個人堵到佢，問佢：「你尋麼介？」</verse>
				<verse number="16">佢應講：「𠊎愛尋吾哥。請你㧯𠊎講，佢等在㖠位掌羊仔？」</verse>
				<verse number="17">該人講：「佢等已經走了。𠊎聽到佢等講愛到 多坍 去。」所以 約瑟 去逐佢該兜阿哥，在 多坍 尋到佢等。</verse>
				<verse number="18">佢等遠遠就看到 約瑟 。佢還吂行到以前，佢等參詳愛害死佢。</verse>
				<verse number="19">佢等彼此講：「看啊，該隻發夢个人來囉！</verse>
				<verse number="20">來啊！𠊎等㓾掉佢，將屍體㧒到燥井肚，講佢係被野獸食掉；看佢个夢愛樣般實現噢！」</verse>
				<verse number="21">呂便 聽到佢等个陰謀，當想救 約瑟 ；佢講：「𠊎等毋好㓾佢，</verse>
				<verse number="22">毋好流佢个血！將佢㧒落曠野个囤水窟肚就好！毋好傷害佢！」 呂便 恁樣講係因為佢愛對佢等个手中將 約瑟 救出來，將佢送轉阿爸該位去。</verse>
				<verse number="23">約瑟 一到厥哥該位，佢等就強強脫掉佢該領花色个長衫，</verse>
				<verse number="24">將佢捉起來，㧒落囤水窟肚；該囤水窟係空个，底背無水。</verse>
				<verse number="25">佢等坐下來食飯个時，昂頭忽然看到一群 以實瑪利 人个駱駝商隊對 基列 來，愛去 埃及 ；佢等个駱駝載當多香料、乳香㧯沒藥。</verse>
				<verse number="26">猶大 對佢該兜兄弟講：「𠊎等㓾死自家个老弟，將佢个血囥起來有麼介好處呢？</verse>
				<verse number="27">𫣆等來將佢賣給這兜 以實瑪利 人，恁樣𫣆等毋使出手傷害佢；因為佢還係𫣆等个老弟、𫣆等个骨肉之親。」佢該兜兄弟全部贊成。</verse>
				<verse number="28">有 米甸 个生理人經過个時，佢等就對窟肚將 約瑟 拉上來，講定二十隻銀幣，將佢賣給 以實瑪利 人；這兜人就將 約瑟 帶到 埃及 去。</verse>
				<verse number="29">呂便 轉到窟个堘頭，發現 約瑟 毋見掉了，就盡傷心，扯爛佢个衫。</verse>
				<verse number="30">佢轉到其他兄弟該位講：「細人仔毋見掉了！𠊎愛樣般正好呢？」</verse>
				<verse number="31">佢等決定㓾一隻山羊牯，將 約瑟 該領花色个長衫染兜羊血，</verse>
				<verse number="32">帶轉厥爸該位，講：「𠊎等尋到這領長衫；認一下，係若孻仔个衫麼？」</verse>
				<verse number="33">雅各 認出，就講：「這係吾孻仔个長衫！一定係野獸食掉佢！ 約瑟 被野獸扯爛了！」</verse>
				<verse number="34">雅各 悲傷到扯爛外衫、著麻衫，為厥孻仔哀傷盡多日。</verse>
				<verse number="35">厥該兜子女全部來安慰佢，總係佢毋接受安慰。佢講：「𠊎就係落陰間，還會為吾孻仔悲傷！」恁樣， 約瑟 个阿爸就一直為佢哀傷。</verse>
				<verse number="36">同時，該兜 米甸 人在 埃及 將 約瑟 賣給 埃及 王个一個官員 — 侍衛長 波提乏 。</verse>
			</chapter>
			<chapter number="38">
				<verse number="1">大約在該時， 猶大 離開佢該兜兄弟，去㧯一個 亞杜蘭 人 希拉 共下住。</verse>
				<verse number="2">猶大 在該位堵到 迦南 人 書亞 个妹仔，就討姖做𡜵娘，㧯姖同房。</verse>
				<verse number="3">厥𡜵娘有身項，𫱔一個孻仔； 猶大 㧯佢安名 珥 。</verse>
				<verse number="4">姖又有身項，𫱔第二個孻仔，安名 俄南 。</verse>
				<verse number="5">姖又𫱔第三個孻仔，安名 示拉 ； 示拉 出世个時， 猶大 在 基悉 。</verse>
				<verse number="6">猶大 為佢个長子 珥 討𡜵娘，姖安到 塔瑪 。</verse>
				<verse number="7">珥 个行為邪惡，得罪上主，上主就除掉佢个性命。</verse>
				<verse number="8">猶大 對 珥 个老弟 俄南 講：「你去㧯若大嫂同房，對姖盡你做細叔个義務，好代若哥留種。」</verse>
				<verse number="9">俄南 知就算𫱔到孻仔也毋係屬自家个，所以逐擺㧯厥大嫂同房，就佻佻洩精在地泥，毋俾厥哥留種。</verse>
				<verse number="10">佢這個行為得罪上主，上主也除掉佢个性命。</verse>
				<verse number="11">猶大 對厥心舅 塔瑪 講：「你轉去外家守寡，等吾孻仔 示拉 長大成人。」佢講這話，因為驚怕 示拉 會像佢兩個阿哥恁樣死掉。 塔瑪 就轉外家去。</verse>
				<verse number="12">過一站時間， 猶大 个𡜵娘 書亞 个妹仔死掉。喪期過後， 猶大 㧯厥朋友 亞杜蘭 人 希拉 共下去 亭拿 ，到為佢剪羊毛該兜人該位。</verse>
				<verse number="13">有人㧯 塔瑪 講：「若家官堵堵去 亭拿 剪羊毛。」</verse>
				<verse number="14">姖就脫掉守寡个衫，用面帕幪面，坐在愛去 亭拿 路上个 伊拿印 城門口；因為姖知 猶大 个滿子 示拉 已經長大成人，總係還係無來討姖做𡜵娘。</verse>
				<verse number="15">猶大 看到姖，恅到係妓女，因為姖幪等面。</verse>
				<verse number="16">猶大 毋知姖就係自家个心舅，行到路堘姖該位去，問姖：「來啊！𠊎㧯你睡好麼？」 姖講：「你㧯𠊎睡愛給𠊎麼介？」</verse>
				<verse number="17">佢應講：「𠊎對羊群中拿一隻細山羊給你。」 塔瑪 講：「送山羊以前，你愛留東西給𠊎做抵押。」</verse>
				<verse number="18">佢問：「你愛𠊎麼介東西做抵押？」 塔瑪 講：「你个印仔、連印帶仔，㧯若手杖。」 猶大 就將這兜東西交給姖，㧯姖共下睡； 塔瑪 就有身項了。</verse>
				<verse number="19">塔瑪 轉外家去，拿掉幪面个面帕，照常著守寡个衫。</verse>
				<verse number="20">猶大 託厥朋友 希拉 送一隻細山羊去給該婦人家，愛贖轉做抵押个東西，總係 希拉 尋毋到姖。</verse>
				<verse number="21">希拉 問 伊拿印 地方个人：「以前在這路堘該宮廟妓女㖠位去了？」 佢等應講：「這地方從來毋識有宮廟妓女。」</verse>
				<verse number="22">希拉 轉到 猶大 該位，對佢講：「𠊎尋毋到姖。當地个人乜講，這位從來毋識有宮廟妓女。」</verse>
				<verse number="23">猶大 講：「該兜東西給姖算了，免得𠊎等被人笑。𠊎有意送姖這隻細山羊，總係你卻尋毋到姖。」</verse>
				<verse number="24">大約過三隻月，有人㧯 猶大 講：「若心舅 塔瑪 犯姦淫，已經有身項了。」 猶大 發譴講：「拉出來，燒俾姖死！」</verse>
				<verse number="25">塔瑪 被人拉出來个時，託人㧯厥家官講：「𠊎係對這兜東西个主人有身項；你認一下這印仔、印帶仔，㧯手杖；這兜東西係麼人个？」</verse>
				<verse number="26">猶大 認到這兜東西，就講：「姖比𠊎較著。𠊎無盡到義務；𠊎本來應該喊𠊎个滿子 示拉 㧯姖結婚。」該時以後， 猶大 毋識再㧯姖同房。</verse>
				<verse number="27">塔瑪 愛𫱔个時，正知姖所懷个係雙胞胎。</verse>
				<verse number="28">姖𫱔个時，一個孲𤘅仔伸出一隻手來；產婆將這隻手䌈一條紅線，講：「這個係先出世个。」</verse>
				<verse number="29">總係孲𤘅个手又跔轉去，厥哥卻先𫱔出來；產婆講：「你就係恁樣搶等出來个！」就㧯佢安名 法勒斯 。</verse>
				<verse number="30">接等厥老弟𫱔出來，手項䌈等紅線，就㧯佢安名 謝拉 。</verse>
			</chapter>
			<chapter number="39">
				<verse number="1">以實瑪利 人將 約瑟 帶到 埃及 ，賣給 埃及 王个一個官員 — 侍衛長 波提乏 。</verse>
				<verse number="2">上主㧯 約瑟 共下，使佢事事順利。佢住在 埃及 主人屋下。</verse>
				<verse number="3">主人看出上主㧯佢共下、俾佢所做个事全部順利。</verse>
				<verse number="4">波提乏 中意 約瑟 ，派佢做自家个管家，管理家務㧯佢所有个一切。</verse>
				<verse number="5">對該時開始，因為 約瑟 个緣故，上主就賜福給該 埃及 人个屋下；厥屋肚㧯田園所有个，全部得到上主个賜福。</verse>
				<verse number="6">波提乏 將一切所有个交給 約瑟 管理；除了佢自家个飲食以外，佢麼介都毋使插。 約瑟 身體當紮，又盡緣投。</verse>
				<verse number="7">過無幾久，主人个𡜵娘中意到 約瑟 ，引誘佢講：「來㧯𠊎睡！」</verse>
				<verse number="8">約瑟 拒絕姖，對姖講：「你看，因為有𠊎在這位，吾頭家毋使為家務操心；佢已經將所有个一切交給𠊎管理。</verse>
				<verse number="9">在這屋下，無人比𠊎較大，頭家無麼介無交給𠊎管理，只有你例外，因為你係佢个𡜵娘。𠊎樣般敢做這種無道德个事，來得罪上帝呢？」</verse>
				<verse number="10">雖然頭家娘日日引誘 約瑟 ，總係 約瑟 毋聽從，毋肯㧯姖共下睡，盡量閃開。</verse>
				<verse number="11">有一日， 約瑟 到屋肚辦事，該時屋肚無半個僕人。</verse>
				<verse number="12">頭家娘揪等 約瑟 个外衫講：「來㧯𠊎睡！」 約瑟 將外衫留在頭家娘手中，遽遽走到外背去。</verse>
				<verse number="13">頭家娘看到 約瑟 个外衫留在厥手中，又看到佢走到外背去，</verse>
				<verse number="14">就大聲喊家僕來，對佢等講：「你等看，吾老公帶轉來个 希伯來 人侮辱𠊎等！佢入𠊎个間肚，想愛㧯𠊎睡，𠊎就大聲喊。</verse>
				<verse number="15">佢聽到𠊎大聲喊，就將外衫留在𠊎身邊，遽遽走出去。」</verse>
				<verse number="16">頭家娘留等 約瑟 个外衫，等到 約瑟 个主人轉屋下，</verse>
				<verse number="17">姖就投厥老公這件事：「你帶轉來該 希伯來 奴僕入𠊎房間愛侮辱𠊎。</verse>
				<verse number="18">𠊎大聲喊，佢就將外衫留在𠊎身邊，遽遽走出去。」</verse>
				<verse number="19">約瑟 个主人聽到𡜵娘講「你該奴僕恁樣侮辱𠊎」這個話，佢就大發譴，</verse>
				<verse number="20">將 約瑟 捉起來，關到王室个監獄； 約瑟 就在該位坐監。</verse>
				<verse number="21">總係上主㧯 約瑟 共下，賜福給佢；所以監獄長盡歡喜佢，</verse>
				<verse number="22">派佢管理所有个犯人，負責處理監獄肚个事務。</verse>
				<verse number="23">約瑟 負責辦理个事，監獄長毋使操心，因為上主㧯 約瑟 共下，俾佢管理个一切盡順利。</verse>
			</chapter>
			<chapter number="40">
				<verse number="1">這事以後， 埃及 王个酒政㧯膳長得罪王；</verse>
				<verse number="2">埃及 王非常發譴，</verse>
				<verse number="3">下令將這兩個官員關入侍衛長府內个監獄，就係關 約瑟 个所在。</verse>
				<verse number="4">侍衛長派 約瑟 服事這兩個官員；佢等在監獄肚關盡久。</verse>
				<verse number="5">有一暗晡， 埃及 王个酒政㧯膳長在監獄肚，逐儕發一個夢，兩儕个夢無共樣。</verse>
				<verse number="6">第二日朝晨， 約瑟 來看佢等，看到佢等心神無定，</verse>
				<verse number="7">就問佢等：「你等今晡日做麼介恁憂愁呢？」</verse>
				<verse number="8">佢等應講：「𠊎等逐儕發一個夢，總係無人能代𠊎等解夢。」 約瑟 講：「解夢个能力敢毋係上帝所賜个！請將你等个夢㧯𠊎講。」</verse>
				<verse number="9">酒政就將佢个夢㧯 約瑟 講：「𠊎發夢看到𠊎面前有一頭葡萄樹，</verse>
				<verse number="10">樹頂分做三枝桍。樹一爆芽就開花，葡萄跈等也熟了。</verse>
				<verse number="11">𠊎手項拿等王个酒杯；𠊎摘葡萄，將葡萄汁撚落酒杯，將酒杯㨮給王。」</verse>
				<verse number="12">約瑟 對佢講：「這夢个意思係恁樣：三枝桍代表三日。</verse>
				<verse number="13">三日後，王會放你出去，赦免你，恢復你原來个職位；你會同頭擺做酒政一樣，㧯王㨮酒。</verse>
				<verse number="14">總係你一切順利个時，請你記得𠊎，好款待𠊎，在王面前代𠊎講好話，幫助𠊎出這個監獄。</verse>
				<verse number="15">𠊎實在係在 希伯來 人个地方被人捉來个；𠊎在 埃及 也無做過麼介壞事，無應該被人關起來。」</verse>
				<verse number="16">膳長看 約瑟 將酒政个夢解釋恁好，就對 約瑟 講：「𠊎也發一個夢，在夢中看到自家頭那頂放等三隻裝滿麵包个籃仔。</verse>
				<verse number="17">最頂高个籃仔裝滿愛給王食个各種麵包；有鳥仔來食這兜麵包。」</verse>
				<verse number="18">約瑟 講：「這夢个意思係恁樣：三隻籃仔代表三日。</verse>
				<verse number="19">三日後，王會斬你个頭那，將你吊在樹𣎴頂，飛鳥愛來食你个肉。」</verse>
				<verse number="20">再過三日係王个生日。該日，王為佢所有个官員擺筵席，將酒政㧯膳長放出來，帶到官員面前。</verse>
				<verse number="21">佢恢復酒政个職位，使佢又將酒杯㨮給王；</verse>
				<verse number="22">總係王將膳長吊死。這兜事完全照 約瑟 个解釋實現了。</verse>
				<verse number="23">總係酒政卻毋記得 約瑟 ，將佢毋記得淨淨。</verse>
			</chapter>
			<chapter number="41">
				<verse number="1">兩年後， 埃及 王發一個夢：佢企在 尼羅 河滣，</verse>
				<verse number="2">看到七隻盡靚盡肥个牛乸對河壩上來，在河邊食草。</verse>
				<verse number="3">接等又有七隻盡媸盡瘦个牛乸對河壩上來，企在河滣該七隻肥牛乸塍頭。</verse>
				<verse number="4">這七隻盡媸盡瘦个牛乸將該七隻盡靚盡肥个牛乸食掉。這時王就醒過來。</verse>
				<verse number="5">佢又睡掉，另外發一個夢：佢看到有一頭麥仔生出七串當飽當熟个麥串，</verse>
				<verse number="6">接等又生出七串被東風吹到燥燥、冇掉个麥串；</verse>
				<verse number="7">這七串冇掉个麥串將該七串當飽當熟个麥串吞掉。王醒後正知這係一個夢。</verse>
				<verse number="8">第二朝晨，王个心煩躁，就派人召集 埃及 所有跳童个㧯星象家來，將佢个夢㧯佢等講，總係無人能為佢解夢。</verse>
				<verse number="9">這時，酒政對王講：「今晡日𠊎想起自家个過失。</verse>
				<verse number="10">上擺王大發譴，下令將𠊎㧯膳長關在侍衛長府內个監獄。</verse>
				<verse number="11">有一暗晡𠊎兩儕攏總發一個夢，兩儕个夢意思無共樣。</verse>
				<verse number="12">當時有一個 希伯來 青年㧯𠊎等共下關在該位，佢原來係侍衛長个僕人。𠊎等將自家个夢㧯佢講，佢就代𠊎等解夢。</verse>
				<verse number="13">結果，事情全部照佢个解釋來實現：𠊎回復原職，膳長卻被人吊死。」</verse>
				<verse number="14">王就派人傳 約瑟 來。佢等遽遽帶佢出監獄；佢就剃頭、修面、換衫，來到王面前。</verse>
				<verse number="15">王對佢講：「𠊎發一個夢，無人能解釋；𠊎聽講你會解夢。」</verse>
				<verse number="16">約瑟 應王講：「𠊎無這個才調，總係上帝會將圓滿个解釋賜給王。」</verse>
				<verse number="17">王對 約瑟 講：「𠊎發夢看到自家企在 尼羅 河滣。</verse>
				<verse number="18">有七隻盡靚盡肥个牛乸對河壩上來，在河邊食草。</verse>
				<verse number="19">接等有七隻盡媸盡瘦个牛乸上來，係𠊎在 埃及 從來毋識看過恁瘦个。</verse>
				<verse number="20">這兜盡媸盡瘦个牛乸食掉該七隻肥牛乸。</verse>
				<verse number="21">無想到，這兜牛乸還係盡媸盡瘦，看毋出佢等有食掉肥牛乸。這時𠊎就醒過來。</verse>
				<verse number="22">𠊎又發一個夢，看到有一頭麥仔，生出七串當飽當熟个麥串。</verse>
				<verse number="23">接等又生出七串被東風吹到燥燥、冇掉个麥串。</verse>
				<verse number="24">這兜冇掉个麥串將該七串飽滿个麥串吞掉。𠊎將這兜夢㧯跳童个講，總係無人能為𠊎解夢。」</verse>
				<verse number="25">約瑟 對王講：「其實這兩個夢可以做一個夢來解釋，意思攏總共樣。上帝已經將自家愛做个事先㧯王講。</verse>
				<verse number="26">該七隻肥牛乸代表七年，該七串飽滿个麥串也代表七年，意思攏總共樣。</verse>
				<verse number="27">接等上來該七隻盡媸盡瘦个牛乸代表七年，該七串被東風吹到燥燥、冇掉个麥串也代表七年，攏總代表七年飢荒。</verse>
				<verse number="28">就像𠊎頭先對王所講个，上帝已經將自家愛做个事預先指示王了。</verse>
				<verse number="29">埃及 全地會有七年个大豐收，</verse>
				<verse number="30">接等有七年飢荒。這飢荒會毀壞 埃及 全地，使人完全毋記得好年冬个樣像；</verse>
				<verse number="31">飢荒嚴重到非常得人驚，人會感覺毋出以前識有豐收。</verse>
				<verse number="32">王連續發這兩個夢，代表這係上帝決定个計劃，盡遽就會實現了。</verse>
				<verse number="33">所以，𠊎建議王選一個有智慧、有眼光个人，派佢治理 埃及 全國，</verse>
				<verse number="34">並指派其他官員，在七年豐收期間，徵收 埃及 全國農產物个五分之一。</verse>
				<verse number="35">命令佢等在將愛來个豐年期間收集五榖，在各城積存糧食，派人管理。</verse>
				<verse number="36">在接等將愛來該七年飢荒，這兜囤糧做得供應 埃及 人民，使國家毋會被飢荒滅掉。」</verse>
				<verse number="37">王㧯佢一切官員攏總贊成這個計劃。</verse>
				<verse number="38">王就對佢个官員講：「𠊎等尋毋到比 約瑟 較理想个人選了，因為佢底背有上帝个靈！」</verse>
				<verse number="39">王對 約瑟 講：「上帝既然將這一切指示你，你一定比別人更有智慧、更有眼光。</verse>
				<verse number="40">𠊎愛派你治理𠊎个國；𠊎个人民全部愛服從你个命令。在本國，只有𠊎个權力超過你。</verse>
				<verse number="41">這下𠊎命令你做 埃及 个宰相。」</verse>
				<verse number="42">王將自家手指戴个印仔拿來戴在 約瑟 个手指，又將上等麻紗做个外衫袈在 約瑟 身上，再將金脖鍊掛在 約瑟 个頸項。</verse>
				<verse number="43">佢又俾 約瑟 坐王室个第二輛車，有警衛開路，大聲喊：「跪下來！」 恁樣， 約瑟 受派做宰相，治理 埃及 全國。</verse>
				<verse number="44">王對 約瑟 講：「𠊎係王，總係在 埃及 全地，若係無你个命令，麼人都做毋得隨便行動。」</verse>
				<verse number="45">王賜 約瑟 一個 埃及 名，安到 撒發那特‧巴內亞 ，又將 希利坡里 城个祭司 波提非拉 个妹仔 亞西納 給佢做𡜵娘。恁樣， 約瑟 就治理 埃及 全地。</verse>
				<verse number="46">約瑟 三十歲个時開始為 埃及 王工作；佢離開王宮，到 埃及 各地巡查。</verse>
				<verse number="47">在七個豐年期間，五榖豐登。</verse>
				<verse number="48">約瑟 收集五榖，在各城鎮起倉庫，積存對周圍各地收集來个糧食。</verse>
				<verse number="49">佢大量收集五榖，像海滣个沙仔多到無辦法算。</verse>
				<verse number="50">在荒年吂到以前， 約瑟 个𡜵娘就係 希利坡里 城个祭司 波提非拉 个妹仔 亞西納 㧯佢𫱔兩個孻仔。</verse>
				<verse number="51">約瑟 講：「上帝使𠊎毋記得一切个苦難、㧯吾爸全家人。」所以佢㧯長子安名 瑪拿西 。</verse>
				<verse number="52">佢又講：「上帝使𠊎在受苦个地方興旺。」所以佢㧯第二個孻仔安名 以法蓮 。</verse>
				<verse number="53">埃及 人享受个豐年結束了，</verse>
				<verse number="54">就像 約瑟 个預言，七個荒年接等就來。逐所在有飢荒，單單 埃及 全國有糧食。</verse>
				<verse number="55">後來 埃及 人民也無糧食了，佢等對王求糧。王就命令佢等去見 約瑟 ，一切聽佢个安排。</verse>
				<verse number="56">飢荒越來越嚴重，全國都共樣；所以 約瑟 打開所有倉庫，將存糧賣給 埃及 人。</verse>
				<verse number="57">周圍各國个人也來向 約瑟 糴糧，因為天下逐所在有飢荒，情況非常嚴重。</verse>
			</chapter>
			<chapter number="42">
				<verse number="1">雅各 一聽到 埃及 有糧食，就對佢个孻仔講：「你等做麼介毋想兜辦法呢？</verse>
				<verse number="2">聽講 埃及 有糧，你等去糴兜轉來，免得𠊎等餓死！」</verse>
				<verse number="3">恁樣， 約瑟 十個阿哥全部去 埃及 糴糧了。</verse>
				<verse number="4">總係 雅各 毋肯 約瑟 个老弟 便雅憫 㧯佢等共下去，因為 雅各 驚佢堵到災害。</verse>
				<verse number="5">以色列 該兜孻仔㧯其他个人攏總去糴糧，因為 迦南 全地也有飢荒。</verse>
				<verse number="6">約瑟 做 埃及 宰相，負責糶糧給各地來个人；所以 約瑟 該兜阿哥來到佢面前，伏在地上跪佢。</verse>
				<verse number="7">約瑟 一看到佢該兜阿哥就認出來，總係詐意毋認識，用嚴厲个話問佢等：「你等係對㖠位來个？」 佢等應講：「𠊎等係對 迦南 來糴糧个。」</verse>
				<verse number="8">約瑟 認出該兜阿哥，總係佢个阿哥認毋出佢。</verse>
				<verse number="9">佢想起頭擺自家發過个夢，就故意對佢等講：「你等係探仔，想來打探𠊎等國家个祕密！」</verse>
				<verse number="10">佢等應講：「大人啊！僕人毋係探仔，係來糴糧个。</verse>
				<verse number="11">𠊎等全部係親兄弟，係老實人；若僕人毋係探仔。」</verse>
				<verse number="12">約瑟 硬講：「騙𠊎！你等一定係來打探𠊎等國家个祕密。」</verse>
				<verse number="13">佢等講：「大人啊！僕人本來有十二兄弟，係共阿爸𫱔个；佢住在 迦南 。𠊎等最細个老弟㧯阿爸做伴，還有一個老弟無掉去。」</verse>
				<verse number="14">約瑟 再一擺強調講：「𠊎頭先講過，你等一定係探仔。</verse>
				<verse number="15">𠊎愛試你等有誠實麼。𠊎指王个名發誓：你等若無將最細个老弟帶到這位來，𠊎絕對毋准你等離開。</verse>
				<verse number="16">你等派一個人去帶若老弟來；其他个人關在這位，等到你等所講个話得到證明係毋係有影！若係無影，𠊎指王个性命發誓，你等一定係探仔。」</verse>
				<verse number="17">恁樣 約瑟 將佢等共下關入一間監獄三日。</verse>
				<verse number="18">第三日， 約瑟 對佢等講：「𠊎係敬畏上帝个；若係你等接受𠊎个條件，𠊎就饒你等个命。</verse>
				<verse number="19">為到愛證明你等係誠實个人，你等愛留一儕在監獄做人質；其他个人做得轉去，將糧食帶轉去救飢荒中个屋下人。</verse>
				<verse number="20">然後將最細个老弟帶來𠊎這位。恁樣就證明你等个話係真實个，你等就毋使死。」 佢等接受這個條件，</verse>
				<verse number="21">互相講：「當初𫣆陷害老弟，這下受報應了。當時𫣆看等佢受痛苦，佢求𫣆放佢一條命，𫣆毋搭佢；所以𫣆堵到這個災難。」</verse>
				<verse number="22">呂便 講：「𠊎敢毋識勸你等毋好傷害佢，總係你等毋聽；這下這血債該當𫣆來還。」</verse>
				<verse number="23">約瑟 聽得識佢等个話，佢等卻毋知，因為佢㧯佢等講話有人翻譯。</verse>
				<verse number="24">約瑟 轉身出去噭，然後倒轉來對佢等講話，就選出 西緬 ，在佢等面前將佢捆起來。</verse>
				<verse number="25">約瑟 吩咐人將該兜阿哥帶來个袋仔裝滿糧食，將錢銀放轉逐儕个袋仔，又代佢等準備路項个食物；一切就照恁樣準備好勢。</verse>
				<verse number="26">佢等就將糴來个糧食放在驢仔背囊，離開該位。</verse>
				<verse number="27">在過夜个地方，佢等有人打開袋仔愛餵驢仔，發現自家个錢還在袋仔肚。</verse>
				<verse number="28">佢對該兜兄弟講：「𠊎个錢銀還給𠊎了！你等看，就在𠊎个袋仔肚！」佢等全部驚到會死，又愊愊掣講：「上帝做麼介恁樣對待𫣆呢？」</verse>
				<verse number="29">佢等轉到 迦南 地，到佢等个阿爸 雅各 該位，將經過个事詳細㧯佢講。</verse>
				<verse number="30">佢等講：「 埃及 宰相盡嚴對𠊎等講話，指責𠊎等係去打探佢等个國家。</verse>
				<verse number="31">𠊎等對佢講：『𠊎等係老實人，毋係探仔；</verse>
				<verse number="32">𠊎等原來有十二兄弟，全部係共阿爸𫱔个。有一個老弟無掉去，最細个老弟留在 迦南 㧯阿爸做伴。』</verse>
				<verse number="33">該宰相就講：『𠊎愛試你等有誠實麼？你等愛留一儕在這位，其他个做得轉去，將所糴个糧食帶轉去救飢荒中个屋下人。</verse>
				<verse number="34">然後愛將最細个老弟帶來𠊎這位。恁樣𠊎就相信你等係誠實个人，毋係探仔。𠊎會將你等个兄弟還你等；你等也做得住在這位做生理。』」</verse>
				<verse number="35">後來，佢等將糧食倒出來个時，儕儕都發現自家个錢包還在袋仔肚。佢等㧯阿爸一看到錢包，全部無葛無煞。</verse>
				<verse number="36">雅各 對佢等講：「你等愛𠊎喪掉所有个孻仔，係麼？ 約瑟 無掉， 西緬 也無了！這下你等又愛將 便雅憫 帶走！哎，災難全部臨到𠊎身上了！」</verse>
				<verse number="37">呂便 向厥爸保證講：「若係𠊎無將 便雅憫 帶轉來，你可以㓾掉𠊎兩個孻仔。將細老弟交給𠊎照顧，𠊎一定會帶佢轉來。」</verse>
				<verse number="38">總係 雅各 講：「𠊎這个孻仔做毋得跈你等去！佢个親阿哥死掉，這下只賸佢一儕！佢在路項可能會堵到意外个事。你等愛害𠊎這個滿頭白毛个老人家，悲悲慘慘落陰間係麼？」</verse>
			</chapter>
			<chapter number="43">
				<verse number="1">迦南 地區个飢荒越來越嚴重。</verse>
				<verse number="2">雅各 一家人已經將對 埃及 糴轉來个糧食全部食掉了。 雅各 就對該兜孻仔講：「你等再去糴兜糧食轉來。」</verse>
				<verse number="3">猶大 對阿爸講：「該儕人盡嚴警告𠊎等，若無帶滿老弟共下去，就毋使想去見佢个面。</verse>
				<verse number="4">若係你肯俾滿老弟㧯𠊎等共下去，𠊎等就去代你糴糧；</verse>
				<verse number="5">你若毋肯俾佢去，𠊎等就無愛去，因為該人講過，𠊎等若無帶滿老弟共下去，就毋使想去見佢个面。」</verse>
				<verse number="6">以色列 講：「你等做麼介恁樣害𠊎呢？樣使㧯該人講你等還有一個老弟呢？」</verse>
				<verse number="7">佢等應講：「該人特別詳細查問𠊎等㧯屋下个情況，講：『你等个阿爸還在麼？還有其他个兄弟麼？』𠊎等無法度毋回答佢个問題；𠊎等樣般會知佢愛𠊎等帶滿老弟去呢？」</verse>
				<verse number="8">猶大 對厥爸 以色列 講：「將細人仔交給𠊎，𠊎等黏時出門，恁樣全家大細就毋會餓死。</verse>
				<verse number="9">𠊎自家來擔保，𠊎願負全部个責任。若係𠊎無將佢平安帶轉來交還你，𠊎甘願永遠承擔這個罪。</verse>
				<verse number="10">若毋係𠊎等拖拖挷挷，𠊎等已經去兩擺轉來了！」</verse>
				<verse number="11">佢等个阿爸 以色列 講：「既然恁樣，你等就帶兜乳香、蜂糖、香料、沒藥、開心果㧯杏仁這兜本地个特產，做禮物送給該儕人。</verse>
				<verse number="12">你等也愛帶兩倍个錢去，將上擺袋肚發現个錢銀送還佢；該可能係有人放毋著。</verse>
				<verse number="13">帶等滿老弟，黏時倒轉去 埃及 見該人。</verse>
				<verse number="14">願全能个上帝使該人憐憫你等，俾 便雅憫 㧯你等另外一個兄弟平安轉來。論到𠊎，若係定著愛喪掉孻仔，喪掉就算了！」</verse>
				<verse number="15">佢等就帶等禮物、兩倍个錢，㧯 便雅憫 出發，去到 埃及 ，企在 約瑟 个面前。</verse>
				<verse number="16">約瑟 看到 便雅憫 㧯佢等共下來，就對管家講：「帶這兜人轉吾屋下去；當晝𠊎愛㧯佢等共下食飯。去㓾一隻頭牲，準備筵席。」</verse>
				<verse number="17">管家照命令將佢等帶到 約瑟 个屋下。</verse>
				<verse number="18">佢等因為被人帶到 約瑟 个屋下，就當著驚，心肚想：「一定係為到上擺放轉𠊎等袋肚該兜錢，𠊎等正會被人帶到這位來。無一定佢等係想愛攻擊𠊎等，害𠊎等，搶走𠊎等个驢仔，強迫𠊎等做奴才。」</verse>
				<verse number="19">因為恁樣，佢等一到 約瑟 屋下門口，就對管家講：</verse>
				<verse number="20">「先生啊！請聽𠊎等講；𠊎等上擺係為到糴糧到這位來个。</verse>
				<verse number="21">𠊎等轉去，半路過夜个時，打開袋仔，發現逐儕自家个錢全部還在袋肚；這下𠊎等將該兜錢帶轉來還你。</verse>
				<verse number="22">𠊎等另外又帶錢來糴糧；上擺毋知麼人將錢放轉𠊎等个袋肚？」</verse>
				<verse number="23">管家講：「放心，毋使驚，一定係你等个上帝，你等阿爸个上帝，將財寶放在你等个袋肚；你等个錢𠊎早就收起來了！」接等佢將 西緬 帶出來交還佢等。</verse>
				<verse number="24">管家帶佢等入 約瑟 个屋肚，㨮水給佢等洗腳，又餵佢等个驢仔。</verse>
				<verse number="25">佢等將禮物準備好勢，愛等當晝 約瑟 轉來个時送給佢，因為佢等得到通知愛㧯 約瑟 共下食晝。</verse>
				<verse number="26">約瑟 轉屋下个時，佢等將禮物帶入來獻給佢、跪佢。</verse>
				<verse number="27">約瑟 問佢等有平安麼？又問：「你等識講過年老个阿爸，佢老人家平安麼？還健麼？」</verse>
				<verse number="28">佢等應講：「你个僕人𠊎等个阿爸還盡健。」接等佢等又跪佢。</verse>
				<verse number="29">約瑟 看到自家共𡟓个老弟 便雅憫 ，就講：「這位就係你等講過个滿老弟係麼？」又講：「後生仔！願上帝賜福給你！」</verse>
				<verse number="30">約瑟 看到自家个親老弟，激動到會忍毋住，就遽遽離開、閃入自家个間肚去噭。</verse>
				<verse number="31">佢洗過面正出來，強強忍等，命令開桌食飯。</verse>
				<verse number="32">佢等為 約瑟 擺一桌，佢个兄弟另外一桌，共下食个 埃及 人又另外一桌，因為 埃及 人認為㧯 希伯來 人共桌食飯盡無體面。</verse>
				<verse number="33">約瑟 使佢个兄弟在厥面前坐席，攏照大細个順序坐等。恁樣个安排使兄弟感覺當奇怪，彼此緊看。</verse>
				<verse number="34">約瑟 將佢該桌个菜分給佢該兜兄弟； 便雅憫 分到个係別人个五倍。佢等㧯 約瑟 共下啉食，非常快樂。</verse>
			</chapter>
			<chapter number="44">
				<verse number="1">約瑟 命令管家講：「照佢等个頭牲所能揹个，將糧食裝滿逐儕个袋仔，又將逐儕个錢放轉袋肚。</verse>
				<verse number="2">該最後生个，你愛將𠊎个銀酒杯㧯佢个錢放在佢个袋肚。」管家就照 約瑟 所吩咐个去做。</verse>
				<verse number="3">第二日打早，這兜兄弟得到批准就帶等佢等个驢仔離開。</verse>
				<verse number="4">佢等離該城無幾遠， 約瑟 就對管家講：「你趕緊去追該兜人，追到人个時愛問佢等講：『你等做麼介用惡報善呢？</verse>
				<verse number="5">做麼介偷𠊎主人个銀杯呢？ 該杯仔係佢啉酒用个，也係佢卜卦用个；你等犯到嚴重个罪了！』」</verse>
				<verse number="6">管家追到佢等个時，就對佢等講這兜話。</verse>
				<verse number="7">佢等應佢講：「先生！你做麼介講這種話呢？若僕人發誓，𠊎等無做恁樣个事。</verse>
				<verse number="8">你知，𠊎等也將上擺袋肚發現該兜錢，對 迦南 帶轉來還你；恁樣，𠊎等樣還會偷若主人屋下个金銀？</verse>
				<verse number="9">先生！若係你在僕人當中，無論在麼人个袋肚尋到酒杯，該人就該死；𠊎等其他个人也甘願做你个奴才。」</verse>
				<verse number="10">管家講：「𠊎同意你等个話。總係𠊎只有愛該偷走酒杯个人留下來做𠊎个奴才；其他个人無罪，做得自由轉去。」</verse>
				<verse number="11">大家就遽遽將袋仔拿下來放在地上，逐儕打開自家个袋仔。</verse>
				<verse number="12">管家詳細檢查，對做大哥个開始，搜到最細个。結果酒杯在 便雅憫 个袋肚尋到。</verse>
				<verse number="13">該兜兄弟非常悲傷，就將衫扯爛，又將包袱放在驢仔个背囊，倒轉城肚去。</verse>
				<verse number="14">猶大 㧯其他个兄弟倒轉 約瑟 屋下該時， 約瑟 還在該位；佢等就在厥面前伏在地上。</verse>
				<verse number="15">約瑟 對佢等講：「你等樣般做恁樣个事？敢毋知𠊎這種人會卜卦、知你等个行動嗎？」</verse>
				<verse number="16">猶大 應佢：「大人啊！𠊎等還有麼介話好講呢？還敢拗抑係喊冤枉麼？上帝已經查出𠊎等个罪！這下毋單淨該被人搜到有酒杯个，𠊎等全部愛做大人个奴才了。」</verse>
				<verse number="17">約瑟 講：「𠊎絕對毋會做恁樣个事。該拿走酒杯个正應該做𠊎个奴僕；其他个人可以平平安安轉若爸該位去。」</verse>
				<verse number="18">猶大 行近，對 約瑟 講：「大人啊！求你聽𠊎講，毋好對若僕人發譴。對𠊎來講，你係像王共樣。</verse>
				<verse number="19">大人識問過僕人講：『你等有阿爸抑係其他兄弟麼？』</verse>
				<verse number="20">𠊎等應大人講：『𠊎等有一位年老个阿爸，還有一個滿老弟，係吾爸年老个時𫱔个。這滿老弟个親阿哥已經過身了；佢係佢等共𡟓單單留下來个孻仔，所以阿爸當惜佢。』</verse>
				<verse number="21">你對僕人講：『將佢帶來這位，俾𠊎親眼看到佢。』</verse>
				<verse number="22">𠊎等應大人講：『這個細人仔做毋得離開厥爸；若係離開，厥爸一定會死掉。』</verse>
				<verse number="23">總係你對僕人講：『無若滿老弟共下來，毋使想愛見𠊎个面！』</verse>
				<verse number="24">「𠊎等轉到若僕人 — 吾爸該位，就將大人个話㧯佢講。</verse>
				<verse number="25">後來，佢愛𠊎等再來糴糧。</verse>
				<verse number="26">𠊎等對佢講：『𠊎等毋敢去。滿老弟若㧯𠊎等共下去，𠊎等就敢去；滿老弟無㧯𠊎等共下去，𠊎等做毋得見該人个面。』</verse>
				<verse number="27">你个僕人 — 吾爸對𠊎等講：『你等知吾𡜵娘 蕾潔 只有㧯𠊎𫱔兩個孻仔，</verse>
				<verse number="28">其中一個已經離開𠊎去了。佢離開以後，𠊎無再看到佢；佢一定係被野獸食掉了！</verse>
				<verse number="29">這下你等愛連這細个也帶走。若係佢在路項堵到麼介意外，你等就會害𠊎這個滿頭白毛个老人家，悲悲慘慘落陰間去。』」</verse>
				<verse number="30">猶大 繼續講：「吾爸个命㧯這細人仔个命相連。若係𠊎等無帶這細人仔轉去，若僕人 — 吾爸無看到這細人仔，佢一定會無命！𠊎等就會害若僕人 — 𠊎等个阿爸滿頭白毛，悲悲慘慘落陰間去！</verse>
				<verse number="31"></verse>
				<verse number="32">毋單淨恁樣，𠊎有向吾爸保證，㧯佢講：『若係𠊎無將滿老弟帶轉來給阿爸，𠊎甘願一生人擔當這罪。』</verse>
				<verse number="33">大人啊，這下求你俾𠊎留下來，代這細人仔做你个奴才。請俾佢㧯該兜阿哥共下轉去。</verse>
				<verse number="34">若係這細人仔無㧯𠊎共下轉去，𠊎愛樣般轉去見吾爸呢？𠊎毋拌得看到災禍臨到吾爸啊！」</verse>
			</chapter>
			<chapter number="45">
				<verse number="1">約瑟 在佢身邊企等个人面前強強會忍毋住，就吩咐該兜人離開，到外背去。恁樣， 約瑟 向佢該兜兄弟表明自家身份該時，無別人在場。</verse>
				<verse number="2">總係佢開聲大噭个聲音被 埃及 人聽到，消息就傳到王宮。</verse>
				<verse number="3">約瑟 對佢該兜兄弟講：「𠊎就係 約瑟 ！阿爸有影還在麼？」該兜兄弟一聽到這句話，嚇到呆掉，毋會應佢。</verse>
				<verse number="4">約瑟 喊佢等行兼兜仔，佢等就偎近佢。佢講：「𠊎就係你等个老弟，係你等賣到 埃及 个 約瑟 。</verse>
				<verse number="5">這下，你等毋使因為將𠊎賣到這位來著急、責備自家。派𠊎先到這位來个係上帝，為到愛留𫣆大家个生命。</verse>
				<verse number="6">這地方个飢荒到這下正兩年，還有五年無法度耕種，也毋會有收成。</verse>
				<verse number="7">為到愛留你等㧯你等个後代，上帝派𠊎先到這位來；這就係上帝奇妙个拯救。</verse>
				<verse number="8">恁樣看來，派𠊎來个係上帝，毋係你等！佢俾𠊎在王面前做最高个參謀，做 埃及 个宰相，治理全國。</verse>
				<verse number="9">「你等愛遽遽轉去阿爸該位，㧯佢講，『若孻仔 約瑟 恁樣講：上帝俾𠊎做 埃及 全國个宰相；請你毋好延纏，愛遽遽到𠊎這位來！</verse>
				<verse number="10">你愛帶若子女、孫仔、牛羊㧯一切所有个，到 歌珊 附近來住，㧯𠊎較近。</verse>
				<verse number="11">𠊎愛在該位奉養你；因為還有五年个飢荒，𠊎無愛看到你㧯全家並頭牲全部餓死。』」</verse>
				<verse number="12">約瑟 又講：「這下，你等㧯吾老弟 便雅憫 全部親眼看到，係𠊎 — 約瑟 親口對你等講這兜話个。</verse>
				<verse number="13">你等愛㧯阿爸講，𠊎在 埃及 有當大个權力，又愛報給佢知你等親眼看到个一切。你等愛遽遽接吾爸到這位來！」</verse>
				<verse number="14">約瑟 就揇等老弟 便雅憫 大聲噭；厥老弟也伏在佢肩頭盡噭。</verse>
				<verse number="15">接等，佢揇等其他个阿哥緊噭、緊唚；然後佢該兜兄弟正㧯佢講話。</verse>
				<verse number="16">約瑟 該兜兄弟來到 埃及 个消息傳到王宮，王㧯佢个官員全部非常歡喜。</verse>
				<verse number="17">王對 約瑟 講：「㧯你該兜兄弟講，用佢等个頭牲載糧食，黏時轉去 迦南 。</verse>
				<verse number="18">愛將你等个阿爸㧯家族全部接到𠊎這位來！𠊎愛將 埃及 最好个土地賜給佢等，佢等做得在這位享受豐盛个生活。</verse>
				<verse number="19">你也愛吩咐佢等，愛對 埃及 帶車仔轉去，接佢等个𡜵娘、子女，㧯你等个阿爸共下來。</verse>
				<verse number="20">佢等毋好毋拌得該片个產業，因為 埃及 全地最好个東西，全部係佢等个。」</verse>
				<verse number="21">以色列 該兜孻仔照王个話去做。 約瑟 也照王个吩咐給佢等車仔㧯路項所需要个糧食。</verse>
				<verse number="22">佢又送逐個阿哥一身衫褲，總係給 便雅憫 五身衫褲㧯三百隻銀幣。</verse>
				<verse number="23">佢送給厥爸十隻公驢載 埃及 最好个出產，另外送十隻驢乸載厥爸路項愛食个糧食、麵包㧯其他个食物。</verse>
				<verse number="24">約瑟 送佢該兜兄弟離開，又吩咐佢等講：「你等在路上毋好冤家！」</verse>
				<verse number="25">佢等離開 埃及 ，轉到 迦南 地佢等个阿爸 雅各 該位。</verse>
				<verse number="26">佢等㧯阿爸講：「 約瑟 還在，又做 埃及 全地个宰相。」 雅各 聽到發咄愕，毋敢相信佢等个話。</verse>
				<verse number="27">總係，一聽到 約瑟 交帶傳給佢个話，又看到 約瑟 派來愛接佢到 埃及 个車仔， 雅各 个心就醒過來。</verse>
				<verse number="28">以色列 就講：「毋使講了！𠊎个孻仔 約瑟 還在；𠊎吂死以前，一定愛去看佢。」</verse>
			</chapter>
			<chapter number="46">
				<verse number="1">以色列 帶等佢所有个一切來到 別是巴 ；佢在該位向厥爸 以撒 个上帝獻祭。</verse>
				<verse number="2">該暗晡，在異象中上帝㧯 以色列 講話。上帝喊佢：「 雅各 ！ 雅各 ！」 佢應講：「𠊎在這位！」</verse>
				<verse number="3">上帝講：「𠊎係上帝，係若爸个上帝。你毋使驚！做你去 埃及 ，因為𠊎愛俾你个後代在該位成做大國。</verse>
				<verse number="4">𠊎愛㧯你共下到 埃及 去，也愛帶你个後代轉來這地方。你過身个時， 約瑟 會在你身邊服事。」</verse>
				<verse number="5">雅各 對 別是巴 出發。 以色列 該兜孻仔使佢等个阿爸 雅各 㧯佢等个𡜵娘、子女全部坐在 埃及 王為 雅各 派來个車頂。</verse>
				<verse number="6">佢等又帶等在 迦南 所得到个頭牲㧯財產到 埃及 去。恁樣， 雅各 帶領所有个子孫去到 埃及 ，</verse>
				<verse number="7">佢个孻仔、妹仔、孫仔、孫女，所有个後代攏總共下去。</verse>
				<verse number="8">㧯 雅各 共下到 埃及 个 以色列 人，名單在下背： 雅各 个長子 呂便 。</verse>
				<verse number="9">呂便 个孻仔： 哈諾 、 法路 、 希斯崙 、 迦米 。</verse>
				<verse number="10">西緬 㧯佢个孻仔： 耶母利 、 雅憫 、 阿轄 、 雅斤 、 瑣轄 ，㧯 迦南 女子𫱔个 少羅 。</verse>
				<verse number="11">利未 㧯佢个孻仔： 革舜 、 哥轄 、 米拉利 。</verse>
				<verse number="12">猶大 㧯佢个孻仔： 示拉 、 法勒斯 、 謝拉 。 ( 猶大 另外有兩個孻仔 珥 㧯 俄南 死在 迦南 。) 法勒斯 个孻仔係 希斯崙 㧯 哈母勒 。</verse>
				<verse number="13">以薩迦 㧯佢个孻仔： 陀拉 、 普瓦 、 約伯 、 伸崙 。</verse>
				<verse number="14">西布倫 㧯佢个孻仔： 西烈 、 以倫 、 雅利 。</verse>
				<verse number="15">以上係 麗亞 在 美索不達米亞 㧯 雅各 𫱔个子孫，另外還有妹仔 底拿 。 雅各 對 麗亞 所傳下來个子孫總共三十三儕。</verse>
				<verse number="16">迦得 㧯佢个孻仔： 洗非芸 、 哈基 、 書尼 、 以斯本 、 以利 、 亞羅底 、 亞列利 。</verse>
				<verse number="17">亞設 㧯佢个孻仔： 音拿 、 亦施瓦 、 亦施韋 、 比利亞 ， 還有佢等个老妹 西拉 。 比利亞 个孻仔係 希別 㧯 馬結 。</verse>
				<verse number="18">以上係 拉班 給佢个妹仔 麗亞 做使女个 悉帕 㧯 雅各 𫱔个子孫，總共十六儕。</verse>
				<verse number="19">雅各 个𡜵娘 蕾潔 㧯佢𫱔兩個孻仔： 約瑟 㧯 便雅憫 。</verse>
				<verse number="20">約瑟 在 埃及 㧯 希利坡里 城个祭司 波提非拉 个妹仔 亞西納 𫱔兩個孻仔： 瑪拿西 㧯 以法蓮 。</verse>
				<verse number="21">便雅憫 个孻仔係： 比拉 、 比結 、 亞實別 、 基拉 、 乃幔 、 以希 、 羅實 、 母平 、 戶平 、 亞勒 。</verse>
				<verse number="22">以上係 蕾潔 㧯 雅各 傳下來个子孫，總共十四儕。</verse>
				<verse number="23">但 㧯佢个孻仔： 戶伸 。</verse>
				<verse number="24">拿弗他利 㧯佢个孻仔： 雅薛 、 沽尼 、 耶色 、 示冷 。</verse>
				<verse number="25">以上係 拉班 給厥妹仔 蕾潔 做使女个 辟拉 㧯 雅各 傳下來个子孫，總共七儕。</verse>
				<verse number="26">㧯 雅各 共下到 埃及 个直系子孫，總共有六十六儕，無包含心舅。</verse>
				<verse number="27">再加上 約瑟 在 埃及 𫱔个兩個孻仔， 雅各 全家在 埃及 个人口總共七十儕。</verse>
				<verse number="28">雅各 派 猶大 先到 約瑟 該位，約佢去 歌珊 見面。佢等到 歌珊 个時，</verse>
				<verse number="29">約瑟 坐車到該位迎接厥爸 以色列 。佢等一見面， 約瑟 就揇等厥爸，噭盡久。</verse>
				<verse number="30">以色列 對 約瑟 講：「𠊎有好親眼看到你還在，這下𠊎死也甘願了！」</verse>
				<verse number="31">後來， 約瑟 對佢該兜兄弟㧯厥爸屋下其他个人講：「𠊎愛向王報告：『𠊎該兜兄弟㧯吾爸一家人已經對 迦南 徙到這位來了。</verse>
				<verse number="32">佢等係牧羊人，靠畜頭牲來生活个，所以佢等帶牛羊㧯所有个財產來到這位。』</verse>
				<verse number="33">王召見你等，問起你等係做麼介頭路个時，</verse>
				<verse number="34">你等愛㧯佢講，你等㧯祖先共樣，從後生到這下靠畜頭牲來生活。恁樣，佢就會俾你等住在 歌珊 地區。」 約瑟 恁樣講，係因為 埃及 人無愛㧯牧羊个人來往。</verse>
			</chapter>
			<chapter number="47">
				<verse number="1">約瑟 對佢个兄弟中選出五儕來，帶佢等去見王。 約瑟 入去㧯王講：「吾爸㧯吾兄弟已經帶等佢等个牛羊㧯一切所有个對 迦南 來了，佢等這下留在 歌珊 地區。」然後佢帶該五儕去到王面前。</verse>
				<verse number="2"></verse>
				<verse number="3">王問佢等：「你等做麼介頭路？」 佢等應講：「王啊！若僕人係牧羊人，𠊎等个祖先乜共樣。」</verse>
				<verse number="4">佢等又對王講：「因為 迦南 地區飢荒嚴重，𠊎等个羊群無草好食，所以𠊎等就徙到這位來。這下，求王准若僕人住在 歌珊 地區。」</verse>
				<verse number="5">王對 約瑟 講：「這下若爸㧯若兄弟到你這位來了。</verse>
				<verse number="6">埃及 个土地在你等面前，由在佢等選；佢等可以住在國內最好个地區 歌珊 。佢等當中若有能力較強个人，就派佢等管理𠊎个頭牲。」</verse>
				<verse number="7">約瑟 帶厥爸 雅各 來到王面前。 雅各 㧯王祝福。</verse>
				<verse number="8">王問 雅各 ：「你有幾多歲？」</verse>
				<verse number="9">雅各 應佢講：「𠊎在世間做旅客已經有一百三十年了。𠊎一生个日仔又短又苦，毋像𠊎祖先做旅客个年日恁長。」</verse>
				<verse number="10">愛離開个時， 雅各 又㧯王祝福，正對王面前出去。</verse>
				<verse number="11">約瑟 就照王个命令將厥爸㧯該兜兄弟安頓在 埃及 ，將 蘭塞 城附近、國內最好个土地給佢等做產業。</verse>
				<verse number="12">約瑟 又俾厥爸、佢該兜兄弟㧯所有个家族得到糧食个配給，連最細个也有一份。</verse>
				<verse number="13">飢荒非常嚴重，逐所在攏總無糧食； 埃及 人㧯 迦南 人全部餓到會死。</verse>
				<verse number="14">埃及 人㧯 迦南 人來糴糧个錢， 約瑟 全部收起來，交到王宮去。</verse>
				<verse number="15">後來 埃及 人㧯 迦南 人所有个錢用淨淨， 埃及 人民攏總來見 約瑟 ，要求佢講：「𠊎等个錢全部用掉了，請給𠊎等糧食，免得𠊎等餓死！」</verse>
				<verse number="16">約瑟 應講：「錢若係用掉，做得帶你等个頭牲來換糧食。」</verse>
				<verse number="17">所以佢等將頭牲帶到 約瑟 該位， 約瑟 就用糧食來交換佢等个馬、羊仔、牛、驢仔。該年，佢用囤糧換到民間所有个頭牲。</verse>
				<verse number="18">第二年，佢等又來要求：「大人啊！𠊎等無騙你，𠊎等正經無錢了，頭牲也歸你了。這下除掉𠊎等个身體㧯土地以外，麼介乜無了。</verse>
				<verse number="19">求你代𠊎等做主，免得𠊎等餓死、𠊎等个田地也荒掉。求你用糧食換𠊎等个土地，𠊎等个土地歸給王，𠊎等願意做王个奴才，代佢耕種。求你給𠊎等糧食，俾𠊎等生存下去；給𠊎等種子，𠊎等正有法度耕種。」</verse>
				<verse number="20">因為飢荒越來越嚴重， 埃及 人迫到無辦法，攏總將土地賣給王； 約瑟 就代王將 埃及 所有个土地買過來。</verse>
				<verse number="21">有關人民， 約瑟 使 埃及 國內个人攏總成做奴才 。</verse>
				<verse number="22">只有祭司个土地佢無收買，因為佢等對王領受生活費，毋使賣土地。</verse>
				<verse number="23">約瑟 對人民講：「既然𠊎這下已經代王買下你等㧯你等个土地，𠊎就供給種子俾你等耕種。</verse>
				<verse number="24">收割个時，你等愛將收成个五分之一交給王，其他个歸你等自家㧯屋下人做糧食，也做得拿去做種子。」</verse>
				<verse number="25">佢等應講：「大人啊！你救𠊎等个生命，恩待𠊎等，𠊎等甘願做王个奴才。」</verse>
				<verse number="26">這係 約瑟 為 埃及 所制定个法律：所有收成个農產，五分之一愛歸給王。這法律到今晡日還有效，只有祭司个土地毋係王个。</verse>
				<verse number="27">以色列 人住在 埃及 个 歌珊 地區。佢等在該位興旺發達，人口增加盡多。</verse>
				<verse number="28">雅各 在 埃及 住十七年，食到一百四十七歲。</verse>
				<verse number="29">以色列 死期近个時，佢就派人去喊 約瑟 來，對佢講：「若係你有孝心，就將手放在𠊎兩支大腳髀中間，對𠊎發誓，你毋好將𠊎葬在 埃及 。</verse>
				<verse number="30">𠊎㧯祖宗同睡个時，你愛將𠊎帶出 埃及 ，葬在佢等埋葬个所在。」 約瑟 講：「𠊎一定會照你个吩咐去做。」</verse>
				<verse number="31">雅各 講：「對𠊎發誓啊！」 約瑟 就對佢發誓；後來 以色列 在眠床頂感謝上帝。</verse>
			</chapter>
			<chapter number="48">
				<verse number="1">過一站時間，有人通知 約瑟 ，講厥爸發病。佢就帶兩個孻仔 瑪拿西 㧯 以法蓮 去看老人家。</verse>
				<verse number="2">雅各 聽講厥孻仔 約瑟 來看佢， 以色列 就勉強䟘起來坐在眠床。</verse>
				<verse number="3">雅各 㧯 約瑟 講：「全能个上帝識在 迦南 地个 路斯 向𠊎顯現、賜福給𠊎。</verse>
				<verse number="4">佢對𠊎講：『𠊎愛給你多子多孫，俾你个後代成做盡多國家；𠊎也愛將這兜土地賜給你个後代，永遠做佢等个產業。』」</verse>
				<verse number="5">雅各 又講：「 約瑟 啊！𠊎還吂到 埃及 以前，你在這位𫱔个兩個孻仔 以法蓮 㧯 瑪拿西 ，愛算係𠊎个孻仔，像 呂便 㧯 西緬 係𠊎个一樣。</verse>
				<verse number="6">你在佢等以後所𫱔个孻仔正算係若孻仔；總係佢等愛對 以法蓮 㧯 瑪拿西 分產業。</verse>
				<verse number="7">𠊎恁樣做係為到若姆 蕾潔 个緣故。𠊎對 美索不達米亞 轉來个時，若姆在 迦南 地區、離 以法他 無幾遠个地方過身，𠊎非常悲傷，將姖葬在愛去 以法他 个路堘。」 ( 以法他 就係 伯利恆 。)</verse>
				<verse number="8">以色列 看到 約瑟 个兩個孻仔，就問講：「這兜細人仔係麼人？」</verse>
				<verse number="9">約瑟 應厥爸：「係𠊎个孻仔，係𠊎到 埃及 以後，上帝賜給𠊎个。」 以色列 講：「帶佢等到𠊎面前來，𠊎愛祝福佢等。」</verse>
				<verse number="10">以色列 老了，目珠花花，看毋清楚。 約瑟 將細人仔帶到佢面前，佢就揇等佢等、唚佢等。</verse>
				<verse number="11">以色列 對 約瑟 講：「𠊎無想到會再看到你；這下上帝俾𠊎連你个孻仔也看到。」</verse>
				<verse number="12">約瑟 牽兩個細人仔離開 以色列 个膝頭中間，自家伏在阿爸面前。</verse>
				<verse number="13">約瑟 安排 以法蓮 企在 以色列 左片， 瑪拿西 企在右片。</verse>
				<verse number="14">總係 以色列 兩手交叉伸出來，用正手放在老弟 以法蓮 个頭那頂，左手放在阿哥 瑪拿西 个頭那頂。</verse>
				<verse number="15">佢就祝福 約瑟 講： 「願吾祖先 亞伯拉罕 㧯 以撒 所敬拜个上帝，賜福給這兩個細人仔！ 願直到今晡日一生牧養𠊎个上帝賜福給佢等！</verse>
				<verse number="16">願拯救𠊎脫離一切災難个天使祝福這兩個細人仔！ 願𠊎个名、吾祖先 亞伯拉罕 㧯 以撒 个名，通過佢等繼續傳下去！ 願佢等多子多孫，在地上大大興旺！」</verse>
				<verse number="17">約瑟 看到阿爸將右手放在 以法蓮 頭那頂，認為恁樣毋著，就拿起厥爸个右手，愛對 以法蓮 个頭那徙到 瑪拿西 个頭那頂。</verse>
				<verse number="18">約瑟 對厥爸講：「阿爸，恁樣毋著，這個正係長子，請將右手放在佢个頭那頂。」</verse>
				<verse number="19">厥爸毋肯接受，講：「孻仔啊，𠊎知，𠊎知。 瑪拿西 个後代也愛成做大族；總係厥老弟會比佢較強大，老弟个後代會成做盡多民族。」</verse>
				<verse number="20">該日， 雅各 祝福佢等講：「 以色列 人愛提起你等个名來祝福人；佢等愛講： 『願上帝使你等像 以法蓮 㧯 瑪拿西 一樣。』」 恁樣， 雅各 使 以法蓮 擺在 瑪拿西 个頭前。</verse>
				<verse number="21">後來 以色列 對 約瑟 講：「你知𠊎會死了；總係上帝一定㧯你等共下，帶你等轉祖先个土地去。</verse>
				<verse number="22">𠊎將 示劍 該垤盡肥个地賜給你，毋給你該兜兄弟；該係𠊎親手用刀劍㧯弓對 亞摩利 人手中搶過來个。」</verse>
			</chapter>
			<chapter number="49">
				<verse number="1">雅各 召集佢該兜孻仔來，對佢等講：「你等行偎來，𠊎愛將你等將來會堵到个事㧯你等講。</verse>
				<verse number="2">雅各 个孻仔啊，愛聚集來聽！ 留心聽若爸 以色列 个話。</verse>
				<verse number="3">呂便 啊，你係𠊎个長子，你係𠊎个精力； 你係𠊎成人以後𫱔个第一個孻仔， 係𠊎最強壯、最堪得驕傲个孻仔。</verse>
				<verse number="4">無想到，你个情慾像大水氾濫， 你㧯阿爸个細姐睡， 打垃圾阿爸个眠床， 所以你做毋得企頭。</verse>
				<verse number="5">西緬 㧯 利未 係鱸鰻兄弟； 佢等用刀劍去行暴力。</verse>
				<verse number="6">𠊎無愛參加佢等个陰謀， 無愛㧯佢等共下集會； 因為佢等譴到就㓾人， 斬斷牛个腳筋準搞。</verse>
				<verse number="7">佢等个脾氣盡烈，應該受咒詛； 佢等當惡當殘忍，應該受刑罰。 𠊎愛使佢等分散在 雅各 个家族， 使佢等在 以色列 人當中分散掉去。</verse>
				<verse number="8">猶大 啊，你个兄弟攏總會稱讚你。 你會揢等敵人个頸筋； 你該兜兄弟會在你面前跪拜。</verse>
				<verse number="9">猶大 像少壯个獅仔， 捉到獵物帶轉洞肚； 佢像獅仔伏等睡， 無人敢惹佢！</verse>
				<verse number="10">猶大 會一直掌管王權， 佢个後代會長久統治。 萬國會向佢進貢， 萬民會向佢跪拜。</verse>
				<verse number="11">佢个葡萄樹多到毋驚驢仔來喪， 上等个葡萄樹紽細驢仔也無關係； 葡萄酒多到有好洗衫， 葡萄汁也多到做得洗大襖。</verse>
				<verse number="12">佢个目珠比酒還較明亮； 佢个牙齒比乳還較白。</verse>
				<verse number="13">西布倫 會住在海滣， 佢會成做停船个港口； 佢个領土會透到 西頓 。</verse>
				<verse number="14">以薩迦 像紮磳个驢仔， 伏在兩隻羊欄中間。</verse>
				<verse number="15">佢歡喜安定个地方， 愛盡肥个土地； 所以佢愛揹重擔， 做苦工就像奴僕。</verse>
				<verse number="16">但 會代自家个子民伸冤， 像 以色列 其他支族一樣。</verse>
				<verse number="17">但 會像路堘个蛇哥， 細路个毒蛇； 佢咬傷馬蹄， 害騎馬个橫下來。</verse>
				<verse number="18">上主啊，𠊎等候你个拯救！</verse>
				<verse number="19">迦得 會被強盜攻擊， 總係佢會反輸轉贏。</verse>
				<verse number="20">亞設 个土地係豐富个榖倉； 佢預備好食个東西供奉君王。</verse>
				<verse number="21">拿弗他利 係自由走闖个鹿乸， 佢𫱔个細鹿仔非常得人惜。</verse>
				<verse number="22">約瑟 像泉水滣个野驢， 像山岡頂个細野馬。</verse>
				<verse number="23">敵人強強愛攻擊佢， 開弓射箭來迫害佢。</verse>
				<verse number="24">總係倚靠 雅各 大能个上帝， 佢个弓還係盡硬撐； 因為 以色列 个牧人係你个保護者， 佢个手還遽板有力。</verse>
				<verse number="25">若爸个上帝會幫助你， 全能个上帝賜福給你。 佢賜給你天頂个甘霖、地上个泉水， 六畜興旺，子孫眾多。</verse>
				<verse number="26">佢使你五榖豐登，花草常開； 有萬世个山岡，永存个山脈。 願這一切福氣降在 約瑟 个頭那頂， 降在弟兄中最優秀个一位身上。</verse>
				<verse number="27">便雅憫 像得人畏个豺狼； 佢朝晨吞食所捉到个， 暗晡時分所搶來个。」</verse>
				<verse number="28">以上係 以色列 个十二支族；這也係佢等个阿爸臨終前對每一個孻仔所留下个遺言；佢照各人个性情、品行，講合適个話祝福逐個孻仔。</verse>
				<verse number="29">雅各 吩咐佢該兜孻仔講：「𠊎會死了；你等愛將𠊎㧯𠊎个祖先葬共下，就係在 赫 人 以弗崙 田間个窿肚。</verse>
				<verse number="30">這個窿在 迦南 地、 幔利 東片个 麥比拉 ，係 亞伯拉罕 向 赫 人 以弗崙 買來做墳墓个。</verse>
				<verse number="31">亞伯拉罕 㧯厥𡜵娘 莎拉 葬在該位； 以撒 㧯厥𡜵娘 麗百加 也葬在該位；𠊎也將 麗亞 葬在該位。</verse>
				<verse number="32">這田㧯田間个窿係對 赫 人買來个。」</verse>
				<verse number="33">雅各 交帶佢該兜孻仔這兜話以後，就將腳跔上眠床，斷氣過身，轉到厥祖宗該位去。</verse>
			</chapter>
			<chapter number="50">
				<verse number="1">約瑟 伏在厥爸身上緊噭、緊唚佢。</verse>
				<verse number="2">後來 約瑟 命令醫生用藥仔薰，防止厥爸 以色列 屍體腐爛，醫生就照恁樣去做。</verse>
				<verse number="3">佢等照規定个時間，用香料薰四十日，完成防腐个工作。 埃及 人為佢守孝七十日。</verse>
				<verse number="4">守孝个期滿， 約瑟 對王个官員講：「若係你等歡喜，請你等將𠊎个話轉告王：</verse>
				<verse number="5">『吾爸臨終个時喊𠊎發誓，愛將佢埋在 迦南 地，在佢為自家準備个墳墓底背。所以求你准𠊎去埋葬吾爸；喪事辦好，𠊎就轉來。』」</verse>
				<verse number="6">王應講：「好！照你發个誓去埋葬若爸。」</verse>
				<verse number="7">恁樣 約瑟 就去埋葬厥爸。王所有个官員、宮廷个官長，㧯 埃及 个長老全部跈 約瑟 去。</verse>
				<verse number="8">約瑟 全家、佢該兜兄弟㧯厥爸个家族，也全部共下去；總係佢等个細人仔㧯羊群牛群留在 歌珊 地區。</verse>
				<verse number="9">跈佢共下去个還有車隊㧯騎兵隊，非常大陣。</verse>
				<verse number="10">佢等來到 約旦 河東片个 亞達 禾埕，大家在該位開聲大噭； 約瑟 又為厥爸守孝七日。</verse>
				<verse number="11">迦南 人看到這一大群人在 亞達 禾埕个葬禮，就講：「 埃及 人个葬禮恁嚴肅噢！」所以這地方安到 亞伯‧麥西 ，就在 約旦 河東片。</verse>
				<verse number="12">雅各 該兜孻仔遵照阿爸个吩咐，</verse>
				<verse number="13">將佢个屍體運到 迦南 地，葬在 幔利 東片 麥比拉 窿肚；這個窿係 亞伯拉罕 對 赫 人 以弗崙 買過來做墳墓个。</verse>
				<verse number="14">約瑟 埋葬厥爸後，就㧯該兜兄弟並參加葬禮个人共下轉去 埃及 。</verse>
				<verse number="15">約瑟 該兜兄弟在阿爸過身後，互相講：「若係 約瑟 懷恨在心，照𠊎等頭擺對佢所做个壞事來報復𠊎等，樣般正好呢？」</verse>
				<verse number="16">所以佢等拜託人去㧯 約瑟 講：「阿爸臨終个時，</verse>
				<verse number="17">交帶𠊎等㧯你講一句話：『你該兜阿哥得罪你，求你赦免佢等个罪過。』𠊎等係若爸个上帝个僕人；求你赦免𠊎等所犯个罪過。」 約瑟 聽到這話就噭出來。</verse>
				<verse number="18">後來佢該兜阿哥親身來見佢，伏在佢面前，講：「𠊎等攏總係你个僕人。」</verse>
				<verse number="19">約瑟 㧯佢等講：「毋使驚；𠊎敢做得代上帝？</verse>
				<verse number="20">你等本來想愛害𠊎，總係上帝个意思係好个，為到愛成就今晡日个光景，來保全盡多人个生命。</verse>
				<verse number="21">你等毋使驚；𠊎一定會照顧你等㧯你等个子女。」 約瑟 講這種慈愛个話來安慰佢等，使佢等盡安心。</verse>
				<verse number="22">約瑟 㧯厥爸个家族繼續住在 埃及 。佢食到一百一十歲。</verse>
				<verse number="23">佢有看到 以法蓮 个孻仔㧯孫仔，也有揇過 瑪拿西 个孫仔，就係 瑪吉 該兜孻仔。</verse>
				<verse number="24">後來 約瑟 對佢該兜兄弟講：「𠊎差毋多會死了！總係上帝一定會照顧你等，帶你等離開這個地方，到佢應許給 亞伯拉罕 、 以撒 㧯 雅各 个地方去。」</verse>
				<verse number="25">約瑟 又喊 以色列 个子孫發誓；佢講：「上帝一定會照顧你等；然後你等愛將𠊎个骨頭對這位帶轉去。」</verse>
				<verse number="26">約瑟 一百一十歲个時正過身。佢等用藥仔薰，防止佢个屍體爛掉，將屍體放入棺材，留在 埃及 。</verse>
			</chapter>
		</book>
		<book number="2">
			<chapter number="1">
				<verse number="1">以色列 該兜孻仔逐儕帶等家屬，㧯 雅各 共下到 埃及 去。佢等个名係：</verse>
				<verse number="2">呂便 、 西緬 、 利未 、 猶大 、</verse>
				<verse number="3">以薩迦 、 西布倫 、 便雅憫 、</verse>
				<verse number="4">但 、 拿弗他利 、 迦得 、 亞設 。</verse>
				<verse number="5">雅各 傳下个子孫，總數有七十人。 雅各 另外一個孻仔 約瑟 早就在 埃及 。</verse>
				<verse number="6">後來， 約瑟 死掉，佢該兜兄弟㧯該世代个人也全部死掉。</verse>
				<verse number="7">總係，佢等个後代，就係 以色列 人，人口增加當遽，當旺當強； 埃及 國內逐位看得到佢等。</verse>
				<verse number="8">後來， 埃及 有一個新王興起，佢對 約瑟 个事完全毋知。</verse>
				<verse number="9">佢對 埃及 人講：「這兜 以色列 人又多又強壯，對𠊎等係盡大个威脅。</verse>
				<verse number="10">若係發生戰爭，佢等可能㧯敵人聯合攻打𫣆等，離開𠊎等个國家。𠊎等一定愛設法莫俾佢等个人口增加。」</verse>
				<verse number="11">所以 埃及 人指派監工，強迫 以色列 人做苦工，喊佢等起 比東 城㧯 蘭塞 城，來做國王个補給中心；用這方法來打擊佢等个心情。</verse>
				<verse number="12">總係 埃及 人越壞款待 以色列 人， 以色列 人就越𫱔越多，人口分佈越闊；所以 埃及 人盡驚 以色列 人。</verse>
				<verse number="13">埃及 人強強迫 以色列 人做當重个苦工，</verse>
				<verse number="14">蹧踏佢等，愛佢等煉泥做磚仔，又愛做田肚一切个工作，使佢等非常痛苦。</verse>
				<verse number="15">埃及 王喊 希伯來 个產婆來，一個安到 施弗拉 ，另外一個安到 普阿 ；佢吩咐姖等講：</verse>
				<verse number="16">「你等為 希伯來 个婦女接生 个時，若係姖等𫱔个係細孻仔，愛將佢㓾掉；若係細妹仔，就留姖个生命。」</verse>
				<verse number="17">總係這兩個產婆敬畏上帝，無照 埃及 王个命令做；姖等還係留細孻仔个生命。</verse>
				<verse number="18">所以 埃及 王喊兩個產婆來，問姖等：「你等做麼介恁樣做？做麼介留細孻仔个生命呢？」</verse>
				<verse number="19">產婆應王講：「 希伯來 个婦女無像 埃及 个婦女；姖等當扎，𠊎等還吂趕到，姖等已經𫱔了。」</verse>
				<verse number="20">因為產婆敬畏上帝，上帝特別看顧姖等，俾姖等有自家个家庭。 以色列 人繼續增加，越來越強。</verse>
				<verse number="21"></verse>
				<verse number="22">最後， 埃及 王命令全國人民講：「 希伯來 人 一切所𫱔个細孻仔，愛全部㧒落 尼羅 河，細妹仔个生命就留下來。」</verse>
			</chapter>
			<chapter number="2">
				<verse number="1">有一個 利未 族个人㧯佢同族个一個細妹仔結婚，</verse>
				<verse number="2">𫱔一個孻仔。這婦人家看到孲𤘅仔當得人惜，就將佢囥三個月久。</verse>
				<verse number="3">到實在無辦法囥這細人仔，姖就拿鹹草編一個籃仔，漆上桐油㧯馬膠，毋俾水漏落去，將細人仔放在籃仔底背，然後將籃仔囥在河壩滣蘆竹中間。</verse>
				<verse number="4">這細人仔个阿姊遠遠企等，愛看佢會發生麼介事情。</verse>
				<verse number="5">國王个妹仔到河壩滣來洗身；姖該兜宮女在河壩滣行來行去。忽然姖看到蘆竹中間有一個籃仔，就喊一個奴婢去拿來。</verse>
				<verse number="6">公主打開籃仔，看到一個孲𤘅仔在底背噭，就憐憫佢，講：「這一定係 希伯來 人个孲𤘅仔。」</verse>
				<verse number="7">該時，孲𤘅仔个阿姊行前來，對公主講：「請問，愛𠊎去尋一個 希伯來 婦人家為你做佢个乳𡟓麼？」</verse>
				<verse number="8">公主應講：「好啊！」該細阿妹仔就去喊孲𤘅仔个阿姆來。</verse>
				<verse number="9">公主對該婦人家講：「將這孲𤘅仔帶轉去，代𠊎𢱋佢，𠊎會給你工錢。」所以該婦人家就將孲𤘅仔接轉去，養育佢。</verse>
				<verse number="10">這細人仔長大以後，該婦人家將佢帶到公主面前，公主正式收養佢做自家个孻仔。姖講：「𠊎對水底背將這細人仔拉上來」。姖就㧯佢安到 摩西 。</verse>
				<verse number="11">摩西 長大以後，常常出去看 希伯來 同胞，看到佢等被人強迫做苦工。有一擺，佢看到一個 埃及 人打死一個 希伯來 同胞。</verse>
				<verse number="12">摩西 向左右看，恅到無人注意，就打死該 埃及 人，將屍體埋在沙堆肚。</verse>
				<verse number="13">第二日， 摩西 又到該位去，看到兩個 希伯來 人相打，就對該個較無理个講：「你做麼介欺負自家个同胞呢？」</verse>
				<verse number="14">該人應講：「麼人派你來管𠊎等，做𠊎等个法官？你㓾掉該 埃及 人，也想愛㓾𠊎係麼？」 摩西 一聽到這話，就非常著驚，心肚想：「𠊎所做个，大家已經知了！」</verse>
				<verse number="15">國王聽到這事，想愛㓾 摩西 ， 摩西 就逃到 米甸 去，住在該位。 有一日， 摩西 坐在井堘。 米甸 个祭司有七個妹仔，姖等出來打水，裝滿水槽，愛俾阿爸个羊仔食水。</verse>
				<verse number="16"></verse>
				<verse number="17">另外一群掌羊个來，將姖等逐走。 摩西 就䟘起來保護姖等，又打水俾姖等个羊仔食。</verse>
				<verse number="18">姖等轉到阿爸 流珥 屋下个時，阿爸問姖等：「今晡日樣般會恁早就轉來？」</verse>
				<verse number="19">姖等應講：「有一個 埃及 人㧯𠊎等𢯭手，將該兜欺負𠊎等个掌羊人逐走，還代𠊎等打水俾羊仔食。」</verse>
				<verse number="20">阿爸問該兜妹仔：「佢在㖠位？做麼介將佢留在外背？去請佢來㧯𫣆等共下食飯。」</verse>
				<verse number="21">後來 摩西 同意住在該位；該人將厥妹仔 西坡拉 嫁給 摩西 ；</verse>
				<verse number="22">西坡拉 𫱔一個孻仔。 摩西 講：「𠊎係暫時住在外邦个旅客」。佢就㧯這細人仔安到 革舜 。</verse>
				<verse number="23">過盡多年， 埃及 王死掉， 以色列 人還係過等奴才个生活。佢等向上帝哀求，求佢幫助佢等脫離苦海。</verse>
				<verse number="24">上帝聽到佢等个求喊，想到佢識㧯佢等个祖先 亞伯拉罕 、 以撒 、 雅各 所立个約。</verse>
				<verse number="25">上帝看到 以色列 人做苦工个情況，非常關心佢等。</verse>
			</chapter>
			<chapter number="3">
				<verse number="1">摩西 為佢个丈人老 米甸 祭司 葉特羅 掌羊；有一日，佢將羊群帶過沙漠，去到上帝个山，就係 何烈 山。</verse>
				<verse number="2">在該位，上主个天使對竻藪个火焰中向 摩西 顯現。 摩西 看到竻仔𤏸火，總係無燒掉。</verse>
				<verse number="3">佢想：「樣恁奇怪，竻仔樣毋會燒掉呢？𠊎愛過去看這個大異象。」</verse>
				<verse number="4">主上帝看到 摩西 行前來，就對竻藪中喊佢：「 摩西 ！ 摩西 ！」 摩西 應講：「𠊎在這位！」</verse>
				<verse number="5">上帝講：「做毋得再行前來。脫掉你个鞋，因為你所企个地方係聖地。」</verse>
				<verse number="6">佢又講：「𠊎係若祖先个上帝，係 亞伯拉罕 个上帝， 以撒 个上帝， 雅各 个上帝。」 摩西 遮等面，毋敢看上帝。</verse>
				<verse number="7">上主講：「𠊎已經看到𠊎个子民在 埃及 受苦；𠊎已經聽到佢等受監工管轄、發出个哀求。佢等个痛苦，𠊎攏總知。</verse>
				<verse number="8">所以𠊎下來，愛對 埃及 人手中將佢等救出來，𢱋佢等到盡肥、又闊又大、流乳㧯蜜个地方去：該所在係 迦南 人、 赫 人、 亞摩利 人、 比利洗 人、 希未 人㧯 耶布斯 人住个地方。</verse>
				<verse number="9">𠊎確實聽到 以色列 人哀求个聲，也看到 埃及 人樣般欺負佢等。</verse>
				<verse number="10">這下𠊎愛派你去 埃及 王該位，將吾子民 以色列 人對 埃及 𢱋出來。」</verse>
				<verse number="11">總係 摩西 對上帝講：「𠊎算麼介？𠊎樣做得去 埃及 王該位，將 以色列 人對 埃及 𢱋出來呢？」</verse>
				<verse number="12">上帝應講：「𠊎愛㧯你共下。你𢱋吾子民出 埃及 以後，你等愛在這山頂敬拜𠊎；這就係𠊎派你去个證據。」</verse>
				<verse number="13">摩西 對上帝講：「當𠊎去㧯 以色列 人講：『你等祖先个上帝派𠊎到你等這位來』，佢等會問：『佢安到麼介名？』該時𠊎愛樣般㧯佢等講呢？」</verse>
				<verse number="14">上帝對 摩西 講：「𠊎係自有永有个 。你去㧯 以色列 人講：『該自有永有个派𠊎到你等這位來。』」</verse>
				<verse number="15">上帝又對 摩西 講：「你愛對 以色列 人恁樣講：『上主 — 你等祖先个上帝，就係 亞伯拉罕 个上帝， 以撒 个上帝， 雅各 个上帝，派𠊎到你等這位來。』𠊎个名永遠安到上主，世世代代全部愛恁樣紀念𠊎。</verse>
				<verse number="16">你去召集 以色列 人个長老，㧯佢等講：『上主 — 你等祖先个上帝，就係 亞伯拉罕 、 以撒 、 雅各 个上帝，識向𠊎顯現，講：𠊎實在看顧你等，𠊎已經看到 埃及 人樣般欺負你等。</verse>
				<verse number="17">𠊎決定愛𢱋你等出 埃及 。你等已經受盡困苦；𠊎愛帶你等到流乳㧯蜜、盡肥个土地，就係 迦南 人、 赫 人、 亞摩利 人、 比利洗 人、 希未 人㧯 耶布斯 人住个地方。』</verse>
				<verse number="18">「𠊎个子民會聽你个話。然後你愛帶 以色列 該兜長老去見 埃及 王，對佢講：『上主 — 希伯來 人个上帝識向𠊎等顯現。這下請你准𠊎等行三日个路，到曠野去向上主 — 𠊎等个上帝獻祭。』</verse>
				<verse number="19">𠊎知，若毋係𠊎迫佢， 埃及 王就毋會放你等走。</verse>
				<verse number="20">總係𠊎愛用𠊎大能个手行各樣个神蹟來刑罰 埃及 。到最尾 埃及 王就會放你等走。</verse>
				<verse number="21">「𠊎愛在 埃及 人个面前施恩給𠊎个子民；所以，你等離開該位个時，你等毋會空手走。</verse>
				<verse number="22">以色列 个婦女逐儕愛到隔壁个屋下去，對 埃及 㧯外族个婦女討金銀㧯衫褲。你等愛將這兜東西給子女掛在身上；恁樣你等就將 埃及 人个財富搶走。」</verse>
			</chapter>
			<chapter number="4">
				<verse number="1">摩西 應上主講：「若係 以色列 人毋信𠊎，毋聽𠊎个話，講你毋識向𠊎顯現過，𠊎愛樣般好呢？」</verse>
				<verse number="2">上主問佢：「你手拿等个係麼介？」 佢應講：「係柺棍仔。」</verse>
				<verse number="3">上主講：「將它㧒到地上。」 摩西 將柺棍仔一㧒下去，棍仔就變做蛇；佢就閃開。</verse>
				<verse number="4">上主對 摩西 講：「伸手去捉蛇尾。」 摩西 就伸手捉到蛇尾，蛇又變轉柺棍仔。</verse>
				<verse number="5">上主講：「恁樣就做得向 以色列 人證明，上主 — 佢等祖先个上帝，就係 亞伯拉罕 个上帝， 以撒 个上帝，㧯 雅各 个上帝，識向你顯現。」</verse>
				<verse number="6">上主又對 摩西 講：「將手伸入胸前个衫肚。」 摩西 就將手伸入去；抽出來个時，手就發癩，像雪恁白。</verse>
				<verse number="7">上主又講：「再將手伸入胸前个衫肚。」 摩西 就照恁樣做，再抽出來个時，手已經恢復，㧯身體个其他部份共樣。</verse>
				<verse number="8">上主講：「若係佢等毋信你，抑係毋信第一隻神蹟，恁樣這一隻神蹟一定會使佢等相信。</verse>
				<verse number="9">若係這兩隻神蹟還無辦法使佢等相信，佢等還係毋聽你个話，你就拿一些 尼羅 河个水，潑在地上，水會變做血。」</verse>
				<verse number="10">總係 摩西 講：「上主啊，𠊎一溜裡無嘴碼；你㧯𠊎講話以後也無改變。𠊎本來就係一個嘴鈍舌拙个人。」</verse>
				<verse number="11">上主對佢講：「麼人給人口才？麼人使人耳聾、啞口？麼人使人看得到？麼人使人瞙目？敢毋係𠊎 — 上主。</verse>
				<verse number="12">你做你去；𠊎會賜你口才，𠊎會教你應該講个話。」</verse>
				<verse number="13">總係， 摩西 應講：「毋好！主啊，請你派別人去。」</verse>
				<verse number="14">所以，上主對 摩西 發譴，講：「你敢毋係有一個阿哥 利未 人 亞倫 ？𠊎知佢當有口才。佢堵好出來迎接你；佢一定當歡喜看到你。</verse>
				<verse number="15">你㧯佢講應該講麼介；𠊎會賜你㧯佢有口才；𠊎會教你等應該做麼介。</verse>
				<verse number="16">佢愛做你个嘴，代你向民眾講話；你就像上帝一樣，指示佢講麼介。</verse>
				<verse number="17">你愛帶等這支柺棍仔，因為你愛用它來行神蹟。」</verse>
				<verse number="18">所以， 摩西 轉到厥丈人老 葉特羅 該位去，對佢講：「請你俾𠊎轉 埃及 去，看𠊎个親人係毋係還在。」 葉特羅 對 摩西 講：「做你安心去！」</verse>
				<verse number="19">當 摩西 還在 米甸 个時，上主對佢講：「你愛轉 埃及 去！該兜想愛㓾你个人全部死掉了。」</verse>
				<verse number="20">然後 摩西 帶等佢个𡜵娘㧯兩個孻仔，俾佢等騎驢仔，轉 埃及 ；佢个手擎等上帝个柺棍仔。</verse>
				<verse number="21">上主又對 摩西 講：「轉到 埃及 以後，𠊎愛賜你能力行各樣个神蹟，你愛在 埃及 王面前行出來。總係𠊎愛使佢心硬，毋放𠊎个子民走。</verse>
				<verse number="22">該時，你愛㧯 埃及 王講：『上主恁樣講： 以色列 係𠊎个孻仔、𠊎个長子。</verse>
				<verse number="23">𠊎對你講過：准𠊎个孻仔去敬拜𠊎。你毋肯，所以𠊎愛㓾你个孻仔、你个長子。』」</verse>
				<verse number="24">在轉 埃及 个路上， 摩西 搭帳篷過夜，上主在該位堵到佢，想愛㓾佢。</verse>
				<verse number="25">所以厥𡜵娘 西坡拉 拿一垤當利个石片，割掉厥孻仔个包皮，用它憑 摩西 个腳 。就係因為這個割禮， 西坡拉 正對 摩西 講：「你係𠊎用割禮个血換來个新郎。」恁樣，上主正無㓾 摩西 。</verse>
				<verse number="26"></verse>
				<verse number="27">該時，上主對 亞倫 講：「你去曠野迎接 摩西 。」所以 亞倫 去，在上帝个山堵到 摩西 ，㧯佢唚。</verse>
				<verse number="28">摩西 將上主愛佢去講个話、愛佢行个神蹟全部㧯 亞倫 講。</verse>
				<verse number="29">摩西 㧯 亞倫 就去 埃及 ，召集 以色列 該兜長老。</verse>
				<verse number="30">亞倫 將上主㧯 摩西 講个話全部㧯佢等講； 摩西 也在人民面前行上主愛佢行个神蹟。</verse>
				<verse number="31">人民全部相信； 以色列 人一聽到上主看顧佢等，也知上主看到佢等受苦个情形，就全部伏下來敬拜。</verse>
			</chapter>
			<chapter number="5">
				<verse number="1">後來 摩西 㧯 亞倫 去見 埃及 王，講：「上主 — 以色列 个上帝恁樣講：『放𠊎个子民走，俾佢等到曠野過節來敬拜𠊎。』」</verse>
				<verse number="2">埃及 王講：「上主係麼人？𠊎樣使聽佢个話？𠊎做麼介愛放 以色列 人走？𠊎毋認識上主；𠊎也毋放 以色列 人走。」</verse>
				<verse number="3">摩西 㧯 亞倫 應講：「 希伯來 人个上帝已經對𠊎等顯現。這下請你准𠊎等行三日个路，到曠野去向上主 — 𠊎等个上帝獻祭。若無恁樣做，佢愛用發瘟抑係戰爭來攻擊𠊎等。」</verse>
				<verse number="4">埃及 王對佢等講：「 摩西 ， 亞倫 ！你等係麼介意思？愛俾該兜人荒廢工作係麼？喊該兜奴才遽遽去做事！</verse>
				<verse number="5">以色列 人已經比 埃及 人較多，你等還想愛佢等毋做苦工係麼？」</verse>
				<verse number="6">該日，國王命令 埃及 監工㧯 以色列 人个工頭，講：</verse>
				<verse number="7">「不准再給 以色列 人做磚仔个草料！喊佢等自家去尋，</verse>
				<verse number="8">總係愛佢等完成㧯以前共樣个數量，一垤也做毋得少。佢等懶尸正會要求𠊎俾佢等去向佢等个上帝獻祭！</verse>
				<verse number="9">喊佢等做較重个工作，較無閒兜仔，佢等正毋會有時間聽這兜無影無跡个話。」</verse>
				<verse number="10">埃及 監工㧯 以色列 人个工頭就去㧯 以色列 人講：「國王命令無再給你等草料。</verse>
				<verse number="11">佢講：無論行幾遠，你等一定愛自家去尋草料，磚仔个數量一垤也做毋得少。」</verse>
				<verse number="12">因為恁樣， 以色列 人到 埃及 逐所在去尋草料。</verse>
				<verse number="13">監工迫佢等，對佢等講：「逐日交出个磚仔，愛㧯以前給你等草料个時平多！」</verse>
				<verse number="14">國王派个監工鞭打佢等所指派 以色列 人个工頭，責備佢等講：「做麼介工人昨晡日今晡日無交出㧯以前平多个磚仔呢？」</verse>
				<verse number="15">以色列 人个工頭就去懇求國王，講：「國王，做麼介恁樣對待你个僕人？</verse>
				<verse number="16">監工毋給你个僕人草料，總係愛𠊎等交出㧯以前平多个磚仔！你看！你个僕人全部被人打，其實係若百姓毋著。」</verse>
				<verse number="17">埃及 王講：「你等恁懶尸！你等就係因為恁懶尸，所以正會求𠊎俾你等去向上主獻祭。</verse>
				<verse number="18">遽遽轉去做事！𠊎等毋會給你等草料，你等還係愛交出㧯以前平多个磚仔。」</verse>
				<verse number="19">以色列 人个工頭一聽到佢等逐日還係愛交出㧯以前平多个磚仔，就知慘了。</verse>
				<verse number="20">佢等離開王宮，正看到 摩西 㧯 亞倫 兩儕在外背等佢等。</verse>
				<verse number="21">佢等就對 摩西 㧯 亞倫 講：「上主一定知你等做个係麼介事；你等害𠊎等在國王㧯佢个官員面前有臭名，俾佢等有㓾𠊎等个理由。上主一定會責罰你等！」</verse>
				<verse number="22">摩西 轉到上主面前，講：「上主啊，你做麼介害你个子民？做麼介派𠊎來？</verse>
				<verse number="23">自從𠊎到國王面前為你傳話，佢反轉還較厲害對付你个子民，你一些也無救佢等！」</verse>
			</chapter>
			<chapter number="6">
				<verse number="1">上主對 摩西 講：「你會黏時看到𠊎樣般對付 埃及 王。𠊎愛迫佢放𠊎个子民走。𠊎愛迫佢將佢等趕出佢个國家。」</verse>
				<verse number="2">上帝指示 摩西 講：「𠊎係上主。</verse>
				<verse number="3">𠊎頭擺對 亞伯拉罕 、 以撒 、 雅各 顯現做全能个上帝；總係，𠊎毋識將𠊎个名 — 上主啟示給佢等。</verse>
				<verse number="4">𠊎識㧯佢等立約，應許將佢等做旅客暫時住過个 迦南 地賜給佢等。</verse>
				<verse number="5">這下𠊎聽到 以色列 人因為被 埃及 人欺負所發出个噌聲，𠊎就想到𠊎个約。</verse>
				<verse number="6">所以你去㧯 以色列 人講：『𠊎係上主；𠊎愛救你等，對 埃及 人給你等㧡个重擔中救你等出來。𠊎愛伸出大能个手重重責罰 埃及 人；𠊎愛拯救你等。</verse>
				<verse number="7">𠊎愛將你等看做𠊎个子民，𠊎也愛做你等个上帝。當你等對 埃及 人給你等个重擔中得到自由个時，你等就會知𠊎係上主，係你等个上帝。</verse>
				<verse number="8">𠊎識應許 亞伯拉罕 、 以撒 、 雅各 ，所以𠊎一定愛將你等帶到該地方，將該地方賜給你等做產業。𠊎就係上主。』」</verse>
				<verse number="9">摩西 將這兜話㧯 以色列 人講，總係佢等毋肯聽，因為艱苦个奴才生活已經使佢等灰心失志。</verse>
				<verse number="10">所以上主對 摩西 講：</verse>
				<verse number="11">「你去㧯國王講，愛俾 以色列 人離開 埃及 。」</verse>
				<verse number="12">總係 摩西 在上主面前講：「連 以色列 人全毋聽𠊎个話， 埃及 王樣會聽𠊎講呢？𠊎係一個嘴鈍舌拙个人。」</verse>
				<verse number="13">上主還係命令 摩西 㧯 亞倫 到 以色列 人㧯 埃及 王該位去，將 以色列 人對 埃及 帶出來。</verse>
				<verse number="14">下背所記个係 以色列 个族長。 雅各 个長子 呂便 有四個孻仔： 哈諾 、 法路 、 希斯崙 㧯 迦米 ；佢等成做 呂便 支族。</verse>
				<verse number="15">西緬 有六個孻仔： 耶母利 、 雅憫 、 阿轄 、 雅斤 、 瑣轄 㧯 少羅 — 少羅 係 迦南 个細妹仔所𫱔个；佢等成做 西緬 支族。</verse>
				<verse number="16">利未 有三個孻仔： 革順 、 哥轄 㧯 米拉利 ；佢等成做 利未 支族。 利未 食到一百三十七歲。</verse>
				<verse number="17">革順 有兩個孻仔： 立尼 㧯 示每 ；佢等逐儕有盡多子孫。</verse>
				<verse number="18">哥轄 有四個孻仔： 暗蘭 、 以斯哈 、 希伯倫 㧯 烏薛 。 哥轄 食到一百三十三歲。</verse>
				<verse number="19">米拉利 有兩個孻仔： 抹利 㧯 母示 。這就係 利未 支族㧯佢等个後代。</verse>
				<verse number="20">暗蘭 討自家个阿姑 約基別 ；姖𫱔 亞倫 㧯 摩西 。 暗蘭 食到一百三十七歲。</verse>
				<verse number="21">以斯哈 有三個孻仔： 可拉 、 尼斐 㧯 細基利 。</verse>
				<verse number="22">烏薛 有三個孻仔： 米沙利 、 以利撒反 㧯 西提利 。</verse>
				<verse number="23">亞倫 討 以利沙巴 ；姖係 亞米拿達 个妹仔、 拿順 个老妹。 以利沙巴 為 亞倫 𫱔四個孻仔： 拿答 、 亞比戶 、 以利亞撒 㧯 以他瑪 。</verse>
				<verse number="24">可拉 𫱔三個孻仔： 亞惜 、 以利加拿 㧯 亞比亞撒 ；佢等係 可拉 宗族各房个祖先。</verse>
				<verse number="25">亞倫 个孻仔 以利亞撒 討 普鐵 个妹仔；姖𫱔 非尼哈 。 這兜全部係 利未 支族下各宗族、家族个族長。</verse>
				<verse number="26">亞倫 㧯 摩西 這兩儕，上主識命令佢等講：「你等去將 以色列 人个軍隊一隊一隊對 埃及 𢱋出來。」</verse>
				<verse number="27">對 埃及 王講愛放 以色列 人走个，也係 摩西 㧯 亞倫 。</verse>
				<verse number="28">以前上主在 埃及 對 摩西 講話个時，</verse>
				<verse number="29">佢講：「𠊎係上主；𠊎㧯你講个話，你全部愛㧯 埃及 王講。」</verse>
				<verse number="30">總係 摩西 在上主面前講：「你知𠊎係嘴鈍舌拙个人，國王樣會聽𠊎个話呢？」</verse>
			</chapter>
			<chapter number="7">
				<verse number="1">上主對 摩西 講：「𠊎愛使你在國王面前像上帝共樣，若哥 亞倫 愛代你講話，像做你个先知。</verse>
				<verse number="2">你愛將𠊎命令你講个話全部㧯 亞倫 講，喊若哥向國王講，愛佢放 以色列 人離開這個國家。</verse>
				<verse number="3">總係𠊎愛使國王心硬，無論𠊎對 埃及 行幾多神蹟奇事，</verse>
				<verse number="4">佢還係毋聽你等个話。最後𠊎愛嚴嚴責罰 埃及 ；𠊎愛𢱋𠊎个軍隊 以色列 个子民離開這地方。</verse>
				<verse number="5">𠊎對 埃及 出手，𢱋 以色列 人離開佢等國家个時，佢等就會知𠊎係上主。」</verse>
				<verse number="6">摩西 㧯 亞倫 就完全照上主所命令个去做。</verse>
				<verse number="7">佢等㧯國王交涉个時， 摩西 已經八十歲， 亞倫 八十三歲。</verse>
				<verse number="8">上主對 摩西 㧯 亞倫 講：</verse>
				<verse number="9">「若係國王愛你等行一隻神蹟來證明你等个身份，你愛吩咐 亞倫 將佢个柺棍仔㧒在國王面前，該支柺棍仔會變做蛇。」</verse>
				<verse number="10">摩西 㧯 亞倫 去見國王，佢等照上主个命令去做： 亞倫 將柺棍仔㧒在國王㧯官員面前，該支柺棍仔就變做蛇。</verse>
				<verse number="11">國王黏時召集 埃及 个星象家㧯行邪術个；佢等也變法術來做共樣个事。</verse>
				<verse number="12">佢等逐儕將手中个柺棍仔㧒在地上，也全部變做蛇；總係 亞倫 个柺棍仔吞掉佢等个柺棍仔。</verse>
				<verse number="13">照上主所講个，國王个心還係恁硬；佢毋聽 摩西 㧯 亞倫 个話。</verse>
				<verse number="14">上主對 摩西 講：「 埃及 王心硬，佢毋放𠊎个子民走。</verse>
				<verse number="15">天光朝晨，佢去 尼羅 河个時，你去見佢。將你該支變過蛇个柺棍仔帶去，在河壩滣等佢。</verse>
				<verse number="16">你愛對佢講：『上主 — 希伯來 人个上帝派𠊎來，愛你放佢个子民走，俾佢等在曠野敬拜佢，總係你一直毋肯聽。</verse>
				<verse number="17">上主恁樣講，這下你會對佢所行个來知佢就係上主。你看，𠊎愛用這支柺棍仔打河壩水，水會變做血，</verse>
				<verse number="18">魚仔全部會死淨淨，河壩水會臭掉， 埃及 人會毋敢啉這水。』」</verse>
				<verse number="19">上主對 摩西 講：「你愛㧯 亞倫 講，喊佢手擎佢个柺棍仔，伸手向 埃及 所有个河壩、運河、湖㧯陂塘。水全部會變做血，全國滿地係血，連水桶、石缸底背也全部係血。」</verse>
				<verse number="20">所以， 摩西 㧯 亞倫 照上主个吩咐去做。在國王㧯佢个官員面前， 亞倫 擎起柺棍仔打河壩水，河水全部變做血。</verse>
				<verse number="21">河壩肚个魚仔死掉，河壩水也臭掉， 埃及 人無法度食這個水。 埃及 逐地方个水全部變做血。</verse>
				<verse number="22">總係 埃及 行邪術个也行法術，共樣使水變做血。照上主所講个，國王个心比以前還較硬，毋肯聽 摩西 㧯 亞倫 个話。</verse>
				<verse number="23">毋單淨恁樣，國王轉去王宮，無將這事放在心肚。</verse>
				<verse number="24">所有个 埃及 人全部無法食河壩个水，高不將在河壩滣挖井食地下水。</verse>
				<verse number="25">上主打河壩水後，這災難連續七日。</verse>
			</chapter>
			<chapter number="8">
				<verse number="1">上主對 摩西 講：「你去見 埃及 王，對佢講：『上主恁樣講：放𠊎个子民走，俾佢等去敬拜𠊎。</verse>
				<verse number="2">若係你還係毋肯，𠊎愛責罰你个國家，使全國滿地有蛙仔。</verse>
				<verse number="3">尼羅 河肚會有拶拶个蛙仔；蛙仔對河壩肚愛跳出來，進入你个王宮、你个間肚，跳上你个眠床，到你官員个屋下，到你人民个屋下，甚至跳入灶下，跳入鑊頭肚，</verse>
				<verse number="4">也愛跳到你身項，你官員个身項，㧯你人民个身項。』」</verse>
				<verse number="5">上主對 摩西 講：「你愛㧯 亞倫 講，喊佢手擎佢个柺棍仔，伸向河壩、運河、湖㧯陂塘，喊蛙仔出來，使全國滿地係蛙仔。」</verse>
				<verse number="6">所以 亞倫 伸出佢个柺棍仔，指等 埃及 个水，蛙仔就跳出來，滿地拶拶。</verse>
				<verse number="7">總係行邪術个也變法術，喊蛙仔跳到地面上。</verse>
				<verse number="8">國王喊 摩西 㧯 亞倫 來，講：「請你等求上主逐走該兜蛙仔離開𠊎㧯𠊎个子民，𠊎就放你个人民走，俾佢等去向上主獻祭。」</verse>
				<verse number="9">摩西 應講：「𠊎願意為你祈求。請你定一個時間，𠊎來為你、你个官員、㧯你个人民祈禱。該時，所有个蛙仔全部會滅掉，只有 尼羅 河肚還有。」</verse>
				<verse number="10">國王應講：「請你天光日為𠊎祈求。」 摩西 講：「𠊎會照你所要求个做，你就知天下無像上主 — 𠊎等个上帝恁樣个神。</verse>
				<verse number="11">蛙仔會離開你、你个王宮、你个官員，㧯你个人民，只有 尼羅 河肚還有。」</verse>
				<verse number="12">摩西 㧯 亞倫 離開 埃及 王出去； 摩西 祈禱上主，求上主將降給 埃及 王个蛙仔除掉。</verse>
				<verse number="13">上主照 摩西 所求个去做。所有在屋肚、庭院㧯田肚个蛙仔全部死掉。</verse>
				<verse number="14">埃及 人將死蛙仔堆做一堆一堆，全國臭到無葛無煞。</verse>
				<verse number="15">總係，照上主所講个，國王一看到災難停掉，心又硬起來，毋肯聽 摩西 㧯 亞倫 个話。</verse>
				<verse number="16">上主對 摩西 講：「你愛㧯 亞倫 講，用佢个柺棍仔打地上个泥粉，使 埃及 全地个泥粉全部變做蝨乸。」</verse>
				<verse number="17">佢等就恁樣做。 亞倫 用柺棍仔打地上个泥粉， 埃及 全地个泥粉就變做蝨乸，人㧯頭牲身項全部有蝨乸。</verse>
				<verse number="18">行邪術个也想用佢等个法術使蝨乸出現，總係變毋出來。該時，人㧯頭牲身項全部有蝨乸。</verse>
				<verse number="19">行邪術个㧯國王講：「這件事係上帝親手做个！」總係，照上主所講个，國王个心還係恁硬，毋聽 摩西 㧯 亞倫 个話。</verse>
				<verse number="20">上主對 摩西 講：「天光日打早，你愛到河壩滣去見國王，㧯佢講：『上主恁樣講：放𠊎个子民走，俾佢等去敬拜𠊎。</verse>
				<verse number="21">𠊎警告你，你若毋肯放𠊎个子民走，𠊎就愛派歸大群个烏蠅飛到你、你个官員，㧯你个人民身上。 埃及 人家家戶戶會有烏蠅，滿地係烏蠅。</verse>
				<verse number="22">總係𠊎个子民所住个 歌珊 地區毋會有半隻烏蠅。𠊎恁樣做係愛俾你知，𠊎係全地个上主。</verse>
				<verse number="23">𠊎愛使𠊎个子民㧯你个人民有分別 。這神蹟天光日就會實現。』」</verse>
				<verse number="24">上主就用歸大群个烏蠅飛入國王个王宮，也飛入佢官員个屋下； 埃及 全地受到烏蠅个災害。</verse>
				<verse number="25">國王喊 摩西 㧯 亞倫 來，講：「你等去啊，就在𠊎个國內向你等个上帝獻祭。」</verse>
				<verse number="26">摩西 講：「恁樣做毋得！若係𠊎等獻頭牲給上主 — 𠊎等个上帝， 埃及 人會惱死𠊎等；俾 埃及 人看到𠊎等用頭牲獻祭會惹佢等發譴，佢等會用石頭㧹死𠊎等！</verse>
				<verse number="27">𠊎等一定愛照上主 — 𠊎等个上帝所命令个，行三日路，到曠野去向佢獻祭。」</verse>
				<verse number="28">國王講：「𠊎准你等到曠野去，向上主 — 你等个上帝獻祭，總係你等毋好走忒遠。你等愛為𠊎祈禱。」</verse>
				<verse number="29">摩西 應講：「𠊎一離開就祈求上主在天光日使烏蠅全部離開你、你个官員㧯人民。總係國王毋好再騙𠊎等，阻擋𠊎等去向上主獻祭。」</verse>
				<verse number="30">摩西 離開 埃及 王，去向上主祈禱；</verse>
				<verse number="31">上主照 摩西 所祈求个去做。烏蠅離開 埃及 王、佢个官員㧯人民，連一隻也無留下來。</verse>
				<verse number="32">總係這擺，國王个心還係恁硬，毋放 以色列 人走。</verse>
			</chapter>
			<chapter number="9">
				<verse number="1">上主對 摩西 講：「你去見 埃及 王，對佢講：『上主 — 希伯來 人个上帝恁樣講：「放𠊎个子民走，俾佢等去敬拜𠊎。」</verse>
				<verse number="2">若係你毋肯放佢等走，還係強強留佢等，</verse>
				<verse number="3">上主愛降一個得人驚个災難來責罰你：你所有个頭牲，就係你个馬、驢、駱駝、牛、綿羊㧯山羊，全部會發瘟到當厲害。</verse>
				<verse number="4">上主愛使 以色列 人个頭牲㧯 埃及 人个頭牲有分別， 以色列 人个頭牲一隻也毋會死。</verse>
				<verse number="5">上主已經決定時間：天光日上主愛在全國實行這個事。』」</verse>
				<verse number="6">第二日，上主照佢所講个去做。所有 埃及 人个頭牲全部發瘟死掉，總係 以色列 人个頭牲一隻也無死。</verse>
				<verse number="7">國王打探，知 以色列 人个頭牲一隻也無死。總係佢个心還係恁硬，毋放 以色列 人走。</verse>
				<verse number="8">後來，上主對 摩西 㧯 亞倫 講：「你等對灶爐坑拿幾揢火灰， 摩西 愛在國王面前將這火灰委在空中。</verse>
				<verse number="9">這兜火灰會像泥粉共樣飛到 埃及 全地，火灰一黏到人抑係頭牲，人㧯頭牲就全部起皰、發瘡仔。」</verse>
				<verse number="10">所以佢等去拿火灰，到國王面前。 摩西 將火灰委在空中；這火灰使人㧯頭牲全部起皰、發瘡仔。</verse>
				<verse number="11">該兜行邪術个無辦法企在 摩西 面前，因為佢等像其他 埃及 人共樣全身發瘡仔。</verse>
				<verse number="12">照上主對 摩西 講過个，佢使 埃及 王心硬，毋肯聽 摩西 㧯 亞倫 个話。</verse>
				<verse number="13">後來，上主㧯 摩西 講：「你天光日打早去見國王，對佢講：『上主 — 希伯來 人个上帝恁樣講：放𠊎个子民走，俾佢等去敬拜𠊎。</verse>
				<verse number="14">這擺你若毋聽話，𠊎毋單淨愛責罰你个官員㧯人民，連你也愛受刑罰。恁樣你就知在世上無像𠊎恁樣个。</verse>
				<verse number="15">若係𠊎伸手用瘟仔責罰你㧯你个人民，你等早就對地上消滅了。</verse>
				<verse number="16">總係為到向你顯出𠊎个力量，𠊎留你个生命，俾𠊎个名傳到滿天下。</verse>
				<verse number="17">到這下你還係驕傲，毋放𠊎个子民走。</verse>
				<verse number="18">天光日這時，𠊎愛降冰雹；在 埃及 建國以來毋識落過恁大个冰雹。</verse>
				<verse number="19">這下你愛下令將你个頭牲㧯你在田野个一切全部逐入屋肚。若無，冰雹會打在人㧯所有在田野个頭牲身項；佢等全部會死掉。』」</verse>
				<verse number="20">國王个一兜官員因為上主个話來驚到，就將佢等个奴才㧯頭牲全部逐入屋肚。</verse>
				<verse number="21">總係有兜人還係毋聽上主个警告，由在俾佢等个奴才㧯頭牲留在田野。</verse>
				<verse number="22">上主對 摩西 講：「你愛向天擎手， 埃及 全國會有冰雹降下來，落在人民、頭牲㧯所有个農作物頂高。」</verse>
				<verse number="23">所以 摩西 向天擎起柺棍仔，上主就響雷公、降冰雹，𥍉爧到地上；上主降冰雹在 埃及 全國。</verse>
				<verse number="24">該時大垤冰雹摻等𥍉爧打下來；這係 埃及 建國以來最厲害个冰雹災難。</verse>
				<verse number="25">冰雹將 埃及 境內田野个一切打壞，包含所有个人、頭牲、田肚个農作物，㧯所有个樹木。</verse>
				<verse number="26">只有 以色列 人住个 歌珊 地區無落冰雹。</verse>
				<verse number="27">埃及 王派人喊 摩西 㧯 亞倫 來見佢，對佢等講：「這擺𠊎有犯罪了。𠊎㧯𠊎个人民全部毋著了；上主係著个。</verse>
				<verse number="28">請你等向上主祈禱！𠊎等無法承受這雷公㧯冰雹个災難！𠊎放你等走；你等毋使再過留在這位。」</verse>
				<verse number="29">摩西 對佢講：「𠊎一離開這城就會擎手向上主祈求；雷公就會停止，冰雹也無再落下來。恁樣，你就知大地係屬上主个。</verse>
				<verse number="30">總係𠊎知你㧯你个官員還係毋敬畏主上帝。」</verse>
				<verse number="31">(麻㧯大麥全部被冰雹打壞；因為該時大麥當標串，麻也當開花；</verse>
				<verse number="32">只有小麥㧯粗麥無損傷，因為還吂標串。)</verse>
				<verse number="33">摩西 離開 埃及 王，出城後，擎手向上主祈禱。雷公、冰雹黏時停止，也無再落大水。</verse>
				<verse number="34">國王看到這災難停下來，佢又開始犯罪；佢㧯佢官員个心又硬起來。</verse>
				<verse number="35">照上主早就通過 摩西 講過个， 埃及 王个心還係恁硬，毋肯放 以色列 人走。</verse>
			</chapter>
			<chapter number="10">
				<verse number="1">後來，上主對 摩西 講：「你去見 埃及 王。𠊎使佢㧯佢个官員心硬，目的係愛在佢等當中行𠊎這兜神蹟，</verse>
				<verse number="2">也愛俾你將𠊎樣般行神蹟、使 埃及 人無葛無煞个經過，講給你个子子孫孫聽，恁樣你等就會知𠊎係上主。」</verse>
				<verse number="3">所以， 摩西 㧯 亞倫 去見 埃及 王，對佢講：「上主 — 希伯來 人个上帝恁樣講：『你到麼介時節正會在𠊎面前降服呢？愛放𠊎个子民走，俾佢等去敬拜𠊎！</verse>
				<verse number="4">若係你繼續毋肯放𠊎个子民走，天光日𠊎愛派草蜢到你个國內。</verse>
				<verse number="5">該兜草蜢會多到遮滿全國，使人看毋到地面。該兜無被冰雹打壞个，連賸下來个樹仔，全部會被草蜢食淨淨。</verse>
				<verse number="6">該兜草蜢會充滿你个王宮，㧯你个官員並人民所住个地方。這得人驚个情況係你个祖先世世代代直到今晡日毋識看過个。』」 摩西 講完這話，就轉身對 埃及 王面前離開。</verse>
				<verse number="7">國王个官員對王講：「這個人㩢耍𠊎等愛到幾時呢？放 以色列 人走啊，俾佢等去敬拜上主 — 佢等个上帝。 埃及 已經會滅亡了，敢講你毋知？」</verse>
				<verse number="8">所以國王喊 摩西 㧯 亞倫 倒轉來，對佢等講：「𠊎俾你等去敬拜上主 — 你等个上帝，總係㖠兜人愛去呢？」</verse>
				<verse number="9">摩西 應講：「𠊎等愛全部去，無論老个、後生个；𠊎等愛帶走𠊎等个子女㧯牛羊，因為𠊎等一定愛在該位過節，敬拜𠊎等个上主。」</verse>
				<verse number="10">國王講：「若係𠊎俾你等帶走你等个婦女㧯細人仔，該就愛庇佑上主㧯你等同在噢！其實，你等想愛造反！</verse>
				<verse number="11">做毋得！若係你等愛去敬拜上主，只有你等个男人做得去。」講煞，佢就將 摩西 㧯 亞倫 逐出去。</verse>
				<verse number="12">後來上主對 摩西 講：「你愛向 埃及 地擎手，使草蜢遮滿全國；它兜愛來食淨地上所有个植物，將無被冰雹打壞个一切食淨淨。」</verse>
				<verse number="13">所以 摩西 擎起佢个柺棍仔指向 埃及 地；上主就吹起一陣東風，在地面上透日透夜吹；到第二日朝晨，吹來當多个草蜢。</verse>
				<verse number="14">該兜草蜢一大群、一大群飛等來，遮滿全國。恁大群个草蜢係頭擺吂識有、將來也毋會有个。</verse>
				<verse number="15">該兜草蜢遮蓋大地；地上歸片烏烏。該兜草蜢將無被冰雹打壞个植物全部食淨淨，連樹頂个果子也食淨淨。 埃及 全地，無論田肚抑係樹頂，看毋到半些青色个。</verse>
				<verse number="16">所以，國王趕緊召見 摩西 㧯 亞倫 ，講：「𠊎得罪上主 — 你等个上帝；𠊎也得罪你等。</verse>
				<verse number="17">這下請你等再原諒𠊎一擺，向上主 — 你等个上帝祈求，將這收老命个責罰解除。」</verse>
				<verse number="18">摩西 離開王，去向上主祈禱。</verse>
				<verse number="19">上主將東風變做一陣盡強个西風，將草蜢全部捲起來，吹到 紅海 。 埃及 國內連一隻草蜢也無了。</verse>
				<verse number="20">總係上主使國王心硬，佢還係毋放 以色列 人走。</verse>
				<verse number="21">後來，上主對 摩西 講：「你愛向天擎手，使得人驚个烏暗將 埃及 全國遮到伸手不見五爪。」</verse>
				<verse number="22">摩西 向天擎手，大烏暗遮蓋 埃及 全國三日久。</verse>
				<verse number="23">埃及 人面對面也看毋到，三日个當中無人敢離開自家个屋下；總係 以色列 人住个地方全部有光。</verse>
				<verse number="24">國王召見 摩西 ，講：「你等去敬拜上主啊！連你等个婦女、細人仔全部做得去；總係你等个牛羊一定愛留在這位。」</verse>
				<verse number="25">摩西 應講：「做毋得！你一定愛將獻牲祭㧯燒化祭个頭牲給𠊎等，𠊎等正做得向上主 — 𠊎等个上帝獻祭。</verse>
				<verse number="26">𠊎等愛帶𠊎等所有个頭牲走，連一隻蹄也做毋得留下來。𠊎等一定愛親身擇頭牲來敬拜上主 — 𠊎等个上帝；因為吂到該位以前，𠊎等毋知應該用麼介頭牲獻給上主。」</verse>
				<verse number="27">上主使 埃及 王心硬，佢還係毋肯放 以色列 人走。</verse>
				<verse number="28">國王對 摩西 講：「走開！毋好俾𠊎再看到你。𠊎㖠日再看到你，你就無命了！」</verse>
				<verse number="29">摩西 講：「你講个無毋著；你一定毋會再看到𠊎了！」</verse>
			</chapter>
			<chapter number="11">
				<verse number="1">上主對 摩西 講：「𠊎愛對 埃及 王㧯佢个人民降加一個災難。這擺以後，佢一定放你等走。事實上，佢會將你等全部逐出這地方。</verse>
				<verse number="2">這下你愛去㧯 以色列 人講，喊佢等男女逐儕去向鄰舍討金器㧯銀器。」</verse>
				<verse number="3">上主使 埃及 人尊敬 以色列 人。 埃及 王个官員㧯人民全部尊 摩西 做偉大个人物。</verse>
				<verse number="4">摩西 對 埃及 王講：「上主恁樣講：『今暗晡差毋多在半夜，𠊎愛行透 埃及 全地。</verse>
				<verse number="5">埃及 人每一個長子，對承接王位个王子到挨礱个奴婢所𫱔个長子，全部會死。頭胎个頭牲也全部會死。</verse>
				<verse number="6">埃及 全國會有大噭个聲音；這係自從毋識有，以後也毋會有个。</verse>
				<verse number="7">總係 以色列 人該位，連狗仔吠人抑係吠頭牲个聲音乜無。該時，你會知𠊎係上主；係𠊎使 埃及 人㧯 以色列 人有分別。』」</verse>
				<verse number="8">最後 摩西 講：「你這一切个官員全部愛到𠊎面前來，跪等求𠊎帶𠊎个同胞離開。到該時，𠊎正會離開。」 摩西 就譴到氣勃勃對 埃及 王面前行出去。</verse>
				<verse number="9">上主識對 摩西 講過：「 埃及 王還係毋聽你等个話，恁樣，𠊎就愛在 埃及 行還較多个神蹟。」</verse>
				<verse number="10">摩西 㧯 亞倫 在國王面前行這恁多神蹟，總係上主使國王心硬，佢還係毋放 以色列 人離開佢个國家。</verse>
			</chapter>
			<chapter number="12">
				<verse number="1">上主在 埃及 對 摩西 㧯 亞倫 講：</verse>
				<verse number="2">「這個月愛做正月，係你等一年个第一隻月。</verse>
				<verse number="3">你等愛對 以色列 全部人民講：在本月初十，逐家个家長一定愛為佢全家擇一隻細羊。</verse>
				<verse number="4">若係屋下人少，食毋掉歸隻羊，佢就愛㧯隔壁个鄰舍共下食一隻，照人數㧯各人个食量來分。</verse>
				<verse number="5">你等用綿羊抑係用山羊全部做得，總係一定愛用無缺點个、一歲大个羊牯。</verse>
				<verse number="6">到本月十四日臨暗仔， 以色列 全部个人民愛㓾佢等擇出來个羊牯。</verse>
				<verse number="7">逐家人愛拿兜血膏在門框㧯門楣頂，又愛在該間屋肚食羊肉。</verse>
				<verse number="8">該暗晡佢等一定愛食焙个羊肉、苦菜㧯無酵餅。</verse>
				<verse number="9">羊肉做毋得生食，也做毋得食水煮个，一定愛連頭、連腳㧯腹內，歸隻羊用焙个。</verse>
				<verse number="10">做毋得留到朝晨；食賸个愛在天光前燒掉。</verse>
				<verse number="11">你等食个時，愛遽遽食；愛繫𢫮腰帶，愛著鞋，拿等柺棍仔。這係上主个𨃟過節。</verse>
				<verse number="12">「該暗晡，𠊎愛行透 埃及 ，㓾死所有頭胎𫱔个，不管係人抑係頭牲，全部愛㓾死。𠊎愛責罰所有 埃及 个神明。𠊎係上主。</verse>
				<verse number="13">門框頂个血係你等屋仔个記號。當𠊎看到這血，𠊎愛𨃟過你等个屋下。𠊎責罰 埃及 人个時，災難一定毋會傷害你等。</verse>
				<verse number="14">逐年你等愛紀念這日，也應該慶祝上主這個節，做你等世世代代永遠个例規。」</verse>
				<verse number="15">上主講：「在這七日內，你等愛食無酵餅，做毋得食有酵个餅。你等愛在第一日除掉屋下所有个酵；在該七日內若有人食有酵个餅，一定愛將佢對 以色列 𠊎子民中除名。</verse>
				<verse number="16">第一日㧯第七日，你等愛聚集敬拜。這兩日，除了準備大家愛食个以外，麼介事也做毋得做。</verse>
				<verse number="17">你等愛守這除酵節，因為在這日，𠊎𢱋你等个眾軍隊離開 埃及 。逐年，你等一定愛慶祝這日，慶祝這節期，做你等世世代代永遠个例規。</verse>
				<verse number="18">對正月十四暗晡到二十一暗晡，你等愛食無酵餅。</verse>
				<verse number="19">在這七日中，你等屋下做毋得有酵；若係有人食有酵个食物，無論本國出世抑係來做旅客个，全部愛對 以色列 𠊎子民中除掉。</verse>
				<verse number="20">有酵个食物，你等全部做毋得食；無論你等住在㖠位，都愛食無酵餅。」</verse>
				<verse number="21">摩西 召集所有 以色列 人个長老，㧯佢等講：「你等逐家愛擇一隻羊牯，將這𨃟過節个羊牯㓾掉。</verse>
				<verse number="22">愛拿一揢牛膝草，搵盆肚个血，膏在門框㧯門楣頂。一直到第二朝晨，無論麼人全部做毋得出門。</verse>
				<verse number="23">當上主行透 埃及 、㓾 埃及 人个時，看到門框㧯門楣頂个血，就𨃟過去，毋俾執行毀滅个天使入你等个屋下㓾你等。</verse>
				<verse number="24">你等㧯你等个子孫一定愛永遠遵守這兜例規。</verse>
				<verse number="25">當你等進入上主所應許賜給你等个地，你等愛遵守這節期个禮儀。</verse>
				<verse number="26">你等个細人仔問你等講：『這個禮儀有麼介意義？』</verse>
				<verse number="27">你等就應講：『這係獻給上主𨃟過節个祭物，因為佢在 埃及 𨃟過 以色列 人个屋下。佢㓾掉 埃及 人，拯救𠊎等逐家个性命。』」 以色列 人就跪下來敬拜上主。</verse>
				<verse number="28">佢等出去，照上主吩咐 摩西 㧯 亞倫 个去做。</verse>
				<verse number="29">到半夜，上主㓾掉所有 埃及 人个長子，上對國王个長子 — 就係將來愛承接王位个王子，下到監獄肚犯人个長子；連所有頭牲个頭胎也全部㓾掉。</verse>
				<verse number="30">該暗晡 埃及 王、佢所有个官員，㧯全國人民攏總䟘起來。在 埃及 只有聽到悲傷大噭个聲，因為家家戶戶有死人。</verse>
				<verse number="31">該暗晡， 埃及 王就召見 摩西 㧯 亞倫 ，對佢等講：「遽遽走！你等㧯 以色列 人趕緊離開𠊎个人民；照你等所要求个去敬拜上主。</verse>
				<verse number="32">照你等所講个，帶等你等个牛羊趕緊離開；也愛為𠊎祝福。」</verse>
				<verse number="33">埃及 人催 以色列 人趕緊離開佢等个國家；佢等講：「你等還毋走，𠊎等會死淨淨了！」</verse>
				<verse number="34">所以 以色列 人就將無酵个麵團放在盆肚，用衫褲包起來，揹在肩頭頂。</verse>
				<verse number="35">佢等也照 摩西 所吩咐个，向 埃及 人討金器、銀器㧯衫褲。</verse>
				<verse number="36">上主使 埃及 人尊敬佢个子民；佢等愛麼介， 埃及 人就給佢等麼介。恁樣， 以色列 人帶走 埃及 人个財物。</verse>
				<verse number="37">以色列 人對 蘭塞 一直行到 疏割 。婦女㧯細人仔無算，單淨男人就有六十萬人。</verse>
				<verse number="38">盡多外族人並牛羊盡大群也㧯佢等共下行。</verse>
				<verse number="39">佢等用 埃及 帶出來个無酵麵團焙餅，因為佢等被人催迫愛遽遽離開 埃及 ，無時間準備食物。</verse>
				<verse number="40">以色列 人住在 埃及 一共四百三十年。</verse>
				<verse number="41">滿四百三十年，堵堵好該日，上主个軍隊就全部離開 埃及 。</verse>
				<verse number="42">這暗晡，上主親自保守佢等，𢱋佢等出 埃及 ；所以 以色列 人在這暗晡就愛守夜，將它奉獻給上主，這係佢等世世代代應該遵守个。</verse>
				<verse number="43">上主對 摩西 㧯 亞倫 講：「𨃟過節个例規係恁樣：外族人做毋得食𨃟過節个細羊；</verse>
				<verse number="44">總係你等買來个奴僕，受割禮以後就做得食。</verse>
				<verse number="45">暫時住在你等屋下个人客㧯請來个工人做毋得食。</verse>
				<verse number="46">食个時愛全家共下在屋肚食，做毋得帶出屋外；細羊个骨頭連一支也做毋得拗斷。</verse>
				<verse number="47">以色列 人民全部愛慶祝這隻節期，</verse>
				<verse number="48">總係無受過割禮个人做毋得食這細羊。若係有暫住在你等當中个旅客，愛守𨃟過節來尊敬上主，你等一定愛先為佢全家个男人行割禮。恁樣，佢等就像本地𫱔个 以色列 人，做得食𨃟過節个細羊。</verse>
				<verse number="49">所有本地𫱔个 以色列 人㧯暫住在你等當中个旅客全部愛遵守這例規。」</verse>
				<verse number="50">所有个 以色列 人就照上主吩咐 摩西 㧯 亞倫 个去做。</verse>
				<verse number="51">上主就在該日𢱋 以色列 人个軍隊一隊一隊出 埃及 。</verse>
			</chapter>
			<chapter number="13">
				<verse number="1">上主對 摩西 講：</verse>
				<verse number="2">「你等愛將長子分別為聖歸給𠊎，因為 以色列 人个長子㧯頭胎个頭牲全部係屬𠊎个。」</verse>
				<verse number="3">摩西 對 以色列 人講：「愛記得這日；這日你等離開 埃及 — 你等做奴才个地方。這日係上主用佢大能个手𢱋你等出來个日仔。你等做毋得食有酵个餅。</verse>
				<verse number="4">你等離開 埃及 个這日係在亞筆月，就係第一隻月。</verse>
				<verse number="5">上主識對你等个祖先發誓，愛將 迦南 人、 赫 人、 亞摩利 人、 希未 人㧯 耶布斯 人个土地賜給你等。上主將你等帶入這流乳㧯蜜个土地以後，你等愛在逐年个正月慶祝這節期。</verse>
				<verse number="6">七日內，你等一定愛食無酵餅；在第七日，你等愛守這節來紀念上主。</verse>
				<verse number="7">在這七日內，你等一定愛食無酵餅。你等个境內做毋得有酵，抑係有酵个餅。</verse>
				<verse number="8">在該日你等就愛對孻仔講：『這係為到紀念𠊎等離開 埃及 个時上主所行个一切。』</verse>
				<verse number="9">守這節期係愛提醒你等，就像在手項抑係額頭做一隻記號，使你等記得愛繼續背上主个法律，因為上主識用大能个手𢱋你等離開 埃及 。</verse>
				<verse number="10">逐年到這時節，你等愛守這節期。」</verse>
				<verse number="11">「將來，上主照佢對你等㧯你等个祖先發誓，愛將你等𢱋入 迦南 人个土地，將地賜給你等，</verse>
				<verse number="12">該時，你等一定愛將長子獻給上主。頭胎个頭牲全部也係屬上主。</verse>
				<verse number="13">你等愛用細羊去贖公驢轉來。若係你等無打算贖公驢轉來，就愛拗斷牠个頸筋。你等一定愛將長子贖轉來。</verse>
				<verse number="14">將來你等个孻仔問：『這係麼介意思呢？』你等愛應講：『上主用大能个手對 埃及 — 𠊎等做奴才个地方將𠊎等𢱋出來。</verse>
				<verse number="15">該時， 埃及 王心硬，毋放𠊎等走，上主㓾掉 埃及 所有个頭胎 — 包含人个長子㧯頭胎个頭牲。所以，𠊎等將所有頭胎、公个頭牲，獻給上主，總係將長子全部贖轉來。</verse>
				<verse number="16">𠊎等遵守這例規係為到提醒𠊎等，就像在手項抑係額頭做記號，使𠊎等記得上主識用大能个手對 埃及 𢱋𠊎等出來。』」</verse>
				<verse number="17">埃及 王放 以色列 人走个時，上帝無帶佢等行 非利士 海邊該條較近个路。上帝講：「驚怕𠊎个子民堵到戰爭就後悔，倒轉 埃及 去。」</verse>
				<verse number="18">所以上帝帶佢等捩遠路，經過曠野，向 紅海 行。 以色列 人離開 埃及 个時已經準備好武裝出戰。</verse>
				<verse number="19">摩西 帶等 約瑟 个骨骸去，因為 約瑟 識喊 以色列 人嚴嚴發誓，對佢等講：「上帝一定會照顧你等；然後你等愛將𠊎个骨頭對這位共下帶轉去。」</verse>
				<verse number="20">以色列 人離開 疏割 ，在沙漠堘頭个 以倘 安營。</verse>
				<verse number="21">日時頭，上主行在佢等頭前，用雲柱指示方向；暗晡時，上主行在頭前，用火柱照等佢等。恁樣，佢等日夜攏總做得行。</verse>
				<verse number="22">日時頭有雲柱，暗晡時有火柱，一直行在佢等頭前。</verse>
			</chapter>
			<chapter number="14">
				<verse number="1">上主對 摩西 講：</verse>
				<verse number="2">「你去㧯 以色列 人講愛斡轉頭，在 密奪 㧯 紅海 中間个海滣，接近 巴力‧洗分 个 比‧哈希錄 頭前安營。</verse>
				<verse number="3">埃及 王會恅到 以色列 人在該位迷路，被沙漠困到了。</verse>
				<verse number="4">𠊎愛使佢心硬，出來逐你等。該時𠊎愛打贏 埃及 王㧯佢个軍隊，來得到榮光； 埃及 人就會知𠊎係上主。」 以色列 人照所吩咐个去做。</verse>
				<verse number="5">埃及 王聽到報告，知 以色列 人已經走掉了，佢㧯佢个官員就改變心意，講：「𠊎等做麼介恁戇呢？𠊎等俾 以色列 人走掉，失掉一群奴才！」</verse>
				<verse number="6">所以 埃及 王預備佢个戰車，召集軍隊，</verse>
				<verse number="7">帶 埃及 所有个戰車出發，包含六百輛特選个戰車，有軍官指揮。</verse>
				<verse number="8">上主使 埃及 王心硬，佢就出來逐 以色列 人，因為 以色列 人當大膽離開 埃及 。</verse>
				<verse number="9">埃及 个軍隊，有戰馬、戰車、㧯騎兵，在 紅海 附近安營个地方逐到佢等；該地方靠近 比‧哈希錄 㧯 巴力‧洗分 。</verse>
				<verse number="10">以色列 人一看到 埃及 王㧯佢个軍隊會逐到佢等，非常著驚，就求上主救命。</verse>
				<verse number="11">佢等對 摩西 講：「敢講𠊎等在 埃及 無塚埔，所以你將𠊎等帶到曠野來送死係麼？你將𠊎等𢱋出 埃及 做麼介？</verse>
				<verse number="12">在 埃及 ，𠊎等敢毋係喊你莫搭𠊎等，由在𠊎等做 埃及 人个奴才。做 埃及 人个奴才總比死在曠野較好！」</verse>
				<verse number="13">摩西 應講：「毋使驚！愛企穩。今晡日你等會看到上主樣般救你等！你等永遠毋會再看到這兜 埃及 人了。</verse>
				<verse number="14">上主愛為你等相㓾；你等恬恬，莫出聲。」</verse>
				<verse number="15">上主對 摩西 講：「你做麼介求喊𠊎呢？你吩咐 以色列 人向前行就好。</verse>
				<verse number="16">擎起你个柺棍仔，向海伸出去。海水會分開， 以色列 人就會在海肚个燥地行過去。</verse>
				<verse number="17">𠊎愛使 埃及 人心硬，所以佢等會落去海肚來逐你等。總係𠊎愛贏過 埃及 王、佢个軍隊、戰車、㧯騎兵，來得到榮光。</verse>
				<verse number="18">𠊎打贏佢等个時， 埃及 人就會知𠊎係上主。」</verse>
				<verse number="19">上帝个天使先前在 以色列 大隊个頭前行，這下轉到後背去；雲柱也徙到後背去，</verse>
				<verse number="20">隔開 埃及 人㧯 以色列 人。雲使 埃及 人陷入烏暗中，總係有光照等 以色列 人，所以兩方軍隊歸暗晡無法接近。</verse>
				<verse number="21">摩西 个手向海一伸出，上主就差當強个東風，將海水吹開。強風歸暗晡盡吹，吹到海底變燥地。海水分開，</verse>
				<verse number="22">以色列 人就行燥地過海；海水在佢等兩片像係兩扇牆。</verse>
				<verse number="23">埃及 人逐佢等，國王所有个戰馬、戰車、㧯騎兵全部跈等落海肚去。</verse>
				<verse number="24">臨天光个時，上主對火柱㧯雲柱當中看下來，就使 埃及 个軍隊混亂。</verse>
				<verse number="25">佢使 埃及 戰車个輪仔落到泥塥肚，毋會挺動。 埃及 人講：「上主幫助 以色列 人攻打𫣆等。𫣆等遽遽走噢！」</verse>
				<verse number="26">上主對 摩西 講：「向海伸手，使海水合起來，浸掉 埃及 人㧯佢等个戰車、騎兵。」</verse>
				<verse number="27">摩西 就向海伸手；天光个時，海水就流倒轉去。 埃及 人想愛對水肚逃命，總係上主將佢等逐轉海肚去。</verse>
				<verse number="28">海水恢復到原來恁樣，浸掉所有逐 以色列 人个戰車、騎兵、㧯 埃及 王个部隊；一個也無留。</verse>
				<verse number="29">總係 以色列 人行燥地過海；海水在佢等兩片像係兩扇牆。</verse>
				<verse number="30">該日，上主對 埃及 人手中拯救 以色列 人； 以色列 人看到 埃及 人个身屍滿海滣。</verse>
				<verse number="31">以色列 人看到上主樣般用大能个手打贏 埃及 人，就敬畏上主，相信佢，也信任佢个僕人 摩西 。</verse>
			</chapter>
			<chapter number="15">
				<verse number="1">該時， 摩西 㧯 以色列 人民向上主唱歌： 𠊎愛唱歌頌讚上主， 因為佢得到光榮个勝利； 佢將戰馬㧯騎兵㧹落海肚。</verse>
				<verse number="2">上主係𠊎个力量，𠊎个詩歌； 佢拯救𠊎。 佢係𠊎个上帝，𠊎愛頌讚佢； 佢係吾爸个上帝，𠊎愛讚美佢。</verse>
				<verse number="3">上主係戰士； 上主係佢个名。</verse>
				<verse number="4">佢將 埃及 王个戰車㧯軍隊㧹落海肚， 將特選个軍官浸死在 紅海 底背。</verse>
				<verse number="5">深海吞掉佢等； 佢等像石頭沈落海底。</verse>
				<verse number="6">上主啊，你个右手顯出榮耀㧯大能； 上主啊，你个右手將敵人打到糜糜。</verse>
				<verse number="7">你無比个威嚴征服仇敵； 你个怒氣燒掉佢等，像燒禾稈。</verse>
				<verse number="8">你向海洋歕氣，水就堆起來， 大水像牆壁企到嶝嶝； 海中个深水變做燥地。</verse>
				<verse number="9">仇敵講：『𠊎愛逐佢等，捉到佢等； 𠊎愛分佢等个財產，由在𠊎搶。 𠊎愛挷出刀劍，親手來滅佢等。』</verse>
				<verse number="10">總係上主啊，你歕一口氣， 海就將佢等吞掉； 佢等像鉛鐵，沈到深水中。</verse>
				<verse number="11">上主啊！恁多神明當中，㖠有像你个？ 㖠有像你恁神聖恁有威嚴个？ 㖠有像你恁得人驚恁有光榮个？ 㖠有像你恁會行神蹟奇事个？</verse>
				<verse number="12">你伸出右手， 大地就吞滅仇敵。</verse>
				<verse number="13">你用不變个慈愛𢱋你所拯救个子民； 你用大能帶佢等到你个聖所。</verse>
				<verse number="14">萬國聽到，驚到愊愊掣； 非利士 人愁到無葛煞。</verse>
				<verse number="15">以東 个領袖著驚， 摩押 个英雄愊愊掣， 迦南 人个膽都嚇爛。</verse>
				<verse number="16">恐怖㧯著驚臨到佢等！ 上主啊，佢等看到你个大能； 佢等驚到像石頭毋敢挺動， 直到你个子民過去， 直到你所救贖个子民行過去。</verse>
				<verse number="17">你帶佢等入你个山，在該位栽培佢等； 該位係你 — 上主選來住个地方， 就係你自家所起个聖所。</verse>
				<verse number="18">上主的確會做王， 直到永永遠遠！</verse>
				<verse number="19">以色列 人行燥地過海；總係 埃及 王个戰馬、戰車、㧯騎兵進入海肚个時，上主使海水合起來，將佢等全部浸死。</verse>
				<verse number="20">亞倫 个阿姊女先知 美莉安 手拿等鈴鼓，盡多婦女跈等姖，緊打鼓，緊跳舞，</verse>
				<verse number="21">美莉安 唱歌㧯姖等和聲： 「愛唱歌頌讚上主， 因為佢得到光榮个勝利； 佢將戰馬㧯騎兵㧹落海肚。」</verse>
				<verse number="22">後來， 摩西 𢱋 以色列 人民離開 紅海 ，來到 書珥 曠野，在曠野中行三日久，尋毋到水好食。</verse>
				<verse number="23">佢等來到 瑪拉 ；該位个水係苦个，食毋得。 (因為恁樣，該地方正安到 瑪拉 。)</verse>
				<verse number="24">人民埋怨 摩西 ，問佢講：「𠊎等愛啉麼介呢？」</verse>
				<verse number="25">摩西 迫切在上主面前祈求；上主指給佢看一隻樹頭。佢將樹頭㧹入水底背，水就變做甘甜个水。 上主在該地方為佢等定法律，又在該位考驗佢等。</verse>
				<verse number="26">佢講：「若係你等完全順從𠊎 — 上主你等个上帝 — 做𠊎認為著个事，聽𠊎个命令，遵守𠊎一切个法律，𠊎就毋會用責罰 埃及 人个病痛來責罰你等；因為𠊎係醫治你等个上主。」</verse>
				<verse number="27">後來佢等到 以琳 ；該位有十二窟泉水㧯七十頭棕樹。佢等就在水邊安營。</verse>
			</chapter>
			<chapter number="16">
				<verse number="1">以色列 所有个人民離開 以琳 。在離開 埃及 後第二隻月个十五，佢等來到 以琳 㧯 西奈 中間 汛 个曠野。</verse>
				<verse number="2">在曠野中， 以色列 所有个人民埋怨 摩西 㧯 亞倫 ，</verse>
				<verse number="3">對佢等講：「𠊎等在 埃及 就死在上主个手中還較贏！在 埃及 ，𠊎等至少還有可能圍等鑊仔食肉，也有其他食物好食到飽飽；總係你等將𠊎等帶到這曠野來，害𠊎等在這位餓死。」</verse>
				<verse number="4">上主對 摩西 講：「𠊎愛對天頂降下糧食。人民逐日一定愛出去拈該日所需要个糧食。𠊎恁樣做，係愛試驗佢等，看佢等會遵守𠊎个指示麼。</verse>
				<verse number="5">到第六日，佢等一定愛加拈一日份來做準備，就係愛拈兩日个糧食。」</verse>
				<verse number="6">摩西 㧯 亞倫 對 以色列 人講：「今暗晡，你等就會知𢱋你等出 埃及 个就係上主。</verse>
				<verse number="7">天光朝晨，你等會看到上主个榮光。佢已經聽到你等个埋怨了；𠊎等算麼介，你等个埋怨其實係對上主發个。」</verse>
				<verse number="8">摩西 又講：「上主暗晡頭愛給你等有肉好食，朝晨頭愛給你等有罅額个食物，因為佢已經聽到你等對佢个怨言。你等怪怨𠊎等，其實就係怪怨上主！」</verse>
				<verse number="9">摩西 對 亞倫 講：「去喊 以色列 人民攏總來企在上主面前，因為佢已經聽到佢等个怨言。」</verse>
				<verse number="10">在 亞倫 對 以色列 所有个人民講話个時，佢等向曠野看，忽然看到上主个榮光顯現在雲个中間。</verse>
				<verse number="11">上主對 摩西 講：</verse>
				<verse number="12">「𠊎已經聽到 以色列 人个怨言。你愛㧯佢等講：『在臨暗仔，你等會有肉好食；在朝晨頭，你等會有食物好食飽。恁樣，你等就會知𠊎係上主，係你等个上帝。』」</verse>
				<verse number="13">臨暗仔，一大群鵪鶉飛來，多到將全營攏總遮掉。天一光，營个四圍全部係露水；</verse>
				<verse number="14">露水一燥掉，在曠野个地面上有一層薄薄像霜个東西。</verse>
				<verse number="15">以色列 人看到這東西，毋知係麼介，就問來問去講：「這係麼介東西？」 摩西 對佢等講：「這就係上主給你等个食物。</verse>
				<verse number="16">上主識吩咐：逐儕愛照自家个食量來拈，照帳篷肚个人數，逐儕做得拈兩公升。」</verse>
				<verse number="17">以色列 人照吩咐去做，有兜人拈較多，有兜人拈較少。</verse>
				<verse number="18">照升斗量个時，拈較多个無好賸，拈較少个也無欠；逐個人所拈个堵好係佢所需要个。</verse>
				<verse number="19">摩西 對佢等講：「做毋得有人將食物留到第二朝晨。」</verse>
				<verse number="20">總係有兜人毋聽 摩西 个話，留兜下來。到第二朝晨，這兜留下來个全部發蟲、臭掉。 摩西 對佢等發譴。</verse>
				<verse number="21">逐日朝晨，逐儕全部出去拈自家所需要个食量；日頭發出熱氣个時，食物就溶掉。</verse>
				<verse number="22">到第六日，佢等拈雙倍个食物，逐儕四公升。民間所有个領袖來對 摩西 報告這件事。</verse>
				<verse number="23">摩西 對佢等講：「上主已經吩咐過，天光日係安息聖日，應該獻給上主。今晡日你等愛照平常恁樣焙、恁樣煮；賸到个留到第二朝晨正來食。」</verse>
				<verse number="24">佢等照 摩西 个吩咐，將賸到个食物留到第二朝晨；這兜食物無發蟲，也無臭掉。</verse>
				<verse number="25">摩西 講：「你等就食留下來个食物！因為今晡日係獻給上主个安息日；今晡日你等在營外尋毋到一些仔食物。</verse>
				<verse number="26">你等愛在六日內拈食物，總係第七日係安息日，一定尋毋到。」</verse>
				<verse number="27">到第七日，有兜人還係出去尋食物，總係一些仔也尋毋到。</verse>
				<verse number="28">上主對 摩西 講：「你等毋遵守𠊎个命令㧯法律，愛到幾時呢？</verse>
				<verse number="29">愛記得，𠊎係上主；安息日係𠊎給你等歇睏个；所以𠊎在第六日給你等兩日个食物；到第七日，逐儕一定愛留在屋下，做毋得出去。」</verse>
				<verse number="30">所以 以色列 人在第七日歇睏。</verse>
				<verse number="31">以色列 人將這食物安到嗎哪 。它像芫荽仔，係白色个，食起來像用蜂糖做个餅。</verse>
				<verse number="32">摩西 講：「上主命令𠊎等留下兩公升足足个嗎哪給𠊎等个子孫，好俾佢等看上主對 埃及 𢱋𠊎等出來个時、在曠野所賜給𠊎等个食物。」</verse>
				<verse number="33">摩西 對 亞倫 講：「拿一隻罐仔，裝兩公升嗎哪在罐仔底背，放在上主面前；這係為𠊎等个子孫留下來个。」</verse>
				<verse number="34">上主樣般吩咐 摩西 ， 亞倫 就照恁樣做。佢將罐仔放在約櫃頭前，保存起來。</verse>
				<verse number="35">以色列 人食嗎哪一共四十年，直到佢等到 迦南 定居下來。</verse>
				<verse number="36">(當時標準量器个單位係二十公升。)</verse>
			</chapter>
			<chapter number="17">
				<verse number="1">以色列 所有个人民遵照上主个指示離開 汛 个曠野，一位一位遷徙等去。佢等到 利非訂 安營，總係該位無水好食；</verse>
				<verse number="2">所以人民㧯 摩西 計較講：「給𠊎等水食！」 摩西 應講：「你等做麼介怪𠊎？做麼介愛試探上主？」</verse>
				<verse number="3">總係人民非常嘴燥，就對 摩西 發怨言。佢等講：「你做麼介將𠊎等𢱋出 埃及 ？你愛俾𠊎等㧯𠊎等个子女、連𠊎等个頭牲全部渴死係麼？」</verse>
				<verse number="4">摩西 迫切在上主面前祈禱講：「𠊎愛樣般應付這兜人民正好呢？佢等強強會拿石頭將𠊎㧹死。」</verse>
				<verse number="5">上主對 摩西 講：「你帶幾個 以色列 人个長老㧯你共下行到人民頭前，手愛拿等你打 尼羅 河壩水个柺棍仔。</verse>
				<verse number="6">𠊎愛在 何烈 山个一垤磐石頂企在你面前。你打該磐石，就會有水流出來給人民食。」 摩西 就在 以色列 長老个面前恁樣做。</verse>
				<verse number="7">佢將該地方安到 瑪撒 ，又安到 米利巴 ；因為 以色列 人在該位怪怨、試探上主。佢等問：「上主敢有㧯𠊎等共下？」</verse>
				<verse number="8">亞瑪力 人到 利非訂 攻打 以色列 人。</verse>
				<verse number="9">摩西 對 約書亞 講：「你去選兜人出來，準備㧯 亞瑪力 人相㓾。天光日𠊎愛企在山頂，手拿等上帝个柺棍仔。」</verse>
				<verse number="10">約書亞 照 摩西 所吩咐个，出去㧯 亞瑪力 人相㓾； 摩西 、 亞倫 㧯 戶珥 上到山頂。</verse>
				<verse number="11">摩西 手擎起來个時， 以色列 人就贏；佢手放下來， 亞瑪力 人就贏。</verse>
				<verse number="12">摩西 个手𤸁了， 亞倫 㧯 戶珥 搬一垤石頭來，俾佢坐在頂高；一個企左片，一個企右片，扶等佢个手，直到日頭落山。</verse>
				<verse number="13">恁樣， 約書亞 就用刀劍贏過 亞瑪力 王㧯佢帶來个人。</verse>
				<verse number="14">所以，上主對 摩西 講：「將這擺个勝利記錄下來，好講給後代聽。又愛㧯 約書亞 講，𠊎愛完全拭掉 亞瑪力 人个名號。」</verse>
				<verse number="15">摩西 起一座祭壇，安名做「上主係𠊎个軍旗 」。</verse>
				<verse number="16">佢講：「手擎上主个軍旗！上主愛世世代代㧯 亞瑪力 人相㓾。」</verse>
			</chapter>
			<chapter number="18">
				<verse number="1">摩西 个丈人老 — 米甸 个祭司 葉特羅 聽到上帝𢱋 以色列 人出 埃及 个時，為 摩西 㧯佢个人民所做个事，</verse>
				<verse number="2">就來見 摩西 ，並將 摩西 留在外家个𡜵娘 西坡拉</verse>
				<verse number="3">㧯兩個孻仔帶來。兩個孻仔一個安到 革舜 ，因為 摩西 講：「𠊎係暫時住在外邦个旅客」；</verse>
				<verse number="4">另外一個安到 以利以謝 ，因為 摩西 講：「吾爸个上帝幫助𠊎，拯救𠊎脫離 埃及 王个刀劍。」</verse>
				<verse number="5">葉特羅 帶等 摩西 个𡜵娘㧯兩個孻仔來到上帝个山，就係 摩西 在曠野安營个所在。</verse>
				<verse number="6">葉特羅 先喊人去㧯 摩西 講，佢等會來个消息。</verse>
				<verse number="7">所以 摩西 出去迎接佢个丈人老，㧯佢行禮，又唚佢。佢等互相問安，然後入去 摩西 个帳篷。</verse>
				<verse number="8">上主為到 以色列 人，對 埃及 王㧯 埃及 人所行一切个事，還有 以色列 人歸路所堵到个困難㧯上主樣般拯救佢等个事， 摩西 全部講給佢个丈人老聽。</verse>
				<verse number="9">葉特羅 聽到上主為到 以色列 人所做个一切好事、佢樣般拯救佢等脫離 埃及 人个手，就非常歡喜。</verse>
				<verse number="10">葉特羅 講：「愛讚美上主！佢對 埃及 王㧯佢人民个手中拯救你等出來，俾你等毋使再做 埃及 人个奴才！</verse>
				<verse number="11">這下𠊎知上主比所有个神明較偉大；因為 埃及 人驕傲侮辱 以色列 人，佢成就這所有个事。」</verse>
				<verse number="12">所以 葉特羅 — 摩西 个丈人老向上帝獻燒化祭㧯其他个祭物； 亞倫 㧯其他 以色列 个長老全部來，㧯佢共下在上帝面前食飯。</verse>
				<verse number="13">第二日， 摩西 坐等在人民當中處理紛爭，對天光到斷烏盡多人民企在堘頭緊等。</verse>
				<verse number="14">摩西 个丈人老看到佢為人民所做个一切事，就講：「你為人民到底做麼介？樣般俾恁多人圍在塍頭，對天光到斷烏等你一儕來處理。」</verse>
				<verse number="15">摩西 應講：「𠊎一定愛恁樣做，因為人民到𠊎這位來求問上帝个旨意。</verse>
				<verse number="16">若有兩儕相爭，就來尋𠊎解決；𠊎就代佢等判斷麼人著、麼人毋著，又愛將上帝个法律並指示㧯佢等講。」</verse>
				<verse number="17">摩西 个丈人老對佢講：「你个做法毋好；</verse>
				<verse number="18">你㧯你个人民全部會忒痶。因為事情恁多，你一儕做忒重。</verse>
				<verse number="19">這下你聽𠊎講，𠊎㧯你建議，願上帝也㧯你同在。你愛代表人民，將佢等个紛爭帶到上帝面前，向佢請示；</verse>
				<verse number="20">你也應該將上帝个法律㧯指示教導佢等，解釋給佢等聽，使佢等知愛樣般行事為人。</verse>
				<verse number="21">你還愛選派有能力个人做 以色列 人个領袖：每一千人、一百人、五十人、十人全部應該有一個領袖。佢等一定係敬畏上帝、可靠、毋接受紅包个人。</verse>
				<verse number="22">你愛指派這兜人隨時為人民判斷案件；重要个案件帶到你面前來就好，細个紛爭做得自家處理。佢等恁樣分擔你个責任，你个擔頭就會較輕。</verse>
				<verse number="23">若係你恁樣做，上帝也恁樣吩咐你，你就毋會恁𤸁恁痶；這兜人民就做得早兜仔平平安安轉屋下。」</verse>
				<verse number="24">摩西 接受厥丈人老个建議，</verse>
				<verse number="25">就在 以色列 人當中選出有能力个人，做千人、百人、五十人、㧯十人个領袖。</verse>
				<verse number="26">佢等隨時為人民判斷案件；堵到有較難个案件，就請示 摩西 ，細个紛爭就自家處理。</verse>
				<verse number="27">後來， 摩西 送厥丈人老離開， 葉特羅 就轉佢个家鄉去。</verse>
			</chapter>
			<chapter number="19">
				<verse number="1">以色列 人離開 埃及 ，堵好在滿三個月該日到 西奈 沙漠。</verse>
				<verse number="2">佢等先離開 利非訂 ，然後到 西奈 沙漠，在 西奈 山下安營。</verse>
				<verse number="3">摩西 上山去朝見上帝。 上主對山頂呼喊 摩西 講：「你愛恁樣㧯 雅各 个子孫 以色列 人講：</verse>
				<verse number="4">『你等已經看到𠊎 — 上主樣般對付 埃及 人。𠊎揹等你等，就像鷹鳥乸將細鷹鳥揹在翼胛頂，將你等帶到這位來歸𠊎。</verse>
				<verse number="5">若係你等順從𠊎，守𠊎个約，你等就愛在萬民中做𠊎寶貝个子民。全世界攏總屬𠊎，</verse>
				<verse number="6">只有你等歸屬𠊎做祭司个國度，做聖潔个國民。』這兜話你愛㧯 以色列 人講。」</verse>
				<verse number="7">所以 摩西 下山，召集人民个領袖，將上主命令佢个事全部㧯佢等講。</verse>
				<verse number="8">人民同聲應講：「𠊎等愛遵照上主个話做。」 摩西 就將佢等个話向上主報告。</verse>
				<verse number="9">上主對 摩西 講：「𠊎愛在賁賁个雲中降臨到你該位，俾𠊎个子民聽到𠊎㧯你講話，使佢等完全相信你。」 摩西 將人民个話向上主報告。</verse>
				<verse number="10">上主又對佢講：「你去㧯人民講，今晡日㧯天光日佢等愛潔淨自家，衫褲也愛洗淨，</verse>
				<verse number="11">到第三日全部愛準備好。該日，𠊎 — 上主愛降臨在 西奈 山，俾所有个人民看到𠊎。</verse>
				<verse number="12">你愛在山个四圍做記號，命令人民做毋得超過界限，也做毋得上山，抑係踏到這山。踏到這山个人，愛俾佢死。</verse>
				<verse number="13">愛用石頭㧹死抑係用箭射死，無論麼人全部不准摸佢个屍體。人㧯頭牲全部愛遵守；犯到个愛俾佢死。愛等歕羊角个聲傳來，人民正做得上山。」</verse>
				<verse number="14">摩西 下山吩咐人民，愛佢等潔淨自家，準備敬拜。佢等就洗淨衫褲；</verse>
				<verse number="15">摩西 㧯佢等講：「到第三日一切愛準備好；在這期間做毋得有房事。」</verse>
				<verse number="16">第三日朝晨，雷公緊響、𥍉爧無停，有賁賁个雲在山頂出現、又聽到歕羊角个聲盡響。營肚个人民全部愊愊掣。</verse>
				<verse number="17">摩西 帶領佢等出營來朝見上帝；佢等全部企在山腳下。</verse>
				<verse number="18">歸隻 西奈 山被火煙遮等，因為上主在火中降臨。該火煙像火窯肚衝出來个濃煙；歸隻山大大搖動。</verse>
				<verse number="19">這時歕羊角个聲越來越響。 摩西 講話，上帝響雷公應佢。</verse>
				<verse number="20">上主降臨在 西奈 山頂，喊 摩西 上山； 摩西 就上山去。</verse>
				<verse number="21">上主對佢講：「你下去警告人民，做毋得超過界限來看𠊎，驚怕盡多人會死。</verse>
				<verse number="22">就連祭司也一定先潔淨自家正做得行近𠊎；若無，𠊎會出來責罰佢等。」</verse>
				<verse number="23">摩西 對上主講：「你个子民做毋得上 西奈 山；因為你已經吩咐𠊎等，愛在山邊立界限，將這山分別做聖山。」</verse>
				<verse number="24">上主對 摩西 講：「你下去，將 亞倫 帶上來。總係祭司㧯人民做毋得超過界限到𠊎這位來，驚怕𠊎會出來責罰佢等。」</verse>
				<verse number="25">所以 摩西 下山，轉到人民該位，將上主个話㧯佢等講。</verse>
			</chapter>
			<chapter number="20">
				<verse number="1">上帝吩咐以下這兜誡命，講：</verse>
				<verse number="2">「𠊎係上主 — 你个上帝；𠊎識𢱋你對做奴才个 埃及 地出來。</verse>
				<verse number="3">「𠊎以外，你做毋得敬拜別个神明。</verse>
				<verse number="4">「做毋得為自家雕刻偶像；也做毋得造天頂、地上、抑係地底下、水中所有个形像。</verse>
				<verse number="5">做毋得向該兜偶像跪拜，也做毋得服事它兜，因為𠊎 — 上主 — 你个上帝係專情个上帝 。恨𠊎个人，𠊎一定會責罰佢等㧯佢等个子女，直到三四代。</verse>
				<verse number="6">總係敬愛𠊎、遵守𠊎命令个人，𠊎愛用慈愛款待佢等，直到千代。</verse>
				<verse number="7">「做毋得糮糝用上主 — 你上帝个名；因為糮糝用上主名个人，上主一定會責罰佢。</verse>
				<verse number="8">「愛遵守安息日做聖日。</verse>
				<verse number="9">你有六日好勞碌做一切个工作；</verse>
				<verse number="10">總係第七日係屬上主 — 你上帝个安息日。這日，無論係你、你个子女、奴僕、奴婢、頭牲、抑係城內暫住个旅客，全部做毋得工作；</verse>
				<verse number="11">因為上主在六日內創造天、地、海、㧯其中个萬物；總係第七日佢就歇睏。所以，上主賜福安息日，定這日做聖日。</verse>
				<verse number="12">「愛孝敬爺𡟓，好俾你在上主 — 你上帝愛賜給你个土地上享長壽。</verse>
				<verse number="13">「做毋得㓾人。</verse>
				<verse number="14">「做毋得犯姦淫。</verse>
				<verse number="15">「做毋得偷拿。</verse>
				<verse number="16">「做毋得做假見證害人。</verse>
				<verse number="17">「做毋得貪別人个屋；也做毋得貪別人个𡜵娘、奴僕、奴婢、牛、驢、抑係其他个東西。」</verse>
				<verse number="18">人民聽到雷公聲㧯歕羊角个聲，看到𥍉爧㧯山頂衝出來个煙，全部非常驚，遠遠企等。</verse>
				<verse number="19">佢等對 摩西 講：「請你㧯𠊎等講話，𠊎等一定會聽；若係上帝㧯𠊎等講話，驚怕𠊎等會無命！」</verse>
				<verse number="20">摩西 應佢等講：「毋使驚；上帝降臨來考驗你等，使你等時時敬畏佢，正毋會犯罪。」</verse>
				<verse number="21">總係人民還係遠遠企等；只有 摩西 行近上帝所臨在該賁賁个雲中。</verse>
				<verse number="22">上主對 摩西 講：「你愛㧯 以色列 人講：『你等已經看到𠊎 — 上主樣般對天頂向你等講話。</verse>
				<verse number="23">做毋得造麼介偶像當做𠊎；做毋得為自家造金銀个神像。</verse>
				<verse number="24">你等愛用泥為𠊎造一座祭壇，在壇上獻牛羊做燒化祭㧯平安祭。在𠊎指定做你等敬拜𠊎个每一個地方，𠊎一定會來賜福給你等。</verse>
				<verse number="25">若係你等用石頭為𠊎造祭壇，做毋得用打過个石頭，因為鑿過个石頭會打垃圾祭壇。</verse>
				<verse number="26">做毋得為𠊎起造有段仔个壇，免得你等上段仔个時露出自家个下體。』」</verse>
			</chapter>
			<chapter number="21">
				<verse number="1">「愛為 以色列 人民設立下背个條例：</verse>
				<verse number="2">若係你買一個 希伯來 人做奴才，佢一定愛為你工作六年。到第七年，佢就做得恢復自由，毋使付贖金。</verse>
				<verse number="3">若係佢做你奴才个時還吂結婚，離開个時就愛單身一儕走；若係佢做你奴才个時已經結婚，佢就做得帶𡜵娘共下走。</verse>
				<verse number="4">𡜵娘若係主人給佢个，𡜵娘為佢𫱔有子女，厥𡜵娘㧯子女全部係屬主人个；佢愛單身一儕走。</verse>
				<verse number="5">若係該奴才表示講：『𠊎愛吾主人，惜吾𡜵娘㧯子女，無愛自由離開』，</verse>
				<verse number="6">佢个主人就愛帶佢到敬拜上帝个所在，在該位俾佢憑等門抑係門框企等，用鑽仔在佢耳公鑽一隻孔。恁樣，佢就愛一生人服事厥主人。</verse>
				<verse number="7">「若係有人將自家个妹仔賣做使女，姖做毋得像奴才恁樣自由離開。</verse>
				<verse number="8">若係主人本來想討姖做𡜵娘，後來無中意姖，就愛俾姖个家族贖轉去；主人無權將姖賣給外族人，因為主人已經騙過姖。</verse>
				<verse number="9">若係主人擇姖給自家个孻仔做𡜵娘，就愛對待姖像對待自家个妹仔恁樣。</verse>
				<verse number="10">若係主人討第二個𡜵娘，佢對第一個𡜵娘一定愛像以前恁樣供給食物、衫褲並同房，全部做毋得減少。</verse>
				<verse number="11">若係主人對第一個𡜵娘毋實行這三項義務，這個𡜵娘就做得自由離開，毋使付錢贖身。」</verse>
				<verse number="12">「打死人个，一定愛將佢處死；</verse>
				<verse number="13">若毋係故意㓾人，係一時失手，佢做得逃到𠊎指定个地方去；</verse>
				<verse number="14">若係故意謀殺，就算逃到𠊎个祭壇前，也愛將佢捉去處死。</verse>
				<verse number="15">「打爺𡟓个，一定愛將佢處死。</verse>
				<verse number="16">「強強捉人去賣抑係留下來个，一定愛將佢處死。</verse>
				<verse number="17">「咒罵爺𡟓个，一定愛將佢處死。</verse>
				<verse number="18">「兩儕相打，一方用石頭抑係拳頭打傷對方，總係無將對方打死；被人打个人因為受傷睡眠床，</verse>
				<verse number="19">總係䟘起來以後，出門行愛拄柺棍仔，該打佢个人毋使受刑罰；總係愛賠佢無法度工作个損失，並負責將佢醫到好。</verse>
				<verse number="20">「若係用棍仔打奴才抑係奴婢，使佢即時死亡个，一定愛受刑罰。</verse>
				<verse number="21">若係奴才過一兩日正死，主人就毋使受刑罰；因為這奴才係佢用錢買來个。</verse>
				<verse number="22">「若係有兜人因為相打來撞傷有身項个婦人家，使姖落胎，總係無其他个傷害，該傷害姖个一定愛照婦人家个老公提出來个數額，照判官所決定个來賠償。</verse>
				<verse number="23">若係該婦人家受別个傷害，該傷害姖个就愛：一命賠一命、</verse>
				<verse number="24">目珠賠目珠、牙齒賠牙齒、手賠手、腳賠腳、</verse>
				<verse number="25">燒傷賠燒傷、刀傷賠刀傷、打傷賠打傷。</verse>
				<verse number="26">「若係有人打壞掉奴才抑係奴婢一隻目珠，就愛因為佢个目珠放佢自由離開，準做賠償金。</verse>
				<verse number="27">若係打壞掉奴才抑係奴婢个一支牙齒，就愛因為佢个牙齒放佢自由離開，準做賠償金。」</verse>
				<verse number="28">「若有牛鬥死男人抑係女人，就愛用石頭㧹死牠，總係牠个肉做毋得食；牛个主人就毋使受罰。</verse>
				<verse number="29">若係該隻牛常常鬥傷人，牛个主人逐擺受警告，還係毋將牛紽好，致到牛鬥死人，該隻牛愛用石頭㧹死，牛个主人也愛處死。</verse>
				<verse number="30">若係牛个主人被人判罰錢來賠命，佢一定愛照規定个錢額繳清。</verse>
				<verse number="31">若係牛鬥死細孻仔抑係細妹仔，也愛照這種辦法來處理。</verse>
				<verse number="32">若係牛鬥死奴才抑係奴婢，牛个主人一定愛賠佢等个主人三十隻銀幣，牛也愛用石頭㧹死。</verse>
				<verse number="33">「若係有人掀開井蓋，抑係挖井又毋將井蓋揜好，致到牛抑係驢跌落去，</verse>
				<verse number="34">佢一定愛拿錢賠償頭牲个主人，死掉个頭牲就歸給自家。</verse>
				<verse number="35">若係有牛鬥死掉另外一隻牛，愛將生个牛賣掉，雙方平分賣牛个價錢，同時平分死牛个肉。</verse>
				<verse number="36">若係其中一隻牛一溜裡好鬥，牛个主人無紽好，佢一定愛用一隻生牛賠對方，該隻死牛就歸給自家。」</verse>
			</chapter>
			<chapter number="22">
				<verse number="1">「若係有人偷牛抑係羊，無論係㓾掉、係賣掉，佢一定愛拿五隻牛賠一隻牛，拿四隻羊賠一隻羊。</verse>
				<verse number="2">佢一定愛賠到罅額；若係無東西好賠，就愛被人賣做奴才，來還佢偷牛羊个罰金。</verse>
				<verse number="3">若係偷來个牛、驢、抑係羊被人發現个時還生生，佢就愛加倍賠人。</verse>
				<verse number="4">「若係有人暗晡時偷偷進入別人个屋下，被人發現又被人㓾死，該㓾佢个人無罪；事情若發生在日時頭，㓾佢个人就有罪。</verse>
				<verse number="5">「若係有人在田肚抑係葡萄園掌牛羊，由在頭牲在別人田肚食掉農作物，佢一定愛拿自家田肚出產个五榖抑係葡萄賠別人个損失。</verse>
				<verse number="6">「若係有人在自家田肚燒竻仔，火燒到別人田肚去，將別人吂收割抑係割下个農作物燒掉，佢一定愛賠別人个損失。</verse>
				<verse number="7">「若係有人答應保管別人个錢抑係貴重个東西，被賊仔對屋下偷走，賊仔被人捉到，一定愛加倍賠償；</verse>
				<verse number="8">總係賊仔若係捉毋到，受託个人一定愛到敬拜上帝个地方發誓，表示佢無偷拿別人拜託佢保管个財物。</verse>
				<verse number="9">「有關財產糾紛个案件，無論係牛、驢、羊、衫褲、抑係其他毋見掉个東西，相爭个雙方全部愛到敬拜上帝个地方去。上帝判定有罪个一方，一定愛加倍賠對方。</verse>
				<verse number="10">「若係有人答應看守別人个驢、牛、羊，抑係其他个頭牲，頭牲若有死傷抑係被人搶走，總係無證人，</verse>
				<verse number="11">受託个人一定愛到敬拜上主个地方發誓，表示佢無偷物主个頭牲。恁樣，物主就愛接受損失，受託个人毋使賠。</verse>
				<verse number="12">若係頭牲確實被人偷走，受託个人一定愛賠償物主。</verse>
				<verse number="13">頭牲若被野獸咬死擘爛，受託个人一定愛將屍體碎骨帶來做證據；佢就毋使賠。</verse>
				<verse number="14">「若係有人向別人借用頭牲，物主無在場个時，這頭牲無論係受傷抑係死掉，借用个人一定愛賠；</verse>
				<verse number="15">物主若在場，就毋使賠。頭牲若係租來个，損失愛用租金賠。」</verse>
				<verse number="16">「若係有男人引誘吂定親个人家女㧯姖發生性關係，佢一定愛拿出聘金來討該細妹仔做𡜵娘。</verse>
				<verse number="17">若係細妹仔个阿爸毋肯俾佢㧯妹仔結婚，該男人一定愛交出像送給人家女聘金恁多个錢。</verse>
				<verse number="18">「行邪術个女人，一定愛將姖處死。</verse>
				<verse number="19">「㧯動物發生性關係个人，一定愛將佢處死。</verse>
				<verse number="20">「向𠊎 — 上主以外个神明獻祭个人，一定愛將佢滅掉。</verse>
				<verse number="21">「做毋得欺負抑係壓迫對外地來个旅客；愛記得你等識在 埃及 做旅客暫住過。</verse>
				<verse number="22">做毋得欺負寡婦抑係孤兒。</verse>
				<verse number="23">若係你等欺負佢等，𠊎 — 上主會聽佢等个求喊，</verse>
				<verse number="24">也會大發譴，使你等死在刀下；你等个𡜵娘會成做寡婦，你等个子女會成做孤兒。</verse>
				<verse number="25">「若係你借錢給𠊎子民中个窮苦人，做毋得像放債个人㧯佢算利息。</verse>
				<verse number="26">若係你拿別人个外衫做抵押，一定在日頭落山以前還給佢；</verse>
				<verse number="27">因為該係佢惟一愛蓋燒个，無該領外衫愛樣般睡目呢？佢向𠊎求喊，𠊎一定會幫助佢，因為𠊎係慈悲个。</verse>
				<verse number="28">「做毋得譭謗上帝，也做毋得咒罵人民个領袖。</verse>
				<verse number="29">「愛拿你新出產个農作物、酒、㧯油獻給𠊎，做毋得拖延。 「愛將你个長子獻給𠊎。</verse>
				<verse number="30">將你所有頭胎个牛羊獻給𠊎。頭胎个牛牯、羊牯愛跈牛乸、羊乸七日，到第八日愛獻給𠊎。</verse>
				<verse number="31">「你等係𠊎个子民，愛做聖潔个人；所以你等做毋得食被野獸咬死个頭牲个肉；愛㧒給狗仔食。」</verse>
			</chapter>
			<chapter number="23">
				<verse number="1">「做毋得傳謠言；做毋得㧯壞人連手做假見證。</verse>
				<verse number="2">做毋得跈眾人做壞事；在打官司个事上做毋得跈眾人冤枉正直；</verse>
				<verse number="3">窮苦人打官司个時也做毋得偏心保護佢。</verse>
				<verse number="4">「若係你堵到仇敵个牛抑係驢迷路，愛牽轉去交還佢。</verse>
				<verse number="5">若係仇敵个驢揹忒重跌倒，愛幫助佢將驢扶起來，做毋得閃開。</verse>
				<verse number="6">「窮苦人打官司个時，你做毋得冤枉正直。</verse>
				<verse number="7">做毋得用無影無跡个事來告人；做毋得判正直無罪个人死刑；因為𠊎一定愛責罰做這種壞事个人。</verse>
				<verse number="8">做毋得被人个紅包收買；因為收紅包會使人青盲，又會曲解義人个話。</verse>
				<verse number="9">「做毋得欺負對外地來个旅客；因為你等識在 埃及 做過旅客，經驗過做旅客个滋味。」</verse>
				<verse number="10">「六年中你愛耕種田地，收成產物；</verse>
				<verse number="11">總係在第七年，你愛俾土地歇睏，做毋得耕種。愛俾窮苦人食該兜產物，賸下个給野獸食。你个葡萄園㧯橄欖園也愛照樣辦理。</verse>
				<verse number="12">「一禮拜六日做事，總係第七日做毋得做事，好俾你个牛、驢休息，並使你个奴才㧯暫住个旅客全部有好來回復元氣。</verse>
				<verse number="13">「𠊎 — 上主對你等講過个話，你等愛認真遵守。做毋得向其他个神明祈禱，連佢等个名也做毋得提到。」</verse>
				<verse number="14">「逐年愛為𠊎守三大節期。</verse>
				<verse number="15">愛在亞筆月，就係你離開 埃及 該隻月，照𠊎所吩咐个守除酵節。在節期个七日中，愛食無酵餅。 「做毋得空手來敬拜𠊎。</verse>
				<verse number="16">「你愛在開始收成農產物个時守收割節。 「你愛在秋季摘果子个時守收藏節。</verse>
				<verse number="17">「逐年堵到這三大節期，你屋下所有个男人全部愛來敬拜𠊎 — 至高个上主。</verse>
				<verse number="18">「你獻牲祭个時，做毋得拿牲祭个血㧯有酵个餅共下獻。節期所獻牲祭个油，做毋得留到第二朝晨。</verse>
				<verse number="19">「逐年愛將你所收成最好个新出農產物帶到上主 — 你上帝个聖殿。 「做毋得用羊乸个乳來煮細羊仔。」</verse>
				<verse number="20">「𠊎愛派天使在你路途中保護你，𢱋你到𠊎為你預備个地方去。</verse>
				<verse number="21">你愛謹慎聽從佢，做毋得悖逆佢；若無，佢一定毋會赦免你等个過犯，因為係𠊎差派佢去个。</verse>
				<verse number="22">若係你聽從佢，遵守𠊎所有个命令，𠊎就做你仇敵个仇敵，做迫害你个人个敵人。</verse>
				<verse number="23">𠊎个天使會行在你頭前，𢱋你進入 亞摩利 人、 赫 人、 比利洗 人、 迦南 人、 希未 人、 耶布斯 人該位去；𠊎愛消滅佢等。</verse>
				<verse number="24">做毋得跪拜佢等个神明，也做毋得服事它兜；做毋得跈佢等个宗教。愛消滅佢等个神像，打碎佢等敬拜个柱像。</verse>
				<verse number="25">你等愛敬拜𠊎 — 上主、你等个上帝，𠊎就賜食物㧯水給你，又愛除掉你所有个病痛。</verse>
				<verse number="26">在你國內毋會有落胎抑係毋會𫱔个細妹仔。𠊎愛賜給你長壽。</verse>
				<verse number="27">「𠊎愛使該兜抵抗你个人驚𠊎，使㧯你相㓾个人著驚；所有个對敵全部會在你面前轉身逃走。</verse>
				<verse number="28">𠊎愛派大黃蜂 在你頭前逐走 希未 人、 迦南 人㧯 赫 人。</verse>
				<verse number="29">總係𠊎無愛在一年內逐出佢等，免得土地荒廢，增加多多个野獸來害你等。</verse>
				<verse number="30">𠊎會漸漸逐走佢等，直到你等人數增加，做得承受該土地。</verse>
				<verse number="31">𠊎愛為你定邊界，對 紅海 到 幼發拉底 河；對 地中海 到沙漠地帶。𠊎愛將該地方个人交在你个手中；你前進个時，愛逐走佢等。</verse>
				<verse number="32">做毋得㧯佢等抑係佢等个神明立約。</verse>
				<verse number="33">做毋得俾佢等住在你个國內，驚怕佢等會害你得罪𠊎。若係你跪拜佢等个神明，這會成做害死你个陷阱。」</verse>
			</chapter>
			<chapter number="24">
				<verse number="1">上主對 摩西 講：「你㧯 亞倫 、 拿答 、 亞比戶 ，連同七十個 以色列 个長老愛上山到𠊎這位來；愛在離𠊎遠遠个地方跪拜。</verse>
				<verse number="2">只有你一儕可以到𠊎面前，其他个人做毋得偎近；人民全部做毋得跈你上山。」</verse>
				<verse number="3">摩西 下山，對人民傳講上主所有个命令㧯例規。全體人民同聲應講：「上主所吩咐个話，𠊎等一定遵守。」</verse>
				<verse number="4">摩西 將上主个命令全部寫下來。第二日打早，佢在山腳下起一座祭壇，並頓十二支石柱；每一支石柱代表 以色列 十二支族个一族。</verse>
				<verse number="5">然後佢派 以色列 人中有兜後生人向上主獻燒化祭，又用牛牯獻平安祭。</verse>
				<verse number="6">摩西 將頭牲个血一半裝在盆肚，另外一半洒在祭壇頂，</verse>
				<verse number="7">然後向人民大聲讀約書底背記載上主个命令。人民全部講：「上主所吩咐一切个命令，𠊎等願意順從遵守。」</verse>
				<verse number="8">摩西 就拿盆肚个血拂在人民身項，講：「這係立約个血，係上主照佢一切个誡命㧯你等立約个記號。」</verse>
				<verse number="9">摩西 、 亞倫 、 拿答 、 亞比戶 ，連同七十個 以色列 个長老共下上山；</verse>
				<verse number="10">佢等看到 以色列 个上帝。在佢腳下，有像藍寶石鋪个道路，就像天空个藍色。</verse>
				<verse number="11">上帝並無伸手傷害這兜 以色列 个領袖。佢等看到上帝，還在該位共下食、共下啉。</verse>
				<verse number="12">上主對 摩西 講：「你上山到𠊎這位來。你在這位个時，𠊎愛交給你兩垤石版，石版頂有𠊎所寫愛教導𠊎子民个法律㧯誡命。」</verse>
				<verse number="13">摩西 㧯佢个助手 約書亞 準備好勢， 摩西 就開始上上帝个山。</verse>
				<verse number="14">摩西 對 以色列 个長老講：「你等在營地等，直到𠊎等轉來。有 亞倫 、 戶珥 㧯你等共下；若係有麼介紛爭，做得到佢等面前來解決。」</verse>
				<verse number="15">摩西 上到 西奈 山，有雲將山遮等。</verse>
				<verse number="16">上主个榮耀降在山頂。 以色列 人民親眼看到這榮耀个光彩，就像一團烈火在山頂燒等。雲遮蓋山有六日久，第七日上主對雲肚喊 摩西 。</verse>
				<verse number="17"></verse>
				<verse number="18">摩西 進入雲肚，上山去；佢在該位停留四十日夜。</verse>
			</chapter>
			<chapter number="25">
				<verse number="1">上主對 摩西 講：</verse>
				<verse number="2">「你愛吩咐 以色列 人獻禮物給𠊎。所有樂意奉獻給𠊎个禮物，你等就收下來歸給𠊎。</verse>
				<verse number="3">你等愛接受个禮物係：金、銀、銅；</verse>
				<verse number="4">藍色、紫色、㧯深紅色个羊毛；麻紗；山羊毛刺个布料；</verse>
				<verse number="5">染紅个羊牯皮；盡靚个皮料；金合歡木；</verse>
				<verse number="6">燈油；製造聖油㧯香个原料；</verse>
				<verse number="7">紅瑪瑙㧯其他寶石，愛拿來鑲在大祭司个以弗得聖服㧯胸牌頂。</verse>
				<verse number="8">人民愛為𠊎起一座聖所，好俾𠊎住在佢等當中。</verse>
				<verse number="9">有關這聖帳篷㧯底背所有用品，全部愛照𠊎所指示你个樣式來製造。」</verse>
				<verse number="10">「愛用金合歡木造櫃仔，櫃仔長一百一十公分，闊六十六公分，高六十六公分。</verse>
				<verse number="11">愛用純金將櫃仔个內外全部包等，四面愛鑲齒形金邊。</verse>
				<verse number="12">愛鑄造四隻穿槓仔用个金圈仔，安在櫃仔个四腳上，一片兩隻。</verse>
				<verse number="13">愛用金合歡木造兩支槓仔，用金包等，</verse>
				<verse number="14">拿來穿過櫃仔兩片个金圈仔。</verse>
				<verse number="15">這兩支槓仔愛常常留在圈仔肚，做毋得挷出來。</verse>
				<verse number="16">將𠊎愛賜給你寫等誡命个石版放在櫃仔肚。</verse>
				<verse number="17">「愛用純金造一個櫃仔蓋，就係贖罪蓋，長一百一十公分，闊六十六公分。</verse>
				<verse number="18">又愛用金仔捶出兩隻基路伯 ，</verse>
				<verse number="19">黏在蓋仔頂，一頭一隻，成做蓋仔个一部份。</verse>
				<verse number="20">兩隻基路伯面對面，打開翼胛，遮等櫃仔蓋。</verse>
				<verse number="21">將𠊎愛賜給你寫等誡命个石版放在櫃仔肚，然後將蓋仔揜在櫃仔頂高。</verse>
				<verse number="22">𠊎愛在該位㧯你相會，也愛在蓋仔頂高，對兩隻基路伯中間，將𠊎為 以色列 人民立个法律全部傳給你。」</verse>
				<verse number="23">「愛用金合歡木造一張桌仔，長八十八公分，闊四十四公分，高六十六公分。</verse>
				<verse number="24">愛用純金來包等，並愛在四面鑲齒形金邊。</verse>
				<verse number="25">桌仔个周圍愛加七十五公釐闊个框仔，框仔愛鑲齒形金邊。</verse>
				<verse number="26">愛鑄造四隻用來扛个金圈仔，安在桌仔四角个腳頂。</verse>
				<verse number="27">安金圈仔愛偎近框仔，俾扛桌仔个槓仔穿過去。</verse>
				<verse number="28">愛用金合歡木造兩支槓仔，用金包等。</verse>
				<verse number="29">愛用純金造桌頂个盤仔、碗，㧯敬神用个酒壺㧯酒杯。</verse>
				<verse number="30">桌仔愛放在約櫃前，桌頂常常擺等獻給𠊎个供餅。」</verse>
				<verse number="31">「愛用純金造一座燈臺。燈座㧯柱仔愛用金仔打造；裝飾个花蕊、花托、花瓣，全部愛捶到一垤連共下。</verse>
				<verse number="32">燈臺兩片伸出六支枝仔，一片三支。</verse>
				<verse number="33">逐支枝仔有三蕊花，形狀像杏花，有花托㧯花瓣。</verse>
				<verse number="34">燈臺个柱仔有四蕊花，形狀像杏花，有花托㧯花瓣。</verse>
				<verse number="35">三對枝仔个每一對下背有一個花托。</verse>
				<verse number="36">花托、枝仔㧯燈臺，全部愛用歸垤純金打出來个。</verse>
				<verse number="37">愛為燈臺造七盞燈，燈盞愛俾燈火向頭前照。</verse>
				<verse number="38">愛用純金造燈花剪刀㧯燈盤。</verse>
				<verse number="39">愛用三十五公斤个純金造燈臺㧯所有用品。</verse>
				<verse number="40">愛注意照𠊎在山頂指示你个樣式去造。」</verse>
			</chapter>
			<chapter number="26">
				<verse number="1">「愛用十幅帳幔做聖帳篷 。這兜帳幔愛用麻紗㧯藍色、紫色、深紅色个肨線來刺，又愛用幼秀个手工繡基路伯个圖案。</verse>
				<verse number="2">每一幅大細相同，長十二公尺，闊兩公尺。</verse>
				<verse number="3">愛將五幅攣共下，成做一組，另外五幅也係恁樣。</verse>
				<verse number="4">每一組帳幔个最尾一幅邊愛攣藍色个紐襻。</verse>
				<verse number="5">愛將五十隻紐襻攣在第一組个頭幅，另外五十個紐襻攣在第二組个最尾一幅。</verse>
				<verse number="6">愛造五十隻金鉤仔，將兩組帳幔連共下，成做歸垤帳篷。</verse>
				<verse number="7">「愛用山羊毛刺十一幅帳幔來做聖帳篷个篷頂。</verse>
				<verse number="8">每一幅大細相同，長十三公尺，闊兩公尺。</verse>
				<verse number="9">愛將五幅攣共下，成做一組，其他六幅另外做一組。愛將第六幅摺做兩層，縋在聖帳篷个正面。</verse>
				<verse number="10">第一組帳幔最尾一幅个邊愛攣五十個紐襻，另外一組个邊也愛攣五十個紐襻。</verse>
				<verse number="11">愛做五十隻銅鉤仔，鉤等紐襻，將兩組帳幔連起來，成做歸垤篷頂。</verse>
				<verse number="12">愛將賸到个半幅縋在聖帳篷个後背。</verse>
				<verse number="13">兩片帳幔賸下个五十公分縋在聖帳篷个兩片，將聖帳篷遮好。</verse>
				<verse number="14">「愛再造兩垤篷頂，一垤用染紅个羊牯皮做个，另外一垤用盡靚个皮料，做最外層个頂蓋。</verse>
				<verse number="15">「愛用金合歡木造搭聖帳篷个骨架。</verse>
				<verse number="16">逐支骨架高四公尺，闊六十六公分，</verse>
				<verse number="17">各有兩個榫頭，用來連接骨架。所有个骨架全部有這榫頭。</verse>
				<verse number="18">愛在聖帳篷个南片做二十支骨架，</verse>
				<verse number="19">架底有四十隻銀座，逐支骨架有兩隻銀座來固定。</verse>
				<verse number="20">聖帳篷个北片也愛有二十支骨架，</verse>
				<verse number="21">㧯四十隻銀座，逐支骨架底下兩隻銀座。</verse>
				<verse number="22">愛在聖帳篷个後背，就係篷个西片，造六支骨架；</verse>
				<verse number="23">兩頭兩隻轉角愛加兩支骨架，</verse>
				<verse number="24">轉角兩支骨架个下背相連接，一直連到頂頭，成做一隻轉角；兩隻轉角个兩支骨架全部係恁樣連做一下。</verse>
				<verse number="25">一共愛有八支骨架㧯十六隻銀座，每一支骨架底下各有兩隻銀座。</verse>
				<verse number="26">「愛用金合歡木造十五支橫杠；聖帳篷一片个骨架有五支橫杠，</verse>
				<verse number="27">另外一片五支；篷个後背，就係篷个西片，也有五支。</verse>
				<verse number="28">中間个橫杠安在骨架半中央，愛對篷个這頭通到另外該頭。</verse>
				<verse number="29">愛用金包等骨架，又愛安金圈仔，俾橫杠穿過；橫杠也愛用金包等。</verse>
				<verse number="30">愛照𠊎在山頂指示你个樣式將聖帳篷立起來。</verse>
				<verse number="31">「愛用麻紗㧯藍色、紫色、深紅色个肨線來刺一幅帳幔，頂高愛用幼秀个手工繡基路伯个圖案。</verse>
				<verse number="32">愛將這帳幔掛在四支用金合歡木造成个柱仔頂。柱仔用金包等，柱仔頂有金鉤仔，柱仔安在四隻銀座頂。</verse>
				<verse number="33">愛將帳幔掛在聖帳篷頂該一列鉤仔，將放兩垤石版个約櫃放在帳幔後背。這帳幔愛將聖所㧯至聖所隔開。</verse>
				<verse number="34">愛將贖罪个蓋仔安在至聖所內該約櫃頂高，</verse>
				<verse number="35">將供桌放在至聖所外聖帳篷个北片，將燈臺安在聖帳篷个南片，彼此對等。</verse>
				<verse number="36">「愛用麻紗㧯藍色、紫色、深紅色个肨線，用繡花个手工，為聖帳篷門口來刺一幅門簾。</verse>
				<verse number="37">愛用金合歡木為門簾造五支柱仔，用金包等，頂高有金鉤仔；又愛為柱仔鑄造五隻銅座。」</verse>
			</chapter>
			<chapter number="27">
				<verse number="1">「愛用金合歡木造祭壇。壇係四方个，長兩公尺兩公寸，闊兩公尺兩公寸，高一公尺三公寸。</verse>
				<verse number="2">愛在壇个四角頂造突出來个角，㧯壇連做歸垤，並用銅將壇包等。</verse>
				<verse number="3">愛造火灰盤，又造鏟仔、碗、肉叉、㧯火鼎；這兜用品全部愛用銅仔鑄造。</verse>
				<verse number="4">愛為祭壇造一隻銅網，四角有四隻用來扛个銅圈仔。</verse>
				<verse number="5">愛將網安在祭壇个周圍下半節，對壇底透到壇个一半恁高。</verse>
				<verse number="6">愛用金合歡木造祭壇个槓仔，用銅包等，</verse>
				<verse number="7">扛个時將槓仔插入兩邊个銅圈仔。</verse>
				<verse number="8">愛用枋仔造祭壇；壇个中央係空殼个。你愛照𠊎在山頂指示个樣式造。」</verse>
				<verse number="9">「愛用麻紗刺个帳幔為聖帳篷做圍欄，圍一隻庭院。南片个帳幔長四十四公尺，</verse>
				<verse number="10">用二十支有座个銅柱架起來，柱仔頂个鉤仔㧯橫杠係用銀造个。</verse>
				<verse number="11">北片个帳幔也係恁樣，長四十四公尺，用二十支有座个銅柱架起來，柱仔頂个鉤仔㧯橫杠係用銀造个。</verse>
				<verse number="12">西片个帳幔長二十二公尺，有十支有座个柱仔。</verse>
				<verse number="13">在東片，庭院个門口，帳幔也係二十二公尺闊。</verse>
				<verse number="14">門口个兩片全部愛有六公尺六公寸闊个帳幔，</verse>
				<verse number="15">用三支有座个柱仔架起來。</verse>
				<verse number="16">庭院門口愛有九公尺長个門簾，用麻紗㧯藍色、紫色、深紅色个肨線，用繡花个手工刺成，用四支有座个柱仔架起來。</verse>
				<verse number="17">庭院四圍个柱仔全部愛用銀个橫杠連等，柱仔頂个鉤仔愛用銀造个，柱座用銅造个。</verse>
				<verse number="18">庭院愛長四十四公尺，闊二十二公尺，高兩公尺兩公寸。帳幔愛用麻紗刺个，柱座用銅造个。</verse>
				<verse number="19">聖帳篷內各樣个用品，聖帳篷㧯圍庭院所用个釘仔全部愛用銅造个。」</verse>
				<verse number="20">「愛吩咐 以色列 人民將最好个橄欖油拿來給你，做點燈火用，俾燈火常常𤏸等。</verse>
				<verse number="21">亞倫 㧯佢个子孫愛在聖帳篷內、約櫃前个帳幔外點𤏸燈火。這燈火愛在𠊎 — 上主面前對臨暗仔一直點到天光。 以色列 人民㧯佢等个子孫一定愛永遠謹守這命令。」</verse>
			</chapter>
			<chapter number="28">
				<verse number="1">「你愛使若哥 亞倫 㧯厥孻仔 拿答 、 亞比戶 、 以利亞撒 、 以他瑪 對 以色列 人當中分別出來，到你身邊做祭司來事奉𠊎。</verse>
				<verse number="2">愛為若哥 亞倫 做祭司个聖服，使佢有尊嚴又派頭。</verse>
				<verse number="3">你愛將所有𠊎給佢有技術个師傅喊來，吩咐佢等為 亞倫 做衫褲，俾佢分別出來做祭司來事奉𠊎。</verse>
				<verse number="4">愛吩咐佢等做胸牌、以弗得聖服、外衫、有刺花个內袍、帽仔、腰帶。佢等愛為若哥 亞倫 㧯佢該兜孻仔做這兜聖服，俾佢等做祭司來事奉𠊎。</verse>
				<verse number="5">該兜師傅愛用金線，藍色、紫色、深紅色个肨線，㧯麻紗來刺。</verse>
				<verse number="6">「佢等愛用金線，藍色、紫色、深紅色个肨線，㧯麻紗，用幼秀个手工做以弗得聖服。</verse>
				<verse number="7">愛在以弗得兩片攣兩條做得繫个肩帶。</verse>
				<verse number="8">愛用共樣个材料刺一條帶仔，攣在以弗得，俾它成做歸垤。</verse>
				<verse number="9">愛拿兩垤紅瑪瑙，在頂高刻 以色列 十二個孻仔个名，</verse>
				<verse number="10">照佢等出世个順序，在逐垤寶石頂高刻六個名。</verse>
				<verse number="11">愛喊手工好个打石師傅在兩垤寶石頂高刻 以色列 該兜孻仔个名，將寶石鑲在金絲圈肚，</verse>
				<verse number="12">然後攣在以弗得个肩帶上，代表 以色列 十二支族。恁樣， 亞倫 个肩頭會帶等十二支族个名，俾𠊎 — 上主永遠記得𠊎个子民。</verse>
				<verse number="13">愛打兩隻金絲圈，</verse>
				<verse number="14">㧯兩條純金个鍊仔；鍊仔愛像挼好个索仔恁樣，結在金絲圈頂高。」</verse>
				<verse number="15">「愛用幼秀个手工為大祭司造一隻判斷个胸牌，就係用來推算上帝旨意个胸牌；㧯造以弗得共樣，愛用金線，藍色、紫色、深紅色个肨線，㧯麻紗攣好。</verse>
				<verse number="16">胸牌愛做四方形个，疊做兩層，長二十二公分，闊二十二公分。</verse>
				<verse number="17">愛在胸牌頂高鑲四行寶石：第一行愛鑲紅寶石、黃玉、㧯紅玉；</verse>
				<verse number="18">第二行綠寶石、藍寶石、㧯鑽石；</verse>
				<verse number="19">第三行紫玉、白瑪瑙、㧯紫晶；</verse>
				<verse number="20">第四行水蒼玉、紅瑪瑙、㧯碧玉。這兜全部愛鑲在金絲圈頂高。</verse>
				<verse number="21">十二垤寶石个每一垤愛刻上 以色列 一個孻仔个名，代表 以色列 十二支族。</verse>
				<verse number="22">愛用純金造胸牌个鍊仔，像挼好个索仔。</verse>
				<verse number="23">愛造兩隻金圈仔，安在胸牌頂高个兩頭，</verse>
				<verse number="24">將該兩條金鍊仔穿在胸牌兩頭个圈仔肚。</verse>
				<verse number="25">鍊仔个另外兩頭愛穿在兩隻金絲圈肚，恁樣該兜就連在以弗得頭前个肩帶頂高。</verse>
				<verse number="26">愛造兩隻金圈仔，安在胸牌下背个兩頭，偎近以弗得个內邊。</verse>
				<verse number="27">愛再造兩隻金圈仔，接在以弗得頭前兩條肩帶个下背，偎近攣个地方，在手工刺个帶仔頂高。</verse>
				<verse number="28">愛用藍色个帶仔將胸牌个圈仔㧯以弗得个圈仔䌈共下，使胸牌貼在以弗得个帶仔頂高，就毋會𢫫掉。</verse>
				<verse number="29">「 亞倫 進入聖所个時，愛繫等這刻有 以色列 十二支族名、判斷个胸牌；恁樣，𠊎 — 上主就永遠記得𠊎个子民。</verse>
				<verse number="30">愛將烏陵㧯土明 放在判斷个胸牌肚，俾 亞倫 入到𠊎 — 上主面前个時做得繫等。恁樣， 亞倫 在𠊎面前个時一定愛常常帶等判斷个胸牌，佢正能推算𠊎對吾子民 以色列 个旨意。」</verse>
				<verse number="31">「著在以弗得底下个長衫愛完全用藍色个肨線來刺。</verse>
				<verse number="32">長衫个中央愛為到頭那留一個孔仔做領口；周圍愛加刺領邊，正毋會裂掉。</verse>
				<verse number="33">長衫下背个衫塍愛用藍色、紫色、深紅色个肨線刺做石榴，</verse>
				<verse number="34">又愛用純金个細玲琅隔在石榴中間。</verse>
				<verse number="35">亞倫 執行祭司職務个時，一定愛著這長衫。當佢進入聖所，到𠊎面前抑係退出个時，𠊎就會聽到細玲琅个聲；恁樣，佢就毋會死。</verse>
				<verse number="36">「愛用純金造一面牌仔，頂高刻等『歸上主為聖』。</verse>
				<verse number="37">愛用藍色个帶仔將它繫在帽仔頭前。</verse>
				<verse number="38">亞倫 愛將這牌仔掛在額頭來擔當 以色列 人犯到聖物條例个罪。恁樣，𠊎 — 上主就會歡喜接納人民獻給𠊎所有个禮物。 亞倫 愛一直將這牌仔掛在額頭。</verse>
				<verse number="39">「愛拿麻紗做 亞倫 个內衫，也愛用麻紗做帽仔，用有繡花个料仔做腰帶。</verse>
				<verse number="40">「愛為 亞倫 該兜孻仔做內衫、腰帶、㧯帽仔，使佢等有尊嚴㧯派頭。</verse>
				<verse number="41">愛將這兜衫褲著在若哥 亞倫 㧯佢該兜孻仔身項，又愛膏橄欖油，授聖職給佢等，設立佢等做祭司事奉𠊎。</verse>
				<verse number="42">愛用麻紗做褲給佢等著；褲愛對腰間到膝頭，遮等下體。</verse>
				<verse number="43">亞倫 㧯佢該兜孻仔進入聖帳篷到𠊎面前，抑係在聖所執行祭司職務个時，一定愛著這褲，免得現出下體致死。這係為 亞倫 㧯佢个後代所定永遠个例規。」</verse>
			</chapter>
			<chapter number="29">
				<verse number="1">「你授聖職給 亞倫 㧯佢該兜孻仔，設立佢等做祭司事奉𠊎，愛恁樣做：愛捉一隻細牛牯㧯兩隻無缺點个綿羊牯；</verse>
				<verse number="2">用最好个麵粉去做無酵餅，有兜攪油做，有兜無攪油做，有兜膏油做無酵个薄餅。</verse>
				<verse number="3">將這兜餅裝在籃仔肚，在你獻細牛牯㧯兩隻綿羊牯个時帶來獻給𠊎。</verse>
				<verse number="4">「你愛將 亞倫 㧯佢該兜孻仔帶到聖帳篷門口來，吩咐佢等洗身。</verse>
				<verse number="5">然後愛俾 亞倫 著祭司个聖服 — 內衫、掛等以弗得个長衫、胸牌、㧯手工刺个帶仔。</verse>
				<verse number="6">將帽仔戴在佢个頭那頂，將刻等『歸上主為聖』个聖牌繫在帽仔頂高，</verse>
				<verse number="7">最後拿聖油倒在佢頭那頂來設立佢。</verse>
				<verse number="8">「你愛將佢該兜孻仔帶來，㧯佢等著內衫、</verse>
				<verse number="9">繫腰帶、戴帽仔。這就係授聖職給 亞倫 㧯佢該兜孻仔个條例。佢等㧯佢等个後代愛永遠做祭司事奉𠊎。</verse>
				<verse number="10">「你愛將牛牯牽到聖帳篷前，吩咐 亞倫 㧯佢該兜孻仔按手在牛个頭那頂。</verse>
				<verse number="11">就在聖帳篷門口，在𠊎 — 上主面前，將牛牯㓾掉。</verse>
				<verse number="12">愛拿兜牛血，用手指膏在祭壇四隻角頂；將賸到个血倒在壇腳。</verse>
				<verse number="13">然後將該包等腹內个油、肝个最好部份、㧯帶油个兩隻腰仔，在祭壇頂高燒，來獻給𠊎。</verse>
				<verse number="14">總係牛牯个肉、皮、㧯腸愛在營外燒。這係祭司个贖罪祭。</verse>
				<verse number="15">「你愛牽一隻綿羊牯來，吩咐 亞倫 㧯佢該兜孻仔按手在羊个頭那頂。</verse>
				<verse number="16">將綿羊牯㓾掉，又愛拿羊血洒在祭壇个四周圍。</verse>
				<verse number="17">你愛將綿羊牯切做一垤一垤；洗淨腹內㧯後腿，放在頭那㧯其他碎肉頂高。</verse>
				<verse number="18">愛將歸隻綿羊牯放在祭壇頂燒，做燒化祭獻給𠊎 — 上主。這火祭个香味係𠊎歡喜个。</verse>
				<verse number="19">「你愛牽另外一隻綿羊牯來，吩咐 亞倫 㧯佢該兜孻仔按手在羊个頭那頂。</verse>
				<verse number="20">愛將綿羊牯㓾掉，然後拿兜羊血膏在 亞倫 㧯佢該兜孻仔个右耳鉈，也膏在佢等右手指公㧯右腳指公。其他个血愛洒在祭壇个四周圍。</verse>
				<verse number="21">愛拿一些仔祭壇頂高个血㧯一些仔聖油拂在 亞倫 㧯佢个衫褲，也拂在 亞倫 該兜孻仔㧯佢等个衫褲。恁樣，佢、佢該兜孻仔、㧯佢等个衫褲就全部分別為聖。</verse>
				<verse number="22">「你愛割下綿羊牯个油、尾、包等腹內个油、肝个最好部份、兩隻帶油个腰仔、㧯右腿。 (這係授聖職給祭司所獻个綿羊牯。)</verse>
				<verse number="23">對奉獻給𠊎該放無酵餅个籃肚拿一垤餅，一垤攪油做个餅，㧯一垤薄餅。</verse>
				<verse number="24">將這兜食物全部放在 亞倫 㧯佢該兜孻仔手項，搖幾下做搖祭獻給𠊎。</verse>
				<verse number="25">然後你愛對佢等手中將食物接過來，放在祭壇頂高燒，做燒化祭獻給𠊎 — 上主。這火祭个香味係𠊎歡喜个。</verse>
				<verse number="26">「你愛拿 亞倫 承接聖職所獻綿羊牯个胸脯肉搖幾下，做搖祭獻給𠊎。這份祭肉就係你个。</verse>
				<verse number="27">「授聖職給祭司个時，該兜用過个綿羊牯个胸脯肉㧯右腿，全部愛分別為聖，做搖祭歸給𠊎，然後交給該兜祭司。</verse>
				<verse number="28">這係𠊎毋會改變个定例： 以色列 人獻平安祭个時，頭牲个胸脯肉㧯右腿愛給該兜祭司；該係𠊎个子民獻給𠊎 — 上主个特別祭物。</verse>
				<verse number="29">「 亞倫 死後，佢个聖服愛傳給佢个子孫，俾佢等接受聖職个時好著。</verse>
				<verse number="30">該承接 亞倫 做祭司个子孫，佢來到聖帳篷肚、在聖所事奉𠊎个時，愛著這聖服七日。</verse>
				<verse number="31">「 亞倫 㧯佢該兜孻仔接受聖職个時，用過个綿羊牯个肉，你愛拿到一個聖潔个所在去煮。</verse>
				<verse number="32">佢等愛在聖帳篷門口食這羊肉㧯籃仔肚个餅。</verse>
				<verse number="33">接受聖職个赦罪禮用過个食物，佢等也愛食。只有祭司正做得食，因為這食物係聖个。</verse>
				<verse number="34">若係有肉抑係餅到第二日朝晨還吂食掉，就愛燒掉，毋好再食，因為這食物係聖个。</verse>
				<verse number="35">「你愛照𠊎所吩咐个一切，為 亞倫 㧯佢該兜孻仔舉行接受聖職个典禮七日。</verse>
				<verse number="36">逐日你一定愛獻上一隻牛牯做贖罪祭，使祭壇潔淨，也愛用橄欖油膏祭壇，使它分別為聖。</verse>
				<verse number="37">你愛逐日恁樣做，連等七日，使祭壇完全分別為聖。所有憑到祭壇个人抑係東西全部會分別為聖 。</verse>
				<verse number="38">「你逐日愛獻兩隻一歲大个細羊在祭壇頂，做毋得停；</verse>
				<verse number="39">朝晨獻一隻，臨暗仔獻另外一隻。</verse>
				<verse number="40">獻第一隻羊个時愛同時獻一公斤幼麵粉，攪一公升純个橄欖油，另外獻一公升个祭酒。</verse>
				<verse number="41">臨暗仔獻第二隻羊个時，你愛照朝晨恁樣將素祭㧯祭酒獻給𠊎 — 上主。這火祭个香味係𠊎歡喜个。</verse>
				<verse number="42">世世代代，這燒化祭愛在𠊎面前、在聖帳篷門口獻；該聖帳篷就係𠊎愛㧯你等相會、㧯你講話个地方。</verse>
				<verse number="43">𠊎愛㧯 以色列 人民在該位相會。𠊎个榮耀會將該地分別為聖。</verse>
				<verse number="44">𠊎愛使聖帳篷㧯祭壇成聖，愛將 亞倫 㧯佢該兜孻仔分別出來，做祭司事奉𠊎。</verse>
				<verse number="45">𠊎愛住在 以色列 人民當中，愛做佢等个上帝。</verse>
				<verse number="46">佢等會知𠊎係上主 — 佢等个上帝；𠊎對 埃及 將佢等𢱋出來，係為到愛住在佢等當中。𠊎係上主 — 佢等个上帝。」</verse>
			</chapter>
			<chapter number="30">
				<verse number="1">「你愛用金合歡木造一座燒香个壇。</verse>
				<verse number="2">壇係四方个，長四十五公分，闊四十五公分，高九十公分。這壇个四隻角愛㧯壇連做歸垤。</verse>
				<verse number="3">愛用純金包等壇个頂高、四邊、㧯四角，周圍鑲齒形金邊。</verse>
				<verse number="4">愛造兩隻用來扛壇个金圈仔，安在壇兩片金邊下背，俾扛壇个槓仔穿過去。</verse>
				<verse number="5">愛用金合歡木造槓仔，用金包等。</verse>
				<verse number="6">香壇愛放在約櫃前个帳幔外，面對等約櫃頂高贖罪个蓋仔，就係𠊎愛㧯你相會个地方。</verse>
				<verse number="7">逐日朝晨， 亞倫 來整理燈盞个時，愛在壇頂燒當香个香。</verse>
				<verse number="8">臨暗仔點燈火个時，佢也一定愛燒香。世世代代愛繼續在𠊎 — 上主面前恁樣獻香，做毋得停。</verse>
				<verse number="9">做毋得在這壇頂燒無合規定个香，抑係獻燒化祭抑係素祭，也做毋得在頂高獻祭酒。</verse>
				<verse number="10">每年一擺， 亞倫 愛行潔淨个禮儀 ，用贖罪祭牲个血膏在壇个四角頂。世世代代愛遵行這禮儀。這壇愛完全分別為聖，奉獻給𠊎 — 上主。」</verse>
				<verse number="11">上主對 摩西 講：</verse>
				<verse number="12">「你調查 以色列 人口个時，逐儕人全部愛向𠊎獻贖命金，調查期間佢就毋會堵到麼介災禍。</verse>
				<verse number="13">受調查个人一定愛照聖所規定个標準納固定个錢額，做獻給𠊎个禮物。</verse>
				<verse number="14">每一個登記个人，就係二十歲以上个男人，全部愛納這錢額。</verse>
				<verse number="15">納贖命金無分貧富；有錢人毋使加納，窮人也做毋得少納。</verse>
				<verse number="16">你愛對 以色列 人民收這贖命金，拿去做聖帳篷个維護費用。這係佢等為自家个生命付出个捐獻；𠊎 — 上主會因為恁樣記得保護佢等。」</verse>
				<verse number="17">上主對 摩西 講：</verse>
				<verse number="18">「你愛造一個洗盪用个銅盆㧯一個盆座，拿來放在聖帳篷㧯祭壇中間。盆肚愛裝水。</verse>
				<verse number="19">亞倫 㧯佢該兜孻仔進入聖帳篷，抑係行近祭壇去獻火祭給𠊎以前，愛用這盆肚个水洗手、洗腳。</verse>
				<verse number="20">恁樣佢等就毋會死；</verse>
				<verse number="21">佢等一定愛洗手、洗腳正毋會死。這係佢等㧯佢等个子孫永遠愛遵守个例規。」</verse>
				<verse number="22">上主對 摩西 講：</verse>
				<verse number="23">「愛拿上等个香料：流質个沒藥六公斤、香肉桂三公斤、香菖蒲三公斤、</verse>
				<verse number="24">㧯六公斤个桂皮 (全部照聖所規定个標準來秤)，加上四公升个橄欖油，</verse>
				<verse number="25">用造香水个方法來製造聖油。</verse>
				<verse number="26">愛用這聖油膏抹𠊎个聖帳篷、約櫃、</verse>
				<verse number="27">供桌㧯桌頂个所有用品、燈臺㧯所有个用品、香壇、</verse>
				<verse number="28">獻燒化祭个壇㧯所有用品、還有洗盪盆㧯盆座。</verse>
				<verse number="29">這一切愛用這方法來奉獻，使它兜完全分別為聖；所有憑到个人抑係東西全部會分別為聖 。</verse>
				<verse number="30">愛為 亞倫 㧯佢該兜孻仔膏聖油，立佢等做祭司事奉𠊎。</verse>
				<verse number="31">你愛㧯 以色列 人講：『世世代代，你等愛在事奉𠊎个時，用這聖油。</verse>
				<verse number="32">做毋得將聖油倒在普通人身上，也做毋得用這配方另外做其他相像个油。這油係聖个；你等一定愛將它看做聖物。</verse>
				<verse number="33">若有其他个人製造像這種油，抑係用這油來膏祭司以外个人，一定愛將佢對𠊎个子民中除掉。』」</verse>
				<verse number="34">上主對 摩西 講：「愛拿下背各樣當香个香料：蘇合香、香螺、白松香、㧯純乳香，平重个量，</verse>
				<verse number="35">用造香水个方法來製造，加兜純鹽；然後將它分別為聖。</verse>
				<verse number="36">愛拿一部份來，舂到變幼粉，帶到𠊎个聖帳篷，放在約櫃頭前 — 就係𠊎愛㧯你相會个地方。這香係至聖个東西。</verse>
				<verse number="37">做毋得用共樣个配方為自家製造共樣个香；因為它係獻給𠊎个聖物。</verse>
				<verse number="38">若有其他个人製造像這種香，自家享受香味，一定愛將佢對𠊎个子民中除掉。」</verse>
			</chapter>
			<chapter number="31">
				<verse number="1">上主對 摩西 講：</verse>
				<verse number="2">「𠊎已經對 猶大 支族選出 戶珥 个孫仔、 烏利 个孻仔 比撒列 。</verse>
				<verse number="3">𠊎个靈已經充滿佢；𠊎有賜給佢聰明、才能、技術，會做各樣手藝，</verse>
				<verse number="4">像設計圖案，用金、銀、銅製造各種用品；</verse>
				<verse number="5">會刻愛鑲个寶石；能刻樹仔；還會其他各樣奇巧个手藝。</verse>
				<verse number="6">𠊎又對 但 支族指派 亞希撒抹 个孻仔 亞何利亞伯 做佢个助手。該兜有奇巧技術个人，𠊎也有賜給佢等才能，使佢等會做𠊎所吩咐个各種用品：</verse>
				<verse number="7">就係聖帳篷、約櫃、約櫃頂高贖罪个蓋仔、聖帳篷个所有用品、</verse>
				<verse number="8">供桌㧯所有个用品、純金个燈臺㧯所有个用品、香壇、</verse>
				<verse number="9">獻燒化祭个壇㧯所有个用品、洗盪盆㧯盆座、</verse>
				<verse number="10">手工當幼个祭司聖服 — 亞倫 㧯佢該兜孻仔執行祭司職務个時所著个聖服、</verse>
				<verse number="11">聖油、㧯聖所所用个當香个香。這一切佢等一定愛全部照𠊎所吩咐个去做。」</verse>
				<verse number="12">上主吩咐 摩西 轉告 以色列 人，講：</verse>
				<verse number="13">「你等一定愛守𠊎个安息日；因為這係你等㧯𠊎中間永遠个證據，表示𠊎 — 上主揀選你等做𠊎聖潔个子民。</verse>
				<verse number="14">你等愛守安息日，因為這日係聖日。所有毋遵守、在這日照常去工作个人一定愛處死刑。</verse>
				<verse number="15">你等六日做得工作，總係第七日係安息聖日，係獻給𠊎个；所有在安息日工作个人一定愛處死刑。</verse>
				<verse number="16">以色列 人愛世世代代遵守安息日，做永遠个約。</verse>
				<verse number="17">這係 以色列 人㧯𠊎中間永遠个證據；因為𠊎 — 上主在六日內創造天地，在第七日停工歇睏。」</verse>
				<verse number="18">上帝在 西奈 山頂對 摩西 講這兜話以後，就將兩垤石版交給佢；上帝用手指在石版頂寫下佢个誡命。</verse>
			</chapter>
			<chapter number="32">
				<verse number="1">以色列 人民看到 摩西 恁久還無下山，就聚集到 亞倫 个面前，對佢講：「𠊎等毋知該𢱋𠊎等出 埃及 个 摩西 堵到麼介事；所以拜託你為𠊎等造神明來帶領𠊎等！」</verse>
				<verse number="2">亞倫 對佢等講：「將你等个𡜵娘㧯子女帶等个金耳環剝下來，拿來給𠊎。」</verse>
				<verse number="3">人民就全部剝下佢等个金耳環，送到 亞倫 面前。</verse>
				<verse number="4">亞倫 就將該兜耳環鎔掉，倒在模仔肚，鑄造一隻細牛仔。 人民就講：「 以色列 啊，這係𢱋你等離開 埃及 个神明！」</verse>
				<verse number="5">所以， 亞倫 在金牛像前起一座祭壇，宣佈講：「天光日愛為上主守節。」</verse>
				<verse number="6">第二日打早，人民牽兜頭牲來，有兜獻做燒化祭，也有兜做平安祭來食。後來，佢等坐下來大食大啉，企起來狂歡暢樂。</verse>
				<verse number="7">上主對 摩西 講：「遽遽下山，因為你對 埃及 𢱋出來个人民已經犯罪違背𠊎。</verse>
				<verse number="8">佢等隨時就偏離𠊎命令佢等行个路。佢等用金仔鑄造一隻細牛仔，向牠跪拜、向牠獻祭。佢等乜講：『 以色列 啊，這係𢱋你等離開 埃及 个神明！』」</verse>
				<verse number="9">上主繼續對 摩西 講：「𠊎已經看出來，這人民樣會恁硬頸！</verse>
				<verse number="10">這下，你毋好阻擋𠊎；𠊎愛向佢等大發譴，消滅佢等。總係你，𠊎愛使你㧯你个子孫成做大國。」</verse>
				<verse number="11">總係 摩西 向上主 — 佢个上帝求情講：「上主啊，做麼介對你个子民發譴到恁厲害呢？佢等敢毋係你用大能大力對 埃及 𢱋出來个？</verse>
				<verse number="12">做麼介俾 埃及 人講，你故意𢱋佢等離開 埃及 ，係愛在山肚將佢等完全消滅呢？求你毋好發譴，求你回心轉意，毋好降大災禍給你个子民。</verse>
				<verse number="13">求你紀念你个僕人 亞伯拉罕 、 以撒 、 以色列 ，記得你識指等自家向佢等發誓，講：『𠊎愛俾你等个子孫多到像天頂个星仔恁多；𠊎所應許這歸垤土地，一定愛賜給你等个後代，做永久个產業。』」</verse>
				<verse number="14">因為恁樣，上主改變心意，無將原來愛降个災禍降在佢子民个身上。</verse>
				<verse number="15">摩西 轉身下山，拿等兩垤兩面寫等誡命个石版。</verse>
				<verse number="16">上帝自家造這兩垤石版；誡命也係上帝親手刻在頂高个。</verse>
				<verse number="17">約書亞 聽到人民呼喊个聲音，就對 摩西 講：「𠊎聽到營中有戰爭个聲！」</verse>
				<verse number="18">摩西 講：「這毋像相㓾打贏个聲，也毋像打輸个聲，係唱歌个聲！」</verse>
				<verse number="19">摩西 行近營地个時，看到金牛㧯跳舞个人群，佢就大發譴，將帶轉來个兩垤石版在山腳下抨碎掉。</verse>
				<verse number="20">佢將人民鑄造个細牛仔拿過來鎔掉，研做粉，委在水面上，然後喊 以色列 人啉。</verse>
				<verse number="21">摩西 對 亞倫 講：「這兜人對你做麼介，你樣般會害佢等犯恁重个罪？」</verse>
				<verse number="22">亞倫 應講：「請你毋好恁譴；你也知這兜人決心作惡。</verse>
				<verse number="23">佢等對𠊎講：『𠊎等毋知該𢱋𠊎等出 埃及 个 摩西 堵到麼介事；所以拜託你為𠊎等造神明來帶領𠊎等！』</verse>
				<verse number="24">𠊎對佢等講：『該兜有金器个人愛剝下來』；佢等就拿來給𠊎。𠊎將金器㧹落火肚去，這細牛仔就出來！」</verse>
				<verse number="25">摩西 看出 亞倫 縱人民，佢等正敢恁亂來，成做敵人个笑話。</verse>
				<verse number="26">佢就企在營門前，大聲講：「所有屬上主个人全部愛到𠊎這位來！」所有个 利未 人就聚集在佢堘頭。</verse>
				<verse number="27">佢吩咐佢等：「上主 — 以色列 个上帝命令你等逐儕將劍繫等，對這隻門到該隻門，在營肚滿遍行，㓾你等个兄弟、朋友、㧯鄰舍。」</verse>
				<verse number="28">利未 人順從 摩西 个命令，在該日大約㓾掉三千人。</verse>
				<verse number="29">摩西 對 利未 人講：「你等今晡日已經將自家分別為聖，盡祭司事奉上主个職務，逐儕攻擊自家个孻仔㧯兄弟，恁樣得到上主个賜福。」</verse>
				<verse number="30">第二日， 摩西 對人民講：「你等犯盡重个罪了。這下𠊎愛再上山，到上主該位去，看𠊎有法度為你等贖罪，求到上主个赦免麼。」</verse>
				<verse number="31">所以 摩西 轉到上主該位，講：「主啊！這人民犯盡重个罪了；佢等鑄造金神像來跪拜。</verse>
				<verse number="32">求你赦免佢等个罪；若無，求你對你子民个名冊除掉𠊎个名。」</verse>
				<verse number="33">上主應講：「得罪𠊎个人，𠊎愛對𠊎名冊除掉佢等个名。</verse>
				<verse number="34">這下你去，將人民帶到𠊎指示你个地方。𠊎愛派天使在你頭前𢱋你。總係到算數該日，𠊎愛責罰佢等所犯个罪。」</verse>
				<verse number="35">上主就使人民發瘟仔，因為佢等跪拜 亞倫 鑄造个金牛像 。</verse>
			</chapter>
			<chapter number="33">
				<verse number="1">上主對 摩西 講：「你㧯你對 埃及 𢱋出來个人民愛離開這地方，到𠊎應許賜給 亞伯拉罕 、 以撒 、 雅各 、㧯佢等後代个土地去。</verse>
				<verse number="2">𠊎愛派天使𢱋你；𠊎愛逐走 迦南 人、 亞摩利 人、 赫 人、 比利洗 人、 希未 人㧯 耶布斯 人。</verse>
				<verse number="3">你愛去个地方係流乳㧯蜜个好地方。總係，𠊎毋㧯你等共下去；因為你等當硬頸，驚怕𠊎會在路項將你等消滅掉。」</verse>
				<verse number="4">人民聽到這壞消息，就當悲傷，無人再戴妝飾品，</verse>
				<verse number="5">因為上帝有吩咐 摩西 轉告 以色列 人，講：「你等係硬頸个人；若係𠊎㧯你等共下去，一下仔，𠊎就會將你等消滅掉。這下你等愛將身上个妝飾品全部剝下來，𠊎正決定樣般處理你等。」</verse>
				<verse number="6">所以， 以色列 人離開 何烈 山以後，就無人再戴妝飾品。</verse>
				<verse number="7">逐擺 以色列 人安營， 摩西 就將一張帳篷搭在離營較遠个地方；這帳篷安到聖帳篷 。所有愛求問上主个人全部到該位去。</verse>
				<verse number="8">逐擺 摩西 出營到聖帳篷去，人民全部企在自家个帳篷口，看等 摩西 ，直到佢進入聖帳篷。</verse>
				<verse number="9">摩西 入去以後，雲柱就降下來，停在聖帳篷門口；上主就對雲肚向 摩西 講話。</verse>
				<verse number="10">人民一看到雲柱停在聖帳篷門口，逐儕就在自家个帳篷口跪拜。</verse>
				<verse number="11">逐擺上主㧯 摩西 面對面講話，像人㧯朋友講話一樣。 摩西 轉營个時，佢个後生助手 — 嫩 个孻仔 約書亞 留在聖帳篷肚。</verse>
				<verse number="12">摩西 對上主講：「你吩咐𠊎𢱋人民到該地方去，總係你並無指示𠊎愛派麼人㧯𠊎共下去。你講過你盡了解𠊎，也歡喜𠊎。</verse>
				<verse number="13">恁樣，求你將你个計劃指示𠊎，使𠊎多認識你，繼續在你面前蒙恩。求你記得這民族係屬你个。」</verse>
				<verse number="14">上主講：「𠊎自家愛㧯你共下去；𠊎愛減少你个重擔。」</verse>
				<verse number="15">摩西 應講：「若係你自家毋㧯𠊎等共下去，求你毋好喊𠊎等離開這位。</verse>
				<verse number="16">若係你毋㧯𠊎等共下去，樣會有人知𠊎㧯你个子民係在你面前蒙恩个？你个同在使𠊎等㧯世上其他民族有分別。」</verse>
				<verse number="17">上主對 摩西 講：「𠊎愛照你所求个做；因為𠊎盡了解你，也歡喜你。」</verse>
				<verse number="18">所以 摩西 講：「求你俾𠊎看到你个榮光。」</verse>
				<verse number="19">上主應講：「𠊎愛顯出𠊎所有个恩惠，在你面前經過，並宣告𠊎个聖名。𠊎係上主；𠊎愛施恩給麼人，就施恩給佢；𠊎愛憐憫麼人，就憐憫佢。</verse>
				<verse number="20">𠊎毋俾你看到𠊎个面貌，因為看到𠊎个人就會無命。</verse>
				<verse number="21">總係在𠊎个堘頭有一個地方，你做得企在該隻磐石頂。</verse>
				<verse number="22">當𠊎个榮光經過个時，𠊎會將你放在石孔肚，用𠊎个手遮等你，等𠊎過去，</verse>
				<verse number="23">然後𠊎愛收轉𠊎个手；你就會看到𠊎个背囊，總係做毋得看𠊎个面貌。」</verse>
			</chapter>
			<chapter number="34">
				<verse number="1">上主對 摩西 講：「你愛再打兩垤石版，㧯以前該兩垤共樣；𠊎愛將你抨碎掉个該石版頂个話寫在這兩垤石版頂。</verse>
				<verse number="2">天光朝晨，你愛準備好，上 西奈 山去，在山頂高企在𠊎面前。</verse>
				<verse number="3">毋好俾人㧯你共下上來；歸隻山做毋得有人，也做毋得有牛羊在山腳下食草。」</verse>
				<verse number="4">所以 摩西 再打兩垤石版，㧯以前該兩垤共樣；第二日打早，佢照上主个吩咐將石版拿等上 西奈 山去。</verse>
				<verse number="5">上主在雲中降臨，㧯 摩西 企在該位，宣告佢个聖名 — 上主。</verse>
				<verse number="6">上主對 摩西 面前經過，宣告講：「𠊎係上主 ，𠊎係慈悲㧯憐憫个上帝。𠊎毋會隨便發譴，有豐盛个慈愛㧯信實。</verse>
				<verse number="7">𠊎堅守不變个慈愛直到千萬代，並赦免罪惡㧯過犯。總係，𠊎毋會將有罪个準做無罪，𠊎一定會因為爺𡟓个罪來責罰佢等个子女，直到三四代。」</verse>
				<verse number="8">摩西 遽遽伏在地上敬拜。</verse>
				<verse number="9">佢講：「主啊，若係𠊎在你面前蒙恩，求你㧯𠊎等共下行。雖然這群人當硬頸，總係求你赦免𠊎等个罪惡㧯過犯，接納𠊎等做你个子民。」</verse>
				<verse number="10">上主對 摩西 講：「這下𠊎㧯 以色列 人民立約。𠊎愛在你面前行大事，係世上所有个地方、所有个民族毋識看過个。你四周圍个民族會看到𠊎 — 上主个作為，因為𠊎愛向你行得人驚个事。</verse>
				<verse number="11">𠊎今晡日吩咐給你个法律，你愛遵守。在你前進个時，𠊎愛逐走 亞摩利 人、 迦南 人、 赫 人、 比利洗 人、 希未 人㧯 耶布斯 人。</verse>
				<verse number="12">你愛謹慎，做毋得㧯你愛去該地方个人民立約，因為該會成做你致命个羅網。</verse>
				<verse number="13">你等反轉愛拆掉佢等个祭壇，打碎佢等个神柱，斬橫佢等个 亞舍拉 女神像。</verse>
				<verse number="14">「做毋得敬拜別个神明，因為𠊎 — 上主係專情个上帝，𠊎个名安到『專情者』 。</verse>
				<verse number="15">做毋得㧯當地个人民立約，驚怕佢等拜自家个神明、行姦淫、獻祭个時，會邀請你去參加，你會被人引誘去食佢等獻給神明个祭物。</verse>
				<verse number="16">驚怕你个孻仔㧯別族个細妹仔通婚，該兜細妹仔拜自家个神明、行姦淫，你个孻仔就會跈等去拜別个神明、行姦淫。</verse>
				<verse number="17">「做毋得鑄造抑係敬拜神像。」</verse>
				<verse number="18">「愛守除酵節。你愛遵照𠊎个吩咐，在亞筆月食無酵餅七日，因為你係在亞筆月離開 埃及 个。</verse>
				<verse number="19">「所有頭胎个孻仔㧯所有頭胎牯个頭牲，無論係牛係羊，全部屬𠊎；</verse>
				<verse number="20">總係你愛用細羊贖轉所有頭胎个驢，若毋贖轉去，就愛打斷牠个頸筋。你子孫中所有頭胎个孻仔全部愛贖轉去。 「做毋得空手來敬拜𠊎。</verse>
				<verse number="21">「你六日愛工作，總係第七日，你一定愛歇睏；就算耕種抑係收割期間，也愛歇睏。</verse>
				<verse number="22">「在開始收割新出个麥仔个時愛守七七收割節；秋季收藏農產物个時，愛守收藏節。</verse>
				<verse number="23">「一年三擺，所有男人全部愛來朝拜𠊎 — 至高个上主、 以色列 个上帝。</verse>
				<verse number="24">𠊎愛對你面前逐出各民族，擴展你个境界；你一年三擺上去朝拜𠊎 — 上主、你上帝个時，毋會有人侵略你个國土。</verse>
				<verse number="25">「你獻牲祭个時，做毋得拿牲祭个血㧯有酵个餅共下獻。𨃟過節㓾个頭牲做毋得留到隔日朝晨。</verse>
				<verse number="26">「逐年愛將你所收成最好个新出農產物帶到上主 — 你上帝个聖殿。 「做毋得用羊乸个乳來煮細羊仔。」</verse>
				<verse number="27">上主對 摩西 講：「將這兜話寫下來；因為𠊎愛用這兜話做根據，同你㧯 以色列 人立約。」</verse>
				<verse number="28">摩西 在上主該位停留四十日夜，無食無啉。佢將這約个話，就係十條誡命，寫在兩垤石版頂。</verse>
				<verse number="29">摩西 帶等十條誡个兩垤石版對 西奈 山下來个時，面貌皓光，因為佢㧯上主講過話；總係佢自家毋知。</verse>
				<verse number="30">亞倫 㧯 以色列 人民看到 摩西 面上个榮光，毋敢偎近佢。</verse>
				<verse number="31">摩西 喊佢等過來； 亞倫 㧯該兜會眾个領袖攏總行前來， 摩西 就㧯佢等講話。</verse>
				<verse number="32">隨後 以色列 人民全部來到 摩西 面前， 摩西 就將上主在 西奈 山交帶給佢个法律全部㧯人民講。</verse>
				<verse number="33">摩西 㧯佢等講煞，拿帕仔揞自家个面。</verse>
				<verse number="34">逐擺 摩西 進入聖帳篷㧯上主講話，一定將帕仔掀起來，出來个時就將上主所吩咐个話㧯 以色列 人民講。</verse>
				<verse number="35">佢等看到佢个面皓光；然後 摩西 再用帕仔揞面，等到再入去㧯上主講話正掀開來。</verse>
			</chapter>
			<chapter number="35">
				<verse number="1">摩西 召集 以色列 全體會眾，對佢等講：「這係上主命令你等遵行个事：</verse>
				<verse number="2">你等六日愛工作，總係第七日係聖日，應該歸給𠊎 — 上主做安息日。所有在這日工作个人一定愛處死刑。</verse>
				<verse number="3">在安息日，連在自家屋下起火也做毋得。」</verse>
				<verse number="4">摩西 對全體 以色列 會眾講：「上主恁樣命令：</verse>
				<verse number="5">你等愛向上主獻禮物。所有樂意个人做得奉獻金、銀、銅；</verse>
				<verse number="6">麻紗；藍色、紫色㧯深紅色个肨線；山羊毛刺个布料；</verse>
				<verse number="7">染紅个羊牯皮；盡靚个皮料；金合歡木；</verse>
				<verse number="8">燈油；製造聖油㧯香个原料；</verse>
				<verse number="9">紅瑪瑙㧯其他寶石，愛拿來鑲在大祭司个以弗得聖服㧯胸牌頂。」</verse>
				<verse number="10">「你等當中出名个師傅全部愛來做上主所吩咐个一切用品：</verse>
				<verse number="11">就係聖帳篷、聖帳篷頂㧯外層个頂蓋、聖帳篷个鉤仔、骨架、橫杠、柱仔㧯柱座；</verse>
				<verse number="12">約櫃、約櫃个槓仔、贖罪个蓋仔，㧯隔等約櫃个帳幔；</verse>
				<verse number="13">供桌、桌个槓仔，㧯所有个用品；獻給上帝个供餅；</verse>
				<verse number="14">燈臺㧯它个零件；燈盞㧯燈油；</verse>
				<verse number="15">香壇㧯槓仔；聖油㧯當香个香；聖帳篷門口个門簾；</verse>
				<verse number="16">獻燒化祭个祭壇㧯銅網、槓仔，㧯所有个用品；洗盪盆㧯盆座；</verse>
				<verse number="17">圍外院个帳幔、柱仔㧯柱座；外院門口个門簾；</verse>
				<verse number="18">聖帳篷㧯圍庭院个閂仔㧯索仔；</verse>
				<verse number="19">祭司在聖所服事个時所著盡靚个聖服，就係祭司 亞倫 㧯佢該兜孻仔个聖服。」</verse>
				<verse number="20">以色列 全體會眾對 摩西 面前離開；</verse>
				<verse number="21">所有甘心樂意奉獻个人，全部帶上主个禮物來，獻做起聖帳篷个用途。佢等帶來崇拜需要个用品㧯製造祭司聖服个材料。</verse>
				<verse number="22">逐個樂意奉獻个男女帶來秉針、耳環、禁指、脖鍊、㧯各種金器，獻給上主。</verse>
				<verse number="23">凡有麻紗，藍色、紫色、㧯深紅色个肨線，山羊毛刺个布料，染紅个羊牯皮，抑係盡靚个皮料个，也全部帶來。</verse>
				<verse number="24">有能力奉獻銀抑係銅个禮物，全部帶來獻給上主；屋下有金合歡木好做工程用个也帶過來。</verse>
				<verse number="25">手藝好个婦女全部帶來親手刺个麻紗，㧯藍色、紫色、深紅色个肨線。</verse>
				<verse number="26">甘心樂意个婦女也用山羊毛做肨線。</verse>
				<verse number="27">該兜領袖將做得鑲在以弗得聖服㧯胸牌頂个紅瑪瑙㧯其他个寶石，</verse>
				<verse number="28">並點燈火、做聖油㧯做香所需要个香料㧯油帶來。</verse>
				<verse number="29">所有 以色列 人，無論男女，為到上主吩咐 摩西 進行个工程，全部甘心樂意將禮物帶來，獻給上主。</verse>
				<verse number="30">摩西 對 以色列 人民講：「上主已經對 猶大 支族選出 戶珥 个孫仔、 烏利 个孻仔 比撒列 ，</verse>
				<verse number="31">用自家个靈充滿佢，賜給佢聰明、才能、技術，會做各樣手藝，</verse>
				<verse number="32">像設計圖案，用金、銀、銅製造各種用品；</verse>
				<verse number="33">會刻愛鑲个寶石；能刻樹仔；還會其他各樣奇巧个手藝。</verse>
				<verse number="34">上主賜給佢㧯 但 支族 亞希撒抹 个孻仔 亞何利亞伯 有教手藝个能力。</verse>
				<verse number="35">佢賜給佢等各種技術，會做各樣手工，像雕刻、圖案設計、紡織麻紗，用藍色、紫色、深紅色个肨線刺花、還會刺各種布料。各種工作佢等全部會做，也盡會設計各樣圖案。」</verse>
			</chapter>
			<chapter number="36">
				<verse number="1">「 比撒列 、 亞何利亞伯 、㧯其他精靈个工人，就係所有蒙上主賞賜技術㧯才能、知樣般營造聖帳篷个人，全部愛按照上主个吩咐去進行各項工程。」</verse>
				<verse number="2">摩西 召集 比撒列 、 亞何利亞伯 ，㧯所有蒙上主賞賜才能、願意協助工作个人，吩咐佢等開工。</verse>
				<verse number="3">佢等對 摩西 領走 以色列 人為到起聖帳篷所奉獻个全部禮物。總係，逐日朝晨，人民還係繼續帶禮物來，交給 摩西 。</verse>
				<verse number="4">後來，該兜負責建築个工人暫停佢等个工作，</verse>
				<verse number="5">去見 摩西 ，講：「人民所獻个禮物已經超過上主吩咐个工程所需要个。」</verse>
				<verse number="6">所以 摩西 命令全營，喊人民無論男女毋使再為聖帳篷奉獻；恁樣，人民正無繼續奉獻。</verse>
				<verse number="7">因為所收到个禮物拿來完成全部个工程已經罅用，還有好賸。</verse>
				<verse number="8">在工作人員中該兜最精靈个工人負責起聖帳篷。佢等用十幅帳幔做聖帳篷；這帳幔係用麻紗㧯藍色、紫色、深紅色个肨線刺个，又用幼秀个手工繡基路伯个圖案，</verse>
				<verse number="9">每一幅大細相同，長十二公尺，闊兩公尺。</verse>
				<verse number="10">佢等將五幅攣共下，成做一組，另外五幅也係恁樣。</verse>
				<verse number="11">佢等在每一組帳幔最尾一幅个邊攣藍色个紐襻。</verse>
				<verse number="12">佢等將五十隻紐襻攣在第一組个頭幅，另外五十隻紐襻攣在第二組个最尾一幅。</verse>
				<verse number="13">佢等又造五十隻金鉤仔，將兩組帳幔連共下，成做歸垤帳篷。</verse>
				<verse number="14">佢等又用山羊毛刺十一幅帳幔來做聖帳篷个篷頂。</verse>
				<verse number="15">每一幅大細相同，長十三公尺，闊兩公尺。</verse>
				<verse number="16">佢等將五幅攣共下，成做一組，其他六幅另外做一組。</verse>
				<verse number="17">佢等在第一組帳幔最尾一幅个邊攣五十隻紐襻，另外一組个邊也攣五十隻紐襻。</verse>
				<verse number="18">佢等做五十隻銅鉤仔，將兩組帳幔連起來，成做歸垤篷頂。</verse>
				<verse number="19">佢等另外又用一垤染紅个羊牯皮㧯另外一垤盡靚个皮料造兩垤篷頂，做聖帳篷最外層个頂蓋。</verse>
				<verse number="20">佢等用金合歡木造起聖帳篷个骨架。</verse>
				<verse number="21">逐支骨架高四公尺、闊六十六公分，</verse>
				<verse number="22">各有兩隻榫頭，用來連接骨架。所有个骨架全部有這種榫頭。</verse>
				<verse number="23">佢等在聖帳篷个南片做二十支骨架，</verse>
				<verse number="24">架底有四十隻銀座，逐支骨架有兩隻銀座固定。</verse>
				<verse number="25">佢等又在聖帳篷个北片做二十支骨架，</verse>
				<verse number="26">㧯四十隻銀座，逐支骨架底下兩隻銀座。</verse>
				<verse number="27">在聖帳篷个後背，就係篷个西片，佢等造六支骨架；</verse>
				<verse number="28">兩頭兩隻轉角加兩支骨架。</verse>
				<verse number="29">轉角兩支骨架个下背相連接，一直連到頂頭，成做一隻轉角；兩隻轉角个兩支骨架全部係恁樣連做一下。</verse>
				<verse number="30">所以一共有八支骨架㧯十六隻銀座，每一支骨架底下各有兩隻銀座。</verse>
				<verse number="31">佢等又用金合歡木造十五支橫杠；聖帳篷一片个骨架有五支橫杠，</verse>
				<verse number="32">另外一片五支；篷个後背，就係篷个西片，也有五支。</verse>
				<verse number="33">中間个橫杠安在骨架半中央，對篷个這頭通到另外該頭。</verse>
				<verse number="34">佢等用金包等骨架，並安金圈仔，俾橫杠穿過；橫杠也用金包等。</verse>
				<verse number="35">佢等用麻紗㧯藍色、紫色、深紅色个肨線來刺一幅帳幔，頂高用幼秀个手工繡基路伯个圖案。</verse>
				<verse number="36">佢等又用金合歡木造四支掛帳幔个柱仔，柱仔用金包等；柱仔頂有金鉤仔。佢等又為柱仔造四隻銀座。</verse>
				<verse number="37">佢等又用麻紗㧯藍色、紫色、深紅色个肨線，用繡花个手工，為聖帳篷門口來刺一幅門簾。</verse>
				<verse number="38">佢等為這幅門簾造五支柱仔，柱仔頂有鉤仔。柱頂㧯柱仔頂个槓仔全部用金包等；又為柱仔造五隻銅座。</verse>
			</chapter>
			<chapter number="37">
				<verse number="1">比撒列 用金合歡木造約櫃，長一百一十公分，闊六十六公分，高六十六公分。</verse>
				<verse number="2">佢用純金將櫃仔个內外全部包等，四面鑲齒形金邊。</verse>
				<verse number="3">佢又造四隻穿槓仔用个金圈仔，安在櫃仔个四腳上，一片兩隻。</verse>
				<verse number="4">佢用金合歡木造兩支槓仔，用金包等，</verse>
				<verse number="5">拿來穿過櫃仔兩片个金圈仔。</verse>
				<verse number="6">佢用純金造一隻櫃仔蓋，就係贖罪蓋，長一百一十公分，闊六十六公分，</verse>
				<verse number="7">又用金仔捶出兩隻基路伯，</verse>
				<verse number="8">黏在蓋仔頂，一頭一隻、成做蓋仔个一部份。</verse>
				<verse number="9">兩隻基路伯面對面，打開翼胛，遮等櫃仔蓋。</verse>
				<verse number="10">比撒列 用金合歡木造一張桌仔，長八十八公分，闊四十四公分，高六十六公分。</verse>
				<verse number="11">佢用純金來包等，並在四面鑲齒形金邊。</verse>
				<verse number="12">桌仔个周圍有加七十五公釐闊个框仔，框仔有鑲齒形金邊。</verse>
				<verse number="13">佢造四隻用來扛个金圈仔，安在桌仔四角个腳頂。</verse>
				<verse number="14">金圈仔安較近框仔，俾扛桌仔个槓仔穿過去。</verse>
				<verse number="15">佢用金合歡木造兩支槓仔，用金包等。</verse>
				<verse number="16">佢又用純金造桌頂个用品，就係盤仔、碗、還有敬神用个酒壺㧯酒杯。</verse>
				<verse number="17">佢用純金造一座燈臺。燈座㧯柱仔用金仔打造；裝飾个花蕊、花托、花瓣，全部打到連共下。</verse>
				<verse number="18">燈臺兩片伸出六支枝仔，一片三支。</verse>
				<verse number="19">逐支枝仔有三蕊花，形狀像杏花，有花托㧯花瓣。</verse>
				<verse number="20">燈臺个柱仔有四蕊花，形狀像杏花，有花托㧯花瓣。</verse>
				<verse number="21">三對枝仔个每一對下背有一個花托。</verse>
				<verse number="22">花托、枝仔，㧯燈臺全部係用歸垤純金打出來个。</verse>
				<verse number="23">佢為燈臺造七盞燈，又用純金造燈花剪刀㧯燈盤。</verse>
				<verse number="24">佢用三十五公斤个純金造燈臺㧯所有用品。</verse>
				<verse number="25">佢用金合歡木造一座燒香个壇。壇係四方个，長四十五公分，闊四十五公分，高九十公分。這壇个四隻角㧯壇連做歸垤。</verse>
				<verse number="26">佢用純金包等壇个頂高、四邊㧯四角，周圍鑲齒形金邊。</verse>
				<verse number="27">佢又造兩隻用來扛壇个金圈仔，安在壇兩片金邊下背，俾扛壇个槓仔穿過去。</verse>
				<verse number="28">佢用金合歡木造槓仔，用金包等。</verse>
				<verse number="29">佢也用造香水个方法來製造聖油㧯盡香个上等香。</verse>
			</chapter>
			<chapter number="38">
				<verse number="1">佢用金合歡木造燒化祭个祭壇。壇係四方个，長兩公尺兩公寸，闊兩公尺兩公寸，高一公尺三公寸。</verse>
				<verse number="2">佢在壇个四角頂造突出來个角，㧯壇連做歸垤，並用銅將壇包等。</verse>
				<verse number="3">佢為祭壇造所需要个一切用品：火灰盤、鏟仔、碗、肉叉㧯火鼎；這兜用品全部係用銅鑄造个。</verse>
				<verse number="4">佢為祭壇造一隻銅網，安在祭壇个周圍下半節，對壇底透到壇个一半恁高。</verse>
				<verse number="5">佢又造四隻用來扛个銅圈仔，安在壇个四角；</verse>
				<verse number="6">又用金合歡木造祭壇个槓仔，用銅包等，</verse>
				<verse number="7">穿過壇兩片个圈仔。壇係用枋仔造个，中央係空殼个。</verse>
				<verse number="8">佢造一個洗盪用个銅盆㧯一個盆座，係用該兜在聖帳篷門口事奉个該兜婦女所用个鏡仔造个。</verse>
				<verse number="9">佢用麻紗刺个帳幔為聖帳篷做圍欄，圍一隻庭院。南片个帳幔長四十四公尺，</verse>
				<verse number="10">用二十支有座个銅柱架起來，柱仔頂个鉤仔㧯橫杠係用銀造个。</verse>
				<verse number="11">北片个帳幔也係恁樣，長四十四公尺，用二十支有座个銅柱架起來，柱仔頂个鉤仔㧯橫杠係用銀造个。</verse>
				<verse number="12">西片个帳幔長二十二公尺，用十支有座个柱仔架起來，柱仔頂个鉤仔㧯橫杠係銀造个。</verse>
				<verse number="13">在東片，庭院个門口，帳幔也係二十二公尺闊。</verse>
				<verse number="14">門口个兩片全部有六公尺六公寸闊个帳幔，</verse>
				<verse number="15">用三支有座个柱仔架起來。</verse>
				<verse number="16">庭院周圍所有个帳幔係用麻紗做个。</verse>
				<verse number="17">柱仔个座係銅造个；鉤仔、橫杠、㧯柱仔頂高全部用銀包等。庭院四圍个柱仔全部用銀个橫杠連等。</verse>
				<verse number="18">庭院門口个門簾係用麻紗㧯藍色、紫色、深紅色个肨線，用繡花个手工刺个，闊九公尺，高兩公尺，㧯庭院个帳幔平高，</verse>
				<verse number="19">用四支有銅座个柱仔架起來。柱仔頂个鉤仔㧯橫杠係用銀造个，柱仔頂用銀包等。</verse>
				<verse number="20">聖帳篷㧯圍庭院所用个釘仔全部係用銅造个。</verse>
				<verse number="21">聖帳篷 (就係放約櫃个聖所) 所用个金器總數列在下背。這份清單係遵照 摩西 个命令、祭司 亞倫 个孻仔 以他瑪 指揮 利未 人所準備个。</verse>
				<verse number="22">(上主所命令 摩西 个事，全部係 猶大 支族 戶珥 个孫仔、 烏利 个孻仔 比撒列 做个。</verse>
				<verse number="23">佢个助手 但 族人 亞希撒抹 个孻仔 亞何利亞伯 係一位雕刻个師傅㧯設計師，也會用藍色、紫色、㧯深紅色个肨線㧯麻紗來繡花。)</verse>
				<verse number="24">為到聖所个工程奉獻給上主个金仔，照聖所个標準來秤，總共一千公斤。</verse>
				<verse number="25">對登記戶口个人所收到个銀仔，照聖所个標準來秤，總共三千四百三十公斤。</verse>
				<verse number="26">這數目係照戶口登記个、逐儕照聖所个標準來秤所繳納个銀仔个總數。登記个人數二十歲以上个，總共六十萬三千五百五十人。</verse>
				<verse number="27">佢等用三千四百公斤个銀仔造聖帳篷㧯帳幔个一百隻銀座，逐隻重三十四公斤。</verse>
				<verse number="28">賸到个三十公斤銀仔， 比撒列 拿來包柱仔个橫杠、鉤仔、㧯柱仔頂。</verse>
				<verse number="29">獻給上主个銅總共兩千四百二十五公斤。</verse>
				<verse number="30">佢用這銅來造聖帳篷門口个座、銅壇、壇个銅網，壇攏總个用品、</verse>
				<verse number="31">庭院周圍㧯庭院門口个座，還有聖帳篷㧯庭院周圍所用个一切釘仔。</verse>
			</chapter>
			<chapter number="39">
				<verse number="1">佢等用藍色、紫色㧯深紅色个肨線攣祭司在聖所服事个時所著个高貴聖服。佢等又為 亞倫 做聖服。這係照上主吩咐 摩西 个話做个。</verse>
				<verse number="2">比撒列 用金線，藍色、紫色、深紅色个肨線，㧯麻紗做以弗得聖服。</verse>
				<verse number="3">佢等將金仔打做薄薄，剪做細細條，㧯麻紗，藍色、紫色、深紅色个肨線，用幼秀个手工繡共下。</verse>
				<verse number="4">佢等又為以弗得做兩條做得繫个肩帶，攣在兩片。</verse>
				<verse number="5">該條連在以弗得、用來繫在身上个帶仔，㧯以弗得用共樣个材料，係用金線，藍色、紫色、深紅色个肨線，㧯麻紗刺个。這攏總係照上主吩咐 摩西 个話做个。</verse>
				<verse number="6">佢等又用兩垤紅瑪瑙鑲在金絲圈肚，刻等 以色列 十二個孻仔个名。</verse>
				<verse number="7">這兩垤寶石攣在以弗得个兩條肩帶上，代表 以色列 个十二支族。這攏總係照上主吩咐 摩西 个話做个。</verse>
				<verse number="8">佢用幼秀个手工造胸牌，㧯做以弗得共樣，用金線，藍色、紫色、深紅色个肨線，㧯麻紗攣好。</verse>
				<verse number="9">胸牌係四方形个，疊做兩層，長二十二公分，闊二十二公分。</verse>
				<verse number="10">佢等在胸牌頂高鑲四行寶石：第一行鑲紅寶石、黃玉、㧯紅玉；</verse>
				<verse number="11">第二行綠寶石、藍寶石、㧯鑽石；</verse>
				<verse number="12">第三行紫玉、白瑪瑙、㧯紫晶；</verse>
				<verse number="13">第四行水蒼玉、紅瑪瑙、㧯碧玉。這兜全部鑲在金絲圈頂高。</verse>
				<verse number="14">十二垤寶石个每一垤刻上 以色列 一個孻仔个名，代表 以色列 个十二支族。</verse>
				<verse number="15">佢等用純金造胸牌个鍊仔，像挼好个索仔。</verse>
				<verse number="16">佢等又造兩隻金絲圈㧯兩隻金圈仔，金圈仔安在胸牌頂高个兩頭。</verse>
				<verse number="17">佢等將兩條金鍊仔穿在胸牌兩頭个圈仔肚。</verse>
				<verse number="18">鍊仔个另外兩頭穿在兩隻金絲圈肚，連在以弗得頭前个肩帶頂高。</verse>
				<verse number="19">佢等又造兩隻金圈仔，安在胸牌下背个兩頭，偎近以弗得个內邊，</verse>
				<verse number="20">再造兩隻金圈仔，接在以弗得頭前兩條肩帶个下背，偎近攣个地方，在手工刺个帶仔頂高。</verse>
				<verse number="21">佢等用藍色个帶仔將胸牌个圈仔㧯以弗得个圈仔䌈共下，使胸牌貼在以弗得个帶仔頂高，就毋會𢫫掉。這攏總係照上主吩咐 摩西 个話做个。</verse>
				<verse number="22">佢用刺花个手工㧯藍色个肨線來做在以弗得底下个長衫。</verse>
				<verse number="23">長衫个中央留一個孔仔做領口，周圍加刺領邊，正毋會裂掉。</verse>
				<verse number="24">長衫下背个衫塍用藍色、紫色、深紅色个肨線，㧯麻紗做石榴，</verse>
				<verse number="25">又用純金个細玲琅隔在石榴中間。</verse>
				<verse number="26">這攏總係照上主吩咐 摩西 个話做个。</verse>
				<verse number="27">佢等為 亞倫 㧯佢該兜孻仔拿麻紗做內衫，</verse>
				<verse number="28">又用麻紗做帽仔、頭巾㧯短褲，</verse>
				<verse number="29">又用麻紗㧯藍色、紫色、深紅色个肨線，用繡花个手工來刺一條腰帶。這攏總係照上主吩咐 摩西 个話做个。</verse>
				<verse number="30">佢等又用純金造一面表示奉獻个牌仔，頂高刻等「歸上主為聖」。</verse>
				<verse number="31">佢等用藍色个帶仔將它繫在帽仔頭前。這攏總係照上主吩咐 摩西 个話做个。</verse>
				<verse number="32">聖帳篷，就係相見个帳篷，一切个工程全部完成。上主吩咐 摩西 个， 以色列 人全部做好。</verse>
				<verse number="33">佢等將聖帳篷㧯聖帳篷个所有用品全部帶到 摩西 面前，其中有：鉤仔、骨架、橫杠、柱仔㧯柱座；</verse>
				<verse number="34">染紅个羊牯皮頂蓋、盡靚个皮料頂蓋、隔等約櫃个帳幔；</verse>
				<verse number="35">約櫃、約櫃个槓仔，㧯贖罪个蓋仔；</verse>
				<verse number="36">供桌、桌个用品，㧯獻給上帝个供餅；</verse>
				<verse number="37">純金个燈臺、燈盞、其他个用品，㧯燈盞用个油；</verse>
				<verse number="38">金香壇、聖油、盡香个香、聖帳篷門口个門簾；</verse>
				<verse number="39">銅祭壇㧯壇頂个銅網、壇个槓仔㧯用品、洗盪盆㧯盆座；</verse>
				<verse number="40">圍庭院个帳幔、帳幔个柱仔㧯柱座；庭院門口个門簾㧯索仔、聖帳篷个釘仔；</verse>
				<verse number="41">祭司在聖所服事个時所著盡靚个聖服，就係祭司 亞倫 㧯佢該兜孻仔个聖服。</verse>
				<verse number="42">上主吩咐 摩西 个， 以色列 人民全部做好了。</verse>
				<verse number="43">摩西 去看各項工程，看佢等所做个完全遵照上主个命令。 摩西 就祝福佢等。</verse>
			</chapter>
			<chapter number="40">
				<verse number="1">上主吩咐 摩西 講：</verse>
				<verse number="2">「正月初一，你愛將聖帳篷搭起來，</verse>
				<verse number="3">將該放十誡个約櫃放在底背，並用帳幔遮等。</verse>
				<verse number="4">你愛將供桌搬入去，在桌頂擺好用品；也將燈臺搬入去，又愛點燈火。</verse>
				<verse number="5">你愛將燒香个金壇面對約櫃放好，並在聖帳篷門口掛上門簾。</verse>
				<verse number="6">愛將燒化祭个祭壇擺在聖帳篷門口前，</verse>
				<verse number="7">洗盪盆放在聖帳篷㧯祭壇中間，底背裝等水。</verse>
				<verse number="8">愛將庭院周圍个帳幔掛起來，並在門口掛上門簾。</verse>
				<verse number="9">「你愛拿聖油膏聖帳篷㧯所有用品，分別它兜為聖，</verse>
				<verse number="10">然後用聖油膏燒化祭个祭壇㧯所有用品，使它兜全部分別為聖。</verse>
				<verse number="11">你也愛用聖油膏洗盪盆㧯盆座，使它兜分別為聖。</verse>
				<verse number="12">「你愛帶 亞倫 㧯佢該兜孻仔到聖帳篷門口，俾佢等在該位洗身。</verse>
				<verse number="13">愛㧯 亞倫 著好聖服，用聖油膏佢，使佢分別為聖，做祭司事奉𠊎。</verse>
				<verse number="14">愛帶 亞倫 該兜孻仔來，㧯佢等著好內衫，</verse>
				<verse number="15">用聖油膏佢等，像膏佢等个阿爸共樣，使佢等做祭司事奉𠊎。通過這聖禮佢等愛永遠做祭司，世世代代事奉𠊎。」</verse>
				<verse number="16">這一切个事 摩西 全部照上主所吩咐个話去做。</verse>
				<verse number="17">所以佢等在離開 埃及 後个第二年正月初一將聖帳篷搭起來。</verse>
				<verse number="18">摩西 放好篷座，安骨架，穿橫杠，扶起柱仔。</verse>
				<verse number="19">佢將聖帳篷个篷頂揜好，頂高還有頂蓋。這攏總係照上主吩咐 摩西 个話做个。</verse>
				<verse number="20">佢又將兩垤寫誡命个石版放在約櫃底背，將槓仔穿過約櫃个圈仔，頂高安贖罪个蓋仔，</verse>
				<verse number="21">然後將約櫃放在聖帳篷底背，掛帳幔來遮等約櫃。這攏總係照上主吩咐 摩西 个話做个。</verse>
				<verse number="22">摩西 將供桌搬入聖帳篷，放在聖帳篷个北片，在帳幔外面，</verse>
				<verse number="23">又在桌頂放獻給上主个供餅。這攏總係照上主吩咐 摩西 个話做个。</verse>
				<verse number="24">佢將燈臺放在聖帳篷个南片，㧯供桌相對，</verse>
				<verse number="25">又在上主面前點燈盞。這攏總係照上主吩咐 摩西 个話做个。</verse>
				<verse number="26">佢將金香壇放在聖帳篷底背，面對等帳幔，</verse>
				<verse number="27">在壇頂燒盡香个香。這攏總係照上主吩咐 摩西 个話做个。</verse>
				<verse number="28">佢在聖帳篷个門口掛門簾，</verse>
				<verse number="29">將燒化祭个祭壇放聖帳篷外門簾个正對面，然後在壇頂獻燒化祭㧯素祭。這攏總係照上主吩咐 摩西 个話做个。</verse>
				<verse number="30">佢將洗盪盆放在聖帳篷㧯祭壇中間，盆肚裝等水。</verse>
				<verse number="31">摩西 、 亞倫 、㧯 亞倫 該兜孻仔在進入聖帳篷以前抑係就近祭壇个時，在盆肚洗手洗腳。</verse>
				<verse number="32">這攏總係照上主吩咐 摩西 个話做个。</verse>
				<verse number="33">最後 摩西 在聖帳篷㧯祭壇个外圍起圍欄，來做庭院，然後在門口將庭院个門簾掛起來。恁樣， 摩西 就完成所有个工作。</verse>
				<verse number="34">該時，雲遮等聖帳篷，上主个榮光就充滿聖帳篷。</verse>
				<verse number="35">摩西 無辦法進入聖帳篷；因為雲停在聖帳篷頂，上主个榮光充滿聖帳篷。</verse>
				<verse number="36">逐擺雲對聖帳篷升上去， 以色列 人就徙營向前行。</verse>
				<verse number="37">雲一停下來，佢等就停下來安營。</verse>
				<verse number="38">在 以色列 人全部个行程中，日時頭，佢等看到上主个雲在聖帳篷頂，暗晡時，看到雲中有火燒等。</verse>
			</chapter>
		</book>
		<book number="3">
			<chapter number="1">
				<verse number="1">上主對聖帳篷中喊 摩西 ，吩咐佢</verse>
				<verse number="2">向 以色列 人民宣佈以下个條例。 你等當中若有人獻牲儀給上主，愛獻牛群中个牛，抑係羊群中个羊。</verse>
				<verse number="3">若係佢獻牛做燒化祭，一定愛用無缺點个牛牯，牽牠到聖帳篷門口，上主就會接納。</verse>
				<verse number="4">佢愛將手放在頭牲个頭那頂；這燒化祭就受接納，能代佢贖罪。</verse>
				<verse number="5">佢愛在上主面前將這隻牛牯㓾死； 亞倫 族个祭司愛獻牲儀个血，然後將這血洒在聖帳篷門口个祭壇四周圍。</verse>
				<verse number="6">接等，該人愛剝牲儀个皮，將肉切做一垤一垤；</verse>
				<verse number="7">該兜祭司愛將柴放在祭壇頂，點火，</verse>
				<verse number="8">將肉、頭那㧯油全部放在祭壇个柴火頂高來燒。</verse>
				<verse number="9">該人一定愛用水將牲儀个腹內㧯後腿洗淨；祭司愛將牲儀全部放在祭壇頂獻做燒化祭。這火祭个香味係上主所歡喜个。</verse>
				<verse number="10">若係佢獻綿羊抑係山羊做燒化祭，佢一定愛用無缺點个羊牯。</verse>
				<verse number="11">佢愛在祭壇个北片，在上主面前將這隻羊牯㓾掉； 亞倫 族个祭司愛將牲儀个血洒在祭壇个四周圍。</verse>
				<verse number="12">該人將肉切做垤以後，祭司愛將肉、頭那㧯油全部放在祭壇个柴火頂高來燒。</verse>
				<verse number="13">該人一定愛用水將牲儀个腹內㧯後腿洗淨；祭司愛將牲儀全部放在祭壇頂獻做燒化祭。這火祭个香味係上主所歡喜个。</verse>
				<verse number="14">若係佢獻鳥仔給上主做燒化祭，佢一定愛用班鳩抑係月鴿仔。</verse>
				<verse number="15">祭司愛將鳥仔帶到祭壇前，扭斷牠个頭那，將頭那放在壇頂來燒，將鳥仔放在壇堘，俾牠个血流燥。</verse>
				<verse number="16">該人愛將鳥仔个頦㧯留在底背个東西共下拿掉，㧹在祭壇東片倒灰个地方。</verse>
				<verse number="17">佢愛拿等鳥仔个兩隻翼胛，將鳥仔扯開，總係毋好扯斷掉；然後祭司愛將牲儀放在祭壇頂、在柴火頂高，獻做燒化祭。這火祭个香味係上主所歡喜个。</verse>
			</chapter>
			<chapter number="2">
				<verse number="1">若係有人獻素祭給上主，佢愛用幼麵粉。佢愛倒兜橄欖油在麵粉底背，將乳香放在頂高，</verse>
				<verse number="2">帶到 亞倫 族个祭司面前。祭司愛扡一揢幼麵粉㧯橄欖油，並所有个乳香放在祭壇頂來燒，代表獻全部。這火祭个香味係上主所歡喜个。</verse>
				<verse number="3">賸到个素祭愛歸給 亞倫 㧯佢个子孫；這係至聖个，因為係對獻給上主个火祭中留下來个。</verse>
				<verse number="4">若係你獻个係用爐仔焙个素祭，愛獻用幼麵粉攪橄欖油做成个無酵賁餅，抑係膏橄欖油个無酵薄餅。</verse>
				<verse number="5">若係你獻个係用煎盤煎个素祭，愛獻用幼麵粉攪橄欖油做个無酵餅。</verse>
				<verse number="6">獻餅个時，愛將它擘做一垤一垤，頂高淋兜油。這係素祭。</verse>
				<verse number="7">若係你獻个係淺鑊頭煏个素祭，愛用幼麵粉攪橄欖油做个。</verse>
				<verse number="8">你愛將這兜東西做个素祭帶到上主面前，交給祭司帶到祭壇頭前。</verse>
				<verse number="9">祭司愛拿素祭个一部份放在壇頂來燒，代表獻全部。這火祭个香味係上主所歡喜个。</verse>
				<verse number="10">賸到个素祭愛歸給 亞倫 㧯佢个子孫；這係至聖个，因為係對獻給上主个火祭中留下來个。</verse>
				<verse number="11">你等獻給上主个素祭全部做毋得攪酵乸；你等絕對做毋得將酵抑係蜂糖做火祭獻給上主。</verse>
				<verse number="12">你等做得將這兜獻給上主做每年新出个祭物，總係做毋得放在祭壇頂燒做清香个祭物。</verse>
				<verse number="13">你所獻个各種素祭全部愛攪鹽，因為鹽代表上帝㧯你等所立个約。你一定愛用鹽攪各種祭物。</verse>
				<verse number="14">若係你獻新出个五榖給上主做素祭，愛獻焙過个五榖軋做粗粉。</verse>
				<verse number="15">還愛加兜橄欖油，將乳香放在頂高；這係素祭。</verse>
				<verse number="16">祭司愛拿一部份个五榖粗粉、油㧯所有个乳香，代表獻全部，做火祭獻給上主。</verse>
			</chapter>
			<chapter number="3">
				<verse number="1">若係有人獻牛做平安祭 ，佢一定愛選無缺點个牛牯抑係牛牸，獻在上主面前。</verse>
				<verse number="2">佢愛將手放在頭牲个頭那頂，在聖帳篷門口將牠㓾掉。 亞倫 族个祭司愛將牲儀个血洒在祭壇四周圍。</verse>
				<verse number="3">該人愛對平安祭中準備獻給上主个火祭；佢愛將包等腹內㧯腹內面頂个油，</verse>
				<verse number="4">兩隻腰仔㧯腰仔面頂个油，並肝面頂个網油割下來。</verse>
				<verse number="5">亞倫 个子孫愛將這兜放在祭壇个柴火頂，就係在燒化祭頂高共下燒。這火祭个香味係上主所歡喜个。</verse>
				<verse number="6">若係佢愛對羊群中選一隻羊獻給上主做平安祭，佢一定愛選無缺點个羊牯抑係羊乸。</verse>
				<verse number="7">若係佢獻細綿羊給上主，</verse>
				<verse number="8">佢愛將手放在頭牲个頭那頂，在聖帳篷前將牠㓾死。 亞倫 个子孫愛將牲儀个血洒在祭壇四周圍。</verse>
				<verse number="9">該人愛對平安祭中準備獻給上主个火祭；佢愛將油、對偎龍骨个地方割下來个歸條肥个羊尾、包等腹內㧯在腹內面頂个油、</verse>
				<verse number="10">兩隻腰仔㧯腰仔面頂个油，並肝面頂个網油割下來。</verse>
				<verse number="11">祭司愛將這兜全部放在祭壇頂來燒，就像食物一樣，做火祭獻給上主。</verse>
				<verse number="12">若係佢獻山羊給上主，</verse>
				<verse number="13">佢愛將手放在頭牲个頭那頂，在聖帳篷前將牠㓾死。 亞倫 个子孫愛將牲儀个血洒在祭壇四周圍。</verse>
				<verse number="14">該人愛對這牲儀準備獻給上主个火祭；佢愛將包等腹內㧯腹內面頂个油、</verse>
				<verse number="15">兩隻腰仔㧯腰仔面頂个油，並肝面頂个網油割下來。</verse>
				<verse number="16">祭司愛將這兜全部放在祭壇頂來燒，就像食物一樣，做清香个火祭。 所有个油係屬上主个。</verse>
				<verse number="17">你等無論住在㖠位，絕對做毋得食油㧯血。這係你等世世代代永遠愛遵守个命令。</verse>
			</chapter>
			<chapter number="4">
				<verse number="1">上主命令 摩西 ，</verse>
				<verse number="2">吩咐佢向 以色列 人民宣佈：若係有人無意中犯罪，違反上主个禁令，佢一定愛遵守以下个條例。</verse>
				<verse number="3">若係大祭司自家犯罪，連累人民，佢一定愛為自家个罪獻一隻無缺點个細牛牯給上主，來做贖罪祭。</verse>
				<verse number="4">佢愛牽牛牯到上主个聖帳篷門口，將手放在牛牯个頭那頂，在上主面前將牠㓾死。</verse>
				<verse number="5">然後，大祭司愛拿兜牛牯个血，帶到聖帳篷底背，</verse>
				<verse number="6">用手指搵血，對等聖所个帳幔拂七擺，</verse>
				<verse number="7">又愛拿兜血膏在聖帳篷底背、上主面前个香壇个四隻角。佢愛將牛牯賸到个血倒在聖帳篷門口燒化祭个祭壇腳該位。</verse>
				<verse number="8">佢愛將這隻贖罪祭个牛牯所有个油，就係包等腹內㧯腹內面頂个油、</verse>
				<verse number="9">兩個腰仔㧯腰仔面頂个油，並肝面頂个網油割下來，</verse>
				<verse number="10">就像平安祭該牛个油割下來一樣。祭司愛將這兜放在獻燒化祭个祭壇頂高來燒。</verse>
				<verse number="11">總係佢愛將牛牯个皮、所有个肉、頭、腿、腹內 — 包含腸仔，</verse>
				<verse number="12">就係歸隻牛牯，帶到營外禮儀上認定淨浰个地方，就係倒灰个地方，放在柴火頂來燒。</verse>
				<verse number="13">若係 以色列 全會眾無意中犯罪，違反上主个禁令，雖然全會眾無看出來，</verse>
				<verse number="14">佢等一發現有罪，會眾就愛獻一隻細牛牯做贖罪祭。佢等愛牽牛牯到聖帳篷前；</verse>
				<verse number="15">會眾當中該兜長老愛在上主面前將手放在該牛牯个頭那頂，在上主面前將牠㓾死。</verse>
				<verse number="16">大祭司愛拿兜牛牯个血，帶到聖帳篷底背，</verse>
				<verse number="17">用手指搵血，在上主面前對等聖所个帳幔拂七擺，</verse>
				<verse number="18">又愛拿兜血膏在聖帳篷底背、上主面前香壇个四隻角。佢愛將賸到个血倒在聖帳篷門口燒化祭个祭壇腳該位。</verse>
				<verse number="19">佢愛將牛牯所有个油割下來，放在祭壇頂來燒。</verse>
				<verse number="20">佢愛照處理贖罪祭个牛牯个方法處理這隻牛牯。祭司愛照這方法為全會眾獻贖罪祭，佢等就得到赦免。</verse>
				<verse number="21">然後，佢愛將牛牯帶到營外用火燒，就像佢燒該為自家个罪獻个牛牯。這係為全會眾獻个贖罪祭。</verse>
				<verse number="22">若係官長無意中犯罪，違反上主 — 佢个上帝个禁令，</verse>
				<verse number="23">佢一發現有罪，就愛獻一隻無缺點个山羊牯做牲儀。</verse>
				<verse number="24">佢愛將手放在該隻羊个頭那頂，在上主面前、祭壇北片㓾燒化祭頭牲个地方將牠㓾死。這係贖罪祭。</verse>
				<verse number="25">祭司愛用手指搵這牲儀个血，膏在燒化祭个祭壇个四隻角，將賸到个血倒在祭壇腳該位。</verse>
				<verse number="26">佢又愛將該山羊牯所有个油放在祭壇頂來燒，就像佢燒平安祭牲儀个油恁樣。祭司愛照這方法為官長个罪獻贖罪祭，佢就得到赦免。</verse>
				<verse number="27">若係人民中有人無意中犯罪，違反上主个禁令，</verse>
				<verse number="28">佢一發現有罪，就愛獻一隻無缺點个山羊乸做牲儀。</verse>
				<verse number="29">佢愛將手放在該頭牲个頭那頂，在祭壇北片㓾燒化祭頭牲个地方將牠㓾死，做贖罪祭。</verse>
				<verse number="30">祭司愛用手指搵這牲儀个血，膏在燒化祭个祭壇个四隻角，將賸到个血倒在祭壇腳該位。</verse>
				<verse number="31">該人愛將該山羊乸所有个油割下來，就像人將平安祭牲儀个油割下來恁樣。祭司愛將所有个油放在祭壇頂來燒，做清香个牲儀獻給上主。祭司愛用這方法為該人獻贖罪祭，佢就得到赦免。</verse>
				<verse number="32">若係佢獻綿羊做贖罪祭个牲儀，一定愛獻無缺點个綿羊乸。</verse>
				<verse number="33">佢愛將手放在該贖罪祭个頭牲个頭那頂，在祭壇北片㓾燒化祭頭牲个地方將牠㓾死，做贖罪祭。</verse>
				<verse number="34">祭司愛用手指搵這牲儀个血，膏在燒化祭个祭壇个四隻角，將賸到个血倒在祭壇腳該位。</verse>
				<verse number="35">該人愛將該綿羊乸所有个油割下來，就像人將平安祭个綿羊个油割下來恁樣。祭司愛將所有个油放在祭壇頂，㧯獻給上主个火祭共下燒。祭司愛用這方法為該人个罪獻贖罪祭，佢就得到赦免。</verse>
			</chapter>
			<chapter number="5">
				<verse number="1">下背係獻贖罪祭个條例。 若係有人被人喊到法庭做證个時，毋肯將佢所看到、所知个講出來，佢就有罪，一定愛承擔罪个責任。</verse>
				<verse number="2">若係有人無意中摸到禮儀上認定無淨浰个東西，無論野獸、頭牲、爬蟲个屍體，佢就無淨浰了，佢就算有罪。</verse>
				<verse number="3">若係有人無意中摸到所有對人身體出來个屙糟東西，無論該係麼介，佢就無淨浰了；佢一發現自家所做个，就算有罪。</verse>
				<verse number="4">若係有人無意中隨便發誓，無論係好意抑係壞意，也無論在麼介事上隨便發誓，佢一發現自家所做个，就算有罪。</verse>
				<verse number="5">人有罪，就一定愛認罪。</verse>
				<verse number="6">佢一定愛為所犯个罪牽一隻綿羊乸抑係山羊乸，獻給上主做贖罪祭。祭司愛為佢个罪行贖罪禮。</verse>
				<verse number="7">若係有人買毋起一隻羊仔，佢一定愛為所犯个罪帶兩隻班鳩抑係兩隻月鴿仔到上主面前，一隻做贖罪祭，另外一隻做燒化祭。</verse>
				<verse number="8">佢愛將這兩隻鳥仔帶到祭司該位；祭司愛先獻贖罪祭。佢愛扭斷鳥仔个頸筋，總係毋好將牠个頭扭斷掉，</verse>
				<verse number="9">然後將一些仔血拂在祭壇堘，賸到个血全部倒在祭壇腳該位。這係贖罪祭。</verse>
				<verse number="10">接等，佢愛照條例獻另外一隻鳥仔做燒化祭。祭司愛照這方法為這個人所犯个罪獻贖罪祭，佢就得到赦免。</verse>
				<verse number="11">若係有人買毋起兩隻班鳩抑係兩隻月鴿仔，佢做得為自家所犯个罪獻一公斤个幼麵粉做贖罪祭；總係做毋得加上橄欖油抑係乳香，因為這係贖罪祭，毋係素祭。</verse>
				<verse number="12">佢愛將幼麵粉帶到祭司該位；祭司愛扡一揢麵粉做代表，放在祭壇頂來燒，做火祭獻給上主。這係贖罪祭。</verse>
				<verse number="13">祭司愛照這方法為這個人所犯个罪獻贖罪祭，佢就得到赦免。賸到个麵粉愛照素祭个條例歸給祭司。</verse>
				<verse number="14">上主向 摩西 宣佈以下个條例。</verse>
				<verse number="15">若係有人無意中無將應該歸給上主个聖物獻出來，佢一定愛為所犯个罪牽一隻無缺點个綿羊牯來，獻給上主做贖過失祭。羊个價值愛照聖所个標準決定。</verse>
				<verse number="16">佢一定愛賠無獻出來个部份，另外還愛加百分之二十。佢愛將這兜交給祭司；祭司愛為佢獻綿羊牯做贖過失祭來代佢贖罪，佢就得到赦免。</verse>
				<verse number="17">若係有人無意中犯罪，違反上主个禁令，佢就有罪，一定愛承擔罪个責任。</verse>
				<verse number="18">佢一定愛牽一隻無缺點个綿羊牯到祭司該位做贖過失祭。羊个價值愛照聖所个標準決定。祭司愛為佢無意中所犯个過失行贖罪禮，佢就得到赦免。</verse>
				<verse number="19">這係為到佢得罪上主所獻个贖過失祭。</verse>
			</chapter>
			<chapter number="6">
				<verse number="1">上主向 摩西 宣佈以下个條例。</verse>
				<verse number="2">若係有人毋肯還 以色列 同胞所付个定錢抑係保證金，抑係偷拿別人个東西，抑係剝削別人，</verse>
				<verse number="3">抑係騙人講東西跌掉，抑係發假誓毋承認有拈到別人跌掉个東西，恁樣來得罪上主，佢一定愛獻贖過失祭。</verse>
				<verse number="4">若係佢犯以上所列个罪，佢一定愛還佢用毋誠實个方法得到个東西；無論係偷个、係剝削个、係定錢、係拈到个、</verse>
				<verse number="5">抑係發假誓得來个東西，在查出佢有罪該日，佢全部愛還給原來个主人，還愛加百分之二十。</verse>
				<verse number="6">為到還所犯个罪，佢一定愛牽一隻無缺點个綿羊牯到祭司該位，做贖過失祭給上主。羊个價值愛照聖所个標準來決定。</verse>
				<verse number="7">祭司愛在上主面前為佢行贖罪禮，佢所犯个一切過失就得到赦免。</verse>
				<verse number="8">上主命令 摩西</verse>
				<verse number="9">向 亞倫 㧯佢該兜孻仔宣佈燒化祭个條例。燒化祭愛放在祭壇頂，連暗晡頭也愛透夜俾它𤏸，一直到天光。</verse>
				<verse number="10">該時，祭司愛著麻紗个長衫㧯褲，將祭壇頂燒化祭个灰收起來，放在祭壇堘。</verse>
				<verse number="11">接等，佢愛換衫褲，將灰帶到營外禮儀上認定淨浰个地方。</verse>
				<verse number="12">祭壇頂个火愛一直俾它燒等，做毋得烏掉。逐日朝晨，祭司愛在祭壇頂高放加兜柴，將燒化祭排列在頂高，也愛燒平安祭个油。</verse>
				<verse number="13">祭壇頂个火愛日夜一直俾它𤏸，做毋得烏掉。</verse>
				<verse number="14">以下係素祭个條例。 亞倫 个子孫愛在祭壇前向上主獻素祭。</verse>
				<verse number="15">祭司愛扡一揢幼麵粉、橄欖油，㧯素祭上所有个乳香放在祭壇頂來燒，代表獻全部給上主做清香个素祭。</verse>
				<verse number="16">亞倫 㧯佢个子孫愛食賸下來个祭物。這兜祭物愛做無酵餅，在聖所，就係在聖帳篷前个庭院食。</verse>
				<verse number="17">用火燒个祭物當中，上主已經將這部份賜給祭司；這同贖罪祭㧯贖過失祭共樣係至聖个。</verse>
				<verse number="18">亞倫 後代个男人全部做得食這用火燒个祭物，係佢等世世代代應當得个部份。其他个人抑係麼介東西憑到這兜聖物，就會分別為聖 。</verse>
				<verse number="19">上主向 摩西 宣佈</verse>
				<verse number="20">有關設立 亞倫 㧯佢个子孫做祭司个條例。祭司受設立該日，佢愛向上主獻一公斤幼麵粉 (㧯逐日獻个素祭平多)，朝晨頭㧯暗晡頭各獻一半。</verse>
				<verse number="21">麵粉愛攪油，放在淺鑊頭來煏，然後將它擘碎，獻給上主做清香个素祭。</verse>
				<verse number="22">亞倫 族个祭司承接做大祭司个，每一代全部愛獻這種祭。這種祭物愛全部燒獻給上主。</verse>
				<verse number="23">祭司做个素祭一定愛全部燒掉，做毋得食。</verse>
				<verse number="24">上主吩咐 摩西</verse>
				<verse number="25">將贖罪祭个條例宣佈給 亞倫 㧯佢个子孫。愛在上主面前、祭壇北片㓾燒化祭頭牲个地方，㓾贖罪祭个頭牲。這牲儀係至聖个。</verse>
				<verse number="26">獻贖罪祭个祭司愛在聖个所在，就係聖帳篷个庭院底背，食這獻祭个牲儀。</verse>
				<verse number="27">其他个人抑係麼介東西憑到這祭肉，全部會分別為聖 。用布料做个所有个東西，若係膏到這牲儀个血，一定愛在聖个所在洗淨。</verse>
				<verse number="28">煮這種祭肉缶个鑊頭一定愛打碎；若係煮在銅鑊頭肚，愛先拭淨，正用水洗。</verse>
				<verse number="29">祭司家屬中个所有男人全部做得食這種祭肉；這係至聖个。</verse>
				<verse number="30">總係，牲儀个血若被人帶入聖帳篷，為到愛在聖所行贖罪个禮儀，這牲儀个肉就做毋得食，一定愛燒掉。</verse>
			</chapter>
			<chapter number="7">
				<verse number="1">以下係贖過失祭个條例；這祭係至聖个。</verse>
				<verse number="2">愛在祭壇北片，就係㓾燒化祭頭牲个地方，㓾贖過失祭个頭牲，將血洒在祭壇四周圍。</verse>
				<verse number="3">全部个油，就係歸條肥个尾、包等腹內个油、</verse>
				<verse number="4">兩隻腰仔㧯腰仔面頂个油、肝个網油，攏總愛放在祭壇頂。</verse>
				<verse number="5">祭司愛在祭壇頂將全部个油燒獻給上主；這係贖過失祭。</verse>
				<verse number="6">祭司家族中所有个男人全部做得食這種祭肉，總係一定愛在聖个所在食，因為這祭係至聖个。</verse>
				<verse number="7">贖罪祭㧯贖過失祭个條例有一項係共樣个：祭肉愛歸主持贖罪禮个祭司。</verse>
				<verse number="8">燒化祭頭牲个皮愛歸主持祭禮个祭司。</verse>
				<verse number="9">素祭，無論係用爐仔焙个、用煎盤煎个，抑係用淺鑊頭煏个，全部愛歸主持祭禮个祭司。</verse>
				<verse number="10">總係生个素祭，無論係攪油个抑係燥个，攏總愛歸給 亞倫 族所有个祭司；佢等愛平均分配這兜祭物。</verse>
				<verse number="11">以下係有關向上主獻平安祭个條例。</verse>
				<verse number="12">若係有人為到愛感謝上主來獻平安祭，除了這感謝祭以外，還愛獻無酵个餅：就係幼麵粉攪橄欖油做个賁餅、膏橄欖油个薄餅，㧯幼麵粉攪橄欖油个餅。</verse>
				<verse number="13">佢還愛獻一些仔有酵个餅。</verse>
				<verse number="14">佢愛對這兜餅當中各拿一隻做特別个禮物獻給上主。這禮物愛給該將平安祭个血洒在祭壇四周圍个祭司。</verse>
				<verse number="15">為到感謝上主所獻个平安祭个祭肉，愛在獻祭當日食掉，做毋得留到第二朝晨。</verse>
				<verse number="16">所獻个平安祭若係為到還願抑係甘心獻个祭，祭肉愛在獻祭當日來食，總係所賸到个做得留到第二日正食。</verse>
				<verse number="17">若係到第三日還有賸到个祭肉，一定愛燒掉。</verse>
				<verse number="18">若係在第三日還食平安祭个肉，上帝就毋接受佢所獻个祭；佢所獻个毋算做祭。這牲儀係無淨浰个；無論麼人食這種祭肉，就愛承擔自家个罪。</verse>
				<verse number="19">若係祭肉接觸禮儀上無淨浰个東西抑係人，就做毋得食，愛燒掉。禮儀上定為淨浰个人，無論麼人，全部做得食祭肉。</verse>
				<verse number="20">總係禮儀上無淨浰个人，若係食獻給上主平安祭个肉，一定愛將佢對上帝个子民中除名。</verse>
				<verse number="21">若有人接觸禮儀上無淨浰个東西 — 無論係人，抑係頭牲，抑係任何無淨浰个東西 — 然後還食獻給上主平安祭个肉，一定愛將佢對上帝个子民中除名。</verse>
				<verse number="22">上主吩咐 摩西</verse>
				<verse number="23">將以下个條例宣佈給 以色列 人。牛、綿羊㧯山羊个油全部做毋得食。</verse>
				<verse number="24">自然死掉抑係被野獸咬死个動物个油也做毋得食，總係做得做別个用途。</verse>
				<verse number="25">無論麼人食燒獻給上主頭牲个油，一定愛將佢對上帝个子民中除名。</verse>
				<verse number="26">無論你等住在㖠位，飛禽个血抑係走獸个血全部做毋得食。</verse>
				<verse number="27">麼人食血，一定愛將佢對上帝个子民中除名。</verse>
				<verse number="28">上主吩咐 摩西</verse>
				<verse number="29">將以下个條例宣佈給 以色列 人。無論麼人獻平安祭，佢一定愛將一部份祭肉獻給上主做禮物。</verse>
				<verse number="30">佢愛親手將這兜禮物帶來獻給上主做火祭。佢愛帶頭牲个油㧯胸脯肉來，將胸脯肉搖幾下做搖祭獻給上主。</verse>
				<verse number="31">祭司愛將油放在祭壇頂來燒；總係胸脯肉愛給 亞倫 㧯佢个子孫。</verse>
				<verse number="32">右後腿愛給該負責獻平安祭个油㧯血个祭司做禮物。</verse>
				<verse number="33"></verse>
				<verse number="34">平安祭中个胸脯肉㧯右後腿，係上主對 以色列 人中拿出來賜給祭司 亞倫 㧯佢个子孫个一種特別禮物。 以色列 人一定愛將這兜歸給該兜祭司。這係永遠毋會改變个規定。</verse>
				<verse number="35">這兜祭肉係對 亞倫 㧯佢个子孫受設立做祭司事奉上主該日就指定給佢等个。</verse>
				<verse number="36">該一日，上主命令 以色列 人將這兜祭肉分給該兜祭司。 以色列 人一定愛永遠遵守這條例。</verse>
				<verse number="37">以上記載个就係有關燒化祭、素祭、贖罪祭、贖過失祭、設立祭司、㧯平安祭个條例。</verse>
				<verse number="38">上主在曠野个 西奈 山將這兜條例吩咐 摩西 。該日， 摩西 命令 以色列 人向上主獻祭。</verse>
			</chapter>
			<chapter number="8">
				<verse number="1">上主吩咐 摩西 ：</verse>
				<verse number="2">「你愛帶 亞倫 㧯佢該兜孻仔到𠊎聖帳篷門口。你也愛帶祭司个聖服、設立用个聖油、一隻贖罪祭个細牛牯、兩隻綿羊牯，㧯一籃無酵餅去，</verse>
				<verse number="3">然後召集全體人民到該位聚會。」</verse>
				<verse number="4">摩西 遵照上主个命令去做。全體民眾全部聚集在聖帳篷門口，</verse>
				<verse number="5">摩西 就對佢等宣佈：「𠊎這下所執行个係遵照上主个命令去做个。」</verse>
				<verse number="6">摩西 𢱋 亞倫 㧯佢該兜孻仔到頭前來，用水㧯佢等洗身。</verse>
				<verse number="7">佢㧯 亞倫 著好內衫，繫腰帶，著好長衫、又加上以弗得聖服，用手工刺成个帶仔將以弗得繫在身上。</verse>
				<verse number="8">接等，佢將胸牌掛在 亞倫 身上，將烏陵㧯土明 放入胸牌肚。</verse>
				<verse number="9">然後，佢將帽仔戴在 亞倫 个頭那頂，又將該用純金造个表示奉獻个牌仔繫在帽仔个頭前。這全部係遵照上主命令 摩西 做个。</verse>
				<verse number="10">摩西 拿聖油膏聖帳篷㧯內肚所有个東西，恁樣使它兜全部分別為聖。</verse>
				<verse number="11">佢也用聖油在祭壇㧯壇个用品頂高拂七擺，在洗盪盆㧯盆座頂高拂七擺，來將這兜東西全部分別為聖。</verse>
				<verse number="12">佢將聖油倒在 亞倫 个頭那頂，設立佢做祭司。</verse>
				<verse number="13">接等， 摩西 𢱋 亞倫 該兜孻仔到頭前，給佢等著好內衫、繫腰帶、戴帽仔。這全部係遵照上主命令 摩西 做个。</verse>
				<verse number="14">摩西 將贖罪祭个細牛牯牽過來； 亞倫 㧯佢該兜孻仔將手放在牛牯个頭那頂。</verse>
				<verse number="15">摩西 㓾死該牛牯，用手指搵血，膏在祭壇个四角頂，使祭壇成做淨浰。然後，佢將賸到个血倒在壇腳該位。恁樣，佢將祭壇分別為聖，好在祭壇頂贖罪。</verse>
				<verse number="16">摩西 拿牛牯腹內所有个油、肝个網油、兩隻腰仔㧯腰仔面頂个油，放在祭壇頂，全部燒掉。</verse>
				<verse number="17">總係，佢將牛牯賸到个部份，包含皮、肉、腸，全部帶到營外燒掉。這全部係遵照上主命令 摩西 做个。</verse>
				<verse number="18">接等， 摩西 牽該隻做燒化祭个綿羊牯來； 亞倫 㧯佢該兜孻仔將手放在綿羊牯頭那頂。</verse>
				<verse number="19">摩西 㓾死該羊牯，將血洒在祭壇四周圍。</verse>
				<verse number="20">佢將羊肉切做一垤一垤，用水洗淨腹內㧯後腿，將這兜㧯羊頭並油全部放在祭壇頂燒獻。</verse>
				<verse number="21">這火祭个香味係上主所歡喜个。這全部係遵照上主命令 摩西 做个。</verse>
				<verse number="22">摩西 牽另外一隻綿羊牯來，這隻係為到授聖職給祭司獻个。 亞倫 㧯佢該兜孻仔將手放在綿羊牯个頭那頂。</verse>
				<verse number="23">摩西 㓾死該羊牯，拿一些仔血膏 亞倫 个右耳鉈、正手个手指公，㧯正腳个腳指公。</verse>
				<verse number="24">接等，佢帶 亞倫 該兜孻仔到頭前來，將一些仔血膏佢等个右耳鉈、正手个手指公，㧯正腳个腳指公，然後佢將賸到个血倒在祭壇四周圍。</verse>
				<verse number="25">佢將油、肥个尾、包等腹內个油、肝个網油、兩隻腰仔㧯腰仔面頂个油，㧯右後腿分出來。</verse>
				<verse number="26">佢對獻給上主該籃無酵餅中拿出一垤餅，一垤膏橄欖油个餅，㧯一垤薄餅，放在油㧯右腿頂，</verse>
				<verse number="27">然後將這兜東西全部放在 亞倫 㧯佢該兜孻仔个手項搖幾下做搖祭獻給上主。</verse>
				<verse number="28">接等 摩西 對佢等个手項將這兜餅接過來，放在祭壇頂个燒化祭頂高燒獻。這係授聖職給祭司所獻个祭。這火祭个香味係上主所歡喜个。</verse>
				<verse number="29">然後， 摩西 將胸脯肉搖幾下做搖祭獻給上主；這係 摩西 對該授聖職給祭司个羊牯所得个一份。這全部係遵照上主命令 摩西 做个。</verse>
				<verse number="30">摩西 拿一些仔聖油㧯祭壇頂个血拂在 亞倫 㧯佢該兜孻仔身上，也拂在佢等个衫褲頂。恁樣，佢將佢等㧯佢等个衫褲分別為聖，奉獻給上主。</verse>
				<verse number="31">摩西 對 亞倫 㧯佢該兜孻仔講：「你等愛遵照上主个命令將肉帶到聖帳篷門口，在該位煮，在該位食，又愛食籃仔肚該授聖職給祭司个餅。</verse>
				<verse number="32">賸到个肉㧯餅全部愛燒掉。</verse>
				<verse number="33">你等愛留在聖帳篷門口七日，做毋得離開，等到你等接受聖職个禮儀完成，因為你等愛用七日个時間接受聖職做祭司。</verse>
				<verse number="34">𠊎等今晡日所做个全部係遵照上主个命令做个；這命令係為到愛贖你等个罪。</verse>
				<verse number="35">你等一定愛留在聖帳篷門口七日，日夜在該位，遵行上主个命令。若係無，你等一定會死。這就係上主給𠊎个命令。」</verse>
				<verse number="36">所以， 亞倫 㧯佢該兜孻仔就遵行上主吩咐 摩西 命令个一切事。</verse>
			</chapter>
			<chapter number="9">
				<verse number="1">到第八日， 摩西 召集 亞倫 㧯佢該兜孻仔，並 以色列 該兜長老來。</verse>
				<verse number="2">佢㧯 亞倫 講：「你愛擇一隻無缺點个細牛牯來做贖罪祭，一隻無缺點个綿羊牯做燒化祭獻給上主。</verse>
				<verse number="3">然後，你愛對 以色列 人講：『你等愛擇一隻山羊牯來做贖罪祭，又擇一歲大、無缺點个細牛牯㧯細綿羊牯各一隻做燒化祭，</verse>
				<verse number="4">又擇一隻牛牯㧯一隻綿羊牯做平安祭。你等愛將這兜㧯攪橄欖油个素祭全部獻給上主，因為今晡日上主愛向你等顯現。』」</verse>
				<verse number="5">所以，佢等將 摩西 吩咐佢等个全部帶到聖帳篷前；全體人民聚集在該位，企在上主面前。</verse>
				<verse number="6">摩西 講：「上主命令你等做這所有个事，係愛向你等顯現佢个榮光。」</verse>
				<verse number="7">接等， 摩西 對 亞倫 講：「你愛到祭壇前獻你个贖罪祭㧯燒化祭，為你自家㧯人民贖罪；你又愛獻人民个祭，為佢等贖罪，全部照上主所命令个。」</verse>
				<verse number="8">所以， 亞倫 行到祭壇前，㓾死細牛牯做佢自家个贖罪祭。</verse>
				<verse number="9">佢該兜孻仔將血帶到佢面前，佢就用手指搵血，將血膏在祭壇个四角頂，賸到个血全部倒在祭壇个腳該位。</verse>
				<verse number="10">接等，佢照上主通過 摩西 宣佈个命令將贖罪祭个油、兩隻腰仔，㧯肝个網油全部放在祭壇頂燒獻。</verse>
				<verse number="11">佢又將牛个肉㧯皮帶到營外燒掉。</verse>
				<verse number="12">亞倫 也㓾死為自家獻燒化祭个頭牲。佢該兜孻仔將血帶到佢面前，佢就將血洒在祭壇四周圍。</verse>
				<verse number="13">然後，佢等將燒化祭个肉一垤一垤、連頭交給佢，佢就將這兜放在祭壇頂燒。</verse>
				<verse number="14">佢又洗淨腹內㧯後腿，擺在燒化祭頂燒獻。</verse>
				<verse number="15">接下去， 亞倫 為人民獻祭。佢將為人民贖罪个山羊牯牽過來，㓾死，然後照佢為自家獻贖罪祭个方法獻該隻山羊牯。</verse>
				<verse number="16">佢又牽燒化祭个頭牲過來，照條例將牠奉獻。</verse>
				<verse number="17">佢也獻素祭，對中間扡一揢放在祭壇頂燒。 (除了逐朝晨个燒化祭以外，再獻這祭。)</verse>
				<verse number="18">佢㓾死牛牯㧯綿羊牯，為人民獻平安祭。 亞倫 該兜孻仔將血帶到佢面前，佢就將血洒在祭壇四周圍。</verse>
				<verse number="19">佢等將牛牯㧯綿羊牯个油，包含肥个尾、包等腹內个油、兩隻腰仔、㧯肝个網油，</verse>
				<verse number="20">全部放在牲儀个胸脯頂，帶到佢面前。 亞倫 就將這兜油燒在祭壇頂，</verse>
				<verse number="21">又遵照 摩西 个命令將胸脯肉㧯右後腿搖幾下做搖祭獻給上主。</verse>
				<verse number="22">亞倫 獻贖罪祭、燒化祭、㧯平安祭以後，就擎手祝福人民，然後對祭壇頂下來。</verse>
				<verse number="23">摩西 㧯 亞倫 入去聖帳篷，再對該位出來，祝福人民。這時，上主个榮光向全體民眾顯現。</verse>
				<verse number="24">有火對上主面前出來，燒掉燒化祭㧯祭壇頂个油。人民一看到就全部歡喜到大聲嘶，伏在地上。</verse>
			</chapter>
			<chapter number="10">
				<verse number="1">亞倫 个孻仔 拿答 㧯 亞比戶 各拿自家个香爐，點火，燒香，將它獻給上主。總係這係無合法个火，因為上主並無命令佢等做這個事。</verse>
				<verse number="2">忽然，就有火對上主面前出來，將佢等燒滅，佢等就死在上主面前。</verse>
				<verse number="3">所以， 摩西 對 亞倫 講：「這就係上主所講个： 『在親近𠊎个人中， 𠊎愛顯出𠊎个神聖； 在眾人面前， 𠊎愛彰顯𠊎个榮光 。』」 亞倫 就恬恬。</verse>
				<verse number="4">摩西 喊 亞倫 个阿叔 烏薛 个孻仔 米沙利 㧯 以利撒反 來，對佢等講：「將你等親人个屍體扛出聖所，帶到營外去。」</verse>
				<verse number="5">佢等就遵照 摩西 个命令揪等屍體个衫褲，將屍體扛到營外去。</verse>
				<verse number="6">摩西 對 亞倫 㧯佢个孻仔 以利亞撒 㧯 以他瑪 講：「你等做毋得俾頭那毛襛襛，也做毋得扯爛衫褲來表示哀傷。若無遵守這個話，你等一定會死；上主也會向全體人民發譴。總係，你等个親屬 以色列 全家做得為上主用火燒死人个事件哀傷。</verse>
				<verse number="7">你等做毋得離開聖帳篷門口；若係離開，你等一定會死，因為上主个聖油已經使你等分別為聖了。」所以佢等遵照 摩西 个話來做。</verse>
				<verse number="8">上主對 亞倫 講：</verse>
				<verse number="9">「你㧯你該兜孻仔啉淡酒抑係釅酒以後做毋得入去𠊎个聖帳篷；若係入去，你等一定會死。你等个後代一定愛永遠遵守這條例。</verse>
				<verse number="10">神聖㧯世俗个，禮儀上淨浰㧯無淨浰个，你等一定愛分別到清清楚楚。</verse>
				<verse number="11">𠊎 — 上主通過 摩西 頒佈个所有法律，你等愛教導 以色列 人。」</verse>
				<verse number="12">摩西 對 亞倫 同佢賸个兩個孻仔 以利亞撒 㧯 以他瑪 講：「你等愛用獻給上主个火祭中所賸到个素祭做無酵餅，在祭壇堘食，因為這祭係至聖个。</verse>
				<verse number="13">你等愛在聖个所在食；因為在獻給上主个火祭當中，這係歸你等㧯你等子孫个份額。這就係上主給𠊎个命令。</verse>
				<verse number="14">你等㧯你等个子女做得食獻給上主个特別禮物，就係所搖个胸脯肉㧯所獻个後腿。你等愛在禮儀上淨浰个地方食這種肉。這係對 以色列 人所獻个平安祭分出來給你等㧯你等子孫个。</verse>
				<verse number="15">所獻个後腿㧯所搖个胸脯肉，佢等愛㧯火祭个油共下帶來，搖幾下獻給上主做搖祭。照上主个命令，這部份愛永遠歸你等㧯你等个子孫。」</verse>
				<verse number="16">摩西 查問該隻贖罪祭个山羊牯，發現牠已經被人燒掉。佢就向 亞倫 賸个孻仔 以利亞撒 㧯 以他瑪 發譴，責備佢等：</verse>
				<verse number="17">「你等做麼介無在聖个所在食贖罪祭呢？這祭係至聖个。上主將牠賜給你等，愛你等擔當 全體人民个罪孽，在上主面前為佢等贖罪。</verse>
				<verse number="18">既然這牲儀个血無帶入聖所底背，你等就應該照𠊎个命令在聖所底背食這祭肉。」</verse>
				<verse number="19">亞倫 應 摩西 講：「今晡日人民獻佢等个贖罪祭㧯燒化祭給上主，總係𠊎堵到這種災難。就算𠊎今晡日食掉贖罪祭个祭物，這會使上主接納麼？」</verse>
				<verse number="20">摩西 聽了這話，認為佢講个有理。</verse>
			</chapter>
			<chapter number="11">
				<verse number="1">上主命令 摩西 㧯 亞倫</verse>
				<verse number="2">向 以色列 人宣佈以下个條例。地上所有个走獸當中，你等做得食這兜：</verse>
				<verse number="3">凡腳蹄分做兩瓣，又會倒草个動物，你等全部做得食。</verse>
				<verse number="4">總係你等做毋得食駱駝、獾，抑係兔仔，愛將這兜算做無淨浰个動物；因為牠兜雖然會倒草，總係腳蹄無分瓣。</verse>
				<verse number="5"></verse>
				<verse number="6"></verse>
				<verse number="7">豬仔也做毋得食，愛將牠算做無淨浰个動物；因為豬仔雖然腳蹄分瓣，總係無倒草。</verse>
				<verse number="8">這兜動物个肉你等做毋得食，連摸牠兜个屍體也做毋得；牠兜算做無淨浰个動物。</verse>
				<verse number="9">凡在水肚、海肚、河壩底背个，你等做得食這兜：有魚翼有鱗个魚類，你等全部做得食；</verse>
				<verse number="10">總係無魚翼無鱗个魚類，你等做毋得食。</verse>
				<verse number="11">你等愛將牠兜算做無淨浰个，做毋得食牠兜个肉，連摸牠兜个屍體也做毋得。</verse>
				<verse number="12">凡在水肚無魚翼、無鱗个魚類，你等愛將牠兜算做無淨浰个。</verse>
				<verse number="13">以下个鳥仔算做無淨浰，你等全部做毋得食：鷹鳥、禿鷹、鷂婆、鳶、獵鷹、烏鴉㧯牠共類个、鴕鳥、梟、海鷗、鷹雀㧯牠共類个、鴟鴞、鸕鶿、貓頭鳥、角鴟、鵜鶘、鵰、鸛鳥、白鶴㧯牠共類个、戴鵀、㧯蝠婆 。</verse>
				<verse number="14"></verse>
				<verse number="15"></verse>
				<verse number="16"></verse>
				<verse number="17"></verse>
				<verse number="18"></verse>
				<verse number="19"></verse>
				<verse number="20">凡係有翼胛个昆蟲，除了會跳个，全部係無淨浰个。</verse>
				<verse number="21"></verse>
				<verse number="22">你等做得食草蜢、土狗仔，抑係大草蜢。</verse>
				<verse number="23">總係其他有翼胛、會爬个細昆蟲，你等愛將牠兜算做無淨浰个。</verse>
				<verse number="24">以下動物个屍體，麼人摸到、麼人就會無淨浰到臨暗仔：所有腳蹄無分瓣、無倒草，㧯有腳盤个四腳動物。動到牠兜屍體个人，一定愛將衫褲洗淨，總係佢還係無淨浰到臨暗仔。</verse>
				<verse number="25"></verse>
				<verse number="26"></verse>
				<verse number="27"></verse>
				<verse number="28"></verse>
				<verse number="29">地上爬个，愛算做無淨浰个，有這兜：錢鼠、老鼠、狗乸蛇㧯牠共類个、壁蛇、大蜥蜴、山狗螮、蛇醫、㧯變色龍。</verse>
				<verse number="30"></verse>
				<verse number="31">地上爬个，這兜全部愛算做無淨浰个。麼人摸牠兜个屍體，麼人就無淨浰到臨暗仔。</verse>
				<verse number="32">牠兜个屍體跌在麼介東西頂高，無論係樹仔做个、布仔做个、皮仔做个，抑係麻布袋，無論用途係麼介，全部算係無淨浰。愛將這個東西浸在水肚；它算係無淨浰到臨暗仔，以後就淨浰了。</verse>
				<verse number="33">牠兜个屍體若跌落泥做个鑊頭肚，鑊頭肚个東西就無淨浰；你等愛將鑊頭打爛。</verse>
				<verse number="34">平常做得食个東西，若搵到該鑊頭个水，就無淨浰；平常做得啉个東西，若裝在該鑊頭肚，也算無淨浰。</verse>
				<verse number="35">牠兜个屍體無論跌在麼介東西頂高，這東西就無淨浰；無論係風爐抑係灶頭全部愛打爛。</verse>
				<verse number="36">雖然各種東西一憑到牠兜个屍體就無淨浰，總係泉水㧯陂塘水還係淨浰个。</verse>
				<verse number="37">這兜動物个屍體若跌在愛種个種子頂高，種子還係淨浰个。</verse>
				<verse number="38">總係種子若係淋過水，有屍體也跌在頂高，這種子就無淨浰了。</verse>
				<verse number="39">做得食个動物若係死掉，麼人摸到牠就算係無淨浰到臨暗仔。</verse>
				<verse number="40">人食到牠个肉，一定愛將衫褲洗淨，總係佢還係無淨浰到臨暗仔。所有搬屍體个，也愛洗淨衫褲，總係佢還係無淨浰到臨暗仔。</verse>
				<verse number="41">地面个細爬蟲，無論係用肚笥爬个、用四隻腳行个，抑係用多腳行个全部算做無淨浰个，你等做毋得食。</verse>
				<verse number="42"></verse>
				<verse number="43">你等做毋得食這兜爬蟲來打垃圾自家變做無淨浰。</verse>
				<verse number="44">𠊎係上主 — 你等个上帝；你等愛將自家分別為聖，成做聖潔，因為𠊎係聖潔个。你等做毋得因為這兜爬蟲來打垃圾自家。</verse>
				<verse number="45">𠊎係上主；𠊎𢱋你等出 埃及 ，愛做你等个上帝。你等愛聖潔，因為𠊎係聖潔个。</verse>
				<verse number="46">以上係有關動物、鳥類、魚類㧯爬蟲類个條例。</verse>
				<verse number="47">你等一定愛分別淨浰抑係無淨浰个、做得食抑係做毋得食个生物。</verse>
			</chapter>
			<chapter number="12">
				<verse number="1">上主吩咐 摩西</verse>
				<verse number="2">向 以色列 人宣佈以下个條例。婦人家若𫱔孻仔，產後个七日，姖在禮儀上係無淨浰个，㧯月經期間共樣無淨浰。</verse>
				<verse number="3">第八日細孻仔一定愛受割禮。</verse>
				<verse number="4">該婦人家愛再等三十三日，到產血停正淨浰。在這站期間，在完成潔淨禮以前，姖做毋得摸所有个聖物，也做毋得進入聖所。</verse>
				<verse number="5">婦人家若𫱔妹仔，產後个十四日，姖在禮儀上係無淨浰个，㧯月經期間共樣無淨浰。姖愛再等六十六日，到產血停正淨浰。</verse>
				<verse number="6">婦人家潔淨个日期滿以後，無論𫱔孻仔𫱔妹仔，姖愛牽一隻一歲大个細羊仔做燒化祭，又愛帶一隻班鳩抑係月鴿仔做贖罪祭，到上主个聖帳篷門口交給祭司。</verse>
				<verse number="7">祭司愛為姖向上主獻祭，為姖舉行潔淨禮 。恁樣，姖在禮儀上就淨浰了。 這係婦人家𫱔孻仔抑係妹仔个條例。</verse>
				<verse number="8">婦人家若買毋起一隻細羊仔，姖做得換做兩隻月鴿仔抑係兩隻班鳩，一隻做燒化祭，另外一隻做贖罪祭。祭司愛為姖行潔淨禮。恁樣，姖在禮儀上就淨浰了。</verse>
			</chapter>
			<chapter number="13">
				<verse number="1">上主向 摩西 㧯 亞倫 宣佈以下个條例。</verse>
				<verse number="2">若有人个皮肉起皰、發癬，抑係發炎，當像係發癩 ，就愛帶佢到 亞倫 族个祭司該位去。</verse>
				<verse number="3">祭司愛檢查佢發東西个位所；若係發東西个位所个毛變白色，發東西个現象深入皮肉，這就係癩，祭司愛宣佈這個人在禮儀上無淨浰。</verse>
				<verse number="4">若係這個人發東西个位所變做白色，總係無深入皮肉，毛也無變白色，祭司愛將佢隔離七日。</verse>
				<verse number="5">第七日，祭司愛加檢查一擺，若係發東西个位所無變較嚴重，也無遰到較大𣽛，就愛繼續將佢隔離七日。</verse>
				<verse number="6">第七日，祭司愛再檢查佢；若係發東西个位所變做無恁白，無遰到較大𣽛，祭司就愛宣佈這個人係淨浰个；佢發个係癬定定。這個人愛洗淨佢个衫褲。恁樣，佢在禮儀上就淨浰了。</verse>
				<verse number="7">總係，祭司檢查佢，宣佈佢在禮儀上淨浰後，若係發東西个位所又緊遰緊大𣽛，佢就愛轉到祭司該位。</verse>
				<verse number="8">祭司愛重新檢查佢；若係發現發東西个位所有影遰到較大𣽛，就愛宣佈佢在禮儀上係無淨浰个。這係癩。</verse>
				<verse number="9">若係有人發癩，愛帶佢到祭司該位；</verse>
				<verse number="10">祭司愛檢查佢。若係發東西个位所腫起來、皮膚變白色，毛也變白，又糜到看得到肉，</verse>
				<verse number="11">這係慢性癩个病症。祭司愛宣佈佢無淨浰，毋使將佢隔離，因為已經知佢係無淨浰个。</verse>
				<verse number="12">若係癩遰到全身逐位，對頭那到腳全部有，</verse>
				<verse number="13">祭司就愛再檢查佢；就算發現佢全身雖然發癩，還係愛宣佈佢在禮儀上係淨浰个；因為全身个皮肉變白，佢在禮儀上也係淨浰个。</verse>
				<verse number="14">總係，一發現有紅腫个肉，佢就算係無淨浰个。</verse>
				<verse number="15">祭司檢查佢，一發現有紅腫个肉，就愛宣佈佢無淨浰，係癩个病症。</verse>
				<verse number="16">總係紅腫个位所若係好轉來，變做白色，佢就愛轉到祭司該位；</verse>
				<verse number="17">祭司愛重新檢查佢。若係發東西个位所確實變白，佢在禮儀上係淨浰个；祭司愛宣佈佢淨浰。</verse>
				<verse number="18">若有人个皮膚發粒仔，已經好了，</verse>
				<verse number="19">原來發粒仔个位所又腫起來變做白色，抑係有紅白斑點出現，佢愛去俾祭司看；</verse>
				<verse number="20">祭司愛檢查佢。若係有深入皮肉个情形，毛又變白色，祭司愛宣佈佢無淨浰；這係對粒仔變做癩个症頭。</verse>
				<verse number="21">若係祭司檢查个時，發現毛無變白，發粒仔个現象也無深入皮肉，色也無恁白，祭司愛將佢隔離七日。</verse>
				<verse number="22">若係發粒仔个位所遰到較大𣽛，祭司愛宣佈佢無淨浰；這係癩个症頭。</verse>
				<verse number="23">若係發粒仔个位所無變較嚴重，也無遰到較大𣽛，該就係粒仔个疤定定。祭司愛宣佈佢在禮儀上係淨浰个。</verse>
				<verse number="24">若有人被火燒傷，傷口變白抑係有紅白斑點，</verse>
				<verse number="25">祭司就愛檢查。若係傷口个毛變白，傷口深入皮肉，這係癩對火燒傷个傷口發出來个症頭，祭司愛宣佈佢無淨浰。</verse>
				<verse number="26">若係傷口个毛無變白，傷口無深入皮肉，色也無恁白，祭司愛將佢隔離七日。</verse>
				<verse number="27">第七日，祭司愛再檢查佢。若係傷口遰到較大𣽛，這係癩个症頭，祭司愛宣佈佢無淨浰。</verse>
				<verse number="28">若係傷口無變嚴重，也無遰到較大𣽛，色也無恁白，這就係因為火燒傷腫起來个。祭司愛宣佈佢在禮儀上淨浰，因為這係燒傷个疤定定。</verse>
				<verse number="29">無論男女，頭那頂抑係下頷若有發東西，</verse>
				<verse number="30">祭司就愛檢查。若係發東西个位所深入皮肉，該位所个頭那毛抑係鬍鬚變黃色，又變較少，這係癩个症頭，祭司愛宣佈這個人無淨浰。</verse>
				<verse number="31">祭司檢查个時，若係發現發東西个現象無深入皮肉，總係吂生烏色个頭那毛抑係鬍鬚，祭司愛將佢隔離七日。</verse>
				<verse number="32">第七日，祭司愛再檢查發東西个現象；若係發東西个位所無遰到較大𣽛，頭那毛抑係鬍鬚無變黃，發東西个位所也無深入皮肉，</verse>
				<verse number="33">這個人就愛將發東西个位所周圍个頭那毛抑係鬍鬚剃掉。然後，祭司愛將佢再隔離七日。</verse>
				<verse number="34">第七日，祭司愛重新檢查發東西个位所；若係發東西个位所無遰到較大𣽛，也無深入皮肉，祭司愛宣佈佢在禮儀上係淨浰个。佢愛洗淨衫褲，恁樣佢就淨浰了。</verse>
				<verse number="35">總係，淨浰後，發東西个位所若緊遰緊大𣽛，</verse>
				<verse number="36">祭司就愛再檢查佢。若係發東西个位所有遰到較大𣽛，就毋使再尋變黃个頭那毛抑係鬍鬚，佢係無淨浰个。</verse>
				<verse number="37">若係認為發東西个位所無遰到較大𣽛，烏色个頭那毛抑係鬍鬚也生出來，發東西个位所就算好了；祭司愛宣佈佢在禮儀上係淨浰个。</verse>
				<verse number="38">無論男女，若係皮膚有白色个斑點，</verse>
				<verse number="39">祭司就愛檢查。若斑點係暗灰色，這係皮膚發癬；這個人在禮儀上係淨浰个。</verse>
				<verse number="40">若有人𢫫掉頭那毛，無論係頭那个頭前抑係後背光頭，佢係淨浰个。</verse>
				<verse number="41"></verse>
				<verse number="42">總係𢫫毛个位所若出現白中帶紅个症頭，這係癩个病症。</verse>
				<verse number="43">祭司愛檢查佢；若係光頭个位所正經有白中帶紅个症頭，</verse>
				<verse number="44">祭司愛宣佈佢係無淨浰个，因為佢个頭那發癩。</verse>
				<verse number="45">發癩个人一定愛著扯爛个衫，頭那毛愛裝俾它襛襛，揞等嘴唇，喊講：「無淨浰，無淨浰！」</verse>
				<verse number="46">在癩吂醫好以前，佢係無淨浰个；佢一定愛住在營外，㧯別人隔離。</verse>
				<verse number="47">無論係羊毛衫抑係麻紗衫，係直紗抑係橫紗个，係皮个抑係皮个產品，若係生菇 ，</verse>
				<verse number="48"></verse>
				<verse number="49">這生菇若係青色抑係紅色，就係會遰到較大𣽛个菇，一定愛交給祭司檢查。</verse>
				<verse number="50">祭司愛詳細檢查，將它隔離七日。</verse>
				<verse number="51">第七日，愛再檢查它。若係生菇遰到較大𣽛，這東西係無淨浰个。</verse>
				<verse number="52">祭司愛將它燒掉，因為它係會緊遰緊大𣽛个菇，一定愛用火燒掉。</verse>
				<verse number="53">總係，祭司檢查後若發現這生菇無遰到較大𣽛，</verse>
				<verse number="54">佢愛喊人洗該東西，將它再隔離七日。</verse>
				<verse number="55">然後，祭司愛再檢查它；若係生菇無遰到較大𣽛，總係還係無變色，這東西還係無淨浰个。無論生菇係在正面抑係背面，該東西一定愛用火燒掉。</verse>
				<verse number="56">總係，祭司再檢查它个時，若係發現生菇已經無掉，就愛將該部份扯下來。</verse>
				<verse number="57">以後，生菇若又出現，又緊遰緊大𣽛，你就愛用火將該東西燒掉。</verse>
				<verse number="58">若係你將該東西洗過，生菇就無掉去，你愛再洗一擺，恁樣該東西在禮儀上就淨浰了。</verse>
				<verse number="59">以上係有關衫褲生菇个條例。無論係羊毛衫抑係麻紗衫，係直紗抑係橫紗个，抑係皮个東西，所有生菇个，全部愛按照這條例來決定淨浰抑係無淨浰。</verse>
			</chapter>
			<chapter number="14">
				<verse number="1">上主將有關癩淨浰後个條例宣佈給 摩西 。</verse>
				<verse number="2">病人愛算做淨浰該日，人愛帶佢去看祭司。</verse>
				<verse number="3">祭司愛到營外去檢查佢，若係發現佢个癩病好了，</verse>
				<verse number="4">祭司愛喊人為該求淨浰个帶兩隻禮儀上認定淨浰个鳥仔、一垤香柏樹、一條深紅色个線，㧯一支牛膝草个嫩枝來。</verse>
				<verse number="5">祭司愛吩咐人在裝滿泉水个泥盆頂㓾其中个一隻鳥仔，</verse>
				<verse number="6">同時祭司愛捉住另外一隻鳥仔，將牠連同香柏樹、深紅色个線，㧯牛膝草共下搵盆肚个血，</verse>
				<verse number="7">在該求淨浰个病人身上拂血七擺，然後宣佈佢係淨浰个。祭司還愛放該隻生鳥仔走，俾牠飛向野外。</verse>
				<verse number="8">求淨浰个人愛洗淨衫褲，剃掉所有个頭那毛，洗身，恁樣佢在禮儀上就淨浰了。然後佢做得入到營肚，總係一定愛在佢个帳篷外先住七日。</verse>
				<verse number="9">第七日，佢愛再剃頭，剃鬚，剃掉目眉毛㧯身上所有个毛，還愛洗淨衫褲，洗身，然後在禮儀上正算淨浰。</verse>
				<verse number="10">第八日，佢愛帶兩隻無缺點个細羊牯、一隻一歲大、無缺點个羊牸仔、三公斤攪橄欖油个幼麵粉，㧯三分之一公升个橄欖油來。</verse>
				<verse number="11">行潔淨禮个祭司愛帶該求淨浰个人㧯這兜祭物到聖帳篷門口、上主个面前，</verse>
				<verse number="12">然後祭司愛獻一隻細羊牯㧯三分之一公升个橄欖油做贖過失祭；佢也愛將這兜搖幾下做搖祭獻給上主。</verse>
				<verse number="13">佢愛在㓾贖罪祭㧯燒化祭頭牲該聖个所在㓾這隻細羊。佢一定愛恁樣做，因為贖過失祭㧯贖罪祭共樣係歸給祭司，係至聖个。</verse>
				<verse number="14">祭司愛拿兜贖過失祭牲儀个血，膏在該求淨浰个人个右耳鉈、右手个手指公，㧯右腳个腳指公頂。</verse>
				<verse number="15">祭司愛倒一些仔橄欖油在左手心，</verse>
				<verse number="16">用右手个手指搵該油，在上主面前拂七擺。</verse>
				<verse number="17">祭司也愛拿一些仔左手心个油膏在該求淨浰个人个右耳鉈、右手个手指公，㧯右腳个腳指公頂，就係膏在贖過失祭牲儀个血頂。</verse>
				<verse number="18">佢也愛將手心賸到个油倒在該人頭那頂。祭司愛用這種方法在上主面前為該人行潔淨禮 。</verse>
				<verse number="19">接等，祭司愛獻贖罪祭，為該本來無淨浰个人行潔淨禮，然後㓾燒化祭个頭牲，</verse>
				<verse number="20">將牠㧯素祭獻在祭壇頂。祭司愛用這方法為該人行潔淨禮，佢就淨浰了。</verse>
				<verse number="21">若係該人當苦，買毋起恁多牲儀，佢做得用一隻細羊牯來做贖過失祭，來搖幾下行潔淨禮。佢也愛帶一公斤攪橄欖油个幼麵粉做素祭，加三分之一公升个橄欖油。</verse>
				<verse number="22">佢還愛帶佢有力量買个兩隻月鴿仔抑係兩隻班鳩來，一隻做贖罪祭，一隻做燒化祭。</verse>
				<verse number="23">第八日，就係佢愛被人宣佈做淨浰該日，佢愛將這兜祭物帶到上主聖帳篷門口，交給祭司。</verse>
				<verse number="24">祭司愛將贖過失祭个細羊牯㧯橄欖油，搖幾下做搖祭獻給上主。</verse>
				<verse number="25">佢愛㓾該隻細羊，拿一些仔血，膏在該求淨浰个人个右耳鉈、右手个手指公，㧯右腳个腳指公頂。</verse>
				<verse number="26">祭司愛倒一些仔橄欖油在左手心，</verse>
				<verse number="27">用右手个手指搵該油，在上主面前拂七擺。</verse>
				<verse number="28">祭司也愛拿一些仔左手心个油膏在該求淨浰个人个右耳鉈、右手个手指公，㧯右腳个腳指公頂，就係用贖過失祭牲儀个血膏過个地方。</verse>
				<verse number="29">佢也愛將手心賸到个油倒在該人頭那頂。祭司愛用這種方法在上主面前為該人行潔淨禮。</verse>
				<verse number="30">接等，該人愛照佢有力量買个獻一隻月鴿仔抑係班鳩</verse>
				<verse number="31">做贖罪祭，另外一隻做燒化祭，㧯素祭共下獻。祭司愛用這種方法在上主面前為該人行潔淨禮。</verse>
				<verse number="32">這係發癩病、總係買毋起潔淨禮所愛獻个牲儀个人應該遵行个條例。</verse>
				<verse number="33">上主向 摩西 㧯 亞倫 宣佈有關屋仔生菇个條例。</verse>
				<verse number="34">( 以色列 人進入上主賜給佢等做產業个 迦南 地以後，若係佢使佢等个屋仔生菇，佢等愛照這兜條例為到屋仔行潔淨禮。)</verse>
				<verse number="35">無論麼人發現自家个屋仔生菇，一定愛去向祭司報告。</verse>
				<verse number="36">祭司愛吩咐人將屋仔底背所有个東西全部搬出來，免得屋仔底背个東西全部被人宣佈做無淨浰。東西搬出來後，祭司愛入去屋肚，</verse>
				<verse number="37">檢查生菇个地方。若係佢發現有青色斑點抑係紅色斑點生到壁頂，</verse>
				<verse number="38">佢就愛出來，在門口將屋仔封七日。</verse>
				<verse number="39">第七日，祭司愛再倒轉去檢查，若係發現壁頂个生菇已經遰到較大𣽛，</verse>
				<verse number="40">就愛吩咐人將有生菇个石頭挖出來，㧹在城外無淨浰个地方。</verse>
				<verse number="41">然後，佢愛吩咐人將屋肚壁頂个泥灰刮掉，將它倒在城外無淨浰个地方。</verse>
				<verse number="42">該挖出石頭个地方愛另外用石頭補上去，壁愛用泥灰重新粉過。</verse>
				<verse number="43">在挖出石頭、刮掉泥灰、重新粉過以後，若係屋仔再生菇，</verse>
				<verse number="44">祭司愛去檢查，生菇若遰到較大𣽛，這生菇盡嚴重，這屋仔就無淨浰了。</verse>
				<verse number="45">屋仔愛拆掉，將石頭、樹料、泥灰全部搬到城外無淨浰个地方㧒掉。</verse>
				<verse number="46">屋仔封鎖个期間，無論麼人入去，麼人就無淨浰到該日臨暗仔。</verse>
				<verse number="47">無論麼人在該屋肚睡抑係食，全部愛洗淨衫褲。</verse>
				<verse number="48">屋仔重新粉過以後，祭司倒轉來檢查，若係壁無再生菇，佢愛宣佈這屋仔係淨浰个，因為生菇已經完全無掉去了。</verse>
				<verse number="49">佢愛帶來兩隻鳥仔、一垤香柏樹、一條深紅色个線，㧯一支牛膝草个嫩枝，為屋仔行潔淨禮。</verse>
				<verse number="50">佢愛在裝滿泉水个泥盆頂㓾掉其中个一隻鳥仔，</verse>
				<verse number="51">然後拿香柏樹、牛膝草、深紅色个線，㧯另外一隻生鳥仔，將這兜搵盆肚个血，拂屋仔七擺。</verse>
				<verse number="52">佢愛用鳥仔血、泉水、生鳥仔、香柏樹、牛膝草，㧯深紅色个線為到屋仔行潔淨禮。</verse>
				<verse number="53">然後，佢愛將該隻生鳥仔放掉，由在牠飛去野外。佢愛用這種方法為到屋仔行潔淨禮，屋仔就淨浰了。</verse>
				<verse number="54">以上係有關癩，</verse>
				<verse number="55">皮膚上有起皰、發癬、發炎，也係有關衫褲㧯屋仔生菇个各種條例。</verse>
				<verse number="56"></verse>
				<verse number="57">這兜條例愛做決定淨浰㧯無淨浰个根據。</verse>
			</chapter>
			<chapter number="15">
				<verse number="1">上主吩咐 摩西 㧯 亞倫</verse>
				<verse number="2">向 以色列 人宣佈以下个條例。男人發遺漏症，所漏出个係無淨浰个。</verse>
				<verse number="3">佢發遺漏症，無論係漏出來个抑係塞到个，全部使佢無淨浰。</verse>
				<verse number="4">佢睡過个眠床抑係坐過个東西全部係無淨浰个。</verse>
				<verse number="5">憑到佢个眠床抑係坐佢坐過个東西个人一定愛洗淨衫褲、洗身，總係佢還係無淨浰到該日臨暗仔。</verse>
				<verse number="6"></verse>
				<verse number="7">麼人憑到發遺漏症个人，麼人就一定愛洗淨衫褲、洗身，總係佢還係無淨浰到該日臨暗仔。</verse>
				<verse number="8">淨浰个人若係被發遺漏症个人呸到口潾，這人一定愛洗淨衫褲、洗身，總係佢還係無淨浰到該日臨暗仔。</verse>
				<verse number="9">發遺漏症个人騎過个馬鞍抑係坐過个位仔全部係無淨浰个。</verse>
				<verse number="10">麼人憑到佢坐過个東西，麼人就無淨浰到該日臨暗仔。麼人將這兜東西拿起來，這人一定愛洗淨衫褲、洗身，總係佢還係無淨浰到該日臨暗仔。</verse>
				<verse number="11">發遺漏症个人無洗手以前摸到麼人，麼人就一定愛洗淨衫褲、洗身，總係佢還係無淨浰到該日臨暗仔。</verse>
				<verse number="12">發遺漏症个人摸過个缶仔一定愛㧹爛，樹仔做个一定愛用水洗淨。</verse>
				<verse number="13">發遺漏症个人病症好掉以後，佢一定愛等七日，然後愛洗淨衫褲，用流動个水洗身，恁樣佢正算淨浰。</verse>
				<verse number="14">第八日，佢愛帶兩隻月鴿仔抑係兩隻班鳩到上主个聖帳篷門口，交給祭司。</verse>
				<verse number="15">祭司愛將其中一隻做贖罪祭來獻，將另外一隻做燒化祭來獻。祭司愛用這種方法在上主面前為這個人行潔淨禮 。</verse>
				<verse number="16">人若有漏精，佢一定愛洗全身，總係佢還係無淨浰到該日臨暗仔。</verse>
				<verse number="17">被精水膏到衫褲抑係皮做个東西，一定愛洗淨，總係這兜東西還係無淨浰到該日臨暗仔。</verse>
				<verse number="18">男女交合以後一定愛洗身，總係佢等還係無淨浰到該日臨暗仔。</verse>
				<verse number="19">女人在月經期間，七日無淨浰。憑到姖个人也無淨浰到該日臨暗仔。</verse>
				<verse number="20">姖在經期內睡過抑係坐過个東西全部無淨浰。</verse>
				<verse number="21">憑到姖个眠床抑係坐姖坐過个東西个人一定愛洗淨衫褲、洗身，總係佢還係無淨浰到該日臨暗仔。</verse>
				<verse number="22"></verse>
				<verse number="23"></verse>
				<verse number="24">男人若㧯經期內个女人交合，佢就遰到該女人个無淨浰，愛無淨浰七日；佢睡个眠床也係無淨浰个。</verse>
				<verse number="25">女人在經期以外流血多日，抑係經期無順繼續緊流血，在流血期間㧯在經期內共樣，姖係無淨浰个。</verse>
				<verse number="26">在這流血期間㧯在經期內共樣，姖睡過个眠床抑係坐過个東西，全部係無淨浰个。</verse>
				<verse number="27">憑到這兜東西个人就無淨浰；佢一定愛洗淨衫褲、洗身，總係佢還係無淨浰到該日臨暗仔。</verse>
				<verse number="28">女人个經血停止以後，一定愛等七日正算淨浰。</verse>
				<verse number="29">第八日，姖愛帶兩隻月鴿仔抑係兩隻班鳩到聖帳篷門口，交給祭司。</verse>
				<verse number="30">祭司愛將其中一隻做贖罪祭來獻，將另外一隻做燒化祭來獻。祭司愛用這種方法在上主面前為姖行潔淨禮。</verse>
				<verse number="31">上主吩咐 摩西 愛用這種方法使 以色列 人莫犯無淨浰个條例，免得佢等打垃圾營中个聖帳篷。佢等打垃圾上主个聖帳篷一定會死。</verse>
				<verse number="32">以上个條例係有關男人發遺漏症抑係有漏精，恁樣來算無淨浰，</verse>
				<verse number="33">並女人在經期內流血，就係有關男人抑係女人發遺漏症，以及男人㧯無淨浰个女人交合等各種條例。</verse>
			</chapter>
			<chapter number="16">
				<verse number="1">亞倫 个兩個孻仔親近上主 ，死掉以後，上主就對 摩西 講：</verse>
				<verse number="2">「愛㧯若哥 亞倫 講，做毋得隨時隨意進入帳幔後背个至聖所、到約櫃頂贖罪个蓋仔面前，免得佢死掉；因為𠊎在贖罪个蓋仔頂對雲中顯現。」</verse>
				<verse number="3">接等，上主宣佈以下个指示。 亞倫 進入聖所，愛牽一隻細牛牯做贖罪祭，㧯一隻綿羊牯做燒化祭。</verse>
				<verse number="4">佢愛洗身，然後著好祭司禮服：著麻紗做个聖內衫㧯短褲，繫等麻紗做个腰帶，又戴麻紗做个帽仔。</verse>
				<verse number="5">以色列 會眾愛將獻祭个頭牲交給佢：兩隻山羊牯做贖罪祭，一隻綿羊牯做燒化祭。</verse>
				<verse number="6">亞倫 一定愛為自家㧯佢个家屬獻該隻牛牯做贖罪祭。</verse>
				<verse number="7">然後，佢愛牽該兩隻山羊牯到聖帳篷門口，放在上主面前，</verse>
				<verse number="8">為兩隻山羊牯抽籤，一籤寫「歸給上主」，另外一籤寫「歸給 阿撒瀉勒 」。</verse>
				<verse number="9">亞倫 愛將抽到「歸給上主」个山羊牯獻做贖罪祭，</verse>
				<verse number="10">將抽到「歸給 阿撒瀉勒 」个另外一隻山羊牯生生獻給上主，然後放到曠野去歸給 阿撒瀉勒 ，為人民贖罪。</verse>
				<verse number="11">亞倫 愛為自家㧯佢个家屬獻該隻牛牯做贖罪祭；佢將這牛牯㓾掉以後，</verse>
				<verse number="12">愛拿等香爐，對上主面前个祭壇頂裝滿火炭，並帶等兩揢香粉，進入帳幔後背个至聖所。</verse>
				<verse number="13">佢愛在上主面前燒香，使煙遮等約櫃頂贖罪个蓋仔，免得佢死掉。</verse>
				<verse number="14">佢愛拿兜牛牯个血，用手指搵血，拂在贖罪个蓋仔東片，又在贖罪个蓋仔頭前拂七擺。</verse>
				<verse number="15">接等，佢愛㓾山羊牯，為人民獻贖罪祭。佢愛將羊血帶入帳幔後背个至聖所，拂在贖罪个蓋仔頂㧯蓋仔頭前，就像佢拂牛血恁樣。</verse>
				<verse number="16">因為 以色列 人个無淨浰㧯所犯一切个罪，佢愛用這種方法為至聖所行潔淨禮 ；佢也愛為聖帳篷行潔淨禮，因為聖帳篷在營个中間，營在禮儀上係無淨浰个。</verse>
				<verse number="17">對 亞倫 進入至聖所行潔淨禮到佢出來个這站時間，聖帳篷底背做毋得有人。佢愛為自家、厥家屬、㧯 以色列 全會眾行贖罪禮。</verse>
				<verse number="18">然後佢愛出來，愛到上主面前个祭壇獻燒化祭，潔淨祭壇。佢愛拿兜牛牯个血㧯山羊牯个血，膏在祭壇个四隻角。</verse>
				<verse number="19">佢一定愛用手指搵血，在祭壇頂拂七擺。佢愛用這種方法，除掉 以色列 人个污穢，潔淨祭壇，使它成做聖潔。</verse>
				<verse number="20">亞倫 為至聖所、聖帳篷、㧯祭壇行潔淨禮以後，就愛將「歸給 阿撒瀉勒 」該隻生个山羊牯牽過來。</verse>
				<verse number="21">佢愛將雙手放在羊个頭那頂，承認 以色列 人一切个罪惡㧯過犯，將這兜罪全部歸到羊个頭頂，然後派一儕將這隻羊送到曠野去。</verse>
				<verse number="22">這隻羊就愛擔當佢等一切个罪，全部帶到無人住个地方去；該儕人就愛將羊留在曠野。</verse>
				<verse number="23">然後， 亞倫 愛進入聖帳篷底背，將佢入至聖所个時所著个祭司禮服脫下來，放在該位。</verse>
				<verse number="24">佢愛在聖个所在洗身，著好便服，然後出來為自家㧯人民个罪獻燒化祭。</verse>
				<verse number="25">佢愛在祭壇頂燒牲儀个油做贖罪祭。</verse>
				<verse number="26">該將山羊牯送到曠野「歸給 阿撒瀉勒 」个人，佢一定愛先洗淨衫褲也愛洗身正做得轉到營肚。</verse>
				<verse number="27">愛將贖罪祭个牛牯㧯山羊牯帶到營外燒；皮、肉、腸全部愛燒掉。牠兜个血已經帶入至聖所贖罪了。</verse>
				<verse number="28">該燒頭牲个人一定愛先洗淨衫褲也愛洗身正做得轉到營肚。</verse>
				<verse number="29">以色列 人愛永遠遵守以下个條例。逐年七月初十， 以色列 人㧯暫時住在佢等當中个旅客一定愛禁食、刻苦自家，做毋得做事。</verse>
				<verse number="30">在這一日，愛為佢等行贖罪禮，潔淨佢等，使佢等在上主面前淨浰，除掉佢等所有个罪。</verse>
				<verse number="31">這係至聖个安息日；佢等一定愛禁食、刻苦自家，做毋得做事。這係永遠个條例。</verse>
				<verse number="32">該照法設立、承接阿爸執行祭司職務个大祭司愛行贖罪禮。佢愛著好祭司禮服，</verse>
				<verse number="33">為至聖所、聖帳篷，㧯祭壇舉行潔淨禮，也為其他个祭司㧯全部會眾舉行贖罪禮。</verse>
				<verse number="34">這個條例一定愛永遠遵守。這贖罪禮逐年一定愛舉行一擺，為 以色列 人除掉所有个罪。 摩西 就遵照上主个命令去做 。</verse>
			</chapter>
			<chapter number="17">
				<verse number="1">上主吩咐 摩西</verse>
				<verse number="2">向 亞倫 㧯佢該兜孻仔，並 以色列 全部人民宣佈以下个條例。</verse>
				<verse number="3">以色列 人愛在上主个聖帳篷門口㓾牛牯、綿羊、山羊牯獻給上主做牲儀；若係隨便在營肚抑係營外別个地方㓾頭牲，</verse>
				<verse number="4">流血个罪就係歸到該人身上。佢既然使血流出，就一定愛對上主个子民中除名。</verse>
				<verse number="5">這個條例主要个目的係愛 以色列 人將頭牲帶來獻給上主。以前佢等在野外㓾頭牲，這下愛將頭牲帶到聖帳篷門口來交給祭司做平安祭獻給上主。</verse>
				<verse number="6">祭司愛將頭牲个血洒在聖帳篷門口、上主个祭壇四周圍，將油燒掉，發出上主所歡喜个香味。</verse>
				<verse number="7">以色列 人絕對做毋得再悖逆上主，在野外㓾頭牲獻給山羊鬼。 以色列 人一定愛世世代代遵行這條例。</verse>
				<verse number="8">以色列 人㧯暫時住在佢等當中个旅客，愛在聖帳篷門口獻燒化祭抑係其他牲儀給上主；</verse>
				<verse number="9">若係隨便在別个地方獻祭，就一定愛對上主个子民中除名。</verse>
				<verse number="10">若係有 以色列 人抑係暫時住在佢等當中个旅客，無論食麼介血，上主愛對該食血个人變面，愛將佢對自家个子民中除掉。</verse>
				<verse number="11">因為動物个生命在血底背，所以上主將血賜給你等，愛在祭壇頂為你等个生命贖罪；因為血底背有生命，所以能贖罪。</verse>
				<verse number="12">所以，上主禁止 以色列 人㧯暫時住在佢等當中个旅客食血。</verse>
				<verse number="13">若係有 以色列 人抑係暫時住在佢等當中个旅客打獵得到淨浰个野獸抑係鳥仔，一定愛將牠个血放掉，將血用泥埋掉。</verse>
				<verse number="14">各種動物个生命在血底背，所以上主禁止 以色列 人食所有動物个血；麼人食動物个血，麼人就愛對上主个子民中除名。</verse>
				<verse number="15">麼人食到自然死掉个動物抑係被野獸咬死个動物，無論係 以色列 人抑係暫住个旅客，一定愛先洗淨衫褲，洗身，等到該日臨暗仔以後正算淨浰。</verse>
				<verse number="16">若係佢毋洗淨衫褲，也毋洗身，佢一定愛擔當自家个罪。</verse>
			</chapter>
			<chapter number="18">
				<verse number="1">上主吩咐 摩西</verse>
				<verse number="2">㧯 以色列 人講：「𠊎係上主 — 你等个上帝。</verse>
				<verse number="3">你等住過 埃及 ，總係你等做毋得學該地方个風俗。𠊎愛𢱋你等入 迦南 地，總係你等也做毋得學該地方个風俗。做毋得跈佢等个壞規矩。</verse>
				<verse number="4">你等愛遵守𠊎个法律，實行𠊎个命令。𠊎係上主 — 你等个上帝。</verse>
				<verse number="5">你等愛遵守𠊎个法律㧯命令；恁樣，你等就能得到生命。𠊎係上主。</verse>
				<verse number="6">「無論麼人全部做毋得㧯骨肉之親亂倫。𠊎係上主。</verse>
				<verse number="7">「做毋得㧯自家个阿姆亂倫，羞辱阿爸；做毋得侮辱自家个阿姆。</verse>
				<verse number="8">「做毋得㧯阿爸其他个𡜵娘亂倫，羞辱阿爸。</verse>
				<verse number="9">「做毋得㧯自家个親姊妹、無共阿姆抑係無共阿爸个姊妹亂倫；不管姖係毋係從細㧯你在屋下共下生活到大。</verse>
				<verse number="10">「做毋得㧯自家个孫女抑係外孫女亂倫，這係羞辱你自家。</verse>
				<verse number="11">「做毋得㧯無共阿姆个姊妹亂倫，因為姖也係你个姊妹。</verse>
				<verse number="12">「做毋得㧯自家个阿姑</verse>
				<verse number="13">抑係阿姨亂倫。</verse>
				<verse number="14">「做毋得㧯自家个伯姆抑係叔姆亂倫，羞辱阿伯抑係阿叔。</verse>
				<verse number="15">做毋得㧯自家个心舅亂倫，姖係若孻仔个𡜵娘。</verse>
				<verse number="16">做毋得㧯自家个阿嫂抑係老弟心舅亂倫，羞辱若兄弟。</verse>
				<verse number="17">「識㧯你有性關係該婦人家，你做毋得㧯厥妹仔、孫女抑係外孫女有性關係；姖等係厥骨肉之親，恁樣做係盡積惡。</verse>
				<verse number="18">「若𡜵娘還在，做毋得討厥姊妹㧯姖做對頭，羞辱姖。</verse>
				<verse number="19">「做毋得㧯經期內个女人有性關係，因為姖係無淨浰个。</verse>
				<verse number="20">「做毋得㧯別人个𡜵娘私通，羞辱你自家。</verse>
				<verse number="21">「做毋得將自家个子女準做祭物燒獻給邪神 摩洛 ，因為恁樣係侮辱你个上帝。𠊎係上主。</verse>
				<verse number="22">「男人做毋得㧯男人有性關係，像㧯女人有性關係一樣；這係積惡个事。</verse>
				<verse number="23">「無論男女全部做毋得㧯獸類有性關係；因為這係違背天性个行為，係羞辱自家。</verse>
				<verse number="24">「你等做毋得犯以上所列个所有行為來羞辱自家，因為𠊎愛對你等面前逐走个該兜外族人，就係因為做這兜事來羞辱自家。</verse>
				<verse number="25">佢等个敗壞打垃圾該土地，所以𠊎責罰該土地，使土地呸出它个住民。</verse>
				<verse number="26">佢等做這一切積惡个事，打垃圾土地，</verse>
				<verse number="27">總係你等做毋得犯共樣个罪。你等無論係 以色列 人抑係暫住个旅客，一定愛遵行𠊎个法律㧯命令，</verse>
				<verse number="28">免得你等打垃圾該土地，該地就將你等呸出去，像呸出在你等以前个各民族一樣。</verse>
				<verse number="29">「無論麼人做這兜積惡个事，麼人就愛對自家个子民中除名。</verse>
				<verse number="30">你等愛順從𠊎所宣佈个命令；做毋得學在你等以前住个人个壞風俗，免得你等做積惡个事來羞辱自家。𠊎係上主 — 你等个上帝。」</verse>
			</chapter>
			<chapter number="19">
				<verse number="1">上主吩咐 摩西</verse>
				<verse number="2">向 以色列 全會眾宣佈：「你等愛聖潔，因為𠊎 — 上主、你等个上帝係聖潔个。</verse>
				<verse number="3">「你等逐儕一定愛遵守𠊎个誡命，孝順父母，守安息日。𠊎係上主 — 你等个上帝。</verse>
				<verse number="4">「你等做毋得離開𠊎去拜偶像；也做毋得為自家鑄造偶像。𠊎係上主 — 你等个上帝。</verse>
				<verse number="5">「你等㓾頭牲做平安祭獻給𠊎 — 上主个時，愛照𠊎頒佈給你等个條例，𠊎就會接受你等个牲儀。</verse>
				<verse number="6">祭肉愛在奉獻个當日抑係第二日食掉。到第三日，祭肉若係還有賸，愛用火燒掉，</verse>
				<verse number="7">因為這係無淨浰个。若有人拿去食，𠊎就毋接受所獻个牲儀。</verse>
				<verse number="8">食个人就有罪，因為佢褻瀆獻給𠊎个聖物；佢一定會對𠊎个子民中除名。</verse>
				<verse number="9">「你等收割个時，毋好將田角割淨淨，也毋好去拈跌下來个榖串。</verse>
				<verse number="10">做毋得將葡萄園个葡萄摘淨淨，也做毋得拈跌下來个葡萄；愛將這兜留給窮苦人㧯暫住个旅客。𠊎係上主 — 你等个上帝。</verse>
				<verse number="11">「做毋得做賊；做毋得欺騙；做毋得講花撩。</verse>
				<verse number="12">做毋得指等𠊎个名發假誓，侮辱𠊎个名。𠊎係上主 — 你等个上帝。</verse>
				<verse number="13">「做毋得剝削鄰舍，也做毋得搶佢个東西。愛付給工人个工錢做毋得拖，就算一暗晡也做毋得。</verse>
				<verse number="14">「做毋得咒罵耳聾个，也做毋得阻礙瞙目个路，使佢跌倒。你等愛敬畏𠊎；𠊎係上主 — 你等个上帝。</verse>
				<verse number="15">「你等審判个時節，做毋得無公當；做毋得偏心對待窮苦人，也做毋得巴結有權勢个人。愛用公正對待同胞。</verse>
				<verse number="16">做毋得到處去搬弄是非；做毋得害鄰舍个生命。𠊎係上主。</verse>
				<verse number="17">「做毋得心肚怨恨兄弟；同胞有毋著，你愛坦白指責佢，免得你因為佢來擔到罪。</verse>
				<verse number="18">做毋得報仇；也做毋得怪怨本國个同胞。愛惜鄰舍，就像惜自家一樣。𠊎係上主。</verse>
				<verse number="19">「你等愛遵守𠊎个誡命。 「做毋得使無共類个頭牲配種。做毋得在一坵田委兩樣種。做毋得著兩種原料刺成个衫褲。</verse>
				<verse number="20">「已經㧯別人有婚約个奴婢，還吂被人贖轉去、還吂自由个時，若係有人㧯姖有性關係，該人愛受處罰 ；總係毋好將兩儕處死，因為該時奴婢還吂得到自由。</verse>
				<verse number="21">該人愛牽一隻綿羊牯到聖帳篷門口做贖過失祭獻給上主。</verse>
				<verse number="22">祭司愛用該隻羊在上主面前代佢行贖罪禮，上主正會赦免佢所犯个罪。</verse>
				<verse number="23">「你等進入 迦南 地以後，無論種㖠種果子樹，頭三年个果子愛看做受禁止个，你等做毋得食。</verse>
				<verse number="24">第四年打个果子愛全部奉獻給上主做聖物，表示你等對𠊎个感恩。</verse>
				<verse number="25">到第五年，你等就做得食該樹頂个果子。你等恁樣做，果子樹就會結出過較多个果子。𠊎係上主 — 你等个上帝。</verse>
				<verse number="26">「你等做毋得食帶血个肉。 「做毋得卜卦，也做毋得算命。</verse>
				<verse number="27">「做毋得剃掉頭那周圍个頭那毛，也做毋得將鬍鬚个周圍剃掉。</verse>
				<verse number="28">為死人哀傷个時，做毋得紋身，抑係割自家个身體。𠊎係上主。</verse>
				<verse number="29">「你等做毋得俾自家个妹仔受侮辱去做神廟娼妓。若係恁樣做，你等會轉向別个神明，使你等住个地方充滿淫亂。</verse>
				<verse number="30">「你等愛守𠊎个安息日，尊重𠊎个聖所。𠊎係上主。</verse>
				<verse number="31">「你等做毋得去交鬼，也做毋得去問行邪術个；若係求問佢等，你等就變做無淨浰。𠊎係上主 — 你等个上帝。</verse>
				<verse number="32">「你等愛尊敬老人家，在白頭那毛个人面前恭敬企等。你等愛敬畏𠊎；𠊎係上主 — 你等个上帝。</verse>
				<verse number="33">「你等做毋得欺負暫時住在你等當中个旅客。</verse>
				<verse number="34">款待佢等愛像款待 以色列 同胞恁樣，惜佢等愛像惜自家共樣。愛記得你等識在 埃及 暫住過。𠊎係上主 — 你等个上帝。</verse>
				<verse number="35">「做毋得用無公平个尺、斗、秤欺騙人；</verse>
				<verse number="36">愛用公平个秤、尺、斗。 「𠊎係上主 — 你等个上帝；𠊎對 埃及 將你等𢱋出來。</verse>
				<verse number="37">你等愛遵守𠊎一切个法律，實行𠊎一切个條例。𠊎係上主。」</verse>
			</chapter>
			<chapter number="20">
				<verse number="1">上主吩咐 摩西</verse>
				<verse number="2">向 以色列 人宣佈：「你等當中，無論 以色列 人抑係暫住个旅客，若係有人將自家个子女獻給邪神 摩洛 ，一定愛判死刑；人民愛用石頭㧹死佢。</verse>
				<verse number="3">𠊎愛對該人變面，將佢對𠊎个子民中除掉；因為佢將自家个子女獻給 摩洛 ，打垃圾𠊎个聖所，侮辱𠊎个聖名。</verse>
				<verse number="4">假使該人將自家个子女獻給 摩洛 ，總係人民詐意無看到，毋將佢處死，</verse>
				<verse number="5">𠊎愛親自對付佢㧯佢个全家；𠊎也愛對付該兜㧯佢共下背叛𠊎去拜 摩洛 个人。𠊎愛對𠊎个子民中將佢等除掉。</verse>
				<verse number="6">「若係有人去交鬼抑係去問行邪術个，跈佢等背叛𠊎，𠊎愛對付佢，對𠊎个子民中將佢除掉。</verse>
				<verse number="7">所以，你等愛將自家分別為聖，成做聖潔，因為𠊎係上主 — 你等个上帝。</verse>
				<verse number="8">你等愛謹守實行𠊎个法律，因為𠊎係使你等成做聖潔个上主。</verse>
				<verse number="9">「無論麼人咒罵父母，一定愛判死刑；佢係罪有應得个。</verse>
				<verse number="10">「若有人㧯鄰舍个𡜵娘私通，姦夫㧯淫婦全部愛判死刑。</verse>
				<verse number="11">若有人㧯厥爸个𡜵娘私通，羞辱厥爸，兩儕全部愛判死刑；佢等係罪有應得个。</verse>
				<verse number="12">若有人㧯心舅私通，兩儕全部愛判死刑；佢等亂倫，係罪有應得个。</verse>
				<verse number="13">若有男人㧯男人有性關係，佢等係做積惡个事，兩儕一定愛判死刑；佢等係罪有應得个。</verse>
				<verse number="14">若有人討𡜵娘，又㧯丈人𡟓私通，三儕攏總愛用火燒死，來使你等當中个污穢燒淨淨。</verse>
				<verse number="15">若有男人㧯獸類有性關係，男人一定愛判死刑，你等也愛㓾死該獸類。</verse>
				<verse number="16">若有女人親近獸類、㧯獸類有性關係，一定愛將女人㧯獸類㓾死；佢等係罪有應得个。</verse>
				<verse number="17">「若有人討自家親姊妹，無論係無共阿姆抑係無共阿爸个姊妹，彼此有性關係，佢等一定愛公開受侮辱，被人逐出佢等个社區。佢㧯自家个姊妹有亂倫个關係，一定愛擔當佢个罪孽。</verse>
				<verse number="18">若有人㧯經期內个女人有性關係，一定愛將兩儕逐出社區，因為佢等犯到有關無淨浰个條例。</verse>
				<verse number="19">「做毋得㧯阿姑抑係阿姨有性關係，這係犯亂倫个罪；兩儕一定會擔當自家个罪孽。</verse>
				<verse number="20">若有人㧯伯姆抑係叔姆有亂倫个關係，就係侮辱阿伯、阿叔；兩儕愛擔當自家个罪，到死會無子女。</verse>
				<verse number="21">若有人討阿嫂抑係老弟心舅，就係侮辱自家个兄弟，這係無淨浰个事；兩儕到死會無子女。</verse>
				<verse number="22">「你等愛遵守𠊎一切个法律，實行𠊎一切个條例，恁樣，𠊎愛𢱋你等入去个 迦南 地就毋會將你等呸出去。</verse>
				<verse number="23">你等做毋得學該地先前住民个風俗習慣；因為佢等做這一切个事，𠊎盡惱佢等，愛將佢等逐走，俾你等入去。</verse>
				<verse number="24">𠊎識應許，你等愛承受佢等个土地；𠊎愛將該垤流乳㧯蜜个土地賜給你等做產業。𠊎係上主 — 你等个上帝；𠊎將你等㧯列國分開。</verse>
				<verse number="25">所以，你等一定愛分別淨浰㧯無淨浰个飛鳥走獸。你等做毋得食無淨浰个獸類㧯鳥仔；𠊎已經宣佈牠兜係無淨浰个，拿來食會使你等無淨浰。</verse>
				<verse number="26">你等愛聖潔，愛歸屬𠊎；因為𠊎係上主，係聖潔个。𠊎將你等㧯列國分開，愛使你等做𠊎个子民。</verse>
				<verse number="27">「所有交鬼抑係算命个男女一定愛判死刑；人民愛用石頭㧹死佢等。這種人係罪有應得个。」</verse>
			</chapter>
			<chapter number="21">
				<verse number="1">上主吩咐 摩西 愛㧯做祭司个，就係 亞倫 个子孫講：</verse>
				<verse number="2">「除了參加自家个爺𡟓、子女、兄弟，</verse>
				<verse number="3">抑係吂出嫁个親姊妹个葬禮外，祭司做毋得參加宗族个葬禮來打垃圾自家。</verse>
				<verse number="4">佢也做毋得參加姻親个葬禮 來打垃圾自家。</verse>
				<verse number="5">「祭司做毋得剃光頭，做毋得剃掉鬍鬚个周圍，也做毋得割自家个身體來表示哀傷。</verse>
				<verse number="6">佢一定愛聖潔，愛歸屬上帝，做毋得侮辱上帝个聖名；因為佢向𠊎 — 上主獻火祭，就係給上帝个食物，所以佢一定愛聖潔。</verse>
				<verse number="7">祭司做毋得㧯妓女、毋係人家女，抑係離婚个婦人家結婚，因為佢係分別為聖歸給上帝个。</verse>
				<verse number="8">人民一定愛看祭司做聖潔个，因為佢向上帝獻食物做祭。𠊎係上主；𠊎係聖潔个；𠊎使𠊎个子民成做聖潔。</verse>
				<verse number="9">若有祭司个妹仔去做妓女、打垃圾自家，姖係侮辱自家个阿爸，一定愛用火燒死姖。</verse>
				<verse number="10">「在兄弟中做大祭司、頭那被聖油膏過、又接受聖職、著祭司聖服，做毋得在哀傷期間頭那毛襛襛，抑係扯爛衫褲。</verse>
				<verse number="11">佢做毋得離開聖所，進入喪家；就算係自家个爺𡟓死掉也做毋得，免得侮辱自家㧯𠊎个聖所，因為佢已經奉獻給𠊎 — 上主了。</verse>
				<verse number="12"></verse>
				<verse number="13">佢一定愛討人家女做𡜵娘，</verse>
				<verse number="14">做毋得㧯寡婦、離婚个婦人家，抑係妓女結婚，單淨做得㧯本族个人家女結婚；</verse>
				<verse number="15">恁樣，佢毋會使自家个子女成做無淨浰个。𠊎係上主；𠊎使佢成做聖潔 。」</verse>
				<verse number="16">上主吩咐 摩西 去㧯 亞倫 講：</verse>
				<verse number="17">「你个後代中，所有身體有缺點个人做毋得向上帝獻食物做祭；這係世世代代應該遵守个條例。</verse>
				<verse number="18">若係身體有缺點个，無論係瞙目个、瘸腳个、五官無正个、畸形个、</verse>
				<verse number="19">手腳破相个、</verse>
				<verse number="20">痀背个、矮細个、目珠有毛病个、有皮膚病个，抑係閹掉个人，全部做毋得向𠊎獻祭。</verse>
				<verse number="21">祭司 亞倫 个後代，所有身體有缺點个，全部做毋得向𠊎獻火祭，因為有缺點个人做毋得向上帝獻食物做祭。</verse>
				<verse number="22">恁樣个人做得食獻給上帝个食物，無論聖个抑係至聖个全部做得食。</verse>
				<verse number="23">總係，因為佢个身體有缺點，佢做毋得接近至聖所頭前个帳幔，也做毋得接近祭壇。佢做毋得打垃圾𠊎聖所中个聖物。𠊎係使這兜東西分別為聖个上主。」</verse>
				<verse number="24">以上係 摩西 對 亞倫 、佢該兜孻仔、並 以色列 全人民講个話。</verse>
			</chapter>
			<chapter number="22">
				<verse number="1">上主吩咐 摩西</verse>
				<verse number="2">對 亞倫 㧯佢該兜孻仔講：「你等一定愛細膩處理 以色列 人獻給𠊎个聖物，免得你等侮辱𠊎个聖名。𠊎係上主。</verse>
				<verse number="3">你等个後代中，若有人在禮儀上無淨浰个時，還接近 以色列 人獻給𠊎个聖物，佢做毋得再過在𠊎个祭壇事奉𠊎。你等个後代愛永遠遵守這條例。𠊎係上主。</verse>
				<verse number="4">「 亞倫 个後代中，所有發癩抑係發遺漏症个人，一定愛等到淨浰後，正做得食神聖个牲儀。祭司若係憑到該因為接觸屍體抑係接觸漏精症个人無淨浰个東西，</verse>
				<verse number="5">抑係摸到其他無淨浰个動物抑係人，就無淨浰。</verse>
				<verse number="6">祭司無淨浰以後一直到該日臨暗仔全部無淨浰。佢一定愛洗身，正做得食神聖个牲儀。</verse>
				<verse number="7">日頭落山以後，佢就淨浰，做得食神聖个牲儀，因為該就係佢个食物。</verse>
				<verse number="8">佢做毋得食自然死掉抑係被野獸咬死个動物，免得打垃圾自家。𠊎係上主。</verse>
				<verse number="9">「所有个祭司全部應該遵守𠊎所頒佈个例規；若無，佢等就有罪，一定會死，因為佢等褻瀆𠊎神聖个例規。𠊎係使佢等成做聖潔个上主。</verse>
				<verse number="10">「只有祭司屋下个人正做得食神聖个牲儀；其他个人全部做毋得食，就算住在祭司屋下个人客抑係請个工人也做毋得食。</verse>
				<verse number="11">總係祭司个奴僕，無論係用錢買个抑係在佢屋下出世个，全部做得食祭司分到个牲儀。</verse>
				<verse number="12">祭司个妹仔若嫁給毋係祭司个平民就做毋得食神聖个牲儀。</verse>
				<verse number="13">總係祭司个妹仔若成做寡婦抑係離婚，又無子女，姖轉到外家來住，就做得食阿爸做祭司所分到个食物。只有祭司屋下个人正做得食牲儀。</verse>
				<verse number="14">「若有一般人毋堵好食到神聖个祭物，佢愛照原來个價錢加五分之一賠給祭司。</verse>
				<verse number="15">祭司毋好俾一般个 以色列 人隨便食獻給上主神聖个牲儀來打垃圾牲儀；</verse>
				<verse number="16">恁樣會害該兜人犯罪，受責罰。𠊎係使佢等成做聖潔个上主。」</verse>
				<verse number="17">上主吩咐 摩西</verse>
				<verse number="18">向 亞倫 、佢該兜孻仔，並 以色列 全人民講：「 以色列 人抑係暫時住在 以色列 个旅客，所有獻燒化祭給上主个，無論係還願抑係甘心奉獻个，</verse>
				<verse number="19">一定愛獻無缺點个牛牯、綿羊牯，抑係山羊牯正會得到接納。</verse>
				<verse number="20">你等若獻有缺點个頭牲，上主毋會接納。</verse>
				<verse number="21">無論麼人，為到還願抑係甘心獻平安祭給上主，一定愛獻無缺點个牛抑係羊，正會得到接納。</verse>
				<verse number="22">做毋得將瞙目个、跛腳个、破相个、皮肉有傷、腫，抑係發癬个頭牲獻給上主。做毋得獻這種頭牲在祭壇頂做火祭給上主。</verse>
				<verse number="23">你等做得獻發育毋好抑係畸形个牛抑係細綿羊做甘心祭，總係這種頭牲做毋得做還願祭。</verse>
				<verse number="24">做毋得將卵損傷、磧碎、裂掉，抑係割掉个頭牲獻給上主。在你等个地上做毋得有這種事。</verse>
				<verse number="25">以上个頭牲，你等也做毋得對外族人拿來做獻給上帝个食物。這兜頭牲算係有損傷、有缺點个，毋會得到上主接納。」</verse>
				<verse number="26">上主吩咐 摩西 講：</verse>
				<verse number="27">「正出世个細牛牯、細綿羊，抑係細山羊，在七日內做毋得使牠㧯牛乸抑係羊乸分開。第八日以後，牠就做得當做火祭獻給上主。</verse>
				<verse number="28">做毋得在共日將牛乸㧯細牛、綿羊乸㧯細綿羊、山羊乸㧯細山羊㓾來獻祭。</verse>
				<verse number="29">「獻感謝祭給上主个時，愛照條例獻正會得到接納。</verse>
				<verse number="30">你等愛在該日將祭肉食掉，連一垤做毋得留到第二朝晨。𠊎係上主。</verse>
				<verse number="31">「你等愛謹守實行𠊎个誡命；𠊎係上主。</verse>
				<verse number="32">你等做毋得侮辱𠊎个聖名； 以色列 人一定愛尊敬𠊎做聖潔个。𠊎係使你等成做聖潔个上主；</verse>
				<verse number="33">𠊎識𢱋你等出 埃及 ，愛做你等个上帝。𠊎係上主。」</verse>
			</chapter>
			<chapter number="23">
				<verse number="1">上主吩咐 摩西</verse>
				<verse number="2">向 以色列 人講：「以下係𠊎 — 上主所定个節期；在節期內，你等愛宣佈舉行聖會，來敬拜上主。</verse>
				<verse number="3">「一禮拜你等有六日好做事，總係第七日係神聖个安息日，你等一定愛歇睏。這日，你等麼介事就毋好做，愛聚集敬拜。無論你等住在㖠位，安息日係上主个。</verse>
				<verse number="4">「以下係上主个節期，在這兜日仔當中你等愛宣佈舉行聖會。</verse>
				<verse number="5">每年正月十四，對臨暗仔開始就係上主个𨃟過節。</verse>
				<verse number="6">正月十五開始就係向上主守个除酵節；七日內，你等愛食無酵餅。</verse>
				<verse number="7">這節期个第一日，你等愛聚集敬拜上主，日常一切个工作都毋好做。</verse>
				<verse number="8">在這七日內逐日愛向上主獻火祭。第七日，你等愛再聚集敬拜上主，日常一切个工作都毋好做。」</verse>
				<verse number="9">上主吩咐 摩西</verse>
				<verse number="10">向 以色列 人講：「進入𠊎 — 上主所賜給你等个土地以後，逐擺收割，你等愛拿最先收割个一捆五榖到祭司該位；</verse>
				<verse number="11">佢愛將這一捆在上主面前搖幾下，使你等得到上主个接納。祭司愛在安息日个第二日將這綑搖幾下。</verse>
				<verse number="12">搖這綑五榖該日，你等愛將一隻無缺點一歲大个綿羊牯獻給上主做燒化祭；</verse>
				<verse number="13">同時愛獻兩公斤攪橄欖油个幼麵粉做素祭，將它燒獻做清香个禮物獻給上主，也愛獻一公升个祭酒。</verse>
				<verse number="14">新收成个五榖，無論係生个、焙熟个，抑係焙做餅个，愛等到你等向上帝獻祭物後正做得食。你等个後代，無論住在㖠位，愛永遠遵守這條例。</verse>
				<verse number="15">「愛對安息日个第二日，就係你等獻一捆五榖做搖祭給上主該日算起，你等愛算滿七禮拜。</verse>
				<verse number="16">到第五十日，就係第七個安息日个第二日，你等愛將新收成个五榖做素祭獻給上主。</verse>
				<verse number="17">逐家愛帶來兩垤餅，獻給上主做搖祭。逐垤餅愛用兩公斤幼麵粉加發粉來焙，做新收成个祭物獻給上主。</verse>
				<verse number="18">除了餅，你等愛獻七隻一歲大、無缺點个綿羊牯、一隻細牛牯，㧯兩隻綿羊牯。這兜頭牲愛㧯素祭㧯祭酒共下做燒化祭獻給上主。牲儀个香氣係上主所歡喜个。</verse>
				<verse number="19">你等也愛獻一隻山羊牯做贖罪祭，兩隻一歲大个綿羊牯做平安祭。</verse>
				<verse number="20">祭司愛將餅㧯兩隻綿羊牯做搖祭，在上主面前搖幾下，然後歸給該兜祭司；這兜祭物係聖个。</verse>
				<verse number="21">該日，你等愛聚集敬拜上主，日常一切个工作都毋好做。你等个後代，無論住在㖠位，愛永遠遵守這條例。</verse>
				<verse number="22">「收割个時，你等做毋得割田堘个五榖，也做毋得回頭拈跌下个榖串；愛將這兜留給窮苦人㧯暫住个旅客。𠊎係上主 — 你等个上帝。」</verse>
				<verse number="23">上主吩咐 摩西</verse>
				<verse number="24">向 以色列 人講：「你等逐年愛守七月初一做特別个安息日；愛歕羊角做紀念，大家聚集來敬拜上主。</verse>
				<verse number="25">你等日常一切个工作都毋好做；愛向上主獻火祭。」</verse>
				<verse number="26">上主對 摩西 講：</verse>
				<verse number="27">「逐年七月初十係贖罪日。該日，你等愛禁食、刻苦自家，愛聚集敬拜上主，向佢獻火祭。</verse>
				<verse number="28">該日，麼介事都毋好做，因為係贖罪日，愛在上主 — 你等个上帝面前行贖罪禮。</verse>
				<verse number="29">無論麼人，若在該日無禁食、無刻苦自家，就愛對上帝个子民中除掉。</verse>
				<verse number="30">無論麼人，若在該日做麼介事，𠊎 — 上主愛親自對子民中將佢除掉。</verse>
				<verse number="31">你等麼介事都毋好做。你等个後代，無論住在㖠位，愛永遠遵守這條例。</verse>
				<verse number="32">對七月初九个臨暗仔到第二日臨暗仔，你等愛守這日做特別个安息日，愛在這站期間禁食、刻苦自家。」</verse>
				<verse number="33">上主吩咐 摩西</verse>
				<verse number="34">向 以色列 人講：「七月十五係搭寮仔節，愛連等七日向上主守這節。</verse>
				<verse number="35">搭寮仔節个頭一日，你等愛聚集敬拜上主，日常一切个工作都毋好做。</verse>
				<verse number="36">在七日內，你等愛逐日向上主獻火祭；第八日，愛再聚集敬拜上主，向佢獻火祭。這係嚴肅个集會，你等日常一切个工作都毋好做。</verse>
				<verse number="37">(「以上所列个日仔係上主所定个節期。你等愛聚集敬拜上主，逐日按照條例向佢獻火祭、燒化祭、素祭、頭牲祭㧯祭酒。</verse>
				<verse number="38">除了上主所定个安息日，你等還愛守這兜節期；除了照常个牲儀、還願祭、㧯甘心祭，你等還愛向上主獻這兜牲儀。)</verse>
				<verse number="39">「收割完成以後，你等愛對七月十五開始守上主个節期七日。第一日係特別个安息日；第八日也係特別个安息日。</verse>
				<verse number="40">第一日，你等愛拿果樹所結盡好个果子、棕樹枝、茂盛个樹枝、㧯柳樹桍，在上主 — 你等个上帝面前歡喜慶祝七日。</verse>
				<verse number="41">逐年七月，你等愛向上主慶祝這節期七日。你等愛世世代代遵守這條例。</verse>
				<verse number="42">所有 以色列 人全部愛在寮仔底背住七日，</verse>
				<verse number="43">使你等个後代知𠊎𢱋 以色列 人出 埃及 以後，識使佢等住在寮仔底背。𠊎係上主 — 你等个上帝。」</verse>
				<verse number="44">恁樣， 摩西 就向 以色列 人宣佈上主所定个節期个條例。</verse>
			</chapter>
			<chapter number="24">
				<verse number="1">上主吩咐 摩西 ：</verse>
				<verse number="2">「愛命令 以色列 人將盡純个橄欖油帶來，做聖帳篷底背燈臺个油料，好俾燈臺个燈常常𤏸等。</verse>
				<verse number="3">逐暗晡， 亞倫 愛在放約櫃个至聖所頭前、該帳幔外點燈火，使這燈對臨暗仔到天光在上主面前𤏸等。這條例係佢个子孫愛世世代代遵守个。</verse>
				<verse number="4">亞倫 愛負責該純金燈臺頂高个燈火，使它在上主面前常常𤏸等。</verse>
				<verse number="5">「你愛用二十四公斤幼麵粉焙十二垤餅，</verse>
				<verse number="6">然後將餅擺在上主面前純金个桌頂；餅愛擺做兩行，一行六垤。</verse>
				<verse number="7">你愛在逐行餅頂高委兜純乳香，代表將餅當做獻給上主个火祭。</verse>
				<verse number="8">逐個安息日， 亞倫 一定愛將餅擺在上主面前，永遠做毋得停。這係 以色列 人永久愛遵守个約。</verse>
				<verse number="9">這餅愛歸給 亞倫 㧯佢个後代。佢等愛在聖个所在食這餅；因為這係獻給上主个火祭中至聖个部份，係屬祭司个。」</verse>
				<verse number="10">有一個人，厥爸係 埃及 人，阿姆係 以色列 中 但 支族人 底伯利 个妹仔、名安到 示羅密 。有一日，這個人在營肚㧯一個 以色列 人冤家。在爭吵當中，佢咒詛上主个聖名，佢等就帶佢到 摩西 該位，</verse>
				<verse number="11"></verse>
				<verse number="12">將佢關起來，等上主指示愛樣般刑罰佢。</verse>
				<verse number="13">上主㧯 摩西 講：</verse>
				<verse number="14">「將該個人帶到營外。所有聽到佢咒詛个人，全部愛將手放在佢个頭那頂，證明佢有罪，然後全會眾愛用石頭㧹死佢。</verse>
				<verse number="15">接等，你愛㧯 以色列 人講：所有咒詛上帝个人愛㧡自家个罪。</verse>
				<verse number="16">所有褻瀆上主名个人一定愛處死刑；全會眾愛用石頭將佢㧹死。無論係 以色列 人抑係暫住个旅客，若係佢咒詛上主个名，一定愛處死刑。</verse>
				<verse number="17">「㓾人个，定著愛處死刑；</verse>
				<verse number="18">㓾別人頭牲个，一定愛賠頭牲，係用命賠命。</verse>
				<verse number="19">「人若傷害別人，愛照佢樣般對待別人來對待佢：</verse>
				<verse number="20">骨頭賠骨頭；目珠賠目珠；牙齒賠牙齒。佢樣般傷害別人，也愛受共樣个傷害。</verse>
				<verse number="21">㓾別人頭牲个，一定愛賠頭牲；總係㓾死人个，一定愛處死刑。</verse>
				<verse number="22">無論係 以色列 人抑係暫住个旅客，全部共樣愛守這法律。𠊎係上主 — 你等个上帝。」</verse>
				<verse number="23">摩西 對 以色列 人講煞這兜話，佢等就帶該人到營外，用石頭將佢㧹死。恁樣， 以色列 人就照上主給 摩西 个命令去做。</verse>
			</chapter>
			<chapter number="25">
				<verse number="1">上主在 西奈 山對 摩西 講話，</verse>
				<verse number="2">吩咐佢對 以色列 人宣佈以下个條例：「你等進入𠊎 — 上主賜給你等个土地以後，逐擺堵到第七年愛休耕，表示對上主个尊敬。</verse>
				<verse number="3">六年內，你等愛耕田，也愛修剪葡萄園，收藏土產。</verse>
				<verse number="4">總係第七年愛俾土地完全歇睏；這年係獻給上主个。你等做毋得耕種田園，也做毋得修剪葡萄園。</verse>
				<verse number="5">連田肚自然生个五榖做毋得收割；園肚無修剪也打个葡萄共樣做毋得摘。這年，土地愛完全休耕。</verse>
				<verse number="6">這一年，土地雖然休耕，還係會有出產好給你等㧯你等个奴僕、奴婢、雇工、並暫時住在你等當中个旅客來食；</verse>
				<verse number="7">這兜出產，連你等个頭牲㧯田野个走獸也會有好食。土地自然出產个，你等全部做得食。</verse>
				<verse number="8">「你等愛計算七個安息年，就係七個七年，一共四十九年。</verse>
				<verse number="9">該年七月初十，就係贖罪日，你等愛派人到全國各地歕羊角。</verse>
				<verse number="10">你等愛用恁樣來將第五十年分別出來，向全部人民宣佈這年係自由年。這年愛成做你等个禧年；所有買賣个產業愛還給原主抑係原主个後代；賣給人做奴僕个，全部愛放佢等轉自家个屋下。</verse>
				<verse number="11">第五十年愛成做你等个禧年。你等做毋得耕種，做毋得收割田肚自然生个五榖，也做毋得摘園肚無修剪也打个葡萄。</verse>
				<verse number="12">這年係禧年，係你等个聖年；你等正做得食土地自然出產个土產。</verse>
				<verse number="13">「這禧年，所有買賣个財產愛還給原主。</verse>
				<verse number="14">所以，你等㧯 以色列 同胞買賣土地个時，愛公當。</verse>
				<verse number="15">土地个價錢愛根據對買賣个時到下一擺禧年當中土地做得收成个年數來決定；</verse>
				<verse number="16">年數多，價錢就高，年數少，價錢就低；因為這係照有幾多擺做得收成來賣个。</verse>
				<verse number="17">你等做毋得梟 以色列 同胞；愛敬畏你等个上帝，因為𠊎係上主 — 你等个上帝。</verse>
				<verse number="18">「你等愛實行𠊎个法律，愛遵守𠊎个誡命，好俾你等在這土地安居樂業。</verse>
				<verse number="19">土地會出產五榖，罅你等食；你等會安居樂業。</verse>
				<verse number="20">「你等當中可能有人會問：第七年休耕，無收成，愛食麼介呢？</verse>
				<verse number="21">𠊎 — 上主愛賜福給你等，使土地在第六年出產罅三年食个糧食。</verse>
				<verse number="22">第八年，你等愛耕種，總係你等還係愛食存糧，直到第九年收成个時。</verse>
				<verse number="23">「你等做毋得將土地永久賣斷，因為土地係𠊎个；你等係像暫住个旅客，做得使用土地定定。</verse>
				<verse number="24">買賣土地个時，你等一定愛承認原主有贖轉土地个權利。</verse>
				<verse number="25">「若係你有同胞因為當苦，高不將賣掉土地，後來佢个至親應該將這土地贖轉來。</verse>
				<verse number="26">該無親戚好將土地贖轉去个人，後來可能經濟好轉，有罅錢好將土地贖轉去，</verse>
				<verse number="27">在這種情形下，佢一定愛算使用个年數，將贖轉个時到下一擺禧年這站還賸个年數照價值還給買主，恁樣佢就做得贖轉佢承接个土地。</verse>
				<verse number="28">佢若係無罅錢買轉土地，土地還係歸買主使用到下一擺禧年。到該年，土地就愛歸還原主。</verse>
				<verse number="29">「若有人將城肚个屋仔賣掉，佢有權在一年內將屋仔贖轉來。</verse>
				<verse number="30">若係佢在該年內無贖轉，佢就失掉贖轉个權利，屋仔愛歸買主㧯佢个後代做永久个產業；在禧年，屋仔也毋使歸還原主。</verse>
				<verse number="31">總係，在城外个屋仔愛照鄉下田地个條例處理，原主有權贖轉去；到禧年，屋仔愛歸還原主。</verse>
				<verse number="32">總係 利未 人做得隨時贖轉在 利未 城底背个屋仔。</verse>
				<verse number="33">利未 人若係賣掉 利未 城肚个屋仔又無贖轉去，到禧年，屋仔愛歸還佢；因為 利未 人在 利未 城肚个屋仔係佢等在 以色列 人中永久个產業。</verse>
				<verse number="34">總係 利未 城周圍个牧場做毋得賣；該係佢等永久个產業。</verse>
				<verse number="35">「若係你有同胞苦到無法度維持生活，你一定愛照顧佢，就像照顧外族人㧯暫住个旅客恁樣，俾佢繼續住在你該位。</verse>
				<verse number="36">你做毋得拿佢个利息；愛敬畏你个上帝，俾你个同胞繼續住在你該位。</verse>
				<verse number="37">你借錢給佢，做毋得拿利息，借糧食給佢，也做毋得愛佢還較多。</verse>
				<verse number="38">𠊎係上主 — 你等个上帝，𠊎識𢱋你等出 埃及 ，愛將 迦南 地賜給你等，也愛做你等个上帝。</verse>
				<verse number="39">「若係你有同胞苦到賣身給你做僕人，你做毋得款待佢像奴才。</verse>
				<verse number="40">愛款待佢像請个工人抑係暫住个旅客共樣，佢愛服事你到禧年。</verse>
				<verse number="41">到禧年，佢㧯佢个子女全部愛離開你，轉到佢自家个家族，到佢祖先个土地去。</verse>
				<verse number="42">以色列 人係𠊎个僕人。𠊎對 埃及 將佢等𢱋出來；佢等做毋得再賣給人做奴才。</verse>
				<verse number="43">你做毋得壞款待佢等，愛敬畏你个上帝。</verse>
				<verse number="44">你若需要奴僕抑係奴婢，做得去四周圍个國買外國人。</verse>
				<verse number="45">你等也做得買該兜暫時住在你等當中个旅客个子女㧯佢等在你等土地上出世个家屬。這兜人做得做你等个產業；</verse>
				<verse number="46">你等做得將佢等留給子孫做產業，使佢等一生人服事你等个子孫。總係你等做毋得壞款待 以色列 同胞。</verse>
				<verse number="47">「若有暫時住在你等當中个旅客經濟越來越好，總係 以色列 同胞緊來緊苦，最後卻將自家賣給該暫住个旅客抑係佢个家族，</verse>
				<verse number="48">賣身以後，佢還有權利好贖身。佢个兄弟、</verse>
				<verse number="49">叔伯、堂兄弟，抑係其他宗親全部做得為佢贖身。若係佢有罅錢，也做得將自家贖轉來。</verse>
				<verse number="50">佢愛㧯佢个買主約定贖價。佢等愛對佢賣身做奴僕該年算起，算到禧年，愛照請工人逐年个工錢約定贖價，</verse>
				<verse number="51">佢一定愛照還賸幾多年來算、來納贖價。</verse>
				<verse number="52"></verse>
				<verse number="53">買主愛款待佢像做長年个工人恁樣，做毋得壞款待佢。</verse>
				<verse number="54">若係佢無辦法照這兜方法被人贖轉來，到禧年，佢㧯佢个子女全部愛得到釋放，恢復自由。</verse>
				<verse number="55">因為 以色列 人係𠊎个僕人；𠊎𢱋佢等出 埃及 。𠊎係上主 — 你等个上帝。」</verse>
			</chapter>
			<chapter number="26">
				<verse number="1">上主講：「你等做毋得做偶像；你等做毋得設立神像抑係石柱，也做毋得在你等个地上放雕刻个石頭來做敬拜个對象。𠊎係上主 — 你等个上帝。</verse>
				<verse number="2">你等愛守𠊎个安息日，尊重𠊎个聖所。𠊎係上主。</verse>
				<verse number="3">「你等若係實行𠊎个法律，遵守𠊎个誡命，</verse>
				<verse number="4">𠊎愛照時落水給你等，使土地出產五榖，果樹打果子。</verse>
				<verse number="5">你等會有五榖，一直收到葡萄熟个時；你等个葡萄會摘到委種个時。你等會有充足个糧食，會在自家个土地上安居樂業。</verse>
				<verse number="6">「𠊎愛使你等个土地太平；你等做得一覺睡到天光，毋會被人嚇倒。𠊎愛將兇惡个野獸對你等个土地收掉；戰爭也毋會打到你等个土地。</verse>
				<verse number="7">你等會追擊敵人，用刀劍打贏佢等。</verse>
				<verse number="8">你等五個人會追擊一百人，你等一百人會追擊一萬人；敵人全部會死在你等个刀劍之下。</verse>
				<verse number="9">𠊎愛賜福給你等，使你等多子多孫。𠊎愛堅定㧯你等所立个約。</verse>
				<verse number="10">你等會有盡多个糧食，歸年無欠，甚至愛豁掉舊糧來囤新糧。</verse>
				<verse number="11">𠊎愛在𠊎个聖帳篷底背㧯你等共下住，絕對毋會離開你等。</verse>
				<verse number="12">𠊎愛行在你等當中，做你等个上帝；你等愛做𠊎个子民。</verse>
				<verse number="13">𠊎係上主 — 你等个上帝。𠊎識𢱋你等出 埃及 ，使你等無再做 埃及 人个奴才。𠊎識打碎你等个軛，使你等做得行路有風。」</verse>
				<verse number="14">上主講：「你等若毋聽從𠊎，毋遵行這一切个誡命，你等會受到責罰。</verse>
				<verse number="15">你等若豁掉𠊎个法律㧯條例，毋遵行𠊎一切个誡命，違背㧯𠊎立个約，</verse>
				<verse number="16">𠊎會責罰你等。𠊎會降災禍給你等，使你等著驚、發絕症、發熱病、目珠花花、全無元氣。你等會委種，總係有功打無勞，因為你等所種个會被敵人食淨淨。</verse>
				<verse number="17">𠊎會對你等變面，你等就會被仇敵打敗。恨你等个人會來統治你等，嚇到你等毋使人逐也會走到無愛命。</verse>
				<verse number="18">「你等若係經過這兜災難還毋聽從𠊎，因為你等个罪，𠊎給你等个刑罰就會加七倍。</verse>
				<verse number="19">𠊎會打碎你等个硬頸㧯驕傲；𠊎會使天頂像鐵毋會落水，使你等个土地燥到像銅恁硬。</verse>
				<verse number="20">無論你等樣般煞猛也會空空，因為土地毋會生產，果樹毋會打果子。</verse>
				<verse number="21">「你等若係繼續㧯𠊎作對，還毋聽從𠊎，因為你等个罪，𠊎給你等个災禍會再加七倍。</verse>
				<verse number="22">𠊎會放兇惡个野獸到你等當中；牠兜會搶食你等个子女，吞掉你等个頭牲，使你等人數減少，道路荒涼。</verse>
				<verse number="23">「經過這兜刑罰以後，你等若還係毋接受𠊎个管教，繼續㧯𠊎作對，</verse>
				<verse number="24">𠊎就會㧯你等作對；因為你等个罪，𠊎會再加七倍打擊你等。</verse>
				<verse number="25">𠊎會用戰爭責罰你等背約个罪。你等若係聚集在城肚，𠊎會使你等發瘟；𠊎也會將你等交在敵人个手中。</verse>
				<verse number="26">𠊎會切斷你等个糧食，使到十個婦人家共用一隻灶頭焙餅就罅。姖等所配給个餅會盡少，你等雖然有東西食，總係食毋飽。</verse>
				<verse number="27">「經過這兜刑罰以後，你等若還係毋聽從𠊎，繼續㧯𠊎作對，</verse>
				<verse number="28">𠊎就會大發譴對付你等；因為你等个罪，𠊎會再加七倍責罰你等。</verse>
				<verse number="29">你等會餓到食自家子女个肉。</verse>
				<verse number="30">𠊎會拆掉你等山頂个神廟，斬橫你等个香壇，將你等个身屍㧒在橫掉个偶像頂高。𠊎个心會當惱你等。</verse>
				<verse number="31">𠊎會使你等个城市變做荒埔；𠊎會廢掉你等敬拜个地方，拒絕你等清香个牲儀。</verse>
				<verse number="32">𠊎會使你等个土地完全荒廢，連佔領這土地个敵人看到也會著驚！</verse>
				<verse number="33">𠊎會將你等分散到外國去；𠊎也會擎劍逐你等。你等个土地會荒廢，你等个城市變做荒埔。</verse>
				<verse number="34">恁樣，土地就會正經有好歇睏，享受你等住在該位个時毋肯俾它个安息年。在你等流亡到外國以後，土地會因為荒廢來得到安息。</verse>
				<verse number="35"></verse>
				<verse number="36">「𠊎會使流亡在敵人國內个人非常著驚，連風吹落葉个聲音也會使你等驚到逃走。你等會像在戰場被人逐到緊走，無人逐也會緊跌倒。</verse>
				<verse number="37">無人逐也會相撞；你等毋會有力量好抵抗敵人。</verse>
				<verse number="38">你等會在流亡中死掉，被敵人个土地吞掉。</verse>
				<verse number="39">你等賸到个人會因為自家㧯祖先个罪，在敵人土地上消滅。</verse>
				<verse number="40">「總係，你等个後代會承認自家个罪過，也會承認祖先个罪過，因為佢等悖逆𠊎，㧯𠊎作對，</verse>
				<verse number="41">惹𠊎來對付佢等，將佢等逐到敵人个土地。總係你等个後代最後會有謙卑个心，為自家个罪㧯悖逆來接受刑罰。</verse>
				<verse number="42">該時，𠊎會想起𠊎㧯 雅各 所立个約，㧯 以撒 所立个約，㧯 亞伯拉罕 所立个約；𠊎也會紀念這土地。</verse>
				<verse number="43">總係，一定愛先將這土地个人民逐走，俾土地好享受安息年；這兜人民因為豁掉𠊎个法律，違背𠊎个誡命，一定愛接受應該有个刑罰。</verse>
				<verse number="44">雖然恁樣，佢等還在敵人土地上个時，𠊎一定毋會完全㧒掉佢等，抑係毀滅佢等，也毋會廢掉𠊎㧯佢等所立个約。𠊎係上主 — 佢等个上帝。</verse>
				<verse number="45">𠊎愛㧯佢等重新立𠊎㧯佢等祖先立過个約。𠊎識向列國顯明𠊎个大能，對 埃及 將𠊎个子民𢱋出來，使𠊎做佢等个上帝。𠊎係上主。」</verse>
				<verse number="46">以上个法律、條例㧯誡命係上主在 西奈 山交給 摩西 、愛佢向 以色列 人宣佈个。</verse>
			</chapter>
			<chapter number="27">
				<verse number="1">上主吩咐 摩西</verse>
				<verse number="2">向 以色列 人宣佈以下个條例。「有人向上主還特別許个願个時，愛照以下个規定來納錢。</verse>
				<verse number="3">照聖所規定个標準： 大人，對二十歲到六十歲： 男人付五十隻銀幣，</verse>
				<verse number="4">女人付三十隻銀幣。</verse>
				<verse number="5">後生人，對五歲到二十歲： 細孻仔付二十隻銀幣， 細妹仔付十隻銀幣。</verse>
				<verse number="6">細人仔，對一隻月到五歲： 細阿哥仔付五隻銀幣， 細阿妹仔付三隻銀幣。</verse>
				<verse number="7">老人家，六十歲以上： 男人付十五隻銀幣， 女人付十隻銀幣。</verse>
				<verse number="8">「還願个人若係因為窮苦無法度照所定个標準還清，就愛帶佢到祭司該位，祭司愛照佢納得起个能力另外規定價錢。</verse>
				<verse number="9">「若係所許个願係有關獻給上主做牲儀个頭牲，這種禮物愛歸上主做聖物。</verse>
				<verse number="10">許願个人做毋得用其他頭牲交換，好个換壞个抑係壞个換好个；若係有交換个，兩隻頭牲全部愛歸給上主。</verse>
				<verse number="11">若係所許个願係有關無淨浰个動物，就係該做毋得獻給上主做牲儀个，許願个人就愛將頭牲牽到祭司該位。</verse>
				<verse number="12">祭司愛照頭牲个好壞估價，佢講幾多就幾多。</verse>
				<verse number="13">若係佢愛將頭牲贖轉來，一定愛照所估个價錢，加五分之一。</verse>
				<verse number="14">「人獻屋仔給上主个時，祭司就愛照屋仔个好壞估價，佢講幾多就幾多。</verse>
				<verse number="15">奉獻个人若係愛將該間屋仔贖轉來，一定愛付出原來个價錢，加五分之一，屋仔正歸給佢。</verse>
				<verse number="16">「若係有人將所承接个一部份土地獻給上主，祭司就愛照該土地委種个量來估價，做得委一百公斤大麥種个土地價值係五十隻銀幣。</verse>
				<verse number="17">佢若係在禧年奉獻个，就愛照價錢納清。</verse>
				<verse number="18">佢若係在禧年以後奉獻个，祭司愛對該時到下一個禧年所賸个年數、所估个價錢來減掉。</verse>
				<verse number="19">該人若愛將土地贖轉來，一定愛照所估價个數目加五分之一，土地正歸還佢。</verse>
				<verse number="20">若係佢毋先對上主將該土地贖轉來，就將土地轉賣給別人，佢就失掉將該土地贖轉來个權利。</verse>
				<verse number="21">到下一個禧年，該土地愛成做上主永久个產業，歸屬祭司。</verse>
				<verse number="22">「若係有人將買來个土地 (毋係承接个土地) 獻給上主，</verse>
				<verse number="23">祭司就愛對該時到下一個禧年所賸个年數來估價；該人一定愛當日就將價錢納給上主。</verse>
				<verse number="24">到禧年，該土地愛還原主抑係佢个後代。</verse>
				<verse number="25">「所有个價錢全部愛照聖所規定个標準。</verse>
				<verse number="26">「頭胎个頭牲，無論係牛抑係羊，已經歸屬上主，所以人做毋得再拿牠來做甘心个祭物來獻，因為這係上主个。</verse>
				<verse number="27">若係該頭胎係無淨浰个，佢做得照原來个價錢加五分之一贖轉來；若係毋贖轉來，做得照規定个價錢賣給別人。</verse>
				<verse number="28">「該永遠獻給上主个，無論係人、頭牲，抑係承接个土地，全部做毋得賣給別人，也做毋得贖轉來，愛永遠歸屬上主。</verse>
				<verse number="29">應當滅掉个人全部做毋得贖轉來，一定愛處死刑。</verse>
				<verse number="30">「土地所出產个，無論係五榖抑係果子，十分之一係上主个；愛分別為聖歸給上主。</verse>
				<verse number="31">若係有人想愛將這十分之一贖轉來，一定愛照規定个價錢再加付五分之一。</verse>
				<verse number="32">十隻頭牲，無論係牛抑係羊，對牧人个杖經過个時，第十隻係上主个。逐擺算到第十隻，該隻就係上主个。</verse>
				<verse number="33">主人做毋得拿別隻來換、將壞个換出來奉獻，也做毋得用別種个頭牲來換。若係佢用另外一隻來交換，兩隻全部係上主个，做毋得贖轉來。」</verse>
				<verse number="34">這兜誡命係上主在 西奈 山交給 摩西 向 以色列 人宣佈个。</verse>
			</chapter>
		</book>
		<book number="4">
			<chapter number="1">
				<verse number="1">以色列 人離開 埃及 後个第二年二月初一，上主在 西奈 曠野，在佢个聖帳篷底背對 摩西 講：</verse>
				<verse number="2">「你㧯 亞倫 愛調查 以色列 全會眾个人口，愛一宗族一宗族、一家族一家族調查，將二十歲以上會相㓾个男人一儕一儕，照佢等个軍隊列出名單來。</verse>
				<verse number="3">你等愛對逐支族尋一個族長來幫助你等。」</verse>
				<verse number="4">以下係逐支族為這項工作所選出來个領袖： 呂便支族 — 示丟珥个孻仔以利蓿； 西緬支族 — 蘇利沙代个孻仔示路蜜； 猶大支族 — 亞米拿達个孻仔拿順； 以薩迦支族 — 蘇押个孻仔拿坦業； 西布倫支族 — 希倫个孻仔以利押； 約瑟个子孫兩個支族： 以法蓮支族 — 亞米忽个孻仔以利沙瑪； 瑪拿西支族 — 比大蓿个孻仔迦瑪列； 便雅憫支族 — 基多尼个孻仔亞比但； 但支族 — 亞米沙代个孻仔亞希以謝； 亞設支族 — 俄蘭个孻仔帕結； 迦得支族 — 丟珥个孻仔以利雅薩； 拿弗他利支族 — 以南个孻仔亞希拉。 以上个人係對會眾選出來个，逐儕做本支族个族長，全部係以色列軍隊个領袖。</verse>
				<verse number="5">摩西 㧯 亞倫 得到這十二儕个幫助，</verse>
				<verse number="6">就在二月初一聚集全會眾，照宗族、家族个順序登記全部人民。所有二十歲以上个男人一儕一儕全部登記下來算人數，</verse>
				<verse number="7">照上主所命令个。恁樣， 摩西 在 西奈 曠野登記全部人民。</verse>
				<verse number="8">二十歲以上會相㓾个男人，照宗族、家族个順序，一儕一儕全部登記下來算人數；以色列个長子呂便該一支族排頭前。逐支族个總人數記在下背： 呂便支族 — 四萬六千五百人； 西緬支族 — 五萬九千三百人； 迦得支族 — 四萬五千六百五十人； 猶大支族 — 七萬四千六百人； 以薩迦支族 — 五萬四千四百人； 西布倫支族 — 五萬七千四百人； 約瑟个子孫兩個支族： 以法蓮支族 — 四萬零五百人； 瑪拿西支族 — 三萬兩千兩百人； 便雅憫支族 — 三萬五千四百人； 但支族 — 六萬兩千七百人； 亞設支族 — 四萬一千五百人； 拿弗他利支族 — 五萬三千四百人。</verse>
				<verse number="9">以上个男人全部係摩西㧯亞倫並代表以色列十二支族个族長登記下來个。 45以色列全會眾二十歲以上會相㓾个男人，全部係照家族登記下來算人數个。 46總共人數就係六十萬三千五百五十人。</verse>
				<verse number="10">利未人無㧯其他支族共下登記，</verse>
				<verse number="11">因為上主識對摩西講：</verse>
				<verse number="12">「你調查會相㓾个人數个時，毋好包含利未支族。</verse>
				<verse number="13">你愛派利未人管理約櫃个聖帳篷㧯其中个用品；佢等愛搬運這兜東西，在聖帳篷底背事奉。佢等个帳篷愛搭在聖帳篷个四周圍。</verse>
				<verse number="14">你等逐擺徙營个時，利未人愛拆下聖帳篷，在新个營地重新搭起來。所有其他个人若係接近聖帳篷，一定愛處死刑。</verse>
				<verse number="15">「其他个以色列人愛安營，逐儕在佢所屬个大旗下，照軍隊來安排。</verse>
				<verse number="16">總係利未人愛在約櫃个聖帳篷个四周圍安營守衛，免得有人行近聖帳篷，惹𠊎責罰以色列會眾。」</verse>
				<verse number="17">所有上主命令摩西个話，以色列人就照恁樣去做。</verse>
			</chapter>
			<chapter number="2">
				<verse number="1">上主指示 摩西 㧯 亞倫 ：</verse>
				<verse number="2">以色列 人安營个時，逐儕愛在所屬个大旗下，照自家宗族个大旗，面對聖帳篷、在聖帳篷四周圍安營。</verse>
				<verse number="3">東片係 猶大 區：該兜在 猶大 大旗下个人愛照所屬个軍隊，用逐族領袖个帳篷做中心來安營。 猶大 支族：領袖 — 亞米拿達 个孻仔 拿順 ，人數七萬四千六百人。 以薩迦 支族：領袖 — 蘇押 个孻仔 拿坦業 ，人數五萬四千四百人。 西布倫 支族：領袖 — 希倫 个孻仔 以利押 ，人數五萬七千四百人。 猶大 區个總人數係十八萬六千四百人。 猶大 總隊愛帶頭出發。</verse>
				<verse number="4"></verse>
				<verse number="5"></verse>
				<verse number="6"></verse>
				<verse number="7"></verse>
				<verse number="8"></verse>
				<verse number="9"></verse>
				<verse number="10">南片係 呂便 區：該兜在 呂便 大旗下个人愛照所屬个軍隊，用逐族領袖个帳篷做中心來安營。 呂便 支族：領袖 — 示丟珥 个孻仔 以利蓿 ，人數四萬六千五百人。 西緬 支族：領袖 — 蘇利沙代 个孻仔 示路蜜 ，人數五萬九千三百人。 迦得 支族：領袖 — 丟珥 个孻仔 以利雅薩 ，人數四萬五千六百五十人。 呂便 區个總人數係十五萬一千四百五十人。 呂便 總隊愛跈 猶大 總隊个後背出發。</verse>
				<verse number="11"></verse>
				<verse number="12"></verse>
				<verse number="13"></verse>
				<verse number="14"></verse>
				<verse number="15"></verse>
				<verse number="16"></verse>
				<verse number="17">然後，在前兩個㧯後兩個總隊中間， 利未 人愛扛等聖帳篷行。逐個總隊愛照安營个順序，在逐隊大旗下个固定位仔向前行。</verse>
				<verse number="18">西片係 以法蓮 區：該兜在 以法蓮 大旗下个人愛照所屬个軍隊，用逐族領袖个帳篷做中心來安營。 以法蓮 支族：領袖 — 亞米忽 个孻仔 以利沙瑪 ，人數四萬零五百人。 瑪拿西 支族：領袖 — 比大蓿 个孻仔 迦瑪列 ，人數三萬兩千兩百人。 便雅憫 支族：領袖 — 基多尼 个孻仔 亞比但 ，人數三萬五千四百人。 以法蓮 區个總人數係十萬八千一百人。 以法蓮 總隊愛跈 呂便 總隊㧯 利未 人个後背出發。</verse>
				<verse number="19"></verse>
				<verse number="20"></verse>
				<verse number="21"></verse>
				<verse number="22"></verse>
				<verse number="23"></verse>
				<verse number="24"></verse>
				<verse number="25">北片係 但 區：該兜在 但 大旗下个人愛照所屬个軍隊，用逐族領袖个帳篷做中心來安營。 但 支族：領袖 — 亞米沙代 个孻仔 亞希以謝 ，人數六萬兩千七百人。 亞設 支族：領袖 — 俄蘭 个孻仔 帕結 ，人數四萬一千五百人。 拿弗他利 支族：領袖 — 以南 个孻仔 亞希拉 ，人數五萬三千四百人。 但 區个總人數係十五萬七千六百人。 但 總隊愛跈在最尾出發。</verse>
				<verse number="26"></verse>
				<verse number="27"></verse>
				<verse number="28"></verse>
				<verse number="29"></verse>
				<verse number="30"></verse>
				<verse number="31"></verse>
				<verse number="32">照逐區，一隊一隊登記个 以色列 總人數有六十萬三千五百五十人。</verse>
				<verse number="33">照上主命令 摩西 个， 利未 人無㧯其他个 以色列 人共下登記。</verse>
				<verse number="34">以色列 人全部照上主給 摩西 个命令去做，佢等在自家所屬个大旗下安營，也跈等本宗族向前行。</verse>
			</chapter>
			<chapter number="3">
				<verse number="1">上主在 西奈 山對 摩西 講話該時節， 亞倫 㧯 摩西 个後代有下背這兜人：</verse>
				<verse number="2">亞倫 有四個孻仔：長子 拿答 ，佢下來係 亞比戶 、 以利亞撒 、 以他瑪 。</verse>
				<verse number="3">佢等全部受膏油、受聖職做祭司。</verse>
				<verse number="4">總係 拿答 㧯 亞比戶 在 西奈 曠野向上主獻無合法个火个時，死在上主面前。佢等無孻仔，所以 以利亞撒 㧯 以他瑪 在 亞倫 還在个時就做祭司。</verse>
				<verse number="5">上主對 摩西 講：</verse>
				<verse number="6">「你愛𢱋 利未 支族前來，派佢等做 亞倫 祭司个僕人。</verse>
				<verse number="7">佢等愛辦理聖帳篷个事，代祭司㧯全會眾執行任務。</verse>
				<verse number="8">佢等愛管理聖帳篷所有个用品，代其他个 以色列 人執行任務，辦理聖帳篷个事。</verse>
				<verse number="9">利未 人係對 以色列 人中揀選出來个，佢等惟一个責任係服事 亞倫 㧯佢該兜孻仔。</verse>
				<verse number="10">你愛派 亞倫 㧯佢該兜孻仔負責祭司个職務。所有其他个人若係干涉這個職務 ，一定愛處死刑。」</verse>
				<verse number="11">上主又對 摩西 講：</verse>
				<verse number="12">「 利未 人這下愛歸屬𠊎。𠊎㓾死 埃及 人所有个頭胎該日，𠊎將 以色列 逐家个長子㧯逐隻頭牲个頭胎，全部分別為聖，歸給𠊎。總係，這下 利未 人愛代 以色列 長子个地位；佢等愛歸屬𠊎。𠊎係上主。」</verse>
				<verse number="13"></verse>
				<verse number="14">上主在 西奈 曠野命令 摩西 ，講：</verse>
				<verse number="15">「你愛照宗族㧯家族登記 利未 人，出世一個月以上个細孻仔全部登記下來。」</verse>
				<verse number="16">摩西 就照上主所命令个去登記。</verse>
				<verse number="17">利未 有三個孻仔： 革順 、 哥轄 、 米拉利 ； 佢等係 革順 族、 哥轄 族、 米拉利 族个祖先。</verse>
				<verse number="18">革順 有兩個孻仔： 立尼 㧯 示每 。</verse>
				<verse number="19">哥轄 有四個孻仔： 暗蘭 、 以斯哈 、 希伯倫 、 烏薛 。</verse>
				<verse number="20">米拉利 有兩個孻仔： 抹利 㧯 母示 。 這兜孻仔係對 利未 支族傳下來逐家族个祖先。</verse>
				<verse number="21">革順 宗族有 立尼 㧯 示每 兩個家族。</verse>
				<verse number="22">出世一個月以上个細孻仔登記个總人數係七千五百人。</verse>
				<verse number="23">這宗族愛在西片，在聖帳篷後背安營。</verse>
				<verse number="24">拉伊勒 个孻仔 以利雅薩 係這宗族个族長。</verse>
				<verse number="25">這宗族愛負責掌管聖帳篷，聖帳篷底背个篷頂㧯外層个頂蓋、門簾、</verse>
				<verse number="26">聖帳篷㧯祭壇周圍庭院个帳幔、庭院門个門簾、㧯索仔。佢等愛負責所有㧯這兜東西有關个事務。</verse>
				<verse number="27">哥轄 宗族有 暗蘭 、 以斯哈 、 希伯倫 㧯 烏薛 四個家族。</verse>
				<verse number="28">出世一個月以上个細孻仔登記个總人數係八千六百人。</verse>
				<verse number="29">這宗族愛在聖帳篷南片安營。</verse>
				<verse number="30">烏薛 个孻仔 以利撒反 係這宗族个族長。</verse>
				<verse number="31">佢等愛負責掌管約櫃、供桌、燈臺、兩座祭壇、祭司在聖所用个用品，以及到聖所門口个門簾。佢等愛負責所有㧯這兜東西有關个事務。</verse>
				<verse number="32">利未 人个總領袖係祭司 亞倫 个孻仔 以利亞撒 ；佢負責管理該兜在聖所執行任務个人。</verse>
				<verse number="33">米拉利 宗族有 抹利 㧯 母示 兩個家族。</verse>
				<verse number="34">出世一個月以上个細孻仔登記个總人數係六千兩百人。</verse>
				<verse number="35">這宗族愛在聖帳篷北片安營。 亞比亥 个孻仔 蘇列 係這宗族个族長。</verse>
				<verse number="36">這宗族派去負責掌管聖帳篷个骨架、橫杠、柱仔、柱座㧯這兜東西所有个附件。佢等愛負責所有㧯這兜東西有關个事務。</verse>
				<verse number="37">佢等也愛負責掌管庭院个柱仔、柱座、釘仔㧯索仔。</verse>
				<verse number="38">摩西 、 亞倫 㧯佢該兜孻仔愛在東片，在聖帳篷个頭前安營。佢等愛負責代 以色列 人執行聖所底背个事務。所有其他个人若係干涉這個職務 ，一定愛處死刑。</verse>
				<verse number="39">摩西 㧯 亞倫 遵照上主个命令，照宗族登記 利未 人，包含出世一個月以上个細孻仔，男人登記个總數係兩萬兩千人。</verse>
				<verse number="40">上主對 摩西 講：「 以色列 所有个長子全部愛歸給𠊎，所以愛照名仔登記逐個出世一個月以上个 以色列 人个長子。同時，𠊎宣佈 利未 人愛代佢等歸屬𠊎！𠊎係上主。𠊎也宣佈 利未 人个頭牲愛代所有頭胎个頭牲歸屬𠊎。」</verse>
				<verse number="41"></verse>
				<verse number="42">摩西 就照上主个命令，將 以色列 人所有出世一個月以上个長子全部登記下來，總數有兩萬兩千兩百七十三人。</verse>
				<verse number="43"></verse>
				<verse number="44">上主對 摩西 講：</verse>
				<verse number="45">「這下你愛將 利未 人奉獻給𠊎，來代 以色列 人所有个長子，也愛將 利未 人个頭牲奉獻給𠊎，來代 以色列 人頭胎个頭牲。 利未 人愛歸屬𠊎；𠊎係上主。</verse>
				<verse number="46">因為 以色列 人个長子比 利未 人多出兩百七十三人，你一定愛將這兜長子贖轉去。</verse>
				<verse number="47">照聖所規定个標準，逐儕愛納五隻銀幣。</verse>
				<verse number="48">你愛將這代贖錢給 亞倫 㧯佢該兜孻仔。」</verse>
				<verse number="49">摩西 就對 以色列 人个長子，係該兜被 利未 人贖轉去个人，拿代贖錢，一共一千三百六十五隻銀幣，</verse>
				<verse number="50"></verse>
				<verse number="51">照上主个命令將這代贖錢交給 亞倫 㧯佢該兜孻仔。</verse>
			</chapter>
			<chapter number="4">
				<verse number="1">上主吩咐 摩西 㧯 亞倫</verse>
				<verse number="2">照宗族、家族調查 利未 人 哥轄 宗族个人口，</verse>
				<verse number="3">將所有三十歲到五十歲中間、會在聖帳篷底背工作个男人全部登記下來。</verse>
				<verse number="4">上主指示 摩西 ， 哥轄 宗族在聖帳篷底背愛專門做㧯至聖物有關个工作。</verse>
				<verse number="5">在徙營个時， 亞倫 㧯佢該兜孻仔愛進入聖帳篷，將隔等約櫃个帳幔拿下來，揜在約櫃頂高。</verse>
				<verse number="6">佢等還愛用盡靚个皮料揜在頂高，再揜一垤純藍色个布仔，然後將槓仔穿過去。</verse>
				<verse number="7">佢等愛鋪一垤藍色个布仔在供餅个桌頂，再將盤仔、碗、敬神用个酒壺㧯酒杯全部放在頂高。桌頂愛時常排列供餅。</verse>
				<verse number="8">佢等還愛用一垤深紅色个布仔揜在這兜東西頂高，再揜一層盡靚个皮料，然後將槓仔穿過去。</verse>
				<verse number="9">佢等愛用藍色个布仔揜燈臺、燈、燈花剪刀、燈盤、㧯所有裝橄欖油个用品；</verse>
				<verse number="10">又愛用盡靚个皮料將這兜東西包起來，放在扛架頂高。</verse>
				<verse number="11">再來，佢等愛鋪一垤藍色个布仔在金香壇頂，並用盡靚个皮料揜等，然後將槓仔穿過去。</verse>
				<verse number="12">愛用藍布將所有聖所底背个用品包起來，並用盡靚个皮料揜等，放在扛架頂高。</verse>
				<verse number="13">愛將祭壇頂个灰收起來，用紫色个布仔揜在祭壇頂，</verse>
				<verse number="14">將所有祭壇个附件，就係火灰盤、肉叉、鏟仔㧯火鼎全部放在頂高，然後愛用盡靚个皮料揜在頂高，將槓仔穿過去。</verse>
				<verse number="15">徙營个時， 哥轄 宗族愛等 亞倫 㧯佢該兜孻仔將這兜聖物㧯所有个零件揜好以後，正來扛。 哥轄 宗族个人絕對做毋得摸到這兜聖物，若係摸到就會死。 徙聖帳篷个時， 哥轄 宗族愛負責扛這兜東西。</verse>
				<verse number="16">祭司 亞倫 个孻仔 以利亞撒 愛負責掌管歸隻聖帳篷，並燈油、香、素祭、聖油，㧯聖帳篷底背所有分別為聖歸給上主个東西。</verse>
				<verse number="17">上主對 摩西 㧯 亞倫 講：</verse>
				<verse number="18">「毋好俾 哥轄 宗族个人行近這兜至聖物，免得佢等死掉。</verse>
				<verse number="19">為到避免發生這種事， 亞倫 㧯佢該兜孻仔愛進入聖帳篷，分派佢等逐儕个工作，㧯佢等說明所愛扛个係麼介。</verse>
				<verse number="20">總係， 哥轄 人入聖帳篷，毋好去看到聖物，免得佢等會死。」</verse>
				<verse number="21">上主命令 摩西 ，</verse>
				<verse number="22">愛照宗族、家族調查 利未 人 革順 宗族个人口，</verse>
				<verse number="23">將所有三十歲到五十歲中間、會在聖帳篷底背工作个男人全部登記下來。</verse>
				<verse number="24">革順 宗族愛負責扛以下个東西：</verse>
				<verse number="25">聖帳篷內个篷頂㧯外層个頂蓋、揜在頂高盡靚个皮料、門簾、</verse>
				<verse number="26">聖帳篷㧯祭壇周圍庭院个帳幔㧯索仔、庭院大門个門簾，㧯這兜東西个附件全部放好勢。佢等愛管理所有㧯這兜東西有關个事務。</verse>
				<verse number="27">摩西 㧯 亞倫 愛監督 革順 宗族个人負責扛這兜東西，掌等佢等搬運 亞倫 㧯佢該兜孻仔派佢等搬運个物件。</verse>
				<verse number="28">這兜工作係 革順 宗族在聖帳篷底背應該做个事。佢等愛在祭司 亞倫 个孻仔 以他瑪 个指揮下背執行任務。</verse>
				<verse number="29">上主愛 摩西 照宗族、家族調查 利未 人 米拉利 宗族个人口，</verse>
				<verse number="30">將所有三十歲到五十歲中間、會在聖帳篷底背工作个男人全部登記下來。</verse>
				<verse number="31">佢等愛負責扛聖帳篷个骨架、橫杠、柱仔、基座，</verse>
				<verse number="32">㧯聖帳篷周圍庭院个柱仔、基座、釘仔、索仔，並這兜東西个零件。逐儕愛負責扛指定个東西。</verse>
				<verse number="33">這兜係 米拉利 宗族在聖帳篷底背應該做个事。佢等愛在祭司 亞倫 个孻仔 以他瑪 个指揮下背執行任務。</verse>
				<verse number="34">摩西、亞倫㧯會眾个領袖遵照上主个命令調查利未三隻宗族哥轄、革順、米拉利个人口。佢等照宗族、家族，將所有三十歲到五十歲中間、會在聖帳篷底背工作个男人全部登記下來： 哥轄宗族，兩千七百五十人； 革順宗族，兩千六百三十人； 米拉利宗族，三千兩百人； 總人數，八千五百八十人。</verse>
				<verse number="35">照上主給 摩西 个命令，逐儕全部登記了；遵照上主通過 摩西 所命令个，逐儕全部有指定个任務，有兜負責事奉，有兜負責扛。</verse>
			</chapter>
			<chapter number="5">
				<verse number="1">上主對 摩西 講：</verse>
				<verse number="2">「你愛命令 以色列 人，將該兜無淨浰个人 — 發癩个 、發遺漏症个、摸到屍體个人，全部逐出營地。</verse>
				<verse number="3">無論男女，愛將所有在禮儀上無淨浰个人逐出去，佢等就毋會打垃圾營地，就係𠊎所住个地方。」</verse>
				<verse number="4">以色列 人遵照命令，將恁樣个人全部逐到營外去。上主樣般吩咐 摩西 ， 以色列 人就恁樣做。</verse>
				<verse number="5">上主㧯 摩西 講，</verse>
				<verse number="6">愛 以色列 人遵行以下个指示：無論男女，若係有人違背上主、做壞事來得罪別人，佢就有罪；</verse>
				<verse number="7">佢一定愛承認自家个毋著，將所虧欠个全數還給佢所得罪个人，另外再加五分之一。</verse>
				<verse number="8">若係該人已經死掉，又無親戚好接受賠償，就愛將錢獻給上主，俾祭司使用。這係禮儀所規定贖罪祭个羊牯以外再加个一項賠償。</verse>
				<verse number="9">逐個 以色列 人給上主个特別奉獻全部愛歸給為佢等舉行奉獻禮个祭司。</verse>
				<verse number="10">帶到祭司面前个特別禮物全部愛歸給祭司。</verse>
				<verse number="11">上主命令 摩西 ，</verse>
				<verse number="12">愛將以下个指示㧯 以色列 人講。有人懷疑自家个𡜵娘無守貞節，㧯別个男人有性關係，羞辱到佢。</verse>
				<verse number="13">總係這老公無辦法確定這件事，因為厥𡜵娘毋承認，又無證人，也無當場捉到。</verse>
				<verse number="14">另外可能𡜵娘根本無對毋起老公，係老公心肝嫉妒、忒會懷疑姖。</verse>
				<verse number="15">無論係㖠種情形，這人一定愛將𡜵娘帶到祭司面前。佢同時愛帶為𡜵娘獻个祭物，就係一公斤个大麥粉。佢做毋得在頂高攪橄欖油抑係加乳香；因為這係疑心个老公所獻个素祭，係愛俾真相顯明个素祭。</verse>
				<verse number="16">祭司愛𢱋該婦人家行前來，企在上主个面前。</verse>
				<verse number="17">祭司愛倒一些仔聖水在碗肚，將聖帳篷地上个泥粉委兜仔在水底背，</verse>
				<verse number="18">然後將該婦人家个頭那毛鬆開，將愛獻个素祭 (就係思念个素祭、懷疑个素祭) 放在姖手中。祭司个手愛㨮等咒詛个苦水。</verse>
				<verse number="19">接等，祭司愛喊該婦人家發誓，同意祭司所講以下个話：「若係你無㧯人通姦，無違背老公做污穢个事，你就毋會受到這苦水所帶來个咒詛。</verse>
				<verse number="20">若係你識㧯人通姦，違背老公做污穢个事，</verse>
				<verse number="21">願上主使你个同胞咒詛你；願佢使你个肚笥脹起來，子宮跔掉。</verse>
				<verse number="22">願這水進入你个肚笥，使你个肚笥脹起來，你个子宮跔掉。」 該婦人家愛應講：「𠊎同意。願上主个旨意實現。」</verse>
				<verse number="23">然後，祭司愛將這咒詛寫下來，將寫下个字放在苦水碗肚洗掉。</verse>
				<verse number="24">在祭司還吂喊該婦人家啉這苦水以前， (這苦水可能會使姖非常痛苦，)</verse>
				<verse number="25">祭司愛將婦人家手中該懷疑个素祭拿過來，在上主面前搖幾下，拿到祭壇个頭前，</verse>
				<verse number="26">然後扡一揢麵粉做這事个紀念，在祭壇頂燒掉。最後，祭司愛將這水喊該婦人家啉落去。</verse>
				<verse number="27">若係姖確實㧯人通姦，違背老公做污穢个事，這帶來咒詛个水會使姖大痛苦，肚笥會脹起來，子宮跔掉。姖會被同胞咒詛。</verse>
				<verse number="28">若係該婦人家無罪，算係淨浰个，姖就毋會受到傷害，還係會生育。</verse>
				<verse number="29">這懷疑个法律係有關婦人家違背老公做污穢个事，</verse>
				<verse number="30">抑係老公嫉妒、懷疑𡜵娘無守貞節。該婦人家愛企在上主个面前，祭司愛執行這儀式。</verse>
				<verse number="31">老公就無罪。若係該婦人家有罪，姖一定愛自家擔當。</verse>
			</chapter>
			<chapter number="6">
				<verse number="1">上主命令 摩西</verse>
				<verse number="2">愛將以下个指示㧯 以色列 人講。無論男女，若係許願愛做離俗人 ，將自家獻給上主，</verse>
				<verse number="3">就愛禁止啉淡酒抑係釅酒。佢也做毋得啉葡萄做个飲料，做毋得食葡萄抑係葡萄乾。</verse>
				<verse number="4">做離俗人个期間，做毋得食葡萄樹所結个東西，連葡萄子、葡萄皮也做毋得食。</verse>
				<verse number="5">在佢許願做離俗人个期間，佢做毋得剃頭。佢獻給上主、分別為聖个期間，頭那毛由在它長。</verse>
				<verse number="6">佢个頭那毛係奉獻自家給上帝个記號。佢做毋得行近屍體，使自家無淨浰，就算係佢个阿爸、阿姆、兄弟、抑係姊妹，佢也做毋得行前。</verse>
				<verse number="7"></verse>
				<verse number="8">在佢做離俗人期間，佢係分別為聖歸給上主个。</verse>
				<verse number="9">若係離俗人身邊个人忽然死掉，打垃圾佢分別為聖个頭那毛，佢愛等七日，然後剃頭。恁樣，佢在禮儀上就淨浰了。</verse>
				<verse number="10">第八日，佢愛帶兩隻月鴿仔抑係兩隻班鳩，到聖帳篷門口，交給祭司。</verse>
				<verse number="11">祭司愛獻一隻做贖罪祭，一隻做燒化祭，為佢行贖罪禮，因為佢憑到屍體。該日，佢愛重新將頭那毛分別為聖，</verse>
				<verse number="12">再一擺將自家獻給上主，做離俗人；以前該站日仔就無算，因為佢該分別為聖个頭那毛變做無淨浰。佢愛牽一隻一歲大个細羊牯做贖過失祭。</verse>
				<verse number="13">到離俗人許願个日期滿，愛行以下个禮儀。佢愛到聖帳篷門口，</verse>
				<verse number="14">將無缺點个頭牲獻給上主：一隻一歲大个細羊牯做燒化祭，一隻一歲大个羊牸仔做贖罪祭，一隻綿羊牯做平安祭。</verse>
				<verse number="15">佢也愛獻一籃無酵餅：有幼麵粉攪橄欖油做个賁餅㧯頂高膏橄欖油个薄餅，又愛獻素祭㧯祭酒。</verse>
				<verse number="16">祭司愛將這兜東西奉獻給上主，為該人獻贖罪祭㧯燒化祭。</verse>
				<verse number="17">佢愛將該隻綿羊牯做平安祭獻給上主，同時獻該籃無酵餅，也愛獻素祭㧯祭酒。</verse>
				<verse number="18">離俗人愛在聖帳篷門口剃頭那毛，將頭那毛放在獻平安祭个火頂高燒掉。</verse>
				<verse number="19">然後，祭司愛將煮好个綿羊牯个一支前腿㧯籃仔肚个一垤無酵賁餅、一垤無酵薄餅放在離俗人个手中。</verse>
				<verse number="20">接等，祭司愛將這兜搖幾下做搖祭獻給上主；這兜係歸給祭司个聖物。法律所規定个胸脯肉㧯後腿也係歸給祭司个。這以後，離俗人就做得啉酒。</verse>
				<verse number="21">以上係離俗人應該遵守个條例。若係離俗人在所許个願以外講過愛獻別个祭給上主，就一定愛照所講過个去做。</verse>
				<verse number="22">上主命令 摩西 ，</verse>
				<verse number="23">愛吩咐 亞倫 㧯佢該兜孻仔用以下个話祝福 以色列 人：</verse>
				<verse number="24">願上主賜福給你，保護你；</verse>
				<verse number="25">願上主用慈愛款待你 ，施恩給你；</verse>
				<verse number="26">願上主看顧你，賞賜你平安。</verse>
				<verse number="27">上主講：「若係佢等奉𠊎个名祝福 以色列 人，𠊎就賜福給佢等。」</verse>
			</chapter>
			<chapter number="7">
				<verse number="1">摩西 搭好聖帳篷該日，佢用聖油膏聖帳篷㧯底背肚所有个用器、祭壇，㧯祭壇頂所有个用品，使它兜分別為聖。</verse>
				<verse number="2">以色列 各支族个領袖，就係各族族長，係管理人口登記个人，</verse>
				<verse number="3">帶佢等个禮物來，獻給上主：有六輛篷布車，十二隻牛牯。每兩個領袖獻一輛篷布車，每一個領袖獻一隻牛牯。 佢等將這兜東西獻在聖帳篷前以後，</verse>
				<verse number="4">上主對 摩西 講：</verse>
				<verse number="5">「你愛收下這兜禮物做聖帳篷个用途，照 利未 人工作个需要分給佢等。」</verse>
				<verse number="6">所以 摩西 將篷布車㧯牛牯交給 利未 人。</verse>
				<verse number="7">佢將兩輛車，四隻牛，照 革順 子孫工作个需要交給佢等，</verse>
				<verse number="8">又將四輛車，八隻牛，照 米拉利 子孫工作个需要交給佢等。佢等全部愛在祭司 亞倫 个孻仔 以他瑪 个指揮下背執行任務。</verse>
				<verse number="9">總係 摩西 無將車抑係牛交給 哥轄 个子孫，因為佢等負責用肩頭扛聖物。</verse>
				<verse number="10">各領袖也帶來慶祝獻壇典禮个禮物。當佢等預備好將禮物獻在祭壇頂个時，</verse>
				<verse number="11">上主對 摩西 講：「你愛㧯佢等講，在十二日當中，逐日愛有一個領袖為獻壇典禮獻禮物。」</verse>
			</chapter>
			<chapter number="8">
				<verse number="1">上主對 摩西 講：</verse>
				<verse number="2">「你愛㧯 亞倫 講，佢安七盞燈在燈臺頂个時，愛將燈光向頭前照。」</verse>
				<verse number="3">亞倫 就照恁樣辦理，將燈向燈臺頭前个方向來安，係照上主所吩咐 摩西 个。</verse>
				<verse number="4">這個燈臺，對頂高到底下，全部係用金仔打出來个，係照上主指示 摩西 个樣式打造个。</verse>
				<verse number="5">上主對 摩西 講：</verse>
				<verse number="6">「你愛將 利未 人㧯其他个 以色列 人分開，</verse>
				<verse number="7">用以下个方法潔淨佢等：用淨浰个水拂在佢等个身上，喊佢等將全身用剃頭刀剃淨，將衫褲洗淨；恁樣，佢等在禮儀上就算淨浰了。</verse>
				<verse number="8">佢等愛牽一隻細牛牯㧯一定愛獻个素祭，就係攪橄欖油个幼麵粉；你還愛牽另外一隻細牛牯，來做贖罪祭。</verse>
				<verse number="9">然後你愛召集 以色列 全會眾，喊 利未 人企在聖帳篷頭前、𠊎 — 上主个面前。</verse>
				<verse number="10">以色列 人愛將佢等个手放在 利未 人个頭那頂；</verse>
				<verse number="11">亞倫 愛將 利未 人獻給𠊎當做搖祭，係 以色列 人特別个禮物。恁樣，佢等正做得辦理𠊎个事。</verse>
				<verse number="12">利未 人愛按手在該兩隻牛牯个頭那頂；一隻做贖罪祭，一隻做燒化祭，獻給𠊎，為 利未 人贖罪。</verse>
				<verse number="13">「你愛將 利未 人做特別个禮物獻給𠊎，又愛喊 亞倫 㧯佢該兜孻仔管理佢等。</verse>
				<verse number="14">你愛恁樣將 利未 人㧯其他个 以色列 人分開，使佢等歸屬𠊎。</verse>
				<verse number="15">你將 利未 人潔淨並奉獻以後，佢等就做得在聖帳篷底背工作。</verse>
				<verse number="16">𠊎已經宣佈，佢等愛代 以色列 長子个地位；佢等愛完全歸屬𠊎。</verse>
				<verse number="17">𠊎在 埃及 打死所有个頭胎該日，已經將 以色列 人逐家个長子㧯逐隻頭牲个頭胎分別為聖，歸屬𠊎。</verse>
				<verse number="18">𠊎這下愛將 利未 人代所有 以色列 人个長子。</verse>
				<verse number="19">𠊎對 以色列 人當中將 利未 人當做禮物賜給 亞倫 㧯佢該兜孻仔，在聖帳篷底背為 以色列 人工作又為佢等行贖罪禮，免得 以色列 人行到聖所面前堵到災難。」</verse>
				<verse number="20">摩西 、 亞倫 、㧯 以色列 全會眾就遵照上主命令 摩西 个話，將 利未 人奉獻。</verse>
				<verse number="21">利未 人潔淨自家，洗淨佢等个衫褲； 亞倫 將佢等當做搖祭係特別个禮物獻給上主，也為佢等行贖罪禮來潔淨佢等。</verse>
				<verse number="22">有關 利未 人个事，人民全部遵照上主命令 摩西 个話來行。恁樣， 利未 人就在 亞倫 㧯佢該兜孻仔个指揮下，執行聖帳篷底背个任務。</verse>
				<verse number="23">上主對 摩西 講：</verse>
				<verse number="24">「逐個二十五歲以上个 利未 人愛在聖帳篷事奉，</verse>
				<verse number="25">總係到五十歲个時愛退休。</verse>
				<verse number="26">以後佢做得在聖帳篷幫助同事，總係做毋得自家單獨辦事。你愛恁樣分配 利未 人个工作。」</verse>
			</chapter>
			<chapter number="9">
				<verse number="1">以色列 人離開 埃及 後个第二年正月，上主在 西奈 曠野對 摩西 講：</verse>
				<verse number="2">「本月十四，對日頭落山開始， 以色列 人愛遵照所有个規定㧯條例來守𨃟過節。」</verse>
				<verse number="3"></verse>
				<verse number="4">所以 摩西 吩咐人民守𨃟過節。</verse>
				<verse number="5">正月十四臨暗仔，佢等在 西奈 曠野守𨃟過節。上主所命令 摩西 一切个話， 以色列 人全部遵行。</verse>
				<verse number="6">總係，有幾個人因為憑到屍體就無淨浰，做毋得在該日守𨃟過節。佢等到 摩西 、 亞倫 面前，</verse>
				<verse number="7">講：「𠊎等因為憑到屍體就無淨浰；總係做麼介不准𠊎等㧯其他个 以色列 人共下在指定个日仔獻祭物給上主呢？」</verse>
				<verse number="8">摩西 應講：「你等在這位等，𠊎去聽上主有麼介指示！」</verse>
				<verse number="9">上主吩咐 摩西</verse>
				<verse number="10">對 以色列 人講：「你等㧯你等个後代當中若有人因為憑到屍體就無淨浰，抑係出門在外，還係愛守𨃟過節；</verse>
				<verse number="11">恁樣个人做得慢一隻月，就係在二月十四臨暗仔來守節。愛食無酵餅、苦菜㧯羊羔个肉；</verse>
				<verse number="12">總係做毋得將賸到个食物留到第二朝晨，也做毋得拗斷羊羔个骨頭。愛照所有个條例來守𨃟過節。</verse>
				<verse number="13">總係，若有人係淨浰个，又無出門旅行，佢敢毋守𨃟過節，就愛將佢對𠊎个子民中除掉，因為佢無在指定个日仔獻祭物給𠊎。佢一定愛擔當自家个罪。」</verse>
				<verse number="14">「若係住在你等當中个外族人有人愛守𨃟過節，佢應該照所有个規定㧯條例來遵守。無論本地人抑係外族人，全部愛遵守共樣个法律。」</verse>
				<verse number="15">約櫃个聖帳篷搭起來該日，有一片雲遮等它。暗晡時，這雲看起來像火。</verse>
				<verse number="16">常常係恁樣，雲遮等聖帳篷，暗晡時這雲看起來像火。</verse>
				<verse number="17">雲升上去个時， 以色列 人就徙營出發；雲停在㖠位，佢等就在該位安營。</verse>
				<verse number="18">人民遵照上主个命令徙營，也遵照上主个命令安營。雲停在聖帳篷頂高幾久，佢等就留在該營地幾久。</verse>
				<verse number="19">雲停在聖帳篷頂高有一站當長个時間，佢等還係聽從上主个命令，無徙營。</verse>
				<verse number="20">有時雲停在聖帳篷頂高只有幾日。無論在樣般个情況，佢等全部遵照上主个命令徙營、安營。</verse>
				<verse number="21">有時雲停留个時間只有一暗晡，朝晨頭就升上去。它一升上去，佢等就徙營。無論係日時頭抑係暗晡時，雲一升上去，佢等就徙營。</verse>
				<verse number="22">無論係兩日、一隻月、一年抑係較久个時間，雲停在聖帳篷頂高个時，佢等就無徙營；雲一升上去，佢等就徙營。</verse>
				<verse number="23">以色列 人安營抑係徙營，全部係遵照上主通過 摩西 所命令个話去做。</verse>
			</chapter>
			<chapter number="10">
				<verse number="1">上主對 摩西 講：</verse>
				<verse number="2">「你愛用銀仔打造兩支喇叭，用來召集民眾、也做得喊佢等徙營。</verse>
				<verse number="3">兩支喇叭歕長聲个時，全會眾愛聚集在聖帳篷門前，在你个周圍。</verse>
				<verse number="4">若係只有歕一支喇叭， 以色列 軍隊逐支族个領袖愛聚集到你个面前。</verse>
				<verse number="5">若係歕出短短當急个聲，安營在東片个支族愛徙營。</verse>
				<verse number="6">第二擺歕出短短當急个聲，安營在南片个支族愛徙營。所以，歕短短當急个聲係愛徙營个意思，</verse>
				<verse number="7">歕長聲係愛聚集會眾。</verse>
				<verse number="8">亞倫 个子孫、做祭司个，愛歕這兩支喇叭。 「以下个條例，你等愛世世代代遵守。</verse>
				<verse number="9">你等在自家个土地上堵到戰爭个時，為到保護自家、抵抗來攻打个敵人，你等愛用這兩支喇叭歕出戰爭个警報；𠊎 — 上主、你等个上帝就會紀念你等，救你等脫離仇敵。</verse>
				<verse number="10">在歡樂个日仔，初一㧯其他个節期，獻燒化祭㧯平安祭个時，你等愛歕喇叭；𠊎就會紀念你等。𠊎係上主 — 你等个上帝。」</verse>
				<verse number="11">以色列 人離開 埃及 後第二年个二月二十，約櫃个聖帳篷頂高个雲升上去了。</verse>
				<verse number="12">以色列 人就開始佢等个路程，離開 西奈 曠野。雲來到 巴蘭 曠野，停在該位。</verse>
				<verse number="13">佢等遵照上主給 摩西 个命令向前行，逐擺前進係照共樣个順序。</verse>
				<verse number="14">猶大 總隊个大旗帶頭出發，一隊一隊跈等向前行。 亞米拿達 个孻仔 拿順 𢱋 猶大 支族；</verse>
				<verse number="15">蘇押 个孻仔 拿坦業 𢱋 以薩迦 支族；</verse>
				<verse number="16">希倫 个孻仔 以利押 𢱋 西布倫 支族。</verse>
				<verse number="17">聖帳篷拆下來以後， 革順 㧯 米拉利 兩宗族个人就扛等聖帳篷向前行。</verse>
				<verse number="18">然後， 呂便 總隊个大旗就出發，一隊一隊跈等向前行。 示丟珥 个孻仔 以利蓿 𢱋 呂便 支族；</verse>
				<verse number="19">蘇利沙代 个孻仔 示路蜜 𢱋 西緬 支族；</verse>
				<verse number="20">丟珥 个孻仔 以利雅薩 𢱋 迦得 支族。</verse>
				<verse number="21">然後， 哥轄 宗族个人扛等聖物跈等向前行。等佢等到新營地个時，聖帳篷已經重新搭起來了。</verse>
				<verse number="22">再下去係 以法蓮 總隊个大旗出發，一隊一隊跈等向前行。 亞米忽 个孻仔 以利沙瑪 𢱋 以法蓮 支族；</verse>
				<verse number="23">比大蓿 个孻仔 迦瑪列 𢱋 瑪拿西 支族；</verse>
				<verse number="24">基多尼 个孻仔 亞比但 𢱋 便雅憫 支族。</verse>
				<verse number="25">最後出發个係後衛隊 但 總隊个大旗，一隊一隊跈等向前行。 亞米沙代 个孻仔 亞希以謝 𢱋 但 支族；</verse>
				<verse number="26">俄蘭 个孻仔 帕結 𢱋 亞設 支族；</verse>
				<verse number="27">以南 个孻仔 亞希拉 𢱋 拿弗他利 支族。</verse>
				<verse number="28">這就係 以色列 人徙營、一隊一隊向前行个順序。</verse>
				<verse number="29">摩西 對佢个妻舅仔 — 米甸 人 流珥 个孻仔 — 何巴 講：「𠊎等愛到上主應許給𠊎等个地方去。佢識應許愛使 以色列 人強盛，所以跈𠊎等來去啊，𠊎等會俾你分享𠊎等个好處。」</verse>
				<verse number="30">何巴 應講：「𠊎無愛去。𠊎愛轉𠊎个故鄉，𠊎自家人該位去。」</verse>
				<verse number="31">摩西 講：「拜託毋好離開𠊎等。你對這曠野當熟，𠊎等應該在㖠位安營，你做得為𠊎等帶路。</verse>
				<verse number="32">你若係㧯𠊎等共下去，𠊎等一定將上主賜給𠊎等所有个福氣㧯你共下分享。」</verse>
				<verse number="33">以色列 人離開上主个山，向前行三日。上主个約櫃一直在佢等个頭前，為佢等尋安營个所在。</verse>
				<verse number="34">佢等對一個營地徙到另外一個營地；日時頭有上主个雲在佢等頂高。</verse>
				<verse number="35">逐擺約櫃向前行， 摩西 就講： 「上主啊，求你䟘起來！ 逐走你个仇敵， 使該兜恨你个人對你面前逃走！」</verse>
				<verse number="36">逐擺約櫃停下來个時， 摩西 就講： 「上主啊，求你轉到 以色列 千萬人个當中！」</verse>
			</chapter>
			<chapter number="11">
				<verse number="1">人民堵到困難，開始埋怨上主。上主聽到就發譴，降火在佢等當中，燒掉營地个一角。</verse>
				<verse number="2">人民向 摩西 哀求。 摩西 向上主祈禱，火就烏掉。</verse>
				<verse number="3">該地方就喊做 他備拉 ，因為上主个火識燒在佢等當中。</verse>
				<verse number="4">有兜外族人㧯 以色列 人共下行；佢等當想食肉。 以色列 人也開始緊噭埋怨講：「𠊎等若係有肉好食毋知幾好呢！</verse>
				<verse number="5">在 埃及 个時，𠊎等常常食魚仔，也毋使用錢去買。記得黃瓜、西瓜、韭菜、洋蔥、大蒜恁多好食个東西。</verse>
				<verse number="6">這下𠊎等無半點元氣，因為逐日除了這嗎哪以外，麼介東西乜無好食！」</verse>
				<verse number="7">(嗎哪个樣仔像芫荽仔、色像珍珠，</verse>
				<verse number="8">逐暗晡㧯露水共下落在營地。第二日打早，人民出去拈，將它磨碎抑係舂碎變做粉，然後用鑊頭煎做餅。它个味道像攪橄欖油焙个餅。)</verse>
				<verse number="9"></verse>
				<verse number="10">摩西 聽到人民歸群企在佢等个帳篷門口緊噭又埋怨。上主對人民發譴； 摩西 心肚就當艱苦。</verse>
				<verse number="11">摩西 對上主講：「你做麼介恁樣為難你个僕人？做麼介恁樣無歡喜𠊎？做麼介愛𠊎𢱋這兜人負恁重个責任？</verse>
				<verse number="12">佢等敢係𠊎造个抑係𫱔个？做麼介你愛𠊎做乳𡟓，將佢等像孲𤘅仔恁樣揇在胸前，一直揇到你應許給佢等祖先个土地呢？</verse>
				<verse number="13">𠊎愛去㖠位尋肉給這恁多人食呢？佢等一直緊噭又埋怨，愛𠊎給佢等食肉！</verse>
				<verse number="14">管理這兜人个責任忒重，𠊎一儕㧡毋贏！</verse>
				<verse number="15">若係你愛恁樣對待𠊎，求你可憐𠊎，黏時將𠊎㓾掉，使𠊎毋使再繼續面對恁樣个艱難。」</verse>
				<verse number="16">上主對 摩西 講：「你愛召集七十個受人尊敬个長老，將佢等帶到𠊎這位來，㧯你共下企在聖帳篷堘頭。</verse>
				<verse number="17">𠊎愛下來，在該位對你講話。𠊎愛將賜給你个靈分給佢等，佢等就能分擔你个責任；你就毋使一儕㧡這重擔。</verse>
				<verse number="18">你愛吩咐人民，講：『大家愛潔淨自家，天光日你等會有肉好食。上主識聽到你等緊噭埋怨講：𠊎等想愛食肉，𠊎等感覺在 埃及 較好。所以，上主就愛給你等有肉好食了。</verse>
				<verse number="19">你等毋單淨會食一日、兩日、五日、十日、甚至二十日。</verse>
				<verse number="20">你等會食一隻月，直到肉對你等个鼻孔噴出來，使你等食到畏頦。這件事一定會發生；因為你等豁掉在你等當中个上主，在佢个面前緊噭埋怨講：𠊎等做麼介離開 埃及 呢！』」</verse>
				<verse number="21">摩西 對上主講：「𠊎𢱋个男人就有六十萬恁多，你樣會講你愛給佢等食肉，使佢等做得食歸隻月？</verse>
				<verse number="22">㖠有恁多个牛羊好㓾來滿足佢等？海肚所有个魚仔驚怕也毋罅佢等食呢！」</verse>
				<verse number="23">上主對 摩西 講：「𠊎个能力敢有限制嗎？你這下就會看到𠊎講个話係毋係會實現！」</verse>
				<verse number="24">所以 摩西 出去，將上主所講个話㧯人民講。佢召集七十個長老，喊佢等企在聖帳篷四周圍。</verse>
				<verse number="25">上主在雲當中降下來，對 摩西 講話，將賜給 摩西 个靈分給該七十個長老。靈降在佢等身上个時，佢等全部像先知恁樣受感講話，總係以後無再講。</verse>
				<verse number="26">其中有兩個長老 伊利達 㧯 米達 還留在營肚，無到聖帳篷該位去。在營肚，靈降在佢等身上，佢等也像先知恁樣受感講話。</verse>
				<verse number="27">有一個青年走去見 摩西 ，將 伊利達 㧯 米達 在營肚所做个事向佢報告。</verse>
				<verse number="28">嫩 个孻仔 約書亞 對後生个時就係 摩西 个助手；這時， 約書亞 對 摩西 講：「 摩西 大人啊，請你去阻擋佢等。」</verse>
				<verse number="29">摩西 應講：「你為到𠊎个緣故來嫉妒係麼？𠊎希望上主將佢个靈賜給佢所有个子民，使佢等全部像先知恁樣講話！」</verse>
				<verse number="30">然後， 摩西 㧯 以色列 个七十個長老全部轉到營肚去。</verse>
				<verse number="31">忽然間，上主使風吹起，歸群个鵪鶉對海上飛來，離地面只有一公尺高。牠兜停在營地㧯四周圍，逐所在全部有，東西南北、連等幾公里 。</verse>
				<verse number="32">人民歸日歸夜捉鵪鶉；第二日也歸日捉，逐儕最少捉到一千公斤。佢等將鵪鶉擺在營地四周圍曬乾。</verse>
				<verse number="33">佢等牙齒還嚼等肉个時，上主向人民大發譴，使佢等發瘟，害死佢等。</verse>
				<verse number="34">該地方就喊做 基博羅‧哈他瓦 ，因為佢等在該位埋葬貪食个人。</verse>
				<verse number="35">對 基博羅‧哈他瓦 ，人民徙到 哈洗錄 ，在該位安營。</verse>
			</chapter>
			<chapter number="12">
				<verse number="1">摩西 識討一個 古實 个細妹仔做𡜵娘； 美莉安 㧯 亞倫 為這件事批評 摩西 。</verse>
				<verse number="2">佢等講：「敢講上主單單通過 摩西 講話？敢毋係也通過𠊎等講話？」這話上主聽到了。</verse>
				<verse number="3">摩西 係一個謙卑个人；佢比世間所有个人還較謙卑。</verse>
				<verse number="4">上主忽然對 摩西 、 亞倫 㧯 美莉安 講：「你三儕到𠊎聖帳篷這位來。」佢三儕就去了。</verse>
				<verse number="5">上主在雲柱中降臨，企在聖帳篷門口，喊講：「 亞倫 ！ 美莉安 ！」佢兩儕就企出來。</verse>
				<verse number="6">上主講：「你等聽𠊎講！ 你等當中有先知个時， 𠊎 — 上主在異象中向佢啟示𠊎自家， 在夢中對佢講話。</verse>
				<verse number="7">總係𠊎个僕人 摩西 毋係恁樣； 𠊎派佢管理𠊎所有个子民 。</verse>
				<verse number="8">所以𠊎㧯佢面對面講話， 清清楚楚，毋使用鈴仔。 佢甚至看𠊎 — 上主个形像！ 你等樣般恁大膽批評𠊎个僕人 摩西 呢？」</verse>
				<verse number="9">上主向佢等發譴，就離開佢等。</verse>
				<verse number="10">雲對聖帳篷頂高徙開个時， 美莉安 个皮膚忽然發癩像雪恁白。 亞倫 看到 美莉安 發癩，</verse>
				<verse number="11">就對 摩西 講：「大人啊，求你毋好俾𠊎等因為戇檔犯罪來受到這個責罰。</verse>
				<verse number="12">毋好俾 美莉安 像一出母胎就糜掉一半个死胎。」</verse>
				<verse number="13">摩西 就向上主祈求講：「上帝啊，求你醫治姖！」</verse>
				<verse number="14">上主應 摩西 講：「若係厥爸呸口潾在姖个面，姖也應該忍受七日个見笑。這下，愛將姖關在營外七日，然後正做得帶姖轉來。」</verse>
				<verse number="15">所以， 美莉安 被人關在營外七日；人民等姖轉來後正徙營。</verse>
				<verse number="16">佢等離開 哈洗錄 ，來到 巴蘭 曠野安營。</verse>
			</chapter>
			<chapter number="13">
				<verse number="1">上主對 摩西 講：</verse>
				<verse number="2">「你愛對十二支族中各選出一個領袖，派佢等去打探 迦南 地，就係𠊎愛賜給 以色列 人个土地。」</verse>
				<verse number="3">摩西就聽從上主个命令，對巴蘭曠野派出十二個領袖。佢等个名記在下背： 呂便支族：撒刻个孻仔沙母亞 西緬支族：何利个孻仔沙法 猶大支族：耶孚尼个孻仔迦勒 以薩迦支族：約色个孻仔以迦 以法蓮支族：嫩个孻仔何希阿 便雅憫支族：拉孚个孻仔帕提 西布倫支族：梭底个孻仔迦疊 瑪拿西 支族：穌西个孻仔迦底 但支族：基瑪利个孻仔亞米利 亞設支族：米迦勒个孻仔西帖 拿弗他利支族：縛西个孻仔拿比 迦得支族：瑪基个孻仔臼利</verse>
				<verse number="4">以上這兜人係 摩西 派出去个探仔。 摩西 將 嫩 个孻仔 何希阿 改名做 約書亞 。</verse>
				<verse number="5">摩西 派佢等出去个時，吩咐佢等講：「對這位向北行，到 迦南 地个南片，然後進入山區。</verse>
				<verse number="6">看該所在係樣般个地方，有幾多人住在該位，人民係強抑係弱。</verse>
				<verse number="7">看該地方係好抑係壞，人民係住在山野抑係住在有防衛个城市。</verse>
				<verse number="8">看該位个土地有肥麼？有樹仔麼？你等愛盡量將該位出產个果子帶兜轉來。」 (該時堵好係葡萄新出个時節。)</verse>
				<verse number="9">所以，佢等向北行，對南片 尋 个曠野一直打探到北片 哈馬 隘口附近个 利合 。</verse>
				<verse number="10">佢等先進入該地个南部，然後來到 希伯崙 。住在該位个人有 亞希幔 族、 示篩 族、 撻買 族；佢等係高大个人 亞衲 族个後代。 ( 希伯崙 城比 埃及 个 瑣安 早七年起个。)</verse>
				<verse number="11">佢等來到 以實各 山壢，在該位斬下一截葡萄樹枝，頂高有一大串葡萄，愛兩儕用槓仔正扛得起。佢等也帶兜石榴㧯無花果轉來。</verse>
				<verse number="12">(該地方安到 以實各 山壢，因為 以色列 人在該位斬下一大串葡萄。)</verse>
				<verse number="13">探仔在該地打探四十日以後，</verse>
				<verse number="14">就轉到 巴蘭 曠野个 加低斯 ，將佢等所看到个向 摩西 、 亞倫 㧯 以色列 全會眾報告，同時將帶轉來个果子給大家看。</verse>
				<verse number="15">佢等㧯 摩西 講：「𠊎等打探你派𠊎等去个地方，發現該係流乳㧯蜜、盡肥个土地；這就係該地方所出產个果子。</verse>
				<verse number="16">總係該地方个人民當勇壯；佢等个城當大當堅固。還有，𠊎等在該位看到高大个人 亞衲 族个後代。</verse>
				<verse number="17">亞瑪力 人住在南片； 赫 人、 耶布斯 人㧯 亞摩利 人住在山區； 迦南 人住在 地中海 滣㧯 約旦 河滣。」</verse>
				<verse number="18">迦勒 喊該兜對 摩西 埋怨个人恬恬，講：「𠊎等這下應該上去佔領該片土地；𠊎等有能力征服。」</verse>
				<verse number="19">總係，該兜㧯 迦勒 共下去个人講：「做毋得！𠊎等無能力去攻打佢等；該位个人比𠊎等強壯。」</verse>
				<verse number="20">佢等就在 以色列 人當中傳出有關該地方無確實个報告。佢等講：「𠊎等所打探、該地方个出產還毋罅本地人食。𠊎等所看到个每一個人全部當高大。</verse>
				<verse number="21">𠊎等在該位還看到高大个人 亞衲 族个後代；𠊎等感覺自家像草蜢恁細，在佢等眼中，𠊎等也確實係恁樣。」</verse>
			</chapter>
			<chapter number="14">
				<verse number="1">以色列 全會眾透夜盡吵、開聲大噭。</verse>
				<verse number="2">佢等埋怨 摩西 㧯 亞倫 講：「𠊎等死在 埃及 抑係死在這曠野還較贏！</verse>
				<verse number="3">上主做麼介愛𢱋𠊎等到該地方去？𠊎等一定會被人㓾死，𠊎等个𡜵娘子女一定會被人捉走。𠊎等倒轉 埃及 去敢毋係較好？」</verse>
				<verse number="4">佢等彼此講：「𠊎等來選一個領袖帶𠊎等轉去 埃及 ！」</verse>
				<verse number="5">摩西 㧯 亞倫 就伏在 以色列 全會眾面前；</verse>
				<verse number="6">嫩 个孻仔 約書亞 㧯 耶孚尼 个孻仔 迦勒 這兩個探仔悲傷到扯爛衫褲，</verse>
				<verse number="7">對人民講：「𠊎等所打探个該垤土地係非常肥个土地。</verse>
				<verse number="8">若係上主歡喜𠊎等，佢會𢱋𠊎等到該位，將該垤流乳㧯蜜、盡肥个土地賜給𠊎等。</verse>
				<verse number="9">你等毋好悖逆上主，也毋使驚該地方个人民。𠊎等會盡容易征服佢等。上主㧯𠊎等同在；佢已經打贏該兜保護佢等个神明，所以你等毋使驚！」</verse>
				<verse number="10">總係全會眾威脅佢等，愛用石頭打死佢兩儕。忽然， 以色列 人全部看到上主个榮光出現在聖帳篷頂高。</verse>
				<verse number="11">上主對 摩西 講：「這兜人藐視𠊎愛到幾時呢？佢等毋相信𠊎愛到幾時呢？雖然𠊎在佢等當中行恁多神蹟，佢等還係毋信𠊎。</verse>
				<verse number="12">𠊎愛使佢等發瘟來毀滅佢等，總係𠊎愛使你㧯你个子孫成做大國，比佢等較強大！」</verse>
				<verse number="13">總係， 摩西 對上主講：「你用你个大能𢱋這兜人離開 埃及 。 埃及 人聽到你對你个子民所做个事以後，</verse>
				<verse number="14">佢等會㧯這地方个人講。這地方个人已經聽講你 — 上主㧯𠊎等同在个消息。你个雲停在𠊎等頂高个時，你在𠊎等面前顯現。日時頭，你在雲柱肚𢱋𠊎等；暗晡時，你在火柱肚𢱋𠊎等。</verse>
				<verse number="15">這下，若係你將你个子民㓾淨淨，該兜聽過你名聲个國家會講：</verse>
				<verse number="16">『上主在曠野㓾掉佢个子民，因為佢無法度𢱋佢等進入佢所應許賜給佢等个土地去。』</verse>
				<verse number="17">所以，主啊，𠊎這下求你顯出你个大能，實現你个應許。你識講過：</verse>
				<verse number="18">『𠊎係上主；𠊎毋會隨便發譴。𠊎有豐盛个慈愛；𠊎赦免罪惡㧯過犯。總係，𠊎毋會將有罪个準做無罪，𠊎一定會因為爺𡟓个罪來責罰佢等个子女，直到三四代。』</verse>
				<verse number="19">上主啊，求你照你偉大不變个慈愛赦免這兜人个罪，就像佢等對離開 埃及 以來你一直赦免佢等恁樣。」</verse>
				<verse number="20">上主應講：「𠊎照你所求个赦免佢等。</verse>
				<verse number="21">總係，𠊎指等𠊎个永生發誓：就像𠊎个榮光充滿全地恁確實，</verse>
				<verse number="22">這兜人連一儕毋會入去該土地。佢等看過𠊎个榮光，看過𠊎在 埃及 㧯曠野所行个神蹟，還係連連試探𠊎，毋聽從𠊎。</verse>
				<verse number="23">佢等一定做毋得進入𠊎所應許給佢等祖先个土地；藐視𠊎个人，無一儕做得入去。</verse>
				<verse number="24">總係𠊎个僕人 迦勒 無㧯佢等共樣；佢一直對𠊎忠心，所以，𠊎會𢱋佢到該垤佢打探過个土地；佢个後代也會得到該地做產業。</verse>
				<verse number="25">亞瑪力 人㧯 迦南 人這下住在山壢，所以，天光日你等愛倒轉去，向 紅海 路上个曠野行。」</verse>
				<verse number="26">上主對 摩西 㧯 亞倫 講：</verse>
				<verse number="27">「這兜邪惡个人民埋怨𠊎愛到幾時呢？佢等个怪怨𠊎全部聽到了！</verse>
				<verse number="28">你等去㧯佢等講：『𠊎指等𠊎个永生發誓：𠊎會照你等所求个對付你等。𠊎係上主；𠊎恁樣宣佈了。</verse>
				<verse number="29">你等全部會死；你等个屍體會橫到這曠野。因為你等怪怨𠊎，你等當中二十歲以上个人，無一儕做得進入該地。</verse>
				<verse number="30">𠊎識答應俾你等住在該位；總係除了 耶孚尼 个孻仔 迦勒 㧯 嫩 个孻仔 約書亞 ，無一儕做得入去。</verse>
				<verse number="31">你等恅到你等个子女會被人捉去，總係𠊎會𢱋佢等進入你等所棄絕个土地；該地會成做佢等个家鄉。</verse>
				<verse number="32">論到你等，你等个屍體會橫在這曠野。</verse>
				<verse number="33">你等个子女會為你等个毋信受責罰，在這曠野流浪四十年，直到你等全部死淨淨。</verse>
				<verse number="34">你等會擔當自家个罪，一日算一年，你等打探該地四十日，就會受四十年个痛苦。恁樣，你等就知𠊎㧯你等越來越毋親了。</verse>
				<verse number="35">𠊎發誓愛恁樣對付你這兜聚集起來悖逆𠊎个邪惡人民。你等每一儕全部會死在這曠野。𠊎係上主；𠊎恁樣宣佈了。』」</verse>
				<verse number="36">摩西 派去打探該地个探仔轉來，傳出有關該地無確實个報告，害全會眾怪怨上主。所以上主使這兜人發瘟，佢等就死掉。</verse>
				<verse number="37"></verse>
				<verse number="38">十二個探仔只有 嫩 个孻仔 約書亞 㧯 耶孚尼 个孻仔 迦勒 無死。</verse>
				<verse number="39">摩西 將上主个話㧯 以色列 人講，佢等就盡悲哀。</verse>
				<verse number="40">第二日打早，佢等出發進攻山區。佢等講：「𠊎等確實有犯罪；𠊎等這下愛上去上主應許𠊎等个地方。」</verse>
				<verse number="41">總係 摩西 講：「你等這下做麼介毋聽從上主个話呢？你等一定毋會成功！</verse>
				<verse number="42">毋好上去！上主毋㧯你等同在，你等會被仇敵打敗。</verse>
				<verse number="43">你等堵到 亞瑪力 人㧯 迦南 人，一定會被佢等㓾死。上主毋㧯你等同在，因為你等離開佢，毋跈佢。」</verse>
				<verse number="44">雖然上主个約櫃㧯 摩西 無離開營地，佢等還係強強上山去。</verse>
				<verse number="45">所以，住在該山區个 亞瑪力 人㧯 迦南 人下來攻打佢等，打敗佢等，一直將佢等逐到 何珥瑪 。</verse>
			</chapter>
			<chapter number="15">
				<verse number="1">上主㧯 摩西 講，</verse>
				<verse number="2">以色列 人到上主賜給佢等个土地以後，愛遵守以下个條例。</verse>
				<verse number="3">燒獻給上主做燒化祭、還願祭、甘心祭，抑係宗教節期應該獻个祭，做得用牛牯、羊牯、綿羊、山羊做祭物；這兜祭物个香味係上主所歡喜个。</verse>
				<verse number="4">獻綿羊抑係山羊做燒化祭給上主个，在獻每一隻頭牲个時，愛同時帶一公斤幼麵粉攪一公升橄欖油个素祭，還愛㧯一公升个酒共下獻。</verse>
				<verse number="5"></verse>
				<verse number="6">獻綿羊牯个時，愛同時獻兩公斤幼麵粉攪一公升半橄欖油个素祭，</verse>
				<verse number="7">還愛㧯一公升半个酒共下獻。這兜祭物个香味係上主所歡喜个。</verse>
				<verse number="8">獻牛牯給上主做燒化祭、還願祭，抑係平安祭个時，</verse>
				<verse number="9">愛同時獻三公斤幼麵粉攪兩公升橄欖油个素祭，</verse>
				<verse number="10">還愛㧯兩公升个酒共下獻。這火祭个香味係上主所歡喜个。</verse>
				<verse number="11">獻一隻牛牯、羊牯、綿羊抑係山羊个時，全部愛恁樣辦理。</verse>
				<verse number="12">若獻一隻以上，連帶愛獻个祭物應該照頭牲个數目增加。</verse>
				<verse number="13">每一個本地𫱔个 以色列 人在獻上主所歡喜个清香火祭个時，全部應該恁樣辦理。</verse>
				<verse number="14">無論㖠時，住在你等當中个外族人，不管係暫時抑係永久定居，在獻上主所歡喜个清香火祭个時，也愛照這個條例恁樣來辦理。</verse>
				<verse number="15">這條共用个條例愛做你等㧯你等當中个外族人世世代代遵守个規則。你等㧯佢等在上主看來係共樣个。</verse>
				<verse number="16">所以，共樣个條例㧯規則用在你等身上，也用在佢等身上。</verse>
				<verse number="17">上主㧯 摩西 講，</verse>
				<verse number="18">以色列 人到上主𢱋佢等入去个土地以後，愛遵守以下个條例。</verse>
				<verse number="19">佢等享受該地所出產个糧食時，一定愛拿出一部份做特別个禮物獻給上主。</verse>
				<verse number="20">你等焙餅个時，愛用最先收成个麥仔所焙个第一垤餅做特別个禮物獻給上主，就像拿正打好个麥仔獻做特別个奉獻恁樣。</verse>
				<verse number="21">你等世世代代愛對所焙个這種餅中，將第一垤拿出來做特別个禮物獻給上主。</verse>
				<verse number="22">若係你等無意中違背上主吩咐 摩西 个條例 —</verse>
				<verse number="23">就係對該日直到世世代代个會眾無完全遵行上主通過 摩西 所頒佈个命令 —</verse>
				<verse number="24">會眾並毋知恁樣做係毋著，全會眾就一定愛獻一隻牛牯做燒化祭、做上主所歡喜清香个火祭，同時愛獻應該獻个素祭㧯祭酒。另外，佢等還愛獻一隻山羊牯做贖罪祭。</verse>
				<verse number="25">祭司愛為 以色列 全會眾贖罪，使佢等得到赦免；因為佢等做毋著毋係故意个，佢等也因為自家个毋著將火祭㧯贖罪祭獻給上主。</verse>
				<verse number="26">恁樣， 以色列 全會眾㧯住在佢等當中个外族人全部會得到赦免，因為佢等做毋著毋係故意个。</verse>
				<verse number="27">若係有一個人無意中犯罪，就一定愛獻一隻一歲大个山羊乸做贖罪祭。</verse>
				<verse number="28">祭司愛在上主面前為佢行潔淨禮，除掉佢个罪，使佢得到赦免。</verse>
				<verse number="29">無論係本地𫱔个 以色列 人抑係住在佢等當中个外族人，無意中犯罪，全部一定愛守共樣个條例。</verse>
				<verse number="30">總係該故意犯罪个，不管係本地𫱔个 以色列 人抑係外族人，全部係犯了侮辱上主个罪，一定愛處死刑。</verse>
				<verse number="31">因為佢藐視上主个話，故意違背上主个命令，該人總愛處死刑；佢个罪孽愛歸到佢个身上。</verse>
				<verse number="32">以色列 人還在曠野个時，有一儕在安息日出去拈柴，被人發現。</verse>
				<verse number="33">該兜發現佢拈柴个人，就將佢帶到 摩西 、 亞倫 㧯全會眾該位，</verse>
				<verse number="34">將佢關起來，因為當時毋知愛樣般刑罰佢。</verse>
				<verse number="35">後來上主對 摩西 講：「這個人一定愛處死刑；全會眾愛在營外用石頭㧹死佢。」</verse>
				<verse number="36">所以全會眾將佢帶到營外，照上主命令 摩西 个，用石頭㧹死佢。</verse>
				<verse number="37">上主命令 摩西 ，</verse>
				<verse number="38">愛吩咐 以色列 人講：「你等愛在衫个邊堘四角攣繸仔，在逐條繸仔頂愛有一條藍色个細帶仔。你等世世代代愛恁樣做。</verse>
				<verse number="39">這繸仔係愛提醒你等，逐擺看到它就會想到𠊎所有个誡命，並去遵行。恁樣，你等正毋會照自家个心意㧯眼目个慾望亂來。</verse>
				<verse number="40">這繸仔會提醒你等遵守𠊎所有个誡命。你等愛分別為聖歸屬𠊎。</verse>
				<verse number="41">𠊎係上主 — 你等个上帝；𠊎識𢱋你等出 埃及 ，愛做你等个上帝。𠊎係上主 — 你等个上帝。」</verse>
			</chapter>
			<chapter number="16">
				<verse number="1">以斯哈 个孻仔 可拉 屬 利未 支族个 哥轄 宗族； 可拉 背叛 摩西 。㧯佢共下个有 呂便 支族 以利押 个兩個孻仔 — 大坍 㧯 亞比蘭 ，並 比勒 个孻仔 安 。另外還有兩百五十人係對 以色列 會眾選出來、有名望个領袖。</verse>
				<verse number="2"></verse>
				<verse number="3">佢等聚集反對 摩西 㧯 亞倫 ，對佢等講：「你等忒過份了！全會眾逐儕係聖潔个；上主也㧯𠊎等大家同在。你等做麼介看重自家，超過上主个會眾呢？」</verse>
				<verse number="4">摩西 聽到這話就伏在地上祈禱。</verse>
				<verse number="5">然後佢對 可拉 㧯跈佢个人講：「天光朝晨，上主愛指示𠊎等，麼人係屬佢个，麼人係聖潔个；佢愛喊屬佢个人，就係佢所揀選个，在祭壇接近佢。</verse>
				<verse number="6">天光朝晨，你㧯跈你个人愛帶等香爐，底背裝火炭火㧯香，到祭壇該位來。然後𠊎等看，𠊎等當中麼人係上主所揀選个，麼人就係聖潔个。你這兜 利未 人正係忒過份！」</verse>
				<verse number="7"></verse>
				<verse number="8">摩西 繼續對 可拉 講：「你這兜 利未 人，聽𠊎講！</verse>
				<verse number="9">以色列 个上帝將你等對會眾當中分別出來，使你等做得接近佢，在上主个聖帳篷工作，又企在會眾面前服事佢等。你等認為這係小可事情嗎？</verse>
				<verse number="10">佢俾你等㧯其他个 利未 人做得接近佢，你等還想愛得到祭司个職位，係麼？</verse>
				<verse number="11">你等埋怨 亞倫 ，其實，你等㧯你等个同黨係在背叛上主！」</verse>
				<verse number="12">摩西 派人去喊 以利押 个孻仔 大坍 㧯 亞比蘭 ，總係佢等講：「𠊎等毋去！</verse>
				<verse number="13">你𢱋𠊎等離開流乳㧯蜜當肥个 埃及 ，害𠊎等死在曠野，這還毋罅係麼？你還愛抓權來管𠊎等噢！</verse>
				<verse number="14">你並無𢱋𠊎等去到流乳㧯蜜當肥个土地，也無給𠊎等田地㧯葡萄園做𠊎等个產業。你敢愛欺騙這兜人嗎？𠊎等毋去！」</verse>
				<verse number="15">摩西 就大發譴。佢對上主講：「求你毋好接受這兜人个祭物。𠊎無害過佢等一個人，也毋識搶過佢等一隻驢仔。」</verse>
				<verse number="16">摩西 對 可拉 講：「天光日你㧯跈你个兩百五十儕，全部愛到上主个聖帳篷來； 亞倫 也愛到該位。</verse>
				<verse number="17">你等逐儕愛拿自家个香爐，底背裝等香，將它帶到上主个面前。」</verse>
				<verse number="18">所以佢等逐儕帶等香爐來，底背裝𤏸等个火炭火㧯香，跈 摩西 㧯 亞倫 ，共下企在聖帳篷門口。</verse>
				<verse number="19">可拉 聚集全會眾在聖帳篷門口，面對 摩西 㧯 亞倫 企等。忽然間，上主个榮光向全會眾顯現。</verse>
				<verse number="20">上主對 摩西 㧯 亞倫 講：</verse>
				<verse number="21">「你等企開，離這兜人較遠兜仔！𠊎即時愛消滅佢等。」</verse>
				<verse number="22">總係， 摩西 㧯 亞倫 伏在地上，講：「上帝啊，你係所有生命个源頭。一個人犯罪，你就向全會眾發譴係麼？」</verse>
				<verse number="23">上主就對 摩西 講：</verse>
				<verse number="24">「你㧯人民講，喊佢等遠遠離開 可拉 、 大坍 㧯 亞比蘭 个帳篷。」</verse>
				<verse number="25">摩西 企䟘起來，去到 大坍 㧯 亞比蘭 該位； 以色列 該兜長老也跈佢去。</verse>
				<verse number="26">佢吩咐人民講：「你等離開這兜壞人个帳篷，毋好摸佢等个東西。若係你等毋聽，你等就會因為佢等个罪㧯佢等共下消滅。」</verse>
				<verse number="27">所以佢等離開 可拉 、 大坍 㧯 亞比蘭 个帳篷。 大坍 㧯 亞比蘭 帶等𡜵娘子女出來，企在佢等个帳篷門口。</verse>
				<verse number="28">摩西 對人民講：「你等就會知，係上主派𠊎做這兜事，毋係𠊎自家愛恁樣對付佢等。</verse>
				<verse number="29">若係這兜人還係像一般人恁樣死，無受到刑罰，就係表示上主無派𠊎來。</verse>
				<verse number="30">總係，上主若做一件從來吂識聽過个事，俾地裂開，吞掉這兜人㧯佢等所有个東西，使佢等生生跌落陰間，你等就知係這兜人藐視上主。」</verse>
				<verse number="31">摩西 正講煞， 大坍 㧯 亞比蘭 腳下个地就裂開，</verse>
				<verse number="32">將佢等㧯佢等屋下个人，並所有跈 可拉 个人㧯佢等个東西，全部吞掉。</verse>
				<verse number="33">佢等生生㧯佢等个東西共下跌落陰間。地在佢等頂高又合起來，佢等就毋見掉。</verse>
				<verse number="34">所有在場个 以色列 人聽到佢等大噭，就全部逃走，喊等講：「遽遽走！驚怕地也會吞滅𠊎等！」</verse>
				<verse number="35">接等，有火對上主面前出來，消滅該獻香个兩百五十儕。</verse>
				<verse number="36">上主對 摩西 講：</verse>
				<verse number="37">「你去㧯祭司 亞倫 个孻仔 以利亞撒 講，喊佢將該兜被火燒死个人所留下來个香爐拿走，將香爐肚个火炭火委在別个所在，因為香爐係聖个。</verse>
				<verse number="38">香爐獻在上主面前个時，就成做聖个。所以愛將該兜該死个罪人个香爐拿走，打造薄片，為祭壇做一個蓋仔。它愛做 以色列 人个警戒。」</verse>
				<verse number="39">所以祭司 以利亞撒 將該兜被火燒死个人所獻个銅香爐拿來，打造薄片，為祭壇做一個蓋仔。</verse>
				<verse number="40">這係愛警戒 以色列 人，若毋係 亞倫 个後代，絕對做毋得來到上主个面前燒香；違犯个人，就會像 可拉 㧯跈佢个人共樣。這事係照上主通過 摩西 命令 以利亞撒 辦个。</verse>
				<verse number="41">第二日， 以色列 全會眾埋怨 摩西 㧯 亞倫 講：「你等㓾死上主个子民了。」</verse>
				<verse number="42">佢等聚集怪怨 摩西 㧯 亞倫 以後，轉身向聖帳篷。佢等看到雲遮等聖帳篷；有上主个榮光出現。</verse>
				<verse number="43">摩西 㧯 亞倫 到聖帳篷頭前企等；</verse>
				<verse number="44">上主吩咐 摩西 講：</verse>
				<verse number="45">「離這兜人較遠兜仔，𠊎即時愛消滅佢等！」 佢兩儕伏在地上；</verse>
				<verse number="46">摩西 對 亞倫 講：「拿你个香爐來，將祭壇頂个火炭火放在底背，再放一些仔香在火頂高，遽遽帶到人民該位，為佢等贖罪。遽遽去！上主已經發譴，人民開始發瘟了。」</verse>
				<verse number="47">亞倫 聽從 摩西 个話，帶等香爐走入聚集个人群當中。佢看到瘟仔已經發作，就將香放在火炭火頂高，為人民贖罪。</verse>
				<verse number="48">佢企在生人㧯死人當中，瘟仔就停下來。</verse>
				<verse number="49">除了因為 可拉 造反死掉个人以外，這擺因為發瘟死掉个總共有一萬四千七百人。</verse>
				<verse number="50">發瘟停下來以後， 亞倫 轉到聖帳篷門口 摩西 該位。</verse>
			</chapter>
			<chapter number="17">
				<verse number="1">上主對 摩西 講：</verse>
				<verse number="2">「你愛吩咐 以色列 人給你十二支柺棍仔，對逐支族个領袖拿出一支，頂高愛寫佢自家个名。</verse>
				<verse number="3">愛將 亞倫 个名寫在代表 利未 个柺棍仔頂，因為逐支族个領袖愛有一支柺棍仔。</verse>
				<verse number="4">你愛將這十二支柺棍仔帶到聖帳篷，放在約櫃頭前，就係𠊎㧯你等相會个所在。</verse>
				<verse number="5">𠊎所揀選該人个柺棍仔會生芽。恁樣，𠊎會使 以色列 人埋怨你等个話消掉，無俾𠊎再聽到。」</verse>
				<verse number="6">所以， 摩西 吩咐 以色列 人逐支族个領袖給佢一支柺棍仔，總共十二枝； 亞倫 个柺棍仔㧯其他人个柺棍仔全部放共下。</verse>
				<verse number="7">摩西 將所有个柺棍仔放入聖帳篷，在約櫃个頭前、上主个面前。</verse>
				<verse number="8">第二日， 摩西 到約櫃个聖帳篷底背去，看到該代表 利未 支族 亞倫 个柺棍仔已經生芽、生花苞、又開花、結出个杏仁已經熟了！</verse>
				<verse number="9">摩西 就將所有个柺棍仔對上主面前拿出來，給 以色列 人看；佢等全部有看到。各領袖將自家个柺棍仔拿轉去。</verse>
				<verse number="10">上主對 摩西 講：「將 亞倫 个柺棍仔放轉約櫃頭前，愛保存這支柺棍仔，來警告悖逆个人，使佢等毋敢繼續埋怨𠊎，免得佢等死掉。」</verse>
				<verse number="11">摩西 就照上主个命令去做。</verse>
				<verse number="12">以色列 人對 摩西 講：「𠊎等該死了，𠊎等慘了！</verse>
				<verse number="13">麼人接近上主个聖帳篷，麼人就會死。恁樣，𠊎等定著會死淨淨了！」</verse>
			</chapter>
			<chapter number="18">
				<verse number="1">上主對 亞倫 講：「你㧯你該兜孻仔、還有 利未 人，一定愛承擔所有犯到聖所个罪；總係只有你㧯你該兜孻仔愛承擔犯到祭司職務个罪。</verse>
				<verse number="2">你愛帶你个親族 — 利未 支族个人來，使佢等㧯你共下事奉。當你㧯你該兜孻仔在約櫃个聖帳篷事奉个時，佢等愛幫助你。</verse>
				<verse number="3">佢等愛向你負責，在聖帳篷底背服務，總係絕對做毋得摸到聖所㧯祭壇頂个聖物，免得佢等㧯你等全部死掉。</verse>
				<verse number="4">佢等愛㧯你共下工作，負責聖帳篷底背个事務；總係其他資格毋合个人做毋得㧯你等共下工作。</verse>
				<verse number="5">只有你㧯你該兜孻仔負責聖所㧯祭壇个工作。恁樣，𠊎就毋會再向 以色列 人發譴。</verse>
				<verse number="6">𠊎自家對 以色列 人中揀選你个親族 利未 人賜給你等。佢等愛歸𠊎，在聖帳篷底背做事。</verse>
				<verse number="7">只有你㧯你該兜孻仔應該負責有關祭壇㧯至聖所个祭司職務。這係你等个責任，因為𠊎將祭司个職務賜給你等。其他个人若行近聖物，一定愛處死刑。」</verse>
				<verse number="8">上主對 亞倫 講：「𠊎愛將所有獻給𠊎个特別个禮物，就係該兜毋使在祭壇頂燒掉个祭物，全部賜給你。𠊎將這兜祭物給你㧯你个後代，成做你等永久个份額。</verse>
				<verse number="9">該兜毋使在祭壇頂燒掉个至聖祭物，就係該部份對素祭、贖罪祭、㧯贖過失祭个祭物愛歸給你等。所有獻給𠊎个至聖祭物全部歸你㧯你个子孫。</verse>
				<verse number="10">你等一定愛在聖所食這兜東西，只有男人做得食。這兜東西係聖个。</verse>
				<verse number="11">「另外， 以色列 人獻給𠊎个其他特別供物、搖祭也愛歸給你等。𠊎愛將它兜給你㧯你个子女，做世世代代應得个份額。你等屋下在禮儀上淨浰个人，逐儕全部做得食。</verse>
				<verse number="12">「 以色列 人將逐年頭一擺出產中最好个獻給𠊎，𠊎愛將這兜橄欖油、酒、㧯五榖賜給你等。</verse>
				<verse number="13">這兜全部歸給你等。你等屋下在禮儀上淨浰个人，逐儕全部做得食。</verse>
				<verse number="14">「在 以色列 所有無條件獻給𠊎个祭物，全部屬你等。</verse>
				<verse number="15">「 以色列 人獻給𠊎个長子㧯頭胎个頭牲也全部屬你等；總係你等一定愛將每一個長子贖轉去，也愛將無淨浰个頭胎頭牲贖轉去。</verse>
				<verse number="16">細人仔愛在一隻月大个時贖轉去，照聖所規定个標準付五隻銀幣。</verse>
				<verse number="17">總係頭胎个牛、綿羊㧯山羊做毋得贖轉去；牠兜愛完全歸𠊎，成做牲祭。你愛將牠兜个血洒在祭壇頂，燒牠兜个油，成做清香个火祭獻給𠊎 — 上主。</verse>
				<verse number="18">牠兜个肉歸給你等，像搖祭个胸脯肉㧯右後腿歸你等共樣。</verse>
				<verse number="19">「𠊎愛將 以色列 人獻給𠊎所有个特別祭物，賜給你㧯你个子女，做世世代代應得个份額。這係𠊎㧯你還有你个後代所立毋會廢掉个約。」</verse>
				<verse number="20">上主對 亞倫 講：「你做毋得接受 以色列 人傳給子孫个產業，做毋得在佢等个土地上有份。𠊎係上主；𠊎係你个份額、你个產業。」</verse>
				<verse number="21">上主講：「𠊎已經將 以色列 人獻給𠊎个十分之一給 利未 人。這係佢等管理聖帳篷个代價。</verse>
				<verse number="22">其他 以色列 人做毋得再接近聖帳篷，免得犯罪致死。</verse>
				<verse number="23">對這下開始，只有 利未 人做得管理聖帳篷，負責聖帳篷底背个所有事務。這係你等世世代代愛遵守个條例。 利未 人在 以色列 人中做毋得有永久个產業，</verse>
				<verse number="24">因為𠊎已經將 以色列 人獻給𠊎个特別个禮物个十分之一給佢等。所以𠊎對佢等講，佢等在 以色列 人中做毋得有永久个產業。」</verse>
				<verse number="25">上主命令 摩西</verse>
				<verse number="26">吩咐 利未 人講：「你等收到上主賜給你等該份 以色列 人所獻个十分之一个時，愛將其中个十分之一做特別个禮物，獻給上主。</verse>
				<verse number="27">這特別个禮物就㧯耕田人拿正收成个五榖㧯新酒來獻个祭共樣。</verse>
				<verse number="28">恁樣，你等也愛對 以色列 人中所收到个十分之一，就係屬上主个特別个禮物中再獻出來。你等愛將這獻給上主个特別个禮物給祭司 亞倫 ，</verse>
				<verse number="29">愛對你等得到个收成中將最好个拿出來。</verse>
				<verse number="30">你等將最好个部份獻出來以後，做得保留賸到个，就像耕田人獻祭後保留賸到个恁樣。</verse>
				<verse number="31">你等㧯你等屋下个人做得在逐所在食該兜賸到个，因為該係你等在聖帳篷工作个代價。</verse>
				<verse number="32">你等將最好个部份獻給上主以後，食該賸到个就無罪；總係在最好个部份獻出以前食祭物个，就係打垃圾 以色列 人个聖物，一定愛處死刑。」</verse>
			</chapter>
			<chapter number="19">
				<verse number="1">上主命令 摩西 㧯 亞倫 ，</verse>
				<verse number="2">吩咐 以色列 人遵守以下條例：「愛牽一隻無缺點、無掛過軛个赤牛乸，</verse>
				<verse number="3">交給祭司 以利亞撒 ，然後將赤牛乸牽到營外，在佢面前㓾掉。</verse>
				<verse number="4">祭司 以利亞撒 一定愛用手指搵這牛个血，向聖帳篷个方向拂七擺。</verse>
				<verse number="5">歸隻牛乸，連皮、肉、血、腸仔，全部愛在祭司面前燒掉。</verse>
				<verse number="6">然後，祭司愛拿一垤香柏樹、一支牛膝草，㧯一條深紅色个線㧹入火底背。</verse>
				<verse number="7">事後，祭司愛洗淨衫褲，用水洗身，正做得入營地；直到臨暗仔，佢在禮儀上係無淨浰个。</verse>
				<verse number="8">燒牛乸个人也一定愛洗淨衫褲，用水洗身；共樣，直到臨暗仔，佢在禮儀上係無淨浰个。</verse>
				<verse number="9">然後一個在禮儀上淨浰个人愛收牛乸个灰，放在營外一個淨浰个地方。這灰愛保存在該位，拿來為 以色列 會眾做除垃圾个水用个。執行這禮儀个目的係愛除罪。</verse>
				<verse number="10">收牛乸灰个人也一定愛洗淨衫褲，直到臨暗仔，佢在禮儀上係無淨浰个。這條例愛成做 以色列 人㧯住在佢等當中个外族人永遠个例規。」</verse>
				<verse number="11">「憑到屍體个人在禮儀上就七日無淨浰。</verse>
				<verse number="12">佢一定愛在第三日㧯第七日用水潔淨自家；恁樣，佢就淨浰了。若係佢無在第三日㧯第七日潔淨自家，佢就係無淨浰个。</verse>
				<verse number="13">憑到屍體又無去潔淨自家个人係無淨浰个，因為除垃圾个水無洒在佢个身上。佢打垃圾上主个聖帳篷，一定愛對上帝个子民中除名。</verse>
				<verse number="14">「有人死在帳篷肚，當時在帳篷肚个人㧯行入帳篷个人就七日無淨浰。</verse>
				<verse number="15">帳篷肚該兜無蓋仔个用品㧯鑊仔也無淨浰。</verse>
				<verse number="16">有人在屋外背憑到被人㓾死抑係自然死掉个人，或者憑到死人个骨頭抑係墳墓，佢就七日無淨浰。</verse>
				<verse number="17">「你等愛拿赤牛乸个灰，就係燒好做除罪用个，放在鑊頭肚，加淨水，為無淨浰个人除掉垃圾。</verse>
				<verse number="18">最先，一個淨浰个人愛拿一支牛膝草搵在水肚，洒在帳篷㧯帳篷肚所有个東西㧯人身上。然後，淨浰个人愛洒水在該憑到死人骨頭、屍體，抑係墳墓个人身上。</verse>
				<verse number="19">在第三日㧯第七日，該淨浰个人愛洒水在無淨浰个人身上。第七日，佢愛潔淨該人；該人愛洗淨衫褲，用水洗身，做好以後，等日頭落山，佢就淨浰了。</verse>
				<verse number="20">「有人在禮儀上無淨浰又無潔淨自家，佢還係無淨浰个，因為除垃圾个水無洒在佢身上。佢打垃圾上主个聖帳篷，一定愛對上帝个子民中除名。</verse>
				<verse number="21">你等愛世世代代遵守這條例。該洒水除垃圾个人也愛洗淨衫褲；所有憑到該水个人直到臨暗仔攏總無淨浰。</verse>
				<verse number="22">無淨浰个人所憑到个東西也全部無淨浰；憑到這兜東西个人，直到臨暗仔攏總無淨浰。」</verse>
			</chapter>
			<chapter number="20">
				<verse number="1">正月， 以色列 全會眾來到 尋 曠野，在 加低斯 安營。 美莉安 死在該位，就葬在該位。</verse>
				<verse number="2">佢等安營个地方無水，人民聚集向 摩西 㧯 亞倫 計較，</verse>
				<verse number="3">對 摩西 發怨言講：「以前𠊎等个同胞 以色列 人識死在上主个聖帳篷前；𠊎等甘願㧯佢等共下死！</verse>
				<verse number="4">你等做麼介𢱋𠊎等 — 上主个會眾 — 到這曠野來？敢係愛𠊎等㧯頭牲共下死在這位？</verse>
				<verse number="5">你等做麼介𢱋𠊎等離開 埃及 ，到這無出產个地方來呢？這位無五榖、葡萄、無花果、石榴；連水乜無好啉！」</verse>
				<verse number="6">摩西 㧯 亞倫 離開會眾，企在聖帳篷門口。佢等伏在地上；上主个榮光向佢等顯現。</verse>
				<verse number="7">上主對 摩西 講：</verse>
				<verse number="8">「將約櫃頭前該支柺棍仔擎來。你㧯若哥 亞倫 愛召集全會眾，在佢等眼前命令磐石，水就會對磐石流出來。恁樣，你做得俾人民㧯頭牲啉對磐石流出來个水。」</verse>
				<verse number="9">摩西 照上主个命令去將柺棍仔對佢个面前擎來。</verse>
				<verse number="10">摩西 㧯 亞倫 召集全會眾到磐石前。 摩西 講：「你這兜叛徒聽好！𠊎等應該喊磐石流出水來給你等啉係麼？」</verse>
				<verse number="11">然後， 摩西 擎起柺棍仔，打磐石兩下，當多个水流出來。會眾㧯頭牲全部有水好啉了。</verse>
				<verse number="12">總係，上主責備 摩西 㧯 亞倫 ，講：「因為你等信心無罅，在 以色列 人眼前無尊𠊎為聖，你等做毋得𢱋佢等進入𠊎應許賜給佢等个土地。」</verse>
				<verse number="13">這事發生在 米利巴 泉水滣； 以色列 人在該位怪怨上主，上主在佢等當中顯明自家係神聖个。</verse>
				<verse number="14">摩西 對 加低斯 派使者去見 以東 王，對佢講：「你个親屬 以色列 人有話對你講。你知𠊎等所堵到个困難。</verse>
				<verse number="15">𠊎等个祖先樣般到 埃及 去；𠊎等在該位住當多年。 埃及 人苦毒𠊎等个祖先㧯𠊎等，</verse>
				<verse number="16">𠊎等就求喊上主。上主聽𠊎等个哀求，派天使將𠊎等𢱋出 埃及 。這下𠊎等到你邊界个 加低斯 城，</verse>
				<verse number="17">請俾𠊎等經過你个土地。𠊎等㧯𠊎等个頭牲毋會離開大路、行到田肚抑係葡萄園去；𠊎等也毋啉你等井肚个水。𠊎等單淨行王个大路，無偏左右，一直通過你个土地。」</verse>
				<verse number="18">總係， 以東 王應講：「𠊎毋准你等經過𠊎个土地！若係你等來，𠊎就派兵攻打你等。」</verse>
				<verse number="19">以色列 人講：「𠊎等單淨行大路。若係𠊎等抑係𠊎等个頭牲啉你个水，𠊎等會付錢。𠊎等借過定定。」</verse>
				<verse number="20">以東 王又講：「做毋得！」所以，佢派出精良个大軍來，愛攻打 以色列 人。</verse>
				<verse number="21">因為 以東 王拒絕 以色列 人通過佢个土地， 以色列 人就轉向另外一條路去。</verse>
				<verse number="22">以色列 全會眾離開 加低斯 ，來到 何珥 山；</verse>
				<verse number="23">這山在 以東 个邊界。上主在該位對 摩西 㧯 亞倫 講：</verse>
				<verse number="24">「 亞倫 做毋得進入𠊎應許給 以色列 人个土地；佢就會轉到厥祖宗該位去，因為你等兩儕在 米利巴 泉水滣違背𠊎个命令。</verse>
				<verse number="25">你愛帶 亞倫 㧯佢个孻仔 以利亞撒 上 何珥 山，</verse>
				<verse number="26">在該位脫掉 亞倫 个祭司衫，給 以利亞撒 著好。 亞倫 就會死，轉到厥祖宗該位去。」</verse>
				<verse number="27">摩西 照上主个命令去做。佢等在全會眾面前上 何珥 山。</verse>
				<verse number="28">摩西 脫掉 亞倫 个祭司衫，給 以利亞撒 著好。 亞倫 就死在該山頂； 摩西 㧯 以利亞撒 下山。</verse>
				<verse number="29">以色列 全會眾知 亞倫 死掉，就為佢哀傷三十日。</verse>
			</chapter>
			<chapter number="21">
				<verse number="1">住在南部个 迦南 人 亞拉得 王聽講 以色列 人愛行 亞他林 這條路來，就攻打佢等，捉走幾下儕。</verse>
				<verse number="2">所以 以色列 人向上主許願講：「若係你俾𠊎等打贏這兜人，𠊎等就無條件將佢等㧯佢等个城市奉獻 給你，毀滅佢等个城。」</verse>
				<verse number="3">上主聽佢等个祈求，將 迦南 人交在佢等个手。所以 以色列 人徹底毀滅佢等㧯佢等个城市；該地方就喊做 何珥瑪 。</verse>
				<verse number="4">以色列 人離開 何珥 山，向 紅海 个路行，為了係愛捩過 以東 地區。在路上，人民煩躁到講毋得；</verse>
				<verse number="5">佢等就怪怨上帝㧯 摩西 講：「做麼介將𠊎等𢱋出 埃及 、愛𠊎等死在這無好食又無水个曠野？𠊎等實在吞毋下這恁難食个東西了！」</verse>
				<verse number="6">所以上主喊毒蛇進入人民當中；當多 以色列 人被毒蛇咬死掉。</verse>
				<verse number="7">人民來見 摩西 ，講：「𠊎等有犯罪，因為𠊎等怪怨上主㧯你。這下求你祈禱上主，使這兜蛇離開𠊎等。」 摩西 就為人民祈禱。</verse>
				<verse number="8">上主吩咐 摩西 鑄造一條銅蛇，掛在樹棍頂，被毒蛇咬到个人若係看到這蛇就毋會死。</verse>
				<verse number="9">所以 摩西 鑄造一條銅蛇，掛在樹棍頂。被毒蛇咬到个人一看到這銅蛇就毋會死。</verse>
				<verse number="10">以色列 人再向前行，在 阿伯 安營。</verse>
				<verse number="11">離開 阿伯 以後，佢等在 摩押 地个東片、曠野底背个 亞巴琳 荒地安營，</verse>
				<verse number="12">後來又到 撒烈 山壢安營。</verse>
				<verse number="13">佢等對該位再向前行，在 亞嫩 山壢北片个曠野安營；這曠野直到 亞摩利 人个地界。 ( 亞嫩 山壢係 摩押 人㧯 亞摩利 人中間个界限。)</verse>
				<verse number="14">所以，《上主个戰記》上講： 「…… 蘇法 地區个 哇哈伯 城、 亞嫩 个山壢，</verse>
				<verse number="15">㧯伸入 亞珥 城直到 摩押 邊界个山崎。」</verse>
				<verse number="16">佢等對該位到一個名安到 比珥 个地方。上主在該位對 摩西 講：「你去召集人民，𠊎愛給佢等水啉。」</verse>
				<verse number="17">該時， 以色列 人唱恁樣个一首歌： 「井啊，愛湧出水來； 𠊎等愛唱歌慶祝。</verse>
				<verse number="18">這係領袖 — 民間个尊貴人 用權杖㧯柺棍仔挖个井。」 佢等對曠野徙到 瑪他拿 ，</verse>
				<verse number="19">再對該位到 拿哈列 ，再到 巴末 ，</verse>
				<verse number="20">對 巴末 到 摩押 地个山壢，就係遠遠看得到曠野个 比斯迦 山頂。</verse>
				<verse number="21">以色列 人派使者去見 亞摩利 人个王 西宏 ，講：</verse>
				<verse number="22">「請准𠊎等經過你个地界。𠊎等㧯𠊎等个頭牲毋會離開大路、行到田肚抑係葡萄園去；𠊎等也毋啉你等井肚个水。𠊎等單淨行王个大路，一直通過你个土地。」</verse>
				<verse number="23">總係 西宏 毋准 以色列 人經過佢个土地。佢召集軍隊到曠野去，在 雅雜 攻打 以色列 人。</verse>
				<verse number="24">總係 以色列 人㓾掉佢㧯佢个軍隊，又佔領佢个土地，對 亞嫩 山壢向北直到 雅博 山壢，就係 亞捫 人个邊界，因為 亞捫 人有盡堅固个邊界防備。</verse>
				<verse number="25">以色列 人佔領 亞摩利 人所有个城市，包含 希實本 㧯周圍个村莊； 以色列 人就住在該位。</verse>
				<verse number="26">希實本 係 亞摩利 王 西宏 个首都； 西宏 識攻打以前个 摩押 王，佔領佢所有个土地，直到 亞嫩 山壢。</verse>
				<verse number="27">所以詩人講： 「到 西宏 王个城 希實本 來！ 𠊎等愛看它重新起過。</verse>
				<verse number="28">因為有火對 希實本 城發出， 有火焰對 西宏 个城出來， 毀滅 摩押 个 亞珥 城， 吞滅 亞嫩 山壢上游个山區。</verse>
				<verse number="29">摩押 人啊，你等有災禍了！ 拜 基抹 个人啊，你等滅亡了！ 這神明迫你等个男人逃走， 使你等个婦女被 亞摩利 王 西宏 捉去。</verse>
				<verse number="30">這下𠊎等射佢等， 希實本 直到 底本 就滅掉； 𠊎等毀滅佢等， 直到 米底巴 附近个 挪法 。」</verse>
				<verse number="31">所以 以色列 人住在 亞摩利 人个地方。</verse>
				<verse number="32">摩西 派人去打探 雅謝 城； 以色列 人佔領 雅謝 㧯周圍个城鎮，將住在該位个 亞摩利 人逐走。</verse>
				<verse number="33">後來 以色列 人倒轉來，向 巴珊 个路去。 巴珊 王 噩 帶領軍隊到 以得來 攻打佢等。</verse>
				<verse number="34">上主對 摩西 講：「毋使驚佢！𠊎愛將佢、佢个人民、還有佢个土地全部交在你个手中。你樣般對待住在 希實本 个 亞摩利 王 西宏 ，也愛照樣對待 巴珊 王。」</verse>
				<verse number="35">所以， 以色列 人㓾掉 噩 㧯佢該兜孻仔、還有佢所有个人民，一個也無留下，又佔領佢个土地。</verse>
			</chapter>
			<chapter number="22">
				<verse number="1">以色列 人再向前行，在 約旦 河東岸个 摩押 平原、 耶利哥 个對面安營。</verse>
				<verse number="2">西撥 个孻仔 摩押 王 巴勒 看到 以色列 人樣般對待 亞摩利 人，</verse>
				<verse number="3">又知佢等人多，佢㧯佢个人民就全部盡驚 以色列 人。</verse>
				<verse number="4">所以 摩押 人對 米甸 人个領袖講：「這群人無幾久就會將𠊎等周圍个東西全部毀滅掉，像牛仔食掉草場个草共樣。」 摩押 王 巴勒</verse>
				<verse number="5">派使者去喊 比珥 个孻仔 巴蘭 來； 巴蘭 住在佢个故鄉、 幼發拉底 河附近个 比奪 。使者將 巴勒 个意思㧯佢講：「有一族人對 埃及 出來，遮滿地面，住在𠊎个堘頭。</verse>
				<verse number="6">佢等个人數比𠊎个人民較多，所以請你來，為𠊎咒詛佢等。恁樣𠊎正有可能打贏佢等，將佢等逐出𠊎个土地。𠊎知，你所祝福个，就會得福；你所咒詛个，就會受咒詛。」</verse>
				<verse number="7">所以， 摩押 人㧯 米甸 人个領袖帶等卜卦个禮金到 巴蘭 該位去，將 巴勒 个意思㧯佢講。</verse>
				<verse number="8">巴蘭 對佢等講：「你等在這位過夜，天光日𠊎會㧯你等講上主對𠊎講麼介。」 摩押 該兜領袖就留在 巴蘭 該位過夜。</verse>
				<verse number="9">上帝臨到 巴蘭 該位，問佢：「㧯你共下个這兜人係麼人？」</verse>
				<verse number="10">巴蘭 應上帝講：「 摩押 王 巴勒 派佢等來㧯𠊎講：</verse>
				<verse number="11">『對 埃及 出來个一族人，遮滿地面。你愛來為𠊎咒詛佢等，俾𠊎打贏佢等，將佢等逐走。』」</verse>
				<verse number="12">上帝對 巴蘭 講：「毋好㧯這兜人去，也做毋得咒詛 以色列 人，因為𠊎賜福給佢等。」</verse>
				<verse number="13">第二朝晨， 巴蘭 去見 巴勒 个使者，講：「你等轉去，上主毋准𠊎㧯你等去。」</verse>
				<verse number="14">佢等就轉去見 巴勒 ，報告佢講：「 巴蘭 毋肯跈𠊎等共下來！」</verse>
				<verse number="15">所以 巴勒 另外派比上擺較多又較重要个使者去。</verse>
				<verse number="16">佢等去見 巴蘭 ，將 巴勒 个意思㧯佢講：「請毋好受到麼介阻擋毋肯來！</verse>
				<verse number="17">𠊎會大大報答你，你無論要求麼介，𠊎一定會照恁樣做。請你來為𠊎咒詛這兜人。」</verse>
				<verse number="18">總係 巴蘭 應佢等講：「就算 巴勒 將佢王宮底背个金銀全部給𠊎，無論大細事，𠊎全部毋敢違背上主 — 𠊎上帝个命令。</verse>
				<verse number="19">總係請你等在這位過夜，像以前該兜人恁樣，𠊎愛知上主係毋係還有別个話愛㧯𠊎講。」</verse>
				<verse number="20">該暗晡，上帝臨到 巴蘭 該位，對佢講：「若係這兜人係來求你跈佢等去，你就準備跈佢等去，總係愛照𠊎个話去做。」</verse>
				<verse number="21">第二朝晨， 巴蘭 將馬鞍掛好在驢仔背頂，跈 摩押 該兜領袖共下去。</verse>
				<verse number="22">上帝無歡喜 巴蘭 跈佢等去。 巴蘭 騎驢仔、兩個僕人跈佢行，在路上，上主个天使企在路中央擋等。</verse>
				<verse number="23">驢仔看到上主个天使拿等劍企在該位，就離開路，閃到田肚去。 巴蘭 打驢仔，愛牠轉到路上。</verse>
				<verse number="24">後來上主个天使企在兩個葡萄園中間个狹路上，兩片全部係石牆。</verse>
				<verse number="25">驢仔看到上主个天使，就憑到牆，將 巴蘭 个腳靠傷； 巴蘭 又打驢仔。</verse>
				<verse number="26">上主个天使又去到頭前，企在一個當狹个地方，無縫好通過。</verse>
				<verse number="27">這擺，驢仔看到上主个天使，就伏下來。 巴蘭 發譴，用柺棍仔打驢仔。</verse>
				<verse number="28">該時，上主使驢仔講話，牠對 巴蘭 講：「𠊎對你做麼介事，你這三擺打𠊎呢？」</verse>
				<verse number="29">巴蘭 對驢仔講：「因為你㩢耍𠊎！若係𠊎手中有刀，就會將你㓾掉！」</verse>
				<verse number="30">驢仔對 巴蘭 講：「𠊎毋係你從細所騎个驢仔嗎？𠊎以前識恁樣對待你嗎？」 巴蘭 講：「毋識！」</verse>
				<verse number="31">接等，上主使 巴蘭 看到佢个天使拿等劍企在該位， 巴蘭 就伏在地上。</verse>
				<verse number="32">上主个天使對佢講：「你做麼介這三擺打驢仔呢？𠊎來阻擋你个路，因為你毋應該去 。</verse>
				<verse number="33">你个驢仔看到𠊎，三擺閃開；若係牠無閃開，𠊎早就將你㓾掉，留驢仔个命。」</verse>
				<verse number="34">巴蘭 對上主个天使講：「𠊎有罪了；𠊎毋知你企在路中央擋𠊎。若係你認為𠊎毋應該去，𠊎就倒轉去。」</verse>
				<verse number="35">上主个天使對 巴蘭 講：「跈這兜人去啊！總係你一定愛照𠊎喊你講个話去講。」 巴蘭 就跈 巴勒 个使者去。</verse>
				<verse number="36">巴勒 聽講 巴蘭 來了，就到 亞珥 城去迎接佢；這城在 摩押 邊界 亞嫩 山壢个堘頭。</verse>
				<verse number="37">巴勒 對 巴蘭 講：「𠊎第一擺恁積極派人去請你个時，你樣般毋肯來呢？你恅到𠊎毋會大大報答你係麼？」</verse>
				<verse number="38">巴蘭 講：「𠊎毋係已經來了？這下，𠊎做得講麼介呢？𠊎只有做得講上帝愛𠊎講个話。」</verse>
				<verse number="39">巴蘭 跈 巴勒 到 胡瑣 城。</verse>
				<verse number="40">巴勒 在該位㓾牛羊，將肉送給 巴蘭 㧯跈佢共下來該兜領袖。</verse>
				<verse number="41">第二朝晨， 巴勒 帶 巴蘭 上到 巴莫‧巴力 去；對該位 巴蘭 看到部份个 以色列 人。</verse>
			</chapter>
			<chapter number="23">
				<verse number="1">巴蘭 對 巴勒 講：「你愛在這位為𠊎起七座祭壇，又為𠊎準備七隻牛牯㧯七隻羊牯。」</verse>
				<verse number="2">巴勒 照佢吩咐去做；佢㧯 巴蘭 在逐座祭壇獻一隻牛牯㧯一隻羊牯。</verse>
				<verse number="3">巴蘭 對 巴勒 講：「你企在你个燒化祭堘頭；𠊎去看上主愛見𠊎麼。佢啟示𠊎麼介，𠊎一定㧯你講。」所以 巴蘭 單儕上到山頂。</verse>
				<verse number="4">上帝向 巴蘭 顯現； 巴蘭 講：「𠊎已經起七座祭壇，在逐座祭壇獻一隻牛牯㧯一隻羊牯。」</verse>
				<verse number="5">上主㧯 巴蘭 講應該講个話，然後喊佢倒轉 巴勒 該位去，將上主个話㧯 巴勒 講。</verse>
				<verse number="6">巴蘭 轉去，發現 巴勒 㧯所有 摩押 个領袖還企在燒化祭堘頭。</verse>
				<verse number="7">巴蘭 就講出以下个預言： 「 摩押 王 巴勒 帶𠊎出 敘利亞 ， 帶𠊎出東片个山。 佢講：『來啊，為𠊎咒詛 雅各 ； 來啊，為𠊎咒罵 以色列 。』</verse>
				<verse number="8">上帝無咒詛个，𠊎樣做得咒詛？ 上主無咒罵个，𠊎樣做得咒罵？</verse>
				<verse number="9">𠊎對高山頂看佢等； 𠊎對山岡頂見佢等。 佢等係一個㧯萬民無共樣个國家； 佢等比別个國家還較蒙福。</verse>
				<verse number="10">雅各 个子孫像泥沙恁樣； 以色列 个後代多到無法度計算。 俾𠊎像上帝个子民恁樣結束一生； 𠊎願像義人恁樣平安過身。」</verse>
				<verse number="11">巴勒 對 巴蘭 講：「你對𠊎做个係麼介？𠊎帶你到這位來咒詛𠊎个敵人，你反轉卻祝福佢等！」</verse>
				<verse number="12">巴蘭 應講：「𠊎單淨做得講上主愛𠊎講个話！」</verse>
				<verse number="13">巴勒 對 巴蘭 講：「你跈𠊎到另外一個地方去，對該位你只有看得到部份个 以色列 人。你愛在該位為𠊎咒詛佢等！」</verse>
				<verse number="14">佢帶 巴蘭 到 比斯迦 山頂高个 瑣腓田 ，在該位也起七座祭壇，在逐座祭壇獻一隻牛牯㧯一隻羊牯。</verse>
				<verse number="15">巴蘭 對 巴勒 講：「你企在你个燒化祭堘頭，𠊎到該片去見上帝。」</verse>
				<verse number="16">上主向 巴蘭 顯現，㧯佢講應該講个話，然後喊佢倒轉 巴勒 該位去，將上主个話㧯 巴勒 講。</verse>
				<verse number="17">巴蘭 轉去，發現 巴勒 㧯 摩押 該兜領袖還企在燒化祭堘頭。 巴勒 問佢上主講麼介話，</verse>
				<verse number="18">巴蘭 就講出以下个預言： 「來啊， 西撥 个孻仔 巴勒 ； 你來聽𠊎愛講个話。</verse>
				<verse number="19">上帝㧯人無共樣，佢毋講花撩； 佢毋像普通人，佢毋會改變主意。 佢答應个事，一定做到； 佢一講話，事就完成。</verse>
				<verse number="20">𠊎奉主命令來祝福； 上帝賜个恩典，𠊎無法度收轉來。</verse>
				<verse number="21">𠊎看出 雅各 个將來， 以色列 無災難，也無災禍。 上主 — 佢等个上帝㧯佢等同在； 佢等歡喜慶祝上主做佢等个王。</verse>
				<verse number="22">上帝𢱋佢等出 埃及 ； 佢打退 埃及 ，就像野牛恁有力。</verse>
				<verse number="23">法術無法度害 雅各 ； 卜卦也無辦法害 以色列 。 這下，人愛談論 雅各 ， 就係談論 以色列 ，講： 『看哪，上帝成就偉大个事！』</verse>
				<verse number="24">以色列 人像母獅企起來， 就像公獅䟘起來尋食； 牠若無食掉獵物个肉， 無啉到獵物个血，牠絕對毋肯停。」</verse>
				<verse number="25">巴勒 對 巴蘭 講：「你毋咒詛 以色列 人，至少也毋應該祝福佢等啊！」</verse>
				<verse number="26">巴蘭 應講：「𠊎毋係有㧯你講過，𠊎一定愛照上主所講个話做！」</verse>
				<verse number="27">巴勒 對 巴蘭 講：「跈𠊎來！𠊎愛帶你到另外一個地方；有可能上帝會俾你在該位為𠊎咒詛佢等。」</verse>
				<verse number="28">巴勒 就帶 巴蘭 到該遠遠看得到曠野个 批珥 山頂高。</verse>
				<verse number="29">巴蘭 對 巴勒 講：「你愛在這位為𠊎起七座祭壇，又為𠊎準備七隻牛牯㧯七隻羊牯。」</verse>
				<verse number="30">巴勒 照 巴蘭 个話去做，在逐座祭壇獻一隻牛牯㧯一隻羊牯。</verse>
			</chapter>
			<chapter number="24">
				<verse number="1">巴蘭 已經看出上主愛佢祝福 以色列 人，所以佢這擺無像以前恁樣去求兆頭。佢个面轉向曠野，</verse>
				<verse number="2">看到 以色列 人逐支族安營在該位。上帝个靈臨到佢，</verse>
				<verse number="3">佢就講出以下个預言： 「 比珥 个孻仔 巴蘭 个預言， 該看盡清楚 个人講：</verse>
				<verse number="4">𠊎聽到上帝所講个話， 𠊎看到該對全能者來个異象， 𠊎就伏下去，目珠打開。</verse>
				<verse number="5">雅各 啊，你个帳篷盡靚！ 以色列 啊，你个營帳也當好看！</verse>
				<verse number="6">它兜像一排一排个棕樹， 像河壩滣个花園， 像上主親手種个沉香樹， 也像水滣个香柏樹。</verse>
				<verse number="7">水會對佢等个桶流出來； 佢等个種子會委在溼潤个田肚。 佢等个王會比 亞甲 偉大； 佢个國會向四方發展。</verse>
				<verse number="8">上帝𢱋佢等出 埃及 ， 佢打退 埃及 ，就像野牛恁有力。 佢等會吞滅仇敵， 磧碎佢等个骨頭， 拗斷佢等个箭。</verse>
				<verse number="9">這個國家像公獅伏等； 像母獅睡等，無人敢吵到牠。 祝福 以色列 个，一定有福氣； 咒詛 以色列 个，一定有災難。」</verse>
				<verse number="10">巴勒 大發譴揢等拳頭，對 巴蘭 講：「𠊎喊你來咒詛𠊎个仇敵，你顛倒三擺祝福佢等。</verse>
				<verse number="11">你轉去！𠊎想愛大大答謝你，總係上主毋俾你得到。」</verse>
				<verse number="12">巴蘭 應講：「𠊎敢毋係對你派來个使者講：</verse>
				<verse number="13">『就算 巴勒 將王宮所有个金銀給𠊎，𠊎也做毋得照自家个意思來違背上主个命令。𠊎單淨做得講上主愛𠊎講个話。』」</verse>
				<verse number="14">巴蘭 對 巴勒 講：「𠊎這下愛轉到𠊎同胞該位去。離開以前，𠊎愛警告你，俾你知將來 以色列 人愛樣般對待你个人民。」</verse>
				<verse number="15">所以 巴蘭 講出以下个預言： 「 比珥 个孻仔 巴蘭 个預言， 該看盡清楚 个人講：</verse>
				<verse number="16">𠊎聽到上帝所講个話， 得到對至高者來个知識； 𠊎看到該對全能者來个異象， 𠊎就伏下去，目珠打開。</verse>
				<verse number="17">𠊎看遠遠个將來； 𠊎看到一儕人。 有一粒星仔愛對 雅各 出來； 有一個君王愛對 以色列 興起。 佢愛打碎 摩押 个領袖， 毀滅所有个 西珥 人。</verse>
				<verse number="18">佢愛征服 以東 ， 佔領 西珥 、這仇敵个土地。 以色列 會常常得勝。</verse>
				<verse number="19">有一儕愛對 雅各 出來掌權， 將城肚賸到个人除淨淨。」</verse>
				<verse number="20">後來， 巴蘭 在異象中看到 亞瑪力 人，就講出以下个預言： 「 亞瑪力 本係最強大个國家， 總係最後一定會滅亡。」</verse>
				<verse number="21">巴蘭 在異象中看到 基尼 人，就講出以下个預言： 「你住个所在本來係安全， 像做在巖石壁頂个竇。</verse>
				<verse number="22">總係你等 基尼 人會消滅； 亞述 人會將你等捉走。」</verse>
				<verse number="23">巴蘭 又講預言： 「噯！上帝行這兜事，麼人會生下去呢？</verse>
				<verse number="24">對 基提 有侵略者坐船來； 佢等會征服 亞述 㧯 希伯 ， 總係佢等也一定會消滅。」</verse>
				<verse number="25">然後， 巴蘭 就轉屋下， 巴勒 也轉去。</verse>
			</chapter>
			<chapter number="25">
				<verse number="1">以色列 人在 什亭 安營个時，有人㧯該位个 摩押 婦人家行姦淫。</verse>
				<verse number="2">該兜婦人家請佢等參加 摩押 人拜神明个祭典。 以色列 人食祭物，也拜 批珥 地方个神明 巴力 ；所以，上主向佢等發譴。</verse>
				<verse number="3"></verse>
				<verse number="4">上主吩咐 摩西 講：「你愛照𠊎个話，在日頭下將這兜 以色列 領袖吊死，𠊎就毋會繼續向 以色列 人發譴。」</verse>
				<verse number="5">摩西 對 以色列 个審判官講：「你等逐儕愛將你等支族當中拜 巴力 該兜人㓾掉。」</verse>
				<verse number="6">有一個 以色列 人在 摩西 㧯 以色列 全會眾面前，將一個 米甸 婦人家帶入佢个帳篷；該時，會眾堵好在聖帳篷門口悲傷哀噭。</verse>
				<verse number="7">祭司 亞倫 个孫仔， 以利亞撒 个孻仔 非尼哈 看到，就企起來，離開會眾。佢拿一支槍，</verse>
				<verse number="8">跈等該 以色列 人㧯該婦人家入去帳篷，用槍將佢兩儕對肚笥刺過去死掉。恁樣，該在 以色列 人當中流行个瘟仔就停止；</verse>
				<verse number="9">總係因為發瘟死掉个已經有兩萬四千人。</verse>
				<verse number="10">上主對 摩西 講：</verse>
				<verse number="11">「因為祭司 亞倫 个孫仔， 以利亞撒 个孻仔 非尼哈 所做个事，𠊎就毋會繼續向 以色列 人發譴。佢對𠊎盡熱心，只有准人拜𠊎，毋准人拜別个神明，𠊎正無大發譴來毀滅佢等。</verse>
				<verse number="12">你㧯佢講，𠊎愛㧯佢立平安个約。</verse>
				<verse number="13">佢㧯佢个後代愛永遠做祭司；因為佢對𠊎盡熱心，也為 以色列 人贖罪。」</verse>
				<verse number="14">該㧯 米甸 婦人家共下被人㓾死个 以色列 人安到 心利 ，係 撒路 个孻仔， 西緬 支族一個家族个族長。</verse>
				<verse number="15">該被人㓾死个 米甸 婦人家安到 哥斯比 ；姖个阿爸 蘇珥 係 米甸 一個部落个領袖。</verse>
				<verse number="16">上主命令 摩西 ：</verse>
				<verse number="17">「你愛攻打 米甸 人，將佢等消滅；</verse>
				<verse number="18">因為佢等在 批珥 用詭計陷害你等，也係因為佢等个姊妹、該 米甸 領袖个妹仔 哥斯比 ，在 批珥 發瘟當厲害个時被人刺死。」</verse>
			</chapter>
			<chapter number="26">
				<verse number="1">發瘟停掉以後，上主對 摩西 㧯祭司 亞倫 个孻仔 以利亞撒 講：</verse>
				<verse number="2">「你等愛調查 以色列 全會眾个人口，愛一家族一家族調查，將二十歲以上、會相㓾个男人登記下來算人數。」</verse>
				<verse number="3">摩西 㧯祭司 以利亞撒 就召集所有二十歲以上个男人。佢等聚集在 耶利哥 對岸 約旦 河壩滣个 摩押 平原。 對 埃及 出來个 以色列 人有這兜：</verse>
				<verse number="4"></verse>
				<verse number="5">呂便 支族 ( 呂便 係 以色列 个長子)：包含 哈諾 、 法路 、</verse>
				<verse number="6">希斯崙 、 迦米 等宗族；</verse>
				<verse number="7">登記个人數一共有四萬三千七百三十人。</verse>
				<verse number="8">法路 个後代有 以利押 ，</verse>
				<verse number="9">㧯 以利押 个孻仔 尼母利 、 大坍 、 亞比蘭 。 ( 大坍 㧯 亞比蘭 係會眾選出來个；佢等反抗 摩西 㧯 亞倫 ，加入 可拉 一黨，悖逆上主。</verse>
				<verse number="10">地裂開吞掉佢等。當火消滅兩百五十人个時，佢等㧯 可拉 共黨个人共下死掉，成做民眾个警戒。</verse>
				<verse number="11">總係 可拉 該兜孻仔無死。)</verse>
				<verse number="12">西緬 支族：包含 尼母利 、 雅憫 、 雅斤 、</verse>
				<verse number="13">謝拉 、 少羅 等宗族；</verse>
				<verse number="14">登記个人數一共有兩萬兩千兩百人。</verse>
				<verse number="15">迦得 支族：包含 洗分 、 哈基 、 書尼 、</verse>
				<verse number="16">阿斯尼 、 以利 、</verse>
				<verse number="17">亞律 、 亞列利 等宗族；</verse>
				<verse number="18">登記个人數一共有四萬零五百人。</verse>
				<verse number="19">猶大 支族：包含 示拉 、 法勒斯 、 謝拉 、 希斯崙 、 哈母勒 等宗族。 ( 猶大 个兩個孻仔 珥 㧯 俄南 已經死在 迦南 地。)</verse>
				<verse number="20"></verse>
				<verse number="21"></verse>
				<verse number="22">這兜宗族登記个人數一共有七萬六千五百人。</verse>
				<verse number="23">以薩迦 支族：包含 陀拉 、 普瓦 、</verse>
				<verse number="24">雅述 、 伸崙 等宗族；</verse>
				<verse number="25">登記个人數一共有六萬四千三百人。</verse>
				<verse number="26">西布倫 支族：包含 西烈 、 以倫 、 雅利 等宗族；</verse>
				<verse number="27">登記个人數一共有六萬零五百人。</verse>
				<verse number="28">約瑟 有兩個孻仔 — 瑪拿西 㧯 以法蓮 — 所以分做兩隻支族。</verse>
				<verse number="29">瑪拿西 支族： 瑪拿西 𫱔 瑪吉 ， 瑪吉 𫱔 基列 。</verse>
				<verse number="30">基列 係 伊以謝 、 希勒 、</verse>
				<verse number="31">亞斯烈 、 示劍 、</verse>
				<verse number="32">示米大 、 希弗 各宗族个祖先。</verse>
				<verse number="33">希弗 个孻仔 西羅非哈 無孻仔，只有妹仔；姖等个名安到 瑪拉 、 挪阿 、 曷拉 、 密迦 㧯 得撒 。</verse>
				<verse number="34">這兜宗族登記个人數一共有五萬兩千七百人。</verse>
				<verse number="35">以法蓮 支族：包含 書提拉 、 比結 、 他罕 等宗族，</verse>
				<verse number="36">還有 書提拉 个後代 以蘭 宗族。</verse>
				<verse number="37">這兜宗族登記个人數一共有三萬兩千五百人。 以上這兜宗族係 約瑟 个後代。</verse>
				<verse number="38">便雅憫 支族：包含 比拉 、 亞實別 、 亞希蘭 、</verse>
				<verse number="39">書反 、 戶反 等宗族，</verse>
				<verse number="40">還有 比拉 个後代 亞勒 㧯 乃幔 兩宗族。</verse>
				<verse number="41">這兜宗族登記个人數一共有四萬五千六百人。</verse>
				<verse number="42">但 支族：有 書含 宗族；</verse>
				<verse number="43">登記个人數一共有六萬四千四百人。</verse>
				<verse number="44">亞設 支族：包含 音拿 、 亦施韋 、 比利亞 等宗族；</verse>
				<verse number="45">還有 比利亞 个後代 希別 㧯 馬結 兩宗族。</verse>
				<verse number="46">亞設 有一個妹仔安到 西拉 。</verse>
				<verse number="47">這兜宗族登記个人數一共有五萬三千四百人。</verse>
				<verse number="48">拿弗他利 支族：包含 雅薛 、 沽尼 、</verse>
				<verse number="49">耶色 、 示冷 等宗族；</verse>
				<verse number="50">登記个人數一共有四萬五千四百人。</verse>
				<verse number="51">以色列 人登記个人數總共有六十萬一千七百三十人。</verse>
				<verse number="52">上主對 摩西 講：</verse>
				<verse number="53">「你愛照各支族个人數分配土地，</verse>
				<verse number="54">用抽籤个方式將闊个土地給人數多个支族，狹个土地給人數少个支族。愛照祖先各支族个名分配土地。」</verse>
				<verse number="55"></verse>
				<verse number="56"></verse>
				<verse number="57">利未 支族有 革順 、 哥轄 、 米拉利 三宗族。</verse>
				<verse number="58">佢等个後代有 立尼 、 希伯倫 、 瑪利 、 母示 、 可拉 等宗族。 哥轄 𫱔 暗蘭 。</verse>
				<verse number="59">暗蘭 討出世在 埃及 个 利未 个妹仔 約基別 。姖㧯 暗蘭 𫱔兩個孻仔 — 亞倫 㧯 摩西 ，並佢等个阿姊 美莉安 。</verse>
				<verse number="60">亞倫 有四個孻仔 — 拿答 、 亞比戶 、 以利亞撒 、 以他瑪 。</verse>
				<verse number="61">拿答 㧯 亞比戶 在獻無合法个火給上主个時死掉。</verse>
				<verse number="62">出世一隻月以上个男人， 利未 支族一共有兩萬三千人。佢等㧯其他个 以色列 人分開登記，因為佢等在 以色列 中無分到產業。</verse>
				<verse number="63">以色列 人在 耶利哥 對岸 約旦 河滣个 摩押 平原个時， 摩西 㧯祭司 以利亞撒 完成人口調查。以上各宗族个人口就係佢等所登記个，</verse>
				<verse number="64">底背無一個係以前 摩西 㧯祭司 亞倫 在 西奈 曠野第一擺人口調查个時所登記个 以色列 人。</verse>
				<verse number="65">上主識講過，佢等全部會死在曠野；除了 耶孚尼 个孻仔 迦勒 㧯 嫩 个孻仔 約書亞 以外，其他个一個都無賸。</verse>
			</chapter>
			<chapter number="27">
				<verse number="1">西羅非哈 該兜妹仔係 瑪拉 、 挪阿 、 曷拉 、 密迦 㧯 得撒 。 西羅非哈 个阿爸係 希弗 ； 希弗 个阿爸係 基列 ； 基列 个阿爸係 瑪吉 ； 瑪吉 个阿爸係 瑪拿西 ； 瑪拿西 个阿爸係 約瑟 。</verse>
				<verse number="2">西羅非哈 个五個妹仔到上主个聖帳篷門口，企在 摩西 㧯祭司 以利亞撒 ，還有各領袖㧯全會眾面前，對佢等講：</verse>
				<verse number="3">「𠊎等个阿爸死在曠野，無孻仔。佢無㧯悖逆上主个 可拉 共黨。佢係因為自家个罪死个。</verse>
				<verse number="4">敢講因為𠊎等个阿爸無孻仔，就愛對 以色列 中將佢个名除掉，係麼？求你等俾𠊎等在阿爸个親屬中有好分產業。」</verse>
				<verse number="5">摩西 向上主講姖等个案件。</verse>
				<verse number="6">上主對佢講：</verse>
				<verse number="7">「 西羅非哈 該兜妹仔所要求个係著个。你一定愛對姖等阿爸个親屬中將產業分給姖等，俾姖等承接阿爸个產業。</verse>
				<verse number="8">你愛㧯 以色列 人講，若係有人死掉，總係無孻仔，就愛將佢个產業俾佢个妹仔承接。</verse>
				<verse number="9">若係佢無妹仔，就俾佢个兄弟承接；</verse>
				<verse number="10">若係佢無兄弟，就俾阿伯、阿叔承接。</verse>
				<verse number="11">若係佢連阿伯、阿叔也無，就愛俾佢親族中最親个親人，來承接佢个產業。這愛成做 以色列 人个法律。𠊎係上主；𠊎恁樣吩咐你。」</verse>
				<verse number="12">上主對 摩西 講：「你愛上這 亞巴琳 山，遠遠看𠊎賜給 以色列 人个土地。</verse>
				<verse number="13">你看過以後，就會轉到若祖宗該位，像若哥 亞倫 共樣。</verse>
				<verse number="14">因為你兩儕在 尋 个曠野違背𠊎个命令。當全會眾在 米利巴 怪怨𠊎个時，你無在佢等面前尊𠊎為聖。」 ( 米利巴 係 尋 个曠野 加低斯 个泉水。)</verse>
				<verse number="15">摩西 祈禱講：</verse>
				<verse number="16">「主上帝啊，你係所有生命个源頭。求你指派一儕做全會眾个領袖，</verse>
				<verse number="17">能在佢等面前來出入，也會帶領佢等相㓾，使你个子民毋會像無牧人个羊群。」</verse>
				<verse number="18">上主對 摩西 講：「 嫩 个孻仔 約書亞 係有聖靈个人；你愛按手在佢頭那頂。</verse>
				<verse number="19">你愛喊佢企在祭司 以利亞撒 㧯全會眾頭前宣告佢係你个繼承人。</verse>
				<verse number="20">你愛將你个權力分給佢，使 以色列 全會眾順服佢。</verse>
				<verse number="21">佢愛企在祭司 以利亞撒 个面前； 以利亞撒 愛用烏陵 來判斷𠊎个旨意。恁樣， 約書亞 㧯 以色列 全會眾愛遵守 以利亞撒 个命令來出入。」</verse>
				<verse number="22">摩西 就遵照上主个命令去做。佢喊 約書亞 企在祭司 以利亞撒 㧯全會眾面前，</verse>
				<verse number="23">照上主个命令，按手在 約書亞 頭那頂，宣告佢係自家个繼承人。</verse>
			</chapter>
			<chapter number="28">
				<verse number="1">上主命令 摩西 ，</verse>
				<verse number="2">愛指示 以色列 人在規定个時間向上帝獻食物，就係佢歡喜个清香火祭。</verse>
				<verse number="3">以下係一定愛獻給上主个火祭：逐日个燒化祭愛獻兩隻一歲大、無缺點个細羊牯，</verse>
				<verse number="4">朝晨獻一隻，臨暗仔獻一隻，</verse>
				<verse number="5">逐隻㧯一公斤幼麵粉攪一公升純橄欖油个素祭共下獻。</verse>
				<verse number="6">這種平常愛獻个燒化祭第一擺係在 西奈 山獻个。所獻个係上主所歡喜个清香火祭。</verse>
				<verse number="7">你愛㧯第一隻羊共下獻祭酒給上主，就係愛將一公升酒洒在祭壇頂。</verse>
				<verse number="8">臨暗仔獻第二隻羊，也㧯朝晨獻个方法共樣，愛㧯素祭並祭酒共下獻，做清香个火祭，使上主歡喜。</verse>
				<verse number="9">在安息日，愛獻兩隻一歲大、無缺點个細羊牯，兩公斤幼麵粉攪橄欖油个素祭、㧯祭酒。</verse>
				<verse number="10">除了平常愛獻个燒化祭㧯祭酒以外，逐擺安息日還愛獻安息日个燒化祭。</verse>
				<verse number="11">逐隻月个初一愛獻燒化祭給上主：兩隻細牛牯，一隻綿羊牯，七隻一歲大个細羊牯，全部愛無缺點个。</verse>
				<verse number="12">愛用素祭㧯燒化祭共下獻：逐隻牛牯愛配三公斤攪橄欖油个幼麵粉；該隻綿羊牯配兩公斤攪橄欖油个幼麵粉；</verse>
				<verse number="13">逐隻細羊牯配一公斤攪橄欖油个幼麵粉。愛獻這清香个燒化祭，使上主歡喜。</verse>
				<verse number="14">也愛用祭酒㧯燒化祭共下獻：逐隻牛牯配兩公升酒；該隻綿羊牯配一公升半酒；逐隻細羊牯配一公升酒。這係逐隻月初一獻燒化祭个條例，一年十二隻月全部恁樣。</verse>
				<verse number="15">除了平常愛獻个燒化祭㧯祭酒以外，還愛獻一隻山羊牯做贖罪祭給上主。</verse>
				<verse number="16">正月十四愛舉行紀念上主个𨃟過節。</verse>
				<verse number="17">對十五開始，連等七日愛有敬拜个聖會；這七日當中，單淨做得食無酵餅。</verse>
				<verse number="18">你等在聖會个第一日愛聚集敬拜，日常一切个工作都毋好做。</verse>
				<verse number="19">愛獻燒化祭做清香个火祭，使上主歡喜。愛獻兩隻細牛牯，一隻綿羊牯，七隻一歲大个細羊牯，全部愛無缺點个。</verse>
				<verse number="20">也愛獻幼麵粉攪橄欖油个素祭：逐隻牛牯配三公斤幼麵粉；該隻綿羊牯配兩公斤幼麵粉；</verse>
				<verse number="21">逐隻細羊牯配一公斤幼麵粉。</verse>
				<verse number="22">又愛獻一隻山羊牯做贖罪祭，為人民行潔淨禮。</verse>
				<verse number="23">除了朝晨平常愛獻个燒化祭以外，還愛獻這兜祭。</verse>
				<verse number="24">共樣，除了平常愛獻个燒化祭㧯祭酒以外，連等七日，逐日愛獻上主所歡喜个清香火祭。</verse>
				<verse number="25">第七日愛聚集敬拜，日常一切个工作都毋好做。</verse>
				<verse number="26">你等愛在七七收割節个第一日，將新收成个五榖做素祭獻給上主；你等愛聚集敬拜，日常一切个工作都毋好做。</verse>
				<verse number="27">你等愛獻清香个燒化祭，使上主歡喜。愛獻兩隻細牛牯，一隻綿羊牯，七隻一歲大个細羊牯，全部愛無缺點个。</verse>
				<verse number="28">也愛獻幼麵粉攪橄欖油个素祭：逐隻牛牯愛配三公斤幼麵粉；該隻綿羊牯配兩公斤幼麵粉；</verse>
				<verse number="29">逐隻細羊牯配一公斤幼麵粉。</verse>
				<verse number="30">又愛獻一隻山羊牯做贖罪祭，為人民行潔淨禮。</verse>
				<verse number="31">除了這兜祭㧯祭酒以外，平常愛獻个燒化祭㧯素祭照常愛獻；頭牲全部愛無缺點个。</verse>
			</chapter>
			<chapter number="29">
				<verse number="1">七月初一，你等愛聚集敬拜，日常一切个工作都毋好做。該日，愛歕羊角，</verse>
				<verse number="2">又獻上主所歡喜个清香燒化祭：一隻細牛牯，一隻綿羊牯，七隻一歲大个細羊牯，全部愛無缺點个。</verse>
				<verse number="3">也愛獻幼麵粉攪橄欖油个素祭：該隻牛牯愛配三公斤幼麵粉；該隻綿羊牯配兩公斤幼麵粉；</verse>
				<verse number="4">逐隻細羊牯配一公斤幼麵粉。</verse>
				<verse number="5">又愛獻一隻山羊牯做贖罪祭，為人民行潔淨禮。</verse>
				<verse number="6">除了這兜以外，逐隻月初一應該獻个燒化祭㧯素祭，並平常愛獻个燒化祭、素祭㧯祭酒照常愛來獻。這兜係上主所歡喜个清香火祭。</verse>
				<verse number="7">七月初十，你等愛聚集敬拜；愛禁食、刻苦自家，日常一切个工作都毋好做。</verse>
				<verse number="8">你等愛向上主獻清香个燒化祭：一隻細牛牯，一隻綿羊牯，七隻一歲大个細羊牯，全部愛無缺點个。</verse>
				<verse number="9">也愛獻幼麵粉攪橄欖油个素祭：該隻牛牯愛配三公斤幼麵粉；該隻綿羊牯配兩公斤幼麵粉；</verse>
				<verse number="10">逐隻細羊牯配一公斤幼麵粉。</verse>
				<verse number="11">除了為人民行潔淨禮所獻个山羊牯㧯平常愛獻个燒化祭、素祭㧯祭酒以外，還愛獻一隻山羊牯做贖罪祭。</verse>
				<verse number="12">七月十五，你等愛聚集敬拜，慶祝節期七日來紀念上主，日常一切个工作都毋好做。</verse>
				<verse number="13">在節期个第一日，你等愛獻燒化祭，做清香个火祭，使上主歡喜。愛獻十三隻細牛牯，兩隻綿羊牯，十四隻一歲大个細羊牯，全部愛無缺點个。</verse>
				<verse number="14">也愛獻幼麵粉攪橄欖油个素祭：逐隻牛牯配三公斤幼麵粉；逐隻綿羊牯配兩公斤幼麵粉；</verse>
				<verse number="15">逐隻細羊牯配一公斤幼麵粉。</verse>
				<verse number="16">除了平常愛獻个燒化祭、素祭㧯祭酒以外，還愛獻一隻山羊牯做贖罪祭。</verse>
				<verse number="17">節期个第二日，你等愛獻十二隻細牛牯，兩隻綿羊牯，十四隻一歲大个細羊牯，全部愛無缺點个。</verse>
				<verse number="18">也愛照細牛牯、綿羊牯㧯細羊牯个數目獻所配合个素祭㧯祭酒。</verse>
				<verse number="19">除了平常愛獻个燒化祭、素祭㧯祭酒以外，還愛獻一隻山羊牯做贖罪祭。</verse>
				<verse number="20">節期个第三日，你等愛獻十一隻細牛牯，兩隻綿羊牯，十四隻一歲大个細羊牯，全部愛無缺點个。</verse>
				<verse number="21">也愛照細牛牯、綿羊牯㧯細羊牯个數目獻所配合个素祭㧯祭酒。</verse>
				<verse number="22">除了平常愛獻个燒化祭、素祭㧯祭酒以外，還愛獻一隻山羊牯做贖罪祭。</verse>
				<verse number="23">節期个第四日，你等愛獻十隻細牛牯，兩隻綿羊牯，十四隻一歲大个細羊牯，全部愛無缺點个。</verse>
				<verse number="24">也愛照細牛牯、綿羊牯㧯細羊牯个數目獻所配合个素祭㧯祭酒。</verse>
				<verse number="25">除了平常愛獻个燒化祭、素祭㧯祭酒以外，還愛獻一隻山羊牯做贖罪祭。</verse>
				<verse number="26">節期个第五日，你等愛獻九隻細牛牯，兩隻綿羊牯，十四隻一歲大个細羊牯，全部愛無缺點个。</verse>
				<verse number="27">也愛照細牛牯、綿羊牯㧯細羊牯个數目獻所配合个素祭㧯祭酒。</verse>
				<verse number="28">除了平常愛獻个燒化祭、素祭㧯祭酒以外，還愛獻一隻山羊牯做贖罪祭。</verse>
				<verse number="29">節期个第六日，你等愛獻八隻細牛牯，兩隻綿羊牯，十四隻一歲大个細羊牯，全部愛無缺點个。</verse>
				<verse number="30">也愛照細牛牯、綿羊牯㧯細羊牯个數目獻所配合个素祭㧯祭酒。</verse>
				<verse number="31">除了平常愛獻个燒化祭、素祭㧯祭酒以外，還愛獻一隻山羊牯做贖罪祭。</verse>
				<verse number="32">節期个第七日，你等愛獻七隻細牛牯，兩隻綿羊牯，十四隻一歲大个細羊牯，全部愛無缺點个。</verse>
				<verse number="33">也愛照細牛牯、綿羊牯㧯細羊牯个數目獻所配合个素祭㧯祭酒。</verse>
				<verse number="34">除了平常愛獻个燒化祭、素祭㧯祭酒以外，還愛獻一隻山羊牯做贖罪祭。</verse>
				<verse number="35">節期个第八日，你等愛聚集敬拜，日常一切个工作都毋好做。</verse>
				<verse number="36">愛獻燒化祭做清香个火祭，使上主歡喜。愛獻一隻細牛牯，一隻綿羊牯，七隻一歲大个細羊牯，全部愛無缺點个。</verse>
				<verse number="37">也愛照細牛牯、綿羊牯㧯細羊牯个數目獻所配合个素祭㧯祭酒。</verse>
				<verse number="38">除了平常愛獻个燒化祭、素祭㧯祭酒以外，還愛獻一隻山羊牯做贖罪祭。</verse>
				<verse number="39">這兜係有關你等在規定个節期應該向上主獻燒化祭、素祭、祭酒、㧯平安祭个條例。這兜係你等還願㧯甘心獻个祭以外固定愛獻个。</verse>
				<verse number="40">摩西 就將上主命令佢个話全部吩咐 以色列 人。</verse>
			</chapter>
			<chapter number="30">
				<verse number="1">摩西 將以下个指示交給 以色列 逐支族个領袖。上主所命令个就係恁樣：</verse>
				<verse number="2">有人向上主許願，抑係發誓來約束自家，攏總做毋得失信，一定愛照佢所講个去做。</verse>
				<verse number="3">細妹仔還在阿爸屋下个時，若係向上主許願，抑係發誓來約束自家，</verse>
				<verse number="4">除非厥爸聽到个時反對，姖就一定愛照所許个願去做，抑係照所發个誓來約束自家。</verse>
				<verse number="5">若係厥爸聽到个時毋准姖還願抑係約束自家，姖就毋使遵守。上主會原諒姖，因為厥爸毋准姖遵守。</verse>
				<verse number="6">若係吂結婚个細妹仔許願，抑係亂發誓來約束自家，結婚以後，</verse>
				<verse number="7">除非厥老公聽到个時反對，姖就一定愛照所許个願去做，抑係照所發个誓來約束自家。</verse>
				<verse number="8">若係厥老公聽到个時毋准姖還願抑係約束自家，姖就毋使遵守。上主會原諒姖。</verse>
				<verse number="9">寡婦抑係離婚个婦人家所許个願，抑係發誓愛約束自家个話，全部愛遵守。</verse>
				<verse number="10">若係已經結婚个婦人家許願，抑係發誓愛約束自家，</verse>
				<verse number="11">除非厥老公聽到个時反對，姖就一定愛照所許个願去做，抑係照所發个誓來約束自家。</verse>
				<verse number="12">若係厥老公聽到个時毋准姖還願抑係約束自家，姖就毋使遵守。上主會原諒姖，因為厥老公毋准姖遵守。</verse>
				<verse number="13">厥老公有權確認抑係取消姖所許个願㧯所發个誓。</verse>
				<verse number="14">總係，厥老公聽到姖許願，一日過一日恬恬無反對，姖就一定愛照所許个願去做，抑係照所發个誓來約束自家。厥老公在聽到姖許願該日無反對，就係確認姖所許个願。</verse>
				<verse number="15">後來，若係厥老公取消姖所許个願抑係所發个誓，老公就愛擔當厥𡜵娘个罪孽。</verse>
				<verse number="16">這係上主交給 摩西 有關住在阿爸屋下吂結婚个細妹仔抑係已經結婚个婦人家許願㧯發誓个條例。</verse>
			</chapter>
			<chapter number="31">
				<verse number="1">上主對 摩西 講：</verse>
				<verse number="2">「你愛因 米甸 人欺騙 以色列 人來刑罰佢等；你做這事以後就會轉到若祖宗該位。」</verse>
				<verse number="3">所以 摩西 對人民講：「你等愛預備相㓾，去攻打 米甸 人，為上主報仇。</verse>
				<verse number="4">以色列 逐支族愛派出一千人參加戰爭。」</verse>
				<verse number="5">所以，逐支族選出一千人，參加戰爭个人數總共一萬兩千人。</verse>
				<verse number="6">摩西 就派逐支族个一千人去相㓾，又派祭司 以利亞撒 个孻仔 非尼哈 做佢等个元帥； 非尼哈 帶等聖所个用品㧯歕戰爭警報个喇叭。</verse>
				<verse number="7">佢等遵照上主給 摩西 个命令攻打 米甸 人，㓾掉佢等所有个壯丁，</verse>
				<verse number="8">包含 米甸 个五個王 — 以未 、 利金 、 蘇珥 、 戶珥 、 利巴 。佢等也㓾死 比珥 个孻仔 巴蘭 。</verse>
				<verse number="9">以色列 人捉 米甸 人个婦人家㧯細人仔，搶佢等个牛羊㧯佢等所有个財寶，</verse>
				<verse number="10">燒掉佢等所住个城㧯所有个營地。</verse>
				<verse number="11">佢等將搶來个戰利品，連人㧯頭牲全部帶走，</verse>
				<verse number="12">帶到佢等在 耶利哥 對岸 約旦 河滣 摩押 平原个營地，交給 摩西 、祭司 以利亞撒 ，㧯 以色列 全會眾。</verse>
				<verse number="13">摩西 、祭司 以利亞撒 ，㧯所有其他領袖全部出營去迎接軍隊。</verse>
				<verse number="14">摩西 對該兜戰場轉來个軍官㧯指揮官發譴，</verse>
				<verse number="15">問佢等講：「你等做麼介留這兜婦人家个命？</verse>
				<verse number="16">愛知，就係這兜婦人家聽 巴蘭 个話，在 批珥 引誘 以色列 人悖逆上主，害上主个子民發瘟。</verse>
				<verse number="17">這下，你等愛㓾掉所有个細阿哥仔、以及識㧯男人有性關係个婦人家，</verse>
				<verse number="18">總係做得為你等自家留下所有个細阿妹仔㧯人家女。</verse>
				<verse number="19">你等當中有㓾死人个，抑係憑到屍體个，愛留在營外七日。在第三日㧯第七日，你等愛潔淨自家㧯你等捉來个人，</verse>
				<verse number="20">也愛潔淨所有布仔、皮仔、山羊毛㧯樹仔做个東西。」</verse>
				<verse number="21">祭司 以利亞撒 對該兜相㓾轉來个人講：「上主給 摩西 个條例係恁樣：</verse>
				<verse number="22">所有燒毋壞个東西，像金、銀、銅、鐵、錫、鉛，愛用火燒淨浰，另外也愛用水潔淨；其他會燒壞个東西，愛用水洗淨。</verse>
				<verse number="23"></verse>
				<verse number="24">第七日，你等一定愛潔淨自家个衫褲，恁樣你等就算淨浰，做得進入營帳。」</verse>
				<verse number="25">上主對 摩西 講：</verse>
				<verse number="26">「你㧯祭司 以利亞撒 ，並會眾个各族長愛將搶來个戰利品，連人帶頭牲全部點算一下，</verse>
				<verse number="27">然後平均分做兩半，一半給軍隊，另外一半給其他个會眾。</verse>
				<verse number="28">分給軍隊个一半中愛留下五百分之一做獻給上主个供物，就係逐五百個捉到个人中留下一儕；牛、驢、綿羊、山羊也全部恁樣。</verse>
				<verse number="29">將這兜交給祭司 以利亞撒 做獻給上主特別个供物。</verse>
				<verse number="30">分給人民个一半中，無論係捉到个人、牛、驢、綿羊、山羊、各樣頭牲，愛拿出五十分之一給管理上主聖帳篷个 利未 人。」</verse>
				<verse number="31">摩西 㧯祭司 以利亞撒 就照上主个命令去做。</verse>
				<verse number="32">除了士兵自家留下个財物，佢等搶過來个戰利品有：羊六十七萬五千隻，</verse>
				<verse number="33">牛七萬兩千隻，</verse>
				<verse number="34">驢六萬一千隻，</verse>
				<verse number="35">人家女三萬兩千人。</verse>
				<verse number="36">相㓾个軍隊得到个一半有：羊三十三萬七千五百隻，</verse>
				<verse number="37">其中六百七十五隻係獻給上主个供物；</verse>
				<verse number="38">牛三萬六千隻，其中七十二隻係獻給上主个供物；</verse>
				<verse number="39">驢三萬零五百隻，其中六十一隻係獻給上主个供物；</verse>
				<verse number="40">人家女一萬六千人，其中三十二人歸給上主。</verse>
				<verse number="41">摩西 遵照上主个命令將戰利品交給祭司 以利亞撒 做獻給上主特別个供物。</verse>
				<verse number="42">會眾得到个一半㧯軍隊得到个共樣：</verse>
				<verse number="43">羊三十三萬七千五百隻，</verse>
				<verse number="44">牛三萬六千隻，</verse>
				<verse number="45">驢三萬零五百隻，</verse>
				<verse number="46">人家女一萬六千人。</verse>
				<verse number="47">摩西 對會眾个一半中，連人帶頭牲，拿出五十分之一來，照上主个命令交給管理上主聖帳篷个 利未 人。</verse>
				<verse number="48">該兜帶領軍隊个軍官㧯指揮官去見 摩西 ，</verse>
				<verse number="49">對佢講：「𠊎等係你个僕人，𠊎等已經點算屬下个士兵，一個就無少。</verse>
				<verse number="50">所以𠊎等將逐儕搶來个金器、手鈪、手髀鈪、禁指、耳環、脖鍊，帶來獻給上主，做𠊎等生命个贖價，希望上主保佑𠊎等。」</verse>
				<verse number="51">摩西 㧯祭司 以利亞撒 接受這兜金仔，全部係手工當幼个金器。</verse>
				<verse number="52">該兜軍官㧯指揮官獻給上主个金仔大約有兩百公斤。</verse>
				<verse number="53">一般个士兵攏總將搶來个戰利品留給自家。</verse>
				<verse number="54">摩西 㧯祭司 以利亞撒 接受軍官㧯指揮官个金仔以後，就帶到聖帳篷，祈求上主保佑 以色列 人。</verse>
			</chapter>
			<chapter number="32">
				<verse number="1">呂便 㧯 迦得 兩支族有當多牛羊。佢等看到 雅謝 㧯 基列 地區係畜頭牲當好个所在，</verse>
				<verse number="2">就去見 摩西 、祭司 以利亞撒 ，㧯會眾个領袖，講：</verse>
				<verse number="3">「上主幫助 以色列 人佔領个這地區 — 就係 亞他錄 、 底本 、 雅謝 、 寧拉 、 希實本 、 以利亞利 、 示班 、 尼波 㧯 比穩 — 係畜頭牲當好个所在。你个僕人也有當多牛羊；</verse>
				<verse number="4"></verse>
				<verse number="5">你若認為𠊎等堪得，拜託將這片土地給你个僕人做產業，毋好俾𠊎等過 約旦 河去，住在該片。」</verse>
				<verse number="6">摩西 應講：「敢講你等愛留在這位、由在你等个同胞 以色列 人去相㓾係麼？</verse>
				<verse number="7">你等樣般做得害 以色列 同胞失志，毋過 約旦 河，毋進入上主所賜給佢等个該片土地呢？</verse>
				<verse number="8">𠊎派你等个祖先對 加低斯‧巴尼亞 去打探該地个時，佢等乜係恁樣。</verse>
				<verse number="9">佢等到了 以實各 山壢，看到該片土地，總係轉來个時，佢等使 以色列 人失志，毋敢進入上主賜給佢等个土地。</verse>
				<verse number="10">該日，上主發譴，發誓講：</verse>
				<verse number="11">『佢等當中二十歲以上、對 埃及 出來个人，無一儕做得進入𠊎應許給 亞伯拉罕 、 以撒 、 雅各 該垤土地，因為佢等對𠊎無忠心。』</verse>
				<verse number="12">這個話係指逐儕人講个，只有 基尼洗 族人 耶孚尼 个孻仔 迦勒 㧯 嫩 个孻仔 約書亞 無算在內，因為佢等一直對上主當忠心。</verse>
				<verse number="13">上主向 以色列 人發譴，使佢等在曠野流浪四十年，直到該代在佢面前行邪惡个人全部死掉。</verse>
				<verse number="14">這下你等又想愛跈你等个祖先，成做新一代个罪人，愛再一擺使上主向 以色列 人發譴。</verse>
				<verse number="15">若係你等 呂便 㧯 迦得 支族个人毋願意跈佢，佢會再一擺將 以色列 人㧒在曠野，你等就愛擔佢等滅亡个責任。」</verse>
				<verse number="16">佢等行近 摩西 面前，講：「求你准𠊎等在這位先為羊群圍羊圈，為𡜵娘子女起城來保護佢等，</verse>
				<verse number="17">然後𠊎等正帶 以色列 同胞上戰場，帶頭攻打，直到佢等在屬佢等个土地安定下來。同時，𠊎等个𡜵娘子女做得安全住在這保護佢等个城內，毋受這地人民个侵犯。</verse>
				<verse number="18">𠊎等愛等到 以色列 同胞佔領該分配給佢等个土地後，正會轉來自家个屋下。</verse>
				<verse number="19">𠊎等毋會㧯佢等分 約旦 河西片佔領个產業，因為𠊎等已經有 約旦 河東片个產業。」</verse>
				<verse number="20">摩西 應講：「若係你等正經愛恁樣做，就在上主面前 準備好勢去作戰啊！</verse>
				<verse number="21">你等个戰士全部愛準備好勢，在上主面前過 約旦 河，去攻打敵人，直到上主打贏佢等，</verse>
				<verse number="22">佔領該土地。然後你等就做得轉來，因為你等已經對上主㧯 以色列 同胞盡義務。上主會將 約旦 河東片个這垤土地歸給你等做產業。</verse>
				<verse number="23">總係，你等若毋守約束，就係得罪上主；你等一定會因為自家个罪受責罰，絕對走毋掉。</verse>
				<verse number="24">這下你等去為𡜵娘子女起城，為羊群圍羊圈。總係毋好毋記得你等个約束！」</verse>
				<verse number="25">迦得 㧯 呂便 支族个人對 摩西 講：「你个僕人一定會照大人个命令去做。</verse>
				<verse number="26">𠊎等个𡜵娘子女、牛群、羊群就留在 基列 這兜城鎮。</verse>
				<verse number="27">總係你个僕人、逐儕會準備好勢，在上主面前過 約旦 河去相㓾，照你所講个去做。」</verse>
				<verse number="28">所以， 摩西 吩咐祭司 以利亞撒 、 嫩 个孻仔 約書亞 ，㧯 以色列 其他支族个族長，講：</verse>
				<verse number="29">「若係 迦得 㧯 呂便 支族个人全部準備好勢，在上主面前渡過 約旦 河去相㓾，若係你等因為佢等个幫助佔領該土地，你等就愛將 基列 地區給佢等做產業。</verse>
				<verse number="30">若係佢等毋過 約旦 河㧯你等共下去相㓾，佢等就愛㧯你等共樣，在 迦南 地分到自家个產業。」</verse>
				<verse number="31">迦得 㧯 呂便 支族人應講：「你个僕人一定愛照上主个命令去做。</verse>
				<verse number="32">𠊎等會準備好勢，在上主面前過河，入 迦南 地去相㓾；恁樣，𠊎等就會得到 約旦 河東片个土地做產業。」</verse>
				<verse number="33">所以， 摩西 將 亞摩利 王 西宏 个國㧯 巴珊 王 噩 个國，連該土地㧯周圍个村莊分配給 迦得 、 呂便 兩支族，㧯 約瑟 个孻仔 瑪拿西 半支族。</verse>
				<verse number="34">迦得 支族重新起 底本 、 亞他錄 、 亞羅珥 、</verse>
				<verse number="35">亞他錄‧朔反 、 雅謝 、 約比哈 、</verse>
				<verse number="36">伯‧寧拉 、 伯‧哈蘭 這兜堅固个城；佢等又圍羊圈。</verse>
				<verse number="37">呂便 支族重新起 希實本 、 以利亞利 、 基列亭 、</verse>
				<verse number="38">尼波 、 巴力‧免 (這個名係改過个)、 西比瑪 。佢等為重建个城鎮重新安名。</verse>
				<verse number="39">瑪拿西 个孻仔 瑪吉 个宗族个人侵入 基列 地，逐走該位个 亞摩利 人，佔領佢等个土地。</verse>
				<verse number="40">所以 摩西 將 基列 給 瑪吉 族；佢等就住在該位。</verse>
				<verse number="41">瑪拿西 支族个 睚珥 佔領這兜村莊，就安這兜村莊个名做「 睚珥 村」。</verse>
				<verse number="42">挪巴 佔領 基納 㧯周圍个村莊，就用自家个名喊該兜村莊做 挪巴 。</verse>
			</chapter>
			<chapter number="33">
				<verse number="1">以下係 以色列 人照軍隊，在 摩西 㧯 亞倫 帶領之下離開 埃及 以後安營个地方。</verse>
				<verse number="2">摩西 遵照上主个命令將逐擺安營个地名記錄下來。</verse>
				<verse number="3">以色列 人在正月十五，就係第一個𨃟過節个第二日，離開 埃及 。佢等因為有上主个保護，在 埃及 眾人目瞋瞋之下，勇敢無驚離開 蘭塞 城；</verse>
				<verse number="4">該時 埃及 人當在埋葬佢該兜被上主㓾死个長子。上主做這事，顯明佢个權力贏過 埃及 个神明。</verse>
				<verse number="5">以色列 人離開 蘭塞 ，先在 疏割 安營，</verse>
				<verse number="6">然後在曠野堘个 以倘 安營。</verse>
				<verse number="7">對該位佢等轉到 巴力‧洗分 東片个 比‧哈希錄 ，在 密奪 附近安營。</verse>
				<verse number="8">佢等離開 比‧哈希錄 以後，經過 紅海 到曠野，又在 以倘 曠野行三日个路，然後在 瑪拉 安營。</verse>
				<verse number="9">佢等對該位到 以琳 安營，因為 以琳 有十二口泉水，七十頭棕樹。</verse>
				<verse number="10">離開 以琳 以後，佢等在 紅海 附近安營。</verse>
				<verse number="11">接下來佢等到 汛 曠野，</verse>
				<verse number="12">然後到 脫加 ，</verse>
				<verse number="13">去到 亞錄 。</verse>
				<verse number="14">接下去佢等去到 利非訂 ；在該位佢等無水好啉。</verse>
			</chapter>
			<chapter number="34">
				<verse number="1">上主吩咐 摩西</verse>
				<verse number="2">將以下个指示㧯 以色列 人講：「你等進入𠊎愛賜給你等个 迦南 地以後，你等个地界係恁樣：</verse>
				<verse number="3">南片對 尋 个曠野跈等 以東 邊界延長下去，就係對 死海 南端个東片開始，</verse>
				<verse number="4">轉向南方个 亞克拉濱 隘口，經過 尋 ，一直向南到 加低斯‧巴尼亞 ，然後向西北方到 哈薩‧亞達 ，再到 押捫 ，</verse>
				<verse number="5">對該位轉向 埃及 邊界个山壢，到 地中海 為止。</verse>
				<verse number="6">「西片个地界係 地中海 。</verse>
				<verse number="7">「北片个地界對 地中海 到 何珥 山，</verse>
				<verse number="8">再到 哈馬 隘口，又直到 西達達 㧯</verse>
				<verse number="9">西斐崙 ，到 哈薩‧以難 為止。</verse>
				<verse number="10">「東片个地界對 哈薩‧以難 到 示番 ，</verse>
				<verse number="11">然後向南到 亞延 東片个 利比拉 ，再到 加利利 湖東岸个山岡，</verse>
				<verse number="12">然後跈等 約旦 河南下到 死海 。 「這就係你等土地四圍个邊界。」</verse>
				<verse number="13">所以， 摩西 吩咐 以色列 人講：「這就係你等愛抽籤來分个土地，係上主分配給九隻半支族做產業个土地。</verse>
				<verse number="14">呂便 、 迦得 兩支族㧯 瑪拿西 半支族已經得到佢等个產業，照佢等个家族分配，</verse>
				<verse number="15">就係在 約旦 河東片 耶利哥 對面个土地。」</verse>
				<verse number="16">上主對 摩西 講：</verse>
				<verse number="17">「祭司 以利亞撒 㧯 嫩 个孻仔 約書亞 愛為人民分配土地做產業。</verse>
				<verse number="18">逐支族愛派一個領袖協助佢等。」</verse>
				<verse number="19">以下係上主所選个人： 猶大 支族： 耶孚尼 个孻仔 迦勒 ； 西緬 支族： 亞米忽 个孻仔 示母利 ； 便雅憫 支族： 基斯倫 个孻仔 以利達 ； 但 支族： 約利 个孻仔 布基 ； 約瑟 个子孫 瑪拿西 支族： 以弗 个孻仔 漢聶 ； 以法蓮 支族： 拾弗但 个孻仔 基母利 ； 西布倫 支族： 帕納 个孻仔 以利撒番 ； 以薩迦 支族： 阿散 个孻仔 帕鐵 ； 亞設 支族： 示羅米 个孻仔 亞希忽 ； 拿弗他利 支族： 亞米忽 个孻仔 比大黑 。</verse>
				<verse number="20"></verse>
				<verse number="21"></verse>
				<verse number="22"></verse>
				<verse number="23"></verse>
				<verse number="24"></verse>
				<verse number="25"></verse>
				<verse number="26"></verse>
				<verse number="27"></verse>
				<verse number="28"></verse>
				<verse number="29">以上係上主指定為 以色列 人分配 迦南 土地个人。</verse>
			</chapter>
			<chapter number="35">
				<verse number="1">上主在 耶利哥 對面 約旦 河滣个 摩押 平原對 摩西 講：</verse>
				<verse number="2">「你愛吩咐 以色列 人，愛佢等對所得到个產業中，給兜城鎮㧯周圍个草場給 利未 人。</verse>
				<verse number="3">這兜城鎮愛歸 利未 人所有，俾佢等住在該位；草場係給佢等畜牛群㧯其他頭牲用个。</verse>
				<verse number="4">草場愛對城牆四面个外圍向外伸展四百五十公尺，</verse>
				<verse number="5">也就係用城做中心，逐邊各有九百公尺个一個四方形个地方。</verse>
				<verse number="6">你等愛給 利未 人六座逃閃城，俾因為過失害死人个人做得逃到該位求保護。這兜以外，愛給佢等四十二座城。</verse>
				<verse number="7">城个周圍愛有草場，一共四十八座城。</verse>
				<verse number="8">你等愛對 以色列 人个產業中，將城分給 利未 人，人多个支族愛多分，人少个就少分，逐支族愛照所得到个產業，將城分給 利未 人。」</verse>
				<verse number="9">上主命令 摩西</verse>
				<verse number="10">對 以色列 人講：「你等過 約旦 河、進入 迦南 地以後，</verse>
				<verse number="11">一定愛選出逃閃城，使因為過失害死人个人做得逃到該位，</verse>
				<verse number="12">來閃避死者報仇个親戚。在這位，就算被人告犯到㓾人罪，無經過公開審判，也做毋得處死。</verse>
				<verse number="13">你等愛選六座城，來做逃閃城，</verse>
				<verse number="14">三座在 約旦 河東片，三座在 迦南 地。</verse>
				<verse number="15">這兜城愛給 以色列 人，並暫時㧯永久住个外族人做逃閃城，所有因為過失害死人个做得逃到該位去。</verse>
				<verse number="16">「若係有人用武器㓾人，無論佢係用鐵器、石頭，抑係棍仔，就係犯㓾人罪，一定愛處死。</verse>
				<verse number="17"></verse>
				<verse number="18"></verse>
				<verse number="19">報血仇个親戚愛親手處死兇手；佢一尋到兇手，就愛處死佢。</verse>
				<verse number="20">「若係有人怨恨麼人，將佢㩳橫，害佢跌死，抑係㧹東西打死佢，</verse>
				<verse number="21">抑係用拳頭打死佢，該人就犯㓾人罪，一定愛處死。報血仇个親戚愛親手處死兇手；佢一尋到兇手，就愛處死佢。</verse>
				<verse number="22">「總係，若有人毋堵好害死㧯佢全無冤仇个人，無論係佢將人㩳橫，還係㧹東西打死人，</verse>
				<verse number="23">抑係無看到个時㧹一垤石頭打死佢無想愛傷害个人，該人㧯佢並無冤仇，</verse>
				<verse number="24">在這種情形之下，民眾應該在該毋堵好害死人个㧯該報血仇个親戚中間照法律來審判。</verse>
				<verse number="25">民眾愛救該毋堵好害死人个離開該報血仇个親戚，將佢送倒轉佢逃到个該座逃閃城去。佢一定愛住在該位，一直到現任个大祭司過身。</verse>
				<verse number="26">總係該毋堵好害死人个若離開該座逃閃城，</verse>
				<verse number="27">該報血仇个親戚尋到佢來處死佢，毋算有罪。</verse>
				<verse number="28">毋堵好害死人个一定愛留在逃閃城，等大祭司過身後正做得轉到屋下。</verse>
				<verse number="29">你等㧯你等个後代無論住在㖠位，全部愛遵守這條例。</verse>
				<verse number="30">「有人被人告犯到謀殺罪，一定愛有兩個以上个證人做證，正做得判死刑；只有一個證人還做毋得成立㓾人罪。</verse>
				<verse number="31">㓾死人个一定愛用命來賠，做毋得俾佢用賠錢來贖命。</verse>
				<verse number="32">若係有人逃到逃閃城，做毋得對佢收贖金，准佢在大祭司過身前轉屋下。</verse>
				<verse number="33">若係准佢恁樣，就係打垃圾你等所住个土地。㓾人就係打垃圾土地；除非該㓾人个用自家个命來賠，無其他个辦法來使兇殺案个地方得到淨浰。</verse>
				<verse number="34">你等做毋得打垃圾所住个土地，就係𠊎住在其中个土地；因為𠊎 — 上主住在 以色列 人當中。」</verse>
			</chapter>
			<chapter number="36">
				<verse number="1">約瑟 个孻仔 瑪拿西 个孫仔，也就係 瑪吉 个孻仔 基列 ，佢个宗族該兜家長去見 摩西 㧯 以色列 人其他領袖，</verse>
				<verse number="2">講：「上主識命令你等用抽籤个方法將土地分給 以色列 人，也命令你等將𠊎等親屬 西羅非哈 个產業分給佢該兜妹仔。</verse>
				<verse number="3">總係，若係姖等嫁給 以色列 別支族个人，姖等个產業就會屬厥老公个支族了。恁樣，𠊎等抽籤所得到个土地就會減少。</verse>
				<verse number="4">到 以色列 人个禧年，所有賣出去个產業全部愛歸還原主； 西羅非哈 該兜妹仔个產業就會永遠屬在逐儕老公个支族，𠊎等个支族就會永遠失掉該份產業。」</verse>
				<verse number="5">所以 摩西 將上主个命令㧯 以色列 人講：「 約瑟 支族个人所講个話係著个。</verse>
				<verse number="6">所以上主吩咐講： 西羅非哈 該兜妹仔做得自由選老公，總係一定愛在阿爸个支族內來選。</verse>
				<verse number="7">恁樣， 以色列 人个產業就毋會對一支族轉到另外一支族去。逐個 以色列 人个產業一定愛留在本支族內。</verse>
				<verse number="8">以色列 各支族中，所有承接產業个細妹仔，一定愛嫁給共支族个人。恁樣， 以色列 人逐儕就能承接祖先所傳下來个產業，</verse>
				<verse number="9">產業就毋會對一支族轉到另外一支族去； 以色列 逐支族應該保留本族个產業。」</verse>
				<verse number="10">所以， 西羅非哈 个妹仔 瑪拉 、 得撒 、 曷拉 、 密迦 、 挪阿 遵照上主命令 摩西 个話，嫁給姖等个叔伯兄弟。</verse>
				<verse number="11"></verse>
				<verse number="12">姖等全部在 約瑟 个孻仔 瑪拿西 支族內尋到老公。姖等个產業就保留在姖等阿爸个支族內。</verse>
				<verse number="13">以上係上主在 耶利哥 對面 約旦 河滣个 摩押 平原、通過 摩西 傳給 以色列 人个例規㧯條文。</verse>
			</chapter>
		</book>
		<book number="5">
			<chapter number="1">
				<verse number="1">本書係記載 摩西 所講个話。當 以色列 人在 約旦 河東片个曠野、 疏弗 對面个 約旦 河谷，就在 巴蘭 城㧯 陀弗 、 拉班 、 哈洗錄 、 底撒哈 這兜城鎮中間， 摩西 向眾人講以下个話。</verse>
				<verse number="2">(對 何烈 山經過 以東 山區到 加低斯‧巴尼亞 需要十一日个路程。)</verse>
				<verse number="3">在 以色列 人出 埃及 後个第四十年十一月初一， 摩西 將上主命令佢講个話全部㧯佢等講。</verse>
				<verse number="4">該時，佢 已經打贏用 希實本 做京城个 亞摩利 王 西宏 㧯用 亞斯他錄 、 以得來 做京城个 巴珊 王 噩 。</verse>
				<verse number="5">摩西 在 約旦 河東片个 摩押 地向 以色列 人解釋上主个教示。 佢講：</verse>
				<verse number="6">「𠊎等還在 何烈 山个時，上主 — 𠊎等个上帝對𠊎等講：『你等已經在這山頂住罅久了。</verse>
				<verse number="7">這下你等愛徙營，向前行。你等愛進入 亞摩利 人个山區㧯附近逐所在 — 就係 約旦 河谷、山地、高原、南區㧯 地中海 滣，也就係講，你等愛進入 迦南 、 黎巴嫩 㧯對該位到 幼發拉底 河个土地。</verse>
				<verse number="8">這垤土地就係𠊎 — 上主應許愛給你等祖先 亞伯拉罕 、 以撒 、 雅各 㧯佢等後代个土地。你等愛入去，佔領這垤土地。』」</verse>
				<verse number="9">摩西 對人民講：「𠊎等還在 何烈 山个時，𠊎㧯你等講過：『𠊎無法度自家一儕擔當帶領你等个責任。</verse>
				<verse number="10">上主 — 你等个上帝已經使你等人口增加，像天頂个星仔恁多。</verse>
				<verse number="11">願上主 — 你等祖先个上帝照佢自家个應許使你等个人口再增加千倍，使你等興旺。</verse>
				<verse number="12">總係𠊎一儕愛樣般擔當你等混雜个事情，㧯為你等排解困難个責任呢？</verse>
				<verse number="13">你等愛對逐支族選出有智慧、有才調、受尊敬个人來；𠊎愛設立佢等來管理你等。』</verse>
				<verse number="14">「你等識同意應該恁樣做。</verse>
				<verse number="15">所以，𠊎設立該兜逐支族選出來个有智慧、受尊敬个人來管理你等：有負責管一千人个，有管一百人个，有管五十人个，有管十人个。𠊎又對逐支族另外設立其他个官員。</verse>
				<verse number="16">「該時，𠊎指示你等个審判官講：『你等愛處理民間个官司。無論係同胞中間个糾紛，抑係㧯你等當中外族人个糾紛，你等攏總愛公正審判。</verse>
				<verse number="17">你等愛公正對人無偏心，無論地位高低，全部毋好看人个情面。毋好驚麼人，因為你等係代上帝審判个。若係你等有困難个案件，做得送到𠊎這位來，𠊎會處理。』</verse>
				<verse number="18">該時，𠊎也將其他應該做个事全部指示你等了。」</verse>
				<verse number="19">「𠊎等遵照上主 — 𠊎等上帝个命令，離開 何烈 山，經過你等所看到該當闊、當得人驚个曠野，去 亞摩利 人个山區。𠊎等到 加低斯‧巴尼亞 个時，</verse>
				<verse number="20">𠊎識對你等講：『這下，你等已經到 亞摩利 人个山區，就係上主 — 𠊎等个上帝賜給𠊎等个土地。</verse>
				<verse number="21">看啊，上主 — 你等个上帝已經將這垤土地擺在面前。你等愛遵照上主 — 你等祖先个上帝所命令个去佔領；毋好驚，毋好失志。』</verse>
				<verse number="22">「總係你等全部來見𠊎，向𠊎建議講：『𠊎等想愛先派人去打探該垤土地，喊佢等轉來報告愛行个路線㧯愛攻打个城。』</verse>
				<verse number="23">「𠊎認為恁樣做無毋著，就對逐支族選一儕，一共選出來十二儕。</verse>
				<verse number="24">佢等進入山區，一直到 以實各 山壢去打探。</verse>
				<verse number="25">佢等帶轉該地个果子，報告講：『上主 — 𠊎等个上帝賜給𠊎等个係當靚个土地。』</verse>
				<verse number="26">「總係，你等悖逆上主 — 你等上帝个命令，毋肯進入該土地。</verse>
				<verse number="27">你等在帳篷肚怪怨講：『上主惱𠊎等！佢𢱋𠊎等出 埃及 ，係愛將𠊎等交給 亞摩利 人，來除滅𠊎等。</verse>
				<verse number="28">𠊎等樣愛使入去呢？探仔个報告使𠊎等非常驚。佢等講：該地方个人比𠊎等較強壯高大；佢等住在堅固个城肚，城牆高到堵天。𠊎等還在該位看到 亞衲 族个人！』</verse>
				<verse number="29">「總係𠊎㧯你等講：『毋好驚佢等！</verse>
				<verse number="30">上主 — 你等个上帝愛帶領你等，為你等來相㓾，像頭擺恁樣。你等有親目看到佢在 埃及 㧯曠野為你等所做个一切。</verse>
				<verse number="31">上主 — 你等个上帝識帶領你等一路平安到這地方，像阿爸揹自家个孻仔恁樣。』</verse>
				<verse number="32">總係，無論𠊎樣般講，你等還係毋肯信靠上主 — 你等个上帝。</verse>
				<verse number="33">雖然恁樣，上主從頭到尾行在你等頭前，為你等尋安營个地方。佢暗晡時用火柱，日時頭用雲柱，帶領你等个路程。」</verse>
				<verse number="34">「上主聽到你等怪怨，非常發譴，發誓講：</verse>
				<verse number="35">『你等這邪惡个一代，麼人也做毋得看𠊎應許賜給你等祖先該盡靚个土地；</verse>
				<verse number="36">只有 耶孚尼 个孻仔 迦勒 做得看。因為佢一心一意跈等𠊎；𠊎愛將佢行過个土地賜給佢㧯佢个子孫。』</verse>
				<verse number="37">因為你等个緣故，上主也對𠊎發譴。佢講：『連你也做毋得進入該垤土地。</verse>
				<verse number="38">總係你个助手、 嫩 个孻仔 約書亞 做得入去；你愛鼓勵佢堅強起來，因為佢會帶領 以色列 人佔領該垤土地。』</verse>
				<verse number="39">「接等，上主對𠊎等講：『該兜今晡日還毋會分別是非个細人仔，你等恅到會被敵人捉去个，反轉會進入該垤土地。佢等會佔領該垤土地；因為𠊎愛賜給佢等。</verse>
				<verse number="40">總係你這兜人，你等愛斡轉頭，愛轉到向 紅海 路上个曠野去。』</verse>
				<verse number="41">「你等應講：『 摩西 啊！𠊎等得罪上主！這下𠊎等愛遵行上主 — 𠊎等上帝个命令，去相㓾。』你等逐儕帶等武器，準備相㓾，恅到隨便就做得佔領該山區。</verse>
				<verse number="42">「總係，上主對𠊎講：『你愛警告佢等，毋好去相㓾，免得被敵人打輸掉，因為𠊎毋㧯佢等同在。』</verse>
				<verse number="43">𠊎將上主个話㧯你等講，總係你等毋聽。你等悖逆上主个命令，強強向山區前進。</verse>
				<verse number="44">住在該山區个 亞摩利 人像歸大陣个蜂仔恁樣出來面對你等。佢等將你等逐到 以東 山區个 何珥瑪 ，在該位打敗你等。</verse>
				<verse number="45">該時你等轉來，在上主面前哀求；總係佢毋肯聽你等个哀求，毋插你等。</verse>
				<verse number="46">你等就在 加低斯 住一站當久个時間。」</verse>
			</chapter>
			<chapter number="2">
				<verse number="1">「後來，𠊎等遵照上主个命令轉方向，順等 紅海 滣个路去曠野。𠊎等在 以東 山區捩一站當久个時間。</verse>
				<verse number="2">「後來，上主㧯𠊎講，𠊎等已經在這山野地區𫟧來𫟧去𫟧罅了，應該轉向北片行。</verse>
				<verse number="3"></verse>
				<verse number="4">佢愛𠊎將以下个話吩咐你等講：『你等會經過 以東 山區，就係你等个遠親 以掃 後代个地區。雖然佢等會驚你等，總係你等愛注意，</verse>
				<verse number="5">做毋得㧯佢等相㓾；因為𠊎毋將這垤土地賜給你等，連踏腳个地方也無給你等。𠊎已經將 以東 山區賜給 以掃 个後代做產業。</verse>
				<verse number="6">你等做得用錢向佢等買食个㧯啉个東西。』</verse>
				<verse number="7">「愛知，上主 — 你等个上帝樣般在你等所做个事賜福給你等。你等在該當闊个曠野流浪个時，佢照顧你等。四十年來，佢㧯你等共下，你等並無欠麼介。</verse>
				<verse number="8">「恁樣，𠊎等𫟧過 以東 ，就係𠊎等遠親 以掃 後代个地區，對 以拉他 㧯 以旬‧迦別 到 死海 个路，向東北 摩押 曠野个路去。</verse>
				<verse number="9">上主對𠊎講：『你等毋好惹 摩押 人，也做毋得㧯佢等相㓾。𠊎已經將 亞珥 城賜給 羅得 个後代做產業；𠊎毋將佢等个土地給你等。』」</verse>
				<verse number="10">(以前有一個當勇壯高大个種族住在 亞珥 城；佢等人盡多，身材㧯 亞衲 族个人共樣恁高大。</verse>
				<verse number="11">佢等㧯 亞衲 人共樣，也算做 利乏音 人，總係 摩押 人喊佢等 以米 人。</verse>
				<verse number="12">何利 人識住在 以東 ； 以掃 个後代將佢等逐走，消滅佢等，住在該位，就像 以色列 人對上主賜給佢等个土地將敵人逐走共樣。)</verse>
				<verse number="13">「後來，𠊎等遵照上主个命令過 撒烈 山壢。</verse>
				<verse number="14">𠊎等對離開 加低斯‧巴尼亞 到過去 撒烈 山壢，共有三十八年久。照上主所發个誓，該世代个戰士全部死淨淨了。</verse>
				<verse number="15">上主親自攻擊佢等，直到將佢等對營中全部消滅掉。</verse>
				<verse number="16">「該兜戰士對人民中全部死掉以後，</verse>
				<verse number="17">上主對𠊎講：</verse>
				<verse number="18">『今晡日，你等愛對 亞珥 城經過 摩押 个地區。</verse>
				<verse number="19">然後你等會來到 羅得 後代 亞捫 人个地區；總係你等毋好惹 亞捫 人，也做毋得㧯佢等相㓾。𠊎已經將這垤土地賜給 羅得 个後代做產業；𠊎毋將佢等个土地給你等。』」</verse>
				<verse number="20">(這垤土地也算做 利乏音 地，因為原來个人民係 利乏音 人。 亞捫 人喊佢等 散組明 人。</verse>
				<verse number="21">佢等个身材㧯 亞衲 族个人共樣恁高大，人口盡多，係當勇壯个種族。總係上主消滅佢等； 亞捫 人就佔領該垤土地，住在該位。</verse>
				<verse number="22">上主識為 以掃 个後代 — 以東 人完成共樣个事。佢消滅住在 以東 山區个 何利 人； 以東 人就佔領該片土地，住在該位，一直到今晡日。</verse>
				<verse number="23">該兜對 克里特 島來个人識住在 地中海 滣頭；佢等消滅原住民 亞衛 人，佔領佢等个土地，住在該位，直到南部个 迦薩 城。)</verse>
				<verse number="24">「𠊎等經過 摩押 後，上主㧯𠊎等講：『這下你等愛出發，過 亞嫩 山壢。𠊎將該用 希實本 做京城个 亞摩利 王 西宏 㧯佢个土地全部交在你等手中。你等愛㧯佢相㓾，佔領佢个土地。</verse>
				<verse number="25">對今晡日開始，𠊎愛使天下萬民全部驚你等。佢等一聽到你等个名就會驚到愊愊掣。』」</verse>
				<verse number="26">「後來，𠊎對 基底莫 曠野派使者到 希實本 去見 西宏 王，用和睦个話對佢講：</verse>
				<verse number="27">『請俾𠊎等經過你个土地。𠊎等單淨行大路，無偏左右，一直行大路。</verse>
				<verse number="28">𠊎等願意出錢向你等買食个㧯啉个東西。𠊎等單淨愛經過你个土地，</verse>
				<verse number="29">過 約旦 河，進入上主 — 𠊎等上帝愛賜給𠊎等个土地。住在 以東 个 以掃 後代㧯住在 亞珥 城个 摩押 人全部俾𠊎等經過佢等个土地。』</verse>
				<verse number="30">「總係， 希實本 王 西宏 毋肯俾𠊎等經過佢个土地。上主 — 𠊎等个上帝使佢硬頸又硬殼，好俾𠊎等打贏佢，佔領佢个土地；到今晡日𠊎等還係佔領這垤土地。</verse>
				<verse number="31">「後來，上主對𠊎講：『看哪，𠊎已經將 西宏 王㧯佢个土地交給你等了。你等這下入去佔領。』</verse>
				<verse number="32">西宏 帶領全軍出來，在 雅雜 城㧯𠊎等相㓾。</verse>
				<verse number="33">總係上主 — 𠊎等个上帝將佢等全部交給𠊎等。𠊎等㓾死佢、佢該兜孻仔，㧯所有个戰士。</verse>
				<verse number="34">「𠊎等又佔領、打壞逐個城市，將城肚个人，無分男女老幼，全部㓾淨淨，一個也無留。</verse>
				<verse number="35">𠊎等將頭牲㧯城肚个財物攏總搶淨淨。</verse>
				<verse number="36">上主 — 𠊎等个上帝使𠊎等佔領所有个城鎮，對 亞嫩 山壢堘頭个 亞羅珥 ，到山壢中央个城鎮，一直到 基列 ，全部佔領下來。</verse>
				<verse number="37">總係照上主 — 𠊎等上帝个禁令，𠊎等無接近 亞捫 人个土地抑係 雅博 山壢兩片个地方，也無行過山區所有个城鎮。」</verse>
			</chapter>
			<chapter number="3">
				<verse number="1">「接等，𠊎等再向北片愛去 巴珊 地區。 巴珊 王 噩 帶領佢个全軍出來，在 以得來 城附近㧯𠊎等相㓾。</verse>
				<verse number="2">上主對𠊎講：『你等毋使驚！𠊎愛將佢、佢个人民，㧯佢个土地全部交在你等手中。以前你等樣般對待該京城在 希實本 个 亞摩利 王 西宏 ，這下也愛照樣對待 巴珊 王。』</verse>
				<verse number="3">「對恁樣，上主 — 𠊎等个上帝也將 巴珊 王 噩 㧯佢个人民交在𠊎等手中。𠊎等將佢等全部消滅，連一個也無留。</verse>
				<verse number="4">同時，𠊎等佔領佢所有个城鎮，無一座城無佔領。𠊎等就佔領 巴珊 王 噩 統治个歸隻 亞珥歌伯 地區，一共有六十座城；</verse>
				<verse number="5">這兜城全部有堅固个防備：有高牆、城門㧯門閂。𠊎等也佔領其他無城牆个村莊。</verse>
				<verse number="6">𠊎等毀滅所有个城鎮，將城肚个人，無分男女老幼，全部㓾淨淨，像以前𠊎等毀滅 希實本 王 西宏 所有个城鎮共樣。</verse>
				<verse number="7">𠊎等將頭牲㧯城肚个財物攏總搶淨淨。</verse>
				<verse number="8">「該時，𠊎等對兩個 亞摩利 王个手，將 約旦 河東片个土地搶過來，對南部个 亞嫩 山壢直到北部个 黑門 山。</verse>
				<verse number="9">( 西頓 人將 黑門 山喊做 西連 ； 亞摩利 人喊它 示尼珥 。)</verse>
				<verse number="10">𠊎等佔領 巴珊 王 噩 所有个城鎮：包含平原个逐城鎮、 基列 㧯 巴珊 歸隻地區，東片到 撒迦 㧯 以得來 城。」</verse>
				<verse number="11">( 巴珊 王 噩 係最後一個 利乏音 人。佢个棺材 係用石頭 做个，照普通个尺寸，長四公尺，闊兩公尺。在 亞捫 人个 拉巴 城肚還看得到這副棺材。)</verse>
				<verse number="12">「𠊎等佔領這片土地以後，𠊎將 亞嫩 山壢堘頭个 亞羅珥 城以北地區㧯 基列 山區个一半，還有這地區个城鎮，分給 呂便 㧯 迦得 支族。</verse>
				<verse number="13">𠊎又將 基列 其他个地區㧯 巴珊 王 噩 个歸隻地區分給 瑪拿西 个半支族。」 ( 巴珊 地區又喊做 利乏音 地。</verse>
				<verse number="14">瑪拿西 半支族个 睚珥 佔領歸隻 亞珥歌伯 地區，就係 巴珊 歸隻地區，對該位直到 基述 人㧯 瑪迦 人交界个地方。 睚珥 用自家个名將該地个城鎮安到 哈倭特‧睚珥 ，到今晡日還係恁樣。)</verse>
				<verse number="15">「𠊎將 基列 分給 瑪拿西 支族个 瑪吉 宗族，</verse>
				<verse number="16">將 基列 到 亞嫩 山壢个一垤土地分給 呂便 㧯 迦得 支族。佢等南片个邊界在 亞嫩 山壢中央，北片个邊界係 雅博 山壢，其中一部份㧯 亞捫 人个邊界相接。</verse>
				<verse number="17">佢等西片个界限到 約旦 河，對北片个 加利利 湖到南片个 死海 ，東到 比斯迦 山山腳。</verse>
				<verse number="18">「該時，𠊎指示佢等講：『上主 — 你等个上帝將 約旦 河東片个土地賜給你等，使你等佔領這垤土地。這下，你等愛將軍隊武裝起來，派佢等為 以色列 逐支族打頭陣，過 約旦 河，幫助逐支族佔領上主賜給佢等个土地。</verse>
				<verse number="19">總係你等个𡜵娘、子女、㧯頭牲 (𠊎知你等有盡多頭牲) 做得留在𠊎分給你等个城鎮。</verse>
				<verse number="20">你等愛幫助同胞佔領上主所賜 約旦 河西片个土地，直到上主使佢等住在該位，像佢使你等在這位住共樣。該時，你等就做得轉到𠊎分給你等个這垤土地。』</verse>
				<verse number="21">「然後，𠊎指示 約書亞 講：『你已經親目看到上主 — 你等个上帝對 西宏 㧯 噩 兩個王所做个事；上主也愛恁樣對待你等愛去佔領个其他國家。</verse>
				<verse number="22">你等毋使驚佢等，因為上主 — 你等个上帝愛為你等相㓾。』」</verse>
				<verse number="23">「該時，𠊎祈求上主：</verse>
				<verse number="24">『至高个上主啊！𠊎知你已經開始向你个僕人顯明你偉大、奇妙个作為。天地之間無其他神明能做你所做个大事！</verse>
				<verse number="25">求你准𠊎過 約旦 河，去看該片盡靚个土地、美麗个山區，㧯 黎巴嫩 山。』</verse>
				<verse number="26">「總係因為你等个緣故，上主向𠊎發譴，毋聽𠊎个祈求。佢對𠊎講：『好了哪！這件事毋使講了！</verse>
				<verse number="27">你上 比斯迦 山頂去，對該位遠遠看東西南北四方。你愛詳細看，因為你做毋得過這 約旦 河。</verse>
				<verse number="28">你愛指導 約書亞 ，也愛堅定佢个心志，使佢勇敢，因為佢愛帶領人民過河，佔領你所看到个土地。』</verse>
				<verse number="29">所以，𠊎等留在 伯‧批珥 對面个山壢。」</verse>
			</chapter>
			<chapter number="4">
				<verse number="1">摩西 勸勉人民講：「 以色列 人哪，這下你等愛聽從𠊎教你等个法律㧯例規；恁樣，你等正能生存，又做得入去佔領上主 — 你等祖先个上帝所賜給你等个土地。</verse>
				<verse number="2">𠊎所命令你等个話，你等毋好加添，也做毋得減少。你等一定愛遵行𠊎所吩咐上主 — 你等上帝个誡命。</verse>
				<verse number="3">你等親目看過上主在 批珥 山所做个事。上主 — 你等个上帝在該位消滅所有拜 巴力 个人，</verse>
				<verse number="4">只有你這兜對上主 — 你等个上帝忠心个人到今晡日還在。</verse>
				<verse number="5">「𠊎遵照上主 — 𠊎上帝个命令，將所有个法律㧯例規教你等；俾你等在愛去佔領个土地上遵守。</verse>
				<verse number="6">你等一定愛確實遵行；恁樣正有好向萬民顯明你等个聰明智慧。佢等一聽到這兜法律，就會講：『這偉大國家个人民實在真聰明、真有智慧！』</verse>
				<verse number="7">「無論幾強大个國家，它个神明無一個親近它个國民像上主 — 𠊎等个上帝恁樣㧯𠊎等親近；𠊎等求喊佢，佢就答應。</verse>
				<verse number="8">無論幾強大个國家，它个法律㧯例規無一種像今晡日𠊎交給你等个法律恁公正。</verse>
				<verse number="9">你等愛細膩！愛記在你等个心中！一生人毋好毋記得親目看過个這兜事。你等愛教你等个子女㧯子孫講，</verse>
				<verse number="10">頭擺你等識在 何烈 山山腳，企在上主 — 你等上帝个面前。該時，上主㧯𠊎講：『你愛將人民聚集共下。𠊎愛佢等聽到𠊎講个話，使佢等學習一生人敬畏𠊎，也教佢等个子女敬畏𠊎。』</verse>
				<verse number="11">「恁樣，你等全部來企在山下。山頂烏雲賁賁，火焰衝天，又有濃煙衝等上。</verse>
				<verse number="12">上主對火焰中對你等講話，你等單淨聽到佢講話个聲，總係看毋到佢个形像。</verse>
				<verse number="13">佢對你等宣佈佢㧯你等立个約，愛你等遵行十條誡命。佢將這十條誡命寫在兩垤石版面頂。</verse>
				<verse number="14">該時上主命令𠊎將法律㧯例規全部教你等；愛你等過河並佔領該垤土地後，確實遵行。」</verse>
				<verse number="15">「上主在 何烈 山頂，對火焰中㧯你等講話个時，你等無看到麼介形像。所以，你等愛特別注意，</verse>
				<verse number="16">做毋得為自家造㖠種形像个偶像來敗壞自家，無論係男个抑係女个偶像、</verse>
				<verse number="17">係像地上个野獸抑係天頂个飛鳥、</verse>
				<verse number="18">係像地上个爬蟲抑係水中个魚類，全部做毋得。</verse>
				<verse number="19">你等也做毋得陷入誘惑，去拜你等所看到个日月星辰這兜天頂个星球。這兜係上主 — 你等个上帝擺好在萬民面前个。</verse>
				<verse number="20">總係你等係上主對 埃及 、對鎔鐵个火爐肚搶救出來个。佢𢱋你等出來，愛你等做佢自家个子民，就像今晡日恁樣。</verse>
				<verse number="21">因為你等个緣故，上主 — 你等个上帝向𠊎發譴，發誓不准𠊎過 約旦 河，進入佢愛賜給你等該盡肥个土地。</verse>
				<verse number="22">𠊎會死在這位，做毋得過 約旦 河；總係你等愛過河，佔領該盡肥个土地。</verse>
				<verse number="23">你等愛細膩，做毋得毋記得上主 — 你等个上帝㧯你等立个約。做毋得為自家造上主所禁止个偶像。</verse>
				<verse number="24">因為上主 — 你等个上帝就像一團烈火，係專情个上帝 。</verse>
				<verse number="25">「就算你等在該地住當久，有子孫，也做毋得造㖠種形像个偶像，來敗壞自家。這在上主 — 你等上帝个眼中係邪惡个，會惹佢發譴。</verse>
				<verse number="26">今晡日，𠊎喊天喊地來做見證，若係你等毋聽從𠊎，當遽就會對該土地上消滅。你等過 約旦 河、佔到該土地以後，就毋使想愛長長久久住在該位。</verse>
				<verse number="27">上主會將你等打散逐到各國，在該位存下來个只有少數人。</verse>
				<verse number="28">在該位，你等會拜人用樹仔㧯石頭雕刻个神明，係毋會看、毋會聽、毋會食、毋會鼻个偶像。</verse>
				<verse number="29">總係，你等在該位愛尋求上主 — 你等个上帝；若係你等專心一意尋求佢，就會尋到佢。</verse>
				<verse number="30">你等堵到災難、受盡痛苦个時，到尾愛歸向上主 — 你等个上帝，聽從佢。</verse>
				<verse number="31">上主 — 你等个上帝係憐憫个上帝，佢絕對毋會㧒掉你等，毋會消滅你等；佢毋會毋記得㧯你等个祖先所立个約。</verse>
				<verse number="32">「你等愛研究歷史，對你等出世以前，一直查到上帝在地上創造人類个時。你等愛查遍全世界，有麼人看過抑係聽過這恁偉大个事？</verse>
				<verse number="33">有㖠個民族聽到上帝對火焰中㧯佢等講話，像你等聽到，還有命呢？</verse>
				<verse number="34">上主 — 你等个上帝在 埃及 為你等所做个事，有㖠個神明識恁樣做、敢將一個民族對另外一個國家搶救出來，成做自家个子民？你等親目看到佢用大能大力，降下瘟仔㧯戰爭，行神蹟奇事，俾這兜得人驚个事發生。</verse>
				<verse number="35">「上主對你等顯示這兜，係愛證明只有佢係上帝；除了佢以外，無別个上帝。</verse>
				<verse number="36">佢使你等聽到佢對天頂發出个聲音，用恁樣來教訓你等，又使你等在地上看到佢神聖个火，並聽到佢對火焰中㧯你等講話。</verse>
				<verse number="37">佢因為痛惜你等个祖先，就揀選你等，用自家个大能大力，親自𢱋你等出 埃及 。</verse>
				<verse number="38">你等前進个時，佢就將該兜比你等較強大个民族逐出去，為到愛𢱋你等入去，將佢等个土地賜給你等做產業。今晡日你等正會得到這垤土地。</verse>
				<verse number="39">所以，你等愛知，也愛記在心肚，天地間只有上主係上帝；除了佢以外，無別个上帝。</verse>
				<verse number="40">今晡日，𠊎將佢个法律㧯誡命頒佈給你等；你等愛遵行。恁樣，你等㧯你等个子孫一定會事事順利。你等會繼續住在上主 — 你等个上帝賜給你等做永久產業个這垤土地。」</verse>
				<verse number="41">後來， 摩西 在 約旦 河東片指定三座城做逃閃城。</verse>
				<verse number="42">這種城係為到該兜因為過失、毋係故意㓾死人个來設立个。這種人做得入到逃閃城，免得被人處死。</verse>
				<verse number="43">摩西 在 呂便 支族个地區指定曠野高原上个 比悉 城，在 迦得 支族个地區指定 基列 个 拉末 城，在 瑪拿西 支族个地區指定 巴珊 个 哥蘭 城，做逃閃城。</verse>
				<verse number="44">摩西 將以下个法律交給 以色列 人。</verse>
				<verse number="45">佢等對 埃及 出來，來到 約旦 河東片 伯‧批珥 城對面个山壢後， 摩西 向佢等頒佈這兜法律㧯例規。這地係以前京城在 希實本 个 亞摩利 王 西宏 个土地。 摩西 㧯 以色列 人出 埃及 以後，打贏佢，</verse>
				<verse number="46"></verse>
				<verse number="47">佔領佢㧯 巴珊 王 噩 个土地。這兩個 亞摩利 王个土地全部在 約旦 河東片，</verse>
				<verse number="48">南片對 亞嫩 山壢堘頭个 亞羅珥 到北片个 西連 山，就係 黑門 山。</verse>
				<verse number="49">這垤土地也包含 約旦 河東片个歸隻地區，南片到 死海 ，東片到 比斯迦 山个山腳。</verse>
			</chapter>
			<chapter number="5">
				<verse number="1">摩西 召集所有个 以色列 人，對佢等講：「 以色列 人哪，愛注意聽𠊎今晡日向你等頒佈个法律㧯例規。你等愛學習，又愛確實遵守。</verse>
				<verse number="2">上主 — 𠊎等个上帝在 何烈 山㧯𠊎等立約。</verse>
				<verse number="3">上主毋單淨㧯𠊎等个祖先立這約，也係㧯𠊎等今晡日在這位還生等个人立約。</verse>
				<verse number="4">上主在該山頂，對火焰中面對面㧯你等講話。</verse>
				<verse number="5">該時，𠊎企在你等㧯上主中間，愛向你等傳上主个話；因為你等驚該火，毋敢上山。</verse>
				<verse number="6">「上主講：『𠊎係上主 — 你个上帝；𠊎識𢱋你對做奴才个 埃及 地出來。</verse>
				<verse number="7">「『𠊎以外，你做毋得敬拜別个神明。</verse>
				<verse number="8">「『做毋得為自家雕刻偶像；也做毋得造天頂、地上、抑係地底下、水中所有个形像。</verse>
				<verse number="9">做毋得向該兜偶像跪拜，也做毋得服事它兜，因為𠊎 — 上主 — 你个上帝係專情个上帝 。恨𠊎个人，𠊎一定會責罰佢等㧯佢等个子女，直到三四代。</verse>
				<verse number="10">總係敬愛𠊎、遵守𠊎命令个人，𠊎愛用慈愛款待佢等，直到千代。</verse>
				<verse number="11">「『做毋得糮糝用上主 — 你上帝个名；因為糮糝用上主名个人，上主一定會責罰佢。</verse>
				<verse number="12">「『愛遵照上主 — 你上帝个命令，遵守安息日做聖日。</verse>
				<verse number="13">你有六日好勞碌做一切个工作；</verse>
				<verse number="14">總係第七日係屬上主 — 你上帝个安息日。這日，無論係你、你个子女、奴僕、奴婢、牛、驢、頭牲抑係城內暫住个旅客，全部做毋得工作。你个奴僕、奴婢一定愛㧯你共樣歇睏。</verse>
				<verse number="15">你愛記得，你識在 埃及 做過奴才；上主 — 你个上帝用大能大力將你對該位救出來。所以，上主 — 你个上帝命令你，一定愛守安息日。</verse>
				<verse number="16">「『愛照上主 — 你上帝个命令孝敬爺𡟓，好俾你事事順利，在上主 — 你上帝愛賜給你个土地上享長壽。</verse>
				<verse number="17">「『做毋得㓾人。</verse>
				<verse number="18">「『做毋得犯姦淫。</verse>
				<verse number="19">「『做毋得偷拿。</verse>
				<verse number="20">「『做毋得做假見證害人。</verse>
				<verse number="21">「『做毋得貪別人个𡜵娘；也做毋得貪別人个屋、土地、奴僕、奴婢、牛、驢，抑係其他个東西。』</verse>
				<verse number="22">「這係你等全會眾在山頂聚集个時，上主向你等頒佈个誡命。該時，佢對火焰中、烏雲中，㧯濃煙中向你等大聲講話。佢只有頒佈這兜誡命。後來佢將這兜誡命寫在兩垤石版面頂，交給𠊎。」</verse>
				<verse number="23">「當時，歸隻山全部𤏸火；你等聽到有聲對烏暗中發出。各支族个領袖㧯該兜長老全部來見𠊎，</verse>
				<verse number="24">講：『𠊎等聽到上主 — 𠊎等个上帝對火焰中㧯𠊎等講話，佢向𠊎等顯明佢个榮光㧯大能！今晡日，𠊎等體驗到，就算上帝㧯人講話，人還係生等。</verse>
				<verse number="25">總係這下，𠊎等樣愛使冒生命个危險呢？該得人驚个火焰會消滅𠊎等。若係𠊎等再聽到上主 — 𠊎等上帝个聲，𠊎等一定會死。</verse>
				<verse number="26">人類當中有麼人像𠊎等聽過永生上帝對火焰中發出个聲還有命呢？</verse>
				<verse number="27">摩西 啊，請你行前去，注意聽上主 — 𠊎等上帝所講个話，然後吩咐𠊎等。𠊎等會聽，又會遵行。』</verse>
				<verse number="28">「上主聽到這話就對𠊎講：『𠊎已經聽到這兜人所講个話。佢等所講个盡著，</verse>
				<verse number="29">𠊎盡希望佢等常常有恁樣个心，從頭到尾敬畏𠊎，遵行𠊎所有个誡命，使佢等㧯佢等个子孫事事順利。</verse>
				<verse number="30">你愛㧯佢等講，喊佢等轉自家个帳篷去。</verse>
				<verse number="31">總係你愛留在𠊎這位；𠊎愛將所有个誡命、法律㧯例規全部交託你。你愛教佢等，俾佢等在𠊎賜給佢等个土地上確實遵行。』</verse>
				<verse number="32">「 以色列 人哪，你等愛細膩，一定愛遵行上主 — 你等个上帝所吩咐你等个命令，無論㖠條都做毋得偏差；</verse>
				<verse number="33">愛全部遵行。恁樣，你等就會生存下去，事事順利，在你等愛去佔領个土地上住久久。」</verse>
			</chapter>
			<chapter number="6">
				<verse number="1">「上主 — 你等个上帝命令𠊎將以下个誡命、法律㧯例規教你等，好俾你等在愛過去佔領个土地上遵行。</verse>
				<verse number="2">你等㧯你等个子孫愛一生人敬畏上主 — 你等个上帝，順從佢通過𠊎吩咐你等所有个法律㧯誡命。恁樣，你等就會享受長壽。</verse>
				<verse number="3">以色列 人哪，你等愛注意聽，也愛確實遵行。恁樣，你等就會照上主 — 𠊎等祖先个上帝所應許个，事事順利，成做強盛个國家，在該流乳㧯蜜、盡肥个土地上享福。</verse>
				<verse number="4">「 以色列 人哪，你等愛注意聽！上主係𠊎等个上帝；只有佢係上主 。</verse>
				<verse number="5">你等愛用全部个心志、情感㧯力量敬愛上主 — 你等个上帝。</verse>
				<verse number="6">今晡日𠊎吩咐你等个誡命，你等愛放在心肚，</verse>
				<verse number="7">煞猛教你等个子女。無論在屋下抑係出外，歇睏抑係做工，愛常常談論這兜誡命。</verse>
				<verse number="8">你等愛將這兜誡命做記號，䌈在手項，戴在額頭，</verse>
				<verse number="9">寫在屋下个門框㧯大門。</verse>
				<verse number="10">「上主 — 你等个上帝會照佢對你等个祖先 — 亞伯拉罕 、 以撒 、 雅各 所應許个，𢱋你等進入該土地。該所在又大又靚个城市毋係你等所起个，</verse>
				<verse number="11">屋肚堆滿个好東西也毋係你等囥个。該位个井毋係你等挖个；葡萄園、橄欖園也毋係你等種个。上主𢱋你等入去、俾你等食飽个時，</verse>
				<verse number="12">你等愛細膩，毋好毋記得佢。上主識對做奴才个 埃及 地將你等救出來。</verse>
				<verse number="13">你等愛敬畏上主 — 你等个上帝，單淨敬拜佢，奉佢个名發誓。</verse>
				<verse number="14">做毋得拜周圍各國一切个神明。</verse>
				<verse number="15">若係你等拜別个神明，上主 — 你等个上帝會發譴將你等消滅，因為㧯你等同在个上主係專情个上帝 。</verse>
				<verse number="16">「你等做毋得像以前在 瑪撒 恁樣試探上主 — 你等个上帝。</verse>
				<verse number="17">你等愛認真遵守上主 — 你等个上帝向你等頒佈个誡命、法律㧯例規。</verse>
				<verse number="18">你等愛做上主看做著㧯好个事，就能事事順利，好俾你等入去佔領上主應許給你等祖先該盡靚个土地；</verse>
				<verse number="19">你等也愛照上主个命令將所有个敵人逐走。</verse>
				<verse number="20">「將來，你等个子孫會問你等：『上主 — 𠊎等个上帝做麼介命令𠊎等遵守這所有个誡命、法律㧯例規呢？』</verse>
				<verse number="21">你等愛㧯佢等講：『𠊎等識在 埃及 做 埃及 王个奴才，總係上主用當大个能力解救𠊎等。</verse>
				<verse number="22">𠊎等親目看到上主在 埃及 人當中，在 埃及 王㧯佢所有官員面前，行得人驚个神蹟奇事。</verse>
				<verse number="23">佢救𠊎等離開 埃及 ，𢱋𠊎等到這位，照佢對𠊎等祖先所應許个，將這垤土地賜給𠊎等。</verse>
				<verse number="24">上主 — 𠊎等个上帝命令𠊎等遵守這所有个法律，敬畏佢；恁樣，佢就會常常保佑𠊎等，使𠊎等興旺，像今晡日共樣。</verse>
				<verse number="25">若係𠊎等確實遵行上主 — 𠊎等个上帝所命令這一切个誡命，佢就會接納𠊎等 。』」</verse>
			</chapter>
			<chapter number="7">
				<verse number="1">「上主 — 你等个上帝愛𢱋你等進入你等愛去佔領个土地；佢愛逐出盡多民族。你等前進个時，佢愛逐走七個比你等強大个民族：就係 赫 人、 革迦撒 人、 亞摩利 人、 迦南 人、 比利洗 人、 希未 人、 耶布斯 人。</verse>
				<verse number="2">上主 — 你等个上帝愛將這兜民族交給你等。你等愛打贏佢等，徹底消滅佢等，做毋得憐憫佢等，抑係㧯佢等立約。</verse>
				<verse number="3">你等做毋得㧯佢等通婚；你等个妹仔做毋得嫁給佢等个孻仔，孻仔做毋得討佢等个妹仔；</verse>
				<verse number="4">因為佢等會引誘你等離開上主，去拜別个神明。若係你等離開上主，佢會向你等發譴，黏時消滅你等。</verse>
				<verse number="5">所以，你等愛拆掉佢等个祭壇，打碎佢等个神柱，斬橫 亞舍拉 女神像，燒掉佢等个偶像。</verse>
				<verse number="6">你等係屬上主 — 你等个上帝个；你等係聖潔个子民。上主 — 你等个上帝對天下萬民中揀選你等做佢自家寶貝个子民。</verse>
				<verse number="7">「上主惜你等，揀選你等，並毋係因為你等个人數比別人較多；其實，你等係世界上最細个民族。</verse>
				<verse number="8">上主惜你等，係為到愛守佢向你等祖先所應許个。恁樣，上主就用大能力救你等，對做奴才个所在將你等救出來，使你等脫離 埃及 王个手。</verse>
				<verse number="9">所以，你等愛知：上主 — 你等个上帝係惟一个上帝。所有敬愛佢、遵行佢誡命个人，佢係信實个、定著會守約，用不變个慈愛對待佢等，直到千代。</verse>
				<verse number="10">總係惱佢个人，佢會當面責罰佢等、盡遽消滅佢等。</verse>
				<verse number="11">所以，你等一定愛確實遵行𠊎今晡日向你等頒佈个所有誡命、法律㧯例規。」</verse>
				<verse number="12">「你等若係聽從這兜誡命，確實遵行，上主 — 你等个上帝會照佢向你等祖先所應許个，守佢㧯你等所立个約，用不變个慈愛款待你等。</verse>
				<verse number="13">佢定著會惜你等，賜福給你等，使你等興旺，在佢應許你等祖先愛賜給你等个土地上賜福給你等，使你等多子多孫，生產豐富 — 有五榖、酒、橄欖油㧯當大群个牛羊。</verse>
				<verse number="14">你等領受个福氣會贏過世上萬族所領受个。無論你等抑係你等个牛羊全部無毋會𫱔个。</verse>
				<verse number="15">上主會使你等無災無病，毋會再俾你等遰到在 埃及 發過該兜得人驚个病痛；佢會將該兜得人驚个病痛加在你等敵人个身上。</verse>
				<verse number="16">上主 — 你等个上帝交在你等手中个各民族，你等一定愛消滅，毋好憐憫佢等。你等做毋得拜佢等个神明，因為該會成做害死你等个羅網。</verse>
				<verse number="17">「你等毋好恅到這兜民族比你等較多，就無法度逐走佢等。</verse>
				<verse number="18">毋使驚佢等！你等定著愛記得上主 — 你等个上帝樣般對付 埃及 王㧯佢所有个人民。</verse>
				<verse number="19">你等親目看過該兜得人驚个災難、神蹟、奇事。愛記得，上主 — 你等个上帝用大能大力救你等出來。上主 — 你等个上帝樣般消滅 埃及 人，也愛照樣消滅你等所驚个該兜民族。</verse>
				<verse number="20">上主 — 你等个上帝愛使佢等著驚混亂 ；就算有兜逃走、囥起來，也會全部被佢消滅。</verse>
				<verse number="21">所以，你等毋使驚這兜人，因為上主 — 你等个上帝㧯你等同在。佢係至大、應該受敬畏个上帝。</verse>
				<verse number="22">你等前進个時，上主 — 你等个上帝會漸漸將這兜民族逐走。你等做毋得一下仔就將佢等全部消滅，驚怕恁樣做，會使野獸增多，反轉傷害到你等。</verse>
				<verse number="23">上主 — 你等个上帝會將敵人交在你等个手中，使佢等大著驚，直到佢等全部消滅。</verse>
				<verse number="24">佢也會將佢等个君王交在你等手中；你等愛㓾掉佢等，使人毋會再想起佢等个名。你等㓾佢等个時，無人能抵抗。</verse>
				<verse number="25">你等愛燒掉佢等个偶像；做毋得貪偶像身上个金銀，也做毋得偷偷仔留起來，驚怕恁樣做會陷害你等跌落羅網，因為上主 — 你等个上帝盡惱偶像。</verse>
				<verse number="26">連一個偶像都做毋得帶轉屋下，免得你等受到這兜偶像所受个咒詛。你等一定愛盡惱、盡恨這兜偶像；因為它兜係上主所咒詛个。」</verse>
			</chapter>
			<chapter number="8">
				<verse number="1">「今晡日𠊎頒佈給你等所有个法律，你等一定愛確實遵行，使你等生存下去，人口增多，又入去得到上主應許給你等祖先該垤土地。</verse>
				<verse number="2">你等愛回想，在曠野流浪這四十年間，上主 — 你等个上帝樣般帶領你等个路程。佢用困難考驗你等，使你等謙卑，想愛知你等个心志，看你等係毋係肯遵行佢个誡命。</verse>
				<verse number="3">上主使你等餓肚笥，使你等謙卑，然後將嗎哪 — 係你等㧯你等个祖先全部毋知係麼介食物賜給你等，用這來教你等，人个生存毋係單淨靠食物，愛靠上主所講个逐句話。</verse>
				<verse number="4">這四十年來，你等个衫褲無著爛，腳也無行腫。</verse>
				<verse number="5">你等愛愐想，上主 — 你等个上帝管教你等，就像阿爸管教佢个子女。</verse>
				<verse number="6">所以，你等愛謹守上主 — 你等上帝个誡命，遵行佢个道，敬畏佢。</verse>
				<verse number="7">上主 — 你等个上帝愛帶領你等到盡靚个土地去；該位有河壩、泉水㧯地下水好滋潤山壢㧯山排；</verse>
				<verse number="8">該地出產大麥、小麥、葡萄、無花果、石榴、橄欖㧯蜂糖。</verse>
				<verse number="9">在該地，你等毋會再餓肚笥，毋會欠麼介。該地个石頭有豐富个鐵質，山肚有銅礦。</verse>
				<verse number="10">你等會有好食到飽飽，也愛感謝上主 — 你等个上帝，因為佢將盡靚个土地賜給你等。」</verse>
				<verse number="11">「你等愛細膩，做毋得毋記得上主 — 你等个上帝；做毋得毋遵守佢所有个誡命、法律㧯例規，就係𠊎今晡日所吩咐你等个。</verse>
				<verse number="12">當你等食到飽足、起靚靚个屋仔住，</verse>
				<verse number="13">你等个牛羊、金銀㧯其他財產全部增加个時，</verse>
				<verse number="14">愛細膩！做毋得驕傲到毋記得上主 — 你等个上帝。佢識救你等離開做奴才个 埃及 地，</verse>
				<verse number="15">𢱋你等經過該當闊、荒涼、毒蛇㧯毒蟲盡多个曠野。在該燥燥無水个所在，佢使當硬个磐石流出泉水，俾你等毋會嘴燥。</verse>
				<verse number="16">在曠野，佢將嗎哪，係你等㧯祖先毋知个食物賜給你等。佢先用困難考驗你等，使你等謙卑，然後賜給你等美好个東西。</verse>
				<verse number="17">所以，毋好恅到你等係靠自家个雙手㧯能力成做好額。</verse>
				<verse number="18">你等愛記得，係上主 — 你等个上帝賜給你等力量，使你等好額个。佢恁樣好款待你等，因為到今晡日佢還係守佢㧯你等祖先所立个約。</verse>
				<verse number="19">你等做毋得毋記得上主 — 你等个上帝，做毋得轉向別个神明，跪拜、服事它兜。𠊎今晡日警告你等，若係你等離開上主，一定會消滅。</verse>
				<verse number="20">若係你等毋順從上主 — 你等个上帝，一定會滅亡，就像佢愛在你等前進个時消滅該兜民族共樣。」</verse>
			</chapter>
			<chapter number="9">
				<verse number="1">「 以色列 人哪，愛注意聽！你等今晡日愛過 約旦 河，入去佔領比你等較強大个各民族个土地。佢等个城又闊又大，城牆高到堵天。</verse>
				<verse number="2">該地方住个人又高又大，係 亞衲 族人个子孫；你等已經聽人講過，無人能㧯 亞衲 族人對抗。</verse>
				<verse number="3">總係今晡日，你等會親目看到上主 — 你等个上帝，像烈火恁樣在你等頭前行過去。你等前進个時，佢會打敗佢等，使你等照佢个應許進入，逐出敵人，將佢等消滅。</verse>
				<verse number="4">「上主 — 你等个上帝為你等逐走敵人後，你等毋好認為上主帶領你等佔領該土地係因為你等个功德，係應該个。毋係恁樣！這係因為該地个住民邪惡，上主正將佢等逐走；</verse>
				<verse number="5">毋係因為你等心肝好、行為正直，你等正能入去佔領佢等个土地。上主 — 你等个上帝將佢等逐走，係因為這兜人邪惡，又因為佢愛實行佢對你等祖先 — 亞伯拉罕 、 以撒 、 雅各 所應許个。</verse>
				<verse number="6">所以，你等愛知，上主 — 你等个上帝將這盡靚个土地賜給你等做產業，絕對毋係因為你等有麼介功德，其實，你等係硬頸个子民。」</verse>
				<verse number="7">「毋好毋記得你等識在曠野惹上主 — 你等个上帝發譴。對你等離開 埃及 該日到這下，你等一直悖逆佢。</verse>
				<verse number="8">甚至在 何烈 山，你等乜惹上主發譴，佢險險將你等消滅。</verse>
				<verse number="9">該時𠊎上山去接受兩垤石版 — 該面頂寫等上主㧯你等所立个約。𠊎在山頂停留四十日夜，無食，無啉。</verse>
				<verse number="10">後來，上主將這兩垤石版交給𠊎。這兩垤石版有上帝親自用手指寫个話，係你等聚集該日，佢在山頂个火焰中講過个話。</verse>
				<verse number="11">過四十日夜，上主將寫等約个兩垤石版交給𠊎。</verse>
				<verse number="12">「接等，上主㧯𠊎講：『你遽遽下山，因為你對 埃及 帶出來个同胞已經敗壞，做邪惡个事。佢等盡遽偏離𠊎命令佢等个道路，為自家鑄造偶像！』</verse>
				<verse number="13">「上主又㧯𠊎講：『𠊎知這兜人民非常硬頸。</verse>
				<verse number="14">𠊎愛消滅佢等，完全除掉佢等个名；你毋好阻擋𠊎。𠊎愛俾你成做一個比佢等較強大个國家。』</verse>
				<verse number="15">「然後𠊎轉身，拿等寫好約个兩垤石版下山；山頂一直𤏸等火。</verse>
				<verse number="16">𠊎看到你等已經得罪上主 — 你等个上帝，為自家鑄造一隻細牛仔个偶像，盡遽就偏離上主所吩咐你等个道路。</verse>
				<verse number="17">所以𠊎在你等面前將該兩垤石版抨在地上，抨碎掉。</verse>
				<verse number="18">𠊎又一擺伏在上主面前，四十日夜無食、無啉。這全部係因為你等行盡邪惡个事來得罪上主，惹佢發譴。</verse>
				<verse number="19">上主大發譴，譴到愛消滅你等，𠊎非常著驚。總係上主又一擺聽𠊎个祈禱。</verse>
				<verse number="20">上主在大發譴中也當想愛㓾掉 亞倫 ；當時𠊎也代 亞倫 祈禱。</verse>
				<verse number="21">𠊎將你等所鑄造該害你等犯罪个金牛㧹在火底背燒，又打到碎碎，磨到像塵灰恁幼，委在對山頂流下來个溪水肚。</verse>
				<verse number="22">「在 他備拉 、 瑪撒 、 基博羅‧哈他瓦 个時，你等也惹上主發譴。</verse>
				<verse number="23">上主喊你等離開 加低斯‧巴尼亞 ，講：『你等去佔領𠊎賜給你等个土地。』總係，你等悖逆上主 — 你等个上帝，毋信靠佢，毋聽從佢。</verse>
				<verse number="24">對𠊎認識你等以來，你等常常悖逆上主。</verse>
				<verse number="25">「𠊎伏在上主面前四十日夜，因為𠊎知佢決定愛消滅你等。</verse>
				<verse number="26">𠊎祈禱講：『至高个上主啊，求你毋好消滅你自家个子民。佢等係你用大能大力對 埃及 救出來个，佢等係你个產業。</verse>
				<verse number="27">求你紀念你个僕人 — 亞伯拉罕 、 以撒 、 雅各 ，莫看你子民个硬頸、邪惡、㧯罪過。</verse>
				<verse number="28">若毋係恁樣， 埃及 人會講，你無法度帶領佢等到你應許給佢等个土地。佢等會講，你當惱你自家个子民，你帶領佢等去曠野，係愛㓾掉佢等。</verse>
				<verse number="29">總係這人民係你个產業，係你揀選做自家子民个，係你用大能大力對 埃及 帶領出來个。』」</verse>
			</chapter>
			<chapter number="10">
				<verse number="1">「該時，上主對𠊎講：『你愛鑿兩垤石版，像以前該兩垤，又愛用枋仔做一個放石版个樹櫃仔。你愛上山，來到𠊎這位。</verse>
				<verse number="2">𠊎愛將你抨碎該兩垤石版面頂所寫个約重新寫在這兩垤石版面頂。你愛將石版放在櫃肚。』</verse>
				<verse number="3">「然後𠊎用金合歡木做一隻櫃仔，又鑿兩垤石版，像以前該兩垤；𠊎帶石版上山。</verse>
				<verse number="4">以前你等聚集个時，上主在山頂對火焰中向你等宣佈十條誡命。佢將這兜誡命重新寫在這兩垤石版，然後交給𠊎。</verse>
				<verse number="5">𠊎轉身下山，遵照上主个命令將這兩垤石版放在𠊎造个櫃肚，到這下還在該位。」</verse>
				<verse number="6">( 以色列 人對 亞干 人个井該位出發，來到 摩西拉 。 亞倫 死在該位、埋在該位。佢个孻仔 以利亞撒 承接佢做祭司。</verse>
				<verse number="7">以色列 人離開該位，來到 谷歌大 ，然後到 約巴他 ；這位水源充足。</verse>
				<verse number="8">在 何烈 山个時 ，上主指派 利未 支族个人扛上主个約櫃，做祭司事奉佢，奉佢个名祝福。到今晡日， 利未 支族个子孫還係擔任這職份。</verse>
				<verse number="9">所以， 利未 支族無像其他支族分到土地；佢等照上主 — 你等上帝个應許，享受上主做佢等个產業。)</verse>
				<verse number="10">「像上擺恁樣，𠊎在山頂停留四十日夜；上主又一擺聽𠊎个祈禱，答應毋消滅你等。</verse>
				<verse number="11">佢命令𠊎，喊𠊎𢱋你等出發，使你等入去佔領佢應許愛賜給你等祖先个土地。」</verse>
				<verse number="12">「 以色列 人哪，愛注意聽上主 — 你等个上帝對你等个要求。你等愛敬畏上主 — 你等个上帝，遵行佢个道。你等愛一心一意敬愛佢，事奉佢，</verse>
				<verse number="13">遵守佢个誡命。為到你等个幸福，𠊎今晡日向你等頒佈上主个法律。</verse>
				<verse number="14">天㧯至高个天係上主 — 你等上帝个；大地㧯地上所有个也全部屬佢。</verse>
				<verse number="15">上主惜你等个祖先，所以對萬民中只有揀選你等成做佢自家个子民。到今晡日，你等還係佢个選民。</verse>
				<verse number="16">所以從今以後，你等愛將心肚个垃圾除掉，毋好再硬頸。</verse>
				<verse number="17">因為上主 — 你等个上帝係萬神个神，萬主个主。佢係至大、全能、應該受敬畏个上帝。佢無偏心，也毋被人收買。</verse>
				<verse number="18">佢為孤兒㧯寡婦伸冤，也惜你等當中个外族人，賜給佢等食个㧯著个。</verse>
				<verse number="19">所以，你等應該惜外族人，因為你等在 埃及 也做過外族人。</verse>
				<verse number="20">你等愛敬畏上主 — 你等个上帝，愛事奉佢。你等愛對佢忠心，奉佢个名正做得發誓。</verse>
				<verse number="21">你等愛稱頌佢，因為佢係你等个上帝；你等親目看到佢為你等做奇妙偉大个事。</verse>
				<verse number="22">你等个祖先到 埃及 个時只有七十儕，這下，上主 — 你等个上帝使你等个人數增加到像天頂个星仔恁多。」</verse>
			</chapter>
			<chapter number="11">
				<verse number="1">「你等應當敬愛上主 — 你等个上帝，從頭到尾遵守佢所有个法律、例規㧯誡命。</verse>
				<verse number="2">愛知，𠊎今晡日係對你等講話，毋係對你等个子女講話，因為係你等親身體驗上主 — 你等上帝个管教，來認識佢。你等看過上主个偉大、權柄、能力，</verse>
				<verse number="3">㧯神蹟。你等親目看到佢樣般對付 埃及 王㧯佢个國家，</verse>
				<verse number="4">也看到佢樣般消滅 埃及 个軍隊、戰馬㧯戰車。佢等追你等个時，上主使 紅海 浸掉佢等，將佢等徹底消滅。</verse>
				<verse number="5">你等知，你等來到這地以前，在曠野中，上主為你等所做个一切。</verse>
				<verse number="6">你等記得佢樣般對付 呂便 个後代、 以利押 个孻仔 大坍 㧯 亞比蘭 。大地在 以色列 眾人面前裂開，將佢等㧯佢等个家族、帳篷、㧯所有个僕人、頭牲全部吞落去。</verse>
				<verse number="7">你等親目看到上主所做這一切偉大个事。」</verse>
				<verse number="8">「你等愛遵守𠊎今晡日吩咐你等所有个誡命，恁樣你等正會有力量，做得過河佔領你等愛入去个土地，</verse>
				<verse number="9">在上主應許給你等个祖先㧯子孫、該流乳㧯蜜盡肥个土地上享受長久个日仔。</verse>
				<verse number="10">你等愛入去佔領个土地毋係像你等離開个 埃及 。在 埃及 ，你等委種以後還愛辛苦踏水車淹水正有收成，</verse>
				<verse number="11">總係你等愛過河佔領个土地有山、有谷、有雨水个滋潤。</verse>
				<verse number="12">上主 — 你等个上帝對年頭到年尾一直看顧這土地。</verse>
				<verse number="13">「所以，你等愛認真遵行𠊎今晡日頒佈給你等个誡命，敬愛上主 — 你等个上帝，一心一意事奉佢。</verse>
				<verse number="14">恁樣，佢就會照時給你等春雨、秋水，使你等有罅額个五榖、新酒、橄欖油，</verse>
				<verse number="15">㧯畜頭牲个草料。你等會食到飽足。</verse>
				<verse number="16">你等愛細膩，免得心肝受到引誘，害你等背叛上主，去服事跪拜別个神明。</verse>
				<verse number="17">若係毋聽，上主會向你等發譴，毋落水給你等，使土地燥旱，毋會出產五榖；就算佢賜給你等个係盡靚个土地，你等也會當遽在該位消滅。</verse>
				<verse number="18">「所以，你等愛記得這兜誡命，放在心肚。愛將這兜誡命做記號，䌈在手項、戴在額頭。</verse>
				<verse number="19">你等愛將這兜誡命教你等个子女，無論在屋下抑係出外，歇睏抑係做工，愛常常談論這兜誡命。</verse>
				<verse number="20">你等愛將這兜誡命寫在屋下个門框㧯大門。</verse>
				<verse number="21">恁樣，你等㧯你等个子女就會在上主所應許給你等祖先个土地上享受長久个日仔；天地存在幾久，你等就住在該位幾久。</verse>
				<verse number="22">「你等愛認真遵行𠊎頒佈給你等所有个誡命，敬愛上主 — 你等个上帝，實行佢个道，對佢忠心。</verse>
				<verse number="23">恁樣，你等入去个時，上主會逐出各民族，使你等佔領比你等較強大个民族个土地。</verse>
				<verse number="24">你等腳所行過个土地全部愛歸給你等。你等个地界愛對南片个曠野到北片个 黎巴嫩 山，對東片个 幼發拉底 河到西片个 地中海 。</verse>
				<verse number="25">無一儕在你等面前企得住。你等無論到㖠位去，上主 — 你等个上帝愛照佢个應許使你等大大得勝；無人毋驚你等。</verse>
				<verse number="26">「看哪，𠊎今晡日將祝福㧯咒詛擺在你等面前，俾你等自家來選。</verse>
				<verse number="27">若係你等遵行𠊎今晡日吩咐你等，就係上主 — 你等上帝个所有誡命，就會得到祝福。</verse>
				<verse number="28">若係你等毋遵行這兜誡命，轉向你等從來毋認識个神明，去跈它兜，就會受咒詛。</verse>
				<verse number="29">當上主 — 你等个上帝帶領你等入去你等愛佔領个土地以後，你等愛在 基利心 山宣佈祝福个話，在 以巴路 山宣佈咒詛个話。</verse>
				<verse number="30">(這兩座山全部在 約旦 河西片日頭落山个所在，係山壢个 迦南 人个土地，在 吉甲 个西片，偎近 摩利 聖樹。)</verse>
				<verse number="31">你等黏時愛過 約旦 河，去佔領上主 — 你等个上帝所賜給你等个土地。你等佔領該土地，在該位安居以後，</verse>
				<verse number="32">一定愛遵行𠊎今晡日吩咐你等个所有法律。」</verse>
			</chapter>
			<chapter number="12">
				<verse number="1">「你等住在上主 — 你等祖先个上帝賜給你等土地个時，愛一生人認真遵守這所有个法律㧯誡命。</verse>
				<verse number="2">你等佔領該垤土地、逐出該兜民族以後，愛將佢等拜神明个逐所在，無論在高山、細山、抑係在逐頭大樹下，全部滅掉。</verse>
				<verse number="3">你等也愛拆掉佢等个祭壇，打碎佢等个神柱，燒掉 亞舍拉 女神像，斬斷佢等个偶像，恁樣將佢等个名對該兜所在除掉。</verse>
				<verse number="4">「你等做毋得學該兜民族个方式來敬拜上主 — 你等个上帝。</verse>
				<verse number="5">反轉，對你等各支族个地區中，上主 — 你等个上帝愛選一個所在，來設立佢个名，俾你等在該位敬拜佢。</verse>
				<verse number="6">你等愛到該所在獻燒化祭㧯其他牲儀、十分之一个祭物、供物、還願祭、甘心祭㧯頭胎个牛羊。</verse>
				<verse number="7">你等㧯屋下个人全部愛去該位，在該賜福給你等，上主 — 你等上帝个面前啉食，享受你等煞猛得來个好東西。</verse>
				<verse number="8">「到這下為止，你等全部照自家个意思敬拜，因為你等還吂入去上主 — 你等个上帝所賜給你等該安居樂業个土地。到你等入去个時，你等就做毋得再照這下个方式敬拜。</verse>
				<verse number="9"></verse>
				<verse number="10">你等過 約旦 河後，上主 — 你等个上帝愛使你等佔領該垤土地，在該位住。佢愛保護你等無受四周圍个對敵侵害，使你等安居樂業。</verse>
				<verse number="11">上主 — 你等个上帝愛選一個所在來設立佢个名；你等愛帶等𠊎命令你等愛獻个所有祭物，到該位敬拜佢，就係帶燒化祭㧯其他个牲儀、十分之一个祭物㧯供物，㧯許願愛獻給上主所有好个禮物。</verse>
				<verse number="12">你等愛㧯你等个子女、奴僕、奴婢、並住在你等城肚个 利未 人，共下在上主 — 你等上帝个面前歡喜快樂；愛記得 利未 支族無自家个產業。</verse>
				<verse number="13">你等愛細膩，做毋得隨便選獻祭个所在；</verse>
				<verse number="14">你等一定愛到上主在你等某一支族所選定个所在獻祭。你等只有做得在該位獻燒化祭，遵行𠊎命令你等所有个事。</verse>
				<verse number="15">「你等無論住在麼介城肚，上主 — 你等个上帝所賜給你等个頭牲，你等全部做得照自家个意思㓾掉，食牠兜个肉。無論在禮儀上係淨浰抑係無淨浰个人，全部做得食，像食野鹿抑係羚羊个肉恁樣。</verse>
				<verse number="16">總係你等做毋得食血，愛將它倒在地上，像倒水一樣。</verse>
				<verse number="17">你等做毋得在自家住个城肚食獻給上主个祭物，就係五榖、酒㧯橄欖油个十分之一、頭胎个牛羊、許願愛獻个祭、甘心祭，抑係一切其他个祭物。</verse>
				<verse number="18">你等㧯你等个子女、奴僕、奴婢、並住在你等城肚个 利未 人，只有做得在上主 — 你等个上帝所選个所在，在上主面前食祭物。你等愛在該位享受自家所做个一切，歡喜快樂。</verse>
				<verse number="19">你等愛細膩，在自家土地上住个時，做毋得無顧到 利未 支族个人。</verse>
				<verse number="20">「在上主 — 你等个上帝照應許發展你等个土地後，你等做得照自家个意思食肉。</verse>
				<verse number="21">若係上主 — 你等个上帝所選愛設立佢名个所在離你等當遠，你等就做得照𠊎所吩咐个，將上主賜給你等个牛羊㓾掉，在你等住个城肚照自家个意思食肉。</verse>
				<verse number="22">無論在禮儀上係淨浰抑係無淨浰个人，全部做得食，像食野鹿㧯羚羊个肉恁樣。</verse>
				<verse number="23">總係你等絕對做毋得食血，因為血係生命，你等做毋得將生命㧯肉共下食落去。</verse>
				<verse number="24">你等絕對做毋得食血，愛將它倒在地上，像倒水一樣。</verse>
				<verse number="25">若係你等遵行這誡命，上主就會歡喜；你等㧯子孫全部會事事順利。</verse>
				<verse number="26">愛將你等分別為聖个祭物㧯許願愛獻个祭帶到上主所選个所在，</verse>
				<verse number="27">在該位獻燒化祭，連肉帶血放在上主 — 你等上帝个祭壇頂來燒。你等也愛在該所在獻其他个牲儀，將血倒在上主 — 你等上帝个祭壇頂，食牠兜个肉。</verse>
				<verse number="28">你等愛認真遵守𠊎所吩咐个命令，你等㧯子孫就會長久事事順利；因為你等做个事係好个，係上主 — 你等个上帝所歡喜个。」</verse>
				<verse number="29">「你等佔領各民族个土地後，上主 — 你等个上帝愛消滅這兜民族。你等愛佔領佢等个土地，在該位住。</verse>
				<verse number="30">上主消滅這兜民族後，你等愛細膩，做毋得跈佢等个宗教風俗，因為該會帶來悲慘个結局。你等也做毋得問佢等樣般拜佢等个神明，做毋得學佢等个儀式，</verse>
				<verse number="31">做毋得用佢等个儀式來敬拜上主 — 你等个上帝，因為佢等在崇拜中做上主所惱个事。佢等甚至用自家个子女做牲儀，在祭壇頂燒，獻給佢等个神明。</verse>
				<verse number="32">「你等愛確實遵守𠊎所吩咐个誡命，做毋得加添，也做毋得減少。」</verse>
			</chapter>
			<chapter number="13">
				<verse number="1">「若係你等當中有做先知抑係解夢个人，用神蹟奇事拐騙你等，</verse>
				<verse number="2">喊你等去拜從來毋識拜過个神明，就算佢講个神蹟奇事實現了，</verse>
				<verse number="3">你等也毋好搭佢；因為上主 — 你等个上帝用佢來考驗你等，愛知你等係毋係一心一意敬愛上主 — 你等个上帝。</verse>
				<verse number="4">你等愛順從上主 — 你等个上帝，敬畏佢；你等愛聽從佢，遵行佢个誡命；你等愛事奉佢，專心靠佢。</verse>
				<verse number="5">該先知抑係解夢个人，你等一定愛處死佢；因為佢煽動你等悖逆上主 — 你等个上帝，就係𢱋你等出 埃及 、救你等離開做奴才之地个上主。這種人係邪惡个；佢想愛拐騙你等偏離上主 — 你等个上帝所指示个道路。你等一定愛處死佢，對你等當中除掉這種邪惡个事。</verse>
				<verse number="6">「連你等个兄弟、子女、所惜个𡜵娘，抑係盡親近个朋友，也可能會偷偷仔來煽動你等去拜你等㧯你等祖先從來毋識拜過个神明。</verse>
				<verse number="7">佢等當中，可能有人會拐騙你等去拜附近抑係遠方个人所拜个神明。</verse>
				<verse number="8">總係你等做毋得聽從佢，做毋得信服佢。你等毋使憐憫這種人，也毋好保護佢。</verse>
				<verse number="9">一定愛除掉佢！你等自家愛先出手用石頭㧹佢，來俾別人跈。</verse>
				<verse number="10">愛用石頭㧹死佢，因為佢想愛拐騙你等離開上主 — 你等个上帝，就係𢱋你等出 埃及 、救你等離開做奴才之地个上主。</verse>
				<verse number="11">恁樣， 以色列 人全部聽到這件事正會驚，你等當中就毋會再有人敢做這種邪惡个事。</verse>
				<verse number="12">「若係你等聽人講，在上主 — 你等个上帝賜給你等住个一個城肚有壞人出現，拐騙城肚个人去拜你等從來毋識拜過个神明，</verse>
				<verse number="13"></verse>
				<verse number="14">你等愛徹底打探、調查。若係證明這種邪惡个事確實發生過，</verse>
				<verse number="15">你等就愛用刀劍消滅城肚所有个人民㧯頭牲，將該城完全毀滅。</verse>
				<verse number="16">你等愛將城肚所有个戰利品集在廣場上，然後放火將城㧯城肚所有財物全部燒掉，做祭物獻給上主 — 你等个上帝。該城愛永遠變荒埔，做毋得重建。</verse>
				<verse number="17">所有應該燒掉个東西，你等做毋得保留。恁樣，上主就毋會再發譴。若係你等遵行𠊎今晡日所頒佈个、上主 — 你等上帝一切个誡命，實行佢所歡喜个事，佢就會憐憫你等，用慈愛款待你等，照佢對你等祖先个應許，使你等人口增加。」</verse>
				<verse number="18"></verse>
			</chapter>
			<chapter number="14">
				<verse number="1">「你等係上主 — 你等上帝个子女。你等為死人哀傷个時，做毋得像外族人割傷自家个身體，剃光額頭；</verse>
				<verse number="2">因為你等係聖潔个人，屬上主 — 你等个上帝；佢對天下萬民中揀選你等做佢自家寶貝个子民。」</verse>
				<verse number="3">「上主宣佈一切得人惱个東西，你等做毋得食。</verse>
				<verse number="4">你等做得食个動物係：牛、綿羊、山羊、</verse>
				<verse number="5">野鹿、野綿羊、野山羊、羚羊。</verse>
				<verse number="6">所有腳蹄分做兩瓣，又會倒草个動物，你等全部做得食；</verse>
				<verse number="7">總係該兜只有腳蹄分瓣，抑係單淨會倒草个動物，就做毋得食。駱駝、兔仔、獾，係無淨浰个動物，全部做毋得食；因為牠兜雖然會倒草，總係腳蹄無分瓣。</verse>
				<verse number="8">豬仔係無淨浰个動物，也做毋得食；因為豬仔雖然腳蹄分瓣，總係毋會倒草。這兜無淨浰動物个肉，你等做毋得食，連摸牠兜个屍體也做毋得。</verse>
				<verse number="9">「所有在水肚，有魚翼有鱗个魚類，你等全部做得食；</verse>
				<verse number="10">總係無魚翼無鱗个魚類，你等做毋得食；你等愛將牠兜算做無淨浰个。</verse>
				<verse number="11">「所有算做淨浰个鳥仔，你等全部做得食。</verse>
				<verse number="12">做毋得食个鳥仔係：鷹鳥、禿鷹、鷂婆、鳶、獵鷹、烏鴉㧯牠共類个、鴕鳥、梟、海鷗、鷹雀㧯牠共類个、鴟鴞、鸕鶿、貓頭鳥、角鴟、鵜鶘、鵰、鸛鳥、白鶴㧯牠共類个、戴鵀、㧯蝠婆 。</verse>
				<verse number="13"></verse>
				<verse number="14"></verse>
				<verse number="15"></verse>
				<verse number="16"></verse>
				<verse number="17"></verse>
				<verse number="18"></verse>
				<verse number="19">「凡係有翼胛个昆蟲，你等愛將牠兜算做無淨浰个，全部做毋得食。</verse>
				<verse number="20">凡係淨浰个昆蟲，你等全部做得食。</verse>
				<verse number="21">「凡係自然死掉个動物，你等全部做毋得食；總係做得給你等城肚个外族人食，抑係賣給其他个外族人食；因為你等係神聖个子民，屬上主 — 你等个上帝。 「做毋得用羊乸个乳來煮細羊仔。」</verse>
				<verse number="22">「你等愛對逐年土地个收成中拿十分之一出來，</verse>
				<verse number="23">到上主 — 你等上帝所選愛設立佢个名个所在，在佢面前食所獻該十分之一个五榖、酒、橄欖油，㧯頭胎个牛羊。你等愛實行這條例，學習常常敬畏上主 — 你等个上帝。</verse>
				<verse number="24">若係你等个屋離開上主所選愛設立佢个名个所在當遠，毋使將上主 — 你等个上帝使你等豐收个十分之一運到該位，</verse>
				<verse number="25">你等做得賣土產㧯頭牲，將錢帶到上主 — 你等个上帝所選个所在。</verse>
				<verse number="26">你等做得照自家个意思在該位用錢買牛、羊、酒、釅酒，抑係你等心肝所想愛个。你等全家愛在上主 — 你等上帝面前食啉快樂。</verse>
				<verse number="27">「你等做毋得無顧到住在你等城肚个 利未 人，因為佢等無自家个產業。</verse>
				<verse number="28">每三年个最後一年，你等愛將該年个十分之一運到城肚囤起來。</verse>
				<verse number="29">這兜存糧係愛供應無自家產業个 利未 人，還有你等城肚个外族人、孤兒㧯寡婦。佢等做得來食到飽足。你等恁樣做，上主 — 你等个上帝就會在你等所做个一切事上賜福給你等。」</verse>
			</chapter>
			<chapter number="15">
				<verse number="1">「在逐個七年最尾个一年，你等愛免掉人个債。</verse>
				<verse number="2">這個條例規定：所有借錢給 以色列 同胞个債主一定愛將同胞个債免掉，做毋得再討，因為這債務得到免掉係上主宣佈个。</verse>
				<verse number="3">外國人欠个債，你等做得再討；總係對自家个同胞，無論欠你等麼介，全部做毋得再討。</verse>
				<verse number="4">「上主 — 你等个上帝會在佢愛賜給你等个土地上大大賜福給你等。若係你等聽從上主 — 你等个上帝，認真遵行𠊎今晡日給你等所有个命令，你等當中就毋會有窮苦人。</verse>
				<verse number="5"></verse>
				<verse number="6">因為上主 — 你等个上帝愛照佢个應許賜福給你等。你等會有錢借給盡多外國人，也毋使向人借錢。你等會管多多國人，總係無一國會管你等。</verse>
				<verse number="7">「在上主 — 你等个上帝賜給你等个土地上，無論在㖠個城肚，若係發現有窮苦个同胞，你等做毋得恁硬心、跔手毋幫助佢。</verse>
				<verse number="8">你等顛倒愛出手大方，將佢所需要个借給佢，來補佢个不足。</verse>
				<verse number="9">你等愛細膩，做毋得因為第七年 — 安息年會到了，就毋借給窮苦个同胞；你等心肚絕對做毋得有這種壞念頭。若係你等毋借，佢向上主控告，你等就有罪了。</verse>
				<verse number="10">毋好毋拌得，一定愛大方給佢，上主 — 你等个上帝就會凡事賜福給你等。</verse>
				<verse number="11">你等住个所在常常會有窮苦人，所以𠊎命令你等，一定愛向窮苦有需要个同胞大大方方伸手幫助佢等。」</verse>
				<verse number="12">「若係有 希伯來 同胞，無論男女，賣做你等个奴才，已經服事你等六年，到第七年，你等一定愛放佢，俾佢自由。</verse>
				<verse number="13">你等放佢个時，毋好俾佢空手離開。</verse>
				<verse number="14">上主 — 你等个上帝樣般賜福給你等，你等也愛照樣將你等个羊群、五榖㧯酒大方分給佢。</verse>
				<verse number="15">你等愛記得，你等在 埃及 做過奴才；上主 — 你等个上帝救贖你等，所以𠊎今晡日正恁樣命令你等。</verse>
				<verse number="16">「若係你等个奴才因為敬愛你等㧯你等个家庭，無愛離開你等，愛㧯你等共下住下去，</verse>
				<verse number="17">你等就愛拿鑽仔來將佢个耳公靠在門枋鑽一隻孔。恁樣，佢就一生人做你等个奴才。對待奴婢也用共樣个方法。</verse>
				<verse number="18">你等放奴才个時，心肝毋好毋甘願；因為佢服事你等六年，只有拿一般工人所得工錢个一半 。你等恁樣做，上主 — 你等个上帝就會凡事賜福給你等。」</verse>
				<verse number="19">「你等愛將頭胎个牛牯、羊牯分別出來，獻給上主 — 你等个上帝；做毋得用這種牛耕種，也毋好剪這種羊个毛。</verse>
				<verse number="20">逐年，你等㧯你等屋下人愛在上主所選个所在，在上主 — 你等上帝面前，食這種牛羊个肉。</verse>
				<verse number="21">若係這種牛羊有缺點，像跛腳、瞙目，抑係其他任何缺點，你等就做毋得將牠獻給上主 — 你等个上帝。</verse>
				<verse number="22">你等做得在屋下食這種有缺點个牛羊个肉。無論在禮儀上係淨浰抑係無淨浰个人，全部做得食，像食野鹿抑係羚羊一樣。</verse>
				<verse number="23">總係你等做毋得食血，愛將它倒在地上，像倒水一樣。」</verse>
			</chapter>
			<chapter number="16">
				<verse number="1">「你等一定愛在亞筆月守𨃟過節，對上主 — 你等个上帝表示尊敬，因為佢識在這隻月个一個暗晡救你等出 埃及 。</verse>
				<verse number="2">你等愛到上主 — 你等上帝所選愛設立佢个名个所在，在該位㓾牛羊，做𨃟過節个牲儀獻給佢。</verse>
				<verse number="3">𨃟過節个食物做毋得有發酵个。你等一定愛食無酵餅七日，就像該年你等緊緊促促離開 埃及 。這種餅又安到苦難餅；你等愛食，使你等一生人紀念出 埃及 、離開苦難該日。</verse>
				<verse number="4">這七日，你等境內个逐家全部不准有發酵；第一暗晡所㓾頭牲个肉愛在該暗晡食掉，做毋得留到第二朝晨。</verse>
				<verse number="5">「你等愛在上主 — 你等个上帝所選愛設立佢个名个所在㓾𨃟過節个頭牲，做毋得在佢愛賜給你等个其他城肚來㓾。愛等日頭落山以後正㓾，因為出 埃及 當時係在日頭落山个時。</verse>
				<verse number="6"></verse>
				<verse number="7">愛在上主 — 你等个上帝所選个所在煮祭肉，食祭肉，第二朝晨就轉屋下去。</verse>
				<verse number="8">你等愛繼續食無酵餅六日；第七日愛聚集敬拜上主 — 你等个上帝，做毋得工作。」</verse>
				<verse number="9">「你等愛對開始收割該日，算七禮拜，</verse>
				<verse number="10">然後守七七收割節，對上主 — 你等个上帝表示尊敬。你等愛照佢所賞賜个收成，帶等甘心祭來獻給佢。</verse>
				<verse number="11">你等㧯你等个子女、奴僕、奴婢、住在你等城肚个 利未 人、並在你等中間个外族人、孤兒㧯寡婦，愛在上主 — 你等个上帝所選愛設立佢个名个所在共下歡喜慶祝。</verse>
				<verse number="12">你等一定愛確實遵守這兜條例；毋好毋記得你等識在 埃及 做過奴才。」</verse>
				<verse number="13">「你等囤好五榖㧯新酒以後，愛守搭寮仔節七日。</verse>
				<verse number="14">你等㧯你等个子女、奴僕、奴婢、並住在你等城肚个 利未 人、外族人、孤兒、寡婦，愛共下歡喜慶祝。</verse>
				<verse number="15">你等愛在上主 — 你等个上帝所選个所在守搭寮仔節七日，表示尊敬。大家愛歡喜快樂；因為上主 — 你等个上帝會使你等豐收，使你等所做个全部順利。</verse>
				<verse number="16">「全國所有个男人愛一年三擺，就係在𨃟過節、七七收割節、搭寮仔節，到上主 — 你等个上帝所選个所在敬拜佢。毋好空手去。</verse>
				<verse number="17">逐儕愛照上主 — 你等个上帝所賜个福份，盡自家个能力，帶禮物獻給佢。」</verse>
				<verse number="18">「你等愛對各支族中，為上主 — 你等个上帝所賜給你等个城鎮設立審判官㧯其他官員。這兜人一定愛用公平審判人民，</verse>
				<verse number="19">愛公正無偏心，毋好亂用職權；也做毋得被人收買，因為被人收買會使明理个人青盲，使公正个人顛倒是非。</verse>
				<verse number="20">你等執行法律愛追求公平正直。恁樣，你等正會有好承接上主 — 你等个上帝所愛賜給你等个土地，長久住在該位。</verse>
				<verse number="21">「你等為上主 — 你等个上帝起祭壇个時，做毋得在堘頭設立 亞舍拉 女神个樹𣎴仔，</verse>
				<verse number="22">也做毋得設立石𣎴仔來拜，因為該係上主 — 你等个上帝所惱个。」</verse>
			</chapter>
			<chapter number="17">
				<verse number="1">「做毋得將有缺點个牛羊獻給上主 — 你等个上帝，因為該係佢所惱个。</verse>
				<verse number="2">「在上主 — 你等个上帝所賜給你等住个城肚，若係有男人抑係婦人家得罪上主，離開佢个約，違背佢个禁令，去敬拜服事別个神明，抑係拜日頭、月光、星辰，</verse>
				<verse number="3"></verse>
				<verse number="4">你等若聽到這種事，就一定愛徹底調查追究。若係這種壞事確實在 以色列 中發生，</verse>
				<verse number="5">你等一定愛將該男人抑係婦人家拉到城門外，用石頭㧹死。</verse>
				<verse number="6">總係你等愛有兩個抑係兩個以上个證人控告佢，正做得處死佢；你等做毋得單靠一個人做見證就處死佢。</verse>
				<verse number="7">做證人个愛先㧹石頭，眾人正跈等佢㧹石頭。恁樣，正能對你等當中除掉這種壞事。</verse>
				<verse number="8">「有兜案件可能係地方上个審判官盡難裁決个，像財產个糾紛、傷害个案件、分辨謀殺抑係誤殺个案件。若係有這種个案件，你等一定愛拿到上主 — 你等个上帝所選个所在，</verse>
				<verse number="9">交給值班个 利未 祭司㧯審判官去裁決。</verse>
				<verse number="10">佢等在上主所選个所在裁決以後，你等就愛遵照佢等个指示認真執行。</verse>
				<verse number="11">愛完全照佢等个指教，照佢等个裁決去執行，做毋得偏離左右。</verse>
				<verse number="12">麼人違抗該值班在上主 — 你等上帝面前个祭司抑係審判官个裁決，就愛處死刑。恁樣，你等就能對 以色列 中除掉這種壞事。</verse>
				<verse number="13">人民聽到正會驚；無人敢再做這種壞事。」</verse>
				<verse number="14">「你等佔領上主 — 你等个上帝愛賜給你等个土地，在該位安居之後，若係決定愛像周圍个國家共樣有自家个王，</verse>
				<verse number="15">就一定愛設立上主 — 你等个上帝所揀選个人。你等一定愛設立自家个同胞做王，做毋得設立外族人。</verse>
				<verse number="16">王做毋得為自家增加戰馬；也做毋得派人倒轉 埃及 買馬 ，因為上主識吩咐你等講：『做毋得再轉去 埃及 。』</verse>
				<verse number="17">王做毋得增加王妃，免得受引誘離開上主；也做毋得為自家積存金銀，貪愛財富。</verse>
				<verse number="18">王登基以後，就愛對該兜 利未 祭司拿這法律書，為自家抄寫一份。</verse>
				<verse number="19">王愛將這卷書放在身邊，一生人常常讀，煞猛學習樣般敬畏上主 — 佢个上帝，確實遵行這法律書底背所記載一切个法律㧯誡命。</verse>
				<verse number="20">恁樣，佢就毋會驕傲、看輕同胞，也毋會違背上主个命令，偏差左右。佢正會統治久久；佢个子孫也會繼續統治 以色列 。」</verse>
			</chapter>
			<chapter number="18">
				<verse number="1">「 利未 支族个祭司，就係 利未 全支族，在 以色列 中做毋得有自家个土地㧯產業。佢等个生活愛倚靠人民獻給上主个祭物㧯奉獻。</verse>
				<verse number="2">佢等無像其他支族个人有自家个產業；照上主个應許，上主自家就做佢等个產業。</verse>
				<verse number="3">「人民獻牛羊做牲儀个時，愛將前腿、下頷㧯腹內分給祭司。</verse>
				<verse number="4">你等也愛將新出个五榖、新酒、橄欖油，㧯新剪个羊毛交給佢等；</verse>
				<verse number="5">因為上主 — 你等个上帝對各支族中揀選 利未 人㧯佢等个子孫，永遠奉上主个名做祭司。</verse>
				<verse number="6">「 利未 人若係自願離開佢在 以色列 中住个城鎮，一心一意到上主所選个所在，</verse>
				<verse number="7">就做得奉上主 — 佢上帝个名做祭司，㧯該所在其他 利未 人共下同工事奉上主。</verse>
				<verse number="8">佢㧯其他个祭司愛接受平多个糧食。佢屋下多送給佢个，佢還做得留等。」</verse>
				<verse number="9">「你等進入上主 — 你等个上帝所愛賜給你等个土地之後，做毋得跈該地各民族所行得人惱个壞風俗。</verse>
				<verse number="10">你等做毋得將子女放在祭壇頂燒；也做毋得卜卦、算命、行邪術、</verse>
				<verse number="11">畫符筊、求問鬼神抑係死人个陰魂。</verse>
				<verse number="12">上主盡惱做這種壞事个人。所以，上主 — 你等个上帝愛在你等面前除掉該兜民族。</verse>
				<verse number="13">你等絕對愛對上主 — 你等个上帝完全忠心。」</verse>
				<verse number="14">接等， 摩西 講：「你等愛佔領个地，該兜民族聽從卜卦㧯算命个話；總係上主 — 你等个上帝不准你等恁樣做。</verse>
				<verse number="15">上主 — 你等个上帝愛對你等同胞中間為你等興起一位像𠊎恁樣个先知；你等愛聽從佢。</verse>
				<verse number="16">「你等聚集在 何烈 山該日，懇求上主 — 你等个上帝，講：『毋好再俾𠊎等聽到上主 — 𠊎等个上帝講話，也毋好再俾𠊎等看到佢在火焰中出現，免得𠊎等黏時死掉。』</verse>
				<verse number="17">對恁樣，上主就㧯𠊎講：『佢等个要求盡著。</verse>
				<verse number="18">𠊎愛對佢等同胞中間為佢等興起一位像你恁樣个先知。𠊎愛將所愛講个話親自㧯佢講；佢愛將𠊎一切个命令㧯人民講。</verse>
				<verse number="19">佢愛奉𠊎个名講𠊎喊佢講个話；麼人毋聽從，麼人就會受責罰。</verse>
				<verse number="20">若係有先知無𠊎个命令，總係借𠊎个名講話，抑係有先知用別个神明个名講話，佢一定愛處死刑。』</verse>
				<verse number="21">「你等可能會想：『愛樣般正會知，該毋係上主所講个話？』</verse>
				<verse number="22">若係有先知自家認為代上主講話，總係佢所講个話並無實現，恁樣，佢个話就毋係上主所講个。該先知係照自家个意思講話，你等毋使驚佢。」</verse>
			</chapter>
			<chapter number="19">
				<verse number="1">「在上主 — 你等个上帝消滅佢愛賜給你等該地个各民族，使你等佔領佢等个土地，俾你等住在佢等个城鎮㧯屋仔以後，</verse>
				<verse number="2">你等就愛將歸垤土地分做三區，在逐區个中心起一座城，愛在交通方便个地方，使因為過失害死人个人做得逃到該位，要求保護。</verse>
				<verse number="3"></verse>
				<verse number="4">若係有人毋堵好害死㧯佢全無冤仇个人，佢做得逃到一個逃閃城去保命。</verse>
				<verse number="5">舉例來講，有人㧯鄰舍共下到樹林中斬樹仔，當斬个時，佢个斧頭𢫫掉，飛到佢鄰舍个身項，害佢死掉，這個人做得逃到任何一個逃閃城去保命。</verse>
				<verse number="6">若係只有一個逃閃城，可能因為路途忒遠，該報血仇个親戚逐到佢，在大發火中將佢㓾死。其實，這個人係毋堵好害死㧯佢全無冤仇个鄰舍，係毋應該處死个。</verse>
				<verse number="7">所以，𠊎命令你等愛起三座逃閃城。</verse>
				<verse number="8">「上主 — 你等个上帝，照佢向你等祖先所做个應許，若係擴展你等个地界，將佢應許給你等个土地賜給你等，</verse>
				<verse number="9">你等就愛另外增加三座逃閃城。 (若係你等認真遵行𠊎今晡日向你等頒佈个所有誡命，敬愛上主 — 你等个上帝，常常遵行佢个道，佢就會將這土地賜給你等。)</verse>
				<verse number="10">你等愛恁樣做，俾無罪个人毋使死；你等也毋使在上主 — 你等个上帝愛賜給你等个土地上承擔無罪个人被人㓾死个血債。</verse>
				<verse number="11">「若係有人恨佢个鄰舍，埋伏起來，故意殺害佢，然後逃到一個逃閃城去，</verse>
				<verse number="12">佢本城个長老一定愛派人去將佢強強捉轉來，交給報血仇个親戚來處死佢。</verse>
				<verse number="13">你等毋使憐憫這種人，愛對 以色列 中除掉這種謀殺人个罪，使你等就凡事順利。」</verse>
				<verse number="14">「你等在上主 — 你等个上帝愛賜給你等个土地上，做毋得徙鄰舍个地界；該係前人所劃定个。」</verse>
				<verse number="15">「單單靠一個證人來定人个罪係毋罅个；至少愛有兩個以上个證人正做得定人个罪。</verse>
				<verse number="16">若係有一個壞人做假見證，陷害另外一個人，</verse>
				<verse number="17">這兩個爭論个人就愛到上主所選个所在，求輪班个祭司㧯審判官來決裁。</verse>
				<verse number="18">審判官一定愛詳細調查案件，若係發現證人做假見證，陷害 以色列 同胞，</verse>
				<verse number="19">你等就愛對待佢像佢想愛對待同胞一樣。恁樣，你等就做得除掉這種壞事。</verse>
				<verse number="20">其他个人聽到正會驚，無人敢再做這種壞事。</verse>
				<verse number="21">對這種人，你等毋使憐憫，應該用命賠命，目珠賠目珠，牙齒賠牙齒，手賠手，腳賠腳。」</verse>
			</chapter>
			<chapter number="20">
				<verse number="1">「你等出去㧯敵人相㓾，看到佢等个戰車、戰馬㧯軍隊比你等較多个時，毋使驚，因為救你等離開 埃及 个上主 — 你等个上帝會㧯你等同在。</verse>
				<verse number="2">你等相㓾以前，祭司愛行前向軍隊講：</verse>
				<verse number="3">『 以色列 人啊，你等愛聽！今晡日你等出去㧯敵人相㓾，毋好恁無膽，毋使緊張，毋使驚，毋使顫；</verse>
				<verse number="4">因為上主 — 你等个上帝會㧯你等共下去；佢會為你等㧯敵人相㓾，使你等打贏。』</verse>
				<verse number="5">「接等，長官愛對部下宣佈：『你等當中有麼人屋仔起好還吂行奉獻禮？恁樣个人做得轉去。驚怕佢戰死，別人代佢奉獻屋仔。</verse>
				<verse number="6">你等當中有麼人種葡萄園還吂收成？恁樣个人做得轉去。驚怕佢戰死，別人享受佢个葡萄。</verse>
				<verse number="7">你等當中有麼人過定了，還吂結婚？恁樣个人做得轉去。驚怕佢戰死，別人討佢个未婚妻。』</verse>
				<verse number="8">「長官又愛對部下講：『若係你等當中有人無膽，驚死，佢乜做得轉去。驚怕佢會影響全軍个士氣。』</verse>
				<verse number="9">長官向部下宣佈以後，愛指派各單位个指揮官。</verse>
				<verse number="10">「你等攻打一座城个時，愛先俾城肚个人有機會投降。</verse>
				<verse number="11">若係佢等打開城門投降，城肚所有个人全部愛做你等个奴才，代你等做苦工。</verse>
				<verse number="12">若係佢等毋投降，愛㧯你等對抗，你等就愛圍困該城。</verse>
				<verse number="13">上主 — 你等个上帝使你等佔領該城以後，你等就愛將城肚个男人㓾淨淨。</verse>
				<verse number="14">若係婦人家、細人仔、頭牲㧯城肚其他个東西，你等做得看做戰利品拿去用，因為係上主 — 你等个上帝賜給你等个。</verse>
				<verse number="15">這條例只有適用在該兜離你等愛住个所在當遠个城市。</verse>
				<verse number="16">「總係，在上主 — 你等个上帝愛賜給你等个土地上、在佔領該兜城以後，你等愛將所有个人㓾淨淨。</verse>
				<verse number="17">你等愛遵照上主 — 你等上帝个命令消滅所有个 赫 人、 亞摩利 人、 迦南 人、 比利洗 人、 希未 人、 耶布斯 人，</verse>
				<verse number="18">免得佢等拐騙你等去學佢等拜偶像个種種壞風俗，得罪上主 — 你等个上帝。</verse>
				<verse number="19">「你等攻打一座城个時，就算圍困當久，也做毋得斬掉果樹。你等做得食樹頂个果子，總係做毋得將樹仔斬掉，因為樹仔毋係你等个敵人！</verse>
				<verse number="20">你等做得斬無結果子个樹仔做材料，來造攻打城个設備，直到將該城打下來。」</verse>
			</chapter>
			<chapter number="21">
				<verse number="1">「你等在上主 — 你等个上帝愛賜給你等个土地上，若係發現有人被人㓾死，屍體被人㧒在野地，總係毋知係麼人㓾个，</verse>
				<verse number="2">你等个長老㧯審判官就愛去到㧒屍體个現場，對該位量到周圍各城鎮个距離，</verse>
				<verse number="3">看㖠座城最近現場。該城个長老就愛選一隻毋識掛過軛、毋識耕過田个細牛乸，</verse>
				<verse number="4">將牠牽到毋識燥過水个河壩滣，在無人耕種過个地方打斷牠个頸筋。</verse>
				<verse number="5">利未 祭司也愛跈等去，因為佢等愛決裁有關相爭㧯兇殺所有个案件。上主 — 你等个上帝已經揀選佢等來事奉佢，奉佢个名祝福。</verse>
				<verse number="6">最近現場該城个長老，全部愛在該隻細牛乸頂高洗手，</verse>
				<verse number="7">然後祈禱講：『𠊎等無㓾這個人，也無看到麼人㓾死佢。</verse>
				<verse number="8">上主啊，求你赦免你對 埃及 拯救出來个子民 以色列 。求你赦免𠊎等，莫俾𠊎等揹㓾無罪个人个血債。』</verse>
				<verse number="9">你等恁樣實行上主个要求，就毋使揹這㓾人个血債。」</verse>
				<verse number="10">「上主 — 你等个上帝使你等打贏仇敵，捉人轉來，</verse>
				<verse number="11">你可能在捉來个人當中發現盡靚个細妹仔，當合意，想討姖做𡜵娘。</verse>
				<verse number="12">恁樣，你就做得帶姖轉屋下。姖應該剃頭那毛，剪手指甲、腳指甲，</verse>
				<verse number="13">換掉舊个衫褲，住在你屋下為姖个爺𡟓哀傷一隻月。經過這站時間，你就做得㧯姖結婚。</verse>
				<verse number="14">後來你若係毋愛姖，就愛放姖自由；因為你識強迫姖㧯你結婚，毋好將姖準做奴婢賣掉。」</verse>
				<verse number="15">「若係有人有兩個𡜵娘，佢惜其中个一儕，無惜另外一儕。佢等兩儕㧯佢𫱔孻仔，總係長子係該佢無惜个𡜵娘𫱔个；</verse>
				<verse number="16">到分財產个時，佢做毋得偏心，做毋得將長子个權利轉給所惜个𡜵娘𫱔个孻仔。</verse>
				<verse number="17">就算長子係佢無惜个𡜵娘所𫱔个，也愛承認佢長子个權利，在分財產个時愛加一份給佢。佢係長子，係阿爸最後生个時𫱔个，應該得到長子个特權。」</verse>
				<verse number="18">「若係有人有硬頸又悖逆个孻仔，雖然逐擺受處罰，佢還係毋聽從爺𡟓个話，</verse>
				<verse number="19">爺𡟓就愛捉佢，帶佢到本城門口、該兜長老面前接受審判。</verse>
				<verse number="20">佢等愛對該兜長老講：『𠊎等个孻仔硬頸悖逆，毋聽從𠊎等个話，歸日好酒放蕩。』</verse>
				<verse number="21">城肚个人民就愛用石頭㧹死佢。恁樣，就能對你等當中除掉這種壞事。 以色列 人民聽到這種事，大家正會驚。」</verse>
				<verse number="22">「若係有人處死刑，屍體掛在𣎴仔頂，</verse>
				<verse number="23">這屍體做毋得留在𣎴仔頂到第二日，一定愛在該日埋葬，因為屍體掛在𣎴仔頂會來惹上帝咒詛該土地。你等愛埋葬屍體，免得打垃圾上主 — 你等个上帝賜給你等个土地。」</verse>
			</chapter>
			<chapter number="22">
				<verse number="1">「你等若係看到 以色列 同胞个牛羊尋毋到路，做毋得毋插牠；愛將牠牽轉去交還主人。</verse>
				<verse number="2">若係牠个主人離開你等當遠，抑係你等毋知牠个主人係麼人，就將牠牽轉屋下，等牠个主人來尋个時正還佢。</verse>
				<verse number="3">你等若係尋到 以色列 同胞毋見掉个驢仔、跌掉个衫褲抑係所有其他个東西，全部愛共樣處理，做毋得毋插。</verse>
				<verse number="4">「你等若係看到 以色列 同胞个驢仔抑係牛仔在路項跢倒，做毋得毋插牠；愛幫助主人將頭牲拉起來。</verse>
				<verse number="5">「婦女做毋得著男人个衫褲；男人也做毋得著婦女个衫褲；因為上主 — 你等个上帝盡惱恁樣打扮个人。</verse>
				<verse number="6">「你等若係發現樹頂抑係地上个鳥藪，藪肚有鳥乸在孵卵抑係㧯鳥子共下，做毋得將鳥乸捉走。</verse>
				<verse number="7">你等做得捉鳥子走，總係愛放鳥乸走。恁樣，你等就會凡事順利，享受長壽。</verse>
				<verse number="8">「起新屋个時，屋頂四面愛圍欄杆。恁樣，若有人跢死，你等就毋使承擔流人血个債。</verse>
				<verse number="9">「做毋得在葡萄園肚種別个農作物；免得你等食毋到園中出產个葡萄抑係別个產物。</verse>
				<verse number="10">「做毋得用牛仔㧯驢仔共下犁田。</verse>
				<verse number="11">「做毋得著羊毛㧯細麻紗共下刺个衫褲。</verse>
				<verse number="12">「外衫个四角愛攣繸仔。」</verse>
				<verse number="13">「有人結婚，後來毋惜佢个𡜵娘，</verse>
				<verse number="14">損害姖个名聲，講姖在新婚夜已經毋係童貞女。</verse>
				<verse number="15">若係有這種糾紛，細妹仔个爺𡟓愛到城門口見該兜長老，拿出證據，證明妹仔確實係童貞女。</verse>
				<verse number="16">細妹仔个阿爸愛對該兜長老講：『𠊎將吾妹仔嫁給這個人，這下佢毋惜姖，</verse>
				<verse number="17">亂講姖無守婚前童貞。其實，𠊎這位有證據做得證明姖係童貞女。』爺𡟓就愛將新婚夜用个床單擺在城肚該兜長老面前。</verse>
				<verse number="18">該城該兜長老就一定愛將這個老公捉起來刑罰，</verse>
				<verse number="19">也愛罰佢一百隻銀幣，將錢交給細妹仔个阿爸，因為佢侮辱 以色列 个童貞女。以後，這細妹仔還係佢个𡜵娘；佢一生人做毋得㧯這細妹仔離婚。</verse>
				<verse number="20">「若係這個老公所講个係事實，無證據好證明細妹仔係童貞女，</verse>
				<verse number="21">城肚該兜長老就一定愛帶細妹仔到外家門口，本城个男人愛用石頭㧹死姖；因為姖在 以色列 中做見笑个事，在父家還吂出嫁就犯姦淫。恁樣，你等就除掉你等當中這種壞事。</verse>
				<verse number="22">「若係有人㧯別人个𡜵娘通姦，被人捉到，兩儕全部應該處死，恁樣，你等就除掉 以色列 中這種壞事。</verse>
				<verse number="23">「若係有人在城肚㧯別人个未婚妻通姦，</verse>
				<verse number="24">你等一定愛帶兩儕到城門口，用石頭㧹死。該細妹仔該死，因為姖雖然在城肚，總係無出聲喊救命；該男人該死，因為佢㧯別人个未婚妻通姦。恁樣，你等就除掉你等當中這種壞事。</verse>
				<verse number="25">「若係有人在野外強姦別人个未婚妻，只有該男人該死。</verse>
				<verse number="26">你等做毋得傷害該細妹仔；姖並無該死个罪。這種案件㧯人被人謀殺共樣。</verse>
				<verse number="27">該男人在野外強姦該未婚妻，細妹仔喊救命，也無人來救姖。</verse>
				<verse number="28">「若係有人強姦還吂定親个童貞女，兩儕被人捉到，</verse>
				<verse number="29">該男人一定愛付給細妹仔个阿爸五十隻銀幣做聘金；因為佢強姦姖，就愛討姖做𡜵娘，一生人做毋得㧯姖離婚。</verse>
				<verse number="30">「人做毋得㧯佢个後𡟓結婚，做毋得侮辱自家个阿爸。」</verse>
			</chapter>
			<chapter number="23">
				<verse number="1">「卵受傷抑係閹掉个人做毋得加入敬拜上主个聚會。</verse>
				<verse number="2">「私生子做毋得加入敬拜上主个聚會；佢个子孫，甚至到第十代，也做毋得加入敬拜上主个聚會。</verse>
				<verse number="3">「 亞捫 人抑係 摩押 人做毋得加入敬拜上主个聚會。佢等个子孫，甚至到第十代，也做毋得加入敬拜上主个聚會。</verse>
				<verse number="4">因為你等出 埃及 个時，佢等無供給你等路途上所需要个糧食㧯水，佢等又對 美索不達米亞 个 比奪 城請 比珥 个孻仔 巴蘭 來咒詛你等。</verse>
				<verse number="5">總係上主 — 你等个上帝毋肯聽 巴蘭 个話，反轉將咒詛轉做祝福，因為上主 — 你等个上帝惜你等。</verse>
				<verse number="6">你等一生人絕對做毋得為佢等求平安、求繁榮。</verse>
				<verse number="7">「你等做毋得藐視 以東 人，因為佢等係你等个親族。你等做毋得藐視 埃及 人，因為你等識暫時住在佢等个土地上。</verse>
				<verse number="8">這兜人个第三代子孫做得加入敬拜上主个聚會。」</verse>
				<verse number="9">「你等在戰地安營个時，愛離開所有使你等在禮儀上無淨浰个事。</verse>
				<verse number="10">若係有人在暗晡時因為漏精變做無淨浰，佢就愛離開軍營，留在營外。</verse>
				<verse number="11">臨暗仔佢一定愛洗身，到日頭落山正做得轉營房。</verse>
				<verse number="12">「你等愛在軍營外指定一個所在做便所。</verse>
				<verse number="13">在你等个裝備中愛帶一支細鏟仔，屙屎个時拿來挖窟仔，然後將所屙个埋掉。</verse>
				<verse number="14">你等个軍營一定愛保持禮儀上个淨浰；因為上主 — 你等个上帝㧯你等共下在營肚，保護你等，使你等打贏敵人。你等做毋得做無淨浰个事，免得上主離開你等。」</verse>
				<verse number="15">「若係有奴僕逃走離開主人，要求你等个保護，你等做毋得將佢送轉佢主人該位。</verse>
				<verse number="16">佢做得自由在你等當中選愛住个城；你等做毋得欺負佢。</verse>
				<verse number="17">「 以色列 个男女做毋得在神廟做牛郎抑係妓女。</verse>
				<verse number="18">做牛郎 抑係妓女得到个錢做毋得拿到上主 — 你等上帝个聖殿還願；因為上主 — 你等个上帝盡惱人去做神廟个男娼㧯妓女。</verse>
				<verse number="19">「你等借錢、糧食，抑係其他个東西給 以色列 同胞，做毋得算利息。</verse>
				<verse number="20">借給外族人做得算利息，借給 以色列 同胞就做毋得。你等遵守這規定，上主 — 你等个上帝就會在你等愛入去佔領該垤土地上凡事賜福給你等。</verse>
				<verse number="21">「你等向上主 — 你等个上帝許願，做毋得緊延纏毋還；因為上主一定會討你等所起个願。毋還願就係犯罪。</verse>
				<verse number="22">無向上主 — 你等个上帝許願，毋算犯罪，總係自動許願，一定愛還願。</verse>
				<verse number="23"></verse>
				<verse number="24">「你等經過鄰舍个葡萄園，做得隨意食園中个葡萄，總係做毋得拿麼介東西將葡萄裝起來帶走。</verse>
				<verse number="25">你等經過鄰舍个麥田，做得用手捋麥串來食，總係做毋得用鐮仔去收割。」</verse>
			</chapter>
			<chapter number="24">
				<verse number="1">「若係有人討𡜵娘後發現姖有見笑个行為就毋惜姖，寫離婚書給姖，喊姖離開；</verse>
				<verse number="2">若係這個𡜵娘離開後，去㧯別人結婚，</verse>
				<verse number="3">第二個老公也毋惜姖，寫離婚書給姖，喊姖離開；抑係這個老公死掉；</verse>
				<verse number="4">無論在㖠種情形之下，姖个前夫做毋得再㧯姖結婚。因為對姖个前夫來講，姖已經被人打垃圾了。若係前夫再㧯姖結婚，就係冒犯上主。你等一定做毋得在上主 — 你等个上帝愛賜給你等个土地上犯佢所盡惱个罪。」</verse>
				<verse number="5">「做毋得喊正結婚个人做兵，也做毋得喊佢擔任公職；愛俾佢有一年个假期，留在屋下，給𡜵娘快樂。</verse>
				<verse number="6">「做毋得拿人个磨石抑係上𣎴做抵押，因為恁樣會害佢無辦法生活。</verse>
				<verse number="7">「若係有人綁架 以色列 同胞，強迫佢做奴僕，抑係將佢賣做奴才，該綁架人个就一定愛處死。你等愛對你等當中除掉這種壞事。</verse>
				<verse number="8">「你等若係發傳染性个皮膚病，一定愛照 利未 祭司所指教你等个認真去做；你等愛照𠊎命令佢等个，確實遵行。</verse>
				<verse number="9">愛記得，你等離開 埃及 後，上主 — 你等个上帝識在路途中樣般對待 美莉安 。</verse>
				<verse number="10">「你等無論借給人麼介，做毋得入佢屋下，自家擇愛做抵押个東西；</verse>
				<verse number="11">愛在外背，等佢親自將抵押品拿出來交給你等。</verse>
				<verse number="12">佢若係窮人，又拿外衫交給你等，你等做毋得將這抵押品留到第二日；</verse>
				<verse number="13">愛在該日、日頭落山个時，將外衫還給佢，俾佢做得拿來做被蓋等睡目。恁樣，佢會感激你等；上主 — 你等个上帝也會看這公義个事，來對你等歡喜。</verse>
				<verse number="14">「困苦、貧窮个工人，無論係 以色列 同胞抑係暫時住在你等城肚个外族人，你等全部做毋得欺負佢。</verse>
				<verse number="15">愛在日頭落山以前付給佢該日个工錢，因為佢需要錢；佢靠工錢維持生活。你等若係毋付給佢，佢向上主控告，你等就有罪了。</verse>
				<verse number="16">「爺𡟓無應該因為子女所犯个罪來處死；子女也無應該因為爺𡟓所犯个罪來處死。逐儕應當擔當自家所犯个罪。</verse>
				<verse number="17">「做毋得侵犯外族人抑係孤兒个權利；也做毋得拿寡婦个衫褲做抵押。</verse>
				<verse number="18">愛記得，你等在 埃及 做過奴才。上主 — 你等个上帝救贖你等離開該位，所以𠊎命令你等愛遵行這誡命。</verse>
				<verse number="19">「你等收成个時，漏掉無帶轉屋下个五榖，做毋得倒轉去拿；愛留在田肚，俾外族人、孤兒㧯寡婦去拈。恁樣，上主 — 你等个上帝會凡事賜福給你等。</verse>
				<verse number="20">你等打橄欖，打一輪以後，做毋得倒轉去打無打到个；愛將賸到个留給外族人、孤兒㧯寡婦。</verse>
				<verse number="21">你等摘葡萄，摘一輪以後，做毋得倒轉去摘無摘到个；愛將賸到个留給外族人、孤兒㧯寡婦。</verse>
				<verse number="22">愛記得，你等在 埃及 做過奴才，所以𠊎命令你等愛遵行這誡命。」</verse>
			</chapter>
			<chapter number="25">
				<verse number="1">「若係有兩個 以色列 人上法院解決冤家个事，其中一儕被審判官判無罪，另外一儕有罪，</verse>
				<verse number="2">若係有罪个人應該受鞭刑，審判官愛命令佢當面伏在地上受刑。鞭打个數目愛看犯罪个重輕來定。</verse>
				<verse number="3">最多打四十下，做毋得超過；若係超過這數目，就係公開侮辱你个同胞。</verse>
				<verse number="4">「牛踏榖个時，毋好籠等牠个嘴。」</verse>
				<verse number="5">「若係有兄弟兩儕共下住，其中一儕先死掉，無留下後代，佢个寡婦做毋得再㧯族外人結婚。死者个兄弟愛盡兄弟个義務討姖；</verse>
				<verse number="6">佢等𫱔个長子愛算做死掉个兄弟个孻仔，免得佢个名在 以色列 中除掉。</verse>
				<verse number="7">若係死者个兄弟毋肯討姖，該女人愛到城門口見長老，㧯佢等講：『先夫个兄弟毋肯盡兄弟个義務，留死掉个兄弟个名，代佢在 以色列 中留後代。』</verse>
				<verse number="8">本城該兜長老就愛喊該兄弟來，㧯佢商量。若係佢還係堅持講：『𠊎無愛討姖』，</verse>
				<verse number="9">厥兄弟个寡婦就愛在該兜長老面前行上去，脫下該兄弟个一隻鞋，呸口潾在佢个面，宣佈講：『毋肯代兄弟留後代个人應該受這種侮辱。』</verse>
				<verse number="10">在 以色列 中，佢个家愛喊做『被人脫鞋个家。』」</verse>
				<verse number="11">「若係兩個人相打，其中一儕个𡜵娘為到愛救老公離開對方个手，去揢到另外該儕个卵，</verse>
				<verse number="12">就愛斬斷𡜵娘个手，做毋得憐憫姖。</verse>
				<verse number="13">「你等个袋仔肚做毋得有一大一細兩樣个秤砣。</verse>
				<verse number="14">你等屋下做毋得有一大一細兩樣个升斗。</verse>
				<verse number="15">愛誠實，用正確个秤砣㧯升斗，好俾你等在上主 — 你等个上帝愛賜給你等个土地上享受長壽。</verse>
				<verse number="16">上主 — 你等个上帝盡惱詐欺个人。」</verse>
				<verse number="17">「愛記得，你等出 埃及 个時，在路途 亞瑪力 人樣般對待你等。</verse>
				<verse number="18">佢等毋驚上帝，在你等當𤸁無力个時，對後背攻打，將行在後背个人全部㓾掉。</verse>
				<verse number="19">所以，當上主 — 你等个上帝將土地賜給你等、使你等無受外敵攪亂、做得享受平安个時，你等愛消滅所有个 亞瑪力 人，俾人無再想起佢等。毋好毋記得！」</verse>
			</chapter>
			<chapter number="26">
				<verse number="1">「你等入去佔領上主 — 你等个上帝愛賜給你等个土地、在該位定居後，</verse>
				<verse number="2">愛對該土地將新出个各種土產放兜在籃仔肚，帶到上主 — 你等个上帝所選愛設立佢个名个所在。</verse>
				<verse number="3">你等愛去見輪班做祭司个，對佢講：『𠊎今晡日向上主 — 你个上帝表明，𠊎已經入到上主向𠊎等祖先應許愛賜給𠊎等个土地。』</verse>
				<verse number="4">「祭司愛將你等帶去个籃仔收下來，放在上主 — 你等上帝个祭壇前。</verse>
				<verse number="5">你等在上主 — 你等上帝面前愛照恁樣講：『𠊎个祖先係一個流浪个 亞蘭 人。佢帶家族到 埃及 暫時住。佢等去个時人數盡少，以後漸漸增多，成做強大个民族。</verse>
				<verse number="6">埃及 人欺負𠊎等，強迫𠊎等做奴才，做苦工。</verse>
				<verse number="7">𠊎等就求喊上主 — 𠊎等祖先个上帝；佢看到𠊎等个痛苦、艱難、受迫害，就垂聽𠊎等个哀求。</verse>
				<verse number="8">上主用自家个大能大力行神蹟奇事，又使得人驚个事發生，來救𠊎等離開 埃及 。</verse>
				<verse number="9">佢𢱋𠊎等到這位，將這垤流乳㧯蜜、盡肥个土地賜給𠊎等。</verse>
				<verse number="10">所以，上主啊，𠊎這下將你所賜給𠊎土地上新出个土產帶來獻給你。』 「你等講這兜話以後，愛將籃仔放在上主 — 你等个上帝面前，在該位敬拜佢。</verse>
				<verse number="11">你等愛為上主 — 你等个上帝賜給你等个豐收歡喜快樂，也愛邀請 利未 人㧯住在你等當中个外族人共下歡喜快樂。</verse>
				<verse number="12">「你等每第三年，就係獻十分之一該年，愛將你等土產收成个十分之一分給 利未 人、外族人、孤兒㧯寡婦，俾佢等在你等个城中攏總有好食到飽。</verse>
				<verse number="13">然後，你等愛向上主 — 你等个上帝講：『𠊎無將神聖个十分之一留在屋下；𠊎已經照你个命令，將它分給 利未 人、外族人、孤兒㧯寡婦。𠊎無違背抑係毋記得獻十分之一个條例。</verse>
				<verse number="14">屋下做喪事个時，𠊎無食這聖物；在禮儀上無淨浰个時，𠊎也無將它拿出屋外；𠊎也無拿它做祭物來獻給死掉个人 。上主 — 𠊎个上帝啊，𠊎聽從你，遵守你有關獻十分之一个一切條例。</verse>
				<verse number="15">求你對天頂 — 你个聖所看顧𠊎等，賜福給你个子民 以色列 。求你照你向𠊎等祖先所應許个，降福給你所賜𠊎等這垤流乳㧯蜜、盡肥个土地。』」</verse>
				<verse number="16">「今晡日，上主 — 你等个上帝命令你等遵行佢所有个法律誡命；所以你等愛一心一意確實遵行。</verse>
				<verse number="17">今晡日，你等承認上主做你等个上帝，也答應愛遵行佢个道，遵守佢个法律、誡命㧯例規，聽從佢个話。</verse>
				<verse number="18">今晡日，上主也照佢个應許承認你等做佢自家寶貝个子民，命令你等遵行佢所有个誡命。</verse>
				<verse number="19">佢愛使你等比佢所造个任何國家較強大，使你等个名受頌讚，受尊敬。你等愛照佢个應許成做上主 — 你等上帝聖潔个子民。」</verse>
			</chapter>
			<chapter number="27">
				<verse number="1">摩西 㧯 以色列 該兜長老吩咐人民講：「你等愛遵守𠊎今晡日向你等頒佈所有个命令。</verse>
				<verse number="2">你等過 約旦 河，入到上主 — 你等个上帝賜給你等个土地該日，愛頓幾垤大石頭起來，面頂抹石灰，</verse>
				<verse number="3">將這所有个法律㧯教訓全部寫上去。你等入到上主 — 你等祖先个上帝所應許給你等該流乳㧯蜜盡肥个土地、</verse>
				<verse number="4">踏上 約旦 河西片後，愛照𠊎今晡日頒給你等个命令在 以巴路 山頂將這兜大石頭頓起來，面頂抹石灰。</verse>
				<verse number="5">你等在該位也愛拿無用鐵器鑿過个石頭，為上主 — 你等个上帝起一個祭壇。</verse>
				<verse number="6">為上主 — 你等个上帝起个祭壇，愛用無鑿過个石頭。你等愛在祭壇頂將燒化祭獻給上主 — 你等个上帝；</verse>
				<verse number="7">也愛在該位獻平安祭、食平安祭，在上主 — 你等个上帝面前歡喜快樂。</verse>
				<verse number="8">你等愛在抹石灰个大石頭面頂將這所有个法律㧯教訓全部清清楚楚寫上去。」</verse>
				<verse number="9">接等， 摩西 㧯 利未 支族該兜祭司對 以色列 全會眾講：「 以色列 人哪，愛安靜，認真聽𠊎个話。你等今晡日已經成做上主 — 你等上帝个子民。</verse>
				<verse number="10">所以，你等愛聽從佢，確實遵行𠊎今晡日向你等頒佈个所有法律誡命。」</verse>
				<verse number="11">該日， 摩西 又命令人民講：</verse>
				<verse number="12">「你等過 約旦 河以後， 西緬 、 利未 、 猶大 、 以薩迦 、 約瑟 、 便雅憫 這兜支族愛企在 基利心 山頂為人民祝福；</verse>
				<verse number="13">呂便 、 迦得 、 亞設 、 西布倫 、 但 、 拿弗他利 這兜支族愛企在 以巴路 山頂宣佈咒詛。</verse>
				<verse number="14">利未 支族該兜祭司愛大聲向 以色列 全會眾宣佈：</verse>
				<verse number="15">「『所有用石頭、樹仔，抑係金器造偶像、偷偷仔拜，一定會受咒詛，因為上主盡惱人拜偶像。』 「全會眾愛應講：『阿愐！』</verse>
				<verse number="16">「『無孝敬爺𡟓个，一定會受咒詛。』 「全會眾愛應講：『阿愐！』</verse>
				<verse number="17">「『徙鄰舍地界个，一定會受咒詛。』 「全會眾愛應講：『阿愐！』</verse>
				<verse number="18">「『佻佻𢱋瞙目个行差路个，一定會受咒詛。』 「全會眾愛應講：『阿愐！』</verse>
				<verse number="19">「『侵犯外族人、孤兒㧯寡婦權利个，一定會受咒詛。』 「全會眾愛應講：『阿愐！』</verse>
				<verse number="20">「『㧯後𡟓同房、侮辱阿爸个，一定會受咒詛。』 「全會眾愛應講：『阿愐！』</verse>
				<verse number="21">「『㧯動物發生性關係个，一定會受咒詛。』 「全會眾愛應講：『阿愐！』</verse>
				<verse number="22">「『㧯親姊妹 (包含共爺無共𡟓抑係共𡟓無共爺个姊妹) 同房个，一定會受咒詛。』 「全會眾愛應講：『阿愐！』</verse>
				<verse number="23">「『㧯丈人𡟓同房个，一定會受咒詛。』 「全會眾愛應講：『阿愐！』</verse>
				<verse number="24">「『暗中㓾人个，一定會受咒詛。』 「全會眾愛應講：『阿愐！』</verse>
				<verse number="25">「『被人收買去㓾無罪个，一定會受咒詛。』 「全會眾愛應講：『阿愐！』</verse>
				<verse number="26">「『毋確實遵守這兜法律㧯教訓个，一定會受咒詛。』 「全會眾愛應講：『阿愐！』」</verse>
			</chapter>
			<chapter number="28">
				<verse number="1">「你等若係聽從上主 — 你等个上帝，確實遵行𠊎今晡日頒佈給你等所有个誡命，佢就會使你等比天下所有个國家較強大。</verse>
				<verse number="2">你等聽從上主 — 你等个上帝，就會得到這所有个福氣：</verse>
				<verse number="3">「上主會賜福給你等个城鎮㧯田園。</verse>
				<verse number="4">「上主會賜福給你等多子多孫，五榖豐登，牛羊興旺。</verse>
				<verse number="5">「上主會賜福給你等个米籮㧯攪麵个盆仔。</verse>
				<verse number="6">「上主會使你等出入平安，事事蒙福。</verse>
				<verse number="7">「上主會使前來攻打你等个敵人打輸。佢等對一個方向來攻打你等，總係會向四面八方逃走。</verse>
				<verse number="8">「上主會賜福給你等个事業，使你等个倉庫裝滿糧食。上主 — 你等个上帝會在佢賜給你等个土地上賜福給你等。</verse>
				<verse number="9">「你等若係遵守上主 — 你等上帝个誡命，遵行佢个道，佢會照自家个應許立你等做佢聖潔个子民。</verse>
				<verse number="10">天下萬民看到上主揀選你等做自家个子民就會驚你等。</verse>
				<verse number="11">上主會在佢向你等祖先應許愛賜給你等个土地上，賜福給你等多子多孫，五榖豐登，牛羊興旺。</verse>
				<verse number="12">上主會打開天頂豐富个倉庫，照時落雨滋潤你等个田園，使你等个事業蒙福，使你等富足有賸；你等會有好借給盡多國，乜毋使向別國借。</verse>
				<verse number="13">你等若確實遵行𠊎今晡日向你等頒佈、上主 — 你等上帝所有个誡命，佢就會使你等在列國中做頭無做尾、毋會被列國管，國家安定，永遠毋會衰敗。</verse>
				<verse number="14">總係你等絕對做毋得偏左偏右、違背佢个誡命，也做毋得拜別个神明。」</verse>
				<verse number="15">「若係你等毋聽從上主 — 你等个上帝，毋確實遵行𠊎今晡日頒佈給你等所有个法律誡命，你等就會受到以下各種咒詛：</verse>
				<verse number="16">「上主會咒詛你等个城鎮㧯田園。</verse>
				<verse number="17">「上主會咒詛你等个米籮㧯攪麵个盆仔。</verse>
				<verse number="18">「上主會咒詛你等个子孫、五榖㧯牛羊。</verse>
				<verse number="19">「上主會使你等出入堵到災難，凡事受咒詛。</verse>
				<verse number="20">「若係你等作惡、離開上主，佢就會使你等堵到災難、混亂㧯困難；所有工作全部毋會順利，當遽就會滅亡。</verse>
				<verse number="21">上主會使你等攏總遰到傳染病，直到你等在愛入去佔領个土地上滅掉。</verse>
				<verse number="22">上主會用肺病、毒瘡、熱病傷害你等，又用燒風㧯天旱毀滅你等个五榖，一直到你等全部滅掉。</verse>
				<verse number="23">天會像銅做个、毋會落雨，地會像鐵恁硬。</verse>
				<verse number="24">上主會使你等个土地只有灰塵㧯風沙，直到佢將你等全部消滅。</verse>
				<verse number="25">「上主會使敵人打贏你等。你等對一個方向攻打佢等，總係你等會向四面八方逃走。天下萬民看到你等所受到个災難全部會著驚。</verse>
				<verse number="26">飛鳥㧯獸類會來食你等个身屍；無人好逐牠兜走。</verse>
				<verse number="27">上主會使你等發瘡仔，像佢以前使 埃及 人發瘡仔一樣。佢會使你等全身發癬，又痛又癢，無法度醫治。</verse>
				<verse number="28">上主會使你等發癲、瞙目、心神亂亂。</verse>
				<verse number="29">日時頭，你等會像瞙目仔在烏暗中摸來摸去。你等个事業會毋順利。你等常常會被人欺負，被人搶，無人好救你等。</verse>
				<verse number="30">「㧯你等定親个細妹仔，會有別個男人去強強㧯姖睡目。你等起屋，無法度入去住；你等種葡萄園，食毋到葡萄。</verse>
				<verse number="31">你等會看到別人㓾你等个牛，總係你等食毋到牛肉。你等會看到自家个驢仔被人搶去，總係討毋轉來。你等个羊群會被敵人逐去，無人好𢯭手搶轉來。</verse>
				<verse number="32">你等會目金金看等自家个子女被外族人捉去做奴才，逐日等佢等轉來，等到目珠青盲，總係全無力救佢等。</verse>
				<verse number="33">你等所毋認識个一個民族會搶走你等煞猛耕種个出產；你等反轉會常常被人欺負、壓迫。</verse>
				<verse number="34">你等會因為親目所看到个災難來發癲。</verse>
				<verse number="35">上主會使你等雙腳連膝頭發瘡仔，對腳底到頭那發毒瘡仔，無法度醫好。</verse>
				<verse number="36">「上主會將你等㧯你等所立个君王逐到外國，到你等㧯你等祖先無住過个所在去；你等會在該位拜樹仔㧯石頭造个神明。</verse>
				<verse number="37">在上主逐你等去个國家，該位个人會因為你等所堵到个災難來著驚；佢等會笑你等，嘲謔你等。</verse>
				<verse number="38">「你等委種多，總係收成少，因為草蜢會食掉五榖。</verse>
				<verse number="39">你等栽種、照顧葡萄園，總係摘毋到葡萄，啉毋到葡萄酒，因為葡萄樹會被蟲仔食掉。</verse>
				<verse number="40">雖然你等个土地有盡多橄欖樹，總係無橄欖油好用，因為橄欖吂熟就會𢫫淨淨。</verse>
				<verse number="41">你等生養子女，總係佢等會打毋見掉，因為佢等會被人捉走。</verse>
				<verse number="42">你等个樹仔㧯五榖全部會被害蟲食淨淨。</verse>
				<verse number="43">「住在你等當中个外族人越來越興旺；總係你等會緊來緊衰微。</verse>
				<verse number="44">佢等有錢借給你等；總係你等無錢好借給佢等。佢等會做頭，你等會做尾被佢等管。</verse>
				<verse number="45">「這兜咒詛全部會臨到你等身上，逐到你等，直到你等全部滅亡；因為你等毋聽從上主 — 你等个上帝，毋遵守佢交給你等个所有法律誡命。</verse>
				<verse number="46">這兜咒詛會像神蹟恁樣實現，來做上帝審判你等㧯你等个子孫永遠个證據。</verse>
				<verse number="47">上主 — 你等个上帝在逐方面賜福給你等，總係你等係無甘心樂意來事奉佢；</verse>
				<verse number="48">所以，你等會服事上主派來攻打你等个敵人。你等會餓肚笥、嘴燥、赤身露體，麼介就無了。上主會使你等枷鐵枷，一直到你等全部滅亡。</verse>
				<verse number="49">上主會使遠方个一個國家來，就像鷹鳥一樣，忽然間飛來攻打你等。佢等个話你等聽毋識；</verse>
				<verse number="50">佢等非常兇惡，無尊敬老人家，乜無體恤細人仔。</verse>
				<verse number="51">佢等會將你等个頭牲㧯土產食淨淨，無論五榖、新酒、橄欖油、牛羊全無留下來，直到你等滅掉。</verse>
				<verse number="52">佢等會包圍上主 — 你等个上帝愛賜給你等該土地上逐個城鎮；你等所倚靠該兜高大堅固个城牆全部會橫掉。</verse>
				<verse number="53">「敵人圍困你等个城鎮个時，你等會因為無東西好食就食自家个骨肉，就係上主 — 你等个上帝賜給你等个子女。</verse>
				<verse number="54">你等受圍困个時，你等中間連心腸當軟个男人也會因為餓肚笥就食自家个子女，因為無東西好食！連自家个兄弟、所惜个𡜵娘，抑係所賸个子女，佢也毋肯分給佢等食。</verse>
				<verse number="55"></verse>
				<verse number="56">你等中間最幼秀、高貴、連腳底乜毋識踏地个婦人家也會變到心肝當毒。敵人圍困城鎮个時，姖會因為無東西好食、偷偷仔食掉自家𫱔个孲𤘅仔㧯胞衣。連姖所惜个老公抑係賸到个子女，姖也毋肯分給佢等食。</verse>
				<verse number="57"></verse>
				<verse number="58">「若係你等毋確實遵行這書項所記載上帝所有个法律，毋敬畏上主 — 你等个上帝榮耀可畏个聖名，</verse>
				<verse number="59">上主會使你等㧯你等个子孫發到得人驚个大病，就係又久又痛个病症。</verse>
				<verse number="60">埃及 人所發、該兜得人驚个病痛，佢會使你等發，永遠醫毋好。</verse>
				<verse number="61">上主也會使你等發這法律書無寫个各種病痛㧯瘟仔，直到你等全部滅亡。</verse>
				<verse number="62">雖然你等个人口像天頂个星仔恁多，總係賸下來个人會盡少，因為你等毋聽從上主 — 你等个上帝。</verse>
				<verse number="63">上主識好款待你等，歡喜使你等發達；照樣，佢也會拌得消滅你等，使你等滅亡。你等會對該愛入去佔領个土地上被佢連根挷掉。</verse>
				<verse number="64">「上主會將你等逐到各國，分散到全世界。你等會在該位拜樹仔㧯石頭造个神明，就係你等㧯你等个祖先毋識拜過个神明。</verse>
				<verse number="65">你等無論去到㖠國毋會有平安，無位所好落腳。上主會使你等充滿愁慮、目珠失明、心神絕望。</verse>
				<verse number="66">你等个性命無定無著，心中充滿驚險，日夜面臨死亡。</verse>
				<verse number="67">你等所看到个一切會害你等驚到無葛無煞，朝晨等毋得到暗晡，暗晡等毋得到天光。</verse>
				<verse number="68">雖然上主講過你等毋會再看到 埃及 ，佢還係 會用奴才船送你等轉去。在該位，就算你等想愛賣身做敵人个奴才㧯奴婢，總係無人會買你等。」</verse>
			</chapter>
			<chapter number="29">
				<verse number="1">以下係上主在 摩押 命令 摩西 㧯 以色列 人立約个內容。這係佢頭擺在 何烈 山㧯佢等立約以外个。</verse>
				<verse number="2">摩西 召集所有个 以色列 人，對佢等講：「你等親目看到上主對 埃及 王、佢个官員㧯全國所做个一切。</verse>
				<verse number="3">你等親目看到上主降下該兜得人驚个災禍㧯佢所行偉大个神蹟奇事。</verse>
				<verse number="4">總係到今晡日，上主還無俾你等確實明白你等所經驗个有麼介意義。</verse>
				<verse number="5">四十年久，上主𢱋你等經過曠野，你等个衫褲㧯鞋全部無著爛。</verse>
				<verse number="6">你等無食餅，無啉釅酒抑係淡酒，總係上主供給你等所需要个一切，為到愛使你等認識佢係上主 — 你等个上帝。</verse>
				<verse number="7">你等到這地方个時， 希實本 王 西宏 㧯 巴珊 王 噩 出來攻打𠊎等；𠊎等就打贏佢等，</verse>
				<verse number="8">佔領佢等个土地，將土地分給 呂便 、 迦得 兩支族㧯 瑪拿西 个半支族。</verse>
				<verse number="9">你等愛確實遵行這約所有个規定，使你等所做个全部順利。</verse>
				<verse number="10">「今晡日，你等各支族个族長、長老、官員，㧯 以色列 所有个男女老幼，連住在你等當中、代你等剖柴㧡水个外族人，全部企在上主 — 你等个上帝面前；</verse>
				<verse number="11"></verse>
				<verse number="12">你等愛遵守佢今晡日㧯你等所立个約，向你等所發个誓。</verse>
				<verse number="13">恁樣，上主會照自家向你等所應許个話，又向你等个祖先 亞伯拉罕 、 以撒 、 雅各 所發个誓，就在今晡日立你等做佢个子民，佢做你等个上帝。</verse>
				<verse number="14">上主毋單淨㧯你等立這約，發這誓，</verse>
				<verse number="15">上主 — 𠊎等个上帝也㧯𠊎等今晡日企在佢面前个人並每一個還吂出世个子子孫孫立約。</verse>
				<verse number="16">「你等記得在 埃及 過樣般个生活，經過其他外族个國家又係樣般个情況。</verse>
				<verse number="17">你等看到佢等用樹頭、石頭、金銀製造邪惡个偶像。</verse>
				<verse number="18">你等今晡日企在這位个人，無論男女、家族㧯支族，做毋得有一儕心肝離開上主 — 𠊎等个上帝，去拜別國个神明；若係有，就會像樹根生出又苦又毒个樹仔。</verse>
				<verse number="19">你等今晡日企在這位、聽到這兜咒詛个人，無一儕敢講，『就算𠊎硬頸毋受約束，一切還會順利』。若係有恁樣个人，佢會連累你等，使好人壞人共下滅亡。</verse>
				<verse number="20">上主絕對毋會赦免這種人；佢會對佢大發譴。法律書上所寫个咒詛全部會臨到佢个身上，一直到上帝完全除掉佢个名。</verse>
				<verse number="21">上主定著愛拿佢做例仔來警告 以色列 各支族，照這法律書㧯立約所記載个各種咒詛，使災難臨到佢身上。</verse>
				<verse number="22">「你等个子孫㧯遠方个外族人會看到上主降災禍㧯病痛在你等个土地上。</verse>
				<verse number="23">田園會荒廢，全地遍滿硫磺㧯鹽，無法度耕種，連雜草也毋會生。你等个土地會像上主在大發譴之下毀壞个 所多瑪 、 蛾摩拉 、 押瑪 、 洗扁 該兜城市。</verse>
				<verse number="24">該時，天下个人會問：『上主做麼介恁樣對待這地呢？佢做麼介恁樣大發譴呢？』</verse>
				<verse number="25">有人會應講：『因為上主个子民違悖上主 — 佢等祖先个上帝㧯佢等所立个約；這約係上主帶領佢等離開 埃及 後㧯佢等所立个。</verse>
				<verse number="26">佢等離開上主去服事別个神明，去拜該兜從來毋識拜過、上主禁止佢等拜个神明。</verse>
				<verse number="27">所以，上主對佢等發譴，使這書上所記載个咒詛降在佢等个土地上。</verse>
				<verse number="28">上主在大發火中、大發譴，對佢等个土地上將佢等連根挷出來，㧒到外國去。今晡日佢等還在該位。』</verse>
				<verse number="29">「奧秘个事係屬上主 — 𠊎等个上帝；總係顯明个事永遠屬𠊎等㧯𠊎等个子孫，為到愛𠊎等遵行這法律一切个話。」</verse>
			</chapter>
			<chapter number="30">
				<verse number="1">「這下，𠊎已經俾你等在祝福㧯咒詛之間自家擇。在盡多災難發生後，你等住在上主 — 你等个上帝逐你等去到个外國時，就會想起𠊎給你等个選擇。</verse>
				<verse number="2">若係你等㧯你等个子孫回心轉意，歸向上主 — 你等个上帝，一心一意遵行𠊎今晡日頒佈給你等个誡命，</verse>
				<verse number="3">佢就會憐憫你等。上主 — 你等个上帝會對佢逐你等分散个逐所在，𢱋你等倒轉來，使你等再享受繁榮。</verse>
				<verse number="4">就算你等流浪到天涯海角，上主 — 你等个上帝也會將你等聚集共下，𢱋你等倒轉來，</verse>
				<verse number="5">使你等重新得到你等祖先住過个土地，又會使你等比祖先還較興旺，人口還較多。</verse>
				<verse number="6">上主 — 你等个上帝會在你等㧯你等子孫个心行割禮，使你等一心一意敬愛佢，又繼續生活。</verse>
				<verse number="7">上主 — 你等个上帝會將這兜咒詛加在該兜惱你等、迫害你等个敵人身上。</verse>
				<verse number="8">你等會再一擺聽從上主，遵行𠊎今晡日頒佈給你等一切个誡命。</verse>
				<verse number="9">上主 — 你等个上帝會使你等个事業發達，多子多孫，六畜興旺，五榖豐登。上主樂意使你等个祖先繁榮，佢共樣會樂意使你等繁榮。</verse>
				<verse number="10">總係你等一定愛聽從佢，遵行寫在這法律書、佢所有个法律誡命。你等一定愛一心一意歸向上主 — 你等个上帝。</verse>
				<verse number="11">「𠊎今晡日頒佈給你等个誡命毋會難遵行，也離你等無幾遠。</verse>
				<verse number="12">這誡命毋係掛在天頂；你等毋使問：『麼人愛代𠊎等上天去將這誡命帶轉地上來，好俾𠊎等聽到來實行呢？』</verse>
				<verse number="13">這誡命乜毋係在海該片；你等毋使問：『麼人愛代𠊎等過海去將這誡命帶來，好俾𠊎等聽到來實行呢？』</verse>
				<verse number="14">其實，這誡命離你等無幾遠，就在你等嘴肚也在你等心肚，好俾你等遵行。</verse>
				<verse number="15">「今晡日，𠊎將生死禍福全部擺在你等面前，俾你等自家擇。</verse>
				<verse number="16">這下，𠊎吩咐你等敬愛上主 — 你等个上帝，遵行佢个道，遵守佢个法律、誡命㧯例規；恁樣，你等就會成做繁榮个國家。在你等愛入去佔領个土地上，上主 — 你等个上帝會賜福給你等。</verse>
				<verse number="17">若係你等个心毋肯聽從，反轉受引誘去拜別个神明，</verse>
				<verse number="18">𠊎這下在這位嚴嚴警告你等，你等一定會滅亡，絕對毋會長久住在 約旦 河該片、你等愛入去佔領个土地上。</verse>
				<verse number="19">這下，𠊎喊天地來做證，𠊎將生命㧯死亡、祝福㧯咒詛擺在你等面前。愛擇生命！你等㧯你等个子孫就能生存。</verse>
				<verse number="20">愛敬愛上主 — 你等个上帝，聽從佢，對佢忠心。恁樣，你等㧯你等个子孫就能長久生活在上主應許給你等祖先 亞伯拉罕 、 以撒 、 雅各 个土地上。」</verse>
			</chapter>
			<chapter number="31">
				<verse number="1">摩西 繼續對 以色列 人民講：</verse>
				<verse number="2">「這下𠊎已經一百二十歲，無法度繼續帶領你等了。上主也已經㧯𠊎講，𠊎做毋得過 約旦 河。</verse>
				<verse number="3">上主 — 你等个上帝會在你等頭前親自帶領你等過去，消滅該地个各民族，使你等佔領佢等个土地。照上主所講个， 約書亞 愛做你等个領袖𢱋你等過去。</verse>
				<verse number="4">上主樣般打贏 亞摩利 个兩個王 — 西宏 㧯 噩 ，毀壞佢等个國家，也愛照樣消滅該片个各民族。</verse>
				<verse number="5">上主愛將佢等交給你等；你等一定愛照𠊎个命令對付佢等。</verse>
				<verse number="6">愛堅強，愛勇敢，毋使驚佢等，因為上主 — 你等个上帝愛㧯你等共下去。佢毋會離開你等，毋會㧒掉你等。」</verse>
				<verse number="7">然後， 摩西 喊 約書亞 來，在 以色列 眾人面前對佢講：「你愛堅強，愛勇敢，因為你愛帶領人民去佔領上主應許賜給佢等祖先个土地。</verse>
				<verse number="8">上主愛在你頭前親自帶領你，㧯你共下去。佢毋會離開你，也毋會㧒掉你。所以，你做毋得無膽，也做毋得著驚。」</verse>
				<verse number="9">恁樣， 摩西 將這法律寫下來，交給該兜扛上主約櫃个 利未 祭司㧯 以色列 所有个長老。</verse>
				<verse number="10">摩西 命令佢等講：「逐擺七年个最尾一年，就係免掉債務該年个搭寮仔節，</verse>
				<verse number="11">以色列 人全部來到上主 — 你等个上帝所選个所在朝見佢，該時你等愛向佢等宣讀這法律。</verse>
				<verse number="12">你等愛召集所有个男人、婦女、細人仔，㧯住在你等城肚个外族人，好俾大家聽到，好俾大家學習敬畏上主 — 你等个上帝，確實遵行這法律一切个話。</verse>
				<verse number="13">恁樣，你等个子孫，就係該兜還吂聽到這法律个，會有機會聽到。佢等還生个日也愛在你等愛佔領个 約旦 河該片學習敬畏上主 — 你等上帝。」</verse>
				<verse number="14">上主對 摩西 講：「你無幾久就愛離開世間。你喊 約書亞 到聖帳篷來，𠊎愛給佢任務。」 摩西 㧯 約書亞 就來到聖帳篷。</verse>
				<verse number="15">有雲柱停在聖帳篷門口，上主在雲柱底背向佢等顯現。</verse>
				<verse number="16">上主對 摩西 講：「你快會㧯祖宗同睡了；你死後，這人民會在佢等愛入去个土地去拜別个神明、行姦淫，離開𠊎，違背𠊎㧯佢等立个約。</verse>
				<verse number="17">該時，𠊎會對佢等發譴，㧒掉佢等，揞等面毋搭佢等；佢等就會消滅。盡多災難會臨到佢等身上，佢等就知這係因為𠊎 — 佢等个上帝無再㧯佢等共下。</verse>
				<verse number="18">該時，𠊎會揞等面毋幫助佢等；因為佢等行邪惡个事，去拜別个神明。</verse>
				<verse number="19">「這下你愛寫下這首詩歌，教 以色列 人民，俾佢等背，使這首歌成做𠊎責備佢等个證據。</verse>
				<verse number="20">𠊎愛照向佢等祖先个應許，𢱋佢等到該流乳㧯蜜、盡肥个土地。在該位，佢等會過毋愁食毋愁著个生活。總係佢等會離開𠊎，去拜別个神明，㧒掉𠊎，違背𠊎个約。</verse>
				<verse number="21">盡多災難會臨到佢等身上。總係這首歌還係會流傳，會成做責備佢等个證據。雖然𠊎還吂𢱋佢等到𠊎應許愛給佢等个土地，總係𠊎已經知佢等个心思意念。」</verse>
				<verse number="22">該日， 摩西 就寫下這首詩歌，教 以色列 人民。</verse>
				<verse number="23">後來，上主對 嫩 个孻仔 約書亞 講：「你愛堅強，愛勇敢，因為你愛帶領 以色列 人民入去𠊎應許給佢等个土地。有𠊎㧯你共下。」</verse>
				<verse number="24">摩西 將上主个法律寫在書上；佢將全部寫下來。</verse>
				<verse number="25">寫好以後，佢對該兜扛上主約櫃个 利未 祭司講：</verse>
				<verse number="26">「你等愛將這法律書放在上主 — 你等上帝个約櫃堘頭，留在該位，成做佢責備佢子民个證據。</verse>
				<verse number="27">𠊎知佢等盡硬頸盡悖逆。𠊎在世間个時，佢等長透悖逆上主，𠊎死後，佢等會還較悖逆。</verse>
				<verse number="28">你等愛召集各支族个長老㧯官員到𠊎面前來，𠊎愛將這兜話講給佢等聽。𠊎愛警告佢等，又愛喊天地來做證。</verse>
				<verse number="29">𠊎知，𠊎死後人民會非常敗壞，偏離𠊎所吩咐佢等个道。將來，佢等受到災難係因為佢等做上主看做邪惡个事，佢等手所做个惹佢發譴。」</verse>
				<verse number="30">後來， 摩西 在 以色列 全會眾面前大聲唸這首詩：</verse>
			</chapter>
			<chapter number="32">
				<verse number="1">天哪，注意聽𠊎講； 地啊，留心聽𠊎个話。</verse>
				<verse number="2">𠊎个教導像雨點落下來， 像露水滴落大地。 𠊎个話像雨毛滋潤嫩草， 像甘霖淋濕花木。</verse>
				<verse number="3">𠊎愛宣揚上主个聖名； 你等愛歌頌𠊎等上帝个偉大。</verse>
				<verse number="4">上主係保護𠊎等个磐石； 佢个作為完全， 佢个道路公正； 佢係信實、可靠个上帝， 佢又係公義、又係正直。</verse>
				<verse number="5">總係你等對佢無忠心， 無資格做佢个子女， 你等係犯罪、詐欺个一代。</verse>
				<verse number="6">你這兜無智識个戇百姓啊， 樣般敢恁樣來報答上主啊？ 佢係你等个創造主，你等个阿爸； 佢創造你等，使你等成做國家。</verse>
				<verse number="7">你等愛回想頭擺； 你等愛思念歷史。 你等愛請父老指示； 你等愛請長輩說明。</verse>
				<verse number="8">至高者分配各國个領土， 將人類分開該時， 佢就照 以色列 人个數目， 劃定萬民个國界。</verse>
				<verse number="9">佢選 雅各 个子孫做自家个子民， 因為佢等就係上主特別个產業。</verse>
				<verse number="10">佢在曠野尋到佢等， 在飛沙走石个荒地看到佢等。 佢愛護佢等，照顧佢等， 像保護自家个目珠仁。</verse>
				<verse number="11">鷹鳥罅藪教子學飛， 打開翼胛揹細鷹鳥； 上主也用翼胛來揹， 使 以色列 毋會跌死。</verse>
				<verse number="12">上主自家帶領佢个子民， 毋使其他神明來協助佢。</verse>
				<verse number="13">佢使佢等統治高地， 享受田園出个土產。 佢等食石縫中个蜂糖， 石頭地出產个橄欖油。</verse>
				<verse number="14">佢等个牛羊有捋毋掉个乳汁； 佢等有最好个綿羊、山羊、 佢等有 巴珊 个牛豭、羊豭； 佢等有上等个麥仔㧯葡萄酒。</verse>
				<verse number="15">這正直个子民 漸漸肥壯； 佢等一富強就開始悖逆。 佢等離開創造佢等个上帝； 佢等㧒掉拯救佢等个磐石。</verse>
				<verse number="16">佢等拜偶像惹上主嫉妒； 佢等做壞事惹佢大發譴。</verse>
				<verse number="17">佢等獻祭給鬼神、給假神， 給佢等毋認識个神明； 這兜神明係最近正出現个， 係佢等个祖先完全毋驚个。</verse>
				<verse number="18">佢等毋搭佢等个磐石、佢等个阿爸； 佢等毋記得賜生命給佢等个上帝。</verse>
				<verse number="19">上主看到這个壞行為就發譴； 佢㧒掉自家个子女。</verse>
				<verse number="20">佢講： 「𠊎愛揞面毋幫助佢等， 愛看佢等个結局樣般； 因為佢等係硬頸个一代， 係無忠心个子女。</verse>
				<verse number="21">佢等用『毋算係神』个偶像激𠊎嫉妒； 佢等用假神惹𠊎受氣。 所以，𠊎愛用『毋算係子民』个民族來激佢等嫉妒； 𠊎愛用戇檔个國惹佢等受氣。</verse>
				<verse number="22">𠊎个大發譴像火燒， 愛燒掉地上所有个； 𠊎一發火，陰間就𤏸起來， 連大山个根基也燒淨淨。</verse>
				<verse number="23">「𠊎愛用災難來打擊佢等； 𠊎愛用所有个箭射佢等。</verse>
				<verse number="24">佢等若毋係餓死，就係病死； 得人驚个瘟仔愛消滅佢等。 佢等會被當毒个蛇咬傷； 盡惡个野獸愛攻擊佢等。</verse>
				<verse number="25">戰爭使孤兒流浪街頭； 相㓾使寡婦空守間房。 壯丁少女死淨淨； 老人細子死光光。</verse>
				<verse number="26">𠊎本來應該滅掉佢等， 使天下人毋記得佢等；</verse>
				<verse number="27">總係𠊎毋俾敵人誇口， 𠊎毋俾仇敵妄想， 講係佢等打贏𠊎个子民； 其實係𠊎親手毀滅佢等。」</verse>
				<verse number="28">以色列 係無常識个民族； 佢等當中無半儕有智識。</verse>
				<verse number="29">佢等想毋出失敗个原因； 佢等毋明白自家个結局。</verse>
				<verse number="30">一個人做麼介能逐散千人？ 兩個人能使萬人到處逃走？ 因為佢等个磐石賣掉佢等， 大能个上主自家㧒掉佢等。</verse>
				<verse number="31">敵人就知自家个神明無才調， 無像 以色列 个磐石大有能力。</verse>
				<verse number="32">敵人像 所多瑪 、 蛾摩拉 恁敗壞， 像葡萄樹結當苦當毒个果子。</verse>
				<verse number="33">佢等个酒就像毒蛇个口水恁毒。</verse>
				<verse number="34">上主記得敵人个壞行為， 時機一到就愛責罰佢等。</verse>
				<verse number="35">上主愛向敵人報仇； 到時佢等就會敗壞。 佢等滅亡个日已經近了， 佢等个終局盡遽就會到。</verse>
				<verse number="36">上主看到佢个子民， 無論做奴才个抑係自由个， 全部失敗無力， 就為佢等伸冤， 憐恤佢个僕人。</verse>
				<verse number="37">上主愛責備佢个子民： 「你等所拜个神明在㖠位？ 你等靠个細石頭在㖠位？</verse>
				<verse number="38">你等用牲儀个油餵過它兜， 你等用敬神个酒灌過它兜。 這下喊它兜來幫助啊！ 大聲喊它兜來保護啊！</verse>
				<verse number="39">「你等這下愛看清楚！ 𠊎，只有𠊎正係上帝， 在𠊎以外無別个神。 𠊎使人死，也使人生； 𠊎打傷人，也醫治人； 無人能脫離𠊎个手。</verse>
				<verse number="40">𠊎用𠊎永遠个生命， 向天擎手來發誓講：</verse>
				<verse number="41">𠊎愛磨利皓光个劍， 愛執行公道个審判； 𠊎愛責罰敵人， 報應恨𠊎个人。</verse>
				<verse number="42">𠊎个箭頭愛啉血啉到醉， 就係被人㓾被人捉个血。 𠊎个利劍愛食佢等个肉， 就係仇敵中領袖个頭那。」</verse>
				<verse number="43">列國啊，愛為上主个子民歡喜！ 因為上主為佢个僕人討血債。 佢愛報應佢个仇敵； 佢愛潔淨佢个土地， 佢愛救贖佢个子民。</verse>
				<verse number="44">摩西 㧯 嫩 个孻仔 約書亞 在 以色列 全會眾面前大聲讀這首詩。</verse>
				<verse number="45">摩西 將上帝个教訓向 以色列 人民宣告後，</verse>
				<verse number="46">對佢等講：「你等一定愛將𠊎今晡日向你等頒佈个這兜誡命記在心中，又愛傳給你等个子女，喊佢等確實遵行這法律一切个話。</verse>
				<verse number="47">這兜誡命毋係無用个話，係你等个生命。你等遵行，就做得長久住在 約旦 河對面 — 你等愛入去佔領个該垤土地。」</verse>
				<verse number="48">該日，上主對 摩西 講：</verse>
				<verse number="49">「你愛到 耶利哥 城對面、就係 摩押 地个 亞巴琳 山區，跋上 尼波 山，對該位遠遠看 迦南 地，就係𠊎愛賜給 以色列 人个土地。</verse>
				<verse number="50">你愛死在該山頂，歸祖宗該位去，像若哥 亞倫 死在 何珥 山頂，歸祖宗該位去一樣，</verse>
				<verse number="51">因為你兩儕在 以色列 人面前違背𠊎。你等在 尋 个曠野， 加低斯 城附近个 米利巴 泉水滣，在人民面前無尊𠊎為聖。</verse>
				<verse number="52">所以，你做得對遠遠个地方看𠊎愛賜給 以色列 人个土地，總係你做毋得入去。」</verse>
			</chapter>
			<chapter number="33">
				<verse number="1">以下係神人 摩西 過身以前，向 以色列 人民祝福个話。</verse>
				<verse number="2">佢講： 上主對 西奈 山來； 佢像日頭對 以東 出來， 對 巴蘭 山光照自家个子民。 千千萬萬个天使跈等佢； 佢正手擎等當猛个火把。</verse>
				<verse number="3">上主惜佢个子民 ； 佢保護佢个聖民。 𠊎等伏在佢个腳前， 全心接受佢个教訓。</verse>
				<verse number="4">摩西 將上主个法律頒佈給𠊎等； 該係 雅各 个後代最寶貝个產業。</verse>
				<verse number="5">當 以色列 各支族个領袖聚集共下， 該時上主做佢正直个子民 个君王。</verse>
				<verse number="6">摩西 祝福 呂便 支族，講： 呂便 个人數雖然較少兜仔， 願佢等永遠存在毋會滅亡。</verse>
				<verse number="7">佢祝福 猶大 支族，講： 上主啊，求你聽 猶大 个哀求， 使佢等㧯其他支族重新聯合。 猶大 个支族愛為自家作戰； 願上主幫助佢等征服敵人。</verse>
				<verse number="8">佢祝福 利未 支族，講： 上主啊，求你通過 利未 支族 用烏陵土明啟示你个旨意； 佢等係你忠誠个子民。 你識在 瑪撒 考驗過佢等， 在 米利巴 泉水滣爭論過。</verse>
				<verse number="9">佢等對爺𡟓、兄弟、子女， 無像對你表現个忠心。 佢等遵行你个誡命； 佢等堅守你立个約。</verse>
				<verse number="10">佢等愛教 以色列 人遵行你个法律誡命， 也愛在你面前燒香，在祭壇頂獻燒化祭。</verse>
				<verse number="11">上主啊，願你使佢等強盛； 求你愛接納佢等个工作。 求你愛攻擊該兜怨恨佢等个敵人， 打傷敵人个腰骨，使佢等䟘毋起來。</verse>
				<verse number="12">佢祝福 便雅憫 支族，講： 上主痛惜並保護 便雅憫 ； 佢一定會歸日保護佢等， 佢等在佢个手中有平安 。</verse>
				<verse number="13">佢祝福 約瑟 支族，講： 願上主賜福佢等个土地， 對天頂降下甘霖， 對地下湧出泉水。</verse>
				<verse number="14">願佢等个田園日光充足，年年豐收， 願佢等个土地逐隻月出產好果子。</verse>
				<verse number="15">願佢等个老山嶺 永遠果樹滿遍係。</verse>
				<verse number="16">在𤏸等个竻藪肚呼召𠊎个上主啊， 大大賜福給佢等，使佢等全地豐收。 願這兜福氣臨到 約瑟 支族， 因為佢係兄弟當中个領袖。</verse>
				<verse number="17">約瑟 有牛牯个氣力， 有野牛个角； 一支角係 瑪拿西 个千千， 一支角係 以法蓮 个萬萬； 佢愛用佢等征服萬國， 將萬民逐到地極。</verse>
				<verse number="18">佢祝福 西布倫 㧯 以薩迦 支族，講： 願 西布倫 个生理發展到海外； 願 以薩迦 在本地个財富增加。</verse>
				<verse number="19">佢等邀請列國到佢等山頂， 在該位獻各種應該獻个祭。 佢等對大海將財產運轉來， 對沙灘該位將寶貝搬轉去。</verse>
				<verse number="20">佢祝福 迦得 支族，講： 上帝應當得到稱頌， 佢擴張 迦得 个土地。 迦得 就像獅仔伏等， 愛揪下獵物个腳髀， 愛剝掉牠个頭那皮。</verse>
				<verse number="21">佢等為自家擇最好个土地， 就係領袖應該得到个一份。 以色列 該兜領袖聚集个時， 佢等遵行上主个法律誡命。</verse>
				<verse number="22">佢祝福 但 支族，講： 但 就係細个獅仔， 對 巴珊 山猋出來。</verse>
				<verse number="23">佢祝福 拿弗他利 支族，講： 拿弗他利 得到上主个大恩㧯慈愛； 佢等个地界對 加利利 湖向南擴展。</verse>
				<verse number="24">佢祝福 亞設 支族，講： 亞設 所得个祝福超過別族； 願佢等在兄弟當中得人惜； 願佢等个土地生滿橄欖樹。</verse>
				<verse number="25">願佢等个城鎮有銅門鐵閂保護； 願佢等在世間个日仔充滿力量。</verse>
				<verse number="26">以色列 啊 ，別个神明㧯你个上帝比毋得。 佢坐等雲來幫助你； 佢个威嚴飛過天空。</verse>
				<verse number="27">永生个上帝係你个避難所； 佢个雙手永遠支持你。 佢為你逐走敵人； 佢命令滅掉佢等。</verse>
				<verse number="28">以色列 會安居樂業， 雅各 子孫享受太平， 住在五榖新酒豐收个所在， 天頂甘霖滋潤佢等个土地。</verse>
				<verse number="29">以色列 啊，你等樣般恁有幸福！ 上主拯救个人民，麼人比抑得？ 上主係你等个盾牌、刀劍； 佢保護你等，使你等得勝。 你等个敵人愛向你等投降； 你等愛踏在佢等个背囊頂。</verse>
			</chapter>
			<chapter number="34">
				<verse number="1">摩西 對 摩押 平原跋上 尼波 山，到 耶利哥 對面个 比斯迦 山頂高。上主在該位俾佢看到 迦南 全地：對 基列 到北片个 但 城、</verse>
				<verse number="2">拿弗他利 全地、 以法蓮 㧯 瑪拿西 地區、 猶大 全地、向西透到 地中海 、</verse>
				<verse number="3">猶大 个南部、㧯對 瑣珥 到棕樹城 耶利哥 中間个平原。</verse>
				<verse number="4">上主對 摩西 講：「這歸垤土地就係𠊎應許 亞伯拉罕 、 以撒 、 雅各 愛賜給佢等子孫个。𠊎已經俾你親眼看到這垤土地，總係你做毋得入去。」</verse>
				<verse number="5">恁樣，上主个僕人 摩西 就在 摩押 地過身，係照上主所講个。</verse>
				<verse number="6">上主將佢埋在 伯‧批珥 城對面个 摩押 山壢；直到今晡日，無人知佢个墳墓在㖠位。</verse>
				<verse number="7">摩西 過身个時一百二十歲，身體還健，目珠也還盡金。</verse>
				<verse number="8">以色列 人民在 摩押 平原為 摩西 傷心大噭三十日，辦喪事个期間就滿了。</verse>
				<verse number="9">嫩 个孻仔 約書亞 被智慧个靈充滿，因為 摩西 按手設立佢做繼承人。 以色列 人民就聽從 約書亞 ，遵行上主通過 摩西 頒給佢等个誡命。</verse>
				<verse number="10">以色列 中自從吂識有像 摩西 恁樣个先知；因為上主面對面認識佢。</verse>
				<verse number="11">上主識派 摩西 對付 埃及 王、佢个官員，㧯 埃及 全國；無人能行 摩西 在該位所行个神蹟奇事。</verse>
				<verse number="12">摩西 也識在全 以色列 人民面前行當大當得人驚个事。</verse>
			</chapter>
		</book>
		<book number="6">
			<chapter number="1">
				<verse number="1">上主个僕人 摩西 死掉後，上主對 摩西 个助手 — 嫩 个孻仔 約書亞 講：</verse>
				<verse number="2">「𠊎个僕人 摩西 死掉了；這下你愛準備帶領所有个 以色列 人過 約旦 河，到𠊎愛賜給你等个土地去。</verse>
				<verse number="3">照𠊎應許 摩西 个，你等踏過个地方，𠊎全部愛賜給你等。</verse>
				<verse number="4">你等个國界會對南片个沙漠，直到北片个 黎巴嫩 山，對東片个 幼發拉底 河，經過 赫 人全地，到西片个 地中海 。</verse>
				<verse number="5">約書亞 啊，你在生个日仔，無一個人有可能打贏你。𠊎愛㧯你共下，像𠊎㧯 摩西 共下一樣。𠊎一定毋會㧒掉你，絕對毋會離開你。</verse>
				<verse number="6">你愛堅強，愛勇敢，因為你愛帶領這人民去佔領𠊎應許給佢等祖先个土地。</verse>
				<verse number="7">你愛堅強，盡勇敢，確實遵守𠊎僕人 摩西 交給你个全部法律，毋偏左毋偏右，你無論去到㖠位，一定會凡事順利。</verse>
				<verse number="8">這法律書你愛長透讀，日夜思想，使你會認真遵守這書底背所寫个話。恁樣，你就會成功，凡事順利。</verse>
				<verse number="9">你愛記得𠊎个命令：愛堅強，愛勇敢！毋使驚，毋好失志；因為你無論到㖠位，𠊎、上主 — 你个上帝一定會㧯你共下。」</verse>
				<verse number="10">約書亞 吩咐人民該兜領袖，</verse>
				<verse number="11">愛到營中逐所在去宣佈：「你等愛準備食物，因為三日內你等愛過 約旦 河，入去佔領上主 — 你等个上帝愛賜給你等个土地。」</verse>
				<verse number="12">約書亞 對 呂便 、 迦得 兩支族，並 瑪拿西 半支族个人講：</verse>
				<verse number="13">「你等愛記得上主个僕人 摩西 吩咐過你等个話：『上主 — 你等个上帝將 約旦 河東片這垤土地賜給你等，俾你等安頓好勢。』</verse>
				<verse number="14">你等个𡜵娘、子女㧯頭牲愛留在這位；總係你等个戰士愛裝備好勢，在 以色列 同胞頭前打頭陣，先過 約旦 河。你等愛㧯佢等共下去相㓾，</verse>
				<verse number="15">直到佢等佔領 約旦 河西片，就係上主 — 你等个上帝賜給佢等个土地。佢等在該位安頓好勢以後，你等正做得轉 約旦 河東片，到上主个僕人 摩西 給你等个土地。」</verse>
				<verse number="16">佢等應 約書亞 ：「你命令𠊎等做麼介，𠊎等就做麼介；你派𠊎等到麼介地方去，𠊎等就到麼介地方去。</verse>
				<verse number="17">𠊎等會聽從你，像𠊎等頭擺認真聽從 摩西 共樣。總係，願上主 — 你个上帝㧯你共下，就像佢㧯 摩西 共下一樣。</verse>
				<verse number="18">麼人反抗你个命令，毋聽從你个指揮，麼人就愛處死。總係，你愛堅強，愛勇敢！」</verse>
			</chapter>
			<chapter number="2">
				<verse number="1">嫩 个孻仔 約書亞 對 什亭 暗中派兩個探仔，吩咐講：「你等到 迦南 地去打探，特別調查 耶利哥 城个情況。」佢等去城肚，就到妓女 喇合 屋下過夜。</verse>
				<verse number="2">耶利哥 王聽講該暗晡有 以色列 人來城肚打探，</verse>
				<verse number="3">就派人去對 喇合 講：「在你屋肚个人係來打探全地，你愛將佢等交出來！」</verse>
				<verse number="4">喇合 講：「確實有人來過𠊎這位，總係𠊎毋知佢等對㖠位來。佢等在日頭落山、城門關掉以前就離開了。𠊎無問佢等愛到㖠位去；若係你等遽遽去追，一定追得到。」 (其實， 喇合 已經將該兩個探仔帶到屋頂，囥在一大堆个黃麻骨底背。)</verse>
				<verse number="5"></verse>
				<verse number="6"></verse>
				<verse number="7">王派去搜查个人一離開 耶利哥 城，城門就關掉。該兜人去追兩個探仔，直到 約旦 河个渡船口。</verse>
				<verse number="8">兩個探仔還吂睡目以前， 喇合 上到屋頂，</verse>
				<verse number="9">對佢等講：「𠊎知上主已經將這土地賜給你等。這地方所有个人全部當驚你等，驚到會死。</verse>
				<verse number="10">𠊎等有聽講，你等離開 埃及 个時，上主樣般使你等面前个 紅海 燥掉；𠊎等也聽講，你等樣般對待 約旦 河東片个兩個 亞摩利 王 — 西宏 㧯 噩 ，將佢等毀滅。</verse>
				<verse number="11">𠊎等一聽到這兜事就著驚，逐儕一想到你等就無葛無煞，因為上主 — 你等个上帝係天頂人間个上帝。</verse>
				<verse number="12">這下，求你等指等上主對𠊎發誓，你等愛好款待𠊎全家人，親像𠊎好款待你等共樣。求你等給𠊎一個確實个保證。</verse>
				<verse number="13">求你等答應𠊎，你等愛饒赦𠊎个爺𡟓、兄弟、姊妹、並佢等家屬个性命，救𠊎等脫離死亡。」</verse>
				<verse number="14">該兩儕應講：「你毋好將𠊎等个祕密講出去，𠊎等就答應你。上主將這土地賜給𠊎等个時，𠊎等會誠心誠意好好款待你。若係𠊎等無信用，願上帝拿𠊎等个性命換你等个性命。」</verse>
				<verse number="15">喇合 个屋起在城牆頂，所以姖用一條索仔將該兩儕對窗門縋下去。</verse>
				<verse number="16">姖對佢等講：「你等愛走到山肚去；若無，你等會被該兜愛捉你等个人尋到。你等愛在該位囥三日，等佢等轉來城肚以後正做得逃走。」</verse>
				<verse number="17">佢等對 喇合 講：「𠊎等照你个要求所發誓个，𠊎等一定會遵守，</verse>
				<verse number="18">總係你一定愛照𠊎等个話去做。𠊎等佔領你等土地个時，你愛將這條紅索仔䌈在你放𠊎等逃走个窗門頂。你愛將若爺𡟓、兄弟，㧯若爸全家全部聚集在你屋下。</verse>
				<verse number="19">若係有人行出這間屋，佢被人㓾死係自家个責任，毋係𠊎等个毋著；若係有人在你屋下受傷害，罪就歸給𠊎等。</verse>
				<verse number="20">若係你將𠊎等个祕密講出去，𠊎等就毋使遵守對你个發誓。」</verse>
				<verse number="21">喇合 答應佢等个條件，然後將佢等送走。佢等離開以後， 喇合 將紅索仔䌈在窗門頂。</verse>
				<verse number="22">兩個探仔到山肚囥起來。王派去搜查个人在城外逐所在尋佢等，尋三日還係尋毋到，就轉 耶利哥 城去。</verse>
				<verse number="23">所以兩個探仔對山肚出來，過河去見 嫩 个孻仔 約書亞 ，將經過个情形向佢報告。</verse>
				<verse number="24">佢等對 約書亞 講：「𠊎等確信上主已經將該地全部賜給𠊎等了。該位个人全部當驚𠊎等。」</verse>
			</chapter>
			<chapter number="3">
				<verse number="1">第二朝晨， 約書亞 㧯所有个 以色列 人打早離開 什亭 ，來到 約旦 河，在該位安營，等過河。</verse>
				<verse number="2">三日後，人民該兜領袖到營中逐所在去，</verse>
				<verse number="3">吩咐人民講：「你等看到 利未 支族該兜祭司扛上主 — 你等上帝个約櫃前進个時，你等就愛徙營，跈約櫃前進。</verse>
				<verse number="4">你等吂識去過這地方，所以佢等會在頭前帶路。總係你等毋好行忒近約櫃，愛跈在約櫃後背，保持大約一公里遠。」</verse>
				<verse number="5">約書亞 吩咐人民：「你等愛潔淨自家，因為天光日上主愛在你等當中行神蹟。」</verse>
				<verse number="6">然後 約書亞 吩咐該兜祭司：「你等愛將約櫃扛起來，行在人民頭前。」佢等就照恁樣去做。</verse>
				<verse number="7">上主對 約書亞 講：「對今晡日開始，𠊎愛使所有个 以色列 人民尊你做大領袖。佢等會看出𠊎㧯你共下，像以前𠊎㧯 摩西 共下一樣。</verse>
				<verse number="8">你愛吩咐扛約櫃該兜祭司：『你等到 約旦 河滣个時，就愛行入河壩肚企等。』」</verse>
				<verse number="9">所以 約書亞 對 以色列 人民講：「來啊！來聽上主 — 你等上帝个話。</verse>
				<verse number="10">你等向前行个時，上帝一定會在你等面前逐走 迦南 人、 赫 人、 希未 人、 比利洗 人、 革迦撒 人、 亞摩利 人㧯 耶布斯 人。全世界个主宰 — 上主个約櫃在你等頭前過 約旦 河个時，你等就知永生上帝在你等中間。</verse>
				<verse number="11"></verse>
				<verse number="12">這下，你等愛對 以色列 十二支族當中各支族選出一儕，一共十二儕。</verse>
				<verse number="13">該兜祭司扛全世界个主宰 — 上主个約櫃踏到水个時， 約旦 河个水會停止流動。上游流下來个水會集在一個地方，成做一隻大陂頭。」</verse>
				<verse number="14">該時堵好係收割个時節，河壩水照常漲過兩岸。 民眾就徙營，準備過 約旦 河；該兜祭司扛等約櫃在佢等頭前行。該兜祭司个腳一踏入水，</verse>
				<verse number="15"></verse>
				<verse number="16">河壩水就停止流動：上游个水在 撒拉旦 附近个 亞當 城就集做一下，成做一隻大陂頭；下游流入 死海 个水完全切斷。所以民眾對 耶利哥 對面附近過去。</verse>
				<verse number="17">該兜祭司扛等上主个約櫃，企住在 約旦 河中央个燥地，等 以色列 民眾行等過燥地，直到所有个國民全部過 約旦 河。</verse>
			</chapter>
			<chapter number="4">
				<verse number="1">國民全部過 約旦 河以後，上主對 約書亞 講：</verse>
				<verse number="2">「你愛對人民當中選出十二個人，各支族一儕，</verse>
				<verse number="3">吩咐佢等到 約旦 河肚、到祭司企住个地方，取十二隻石頭，然後帶過去，放在你等今暗晡安營个地方。」</verse>
				<verse number="4">所以， 約書亞 對 以色列 人當中設立十二個人，各支族一儕，將佢等召集共下，</verse>
				<verse number="5">吩咐佢等：「你等到 約旦 河肚，行到上主 — 你等上帝个約櫃頭前，逐儕對河壩肚取一隻石頭，擎在自家肩頭。逐隻石頭代表 以色列 一個支族。</verse>
				<verse number="6">你等愛將這兜石頭頓起來做紀念碑。將來，你等个子孫問起你等：『這兜石頭係紀念麼介？』</verse>
				<verse number="7">你等愛㧯佢等講，上主个約櫃過 約旦 河个時，河壩水就停下來、無流動。這兜石頭愛永遠使 以色列 人紀念在這位所發生个事。」</verse>
				<verse number="8">該十二儕就照 約書亞 个命令去做。佢等遵照上主吩咐 約書亞 个話對 約旦 河肚取十二隻石頭，逐隻石頭代表 以色列 一個支族；佢等將石頭擎到營地，放在該位。</verse>
				<verse number="9">約書亞 也在 約旦 河肚，在祭司扛等約櫃企住个地方，另外堆十二隻石頭。 (該兜石頭到今晡日還留在該位。)</verse>
				<verse number="10">該兜扛約櫃个祭司企住在 約旦 河中央，等人民完成上主吩咐 約書亞 喊佢等去做个事。這也係照 摩西 命令 約書亞 做个。 人民遽遽過 約旦 河。</verse>
				<verse number="11">佢等全部過河以後，該兜祭司正扛等上主个約櫃，在大眾面前行過去。</verse>
				<verse number="12">呂便 、 迦得 兩支族，㧯 瑪拿西 半支族裝備好个戰士，照 摩西 个吩咐，在 以色列 人最頭前行。</verse>
				<verse number="13">大約有四萬裝備好个戰士在上主面前過河，到 耶利哥 平原準備相㓾。</verse>
				<verse number="14">該日，上主使 以色列 人民全部尊 約書亞 做大領袖。對該時起， 約書亞 㧯 摩西 共樣，一生人受人民尊敬。</verse>
				<verse number="15">上主吩咐 約書亞 講：</verse>
				<verse number="16">「命令該兜扛等約櫃个祭司對 約旦 河上來。」</verse>
				<verse number="17">約書亞 就照恁樣去做。</verse>
				<verse number="18">該兜扛等上主約櫃个祭司對 約旦 河一上來、踏到燥地，河壩水又開始流通，㧯頭擺共樣漲過兩岸。</verse>
				<verse number="19">正月初十，人民對 約旦 河上來，就在 耶利哥 東片个 吉甲 安營。</verse>
				<verse number="20">約書亞 將該兜對 約旦 河肚擎來个十二隻石頭頓在該位。</verse>
				<verse number="21">佢對 以色列 人講：「將來，你等个子孫問起你等：『這兜石頭係紀念麼介？』</verse>
				<verse number="22">你等愛㧯佢等講：『 以色列 人識行過變做燥地个 約旦 河。』</verse>
				<verse number="23">上主 — 你等个上帝使你等頭前个 約旦 河燥掉，等到你等全部行過去，就像佢當年使𠊎等頭前个 紅海 燥掉，俾𠊎等行過去共樣。</verse>
				<verse number="24">佢恁樣做，愛使天下萬民全部知上主个手大有能力，也愛使你等永遠敬畏上主 — 你等个上帝。」</verse>
			</chapter>
			<chapter number="5">
				<verse number="1">約旦 河西片 亞摩利 所有个王㧯 地中海 滣頭 迦南 所有个王聽到上主使 約旦 河燥掉，俾 以色列 人民行過去，就全部驚到愊愊掣、無葛無煞。</verse>
				<verse number="2">該時，上主吩咐 約書亞 ：「你愛用火石磨个刀仔，重新為 以色列 人行割禮。」</verse>
				<verse number="3">所以 約書亞 製造火石刀，在「 包皮 山」該地方為 以色列 人行割禮。</verse>
				<verse number="4">約書亞 行割禮个原因係恁樣： 以色列 人離開 埃及 个時，所有个男人全部有受割禮。</verse>
				<verse number="5">總係佢等在曠野流浪該四十年，所𫱔个細孻仔全部無受割禮。</verse>
				<verse number="6">四十年後，當初離開 埃及 時會相㓾个壯丁全部死掉，因為佢等悖逆上主。上主識發誓，毋准佢等看到佢向佢等祖先所應許、愛賜給𠊎等這流乳㧯蜜當肥个土地。</verse>
				<verse number="7">這兜人个子孫，自從毋識受割禮；所以 約書亞 就為這新个一代行割禮。</verse>
				<verse number="8">行割禮以後，國民全部留在營肚，等傷口醫好了。</verse>
				<verse number="9">上主對 約書亞 講：「今晡日，𠊎將你等在 埃及 做奴才个見笑對你等身上除掉了。」所以，到今晡日，該地方還係安到 吉甲 。</verse>
				<verse number="10">以色列 人民在 吉甲 安營。該隻月个十四暗晡，佢等在 耶利哥 平原守𨃟過節。</verse>
				<verse number="11">第二日，佢等第一擺食到 迦南 地个土產：有無酵餅㧯焙个麥串。</verse>
				<verse number="12">該日就停止落嗎哪； 以色列 人民也無再食嗎哪。對該時開始，佢等食 迦南 地个出產。</verse>
				<verse number="13">約書亞 會到 耶利哥 个時，忽然看到一儕企在佢面前，手項拿等一支挷出來个劍。 約書亞 行前問佢：「你係屬𠊎等个，抑係屬敵人个？」</verse>
				<verse number="14">該人講：「都毋係。𠊎係來做上主軍隊个元帥。」 約書亞 伏在地上拜佢，講：「𠊎个主啊，𠊎係你个僕人；你有麼介吩咐？」</verse>
				<verse number="15">上主軍隊个元帥對佢講：「將你个鞋脫下來！因為你企个地方係聖地。」 約書亞 就照佢个話去做。</verse>
			</chapter>
			<chapter number="6">
				<verse number="1">耶利哥 人將城門關到𢫮𢫮，為到愛阻擋 以色列 人个侵入。無人做得對城門出入。</verse>
				<verse number="2">上主對 約書亞 講：「𠊎已經將 耶利哥 城、連它个王㧯該兜勇士，全部交在你个手中了。</verse>
				<verse number="3">你愛帶領軍隊，逐日𫟧城一輪，連續六日。</verse>
				<verse number="4">你愛派七個祭司，逐儕拿等羊角做个號角，行在約櫃頭前。到第七日，你愛帶領軍隊𫟧城七輪，該七個祭司愛緊歕號角。</verse>
				<verse number="5">然後佢等愛歕一長聲；你等一聽到這長聲，全部愛大聲喊，城牆就會橫掉。該時，軍隊就愛做一下攻入城肚。」</verse>
				<verse number="6">嫩 个孻仔 約書亞 召集該兜祭司來，對佢等講：「你等愛扛等上主个約櫃，其中七個祭司愛拿號角行在約櫃頭前。」</verse>
				<verse number="7">接等，佢命令軍隊講：「你等愛開始𫟧城，打頭陣个部隊愛帶頭，行在上主約櫃个頭前。」</verse>
				<verse number="8">所以， 約書亞 一命令，打頭陣个部隊就帶頭行，接等係該七個歕號角个祭司，再來係該兜扛約櫃个祭司，最後背係後衛部隊。該七個祭司歸路緊歕號角；</verse>
				<verse number="9"></verse>
				<verse number="10">總係 約書亞 命令軍隊講：「你等毋好喊，毋好出聲，連一句話也做毋得講，愛等到𠊎下命令个日，該時正做得大聲喊。」</verse>
				<verse number="11">恁樣， 約書亞 使上主个約櫃𫟧城一輪；然後大家轉營中過夜。</verse>
				<verse number="12">第二日， 約書亞 打早䟘起來。該兜祭司㧯軍隊第二擺𫟧城。佢等照前一日个順序行：對打頭陣个部隊開路，然後係七個歕號角个祭司，接下去係該兜扛上主約櫃个祭司，最後背係後衛部隊。該七個祭司歸路緊歕號角。</verse>
				<verse number="13"></verse>
				<verse number="14">這日，佢等就𫟧城行一輪，然後轉營中。連續六日，佢等逐日就恁樣做。</verse>
				<verse number="15">第七日，佢等天一光就䟘起來，用共樣个方式𫟧城七輪。單單這日，佢等𫟧城七擺。</verse>
				<verse number="16">到第七輪，該兜祭司愛歕號角个時， 約書亞 命令部隊講：「愛大聲喊！因為上主已經將這城交給你等了！</verse>
				<verse number="17">這城㧯城肚所有个東西愛毀滅，當做祭物獻給上主；只有妓女 喇合 㧯姖个屋下人，你等愛饒佢等个性命，因為姖識將𠊎等个探仔囥起來。</verse>
				<verse number="18">你等愛細膩，做毋得拿該兜愛毀滅个東西；驚怕你等係有拿，就會給 以色列 全營帶來災禍、滅亡。</verse>
				<verse number="19">所有用金銀銅鐵製造个東西全部愛聖化歸上主，放入上主个寶庫。」</verse>
				<verse number="20">所以，該兜祭司開始歕號角；人民一聽到就大聲喊，城牆黏時橫下來。軍隊就做一下向前，佔領這座城。</verse>
				<verse number="21">佢等用刀仔㓾掉城肚所有个人，無分男女老幼全部㓾掉。佢等也㓾掉牛、羊、㧯驢。</verse>
				<verse number="22">約書亞 對該兩個探仔講：「你等到妓女 喇合 屋下，照你等向姖發誓个，將姖㧯姖个屋下人全部帶出來。」</verse>
				<verse number="23">兩個探仔就去，將 喇合 帶出來，也帶出姖个爺𡟓、兄弟、㧯其他个屋下人，將佢等安頓在 以色列 營外安全个所在。</verse>
				<verse number="24">然後人民放火燒城。佢等單單將金銀銅鐵製造个東西帶出來，放在上主个寶庫，其他个東西全部燒掉。</verse>
				<verse number="25">約書亞 保全妓女 喇合 㧯姖全家人个性命，因為姖識將 約書亞 派去 耶利哥 个兩個探仔囥起來。 ( 喇合 㧯姖个屋下人就安居在 以色列 ，直到今晡日。)</verse>
				<verse number="26">這時， 約書亞 發出嚴厲个警告，講：「願上主咒詛該想愛重建 耶利哥 城个人： 愛打這城地基个人，會死長子； 愛起這城門个人，會死滿子。」</verse>
				<verse number="27">上主㧯 約書亞 共下； 約書亞 个名聲傳遍該地方。</verse>
			</chapter>
			<chapter number="7">
				<verse number="1">上主識命令 以色列 人做毋得拿該兜愛毀滅个戰利品，總係有人違背命令。佢个名安到 亞干 ，係 迦米 个孻仔， 撒底 个孫仔，屬 猶大 支族中个 謝拉 宗族。佢無遵守這命令，所以上主向 以色列 人大發譴。</verse>
				<verse number="2">約書亞 派人對 耶利哥 到 伯‧亞文 附近、 伯特利 東片个 艾 城，命令佢等去打探該所在。佢等完成打探後，</verse>
				<verse number="3">轉來向 約書亞 報告講：「毋使出動全部人民去攻打 艾 城；用兩三千人就罅了，因為城肚个人無幾多。」</verse>
				<verse number="4">所以大約有三千個 以色列 人上去攻打 艾 城，總係佢等卻輸掉。</verse>
				<verse number="5">艾 城个人逐佢等，對城門一直逐到 示巴琳 ，在下崎个地方將三十六儕㓾掉。所以， 以色列 人驚到無膽。</verse>
				<verse number="6">約書亞 㧯 以色列 人該兜長老悲傷到扯爛衫褲，拿塵灰委在頭那頂，在上主个約櫃前伏在地上，直到臨暗仔。</verse>
				<verse number="7">約書亞 講：「唉！至高个上主啊，你做麼介𢱋這人民過 約旦 河呢？係愛將𠊎等交給 亞摩利 人、毀滅𠊎等係麼？做麼介毋俾𠊎等留在 約旦 河該片呢？</verse>
				<verse number="8">主啊，這下 以色列 人民已經在敵人面前輸掉，𠊎還有麼介好講呢？</verse>
				<verse number="9">迦南 人㧯這地方所有个人一聽到這消息，佢等會來包圍𠊎等，將𠊎等个名完全除掉。該時，你愛樣般維護你个大名呢？」</verse>
				<verse number="10">上主對 約書亞 講：「䟘起來！做麼介伏在地上呢？</verse>
				<verse number="11">以色列 人有犯罪！佢等違犯𠊎个命令，違背𠊎㧯佢等个立約。佢等拿該兜愛毀滅个戰利品；佢等偷這兜東西，㧯自家个東西共下囥起來。</verse>
				<verse number="12">所以， 以色列 人無辦法打贏敵人。佢等轉身逃走，因為佢等成做受咒詛个。你等若毋毀滅該兜無應該拿个戰利品，𠊎就無再㧯你等共下！</verse>
				<verse number="13">這下你䟘起來，愛潔淨人民，喊佢等準備好，天光日到𠊎面前來，因為𠊎 — 上主、 以色列 个上帝愛㧯佢等講：『 以色列 人哪，你等有拿𠊎命令你等一定愛毀滅个戰利品。若係你等毋除掉這兜東西，你等就無辦法打贏敵人！』</verse>
				<verse number="14">你愛吩咐人民，天光朝晨愛照支族集合到𠊎面前來；𠊎 — 上主抽到个支族愛一宗族一宗族行前來，抽到个宗族愛一家族一家族行前來；抽到个家族愛一儕一儕行前來。</verse>
				<verse number="15">𠊎抽到个該儕，就係拿應該愛毀滅个戰利品个人；你等愛燒死佢，連佢个屋下人㧯所有屬佢个東西也愛燒掉；因為佢違背𠊎个約，給 以色列 帶來見笑。」</verse>
				<verse number="16">第二日打早， 約書亞 喊 以色列 人一支族一支族集合到佢面前來，抽到个係 猶大 支族。</verse>
				<verse number="17">佢喊 猶大 支族一宗族一宗族行前來，抽到 謝拉 宗族。佢喊 謝拉 宗族一家族一家族行前來，抽到个係 撒底 家族。</verse>
				<verse number="18">佢喊 撒底 家族一個一個行前來；最後就抽到 撒底 个孫仔、 迦米 个孻仔 亞干 。</verse>
				<verse number="19">約書亞 對 亞干 講：「細子啊，你愛將榮光歸給上主 — 以色列 个上帝，在佢面前認罪。㧯𠊎講，你到底做麼介事；做毋得騙𠊎噢！」</verse>
				<verse number="20">亞干 應 約書亞 講：「𠊎確實有得罪上主 — 以色列 个上帝。這係𠊎所做个：</verse>
				<verse number="21">在𠊎等个戰利品當中，𠊎看到一領當靚个 巴比倫 外衫，還有大約兩公斤重个銀仔，㧯一條大約半公斤重个金仔。𠊎貪愛這兜東西，就拿起來。這兜東西全部埋在𠊎帳篷肚个地泥下；銀仔在最下背。」</verse>
				<verse number="22">所以， 約書亞 派人走到帳篷該位去尋，正經發現該兜一定愛毀滅个東西埋在地泥下，銀仔在最下背。</verse>
				<verse number="23">佢等將該兜東西搬出帳篷，帶到 約書亞 㧯所有 以色列 人民該位，擺在上主面前。</verse>
				<verse number="24">約書亞 㧯 以色列 人民揪到 亞干 ，將銀仔、外衫、金條，連同 亞干 个子女、牛、羊、驢、帳篷，㧯佢所有个東西全部帶到 亞割 山壢。</verse>
				<verse number="25">約書亞 對 亞干 講：「你做麼介帶給𠊎等這個災難呢？這下上主愛降災難給你了！」所以 以色列 民眾用石頭㧹死 亞干 㧯佢个屋下人，燒掉佢所有个東西。</verse>
				<verse number="26">佢等在 亞干 屍體面頂堆一大堆石頭。這石堆到這下還在該位。所以，該地方到今晡日還安到 亞割 山壢 。 恁樣，上主停掉佢个大發譴。</verse>
			</chapter>
			<chapter number="8">
				<verse number="1">上主對 約書亞 講：「你愛帶領所有會相㓾个人到 艾 城去；毋使驚，毋好失志。𠊎已經將 艾 城个王、佢个人民、城鎮、㧯土地全部交給你。</verse>
				<verse number="2">以前你樣般對待 耶利哥 城㧯它个王，你也愛照樣對待 艾 城㧯它个王；總係這擺你等做得為自家留下財物㧯頭牲。你愛對後背攻擊 艾 城。」</verse>
				<verse number="3">所以， 約書亞 㧯全部會相㓾个人準備到 艾 城去。佢選出三萬精兵，派佢等在暗晡頭出發。</verse>
				<verse number="4">佢命令佢等講：「你等愛埋伏在城个後背，總係毋好離開忒遠，逐儕愛隨時準備攻擊。</verse>
				<verse number="5">𠊎帶領个人愛正面進攻 艾 城；城肚个人出來攻擊𠊎等个時，𠊎等愛像上擺恁樣轉身逃走。</verse>
				<verse number="6">佢等會逐𠊎等，直到𠊎等騙佢等離開該城當遠。佢等會恅到𠊎等係像上擺恁樣在佢等面前逃走。</verse>
				<verse number="7">該時，你等就愛對埋伏个地方出來攻擊，佔領該城。上主 — 你等个上帝會將這城交給你等。</verse>
				<verse number="8">你等佔領這城以後，愛遵照上主个命令，放火燒城。這係𠊎給你等个命令。」</verse>
				<verse number="9">所以 約書亞 派佢等出去，佢等去到 艾 城西片、 伯特利 㧯 艾 城中央个所在，埋伏在該位等等。總係 約書亞 㧯人民還在營地過夜。</verse>
				<verse number="10">第二日打早， 約書亞 䟘起來，召集佢个軍隊。佢㧯 以色列 該兜長老帶領軍隊向 艾 城出發。</verse>
				<verse number="11">約書亞 帶領个軍隊行到 艾 城進攻，在城个北片安營；佢等㧯 艾 城中間隔等一個山壢。</verse>
				<verse number="12">約書亞 派大約五千人去埋伏在城个西片，就在 伯特利 㧯 艾 城个中央。</verse>
				<verse number="13">軍隊个佈置係恁樣：主力軍隊在城个北片，埋伏个軍隊在城个西片。該暗晡， 約書亞 在山壢過夜。</verse>
				<verse number="14">艾 城个王看到 約書亞 个軍隊，打早就出來迎戰。佢召集所有部下，在 約旦 河谷前上擺交戰个地方㧯 以色列 人相㓾，並毋知城个後背有軍隊埋伏愛來攻擊。</verse>
				<verse number="15">約書亞 㧯佢个軍隊詐意打輸，向曠野逃走。</verse>
				<verse number="16">艾 城个人全部出來追 以色列 人；佢等越追，就離城越遠。</verse>
				<verse number="17">艾 城㧯 伯特利 城無一儕無出來逐 以色列 人；佢等就留下空城，無人防備。</verse>
				<verse number="18">該時，上主對 約書亞 講：「將你个槍頭指向 艾 城；𠊎愛將這城賜給你了。」 約書亞 就照恁樣去做。</verse>
				<verse number="19">佢擎起槍來，埋伏个軍隊遽遽對埋伏个地方出來，走等去 艾 城，佔領該城，黏時放火將它燒掉。</verse>
				<verse number="20">艾 城个人回頭一看，就看到火煙衝天。這時，向曠野逃走个 以色列 人轉過身來攻擊佢等；佢等無㖠好走。</verse>
				<verse number="21">約書亞 㧯佢个軍隊看到埋伏个軍隊已經佔領 艾 城，城也𤏸火了，就轉身攻打 艾 城个人。</verse>
				<verse number="22">這時，攻入城肚去个 以色列 人也出來接應。 艾 城个人完全被 以色列 人包圍，全部被人㓾淨淨，無一個走掉。</verse>
				<verse number="23">只有 艾 城个王被人生生捉到 約書亞 个面前。</verse>
				<verse number="24">艾 城人逐 以色列 人到荒涼个野地；總係 以色列 人將佢等全部㓾死在該位，然後轉到 艾 城，又將留在城肚个人㓾掉。</verse>
				<verse number="25">約書亞 一直用佢个槍頭指向 艾 城，直到城肚个人全部被人㓾淨淨，正放下佢个槍頭。該日， 艾 城个人全部被人㓾淨淨，男女一共一萬兩千人。</verse>
				<verse number="26"></verse>
				<verse number="27">以色列 人照上主吩咐 約書亞 个話將城肚个頭牲㧯財物留下來。</verse>
				<verse number="28">約書亞 將 艾 城燒淨淨；到今晡日 艾 城還係一片荒涼个泥堆。</verse>
				<verse number="29">佢將 艾 城个王吊死在樹頂，屍體留在該位，直到臨暗仔。日頭落山个時， 約書亞 喊人將屍體拿下來，㧒在城門口。佢等在屍體面頂堆一大堆石頭；這石堆到今晡日還在該位。</verse>
				<verse number="30">該時， 約書亞 在 以巴路 山為上主 — 以色列 个上帝起一座祭壇，</verse>
				<verse number="31">係照上主个僕人 摩西 所指示 以色列 人个方法起个； 摩西 个法律書記載：「愛用該兜無經過鐵器鑿个歸隻石頭起祭壇。」佢等在祭壇頂獻燒化祭給上主，也獻平安祭。</verse>
				<verse number="32">在該位，當 以色列 人面前， 約書亞 將 摩西 所寫个法律重新寫在石頭頂。</verse>
				<verse number="33">以色列 人㧯佢該兜長老、長官、審判官，㧯暫時住在佢等當中个外族人分做兩隊，企在上主个約櫃兩片，面對扛約櫃个 利未 人祭司，一半个人對等 基利心 山，另外一半个人對等 以巴路 山。上主个僕人 摩西 識吩咐佢等，當佢等接受祝福个時，就係愛恁樣做。</verse>
				<verse number="34">然後， 約書亞 照法律書所寫个，大聲宣讀全部法律，包含祝福㧯咒詛。</verse>
				<verse number="35">摩西 誡命中个逐句話， 約書亞 攏總在 以色列 全體人民个聚會中宣讀；這兜人中，也包含婦女、細人仔，㧯暫時住在佢等當中个外族人。</verse>
			</chapter>
			<chapter number="9">
				<verse number="1">以色列 人民勝利个消息傳遍 約旦 河西片个山區、高原，㧯 地中海 海滣个平原，甚至遠到北片个 黎巴嫩 ；也傳到 赫 人、 亞摩利 人、 迦南 人、 比利洗 人、 希未 人、 耶布斯 人這兜王个耳公中。</verse>
				<verse number="2">佢等就聯合起來，一心一意愛對抗 約書亞 㧯 以色列 人。</verse>
				<verse number="3">總係，住在 基遍 个 希未 人聽到 約書亞 樣般對待 耶利哥 㧯 艾 城，</verse>
				<verse number="4">就設計欺騙 約書亞 。佢等拿舊布袋㧯補過个皮酒袋裝食物，放在驢背頂，</verse>
				<verse number="5">膚身著舊衫褲，腳著補過个舊鞋，帶等硬掉又生菇个餅。</verse>
				<verse number="6">佢等來到 吉甲 營地去見 約書亞 㧯 以色列 人，講：「𠊎等係對當遠个地方來个，拜託㧯𠊎等立約！」</verse>
				<verse number="7">以色列 人對這兜 希未 人講：「你等無定著就住在附近呢！𠊎等樣愛㧯你等立約？」</verse>
				<verse number="8">佢等對 約書亞 講：「𠊎等係來服事你等个。」 約書亞 問佢等：「你等係麼人？對㖠位來个？」</verse>
				<verse number="9">佢等就對 約書亞 講：「僕人對當遠个地方來，因為𠊎等聽到上主 — 你等上帝个聖名；佢在 埃及 所做个一切，</verse>
				<verse number="10">㧯佢對 約旦 河東片个兩個 亞摩利 王 — 希實本 王 西宏 並住在 亞斯他錄 个 巴珊 王 噩 所做个一切，𠊎等全部有聽到了。</verse>
				<verse number="11">𠊎等个領袖㧯國內个人民喊𠊎等帶等路上愛食个東西來見你等，講：『𠊎等甘願服事你等，拜託㧯𠊎等立約！』</verse>
				<verse number="12">你看這兜餅，𠊎等出門愛來看你等个時還燒燒，這下全部硬掉，也生菇了。</verse>
				<verse number="13">𠊎等裝酒个時，酒袋還係新个，總係這下全部舊了。𠊎等个衫褲、鞋也全部因為行遠路爛掉了。」</verse>
				<verse number="14">以色列 人拿兜佢等个食物，總係無去求問上主。</verse>
				<verse number="15">約書亞 就㧯 基遍 人打和平个契約，答應毋㓾佢等。 以色列 該兜領袖也發誓遵守這條約。</verse>
				<verse number="16">契約打好三日， 以色列 人正知這兜人原來住在附近定定。</verse>
				<verse number="17">以色列 人就去尋佢等；三日以後，到這兜人住个地方，就係 基遍 、 基非拉 、 比錄 、㧯 基列‧耶琳 。</verse>
				<verse number="18">總係 以色列 人毋敢㓾佢等，因為佢該兜領袖識指等上主 — 以色列 上帝个名向這兜人發誓。為到這件事，會眾攏總怪怨該兜領袖。</verse>
				<verse number="19">總係該兜領袖對全會眾講：「𠊎等已經指等上主 — 以色列 上帝个名向佢等發誓，這下𠊎等做毋得傷害佢等。</verse>
				<verse number="20">因為有這契約，𠊎等一定愛留佢等生命，若無，上帝會責罰𠊎等。」</verse>
				<verse number="21">該兜領袖繼續對會眾講：「愛留佢等个生命，佢等還做得為全會眾剖柴㧡水。」大家就接受該兜領袖个意見。</verse>
				<verse number="22">約書亞 吩咐人將 基遍 人帶來，問佢等：「你等做麼介欺騙𠊎等？你等明明住在附近，做麼介講係對遠方來个呢？</verse>
				<verse number="23">因為欺騙𠊎等，上帝已經定你等个罪；你等愛永遠做奴才，為𠊎上帝个聖殿來剖柴㧡水。」</verse>
				<verse number="24">佢等應 約書亞 講：「僕人恁樣做係因為有人實在㧯𠊎等講，上主 — 你个上帝識指示佢个僕人 摩西 ，愛將這垤土地全部賜給你等，喊你等在進入這垤土地个時，愛㓾淨所有个人。因為驚被你等㓾掉，𠊎等正騙你等。</verse>
				<verse number="25">這下𠊎等在你等个手中，由在你等愛樣般公當對待𠊎等！」</verse>
				<verse number="26">所以 約書亞 保護佢等，毋准 以色列 人㓾佢等；</verse>
				<verse number="27">總係佢同時也喊佢等做奴才，為會眾㧯上主个祭壇剖柴㧡水。直到今晡日，佢等還繼續在上主所選个所在做這種工作。</verse>
			</chapter>
			<chapter number="10">
				<verse number="1">耶路撒冷 王 亞多尼‧洗德 聽講 約書亞 攻打並徹底毀滅 艾 城，㓾死 艾 城个王，像佢以前對待 耶利哥 㧯它个王共樣。佢又聽講 基遍 人㧯 以色列 人打和平个契約，這下住在佢等當中。</verse>
				<verse number="2">耶路撒冷 人非常驚；因為 基遍 毋係細城，它㧯該兜有王个城差毋多大，比 艾 城還較大。 基遍 城个人又全部係勇士。</verse>
				<verse number="3">所以 耶路撒冷 王 亞多尼‧洗德 派人傳話給 希伯崙 王 何咸 、 耶末 王 比蘭 、 拉吉 王 雅非亞 ，㧯 伊磯倫 王 底璧 ，講：</verse>
				<verse number="4">「請來幫助𠊎攻打 基遍 ，因為佢等同 約書亞 㧯 以色列 人打和平个契約。」</verse>
				<verse number="5">所以 耶路撒冷 王、 希伯崙 王、 耶末 王、 拉吉 王、㧯 伊磯倫 王，就係五個 亞摩利 王聯合起來，帶領軍隊，安營攻打 基遍 。</verse>
				<verse number="6">基遍 人傳話給在 吉甲 營地个 約書亞 ，講：「做毋得毋搭你个僕人，請遽遽上來幫助𠊎等！救𠊎等！所有住在山區个 亞摩利 王全部聯合起來攻打𠊎等了！」</verse>
				<verse number="7">所以 約書亞 帶領全部軍隊，包含最會相㓾个部隊，對 吉甲 上去。</verse>
				<verse number="8">上主對 約書亞 講：「毋使驚佢等；𠊎已經將佢等交在你手中了！佢等當中無人能抵抗你。」</verse>
				<verse number="9">約書亞 帶領軍隊透夜對 吉甲 趕到 基遍 ，忽然出現攻擊 亞摩利 人。</verse>
				<verse number="10">上主使 亞摩利 人一看到 以色列 軍隊就驚到亂淨淨。 以色列 人在 基遍 大贏佢等，追佢等到 伯‧和崙 个山崎，又向南一直追到 亞西加 㧯 瑪基大 ，㓾死當多人。</verse>
				<verse number="11">當 亞摩利 人被 以色列 軍隊逐到 伯‧和崙 下崎个時，上主透路落大冰雹打佢等，直到 亞西加 。被冰雹打死个人比被 以色列 軍隊㓾死个還較多。</verse>
				<verse number="12">上主使 以色列 人打贏 亞摩利 人。該日， 約書亞 在 以色列 人面前向上主祈禱： 「日頭啊，停在 基遍 个天頂高； 月光啊，停在 亞雅崙 山壢頂。」</verse>
				<verse number="13">日頭就停下來，月光也無挺動，直到 以色列 打贏仇敵。這件事記載在《雅煞珥書》。日頭停在天頂大約一日，無照時落山。</verse>
				<verse number="14">上主聽人个祈禱，從來毋識有像恁樣个一日，因為上主為 以色列 戰爭！</verse>
				<verse number="15">事情結束後， 約書亞 帶領 以色列 軍隊轉 吉甲 營地。</verse>
				<verse number="16">五個 亞摩利 王逃走，囥在 瑪基大 个山窿肚。</verse>
				<verse number="17">有人發現佢等，就報給 約書亞 知佢等囥在山窿肚。</verse>
				<verse number="18">約書亞 講：「碾幾垤大石頭過來，塞山窿口，派幾個人掌等。</verse>
				<verse number="19">總係你等毋好留在該位，愛繼續追敵人，去㓾背尾个部隊，毋好俾佢等走轉城肚！上主 — 你等个上帝已經將佢等交在你等手中了。」</verse>
				<verse number="20">約書亞 㧯 以色列 人完全無留情、盡命㓾掉佢等，只有賸到少數幾個人逃入幾座堅固个城肚，無㓾掉。</verse>
				<verse number="21">然後， 約書亞 帶領个軍民全部平安轉到 瑪基大 个營地。 對恁樣，無人敢開口反對 以色列 人。</verse>
				<verse number="22">約書亞 講：「碾開山窿口个石頭！將該五個王帶出來見𠊎！」</verse>
				<verse number="23">佢等就碾開石頭，將該五個王，就係 耶路撒冷 王、 希伯崙 王、 耶末 王、 拉吉 王、㧯 伊磯倫 王帶到 約書亞 面前。</verse>
				<verse number="24">約書亞 召集所有个 以色列 人來，吩咐該兜跈佢去相㓾个軍官，用腳踏在該五個王个頸筋，佢等就照恁樣做。</verse>
				<verse number="25">約書亞 對該兜軍官講：「毋使驚佢等，毋好失志，愛堅強，愛勇敢，因為上主愛像恁樣打贏你等所有个仇敵。」</verse>
				<verse number="26">然後 約書亞 㓾掉該五個王，將佢等个屍體掛在五頭樹頂，直到臨暗仔。</verse>
				<verse number="27">日頭落山个時， 約書亞 下令將屍體解下來，㧒入佢等囥過个山窿肚，窿口用大石頭塞等。該兜石頭到這下還在該位。</verse>
				<verse number="28">該日， 約書亞 攻下 瑪基大 。佢㓾掉它个王㧯城肚所有个人，無留下一個。佢對待 瑪基大 王，像對待 耶利哥 王共樣。</verse>
				<verse number="29">接下去， 約書亞 㧯 以色列 軍隊對 瑪基大 去攻打 立拿 。</verse>
				<verse number="30">上主也將這城㧯它个王交在 以色列 人手中。佢等㓾掉城肚所有个人，無留一個。佢等對待 立拿 王，像對待 耶利哥 王共樣。</verse>
				<verse number="31">接等， 約書亞 帶領 以色列 軍隊離開 立拿 去圍攻 拉吉 。</verse>
				<verse number="32">在戰爭个第二日，上主將 拉吉 交在 以色列 人手中。佢等對待 拉吉 ，像對待 立拿 共樣，也㓾掉城肚所有个人，無留一個。</verse>
				<verse number="33">該時， 基色 王 何蘭 來幫助 拉吉 ，總係 約書亞 打贏佢，消滅佢个軍隊，無留一個人。</verse>
				<verse number="34">後來， 約書亞 帶領 以色列 軍隊離開 拉吉 去圍攻 伊磯倫 。</verse>
				<verse number="35">佢等當日就攻下該城，將該位个人㓾淨淨，像佢等在 拉吉 所做个共樣。</verse>
				<verse number="36">過後， 約書亞 帶領 以色列 軍隊離開 伊磯倫 上去 希伯崙 山區，圍攻 希伯崙 。</verse>
				<verse number="37">佢等攻下該城，㓾掉它个王㧯城肚所有个人，並周圍城鎮个人，無留一個。 約書亞 消滅這城，就像佢對待 伊磯倫 共樣，無留一個人。</verse>
				<verse number="38">最後， 約書亞 帶領 以色列 軍隊轉去攻打 底璧 ，</verse>
				<verse number="39">佔領該城㧯附近所有个城鎮，將王㧯該位个人全部㓾死，無留一個。 約書亞 對待 底璧 㧯它个王，就像佢對待 希伯崙 㧯 立拿 ，並 立拿 王共樣。</verse>
				<verse number="40">恁樣， 約書亞 征服歸隻地區。佢征服山區、東片个山排㧯西片个高原，還有南部个燥地。佢打贏這地區所有个王，㓾死所有个人民，無留一個。這係上主 — 以色列 个上帝所命令个。</verse>
				<verse number="41">約書亞 攻打敵人，對南片个 加低斯‧巴尼亞 到近海个 迦薩 ，包含所有 歌珊 地區，向北直到 基遍 。</verse>
				<verse number="42">約書亞 在一擺戰爭中征服這兜王㧯佢等个土地，因為上主 — 以色列 个上帝為 以色列 戰爭。</verse>
				<verse number="43">戰爭結束後， 約書亞 帶領 以色列 軍隊轉去 吉甲 營地。</verse>
			</chapter>
			<chapter number="11">
				<verse number="1">以色列 打贏个消息傳到 夏瑣 王 耶賓 个耳公，佢就派人傳話給 瑪頓 王 約巴 、 伸崙 王、 押煞 王，</verse>
				<verse number="2">㧯北片山區、 加利利 湖南片个 約旦 河谷、高原、㧯 多珥 附近海滣該兜王。</verse>
				<verse number="3">佢也派人傳話給 約旦 河滣兩片个 迦南 人，又給 亞摩利 人、 赫 人、 比利洗 人，㧯山區个 耶布斯 人，㧯住在 黑門 山山下 米斯巴 地个 希未 人。</verse>
				<verse number="4">這兜王帶領佢等所有个軍隊共下來，人數多到像海滣个沙仔。佢等有當多戰馬㧯戰車。</verse>
				<verse number="5">這兜王聯合起來，在 米倫 溪共下安營，愛㧯 以色列 人相㓾。</verse>
				<verse number="6">上主對 約書亞 講：「你毋使驚佢等；天光日這時節，𠊎愛俾佢等死在 以色列 人个手中。你愛斬斷佢等戰馬个腳，燒掉佢等个戰車。」</verse>
				<verse number="7">所以 約書亞 帶領佢所有个軍隊，忽然出現在 米倫 溪去攻擊佢等。</verse>
				<verse number="8">上主將佢等交在 以色列 人手中。 以色列 人追殺佢等，向北到 米斯利弗‧瑪音 㧯 西頓 大城，向東到 米斯巴 山壢，直到將敵人㓾淨淨。</verse>
				<verse number="9">約書亞 照上主所命令个去行，斬斷佢等戰馬个腳，燒掉佢等个戰車。</verse>
				<verse number="10">然後， 約書亞 倒轉來攻打 夏瑣 ，㓾死 夏瑣 王。 (該時 夏瑣 在這兜國家當中係最強大个。)</verse>
				<verse number="11">以色列 人㓾死該城所有个人，將佢等滅掉，無留一個，又放火將 夏瑣 城燒掉。</verse>
				<verse number="12">約書亞 佔領這兜君王个城市，將這兜王捉起來，將所有个人㓾死，就像上主个僕人 摩西 所命令个。</verse>
				<verse number="13">除了 夏瑣 城被 約書亞 燒掉以外， 以色列 人並無燒掉其他起在山岡頂个城市。</verse>
				<verse number="14">以色列 人將這兜城肚所有財物㧯頭牲全部搶走，將所有个人㓾淨淨，無留一個。</verse>
				<verse number="15">上主樣般命令佢个僕人 摩西 ， 摩西 也照樣命令 約書亞 ； 約書亞 就照恁樣去做。上主命令 摩西 个逐件事， 約書亞 無一件無遵行。</verse>
				<verse number="16">約書亞 佔領這一帶所有个土地，包含北方㧯南方个山區㧯高原， 歌珊 全地㧯南方燥地，㧯 約旦 河谷。</verse>
				<verse number="17">歸隻地區个範圍，南片對 以東 附近个 哈拉 山起，北片到 黑門 山南部 黎巴嫩 山壢个 巴力‧迦得 為止。 約書亞 㧯這一帶地區所有个王相㓾當久，到最尾佢正捉到佢等，將佢等㓾死。</verse>
				<verse number="18"></verse>
				<verse number="19">只有住在 基遍 城个 希未 人㧯 以色列 人講和；其他个城全部被 以色列 人征服了。</verse>
				<verse number="20">因為上主个意思係愛使該兜城个人硬心，來㧯 以色列 作對，恁樣佢等正會全部受毀滅、被人㓾死，無機會得到憐憫，就像上主命令 摩西 个。</verse>
				<verse number="21">該時， 約書亞 毀滅住在山區當大漢个民族 亞衲 人。這族个人住在 希伯崙 、 底璧 、 亞拿伯 ，並 猶大 㧯 以色列 个山區。 約書亞 徹底毀滅佢等㧯佢等个城。</verse>
				<verse number="22">以色列 境內無留一個 亞衲 族人，只有在 迦薩 、 迦特 㧯 亞實突 還有賸兜仔。</verse>
				<verse number="23">恁樣， 約書亞 照上主命令 摩西 个話征服這一帶地區。佢將地分給 以色列 人，逐支族有一份做產業。 所以，全地太平，無戰爭。</verse>
			</chapter>
			<chapter number="12">
				<verse number="1">先前 以色列 人征服㧯佔領 約旦 河東片地區，對 亞嫩 山壢向北到 約旦 河谷，直到 黑門 山。佢等打贏兩個王。</verse>
				<verse number="2">其中一個係住在 希實本 个 亞摩利 王 西宏 。佢統治个國土包含 基列 个一半：就係對 亞嫩 山壢堘頭个 亞羅珥 ，㧯對山壢中央个城鎮，到 亞捫 邊界个 雅博 山壢；</verse>
				<verse number="3">又包含 約旦 河谷：對 加利利 湖向南到 死海 東片个 伯‧耶西末 ，直到 比斯迦 山腳下。</verse>
				<verse number="4">佢等也打贏 巴珊 王 噩 。佢係最後一個 利乏音 人；佢住在 亞斯他錄 㧯 以得來 。</verse>
				<verse number="5">佢統治个國土包含 黑門 山、 撒迦 、 巴珊 全地，直到 基述 㧯 瑪迦 个邊界；另外有 基列 个一半，一直到 希實本 王 西宏 个邊界。</verse>
				<verse number="6">摩西 㧯 以色列 人打贏這兩個王。上主个僕人 摩西 將這兜土地分給 呂便 支族、 迦得 支族，㧯 瑪拿西 个半支族，做佢等个產業。</verse>
				<verse number="7">約書亞 㧯 以色列 人打贏 約旦 河西片地區該兜王，對 黎巴嫩 山壢个 巴力‧迦得 到南片 以東 附近个 哈拉 山。 約書亞 將這垤土地分給 以色列 各支族，做佢等永久个產業。</verse>
				<verse number="8">這垤土地包含山區、西片个高原、 約旦 河谷㧯它个山岡、東片个山排，㧯南片个燥地。這垤土地本來係 赫 人、 亞摩利 人、 迦南 人、 比利洗 人、 希未 人㧯 耶布斯 人住个。</verse>
				<verse number="9">以色列 人打贏以下各城个王： 耶利哥 、 艾 (在 伯特利 附近)、</verse>
				<verse number="10">耶路撒冷 、 希伯崙 、</verse>
				<verse number="11">耶末 、 拉吉 、</verse>
				<verse number="12">伊磯倫 、 基色 、</verse>
				<verse number="13">底璧 、 基德 、</verse>
				<verse number="14">何珥瑪 、 亞拉得 、</verse>
				<verse number="15">立拿 、 亞杜蘭 、</verse>
				<verse number="16">瑪基大 、 伯特利 、</verse>
				<verse number="17">他普亞 、 希弗 、</verse>
				<verse number="18">亞弗 、 拉沙崙 、</verse>
				<verse number="19">瑪頓 、 夏瑣 、</verse>
				<verse number="20">伸崙‧米崙 、 押煞 、</verse>
				<verse number="21">他納 、 米吉多 、</verse>
				<verse number="22">基低斯 、 約念 (在 迦密 )、</verse>
				<verse number="23">多珥 (在山地)、 戈印 (在 加利利 )，</verse>
				<verse number="24">㧯 得撒 ，總共三十一個王。</verse>
			</chapter>
			<chapter number="13">
				<verse number="1">這時， 約書亞 已經當老。上主對佢講：「你恁老了；總係還有盡闊个所在吂佔領，</verse>
				<verse number="2">就係 非利士 㧯 基述 个歸隻地區，</verse>
				<verse number="3">並南方 亞衛 人所有个土地。 (這垤地南對 埃及 邊境个 西曷 河，北到 以革倫 个邊境，本來屬 迦南 人，就係住在 迦薩 、 亞實突 、 亞實基倫 、 迦特 㧯 以革倫 个 非利士 五個王所有个。)</verse>
				<verse number="4">還有 迦南 人所有个土地，㧯屬 西頓 人个 米亞拉 ，直到 亞摩利 人邊境个 亞弗 ；</verse>
				<verse number="5">又有 迦巴勒 人个土地， 黎巴嫩 東片所有个土地 — 對 黑門 山南片个 巴力‧迦得 到 哈馬 隘口。</verse>
				<verse number="6">這地區包含住在 黎巴嫩 山㧯 米斯利弗‧瑪音 之間山區个 西頓 人所有个土地。當 以色列 人進到該位个時，𠊎愛親自將這兜人全部逐出去。你愛照𠊎命令你个話將這垤地抽籤分給 以色列 人。</verse>
				<verse number="7">這下，你愛將這垤地分給其他个九個支族㧯 瑪拿西 个半支族，做佢等个產業。」</verse>
				<verse number="8">呂便 支族、 迦得 支族，㧯 瑪拿西 个半支族个人已經得到上主个僕人 摩西 分給佢等、在 約旦 河東片个土地。</verse>
				<verse number="9">佢等个土地對 亞嫩 山壢堘頭个 亞羅珥 一直到山壢中央个城，包含 米底巴 到 底本 所有个高原；</verse>
				<verse number="10">又直到 亞捫 邊界，包含 希實本 个 亞摩利 王 西宏 所統治个該兜城。</verse>
				<verse number="11">這垤土地也包含 基列 、 基述 㧯 瑪迦 、歸隻 黑門 山，㧯 巴珊 全地，直到 撒迦 ；</verse>
				<verse number="12">又包含最後一個 利乏音 人、 巴珊 王 噩 所統治个國土 — 亞斯他錄 㧯 以得來 。 摩西 打贏這兜人，將佢等逐出去。</verse>
				<verse number="13">總係 以色列 人無逐走 基述 人㧯 瑪迦 人；佢等直到今晡日還係住在 以色列 國內。</verse>
				<verse number="14">摩西 無分土地給 利未 支族，因為上主識㧯 摩西 講，佢等愛分到燒獻給上主 — 以色列 上帝个祭物；這就係佢等个產業。</verse>
				<verse number="15">摩西 分一部份土地給 呂便 支族該兜家族，做佢等个產業。</verse>
				<verse number="16">佢等个地界直到 亞嫩 山壢堘頭个 亞羅珥 ，㧯山壢中央个城，並 米底巴 周圍个高原；</verse>
				<verse number="17">又包含 希實本 㧯高原上所有个城，就係 底本 、 巴末‧巴力 、 伯‧巴力‧勉 、</verse>
				<verse number="18">雅雜 、 基底莫 、 米法押 、</verse>
				<verse number="19">基列亭 、 西比瑪 、河谷中山岡个 細列哈‧沙轄 、</verse>
				<verse number="20">伯‧批珥 、 比斯迦 山排，㧯 伯‧耶西末 。</verse>
				<verse number="21">佢等个土地也包含高原上所有个城㧯 希實本 个 亞摩利 王 西宏 全部个國土。 摩西 打贏 西宏 王，也打贏 米甸 該兜領袖： 以未 、 利金 、 蘇珥 、 戶珥 㧯 利巴 。這兜領袖識為 西宏 王統治這地區。</verse>
				<verse number="22">在 以色列 人㓾掉个人當中，有 比珥 个孻仔卜卦个 巴蘭 。</verse>
				<verse number="23">呂便 支族个西片係用 約旦 河做界限。以上這兜城鎮全部分給 呂便 支族該兜家族，做佢等个產業。</verse>
				<verse number="24">摩西 分一部份土地給 迦得 支族該兜家族，做佢等个產業。</verse>
				<verse number="25">佢等个地界包含 雅謝 㧯 基列 所有个城，㧯 亞捫 人土地个一半，直到 拉巴 東片个 亞羅珥 ；</verse>
				<verse number="26">又包含對 希實本 到 拉抹‧米斯巴 㧯 比多寧 ，對 瑪哈念 到 羅‧底巴 个邊界。</verse>
				<verse number="27">約旦 河谷个部份包含 伯‧哈蘭 、 伯‧寧拉 、 疏割 、㧯 撒分 ，就係 希實本 王 西宏 其他个土地，西片个邊界係 約旦 河，向北直到 加利利 湖。</verse>
				<verse number="28">以上這兜城鎮全部分給 迦得 支族該兜家族，做佢等个產業。</verse>
				<verse number="29">摩西 分一部份土地給 瑪拿西 个半支族該兜家族，做佢等个產業。</verse>
				<verse number="30">佢等个地界直到 瑪哈念 ，包含 巴珊 全地，就係 巴珊 王 噩 个全部土地、㧯在 巴珊 、屬 睚珥 个六十個村莊。</verse>
				<verse number="31">又包含 基列 个一半，㧯 巴珊 王 噩 个兩座大城 — 亞斯他錄 㧯 以得來 。以上這兜土地全部分給 瑪拿西 个半支族該兜家族；這半支族係 瑪拿西 个孻仔 瑪吉 个後代。</verse>
				<verse number="32">以上所記載係 摩西 在 約旦 河東片、 耶利哥 對面、在 摩押 平原分土地个情形。</verse>
				<verse number="33">摩西 無分土地給 利未 支族；佢㧯佢等講，照上主所應許个，上主 — 以色列 个上帝就係佢等分到个產業。</verse>
			</chapter>
			<chapter number="14">
				<verse number="1">以下係 以色列 人在 約旦 河西片 迦南 地分產業个情形。祭司 以利亞撒 㧯 嫩 个孻仔 約書亞 ，並 以色列 各支族、該兜家族該兜領袖將土地分給人民。</verse>
				<verse number="2">佢等遵照上主給 摩西 个命令，抽籤決定將 約旦 河西片个土地分給九個半支族。</verse>
				<verse number="3">摩西 已經將 約旦 河東片个土地分給另外兩個半支族个人。 ( 約瑟 个後代分做 瑪拿西 㧯 以法蓮 兩個支族。) 利未 人無分到土地，總係佢等有城好住，有土地好畜牛群、羊群。</verse>
				<verse number="4"></verse>
				<verse number="5">以色列 人遵照上主給 摩西 个命令將土地分配好勢。</verse>
				<verse number="6">有一日，有兜 猶大 支族个人到 吉甲 去見 約書亞 。其中一儕名安到 迦勒 ，係 基尼洗 人 耶孚尼 个孻仔。佢對 約書亞 講：「在 加低斯‧巴尼亞 个時，上主對神人 摩西 提到你㧯𠊎个事，你知這件事！</verse>
				<verse number="7">𠊎四十歲个時，上主个僕人 摩西 派𠊎對 加低斯‧巴尼亞 來打探這地方；𠊎照實將所看到个向佢報告。</verse>
				<verse number="8">可惜，㧯𠊎共下去个人佢等个報告使人民大著驚；總係𠊎全心順服上主 — 𠊎个上帝。</verse>
				<verse number="9">該日， 摩西 就答應𠊎，講：『你个腳踏過个土地，一定會成做你㧯你个子孫永久个產業，因為你全心順服上主 — 𠊎个上帝。』</verse>
				<verse number="10">「看哪！上主向 摩西 講該兜話到這下，已經過四十五年。該時 以色列 人在曠野流浪，總係上主照佢个應許保守𠊎个生命。你看！𠊎已經八十五歲了。</verse>
				<verse number="11">今晡日𠊎還係恁健，就像當日 摩西 派𠊎出去个時共樣。𠊎還係恁有力，做得像頭擺恁樣出去相㓾。</verse>
				<verse number="12">這下，請你將上主應許愛給𠊎个山區交給𠊎。你識聽過，該地方有當大漢个 亞衲 族人，住在高高个城牆底背。若係上主㧯𠊎共下，𠊎就有法度將佢等逐出去，就像上主所應許个。」</verse>
				<verse number="13">約書亞 就祝福 耶孚尼 个孻仔 迦勒 ，將 希伯崙 城交給佢，做佢个產業。</verse>
				<verse number="14">所以 希伯崙 到這下還係屬 基尼洗 人 耶孚尼 个孻仔 迦勒 个後代，因為佢全心順服上主 — 以色列 个上帝。</verse>
				<verse number="15">(在這以前， 希伯崙 安到 亞巴 城； 亞巴 係 亞衲 族中最強大个人物。) 然後，該地方太平，全無戰爭。</verse>
			</chapter>
			<chapter number="15">
				<verse number="1">猶大 支族該兜家族所分到个土地記在下背： 佢等个土地向南直到 以東 邊界，到 尋 个曠野最南片。</verse>
				<verse number="2">這南片地界係對 死海 南片開始，</verse>
				<verse number="3">向南對 亞克拉濱 路口到 尋 ，又對 加低斯‧巴尼亞 南方向北，經過 希斯崙 ，直到 亞達珥 ，再轉向 甲加 ，</verse>
				<verse number="4">直到 押捫 ，再順 埃及 邊境个河壩到 地中海 。這就係 猶大 支族南片个地界。</verse>
				<verse number="5">東片个地界係 死海 ，向上到 約旦 河流到 死海 个入口。 北片个地界對該入口開始，</verse>
				<verse number="6">直到 伯‧曷拉 ，透到該會看到 約旦 河河滣平原个山嶺北片，向北到 波罕 石 ( 波罕 係 呂便 个孻仔)，</verse>
				<verse number="7">又對 亞割 山壢到 底璧 ，向北到 吉甲 ( 吉甲 面對河谷南片个 亞都冥 路口)。然後地界透到 隱‧示麥 ，通到 隱‧羅結 ，</verse>
				<verse number="8">順 欣嫩子 山壢到山南片个 耶布斯 城 (就係 耶路撒冷 )，對這位上到 欣嫩 山壢西片个山頂，就係 利乏音 山壢最北片，</verse>
				<verse number="9">又透到 尼弗多亞 泉，到 以弗崙 山附近个城鎮，然後轉向 巴拉 (又安到 基列‧耶琳 )，</verse>
				<verse number="10">捩過 巴拉 西片到 以東 山區，連到 耶琳 山北片 (又安到 基撒崙 山)，向下到 伯‧示麥 ，過 亭拿 ，</verse>
				<verse number="11">然後向 以革倫 北片个山，再轉向 施基崙 ，經過 巴拉 山到 雅比聶 ，直到 地中海 。</verse>
				<verse number="12">地中海 就係 猶大 支族西片个邊界。 猶大 該兜家族个人就係住在這地區。</verse>
				<verse number="13">約書亞 遵照上主个命令將 猶大 一部份土地分給 猶大 支族 耶孚尼 个孻仔 迦勒 。 迦勒 得到 希伯崙 ，就係屬 亞衲 厥爸个 亞巴 城。</verse>
				<verse number="14">迦勒 將 亞衲 三個孻仔个後代逐出城；就係 示篩 族、 亞希幔 族，㧯 撻買 族。</verse>
				<verse number="15">迦勒 又對該位攻打 底璧 个人民。這城以前安到 基列‧西弗 。</verse>
				<verse number="16">迦勒 講：「麼人佔領 基列‧西弗 ，𠊎就將𠊎个妹仔 押撒 嫁給佢！」</verse>
				<verse number="17">迦勒 个老弟 基納斯 个孻仔 俄陀聶 佔領該城；所以 迦勒 將妹仔 押撒 給佢做𡜵娘。</verse>
				<verse number="18">結婚該日， 俄陀聶 唆慫 押撒 去向厥爸討一垤田地。 押撒 一下驢仔， 迦勒 就問姖愛麼介，</verse>
				<verse number="19">姖講：「求你送𠊎一個禮物；因為你俾𠊎安居在燥地，求你也給𠊎泉水。」所以 迦勒 將上泉水㧯下泉水全部給姖。</verse>
				<verse number="20">以下係 猶大 支族該兜家族得到个產業。</verse>
				<verse number="21">最南片偎近 以東 邊境个城鎮有： 甲薛 、 以得 、 雅姑珥 、</verse>
				<verse number="22">基拿 、 底摩拿 、 亞大達 、</verse>
				<verse number="23">基低斯 、 夏瑣 、 以提楠 、</verse>
				<verse number="24">西弗 、 提鍊 、 比亞綠 、</verse>
				<verse number="25">夏瑣‧哈大他 、 加略‧希斯崙 (就係 夏瑣 )、</verse>
				<verse number="26">亞曼 、 示瑪 、 摩拉大 、</verse>
				<verse number="27">哈薩‧迦大 、 黑實門 、 伯‧帕列 、</verse>
				<verse number="28">哈薩‧書亞 、 別是巴 、 比斯約他 、</verse>
				<verse number="29">巴拉 、 以因 、 以森 、</verse>
				<verse number="30">伊勒多臘 、 基失 、 何珥瑪 、</verse>
				<verse number="31">洗革拉 、 麥瑪拿 、 三撒拿 、</verse>
				<verse number="32">利巴勿 、 實欣 、 亞因 㧯 臨門 ，總共二十九座城，㧯附近个村莊。</verse>
				<verse number="33">在西片高原个城鎮有： 以實陶 、 瑣拉 、 亞實拿 、</verse>
				<verse number="34">撒挪亞 、 隱‧干寧 、 他普亞 、 以楠 、</verse>
				<verse number="35">耶末 、 亞杜蘭 、 梭哥 、 亞西加 、</verse>
				<verse number="36">沙拉音 、 亞底他音 、 基底拉 㧯 基底羅他音 ，總共十四座城，㧯附近个村莊。</verse>
				<verse number="37">又有 洗楠 、 哈大沙 、 麥大‧迦得 、</verse>
				<verse number="38">底連 、 米斯巴 、 約帖 、</verse>
				<verse number="39">拉吉 、 波斯加 、 伊磯倫 、</verse>
				<verse number="40">迦本 、 拉幔 、 基提利 、</verse>
				<verse number="41">基低羅 、 伯‧大袞 、 拿瑪 㧯 瑪基大 ，總共十六座城，㧯附近个村莊。</verse>
				<verse number="42">又有 立拿 、 以帖 、 亞珊 、</verse>
				<verse number="43">益弗他 、 亞實拿 、 尼悉 、</verse>
				<verse number="44">基伊拉 、 亞革悉 㧯 瑪利沙 ，總共九座城，㧯附近个村莊。</verse>
				<verse number="45">又有 以革倫 㧯附近个村莊，</verse>
				<verse number="46">對 以革倫 到 地中海 、偎近 亞實突 所有个村莊。</verse>
				<verse number="47">又有 亞實突 㧯 迦薩 ，連同附近个村莊，直到 埃及 邊境个河壩㧯 地中海 滣。</verse>
				<verse number="48">在山區有： 沙密 、 雅提珥 、 梭哥 、</verse>
				<verse number="49">大拿 、 基列‧薩拿 (就係 底璧 )、</verse>
				<verse number="50">亞拿伯 、 以實提莫 、 亞念 、</verse>
				<verse number="51">歌珊 、 何倫 㧯 基羅 ，總共十一座城，㧯附近个村莊。</verse>
				<verse number="52">又有 亞拉 、 度瑪 、 以珊 、</verse>
				<verse number="53">雅農 、 伯‧他普亞 、 亞非加 、</verse>
				<verse number="54">宏他 、 基列‧亞巴 (就係 希伯崙 )，㧯 洗珥 ，總共九座城，㧯附近个村莊。</verse>
				<verse number="55">又有 瑪雲 、 迦密 、 西弗 、 淤他 、</verse>
				<verse number="56">耶斯列 、 約甸 、 撒挪亞 、</verse>
				<verse number="57">該隱 、 基比亞 㧯 亭拿 ，總共十座城，㧯附近个村莊。</verse>
				<verse number="58">又有 哈忽 、 伯‧夙 、 基突 、</verse>
				<verse number="59">瑪臘 、 伯‧亞諾 㧯 伊勒提君 ，總共六座城，㧯附近个村莊。</verse>
				<verse number="60">又有 基列‧巴力 (就係 基列‧耶琳 ) 㧯 拉巴 兩座城，㧯附近个村莊。</verse>
				<verse number="61">在曠野有： 伯‧亞拉巴 、 密丁 、 西迦迦 、</verse>
				<verse number="62">匿珊 、 鹽 城㧯 隱‧基底 ，總共六座城，㧯附近个村莊。</verse>
				<verse number="63">猶大 人無法度將住在 耶路撒冷 个 耶布斯 人逐走，所以 耶布斯 人還係㧯 猶大 人共下住在該位，直到今晡日。</verse>
			</chapter>
			<chapter number="16">
				<verse number="1">約瑟 後代所分到个土地：南部邊界對偎近 耶利哥 个 約旦 河起，就係 耶利哥 泉水个東片開始，經過曠野；又對 耶利哥 上到 伯特利 山區，</verse>
				<verse number="2">又對 伯特利 到 路斯 ，通到 亞基 人住个 亞他錄‧亞達 ，</verse>
				<verse number="3">向西到 押利提 人个地區，一直到下 伯‧和崙 ，又對該位到 基色 ，直到 地中海 為止。</verse>
				<verse number="4">約瑟 个後代 — 以法蓮 㧯西 瑪拿西 支族分到這垤土地，做佢等个產業。</verse>
				<verse number="5">以法蓮 該兜家族个地界記在下背：南片係對 亞他錄‧亞達 向西到上 伯‧和崙 ，</verse>
				<verse number="6">透到 地中海 ；北片係 密米他 ；東片个地界對 他納‧示羅 透到 雅挪哈 東部，</verse>
				<verse number="7">然後向南，對 雅挪哈 到 亞他錄 㧯 拿拉 ，再經過 耶利哥 ，到 約旦 河為止。</verse>
				<verse number="8">西片个地界對 他普亞 經過 加拿 河，到 地中海 為止。以上係 以法蓮 支族該兜家族所分到个產業。</verse>
				<verse number="9">另外，在 瑪拿西 境內有兜城鎮，連同附近个村莊也分給 以法蓮 人。</verse>
				<verse number="10">以法蓮 人無將住在 基色 个 迦南 人逐走，所以 迦南 人住在 以法蓮 人當中，佢等做 以法蓮 人个奴才直到今晡日。</verse>
			</chapter>
			<chapter number="17">
				<verse number="1">約瑟 个長子 瑪拿西 个後代分到 約旦 河西片个部份土地。 瑪吉 係 瑪拿西 个長子，係 基列 个阿爸，佢盡會相㓾，所以 約旦 河東片个 基列 㧯 巴珊 就歸給佢。</verse>
				<verse number="2">約旦 河西片个土地歸給其他个 瑪拿西 家族，就係 亞比以謝 、 希勒 、 亞斯列 、 示劍 、 希弗 㧯 示米大 。佢等係 約瑟 个孻仔 瑪拿西 逐家族个族長。</verse>
				<verse number="3">西羅非哈 係 希弗 个孻仔、 基列 个孫仔、 瑪吉 个曾孫， 瑪拿西 个玄孫；佢無孻仔，只有妹仔。姖等个名係 瑪拉 、 挪阿 、 曷拉 、 密迦 、 得撒 。</verse>
				<verse number="4">姖等到祭司 以利亞撒 、 嫩 个孻仔 約書亞 ，㧯該兜領袖面前，講：「上主吩咐 摩西 給𠊎等一份土地做產業，像給男人共樣。」所以，照上主个命令，姖等也㧯姖等个阿叔阿伯共樣分到土地。</verse>
				<verse number="5">瑪拿西 支族，除了 約旦 河東片个 基列 㧯 巴珊 以外，還得到十份，</verse>
				<verse number="6">因為這幾個女子孫㧯其他个男子孫共樣有分到土地。 瑪拿西 其他个後代得到 基列 。</verse>
				<verse number="7">瑪拿西 支族个地界對 亞設 直到 示劍 東片个 密米他 ，南片到 隱‧他普亞 人住个地方。</verse>
				<verse number="8">他普亞 周圍个土地屬 瑪拿西 ，總係在邊境个 他普亞 鎮係屬 以法蓮 後代。</verse>
				<verse number="9">瑪拿西 支族个地界對該位向南到 加拿 河。河南片个城鎮雖然在 瑪拿西 境內，總係屬 以法蓮 。 瑪拿西 支族个地界順等河个北片直到 地中海 。</verse>
				<verse number="10">以法蓮 在南片； 瑪拿西 在北片； 地中海 係佢等西片个地界。 亞設 在西北角； 以薩迦 在東北角。</verse>
				<verse number="11">瑪拿西 支族在 以薩迦 㧯 亞設 境內得到 伯‧善 㧯 以伯蓮 ，並附近个村莊，還有 多珥 (就係在海滣該城)、 隱‧多珥 、 他納 、 米吉多 、㧯這兜城鎮附近个村莊。</verse>
				<verse number="12">總係 瑪拿西 人無法度將該兜城肚个人民逐走，所以 迦南 人還係繼續住在該位。</verse>
				<verse number="13">甚至當 以色列 人強壯个時，佢等也無將所有个 迦南 人逐走，只有強迫 迦南 人做苦工。</verse>
				<verse number="14">約瑟 个後代對 約書亞 講：「做麼介你只有分一份土地給𠊎等做產業呢？上主賜福給𠊎等，𠊎等个人數當多啊！」</verse>
				<verse number="15">約書亞 講：「若係你等人數多，嫌 以法蓮 山區忒細，就到 比利洗 人㧯 利乏音 人个樹林肚去開墾土地啊！」</verse>
				<verse number="16">約瑟 个後代講：「對𠊎等來講，該山區還係毋罅闊，毋單淨恁樣，住在平原个 迦南 人，就係在 伯‧善 㧯附近村莊，還有 耶斯列 平原个人，全部也有鐵戰車啊。」</verse>
				<verse number="17">約書亞 對 約瑟 支族，就係 以法蓮 㧯西 瑪拿西 支族个人講：「你等个人口確實當多；你等也當強大，毋應該只得到一份土地。</verse>
				<verse number="18">該山區愛歸你等；雖然係樹林，你等做得去開發，就會得到盡闊个土地。就算 迦南 人有鐵戰車，當強大，你等也會將佢等逐出去。」</verse>
			</chapter>
			<chapter number="18">
				<verse number="1">以色列 人民征服這垤土地以後，全體人民聚集在 示羅 ，搭上主个聖帳篷。</verse>
				<verse number="2">以色列 人還有七個支族吂得到佢等應得个土地。</verse>
				<verse number="3">所以 約書亞 對 以色列 人講：「你等愛等幾久正入去佔領上主 — 你等祖先个上帝所賜給你等个土地呢？</verse>
				<verse number="4">這下，逐支族愛選三個人到𠊎這位來；𠊎愛派佢等去歸隻地區查看。佢等愛將應得个地區畫好地圖，然後轉來見𠊎。</verse>
				<verse number="5">這垤土地愛分做七份； 猶大 還係保有佢南方个土地， 約瑟 保有佢北方个土地。</verse>
				<verse number="6">你等愛將這七個地區个地圖帶來給𠊎；𠊎愛在這地方為你等抽籤，求問上主 — 𠊎等个上帝。</verse>
				<verse number="7">利未 人做毋得分到土地，因為做上主个祭司，事奉佢，就係佢等个產業。 迦得 、 呂便 㧯東 瑪拿西 支族，佢等已經得到 約旦 河東片个土地了；該係上主个僕人 摩西 分給佢等个。」</verse>
				<verse number="8">這兜人起身去查看地形，畫地圖。 約書亞 吩咐佢等，講：「你等愛行遍歸隻地區，地圖畫好，帶轉來給𠊎。𠊎愛在 示羅 這地方為你等抽籤，求問上主。」</verse>
				<verse number="9">所以佢等行遍歸隻地區，將地分做七份，寫下各城鎮个名稱，然後轉到 示羅 營地見 約書亞 。</verse>
				<verse number="10">約書亞 就在 示羅 為佢等抽籤，求問上主，將各支族應得个土地分給佢等。</verse>
				<verse number="11">第一籤係分配給 便雅憫 支族該兜家族个土地。佢等个土地在 猶大 㧯 約瑟 支族中間。</verse>
				<verse number="12">北片个地界對 約旦 河到 耶利哥 以北个山排，向西經過山區，直到 伯‧亞文 曠野，</verse>
				<verse number="13">又對該位透到 路斯 南片个山排 ( 路斯 就係 伯特利 )，向南到 亞他錄‧亞達 ，到下 伯‧和崙 南片个山。</verse>
				<verse number="14">地界對這位轉向另一個方向，對山个西片向南，到 猶大 支族个城 — 基列‧巴力 (就係 基列‧耶琳 )。這係西片个地界。</verse>
				<verse number="15">南片个地界對 基列‧耶琳 个邊堘開始，到 尼弗多亞 泉水，</verse>
				<verse number="16">然後下到 欣嫩子 山壢對面个山腳，就係在 利乏音 山壢个北端。地界對這位向南經過 欣嫩 山壢， 耶布斯 山嶺个南片，到 隱‧羅結 ，</verse>
				<verse number="17">然後轉向北，到 隱‧示麥 ，再到 亞都冥 路口對面个 基利綠 ，又到 波罕 石 ( 波罕 係 呂便 个孻仔)，</verse>
				<verse number="18">經過山个北片，該位看 約旦 河谷，然後向下直到山壢底，</verse>
				<verse number="19">經過 伯‧曷拉 个北片，到 約旦 河入 死海 个地方為止。這係南片个地界。</verse>
				<verse number="20">約旦 河係東片个地界。以上个土地係 便雅憫 支族該兜家族所分到个產業。</verse>
				<verse number="21">屬 便雅憫 支族該兜家族个城有： 耶利哥 、 伯‧曷拉 、 伊麥基悉 、</verse>
				<verse number="22">伯‧亞拉巴 、 洗瑪臉 、 伯特利 、</verse>
				<verse number="23">亞文 、 巴拉 、 俄弗拉 、</verse>
				<verse number="24">基法‧阿摩尼 、 俄弗尼 㧯 迦巴 ，總共十二座城，㧯附近个村莊。</verse>
				<verse number="25">另外有 基遍 、 拉瑪 、 比錄 、</verse>
				<verse number="26">米斯巴 、 基非拉 、 摩撒 、</verse>
				<verse number="27">利堅 、 伊利比勒 、 他拉拉 、</verse>
				<verse number="28">洗拉 、 以利弗 、 耶布斯 (就係 耶路撒冷 )、 基比亞 㧯 基列‧耶琳 ，總共十四座城，㧯附近个村莊。以上係 便雅憫 支族該兜家族所分到个產業。</verse>
			</chapter>
			<chapter number="19">
				<verse number="1">第二籤係分配給 西緬 支族該兜家族个土地。佢等个土地有兜透到 猶大 支族境內；</verse>
				<verse number="2">有 別是巴 (抑係安到 示巴 )、 摩拉大 、</verse>
				<verse number="3">哈薩‧書亞 、 巴拉 、 以森 、</verse>
				<verse number="4">伊利多拉 、 比土力 、 何珥瑪 、</verse>
				<verse number="5">洗革拉 、 伯‧瑪加博 、 哈薩‧蘇撒 、</verse>
				<verse number="6">伯‧利巴勿 㧯 沙魯險 ，總共十三座城，㧯附近个村莊。</verse>
				<verse number="7">另外還有 亞因 、 利門 、 以帖 、 亞珊 四座城，㧯附近个村莊。</verse>
				<verse number="8">這兜城鎮周圍所有个村莊，一直到南片个 巴拉‧比珥 (就係 拉瑪 )，全部包含在內。以上个土地係 西緬 支族該兜家族所分到个產業。</verse>
				<verse number="9">因為 猶大 支族分配到个土地比所需要个較多，其中一部份就分給 西緬 支族。</verse>
				<verse number="10">第三籤係分配給 西布倫 支族該兜家族个土地。佢等个土地透到 撒立 。</verse>
				<verse number="11">西片个地界對 撒立 向西到 瑪拉拉 ，接到 大巴設 㧯 約念 東片个河壩。</verse>
				<verse number="12">東片个地界對 撒立 向東到 吉斯綠‧他泊 个邊界，再到 大比拉 ，又上到 雅非亞 ，</verse>
				<verse number="13">對該位向東到 迦特‧希弗 㧯 以特‧加汛 ，轉向 臨門 个 尼亞 。</verse>
				<verse number="14">北片个地界對該位轉向 哈拿頓 ，一直到 伊弗他‧伊勒 山壢。</verse>
				<verse number="15">佢等个土地又包含 加他 、 拿哈拉 、 伸崙 、 以大拉 、 伯利恆 ，總共十二座城，㧯附近个村莊。</verse>
				<verse number="16">這兜城鎮㧯村莊全部係 西布倫 支族該兜家族所分到个產業。</verse>
				<verse number="17">第四籤係分配給 以薩迦 支族該兜家族个土地。</verse>
				<verse number="18">佢等个土地包含 耶斯列 、 基蘇律 、 書念 、</verse>
				<verse number="19">哈弗連 、 示按 、 亞拿哈拉 、</verse>
				<verse number="20">拉璧 、 基善 、 亞別 、</verse>
				<verse number="21">利篾 、 隱‧干寧 、 隱‧哈大 、㧯 伯‧帕薛 。</verse>
				<verse number="22">佢等个地界透到 他泊 、 沙哈洗瑪 、 伯‧示麥 ，一直到 約旦 河，總共十六座城，㧯附近个村莊。</verse>
				<verse number="23">這兜城鎮㧯村莊全部係 以薩迦 支族該兜家族所分到个產業。</verse>
				<verse number="24">第五籤係分配給 亞設 支族該兜家族个土地。</verse>
				<verse number="25">佢等个土地包含 黑甲 、 哈利 、 比田 、 押煞 、</verse>
				<verse number="26">亞拉米勒 、 亞末 、㧯 米沙勒 。西片个地界透到 迦密 㧯 希曷‧立納 ，</verse>
				<verse number="27">轉向東片到 伯‧大袞 ，接 細步綸 㧯 伊弗他‧伊勒 山壢，到北片个 伯‧以墨 㧯 尼業 ，再向北到 迦步勒 、</verse>
				<verse number="28">義伯崙 、 利合 、 哈們 、 加拿 ，一直到 西頓 大城。</verse>
				<verse number="29">對這位轉向 拉瑪 ，到堅固城 泰爾 ，然後轉向 何薩 ，一直到 地中海 。佢等个土地包含 瑪黑拉 、 亞革悉 、</verse>
				<verse number="30">烏瑪 、 亞弗 、 利合 ，總共二十二座城，㧯附近个村莊。</verse>
				<verse number="31">這兜城鎮㧯村莊全部係 亞設 支族該兜家族所分到个產業。</verse>
				<verse number="32">第六籤係分配給 拿弗他利 支族該兜家族个土地。</verse>
				<verse number="33">佢等个地界對 希利弗 到 撒拿音 个橡樹該位，又到 亞大米‧尼吉 㧯 雅比聶 ，透到 拉共 ，一直到 約旦 河。</verse>
				<verse number="34">地界對這位轉向西片，到 亞斯納‧他泊 ，又到 戶割 ，南到 西布倫 ，西到 亞設 ，東到 約旦 河 。</verse>
				<verse number="35">堅固城有 西丁 、 側耳 、 哈末 、 拉甲 、 基尼烈 、</verse>
				<verse number="36">亞大瑪 、 拉瑪 、 夏瑣 、</verse>
				<verse number="37">基低斯 、 以得來 、 隱‧夏瑣 、</verse>
				<verse number="38">以利穩 、 密大‧伊勒 、 和璉 、 伯‧亞納 㧯 伯‧示麥 ，總共十九座城，㧯附近个村莊。</verse>
				<verse number="39">這兜城鎮㧯村莊全部係 拿弗他利 支族該兜家族所分到个產業。</verse>
				<verse number="40">第七籤係分配給 但 支族該兜家族个土地。</verse>
				<verse number="41">佢等个土地包含 瑣拉 、 以實陶 、 伊珥‧示麥 、</verse>
				<verse number="42">沙拉賓 、 亞雅崙 、 伊提拉 、</verse>
				<verse number="43">以倫 、 亭拿 、 以革倫 、</verse>
				<verse number="44">伊利提基 、 基比頓 、 巴拉 、</verse>
				<verse number="45">伊胡得 、 比尼‧比拉 、 迦特‧臨門 、</verse>
				<verse number="46">美‧耶昆 、 拉昆 、㧯 約帕 對面个土地。</verse>
				<verse number="47">但 支族个人失掉土地个時，佢等去打 利善 ，將它攻下，㓾掉該位个人，佔領該城。佢等住在該位，用佢等祖先 但 个名，將 利善 个名改做 但 。</verse>
				<verse number="48">這兜城鎮㧯村莊全部係 但 支族該兜家族所分到个產業。</verse>
				<verse number="49">以色列 人民將土地分好以後，佢等給 嫩 个孻仔 約書亞 一垤地，做佢个產業。</verse>
				<verse number="50">佢等遵照上主个命令，將 約書亞 要求个城給佢，就係 以法蓮 山區个 亭拿‧西拉 。 約書亞 修建該城，住在該位。</verse>
				<verse number="51">祭司 以利亞撒 、 嫩 个孻仔 約書亞 ，㧯 以色列 各支族、各家族該兜領袖在 示羅 ，在上主聖帳篷个門口抽籤，求問上主，分配以上這兜土地。恁樣，佢等完成分配土地个工作。</verse>
			</chapter>
			<chapter number="20">
				<verse number="1">上主吩咐 約書亞</verse>
				<verse number="2">對 以色列 人民講：「你等愛照𠊎喊 摩西 傳給你等个命令，指定幾座城做逃閃城。</verse>
				<verse number="3">該毋堵好、毋係有意害死人个，做得到該位去，逃避報血仇个人。</verse>
				<verse number="4">恁樣个人做得逃到其中个一座城，到城門口審判个地方，向該兜長老解釋事情个經過。佢等會俾佢入城肚，給佢地方好住，恁樣，佢做得留下來。</verse>
				<verse number="5">若係報血仇个人追到該位，城肚个長老做毋得將該人交出來，反轉愛保護佢；因為佢㧯死者無冤仇，毋係有意害死人个。</verse>
				<verse number="6">佢做得住在城肚，等候接受公開个審判，也愛等到當時个大祭司死掉，正做得轉到佢所逃避个家鄉。」</verse>
				<verse number="7">所以 以色列 人在 約旦 河西片 拿弗他利 山區个 加利利 指定 基低斯 ，在 以法蓮 山區指定 示劍 ，在 猶大 山區指定 亞巴 城 (就係 希伯崙 )。</verse>
				<verse number="8">佢等又在 約旦 河東片， 耶利哥 東片个曠野高原，在 呂便 支族境內指定 比悉 ，在 迦得 支族境內个 基列 指定 拉末 ，在 瑪拿西 支族境內个 巴珊 指定 哥蘭 ，來做逃閃城。</verse>
				<verse number="9">這兜逃閃城係為所有 以色列 人㧯暫時住在佢等當中个外族人設立个。凡毋係有意害死人个，全部做得到該位去請求保護，閃避報血仇个人。報血仇个人做毋得㓾佢，除非佢經過公開个審判。</verse>
			</chapter>
			<chapter number="21">
				<verse number="1">利未 各家族該兜族長去見祭司 以利亞撒 、 嫩 个孻仔 約書亞 ，㧯 以色列 各支族、各家族該兜領袖，</verse>
				<verse number="2">在 迦南 地个 示羅 對佢等講：「上主識通過 摩西 傳下命令，愛分兜城給𠊎等住，還愛有草埔好畜𠊎等个頭牲。」</verse>
				<verse number="3">所以， 以色列 人就照上主个命令，對佢等自家个土地中將以下所記个城鎮㧯草埔分給 利未 人：</verse>
				<verse number="4">利未 支族个 哥轄 宗族最先分到城鎮。祭司 亞倫 家族个後代對 猶大 、 西緬 、㧯 便雅憫 支族个土地分到十三座城。</verse>
				<verse number="5">哥轄 宗族其他个家族對 以法蓮 、 但 、㧯西 瑪拿西 支族个土地分到十座城。</verse>
				<verse number="6">革順 宗族對 以薩迦 、 亞設 、 拿弗他利 、㧯在 巴珊 个東 瑪拿西 支族个土地分到十三座城。</verse>
				<verse number="7">米拉利 宗族對 呂便 、 迦得 ，㧯 西布倫 支族个土地分到十二座城。</verse>
				<verse number="8">以色列 人照上主通過 摩西 傳下个命令，用抽籤个辦法將這兜城鎮㧯各城附近个草埔分配給 利未 人。</verse>
				<verse number="9">以下這兜城係對 猶大 㧯 西緬 支族个土地分出來，</verse>
				<verse number="10">給 亞倫 个後代。 亞倫 屬 利未 支族、 哥轄 宗族。佢等最先分到城鎮。</verse>
				<verse number="11">佢等得到个城有 亞巴 ( 亞巴 係 亞衲 个阿爸)，這下安到 希伯崙 ，在 猶大 山區；佢等也分到 亞巴 周圍个草埔。</verse>
				<verse number="12">總係屬這城个田地㧯村莊，已經分給 耶孚尼 个孻仔 迦勒 做產業。</verse>
				<verse number="13">祭司 亞倫 个後代，除了分到 希伯崙 (逃閃城之一) 以外，還分到以下這兜城： 立拿 、</verse>
				<verse number="14">雅提珥 、 以實提莫 、</verse>
				<verse number="15">何崙 、 底璧 、</verse>
				<verse number="16">亞因 、 淤他 㧯 伯‧示麥 ，總共九座 猶大 㧯 西緬 支族个城，㧯各城附近个草埔。</verse>
				<verse number="17">佢等也對 便雅憫 支族个土地分到四座城，就係 基遍 、 迦巴 、</verse>
				<verse number="18">亞拿突 、 亞勒們 ，㧯各城附近个草埔。</verse>
				<verse number="19">祭司 亞倫 个後代總共分到十三座城，㧯各城附近个草埔。</verse>
				<verse number="20">利未 个 哥轄 宗族其他个家族對 以法蓮 支族个土地分到四座城，</verse>
				<verse number="21">就係 以法蓮 山區个 示劍 (逃閃城之一)、 基色 、</verse>
				<verse number="22">基伯先 、 伯‧和崙 ，㧯各城附近个草埔。</verse>
				<verse number="23">佢等對 但 支族个土地也分到四座城： 伊利提基 、 基比頓 、</verse>
				<verse number="24">亞雅崙 、 迦特‧臨門 ，㧯各城附近个草埔。</verse>
				<verse number="25">佢等對西 瑪拿西 支族个土地分到兩座城： 他納 、 迦特‧臨門 ，㧯各城附近个草埔。</verse>
				<verse number="26">哥轄 宗族其他个家族總共分到十座城，㧯各城附近个草埔。</verse>
				<verse number="27">利未 个 革順 宗族對東 瑪拿西 支族个土地分到兩座城： 巴珊 个 哥蘭 (逃閃城之一)、 比‧施提拉 ，㧯各城附近个草埔。</verse>
				<verse number="28">佢等對 以薩迦 支族个土地分到四座城： 基善 、 大比拉 、</verse>
				<verse number="29">耶末 、 隱‧干寧 ，㧯各城附近个草埔。</verse>
				<verse number="30">佢等對 亞設 支族个土地也分到四座城： 米沙勒 、 押頓 、</verse>
				<verse number="31">黑甲 、 利合 ，㧯各城附近个草埔。</verse>
				<verse number="32">佢等對 拿弗他利 支族个土地分到三座城： 加利利 个 基低斯 (逃閃城之一)、 哈末‧多珥 、 加珥坦 ，㧯各城附近个草埔。</verse>
				<verse number="33">革順 宗族各家族總共分到十三座城，㧯各城附近个草埔。</verse>
				<verse number="34">其他个 利未 人、 米拉利 宗族，對 西布倫 支族个土地分到四座城： 約念 、 加珥他 、</verse>
				<verse number="35">丁拿 、 拿哈拉 ，㧯各城附近个草埔。</verse>
				<verse number="36">佢等對 呂便 支族个土地分到四座城： 比悉 、 雅雜 、</verse>
				<verse number="37">基底莫 、 米法押 ，㧯各城附近个草埔。</verse>
				<verse number="38">佢等對 迦得 支族个土地分到四座城： 基列 个 拉末 (逃閃城之一)、 瑪哈念 、</verse>
				<verse number="39">希實本 、 雅謝 ，㧯各城附近个草埔。</verse>
				<verse number="40">其他个 利未 人、 米拉利 宗族總共分到十二座城。</verse>
				<verse number="41">以色列 人對佢等个土地總共分出四十八座城，㧯各城附近个草埔給 利未 人。</verse>
				<verse number="42">這兜城四周圍有草埔，逐座城全部係恁樣。</verse>
				<verse number="43">恁樣，上主照佢向 以色列 人个祖先所應許个，將所有个土地賜給佢等。佢等佔領該兜土地，就在該位安居。</verse>
				<verse number="44">上主賜給佢等境內太平，就像佢對佢等个祖先所應許个。佢等个仇敵無一個有辦法㧯佢等作對，因為上主將所有个敵人全部交在 以色列 人手中。</verse>
				<verse number="45">上主應許賜福給 以色列 人个話，一句也無漏掉，全部有實現。</verse>
			</chapter>
			<chapter number="22">
				<verse number="1">約書亞 召集 呂便 、 迦得 ，㧯東 瑪拿西 支族个人來，</verse>
				<verse number="2">對佢等講：「你等已經完成上主个僕人 摩西 所命令你等做个逐件事，也聽從𠊎所有个吩咐。</verse>
				<verse number="3">直到今晡日，你等毋識離開你等个 以色列 同胞；你等認真遵守上主 — 你等上帝个命令。</verse>
				<verse number="4">這下，上主 — 你等个上帝已經照佢个應許，使你等个 以色列 同胞安居。所以，你等做得轉屋下，轉到你等所得到个土地，就係上主个僕人 摩西 給你等該垤在 約旦 河東片个土地。</verse>
				<verse number="5">總係你等愛確實遵守上主个僕人 摩西 交給你等个法律誡命：敬愛上主 — 你等个上帝，遵行佢个道，服從佢个誡命，對佢忠心，全心全意事奉佢。」</verse>
				<verse number="6">所以 約書亞 祝福佢等，送佢等轉屋下，佢又講：「你等愛帶等盡多頭牲、金、銀、銅、鐵、㧯衫褲，豐豐富富轉去。愛㧯你等个同胞分享對敵人搶來个戰利品。」恁樣佢等就轉屋下去了。 摩西 已經將 約旦 河東片、 巴珊 个一部份土地給 瑪拿西 半支族； 約書亞 將 約旦 河西片个土地給 瑪拿西 另外一半支族㧯其他支族。</verse>
				<verse number="7"></verse>
				<verse number="8"></verse>
				<verse number="9">所以 呂便 、 迦得 、㧯東 瑪拿西 支族个人轉屋下去。佢等在 迦南 地个 示羅 離開其他个 以色列 人，向佢等自家个土地 基列 出發，就係佢等照上主通過 摩西 命令佢等去佔領个土地。</verse>
				<verse number="10">呂便 、 迦得 ，㧯東 瑪拿西 支族个人來到 基利綠 ，就係 約旦 河西片 。佢等在河壩滣起一座高大个祭壇。</verse>
				<verse number="11">有人㧯 以色列 其他支族个人講：「看哪， 呂便 、 迦得 、㧯東 瑪拿西 支族个人在 基利綠 ，就係在 約旦 河𠊎等這片起一座祭壇！」</verse>
				<verse number="12">以色列 人一聽到這消息，全會眾都聚集到 示羅 ，愛去攻打東片該兜支族。</verse>
				<verse number="13">以色列 人派祭司 以利亞撒 个孻仔 非尼哈 ，到 基列 地去見 呂便 、 迦得 、㧯東 瑪拿西 支族个人；</verse>
				<verse number="14">有十個 以色列 領袖㧯 非尼哈 共下去。佢等逐儕代表在 約旦 河西片安居个一個支族，全部係宗族个族長。</verse>
				<verse number="15">佢等來到 基列 地，看到 呂便 、 迦得 、㧯東 瑪拿西 支族个人民，</verse>
				<verse number="16">就代表上主个全會眾對佢等講：「你等做麼介做這壞事冒犯 以色列 个上帝呢？你等為自家起這祭壇，悖逆上主！你等這下無愛再聽從佢係麼？</verse>
				<verse number="17">你等還記得𠊎等在 批珥 犯个罪麼？該時，上主用發瘟責罰自家个子民。𠊎等到這下還係為該件事受苦。敢講該罪還毋罅係麼？</verse>
				<verse number="18">你等這下愛拒絕佢，毋跈佢係麼？今晡日你等悖逆上主，天光日佢就會對 以色列 全會眾發譴。</verse>
				<verse number="19">若係你等个土地無淨浰，無適合敬拜上主，恁樣，過這片來，到上主个聖帳篷停留个地方來向𠊎等討兜土地。你等做毋得悖逆上主，也做毋得得罪𠊎等。做毋得在上主 — 𠊎等上帝个祭壇以外另外為自家起祭壇。</verse>
				<verse number="20">你等愛記得 謝拉 个子孫 亞干 个事件。佢毋遵從命令，無毀滅應該毀滅个戰利品， 以色列 全會眾敢毋係為到這件事受責罰？ 亞干 犯罪，連累別人㧯佢共下死！」</verse>
				<verse number="21">呂便 、 迦得 、㧯東 瑪拿西 支族个人，回答住在西片支族該兜族長講：</verse>
				<verse number="22">「上帝係大能者！佢係上主！上帝係大能者！佢係上主！佢知𠊎等做麼介恁樣做；𠊎等也愛 以色列 人知。若係𠊎等悖逆上主，對佢無忠心，你等今晡日就俾𠊎等死！</verse>
				<verse number="23">若係𠊎等毋遵從上主，反轉為自家起祭壇，在頂高獻燒化祭、素祭，抑係平安祭，願上主親自責罰𠊎等！</verse>
				<verse number="24">事實毋係恁樣。𠊎等恁樣做係因為驚將來你等个子孫會對𠊎等个子孫講：『你等㧯上主 — 以色列 个上帝有麼介關係？</verse>
				<verse number="25">上主用 約旦 河做𠊎等㧯你等 呂便 、 迦得 人中間个界限；你等就㧯上主無關係。』該時，你等个子孫驚怕會禁止𠊎等个子孫去敬拜上主。</verse>
				<verse number="26">「所以𠊎等起一座祭壇，毋係愛獻燒化祭抑係別个牲儀，</verse>
				<verse number="27">係愛在你㧯𠊎中間，㧯世世代代，做證據，證明𠊎等確實係在上主个聖帳篷該位獻燒化祭、別个牲儀，㧯平安祭。這係愛證明𠊎等係敬拜佢个，免得將來你等个子孫講，𠊎等个子孫㧯上主無關係。</verse>
				<verse number="28">這就係𠊎等个主張。若係將來真實發生這事，𠊎等个子孫就做得講：『看哪，𠊎等个祖先起一座祭壇，㧯上主个祭壇共樣，毋係愛獻燒化祭抑係別个祭物，係愛在你㧯𠊎中間做證據。』</verse>
				<verse number="29">𠊎等絕對毋會悖逆上主；除了該在上主 — 𠊎等上帝个聖帳篷前个祭壇，𠊎等毋會起別个祭壇，去獻燒化祭、素祭，㧯別个祭物來悖逆佢。」</verse>
				<verse number="30">祭司 非尼哈 㧯跈佢共下个十個領袖，就係住在 約旦 河西片 以色列 各支族該兜族長，聽到 呂便 、 迦得 、㧯東 瑪拿西 支族个人所講个話，全部當滿意。</verse>
				<verse number="31">祭司 以利亞撒 个孻仔 非尼哈 對佢等講：「這下𠊎等知，上主㧯𠊎等共下；你等並無悖逆佢。所以，你等救到 以色列 人，使佢等毋會受上主个責罰。」</verse>
				<verse number="32">恁樣，祭司 以利亞撒 个孻仔 非尼哈 㧯該兜領袖離開 呂便 人㧯 迦得 人，對 基列 地轉 迦南 地，去向 以色列 人民報告。</verse>
				<verse number="33">以色列 人民全部當滿意，又讚美上帝。佢等無再提起愛去攻打 呂便 人㧯 迦得 人、破壞佢等住个土地了。</verse>
				<verse number="34">呂便 人㧯 迦得 人講：「這座祭壇向𠊎等做證據，證明上主係上帝。」所以，佢等喊這座壇做「證壇」。</verse>
			</chapter>
			<chapter number="23">
				<verse number="1">上主使 以色列 人享受太平，四周圍仇敵毋敢來作怪，已經盡久了。這時 約書亞 也當老了；</verse>
				<verse number="2">佢召集全部 以色列 人、長老、領袖、審判官、㧯官長來，對佢等講：「𠊎這下已經恁老了。</verse>
				<verse number="3">上主 — 你等个上帝為到你等對這兜國家所做个一切，你等全部看到了；上主 — 你等个上帝一直為你等戰爭。</verse>
				<verse number="4">𠊎已經將所有佔領㧯吂佔領个各國土地 — 東片對 約旦 河，西片到 地中海 — 全部分配給你等各支族做產業。</verse>
				<verse number="5">上主 — 你等个上帝會使佢等離開你等；你等進攻个時，佢愛將佢等逐走。你等會照上主 — 你等上帝个應許，得到佢等个土地。</verse>
				<verse number="6">「所以，你等愛堅強，愛確實遵行 摩西 法律書所寫个一切命令，毋好偏左、毋好偏右。</verse>
				<verse number="7">你等做毋得㧯留在你等當中个外族人摻雜；做毋得提到佢等个神明，抑係奉該兜神明个名發誓；做毋得事奉它兜抑係向它兜跪拜。</verse>
				<verse number="8">只愛照你等到這下一直所遵行个，繼續對上主 — 你等个上帝忠心。</verse>
				<verse number="9">你等進攻个時，上主已經將當強當大个民族逐走；到今晡日無一個國家有辦法抵擋你等。</verse>
				<verse number="10">你等當中無論㖠儕就有辦法打贏一千儕，因為上主 — 你等个上帝照佢个應許會為你等戰爭。</verse>
				<verse number="11">你等愛細膩，愛全心敬愛上主 — 你等个上帝。</verse>
				<verse number="12">「若係你等對佢無忠心，反轉㧯留在你等當中个外族人摻雜，同佢等通婚，</verse>
				<verse number="13">你等進攻个時，上主 — 你等个上帝一定毋會再將這兜民族逐走；反轉佢等會像羅網、陷阱，像打在你等背囊个鞭仔、刺在你等目珠个竻仔，直到你等無一儕存留在上主 — 你等上帝所賜給你等這垤盡靚个土地。</verse>
				<verse number="14">「這下，𠊎過身个時間會到了。你等一心一意全部清楚，上主 — 你等个上帝已經將佢應許給你等所有个福氣賜給你等了。佢个應許全部有實現，無一項漏掉。</verse>
				<verse number="15">總係，你等愛知，就像上主 — 你等个上帝實現所有應許給你等个福氣，上主也會照樣降各樣个災禍，直到將你等對佢所賜這垤盡靚个土地上除滅。</verse>
				<verse number="16">若係你等毋遵守上主 — 你等上帝所命令你等个約，去事奉敬拜別个神明，佢會大發譴責罰你等，使你等當遽就對佢所賜這垤盡靚个土地上消滅。」</verse>
			</chapter>
			<chapter number="24">
				<verse number="1">約書亞 在 示劍 召集 以色列 各支族。佢召集 以色列 个長老、領袖、審判官、㧯官長，佢等就來到上帝面前。</verse>
				<verse number="2">約書亞 對全部民眾講：「上主 — 以色列 个上帝恁樣講：『當久以前，你等个祖先 他拉 並佢个孻仔 亞伯拉罕 㧯 拿鶴 ，住在 幼發拉底 河該片；佢等拜別个神明。</verse>
				<verse number="3">𠊎帶你等个祖先 亞伯拉罕 對該位過 幼發拉底 河，𢱋佢行遍 迦南 各地，又賜給佢盡多子孫。𠊎賜給佢 以撒 ，</verse>
				<verse number="4">又給 以撒 兩個孻仔 — 雅各 㧯 以掃 。𠊎將 以東 个山區給 以掃 ，做佢个產業；總係 雅各 㧯佢个子孫下到 埃及 去。</verse>
				<verse number="5">「『𠊎差派 摩西 㧯 亞倫 ；𠊎降大災禍給 埃及 ；最後𠊎𢱋你等出來。</verse>
				<verse number="6">𠊎對 埃及 將你等个祖先𢱋出來； 埃及 人用戰車、兵馬逐佢等。你等个祖先到 紅海 个時，</verse>
				<verse number="7">佢等求𠊎救命。𠊎用烏暗將佢等㧯 埃及 人隔開，𠊎用海水浸掉 埃及 人，將佢等吞滅。𠊎對 埃及 所做个你等全部盡清楚。 「『你等在曠野住當久，</verse>
				<verse number="8">後來，𠊎𢱋你等到 約旦 河東片，到 亞摩利 人所住个土地。佢等攻擊你等；總係𠊎將佢等交在你等手中，使你等得到佢等个土地。你等進攻个時，𠊎就除滅佢等。</verse>
				<verse number="9">後來， 摩押 王 西撥 个孻仔 巴勒 準備攻打你等，派人喊 比珥 个孻仔 巴蘭 來咒詛你等。</verse>
				<verse number="10">總係𠊎毋聽 巴蘭 个話，所以佢反轉祝福你等幾下擺；恁樣，𠊎就救你等脫離 巴勒 个手。</verse>
				<verse number="11">「『你等過 約旦 河，到 耶利哥 。 耶利哥 人攻打你等，像 亞摩利 人、 比利洗 人、 迦南 人、 赫 人、 革迦撒 人、 希未 人、 耶布斯 人攻打你等一樣；總係𠊎將佢等全部交在你等手中。</verse>
				<verse number="12">你等前進个時，𠊎使佢等著驚混亂 ，將兩個 亞摩利 王逐走；這並毋係因為你等用刀劍抑係弓箭所做成个。</verse>
				<verse number="13">𠊎賜給你等个土地毋係你等用勞力得來个；𠊎賜給你等个城市並毋係你等起个。你等這下就住在該位；你等食个葡萄㧯橄欖並毋係你等自家種个。』」</verse>
				<verse number="14">約書亞 繼續講：「你等愛敬畏上主，真心誠意事奉佢。你等愛除掉祖先在 美索不達米亞 㧯 埃及 所拜个神明，單單事奉上主。</verse>
				<verse number="15">若係你等毋甘願事奉上主，恁樣，今晡日愛做決定，你等愛事奉㖠個：係你等祖先在 美索不達米亞 所拜个神明？抑係你等住這地方个 亞摩利 人所拜个神明？總係𠊎㧯𠊎全家，𠊎等愛事奉上主。」</verse>
				<verse number="16">民眾應講：「𠊎等絕對毋敢離開上主，去事奉別个神明！</verse>
				<verse number="17">上主 — 𠊎等个上帝識𢱋𠊎等个祖先㧯𠊎等離開在 埃及 做奴才个國家；𠊎等親眼看到佢所行个大神蹟。在𠊎等經過个國家中，無論麼介地方，佢攏總保守𠊎等安全。</verse>
				<verse number="18">𠊎等進入這片土地个時，上主逐走所有住在這位个 亞摩利 人。所以𠊎等愛事奉上主；佢係𠊎等个上帝。」</verse>
				<verse number="19">約書亞 對民眾講：「總係你等無一定有辦法事奉上主！因為佢係神聖个上帝，係專情个上帝 。佢毋會赦免你等个過犯㧯罪惡。</verse>
				<verse number="20">若係你等離開上主，去事奉外族个神明，雖然佢識恩待你等，佢還係會降災禍毀滅你等。」</verse>
				<verse number="21">民眾對 約書亞 講：「𠊎等決定愛事奉上主！」</verse>
				<verse number="22">約書亞 講：「你等自家做證，證明你等決定愛事奉上主。」 佢等講：「好！𠊎等自家做證。」</verse>
				<verse number="23">所以 約書亞 命令佢等：「既然恁樣，你等愛除掉所有外族个神明，決心歸向上主 — 以色列 个上帝。」</verse>
				<verse number="24">民眾對 約書亞 講：「𠊎等決定愛事奉上主 — 𠊎等个上帝；𠊎等愛聽從佢。」</verse>
				<verse number="25">該日， 約書亞 為 人民立約；佢在 示劍 將法律㧯條例交給佢等。</verse>
				<verse number="26">約書亞 將這兜命令寫在上帝个法律書，然後在上主聖所个橡樹下頓一垤大石頭。</verse>
				<verse number="27">佢對全部人民講：「這垤石頭愛為𠊎等做證；它聽到上主對𠊎等所講一切个話。所以，它愛為你等做證，免得你等悖逆你等个上帝。」</verse>
				<verse number="28">然後 約書亞 喊人民逐儕倒轉自家分到个土地去。</verse>
				<verse number="29">這兜事以後，上主个僕人 — 嫩 个孻仔 約書亞 過身；佢過身个時係一百一十歲。</verse>
				<verse number="30">以色列 人民將佢安葬在佢分到个土地，就係 迦實 山北片 以法蓮 山區个 亭拿‧西拉 。</verse>
				<verse number="31">約書亞 在世个日仔， 以色列 人民事奉上主；佢死掉以後，該兜親眼看到上主為 以色列 人所做一切事个長老還生个日仔，人民還係事奉上主。</verse>
				<verse number="32">以色列 人民對 埃及 所帶出來 約瑟 个骸骨，安葬在 示劍 ，就係 雅各 用一百隻銀幣向 示劍 个阿爸、 哈抹 个子孫買下來該垤地。 約瑟 个後代承接該地。</verse>
				<verse number="33">亞倫 个孻仔 以利亞撒 也過身，安葬在 基比亞 ，就係厥孻仔 非尼哈 所分到在 以法蓮 山區个細山頂。</verse>
			</chapter>
		</book>
		<book number="7">
			<chapter number="1">
				<verse number="1">約書亞 過身以後， 以色列 人求問上主：「𠊎等當中㖠個支族愛先上去攻打 迦南 人呢？」</verse>
				<verse number="2">上主應講：「 猶大 支族愛先上去。𠊎已經將這垤土地交在佢等手中。」</verse>
				<verse number="3">猶大 支族个人對佢等个兄弟 西緬 支族个人講：「請㧯𠊎等共下到該已經分配給𠊎等个土地，去征服 迦南 人，然後𠊎等就㧯你等共下到分配給你等个土地去。」</verse>
				<verse number="4">所以 西緬 㧯 猶大 支族共下去相㓾；上主將 迦南 人㧯 比利洗 人交在佢等手中。佢等在 比色 㓾死一萬人，</verse>
				<verse number="5">又在該位堵到 亞多尼‧比色 ，就㧯佢相㓾。</verse>
				<verse number="6">亞多尼‧比色 逃走；佢等追佢，捉到佢，將佢个手指公㧯腳指公剁掉。</verse>
				<verse number="7">亞多尼‧比色 講：「識有七十個王被𠊎剁斷手指公㧯腳指公；佢等在𠊎桌仔底下拈人㧹掉个食物。這下上帝照𠊎所做个報應𠊎了。」佢被人帶到 耶路撒冷 ，就死在該位。</verse>
				<verse number="8">猶大 支族个人攻打 耶路撒冷 。佢等佔領該城，將城肚个人㓾掉，又放火燒城。</verse>
				<verse number="9">接等，佢等攻打住在山區、高原、㧯南部燥地个 迦南 人。</verse>
				<verse number="10">佢等也攻打住在 希伯崙 城个 迦南 人 ( 希伯崙 以前安到 基列‧亞巴 )，打贏 示篩 族、 亞希幔 族，㧯 撻買 族个人。</verse>
				<verse number="11">猶大 支族个人對該位攻打 底璧 城；該時， 底璧 安到 基列‧西弗 。</verse>
				<verse number="12">猶大 支族个人 迦勒 講：「麼人佔領 基列‧西弗 ，𠊎就將𠊎个妹仔 押撒 嫁給佢。」</verse>
				<verse number="13">迦勒 个老弟 基納斯 个孻仔 俄陀聶 佔領該城，所以 迦勒 將妹仔 押撒 給佢做𡜵娘。</verse>
				<verse number="14">結婚該日， 俄陀聶 唆慫 押撒 去向厥爸討一垤田地。 押撒 一下驢仔， 迦勒 就問姖愛麼介；</verse>
				<verse number="15">姖講：「求你送𠊎一個禮物；因為你俾𠊎安居在燥地，求你也給𠊎泉水。」所以 迦勒 將上泉水㧯下泉水全部給姖。</verse>
				<verse number="16">摩西 丈人老个後代係 基尼 人；佢等㧯 猶大 支族个人共下離開棕樹城 — 耶利哥 到 亞拉得 南片个 猶大 荒地，住在 亞瑪力 人 當中。</verse>
				<verse number="17">猶大 支族个人㧯佢等个兄弟 西緬 支族个人聯合起來，上去打贏住在 洗法 城个 迦南 人，將該城全部毀滅，它个名就安到 何珥瑪 。</verse>
				<verse number="18">猶大 支族个人又佔領 迦薩 、 亞實基倫 、 以革倫 㧯這兜城周圍个土地。</verse>
				<verse number="19">上主幫助 猶大 支族个人，佢等就佔領山區，總係無法度將住在平地个人逐走，因為佢等有鐵戰車。</verse>
				<verse number="20">照 摩西 个命令， 迦勒 得到 希伯崙 ；佢將 亞衲 後代三族个人逐出該城。</verse>
				<verse number="21">便雅憫 支族个人無將住在 耶路撒冷 个 耶布斯 人逐走，所以 耶布斯 人直到今晡日還㧯 便雅憫 人共下住在該位。</verse>
				<verse number="22">約瑟 个後代 — 以法蓮 㧯 瑪拿西 支族个人去攻打 伯特利 城；這城以前安到 路斯 。上主幫助佢等。佢等派探仔到城肚去；</verse>
				<verse number="23"></verse>
				<verse number="24">探仔看到一個人對城肚出來，就問佢：「請㧯𠊎等講樣般入城，𠊎等毋會傷害你。」</verse>
				<verse number="25">該人就㧯佢等講。所以 以法蓮 㧯 瑪拿西 支族个人㓾死城肚所有个人民，只留下該人㧯佢屋下人。</verse>
				<verse number="26">後來，該人到 赫 人个土地，在該位起一座城，將它安到 路斯 ；這城到這下還係喊這個名。</verse>
				<verse number="27">瑪拿西 支族个人無將住在 伯‧善 、 他納 、 多珥 、 以伯蓮 、 米吉多 ，㧯各城附近村莊个人民逐走； 迦南 人強強毋肯走，繼續住在該位。</verse>
				<verse number="28">以色列 人強盛後，佢等強迫 迦南 人做苦工，總係無將佢等全部逐走。</verse>
				<verse number="29">以法蓮 支族个人無將住在 基色 城个 迦南 人逐走，所以 迦南 人繼續㧯佢等共下住。</verse>
				<verse number="30">西布倫 支族个人無將住在 基倫 㧯 拿哈拉 城个人民逐走，所以 迦南 人繼續住在該位，總係做 西布倫 人个苦工。</verse>
				<verse number="31">亞設 支族个人無將住在 亞柯 、 西頓 、 亞黑拉 、 亞革悉 、 黑巴 、 亞弗革 、㧯 利合 个人民逐走。</verse>
				<verse number="32">佢等㧯這兜當地个 迦南 人共下住，無將佢等逐走。</verse>
				<verse number="33">拿弗他利 支族个人無將住在 伯‧示麥 㧯 伯‧亞納 城个人民逐走。佢等㧯當地个 迦南 人共下住，總係強迫這兜人做苦工。</verse>
				<verse number="34">亞摩利 人將 但 支族个人迫上山區，毋准佢等下到平地來。</verse>
				<verse number="35">亞摩利 人繼續住在 亞雅崙 、 沙賓 㧯 希烈 山；總係 約瑟 个後代 — 以法蓮 㧯 瑪拿西 支族个人征服佢等，強迫佢等做苦工。</verse>
				<verse number="36">亞摩利 人个邊界對 亞克拉濱 路口開始，在 西拉 北片。</verse>
			</chapter>
			<chapter number="2">
				<verse number="1">上主个天使對 吉甲 到 波金 ，對 以色列 人民講：「𠊎𢱋你等離開 埃及 ，到𠊎應許給你等祖先个土地。𠊎識講過，𠊎絕對毋會廢掉㧯你等立个約；</verse>
				<verse number="2">你等絕對做毋得㧯當地个人民立麼介契約。你等愛拆掉佢等个祭壇。總係，你等無照𠊎个話做，偏偏去做𠊎毋准你等做个事。</verse>
				<verse number="3">所以，𠊎㧯你等講，你等向前進个時，𠊎毋將該地个人民逐走。佢等定著會成做你等个仇敵 ；佢等个神明會引誘你等陷入羅網。」</verse>
				<verse number="4">上主个天使這兜話一講煞， 以色列 人民就開聲大噭，</verse>
				<verse number="5">所以該地方个名安到 波金 。佢等在該位向上主獻祭。</verse>
				<verse number="6">約書亞 解散 以色列 人民；各支族就分開去佔領自家分到个土地。</verse>
				<verse number="7">約書亞 在世个時， 以色列 人民攏總事奉上主；佢死後，該兜親目看到上主為 以色列 行奇事个長老還在个時， 以色列 人民還係事奉上主。</verse>
				<verse number="8">上主个僕人 嫩 个孻仔 約書亞 一百一十歲个時過身。</verse>
				<verse number="9">以色列 人民將佢安葬在佢分到个土地，就係 迦實 山北片 以法蓮 山區个 亭拿‧西拉 。</verse>
				<verse number="10">該代人也全部過身、轉到祖宗該位去。下一代人興起，就毋識上主，乜毋知上主為 以色列 人民所做个一切事。</verse>
				<verse number="11">後來， 以色列 人民行上主看做邪惡个事，開始去拜該兜 巴力 。</verse>
				<verse number="12">佢等離開𢱋佢等出 埃及 个上主 — 佢等祖先个上帝，去拜別个神，就係佢等周圍各國人所拜个神明，惹上主發譴。</verse>
				<verse number="13">佢等離開上主，去拜 巴力 神㧯 亞斯她錄 女神。</verse>
				<verse number="14">所以，上主向 以色列 人大發譴，將佢等交在四周圍敵人个手中，由在敵人搶佢等，害 以色列 人無法度再抵抗敵人。</verse>
				<verse number="15">以色列 人無論出戰到㖠位，上主照自家所發个誓，逐擺做佢等个對敵，來攻擊佢等。佢等就堵到極大个苦難。</verse>
				<verse number="16">該時，上主就為 以色列 人興起士師來帶領佢等，解救佢等脫離該兜搶佢等人个手中。</verse>
				<verse number="17">總係 以色列 人民還係毋聽從佢等个士師，悖逆上主、行姦淫，去拜別个神明。這兜新个一代人當遽就毋跈祖先个腳步，毋遵行上主个命令。</verse>
				<verse number="18">逐擺上主興起士師給佢等，上主就㧯該士師共下，俾佢一生人救人民脫離仇敵。因為佢等受苦、受欺負到緊噌，上帝就憐憫佢等，</verse>
				<verse number="19">總係，該士師死掉以後，人民又倒轉去行壞事，過罪惡个生活，又比上代人還較厲害。佢等去拜別个神，服事佢等，盡硬頸，壞行為還係毋肯改。</verse>
				<verse number="20">所以上主又向 以色列 人發譴，講：「既然這人民違背𠊎命令佢等祖先遵守个約，毋聽從𠊎个話，</verse>
				<verse number="21">𠊎也毋將 約書亞 過身个時還留在這地个該兜外族人逐走。</verse>
				<verse number="22">𠊎愛用佢等來考驗 以色列 人民，看佢等係毋係像佢等祖先恁樣遵行𠊎个道路。」</verse>
				<verse number="23">所以，上主允准該兜民族留在這垤土地，無將佢等交給 約書亞 ，乜無在 約書亞 過身後當遽就將佢等逐出去。</verse>
			</chapter>
			<chapter number="3">
				<verse number="1">上主留兜民族在這垤土地，愛考驗該兜無經驗過 迦南 戰爭个 以色列 人。</verse>
				<verse number="2">佢个目的係愛教 以色列 人个後代相㓾，特別係從來毋識上戰場个人。</verse>
				<verse number="3">留下个有 非利士 五座城个領袖㧯所有 迦南 人、 西頓 人，㧯住在 巴力‧黑門 山到 哈馬 隘口中間 黎巴嫩 山區个 希未 人。</verse>
				<verse number="4">上主留下這兜民族係愛考驗 以色列 人，看佢等係毋係服從上主通過 摩西 頒佈給佢等祖先个誡命。</verse>
				<verse number="5">所以 以色列 人住在 迦南 人、 赫 人、 亞摩利 人、 比利洗 人、 希未 人，㧯 耶布斯 人當中，</verse>
				<verse number="6">討佢等个妹仔做𡜵娘，將自家个妹仔嫁給佢等个孻仔，又拜佢等个神明。</verse>
				<verse number="7">以色列 人民行上主看做邪惡个事，毋記得上主 — 佢等个上帝，去拜該兜 巴力 㧯 亞舍拉 。</verse>
				<verse number="8">所以上主向 以色列 人發譴，將佢等交在 美索不達米亞 王 古珊‧利薩田 个手中。 以色列 人服事佢八年。</verse>
				<verse number="9">後來佢等求喊上主，上主就興起一個拯救者來解救佢等。這個人就係 俄陀聶 ；佢係 迦勒 个老弟 基納斯 个孻仔。</verse>
				<verse number="10">上主个靈降在佢身上，佢就做 以色列 人民个士師。 俄陀聶 出去相㓾；上主將 美索不達米亞 王 古珊‧利薩田 交在佢手中，俾佢打贏。</verse>
				<verse number="11">所以這地方太平四十年，直到 俄陀聶 過身。</verse>
				<verse number="12">以色列 人民又行上主看做邪惡个事。所以，上主使 摩押 王 伊磯倫 比 以色列 較強，來攻擊 以色列 人。</verse>
				<verse number="13">伊磯倫 聯合 亞捫 人㧯 亞瑪力 人，來打贏 以色列 人，佔領棕樹城 耶利哥 。</verse>
				<verse number="14">以色列 人服事 摩押 王 伊磯倫 十八年。</verse>
				<verse number="15">後來 以色列 人求喊上主，上主就為佢等興起一個拯救者。這個人就係 以笏 ；佢係 便雅憫 人 基拉 个孻仔，習慣用左手。 以色列 人派 以笏 送禮物給 摩押 王 伊磯倫 。</verse>
				<verse number="16">以笏 打一支兩邊利个劍，半公尺長，將它䌈在右腳髀，囥在長衫底下，</verse>
				<verse number="17">然後帶等禮物去見 摩押 王 伊磯倫 ； 伊磯倫 係一個大箍牯。</verse>
				<verse number="18">以笏 獻禮物給佢以後，喊扛禮物个人全部轉去。</verse>
				<verse number="19">佢自家在 吉甲 附近刻石頭个所在轉到 伊磯倫 該位，對佢講：「國王，𠊎有祕密愛㧯你講。」 所以王命令佢塍頭个人：「你等閃開！」佢等就全部退出去。</verse>
				<verse number="20">該時，王單獨坐在屋頂坐涼个樓房底背； 以笏 行過去，對佢講：「𠊎有對上帝來个信息愛㧯你講。」王就企起來。</verse>
				<verse number="21">以笏 就用左手挷出囥在右腳髀个劍，刺入王个肚笥；</verse>
				<verse number="22">將劍連柄全部刺入去，劍被皮肉夾到，連屎也洩出來 。 以笏 將劍留在王个肚笥，</verse>
				<verse number="23">然後出去，將門全部關起來鎖好。</verse>
				<verse number="24">佢離開該位以後，王个僕人來到，看到門全部鎖等，恅到王在底背屙屎。</verse>
				<verse number="25">佢等緊等，等到無葛煞，王還係無開門，就拿鎖匙開門，發現佢等个主人已經橫在地上，死掉了。</verse>
				<verse number="26">該兜僕人拖時間个時， 以笏 就逃走了。佢經過刻石頭个所在，走到 西伊拉 。</verse>
				<verse number="27">到 以法蓮 山區个 西伊拉 以後，佢歕羊角召集 以色列 人準備相㓾。佢帶領 以色列 人下山，</verse>
				<verse number="28">命令佢等講：「跈𠊎來！上主將你等个仇敵 摩押 人交在你等手中了。」佢等就跈 以笏 下山，佔領 約旦 河渡船頭，攔等 摩押 人，毋准敵人過河。</verse>
				<verse number="29">該日，佢等㓾掉 摩押 精兵一萬人，連一個也無被佢走掉。</verse>
				<verse number="30">該日， 以色列 人打贏 摩押 。所以這地方就太平八十年。</verse>
				<verse number="31">以笏 以後，有 亞拿 个孻仔 珊迦 ；佢用一支逐牛个竻棍打死六百個 非利士 人，也拯救 以色列 。</verse>
			</chapter>
			<chapter number="4">
				<verse number="1">以笏 死後， 以色列 人民又行上主看做邪惡个事，</verse>
				<verse number="2">所以上主將佢等交在統治 夏瑣 城个 迦南 王 耶賓 个手中。 耶賓 个元帥係 西西拉 ，住在外邦人个 夏羅設 。</verse>
				<verse number="3">耶賓 有九百輛鐵戰車；佢非常殘暴，欺負壓迫 以色列 人二十年。後來 以色列 人民求喊上主幫助。</verse>
				<verse number="4">有一個女先知名安到 底波拉 ；姖係 拉比多 个𡜵娘，該時做 以色列 个士師。</verse>
				<verse number="5">在 以法蓮 山區 拉瑪 㧯 伯特利 中間有一頭棕樹， 底波拉 常常坐在該棕樹下； 以色列 人民有事情就到該位請姖主持公道。</verse>
				<verse number="6">有一日，姖派人到 拿弗他利 个 基低斯 城去喊 亞比挪菴 个孻仔 巴拉 來，對佢講：「上主 — 以色列 个上帝命令你講：『你愛對 拿弗他利 㧯 西布倫 支族中召集一萬人，帶領佢等到 他泊 山。</verse>
				<verse number="7">𠊎愛引誘 耶賓 个元帥 西西拉 帶領戰車㧯軍隊去 基順 河㧯你相㓾，總係𠊎愛將佢交在你手中。』」</verse>
				<verse number="8">巴拉 應姖講：「若係你㧯𠊎共下去，𠊎就去；你毋㧯𠊎共下去，𠊎就毋去。」</verse>
				<verse number="9">底波拉 講：「好啊，𠊎㧯你共下去；總係你打贏乜無功勞，因為上主愛將 西西拉 交在一個婦人家个手中。」所以 底波拉 㧯 巴拉 共下出發去 基低斯 。</verse>
				<verse number="10">巴拉 召集 西布倫 㧯 拿弗他利 支族个人到 基低斯 ，有一萬人跈等佢。 底波拉 乜㧯佢共下去。</verse>
				<verse number="11">該時， 基尼 人 希百 在 基低斯 附近 撒拿音 个橡樹堘搭帳篷。佢已經離開其他个 基尼 人；佢等係 摩西 个妻舅仔 何巴 个後代。</verse>
				<verse number="12">西西拉 聽到 亞比挪菴 个孻仔 巴拉 已經到 他泊 山頂，</verse>
				<verse number="13">佢就聚集九百輛鐵戰車㧯所有个軍隊，派佢等對外邦人个 夏羅設 到 基順 河去。</verse>
				<verse number="14">底波拉 對 巴拉 講：「好出戰了，上主在頭前帶領你！今晡日，上主已經將 西西拉 交在你个手中。」所以 巴拉 帶領一萬人對 他泊 山下去。</verse>
				<verse number="15">巴拉 个軍隊發動攻擊个時，上主將 西西拉 㧯佢所有个鐵戰車㧯軍隊打到亂跤跤。 西西拉 下車，行路逃走。</verse>
				<verse number="16">巴拉 追打佢等个軍隊㧯鐵戰車，一直追到外邦人个 夏羅設 。 西西拉 全軍倒在刀下，連一儕也無賸。</verse>
				<verse number="17">單淨 西西拉 行路逃走，到 基尼 人 希百 个𡜵娘 雅億 个帳篷，因為 夏瑣 王 耶賓 㧯 希百 家盡好。</verse>
				<verse number="18">雅億 出來迎接 西西拉 ，對佢講：「大人啊，請入𠊎帳篷來，毋使驚。」 西西拉 就入去； 雅億 用被骨將佢蓋等。</verse>
				<verse number="19">西西拉 對姖講：「拜託你給兜水𠊎啉，𠊎嘴當燥。」 雅億 打開一皮袋牛乳給佢啉，然後再將佢囥起來。</verse>
				<verse number="20">西西拉 對 雅億 講：「拜託你企在帳篷門口。若有人來問你：『有人在這位麼？』你愛講：『無』。」</verse>
				<verse number="21">西西拉 非常𤸁，一橫落去就睡掉。 希百 个𡜵娘 雅億 拿一支鎚仔㧯一支固定帳篷个釘仔，偷偷仔行到 西西拉 身邊，將釘仔釘入佢个太陽穴，穿到地泥底背。 西西拉 就死掉。</verse>
				<verse number="22">巴拉 來追 西西拉 ； 雅億 出來迎接，對佢講：「請入來，𠊎給你看你愛尋个人。」 巴拉 跈姖入去，看到 西西拉 死在地上，有一支釘仔穿過佢个頭那。</verse>
				<verse number="23">該日，上帝使 以色列 人征服 迦南 王 耶賓 。</verse>
				<verse number="24">對恁樣， 以色列 人越來越強大，贏過 迦南 王 耶賓 ，直到將佢消滅。</verse>
			</chapter>
			<chapter number="5">
				<verse number="1">該日， 底波拉 㧯 亞比挪菴 个孻仔 巴拉 唱這首歌：</verse>
				<verse number="2">愛頌讚上主！ 以色列 个軍長決心相㓾， 人民自願從軍。</verse>
				<verse number="3">君王啊，你等愛聽！ 領袖啊，側耳來聽！ 𠊎愛向上主彈琴唱歌， 愛歌頌上主 — 以色列 个上帝。</verse>
				<verse number="4">上主啊！你離開 西珥 山， 你對 以東 出發， 大地緊顫，天頂落雨， 雲層倒水。</verse>
				<verse number="5">在 西奈 个上主 — 以色列 个上帝面前， 群山全部緊顫。</verse>
				<verse number="6">在 亞拿 个孻仔 珊迦 个時代， 在 雅億 个日仔， 生理人毋敢經過這位， 出外人捩到別條路去。</verse>
				<verse number="7">底波拉 啊， 以色列 个村莊無人敢住， 逐所在空空，直到你來； 你來做 以色列 个阿姆。</verse>
				<verse number="8">以色列 換新个神明， 城門就有戰爭。 四萬 以色列 人中， 看毋到盾牌㧯槍。</verse>
				<verse number="9">𠊎向 以色列 个指揮官忠心， 支持 以色列 人个志願軍。 愛頌讚上主！</verse>
				<verse number="10">你等騎白驢个、坐在馬鞍頂个、 行路个全部愛傳揚。</verse>
				<verse number="11">聽啊，在井堘有人 傳出歡呼！ 佢等傳講上主个勝利； 慶祝 以色列 得勝轉來。 該時上主个子民行到城門歡呼：</verse>
				<verse number="12">底波拉 啊，興起興起！ 興起唱歌，勇敢向前！ 亞比挪菴 个孻仔 巴拉 啊，䟘起來！ 將你捉到个人帶走！</verse>
				<verse number="13">忠信个人向佢等个領袖行等去； 上主个子民到佢 面前準備相㓾。</verse>
				<verse number="14">佢等對 以法蓮 來 ，進入山壢 ， 跈在 便雅憫 支族人个後背。 有指揮官對 瑪吉 出來； 有軍官對 西布倫 下來。</verse>
				<verse number="15">以薩迦 个領袖㧯 底波拉 共下來； 以薩迦 來， 巴拉 也來； 佢等跈佢進入山壢。 總係 呂便 支族意見講毋和； 佢等無法度做決定。</verse>
				<verse number="16">你等做麼介跈在羊群後背？ 愛聽牧人喊群羊係麼？ 係啊， 呂便 支族意見講毋和； 佢等無法度決定。</verse>
				<verse number="17">基列 人住在 約旦 河東片； 但 支族做麼介留在船頂？ 亞設 支族住在海滣； 佢等在海港滣停跎。</verse>
				<verse number="18">總係 西布倫 人敢拚命毋驚死； 拿弗他利 人在戰場也係恁樣。</verse>
				<verse number="19">在 米吉多 河滣个 他納 ， 眾王全部來這位相㓾。 迦南 所有个王來戰爭； 總係佢等無帶走銀仔。</verse>
				<verse number="20">星仔對天頂來援助， 飛過來攻打 西西拉 。</verse>
				<verse number="21">基順 个河水沖等下 — 急流將佢等打走。 𠊎愛前進，拚命向前！</verse>
				<verse number="22">該時戰馬猋等走， 腳蹄聲的的躂躂。</verse>
				<verse number="23">上主个天使講：愛咒詛 米羅斯 ， 愛大大來咒詛住在該位个人民。 佢等無來幫助上主， 毋來𢯭手攻打強敵。</verse>
				<verse number="24">基尼 人 希百 个𡜵娘 雅億 ， 在婦人家中最受人稱讚； 比住帳篷个婦女較蒙福。</verse>
				<verse number="25">西西拉 向姖討水，姖給佢牛乳； 姖用貴重个碗裝乳油給佢。</verse>
				<verse number="26">雅億 左手拿帳篷个釘仔， 右手拿等師傅用个鎚仔； 姖盡錘 西西拉 ，打爛佢个頭那， 刺穿佢个太陽穴。</verse>
				<verse number="27">在 雅億 腳前， 西西拉 跔起來， 又橫轉去，橫到直直； 西西拉 跔起來，又橫轉去， 佢就斷氣。</verse>
				<verse number="28">西西拉 个阿姆緊看窗門外背； 在格仔窗門个後背大聲緊問： 佢个戰車做麼介恁久吂轉？ 佢个戰馬做麼介還毋轉來？</verse>
				<verse number="29">姖最聰明个宮女安慰姖， 姖也係自家問自家應講：</verse>
				<verse number="30">佢等一定係搶當多東西，當分戰利品， 無一定一個兵仔分到一、兩個細妹仔。 可能 西西拉 分到个係彩色个外衫； 佢定著會帶繡花圍巾轉來給王后。</verse>
				<verse number="31">上主啊，願你个仇敵全部恁樣滅亡！ 願你个朋友像日頭恁光明！ 恁樣這地方太平四十年。</verse>
			</chapter>
			<chapter number="6">
				<verse number="1">以色列 人民又行上主看做邪惡个事，所以上主將佢等交在 米甸 人手中七年。</verse>
				<verse number="2">米甸 人比 以色列 人強壯； 以色列 人為到逃避 米甸 人就在山肚為自家挖山窿起山寨。</verse>
				<verse number="3">逐擺 以色列 人委種， 米甸 人就聯合 亞瑪力 人㧯東方个遊牧民族來攻打佢等。</verse>
				<verse number="4">這兜敵人對等佢等安營，損壞土產一直到南部个 迦薩 一帶。佢等搶走所有个羊群、牛群㧯驢仔，無留下一些仔東西給 以色列 人做食物。</verse>
				<verse number="5">佢等像一大群草蜢恁多，帶等牛群、帳篷共下逐等來；佢等个駱駝也多到算毋掉。佢等入到國內，毀壞全地。</verse>
				<verse number="6">以色列 人無法度抵抗 米甸 人，變做盡窮苦，就求喊上主。</verse>
				<verse number="7">以色列 人求喊上主幫助佢等抵抗 米甸 人，</verse>
				<verse number="8">上主就派一個先知到佢等該位，向佢等傳講上主 — 以色列 上帝个信息，講：「𠊎識帶領你等脫離 埃及 ，離開做奴才个地方。</verse>
				<verse number="9">𠊎對 埃及 人手中將你等救出來；𠊎也救你等離開所有欺負你等个人个手，在你等前進个時將佢等逐走，將佢等个土地賜給你等。</verse>
				<verse number="10">𠊎識㧯你等講，𠊎係上主 — 你等个上帝。你等住在 亞摩利 人个土地，做毋得拜佢等个神明。總係你等毋聽𠊎講。」</verse>
				<verse number="11">後來，上主个天使來到 俄弗拉 ，坐在 約阿施 屋外个橡樹下； 約阿施 係 亞比以謝 族个人。佢个孻仔 基甸 堵好在醡酒池偷偷仔打麥仔，毋給 米甸 人知。</verse>
				<verse number="12">上主个天使在該位向 基甸 顯現，對佢講：「大能个勇士啊，上主㧯你共下！」</verse>
				<verse number="13">基甸 講：「大人啊，若係上主㧯𠊎等共下，𠊎等樣般會受到這兜苦難呢？𠊎等个祖先識㧯𠊎等講，上主樣般𢱋佢等出 埃及 ，今晡日，該兜神蹟奇事在㖠位呢？上主㧒掉𠊎等，將𠊎等交在 米甸 人手中。」</verse>
				<verse number="14">上主就看等 基甸 ，對佢講：「你愛盡你最大个力量去解救 以色列 離開 米甸 人个手中。敢毋係𠊎親自派你去嗎？」</verse>
				<verse number="15">基甸 應講：「主啊，𠊎愛樣般解救 以色列 呢？𠊎屬 瑪拿西 支族最弱个宗族；𠊎乜係屋下最無用个人。」</verse>
				<verse number="16">上主對佢講：「𠊎一定㧯你共下。你會打贏 米甸 人，就像打贏一個人共樣。」</verse>
				<verse number="17">基甸 應講：「若係你中意𠊎，請給𠊎證據，證明係你親自㧯𠊎講話。</verse>
				<verse number="18">請毋好離開，等𠊎帶禮物擺在你面前。」 上主講：「𠊎會等你轉來。」</verse>
				<verse number="19">所以， 基甸 轉到屋下煮一隻細山羊，又用十公斤麵粉做無酵餅。佢將肉放在籃仔肚，將湯放在鑊仔肚，帶去給橡樹下个天使。</verse>
				<verse number="20">上帝个天使對佢講：「將肉㧯無酵餅放在這垤大石頭頂，將湯倒在頂高。」 基甸 照恁樣做。</verse>
				<verse number="21">上主个天使伸出佢个柺棍仔，棍頭一揬到肉㧯餅，就有火對大石頭噴出來，將肉㧯餅燒掉；上主个天使就毋見掉。</verse>
				<verse number="22">基甸 一知佢所看到个係上主个天使，就著驚講：「至高个上主啊，𠊎慘了，𠊎竟然面對面看到上主个天使！」</verse>
				<verse number="23">上主對佢講：「平安！毋使驚。你毋會死。」</verse>
				<verse number="24">基甸 就在該位為上主起一座祭壇，將它安到「上主賜平安 」。 (這祭壇到今晡日還係在 亞比以謝 族个 俄弗拉 。)</verse>
				<verse number="25">該暗晡，上主㧯 基甸 講：「你愛將若爸个牛牯，就係該七歲大个第二隻牛牯 牽走，也愛拆掉若爸為 巴力 起个祭壇，斬斷祭壇堘頭 亞舍拉 女神个樹𣎴。</verse>
				<verse number="26">你愛在這磐石頂為上主 — 你个上帝起一座整齊妥當个祭壇，用你斬斷个 亞舍拉 樹𣎴做柴，將該第二隻牛牯放在頂高做燒化祭燒掉。」</verse>
				<verse number="27">所以 基甸 帶等十個僕人，遵照上主吩咐佢个去做。佢因為驚屋下人㧯城肚个人，毋敢在日時頭做，所以在暗晡時做。</verse>
				<verse number="28">第二朝晨，城肚个人䟘起來，發現 巴力 个祭壇被人拆掉，它堘頭个 亞舍拉 樹𣎴被人斬斷，該第二隻牛牯在新起个祭壇頂燒掉。</verse>
				<verse number="29">佢等互相問：「這係麼人做个？」佢等去詳細查，探出係 約阿施 个孻仔 基甸 做个。</verse>
				<verse number="30">城肚个人就對 約阿施 講：「將你个孻仔交出來，𠊎等愛㓾死佢！佢拆掉 巴力 个祭壇，斬斷壇堘頭个 亞舍拉 樹𣎴。」</verse>
				<verse number="31">約阿施 應攻擊佢該兜眾人講：「你等想愛代 巴力 辯護、想愛救佢係麼？麼人代 巴力 辯護，天光以前就會死掉。 巴力 若係神，俾佢為自家辯護啊！因為係佢个祭壇被人拆掉！」</verse>
				<verse number="32">所以該日 基甸 被人喊做 耶路‧巴力 ，意思講：「俾 巴力 㧯佢辯護啊！」因為佢拆掉 巴力 个祭壇。</verse>
				<verse number="33">該時， 米甸 人、 亞瑪力 人、㧯東方个遊牧民族全部聯合，過 約旦 河，在 耶斯列 平原安營。</verse>
				<verse number="34">上主个靈遮蓋 基甸 ，佢就歕羊角，召集 亞比以謝 族个人來跈佢。</verse>
				<verse number="35">佢派人到 瑪拿西 全地，召集佢等來跈佢。佢也派人到 亞設 、 西布倫 、㧯 拿弗他利 支族去；佢等也全部來㧯佢會合。</verse>
				<verse number="36">基甸 對上帝講：「你講過你愛用𠊎來解救 以色列 。</verse>
				<verse number="37">恁樣，𠊎放兜羊毛在𠊎等打麥仔个麥場，若係天光朝晨只有羊毛頂有露水，地面係燥个，𠊎就知你愛用𠊎來拯救 以色列 。」</verse>
				<verse number="38">事情攏總照佢所講个發生。 基甸 打早䟘起來，佢撚羊毛，就撚出一碗滿滿个露水來。</verse>
				<verse number="39">基甸 又對上帝講：「請毋好向𠊎發譴，准𠊎再求一擺，俾𠊎用羊毛再試一擺。這擺請使羊毛燥燥，地面反轉全部愛有露水。」</verse>
				<verse number="40">該暗晡，上帝照恁樣去做。第二朝晨，只有羊毛正經燥燥，地面反轉全部係露水。</verse>
			</chapter>
			<chapter number="7">
				<verse number="1">有一日， 耶路‧巴力 — 就係 基甸 — 㧯所有跈佢个人打早䟘起來，在 哈律 泉水滣安營。 米甸 人个營地在山壢肚，在佢等北片，偎近 摩利 山岡。</verse>
				<verse number="2">上主對 基甸 講：「來跈你个人忒多了；若係𠊎將 米甸 人交在佢等手中， 以色列 人會自誇講，該係靠佢等自家个力量打贏个。</verse>
				<verse number="3">這下你愛向人民講：『無膽驚死个人，做得轉去，離開 基列 山。』」結果有兩萬兩千人轉去，總係還有一萬人留下來。</verse>
				<verse number="4">上主又對 基甸 講：「跈你个人還係忒多。帶佢等到水邊去；𠊎愛在該位為你將佢等分開來。若係𠊎㧯你講這個人做得㧯你去，佢就做得去；若係𠊎講這個人無應該去，佢就做毋得去。」</verse>
				<verse number="5">基甸 將跈佢个人帶到水邊；上主對佢講：「你愛將該兜像狗恁樣用舌乸舐水个㧯該兜跪下啉水个分開來。」</verse>
				<verse number="6">有三百個人用手捧水來舐，其他个全部跪下伏等啉。</verse>
				<verse number="7">上主對 基甸 講：「𠊎愛用這三百個用手捧水舐个人救你等，將 米甸 人交在你等手中；喊其他个人全部轉到自家个所在去。」</verse>
				<verse number="8">所以 基甸 留下三百個人保管補給品㧯號角，喊其他个 以色列 人解散轉到自家个帳篷去。 米甸 人个營地在佢等下背个山壢肚。</verse>
				<verse number="9">該日暗晡，上主命令 基甸 ：「䟘起來！下去攻打 米甸 人个營地；𠊎已經將佢等交在你个手中。</verse>
				<verse number="10">若係你毋敢去攻打，你就先帶你个僕人 普拉 下去到 米甸 人个營該位。</verse>
				<verse number="11">你聽佢等个講話，你就會有勇氣下去攻打了。」所以 基甸 帶等佢个僕人去到敵人營地个邊堘。</verse>
				<verse number="12">米甸 人、 亞瑪力 人、㧯所有東方个遊牧民族遍滿在山壢肚，像一群草蜢恁多；佢等个駱駝多到像海滣个沙仔。</verse>
				<verse number="13">基甸 去到个時，聽到有人對佢个朋友講起所發个夢。該人講：「𠊎發夢看到一垤大麥餅輪入𠊎等 米甸 人个營地，撞到帳篷，帳篷就橫到揙轉來。」</verse>
				<verse number="14">佢个朋友應講：「這無別个意思，一定係 以色列 人 約阿施 个孻仔 基甸 个刀仔！上帝已經將 米甸 人㧯𠊎等个軍隊全部交在佢个手中。」</verse>
				<verse number="15">聽到該儕个夢㧯解釋以後， 基甸 就跪下來敬拜上帝。佢轉到 以色列 營肚，對佢等講：「䟘起來！上主將 米甸 个軍隊交在你等手中了！」</verse>
				<verse number="16">基甸 就將三百個人分做三隊，將一支號角㧯一隻底背有火把个罌仔交給逐儕人。</verse>
				<verse number="17">佢㧯佢等講：「𠊎到敵人營地邊堘个時，你等看𠊎恁樣做，你等就跈𠊎做。</verse>
				<verse number="18">當𠊎㧯跈𠊎个人歕號角个時，你等在營地四周圍也全部愛歕號角，然後大聲喊：『為上主！為 基甸 ！』」</verse>
				<verse number="19">基甸 㧯佢帶領个一百人，在半夜以前，衛兵換班以後，來到營地邊堘。佢等歕號角，打爛手中个罌仔；</verse>
				<verse number="20">其他兩隊也照恁樣做。佢等左手擎火把，右手拿號角，大聲喊：「為上主㓾敵人！為 基甸 㓾敵人！」</verse>
				<verse number="21">佢等在營地四周圍企在逐儕个位仔掌等；敵軍就亂撞、大聲喊、逃走。</verse>
				<verse number="22">三百人歕號角个時，上主使敵軍自家人㓾自家人。佢等向 西利拉 方向逃走，一直走到 伯‧示他 㧯 他巴 附近个 亞伯‧米何拉 。</verse>
				<verse number="23">拿弗他利 、 亞設 㧯 瑪拿西 全地个 以色列 人聚集，去逐 米甸 人。</verse>
				<verse number="24">基甸 派人到 以法蓮 山區逐所在，對佢等講：「下來攻打 米甸 人！掌等 約旦 河个渡船頭，直到 伯‧巴拉 ，防止 米甸 人過河。」 以法蓮 所有个人就集合起來，掌等 約旦 河渡船頭，一直到 伯‧巴拉 。</verse>
				<verse number="25">佢等捉到 米甸 人个兩個領袖 — 俄立 㧯 西伊伯 。佢等在 俄立 巖㓾死 俄立 ，在 西伊伯 醡酒池㓾死 西伊伯 。佢等繼續追 米甸 人，又將 俄立 㧯 西伊伯 个頭那帶到 約旦 河東片給 基甸 。</verse>
			</chapter>
			<chapter number="8">
				<verse number="1">以法蓮 人對 基甸 講：「你去攻打 米甸 人个時，做麼介毋喊𠊎等？你做麼介恁樣對待𠊎等？」佢等大聲責備 基甸 。</verse>
				<verse number="2">基甸 㧯佢等講：「𠊎所做到个比毋得你等所做个；你等 以法蓮 人所拈到个葡萄比𠊎等 亞比以謝 人个上等葡萄還較好呢！</verse>
				<verse number="3">上帝將 米甸 人个領袖 俄立 㧯 西伊伯 交在你等手中；𠊎所做个樣做得㧯你等比呢？」佢等聽到 基甸 這話就無再發譴了。</verse>
				<verse number="4">基甸 㧯跈佢个三百個人來到 約旦 河，過河个時，雖然佢等全部當𤸁，還係繼續追殺敵人。</verse>
				<verse number="5">佢等到 疏割 ， 基甸 對城肚个人講：「請拿兜餅仔給跈𠊎个人食，因為佢等當𤸁。𠊎還愛去追殺 米甸 王 西巴 㧯 撒慕拿 。」</verse>
				<verse number="6">總係 疏割 个領袖講：「𠊎等樣愛拿餅仔給你个軍隊？你還吂捉到 西巴 㧯 撒慕拿 ！」</verse>
				<verse number="7">基甸 講：「好！上主將 西巴 㧯 撒慕拿 交給𠊎以後，𠊎愛拿曠野个竻仔來打傷你等。」</verse>
				<verse number="8">基甸 向前行，來到 比努伊勒 ，向該位个人提出共樣个要求。該位个人所應个㧯 疏割 人共樣。</verse>
				<verse number="9">所以 基甸 對 比努伊勒 个人講：「𠊎會平平安安倒轉來；該時，𠊎愛拆掉這座城堡！」</verse>
				<verse number="10">該時， 西巴 㧯 撒慕拿 並佢等个軍隊在 加各 。歸隻東方个遊牧民族只賸到一萬五千個士兵，已經有十二萬人戰死。</verse>
				<verse number="11">基甸 對 挪巴 㧯 約比哈 東片、對遊牧民族个道路前進； 米甸 个軍隊完全無防備， 基甸 一下仔就打贏佢等。</verse>
				<verse number="12">米甸 人个兩個王 — 西巴 㧯 撒慕拿 走掉去； 基甸 追佢等，將佢等捉到，使佢等全軍四散。</verse>
				<verse number="13">約阿施 个孻仔 基甸 對戰場轉來，經過 希列斯 山个路口，</verse>
				<verse number="14">捉到一個 疏割 个後生人，審問佢。佢將 疏割 領袖㧯長老个名單寫給 基甸 ，總共七十七個人。</verse>
				<verse number="15">基甸 到 疏割 ，對城肚个人講：「還記得你等識拒絕幫助𠊎麼？你等講𠊎無捉到 西巴 㧯 撒慕拿 ，所以毋將餅仔給𠊎當𤸁个軍隊。這下你等看！佢兩儕在這位！」</verse>
				<verse number="16">所以 基甸 將 疏割 个領袖捉起來，用曠野个竻仔刑罰佢等。</verse>
				<verse number="17">佢也拆掉 比努伊勒 个城堡，㓾掉城肚个人。</verse>
				<verse number="18">基甸 審問 西巴 㧯 撒慕拿 ：「你等在 他泊 山㓾死个人係麼介樣仔？」 佢等應講：「佢等當像你，逐儕全部像王子。」</verse>
				<verse number="19">基甸 講：「佢等係𠊎个兄弟，㧯𠊎共阿姆𫱔个。𠊎識指等永生个上主發誓，若係你等無㓾掉佢等，𠊎就毋㓾你等。」</verse>
				<verse number="20">所以 基甸 對佢大个孻仔 益帖 講：「去將佢等㓾掉！」總係 益帖 盡驚，無挷出刀，因為佢還係一個細阿哥仔。</verse>
				<verse number="21">西巴 㧯 撒慕拿 對 基甸 講：「你親身來㓾𠊎等啊！你正有這力量。」所以 基甸 㓾掉佢等，將佢等駱駝頸項月型个妝飾品拿走。</verse>
				<verse number="22">後來， 以色列 人民對 基甸 講：「請做𠊎等个統治者；你㧯你个子孫全部做𠊎等个統治者，因為你救𠊎等脫離 米甸 人。」</verse>
				<verse number="23">基甸 講：「𠊎毋做你等个統治者；𠊎个孻仔也毋做你等个統治者。上主愛統治你等。」</verse>
				<verse number="24">佢又講：「𠊎只要求你等一件事，請將你等逐儕所搶來个耳環交給𠊎。」 (原來 米甸 人像其他 以實瑪利 人共樣，全部戴金耳環。)</verse>
				<verse number="25">民眾應講：「𠊎等當願意給你。」佢等就攤開一領外衫，逐個人將搶來个耳環㧒落去。</verse>
				<verse number="26">基甸 收集大約二十公斤重个金耳環，另外還有 米甸 王戴个妝飾品、脖鍊㧯紫色衫褲，並駱駝頸項个鍊仔。</verse>
				<verse number="27">基甸 用這兜金仔做一個偶像 ，放在佢个家鄉 俄弗拉 。後來所有个 以色列 人離開上帝、行姦淫，到該位去拜該偶像；這就成做 基甸 㧯佢屋下人个陷阱。</verse>
				<verse number="28">恁樣， 米甸 人被 以色列 人打輸了，擎頭毋起。國內太平四十年，直到 基甸 過身。</verse>
				<verse number="29">約阿施 个孻仔 基甸 轉故鄉，住在屋下。</verse>
				<verse number="30">基甸 有七十個孻仔，因為佢有當多𡜵娘㧯細姐。</verse>
				<verse number="31">佢在 示劍 有一個細姐；姖也𫱔一個孻仔， 基甸 㧯佢安名 亞比米勒 。</verse>
				<verse number="32">約阿施 个孻仔 基甸 盡長命正過身，葬在 亞比以謝 族个 俄弗拉 ，厥爸 約阿施 个墳墓。</verse>
				<verse number="33">基甸 一過身， 以色列 人又離開上帝、行姦淫，去拜該兜 巴力 。佢等認 巴力‧彼利土 做佢等个神明。</verse>
				<verse number="34">以色列 人無紀念上主 — 佢等个上帝，就係救佢等離開四周圍仇敵个上帝。</verse>
				<verse number="35">佢等乜無因為 耶路‧巴力 — 就係 基甸 — 為 以色列 人所做个好事來好款待佢屋下个人。</verse>
			</chapter>
			<chapter number="9">
				<verse number="1">基甸 个孻仔 亞比米勒 到 示劍 ；佢該兜母舅住在該位。佢要求母舅㧯佢姐公全家个人講：</verse>
				<verse number="2">「請你等問 示劍 人：『你等愛麼人來治理你等？ 基甸 所有个七十個孻仔呢？抑係一個人呢？』愛記得，𠊎 — 亞比米勒 係你等个骨肉哦！」</verse>
				<verse number="3">佢該兜母舅就代佢去問 示劍 人； 示劍 人決定跈 亞比米勒 ，因為佢等講：「佢係𠊎等个兄弟。」</verse>
				<verse number="4">佢等對 巴力‧彼利土 个廟肚拿出七十隻銀幣給 亞比米勒 ；佢用這錢請一群鱸鰻仔來跈佢。</verse>
				<verse number="5">佢轉到 俄弗拉 厥爸屋下，在一垤大石頭頂將 基甸 个七十個孻仔，就係佢該兜兄弟，全部㓾掉。總係 基甸 最細个孻仔 約坦 囥起來，無被人㓾死。</verse>
				<verse number="6">所有个 示劍 人㧯 米羅 人聯合起來，在 示劍 該頭聖橡樹邊，立 亞比米勒 做王。</verse>
				<verse number="7">約坦 一聽到這事就到 基利心 山，企在山頂，大聲向佢等喊講：「 示劍 人啊！你等聽𠊎講，上帝正會聽你等个祈求！</verse>
				<verse number="8">頭擺，森林肚个樹仔愛立一個王。佢等對橄欖樹講：『請你做𠊎等个王。』</verse>
				<verse number="9">橄欖樹應講：『𠊎敢做得停止生產服事神明㧯供給人个橄欖油、去統治你等麼？』</verse>
				<verse number="10">樹仔對無花果樹講：『請你做𠊎等个王。』</verse>
				<verse number="11">無花果樹應講：『𠊎敢做得停止結甘甜个果子、去統治你等麼？』</verse>
				<verse number="12">樹仔對葡萄樹講：『請你做𠊎等个王。』</verse>
				<verse number="13">葡萄樹應講：『𠊎敢做得停止使神明㧯人歡喜个酒、去統治你等麼？』</verse>
				<verse number="14">所有个樹仔對竻仔講：『請你做𠊎等个王。』</verse>
				<verse number="15">竻仔應講：『若係你等誠心愛立𠊎做你等个王，就來偎靠𠊎个庇蔭，𠊎會保護你等；若無，有火會對竻仔出來，將 黎巴嫩 个香柏樹燒淨淨。』」</verse>
				<verse number="16">約坦 繼續講：「這下，你等正經誠心誠意立 亞比米勒 做王係麼？你等敢毋係應當紀念 基甸 ，照佢个功勞好款待佢屋下个人？</verse>
				<verse number="17">你等毋記得吾爸帶領你等相㓾，拚生拚死解救你等離開 米甸 人，係麼？</verse>
				<verse number="18">無想到，今晡日你等竟然悖逆吾爸个家族；你等在一垤大石頭頂㓾掉佢七十個孻仔。因為佢奴婢个孻仔 亞比米勒 係你等个兄弟，你等就立佢做 示劍 王。</verse>
				<verse number="19">你等今晡日若係正經誠心誠意愛恁樣款待 基甸 㧯厥屋下人，𠊎祝福你等㧯 亞比米勒 彼此因為對方得到快樂；</verse>
				<verse number="20">若毋係恁樣，願 亞比米勒 放火燒淨 示劍 人㧯 米羅 人，也願 示劍 人㧯 米羅 人放火燒掉 亞比米勒 。」</verse>
				<verse number="21">約坦 因為驚厥哥 亞比米勒 ，就逃走，來到 比珥 ，住在該位。</verse>
				<verse number="22">亞比米勒 統治 以色列 三年。</verse>
				<verse number="23">後來上帝使 亞比米勒 㧯 示劍 人有冤仇， 示劍 人就悖逆 亞比米勒 。</verse>
				<verse number="24">這就係愛報應 亞比米勒 㧯幫助佢㓾死 基甸 七十個孻仔个 示劍 人。</verse>
				<verse number="25">示劍 人派人在逐隻山頂埋伏，愛㓾 亞比米勒 。佢等搶所有經過這條路个人。有人將這事㧯 亞比米勒 講。</verse>
				<verse number="26">以別 个孻仔 迦勒 㧯佢該兜兄弟來到 示劍 ； 示劍 人全部信任佢。</verse>
				<verse number="27">佢等到葡萄園摘葡萄、焗酒、辦筵席。佢等去到佢等个神廟，在該位又食又啉，咒罵 亞比米勒 。</verse>
				<verse number="28">以別 个孻仔 迦勒 講：「𠊎等 示劍 人係麼介人？做麼介愛服事 亞比米勒 ？佢算麼介？佢係 基甸 个孻仔定定！佢个助手敢毋係 西布勒 。𠊎等做麼介愛服事佢呢？愛忠心服事 示劍 个阿爸 哈抹 个後代！</verse>
				<verse number="29">希望這人民俾𠊎來帶領！𠊎就會除掉 亞比米勒 ！𠊎會㧯佢講 ：『加派兜軍隊，出來相㓾啊！』」</verse>
				<verse number="30">示劍 城个領袖 西布勒 聽到 以別 个孻仔 迦勒 个話，非常發譴。</verse>
				<verse number="31">佢派使者到 亞魯瑪 向 亞比米勒 報告：「 以別 个孻仔 迦勒 㧯佢个兄弟來到 示劍 ，煽動城肚个人反對你。</verse>
				<verse number="32">所以，你愛在暗晡時帶領部下埋伏在城外，</verse>
				<verse number="33">天光朝晨，天一光你就來攻打這城。 迦勒 㧯佢个群眾出來相㓾个時，你愛盡全力攻打佢！」</verse>
				<verse number="34">所以， 亞比米勒 在暗晡時帶領部下，分做四隊，埋伏在 示劍 城外。</verse>
				<verse number="35">亞比米勒 㧯佢个部下一看到 迦勒 出來，企在城門口，佢等就對埋伏个地方出來。</verse>
				<verse number="36">迦勒 看到，就對 西布勒 講：「你看，有人對山頂下來了！」 西布勒 應講：「你看毋著了；你將山个陰影看做人！」</verse>
				<verse number="37">迦勒 又講：「你看，有人對山中央下來；另外有一隊對『卜卦个橡樹』該條路過來！」</verse>
				<verse number="38">西布勒 對佢講：「你以前敢毋係歕雞頦講：『 亞比米勒 係麼人？𠊎等樣愛服事佢？』這兜人就係你所看輕个。這下，你出去相㓾啊！」</verse>
				<verse number="39">所以 迦勒 帶領 示劍 人出去㧯 亞比米勒 相㓾。</verse>
				<verse number="40">亞比米勒 追打 迦勒 ， 迦勒 就逃走；受傷橫落去个人當多，透路直到城門。</verse>
				<verse number="41">亞比米勒 住在 亞魯瑪 。 西布勒 將 迦勒 㧯佢該兜兄弟全部逐出 示劍 ，毋准佢等再住在該位。</verse>
				<verse number="42">第二日， 亞比米勒 發現 示劍 人計劃徙到城外，</verse>
				<verse number="43">佢就將部下分做三隊，埋伏在城外。佢一看到民眾離開城肚，就對埋伏个地方出來㓾佢等。</verse>
				<verse number="44">亞比米勒 帶領一隊部下衝過去看守城門；另外兩隊衝到城外，㓾掉城外个民眾。</verse>
				<verse number="45">亞比米勒 歸日攻打城，最後將城打下，㓾掉城肚个人民，拆掉該城，又委鹽在地上。</verse>
				<verse number="46">在 示劍 城堡底背个領袖聽到這事，就囥入 伊勒‧彼利土 廟个地窿肚。</verse>
				<verse number="47">有人將這事㧯 亞比米勒 講，</verse>
				<verse number="48">佢就帶部下到 撒們 山去。 亞比米勒 拿一支斧頭剁一枝大樹桍，擎在肩頭頂，佢也喊部下趕緊照等做。</verse>
				<verse number="49">所以逐個人剁一枝大樹枝，跈 亞比米勒 ，將樹枝堆在地窿周圍。佢等放火燒地窿， 示劍 城堡个人全部燒死掉，男女約有一千人。</verse>
				<verse number="50">接等， 亞比米勒 到 提備斯 圍攻，佔領這城。</verse>
				<verse number="51">城中有一座堅固个塔；城肚所有个人，無論男女，全部逃入塔肚。佢等將門關好，走到塔頂。</verse>
				<verse number="52">亞比米勒 攻打這塔，行近門口愛放火燒塔。</verse>
				<verse number="53">有一個婦人家㧹一垤大磨石，打到 亞比米勒 个頭那，打爛佢个頭那殼；</verse>
				<verse number="54">佢趕緊喊該代佢拿武器个後生人來，對佢講：「刀仔挷出來㓾𠊎啊！𠊎無愛被人講𠊎係被一個婦人家㓾死个。」所以該後生人用刀仔刺穿 亞比米勒 ，佢就死掉。</verse>
				<verse number="55">以色列 人看到 亞比米勒 死掉，就全部轉去自家个所在。</verse>
				<verse number="56">恁樣，上帝報應 亞比米勒 對厥爸所做个壞事，因為佢㓾掉自家个兄弟七十個人。</verse>
				<verse number="57">上帝也使 示劍 人為自家个罪惡受盡痛苦； 基甸 个孻仔 約坦 咒罵佢等个話歸到佢等身上了。</verse>
			</chapter>
			<chapter number="10">
				<verse number="1">亞比米勒 死後， 朵多 个孫仔、 普瓦 个孻仔 陀拉 興起，來解救 以色列 人。佢係 以薩迦 支族人，住在 以法蓮 山區个 沙密 。</verse>
				<verse number="2">陀拉 做 以色列 个士師二十三年。佢死掉，埋葬在 沙密 。</verse>
				<verse number="3">陀拉 死後，有 基列 人 睚珥 興起，做 以色列 个士師二十二年。</verse>
				<verse number="4">佢有三十個孻仔，騎三十隻驢仔。佢等在 基列 一帶有三十座城；到今晡日這兜城還喊做 哈倭特‧睚珥 。</verse>
				<verse number="5">睚珥 死掉，葬在 加們 。</verse>
				<verse number="6">以色列 人民又行上主看做邪惡个事。佢等拜該兜 巴力 㧯 亞斯她錄 ，還有 敘利亞 、 西頓 、 摩押 、 亞捫 、 非利士 个神明。佢等離開上主，毋敬拜佢。</verse>
				<verse number="7">上主向 以色列 人發譴，將佢等交在 非利士 人㧯 亞捫 人个手中。</verse>
				<verse number="8">佢等迫害並欺負住在 約旦 河東片、 亞摩利 人境內、 基列 一帶个 以色列 人，總共十八年，</verse>
				<verse number="9">亞捫 人又過 約旦 河去攻打 猶大 、 便雅憫 、㧯 以法蓮 支族。 以色列 人就堵到極大个困苦。</verse>
				<verse number="10">所以， 以色列 人求喊上主，講：「𠊎等得罪你；𠊎等離開𠊎等个上帝去拜該兜 巴力 。」</verse>
				<verse number="11">上主應講：「頭擺 埃及 人、 亞摩利 人、 亞捫 人、 非利士 人、</verse>
				<verse number="12">西頓 人、 亞瑪力 人、㧯 馬雲 人欺負你等，你等求喊𠊎，敢講𠊎無解救你等係麼？</verse>
				<verse number="13">總係，你等還係離開𠊎，去拜別个神明！所以，𠊎無愛再救你等了。</verse>
				<verse number="14">你等去求喊你等所選个神明啊！你等堵到災難个時，俾佢等來救你等啊！」</verse>
				<verse number="15">總係， 以色列 人對上主講：「𠊎等已經犯到罪了；由在你愛樣般對待𠊎等！總係求你今晡日解救𠊎等！」</verse>
				<verse number="16">接等，佢等就除掉外國个神明，敬拜上主。上主因 以色列 所受个困苦心肝盡艱苦。</verse>
				<verse number="17">該時， 亞捫 人个軍隊在 基列 安營，準備相㓾。 以色列 人也聚集，在 基列 个 米斯巴 安營。</verse>
				<verse number="18">住在 基列 該片个 以色列 人㧯逐支族个領袖攏總恁樣講：「麼人先去攻打 亞捫 人，麼人就做 基列 人民个領袖。」</verse>
			</chapter>
			<chapter number="11">
				<verse number="1">基列 人 耶弗他 係一個勇敢个戰士。厥爸係 基列 ，總係厥姆係妓女。</verse>
				<verse number="2">基列 㧯𡜵娘𫱔幾個孻仔；這兜孻仔長大以後，就將 耶弗他 逐出家門。佢等對佢講：「你做毋得承接𠊎等阿爸个家業，因為你係妓女𫱔个。」</verse>
				<verse number="3">恁樣 耶弗他 離開佢个兄弟，住在 陀伯 。在該位有一群鱸鰻仔聚集來跈佢。</verse>
				<verse number="4">一站時間以後， 亞捫 人攻打 以色列 人。</verse>
				<verse number="5">戰爭一開始， 基列 該兜長老就到 陀伯 請 耶弗他 轉來。</verse>
				<verse number="6">佢等對佢講：「請你做𠊎等个元帥，帶領𠊎等㧯 亞捫 人相㓾。」</verse>
				<verse number="7">耶弗他 應講：「以前你等敢毋係惱𠊎、逐𠊎離開吾爸个屋下？這下你等堵到災難，樣般又來尋𠊎？」</verse>
				<verse number="8">基列 該兜長老對 耶弗他 講：「這下𠊎等轉來尋你，愛你帶領𠊎等㧯 亞捫 人相㓾；恁樣，你就會做所有 基列 人民个領袖。」</verse>
				<verse number="9">耶弗他 講：「你等愛𠊎轉去㧯 亞捫 人相㓾，若係上主使𠊎打贏，𠊎就做你等个領袖。」</verse>
				<verse number="10">佢等講：「上主為𠊎等做證，𠊎等一定會照你个話去做。」</verse>
				<verse number="11">所以 耶弗他 㧯 基列 該兜長老轉去；民眾就立佢做佢等个領袖㧯元帥。 耶弗他 在 米斯巴 將自家个話在上主面前講出來。</verse>
				<verse number="12">耶弗他 派使者到 亞捫 王該位，講：「你㧯𠊎等鬥麼介？你做麼介侵佔𠊎等个土地？」</verse>
				<verse number="13">亞捫 王應 耶弗他 派來个使者，講：「 以色列 人離開 埃及 以後佔領𠊎个土地，對 亞嫩 山壢到 雅博 山壢，直到 約旦 河。這下，你等愛乖乖將這垤地交還給𠊎。」</verse>
				<verse number="14">耶弗他 又派使者去見 亞捫 王，</verse>
				<verse number="15">對佢講：「 以色列 人並無侵佔 摩押 人抑係 亞捫 人个土地。</verse>
				<verse number="16">其實， 以色列 人離開 埃及 以後，經過曠野到 紅海 ，然後到 加低斯 。</verse>
				<verse number="17">該時，佢等派使者去請求 以東 王准佢等經過佢个土地，總係 以東 王毋准。佢等也派使者去請求 摩押 王准佢等經過佢个土地，佢也毋准。所以 以色列 人留在 加低斯 。</verse>
				<verse number="18">「後來，佢等向前行過曠野，𫟧過 以東 㧯 摩押 个土地，到 摩押 个東片。佢等在 亞嫩 山壢對面安營，並無過 亞嫩 山壢，因為該係 摩押 个邊界。</verse>
				<verse number="19">以色列 人派使者去請求 亞摩利 人个王，就係 希實本 王 西宏 ，准佢等經過佢个土地，到 以色列 人自家个所在。</verse>
				<verse number="20">總係 西宏 毋信服 以色列 人，毋准佢等經過佢个土地；佢反轉帶領全軍在 雅雜 安營，攻打 以色列 人。</verse>
				<verse number="21">「上主 — 以色列 个上帝將 西宏 㧯佢个軍隊全部交在 以色列 人个手中； 以色列 人打贏 亞摩利 人，佔領佢等所有个土地。</verse>
				<verse number="22">佢等佔領 亞摩利 人所有个土地，對南部个 亞嫩 山壢到北部个 雅博 山壢，對東片个曠野到西片个 約旦 河。</verse>
				<verse number="23">「所以，係上主 — 以色列 个上帝為佢个子民 以色列 逐走 亞摩利 人。你想愛搶轉這垤土地係麼？</verse>
				<verse number="24">你个神明 基抹 給你个土地，你做得佔等；總係上主 — 𠊎等上帝給𠊎等所有个，𠊎等愛守好。</verse>
				<verse number="25">你恅到你比 摩押 王 西撥 个孻仔 巴勒 還較強係麼？佢毋識惹 以色列 人戰爭，也毋識攻打𠊎等。</verse>
				<verse number="26">以色列 佔有 希實本 㧯周圍个城鎮、 亞羅珥 㧯周圍个城鎮，並 亞嫩 山壢兩片所有个城市，已經有三百年了。在這站時間，你等做麼介毋收轉這兜地方呢？</verse>
				<verse number="27">𠊎無得罪你，你反轉來攻打𠊎，惹𠊎戰爭。上主係審判者；今晡日佢愛在 以色列 人㧯 亞捫 人中間判斷是非。」</verse>
				<verse number="28">總係， 亞捫 王毋搭 耶弗他 派个人轉給佢个話。</verse>
				<verse number="29">該時，上主个靈臨到 耶弗他 ，佢就經過 基列 、 瑪拿西 ，轉到 基列 个 米斯巴 ，愛去 亞捫 人該位。</verse>
				<verse number="30">耶弗他 向上主許願講：「若係你使𠊎打贏 亞捫 人，</verse>
				<verse number="31">𠊎得勝歸來个時，一定會將第一個對𠊎屋下出來迎接𠊎个人，做燒化祭獻給你。」</verse>
				<verse number="32">所以， 耶弗他 過去㧯 亞捫 人相㓾；上主使佢打贏。</verse>
				<verse number="33">佢攻打佢等，對 亞羅珥 到 米匿 一帶，遠遠到 亞備勒‧基拉明 ，一共二十座城，㓾掉當多人。恁樣， 亞捫 人被 以色列 人征服了。</verse>
				<verse number="34">耶弗他 轉到 米斯巴 自家屋下个時，佢个獨生女拿等鈴鼓跳舞出來迎接佢。</verse>
				<verse number="35">耶弗他 看到姖，就傷心扯爛衫，講：「𠊎个妹仔啊，你會害𠊎傷心死哦！樣般係你呢？𠊎已經慎重向上主許願，做毋得收轉來了！」</verse>
				<verse number="36">佢个妹仔講：「阿爸！你已經向上主許願，就照你許个願對待𠊎好了，因為上主使你在仇敵 亞捫 人身上報仇。」</verse>
				<verse number="37">佢个妹仔要求佢講：「𠊎只求你一件事。請准𠊎離開屋下兩個月，毋好管𠊎；𠊎愛㧯朋友到山頂去，為𠊎無出嫁就死來哀傷。」</verse>
				<verse number="38">耶弗他 准姖離開屋下兩個月，姖就㧯朋友到山頂去，在該位為姖還吂出嫁就死來哀傷。</verse>
				<verse number="39">兩個月後，姖轉到厥爸該位， 耶弗他 照佢向上主許个願還願。佢个妹仔死个時還係童貞女。 後來，在 以色列 中有一個風俗：</verse>
				<verse number="40">以色列 个婦女逐年愛離開屋下四日，去懷念 基列 人 耶弗他 个妹仔。</verse>
			</chapter>
			<chapter number="12">
				<verse number="1">以法蓮 人準備相㓾；佢等過 約旦 河，來到 撒分 ，對 耶弗他 講：「你做麼介無喊𠊎等共下去打 亞捫 人？𠊎等愛將你㧯你个屋仔燒掉！」</verse>
				<verse number="2">耶弗他 對佢等講：「𠊎㧯𠊎个同胞攻打 亞捫 人；𠊎識求你等幫助，你等卻毋肯伸手來救𠊎等。</verse>
				<verse number="3">𠊎看你等毋來，就無顧生命个危險𨃟過邊界去打 亞捫 人。上主使𠊎打贏了。這下你等做麼介上來攻打𠊎呢？」</verse>
				<verse number="4">恁樣 耶弗他 召集 基列 所有个人民，㧯 以法蓮 人相㓾，打贏佢等。 (因為 以法蓮 人識講過：「你這兜住在 以法蓮 㧯 瑪拿西 中間个 基列 人就像 以法蓮 个逃兵。」)</verse>
				<verse number="5">基列 人佔領 約旦 河个幾個渡船頭，毋俾 以法蓮 人走掉。若係有 以法蓮 人个逃兵愛過河， 基列 人就問佢：「你係 以法蓮 人麼？」該人若講：「毋係！」</verse>
				<verse number="6">佢等就愛佢講「示播列」，因為 以法蓮 人發音毋正確，一定會講做「西播列」；恁樣， 基列 人就捉佢，在 約旦 河渡船頭將佢㓾掉。該時， 以法蓮 人有四萬兩千人被人㓾死。</verse>
				<verse number="7">耶弗他 做 以色列 个士師六年。 耶弗他 死掉，埋葬在 基列 个一個城肚。</verse>
				<verse number="8">佢死後，有 伯利恆 人 以比讚 做 以色列 个士師。</verse>
				<verse number="9">佢有三十個孻仔，三十個妹仔。佢將妹仔嫁給別个宗族，又對別个宗族討三十個心舅。 以比讚 做 以色列 个士師七年。</verse>
				<verse number="10">以比讚 死掉，埋葬在 伯利恆 。</verse>
				<verse number="11">佢死後，有 西布倫 人 以倫 做 以色列 个士師十年。</verse>
				<verse number="12">以倫 死掉，埋葬在 西布倫 境內个 亞雅崙 。</verse>
				<verse number="13">佢死後，有 比拉頓 人 希列 个孻仔 押頓 做 以色列 个士師。</verse>
				<verse number="14">佢有四十個孻仔，三十個孫仔；佢等騎七十隻驢仔。 押頓 做 以色列 个士師八年。</verse>
				<verse number="15">希列 个孻仔 押頓 死掉，埋葬在 以法蓮 境內个 比拉頓 ，在 亞瑪力 人个山區。</verse>
			</chapter>
			<chapter number="13">
				<verse number="1">以色列 人又行上主看做邪惡个事，所以上主將佢等交在 非利士 人手中四十年。</verse>
				<verse number="2">該時，有一個 但 支族个人，名安到 瑪挪亞 ，住在 瑣拉 城。佢个𡜵娘毋會𫱔，無細人仔。</verse>
				<verse number="3">上主个天使向厥𡜵娘顯現，講：「你毋會𫱔，無細人仔，總係過無幾久你會有身，𫱔一個孻仔。</verse>
				<verse number="4">你愛細膩，淡酒㧯釅酒全部做毋得啉，也做毋得食禮儀上定做無淨浰个東西，</verse>
				<verse number="5">因為你愛𫱔一個孻仔。細人仔出世以後，毋好剃佢个頭那毛，因為佢一出世就愛獻給上帝做離俗人 。佢會帶頭拯救 以色列 人脫離 非利士 人个手。」</verse>
				<verse number="6">這婦人家去㧯老公講：「有一個神人向𠊎顯現；佢个面像上帝个天使，盡得人驚。𠊎無問佢對㖠位來；佢也無㧯𠊎講佢安到麼介名。</verse>
				<verse number="7">總係佢對𠊎講，𠊎會有身，𫱔一個孻仔。佢喊𠊎做毋得啉淡酒㧯釅酒，也做毋得食禮儀上定做無淨浰个東西；因為細人仔一出世就愛獻給上帝，一生人做離俗人。」</verse>
				<verse number="8">所以， 瑪挪亞 向上主祈求：「上主啊，求你俾你派來該神人倒轉𠊎等這位來，教𠊎等愛樣般對待將會出世个細孻仔。」</verse>
				<verse number="9">上帝聽到 瑪挪亞 个祈禱。該婦人家在田項个時，上帝个天使倒轉姖面前。該時，厥老公 瑪挪亞 無在該位；</verse>
				<verse number="10">姖趕緊走去㧯厥老公講：「你看！該日來尋𠊎个人又向𠊎顯現了！」</verse>
				<verse number="11">瑪挪亞 䟘起來跈厥𡜵娘去，到該人面前，問佢：「㧯𠊎𡜵娘講過話个人，係你麼？」 該人應講：「係啊！」</verse>
				<verse number="12">瑪挪亞 講：「你講个話實現以後，𠊎等應該樣般教這細人仔呢？佢愛過樣般个生活呢？」</verse>
				<verse number="13">上主个天使應 瑪挪亞 講：「你个𡜵娘一定愛遵守所有𠊎㧯姖講過个話。</verse>
				<verse number="14">姖做毋得食葡萄做个東西，做毋得啉淡酒㧯釅酒，也做毋得食禮儀上定做無淨浰个東西。𠊎吩咐姖个一切，姖全部愛遵守。」</verse>
				<verse number="15">瑪挪亞 毋知佢係上主个天使，就對佢講：「請毋好走！𠊎等預備一隻細山羊給你食。」 上主个天使應 瑪挪亞 講：「就算留下來，𠊎也毋食你个食物。若係你愛準備，就將它做燒化祭獻給上主啊！」</verse>
				<verse number="16"></verse>
				<verse number="17">瑪挪亞 講：「請問大名？你个話實現以後，𠊎等好對你表示尊敬。」</verse>
				<verse number="18">上主个天使應講：「你樣愛問𠊎个名呢？𠊎个名係奇妙个名。」</verse>
				<verse number="19">所以， 瑪挪亞 帶等一隻細山羊㧯素祭，放在石頭个祭壇頂，獻給行奇事个上主 。</verse>
				<verse number="20">火焰對祭壇衝上去个時， 瑪挪亞 㧯厥𡜵娘看到上主个天使在火焰中升天。 瑪挪亞 這時正知該人原來係上主个天使；佢㧯佢个𡜵娘就伏在地上。後來上主个天使無再向佢等顯現。</verse>
				<verse number="21"></verse>
				<verse number="22">瑪挪亞 對厥𡜵娘講：「𠊎等一定會死，因為𠊎等看到上帝了！」</verse>
				<verse number="23">總係厥𡜵娘應講：「若係上主愛㓾𠊎等，佢毋會接受𠊎等个燒化祭㧯素祭，毋會向𠊎等顯明這兜事，也毋會在這時節㧯𠊎等講這所有个話。」</verse>
				<verse number="24">瑪挪亞 个𡜵娘𫱔一個孻仔，將佢安名 參孫 。這細人仔漸漸長大；上主賜福給佢。</verse>
				<verse number="25">當佢在 瑣拉 㧯 以實陶 中間、 但 營个所在，上主个靈開始感動佢。</verse>
			</chapter>
			<chapter number="14">
				<verse number="1">有一日， 參孫 到 亭拿 ；佢在該位看到一個 非利士 个細妹仔。</verse>
				<verse number="2">佢轉屋下㧯爺𡟓講：「𠊎在 亭拿 看到一個 非利士 个細妹仔，請將姖討轉來做𠊎个𡜵娘。」</verse>
				<verse number="3">佢个爺𡟓問佢：「你做麼介偏偏愛在無受割禮个 非利士 人中討𡜵娘呢？敢講在𠊎等自家个宗族抑係同胞當中無細妹仔係麼？」 總係 參孫 對厥爸講：「𠊎當合意姖；請將姖討轉來。」</verse>
				<verse number="4">佢个爺𡟓卻毋知上主愛 參孫 恁樣做，因為上主尋機會愛攻擊 非利士 人。這時， 非利士 人統治 以色列 。</verse>
				<verse number="5">所以， 參孫 㧯厥爺𡟓到 亭拿 去。佢等經過該位个葡萄園个時，有一隻獅仔出來對佢吼吼滾。</verse>
				<verse number="6">上主个靈強烈臨到 參孫 ，佢空手擘爛該隻獅仔，就像擘一隻細山羊。佢無將所做个事㧯爺𡟓講。</verse>
				<verse number="7">參孫 去看該細妹仔，㧯姖講話； 參孫 當合意姖。</verse>
				<verse number="8">過幾日， 參孫 愛倒轉去討姖。半路， 參孫 走過去看㓾死个獅仔，無想到竟然在獅仔个屍體內發現一群蜂仔㧯蜂糖。</verse>
				<verse number="9">佢將蜂糖挖出來放在手項，緊行緊食。然後佢到爺𡟓該位，拿兜蜂糖給佢等，佢等也食；總係 參孫 無㧯佢等講蜂糖係對獅仔个屍體內挖出來个。</verse>
				<verse number="10">厥爸到該細妹仔屋下； 參孫 照該樣時後生人个習慣，在該位辦婚姻个筵席。</verse>
				<verse number="11">非利士 人看到 參孫 ，就派三十個人陪佢。</verse>
				<verse number="12">參孫 對這三十個人講：「𠊎出一個鈴仔俾你等揣，若係你等能在這七日婚姻个筵席期間揣出來，𠊎就給你等逐儕一領上等麻紗衫㧯一身禮服；</verse>
				<verse number="13">若係你等揣毋出，你等逐儕愛給𠊎一領上等麻紗衫㧯一身禮服。」 佢等講：「將鈴仔講出俾𠊎等聽啊！」</verse>
				<verse number="14">參孫 對佢等講： 食个對食者出； 甜个對強者來。 佢等想三日，全部揣毋出來。</verse>
				<verse number="15">第四日 ，佢等對 參孫 个𡜵娘講：「你愛用計嘐若老公將答案打探出來，若無，𠊎等愛放火燒若爸全家，連你也燒掉。你等請𠊎等來係愛搶𠊎等係麼？」</verse>
				<verse number="16">所以， 參孫 个𡜵娘在佢面前噭等講：「你惱𠊎！毋係正經惜𠊎！你出鈴仔給𠊎个鄉親，總係毋㧯𠊎講答案！」 參孫 應講：「𠊎連自家个爺𡟓乜無㧯佢等講，𠊎樣般做得㧯你講呢？」</verse>
				<verse number="17">厥𡜵娘在七日婚姻个筵席期間，逐日為這件事緊噭緊鬧。第七日， 參孫 被厥𡜵娘纏到無葛無煞，就將答案㧯姖講，姖就去㧯姖个鄉親講。</verse>
				<verse number="18">第七日，日頭還吂落山以前，城肚个人去見 參孫 ，講： 還有麼介比蜂糖較甜？ 還有麼介比獅仔較強？ 參孫 應講： 若毋係用𠊎个牛乸犁田， 你等就揣毋出𠊎个鈴仔！</verse>
				<verse number="19">上主个靈強烈臨到 參孫 ，佢就到 亞實基倫 ，㓾掉三十個人，將佢等个禮服搶去給該兜揣出鈴仔个人。事後，佢非常發譴，就轉厥爸屋下去。</verse>
				<verse number="20">參孫 个𡜵娘後來嫁給佢个且郎，就係 參孫 盡好个朋友。</verse>
			</chapter>
			<chapter number="15">
				<verse number="1">後來，在割麥仔个時節， 參孫 帶一隻細山羊去看佢个𡜵娘。 參孫 對厥丈人老講：「𠊎愛入間房去尋𠊎个𡜵娘。」 厥丈人老毋准佢入去，</verse>
				<verse number="2">對佢講：「𠊎真知你當惱姖，所以將姖嫁給你个且郎了。姖个老妹比姖還較靚，你做得討姖！」</verse>
				<verse number="3">參孫 講：「這擺𠊎有資格好好來修理 非利士 人！」</verse>
				<verse number="4">參孫 就捉三百隻狐狸來，將狐狸个尾一對一對結共下，結頭頂高插一支火把，</verse>
				<verse number="5">然後點火，將狐狸放入 非利士 人个麥田肚。恁樣，佢將割好个㧯還吂割个麥仔全部燒掉，連葡萄園㧯橄欖園也燒掉。</verse>
				<verse number="6">非利士 人調查麼人放火，發現係 參孫 做个，因為厥丈人老 ( 亭拿 人) 將佢个𡜵娘嫁給厥且郎。所以 非利士 人上去，放火燒該婦人家㧯姖个阿爸。</verse>
				<verse number="7">參孫 對 非利士 人講：「你等既然敢恁樣做，𠊎發誓，若毋報這冤仇，𠊎絕對毋放你等煞！」</verse>
				<verse number="8">參孫 打到佢等慘慘，㓾死盡多人。後來佢到 以坦 ，住在該位个石窿肚。</verse>
				<verse number="9">非利士 人到 猶大 ，在該位安營，攻打 利希 城。</verse>
				<verse number="10">猶大 人問佢等：「你等做麼介上來攻打𠊎等呢？」 佢等講：「𠊎等來捉 參孫 ；佢樣般對待𠊎等，𠊎等也愛樣般對待佢。」</verse>
				<verse number="11">所以，有三千 猶大 人到 以坦 个石窿去尋 參孫 ，對佢講：「敢講你毋知 非利士 人係統治𠊎等个？𠊎等會被你害死！」 參孫 應講：「𠊎係照佢等對待𠊎个方式來對待佢等定定！」</verse>
				<verse number="12">猶大 人㧯佢講：「𠊎等到這位來，愛將你捆起來，交給 非利士 人。」 參孫 講：「你等愛㧯𠊎發誓，你等自家毋會㓾𠊎。」</verse>
				<verse number="13">佢等講：「好，𠊎等單單將你捆起來，交給佢等；𠊎等毋會㓾你。」所以佢等用兩條新个索仔將 參孫 捆起來，帶佢出石窿。</verse>
				<verse number="14">參孫 到 利希 ， 非利士 人向佢走等去，對佢盡嘶。上主个靈強烈臨到佢；佢一用力，捆厥手个索仔就像麻索被火燒斷掉一樣。</verse>
				<verse number="15">佢看到一支還吂燥个驢腮骨，就拈起來，用它㓾掉一千人。</verse>
				<verse number="16">參孫 做詩講： 𠊎用一支驢腮骨㓾掉一千人； 用一支驢腮骨使屍體堆歸堆 。</verse>
				<verse number="17">佢講煞就將驢腮骨㧒掉。該地方就安到 拉末‧利希 。</verse>
				<verse number="18">後來， 參孫 非常嘴燥；佢懇求上主講：「你使你个僕人大贏敵人；這下你愛𠊎渴死、落在該兜無受割禮个人手中係麼？」</verse>
				<verse number="19">上帝就使 利希 个低窩地裂開，湧出泉水。 參孫 啉水以後，精神恢復。所以，該泉水安到 隱‧哈歌利 ，到今晡日還在 利希 。</verse>
				<verse number="20">非利士 人統治 以色列 人个期間， 參孫 做 以色列 个士師二十年。</verse>
			</chapter>
			<chapter number="16">
				<verse number="1">有一日， 參孫 到 非利士 人个 迦薩 城，在該位堵到一個妓女，就㧯姖睡目。</verse>
				<verse number="2">迦薩 人發現 參孫 在城肚就包圍該地方，歸暗晡埋伏在城門，恬恬無出手；佢等講：「等到天光正來㓾佢。」</verse>
				<verse number="3">總係 參孫 睡到半夜就䟘起來，將城門拆掉，連門框帶門扇、門閂全部拆下來，扛在肩頭頂，扛到 希伯崙 對面个山頂。</verse>
				<verse number="4">後來， 參孫 在 梭烈 山壢愛到一個婦人家，名安到 黛利拉 。</verse>
				<verse number="5">有五個 非利士 領袖去見 黛利拉 ，對姖講：「你愛用計嘐 參孫 ，問佢做麼介有恁大个力量，𠊎等愛樣般正能贏過佢，捆得佢住，來控制佢。恁樣，𠊎等逐儕給你一千一百隻銀幣。」</verse>
				<verse number="6">所以， 黛利拉 問 參孫 ：「請㧯𠊎講，你做麼介有恁大个力量。愛樣般正有辦法捆得你住，來控制你？」</verse>
				<verse number="7">參孫 應講：「若係人用七條還吂燥个青藤仔 捆𠊎，𠊎就㧯普通人共樣無麼介力。」</verse>
				<verse number="8">所以，該兜 非利士 領袖將七條還吂燥个青藤仔交給 黛利拉 ，姖就用青藤仔將 參孫 捆起來。</verse>
				<verse number="9">姖早就喊人在姖屋肚埋伏。姖喊：「 參孫 哪， 非利士 人來囉！」 參孫 作力，青藤仔就像麻線堵到火，一下仔就斷掉。所以，佢等還係毋知 參孫 个力量對㖠位來。</verse>
				<verse number="10">黛利拉 對 參孫 講：「你作弄𠊎，欺騙𠊎！正經㧯𠊎講，愛樣般正有辦法捆得你住？」</verse>
				<verse number="11">參孫 講：「若係人用從來毋識用過个新索仔捆𠊎，𠊎就會㧯普通人共樣無麼介力。」</verse>
				<verse number="12">所以， 黛利拉 拿新索仔將佢捆起來，然後喊：「 參孫 哪， 非利士 人來囉！」當時也有人埋伏在屋肚。 參孫 挷斷手項个新索仔，像挷斷一條線共樣。</verse>
				<verse number="13">黛利拉 對 參孫 講：「你還係作弄𠊎，欺騙𠊎！請㧯𠊎講，愛樣般正有辦法捆得你住？」 參孫 應講：「若係你將𠊎頭那頂个七條毛瓣仔編入織布機肚，用釘仔釘好，𠊎就會㧯普通人共樣無麼介力。」</verse>
				<verse number="14">所以， 黛利拉 拐佢睡落覺，將佢頭那頂个七條毛瓣仔編入織布機肚 ，又用釘仔釘好，然後喊：「 參孫 哪， 非利士 人來囉！」 參孫 醒過來，一下仔就將頭那毛對織布機肚挷出來了。</verse>
				<verse number="15">黛利拉 對 參孫 講：「你根本無㧯𠊎同心，樣般還講你惜𠊎呢？你作弄𠊎三擺，無㧯𠊎講你做麼介恁有力。」</verse>
				<verse number="16">黛利拉 逐日吵佢， 參孫 被姖纏到會閼死，</verse>
				<verse number="17">最後將祕密㧯 黛利拉 講。佢講：「𠊎个頭那毛從來毋識剃過，因為𠊎一出世就獻給上帝做離俗人。若係𠊎个頭那毛剃掉，𠊎个力量就會無掉去，𠊎會㧯普通人共樣軟弱。」</verse>
				<verse number="18">黛利拉 知 參孫 已經將祕密㧯姖講，就派人去對 非利士 領袖講：「再上來一擺；佢已經將祕密㧯𠊎講了！」所以佢等再來，並帶等銀幣來。</verse>
				<verse number="19">黛利拉 拐 參孫 睡在姖个大腳髀，然後喊人來，將 參孫 个七條毛瓣仔剃掉。然後， 黛利拉 作弄 參孫 ，因為佢正經變無力了。</verse>
				<verse number="20">黛利拉 喊：「 參孫 哪， 非利士 人來囉！」 參孫 醒過來，心肚想：「𠊎會像以前共樣一作力就做得脫身。」佢毋知上主已經離開佢了。</verse>
				<verse number="21">所以 非利士 人捉到佢，將佢兩隻目珠仁挖出來，帶佢到 迦薩 ，用銅鍊仔鎖等佢，喊佢在監獄肚㩳磨石。</verse>
				<verse number="22">總係 參孫 个頭那毛又慢慢生出來。</verse>
				<verse number="23">非利士 領袖聚集共下慶祝，向佢等个神明 大袞 獻大祭；佢等唱：「𠊎等个神明將仇敵 參孫 交給𠊎等了！」</verse>
				<verse number="24">佢等盡歡喜，就講：「將 參孫 喊出來，𠊎等愛㩢耍佢 ！」 參孫 被人帶出監獄；佢等㩢耍佢 ，喊佢企在兩支柱仔中間。民眾看到 參孫 就頌讚佢等个神明，講：「仇敵 參孫 毀壞𠊎等个土地，㓾掉當多人；𠊎等个神明將佢交在𠊎等手中！」</verse>
				<verse number="25"></verse>
				<verse number="26">參孫 對拉佢手个少年講：「俾𠊎摸該兜撐等這神廟个柱仔；𠊎愛憑一下。」</verse>
				<verse number="27">該時廟肚尖滿男男女女，五個 非利士 領袖全部在該位。廟頂大約有三千個男女，看 參孫 被人㩢耍 。</verse>
				<verse number="28">參孫 祈禱上主講：「至高个上主啊，懇求你紀念𠊎！上帝啊，懇求你再賜給𠊎力量，給𠊎加一擺機會報復 非利士 人挖𠊎兩隻目珠仁个仇恨。」</verse>
				<verse number="29">參孫 揇等在半中央撐等廟該兩支柱仔，一手揇等一支，</verse>
				<verse number="30">喊等講：「俾𠊎㧯 非利士 人共下死！」所以佢用盡所有个力量向前㩳，廟就橫掉，磧到五個領袖㧯所有个人身上。 參孫 死个時，所㓾个人比佢過身前所㓾个還較多。</verse>
				<verse number="31">參孫 个兄弟㧯厥爸个全家人來扛佢个屍體，將佢運轉去，葬在 瑣拉 㧯 以實陶 之間厥爸 瑪挪亞 个墳墓肚。 參孫 做 以色列 个士師總共二十年。</verse>
			</chapter>
			<chapter number="17">
				<verse number="1">有一個人名安到 米迦 ，住在 以法蓮 山區。</verse>
				<verse number="2">佢對阿姆講：「有人偷你一千一百隻銀幣，𠊎聽到你咒詛該賊仔。你看，銀幣在𠊎這位，係𠊎拿去个。」 厥姆講：「孻仔啊，願上主賜福給你！」</verse>
				<verse number="3">米迦 就將一千一百隻銀幣還給阿姆。厥姆講：「為到收轉孻仔應該受个咒詛，𠊎誠心將銀幣獻給上主，來雕刻一隻偶像，另外鑄造一隻偶像。這下𠊎將這兜銀幣交給你。」</verse>
				<verse number="4">米迦 將銀幣還給阿姆，阿姆拿兩百隻銀幣給一個銀匠，喊佢雕刻一隻偶像又鑄造一隻偶像。這兜偶像就放在 米迦 个屋下。</verse>
				<verse number="5">這人 米迦 有自家个神廟；佢還造一兜家中个神像㧯一領以弗得，又指定佢一個孻仔做祭司。</verse>
				<verse number="6">該時， 以色列 還吂有君王，逐儕照自家所歡喜个去做。</verse>
				<verse number="7">同時， 猶大 个 伯利恆 城有一個後生个 利未 人；</verse>
				<verse number="8">佢離開 伯利恆 ，想尋別个地方住。在路途中 ，佢行到 以法蓮 山區，到 米迦 个屋下。</verse>
				<verse number="9">米迦 問佢：「你對㖠位來？」 佢應講：「𠊎係 利未 人，對 猶大 个 伯利恆 來；𠊎愛尋位所住。」</verse>
				<verse number="10">米迦 講：「你就住在𠊎這位啊！你做𠊎个顧問㧯祭司；𠊎逐年給你十隻銀幣，也給你幾身衫褲㧯食物。」</verse>
				<verse number="11">這後生 利未 人答應留在 米迦 屋下， 米迦 款待佢像自家个孻仔。</verse>
				<verse number="12">米迦 派佢做祭司，佢就住在 米迦 屋下。</verse>
				<verse number="13">米迦 講：「這下𠊎有一個 利未 人做𠊎个祭司了，上主一定會賜福給𠊎！」</verse>
			</chapter>
			<chapter number="18">
				<verse number="1">該時， 以色列 無君王。 但 支族還係尋佢等做得安居个土地，因為佢等還吂在 以色列 逐支族中分到自家个土地。</verse>
				<verse number="2">但 支族人對全族選出五個勇士，派佢等離開 瑣拉 㧯 以實陶 ，去打探土地。佢等來到 以法蓮 山區，住在 米迦 屋下。</verse>
				<verse number="3">佢等聽到該後生 利未 人講話个口音就去問佢：「你在這位做麼介？麼人帶你到這位來？」</verse>
				<verse number="4">佢應講：「係 米迦 安排个；佢請𠊎做佢个祭司，有月給給𠊎。」</verse>
				<verse number="5">佢等對佢講：「請你求問上帝，𠊎等這擺出來打探會成功麼？」</verse>
				<verse number="6">祭司應講：「你等做得平平安安去，上主在你等所行个路上看顧你等。」</verse>
				<verse number="7">所以，這五儕離開。佢等來到 拉億 城，發現該位个人民無愁無慮，像 西頓 人共樣。這兜人和平、恬靜，無㧯外人相爭；土地出產又豐富。佢等離 西頓 人當遠，無㧯外人來往。</verse>
				<verse number="8">這五儕轉到 瑣拉 㧯 以實陶 以後，佢等个同胞問佢等有麼介發現，</verse>
				<verse number="9">佢等講：「大家來去，來去攻打 拉億 ！𠊎等打探過該地方，確實係盡好。毋好在這位閒閒毋做事，遽遽來去啊！𠊎等去佔領啊！</verse>
				<verse number="10">你等到該位就會發現人民全無防守；該係一垤當闊个土地，出產豐富，麼介都有。上帝已經將它交給你等了。」</verse>
				<verse number="11">所以， 但 支族有六百儕武裝好，離開 瑣拉 㧯 以實陶 。</verse>
				<verse number="12">佢等出發，在 猶大 个 基列‧耶琳 西片安營，所以該地方到這下還喊做 但 營。</verse>
				<verse number="13">佢等繼續向前，到 以法蓮 山區 米迦 个屋下。</verse>
				<verse number="14">該五個打探過 拉億 个人對同伴講：「你等知麼？這位有一間屋，底背有一領以弗得，一兜家中个神像，還有一隻雕刻个偶像㧯一隻鑄成个偶像。這下你等知𠊎等應該樣般做。」</verse>
				<verse number="15">五個探仔就入到 米迦 屋下，問候該後生 利未 人。</verse>
				<verse number="16">該時， 但 支族該六百個武裝好个士兵企在門口。</verse>
				<verse number="17">當祭司㧯六百個武裝好个士兵還在門口个時，該五個探仔行入屋肚，拿走雕刻个偶像、以弗得、家中个神像㧯鑄成个偶像。</verse>
				<verse number="18">佢等行入 米迦 屋肚拿走這兜東西个時，祭司問佢等：「你等做麼介啊？」</verse>
				<verse number="19">佢等講：「噯，恬恬！毋好出聲！跈𠊎等共下來，做𠊎等个祭司㧯顧問。做 以色列 一支族个祭司敢毋係贏過做一個家族个祭司！」</verse>
				<verse number="20">祭司聽到非常歡喜，就帶等以弗得、家中个神像㧯雕刻个偶像，跈佢等走。</verse>
				<verse number="21">佢等轉身出發，俾子女、牛群㧯財物在頭前行。</verse>
				<verse number="22">佢等離開 米迦 个屋下一站路以後， 米迦 正召集鄰舍出來追。佢等追到 但 族人，</verse>
				<verse number="23">喊佢等。 但 族人轉身問 米迦 ：「麼介事情？這群人來做麼介？」</verse>
				<verse number="24">米迦 應講：「你等搶走𠊎个祭司㧯𠊎所造个神像；𠊎無賸半項！你等還問𠊎麼介事情！」</verse>
				<verse number="25">但 族人對佢講：「你最好毋好加講；若係無，惹這兜人發譴，佢等會攻擊你，你㧯你全家會無命。」</verse>
				<verse number="26">但 族人繼續向前行； 米迦 看佢等比自家較強，就轉屋下去了。</verse>
				<verse number="27">但 族人搶 米迦 所造个神像㧯佢个祭司以後，就去攻打 拉億 。 拉億 偎近 伯‧利合 山壢，係一座和平、無愁無慮个城。 但 族人㓾掉城肚个人民，放火燒城。無人來救佢等，因為 拉億 離 西頓 當遠，佢等也無㧯外人來往。 但 族人重建該城，在該位住。</verse>
				<verse number="28"></verse>
				<verse number="29">佢等用佢等祖先 以色列 个孻仔 但 个名，將 拉億 這座城个名改做 但 。</verse>
				<verse number="30">但 族人將偶像安好，派 摩西 个孫仔 — 革舜 个孻仔 約拿單 做 但 支族个祭司。 約拿單 个子孫在該位做祭司直到 但 族人被人捉走。</verse>
				<verse number="31">上帝个聖帳篷停留在 示羅 有幾久， 米迦 雕刻个偶像也留在 但 幾久。</verse>
			</chapter>
			<chapter number="19">
				<verse number="1">以色列 還吂有君王該段期間，有一個 利未 人住在 以法蓮 偏僻个山區。佢討 猶大 个 伯利恆 一個細妹仔做細姐。</verse>
				<verse number="2">這細姐對老公發譴 ，轉到 伯利恆 外家，在該位住四個月。</verse>
				<verse number="3">後來這 利未 人決定去尋姖，想愛勸姖轉到自家身邊。佢帶一個僕人、兩隻驢仔去。這細妹仔請佢入去屋肚；佢个丈人老看到就熱誠歡迎佢，</verse>
				<verse number="4">堅持愛佢留下來，所以佢就住三日。公婆兩儕停留在該位食啉，睡目。</verse>
				<verse number="5">到第四日朝晨，佢等打早䟘起來，準備離開；總係佢个丈人老對佢講：「先食兜東西！你會感覺較有元氣，然後正走。」</verse>
				<verse number="6">所以，兩儕坐下來，共下食啉。佢个丈人老對佢講：「歇加一暗晡，放較輕鬆兜仔。」</verse>
				<verse number="7">利未 人企起來愛走，佢个丈人老強留佢，所以佢又歇一暗晡。</verse>
				<verse number="8">第五日打早， 利未 人準備離開；佢个丈人老又講：「先食兜東西，過晝以後正走！」所以兩儕又共下食啉。</verse>
				<verse number="9">這儕㧯佢个細姐、僕人又預備愛走，佢个丈人老又講：「你看，天會暗囉，歇加一暗晡哪！無幾久就會斷烏囉，歇在這位好好享受享受。天光日打早你就做得起身轉屋下去。」</verse>
				<verse number="10">總係，這個人無愛再留下來，就㧯佢个細姐起身。佢等帶等兩隻載滿東西个驢仔出發。</verse>
				<verse number="11">當佢等來到 耶布斯 (就係 耶路撒冷 ) 附近，天已經暗了，僕人對主人講：「𠊎等來去這 耶布斯 城歇一暗晡！」</verse>
				<verse number="12">總係主人講：「𠊎等毋好進入毋係 以色列 人住个外邦人个城肚；𠊎等愛向前行，在 基比亞 抑係 拉瑪 過夜。」</verse>
				<verse number="13"></verse>
				<verse number="14">所以佢等經過 耶布斯 ，繼續向前行。佢等到 便雅憫 支族境內个 基比亞 ，日頭已經落山了；</verse>
				<verse number="15">佢等入城，愛在該位過夜。佢等到城肚，在廣場坐下來，總係無人接待佢等到屋下過夜。</verse>
				<verse number="16">該暗晡，有一個老人家對田肚工作轉來，經過該位。以前佢住 以法蓮 山區，這下住在 基比亞 。 ( 基比亞 个人民本來係 便雅憫 支族人。)</verse>
				<verse number="17">這老人家看到有過路人在廣場，就問佢：「你對㖠位來？愛到㖠位去？」</verse>
				<verse number="18">利未 人應講：「𠊎等對 猶大 个 伯利恆 來，愛轉 以法蓮 偏僻个山區去。𠊎就住在該位。𠊎正對 猶大 个 伯利恆 來，這下愛到上主个聖殿去，總係無人招待𠊎過夜。</verse>
				<verse number="19">𠊎等有飼料、草料好餵驢仔；𠊎㧯𠊎个細姐並𠊎个僕人也有自家食个餅㧯酒，𠊎等需要用个逐項全部有。」</verse>
				<verse number="20">老人家講：「歡迎你等到𠊎屋下來！你等需要麼介，𠊎全部會給你等；毋好在廣場過夜。」</verse>
				<verse number="21">恁樣佢就帶佢等轉屋下，又餵飽驢仔；佢等就洗腳、食飯。</verse>
				<verse number="22">佢等當輕鬆歡喜个時，忽然城肚个鱸鰻仔來包圍這間屋，連連掽門，對老人家講：「將該㧯你共下轉屋下个人帶出來，𠊎等愛㧯佢發生性關係！」</verse>
				<verse number="23">老人家到門外對佢等講：「朋友，千萬做毋得做這恁積惡个事！這個人係𠊎个人客，你等絕對毋好做這恁淫亂个事！</verse>
				<verse number="24">看啊，佢个細姐在這位，還有𠊎自家个妹仔，姖還係童貞女，這下𠊎將姖等交給你等，你等做得照自家个心意對待姖等；絕對毋好對這個人做該種恁積惡个事！」</verse>
				<verse number="25">總係佢等毋聽。 利未 人就將佢个細姐強強㩳出門外給佢等。佢等強姦姖，歸夜侮辱姖，一直到天曚光正放姖走。</verse>
				<verse number="26">天光个時，這婦人家倒轉來，橫在厥老公歇个老人家屋下个門口。天大光个時，姖還橫在該位。</verse>
				<verse number="27">厥老公朝晨䟘起來，開門愛走，發現佢个細姐橫在門口，雙手放在門檻頂。</verse>
				<verse number="28">佢對婦人家講：「䟘起來，𠊎等愛走了！」總係姖無應。所以佢將姖个身屍放在驢仔个背頂，向轉屋下个路去。</verse>
				<verse number="29">到屋下个時，佢入去拿一支刀仔，將厥細姐个身屍剁做十二垤，送到 以色列 十二支族該位。</verse>
				<verse number="30">看到个人全部講：「𠊎等從來毋識看過這種事！對 以色列 人離開 埃及 以來，無發生過這種事！𠊎等一定愛來參詳，應該樣般做！」</verse>
			</chapter>
			<chapter number="20">
				<verse number="1">以色列 人民，對北部个 但 到南部个 別是巴 ，東到 基列 地，全部同心來到 米斯巴 ，聚集在上主面前。</verse>
				<verse number="2">以色列 逐支族个領袖全部出席這擺上帝子民个聚會。擎刀仔个步兵有四十萬人。</verse>
				<verse number="3">同時， 便雅憫 人也聽講所有个 以色列 人全部集合在 米斯巴 。 以色列 人問：「㧯𠊎等講，這種邪惡个事樣般會發生？」</verse>
				<verse number="4">該 利未 人，就係受害婦人家个老公，應講：「𠊎㧯𠊎个細姐到 便雅憫 境內个 基比亞 過夜；</verse>
				<verse number="5">該暗晡 基比亞 人來包圍屋仔，愛捉𠊎、㓾𠊎，又將𠊎个細姐強姦到死掉。</verse>
				<verse number="6">𠊎將姖个屍體剁做一垤一垤，送到 以色列 十二支族，一支族一垤。 基比亞 人在𠊎等當中做恁積惡、恁淫亂个事。</verse>
				<verse number="7">你等全部係 以色列 人；這下你等愛樣般處理這件事呢？」</verse>
				<verse number="8">所有个人全部共下企起來講：「𠊎等連一儕也毋轉帳篷、毋轉屋肚去。</verse>
				<verse number="9">這下𠊎等愛恁樣做：𠊎等愛抽籤選兜人去攻打 基比亞 。</verse>
				<verse number="10">以色列 逐支族十分之一个人愛負責運軍糧，其他个人愛去報復 便雅憫 个 基比亞 ，因為佢等在 以色列 當中犯到恁積惡个罪。」</verse>
				<verse number="11">所以所有个 以色列 人同心一意，聚集攻打該城。</verse>
				<verse number="12">以色列 逐支族派使者去問 便雅憫 支族个各家族，對佢等講：「你等當中樣會有人做恁邪惡个事！</verse>
				<verse number="13">這下將該兜 基比亞 个鱸鰻仔交出來，𠊎等愛將佢等處死刑，對 以色列 當中除掉這罪惡。」總係 便雅憫 人毋搭這兜 以色列 同胞；</verse>
				<verse number="14">佢等對 便雅憫 逐城來到 基比亞 ，愛㧯這兜 以色列 人相㓾。</verse>
				<verse number="15">該日， 便雅憫 人對逐城召集兩萬六千擎刀仔个士兵。另外， 基比亞 个人民也召集七百名使用左手、特別選過个人 。佢等全部會拂石仔，拂到準準無偏差。</verse>
				<verse number="16"></verse>
				<verse number="17">便雅憫 支族以外个 以色列 人召集四十萬擎刀仔个、受過訓練个士兵。</verse>
				<verse number="18">以色列 人到 伯特利 个聖所求問上帝：「㖠一支族愛帶頭去攻打 便雅憫 人呢？」 上主講：「 猶大 支族。」</verse>
				<verse number="19">第二朝晨， 以色列 人出發，在 基比亞 附近安營。</verse>
				<verse number="20">佢等面對城个方向準備相㓾，愛攻打 便雅憫 軍隊。</verse>
				<verse number="21">便雅憫 軍隊就對 基比亞 出來。該日，佢等㓾掉兩萬兩千個 以色列 士兵。</verse>
				<verse number="22">以色列 人轉到聖所，在上主面前大噭，直到暗晡時。佢等求問上主：「𠊎等應該再去攻打𠊎等个同胞 便雅憫 人麼？」 上主應講：「應該去。」 所以， 以色列 人得到鼓勵，又在前一日擺陣个地方準備相㓾。</verse>
				<verse number="23"></verse>
				<verse number="24">第二日佢等又攻打 便雅憫 軍隊。</verse>
				<verse number="25">便雅憫 人又一擺對 基比亞 出來，㓾掉一萬八千擎刀仔个 以色列 士兵。</verse>
				<verse number="26">所有 以色列 人全部到 伯特利 ，在上主面前坐等大噭，佢等禁食，一直到暗晡時。佢等在上主面前獻平安祭㧯燒化祭。</verse>
				<verse number="27">該時，上帝个約櫃在 伯特利 ； 亞倫 个孫仔、 以利亞撒 个孻仔 非尼哈 企在約櫃前。人民求問上主：「𠊎等應該再去攻打𠊎等个同胞 便雅憫 人麼？抑係就停止戰爭？」 上主應講：「去攻打！天光日𠊎愛將佢等交在你等个手中。」</verse>
				<verse number="28"></verse>
				<verse number="29">所以， 以色列 人安排士兵埋伏在 基比亞 四周圍。</verse>
				<verse number="30">第三日，佢等攻打 便雅憫 軍隊，像前兩擺共樣，面對 基比亞 个方向準備相㓾。</verse>
				<verse number="31">便雅憫 人出來相㓾，被 以色列 人拐騙離開城。 便雅憫 人㧯頭擺共樣，在去 伯特利 㧯 基比亞 路上个曠野㓾掉 以色列 人，大約三十儕。</verse>
				<verse number="32">便雅憫 人講：「𠊎等像以前共樣打贏佢等了。」 總係， 以色列 人已經計劃好，用退兵來騙佢等離開城，到大路去。</verse>
				<verse number="33">所以，在 以色列 人个主力軍退轉 巴力‧他瑪 重新擺陣个時，另外埋伏在 基比亞 四周圍 个人忽然走出來。</verse>
				<verse number="34">對全 以色列 選出个一萬勇士，到 基比亞 ，攻打 便雅憫 人。戰爭激烈， 便雅憫 人還毋知佢等就會被 以色列 人消滅了。</verse>
				<verse number="35">上主將 便雅憫 軍隊交在 以色列 手中；該日， 以色列 人㓾掉 便雅憫 人兩萬五千一百儕，全部係擎刀仔个士兵。</verse>
				<verse number="36">便雅憫 人正知自家輸掉了。 先前， 以色列 軍隊个主力對 便雅憫 人面前假退兵，因為佢等靠該兜埋伏在 基比亞 四周圍个人。</verse>
				<verse number="37">這兜人盡遽衝入 基比亞 ，分散在城肚，將城肚个人全部㓾掉。</verse>
				<verse number="38">以色列 人个主力軍㧯埋伏个軍隊事前約定一個信號：佢等看到城肚火煙衝起來个時，</verse>
				<verse number="39">戰場上个 以色列 人就愛斡轉頭。這時， 便雅憫 人已經㓾掉三十個 以色列 人；佢等講：「𠊎等像以前共樣又打贏佢等了。」</verse>
				<verse number="40">後來，信號出現，城肚火煙衝起來， 便雅憫 人轉頭一看，發現全城火煙衝天。</verse>
				<verse number="41">以色列 人个主力軍斡轉頭， 便雅憫 人就當著驚，因為佢等知自家會被 以色列 人消滅了。</verse>
				<verse number="42">佢等對 以色列 人面前轉身，向曠野逃走，總係走毋掉；佢等被 以色列 个主力軍㧯城肚 出來个人夾在中間，被人㓾淨淨。</verse>
				<verse number="43">以色列 人包圍 便雅憫 人，一直追佢等，直到 基比亞 東片个地方，透路盡㓾佢等。</verse>
				<verse number="44">便雅憫 人大約有一萬八千精兵被人㓾死；</verse>
				<verse number="45">其他个人轉到曠野，向 臨門 个巖石逃走，有五千人在路上被 以色列 人㓾死。 以色列 人繼續追賸到个人，直到 基頓 ，又㓾掉兩千人。</verse>
				<verse number="46">該日， 便雅憫 人總共有兩萬五千擎刀仔个勇士被 以色列 人㓾死。</verse>
				<verse number="47">向曠野逃走个 便雅憫 人有六百儕；佢等來到 臨門 个巖石，在該位住四隻月。</verse>
				<verse number="48">以色列 人倒轉 便雅憫 地去，將各城个人㧯頭牲全部㓾淨淨，也將該地區所有个城鎮燒掉。</verse>
			</chapter>
			<chapter number="21">
				<verse number="1">以色列 人民在 米斯巴 集合个時，識向上主發誓講：「𠊎等絕對毋會將妹仔嫁給 便雅憫 人。」</verse>
				<verse number="2">這下， 以色列 人民到 伯特利 ，坐在上帝面前直到暗晡時，大聲哀噭講：</verse>
				<verse number="3">「上主 — 以色列 个上帝啊，樣般會有這種事發生呢？做麼介 以色列 會少掉 便雅憫 支族呢？」</verse>
				<verse number="4">第二日，人民打早䟘起來，在該位起一座祭壇，獻燒化祭㧯平安祭。</verse>
				<verse number="5">佢等互相問：「 以色列 逐支族中，有㖠兜人無到 米斯巴 上主面前集合？」 (先前佢等識發誓：無到 米斯巴 上主面前去个人愛處死刑。)</verse>
				<verse number="6">以色列 人民為佢等个同胞 便雅憫 人堵到絕種个危機，感覺當後悔，講：「今晡日 以色列 少掉一支族，</verse>
				<verse number="7">𠊎等愛樣般為賸到个 便雅憫 人尋𡜵娘呢？𠊎等已經向上主發誓毋將𠊎等个妹仔嫁給佢等。」</verse>
				<verse number="8">佢等又查問：「 以色列 逐支族中，有㖠兜人無到 米斯巴 上主面前集合？」結果發現 基列 地 雅比 城个人無一個來參加聚會；</verse>
				<verse number="9">軍隊點名个時，無一個 雅比 人在該位。</verse>
				<verse number="10">所以會眾派出一萬兩千名勇士，命令佢等：「到 雅比 去，將該位个人㓾淨淨，連婦女㧯細人仔全部㓾掉。</verse>
				<verse number="11">愛㓾死所有个男人，也㓾淨所有已經結婚个婦人家。」</verse>
				<verse number="12">佢等在 雅比 人當中尋到四百個後生人家女，將姖等帶到 迦南 个 示羅 營地。</verse>
				<verse number="13">然後，全會眾派人去見在 臨門 个巖石該兜 便雅憫 人，表示願意講和。</verse>
				<verse number="14">該時 便雅憫 人轉來， 以色列 人就將無受到災難个 雅比 个細妹仔給佢等做𡜵娘，總係還毋罅。</verse>
				<verse number="15">人民為到 便雅憫 人憂傷，因為上主使 以色列 眾支族缺掉一角。</verse>
				<verse number="16">會眾个長老講：「 便雅憫 支族無婦人家了，𠊎等應該樣般為該兜賸到个人尋𡜵娘呢？</verse>
				<verse number="17">以色列 十二支族中做毋得絕掉一支族；𠊎等一定愛想辦法保存 便雅憫 支族。</verse>
				<verse number="18">總係𠊎等又做毋得俾佢等討𠊎等个妹仔，因為𠊎等已經發誓講，該將妹仔嫁給 便雅憫 人个一定會受咒詛。」</verse>
				<verse number="19">後來，佢等想：「一年一擺在 示羅 有上主个節期；這節期會到了。」 ( 示羅 在 伯特利 北片， 利波拿 南片， 伯特利 㧯 示劍 之間大路个東片。)</verse>
				<verse number="20">佢等吩咐 便雅憫 人講：「你等到葡萄園囥起來，</verse>
				<verse number="21">注意看。 示羅 个細妹仔在年會中出來跳舞个時，你等就對葡萄園出來，一儕搶一個做𡜵娘，帶姖轉 便雅憫 地區去。</verse>
				<verse number="22">若係姖等个阿爸㧯兄弟來尋𠊎等理論，𠊎等會㧯佢等講：『請看𠊎等个情面，施恩給該兜 便雅憫 人，因為𠊎等在戰場無留下細妹仔給佢等做𡜵娘。這下，也毋係你等將細妹仔嫁給佢等，所以你等乜無罪。』」</verse>
				<verse number="23">便雅憫 人就照恁樣去做。佢等逐儕在 示羅 跳舞个細妹仔當中搶一個做𡜵娘，帶等走。佢等轉到自家个土地，重建城鎮，住在該位。</verse>
				<verse number="24">同時，其他 以色列 人也離開該位，逐儕轉自家个支族、家族㧯本地去了。</verse>
				<verse number="25">該時， 以色列 還吂有君王；逐儕照自家所歡喜个去做。</verse>
			</chapter>
		</book>
		<book number="8">
			<chapter number="1">
				<verse number="1">當士師治理 以色列 該站期間，地方上發生飢荒。有一個 以法他 族人，名安到 以利米勒 ，原來住在 猶大 个 伯利恆 ；佢帶等𡜵娘 拿娥美 㧯兩個孻仔 瑪倫 㧯 基連 ，全家徙到 摩押 去，暫時住在該位。</verse>
				<verse number="2"></verse>
				<verse number="3">後來 以利米勒 死掉，留下 拿娥美 㧯姖兩個孻仔；</verse>
				<verse number="4">這兩個孻仔討 摩押 地方个細妹仔 — 娥珥巴 㧯 路得 。大約十年後，</verse>
				<verse number="5">瑪倫 㧯 基連 也死掉，留下 拿娥美 ，無老公，也無孻仔。</verse>
				<verse number="6">拿娥美 還住在 摩押 个時，聽講上主看顧佢个子民，已經使佢等有收成，就準備㧯兩個心舅離開 摩押 轉故鄉去。</verse>
				<verse number="7">姖等共下起身愛轉 猶大 ，總係在路上，</verse>
				<verse number="8">拿娥美 對兩個心舅講：「你兩儕轉妹家去好哪！願上主用慈愛款待你等，像你等好款待𠊎㧯已經死掉个人共樣。</verse>
				<verse number="9">願上主使你等有機會再結婚，兩儕有安身个所在。」 然後， 拿娥美 唚姖等。兩個心舅就開聲大噭，</verse>
				<verse number="10">對姖講：「無愛！𠊎等愛㧯你轉你本族該位去。」</verse>
				<verse number="11">拿娥美 講：「𠊎个妹仔啊，你等還係轉去哪！愛跈𠊎去做麼介呢？𠊎敢還會𫱔孻仔來給你等做老公嗎？</verse>
				<verse number="12">𠊎个妹仔啊，轉去好哪！𠊎已經忒老，無可能再結婚了。就算𠊎還有一些仔希望，今暗晡就結婚，正經𫱔孻仔，</verse>
				<verse number="13">你等愛等佢等長大成人係麼？你等敢能守得住，毋嫁人嗎？𠊎个妹仔啊，毋好恁樣，這係無可能个。因為上主刑罰𠊎，連累到你等，𠊎也盡傷心 。」</verse>
				<verse number="14">姖等又開聲大噭。 娥珥巴 唚家娘後就轉妹家去 ；總係 路得 還係毋拌得離開。</verse>
				<verse number="15">拿娥美 對姖講：「 路得 ！若嫂已經轉去厥本族㧯姖所拜个神 該位去了。你跈姖轉去好哪！」</verse>
				<verse number="16">總係 路得 講：「請毋好喊𠊎離開你。莫喊𠊎轉去！你到㖠位，𠊎也到㖠位；你住㖠位，𠊎也住㖠位；你个民族就係𠊎个民族；你个上帝就係𠊎个上帝。</verse>
				<verse number="17">你死在㖠位，𠊎也死在該位，埋葬在該位。除了死，絕對無麼介事能使𠊎㧯你分開！若係𠊎背約，願上主重重刑罰𠊎！」</verse>
				<verse number="18">拿娥美 看到 路得 恁決心愛跈自家去，就無再勸姖。</verse>
				<verse number="19">恁樣，姖兩儕繼續共下行，直到 伯利恆 。 姖等到 伯利恆 个時，全城个人就鬧起來。該兜婦人家著驚到喊講：「這斷真係 拿娥美 嗎？」</verse>
				<verse number="20">拿娥美 對姖等講：「毋好喊𠊎 拿娥美 ，愛喊𠊎 瑪拉 。因為全能个上帝使𠊎命變當苦。</verse>
				<verse number="21">𠊎出去个時富足，總係上主使𠊎空手轉來。做麼介還愛喊𠊎 拿娥美 呢？上主責罰𠊎；全能者使𠊎受苦。」</verse>
				<verse number="22">這就係 拿娥美 㧯姖个 摩押 心舅 路得 對 摩押 轉來个經過。姖等轉到 伯利恆 ，堵堵好係開始收割大麥个時節。</verse>
			</chapter>
			<chapter number="2">
				<verse number="1">有一個人名安到 波阿斯 ，有錢又有地位，係 拿娥美 老公 以利米勒 个親族。</verse>
				<verse number="2">有一日， 摩押 細妹仔 路得 對 拿娥美 講：「俾𠊎到田肚去；若有人肯好款待𠊎，𠊎就在厥後背拈佢跌掉个麥串。」 拿娥美 講：「𠊎个妹仔啊，做你去！」</verse>
				<verse number="3">所以 路得 就到田肚去，跈在收割工人後背拈跌下來个麥串。堵堵好，姖就到 以利米勒 親族 波阿斯 該垤田肚。</verse>
				<verse number="4">無幾久， 波阿斯 對 伯利恆 來；佢向收割工人問安講：「上主㧯你等共下！」 佢等應講：「上主賜福給你！」</verse>
				<verse number="5">波阿斯 問工頭：「該係㖠家人个細妹仔？」</verse>
				<verse number="6">工頭應講：「姖就係該 摩押 細妹仔，係跈 拿娥美 對 摩押 轉來个。</verse>
				<verse number="7">姖要求𠊎俾姖跈在工人後背拈跌掉个麥串。姖打早就開始拈，這下正停下來，在涼篷下歇睏。」</verse>
				<verse number="8">波阿斯 就去對 路得 講：「細妹仔，聽𠊎講。你毋使到別人个田肚去拈麥串，留在這位㧯𠊎這兜使女共下就好。</verse>
				<verse number="9">看男工到㖠垤田收割，你就跈使女去拈。𠊎已經吩咐男工做毋得欺負你。你嘴燥，就到水罐該位啉男工打來个水。」</verse>
				<verse number="10">路得 就伏在地上跪 波阿斯 ，講：「你做麼介款待𠊎恁好？樣會恁關心𠊎這個外國人？」</verse>
				<verse number="11">波阿斯 應講：「若老公死後，你對家娘恁有孝，樣般離開爺𡟓㧯自家个故鄉，來住在這生份个民族當中，這兜事情𠊎全部聽到了。</verse>
				<verse number="12">願上主照你所做个報答你。願 以色列 个上帝，你所倚靠个上主大大賞賜你 。」</verse>
				<verse number="13">路得 講：「先生，你對𠊎恁好 ！雖然𠊎連做你个使女也堪毋得，你還用親切个話來安慰𠊎。」</verse>
				<verse number="14">到食飯个時， 波阿斯 對 路得 講：「過來這位，食麥餅，搵酸醋來食。」 路得 就㧯該兜工人共下坐。 波阿斯 拿兜焙好个麥串傳給姖，姖食到飽，還有賸。</verse>
				<verse number="15">姖起身又去拈麥串个時， 波阿斯 吩咐佢个工人講：「姖就係對堆等个麥堆肚去拈，你等也做毋得侮辱姖，</verse>
				<verse number="16">甚至愛對捆好个麥捆中抽兜出來，留俾姖拈，也毋好責備姖。」</verse>
				<verse number="17">路得 就恁樣在田肚拈麥串，直到臨暗仔。姖將拈來个麥串打好，差毋多有一籮。</verse>
				<verse number="18">姖將打好个麥仔帶轉城肚給家娘看，又將姖食賸个食物拿給姖。</verse>
				<verse number="19">家娘問姖：「你今晡日對㖠位拈來恁多麥串？你在麼人个田肚做事？願上帝賜福給該照顧你个人！」 路得 就㧯家娘講：「𠊎今晡日在一個名安到 波阿斯 个田肚做事。」</verse>
				<verse number="20">拿娥美 對心舅講：「願一直好款待生人㧯死人个上主賜福給 波阿斯 ！」 拿娥美 又解釋講：「該儕係𫣆等个至親，有義務照顧𫣆等。」</verse>
				<verse number="21">摩押 細妹仔 路得 講：「佢還㧯𠊎講，愛𠊎跈在厥工人个後背拈麥串，直到做完工。」</verse>
				<verse number="22">拿娥美 對心舅 路得 講：「𠊎个妹仔啊，你最好㧯佢个使女共下去做事；若係你到別人个田肚去，驚怕會被人欺負。」</verse>
				<verse number="23">所以 路得 跈 波阿斯 該兜使女去拈麥串，直到大麥、小麥全部收割結束。 路得 還係㧯家娘共下住。</verse>
			</chapter>
			<chapter number="3">
				<verse number="1">有一日， 路得 个家娘 拿娥美 對姖講：「𠊎个妹仔啊，𠊎一定愛為你尋安身个所在，俾你幸福。</verse>
				<verse number="2">波阿斯 敢毋係𫣆等个親族嗎？你識㧯佢个使女共下做事。聽𠊎講，今暗晡佢會在禾埕簸麥仔。</verse>
				<verse number="3">你去洗身，搽一些仔香水，著最好个衫褲，然後到禾埕去。總係毋好俾佢知你在該位，愛等佢食飽、啉罅。</verse>
				<verse number="4">愛注意佢睡个地方；佢睡掉，你就去，掀開佢腳項个被，睡在該位。佢會㧯你講應該做麼介。」</verse>
				<verse number="5">路得 應講：「你恁樣講，𠊎就照恁樣做。」</verse>
				<verse number="6">所以， 路得 到禾埕去，照厥家娘㧯姖講个去做。</verse>
				<verse number="7">波阿斯 食飽、啉罅，心情當好，就去睡在麥堆堘。 路得 恬恬仔行過去，掀開佢腳項个被，睡在該位。</verse>
				<verse number="8">到半夜， 波阿斯 忽然間醒過來，轉身看到有一個婦人家睡在佢腳塍，盡著驚，</verse>
				<verse number="9">就問：「你係麼人？」 姖講：「先生，𠊎係 路得 ，你个使女。請你討𠊎，㧯𠊎結婚 ，因為你係𠊎个至親，有義務照顧𠊎！」</verse>
				<verse number="10">波阿斯 講：「細妹仔，願上主賜福給你！你以前對家娘忠心，這下你對老公个家族所表現个忠心還較大。你本來做得去尋一個後生人，不管佢有錢、無錢，總係你無恁樣做。</verse>
				<verse number="11">細妹仔，這下毋使愁！你要求麼介，𠊎全部會為你辦好，因為𠊎本城个人全部知你係一個賢慧个婦人家。</verse>
				<verse number="12">𠊎確實係你个至親，對你有義務，總係另外有一儕比𠊎還較親。</verse>
				<verse number="13">今暗晡你就留在這位，天光朝晨，𠊎等看佢肯對你盡至親个義務麼。若係佢肯，就當好；若係佢毋肯，𠊎指等永生个上主發誓：𠊎一定會盡這個義務。這下你做得留在這位，睡到天光。」</verse>
				<verse number="14">路得 就睡在佢腳塍。總係天還吂光，人還認毋出姖个時，姖就䟘起來，因為 波阿斯 無愛給人知有婦人家來到禾埕。</verse>
				<verse number="15">波阿斯 對姖講：「脫下你袈等个衫，鋪在這位。」姖就照恁樣做。 波阿斯 就倒差毋多二十公斤个大麥在衫頂項，幫姖放在肩頭頂，然後轉城肚去。</verse>
				<verse number="16">路得 轉到屋下个時，家娘問姖：「𠊎个妹仔啊，樣般？」 路得 就將 波阿斯 為姖所做个全部㧯家娘講。</verse>
				<verse number="17">路得 又講：「佢給𠊎這二十公斤个大麥，因為佢㧯𠊎講：『做毋得空手轉到若家娘該位。』」</verse>
				<verse number="18">拿娥美 講：「𠊎个妹仔啊，毋使著急，看這件事樣般發展。 波阿斯 今晡日無辦好這事定著毋會歇睏。」</verse>
			</chapter>
			<chapter number="4">
				<verse number="1">波阿斯 到城門口眾人聚集个地方，坐在該位。恁堵好， 波阿斯 所講个至親，有義務照顧厥家族該儕，對該位經過。 波阿斯 就喊佢个名講：「請過來這位坐。」佢就過來坐。</verse>
				<verse number="2">波阿斯 又對城肚請出十位長老來，請佢等在該位坐下來。大家全部坐好勢。</verse>
				<verse number="3">佢對該至親講：「 拿娥美 對 摩押 轉來，姖愛賣𠊎等親族 以利米勒 該垤田；</verse>
				<verse number="4">𠊎想你應該知這件事。若係你愛買轉去，就愛在這兜坐等个人㧯𫣆等个長老面前來買；若係毋買，請講清楚，因為你有優先權，接等正輪到𠊎。」 該儕講：「𠊎愛買轉去。」</verse>
				<verse number="5">波阿斯 講：「當你對 拿娥美 買該垤田个時，你也應該討死人个寡婦 摩押 細妹仔 路得 ；恁樣，該垤田正會保留在已經死掉个人名下。」</verse>
				<verse number="6">該至親應講：「恁樣，𠊎放棄買轉這垤田个權利，驚怕𠊎買轉去，𠊎自家个子女也無法度繼承這個產業 。俾你買！𠊎做毋得買。」</verse>
				<verse number="7">該時代， 以色列 人買賣財產有一種慣例：賣方愛脫下自家个鞋給買方。佢等用這種方法表示買賣已經定著。</verse>
				<verse number="8">所以，當該至親對 波阿斯 講：「俾你買！」佢就脫自家个鞋給 波阿斯 。</verse>
				<verse number="9">波阿斯 對該兜長老㧯所有在場个人講：「今晡日你等全部係見證人；𠊎已經對 拿娥美 買 以利米勒 㧯厥孻仔 基連 㧯 瑪倫 所有个家產。</verse>
				<verse number="10">𠊎又討 瑪倫 个寡婦，就係 摩押 細妹仔 路得 做𠊎个𡜵娘。恁樣，所有个產業就做得保留在已經死个人名下，又做得將死人个名繼續存留在本鄉㧯本族人當中。今晡日，你等全部係這事个見證人。」</verse>
				<verse number="11">該兜長老㧯城門口所有个人全部講：「好！𠊎等係見證人。願上主使你愛入門个𡜵娘生養盡多，像 蕾潔 㧯 麗亞 兩姊妹，建立 以色列 家族一樣。願你在 以法他 族中好額，在 伯利恆 有名望。</verse>
				<verse number="12">願上主通過這後生个婦人家俾你有後代，使你个家像 猶大 㧯 塔瑪 𫱔个孻仔 法勒斯 个家共樣興旺。」</verse>
				<verse number="13">所以 波阿斯 討 路得 做𡜵娘。上主賜福給姖，姖就有身項，𫱔一個孻仔。</verse>
				<verse number="14">城肚个婦人家對 拿娥美 講：「讚美上主！佢今晡日給你一個至親來照顧你。願這細人仔在 以色列 中有名望。</verse>
				<verse number="15">你个心舅惜你；姖為你所做个，比七個孻仔所做个還較多。這下姖𫱔一個孫仔；這孫仔會帶給你新个元氣，使你安享天年。」</verse>
				<verse number="16">拿娥美 就將細人仔揇過來，養育佢 。</verse>
				<verse number="17">鄰舍个婦人家㧯這細人仔安名 俄備得 。姖等相爭㧯大家講：「 拿娥美 有一個孻仔！」 俄備得 係 耶西 个阿爸； 耶西 就係 大衛 王个阿爸。</verse>
				<verse number="18">法勒斯 到 大衛 个家譜記在下背： 法勒斯 𫱔 希斯崙 ，</verse>
				<verse number="19">希斯崙 𫱔 蘭 ， 蘭 𫱔 亞米拿達 ，</verse>
				<verse number="20">亞米拿達 𫱔 拿順 ， 拿順 𫱔 撒門 ，</verse>
				<verse number="21">撒門 𫱔 波阿斯 ， 波阿斯 𫱔 俄備得 ，</verse>
				<verse number="22">俄備得 𫱔 耶西 ， 耶西 𫱔 大衛 。</verse>
			</chapter>
		</book>
		<book number="9">
			<chapter number="1">
				<verse number="1">在 以法蓮 山區个 拉瑪 城有一個人，名喊 以利加拿 。佢係 耶羅罕 个孻仔， 以利戶 个孫仔，係屬 以法蓮 支族， 蘇弗 宗族， 託戶 家族个人。</verse>
				<verse number="2">以利加拿 有兩個𡜵娘 — 哈娜 㧯 比尼娜 。 比尼娜 有子女， 哈娜 就無。</verse>
				<verse number="3">以利加拿 逐年對 拉瑪 到 示羅 去敬拜上主 — 萬軍个元帥，向佢獻祭。在該位，有 以利 个兩個孻仔 — 何弗尼 㧯 非尼哈 做上主个祭司。</verse>
				<verse number="4">以利加拿 逐擺獻祭後，一定將祭過个肉分給 比尼娜 一份，給姖个子女各一份。</verse>
				<verse number="5">總係給 哈娜 个係特選个雙份，因為 以利加拿 當惜 哈娜 ，雖然 上主一直無俾姖𫱔。</verse>
				<verse number="6">哈娜 个對頭 比尼娜 常常侮辱姖，欺負姖，因為上主無給姖子女。</verse>
				<verse number="7">這種情形年年共樣，逐擺佢等來到上主个殿， 比尼娜 就使 哈娜 艱苦到流目汁，食毋落東西。</verse>
				<verse number="8">厥老公 以利加拿 會問姖：「 哈娜 ！你做麼介噭？做麼介毋食東西？你樣般恁傷心？有𠊎敢毋係比有十個孻仔較贏？」</verse>
				<verse number="9">有一擺，佢等在 示羅 ，在上主个殿食飽飯， 哈娜 企起來。姖非常難過，就開聲大噭，緊噭緊向上主祈禱。該時，祭司 以利 坐在殿門堘祭司个座位。</verse>
				<verse number="10"></verse>
				<verse number="11">哈娜 許願講：「上主 — 萬軍个元帥啊，請看顧你使女个苦情，紀念𠊎，毋好毋記得𠊎！若係你賜給𠊎一個孻仔，𠊎一定會將佢一生人獻給你；佢个頭那毛一直毋剃掉 。」</verse>
				<verse number="12">哈娜 一直向上主祈禱； 以利 緊看姖个嘴唇。</verse>
				<verse number="13">因為 哈娜 心中恬恬祈禱，只有嘴唇挺動，無出聲， 以利 恅到姖食酒醉，</verse>
				<verse number="14">就對姖講：「你愛醉到幾時？毋好再醉了！」</verse>
				<verse number="15">哈娜 應講：「大人啊，毋係恁樣！𠊎根本無啉酒；𠊎係心肚艱苦个婦女，當㧯上主講𠊎所有个苦情。</verse>
				<verse number="16">毋好恅到你个使女係無規矩个婦人家；𠊎一直在這祈禱，因為𠊎實在盡傷心、盡痛苦。」</verse>
				<verse number="17">以利 講：「你做得平平安安轉去！願 以色列 个上帝照你所求个賜給你！」</verse>
				<verse number="18">哈娜 講：「願你常常用慈愛款待你个使女。」講煞，姖就離開，去食東西，面無再憂愁。</verse>
				<verse number="19">第二朝晨， 以利加拿 全家人打早䟘起來敬拜上主，然後就轉 拉瑪 去。 以利加拿 㧯厥𡜵娘 哈娜 同房，上主聽 哈娜 个祈禱，</verse>
				<verse number="20">姖就有身項，𫱔一個孻仔。 哈娜 㧯細人仔安名 撒母耳 ，因為姖講：「這係𠊎向上主求來个。」</verse>
				<verse number="21">去 示羅 个時間又到了， 以利加拿 帶厥屋下人上去向上主獻年祭，還佢所許个願。</verse>
				<verse number="22">這擺 哈娜 無去；姖對老公講：「等細人仔斷乳，𠊎正帶佢去朝見上主，俾佢一生人留在該位。」</verse>
				<verse number="23">以利加拿 應講：「好！你認為恁樣做較好，就恁樣做；留在屋下等細人仔斷乳以後正去！總係，願上主實現佢自家个話 ！」所以 哈娜 留在屋下養育細人仔。</verse>
				<verse number="24">細人仔斷乳以後， 哈娜 帶佢到 示羅 去，同時牽去一隻三歲个牛牯 ，十公斤麵粉，一皮袋酒。 哈娜 帶等還細个 撒母耳 去 示羅 ，到上主个殿。</verse>
				<verse number="25">㓾掉牛牯以後，佢等就將細人仔交給 以利 。</verse>
				<verse number="26">哈娜 對佢講：「大人啊，𠊎發誓，𠊎就係你以前看到、企在這位向上主祈禱該婦人家。</verse>
				<verse number="27">𠊎向上主求這細人仔，佢照𠊎所求个賜給𠊎。</verse>
				<verse number="28">所以𠊎愛將佢獻給上主；佢愛一生人歸屬上主。」 佢 就在該位敬拜上主。</verse>
			</chapter>
			<chapter number="2">
				<verse number="1">哈娜 祈禱講： 上主使𠊎心肝充滿歡喜； 上主使𠊎頭那 擎到高高。 𠊎向𠊎个敵人開嘴大笑， 因為上帝救𠊎，使𠊎快樂。</verse>
				<verse number="2">只有上主係神聖个； 除佢以外無別個神， 唯有上帝係保護𠊎等个磐石。</verse>
				<verse number="3">你等个講話毋好恁驕傲； 你等毋好像癲仔講狂話。 因為上主真知一切； 佢係審判人个上帝。</verse>
				<verse number="4">勇士个弓被人拗斷； 軟弱个人變做強壯。</verse>
				<verse number="5">有錢人反轉為到食勞碌； 無好食个人毋會再肚飢。 毋會𫱔个𡜵娘𫱔七個； 當會𫱔个卻喪掉子女。</verse>
				<verse number="6">上主能使人死，也能使人生； 佢使人落陰間，也使人返生。</verse>
				<verse number="7">佢使人貧窮，也使人富足； 佢使人卑微，也使人尊貴。</verse>
				<verse number="8">佢對泥粉中高升窮苦人； 佢對糞堆肚牽起困苦人。 佢使佢等㧯王子做朋友， 使佢等坐大位盡有面子。 地个根基係上主所立个； 佢在地个頂高建立世界。</verse>
				<verse number="9">上主看顧忠心子民个腳步； 邪惡个人會在烏暗中消滅。 人無辦法靠自家个力量來贏。</verse>
				<verse number="10">上主愛除滅自家个仇敵； 佢愛用雷公將佢等打死。 上主愛審判全世界。 佢愛賜能力給佢所立个王， 使自家膏油設立个王得勝。</verse>
				<verse number="11">後來， 以利加拿 轉 拉瑪 去了；細阿哥仔 撒母耳 就留在 示羅 ，在祭司 以利 个教導之下事奉上主。</verse>
				<verse number="12">以利 个兩個孻仔係鱸鰻仔。佢等藐視上主，</verse>
				<verse number="13">毋守祭司取祭肉个規定。在人獻祭个時，佢等常常派僕人帶等三齒叉去，肉還在鑊頭肚煮，</verse>
				<verse number="14">僕人就將三齒叉插落去，插到麼介，拿出來就算係祭司个。佢等恁樣對待所有來 示羅 獻祭个 以色列 人。</verse>
				<verse number="15">毋單淨恁樣，甚至牲儀个油還吂燒以前，祭司个僕人就來，對獻祭个人講：「給𠊎一垤肉，𠊎愛拿去給祭司焙。佢無愛煮過个，生肉佢正愛。」</verse>
				<verse number="16">若係該人應講：「照規定愛先將油燒掉，然後正做得由在你拿！」祭司个僕人就會講：「做毋得，𠊎這下就愛！若係毋給𠊎，𠊎就愛用搶！」</verse>
				<verse number="17">在上主看來， 以利 這兩個孻仔个罪惡係非常嚴重，因為佢等毋尊重獻給上主个祭物。</verse>
				<verse number="18">該時， 撒母耳 還細；佢著麻紗个以弗得聖服事奉上主。</verse>
				<verse number="19">厥姆逐年為佢做一領細長衫，跈老公去獻年祭个時帶給佢。</verse>
				<verse number="20">以利 逐擺祝福 以利加拿 㧯厥𡜵娘，對佢講：「願上主通過你个𡜵娘，再賜給你子女，來代你獻給上主个這個孻仔。」然後，佢等就轉屋下去。</verse>
				<verse number="21">上主賜福 哈娜 ；姖又𫱔三個孻仔，兩個妹仔。 細阿哥仔 撒母耳 事奉上主，緊來緊大。</verse>
				<verse number="22">以利 已經當老。佢聽到佢兩個孻仔對 以色列 人个種種壞行為，佢等甚至㧯該兜在聖帳篷門前工作个婦女睡。</verse>
				<verse number="23">以利 對佢等講：「你等樣般做這種事呢？大家都將你等所做个壞事㧯𠊎講。</verse>
				<verse number="24">吾孻仔啊，做毋得恁樣！在上主子民當中，流傳盡多你等个壞名聲！</verse>
				<verse number="25">若係有人得罪別人，還有上帝為佢講話；總係人得罪上主，麼人能為佢講話呢？」 佢等毋聽阿爸个話，因為上帝已經決定愛㓾佢等。</verse>
				<verse number="26">細阿哥仔 撒母耳 緊來緊大，上主㧯人當惜佢。</verse>
				<verse number="27">有一個神人來見 以利 ，將上主个話㧯佢講：「你个祖先 亞倫 家族做 埃及 王奴才个時，𠊎識向佢啟示。</verse>
				<verse number="28">𠊎對 以色列 所有支族當中，選出佢个家族做𠊎个祭司，使佢等在祭壇前服事𠊎，向𠊎燒香，又著以弗得聖服求問𠊎。𠊎還給佢等有權利好分祭壇頂燒獻个祭肉。</verse>
				<verse number="29">你等做麼介看輕𠊎要求𠊎子民个獻祭㧯牲儀呢？ 以利 ，你做麼介看重若孻仔高過看重𠊎，准佢等將𠊎个子民 以色列 所獻牲儀中最好个部份拿去畜肥自家呢？</verse>
				<verse number="30">𠊎 — 上主、 以色列 个上帝識應許你个家族㧯你个宗族會永遠做祭司事奉𠊎。總係，𠊎這下愛廢除你等个職位！尊重𠊎个，𠊎一定看重佢等；藐視𠊎个，𠊎一定看輕佢等。</verse>
				<verse number="31">看啊！時節快到了，𠊎愛使你家族㧯你宗族中个後生人短命，無人長壽。</verse>
				<verse number="32">你一定會煩勞，嫉妒𠊎給其他 以色列 人个福氣。你个家庭毋會再有人食到老。</verse>
				<verse number="33">𠊎會保留一個後代給你，使佢做祭司事奉𠊎，總係佢會使你青盲、絕望。你所有其他个後代全部會無好死。</verse>
				<verse number="34">你兩個孻仔 何弗尼 㧯 非尼哈 會共日死掉；這就係對你顯示𠊎所講个話全部會實現个證據。</verse>
				<verse number="35">𠊎愛選一個祭司，佢會對𠊎忠心，照𠊎个心意做事。𠊎愛堅固佢个家庭；佢會永遠在𠊎膏油設立个君王面前服事。</verse>
				<verse number="36">你个後代中留下來个人會向該祭司求乞、討食，為到過日仔來要求做祭司个助理。」</verse>
			</chapter>
			<chapter number="3">
				<verse number="1">細阿哥仔 撒母耳 在 以利 个教導之下事奉上主。該期間，盡少有對上主來个信息，無常常有異象。</verse>
				<verse number="2">有一暗晡，目珠花花个 以利 在自家个房間睡目；</verse>
				<verse number="3">撒母耳 睡在上主个聖帳篷中，就係放上帝約櫃个所在。上帝个燈還𤏸等，</verse>
				<verse number="4">上主喊 撒母耳 。 撒母耳 應講：「𠊎在這位！」</verse>
				<verse number="5">佢就走到 以利 該位，講：「你喊𠊎係麼？𠊎在這位。」 以利 講：「𠊎無喊你，倒轉去睡！」 撒母耳 就倒轉去睡。</verse>
				<verse number="6">上主又喊 撒母耳 。該時 撒母耳 還毋識上主，因為上主吂識向佢顯現。佢又䟘起來，到 以利 該位，講：「你喊𠊎係麼？𠊎在這位。」 以利 講：「吾孻仔啊，𠊎無喊你，倒轉去睡！」</verse>
				<verse number="7"></verse>
				<verse number="8">上主第三擺喊 撒母耳 。佢又再䟘起來，到 以利 該位，講：「你喊𠊎係麼？𠊎在這位。」 以利 正知該係上主喊這細阿哥仔。</verse>
				<verse number="9">以利 就對 撒母耳 講：「倒轉去睡；若係佢再喊你，你就講：『上主啊，請講！僕人在這位聽！』」 撒母耳 就轉去睡目。</verse>
				<verse number="10">上主來，企在該位，像先前共樣喊：「 撒母耳 ！ 撒母耳 ！」 撒母耳 應講：「請講！僕人在這位聽！」</verse>
				<verse number="11">上主對佢講：「無幾久，𠊎愛在 以色列 人當中做一件事，使逐個聽到个人全部著驚、耳公咻咻滾。</verse>
				<verse number="12">該日，𠊎愛從頭到尾實行𠊎向 以利 个家所講過个話。</verse>
				<verse number="13">𠊎已經㧯佢講過，𠊎愛因為佢兩個孻仔咒詛𠊎，來永遠責罰佢一家。 以利 知佢等做壞事，總係無禁止佢等。</verse>
				<verse number="14">所以，𠊎嚴嚴向 以利 个家宣告：佢等獻麼介祭抑係牲儀，永遠無辦法贖這恁重个罪。」</verse>
				<verse number="15">撒母耳 睡到天光，䟘起來開上主殿个門；佢毋敢向 以利 提起這異象。</verse>
				<verse number="16">以利 喊佢：「吾孻仔 撒母耳 ！」 撒母耳 應講：「𠊎在這位！」</verse>
				<verse number="17">以利 問佢：「上主對你講麼介？毋好瞞騙𠊎。若係你無全部講出來，願上帝重重罰你！」</verse>
				<verse number="18">所以， 撒母耳 就全部講出來，全無騙佢。 以利 講：「佢係上主；願佢照佢自家个旨意去行！」</verse>
				<verse number="19">撒母耳 緊來緊大；上主㧯佢共下，使佢所講个逐句話全部實現。</verse>
				<verse number="20">全 以色列 人民，對 但 到 別是巴 ，全部知 撒母耳 係上主所立忠心个先知。</verse>
				<verse number="21">上主繼續在 示羅 — 就係佢向 撒母耳 講話个地方顯現。 撒母耳 个話傳到 以色列 全地。</verse>
			</chapter>
			<chapter number="4">
				<verse number="1">該時， 以色列 人出去愛㧯 非利士 人相㓾。 以色列 人在 以便以謝 安營； 非利士 人在 亞弗 安營。</verse>
				<verse number="2">非利士 人擺陣攻擊 以色列 人，打到非常激烈，最後打贏佢等，㓾掉差毋多四千 以色列 人。</verse>
				<verse number="3">士兵轉到營肚个時， 以色列 該兜長老講：「今晡日上主做麼介俾 非利士 人打贏𠊎等呢？𠊎等遽遽到 示羅 去，將上主个約櫃扛出來！恁樣，佢 就會㧯𠊎等共下去，將𠊎等對敵人个手中救出來。」</verse>
				<verse number="4">所以，佢等派人到 示羅 去，將坐在兩個基路伯中間个上主 — 萬軍元帥个約櫃扛出來。 以利 个兩個孻仔 何弗尼 㧯 非尼哈 跈上帝个約櫃共下來。</verse>
				<verse number="5">上主个約櫃到軍營个時， 以色列 人就大聲歡呼，連地泥都會顫。</verse>
				<verse number="6">非利士 人聽到歡呼个聲，就講：「 希伯來 營肚做麼介喊到恁大聲！係麼介意思呢？」當佢等發現該係上主个約櫃到 希伯來 營中，</verse>
				<verse number="7">就全部著驚，講：「有神明到佢等个營肚來了！𠊎等慘了！𠊎等從來毋識堵到這種事！</verse>
				<verse number="8">𠊎等慘了！麼人能救𠊎等離開該兜大能个神明呢？在曠野用各種災禍㓾死 埃及 人个，就係該兜神明啊！</verse>
				<verse number="9">非利士 人啊，愛勇敢！愛做大丈夫出去相㓾！若無，𠊎等就會做 希伯來 人个奴才，像佢等以前做𠊎等个奴才共樣。所以，𠊎等愛做大丈夫勇敢去相㓾！」</verse>
				<verse number="10">非利士 人拚命相㓾。 以色列 人又輸掉，逐儕走轉自家个屋下。這擺死掉个人非常多， 以色列 有三萬軍人被人㓾死。</verse>
				<verse number="11">上帝个約櫃被人搶走； 以利 个兩個孻仔 何弗尼 㧯 非尼哈 也被人㓾死。</verse>
				<verse number="12">該日，有一個 便雅憫 支族个人對戰場一直走到 示羅 。佢扯爛衫，委灰在頭那頂，表示悲傷。</verse>
				<verse number="13">以利 心肝肚非常擔心上帝个約櫃，坐在路堘緊看。該人在城肚將消息傳開，逐儕全部著驚大噭。</verse>
				<verse number="14">以利 聽到大噭个聲，就問：「做麼介有這個大聲？」該人也走到 以利 頭前報告消息。</verse>
				<verse number="15">(當時 以利 已經九十八歲，差毋多完全看毋到。)</verse>
				<verse number="16">該人對 以利 講：「今晡日𠊎對戰場一直逃到這位。」 以利 問佢：「吾孻仔啊，發生麼介事情？」</verse>
				<verse number="17">該人講：「 以色列 人對 非利士 人面前逃走；𠊎等个軍隊輸到當慘；另外，你兩個孻仔 何弗尼 㧯 非尼哈 也被人㓾死。上帝个約櫃乜被人搶走了！」</verse>
				<verse number="18">該人講到上帝約櫃个時， 以利 就對城門堘、佢个座位頂向後背橫落去。 以利 盡老又大箍，一橫落去就跌斷頸筋死掉。佢做 以色列 个士師總共四十年。</verse>
				<verse number="19">以利 个心舅， 非尼哈 个𡜵娘，堵好有身項，產期會到。姖聽講上帝个約櫃被人搶走，厥家官㧯老公也死掉，姖个肚笥就痛到無葛無煞，𫱔出細人仔。</verse>
				<verse number="20">姖斷氣以前，在塍頭照顧姖个婦人家對姖講：「毋使驚！你𫱔到一個孻仔囉！」總係姖毋搭人，也毋出聲。</verse>
				<verse number="21">姖㧯細人仔安到 以迦博 ，又解釋講：「上帝个榮光離開 以色列 了」，意思係指上帝个約櫃被人搶走，厥家官㧯老公也死掉。</verse>
				<verse number="22">姖講：「上帝个榮光已經離開 以色列 ，因為上帝个約櫃被人搶走了。」</verse>
			</chapter>
			<chapter number="5">
				<verse number="1">非利士 人搶到上帝个約櫃以後，佢等對 以便以謝 將它扛到 亞實突 城。</verse>
				<verse number="2">非利士 人將上帝个約櫃扛入 大袞 神廟肚，放在 大袞 神像个堘頭。</verse>
				<verse number="3">第二日打早， 亞實突 人䟘起來，看到 大袞 神像面向地泥，橫在上主約櫃頭前。佢等將它扶起來，放轉原來个所在。</verse>
				<verse number="4">第三朝晨，佢等䟘起來又看到 大袞 神像面向地泥，橫在上主約櫃頭前。這擺， 大袞 个頭那㧯雙手全部拗斷掉，跌在門檻，只有賸到膚身。</verse>
				<verse number="5">(所以，直到今晡日， 大袞 神个祭司㧯所有在 亞實突 个信徒全部𨃰過 大袞 神廟个門檻，毋敢踏上去。)</verse>
				<verse number="6">上主重重責罰 亞實突 㧯四周圍地區个人民，使佢等全部發毒粒仔 ，驚到無葛無煞。</verse>
				<verse number="7">佢等看到這情形，就講：「 以色列 个上帝重重責罰𠊎等㧯𠊎等个 大袞 神了。𠊎等做毋得繼續將約櫃留在這位。」</verse>
				<verse number="8">所以，佢等派人去請 非利士 个五個領袖來，問佢等：「𠊎等應該樣般來處理 以色列 上帝个約櫃呢？」 佢等應講：「將它徙到 迦特 去！」所以民眾就將 以色列 上帝个約櫃徙到該位。</verse>
				<verse number="9">總係約櫃徙到該位以後，上主也責罰該城，引起當大个緊張。上帝使全城所有个人發毒粒仔，老个、後生个全部共樣。</verse>
				<verse number="10">所以佢等將上帝个約櫃送到 非利士 另外一個城 以革倫 去。上帝个約櫃到該位个時， 以革倫 人全部盡喊講：「佢等將 以色列 上帝个約櫃扛來，愛將𠊎等全部害死！」</verse>
				<verse number="11">所以，佢等派人去請 非利士 个五個領袖來，對佢等講：「將 以色列 上帝个約櫃送轉它原來个地方去！恁樣它正毋會害死𠊎等㧯𠊎等个人民。」因為上帝重重責罰佢等，全城个人被死驚到無葛無煞。</verse>
				<verse number="12">該兜無死个人也滿身發毒粒仔。大家就盡喊，向佢等个神明求救命。</verse>
			</chapter>
			<chapter number="6">
				<verse number="1">上主个約櫃在 非利士 地區停留七個月以後，</verse>
				<verse number="2">非利士 人請祭司㧯卜卦个來，問佢等：「𠊎等應該樣般來處理上主个約櫃？指示𠊎等愛樣般將約櫃送轉原來个地方。」</verse>
				<verse number="3">佢等應講：「若係你等愛將 以色列 上帝个約櫃送轉去，應當向佢獻贖罪个禮物賠罪，做毋得單單將約櫃送轉去。恁樣，你等个病就會得到醫治，正會知做麼介上帝一直責罰你等。」</verse>
				<verse number="4">非利士 人問：「𠊎等愛送麼介贖罪个禮物呢？」 佢等應講：「用金仔做五隻粒仔 㧯五隻老鼠。逐隻金粒仔㧯金老鼠代表一個 非利士 領袖，因為共樣个災難發生在你等㧯你等領袖个身上。</verse>
				<verse number="5">你等一定愛做毒粒仔个形像㧯毀壞你等田地老鼠个形像，向 以色列 个上帝承認你等个罪。恁樣，無一定佢就毋會繼續責罰你等㧯你等个神明、還有你等个土地。</verse>
				<verse number="6">你等何麼死苦像 埃及 王㧯 埃及 人恁硬頸？佢等被上帝㩢到無葛無煞，敢毋係乖乖放 以色列 人離開 埃及 ？</verse>
				<verse number="7">所以，你等愛預備一輛新車㧯兩隻從來吂識掛過軛有乳个牛乸，將牛乸牽到車仔頭前，牛軛掛在牛乸个頸筋，還愛將牠兜个細牛仔逐轉牛欄。</verse>
				<verse number="8">愛將上主个約櫃放在車頂，堘頭另外放一個箱仔，底背裝該兜金仔个形像，就係你等贖罪个禮物，然後由在牛拉等車仔行。</verse>
				<verse number="9">你等愛注意車仔行个方向：若係它向 伯‧示麥 行，這災禍就係 以色列 个上帝降給𠊎等个；若係無向該地方行，𠊎等就知上帝無降災，這災禍係毋堵好堵到个。」</verse>
				<verse number="10">非利士 人照佢等講个去做。佢等將兩隻有乳个牛乸落在車仔頭前，將細牛仔關在牛欄肚，</verse>
				<verse number="11">將上主个約櫃放在車頂，還有該裝金老鼠㧯金粒仔个箱仔也放在車頂。</verse>
				<verse number="12">牛乸在向 伯‧示麥 个路上，毋偏左抑毋偏右直直去；牠兜緊行緊噭。五個 非利士 人个領袖跈等牠兜，直到 伯‧示麥 个邊界。</verse>
				<verse number="13">伯‧示麥 人民在山壢割麥仔；佢等頭那一擎起來，看到約櫃，大家就非常歡喜。</verse>
				<verse number="14">車仔來到 伯‧示麥 人 約書亞 个田肚，停在一垤大石頭堘頭。人民將車仔劈掉，將兩隻牛乸㓾掉做燒化祭獻給上主。</verse>
				<verse number="15">利未 人將上主个約櫃㧯裝金仔个形像个箱仔扛下來，放在大石頭頂。該日， 伯‧示麥 人民向上主獻燒化祭㧯其他牲儀。</verse>
				<verse number="16">五個 非利士 人个領袖看到佢等所做个事，該日就轉 以革倫 去了。</verse>
				<verse number="17">非利士 人獻五隻金粒仔給上主做贖罪个禮物：一個為 亞實突 、一個為 迦薩 、一個為 亞實基倫 、一個為 迦特 、一個為 以革倫 。</verse>
				<verse number="18">佢等也獻金老鼠，逐隻係為各 非利士 領袖管轄个城鎮，包含防衛个城鎮㧯無圍牆个村莊。 伯‧示麥 人 約書亞 田肚該垤大石頭，就係佢等放上主約櫃該垤大石頭，到這下還留在該位，做發生這事个證據。</verse>
				<verse number="19">上主㓾掉七十 個 伯‧示麥 人，因為佢等偷看約櫃个底背。人民因為上主在佢等當中㓾掉恁多人就盡傷心。</verse>
				<verse number="20">伯‧示麥 人講：「在上主這位神聖个上帝面前，麼人企得住呢？𠊎等做得將約櫃送到㖠位去、使它離開𠊎等呢？」</verse>
				<verse number="21">佢等派人去對 基列‧耶琳 城个人講：「 非利士 人將上主个約櫃送轉來了；請將約櫃接到你等該位去！」</verse>
			</chapter>
			<chapter number="7">
				<verse number="1">所以 基列‧耶琳 城个人將上主个約櫃接過來，扛到一個細山頂，放在 亞比拿達 个屋下。佢等特別設立 亞比拿達 个孻仔 以利亞撒 看守上主个約櫃。</verse>
				<verse number="2">約櫃留在 基列‧耶琳 城當久，大約有二十年，然後 以色列 人全部尋求上主个幫助。</verse>
				<verse number="3">撒母耳 對 以色列 人民講：「若係你等專心歸向上主，就一定愛除掉你等當中所有外族个神明㧯 亞斯她錄 女神个神像。你等愛將自家完全獻給上主，單單事奉佢。恁樣，佢就會救你等離開 非利士 人个手。」</verse>
				<verse number="4">所以 以色列 人除掉該兜 巴力 㧯 亞斯她錄 偶像，單單事奉上主。</verse>
				<verse number="5">撒母耳 講：「愛召集所有 以色列 人到 米斯巴 ，𠊎愛在該位為你等向上主祈禱。」</verse>
				<verse number="6">所以佢等全部聚集到 米斯巴 。佢等打水，倒在上主面前，做獻給上主个祭物，又禁食歸日。佢等講：「𠊎等得罪上主了。」 ( 米斯巴 係 撒母耳 為 以色列 人處理糾紛个所在。)</verse>
				<verse number="7">非利士 人聽到 以色列 人聚集在 米斯巴 ，該五個 非利士 領袖就帶領軍隊愛出來攻擊佢等。 以色列 人聽到這消息當驚，</verse>
				<verse number="8">就對 撒母耳 講：「請繼續為𠊎等向上主 — 𠊎等个上帝祈禱，毋好停，求佢救𠊎等脫離 非利士 人个手。」</verse>
				<verse number="9">撒母耳 㓾一隻還食乳个細羊仔做全牲个燒化祭獻給上主。佢祈求上主幫助 以色列 ；上主就聽佢个祈禱。</verse>
				<verse number="10">撒母耳 正獻燒化祭个時， 非利士 人來攻擊 以色列 。在該時，上主對天頂用雷公打 非利士 人，使佢等亂淨淨，在 以色列 人面前逃走。</verse>
				<verse number="11">以色列 人對 米斯巴 出來，一直追 非利士 人到 伯‧甲 附近，透路㓾佢等。</verse>
				<verse number="12">後來， 撒母耳 在 米斯巴 㧯 善 个中間頓一垤石頭，講：「上主到這下一直幫助𠊎等。」所以，佢將這垤石頭安到「 以便以謝 」。</verse>
				<verse number="13">恁樣， 非利士 人被 以色列 人打輸了。 撒母耳 還生个時，上主無俾 非利士 人再侵犯 以色列 个領土。</verse>
				<verse number="14">對 以革倫 到 迦特 ，所有被 非利士 人搶走个城鎮全部還 以色列 。 以色列 收復全部領土。該時， 以色列 人㧯 亞摩利 人和平相處。</verse>
				<verse number="15">撒母耳 一生做士師領導 以色列 。</verse>
				<verse number="16">佢逐年出去巡查 伯特利 、 吉甲 㧯 米斯巴 ，在這兜所在處理 以色列 人个糾紛。</verse>
				<verse number="17">出巡以後，佢就轉到家鄉 拉瑪 ，在該位做 以色列 个士師。佢在 拉瑪 為上主起一座祭壇。</verse>
			</chapter>
			<chapter number="8">
				<verse number="1">撒母耳 年老个時，立厥孻仔做 以色列 个士師。</verse>
				<verse number="2">大个孻仔安到 約珥 ，細个孻仔安到 亞比亞 ；佢等在 別是巴 做士師。</verse>
				<verse number="3">佢等毋學阿爸个模範，反轉貪愛錢財，被人收買，毋照公道斷是非。</verse>
				<verse number="4">所以， 以色列 所有个長老全部聚集到 拉瑪 去見 撒母耳 ，</verse>
				<verse number="5">對佢講：「你看，你恁老了，你个孻仔又毋學你个模範。所以，請為𠊎等立一個王，像其他國家共樣，有王來治理𠊎等。」</verse>
				<verse number="6">撒母耳 當無歡喜佢等要求立王个事，所以佢去求問上主。</verse>
				<verse number="7">上主對 撒母耳 講：「做你順人民个意思！佢等並毋係㧒掉你，係㧒掉𠊎，無愛𠊎做佢等个王。</verse>
				<verse number="8">自從𠊎𢱋佢等出 埃及 以來，佢等就離開𠊎，去拜別个神明。這下佢等對你所做个，就係佢等一直對𠊎所做个。</verse>
				<verse number="9">做你順佢等！總係你愛嚴嚴警告佢等，㧯佢等講清楚，將來佢等个王會樣般對待佢等。」</verse>
				<verse number="10">撒母耳 將上主个話全部㧯該兜來向佢要求立王个人民講。</verse>
				<verse number="11">佢講：「你等个王會恁樣對待你等：佢會喊你等个孻仔做兵，有兜做戰車兵，有兜做騎兵，有兜做先鋒隊員。</verse>
				<verse number="12">佢會設立人做官長，有兜帶兵一千儕，有兜帶兵五十儕。你等个孻仔會代佢耕田，代佢收割，代佢製造武器㧯戰車个裝備。</verse>
				<verse number="13">佢會喊你等个妹仔為佢做香料、煮食、焙餅。</verse>
				<verse number="14">佢會將你等最好个田地、葡萄園、橄欖園賜給佢个官員。</verse>
				<verse number="15">佢會將你等个五榖㧯葡萄个十分之一賜給佢个宮廷大臣㧯其他官員。</verse>
				<verse number="16">佢會將你等个僕人、使女、最好个頭牲 㧯驢帶走，喊佢等代佢做工。</verse>
				<verse number="17">佢會拿走你等羊群个十分之一，你等自家也會做佢个奴才。</verse>
				<verse number="18">到該時，你等會為到自家所要求个王哀求上主，總係上主毋會搭你等。」</verse>
				<verse number="19">人民毋聽 撒母耳 个話，反轉應講：「毋使你管！𠊎等一定愛有王治理𠊎等！</verse>
				<verse number="20">恁樣𠊎等正會像別國个人民有自家个王治理𠊎等，帶領𠊎等上戰場相㓾。」</verse>
				<verse number="21">撒母耳 聽到佢等个話就照恁樣向上主講。</verse>
				<verse number="22">上主對 撒母耳 講：「照佢等所要求个，為佢等立一個王！」所以 撒母耳 對所有个 以色列 人講：「逐儕轉自家个城去！」</verse>
			</chapter>
			<chapter number="9">
				<verse number="1">有一個 便雅憫 支族个人，名安到 基士 ；佢係 亞別 个孻仔、 洗羅 个孫仔，屬 亞斐亞 宗族、 比歌拉 家族个人。 基士 有錢，有地位。</verse>
				<verse number="2">佢有一個孻仔名安到 掃羅 ，係一個當紮磳、當緣投个後生人，無人㧯佢比抑得。 掃羅 比最高个 以色列 人還高加一隻頭。</verse>
				<verse number="3">基士 有幾隻驢仔打毋見掉；佢對 掃羅 講：「你帶一個僕人共下去尋驢仔！」</verse>
				<verse number="4">佢等行遍 以法蓮 山區㧯 沙利沙 地區，總係無尋到。佢等繼續尋，經過 沙琳 地區，驢仔也無在該位。所以佢等到 便雅憫 地區去尋，還係無尋到。</verse>
				<verse number="5">後來，佢等到 蘇弗 地， 掃羅 對佢个僕人講：「𠊎等轉去較好！驚怕吾爸無再愁驢仔，顛倒愁𠊎等。」</verse>
				<verse number="6">僕人講：「等一下。在這城有一個神人，受大家尊重，因為佢所講个逐件事全部實現。𠊎等去問佢，無一定佢會㧯𠊎等講到㖠位去尋驢仔。」</verse>
				<verse number="7">掃羅 講：「若係𠊎等去見佢，有麼介東西好送給佢？𠊎等袋肚已經無食物，無東西好送給該神人。」</verse>
				<verse number="8">僕人應講：「𠊎有一隻細銀幣，做得送該神人，請佢㧯𠊎等講，愛到㖠位去尋驢仔。」</verse>
				<verse number="9">掃羅 講：「做得噢！𠊎等來去。」佢等就向神人所住个城肚去。佢等行上山崎、愛入城个時堵到幾個出來打水个細妹仔，就問姖等：「先見在城肚麼？」 (頭擺，先知被 以色列 人稱做先見。若係有人愛求問上帝，就講：「𠊎等來去見先見！」)</verse>
				<verse number="10"></verse>
				<verse number="11"></verse>
				<verse number="12">細妹仔應講：「係啊，佢在城肚。其實，佢就在你等頭前無幾遠！你等遽遽入城去尋佢。佢今晡日到城肚來，係因為民眾愛在山頂个祭壇獻祭。</verse>
				<verse number="13">民眾一定愛等佢來，因為佢愛先為祭物祝福，佢等正做得食。若係你等這下就入城去，做得在佢上山食東西以前尋到佢。」</verse>
				<verse number="14">掃羅 㧯佢个僕人繼續向前行，愛入城个時，看到 撒母耳 向佢等這方向來，愛到敬拜个祭壇該位去。</verse>
				<verse number="15">掃羅 還吂到个前一日，上主已經指示 撒母耳 講：</verse>
				<verse number="16">「天光日這時，𠊎會派一個 便雅憫 支族个人到你這位來。你愛用油膏佢，立佢做𠊎子民 以色列 个統治者。佢會救佢等脫離 非利士 人个手。𠊎个子民受苦，𠊎有看到；佢等个哀求𠊎有聽到。」</verse>
				<verse number="17">撒母耳 看到 掃羅 个時，上主對佢講：「看啊！這個人就係𠊎㧯你講个人；佢會治理𠊎个子民。」</verse>
				<verse number="18">該時 撒母耳 來到城門堘； 掃羅 行前問佢：「請問，先見住在㖠位？」</verse>
				<verse number="19">撒母耳 應講：「𠊎就係先見。你先行，先到祭壇去。你兩儕今晡日愛㧯𠊎共下食飯；天光朝晨𠊎會回答你所有个問題，然後送你離開。</verse>
				<verse number="20">三日前打毋見掉該幾隻驢仔，你毋使愁，已經尋到了。總係， 以色列 人民盡期待个係麼人呢？ 毋係你㧯若爸个家族嗎？」</verse>
				<verse number="21">掃羅 應講：「𠊎屬 便雅憫 支族，係 以色列 最細个支族。𠊎家族乜係 便雅憫 支族中最卑微个家族。你做麼介對𠊎講恁樣个話？」</verse>
				<verse number="22">撒母耳 𢱋 掃羅 㧯佢个僕人入去一間大房間，俾佢等坐大位。該位大約有三十個人客，大家全部坐好。</verse>
				<verse number="23">撒母耳 對煮食个講：「去將𠊎交給你該垤特別留下來个肉拿來。」</verse>
				<verse number="24">煮食个就將該垤特選个後腿肉拿來，放在 掃羅 面前， 撒母耳 講：「這係為你留下个肉。拿去食！這係𠊎特別留下來，愛在人客面前給你个。」 該日， 掃羅 就㧯 撒母耳 共下食飯。</verse>
				<verse number="25">佢等對山頂个祭壇轉城以後， 撒母耳 㧯 掃羅 在屋頂講話。</verse>
				<verse number="26">第二朝晨，佢等當早就䟘起來。 撒母耳 到屋頂喊 掃羅 ：「愛準備好！𠊎送你轉。」 掃羅 準備好勢，㧯 撒母耳 共下到街項去。</verse>
				<verse number="27">佢等行到城堘， 撒母耳 對 掃羅 講：「喊你个僕人先行。」僕人離開以後， 撒母耳 講：「在這位停一下，𠊎愛將上帝个話㧯你講。」</verse>
			</chapter>
			<chapter number="10">
				<verse number="1">撒母耳 拿一罌橄欖油，倒在 掃羅 頭那頂，唚佢講：「上主毋係膏油立你做佢个子民 以色列 个統治者嗎？你愛治理上主个子民，救佢等離開四周圍所有个仇敵。以下就係上主膏油立你做佢个子民統治者个證據 ：</verse>
				<verse number="2">今晡日離開𠊎以後，你會在 便雅憫 地區个 泄撒 ，偎近 蕾潔 个墳墓該位堵到兩個人。佢等會㧯你講：『你愛尋个驢仔已經尋到了。若爸無再愁驢仔，顛倒愁你，一直問人：𠊎為吾孻仔愛樣般正好？』</verse>
				<verse number="3">你對該位再向前行，到 他泊 个聖樹該位，會堵到三個人；佢等愛去 伯特利 向上帝獻祭。其中一儕帶等三隻細山羊，另外一儕帶等三隻餅，第三儕帶等一皮袋酒。</verse>
				<verse number="4">佢等會㧯你請安，給你兩隻餅；你愛收下來。</verse>
				<verse number="5">「然後，你愛去 基比亞 ，到上帝个山；該位有 非利士 人个駐防兵。你在入城个所在會堵到一群對山頂祭壇該位下來个先知；佢等面前有人打鼓、歕笛、彈豎琴㧯七弦琴；佢等又受感入神忘形講話。</verse>
				<verse number="6">上主个靈愛強烈臨到你；你就會㧯佢等共下受感入神忘形講話，像變另外一個人。</verse>
				<verse number="7">這兜兆頭發生个時，做你照上帝指示你个去做，因為上帝㧯你共下。</verse>
				<verse number="8">你愛比𠊎先到 吉甲 ；𠊎會在該位㧯你會合，又獻燒化祭㧯平安祭。你愛在該位等七日；𠊎到以後，會俾你知應該做个事。」</verse>
				<verse number="9">掃羅 離開 撒母耳 个時，上帝使佢个心變做新个。 撒母耳 㧯佢講个逐個兆頭，該日全部實現了。</verse>
				<verse number="10">掃羅 㧯佢个僕人到 基比亞 个時，一群先知迎接佢。上帝个靈強烈臨到佢，佢就㧯該群先知共下受感入神忘形講話。</verse>
				<verse number="11">以前認識 掃羅 个人看到佢恁樣，大家互相問講：「 基士 个孻仔樣會恁樣？ 掃羅 敢也成做先知嗎？」</verse>
				<verse number="12">該地方有一個人講：「恁樣，其他个人呢？佢等个阿爸係先知麼？」這就係「 掃羅 敢也成做先知嗎？」這句俗語个來源。</verse>
				<verse number="13">掃羅 在該位受感入神忘形講話以後，就去山頂祭壇該位。</verse>
				<verse number="14">掃羅 个阿叔看到佢㧯僕人，就問佢等：「你等到㖠位去？」 掃羅 講：「𠊎等去尋驢仔啊！尋毋到，𠊎等就去見 撒母耳 。」</verse>
				<verse number="15">掃羅 个阿叔問：「 撒母耳 㧯你等講麼介？」</verse>
				<verse number="16">掃羅 應講：「佢㧯𠊎等講驢仔已經尋到了。」總係 掃羅 無㧯厥叔提起 撒母耳 所講立王个話。</verse>
				<verse number="17">撒母耳 召集 以色列 人去 米斯巴 ，到上主个面前去，</verse>
				<verse number="18">對佢等講：「上主 — 以色列 个上帝講，佢帶領你等出 埃及 ，救你等脫離 埃及 人㧯所有欺負你等个國家。</verse>
				<verse number="19">佢係你等个上帝，係救你等脫離所有災難㧯壓制个上帝。總係今晡日，你等拒絕佢，要求𠊎為你等立一個王。這下你等愛照支族㧯宗族个順序集合在上主面前。」</verse>
				<verse number="20">所以， 撒母耳 喊 以色列 逐支族行前來拈鬮，就拈出 便雅憫 支族。</verse>
				<verse number="21">撒母耳 喊 便雅憫 支族个逐家族行前來，拈出 瑪特利 家族，然後拈出 基士 个孻仔 掃羅 。眾人愛尋 掃羅 ，總係尋佢毋到。</verse>
				<verse number="22">佢等求問上主：「這儕人有來麼？」 上主應講：「 掃羅 在該片，囥在包袱堆後背。」</verse>
				<verse number="23">有人走去拉 掃羅 出來，帶佢到眾人當中；佢比所有个人高加一隻頭。</verse>
				<verse number="24">撒母耳 對眾人講：「你等看，這就係上主揀選个人！𠊎等當中無一個人㧯佢比抑得。」 眾人大聲喊：「願王萬歲！」</verse>
				<verse number="25">撒母耳 向眾人說明王个責任㧯權利，又將這兜規定寫在書卷上，放在上主面前，然後喊逐儕轉屋下去。</verse>
				<verse number="26">掃羅 就轉 基比亞 屋下去；有一群被上帝感動个勇士跈 掃羅 共下去。</verse>
				<verse number="27">總係有兜鱸鰻仔講：「這種腳數敢有辦法救𠊎等？」佢等看毋起 掃羅 ，也無送禮物給佢； 掃羅 卻毋搭佢等。</verse>
			</chapter>
			<chapter number="11">
				<verse number="1">亞捫 人个王 拿轄 攻打 基列 地區个 雅比 城；佢个軍隊包圍全城。 雅比 人全部對 拿轄 講：「你㧯𠊎等立約，𠊎等就服事你。」</verse>
				<verse number="2">亞捫 人 拿轄 講：「愛𠊎㧯你等立約？做得！有一個條件：𠊎愛將你等逐儕人个右眼挖出來，用恁樣來侮辱所有个 以色列 人。」</verse>
				<verse number="3">雅比 該兜長老對佢講：「請寬容𠊎等七日，俾𠊎等派使者到 以色列 各地區去。若係無人幫助𠊎等，𠊎等就向你投降。」</verse>
				<verse number="4">使者到 掃羅 住个 基比亞 ，將消息傳出去。人民全部絕望到大聲噭起來。</verse>
				<verse number="5">該時， 掃羅 正對田肚逐牛轉來。佢問：「大家噭麼介？」佢等就將 雅比 人傳來个消息㧯佢講。</verse>
				<verse number="6">掃羅 聽到這消息，被上帝个靈大大感動，就當發譴。</verse>
				<verse number="7">佢牽出兩隻牛，將牛剁做細細垤，命令使者帶這兜細垤肉到 以色列 各地區去，警告人民講：「麼人毋跈 掃羅 㧯 撒母耳 去相㓾，麼人个牛就愛剁做恁樣！」 上主使 以色列 人當著驚；所有个人就同心合意出來作戰。</verse>
				<verse number="8">掃羅 喊佢等在 比色 集合。有三十萬人對 以色列 來，三萬人對 猶大 來。</verse>
				<verse number="9">佢等對 雅比 來个使者講：「轉去 基列 地區㧯你等 雅比 人講，天光日當晝以前，佢等會得到解救。」 雅比 人民聽到這消息非常歡喜，</verse>
				<verse number="10">就對 拿轄 講：「天光日𠊎等投降，由在你等樣般對待𠊎等。」</verse>
				<verse number="11">第二朝晨， 掃羅 將佢个軍隊分做三隊；天一光，就入到 亞捫 人个營肚攻擊佢等，直到當晝，㓾掉盡多人；還生个士兵全部四散，隨人逃命。</verse>
				<verse number="12">以色列 人對 撒母耳 講：「麼人講 掃羅 無資格做𠊎等个王？將該兜人交出來，𠊎等愛㓾掉佢等！」</verse>
				<verse number="13">總係 掃羅 講：「今晡日做毋得㓾人，因為今晡日上主救了 以色列 。」</verse>
				<verse number="14">撒母耳 對人民講：「𠊎等全部來去 吉甲 ，在該位重新立 掃羅 做𠊎等个王。」</verse>
				<verse number="15">所以佢等全部去到 吉甲 ，在上主面前立 掃羅 做王，又在上主面前獻平安祭。 掃羅 㧯所有个 以色列 人大大慶祝這件事。</verse>
			</chapter>
			<chapter number="12">
				<verse number="1">撒母耳 對所有个 以色列 人講：「𠊎已經照你等个要求立王治理你等。</verse>
				<verse number="2">這下，你等有王好帶領你等。𠊎已經恁老、頭那毛白囉，𠊎个孻仔全部在你等當中。𠊎後生到這下，一直帶領你等。</verse>
				<verse number="3">這下，𠊎在這位；若係𠊎做過麼介毋著个事，你等做得在上主㧯佢膏油立个王面前告𠊎。𠊎搶過人个牛抑係驢仔麼？𠊎識欺騙抑係壓制麼人麼？𠊎識被麼人收買麼？若係𠊎做過這種事，𠊎一定愛賠。」</verse>
				<verse number="4">民眾應講：「你毋識欺騙𠊎等抑毋識壓制𠊎等；你毋識對麼人拿無應該拿个東西。」</verse>
				<verse number="5">撒母耳 對佢等講：「今晡日，上主㧯佢膏油立个王係𠊎个證人；你等知𠊎係清白个。」 民眾講：「無毋著！上主做得為𠊎等做證。」</verse>
				<verse number="6">撒母耳 繼續對人民講：「實在係上主揀選 摩西 㧯 亞倫 ，佢又帶領你等个祖先出 埃及 。</verse>
				<verse number="7">這下，你等愛企好！𠊎在上主面前愛警告你等：上主為到救你等㧯你等个祖先行恁多公義个大事。</verse>
				<verse number="8">雅各 全家到 埃及 去，後來 埃及 人欺負佢等个時 ，你等个祖先向上主求喊。上主就派 摩西 㧯 亞倫 帶領佢等出 埃及 ，將佢等安頓在這所在。</verse>
				<verse number="9">「無想到佢等卻毋記得上主 — 佢等个上帝。所以，上主俾 非利士 人、 摩押 王㧯 夏瑣 城个將軍 西西拉 攻打你等个祖先，征服佢等。</verse>
				<verse number="10">所以佢等向上主求喊講：『上主啊！𠊎等有罪了；因為𠊎等悖逆你，去拜該兜 巴力 㧯 亞斯她錄 。這下求你救𠊎等離開仇敵！𠊎等一定會敬拜你！』</verse>
				<verse number="11">上主就派 基甸 、 巴拉 㧯 耶弗他 ，最尾派𠊎來救你等脫離四周圍个仇敵，使你等平安過日。</verse>
				<verse number="12">總係你等看到 亞捫 人个王 拿轄 攻擊你等，就拒絕上主 — 你等个上帝做你等个王，要求𠊎講：『𠊎等一定愛有王來治理𠊎等。』</verse>
				<verse number="13">「這下，你等所選个王在這位。你等愛一個王；看哪，上主已經給你等了。</verse>
				<verse number="14">你等若敬畏上主 — 你等个上帝，事奉佢，聽從佢，遵守佢个誡命，你等㧯你等个王若對佢忠誠，你等就會平安無事。</verse>
				<verse number="15">總係，你等若毋聽從上主，毋遵守佢个誡命，佢就會攻擊你等，像頭擺攻擊你等个祖先共樣。</verse>
				<verse number="16">這下，你等企好！你等會看到上主愛做个大事。</verse>
				<verse number="17">這下敢毋係收割、毋會落雨个時期？總係𠊎愛祈求上主，佢就會打雷公、落雨。你等看到就知，你等向上主討愛立王係犯大罪。」</verse>
				<verse number="18">所以， 撒母耳 祈求上主；該日，上主就打雷公、落雨。人民全部盡驚上主㧯 撒母耳 ；</verse>
				<verse number="19">佢等對 撒母耳 講：「請為僕人向上主 — 你个上帝祈禱，免得𠊎等死掉。這下𠊎等知，𠊎等討愛立王係罪上加罪。」</verse>
				<verse number="20">撒母耳 應講：「毋使驚！雖然你等做這壞事，總係做毋得離開上主，反轉愛專心事奉佢。</verse>
				<verse number="21">你等毋好離開上主去跈該兜假神，它兜毋會幫助你等、救你等，因為它兜係假个。</verse>
				<verse number="22">上主因為佢自家个聖名，絕對毋會豁掉你等，因為佢歡喜選你等做佢自家个子民。</verse>
				<verse number="23">論到𠊎，上主愛𠊎一直為你等祈禱，恁樣𠊎正毋會再得罪佢。𠊎會教你等樣般做好事行正路。</verse>
				<verse number="24">愛敬畏上主，誠心誠意事奉佢；愛記得佢為你等做過个大事。</verse>
				<verse number="25">若係你等一直緊犯罪，你等㧯你等个王就會滅亡。」</verse>
			</chapter>
			<chapter number="13">
				<verse number="1">掃羅 登基做王个時三十 歲，佢做 以色列 王兩年 。</verse>
				<verse number="2">掃羅 對 以色列 人當中選出三千人，將兩千人留在佢身邊，在 密抹 㧯 伯特利 山區，將另外一千人派到 便雅憫 支族个 基比亞 所在，俾佢个孻仔 約拿單 帶領。 掃羅 吩咐其他个人轉屋下。</verse>
				<verse number="3">約拿單 在 迦巴 攻打 非利士 人个駐防營 ； 非利士 人全部聽到這事。 掃羅 派專人到全國各地，歕羊角召集 希伯來 人出來相㓾。</verse>
				<verse number="4">所有个 以色列 人聽到 掃羅 攻打 非利士 人个駐防營，又聽講 非利士 人怨恨佢等，就響應 掃羅 个呼召，集合在 吉甲 。</verse>
				<verse number="5">非利士 人聚集攻打 以色列 人。佢等有三萬戰車、六千騎兵，㧯盡多个步兵，多到像海滣个沙仔恁多。佢等將部隊調到 伯‧亞文 東片个 密抹 ，在該位安營。</verse>
				<verse number="6">以色列 人看到強敵來到、知大難臨頭，有兜人就去囥在山孔肚、樹林肚、石窿肚、井肚抑係坑窟肚；</verse>
				<verse number="7">有兜 希伯來 人過 約旦 河，逃到 迦得 㧯 基列 地區去。 掃羅 還在 吉甲 ，跈佢个人全部驚到緊顫。</verse>
				<verse number="8">佢照 撒母耳 个指示，在 吉甲 等七日，總係 撒母耳 還吂到。人民開始離開 掃羅 散掉去，</verse>
				<verse number="9">所以 掃羅 對佢等講：「將燒化祭㧯平安祭个牲儀帶到𠊎這位來！」佢就獻燒化祭。</verse>
				<verse number="10">佢獻祭一完成， 撒母耳 就到。 掃羅 出去迎接佢，愛㧯佢請安，</verse>
				<verse number="11">總係 撒母耳 責備佢：「你做麼介事呢？」 掃羅 講：「人民離開𠊎散掉去，你乜無照約好个時間來，再講， 非利士 人又聚集在 密抹 。</verse>
				<verse number="12">𠊎想， 非利士 人愛在 吉甲 攻擊𠊎，𠊎還吂得到上主个看顧，所以𠊎無奈何自家就去獻祭。」</verse>
				<verse number="13">撒母耳 對 掃羅 講：「你樣般恁糊塗！你樣般無遵守上主 — 你上帝給你个命令？若係你遵守，上主會使你㧯你个後代永遠統治 以色列 。</verse>
				<verse number="14">這下，你个王位毋會長久，因為你無聽從佢。上主愛尋合佢心意个人，立佢做佢子民个統治者。」</verse>
				<verse number="15">然後， 撒母耳 離開 吉甲 ，繼續佢个行程。其他个人民跈 掃羅 ，去㧯佢个部隊會合。佢等對 吉甲 到 便雅憫 地區个 基比亞 。 掃羅 算佢个部隊，大約有六百人。</verse>
				<verse number="16">掃羅 㧯佢个孻仔 約拿單 ，還有跈佢等个人，在 便雅憫 地區个 迦巴 安營； 非利士 人在 密抹 安營。</verse>
				<verse number="17">非利士 个軍隊對營地分三隊出來攻擊：一隊向 書亞 地區个 俄弗拉 去，</verse>
				<verse number="18">一隊向 伯‧和崙 去，另外一隊在 洗波音 山壢个對面往曠野个山肚去。</verse>
				<verse number="19">該時， 以色列 全地無打鐵師傅，因為 非利士 人毋俾 希伯來 人製造刀劍抑係槍。</verse>
				<verse number="20">( 以色列 人愛尋 非利士 人來磨犁仔、钁頭、斧頭、鐮仔 。</verse>
				<verse number="21">磨斧頭㧯逐牛个刺棍愛一隻細銅錢；磨犁仔㧯钁頭就愛兩隻銅錢。)</verse>
				<verse number="22">所以，相㓾个時，除了 掃羅 㧯厥孻仔 約拿單 以外， 以色列 軍隊無一個士兵有刀劍抑係槍。</verse>
				<verse number="23">非利士 人派一隊駐防兵去掌等 密抹 出入个路口。</verse>
			</chapter>
			<chapter number="14">
				<verse number="1">有一日， 約拿單 對代佢拿武器个後生侍衛講：「𠊎等偷偷過去該片，入去 非利士 人个駐防營！」總係佢無㧯厥爸 掃羅 講。</verse>
				<verse number="2">這時 掃羅 堵好在 基比亞 城外，停留在 米磯崙 个一頭石榴樹下。跈佢个大約有六百人。</verse>
				<verse number="3">在佢等中間有祭司 亞希亞 ，著等以弗得。 (佢係 以迦博 个兄弟 亞希突 个孻仔。 亞希突 係 非尼哈 个孻仔，係在 示羅 做上主个祭司 以利 个孫仔。) 無人知 約拿單 離開營地。</verse>
				<verse number="4">約拿單 愛偷偷入去 非利士 人个駐防營，一定愛經過 密抹 出入个路口。路口兩片有兩座鋸仔形个大巖石，一座喊做 播薛 ，一座喊做 西尼 ；</verse>
				<verse number="5">一座在路口北片向 密抹 ，一座在路口南片向 迦巴 。</verse>
				<verse number="6">約拿單 對佢个後生侍衛講：「來啊，𠊎等偷偷入去該兜無受割禮个人个駐防營！可能上主會幫助𠊎等。若係佢幫助𠊎等，麼人能抵擋𠊎等呢？不管𠊎等人數幾多，佢一定會使𠊎等打贏。」</verse>
				<verse number="7">該侍衛應講：「無論你想做麼介，𠊎定著會跈等你去！」</verse>
				<verse number="8">約拿單 講：「好！𠊎等過去，故意俾 非利士 人看到𠊎等。</verse>
				<verse number="9">若係佢等喊𠊎等留在這位等佢等過來，𠊎等就在這位等。</verse>
				<verse number="10">若係佢等喊𠊎等過去，𠊎等就去；該就係上主愛俾𠊎等打贏个記號了。」</verse>
				<verse number="11">所以，佢兩儕故意俾 非利士 个駐防兵看到。 非利士 人講：「你看，有 希伯來 人對佢等囥个孔肚出來了！」</verse>
				<verse number="12">佢等就對 約拿單 㧯該侍衛喊講：「你等過來啊，𠊎等有事㧯你等講哦！」 約拿單 對佢个侍衛講：「跈等𠊎上去！上主已經將佢等交給 以色列 人了。」</verse>
				<verse number="13">約拿單 爬上出入个路口；佢个侍衛跈等佢。 約拿單 將 非利士 人打到橫笐橫袋；侍衛就跈等來將佢等㓾掉。</verse>
				<verse number="14">這第一擺个攻擊， 約拿單 㧯佢个侍衛就在四分之一公頃闊个所在，㓾掉二十儕左右。</verse>
				<verse number="15">所有在營地並田野个 非利士 人全部非常著驚；駐防兵㧯攻擊个軍隊也全部愊愊掣；地也震動，佢等驚到無葛無煞！</verse>
				<verse number="16">掃羅 个守望兵在 便雅憫 地區个 基比亞 看到 非利士 人驚到相爭逃走。</verse>
				<verse number="17">掃羅 就對跈佢个人講：「去點算軍隊，看麼人無在！」佢等查出 約拿單 㧯佢个侍衛無在。</verse>
				<verse number="18">掃羅 對祭司 亞希亞 講：「將上帝个約櫃扛過來！」 (該時，上帝个約櫃在 以色列 人中間。)</verse>
				<verse number="19">掃羅 當對祭司講話个時， 非利士 軍營越來越亂； 掃羅 對祭司講：「𠊎等來毋掣求問上主了！」</verse>
				<verse number="20">所以 掃羅 帶領部隊來到戰場；佢等就看到 非利士 人亂到繷交交，互相殘殺。</verse>
				<verse number="21">頭擺投靠 非利士 人个 希伯來 人，就係一直在佢等營肚个 希伯來 人，這下轉過來參加 掃羅 㧯 約拿單 个 以色列 軍隊。</verse>
				<verse number="22">該兜囥在 以法蓮 山區个 以色列 人聽到 非利士 人逃走了，也全部出來追殺佢等，</verse>
				<verse number="23">一直打到 伯‧亞文 該片。恁樣，該日上主就救到 以色列 人。</verse>
				<verse number="24">該日， 以色列 人又𤸁又肚飢，因為 掃羅 識在人民面前發誓講：「今晡日，在𠊎向敵人報仇以前麼人食東西，麼人就受咒詛。」所以，歸日無人敢食東西。</verse>
				<verse number="25">該樣時，樹林肚連地泥也有蜂糖。</verse>
				<verse number="26">人民進入樹林，看到蜂糖流下來，總係無人敢伸手拿來食，因為大家驚 掃羅 所發个誓。</verse>
				<verse number="27">總係 約拿單 無聽到厥爸在人民面前所發个誓，所以伸出柺棍仔，插入一隻蜂藪肚，搵蜂糖來食。佢黏時感覺加盡有精神。</verse>
				<verse number="28">有人㧯佢講：「𠊎等又𤸁又肚飢，總係若爸警告𠊎等講：『今晡日麼人食東西，麼人就受咒詛。』」</verse>
				<verse number="29">約拿單 講：「吾爸所發个誓盡無理、害到大家！你看，𠊎食這一些仔蜂糖，感覺加盡有精神！</verse>
				<verse number="30">打贏敵人後，食搶來个食物，正會精神百倍，㓾死更多个 非利士 人啊！」</verse>
				<verse number="31">該日， 以色列 人打贏 非利士 人，對 密抹 一直打到 亞雅崙 。這時， 以色列 人全部痶到手軟腳攋；</verse>
				<verse number="32">佢等黏時對戰利品當中牽出牛羊㧯細牛仔，當場就㓾，肉還帶血就拿來食。</verse>
				<verse number="33">有人向 掃羅 報告講：「看哪，人民食帶血个肉，得罪上主了！」 掃羅 講：「你等有罪了！遽遽輾一隻大石頭到𠊎這位來！」</verse>
				<verse number="34">掃羅 又下令講：「到人民該位㧯佢等講，逐儕愛將佢等个牛羊逐過來，在這位㓾來食；總係做毋得食帶血个肉得罪上主。」所以，該暗晡，人民將佢等个牛羊逐過來，在該位㓾。</verse>
				<verse number="35">掃羅 為上主起一座祭壇；這係佢所起个第一座壇。</verse>
				<verse number="36">掃羅 對佢个部下講：「𠊎等今暗晡下去攻打 非利士 人，搶佢等个東西，直到天光，將佢等㓾淨淨！」 佢等應講：「你認為妥當，就恁樣去做！」 總係祭司講：「𠊎等應當先求問上帝！」</verse>
				<verse number="37">所以 掃羅 求問上帝：「𠊎應該下去攻打 非利士 人麼？你會將佢等交在 以色列 人手中麼？」總係該日上帝無應佢。</verse>
				<verse number="38">掃羅 就對人民該兜領袖講：「到這位來，調查今晡日𠊎等犯麼介罪。</verse>
				<verse number="39">𠊎指等永生上主 — 以色列 个救主發誓：犯罪个人一定愛處死；就算係𠊎个孻仔 約拿單 也共樣愛死。」總係無一儕敢出聲。</verse>
				<verse number="40">所以 掃羅 對 以色列 人民講：「你等企在該位；𠊎㧯吾孻仔 約拿單 企在這位。」 人民對 掃羅 講：「你認為妥當，就恁樣去做！」</verse>
				<verse number="41">掃羅 向上主 — 以色列 个上帝講：「今晡日你樣毋應你个僕人呢？上主 — 以色列 个上帝啊，若係罪在𠊎抑係吾孻仔 約拿單 ，請用烏陵應𠊎；若係罪在你个子民 以色列 人 ，請用土明應𠊎。」結果抽出來个係 約拿單 㧯 掃羅 ；人民全部無事。</verse>
				<verse number="42">掃羅 講：「再抽籤，看係𠊎，抑係吾孻仔 約拿單 ？」結果抽出 約拿單 。</verse>
				<verse number="43">所以 掃羅 問佢：「你做麼介事啊？」 約拿單 應講：「𠊎用柺棍仔搵一些仔蜂糖食。𠊎在這位，𠊎甘願死！」</verse>
				<verse number="44">掃羅 講：「 約拿單 哪，若係你無死，願上帝㓾掉𠊎！」</verse>
				<verse number="45">總係人民對 掃羅 講：「 約拿單 為 以色列 贏到偉大个勝利，敢好俾佢死？做毋得！𠊎等指等永生上主發誓：動佢一條頭那毛也做毋得。佢今晡日所做个係靠上帝个幫助。」恁樣，人民救到 約拿單 ，俾佢毋使死。</verse>
				<verse number="46">掃羅 無再追殺 非利士 人； 非利士 人就轉自家个所在去了。</verse>
				<verse number="47">掃羅 堅固 以色列 个王位以後，常常去攻打四周圍个仇敵：佢㧯 摩押 人、 亞捫 人、 以東 人、 瑣巴 該兜王，以及 非利士 人相㓾。無論佢去到㖠位全部打贏。</verse>
				<verse number="48">掃羅 相㓾非常勇敢，甚至打贏 亞瑪力 人。佢救 以色列 人脫離所有欺負佢等个外族人。</verse>
				<verse number="49">掃羅 个孻仔有 約拿單 、 亦施韋 、 麥基‧舒亞 。佢个長女安到 米拉 ，第二個妹仔安到 米甲 。</verse>
				<verse number="50">掃羅 个𡜵娘安到 亞希暖 ，係 亞希瑪斯 个妹仔。佢軍隊个元帥係厥叔 尼珥 个孻仔 押尼珥 。</verse>
				<verse number="51">掃羅 个阿爸 基士 㧯 押尼珥 个阿爸 尼珥 全部係 亞別 个孻仔。</verse>
				<verse number="52">掃羅 一生人㧯 非利士 人常常有激烈个戰爭，所以佢一發現有勇敢強壯个人，就喊佢等來跈佢。</verse>
			</chapter>
			<chapter number="15">
				<verse number="1">撒母耳 對 掃羅 講：「上主派𠊎用油膏你，立你做佢子民 以色列 个王。所以，你愛聽上主个話。</verse>
				<verse number="2">上主 — 萬軍个元帥愛責罰 亞瑪力 人，因為 以色列 人對 埃及 出來个時， 亞瑪力 人个祖先樣般對待佢等、樣般阻擋佢等。</verse>
				<verse number="3">這下你愛去攻打 亞瑪力 人，毀滅佢等所有个一切，毋好留下一項東西；愛將佢等个男人、婦人家、細人仔、孲𤘅仔、牛羊、駱駝㧯驢仔㓾淨淨。」</verse>
				<verse number="4">掃羅 就在 提鍊 召集並點算佢个軍隊：對 以色列 來个有二十萬步兵，對 猶大 來个有一萬人。</verse>
				<verse number="5">掃羅 帶領佢个軍隊到 亞瑪力 城，在山壢肚埋伏。</verse>
				<verse number="6">掃羅 派人警告 基尼 人講：「你等離開 亞瑪力 人到別位去，免得𠊎連你等共下㓾掉；因為 以色列 人對 埃及 出來个時，你等个祖先識好款待佢等。」所以 基尼 人就離開 亞瑪力 人。</verse>
				<verse number="7">掃羅 打贏 亞瑪力 人，對 哈腓拉 一直打到 埃及 東片个 書珥 ，</verse>
				<verse number="8">生生捉到 亞瑪力 王 亞甲 ，㓾掉所有个人民。</verse>
				<verse number="9">總係 掃羅 㧯佢个軍隊留下 亞甲 个性命，乜無㓾掉該兜最好个牛群、羊群、細牛仔㧯細羊仔，其他好个東西也全部留等，毋肯滅掉。佢等單淨毀滅掉該兜無用个㧯無價值个東西。</verse>
				<verse number="10">上主對 撒母耳 講：</verse>
				<verse number="11">「𠊎後悔立 掃羅 做王；佢已經離開𠊎，無遵守𠊎个命令。」 撒母耳 就盡難過，歸暗晡向上主哀求。</verse>
				<verse number="12">第二日打早， 撒母耳 去尋 掃羅 。佢聽講 掃羅 已經到 迦密 ，在該位為自家起一座紀念碑，又向 吉甲 去了。</verse>
				<verse number="13">撒母耳 就去見 掃羅 。 掃羅 向佢問安講：「願上主賜福給你！上主个命令𠊎已經遵守了。」</verse>
				<verse number="14">撒母耳 講：「恁樣，𠊎做麼介還聽到牛羊个噭聲？」</verse>
				<verse number="15">掃羅 應講：「這係𠊎个軍隊對 亞瑪力 人該位捉來个。佢等留下最好个牛羊，愛獻給上主 — 你个上帝。其他个，𠊎等全部滅淨淨了。」</verse>
				<verse number="16">撒母耳 對 掃羅 講：「恬恬！𠊎愛㧯你講上主昨暗晡對𠊎講个話。」 掃羅 講：「請講！」</verse>
				<verse number="17">撒母耳 講：「雖然你恅到自家無重要，總係你係 以色列 各支族个領袖！上主膏油立你做 以色列 个王；</verse>
				<verse number="18">上主派你去，命令你消滅該兜邪惡个 亞瑪力 人，將佢等全部㓾淨淨。</verse>
				<verse number="19">你做麼介毋聽上主个命令、恁遽去搶戰利品、行上主看做邪惡个事？」</verse>
				<verse number="20">掃羅 講：「總係𠊎有聽從上主个話！𠊎照上主个吩咐去相㓾、捉到 亞瑪力 王 亞甲 ，又將所有个 亞瑪力 人㓾淨淨。</verse>
				<verse number="21">𠊎个軍隊無將捉來該兜最好个牛羊㓾掉，反轉愛在 吉甲 獻給上主 — 你个上帝。」</verse>
				<verse number="22">撒母耳 講： 「上主歡喜燒化祭㧯平安祭， 抑係較歡喜人聽從佢个話？ 聽從命令比獻祭較好； 順從贏過羊牯个脂油。</verse>
				<verse number="23">悖逆佢㧯行邪術共樣壞； 傲慢㧯拜偶像共樣有罪。 因為你違背上主个命令， 佢豁掉你，無愛你做王了。」</verse>
				<verse number="24">掃羅 對 撒母耳 講：「𠊎有罪了；𠊎違背上主个命令㧯你个指示。因為𠊎驚人民，所以聽從佢等个話去做。</verse>
				<verse number="25">這下，𠊎懇求你赦免𠊎个罪，㧯𠊎共下轉去，𠊎正好敬拜上主。」</verse>
				<verse number="26">撒母耳 應講：「𠊎毋㧯你共下轉去。因為你違背上主个命令，佢也豁掉你，無愛你做 以色列 个王了。」</verse>
				<verse number="27">撒母耳 轉身愛走， 掃羅 挷等佢外衫个衫尾，將衫尾挷斷掉。</verse>
				<verse number="28">撒母耳 對佢講：「像恁樣，今晡日上主已經使 以色列 國㧯你斷絕，搶轉來，賜給一個比你較好个人。</verse>
				<verse number="29">以色列 个榮耀者 — 上帝毋會講花撩，也毋會改變主意；佢毋係世間人，佢毋會改變主意。」</verse>
				<verse number="30">掃羅 講：「𠊎有罪了。總係，請你至少在人民該兜長老㧯所有 以色列 人面前給𠊎多少面子，請㧯𠊎共下轉去，𠊎正好敬拜上主 — 你个上帝。」</verse>
				<verse number="31">所以， 撒母耳 㧯佢共下轉去。 掃羅 就敬拜上主。</verse>
				<verse number="32">撒母耳 講：「將 亞瑪力 王 亞甲 帶到𠊎這位來！」 亞甲 歡歡喜喜來到 撒母耳 面前，心肚想：「死个苦難一定過去了 ！」</verse>
				<verse number="33">撒母耳 講：「你个刀識使盡多阿姆喪失子女，這下若姆也一定會失掉孻仔。」 撒母耳 就在 吉甲 祭壇、上主个面前將 亞甲 斬死。</verse>
				<verse number="34">後來， 撒母耳 轉 拉瑪 去； 掃羅 也轉 基比亞 个屋下去。</verse>
				<verse number="35">對該時起， 撒母耳 一直到死無再去看 掃羅 ，總係佢為 掃羅 悲傷。上主後悔立 掃羅 做 以色列 个王。</verse>
			</chapter>
			<chapter number="16">
				<verse number="1">上主對 撒母耳 講：「你還愛為 掃羅 悲傷到幾時？𠊎已經豁掉佢，無愛佢做 以色列 个王。你愛將橄欖油裝滿角，帶到 伯利恆 人 耶西 該位，因為𠊎已經選佢一個孻仔做王。」</verse>
				<verse number="2">撒母耳 講：「𠊎樣做得恁樣做呢？若係 掃羅 知到，一定會㓾𠊎！」 上主講：「你帶一隻細牛仔去，就講你係去該位向上主獻祭个。</verse>
				<verse number="3">你愛請 耶西 來參加獻祭典禮；該時，𠊎會㧯你講愛樣般做。𠊎指示你麼人，你就膏油立佢做王。」</verse>
				<verse number="4">撒母耳 遵照上主个話去做。佢去到 伯利恆 ，城肚該兜長老驚鹿鹿仔，問講：「你个訪問係帶平安來麼？」</verse>
				<verse number="5">撒母耳 應講：「𠊎會帶來平安。𠊎係來向上主獻祭个。你等愛洗淨自家，然後跈𠊎來。」 撒母耳 也喊 耶西 㧯佢該兜孻仔洗淨自家，前來參加祭禮。</verse>
				<verse number="6">佢等到个時， 撒母耳 看到 耶西 个孻仔 以利押 ，心肚想：「企在上主面前這儕人一定係佢愛膏油設立个。」</verse>
				<verse number="7">總係上主對 撒母耳 講：「毋好看佢个外表抑係看佢恁高大。𠊎無選佢，因為𠊎看人無像世間人恁樣。人係看外表，上主係看內心。」</verse>
				<verse number="8">然後， 耶西 喊厥孻仔 亞比拿達 對 撒母耳 面前行過去。總係 撒母耳 講：「上主乜無選這儕。」</verse>
				<verse number="9">耶西 又喊 沙瑪 對 撒母耳 面前行過去； 撒母耳 又講：「上主乜無選這儕。」</verse>
				<verse number="10">恁樣， 耶西 喊佢七個孻仔全部經過 撒母耳 面前。 撒母耳 對佢講：「上主無選佢等當中个一儕。」</verse>
				<verse number="11">所以 撒母耳 問 耶西 ：「你還有其他个孻仔麼？」 耶西 講：「還有一個滿子；佢在野外掌羊。」 撒母耳 講：「喊佢到這位來。佢毋來，𠊎等就毋獻祭。」</verse>
				<verse number="12">所以 耶西 派人去喊佢來。佢係一個面色紅潤、雙目有神、外表斯文个青年。上主對 撒母耳 講：「就係這儕！去㧯佢膏油！」</verse>
				<verse number="13">撒母耳 將橄欖油拿出來，在 大衛 該兜阿哥面前膏佢。上主个靈強烈臨到 大衛 ，對該日起㧯佢共下。然後 撒母耳 就轉 拉瑪 去了。</verse>
				<verse number="14">上主个靈離開 掃羅 ；有邪靈對上主來蹧踏佢。</verse>
				<verse number="15">掃羅 个官員對佢講：「𠊎等知有邪靈對上帝來蹧踏你。</verse>
				<verse number="16">所以請下令僕人去尋一個盡會彈琴个人來。邪靈對上帝來到你身上个時，該人一彈琴，你就會好。」</verse>
				<verse number="17">掃羅 就命令佢等：「去㧯𠊎尋一個盡會彈琴个人來！」</verse>
				<verse number="18">掃羅 一個部下應講：「 伯利恆 城个 耶西 有一個孻仔；佢盡會彈琴。佢係當勇敢个戰士，人盡斯文，又有口才；上主㧯佢共下。」</verse>
				<verse number="19">所以， 掃羅 派使者到 耶西 該位，講：「喊你該掌羊个孻仔 大衛 到𠊎這位來。」</verse>
				<verse number="20">耶西 就用驢仔載餅仔、一皮袋个酒㧯一隻細山羊，交給厥孻仔 大衛 送給 掃羅 。</verse>
				<verse number="21">大衛 到 掃羅 該位，服事佢。 掃羅 當惜 大衛 ，選佢做拿武器个侍衛。</verse>
				<verse number="22">掃羅 派人傳話給 耶西 ：「𠊎當中意 大衛 ；請俾佢留在這位服事𠊎！」</verse>
				<verse number="23">對該時起，逐擺有邪靈對上帝來到 掃羅 身上个時， 大衛 就拿佢个琴來彈，邪靈黏時離開 掃羅 ， 掃羅 就感覺盡爽快。</verse>
			</chapter>
			<chapter number="17">
				<verse number="1">非利士 人召集軍兵在 猶大 个 梭哥 城，準備相㓾。佢等安營在 梭哥 㧯 亞西加 中間个 以弗‧大憫 。</verse>
				<verse number="2">同時 掃羅 㧯 以色列 人聚集，在 以拉 山壢安營，在該位準備㧯 非利士 人相㓾。</verse>
				<verse number="3">非利士 人企在一個山頂， 以色列 人企在另外一個山頂，中央隔等一個山壢。</verse>
				<verse number="4">有一個 迦特 城个人，名安到 歌利亞 ，對 非利士 營出來，向 以色列 人挑戰。這個人高差毋多三 公尺，</verse>
				<verse number="5">著等有銅鱗片个戰甲，大約五十七公斤重，頭戴銅盔，</verse>
				<verse number="6">腳髀也用銅甲保護等。佢个肩頭揹等一支銅做个短槍。</verse>
				<verse number="7">佢个手拿等長槍，槍柄像織布機个車心恁粗，槍頭就有七公斤重。有一個兵，拿等佢个盾牌，在佢頭前開路。</verse>
				<verse number="8">歌利亞 企等，向 以色列 人个軍隊喊講：「你等在該位做麼介？擺陣想愛相㓾係麼？𠊎係 非利士 人；你等係 掃羅 个奴才！選一儕人出來㧯𠊎打看仔！</verse>
				<verse number="9">若係佢打贏，㓾掉𠊎，𠊎等就做你等个奴才；若係𠊎贏了，㓾掉佢，你等就做𠊎等个奴才服事𠊎等。」</verse>
				<verse number="10">該 非利士 人又講：「今晡日𠊎向 以色列 軍隊挑戰！你等敢派人出來㧯𠊎打麼！」</verse>
				<verse number="11">掃羅 㧯 以色列 軍隊聽到 非利士 人這兜話全部盡驚。</verse>
				<verse number="12">大衛 係 猶大 个 伯利恆 城 以法他 人 耶西 个孻仔。 耶西 有八個孻仔。 掃羅 做王个時， 耶西 已經盡老了。</verse>
				<verse number="13">耶西 三個大孻仔跈 掃羅 去相㓾：最大个安到 以利押 ，第二個安到 亞比拿達 ，第三個安到 沙瑪 。</verse>
				<verse number="14">大衛 係最細个孻仔。這三個阿哥㧯 掃羅 共下个時，</verse>
				<verse number="15">大衛 有時在 掃羅 該位，有時轉 伯利恆 代阿爸掌羊。</verse>
				<verse number="16">該 非利士 人逐朝晨逐暗晡出來熻 以色列 人來相㓾；恁樣有四十日久。</verse>
				<verse number="17">有一日， 耶西 對厥孻仔 大衛 講：「帶十公斤焙好个麥串㧯十隻餅，去軍營看若三個阿哥！</verse>
				<verse number="18">你將這十垤牛乳餅送給指揮官。去看你該兜阿哥个情況，又愛帶一樣東西轉來，證明你有看到佢等，佢等一切平安。</verse>
				<verse number="19">掃羅 、你三個阿哥㧯所有 以色列 个軍隊，全部在 以拉 山壢㧯 非利士 人相㓾。」</verse>
				<verse number="20">第二日， 大衛 打早䟘起來，將羊群交給別人掌，然後照 耶西 个吩咐帶等食物出發。佢到軍營个時， 以色列 人堵好出去戰場、大聲喊、準備作戰；</verse>
				<verse number="21">非利士 人㧯 以色列 人个軍隊面對面擺陣好勢。</verse>
				<verse number="22">大衛 將食物留在補給官該位，走到軍隊頭前尋厥哥，問佢等个情形樣般。</verse>
				<verse number="23">佢㧯厥哥當講等話个時， 迦特 城个 非利士 人 歌利亞 走過來，像以前恁樣熻 以色列 人來相㓾； 大衛 全部有聽到。</verse>
				<verse number="24">以色列 人一看到 歌利亞 ，就驚到遽遽走開。</verse>
				<verse number="25">過去，佢等傳話講：「你看該隻人！你聽，佢在該盡罵 以色列 人！王講，㓾死 歌利亞 个人會得到盡多財產做獎賞，王个妹仔也愛嫁給佢，厥爸个家族也毋使納稅。」</verse>
				<verse number="26">大衛 問佢堘頭个人講：「若有人㓾死該 非利士 人，除掉 以色列 个羞辱，佢會得到麼介獎賞？到底該無受割禮个 非利士 人係麼人？樣敢藐視永生上帝个軍隊！」</verse>
				<verse number="27">佢等就照先前个話㧯 大衛 講，㓾死 歌利亞 个人會得到麼介獎賞。</verse>
				<verse number="28">大衛 个大哥 以利押 聽到 大衛 㧯該兜人講話，就當無歡喜，對 大衛 講：「你來這位做麼介？麼人代你在野地掌該幾隻羊？你這個鬼靈精！恁驕傲，存心不良！你走來這看人相㓾係麼！」</verse>
				<verse number="29">大衛 講：「𠊎做毋著麼介呢？敢講𠊎問看仔也做毋得？」</verse>
				<verse number="30">大衛 又去問另外一儕共樣个問題。佢逐擺問，得到个回答攏總共樣。</verse>
				<verse number="31">有人聽到 大衛 問个話，就去㧯 掃羅 講； 掃羅 就喊 大衛 來。</verse>
				<verse number="32">大衛 對 掃羅 講：「𠊎等大家毋使驚該 非利士 人！若僕人就會去㧯佢拚！」</verse>
				<verse number="33">掃羅 應講：「做毋得，你樣般會打得佢贏呢？你係一個細人仔，佢係一個對細就相㓾到大个軍人！」</verse>
				<verse number="34">大衛 對 掃羅 講：「若僕人係為阿爸掌羊个。有時獅仔抑係熊會來，捉走細羊仔，</verse>
				<verse number="35">𠊎就逐牠、打牠、救轉該隻細羊。若係牠攻擊𠊎，𠊎就揪牠个鬚，將牠打死。</verse>
				<verse number="36">若僕人識打死獅仔㧯熊，𠊎共樣有辦法㓾死該無受割禮、藐視永生上帝軍隊个 非利士 人。</verse>
				<verse number="37">上主識救𠊎脫離獅仔㧯熊个爪，佢也會救𠊎脫離該 非利士 人个手。」 掃羅 對 大衛 講：「好！你去啊！願上主㧯你共下。」</verse>
				<verse number="38">掃羅 就將佢自家个戰甲給 大衛 著 — 有一頂銅盔㧯一領有鱗片个戰甲。佢將銅盔戴在 大衛 頭那頂。</verse>
				<verse number="39">大衛 將 掃羅 个刀仔繫在戰甲邊，想愛行，總係無辦法行，因為佢無習慣著這兜。佢對 掃羅 講：「𠊎無辦法著這兜東西去相㓾，𠊎著毋慣。」佢就將戰甲全部脫掉。</verse>
				<verse number="40">大衛 拿等佢掌羊个柺棍仔，又對河壩滣拈五粒光滑个石仔放在掌羊人用个袋仔肚，然後拿拂石仔个索仔出去面對該 非利士 人。</verse>
				<verse number="41">該 非利士 人開始向 大衛 行等過來，代佢拿盾牌个人行在佢頭前。</verse>
				<verse number="42">非利士 人看清楚 大衛 个時，就藐視佢，因為 大衛 係一個面色紅潤、斯文个細人仔定定。</verse>
				<verse number="43">佢問 大衛 ：「該支柺棍仔係做麼介用个？你將𠊎看做一隻狗仔係麼？」所以佢指自家个神明咒詛 大衛 ，侮辱 大衛 ，講：</verse>
				<verse number="44">「來啊！𠊎愛將你个屍體豁給飛鳥㧯野獸食！」</verse>
				<verse number="45">大衛 應講：「你來㓾𠊎，係用刀仔、長槍㧯短槍，總係𠊎㓾你係奉上主 — 萬軍元帥个名；佢就係你所藐視个 以色列 軍隊个上帝。</verse>
				<verse number="46">今晡日，上主愛將你交在𠊎手中。𠊎愛打贏你，剁下你个頭那。𠊎愛將 非利士 軍隊个屍體豁給飛鳥㧯野獸食。恁樣，普天下就會知 以色列 有一位上帝；</verse>
				<verse number="47">在這位逐個人也全部會知上主無需要用刀仔抑係槍來拯救佢个子民。因為戰爭个輸贏全看上主；佢愛將你等交在𠊎等个手中。」</verse>
				<verse number="48">歌利亞 緊行緊近 大衛 ； 大衛 遽遽向 非利士 人陣前走等去。</verse>
				<verse number="49">佢伸手對袋肚拿出一粒石仔，用索仔將石仔向 歌利亞 拂過去。石仔打到 歌利亞 个額頭，打爛佢个頭那殼， 歌利亞 就橫下去伏等。</verse>
				<verse number="50">恁樣， 大衛 無用刀仔，只用拂石仔个索仔㧯一粒石仔就將 歌利亞 打橫。</verse>
				<verse number="51">大衛 走過去，踏在 歌利亞 身上，將 歌利亞 个刀仔對刀鞘肚挷出來，㓾死佢、剁下佢个頭那。 非利士 人看到佢等个英雄死掉，就全部逃走。</verse>
				<verse number="52">以色列 㧯 猶大 个軍隊在後背大聲盡喊、盡㓾，一直追到 迦特 㧯 以革倫 个城門。在 沙拉音 該條路上，死傷个 非利士 人滿遍係，直到 迦特 㧯 以革倫 。</verse>
				<verse number="53">以色列 人追殺 非利士 人轉來以後，就搶 非利士 人个營地。</verse>
				<verse number="54">大衛 帶等 歌利亞 个頭那到 耶路撒冷 ，將 歌利亞 个武器留在佢自家个帳篷肚。</verse>
				<verse number="55">掃羅 看 大衛 去打 歌利亞 ，就問佢个元帥 押尼珥 講：「 押尼珥 ，該後生人係麼人个孻仔？」 押尼珥 應佢：「國王，𠊎發誓講，𠊎毋知。」</verse>
				<verse number="56">王講：「你去查看仔該後生人係麼人个孻仔！」</verse>
				<verse number="57">大衛 㓾掉 歌利亞 轉到軍營以後， 押尼珥 帶佢去見 掃羅 ， 大衛 還拿等 歌利亞 个頭那。</verse>
				<verse number="58">掃羅 問佢：「後生人，你係麼人个孻仔？」 大衛 應講：「𠊎係若僕人 伯利恆 人 耶西 个孻仔。」</verse>
			</chapter>
			<chapter number="18">
				<verse number="1">掃羅 㧯 大衛 講話結束以後， 掃羅 个孻仔 約拿單 个心黏等 大衛 个心。 約拿單 惜 大衛 ，像惜自家个命一樣。</verse>
				<verse number="2">對該日起， 掃羅 留 大衛 在身邊，毋俾佢轉屋下去。</verse>
				<verse number="3">約拿單 因為非常惜 大衛 ，像惜自家个命一樣，就㧯 大衛 結拜做兄弟。</verse>
				<verse number="4">約拿單 脫下自家身上个外衫給 大衛 ，又將自家个戰甲、刀仔、弓㧯腰帶全部給佢。</verse>
				<verse number="5">掃羅 無論派 大衛 去做麼介，佢攏總做到當順利，所以 掃羅 派佢做帶兵个官長。這件事使人民㧯 掃羅 个官員盡歡喜。</verse>
				<verse number="6">大衛 㓾死 歌利亞 以後，軍隊得勝轉來； 以色列 各城鎮个婦女全部出來迎接 掃羅 王。姖等當歡喜唱歌、跳舞、打鼓、彈琴。</verse>
				<verse number="7">姖等緊跳、緊唱： 「 掃羅 㓾死千千； 大衛 㓾死萬萬！」</verse>
				<verse number="8">掃羅 當惱這歌詞，氣勃勃講：「姖等給 大衛 萬萬，卻給𠊎千千，就賸到王位無給佢定定！」</verse>
				<verse number="9">對該日起， 掃羅 就嫉妒 大衛 。</verse>
				<verse number="10">第二日，有邪靈對上帝該位來，強烈控制 掃羅 ，佢就像癲仔一樣在屋肚亂講話。 大衛 㧯平常共樣彈琴。 掃羅 拿等槍，</verse>
				<verse number="11">自家㧯自家講：「𠊎愛將 大衛 刺在壁頂！」就對準 大衛 丟兩擺，總係兩擺被 大衛 閃開了。</verse>
				<verse number="12">掃羅 驚 大衛 ，因為上主㧯 大衛 共下，卻離開 掃羅 。</verse>
				<verse number="13">所以 掃羅 使 大衛 離開佢，派佢指揮一千人个軍隊。 大衛 帶領部下出入戰場，</verse>
				<verse number="14">毋識打輸，因為上主㧯佢共下。</verse>
				<verse number="15">掃羅 看到 大衛 凡事成功，就還較驚佢。</verse>
				<verse number="16">總係 以色列 㧯 猶大 个人民全部惜 大衛 ，因為佢係一個盡優秀个領袖。</verse>
				<verse number="17">掃羅 對 大衛 講：「𠊎愛將𠊎大个妹仔 米拉 嫁給你，條件係你愛做一個勇敢个軍人，忠心服事𠊎，為上主相㓾。」 (其實 掃羅 想借 非利士 人个刀仔㓾死 大衛 ，毋使親身出手！)</verse>
				<verse number="18">大衛 應講：「𠊎係麼人？𠊎个家族在 以色列 算麼介？𠊎㖠堪得做王个婿郎？」</verse>
				<verse number="19">到 米拉 應該㧯 大衛 結婚个時， 掃羅 反轉將姖嫁給 米何拉 人 亞得列 。</verse>
				<verse number="20">總係， 掃羅 另外一個妹仔 米甲 愛到 大衛 。 掃羅 知這件事，就當歡喜，</verse>
				<verse number="21">心肚想：「𠊎愛將 米甲 嫁給 大衛 ，用姖做羅網， 大衛 就會死在 非利士 人手項。」所以 掃羅 第二擺對 大衛 講：「你愛做𠊎个婿郎！」</verse>
				<verse number="22">掃羅 又吩咐部下偷偷仔去對 大衛 講：「王當欣賞你，佢个官員也全部歡喜你。你這下去討王个妹仔係當好个時機。」</verse>
				<verse number="23">掃羅 个部下將這話㧯 大衛 講。 大衛 應講：「做王个婿郎係一件當光榮个事。像𠊎恁窮苦、卑微个人，敢堪得恁樣个光榮？」</verse>
				<verse number="24">部下將 大衛 个話傳給 掃羅 ，</verse>
				<verse number="25">掃羅 又命令佢等去㧯 大衛 講：「王所愛个聘禮係一百個 非利士 人个包皮，來做對仇敵个報復。」 (這係 掃羅 个陰謀，想通過 非利士 人㓾 大衛 。)</verse>
				<verse number="26">掃羅 个部下將 掃羅 所講个話㧯 大衛 講， 大衛 當歡喜，願意做王个婿郎。在結婚以前，</verse>
				<verse number="27">大衛 㧯佢个部下去㓾死兩百個 非利士 人。 大衛 將佢等个包皮帶去交給 掃羅 ，愛做王个婿郎。所以， 掃羅 無奈何就將妹仔 米甲 嫁給 大衛 。</verse>
				<verse number="28">掃羅 看出上主確實㧯 大衛 共下，佢个妹仔 米甲 也惜 大衛 ，</verse>
				<verse number="29">掃羅 就還較驚 大衛 ，一直㧯佢作對。</verse>
				<verse number="30">非利士 人个軍長常常來攻打； 大衛 出戰，逐擺个戰功比 掃羅 其他个官員贏加盡多，所以佢个名聲當受尊重。</verse>
			</chapter>
			<chapter number="19">
				<verse number="1">掃羅 對佢个孻仔 約拿單 㧯所有个官員講，愛設法除掉 大衛 ；總係 約拿單 當惜 大衛 ，</verse>
				<verse number="2">就去㧯佢講：「吾爸想愛㓾你。天光日打早，你愛囥在祕密个所在，留在該位。</verse>
				<verse number="3">𠊎會到你囥个田肚，企在吾爸身邊㧯佢談論你个事。𠊎發現麼介情況，一定會㧯你講。」</verse>
				<verse number="4">約拿單 在厥爸 掃羅 面前稱讚 大衛 ，又講：「請王毋好傷害王个僕人 大衛 。佢從來毋識做對毋起你个事；反轉佢所做个全部對你大有好處。</verse>
				<verse number="5">佢冒生命个危險去㓾該 非利士 人 歌利亞 ；上主使全 以色列 大大打贏。該時你看到，就當歡喜，這下做麼介愛傷害一個無辜个人，無緣無故去㓾 大衛 呢？」</verse>
				<verse number="6">掃羅 聽 約拿單 个話，就指上主个名發誓毋㓾 大衛 。</verse>
				<verse number="7">約拿單 喊 大衛 來，將這一切个話全部㧯佢講，然後帶佢去見 掃羅 。所以 大衛 像以前恁樣服事王。</verse>
				<verse number="8">以色列 人㧯 非利士 人又再發生戰爭。 大衛 攻擊 非利士 人，大大打贏佢等，佢等就全部逃走。</verse>
				<verse number="9">有一日，對上主該位來个邪靈又作躁 掃羅 。 掃羅 手項拿等槍，坐在屋肚； 大衛 也在該位彈琴。</verse>
				<verse number="10">掃羅 想愛用佢个槍將 大衛 刺在壁頂，總係 大衛 閃開，槍刺在壁頂。 大衛 就逃走，離開該位。</verse>
				<verse number="11">該暗晡， 掃羅 派人去監視 大衛 个屋下，愛在第二朝晨㓾佢。 大衛 个𡜵娘 米甲 警告 大衛 講：「你今暗晡若毋走，天光日你一定會死。」</verse>
				<verse number="12">所以 米甲 對窗門將 大衛 縋下去，俾佢逃走。</verse>
				<verse number="13">米甲 將一尊屋下个神像放在眠床頂，用一隻山羊毛枕頭俾神像墊頭那，用被蓋等。</verse>
				<verse number="14">掃羅 个人來捉 大衛 个時， 米甲 㧯佢等講 大衛 發病仔。</verse>
				<verse number="15">總係 掃羅 愛佢等再去看 大衛 。 掃羅 又吩咐：「將佢連人帶眠床共下扛轉來，𠊎愛㓾佢。」</verse>
				<verse number="16">佢等入到屋肚，發現睡在眠床頂个係一尊屋下个神像，頭那墊等一隻山羊毛个枕頭。</verse>
				<verse number="17">掃羅 問 米甲 ：「你樣般恁樣騙𠊎，放𠊎个敵人逃走？」 米甲 應講：「佢講𠊎毋放佢走，佢就愛㓾𠊎。」</verse>
				<verse number="18">大衛 逃到 拉瑪 去見 撒母耳 ，將 掃羅 對佢做个事全部㧯 撒母耳 講。然後，佢㧯 撒母耳 共下到 拿約 去，住在該位。</verse>
				<verse number="19">有人㧯 掃羅 講， 大衛 在 拉瑪 个 拿約 ，</verse>
				<verse number="20">掃羅 就派人去捉 大衛 。佢等看到一群先知受感入神忘形講話， 撒母耳 企在佢等當中帶頭。上帝个靈也臨到 掃羅 派去个人，佢等就受感入神忘形講話。</verse>
				<verse number="21">掃羅 聽到這個消息，就派過較多人去；這兜人也㧯先前去个人共樣受感入神忘形講話。 掃羅 第三擺派人去，共樣个事又發生。</verse>
				<verse number="22">最尾 掃羅 親身到 拉瑪 去。當佢來到 西沽 該口大井堘个時，佢打探 撒母耳 㧯 大衛 在麼介所在。有人㧯佢講，佢等在 拉瑪 个 拿約 。</verse>
				<verse number="23">掃羅 愛去該位个時，上帝个靈也臨到佢，佢就受感入神忘形緊行緊講話，直到 拿約 。</verse>
				<verse number="24">佢在 撒母耳 面前脫掉自家个衫褲，受感入神忘形講話，一日一夜無著衫褲橫等。所以有一句俗語講：「 掃羅 敢也成做先知嗎？」</verse>
			</chapter>
			<chapter number="20">
				<verse number="1">大衛 對 拉瑪 个 拿約 走去見 約拿單 ，對佢講：「𠊎做麼介事？犯麼介罪？有麼介對毋起若爸个事，使佢愛㓾𠊎呢？」</verse>
				<verse number="2">約拿單 應講：「你絕對毋會死！吾爸無論做麼介事，不管重要、無重要，全部會㧯𠊎講。這個事佢也毋會恬恬無㧯𠊎講，絕對毋會。」</verse>
				<verse number="3">總係 大衛 又發誓講：「若爸明明知你對𠊎恁好，所以佢毋會將計劃㧯你講，因為佢驚你傷心。𠊎指等永生个上帝，又敢在你面前發誓：𠊎離死亡賸一步腳定定！」</verse>
				<verse number="4">約拿單 對 大衛 講：「你愛𠊎做麼介，𠊎絕對毋會推辭。」</verse>
				<verse number="5">大衛 應 約拿單 講：「天光日係初一，𠊎本來應該㧯王共下食飯，總係求你俾𠊎去田肚囥到後日暗晡。</verse>
				<verse number="6">若係若爸看到𠊎無去食飯，請你㧯佢講：『 大衛 向𠊎請假趕轉 伯利恆 个老屋，因為佢全家這下當在該位獻年祭。』</verse>
				<verse number="7">若係佢講：『好！』恁樣若僕人就安全了；若係佢發譴，你就知佢係決心愛㓾𠊎。</verse>
				<verse number="8">請你施恩、遵守你㧯僕人在上主面前所立个誓約。若係𠊎有罪，你親手㓾死𠊎就好！樣愛使將𠊎交給若爸呢？」</verse>
				<verse number="9">約拿單 講：「毋好恁樣想！若係𠊎確實知吾爸愛害你，𠊎敢毋會㧯你講嗎？」</verse>
				<verse number="10">大衛 又問：「若係若爸發譴來應你，麼人來㧯𠊎講？」</verse>
				<verse number="11">約拿單 應講：「𫣆兩儕來去田肚。」佢兩儕就共下去。</verse>
				<verse number="12">約拿單 對 大衛 講：「願上主 — 以色列 个上帝做𠊎等个證人 ！天光日㧯後日這個時節，𠊎會打探吾爸个意思。若係佢對你無惡意，𠊎會派人傳話給你；</verse>
				<verse number="13">若係吾爸存心愛害你，總係𠊎無㧯你講俾你好安全離開，願上主重重責罰𠊎。」 約拿單 又講：「願上主㧯你共下，像佢以前㧯吾爸共下一樣！</verse>
				<verse number="14">𠊎還生个日，你愛照上主不變个慈愛誠心實意款待𠊎；若係𠊎死掉 ，</verse>
				<verse number="15">你愛一直共樣誠心實意款待𠊎屋下人。當上主徹底消滅你个仇敵以後，</verse>
				<verse number="16">願你㧯𠊎个誓約永遠有效。若係你毀約，上主愛通過你个仇敵來責罰你 。」</verse>
				<verse number="17">約拿單 再一擺喊 大衛 發誓，因為佢非常惜 大衛 ，就像惜自家个命一樣。</verse>
				<verse number="18">約拿單 對 大衛 講：「天光日係初一，食飯个時你無在，人一定會發現；</verse>
				<verse number="19">後日你又無在，人還較會感覺 。所以你愛到上擺囥个所在去，囥在石堆 後背等等。</verse>
				<verse number="20">𠊎會將石堆準做箭靶，射出三支箭，</verse>
				<verse number="21">然後吩咐𠊎个僕人行過去尋箭。若係𠊎對僕人講：『箭在你後背，轉來這片尋出來！』該就係講你安全了，做得出來。𠊎指永生个上主發誓，你一定無危險。</verse>
				<verse number="22">若係𠊎㧯僕人講：『箭在你頭前』，你愛趕緊走！因為係上主愛你離開。</verse>
				<verse number="23">論到𫣆兩儕个誓約，有上主永遠在你㧯𠊎中間做證人。」</verse>
				<verse number="24">所以， 大衛 去囥在田肚。初一該日， 掃羅 王來食飯，</verse>
				<verse number="25">照常坐在偎壁个座位。 押尼珥 坐在佢塍頭， 約拿單 坐在佢對面 ， 大衛 坐个凳仔空空。</verse>
				<verse number="26">總係該日 掃羅 無講麼介，因為佢恅到 大衛 一定係堵到使佢無淨浰个事情。</verse>
				<verse number="27">第二日，就係初二， 大衛 坐个凳仔還係空空； 掃羅 就問厥孻仔 約拿單 ：「做麼介 耶西 个孻仔昨晡日㧯今晡日無來食飯？」</verse>
				<verse number="28">約拿單 應講：「佢向𠊎請假，求𠊎俾佢轉去 伯利恆 。</verse>
				<verse number="29">佢對𠊎講：『請俾𠊎轉去，因為𠊎等全家愛在城肚獻祭；吾哥喊𠊎一定愛到。若係你係𠊎个朋友，就俾𠊎轉去看吾屋下个人。』所以 大衛 無來㧯王共下食飯。」</verse>
				<verse number="30">掃羅 對 約拿單 大發譴，罵佢講：「你這畜牲，就像若姆恁頑固恁悖逆！𠊎這下正知你係企在 耶西 个孻仔該片，瀉自家㧯若姆个面皮！</verse>
				<verse number="31">敢講你毋知， 耶西 个孻仔無死，你就永遠毋使想愛做這國家个王？去將佢捉來交給𠊎。佢無死做毋得！」</verse>
				<verse number="32">約拿單 對厥爸 掃羅 講：「佢做麼介該死？佢做差麼介事？」</verse>
				<verse number="33">掃羅 黏時擎起佢个槍，向 約拿單 㧹過去，愛㓾佢。 約拿單 這下正知厥爸正經想愛㓾 大衛 。</verse>
				<verse number="34">約拿單 氣噴噴對桌席企起來，一日無食東西，該日係初二。 約拿單 為 大衛 个事當愁，因為厥爸侮辱 大衛 。</verse>
				<verse number="35">第二朝晨， 約拿單 帶等一個細阿哥仔，照先前約好个時間到田肚去見 大衛 。</verse>
				<verse number="36">約拿單 對細阿哥仔講：「你去尋𠊎射出去个箭。」該細阿哥仔就去。 約拿單 射一支箭，落在細阿哥仔頭前。</verse>
				<verse number="37">當細阿哥仔會到箭跌落个所在， 約拿單 對佢喊講：「箭還在頭前！」</verse>
				<verse number="38">約拿單 又對細阿哥仔喊講：「毋好企在該位，遽遽過去！」細阿哥仔將箭拈起來，拿還主人，</verse>
				<verse number="39">完全毋知該兜話有麼介意思，只有 約拿單 㧯 大衛 知。</verse>
				<verse number="40">約拿單 將弓箭交給細阿哥仔，喊佢先帶轉城肚去。</verse>
				<verse number="41">細阿哥仔離開以後， 大衛 對石堆 後背出來，跪落去，伏在地上拜佢三擺。佢兩儕緊唚緊噭， 大衛 比 約拿單 還較悲傷。</verse>
				<verse number="42">約拿單 對 大衛 講：「做你平安去！上主一定會使你㧯𠊎並𫣆兩儕个後代，永遠遵守𠊎等中間个誓約。」所以 大衛 就離開； 約拿單 也轉城肚去。</verse>
			</chapter>
			<chapter number="21">
				<verse number="1">大衛 到 挪伯 城、到祭司 亞希米勒 該位。 亞希米勒 當緊張出來見佢，講：「你做麼介一儕到𠊎這位來？樣般無人跈你來？」</verse>
				<verse number="2">大衛 應祭司 亞希米勒 講：「係王命令𠊎到你這位來个。王㧯𠊎講，毋好俾人知佢派𠊎來這位做麼介。𠊎个部下，𠊎已經吩咐佢等到某某所在見𠊎。</verse>
				<verse number="3">這下，你有麼介好食？請給𠊎五隻餅，抑係別个食物。」</verse>
				<verse number="4">祭司應 大衛 講：「𠊎無普通个餅，只有聖餅。若係你个部下最近無親近過婦人家就做得拿去。」</verse>
				<verse number="5">大衛 應祭司講：「事實上，就算平常出任務，𠊎等全部做毋得親近婦人家，該兜後生人个身體定著愛保持淨浰，何況今晡日有特殊个任務，敢毋會還較愛保持淨浰！」</verse>
				<verse number="6">所以，祭司將聖餅拿給 大衛 ；因為佢只有獻給上主个聖餅，係對聖桌頂正換下來个。</verse>
				<verse number="7">(為 掃羅 畜頭牲个總管， 以東 人 多益 ，該日堵好在場，因為禮儀上个關係留在上主面前。)</verse>
				<verse number="8">大衛 對 亞希米勒 講：「你這位有槍抑係刀仔麼？王个命令當急，𠊎就趕緊出門，無時間去拿𠊎个刀仔抑係其他个武器。」</verse>
				<verse number="9">祭司應講：「𠊎這位有一支刀仔，你在 以拉 山壢㓾死个 非利士 人 歌利亞 ，佢該支刀仔這下放在以弗得後背，用布包等。你若愛，就拿去。該支刀仔係這位惟一个武器。」 大衛 講：「請交給𠊎！無比這支較好个刀仔！」</verse>
				<verse number="10">所以， 大衛 離開該位，來閃開 掃羅 ，逃到 迦特 王 亞吉 該位去。</verse>
				<verse number="11">亞吉 个官員對佢講：「這敢毋係 大衛 、 以色列 國个王嗎？該兜婦女跳舞个時唱講： 『 掃羅 㓾死千千， 大衛 㓾死萬萬』。 敢毋係這個 大衛 嗎？」</verse>
				<verse number="12">大衛 聽到佢等講个話，盡驚 迦特 王 亞吉 ，</verse>
				<verse number="13">所以就在佢等面前詐癲。佢就在城 門亂寫、亂畫，由在口潾流到鬍鬚。</verse>
				<verse number="14">亞吉 對佢个官員講：「看哪！這個人係癲仔！做麼介帶佢到𠊎面前來？</verse>
				<verse number="15">敢講𠊎這位欠癲仔係麼？你等樣般帶這隻癲仔來𠊎這位，在𠊎屋肚癲癲狂狂，惹𠊎受氣？」</verse>
			</chapter>
			<chapter number="22">
				<verse number="1">大衛 對 迦特 城逃到偎近 亞杜蘭 城个一個山窿。佢个兄弟㧯家族聽講佢在該位，全部去看佢。</verse>
				<verse number="2">所有被人欺負个、欠債个，㧯不滿現況个人全部集合到佢該位去；人數約有四百儕。 大衛 就做佢等个領袖。</verse>
				<verse number="3">大衛 對該位去 摩押 个 米斯巴 ，對 摩押 王講：「求你准𠊎个爺𡟓住在你這位，等到𠊎知上帝樣般為𠊎安排正來做打算。」</verse>
				<verse number="4">恁樣， 大衛 將爺𡟓搭 摩押 王。佢囥在山寨肚該站期間，佢个爺𡟓一直住在該位。</verse>
				<verse number="5">後來，先知 迦得 來對 大衛 講：「毋好再停留在這山寨肚；趕緊到 猶大 去。」所以 大衛 離開該位，去 哈列 个樹林。</verse>
				<verse number="6">有一日， 掃羅 在 基比亞 ，坐在山崎頂一頭柳樹下，手項拿等槍。佢所有个官員企在佢身邊。 掃羅 聽講，有人發現 大衛 㧯佢手下囥个所在。</verse>
				<verse number="7">掃羅 就對官員講：「 便雅憫 人哪，愛聽𠊎个話！你等恅到 耶西 个孻仔會將田地㧯葡萄園給你等，會設立你等在軍隊肚做軍官嗎？</verse>
				<verse number="8">你等陰謀愛對抗𠊎係麼？𠊎自家个孻仔㧯 耶西 个孻仔結盟，你等樣無㧯𠊎報告。無人關心𠊎；也無人㧯𠊎講𠊎个部下 大衛 今晡日尋機會愛㓾𠊎，𠊎个孻仔還唆慫佢！」</verse>
				<verse number="9">以東 人 多益 㧯 掃羅 其他个官員企共下；佢應講：「 耶西 个孻仔 大衛 到 挪伯 城、到 亞希突 个孻仔 亞希米勒 該位个時，𠊎有看到佢。</verse>
				<verse number="10">亞希米勒 為 大衛 求問上主，然後將糧食㧯 非利士 人 歌利亞 該支刀交給佢。」</verse>
				<verse number="11">所以， 掃羅 王派人去喊祭司 亞希突 个孻仔 亞希米勒 㧯佢个家族，就係所有在 挪伯 做祭司个人；佢等全部就來見王。</verse>
				<verse number="12">掃羅 對 亞希米勒 講：「 亞希突 个孻仔，聽好！」 亞希米勒 應講：「國王，請吩咐！」</verse>
				<verse number="13">掃羅 對佢講：「你做麼介㧯 耶西 个孻仔謀害𠊎？做麼介給佢糧食㧯刀仔，又為佢求問上帝？佢這下悖逆𠊎、今晡日尋機會愛㓾𠊎！」</verse>
				<verse number="14">亞希米勒 應王講：「 大衛 係國王最忠心个官員，係國王个婿郎，國王个侍衛長，又係宮廷肚最受敬重个人。</verse>
				<verse number="15">𠊎確實為佢求問過上帝，這乜毋係第一擺！請國王毋好將罪歸給𠊎㧯𠊎个家族，因為若僕人完全毋知這件事！」</verse>
				<verse number="16">王講：「 亞希米勒 ，你㧯你家族所有个人全部該死！」</verse>
				<verse number="17">然後王對企在身邊个侍衛講：「去㓾上主个祭司！佢等㧯 大衛 同謀，又知 大衛 逃到這位來，乜無向𠊎報告。」總係王个侍衛毋敢出手㓾上主个祭司。</verse>
				<verse number="18">所以王吩咐 多益 講：「去㓾該兜祭司！」 以東 人 多益 就將佢等全部㓾掉。該日， 多益 親手㓾掉八十五個有資格著以弗得个祭司。</verse>
				<verse number="19">佢又將住在 挪伯 — 祭司城个其他人民全部處死，無論男女、細人仔抑係孲𤘅仔，並牛、羊、驢仔全部㓾掉。</verse>
				<verse number="20">總係， 亞希米勒 个一個孻仔 亞比亞他 逃去投靠 大衛 。</verse>
				<verse number="21">亞比亞他 㧯 大衛 講， 掃羅 樣般㓾掉該兜上主个祭司。</verse>
				<verse number="22">大衛 對 亞比亞他 講：「𠊎該日看到 以東 人 多益 在該位，就知佢一定會去向 掃羅 報告。你家族个死，𠊎對逐儕全部有責任。</verse>
				<verse number="23">請你留在𠊎這位，毋使驚。 掃羅 想愛㓾𫣆兩儕，總係你留在𠊎這位會安全。」</verse>
			</chapter>
			<chapter number="23">
				<verse number="1">有人㧯 大衛 講：「 非利士 人這下攻打 基伊拉 城，緊搶正收成个五榖。」</verse>
				<verse number="2">大衛 就求問上主：「𠊎應該去攻打該兜 非利士 人麼？」 上主應講：「你去攻打佢等，救 基伊拉 城。」</verse>
				<verse number="3">總係， 大衛 个部下對佢講：「𠊎等在 猶大 就驚到會死，到 基伊拉 去攻打 非利士 人个軍隊敢毋係還較慘？」</verse>
				<verse number="4">所以 大衛 又求問上主。上主應佢講：「做你去 基伊拉 ！𠊎會使你打贏 非利士 人。」</verse>
				<verse number="5">大衛 㧯佢个部下就去 基伊拉 攻打 非利士 人。佢等㓾死當多敵人，又捉轉來敵人个頭牲。恁樣， 大衛 就救到 基伊拉 城个人。</verse>
				<verse number="6">亞希米勒 个孻仔 亞比亞他 逃到 基伊拉 去投靠 大衛 該時，有將以弗得帶等去。</verse>
				<verse number="7">掃羅 知 大衛 到 基伊拉 去了，就講：「上帝已經將佢交在𠊎手中了。 大衛 走到一個有牆、有門閂个城肚去，就係自家陷入羅網。」</verse>
				<verse number="8">所以 掃羅 召集軍隊準備作戰，向 基伊拉 進軍，愛圍攻 大衛 㧯佢个部下。</verse>
				<verse number="9">大衛 知 掃羅 計劃攻打佢，就對祭司 亞比亞他 講：「將以弗得帶到這位來。」</verse>
				<verse number="10">大衛 講：「上主 — 以色列 个上帝啊，你个僕人確實聽講 掃羅 計劃到 基伊拉 來，為到𠊎个緣故愛毀滅這城。</verse>
				<verse number="11">基伊拉 人民會將𠊎交給 掃羅 麼？你个僕人聽講 掃羅 愛來，佢斷真會來麼？上主 — 以色列 个上帝啊，懇求你㧯僕人講！」 上主應講：「 掃羅 會來。」</verse>
				<verse number="12">大衛 又問：「恁樣， 基伊拉 个人民會將𠊎㧯𠊎个部下交給 掃羅 麼？」 上主講：「會！」</verse>
				<verse number="13">所以， 大衛 㧯佢个部下約有六百人黏時離開 基伊拉 到處流浪。 掃羅 聽到 大衛 已經逃走離開 基伊拉 就取消原來个計劃。</verse>
				<verse number="14">大衛 囥在 西弗 曠野該片个山寨肚。 掃羅 一直在尋佢，總係上帝毋將 大衛 交給佢。</verse>
				<verse number="15">大衛 也清楚 掃羅 決心愛㓾佢。 大衛 在偎近 西弗 曠野个 哈列 時，</verse>
				<verse number="16">掃羅 个孻仔 約拿單 來見佢，鼓勵佢倚靠上帝來得到剛強，</verse>
				<verse number="17">對佢講：「毋使驚！吾爸 掃羅 無辦法害你；你將來一定會做 以色列 个王，𠊎个地位也會在你底下、擺第二位。這事吾爸乜當清楚。」</verse>
				<verse number="18">兩儕在上主面前重新結做生死朋友。 大衛 留在 哈列 ； 約拿單 就轉屋下去。</verse>
				<verse number="19">有兜人對 西弗 到 基比亞 去見 掃羅 ，講：「 大衛 囥在𠊎等該片，在 猶大 曠野个南部， 哈基拉 山頂， 哈列 个山寨肚。</verse>
				<verse number="20">𠊎等知國王當想愛捉佢；請到𠊎等該片去，𠊎等一定會協助國王捉到佢。」</verse>
				<verse number="21">掃羅 講：「你等對𠊎盡好。願上主賜福給你等！</verse>
				<verse number="22">你等轉去，再一擺查較清楚兜仔，佢在㖠位，麼人看過佢。𠊎聽講佢當搞怪。</verse>
				<verse number="23">你等去查明佢所有囥个所在，黏時倒轉來報告，𠊎就㧯你等去。若係佢還在這個地區，就算愛將 猶大 个各宗族尋到揙轉來，𠊎也愛將佢搜出來。」</verse>
				<verse number="24">所以，這兜人出發，比 掃羅 先轉到 西弗 去。 大衛 㧯佢个部下囥在 瑪雲 曠野，在 猶大 南片个山壢肚。</verse>
				<verse number="25">掃羅 帶佢个部下出發搜查 大衛 ； 大衛 聽到風聲，就向 瑪雲 曠野逃走，囥在一個大巖石後背。 掃羅 聽到，就去逐佢。</verse>
				<verse number="26">掃羅 㧯佢个部下在巖石這片行； 大衛 㧯佢个部下在另外一片行，愛遽遽逃走。 掃羅 這片个人已經離佢等當近，會捉到佢等个時，</verse>
				<verse number="27">就有一個使者到來，向 掃羅 報告講：「遽遽轉去！ 非利士 人來侵犯𠊎等个土地囉！」</verse>
				<verse number="28">所以 掃羅 停下來、無繼續逐 大衛 ，就轉去打 非利士 人。所以該所在被人喊做「隔離个巖石」。</verse>
				<verse number="29">大衛 離開該位，去 隱‧基底 地區，囥在該片个山寨肚。</verse>
			</chapter>
			<chapter number="24">
				<verse number="1">掃羅 逐 非利士 人，轉來聽到 大衛 在 隱‧基底 个曠野，</verse>
				<verse number="2">就帶領 以色列 最精良个軍隊三千名，到「野山羊个巖石」搜查 大衛 㧯佢个部下。</verse>
				<verse number="3">掃羅 來到路堘羊欄附近个一個山窿，入底背去屙屎，堵好 大衛 㧯跈佢个人囥在這山窿最底背。</verse>
				<verse number="4">大衛 个部下對佢講：「你个機會到了！上主㧯你講過，佢愛將你个敵人交在你手中，你做得照自家个意思處理佢。」 大衛 恬恬仔爬過去，割下 掃羅 外衫个一角。</verse>
				<verse number="5">後來 大衛 為到所做个事心肚無平安，</verse>
				<verse number="6">就對部下講：「願上主阻擋𠊎做出傷害𠊎主人个事；佢係上主膏油立个君王！𠊎絕對做毋得傷害佢；因為佢係王，係上主膏油設立个。」</verse>
				<verse number="7">大衛 盡勸佢个部下，毋准佢等傷害 掃羅 。 掃羅 䟘起來，行出山窿，做佢離開；</verse>
				<verse number="8">大衛 出來跈在佢後背，大聲喊：「𠊎个主人！𠊎个王！」 掃羅 轉過身來看， 大衛 就伏在地上拜佢，講：</verse>
				<verse number="9">「人講𠊎想愛傷害你，國王做麼介相信呢？</verse>
				<verse number="10">請你自家看，今晡日在山窿肚，上主將你交在𠊎手中。𠊎个部下有人喊𠊎㓾你，總係𠊎痛惜你；𠊎講，𠊎絕對毋傷害𠊎个主人，因為你係上主膏油設立个王。</verse>
				<verse number="11">吾爸，請看！𠊎手中揢等你外衫个一角！𠊎愛㓾你盡簡單，總係𠊎只有割下這垤衫角。恁樣你應該相信，𠊎無悖逆抑係傷害你个想法。雖然𠊎無做麼介對毋起你个事，你還係逐所在尋𠊎，愛㓾𠊎。</verse>
				<verse number="12">願上主判斷你㧯𠊎中間个是非。願上主代𠊎伸冤，因為𠊎毋會傷害你。</verse>
				<verse number="13">古人有俗語講：『壞人正會做壞事。』所以𠊎絕對毋會傷害你。</verse>
				<verse number="14">以色列 王出來愛㓾麼儕！你愛逐麼人！係一條死狗、一隻跳蚤定定！</verse>
				<verse number="15">上主會審判，會判斷你㧯𠊎中間个是非。願佢鑒察𠊎，為𠊎伸冤，救𠊎脫離你个手。」</verse>
				<verse number="16">大衛 講煞， 掃羅 講：「𠊎个孻仔 大衛 ，敢斷真係你？」接等， 掃羅 就開聲大噭，</verse>
				<verse number="17">對 大衛 講：「你正著，𠊎毋著了。𠊎恁樣用怨恨對待你，你還係用善良款待𠊎。</verse>
				<verse number="18">今晡日，你已經表現你係樣般善良；因為上主雖然將𠊎交在你手中，總係你無㓾𠊎。</verse>
				<verse number="19">人若係捉到敵人，樣會放佢平安無事走？願上主因為你今晡日對𠊎所做个賜福給你！</verse>
				<verse number="20">這下𠊎知你一定會做 以色列 个王，國家也會被你統治。</verse>
				<verse number="21">這下，你愛指上主向𠊎發誓，你毋會剪除𠊎个後代，毋會將𠊎个名對家族中除掉。」</verse>
				<verse number="22">大衛 就向 掃羅 發誓。 事後， 掃羅 轉屋下去； 大衛 㧯佢个部下又轉到佢等囥个山寨去。</verse>
			</chapter>
			<chapter number="25">
				<verse number="1">撒母耳 死掉；所有个 以色列 人聚集為佢哀傷，然後將佢葬在佢个故鄉 拉瑪 。 這事以後， 大衛 下去 巴蘭 个曠野。</verse>
				<verse number="2">有一個 迦勒 宗族个人，安到 拿霸 ，係對 瑪雲 城來个。佢在 迦密 城做生理，係一個有錢人，佢有三千隻綿羊㧯一千隻山羊。佢个𡜵娘安到 愛比該 ，係一個盡靚又賢慧个婦人家；總係 拿霸 係一個當壞又魯夫个人。</verse>
				<verse number="3"></verse>
				<verse number="4">大衛 在曠野聽到 拿霸 堵好在 迦密 剪羊毛，</verse>
				<verse number="5">就派十個後生人到 迦密 尋 拿霸 ，向佢問安。</verse>
				<verse number="6">大衛 喊佢等代佢向 拿霸 請安講：「願你長壽！全家健康！所有屬你个也平安順利！</verse>
				<verse number="7">𠊎聽講你在這位剪羊毛；你个牧人一直㧯𠊎等共下，𠊎等無欺負佢等，佢等在 迦密 个時，無跌掉麼介東西。</verse>
				<verse number="8">你問佢等，佢等會㧯你講。在這過節个時𠊎等到你這位來，所以拜託你好好款待𠊎个僕人。看做得拿兜東西給佢等麼？也給兜𠊎 — 你親愛个朋友 大衛 。」</verse>
				<verse number="9">大衛 个部下來到，提 大衛 个名㧯 拿霸 講這兜好話，等佢回答。</verse>
				<verse number="10">拿霸 應講：「 大衛 係麼人？ 耶西 个孻仔係麼人？最近有當多奴才悖逆佢等个主人逃到這位來，</verse>
				<verse number="11">𠊎無愛隨便將𠊎个餅、水㧯為𠊎剪羊毛个人預備个肉，給該兜𠊎毋知對㖠位來个人！」</verse>
				<verse number="12">大衛 个部下倒轉去，將 拿霸 所講个話向 大衛 報告。</verse>
				<verse number="13">大衛 就下令：「帶等刀仔！」佢等就照恁樣做。 大衛 自家也帶等刀仔，𢱋四百個部下出發，留下兩百儕看守補給品。</verse>
				<verse number="14">拿霸 个一個僕人對 拿霸 个𡜵娘 愛比該 講：「 大衛 派人對曠野來向𠊎等个主人請安，總係𠊎等个主人侮辱佢等。</verse>
				<verse number="15">佢等實在對𠊎等當好，從來毋識欺負𠊎等。𠊎等㧯佢等共下在曠野个時，𠊎等也毋識跌掉麼介東西。</verse>
				<verse number="16">𠊎等掌羊仔个時，全部㧯佢等共下，佢等日夜保護𠊎等。</verse>
				<verse number="17">請你想看仔你應該樣般做？這事可能會成做𠊎等主人㧯全家个災難。𠊎等个主人當惡，麼人个話佢全毋聽！」</verse>
				<verse number="18">愛比該 趕緊預備好兩百垤餅、兩皮袋酒、五隻焙好个羊、十七公斤焙熟个麥仔、一百垤葡萄餅、兩百垤無花果餅，全部疊在幾隻驢仔个背囊頂，</verse>
				<verse number="19">然後姖對僕人講：「你等在頭前行，𠊎在後背跈。」總係姖無將這事㧯厥老公 拿霸 講。</verse>
				<verse number="20">愛比該 騎等驢仔，正跈等山路下來个時，忽然看到 大衛 㧯佢个部下在對面行下來。</verse>
				<verse number="21">大衛 本來想：「𠊎做麼介愛在這曠野保護該人个財產，使佢無跌掉麼介東西。𠊎恁樣㧯佢𢯭手，佢卻用惡報善！</verse>
				<verse number="22">天光以前，若係𠊎毋將佢所有个細孻仔㓾淨淨，願上帝嚴嚴來責罰𠊎 ！」</verse>
				<verse number="23">愛比該 一看到 大衛 ，趕緊對驢仔个背囊頂下來，伏在地上跪拜，</verse>
				<verse number="24">在 大衛 腳前講：「大人啊，這罪過俾𠊎一儕來㧡！求你俾你个使女對你講話，求你甘願聽使女个說明。</verse>
				<verse number="25">大人啊，請毋好插 拿霸 該隻壞東西；佢个性情㧯佢个名共樣，佢安到 拿霸 ，佢做人就係戇仔。論到𠊎，大人所派來个僕人到个時，你个使女無在該位。</verse>
				<verse number="26">大人啊，既然上主無愛你親手向敵人報仇，流佢等个血，這下𠊎指等永生个上主，又敢在你面前發誓：願你个敵人㧯所有想害你个人，全部像 拿霸 一樣受責罰。</verse>
				<verse number="27">求大人收使女帶來个禮物，分給你个部下。</verse>
				<verse number="28">也求你赦免使女个毋著。上主一定會使你做王，你个後代也會做王，因為大人係為上主相㓾。你一生人毋會做麼介毋著个事 。</verse>
				<verse number="29">有人想愛攻擊你，㓾你，上主 — 你个上帝會保守你，就像人保護珍貴个寶物。你个敵人，上主會豁掉佢等，就像人用拂石仔个索仔將石仔拂到遠遠去共樣。</verse>
				<verse number="30">大人啊，上主照佢个應許為你成就一切好事、使你做 以色列 王个時節，</verse>
				<verse number="31">你就毋會因為無故㓾人抑係親手報仇感覺良心不安。上主賜福給你个時節，求你毋好毋記得你个使女。」</verse>
				<verse number="32">大衛 對 愛比該 講：「上主 — 以色列 个上帝係應當稱頌个！因為佢今晡日派你來見𠊎！</verse>
				<verse number="33">𠊎為你个見識㧯你今晡日所做个一切感謝上主，因為你使𠊎毋使親手報仇、流人个血。</verse>
				<verse number="34">𠊎指等該使𠊎毋使傷害你个上主 — 以色列 永生个上帝老實講，若毋係你趕來見𠊎， 拿霸 屋下所有个細孻仔在天光以前全部會死淨淨！」</verse>
				<verse number="35">所以 大衛 收下 愛比該 帶來个禮物，並對姖講：「安心轉去。𠊎會照你講个去做。」</verse>
				<verse number="36">愛比該 轉到 拿霸 該位，看到 拿霸 在屋下享受筵席，就像王个筵席。 拿霸 心情爽快，食到當醉，所以 愛比該 該暗晡無㧯佢講所發生个事，</verse>
				<verse number="37">等到第二朝晨 拿霸 清醒正㧯佢講。 拿霸 黏時心臟病發作，完全毋知人事。</verse>
				<verse number="38">十日後，上主擊打 拿霸 ，佢就死掉。</verse>
				<verse number="39">大衛 聽講 拿霸 死掉，就講：「讚美上主！佢為𠊎報 拿霸 侮辱𠊎个冤仇，又使𠊎 — 佢个僕人無做毋著事。上主因 拿霸 个壞行為責罰佢。」 過無幾久， 大衛 派人去㧯 愛比該 講，愛討姖做𡜵娘。</verse>
				<verse number="40">大衛 个僕人到 迦密 見 愛比該 ，對姖講：「 大衛 派𠊎等來你這位，佢想愛討你做𡜵娘。」</verse>
				<verse number="41">愛比該 就伏在地上，講：「𠊎甘願做佢个使女，洗𠊎主人該兜僕人个腳。」</verse>
				<verse number="42">愛比該 黏時䟘起來，騎上姖个驢仔，帶等五個使女，㧯 大衛 个僕人共下去。 愛比該 就做 大衛 个𡜵娘。</verse>
				<verse number="43">大衛 已經討 耶斯列 人 亞希暖 ，所以姖兩儕都做佢个𡜵娘。</verse>
				<verse number="44">以前做 大衛 个𡜵娘、 掃羅 个妹仔 米甲 ， 掃羅 早就將姖嫁給 迦琳 人 拉億 个孻仔 帕提 做𡜵娘。</verse>
			</chapter>
			<chapter number="26">
				<verse number="1">有兜人對 西弗 到 基比亞 來見 掃羅 ，向佢報告， 大衛 囥在 猶大 曠野堘頭个 哈基拉 山頂。</verse>
				<verse number="2">掃羅 黏時帶 以色列 个三千精兵到 西弗 个曠野尋 大衛 。</verse>
				<verse number="3">佢等在 哈基拉 山路堘安營。 大衛 還在曠野，當佢聽到 掃羅 已經帶領軍隊來到个時，</verse>
				<verse number="4">佢派探仔出去打探，知得 掃羅 斷真到來。</verse>
				<verse number="5">大衛 黏時起身，尋到 掃羅 㧯佢个元帥 — 尼珥 个孻仔 押尼珥 睡目个所在。 掃羅 睡在兵營肚；佢个軍隊在佢个周圍安營。</verse>
				<verse number="6">大衛 問 赫 人 亞希米勒 㧯 洗璐雅 个孻仔 約押 个兄弟 亞比篩 講：「你等兩儕麼人願意㧯𠊎到 掃羅 个營肚去？」 亞比篩 講：「𠊎願意！」</verse>
				<verse number="7">該暗晡， 大衛 㧯 亞比篩 入去 掃羅 个營肚，發現 掃羅 睡在兵營个中央，佢个槍插在頭那塍个地上； 押尼珥 㧯軍隊圍等佢睡。</verse>
				<verse number="8">亞比篩 對 大衛 講：「今暗晡，上帝將你个敵人交在你手中。這下俾𠊎用佢自家个槍刺穿佢，刺一下就做得將佢釘在地上，毋使刺兩下！」</verse>
				<verse number="9">總係 大衛 應講：「你做毋得傷害佢！麼人傷害上主膏油立个王，上主一定會責罰佢。」</verse>
				<verse number="10">大衛 又講：「𠊎指等永生上主發誓，𠊎知上主會㓾 掃羅 ，可能日仔就到了、自家死掉，抑係死在戰場。</verse>
				<verse number="11">上主毋准𠊎傷害佢膏油立个王！𠊎等來拿佢頭那塍个槍㧯水罐仔走！」</verse>
				<verse number="12">所以 大衛 對 掃羅 个頭那塍拿走佢个槍㧯水罐仔，然後㧯 亞比篩 離開。無人看到，也無人知發生麼介事，連一個乜無醒過來；佢等全部當好睡，因為上主使佢等毋知醒。</verse>
				<verse number="13">大衛 過去山壢該片，企在山頂，㧯佢等離盡遠，</verse>
				<verse number="14">然後大聲向 掃羅 个軍隊㧯 尼珥 个孻仔 押尼珥 喊講：「 押尼珥 ！你有聽到𠊎喊麼？」 押尼珥 問：「麼人在該位喊王？」</verse>
				<verse number="15">大衛 應講：「 押尼珥 ，你敢毋係 以色列 當中最強壯个勇士？你樣般無好好保護國王 — 你个主人？頭下有人入到營肚去，愛㓾國王 — 你个主人！</verse>
				<verse number="16">押尼珥 ！你無盡責任。𠊎指等永生个上主發誓，你等全部該死！因為你等無保護好主人，就係上主所膏油立个王。這下你去看，王頭那塍个槍㧯水罐仔在㖠位？」</verse>
				<verse number="17">掃羅 認出係 大衛 个聲音，就問：「 大衛 ，吾孻仔啊！係你麼？」 大衛 應講：「吾主吾王，係𠊎！」</verse>
				<verse number="18">然後又講：「主人啊，你做麼介追你个僕人？𠊎做毋著麼介？犯麼介罪？</verse>
				<verse number="19">吾主吾王，請聽僕人講。若係上主使你做𠊎个對敵，𠊎願獻祭給佢，好改變佢个心意；若係出在人个陰謀，願上帝咒詛佢等。因為佢等將𠊎逐出上主賜給佢子民个土地，愛使𠊎流浪國外，拜該位个神明。</verse>
				<verse number="20">求你毋好俾𠊎死在外國个土地上，遠離上主。 以色列 个王做麼介愛出來捉𠊎，像捉一隻跳蚤？做麼介愛射𠊎，像射一隻鷓鴣呢？」</verse>
				<verse number="21">掃羅 講：「𠊎毋著了！𠊎个孻仔 大衛 ，轉來啊！𠊎毋會再傷害你，因為你今暗晡留𠊎个性命。𠊎係糊塗人；斷真盡差！」</verse>
				<verse number="22">大衛 講：「國王，這係你个槍！請吩咐你一個部下過來拿。</verse>
				<verse number="23">上主會照逐儕个信實㧯正義來獎賞佢。今晡日上主將你交在𠊎手中，總係𠊎無傷害上主所膏油立个王。</verse>
				<verse number="24">今晡日𠊎保留你个性命，願上主也恁樣保留𠊎个性命，救𠊎脫離所有个災難。」</verse>
				<verse number="25">掃羅 應講：「𠊎个孻仔 大衛 啊，願上帝賜福給你！你定著會做大事，也一定會得勝！」 所以 大衛 離開該位； 掃羅 就轉屋下去了。</verse>
			</chapter>
			<chapter number="27">
				<verse number="1">大衛 心肚想：「總有一日𠊎會落在 掃羅 个手中；𠊎最好還係逃到 非利士 去。恁樣， 掃羅 會無法度在 以色列 國內尋到𠊎，𠊎就做得脫離佢个手。」</verse>
				<verse number="2">所以 大衛 帶佢个部下六百人，黏時去投靠 迦特 王 — 瑪俄 个孻仔 亞吉 。</verse>
				<verse number="3">大衛 㧯部下帶等家族，就㧯 亞吉 共下住在 迦特 。 大衛 个兩個𡜵娘 — 耶斯列 人 亞希暖 㧯 拿霸 个寡婦 迦密 人 愛比該 㧯佢共下。</verse>
				<verse number="4">掃羅 聽講 大衛 逃到 迦特 去，就無再尋佢。</verse>
				<verse number="5">大衛 對 亞吉 講：「王若看𠊎做朋友，請俾𠊎住在鄉下一個細城；僕人樣做得㧯王共下住在京城呢？」</verse>
				<verse number="6">所以 亞吉 將 洗革拉 城賜給 大衛 。對該日起， 洗革拉 城就屬 猶大 个王。</verse>
				<verse number="7">大衛 住在 非利士 人个地區前後一年又四隻月。</verse>
				<verse number="8">該站期間， 大衛 帶領佢个部下去攻打 基述 人、 基色 人㧯 亞瑪力 人。 (這兜人住在該地區已經當久了。佢等个土地遠對 書珥 ，直到 埃及 。)</verse>
				<verse number="9">大衛 就會㓾死所有个男人、婦女，又搶佢等个羊群、牛群、驢仔、駱駝，連衫褲也會搶走。 大衛 相㓾後會轉到 亞吉 該位，</verse>
				<verse number="10">亞吉 就會問：「今晡日你去麼介所在相㓾？」 大衛 會講係「 猶大 南部」、抑係「 耶拉篾 部落該位」、抑係「 基尼 人住个所在」。</verse>
				<verse number="11">大衛 會㓾掉所有个男人㧯婦女，毋留一儕，免得該人到 迦特 去報告佢㧯部下活動个情形。這就係 大衛 住在 非利士 个時常常做个事。</verse>
				<verse number="12">亞吉 相信 大衛 ；佢想：「 大衛 已經使自家个同胞 以色列 人惱佢，所以佢一定會一生人服事𠊎。」</verse>
			</chapter>
			<chapter number="28">
				<verse number="1">無幾久， 非利士 人召集軍隊攻打 以色列 人。 亞吉 對 大衛 講：「你應該知，你㧯你个部下愛跈𠊎共下去相㓾。」</verse>
				<verse number="2">大衛 講：「當然，𠊎係你个僕人。你自家知𠊎能做麼介。」 亞吉 對 大衛 講：「恁樣，𠊎愛你一生人做𠊎个侍衛。」</verse>
				<verse number="3">撒母耳 已經過身； 以色列 人全部為佢哀傷，將佢葬在佢个故鄉 拉瑪 。 掃羅 頭擺識強迫所有仙姑㧯行邪術个離開 以色列 。</verse>
				<verse number="4">非利士 人个軍隊聚集在 書念 城附近安營； 掃羅 召集 以色列 人在 基利波 山安營。</verse>
				<verse number="5">掃羅 看到 非利士 人个軍隊，心肝驚到愊愊掣，</verse>
				<verse number="6">就求問上主應該樣般做。總係上主無用托夢，又無通過烏陵，乜無通過先知回答佢。</verse>
				<verse number="7">所以 掃羅 命令佢个官員講：「代𠊎尋一個仙姑，𠊎愛去問姖。」 該兜官員應講：「在 隱‧多珥 有一個。」</verse>
				<verse number="8">所以 掃羅 改變佢个面貌，著別樣个衫，在日頭落山後㧯兩個部下去見該婦人家。 掃羅 對姖講：「請為𠊎作法，𠊎指定一個死人，你將佢个魂招上來。」</verse>
				<verse number="9">該婦人家對佢講：「你應該知 掃羅 所做過个事，佢強迫仙姑㧯行邪術个全部離開 以色列 。你做麼介愛陷害𠊎，害𠊎無命呢？」</verse>
				<verse number="10">掃羅 對姖發誓講：「𠊎指等永生上主答應你：你做這事，一定毋會受責罰。」</verse>
				<verse number="11">該婦人家問：「你愛𠊎招麼人上來？」 掃羅 講：「招 撒母耳 上來。」</verse>
				<verse number="12">當婦人家看到 撒母耳 个時，姖驚到喊起來，對 掃羅 講：「你做麼介瞞騙𠊎？你就係 掃羅 啊！」</verse>
				<verse number="13">王對姖講：「毋使驚！你看到麼介？」 婦人家應 掃羅 講：「𠊎看到一個像神明个人 對地底下上來。」</verse>
				<verse number="14">掃羅 問：「佢係麼介樣仔？」 婦人家應講：「係一個老人家上來；佢著長衫。」 掃羅 知該係 撒母耳 ，就恭恭敬敬伏在地上。</verse>
				<verse number="15">撒母耳 問 掃羅 ：「你做麼介吵𠊎？做麼介招𠊎上來？」 掃羅 講：「𠊎有大災禍了！ 非利士 人愛㧯𠊎相㓾，上帝又已經離開𠊎。佢毋肯再通過先知抑係夢來應𠊎。所以𠊎正請你上來，求你指示𠊎應該樣般做。」</verse>
				<verse number="16">撒母耳 講：「既然上主離開你，做你个對敵，你做麼介還愛求問𠊎？</verse>
				<verse number="17">上主向你所做个，佢已經通過𠊎个嘴㧯你講過了；上主已經將你个王國搶轉來，賜給別人 — 就係 大衛 ；</verse>
				<verse number="18">因為你違背上主个命令，無執行佢對 亞瑪力 人个憤怒，將佢等㧯佢等所有个一切全部消滅；所以，今晡日上主正恁樣對待你。</verse>
				<verse number="19">上主一定會將你㧯 以色列 人交給 非利士 人。天光日，你㧯你該兜孻仔會來㧯𠊎共下；上主一定會將 以色列 个軍隊交給 非利士 人。」</verse>
				<verse number="20">掃羅 被 撒母耳 个話嚇倒，黏時橫下來，全身直直在地上；因為佢一日一夜無食東西，就無半滴氣力。</verse>
				<verse number="21">該婦人家到 掃羅 頭前，看到佢嚇到半死，就對佢講：「你看！你个使女聽你个話，冒生命个危險做你所要求个事。</verse>
				<verse number="22">這下請你也照使女所要求个做。𠊎為你煮兜東西食，你一定愛食正有氣力向前行！」</verse>
				<verse number="23">掃羅 毋肯；佢講佢無愛食東西。總係佢个部下㧯該婦人家再三勸佢食。最後，佢聽佢等个話，對地上䟘起來，坐在眠床頂。</verse>
				<verse number="24">該婦人家趕緊將屋下个一隻肥肥个細牛仔㓾掉，又攪麵粉，焙兜仔無酵餅。</verse>
				<verse number="25">姖將食物㨮到 掃羅 㧯佢部下面前，佢等就食。該暗晡佢等就離開。</verse>
			</chapter>
			<chapter number="29">
				<verse number="1">非利士 人集合佢等所有个軍隊在 亞弗 ； 以色列 人在 耶斯列 山壢个泉水滣安營。</verse>
				<verse number="2">五個 非利士 人个領袖帶等佢等个軍隊百人一隊㧯千人一隊照順序前進； 大衛 㧯佢个軍隊跈 亞吉 行在後背。</verse>
				<verse number="3">非利士 該兜領袖看到佢等，就問：「這兜 希伯來 人在這位做麼介？」 亞吉 應講：「這係 大衛 ， 以色列 王 掃羅 个部下。佢跈𠊎已經有幾年个時間。自從佢投靠𠊎到這下，𠊎尋毋到佢有麼介毋著。」</verse>
				<verse number="4">總係， 非利士 該兜領袖當無歡喜，就對 亞吉 講：「喊這個人轉你所給佢个城去！做毋得俾佢㧯𠊎等共下去作戰；佢可能在相㓾个時轉過來攻打𠊎等。做麼介犧牲𠊎等自家人个生命，俾佢重新得到佢主人个信任呢？</verse>
				<verse number="5">這敢毋係 大衛 嗎？該兜婦女跳舞个時唱講： 『 掃羅 㓾死千千， 大衛 㓾死萬萬』。 敢毋係這個 大衛 嗎？」</verse>
				<verse number="6">所以， 亞吉 喊 大衛 來，對佢講：「𠊎指等永生个上主發誓：你對𠊎一直忠心；𠊎盡愛你㧯𠊎共下去作戰。對你投靠𠊎到這下，𠊎尋毋到你有麼介毋著，總係其他个領袖反對你。</verse>
				<verse number="7">所以，你平安轉去，免得惹佢等發譴。」</verse>
				<verse number="8">大衛 應講：「𠊎犯了麼介毋著？若係照你所講，對𠊎來投靠你該日起，你尋毋出僕人有麼介毋著；恁樣，做麼介毋准𠊎去攻打吾主吾王个敵人呢？」</verse>
				<verse number="9">亞吉 應 大衛 講：「𠊎知你在𠊎面前像上帝个天使共樣恁忠心；總係 非利士 人其他个領袖無愛你㧯𠊎等共下去相㓾。</verse>
				<verse number="10">所以，天光朝晨打早，該兜離開 掃羅 、也就係㧯你共下來投靠𠊎个人，你愛帶領佢等倒轉去。」</verse>
				<verse number="11">所以， 大衛 㧯佢个部下第二日打早就起身，轉 非利士 去。 非利士 人繼續向 耶斯列 進軍。</verse>
			</chapter>
			<chapter number="30">
				<verse number="1">兩日後， 大衛 帶佢个部下轉到 洗革拉 。 亞瑪力 人已經侵犯 猶大 南片，進攻 洗革拉 。佢等燒掉城市，</verse>
				<verse number="2">將所有个婦女，還有城肚所有个人，無論大細全部捉走，總係無㓾掉。</verse>
				<verse number="3">大衛 㧯佢个部下一到，發現城已經燒掉，佢等个𡜵娘子女全部被人捉走，</verse>
				<verse number="4">就大聲盡噭，噭到無氣力。</verse>
				<verse number="5">大衛 个兩個𡜵娘 — 耶斯列 人 亞希暖 㧯 拿霸 个寡婦 迦密 人 愛比該 ，也被人捉走。</verse>
				<verse number="6">大衛 个心情非常著急，因為佢个部下為子女盡艱苦，就講愛用石頭打死佢；總係 大衛 倚靠上主 — 佢个上帝，心肝就剛強。</verse>
				<verse number="7">大衛 對 亞希米勒 个孻仔祭司 亞比亞他 講：「將以弗得帶到這位來！」 亞比亞他 就照佢个吩咐去做。</verse>
				<verse number="8">大衛 求問上主，講：「𠊎應該去追該兜侵犯个人麼？𠊎能逐到佢等麼？」 上主應講：「你去追。你一定逐得到，也會救轉你个人。」</verse>
				<verse number="9">所以， 大衛 㧯佢个部下六百人出發去到 比梭 溪；有一部份人留在該位。</verse>
				<verse number="10">大衛 帶等四百人繼續追等去，其他兩百人因為當𤸁、當痶，無法度過 比梭 溪，就留在後背。</verse>
				<verse number="11">大衛 个部下在野地發現一個 埃及 个細孻仔，就帶佢去見 大衛 。佢等給佢食物㧯水，</verse>
				<verse number="12">也給佢一些仔無花果餅㧯兩垤葡萄餅。佢食掉以後，就恢復元氣；因為佢已經三日三夜無食、無啉。</verse>
				<verse number="13">大衛 問佢：「你个主人係麼人？你對㖠位來？」 佢應講：「𠊎係 埃及 人，係 亞瑪力 人个奴才。因為𠊎三日前發病仔，主人就將𠊎豁在這位。</verse>
				<verse number="14">𠊎等侵犯 猶大 南部 基利提 个土地㧯 迦勒 族个土地；𠊎等也將 洗革拉 城燒掉。」</verse>
				<verse number="15">大衛 問佢：「你願意帶𠊎去逐該兜侵略个 亞瑪力 人麼？」 佢講：「若係你指等上帝个名答應毋㓾𠊎，也毋將𠊎交給𠊎个主人，𠊎願意帶你去。」</verse>
				<verse number="16">就恁樣，佢帶等 大衛 去逐佢等。 該兜侵略个 亞瑪力 人分散到滿遍係，又食又啉，當歡喜慶祝，因為佢等對 非利士 㧯 猶大 搶來个財物當多。</verse>
				<verse number="17">第二日打早， 大衛 攻打佢等，一直打到臨暗仔；敵人除了四百個騎駱駝个後生人以外，無一個走掉。</verse>
				<verse number="18">大衛 救轉 亞瑪力 人搶走个人㧯財物：佢救到佢兩個𡜵娘，</verse>
				<verse number="19">救到所有部下个子女，搶轉所有被 亞瑪力 人搶走个財物，無一項東西失掉。</verse>
				<verse number="20">大衛 也搶轉所有个羊群㧯牛群；佢个部下逐等頭牲行在頭前，講：「這兜全部係 大衛 个！」</verse>
				<verse number="21">無幾久， 大衛 轉到兩百人停留个所在；這兜人當痶無法度跈佢共下去，留在 比梭 溪。佢等出來迎接 大衛 㧯佢个部下； 大衛 也親切㧯佢等請安。</verse>
				<verse number="22">總係有兜㧯 大衛 共下去个係鱸鰻仔㧯壞心个人；佢等講：「這兜人無㧯𠊎等共下去，𠊎等毋好將搶轉來个戰利品分給佢等。單單將佢等个𡜵娘、子女還佢等𢱋轉去就好了！」</verse>
				<verse number="23">總係 大衛 講：「弟兄啊，𠊎等做毋得恁樣處理上主所賜給𠊎等个；因為佢保護𠊎等平安，又使𠊎等打贏該兜侵略者。</verse>
				<verse number="24">無人會同意你等个話！所有个東西逐儕有份：留在後方看守武器个㧯出戰个應該平分戰利品。」</verse>
				<verse number="25">大衛 將這個規矩定做條例；這條例 以色列 人對該日一直遵守下去。</verse>
				<verse number="26">大衛 轉到 洗革拉 以後，將搶轉來个財物拿一部份送給佢个朋友，就係 猶大 該兜領袖，講：「這兜禮物係𠊎等對上主个敵人該位搶轉來个。」</verse>
				<verse number="27">大衛 送禮物給 伯特利 个人， 猶大 南部 拉末 个人，又給 雅提珥 、</verse>
				<verse number="28">亞羅珥 、 息末 、 以實提莫 、</verse>
				<verse number="29">拉哈勒 這兜城市个人，也給 耶拉篾 族㧯 基尼 族這兜城市个人，</verse>
				<verse number="30">又給住在 何珥瑪 、 歌拉珊 ， 亞達</verse>
				<verse number="31">㧯 希伯崙 這兜城市个人。 大衛 㧯佢部下去過个所在，佢全部送禮物給佢等。</verse>
			</chapter>
			<chapter number="31">
				<verse number="1">非利士 人㧯 以色列 人在 基利波 山相㓾。當多 以色列 人被人㓾死；無死个人全部逃走。</verse>
				<verse number="2">非利士 人逐到 掃羅 㧯佢該兜孻仔，㓾掉 約拿單 、 亞比拿達 㧯 麥基‧舒亞 。</verse>
				<verse number="3">四周圍向 掃羅 个攻擊緊來緊激烈；佢被敵人个箭射到，受重傷。</verse>
				<verse number="4">掃羅 對代佢拿武器个侍衛講：「你个刀仔挷出來，將𠊎㓾掉！恁樣，該兜無受割禮个 非利士 人就無法度㓾到𠊎來凌辱𠊎。」總係該侍衛非常驚，毋敢㓾；所以 掃羅 挷出自家个刀仔來，伏在刀仔頂高將自家刺死。</verse>
				<verse number="5">該侍衛一看到 掃羅 死掉，也伏在自家个刀仔頂高自殺，㧯 掃羅 共下死。</verse>
				<verse number="6">這就係 掃羅 㧯三個孻仔，並該代佢拿武器个侍衛死个情形；在該日， 掃羅 个軍隊全部戰死。</verse>
				<verse number="7">耶斯列 山壢該片㧯 約旦 河東片个 以色列 人看到 以色列 个軍隊全部逃走，又看到 掃羅 㧯佢該兜孻仔攏總戰死，就逃難離開佢等个城； 非利士 人就來佔領，住在該兜城。</verse>
				<verse number="8">第二日， 非利士 人去剝死人个戰衫；佢等發現 掃羅 㧯佢三個孻仔个屍體橫在 基利波 山，</verse>
				<verse number="9">就剁下 掃羅 个頭，剝掉佢个武器。佢等派人到 非利士 各地去，向佢等个偶像㧯人民報告這消息。</verse>
				<verse number="10">佢等將 掃羅 个武器放在 亞斯她錄 女神廟肚，將佢个屍體釘在 伯‧珊 个城牆頂。</verse>
				<verse number="11">基列 地區 雅比 城个人民一聽到 非利士 人對 掃羅 所做个事，</verse>
				<verse number="12">佢等當中所有个勇士就出發，行歸夜，來到 伯‧珊 。佢等對城牆頂將 掃羅 㧯佢該兜孻仔个屍體拿下來，帶轉 雅比 ，在該位燒掉。</verse>
				<verse number="13">佢等將骸骨葬在城肚个柳樹下，然後禁食七日。</verse>
			</chapter>
		</book>
		<book number="10">
			<chapter number="1">
				<verse number="1">掃羅 死後， 大衛 打贏 亞瑪力 人轉來，在 洗革拉 住兩日。</verse>
				<verse number="2">第三日，有一個後生人對 掃羅 軍營來，佢扯爛衫，委灰在自家頭那頂。佢來到 大衛 面前，恭敬伏在地上。</verse>
				<verse number="3">大衛 問佢：「你對㖠位來？」 佢講：「𠊎係對 以色列 軍營逃命出來个。」</verse>
				<verse number="4">大衛 問：「㧯𠊎講，該片个情況樣般？」 該後生人講：「𠊎等个軍隊對戰場打輸逃走，盡多人戰死。 掃羅 㧯厥孻仔 約拿單 乜死掉了！」</verse>
				<verse number="5">大衛 問：「你樣般知 掃羅 㧯 約拿單 死掉了呢？」</verse>
				<verse number="6">後生人應講：「𠊎堵好在 基利波 山，看到 掃羅 憑等佢个槍，敵人个戰車㧯騎兵盡遽就會逐到佢了。</verse>
				<verse number="7">佢轉身看到𠊎，就喊𠊎。𠊎講：『𠊎在這位！』</verse>
				<verse number="8">佢問𠊎係麼人；𠊎㧯佢講𠊎係 亞瑪力 人。</verse>
				<verse number="9">佢講：『企到𠊎身邊來，將𠊎刺死！𠊎受重傷，會死了，總係還吂斷氣。』</verse>
				<verse number="10">𠊎就過去㓾死佢，因為𠊎知佢已經橫掉救毋生了。𠊎拿下佢頭那頂个王冠㧯手髀項个手鈪，帶來這位獻給𠊎主人。」</verse>
				<verse number="11">大衛 悲傷到扯爛衫；佢个部下也全部扯爛衫。</verse>
				<verse number="12">佢等傷心大噭，禁食到該暗晡，因為 掃羅 、厥孻仔 約拿單 㧯上主个子民 以色列 同胞在戰場死掉。</verse>
				<verse number="13">大衛 問該報消息給佢个後生人：「你係㖠位人？」 佢應講：「𠊎係 亞瑪力 人，係住在你等國內个外族人。」</verse>
				<verse number="14">大衛 講：「你樣般敢㓾上主膏油立个王呢？」</verse>
				<verse number="15">所以， 大衛 對一個部下講：「㓾掉佢！」該部下就將該 亞瑪力 人㓾死。</verse>
				<verse number="16">大衛 同時對該 亞瑪力 人講：「你罪有應得！你承認㓾死上主膏油立个王，恁樣就係定自家个死罪。」</verse>
				<verse number="17">大衛 為 掃羅 㧯厥孻仔 約拿單 做一首哀歌弔慰，</verse>
				<verse number="18">下令將這首歌教 猶大 个人民。這首歌安到「弓歌」，記錄在《雅煞珥書》。</verse>
				<verse number="19">在 以色列 个山頂，𠊎等个領袖死掉！ 𠊎等个英雄樣會橫落去！</verse>
				<verse number="20">毋好在 迦特 報信； 毋好在 亞實基倫 街路傳開。 毋好俾 非利士 个婦女歡喜； 毋好使外邦个細妹仔快樂。</verse>
				<verse number="21">願 基利波 該兜山永遠無降雨露； 願它个田地永遠荒涼。 因為英雄个盾牌在該位染到血； 掃羅 个盾牌無再用油拭金。</verse>
				<verse number="22">無看到敵人个血， 約拿單 个弓無放下來； 無舐到勇士个油， 掃羅 个劍也無收回。</verse>
				<verse number="23">掃羅 㧯 約拿單 受人尊敬得人歡喜！ 佢等生前相愛相惜，臨死乜無分開； 佢等比鷹鳥還較遽，比公獅還較強。</verse>
				<verse number="24">以色列 个婦女啊，愛為 掃羅 傷心流目汁！ 佢使你等著紅色个靚衫， 使你等有好戴金銀珠寶。</verse>
				<verse number="25">英雄樣會橫落去，死在戰場！ 約拿單 也戰死在山頂！</verse>
				<verse number="26">吾哥 約拿單 哪，𠊎為你哀傷！ 你對𠊎非常親愛！ 你个深情樣般美好， 遠遠贏過婦女个愛情。</verse>
				<verse number="27">英雄樣會橫落去； 佢等个武器也廢掉。</verse>
			</chapter>
			<chapter number="2">
				<verse number="1">這事以後， 大衛 求問上主：「𠊎做得上 猶大 个一個城市去麼？」 上主應講：「做得。」 大衛 問：「㖠個城呢？」 上主講：「 希伯崙 。」</verse>
				<verse number="2">所以 大衛 到 希伯崙 去，帶等佢兩個𡜵娘 — 耶斯列 人 亞希暖 㧯 迦密 人 拿霸 个寡婦 愛比該 。</verse>
				<verse number="3">大衛 也帶等部下㧯佢等个家族共下去。佢等在 希伯崙 周圍个城市住。</verse>
				<verse number="4">猶大 人就到 希伯崙 來，膏油設立 大衛 做 猶大 个王。 大衛 聽講 基列 地區 雅比 城个人民埋葬 掃羅 ，</verse>
				<verse number="5">就派使者到該位去，對佢等講：「願上主賜福給你等，因為你等對主人 掃羅 忠心，將佢埋葬。</verse>
				<verse number="6">願上主對你等信實，永遠愛護你等；𠊎也會因你等所做个來好款待你等。</verse>
				<verse number="7">愛勇敢堅強！你等个主人 掃羅 死掉，總係 猶大 个人民已經膏油設立𠊎做佢等个王。」</verse>
				<verse number="8">掃羅 軍隊个元帥 尼珥 个孻仔 押尼珥 識將 掃羅 个孻仔 伊施波設 帶過 約旦 河，到 瑪哈念 去。</verse>
				<verse number="9">在該位， 押尼珥 立 伊施波設 做王，統治 基列 、 亞設 、 耶斯列 、 以法蓮 、 便雅憫 ，事實上係全 以色列 。</verse>
				<verse number="10">掃羅 个孻仔 伊施波設 做 以色列 王个時四十歲；佢統治 以色列 共兩年。 總係 猶大 支族全部對 大衛 盡忠心；</verse>
				<verse number="11">大衛 在 希伯崙 做王治理 猶大 共七年半。</verse>
				<verse number="12">尼珥 个孻仔 押尼珥 㧯 掃羅 个孻仔 伊施波設 个官員對 瑪哈念 到 基遍 去。</verse>
				<verse number="13">洗璐雅 个孻仔 約押 㧯 大衛 个官員到 基遍 个陂塘滣㧯佢等相會。大家全部坐好了，一隊在陂塘這片，一隊在陂塘該片。</verse>
				<verse number="14">押尼珥 對 約押 講：「𠊎等各派幾個後生人出來比武拚看仔好麼？」 約押 應講：「好。」</verse>
				<verse number="15">所以，有十二個人代表 掃羅 个孻仔 伊施波設 㧯 便雅憫 支族出來，㧯 大衛 該片个十二個人比武。</verse>
				<verse number="16">逐儕攏總揪等對方个頭那，用劍刺入對方个脇下。恁樣，二十四個人全部橫落去，死共下。所以 基遍 該地方就安到「劍場」。</verse>
				<verse number="17">該日，雙方打到盡厲害。 押尼珥 㧯 以色列 人被 大衛 該片个人打輸了。</verse>
				<verse number="18">婦女 洗璐雅 个三個孻仔全部在該位，佢等三儕係 約押 、 亞比篩 㧯 亞撒黑 。 亞撒黑 走起來像野鹿恁遽，</verse>
				<verse number="19">佢就去追 押尼珥 ，無偏左右，直直追等去。</verse>
				<verse number="20">押尼珥 轉頭一看，講：「 亞撒黑 ，係你麼？」 亞撒黑 講：「係！」</verse>
				<verse number="21">押尼珥 對佢講：「毋好追𠊎，去追別个兵仔，搶佢个東西。」總係 亞撒黑 還係緊追毋放佢走。</verse>
				<verse number="22">押尼珥 再過對 亞撒黑 講：「毋好追𠊎！你愛𠊎㓾你係麼？㓾掉你，𠊎樣會有面皮見若哥 約押 呢？」</verse>
				<verse number="23">總係 亞撒黑 還係毋肯斡頭轉去。所以， 押尼珥 向後背㧹槍，刺穿 亞撒黑 个肚笥；槍對佢个背囊穿出去，佢就橫下去死掉。眾人追到 亞撒黑 橫下去死掉个地方，全部停腳企等。</verse>
				<verse number="24">總係， 約押 㧯 亞比篩 䟘起來追 押尼珥 。日頭下山个時，佢等來到 亞瑪 山，就係在 基亞 个東片，通到 基遍 曠野个路上。</verse>
				<verse number="25">便雅憫 支族又聚集所賸个人跈等 押尼珥 ，掌等一座山頭。</verse>
				<verse number="26">押尼珥 對 約押 大聲喊講：「𠊎等愛一直㓾下去麼？敢講你毋知，到頭來雙方个冤仇會越結越深？𠊎等係你个同胞，你還愛等幾久正下令停止追𠊎等呢？」</verse>
				<verse number="27">約押 講：「𠊎指等永生个上帝發誓，若毋係你開嘴，天光朝晨以前，𠊎个軍隊還係會追你等。」</verse>
				<verse number="28">所以 約押 歕羊角，命令佢个軍隊毋好再逐 以色列 人，相㓾就停下來。</verse>
				<verse number="29">押尼珥 㧯佢个軍隊透夜行軍，經過 約旦 山壢，過 約旦 河，又行歸朝晨正轉到 瑪哈念 。</verse>
				<verse number="30">約押 追 押尼珥 轉來以後，就聚集佢所有个軍隊，發現少 亞撒黑 以外，還少 大衛 个人十九儕。</verse>
				<verse number="31">總係 大衛 這片个軍隊㓾死 押尼珥 對 便雅憫 支族帶來个人共三百六十儕。</verse>
				<verse number="32">約押 㧯部下將 亞撒黑 个屍體帶到 伯利恆 ，葬在佢等家族个墳墓肚。然後， 約押 㧯跈佢个人透夜行，到天光正轉到 希伯崙 。</verse>
			</chapter>
			<chapter number="3">
				<verse number="1">擁護 掃羅 家族个軍隊㧯 大衛 家族个軍隊相㓾當久。 大衛 一日比一日強壯，總係 掃羅 个家族一日比一日衰弱。</verse>
				<verse number="2">大衛 在 希伯崙 𫱔六個孻仔。照出世个順序來排： 暗嫩 係 耶斯列 人 亞希暖 𫱔个；</verse>
				<verse number="3">基利押 係 迦密 人 拿霸 个寡婦 愛比該 𫱔个； 押沙龍 係 基述 王 達買 个妹仔 瑪迦 𫱔个；</verse>
				<verse number="4">亞多尼雅 係 哈及 𫱔个； 示法提雅 係 亞比她 𫱔个；</verse>
				<verse number="5">以特念 係 大衛 个𡜵娘 以格拉 𫱔个。 大衛 這六個孻仔全部係在 希伯崙 出世个。</verse>
				<verse number="6">大衛 家族个軍隊㧯擁護 掃羅 家族个人相㓾毋識斷；在 掃羅 个部下當中， 押尼珥 元帥个勢力越來越大。</verse>
				<verse number="7">掃羅 有一個細姐安到 利斯巴 ，係 愛亞 个妹仔。有一日， 掃羅 个孻仔 伊施波設 問 押尼珥 ：「你做麼介㧯吾爸个細姐共下睡呢？」</verse>
				<verse number="8">這話使 押尼珥 非常受氣；佢講：「你想𠊎會出賣 掃羅 个家族係麼？𠊎敢係 猶大 个走狗？一開始𠊎就對若爸 掃羅 㧯佢个兄弟朋友忠心；𠊎乜無將你交在 大衛 个手中。今晡日，你卻為這婦人家來責備𠊎。</verse>
				<verse number="9">上主識應許 大衛 愛對 掃羅 㧯佢个家族手中搶走王權，使 大衛 做 以色列 㧯 猶大 个王，對最北片个 但 直到最南片个 別是巴 。這下，𠊎若係毋完成這件事，願上帝重重責罰𠊎！」</verse>
				<verse number="10"></verse>
				<verse number="11">伊施波設 非常驚 押尼珥 ，毋敢講半句話。</verse>
				<verse number="12">押尼珥 派人到 大衛 該位去，㧯佢講：「麼人想統治這國？若係你㧯𠊎講好條件，𠊎就幫助你，使 以色列 人全部歸順你。」</verse>
				<verse number="13">大衛 講：「好啊！𠊎做得㧯你立約，總係𠊎有一隻要求：你來見𠊎个時，一定愛帶 掃羅 个妹仔 米甲 共下來。」</verse>
				<verse number="14">大衛 也派人去見 掃羅 个孻仔 伊施波設 ，講：「將𠊎个𡜵娘 米甲 還𠊎啊！姖係𠊎用一百個 非利士 人个包皮換來个。」</verse>
				<verse number="15">伊施波設 就派人對 米甲 个老公 — 拉億 个孻仔 帕鐵 該位將 米甲 帶走。</verse>
				<verse number="16">老公 帕鐵 跈等 米甲 緊行緊噭，一直跈到 巴戶琳 。 押尼珥 對佢講：「你好轉了！」 帕鐵 就轉去。</verse>
				<verse number="17">押尼珥 㧯 以色列 該兜長老講：「盡久以來，你等一直希望 大衛 做你等个王，</verse>
				<verse number="18">這下，你等个機會來了。因為上主識應許 大衛 講：『𠊎愛用𠊎个僕人 大衛 來救𠊎个子民 以色列 脫離 非利士 人㧯所有仇敵个手。』」</verse>
				<verse number="19">押尼珥 也對 便雅憫 支族个人講共樣个話，然後到 希伯崙 去，將 以色列 人㧯 便雅憫 全支族所同意个事向 大衛 報告。</verse>
				<verse number="20">當 押尼珥 帶等二十儕到 希伯崙 見 大衛 个時， 大衛 為佢等擺設筵席。</verse>
				<verse number="21">押尼珥 對 大衛 講：「這下，𠊎愛去召集全 以色列 人來見𠊎个主𠊎个王，㧯你立約，使你照心願統治全國。」 大衛 保證 押尼珥 个安全，然後送佢離開。</verse>
				<verse number="22">無幾久， 約押 㧯 大衛 个軍隊攻打敵人轉來，帶轉當多戰利品。總係該時 押尼珥 已經無在 希伯崙 ，因為 大衛 已經保證佢个安全，送佢走了。</verse>
				<verse number="23">約押 㧯佢个軍隊轉到 希伯崙 个時，有人㧯佢講 尼珥 个孻仔 押尼珥 來見過王，王保證佢个安全，送佢走了。</verse>
				<verse number="24">約押 就去見王，講：「你做麼介恁樣？ 押尼珥 來見你，你還送佢走？</verse>
				<verse number="25">你愛知， 尼珥 个孻仔 押尼珥 到這位來係愛欺騙你，打探你出入个地方㧯你所做个事情。」</verse>
				<verse number="26">約押 離開 大衛 以後，就派人去追 押尼珥 ，對 西拉 井該位將 押尼珥 帶轉來；總係這事 大衛 並毋知。</verse>
				<verse number="27">押尼珥 轉到 希伯崙 个時， 約押 將佢帶到城門堘，詐意愛㧯佢講祕密話，就在該位刺穿佢个肚笥。恁樣， 押尼珥 就死掉，因為佢識㓾死 約押 个老弟 亞撒黑 。</verse>
				<verse number="28">大衛 聽到這消息，就講：「流 尼珥 个孻仔 押尼珥 个血，這罪在上主面前永遠毋會歸給𠊎㧯𠊎个國。</verse>
				<verse number="29">願報應歸到 約押 㧯佢个家族身上。願 約押 个家族代代有人著到性病、發癩、瘸手跛腳 、戰死、餓死。」</verse>
				<verse number="30">恁樣， 約押 㧯厥大老弟 亞比篩 㓾掉 押尼珥 ，為到報佢等个細老弟 亞撒黑 在 基遍 戰場被 押尼珥 㓾死个冤仇。</verse>
				<verse number="31">大衛 命令 約押 㧯佢个部下講：「你等愛扯爛衫，著麻衫，在 押尼珥 棺木前悲傷大噭。」 大衛 王親自跈在棺木後背行。</verse>
				<verse number="32">押尼珥 葬在 希伯崙 。王在 押尼珥 墳墓前傷心到大聲噭；所有个人民也全部悲傷大噭。</verse>
				<verse number="33">大衛 王為 押尼珥 唱這首哀歌： 押尼珥 敢應該像戇仔恁樣死？</verse>
				<verse number="34">你个雙手無被人䌈等； 你个雙腳無被人捆等。 你就像被暴徒㓾死共樣！ 所以人民又為 押尼珥 悲傷大噭。</verse>
				<verse number="35">大家歸日勸 大衛 食東西，總係 大衛 發誓講：「若係𠊎在日頭落山以前食東西，願上帝重重責罰𠊎！」</verse>
				<verse number="36">大家聽講這件事，全部當歡喜王恁樣做。事實上，王所做个每一件事大家全部當歡喜。</verse>
				<verse number="37">該日所有跈 大衛 个人㧯 以色列 人民全部知謀殺 尼珥 个孻仔 押尼珥 這件事毋係王个意思。</verse>
				<verse number="38">王對佢个部下講：「敢講你等毋知今晡日 以色列 死掉一個偉大个將軍？</verse>
				<verse number="39">今晡日，雖然𠊎係上帝膏油設立个王，𠊎乜無辦法做麼介。 洗璐雅 這兩個孻仔恁強恁暴，𠊎無法應付！願上主照佢等个罪來責罰佢等！」</verse>
			</chapter>
			<chapter number="4">
				<verse number="1">掃羅 个孻仔 伊施波設 聽到 押尼珥 在 希伯崙 被人㓾死，就當驚；所有 以色列 人民也當著驚。</verse>
				<verse number="2">伊施波設 有兩個軍長 — 巴拿 㧯 利甲 ；佢等係 便雅憫 支族 比錄 人 臨門 个孻仔。 ( 比錄 係 便雅憫 个一個地區。</verse>
				<verse number="3">以前住在 比錄 个人已經逃到 基他音 去；佢等對該時起一直暫住在 基他音 。)</verse>
				<verse number="4">( 掃羅 个孻仔 約拿單 ，佢有一個孻仔安到 米非波設 。 掃羅 㧯 約拿單 被人㓾死个時，佢正五歲。當佢等死掉个消息對 耶斯列 傳來，佢个乳𡟓揇等佢逃走；因為乳𡟓忒緊張，卻俾細人仔跌下來，佢就成做跛腳个。)</verse>
				<verse number="5">比錄 人 臨門 个兩個孻仔 利甲 㧯 巴拿 到 伊施波設 住个地方去，到該位个時，堵好係盡熱个當晝頭， 伊施波設 在睡當晝。</verse>
				<verse number="6">掌門个婦人家因為簸麥仔當𤸁，就啄目睡。兩兄弟 利甲 㧯 巴拿 就偷偷仔入去 。</verse>
				<verse number="7">佢等入去以後，就到 伊施波設 个房間， 伊施波設 當好睡，佢等將佢㓾掉，然後將佢个頭那剁下來，帶等行一暗晡个路，經過 約旦 山壢。</verse>
				<verse number="8">佢等將 伊施波設 个頭那帶到 希伯崙 獻給 大衛 王，對佢講：「看啊，這係你个仇敵 掃羅 个孻仔 伊施波設 个頭那。 掃羅 一直想㓾國王。今晡日上主在 掃羅 㧯佢个後代身上為吾主吾王報冤仇。」</verse>
				<verse number="9">大衛 應 利甲 㧯 巴拿 ，對佢等講：「𠊎指等救𠊎離開所有危險个永生上主老實㧯你等講：</verse>
				<verse number="10">在 洗革拉 有人向𠊎報告 掃羅 死掉个消息，佢恅到帶來好消息！𠊎就將佢捉起來㓾掉。這就係𠊎給報消息个人个獎賞！</verse>
				<verse number="11">你這兩個壞東西！你等將無辜个人㓾死在厥屋下、在自家个眠床頂，實在真該死！這下𠊎愛因為你等謀殺佢來報復你等，將你等對地上除滅！」</verse>
				<verse number="12">所以， 大衛 命令佢个僕人，佢等就將 利甲 㧯 巴拿 㓾掉，並剁斷佢等个手腳，將屍體掛在 希伯崙 个陂塘滣，然後將 伊施波設 个頭那葬在 希伯崙 ，在 押尼珥 个墳墓肚。</verse>
			</chapter>
			<chapter number="5">
				<verse number="1">以色列 所有支族全部到 希伯崙 來見 大衛 ，對佢講：「𠊎等係你个骨肉之親。</verse>
				<verse number="2">以前，當 掃羅 還做𠊎等个王，你就已經帶領𠊎等 以色列 人民出入戰場。上主識應許你講：『你愛做牧人領導𠊎个子民 以色列 ，做佢等个統治者。』」</verse>
				<verse number="3">所有 以色列 个長老全部到 希伯崙 見 大衛 王。 大衛 在上主面前㧯佢等立約，佢等就膏油設立佢做 以色列 个王。</verse>
				<verse number="4">大衛 做王个時三十歲，在位共四十年。</verse>
				<verse number="5">佢在 希伯崙 統治 猶大 七年半，在 耶路撒冷 統治全 以色列 㧯 猶大 共三十三年。</verse>
				<verse number="6">大衛 王㧯佢个軍隊準備愛攻打 耶路撒冷 。該地个 耶布斯 人認為 大衛 無可能征服這城，就對 大衛 講：「你永遠無法度進入這城，就連瞙目个㧯跛腳个也會將你逐走！」</verse>
				<verse number="7">(總係 大衛 還係佔領佢等个 錫安 城堡；該就係後來有名个 大衛 城。)</verse>
				<verse number="8">該日， 大衛 對佢个部下講：「麼人㧯𠊎共樣恁惱 耶布斯 人，愛攻打佢等，就愛對這水溝暗窿上去，攻打該兜瞙目个㧯跛腳个！」 (因為恁樣，有一句俗語講：「瞙目个㧯跛腳个做毋得入上主个殿 。」)</verse>
				<verse number="9">佔領城堡以後， 大衛 就徙入去，又將它个名安到 大衛 城。 大衛 在這城堡个周圍起城牆 ，對山東片坉平个台地 開始起。</verse>
				<verse number="10">大衛 个王國一日比一日興旺，因為上主 — 萬軍个元帥上帝㧯佢共下。</verse>
				<verse number="11">泰爾 王 希蘭 派使者到 大衛 該位去，帶等香柏樹、木匠㧯打石師傅，代 大衛 起王宮。</verse>
				<verse number="12">大衛 就知上主設立佢做 以色列 王个事已經完成了，也知上主係因為自家个子民使佢个王國興旺。</verse>
				<verse number="13">大衛 離開 希伯崙 到 耶路撒冷 後，又討細姐，又𫱔子女。</verse>
				<verse number="14">在 耶路撒冷 𫱔个有： 沙母亞 、 朔罷 、 拿單 、 所羅門 、</verse>
				<verse number="15">益轄 、 以利書亞 、 尼斐 、 雅非亞 、</verse>
				<verse number="16">以利沙瑪 、 以利雅大 、 以利法列 。</verse>
				<verse number="17">非利士 人聽到 大衛 已經被人膏油立做 以色列 王，就派大軍隊來尋 大衛 。 大衛 一聽講，就到城堡去。</verse>
				<verse number="18">非利士 人來到 利乏音 山壢，佔領該地方。</verse>
				<verse number="19">大衛 求問上主：「𠊎應該去攻打 非利士 人麼？你會使𠊎打贏麼？」 上主應講：「去！𠊎一定會將 非利士 人交在你手中。」</verse>
				<verse number="20">所以， 大衛 到 巴力‧比拉心 去，在該位打贏 非利士 人。佢講：「上主衝散𠊎个仇敵，像大水沖壞石壆。」所以該地方喊做 巴力‧比拉心 。</verse>
				<verse number="21">非利士 人逃命个時將佢等个偶像㧒在該位， 大衛 㧯佢个部下就將它兜帶走。</verse>
				<verse number="22">無幾久， 非利士 人又轉到 利乏音 山壢來，佔領該地方。</verse>
				<verse number="23">大衛 又求問上主；上主講：「毋好對這位攻打佢等，愛𫟧到佢等後背，對桑仔樹樹林該片來攻打。</verse>
				<verse number="24">你一聽到桑仔樹尾頂有腳步聲，就遽遽進攻，因為𠊎 — 上主已經行到你頭前去攻打 非利士 人个軍隊。」</verse>
				<verse number="25">大衛 就照上主个命令去做。結果，佢將 非利士 人打退，對 迦巴 逐到 基色 。</verse>
			</chapter>
			<chapter number="6">
				<verse number="1">大衛 又召集 以色列 中个精兵，共有三萬人，</verse>
				<verse number="2">帶佢等到 猶大 个 巴拉 去，想愛對該位將上帝个約櫃運過來；這約櫃个名係照該坐在基路伯頂个上主 — 萬軍元帥个名安个。</verse>
				<verse number="3">佢等將上帝个約櫃放在一輛新車頂，對山頂 亞比拿達 个屋下運出來， 亞比拿達 兩個孻仔 — 烏撒 㧯 亞希約 負責駛車；</verse>
				<verse number="4">亞希約 在約櫃頭前行。</verse>
				<verse number="5">大衛 㧯所有 以色列 人攏總放勢 跳舞唱歌，榮光上主。佢等彈奏用杉仔做个各種樂器，有豎琴、七弦琴、鈴鼓、響板，還有鑇仔。</verse>
				<verse number="6">佢等來到 拿康 个打麥場，該時拉車仔个牛逕倒，險險跪落去， 烏撒 就伸手扶等上帝个約櫃。</verse>
				<verse number="7">主上帝因為 烏撒 違犯規定，就向佢發譴，擊打佢。佢就死在上帝約櫃个堘頭；</verse>
				<verse number="8">該地方就喊做 比列斯‧烏撒 ，直到今晡日。因為上主向 烏撒 發譴，處罰佢， 大衛 心肚當無歡喜。</verse>
				<verse number="9">該日， 大衛 嚇倒，盡驚上主，就講：「𠊎這下樣敢將上主个約櫃請過來呢？」</verse>
				<verse number="10">所以 大衛 決定毋將上主个約櫃運入 大衛 个城，就對別條路將約櫃運到 迦特 人 俄別‧以東 屋下。</verse>
				<verse number="11">上主个約櫃在 俄別‧以東 屋下停留三個月；上主賜福給佢㧯佢全家。</verse>
				<verse number="12">大衛 王聽講，上主因為約櫃个緣故賜福給 俄別‧以東 全屋下人㧯所有屬佢个，就歡歡喜喜對 俄別‧以東 屋下將上帝个約櫃接到 大衛 个城。</verse>
				<verse number="13">扛上主約櫃个人行六步腳个時， 大衛 就喊佢等停下來。佢向上主獻牛牯㧯肥个細牛做祭物。</verse>
				<verse number="14">大衛 只有在腰間圍等一領麻紗以弗得，放勢跳舞，榮光上主。</verse>
				<verse number="15">佢㧯所有个 以色列 人歡呼歕羊角，將上主个約櫃接到 耶路撒冷 。</verse>
				<verse number="16">上主个約櫃入 大衛 城个時， 掃羅 个妹仔 米甲 對窗門看出來，看到 大衛 王在上主面前放勢跳舞，就看輕佢。</verse>
				<verse number="17">佢等將上主个約櫃扛下來，放在 大衛 預備好个帳篷肚。然後， 大衛 獻燒化祭㧯平安祭給上主；</verse>
				<verse number="18">獻祭後， 大衛 奉上主 — 萬軍个元帥个名祝福人民，</verse>
				<verse number="19">又將食物分給佢等；所有在 以色列 个人，無論男女，逐儕全部得到一垤餅，一垤肉 㧯一垤葡萄餅；大家就轉屋下去。</verse>
				<verse number="20">轉屋下後， 大衛 愛㧯家屬祝福。 掃羅 个妹仔 米甲 出來迎接佢，講：「 以色列 个王今晡日真有體面噢！佢像下流个人，在該兜官員个奴婢面前打赤膊！」</verse>
				<verse number="21">大衛 對 米甲 講：「𠊎跳舞係為到榮光上主。佢選立𠊎代若爸㧯若爸个家族，使𠊎做佢 以色列 子民个領袖。所以𠊎愛繼續跳舞榮光上主，</verse>
				<verse number="22">使𠊎自家過較卑賤。你 可能感覺𠊎毋知見笑，總係該兜奴婢感覺𠊎應該受尊敬呢！」</verse>
				<verse number="23">掃羅 个妹仔 米甲 一生人無𫱔子女。</verse>
			</chapter>
			<chapter number="7">
				<verse number="1">大衛 王住在王宮。上主使佢享受太平，無受四周圍仇敵个侵犯。</verse>
				<verse number="2">王對先知 拿單 講：「你看，𠊎住在香柏樹起个王宮，總係上帝个約櫃還在帳篷肚！」</verse>
				<verse number="3">拿單 對王講：「你就照你个心意去做，因為上主㧯你共下。」</verse>
				<verse number="4">總係，該暗晡上主對 拿單 講：</verse>
				<verse number="5">「去㧯𠊎个僕人 大衛 講，上主恁樣講：『敢係你起聖殿給𠊎住？</verse>
				<verse number="6">自從𠊎對 埃及 帶 以色列 人民出來到這下，𠊎無住過聖殿；𠊎一直住在帳篷，逐所在徙來徙去。</verse>
				<verse number="7">𠊎㧯 以色列 人民共下流浪該兜年日，該兜𠊎選來看顧𠊎子民所有个領袖 ，𠊎從來毋識問過麼人，做麼介毋為𠊎起一座香柏樹个聖殿。』</verse>
				<verse number="8">「所以，你愛㧯𠊎个僕人 大衛 講，𠊎 — 上主、萬軍个元帥恁樣講：『你在野地掌羊，𠊎將你呼召出來，立你做𠊎子民 以色列 个王。</verse>
				<verse number="9">你無論到麼介地方，𠊎攏總㧯你共下；𠊎除掉你所有个仇敵。𠊎愛使你㧯世界最偉大个人共樣恁有名。</verse>
				<verse number="10">𠊎為𠊎个子民 以色列 選一個地方，將佢等安頓在該位，使佢等毋會再被人欺負。自從佢等徙到這垤土地，𠊎又設立士師來治理佢等，佢等卻常常被惡霸欺壓；總係這種事毋會再發生了。</verse>
				<verse number="11">𠊎愛使你享受太平，毋會被仇敵侵犯。𠊎 — 上主也對你宣告，𠊎愛賜給你有後代。</verse>
				<verse number="12">你死後㧯祖先葬共下个時，𠊎會立你一個孻仔做王，使佢个國強盛。</verse>
				<verse number="13">佢正係為𠊎个名起聖殿个人；𠊎愛堅固佢个王位直到永遠。</verse>
				<verse number="14">𠊎愛做佢个阿爸；佢愛做𠊎个孻仔。佢若犯罪，𠊎會責罰佢，像人用棍仔抑係皮鞭處罰人共樣。</verse>
				<verse number="15">總係，𠊎毋會收轉𠊎對佢个痛惜，像𠊎收轉對 掃羅 个痛惜恁樣；𠊎識將 掃羅 廢掉，立你做王。</verse>
				<verse number="16">你个後代㧯你个國會在𠊎 面前永遠堅固；你个王位會永遠存在。』」</verse>
				<verse number="17">拿單 將上帝向佢啟示个逐件事全部㧯 大衛 講。</verse>
				<verse number="18">大衛 王入去聖帳篷，到上主面前，坐等祈禱講：「至高个上主啊！你為𠊎所做个一切，𠊎實在堪毋得，𠊎个家族也堪毋得。</verse>
				<verse number="19">總係，至高个上主啊，你賜給𠊎恁多，甚至應許在將來个日仔愛恩待你僕人个子孫。至高个上主啊，敢講這係平常个小事情嗎？</verse>
				<verse number="20">至高个上主啊，𠊎還有麼介話好講呢？因為你知你个僕人。</verse>
				<verse number="21">你恁樣做係因為你所應許个話，也係照你个心意；你做這一切个大事，係為到俾你个僕人明白。</verse>
				<verse number="22">至高个上主啊，你恁偉大！㖠有㧯你比抑得个！𠊎等知，除了你以外，無別個上帝。</verse>
				<verse number="23">世間乜無一個國家像 以色列 ；你救 以色列 人民離開 埃及 ，使佢等做你自家个子民。你為佢等做偉大奇妙个事，使你个大名傳到全世界；你甚至為到自家个子民，將外族㧯佢等个神明全部逐走。</verse>
				<verse number="24">你使 以色列 永遠做你自家个子民，你 — 上主也做佢等个上帝。</verse>
				<verse number="25">「主上帝啊，求你實現你有關𠊎㧯𠊎後代个應許；求你永遠照你所講个話去做。</verse>
				<verse number="26">願你个名永遠受尊敬；願人民永遠稱頌：『上主 — 萬軍个元帥係治理 以色列 个上帝！』恁樣，你會 世世代代保守你僕人 大衛 个王朝。</verse>
				<verse number="27">上主 — 萬軍个元帥、 以色列 个上帝啊，𠊎大膽在你面前恁樣祈禱；因為你將這一切向𠊎 — 你个僕人啟示出來，㧯𠊎講，你愛立𠊎个後代做王。</verse>
				<verse number="28">「至高个上主啊，只有你係上帝。你个話係真實个；你對你个僕人也有恁奇妙个應許。</verse>
				<verse number="29">這下求你賜福給僕人个後代，使佢等繼續享受你个恩惠。至高个上主啊，你已經應許。願你永遠恩待僕人个後代。」</verse>
			</chapter>
			<chapter number="8">
				<verse number="1">後來， 大衛 又攻擊 非利士 人，打贏佢等，結束佢等在這垤土地个統治。</verse>
				<verse number="2">佢又打贏 摩押 人。佢喊佢等睡在地上，用一條索仔量佢等，將頭兩擺量到个人㓾死，第三擺量到个人就留佢等个命 。所以 摩押 人歸順 大衛 ，向佢進貢。</verse>
				<verse number="3">大衛 又打贏 瑣巴 王 利合 个孻仔 哈大底謝 。當 哈大底謝 向 幼發拉底 河地區進軍、愛恢復佢个統治个時，</verse>
				<verse number="4">大衛 捉到佢个騎兵一千七百人，步兵兩萬人。對捉來个馬當中， 大衛 留下愛拖一百輛戰車罅額个戰馬，將其他戰馬个腳筋全部剁斷。</verse>
				<verse number="5">大馬士革 个 敘利亞 人派軍隊去幫助 瑣巴 王 哈大底謝 个時， 大衛 攻打佢等，㓾掉兩萬兩千人。</verse>
				<verse number="6">然後， 大衛 派軍隊駐在 大馬士革 、 敘利亞 人个國內；佢等全部歸順 大衛 ，向佢進貢。 大衛 無論去到㖠位，上主使佢逐擺打贏。</verse>
				<verse number="7">大衛 搶到 哈大底謝 該兜軍官所拿个金盾牌，帶轉 耶路撒冷 去，</verse>
				<verse number="8">又對 哈大底謝 統治个兩隻城市 比他 㧯 比羅他 搶到盡多个銅。</verse>
				<verse number="9">哈馬 王 陀以 聽講 大衛 打贏 哈大底謝 个全軍，</verse>
				<verse number="10">就派佢个孻仔 約蘭 去向 大衛 王請安，祝賀佢得到勝利 (原來 陀以 㧯 哈大底謝 時常相㓾)。 約蘭 帶來金、銀、銅製造个禮物送給 大衛 ，</verse>
				<verse number="11">大衛 王將這兜禮物連同佢對其他國家搶來个金銀，就係對佢所征服个 以東 、 摩押 、 亞捫 、 非利士 、 亞瑪力 ，還有對 瑣巴 王 利合 个孻仔 哈大底謝 該位搶來个攏總分別為聖獻給上主。</verse>
				<verse number="12"></verse>
				<verse number="13">大衛 在 鹽谷 㓾掉一萬八千 以東 人，轉來以後就得到當大个名聲。</verse>
				<verse number="14">佢派軍隊駐在 以東 个逐地方；該地方个人民全部歸順佢。 大衛 無論去到㖠位，上主使佢逐擺打贏。</verse>
				<verse number="15">大衛 統治全 以色列 ，向人民實行公義。</verse>
				<verse number="16">洗璐雅 个孻仔 約押 做元帥； 亞希律 个孻仔 約沙法 做歷史官；</verse>
				<verse number="17">亞希突 个孻仔 撒督 㧯 亞比亞他 个孻仔 亞希米勒 做祭司； 西萊雅 做王室書記；</verse>
				<verse number="18">耶何耶大 个孻仔 比拿雅 做 大衛 个侍衛長、統管 基利提 人㧯 比利提 人； 大衛 該兜孻仔全部做祭司。</verse>
			</chapter>
			<chapter number="9">
				<verse number="1">有一擺， 大衛 問：「 掃羅 家族還有還生个人麼？若係有，𠊎愛因為 約拿單 个緣故好好款待佢。」</verse>
				<verse number="2">掃羅 家有一個僕人安到 洗巴 ；有人喊佢去見 大衛 。王問佢講：「你係 洗巴 麼？」 洗巴 應講：「係！請國王吩咐。」</verse>
				<verse number="3">王又問：「 掃羅 家族還有還生个人麼？𠊎愛照上帝个慈愛款待佢。」 洗巴 應王講：「還有 約拿單 一個孻仔；佢係兩腳跛腳个人。」</verse>
				<verse number="4">王問：「佢在㖠位？」 洗巴 應王講：「佢在 羅‧底巴 ， 亞米利 个孻仔 瑪吉 个屋下。」</verse>
				<verse number="5">所以 大衛 王派人將佢接來。</verse>
				<verse number="6">掃羅 个孫仔 — 約拿單 个孻仔 米非波設 來到个時，就恭恭敬敬伏在 大衛 面前。 大衛 喊佢：「 米非波設 ！」佢應講：「國王，請吩咐。」</verse>
				<verse number="7">大衛 講：「毋使驚，𠊎會因為若爸 約拿單 个緣故好好款待你。𠊎會將若公 掃羅 个土地全部還給你；你也做得常常㧯𠊎共桌食飯。」</verse>
				<verse number="8">米非波設 又向 大衛 伏拜，講：「若僕人像係一條死狗，還得到王恁樣恩待！」</verse>
				<verse number="9">王喊 掃羅 个僕人 洗巴 過來，對佢講：「𠊎愛將 掃羅 㧯厥家族所有个財產賜給若主人个孫仔 米非波設 。</verse>
				<verse number="10">你㧯你該兜孻仔、奴僕，全部愛為若主人 掃羅 个家族耕田，將收成拿來給佢等食 ， 米非波設 本人愛常常做𠊎个人客、㧯𠊎共桌食飯。」 ( 洗巴 有十五個孻仔，二十個奴僕。)</verse>
				<verse number="11">洗巴 應王講：「吾主吾王个命令，僕人全部會遵照去辦。」 恁樣， 米非波設 常常㧯 大衛 共桌食飯，就像係王个孻仔。</verse>
				<verse number="12">米非波設 有一個孻仔還細，安到 米迦 。所有 洗巴 屋下个人全部成做 米非波設 个奴僕。</verse>
				<verse number="13">恁樣，兩腳跛腳个 米非波設 就住在 耶路撒冷 ，常常㧯王共桌食飯。</verse>
			</chapter>
			<chapter number="10">
				<verse number="1">過一駁仔， 亞捫 人个王 拿轄 死掉；佢个孻仔 哈嫩 承接佢个王位。</verse>
				<verse number="2">大衛 講：「𠊎愛對 哈嫩 表示友好，像厥爸 拿轄 對𠊎友好一樣。」所以 大衛 就派使者去安慰佢。 佢等來到个時，</verse>
				<verse number="3">亞捫 人个領袖對 哈嫩 王講：「你恅到 大衛 派這兜人來係為到尊敬若爸、向你表示安慰嗎？當然毋係！佢派這兜人到這位來係愛打探這城个情況，好征服𠊎等！」</verse>
				<verse number="4">哈嫩 就將 大衛 派去个使者捉起來，將逐儕个鬍鬚剃掉一半，將佢等个長衫下半截到屎窟割斷，然後逐佢等離開。</verse>
				<verse number="5">這兜人感覺當見笑，毋敢轉去。 大衛 聽到這事，就喊人通知佢等留在 耶利哥 ，等鬍鬚生長正轉來。</verse>
				<verse number="6">亞捫 人知佢等已經㧯 大衛 結冤仇，就對 伯‧利合 㧯 瑣巴 招募兩萬 敘利亞 步兵，對 陀伯 招募一萬兩千人，又對 瑪迦 王該位招募一千人。</verse>
				<verse number="7">大衛 得到消息，就命令 約押 帶領全軍出去相㓾。</verse>
				<verse number="8">亞捫 人出兵，聚集在 拉巴 城門口；其他个 敘利亞 軍㧯對 陀伯 、 瑪迦 來个就在城外擺陣。</verse>
				<verse number="9">約押 看出敵軍會對前後兩頭來攻擊，就選出 以色列 最精良个部隊，喊佢等擺陣進攻 敘利亞 軍隊，</verse>
				<verse number="10">將其他个部隊交給厥老弟 亞比篩 帶領。 亞比篩 指揮這兜部隊擺陣進攻 亞捫 人。</verse>
				<verse number="11">約押 對 亞比篩 講：「若係你看到 敘利亞 人打贏𠊎，你就過來救𠊎；若係 亞捫 人打贏你，𠊎就過去救你。</verse>
				<verse number="12">愛勇敢堅強！為𠊎等个同胞㧯上帝个城鎮打拚戰鬥！願上主成全佢个旨意！」</verse>
				<verse number="13">約押 㧯佢个部隊向前攻打； 敘利亞 人打輸，趕緊逃走。</verse>
				<verse number="14">亞捫 人看到 敘利亞 人逃走，佢等也對 亞比篩 面前逃走，退轉城肚去。所以 約押 離開 亞捫 人該位，轉到 耶路撒冷 。</verse>
				<verse number="15">敘利亞 人看到自家被 以色列 人打輸了，就再召集所有个軍隊。</verse>
				<verse number="16">哈大底謝 王派人去將 幼發拉底 河東个 敘利亞 軍隊調過來，佢等就在 哈大底謝 軍隊个元帥 朔法 个帶領之下來到 希蘭 。</verse>
				<verse number="17">大衛 聽到這消息，就召集 以色列 軍隊，過 約旦 河，向 希蘭 ，就係 敘利亞 人向 大衛 擺陣个地方前進。戰爭一開始，</verse>
				<verse number="18">以色列 人就打贏 敘利亞 軍隊。 大衛 㧯佢个軍隊㓾掉七百輛戰車个人㧯四萬騎兵，又將敵軍个元帥 朔法 㓾死在戰場。</verse>
				<verse number="19">哈大底謝 屬下該兜王看到自家被 以色列 人打輸，就㧯 以色列 人講和，歸順佢等。以後 敘利亞 人毋敢再㧯 亞捫 人𢯭手。</verse>
			</chapter>
			<chapter number="11">
				<verse number="1">第二年春天，就係所有个王出去相㓾个時， 大衛 派 約押 帶領部下㧯 以色列 軍隊出征。佢等打贏 亞捫 人，攻打 拉巴 城。總係 大衛 自家留在 耶路撒冷 。</verse>
				<verse number="2">有一日个臨暗仔， 大衛 睡目䟘起來，到王宮个屋頂散步，看到一個婦人家洗身；該婦人家十分靚。</verse>
				<verse number="3">大衛 派人去查姖係麼人，知姖安到 拔示芭 ，係 以蓮 个妹仔， 赫 人 烏利亞 个𡜵娘。</verse>
				<verse number="4">大衛 派人去，將 拔示芭 接過來， 大衛 就㧯姖同房。 (該時 拔示芭 个月經已經淨浰。) 事後， 拔示芭 轉屋下去。</verse>
				<verse number="5">過無幾久， 拔示芭 發現自家有娠妊，就送信給 大衛 ，㧯佢講：「𠊎有身項了！」</verse>
				<verse number="6">所以 大衛 派人㧯 約押 講：「你派 赫 人 烏利亞 到𠊎這位來。」 約押 就派 烏利亞 去見 大衛 。</verse>
				<verse number="7">烏利亞 轉到來， 大衛 問佢 約押 㧯軍隊好勢無，戰爭个情況樣般？</verse>
				<verse number="8">然後 大衛 對 烏利亞 講：「你轉屋下洗涼歇睏！」 烏利亞 離開以後， 大衛 派人送一份禮物到厥屋下去。</verse>
				<verse number="9">總係 烏利亞 並無轉屋下；佢㧯王个守衛睡在王宮門口。</verse>
				<verse number="10">大衛 聽講 烏利亞 無轉屋下，就問佢：「你出門恁久，這下轉來，做麼介毋轉屋下去？」</verse>
				<verse number="11">烏利亞 應講：「 以色列 㧯 猶大 个士兵全部在戰場，約櫃也在該位， 約押 元帥㧯佢个部下全部在野外安營，𠊎樣般做得轉屋下啉食，㧯𡜵娘同房呢？𠊎指等你个生命發誓，𠊎絕對毋做恁樣个事！」</verse>
				<verse number="12">所以 大衛 講：「恁樣，你今晡日還係留在這位，天光日𠊎送你轉去。」該日 烏利亞 就留在 耶路撒冷 。</verse>
				<verse number="13">第二日， 大衛 喊佢來㧯自家共下啉食，俾佢啉到醉醉。總係該暗晡， 烏利亞 還係無轉屋下；佢到王宮守衛室去，睡在自家个毯仔項。</verse>
				<verse number="14">第二朝晨， 大衛 寫一封信仔，吩咐 烏利亞 帶去給 約押 。</verse>
				<verse number="15">信中講：「將 烏利亞 調到最激烈个前線，然後你等撤退，俾佢戰死。」</verse>
				<verse number="16">所以， 約押 攻城个時，佢派 烏利亞 到敵軍防備最強个地方去。</verse>
				<verse number="17">敵軍對城肚出來，攻擊 約押 个軍隊。 大衛 个軍官有兜戰死； 赫 人 烏利亞 也戰死。</verse>
				<verse number="18">事後， 約押 將戰爭个經過報告 大衛 ；</verse>
				<verse number="19">約押 指示送信个人講：「你向王報告這擺戰爭个經過以後，</verse>
				<verse number="20">佢可能會發譴，責備講：『你等相㓾做麼介偎恁近城牆？敢講你等毋知敵人會對城牆射箭？</verse>
				<verse number="21">你等毋記得 基甸 个孻仔 亞比米勒 係樣般死个？佢係在 提備斯 被一個婦人家對城牆頂㩳下來个一垤磨石磧死个。你等相㓾做麼介偎恁近城牆？』若係王問這兜話，你就㧯佢講：『王个軍官 赫 人 烏利亞 乜死掉了！』」</verse>
				<verse number="22">送信个人到 大衛 該位，照 約押 指示佢个話向 大衛 報告，</verse>
				<verse number="23">講：「敵軍比𠊎等較強；佢等對城肚衝出來，在城外㧯𠊎等對打。𠊎等將敵軍逐轉城門口；</verse>
				<verse number="24">敵人就對城牆頂對𠊎等射箭。國王个軍官有兜中箭戰死； 赫 人 烏利亞 乜死掉了。」</verse>
				<verse number="25">大衛 對送信个人講：「你轉去安慰 約押 ，喊佢毋使難過，因為在戰場麼人死、麼人生係無人揣得到个。鼓勵佢集中力量，將城攻破。」</verse>
				<verse number="26">烏利亞 个𡜵娘 拔示芭 聽到老公戰死个消息，就為佢哀傷。</verse>
				<verse number="27">哀傷个日期過後， 大衛 將 拔示芭 接入王宮；姖就成做 大衛 个𡜵娘，為佢𫱔一個孻仔。總係，上主對 大衛 所做這事盡無歡喜。</verse>
			</chapter>
			<chapter number="12">
				<verse number="1">上主派先知 拿單 去見 大衛 。 拿單 到 大衛 該位，對佢講：「某城有兩個人，一個當有錢，一個盡貧窮。</verse>
				<verse number="2">該有錢人有當多牛羊；</verse>
				<verse number="3">該窮苦人麼介都無，只有一隻羊牸仔係佢買來畜个。佢照顧羊牸仔，俾羊牸仔㧯自家个子女共下畜大。佢將自家食个、啉个也給羊牸仔食，將羊牸仔揇在佢懷中睡，像自家个妹仔共樣。</verse>
				<verse number="4">有一日，該有錢人屋下來一個人客；佢毋拌得㓾一隻自家畜个頭牲來招待人客，卻將窮苦人屋下該隻羊牸仔搶來，款待人客。」</verse>
				<verse number="5">大衛 聽到，對該有錢人非常發譴，對 拿單 講：「𠊎指等永生上主發誓，做這事个人該死！</verse>
				<verse number="6">佢做出恁無天良个事，應該賠四倍給佢所搶个人。」</verse>
				<verse number="7">拿單 對 大衛 講：「你就係該隻人！上主 — 以色列 个上帝恁樣講：『𠊎膏油立你做 以色列 个王，救你離開 掃羅 个手。</verse>
				<verse number="8">𠊎將 掃羅 个國㧯佢个𡜵娘細姐全部給你，使你做王統治 以色列 㧯 猶大 。若係這兜還毋罅擺，𠊎還會加倍賜給你。</verse>
				<verse number="9">你做麼介違背𠊎个命令？做麼介做恁壞个事？你使 赫 人 烏利亞 死在戰場；你借 亞捫 人个刀㓾死佢，然後搶佢个𡜵娘！</verse>
				<verse number="10">你恁樣藐視𠊎，搶 赫 人 烏利亞 个𡜵娘，你个家會永遠離毋開刀劍。』</verse>
				<verse number="11">上主恁樣講：『𠊎愛喊你自家屋下个人䟘起來作亂攻擊你。你會看到𠊎將你个𡜵娘細姐給你身邊个男人；這儕人會在光天白日之下㧯姖等睡目。</verse>
				<verse number="12">你在暗中犯罪，總係𠊎愛在光明个所在使這事顯明出來，俾全 以色列 人看到。』」</verse>
				<verse number="13">大衛 對 拿單 講：「𠊎得罪上主了！」 拿單 應講：「上主赦免你；你毋會致到死。</verse>
				<verse number="14">總係，因為你做這事藐視上主，你這個孻仔會死掉。」</verse>
				<verse number="15">講煞， 拿單 就轉屋下去了。 上主使 烏利亞 个𡜵娘㧯 大衛 所𫱔个細人仔發病。</verse>
				<verse number="16">大衛 祈求上帝俾細人仔康復。佢禁食，逐暗晡入自家个間肚，透夜睡在地上。</verse>
				<verse number="17">佢內院个老僕人勸佢䟘起來；佢毋肯，也毋㧯佢等共下食飯。</verse>
				<verse number="18">過一個禮拜，細人仔死掉。 大衛 个官員毋敢將這個消息㧯佢報告；佢等講：「細人仔還生个時，𠊎等㧯 大衛 講話，佢就毋肯聽，𠊎等樣般敢㧯佢講細人仔死掉个消息？佢可能會做出傷害自家个事！」</verse>
				<verse number="19">大衛 發現佢个官員細聲講話，知細人仔已經死掉，就問佢等：「細人仔死掉係麼？」 佢等應講：「係！細人仔死掉了。」</verse>
				<verse number="20">大衛 就對地上䟘起來，洗身，梳頭，換衫褲，然後到上主个聖殿敬拜。佢轉到王宮个時，吩咐人準備食物；飯菜一上桌，佢就食。</verse>
				<verse number="21">佢个官員問佢：「𠊎等真毋明白：細人仔還生，你為佢禁食緊噭，細人仔一死，你反轉䟘起來啉食！」</verse>
				<verse number="22">大衛 講：「著啊！細人仔還生，𠊎禁食緊噭；因為𠊎想，上主可能會憐憫𠊎，莫俾細人仔死掉。</verse>
				<verse number="23">這下細人仔死掉，𠊎做麼介還愛禁食呢？𠊎會使細人仔返生係麼？有一日𠊎會到佢該位去，總係佢無法度轉到𠊎這位來！」</verse>
				<verse number="24">大衛 安慰佢个𡜵娘 拔示芭 ，㧯姖同房。姖後來𫱔一個孻仔； 大衛 㧯佢安名 所羅門 。上主惜這細人仔，</verse>
				<verse number="25">吩咐先知 拿單 㧯這細人仔安名 耶底底亞 ，因為上主盡惜佢。</verse>
				<verse number="26">約押 繼續攻打 亞捫 人个京城 拉巴 ，差毋多會打下來。</verse>
				<verse number="27">佢派人去向 大衛 報告：「𠊎攻打 拉巴 城，已經搶到水源頭，</verse>
				<verse number="28">這下請國王召集其他个軍隊，親自帶領去攻打！𠊎無愛將打下這城个功勞歸𠊎自家。」</verse>
				<verse number="29">所以 大衛 集中大軍，去攻擊 拉巴 ，將城打下來。</verse>
				<verse number="30">亞捫 人个神像 米勒公 有一頂金冕旒，大約重三十五公斤，有鑲寶石。 大衛 將寶石剝下來，鑲在自家个王冠頂 。佢也對城肚搶到盡多戰利品，</verse>
				<verse number="31">將該城个人民拉出來，強迫佢等用鋸仔、鐵耙、斧頭做工，又強迫佢等在磚窯工作 。 大衛 也共樣對待其他 亞捫 城市个人民。然後 大衛 㧯佢个大軍就轉 耶路撒冷 去。</verse>
			</chapter>
			<chapter number="13">
				<verse number="1">大衛 个孻仔 押沙龍 有一個當靚个老妹，安到 塔瑪 。 大衛 另外一個孻仔 暗嫩 愛到姖。</verse>
				<verse number="2">因為 塔瑪 還係一個童貞女， 暗嫩 想毋出有麼介機會親近姖，佢就思念到發病仔。</verse>
				<verse number="3">暗嫩 有一個朋友安到 約拿達 ，係 大衛 个阿哥 示米亞 个孻仔。 約拿達 當狡猾；</verse>
				<verse number="4">佢問 暗嫩 講：「王子啊，你做麼介一日比一日無元氣？你做得㧯𠊎講麼？」 暗嫩 應講：「𠊎愛到 塔瑪 — 𠊎共爺無共𡟓个兄弟 押沙龍 个老妹。」</verse>
				<verse number="5">約拿達 對佢講：「你做得假發病仔，睡在眠床頂。若爸來看你个時，就要求佢：『請喊吾老妹 塔瑪 來照顧𠊎，在𠊎面前為𠊎焙幾垤餅仔，俾𠊎好看到姖，喊姖親手拿給𠊎食。』」</verse>
				<verse number="6">所以 暗嫩 假發病仔，睡在眠床頂。 大衛 王去看佢； 暗嫩 對王講：「請喊吾老妹 塔瑪 來，俾姖在𠊎面前為𠊎焙幾垤餅仔，親手拿給𠊎食。」</verse>
				<verse number="7">所以， 大衛 派人到王宮㧯 塔瑪 講：「你去若哥 暗嫩 个屋下，做兜東西給佢食！」</verse>
				<verse number="8">塔瑪 就去厥哥 暗嫩 屋下； 暗嫩 在眠床頂睡等。 塔瑪 拿兜麵，在 暗嫩 个面前做幾垤餅，然後拿去焙。</verse>
				<verse number="9">塔瑪 將焙好个餅對盤肚倒出來，交給佢，總係 暗嫩 毋食。 暗嫩 講：「喊大家行開！」所以大家就行開。</verse>
				<verse number="10">暗嫩 對 塔瑪 講：「將餅仔帶到𠊎眠床堘，親手飼𠊎。」 塔瑪 就將姖所做个餅仔帶過去厥哥 暗嫩 个眠床堘。</verse>
				<verse number="11">塔瑪 飼佢个時，佢揪等 塔瑪 ，講：「老妹，來啊！㧯𠊎共下睡！」</verse>
				<verse number="12">塔瑪 講：「阿哥，做毋得！毋好迫𠊎做這見笑个事。在 以色列 中做毋得有這種事。你毋好恁戇！</verse>
				<verse number="13">在人个面前，𠊎頭那還會擎得起麼？你在 以色列 人面前也會盡無面子。請去求王，佢一定會將𠊎嫁給你。」</verse>
				<verse number="14">總係 暗嫩 毋聽；佢氣力比 塔瑪 大，就用暴力強姦姖。</verse>
				<verse number="15">事後， 暗嫩 就非常惱 塔瑪 ；佢惱 塔瑪 个程度比以前愛姖還較厲害。佢對 塔瑪 講：「䟘起來！出去！」</verse>
				<verse number="16">塔瑪 講：「𠊎毋出去！你恁樣逐𠊎走，所犯个罪比你先前犯个還較重！」 總係 暗嫩 毋聽；</verse>
				<verse number="17">佢喊服事自家个僕人來，對佢講：「將這女子逐走，將門鎖好！」</verse>
				<verse number="18">該僕人就將 塔瑪 逐走，將門鎖好。 塔瑪 著等當時吂嫁人个公主常著个彩色外袍 。</verse>
				<verse number="19">姖拿火灰委在頭那頂，扯裂外袍，雙手揞等面，緊行緊噭。</verse>
				<verse number="20">厥哥 押沙龍 看到，就問姖：「 暗嫩 欺負你係麼？老妹，毋好艱苦心。 暗嫩 係你共爺無共𡟓个阿哥，你毋好㧯人提起這件事。」 塔瑪 就孤孤單單住在厥哥 押沙龍 个屋下。</verse>
				<verse number="21">大衛 王聽到這事，就大發譴。</verse>
				<verse number="22">押沙龍 因為 暗嫩 侮辱厥老妹 塔瑪 ，怨恨 暗嫩 極深，無愛㧯佢講話。</verse>
				<verse number="23">兩年後， 押沙龍 在偎近 以法蓮 个 巴力‧夏瑣 請人剪羊毛；佢邀請所有个王子到該位去過節。</verse>
				<verse number="24">押沙龍 去見 大衛 王，講：「國王啊，𠊎已經請人剪羊毛了，請你㧯你个官員跈𠊎共下去過節。」</verse>
				<verse number="25">王應講：「孻仔啊，毋使恁樣！若係𠊎等全部去，驚怕忒麻煩你了。」總係 押沙龍 再三邀請；王還係毋答應，單單為佢祝福。</verse>
				<verse number="26">押沙龍 講：「恁樣，請你至少俾吾哥 暗嫩 跈𠊎去。」 王講：「樣使佢去呢？」</verse>
				<verse number="27">總係 押沙龍 再三懇求， 大衛 就答應俾 暗嫩 㧯王其他个孻仔跈 押沙龍 共下去。 押沙龍 預備非常滂沛个筵席，就像王个筵席 。</verse>
				<verse number="28">吩咐部下講：「你等注意，看 暗嫩 啉酒醉，𠊎一命令，你等就出手㓾掉佢。毋使驚，所有後果𠊎負責。你等愛勇敢堅強去做！」</verse>
				<verse number="29">部下就照 押沙龍 个指示㓾掉 暗嫩 。王其他个孻仔全部騎騾仔逃走。</verse>
				<verse number="30">當佢等還在路上个時，有風聲傳到 大衛 該位講：「 押沙龍 㓾掉王所有个孻仔，一個乜無留！」</verse>
				<verse number="31">王企起來，哀傷到扯裂自家个衫，睡在地上。王个官員也全部扯裂衫，企在塍頭。</verse>
				<verse number="32">總係 大衛 厥哥 示米亞 个孻仔 約拿達 講：「吾主啊，你該兜孻仔並無死，只有 暗嫩 一儕被人㓾死。自從 暗嫩 侮辱 押沙龍 个老妹 塔瑪 以後， 押沙龍 就決定愛㓾佢。</verse>
				<verse number="33">吾主吾王，請毋好相信該無確實个消息，講王个孻仔全部死掉；其實，只有 暗嫩 一儕被人㓾死。」</verse>
				<verse number="34">押沙龍 已經逃走了。 就在該時，守衛个兵仔看到一群人對 何羅念 山頂个路下來，就將所看到个向王報告 。</verse>
				<verse number="35">約拿達 對 大衛 王講：「看哪，王个孻仔全部來了，就像若僕人頭先所講个。」</verse>
				<verse number="36">佢个話正講煞，王个孻仔就全部入來。佢等開聲大噭；王㧯佢个官員也全部悲傷大噭。</verse>
				<verse number="37">押沙龍 走到 基述 王 亞米忽 个孻仔 達買 該位去，在該位住三年。 大衛 王為佢个孻仔 暗嫩 悲傷當久；</verse>
				<verse number="38"></verse>
				<verse number="39">總係佢傷心過掉，就當想念 押沙龍 。</verse>
			</chapter>
			<chapter number="14">
				<verse number="1">洗璐雅 个孻仔 約押 知 大衛 王當想念 押沙龍 ，</verse>
				<verse number="2">就派人去 提哥亞 ，對該位尋一個聰明个婦人家來，對姖講：「請你假做守孝个，著孝服，毋好打扮，就像一個守孝當久个婦人家，</verse>
				<verse number="3">然後到王該位去，將𠊎㧯你講个話對王講。」所以 約押 就教該婦人家樣般講。</verse>
				<verse number="4">提哥亞 个婦人家就去見王，恭恭敬敬伏在地上，講：「國王啊，求你幫助𠊎！」</verse>
				<verse number="5">王問姖：「你有麼介事？」 姖講：「𠊎係一個盡衰過个寡婦，老公早就死掉了。</verse>
				<verse number="6">若使女有兩個孻仔，有一日佢等在田肚吵起來就相打，無別人在該位勸開佢等，所以其中一儕打死另外一儕。</verse>
				<verse number="7">國王，這下𠊎所有个親屬全部看𠊎做對敵，佢等愛𠊎將孻仔交出來給佢等，愛用㓾兄弟个罪判佢死刑。佢等恁樣做，𠊎就連一個孻仔乜無了！佢等愛滅掉𠊎个香火，使吾老公在世上無孻仔好傳宗接代。」</verse>
				<verse number="8">王對姖講：「做你轉屋下去！𠊎會為你處理這件事。」</verse>
				<verse number="9">提哥亞 个婦人家又對王講：「吾主吾王，願這罪歸𠊎㧯𠊎个家族，㧯王並王个家族無關係。」</verse>
				<verse number="10">王應講：「若係有人對你講長講短，將佢帶到𠊎這位來，佢就毋會再吵你了。」</verse>
				<verse number="11">婦人家講：「國王啊，請向上主 — 你个上帝祈禱，毋好俾𠊎該兜親屬為到愛為𠊎死掉个孻仔報血仇，卻㓾掉𠊎賸到个孻仔。」 王應講：「𠊎指等永生个上主答應你：若孻仔个一條頭那毛也毋會跌在地上。」</verse>
				<verse number="12">該婦人家又講：「吾主吾王，請准使女再講一句話。」 王應講：「你講！」</verse>
				<verse number="13">婦人家對王講：「你做麼介會想到害上帝个子民？你俾你个孻仔流亡在外，毋准佢轉來；你頭先講个就已經定了你自家个罪。</verse>
				<verse number="14">𠊎等全部一定會死，像覆水難收。上帝並無搶走人个生命，總係佢定著有辦法使一個流亡个人轉來。</verse>
				<verse number="15">吾主吾王，𠊎來向你講話係因為有人嚇𠊎，所以使女想，𠊎應該對王提起，或者王會照使女所求个做。</verse>
				<verse number="16">𠊎想王會聽，救使女脫離該想愛㓾𠊎㧯吾孻仔、將𠊎等對上帝賜佢子民个土地上除掉个人。</verse>
				<verse number="17">使女又想，國王个話一定會安慰𠊎，因為國王像上帝个天使共樣，能分別是非。願上主 — 你个上帝㧯你共下！」</verse>
				<verse number="18">王應講：「𠊎問你一個問題，你一定愛照實回答𠊎。」 婦人家講：「吾主吾王，請你講！」</verse>
				<verse number="19">王問：「敢係 約押 喊你來勸𠊎个？」 婦人家應講：「𠊎在吾主吾王面前發誓，你講个無毋著 。確實係你个元帥 約押 吩咐𠊎恁樣做，教𠊎恁樣講个。</verse>
				<verse number="20">你个元帥 約押 恁樣做係愛挽回這件事。國王像上帝个天使恁聰明，能知世上所有个事。」</verse>
				<verse number="21">後來，王對 約押 講：「𠊎同意你恁樣做。你去將該後生人 押沙龍 帶轉這位來！」</verse>
				<verse number="22">約押 恭恭敬敬伏在王面前，講：「吾主吾王，上帝賜福給你！這下僕人正知你給𠊎个恩典有幾大，因為王答應𠊎个請求。」</verse>
				<verse number="23">所以 約押 䟘起來，到 基述 去，帶 押沙龍 轉 耶路撒冷 。</verse>
				<verse number="24">總係王下令毋准 押沙龍 住在王宮。王講：「𠊎無愛看到佢。」所以 押沙龍 轉自家个屋下去，無去見王个面。</verse>
				<verse number="25">在全 以色列 ，無一儕像 押沙龍 恁緣投，人人欣慕，對頭那頂到腳底下無一些仔缺點。</verse>
				<verse number="26">佢个頭那毛盡靚，逐年愛剪一擺，若無就會忒長忒賁。該剪下來个頭那毛，照王家个標準去秤，大約重兩公斤。</verse>
				<verse number="27">押沙龍 有三個孻仔，一個妹仔；妹仔安到 塔瑪 ，生到非常靚。</verse>
				<verse number="28">押沙龍 住在 耶路撒冷 兩年，無見過王个面。</verse>
				<verse number="29">然後， 押沙龍 派人去喊 約押 來，愛請佢去向王求情，總係 約押 毋肯來。 押沙龍 再一擺派人去請 約押 ，佢還係毋肯來。</verse>
				<verse number="30">押沙龍 就對佢个僕人講：「你等看， 約押 个田園就在𠊎隔壁，有種大麥；你等去放火將它燒掉。」所以 押沙龍 該兜僕人就去放火燒該垤田。</verse>
				<verse number="31">約押 就起身，到 押沙龍 屋下去問佢講：「做麼介你該兜僕人放火燒𠊎个田呢？」</verse>
				<verse number="32">押沙龍 應 約押 講：「𠊎喊人請你來，你毋來。𠊎想請你到王該位去代𠊎講情，問佢做麼介愛𠊎離開 基述 轉來；𠊎還係留在該位較好。這下，請你為𠊎安排機會去見王；若係𠊎有罪，就俾王㓾死𠊎好了。」</verse>
				<verse number="33">所以， 約押 去見王，將 押沙龍 所講个向佢報告，王就派人去喊 押沙龍 來。 押沙龍 來見王，伏在王面前跪拜；王就唚 押沙龍 。</verse>
			</chapter>
			<chapter number="15">
				<verse number="1">這事以後， 押沙龍 為自家預備一輛戰車㧯盡多馬仔，又派五十個衛兵在佢頭前開路。</verse>
				<verse number="2">佢常常打早䟘起來就到城門口个路堘企等，堵到人有紛爭个事愛來求王解決， 押沙龍 就會喊佢過來，問佢對㖠來。當該儕人講明係屬 以色列 㖠個支族以後，</verse>
				<verse number="3">押沙龍 就會講：「你看，你个事有情有理；可惜王無派人來聽你个案件。」</verse>
				<verse number="4">然後佢還會加上一句：「當希望𠊎做一個法官！有人堵到紛爭抑係請求，做得到𠊎這位來，𠊎一定會給佢公平个審判。」</verse>
				<verse number="5">若係有人行近 押沙龍 ，愛拜佢， 押沙龍 就會伸手扶等佢、唚佢。</verse>
				<verse number="6">押沙龍 向逐個到王該位求審判个 以色列 人全部恁樣做，所以 押沙龍 就私下得到 以色列 人个心。</verse>
				<verse number="7">四年後 ， 押沙龍 對 大衛 王講：「請准𠊎到 希伯崙 去，還𠊎向上主許个願！</verse>
				<verse number="8">若僕人還住在 敘利亞 个 基述 時，𠊎識向上主許願講，若係佢帶𠊎轉 耶路撒冷 ，𠊎就會在 希伯崙 敬拜佢。」</verse>
				<verse number="9">王講：「做你安心去啊！」 押沙龍 就到 希伯崙 去了。</verse>
				<verse number="10">總係佢暗中派使者到 以色列 逐支族去，講：「當你等聽到羊角響个時，就喊講：『 押沙龍 在 希伯崙 做王了！』」</verse>
				<verse number="11">押沙龍 對 耶路撒冷 請兩百個人，㧯佢共下去；佢等一些仔乜毋知內情，全部係單純跈等去个。</verse>
				<verse number="12">押沙龍 獻祭个時，佢同時派人請 基羅 城个 亞希多弗 來；這個人係 大衛 王个參謀。所以悖逆个勢力越來越大，跈等 押沙龍 个人也越來越多。</verse>
				<verse number="13">有使者向 大衛 報告講：「 以色列 人个心全部歸向 押沙龍 了。」</verse>
				<verse number="14">大衛 就對該兜跈佢在 耶路撒冷 个官員講：「若係𠊎等想愛閃 押沙龍 ，就愛黏時離開這位，若無就會來毋掣了。遽遽走！驚怕佢忽然間來到，會傷害𠊎等，㓾死全城个人！」</verse>
				<verse number="15">王个官員應講：「吾主吾王，僕人全部準備心，愛照你所決定个去做！」</verse>
				<verse number="16">所以王帶等全家人離開，只留下十個細姐看守王宮。</verse>
				<verse number="17">王㧯所有跈等佢个人民離開 耶路撒冷 ，到城最尾項一間屋就停下來。</verse>
				<verse number="18">王个官員全部在佢面前經過；該兜做侍衛个 基利提 人㧯 比利提 人，並該六百個對 迦特 來跈佢个人也全部在佢面前經過。</verse>
				<verse number="19">王對 迦特 人个領袖 以太 講：「你做麼介跈𠊎等共下走呢？轉去留在新王該位！因為你係外國人，係遠離自家个國家避難个。</verse>
				<verse number="20">你在這位个時間當短，𠊎樣做得俾你㧯𠊎等共下流浪？連𠊎自家乜毋知愛到㖠位去。轉去啊！帶等你个同胞共下走！願上主用慈愛信實款待你 ！」</verse>
				<verse number="21">以太 應講：「吾主吾王，𠊎指等永生个上主向你發誓，無論吾主吾王到麼介地方，僕人愛跈你，係生係死，𠊎也願意。」</verse>
				<verse number="22">大衛 對 以太 講：「當好，繼續向前出發。」恁樣 迦特 人 以太 帶等佢个軍隊㧯佢等个家眷全部行過去。</verse>
				<verse number="23">大衛 㧯跈佢个人離開个時，本地个人民全部開聲大噭。王過 汲淪 溪，佢个部下也跈等過去；佢等共下向曠野去。</verse>
				<verse number="24">該時，祭司 撒督 也來了；扛上帝約櫃个 利未 人也㧯佢共下在該位。佢等將上帝个約櫃放下來，等所有人民離城後再扛起來。祭司 亞比亞他 也在該位。</verse>
				<verse number="25">王對 撒督 講：「將上帝个約櫃扛轉城肚去！若係上主歡喜𠊎，有一日佢會俾𠊎轉來，再看到約櫃㧯安放个地方。</verse>
				<verse number="26">若係佢無歡喜𠊎，恁樣，願佢照自家个好意款待𠊎。」</verse>
				<verse number="27">王繼續對祭司 撒督 講：「你毋係先見嗎？你㧯 亞比亞他 做得帶你个孻仔 亞希瑪斯 㧯 亞比亞他 个孻仔 約拿單 共下安心轉城肚去。</verse>
				<verse number="28">𠊎在曠野渡船頭該片等你等个消息。」</verse>
				<verse number="29">所以 撒督 㧯 亞比亞他 將上帝个約櫃扛轉 耶路撒冷 ，佢等就留在該位。</verse>
				<verse number="30">大衛 噭等上 橄欖 山；佢打赤腳，悲傷到揞等頭那。所有跈佢个人也全部揞等頭那，緊行緊噭。</verse>
				<verse number="31">有人向 大衛 報告，講 亞希多弗 㧯 押沙龍 共下造反。 大衛 就祈禱講：「上主啊，求你使 亞希多弗 个計謀全部戇掉去！」</verse>
				<verse number="32">大衛 到山頂、敬拜上帝个地方，佢个朋友 亞基 人 戶篩 扯爛衫，委泥沙在頭那頂，出來迎接佢。</verse>
				<verse number="33">大衛 對佢講：「你跈等𠊎，對𠊎一些仔好處乜無。</verse>
				<verse number="34">你若係轉城肚去，對 押沙龍 講：『王啊，𠊎願意忠心服事你，像頭擺服事若爸共樣』，恁樣，你就會幫助𠊎破壞 亞希多弗 个計謀。</verse>
				<verse number="35">兩個祭司 撒督 㧯 亞比亞他 敢毋會在該位嗎？你做得將你在王宮肚聽到个每一件事㧯佢等講。</verse>
				<verse number="36">撒督 个孻仔 亞希瑪斯 㧯 亞比亞他 个孻仔 約拿單 也㧯佢等共下。你就將打探到个消息交給佢等帶來給𠊎。」</verse>
				<verse number="37">所以， 大衛 个朋友 戶篩 轉城肚去；堵好 押沙龍 也在該時到 耶路撒冷 。</verse>
			</chapter>
			<chapter number="16">
				<verse number="1">大衛 正過山頂，忽然看到 米非波設 个僕人 洗巴 牽等兩隻驢仔，驢背頂載等兩百隻餅，一百串葡萄乾，一百隻熱天个水果㧯一皮袋酒來迎接佢。</verse>
				<verse number="2">大衛 王問 洗巴 ：「你帶這兜東西來做麼介呢？」 洗巴 講：「驢仔係給國王屋下个人騎个；餅㧯熱天个水果係給跈你个人食个；酒係給佢等在曠野𤸁个時啉个。」</verse>
				<verse number="3">王問佢：「若主人 掃羅 个孫仔 米非波設 在㖠位？」 洗巴 應講：「佢留在 耶路撒冷 ，因為佢相信 以色列 人這下一定會將厥公 掃羅 个王國還給佢。」</verse>
				<verse number="4">王對 洗巴 講：「屬 米非波設 所有个財產這下全部歸給你了！」 洗巴 應講：「吾主吾王，𠊎跪下感謝你个大恩。願𠊎在你面前永遠得到照顧！」</verse>
				<verse number="5">大衛 王到 巴戶琳 个時， 掃羅 个一個親屬 — 基拉 个孻仔 示每 出來見 大衛 ；佢緊行緊咒罵 大衛 。</verse>
				<verse number="6">示每 毋驚 大衛 有身邊个勇士㧯侍衛个保護，拿石頭㧹 大衛 王㧯佢个官員。</verse>
				<verse number="7">示每 咒罵 大衛 講：「出去！你這流人血个兇手出去！</verse>
				<verse number="8">你搶 掃羅 个王國，這下上主愛因為你㓾 掃羅 个家族責罰你。上主已經將這王國交給若孻仔 押沙龍 了。你這兇手，你害到自家了！」</verse>
				<verse number="9">洗璐雅 个孻仔 亞比篩 對王講：「吾主吾王，做麼介俾這條死狗咒罵你呢？俾𠊎過去剁下佢个頭來！」</verse>
				<verse number="10">王對 亞比篩 㧯厥哥 約押 講：「 洗璐雅 个孻仔啊，這㧯你等無關係！若係佢咒罵𠊎，係因為上主愛佢恁樣做，麼人有權利問佢，做麼介愛恁樣做呢？」</verse>
				<verse number="11">大衛 又對 亞比篩 㧯所有个官員講：「連𠊎自家个孻仔也愛㓾𠊎，這 便雅憫 人个行為有麼介好奇怪？這係上主愛佢咒罵个；由在佢去罵！</verse>
				<verse number="12">因為𠊎今晡日被人咒罵，可能上主會顧念𠊎个苦難 ，施恩賜福給𠊎。」</verse>
				<verse number="13">所以 大衛 㧯跈佢个人繼續向前行。 示每 在 大衛 對面个山崎頂緊行緊咒罵，又拿石頭㧯泥團㧹佢。</verse>
				<verse number="14">王㧯所有跈佢个人到 約旦 河 个時感覺盡𤸁，就在該位歇睏。</verse>
				<verse number="15">押沙龍 㧯跈佢个 以色列 人進入 耶路撒冷 ； 亞希多弗 也㧯佢共下。</verse>
				<verse number="16">大衛 个朋友 亞基 人 戶篩 去迎接 押沙龍 ，喊等講：「國王萬歲！國王萬歲！」</verse>
				<verse number="17">押沙龍 問 戶篩 ：「你對你个朋友 大衛 个忠誠㖠位去了？你樣般無跈佢走呢？」</verse>
				<verse number="18">戶篩 應講：「𠊎樣般做得走呢？𠊎愛盡忠个係該被上主、這兜人㧯所有 以色列 人揀選出來个人，所以𠊎係屬佢个，𠊎愛㧯佢共下。</verse>
				<verse number="19">過講，𠊎毋服事𠊎主人个孻仔還愛服事麼人呢？𠊎樣般服事若爸，這下𠊎愛照樣服事你。」</verse>
				<verse number="20">押沙龍 轉身對 亞希多弗 講：「你有麼介建議？𠊎等應該樣般做？」</verse>
				<verse number="21">亞希多弗 對 押沙龍 講：「你去㧯若爸留下來、該兜看守王宮个細姐共下睡。恁樣，每一個 以色列 人會聽到你變成若爸个仇敵；跈你个人就會大大堅強起來。」</verse>
				<verse number="22">所以佢等在王宮樓頂搭一座布篷給 押沙龍 。眾人目金金看 押沙龍 入布篷，㧯厥爸該兜細姐共下睡。</verse>
				<verse number="23">在該時代， 亞希多弗 無論係為 大衛 抑係為 押沙龍 所出个主意，全部像係對上帝來个話。</verse>
			</chapter>
			<chapter number="17">
				<verse number="1">亞希多弗 對 押沙龍 講：「請准𠊎選一萬兩千人；今暗晡𠊎就去追 大衛 。</verse>
				<verse number="2">𠊎愛在佢當灰心當𤸁个時攻擊佢；佢一定會驚到無葛煞，跈佢个人也全部會逃走。𠊎會單淨㓾王，</verse>
				<verse number="3">將佢个軍隊帶來歸你，就像新娘轉到老公个身邊恁樣。你單淨㓾一儕 ，其他个人全部會平安無事。」</verse>
				<verse number="4">押沙龍 㧯 以色列 該兜長老全部認為這係當好个主意。</verse>
				<verse number="5">押沙龍 講：「去喊 亞基 人 戶篩 來，𠊎等也愛聽佢个意見。」</verse>
				<verse number="6">戶篩 來到， 押沙龍 對佢講：「 亞希多弗 㧯𠊎等出恁樣个主意，𠊎等照佢个提議去做好麼？若係你毋同意，你有麼介建議？」</verse>
				<verse number="7">戶篩 應講：「 亞希多弗 這擺个主意毋好。</verse>
				<verse number="8">你知若爸 大衛 㧯佢个部下全部係當會相㓾个人；佢等這下像被人搶走細熊个熊乸恁惡。若爸係一個經驗豐富个戰士，暗晡時一定無㧯軍隊共下住。</verse>
				<verse number="9">驚怕這下佢囥在山窿肚，抑係別个所在。佢一出手攻打你个軍隊，聽到个人一定會恅到你个部下打輸了。</verse>
				<verse number="10">該時，就係勇壯像獅仔个人也會嚇到半生死；因為在 以色列 當中，麼人都知若爸係大英雄，佢个部下也全部係當會相㓾个人。</verse>
				<verse number="11">所以，𠊎建議你召集所有 以色列 人共下，對最北片个 但 到最南片个 別是巴 ，像海滣个沙仔恁多，你親自帶領佢等上戰場。</verse>
				<verse number="12">無論 大衛 在㖠位，𠊎等定著會尋到佢，然後，在佢無注意个時，𠊎等會臨到佢像露水落在地上一樣；恁樣，佢㧯佢个部下一個也走毋掉。</verse>
				<verse number="13">若係佢退到城肚去，𠊎等這片个 以色列 人就會帶索仔去將該城拉下山壢！連一粒細石仔也毋俾它留在山頂。」</verse>
				<verse number="14">押沙龍 㧯所有 以色列 人全部講：「 亞基 人 戶篩 个建議比 亞希多弗 个較好。」上主決定毋俾 亞希多弗 个好主意受採納，為到愛降災禍在 押沙龍 身上。</verse>
				<verse number="15">戶篩 將佢向 押沙龍 並 以色列 該兜長老所提个建議㧯祭司 撒督 並 亞比亞他 講，同時也㧯佢等講 亞希多弗 个建議。</verse>
				<verse number="16">戶篩 又講：「趕緊派人去㧯 大衛 講，今暗晡毋好在曠野个渡船頭過夜，愛黏時過 約旦 河；恁樣，王㧯部下正毋會被人消滅。」</verse>
				<verse number="17">該時， 亞比亞他 个孻仔 約拿單 㧯 撒督 个孻仔 亞希瑪斯 在 耶路撒冷 外圍个 隱‧羅結 泉水滣頭等等，因為佢等毋敢入城，驚怕被人發現。有一個使女常常來㧯佢等講所發生个事，佢等就轉去㧯 大衛 王講。</verse>
				<verse number="18">總係有一日，一個細阿哥仔看到佢等，就去㧯 押沙龍 講。兩儕趕緊走去囥在 巴戶琳 某人个屋下。該人个禾埕有一口井，佢等就落井肚去。</verse>
				<verse number="19">該人个𡜵娘用井蓋將井口揜好，又在頂高委兜麥仔，免得被人注意到。</verse>
				<verse number="20">押沙龍 个官員到這人屋下來，問該婦人家講：「 亞希瑪斯 㧯 約拿單 在㖠位？」 婦人家應講：「佢等過河去了。」 該兜人尋來尋去尋毋到佢等，就轉 耶路撒冷 去了。</verse>
				<verse number="21">該兜人離開以後， 亞希瑪斯 㧯 約拿單 對井肚上來，去向 大衛 王報告 亞希多弗 計謀追殺王个事，又講：「遽遽過河去！」</verse>
				<verse number="22">所以 大衛 㧯跈佢个人全部開始過 約旦 河去。到天光个時，佢等全部過去了。</verse>
				<verse number="23">亞希多弗 看自家个建議無被人採納，就騎驢仔轉家鄉去。佢將自家个後事交帶清楚，就吊頸自殺。有人將佢埋在厥家族个墳墓。</verse>
				<verse number="24">押沙龍 㧯佢个軍隊過 約旦 河个時， 大衛 已經到 瑪哈念 。</verse>
				<verse number="25">( 押沙龍 已經派 亞瑪撒 做元帥，代 約押 。 亞瑪撒 係 以實瑪利 人 益帖 个孻仔。厥姆 愛比該 係 拿轄 个妹仔，㧯 約押 个阿姆 洗璐雅 係姊妹。)</verse>
				<verse number="26">押沙龍 㧯 以色列 人在 基列 安營。</verse>
				<verse number="27">大衛 到 瑪哈念 个時，有三個人出來迎接佢。佢等係 亞捫 族个 拉巴 人 拿轄 个孻仔 朔比 ， 羅‧底巴 人 亞米利 个孻仔 瑪吉 ，㧯 基列 个 羅基琳 人 巴西萊 。</verse>
				<verse number="28">佢等帶等鑊頭、碗、被、食物給 大衛 㧯跈佢个人。食个東西有小麥、大麥、麥片、焙熟个麥串、四季豆、碗豆 、</verse>
				<verse number="29">蜂糖、乳餅、乳油㧯綿羊。佢等講， 大衛 㧯跈佢个人在曠野一定又𤸁又饑渴。</verse>
			</chapter>
			<chapter number="18">
				<verse number="1">大衛 王集合所有跈佢个人，將佢等分做一千人㧯一百人做單位个軍隊，逐單位有軍官指揮，</verse>
				<verse number="2">然後將佢等編做三大隊，分別係 約押 、 約押 个老弟 亞比篩 ，㧯 迦特 人 以太 帶領出發。王對佢个部下講：「𠊎自家也愛㧯你等共下上戰場。」</verse>
				<verse number="3">佢等講：「你絕對做毋得㧯𠊎等上戰場；若係𠊎等打輸逃走，就算有一半个人被人㓾死，敵人也毋會看做重要；總係你一儕當得𠊎等一萬人，你最好留在城肚，隨時幫助𠊎等。」</verse>
				<verse number="4">王應講：「你等認為樣般好，𠊎就恁樣做。」所以王企在城門堘，看等佢个軍隊一百個一隊、一千個一隊，照順序出發。</verse>
				<verse number="5">王命令 約押 、 亞比篩 㧯 以太 講：「為到𠊎个緣故，你等毋好傷害該後生人 押沙龍 。」士兵全部有聽到王對佢个將官所講个命令。</verse>
				<verse number="6">大衛 个軍隊出去到野地，㧯 以色列 軍隊在 以法蓮 樹林肚相㓾。</verse>
				<verse number="7">大衛 个軍隊打贏 以色列 人，該日死傷悽慘，共有兩萬人戰死。</verse>
				<verse number="8">因為戰爭擴大到周圍野地，死在樹林肚个人比在戰場被人㓾死个人較多。</verse>
				<verse number="9">押沙龍 忽然堵到幾個 大衛 个部下。該時 押沙龍 騎等騾仔，經過一頭大橡樹个底下；佢个頭那毛纏到樹枝，騾仔走開，佢就掛在樹頂。</verse>
				<verse number="10">有一個 大衛 个部下看到，就報告 約押 講：「𠊎有看到 押沙龍 掛在一頭橡樹頂！」</verse>
				<verse number="11">約押 應講：「你看到佢！做麼介毋將佢當場㓾死？你若有將佢㓾死，𠊎就會賞你十隻銀幣㧯一條皮帶！」</verse>
				<verse number="12">總係該人對 約押 講：「你就係給𠊎一千隻銀幣，𠊎也毋敢出手傷害王个孻仔啊！𠊎等全部有聽到王命令你、 亞比篩 㧯 以太 个話，講：『為到𠊎个緣故，你等毋好傷害該後生人 押沙龍 。』</verse>
				<verse number="13">若係𠊎違背王个命令，㓾掉 押沙龍 ，王一定會知，麼介事乜瞞毋過佢！到時，你敢會保護𠊎？」</verse>
				<verse number="14">約押 講：「𠊎無時間㧯你囉唆！」佢遽遽帶等三支槍去，趕 押沙龍 還生生掛在該頭橡樹頂，就將三支槍全部刺入 押沙龍 个心肝肚。</verse>
				<verse number="15">拿 約押 个武器有十個侍衛走過去圍等 押沙龍 ，將佢㓾死。</verse>
				<verse number="16">約押 歕羊角停止攻擊；佢个軍隊全部倒轉來，無再追 以色列 人。</verse>
				<verse number="17">佢等將 押沙龍 个屍體㧒在樹林肚个一個大窟肚，在頂高堆一大堆石頭。所有个 以色列 人全部向自家个家鄉逃走。</verse>
				<verse number="18">押沙龍 生前識在 王谷 為自家頓一個石碑；因為佢想：「𠊎無孻仔做得承接𠊎个名」，所以佢將石碑安到 押沙龍 。直到今晡日，這石碑還係喊做 押沙龍 紀念碑。</verse>
				<verse number="19">撒督 个孻仔 亞希瑪斯 對 約押 講：「𠊎來去將這好消息向王報告！上主已經救王離開佢个仇敵。」</verse>
				<verse number="20">約押 對佢講：「毋好，今晡日毋好去報告麼介好消息，另日正去！今晡日毋好去，因為王个孻仔死掉。」</verse>
				<verse number="21">所以 約押 對一個 古實 人講：「你去，將所看到个事向王報告。」該 古實 人跪下來拜，然後走等去。</verse>
				<verse number="22">撒督 个孻仔 亞希瑪斯 還係堅持愛去，對 約押 講：「毋管樣般，請俾𠊎跈該 古實 人也帶這消息去。」 約押 講：「孻仔啊，你做麼介一定愛去？報這個消息係毋會有獎賞个。」</verse>
				<verse number="23">亞希瑪斯 講：「毋管樣般，𠊎還係愛去！」 約押 講：「恁樣，你去啊！」所以 亞希瑪斯 跈等 約旦 平原个路走等去，無幾久就追過該 古實 人。</verse>
				<verse number="24">該時， 大衛 坐在內外城門中央个地方。守望个人到城牆頂去，企在門樓頂看。佢看到一儕走等來，</verse>
				<verse number="25">就向下背大聲喊，向王報告。王講：「若係單單一儕，佢一定係報好消息个。」該人越走越近。</verse>
				<verse number="26">後來，守望个人又看到另外一儕走等來，就對掌城門个人喊講：「你看！又有一個人走等來！」 王講：「這儕乜係來報好消息个。」</verse>
				<verse number="27">守望个人講：「𠊎看頭前該儕走个樣仔像係 撒督 个孻仔 亞希瑪斯 。」 王講：「佢係一個好人；佢一定帶好消息來。」</verse>
				<verse number="28">亞希瑪斯 向王喊講：「平安了！」就在王面前伏在地上，跪拜講：「讚美上主 — 你个上帝，佢使吾主吾王贏過該兜悖逆个人！」</verse>
				<verse number="29">王問：「該後生人 押沙龍 平安麼？」 亞希瑪斯 應講：「當 約押 派王个僕人㧯𠊎 — 若僕人出去，𠊎看到眾人盡吵，總係毋知發生麼介事。」</verse>
				<verse number="30">王講：「閃開，去堘頭企！」 亞希瑪斯 就退到堘頭企等。</verse>
				<verse number="31">該時，該 古實 人也到了，向王講：「吾主吾王，𠊎有好消息愛報告！今晡日上主使你贏過一切悖逆你个人！」</verse>
				<verse number="32">王問：「該後生人 押沙龍 平安麼？」 該 古實 人講：「願發生在佢身上个事發生在吾主吾王个仇敵㧯所有悖逆你个人身上！」</verse>
				<verse number="33">王一聽到，就盡悲傷，上城門樓頂个房間去噭。佢緊行緊噭等講：「吾孻仔 押沙龍 啊！吾孻仔，吾孻仔 押沙龍 啊！樣毋俾𠊎代你死！ 押沙龍 啊，吾孻仔！吾孻仔！」</verse>
			</chapter>
			<chapter number="19">
				<verse number="1">有人㧯 約押 講， 大衛 王為 押沙龍 傷心盡噭，</verse>
				<verse number="2">致到該日 大衛 全軍勝利个歡樂全部變做哀傷，因為大家聽講王為佢个孻仔盡傷心。</verse>
				<verse number="3">佢等恬恬轉到城肚，就像對戰場逃轉來、感覺盡見笑个軍隊一樣。</verse>
				<verse number="4">王揞等面，大聲噭等講：「吾孻仔 押沙龍 啊！ 押沙龍 ，吾孻仔，吾孻仔啊！」</verse>
				<verse number="5">約押 入去王个屋肚見王，對佢講：「你今晡日侮辱你个部下 — 該兜救你㧯你子女並𡜵娘細姐性命个人。</verse>
				<verse number="6">你惱該兜惜你个人，反轉惜該兜惱你个人；你今晡日明明看毋起𠊎這兜將軍㧯部下。𠊎看，若係今晡日 押沙龍 還生，𠊎等全部死掉，你就歡喜了！</verse>
				<verse number="7">這下請你出去安慰你个部下！𠊎指等上主个名發誓，若係你毋恁樣做，到今暗晡無一儕會留在你這位；該就係你這一生人所堵到最得人驚个災難。」</verse>
				<verse number="8">所以王起來，出去坐在城門堘。佢个部下聽講佢在該位，就全部聚集到佢面前。 該時， 以色列 人已經逃走，逐儕轉自家个家鄉去了。</verse>
				<verse number="9">以色列 各支族个人全部議論紛紛講：「 大衛 王識救𠊎等脫離仇敵；就係佢救𠊎等脫離 非利士 人。總係這下，佢因為閃 押沙龍 就離開國家。</verse>
				<verse number="10">𠊎等膏油設立 押沙龍 做王，總係佢已經死在戰場。恁樣，𠊎等做麼介毋趕緊去接 大衛 王轉來呢？」</verse>
				<verse number="11">大衛 王派人去喊祭司 撒督 㧯 亞比亞他 去問 猶大 該兜長老：「 以色列 人已經在談論請王轉王宮來，你等做麼介落在佢等个後背？</verse>
				<verse number="12">你等係𠊎个親戚，係𠊎个骨肉，做麼介愛等到最後正請王轉來？」</verse>
				<verse number="13">大衛 也喊佢等去對 亞瑪撒 講：「你敢毋係𠊎个骨肉？從今以後，𠊎愛你做軍隊个元帥，將 約押 換下來。若係𠊎毋恁樣做，願上帝重重責罰𠊎！」</verse>
				<verse number="14">大衛 个話徹底得到所有 猶大 人个心；佢等就傳話給王，請佢㧯佢个官員全部轉來。</verse>
				<verse number="15">在轉來个路上，王來到 約旦 河，就堵到 猶大 人；佢等到 吉甲 來歡迎王過河。</verse>
				<verse number="16">同時， 巴戶琳 个 便雅憫 人 基拉 个孻仔 示每 也當遽到 約旦 河去迎接 大衛 王。</verse>
				<verse number="17">佢帶等 便雅憫 支族个一千人共下來。還有 掃羅 家族个僕人 洗巴 也帶等佢十五個孻仔㧯二十個僕人共下來。佢等比王先到 約旦 河。</verse>
				<verse number="18">佢等過河去，保護王个家眷過河，又照王个意思做各樣个事。 當王愛過 約旦 河个時， 基拉 个孻仔 示每 就伏在佢面前，</verse>
				<verse number="19">講：「吾主吾王，求你赦免僕人在你離開 耶路撒冷 个時所犯悖逆个罪。求你毋好因為恁樣定𠊎个罪，也毋好將這事放在心肚。</verse>
				<verse number="20">僕人知自家有罪，所以今晡日，在北部支族 當中𠊎係第一個來迎接吾主吾王个。」</verse>
				<verse number="21">洗璐雅 个孻仔 亞比篩 講：「應該將 示每 㓾死，因為佢咒罵上主膏油設立个王。」</verse>
				<verse number="22">總係， 大衛 對 亞比篩 㧯厥哥 約押 講：「 洗璐雅 个孻仔啊，有麼人問你等个意見？你等愛㧯𠊎尋麻煩係麼？𠊎這下係 以色列 个王；今晡日，無一個 以色列 人會被人㓾死。」</verse>
				<verse number="23">所以王對 示每 講：「𠊎保證你毋會被人㓾死。」</verse>
				<verse number="24">掃羅 个孫仔 米非波設 也下來迎接王。自從王離開 耶路撒冷 直到這下平安轉來，佢毋識洗腳、無修鬍鬚、也無洗衫褲。</verse>
				<verse number="25">米非波設 對 耶路撒冷 來見王个時，王問佢：「 米非波設 ，你做麼介無㧯𠊎共下離開？」</verse>
				<verse number="26">米非波設 應講：「吾主吾王，你知僕人係瘸腳个人；𠊎有吩咐人預備驢仔，好俾𠊎騎等驢仔㧯王共下去，總係𠊎个僕人 洗巴 出賣𠊎。</verse>
				<verse number="27">佢又向吾主吾王講花撩害𠊎；總係吾主吾王像上帝个天使共樣，你看樣般好，就樣般做！</verse>
				<verse number="28">吾爸屋下所有个人本來就該死，總係吾主吾王个恩典使僕人㧯王共桌食飯，𠊎還有麼介權利再要求王賞賜恩典給𠊎呢？」</verse>
				<verse number="29">王對佢講：「你樣愛使再提這兜事呢？𠊎已經決定，你㧯 洗巴 兩儕愛分 掃羅 个財產。」</verse>
				<verse number="30">米非波設 對王講：「將所有財產全部給 洗巴 。吾主吾王已經平安轉來了，𠊎麼介都毋使。」</verse>
				<verse number="31">基列 人 巴西萊 已經對 羅基琳 下來；佢㧯王共下去 約旦 河，愛送王過河。</verse>
				<verse number="32">巴西萊 係一個八十歲个老人家。佢當發；王住在 瑪哈念 个時，佢識供給王食物。</verse>
				<verse number="33">王對 巴西萊 講：「㧯𠊎共下過河，到 耶路撒冷 𠊎會照顧你。」</verse>
				<verse number="34">總係 巴西萊 應講：「𠊎驚怕在世間無幾久，做麼介還跈王到 耶路撒冷 去呢？</verse>
				<verse number="35">𠊎已經八十歲了，麼介事都無興趣，食啉無感覺麼介味道，男女歌手美好个聲音也聽毋到。僕人只會加添吾主吾王个麻煩定定。</verse>
				<verse number="36">𠊎也堪毋得王恁大个賞賜；僕人送王行一站路，過 約旦 河，</verse>
				<verse number="37">然後俾𠊎轉屋下，死在𠊎本城，葬在爺𡟓墳墓个堘頭！這係𠊎个孻仔 金罕 ；請吾主吾王帶佢過去，看樣般較妥當，就樣般對待佢。」</verse>
				<verse number="38">王應講：「𠊎會帶 金罕 共下去，照你所希望个款待佢；你還有麼介要求，𠊎全部會答應你。」</verse>
				<verse number="39">然後，眾人過 約旦 河，王也過去。王唚 巴西萊 ，為佢祝福， 巴西萊 就轉屋下去。</verse>
				<verse number="40">王過去到 吉甲 ， 金罕 也㧯佢過去。所有 猶大 人㧯 以色列 人个一半也全部送王過去。</verse>
				<verse number="41">後來，所有个 以色列 人去見王，對王講：「做麼介𠊎等个兄弟 猶大 人恅到佢等有權偷偷仔送王㧯王屋下个人並部下過 約旦 河？」</verse>
				<verse number="42">猶大 人應講：「𠊎等恁樣做係因為王㧯𠊎等係親戚。你等做麼介發譴？王並無給𠊎等食物，也無賞賜𠊎等麼介東西。」</verse>
				<verse number="43">以色列 人講：「就算王㧯你等係親戚，𠊎等對 大衛 王比你等更加有十倍个情分。你等做麼介看𠊎等毋起？毋好毋記得，𠊎等係最先參詳請王轉來个！」 雙方為這事爭論，總係 猶大 人个態度比 以色列 人還較硬。</verse>
			</chapter>
			<chapter number="20">
				<verse number="1">在 吉甲 有一個敗類安到 示巴 ，係 便雅憫 支族人 比基利 个孻仔。佢歕羊角喊講：「 大衛 㧯𠊎等無關係！ 耶西 个孻仔對𠊎等全無好處！ 以色列 人哪，轉老屋來去！」</verse>
				<verse number="2">所以， 以色列 人全部離開 大衛 ，跈 比基利 个孻仔 示巴 去。總係 猶大 人還係對 大衛 王忠心，跈王對 約旦 河到 耶路撒冷 。</verse>
				<verse number="3">大衛 王轉到 耶路撒冷 王宮，將佢以前留下來看守王宮个十個細姐關起來，供給姖等所需要个一切，總係毋㧯姖等同房。姖等一生人關在冷宮，像寡婦一樣。</verse>
				<verse number="4">王對 亞瑪撒 講：「去召集 猶大 人，三日內㧯佢等轉到這位來。」</verse>
				<verse number="5">亞瑪撒 就去召集 猶大 人，總係佢無在王規定个時間內轉來。</verse>
				<verse number="6">所以 大衛 對 亞比篩 講：「驚怕 比基利 个孻仔 示巴 對𠊎等个傷害比 押沙龍 還較大。你帶𠊎个軍隊去追佢！若係無，佢會佔領防衛个城市，愛捉佢就難了。」</verse>
				<verse number="7">所以 約押 个軍隊，該兜做宮廷侍衛隊个 基利提 人㧯 比利提 人，並所有个勇士全部跈 亞比篩 共下離開 耶路撒冷 去追 示巴 。</verse>
				<verse number="8">佢等追到 基遍 个大巖石該位个時， 亞瑪撒 來迎接佢等。該時 約押 著等戰甲，腰間繫刀鞘，刀仔在刀鞘內。 約押 向前行个時，佢个刀仔對刀鞘內跌下來。</verse>
				<verse number="9">約押 對 亞瑪撒 講：「朋友，你平安無？」就用正手捋 亞瑪撒 个鬍鬚，愛唚佢。</verse>
				<verse number="10">亞瑪撒 無提防 約押 另外一支手所揢等个刀仔； 約押 用這刀仔刺入佢个肚笥，腸肚流在地泥下。 約押 毋使刺第二下， 亞瑪撒 就死掉。 約押 㧯厥老弟 亞比篩 繼續去追 比基利 个孻仔 示巴 。</verse>
				<verse number="11">有一個 約押 个僕人企在 亞瑪撒 屍體堘頭喊講：「順服 約押 㧯 大衛 个人全部應該跈 約押 去！」</verse>
				<verse number="12">亞瑪撒 个屍體歸身係血，睡在路中央。 約押 个僕人看到過路个人全部企下來，就將屍體拖到田肚，㧒一領衫將它遮等。</verse>
				<verse number="13">屍體對路上徙開以後，大家就跈 約押 去追 比基利 个孻仔 示巴 。</verse>
				<verse number="14">示巴 行過 以色列 逐支族个地區，來到 亞伯‧伯‧瑪迦 ；所有 比基利 宗族个人全部集合起來，跈佢入城。</verse>
				<verse number="15">約押 个軍隊聽到 示巴 在該位，就去圍攻該城。佢等對等城个外牆，起攻城个土堆，又用槌仔撞城牆，愛使城牆橫下來。</verse>
				<verse number="16">城肚有一個聰明个婦人家對城牆頂喊講：「聽啊，聽啊！去請 約押 到這位來；𠊎愛㧯佢講話。」</verse>
				<verse number="17">約押 行近去；該婦人家問：「你係 約押 麼？」 佢講：「係啊！」 該婦人家講：「請聽使女个話。」 約押 講：「好，你講。」</verse>
				<verse number="18">該婦人家講：「老古人言講：『到 亞伯 去請教』，事情就會得到解決。</verse>
				<verse number="19">𠊎等這城肚个人係 以色列 當中最和平、忠誠个人。你做麼介愛毀滅這偉大个城呢？你愛吞掉上主个產業係麼？」</verse>
				<verse number="20">約押 應講：「𠊎絕對毋會毀滅你等个城！</verse>
				<verse number="21">該毋係𠊎等个計劃。有一個人名喊 示巴 ，係 比基利 个孻仔，對 以法蓮 山區來。佢煽動人悖逆 大衛 王。你等將這一儕交出來，𠊎就下令撤退。」 該婦人家對 約押 講：「𠊎等會對城牆頂將佢个頭那㧒給你！」</verse>
				<verse number="22">所以姖向城肚个人民獻計謀；佢等就將 示巴 个頭那剁下來，對城牆頂㧹給 約押 。 約押 就歕羊角，佢个軍隊就離開這城，轉屋下去了。 約押 轉到 耶路撒冷 去見 大衛 王。</verse>
				<verse number="23">約押 做 以色列 全軍隊个元帥； 耶何耶大 个孻仔 比拿雅 做 大衛 个侍衛長、統管 基利提 人㧯 比利提 人；</verse>
				<verse number="24">亞多蘭 做苦工个總管； 亞希律 个孻仔 約沙法 做歷史官；</verse>
				<verse number="25">示法 做王室書記； 撒督 㧯 亞比亞他 做祭司；</verse>
				<verse number="26">睚珥 人 以拉 也做 大衛 个一個祭司。</verse>
			</chapter>
			<chapter number="21">
				<verse number="1">大衛 統治期間識堵到大飢荒，足足三年久。 大衛 為這事求問上主；上主講：「這係因為 掃羅 㧯佢个家族犯謀殺罪；佢㓾死 基遍 人。」</verse>
				<verse number="2">( 基遍 人毋係 以色列 人；佢等係 亞摩利 人當中賸到个人。 以色列 人識㧯佢等立約，愛保護佢等，總係 掃羅 想辦法愛消滅佢等，因為 掃羅 單單惜 以色列 人㧯 猶大 人。) 大衛 王喊 基遍 人來，對佢等講：</verse>
				<verse number="3">「𠊎應當為你等做麼介？𠊎應該用麼介來贖罪，你等正肯為上主个子民祝福？」</verse>
				<verse number="4">基遍 人應講：「𠊎等㧯 掃羅 家个冤仇毋係金銀所能解決个；𠊎等也無愛殺害 以色列 人。」 大衛 問：「恁樣，你等認為𠊎應該為你等做麼介？」</verse>
				<verse number="5">佢等對王講：「 掃羅 謀害𠊎等，愛消滅𠊎等，毋俾𠊎等留在 以色列 國內住。</verse>
				<verse number="6">所以，請你對佢个後代中交出七個男人來；𠊎等愛在 基比亞 ，就係在上主選立 掃羅 做王个地方，在上主面前吊死佢等。」 王講：「𠊎會將佢等交出來。」</verse>
				<verse number="7">大衛 王因為識㧯 掃羅 个孻仔 約拿單 在上主面前立約，所以留下 約拿單 个孻仔，就係 掃羅 个孫仔 米非波設 ，</verse>
				<verse number="8">總係將 愛亞 个妹仔 利斯巴 為 掃羅 𫱔个兩個孻仔 亞摩尼 㧯 米非波設 交出來。佢也將 掃羅 个妹仔 米拉 為 米何拉 人 巴西萊 个孻仔 亞得列 所𫱔个五個孻仔交出來。</verse>
				<verse number="9">大衛 王將佢等交給 基遍 人； 基遍 人就在山頂，在上主个面前吊死佢等。這七個人就共下死掉；佢等被人處死个時堵好係春天後期，開始收割大麥个季節。</verse>
				<verse number="10">愛亞 个妹仔 利斯巴 用麻布在屍體附近个磐石頂搭帳篷，對收割大麥到落秋雨个時一直住在該位；姖日時頭毋俾飛鳥停在屍體面頂，暗晡時毋俾野獸偎近。</verse>
				<verse number="11">有人將 掃羅 个細姐 利斯巴 所做个事㧯 大衛 講，</verse>
				<verse number="12">大衛 就去 基列 个 雅比 人該位，將 掃羅 㧯厥孻仔 約拿單 个骨骸搬轉來。 ( 非利士 人在 基利波 山㓾死 掃羅 該日，將佢等个屍體掛在 伯‧珊 个廣場； 雅比 人已經將屍體偷轉去。)</verse>
				<verse number="13">大衛 帶轉 掃羅 㧯厥孻仔 約拿單 个骨骸，也將該七個被人吊死个人入殮。</verse>
				<verse number="14">照王个指示，佢等將 掃羅 㧯厥孻仔 約拿單 个骨骸葬在 便雅憫 地方个 洗拉 ，在 掃羅 厥爸 基士 个墳墓肚。該時以後，上帝就聽佢等為國家祈禱。</verse>
				<verse number="15">非利士 人㧯 以色列 人又有戰爭； 大衛 帶佢个軍隊去攻打 非利士 人。一場戰爭打下來， 大衛 當𤸁了。</verse>
				<verse number="16">有一個巨人，名安到 以實‧比諾 ；佢帶等重三公斤半个銅槍，繫等新劍，想愛㓾 大衛 。</verse>
				<verse number="17">總係 洗璐雅 个孻仔 亞比篩 過來協助 大衛 攻打該 非利士 人，將佢㓾死。後來 大衛 个部下要求 大衛 答應佢等，講：「請毋好再㧯𠊎等去相㓾，免得 以色列 个燈火烏掉。」</verse>
				<verse number="18">這事以後， 以色列 人在 歌伯 又㧯 非利士 人相㓾。 戶沙 人 西比該 㓾死一個巨人喊做 撒弗 。</verse>
				<verse number="19">在 歌伯 ， 以色列 人㧯 非利士 人又有另外一場戰爭。 伯利恆 人 睚珥 个孻仔 伊勒哈難 㓾掉 迦特 人 歌利亞 ；這人个槍柄像織布機个車心恁粗。</verse>
				<verse number="20">後來在 迦特 又有戰爭。該地方有一個巨人；佢个手指㧯腳趾攏總係六支，總共有二十四支。</verse>
				<verse number="21">佢向 以色列 人罵陣； 大衛 个阿哥 示米亞 个孻仔 約拿單 將佢㓾掉。</verse>
				<verse number="22">以上四個人全部係 迦特 巨人个後代；佢等全部死在 大衛 㧯厥部下个手中。</verse>
			</chapter>
			<chapter number="22">
				<verse number="1">上主救 大衛 脫離一切仇敵㧯 掃羅 个手時， 大衛 向上主唱這首詩歌，講：</verse>
				<verse number="2">上主係𠊎个巖石， 𠊎个城堡，𠊎个救主；</verse>
				<verse number="3">𠊎个上帝係𠊎个磐石，𠊎避難个所在； 佢係𠊎个盾牌，拯救个角㧯要塞。 𠊎个救主啊，你救𠊎離開暴力。</verse>
				<verse number="4">𠊎求喊應當受讚美个上主， 𠊎就得拯救脫離𠊎个仇敵。</verse>
				<verse number="5">死亡个大浪圍等𠊎； 毀滅个急流沖等𠊎；</verse>
				<verse number="6">陰間个絞索纏等𠊎； 死亡个羅網揜過來。</verse>
				<verse number="7">在急難中𠊎求喊上主； 𠊎求𠊎个上帝拯救𠊎。 佢在佢个聖殿肚聽到𠊎个聲； 𠊎求喊个聲音傳入佢个耳公。</verse>
				<verse number="8">該時，就有大地動； 天个根基也搖動， 因為上帝大發譴！</verse>
				<verse number="9">佢个鼻公有煙衝等出來， 嘴歕出烈火㧯𤏸等个火炭。</verse>
				<verse number="10">佢打開天，親自降臨； 有賁賁个烏雲在佢个腳下。</verse>
				<verse number="11">佢騎等基路伯來飛； 在風个翼胛頂顯現。</verse>
				<verse number="12">佢用烏暗像布篷遮等自家； 有盡賁个雲㧯水氣圍等佢；</verse>
				<verse number="13">因佢面前个榮光， 火炭全部𤏸起來。</verse>
				<verse number="14">上主對天頂打雷公； 至高者發出佢个聲。</verse>
				<verse number="15">佢射箭逐走佢个仇敵； 佢緊𥍉爧使佢等亂掉。</verse>
				<verse number="16">上主一下大聲咄， 鼻公个氣一歕出， 水就分開，海底現出來， 大地个根基也露出來。</verse>
				<verse number="17">上主對頂高伸手捉等𠊎， 將𠊎對大水中間拉出來。</verse>
				<verse number="18">佢救𠊎脫離盡兇个對敵， 脫離一切怨恨𠊎个敵人； 因為佢等全部比𠊎較強。</verse>
				<verse number="19">𠊎堵到災難个時節， 當日佢等就來攻擊， 好得有上主保護𠊎。</verse>
				<verse number="20">佢帶𠊎到當闊个所在； 佢救𠊎，因為佢歡喜𠊎。</verse>
				<verse number="21">上主照𠊎个正直報答𠊎， 佢賜福給𠊎，因為𠊎雙手淨浰。</verse>
				<verse number="22">𠊎遵行上主个道路， 毋識悖逆𠊎个上帝。</verse>
				<verse number="23">𠊎遵行佢一切个法律， 也毋識違背佢个命令。</verse>
				<verse number="24">𠊎在佢面前無污點； 𠊎有遠遠離開罪惡。</verse>
				<verse number="25">所以上主照𠊎个正直報答𠊎， 因為在佢眼中𠊎係淨浰个人。</verse>
				<verse number="26">上主啊，對信實个人，你顯明你个信實； 對無污點个，你顯明你个完全。</verse>
				<verse number="27">對純潔个人，你顯明你个純潔； 對詭詐个人，你顯明你个精明。</verse>
				<verse number="28">你拯救謙卑个人； 你鑒察驕傲个人， 將佢等降做卑賤。</verse>
				<verse number="29">上主啊，你就係𠊎个明燈； 你將𠊎个烏暗變做光明。</verse>
				<verse number="30">同𠊎共下攻入敵人軍隊个就係你， 同𠊎共下跳過圍牆个係𠊎个上帝！</verse>
				<verse number="31">論到上帝， 佢所行个極圓滿！ 佢講个話最真實！ 一切求佢庇佑个人， 佢就做佢等个盾牌。</verse>
				<verse number="32">除了上主，無別个上帝； 唯有上帝係保護𠊎等个磐石。</verse>
				<verse number="33">上帝係𠊎堅固个避難所； 佢使𠊎所行个道路平安。</verse>
				<verse number="34">佢使𠊎个腳像鹿仔个腳， 使𠊎在高山頂企到在在。</verse>
				<verse number="35">佢訓練𠊎个手，俾𠊎知愛樣般相㓾， 使𠊎个手骨拉得開銅弓。</verse>
				<verse number="36">上主啊，你賜給𠊎得救个盾牌； 你庇佑𠊎，使𠊎興旺。</verse>
				<verse number="37">你使𠊎所行个路變闊， 使𠊎个腳毋會打盪溜。</verse>
				<verse number="38">𠊎追敵人，就消滅佢等， 無打贏佢等，𠊎毋轉頭。</verse>
				<verse number="39">𠊎將佢等打到䟘毋起來， 佢等全部橫在𠊎个腳下。</verse>
				<verse number="40">你賜𠊎相㓾个力量； 使𠊎个敵人降服𠊎。</verse>
				<verse number="41">你使𠊎个對敵翻轉身逃走； 𠊎將該兜怨恨𠊎个人消滅。</verse>
				<verse number="42">佢等喊救命，總係無人來救佢等； 佢等求喊上主，總係佢毋應佢等。</verse>
				<verse number="43">𠊎打碎佢等，像塵灰被風吹散； 𠊎抔走佢等，像掃街項个泥糜。</verse>
				<verse number="44">百姓背叛，你拯救𠊎， 你立𠊎做列國个頭； 連𠊎毋識个人民也服事𠊎。</verse>
				<verse number="45">佢等一聽到係𠊎就歸順； 外族人降服在𠊎个面前。</verse>
				<verse number="46">佢等个勇氣毋見掉淨淨， 愊愊掣 走出佢等个營房。</verse>
				<verse number="47">上主係永生个！愛頌讚𠊎个磐石！ 上帝係拯救𠊎个磐石！愛傳揚佢个偉大！</verse>
				<verse number="48">佢就係為𠊎伸冤个上帝， 使萬族降服𠊎个就係佢，</verse>
				<verse number="49">救𠊎脫離敵人个也係佢。 上主啊，你使𠊎贏過對敵； 你拯救𠊎脫離強暴个人。</verse>
				<verse number="50">所以，𠊎愛在列國中讚美你； 𠊎愛吟詩唱歌頌讚你个名。</verse>
				<verse number="51">上主使佢所立个王得到大勝利； 佢賜不變个慈愛給佢膏油所設立个， 就係給 大衛 㧯佢个後代， 一直到永遠。</verse>
			</chapter>
			<chapter number="23">
				<verse number="1">耶西 个孻仔 大衛 个預言，就係上帝所重用个人發出个預言； 雅各 个上帝膏油設立佢做王。 大衛 為 以色列 做當多盡靚个詩歌。下背這首詩係 大衛 最後个遺言：</verse>
				<verse number="2">上主个靈通過𠊎講話； 佢个信息常在𠊎嘴唇。</verse>
				<verse number="3">以色列 个上帝識恁樣講， 以色列 个磐石㧯𠊎講話： 該用正義來治理人民个， 用敬畏上帝來掌權个王，</verse>
				<verse number="4">就像日頭打早一出來， 在無烏雲个天頂發光， 使落雨後个青草茂盛。</verse>
				<verse number="5">上帝愛恁樣恩待𠊎个後代， 因為佢㧯𠊎有立永遠个約， 係永遠毋會廢掉个誓約， 佢一定會成全𠊎个願望， 佢會賜給𠊎一切个救恩。</verse>
				<verse number="6">惡人就像㧒掉个竻仔， 麼人都毋敢用手拈它，</verse>
				<verse number="7">愛拈它就用鐵棍鐵鉗； 定著將它用火燒淨淨。</verse>
				<verse number="8">大衛 手下有名个勇士記在下背：第一個係 他革捫 人 約設‧巴設 ；佢係「三勇士」 个領袖。佢識在一擺戰爭中用槍 刺死八百人。</verse>
				<verse number="9">「三勇士」个第二個係 亞合 族人 朵多 个孻仔 以利亞撒 。有一擺，佢㧯 大衛 向該兜前來攻打个 非利士 人罵陣。 以色列 人撤退；</verse>
				<verse number="10">總係佢企在該位㧯 非利士 人拚命，直到佢个手痺到硬鉸掉，放毋開手中个劍。該日，上主使 以色列 人大贏。戰爭過後， 以色列 人轉到 以利亞撒 該位，相爭𢲾背搶敵人屍體个鐵甲。</verse>
				<verse number="11">「三勇士」个第三個係 哈拉 人 亞基 个孻仔 沙瑪 。有一日， 非利士 人聚集在 利希 个豆仔田个時， 以色列 人全部逃走，</verse>
				<verse number="12">總係 沙瑪 為到保護該垤田，就企在田肚抵抗佢等，㓾死盡多 非利士 人。該日，上主使 以色列 人大贏。</verse>
				<verse number="13">收割个時，「三十勇士」當中有三儕下到 亞杜蘭 山窿該位去見 大衛 。該時，有一隊 非利士 人安營在 利乏音 山壢肚。</verse>
				<verse number="14">該時 大衛 在一個有防衛个山頭；一群 非利士 人佔領 伯利恆 。</verse>
				<verse number="15">大衛 想念家鄉，就講：「𠊎當想愛啉 伯利恆 城門堘个井水啊！」</verse>
				<verse number="16">該三個勇士就闖等過 非利士 人个營地，對該井肚打水，帶來給 大衛 。總係 大衛 毋肯啉，反轉將水倒出來獻給上主。</verse>
				<verse number="17">佢講：「上主啊，𠊎樣般做得啉這水！這敢毋係啉冒生命危險去打水个勇士个血？」所以 大衛 毋啉。 這就係該三個勇士勇敢个行為。</verse>
				<verse number="18">洗璐雅 个孻仔、 約押 个老弟 亞比篩 係「三十勇士」 个領袖。佢識用槍刺死三百人，所以㧯「三勇士」共樣出名。</verse>
				<verse number="19">佢係「三十勇士」 當中最傑出个一個，成做佢等个領袖，總係比毋得「三勇士」个名聲。</verse>
				<verse number="20">甲薛 人 耶何耶大 个孻仔 比拿雅 係另外一個出名个勇士。佢有當多勇敢个行為，包含㓾死兩個強壯个 摩押 戰士 。佢識在落雪天下到大窟肚打死一隻獅仔。</verse>
				<verse number="21">佢又㓾死一個強壯个 埃及 人；該人拿等長槍， 比拿雅 只有拿等一支棍仔； 比拿雅 將佢手中个槍搶過來，用該槍將佢㓾死。</verse>
				<verse number="22">這係 耶何耶大 个孻仔 比拿雅 勇敢个行為；佢㧯「三勇士」也盡出名。</verse>
				<verse number="23">佢在「三十勇士」當中最受人尊重，總係㧯「三勇士」个名聲還係比毋得。 大衛 派佢做侍衛長。</verse>
			</chapter>
			<chapter number="24">
				<verse number="1">上主又向 以色列 人大發譴，所以激 大衛 來尋佢等个麻煩。上主對 大衛 講：「你去調查一下 以色列 㧯 猶大 个人口。」</verse>
				<verse number="2">王就命令軍隊个元帥 約押 講：「帶等你个部下，行透 以色列 逐支族，對北片个 但 到南片个 別是巴 ，點算人民。𠊎愛知人民个數目。」</verse>
				<verse number="3">總係 約押 對王講：「吾主吾王，願上主 — 你个上帝使 以色列 人民比這下个人數多一百倍。願你親目看到上帝个作為。毋過，吾主吾王，做麼介愛做這事呢？」</verse>
				<verse number="4">總係王堅持愛 約押 㧯佢个部下服從佢个命令；佢等就離開王，出去點算 以色列 人民。</verse>
				<verse number="5">佢等過 約旦 河，在 迦得 境內山壢肚个 亞羅珥 城南片安營，然後對該位向北到 雅謝 ，</verse>
				<verse number="6">又到 基列 㧯 赫 人境內个 加低斯 ，然後到 但 ，又對 但 向西到 西頓 ，</verse>
				<verse number="7">然後向南行，到防衛城 泰爾 ，又到所有 希未 人㧯 迦南 人个城市，最後來到 猶大 南部个 別是巴 。</verse>
				<verse number="8">佢等全國行透透，經過九個月又二十日，然後轉到 耶路撒冷 。</verse>
				<verse number="9">約押 向王報告： 以色列 帶武器个壯丁總數八十萬人； 猶大 壯丁總數五十萬人。</verse>
				<verse number="10">大衛 調查人口後，良心盡不安，就對上主講：「𠊎做這事犯大罪了！求你赦免僕人个過失！𠊎个行為實在當戇。」</verse>
				<verse number="11">上主對 大衛 个先見 迦得 先知講：「去㧯 大衛 講，𠊎用三個災難給佢選一個，佢選麼介，𠊎就做麼介。」第二朝晨， 大衛 䟘起來以後，</verse>
				<verse number="12"></verse>
				<verse number="13">迦得 去見佢，㧯佢講上主所講个話，又問 大衛 ：「你愛選㖠樣？你个國內有三年 飢荒？抑係在你敵人面前逃亡三個月？抑係你个國家發三日个瘟仔？想看仔，愛𠊎樣般回答上主。」</verse>
				<verse number="14">大衛 對 迦得 講：「𠊎當為難！𠊎無愛被人處罰。𠊎甘願俾上主自家責罰𠊎，因為上主有豐盛个憐憫。」</verse>
				<verse number="15">所以上主降瘟仔在 以色列 人身上，對該日朝晨到佢所定个時；對北片个 但 到南片个 別是巴 共有七萬 以色列 人死掉。</verse>
				<verse number="16">天使伸手愛毀滅 耶路撒冷 个時，上主改變佢責罰人民个心意，就對該執行毀滅个天使講：「手停下來，罅了！」該時，上主个天使在 耶布斯 人 亞勞拿 个打麥場。</verse>
				<verse number="17">大衛 看到該執行毀滅个天使，就對上主講：「係𠊎犯个罪，𠊎正係該做毋著事个人。這兜人民像羊仔，佢等乜無做麼介。你應該責罰𠊎㧯𠊎屋下个人！」</verse>
				<verse number="18">該日， 迦得 去見 大衛 ，對佢講：「到 耶布斯 人 亞勞拿 个打麥場去，為上主起一座祭壇。」</verse>
				<verse number="19">大衛 照 迦得 奉上主命令所講个話上去。</verse>
				<verse number="20">亞勞拿 向下看，看到王㧯佢个官員向佢這片上來，就行前去伏落在王面前，</verse>
				<verse number="21">問佢：「吾主吾王來到僕人這位有麼介事？」 大衛 講：「𠊎愛買你个打麥場，為上主起一座祭壇，俾發瘟停下來。」</verse>
				<verse number="22">亞勞拿 講：「吾主吾王，你合意麼介就做你拿去獻給上主。這位有牛好做燒化祭，又有牛軛㧯打麥个枋仔好做柴燒。</verse>
				<verse number="23">王啊，𠊎 — 亞勞拿 將這兜全部給你。」佢又對王講：「願上主 — 你个上帝歡喜接納你。」</verse>
				<verse number="24">總係王對 亞勞拿 講：「做毋得！𠊎一定愛照價錢㧯你買；𠊎無愛向上主 — 𠊎个上帝獻白白得來个做燒化祭。」 大衛 就用五十隻銀幣買下打麥場㧯牛。</verse>
				<verse number="25">大衛 在該位為上主起一座祭壇，獻燒化祭㧯平安祭。所以，上主聽佢為這土地个祈禱，發瘟就在 以色列 停掉。</verse>
			</chapter>
		</book>
		<book number="11">
			<chapter number="1">
				<verse number="1">這時， 大衛 王已經盡老；雖然佢个僕人用毯仔枷在佢身項，佢還係感覺毋罅燒暖。</verse>
				<verse number="2">佢个大臣對佢講：「吾主吾王，俾𠊎等去尋一個人家女來服事你，照顧你，喊姖睡在你个身邊，使你燒暖。」</verse>
				<verse number="3">所以佢等到 以色列 各地去尋靚靚个人家女，最尾在 書念 尋到一個人家女，名喊 雅比莎 ，就帶姖去見王。</verse>
				<verse number="4">這人家女盡靚；姖在王塍頭服事照顧王，總係王無㧯姖發生親密个關係。</verse>
				<verse number="5">該時， 押沙龍 已經死掉； 大衛 㧯 哈及 所𫱔个孻仔 亞多尼雅 照算係最大个孻仔。佢生到盡緣投。 大衛 自從毋識俾佢食過苦，毋識嫌過佢，總係佢野心當大，想愛做王。佢為自家準備戰車㧯騎兵，又有五十個衛兵在頭前行。</verse>
				<verse number="6"></verse>
				<verse number="7">亞多尼雅 識㧯 洗璐雅 个孻仔 約押 並祭司 亞比亞他 參詳過；兩儕攏總贊成，答應支持佢。</verse>
				<verse number="8">總係祭司 撒督 、 耶何耶大 个孻仔 比拿雅 、先知 拿單 、 示每 、 利以 㧯 大衛 該兜侍衛攏總毋贊成 亞多尼雅 。</verse>
				<verse number="9">有一日， 亞多尼雅 在 隱‧羅結 泉水附近个「蛇巖」該位㓾牛、羊㧯細肥牛來獻祭，又請 大衛 王其他个孻仔㧯大臣對 猶大 來參加獻祭个筵席。</verse>
				<verse number="10">總係佢無請先知 拿單 、 比拿雅 㧯王該兜侍衛，乜無請厥老弟 所羅門 。</verse>
				<verse number="11">所以， 拿單 去見 所羅門 个阿姆 拔示芭 ，問姖：「你無聽講 哈及 个孻仔 亞多尼雅 已經立自家做王麼？𠊎等个主 大衛 還毋知這件事。</verse>
				<verse number="12">若係你愛救自家㧯若孻仔 所羅門 个性命，𠊎建議你，</verse>
				<verse number="13">黏時去見 大衛 王，問佢：『吾主吾王，你毋係正經答應過𠊎，吾孻仔 所羅門 一定會承接你做王，坐你个王位麼？樣般這下 亞多尼雅 做王呢？』」</verse>
				<verse number="14">拿單 又講：「你還㧯王講等話个時，𠊎會入去，證實你所講个話。」</verse>
				<verse number="15">所以 拔示芭 到王个間房去見王。王當老了；對 書念 來个細妹仔 雅比莎 在照顧佢。</verse>
				<verse number="16">拔示芭 在王面前跪落去；王問姖：「你愛麼介？」</verse>
				<verse number="17">拔示芭 講：「吾主吾王，你識指等上主 — 你上帝个名發誓，愛俾吾孻仔 所羅門 承接你做王，坐你个王位。</verse>
				<verse number="18">總係， 亞多尼雅 已經立自家做王，你還毋知。</verse>
				<verse number="19">佢㓾盡多牛、羊㧯細肥牛來獻祭，又請你所有个孻仔、祭司 亞比亞他 㧯你軍隊个元帥 約押 去參加筵席，總係無請你个僕人 所羅門 。</verse>
				<verse number="20">吾主吾王，全 以色列 个人民緊看你，等你㧯佢等講，麼人愛承接你个王位。</verse>
				<verse number="21">若係你毋講，你過身以後，𠊎㧯吾孻仔 所羅門 就會被人準做罪人了。」</verse>
				<verse number="22">拔示芭 還㧯王講等話个時，先知 拿單 來到王宮。</verse>
				<verse number="23">有人報告王講：「先知 拿單 到了。」 拿單 入去，在王面前伏落去跪等，</verse>
				<verse number="24">然後講：「吾主吾王，你識講過愛 亞多尼雅 承接你做王，坐你个王位係麼？</verse>
				<verse number="25">今晡日佢去㓾盡多牛、羊㧯細肥牛來獻祭，又請你所有个孻仔、你軍隊該兜軍長㧯祭司 亞比亞他 坐桌。這下佢等㧯 亞多尼雅 共下啉食，又大聲喊講：『 亞多尼雅 王萬歲！』</verse>
				<verse number="26">總係 亞多尼雅 無請𠊎 — 就係你个僕人、祭司 撒督 㧯 耶何耶大 个孻仔 比拿雅 ，乜無請你个僕人 所羅門 。</verse>
				<verse number="27">吾主吾王斷真同意這件事係麼？樣般毋㧯你个僕人講麼人愛承接你个王位呢？」</verse>
				<verse number="28">所以， 大衛 王吩咐講：「喊 拔示芭 過來。」 拔示芭 就過來，企在王面前。</verse>
				<verse number="29">王發誓對姖講：「𠊎指等該救𠊎脫離各種患難个永生上主答應你，</verse>
				<verse number="30">今晡日𠊎愛遵守𠊎指等上主 — 以色列 上帝个名所發个誓：你个孻仔 所羅門 一定會承接𠊎做王，坐𠊎个王位。」</verse>
				<verse number="31">拔示芭 伏落去跪等講：「願𠊎个主 大衛 王萬歲！」</verse>
				<verse number="32">大衛 王又吩咐人去喊祭司 撒督 、先知 拿單 㧯 耶何耶大 个孻仔 比拿雅 來。佢等來到王面前，</verse>
				<verse number="33">大衛 王對佢等講：「你等愛帶領宮廷个官長，俾𠊎个孻仔 所羅門 騎𠊎个騾仔，護送佢到 基訓 个泉水滣。</verse>
				<verse number="34">在該位，祭司 撒督 㧯先知 拿單 愛膏油立佢做 以色列 个王。你等愛歕羊角大聲喊：『 所羅門 王萬歲！』</verse>
				<verse number="35">然後你等愛護送佢轉到這位來；佢愛坐𠊎个王位，承接𠊎做王，因為𠊎已經立佢做 以色列 㧯 猶大 个統治者。」</verse>
				<verse number="36">耶何耶大 个孻仔 比拿雅 講：「願吾主吾王个旨意成就！願上主 — 你个上帝成全這事。</verse>
				<verse number="37">上主樣般㧯吾主吾王同在，願佢照樣㧯 所羅門 同在，使佢个權勢比吾主 大衛 王个權勢還較強盛！」</verse>
				<verse number="38">所以祭司 撒督 、先知 拿單 、 耶何耶大 个孻仔 比拿雅 、並該兜做侍衛个 基利提 人㧯 比利提 人攏總去，請 所羅門 騎 大衛 王个騾仔，護送佢到 基訓 个泉水滣。</verse>
				<verse number="39">祭司 撒督 對放約櫃个聖帳篷肚帶來一個裝滿聖油个角來膏立 所羅門 做王。所以佢等歕羊角，人民全部大聲喊：「 所羅門 王萬歲！」</verse>
				<verse number="40">然後佢等全部跈 所羅門 轉來，一路大聲喊，又歕笛仔，聲音大到連地也會顫。</verse>
				<verse number="41">亞多尼雅 㧯佢个人客正結束佢等个筵席，聽到這聲音。 約押 聽到歕羊角个聲音，就問：「城肚發生麼介事？恁大个聲音係麼介意思？」</verse>
				<verse number="42">佢等話還吂講煞，祭司 亞比亞他 个孻仔 約拿單 就到。 亞多尼雅 講：「入來！你係好人，你一定係帶來好消息。」</verse>
				<verse number="43">約拿單 對 亞多尼雅 講：「壞掉了！𠊎等个主 大衛 王已經立 所羅門 做王。</verse>
				<verse number="44">佢派祭司 撒督 、先知 拿單 、 耶何耶大 个孻仔 比拿雅 、並該兜做侍衛个 基利提 人㧯 比利提 人護送 所羅門 ，還俾佢騎王个騾仔。</verse>
				<verse number="45">祭司 撒督 㧯先知 拿單 在 基訓 个泉水滣膏油立佢做王。佢等護送佢入城，一路大聲喊；人民全部大聲應。該就係你等頭先聽到个聲音。</verse>
				<verse number="46">所羅門 已經登基做王了。</verse>
				<verse number="47">毋單淨恁樣，連所有宮廷个官長也去恭賀𠊎等个主 大衛 王，對佢講：『願你个上帝使 所羅門 比你更有名聲，佢个權勢比你个還較強盛！』 大衛 王就在眠床頂伏等敬拜，</verse>
				<verse number="48">祈禱講：『愛頌讚上主 — 以色列 个上帝！佢今晡日使𠊎个一個後代承接𠊎个王位，又使𠊎還生个時親目看到這事！』」</verse>
				<verse number="49">亞多尼雅 該兜人客當著驚；佢等黏時企起來，一下就四散掉去。</verse>
				<verse number="50">亞多尼雅 也驚 所羅門 ，走到放約櫃个聖帳篷肚，抓等祭壇个角 。</verse>
				<verse number="51">有人㧯 所羅門 講：「 亞多尼雅 因為驚 所羅門 王，這下去抓等祭壇个角，講：『𠊎愛 所羅門 王今晡日向𠊎發誓，毋將僕人㓾死。』」</verse>
				<verse number="52">所羅門 講：「佢若對𠊎忠心，佢一條頭那毛也毋會𢫫掉；佢若係做壞事，定著會無命。」</verse>
				<verse number="53">所以 所羅門 王派人去對祭壇頂將 亞多尼雅 帶下來。 亞多尼雅 來見 所羅門 王，跪在王面前。 所羅門 對佢講：「你做得轉屋下了！」</verse>
			</chapter>
			<chapter number="2">
				<verse number="1">大衛 臨終个時，吩咐佢个孻仔 所羅門 講：</verse>
				<verse number="2">「𠊎離開世間个時到了。你愛堅強，愛做大丈夫。</verse>
				<verse number="3">你愛遵守上主 — 你上帝个命令，實行佢个道，順從佢所有个法律誡命，就係該兜記在 摩西 法律書个命令。恁樣，無論你到㖠位，你所做个逐件事全部會當順利。</verse>
				<verse number="4">若係你順服上主，佢一定會守佢个應許，就係講：𠊎个後代若係謹守佢个命令，一心一意對佢忠心，佢等就做得永遠統治 以色列 。</verse>
				<verse number="5">「還有一件事，你知 洗璐雅 个孻仔 約押 得罪𠊎，㓾掉 以色列 軍隊个兩個元帥， 尼珥 个孻仔 押尼珥 ，㧯 益帖 个孻仔 亞瑪撒 。你愛記得，佢在太平个日仔㓾掉佢等，像在戰爭中㓾人共樣。因為佢㓾掉無辜个人 ，𠊎卻為佢所做个事來㧡責任，為這事个後果受苦 。</verse>
				<verse number="6">所以你愛用你个智慧來處理，毋好俾佢恁好死。</verse>
				<verse number="7">「你愛好好來款待 基列 人 巴西萊 个孻仔，照顧佢等；因為𠊎逃閃若哥 押沙龍 个時，佢等好款待𠊎。</verse>
				<verse number="8">「還有， 巴戶琳 个 便雅憫 人， 基拉 个孻仔 示每 ；在𠊎愛去 瑪哈念 該日，佢用當毒个話來咒罵𠊎。毋過，後來佢到 約旦 河迎接𠊎个時，𠊎指等上主个名發誓毋㓾佢。</verse>
				<verse number="9">總係你做毋得算佢無罪。你係聰明人，你知應該樣般做；一定愛想辦法將佢㓾死。」</verse>
				<verse number="10">大衛 過身以後，葬在 大衛 城。</verse>
				<verse number="11">佢做 以色列 王四十年：在 希伯崙 統治七年，在 耶路撒冷 統治三十三年。</verse>
				<verse number="12">所羅門 承接厥爸 大衛 做王；佢个國非常堅固。</verse>
				<verse number="13">後來， 哈及 个孻仔 亞多尼雅 去見 所羅門 个阿姆 拔示芭 。 拔示芭 問佢：「你係為到和平來个麼？」 佢講：「係為到和平。」</verse>
				<verse number="14">然後又講：「𠊎有話愛㧯你講。」 拔示芭 講：「你講。」</verse>
				<verse number="15">亞多尼雅 講：「你知𠊎本來應該做王； 以色列 人全部也希望𠊎做王。總係事情个經過並毋係恁樣；𠊎个老弟反轉做王，因為這係上主个旨意。</verse>
				<verse number="16">這下𠊎有一件事愛拜託你；求你毋好拒絕。」 拔示芭 講：「你講看仔。」</verse>
				<verse number="17">亞多尼雅 講：「拜託你代𠊎要求 所羅門 王將該 書念 个細妹仔 雅比莎 給𠊎做𡜵娘；𠊎知佢毋會拒絕你。」</verse>
				<verse number="18">拔示芭 講：「好，𠊎代你去向王要求。」</verse>
				<verse number="19">所以 拔示芭 去見 所羅門 王，為 亞多尼雅 向王講情。王企起來迎接厥姆，向姖行禮，然後坐在寶座，又喊人另外放一隻座位在佢右片，給厥姆坐。</verse>
				<verse number="20">拔示芭 講：「𠊎有一件細事情要求你，請毋好拒絕。」 王問講：「阿姆，係麼介事？𠊎毋會拒絕你。」</verse>
				<verse number="21">拔示芭 講：「請你將 書念 个細妹仔 雅比莎 給若哥 亞多尼雅 做𡜵娘。」</verse>
				<verse number="22">所羅門 王應厥姆講：「你做麼介愛𠊎將 書念 个細妹仔 雅比莎 給 亞多尼雅 呢？你樣毋喊𠊎將王位也讓給佢！你知佢係𠊎个阿哥，還有祭司 亞比亞他 㧯 洗璐雅 个孻仔 約押 擁護佢！」</verse>
				<verse number="23">所以 所羅門 王指等上主个名發誓：「 亞多尼雅 敢恁樣要求，𠊎若無收佢个命，願上帝大大責罰𠊎！</verse>
				<verse number="24">上主已經選𠊎，使𠊎穩穩坐在吾爸 大衛 个王位，又應許將這國給𠊎㧯𠊎个後代。𠊎向永生上主發誓， 亞多尼雅 今晡日無死做毋得！」</verse>
				<verse number="25">所以， 所羅門 王下命令給 耶何耶大 个孻仔 比拿雅 ； 比拿雅 就去將 亞多尼雅 㓾掉。</verse>
				<verse number="26">所羅門 王對祭司 亞比亞他 講：「你轉自家个家鄉 亞拿突 去！你本來係該死个，總係𠊎這下毋㓾你；因為你在吾爸 大衛 个時代扛過上主个約櫃，也識㧯吾爸共下承受盡多苦難。」</verse>
				<verse number="27">所羅門 就解除 亞比亞他 个職位，毋准佢做上主个祭司。恁樣就實現上主在 示羅 所講有關祭司 以利 㧯佢後代个話。</verse>
				<verse number="28">約押 聽到所發生个事就逃到放約櫃个聖帳篷肚，抓等祭壇个角。 (雖然佢無擁護 押沙龍 ，總係擁護 亞多尼雅 。)</verse>
				<verse number="29">所羅門 王聽到這個消息，講 約押 已經逃到放約櫃个聖帳篷肚，囥在祭壇堘頭， 所羅門 就派人去問 約押 做麼介愛逃到祭壇該位。 約押 講佢逃到上主該位係因為驚 所羅門 。所以， 所羅門 王就派 耶何耶大 个孻仔 比拿雅 去㓾 約押 。</verse>
				<verse number="30">比拿雅 到放約櫃个聖帳篷該位，對 約押 講：「王命令你出來！」 約押 講：「無愛！𠊎愛死在這位。」 比拿雅 轉到王該位，向王報告 約押 所講个話。</verse>
				<verse number="31">王講：「照佢自家个話㓾死佢，然後將佢埋葬。𠊎㧯吾爸 大衛 所有个後代毋使為 約押 㓾無辜人个罪來負責。</verse>
				<verse number="32">上主愛 約押 自家揹㓾人个罪，因為佢瞞等吾爸 大衛 去㓾人。 約押 㓾掉兩個比佢較好又較正直个人，就係 以色列 軍隊个元帥 尼珥 个孻仔 押尼珥 㧯 猶大 軍隊个元帥 益帖 个孻仔 亞瑪撒 。</verse>
				<verse number="33">約押 㓾人个罪愛永遠歸佢㧯佢个後代；總係上主愛使 大衛 个後代承接佢个王位，得到平安直到永遠。」</verse>
				<verse number="34">所以， 耶何耶大 个孻仔 比拿雅 到放約櫃个聖帳篷該位，將 約押 㓾掉，葬在曠野 約押 自家屋下个墳墓。</verse>
				<verse number="35">王派 耶何耶大 个孻仔 比拿雅 代 約押 做全軍个元帥，又任命祭司 撒督 代 亞比亞他 个職位。</verse>
				<verse number="36">王派人喊 示每 來，對佢講：「你來，在 耶路撒冷 為自家起屋，愛住在這位，毋准離開這城。</verse>
				<verse number="37">若係你離開，超過 汲淪 溪，該日你就一定會死；流若血个罪歸在你自家。」</verse>
				<verse number="38">示每 應講：「吾主吾王，你講个係盡公當，僕人會照你个話去做。」所以 示每 在 耶路撒冷 住當久。</verse>
				<verse number="39">總係三年後， 示每 个兩個奴才逃到 迦特 王 瑪迦 个孻仔 亞吉 該位。 示每 聽講佢等在 迦特 ，</verse>
				<verse number="40">就預備驢仔，到 迦特 王 亞吉 該位尋佢个奴才，尋到就帶佢等轉來。</verse>
				<verse number="41">所羅門 王聽到 示每 離開 耶路撒冷 、去 迦特 、又轉來个事，</verse>
				<verse number="42">就派人喊佢來，對佢講：「𠊎識喊你指等上主个名發誓，絕對毋離開 耶路撒冷 ，又警告你講，你離開該日就係你死个日仔；你毋係答應愛聽從𠊎嗎？</verse>
				<verse number="43">你做麼介違背自家所發个誓㧯𠊎个命令？</verse>
				<verse number="44">你心肚也當清楚你頭擺對吾爸 大衛 所做个壞事。上主愛因為這壞事責罰你；</verse>
				<verse number="45">總係上主愛賜福給𠊎，使 大衛 个王位永遠堅固。」</verse>
				<verse number="46">所以，王下命令給 耶何耶大 个孻仔 比拿雅 ，佢就去將 示每 㓾掉。恁樣， 所羅門 就完全堅固佢个王國。</verse>
			</chapter>
			<chapter number="3">
				<verse number="1">所羅門 㧯 埃及 王結盟，討 埃及 王个妹仔做𡜵娘。佢吂起自家住个王宮、上主个聖殿㧯 耶路撒冷 周圍个城牆以前，佢一直俾 埃及 公主住在 大衛 城肚。</verse>
				<verse number="2">上主个聖殿還吂起个時，人民在山岡頂獻祭。</verse>
				<verse number="3">所羅門 敬愛上主，照厥爸 大衛 个訓示行事，總係佢還係在逐位山岡頂獻祭燒香。</verse>
				<verse number="4">有一擺， 所羅門 王到 基遍 獻祭，因為該山岡頂个祭壇係最出名个。佢在該位獻 一千隻燒化祭。</verse>
				<verse number="5">該暗晡，上主在夢中向佢顯現，問佢：「你愛求𠊎賜給你麼介？」</verse>
				<verse number="6">所羅門 應講：「你一直用偉大个慈愛款待你个僕人 — 吾爸 大衛 ，因為佢對你忠心、誠實、有正直个心。到這下，你還係用這種偉大个慈愛款待佢，賜給佢一個孻仔今晡日坐在佢个王位。</verse>
				<verse number="7">上主 — 𠊎个上帝啊，雖然僕人還後生，毋知樣般治理國家，總係你俾𠊎承接吾爸 大衛 做王。</verse>
				<verse number="8">僕人在你所揀選个人民當中做王；佢等个人數多到無法度算。</verse>
				<verse number="9">所以，求你賜給僕人有智慧，使𠊎有能力為佢等斷是非、分好壞；若無，𠊎樣般做得統治你恁多个人民？」</verse>
				<verse number="10">主上帝歡喜 所羅門 个祈求，</verse>
				<verse number="11">就對佢講：「因為你無為自家求長壽、求財富、抑係求消滅敵人，反轉求斷是非个智慧，會用公義治理人民，</verse>
				<verse number="12">所以𠊎愛照你所求个給你。𠊎愛賜給你聰明智慧；這係以前个人所無个，以後个人也毋會再有。</verse>
				<verse number="13">你無求个，𠊎也愛賜給你；你一生享受个榮華富貴，在列王中無一個做得㧯你比。</verse>
				<verse number="14">你若順從𠊎，遵行𠊎个法律㧯誡命，像若爸 大衛 共樣，𠊎會賜給你長壽。」</verse>
				<verse number="15">所羅門 睡醒，知上帝在夢中向佢講話。所以佢到 耶路撒冷 去，企在上主个約櫃前，獻燒化祭㧯平安祭，然後擺筵席款待佢所有个官員。</verse>
				<verse number="16">有一日，有兩個妓女來見 所羅門 王，企在佢面前。</verse>
				<verse number="17">一個講：「吾主啊，這婦人家㧯𠊎共下住在一間屋肚；𠊎在屋下𫱔細人仔个時，姖也在該位。</verse>
				<verse number="18">𠊎𫱔一個細孻仔；兩日後姖也𫱔一個細孻仔。這屋肚只有𠊎兩儕，無別人。</verse>
				<verse number="19">有一暗晡，姖無注意，卻磧死自家个細人仔。</verse>
				<verse number="20">姖就半夜䟘起來，在𠊎當好睡个時對吾身邊揇走𠊎个孻仔，放在姖个胸前，然後將姖死掉个細人仔放在𠊎胸前。</verse>
				<verse number="21">第二朝晨，𠊎䟘起來愛給細人仔食乳，發現佢已經死掉；𠊎詳細看，原來這個毋係𠊎𫱔个細人仔。」</verse>
				<verse number="22">另外一個婦人家講：「毋著！還生个細人仔係𠊎个，死个正係你个！」 第一個婦人家應講：「毋著！死个細人仔係你个，還生个正係𠊎个！」 姖等在王面前就恁樣吵來吵去。</verse>
				<verse number="23">所羅門 王心肚想：「姖等兩儕全部講還生个細人仔係自家个，死个係對方个。」</verse>
				<verse number="24">所以佢講：「拿刀仔來！」部下就將刀仔拿來。</verse>
				<verse number="25">王下令講：「將這還生个細人仔剖做兩析，一析給這婦人家，一析給該婦人家。」</verse>
				<verse number="26">該還生个細人仔个阿姆因為惜自家个孻仔，就對王講：「吾主啊，千萬毋好㓾這細人仔！求你將佢交給該婦人家好了！」 總係另外一個婦人家講：「毋使給𠊎，也毋好給姖，將這細人仔剖做兩析！」</verse>
				<verse number="27">所羅門 王講：「毋好㓾這細人仔！將佢交給第一個婦人家，因為姖正係細人仔个阿姆。」</verse>
				<verse number="28">以色列 人民聽到 所羅門 王恁樣个決裁，全部當佩服佢；因為佢等知上帝賜給佢智慧，有能力審判案仔。</verse>
			</chapter>
			<chapter number="4">
				<verse number="1">所羅門 王係全 以色列 个王；</verse>
				<verse number="2">厥官員个名記在下背： 大祭司： 撒督 个孻仔 亞撒利雅 。</verse>
				<verse number="3">王室書記： 示沙 个孻仔 以利何烈 㧯 亞希亞 。 歷史官： 亞希律 个孻仔 約沙法 。</verse>
				<verse number="4">元帥： 耶何耶大 个孻仔 比拿雅 。 祭司： 撒督 㧯 亞比亞他 。</verse>
				<verse number="5">總督長： 拿單 个孻仔 亞撒利雅 。 王室顧問： 拿單 个孻仔祭司 撒布得 。</verse>
				<verse number="6">王宮僕人總管： 亞希煞 。 苦工个總管： 亞比大 个孻仔 亞多尼蘭 。</verse>
				<verse number="7">所羅門 設立十二個人在 以色列 逐所在做地區總督。佢等一定愛對所管个地區供給食物給王㧯王个家族；逐區總督逐年負責一隻月。</verse>
				<verse number="8">這十二地區个總督㧯佢等个管區記在下背： 便‧戶珥 ：管區係 以法蓮 山區。</verse>
				<verse number="9">便‧底甲 ：管區係 瑪加斯 、 沙賓 、 伯‧示麥 、 以倫‧伯‧哈蘭 這兜城。</verse>
				<verse number="10">便‧希悉 ：管區係 亞魯泊 㧯 梭哥 兩城，並全部 希弗 地區。</verse>
				<verse number="11">討 所羅門 妹仔 她法 做𡜵娘个 便‧亞比拿達 ：管區係 多珥 全地。</verse>
				<verse number="12">亞希律 个孻仔 巴拿 ：管區係 他納 、 米吉多 兩城，㧯偎近 伯‧善 、 撒拉旦 、 耶斯列 南片个全部地區，直到 亞伯‧米何拉 城㧯 約念 城。</verse>
				<verse number="13">便‧基別 ：管區係 基列 个 拉末 城，㧯在 基列 屬 瑪拿西 子孫 睚珥 宗族个村莊，㧯 巴珊 个 亞珥歌伯 地區，共六十個大鎮，全部有城牆㧯銅門閂。</verse>
				<verse number="14">易多 个孻仔 亞希拿達 ：管區係 瑪哈念 地區。</verse>
				<verse number="15">討 所羅門 另外一個妹仔 芭實抹 做𡜵娘个 亞希瑪斯 ：管區係 拿弗他利 地區。</verse>
				<verse number="16">戶篩 个孻仔 巴拿 ：管區係 亞設 㧯 比亞錄 鎮。</verse>
				<verse number="17">帕路亞 个孻仔 約沙法 ：管區係 以薩迦 地區。</verse>
				<verse number="18">以拉 个孻仔 示每 ：管區係 便雅憫 地區。</verse>
				<verse number="19">烏利 个孻仔 基別 ：管區係 基列 地區，就係以前 亞摩利 王 西宏 㧯 巴珊 王 噩 管个所在。 除了這十二個地區總督以外，有一個總督長總管全部地區。</verse>
				<verse number="20">猶大 㧯 以色列 个人民像海滣个沙恁多。佢等有食有啉，非常快樂。</verse>
				<verse number="21">所羅門 管理个國家包含對 幼發拉底 河到 非利士 㧯 埃及 邊界所有个國家。 所羅門 在世个日仔，佢等向佢進貢，歸順佢。</verse>
				<verse number="22">所羅門 逐日需要五千公升幼麵粉，一萬公升粗麵粉，</verse>
				<verse number="23">十隻牛欄肚畜个肥牛，二十隻牧場畜个肥牛，一百隻綿羊；另外還有鹿仔、羚羊、黃斑鹿㧯屋下畜个雞仔。</verse>
				<verse number="24">所羅門 統治 幼發拉底 河西片所有个土地，對 幼發拉底 个 提弗薩 直到最西片个 迦薩 城。所有 幼發拉底 河西片个國王全部歸順佢；佢也㧯鄰國和平相處。</verse>
				<verse number="25">所羅門 在世个時，全 猶大 㧯 以色列 个人民全部過太平个日仔，對最北片个 但 到最南片个 別是巴 逐家庭全部有自家个葡萄樹㧯無花果樹。</verse>
				<verse number="26">所羅門 个馬寮肚有四萬隻拖戰車个馬㧯一萬兩千隻騎兵个馬。</verse>
				<verse number="27">該十二個地區个總督逐個月照輪負責供給 所羅門 王㧯王宮肚所需要个食物，從來毋識缺少。</verse>
				<verse number="28">逐地區个總督也供給份內應該繳个大麥㧯燥草給需要个地方，來畜戰馬㧯其他个馬。</verse>
				<verse number="29">上帝賜給 所羅門 盡大个智慧、盡強个理解力、又有像海恁闊个心胸。</verse>
				<verse number="30">所羅門 个智慧超過東方人㧯 埃及 人个智慧。</verse>
				<verse number="31">佢比萬人較有智慧，贏過 以斯拉 人 以探 ，又贏過 瑪曷 个孻仔 希幔 、 甲各 、 達大 。佢个名聲傳到周圍各國。</verse>
				<verse number="32">佢做三千句箴言㧯一千零五首詩歌。</verse>
				<verse number="33">佢講論樹木花草，對 黎巴嫩 个香柏樹到生在牆頂个牛膝草，又講論逐種飛禽、走獸、爬蟲㧯魚類。</verse>
				<verse number="34">世界逐國个王全部聽到 所羅門 个智慧，就派人去聽佢智慧个話。</verse>
			</chapter>
			<chapter number="5">
				<verse number="1">泰爾 王 希蘭 一溜裡係 大衛 个朋友；佢一聽到 所羅門 承接厥爸 大衛 做王，就派人來見 所羅門 。</verse>
				<verse number="2">所羅門 派人去㧯 希蘭 講：</verse>
				<verse number="3">「你知吾爸 大衛 無法度為上主 — 佢个上帝起聖殿，因為佢一直㧯周圍个國家相㓾。佢愛等到上主使佢贏過所有个仇敵以後正做得起聖殿。</verse>
				<verse number="4">這下，上主 — 𠊎个上帝已經使𠊎个天下太平，無仇敵，乜無災禍。</verse>
				<verse number="5">上主識應許吾爸 大衛 講：『𠊎愛該承接你王位个孻仔為𠊎个名起聖殿。』所以，𠊎決定愛起聖殿，來敬拜上主 — 𠊎个上帝。</verse>
				<verse number="6">請你派你个工人到 黎巴嫩 為𠊎斬香柏樹。𠊎這片个工人會㧯佢等共下工作；𠊎也會照你所定个工錢給你个工人。你知，𠊎等毋像你等 西頓 人恁會斬樹仔。」</verse>
				<verse number="7">希蘭 聽到 所羅門 个話，非常歡喜；佢講：「願上主今晡日得到頌讚！佢賜給 大衛 一個有智慧个孻仔治理這偉大个民族！」</verse>
				<verse number="8">所以 希蘭 回答 所羅門 ：「𠊎已經接到你傳來个話；𠊎準備照你个要求供應香柏樹㧯松樹。</verse>
				<verse number="9">𠊎个工人會對 黎巴嫩 將樹料運到海肚，捆做木排，漂到你指定个所在。𠊎个工人會在該位拆開木排，交給你个工人處理。另外，𠊎希望你供應食物給𠊎个家族。」</verse>
				<verse number="10">恁樣， 希蘭 照 所羅門 个要求供給香柏樹㧯松樹；</verse>
				<verse number="11">所羅門 逐年給 希蘭 兩千公噸麥仔㧯四十萬公升 純橄欖油，做佢家族个食物。</verse>
				<verse number="12">上主照佢个應許，賜給 所羅門 智慧。 希蘭 㧯 所羅門 和平相處，彼此立約。</verse>
				<verse number="13">所羅門 王對全 以色列 擇三萬人做苦工，</verse>
				<verse number="14">派 亞多尼蘭 管理佢等。佢將佢等分做三隊，逐隊一萬人。逐隊在 黎巴嫩 一隻月，在屋下兩隻月。</verse>
				<verse number="15">所羅門 也派八萬儕在山頂鑿石頭，七萬儕搬運石頭，</verse>
				<verse number="16">又有三千三百個工頭來監督佢等工作。</verse>
				<verse number="17">佢等照 所羅門 王个命令鑿貴重个大石頭，做聖殿个地基石。</verse>
				<verse number="18">所羅門 㧯 希蘭 个建築工人，還有對 迦巴勒 城來个人鑿石頭，準備石頭㧯樹料起聖殿。</verse>
			</chapter>
			<chapter number="6">
				<verse number="1">以色列 人離開 埃及 以後四百八十年， 所羅門 做 以色列 王第四年二月，就係西弗月， 所羅門 開工起上主个聖殿。</verse>
				<verse number="2">聖殿內部有二十七公尺長，九公尺闊，十三公尺半高。</verse>
				<verse number="3">入門口个門廊有四公尺半深，九公尺闊，㧯聖殿平闊。</verse>
				<verse number="4">聖殿个壁項有窗門；窗門外背細，底背大。</verse>
				<verse number="5">靠等外壁，在聖殿个兩片堘頭㧯後背，起三層樓房，逐層兩公尺兩公寸高。</verse>
				<verse number="6">最下層个樓房逐間有兩公尺兩公寸闊；中央該層个樓房有兩公尺七公寸闊；頂高該層个樓房有三公尺一公寸闊。逐層个聖殿外壁全部比下層較薄，留有崁；恁樣，樓房做得起在崁頂，毋使在壁項鑿孔來放橫樑。</verse>
				<verse number="7">起殿用个石頭係在沙石場鑿好个，所以起聖殿个時聽毋到鎚仔、斧頭㧯其他鐵器个響聲。</verse>
				<verse number="8">樓房最下層 个入口，在聖殿个南片，有樓梯通到第二層㧯第三層。</verse>
				<verse number="9">所羅門 王完成聖殿个建造。佢用香柏樹做樑㧯天花板。</verse>
				<verse number="10">該三層樓房，逐層有兩公尺兩公寸高，係靠等聖殿个外壁起个，也係用香柏樹个樑㧯外壁連共下。</verse>
				<verse number="11">上主對 所羅門 講：</verse>
				<verse number="12">「若係你遵守𠊎个法律誡命，𠊎一定會實現𠊎向若爸 大衛 所講个應許。</verse>
				<verse number="13">𠊎會住在你所起个這聖殿，住在𠊎个子民 以色列 當中，永遠毋會離開佢等。」</verse>
				<verse number="14">恁樣， 所羅門 完成起聖殿个工作。</verse>
				<verse number="15">聖殿內壁，對地面到天花板，全部係用香柏樹个枋仔裝璜个；地泥下係松樹个枋仔鋪等。</verse>
				<verse number="16">有一間內殿，就係至聖所，起在聖殿內肚个後向，長九公尺；對地枋到天花板全部用香柏樹个枋仔隔開。</verse>
				<verse number="17">內殿前向个外殿，就係聖所，長十八公尺。</verse>
				<verse number="18">香柏樹个枋仔全部刻等葫蘆㧯花个圖形。歸間聖殿內部攏總用香柏樹料裝璜，看毋到壁項个石頭。</verse>
				<verse number="19">佢在聖殿內肚个後向準備內殿；上主个約櫃愛安放在該位。</verse>
				<verse number="20">內殿長九公尺，闊九公尺，高九公尺，內肚全部貼純金。香壇用香柏樹个枋仔包等 。</verse>
				<verse number="21">所羅門 用純金貼聖殿个內部，又用金鍊仔掛在內殿个入口；內殿也係貼金仔。</verse>
				<verse number="22">歸間聖殿內部全部貼等金仔，㧯至聖所底背个香壇共樣。</verse>
				<verse number="23">佢用橄欖樹做兩個基路伯放在至聖所，逐個有四公尺四公寸高。</verse>
				<verse number="24">兩個基路伯平大、共樣形狀，全部有兩隻翼胛；逐隻翼胛兩公尺兩公寸長。所以，對這隻翼胛尾到該隻翼胛尾係四公尺四公寸。</verse>
				<verse number="25"></verse>
				<verse number="26"></verse>
				<verse number="27">佢將兩個基路伯並排放在至聖所；恁樣，它兜伸開个翼胛在內殿中央互相接到，另外兩隻翼胛揬到兩片个壁。</verse>
				<verse number="28">這兩個基路伯全部係金仔包个。</verse>
				<verse number="29">內殿㧯外殿个壁項全部有雕刻基路伯、棕樹㧯花。</verse>
				<verse number="30">內殿㧯外殿个地枋面頂也有貼金仔。</verse>
				<verse number="31">至聖所个入口有兩扇橄欖樹做个門。門楣係尖形个 ，</verse>
				<verse number="32">門扇有雕刻基路伯、棕樹㧯花；基路伯㧯棕樹全部係用金仔鑲个。</verse>
				<verse number="33">外殿个入口係橄欖樹做个四角形个門框。</verse>
				<verse number="34">兩扇門係松樹做个，逐扇做得對摺起來。</verse>
				<verse number="35">門扇項刻等基路伯、棕樹㧯花；它兜全部係用金仔鑲个。</verse>
				<verse number="36">佢又用三層石頭隔一層香柏樹个樑起內院。</verse>
				<verse number="37">聖殿个地基係在 所羅門 做王个第四年二月，就係西弗月打好个。</verse>
				<verse number="38">所羅門 在位第十一年八月，就係布勒月，聖殿完全照所計劃个樣式起好。 所羅門 用掉七年个時間完成起聖殿个工程。</verse>
			</chapter>
			<chapter number="7">
				<verse number="1">所羅門 也為自家起一座王宮，用十三年个時間正完工。</verse>
				<verse number="2">黎巴嫩 林宮 長四十四公尺，闊二十二公尺，高十三公尺半；有三行 香柏樹个柱仔，逐行十五支，頂高架等香柏樹个橫樑。天花板也係香柏樹料做个，透到倉庫；倉庫有柱仔撐等。</verse>
				<verse number="3"></verse>
				<verse number="4">兩片个壁項各有三排窗門。</verse>
				<verse number="5">門框㧯窗門 全部係四角形个。這片个三排窗門㧯該片个三排窗門相對。</verse>
				<verse number="6">佢又起圓柱大廳，長二十二公尺，闊十三公尺半，又搭一座有篷仔个走廊，用圓柱撐等。</verse>
				<verse number="7">佢又起寶座廳，另外喊做審判廳，係佢審判案件个地方。廳內對地枋到天花板全部係香柏樹料做个。</verse>
				<verse number="8">在審判廳後背个一個庭院肚有 所羅門 个間房；這間房也起到像其他个建築共樣。 所羅門 也為佢个𡜵娘 — 埃及 公主起共樣个間房。</verse>
				<verse number="9">所有這兜建築㧯大院，對地基到屋簷，全部係用貴重个石頭起个，這兜石頭係對採石場照尺寸打出來、用鋸仔內外兩面整理過个。</verse>
				<verse number="10">地基係用品質盡好个大石頭鋪个，有三公尺半長个，也有四公尺長个。</verse>
				<verse number="11">在這頂高有照尺寸鑿成个石頭㧯香柏樹个樑。</verse>
				<verse number="12">無論大院、聖殿个內院、抑係上主聖殿个門廊全部有三層鑿好个石頭隔一層香柏樹樑个壁。</verse>
				<verse number="13">所羅門 王派人去 泰爾 城喊 戶蘭 來。</verse>
				<verse number="14">厥爸係 泰爾 人，係鑄造銅器个師傅，總係已經死掉；厥姆係 拿弗他利 支族个人。 戶蘭 係非常聰明又有經驗个出名師傅；佢接受 所羅門 王个聘請，負責所有个銅器工程。</verse>
				<verse number="15">戶蘭 鑄造兩支銅柱，逐支高八公尺，周圍五公尺三公寸。</verse>
				<verse number="16">佢也鑄造兩隻銅个柱頭，逐隻高兩公尺兩公寸，安在銅柱頂。</verse>
				<verse number="17">逐支銅柱頭安等一隻辮織个鍊仔圖形，</verse>
				<verse number="18">㧯兩排銅石榴遮等柱頭。</verse>
				<verse number="19">門廊个柱仔頂个柱頭高一公尺八公寸，形狀像百合花，</verse>
				<verse number="20">安在鍊仔圖形頂高。有兩百個石榴分兩排圍等逐支柱頂个柱頭。</verse>
				<verse number="21">戶蘭 將這兩支銅柱頓在聖殿个入門口：南片該支喊做 雅斤 ；北片該支喊做 波阿斯 。</verse>
				<verse number="22">百合花形狀个柱頭安在銅柱頂。恁樣，造銅柱个工程就完成了。</verse>
				<verse number="23">戶蘭 鑄造一個圓个銅海，深兩公尺兩公寸，對這片到該片四公尺四公寸，周圍十三公尺兩公寸。</verse>
				<verse number="24">銅海邊堘个外背係兩排銅葫蘆，這兜銅葫蘆㧯銅海全部係用歸垤銅鑄造个。</verse>
				<verse number="25">銅海安在十二隻銅牛背囊頂；牛頭向外，三隻向東，三隻向西，三隻向南，三隻向北。</verse>
				<verse number="26">銅海賁七公分半，邊堘像杯仔个邊堘，刻有百合花个花瓣。銅海做得裝四萬公升。</verse>
				<verse number="27">戶蘭 又鑄造十隻做得徙來徙去个銅盆座，逐座長一公尺八公寸，闊一公尺八公寸，高一公尺三公寸。</verse>
				<verse number="28">銅盆座係用四角形个鑲板造个；鑲板个邊堘係用框架來固定，</verse>
				<verse number="29">鑲板面頂有獅仔、牛牯㧯基路伯个像。框架外向，就係獅仔㧯牛牯个頂高㧯底下，刻等浮起來个花紋。</verse>
				<verse number="30">逐座有四隻銅輪仔，車心也係銅个。逐座底下有四支銅腳撐等，腳上刻等浮起來个花紋。</verse>
				<verse number="31">盆口最頂高有一隻圓框，高出銅座个最頂高四十五公分，俾銅座遮到个部份有十八公分，周圍全部有雕刻个圖案。</verse>
				<verse number="32">銅盆座个輪仔高六十六公分，在鑲板下背。車心㧯銅盆座全部係用歸垤銅鑄造个。</verse>
				<verse number="33">輪仔个樣式像戰車个輪仔；輪心、輪框、輪徑㧯車心全部係銅鑄造个。</verse>
				<verse number="34">逐座下背有四支腳撐等；這兜腳㧯銅盆座全部係用歸垤銅鑄造个。</verse>
				<verse number="35">逐座面頂有高起來二十二公分个圓圈仔。座个腳、鑲板㧯銅盆座全部係用歸垤銅鑄造个。</verse>
				<verse number="36">腳㧯鑲板刻有獅仔、棕樹㧯基路伯，周圍个框架刻等有浮起來个花紋。</verse>
				<verse number="37">十隻銅盆座就係恁樣鑄造个。逐座外形全部共樣，大細也共樣。</verse>
				<verse number="38">戶蘭 又為銅盆座鑄造十隻銅盆；逐隻銅盆對這片到該片一公尺八公寸，做得裝八百公升。</verse>
				<verse number="39">佢將五隻銅盆座放在聖殿南片，另外五隻放在北片，將銅海放在聖殿个東南片。</verse>
				<verse number="40">戶蘭 也鑄造鑊頭、鑊鏟㧯碗。佢為 所羅門 王完成佢所負責上主聖殿个工程。佢所鑄造个用品列在下背： 兩支銅柱， 安在銅柱頂高个兩隻碗型柱頭， 柱頂辮織个鍊仔个圖形， 四百隻銅石榴 — 逐隻柱頭圖形箍等兩排石榴、一排一百隻， 十隻銅盆座， 十隻銅盆， 銅海， 撐等銅海个十二隻銅牛牯， 鑊頭、鑊鏟㧯碗。 戶蘭 為 所羅門 王鑄造上主聖殿个用品，全部係用銅鑄造磨到金金。</verse>
				<verse number="41"></verse>
				<verse number="42"></verse>
				<verse number="43"></verse>
				<verse number="44"></verse>
				<verse number="45"></verse>
				<verse number="46">這兜東西全部係照王个命令，在 約旦 平原、 疏割 㧯 撒拉旦 中央个鑄造場鑄造个。</verse>
				<verse number="47">所羅門 王無喊人秤這兜銅器；因為數量當多，所以從來毋識算過該兜用品有幾重。</verse>
				<verse number="48">所羅門 也喊人為上主个聖殿製造金器：有金壇、擺設供餅个金桌仔、</verse>
				<verse number="49">放在至聖所頭前个十隻純金燈臺 (五隻在南，五隻在北)、金花、燈、火鉗，</verse>
				<verse number="50">㧯純金盆、燈心剪刀、碗、放香个碟仔、裝火炭个盆仔，並至聖所个門鉸仔㧯聖殿外門个門鉸仔。這兜用品全部係用金仔製造个。</verse>
				<verse number="51">所羅門 王完成上主聖殿所有个工程，就將厥爸 大衛 獻給上主个金銀㧯其他用品全部放在聖殿个倉庫肚。</verse>
			</chapter>
			<chapter number="8">
				<verse number="1">為到愛對 大衛 城 — 就係 錫安 將上主个約櫃請入聖殿， 所羅門 王召集 以色列 該兜長老㧯逐宗族、逐支族該兜族長到 耶路撒冷 。</verse>
				<verse number="2">佢等就在以他念月，就係第七月，搭寮仔節个時聚集到 所羅門 王該位。</verse>
				<verse number="3">當所有个 以色列 長老來到个時，該兜祭司就將約櫃扛起來，</verse>
				<verse number="4">利未 人㧯祭司也將上主个約櫃、聖帳篷並所有个聖用品搬到聖殿前。</verse>
				<verse number="5">所羅門 王㧯全部 以色列 人民聚集在約櫃頭前，獻牛羊做牲儀，數目多到無法度算。</verse>
				<verse number="6">該兜祭司就將上主个約櫃扛入聖殿，放在至聖所兩隻基路伯个翼胛下。</verse>
				<verse number="7">基路伯打開个翼胛遮等約櫃㧯扛約櫃个槓仔。</verse>
				<verse number="8">槓仔當長，企在至聖所頭前个人正做得看到槓仔个兩頭，對其他方向就看毋到。 (這兜槓仔今晡日還在該位。)</verse>
				<verse number="9">約櫃肚只有放等兩垤石版，無其他東西；這兩垤石版係 以色列 人民對 埃及 出來、上主㧯佢等立約个時， 摩西 在 西奈 山將它兜放在約櫃肚个。</verse>
				<verse number="10">該兜祭司離開聖殿个時，忽然間有雲充滿聖殿，</verse>
				<verse number="11">發出上主个榮光，使祭司無辦法繼續在聖殿底背服事。</verse>
				<verse number="12">該時， 所羅門 祈禱講： 「上主啊，你決定愛住在賁賁个烏雲肚。</verse>
				<verse number="13">𠊎已經為你起一座偉大个殿， 做你永遠住个所在。」</verse>
				<verse number="14">以色列 會眾全部企在該位。 所羅門 王轉過身來，面對會眾，為佢等向上帝求福。</verse>
				<verse number="15">佢講：「讚美上主 — 以色列 个上帝！佢親自完成佢向吾爸 大衛 所應許个；佢識親嘴㧯 大衛 講：</verse>
				<verse number="16">『自從𠊎將𠊎个子民帶出 埃及 以來，𠊎無選 以色列 㖠座城來起敬拜𠊎个聖殿；總係𠊎選你 — 大衛 來統治𠊎个子民。』」</verse>
				<verse number="17">所羅門 繼續講：「吾爸 大衛 計劃起聖殿，做敬拜上主 — 以色列 上帝个所在。</verse>
				<verse number="18">毋過上主對佢講：『你想愛為𠊎起聖殿，這心意當好；</verse>
				<verse number="19">總係你做毋得開工，只有你个孻仔 — 你親生个孻仔正做得起𠊎个聖殿。』</verse>
				<verse number="20">「這下上主已經實現佢个應許。𠊎承接吾爸 大衛 做 以色列 个王，又已經起好敬拜上主 — 以色列 上帝个聖殿。</verse>
				<verse number="21">𠊎也在聖殿底背預備好放約櫃个地方。約櫃底背放等立約个石版；這就係上主𢱋𠊎等个祖先出 埃及 時㧯佢等立个約。」</verse>
				<verse number="22">接等， 所羅門 在 以色列 會眾面前企在上主个祭壇前，向天擎起雙手祈禱講：</verse>
				<verse number="23">「上主 — 以色列 个上帝啊，天頂地上無別个神做得㧯你比！你信守你㧯你僕人所立个約：該兜一心一意順服你个，你就愛向佢等顯出慈愛。</verse>
				<verse number="24">你親自完成你向你个僕人 — 吾爸 大衛 个應許，到今晡日，逐隻字、逐句話全部實現了。</verse>
				<verse number="25">上主 — 以色列 个上帝啊，這下𠊎求你也實現你向吾爸所講个其他个應許：你識㧯佢講，若係佢个後代像佢共樣認真遵行你个法律，佢个後代就會永遠有人做 以色列 个王。</verse>
				<verse number="26">所以， 以色列 个上帝啊，求你實現向你个僕人 — 吾爸 大衛 所應許个話。</verse>
				<verse number="27">「上帝啊，你斷真會住在地上嗎？就算天㧯天頂个天也毋罅你住，𠊎所起个這聖殿算麼介呢？</verse>
				<verse number="28">上主 — 𠊎个上帝啊，𠊎係你个僕人；求你聽𠊎个祈禱，聽𠊎今晡日在你面前个求喊。</verse>
				<verse number="29">求你日夜看顧這聖殿；這係你選做敬拜你个所在。你个僕人面對這聖殿祈禱个時，求你聽𠊎个祈求。</verse>
				<verse number="30">你个僕人㧯你个子民 以色列 面對這所在祈禱个時，求你對天頂你住个所在聽𠊎等个祈求，赦免𠊎等。</verse>
				<verse number="31">「若係有人得罪同胞被人告，被人帶到這聖殿 — 你个祭壇前，發誓講佢係無罪个，</verse>
				<verse number="32">上主啊，求你對天頂聽，來審判你个僕人：有罪个，就照佢該得个責罰佢；無罪个，就判佢無罪，還佢清白。</verse>
				<verse number="33">「若係你个子民 以色列 因為得罪你，被敵人打贏，後來又悔改歸向你，尊你个名做大，到這聖殿來，謙卑祈求你个赦免，</verse>
				<verse number="34">求你對天頂聽佢等个祈求，赦免你子民个罪，𢱋佢等轉到你賜給佢等祖先个這垤土地。</verse>
				<verse number="35">「若係有你个子民得罪你，你使天無落雨，後來佢等悔改，尊你个名做大，面對這聖殿，謙卑向你祈禱，</verse>
				<verse number="36">求你對天頂聽佢等个祈求。求你赦免你个僕人 — 以色列 人民个罪，教佢等行正直个路。該時，上主啊，求你落水在你个土地上，就係你賜給你子民做產業个土地。</verse>
				<verse number="37">「若係國內有飢荒、發瘟、燒風、生菇、草蜢、禾蝦，抑係你个子民被仇敵圍困，抑係堵到其他災禍病痛，</verse>
				<verse number="38">求你聽佢等个祈禱。若係你个子民 以色列 中有人感覺有罪、內心憂傷，伸出雙手向這聖殿祈禱，</verse>
				<verse number="39">求你對天頂你住个所在聽佢等个祈求，赦免佢等，又幫助佢等。只有你深知人心。求你照逐儕所做个款待佢等，</verse>
				<verse number="40">使你个子民永遠在你賜給𠊎等祖先个土地上敬畏你。</verse>
				<verse number="41">「若係有一個住在遠方个外族人聽到你个大名㧯大有能力、隨時幫助人个手，就來向這聖殿祈禱，</verse>
				<verse number="42"></verse>
				<verse number="43">求你對天頂你住个所在聽佢个祈求，照佢所求个答應佢，使全世界个人全部像你个子民 以色列 共樣認識你，敬畏你，知𠊎所起个這聖殿就係敬拜你个所在。</verse>
				<verse number="44">「若係你个子民照你个命令上戰場㧯敵人相㓾，無論佢等在麼介地方，面對你所選个這城㧯𠊎為你起个這聖殿祈禱，</verse>
				<verse number="45">求你聽佢等。求你對天頂聽佢等个祈禱，使佢等得勝。</verse>
				<verse number="46">「若係你个子民得罪你 (世上無人係無犯罪个)，你發譴个時准敵人打贏佢等，將佢等捉去別个地方，無論係遠抑係近，</verse>
				<verse number="47">也求你聽你子民个祈禱。若係佢等在該位悔改，向你祈求，承認佢等犯罪、行事邪惡，上主啊，求你聽佢等个祈禱。</verse>
				<verse number="48">若係佢等在該地方誠心誠意悔改，面對你賜給𠊎等祖先个這垤土地向你祈禱，面對你所選个這城㧯𠊎為你起个這聖殿祈禱，</verse>
				<verse number="49">求你聽佢等。求你對天頂你住个所在聽佢等个祈求，憐憫佢等。</verse>
				<verse number="50">求你赦免你个子民，就係該兜得罪你个人，求你赦免佢等所有个過犯，俾仇敵也會憐憫佢等。</verse>
				<verse number="51">佢等係你个子民，係你个產業，係你對 埃及 該鎔鐵个火爐肚𢱋出來个。</verse>
				<verse number="52">「至高个上主啊，願你个目珠永遠看顧你个僕人㧯你个子民 以色列 ，逐擺佢等向你祈求，求你聽佢等个祈禱。就像你𢱋𠊎等个祖先出 埃及 个時，通過你僕人 摩西 所應許个，你對萬民中揀選佢等做你个產業。」</verse>
				<verse number="53"></verse>
				<verse number="54">所羅門 一直跪在祭壇前，擎起雙手祈禱；佢向上主祈禱煞，就企起來。</verse>
				<verse number="55">佢大聲祈求上主賜福給 以色列 全會眾；佢講：</verse>
				<verse number="56">「頌讚上主！佢實現佢个應許，賜平安給佢个子民，通過佢个僕人 摩西 所講个話，一句也無落空。</verse>
				<verse number="57">願上主 — 𠊎等个上帝㧯𠊎等同在，就像佢㧯𠊎等个祖先共下一樣。願佢永遠毋會離開𠊎等，毋會㧒掉𠊎等。</verse>
				<verse number="58">願佢使𠊎等个心歸向佢，使𠊎等能對頭到尾照佢个旨意生活，遵守佢吩咐𠊎等祖先个法律誡命。</verse>
				<verse number="59">𠊎在上主面前祈求个這兜話，願上主 — 𠊎等个上帝日夜紀念；願佢照佢个僕人㧯佢个子民 以色列 逐日个需要憐憫𠊎等。</verse>
				<verse number="60">恁樣，世上个萬民全部正會知，只有上主係上帝，無別个上帝。</verse>
				<verse number="61">願你等大家，就係上帝个子民，永遠對上主 — 𠊎等个上帝忠誠，遵行佢所有个法律㧯誡命，像今晡日恁樣。」</verse>
				<verse number="62">然後， 所羅門 王㧯全 以色列 人民獻牲儀給上主。</verse>
				<verse number="63">所羅門 獻兩萬兩千隻牛㧯十二萬隻羊做平安祭。恁樣，王㧯所有个人民為上主个聖殿舉行奉獻禮。</verse>
				<verse number="64">該日，王也將聖殿頭前庭院中个廣場分別為聖，在該位獻燒化祭、素祭㧯平安祭所用頭牲个油。 所羅門 恁樣做係因為聖殿頭前个銅祭壇忒細，無辦法放恁多个祭物。</verse>
				<verse number="65">所羅門 㧯所有个 以色列 人民在聖殿守搭寮仔節七日，又加七日，總共十四日。民眾遠遠對北方 哈馬 隘口㧯南方个 埃及 邊境逐所在前來參加大會。</verse>
				<verse number="66">節期最後一日 ， 所羅門 喊民眾好轉了；佢等全部為王祝福，歡歡喜喜轉屋下去，因為上主賞賜一切个恩惠給佢个僕人 大衛 㧯佢个子民 以色列 。</verse>
			</chapter>
			<chapter number="9">
				<verse number="1">所羅門 王起上主个聖殿、王宮㧯佢所愛起个其他房屋以後，</verse>
				<verse number="2">上主再一擺向佢顯現，像以前在 基遍 向佢顯現共樣。</verse>
				<verse number="3">上主對佢講：「𠊎已經聽你个祈禱。𠊎將你起个這聖殿分別為聖，成做永遠敬拜𠊎个地方；𠊎會常常在這位看顧它，關心它。</verse>
				<verse number="4">若係你像若爸 大衛 共樣誠心誠意來服事𠊎，遵守𠊎个法律，照𠊎个命令去做，</verse>
				<verse number="5">𠊎一定會堅固你 以色列 个王位，照𠊎向若爸 大衛 所應許个，俾厥後代个王位毋會斷掉，會永遠統治 以色列 。</verse>
				<verse number="6">若係你等㧯你等个後代斡頭離開𠊎，毋遵守𠊎給你等个法律㧯誡命，去敬拜別个神，</verse>
				<verse number="7">𠊎會將𠊎个子民 以色列 對𠊎賜給佢等个土地上豁出去，又㧒掉這座𠊎識分別為聖、成做敬拜𠊎个聖殿。萬民會恥笑 以色列 ，看輕佢等。</verse>
				<verse number="8">這聖殿將來會成做荒埔 ；過路人全部會著驚、嘲謔講：『上主做麼介恁樣款待這國㧯這聖殿呢？』</verse>
				<verse number="9">人會應講：『因為佢等離開上主 — 佢等个上帝。上主識𢱋佢等个祖先對 埃及 出來，佢等反轉去親近、服事、敬拜別个神明，所以上主降這一切災難給佢等。』」</verse>
				<verse number="10">所羅門 用二十年个時間起上主个聖殿㧯王宮。</verse>
				<verse number="11">泰爾 个王 希蘭 供給 所羅門 所需要个香柏樹、松樹㧯工程需要个金仔。完工以後， 所羅門 王就將 加利利 地區个二十座城給 希蘭 。</verse>
				<verse number="12">希蘭 對 泰爾 來看 所羅門 給佢該兜城，當毋滿意，</verse>
				<verse number="13">就對 所羅門 講：「兄弟啊，你給𠊎个這兜城市算麼介？」所以該地區到今晡日還係喊做 迦步勒 。</verse>
				<verse number="14">希蘭 給 所羅門 个金仔大約有四千公斤。</verse>
				<verse number="15">所羅門 王喊工人來起聖殿㧯王宮，又坉平城東个低窩地 ，起 耶路撒冷 城牆。佢也用這兜工人重建 夏瑣 、 米吉多 、㧯 基色 該兜城。</verse>
				<verse number="16">(以前 埃及 王來攻打 基色 ，佔領它，將城內个 迦南 人㓾掉，又放火燒城。後來，厥妹仔嫁給 所羅門 个時，佢就將這城做嫁妝送給厥妹仔。</verse>
				<verse number="17">所羅門 就重建 基色 。) 佢又起下 伯‧和崙 、</verse>
				<verse number="18">巴拉 、 猶大 曠野个 達莫 、</verse>
				<verse number="19">囤貨物个城市、放戰車㧯戰馬个城市，並完成在 耶路撒冷 、 黎巴嫩 㧯國內所有地方佢所愛做个工程。</verse>
				<verse number="20">所羅門 喊个工人係 迦南 人个後代，就係 以色列 人征服 迦南 地个時無㓾淨該兜人个後代。該兜人中有 亞摩利 人、 赫 人、 比利洗 人、 希未 人㧯 耶布斯 人。佢等个後代到這下還係做奴才。</verse>
				<verse number="21"></verse>
				<verse number="22">所羅門 無使 以色列 人做奴才，只有喊佢等做戰士、官長、將軍、軍長、戰車長㧯騎兵。</verse>
				<verse number="23">所羅門 有五百五十個監工，監督工人做各種建築工程。</verse>
				<verse number="24">所羅門 个𡜵娘 — 埃及 王个妹仔，對 大衛 城搬到 所羅門 為姖新起个王宮以後， 所羅門 將城東个低窩地坉平 。</verse>
				<verse number="25">所羅門 一年三擺在佢為上主起个祭壇頂獻燒化祭㧯平安祭。佢也向上主燒香。恁樣，佢完成起聖殿个工程。</verse>
				<verse number="26">所羅門 王又在 以東 地區 紅海 滣頭偎近 以祿 个 以旬‧迦別 造了大船，編成船隊。</verse>
				<verse number="27">希蘭 王派佢有經驗个船員出去，㧯 所羅門 个部下共下行船。</verse>
				<verse number="28">佢等行船到 俄斐 ，對該位得到大約一萬四千公斤个金仔，就運轉來給 所羅門 王。</verse>
			</chapter>
			<chapter number="10">
				<verse number="1">示巴 女王聽到 所羅門 王因為上主賜福得到好名聲，就到 耶路撒冷 來，想用困難个問題來考佢。</verse>
				<verse number="2">姖帶等一大群臣僕，還有一大隊駱駝載等香料、珠寶㧯盡多黃金。姖看到 所羅門 个時，將心中所想到个問題全部拿來問。</verse>
				<verse number="3">所羅門 王一一回答姖所有个問題，無一隻問題考倒佢。</verse>
				<verse number="4">示巴 女王聽到 所羅門 智慧个話，也看到佢所起个王宮，</verse>
				<verse number="5">又看到佢桌頂豐富个食物、厥官員住个屋、王宮僕人个組織㧯所著个制服、斟酒个僕人、㧯聖殿肚獻个燒化祭，歸隻人戇掉去。</verse>
				<verse number="6">姖對 所羅門 王講：「𠊎在自家个國家所聽到有關你个成就㧯智慧全部係斷真个！</verse>
				<verse number="7">𠊎原來毋信，總係直到𠊎來這位，親眼看到這一切正相信。𠊎所聽到个還吂有一半呢！你个智慧㧯財富比別人所㧯𠊎講个超過盡多。</verse>
				<verse number="8">你个𡜵娘細姐 還有福氣噢！服事你个人樣般恁有福氣啊！佢等有好常常在你面前聽你智慧个話！</verse>
				<verse number="9">願上主 — 你个上帝得到讚美！佢設立你做 以色列 个王，表示佢樣般中意你。因為上主永遠痛惜 以色列 ，所以設立你做佢等个王，愛你維護法律，伸張正義。」</verse>
				<verse number="10">示巴 女王將帶來个禮物獻給 所羅門 王：大約有四千公斤重个黃金，盡多香料㧯寶石。 所羅門 王以後，毋識收過恁多个香料。</verse>
				<verse number="11">( 希蘭 个船隊對 俄斐 運金仔來，也運來盡多檀香木㧯寶石。</verse>
				<verse number="12">所羅門 王用這兜檀香木做上主个聖殿㧯王宮个欄杆，也為樂師歌手製造豎琴㧯七弦琴。 以色列 從來毋識進口恁好个檀香木，直到今晡日也毋識看過恁好个。)</verse>
				<verse number="13">所羅門 王也當慨，送 示巴 女王各種禮物，除了照例愛送个禮物以外，凡係 示巴 女王要求个，佢全部給姖。女王㧯姖个臣僕就轉 示巴 去了。</verse>
				<verse number="14">所羅門 王逐年收到兩萬三千公斤个黃金，</verse>
				<verse number="15">另外還有生理人納个稅、貿易稅、 阿拉伯 該兜王進貢个禮物、㧯 以色列 各地區總督獻个禮物。</verse>
				<verse number="16">所羅門 王製造兩百垤大盾牌；逐垤大約用七公斤个金仔打个。</verse>
				<verse number="17">佢又製造三百垤細盾牌；逐垤大約用兩公斤个金仔打个。佢將這兜盾牌放在 黎巴嫩 林宮肚。</verse>
				<verse number="18">所羅門 王又用象牙製造一隻大寶座，用純金包等。</verse>
				<verse number="19">寶座頭前有六層段仔；逐層兩頭各有一座獅仔，總共十二座。寶座个憑背頂係圓形个，兩片个扶手各有一座獅仔。其他國家全部毋識有恁樣个寶座。</verse>
				<verse number="20"></verse>
				<verse number="21">所羅門 王所有个酒杯全部係金仔做个；所有在 黎巴嫩 林宮肚个碗盤全部係純金做个，毋係用銀仔做个；因為在 所羅門 个時代，銀仔毋係貴重个。</verse>
				<verse number="22">所羅門 王有一隊大船，㧯 希蘭 王个船隊共下出海；船隊三年轉來一擺，帶等金銀、象牙、猴仔㧯孔雀轉來。</verse>
				<verse number="23">所羅門 王比世上所有个國王較富有，還較有智慧。</verse>
				<verse number="24">全世界个人全部想愛來見 所羅門 ，愛聽上帝賜給佢智慧个話。</verse>
				<verse number="25">佢等逐年帶禮物給佢，像係金器、銀器、衫褲、武器、香料、馬㧯騾仔。</verse>
				<verse number="26">所羅門 建立一隊有一千四百輛戰車㧯一萬兩千隻戰馬个騎兵隊。佢將一部份安排到 耶路撒冷 ，其他个分駐到逐個城市。</verse>
				<verse number="27">在佢統治期間， 耶路撒冷 个銀幣像石頭恁多，香柏樹也像高原个桑仔樹恁普遍。</verse>
				<verse number="28">所羅門 个生理人對 慕茲黎 㧯 基利家 進口馬仔，</verse>
				<verse number="29">也對 埃及 進口戰車。佢等將馬仔㧯戰車轉賣給 赫 人个王㧯 敘利亞 人个王：戰車一輛六百隻銀幣；馬仔一隻一百五十隻銀幣。</verse>
			</chapter>
			<chapter number="11">
				<verse number="1">所羅門 貪戀當多外國細妹仔。除了 埃及 王个妹仔以外，佢又討 赫 人个細妹仔㧯 摩押 、 亞捫 、 以東 、㧯 西頓 个細妹仔。</verse>
				<verse number="2">上主識命令 以色列 人做毋得㧯這兜外族人通婚，因為姖等會引誘 以色列 人去拜姖等个神明。總係 所羅門 貪戀這兜細妹仔。</verse>
				<verse number="3">佢討七百個公主做𡜵娘，另外又有三百個細姐；姖等使 所羅門 離開上帝。</verse>
				<verse number="4">在 所羅門 年老个時，姖等引誘佢去拜外國个神明；佢無像厥爸 大衛 恁樣對上主 — 佢个上帝忠心。</verse>
				<verse number="5">佢也去拜 西頓 人个 亞斯她錄 女神㧯 亞捫 人邪惡个神 摩洛 。</verse>
				<verse number="6">所羅門 行上主看做邪惡个事，無像厥爸 大衛 恁樣完全順服上主。</verse>
				<verse number="7">佢在 耶路撒冷 東片个山頂起一座祭壇拜 摩押 邪惡个神 基抹 ，又起一座祭壇拜 亞捫 人邪惡个神 摩洛 。</verse>
				<verse number="8">佢又為所有外國討來个𡜵娘細姐起盡多拜偶像个地方，俾姖等做得在該位向自家个神明燒香獻祭。</verse>
				<verse number="9">雖然上主 — 以色列 个上帝識兩擺向 所羅門 顯現，命令佢做毋得拜外國个神明，總係 所羅門 無聽從上主，反轉離開佢。所以上主向 所羅門 發譴，</verse>
				<verse number="10"></verse>
				<verse number="11">對佢講：「因為你故意悖逆𠊎㧯你立个約，毋遵守𠊎个命令，𠊎一定會將你个國搶走，給你个一個大臣。</verse>
				<verse number="12">總係，為到若爸 大衛 个緣故，你還生个時，𠊎毋做這事，愛等到若孻仔做王个時正實行。</verse>
				<verse number="13">總係𠊎毋將歸隻國家對佢手中搶走；為到𠊎僕人 大衛 ，也為到𠊎選立个 耶路撒冷 城，𠊎會留下一個支族給佢。」</verse>
				<verse number="14">所以，上主興起 以東 王後代个 哈達 做 所羅門 个對敵。</verse>
				<verse number="15">在這以前， 大衛 征服 以東 个時， 大衛 軍隊个元帥 約押 識到該位去埋葬戰爭死掉个人。</verse>
				<verse number="16">約押 㧯佢个部下留在 以東 六個月。該站期間，佢等㓾掉 以東 所有个男人，</verse>
				<verse number="17">只有 哈達 㧯厥爸个幾個 以東 僕人逃到 埃及 ，無被人㓾死。 (該時 哈達 還係一個細人仔。)</verse>
				<verse number="18">佢等離開 米甸 到 巴蘭 ，㧯在該位个幾個人會合，然後逃到 埃及 。 埃及 王將田地、房屋賜給 哈達 ，也供給佢食物。</verse>
				<verse number="19">埃及 王中意 哈達 ，甚至將王后 答比妮 个老妹給佢做𡜵娘。</verse>
				<verse number="20">姖㧯 哈達 𫱔一個孻仔，安到 基努拔 。王后養育佢，使佢在王宮底背㧯該兜王子共下住。</verse>
				<verse number="21">哈達 在 埃及 聽到 大衛 過身，元帥 約押 也已經死掉，就對王講：「請俾𠊎轉自家个國家！」</verse>
				<verse number="22">王講：「你在𠊎這位敢有欠麼介？做麼介愛轉你个國家去？」 哈達 應講：「𠊎無欠麼介！只有求王准𠊎轉去！」</verse>
				<verse number="23">上帝也興起 以利亞大 个孻仔 利遜 做 所羅門 个對敵。 利遜 對厥主人 瑣巴 王 哈大底謝 該位逃出來；</verse>
				<verse number="24">佢招一群強盜來，自家做佢等个頭目。 (這事發生在 大衛 打贏 哈大底謝 ，㓾掉佢个 敘利亞 同盟以後。) 利遜 㧯佢个部下去到 大馬士革 ，在該位住。佢个部下擁護佢做王。</verse>
				<verse number="25">所羅門 還生个時， 利遜 㧯 哈達 共樣係 以色列 个對敵， 利遜 增加 以色列 个災禍，又做 亞蘭 人个王。</verse>
				<verse number="26">另外有一個 所羅門 王个對敵，就係王个一個官員， 以法蓮 支族个 洗利達 人， 尼八 个孻仔 耶羅波安 。厥姆係寡婦，安到 洗魯雅 。</verse>
				<verse number="27">以下就係佢造反个經過。 當 所羅門 坉平 耶路撒冷 城東个低窩地 ，並修補厥爸 大衛 城牆个時，</verse>
				<verse number="28">耶羅波安 係一個辦事能力當強个青年人。 所羅門 發現佢工作認真，就派佢監督所有在 瑪拿西 㧯 以法蓮 支族地區个勞工。</verse>
				<verse number="29">有一日， 耶羅波安 對 耶路撒冷 出來， 示羅 人先知 亞希雅 在曠野个路上堵到佢；該時在曠野只有佢兩儕。 亞希雅 著一領新衫，</verse>
				<verse number="30">佢將新衫脫下來，扯做十二垤，</verse>
				<verse number="31">然後對 耶羅波安 講：「你拿十垤去，因為上主 — 以色列 个上帝恁樣講：『𠊎愛將 所羅門 个國扯開來，分十個支族給你。</verse>
				<verse number="32">總係為到𠊎个僕人 大衛 ，也為到𠊎對 以色列 各支族中所選个 耶路撒冷 城个緣故， 所羅門 還做得保留一個支族。</verse>
				<verse number="33">𠊎恁樣做係因為 所羅門 離開𠊎，去拜外國个神明：就係 西頓 个女神 亞斯她錄 、 摩押 神 基抹 、 亞捫 神 摩洛 。 所羅門 悖逆𠊎；佢無行𠊎看做著个事，也無像厥爸 大衛 恁樣遵守𠊎个法律誡命。</verse>
				<verse number="34">總係𠊎毋對佢該位將歸隻國家搶走；𠊎會俾佢在還生个時繼續掌權。𠊎恁樣做係為到𠊎揀選个僕人 大衛 个緣故，因為佢遵守𠊎个法律㧯誡命。</verse>
				<verse number="35">𠊎愛對 所羅門 孻仔个手中將國權搶走，給你十個支族，</verse>
				<verse number="36">總係留一個支族給 所羅門 个孻仔。恁樣，𠊎就永遠有𠊎个僕人 大衛 个後代統治 耶路撒冷 ；這城係𠊎所選立做敬拜𠊎个地方。</verse>
				<verse number="37">耶羅波安 哪，𠊎愛立你做 以色列 个王；你會統治你所希望得到个土地。</verse>
				<verse number="38">若係你完全聽從𠊎，遵行𠊎个道，做𠊎所歡喜个事，遵守𠊎个法律，實行𠊎个命令，像𠊎个僕人 大衛 恁樣，𠊎就永遠㧯你同在。𠊎會使你做 以色列 个王，又使你个後代繼續統治，就像𠊎向 大衛 所做个一樣。</verse>
				<verse number="39">𠊎愛因為 所羅門 个罪責罰 大衛 个後代，總係這責罰毋係永遠个。』」</verse>
				<verse number="40">所以， 所羅門 想辦法愛㓾 耶羅波安 ；總係 耶羅波安 逃到 埃及 王 示撒 該位去，住在 埃及 ，直到 所羅門 過身正轉來。</verse>
				<verse number="41">所羅門 其他个事，無論佢个成就抑係佢个智慧，全部記在《所羅門史》底背。</verse>
				<verse number="42">所羅門 在 耶路撒冷 做王，統治全 以色列 四十年。</verse>
				<verse number="43">佢過身後，葬在厥爸 大衛 个城；佢个孻仔 羅波安 承接佢做王。</verse>
			</chapter>
			<chapter number="12">
				<verse number="1">羅波安 到 示劍 去； 以色列 人全部聚集在該位，愛設立佢做王。</verse>
				<verse number="2">尼八 个孻仔 耶羅波安 因為閃 所羅門 王逃到 埃及 去；佢一聽到 羅波安 做王个消息，就對 埃及 趕轉來 。</verse>
				<verse number="3">北部支族个人民派人去請佢來，然後㧯佢共下去見 羅波安 ，對佢講：</verse>
				<verse number="4">「若爸 所羅門 使𠊎等揹重擔。若係你減輕𠊎等个負擔，俾𠊎等个生活過得去，𠊎等就服事你。」</verse>
				<verse number="5">羅波安 講：「三日以後再過來，𠊎會回答你等。」所以佢等就離開。</verse>
				<verse number="6">羅波安 王問幾個元老个意見；佢等識做過厥爸 所羅門 王个顧問。佢問佢等：「你等想𠊎應該樣般回答這兜人呢？」</verse>
				<verse number="7">佢等講：「若係你想愛好好為人民服務，回答佢等个時愛講好話，佢等就會永遠做你个奴僕。」</verse>
				<verse number="8">總係， 羅波安 毋搭這兜元老个勸話，反轉去尋該兜㧯佢共下大个後生人；佢等這下做佢个顧問。</verse>
				<verse number="9">羅波安 問佢等：「你等有麼介建議？該兜人民要求𠊎減輕佢等个負擔，𠊎應該樣般回答佢等呢？」</verse>
				<verse number="10">佢等講：「你做得恁樣㧯佢等講：『𠊎个手指尾比吾爸个腰身還較粗！</verse>
				<verse number="11">吾爸給你等重擔，𠊎愛給你等還較重个擔頭。吾爸用皮鞭打你等，𠊎愛用帶鉤仔个皮鞭打你等！』」</verse>
				<verse number="12">三日以後， 耶羅波安 㧯所有人民照 羅波安 王个指示，又到佢面前。</verse>
				<verse number="13">王毋聽元老个建議，反轉照後生人个建議對人民講當嚴个話。佢講：「吾爸給你等重擔，𠊎愛給你等還較重个擔頭。吾爸用皮鞭打你等，𠊎愛用帶鉤仔个皮鞭打你等！」</verse>
				<verse number="14"></verse>
				<verse number="15">王毋搭人民个要求；總係這係上主个旨意，愛實現佢通過 示羅 人先知 亞希雅 對 尼八 个孻仔 耶羅波安 所講个話。</verse>
				<verse number="16">以色列 人民看到王毋接納佢等个要求就大聲喊講： 「在 大衛 家𠊎等算麼介？ 耶西 个孻仔對𠊎等有麼介好處？ 以色列 人啊，𠊎等來去轉！ 大衛 家啊，自家保重噢！」 所以， 以色列 人民造反，轉屋下去。</verse>
				<verse number="17">總係住在 猶大 地區个 以色列 人， 羅波安 還係做佢等个王。</verse>
				<verse number="18">羅波安 王派苦工个總管 亞多蘭 到 以色列 人該位去， 以色列 人卻用石頭將佢㧹死。這時， 羅波安 王趕緊上戰車，瀉轉去 耶路撒冷 。</verse>
				<verse number="19">對恁樣，北國 以色列 个人民一直反 大衛 个家族。</verse>
				<verse number="20">以色列 人民聽講 耶羅波安 對 埃及 轉來了，就請佢去赴一個民眾大會，設立佢做 以色列 王。只有 猶大 一支族還係對 大衛 个後代盡忠心。</verse>
				<verse number="21">羅波安 一到 耶路撒冷 就召集 猶大 㧯 便雅憫 支族最優秀个軍隊十八萬人，愛去攻打 以色列 ，搶轉佢 — 所羅門 个孻仔對北部支族个控制。</verse>
				<verse number="22">總係上帝㧯神人 示瑪雅 講：</verse>
				<verse number="23">「你去對 所羅門 个孻仔 猶大 王 羅波安 㧯所有 猶大 、 便雅憫 支族，並其他个人民講：</verse>
				<verse number="24">『上主恁樣講：毋好去攻打你等个兄弟 以色列 人。你等全部轉去！這擺所發生个事係出於𠊎。』」佢等就聽從上主个命令，全部轉屋下去。</verse>
				<verse number="25">以色列 王 耶羅波安 在 以法蓮 山區个 示劍 起防備工事，住在該位一站時間。後來，佢離開該城，又在 比努伊勒 起防備工事。</verse>
				<verse number="26">耶羅波安 心肚想：「照目前个情形看，若係𠊎个人民上 耶路撒冷 去，在該位个聖殿向上主獻祭，佢等會變心去對 猶大 王 羅波安 盡忠，又會來㓾𠊎。恁樣，𠊎个國會歸 大衛 个後代。」</verse>
				<verse number="27"></verse>
				<verse number="28">耶羅波安 王參詳過，就決定鑄造兩隻金牛，然後對人民講：「你等去 耶路撒冷 敬拜忒辛苦了。 以色列 人民啊，這就係𢱋你等出 埃及 个神明！」</verse>
				<verse number="29">耶羅波安 將一隻金牛放在 伯特利 ，另外一隻放在 但 。</verse>
				<verse number="30">這就成做人民犯罪个原因，因為佢等到 伯特利 㧯 但 去拜金牛。</verse>
				<verse number="31">耶羅波安 又在山岡頂起祭拜个神廟，甚至對 利未 支族以外个人選出祭司。</verse>
				<verse number="32">耶羅波安 又定八月十五做宗教節期，像在 猶大 个節期共樣。佢在 伯特利 祭壇頂向佢鑄造个金牛獻祭，又在 伯特利 選立祭司，愛佢等在佢所起个神廟事奉。</verse>
				<verse number="33">耶羅波安 在八月十五，就係佢自家為 以色列 人民選定个節期，去 伯特利 ，在祭壇頂燒香。</verse>
			</chapter>
			<chapter number="13">
				<verse number="1">有一個神人奉上主个命令對 猶大 到 伯特利 去。佢到个時， 耶羅波安 企在祭壇前燒香。</verse>
				<verse number="2">神人照上主个命令罵祭壇講：「祭壇啊，祭壇！上主恁樣講： 大衛 个家族會𫱔一個細孻仔，名安到 約西亞 。佢會將神廟肚該兜祭司，就係在你這祭壇頂燒香个祭司，在你頂高㓾掉，又在你頂高燒人个骨頭。」</verse>
				<verse number="3">該日，神人提出一個兆頭，講：「這祭壇會裂掉，頂高个灰會瀉下來。該時，你就知這話係上主通過𠊎講个。」</verse>
				<verse number="4">耶羅波安 王聽到這話就伸手指等神人下令講：「捉起來！」王个手骨黏時毋會挺動，無辦法跔轉來。</verse>
				<verse number="5">祭壇忽然裂掉，頂高个灰瀉到滿地泥，就像神人奉上主个命令所預言个。</verse>
				<verse number="6">王遽遽對神人講：「請為𠊎向上主 — 你个上帝祈禱，求佢醫治𠊎个手骨！」 神人向上主祈禱，王个手骨就好轉去，像原旦一樣。</verse>
				<verse number="7">所以王對神人講：「請㧯𠊎共下轉屋下，食兜東西！𠊎乜愛送禮物答謝你。」</verse>
				<verse number="8">神人對王講：「就算你將一半个家產給𠊎，𠊎乜毋㧯你去，乜毋㧯你共下啉食；</verse>
				<verse number="9">因為上主命令𠊎，毋好在 伯特利 食麼介、啉麼介，也喊𠊎毋好對原來該條路轉去。」</verse>
				<verse number="10">所以該神人無對佢來 伯特利 个路轉去；佢對另外一條路轉去。</verse>
				<verse number="11">該時，有一個老先知住在 伯特利 。佢該兜孻仔來㧯佢講有關 猶大 來个神人在 伯特利 所做个事並佢對 耶羅波安 王所講个話。</verse>
				<verse number="12">老先知就問佢等：「佢係對㖠條路轉去？」該兜孻仔就指給佢看 猶大 來个神人行㖠條路轉去。</verse>
				<verse number="13">佢喊佢等為佢預備驢仔；佢等照阿爸个話去做。老先知就騎上驢仔，</verse>
				<verse number="14">向該條路去追 猶大 來个神人。佢尋到該神人坐在一頭橡樹下，就問佢：「你係對 猶大 來个神人麼？」 該人應講：「係！」</verse>
				<verse number="15">老先知講：「請㧯𠊎轉屋下食飯！」</verse>
				<verse number="16">神人講：「𠊎做毋得㧯你共下轉去，也做毋得在這位㧯你共下啉食；</verse>
				<verse number="17">因為上主識命令𠊎，毋好在 伯特利 食麼介、啉麼介，也喊𠊎毋好對原來該條路轉去。」</verse>
				<verse number="18">老先知對佢講：「𠊎也係先知，㧯你共樣。有一位天使奉上主个命令㧯𠊎講，愛𠊎帶你共下轉屋下，請你共下啉食。」其實，這老先知係講花撩。</verse>
				<verse number="19">所以，神人㧯老先知共下轉去，在厥屋下共下食飯啉水。</verse>
				<verse number="20">佢等堵堵坐桌个時，上主个話臨到老先知。</verse>
				<verse number="21">佢就對 猶大 來个神人喊講：「上主恁樣講：『你毋聽從上主个話，無照上主 — 你上帝个命令做，</verse>
				<verse number="22">你樣做得轉來，在𠊎毋准你啉食个地方啉食。所以，你會死掉，你个身屍也毋會葬在你家族个墳墓肚。』」</verse>
				<verse number="23">佢等食啉以後，老先知為 猶大 來个神人預備驢仔，</verse>
				<verse number="24">佢就上路。在路上有一隻獅仔堵到佢，將佢咬死掉，身屍橫在路上；驢仔㧯獅仔企在身屍堘頭。</verse>
				<verse number="25">有人對該位經過，看到身屍橫在路上，獅仔企在堘頭，就到 伯特利 去，將所看到个事傳出去。</verse>
				<verse number="26">老先知聽到，就講：「該係毋聽從上主命令个神人；就像上主講過个，上主喊獅仔扯裂佢，咬死佢。」</verse>
				<verse number="27">所以佢對該兜孻仔講：「為𠊎預備驢仔。」佢等照佢个話去做。</verse>
				<verse number="28">佢騎上驢仔出門去，看到該神人个身屍橫在路上，驢仔㧯獅仔還企在身屍堘頭。獅仔無食身屍，也無扯裂驢仔。</verse>
				<verse number="29">所以老先知將神人个身屍搬上驢背，帶轉 伯特利 ，為佢傷心流目汁，也將佢埋葬。</verse>
				<verse number="30">老先知將身屍葬在自家家族个墳墓肚；佢㧯佢該兜孻仔對等身屍傷心流目汁講：「哀哉，𠊎个兄弟啊！」</verse>
				<verse number="31">埋葬以後，老先知對該兜孻仔講：「以後𠊎死掉，將𠊎葬在這墳墓肚，將𠊎个身屍放在神人个塍頭。</verse>
				<verse number="32">佢奉上主命令攻擊 伯特利 祭壇㧯所有在 撒馬利亞 城鎮該兜神廟个話一定會實現。」</verse>
				<verse number="33">這事以後， 以色列 个王 耶羅波安 還係毋離開佢邪惡个道路，繼續對普通个家族中選祭司在山岡頂个祭壇事奉。佢隨便封立所有願意做祭司个人做山岡頂祭壇个祭司。</verse>
				<verse number="34">耶羅波安 所犯个罪使佢个王朝衰敗，致到在地上完全滅亡。</verse>
			</chapter>
			<chapter number="14">
				<verse number="1">該時， 耶羅波安 个孻仔 亞比雅 發病。</verse>
				<verse number="2">耶羅波安 對厥𡜵娘講：「你改裝一下，俾別人認毋出你係 耶羅波安 个𡜵娘，然後到 示羅 去。先知 亞希雅 住在該位；佢識講𠊎會做 以色列 人个王。</verse>
				<verse number="3">你愛帶給佢十垤餅，一些仔薄餅，㧯一罐蜂糖。佢會㧯你講，𠊎等个孻仔會樣般。」</verse>
				<verse number="4">所以， 耶羅波安 个𡜵娘到 示羅 、 亞希雅 个屋下去。 亞希雅 已經年老，目珠看毋到。</verse>
				<verse number="5">上主先㧯佢講， 耶羅波安 个𡜵娘會因為孻仔發病來求問佢；上主也指示佢應該講个話。 耶羅波安 个𡜵娘到个時，姖改裝變像另外一個人。</verse>
				<verse number="6">總係 亞希雅 聽到姖个腳步聲到門口，就講：「 耶羅波安 个𡜵娘，落來啊！你做麼介愛改裝做另外一個人呢？𠊎奉命將壞消息㧯你講。</verse>
				<verse number="7">去㧯 耶羅波安 講，上主 — 以色列 个上帝恁樣講：『𠊎對人民中揀選你，設立你做𠊎 以色列 子民个統治者。</verse>
				<verse number="8">𠊎對 大衛 个後代將國權搶過來賜給你；總係你無像𠊎僕人 大衛 恁樣一心一意對𠊎忠心，聽從𠊎个命令，單淨做𠊎看做著个事。</verse>
				<verse number="9">你比你以前个統治者犯還較大个罪。你違背𠊎，為自家設立別个神，又鑄造偶像來拜，惹𠊎發譴。</verse>
				<verse number="10">所以， 耶羅波安 啊，𠊎愛降災禍給你个家族；𠊎愛將所有屬你个男人，無論自由身个抑係無自由身个，全部對 以色列 中㓾淨淨。𠊎愛除滅你个家族，就像人將垃圾掃掉一樣。</verse>
				<verse number="11">你屋下所有个人，死在城肚个一定會被狗仔食掉，死在山野个一定會被鳥仔食掉。𠊎係上主；這係𠊎所講个。』」</verse>
				<verse number="12">亞希雅 繼續對 耶羅波安 个𡜵娘講：「你好轉屋下去了！你一入城，你个孻仔就會死掉。</verse>
				<verse number="13">以色列 全國个人民會為佢傷心流目汁，將佢埋葬。佢係 耶羅波安 家族當中惟一有人埋葬个，因為只有佢係上主 — 以色列 个上帝所歡喜个。</verse>
				<verse number="14">上主愛設立一個王統治 以色列 ；這王會結束 耶羅波安 个王朝，其實這下就係該時節了！</verse>
				<verse number="15">上主愛責罰 以色列 ，搖動它，像細河壩肚个蘆竹搖來搖去。佢愛將 以色列 人民對佢賜給佢等祖先這垤當好个土地上挷起來，將佢等分散到 幼發拉底 河該片去，因為佢等製造 亞舍拉 女神个像，惹上主發譴。</verse>
				<verse number="16">上主愛㧒掉 以色列 ；因為 耶羅波安 犯罪，也使 以色列 人民陷在罪惡當中。」</verse>
				<verse number="17">耶羅波安 个𡜵娘轉到 得撒 ，一入家門，細人仔就死掉。</verse>
				<verse number="18">以色列 人民為這細人仔傷心流目汁，將佢埋葬，就像上主通過佢个僕人先知 亞希雅 所講个。</verse>
				<verse number="19">耶羅波安 其他个事，佢樣般相㓾㧯統治，全部記在《 以色列 列王史》底背。</verse>
				<verse number="20">耶羅波安 做王二十二年，然後死掉。佢个孻仔 拿答 承接佢做王。</verse>
				<verse number="21">所羅門 个孻仔 羅波安 做 猶大 王个時，係四十一歲。佢在 耶路撒冷 統治十七年；這城係上主對 以色列 逐支族當中選出來做敬拜佢个地方。 羅波安 个阿姆名安到 拿瑪 ，係 亞捫 人。</verse>
				<verse number="22">猶大 个人民行上主看做邪惡个事，比佢等个祖先所做个還較惹佢發譴。</verse>
				<verse number="23">佢等在逐座山岡頂㧯逐頭大樹下為假神起神廟，又頓石柱㧯 亞舍拉 女神像來拜。</verse>
				<verse number="24">最可惡个係在國內个神廟有男娼。 猶大 人民做這一切可惡个事，就像 以色列 人入去這地以前該兜被上主逐走个外族人所做个。</verse>
				<verse number="25">羅波安 在位个第五年， 埃及 王 示撒 來攻打 耶路撒冷 。</verse>
				<verse number="26">佢將上主个聖殿㧯王宮所有个寶物全部搶走，包含 所羅門 製造个金盾牌。</verse>
				<verse number="27">羅波安 王為到補這兜金盾牌，就造銅盾牌，將它兜交給看守王宮大門个守衛長管理。</verse>
				<verse number="28">王逐擺到聖殿去个時，守衛就拿等這兜盾牌，事後又放轉守衛室。</verse>
				<verse number="29">羅波安 其他个事全部記在《 猶大 列王史》底背。</verse>
				<verse number="30">這站期間， 羅波安 㧯 耶羅波安 常常戰爭。</verse>
				<verse number="31">羅波安 死掉，葬在 大衛 城个王室墳墓肚。厥姆安到 拿瑪 ，係 亞捫 人；厥孻仔 亞比雅 承接佢做王。</verse>
			</chapter>
			<chapter number="15">
				<verse number="1">以色列 王 耶羅波安 在位个第十八年， 亞比雅 做 猶大 王。</verse>
				<verse number="2">佢在 耶路撒冷 統治三年。厥姆安到 瑪迦 ，係 押沙龍 个妹仔 。</verse>
				<verse number="3">佢犯到㧯厥爸共樣个罪，無像厥太 大衛 恁樣一心一意在上主 — 佢个上帝面前忠心。</verse>
				<verse number="4">總係為到 大衛 个緣故，上主 — 佢个上帝給 亞比雅 一個孻仔，來承接佢做王，使 大衛 个王朝在 耶路撒冷 毋會斷掉，又堅固 耶路撒冷 个安全。</verse>
				<verse number="5">上主恁樣做係因為 大衛 行上主看做著个事；除了 赫 人 烏利亞 該件事， 大衛 一生人毋識違背上主个命令。</verse>
				<verse number="6">亞比雅 還生个時， 羅波安 㧯 耶羅波安 常常戰爭。</verse>
				<verse number="7">亞比雅 其他个事全部記在《 猶大 列王史》底背。 亞比雅 㧯 耶羅波安 常常戰爭。</verse>
				<verse number="8">亞比雅 死掉，葬在 大衛 城。佢个孻仔 亞撒 承接佢做王。</verse>
				<verse number="9">以色列 王 耶羅波安 在位个第二十年， 亞撒 做 猶大 王。</verse>
				<verse number="10">佢在 耶路撒冷 統治四十一年。厥婆安到 瑪迦 ，係 押沙龍 个妹仔。</verse>
				<verse number="11">亞撒 像厥祖先 大衛 恁樣行上主看做著个事。</verse>
				<verse number="12">佢將所有在神廟肚个男娼全部逐出去國外，又將厥祖先所造个偶像全部除掉。</verse>
				<verse number="13">佢廢掉厥婆 瑪迦 太后个名份，因為太后為 亞舍拉 女神造邪淫个柱像。 亞撒 將女神像斬斷，在 汲淪 溪滣燒掉。</verse>
				<verse number="14">雖然 亞撒 無將所有在山岡頂个神廟廢掉，總係佢一生人一心一意在上主面前忠心。</verse>
				<verse number="15">佢將厥爸㧯自家奉獻給上主个東西，就係金銀㧯用品，全部放在聖殿肚。</verse>
				<verse number="16">猶大 王 亞撒 㧯 以色列 王 巴沙 在位个期間，常常戰爭。</verse>
				<verse number="17">巴沙 愛攻打 猶大 ，就修建 拉瑪 做防衛城，目的係愛切斷出入 猶大 所有个交通。</verse>
				<verse number="18">所以 亞撒 將聖殿㧯王宮寶庫還賸个金仔㧯銀仔全部拿走，交給佢个大臣，帶去 大馬士革 ，到 他伯利門 个孻仔、 希旬 个孫仔 敘利亞 王 便‧哈達 該位。 亞撒 个大臣帶佢个話去，講：</verse>
				<verse number="19">「若爸㧯吾爸以前係同盟，𠊎等也來立約做同盟。這兜金仔㧯銀仔係送給你个禮物。請將你㧯 以色列 王 巴沙 个盟約廢掉，佢正會對𠊎个土地將軍隊撤走。」</verse>
				<verse number="20">便‧哈達 同意 亞撒 王个建議，就派佢个元帥去攻打 以色列 个城市。佢等佔領 以雲 、 但 、 亞伯‧伯‧瑪迦 、 加利利 湖附近个地區、㧯 拿弗他利 全地。</verse>
				<verse number="21">巴沙 聽到所發生个事，就黏時停止修建 拉瑪 个工程，退轉 得撒 去。</verse>
				<verse number="22">所以， 亞撒 王向全 猶大 發出命令，規定逐儕全部愛來協助將 巴沙 用來修建 拉瑪 个石頭㧯樹料運走，毋准有人推辭。 亞撒 王用這兜材料在 米斯巴 㧯 便雅憫 个 迦巴 起防衛城。</verse>
				<verse number="23">亞撒 其他个事，佢个勇敢㧯建設城市个功勞，全部記在《 猶大 列王史》底背。佢年老个時，因為腳發病變做跛腳。</verse>
				<verse number="24">亞撒 死後，葬在 大衛 城个王室墳墓肚。佢个孻仔 約沙法 承接佢做王。</verse>
				<verse number="25">猶大 王 亞撒 在位个第二年， 耶羅波安 个孻仔 拿答 做 以色列 王。佢統治 以色列 兩年。</verse>
				<verse number="26">佢像厥爸共樣犯罪，行上主看做邪惡个事，害 以色列 人陷在罪惡當中。</verse>
				<verse number="27">以薩迦 族人 亞希雅 个孻仔 巴沙 造反 拿答 ，在 拿答 㧯佢个軍隊圍困 非利士 个 基比頓 城个時， 巴沙 將佢㓾掉。</verse>
				<verse number="28">這事發生在 猶大 王 亞撒 在位个第三年。 巴沙 承接 拿答 做 以色列 王；</verse>
				<verse number="29">佢一做王就將 耶羅波安 家族个人㓾淨淨。照上主通過佢僕人 示羅 人 亞希雅 先知所講个， 耶羅波安 家族个人全部被人㓾死，無留一個。</verse>
				<verse number="30">這係因為 耶羅波安 自家犯罪，又害 以色列 人陷在罪惡當中，惹上主 — 以色列 个上帝發譴。</verse>
				<verse number="31">拿答 其他个事全部記在《 以色列 列王史》底背。</verse>
				<verse number="32">猶大 王 亞撒 㧯 以色列 王 巴沙 在位期間，常常戰爭。</verse>
				<verse number="33">猶大 王 亞撒 在位个第三年， 亞希雅 个孻仔 巴沙 做 以色列 个王。佢在 得撒 統治二十四年。</verse>
				<verse number="34">佢像 耶羅波安 共樣犯罪，行上主看做邪惡个事，害 以色列 人陷在罪惡當中。</verse>
			</chapter>
			<chapter number="16">
				<verse number="1">上主對 哈拿尼 个孻仔先知 耶戶 講話，愛佢將以下个消息㧯 巴沙 講：</verse>
				<verse number="2">「𠊎對泥粉中將你提升，設立你做𠊎个子民 以色列 个領袖。你反轉犯罪，像 耶羅波安 共樣，害𠊎个子民陷在罪惡當中。佢等个罪惹𠊎發譴，</verse>
				<verse number="3">所以𠊎愛除滅你㧯你个家族，像𠊎對待 耶羅波安 个家族共樣。</verse>
				<verse number="4">你屋下所有个人，死在城肚个一定會被狗仔食掉，死在山野个一定會被鳥仔食掉。」</verse>
				<verse number="5">巴沙 其他个事，㧯佢英勇个所做，全部記在《 以色列 列王史》底背。</verse>
				<verse number="6">巴沙 死後葬在 得撒 。佢个孻仔 以拉 承接佢做王。</verse>
				<verse number="7">哈拿尼 个孻仔先知 耶戶 講出上主責備 巴沙 㧯佢家族个話，因為 巴沙 犯罪，行上主看做邪惡个事。佢惹上主發譴，因為佢㧯 耶羅波安 家族共樣行邪惡个事，也因為佢㓾掉 耶羅波安 家族所有个人。</verse>
				<verse number="8">猶大 王 亞撒 在位第二十六年， 巴沙 个孻仔 以拉 做 以色列 王。佢在 得撒 統治兩年。</verse>
				<verse number="9">有一個軍官 心利 ，佢指揮王室一半个戰車，想愛造反。當王在 得撒 管理王宮事務大臣 亞雜 屋下食酒醉个時，</verse>
				<verse number="10">心利 入去屋肚，將 以拉 㓾死，篡佢个王位。這事發生在 猶大 王 亞撒 在位第二十七年。</verse>
				<verse number="11">心利 一坐王位就將 巴沙 全家个人㓾掉，連佢个親戚㧯朋友，凡係男人也全部㓾死。</verse>
				<verse number="12">心利 㓾掉 巴沙 全家，這事係應驗上主通過先知 耶戶 責備 巴沙 个話。</verse>
				<verse number="13">因為 巴沙 㧯厥孻仔 以拉 拜偶像，又害 以色列 人犯罪，佢等就惹上主 — 以色列 个上帝發譴。</verse>
				<verse number="14">以拉 其他个事全部記在《 以色列 列王史》底背。</verse>
				<verse number="15">猶大 王 亞撒 在位第二十七年， 心利 在 得撒 做王七日。該時， 以色列 个軍隊堵好在該位安營圍攻 非利士 个 基比頓 城。</verse>
				<verse number="16">佢等聽到 心利 造反，㓾掉王，佢等當日就在營肚立元帥 暗利 做 以色列 王。</verse>
				<verse number="17">暗利 㧯佢个軍隊離開 基比頓 轉去圍攻 得撒 。</verse>
				<verse number="18">心利 看到城已經被人佔領，就入王宮內个城堡，放火燒王宮，將自家燒死。</verse>
				<verse number="19">這係因為 心利 犯罪，行上主看做邪惡个事。佢像 耶羅波安 共樣毋單淨自家犯罪，又害 以色列 人犯罪，惹上主發譴。</verse>
				<verse number="20">心利 其他个事，包含佢陰謀造反王个經過，全部記在《 以色列 列王史》底背。</verse>
				<verse number="21">以色列 人民分做兩派：一派愛設立 基納 个孻仔 提比尼 做王，另外一派擁護 暗利 。</verse>
				<verse number="22">最後，該兜擁護 暗利 个人贏了。 提比尼 死掉， 暗利 就做王。</verse>
				<verse number="23">猶大 王 亞撒 在位个第三十一年， 暗利 做 以色列 王。佢在位十二年，前六年在 得撒 。</verse>
				<verse number="24">後來，佢用六千隻銀幣 對一個名喊 撒馬 个人該位將 撒馬利亞 山買過來。 暗利 在這山頂起一座城，照這山原主 撒馬 个名㧯它安到 撒馬利亞 。</verse>
				<verse number="25">暗利 比佢以前所有个王犯還較重个罪，行上主看做邪惡个事。</verse>
				<verse number="26">佢像 耶羅波安 共樣，毋單淨自家犯罪，又害 以色列 人犯罪，拜偶像，惹上主 — 以色列 个上帝發譴。</verse>
				<verse number="27">暗利 其他个事㧯佢勇敢个行為全部記在《 以色列 列王史》底背。</verse>
				<verse number="28">暗利 死掉以後葬在 撒馬利亞 。佢个孻仔 亞哈 承接佢做王。</verse>
				<verse number="29">猶大 王 亞撒 在位第三十八年， 暗利 个孻仔 亞哈 做 以色列 王。佢在 撒馬利亞 統治二十二年。</verse>
				<verse number="30">亞哈 犯罪，行上主看做邪惡个事，比佢以前所有个王還較厲害。</verse>
				<verse number="31">佢所犯个罪比 耶羅波安 王還較重，佢又討 西頓 王 謁巴力 个妹仔 耶洗碧 做𡜵娘，還去拜 巴力 。</verse>
				<verse number="32">佢在 撒馬利亞 起 巴力 个廟，在廟肚為 巴力 起一座祭壇。</verse>
				<verse number="33">亞哈 又頓一支 亞舍拉 女神个柱像來拜。佢所犯个罪比佢以前所有个 以色列 王還較重，惹上主 — 以色列 个上帝發譴。</verse>
				<verse number="34">佢在位个時， 伯特利 人 希伊勒 重建 耶利哥 城。照上主通過 嫩 个孻仔 約書亞 所講个預言， 希伊勒 在 耶利哥 城打地基个時，大个孻仔 亞比蘭 死掉；當佢安城門个時，細个孻仔 西割 死掉。</verse>
			</chapter>
			<chapter number="17">
				<verse number="1">有一個先知名喊 以利亞 ，係 基列 个 提斯比 人。佢對 亞哈 王講：「𠊎指等𠊎所服事永生个上主 — 以色列 个上帝發誓：這幾年內，𠊎若無講，天就毋會落雨，也毋會降露水。」</verse>
				<verse number="2">上主對 以利亞 講：</verse>
				<verse number="3">「你離開這位，向東行，到 約旦 河東片个 基立 溪附近囥起來。</verse>
				<verse number="4">你做得啉溪肚个水；𠊎已經命令烏鴉送食物到該位給你食。」</verse>
				<verse number="5">以利亞 聽從上主个命令去住在 約旦 河東片个 基立 溪附近。</verse>
				<verse number="6">佢啉溪肚个水；烏鴉逐日朝晨㧯臨暗仔就送餅仔㧯肉來給佢。</verse>
				<verse number="7">過一站時間，因為無落雨，溪肚个水全部燥掉。</verse>
				<verse number="8">所以，上主對 以利亞 講：</verse>
				<verse number="9">「你到 西頓 附近个 撒勒法 去，住在該位。𠊎已經吩咐住在該位个一個寡婦供給你食物。」</verse>
				<verse number="10">以利亞 就去 撒勒法 。來到城門口个時，佢看到一個寡婦在該位拈柴。佢就喊姖講：「拜託你用罌仔裝兜水俾𠊎食。」</verse>
				<verse number="11">寡婦愛去拿水个時， 以利亞 喊姖，講：「拜託也帶兜餅仔給𠊎！」</verse>
				<verse number="12">寡婦講：「𠊎對永生上主 — 你个上帝發誓，𠊎無餅仔。𠊎只有賸罌肚一揢麵粉㧯罐肚一些仔橄欖油。𠊎到這位來拈兜仔柴，愛帶轉屋下去做餅，給𠊎兩子𡟓食；食掉後，𠊎等只有等死！」</verse>
				<verse number="13">以利亞 對姖講：「毋使驚！照你所講个去做！總係先做一垤細餅仔，拿來給𠊎食，然後正做兜仔給你㧯若孻仔食，</verse>
				<verse number="14">因為上主 — 以色列 个上帝恁樣講：『直到𠊎 — 上主落雨該日，裝麵粉个罌仔毋會見底，罐肚个油也毋會用淨淨。』」</verse>
				<verse number="15">寡婦就去，照 以利亞 吩咐个話去做。佢等大家全部有好食，又食盡久。</verse>
				<verse number="16">就像上主通過 以利亞 所應許个，裝麵粉个罌仔無見底，罐肚个油也無用淨淨。</verse>
				<verse number="17">過一站時間，寡婦个孻仔發病仔，越來越嚴重，後來病到死掉。</verse>
				<verse number="18">寡婦對 以利亞 講：「神人哪，你做麼介恁樣對待𠊎？你到這位來係愛使上帝想起𠊎个罪，使𠊎个孻仔死掉係麼？」</verse>
				<verse number="19">以利亞 講：「將細人仔交給𠊎！」佢對寡婦懷中將細人仔揇過來，帶到樓頂佢住个房間，放在眠床頂。</verse>
				<verse number="20">然後 以利亞 大聲祈禱：「上主 — 𠊎个上帝啊，你做麼介降災禍給這寡婦呢？𠊎借厥屋下歇，你樣愛使姖个孻仔死掉呢？」</verse>
				<verse number="21">以利亞 三擺伏在細人仔身上，祈求講：「上主 — 𠊎个上帝啊，求你使這細人仔返生！」</verse>
				<verse number="22">上主聽 以利亞 个祈禱，細人仔个靈魂就轉到佢个身體，佢就返生過來。</verse>
				<verse number="23">以利亞 將細人仔對樓頂揇下來，入到屋肚 交給厥姆，對姖講：「看哪，若孻仔返生了！」</verse>
				<verse number="24">寡婦對 以利亞 講：「這下𠊎確實知你係神人；上主通過你講个話全部係真實个！」</verse>
			</chapter>
			<chapter number="18">
				<verse number="1">過盡久以後，天旱第三年，上主對 以利亞 講：「你去見 亞哈 王，𠊎愛落雨在地上了。」</verse>
				<verse number="2">以利亞 就去，愛見 亞哈 王。 該時， 撒馬利亞 个飢荒非常嚴重；</verse>
				<verse number="3">亞哈 喊管理王宮事務个 俄巴底 來。 ( 俄巴底 係虔誠敬畏上主个人。</verse>
				<verse number="4">耶洗碧 㓾上主个先知該時， 俄巴底 救出一百個先知，將佢等分做兩組，逐組五十儕，囥在山窿肚，又供給佢等食物㧯水。)</verse>
				<verse number="5">亞哈 對 俄巴底 講：「𠊎等到國內所有个泉源㧯山壢去尋，看尋得到青草來畜馬仔㧯騾仔麼；𠊎等就毋使㓾掉這兜頭牲。」</verse>
				<verse number="6">所以佢等同意分開到無共樣个方向㧯地區去打探。</verse>
				<verse number="7">在路上， 俄巴底 堵到 以利亞 。佢認出係 以利亞 ，就伏在地上，問：「你斷真係𠊎个主 以利亞 麼？」</verse>
				<verse number="8">以利亞 講：「係！你去㧯王 — 你个主人講， 以利亞 在這位。」</verse>
				<verse number="9">俄巴底 講：「僕人犯麼介罪，你樣愛將𠊎交給 亞哈 ，俾佢㓾𠊎呢？</verse>
				<verse number="10">𠊎對永生上主 — 你个上帝發誓，無論㖠邦、㖠國，𠊎个主人攏總派人去尋你。若係有人講你無在該位，佢就愛喊該邦該國个人發誓講，斷真尋你毋到。</verse>
				<verse number="11">這下你樣般對𠊎講：『去㧯你个主人講， 以利亞 在這位！』</verse>
				<verse number="12">在𠊎離開以後，若係上主个靈帶你到另外一個𠊎毋知个地方，𠊎又㧯 亞哈 講你在這位，佢尋毋到你，一定會㓾死𠊎。你愛知，僕人從細就係虔誠敬畏上主个人。</verse>
				<verse number="13">敢無人㧯吾主講， 耶洗碧 㓾上主个先知該時，𠊎將一百個先知囥在山窿肚？𠊎將佢等分做兩組囥起來，逐組五十儕，𠊎供給佢等食物㧯水。</verse>
				<verse number="14">這下你講：『去㧯你个主人講， 以利亞 在這位！』佢一定會㓾死𠊎！」</verse>
				<verse number="15">以利亞 講：「𠊎指等𠊎所服事个上主 — 萬軍个元帥發誓，今晡日𠊎一定愛俾王看到𠊎。」</verse>
				<verse number="16">所以， 俄巴底 到 亞哈 王該位去報告， 亞哈 就去見 以利亞 。</verse>
				<verse number="17">亞哈 看到 以利亞 就講：「㩢衰 以色列 个就係你麼？」</verse>
				<verse number="18">以利亞 講：「毋係𠊎㩢衰 以色列 ；係你㧯若爸个家族！你等違背上主个命令，去跈 巴力 。</verse>
				<verse number="19">這下，去召集所有个 以色列 人到 迦密 山見𠊎，又愛帶等 耶洗碧 王后所畜个四百五十個 巴力 个先知㧯四百個 亞舍拉 女神个先知共下來。」</verse>
				<verse number="20">所以， 亞哈 召集所有个 以色列 人㧯 巴力 該兜先知上 迦密 山。</verse>
				<verse number="21">以利亞 企出來，對人民講：「你等三心兩意愛到幾時呢？若上主係上帝，就愛拜上主；若 巴力 係上帝，就拜 巴力 ！」總係人民一句話也毋講。</verse>
				<verse number="22">以利亞 又講：「上主个先知只賸到𠊎一儕，總係 巴力 有四百五十個先知。</verse>
				<verse number="23">你等帶兩隻牛牯來，俾 巴力 个先知先擇一隻，喊佢等將牛㓾掉，切做一垤一垤，放在柴頂，毋好點火；另外一隻牛給𠊎，𠊎也照恁樣做。</verse>
				<verse number="24">然後， 巴力 个先知向佢等个神明祈禱，𠊎向上主祈禱；該降火應答祈禱个就係上帝！」 人民全部講：「你恁樣講當好。」</verse>
				<verse number="25">以利亞 對 巴力 个先知講：「既然你等人多，你等先擇一隻牛去預備！向你等个神明祈禱，總係做毋得點火。」</verse>
				<verse number="26">佢等將給佢等个牛預備好勢，就向 巴力 祈禱，對朝晨頭一直求到當晝。佢等盡喊：「 巴力 啊，答應𠊎等哪！」又緊圍等佢等起个祭壇跳舞，總係全無反應。</verse>
				<verse number="27">當晝个時， 以利亞 㩢耍佢等講：「嘶較大聲兜仔！佢當然係神！可能佢在該位默想；可能佢盡無閒；也可能出去旅行了。無一定係睡掉去，你等去喊佢醒！」</verse>
				<verse number="28">該兜先知就還較大聲祈禱，又照佢等个儀式用刀仔㧯短劍割傷自家，直到血流滿身。</verse>
				<verse number="29">佢等一直盡嘶盡喊，對當晝直到臨暗仔獻祭个時，還係無反應，無回答，無一些仔聲音。</verse>
				<verse number="30">所以， 以利亞 對大眾講：「你等到𠊎這位來！」佢等就全部圍等佢。佢先將壞掉个上主个祭壇整好。</verse>
				<verse number="31">以利亞 拿十二垤石頭，逐垤代表一個支族；這兜支族就係照 雅各 十二個孻仔安名个。上主識給 雅各 一個名喊做 以色列 。</verse>
				<verse number="32">以利亞 用這兜石頭起一個敬拜上主个祭壇。佢又在祭壇四周圍挖溝仔，可以裝十四公升榖種恁大。</verse>
				<verse number="33">然後，佢將柴放在壇頂，將牛牯切做一垤一垤，放在柴頂。佢吩咐講：「㧡四桶水來，倒在祭物㧯柴頂高。」佢等照恁樣去做。</verse>
				<verse number="34">佢又講：「再倒一擺！」佢等就再倒一擺。佢又再講：「倒第三擺！」佢等就倒第三擺。</verse>
				<verse number="35">水流到祭壇个四周圍，溝仔水滿滿。</verse>
				<verse number="36">到臨暗仔獻祭个時，先知 以利亞 到祭壇前祈禱講：「上主啊， 亞伯拉罕 、 以撒 、 雅各 个上帝啊，求你顯明你係 以色列 个上帝，也顯明𠊎係你个僕人，𠊎所做个全部係照你个命令。</verse>
				<verse number="37">求你答應𠊎！上主啊，答應𠊎，使這人民知你 — 上主係上帝，又知係你使佢等回心轉意。」</verse>
				<verse number="38">上主就降下火來，燒掉燒化祭、柴、石頭、㧯泥，又將溝仔个水燒燥掉。</verse>
				<verse number="39">民眾看到，全部就伏在地上，大聲講：「上主係上帝！上主正係上帝！」</verse>
				<verse number="40">以利亞 下令講：「去捉 巴力 个先知，一個也毋好俾佢走掉！」民眾就捉到佢等。 以利亞 帶佢等到 基訓 河滣，在該位將佢等㓾掉。</verse>
				<verse number="41">以利亞 對 亞哈 王講：「這下你做得去食去啉。𠊎有聽到落大雨个響聲了。」</verse>
				<verse number="42">亞哈 去啉食个時， 以利亞 上到 迦密 山頂，跪在地上，頭那放在兩隻膝頭中央。</verse>
				<verse number="43">佢對佢个僕人講：「你去，向海該片看。」 僕人上去看了轉來，講：「𠊎無看到麼介。」 以利亞 喊佢再過去看加一擺，一共喊佢去看七擺。</verse>
				<verse number="44">第七擺僕人轉來講：「𠊎看到一細垤雲，還無人个手巴掌恁大，對海該片上來。」 以利亞 吩咐僕人：「到 亞哈 王該位去㧯佢講，趕緊坐戰車轉去，若無，會被大雨擋到。」</verse>
				<verse number="45">過一下仔，斷真烏雲滿天，起大風落大雨。 亞哈 就坐戰車，轉 耶斯列 去。</verse>
				<verse number="46">上主个能力臨到 以利亞 ，佢就繫𢫮腰帶，趕在 亞哈 頭前，一直走到 耶斯列 。</verse>
			</chapter>
			<chapter number="19">
				<verse number="1">以利亞 所做个每一件事㧯佢樣般用刀仔㓾死所有 巴力 先知个事， 亞哈 王將全部㧯厥𡜵娘 耶洗碧 講。</verse>
				<verse number="2">耶洗碧 就派使者去見 以利亞 ，講：「天光日這時，𠊎若無像你對待該兜先知个性命恁樣對付你，願神明重重責罰𠊎！」</verse>
				<verse number="3">以利亞 嚇倒，就䟘起來逃命，帶等佢个僕人到 猶大 个 別是巴 去。 以利亞 將僕人留在該位，</verse>
				<verse number="4">自家在曠野行一日个路程，來到一頭杜松樹下，坐在該位求死；佢祈禱講：「上主啊，罅擺了！將𠊎个性命收轉去好哪！因為𠊎無比𠊎个祖先較會。」</verse>
				<verse number="5">佢睡在樹下，睡掉了。忽然間，有一個天使來拍佢，對佢講：「好䟘了，來食兜東西！」</verse>
				<verse number="6">佢擘開目珠一看，看到在頭那堘頭有用火炭焙好个餅㧯一罐水。佢就拿來啉食，然後又橫轉去睡。</verse>
				<verse number="7">上主个天使第二擺來拍佢，講：「好䟘了！來食兜東西，你愛行个路還當遠！」</verse>
				<verse number="8">以利亞 就䟘起來，拿來食，拿來啉。食物給佢盡有元氣，行四十日夜，到上帝个山，就係 何烈 山。</verse>
				<verse number="9">在該位，佢入去一隻山窿過夜。忽然，上主對佢講話：「 以利亞 ，你在這位做麼介？」</verse>
				<verse number="10">以利亞 應講：「上主 — 萬軍个元帥上帝啊，𠊎為你大發熱心。總係 以色列 人民違悖你㧯佢等立个約，拆掉你个祭壇，又㓾掉你所有个先知。這下只有賸𠊎一個人，佢等還係愛尋𠊎，收𠊎个命！」</verse>
				<verse number="11">上主對佢講：「出去企在山頂，企在𠊎个面前。」該時，上主對該位經過，忽然間強風使山崩石裂，總係上主無在風中。風吹過，接等有地動，總係上主也無在地動中。</verse>
				<verse number="12">地動後有火，總係上主也無在火中。火以後，有微細个聲。</verse>
				<verse number="13">以利亞 聽到，就用外衫揞等面，出去企在窿口。有一個聲音對佢講：「 以利亞 ，你在這位做麼介？」</verse>
				<verse number="14">佢應講：「上主 — 萬軍个元帥上帝啊，𠊎為你大發熱心。總係 以色列 人民違悖你㧯佢等立个約，拆掉你个祭壇，又㓾掉你所有个先知。這下只有賸𠊎一個人，佢等還係愛尋𠊎，收𠊎个命！」</verse>
				<verse number="15">上主講：「你對原來个路轉到 大馬士革 附近个曠野去，然後入城去膏油設立 哈薛 做 敘利亞 王，</verse>
				<verse number="16">膏油設立 寧示 个孫仔 耶戶 做 以色列 王，又膏油設立 亞伯‧米何拉 人 沙法 个孻仔 以利沙 接你做先知。</verse>
				<verse number="17">閃得開 哈薛 刀仔个人，就會被 耶戶 㓾死；閃得開 耶戶 刀仔个人，就會被 以利沙 㓾死。</verse>
				<verse number="18">總係𠊎愛在 以色列 中留下七千人；這兜人毋識向 巴力 跪拜，也毋識唚過佢。」</verse>
				<verse number="19">以利亞 離開該位，尋到 沙法 个孻仔 以利沙 。 以利沙 堵堵好在耕田；有十二對牛在佢頭前，佢駛等最後一對。 以利亞 脫下外衫，袈在 以利沙 身上。</verse>
				<verse number="20">以利沙 就離開佢个牛，去逐 以利亞 ，講：「等𠊎先㧯爺𡟓辭別，然後𠊎正來跈你。」 以利亞 講：「好，你轉去。𠊎無阻擋你！」</verse>
				<verse number="21">以利沙 就轉去，將佢个一對牛㓾掉，將牛軛拿來做柴燒，將牛肉煮給大家食；然後 以利沙 去跈 以利亞 ，服事佢。</verse>
			</chapter>
			<chapter number="20">
				<verse number="1">敘利亞 个王 便‧哈達 召集佢所有个軍隊，帶領屬佢个三十二個王㧯佢等个戰車、戰馬出去相㓾，圍攻 撒馬利亞 。</verse>
				<verse number="2">佢派兜使者到城肚去㧯 以色列 王 亞哈 講：「 便‧哈達 恁樣講：</verse>
				<verse number="3">你愛將金仔、銀仔、你該兜𡜵娘，還有若該兜當紮、當靚个子女全部交給𠊎。」</verse>
				<verse number="4">以色列 王回答佢个話講：「請㧯𠊎个主 便‧哈達 王講，𠊎會照佢所講个去做。𠊎㧯𠊎所有个全部做得給佢。」</verse>
				<verse number="5">無幾久，該兜使者又倒轉來，帶等 便‧哈達 另外个要求講：「𠊎㧯你講過，你愛將你个金銀、你該兜𡜵娘，還有子女全部交給𠊎。</verse>
				<verse number="6">總係天光日這時節，𠊎愛派𠊎个官員到你个王宮㧯你大臣个屋下搜查，將你所看做值錢个東西全部拿走。」</verse>
				<verse number="7">以色列 王將國內該兜長老全部召集來，對佢等講：「你等看，這個人愛來害𠊎等。佢先派人迫𠊎交出𠊎个𡜵娘、子女㧯金銀，𠊎並無拒絕。」</verse>
				<verse number="8">所有个長老㧯人民全部講：「毋好聽佢个！毋好答應佢！」</verse>
				<verse number="9">所以， 亞哈 回答 便‧哈達 該兜使者講：「請㧯𠊎个主 便‧哈達 王講：僕人會答應你第一擺个要求，總係這擺𠊎無辦法答應！」 該兜使者就轉去向王報告，</verse>
				<verse number="10">無幾久又帶等 便‧哈達 个話轉來，講：「𠊎愛帶大隊人馬去破壞 撒馬利亞 。若係城肚个泥粉罅佢等逐儕捧一捧，願神明重重責罰𠊎！」</verse>
				<verse number="11">以色列 王講：「你等轉去㧯佢講：真實个戰士毋係在相㓾前歕雞頦，係在打贏後誇口。」</verse>
				<verse number="12">便‧哈達 接到 亞哈 个答覆，佢㧯其他个王堵好在營肚个帳篷 啉酒。佢下令講：「準備攻城！」佢等就準備好勢愛去攻打 撒馬利亞 。</verse>
				<verse number="13">這時，有一個先知去見 以色列 王 亞哈 ，對佢講：「上主講：『你有看到對方个軍隊恁大陣麼！看哪！𠊎今晡日愛使你打贏佢等，你就知𠊎係上主。』」</verse>
				<verse number="14">亞哈 問：「麼人愛去打頭陣呢？」 先知講：「上主講：在逐省該兜跈省長屬下个少壯軍官。」 王又問：「麼人做總指揮呢？」 先知講：「就係你。」</verse>
				<verse number="15">所以，王召集在逐省該兜跈省長屬下个少壯軍官兩百三十二儕，又召集 以色列 軍隊七千儕。</verse>
				<verse number="16">當晝， 便‧哈達 㧯協助佢个三十二個王在營肚个帳篷酒醉个時， 以色列 人開始攻擊。</verse>
				<verse number="17">該兜少壯軍官先出發。 便‧哈達 派去个探仔就回報講：「有人對 撒馬利亞 出來。」</verse>
				<verse number="18">佢就下令：「將佢等生生捉起來！毋管佢等係來相㓾抑係來講和个。」</verse>
				<verse number="19">該兜少壯軍官帶頭出戰； 以色列 軍隊跈在後背。</verse>
				<verse number="20">逐儕攏總㓾死所堵到个敵人。因為恁樣， 敘利亞 人就逃走， 以色列 人在後背追。 敘利亞 王 便‧哈達 騎等馬，㧯幾個騎兵共下逃走。</verse>
				<verse number="21">以色列 王一直追到城外，去搶該兜戰車㧯馬仔，將 敘利亞 人打到橫笐橫袋。</verse>
				<verse number="22">後來，該先知去見 以色列 王，講：「轉去加強你个軍力，好好計劃，因為 敘利亞 王明年春天一定還會來攻打你。」</verse>
				<verse number="23">敘利亞 王个官員對佢講：「 以色列 人个神係山神，所以 以色列 人打贏𠊎等。總係，𠊎等在平原㧯佢等相㓾，𠊎等一定會打贏佢等。</verse>
				<verse number="24">大王，你愛恁樣做：撤掉該三十二個王个軍權，改派其他个將軍來代佢等，</verse>
				<verse number="25">然後重新編一隊軍兵，上擺失掉个戰馬㧯戰車也愛補足。𠊎等愛在平地㧯 以色列 人相㓾；這擺𠊎等一定會打贏。」王採納佢等个建議。</verse>
				<verse number="26">第二年春天， 便‧哈達 召集 敘利亞 人到 亞弗 城，愛去攻打 以色列 人。</verse>
				<verse number="27">以色列 人也召集軍隊，好好準備，佢等分做兩隊出去，面向 敘利亞 人安營。總係 以色列 人㧯田野拶拶个 敘利亞 人比起來，就像係兩細群个山羊。</verse>
				<verse number="28">有一個神人去見 以色列 王，講：「上主恁樣講：『因為 敘利亞 人講𠊎係山神，毋係平原个神，所以𠊎愛使你打贏佢等个大軍，你等就知𠊎係上主。』」</verse>
				<verse number="29">敘利亞 人㧯 以色列 人對陣安營七日久。到第七日，佢等就交戰。該日， 以色列 人㓾掉 敘利亞 十萬步兵。</verse>
				<verse number="30">賸到个人逃入 亞弗 城；城牆橫下來，又磧死兩萬七千人。 便‧哈達 也逃入城肚，囥在一座屋仔最底背个間房。</verse>
				<verse number="31">佢个官員對佢講：「𠊎等聽講 以色列 該兜王全部盡慈悲。請准𠊎等去見這 以色列 王。𠊎等愛在腰身圍麻布，在頸筋䌈索仔；恁樣，無一定佢會饒你个命。」</verse>
				<verse number="32">所以佢等拿麻布圍在腰身，用索仔䌈在頸筋，到 以色列 王該位去，講：「你个僕人 便‧哈達 求你饒佢一命。」 亞哈 講：「佢還生係麼？佢係𠊎个兄弟！」</verse>
				<verse number="33">便‧哈達 个官員一看到機會難得，就遽遽順佢个話講：「就像王所講个， 便‧哈達 係你个兄弟！」 亞哈 下令講：「去帶佢來！」 便‧哈達 到个時， 亞哈 請佢㧯自家共下坐上戰車。</verse>
				<verse number="34">便‧哈達 講：「𠊎愛將吾爸對若爸該位搶來个城市歸還你，又俾你在 大馬士革 設立貿易中心，像吾爸在 撒馬利亞 所做个。」 亞哈 應講：「好，𠊎會照約放你走。」 亞哈 就㧯佢立約，然後放佢走。</verse>
				<verse number="35">有一群先知，其中一個奉上主命令向另外一個同伴講：「來打𠊎！」總係該先知毋肯打佢。</verse>
				<verse number="36">所以佢對該先知講：「因為你無聽從上主个命令，你一離開𠊎，就會有獅仔來咬死你。」該先知走開以後，斷真堵到獅仔，將佢咬死。</verse>
				<verse number="37">先前講話該先知又尋到另外一儕，對佢講：「來打𠊎！」該儕人就打佢，將佢打傷了。</verse>
				<verse number="38">先知用布仔將目珠揞起來，假做別人，在路堘企等，等 以色列 王經過。</verse>
				<verse number="39">王經過个時，先知大聲喊：「國王，𠊎相㓾个時，有一個士兵將一個捉來个敵人交給𠊎，講：『掌等這個人；若係佢走掉，你愛用命賠命，抑係罰三千隻銀幣。』</verse>
				<verse number="40">總係𠊎盡無閒个時，這個人卻走掉去。」 以色列 王講：「你已經判自家个罪了；你一定愛接受刑罰。」</verse>
				<verse number="41">先知黏時將揞目珠个布仔拿下來， 以色列 王就認出佢係先知。</verse>
				<verse number="42">所以先知對王講：「上主恁樣講：『因為你將𠊎命令你愛除掉个人放走，你一定愛用你个命賠命，也愛用你个人民賠佢个人民。』」</verse>
				<verse number="43">以色列 王轉到 撒馬利亞 个王宮，心肚發閼當無歡喜。</verse>
			</chapter>
			<chapter number="21">
				<verse number="1">有一個 耶斯列 人喊做 拿伯 ，佢有一垤葡萄園在 耶斯列 ，在 撒馬利亞 王 亞哈 个王宮附近。</verse>
				<verse number="2">有一日， 亞哈 對 拿伯 講：「將你个葡萄園讓給𠊎好麼！因為它偎近王宮，𠊎愛用這垤地做菜園。𠊎會用還較好个葡萄園㧯你換；抑係你愛錢，𠊎就照市價算給你。」</verse>
				<verse number="3">拿伯 對 亞哈 講：「上主毋准𠊎將祖產讓給你。」</verse>
				<verse number="4">亞哈 轉到王宮，因為 耶斯列 人 拿伯 講：「上主毋准𠊎將祖產讓給你」這句話，心肚發閼當無歡喜。佢橫在眠床，面向壁，毋食東西。</verse>
				<verse number="5">佢个𡜵娘 耶洗碧 入去問佢：「你做麼介發閼恁無歡喜？做麼介毋食東西呢？」</verse>
				<verse number="6">佢應講：「因為𠊎向 耶斯列 人 拿伯 講：『𠊎出價錢愛買你个葡萄園；若係你愛，𠊎也做得用另外一垤葡萄園㧯你換。』總係佢卻講：『𠊎做毋得將𠊎个葡萄園讓給你！』」</verse>
				<verse number="7">王后 耶洗碧 對 亞哈 講：「你敢毋係 以色列 个王？䟘起來，歡歡喜喜來食飯；𠊎一定會將 耶斯列 人 拿伯 个葡萄園交給你！」</verse>
				<verse number="8">所以， 耶洗碧 用 亞哈 个名寫信仔，揝 亞哈 个印仔，然後送給該兜㧯 拿伯 共城住个貴族㧯長老。</verse>
				<verse number="9">信仔寫講：「愛宣告禁食一日，召集人民，請 拿伯 坐大位。</verse>
				<verse number="10">喊兩個鱸鰻當面告佢，講佢咒罵上帝㧯王，然後將佢拖出城外，用石頭㧹死佢。」</verse>
				<verse number="11">耶斯列 該兜貴族㧯長老照 耶洗碧 个信仔所指示个去做。</verse>
				<verse number="12">佢等宣告禁食一日，召集人民共下來，請 拿伯 坐大位。</verse>
				<verse number="13">兩個鱸鰻當面告 拿伯 ，講佢咒罵上帝㧯王。所以人民將 拿伯 拖出城外，用石頭將佢㧹死。</verse>
				<verse number="14">佢等就喊人去 耶洗碧 該位，講 拿伯 已經被人用石頭㧹死了。</verse>
				<verse number="15">耶洗碧 一聽到 拿伯 被人用石頭㧹死，就對 亞哈 講：「好去接收 耶斯列 人 拿伯 毋肯賣給你个葡萄園了！佢已經死掉了！」</verse>
				<verse number="16">亞哈 聽到 拿伯 死掉，黏時就出發，愛去霸佔 耶斯列 人 拿伯 个葡萄園。</verse>
				<verse number="17">上主對 提斯比 人先知 以利亞 講：</verse>
				<verse number="18">「到 撒馬利亞 該位去見 以色列 王 亞哈 ，你會在 拿伯 个葡萄園堵到佢；佢想愛霸佔該葡萄園。</verse>
				<verse number="19">你去㧯佢講，𠊎 — 上主對佢講：『你㓾死人，還想霸佔佢个產業係麼？』㧯佢講上主恁樣講：『狗在麼介地方舐 拿伯 个血，也會在該位舐你自家个血！』」</verse>
				<verse number="20">亞哈 看到 以利亞 ，就講：「死對頭个啊，𠊎樣般又堵到你？」 以利亞 應講：「𠊎來尋你。因為你出賣自家，行上主看做邪惡个事。</verse>
				<verse number="21">所以，上主對你講：『𠊎愛降災禍給你，愛除滅你㧯你家族所有个男人，無論自由个抑係無自由个全部愛滅掉。</verse>
				<verse number="22">𠊎會使你个家族像 尼八 个孻仔 耶羅波安 王个家族共樣，又像 亞希雅 个孻仔 巴沙 王个家族共樣，因為你使 以色列 人陷在罪惡當中，又惹𠊎發譴。』</verse>
				<verse number="23">論到 耶洗碧 ，上主講：『狗仔愛在 耶斯列 城牆堘食 耶洗碧 个屍體。』</verse>
				<verse number="24">你屋下所有个人，死在城肚个一定會被狗仔食掉，死在山野个一定會被鳥仔食掉。」</verse>
				<verse number="25">(事實上無人像 亞哈 恁樣出賣自家，行上主看做邪惡个事；這全部係因為厥𡜵娘 耶洗碧 个唆慫。</verse>
				<verse number="26">上主識在 以色列 人面前將 亞摩利 人逐出這地方；總係 亞哈 照 亞摩利 人恁樣去拜偶像，犯最積惡个罪。)</verse>
				<verse number="27">亞哈 聽到這兜話，就扯爛衫，換著麻衫，毋食東西。佢著等麻衫睡目，行路也頭攋攋，緊透大氣。</verse>
				<verse number="28">上主對 提斯比 人先知 以利亞 講：</verse>
				<verse number="29">「 亞哈 在𠊎面前恁謙卑，你有看到麼？因為佢在𠊎面前恁謙卑，𠊎無愛在佢還生个日仔降災禍；𠊎愛在厥孻仔做王个時降災禍給 亞哈 个家族。」</verse>
			</chapter>
			<chapter number="22">
				<verse number="1">以色列 㧯 敘利亞 兩年零無戰爭，</verse>
				<verse number="2">總係在第三年中， 猶大 王 約沙法 去見 以色列 王 亞哈 。</verse>
				<verse number="3">以色列 王對佢个官員講：「𠊎等做麼介毋出手對 敘利亞 王該位將 基列 个 拉末 搶轉來呢？該本來係𠊎等个啊！」</verse>
				<verse number="4">亞哈 問 約沙法 ：「你肯㧯𠊎共下去攻打 基列 个 拉末 麼？」 約沙法 對 以色列 王講：「你个事就係𠊎个事！𠊎个部下就係你个部下，𠊎个戰馬也係你个戰馬。」</verse>
				<verse number="5">約沙法 又講：「總係，你愛先求問上主！」</verse>
				<verse number="6">所以， 以色列 王召集大約四百名先知來，問佢等：「𠊎做得去攻打 基列 个 拉末 麼？」 佢等講：「做你去！主會使王得勝。」</verse>
				<verse number="7">總係 約沙法 講：「這位敢毋係還有上主个先知？𠊎等做得請佢求問上主。」</verse>
				<verse number="8">以色列 王對 約沙法 講：「還有一個，係 音拉 个孻仔 米該雅 ，𠊎等做得通過佢求問上主。毋過𠊎當惱佢，因為佢從來毋識對𠊎預言講一句好話，總係預言講災禍个話。」 約沙法 講：「王毋好恁樣講！」</verse>
				<verse number="9">所以， 以色列 王喊一個宮廷官員來，命令佢黏時去將 音拉 个孻仔 米該雅 尋來。</verse>
				<verse number="10">以色列 王 亞哈 㧯 猶大 王 約沙法 著等王袍，在 撒馬利亞 城門外打麥場該位，坐在自家个寶座頂；所有个先知在佢等面前受感入神講預言。</verse>
				<verse number="11">其中有一個先知係 基拿拿 个孻仔 西底家 ；佢打兜鐵角，對 亞哈 講：「上主恁樣講：『你愛用這兜鐵角打 敘利亞 人，徹底消滅佢等。』」</verse>
				<verse number="12">其他个先知也全部恁樣預言講：「做你去攻打 基列 个 拉末 ，你一定會贏；上主會將該城交在王个手中。」</verse>
				<verse number="13">這時，該去喊 米該雅 來个官員對 米該雅 講：「所有个先知全部講王會成功，你最好也恁樣講。」</verse>
				<verse number="14">總係 米該雅 講：「𠊎指等永生个上主發誓，上主對𠊎講麼介，𠊎就講麼介。」</verse>
				<verse number="15">米該雅 到 亞哈 王面前个時，王問佢：「 米該雅 ，𠊎等做得去攻打 基列 个 拉末 麼？」 米該雅 應講：「做你去打啊！你一定會打贏；上主會將該城交在王个手中！」</verse>
				<verse number="16">總係王對佢講：「你愛奉上主个名照實對𠊎講！這句話𠊎愛㧯你講幾多擺呢？」</verse>
				<verse number="17">米該雅 講：「𠊎看到 以色列 个軍隊散在山岡頂，就像無牧人个羊群。上主講：『這兜人無領袖，喊佢等平平安安轉屋下去！』」</verse>
				<verse number="18">以色列 王對 約沙法 講：「𠊎敢毋係講過，佢從來毋識對𠊎預言講一句好話？總係預言講災禍个話！」</verse>
				<verse number="19">米該雅 繼續講：「好！你愛聽上主个話！𠊎看到上主坐在天庭个寶座，所有个天使企在佢个塍頭。</verse>
				<verse number="20">上主問：『麼人去騙 亞哈 ，俾佢到 基列 个 拉末 去送死呢？』該兜天使一儕講一樣。</verse>
				<verse number="21">後來，有一個靈到上主頭前來講：『𠊎去騙佢。』上主問：『你愛樣般騙呢？』</verse>
				<verse number="22">該靈講：『𠊎會使 亞哈 所有个先知講花撩。』上主講：『好！你去騙佢！你一定會成功。』」</verse>
				<verse number="23">最後 米該雅 講：「這就係事情个經過。上主使你个先知對你講花撩。上主已經命定你堵到災禍！」</verse>
				<verse number="24">基拿拿 个孻仔 西底家 先知行到 米該雅 面前，打佢个嘴角，責問佢：「上主个靈麼介時節離開𠊎，㧯你講話呢？」</verse>
				<verse number="25">米該雅 應講：「等到你走去最底背个細房間囥起來，該日你就會知了。」</verse>
				<verse number="26">然後， 以色列 王命令一個官員：「將 米該雅 捉起來，送到市長 亞們 㧯王子 約阿施 該位，</verse>
				<verse number="27">吩咐佢等將 米該雅 關在監獄肚，逐日單淨給佢維持生命个餅㧯水，等到𠊎平安轉來。」</verse>
				<verse number="28">米該雅 講：「若係你還平安轉來，這就證明上主無通過𠊎講話！」佢又講：「各位，愛記得𠊎頭下所講个話！」</verse>
				<verse number="29">以色列 王 亞哈 㧯 猶大 王 約沙法 去 基列 攻打 拉末 城。</verse>
				<verse number="30">以色列 王對 約沙法 講：「𠊎等上戰場个時，𠊎來改裝，你還係著等王袍。」所以 以色列 王改裝去相㓾。</verse>
				<verse number="31">敘利亞 王命令三十二個戰車指揮官，愛專門打 以色列 王一儕。</verse>
				<verse number="32">所以當佢等看到 約沙法 个時，恅到佢就係 以色列 王，就全部去攻打佢。 約沙法 大聲喊，</verse>
				<verse number="33">佢等認出佢毋係 以色列 王，就無繼續去逐佢。</verse>
				<verse number="34">總係，有一個 敘利亞 士兵隨便射一箭，堵好射到 以色列 王 亞哈 戰甲个接縫。 亞哈 對駛車个喊講：「𠊎著重傷了，倒轉去，退出戰場！」</verse>
				<verse number="35">該時，戰爭越來越厲害，有人扶等 亞哈 王企在戰車肚，面對 敘利亞 人，血對傷口流出，流到滿車。臨暗仔个時，佢就死掉。</verse>
				<verse number="36">日頭落山个時，有一個命令傳遍 以色列 軍營：「全部轉自家个屋下，轉自家个故鄉！」</verse>
				<verse number="37">亞哈 王就恁樣死掉。有人將佢个屍體搬到 撒馬利亞 ，葬在該位；</verse>
				<verse number="38">佢等在 撒馬利亞 个陂塘，妓女洗身个所在，將佢个戰車洗淨。就像上主識講過个，狗仔來舐佢个血。</verse>
				<verse number="39">亞哈 其他个事，包含佢造象牙王宮㧯起盡多城市个經過，全部記在《 以色列 列王史》底背。</verse>
				<verse number="40">亞哈 死後，厥孻仔 亞哈謝 承接佢做王。</verse>
				<verse number="41">以色列 王 亞哈 在位个第四年， 亞撒 个孻仔 約沙法 做 猶大 王。</verse>
				<verse number="42">約沙法 做王个時三十五歲。佢在 耶路撒冷 統治二十五年。厥姆係 示利希 个妹仔 阿蘇巴 。</verse>
				<verse number="43">約沙法 像厥爸 亞撒 共樣，行正直个事，行上主看做著个事。總係，佢無廢掉山岡頂个神廟；人民還係在該位獻祭燒香。</verse>
				<verse number="44">約沙法 也㧯 以色列 王和平相處。</verse>
				<verse number="45">約沙法 其他个事，佢个勇敢㧯佢樣般作戰，全部記在《 猶大 列王史》底背。</verse>
				<verse number="46">佢除掉厥爸 亞撒 時代留下來所有在神廟活動个男娼。</verse>
				<verse number="47">該時 以東 地方無王， 猶大 王指派一個總督在該位治理。</verse>
				<verse number="48">約沙法 做一隊个大船，愛去 俄斐 載金仔；總係無去，因為船在 以旬‧迦別 全部壞掉。</verse>
				<verse number="49">後來 亞哈 个孻仔 亞哈謝 提議，俾佢个僕人㧯 約沙法 个僕人共下坐船去；總係 約沙法 毋肯。</verse>
				<verse number="50">約沙法 死後，葬在 大衛 城个王室墳墓肚。厥孻仔 約何蘭 承接佢做王。</verse>
				<verse number="51">猶大 王 約沙法 在位个第十七年， 亞哈 个孻仔 亞哈謝 做 以色列 王。佢在 撒馬利亞 統治兩年。</verse>
				<verse number="52">佢行上主看做邪惡个事，學厥爸 亞哈 、厥姆 耶洗碧 、㧯 尼八 个孻仔 耶羅波安 个壞模樣，害 以色列 人陷在罪中。</verse>
				<verse number="53">佢像厥爸共樣，服事、敬拜 巴力 ，惹上主 — 以色列 个上帝發譴。</verse>
			</chapter>
		</book>
		<book number="12">
			<chapter number="1">
				<verse number="1">以色列 王 亞哈 死掉以後， 摩押 國就反 以色列 。</verse>
				<verse number="2">以色列 王 亞哈謝 對 撒馬利亞 王宮个陽臺跌下來，著傷盡嚴重。佢派人去求問 非利士 地區 以革倫 城个神 — 巴力‧西卜 ，愛知佢个病會好麼？</verse>
				<verse number="3">總係上主个天使吩咐 提斯比 人先知 以利亞 去見 亞哈謝 王个使者，問佢等：「你等做麼介去求問 以革倫 个神 巴力‧西卜 ？敢講 以色列 當中無上帝係麼？</verse>
				<verse number="4">你等去㧯王講，上主恁樣講：『你無法度對病床下來；你一定會死！』」 以利亞 就照上主个命令去做。</verse>
				<verse number="5">使者轉到王該位；王問佢等：「你等做麼介轉來？」</verse>
				<verse number="6">佢等講：「𠊎等堵到一個人；佢喊𠊎等轉來㧯王講，上主對你恁樣講：『你做麼介派人去求問 以革倫 个神 巴力‧西卜 ？敢講 以色列 當中無上帝係麼？所以你無法度對病床下來；你一定會死！』」</verse>
				<verse number="7">王問：「你等堵到个人生到麼介樣仔？」</verse>
				<verse number="8">佢等講：「佢著皮毛个衫，又繫等皮帶。」 王大聲講：「佢係 提斯比 人 以利亞 ！」</verse>
				<verse number="9">所以，王派一個軍官帶五十個部下去 以利亞 該位，看到佢坐在山岡頂，就對佢講：「神人哪，王命令你下來！」</verse>
				<verse number="10">以利亞 應講：「𠊎若係神人，願火對天頂降下來燒死你㧯你五十個部下！」黏時有火對天頂降下來，燒死該軍官㧯佢五十個部下。</verse>
				<verse number="11">王又派另外一個軍官帶五十個部下去；佢對 以利亞 講：「神人哪，王命令你遽遽下來！」</verse>
				<verse number="12">以利亞 應講：「𠊎若係神人，願火對天頂降下來燒死你㧯你五十個部下！」黏時上帝个火對天頂降下來，燒死該軍官㧯佢五十個部下。</verse>
				<verse number="13">王第三擺又派一個軍官帶五十個部下去。該軍官去到該位，跪在 以利亞 面前，求佢講：「神人哪，請憐憫𠊎㧯你這五十個僕人；救𠊎等个性命！</verse>
				<verse number="14">已經有兩個軍官㧯佢等个部下全部被天頂來个火燒死囉；總係這下求你可憐𠊎！」</verse>
				<verse number="15">上主个天使對 以利亞 講：「你㧯佢共下去，毋使驚佢！」 以利亞 就㧯該軍官到王該位去，</verse>
				<verse number="16">對王講：「上主恁樣講：『因為你派人去求問 以革倫 个神 巴力‧西卜 ，敢講 以色列 當中無上帝係麼？所以你無法度對病床下來；你一定會死！』」</verse>
				<verse number="17">照上主通過 以利亞 所講个， 亞哈謝 王正經死掉。 亞哈謝 無孻仔，所以佢个老弟 約蘭 承接佢做王；該年係 猶大 王 約沙法 个孻仔 約何蘭 在位个第二年。</verse>
				<verse number="18">亞哈謝 其他个事全部記在《 以色列 列王史》底背。</verse>
			</chapter>
			<chapter number="2">
				<verse number="1">上主用龍捲風接 以利亞 升天个時節到了。 以利亞 㧯 以利沙 對 吉甲 出發；</verse>
				<verse number="2">在路上， 以利亞 對 以利沙 講：「你留在這位；上主吩咐𠊎到 伯特利 去。」 以利沙 應講：「𠊎指等永生个上主㧯你發誓，𠊎絕對毋離開你。」所以佢兩儕共下到 伯特利 去。</verse>
				<verse number="3">有一群住在 伯特利 个先知出來見 以利沙 ，問佢：「你知今晡日上主愛將你个先生接走麼？」 以利沙 講：「𠊎知；總係你等莫講這事！」</verse>
				<verse number="4">以利亞 對 以利沙 講：「你留在這位；上主吩咐𠊎到 耶利哥 去。」 以利沙 應講：「𠊎指等永生个上主㧯你發誓，𠊎絕對毋離開你。」所以佢兩儕共下到 耶利哥 去。</verse>
				<verse number="5">有一群住在 耶利哥 个先知來見 以利沙 ，問佢：「你知今晡日上主愛將你个先生接走麼？」 以利沙 講：「𠊎知；總係你等莫講這事！」</verse>
				<verse number="6">以利亞 對 以利沙 講：「你留在這位；上主吩咐𠊎到 約旦 河去。」 以利沙 應講：「𠊎指等永生个上主㧯你發誓，𠊎絕對毋離開你。」所以佢兩儕共下行。</verse>
				<verse number="7">有五十個先知跈佢兩儕到 約旦 河去。 以利亞 㧯 以利沙 停在河壩滣；五十個先知企在離佢等無幾遠个地方。</verse>
				<verse number="8">以利亞 脫下佢个外衫，將它捲起來𫝾水，水就分做兩片。佢㧯 以利沙 就對燥地上行過去，到河壩該片。</verse>
				<verse number="9">佢等過河以後， 以利亞 問 以利沙 ：「𠊎吂被上主接去離開你以前，你愛𠊎為你做麼介？」 以利沙 講：「願感動你个靈加倍傳給𠊎，使𠊎成做你个繼承人。」</verse>
				<verse number="10">以利亞 講：「你所要求个盡難得。毋過，你若係有看到𠊎被上主接去，你就會得到；若無，你就得毋到。」</verse>
				<verse number="11">佢等緊行緊講。忽然間，有幾條火馬拉等一輛火戰車來到佢等中間，將佢兩儕隔開， 以利亞 在一陣龍捲風當中被上主接上天去。</verse>
				<verse number="12">以利沙 看到就大聲喊：「阿爸啊，阿爸啊！ 以色列 个戰車㧯騎兵啊 ！」 以利沙 就無再看到 以利亞 。 以利沙 當悲傷，就將自家个衫扯做兩析，</verse>
				<verse number="13">然後拈起 以利亞 跌下來个外衫，轉到 約旦 河滣企等。</verse>
				<verse number="14">佢用 以利亞 个外衫𫝾水，講：「上主 — 以利亞 个上帝在㖠位？」然後， 以利沙 又𫝾水，水就分做兩片，俾佢行到河壩該片去。</verse>
				<verse number="15">耶利哥 來个五十個先知遠遠看到，就講：「感動 以利亞 个靈已經臨在 以利沙 身上。」佢等就去迎接佢，伏在佢面前，</verse>
				<verse number="16">講：「𠊎等這位有五十個人，全部當紮；請俾𠊎等去尋你个先生。可能上主个靈帶走佢，將佢放在毋知㖠隻山頂抑係山壢。」 以利沙 應講：「毋使派人去。」</verse>
				<verse number="17">總係，佢等強強愛去， 以利沙 就由在佢等去。該五十個人尋三日也無尋到。</verse>
				<verse number="18">所以佢等轉到 以利沙 該位。 以利沙 在 耶利哥 等佢等；佢對佢等講：「𠊎敢毋係㧯你等講過毋使去？」</verse>
				<verse number="19">有人對 耶利哥 城來見 以利沙 ，講：「先生，你知這城个地點當好；總係這位个水毋好，土地毋肥毋會出產。」</verse>
				<verse number="20">以利沙 講：「拿一隻新碗裝兜鹽來。」佢等就拿來給佢。</verse>
				<verse number="21">以利沙 行到水源頭，將鹽倒在水肚，講：「上主恁樣講：『𠊎使這水變好，毋會再有死亡，也毋會再影響出產。』」</verse>
				<verse number="22">所以該水變好直到今晡日，就像 以利沙 所講个。</verse>
				<verse number="23">以利沙 對 耶利哥 上 伯特利 去；在路項，佢堵到一群細人仔對城肚出來。佢等嘲謔佢，喊講：「光頭仔，好去了！光頭仔，好去了！」</verse>
				<verse number="24">以利沙 轉身過來，䁯佢等，奉上主个名咒詛佢等。就有兩隻熊乸對樹林肚出來，扯爛佢等當中个四十二儕。</verse>
				<verse number="25">以利沙 對 伯特利 到 迦密 山去，然後又轉到 撒馬利亞 。</verse>
			</chapter>
			<chapter number="3">
				<verse number="1">猶大 王 約沙法 在位个第十八年， 亞哈 个孻仔 約蘭 做 以色列 王。佢在 撒馬利亞 統治十二年。</verse>
				<verse number="2">佢行上主看做邪惡个事，總係無像厥爸㧯厥姆恁壞。佢除掉厥爸拜 巴力 所頓个柱像。</verse>
				<verse number="3">總係，就像以前 尼八 个孻仔 耶羅波安 王共樣，佢也害 以色列 人陷在罪惡當中，毋識停過。</verse>
				<verse number="4">摩押 王 米沙 畜當多羊；佢逐年向 以色列 王進貢十萬隻細羊㧯十萬隻綿羊牯个毛。</verse>
				<verse number="5">以色列 王 亞哈 死掉以後， 摩押 王就造反。</verse>
				<verse number="6">約蘭 王黏時離開 撒馬利亞 ，召集佢所有个軍隊，</verse>
				<verse number="7">派人去對 猶大 王 約沙法 講：「 摩押 王造反了；你肯㧯𠊎共下去攻打佢麼？」 約沙法 王應講：「好啊！𠊎㧯你共下去。你个事就係𠊎个事！𠊎个部下就係你个部下，𠊎个戰馬也係你个戰馬。</verse>
				<verse number="8">𠊎等應該對㖠條路去攻打？」 約蘭 王講：「𠊎等愛對 以東 曠野該條路去。」</verse>
				<verse number="9">所以 以色列 王、 猶大 王㧯 以東 王共下出發。佢等對該條較遠个路𫟧七日，水用淨淨，軍隊㧯頭牲全部無水好啉。</verse>
				<verse number="10">以色列 王大聲講：「這就慘了！上主召集𠊎等三個王，原來係愛將𠊎等交在 摩押 王手中！」</verse>
				<verse number="11">約沙法 王問：「這位敢毋係有上主个先知？𠊎等做得通過佢求問上主。」 以色列 王个一個官員應講：「這位有 沙法 个孻仔 以利沙 ；佢以前係 以利亞 个助手。」</verse>
				<verse number="12">約沙法 王講：「上主一定會㧯佢講話。」所以三個王共下去見 以利沙 。</verse>
				<verse number="13">以利沙 對 以色列 王講：「𠊎樣愛幫助你？去問若爸㧯若姆个先知啊！」 以色列 王講：「請毋好恁樣講，因為係上主召集𠊎等三個王，愛將𠊎等交在 摩押 王手中。」</verse>
				<verse number="14">以利沙 講：「𠊎指等𠊎所事奉个永生上主 — 萬軍个元帥發誓，若毋係看 猶大 王 約沙法 个面子，𠊎就毋會見你，毋愛搭你。</verse>
				<verse number="15">這下，去㧯𠊎尋一個琴師來。」 彈琴个來彈个時，上主个大能就降在 以利沙 身上。</verse>
				<verse number="16">以利沙 講：「上主恁樣講：『你等愛在這條坑壢肚逐所在挖溝仔。</verse>
				<verse number="17">雖然你等無看到起風，也無看到落雨，總係坑壢肚會有滿滿个水。你等㧯你等个頭牲攏總會有水好啉。』」</verse>
				<verse number="18">以利沙 繼續講：「這事對上主來講係小事情啊；佢還愛將 摩押 人交在你等手中。</verse>
				<verse number="19">你等一定會佔領佢等所有堅固个城堡㧯繁榮个城市，斬掉佢等所有个好樹，塞掉佢等所有个水源，又堆滿石頭破壞佢等所有盡肥个田地。」</verse>
				<verse number="20">第二朝晨，大約係獻早祭个時，正經對 以東 方面有水流等來，滿遍係水。</verse>
				<verse number="21">全 摩押 人聽講三個王聯合起來攻打佢等，就召集所有會相㓾个人，對老到幼，全部在邊界防守。</verse>
				<verse number="22">第二朝晨，佢等䟘起來个時，日頭照在水面上，佢等看到對面个水紅到像血。</verse>
				<verse number="23">佢等大聲喊：「該係血啊！一定係三隊敵軍互相殘殺！ 摩押 人哪，𠊎等去搶佢等个財物啊！」</verse>
				<verse number="24">摩押 人到 以色列 營地个時， 以色列 人攻擊佢等，將佢等逐轉去。 以色列 人一直追殺 摩押 人，</verse>
				<verse number="25">拆掉佢等个城市。逐擺經過好田， 以色列 人就㧹石頭落去，直到所有个田石頭坉滿滿。佢等也將所有个水源塞掉，斬斷所有个好樹。最後，只有賸首都 吉珥‧哈列設 ，㧹石頭个兵仔就圍攻該城。</verse>
				<verse number="26">摩押 王看到情況嚴重，就帶等七百個帶劍个兵仔，想衝出包圍，走到 敘利亞 王 該位，總係無成功。</verse>
				<verse number="27">所以佢將該愛承接王位个長子當做牲儀，在城牆頂獻祭給 摩押 个神明。 以色列 人卻著驚 ，所以三個王就撤退，轉自家个國家去。</verse>
			</chapter>
			<chapter number="4">
				<verse number="1">有一個寡婦，厥老公係先知群个一儕；姖去見 以利沙 ，求佢講：「先生，若僕人 — 吾老公已經過身！你知佢係敬畏上主个人。這下有一個債主來，愛將𠊎兩個孻仔帶去做奴才。」</verse>
				<verse number="2">以利沙 問：「𠊎做得為你做麼介呢？㧯𠊎講，若屋下還有麼介東西？」 寡婦講：「使女只有一細罌橄欖油，以外麼介都無。」</verse>
				<verse number="3">以利沙 㧯姖講：「你去向鄰舍借兜空个罐仔、罌仔，越多越好。</verse>
				<verse number="4">然後，你㧯你兩個孻仔入去屋肚，關好門，將油倒入罐仔、罌仔，裝滿就放在一片。」</verse>
				<verse number="5">恁樣，該寡婦就離開 以利沙 ，㧯兩個孻仔入去屋肚，關好門，厥孻仔拿等罐仔、罌仔，姖就倒油。</verse>
				<verse number="6">佢等倒滿所有个罐仔、罌仔以後，寡婦問還有罐仔、罌仔麼？有一個孻仔應講：「無了！」恁樣，橄欖油就停掉了。</verse>
				<verse number="7">寡婦轉到神人 以利沙 該位， 以利沙 對姖講：「將橄欖油拿去賣來還債！賸到个錢罅擺你等子𡟓生活了！」</verse>
				<verse number="8">有一日， 以利沙 到 書念 去。該位有一個有錢个婦人家；姖強留 以利沙 食飯。對該擺以後， 以利沙 逐擺到 書念 去，就會到厥屋下食飯。</verse>
				<verse number="9">婦人家對厥老公講：「𠊎看出該常常到𠊎等這位來个，係一個聖潔个神人。</verse>
				<verse number="10">𠊎等在屋頂來起一隻細間房，底背放一張眠床、桌仔、凳仔㧯燈臺。佢來𫣆屋下个時，就做得在該位歇。」</verse>
				<verse number="11">有一日， 以利沙 來到 書念 ，就上到該隻間房歇睏。</verse>
				<verse number="12">以利沙 吩咐僕人 基哈西 ：「你喊 書念 个婦人家來！」佢就喊該婦人家來到 以利沙 該位。</verse>
				<verse number="13">以利沙 對 基哈西 講：「你問姖，𠊎做得為姖做麼介。姖為到供給𫣆个需要常常操心，𠊎愛報答姖。可能姖愛𠊎到王該位抑係元帥該位為姖講幾句好話。」 婦人家講：「𠊎住在自家人个當中，麼介都無欠。」</verse>
				<verse number="14">以利沙 問 基哈西 ：「恁樣，𠊎做得為姖做麼介呢？」 基哈西 講：「姖無孻仔，老公又恁老了。」</verse>
				<verse number="15">以利沙 講：「喊姖過來！」該婦人家就過來，企在門口。</verse>
				<verse number="16">以利沙 對姖講：「明年這時節，你會揇等一個孻仔。」 該婦人家應講：「先生，你係神人，做毋得騙𠊎噢！」</verse>
				<verse number="17">該婦人家正經就有身項，第二年春天𫱔一個孻仔，就像 以利沙 所講个。</verse>
				<verse number="18">細人仔緊來緊大，有一日，佢到收割个工人該位去尋厥爸。</verse>
				<verse number="19">細人仔忽然對厥爸講：「𠊎頭那痛！𠊎頭那痛！」 厥爸對一個僕人講：「將細人仔揇轉厥姆該位去！」</verse>
				<verse number="20">僕人就將細人仔揇轉厥姆該位。細人仔坐在厥姆个膝頭頂，到當晝卻死掉。</verse>
				<verse number="21">阿姆將細人仔揇到神人 以利沙 个間房，放在眠床頂，關好門，就走。</verse>
				<verse number="22">婦人家喊厥老公來，對佢講：「你派一個僕人牽一隻驢仔到這位來；𠊎愛遽遽到神人該位去，黏時轉來。」</verse>
				<verse number="23">厥老公講：「做麼介你今晡日一定愛去見佢？今晡日毋係安息日，也毋係初一啊 ！」 婦人家講：「無麼介事情！」</verse>
				<verse number="24">然後，姖預備驢仔，又吩咐僕人講：「遽遽來逐驢仔！𠊎無吩咐你，你就毋好慢下來。」</verse>
				<verse number="25">恁樣，婦人家就趕緊去到神人个所在 迦密 山。 神人遠遠就看到該婦人家到來，對僕人 基哈西 講：「你看！ 書念 个婦人家來了！</verse>
				<verse number="26">你遽遽走去迎接姖，問姖一切平安麼？厥老公平安麼？厥孻仔平安麼？」 婦人家講：「平安！」</verse>
				<verse number="27">當姖上山，行到神人 以利沙 面前，就揇等佢个腳。 基哈西 行過來愛將姖㩳開，總係神人講：「由在姖啊！你無看到姖恁痛苦嗎？上主將事情囥等，無㧯𠊎講。」</verse>
				<verse number="28">婦人家講：「先生，𠊎識㧯你求過孻仔麼？𠊎毋係㧯你講過，毋好騙𠊎嗎？」</verse>
				<verse number="29">以利沙 對 基哈西 講：「遽遽！䌈好你个腰帶，拿𠊎个杖仔去！在路項堵到人，毋好㧯佢講話。若係有人㧯你問安，毋好應佢。到該位，愛將𠊎个杖仔放在細人仔个面項。」</verse>
				<verse number="30">細人仔个阿姆對 以利沙 講：「𠊎指等永生个上主㧯你發誓，𠊎絕對毋離開你！」所以 以利沙 就起身跈姖去。</verse>
				<verse number="31">基哈西 先去，將 以利沙 个杖仔放在細人仔个面項，總係無透氣聲，乜無挺動。所以佢轉頭去見 以利沙 ，講：「細人仔無醒過來！」</verse>
				<verse number="32">以利沙 行入間房，看到細人仔死掉，放在自家个眠床頂。</verse>
				<verse number="33">佢將門關好，只有佢兩儕在底背；佢就向上主祈禱。</verse>
				<verse number="34">然後佢上眠床，伏在細人仔个身上，嘴對嘴、目珠對目珠、手對手。因為佢伏在細人仔个身上，細人仔个身體就燒暖起來。</verse>
				<verse number="35">以利沙 就下來，在間房肚行來行去，然後又上眠床，伏在細人仔身上。細人仔連打七擺哈啾，目珠就擘開來了。</verse>
				<verse number="36">以利沙 喊 基哈西 講：「去喊該 書念 个婦人家來！」婦人家來到， 以利沙 對姖講：「將若孻仔揇起來。」</verse>
				<verse number="37">婦人家就入來，伏在 以利沙 腳前行禮，然後揇等孻仔出去。</verse>
				<verse number="38">有一擺， 以利沙 轉到 吉甲 ，該地方有飢荒。佢在該位教一群先知个時，佢吩咐僕人將大鑊頭放在火頂高，煮兜湯給佢等食。</verse>
				<verse number="39">有人到田肚摘野菜，看到一頭野生个瓜藤，就摘盡多野瓜轉來。佢將野瓜切碎放入鑊頭，雖然佢等毋知該係麼介瓜。</verse>
				<verse number="40">煮好就倒出來食。總係佢等一食到該湯就大聲喊：「神人哪，鑊肚个東西會食死人噢！」大家全部毋敢食。</verse>
				<verse number="41">以利沙 吩咐拿兜麵粉來，就委入鑊頭肚，講：「倒出來給大家食！」鑊頭肚个湯就無毒了。</verse>
				<verse number="42">另外有一擺，有一個人對 巴力‧沙利沙 來，帶二十隻餅給神人 以利沙 ，係初熟个大麥做个。佢也帶一袋新出个麥仔。 以利沙 吩咐僕人將食物分給該兜先知食。</verse>
				<verse number="43">總係僕人問：「這兜罅一百儕食麼？」 以利沙 應講：「做你拿給佢等食！因為上主講，佢等定著會食飽，還會有賸。」</verse>
				<verse number="44">所以僕人將食物擺在佢等面前，佢等就食。就像上主所講个，大家全部食飽，還有好賸。</verse>
			</chapter>
			<chapter number="5">
				<verse number="1">敘利亞 軍隊个元帥 乃縵 被厥國王當看重，因為上主識通過佢使 敘利亞 軍隊得到勝利。 乃縵 係一個大能个勇士，總係卻發到癩病。</verse>
				<verse number="2">有一擺， 敘利亞 人歸陣出去搶 以色列 人，捉到一個 以色列 人个細妹仔；這細妹仔後來做 乃縵 𡜵娘个使女。</verse>
				<verse number="3">姖㧯女主人講：「盼望主人去見住在 撒馬利亞 个先知！佢一定會醫好主人个癩病。」</verse>
				<verse number="4">乃縵 就去見王，將該對 以色列 來个細妹仔講个話詳細㧯王講。</verse>
				<verse number="5">敘利亞 王講：「好，做你去！𠊎也會寫信仔給 以色列 王。」 所以 乃縵 就出發，帶等三萬隻銀幣、六千隻金幣、㧯十套衫褲。</verse>
				<verse number="6">佢帶給 以色列 王个信仔恁樣講：「這封信介紹𠊎个大臣 乃縵 ，你愛醫好佢个癩病。」</verse>
				<verse number="7">以色列 王讀到這封信，就扯裂自家个衫，講：「𠊎又毋係上帝，㖠有辦法喊人生、喊人死？該儕樣般做得喊𠊎醫好這個人个癩病呢？你等看！佢定著係想愛尋把柄來攻擊𠊎！」</verse>
				<verse number="8">神人 以利沙 聽到 以色列 王扯裂衫个事，就喊人去對王講：「做麼介扯裂衫呢？喊佢來尋𠊎，佢就會知 以色列 有一個先知！」</verse>
				<verse number="9">所以， 乃縵 帶等馬㧯戰車來到 以利沙 屋下个門口。</verse>
				<verse number="10">以利沙 喊一個僕人出去㧯 乃縵 講：「你去 約旦 河洗七擺身，恁樣，你个皮肉就會復原，變做淨浰。」</verse>
				<verse number="11">乃縵 就閼到氣浡浡，轉身就走。佢講：「𠊎恅到佢一定會出來看𠊎，企等向上主 — 佢个上帝 祈禱，在𠊎發病个所在擛一下手，醫好𠊎个癩病！</verse>
				<verse number="12">再講， 大馬士革 个 亞罷拿 河㧯 法珥 河，敢無比 以色列 所有个河壩還較好嗎？𠊎在該位洗身敢毋會得到淨浰？」所以佢當發譴就離開。</verse>
				<verse number="13">乃縵 个僕人行前來對佢講：「先生，就算先知喊你做一件困難个事，你敢毋會去做嗎？何況佢這下只有喊你去洗身就會得到淨浰呢？」</verse>
				<verse number="14">所以 乃縵 就到 約旦 河去，照神人个吩咐在河壩肚浸七擺。佢就變做淨浰。佢个皮肉復原到像細人仔个共樣。</verse>
				<verse number="15">乃縵 帶等所有跈等來个人轉到神人該位，企在佢面前講：「這下𠊎知，除了在 以色列 以外，全世界無別个真神上帝 。請你就收下僕人个禮物啊！」</verse>
				<verse number="16">以利沙 講：「𠊎指等𠊎所事奉个永生上主發誓，𠊎麼介都毋接受。」 乃縵 堅持愛佢收，佢還係毋肯收。</verse>
				<verse number="17">所以 乃縵 講：「若係你毋接受僕人个禮物，恁樣，請俾𠊎裝一對騾仔載得贏个泥轉屋下去 ；因為對這下起，除了上主以外，𠊎毋向別个神明獻燒化祭抑係其他个祭。</verse>
				<verse number="18">唯獨一項事，愛求上主赦免僕人！𠊎个主人入 臨門 廟拜神明个時節，𠊎愛用手扶佢入廟，也愛行禮。𠊎在 臨門 廟行禮个事，願上主赦免𠊎。」</verse>
				<verse number="19">以利沙 講：「做你平安轉去！」 乃縵 就離開該位。 乃縵 正行無幾遠，</verse>
				<verse number="20">神人 以利沙 个僕人 基哈西 心肚想：「吾主人毋收 乃縵 半樣禮物就讓佢走！佢應該收該 敘利亞 人个禮物正著。𠊎對永生上主發誓，𠊎愛追到佢，向佢討兜東西。」</verse>
				<verse number="21">所以， 基哈西 起身去追 乃縵 。 乃縵 看到有人追來，就對戰車頂下來見佢，講：「有麼介事？」</verse>
				<verse number="22">基哈西 講：「無麼介事！𠊎主人派𠊎來㧯你講，頭下有兩個後生个先知對 以法蓮 山區來，佢希望你給佢等三千隻銀幣㧯兩身衫褲。」</verse>
				<verse number="23">乃縵 講：「請你拿六千隻銀幣去！」佢勉強佢收，然後將銀幣裝在兩隻袋仔肚，連同兩身衫褲，交給自家个僕人，喊佢等在 基哈西 頭前扛等行。</verse>
				<verse number="24">佢等到 以利沙 住个山岡， 基哈西 將該兩袋東西搬入屋肚，然後請 乃縵 个僕人轉去。</verse>
				<verse number="25">基哈西 入去主人个屋肚； 以利沙 問佢：「 基哈西 ，你去㖠位？」 佢應講：「僕人無去㖠位。」</verse>
				<verse number="26">總係 以利沙 講：「該人對戰車下來迎接你个時，𠊎个心敢毋係也㧯你共下在該位？這下毋係接受人个銀幣、衫褲、橄欖園、葡萄園、牛羊、奴僕㧯奴婢个時節！</verse>
				<verse number="27">因為恁樣， 乃縵 个癩病會遰到你身上㧯你个後代身上，直到永遠。」 基哈西 離開个時，就遰到癩病，皮膚像雪恁白。</verse>
			</chapter>
			<chapter number="6">
				<verse number="1">有一日， 以利沙 所帶領个一群先知對佢發怨言講：「看哪，𠊎等㧯你所住个地方忒狹了！</verse>
				<verse number="2">請准𠊎等到 約旦 河滣頭，逐儕取一枝樹料轉來，另外起一間屋仔。」 以利沙 講：「好，你等去！」</verse>
				<verse number="3">佢等當中有一儕請 以利沙 㧯佢等共下去， 以利沙 就答應佢。</verse>
				<verse number="4">所以佢等共下去，到 約旦 河，大家就開始斬樹仔。</verse>
				<verse number="5">有一儕斬樹仔个時，斧頭𢫫掉，跌落水肚。佢向 以利沙 喊講：「慘了！先生，樣般好呢？該斧頭係㧯人借个！」</verse>
				<verse number="6">神人 以利沙 問佢：「斧頭跌落㖠位？」 該人就指給佢看。 以利沙 斬一枝樹仔，㧹落水肚，斧頭就浮起來。</verse>
				<verse number="7">以利沙 講：「拿起來啊！」該人就伸手將斧頭拿起來。</verse>
				<verse number="8">敘利亞 王㧯 以色列 人相㓾。佢㧯官員參詳，選某一個地方安營。</verse>
				<verse number="9">神人 以利沙 派人去㧯 以色列 王警告講：「你愛細膩，毋好對該位過，因為 敘利亞 人埋伏在該位。」</verse>
				<verse number="10">所以 以色列 王就派人到神人警告佢等个地方去，加強防備。共樣个事發生好多擺。</verse>
				<verse number="11">敘利亞 王為這事發閼；佢就召集官員，問佢等：「你等當中有麼人向 以色列 王走漏消息？」</verse>
				<verse number="12">其中一個講：「國王，毋係𠊎等。係 以色列 个先知 以利沙 講个；佢將你在間肚講个話全部㧯 以色列 王講。」</verse>
				<verse number="13">王下令講：「去查佢在㖠位；𠊎愛派人去捉佢！」 有人㧯王講 以利沙 在 多坍 。</verse>
				<verse number="14">王就派大軍隊、戰馬㧯戰車去該位；佢等半夜去到，黏時就將該城包圍起來。</verse>
				<verse number="15">第二日打早， 以利沙 个僕人䟘起來到屋外去，看到 敘利亞 人个軍隊並佢等个戰馬㧯戰車將城圍困。佢就喊：「壞了！先生，𠊎等慘了。愛樣般好呢？」</verse>
				<verse number="16">以利沙 講：「毋使驚！㧯𠊎等共下个比㧯佢等共下个還較多。」</verse>
				<verse number="17">然後佢祈禱講：「上主啊，求你開佢个目珠，使佢看得到！」上主聽 以利沙 个祈求。 以利沙 个僕人就看到滿山有火馬㧯火戰車圍等 以利沙 。</verse>
				<verse number="18">敘利亞 人打過來个時， 以利沙 祈禱講：「上主啊，求你使該兜人个目珠看毋到！」上主聽 以利沙 个祈禱，使佢等目珠看毋到。</verse>
				<verse number="19">然後 以利沙 到佢等該位講：「你等行毋著路了；這毋係你等愛尋个城。跈𠊎來，𠊎帶你等到你等愛尋个人該位去。」 以利沙 就將佢等帶到 撒馬利亞 。</verse>
				<verse number="20">佢等一入城， 以利沙 就祈禱講：「上主啊，求你開佢等个目珠，使佢等看得到。」上主聽 以利沙 个祈求，開佢等个目珠，佢等就看到自家在 撒馬利亞 城內。</verse>
				<verse number="21">以色列 王看到 敘利亞 人，就問 以利沙 ：「阿爸啊，𠊎做得將佢等㓾掉麼？𠊎做得將佢等㓾掉麼？」</verse>
				<verse number="22">以利沙 講：「做毋得！就係你在戰場上捉到个兵仔也做毋得㓾。給佢等東西食，給佢等水啉；放佢等轉佢等个王該位去。」</verse>
				<verse number="23">所以， 以色列 王為佢等準備當滂沛个桌席，等佢等食飽啉足，就俾佢等轉到 敘利亞 王該位。對這以後， 敘利亞 个軍隊無再侵犯 以色列 个土地。</verse>
				<verse number="24">經過一段時間， 敘利亞 王 便‧哈達 召集全軍攻打 以色列 ，圍困 撒馬利亞 城。</verse>
				<verse number="25">結果，城內糧食缺乏，連驢仔个頭那也一隻值八十隻銀幣，野生个蔥仔 兩百公克值五隻銀幣。</verse>
				<verse number="26">一日， 以色列 王對城牆頂經過；有一個婦人家喊講：「國王啊，請幫助𠊎！」</verse>
				<verse number="27">王講：「若係上主毋幫助你，𠊎能幫助你麼介？𠊎敢還有麥仔抑係酒係麼？</verse>
				<verse number="28">你个困難係麼介？」 該婦人家應講：「這婦人家對𠊎講：『今晡日先將若孻仔拿來食，天光日正食吾孻仔。』</verse>
				<verse number="29">所以𠊎等將吾孻仔煮來食。第二日，𠊎對姖講：『輪到食若孻仔。』姖卻將厥孻仔囥起來！」</verse>
				<verse number="30">王聽到這事，就扯裂衫；佢繼續在城牆頂行等過个時，人民看到佢底背著个係粗麻衫。</verse>
				<verse number="31">王講：「𠊎今晡日毋將 沙法 个孻仔 以利沙 个頭那剁掉，願上帝嚴嚴責罰𠊎！」</verse>
				<verse number="32">王就派人去捉 以利沙 。 這時， 以利沙 堵好㧯來見佢个長老坐共下。王派來个人還吂到以前， 以利沙 對該兜長老講：「你等看，該隻兇手派人愛來斬𠊎个頭那了！佢到這位个時，你等愛關門，毋好俾佢入來。在佢後背敢毋係有王个腳步聲嗎？」</verse>
				<verse number="33">以利沙 話還吂講煞，王 就到了。佢講：「這災禍係上主降給𠊎等个；𠊎做麼介還愛等上主个幫助呢？」</verse>
			</chapter>
			<chapter number="7">
				<verse number="1">以利沙 講：「你等愛聽上主所講个話！上主講這好消息：天光日這個時，在 撒馬利亞 城門口，小麥三公斤只有賣一隻銀幣，大麥六公斤只有賣一隻銀幣。」</verse>
				<verse number="2">扶等王个軍長對神人講：「該係無可能个事。就係上主黏時打開天窗，乜無可能！」 以利沙 應佢講：「你一定會親眼看到這事發生；總係你麼介乜食毋到。」</verse>
				<verse number="3">在 撒馬利亞 城門外，有四個發癩个人；佢等大家交談講：「𠊎等做麼介坐在這位等死呢？</verse>
				<verse number="4">𠊎等到城肚去，城肚有飢荒，𠊎等會在該位餓死；𠊎等坐在這位，也係等死。𠊎等來去向 敘利亞 軍隊投降，無一定佢等會給𠊎等一條生路；佢等若係愛㓾𠊎等，就被佢等㓾好了。」</verse>
				<verse number="5">所以佢等在臨暗仔个時去 敘利亞 兵營。佢等行到營堘，總係無看到半個人。</verse>
				<verse number="6">原來主已經使 敘利亞 軍隊聽到大隊兵馬㧯戰車个聲音；佢等傳講：「 以色列 王買通 赫 人㧯 埃及 人該兜王來攻打𠊎等！」</verse>
				<verse number="7">所以該日臨暗仔， 敘利亞 人全部逃命走淨淨，佢等个帳篷、馬、驢全部無帶走；佢等个兵營還係留在原位。</verse>
				<verse number="8">該四個發癩个行到營地，入去帳篷，在該位又食又啉；佢等看到金仔、銀仔、㧯衫褲就拿去囥起來，然後又入去另外一座帳篷，再做共樣个事。</verse>
				<verse number="9">後來佢等彼此講：「𠊎等無應該恁樣做；𠊎等有好消息，做毋得毋㧯人講。若係𠊎等等到天光朝晨正講，𠊎等一定會受到刑罰。𠊎等這下就去㧯王个官員講！」</verse>
				<verse number="10">所以佢等轉到 撒馬利亞 ，向掌城門个人喊講：「𠊎等去過 敘利亞 兵營，無看到半個人，也聽毋到人聲。馬㧯驢全部還紽等，帳篷也還留在原位。」</verse>
				<verse number="11">掌門个喊起來，又將消息傳到王宮。</verse>
				<verse number="12">總係王在半夜䟘起來，就對佢个官員講：「𠊎㧯你等講，這係 敘利亞 人个陰謀！佢等知𠊎等這位做飢荒、會餓死，所以佻佻離開兵營，埋伏在田野；愛等𠊎等出城尋食物，該時就做得將𠊎等生生捉起來，好佔領這城。」</verse>
				<verse number="13">王个一個官員應講：「就像該兜死掉个人共樣，城肚所賸个人民早慢會餓死淨淨。所以，樣毋喊幾個人，騎五隻賸到个馬，去查看到底係麼介事情。」</verse>
				<verse number="14">所以，佢等選出幾個人來。王派這兜人坐兩輛戰車㧯馬，指示佢等去探 敘利亞 軍隊个實際情形。</verse>
				<verse number="15">這兜人一直追到 約旦 河，透路看到 敘利亞 人逃走時㧒掉个衫㧯武器，佢等就轉去報告王。</verse>
				<verse number="16">撒馬利亞 个人民遽遽出城去，搶 敘利亞 人个兵營。這時，就像上主講過个：小麥三公斤只有賣一隻銀幣，大麥六公斤只有賣一隻銀幣。</verse>
				<verse number="17">在這以前， 以色列 王有派扶等佢个軍長到城門口指揮，這軍長反轉被人群踏死在該位，就像神人 以利沙 在王去看佢該時所預言个。</verse>
				<verse number="18">神人識對王講：「天光日這個時，在 撒馬利亞 城門口，小麥三公斤只有賣一隻銀幣，大麥六公斤只有賣一隻銀幣。」</verse>
				<verse number="19">扶等王个軍長當時有對神人講：「該係無可能个事。就係上主黏時打開天窗，乜無可能！」 以利沙 應佢講：「你一定會親眼看到這事發生，總係你麼介乜食毋到。」</verse>
				<verse number="20">這話果然應驗，因為佢被城門口个人群踏死掉。</verse>
			</chapter>
			<chapter number="8">
				<verse number="1">以利沙 識㧯住在 書念 个婦人家講 (這婦人家个孻仔識被 以利沙 救生起來)：「上主愛使這地方受到七年个飢荒，你應該㧯屋下人離開這位，到別个地方去住。」</verse>
				<verse number="2">婦人家聽從神人个話，㧯屋下人共下到 非利士 去，在該位住七年。</verse>
				<verse number="3">七年過去，該婦人家對 非利士 轉來；姖去見王，請求收轉姖个屋仔㧯田地。</verse>
				<verse number="4">該時王向神人个僕人 基哈西 打探有關 以利沙 行神蹟个事。</verse>
				<verse number="5">基哈西 㧯王講 以利沙 樣般使死掉个人復活个時，該婦人家堵堵到王个面前，愛為姖个屋仔㧯田地求情。 基哈西 對王講：「𠊎个主，𠊎个王啊，這就係該婦人家，這乜係厥孻仔，就係 以利沙 救生起來个。」</verse>
				<verse number="6">王問該婦人家，姖就將事情講給王聽。所以王派一個官員，吩咐佢將該婦人家个東西全部還給姖，包含姖離開該七年間所有个出產。</verse>
				<verse number="7">以利沙 到 大馬士革 去个時， 敘利亞 王 便‧哈達 堵好發病仔。有人㧯王講，神人 以利沙 在 大馬士革 。</verse>
				<verse number="8">王對佢个大臣 哈薛 講：「你帶禮物去見神人，拜託佢問上主，看𠊎个病會好麼？」</verse>
				<verse number="9">所以 哈薛 用四十隻駱駝載等 大馬士革 所有最好个東西，帶等去做禮物愛送給 以利沙 。 哈薛 看到 以利沙 ，講：「你个僕人 敘利亞 王 便‧哈達 派𠊎來請問你，佢个病會好麼？」</verse>
				<verse number="10">以利沙 講：「上主指示𠊎，佢一定會死；總係你轉去愛㧯佢講，佢一定會好。」</verse>
				<verse number="11">接等， 以利沙 䁯等看 哈薛 ，害佢感覺當無自在。忽然間，神人卻噭出來。</verse>
				<verse number="12">哈薛 問：「先生，你做麼介噭？」 以利沙 講：「因為𠊎知你會做盡殘忍个事傷害 以色列 人民。你會用火燒掉佢等个城堡，㓾掉佢等个青年，㧹死佢等个細人仔，又會剖開佢等有身項个婦女。」</verse>
				<verse number="13">哈薛 講：「若僕人算麼介，像一條狗樣，㖠有可能做恁大个事呢？」 以利沙 講：「上主指示𠊎，你會做 敘利亞 个王。」</verse>
				<verse number="14">哈薛 離開 以利沙 ，轉到厥主人該位。 便‧哈達 問佢：「 以利沙 講麼介？」 哈薛 講：「佢講你一定會好。」</verse>
				<verse number="15">第二日， 哈薛 拿一條浸過水个毯仔揞王个面，將王熻死。 就恁樣， 哈薛 篡王位做 敘利亞 王。</verse>
				<verse number="16">以色列 王 亞哈 个孻仔 約蘭 在位个第五年， 猶大 王 約沙法 還在位个時， 約沙法 个孻仔 約何蘭 做 猶大 王；</verse>
				<verse number="17">該時佢三十二歲。佢在 耶路撒冷 統治八年。</verse>
				<verse number="18">佢討 亞哈 个妹仔做𡜵娘，所以佢就像 亞哈 屋下个人共樣，做 以色列 該兜王所做、上主看做邪惡个事。</verse>
				<verse number="19">總係上主因為厥僕人 大衛 个緣故，一直毋肯滅 猶大 ；照佢所應許 大衛 个話，愛使 大衛 个後代永遠有人做王。</verse>
				<verse number="20">約何蘭 在位期間， 以東 造反，對 猶大 獨立出去，自家設立王。</verse>
				<verse number="21">所以 約何蘭 帶領所有个戰車到 撒益 去， 以東 人就在該位將佢等包圍。暗晡時， 約何蘭 㧯佢个戰車指揮官對包圍當中逃走；佢个軍隊也全部走轉自家个屋下。</verse>
				<verse number="22">對該日以後， 以東 就對 猶大 獨立出去。在這期間， 立拿 城也造反。</verse>
				<verse number="23">約何蘭 其他个事全部記在《 猶大 列王史》底背。</verse>
				<verse number="24">約何蘭 死後，葬在 大衛 城个王室墳墓肚。厥孻仔 亞哈謝 承接佢做王。</verse>
				<verse number="25">以色列 王 亞哈 个孻仔 約蘭 在位第十二年， 約何蘭 个孻仔 亞哈謝 做 猶大 王。</verse>
				<verse number="26">亞哈謝 二十二歲个時做王，在 耶路撒冷 統治一年。厥姆安到 亞她利雅 ，係 以色列 王 暗利 个孫女。</verse>
				<verse number="27">亞哈謝 因為婚姻个關係，成做 亞哈 个親戚；佢像 亞哈 家族个人共樣，行上主看做邪惡个事。</verse>
				<verse number="28">亞哈謝 王㧯 以色列 个 約蘭 王聯合起來，去攻打 敘利亞 王 哈薛 。雙方軍隊在 基列 个 拉末 相㓾。 約蘭 著傷，</verse>
				<verse number="29">就轉到 耶斯列 城療傷； 亞哈謝 就去該位看佢。</verse>
			</chapter>
			<chapter number="9">
				<verse number="1">該時，先知 以利沙 喊一個後生先知來，吩咐佢：「遽遽繫好腰帶，帶這罌橄欖油到 基列 个 拉末 去。</verse>
				<verse number="2">到該位，你就尋 約沙法 个孻仔 耶戶 ，就係 寧示 个孫仔，帶佢離開佢个同伴，到一間無人个間房去，</verse>
				<verse number="3">將這橄欖油倒在佢个頭那頂，講：『上主宣佈講：𠊎膏油設立你做 以色列 个王。』然後你就開門，遽遽走，毋好停跎。」</verse>
				<verse number="4">所以，該後生先知就到 基列 个 拉末 去。</verse>
				<verse number="5">佢在該位看到有兜軍官堵好坐共下，就講：「將軍，𠊎有話愛對你講。」 耶戶 問：「𠊎等當中你愛㧯㖠位講話呢？」 佢講：「將軍，就係你。」</verse>
				<verse number="6">所以佢兩儕進入一間屋肚；該後生先知將橄欖油倒在 耶戶 頭那頂，對佢講：「上主 — 以色列 个上帝恁樣宣佈：『𠊎膏油設立你做𠊎个子民 以色列 个王。</verse>
				<verse number="7">你愛㓾死若主人 亞哈 个全家。𠊎恁樣做，係愛為𠊎該兜先知㧯其他僕人被 耶洗碧 㓾死來報冤仇。</verse>
				<verse number="8">所有 亞哈 屋下个人㧯後代全部愛滅亡；𠊎愛對 以色列 當中除掉 亞哈 家族所有个男人，無論做奴才抑係自由身个全部愛除掉。</verse>
				<verse number="9">𠊎愛像對待 尼八 个孻仔 耶羅波安 王㧯 亞希雅 个孻仔 巴沙 王恁樣來對待 亞哈 个家族。</verse>
				<verse number="10">講到 耶洗碧 ，無人會去埋葬姖；姖个屍體會在 耶斯列 地方被狗仔食掉。』」該後生先知一講煞就開門盡命走。</verse>
				<verse number="11">耶戶 轉到同事該位；佢等問佢：「有麼介事？該癲仔來看你做麼介？」 耶戶 應講：「你等識佢，也知佢會講麼介。」</verse>
				<verse number="12">佢等講：「亂講，無講𠊎等樣會知！」 耶戶 講：「佢㧯𠊎講，上主恁樣宣佈：『𠊎膏油設立你做 以色列 个王。』」</verse>
				<verse number="13">耶戶 該兜同事遽遽將佢等个外衫鋪在段仔頂高，喊 耶戶 企上去，然後歕羊角，大聲喊講：「 耶戶 做王了！」</verse>
				<verse number="14">恁樣， 寧示 个孫仔， 約沙法 个孻仔 耶戶 就計劃愛反 約蘭 。 (先前 約蘭 㧯 以色列 眾人因為 敘利亞 王 哈薛 个緣故，看守 基列 个 拉末 。</verse>
				<verse number="15">該時 約蘭 王在 耶斯列 療傷，因為佢在 拉末 戰場㧯 敘利亞 王 哈薛 相㓾个時著傷。) 耶戶 對佢該兜同事講：「你等若擁護𠊎，就毋好俾人逃出 拉末 到 耶斯列 去報消息，一個也做毋得。」</verse>
				<verse number="16">所以 耶戶 坐上佢个戰車，去 耶斯列 。 約蘭 个傷還吂好； 猶大 王 亞哈謝 已經到該位去看佢。</verse>
				<verse number="17">在 耶斯列 守望臺頂企个守衛看到 耶戶 帶等一群人來，就喊：「𠊎看到一群人向這片來！」 約蘭 講：「派一個騎兵去迎接佢等，問佢等係帶來平安麼。」</verse>
				<verse number="18">騎兵就去迎接 耶戶 ，對佢講：「王問，你等係帶來平安麼。」 耶戶 講：「係毋係平安干你麼介事？你跈在𠊎後背！」 守望个人報告講：「使者到佢等該位，卻無轉來。」</verse>
				<verse number="19">王又派另外一個騎兵去。這人到佢等該位，講：「王問，你等係帶來平安麼。」 耶戶 又應講：「平安無平安干你麼介事？你跈在𠊎後背！」</verse>
				<verse number="20">守望个人又報告講：「使者到佢等該位，也無轉來。」佢又講：「駛戰車个人當狂，像係 寧示 个孫仔 耶戶 ！」</verse>
				<verse number="21">約蘭 下令講：「預備𠊎个戰車！」戰車預備好， 以色列 王 約蘭 㧯 猶大 王 亞哈謝 就自家坐自家个戰車出去迎接 耶戶 。佢等在 耶斯列 人 拿伯 个田肚堵到佢。</verse>
				<verse number="22">約蘭 問佢：「 耶戶 ，你係帶來平安麼？」 耶戶 應講：「𠊎等國內還有恁多若姆 耶洗碧 所行个淫亂㧯邪術，樣會有平安？」</verse>
				<verse number="23">約蘭 斡轉戰車逃走，喊講：「 亞哈謝 啊， 耶戶 造反了！」</verse>
				<verse number="24">耶戶 盡命拉弓，射到 約蘭 个背囊，一箭穿心； 約蘭 橫在戰車頂死掉。</verse>
				<verse number="25">耶戶 對佢个助手 畢甲 講：「將佢个屍體㧒在 耶斯列 人 拿伯 个田肚！記得你㧯𠊎識共下跈 約蘭 个阿爸 亞哈 後背駛車麼；上主識對 亞哈 講過恁樣个預言：</verse>
				<verse number="26">『𠊎昨晡日看到 拿伯 㧯佢該兜孻仔被人謀殺；𠊎一定愛在這垤田肚責罰你！』這就係上主講个。所以，你愛將 約蘭 个屍體㧒在 拿伯 个田肚，實現上主个話。」</verse>
				<verse number="27">猶大 王 亞哈謝 一看到所發生个事，就坐戰車向 伯‧哈干 城逃走。 耶戶 在後背追；佢命令部下：「將佢也㓾掉！」所以，在 亞哈謝 个戰車駛向 姑珥 个路上，近 以伯蓮 个地方， 耶戶 个部下將佢射到著傷。總係 亞哈謝 還係向前走，直到 米吉多 城正死在該位。</verse>
				<verse number="28">佢个部下用戰車載佢个屍體轉 耶路撒冷 ，葬在 大衛 城个王室墳墓肚。</verse>
				<verse number="29">亞哈謝 做 猶大 王个時係 以色列 王 亞哈 个孻仔 約蘭 在位个第十一年。</verse>
				<verse number="30">耶戶 到 耶斯列 。 耶洗碧 聽到所發生个事，就梳頭打扮，對王宮个一個窗門向外看。</verse>
				<verse number="31">耶戶 對城門入來个時， 耶洗碧 喊講：「你這隻像 心利 謀殺王个兇手，你會帶來平安麼？」</verse>
				<verse number="32">耶戶 昂頭看窗仔，喊講：「麼人擁護𠊎？麼人？」有兩三個太監就對窗門擔頭看等佢。</verse>
				<verse number="33">耶戶 對佢等講：「將姖㧒下來！」佢等就將 耶洗碧 㧒下來。姖个血噴到牆頂㧯馬仔。 耶戶 駛戰車輾過姖个屍體。</verse>
				<verse number="34">耶戶 入去王宮，又食又啉，然後講：「將這個受咒詛个婦人家扛去埋掉；因為姖係王个妹仔。」</verse>
				<verse number="35">總係該兜去埋姖个人只有尋到姖个頭那殼㧯手腳个骨頭。</verse>
				<verse number="36">佢等轉去報告 耶戶 个時，佢講：「這就係上主通過佢僕人 提斯比 人 以利亞 所講愛發生个事。佢講：『狗仔愛在 耶斯列 个地方食 耶洗碧 个屍體；</verse>
				<verse number="37">賸到个屍體愛像田肚个糞堆，無人認得出該係 耶洗碧 。』」</verse>
			</chapter>
			<chapter number="10">
				<verse number="1">亞哈 王有七十個子孫住在 撒馬利亞 。 耶戶 寫信仔給城肚 个領袖、長老、㧯 亞哈 子孫个監護人，恁樣講：</verse>
				<verse number="2">「你等係監護王後代个人；你等有自家个戰車、馬仔、武器、㧯堅固个城。</verse>
				<verse number="3">所以，你等接到這信仔以後，就愛在王个後代中選出一個能力最強个人來，設立佢做王，好為你等主人个家相㓾。」</verse>
				<verse number="4">撒馬利亞 該兜領袖全部嚇到會死；佢等講：「連 約蘭 王㧯 亞哈謝 王也無法度對抗 耶戶 ！𠊎等樣做得對抗佢呢？」</verse>
				<verse number="5">所以王宮个總管㧯市長，連長老㧯該兜監護人，共下寫信仔送給 耶戶 講：「𠊎等係你个僕人，你吩咐𠊎等做个事，𠊎等全部會照做；總係𠊎等無愛設立麼人做王。請你吩咐𠊎等愛樣般做！」</verse>
				<verse number="6">耶戶 又寫一封信仔給佢等，講：「若係你等歸順𠊎，願意聽𠊎个命令，天光日這時，愛將 亞哈 王該兜子孫个頭那 全部帶到 耶斯列 給𠊎。」 亞哈 七十個子孫係被 撒馬利亞 尊貴个人養育。</verse>
				<verse number="7">當 耶戶 个信到个時，這兜尊貴个人將 亞哈 七十個子孫全部㓾掉，又將佢等个頭那裝在籃肚，送到 耶斯列 給 耶戶 。</verse>
				<verse number="8">有使者㧯 耶戶 講， 亞哈 王該兜子孫个頭那已經帶來了。佢就命令人將該兜人个頭那堆在城門口，堆做兩堆，留到第二日。</verse>
				<verse number="9">第二日打早， 耶戶 到城門口去，對該位个民眾講：「係𠊎反 約蘭 王，將佢㓾掉；總係這兜人係麼人㓾个呢？</verse>
				<verse number="10">這證明上主所講有關 亞哈 後代个逐句話全部愛成就。上主已經實現佢通過佢个僕人先知 以利亞 所講个預言。」</verse>
				<verse number="11">所以 耶戶 將 亞哈 該兜住在 耶斯列 个親屬、官員、親密个朋友、㧯祭司，全部㓾淨淨，一個也無留。</verse>
				<verse number="12">耶戶 離開 耶斯列 到 撒馬利亞 去。在路上一個牧人剪羊毛个地方，</verse>
				<verse number="13">佢堵到 猶大 王 亞哈謝 个幾個親族，就問佢等：「你等係麼人？」 佢等講：「𠊎等係 亞哈謝 个親族，愛到 耶斯列 去，向 耶洗碧 太后該兜王子㧯王其他个親族問安。」</verse>
				<verse number="14">耶戶 吩咐：「將佢等生生捉起來！」佢个部下就將佢等捉起來，在剪羊毛場个井堘將佢等㓾掉，一共四十二儕，一個也無留。</verse>
				<verse number="15">耶戶 對該位向前行，在路上堵到 利甲 个孻仔 約拿達 來迎接佢，就向佢問安講：「你對𠊎个誠意㧯𠊎對你个誠意共樣麼？」 約拿達 講：「共樣！」 耶戶 應講：「恁樣，手伸出來。」然後 耶戶 拉佢上戰車，</verse>
				<verse number="16">講：「跈𠊎來，看𠊎樣般熱心為上主辦事。」佢等共下坐車到 撒馬利亞 。</verse>
				<verse number="17">到該位， 耶戶 將 亞哈 其他个親族全部㓾掉，一個也無留，像上主通過 以利亞 所講个預言。</verse>
				<verse number="18">耶戶 召集所有个人民，對佢等講：「 亞哈 對 巴力 神明个事奉還毋罅，𠊎 — 耶戶 愛還較熱心來事奉佢。</verse>
				<verse number="19">你等去召集 巴力 所有个先知、所有拜 巴力 个人、㧯祭司來，毋好漏掉一個。𠊎愛向 巴力 獻大祭，無來个的確會無命，就愛處死。」這係 耶戶 个計謀；因為佢愛㓾掉所有拜 巴力 个人。</verse>
				<verse number="20">所以 耶戶 下令講：「愛宣佈召開大會來拜 巴力 ！」就發出通告。</verse>
				<verse number="21">耶戶 派人傳話到 以色列 逐所在。所有拜 巴力 个人全部來了，一個也無少。佢等入去 巴力 个廟，對頭前到後背全部尖到拶拶。</verse>
				<verse number="22">耶戶 吩咐管禮服个祭司將禮服帶出來給所有拜 巴力 个人著，佢就照命令去做。</verse>
				<verse number="23">然後， 耶戶 㧯 利甲 个孻仔 約拿達 也入 巴力 个廟肚去，對該位个民眾講：「你等愛確實調查清楚，拜 巴力 个人正做得在場；敬拜上主个人做毋得入來。」</verse>
				<verse number="24">所以 耶戶 㧯 約拿達 入去獻牲祭㧯燒化祭。 耶戶 已經派八十個人掌在廟个外背，吩咐佢等：「你等愛將這兜人全部㓾淨淨；若係俾一儕走掉，一定愛拿自家个命來賠！」</verse>
				<verse number="25">耶戶 獻祭煞，對該兜守衛㧯官長講：「到底背去，將佢等全部㓾掉！不准一個逃走！」佢等就入去，用刀仔㓾掉所有个人，將屍體拖出去。然後，佢等到 巴力 廟肚个內殿，</verse>
				<verse number="26">將 巴力 廟肚个柱像搬出來燒掉；</verse>
				<verse number="27">佢等破壞 巴力 个柱像，拆掉 巴力 个廟，將廟拿來做便所，直到今晡日。</verse>
				<verse number="28">恁樣， 耶戶 對 以色列 當中除掉拜 巴力 个事。</verse>
				<verse number="29">總係 耶戶 無離開 尼八 个孻仔 耶羅波安 所犯个罪，就係害 以色列 人在 伯特利 㧯 但 拜金牛。</verse>
				<verse number="30">上主對 耶戶 講：「因為你對 亞哈 个子孫所做个事盡著，合𠊎心意，所以你个後代會承接你做 以色列 个王，到第四代。」</verse>
				<verse number="31">總係 耶戶 無全心遵守上主 — 以色列 上帝个法律。佢還係毋離開 耶羅波安 个罪，繼續害 以色列 人犯罪。</verse>
				<verse number="32">該時，上主縮細 以色列 个土地。 敘利亞 王 哈薛 攻擊 以色列 全地，</verse>
				<verse number="33">佔領 約旦 河東片所有个土地，南片直到 亞嫩 河滣个 亞羅珥 城，包含 基列 㧯 巴珊 个土地，就係 迦得 、 呂便 、東 瑪拿西 支族所住个地方。</verse>
				<verse number="34">耶戶 其他个事，㧯佢英勇个所做，全部記在《 以色列 列王史》底背。</verse>
				<verse number="35">耶戶 死後葬在 撒馬利亞 ；佢个孻仔 約哈斯 承接佢做王。</verse>
				<verse number="36">耶戶 在 撒馬利亞 做 以色列 王二十八年。</verse>
			</chapter>
			<chapter number="11">
				<verse number="1">亞哈謝 王个阿姆 亞她利雅 一聽講厥孻仔被人㓾死，就下令將 猶大 王个全家族㓾死。</verse>
				<verse number="2">亞哈謝 个孻仔 約阿施 險險㧯別個王子共樣也被太后㓾死，總係厥姑 約示芭 將佢偷救出來； 約示芭 係 約何蘭 王个妹仔、 亞哈謝 共爺無共𡟓个老妹。姖將 約阿施 㧯佢个乳𡟓囥在聖殿肚个間房，閃避 亞她利雅 ，所以 約阿施 無被太后㓾死。</verse>
				<verse number="3">亞她利雅 太后統治 猶大 个期間， 約阿施 㧯乳𡟓在上主个聖殿肚囥六年。</verse>
				<verse number="4">到第七年，祭司 耶何耶大 在上主个聖殿召見負責王室警衛㧯保護王宮該兜軍官，㧯佢等立約；佢喊佢等在上主个聖殿發誓，同意佢个計劃。然後佢就將王子 約阿施 帶到佢等面前，</verse>
				<verse number="5">並命令佢等講：「安息日，你等當班个，三分之一个人愛看守王宮，</verse>
				<verse number="6">三分之一个人愛看守 蘇珥 門，三分之一个人愛看守衛兵營个後門，大家愛照輪班看守王宮。</verse>
				<verse number="7">在安息日無當班个兩隊人愛在上主个聖殿看守，保護王。</verse>
				<verse number="8">你等逐儕愛拿等武器圍等來保護 約阿施 王；佢行到㖠位，你等就跈到㖠位；若係有人硬撞入來，就愛將佢㓾掉。」</verse>
				<verse number="9">該兜軍官照祭司 耶何耶大 个指示將佢等个軍隊，無論在安息日當班抑係無當班个，全部帶來見祭司 耶何耶大 。</verse>
				<verse number="10">耶何耶大 將以前放在聖殿肚 大衛 王該兜槍㧯盾牌交給軍官。</verse>
				<verse number="11">衛兵拿等武器企在聖殿頭前，對南片到北片，在祭壇㧯聖殿該位，愛在王子四周圍保護佢。</verse>
				<verse number="12">然後， 耶何耶大 帶王子 約阿施 出來，將王冠戴在佢頭那頂，將一本有關王權條款个法律書交給佢，膏油設立佢做王。民眾拍手大聲喊：「願王萬歲！」</verse>
				<verse number="13">亞她利雅 聽到守衛㧯民眾歡喜盡嘶个聲，遽遽到群眾聚集个聖殿去。</verse>
				<verse number="14">姖看到新王照儀式企在聖殿入口个柱仔堘頭，該兜軍官㧯喇叭手圍等佢，民眾全部歡喜到大聲喊，盡歕喇叭。 亞她利雅 扯爛衫，喊講：「造反了！造反了！」</verse>
				<verse number="15">祭司 耶何耶大 無愛 亞她利雅 在上主个聖殿該位被人㓾死，吩咐該兜軍官講：「將姖對守衛當中帶出去；敢救姖个，共樣愛俾佢死。」</verse>
				<verse number="16">所以佢等捉等 亞她利雅 ，將姖帶到王宮，在 馬門 該所在將姖㓾掉。</verse>
				<verse number="17">祭司 耶何耶大 設法俾 約阿施 王、人民㧯上主立約，愛做上主个子民。佢也喊王㧯人民立約。</verse>
				<verse number="18">所以，全國人民到 巴力 廟去，拆掉廟，敲掉祭壇㧯偶像，又在祭壇頭前㓾掉 巴力 个祭司 馬坦 。 耶何耶大 派人看守上主个聖殿，</verse>
				<verse number="19">然後，佢㧯軍官、王室侍衛、王宮守衛，護送王對聖殿到王宮；民眾全部跈在後背。 約阿施 對衛兵營个門入去，坐在寶座頂高。</verse>
				<verse number="20">全國人民歡喜快樂，城肚也當平靜，因為該時 亞她利雅 已經在王宮被人㓾死。</verse>
				<verse number="21">約阿施 做 猶大 王个時正七歲。</verse>
			</chapter>
			<chapter number="12">
				<verse number="1">以色列 王 耶戶 在位个第七年， 約阿施 做 猶大 王。佢在 耶路撒冷 統治四十年。厥姆 西比亞 係 別是巴 城个人。</verse>
				<verse number="2">約阿施 一生行上主看做著个事，因為有祭司 耶何耶大 教佢。</verse>
				<verse number="3">總係，佢無除掉山岡頂个神廟，人民還係在該位獻祭燒香。</verse>
				<verse number="4">約阿施 喊該兜祭司來，吩咐佢等好好保管該兜為到獻祭付給聖殿个錢，無論係個人應當獻个錢抑係自願奉獻个錢，</verse>
				<verse number="5">逐個祭司愛負責保管佢所服務个人所獻个錢，這兜錢愛做整聖殿个用途。</verse>
				<verse number="6">總係，到 約阿施 王在位第二十三年，該兜祭司還吂整聖殿。</verse>
				<verse number="7">所以 約阿施 王召見祭司 耶何耶大 㧯其他个祭司，問佢等：「你等做麼介還吂整聖殿呢？對這下開始，你等毋使再負責保管收到个錢，愛將錢交出來，好開始整聖殿个工作。」</verse>
				<verse number="8">該兜祭司同意毋使再負責收錢，也毋使負責整聖殿。</verse>
				<verse number="9">所以，祭司 耶何耶大 拿來一隻箱仔，箱蓋頂高鑽一隻孔仔，放在祭壇附近，在聖殿入門口个右片。在入門口當班个祭司將該兜來敬拜个人所獻个錢全部放入箱肚。</verse>
				<verse number="10">箱肚个錢滿了，王室書記㧯大祭司就來，將錢算好，包起來。</verse>
				<verse number="11">佢等登記確實个數量以後，就將錢交給監督整聖殿个人。這兜人就付工錢給木匠、建築工人、</verse>
				<verse number="12">泥水師傅、㧯打石師傅，又買木材㧯石材來整聖殿，還有支出所有其他整聖殿个費用。</verse>
				<verse number="13">總係這兜錢無拿來製造銀杯、碗、喇叭、燈心剪，抑係其他金銀用品个用途，</verse>
				<verse number="14">全部交給該兜監督个人拿去整聖殿。</verse>
				<verse number="15">佢等將錢交給做工个人。監督个人做人誠實，毋使人㧯佢等算數。</verse>
				<verse number="16">該兜贖過失祭㧯贖罪祭个錢就毋使放入去做聖殿个用途；這兜錢係歸給祭司个。</verse>
				<verse number="17">該時， 敘利亞 王 哈薛 上去攻打 迦特 城，佔領後，就決定進攻 耶路撒冷 。</verse>
				<verse number="18">猶大 王 約阿施 將厥祖先 約沙法 、 約何蘭 、㧯 亞哈謝 這兜 猶大 王獻給上主个禮物，加上自家獻个禮物，並聖殿㧯王宮寶庫肚所有个金仔，全部拿來做禮物送給 敘利亞 王 哈薛 ，所以 哈薛 就帶佢个軍隊離開 耶路撒冷 。</verse>
				<verse number="19">約阿施 其他个事全部記在《 猶大 列王史》底背。</verse>
				<verse number="20">約阿施 个官員陰謀造反；其中兩儕，一個係 示米押 个孻仔 約撒甲 ，另外一個係 朔默 个孻仔 約薩拔 。佢等在愛下去 悉拉 路項个 米羅 宮 將 約阿施 㓾掉。 約阿施 葬在 大衛 城个王室墳墓肚；佢个孻仔 亞瑪謝 承接佢做王。</verse>
				<verse number="21"></verse>
			</chapter>
			<chapter number="13">
				<verse number="1">猶大 王 亞哈謝 个孻仔 約阿施 在位第二十三年， 耶戶 个孻仔 約哈斯 做 以色列 王；佢在 撒馬利亞 統治十七年。</verse>
				<verse number="2">佢行上主看做邪惡个事，像 尼八 个孻仔 耶羅波安 王恁樣害 以色列 人犯罪；佢一直無改變。</verse>
				<verse number="3">所以，上主向 以色列 發譴，使 敘利亞 王 哈薛 㧯佢个孻仔 便‧哈達 常常打贏 以色列 。</verse>
				<verse number="4">後來， 約哈斯 祈求上主，上主就聽佢个祈禱，因為佢看到 敘利亞 王樣般壓迫 以色列 人。</verse>
				<verse number="5">上主賜給 以色列 一個解救者；這解救者使 以色列 人脫離 敘利亞 人个壓迫。所以， 以色列 人又像以前共樣安居樂業。</verse>
				<verse number="6">總係佢等還係犯 耶羅波安 家族害 以色列 人犯个罪，無離開偶像，在 撒馬利亞 還留等 亞舍拉 女神个像。</verse>
				<verse number="7">敘利亞 王險險消滅 約哈斯 个軍隊，將佢等當做禾埕个灰塵恁樣蹂踏，佢等只有賸五十個騎兵、十輛戰車、㧯一萬個步兵。</verse>
				<verse number="8">約哈斯 其他个事，㧯佢英勇个所做，全部記在《 以色列 列王史》底背。</verse>
				<verse number="9">約哈斯 死掉，葬在 撒馬利亞 ；佢个孻仔 約華施 承接佢做王。</verse>
				<verse number="10">猶大 王 約阿施 在位第三十七年， 約哈斯 个孻仔 約華施 做 以色列 王；佢在 撒馬利亞 統治十六年。</verse>
				<verse number="11">佢行上主看做邪惡个事，學 尼八 个孻仔 耶羅波安 王个壞模樣，害 以色列 人犯罪；佢一直無改變。</verse>
				<verse number="12">約華施 其他个事，包含佢在戰場對抗 猶大 王 亞瑪謝 英勇个所做，全部記在《 以色列 列王史》底背。</verse>
				<verse number="13">約華施 死掉，葬在 撒馬利亞 、 以色列 个王室墳墓肚；佢个孻仔 耶羅波安 二世承接佢做王。</verse>
				<verse number="14">先知 以利沙 發到絕症；佢會死个時， 以色列 王 約華施 去看佢，伏等緊噭緊喊：「阿爸啊，阿爸啊！ 以色列 个戰車㧯騎兵啊 ！」</verse>
				<verse number="15">以利沙 吩咐王：「你去拿弓㧯箭來！」 約華施 就拿來了。</verse>
				<verse number="16">以利沙 喊 以色列 王準備拉弓，王就用手拉弓。 以利沙 將手放在王个手項，</verse>
				<verse number="17">王就照先知个指示打開向東片个窗門。 以利沙 講：「射箭！」王个箭一射出，先知就喊：「上主勝利个箭，就係贏過 敘利亞 个箭。你愛在 亞弗 攻打 敘利亞 人，直到將佢等消滅淨淨。」</verse>
				<verse number="18">接等， 以利沙 喊 以色列 王拿兜箭來，佢就拿來。 以利沙 講：「打地泥！」王打三擺就停下來。</verse>
				<verse number="19">神人 以利沙 發譴，對王講：「你應該打五、六擺，恁樣，你正能徹底贏過 敘利亞 人；總係這下你單淨做得贏佢等三擺。」</verse>
				<verse number="20">以利沙 死掉；佢等就埋葬佢。 逐年春天， 摩押 人弛崗打陣來侵犯 以色列 。</verse>
				<verse number="21">一擺，有人堵好在埋葬死人，忽然看到該群人來，就將屍體㧒入 以利沙 个墳墓，轉身就走。屍體一憑到 以利沙 个骨骸，死人就返生，企起來。</verse>
				<verse number="22">約哈斯 在位期間， 敘利亞 王 哈薛 一直壓迫 以色列 人。</verse>
				<verse number="23">總係上主因為佢㧯 亞伯拉罕 、 以撒 、 雅各 有立約，就恩待 以色列 人，憐憫佢等，看顧佢等，還係毋肯消滅佢等，也毋拌得逐佢等離開佢个面前。</verse>
				<verse number="24">敘利亞 王 哈薛 死掉；佢个孻仔 便‧哈達 承接佢做王。</verse>
				<verse number="25">以色列 王 約華施 三擺打贏 便‧哈達 ，將以前厥爸 約哈斯 時代被 哈薛 搶去个 以色列 城市收轉來。</verse>
			</chapter>
			<chapter number="14">
				<verse number="1">以色列 王 約哈斯 个孻仔 約華施 在位第二年， 約阿施 个孻仔 亞瑪謝 做 猶大 王。</verse>
				<verse number="2">佢二十五歲个時做王，在 耶路撒冷 統治二十九年。佢个阿姆 約耶但 係 耶路撒冷 人。</verse>
				<verse number="3">亞瑪謝 行上主看做著个事，總係佢並無做到像厥祖先 大衛 王恁好；佢學厥爸 約阿施 所做个定定，</verse>
				<verse number="4">無拆掉山岡頂个神廟，人民還係在該位獻祭燒香。</verse>
				<verse number="5">亞瑪謝 一堅固政權，就㓾掉該兜暗殺厥爸个官員，</verse>
				<verse number="6">總係佢並無㓾佢等个子女。佢照上主在 摩西 法律書中个命令來做；上主講：「爺𡟓無應該因為子女所犯个罪來處死；子女也無應該因為爺𡟓所犯个罪來處死。逐儕應當擔當自家所犯个罪。」</verse>
				<verse number="7">亞瑪謝 在 死海 南片个 鹽谷 㓾掉一萬 以東 人，又佔領 西拉 城，將它个名改做 約帖 ，直到今晡日。</verse>
				<verse number="8">亞瑪謝 派使者去見 耶戶 个孫仔、 約哈斯 个孻仔 以色列 王 約華施 ，激佢講：「𠊎等來去戰場拚輸贏！」</verse>
				<verse number="9">總係 以色列 王 約華施 派使者去見 猶大 王 亞瑪謝 ，應佢講：「有一擺， 黎巴嫩 山頂个一頭竻仔對一頭香柏樹講：『將你个妹仔嫁給𠊎个孻仔啊！』無想到，有一隻野獸對該位過，該頭竻仔卻被牠蹂掉。</verse>
				<verse number="10">亞瑪謝 啊，打贏 以東 人你个心就恁驕傲噢！在屋下享受你个光榮就好了；何麼死苦惹這個災禍，害你㧯 猶大 人民共下滅亡？」</verse>
				<verse number="11">亞瑪謝 毋聽。所以 以色列 王 約華施 帶領軍隊，在 猶大 个 伯‧示麥 㧯 猶大 王 亞瑪謝 相㓾。</verse>
				<verse number="12">猶大 軍隊打輸，所有士兵全部走轉屋下去。</verse>
				<verse number="13">以色列 王 約華施 在 伯‧示麥 捉到 亞哈謝 个孫仔、 約阿施 个孻仔 猶大 王 亞瑪謝 ，然後進攻 耶路撒冷 ，將 以法蓮 門到 角門 大約兩百公尺長个一段城牆全部拆掉。</verse>
				<verse number="14">約華施 又將上主个聖殿肚所有个金銀、用品，㧯王宮个財寶全部帶轉 撒馬利亞 ，也帶兜人做人質。</verse>
				<verse number="15">約華施 其他个事，包含佢㧯 猶大 王 亞瑪謝 相㓾這兜英勇个事，全部記在《 以色列 列王史》底背。</verse>
				<verse number="16">約華施 死掉，葬在 撒馬利亞 ， 以色列 个王室墳墓肚；佢个孻仔 耶羅波安 二世承接佢做王。</verse>
				<verse number="17">以色列 王 約哈斯 个孻仔 約華施 死後， 猶大 王 約阿施 个孻仔 亞瑪謝 還食加十五年。</verse>
				<verse number="18">亞瑪謝 其他个事全部記在《 猶大 列王史》底背。</verse>
				<verse number="19">在 耶路撒冷 ，有人造反愛謀殺 亞瑪謝 ，所以佢逃到 拉吉 城；總係造反个派人逐到該位，將佢㓾掉。</verse>
				<verse number="20">有人將佢个屍體用馬仔載轉 耶路撒冷 ，葬在 大衛 城个王室墳墓肚。</verse>
				<verse number="21">所有个 猶大 人民設立厥十六歲个孻仔 烏西雅 承接佢做王。</verse>
				<verse number="22">亞瑪謝 王死掉以後， 烏西雅 將 以拉他 收轉來歸屬 猶大 ，重新修建。</verse>
				<verse number="23">猶大 王 約阿施 个孻仔 亞瑪謝 在位第十五年， 約華施 个孻仔 耶羅波安 二世做 以色列 王；佢在 撒馬利亞 統治四十一年。</verse>
				<verse number="24">佢行上主看做邪惡个事，學厥祖先 尼八 个孻仔 耶羅波安 个壞模樣，害 以色列 人犯罪。</verse>
				<verse number="25">佢將所有屬 以色列 个土地收轉來，對北方个 哈馬 隘口直到南方个 死海 。這係上主 — 以色列 个上帝通過佢个僕人 迦特‧希弗 人 亞米太 个孻仔，先知 約拿 所預言个。</verse>
				<verse number="26">上主看到所有个 以色列 人，無論自由抑係無自由个，受到當大个苦難，無人幫助佢等。</verse>
				<verse number="27">上主毋拌得 以色列 人滅掉去，所以佢通過 約華施 个孻仔 耶羅波安 二世拯救佢等。</verse>
				<verse number="28">耶羅波安 二世其他个事，佢在戰場个勇敢㧯佢樣般將 大馬士革 㧯 哈馬 收轉來歸屬 以色列 ，全部記在《 以色列 列王史》底背。</verse>
				<verse number="29">耶羅波安 二世死掉，葬在 以色列 个王室墳墓肚；佢个孻仔 撒迦利雅 承接佢做王。</verse>
			</chapter>
			<chapter number="15">
				<verse number="1">以色列 王 耶羅波安 二世在位第二十七年， 亞瑪謝 个孻仔 烏西雅 做 猶大 王。</verse>
				<verse number="2">該時 烏西雅 十六歲；佢在 耶路撒冷 統治五十二年。厥姆安到 耶可利雅 ，係 耶路撒冷 人。</verse>
				<verse number="3">烏西雅 學厥爸 亞瑪謝 个模樣，行上主看做著个事；</verse>
				<verse number="4">總係佢無除掉山岡頂个神廟，人民還係在該位獻祭燒香。</verse>
				<verse number="5">上主降災難給 烏西雅 王，使佢發癩，直到佢過身。佢就住在隔離个王宮肚，厥孻仔 約坦 掌管國家，治理人民。</verse>
				<verse number="6">烏西雅 其他个事全部記在《 猶大 列王史》底背。</verse>
				<verse number="7">烏西雅 死掉，葬在 大衛 城个王室墳墓肚；佢个孻仔 約坦 承接佢做王。</verse>
				<verse number="8">猶大 王 烏西雅 在位第三十八年， 耶羅波安 二世个孻仔 撒迦利雅 做 以色列 王；佢在 撒馬利亞 統治六個月。</verse>
				<verse number="9">佢㧯厥祖先共樣行上主看做邪惡个事，學 尼八 个孻仔 耶羅波安 王个壞模樣，害 以色列 人犯罪。</verse>
				<verse number="10">雅比 个孻仔 沙龍 造反，在 以伯蓮 將 撒迦利雅 㓾死，搶佢个王位。</verse>
				<verse number="11">撒迦利雅 其他个事全部記在《 以色列 列王史》底背。</verse>
				<verse number="12">上主識向 耶戶 王講：「你个後代一定會承接你做 以色列 个王，到第四代 。」恁樣，這應許已經實現了。</verse>
				<verse number="13">猶大 王 烏西雅 在位第三十九年， 雅比 个孻仔 沙龍 做 以色列 王；佢在 撒馬利亞 統治一個月。</verse>
				<verse number="14">迦底 个孻仔 米拿現 對 得撒 去 撒馬利亞 ，將 沙龍 㓾死，搶佢个王位。</verse>
				<verse number="15">沙龍 其他个事，包含佢造反个故事，全部記在《 以色列 列王史》底背。</verse>
				<verse number="16">米拿現 對 得撒 來个時，攻打 提斐薩 㧯四周圍个地區，㓾掉全城个人民，因為佢等無開城門投降。佢也將全部有身項婦人家个肚笥剖開來。</verse>
				<verse number="17">猶大 王 烏西雅 在位第三十九年， 迦底 个孻仔 米拿現 做 以色列 王；佢在 撒馬利亞 統治十年。</verse>
				<verse number="18">佢行上主看做邪惡个事，學 尼八 个孻仔 耶羅波安 王个壞模樣，一生人害 以色列 人犯罪。</verse>
				<verse number="19">亞述 皇帝 提革拉‧比列色 侵略 以色列 ； 米拿現 就給佢三百萬隻銀幣，因為愛得到佢个支持，來堅固自家个王位。</verse>
				<verse number="20">米拿現 這兜錢係對 以色列 个有錢人該位強討來个；佢強迫逐儕拿出五十隻銀幣。 亞述 皇帝得到這兜錢以後，就轉自家國家去了。</verse>
				<verse number="21">米拿現 其他个事全部記在《 以色列 列王史》底背。</verse>
				<verse number="22">米拿現 死掉；佢个孻仔 比加轄 承接佢做王。</verse>
				<verse number="23">猶大 王 烏西雅 在位第五十年， 米拿現 个孻仔 比加轄 做 以色列 王；佢在 撒馬利亞 統治兩年。</verse>
				<verse number="24">佢行上主看做邪惡个事，學 尼八 个孻仔 耶羅波安 王个壞模樣，害 以色列 人犯罪。</verse>
				<verse number="25">比加轄 个一個將軍， 利瑪利 个孻仔 比加 ，帶等 亞珥歌伯 、 亞利耶 、㧯 對 基列 來个五十儕造反，在 撒馬利亞 王宮內院㓾死 比加轄 ，搶佢个王位。</verse>
				<verse number="26">比加轄 其他个事全部記在《 以色列 列王史》底背。</verse>
				<verse number="27">猶大 王 烏西雅 在位第五十二年， 利瑪利 个孻仔 比加 做 以色列 王；佢在 撒馬利亞 統治二十年。</verse>
				<verse number="28">佢行上主看做邪惡个事，學 尼八 个孻仔 耶羅波安 王个壞模樣，害 以色列 人犯罪。</verse>
				<verse number="29">比加 做 以色列 王个期間， 亞述 皇帝 提革拉‧比列色 來佔領 以雲 、 亞伯‧伯‧瑪迦 、 阿挪 、 基低斯 㧯 夏瑣 這兜城，還有 基列 、 加利利 㧯 拿弗他利 這兜地區，又將人民捉到 亞述 去。</verse>
				<verse number="30">猶大 王 烏西雅 个孻仔 約坦 在位个第二十年， 以拉 个孻仔 何細亞 反 利瑪利 个孻仔 比加 ，㓾死佢，搶佢个王位。</verse>
				<verse number="31">比加 其他个事全部記在《 以色列 列王史》底背。</verse>
				<verse number="32">利瑪利 个孻仔 比加 做 以色列 王第二年， 烏西雅 个孻仔 約坦 做 猶大 王。</verse>
				<verse number="33">該時 約坦 二十五歲；佢在 耶路撒冷 統治十六年。厥姆安到 耶露莎 ，係 撒督 个妹仔。</verse>
				<verse number="34">約坦 學厥爸 烏西雅 个模樣，行上主看做著个事。</verse>
				<verse number="35">總係佢無除掉山岡頂个神廟，人民還係在該位獻祭燒香。 約坦 又起上主个聖殿北片个門。</verse>
				<verse number="36">約坦 其他个事全部記在《 猶大 列王史》底背。</verse>
				<verse number="37">佢做王个期間，上主派 敘利亞 王 利汛 㧯 以色列 王 比加 攻打 猶大 。</verse>
				<verse number="38">約坦 死掉，葬在厥祖先 大衛 城个王室墳墓肚；佢个孻仔 亞哈斯 承接佢做王。</verse>
			</chapter>
			<chapter number="16">
				<verse number="1">利瑪利 个孻仔 比加 做 以色列 王第十七年， 約坦 个孻仔 亞哈斯 做 猶大 王。</verse>
				<verse number="2">該時 亞哈斯 二十歲；佢在 耶路撒冷 統治十六年。佢無學厥祖先 大衛 王行上主 — 佢个上帝看做著个事；</verse>
				<verse number="3">佢反轉學 以色列 列王个壞模樣，甚至將自家个孻仔用火燒來獻給偶像，學原來外族人个邪惡行為；該兜人民就係 以色列 人入去這地該時上主逐出去个人。</verse>
				<verse number="4">亞哈斯 在神廟內、山岡頂㧯逐頭大樹下獻祭燒香。</verse>
				<verse number="5">敘利亞 王 利汛 㧯 以色列 王 利瑪利 个孻仔 比加 攻打 耶路撒冷 ，圍困 亞哈斯 ，總係無法度打贏佢。</verse>
				<verse number="6">(這時， 敘利亞 王 利汛 收復 以拉他 城，將住在該位个 猶大 人逐出去。 以東 人來定居在 以拉他 ，一直住在該位。)</verse>
				<verse number="7">亞哈斯 派使者去見 亞述 皇帝 提革拉‧比列色 ，講：「𠊎係你个僕人、係歸屬你个； 敘利亞 王㧯 以色列 王當在這位攻打𠊎，求你來救𠊎！」</verse>
				<verse number="8">亞哈斯 將上主个聖殿㧯王宮寶庫肚所有个金銀做禮物，送給 亞述 皇帝。</verse>
				<verse number="9">亞述 皇帝答應 亞哈斯 个請求，就帶領軍隊去攻打 大馬士革 ，佔領該城，將 利汛 王㓾掉，又將人民捉到 吉珥 。</verse>
				<verse number="10">亞哈斯 王到 大馬士革 迎接 亞述 皇帝 提革拉‧比列色 个時，看到該位个祭壇，就將詳細个起法㧯圖樣送到祭司 烏利亞 該位。</verse>
				<verse number="11">所以 烏利亞 照該圖樣起一座祭壇，在 亞哈斯 王還吂轉來以前就完工了。</verse>
				<verse number="12">王對 大馬士革 轉來，看到祭壇，就行前去，</verse>
				<verse number="13">在該頂高獻燒化祭㧯素祭，又祭酒又洒平安祭个血。</verse>
				<verse number="14">獻祭給上主个銅祭壇本來在新壇㧯聖殿中間， 亞哈斯 王將它徙到新壇个北片，</verse>
				<verse number="15">然後命令祭司 烏利亞 講：「用𠊎這座大祭壇獻朝晨个燒化祭㧯臨暗仔个素祭，王个燒化祭㧯素祭，人民个燒化祭、素祭㧯祭酒，並將所有牲儀个血洒在頂高。總係𠊎愛留銅祭壇來卜卦。」</verse>
				<verse number="16">祭司 烏利亞 就照 亞哈斯 王个命令去做。</verse>
				<verse number="17">亞哈斯 王拆掉銅盆座四周圍个框架，將頂高个銅盆拿下來，又將十二隻銅牛背頂个銅海搬到石頭做个基座頂。</verse>
				<verse number="18">亞哈斯 為到愛巴結 亞述 皇帝，就將放王座位个檯仔徙出聖殿 ，又將王對外背愛入聖殿个走廊拆掉。</verse>
				<verse number="19">亞哈斯 其他个事全部記在《 猶大 列王史》底背。</verse>
				<verse number="20">亞哈斯 死掉，葬在 大衛 城个王室墳墓肚；佢个孻仔 希西家 承接佢做王。</verse>
			</chapter>
			<chapter number="17">
				<verse number="1">猶大 王 亞哈斯 在位第十二年， 以拉 个孻仔 何細亞 做 以色列 王；佢在 撒馬利亞 統治九年。</verse>
				<verse number="2">佢行上主看做邪惡个事，總係無像佢以前該兜 以色列 王恁壞。</verse>
				<verse number="3">亞述 皇帝 撒縵以色 來攻打佢； 何細亞 就投降，逐年向 撒縵以色 進貢。</verse>
				<verse number="4">有一年， 何細亞 派人去見 埃及 王 梭 ，想愛反 亞述 ，無再繼續逐年向 亞述 皇帝進貢。 亞述 皇帝知這件事，就將 何細亞 捉起來，關在監獄肚。</verse>
				<verse number="5">後來， 亞述 皇帝攻打 以色列 ，包圍 撒馬利亞 。圍城个第三年，</verse>
				<verse number="6">也就係 何細亞 在位第九年， 亞述 皇帝 攻下 撒馬利亞 ，將 以色列 人捉到 亞述 去，將佢等放在 哈臘 城、 歌散 區个 哈博 河附近、㧯 米底亞 人个城市。</verse>
				<verse number="7">撒馬利亞 陷落係因為 以色列 人得罪上主 — 佢等个上帝。上主識救佢等離開 埃及 王个管轄，𢱋佢等出 埃及 ，佢等反轉去拜別个神明，</verse>
				<verse number="8">學該地方人民个風俗，就係上主在佢子民面前逐走該兜外族人，又接受該兜 以色列 王所設个規矩。</verse>
				<verse number="9">以色列 人暗中行上主 — 佢等上帝看做邪惡个事。佢等在所有个城鎮，對守望台到防衛城起山岡頂个神廟，</verse>
				<verse number="10">又在所有个山岡頂㧯大樹下，頓石柱㧯 亞舍拉 女神个柱像。</verse>
				<verse number="11">佢等學上主所逐走該兜原來个外族人，在逐個神廟肚燒香。佢等邪惡个行為惹上主發譴；</verse>
				<verse number="12">佢等拜偶像，就係上主不准佢等做个。</verse>
				<verse number="13">上主識派佢个先知㧯先見去警告 以色列 㧯 猶大 講：「愛離開你等个壞行為，遵守𠊎个誡命，就係𠊎給你等祖先个法律㧯𠊎通過𠊎僕人 — 該兜先知傳給你等个法律。」</verse>
				<verse number="14">總係佢等毋肯聽；佢等像佢等个祖先恁硬頸，毋信靠上主 — 佢等个上帝。</verse>
				<verse number="15">佢等拒絕上主个教訓，毋守佢㧯佢等祖先所立个約，毋搭佢个勸誡。佢等去拜虛假个偶像，自家也變做虛假。佢等學四周圍外族人个風俗，毋聽從上主个命令。</verse>
				<verse number="16">佢等離開上主 — 佢等个上帝所有个法律，鑄造兩隻金牛來拜，又造 亞舍拉 女神个柱像；佢等拜日月星辰，事奉 巴力 。</verse>
				<verse number="17">佢等將自家个子女用火燒來獻給原來外族人个神明，又行邪術㧯卜卦。佢等出賣自家，行上主看做邪惡个事，惹佢發譴。</verse>
				<verse number="18">所以上主向 以色列 人大發譴，對自家面前將佢等逐走，只賸到 猶大 國。</verse>
				<verse number="19">總係， 猶大 人民也毋遵守上主 — 佢等上帝个誡命；佢等跈 以色列 人行對外族人學來个風俗。</verse>
				<verse number="20">所以上主豁掉所有个 以色列 人，使佢等受苦，將佢等交在搶劫佢等个仇敵手中，最後對自家面前將佢等逐出去。</verse>
				<verse number="21">上主使 以色列 對 大衛 家族分裂出來以後， 以色列 人設立 尼八 个孻仔 耶羅波安 做佢等个王。 耶羅波安 引誘佢等悖逆上主，害佢等陷落在大罪中。</verse>
				<verse number="22">以色列 人一直無離開 耶羅波安 所犯个罪，</verse>
				<verse number="23">直到上主對自家面前逐出佢等，就像佢先前通過厥僕人 — 該兜先知所警告个。恁樣， 以色列 人對本地被人捉到 亞述 去，一直住在該位。</verse>
				<verse number="24">亞述 皇帝對 巴比倫 、 古他 、 亞瓦 、 哈馬 、㧯 西法瓦音 將人民徙到 撒馬利亞 逐城市，來代被人捉走个 以色列 人。 亞述 人就佔領 撒馬利亞 ，住在當中這兜城市。</verse>
				<verse number="25">正搬來住个時，佢等毋敬拜上主，上主就派獅仔咬死佢等當中个一兜人。</verse>
				<verse number="26">有人㧯 亞述 皇帝講，該兜徙到 撒馬利亞 个 亞述 人毋知該地神明个規矩，所以神明派獅仔咬死佢等。</verse>
				<verse number="27">亞述 皇帝就下令講：「對捉來个祭司當中派一個轉去，愛佢住在該位，教人民學該地方神明个規矩。」</verse>
				<verse number="28">所以有一個對 撒馬利亞 被人捉去个祭司轉去，住在 伯特利 ，教人民樣般敬拜上主。</verse>
				<verse number="29">總係徙到 撒馬利亞 个各族人在所住个城肚繼續製造自家个偶像，將偶像放在 撒馬利亞 人起个神廟肚。</verse>
				<verse number="30">巴比倫 人製造 疏割‧比訥 个神像； 古他 人製造 匿甲 个神像； 哈馬 人製造 亞示瑪 个神像；</verse>
				<verse number="31">亞瓦 人製造 匿哈 㧯 他珥他 个神像； 西法瓦音 人將佢等个子女用火燒來獻給佢等个神明 亞得米勒 㧯 亞拿米勒 。</verse>
				<verse number="32">這兜人同時也敬畏上主，各種人選出自家个人來做祭司，在山岡頂个神廟代佢等獻祭。</verse>
				<verse number="33">佢等敬畏上主，總係也照佢等原來國家个風俗拜自家个神明。</verse>
				<verse number="34">佢等到今晡日還係保持舊个風俗；佢等毋係正經敬畏上主，也無遵守上主給 雅各 後代个法律誡命。 (上主識將 雅各 又安名做 以色列 。)</verse>
				<verse number="35">上主識㧯佢等立過約，吩咐佢等講：「做毋得拜別个神明，做毋得跪拜佢等，做毋得事奉佢等，也做毋得獻祭給佢等。</verse>
				<verse number="36">你等愛敬畏𠊎 — 上主；𠊎識用大能大力帶你等出 埃及 。你等愛跪拜𠊎，獻祭給𠊎。</verse>
				<verse number="37">你等愛永遠遵從𠊎寫給你等个法律誡命。你等做毋得敬拜別个神明。</verse>
				<verse number="38">𠊎㧯你等所立个約，你等做毋得毋記得。你等做毋得敬拜別个神明。</verse>
				<verse number="39">你等愛單單敬畏𠊎 — 上主、你等个上帝，𠊎就救你等離開仇敵个手。」</verse>
				<verse number="40">總係該兜人毋肯聽，繼續照佢等自家个舊風俗行。</verse>
				<verse number="41">該兜人民敬拜上主，又服事佢等个偶像；直到今晡日，佢等个後代還係學佢等个祖先恁樣行。</verse>
			</chapter>
			<chapter number="18">
				<verse number="1">以色列 王 以拉 个孻仔 何細亞 在位第三年， 亞哈斯 个孻仔 希西家 做 猶大 王。</verse>
				<verse number="2">該時 希西家 二十五歲；佢在 耶路撒冷 統治二十九年。厥姆安到 亞比雅 ，係 撒迦利雅 个妹仔。</verse>
				<verse number="3">希西家 學厥祖先 大衛 王个模樣，行上主看做著个事。</verse>
				<verse number="4">佢除掉山岡頂个神廟，拆掉石柱，斬掉 亞舍拉 女神个柱像，又打碎 摩西 所造个銅蛇 — 尼忽士但 ，因為 以色列 人民直到該時還向它燒香。</verse>
				<verse number="5">希西家 信靠上主 — 以色列 个上帝；在佢前後个 猶大 列王，無一個㧯佢比抑得。</verse>
				<verse number="6">佢對上主忠心，毋識違背上主；佢謹慎遵守上主給 摩西 所有个誡命。</verse>
				<verse number="7">所以上主㧯佢共下；佢所做个全部順利。佢反 亞述 皇帝，毋肯服事佢。</verse>
				<verse number="8">佢打贏 非利士 人，將佢等个土地，包含 迦薩 㧯四周圍个地區，對守望台到防衛城，全部佔領了。</verse>
				<verse number="9">希西家 王在位第四年，也就係 以拉 个孻仔 何細亞 王統治 以色列 第七年， 亞述 皇帝 撒縵以色 侵略 以色列 ，圍攻 撒馬利亞 。</verse>
				<verse number="10">包圍三年後，就佔領 撒馬利亞 ；這係 希西家 在位第六年， 以色列 王 何細亞 在位个第九年發生个。</verse>
				<verse number="11">亞述 皇帝將 以色列 人捉到 亞述 ，將佢等分散到 哈臘 城、 歌散 區个 哈博 河附近、㧯 米底亞 人个城市去住。</verse>
				<verse number="12">撒馬利亞 被人佔領係因為 以色列 人毋聽從上主 — 佢等个上帝，違背上主㧯佢等所立个約，就係上主个僕人 摩西 所吩咐一切个法律；佢等毋聽從，也毋遵守。</verse>
				<verse number="13">希西家 王在位第十四年， 亞述 皇帝 西拿基立 攻打 猶大 所有个防衛城，將它兜佔領。</verse>
				<verse number="14">猶大 王 希西家 派人到 拉吉 去見 亞述 皇帝，講：「𠊎得罪你；請你退兵！𠊎答應你所有个要求。」 亞述 皇帝罰 猶大 王 希西家 一萬公斤个銀仔㧯一千公斤个金仔。</verse>
				<verse number="15">希西家 將上主个聖殿㧯王宮寶庫肚个銀仔全部送過去，</verse>
				<verse number="16">又將聖殿門頂个金仔㧯包殿門柱仔个金仔全部剝下來，全部送給 亞述 皇帝。</verse>
				<verse number="17">亞述 皇帝對 拉吉 派大軍到 耶路撒冷 攻打 希西家 王；佢个元帥、侍衛長㧯大將帶領軍隊。佢等一到 耶路撒冷 ，就擺陣在上池个水溝滣，在通到染布工廠个大路項。</verse>
				<verse number="18">佢等呼喊王个時， 希西家 个三個大臣出來見佢等；這三個大臣係： 希勒家 个孻仔王宮總管 以利亞敬 ，王室書記 舍伯那 ， 亞薩 个孻仔歷史官 約亞 。</verse>
				<verse number="19">亞述 个大將對佢等講：「你等去㧯 希西家 講， 亞述 大皇帝恁樣講：『你憑麼介恁有把扼？</verse>
				<verse number="20">你恅到賣嘴花就有相㓾个計謀㧯能力係麼？你靠麼人想愛反𠊎？</verse>
				<verse number="21">你毋使想 埃及 會來幫助你，該就像拄等一支玭掉个蘆竹準做柺棍仔行路；它會刺穿人个手。 埃及 王對付所有投靠佢个人就係恁樣。</verse>
				<verse number="22">可能你等會對𠊎講：𠊎等倚靠上主 — 𠊎等个上帝。總係， 希西家 敢毋係廢掉佢山頂个廟㧯祭壇？佢敢毋係吩咐 猶大 㧯 耶路撒冷 个人民，單淨做得在 耶路撒冷 个祭壇敬拜上主嗎？』</verse>
				<verse number="23">這下𠊎用吾主 亞述 皇帝个名義㧯你賭：若係你能尋出兩千騎兵，𠊎就送你兩千隻戰馬！</verse>
				<verse number="24">其實，你連 亞述 軍隊中最細个軍官也打毋贏，你還妄想愛靠 埃及 个戰車騎兵！</verse>
				<verse number="25">這下𠊎來攻打毀滅這地方，敢毋係上主个意思？上主親自吩咐𠊎來攻打毀滅這個國家。」</verse>
				<verse number="26">然後， 以利亞敬 、 舍伯那 、㧯 約亞 對該大將講：「先生，請用 亞蘭 話㧯僕人講話；𠊎等聽得識。毋好用 希伯來 話講，因為城樓頂个人民全部在該位聽。」</verse>
				<verse number="27">大將講：「你等恅到皇帝喊𠊎單單對你等㧯王講這兜話麼？𠊎也敢毋係對該兜坐在城樓頂个人民講，佢等㧯你等共樣，全部會食自家个屎，啉自家个尿？」</verse>
				<verse number="28">所以，大將企出來，用 希伯來 話大聲喊講：「你等愛聽 亞述 大皇帝个話！</verse>
				<verse number="29">皇帝警告你等：毋好被 希西家 欺騙； 希西家 無辦法救你等。</verse>
				<verse number="30">希西家 雖然一直講：『上主一定會拯救𠊎等，這個城毋會交在 亞述 皇帝个手中』，總係你等毋好被佢騙去倚靠上主。</verse>
				<verse number="31">毋好聽 希西家 个話！ 亞述 皇帝命令你等出來講和投降。恁樣，你等還係做得食自家个葡萄、自家个無花果，啉自家井肚个水。</verse>
				<verse number="32">直到皇帝將你等徙到另外一個地方，㧯你等這地方共樣，有五榖、葡萄，有餅、美酒。該係出產橄欖㧯蜂糖个地方。你等照皇帝个命令行，正會有命，毋使死。毋好被 希西家 騙去，恅到上主會來拯救你等。</verse>
				<verse number="33">你等看過有㖠隻國家个神明拯救自家个國家脫離 亞述 皇帝个手？</verse>
				<verse number="34">哈馬 㧯 亞珥拔 个神明這下在㖠位？ 西法瓦音 、 希拿 、 以瓦 个神明又在㖠位？佢等敢有來救 撒馬利亞 脫離𠊎个手？</verse>
				<verse number="35">有㖠兜神明識對𠊎个手拯救佢等个國家？上主敢會救 耶路撒冷 脫離𠊎个手？」</verse>
				<verse number="36">人民全部恬恬，無應半句話；因為 希西家 王識下令，講：「毋好應佢！」</verse>
				<verse number="37">該時， 希勒家 个孻仔王宮總管 以利亞敬 、王室書記 舍伯那 、㧯 亞薩 个孻仔歷史官 約亞 悲傷到扯爛衫，轉去將 亞述 大將个話向 希西家 王報告。</verse>
			</chapter>
			<chapter number="19">
				<verse number="1">希西家 王一聽到佢等个報告，非常悲傷，就扯爛衫，著麻衫，入去上主个聖殿。</verse>
				<verse number="2">佢派王宮總管 以利亞敬 、王室書記 舍伯那 、㧯該兜老輩个祭司，佢等全部著麻衫去見 亞摩斯 个孻仔先知 以賽亞 。</verse>
				<verse number="3">佢等對 以賽亞 講：「 希西家 恁樣講：今晡日係國難个日仔；𠊎等全部受到侮辱㧯刑罰。𠊎等像難產个婦人家，無力好𫱔。</verse>
				<verse number="4">亞述 皇帝派佢个大將來侮辱永生个上帝。願上主 — 你个上帝聽到這兜褻瀆个話，責罰講這話个人。所以，請你為𠊎這兜賸到个人大聲祈禱。」</verse>
				<verse number="5">希西家 王个官員來見 以賽亞 ，</verse>
				<verse number="6">以賽亞 就對佢等講：「去㧯你等个主人恁樣講：『上主恁樣講：你等毋使因為聽到 亞述 人講侮辱𠊎个話就恁著驚。</verse>
				<verse number="7">𠊎愛使 亞述 皇帝相信所聽到个風聲，催迫佢趕轉本國去，在該位被人㓾死。』」</verse>
				<verse number="8">亞述 个大將聽講 亞述 皇帝已經徙營離開 拉吉 、去攻打附近个 立拿 城，佢就去該位見佢。</verse>
				<verse number="9">亞述 皇帝聽到風聲講， 古實 王 特哈加 帶 埃及 軍隊來攻打佢。所以皇帝又派兜使者帶信仔去㧯 猶大 王 希西家 講：</verse>
				<verse number="10">「毋好聽你所倚靠个神騙你講：『 耶路撒冷 毋會交在 亞述 皇帝个手中。』</verse>
				<verse number="11">你一定聽過， 亞述 歷代个皇帝係樣般徹底毀滅所有个國家！你恅到你還有救，係麼？</verse>
				<verse number="12">𠊎个祖先識毀滅 歌散 、 哈蘭 、 利色 ，消滅住在 提拉撒 个 伊甸 人；佢等个神明敢有救佢等麼？</verse>
				<verse number="13">哈馬 、 亞珥拔 、 西法瓦音 城、 希拿 、㧯 以瓦 該兜所在个王攏總在㖠位呢？」</verse>
				<verse number="14">希西家 對使者手中將信仔接過來，讀了後就到聖殿去，在上主面前將信仔掀開。</verse>
				<verse number="15">希西家 向上主祈禱講：「在兩隻基路伯中央坐寶座个上主 — 以色列 个上帝啊，你係天下萬國獨一个上帝，天地係你創造个。</verse>
				<verse number="16">上主啊，求你聽𠊎个祈禱！上主啊，求你看顧𠊎等！ 西拿基立 派使者所講、侮辱你 — 永生上帝个話，你聽看仔！</verse>
				<verse number="17">上主啊， 亞述 歷代个皇帝將盡多國家變做荒地，這係事實。</verse>
				<verse number="18">佢等還燒掉逐國个神明；其實它兜毋係真神，係人个手用樹仔、石頭做个偶像定定，所以就會被人除掉。</verse>
				<verse number="19">上主 — 𠊎等个上帝啊，這下求你對 亞述 皇帝个手中拯救𠊎等；恁樣，世界逐國就會知只有你 — 上主係上帝。」</verse>
				<verse number="20">亞摩斯 个孻仔 以賽亞 派人去㧯 希西家 講：「上主 — 以色列 个上帝恁樣講：『有關 亞述 皇帝 西拿基立 个事，你緊求𠊎，你个祈禱𠊎聽到了。』</verse>
				<verse number="21">上主論到 西拿基立 講：『 鍚安 城个子女在該位嘲謔你，藐視你； 耶路撒冷 个人民向你拂頭。</verse>
				<verse number="22">你敢知，你大聲侮辱个係麼人？恁驕傲嘲謔个係麼人？看毋起个係麼人？係𠊎 — 以色列 神聖个上帝！</verse>
				<verse number="23">你派使者來罵𠊎，還誇口你个戰車征服高山，甚至佔領 黎巴嫩 最高个山頭。你誇口講，你在該位斬下最高个香柏樹㧯最好个松樹，又深入到樹林最深个所在。</verse>
				<verse number="24">你誇口講，你識在外國打井啉水，你个士兵將 埃及 个河壩全部踏燥。</verse>
				<verse number="25">「『你敢毋識聽講𠊎古早以來就計劃這一切？𠊎這下在執行中。𠊎給你力量使該兜堅固个城堡成做荒埔、石堆。</verse>
				<verse number="26">𠊎使住在該位个人失掉力量，驚到無葛無煞。佢等像野生个菜㧯屋頂个雜草，給燒燒个東風一吹就全部燥掉。</verse>
				<verse number="27">「『你坐下來、你出去、你入來，𠊎全部知。𠊎也知你向𠊎發譴。</verse>
				<verse number="28">𠊎早就聽到你盡驕傲，還向𠊎發譴。這下𠊎愛用鉤仔穿過你个鼻孔，拿馬啣鐵卡你个嘴；你對㖠條路來，就將你對該條路拉轉去。』</verse>
				<verse number="29">「 希西家 啊，上主愛給你這個兆頭：今年㧯明年，你等只有野生个植物好食。到後年，你等就做得委種，收成；也做得種葡萄，食園中出產个葡萄。</verse>
				<verse number="30">猶大 國在患難後賸到个人還係會像植物向下釘根，向上結果。</verse>
				<verse number="31">在 耶路撒冷 ，在 錫安 山頂，患難後還係會有賸到个人住在該位，因為上主愛熱心成就這事。</verse>
				<verse number="32">「論到 亞述 皇帝，上主恁樣講：『佢無法度入這城，也無辦法射一枝箭入來。拿盾牌个士兵無可能行近這城，也無法度起土堆圍城。</verse>
				<verse number="33">佢對㖠條路來，也會對該條路轉去；佢無可能入這城。這係𠊎 — 上主所宣佈个。</verse>
				<verse number="34">為到𠊎自家个緣故，也為到吾僕人 大衛 个緣故，𠊎愛親自保護這城，拯救這城。』」</verse>
				<verse number="35">該暗晡，上主个天使入去 亞述 人个營中，㓾掉十八萬五千個士兵。第二日打早，有人䟘起來看到滿地係屍體。</verse>
				<verse number="36">亞述 皇帝 西拿基立 高不將就退兵轉 尼尼微 去。</verse>
				<verse number="37">有一日，佢在廟肚拜佢个神 尼斯洛 个時，厥兩個孻仔 亞得米勒 㧯 沙利色 將佢㓾死，逃走到 亞拉臘 去。另外一個孻仔 以撒哈頓 承接佢做皇帝。</verse>
			</chapter>
			<chapter number="20">
				<verse number="1">該時， 希西家 王病到會死。 亞摩斯 个孻仔先知 以賽亞 去見王，對佢講：「上主恁樣講：『你愛留遺言、交帶後事，因為你个病毋會好，一定會死。』」</verse>
				<verse number="2">希西家 翻身面向壁，祈禱講：</verse>
				<verse number="3">「上主啊，求你紀念𠊎識誠心誠意事奉你，做你看做著个事。」 希西家 忍毋住就開聲大噭。</verse>
				<verse number="4">以賽亞 出來，還吂行過王宮中央个庭院，上主㧯佢講：</verse>
				<verse number="5">「你轉到吾子民个領袖 希西家 該位，對佢講：『上主 — 若祖先 大衛 个上帝恁樣講：𠊎已經聽到你个祈禱，也看到你个目汁。𠊎愛醫好你；到第三日，你就會上聖殿去。</verse>
				<verse number="6">𠊎愛俾你食加十五年。𠊎也愛拯救你㧯 耶路撒冷 脫離 亞述 皇帝个手；為到𠊎自家个緣故，也為到吾僕人 大衛 个緣故，𠊎愛親自保護這城。』」</verse>
				<verse number="7">以賽亞 對王个僕人講：「拿一垤無花果膏藥來！貼在粒仔頂，王就會好。」</verse>
				<verse number="8">希西家 問 以賽亞 講：「有麼介兆頭證明上主愛醫治𠊎，到第三日𠊎就會上聖殿去呢？」</verse>
				<verse number="9">以賽亞 應講：「這係上主給你个兆頭，來證明佢一定會成就佢所講个：你愛日頭影向前十步，抑係倒退十步呢？」</verse>
				<verse number="10">希西家 講：「日頭影向前十步容易，𠊎愛它倒退十步！」</verse>
				<verse number="11">先知 以賽亞 向上主祈禱，上主就使 亞哈斯 王日晷 个日頭影倒退十步。</verse>
				<verse number="12">這時， 巴拉但 个孻仔 巴比倫 王 米羅達‧巴拉但 聽到 希西家 王發病，特別送來問安信㧯禮物。</verse>
				<verse number="13">希西家 歡迎使者，又向佢等展佢所有个財富 — 金、銀、香料、香水、㧯武器倉庫；佢將全國逐所在个寶庫㧯佢王宮肚所有个全部俾佢等看。</verse>
				<verse number="14">事後，先知 以賽亞 去見 希西家 王，問佢：「這兜人對㖠位來？佢等㧯你講麼介？」 希西家 應講：「佢等係對一個當遠个國家 巴比倫 來个。」</verse>
				<verse number="15">以賽亞 問：「佢等在王宮肚看到麼介？」 希西家 應講：「𠊎所有个，佢等全部看到；𠊎將寶庫个各樣東西全部給佢等看。」</verse>
				<verse number="16">所以， 以賽亞 對 希西家 講：「你愛聽上主个話：</verse>
				<verse number="17">『時間一定會到，你王宮肚所有个東西，㧯若祖先留下來个逐項東西，全部會被人搬到 巴比倫 去，無留半項。』這係上主講个。</verse>
				<verse number="18">『連你个後代有兜也會被人捉去，在 巴比倫 王宮肚做太監。』」</verse>
				<verse number="19">希西家 想，這預言係講到在佢還生个日仔，佢還做得享受和平㧯安全，所以佢應 以賽亞 講：「你所傳上主个話當好！」</verse>
				<verse number="20">希西家 其他个事，佢英勇个行為㧯佢樣般作陂塘，挖圳溝，俾水透到城肚个事，全部記在《 猶大 列王史》底背。</verse>
				<verse number="21">希西家 死掉；厥孻仔 瑪拿西 承接佢做王。</verse>
			</chapter>
			<chapter number="21">
				<verse number="1">瑪拿西 十二歲个時做 猶大 王；佢在 耶路撒冷 統治五十五年。厥姆安到 協西巴 。</verse>
				<verse number="2">瑪拿西 行上主看做邪惡个事，就像上主在佢个子民面前逐走个原來外族人所做積惡个事。</verse>
				<verse number="3">佢重新起厥爸 希西家 所拆掉山岡頂个神廟，又起祭壇拜 巴力 ，打造 亞舍拉 女神个柱像，像 以色列 王 亞哈 所做个，還去敬拜事奉天象。</verse>
				<verse number="4">佢在 耶路撒冷 、就在上主吩咐愛敬拜上主个聖殿底背起異教个祭壇，</verse>
				<verse number="5">又在聖殿个兩隻庭院起拜天象个祭壇。</verse>
				<verse number="6">佢將自家个孻仔放火燒獻給神明，又去卜卦、行邪術，求問交鬼个㧯算命个。佢行當多上主看做邪惡个事，惹佢發譴。</verse>
				<verse number="7">佢將該 亞舍拉 女神个柱像放在聖殿底背。論到聖殿，上主識對 大衛 㧯厥孻仔 所羅門 講：「 耶路撒冷 个聖殿就係𠊎對 以色列 十二支族个土地中選出來、愛永遠做敬拜𠊎个地方。</verse>
				<verse number="8">若係 以色列 人民認真聽從𠊎所有个誡命，遵守𠊎僕人 摩西 吩咐佢等所有个法律，𠊎一定毋會俾佢等對𠊎賜給佢等祖先个這垤土地上被人逐走。」</verse>
				<verse number="9">總係 猶大 人民毋聽從上主个命令。 瑪拿西 帶佢等犯罪，比上主對佢个子民面前逐走个原來外族人所犯个罪還較嚴重。</verse>
				<verse number="10">上主通過佢个僕人 — 眾先知講：</verse>
				<verse number="11">「 猶大 王 瑪拿西 做這兜邪惡个事，比先前 亞摩利 人所做个還較壞；佢用偶像引誘 猶大 人民犯罪。</verse>
				<verse number="12">所以，𠊎 — 上主、 以色列 个上帝決定愛降災禍給 耶路撒冷 㧯 猶大 ，使所有聽到這事个人全部著驚、耳公咻咻滾。</verse>
				<verse number="13">𠊎愛用共樣个標準責罰 耶路撒冷 ，像𠊎責罰 撒馬利亞 恁樣，又像𠊎責罰 以色列 王 亞哈 㧯佢个後代一樣。𠊎愛除掉 耶路撒冷 个人民，像人拭淨盤仔，將 耶路撒冷 揙轉來。</verse>
				<verse number="14">𠊎愛㧒掉該兜賸到个人民，將佢等交給仇敵；該兜仇敵愛搶佢等，將佢等捉走。</verse>
				<verse number="15">𠊎愛恁樣對待𠊎个子民，因為佢等得罪𠊎，惹𠊎發譴，對佢等个祖先出 埃及 直到這下。」</verse>
				<verse number="16">瑪拿西 毋單淨帶 猶大 人民犯罪，害佢等行上主看做邪惡个事，佢又㓾掉盡多無辜个人民，使 耶路撒冷 滿遍係血。</verse>
				<verse number="17">瑪拿西 其他个事，連佢所犯个罪，全部記在《 猶大 列王史》底背。</verse>
				<verse number="18">瑪拿西 死掉，葬在自家王宮內 烏撒 个墓園肚；佢个孻仔 亞們 承接佢做王。</verse>
				<verse number="19">亞們 二十二歲个時做 猶大 王；佢在 耶路撒冷 統治兩年。厥姆安到 米舒利密 ，係 約提巴 城 哈魯斯 个妹仔。</verse>
				<verse number="20">亞們 㧯厥爸 瑪拿西 共樣行上主看做邪惡个事。</verse>
				<verse number="21">佢學厥爸所有个行為，拜厥爸所拜个偶像。</verse>
				<verse number="22">佢離開上主 — 厥祖先个上帝，毋遵行上主个道路。</verse>
				<verse number="23">亞們 王个官員造反，在王宮將佢㓾掉。</verse>
				<verse number="24">總係 猶大 人民將該兜謀殺 亞們 王个人㓾掉，設立 亞們 个孻仔 約西亞 承接佢做王。</verse>
				<verse number="25">亞們 其他个事全部記在《 猶大 列王史》底背。</verse>
				<verse number="26">亞們 葬在 烏撒 个墓園內，自家个墳墓肚；厥孻仔 約西亞 承接佢做王。</verse>
			</chapter>
			<chapter number="22">
				<verse number="1">約西亞 八歲个時做 猶大 王；佢在 耶路撒冷 統治三十一年。厥姆安到 耶底大 ，係 波斯加 城 亞大雅 个妹仔。</verse>
				<verse number="2">約西亞 行上主看做著个事，行厥祖先 大衛 王个路，無偏左、無偏右。</verse>
				<verse number="3">約西亞 王在位第十八年，佢派 米書蘭 个孫仔， 亞薩利雅 个孻仔 — 王室書記 沙番 到上主个聖殿去，吩咐佢講：</verse>
				<verse number="4">「你到大祭司 希勒家 該位去，喊佢將聖殿掌門个對人民收集个錢銀算好。</verse>
				<verse number="5">愛將該兜錢交給整上主聖殿个該幾個監工；佢等好付工錢給整聖殿个工人，</verse>
				<verse number="6">就係木匠、建築工人、泥水師傅，還愛買整聖殿用个樹料㧯石材。</verse>
				<verse number="7">因為該幾個監工全部誠實可靠，所以毋使㧯佢等算數。」</verse>
				<verse number="8">該時，大祭司 希勒家 㧯書記 沙番 講：「𠊎在上主个聖殿肚發現法律書。」 希勒家 將書交給 沙番 ， 沙番 就讀了。</verse>
				<verse number="9">然後書記 沙番 到王該位報告講：「你个官員已經將聖殿收到个錢，交給整聖殿个該幾個監工。」</verse>
				<verse number="10">書記 沙番 又對王講：「祭司 希勒家 拿一卷書給𠊎。」 沙番 就讀給王聽。</verse>
				<verse number="11">王聽到法律書个話就扯爛衫，</verse>
				<verse number="12">吩咐祭司 希勒家 、 沙番 个孻仔 亞希甘 、 米該亞 个孻仔 亞革波 、王室書記 沙番 、㧯王个僕人 亞撒雅 ，講：</verse>
				<verse number="13">「你等去為𠊎㧯全 猶大 人民求問上主，到底這卷書个教訓係麼介。上主向𠊎等大發譴係因為𠊎等个祖先無聽從這書个話，無照這書所記載个去做。」</verse>
				<verse number="14">希勒家 祭司、 亞希甘 、 亞革波 、 沙番 、㧯 亞撒雅 去求問一個名喊 戶勒大 个女先知。女先知住在 耶路撒冷 个第二區。 (厥老公 沙龍 係 特瓦 个孻仔， 哈珥哈斯 个孫仔，擔任主管聖殿禮服个職務。) 佢等向姖講起所發生个事。</verse>
				<verse number="15">姖喊佢等轉去對王講：「上主 — 以色列 个上帝恁樣講：</verse>
				<verse number="16">『𠊎愛照 猶大 王所聽到該本書所寫个一切話，降災禍給 耶路撒冷 㧯這位所有个人民。</verse>
				<verse number="17">佢等離開𠊎，向別个神明燒香，用佢等个手所造个偶像惹𠊎受氣，所以𠊎愛向 耶路撒冷 大發譴無煞。』</verse>
				<verse number="18">有關 猶大 王本人，你等愛恁樣㧯佢講：『上主 — 以色列 个上帝恁樣講：你一聽到該本書所寫个，</verse>
				<verse number="19">就在𠊎面前謙卑悔改。你一聽到𠊎愛責罰 耶路撒冷 㧯它个人民，使它成做荒涼、受咒詛个地方，你扯爛衫，在𠊎面前流目汁悔改，𠊎就聽你个祈禱。</verse>
				<verse number="20">因為恁樣，𠊎一定會使你平平安安食到老，葬在你列祖个墳墓該位；你還在世間个時，毋會看到𠊎降災難給這地方。』」 佢等就將這消息帶轉去㧯王講。</verse>
			</chapter>
			<chapter number="23">
				<verse number="1">約西亞 王派人召集 猶大 㧯 耶路撒冷 所有个領袖。</verse>
				<verse number="2">王㧯 猶大 眾人、住在 耶路撒冷 个人、還有祭司、先知，㧯所有个人民，無論貧富，也全部共下到上主个聖殿去。王就將該在聖殿肚發現个約書全部讀給佢等聽。</verse>
				<verse number="3">王企在大柱堘頭，向上主立約，愛聽從上主，一心一意遵守佢个法律誡命，並實行約書上所規定个命令。所有个人民也全部答應遵守這約。</verse>
				<verse number="4">所以， 約西亞 王吩咐大祭司 希勒家 、佢个助理祭司，還有在聖殿門口值班个警衛，將上主聖殿肚所有用來拜 巴力 、 亞舍拉 女神㧯天象个用品全部搬出去。王在 耶路撒冷 城外 汲淪 溪滣將這兜用品全部燒掉，然後喊人將灰帶到 伯特利 。</verse>
				<verse number="5">以前 猶大 列王所設立拜偶像个祭司，佢等在 猶大 㧯 耶路撒冷 附近城鎮个神廟燒香，王這下將佢等廢掉；佢又廢掉所有向 巴力 、日頭、月光、星座、㧯天上萬象燒香个祭司。</verse>
				<verse number="6">佢又對上主聖殿肚將 亞舍拉 女神像搬走，帶到 耶路撒冷 城外 汲淪 溪滣燒掉，捶到變粉，委在公共个塚埔。</verse>
				<verse number="7">佢拆掉神廟个男娼在上主聖殿霸佔个宿舍，就係該兜婦女為 亞舍拉 刺布篷个地方。</verse>
				<verse number="8">佢將 猶大 逐城个眾祭司帶到 耶路撒冷 來，破壞佢等燒過香个神廟，對 迦巴 到 別是巴 。佢又拆掉城門堘獻給山羊神个神廟；這神廟在市長 約書亞 个門前，在入城大門个左片。</verse>
				<verse number="9">該兜神廟个祭司做毋得在上主个聖殿事奉，總係做得食供給其他祭司个無酵餅。</verse>
				<verse number="10">約西亞 王又破壞 欣嫩子 山壢个 陀斐特 ，不准人民在該位將自家个子女用火燒來獻給 摩洛 神。</verse>
				<verse number="11">佢也徙走以前 猶大 列王拜日頭所獻个馬仔，燒掉拜日頭用个戰車。 (這兜東西本來放在上主聖殿庭院肚个殿門堘頭，離 拿單‧米勒 大臣个屋下無幾遠)。</verse>
				<verse number="12">以前 猶大 列王在 亞哈斯 王宮屋頂起个祭壇，㧯 瑪拿西 王在聖殿兩院中起个祭壇，也全部被 約西亞 王拆淨淨。佢將祭壇敲碎，㧒在 汲淪 山壢底背。</verse>
				<verse number="13">約西亞 破壞 所羅門 王起在山岡頂个神廟，就係該兜在 耶路撒冷 東片、 橄欖 山 南片，為到拜 西頓 女神 亞斯她錄 、 摩押 神 基抹 、 亞捫 神 摩洛 這兜邪惡个偶像所起个神廟。</verse>
				<verse number="14">約西亞 敲碎石柱，斬橫 亞舍拉 女神像，在原來頓柱仔个地方滿遍放死人骨頭。</verse>
				<verse number="15">約西亞 也拆掉在 伯特利 个祭壇，㧯害 以色列 人犯罪个 尼八 个孻仔 耶羅波安 王起个神廟。 約西亞 拆掉神廟，將它燒掉，捶到變粉，又將 亞舍拉 女神像燒掉。</verse>
				<verse number="16">約西亞 轉身看到山頂有兜墳墓，就派人對墳墓底背將骨頭挖出來，放在祭壇頂燒掉。佢用這種方法羞辱祭壇，就像以前神人所預言上主个話，就係當 耶羅波安 在節期中企在祭壇堘个時講个。 約西亞 又看到講這預言神人个墳墓 。</verse>
				<verse number="17">佢問：「該係麼人个墳墓？」 伯特利 人應講：「係該位對 猶大 來个神人个墳墓。你頭先在 伯特利 祭壇頂所做个，佢早就預言了。」</verse>
				<verse number="18">約西亞 命令講：「保留該墳墓；毋好徙佢个骨骸。」 所以，該神人个骨骸無被人徙挺動；該對 撒馬利亞 來个先知个骨骸也無被人徙挺動。</verse>
				<verse number="19">約西亞 在 撒馬利亞 逐城將以前 以色列 列王起个、惹上主發譴个神廟全部拆掉。像佢在 伯特利 所做个，佢廢掉所有个神廟。</verse>
				<verse number="20">佢將所有神廟个祭司在祭壇頂㓾掉，也在祭壇頂高燒死人个骨頭，後來就轉 耶路撒冷 去。</verse>
				<verse number="21">約西亞 王命令人民遵照約書底背个記載守𨃟過節，紀念上主 — 佢等个上帝。</verse>
				<verse number="22">自從該兜士師治理 以色列 以來，包含 以色列 列王㧯 猶大 列王个時，毋識恁盛大守𨃟過節；</verse>
				<verse number="23">只有 約西亞 王在位个第十八年，王㧯人民在 耶路撒冷 慶祝𨃟過節。</verse>
				<verse number="24">約西亞 將 耶路撒冷 㧯 猶大 地區所有交鬼个、算命个、所有屋下个神明、偶像、㧯一切拜邪神个東西全部除掉，來實行大祭司 希勒家 在上主聖殿肚所發現該本法律書所寫个話。</verse>
				<verse number="25">在 約西亞 以前，無一個王像佢恁樣全心、全意、全力歸向上主，遵行 摩西 所頒佈个法律；在佢以後，也無一個王像佢恁樣。</verse>
				<verse number="26">總係，上主因為 瑪拿西 王所做个事向 猶大 大發譴，到這下還吂過。</verse>
				<verse number="27">上主講：「𠊎愛對付 猶大 像𠊎對付 以色列 共樣。𠊎愛對𠊎面前逐出 猶大 人民；𠊎愛豁掉𠊎所選个城 — 耶路撒冷 㧯𠊎講過愛做敬拜𠊎个聖殿。」</verse>
				<verse number="28">約西亞 其他个事全部記在《 猶大 列王史》底背。</verse>
				<verse number="29">佢在位个時， 埃及 王 尼哥 帶領軍隊到 幼發拉底 河幫助 亞述 皇帝。 約西亞 王就去 米吉多 抵抗 埃及 王，卻死在佢个手中。</verse>
				<verse number="30">佢个部下將佢个屍體放在戰車肚，運轉 耶路撒冷 ，葬在王室个墳墓肚。 猶大 人民選 約西亞 个孻仔 約哈斯 ，膏油設立佢，承接厥爸做王。</verse>
				<verse number="31">約哈斯 二十三歲个時做 猶大 王；佢在 耶路撒冷 統治三個月。厥姆安到 哈慕她 ，係 立拿 城 葉利米 个妹仔。</verse>
				<verse number="32">約哈斯 學厥祖先个壞模樣，行上主看做邪惡个事。</verse>
				<verse number="33">埃及 王 尼哥 將 約哈斯 捉去關在 哈馬 地个 利比拉 ，毋俾佢治理 耶路撒冷 ，又罰 猶大 國賠償三千四百公斤銀仔㧯三十四公斤金仔。</verse>
				<verse number="34">尼哥 王立 約西亞 个孻仔 以利亞敬 接 約西亞 做 猶大 王，將佢个名改做 約雅敬 。 尼哥 王將 約哈斯 帶到 埃及 ； 約哈斯 死在該位。</verse>
				<verse number="35">為到愛繳納 埃及 王要求个賠償， 約雅敬 王就照人民个經濟強收稅金。</verse>
				<verse number="36">約雅敬 二十五歲个時做 猶大 王；佢在 耶路撒冷 統治十一年。厥姆安到 西布大 ，係 魯瑪 城 比大雅 个妹仔。</verse>
				<verse number="37">約雅敬 學厥祖先个壞模樣，行上主看做邪惡个事。</verse>
			</chapter>
			<chapter number="24">
				<verse number="1">約雅敬 在位年間， 巴比倫 王 尼布甲尼撒 侵犯 猶大 。 約雅敬 就投降服事佢三年，後來造反。</verse>
				<verse number="2">上主使 巴比倫 、 敘利亞 、 摩押 、㧯 亞捫 个軍隊來攻打 約雅敬 ，消滅 猶大 ，就像上主通過厥僕人眾先知所講个。</verse>
				<verse number="3">這事會發生，係因為上主个命令，為到愛逐走 猶大 个人民。這係因為 瑪拿西 王所犯一切个罪；</verse>
				<verse number="4">佢又㓾掉盡多無辜个人民，使 耶路撒冷 滿遍係血；上主毋肯赦免 瑪拿西 。</verse>
				<verse number="5">約雅敬 其他个事全部記在《 猶大 列王史》底背。</verse>
				<verse number="6">約雅敬 死掉後，厥孻仔 約雅斤 承接佢做王。</verse>
				<verse number="7">埃及 王無再出兵到厥國家以外个地方；因為對 埃及 北部个細河壩到 幼發拉底 河這片土地以前係屬 埃及 个，這下全部被 巴比倫 王搶去了。</verse>
				<verse number="8">約雅斤 十八歲个時做 猶大 王；佢在 耶路撒冷 統治三個月。厥姆安到 尼護施她 ，係 耶路撒冷 人 以利拿單 个妹仔。</verse>
				<verse number="9">約雅斤 學厥爸个壞模樣，行上主看做邪惡个事。</verse>
				<verse number="10">在該期間， 巴比倫 王 尼布甲尼撒 个大將帶領軍隊攻打 耶路撒冷 ，包圍全城。</verse>
				<verse number="11">在佢个軍隊圍城期間， 巴比倫 王 尼布甲尼撒 親身來到。</verse>
				<verse number="12">猶大 王 約雅斤 㧯厥姆、大臣、將軍、王宮个官員全部出來向 巴比倫 王投降。 尼布甲尼撒 在位第八年，佢捉到 約雅斤 ，</verse>
				<verse number="13">將上主个聖殿㧯王宮肚所有个財寶帶到 巴比倫 去。佢將 以色列 王 所羅門 為聖殿肚所造一切个金器敲掉，就像上主所宣告个。</verse>
				<verse number="14">耶路撒冷 人民㧯所有大官、勇士，總共有一萬人被 尼布甲尼撒 捉走。連有手藝个師傅㧯打鐵師傅也全部被佢捉走，只留下最窮苦个人。</verse>
				<verse number="15">尼布甲尼撒 將 約雅斤 帶到 巴比倫 ，也將厥姆、王后、王妃、太監、㧯 猶大 个領袖全部對 耶路撒冷 帶走。</verse>
				<verse number="16">尼布甲尼撒 也將所有个軍人七千個，還有一千個有手藝个師傅㧯打鐵師傅，帶到 巴比倫 去；佢等全部係勇敢个戰士。</verse>
				<verse number="17">巴比倫 王設立 約雅斤 个阿叔 瑪探雅 做 猶大 王，又㧯佢个名改做 西底家 。</verse>
				<verse number="18">西底家 二十一歲个時做 猶大 王；佢在 耶路撒冷 統治十一年。厥姆安到 哈慕她 ，係 立拿 城 葉利米 个妹仔。</verse>
				<verse number="19">西底家 行上主看做邪惡个事，像 約雅敬 所做个共樣。</verse>
				<verse number="20">上主對 耶路撒冷 㧯 猶大 个人民發譴，對自家面前將佢等逐出去。</verse>
			</chapter>
			<chapter number="25">
				<verse number="1">西底家 反 巴比倫 王 尼布甲尼撒 ，所以 尼布甲尼撒 帶領全軍來攻打 耶路撒冷 ；該時係 西底家 在位第九年十月初十。佢等安營在城外，在城牆四周圍起土堆來攻城，</verse>
				<verse number="2">一直包圍到 西底家 王在位第十一年。</verse>
				<verse number="3">該年四月初九，因為城內飢荒非常嚴重，人民已經無東西好食，</verse>
				<verse number="4">最尾，城牆被人攻破。雖然 巴比倫 軍隊還包圍城，該暗晡王㧯防守个軍隊也全部逃走。佢等對王宮花園無幾遠該條路，穿過兩座城牆中間个門，向 約旦 山壢方向逃走。</verse>
				<verse number="5">總係 巴比倫 軍隊逐 西底家 王，在 耶利哥 附近个平原逐到佢。該時佢个軍隊全部離開佢，散掉去了。</verse>
				<verse number="6">佢等捉到佢，將佢帶到 尼布甲尼撒 王該位去。該時 尼布甲尼撒 王在 利比拉 城，佢就在該位審判 西底家 。</verse>
				<verse number="7">佢等在 西底家 眼前㓾掉佢該兜孻仔，然後將佢个兩隻目珠挖出來，又用銅鍊仔䌈等佢，將佢帶到 巴比倫 去。</verse>
				<verse number="8">巴比倫 王 尼布甲尼撒 个十九年五月初七，王个顧問兼侍衛長 尼布撒拉旦 來到 耶路撒冷 。</verse>
				<verse number="9">佢放火將上主个聖殿、王宮㧯 耶路撒冷 所有个屋舍燒掉，連該兜大官个屋也燒淨淨。</verse>
				<verse number="10">跈侍衛長來个部隊將 耶路撒冷 四周圍个城牆全部拆掉。</verse>
				<verse number="11">然後，侍衛長 尼布撒拉旦 將留在城肚个人 — 該兜賸到有手藝个人㧯投降 巴比倫 个人全部捉到 巴比倫 去。</verse>
				<verse number="12">總係佢將最窮苦个人留在 猶大 ，喊佢等在葡萄園㧯田肚工作。</verse>
				<verse number="13">巴比倫 人敲碎上主聖殿肚个銅柱、銅盆座㧯銅海，將所有个銅帶到 巴比倫 去。</verse>
				<verse number="14">佢等也將清潔祭壇用个鏟仔㧯裝灰个鑊仔、燭花剪刀、裝牲儀个血用个大碗、㧯禮拜用个各種銅器全部帶走。</verse>
				<verse number="15">侍衛長將所有用金仔、銀仔做个各種用品，包含裝火炭个爐仔、細盆仔也全部帶走。</verse>
				<verse number="16">其中有 所羅門 王為聖殿鑄造个銅器 — 兩支銅柱、一隻銅海㧯十隻銅盆座 — 這兜銅器多到無法度來秤。</verse>
				<verse number="17">兩支銅柱係完全共樣个；逐支高八公尺，有一公尺三公寸高个銅个柱頭，周圍裝飾銅製个網仔㧯銅石榴。</verse>
				<verse number="18">尼布撒拉旦 侍衛長也捉走祭司長 西萊雅 、副祭司長 西番亞 ，㧯三個掌門个。</verse>
				<verse number="19">佢又在城肚捉走一個指揮官，五個留在城肚个王室顧問，一個專管軍隊文件个書記官，㧯六十個地方上重要个人物。</verse>
				<verse number="20">尼布撒拉旦 侍衛長將佢等帶到 巴比倫 王面前；該時，王在 哈馬 地區个 利比拉 。</verse>
				<verse number="21">王就在該位打佢等，將佢等㓾死。 恁樣， 猶大 人民被人捉走，離開本國。</verse>
				<verse number="22">巴比倫 王 尼布甲尼撒 設立 亞希甘 个孻仔、 沙番 个孫仔 基大利 做 猶大 總督，愛佢管理無被人捉去 巴比倫 个人。</verse>
				<verse number="23">該兜無投降个 猶大 官員㧯士兵聽到這消息，就來到 米斯巴 見 基大利 。這兜官員有 尼探雅 个孻仔 以實瑪利 ， 加利亞 个孻仔 約哈難 ， 尼陀法 人 單戶默 个孻仔 西萊雅 ， 瑪迦 人 雅撒尼亞 。</verse>
				<verse number="24">基大利 對佢等㧯佢等个士兵發誓講：「你等毋使驚 巴比倫 个官員。做你等住在這地，服事 巴比倫 王，一切就會平安順利。」</verse>
				<verse number="25">總係，在該年七月，王室家族个 尼探雅 个孻仔、 以利沙瑪 个孫仔 以實瑪利 帶等十個人來到 米斯巴 ，㓾掉 基大利 ，也㓾掉㧯佢共下个 猶大 人㧯 巴比倫 人。</verse>
				<verse number="26">所以，所有个人民，無論大細，連同該兜軍官共下離開，逃難到 埃及 去，因為佢等驚 巴比倫 人。</verse>
				<verse number="27">以未‧米羅達 做 巴比倫 王該年，佢放 猶大 王 約雅斤 出監獄。這事發生在 約雅斤 被人捉走以後个第三十七年十二月二十七日。</verse>
				<verse number="28">以未‧米羅達 也恩待 約雅斤 ，俾佢个身份高過該兜被人捉到 巴比倫 去个其他國王。</verse>
				<verse number="29">約雅斤 脫掉犯人个衫，一生人㧯 巴比倫 王共桌食飯。</verse>
				<verse number="30">佢還生个年日，王賜給佢逐日个生活費用。</verse>
			</chapter>
		</book>
		<book number="13">
			<chapter number="1">
				<verse number="1">亞當 𫱔 塞特 ； 塞特 𫱔 以挪士 ； 以挪士 𫱔 該南 ；</verse>
				<verse number="2">該南 𫱔 瑪勒列 ； 瑪勒列 𫱔 雅列 ；</verse>
				<verse number="3">雅列 𫱔 以諾 ； 以諾 𫱔 瑪土撒拉 ； 瑪土撒拉 𫱔 拉麥 ；</verse>
				<verse number="4">拉麥 𫱔 挪亞 ； 挪亞 𫱔三個孻仔 — 閃 、 含 、 雅弗 。</verse>
				<verse number="5">雅弗 个孻仔係： 歌篾 、 瑪各 、 瑪代 、 雅完 、 土巴 、 米設 、 提拉 。</verse>
				<verse number="6">歌篾 个子孫係 亞實基拿 人、 利法 人、 陀迦瑪 人。</verse>
				<verse number="7">雅完 个子孫係 以利沙 人、 他施 人、 基提 人、 羅德 人。</verse>
				<verse number="8">含 个孻仔係： 古實 、 埃及 、 弗 、 迦南 。</verse>
				<verse number="9">古實 个子孫係 西巴 人、 哈腓拉 人、 撒弗他 人、 拉瑪 人、 撒弗提迦 人。 拉瑪 个子孫係 示巴 人、 底但 人。</verse>
				<verse number="10">( 古實 有一個孻仔名安到 寧錄 ；佢係歷史上第一個英雄。)</verse>
				<verse number="11">埃及 个後代係： 路低 人、 亞拿米 人、 利哈比 人、 拿弗土希 人、</verse>
				<verse number="12">帕斯魯細 人、 迦斯路希 人㧯 克里特 人。 非利士 人係 克里特 人个後代。</verse>
				<verse number="13">迦南 𫱔長子 西頓 ，又𫱔 赫 。</verse>
				<verse number="14">迦南 也係 耶布斯 人、 亞摩利 人、 革迦撒 人、</verse>
				<verse number="15">希未 人、 亞基 人、 西尼 人、</verse>
				<verse number="16">亞瓦底 人、 洗瑪利 人㧯 哈馬 人个祖先。</verse>
				<verse number="17">閃 个孻仔係： 以攔 、 亞述 、 亞法撒 、 路得 、 亞蘭 、 烏斯 、 戶勒 、 基帖 、 瑪施 。</verse>
				<verse number="18">亞法撒 𫱔 沙拉 ； 沙拉 𫱔 希伯 。</verse>
				<verse number="19">希伯 有兩個孻仔：一個安到 法勒 ，因為在佢个時代，人類係分散來住个；佢个兄弟名喊 約坍 。</verse>
				<verse number="20">約坍 个子孫係： 亞摩答 人、 沙列 人、 哈薩瑪非 人、 耶拉 人、</verse>
				<verse number="21">哈多蘭 人、 烏薩 人、 德拉 人、</verse>
				<verse number="22">俄巴路 人、 亞比瑪利 人、 示巴 人、</verse>
				<verse number="23">阿斐 人、 哈腓拉 人、 約巴 人。這兜人全部係 約坍 个子孫。</verse>
				<verse number="24">對 閃 到 亞伯蘭 个後代記在下背： 閃 、 亞法撒 、 沙拉 、</verse>
				<verse number="25">希伯 、 法勒 、 拉吳 、</verse>
				<verse number="26">西鹿 、 拿鶴 、 他拉 、</verse>
				<verse number="27">亞伯蘭 (就係 亞伯拉罕 )。</verse>
				<verse number="28">亞伯拉罕 有兩個孻仔 — 以撒 㧯 以實瑪利 。</verse>
				<verse number="29">以實瑪利 个孻仔係下背十二宗族个族長： 尼拜約 ( 以實瑪利 个長子)、 基達 、 亞德別 、 米比衫 、</verse>
				<verse number="30">米施瑪 、 度瑪 、 瑪撒 、 哈達 、 提瑪 、</verse>
				<verse number="31">伊突 、 拿非施 、 基底瑪 。</verse>
				<verse number="32">亞伯拉罕 个細姐 基土拉 為佢𫱔六個孻仔 — 心蘭 、 約珊 、 米但 、 米甸 、 伊施巴 、 書亞 。 約珊 有兩個孻仔 — 示巴 㧯 底但 。</verse>
				<verse number="33">米甸 有五個孻仔 — 以法 、 以弗 、 哈諾 、 亞比大 、 以勒大 。以上這兜全部係 基土拉 个後代。</verse>
				<verse number="34">亞伯拉罕 个孻仔 以撒 有兩個孻仔 — 以掃 㧯 以色列 。</verse>
				<verse number="35">以掃 个孻仔係 以利法 、 流珥 、 耶烏施 、 雅蘭 、 可拉 。</verse>
				<verse number="36">以利法 係 提幔 、 阿抹 、 洗玻 、 迦坦 、 基納斯 、 亭納 、 亞瑪力 各宗族个祖先。</verse>
				<verse number="37">流珥 係 拿哈 、 謝拉 、 沙瑪 、 米撒 各宗族个祖先。</verse>
				<verse number="38">以東 地區原先个住民係 西珥 這兜孻仔个後代： 羅坍 — 何利 㧯 希幔 兩宗族个祖先。 ( 羅坍 有一個老妹名安到 亭納 。) 朔巴 — 亞勒文 、 瑪拿轄 、 以巴錄 、 示玻 、 阿南 等宗族个祖先。 祭便 — 佢有兩個孻仔 亞雅 㧯 亞拿 。 亞拿 係 底順 个阿爸； 底順 係 欣但 、 伊是班 、 益蘭 、 基蘭 等宗族个祖先。 以察 — 辟罕 、 撒番 、 亞干 等宗族个祖先。 底珊 — 烏斯 㧯 亞蘭 兩宗族个祖先。</verse>
				<verse number="39"></verse>
				<verse number="40"></verse>
				<verse number="41"></verse>
				<verse number="42"></verse>
				<verse number="43">以色列 人吂有君王以前，下背這兜王接等統治 以東 ： 亭哈巴 人 比珥 个孻仔 比拉 、 波斯拉 人 謝拉 个孻仔 約巴 、 提幔 地區个人 戶珊 、 亞未得 人 比達 个孻仔 哈達 (佢在 摩押 地打贏 米甸 人)、 瑪士利加 人 桑拉 、 大河壩滣个 利河伯 人 少羅 、 亞革波 个孻仔 巴勒‧哈南 、 巴烏 人 哈達 (佢个𡜵娘 米希她別 係 瑪特列 个妹仔 — 米‧薩合 个孫女)。</verse>
				<verse number="44"></verse>
				<verse number="45"></verse>
				<verse number="46"></verse>
				<verse number="47"></verse>
				<verse number="48"></verse>
				<verse number="49"></verse>
				<verse number="50"></verse>
				<verse number="51">以東 各族个族長係： 亭納 、 亞勒瓦 、 耶帖 、</verse>
				<verse number="52">阿何利巴瑪 、 以拉 、 比嫩 、</verse>
				<verse number="53">基納斯 、 提幔 、 米比薩 、</verse>
				<verse number="54">瑪基疊 、 以蘭 。</verse>
			</chapter>
			<chapter number="2">
				<verse number="1">以色列 有十二個孻仔 — 呂便 、 西緬 、 利未 、 猶大 、 以薩迦 、 西布倫 、</verse>
				<verse number="2">但 、 約瑟 、 便雅憫 、 拿弗他利 、 迦得 、 亞設 。</verse>
				<verse number="3">猶大 有五個孻仔。佢个𡜵娘 迦南 人 巴書亞 為佢𫱔三個孻仔 — 珥 、 俄南 、 示拉 。長子 珥 非常壞，被上主㓾掉。</verse>
				<verse number="4">猶大 个心舅 塔瑪 為佢𫱔兩個孻仔 — 法勒斯 㧯 謝拉 。</verse>
				<verse number="5">法勒斯 有兩個孻仔 — 希斯崙 㧯 哈母勒 。</verse>
				<verse number="6">佢个老弟 謝拉 有五個孻仔 — 心利 、 以探 、 希幔 、 甲各 、 大拉 。</verse>
				<verse number="7">謝拉 个一個後代 — 迦米 个孻仔 亞干 ，因為將應該獻給上帝个戰利品偷囥起來，害 以色列 人堵到災禍。</verse>
				<verse number="8">以探 有一個孻仔，名安到 亞撒利雅 。</verse>
				<verse number="9">希斯崙 有三個孻仔 — 耶拉篾 、 蘭 、 迦勒 。</verse>
				<verse number="10">對 蘭 到 耶西 个家譜記在下背： 蘭 、 亞米拿達 、 拿順 ( 猶大 支族中个一個傑出人物)、</verse>
				<verse number="11">撒門 、 波阿斯 、</verse>
				<verse number="12">俄備得 、 耶西 。</verse>
				<verse number="13">耶西 有七個孻仔，照大細个順序係： 以利押 、 亞比拿達 、 示米亞 、</verse>
				<verse number="14">拿坦業 、 拉代 、</verse>
				<verse number="15">阿鮮 、 大衛 。</verse>
				<verse number="16">耶西 有兩個妹仔 — 洗璐雅 㧯 愛比該 。 耶西 个妹仔 洗璐雅 有三個孻仔 — 亞比篩 、 約押 、 亞撒黑 。</verse>
				<verse number="17">耶西 另外一個妹仔 愛比該 嫁給 以實瑪利 人 益帖 ，𫱔一個孻仔名安到 亞瑪撒 。</verse>
				<verse number="18">希斯崙 个孻仔 迦勒 討 阿蘇芭 ，𫱔一個妹仔，名安到 耶略 。姖有三個孻仔 — 耶設 、 朔罷 、 押墩 。</verse>
				<verse number="19">阿蘇芭 死後， 迦勒 又討 以法她 ，𫱔一個孻仔安到 戶珥 。</verse>
				<verse number="20">戶珥 个孻仔係 烏利 ，孫仔係 比撒列 。</verse>
				<verse number="21">希斯崙 六十歲个時討 瑪吉 个妹仔， 基列 个姊妹。佢等有一個孻仔，名安到 西割 ；</verse>
				<verse number="22">西割 有一個孻仔安到 睚珥 。 睚珥 在 基列 境內識統治過二十三座城。</verse>
				<verse number="23">總係後來 基述 㧯 亞蘭 國佔領該位个六十個城市，就係 睚珥 㧯 基納 个村莊，並附近个城市。所有住在該所在个人全部係 基列 个阿爸 瑪吉 个後代。</verse>
				<verse number="24">希斯崙 在 迦勒‧以法他 死後，佢个𡜵娘 亞比雅 為佢𫱔 亞施戶 。 亞施戶 開設 提哥亞 城。</verse>
				<verse number="25">希斯崙 个長子 耶拉篾 有五個孻仔 — 蘭 (長子)、 布拿 、 阿連 、 阿鮮 、 亞希雅 。</verse>
				<verse number="26">蘭 有三個孻仔 — 瑪斯 、 雅憫 、 以結 。 耶拉篾 另外一個𡜵娘安到 亞她拉 ，𫱔一個孻仔名安到 阿南 。</verse>
				<verse number="27"></verse>
				<verse number="28">阿南 有兩個孻仔 — 沙買 㧯 雅大 。 沙買 也有兩個孻仔 — 拿答 㧯 亞比述 。</verse>
				<verse number="29">亞比述 討 亞比孩 ，𫱔兩個孻仔 — 亞辦 㧯 摩利 。</verse>
				<verse number="30">亞比述 个阿哥 拿答 有兩個孻仔 — 西列 㧯 亞遍 。 西列 到死無孻仔。</verse>
				<verse number="31">亞遍 𫱔 以示 ； 以示 𫱔 示珊 ； 示珊 𫱔 亞來 。</verse>
				<verse number="32">沙買 个老弟 雅大 有兩個孻仔 — 益帖 㧯 約拿單 。 益帖 到死無孻仔。</verse>
				<verse number="33">約拿單 有兩個孻仔 — 比勒 㧯 撒薩 。以上全部係 耶拉篾 个後代。</verse>
				<verse number="34">示珊 無孻仔，只有妹仔。佢有一個 埃及 个僕人名安到 耶哈 。</verse>
				<verse number="35">示珊 將一個妹仔嫁給佢，佢等𫱔一個孻仔安到 亞太 。</verse>
				<verse number="36">對 亞太 到 以利沙瑪 个家譜記在下背： 亞太 、 拿單 、 撒拔 、</verse>
				<verse number="37">以弗拉 、 俄備得 、</verse>
				<verse number="38">耶戶 、 亞撒利雅 、</verse>
				<verse number="39">希利斯 、 以利亞薩 、</verse>
				<verse number="40">西斯買 、 沙龍 、</verse>
				<verse number="41">耶加米雅 、 以利沙瑪 。</verse>
				<verse number="42">耶拉篾 个老弟 迦勒 个長子名安到 米沙 。 米沙 𫱔 西弗 ； 西弗 𫱔 瑪利沙 ； 瑪利沙 𫱔 希伯崙 。</verse>
				<verse number="43">希伯崙 有四個孻仔 — 可拉 、 他普亞 、 利肯 、 示瑪 。</verse>
				<verse number="44">示瑪 係 拉含 个阿爸， 約干 个阿公。 示瑪 个阿哥 利肯 𫱔 沙買 ；</verse>
				<verse number="45">沙買 𫱔 瑪雲 ； 瑪雲 𫱔 伯‧夙 。</verse>
				<verse number="46">迦勒 有一個細姐名安到 以法 ，為佢𫱔三個孻仔 — 哈蘭 、 摩撒 、 迦謝 、 哈蘭 个孻仔名安到 迦卻 。</verse>
				<verse number="47">(有一個人名安到 雅代 ；佢有六個孻仔 — 利健 、 約坦 、 基珊 、 比力 、 以法 、 沙亞弗 。)</verse>
				<verse number="48">迦勒 另外一個細姐 瑪迦 為佢𫱔兩個孻仔 — 示別 㧯 特哈拿 。</verse>
				<verse number="49">後來姖又𫱔兩個孻仔 — 沙亞弗 㧯 示法 。 沙亞弗 開設 麥瑪拿 城； 示法 開設 抹比拿 㧯 基比亞 城。 除這以外， 迦勒 有一個妹仔安到 押撒 。</verse>
				<verse number="50">迦勒 另外有兜後代，記在下背： 戶珥 係 迦勒 㧯厥𡜵娘 以法她 个長子。 戶珥 个長子 朔巴 開設 基列‧耶琳 ；</verse>
				<verse number="51">第二個孻仔 薩瑪 開設 伯利恆 ；第三個孻仔 哈勒 開設 伯‧迦得 。</verse>
				<verse number="52">開設 基列‧耶琳 个人 朔巴 𫱔 哈羅以 ； 米努哈 地區有一半个人民係 哈羅以 个子孫，</verse>
				<verse number="53">哈羅以 也係住在 基列‧耶琳 个各宗族 — 以帖 人、 布特 人、 舒瑪 人、 密來 人个祖先。 ( 瑣拉 㧯 以實陶 城个人民全部係這兜宗族个人。)</verse>
				<verse number="54">開設 伯利恆 个人 薩瑪 係 尼陀法 人㧯 亞他綠‧伯‧約押 人个祖先，也係在 瑪拿哈 个 瑣利 族人个祖先。</verse>
				<verse number="55">特拉 族人、 示米押 族人，㧯 蘇甲 族人係專門抄寫文件个文書世家，住在 雅比斯 城。佢等係 基尼 人 利甲 家族个祖先 哈末 个後代。</verse>
			</chapter>
			<chapter number="3">
				<verse number="1">大衛 在 希伯崙 所𫱔个孻仔，照出世个順序，名仔記在下背： 暗嫩 — 阿姆係 耶斯列 人 亞希暖 ； 但以利 — 阿姆係 迦密 人 愛比該 ； 押沙龍 — 阿姆係 瑪迦 ， 基述 王 達買 个妹仔； 亞多尼雅 — 阿姆係 哈及 ； 示法提雅 — 阿姆係 亞比她 ； 以特念 — 阿姆係 以格拉 。</verse>
				<verse number="2"></verse>
				<verse number="3"></verse>
				<verse number="4">以上六個孻仔全部係 大衛 在 希伯崙 做王个七年半期間𫱔个。 大衛 在 耶路撒冷 做王三十三年；</verse>
				<verse number="5">在 耶路撒冷 這期間，佢𫱔盡多孻仔。 佢个𡜵娘 拔示芭 係 亞米利 个妹仔，為佢𫱔四個孻仔 — 示米亞 、 朔罷 、 拿單 、 所羅門 。</verse>
				<verse number="6">佢另外有九個孻仔 — 益轄 、 以利書亞 、 以法列 、</verse>
				<verse number="7">挪迦 、 尼斐 、 雅非亞 、</verse>
				<verse number="8">以利沙瑪 、 以利雅大 、 以利法列 。</verse>
				<verse number="9">這兜孻仔以外， 大衛 還有對細姐所𫱔个孻仔。佢也有一個妹仔名安到 塔瑪 。</verse>
				<verse number="10">所羅門 个後代，照父系傳下个家譜記在下背： 所羅門 、 羅波安 、 亞比雅 、 亞撒 、 約沙法 、</verse>
				<verse number="11">約何蘭 、 亞哈謝 、 約阿施 、</verse>
				<verse number="12">亞瑪謝 、 亞撒利雅 、 約坦 、</verse>
				<verse number="13">亞哈斯 、 希西家 、 瑪拿西 、</verse>
				<verse number="14">亞們 、 約西亞 。</verse>
				<verse number="15">約西亞 有四個孻仔 — 約哈難 、 約雅敬 、 西底家 、 沙龍 。</verse>
				<verse number="16">約雅敬 有兩個孻仔 — 約雅斤 㧯 西底家 。</verse>
				<verse number="17">約雅斤 被 巴比倫 人捉走。佢有七個孻仔 — 撒拉鐵 、</verse>
				<verse number="18">瑪基蘭 、 比大雅 、 示拿薩 、 耶加米 、 何沙瑪 、 尼大比雅 。</verse>
				<verse number="19">比大雅 有兩個孻仔 — 所羅巴伯 㧯 示每 。 所羅巴伯 有兩個孻仔 — 米書蘭 㧯 哈拿尼雅 ，還有一個妹仔 示羅密 。</verse>
				<verse number="20">佢另外又有五個孻仔 — 哈舒巴 、 阿黑 、 比利家 、 哈撒底 、 于沙‧希悉 。</verse>
				<verse number="21">哈拿尼雅 有兩個孻仔 — 比拉提 㧯 耶篩亞 。 耶篩亞 𫱔 利法雅 ； 利法雅 𫱔 亞珥難 ； 亞珥難 𫱔 俄巴底亞 ； 俄巴底亞 𫱔 示迦尼 。</verse>
				<verse number="22">示迦尼 有一個孻仔 示瑪雅 ，有五個孫仔 — 哈突 、 以甲 、 巴利亞 、 尼利雅 、 沙法 。</verse>
				<verse number="23">尼利雅 有三個孻仔 — 以利約乃 、 希西家 、 亞斯利干 。</verse>
				<verse number="24">以利約乃 有七個孻仔 — 何大雅 、 以利亞實 、 比萊雅 、 阿谷 、 約哈難 、 第萊雅 、 阿拿尼 。</verse>
			</chapter>
			<chapter number="4">
				<verse number="1">猶大 个後代有 法勒斯 、 希斯崙 、 迦米 、 戶珥 㧯 朔巴 。</verse>
				<verse number="2">朔巴 𫱔 利亞雅 ； 利亞雅 𫱔 雅哈 ； 雅哈 𫱔 亞戶買 㧯 拉哈 。佢等係 瑣拉 人个祖先。</verse>
				<verse number="3">戶珥 係 迦勒 㧯 以法她 所𫱔个長子；佢个後代開設 伯利恆 城。 戶珥 有三個孻仔 — 以坦 、 比努伊勒 、 以謝珥 。 以坦 有三個孻仔 — 耶斯列 、 伊施瑪 、 伊得巴 ，並有一個妹仔 哈悉勒玻尼 。 比努伊勒 開設 基多 城； 以謝珥 開設 戶沙 城。</verse>
				<verse number="4"></verse>
				<verse number="5">亞施戶 開設 提哥亞 城，佢有兩個𡜵娘 — 希拉 㧯 拿拉 。</verse>
				<verse number="6">拿拉 為佢𫱔四個孻仔 — 亞戶撒 、 希弗 、 提米尼 、 哈轄斯他利 。</verse>
				<verse number="7">希拉 為佢𫱔三個孻仔 — 洗列 、 瑣轄 、 伊提南 。</verse>
				<verse number="8">哥斯 係 亞諾 㧯 瑣比巴 个阿爸，係 哈崙 个孻仔 亞哈黑 宗族个祖先。</verse>
				<verse number="9">有一個人名安到 雅比斯 ，係佢兄弟當中最受尊重个人。厥姆將佢安到 雅比斯 ，因為𫱔佢个時非常痛苦。</verse>
				<verse number="10">雅比斯 祈求 以色列 个上帝講：「上帝啊，求你賜福給𠊎，俾𠊎土地增加盡多。求你㧯𠊎共下，保守𠊎脫離災害，無受痛苦。」上帝就照佢所求个賜給佢。</verse>
				<verse number="11">書哈 个兄弟 基綠 有一個孻仔安到 米黑 。 米黑 𫱔 伊施屯 ；</verse>
				<verse number="12">伊施屯 有三個孻仔 — 伯‧拉巴 、 巴西亞 、 提欣拿 。 提欣拿 係 拿轄 城个開設人。這兜人个後代全部住在 利迦 。</verse>
				<verse number="13">基納斯 有兩個孻仔 — 俄陀聶 㧯 西萊雅 。 俄陀聶 也有兩個孻仔 — 哈塔 㧯 憫挪太 。</verse>
				<verse number="14">憫挪太 係 俄弗拉 个阿爸。 西萊雅 𫱔 約押 ； 約押 係 師傅 山壢个開設人；住在 師傅 山壢个全部係有技術个工人。</verse>
				<verse number="15">耶孚尼 个孻仔 迦勒 有三個孻仔 — 以路 、 以拉 、 拿安 。 以拉 𫱔 基納斯 。</verse>
				<verse number="16">耶哈利勒 有四個孻仔 — 西弗 、 西法 、 提利 、 亞撒列 。</verse>
				<verse number="17">以斯拉 有四個孻仔 — 益帖 、 米列 、 以弗 、 雅倫 。 米列 討 埃及 王个妹仔 比提雅 ；佢等有一個妹仔 米利暗 ，兩個孻仔 — 沙買 㧯 益巴 。 益巴 開設 以實提摩 城。 米列 也討一個 猶大 支族个細妹仔；佢等𫱔三個孻仔，就係開設 基多 城个 雅列 、開設 梭哥 城个 希伯 、㧯開設 撒挪亞 城个 耶古鐵 。</verse>
				<verse number="18"></verse>
				<verse number="19">荷第雅 討 拿含 个老妹；佢等个後代係住在 基伊拉 城个 迦米 宗族㧯住在 以實提摩 城个 瑪迦 宗族个祖先。</verse>
				<verse number="20">示門 有四個孻仔 — 暗嫩 、 林拿 、 便‧哈南 、 提倫 。 以示 有兩個孻仔 — 梭黑 㧯 便‧梭黑 。</verse>
				<verse number="21">猶大 个孻仔當中，有一個名安到 示拉 。 示拉 个後代有開設 利迦 城个 珥 ，開設 瑪利沙 城个 拉大 ，㧯住在 伯‧亞實比 城刺麻紗个宗族，</verse>
				<verse number="22">還有 約敬 、 哥西巴 城个人民、 約阿施 ，㧯該討 摩押 細妹仔住在 伯利恆 个 薩拉 。 (這兜全部係當早个記錄。)</verse>
				<verse number="23">佢等係為王服務个燒缶師傅，住在 尼他應 㧯 基低拉 。</verse>
				<verse number="24">西緬 有五個孻仔 — 尼母利 、 雅憫 、 雅立 、 謝拉 、 少羅 。</verse>
				<verse number="25">少羅 个孻仔係 沙龍 ，孫仔係 米比衫 ，曾孫係 米施瑪 。</verse>
				<verse number="26">米施瑪 个孻仔係 哈母利 ，孫仔係 撒刻 ，曾孫係 示每 。</verse>
				<verse number="27">示每 有十六個孻仔，六個妹仔，總係厥兄弟个子女較少，所以 西緬 支族無像 猶大 支族人丁興旺。</verse>
				<verse number="28">西緬 个後代一直到 大衛 王時代全部住在這兜城市： 別是巴 、 摩拉大 、 哈薩‧書亞 、</verse>
				<verse number="29">辟拉 、 以森 、 陀臘 、</verse>
				<verse number="30">彼土利 、 何珥瑪 、 洗革拉 、</verse>
				<verse number="31">伯‧瑪加博 、 哈薩‧蘇撒 、 伯‧比利 、 沙拉音 。</verse>
				<verse number="32">佢等也住在 以坦 、 亞因 、 臨門 、 陀健 、 亞珊 五隻城市，</verse>
				<verse number="33">包含附近个村莊，直到西南方个 巴力 城。以上係佢等所住个地方，佢等有自家个族譜。</verse>
				<verse number="34">佢等宗族族長个名記在下背： 米所巴 、 雅米勒 、 亞瑪謝 个孻仔 約沙 、 約珥 、 約示比 个孻仔 耶戶 、 ( 約示比 係 西萊雅 个孻仔、 亞薛 个孫仔)、還有 以利約乃 、 雅哥巴 、 約朔海 、 亞帥雅 、 亞底業 、 耶西篾 、 比拿雅 、 示非 个孻仔 細撒 。 ( 示非 係 亞龍 个孻仔， 亞龍 係 耶大雅 个孻仔， 耶大雅 係 申利 个孻仔， 申利 係 示瑪雅 个孻仔。) 因為佢等个宗族一直增加，</verse>
				<verse number="35"></verse>
				<verse number="36"></verse>
				<verse number="37"></verse>
				<verse number="38"></verse>
				<verse number="39">佢等向西發展，會到 基拉耳 ，在 基拉耳 个山壢東片尋掌羊仔个所在。</verse>
				<verse number="40">佢等在該位尋到一大片當闊當肥个草場；該草場非常恬靜。以前係 含 族人住在該位。</verse>
				<verse number="41">在 猶大 王 希西家 時代，以上講个該兜族長到 基拉耳 ，攻擊 含 族人个帳篷㧯該位所有个 米烏尼 人，將佢等滅掉，然後一直定居在該位，因為該位有當好个草場做得掌羊仔。</verse>
				<verse number="42">西緬 支族另外有五百個人向東到 以東 。佢等个領袖係 以示 个四個孻仔 — 比拉提 、 尼利雅 、 利法雅 、 烏薛 。</verse>
				<verse number="43">佢等㓾掉該兜逃走留在 以東 个 亞瑪力 人，然後一直定居在該位。</verse>
			</chapter>
			<chapter number="5">
				<verse number="1">下背係 以色列 長子 呂便 个後代。 ( 呂便 㧯厥爸个細姐有無正常个關係，所以失去長子个權利。這兜權利歸給 以色列 个孻仔 約瑟 㧯佢个後代。照族譜 呂便 無算長子。</verse>
				<verse number="2">雖然 猶大 支族最強大，對它產生一個領袖，統治所有支族，總係長子个權利歸給 約瑟 。)</verse>
				<verse number="3">以色列 个長子 呂便 有四個孻仔 — 哈諾 、 法路 、 希斯崙 、 迦米 。</verse>
				<verse number="4">下背係 約珥 照父系傳下來个後代： 示瑪雅 、 歌革 、 示每 、 米迦 、 利亞雅 、 巴力 、 備拉 。 備拉 係 呂便 支族个領袖，被 亞述 皇帝 提革拉‧比列色 捉過去。</verse>
				<verse number="5"></verse>
				<verse number="6"></verse>
				<verse number="7">在 呂便 支族族譜頂高所記个族長名仔記在下背： 耶利 、 撒迦利雅 、 比拉 。</verse>
				<verse number="8">比拉 係 亞撒 个孻仔， 示瑪 个孫仔，屬 約珥 个宗族。這宗族个人住在 亞羅珥 ，也有兜住在 亞羅珥 北片直到 尼波 㧯 巴力‧免 。</verse>
				<verse number="9">佢等在 基列 地有一大群个頭牲，所以佢等佔領東片个土地，直到 幼發拉底 河這片个曠野。</verse>
				<verse number="10">在 掃羅 王時代， 呂便 支族攻打 夏甲 人，將佢等㓾掉，佔領佢等在 基列 東片全部个土地。</verse>
				<verse number="11">迦得 支族住在 呂便 支族北片个 巴珊 地區，向東一直到 撒迦 。</verse>
				<verse number="12">迦得 支族中最主要个開設人係 約珥 ；第二重要个開設人係 沙番 ； 巴珊 地區其他宗族个開設人係 雅乃 㧯 沙法 。</verse>
				<verse number="13">迦得 支族其他个人屬下背七個宗族： 米迦勒 、 米書蘭 、 示巴 、 約賴 、 雅干 、 細亞 、 希伯 。</verse>
				<verse number="14">佢等全部係 戶利 个孻仔 亞比孩 个後代。佢等个祖先向前算等上个順序係： 亞比孩 、 戶利 、 耶羅亞 、 基列 、 米迦勒 、 耶示篩 、 耶哈多 、 布斯 。</verse>
				<verse number="15">押比疊 个孻仔、 古尼 个孫仔 亞希 係這兜宗族个族長。</verse>
				<verse number="16">佢等住在 巴珊 㧯 基列 地區，㧯 沙崙 逐位个草場。</verse>
				<verse number="17">(這兜記錄係在 猶大 王 約坦 㧯 以色列 王 耶羅波安 做王期間編寫个。)</verse>
				<verse number="18">呂便 、 迦得 兩支族㧯東 瑪拿西 支族有訓練精良个軍隊四萬四千七百六十人；佢等盡會用盾牌、刀劍㧯弓箭。</verse>
				<verse number="19">佢等去攻打 伊突 、 拿非施 、㧯 挪答 个 夏甲 族人。</verse>
				<verse number="20">佢等信靠上帝，向佢祈求幫助，上帝聽佢等个祈禱，將 夏甲 人㧯佢等个盟國全部交在佢等个手中。</verse>
				<verse number="21">佢等對敵人該位搶到五萬隻駱駝、二十五萬隻羊仔、兩千隻驢仔，又捉到十萬人。</verse>
				<verse number="22">佢等㓾掉盡多敵人，因為這戰爭係上帝个旨意。佢等住在該地區，一直到被人捉去外國个時 。</verse>
				<verse number="23">東 瑪拿西 支族定居在 巴珊 地區，向北到 巴力‧黑門 、 示尼珥 㧯 黑門 山。佢等人口增加當遽。</verse>
				<verse number="24">佢等逐宗族族長个名記在下背： 以弗 、 以示 、 以列 、 亞斯列 、 耶利米 、 何達威雅 、 雅疊 。這兜人全部係優秀个軍人，係這族當中有名个領袖。</verse>
				<verse number="25">約旦 河東片兩支族㧯半支族个人民對佢等祖先个上帝無忠心，離開佢，去拜該地原住民个神明；上帝識對這垤土地將該兜原住民逐走。</verse>
				<verse number="26">所以 以色列 个上帝激動 亞述 皇帝 普勒 (又安到 提革拉‧比列色 ) 來侵犯佢等。 普勒 皇帝捉到 呂便 、 迦得 㧯東 瑪拿西 支族个人，將佢等捉到 哈臘 、 哈博 、 哈拉 㧯 歌散 河壩滣，佢等个後代直到今晡日還在該位。</verse>
			</chapter>
			<chapter number="6">
				<verse number="1">利未 有三個孻仔 — 革順 、 哥轄 、 米拉利 。</verse>
				<verse number="2">哥轄 有四個孻仔 — 暗蘭 、 以斯哈 、 希伯崙 、 烏薛 。</verse>
				<verse number="3">暗蘭 有兩個孻仔 — 亞倫 、 摩西 ，一個妹仔 美莉安 。 亞倫 有四個孻仔 — 拿答 、 亞比戶 、 以利亞撒 、 以他瑪 。</verse>
				<verse number="4">以利亞撒 个後代照父系傳下來个有： 非尼哈 、 亞比書 、</verse>
				<verse number="5">布基 、 烏西 、</verse>
				<verse number="6">西拉希雅 、 米拉約 、</verse>
				<verse number="7">亞瑪利雅 、 亞希突 、</verse>
				<verse number="8">撒督 、 亞希瑪斯 、</verse>
				<verse number="9">亞撒利雅 、 約哈難 、</verse>
				<verse number="10">亞撒利雅 (佢在 所羅門 王所起个 耶路撒冷 聖殿肚做祭司)、</verse>
				<verse number="11">亞瑪利雅 、 亞希突 、</verse>
				<verse number="12">撒督 、 沙龍 、</verse>
				<verse number="13">希勒家 、 亞撒利雅 、</verse>
				<verse number="14">西萊雅 、 約薩答 。</verse>
				<verse number="15">在上主通過 尼布甲尼撒 王將 猶大 㧯 耶路撒冷 人民捉走个時， 約薩答 也被佢捉去。</verse>
				<verse number="16">利未 有三個孻仔 — 革順 、 哥轄 、 米拉利 。</verse>
				<verse number="17">佢等逐儕全部有孻仔。 革順 有 立尼 㧯 示每 ；</verse>
				<verse number="18">哥轄 有 暗蘭 、 以斯哈 、 希伯崙 、 烏薛 ；</verse>
				<verse number="19">米拉利 有 抹利 㧯 母示 。</verse>
				<verse number="20">革順 个後代照父系傳下來个有： 立尼 、 雅哈 、 薪瑪 、</verse>
				<verse number="21">約亞 、 易多 、 謝拉 、 耶特賴 。</verse>
				<verse number="22">哥轄 个後代照父系傳下來个有： 亞米拿達 、 可拉 、 亞惜 、</verse>
				<verse number="23">以利加拿 、 以比雅撒 、 亞惜 、</verse>
				<verse number="24">他哈 、 烏列 、 烏西雅 、 少羅 。</verse>
				<verse number="25">以利加拿 有兩個孻仔 — 亞瑪賽 㧯 亞希摩 。</verse>
				<verse number="26">亞希摩 个後代照父系傳下來个有： 以利加拿 、 瑣菲 、 拿哈 、</verse>
				<verse number="27">以利押 、 耶羅罕 、 以利加拿 。</verse>
				<verse number="28">撒母耳 有兩個孻仔 — 長子 約珥 ，第二個係 亞比亞 。</verse>
				<verse number="29">米拉利 个後代照父系傳下來个有： 抹利 、 立尼 、 示每 、 烏撒 、</verse>
				<verse number="30">示米亞 、 哈基雅 、 亞帥雅 。</verse>
				<verse number="31">約櫃徙到 耶路撒冷 定蹀以後， 大衛 王派人在上主个聖殿負責音樂个事。</verse>
				<verse number="32">在 所羅門 王吂起聖殿該站期間，佢等在上主个聖帳篷頭前輪流任職。</verse>
				<verse number="33">在聖殿負責唱歌个人，佢等个家譜記在下背： 哥轄 宗族有 希幔 。 希幔 係第一隊个領袖，係 約珥 个孻仔。佢个家譜向前算等上个順序係： 希幔 、 約珥 、 撒母耳 、</verse>
				<verse number="34">以利加拿 、 耶羅罕 、 以列 、 陀亞 、</verse>
				<verse number="35">蘇弗 、 以利加拿 、 瑪哈 、 亞瑪賽 、</verse>
				<verse number="36">以利加拿 、 約珥 、 亞撒利雅 、 西番雅 、</verse>
				<verse number="37">他哈 、 亞惜 、 以比雅撒 、 可拉 、</verse>
				<verse number="38">以斯哈 、 哥轄 、 利未 、 以色列 。</verse>
				<verse number="39">革順 宗族个 亞薩 係第二隊个領袖。佢个家譜向前算等上个順序係： 亞薩 、 比利家 、 示米亞 、</verse>
				<verse number="40">米迦勒 、 巴西雅 、 瑪基雅 、</verse>
				<verse number="41">伊特尼 、 謝拉 、 亞大雅 、</verse>
				<verse number="42">以探 、 薪瑪 、 示每 、</verse>
				<verse number="43">雅哈 、 革順 、 利未 。</verse>
				<verse number="44">米拉利 宗族个 以探 係第三隊个領袖。佢个家譜向前算等上个順序係： 以探 、 基示 、 亞伯底 、 瑪鹿 、</verse>
				<verse number="45">哈沙比雅 、 亞瑪謝 、 希勒家 、</verse>
				<verse number="46">暗西 、 巴尼 、 沙麥 、</verse>
				<verse number="47">末力 、 母示 、 米拉利 、 利未 。</verse>
				<verse number="48">佢等共支族其他个 利未 人兄弟也受派在上帝个聖殿擔任別個工作。</verse>
				<verse number="49">亞倫 㧯佢个後代擔任獻祭㧯燒香个服事，並在祭壇頂獻燒化祭。佢等个工作係主理至聖所所有禮拜个事，又獻牲祭。佢等照上帝个僕人 摩西 所指示个做這兜事，為 以色列 人贖罪。</verse>
				<verse number="50">亞倫 个後代照父系傳下來个有： 以利亞撒 、 非尼哈 、 亞比書 、</verse>
				<verse number="51">布基 、 烏西 、 西拉希雅 、</verse>
				<verse number="52">米拉約 、 亞瑪利雅 、 亞希突 、</verse>
				<verse number="53">撒督 、 亞希瑪斯 。</verse>
				<verse number="54">下背係 亞倫 後代 哥轄 宗族所分到个所在。在 利未 人所得到个土地當中， 哥轄 宗族分到个係第一份。</verse>
				<verse number="55">這所在包含在 猶大 境內个 希伯崙 㧯附近个草場，</verse>
				<verse number="56">總係屬 希伯崙 城个田地㧯村莊就分給 耶孚尼 个孻仔 迦勒 。</verse>
				<verse number="57">亞倫 後代分到个城市記在下背：逃閃城 希伯崙 、 雅提珥 、 立拿 附近个城市、 以實提莫 、 希崙 、 底璧 、 亞珊 、 伯‧示麥 ，㧯這兜城附近个草場。</verse>
				<verse number="58"></verse>
				<verse number="59"></verse>
				<verse number="60">在 便雅憫 境內，佢等分到 迦巴 、 阿勒篾 、 亞拿突 ，並這兜城附近个草場。佢等个家族總共分到十三座城。</verse>
				<verse number="61">哥轄 宗族其他个家族抽籤分到西 瑪拿西 境內个十座城。</verse>
				<verse number="62">革順 宗族該兜家族分到十三座城，在 以薩迦 、 亞設 、 拿弗他利 、㧯 巴珊 地區東 瑪拿西 境內。</verse>
				<verse number="63">米拉利 宗族該兜家族也共樣抽籤分到十二座城，在 呂便 、 迦得 、㧯 西布倫 境內。</verse>
				<verse number="64">以色列 人就恁樣將城市分給 利未 人住，也將城市附近个草場給佢等。</verse>
				<verse number="65">(頂高所講在 猶大 、 西緬 ，㧯 便雅憫 境內个城市也係抽籤分个。)</verse>
				<verse number="66">哥轄 宗族有兜家族分到 以法蓮 境內个城市㧯草場，</verse>
				<verse number="67">有 以法蓮 山區个逃閃城 示劍 、 基色 、</verse>
				<verse number="68">約緬 、 伯‧和崙 、</verse>
				<verse number="69">亞雅崙 㧯 迦特‧臨門 。</verse>
				<verse number="70">哥轄 宗族其他家族在西 瑪拿西 境內得到 亞乃 㧯 比連 兩座城㧯附近个草場。</verse>
				<verse number="71">革順 宗族分到下背逐城市㧯附近个草場： 在東 瑪拿西 境內有 巴珊 个 哥蘭 㧯 亞斯他錄 。</verse>
				<verse number="72">在 以薩迦 境內有 基低斯 、 大比拉 、</verse>
				<verse number="73">拉末 、㧯 亞年 。</verse>
				<verse number="74">在 亞設 境內有 瑪沙 、 押頓 、</verse>
				<verse number="75">戶割 、㧯 利合 。</verse>
				<verse number="76">在 拿弗他利 境內有 加利利 个 基低斯 、 哈們 、㧯 基列亭 。</verse>
				<verse number="77">米拉利 宗族該兜家族分到下背逐城市㧯附近个草場： 在 西布倫 境內有 臨摩挪 㧯 他泊 。</verse>
				<verse number="78">在 呂便 境內，就係經過 耶利哥 到 約旦 河東片，有高地个 比悉 、㧯 雅哈撒 、</verse>
				<verse number="79">基底莫 、㧯 米法押 。</verse>
				<verse number="80">在 迦得 境內有 基列 个 拉末 、 瑪哈念 、</verse>
				<verse number="81">希實本 、㧯 雅謝 。</verse>
			</chapter>
			<chapter number="7">
				<verse number="1">以薩迦 有四個孻仔 — 陀拉 、 普瓦 、 雅述 、 伸崙 。</verse>
				<verse number="2">陀拉 有六個孻仔 — 烏西 、 利法雅 、 耶勒 、 雅買 、 易伯散 、 示母利 。佢等全部係 陀拉 宗族中个家族族長，係勇敢个戰士。在 大衛 王時代，佢等个後代有兩萬兩千六百人。</verse>
				<verse number="3">烏西 有一個孻仔 伊斯拉希 ； 伊斯拉希 㧯厥四個孻仔 — 米迦勒 、 俄巴底亞 、 約珥 、㧯 伊示雅 全部係家族个族長。</verse>
				<verse number="4">佢等有盡多𡜵娘細姐㧯子女，所以佢等个後代有三萬六千做得相㓾个戰士。</verse>
				<verse number="5">在 以薩迦 支族逐家个族譜總共登記八萬七千做得相㓾个戰士。</verse>
				<verse number="6">便雅憫 有三個孻仔 — 比拉 、 比結 、 耶疊 。</verse>
				<verse number="7">比拉 有五個孻仔 — 以斯本 、 烏西 、 烏薛 、 耶利摩 、 以利 。佢等全部係這宗族中个家族族長，也係勇敢个戰士。佢等个後代有兩萬兩千零三十四做得相㓾个戰士。</verse>
				<verse number="8">比結 有九個孻仔 — 細米拉 、 約阿施 、 以利以謝 、 以利約乃 、 暗利 、 耶利摩 、 亞比雅 、 亞拿突 、 亞拉篾 。</verse>
				<verse number="9">佢等个後代當中，照族譜所寫个，有兩萬零兩百做得相㓾个戰士。</verse>
				<verse number="10">耶疊 有一個孻仔 比勒罕 。 比勒罕 有七個孻仔 — 耶烏施 、 便雅憫 、 以忽 、 基拿拿 、 細坦 、 他施 、 亞希沙哈 。</verse>
				<verse number="11">佢等全部係這宗族中个家族族長，也係勇敢个戰士。佢等个後代有一萬七千兩百做得相㓾个戰士。</verse>
				<verse number="12">書品 㧯 戶品 也屬這支族。 但 有一個孻仔 戶伸 。</verse>
				<verse number="13">拿弗他利 有四個孻仔 — 雅薛 、 沽尼 、 耶色 、 沙龍 。 (佢等全部係 辟拉 个後代。)</verse>
				<verse number="14">瑪拿西 个細姐 ( 亞蘭 人) 為佢𫱔兩個孻仔 — 亞斯列 㧯 瑪吉 。 瑪吉 𫱔 基列 。</verse>
				<verse number="15">瑪吉 為 戶品 㧯 書品 逐儕討一個𡜵娘。佢个老妹安到 瑪迦 。 瑪吉 个第二個孻仔係 西羅非哈 。 西羅非哈 只有幾個妹仔。</verse>
				<verse number="16">瑪吉 个𡜵娘 瑪迦 𫱔兩個孻仔；佢等將這兩個孻仔安到 比利施 㧯 示利施 。 比利施 有兩個孻仔 — 烏蘭 㧯 利金 。</verse>
				<verse number="17">烏蘭 有一個孻仔安到 比但 。這兜全部係 基列 个後代； 基列 係 瑪吉 个孻仔， 瑪拿西 个孫仔。</verse>
				<verse number="18">基列 个老妹 哈摩利吉 有三個孻仔 — 伊施荷 、 亞比以謝 、 瑪拉 。</verse>
				<verse number="19">示米大 有四個孻仔 — 亞現 、 示劍 、 利克希 、 阿尼安 。</verse>
				<verse number="20">以法蓮 个後代照父系傳下來个有： 書提拉 、 比列 、 他哈 、 以拉大 、 他哈 、</verse>
				<verse number="21">撒拔 、 書提拉 。除了 書提拉 以外， 以法蓮 還有兩個孻仔 — 以謝 㧯 以利 。佢兩儕因為去搶 迦特 人个頭牲，被人㓾死。</verse>
				<verse number="22">佢等个阿爸 以法蓮 為佢等傷心盡久，佢个兄弟全部來安慰佢。</verse>
				<verse number="23">後來佢又㧯佢个𡜵娘同房；厥𡜵娘就有身項，𫱔一個孻仔； 以法蓮 因為屋下識堵到災禍，就㧯這個孻仔安名 比利亞 。</verse>
				<verse number="24">以法蓮 有一個妹仔安到 舍伊拉 。 舍伊拉 起上 伯‧和崙 、下 伯‧和崙 㧯 烏羨‧舍伊拉 三座城。</verse>
				<verse number="25">以法蓮 另外有一個孻仔安到 利法 ； 利法 个後代照父系傳下來个有： 利悉 、 他拉 、 他罕 、</verse>
				<verse number="26">拉但 、 亞米忽 、 以利沙瑪 、</verse>
				<verse number="27">嫩 、 約書亞 。</verse>
				<verse number="28">佢等住个所在包含 伯特利 㧯附近个村莊，向東到 拿蘭 ，向西到 基色 㧯附近个村莊，還有 示劍 㧯 艾雅 兩座城，㧯這兩座城附近个村莊。</verse>
				<verse number="29">瑪拿西 个後代控制 伯‧善 、 他納 、 米吉多 、 多珥 ，㧯各城附近个村莊。 以上全部係 以色列 个孻仔 約瑟 後代住个所在。</verse>
				<verse number="30">下背係 亞設 个後代。 亞設 有四個孻仔 — 音拿 、 亦施瓦 、 亦施韋 、 比利亞 ，㧯一個妹仔 西拉 。</verse>
				<verse number="31">比利亞 有兩個孻仔 — 希別 㧯 瑪結 。 瑪結 係 比撒威 城个開設人。</verse>
				<verse number="32">希別 有三個孻仔 — 雅弗勒 、 朔默 、 何坦 ，㧯一個妹仔 書雅 。</verse>
				<verse number="33">雅弗勒 也有三個孻仔 — 巴薩 、 賓哈 、 亞施法 。</verse>
				<verse number="34">厥老弟 朔默 有三個孻仔 — 羅迦 、 耶戶巴 、 亞蘭 。</verse>
				<verse number="35">厥老弟 何坦 有四個孻仔 — 瑣法 、 音拿 、 示利斯 、 亞抹 。</verse>
				<verse number="36">瑣法 个後代有 書亞 、 哈尼弗 、 書阿勒 、 比利 、 音拉 、</verse>
				<verse number="37">比悉 、 河得 、 珊瑪 、 施沙 、 益蘭 、 比拉 。</verse>
				<verse number="38">益帖 个後代有 耶孚尼 、 比斯巴 、 亞拉 。</verse>
				<verse number="39">烏拉 个後代有 亞拉 、 漢尼業 、 利寫 。</verse>
				<verse number="40">這兜全部係 亞設 个後代。佢等係家族个族長，勇敢个戰士，優秀个領袖。 亞設 个後代有兩萬六千做得相㓾个戰士。</verse>
			</chapter>
			<chapter number="8">
				<verse number="1">便雅憫 有五個孻仔；佢等照大細順序係： 比拉 、 亞實別 、 亞哈拉 、</verse>
				<verse number="2">挪哈 、 拉法 。</verse>
				<verse number="3">比拉 个後代有 亞大 、 基拉 、 亞比忽 、</verse>
				<verse number="4">亞比書 、 乃幔 、 亞何亞 、</verse>
				<verse number="5">基拉 、 示孚汛 、 戶蘭 。</verse>
				<verse number="6">以忽 个後代有 乃幔 、 亞希亞 、 基拉 。佢等係住在 迦巴 該兜家族个族長，總係被人迫到正徙到 瑪拿轄 住。係 烏撒 㧯 亞希忽 个阿爸 基拉 帶領佢等徙過去个。</verse>
				<verse number="7"></verse>
				<verse number="8">沙哈連 个兩個𡜵娘 — 戶伸 㧯 巴拉 全部被佢離掉；後來佢住在 摩押 个時討 賀得 。佢等有七個孻仔 — 約巴 、 洗比雅 、 米沙 、 瑪拉干 、</verse>
				<verse number="9"></verse>
				<verse number="10">耶烏斯 、 沙迦 、 米瑪 。這兜人全部成做家族族長。</verse>
				<verse number="11">戶伸 為佢𫱔个兩個孻仔係 亞比突 㧯 以利巴力 。</verse>
				<verse number="12">以利巴力 有三個孻仔 — 希伯 、 米珊 、 沙麥 。 沙麥 起 阿挪 㧯 羅德 這兩座城㧯附近个村莊。</verse>
				<verse number="13">比利亞 㧯 示瑪 係住在 亞雅崙 城个族長；佢等兩個家族逐走 迦特 个人民。</verse>
				<verse number="14">比利亞 个後代有 亞希約 、 沙煞 、 耶利末 、</verse>
				<verse number="15">西巴第雅 、 亞拉得 、 亞得 、</verse>
				<verse number="16">米迦勒 、 伊施巴 、 約哈 。</verse>
				<verse number="17">以利巴力 个後代有 西巴第雅 、 米書蘭 、 希西基 、 希伯 、</verse>
				<verse number="18">伊施米萊 、 伊斯利亞 、 約巴 。</verse>
				<verse number="19">示每 个後代有 雅金 、 細基利 、 撒底 、</verse>
				<verse number="20">以利乃 、 洗勒太 、 以列 、</verse>
				<verse number="21">亞大雅 、 比拉雅 、 申拉 。</verse>
				<verse number="22">沙煞 个後代有 伊施班 、 希伯 、 以列 、</verse>
				<verse number="23">亞伯頓 、 細基利 、 哈難 、</verse>
				<verse number="24">哈拿尼雅 、 以攔 、 安陀提雅 、</verse>
				<verse number="25">伊弗底雅 、 比努伊勒 。</verse>
				<verse number="26">耶羅罕 个後代有 珊示萊 、 示哈利 、 亞他利雅 、</verse>
				<verse number="27">雅利西 、 以利亞 、 細基利 。</verse>
				<verse number="28">以上全部係家族个族長；佢等主要个後代住在 耶路撒冷 。</verse>
				<verse number="29">耶利 開設 基遍 城，住在該位。佢个𡜵娘安到 瑪迦 ；</verse>
				<verse number="30">佢个長子安到 亞伯頓 。佢其他个孻仔有 蘇珥 、 基士 、 巴力 、 尼珥 、 拿答 、</verse>
				<verse number="31">基多 、 亞希約 、 撒迦 、</verse>
				<verse number="32">米基羅 。 米基羅 係 示米暗 个阿爸。佢等个後代住在 耶路撒冷 ，離佢等本宗族个其他家族無幾遠。</verse>
				<verse number="33">尼珥 𫱔 基士 ； 基士 𫱔 掃羅 。 掃羅 有四個孻仔 — 約拿單 、 麥基‧舒亞 、 亞比拿達 、 伊施‧巴力 。</verse>
				<verse number="34">約拿單 𫱔 米力‧巴力 ； 米力‧巴力 𫱔 米迦 。</verse>
				<verse number="35">米迦 有四個孻仔 — 比敦 、 米勒 、 他利亞 、 亞哈斯 。</verse>
				<verse number="36">亞哈斯 𫱔 耶何阿達 ； 耶何阿達 有三個孻仔 — 亞拉篾 、 亞斯瑪威 、 心利 。 心利 𫱔 摩撒 ；</verse>
				<verse number="37">摩撒 𫱔 比尼亞 ； 比尼亞 𫱔 拉法 ； 拉法 𫱔 以利亞薩 ； 以利亞薩 𫱔 亞悉 。</verse>
				<verse number="38">亞悉 有六個孻仔 — 亞斯利干 、 波基路 、 以實瑪利 、 示亞利雅 、 俄巴底雅 、 哈難 。</verse>
				<verse number="39">亞悉 个老弟 以設 有三個孻仔 — 烏蘭 、 耶烏施 、 以利法列 。</verse>
				<verse number="40">烏蘭 該兜孻仔全部係勇敢个戰士㧯弓箭手。佢个孻仔㧯孫仔總共有一百五十儕。以上所寫全部係 便雅憫 支族个人。</verse>
			</chapter>
			<chapter number="9">
				<verse number="1">所有 以色列 人全部照家譜登記在《 以色列 列王史》底背。 猶大 人因為犯罪受責罰，被人捉去 巴比倫 。</verse>
				<verse number="2">最先倒轉自家个城市、住在自家土地个有 以色列 平民、祭司、 利未 人，㧯聖殿个工人。</verse>
				<verse number="3">猶大 、 便雅憫 、 以法蓮 ，㧯 瑪拿西 支族个人住在 耶路撒冷 。</verse>
				<verse number="4">猶大 支族有六百九十個家族住在 耶路撒冷 。 猶大 个孻仔 法勒斯 个後代中有 烏太 做佢等个領袖。 烏太 係 亞米忽 个孻仔， 暗利 个孫仔；佢个祖先還有 音利 㧯 巴尼 。 猶大 个孻仔 示羅 个後代中有 亞帥雅 做佢等个領袖。 亞帥雅 係這家族个族長。 猶大 个孻仔 謝拉 个後代中有 耶烏利 做佢等个領袖。</verse>
				<verse number="5"></verse>
				<verse number="6"></verse>
				<verse number="7">住在 耶路撒冷 个 便雅憫 族人个名記在下背： 撒路 係 米書蘭 个孻仔， 何達威雅 个孫仔， 哈西努 个曾孫。 伊比尼雅 係 耶羅罕 个孻仔。 以拉 係 烏西 个孻仔， 米基利 个孫仔。 米書蘭 係 示法提雅 个孻仔， 流珥 个孫仔， 伊比尼雅 个曾孫。</verse>
				<verse number="8"></verse>
				<verse number="9">便雅憫 支族有九百五十六個家族住在 耶路撒冷 。以上所記个人全部係家族个族長。</verse>
				<verse number="10">下背係住在 耶路撒冷 个祭司： 耶大雅 、 耶何雅立 、 雅斤 、 聖殿總管 亞撒利雅 ( 希勒家 个孻仔 — 佢个祖先有 米書蘭 、 撒督 、 米拉約 、 亞希突 )、 亞大雅 ( 耶羅罕 个孻仔 — 佢个祖先有 巴施戶珥 、 瑪基雅 )、 瑪賽 ( 亞第業 个孻仔 — 佢个祖先有 雅希細拉 、 米書蘭 、 米實利密 、 音麥 )。</verse>
				<verse number="11"></verse>
				<verse number="12"></verse>
				<verse number="13">做家族族長个祭司共有一千七百六十儕；佢等全部盡會處理上帝聖殿个事務。</verse>
				<verse number="14">下背係住在 耶路撒冷 个 利未 人： 示瑪雅 ( 哈述 个孻仔 — 佢个祖先有 押利甘 、 哈沙比雅 ，屬 米拉利 宗族)、 拔巴甲 、 黑勒施 、 迦拉 、 瑪探雅 ( 米迦 个孻仔 — 佢个祖先有 細基利 、 亞薩 )、 俄巴底 ( 示瑪雅 个孻仔 — 佢个祖先有 迦拉 、 耶杜頓 )、 比利家 ( 亞撒 个孻仔， 以利加拿 个孫仔；佢住在 尼陀法 城个所在)。</verse>
				<verse number="15"></verse>
				<verse number="16"></verse>
				<verse number="17">住在 耶路撒冷 个聖殿守衛記在下背： 沙龍 、 亞谷 、 達們 、 亞希幔 。 沙龍 係佢等个領袖。</verse>
				<verse number="18">佢等這宗族个人在該期間常常安營在王門 東片入口做守衛；佢等以前係 利未 營掌門个人。</verse>
				<verse number="19">以比雅撒 个孫仔， 可利 个孻仔 沙龍 ，㧯佢个 可拉 族該兜兄弟，負責守衛聖帳篷个入口；佢等个祖先負責守衛上主个聖帳篷。</verse>
				<verse number="20">以利亞撒 个孻仔 非尼哈 識做過佢等个隊長。上主㧯佢共下。</verse>
				<verse number="21">米施利米雅 个孻仔 撒迦利雅 也係上主聖帳篷入口个守衛。</verse>
				<verse number="22">總共有兩百十二儕被人選來看守入口个門。佢等係照自家所住个村莊登記在族譜底背。 大衛 㧯先見 撒母耳 將這責任交給佢等。</verse>
				<verse number="23">佢等㧯佢等个後代繼續守衛上主聖殿个門 — 就係聖帳篷个門。</verse>
				<verse number="24">有東門、西門、南門、北門，逐隻門有一個守衛長。</verse>
				<verse number="25">這兜守衛㧯住在佢等村莊肚个親戚互相幫助，輪流守衛，七日輪一擺。</verse>
				<verse number="26">四個守衛長全部係 利未 人，負最大个責任。佢等也負責掌上帝聖殿肚个房間㧯倉庫。</verse>
				<verse number="27">佢等住在上帝聖殿周圍；因為佢等負責掌聖殿，逐日朝晨愛開聖殿个門。</verse>
				<verse number="28">有兜 利未 人負責掌禮拜用个用品。逐擺用這兜用品个時，拿出去，放轉來，佢等全部愛點清楚。</verse>
				<verse number="29">還有个 利未 人保管聖殿个其他東西㧯麵粉、酒、橄欖油、香、香料。</verse>
				<verse number="30">總係負責合香料个工作係祭司个事。</verse>
				<verse number="31">利未 人 可拉 宗族 沙龍 个長子 瑪他提雅 負責準備愛焙个祭物 。</verse>
				<verse number="32">哥轄 宗族个人負責準備逐擺安息日聖殿所需要个供餅 。</verse>
				<verse number="33">有兜 利未 家族个人負責聖殿个音樂。這兜家族个族長住在聖殿堘个房間；佢等毋使做其他工作，因為佢等日夜全部愛做音樂个事奉。</verse>
				<verse number="34">以上所記个人，照族譜，全部係 利未 各家族个族長；佢等全部住在 耶路撒冷 。</verse>
				<verse number="35">耶利 開設 基遍 城，住在該位。佢个𡜵娘安到 瑪迦 ；</verse>
				<verse number="36">佢个長子安到 亞伯頓 。佢其他个孻仔係 蘇珥 、 基士 、 巴力 、 尼珥 、 拿答 、</verse>
				<verse number="37">基多 、 亞希約 、 撒迦利雅 、 米基羅 。</verse>
				<verse number="38">米基羅 係 示米暗 个阿爸。佢等个後代住在 耶路撒冷 ，離佢等本宗族个其他家族無幾遠。</verse>
				<verse number="39">尼珥 𫱔 基士 ； 基士 𫱔 掃羅 。 掃羅 有四個孻仔 — 約拿單 、 麥基‧舒亞 、 亞比拿達 、 伊施‧巴力 。</verse>
				<verse number="40">約拿單 𫱔 米力‧巴力 ； 米力‧巴力 𫱔 米迦 。</verse>
				<verse number="41">米迦 有四個孻仔 — 比敦 、 米勒 、 他利亞 、 亞哈斯 。</verse>
				<verse number="42">亞哈斯 𫱔 雅拉 。 雅拉 有三個孻仔 — 亞拉篾 、 亞斯瑪威 、 心利 。 心利 𫱔 摩撒 ；</verse>
				<verse number="43">摩撒 𫱔 比尼亞 ； 比尼亞 𫱔 拉法 ； 拉法 𫱔 以利亞薩 ； 以利亞薩 𫱔 亞悉 。</verse>
				<verse number="44">亞悉 有六個孻仔 — 亞斯利干 、 波基路 、 以實瑪利 、 示亞利雅 、 俄巴底雅 、 哈難 。</verse>
			</chapter>
			<chapter number="10">
				<verse number="1">非利士 人㧯 以色列 人在 基利波 山相㓾。當多 以色列 人被人㓾死；無死个人，包含 掃羅 㧯佢該兜孻仔，全部逃走。</verse>
				<verse number="2">非利士 人逐到 掃羅 㧯佢該兜孻仔，㓾掉 約拿單 、 亞比拿達 㧯 麥基‧舒亞 。</verse>
				<verse number="3">四周圍向 掃羅 个攻擊緊來緊激烈；佢被敵人个箭射到，受重傷。</verse>
				<verse number="4">掃羅 對代佢拿武器个侍衛講：「你个刀仔挷出來，將𠊎㓾掉！恁樣，該兜無受割禮个 非利士 人就無法度㓾到𠊎來凌辱𠊎。」總係該侍衛非常驚，毋敢㓾；所以 掃羅 挷出自家个刀仔來，伏在刀仔頂高將自家刺死。</verse>
				<verse number="5">該侍衛一看到 掃羅 死掉，也伏在自家个刀仔頂高自殺。</verse>
				<verse number="6">恁樣， 掃羅 㧯佢三個孻仔全部死掉；佢个王朝也結束了。</verse>
				<verse number="7">耶斯列 山壢个 以色列 人看 以色列 軍隊逃走，又看到 掃羅 㧯佢該兜孻仔也攏總戰死，就離開佢等个城逃走。 非利士 人就來佔領，住在該位。</verse>
				<verse number="8">第二日， 非利士 人去剝死人个戰衫；佢等發現 掃羅 㧯佢三個孻仔个屍體橫在 基利波 山，</verse>
				<verse number="9">就剝掉 掃羅 个戰衫，剁下佢个頭，解下佢个武器。佢等派人到 非利士 各地去，向佢等个偶像㧯人民報告這消息。</verse>
				<verse number="10">佢等將 掃羅 个武器放在佢等个一座神廟肚，將佢个頭那掛在佢等个 大袞 神廟肚。</verse>
				<verse number="11">基列 境內 雅比 城个人民一聽到 非利士 人對 掃羅 所做个事，</verse>
				<verse number="12">佢等當中所有个勇士就出發，去將 掃羅 㧯佢該兜孻仔个屍體搶轉來，帶到 雅比 ，將佢等个骸骨葬在 雅比 个一頭柳樹下，然後禁食七日。</verse>
				<verse number="13">掃羅 死掉；因為佢對上主無忠心，無聽從上主个命令。佢求問交鬼个，</verse>
				<verse number="14">毋求問上主，所以上主將佢㓾掉，將王位給 耶西 个孻仔 大衛 。</verse>
			</chapter>
			<chapter number="11">
				<verse number="1">以色列 所有个人全部到 希伯崙 來見 大衛 ，對佢講：「𠊎等係你个骨肉之親。</verse>
				<verse number="2">以前，在 掃羅 還做王个時，你就已經帶領 以色列 人民出入戰場。上主 — 你个上帝識應許你講：『你愛做牧人領導𠊎个子民 以色列 ，做佢等个統治者。』」</verse>
				<verse number="3">所有 以色列 个長老全部到 希伯崙 見 大衛 王。 大衛 在上主面前㧯佢等立約，佢等就膏油設立佢做 以色列 个王，就像上主通過 撒母耳 所應許个。</verse>
				<verse number="4">大衛 王㧯所有个 以色列 人去攻打 耶路撒冷 (該時安到 耶布斯 )，該地个人民 耶布斯 人還住在該位。</verse>
				<verse number="5">耶布斯 人講 大衛 永遠無法度入城，總係 大衛 還係佔領佢等个 錫安 城堡，對恁樣這所在就安到 大衛 城。</verse>
				<verse number="6">大衛 講：「麼人先㓾死 耶布斯 人，就愛做軍隊个元帥！」 洗璐雅 个孻仔 約押 最先攻上去，所以佢就做元帥。</verse>
				<verse number="7">大衛 住在城堡，所以這城堡就安到 大衛 城。</verse>
				<verse number="8">大衛 重建這城个牆，對山東片坉平个台地 開始整， 約押 整城个其他部份。</verse>
				<verse number="9">大衛 个王國一日比一日興旺，因為上主 — 萬軍个元帥㧯佢共下。</verse>
				<verse number="10">下背係 大衛 手下有名勇士个名單。佢等㧯其他个 以色列 人膏油立 大衛 做王，就像上主所應許个；幫助 大衛 堅固王國个也係佢等。</verse>
				<verse number="11">第一個係 哈革摩尼 宗族个 雅朔班 。佢係「三勇士」 个領袖。佢識在一擺戰爭中用槍刺死三百人。</verse>
				<verse number="12">「三勇士」个第二個係 亞合 族人 朵多 个孻仔 以利亞撒 。</verse>
				<verse number="13">在 巴斯‧達閔 戰爭中，佢㧯 大衛 共下抵抗 非利士 人。 以色列 人逃走个時，佢堵好在一垤大麥田肚，</verse>
				<verse number="14">帶領部下保護該垤田，㓾掉當多 非利士 人。上主使佢大大勝利。</verse>
				<verse number="15">一隊 非利士 人安營在 利乏音 山壢肚个時，有一日，「三十勇士」當中有三儕下到 亞杜蘭 山窿附近个磐石該位去見 大衛 。</verse>
				<verse number="16">該時， 大衛 在一個有防衛个山頭；一群 非利士 人佔領 伯利恆 。</verse>
				<verse number="17">大衛 想念家鄉，就講：「𠊎當想愛啉 伯利恆 城門堘个井水啊！」</verse>
				<verse number="18">該三個勇士就闖等過 非利士 人个營地，到 伯利恆 城門堘个井打水，帶轉來給 大衛 。總係 大衛 毋肯啉，反轉將水倒出來獻給上主。</verse>
				<verse number="19">佢講：「上帝啊，𠊎樣般做得啉這水！這就係啉冒生命危險去打水个勇士个血！」所以 大衛 毋啉。這就係該三個勇士勇敢个行為。</verse>
				<verse number="20">約押 个老弟 亞比篩 係「三十勇士」 个領袖。佢識用槍刺死三百人，所以㧯「三勇士」共樣出名。</verse>
				<verse number="21">佢係「三十勇士」 當中最傑出个一個，成做佢等个領袖，總係比毋得「三勇士」个名聲。</verse>
				<verse number="22">甲薛 人 耶何耶大 个孻仔 比拿雅 係另外一個出名个勇士。佢有當多勇敢个行為，包含㓾死兩個強壯个 摩押 戰士 。有一擺落雪天，佢下到大窟肚，打死一隻獅仔。</verse>
				<verse number="23">佢又㓾死一個強壯个 埃及 人；該人兩百零公分高，手項拿等長槍，槍柄像織布機个車心恁粗。 比拿雅 只有拿等一支棍仔㧯佢拚，將佢手項个槍搶過來，用該槍將佢㓾死。</verse>
				<verse number="24">這係 耶何耶大 个孻仔 比拿雅 勇敢个行為；佢㧯「三勇士」也盡出名。</verse>
				<verse number="25">佢在「三十勇士」當中最受人尊重，總係㧯「三勇士」个名聲還係比毋得。 大衛 派佢做侍衛長。</verse>
			</chapter>
			<chapter number="12">
				<verse number="1">大衛 為到走閃 基士 个孻仔 掃羅 王，囥在 洗革拉 ，盡多會相㓾个勇士來幫助佢。</verse>
				<verse number="2">佢等做得用左手抑係正手拉弓射箭、拂石頭。佢等㧯 掃羅 共族，係 便雅憫 支族个人。</verse>
				<verse number="3">基比亞 人 示瑪 个孻仔 亞希以謝 㧯 約阿施 係佢等个領袖。 以下係這兜士兵个名單： 亞斯瑪威 个孻仔 耶薛 㧯 比力 ； 亞拿突 人 比拉迦 㧯 耶戶 ； 基遍 人 以實買雅 (當厲害个戰士，「三十勇士」个領袖之一)； 基得拉 人 耶利米 、 雅哈悉 、 約哈難 、㧯 約撒拔 ； 哈律弗 人 以利烏賽 、 耶利摩 、 比亞利雅 、 示瑪利雅 、㧯 示法提雅 ； 可拉 族人 以利加拿 、 耶西亞 、 亞薩列 、 約以謝 、㧯 雅朔班 ； 基多 人 耶羅罕 个孻仔 猶拉 㧯 西巴第雅 。</verse>
				<verse number="4">大衛 在曠野个山寨該時， 迦得 支族有兜勇士加入 大衛 个部隊。這兜戰士全部係當會用盾牌㧯槍个人；佢等看起來像獅仔，動作像山頂个鹿仔恁遽。</verse>
				<verse number="5">佢等个名單照官位个高低排列在下背： 以薛 、 俄巴底雅 、 以利押 、 彌施瑪拿 、 耶利米 、 亞太 、 以利業 、 約哈難 、 以利薩巴 、 耶利米 、 末巴奈 。</verse>
				<verse number="6">這兜 迦得 支族个軍官，有帶領一千士兵个，有帶領一百士兵个。</verse>
				<verse number="7">有一年正月， 約旦 河个水淰過兩片壆，這群人過河，趕散住在東西兩片平原个人民。</verse>
				<verse number="8">有一擺， 便雅憫 㧯 猶大 支族當中，有一群人到 大衛 个山寨去跈佢。</verse>
				<verse number="9">大衛 出去接佢等，對佢等講：「若係你等真心來幫助𠊎，𠊎歡迎你等加入；若係你等想愛將𠊎這無罪个人出賣給𠊎个敵人，𠊎等祖先个上帝會查看，佢會責罰你等。」</verse>
				<verse number="10">該時，上帝个靈感動佢等當中个 亞瑪撒 (佢係「三十勇士」个領袖)，佢大聲喊講： 「 大衛 啊，𠊎等係你个人！ 耶西 个孻仔啊，𠊎等企在你這片！ 願你㧯你个朋友全部平安！ 因為你个上帝會幫助你。」 大衛 就接納佢等，派佢等在軍隊做軍官。</verse>
				<verse number="11">大衛 㧯 非利士 人去攻擊 掃羅 王个時，有兜 瑪拿西 支族个戰士來歸順 大衛 。事實上， 大衛 該時並無幫助 非利士 人；因為 非利士 該兜領袖驚 大衛 會出賣佢等，擐佢等个頭那做貢物去㧯厥老主人 掃羅 講和，就毋俾佢共下去。</verse>
				<verse number="12">大衛 轉 洗革拉 路上个時，來歸順佢个 瑪拿西 戰士有： 押拿 、 約撒拔 、 耶疊 、 米迦勒 、 約撒拔 、 以利戶 、 洗勒太 。這兜人原旦在 瑪拿西 係有歸千個手下个軍官。</verse>
				<verse number="13">佢等在 大衛 个軍隊中做軍官 ，因為佢等全部係勇士。後來佢等在 以色列 軍隊也做軍官。</verse>
				<verse number="14">差毋多逐日有人來歸順 大衛 ，所以 大衛 个軍隊當遽就成做強大个軍隊，像上帝个軍隊一樣。</verse>
				<verse number="15">大衛在希伯崙个時，盡多受過訓練个戰士來加入佢个軍隊，愛𢯭手將掃羅个王位轉給大衛，就像上主所應許个。這兜軍隊个數目有： 猶大支族：六千八百個戰士，全部有帶盾牌㧯槍； 西緬支族：七千一百個勇敢个戰士； 利未支族：四千六百人； 亞倫後代耶何耶大个戰士有三千七百人； 後生勇敢个戰士撒督个親族當中有二十二個領袖； 便雅憫支族 (掃羅該支族) 有三千人 (大部份个便雅憫支族人還係對掃羅忠心)； 以法蓮支族：有兩萬零八百個出名个勇敢戰士； 西瑪拿西支族：有一萬八千人，受選來扶大衛做王； 以薩迦支族：有兩百個領袖連同佢等个部下 (這兜領袖有智慧、識時局，知以色列人應當做麼介事)； 西布倫支族：有五萬忠心可靠、會用逐種武器个戰士，隨時做得相㓾； 拿弗他利支族：有一千個軍官㧯三萬七千個拿盾牌㧯槍个戰士； 但支族：有兩萬八千六百個受過訓練个人； 亞設支族：有四萬人，隨時做得相㓾； 約旦河東片个呂便、迦得，㧯東瑪拿西支族：有十二萬個受過訓練、做得用逐種武器个人。</verse>
				<verse number="16">以上這兜戰士全部係隨時做得相㓾个。佢等到 希伯崙 去，決心設立 大衛 做全 以色列 个王。其他个 以色列 人也全部聯合起來，愛設立 大衛 做王。</verse>
				<verse number="17">佢等在該位三日，㧯 大衛 共下享受筵席；這兜食物係同胞為佢等預備个。</verse>
				<verse number="18">人民對遠在北方个 以薩迦 、 西布倫 、 拿弗他利 支族前來，用驢仔、駱駝、騾仔、㧯牛仔載等麵粉、無花果、葡萄乾、酒、㧯橄欖油這兜食物。佢等也帶來當多牛羊，準備㓾來食，因為 以色列 全國充滿歡喜快樂。</verse>
			</chapter>
			<chapter number="13">
				<verse number="1">大衛 㧯所有帶領千人軍隊㧯百人軍隊該兜軍官參詳，</verse>
				<verse number="2">然後向全 以色列 人民宣告講：「若係你等同意，又這係出於上主 — 𠊎等上帝个旨意，𠊎等就來派人去全 以色列 ，㧯其他同胞還有住在逐城个祭司㧯 利未 人講，請佢等全部集合到𠊎等這位來。</verse>
				<verse number="3">然後，𠊎等將上帝个約櫃請轉來，因為 掃羅 做王个時𠊎等全無在約櫃面前求問上帝。」</verse>
				<verse number="4">人民感覺這建議當好，全部同意恁樣做。</verse>
				<verse number="5">所以， 大衛 召集全國个 以色列 人，對南片个 埃及 邊界直到北片个 哈馬 隘口逐地區个人全部來，為到愛對 基列‧耶琳 將上帝个約櫃徙到 耶路撒冷 。</verse>
				<verse number="6">大衛 㧯 以色列 人民到 猶大 境內个 巴拉 城 (就係 基列‧耶琳 ) 愛對該位請上帝个約櫃過來；這約櫃个名係照該坐在基路伯頂个上主个名安个。</verse>
				<verse number="7">佢等將上帝个約櫃放在一輛新車頂，對 亞比拿達 个屋下運出來， 烏撒 㧯 亞希約 負責駛車。</verse>
				<verse number="8">大衛 㧯所有 以色列 人攏總放勢 跳舞，頌讚上帝。佢等唱歌，並彈奏各種樂器，有豎琴、七弦琴、鈴鼓、鑇仔㧯喇叭。</verse>
				<verse number="9">佢等來到 基頓 个打麥場，該時拉車仔个牛逕倒，險險跪落去， 烏撒 就伸手扶等約櫃。</verse>
				<verse number="10">上主就向佢發譴，擊打佢，因為佢摸到約櫃。 烏撒 就死在上帝个面前；</verse>
				<verse number="11">所以該地方就喊做 比列斯‧烏撒 ，直到今晡日。因為上主向 烏撒 發譴，處罰佢， 大衛 心肚當無歡喜。</verse>
				<verse number="12">該日， 大衛 嚇倒，盡驚上帝，就講：「𠊎這下樣敢將上帝个約櫃請過來呢？」</verse>
				<verse number="13">所以， 大衛 無將約櫃運入 大衛 个城，反轉對別條路將約櫃運到 迦特 人 俄別‧以東 个屋下。</verse>
				<verse number="14">上帝个約櫃在該位停留三個月；上主賜福給 俄別‧以東 个全家，㧯所有屬佢个一切。</verse>
			</chapter>
			<chapter number="14">
				<verse number="1">泰爾 王 希蘭 派使者到 大衛 該位去，帶等香柏樹、打石師傅㧯木匠，愛代佢起王宮。</verse>
				<verse number="2">大衛 就知上主設立佢做 以色列 王个事已經完成了，也知上主係因為自家个子民使佢个王國興旺。</verse>
				<verse number="3">大衛 在 耶路撒冷 又討盡多細姐，𫱔盡多子女；</verse>
				<verse number="4">在 耶路撒冷 𫱔个有： 沙母亞 、 朔罷 、 拿單 、 所羅門 、</verse>
				<verse number="5">益轄 、 以利書亞 、 以法列 、</verse>
				<verse number="6">挪迦 、 尼斐 、 雅非亞 、</verse>
				<verse number="7">以利沙瑪 、 比利雅大 、 以利法列 。</verse>
				<verse number="8">非利士 人聽到 大衛 已經被人膏油立做全 以色列 个王，就派大軍隊來尋 大衛 。 大衛 一聽講，就帶兵去出戰。</verse>
				<verse number="9">非利士 人來到 利乏音 山壢，攻入該地方。</verse>
				<verse number="10">大衛 求問上帝：「𠊎應該去攻打 非利士 人麼？你會使𠊎打贏麼？」 上主應講：「去！𠊎會將佢等交在你手中。」</verse>
				<verse number="11">所以， 大衛 上 巴力‧比拉心 去，在該位打贏 非利士 人。 大衛 講：「上帝用𠊎衝散𠊎个仇敵，像大水沖壞石壆。」所以該地方喊做 巴力‧比拉心 。</verse>
				<verse number="12">非利士 人逃命个時將佢等个神像㧒在該位， 大衛 命令人將該兜神像燒掉。</verse>
				<verse number="13">無幾久， 非利士 人又倒轉來攻入 利乏音 山壢。</verse>
				<verse number="14">大衛 又求問上帝；上帝講：「毋好對這位攻打佢等，愛𫟧到佢等後背，對桑仔樹樹林該片來攻打。</verse>
				<verse number="15">你一聽到桑仔樹尾頂有腳步聲，就遽遽進攻，因為𠊎 — 上帝已經行到你頭前去攻打 非利士 人个軍隊。」</verse>
				<verse number="16">大衛 就照上帝个命令去做。結果，佢將 非利士 人打退，對 基遍 逐到 基色 。</verse>
				<verse number="17">所以 大衛 个名聲傳到遠遠；上主使逐國全部驚佢。</verse>
			</chapter>
			<chapter number="15">
				<verse number="1">大衛 在 大衛 城為自家起王宮，也為上帝个約櫃預備所在，搭一座帳篷。</verse>
				<verse number="2">該時 大衛 講：「只有 利未 人做得扛上帝个約櫃，因為佢等係上主選出來个人，愛扛上主个約櫃、永遠事奉佢。」</verse>
				<verse number="3">所以 大衛 召集全部 以色列 人到 耶路撒冷 ，愛將上主个約櫃運到 大衛 預備个所在。</verse>
				<verse number="4">大衛 又召集 亞倫 个後代㧯 利未 人：</verse>
				<verse number="5">哥轄 宗族个 烏列 帶領一百二十人；</verse>
				<verse number="6">米拉利 宗族个 亞帥雅 帶領兩百二十人；</verse>
				<verse number="7">革順 宗族个 約珥 帶領一百三十人；</verse>
				<verse number="8">以利撒反 宗族个 示瑪雅 帶領兩百人；</verse>
				<verse number="9">希伯崙 宗族个 以列 帶領八十人；</verse>
				<verse number="10">烏薛 宗族个 亞米拿達 帶領一百一十二人。</verse>
				<verse number="11">大衛 召見祭司 撒督 㧯 亞比亞他 ，還有六個 利未 人 — 烏列 、 亞帥雅 、 約珥 、 示瑪雅 、 以列 、 亞米拿達 ，</verse>
				<verse number="12">對佢等講：「你等係 利未 逐宗族个領袖；愛潔淨你等自家㧯共族个 利未 人，好將上主 — 以色列 上帝个約櫃扛到𠊎所預備个所在去。</verse>
				<verse number="13">因為上擺你等無㧯𠊎等共下去扛約櫃，上主 — 𠊎等个上帝責罰𠊎等，因為𠊎等無問佢照規定愛樣般安排。」</verse>
				<verse number="14">所以，該兜祭司㧯 利未 人潔淨自家，為到愛請上主 — 以色列 上帝个約櫃。</verse>
				<verse number="15">利未 人照上主通過 摩西 所命令个，用槓仔將上帝个約櫃扛在肩頭頂。</verse>
				<verse number="16">大衛 命令該兜 利未 人个領袖派 利未 人唱歌，用豎琴㧯鑇仔彈奏快樂个音樂。</verse>
				<verse number="17">佢等對當會唱歌个宗族選出以下个人來打銅鑇仔： 約珥 个孻仔 希幔 、佢个親戚 比利家 个孻仔 亞薩 ，㧯 米拉利 族 古沙雅 个孻仔 以探 。佢等又選出以下个 利未 人來彈高音个豎琴，配合銅鑇仔；這兜人係 撒迦利雅 、 雅薛 、 示米拉末 、 耶歇 、 烏尼 、 以利押 、 比拿雅 、 瑪西雅 。 佢等也選出彈低音豎琴个 利未 人；這兜人係 瑪他提雅 、 以利斐利戶 、 彌克尼雅 、 亞撒西雅 ，並聖殿守衛 — 俄別‧以東 㧯 耶利 。</verse>
				<verse number="18"></verse>
				<verse number="19"></verse>
				<verse number="20"></verse>
				<verse number="21"></verse>
				<verse number="22">基拿尼雅 對音樂當精通，所以受選出來帶領 利未 人唱歌。</verse>
				<verse number="23">比利家 、 以利加拿 ，還有 俄別‧以東 㧯 耶希亞 受派看守約櫃。 示巴尼 、 約沙法 、 拿坦業 、 亞瑪賽 、 撒迦利雅 、 比拿亞 、㧯 以利以謝 這兜祭司受派在上帝个約櫃前歕喇叭。</verse>
				<verse number="24"></verse>
				<verse number="25">大衛 㧯 以色列 該兜長老，還有軍隊該兜軍官全部去，對 俄別‧以東 个屋下歡歡喜喜迎上主个約櫃。</verse>
				<verse number="26">因為上帝幫助扛約櫃个 利未 人，佢等就獻七隻牛牯㧯七隻綿羊牯來做牲祭。</verse>
				<verse number="27">大衛 㧯扛約櫃个 利未 人，還有聖歌隊㧯佢等个隊長 基拿尼雅 ，全部著等幼麻紗个外袍。 大衛 另外還著一領麻紗以弗得。</verse>
				<verse number="28">所以，所有个 以色列 人民跈上主个約櫃共下到 耶路撒冷 。佢等歸路大聲喊，歕羊角，還有歕喇叭、打鑇仔，並彈豎琴㧯七弦琴个音樂。</verse>
				<verse number="29">上主个約櫃入 大衛 城个時， 掃羅 个妹仔 米甲 對窗門看出來，看到 大衛 王放勢跳舞，就看輕佢。</verse>
			</chapter>
			<chapter number="16">
				<verse number="1">佢等將上帝个約櫃扛下來，放在 大衛 預備好个帳篷肚，然後向上帝獻燒化祭㧯平安祭。</verse>
				<verse number="2">大衛 獻祭以後，就奉上主个名祝福人民，</verse>
				<verse number="3">又將食物分給佢等。 以色列 人，無論男女，逐儕得到一垤餅，一垤肉 㧯一垤葡萄餅。</verse>
				<verse number="4">大衛 指派幾個 利未 人在上主个約櫃頭前事奉，頌讚敬拜上主 — 以色列 个上帝。</verse>
				<verse number="5">亞薩 係隊長， 撒迦利雅 係副隊長。 雅薛 、 示米拉末 、 耶歇 、 瑪他提雅 、 以利押 、 比拿雅 、 俄別‧以東 、㧯 耶利 彈豎琴。 亞薩 打鑇仔。</verse>
				<verse number="6">兩個祭司 — 比拿雅 㧯 雅哈悉 照時在上帝个約櫃頭前歕喇叭。</verse>
				<verse number="7">該日， 大衛 第一擺指派 亞薩 㧯佢个 利未 同胞負責唱歌來讚美上主。</verse>
				<verse number="8">你等愛感謝上主，求喊佢个名； 愛向萬國傳揚佢个作為！</verse>
				<verse number="9">你等愛唱歌來頌讚佢！ 愛講說佢奇妙个作為！</verse>
				<verse number="10">你等愛因為佢个聖名快樂！ 願一切尋求上主个人歡喜！</verse>
				<verse number="11">愛求上主幫助； 愛時常敬拜佢。</verse>
				<verse number="12">上帝个僕人 以色列 个後代啊， 雅各 个子孫，佢所揀選个子民啊， 你等愛記得佢所做奇妙个作為， 佢所行个神蹟㧯所講起个審判。</verse>
				<verse number="13"></verse>
				<verse number="14">佢係上主 — 𠊎等个上帝； 佢个審判傳遍全世界。</verse>
				<verse number="15">你等愛永遠紀念佢个約， 佢所講个應許直到千代。</verse>
				<verse number="16">佢記得同 亞伯拉罕 所立个約， 還有佢發誓賜給 以撒 个應許。</verse>
				<verse number="17">上主同 雅各 堅定這約做條例， 就係佢給 以色列 永久个契約。</verse>
				<verse number="18">佢講：「𠊎愛將 迦南 地賜給你， 全部愛做你等个產業。」</verse>
				<verse number="19">該時，你等人丁有限，數目盡少， 在 迦南 地暫時住。</verse>
				<verse number="20">佢等對這族漂流到該族， 對這國流浪到該國。</verse>
				<verse number="21">總係上帝不准外人欺負佢等； 為到佢等，佢警告外族該兜王。</verse>
				<verse number="22">佢講：「做毋得為難𠊎所揀選个； 你等做毋得傷害𠊎个先知！」</verse>
				<verse number="23">全世界都愛來歌頌上主！ 愛逐日傳揚佢拯救个福音！</verse>
				<verse number="24">愛對萬國宣傳佢个榮光！ 愛對萬民講起佢偉大个作為！</verse>
				<verse number="25">上主係最偉大个，應當受最大个讚美； 佢應當比所有个神明得到較多个敬畏。</verse>
				<verse number="26">列國所有个神明不過係偶像； 總係創造諸天个就係上主。</verse>
				<verse number="27">榮光、威嚴在佢个面前； 大能、喜樂充滿佢个聖所。</verse>
				<verse number="28">地上个萬族啊，應當頌讚上主！ 你等愛頌讚佢个榮光㧯大能！</verse>
				<verse number="29">愛頌讚上主榮光个名； 愛帶祭物來到佢面前。 愛用聖潔个打扮來跪拜上主 ；</verse>
				<verse number="30">全地愛在佢个面前愊愊掣！ 大地堅固，毋會搖動。</verse>
				<verse number="31">諸天愛歡喜，大地愛快樂！ 愛向萬國宣佈：「上主掌權！」</verse>
				<verse number="32">海㧯其中个生物啊，愛大聲歡呼！ 田園㧯其中个出產啊，愛歡喜起來！</verse>
				<verse number="33">該時，樹林中个樹木愛在上主面前歡喜唱歌， 因為佢愛來治理天下。</verse>
				<verse number="34">愛感謝上主，因為佢係至善； 佢个慈愛永遠長存！</verse>
				<verse number="35">愛向佢講：「上帝𠊎等个救主啊， 求你拯救𠊎等！ 求你將𠊎等對列國聚集起來， 使𠊎等有好頌讚你个聖名， 用感謝你來做𠊎等个榮光。」</verse>
				<verse number="36">願上主 — 以色列 个上帝受稱頌， 對永遠到永遠！ 接等人民同聲應講：「阿愐！」佢等全部頌讚上主。</verse>
				<verse number="37">大衛 王派 亞薩 㧯佢个同胞 利未 人在約櫃頭前事奉上主。佢等愛日日在該位服事。</verse>
				<verse number="38">耶杜頓 个孻仔 俄別‧以東 㧯佢本族有六十八人被人派去協助佢等。 何薩 㧯 俄別‧以東 係掌門个隊長。</verse>
				<verse number="39">總係，祭司 撒督 㧯其他个祭司在 基遍 个山頭、上主个聖帳篷頭前事奉佢。</verse>
				<verse number="40">逐日早暗，佢等愛照上主給 以色列 人个法律書上所寫个，在祭壇頂獻燒化祭。</verse>
				<verse number="41">㧯佢等共下个有 希幔 、 耶杜頓 㧯有兜其他个人；佢等特別受選出來，向上主歌唱，頌讚佢个慈愛永遠長存。</verse>
				<verse number="42">希幔 㧯 耶杜頓 也負責喇叭、鑇仔㧯其他樂器；這兜全部係讚美上帝个樂器。 耶杜頓 个子孫負責掌門。</verse>
				<verse number="43">後來所有个人民全部轉屋下去； 大衛 也轉去為全家祝福。</verse>
			</chapter>
			<chapter number="17">
				<verse number="1">大衛 王住在王宮。有一日，佢對先知 拿單 講：「你看，𠊎住在香柏樹起个王宮，總係上主个約櫃還在帳篷肚！」</verse>
				<verse number="2">拿單 對 大衛 講：「你就照你个心意去做，因為上帝㧯你共下。」</verse>
				<verse number="3">總係，該暗晡上帝對 拿單 講：</verse>
				<verse number="4">「去㧯𠊎个僕人 大衛 講，上主恁樣講：『你做毋得起聖殿給𠊎住。</verse>
				<verse number="5">自從𠊎對 埃及 帶 以色列 人出來到這下，𠊎無住過聖殿；𠊎一直住在帳篷，逐所在徙來徙去。</verse>
				<verse number="6">𠊎㧯 以色列 人共下流浪該兜年日，該兜𠊎選來看顧𠊎子民所有个領袖，𠊎從來毋識問過麼人，做麼介毋為𠊎起一座香柏樹个聖殿。』</verse>
				<verse number="7">「所以，你愛㧯𠊎个僕人 大衛 講，𠊎 — 上主、萬軍个元帥恁樣講：『你在野地掌羊，𠊎將你呼召出來，立你做𠊎子民 以色列 个王。</verse>
				<verse number="8">你無論到麼介地方，𠊎攏總㧯你共下；𠊎除掉你所有个仇敵。𠊎愛使你㧯世界最偉大个人共樣恁有名。</verse>
				<verse number="9">𠊎為𠊎个子民 以色列 選一個地方，將佢等安頓在該位，使佢等毋會再被人欺負。自從佢等徙到這垤土地，𠊎又設立士師來治理佢等，佢等卻常常被惡霸欺壓；總係這種事毋會再發生了。𠊎答應打贏你所有个仇敵。𠊎 — 上主也對你宣告，𠊎愛賜給你有後代。</verse>
				<verse number="10"></verse>
				<verse number="11">你死後㧯祖先葬共下个時，𠊎會立你一個孻仔做王，使佢个國強盛。</verse>
				<verse number="12">佢正係為𠊎起聖殿个人；𠊎愛堅固佢个王位直到永遠。</verse>
				<verse number="13">𠊎愛做佢个阿爸；佢愛做𠊎个孻仔。𠊎毋會收轉𠊎對佢个痛惜，像𠊎以前收轉對 掃羅 个痛惜恁樣；𠊎識廢掉佢，立你做王。</verse>
				<verse number="14">𠊎愛使佢永遠治理𠊎个子民㧯𠊎个國；佢个王位會永遠存在。』」</verse>
				<verse number="15">拿單 將上帝向佢啟示个逐件事全部㧯 大衛 講。</verse>
				<verse number="16">大衛 王入去聖帳篷，到上主面前，坐等祈禱講：「主上帝啊，你為𠊎所做个一切，𠊎實在堪毋得，𠊎个家族也堪毋得。</verse>
				<verse number="17">總係，上帝啊，你賜給𠊎恁多，甚至應許在將來个日仔愛恩待你僕人个子孫。主上帝啊，你已經看𠊎做大人物來款待。</verse>
				<verse number="18">𠊎還有麼介話好講呢？因為你知你个僕人，還係賜給𠊎榮耀㧯尊貴。</verse>
				<verse number="19">上主啊，你恁樣款待𠊎，又將僕人將來个興旺向𠊎顯明，這全部係照你个心意。</verse>
				<verse number="20">上主啊，㖠有㧯你比抑得个！𠊎等知，除了你以外，無別個上帝。</verse>
				<verse number="21">世間乜無一個國家像 以色列 ；你救 以色列 人民離開 埃及 ，使佢等做你自家个子民。你為佢等做偉大奇妙个事，使你个大名傳到全世界。你个子民向前行个時，你將其他个民族逐走。</verse>
				<verse number="22">你使 以色列 永遠做你自家个子民，你 — 上主也做佢等个上帝。</verse>
				<verse number="23">「上主啊，求你實現你有關𠊎㧯𠊎後代个應許；求你永遠照你所講个話實行。</verse>
				<verse number="24">願你个應許永遠無變。願你个名永遠受尊敬；願人民永遠稱頌：『上主 — 萬軍个元帥係 以色列 个上帝，係治理 以色列 个上帝！』恁樣，你會 世世代代保守你僕人 大衛 个王朝。</verse>
				<verse number="25">上帝啊，𠊎大膽在你面前恁樣祈禱；因為你將這一切向𠊎 — 你个僕人啟示出來，㧯𠊎講，你愛立𠊎个後代做王。</verse>
				<verse number="26">上主啊，只有你係上帝；你對你个僕人也有恁奇妙个應許。</verse>
				<verse number="27">這下求你賜福給僕人个後代，使佢等繼續享受你个恩惠。上主啊，你已經賜福給佢等；願你永遠恩待佢等 。」</verse>
			</chapter>
			<chapter number="18">
				<verse number="1">後來， 大衛 又攻擊 非利士 人，打贏佢等，佔領 迦特 城㧯附近个村莊。</verse>
				<verse number="2">大衛 也打贏 摩押 人，使 摩押 人歸順佢，向佢進貢。</verse>
				<verse number="3">接等， 大衛 在 哈馬 附近攻打 敘利亞 个 瑣巴 王 哈大底謝 ，因為 哈大底謝 想愛堅固 幼發拉底 河上游地區个統治權。</verse>
				<verse number="4">大衛 搶走佢个戰車一千輛，捉到騎兵七千人、步兵兩萬人。對捉來个馬當中， 大衛 留下愛拖一百輛戰車罅額个戰馬，將其他戰馬个腳筋全部剁斷。</verse>
				<verse number="5">大馬士革 个 敘利亞 人派軍隊去幫助 瑣巴 王 哈大底謝 个時， 大衛 攻打佢等，㓾掉兩萬兩千人。</verse>
				<verse number="6">然後， 大衛 派軍隊駐在 大馬士革 、 敘利亞 人个國內；佢等全部歸順 大衛 ，向佢進貢。 大衛 無論去到㖠位，上主使佢逐擺打贏。</verse>
				<verse number="7">大衛 搶到 哈大底謝 該兜軍官所拿个金盾牌，帶轉 耶路撒冷 去，</verse>
				<verse number="8">又對 哈大底謝 統治个兩隻城市 提巴 㧯 均 搶到盡多个銅。 (後來 所羅門 用這兜銅鑄造聖殿个銅海、銅柱㧯銅器。)</verse>
				<verse number="9">哈馬 王 陀以 聽講 大衛 打贏 瑣巴 王 哈大底謝 个全軍，</verse>
				<verse number="10">就派佢个孻仔 哈多蘭 去向 大衛 王請安，祝賀佢得到勝利 (原來 陀以 㧯 哈大底謝 時常相㓾。) 哈多蘭 帶來金、銀、銅製造个禮物送給 大衛 。</verse>
				<verse number="11">大衛 王將這兜禮物連同佢對其他國家搶來个金銀，就係對佢所征服个 以東 、 摩押 、 亞捫 、 非利士 、㧯 亞瑪力 搶來个，攏總分別為聖獻給上主。</verse>
				<verse number="12">亞比篩 (厥姆係 洗璐雅 ) 在 鹽谷 㓾掉一萬八千 以東 人。</verse>
				<verse number="13">佢派軍隊駐在 以東 个逐地方；該地方个人民全部歸順 大衛 。 大衛 無論去到㖠位，上主使佢逐擺打贏。</verse>
				<verse number="14">大衛 統治全 以色列 ，向人民實行公義。</verse>
				<verse number="15">洗璐雅 个孻仔 約押 做元帥； 亞希律 个孻仔 約沙法 做歷史官；</verse>
				<verse number="16">亞希突 个孻仔 撒督 㧯 亞比亞他 个孻仔 亞希米勒 做祭司； 西萊雅 做王室書記；</verse>
				<verse number="17">耶何耶大 个孻仔 比拿雅 做 大衛 个侍衛長、統管 基利提 人㧯 比利提 人； 大衛 該兜孻仔在王身邊个官員當中做領袖。</verse>
			</chapter>
			<chapter number="19">
				<verse number="1">過一駁仔， 亞捫 人个王 拿轄 死掉；佢个孻仔 哈嫩 承接佢个王位。</verse>
				<verse number="2">大衛 講：「𠊎愛對 哈嫩 表示友好，像厥爸 拿轄 對𠊎友好一樣。」所以 大衛 就派使者去安慰佢。 佢等到 亞捫 境內弔慰 哈嫩 王个時，</verse>
				<verse number="3">亞捫 人个領袖對 哈嫩 講：「你恅到 大衛 派這兜人來係為到尊敬若爸、向你表示安慰嗎？當然毋係！佢派佢等來係愛打探𠊎等个情況，好征服這國家。」</verse>
				<verse number="4">哈嫩 就將 大衛 派去个使者捉起來，將佢等个鬍鬚剃掉，將佢等个長衫下半截到屎窟割斷，然後逐佢等離開。</verse>
				<verse number="5">這兜人感覺當見笑，毋敢轉去。 大衛 聽到這事，就喊人通知佢等留在 耶利哥 ，等鬍鬚生長正轉來。</verse>
				<verse number="6">亞捫 人知佢等已經㧯 大衛 結冤仇， 哈嫩 㧯 亞捫 人就用三萬四千公斤銀仔向上 美索不達米亞 㧯 敘利亞 人个 瑪迦 、 瑣巴 請來戰車㧯騎兵。</verse>
				<verse number="7">佢等請來三萬兩千戰車㧯 瑪迦 王个軍隊；這兜軍隊安營在 米底巴 附近。所有个 亞捫 人也對佢等个城肚出來，準備相㓾。</verse>
				<verse number="8">大衛 得到消息，就命令 約押 帶領全軍出去相㓾。</verse>
				<verse number="9">亞捫 人出兵，聚集在佢等个京城 拉巴 城个門口，其他盟國該兜王就在城外擺陣。</verse>
				<verse number="10">約押 看出敵軍會對前後兩頭來攻擊，就選出 以色列 最精良个部隊，喊佢等擺陣進攻 敘利亞 軍隊，</verse>
				<verse number="11">將其他个部隊交給厥老弟 亞比篩 帶領。 亞比篩 指揮這兜部隊擺陣進攻 亞捫 人。</verse>
				<verse number="12">約押 對 亞比篩 講：「若係你看到 敘利亞 人打贏𠊎，你就過來救𠊎；若係 亞捫 人打贏你，𠊎就過去救你。</verse>
				<verse number="13">愛勇敢堅強！為𠊎等个同胞㧯上帝个城鎮打拚戰鬥！願上主成全佢个旨意！」</verse>
				<verse number="14">約押 㧯佢个部隊向前攻打； 敘利亞 人打輸，趕緊逃走。</verse>
				<verse number="15">亞捫 人看到 敘利亞 人逃走，佢等也對 約押 个老弟 亞比篩 面前逃走，退轉城肚去。 約押 就轉去 耶路撒冷 。</verse>
				<verse number="16">敘利亞 人看到自家被 以色列 人打輸了，就派人將 幼發拉底 河東片个 敘利亞 軍隊調過來，交給 瑣巴 王 哈大底謝 个元帥 朔法 帶領。</verse>
				<verse number="17">大衛 聽到這消息就召集 以色列 軍隊，過 約旦 河，面對 敘利亞 軍隊準備相㓾。戰爭一開始，</verse>
				<verse number="18">以色列 人就打贏 敘利亞 軍隊。 大衛 㧯佢个軍隊㓾掉七千輛戰車个人㧯四萬步兵，又㓾掉 敘利亞 軍隊个元帥 朔法 。</verse>
				<verse number="19">哈大底謝 屬下該兜王看到自家被 以色列 人打輸，就㧯 大衛 講和，歸順佢。以後 敘利亞 人毋敢再㧯 亞捫 人𢯭手。</verse>
			</chapter>
			<chapter number="20">
				<verse number="1">第二年春天，就係所有个王出去相㓾个時， 約押 帶領軍隊佔領 亞捫 人个土地；總係 大衛 王還留在 耶路撒冷 。 約押 將 拉巴 城打下來。</verse>
				<verse number="2">亞捫 人个神像 米勒公 有一頂金冕旒，大約重三十五公斤，有鑲寶石。 大衛 將寶石剝下來，鑲在自家个王冠頂 。佢也對城肚搶到盡多戰利品，</verse>
				<verse number="3">將該城个人民拉出來，強迫佢等用鋸仔、鐵耙、斧頭做工。 大衛 也共樣對待其他 亞捫 城市个人民。然後 大衛 㧯佢个大軍就轉 耶路撒冷 去。</verse>
				<verse number="4">後來， 以色列 人在 基色 又㧯 非利士 人相㓾。該時， 戶沙 人 西比該 㓾死一個巨人安到 細派 ， 非利士 人就打輸了。</verse>
				<verse number="5">以色列 人又㧯 非利士 人相㓾。 睚珥 个孻仔 伊勒哈難 㓾掉 迦特 人 歌利亞 个兄弟 拉哈米 ；這人个槍柄像織布機个車心恁粗。</verse>
				<verse number="6">後來在 迦特 又有戰爭。該地方有一個巨人；佢个手指㧯腳趾攏總係六支，總共有二十四支。佢係古時巨人个後代。</verse>
				<verse number="7">佢向 以色列 人罵陣； 大衛 个阿哥 示米亞 个孻仔 約拿單 將佢㓾掉。</verse>
				<verse number="8">以上三個人全部係 迦特 巨人个後代；佢等全部死在 大衛 㧯厥部下个手中。</verse>
			</chapter>
			<chapter number="21">
				<verse number="1">撒但想愛害 以色列 人，刺激 大衛 來辦理戶口調查。</verse>
				<verse number="2">大衛 就命令軍隊个元帥 約押 㧯其他官員講：「你等愛到 以色列 逐所在，對最南片个 別是巴 到最北片个 但 ，點算人民；轉來㧯𠊎報告，𠊎愛知人民个數目。」</verse>
				<verse number="3">總係 約押 應講：「願上主使 以色列 个人民比這下个人數多一百倍！吾主吾王，佢等全部敢毋係你个僕人？你做麼介強強愛做這事？做麼介愛害全民犯罪呢？」</verse>
				<verse number="4">總係王堅持愛 約押 服從佢个命令。所以 約押 出去，全 以色列 國行到透透，然後轉到 耶路撒冷 。</verse>
				<verse number="5">約押 向 大衛 報告： 以色列 帶武器个壯丁有一百一十萬人； 猶大 帶武器个壯丁有四十七萬人。</verse>
				<verse number="6">約押 無調查 利未 支族㧯 便雅憫 支族个人數，因為佢當惱王這個命令。</verse>
				<verse number="7">上帝也無歡喜這點算人民个事，所以佢責罰 以色列 。</verse>
				<verse number="8">大衛 對上帝講：「𠊎做這事犯大罪了！求你赦免僕人个過失！𠊎个行為實在當戇。」</verse>
				<verse number="9">上主對 大衛 个先見 迦得 講：</verse>
				<verse number="10">「去㧯 大衛 講，𠊎用三個災難給佢選一個，佢選麼介，𠊎就做麼介。」</verse>
				<verse number="11">迦得 去見 大衛 ，將上主講个話㧯佢講，又問 大衛 ：「你愛選㖠樣？</verse>
				<verse number="12">三年个飢荒呢？抑係三個月被敵軍逐？抑係俾上主用佢个劍施行攻擊，使你个國家發三日个瘟仔，上主派天使在 以色列 逐所在造成死亡呢？想看仔，愛𠊎樣般回答上主。」</verse>
				<verse number="13">大衛 對 迦得 講：「𠊎當為難！𠊎無愛被人處罰。𠊎甘願俾上主自家責罰𠊎，因為上主有豐盛个憐憫。」</verse>
				<verse number="14">所以，上主降瘟仔在 以色列 人身上，就有七萬人死掉。</verse>
				<verse number="15">上帝又派天使去毀滅 耶路撒冷 ，總係天使愛執行个時，上主改變佢責罰人民个心意，就對該執行毀滅个天使講：「手停下來，罅了！」該時，上主个天使在 耶布斯 人 亞勞拿 个打麥場。</verse>
				<verse number="16">大衛 看到上主个天使企在半空中，手項擎等劍，愛毀滅 耶路撒冷 。 大衛 㧯該兜長老全部著麻衫，伏在地上跪拜。</verse>
				<verse number="17">大衛 祈禱講：「上帝啊，𠊎正係該犯罪、做毋著事个人，係𠊎下令調查戶口个。這兜人民像羊仔，佢等乜無做麼介。上主 — 𠊎个上帝啊，求你責罰𠊎㧯𠊎屋下人，毋好降瘟仔給你个子民。」</verse>
				<verse number="18">所以，上主个天使㧯 迦得 講，喊佢命令 大衛 到 耶布斯 人 亞勞拿 个打麥場去，為上主起一座祭壇。</verse>
				<verse number="19">大衛 照 迦得 奉上主命令所講个話上去。</verse>
				<verse number="20">亞勞拿 㧯佢四個孻仔堵好在打麥場打麥；佢等一看到天使，該四個孻仔全部走去囥起來。</verse>
				<verse number="21">亞勞拿 看到 大衛 向佢這片行過來，就離開打麥場，行前伏在地上跪拜。</verse>
				<verse number="22">大衛 對 亞勞拿 講：「請你將打麥場賣給𠊎，𠊎好為上主起一座祭壇，俾發瘟停下來，𠊎會照價錢付給你。」</verse>
				<verse number="23">亞勞拿 講：「吾主吾王，做你拿去！你合意麼介就做麼介。這位有牛好做燒化祭，又有打麥个枋仔好做柴燒，還有麥仔好做素祭。𠊎將這兜全部送給你。」</verse>
				<verse number="24">總係 大衛 王對 亞勞拿 講：「做毋得！𠊎一定愛照罅額个價錢㧯你買；𠊎無愛向上主獻你个東西，無愛獻白白得來个做燒化祭。」</verse>
				<verse number="25">所以 大衛 用六百隻金幣向 亞勞拿 買打麥場。</verse>
				<verse number="26">大衛 在該位為上主起一座祭壇，獻燒化祭㧯平安祭。 大衛 祈禱上主；上主就聽佢个祈求，對天頂降火下來，將祭壇頂个頭牲燒掉。</verse>
				<verse number="27">上主吩咐天使，天使就將劍收起來。</verse>
				<verse number="28">大衛 看上主在 耶布斯 人 亞勞拿 打麥場聽佢个祈禱，所以就在該位獻祭。</verse>
				<verse number="29">摩西 在曠野所造上主个聖帳篷㧯獻燒化祭个祭壇該時還在 基遍 敬拜个所在。</verse>
				<verse number="30">總係 大衛 毋敢到該位去求問上帝，因為佢驚上主天使个劍。</verse>
			</chapter>
			<chapter number="22">
				<verse number="1">所以 大衛 講：「主上帝个聖殿會起在這位；這位係 以色列 人民獻燒化祭个所在。」</verse>
				<verse number="2">大衛 命令所有住在 以色列 个外國人聚集共下，派佢等當中个打石師傅預備石頭起上帝个聖殿。</verse>
				<verse number="3">大衛 供應盡多个鐵仔，用來做門扇个釘仔㧯鉤仔，又供應盡多个銅仔，多到無法度秤。</verse>
				<verse number="4">大衛 又供應算毋出个香柏樹，因為 泰爾 㧯 西頓 个人民運來盡多香柏樹給佢。</verse>
				<verse number="5">大衛 想：「𠊎个孻仔 所羅門 為上主起个聖殿一定愛非常靚，世界有名。總係佢還後生，又無經驗；𠊎一定愛將一切預備好勢。」所以 大衛 在吂死以前準備當多材料。</verse>
				<verse number="6">大衛 喊厥孻仔 所羅門 來，交帶佢為上主 — 以色列 个上帝起聖殿。</verse>
				<verse number="7">大衛 對佢講：「孻仔啊，𠊎本來心肝想為上主 — 𠊎上帝个名起聖殿，</verse>
				<verse number="8">總係上主對𠊎講，因為𠊎識㓾過盡多人，打當多戰爭，流盡多人个血，佢無愛𠊎為佢个名起聖殿。</verse>
				<verse number="9">總係佢給𠊎一隻應許。佢講：『你會有一個孻仔。佢統治个期間國泰民安；因為𠊎愛賜給佢平安个日仔，毋受敵人攪躁。佢个名愛喊做 所羅門 ；因為在佢做王个期間，𠊎愛賜給 以色列 人和平安全。</verse>
				<verse number="10">佢愛為𠊎个名起聖殿。佢愛做𠊎个孻仔；𠊎愛做佢个阿爸。𠊎愛堅固佢个王位，永遠統治 以色列 。』」</verse>
				<verse number="11">大衛 繼續講：「孻仔啊，願上主 — 你个上帝㧯你共下；照佢應許你个，使你順利來為佢起聖殿。</verse>
				<verse number="12">願上主 — 你个上帝賜給你聰明智慧，有辦法照佢个法律治理 以色列 。</verse>
				<verse number="13">若係你認真遵行上主通過 摩西 頒佈給 以色列 所有个法律誡命，你就會成功。你愛堅強勇敢；毋好驚，也毋好失志。</verse>
				<verse number="14">起聖殿个材料，𠊎已經盡力準備好金仔三千四百公噸，銀仔三萬四千公噸，另外還有盡多銅㧯鐵，多到無法度秤。𠊎也預備好木材㧯石頭，總係你還愛準備加兜。</verse>
				<verse number="15">你有盡多師傅，就係打石師傅、泥水師傅、㧯木匠師傅，還有各種工作个師傅，</verse>
				<verse number="16">會用金、銀、銅、鐵鑄造東西。這下就好開始，願上主㧯你共下。」</verse>
				<verse number="17">大衛 命令 以色列 所有个領袖幫助厥孻仔 所羅門 。</verse>
				<verse number="18">佢講：「上主 — 你等个上帝一直㧯你等共下，賜給你等四周圍平安。佢使𠊎征服以前住在這地方所有个民族。這兜民族這下全部歸順在上主㧯佢个子民面前。</verse>
				<verse number="19">這下你等愛全心全意事奉上主 — 你等个上帝；愛開始起主上帝个聖殿。聖殿起好以後，你等正有所在好將上主个約櫃㧯所有敬拜上帝个聖物放在底背。」</verse>
			</chapter>
			<chapter number="23">
				<verse number="1">大衛 年老个時，設立佢个孻仔 所羅門 做 以色列 个王。</verse>
				<verse number="2">大衛 王召集 以色列 所有个領袖、祭司、㧯 利未 人。</verse>
				<verse number="3">佢調查 利未 人三十歲以上个男人，總數有三萬八千儕。</verse>
				<verse number="4">王派兩萬四千儕管理上主聖殿个工作，六千儕保管記錄㧯決裁相爭个事，</verse>
				<verse number="5">四千儕做守衛个工作，四千儕擔任頌讚上主个事，彈奏王所供應个樂器。</verse>
				<verse number="6">大衛 照 利未 人所屬个宗族將佢等分做 革順 、 哥轄 ，㧯 米拉利 三組。</verse>
				<verse number="7">革順 有兩個孻仔 — 拉但 㧯 示每 。</verse>
				<verse number="8">拉但 有三個孻仔 — 耶歇 、 細坦 、 約珥 。</verse>
				<verse number="9">佢等全部係 拉但 後代逐宗族个族長。 ( 示每 有三個孻仔 — 示羅密 、 哈薛 、 哈蘭 。)</verse>
				<verse number="10">示每 有四個孻仔，照大細个順序係： 雅哈 、 細拿 、 耶烏斯 、 比利亞 。</verse>
				<verse number="11">耶烏斯 㧯 比利亞 个後代無盡多，所以合共下算一個宗族。</verse>
				<verse number="12">哥轄 有四個孻仔 — 暗蘭 、 以斯哈 、 希伯倫 、 烏薛 。</verse>
				<verse number="13">佢个長子 暗蘭 係 亞倫 㧯 摩西 个阿爸。 ( 亞倫 㧯佢个後代受選派永遠管理聖物，負責燒香敬拜上主，事奉佢，並奉佢个名祝福人民。</verse>
				<verse number="14">總係神人 摩西 該兜孻仔歸在 利未 支族。)</verse>
				<verse number="15">摩西 有兩個孻仔 — 革舜 㧯 以利以謝 。</verse>
				<verse number="16">革舜 个長子係 細布業 。</verse>
				<verse number="17">以利以謝 只有一個孻仔 利哈比雅 ；總係 利哈比雅 有盡多後代。</verse>
				<verse number="18">哥轄 第二個孻仔 以斯哈 有一個孻仔，安到 示羅密 ，係這宗族个族長。</verse>
				<verse number="19">哥轄 第三個孻仔 希伯倫 有四個孻仔，照大細个順序係： 耶利雅 、 亞瑪利亞 、 雅哈悉 、 耶加面 。</verse>
				<verse number="20">哥轄 第四個孻仔 烏薛 有兩個孻仔 — 米迦 㧯 耶西雅 。</verse>
				<verse number="21">米拉利 有兩個孻仔 — 抹利 㧯 母示 。 抹利 也有兩個孻仔 — 以利亞撒 㧯 基士 。</verse>
				<verse number="22">以利亞撒 死个時無孻仔，只有妹仔。厥幾個妹仔嫁給姖等个叔伯兄弟，就係 基士 該兜孻仔。</verse>
				<verse number="23">米拉利 第二個孻仔 母示 有三個孻仔 — 末力 、 以得 、 耶利摩 。</verse>
				<verse number="24">以上係 利未 个後代，係用宗族㧯家族做單位，逐儕全部照名仔來登記。所有二十歲以上个人，全部有份在上主聖殿个工作。</verse>
				<verse number="25">大衛 講：「上主 — 以色列 个上帝賜平安給佢个子民；佢自家愛永遠住在 耶路撒冷 。</verse>
				<verse number="26">所以， 利未 人毋使再扛上主个聖帳篷㧯其他禮拜用个東西。」</verse>
				<verse number="27">照 大衛 臨終个指示，所有滿二十歲个 利未 人全部愛登記，</verse>
				<verse number="28">受派擔任以下个職務：協助 亞倫 後代做祭司个人主持上主聖殿中禮拜个事，管理上帝聖殿个庭院㧯房間，負責清潔聖物；</verse>
				<verse number="29">負責預備獻給上帝个供餅、獻祭个麵粉、無酵餅、焙个祭物、㧯攪橄欖油个麵粉，也愛秤、量聖殿个祭物。</verse>
				<verse number="30">佢等逐日早暗還愛企等感謝讚美上主；</verse>
				<verse number="31">堵到安息日、初一，抑係其他節日，愛照指定个數目㧯例規常常獻燒化祭給上主。</verse>
				<verse number="32">利未 人負責管理上主个聖帳篷㧯聖殿，也協助佢等个親族 — 亞倫 後代主持聖殿禮拜个事。</verse>
			</chapter>
			<chapter number="24">
				<verse number="1">亞倫 个後代分做幾組。 亞倫 有四個孻仔 — 拿答 、 亞比戶 、 以利亞撒 、 以他瑪 。</verse>
				<verse number="2">拿答 㧯 亞比戶 比佢等个阿爸先死，無後代，所以佢等个老弟 以利亞撒 㧯 以他瑪 做祭司。</verse>
				<verse number="3">大衛 王照 亞倫 後代个職務將佢等分做以下幾組，從 以利亞撒 个後代 撒督 㧯 以他瑪 个後代 亞希米勒 協助 大衛 處理這事。</verse>
				<verse number="4">以利亞撒 後代个男人做族長个比 以他瑪 个後代較多，所以 以利亞撒 个後代分做十六組； 以他瑪 个後代分做八組。</verse>
				<verse number="5">總係佢等个工作係用抽籤个方式分配个，因為 以利亞撒 㧯 以他瑪 後代全部有人做聖所事務㧯靈性生活个領導者。</verse>
				<verse number="6">以利亞撒 㧯 以他瑪 个後代輪流抽籤。該時， 利未 人 拿坦業 个孻仔 示瑪雅 做書記代佢等登記；王㧯王个官員、祭司 撒督 、 亞比亞他 个孻仔 亞希米勒 、祭司家族㧯 利未 家族个族長做證人。</verse>
				<verse number="7">二十四組分配職務个順序記在下背： 第一籤， 耶何雅立 ； 二， 耶大雅 ；</verse>
				<verse number="8">三， 哈琳 ； 四， 梭琳 ；</verse>
				<verse number="9">五， 瑪基雅 ； 六， 米雅民 ；</verse>
				<verse number="10">七， 哈歌斯 ； 八， 亞比雅 ；</verse>
				<verse number="11">九， 耶書亞 ； 十， 示迦尼 ；</verse>
				<verse number="12">十一， 以利亞實 ； 十二， 雅金 ；</verse>
				<verse number="13">十三， 胡巴 ； 十四， 耶是比押 ；</verse>
				<verse number="14">十五， 璧迦 ； 十六， 音麥 ；</verse>
				<verse number="15">十七， 希悉 ； 十八， 哈闢悉 ；</verse>
				<verse number="16">十九， 比他希雅 ； 二十， 以西結 ；</verse>
				<verse number="17">二十一， 雅斤 ； 二十二， 迦末 ；</verse>
				<verse number="18">二十三， 第來雅 ； 二十四， 瑪西亞 。</verse>
				<verse number="19">這兜人係照佢等在上主聖殿个職務登記个；這兜職務係佢等个祖先 亞倫 照上主 — 以色列 上帝个命令所定个。</verse>
				<verse number="20">利未 支族其他家族族長个名單記在下背： 暗蘭 子孫 書巴業 个後代 耶希底亞 ，</verse>
				<verse number="21">利哈比雅 个後代 伊示雅 ，</verse>
				<verse number="22">以斯哈 子孫 示羅摩 个後代 雅哈 ，</verse>
				<verse number="23">希伯倫 个四個孻仔，照大細順序排列： 耶利雅 、 亞瑪利亞 、 雅哈悉 、 耶加面 ，</verse>
				<verse number="24">烏薛 子孫 米迦 个後代 沙密 ，</verse>
				<verse number="25">烏薛 子孫 伊示雅 ( 米迦 个兄弟) 个後代 撒迦利雅 。</verse>
				<verse number="26">米拉利 个後代有 抹利 、 母示 、㧯 雅西雅 。</verse>
				<verse number="27">雅西雅 个孻仔就係 朔含 、 撒刻 、 伊比利 。</verse>
				<verse number="28">抹利 有兩個孻仔 — 以利亞撒 㧯 基士 。 以利亞撒 無孻仔； 基士 个後代有 耶拉篾 。</verse>
				<verse number="29"></verse>
				<verse number="30">母示 有三個孻仔 — 末力 、 以得 、 耶利摩 。 以上係 利未 人个家族。</verse>
				<verse number="31">逐家族族長㧯厥族內一個後生个兄弟平等為佢等个職務抽籤，就像佢等个親屬 亞倫 後代做祭司个人所做个共樣。 大衛 王、 撒督 、 亞希米勒 、祭司㧯 利未 家族該兜族長全部係證人。</verse>
			</chapter>
			<chapter number="25">
				<verse number="1">大衛 王㧯 利未 人个領袖分派 亞薩 、 希幔 、 耶杜頓 三個 利未 宗族主持禮拜个事。佢等愛將上帝个話唱出來，用豎琴、七弦琴，㧯鑇仔奏樂。以下係受選主持禮拜个人个名單㧯職務：</verse>
				<verse number="2">亞薩 个四個孻仔 — 撒刻 、 約瑟 、 尼探雅 、 雅薩利拉 ，接受 亞薩 个指導。 亞薩 照王个命令將上帝个話唱出來。</verse>
				<verse number="3">耶杜頓 个六個孻仔 — 基大利 、 西利 、 耶篩亞 、 示每 、 哈沙比雅 、 瑪他提雅 ，在阿爸指導下將上帝个話唱出來，用豎琴奏樂；佢等也向上主唱頌讚㧯感謝个詩歌。</verse>
				<verse number="4">希幔 有十四個孻仔；佢等係 布基雅 、 瑪探雅 、 烏薛 、 細布業 、 耶利摩 、 哈拿尼雅 、 哈拿尼 、 以利亞他 、 基大利提 、 羅幔提‧以謝 、 約施比加沙 、 瑪羅提 、 何提 、 瑪哈秀 。</verse>
				<verse number="5">上帝照佢个應許，賜王个先見 希幔 有這十四個孻仔，又有三個妹仔，使 希幔 有權力。</verse>
				<verse number="6">希幔 該兜孻仔在佢指導之下，配合上主聖殿个禮拜，彈奏豎琴、七弦琴㧯鑇仔。 亞薩 、 耶杜頓 、㧯 希幔 全部聽王个命令。</verse>
				<verse number="7">這二十四個人全部係專家，㧯佢等同工个 利未 同胞也係受過訓練頌讚上主，一共有兩百八十八人。</verse>
				<verse number="8">這兜人無論後生、年老、專家，抑係初學个，全部用抽籤个方式決定所擔任个職務。</verse>
			</chapter>
			<chapter number="26">
				<verse number="1">做聖殿守衛个 利未 人所分派个工作記在下背： 可拉 族有 可利 个孻仔 米施利米雅 ，係 亞薩 家族个人。</verse>
				<verse number="2">米施利米雅 有七個孻仔，照大細順序係： 撒迦利亞 、 耶疊 、 西巴第雅 、 耶提聶 、</verse>
				<verse number="3">以攔 、 約哈難 、 以利約乃 。</verse>
				<verse number="4">另外一儕係 俄別‧以東 。上帝賜福給佢，佢有八個孻仔，照大細順序係： 示瑪雅 、 約薩拔 、 約亞 、 沙甲 、 拿坦業 、</verse>
				<verse number="5">亞米利 、 以薩迦 、 比烏利太 。</verse>
				<verse number="6">俄別‧以東 个長子 示瑪雅 有六個孻仔 — 俄得尼 、 利法益 、 俄備得 、 以利薩巴 、 以利戶 、 西瑪迦 。佢等在族內全部係重要个人物，因為佢等當有能力。</verse>
				<verse number="7"></verse>
				<verse number="8">俄別‧以東 全家有六十二儕有能力擔任這工作。</verse>
				<verse number="9">米施利米雅 全家有十八儕有能力擔任這工作。</verse>
				<verse number="10">米拉利 族有 何薩 ； 何薩 有四個孻仔 — 申利 (佢毋係長子，總係厥爸立佢做領袖)、</verse>
				<verse number="11">希勒家 、 底巴利雅 、 撒迦利亞 。 何薩 家族有十三儕做聖殿守衛。</verse>
				<verse number="12">聖殿守衛照家族分做幾組。佢等受派在上主个聖殿擔任職務，就像其他 利未 人共樣。</verse>
				<verse number="13">每一家族，不管大細，全部用抽籤決定愛負責看守㖠個門。</verse>
				<verse number="14">示利米雅 抽到東門；佢个孻仔 撒迦利雅 係一個精明个參謀，抽到北門。</verse>
				<verse number="15">俄別‧以東 抽到南門；佢該兜孻仔抽到守倉庫。</verse>
				<verse number="16">書聘 㧯 何薩 抽到西門㧯蹶崎仔該條路項个 沙利基 門 。守衛个任務照時間分組，一組接一組。</verse>
				<verse number="17">東門逐日有六個守衛掌等，北門有四個，南門有四個。看守倉庫个守衛逐日也有四個；逐間倉庫兩個。</verse>
				<verse number="18">偎近西片个走廊有四個守衛在路邊掌等，兩個在走廊堘看守。</verse>
				<verse number="19">以上係分派給 可拉 㧯 米拉利 宗族个守衛職務。</verse>
				<verse number="20">其他个 利未 人 管理聖殿寶庫㧯放獻給上帝禮物个倉庫。</verse>
				<verse number="21">革順 个孻仔 拉但 係幾個家族个祖先，其中包含厥孻仔 耶希伊利 个家族。</verse>
				<verse number="22">耶希伊利 兩個孻仔 西坦 㧯 約珥 管理聖殿寶庫㧯倉庫。</verse>
				<verse number="23">暗蘭 、 以斯哈 、 希伯倫 、㧯 烏薛 个後代也全部分派有職務。</verse>
				<verse number="24">摩西 个孻仔 革舜 宗族个 細布業 掌管聖殿个寶庫。</verse>
				<verse number="25">佢㧯 示羅密 有親戚關係，因為 示羅密 个祖先 以利以謝 係 革舜 个老弟。 以利以謝 𫱔 利哈比雅 ； 利哈比雅 𫱔 耶篩亞 ； 耶篩亞 𫱔 約蘭 ； 約蘭 𫱔 細基利 ； 細基利 𫱔 示羅密 。</verse>
				<verse number="26">示羅密 㧯厥屋下人管理所有獻給上帝个禮物，包含 大衛 王、逐家族族長、逐宗族个領袖㧯軍長所獻个。</verse>
				<verse number="27">佢等對戰場上搶來个戰利品拿兜出來奉獻，做修整聖殿个路用。</verse>
				<verse number="28">所有獻做聖殿用个東西全部係 示羅密 㧯佢全家管理，包含先見 撒母耳 、 基士 个孻仔 掃羅 王、 尼珥 个孻仔 押尼珥 㧯 洗璐雅 个孻仔 約押 所獻个禮物。</verse>
				<verse number="29">以斯哈 後代當中， 基拿尼雅 㧯厥該兜孻仔受派負責行政工作：管理公文記錄，也為 以色列 人處理紛爭个事。</verse>
				<verse number="30">希伯倫 後代當中， 哈沙比雅 㧯佢个親人受派管理 約旦 河西片 以色列 所有上主㧯王个事務；總共有一千七百儕，全部盡有能力。</verse>
				<verse number="31">耶利雅 係 希伯倫 後代个領袖。 大衛 做王第四十年，對 希伯倫 後代全家族做一擺調查，發現這家族个勇士全部住在 基列 境內个 雅謝 。</verse>
				<verse number="32">大衛 王對 耶利雅 親人當中選出兩千七百個有能力个家族長，派佢等管理 約旦 河東片，就係 呂便 、 迦得 、㧯東 瑪拿西 境內 以色列 所有上主㧯王个事務。</verse>
			</chapter>
			<chapter number="27">
				<verse number="1">下背係 以色列 逐家族个族長、帶領千人㧯百人軍隊个軍官，㧯王指派做行政个官長个名單。佢等逐年照月輪流值班，逐組有一個軍官指揮；逐組人數係兩萬四千儕。</verse>
			</chapter>
			<chapter number="28">
				<verse number="1">大衛 王命令逐支族个族長、國家个行政官員、帶領千人㧯百人个軍官、負責王㧯該兜王子財產並頭牲个管理人、宮廷个官員、軍隊个軍官，㧯所有个重要人物全部集合在 耶路撒冷 。</verse>
				<verse number="2">大衛 王企在佢等面前向佢等講：「𠊎个兄弟，𠊎个百姓啊，請聽！𠊎本來想愛起一座殿放上主个約櫃；這約櫃係上主 — 𠊎等上帝个腳凳。𠊎已經準備妥當愛起一座聖殿。</verse>
				<verse number="3">總係上主毋准𠊎為佢起；因為𠊎係一個戰士，流過盡多人个血。</verse>
				<verse number="4">上主 — 以色列 个上帝揀選𠊎㧯𠊎个後代永遠做 以色列 个王。佢在 以色列 中揀選 猶大 支族，在 猶大 支族中揀選吾爸个家族，在吾爸个家族特別揀選𠊎，設立𠊎做王，統治全 以色列 。</verse>
				<verse number="5">佢賜給𠊎盡多孻仔，在這兜孻仔中揀選 所羅門 治理 以色列 — 就係上主个國。</verse>
				<verse number="6">「上主對𠊎講：『愛負責起𠊎个聖殿个人就係你个孻仔 所羅門 。𠊎已經揀選佢做𠊎个孻仔，𠊎愛做佢个阿爸。</verse>
				<verse number="7">若係佢像這下恁樣繼續謹慎來遵行𠊎所有个法律命令，𠊎愛永遠堅固佢个國。』</verse>
				<verse number="8">「這下，𠊎个兄弟，𠊎个百姓啊，在上帝个面前㧯全部 以色列 人 — 上主子民个面前，𠊎命令你等愛謹慎遵行上主 — 𠊎等上帝吩咐个逐件事，使你等做得承受這垤恁靚个土地，做得代代傳下去。」</verse>
				<verse number="9">大衛 對 所羅門 講：「孻仔啊，你愛認識若爸个上帝，全心樂意事奉佢；因為上主鑒察眾人个心，佢知𠊎等所有个心思㧯願望。你尋求佢，佢就接納你；你遠離佢，佢會永遠豁掉你。</verse>
				<verse number="10">你愛知，上主已經揀選你來起佢个聖殿。這下你愛勇敢去做。」</verse>
				<verse number="11">大衛 將起聖殿个計劃全部㧯 所羅門 講，像聖殿所有个建築、倉庫、樓房、內殿，㧯至聖所 — 就係贖罪个地方。</verse>
				<verse number="12">佢也將心肚所想个 圖形全部㧯 所羅門 講，像庭院、四周圍个房屋、貯存聖殿个東西㧯獻給上主禮物个倉庫。</verse>
				<verse number="13">大衛 又㧯佢講樣般組織祭司㧯 利未 人，使佢等實行職務，擔任上主聖殿个工作，管理聖殿所有个東西。</verse>
				<verse number="14">佢又指示應該用幾多金仔來製造金器，用幾多銀仔來製造銀器，</verse>
				<verse number="15">用幾多金仔來製造金燈臺㧯臺頂个金燈，用幾多銀仔來製造銀燈臺㧯臺頂个銀燈；</verse>
				<verse number="16">用幾多金仔來製造放供餅獻給上帝个金桌仔，用幾多銀仔來製造銀桌仔。</verse>
				<verse number="17">佢也指示應該用幾多純金製造叉仔、盤仔、杯仔、金碗，用幾多銀仔製造銀碗，</verse>
				<verse number="18">用幾多純金製造燒香个壇㧯安基路伯个固定座 — 外形像車仔；這兩隻金基路伯个翼胛揜等上主个約櫃。</verse>
				<verse number="19">大衛 講：「這所有个工作計劃係照上主親自給𠊎个指示寫个。」</verse>
				<verse number="20">大衛 對厥孻仔 所羅門 講：「你愛堅強勇敢，愛有信心去做！毋使驚，也毋好灰心失志。𠊎所事奉个主上帝㧯你同在；佢毋會離開你，也毋會㧒掉你，直到你完成上主聖殿个工作。</verse>
				<verse number="21">祭司㧯 利未 人受派在上帝聖殿擔任職務。各種手藝高明个師傅全部歡喜幫助你；人民㧯民間个領袖全部聽你个命令。」</verse>
			</chapter>
			<chapter number="29">
				<verse number="1">大衛 王向全會眾宣告：「𠊎个孻仔 所羅門 係上帝所揀選个；總係佢還後生，無經驗。佢所愛完成个工程非常大；因為這毋係起給人住个王宮，係為到主上帝起个聖殿。</verse>
				<verse number="2">𠊎盡最大个努力為𠊎上帝个聖殿準備材料，有金銀銅鐵、木材、高貴个石磚、寶石、有花紋个石頭、㧯盡多个大理石。</verse>
				<verse number="3">因為𠊎盡愛𠊎上帝个聖殿，所以𠊎除了預備這兜以外，還對𠊎个財產當中拿兜金仔㧯銀仔出來，做起上帝聖殿个路用。</verse>
				<verse number="4">𠊎拿出百零公噸最好个金仔㧯大約兩百四十公噸个純銀仔，拿來貼聖殿个壁，</verse>
				<verse number="5">還有金仔做金器，銀仔做銀器，並供給逐種師傅製造个需要。這下，有麼人歡喜奉獻禮物給上主？」</verse>
				<verse number="6">所以，逐宗族族長、 以色列 逐支族官長、千人㧯百人个指揮官、王室財產个管理人，全部歡喜來奉獻。</verse>
				<verse number="7">佢等為到起上帝个聖殿奉獻一百七十零公噸金仔、三百四十零公噸銀仔、銅仔大約六百二十公噸、㧯三千四百公噸鐵仔。</verse>
				<verse number="8">有寶石个人全部拿出來奉獻，放入上主聖殿个寶庫，交給 革順 族个 利未 人 耶歇 管理。</verse>
				<verse number="9">因為這兜領袖甘心樂意奉獻給上主，人民就盡歡喜， 大衛 王也非常歡喜。</verse>
				<verse number="10">大衛 王在全會眾面前頌讚上主。佢講：「上主 — 𠊎等祖先 以色列 个上帝啊，願你受頌讚直到永永遠遠！</verse>
				<verse number="11">上主啊，你盡偉大；你有大能大力、榮光、威嚴。天頂地下所有个全部係你个；你係君王，你係至高，係萬物个主宰。</verse>
				<verse number="12">所有富足㧯尊榮對你該位來；你用你个力量、權柄統治萬有。使人尊貴、強盛个就係你。</verse>
				<verse number="13">𠊎等个上帝啊，這下𠊎等感謝你，頌讚你榮光个尊名！</verse>
				<verse number="14">「𠊎㧯𠊎个人民實在無資格拿麼介獻給你；因為萬物全部係你所賜个，𠊎等只有將屬你个東西還給你定定。</verse>
				<verse number="15">𠊎等在你面前係暫住个旅客㧯流浪个人，就像𠊎等个祖先共樣。𠊎等个人生像影仔共樣會無掉去，無可能長存。</verse>
				<verse number="16">上主 — 𠊎等个上帝啊，𠊎等將這所有財物帶來，愛起一座聖殿，來榮光你个聖名。這一切係對你該位來个，也係屬你个。</verse>
				<verse number="17">上帝啊，𠊎知你鑒察人心；你歡喜正直个人。𠊎用正直个心，歡歡喜喜將這一切獻給你。這下𠊎看到你个子民也歡歡喜喜帶等禮物來獻給你。</verse>
				<verse number="18">上主 — 𠊎等祖先 亞伯拉罕 、 以撒 、 以色列 个上帝啊，求你使你子民个心永遠對你熱誠，又使佢等永遠對你忠心。</verse>
				<verse number="19">求你俾𠊎个孻仔 所羅門 全心遵行你所有个法律、命令㧯例規，來成就一切，用𠊎所預備个來起你个聖殿。」</verse>
				<verse number="20">然後， 大衛 吩咐全會眾：「愛頌讚上主 — 你等个上帝！」全會眾就頌讚上主 — 佢等祖先个上帝。人民恭恭敬敬敬拜上主，也對王行禮。</verse>
				<verse number="21">第二日， 以色列 人民㓾盡多頭牲做牲儀獻給上主，然後分給大家食。另外，佢等又㓾一千隻牛牯，一千隻綿羊牯，一千隻細羊仔做燒化祭獻給上主。佢等也獻盡多祭酒。</verse>
				<verse number="22">該日，佢等在上主面前食啉，非常快樂。 人民第二擺宣佈 大衛 个孻仔 所羅門 做王。佢等奉上主个名膏油設立佢做佢等个統治者，也膏油設立 撒督 做祭司。</verse>
				<verse number="23">所以 所羅門 承接厥爸 大衛 做王；這王權係上主所賜个。 所羅門 係一個成功个君王； 以色列 全國順從佢。</verse>
				<verse number="24">所有个官員㧯軍人，甚至 大衛 王其他个孻仔，全部發誓順服 所羅門 王。</verse>
				<verse number="25">上主使 以色列 全國敬服 所羅門 ，又使 所羅門 个威嚴超過佢以前該兜 以色列 王。</verse>
				<verse number="26">耶西 个孻仔 大衛 做王統治全 以色列 。</verse>
				<verse number="27">佢做王總共四十年：在 希伯崙 做王七年，在 耶路撒冷 做王三十三年。</verse>
				<verse number="28">大衛 享受榮華富貴，食到盡老正過身；佢个孻仔 所羅門 承接佢做王。</verse>
				<verse number="29">大衛 王一生人个事記在先見 撒母耳 、先知 拿單 、先見 迦得 个歷史書底背。</verse>
				<verse number="30">這兜書講起： 大衛 个統治㧯佢个勇敢，也記載佢㧯 以色列 還有鄰國所經歷个事。</verse>
			</chapter>
		</book>
		<book number="14">
			<chapter number="1">
				<verse number="1">大衛 个孻仔 所羅門 堅固佢對 以色列 國个統治。上主 — 佢个上帝㧯佢同在，使佢非常強盛。</verse>
				<verse number="2">所羅門 命令 以色列 所有指揮千儕㧯百儕个軍官、政府官員、家族族長、㧯所有人民，</verse>
				<verse number="3">全部㧯佢共下去到 基遍 敬拜个所在，因為在該位有上帝臨到个聖帳篷；這聖帳篷係上主个僕人 摩西 在曠野造个。</verse>
				<verse number="4">(上帝个約櫃已經在 耶路撒冷 ； 大衛 對 基列‧耶琳 將它請來个時，為它起一座聖帳篷。)</verse>
				<verse number="5">戶珥 个孫仔、 烏利 个孻仔 比撒列 所造个銅祭壇也在 基遍 ，在上主聖帳篷个頭前。 所羅門 㧯所有人民在該位求問上主。</verse>
				<verse number="6">所羅門 在聖帳篷頭前敬拜上主，在銅祭壇頂獻一千隻頭牲做燒化祭。</verse>
				<verse number="7">該暗晡，上帝向 所羅門 顯現，問佢：「你愛求𠊎賜給你麼介？」</verse>
				<verse number="8">所羅門 應上帝講：「你一直用偉大个慈愛款待吾爸 大衛 ，這下又使𠊎承接佢做王。</verse>
				<verse number="9">主上帝啊，求你實現你對吾爸 大衛 所應許个話。你設立𠊎做人民个王，佢等像地上个泥沙恁多，</verse>
				<verse number="10">求你賜給𠊎聰明智慧，好俾𠊎治理佢等；若無，𠊎樣般有辦法統治你恁多个人民？」</verse>
				<verse number="11">上帝應 所羅門 講：「這係你个心願。你無求富貴、財寶、名聲，也無求消滅敵人，也無為自家求長壽，只有祈求聰明智慧，使你有辦法統治𠊎个子民，就係𠊎設立你做王統治个人民；</verse>
				<verse number="12">所以，𠊎愛賜給你聰明智慧。另外，𠊎也愛加添你个財寶、富貴、名聲，超過以前所有个君王，以後也無一個王贏過你。」</verse>
				<verse number="13">所以， 所羅門 離開 基遍 敬拜个所在，對上主聖帳篷面前轉到 耶路撒冷 ，在該位治理 以色列 。</verse>
				<verse number="14">所羅門 建立一隊有一千四百輛戰車㧯一萬兩千隻戰馬个騎兵隊。佢將一部份安排到 耶路撒冷 ，其他个分駐到逐個城市。</verse>
				<verse number="15">在佢統治期間， 耶路撒冷 个金銀像石頭恁多，香柏樹也像高原个桑仔樹恁普遍。</verse>
				<verse number="16">所羅門 个生理人對 慕茲黎 㧯 基利家 進口馬仔，</verse>
				<verse number="17">也對 埃及 進口戰車。佢等將馬仔㧯戰車轉賣給 赫 人个王㧯 敘利亞 人个王：戰車一輛六百隻銀幣；馬仔一隻一百五十隻銀幣。</verse>
			</chapter>
			<chapter number="2">
				<verse number="1">所羅門 決定愛起聖殿，在該位敬拜上主。佢也決定為自家起一座王宮。</verse>
				<verse number="2">所羅門 擇七萬人搬運材料，八萬人在山頂打石，三千六百人監督工程个進行。</verse>
				<verse number="3">所羅門 派人去對 泰爾 王 希蘭 講：「你識㧯吾爸 大衛 做生理，賣給佢起王宮个香柏樹，請你也恁樣對待𠊎。</verse>
				<verse number="4">𠊎這下起聖殿，榮光上主 — 𠊎个上帝。這殿會成做神聖个所在，俾𠊎㧯𠊎个人民在該位燒香敬拜上主，在該位一直獻餅，並在逐朝晨暗晡、逐安息日、逐隻月初一、㧯其他聖日獻燒化祭，敬拜上主 — 𠊎等个上帝。佢識命令 以色列 永遠愛恁樣做。</verse>
				<verse number="5">𠊎愛起个聖殿當大，因為𠊎等个上帝比所有个神明較偉大。</verse>
				<verse number="6">無人有辦法為上帝起聖殿，因為就算天㧯天頂个天也毋罅佢住。𠊎算麼介？有法度為佢起聖殿嗎？只做得起燒香个殿定定。</verse>
				<verse number="7">這下，請你派一個好手藝个師傅來，會雕刻，會用金銀銅鐵打造東西，會刺藍色、紫色、紅色个布。這個人愛㧯 猶大 並 耶路撒冷 該兜師傅，就係吾爸 大衛 選出來个師傅，共下做工。</verse>
				<verse number="8">𠊎知你斬樹仔个工人當有技術，所以請你對 黎巴嫩 運香柏樹、松樹、檀香樹給𠊎。𠊎愛派人去協助你个工人，</verse>
				<verse number="9">準備當多个樹仔，因為𠊎所愛起个係一座高大堂皇个聖殿。</verse>
				<verse number="10">𠊎會給若倒樹仔个工人兩千公噸小麥，兩千公噸大麥，四十萬公升个酒，㧯四十萬公升个橄欖油。」</verse>
				<verse number="11">泰爾 王 希蘭 回信給 所羅門 ，講：「因為上主惜佢个子民，就設立你做佢等个王。」</verse>
				<verse number="12">希蘭 又講：「頌讚上主 — 以色列 个上帝、天地个創造者！佢賜給 大衛 王一個恁有聰明智慧个孻仔；這孻仔打算為上主起聖殿，也為自家起王宮。</verse>
				<verse number="13">𠊎這下派一個非常聰明、好手藝个師傅給你；佢个名安到 戶蘭 ，</verse>
				<verse number="14">厥姆係 但 支族人，厥爸係 泰爾 本地人。佢盡會用金、銀、銅、鐵、石頭、木材來打造東西，也會刺藍色、紫色、紅色个布，還會刺麻紗。佢會用逐種材料雕刻，也會照所有个設計來雕刻。你做得俾佢㧯你个師傅並若爸 大衛 王个師傅共下工作。</verse>
				<verse number="15">這下，請吾主將答應个小麥、大麥、酒、橄欖油運給僕人。</verse>
				<verse number="16">𠊎等會在 黎巴嫩 山斬你所需要个木材，捆做木排，對海路運到 約帕 ，你就對該位運到 耶路撒冷 去。」</verse>
				<verse number="17">所羅門 調查所有暫住在 以色列 个外族人 (像厥爸 大衛 以前所做个戶口調查)，總共有十五萬三千六百儕。</verse>
				<verse number="18">佢派佢等當中个七萬人搬材料，八萬人在山頂打石，又指定三千六百個工頭來監督佢等个工作。</verse>
			</chapter>
			<chapter number="3">
				<verse number="1">所羅門 个阿爸 大衛 已經為聖殿準備一個所在，就係在 耶路撒冷 个 摩利亞 山頂 — 上主識向 大衛 顯現个所在，就係 耶布斯 人 亞勞拿 个打麥場。</verse>
				<verse number="2">所羅門 做王个第四年二月初二開工起聖殿。</verse>
				<verse number="3">所羅門 起上帝聖殿个地基，有二十七公尺長，九公尺闊。</verse>
				<verse number="4">入門口个門廊㧯聖殿平闊，闊九公尺，高九公尺。門廊內部全部貼純金。</verse>
				<verse number="5">大殿个壁釘一排香柏樹枋，再貼純金，頂高雕刻棕樹㧯鍊仔个圖案。</verse>
				<verse number="6">王用盡靚个寶石㧯對 巴瓦音 進口个金仔裝璜聖殿。</verse>
				<verse number="7">佢用金仔貼聖殿个壁、樑、門㧯門檻。師傅在壁頂雕刻基路伯。</verse>
				<verse number="8">至聖所个內殿有九公尺長，九公尺闊，㧯聖殿平闊。至聖所壁頂所貼个金仔有二十公噸。</verse>
				<verse number="9">金釘仔用掉五百七十公克。樓房个壁也有貼金仔。</verse>
				<verse number="10">王又命令師傅做兩個基路伯，外背包等金仔，放在至聖所底背。</verse>
				<verse number="11">這兩個基路伯平平企等，面對入口；逐個基路伯有兩隻翼胛，逐隻翼胛有兩公尺兩公寸長，兩對翼胛打開，在殿个中間互相接到，兩片揬到壁，大約九公尺闊。</verse>
				<verse number="12"></verse>
				<verse number="13"></verse>
				<verse number="14">至聖所个布幕係用麻紗㧯其他材料做个，染做藍色、紫色、紅色，有基路伯个圖案刺在頂高。</verse>
				<verse number="15">王喊人做兩支銅柱，逐支高十五公尺半，頓在聖殿頭前。逐支有一隻柱頭，高兩公尺兩公寸。</verse>
				<verse number="16">銅柱頭安等有辮織个鍊仔圖形，鍊仔頂有一百隻銅石榴。</verse>
				<verse number="17">這兩支銅柱頓在聖殿入口个兩片，南片該支喊做 雅斤 ，北片該支喊做 波阿斯 。</verse>
			</chapter>
			<chapter number="4">
				<verse number="1">所羅門 王喊人鑄造一隻銅祭壇，九公尺四方，高四公尺半。</verse>
				<verse number="2">佢也鑄造一隻圓个銅海，深兩公尺兩公寸，對這片到該片四公尺四公寸，周圍十三公尺兩公寸。</verse>
				<verse number="3">銅海邊堘个外背有兩排雕刻，一排在頂高，一排在下背，刻做牛牯个樣式。這兜銅牛㧯銅海全部係用歸垤銅鑄造个。</verse>
				<verse number="4">銅海安在十二隻銅牛背囊頂，牛頭向外，三隻向東，三隻向西，三隻向南，三隻向北。</verse>
				<verse number="5">銅海賁七公分半，邊堘像杯仔个邊堘，刻有百合花个花瓣。銅海做得裝六萬公升。</verse>
				<verse number="6">佢又鑄造十隻銅盆，五隻放在聖殿南片，另外五隻放在北片。這兜銅盆係用來洗燒化祭个東西。銅海个水係俾祭司用來洗个。</verse>
				<verse number="7">佢照規定个樣式做十隻金燈臺，十張桌仔，放在大殿个兩片，逐片有五隻金燈臺㧯五張桌仔。佢也做一百隻金碗。</verse>
				<verse number="8"></verse>
				<verse number="9">佢為祭司起內院，也起外院。兩院中間个門全部包銅。</verse>
				<verse number="10">銅海放在聖殿个東南角。</verse>
				<verse number="11">戶蘭 也鑄造鑊頭、鑊鏟㧯碗。佢為 所羅門 王完成佢所負責上帝聖殿个工程。佢所鑄造个用品列在下背： 兩支銅柱， 安在銅柱頂高个兩隻碗型柱頭， 柱頂辮織个鍊仔个圖形， 四百隻銅石榴 — 逐隻柱頭圖形箍等兩排石榴、一排一百隻， 十隻 銅盆座， 十隻銅盆， 銅海， 撐等銅海个十二隻銅牛牯， 鑊頭、鑊鏟㧯叉仔。 師傅 戶蘭 為 所羅門 王鑄造上主聖殿个用品，全部係用銅鑄造磨到金金个。</verse>
				<verse number="12"></verse>
				<verse number="13"></verse>
				<verse number="14"></verse>
				<verse number="15"></verse>
				<verse number="16"></verse>
				<verse number="17">這兜東西全部係照王个命令，在 約旦 平原、 疏割 㧯 撒拉旦 中央个鑄造場鑄造个。</verse>
				<verse number="18">因為這兜銅器當多，無人算過到底用掉幾多銅。</verse>
				<verse number="19">所羅門 又喊人為上帝个聖殿製造逐種金器：有金壇㧯擺設供餅个桌仔；</verse>
				<verse number="20">放在至聖所頭前照明用个純金燈㧯燈臺；</verse>
				<verse number="21">純金花、燈、火鉗；</verse>
				<verse number="22">純金燈心剪刀、碗、放香个碟仔、㧯裝火炭个盆仔。這兜用品全部係用純金製造个。聖殿外背个門㧯至聖所个門全部包金仔。</verse>
			</chapter>
			<chapter number="5">
				<verse number="1">所羅門 完成上主聖殿所有个工程，就將厥爸 大衛 獻給上主个金銀㧯其他用品全部放在上帝聖殿个倉庫肚。</verse>
				<verse number="2">為到愛對 大衛 城 — 就係 錫安 將上主个約櫃請入聖殿， 所羅門 召集 以色列 該兜長老㧯逐支族逐宗族該兜族長到 耶路撒冷 。</verse>
				<verse number="3">佢等就在七月，就係搭寮仔節个時聚集到王該位。</verse>
				<verse number="4">當所有个 以色列 長老來到个時， 利未 人將約櫃扛起來，</verse>
				<verse number="5">祭司㧯 利未 人也將約櫃、聖帳篷㧯所有个聖用品搬到聖殿前。</verse>
				<verse number="6">所羅門 王㧯全部 以色列 人民聚集在約櫃頭前，獻牛羊做牲儀，數目多到無法度算。</verse>
				<verse number="7">該兜祭司就將上主个約櫃扛入聖殿，放在至聖所兩隻基路伯个翼胛下。</verse>
				<verse number="8">基路伯打開个翼胛遮等約櫃㧯扛約櫃个槓仔。</verse>
				<verse number="9">槓仔當長，企在至聖所頭前个人正做得看到槓仔个兩頭，對其他方向就看毋到。 (這兜槓仔今晡日還在該位。)</verse>
				<verse number="10">約櫃肚只有放等兩垤石版，無其他東西；這兩垤石版係 以色列 人民對 埃及 出來、上主㧯佢等立約个時， 摩西 在 西奈 山將它兜放在約櫃肚个。</verse>
				<verse number="11">所有个祭司，無論屬㖠組，攏總潔淨自家，全部來齊。</verse>
				<verse number="12">所有負責音樂个 利未 人 — 亞薩 、 希幔 、 耶杜頓 ，㧯佢等个族人全部著麻紗个衫褲。 利未 人在偎近祭壇个東片企等，手拿等鑇仔、豎琴㧯七弦琴，有一百二十名歕喇叭个祭司㧯佢等企共下。</verse>
				<verse number="13">當歌手頌讚上主个時，喇叭、鑇仔，㧯其他樂器共下和聲，非常好聽。佢等同聲唱： 頌讚上主，因為佢最良善； 佢个慈愛永遠長存。 該時有雲充滿上主个聖殿，</verse>
				<verse number="14">發出上主个榮光，使祭司無辦法在聖殿底背繼續服事。</verse>
			</chapter>
			<chapter number="6">
				<verse number="1">該時， 所羅門 祈禱講： 「上主啊，你決定愛住在賁賁个烏雲肚。</verse>
				<verse number="2">𠊎已經為你起一座偉大个殿， 做你永遠住个所在。」</verse>
				<verse number="3">以色列 會眾全部企在該位。 所羅門 王轉過身來，面對會眾，為佢等向上帝求福。</verse>
				<verse number="4">佢講：「讚美上主 — 以色列 个上帝！佢親自完成佢向吾爸 大衛 所應許个；佢識親嘴㧯 大衛 講：</verse>
				<verse number="5">『自從𠊎將𠊎个子民帶出 埃及 以來，𠊎無選 以色列 㖠座城來起敬拜𠊎个聖殿；𠊎也無選麼人來帶領𠊎个子民 以色列 。</verse>
				<verse number="6">總係這下，𠊎選 耶路撒冷 做敬拜𠊎个所在，又揀選你 — 大衛 來統治𠊎个子民。』」</verse>
				<verse number="7">所羅門 繼續講：「吾爸 大衛 計劃起聖殿，做敬拜上主 — 以色列 上帝个所在。</verse>
				<verse number="8">毋過上主對佢講：『你想愛為𠊎起聖殿，這心意當好；</verse>
				<verse number="9">總係你做毋得開工，只有你个孻仔 — 你親生个孻仔正做得起𠊎个聖殿。』</verse>
				<verse number="10">「這下上主已經實現佢个應許。𠊎承接吾爸 大衛 做 以色列 个王，又已經起好敬拜上主 — 以色列 上帝个聖殿。</verse>
				<verse number="11">𠊎也將約櫃放在聖殿肚。約櫃底背放等立約个石版；這就係上主㧯 以色列 人立个約。」</verse>
				<verse number="12">接等， 所羅門 在 以色列 會眾面前行到上主个祭壇前企等，擎起雙手祈禱。</verse>
				<verse number="13">( 所羅門 識喊人做一個銅臺，放在庭院中央，兩公尺兩公寸四方，高一公尺三公寸。 所羅門 企在臺頂，在逐儕看得到个所在跪下來，向天擎起雙手。)</verse>
				<verse number="14">佢祈禱講：「上主 — 以色列 个上帝啊，天頂地上無別个神做得㧯你比！你信守你㧯你僕人所立个約：該兜一心一意順服你个，你就愛向佢等顯出慈愛。</verse>
				<verse number="15">你親自完成你向你个僕人 — 吾爸 大衛 个應許，到今晡日，逐隻字、逐句話全部實現了。</verse>
				<verse number="16">上主 — 以色列 个上帝啊，這下𠊎求你也實現你向吾爸所講个其他个應許：你識㧯佢講，若係佢个後代像佢共樣，認真遵行你个法律，佢个後代就會永遠有人做 以色列 个王。</verse>
				<verse number="17">所以，上主 — 以色列 个上帝啊，求你實現向你个僕人 大衛 所應許个話。</verse>
				<verse number="18">「上帝啊，你斷真會住在地上，在世人當中嗎？就算天㧯天頂个天也毋罅你住，𠊎所起个這聖殿算麼介呢？</verse>
				<verse number="19">上主 — 𠊎个上帝啊，𠊎係你个僕人；求你聽𠊎个祈禱，聽𠊎在你面前个求喊。</verse>
				<verse number="20">求你日夜看顧這聖殿；這係你識應許愛做敬拜你个所在。你个僕人面對這聖殿祈禱个時，求你聽𠊎个祈求。</verse>
				<verse number="21">你个僕人㧯你个子民 以色列 面對這所在祈禱个時，求你對天頂你住个所在聽𠊎等个祈求，赦免𠊎等。</verse>
				<verse number="22">「若係有人得罪同胞被人告，被人帶到這聖殿 — 你个祭壇前，發誓講佢係無罪个，</verse>
				<verse number="23">上主啊，求你對天頂聽，來審判你个僕人：有罪个，就照佢該得个責罰佢；無罪个，就判佢無罪，還佢清白。</verse>
				<verse number="24">「若係你个子民 以色列 因為得罪你被敵人打贏，後來又悔改歸向你，尊你个名做大，到這聖殿來，謙卑祈求你个赦免，</verse>
				<verse number="25">求你對天頂聽佢等个祈求，赦免你子民个罪，𢱋佢等轉到你賜給佢等㧯佢等祖先个這垤土地。</verse>
				<verse number="26">「若係有你个子民得罪你，你使天無落雨，後來佢等悔改，尊你个名做大，面對這聖殿，謙卑向你祈禱，</verse>
				<verse number="27">求你對天頂聽佢等个祈求。求你赦免你个僕人 — 以色列 人民个罪，教佢等行正直个路。該時，上主啊，求你落水在你个土地上，就係你賜給你子民做產業个土地。</verse>
				<verse number="28">「若係國內有飢荒、發瘟、燒風、生菇、草蜢、禾蝦，抑係你个子民被仇敵圍困，抑係堵到其他災禍病痛，</verse>
				<verse number="29">求你聽佢等个祈禱。若係你个子民 以色列 中有人憂傷痛苦，伸出雙手向這聖殿祈禱，</verse>
				<verse number="30">求你對天頂你住个所在聽佢等个祈求，來赦免佢等。只有你深知人心。求你照逐儕所做个款待佢等，</verse>
				<verse number="31">使你个子民永遠在你賜給𠊎等祖先个土地上敬畏你，順服你。</verse>
				<verse number="32">「若係有一個住在遠方个外族人聽到你个大名㧯大有能力、隨時幫助人个手，就來向這聖殿祈禱，</verse>
				<verse number="33">求你對天頂你住个所在聽佢个祈求，照佢向你所求个答應佢，使全世界个人全部像你个子民 以色列 共樣認識你，敬畏你，使佢等知𠊎所起个這聖殿就係敬拜你个所在。</verse>
				<verse number="34">「若係你个子民照你个命令上戰場㧯敵人相㓾，無論佢等在麼介地方，面對你所選个這城㧯𠊎為你起个這聖殿祈禱，</verse>
				<verse number="35">求你聽佢等。求你對天頂聽佢等个祈禱，使佢等得勝。</verse>
				<verse number="36">「若係你个子民得罪你 (世上無人係無犯罪个)，你發譴个時准敵人打贏佢等，將佢等捉去別个地方，無論係遠抑係近，</verse>
				<verse number="37">也求你聽你子民个祈禱。若係佢等在該位悔改，向你祈求，承認佢等犯罪、行事邪惡，上主啊，求你聽佢等个祈禱。</verse>
				<verse number="38">若係佢等在該地方誠心誠意悔改，面對你賜給𠊎等祖先个這垤土地向你祈禱，面對你所選个這城㧯𠊎為你起个這聖殿祈禱，</verse>
				<verse number="39">求你聽佢等。求你對天頂你住个所在聽佢等个祈求，憐憫佢等，赦免你子民所有个罪。</verse>
				<verse number="40">「𠊎个上帝啊，這下求你目珠打開來看，耳公注意來聽𠊎等在這位所獻个祈禱。</verse>
				<verse number="41">主上帝啊，求你䟘起來進入你休息个地方， 㧯代表你大能个約櫃共下入去聖殿。 主上帝啊，求你賜福給你該兜祭司所做个一切； 願你所有个聖民因為你个良善快樂。</verse>
				<verse number="42">上主 — 上帝啊，毋好㧒掉你所選立个王。 求你記得你對你僕人 大衛 个慈愛 。」</verse>
			</chapter>
			<chapter number="7">
				<verse number="1">所羅門 祈禱煞，有火對天頂降下來，將所獻个燒化祭㧯其他个祭物燒淨淨；上主个榮光充滿聖殿。</verse>
				<verse number="2">因為上主个榮光充滿上主个聖殿，所以祭司無法入去。</verse>
				<verse number="3">以色列 眾人看到火對天頂降下來，看到上主个榮光充滿聖殿，佢等就伏在鋪石頭个地上敬拜上主，頌讚講： 「上主係至善； 佢个慈愛永遠長存。」</verse>
				<verse number="4">然後，王㧯全體人民獻牲儀給上主。</verse>
				<verse number="5">所羅門 王獻兩萬兩千隻牛㧯十二萬隻羊做平安祭。恁樣，王㧯全體人民為上帝个聖殿舉行奉獻禮。</verse>
				<verse number="6">該兜祭司企在指定个所在； 利未 人企在佢等个面前，用 大衛 王該時特製个樂器頌讚上主，又照 大衛 所規定唱讚美个詩：「佢个慈愛永遠長存！」該兜祭司歕喇叭个時， 以色列 人全部企起來。</verse>
				<verse number="7">所羅門 將上主聖殿頭前庭院中个廣場分別為聖，在該位獻燒化祭、素祭㧯平安祭所用頭牲个油。 所羅門 恁樣做係因為佢所造个銅祭壇忒細，無辦法放恁多个祭物。</verse>
				<verse number="8">所羅門 㧯全體 以色列 人民在聖殿守搭寮仔節七日。民眾遠遠對北方 哈馬 隘口㧯南方个 埃及 邊境逐所在前來參加大會。</verse>
				<verse number="9">佢等用七日个時間奉獻祭壇，然後係七日个節期；第八日佢等舉行閉會典禮。</verse>
				<verse number="10">再過去該日，就係七月二十三， 所羅門 喊民眾轉屋下。佢等全部當歡喜快樂；因為上主賜福給佢个子民 以色列 ，也賜福給 大衛 㧯 所羅門 。</verse>
				<verse number="11">所羅門 完成上主个聖殿㧯王宮个工程，順利完成佢所計劃个所有工作後，</verse>
				<verse number="12">上主在暗晡時向佢顯現，對佢講：「𠊎已經聽到你个祈禱；𠊎選這聖殿做獻祭給𠊎个所在。</verse>
				<verse number="13">𠊎若毋落水，抑係使草蜢食淨農作物，抑係降瘟仔在𠊎子民身上，</verse>
				<verse number="14">假使𠊎親自所屬个子民謙卑下來，向𠊎祈禱，追求𠊎个恩惠 ，離開佢等所做个壞事，𠊎就會對天頂聽佢等个祈禱，赦免佢等个罪，醫治佢等个土地。</verse>
				<verse number="15">𠊎會看顧這聖殿，會聽在這位所獻个祈禱；</verse>
				<verse number="16">因為𠊎選它，使它分別為聖，這聖殿愛做永遠敬拜𠊎个所在。𠊎會常常在這位看顧它，關心它。</verse>
				<verse number="17">若係你像若爸 大衛 共樣忠心事奉𠊎，遵行𠊎个法律，照𠊎个命令去做，</verse>
				<verse number="18">𠊎一定會堅固你个王位，照𠊎向若爸 大衛 所應許个，就係佢个後代會永遠統治 以色列 。</verse>
				<verse number="19">若係你㧯你个人民斡頭離開𠊎，毋遵守𠊎給你等个法律㧯誡命，去敬拜別个神，</verse>
				<verse number="20">𠊎就會將你等對𠊎賜給你等个土地上挷出來；𠊎也會㧒掉這座𠊎識分別為聖、成做敬拜𠊎个聖殿。萬民會恥笑它，侮辱它。</verse>
				<verse number="21">「這下大家尊重這聖殿，總係到該時，過路人全部會著驚來問：『上主做麼介恁樣款待這國㧯這聖殿呢？』</verse>
				<verse number="22">人會應講：『因為佢等離開上主 — 佢等个上帝。上主識𢱋佢等个祖先對 埃及 出來，佢等反轉去親近、服事、敬拜別个神明，所以上主降這一切災難給佢等。』」</verse>
			</chapter>
			<chapter number="8">
				<verse number="1">所羅門 用二十年个時間起上主个聖殿㧯王宮。</verse>
				<verse number="2">所羅門 也重新整 希蘭 王送給佢个城，將 以色列 人安頓在該兜城肚。</verse>
				<verse number="3">所羅門 佔領 哈馬‧瑣巴 地區，</verse>
				<verse number="4">建設在曠野个 巴美拉 城 ，也重建 哈馬 境內所有囤貨物个城市。</verse>
				<verse number="5">佢也重建以下个城市：上 伯‧和崙 㧯下 伯‧和崙 (有城門、做得閂个防衛城)、</verse>
				<verse number="6">巴拉 城、所有囤貨物个城市、放戰車㧯戰馬个城市。佢將計劃在 耶路撒冷 、 黎巴嫩 㧯國內逐所在想愛起个工程全部完成。</verse>
				<verse number="7">所羅門 強迫所有 迦南 人个後代做苦工；佢等係 以色列 人佔領這地時無㓾掉該兜人个後代，包含 赫 人、 亞摩利 人、 比利洗 人、 希未 人㧯 耶布斯 人。佢等个後代到這下還係做奴才。</verse>
				<verse number="8"></verse>
				<verse number="9">所羅門 無喊 以色列 人做苦工，只有喊佢等做戰士、官長、戰車長㧯騎兵。</verse>
				<verse number="10">所羅門 王有兩百五十個監工，監督工人做各種建築工程。</verse>
				<verse number="11">所羅門 將 埃及 王个妹仔，對 大衛 城徙到為姖新起个王宮肚。佢講：「𠊎个𡜵娘無應該住在 以色列 王 大衛 个王宮，因為約櫃到過个所在就係聖个。」</verse>
				<verse number="12">所羅門 在聖殿頭前、佢所造上主个祭壇頂獻燒化祭給上主。</verse>
				<verse number="13">佢照 摩西 法律个規定，為逐個聖日獻燒化祭；這兜聖日係：安息日、初一㧯三個年節 — 除酵節、七七收割節、搭寮仔節。</verse>
				<verse number="14">佢照厥爸 大衛 个規定分派祭司㧯 利未 人逐日个工作； 利未 人協助祭司共下唱詩㧯擔任其他工作。佢也照神人 大衛 个命令將聖殿守衛分區組織起來，使佢等逐日在各城門執行任務。</verse>
				<verse number="15">大衛 所指示祭司㧯 利未 人有關倉庫㧯其他个工作，佢等全部徹底實行了。</verse>
				<verse number="16">這時， 所羅門 所有个計劃全部完成，上主个聖殿對打地基到完工，所有个工程進行順利。</verse>
				<verse number="17">後來， 所羅門 到 以旬‧迦別 㧯 以祿 去；這係在 以東 地區 阿卡巴 灣兩個海港。</verse>
				<verse number="18">希蘭 王送幾隻船去給 所羅門 ，喊自家个官員指揮，命令經驗豐富个船員來駛。佢等㧯 所羅門 个官員共下行船到 俄斐 ，對該位運轉來大約一萬五千公斤金仔給 所羅門 王。</verse>
			</chapter>
			<chapter number="9">
				<verse number="1">示巴 女王聽到 所羅門 王个名聲，就到 耶路撒冷 來，想愛用困難个問題來考 所羅門 。有一大群人跈等姖，帶等一大隊駱駝載等香料、珠寶㧯當多黃金。姖看到 所羅門 个時，將心中所想到个問題全部拿來問。</verse>
				<verse number="2">所羅門 一一回答姖所有个問題，無一隻問題考倒佢。</verse>
				<verse number="3">示巴 女王聽到 所羅門 智慧个話，也看到佢所起个王宮，</verse>
				<verse number="4">又看到佢桌頂豐富个食物、厥官員住个屋、王宮僕人个組織㧯所著个制服、斟酒个僕人㧯佢等个衫褲、並聖殿肚所獻个燒化祭 ，歸隻人戇掉去。</verse>
				<verse number="5">姖對 所羅門 王講：「𠊎在自家个國家所聽到有關你个成就㧯智慧全部係斷真个！</verse>
				<verse number="6">𠊎原來毋信，總係𠊎來到這位親眼看到這一切正相信。有關你个智慧，𠊎聽到个還吂有一半；你比別人傳講个還較有智慧。</verse>
				<verse number="7">服事你个人樣般恁有福氣啊！佢等有好常常在你面前聽你智慧个話！</verse>
				<verse number="8">願上主 — 你个上帝得到讚美！佢設立你做王，使你奉佢个名統治，表示佢樣般中意你。因為你个上帝痛惜佢个子民 以色列 ，愛永遠保護佢等，所以設立你做佢等个王，愛你維護法律，伸張正義。」</verse>
				<verse number="9">示巴 女王將帶來个禮物送給 所羅門 王：大約有四千公斤重个黃金，當多香料㧯寶石。 所羅門 王從來毋識收過比 示巴 女王所送還較高貴个香料。</verse>
				<verse number="10">( 希蘭 王㧯 所羅門 王个僕人對 俄斐 運金仔來，也運來檀香木㧯珠寶。</verse>
				<verse number="11">所羅門 王用這兜檀香木做上主聖殿㧯王宮个樓梯，也為樂師歌手製造豎琴㧯七弦琴。 猶大 地從來毋識看過恁好个檀香木。)</verse>
				<verse number="12">所羅門 王也當慨，送 示巴 女王各種禮物，除了照例愛送个禮物以外，凡係 示巴 女王所要求个，佢全部給姖。女王㧯跈姖个人就轉 示巴 去了。</verse>
				<verse number="13">所羅門 王逐年收到兩萬三千公斤个黃金，</verse>
				<verse number="14">另外還有生理人納个稅。 阿拉伯 該兜王㧯 以色列 逐地區个總督也向 所羅門 進貢金銀。</verse>
				<verse number="15">所羅門 王製造兩百垤大盾牌，逐垤用大約七公斤个金仔打个。</verse>
				<verse number="16">佢又製造三百垤細盾牌，逐垤用大約三公斤个金仔打个。佢將這兜盾牌放在 黎巴嫩 林宮肚。</verse>
				<verse number="17">所羅門 王又用象牙製造一隻大寶座，用純金包等。</verse>
				<verse number="18">寶座頭前有六層段仔，連等一張包金个腳凳。寶座兩片有扶手，逐片有一座獅仔。</verse>
				<verse number="19">逐層段仔个兩頭也各有一座獅仔，總共十二座。其他國家全部毋識有恁樣个寶座。</verse>
				<verse number="20">所羅門 王所有个酒杯全部係金仔做个；所有在 黎巴嫩 林宮肚个碗盤全部係純金做个，毋係用銀仔做个；因為在 所羅門 个時代，銀仔毋係貴重个。</verse>
				<verse number="21">所羅門 王有一隊大船，㧯 希蘭 王个船隊共下出海；船隊三年轉來一擺，帶等金銀、象牙、猴仔㧯孔雀轉來。</verse>
				<verse number="22">所羅門 王个好額㧯聰明贏過世上所有个君王。</verse>
				<verse number="23">全世界逐個王全部想愛來見 所羅門 ，愛聽上帝賜給佢智慧个話。</verse>
				<verse number="24">佢等逐年帶禮物給佢，有金器、銀器、衫褲、武器、香料、馬㧯騾仔。</verse>
				<verse number="25">所羅門 有四千間馬篷放戰車㧯馬，又有一萬兩千騎兵。佢將一部份安排到 耶路撒冷 ，其他个分駐到逐個城市</verse>
				<verse number="26">所羅門 統治對 幼發拉底 河到 非利士 㧯 埃及 邊境所有个王。</verse>
				<verse number="27">在佢統治期間， 耶路撒冷 个銀幣像石頭恁多，香柏樹也像高原个桑仔樹恁普遍。</verse>
				<verse number="28">所羅門 个生理人對 慕茲黎 㧯別个國家進口馬仔。</verse>
				<verse number="29">所羅門 其他个事，對頭到尾，全部記在《先知 拿單 个書》、《 示羅 人 亞希雅 个預言書》，㧯《先見 易多 个異象書》。最尾一本書係記載 以色列 王 耶羅波安 个事。</verse>
				<verse number="30">所羅門 在 耶路撒冷 做王，統治全 以色列 四十年。</verse>
				<verse number="31">所羅門 過身後，葬在厥爸 大衛 个城；佢个孻仔 羅波安 承接佢做王。</verse>
			</chapter>
			<chapter number="10">
				<verse number="1">羅波安 到 示劍 去； 以色列 人全部聚集在該位，愛設立佢做王。</verse>
				<verse number="2">尼八 个孻仔 耶羅波安 因為閃 所羅門 王逃到 埃及 去；佢一聽到 羅波安 做王个消息，就對 埃及 趕轉來。</verse>
				<verse number="3">北部支族个人民派人去請佢來，然後㧯佢共下去見 羅波安 ，對佢講：</verse>
				<verse number="4">「若爸 所羅門 使𠊎等揹重擔。若係你減輕𠊎等个負擔，俾𠊎等个生活過得去，𠊎等就服事你。」</verse>
				<verse number="5">羅波安 講：「你等三日以後再來見𠊎。」所以佢等就離開。</verse>
				<verse number="6">羅波安 王問幾個元老个意見；佢等識做過厥爸 所羅門 王个顧問。佢問佢等：「你等想𠊎應該樣般回答這兜人呢？」</verse>
				<verse number="7">佢等講：「若係你想愛好款待這兜人，使佢等歡喜，回答佢等个時愛講兜好話，佢等就會永遠做你个奴僕。」</verse>
				<verse number="8">總係， 羅波安 毋搭這兜元老个勸話，反轉去尋該兜㧯佢共下大个後生人；佢等這下做佢个顧問。</verse>
				<verse number="9">羅波安 問佢等：「你等有麼介建議？該兜人要求𠊎減輕佢等个負擔，𠊎應該樣般回答佢等呢？」</verse>
				<verse number="10">佢等講：「你做得恁樣㧯佢等講：『𠊎个手指尾比吾爸个腰身還較粗！</verse>
				<verse number="11">吾爸給你等重擔，𠊎愛給你等還較重个擔頭。吾爸用皮鞭打你等，𠊎愛用帶鉤仔个皮鞭打你等！』」</verse>
				<verse number="12">三日以後， 耶羅波安 㧯所有人民照 羅波安 王个指示，又到佢面前。</verse>
				<verse number="13">羅波安 王毋聽元老个建議，反轉照後生人个建議對人民講當嚴个話。佢講：「吾爸給你等重擔，𠊎愛給你等還較重个擔頭。吾爸用皮鞭打你等，𠊎愛用帶鉤仔个皮鞭打你等！」</verse>
				<verse number="14"></verse>
				<verse number="15">王毋搭人民个要求；總係這係主上帝个旨意，愛實現佢通過 示羅 人先知 亞希雅 對 尼八 个孻仔 耶羅波安 所講个話。</verse>
				<verse number="16">以色列 人民看到王毋接納佢等个要求就大聲喊講： 「在 大衛 家𠊎等算麼介？ 耶西 个孻仔對𠊎等有麼介好處？ 以色列 人啊，𠊎等來去轉！ 大衛 家啊，自家保重噢！」 所以， 以色列 人民造反，轉屋下去。</verse>
				<verse number="17">總係住在 猶大 地區个 以色列 人， 羅波安 還係做佢等个王。</verse>
				<verse number="18">羅波安 王派苦工个總管 亞多蘭 到 以色列 人該位去， 以色列 人卻用石頭將佢㧹死。這時， 羅波安 王趕緊上戰車，瀉轉去 耶路撒冷 。</verse>
				<verse number="19">對恁樣，北國 以色列 个人民一直反 大衛 个家族。</verse>
			</chapter>
			<chapter number="11">
				<verse number="1">羅波安 一到 耶路撒冷 就召集 猶大 㧯 便雅憫 支族最優秀个軍隊十八萬人，愛去攻打 以色列 ，搶轉佢對北部支族个控制。</verse>
				<verse number="2">總係上主㧯神人 示瑪雅 講：</verse>
				<verse number="3">「你去對 所羅門 个孻仔 猶大 王 羅波安 㧯所有住在 猶大 、 便雅憫 地區个 以色列 人講：</verse>
				<verse number="4">『上主恁樣講：毋好去攻打你等个兄弟。你等全部轉去！這擺所發生个事係出於𠊎。』」佢等就聽從上主个命令，無去攻打 耶羅波安 。</verse>
				<verse number="5">羅波安 住在 耶路撒冷 ；佢修理 猶大 㧯 便雅憫 个城做保護。</verse>
				<verse number="6">這兜城有： 伯利恆 、 以坦 、 提哥亞 、</verse>
				<verse number="7">伯‧夙 、 梭哥 、 亞杜蘭 、</verse>
				<verse number="8">迦特 、 瑪利沙 、 西弗 、</verse>
				<verse number="9">亞多萊音 、 拉吉 、 亞西加 、</verse>
				<verse number="10">瑣拉 、 亞雅崙 㧯 希伯崙 。</verse>
				<verse number="11">佢為這兜城整堅固个城堡，為逐座城派指揮官，並供給糧食、橄欖油㧯酒。</verse>
				<verse number="12">佢也為逐座城準備盾牌㧯槍，使它兜盡堅固。恁樣， 羅波安 控制 猶大 㧯 便雅憫 。</verse>
				<verse number="13">以色列 全地个祭司㧯 利未 人全部對四方來歸順 羅波安 。</verse>
				<verse number="14">利未 人㧒掉佢等个牧場㧯其他土地，徙到 猶大 㧯 耶路撒冷 去，因為 以色列 王 耶羅波安 㧯佢个繼承者拒絕佢等，毋准佢等做上主个祭司。</verse>
				<verse number="15">耶羅波安 指派佢自家个人做祭司，在山岡个神廟事奉，拜山羊鬼㧯佢自家鑄造个牛。</verse>
				<verse number="16">以色列 逐支族所有誠心敬拜上主 — 以色列 上帝个人民全部跈 利未 人到 耶路撒冷 去，獻牲儀給上主 — 佢等祖先个上帝。</verse>
				<verse number="17">這件事加強 猶大 國个地位，三年久，人民支持 所羅門 个孻仔 羅波安 ，因為佢等个生活像在 大衛 王㧯 所羅門 王統治个時共樣。</verse>
				<verse number="18">羅波安 討 瑪哈拉 做𡜵娘； 瑪哈拉 个阿爸係 大衛 个孻仔 耶利摩 ，阿姆係 耶西 个孫女， 以利押 个妹仔 亞比孩 。</verse>
				<verse number="19">佢等𫱔三個孻仔 — 耶烏斯 、 示瑪利雅 、 撒罕 。</verse>
				<verse number="20">後來 羅波安 又討 押沙龍 个妹仔 瑪迦 ；佢等𫱔四個孻仔 — 亞比雅 、 亞太 、 細撒 、 示羅密 。</verse>
				<verse number="21">羅波安 一共有十八個𡜵娘，六十個細姐，二十八個孻仔，㧯六十個妹仔。在所有𡜵娘細姐中， 羅波安 最惜 押沙龍 个妹仔 瑪迦 ，</verse>
				<verse number="22">所以也最惜 瑪迦 个孻仔 亞比雅 ，想愛設立佢繼承王位。</verse>
				<verse number="23">羅波安 盡聰明，將責任分給佢該兜孻仔，派佢等在 猶大 㧯 便雅憫 逐個防衛城。佢供給佢等所需要个一切，也為佢等討盡多𡜵娘細姐。</verse>
			</chapter>
			<chapter number="12">
				<verse number="1">羅波安 堅固自家个王位以後，佢㧯 以色列 人民 就離開上主个法律。</verse>
				<verse number="2">羅波安 在位个第五年，上主因為佢等个悖逆責罰佢等。</verse>
				<verse number="3">埃及 王 示撒 帶領一千兩百輛戰車，六萬騎兵，㧯多到算毋出个士兵，包含 利比亞 人、 蘇基 人㧯 古實 人个軍隊，前來攻打 耶路撒冷 。</verse>
				<verse number="4">佢佔領 猶大 个防衛城，逼近 耶路撒冷 。</verse>
				<verse number="5">先知 示瑪雅 去見 羅波安 王㧯 猶大 該兜領袖；該兜領袖因為走閃 示撒 全部來到 耶路撒冷 。 示瑪雅 對佢等講：「上主有話㧯你等講：『你等離開𠊎，所以這下𠊎離開你等，將你等交在 示撒 手中。』」</verse>
				<verse number="6">王㧯該兜領袖全部承認自家犯罪；佢等講：「上主所做个係公當个。」</verse>
				<verse number="7">上主看到佢等謙卑下來，又對 示瑪雅 講：「因為佢等承認自家个罪，𠊎毋毀滅佢等。總係 示撒 來攻打个時，佢等單淨做得保存性命定定。𠊎毋會繼續對 耶路撒冷 大發譴。</verse>
				<verse number="8">總係 示撒 愛征服佢等，該時佢等就會知，服事𠊎㧯服事世間个統治者有麼介分別。」</verse>
				<verse number="9">埃及 王 示撒 攻入 耶路撒冷 ，將上主个聖殿㧯王宮所有个寶物全部搶走，包含 所羅門 製造个金盾牌。</verse>
				<verse number="10">羅波安 王為到補這兜金盾牌就造銅盾牌，將它兜交給看守王宮大門个守衛長管理。</verse>
				<verse number="11">王逐擺到聖殿去个時，守衛就拿等這兜盾牌，事後又放轉守衛室。</verse>
				<verse number="12">因為 羅波安 謙卑順從上主，上主就收轉佢个怒氣，無徹底消滅佢； 猶大 个情形也較安定。</verse>
				<verse number="13">羅波安 在 耶路撒冷 做王，加強自家个勢力。佢做王个時四十一歲，在 耶路撒冷 統治十七年。 耶路撒冷 係上主對 以色列 全地選出來做敬拜佢个城。 羅波安 个阿姆係 亞捫 人 拿瑪 。</verse>
				<verse number="14">羅波安 做邪惡个事，因為佢毋專心尋求上主个旨意。</verse>
				<verse number="15">有關 羅波安 一生人个事㧯佢个家譜全部記在《先知 示瑪雅 史》㧯《先見 易多 史》底背。 羅波安 㧯 耶羅波安 中間常常有戰爭。</verse>
				<verse number="16">羅波安 死後，葬在 大衛 城个王室墳墓肚。佢个孻仔 亞比雅 承接佢做王。</verse>
			</chapter>
			<chapter number="13">
				<verse number="1">以色列 王 耶羅波安 在位个第十八年， 亞比雅 做 猶大 王。</verse>
				<verse number="2">佢在 耶路撒冷 統治三年。厥姆安到 瑪迦 ，係 基比亞 人 烏列 个妹仔。 亞比雅 㧯 耶羅波安 戰爭；</verse>
				<verse number="3">亞比雅 帶領四十萬軍隊㧯 耶羅波安 个八十萬大軍相㓾。</verse>
				<verse number="4">兩軍在 以法蓮 山區擺陣。 亞比雅 王上 洗瑪面 山向 耶羅波安 㧯 以色列 人喊講：「你等聽𠊎講！</verse>
				<verse number="5">敢講你等毋知上主 — 以色列 个上帝識㧯 大衛 立毋會廢掉个約係麼？上主將 以色列 个王位永遠賜給 大衛 㧯佢个後代。</verse>
				<verse number="6">尼八 个孻仔 耶羅波安 悖逆佢个王 — 大衛 个孻仔 所羅門 ，</verse>
				<verse number="7">後來，佢召集一群無下落个鱸鰻，硬硬來欺負 所羅門 个孻仔 羅波安 ；該時 羅波安 還後生，無經驗好抵擋佢等。</verse>
				<verse number="8">這下你等想愛反抗上主賜給 大衛 後代个王權；你等有強大个軍隊，又用 耶羅波安 鑄造个金牛做你等个神。</verse>
				<verse number="9">你等將上主个祭司 亞倫 个後代逐走，也將 利未 人逐走；你等照其他國家个方法指派祭司代佢等。若有人牽來一隻牛牯抑係七隻綿羊，你等就封立佢做祭司，服事虛假个神明。</verse>
				<verse number="10">「總係，𠊎等還係事奉上主 — 𠊎等个上帝，無離開佢。 亞倫 个後代仍然執行祭司个職務； 利未 人協助佢等。</verse>
				<verse number="11">佢等逐日早暗向上主燒香，獻燒化祭，又在純金个桌頂獻供餅；逐暗晡也點𤏸金燈臺頂个燈。𠊎等照上主 — 𠊎等上帝个命令做，總係你等離開佢。</verse>
				<verse number="12">上帝㧯𠊎等共下，係領導𠊎等个；佢个祭司在這位，愛歕喇叭召集𠊎等㧯你等相㓾。 以色列 人哪，毋好㧯上主 — 你等祖先个上帝相㓾！你等係無法度打贏个！」</verse>
				<verse number="13">這時， 耶羅波安 派一部份軍隊在 猶大 軍隊个後背埋伏，其他个就對頭前攻打。</verse>
				<verse number="14">猶大 人斡頭看，看到自家受包圍，就求喊上主；該兜祭司歕喇叭。</verse>
				<verse number="15">猶大 人大聲嘶； 亞比雅 就帶領佢等攻擊。上帝打贏 耶羅波安 㧯 以色列 軍隊。</verse>
				<verse number="16">以色列 人在 猶大 人面前逃走；上帝使 猶大 人贏過佢等。</verse>
				<verse number="17">亞比雅 㧯佢个軍隊大大打贏 以色列 人，消滅 以色列 个精兵五十萬。</verse>
				<verse number="18">該時， 猶大 人打贏了，因為佢等偎靠上主 — 佢等祖先个上帝。</verse>
				<verse number="19">亞比雅 逐 耶羅波安 个軍隊，佔領佢个幾座城，就係 伯特利 、 耶沙拿 、 以弗崙 ，㧯這兜城附近个村莊。</verse>
				<verse number="20">亞比雅 在位期間， 耶羅波安 一直無再掌權。後來上主擊打佢，佢就死掉。</verse>
				<verse number="21">亞比雅 漸漸強盛；佢有十四個𡜵娘，二十二個孻仔，十六個妹仔。</verse>
				<verse number="22">有關 亞比雅 其他个事㧯言行全部記在《先知 易多 史》底背。</verse>
			</chapter>
			<chapter number="14">
				<verse number="1">亞比雅 王死後，葬在 大衛 城个王室墳墓肚；佢个孻仔 亞撒 承接佢做王。 亞撒 在位期間，國家有十年太平。</verse>
				<verse number="2">亞撒 行上主 — 佢个上帝看做好又正直个事。</verse>
				<verse number="3">佢除掉外族人个祭壇㧯山岡頂个神廟，打碎石柱，斬掉 亞舍拉 女神个柱像。</verse>
				<verse number="4">佢命令 猶大 人尋求上主 — 佢等祖先个上帝，行佢个教訓㧯誡命。</verse>
				<verse number="5">亞撒 王除掉所有 猶大 城鎮个神廟㧯燒香个祭壇。所以，在佢統治之下 猶大 國享受太平。</verse>
				<verse number="6">這站期間，佢在 猶大 起幾座防衛城，國家多年無戰爭，因為上主賜給佢太平。</verse>
				<verse number="7">佢對 猶大 人民講：「𠊎等愛起城牆、城樓㧯做得關做得閂个城門來堅固𠊎等个城。因為𠊎等遵行上主 — 𠊎等上帝个旨意，這地方還係屬𠊎等。佢一直保護𠊎等，賜給𠊎等四周圍平安。」所以佢等開始起造，凡事順利。</verse>
				<verse number="8">亞撒 王个軍隊包含三十萬裝備有大盾牌㧯槍个 猶大 人，又有二十八萬裝備細盾牌㧯弓箭个 便雅憫 人。佢等全部係當勇敢个戰士。</verse>
				<verse number="9">古實 人 謝拉 帶領一百萬軍隊㧯三百輛戰車侵犯 猶大 ；佢等來到 瑪利沙 。</verse>
				<verse number="10">亞撒 出去相㓾。雙方在 瑪利沙 附近个 洗法 山壢擺陣。</verse>
				<verse number="11">亞撒 向上主 — 佢个上帝祈禱：「上主啊，只有你正能幫助弱小个軍隊，也能幫助強大个軍隊。上主 — 𠊎等个上帝啊，這下求你幫助𠊎等，因為𠊎等偎靠你。𠊎等奉你个名出來㧯這強大个軍隊相㓾。上主啊，你係𠊎等个上帝，毋好俾人打贏你哦！」</verse>
				<verse number="12">亞撒 㧯 猶大 軍隊攻打 古實 軍隊个時，上主打贏 古實 軍隊。佢等就逃走；</verse>
				<verse number="13">亞撒 帶領軍隊去逐，一直逐到 基拉耳 。 古實 軍隊戰死个人當多，無法度再相㓾 ；佢等被上主㧯佢个軍隊打輸； 猶大 軍隊搶走盡多戰利品；</verse>
				<verse number="14">佢等毀滅 基拉耳 周圍个城鎮，因為該位个人民全部當驚上主。 猶大 軍隊盡勢搶該兜城鎮，搶到當多个戰利品。</verse>
				<verse number="15">佢等也攻擊牧場，搶走盡多羊群㧯駱駝，然後轉去 耶路撒冷 。</verse>
			</chapter>
			<chapter number="15">
				<verse number="1">上帝个靈降在 俄德 个孻仔 亞撒利雅 身上。</verse>
				<verse number="2">佢就去見 亞撒 王，對佢講：「 亞撒 王㧯所有 猶大 、 便雅憫 个人民哪，請聽𠊎講！若係你等順從上主，佢一定會㧯你等共下。你等尋佢，佢就俾你等尋到。你等離開佢，佢就㧒掉你等。</verse>
				<verse number="3">以色列 已經盡久無真神，無教導个祭司，也無法律。</verse>
				<verse number="4">總係災難臨到个時，佢等轉向上主 — 以色列 个上帝；佢等尋求佢，佢就俾佢等尋到。</verse>
				<verse number="5">在該期間，出入个人全部無安全，因為逐所在有動亂。</verse>
				<verse number="6">這國攻打該國，這城攻打該城，因為上帝使災難痛苦降在佢等身上。</verse>
				<verse number="7">總係，你等一定愛堅強，做毋得灰心；你等个工作一定會得到報賞。」</verse>
				<verse number="8">亞撒 聽到先知 俄德 个孻仔 亞撒利雅 个預言，就得到鼓勵。佢將 猶大 㧯 便雅憫 全地所有个偶像並佢在 以法蓮 山區所佔領該兜城个偶像全部除掉；佢又將聖殿庭院肚上主个祭壇整好。</verse>
				<verse number="9">盡多 以色列 人對 以法蓮 、 瑪拿西 、 西緬 來歸順 亞撒 ，住在佢个國中，因為佢等看到上主 — 佢个上帝㧯佢共下。 亞撒 召集這兜人㧯 猶大 、 便雅憫 个人民；</verse>
				<verse number="10">亞撒 在位个第十五年三月，佢等就聚集在 耶路撒冷 。</verse>
				<verse number="11">該日，佢等對捉來个戰利品中，用七百隻牛、七千隻羊獻給上主。</verse>
				<verse number="12">佢等就立約，愛全心全意尋求上主 — 佢等祖先个上帝。</verse>
				<verse number="13">無論男女老幼，毋尋求上主 — 以色列 上帝个，就愛將佢處死刑。</verse>
				<verse number="14">佢等奉上主个名大聲發誓，愛遵守這約；然後佢等歡喜盡嘶，歕喇叭、羊角。</verse>
				<verse number="15">猶大 所有个人民全部當歡喜；因為佢等全心立約，全意尋求上主，佢就俾佢等尋到，所以上主賜佢等國內太平。</verse>
				<verse number="16">亞撒 王廢掉厥婆 瑪迦 太后个名份，因為姖為 亞舍拉 女神造邪淫个柱像。 亞撒 將女神像斬斷，打碎，在 汲淪 溪滣燒掉。</verse>
				<verse number="17">雖然 亞撒 無將 以色列 所有山岡頂个神廟廢掉，總係佢一生人一心一意對上主忠心。</verse>
				<verse number="18">佢將厥爸㧯自家奉獻給上帝个東西，就係金銀㧯用品，全部放在聖殿肚。</verse>
				<verse number="19">一直到 亞撒 在位个第三十五年，這站期間全部無戰爭。</verse>
			</chapter>
			<chapter number="16">
				<verse number="1">猶大 王 亞撒 在位个第三十六年， 以色列 王 巴沙 愛攻打 猶大 ，就修建 拉瑪 做防衛城，目的係愛切斷出入 猶大 所有个交通。</verse>
				<verse number="2">所以 亞撒 將聖殿㧯王宮寶庫肚个金銀全部運到 大馬士革 ，到 敘利亞 王 便‧哈達 該位，對佢講：</verse>
				<verse number="3">「若爸㧯吾爸以前係同盟，𠊎等也來立約做同盟。這兜金銀係送給你个禮物。請將你㧯 以色列 王 巴沙 个盟約廢掉，佢正會對𠊎个土地將軍隊撤走。」</verse>
				<verse number="4">便‧哈達 同意 亞撒 王个建議，就派佢个元帥去攻打 以色列 个城市。佢等佔領 以雲 、 但 、 亞伯‧伯‧瑪迦 ，㧯所有在 拿弗他利 囤貨物个城市。</verse>
				<verse number="5">巴沙 聽到所發生个事，就黏時停止修建 拉瑪 ，豁掉該位个工程。</verse>
				<verse number="6">所以 亞撒 王召集 猶大 逐所在个人，將 巴沙 在 拉瑪 所用个石頭、樹料全部運去修建 迦巴 㧯 米斯巴 城。</verse>
				<verse number="7">該時，先見 哈拿尼 去見 猶大 王 亞撒 ，對佢講：「因為你倚靠 敘利亞 王，毋倚靠上主 — 你个上帝，所以你失掉機會打贏 敘利亞 王个軍隊。</verse>
				<verse number="8">以前 古實 㧯 利比亞 敢毋係有強大个軍隊、又有盡多戰車㧯騎兵嗎？總係因為你倚靠上主，佢就使你贏過佢等。</verse>
				<verse number="9">上主看顧全世界，賜力量給該兜對佢忠實个人。你做這件事實在當戇；所以對這下開始，你會一直堵到戰亂。」</verse>
				<verse number="10">亞撒 聽到就非常譴，將先見關起來。同時， 亞撒 開始對有兜人民當殘忍。</verse>
				<verse number="11">亞撒 在位期間所發生个事全部記在《 猶大 㧯 以色列 列王史》底背。</verse>
				<verse number="12">亞撒 做王个第三十九年，佢个腳因為發嚴重个病變跛腳；就算在該時，佢乜無求上主个幫助，單單求問醫生。</verse>
				<verse number="13">兩年後佢死掉，</verse>
				<verse number="14">葬在 大衛 城 — 佢生前為自家鑿好个石墓肚。人用香料㧯香油膏佢个屍體，又燒一堆大火向佢表示哀傷。</verse>
			</chapter>
			<chapter number="17">
				<verse number="1">約沙法 承接厥爸 亞撒 做王；佢堅強打拚，對抗 以色列 。</verse>
				<verse number="2">佢將軍隊安營在 猶大 該兜防衛城㧯鄉村，並厥爸 亞撒 在 以法蓮 境內佔領个該兜城。</verse>
				<verse number="3">上主㧯 約沙法 共下；因為佢學厥祖先 大衛 早期个模範，無拜 巴力 。</verse>
				<verse number="4">佢事奉厥爸个上帝，遵行上帝个命令，無做 以色列 該兜王所做个事。</verse>
				<verse number="5">上主使 約沙法 在 猶大 國个統治堅固； 猶大 人民向佢獻禮物，所以佢非常好額，又當受人尊敬。</verse>
				<verse number="6">佢看事奉上主做光榮，又廢掉在 猶大 所有山岡頂个神廟，㧯 亞舍拉 女神个柱像。</verse>
				<verse number="7">佢在位个第三年，派官長 便‧亥伊勒 、 俄巴底 、 撒迦利雅 、 拿坦業 㧯 米該亞 到 猶大 逐城教導人民。</verse>
				<verse number="8">㧯佢等共下去个有： 示瑪雅 、 尼探雅 、 西巴第雅 、 亞撒黑 、 示米拉末 、 約拿單 、 亞多尼雅 、 多比雅 、 駝巴多尼雅 九個 利未 人，以及 以利沙瑪 㧯 約蘭 兩個祭司。</verse>
				<verse number="9">佢等帶等上主个法律書，行透 猶大 逐鄉鎮，教導人民。</verse>
				<verse number="10">上主使 猶大 四周圍鄰國全部毋敢㧯 約沙法 相㓾。</verse>
				<verse number="11">有兜 非利士 人向 約沙法 進貢當多个銀仔㧯其他禮物；有兜 阿拉伯 人送給佢七千七百隻綿羊牯㧯七千七百隻山羊牯。</verse>
				<verse number="12">所以 約沙法 越來越強盛。佢在 猶大 逐所在建築防衛城㧯城鎮，</verse>
				<verse number="13">囤當多个貨物。 佢派勇敢个戰士看守 耶路撒冷 ，</verse>
				<verse number="14">照佢等所屬个宗族分派。 押拿 係 猶大 族軍隊个指揮官，手下有三十萬軍隊。</verse>
				<verse number="15">副指揮官係 約哈難 ，手下有二十八萬軍隊。</verse>
				<verse number="16">再來係 細基利 个孻仔 亞瑪斯雅 ，手下有二十萬軍隊。 ( 亞瑪斯雅 係自願來事奉上主个。)</verse>
				<verse number="17">便雅憫 族軍隊个指揮官係 以利雅大 ；佢係一個勇敢个戰士，指揮二十萬拿盾牌㧯弓箭个軍隊。</verse>
				<verse number="18">副指揮官係 約撒拔 ，帶領十八萬裝備精良、隨時做得相㓾个軍隊。</verse>
				<verse number="19">這兜人全部在 耶路撒冷 服事王。除這以外，王也派軍隊看守 猶大 其他个防衛城。</verse>
			</chapter>
			<chapter number="18">
				<verse number="1">猶大 王 約沙法 盡有財富㧯名聲，佢㧯 以色列 王 亞哈 結親。</verse>
				<verse number="2">幾年後， 約沙法 去 撒馬利亞 拜訪 亞哈 ； 亞哈 為到招待 約沙法 㧯佢个隨從㓾盡多牛羊，擺設筵席，想愛說服 約沙法 㧯佢共下去攻打 基列 个 拉末 城。</verse>
				<verse number="3">以色列 王 亞哈 問 猶大 王 約沙法 ：「你肯㧯𠊎共下去攻打 基列 个 拉末 麼？」 約沙法 應講：「你个事就係𠊎个事。𠊎个軍隊就係你个軍隊；𠊎等一定㧯你共下去相㓾。」</verse>
				<verse number="4">約沙法 又講：「總係，你愛先求問上主。」</verse>
				<verse number="5">所以， 以色列 王召集大約四百名先知來，問佢等：「𠊎做得去攻打 基列 个 拉末 麼？」 佢等講：「做你去！上帝會使王得勝。」</verse>
				<verse number="6">總係 約沙法 問：「這位敢毋係還有上主个先知？𠊎等做得請佢求問上主。」</verse>
				<verse number="7">以色列 王對 約沙法 講：「還有一個，係 音拉 个孻仔 米該雅 ，𠊎等做得通過佢求問上主。毋過𠊎當惱佢，因為佢從來毋識對𠊎預言講一句好話，總係預言講災禍个話。」 約沙法 講：「王毋好恁樣講！」</verse>
				<verse number="8">所以， 以色列 王喊一個宮廷官員來，命令佢黏時去將 音拉 个孻仔 米該雅 尋來。</verse>
				<verse number="9">以色列 王 亞哈 㧯 猶大 王 約沙法 著等王袍，在 撒馬利亞 城門外打麥場該位，坐在自家个寶座頂；所有个先知在佢等面前受感入神講預言。</verse>
				<verse number="10">其中有一個先知係 基拿拿 个孻仔 西底家 ；佢打兜鐵角，對 亞哈 講：「上主恁樣講：『你愛用這兜鐵角打 敘利亞 人，徹底消滅佢等。』」</verse>
				<verse number="11">其他个先知也全部恁樣預言講：「做你去攻打 基列 个 拉末 ，你一定會贏；上主會將該城交在王个手中。」</verse>
				<verse number="12">這時，該去喊 米該雅 來个官員對 米該雅 講：「所有个先知全部講王會成功，你最好也恁樣講。」</verse>
				<verse number="13">總係 米該雅 講：「𠊎指等永生个上主發誓，上帝愛𠊎講麼介，𠊎就講麼介。」</verse>
				<verse number="14">米該雅 到 亞哈 王面前个時，王問佢：「 米該雅 ，𠊎等做得去攻打 基列 个 拉末 麼？」 米該雅 應講：「做你等去打啊！你等一定會打贏；敵人會交在你等个手中！」</verse>
				<verse number="15">總係王對佢講：「你愛奉上主个名照實對𠊎講！這句話𠊎愛㧯你講幾多擺呢？」</verse>
				<verse number="16">米該雅 講：「𠊎看到 以色列 个軍隊散在山岡頂，就像無牧人个羊群。上主講：『這兜人無領袖，喊佢等平平安安轉屋下去！』」</verse>
				<verse number="17">以色列 王對 約沙法 講：「𠊎敢毋係講過，佢從來毋識對𠊎預言講一句好話？總係預言講災禍个話！」</verse>
				<verse number="18">米該雅 繼續講：「好！你等愛聽上主个話！𠊎看到上主坐在天庭个寶座，所有个天使企在佢个塍頭。</verse>
				<verse number="19">上主問：『麼人去騙 以色列 王 亞哈 ，俾佢到 基列 个 拉末 去送死呢？』該兜天使一儕講一樣。</verse>
				<verse number="20">後來，有一個靈到上主頭前來講：『𠊎去騙佢。』上主問：『你愛樣般騙呢？』</verse>
				<verse number="21">該靈講：『𠊎會使 亞哈 所有个先知講花撩。』上主講：『好！你去騙佢！你一定會成功。』」</verse>
				<verse number="22">最後 米該雅 講：「這就係事情个經過。上主使你个先知對你講花撩，上主已經命定你堵到災禍！」</verse>
				<verse number="23">基拿拿 个孻仔 西底家 先知行到 米該雅 面前，打佢个嘴角，責問佢：「上主个靈麼介時節離開𠊎，㧯你講話呢？」</verse>
				<verse number="24">米該雅 應講：「等到你走去最底背个細房間囥起來，該日你就會知了。」</verse>
				<verse number="25">然後， 以色列 王命令講：「將 米該雅 捉起來，送到市長 亞們 㧯王子 約阿施 該位，</verse>
				<verse number="26">吩咐佢等將 米該雅 關在監獄肚，逐日單淨給佢維持生命个餅㧯水，等到𠊎平安轉來。」</verse>
				<verse number="27">米該雅 講：「若係你還平安轉來，這就證明上主無通過𠊎講話！」佢又講：「各位，愛記得𠊎頭下所講个話！」</verse>
				<verse number="28">以色列 王 亞哈 㧯 猶大 王 約沙法 去 基列 攻打 拉末 城。</verse>
				<verse number="29">以色列 王對 約沙法 講：「𠊎等上戰場个時，𠊎來改裝，你還係著等王袍。」所以 以色列 王改裝去相㓾。</verse>
				<verse number="30">敘利亞 王命令厥該兜戰車个指揮官，愛專門打 以色列 王一儕。</verse>
				<verse number="31">所以當佢等看到 約沙法 个時，恅到佢就係 以色列 王，就全部去攻打佢。 約沙法 大聲喊，上主就來救佢；上帝使攻打佢个人轉身離開。</verse>
				<verse number="32">戰車个指揮官認出佢毋係 以色列 王就無繼續去逐佢。</verse>
				<verse number="33">總係，有一個 敘利亞 士兵隨便射一箭，堵好射到 以色列 王 亞哈 戰甲个接縫。 亞哈 對駛車个喊講：「𠊎著重傷了，倒轉去，退出戰場！」</verse>
				<verse number="34">該時，戰爭越來越厲害， 以色列 王忍耐企在戰車肚，面對 敘利亞 人，直到臨暗。日頭落山个時，佢就死掉。</verse>
			</chapter>
			<chapter number="19">
				<verse number="1">猶大 王 約沙法 平安轉到 耶路撒冷 王宮。</verse>
				<verse number="2">先見 哈拿尼 个孻仔 耶戶 去見王，對佢講：「你認為幫助壞人、惜該兜惱上主个人敢著？你所做个惹上主發譴。</verse>
				<verse number="3">雖然恁樣，你還有兜仔好處。你廢掉國內所有 亞舍拉 女神个柱像；你決心愛尋求上帝。」</verse>
				<verse number="4">約沙法 王住在 耶路撒冷 ，總係佢定期出巡民間，對南部个 別是巴 到北部 以法蓮 山區个邊界，喊人民歸向上主 — 佢等祖先个上帝。</verse>
				<verse number="5">佢在 猶大 逐防衛城設立審判官，</verse>
				<verse number="6">對佢等講：「你等辦事愛謹慎；你等毋係為人辦事，係為上主。你等宣判个時，上主㧯你等共下。</verse>
				<verse number="7">愛敬畏上主，辦事謹慎；因為上主 — 𠊎等个上帝係公義个，毋准你等 偏心，抑係被人收買。」</verse>
				<verse number="8">約沙法 也在 耶路撒冷 指派 利未 人、祭司㧯其他領袖做審判官，裁判違犯上主法律个案件㧯民間个糾紛。</verse>
				<verse number="9">佢指示佢等講：「你等愛用敬畏上主个心執行任務，愛忠心誠實辦事。</verse>
				<verse number="10">若係對逐所在有同胞因為㓾人抑係任何違犯法律誡命个案件送到你等面前，你等一定愛認真指導佢等在審問期間應該樣般做，恁樣，佢等正毋會得罪上主。若係你等恁樣做，你等就無罪。若無，你㧯你个同胞會惹上主發譴。</verse>
				<verse number="11">大祭司 亞瑪利雅 愛管理你等所有屬上主个事； 猶大 支族个族長， 以實瑪利 个孻仔 西巴第雅 愛管理你等所有屬王个事。 利未 人愛負責監督法庭判決个事。你等愛勇敢去實行以上个指示。願上主㧯善良个人共下。」</verse>
			</chapter>
			<chapter number="20">
				<verse number="1">過無幾久， 摩押 、 亞捫 㧯同盟 米烏尼 人 个軍隊侵犯 猶大 ，愛攻打 約沙法 王。</verse>
				<verse number="2">有人報告 約沙法 講：「 以東 該片有大軍對 死海 對面來攻擊你；佢等已經佔領 哈洗遜‧他瑪 。」 ( 哈洗遜‧他瑪 又安到 隱‧基底 。)</verse>
				<verse number="3">約沙法 著驚，決定祈求上主帶領，然後命令全國禁食。</verse>
				<verse number="4">人民對 猶大 逐城來到 耶路撒冷 ，祈求上主个帶領。</verse>
				<verse number="5">佢等㧯 耶路撒冷 人民聚集在聖殿个新庭院肚。 約沙法 王企在佢等个面前，</verse>
				<verse number="6">大聲祈禱講： 「上主 — 𠊎等祖先个上帝啊，你對天頂統治地上萬國；你有大能大力，無人有辦法抵擋你。</verse>
				<verse number="7">𠊎等个上帝啊，你个子民 以色列 徙到這位个時，你逐走這所在个原住民，將這土地賜給你个朋友 亞伯拉罕 个後代，永遠屬佢等。</verse>
				<verse number="8">佢等一直住在這位，也起聖殿榮光你个名。佢等知，</verse>
				<verse number="9">若係有災難臨到佢等，責罰佢等，像戰爭 、發瘟、飢荒，佢等做得來到這座敬拜你个聖殿，企在殿个面前；佢等在災難中向你呼求，你就聽佢等，拯救佢等。</verse>
				<verse number="10">「這下， 亞捫 人、 摩押 人㧯 以東 人來攻打𠊎等。以前𠊎等个祖先對 埃及 出來个時，你毋准佢等入去該兜人个國內，所以𠊎等个祖先行別條路，無消滅佢等。</verse>
				<verse number="11">這下佢等反轉恁樣報復𠊎等！佢等想愛對你親自賜給𠊎等个土地將𠊎等逐走。</verse>
				<verse number="12">𠊎等个上帝啊，求你刑罰佢等，因為𠊎等無力量來對抗這來攻打𠊎等个大軍。𠊎等毋知愛樣般做，只有仰望你。」</verse>
				<verse number="13">猶大 所有个男人，㧯佢等个𡜵娘子女，企在聖殿面前。</verse>
				<verse number="14">上主个靈降在眾人當中一個 利未 人身上。佢安到 雅哈悉 ，係 撒迦利雅 个孻仔；佢屬 亞薩 宗族，係 瑪探雅 个玄孫、 耶利 个曾孫、 比拿雅 个孫仔。</verse>
				<verse number="15">雅哈悉 講：「 約沙法 王、 猶大 㧯 耶路撒冷 所有个人民哪，上主講，你等毋使愁，也毋使驚恁強大个敵軍。決定戰爭个輸贏係上帝，毋係你等。</verse>
				<verse number="16">天光日，佢等對 洗斯 路口上來个時，你等去對抗佢等。你等會在 耶魯伊勒 曠野前个山壢口堵到佢等。</verse>
				<verse number="17">這場戰爭你等毋使打；單淨擺陣企穩來，你等會看到上主使你等得勝。 猶大 㧯 耶路撒冷 个人民哪，毋使愁，也毋使驚。天光日你等去面對佢等！上主會㧯你等共下！」</verse>
				<verse number="18">所以， 約沙法 王跪下來，伏在地上； 猶大 㧯 耶路撒冷 所有个民眾也㧯佢共下伏等敬拜上主。</verse>
				<verse number="19">利未 支族个 哥轄 㧯 可拉 族人企起來，大聲頌讚上主 — 以色列 个上帝。</verse>
				<verse number="20">第二日打早，人民到 提哥亞 附近个曠野去。佢等出發个時， 約沙法 對佢等講：「 猶大 㧯 耶路撒冷 个人民哪，愛信靠上主 — 你等个上帝，你等就企得穩；愛相信上主先知个話，你等就一定成功。」</verse>
				<verse number="21">王對人民講煞，命令歌手著特別節期時著个衫 ，行在軍隊頭前，透路大聲唱： 「讚美上主！ 佢个慈愛永遠長存！」</verse>
				<verse number="22">佢等開始唱歌讚美个時，上主使來侵犯个敵軍亂淨淨了，打輸掉了。</verse>
				<verse number="23">亞捫 人㧯 摩押 人攻打 以東 人个軍隊，將佢等全部消滅，然後轉過來彼此相㓾。</verse>
				<verse number="24">猶大 軍隊來到曠野个一座塔，向敵軍个陣地看，看到滿遍屍體，無一個走掉。</verse>
				<verse number="25">約沙法 㧯佢个軍隊就去搶戰利品；佢等尋到盡多頭牲 、用品、衫褲㧯其他值錢个東西。佢等用三日个時間收集戰利品，總係還係盡多拿毋走。</verse>
				<verse number="26">第四日，佢等聚集在 比拉加 山壢肚頌讚上主。所以這山壢安到「 比拉加 」 ，直到今晡日。</verse>
				<verse number="27">約沙法 帶領得勝个軍隊歡歡喜喜轉去 耶路撒冷 ，因為上主打贏佢等个仇敵。</verse>
				<verse number="28">佢等一路彈琴、七弦琴、歕喇叭轉到城肚，入去上主个聖殿。</verse>
				<verse number="29">逐國聽到上主樣般打贏 以色列 仇敵个消息全部當驚上帝。</verse>
				<verse number="30">恁樣，在 約沙法 統治期間國家太平；上帝賜給佢四境平安。</verse>
				<verse number="31">約沙法 三十五歲个時做 猶大 王，在 耶路撒冷 統治二十五年。厥姆係 示利希 个妹仔 阿蘇巴 。</verse>
				<verse number="32">約沙法 行厥爸 亞撒 無偏離个路，全部做上主看做著个事。</verse>
				<verse number="33">總係，佢無廢掉山岡頂个神廟；人民還係無全心全意敬拜佢等祖先个上帝。</verse>
				<verse number="34">約沙法 其他个事，對頭到尾，記在《 哈拿尼 个孻仔 耶戶 史》底背；這書係《 以色列 列王史》中个一卷。</verse>
				<verse number="35">有一擺， 猶大 王 約沙法 㧯做盡壞事个 以色列 王 亞哈謝 結盟；</verse>
				<verse number="36">佢等在 以旬‧迦別 港造一隊遠航个船仔。</verse>
				<verse number="37">瑪利沙 城人 多大瓦 个孻仔 以利以謝 預言警告 約沙法 講：「因為你㧯 亞哈謝 結盟，上主愛毀壞你所造个船仔。」後來該兜船仔斷真壞掉，從來毋識出海。</verse>
			</chapter>
			<chapter number="21">
				<verse number="1">約沙法 死後，葬在 大衛 城个王室墳墓肚。厥孻仔 約何蘭 承接佢做王。</verse>
				<verse number="2">猶大 王 約沙法 个孻仔 約何蘭 有六個兄弟；佢等个名係： 亞撒利雅 、 耶歇 、 撒迦利雅 、 亞撒列夫 、 米迦勒 、 示法提雅 。</verse>
				<verse number="3">佢等个阿爸給佢等當多金銀㧯其他值錢个東西，派佢等管理 猶大 个防衛城。因為 約何蘭 係長子， 約沙法 立佢做太子。</verse>
				<verse number="4">約何蘭 堅固自家个王位後，將該兜老弟全部㓾掉，也㓾掉好多 以色列 个官員。</verse>
				<verse number="5">約何蘭 三十二歲个時做王，在 耶路撒冷 統治八年。</verse>
				<verse number="6">佢討 亞哈 个妹仔做𡜵娘，所以佢就像 亞哈 屋下个人共樣，做 以色列 該兜王所做、上主看做邪惡个事。</verse>
				<verse number="7">總係上主毋肯滅 大衛 个王朝；因為佢識㧯 大衛 立約，答應佢，講佢个子孫愛永遠有人做王。</verse>
				<verse number="8">約何蘭 在位期間， 以東 造反，對 猶大 獨立出去，自家設立王。</verse>
				<verse number="9">所以 約何蘭 帶領軍隊、戰車去攻打 以東 人，反轉卻被佢等包圍，到暗晡時正逃走。</verse>
				<verse number="10">恁樣，對該日以後， 以東 就對 猶大 獨立出去。在這期間， 立拿 城也造反，因為 約何蘭 離開上主 — 厥祖先个上帝。</verse>
				<verse number="11">佢甚至在 猶大 个山岡頂起神廟，害 猶大 㧯 耶路撒冷 个人民犯淫亂得罪上主。</verse>
				<verse number="12">先知 以利亞 寫信仔給 約何蘭 講：「上主 — 若祖先 大衛 个上帝責備你；因為你無學若爸 約沙法 㧯若公 猶大 王 亞撒 个好模樣，</verse>
				<verse number="13">反轉去學 以色列 該兜王个壞樣，帶領 猶大 㧯 耶路撒冷 个人民行淫亂悖逆上帝，像 亞哈 㧯佢个繼承人共樣帶領 以色列 人悖逆上帝。你甚至㓾掉該兜老弟，實在佢等比你較好。</verse>
				<verse number="14">所以，上主愛嚴嚴責罰你个人民、你个子女、㧯𡜵娘、細姐，又毀壞你一切个財物。</verse>
				<verse number="15">你本人會發一種嚴重个腸仔病，一日比一日厲害，直到腸仔落下來。」</verse>
				<verse number="16">有兜 非利士 人㧯住在 古實 邊堘个 阿拉伯 人；上主使佢等來攻打 約何蘭 。</verse>
				<verse number="17">佢等攻入 猶大 ，放勢搶王宮，將王个𡜵娘、細姐㧯該兜孻仔全部捉去，只有賸到佢个滿子 亞哈謝 。</verse>
				<verse number="18">這兜事以後，上主使王發一種嚴重个腸仔病；</verse>
				<verse number="19">這種病大約拖兩年久，一日比一日較嚴重，腸仔落下來，最尾痛苦到死。佢个人民並無為佢行燒火禮，無像人民對厥祖先所做个恁樣。</verse>
				<verse number="20">約何蘭 三十二歲做王，在 耶路撒冷 統治八年。佢死个時無人思念佢。佢等將佢葬在 大衛 城，總係無葬在王室个墳墓肚。</verse>
			</chapter>
			<chapter number="22">
				<verse number="1">阿拉伯 人个突擊隊識將 猶大 王 約何蘭 所有个孻仔全部㓾掉，只有賸到滿子 亞哈謝 。所以， 耶路撒冷 人民立 亞哈謝 承接厥爸个王位。</verse>
				<verse number="2">亞哈謝 二十二歲 个時做 猶大 王，在 耶路撒冷 統治一年。厥姆安到 亞她利雅 ，係 以色列 王 亞哈 个妹仔， 暗利 个孫女。</verse>
				<verse number="3">亞哈謝 也學 亞哈 家个壞模樣；因為厥姆代佢出主意，帶佢做壞事。</verse>
				<verse number="4">亞哈謝 行上主看做邪惡个事；因為厥爸死後， 亞哈 王屋下个人變做佢个顧問，教壞佢。</verse>
				<verse number="5">佢聽佢等个建議，㧯 以色列 王 亞哈 个孻仔 約蘭 聯合起來，去攻打 敘利亞 王 哈薛 。雙方軍隊在 基列 个 拉末 相㓾， 約蘭 著傷，</verse>
				<verse number="6">就轉到 耶斯列 城療傷； 亞哈謝 到該位去看佢。</verse>
				<verse number="7">上帝因為 亞哈謝 去看 約蘭 這件事使佢滅亡。 亞哈謝 在 耶斯列 个時，佢㧯 約蘭 堵到 寧示 个孫仔 耶戶 ； 耶戶 係上主揀選來毀滅 亞哈 王朝个人。</verse>
				<verse number="8">該時， 耶戶 堵好去執行上帝對 亞哈 家个責罰，堵到該兜跈 亞哈謝 來个 猶大 領袖㧯佢該兜姪仔。 耶戶 將佢等全部㓾掉。</verse>
				<verse number="9">亞哈謝 囥在 撒馬利亞 ，被 耶戶 个人尋到，將佢交給 耶戶 㓾死。佢等將佢埋葬，因為佢等講：「無論樣般講，佢還係該專心尋求上主个 約沙法 王个孫仔。」 亞哈謝 家無賸一個人好保存王位。</verse>
				<verse number="10">亞哈謝 王个阿姆 亞她利雅 一聽講厥孻仔被人㓾死，就下令將 猶大 王个家族全部剿滅。</verse>
				<verse number="11">亞哈謝 有一個共爺無共𡟓个老妹安到 約示芭 ；姖係 約何蘭 王个妹仔、嫁給祭司 耶何耶大 。 約示芭 將 亞哈謝 个一個孻仔 約阿施 對該兜會被人㓾死个王子中偷偷仔救出來，將佢㧯乳𡟓囥在聖殿肚个間房。 約示芭 將 約阿施 囥起來，救佢離開 亞她利雅 个手，無被太后㓾死。</verse>
				<verse number="12">亞她利雅 用太后个身份統治 猶大 个期間， 約阿施 在上帝个聖殿肚囥六年。</verse>
			</chapter>
			<chapter number="23">
				<verse number="1">到第七年，祭司 耶何耶大 認為應該可以行動了。佢㧯五個軍官結盟；這五個人係 耶羅罕 个孻仔 亞撒利雅 、 約哈難 个孻仔 以實瑪利 、 俄備得 个孻仔 亞撒利雅 、 亞大雅 个孻仔 瑪西雅 、 細基利 个孻仔 以利沙法 。</verse>
				<verse number="2">佢等行透 猶大 逐城，召集 利未 人㧯逐宗族族長來 耶路撒冷 。</verse>
				<verse number="3">佢等在上帝个聖殿肚聚集，㧯王个孻仔 約阿施 立約。 耶何耶大 對佢等講：「這係先王个孻仔。這下佢應該做王，照上主應許給 大衛 王後代个話。</verse>
				<verse number="4">你等愛恁樣做：安息日，祭司㧯 利未 人當班个時，當中三分之一个人愛看守聖殿个門，</verse>
				<verse number="5">三分之一个人愛看守王宮，三分之一个人愛看守 根基門 ；所有个人民愛集合在上主聖殿个院內。</verse>
				<verse number="6">祭司㧯當班个 利未 人以外，麼人都做毋得入上主个聖殿。因為祭司㧯 利未 人係歸屬上主个，做得入去；其他个人民一定愛遵守上主个規定留在外背。</verse>
				<verse number="7">利未 人愛在王个周圍擎武器保護王；王行到㖠位就跈到㖠位。麼人入去聖殿就將佢㓾掉。」</verse>
				<verse number="8">利未 人㧯 猶大 个人民全部照祭司 耶何耶大 个指示做。安息日無當班个人也愛值班；所以，無論當班抑係無當班个，逐個官長全部派出來。</verse>
				<verse number="9">祭司 耶何耶大 將以前放在聖殿肚 大衛 王該兜槍㧯盾牌交給軍官，</verse>
				<verse number="10">派民眾拿等武器企在聖殿頭前，對南片到北片，在祭壇㧯聖殿該位，愛在王子四周圍保護佢。</verse>
				<verse number="11">然後， 耶何耶大 㧯佢該兜孻仔帶王子 約阿施 出來，將王冠戴在佢个頭那頂，將一本有關王權條款个法律書交給佢，立佢做王。佢等膏油設立 約阿施 ；民眾全部大聲喊：「願王萬歲！」</verse>
				<verse number="12">亞她利雅 太后聽到民眾走等對王歡喜盡嘶个聲，遽遽到群眾聚集个聖殿去。</verse>
				<verse number="13">姖看到新王照儀式企在聖殿入口个柱仔堘頭，該兜軍官㧯歕喇叭个圍等佢。民眾全部歡喜到大聲嘶，盡歕喇叭；聖殿歌手彈奏樂器，帶領人歌唱讚美。 亞她利雅 扯爛衫，喊講：「造反了！造反了！」</verse>
				<verse number="14">祭司 耶何耶大 無愛 亞她利雅 在上主个聖殿該位被人㓾死，吩咐該兜軍官講：「將姖對守衛當中帶出去；敢救姖个，共樣愛俾佢死。」</verse>
				<verse number="15">所以，佢等捉等 亞她利雅 ，將姖帶到王宮，在 馬門 該所在將姖㓾掉。</verse>
				<verse number="16">祭司 耶何耶大 㧯人民並 約阿施 王立約，全部愛做上主个子民。</verse>
				<verse number="17">所以大家去 巴力 廟，將廟拆掉，敲掉祭壇㧯偶像，又在祭壇頭前㓾掉 巴力 个祭司 馬坦 。</verse>
				<verse number="18">耶何耶大 派祭司㧯 利未 人負責上主聖殿个工作。佢等愛執行 大衛 所指定个任務，就係照 摩西 个法律向上主獻燒化祭，並照 大衛 所定个負責音樂㧯慶典。</verse>
				<verse number="19">耶何耶大 也派守衛在上主聖殿个逐門口看守，毋准禮儀上無淨浰个人入去。</verse>
				<verse number="20">耶何耶大 帶領所有軍官、貴族、民間領袖、㧯其他个人民，護送王對聖殿到王宮；佢等對大門入去；王坐上寶座。</verse>
				<verse number="21">全國人民歡喜快樂，城肚也當平靜，因為該時 亞她利雅 已經被人㓾死。</verse>
			</chapter>
			<chapter number="24">
				<verse number="1">約阿施 七歲个時做 猶大 王，在 耶路撒冷 統治四十年。厥姆 西比亞 係 別是巴 城个人。</verse>
				<verse number="2">約阿施 在祭司 耶何耶大 還生个年日行上主看做著个事。</verse>
				<verse number="3">耶何耶大 為 約阿施 王選兩個𡜵娘；姖兩儕為王生養子女。</verse>
				<verse number="4">約阿施 在位無幾久就決定愛整上主个聖殿。</verse>
				<verse number="5">佢命令祭司㧯 利未 人到 猶大 逐城向人民收稅，做逐年整上帝聖殿个費用。佢愛佢等趕緊辦理，總係 利未 人延纏時間。</verse>
				<verse number="6">約阿施 王將佢等个領袖 耶何耶大 喊來，問佢：「你做麼介無監督 利未 人向 猶大 㧯 耶路撒冷 人民收稅呢？這稅係上主个僕人 摩西 規定 以色列 人民納个，為到愛維持上主約櫃个聖帳篷。」</verse>
				<verse number="7">(原來該壞婦人家 亞她利雅 个手下損壞上帝个聖殿，又拿聖殿中盡多聖物去拜 巴力 。)</verse>
				<verse number="8">王命令 利未 人做一隻奉獻箱，放在聖殿門口，</verse>
				<verse number="9">吩咐佢等到 耶路撒冷 㧯 猶大 逐所在㧯人民講，將上帝僕人 摩西 以前在曠野規定徵收个稅帶來獻給上主。</verse>
				<verse number="10">人民㧯該兜領袖全部當歡喜，就將佢等个稅金帶來，放在箱仔肚。</verse>
				<verse number="11">逐日 利未 人將箱仔扛到王所指派監督這箱仔个官員該位。箱仔裝滿个時，王室書記㧯大祭司个代表就將錢拿出來，將箱仔放轉去。恁樣，佢等收到盡多个錢。</verse>
				<verse number="12">王㧯 耶何耶大 將錢交給負責整聖殿个人，喊佢等請打石、木匠、打鐵、打銅个師傅來進行整聖殿个工作。</verse>
				<verse number="13">所有个工人全部煞猛工作，將上帝个聖殿整到原來个樣仔，㧯以前共樣恁堅固。</verse>
				<verse number="14">修整工作結束，佢等將賸到个金銀交給王㧯 耶何耶大 ； 耶何耶大 用它來製造聖殿个盤碗㧯其他用品，在禮拜㧯獻祭个時使用。 耶何耶大 還生个年日，人民常常在上主个聖殿照時獻燒化祭。</verse>
				<verse number="15">耶何耶大 食到當老，一百三十歲正過身。</verse>
				<verse number="16">為到紀念佢為 以色列 人民，又為上帝㧯聖殿所做个一切，佢等將佢葬在 大衛 城个王室墳墓肚。</verse>
				<verse number="17">耶何耶大 死後， 猶大 該兜領袖來朝拜 約阿施 王，王就聽從佢等个建議。</verse>
				<verse number="18">所以人民無在上主个聖殿敬拜佢等祖先个上帝，反轉去拜 亞舍拉 女神㧯其他偶像；因為佢等所犯个罪，上主對 猶大 㧯 耶路撒冷 發譴。</verse>
				<verse number="19">上主派先知警告佢等，愛佢等歸向佢，總係人民毋聽。</verse>
				<verse number="20">後來，上帝个靈感動祭司 耶何耶大 个孻仔 撒迦利亞 ；佢就企在人民看得到个所在，喊講：「上帝問：你等做麼介違背上主个命令來惹災禍？你等離開上主，所以佢也愛離開你等！」</verse>
				<verse number="21">大家就想謀害 撒迦利亞 ；王喊人民在上主聖殿个庭院肚用石頭將佢㧹死。</verse>
				<verse number="22">約阿施 王毋記得 撒迦利亞 个阿爸 耶何耶大 對佢个恩情，反轉將 撒迦利亞 㓾掉。 撒迦利亞 斷氣前講：「願上主看到你所做个，責罰你！」</verse>
				<verse number="23">該年秋天， 敘利亞 軍隊來攻打 約阿施 王，來到 猶大 㧯 耶路撒冷 ，㓾掉所有个領袖，又搶走盡多戰利品運到 大馬士革 王該位。</verse>
				<verse number="24">敘利亞 軍隊只有一細隊，總係上主使佢等打贏比佢等強大个 猶大 軍隊，因為人民離開上主 — 佢等祖先个上帝。上主用這方法責罰 約阿施 王。</verse>
				<verse number="25">佢受重傷。軍隊撤退个時，厥手下兩個軍官造反，將佢㓾死在眠床頂，為到報祭司 耶何耶大 个孻仔 被佢㓾死个冤仇。 約阿施 葬在 大衛 城，總係毋係在王室个墳墓肚。</verse>
				<verse number="26">(造反个係 亞捫 婦人 示米押 个孻仔 撒拔 㧯 摩押 婦人 示米利 个孻仔 約薩拔 。)</verse>
				<verse number="27">約阿施 該兜孻仔个事、盡多對佢毋好个預言、㧯佢修整上帝聖殿个事，全部記在《列王史》底背。佢个孻仔 亞瑪謝 承接佢做王。</verse>
			</chapter>
			<chapter number="25">
				<verse number="1">亞瑪謝 二十五歲个時做王，在 耶路撒冷 統治二十九年。佢个阿姆 約耶但 係 耶路撒冷 人。</verse>
				<verse number="2">亞瑪謝 行上主看做著个事，總係無專心。</verse>
				<verse number="3">佢一堅固王權，就處死該兜暗殺厥爸个官員。</verse>
				<verse number="4">總係佢並無㓾死該兜人个子女，係照上主在 摩西 法律書中所命令个：「爺𡟓無應該因為子女所犯个罪來處死；子女也無應該因為爺𡟓所犯个罪來處死。逐儕應當擔當自家所犯个罪。」</verse>
				<verse number="5">亞瑪謝 王召集 猶大 个人民，將 猶大 㧯 便雅憫 支族个人組織起來，照佢等所屬个宗族編做一千人一隊㧯一百人一隊个部隊，逐隊設立官長指揮。二十歲以上个男人全部在內，總共有三十萬人。佢等係特選个部隊，全部做得上戰場，盡會用槍㧯盾牌。</verse>
				<verse number="6">另外， 亞瑪謝 又用大約三千四百公斤銀仔對 以色列 請來十萬大能个勇士。</verse>
				<verse number="7">總係有一個神人來見王，對佢講：「王啊，毋好帶這兜 以色列 軍隊㧯你共下去；上主毋㧯這兜北國个人共下。</verse>
				<verse number="8">你若係一定愛去勇敢爭戰，上帝會使你在敵人面前失敗；事實上，上帝正有權決定輸贏。」</verse>
				<verse number="9">亞瑪謝 問神人：「𠊎付給 以色列 軍隊該三千四百公斤个銀仔愛樣般呢？」 神人講：「上主會賜給你个比這還較多！」</verse>
				<verse number="10">所以 亞瑪謝 將請來个軍隊解散，喊佢等轉去；佢等就當惱 猶大 人，氣噴噴仔走轉去了。</verse>
				<verse number="11">亞瑪謝 拿出勇氣，帶領軍隊到 鹽谷 ；在該位佢㓾掉一萬 以東 人。</verse>
				<verse number="12">猶大 軍隊又捉到一萬人。佢等將捉來个人帶到 西拉 城个崩崗頂，對該位㩳下去，所以這兜人全部跌死在崩崗下。</verse>
				<verse number="13">同時， 亞瑪謝 所喊轉去个 以色列 軍隊卻攻打 猶大 逐城，對 撒馬利亞 直到 伯‧和崙 㓾掉三千人，搶走盡多財物。</verse>
				<verse number="14">亞瑪謝 打贏 以東 人轉來，將 以東 人个偶像也帶轉來，立做自家个神明，向它兜跪拜燒香。</verse>
				<verse number="15">這事惹上主發譴，所以佢派一個先知去見 亞瑪謝 ，責備佢講：「你做麼介拜該兜外族神明？它兜連救自家个人民離開你个手就做毋到！」</verse>
				<verse number="16">亞瑪謝 插嘴講：「𠊎等敢有請你做國王个顧問？恬恬！樣般愛惹𠊎將你㓾掉！」 先知就恬恬，佢又講：「這下𠊎知上帝已經決定愛消滅你；因為你做這事，又毋接受𠊎个勸話。」</verse>
				<verse number="17">猶大 王 亞瑪謝 㧯佢个顧問商量後，派使者去見 耶戶 个孫仔、 約哈斯 个孻仔 以色列 王 約華施 ，激佢講：「𠊎等來去戰場拚輸贏 ！」</verse>
				<verse number="18">總係 以色列 王 約華施 派使者去見 猶大 王 亞瑪謝 ，應佢講：「有一擺， 黎巴嫩 山頂个一頭竻仔對一頭香柏樹講：『將你个妹仔嫁給𠊎个孻仔啊！』無想到，有一隻野獸對該位過，該頭竻仔卻被牠蹂掉。</verse>
				<verse number="19">亞瑪謝 啊，打贏 以東 人你个心就恁驕傲噢！在屋下享福就好了！何麼死苦惹這個災禍，害你㧯 猶大 人民共下滅亡？」</verse>
				<verse number="20">亞瑪謝 毋聽。這係上帝所決定个，愛 亞瑪謝 㧯 猶大 人民被人打輸，因為佢等拜 以東 人个偶像。</verse>
				<verse number="21">所以 以色列 王 約華施 帶領軍隊，在 猶大 个 伯‧示麥 㧯 猶大 王 亞瑪謝 相㓾。</verse>
				<verse number="22">猶大 軍隊打輸，所有士兵全部走轉屋下去。</verse>
				<verse number="23">以色列 王 約華施 在 伯‧示麥 捉到 亞哈謝 个孫仔、 約阿施 个孻仔 猶大 王 亞瑪謝 ，將佢帶到 耶路撒冷 ，然後進攻 耶路撒冷 ，將 以法蓮 門到 角門 大約兩百公尺長个一段城牆全部拆掉。</verse>
				<verse number="24">約華施 又將上帝聖殿肚个金仔、銀仔、 俄別‧以東 个後代看守个聖殿用品，㧯王宮个財寶全部帶轉 撒馬利亞 ，也帶兜人質轉去。</verse>
				<verse number="25">以色列 王 約哈斯 个孻仔 約華施 死後， 猶大 王 約阿施 个孻仔 亞瑪謝 還食加十五年。</verse>
				<verse number="26">亞瑪謝 其他个事，對頭到尾全部記在《 猶大 㧯 以色列 列王史》底背。</verse>
				<verse number="27">對 亞瑪謝 悖逆上主該時起，在 耶路撒冷 就有人愛謀殺佢。最尾佢逃走到 拉吉 城，總係仇敵逐到該位，將佢㓾掉。</verse>
				<verse number="28">有人將佢个屍體用馬仔載轉，葬在 猶大 个城、厥祖先 个墳墓肚。</verse>
			</chapter>
			<chapter number="26">
				<verse number="1">所有 猶大 人民全部設立 亞瑪謝 十六歲个孻仔 烏西雅 承接佢做王。</verse>
				<verse number="2">亞瑪謝 死後， 烏西雅 將 以拉他 收轉來歸屬 猶大 ，重新整過。</verse>
				<verse number="3">烏西雅 十六歲時做王，在 耶路撒冷 統治五十二年。厥姆 耶可利雅 係 耶路撒冷 人。</verse>
				<verse number="4">烏西雅 學厥爸 亞瑪謝 个模樣，行上主看做著个事。</verse>
				<verse number="5">在 撒迦利亞 教佢樣般敬畏上帝个年日，佢專心尋求上帝；佢忠心事奉上主个時，上帝就賜福給佢。</verse>
				<verse number="6">烏西雅 㧯 非利士 人相㓾。佢拆掉 迦特 城、 雅比尼 城㧯 亞實突 城个城牆，又在 亞實突 附近㧯 非利士 其他所在起防衛城。</verse>
				<verse number="7">上帝幫助佢打贏 非利士 人、住在 姑珥‧巴力 个 阿拉伯 人，㧯 米烏尼 人。</verse>
				<verse number="8">亞捫 人向 烏西雅 進貢。佢个勢力強大，名聲傳到 埃及 。</verse>
				<verse number="9">烏西雅 為到加強 耶路撒冷 个防備工事，在 角門 、 谷門 㧯城牆轉角个所在全部起盡堅固个城樓。</verse>
				<verse number="10">佢也在城外造守望塔，挖盡多井，因為佢在西片山腳下㧯平原有當多牛群。因為佢注重耕種，就鼓勵人民在山地種葡萄，在平原肥个土地來耕種。</verse>
				<verse number="11">烏西雅 有強大个軍隊，隨時做得編隊上戰場。軍方个記錄有祕書 耶利 㧯官長 瑪西雅 保管，並有王室个一個指揮官 哈拿尼雅 監督。</verse>
				<verse number="12">軍隊有兩千六百個家族領袖指揮；</verse>
				<verse number="13">佢等手下有三十萬七千五百個士兵，全部係當會相㓾个，有能力做得為王打贏敵人个戰士。</verse>
				<verse number="14">烏西雅 為全軍隊裝備盾牌、槍、鐵帽、戰甲、弓箭、㧯愛拂个石仔。</verse>
				<verse number="15">在 耶路撒冷 ，佢个工程師在城樓㧯城牆轉角安機器，做得對頂高射箭，㧹大石頭。佢个名聲傳到逐位，勢力非常強大，因為上帝幫助佢。</verse>
				<verse number="16">烏西雅 王个強大使佢漸漸驕傲起來，為自家惹災禍。佢得罪上主 — 佢个上帝，因為佢入上主个聖殿去，想愛親身在香壇頂燒香。</verse>
				<verse number="17">祭司 亞撒利雅 帶等八十個上主勇敢个祭司跈等王入去，</verse>
				<verse number="18">愛阻擋佢。佢等講：「 烏西雅 啊，你無權向上主燒香；只有 亞倫 後代做祭司个，正係分別為聖來做這事个人。請離開這聖地。你已經得罪主上帝；你再得毋到佢給你个榮耀了。」</verse>
				<verse number="19">烏西雅 企在聖殿个香壇堘頭，手拿等香爐。佢對該兜祭司發譴，就在該時，佢个額頭忽然發癩病。</verse>
				<verse number="20">大祭司 亞撒利雅 㧯其他祭司看到王个額頭發癩病，佢等就逐佢離開聖殿；佢自家也趕緊離開，因為上主已經責罰佢。</verse>
				<verse number="21">烏西雅 王賸到个年日因這癩病在禮儀上無淨浰，住在隔離个王宮肚，做毋得再入聖殿；國家大事交給厥孻仔 約坦 掌管。</verse>
				<verse number="22">亞摩斯 个孻仔 以賽亞 先知將 烏西雅 王統治期間所有个事全部記錄下來。</verse>
				<verse number="23">烏西雅 死後，葬在王室个塚埔，毋係在王室个墳墓肚，因為佢發過癩病。佢个孻仔 約坦 承接佢做王。</verse>
			</chapter>
			<chapter number="27">
				<verse number="1">約坦 二十五歲个時做王，在 耶路撒冷 統治十六年。厥姆安到 耶露莎 ，係 撒督 个妹仔。</verse>
				<verse number="2">約坦 行上主看做著个事，學厥爸 烏西雅 个模樣，總係無像厥爸入去聖殿燒香來犯罪。人民還係繼續犯罪。</verse>
				<verse number="3">約坦 起上主聖殿个北門，又在 耶路撒冷 个 俄斐勒 加起城牆。</verse>
				<verse number="4">佢在 猶大 个山區建設城鎮，在山林肚起城堡㧯守望台。</verse>
				<verse number="5">約坦 攻打 亞捫 王㧯佢个軍隊，打贏佢等，強迫 亞捫 人向佢進貢三年，逐年愛繳三千四百公斤銀仔，一千公噸小麥，一千公噸大麥。</verse>
				<verse number="6">約坦 一日比一日強大，因為佢忠心順從上主 — 佢个上帝。</verse>
				<verse number="7">約坦 在位期間其他个事，戰爭、政策等，全部記在《 以色列 㧯 猶大 列王史》底背。</verse>
				<verse number="8">約坦 二十五歲个時做王；佢在 耶路撒冷 統治十六年。</verse>
				<verse number="9">約坦 死後葬在 大衛 城；佢个孻仔 亞哈斯 承接佢做王。</verse>
			</chapter>
			<chapter number="28">
				<verse number="1">亞哈斯 二十歲个時做王；佢在 耶路撒冷 統治十六年。佢無學厥祖先 大衛 王行上主看做著个事；</verse>
				<verse number="2">佢反轉學 以色列 列王个壞模樣，鑄造 巴力 个像，</verse>
				<verse number="3">在 欣嫩子 山壢燒香，甚至將自家个孻仔用火燒來獻給偶像，學原來外族人个邪惡行為；該兜人民就係 以色列 人入去這地个時上主逐出去个人。</verse>
				<verse number="4">亞哈斯 在神廟內、山岡頂、㧯逐頭大樹下獻祭燒香。</verse>
				<verse number="5">因為 亞哈斯 王犯罪，上主 — 佢个上帝俾 敘利亞 王打贏佢，捉當多 猶大 人到 大馬士革 去。上主也俾 利瑪利 个孻仔 以色列 王 比加 大贏 亞哈斯 ，在一日內㓾掉十二萬 猶大 个精兵。上主 — 佢等祖先个上帝准這事發生係因為 猶大 人民離開佢。</verse>
				<verse number="6"></verse>
				<verse number="7">一個 以色列 士兵 細基利 㓾掉 亞哈斯 王个孻仔 瑪西雅 ，也㓾掉王宮總管 押斯利甘 㧯宰相 以利加拿 。</verse>
				<verse number="8">以色列 軍隊將佢等个同胞 猶大 人，連𡜵娘人㧯細人仔總共二十萬人捉到 撒馬利亞 去，也搶走盡多財物。</verse>
				<verse number="9">有上主个一個先知安到 俄德 ，住在 撒馬利亞 城。 以色列 軍隊帶等對 猶大 捉來个人轉到 撒馬利亞 、愛入城个時， 俄德 去見佢等，講：「上主 — 你等祖先个上帝因為惱 猶大 正俾你等打贏佢等，你等卻大發譴，亂㓾佢等。</verse>
				<verse number="10">這下，你等又想愛使 耶路撒冷 㧯 猶大 个男女做你等个奴才。敢講你等毋識得罪上主 — 你等个上帝係麼？</verse>
				<verse number="11">聽𠊎講！這兜捉來个人係你等个兄弟姊妹。放佢等轉去，因為上主向你等大發譴了。」</verse>
				<verse number="12">北國个 以法蓮 有幾個領袖 — 約哈難 个孻仔 亞撒利雅 、 米實利末 个孻仔 比利家 、 沙龍 个孻仔 耶希西家 、 哈得萊 个孻仔 亞瑪撒 共下阻擋戰爭轉來个軍隊。</verse>
				<verse number="13">佢等講：「毋好將該兜捉來个人帶到這位來！𠊎等早就得罪上主；應該被佢責罰。你等這下還愛作惡加重𠊎等个罪係麼？𠊎等个過犯已經罅重了；上主个發譴已經臨到 以色列 了。」</verse>
				<verse number="14">所以這兜軍隊將捉到个人㧯戰利品交給人民㧯佢等个領袖。</verse>
				<verse number="15">佢等推選這四個領袖出來照顧捉來个人；對搶來个戰利品中拿衫褲㧯鞋給捉來个人著，給佢等罅額个食物，又用橄欖油膏佢等个傷口，將毋會行个放在驢仔背頂，送所有捉來个人轉 猶大 地區，到棕樹城 耶利哥 去。然後， 以色列 人倒轉 撒馬利亞 。</verse>
				<verse number="16">以東 人又來侵犯 猶大 ，捉去盡多人。所以， 亞哈斯 王求 亞述 皇帝 提革拉‧比列色 幫助。</verse>
				<verse number="17"></verse>
				<verse number="18">就在這時， 非利士 人侵犯 猶大 南片㧯西片山腳下个城市。佢等佔領 伯‧示麥 、 亞雅崙 、 基低羅 、 梭哥 、 亭拿 、 瑾鎖 ，㧯附近个村莊，又住在該位。</verse>
				<verse number="19">猶大 王 亞哈斯 害人民大大得罪上主，所以上主使災難臨到 猶大 。</verse>
				<verse number="20">亞述 皇帝毋單淨毋幫助 亞哈斯 ，反轉來欺負佢。</verse>
				<verse number="21">所以 亞哈斯 就將上主聖殿㧯王宮个金仔，並民間領袖屋下个金仔全部送給 亞述 皇帝；總係恁樣還係無麼介用。</verse>
				<verse number="22">在這當艱難个時節， 亞哈斯 王反轉比以前更加得罪上主。</verse>
				<verse number="23">佢獻牲儀給 大馬士革 个神明，因為 敘利亞 人打贏佢。佢講：「這係因為佢等个神明幫助佢等；若係𠊎向佢等个神明獻祭，佢等也可能會幫助𠊎。」總係該兜神明使 亞哈斯 㧯佢个國滅亡。</verse>
				<verse number="24">亞哈斯 又將上帝聖殿肚所有个東西敲碎，將上主个聖殿關起來，在 耶路撒冷 逐轉角个所在設立祭壇。</verse>
				<verse number="25">佢又在 猶大 逐個城市个山岡頂起神廟，向外族神明燒香。恁樣， 亞哈斯 惹上主 — 厥祖先个上帝發譴。</verse>
				<verse number="26">亞哈斯 其他个事㧯佢个行為，從頭到尾全部記在《 猶大 㧯 以色列 列王史》底背。</verse>
				<verse number="27">亞哈斯 死後葬在 耶路撒冷 ，總係無放在王室个墳墓肚。佢个孻仔 希西家 承接佢做王。</verse>
			</chapter>
			<chapter number="29">
				<verse number="1">希西家 二十五歲个時做 猶大 王，在 耶路撒冷 統治二十九年。厥姆 亞比雅 係 撒迦利雅 个妹仔。</verse>
				<verse number="2">希西家 學厥祖先 大衛 王个模樣，行上主看做著个事。</verse>
				<verse number="3">希西家 做王該年个第一隻月，佢重新將上主聖殿个門打開來，並進行修整个工作。</verse>
				<verse number="4">佢召集祭司㧯 利未 人到聖殿个東院，</verse>
				<verse number="5">在該位對佢等講：「 利未 人哪，愛聽𠊎講：這下你等愛潔淨自家；你等也愛潔淨上主 — 你等祖先上帝个聖殿，將所有屙糟个東西除掉。</verse>
				<verse number="6">𠊎等个祖先對上主 — 𠊎等个上帝毋忠誠，行佢看做邪惡个事，離開佢，轉面背向上主所住个所在。</verse>
				<verse number="7">佢等將聖殿个門關起來，由在燈火烏掉，毋燒香，也無在 以色列 上帝个聖殿獻燒化祭。</verse>
				<verse number="8">所以，上主向 猶大 㧯 耶路撒冷 發譴。上主个行動使人著驚、恥笑佢等。這一切你等全部當清楚。</verse>
				<verse number="9">看哪！𠊎等个祖先死在戰場，𠊎等个𡜵娘子女被人捉去。</verse>
				<verse number="10">「這下，𠊎決定㧯上主 — 以色列 个上帝立約，佢个發譴正會離開𠊎等。</verse>
				<verse number="11">𠊎親愛个 利未 人哪，毋好延纏；你等係上主揀選來向佢燒香个人，愛領導人民敬拜佢。」</verse>
				<verse number="12">在該位个 利未 人有： 哥轄 宗族： 亞瑪賽 个孻仔 瑪哈 㧯 亞撒利雅 个孻仔 約珥 ； 米拉利 宗族： 亞伯底 个孻仔 基士 㧯 耶哈利勒 个孻仔 亞撒利雅 ； 革順 宗族： 薪瑪 个孻仔 約亞 㧯 約亞 个孻仔 伊甸 ； 以利撒反 宗族： 申利 㧯 耶利 ； 亞薩 宗族： 撒迦利雅 㧯 瑪探雅 ； 希幔 宗族： 耶歇 㧯 示每 ； 耶杜頓 宗族： 示瑪雅 㧯 烏薛 。</verse>
				<verse number="13"></verse>
				<verse number="14"></verse>
				<verse number="15">這兜人召集佢等个 利未 族兄弟，全部照禮儀潔淨自家，然後照王个命令、根據上主个法律開始潔淨上主个聖殿。</verse>
				<verse number="16">祭司入去潔淨上主个聖殿。佢等將所有無淨浰个東西搬到聖殿个庭院， 利未 人將它兜搬出城外，㧒落 汲淪 溪。</verse>
				<verse number="17">這項工作在正月初一開始，到第八日就全部完工，連聖殿个前堂也拚淨了。然後佢等又工作八日，到正月十六，將聖殿準備好勢。</verse>
				<verse number="18">利未 人向 希西家 王報告講：「𠊎等已經將上主个聖殿照禮儀拚淨了，包含獻燒化祭个祭壇、放供餅个桌仔，㧯所有附帶个用品全部淨浰了。</verse>
				<verse number="19">𠊎等也將 亞哈斯 王違背上帝該時所徙走个東西全部準備好勢；𠊎等已經將它兜重新奉獻，這下全部放在上主个祭壇前。」</verse>
				<verse number="20">第二日打早， 希西家 王召集城肚該兜領袖，共下到上主个聖殿去。</verse>
				<verse number="21">為到愛贖王室个罪、 猶大 人民个罪，並潔淨聖殿，佢等帶來七隻牛牯，七隻綿羊牯，七隻細羊牯，七隻山羊牯。王吩咐 亞倫 後代个祭司將這兜動物做牲儀獻在上主个祭壇頂。</verse>
				<verse number="22">祭司先㓾牛，正㓾綿羊，然後㓾細羊仔，將逐隻牲儀个血洒在祭壇頂；</verse>
				<verse number="23">最尾將該兜做贖罪祭个山羊牯牽到王㧯其他敬拜个人面前，佢等就按手在山羊頭那頂。</verse>
				<verse number="24">然後祭司㓾山羊做牲儀，將血倒在祭壇頂，除掉所有人民个罪，因為王命令愛為全部 以色列 人民獻燒化祭㧯贖罪祭。</verse>
				<verse number="25">希西家 照上主通過先見 迦得 㧯先知 拿單 給 大衛 王个指示，派 利未 人在上主个聖殿肚，拿等豎琴、七弦琴㧯鑇仔；這就係上主通過先知所吩咐个。</verse>
				<verse number="26">利未 人拿等 大衛 時代所用个樂器，祭司也拿等喇叭企在該位。</verse>
				<verse number="27">希西家 命令在祭壇頂獻燒化祭。獻祭一開始，人民就頌讚上主，祭司歕喇叭，琴師樂隊彈奏 以色列 王 大衛 其他个樂器來和。</verse>
				<verse number="28">所有个會眾參加敬拜，唱歌个唱歌，歕喇叭个歕喇叭，一直到牲儀燒掉。</verse>
				<verse number="29">然後 希西家 王㧯全部人民跪落去拜上帝。</verse>
				<verse number="30">王㧯該兜領袖吩咐 利未 人頌讚上主，唱 大衛 王㧯先見 亞薩 所做个讚美詩。民眾全部歡歡喜喜唱詩，又跪落去拜上帝。</verse>
				<verse number="31">希西家 對民眾講：「這下你等全部淨浰了，將頭牲帶來做感謝祭獻給上主！」佢等就聽王个話，有兜人也自願帶頭牲來做燒化祭。</verse>
				<verse number="32">總共有七十隻牛牯，一百隻綿羊牯，兩百隻細羊牯做燒化祭獻給上主；</verse>
				<verse number="33">還有分別為聖个六百隻牛牯㧯三千隻綿羊，係給民眾食个牲儀。</verse>
				<verse number="34">因為頭牲忒多，負責㓾个祭司毋罅，佢等个同族 利未 人就幫助佢等，直到工作結束。該時，有較多个祭司潔淨自家。 (原來 利未 人比祭司較忠心遵守潔淨个規定。)</verse>
				<verse number="35">除了盡多燒化祭以外，還有盡多平安祭个油，並燒化祭共下獻个祭酒，一一處理。 恁樣，上主聖殿肚个事奉就重新恢復了。</verse>
				<verse number="36">希西家 王㧯人民全部當快樂，因為上帝幫助佢等將這兜事當遽就做好。</verse>
			</chapter>
			<chapter number="30">
				<verse number="1">民眾來毋掣在第一隻月慶祝𨃟過節，因為禮儀上淨浰个祭司毋罅，又有盡多人還吂到 耶路撒冷 ，所以 希西家 王㧯該兜領袖，並 耶路撒冷 人民同意第二隻月慶祝𨃟過節。 希西家 派人通知全部 以色列 人㧯 猶大 人，又特別寫信給 以法蓮 支族㧯 瑪拿西 支族，邀請佢等到 耶路撒冷 上主个聖殿共下慶祝𨃟過節，敬拜上主 — 以色列 个上帝。</verse>
				<verse number="2"></verse>
				<verse number="3"></verse>
				<verse number="4">王㧯人民全部滿意這個計劃。</verse>
				<verse number="5">所以佢等邀請所有个 以色列 人，對南部个 別是巴 到北部个 但 ，共下到 耶路撒冷 來，照法律个規定慶祝𨃟過節，敬拜上主 — 以色列 个上帝；因為盡多人民已經無照所記載个規定來守這節。</verse>
				<verse number="6">送信个人奉王㧯該兜領袖个命令出去，將這封邀請信送到 猶大 㧯 以色列 逐所在；內容係： 「 以色列 个人民啊，在 亞述 皇帝來侵犯个時，上主無俾你這兜賸下來个人受到災難。你等愛轉向上主 — 亞伯拉罕 、 以撒 、 以色列 个上帝，佢就會轉向你等。</verse>
				<verse number="7">毋好學你等个阿爸㧯兄弟；佢等對上主 — 佢等祖先个上帝無忠心。就像你等所看到个，上帝嚴嚴責罰佢等。</verse>
				<verse number="8">毋好像佢等恁硬頸；愛順服上主。你等愛到 耶路撒冷 个聖殿來，這係上主 — 你等个上帝永遠聖潔个所在。你等來敬拜佢，佢就毋會再向你等發譴。</verse>
				<verse number="9">若係你等轉向上主，該兜捉走你等親人个人就會憐憫佢等，俾佢等轉來。上主 — 你等个上帝係慈愛、滿有憐憫个。你等轉向佢，佢就接納你等。」</verse>
				<verse number="10">送信个人去到 以法蓮 㧯 瑪拿西 地區逐所在，甚至到北片 西布倫 支族个逐城。總係該位个人恥笑佢等，侮辱佢等。</verse>
				<verse number="11">總係 亞設 、 瑪拿西 、 西布倫 支族中也有人謙卑下來，願意到 耶路撒冷 來。</verse>
				<verse number="12">上帝也在 猶大 人中做工，使佢等同心遵行佢个旨意，來聽王㧯該兜領袖个命令。</verse>
				<verse number="13">盡多人在第二隻月聚集在 耶路撒冷 慶祝除酵節。</verse>
				<verse number="14">佢等將 耶路撒冷 逐位獻祭燒香个祭壇全部㧹落 汲淪 溪肚。</verse>
				<verse number="15">第二隻月十四日，佢等㓾細羊做𨃟過節个牲儀。該兜無淨浰个祭司㧯 利未 人感覺見笑，就潔淨自家，將燒化祭帶到上主个聖殿。</verse>
				<verse number="16">佢等照神人 摩西 在法律上个指示，企在聖殿佢等應該企个位仔。 利未 人將牲儀个血拿給祭司，祭司就將血洒在祭壇頂。</verse>
				<verse number="17">盡多人因為照禮儀上無淨浰，做毋得自家㓾𨃟過節个細羊仔，所以 利未 人代佢等㓾，將細羊仔獻給上主。</verse>
				<verse number="18">另外，盡多對 以法蓮 、 瑪拿西 、 以薩迦 、 西布倫 支族來个人無潔淨自家，就食𨃟過節个細羊仔；這係無合規定个。所以， 希西家 為佢等恁樣祈禱講：</verse>
				<verse number="19">「慈悲个上主 — 𠊎等祖先个上帝啊，請赦免該兜雖然照聖所規定無淨浰、總係全心全意尋求你个人。」</verse>
				<verse number="20">上主聽 希西家 个祈禱，就赦免 佢等。</verse>
				<verse number="21">聚集在 耶路撒冷 个民眾歡歡喜喜來慶祝除酵節，連等七日。逐日， 利未 人㧯祭司用當響个樂器 頌讚上主。</verse>
				<verse number="22">希西家 稱讚 利未 人，因為佢等當會帶領人民敬拜上主。 民眾食照規定个筵席，又獻平安祭，並讚美上主 — 佢等祖先个上帝。過七日，</verse>
				<verse number="23">大家決定再慶祝七日；所以佢等又快樂慶祝。</verse>
				<verse number="24">猶大 王 希西家 捐出一千隻牛牯㧯七千隻綿羊給民眾㓾來食；該兜領袖另外又捐出一千隻牛牯㧯一萬隻綿羊。盡多祭司潔淨自家。</verse>
				<verse number="25">猶大 人民、祭司、 利未 人、北部 以色列 來个民眾、㧯住在 以色列 㧯 猶大 个外族人，大家全部當快樂。</verse>
				<verse number="26">耶路撒冷 充滿歡喜；因為對 以色列 王 大衛 个孻仔 所羅門 以來毋識恁樣。</verse>
				<verse number="27">祭司㧯 利未 人祈求上主賜福人民。上帝在天頂佢个聖所聽佢等个祈禱，接受佢等个祈求。</verse>
			</chapter>
			<chapter number="31">
				<verse number="1">節期結束以後，所有个 以色列 人到 猶大 逐城去，敲碎石柱，斬斷 亞舍拉 女神个柱像，除掉祭壇㧯山岡頂个神廟。佢等也在 猶大 其他地區㧯 便雅憫 、 以法蓮 、 瑪拿西 境內做共樣个事，然後轉到家鄉。</verse>
				<verse number="2">希西家 王重新組織祭司㧯 利未 人个輪班，在這制度下，逐儕全部有特別个職務。佢等个工作包含獻燒化祭㧯平安祭，在聖殿事奉，在聖殿逐隻門內獻頌讚㧯感謝。</verse>
				<verse number="3">王又奉獻自家个牛羊做逐日早暗个燒化祭，也做安息日、逐隻月初一、㧯其他節期所愛獻个燒化祭，全部照上主法律所規定。</verse>
				<verse number="4">另外王吩咐 耶路撒冷 个人民將祭司㧯 利未 人應該得个份額帶來，使佢等做得專心做上主法律所規定个事。</verse>
				<verse number="5">命令一下來， 以色列 人就將佢等新出个五榖、酒、橄欖油、蜂糖㧯其他農產物帶來，也將所有東西个十分之一帶來。</verse>
				<verse number="6">住在 猶大 逐城个 以色列 人㧯 猶大 人全部將佢等牛羊个十分之一帶來，也奉獻十分之一分別為聖个禮物給上主 — 佢等个上帝。</verse>
				<verse number="7">對三月開始，禮物一直送入來，堆到像山。這情形一直到七月。</verse>
				<verse number="8">希西家 㧯該兜領袖看到恁多个禮物就頌讚上主，又祝福佢个子民 以色列 。</verse>
				<verse number="9">希西家 問祭司、 利未 人樣般有恁多禮物；</verse>
				<verse number="10">撒督 个後代 亞撒利雅 大祭司應講：「對人民開始帶禮物到上主个聖殿以來，毋單淨罅食，還賸當多，因為上主賜福給佢个子民。」</verse>
				<verse number="11">佢等奉 希西家 个命令在上主个聖殿預備倉庫，</verse>
				<verse number="12">忠實將所有个禮物㧯十分之一奉獻放在底背。佢等派 利未 人 歌楠雅 管理，派 歌楠雅 个老弟 示每 做助手。</verse>
				<verse number="13">佢等又派十個 利未 人在佢兩儕手下工作；這十儕个名仔係： 耶歇 、 阿薩細雅 、 拿哈 、 亞撒黑 、 耶利末 、 約撒拔 、 以列 、 伊斯瑪基雅 、 瑪哈 、 比拿雅 。這事係奉 希西家 王㧯 亞撒利雅 大祭司个命令做个。</verse>
				<verse number="14">利未 人 音拿 个孻仔 可利 係聖殿東門个守衛長；佢負責收獻給上主个禮物，也負責分禮物。</verse>
				<verse number="15">在祭司住个其他个城，有以下个 利未 人忠實協助佢。佢等个名仔係： 伊甸 、 珉雅珉 、 耶書亞 、 示瑪雅 、 亞瑪利雅 、 示迦尼雅 。這兜人將食物平均分給 利未 人，係照逐儕个職務，</verse>
				<verse number="16">毋係照宗族分个。所有三十歲 以上个男人、逐日在聖殿值班个，照職務輪班，逐儕做得分到一份。</verse>
				<verse number="17">祭司係照宗族來分；二十歲以上个 利未 人係照職務㧯輪班來分。</verse>
				<verse number="18">佢等㧯佢等个𡜵娘、子女，並其他屋下人全部共下登記；因為佢等忠誠，將自家分別為聖。</verse>
				<verse number="19">住在 亞倫 後代所得个城抑係城外該兜祭司，該兜負責个人將食物分給祭司家族所有个男人㧯 利未 族譜所記个逐個人。</verse>
				<verse number="20">希西家 在 猶大 全地做上主 — 佢个上帝看做良善、正直、忠實个事。</verse>
				<verse number="21">佢非常成功；因為佢所做个，無論係有關上帝个聖殿抑係遵行法律个逐件事，全部專心尋求上帝个旨意。</verse>
			</chapter>
			<chapter number="32">
				<verse number="1">在 希西家 王忠心事奉上主个這兜事件以後， 亞述 皇帝 西拿基立 侵犯 猶大 。佢包圍防衛城，想愛佔領這兜城。</verse>
				<verse number="2">希西家 看到 西拿基立 想愛攻打 耶路撒冷 ，</verse>
				<verse number="3">佢㧯民間該兜領袖㧯官員決定切斷城外个水源，使 亞述 人在接近 耶路撒冷 个時無水好啉。佢等就集合盡多人出去塞所有城外个水源。</verse>
				<verse number="4"></verse>
				<verse number="5">希西家 王整城牆，加強城內个防備，在城牆頂起城樓，又造外牆。另外，佢又整舊 大衛 城東片地基較低个城堡 ，也打造盡多刀槍㧯盾牌。</verse>
				<verse number="6">希西家 王命令城肚所有个男人全部接受軍官个指揮，並召集佢等到城門堘个廣場，勉勵佢等講：</verse>
				<verse number="7">「你等愛堅強，愛勇敢！毋使驚 亞述 皇帝㧯佢所帶領个大軍隊，因為該㧯𠊎等共下个，比㧯佢共下个更有能力。</verse>
				<verse number="8">佢只有人个力量；總係𠊎等有上主 — 𠊎等个上帝幫助，為𠊎等相㓾。」人民因為 猶大 王 希西家 這兜話就得到鼓勵。</verse>
				<verse number="9">過後，當 亞述 皇帝 西拿基立 㧯佢个軍隊攻打 拉吉 个時，佢派幾個官員去 耶路撒冷 ，對 猶大 王 希西家 㧯該位个 猶大 人民講：</verse>
				<verse number="10">「𠊎 — 亞述 皇帝 西拿基立 問你等，你等憑麼介恁有把扼，當 耶路撒冷 受包圍个時還留在該位？</verse>
				<verse number="11">希西家 㧯你等講，上主 — 你等个上帝會救你等離開𠊎个手。 希西家 係欺騙你等，會害你等餓死，渴死。</verse>
				<verse number="12">希西家 敢毋係廢掉上主山頂个廟㧯祭壇，吩咐 猶大 㧯 耶路撒冷 人民單單做得在一個祭壇敬拜燒香嗎？</verse>
				<verse number="13">「敢講你等毋知，𠊎个祖先㧯𠊎樣般對付別个國家係麼？有㖠隻國个神有辦法救人民脫離 亞述 皇帝个手呢？</verse>
				<verse number="14">𠊎个祖先所滅掉个國家，有㖠隻國个神對𠊎个手中救過佢等个國家？恁樣，你等憑麼介恅到你等个上帝能救你等脫離𠊎个手呢？</verse>
				<verse number="15">你等毋好被 希西家 迷惑，毋好被佢騙到。毋好相信佢！吂識有一個國家个神救過佢个人民脫離 亞述 皇帝个手！你等个神過較無辦法救你等脫離𠊎个手！」</verse>
				<verse number="16">亞述 皇帝該兜官員還用盡多難聽个話侮辱主上帝㧯佢个僕人 希西家 。</verse>
				<verse number="17">皇帝又寫信侮辱上主 — 以色列 个上帝，講：「別國个神毋識救過佢等个人民脫離𠊎个手， 希西家 个神也無辦法救佢个人民脫離𠊎个手。」</verse>
				<verse number="18">該兜官員用 希伯來 話向城牆頂个 耶路撒冷 人民大聲喊，愛嚇佢等、使佢等著驚失志，恁樣較容易佔領這城。</verse>
				<verse number="19">佢等講到 耶路撒冷 个上帝，就像講其他民族人手所造个神明共樣。</verse>
				<verse number="20">所以， 希西家 王㧯 亞摩斯 个孻仔先知 以賽亞 向天頂个上帝祈禱求幫助。</verse>
				<verse number="21">上主就派一個天使入去 亞述 皇帝个營中，將軍隊个勇士、官長㧯將軍全部消滅；因為恁樣， 亞述 皇帝轉佢个國去，見笑到頭那擎毋起來。有一日，佢入去厥神个廟肚，厥幾個親生孻仔將佢㓾掉。</verse>
				<verse number="22">恁樣，上主救 希西家 王㧯 耶路撒冷 人民脫離 亞述 皇帝 西拿基立 个手，也脫離其他个仇敵，俾佢等㧯所有个鄰國和平相處。</verse>
				<verse number="23">盡多人到 耶路撒冷 ，向上主獻祭，也送寶物給 猶大 王 希西家 。對該時開始，所有个國家全部尊敬 希西家 。</verse>
				<verse number="24">該樣時， 希西家 發病仔當嚴重，差毋多會死。佢祈禱上主，上主就給佢一個兆頭，指示佢會康復。</verse>
				<verse number="25">總係 希西家 驕傲，無感謝上主為佢所做个，所以災禍臨到佢、 猶大 㧯 耶路撒冷 。</verse>
				<verse number="26">後來， 希西家 㧯 耶路撒冷 个人民謙卑下來，上主就無在 希西家 還生个時刑罰佢等。</verse>
				<verse number="27">希西家 有盡多財富，人人全部尊敬佢。佢起倉庫，囥佢个金仔、銀仔、寶石、香料、盾牌㧯其他值錢个東西。</verse>
				<verse number="28">另外，佢又起倉庫囤五榖、酒、橄欖油，又為牛群、羊群起牛欄、羊寮。</verse>
				<verse number="29">這一切以外，上帝賜給佢个牛、羊、㧯其他个財富盡多，因為恁樣，佢就起加盡多新城。</verse>
				<verse number="30">希西家 將 基訓 泉水个出口堵起來，俾水流到 大衛 城个西片。佢所做个逐件事全部順利成功；</verse>
				<verse number="31">甚至 巴比倫 个使者來問這所在發生个奇事，上帝俾 希西家 自由處理，來考驗佢个內心。</verse>
				<verse number="32">希西家 其他个事㧯佢對上主个忠誠，全部記在《 亞摩斯 个孻仔先知 以賽亞 个異象書》並《 猶大 㧯 以色列 列王史》底背。</verse>
				<verse number="33">希西家 死後，葬在 大衛 後代王室墳墓最高个所在。佢死个時，所有 猶大 㧯 耶路撒冷 个人為佢哀傷致敬。佢个孻仔 瑪拿西 承接佢做王。</verse>
			</chapter>
			<chapter number="33">
				<verse number="1">瑪拿西 十二歲个時做 猶大 王，在 耶路撒冷 統治五十五年。</verse>
				<verse number="2">瑪拿西 行上主看做邪惡个事，就像上主在佢个子民面前逐走个原來外族人所做積惡个事。</verse>
				<verse number="3">佢重新起厥爸 希西家 所拆掉山岡頂个神廟，又起祭壇拜 巴力 ，打造 亞舍拉 女神个柱像，也敬拜事奉天象。</verse>
				<verse number="4">佢在 耶路撒冷 、就在上主吩咐愛永遠敬拜上主个聖殿底背起異教个祭壇，</verse>
				<verse number="5">又在聖殿个兩隻庭院肚起拜天象个祭壇。</verse>
				<verse number="6">佢在 欣嫩子 山壢將自家个孻仔放火燒獻給神明，又去卜卦、用法術、行邪術、求問交鬼个㧯算命个。佢行當多上主看做邪惡个事，惹佢發譴。</verse>
				<verse number="7">佢將偶像放在上帝个聖殿底背。論到聖殿，上帝識對 大衛 㧯厥孻仔 所羅門 講：「 耶路撒冷 个聖殿就係𠊎對 以色列 十二支族个土地中選出來、愛永遠做敬拜𠊎个地方。</verse>
				<verse number="8">若係 以色列 人民認真聽從𠊎所有个誡命，遵守 摩西 吩咐佢等所有个法律，𠊎一定毋會俾佢等對𠊎賜給佢等祖先个這垤土地被人逐走。」</verse>
				<verse number="9">總係 瑪拿西 帶 猶大 㧯 耶路撒冷 人民犯罪，比上主對佢个子民面前逐走个原來外族人所犯个罪還較嚴重。</verse>
				<verse number="10">雖然上主警告 瑪拿西 㧯佢个人民，佢等還係毋聽。</verse>
				<verse number="11">所以上主俾 亞述 皇帝个將軍帶軍隊來侵犯 猶大 。佢等捉到 瑪拿西 ，用鉤仔鉤等佢，銅鍊仔鎖等佢，捉到 巴比倫 去。</verse>
				<verse number="12">瑪拿西 受到痛苦个時謙卑下來，轉向上主 — 佢个上帝、厥祖先个上帝，祈求佢个幫助。</verse>
				<verse number="13">上帝聽佢个祈禱，准佢个祈求，俾佢倒轉 耶路撒冷 做王。因為這件事， 瑪拿西 正確信上主就係上帝。</verse>
				<verse number="14">這事以後， 瑪拿西 將 大衛 城東片个外城牆加高，對 基訓 泉水附近个山壢向北到 魚門 㧯城肚 俄斐勒 地區。佢也在 猶大 逐防衛城派軍隊，有軍官指揮。</verse>
				<verse number="15">佢將以前放在上主聖殿肚个外族神像除掉，也將佢在聖殿山頂㧯 耶路撒冷 其他所在所起个異教祭壇拆掉。 瑪拿西 將這兜東西搬出城外㧹掉。</verse>
				<verse number="16">佢修整敬拜上主个祭壇，在祭壇頂高獻平安祭㧯感恩祭。佢命令 猶大 所有人民愛敬拜上主 — 以色列 个上帝。</verse>
				<verse number="17">雖然人民繼續在其他个山頂獻祭，總係佢等只有獻給上主 — 佢等个上帝。</verse>
				<verse number="18">瑪拿西 其他个事，包含佢向上帝个祈禱，並先見奉上主 — 以色列 个上帝對佢講个話，全部記在《 以色列 列王史》底背。</verse>
				<verse number="19">王个祈禱㧯上帝个回答，並佢在悔改前所犯个罪 — 就係佢所做个壞事，像起造山頂个神廟，打造 亞舍拉 女神个柱像㧯其他敬拜雕刻个偶像，全部記在《先見史》底背。</verse>
				<verse number="20">瑪拿西 死後葬在自家个王宮肚；佢个孻仔 亞們 承接佢做王。</verse>
				<verse number="21">亞們 二十二歲个時做 猶大 王，在 耶路撒冷 統治兩年。</verse>
				<verse number="22">佢像厥爸 瑪拿西 行上主看做邪惡个事，拜厥爸所造个偶像。</verse>
				<verse number="23">總係 亞們 無像厥爸謙卑轉向上主，反轉比厥爸犯還較重个罪。</verse>
				<verse number="24">亞們 个官員造反，在王宮肚將佢㓾掉。</verse>
				<verse number="25">總係 猶大 人民將該兜謀殺 亞們 王个人㓾掉，設立厥孻仔 約西亞 承接佢做王。</verse>
			</chapter>
			<chapter number="34">
				<verse number="1">約西亞 八歲个時做 猶大 王，在 耶路撒冷 統治三十一年。</verse>
				<verse number="2">佢行上主看做著个事，行厥祖先 大衛 王个路，無偏左、無偏右。</verse>
				<verse number="3">約西亞 做王个第八年，佢還當後生就開始敬拜厥祖先 大衛 王个上帝。四年後，佢開始潔淨 猶大 㧯 耶路撒冷 ，廢掉山頂个神廟、 亞舍拉 女神柱像，㧯所有其他偶像。</verse>
				<verse number="4">佢个官員在佢領導之下拆掉拜 巴力 个祭壇，斬斷附近个香壇。佢等將 亞舍拉 女神柱像㧯所有其他偶像全部敲碎，捶做粉，然後委在該兜獻祭給偶像个人个墳墓頂。</verse>
				<verse number="5">佢將異教祭司个骨頭放在佢等拜个祭壇頂燒掉。恁樣，佢潔淨 猶大 㧯 耶路撒冷 。</verse>
				<verse number="6">佢又到 瑪拿西 、 以法蓮 、 西緬 ，直到北片个 拿弗他利 各城鎮㧯它兜四周圍受破壞過个所在也照恁樣做。</verse>
				<verse number="7">佢將北國 以色列 全地个祭壇、 亞舍拉 女神柱像，㧯其他偶像全部拆掉，捶做粉，又將所有香壇敲碎，然後倒轉 耶路撒冷 。</verse>
				<verse number="8">約西亞 王在位个第十八年，潔淨國土、在聖殿廢掉異教崇拜以後，佢派三個人去整上主 — 佢上帝个聖殿。這三個人係： 亞薩利雅 个孻仔 沙番 、 耶路撒冷 市長 瑪西雅 ，㧯 約哈斯 个孻仔歷史官 約亞 。</verse>
				<verse number="9">佢等去見大祭司 希勒家 ，將聖殿收集个錢交給佢。 (這錢係守衛殿門个 利未 人對 瑪拿西 、 以法蓮 㧯北國 以色列 賸下來个人收來个；也有對全 猶大 、 便雅憫 㧯 耶路撒冷 人民收來个。)</verse>
				<verse number="10">佢等將這錢轉給負責整上主聖殿个人；佢等又將錢交給</verse>
				<verse number="11">木匠㧯建築工人去買石材、木材來整聖殿損壞个所在，就係 猶大 該兜王無照顧好致到損壞个。</verse>
				<verse number="12">做這工作个人全部當忠誠；四個監工个 利未 人係： 米拉利 宗族个 雅哈 㧯 俄巴底 ， 哥轄 宗族个 撒迦利亞 㧯 米書蘭 。還有 利未 人全部係優秀个音樂家，</verse>
				<verse number="13">佢等又負責監督搬運材料㧯逐種工程；也有 利未 人保管記錄抑係做守衛。</verse>
				<verse number="14">佢等對聖殿倉庫拿錢出來个時，大祭司 希勒家 發現上主个法律書，就係上帝交給 摩西 个法律書。</verse>
				<verse number="15">希勒家 對王室書記 沙番 講：「𠊎在上主个聖殿肚發現法律書。」 希勒家 將書交給 沙番 ，</verse>
				<verse number="16">沙番 將書帶到王該位，向王報告講：「你命令𠊎等个已經辦好了。</verse>
				<verse number="17">𠊎等已經將聖殿肚个錢交給監工㧯工人。」</verse>
				<verse number="18">書記 沙番 又對王講：「祭司 希勒家 拿一卷書給𠊎。」 沙番 就在王面前大聲讀。</verse>
				<verse number="19">王聽到法律書个話就扯爛衫，</verse>
				<verse number="20">吩咐 希勒家 、 沙番 个孻仔 亞希甘 、 米該亞 个孻仔 亞比頓 、王室書記 沙番 、㧯王个僕人 亞撒雅 ，講：</verse>
				<verse number="21">「你等去為𠊎㧯還留在 以色列 並 猶大 个人民求問上主，到底這卷書个教訓係麼介。上主向𠊎等大發譴係因為𠊎等个祖先無聽從上主个話，無照這書所記載个去做。」</verse>
				<verse number="22">所以， 希勒家 㧯其他幾個人奉王个命令去求問一個名喊 戶勒大 个女先知。女先知住在 耶路撒冷 个第二區。 (厥老公 沙龍 係 特瓦 个孻仔， 哈珥哈斯 个孫仔，擔任主管聖殿禮服个職務。) 佢等向姖講起所發生个事。</verse>
				<verse number="23">姖喊佢等轉去對王講：「上主 — 以色列 个上帝恁樣講：</verse>
				<verse number="24">『𠊎愛照 猶大 王所聽到該本書所寫个咒詛，降災禍給 耶路撒冷 㧯這位所有个人民。</verse>
				<verse number="25">佢等離開𠊎，向別个神明燒香，用佢等个手所造个偶像惹𠊎受氣，所以𠊎愛向 耶路撒冷 大發譴無煞。』</verse>
				<verse number="26">有關 猶大 王本人，你等愛恁樣㧯佢講：『上主 — 以色列 个上帝恁樣講：你一聽到該本書所寫个，</verse>
				<verse number="27">就在𠊎面前謙卑悔改。你一聽到𠊎警告愛責罰 耶路撒冷 㧯它个人民，就扯爛衫，在𠊎面前流目汁悔改，𠊎就聽你个祈禱。</verse>
				<verse number="28">𠊎一定會使你平平安安食到老，葬在你列祖个墳墓該位；你還在世間个時，毋會看到𠊎降災難給這地方㧯它个人民。』」 佢等就將這消息帶轉去㧯王講。</verse>
				<verse number="29">約西亞 王派人召集 猶大 㧯 耶路撒冷 所有个領袖。</verse>
				<verse number="30">王㧯 猶大 眾人、住在 耶路撒冷 个人、還有祭司、 利未 人，㧯所有个人民，無論貧富，也全部共下到上主个聖殿去。王就將該在聖殿肚發現个約書全部讀給佢等聽。</verse>
				<verse number="31">王企在大柱堘頭 ，向上主立約，愛聽從上主，一心一意遵守佢个法律誡命，並實行約書上所規定个命令。</verse>
				<verse number="32">佢使 便雅憫 人㧯所有在 耶路撒冷 个人答應愛遵守這約。所以 耶路撒冷 人民遵行佢等㧯佢等祖先个上帝所立个約。</verse>
				<verse number="33">約西亞 王將 以色列 人國內所有邪惡个偶像全部除掉，喊 以色列 境內所有个人全部事奉上主 — 佢等个上帝。 約西亞 還生个時，佢等一直無離開上主 — 佢等祖先个上帝。</verse>
			</chapter>
			<chapter number="35">
				<verse number="1">約西亞 王在 耶路撒冷 守𨃟過節敬拜上主。正月十四佢等為這節期㓾頭牲。</verse>
				<verse number="2">王分派祭司在上主个聖殿中執行任務，鼓勵佢等在職務上忠心。</verse>
				<verse number="3">佢也指示 利未 人，就係該兜獻身給上主个 以色列 教師，講：「你等愛將聖約櫃放在 以色列 王 大衛 个孻仔 所羅門 所起个聖殿肚，毋使扛來扛去。這下你等愛服事上主 — 你等个上帝㧯佢个子民 以色列 。</verse>
				<verse number="4">你等愛照 以色列 王 大衛 㧯佢个孻仔 所羅門 所寫、分派給你等个職務，照宗族个順序在聖殿值班；</verse>
				<verse number="5">你等自家愛分配好勢，使你等當中有兜人做得幫助 以色列 逐個家庭。</verse>
				<verse number="6">你等愛㓾𨃟過節个細羊仔㧯山羊，潔淨自家，為你等个 以色列 同胞準備獻祭，好遵守上主通過 摩西 所吩咐个話。」</verse>
				<verse number="7">約西亞 為到人民在𨃟過節个需要，對自家个牛群、羊群中捐出三萬隻細綿羊牯、細山羊牯，㧯三千隻牛牯。</verse>
				<verse number="8">佢个官員也自願為人民、祭司㧯 利未 人奉獻。主管上帝聖殿个官長 — 大祭司 希勒家 、 撒迦利亞 、㧯 耶歇 給該兜祭司兩千六百隻細綿羊牯、細山羊牯，㧯三百隻牛牯做𨃟過節个牲儀。</verse>
				<verse number="9">利未 人个領袖 — 歌楠雅 㧯厥兩兄弟 示瑪雅 、 拿坦業 ，並 哈沙比雅 、 耶利 、㧯 約撒拔 捐出五千隻細綿羊牯、細山羊牯，㧯五百隻牛牯給 利未 人做𨃟過節个牲儀。</verse>
				<verse number="10">𨃟過節个事安排好勢以後，祭司㧯 利未 人聽王个命令照輪班各人做各人个事。</verse>
				<verse number="11">利未 人將㓾好个細羊仔剝皮，祭司將血洒在祭壇頂，</verse>
				<verse number="12">然後佢等照家族將燒化祭个頭牲分給人民，使佢等做得照 摩西 法律个指示來獻給上主。</verse>
				<verse number="13">利未 人照規定用火焙𨃟過節个牲儀，又用鑊頭、烳鍋煮祭物，遽遽將肉分給人民。</verse>
				<verse number="14">然後 利未 人為自家㧯 亞倫 後代个祭司準備，因為祭司燒牲儀㧯牲儀个油，無閒到暗。</verse>
				<verse number="15">利未 人 亞薩 宗族个歌手 — 亞薩 、 希幔 、㧯王个先見 耶杜頓 ，照 大衛 王个指示各人企在各位。看守聖殿个警衛毋使離開佢等个工作，因為其他 利未 人已經為佢等準備好𨃟過節个祭物。</verse>
				<verse number="16">恁樣，守𨃟過節㧯在祭壇頂獻燒化祭敬拜上主个事，全部照 約西亞 王个吩咐在該日準備好了。</verse>
				<verse number="17">連等七日，所有在場个 以色列 人全部守𨃟過節㧯除酵節。</verse>
				<verse number="18">對先知 撒母耳 時代以來，在 以色列 中吂識恁盛大守𨃟過節。以前个 以色列 王也無一個像這擺恁樣，連 約西亞 王、祭司、 利未 人、 猶大 、 以色列 、㧯 耶路撒冷 人民全部共下守𨃟過節。</verse>
				<verse number="19">這擺𨃟過節係在 約西亞 做王个第十八年守个。</verse>
				<verse number="20">約西亞 王為聖殿做好這所有个事以後， 埃及 王 尼哥 帶領軍隊攻打 幼發拉底 河个 迦基米施 。 約西亞 想愛阻擋佢，</verse>
				<verse number="21">總係 尼哥 傳話給 約西亞 講：「 猶大 王啊，𠊎打這場戰爭㧯你無關係；𠊎毋係來攻打你，係攻打𠊎个仇敵。上帝愛𠊎遽遽去做。你毋好干涉上帝个事，免得佢毀滅你，因為上帝㧯𠊎共下。」</verse>
				<verse number="22">總係 尼哥 所講上帝个話， 約西亞 毋聽，毋肯轉身離開佢，決定愛㧯佢戰爭。 約西亞 就改裝，到 米吉多 平原去相㓾。</verse>
				<verse number="23">約西亞 王在戰場被 埃及 人个箭射到；王命令僕人講：「𠊎受重傷了！將𠊎帶走！」</verse>
				<verse number="24">佢等將佢扶出戰車外，放在第二輛戰車，帶到 耶路撒冷 。佢死在該位，葬在王室个墳墓肚。所有 猶大 㧯 耶路撒冷 个人民全部為佢哀傷。</verse>
				<verse number="25">先知 耶利米 為 約西亞 王做哀歌。所有唱歌个男女全部唱這首歌來哀悼佢；這在 以色列 中成做一種風俗，直到今晡日。這首歌記在《哀歌書》底背。</verse>
				<verse number="26">約西亞 其他个事，包含佢對上主忠誠，對法律个順服，</verse>
				<verse number="27">㧯佢一生人所做个事，全部記在《 以色列 㧯 猶大 列王史》底背。</verse>
			</chapter>
			<chapter number="36">
				<verse number="1">猶大 人民選 約西亞 个孻仔 約哈斯 ，在 耶路撒冷 設立佢做王。</verse>
				<verse number="2">約哈斯 二十三歲个時做 猶大 王；佢在 耶路撒冷 統治三個月。</verse>
				<verse number="3">埃及 王 尼哥 在 耶路撒冷 捉到佢，罰 猶大 國愛進貢銀仔三千四百公斤、金仔三十四公斤。</verse>
				<verse number="4">埃及 王 尼哥 立 約哈斯 厥哥 以利亞敬 做 猶大 㧯 耶路撒冷 个王，將佢个名改做 約雅敬 。 約哈斯 被 尼哥 捉到 埃及 去。</verse>
				<verse number="5">約雅敬 二十五歲个時做 猶大 王；佢在 耶路撒冷 統治十一年。佢行上主 — 佢个上帝看做邪惡个事。</verse>
				<verse number="6">巴比倫 王 尼布甲尼撒 侵犯 猶大 ，捉到 約雅敬 ，將佢用銅鍊鎖等，帶到 巴比倫 。</verse>
				<verse number="7">尼布甲尼撒 也將上主聖殿肚个一部份寶物帶到 巴比倫 ，放在自家个王宮肚 。</verse>
				<verse number="8">約雅敬 其他个事，包含佢所做邪惡个事㧯所犯个罪，全部記在《 以色列 㧯 猶大 列王史》底背。佢个孻仔 約雅斤 承接佢做王。</verse>
				<verse number="9">約雅斤 十八歲 个時做 猶大 王；佢在 耶路撒冷 統治三個月又十日。佢行上主看做邪惡个事。</verse>
				<verse number="10">春天个時， 尼布甲尼撒 王派人將 約雅斤 㧯上主聖殿肚个寶物帶到 巴比倫 ，然後立 約雅斤 个阿叔 西底家 做 猶大 㧯 耶路撒冷 个王。</verse>
				<verse number="11">西底家 二十一歲个時做 猶大 王；佢在 耶路撒冷 統治十一年。</verse>
				<verse number="12">佢行上主 — 佢个上帝看做邪惡个事，毋肯謙卑聽從先知 耶利米 所傳上主个話。</verse>
				<verse number="13">尼布甲尼撒 王識強迫 西底家 奉上帝个名發誓，愛對佢忠心，總係 西底家 造反。 西底家 硬頸毋肯悔改，毋願轉向上主 — 以色列 个上帝。</verse>
				<verse number="14">另外， 猶大 該兜領袖、祭司，㧯人民也犯了大罪，學佢等周圍个民族去拜偶像，污穢上主在 耶路撒冷 分別為聖个聖殿。</verse>
				<verse number="15">上主 — 佢等祖先个上帝一擺又一擺派先知警告佢等，因為佢痛惜佢个子民㧯聖殿。</verse>
				<verse number="16">佢等反轉藐視上帝个使者，毋搭上帝个話，嘲謔佢个先知。到最後，上主對佢个子民大發譴，致到無人有辦法救佢等。</verse>
				<verse number="17">上主派 巴比倫 王來攻打佢等，在聖殿肚㓾死 猶大 个後生人。無論男女大細， 巴比倫 王攏總無憐憫。上帝將佢等全部交在佢个手中。</verse>
				<verse number="18">巴比倫 王將上主聖殿肚所有个用品㧯財寶，並王㧯官員个財寶，全部帶到 巴比倫 去。</verse>
				<verse number="19">佢燒掉上帝个聖殿，拆掉 耶路撒冷 个城牆，放火將王宮㧯城內重要个建築燒掉，毀壞城內所有个財寶。</verse>
				<verse number="20">佢將災難後還生个人帶到 巴比倫 ，強迫佢等在該位做奴才，服事佢㧯佢个後代，直到 波斯 帝國興起。</verse>
				<verse number="21">上主通過先知 耶利米 所預言：「這垤土地愛荒掉七十年，係愛補足該無遵守个安息年 」，這話實現了。</verse>
				<verse number="22">波斯 王 塞魯士 登基做皇帝 个第一年，上主為到實現佢通過先知 耶利米 所講个預言，就感動 塞魯士 頒佈命令，用字寫下來，傳到全帝國逐所在講：</verse>
				<verse number="23">「這係 波斯 皇帝 塞魯士 个命令：上主 — 天頂个上帝俾𠊎做全世界个統治者；佢愛𠊎負責在 猶大 个 耶路撒冷 為佢起一座殿。這下，你等所有屬上帝个子民愛上去該位，願上主 — 你等个上帝㧯你等同在。」</verse>
			</chapter>
		</book>
		<book number="15">
			<chapter number="1">
				<verse number="1">波斯 王 塞魯士 登基做皇帝 个第一年，上主為到實現佢通過先知 耶利米 所講个預言，就感動 塞魯士 頒佈命令，用字寫下來，傳到全帝國逐所在講：</verse>
				<verse number="2">「這係 波斯 皇帝 塞魯士 个命令：上主 — 天頂个上帝俾𠊎做全世界个統治者；佢愛𠊎負責在 猶大 个 耶路撒冷 為佢起一座殿。</verse>
				<verse number="3">願上帝㧯你這兜屬佢个子民同在。你等愛到 猶大 个 耶路撒冷 去，重新起上主 — 以色列 上帝个聖殿；佢係在 耶路撒冷 个上帝。</verse>
				<verse number="4">若係流亡个子民中，有需要幫助正做得轉去个，佢等个鄰舍就愛用金銀、財物、頭牲幫助佢等，另外還愛為 耶路撒冷 上帝个聖殿甘心獻禮物。」</verse>
				<verse number="5">所以， 猶大 㧯 便雅憫 个族長、祭司㧯 利未 人，還有逐個被上帝感動个人全部準備好，愛轉到 耶路撒冷 去重新起上主个聖殿。</verse>
				<verse number="6">隔壁鄰舍全部幫助佢等，拿銀器、金仔、財物、頭牲，㧯其他值錢个東西給佢等，另外還為聖殿獻各樣个禮物做甘心祭。</verse>
				<verse number="7">塞魯士 皇帝也將以前 尼布甲尼撒 王對 耶路撒冷 上主个聖殿搶來放在自家神廟中个用品還佢等。</verse>
				<verse number="8">波斯 皇帝 塞魯士 派財政大臣 米提利達 點算這兜用品； 米提利達 就開一份清單給 猶大 省長 設巴薩 ，</verse>
				<verse number="9">數目記在下背： 獻祭用个金碗三十隻， 獻祭用个銀碗一千隻， 其他種類个碗二十九隻， 細金碗三十隻， 細銀碗四百一十隻， 其他用品一千件，</verse>
				<verse number="10"></verse>
				<verse number="11">金碗、銀碗㧯其他所有用品，總共有五千四百件。流亡个人對 巴比倫 轉來个時， 設巴薩 將這兜用品全部帶到 耶路撒冷 。</verse>
			</chapter>
			<chapter number="2">
				<verse number="1">盡多流亡个人轉到 耶路撒冷 㧯 猶大 ，到自家个家鄉。自從 巴比倫 王 尼布甲尼撒 將佢等捉去，佢等家族个人一直流亡在 巴比倫 。</verse>
				<verse number="2">佢等當中个領袖有： 所羅巴伯 、 耶書亞 、 尼希米 、 西萊雅 、 利來雅 、 末底改 、 必珊 、 米斯拔 、 比革瓦伊 、 利宏 㧯 巴拿 。 以下係 以色列 逐宗族流亡轉來个人數統計：</verse>
			</chapter>
			<chapter number="3">
				<verse number="1">到第七月， 以色列 人在自家个家鄉全部安頓下來；該時佢等同心一意聚集在 耶路撒冷 。</verse>
				<verse number="2">約撒達 个孻仔 耶書亞 㧯佢該兜祭司同事，並 撒拉鐵 个孻仔 所羅巴伯 㧯佢該兜親戚，重新起 以色列 上帝个祭壇，照神人 摩西 法律書个指示，在壇頂獻燒化祭。</verse>
				<verse number="3">因為 轉來个人驚該地方个人，佢等就在祭壇原來个地基頂重新起祭壇；然後，佢等開始在壇頂逐朝晨暗晡向上主獻燒化祭。</verse>
				<verse number="4">佢等照規定守搭寮仔節，逐日照數額照規例奉獻應該獻个燒化祭；</verse>
				<verse number="5">另外，佢等又照常例獻燒化祭，並在初一㧯所有敬拜上主个節期獻祭，還有向上主獻甘心祭。</verse>
				<verse number="6">雖然人民還吂開始重起聖殿，總係對第七月初一，佢等已經開始向上主獻燒化祭了。</verse>
				<verse number="7">民眾出工錢給打石師傅、木匠，又拿食物、飲料、橄欖油㧯 泰爾 城並 西頓 城个人換 黎巴嫩 个香柏樹。這兜樹料愛經過大海運到 約帕 。這事得到 波斯 皇帝 塞魯士 个許可。</verse>
				<verse number="8">民眾轉來 耶路撒冷 以後，第二年个第二月，佢等在上帝聖殿个老地方開始動工。 撒拉鐵 个孻仔 所羅巴伯 、 約撒達 个孻仔 耶書亞 、㧯其他个同胞，就係祭司、 利未 人㧯所有對流亡轉來 耶路撒冷 个人，全部參加這工作。所有二十歲以上个 利未 人全部受派來監督重建上主聖殿个工程。</verse>
				<verse number="9">利未 人 耶書亞 㧯佢个子孫、親屬，並 甲篾 㧯佢个子孫 ( 何達威雅 宗族)，全部聯合起來監督重建上帝聖殿个工程。 利未 人 希拿達 个子孫、親屬也來𢯭手監督。</verse>
				<verse number="10">上主个聖殿開始打地基个時，祭司全部著禮服，企在逐儕个位所，手拿喇叭； 利未 人 亞薩 个子孫拿鑇仔企在該位。佢等照 以色列 王 大衛 傳下來个禮儀讚美上主。</verse>
				<verse number="11">佢等彼此對唱，感謝讚美上主講： 上主係至善； 佢對 以色列 个慈愛永遠長存。 逐個人全部大聲喊，讚美上主，因為聖殿打地基个工程已經開始了。</verse>
				<verse number="12">當多年老个祭司、 利未 人㧯族長識看過以前个聖殿，這下親目看到這聖殿打地基，忍毋住開聲大噭；其他在場个人盡多歡喜到大聲嘶。</verse>
				<verse number="13">無人分得出大聲嘶个聲抑係大噭个聲，因為聲音十分大，盡遠个所在也聽得到。</verse>
			</chapter>
			<chapter number="4">
				<verse number="1">猶大 㧯 便雅憫 人个仇敵一聽講流亡轉來个人重建上主 — 以色列 上帝个聖殿，</verse>
				<verse number="2">就去見 所羅巴伯 㧯該兜族長，講：「俾𠊎等加入你等起聖殿个工作好麼！因為𠊎等㧯你等敬拜个係共一位上帝。自從 亞述 皇帝 以撒哈頓 帶𠊎等到這以後，𠊎等一直向上帝獻祭。」</verse>
				<verse number="3">所羅巴伯 、 耶書亞 ，還有其他 以色列 个族長對佢等講：「你等做毋得加入，來為上主 — 𠊎等个上帝起聖殿。𠊎等愛照 波斯 皇帝 塞魯士 个吩咐，自家來起。」</verse>
				<verse number="4">所以， 猶太 人起聖殿个時，該地方个人阻擋恐嚇佢等。</verse>
				<verse number="5">對 波斯 皇帝 塞魯士 當政直到 波斯 皇帝 大流士 當政期間 ，該兜人還常常收買 波斯 政府个官員來擾亂佢等。</verse>
				<verse number="6">亞哈隨魯 皇帝執政無幾久， 猶大 㧯 耶路撒冷 人民个仇敵帶等狀仔去告佢等。</verse>
				<verse number="7">另外，在 波斯 皇帝 亞達薛西 年間， 比施蘭 、 米特利達 、 他別 㧯佢共黨个寫信仔給皇帝；這信仔係用 亞蘭 文 寫个，讀个時正翻做 波斯 話 。</verse>
				<verse number="8">省長 利宏 㧯省祕書 伸帥 也寫好恁樣一封告 耶路撒冷 人个狀仔，給 亞達薛西 皇帝：</verse>
				<verse number="9">「省長 利宏 、省祕書 伸帥 ，㧯𠊎等个同伴 — 該兜法官㧯其他對 以力 、 巴比倫 、㧯 以攔 地个 書珊 徙來个部下，</verse>
				<verse number="10">連被偉大尊貴个 亞斯那巴 對故鄉徙來住在 撒馬利亞 㧯 河西 省 該兜人民，共下寫信仔。」</verse>
				<verse number="11">書信个內容係： 「 河西 省个人民上奏 亞達薛西 皇帝。</verse>
				<verse number="12">「𠊎等希望皇帝知：對皇帝治理个其他地區徙來住在 耶路撒冷 个 猶太 人當在重建該座邪惡、悖逆个城。佢等已經開始起城牆，盡遽就會完工了。</verse>
				<verse number="13">皇帝啊，這城若有一日起好，城牆完工，該兜人就毋會再進貢，納各種稅了；皇帝个國庫收入一定會減少。</verse>
				<verse number="14">因為𠊎等係臣僕，對皇帝有義務，無愛看到皇帝食虧，所以向皇帝建議，</verse>
				<verse number="15">請皇帝吩咐人調查先王个記錄。恁樣，你就會發現這城一直係悖逆个，自古以來損害列王㧯逐省个官長。這城个人民全部係當難管个。因為恁樣，這城識被人拆掉。</verse>
				<verse number="16">𠊎等愛皇帝知，若係這城重建起來，城牆整好，皇帝就無法度再管 河西 省了。」</verse>
				<verse number="17">皇帝个回信係恁樣： 「 利宏 省長、 伸帥 省祕書、住在 撒馬利亞 㧯 河西 省地區个官員平安：</verse>
				<verse number="18">「你等送上來个狀仔已經有人翻譯，讀給𠊎聽了。</verse>
				<verse number="19">𠊎下令調查，確實發現 耶路撒冷 自古以來就係悖逆王權个；該城充滿造反㧯暴動个事。</verse>
				<verse number="20">耶路撒冷 識有大能个君王統治過該城㧯歸隻 河西 省，並徵收各種稅。</verse>
				<verse number="21">所以，你等愛宣佈命令，阻擋該城个重建，直到𠊎頒佈命令為止。</verse>
				<verse number="22">你等愛謹慎處理這事，做毋得延纏，免得𠊎受更重个損失。」</verse>
				<verse number="23">利宏 、 伸帥 㧯佢等个共黨一聽到 亞達薛西 皇帝个回信，就黏時到 耶路撒冷 ，用武力迫 猶太 人停工。</verse>
				<verse number="24">在 耶路撒冷 重建上帝聖殿个工程受迫停工，無法度繼續進行，直到 波斯 皇帝 大流士 統治个第二年。</verse>
			</chapter>
			<chapter number="5">
				<verse number="1">該時，有兩個先知 — 哈該 㧯 易多 个孫仔 撒迦利亞 — 奉 以色列 上帝个名向住在 猶大 㧯 耶路撒冷 个 猶太 人講勉勵个話。</verse>
				<verse number="2">撒拉鐵 个孻仔 所羅巴伯 㧯 約撒達 个孻仔 耶書亞 就開始重建在 耶路撒冷 上帝个聖殿，上帝兩位先知幫助佢等。</verse>
				<verse number="3">差毋多在同時， 河西 省省長 達乃 、 示他‧波斯乃 㧯佢等个共黨趕到 耶路撒冷 ，責備佢等講：「麼人下令你等重建這殿，完成這工程呢？」</verse>
				<verse number="4">佢等 又討到所有起殿負責人个名單。</verse>
				<verse number="5">總係上帝看顧 猶太 人該兜長老； 波斯 該兜官長決定等到佢等向 大流士 皇帝送上狀仔、得到回信後正採取行動。</verse>
				<verse number="6">以下係 河西 省省長 達乃 、 示他‧波斯乃 㧯佢等个共黨送給 大流士 皇帝个狀仔个副本：</verse>
				<verse number="7">「願 大流士 皇帝凡事平安！</verse>
				<verse number="8">「𠊎等應該報告皇帝，𠊎等去 猶大 省，看到至大上帝个聖殿用大石頭來起，並有大樑插入牆內。這項工程佢等做到當煞猛，進行當遽。</verse>
				<verse number="9">「𠊎等喊人民該兜長老㧯𠊎等講，麼人下令佢等重建這殿並完成這工程。</verse>
				<verse number="10">𠊎等也討到佢等个名單，恁樣𠊎等就能報告皇帝，麼人係這工程个領導人。</verse>
				<verse number="11">「佢等應講：『𠊎等係天地个主上帝个僕人。𠊎等這下重新修建个聖殿係當多年前 以色列 一位大能个王所建造㧯完成个。</verse>
				<verse number="12">因為𠊎等个祖先惹天頂个上帝發譴，上帝將佢等交在 迦勒底 人 巴比倫 皇帝 尼布甲尼撒 个手下，佢就拆掉這殿，又將人民捉到 巴比倫 去。</verse>
				<verse number="13">後來，在 塞魯士 王做 巴比倫 皇帝个第一年， 塞魯士 下命令重建這聖殿，</verse>
				<verse number="14">又歸還以前 尼布甲尼撒 對 耶路撒冷 聖殿搶去个該兜放在 巴比倫 神廟肚个金銀用品。 塞魯士 皇帝將這兜用品交給一個名安到 設巴薩 个人；佢係 塞魯士 皇帝指派做 猶大 省長个。</verse>
				<verse number="15">皇帝吩咐佢將這兜用品帶轉 耶路撒冷 个聖殿，又在聖殿舊个地點重新起上帝个聖殿。</verse>
				<verse number="16">所以， 設巴薩 轉來，在 耶路撒冷 打好上帝聖殿个地基；工程對該時到這下一直進行，還吂完工。』</verse>
				<verse number="17">「這下，皇帝若認為妥當，請派人調查 巴比倫 个皇室記錄，看 塞魯士 皇帝係毋係識下令重建 耶路撒冷 上帝个聖殿，然後請回信指示𠊎等，皇帝對這件事愛樣般做。」</verse>
			</chapter>
			<chapter number="6">
				<verse number="1">所以， 大流士 皇帝命令調查保存在 巴比倫 个皇室記錄。</verse>
				<verse number="2">總係佢等在 米底亞 省个 亞馬他 城个宮內發現一卷古卷，頂高有恁樣个記載：</verse>
				<verse number="3">「 塞魯士 做皇帝个第一年，下令重建 耶路撒冷 上帝个聖殿，做獻祭个所在。這殿愛有二十七公尺高，二十七公尺闊。</verse>
				<verse number="4">壁愛用三層大石頭隔一層樹料个方式來起。所有費用對國庫支出。</verse>
				<verse number="5">尼布甲尼撒 王對 耶路撒冷 聖殿帶到 巴比倫 來个金器、銀器，也愛歸還 耶路撒冷 个聖殿，放在上帝聖殿肚原來个位所。」</verse>
				<verse number="6">所以， 大流士 皇帝回信講： 「 河西 省省長 達乃 、 示他‧波斯乃 㧯 河西 省个眾官員： 「你等愛離開該聖殿；</verse>
				<verse number="7">毋好干涉建殿个工程。愛俾 猶大 省長㧯 猶太 人个領袖在原來个地方重建上帝个聖殿。</verse>
				<verse number="8">𠊎這下命令你等愛幫助佢等重建。所需要个全部費用遽遽對王庫㧯 河西 省稅收个部份撥出，免得工程停下來。</verse>
				<verse number="9">你等愛日日供應 耶路撒冷 祭司个需要；無論係用來做燒化祭獻給天頂上帝个細牛牯、綿羊牯、細綿羊，抑係麥仔、鹽、酒㧯橄欖油，你等全部愛供給。</verse>
				<verse number="10">恁樣，佢等就有好獻天頂上帝所歡喜个清香牲儀，並祈求佢賜福給𠊎㧯𠊎个子孫。</verse>
				<verse number="11">𠊎另外下令：若係有人隨便改𠊎个命令，愛將厥屋頂个樑挷出一枝，刺穿佢，將佢掛在頂高，佢个屋仔也愛成做垃圾堆。</verse>
				<verse number="12">若係有君王抑係人民改這個命令，想愛毀壞這聖殿，願該揀選 耶路撒冷 做敬拜佢个地方个上帝消滅佢。這係𠊎 — 大流士 个命令，定著愛徹底遵行。」</verse>
				<verse number="13">所以， 河西 省長 達乃 、 示他‧波斯乃 並佢等个共黨，徹底遵行 大流士 皇帝个命令。</verse>
				<verse number="14">猶太 人該兜長老得到先知 哈該 㧯 易多 个孫仔 撒迦利亞 个鼓勵，建殿个工作進行當順利。佢等照 以色列 上帝个旨意，㧯 波斯 皇帝 塞魯士 、 大流士 、還有 亞達薛西 个命令完成起聖殿个工程。</verse>
				<verse number="15">聖殿完工係在 大流士 做皇帝个第六年，亞達月初三。</verse>
				<verse number="16">以色列 个人民，包含祭司、 利未 人㧯所有對流亡轉來个人，全部歡歡喜喜來舉行奉獻上帝聖殿个典禮。</verse>
				<verse number="17">為奉獻這聖殿个典禮，佢等獻一百隻牛牯，兩百隻綿羊牯，㧯四百隻細綿羊做牲儀，又照 以色列 支族个數目獻十二隻山羊牯做贖罪祭。</verse>
				<verse number="18">佢等照 摩西 个書所指示个，將祭司㧯 利未 人組織起來，照排班在 耶路撒冷 聖殿肚服事上帝。</verse>
				<verse number="19">第二年正月十四，對流亡轉來个人民守𨃟過節。</verse>
				<verse number="20">所有个祭司㧯 利未 人全部照儀式潔淨自家。 利未 人為所有轉來个人民、祭司兄弟㧯自家㓾𨃟過節个羊仔。</verse>
				<verse number="21">所有對流亡轉來个 以色列 人全部有食這羊仔；該兜住在這地、離開異教轉來拜上主 — 以色列 上帝个人也食這羊仔。</verse>
				<verse number="22">佢等歡歡喜喜慶祝除酵節七日久。佢等充滿快樂；因為上主使 亞述 皇帝 對佢等當好，幫助佢等重建 以色列 上帝个聖殿。</verse>
			</chapter>
			<chapter number="7">
				<verse number="1">盡多年後，當 亞達薛西 做 波斯 皇帝个時， 以斯拉 對 巴比倫 轉來。 以斯拉 个祖先係大祭司 亞倫 ；佢个族譜記在下背： 以斯拉 係 西萊雅 个孻仔 ， 西萊雅 係 亞撒利雅 个孻仔， 亞撒利雅 係 希勒家 个孻仔，</verse>
				<verse number="2">希勒家 係 沙龍 个孻仔， 沙龍 係 撒督 个孻仔， 撒督 係 亞希突 个孻仔，</verse>
				<verse number="3">亞希突 係 亞瑪利雅 个孻仔， 亞瑪利雅 係 亞撒利雅 个孻仔， 亞撒利雅 係 米拉約 个孻仔，</verse>
				<verse number="4">米拉約 係 西拉希雅 个孻仔， 西拉希雅 係 烏西 个孻仔， 烏西 係 布基 个孻仔，</verse>
				<verse number="5">布基 係 亞比書 个孻仔， 亞比書 係 非尼哈 个孻仔， 非尼哈 係 以利亞撒 个孻仔， 以利亞撒 係 亞倫 个孻仔。</verse>
				<verse number="6">以斯拉 係盡有學問个經學專家，精通上主 — 以色列 上帝給 摩西 个法律。因為上主 — 佢个上帝賜福給佢， 以斯拉 要求皇帝个逐件事，皇帝全部准佢。</verse>
				<verse number="7">亞達薛西 在位个第七年， 以斯拉 㧯一群 以色列 人對 巴比倫 起身轉 耶路撒冷 。這群人包含祭司、 利未 人、聖殿歌手、聖殿守衛㧯工人。</verse>
				<verse number="8">佢等離開 巴比倫 係正月初一；因為上帝施恩幫助，佢等在五月初一就到 耶路撒冷 。</verse>
				<verse number="9"></verse>
				<verse number="10">以斯拉 一生專心研究並遵行上主个教示，又將所有法律條例教導 以色列 人民。</verse>
				<verse number="11">以斯拉 係祭司㧯經學專家，精通上主賜給 以色列 个誡命㧯法律。 亞達薛西 皇帝將以下个信仔送給 以斯拉 。</verse>
				<verse number="12">「𠊎 — 亞達薛西 ，眾王个王，寫信仔給精通天頂上帝法律个經學專家 以斯拉 祭司 ：</verse>
				<verse number="13">「𠊎命令帝國內 以色列 个人民、祭司㧯 利未 人，願意个人全部做得㧯你共下轉 耶路撒冷 去。</verse>
				<verse number="14">𠊎，連同𠊎七個參謀，派你去調查 耶路撒冷 㧯 猶大 个情形，看人民有遵守上帝交給你个法律書麼。</verse>
				<verse number="15">你愛帶𠊎㧯𠊎个參謀甘心獻个金銀、祭物給該位住在 耶路撒冷 聖殿个 以色列 上帝。</verse>
				<verse number="16">你也愛帶等你在 巴比倫 省徵收所有个金銀，並 以色列 人㧯該兜祭司甘心獻給 耶路撒冷 上帝聖殿个禮物。</verse>
				<verse number="17">「你愛留心用這兜錢買牛牯、綿羊牯、細綿羊、五榖㧯酒，獻在 耶路撒冷 — 你等上帝聖殿个祭壇頂。</verse>
				<verse number="18">賸到个金銀，你做得照你等上帝个旨意，用在你㧯同胞認為妥當个所在。</verse>
				<verse number="19">你愛將所有交給你該兜在聖殿事奉个用品獻給 耶路撒冷 个上帝。</verse>
				<verse number="20">另外，上帝聖殿所需要个其他東西，你全部做得對國庫取用。</verse>
				<verse number="21">「𠊎 — 亞達薛西 皇帝命令所有在 河西 省个財政官員，愛遽遽供給這個精通天頂上帝法律个專家 — 以斯拉 祭司所要求个逐樣東西；</verse>
				<verse number="22">莫超過：銀仔三千四百公斤，麥仔一萬公斤，酒兩千公升，橄欖油兩千公升；鹽就無限制。</verse>
				<verse number="23">你等愛謹慎，天頂上帝為佢聖殿所命令个逐樣東西，你等全部愛供給；恁樣，佢正毋會向𠊎㧯承接𠊎王位个人發譴。</verse>
				<verse number="24">你等做毋得向祭司、 利未 人、歌手、守衛、工人，抑係所有㧯這聖殿有關个人打稅。</verse>
				<verse number="25">「 以斯拉 ，你愛用上帝給你个智慧，指派行政官員㧯審判官去治理全 河西 省个人民，就係該兜遵守你上帝法律个人民。你一定愛將該法律教無明白个人。</verse>
				<verse number="26">若係有人毋服從你上帝个法律抑係這帝國个法律，佢一定愛黏時受到嚴嚴个處罰：處死刑、充軍、沒收財產，抑係坐監。」</verse>
				<verse number="27">以斯拉 講：「願上主 — 𠊎等祖先个上帝得到讚美！佢使皇帝甘願用這方法來加添 耶路撒冷 上主聖殿个尊榮。</verse>
				<verse number="28">上帝个恩典使𠊎得到皇帝、佢該兜參謀，㧯佢一切有權勢官員个幫助。上主 — 𠊎个上帝給𠊎勇氣，使𠊎喊盡多 以色列 宗族个領袖，願意㧯𠊎共下轉去。」</verse>
			</chapter>
			<chapter number="8">
				<verse number="1">下背係 亞達薛西 做皇帝个時，㧯𠊎 — 以斯拉 共下對 巴比倫 轉來 耶路撒冷 該兜宗族領袖个名；佢等个族譜記在下背：</verse>
				<verse number="2">革順 — 非尼哈宗族； 但以理 — 以他瑪宗族； 示迦尼个孻仔哈突 — 大衛宗族； 撒迦利亞 — 巴錄宗族，共下个男人一百五十儕 (有佢等个家譜)； 西拉希雅个孻仔以利約乃 — 巴哈‧摩押宗族，共下个男人兩百儕； 雅哈悉个孻仔示迦尼 — 薩土宗族，共下个男人三百儕； 約拿單个孻仔以別 — 亞丁宗族，共下个男人五十儕； 亞他利雅个孻仔耶篩亞 — 以攔宗族，共下个男人七十儕； 米迦勒个孻仔西巴第雅 — 示法提雅宗族，共下个男人八十儕； 耶歇个孻仔俄巴底亞 — 約押宗族，共下个男人兩百十八儕； 約細斐个孻仔示羅密 — 巴尼宗族，共下个男人一百六十儕； 比拜个孻仔撒迦利亞 — 比拜宗族，共下个男人二十八儕； 哈加坦个孻仔約哈難 — 押甲宗族，共下个男人一百一十儕； 以利法列、耶利㧯示瑪雅 — 亞多尼干宗族，共下个男人六十儕 (佢等較慢倒轉來)； 烏太㧯撒布 — 比革瓦伊宗族，共下个男人七十儕。</verse>
				<verse number="3">𠊎召集全部民眾聚集在該條流向 亞哈瓦 城个河壩滣；𠊎等在該位安營三日。𠊎發現民眾當中有祭司，總係無 利未 人。</verse>
				<verse number="4">𠊎就召集該兜領袖： 以利以謝 、 亞列 、 示瑪雅 、 以利拿單 、 雅立 、 以利拿單 、 拿單 、 撒迦利亞 、 米書蘭 ，並教師： 約雅立 㧯 以利拿單 。</verse>
				<verse number="5">𠊎派佢等去見 迦西斐雅 地區个領袖 易多 ，請佢㧯佢个同工 — 聖殿工人，派兜人給𠊎等，來聖殿事奉上帝。</verse>
				<verse number="6">因為𠊎等个上帝施恩幫助𠊎等，佢等派一個盡有才能个 以色列 人 示利比 。佢係屬 抹利 宗族个 利未 人；佢个孻仔㧯兄弟共十八儕也㧯佢共下來。</verse>
				<verse number="7">佢等也派來 米拉利 宗族个 哈沙比雅 㧯 耶篩亞 ，共下个親屬二十儕。</verse>
				<verse number="8">另外，又有兩百二十个聖殿工人共下來；這兜人个祖先係 大衛 王㧯佢該兜大臣派去協助 利未 人个。佢等个名全部列在名單頂高。</verse>
				<verse number="9">在 亞哈瓦 河壩滣，𠊎命令大家禁食，在𠊎等上帝面前謙卑，求佢在路途中𢱋𠊎等，保護𠊎等㧯𠊎等个子女，並𠊎等所有个財物。</verse>
				<verse number="10">𠊎感覺，向皇帝請求一隊騎兵透路保護𠊎等，使𠊎等無受敵人攻擊，這係盡見笑个事；因為𠊎識對皇帝講，𠊎等个上帝施恩幫助一切信靠佢个人，總係該兜違背佢个人，佢就發譴責罰。</verse>
				<verse number="11">所以，𠊎等禁食，祈求上帝保護𠊎等；佢聽𠊎等个祈禱。</verse>
				<verse number="12">對祭司領袖當中，𠊎選 示利比 、 哈沙比雅 㧯佢等个兄弟十個人。</verse>
				<verse number="13">然後，𠊎將皇帝㧯佢个參謀、官員，㧯 以色列 人為上帝聖殿所獻出个金銀㧯用品，全部秤好交給祭司。</verse>
				<verse number="14">以下就係𠊎交給佢等个東西： 銀仔 — 二十二公噸， 銀做个用品 — 三千四百公斤， 金仔 — 三千四百公斤， 二十隻金碗 — 八點四公斤， 兩隻當金个銅碗，價值㧯金碗共樣。</verse>
				<verse number="15"></verse>
				<verse number="16">𠊎對佢等講：「你等在上主 — 你等祖先上帝个眼中係聖个；所有甘心獻給佢个金器、銀器也係聖个。</verse>
				<verse number="17">你等愛小心看守它兜，一直到上主个聖殿。到該位，愛在祭司房間內秤過，交給祭司㧯 利未 人个領袖，並 耶路撒冷 个 以色列 人領袖。」</verse>
				<verse number="18">所以，祭司㧯 利未 人負責看守這兜金仔、銀仔㧯用品，將它兜帶到 耶路撒冷 𠊎等上帝个聖殿。</verse>
				<verse number="19">正月十二，𠊎等離開 亞哈瓦 河，向 耶路撒冷 去。路途中，𠊎等上帝个手保護𠊎等，救𠊎等無被敵人㧯埋伏个人攻擊。</verse>
				<verse number="20">到 耶路撒冷 ，𠊎等歇睏三日。</verse>
				<verse number="21">第四日，𠊎等就到上帝个聖殿去，將金仔、銀仔、㧯用品秤好，將它兜轉交給 烏利亞 个孻仔 — 米利末 祭司。㧯佢共下个，還有 非尼哈 个孻仔 以利亞撒 ，兩個 利未 人 — 耶書亞 个孻仔 約撒拔 㧯 賓內 个孻仔 挪亞底 。</verse>
				<verse number="22">逐件東西全部算過，秤好，同時做詳細个記錄。</verse>
				<verse number="23">所有流亡轉來个人全部帶等祭物，做燒化祭獻給 以色列 个上帝。佢等為全 以色列 人獻十二隻牛牯，九十六隻綿羊牯，七十七隻細綿羊，又為潔淨自家个罪獻十二隻山羊牯。這兜頭牲全部做牲儀燒掉獻給上主。</verse>
				<verse number="24">佢等又將皇帝个信仔交給 河西 省省長㧯該兜官長；該兜領袖就幫助人民，供給上帝聖殿敬拜个需要。</verse>
			</chapter>
			<chapter number="9">
				<verse number="1">這事以後，有兜 以色列 人个領袖來㧯𠊎講：「 以色列 人民、祭司、 利未 人並無㧯該兜鄰國个 迦南 人、 赫 人、 比利洗 人、 耶布斯 人、 亞捫 人、 摩押 人、 埃及 人、 亞摩利 人隔離。佢等學該兜人，做共樣邪惡个事。</verse>
				<verse number="2">佢等為自家㧯子孫討外國个細妹仔，將上帝聖潔个子民打垃圾；領袖㧯官長就係帶頭个罪人。」</verse>
				<verse number="3">𠊎一聽到這事，就扯爛衫㧯外袍，又挷頭那毛㧯鬍鬚，憂傷痛苦坐等。</verse>
				<verse number="4">𠊎呆呆坐等，直到臨暗仔獻祭个時。因為 以色列 个上帝識講，佢愛對付流亡轉來个人所犯个罪，所有聽到這話就著驚憂傷个人全部聚集到𠊎面前來。</verse>
				<verse number="5">臨暗仔獻祭个時，𠊎對憂傷中䟘起來，還係著等扯爛个衫㧯外袍跪落去，伸出雙手向上主 — 𠊎个上帝祈禱。</verse>
				<verse number="6">𠊎講：「上帝啊，𠊎真見笑澇潰，毋敢在你面前昂起頭來。𠊎等个罪惡堆起來高過頭那，𠊎等个罪過堵天。</verse>
				<verse number="7">對𠊎等祖先个時代直到這下，𠊎等个罪惡盡重。因為𠊎等个罪過，𠊎等㧯𠊎等个王，並該兜祭司全部落在外邦君王个手中。𠊎等被人㓾、被人搶、被人捉走，受盡侮辱，到今晡日還係恁樣。</verse>
				<verse number="8">「上主 — 𠊎等个上帝識施恩給𠊎等，使𠊎等賸到个人民暫時毋使做奴才，俾𠊎等安穩住在這神聖个所在。𠊎等个上帝使𠊎等重見光明，脫離捆綁，給𠊎等還有一些仔希望。</verse>
				<verse number="9">𠊎等本來係奴才，總係𠊎等个上帝無俾𠊎等一直做奴才。佢使 波斯 个皇帝好款待𠊎等，俾𠊎等重新䟘起來，又重建上帝个聖殿，整好毀壞个所在，使𠊎等在 猶大 㧯 耶路撒冷 有城牆來保護。</verse>
				<verse number="10">「總係，𠊎等个上帝啊，這下這事既然發生，𠊎等還有麼介好講呢？𠊎等違背</verse>
				<verse number="11">你通過你个僕人 — 該兜先知所給𠊎等个命令。佢等識㧯𠊎等講，𠊎等愛去佔領个所在係屙糟个土地；因為當地个人污穢邪惡个行為使全地充滿垃圾。</verse>
				<verse number="12">佢等又㧯𠊎等講：若係𠊎等愛強盛，享受這垤土地个出產，永遠傳給子孫，𠊎等絕對做毋得㧯該兜人通婚，做毋得幫助佢等繁榮興旺。</verse>
				<verse number="13">𠊎等个上帝啊，就算臨到𠊎等个責罰全部係因為𠊎等个罪惡過犯，𠊎等知，你對𠊎等个責罰還係少過𠊎等所應得个；你還係留𠊎這兜人个生命。</verse>
				<verse number="14">𠊎等樣般做得再違背你个命令，㧯該兜邪惡个人通婚呢？若係𠊎等恁樣做，你一定會發譴，消滅𠊎等，使𠊎等無留一儕。</verse>
				<verse number="15">上主 — 以色列 个上帝啊，你係公義个；總係你還留𠊎等罪人个生命。𠊎等向你承認𠊎等个罪；𠊎等無資格來企在你个面前。」</verse>
			</chapter>
			<chapter number="10">
				<verse number="1">當 以斯拉 伏在上帝聖殿前祈禱，噭吱，承認這兜罪个時，有一大群 以色列 人，包含男女㧯細人仔，聚集圍等佢，傷心大噭。</verse>
				<verse number="2">以攔 宗族 耶歇 个孻仔 示迦尼 對 以斯拉 講：「𠊎等討外族个婦女做𡜵娘，得罪𠊎等个上帝；雖然恁樣， 以色列 還有希望。</verse>
				<verse number="3">這下，𠊎等一定愛向𠊎等个上帝立約：愛將這兜婦人家㧯姖等个細人仔送走。𠊎等愛聽從你㧯該兜敬重上帝命令个人个勸話。𠊎等愛照上帝个法律所要求个來行。</verse>
				<verse number="4">䟘起來，負這個責任。𠊎等會幫助你；愛有勇氣來完成這事！」</verse>
				<verse number="5">所以， 以斯拉 愛祭司、 利未 人、㧯 以色列 眾人該兜領袖發誓，保證愛照 示迦尼 个建議去做。佢等就照恁樣發誓。</verse>
				<verse number="6">接等， 以斯拉 對聖殿頭前入去 以利亞實 个孻仔 約哈難 个間肚，在該位，佢毋食，也毋啉，為流亡轉來人民个罪哀傷歸暗晡。</verse>
				<verse number="7">該兜民間領袖派人到全 耶路撒冷 㧯 猶大 ，愛喊所有流亡轉來个人到 耶路撒冷 聚集。若係有人在三日內無到，愛沒收佢个財產；佢愛對會眾當中除名。</verse>
				<verse number="8"></verse>
				<verse number="9">三日內，就係到第九月二十日，所有住在 猶大 㧯 便雅憫 地方个人全部到 耶路撒冷 ，集合在上帝聖殿个廣場。該日，落當大雨，因為天氣个關係㧯這集會个嚴重，逐儕人全部愊愊掣。</verse>
				<verse number="10">祭司 以斯拉 企起來，對佢等講：「你等有罪了，討外族婦女，增加 以色列 个罪。</verse>
				<verse number="11">這下，你等愛向上主 — 你等祖先个上帝認罪，做佢歡喜个事，愛㧯住在𠊎等土地个外族人斷絕關係，離開你等个外族𡜵娘。」</verse>
				<verse number="12">民眾大聲應講：「你樣般講，𠊎等就樣般做！」</verse>
				<verse number="13">毋過，佢等又講：「會眾恁多，雨又恁大，𠊎等做毋得緊企在外背。這毋係一兩日能辦好个事，因為有當多人犯到這罪。</verse>
				<verse number="14">請𠊎等个官長留在 耶路撒冷 為會眾處理這件事；喊該兜討外族𡜵娘个人，在指定个時間，㧯佢城肚个領袖並審判官共下來。恁樣，上帝就毋會為這事再發譴。」</verse>
				<verse number="15">大家全部贊成，只有 亞撒黑 个孻仔 約拿單 㧯 特瓦 个孻仔 雅哈謝 兩儕反對；佢等有 米書蘭 㧯 利未 人 沙比太 支持。</verse>
				<verse number="16">對流亡轉來个人就照恁樣做，所以祭司 以斯拉 就對族長中指名幾儕出來，記下佢等个名。十月初一，這兜人開始調查，</verse>
				<verse number="17">到正月初一，佢等將所有討外族細妹仔个人全部調查清楚。</verse>
				<verse number="18">以下係討外族細妹仔个人： 祭司 (用宗族排列)： 約薩達 个子孫， 耶書亞 㧯佢該兜兄弟个宗族： 瑪西雅 、 以利以謝 、 雅立 、 基大利 。</verse>
				<verse number="19">佢等答應㧯佢等个𡜵娘離婚，獻一隻綿羊牯做牲儀來贖罪。</verse>
				<verse number="20">音麥 宗族： 哈拿尼 、 西巴第雅 。</verse>
				<verse number="21">哈琳 宗族： 瑪西雅 、 以利雅 、 示瑪雅 、 耶歇 、 烏西雅 。</verse>
				<verse number="22">巴施戶珥 宗族： 以利約乃 、 瑪西雅 、 以實瑪利 、 拿坦業 、 約撒拔 、 以利亞撒 。</verse>
				<verse number="23">利未 人： 約撒拔 、 示每 、 基拉雅 (又安到 基利他 )、還有 比他希雅 、 猶大 、 以利以謝 。</verse>
				<verse number="24">歌手： 以利亞實 。 聖殿守衛： 沙龍 、 提聯 、 烏利 。</verse>
				<verse number="25">其他个 以色列 人： 巴錄 宗族： 拉米 、 耶西雅 、 瑪基雅 、 米雅民 、 以利亞撒 、 瑪基雅 、 比拿雅 。</verse>
				<verse number="26">以攔 宗族： 瑪他尼 、 撒迦利亞 、 耶歇 、 押底 、 耶利末 、 以利雅 。</verse>
				<verse number="27">薩土 宗族： 以利約乃 、 以利亞實 、 瑪他尼 、 耶利末 、 撒拔 、 亞西撒 。</verse>
				<verse number="28">比拜 宗族： 約哈難 、 哈拿尼雅 、 薩拜 、 亞勒 。</verse>
				<verse number="29">巴尼 宗族： 米書蘭 、 瑪鹿 、 亞大雅 、 雅述 、 示押 、 耶利末 。</verse>
				<verse number="30">巴哈‧摩押 宗族： 亞底拿 、 基拉 、 比拿雅 、 瑪西雅 、 瑪他尼 、 比撒列 、 賓內 、 瑪拿西 。</verse>
				<verse number="31">哈琳 宗族： 以利以謝 、 伊示雅 、 瑪基雅 、 示瑪雅 、 西緬 、 便雅憫 、 瑪鹿 、 示瑪利雅 。</verse>
				<verse number="32"></verse>
				<verse number="33">哈順 宗族： 瑪特乃 、 瑪達他 、 撒拔 、 以利法列 、 耶利買 、 瑪拿西 、 示每 。</verse>
				<verse number="34">巴尼 宗族： 瑪玳 、 暗蘭 、 烏益 、 比拿雅 、 比底雅 、 基祿 、 瓦尼雅 、 米利末 、 以利亞實 、 瑪他尼 、 瑪特乃 、 雅掃 。</verse>
				<verse number="35"></verse>
				<verse number="36"></verse>
				<verse number="37"></verse>
				<verse number="38">賓內 宗族 ： 示每 、 示利米雅 、 拿單 、 亞大雅 、 瑪拿底拜 、 沙賽 、 沙賴 、 亞撒利 、 示利米雅 、 示瑪利雅 、 沙龍 、 亞瑪利雅 、 約瑟 。</verse>
				<verse number="39"></verse>
				<verse number="40"></verse>
				<verse number="41"></verse>
				<verse number="42"></verse>
				<verse number="43">尼波 宗族： 耶利 、 瑪他提雅 、 撒拔 、 西比拿 、 雅玳 、 約珥 、 比拿雅 。</verse>
				<verse number="44">以上這兜人全部有討外族个細妹仔。佢等攏總將𡜵娘㧯子女送走 。</verse>
			</chapter>
		</book>
		<book number="16">
			<chapter number="1">
				<verse number="1">下背所記載係 哈迦利亞 个孻仔 尼希米 个事。 亞達薛西 做 波斯 皇帝第二十年基斯流月 ，𠊎 — 尼希米 住在 波斯 京城 書珊 。</verse>
				<verse number="2">𠊎个兄弟 哈拿尼 㧯一群人對 猶大 來到 書珊 城。𠊎向佢等打探對流亡 巴比倫 轉去 个 猶太 同胞㧯 耶路撒冷 个情形。</verse>
				<verse number="3">佢等講：「該兜流亡還生个難民轉到家鄉 ，堵到當大个困難，被外族人侮辱。」佢等又㧯𠊎講：「 耶路撒冷 个城牆橫掉，城門被人燒掉。」</verse>
				<verse number="4">𠊎聽到這兜事，就坐下來，緊流目汁。 𠊎悲傷好多日，無食東西。𠊎向上帝祈禱講：</verse>
				<verse number="5">「上主 — 天頂个上帝啊，你係至大、值得敬畏个上帝；你對愛你又遵守你誡命个人守慈愛个約。</verse>
				<verse number="6">上主啊，𠊎日夜為到你个眾僕人 — 以色列 人民哀求个時，求你注目看𠊎、聽𠊎个祈禱！𠊎承認𠊎等 以色列 人得罪你；𠊎个祖先㧯𠊎全部有犯罪。</verse>
				<verse number="7">𠊎等惡意反抗你，毋遵行你通過你个僕人 摩西 頒佈給𠊎等个法律㧯誡命。</verse>
				<verse number="8">「求你記得你識㧯你个僕人 摩西 講：『若係你等對𠊎無忠心，𠊎愛將你等分散到別个國家；</verse>
				<verse number="9">若係你等歸向𠊎，遵行𠊎个命令，𠊎會帶你等轉來；就算你等流亡散到天邊，𠊎也會帶你等轉到這𠊎所選做敬拜𠊎个所在。』</verse>
				<verse number="10">「主啊，這兜全部係你个僕人，你自家个子民，係你識用大能大力救贖个人。</verse>
				<verse number="11">求你側耳垂聽僕人个祈禱，也聽歡喜敬畏你聖名眾僕人个祈禱。求你幫助僕人今晡日順利成功，使皇帝向𠊎開恩。」 該時，𠊎係做皇帝个酒政。</verse>
			</chapter>
			<chapter number="2">
				<verse number="1">四隻月以後， 亞達薛西 做皇帝第二十年尼散月，有一日，𠊎為佢斟酒。佢毋識看到𠊎滿面憂愁，</verse>
				<verse number="2">皇帝問𠊎：「你又無發病，做麼介面色恁毋好看？一定有麼介事正會使你恁憂愁！」 𠊎非常著驚，</verse>
				<verse number="3">總係應講：「皇帝萬歲！𠊎祖先埋葬个城荒掉，城門被火燒掉，𠊎樣毋會憂愁呢？」</verse>
				<verse number="4">皇帝問𠊎：「你愛麼介？」 𠊎就向天頂个上帝祈禱，</verse>
				<verse number="5">然後𠊎㧯皇帝講：「若係皇帝開恩，准僕人个懇求，請俾𠊎轉到 猶大 地，到𠊎祖先埋葬个城去，恁樣，𠊎愛重建該城。」</verse>
				<verse number="6">該時，皇后坐在佢个堘頭。皇帝問𠊎愛去幾久？幾時轉來？𠊎回答後，佢歡喜派𠊎去；𠊎就定日期。</verse>
				<verse number="7">𠊎又求皇帝開恩賜給𠊎詔書，通知 河西 省 該兜省長准𠊎經過，直到 猶大 。</verse>
				<verse number="8">𠊎也要求一份詔書給管理皇家樹林个 亞薩 ，命令佢給𠊎樹料，來修建聖殿堘城堡个門㧯城牆、還有𠊎愛住个屋仔。因為𠊎个上帝施恩幫助，𠊎所要求个，皇帝全部賜給𠊎。</verse>
				<verse number="9">皇帝派軍官㧯騎兵保護𠊎，𠊎就出發到 河西 省。在該位，𠊎將皇帝个詔書交給該兜省長。</verse>
				<verse number="10">和倫 城个 參巴拉 㧯 亞捫 省个官長 多比雅 ，聽到有人來為 以色列 人爭取利益，就當無歡喜。</verse>
				<verse number="11">𠊎到 耶路撒冷 ，在該位住三日，</verse>
				<verse number="12">無將上帝愛𠊎為 耶路撒冷 做个事㧯人講。第三日半夜，𠊎䟘起來，帶等幾個人共下出去。除了𠊎騎个驢仔，無別个頭牲。</verse>
				<verse number="13">𠊎在半夜出城，經過西片个 谷門 ，向南經過 龍泉 ，來到 垃圾門 。𠊎緊行，緊看 耶路撒冷 橫掉个城牆㧯被火燒掉个城門。</verse>
				<verse number="14">在城个東片，𠊎向北行，到 泉水門 㧯 王池 。在該位，因為𠊎騎个驢仔尋毋到路過去，</verse>
				<verse number="15">𠊎就下到 汲淪 溪，順山壢騎等上，巡查城牆，然後倒轉原來个路，經過 谷門 轉到城肚。</verse>
				<verse number="16">無一個官長知𠊎去過麼介所在，做麼介事。直到該時，𠊎全無㧯 猶太 同胞講起；無論係祭司、領袖、官長，抑係可能參加這工作个人，𠊎全部無講。</verse>
				<verse number="17">後來𠊎對佢等講：「𠊎等所堵到个困難就係 耶路撒冷 荒掉，城門被火燒掉，你等全部看到了。𠊎等來重建 耶路撒冷 个城牆，免得𠊎等再受侮辱！」</verse>
				<verse number="18">𠊎又講，𠊎个上帝樣般施恩幫助𠊎，又㧯佢等講皇帝對𠊎講个話。 佢等講：「𠊎等開始來重建！」所以佢等準備好勢，開始這好个工作。</verse>
				<verse number="19">總係 和倫 城个 參巴拉 、 亞捫 省个官長 多比雅 ，㧯一個喊做 基善 个 阿拉伯 人，一聽到𠊎等愛做个事，就笑𠊎等，藐視𠊎等。佢等講：「你等愛做麼介啊？你等想愛悖逆皇帝係麼？」</verse>
				<verse number="20">𠊎應佢等講：「天頂个上帝會使𠊎等成功。𠊎等係佢个僕人；𠊎等愛開始來起。你等反轉在 耶路撒冷 無份、無權利、無人紀念。」</verse>
			</chapter>
			<chapter number="3">
				<verse number="1">城牆係恁樣重建起來个 ： 大祭司 以利亞實 㧯佢該兜祭司兄弟重建 羊門 ，奉獻給上主，又安好門扇。佢等又起城牆，直到 百樓 㧯 哈楠業樓 ，將它奉獻出來。</verse>
				<verse number="2">接等該站係 耶利哥 人來起。 再接等該站係 音利 个孻仔 撒刻 來起。</verse>
				<verse number="3">哈西拿 宗族起 魚門 。佢等將樑㧯門全部安好，又裝門閂來鎖城門。</verse>
				<verse number="4">接等該站係 哈哥斯 个孫仔， 烏利亞 个孻仔 米利末 來修整。 再接等該站係 米示薩別 个孫仔， 比利迦 个孻仔 米書蘭 來修整。 再接等該站係 巴拿 个孻仔 撒督 來修整。</verse>
				<verse number="5">接等該站係 提哥亞 城个人來修整；總係該城个領袖毋擔當總工頭指定佢等做个工。</verse>
				<verse number="6">巴西亞 个孻仔 耶何耶大 㧯 比所玳 个孻仔 米書蘭 來修整 耶沙拿門 。佢等將樑㧯門全部安好，又裝門閂來鎖城門。</verse>
				<verse number="7">接等該站係 基遍 人 米拉提 、 米倫 人 雅頓 、還有屬 河西 省長所管个 基遍 城㧯 米斯巴 城个人來修整。</verse>
				<verse number="8">接等該站係 哈海雅 个孻仔銀匠 烏薛 來修整。 再接等該站係製造香料个 哈拿尼雅 來修整。這兜人修建 耶路撒冷 ，直到 闊牆 。</verse>
				<verse number="9">接等該站係 戶珥 个孻仔，管理半隻 耶路撒冷 个 利法雅 來修整。</verse>
				<verse number="10">接等該站係 哈路抹 个孻仔 耶大雅 來修整，係在佢自家屋下个對面。 接等該站係 哈沙尼 个孻仔 哈突 來修整。</verse>
				<verse number="11">接等該站係 哈琳 个孻仔 瑪基雅 㧯 巴哈‧摩押 个孻仔 哈述 來修整；佢等也修整 爐樓 。</verse>
				<verse number="12">接等該站係 哈羅黑 个孻仔，管理 耶路撒冷 另外一半个 沙龍 來修整。佢該兜妹仔也共下來𢯭手。</verse>
				<verse number="13">哈嫩 㧯 撒挪亞 城个百姓重新來起 谷門 。佢等將門安好，也裝門閂來鎖城門。佢等又修整城牆四百四十公尺，直到 垃圾門 。</verse>
				<verse number="14">利甲 个孻仔，管理 伯‧哈基琳 區个 瑪基雅 重新來起 垃圾門 。佢將門安好，也裝門閂來鎖城門。</verse>
				<verse number="15">各‧荷西 个孻仔，管理 米斯巴 區个 沙崙 重新來起 泉水門 ，也起入口个門廊。佢將門安好，又裝門閂。佢也將 西羅亞 池滣頭王家花園該站城牆修整，一直做到對 大衛 城下來个石段仔。</verse>
				<verse number="16">押卜 个孻仔 尼希米 管理 伯‧夙 區个一半，佢修整再下一站，直到 大衛 墓地个對面，又到陂塘㧯勇士个屋仔 。</verse>
				<verse number="17">下背係 利未 人修整个幾站城牆： 巴尼 个孻仔 利宏 修整再下一站。 管理一半个 基伊拉 區个 哈沙比雅 ，佢為所管理个地區修整再下一站。</verse>
				<verse number="18">希拿達 个孻仔 巴瓦伊 管理另外一半 基伊拉 區，佢修整再下一站。</verse>
				<verse number="19">耶書亞 个孻仔 以謝 管理 米斯巴 ，佢修整再下一站，在兵器庫个頭前，直到城牆轉彎个所在。</verse>
				<verse number="20">薩拜 个孻仔 巴錄 修整再下一站，直到大祭司 以利亞實 屋仔个門口。</verse>
				<verse number="21">哈哥斯 个孫仔、 烏利亞 个孻仔 米利末 修整再下一站，直到 以利亞實 个屋尾。</verse>
				<verse number="22">下背係祭司修整个幾站城牆： 住在 耶路撒冷 四周圍个祭司修整再下一站。</verse>
				<verse number="23">便雅憫 㧯 哈述 修整再下一站，就在佢等个屋頭前。 亞難尼 个孫仔、 瑪西雅 个孻仔 亞撒利雅 修整再下一站，就在佢个屋頭前。</verse>
				<verse number="24">希拿達 个孻仔 賓內 修整再下一站，對 亞撒利雅 个屋舍到城牆轉角。</verse>
				<verse number="25">烏賽 个孻仔 巴拉 修整再下一站，對城牆轉角㧯王宮上層突出來个城樓，偎護衛院該位開始修整。 巴錄 个孻仔 比大雅 修整再下一站，直到偎 水門 東片㧯聖殿守衛住个城樓。 (這就係偎 俄斐勒 、聖殿工人住个所在。)</verse>
				<verse number="26"></verse>
				<verse number="27">提哥亞 人修整再下一站；這係佢等修整个第二段：對守衛聖殿个大城樓對面開始，直到近 俄斐勒 該位个城牆。</verse>
				<verse number="28">有兜祭司修整再下一站，對 馬門 向北開始。逐個祭司在佢等自家个屋仔頭前修整。</verse>
				<verse number="29">音麥 个孻仔 撒督 修整再下一站，就在厥屋仔頭前。 示迦尼 个孻仔，看守東門个 示瑪雅 修整再下一站。</verse>
				<verse number="30">示利米雅 个孻仔 哈拿尼雅 㧯 薩拉 个第六個孻仔 哈嫩 修整再下一站。這係佢等修整个第二段。 比利迦 个孻仔 米書蘭 修整再下一站，就在厥屋仔个頭前。</verse>
				<verse number="31">打銀仔个 瑪基雅 修整再下一站，直到聖殿工人㧯生理人用个屋仔該位；這屋仔對等 守望門 ，偎近城牆東北个角樓。</verse>
				<verse number="32">打銀仔个㧯生理人修整最尾一站，對城牆个角樓直到 羊門 。</verse>
			</chapter>
			<chapter number="4">
				<verse number="1">參巴拉 聽到𠊎等 猶太 人已經開始修整城牆，就大發譴，又恥笑𠊎等。</verse>
				<verse number="2">佢在同伴㧯 撒馬利亞 軍隊面前講：「這兜軟弱个 猶太 人在做麼介呢？佢等想愛重新起這城係麼？佢等恅到通過獻祭就能在一日之內完工係麼？佢等想對燒過个瓦石堆尋石頭來起城牆係麼！」</verse>
				<verse number="3">亞捫 人 多比雅 企在佢个堘頭，也跈等講：「佢等能起像樣个石牆麼？驚怕一隻狐狸上去就橫掉！」</verse>
				<verse number="4">𠊎祈禱講：「𠊎等个上帝啊，聽佢等在笑𠊎等！求你俾佢等个恥笑歸在自家个頭那頂，佢等个財產被人搶走，佢等被人捉到外國去！</verse>
				<verse number="5">求你毋好赦免佢等所做个壞事，莫毋記得佢等个罪惡，因為佢等在𠊎這兜修建个人面前惹你發譴 。」</verse>
				<verse number="6">恁樣𠊎等繼續重建城牆，無幾久就起到一半恁高，因為人民全部熱心工作。</verse>
				<verse number="7">參巴拉 㧯 多比雅 ，並 阿拉伯 、 亞捫 、 亞實突 个人民，聽到𠊎等重建 耶路撒冷 个城牆，工作進行當遽，城牆个缺口全部會修補好，就盡無歡喜。</verse>
				<verse number="8">佢等共下陰謀，愛來攻擊 耶路撒冷 ，製造混亂。</verse>
				<verse number="9">總係𠊎等向𠊎等个上帝祈禱，派人日夜看守，防備佢等。</verse>
				<verse number="10">猶大 人有一首歌講： 工人緊來緊無力； 瓦析多到搬毋掉！ 城牆樣會起得完？</verse>
				<verse number="11">敵人想愛偷偷仔暗殺𠊎等，阻擋𠊎等个工作。</verse>
				<verse number="12">總係，住在敵人附近个 猶太 人早就一擺又一擺來警告𠊎等，講起敵人个陰謀。</verse>
				<verse number="13">所以𠊎喊民眾帶刀仔、槍、弓箭，用宗族做單位，派佢等在吂修好个城牆盡矮个所在守衛。</verse>
				<verse number="14">𠊎巡查轉來後，就對民眾㧯佢等个領袖、官長講：「毋使驚敵人！愛記得主係至大又值得敬畏个。愛為你等个同胞、你等个𡜵娘、你等个子女，㧯你等个家園拚命。」</verse>
				<verse number="15">敵人聽到𠊎等已經知佢等个陰謀，看出上帝已經破壞佢等个計謀。所以𠊎等大家又轉到城牆該位，逐儕繼續工作。</verse>
				<verse number="16">該日開始，𠊎个手下一半个人工作；一半个人守衛，拿等槍、盾牌、弓箭，著等戰甲。該兜領袖全力支持 猶大 逐個家族。</verse>
				<verse number="17">起城牆个工人，逐儕腰身繫等刀仔，連搬運建築材料个人也一手工作，一手拿等武器。歕羊角个人企在𠊎堘頭。</verse>
				<verse number="18"></verse>
				<verse number="19">𠊎對民眾、官長㧯領袖講：「這工程當大，分散當闊，𠊎等逐儕在城牆頂也離當遠。</verse>
				<verse number="20">你等一聽到羊角，愛黏時集合到𠊎這位來。𠊎等个上帝一定會為𠊎等相㓾！」</verse>
				<verse number="21">所以，逐日對天光到星仔出現，𠊎等有一半个人在城牆頂工作，一半个人拿等武器守衛。</verse>
				<verse number="22">該時，𠊎又對民眾講：「逐儕㧯佢个助手全部愛在 耶路撒冷 過夜；恁樣，佢等暗晡頭保護𠊎等，日時頭工作。」</verse>
				<verse number="23">𠊎暗晡歇睏个時無脫衫；𠊎个同伴、僕人、㧯衛兵也無一儕人脫衫。儕儕隨時拿等武器，連出去打水也係恁樣。</verse>
			</chapter>
			<chapter number="5">
				<verse number="1">過一站時間，盡多人，男个女个，開始怪怨佢等个 猶太 同胞。</verse>
				<verse number="2">有兜講：「𠊎等係子女恁多个大家庭，需要糧食來過日！」</verse>
				<verse number="3">有兜講：「𠊎等高不將愛抵押田地、葡萄園㧯屋仔，正有糧食充飢。」</verse>
				<verse number="4">也有人講：「𠊎等已經借錢來納田地㧯葡萄園个稅給皇帝。</verse>
				<verse number="5">𠊎等㧯𠊎等个 猶太 同胞係共種族；𠊎等个子女㧯佢等个子女無麼介分別。總係𠊎等卻愛迫自家个子女去做奴才，𠊎等个妹仔有兜已經做奴婢了，𠊎等無力拯救，因為𠊎等个田地㧯葡萄園已經變做別人个。」</verse>
				<verse number="6">𠊎聽到佢等个怪怨㧯所講个話，就大發譴，</verse>
				<verse number="7">決定愛解決這事。𠊎責備該兜民眾个領袖㧯官長講：「你等樣般敢剝削自家个兄弟？」 然後𠊎聚集群眾開會來處理這問題，</verse>
				<verse number="8">對佢等講：「𠊎等識盡最大个努力贖轉該兜賣給外族个 猶太 兄弟。這下你等反轉強迫兄弟賣自家給你等 — 給自家个 猶太 个同胞！」該兜領袖全部恬恬，無話好講。</verse>
				<verse number="9">所以𠊎又講：「你等恁樣做實在毋著！你等敢毋係應該敬畏上帝，去做著个事？毋好俾𠊎等个外邦對敵有任何个理由恥笑𠊎等。</verse>
				<verse number="10">𠊎識借錢借糧食給同胞；𠊎个朋友㧯工人也識借給同胞。這下，𠊎等愛免掉所有个利息，</verse>
				<verse number="11">無論係錢、糧食、酒、油，全部毋使佢等還；愛即時將佢等抵押个田地、葡萄園、橄欖園、㧯屋仔還佢等。」</verse>
				<verse number="12">該兜領袖應講：「𠊎等願意照你講个去做，退還佢等个財產，毋會再向佢等討債。」 𠊎召集祭司來，喊該兜領袖在佢等面前發誓，愛遵守頭下个約定。</verse>
				<verse number="13">然後，𠊎解開腰帶 ，擉等講：「上帝愛恁樣擉毋守約定个人，擉掉佢个屋仔㧯一切所有个，使佢麼介就無。」 所有在場个人全部講：「阿愐！」又讚美上主。該兜領袖就照佢等个約定去做。</verse>
				<verse number="14">對𠊎做 猶大 省長个十二年來，就係對 亞達薛西 做皇帝个第二十年到三十二年，𠊎㧯𠊎个兄弟全部無食省長應該得到个糧食。</verse>
				<verse number="15">在𠊎以前該兜省長全部係人民个重擔；佢等要求人民逐日 為到糧食、酒繳四十隻銀幣。連佢等个僕人也欺壓人民。總係𠊎毋恁樣做，因為𠊎敬畏上帝。</verse>
				<verse number="16">𠊎全心在重建城牆；𠊎並無買產業。𠊎个僕人也全部參加重建个工作。</verse>
				<verse number="17">平常㧯𠊎共下食飯个 猶太 人民㧯領袖有一百五十人，另外還有對鄰國來見𠊎个人。</verse>
				<verse number="18">逐日，𠊎愛準備一隻牛牯，六隻肥羊，㧯盡多雞仔。每十日，𠊎愛供給一批新酒。雖然恁樣，𠊎並無要求省長應該得到个糧食，因為𠊎知人民个負擔已經當重了。</verse>
				<verse number="19">𠊎个上帝啊，求你紀念𠊎為人民所做个事，施恩給𠊎。</verse>
			</chapter>
			<chapter number="6">
				<verse number="1">參巴拉 、 多比雅 、 阿拉伯 人 基善 ，㧯𠊎等其他仇敵聽到𠊎已經整好城牆，全無缺口 (其實𠊎還吂在入口安城門)。</verse>
				<verse number="2">所以 參巴拉 㧯 基善 派人送信仔給𠊎，建議𠊎在 阿挪 平原个一個村莊㧯佢等見面。這係佢等个計謀，想愛害𠊎。</verse>
				<verse number="3">𠊎派人去㧯佢等講：「𠊎這下進行重要个工作，無辦法去。𠊎樣會去看你等來使工作停跎哪？」</verse>
				<verse number="4">佢等四擺給𠊎共樣个公文，逐擺𠊎全部用共樣个話應佢等。</verse>
				<verse number="5">後來， 參巴拉 派佢个僕人帶給𠊎第五封公文；這係一封無封口个信仔 。</verse>
				<verse number="6">信仔講： 「 基善 㧯𠊎講，附近人民傳恁樣个風聲，講你㧯 猶太 人想愛造反，所以你正會重建城牆。佢還講，你自家想愛做王，</verse>
				<verse number="7">已經安排先知在 耶路撒冷 愛宣告你係 猶大 个王。皇帝一定會聽到這事。所以，𠊎建議你來㧯𠊎見面，大家來互相參詳。」</verse>
				<verse number="8">𠊎就回覆佢講：「你所講个全部無影，係你自家造話出來个。」</verse>
				<verse number="9">佢等想愛嚇𠊎等，使𠊎等手軟來停工。𠊎祈禱講：「上帝啊，求你使𠊎个手堅強！」</verse>
				<verse number="10">這時，𠊎去見 示瑪雅 。佢係 米希大別 个孫仔， 第來雅 个孻仔；佢做毋得離開屋下。佢對𠊎講：「𫣆等一定愛去囥在上帝聖殿个聖所，門閂好，因為有人愛來㓾你，佢等會在暗晡頭來㓾你。」</verse>
				<verse number="11">𠊎應講：「𠊎毋係該種走去囥个人！你恅到𠊎這種人會去囥在聖殿，保留自家个命係麼？𠊎毋去！」</verse>
				<verse number="12">𠊎將這事認真來想，看出上帝並無派 示瑪雅 來警告𠊎，佢係被 多比雅 㧯 參巴拉 收買个。</verse>
				<verse number="13">佢等收買佢來嚇𠊎，愛害𠊎犯罪；恁樣，佢等就能譭謗𠊎，侮辱𠊎。</verse>
				<verse number="14">𠊎祈禱講：「𠊎个上帝啊，求你記得 多比雅 㧯 參巴拉 所做个事來刑罰佢等。求你也記得女先知 挪亞底 㧯其他想愛嚇𠊎个先知。」</verse>
				<verse number="15">經過五十二日个工作，城牆在以祿月 二十五日全部完工。</verse>
				<verse number="16">𠊎等鄰國該兜敵人聽到全部戇淨淨，因為佢等看出這工程个完成係因為𠊎等上帝个幫助。</verse>
				<verse number="17">在該站時間， 猶太 人該兜領袖常常㧯 多比雅 通信。</verse>
				<verse number="18">盡多 猶大 个人民也企在 多比雅 該片，因為佢係 亞拉 个孻仔 示迦尼 个婿郎，佢个孻仔 約哈難 討 比利迦 个孻仔 米書蘭 个妹仔。</verse>
				<verse number="19">人民常常在𠊎面前講起 多比雅 个好行為，也將𠊎所講个話傳給佢。同時， 多比雅 也常常寫信仔嚇𠊎。</verse>
			</chapter>
			<chapter number="7">
				<verse number="1">這下城牆已經修建好了，城門也安好了；聖殿守衛、詩班隊員，㧯其他 利未 人个工作也全部分派好勢了。</verse>
				<verse number="2">所以𠊎派兩個人監督管理 耶路撒冷 个事；佢等係𠊎个兄弟 哈拿尼 㧯城堡个官長 哈拿尼雅 。 哈拿尼雅 係一個忠心个人，又敬畏上帝贏過眾人。</verse>
				<verse number="3">𠊎吩咐佢等，天還吂光，做毋得開 耶路撒冷 个城門；日頭落山、守衛離開以前，愛關城門，閂好。𠊎也吩咐佢等愛對 耶路撒冷 人民當中指派守衛，一部份人看守特別个地點，其他个就在自家屋下周圍巡邏。</verse>
				<verse number="4">耶路撒冷 城又大又闊，總係住在城肚个人無多，屋舍起好个也無多。</verse>
				<verse number="5">上帝感動𠊎召集民眾㧯佢等个領袖並官長，登記佢等个家譜。𠊎尋到第一批被人捉去又轉來个人个記錄。下背就係𠊎尋到个資料：</verse>
				<verse number="6">盡多流亡个人離開 巴比倫 省，轉到 耶路撒冷 㧯 猶大 ，逐個人轉去自家个家鄉。這兜人㧯佢等屋下个人，自從被 尼布甲尼撒 王捉走以來，一直流亡在 巴比倫 。</verse>
				<verse number="7">佢等个領袖係 所羅巴伯 、 耶書亞 、 尼希米 、 亞撒利雅 、 拉末 、 拿哈瑪尼 、 末底改 、 必珊 、 米斯比列 、 比革瓦伊 、 尼宏 、 巴拿 。</verse>
			</chapter>
			<chapter number="8">
				<verse number="1">到第七月， 以色列 人在逐儕个城鎮全部安定好勢。該隻月个第一日，佢等聚集在 耶路撒冷 ，在 水門 前个廣場。佢等請經學專家 以斯拉 將法律書帶來；這法律就係上主通過 摩西 給 以色列 人个。</verse>
				<verse number="2">所以祭司 以斯拉 將法律書帶到群眾聚集个所在；該位有男人、女人、㧯聽得識个細人仔。</verse>
				<verse number="3">以斯拉 在 水門 前个廣場向佢等大聲讀法律書，對天光一直讀到當晝；佢等全部當認真聽。</verse>
				<verse number="4">經學專家 以斯拉 企在為這事特別做个樹臺頂。佢右片企等 瑪他提雅 、 示瑪 、 亞奈雅 、 烏利亞 、 希勒家 㧯 瑪西雅 ；佢左片企等 比大雅 、 米沙利 、 瑪基雅 、 哈順 、 哈拔大拿 、 撒迦利亞 㧯 米書蘭 。</verse>
				<verse number="5">以斯拉 高高企在臺頂，佢等全部注意看佢。佢一打開書，大家全部企起來。</verse>
				<verse number="6">以斯拉 講：「頌讚上主；佢係偉大个上帝！」 所有民眾全部擎手，應講：「阿愐！阿愐！」然後跪下，面伏在地上敬拜上主。</verse>
				<verse number="7">後來，民眾䟘起來，企在佢等原來个所在；有兜 利未 人就向佢等解釋法律。這兜人係 耶書亞 、 巴尼 、 示利比 、 雅憫 、 亞谷 、 沙比太 、 荷第雅 、 瑪西雅 、 基利他 、 亞撒利雅 、 約撒拔 、 哈難 ，㧯 比萊雅 。</verse>
				<verse number="8">佢等宣讀上帝个法律書，然後翻譯 ，並詳細解釋，使民眾明白。</verse>
				<verse number="9">民眾聽到法律規定个事以後，全部感動到噭出來。所以省長 尼希米 、祭司㧯經學專家 以斯拉 ，並解釋法律个 利未 人㧯民眾講：「今晡日係上主 — 你等上帝个聖日，你等毋好悲傷噭吱。</verse>
				<verse number="10">大家轉屋下去準備筵席！將你等个食物㧯酒分給無能力預備个人。今晡日係𠊎等个主个聖日；你等毋好憂愁，因為上主个喜樂就係你等个力量 。」</verse>
				<verse number="11">利未 人在民眾當中安慰佢等，喊佢等恬恬，毋好悲傷，因為這日係聖日。</verse>
				<verse number="12">民眾就轉屋下去，快樂啉食，又㧯別人分享自家有个，因為讀給佢等聽个法律，佢等有聽入耳。</verse>
				<verse number="13">第二日，逐宗族个族長、祭司㧯 利未 人，共下去經學專家 以斯拉 該位研究法律个教訓。</verse>
				<verse number="14">佢等發現，上主通過 摩西 賜下這法律，識命令 以色列 人在第七月搭寮仔節个時，愛住在臨時搭个寮仔肚。</verse>
				<verse number="15">所以，佢等向 全 耶路撒冷 㧯其他个城鎮發出通知：「你等愛出去，到山頂剁橄欖樹、松樹、石榴樹、棕樹㧯其他樹仔个樹桍，照法律書个指示搭寮仔。」</verse>
				<verse number="16">民眾就出去，剁來盡多樹桍，搭寮仔在佢等个屋頂項，在佢等个庭院肚，在上帝聖殿个庭院肚，在 水門 㧯 以法蓮 門前个廣場。</verse>
				<verse number="17">所有流亡轉來个人全部搭寮仔，住在底背。對 嫩 个孻仔 約書亞 个時代以來，這係 以色列 人第一擺恁樣做。逐儕就當歡喜快樂。</verse>
				<verse number="18">對節期个第一日到盡尾一日， 以斯拉 逐日讀一段上帝个法律書給佢等聽。佢等守節七日，到第八日，就照法律个規定舉行閉會典禮。</verse>
			</chapter>
			<chapter number="9">
				<verse number="1">這隻月个二十四， 以色列 人聚集共下禁食，為佢等个罪憂傷。佢等已經㧯所有个外族人分開。佢等著麻衫，委泥粉在頭那頂，表示悲傷，然後企等承認佢等㧯祖先所犯个罪。</verse>
				<verse number="2"></verse>
				<verse number="3">有三點鐘久，佢等企等聽上主 — 佢等上帝个法律；接等个三點鐘久，佢等認罪、敬拜上主 — 佢等个上帝。</verse>
				<verse number="4">有一隻講臺係為 利未 人設个，頂高企等 耶書亞 、 巴尼 、 甲篾 、 示巴尼 、 布尼 、 示利比 、 巴尼 㧯 基拿尼 。佢等大聲向上主 — 佢等个上帝祈禱。</verse>
				<verse number="5">然後 利未 人 耶書亞 、 甲篾 、 巴尼 、 哈沙尼 、 示利比 、 荷第雅 、 示巴尼 㧯 比他希雅 為開始敬拜宣告講： 愛企起來，讚美上主 — 你等个上帝； 愛永永遠遠頌讚佢！ 佢个名應當受尊重，超過所有个頌讚㧯讚美； 你等愛讚美佢榮光个名。</verse>
				<verse number="6">接等， 以色列 人恁樣祈禱： 上主啊，只有你係上主！ 你創造天㧯天頂个星仔； 你造地㧯當中所有个， 海㧯當中个生物； 你賜生命給萬物。 天軍全部敬拜你。</verse>
				<verse number="7">你係上主， 係揀選 亞伯蘭 个上帝； 你帶佢出 巴比倫 个 吾珥 ， 將佢个名改做 亞伯拉罕 。</verse>
				<verse number="8">你知佢對你忠心， 就㧯佢立約： 愛將 迦南 人、 赫 人、 亞摩利 人个土地， 比利洗 人、 耶布斯 人、 革迦撒 人个土地， 賜給佢个後代。 你遵守你个約定， 因為你係公義个。</verse>
				<verse number="9">你看到𠊎等祖先在 埃及 受苦； 你聽到佢等在 紅海 滣喊救命。</verse>
				<verse number="10">你就行神蹟奇事責罰 埃及 王， 並佢所有个官員㧯全國人民； 因為你知佢等欺負你个子民。 所以你个名聲傳遍直到今晡日。</verse>
				<verse number="11">你為你个子民將海分開， 帶領佢等行燥地過去。 你將追佢等个人㧹入深水， 就像石頭沈落大海个底肚。</verse>
				<verse number="12">日時頭，你用雲柱帶領佢等； 暗晡頭，你用火柱照光佢等个路。</verse>
				<verse number="13">你對天頂臨在 西奈 山， 㧯你个子民講話。 你給佢等正直个典章、真實个法律， 美好个教訓㧯誡命。</verse>
				<verse number="14">你愛佢等守你个安息日做聖日； 你通過你个僕人 摩西 頒佈法律誡命。</verse>
				<verse number="15">佢等肚飢个時，你對天頂降下食物； 佢等嘴燥个時，你對磐石爆水出來。 你吩咐佢等入去佔領， 你應許賜給佢等个土地。</verse>
				<verse number="16">總係𠊎等个祖先越來越驕傲， 越來越硬頸，毋肯遵守你个誡命。</verse>
				<verse number="17">佢等毋肯順從，毋記得你所做个一切； 佢等毋記得你所行个神蹟。 佢等存心悖逆，選一個領袖， 愛帶佢等倒轉去 埃及 做奴才。 總係你係赦免个上帝； 你有恩典㧯憐憫； 你無隨便發譴，有豐盛个慈愛。 你無㧒掉佢等。</verse>
				<verse number="18">佢等鑄造一隻牛型个偶像， 講這就係帶佢等出 埃及 个神！ 佢等大大惹起你个怒氣！</verse>
				<verse number="19">總係你無將佢等㧒在曠野， 因為你大有憐憫。 日時頭帶領佢等个雲柱無離開佢等； 暗晡頭照亮佢等个火柱，你也無徙走。</verse>
				<verse number="20">你賞賜良善个靈指導佢等； 又賜嗎哪 給佢等食，也給佢等水啉。</verse>
				<verse number="21">在曠野四十年， 你供給佢等所需要个一切。 佢等个衫褲無著爛掉； 佢等个腳也無行起皰。</verse>
				<verse number="22">你將列國賜給佢等， 佔佢等附近个土地。 佢等佔領 西宏 王統治个 希實本 ， 噩 王統治个 巴珊 。</verse>
				<verse number="23">你賜佢等子孫，多到像天頂个星仔。 又使佢等得到這地，住在這位， 就係你應許賜給佢等祖先个土地。</verse>
				<verse number="24">佢等佔領 迦南 个土地； 你有壓制該地个人民。 你賜能力給你个子民， 俾佢等照自家个意思對待 迦南 地个王㧯人民。</verse>
				<verse number="25">堅固个城市、 盡肥个土地、 裝滿財寶个屋仔、 挖好个水井、 橄欖樹、果樹、㧯葡萄園、 全部落在佢等个手中。 佢等食到飽𩜰𩜰，緊大箍起來； 你賜个豐盛，使佢等滿足快樂。</verse>
				<verse number="26">總係，你个子民卻悖逆你，毋順從你； 毋搭你个法律。 先知勸佢等轉向你， 反轉被佢等㓾死。 佢等一擺又一擺侮辱你；</verse>
				<verse number="27">你就將佢等交在敵人手中， 敵人就欺負佢等。 佢等堵到災難个時向你求喊， 你就對天頂答應佢等。 你大有憐憫，給佢等拯救者， 救佢等脫離敵人个手。</verse>
				<verse number="28">佢等得平安以後，又在你面前犯罪， 你就將佢等再一擺交給仇敵管。 總係佢等悔改、向你求喊个時， 你在天頂聽到， 你大有憐憫，還係一擺又一擺拯救佢等。</verse>
				<verse number="29">你警告佢等愛遵守你个法律， 總係佢等驕傲，毋聽你个命令。 遵守你个法律正係生命个路， 佢等還係硬頸斡頭毋肯聽。</verse>
				<verse number="30">你忍耐警告佢等盡多年， 你个靈感動先知向佢等講話， 總係你个子民還係耳公背背， 所以你由在別國來佔領佢等。</verse>
				<verse number="31">雖然恁樣，因為你大有憐憫， 你無㧒掉佢等，也無毀滅佢等； 因為你係有恩典憐憫个上帝！</verse>
				<verse number="32">𠊎等个上帝啊，你係偉大个上帝， 你值得敬畏，有大權柄！ 你信守約定，永遠慈悲。 對 亞述 列王壓迫𠊎等到這下， 𠊎等个王，𠊎等个領袖， 𠊎等个祭司，𠊎等个先知， 𠊎等个祖先㧯所有人民， 𠊎等全部受盡痛苦！ 求你毋好毋記得𠊎等受過恁多个苦難！</verse>
				<verse number="33">你對𠊎等所做个係公義个， 你所行个係信實个， 總係𠊎等所做个係邪惡个。</verse>
				<verse number="34">𠊎等个祖先、君王、領袖㧯祭司， 全部無遵守你个法律， 毋聽你个命令㧯警告。</verse>
				<verse number="35">你个子民該時住在自家个國家， 在你所賜盡大盡肥个土地享福， 總係佢等無離開罪惡來事奉你。</verse>
				<verse number="36">看哪，𠊎等這下在你賜給𠊎等祖先个土地做奴才， 在這供給𠊎等食物个好土地做別人个奴才。</verse>
				<verse number="37">這地个出產全部歸你派來管𠊎等个君王， 因為𠊎等有犯罪。 佢等隨意對待𠊎等个身體㧯頭牲， 𠊎等非常痛苦！</verse>
				<verse number="38">因為所發生个這兜事，𠊎等 以色列 人民就在這位簽一個確實个約。𠊎等个領袖、 利未 人㧯祭司全部簽名。</verse>
			</chapter>
			<chapter number="10">
				<verse number="1">最先簽名个係 哈迦利亞 个孻仔 — 省長 尼希米 ，然後係 希底家 ，下背个就係其他个人。</verse>
				<verse number="2">祭司有： 西萊雅 、 亞撒利雅 、 耶利米 、</verse>
				<verse number="3">巴施戶珥 、 亞瑪利雅 、 瑪基雅 、</verse>
				<verse number="4">哈突 、 示巴尼 、 瑪鹿 、</verse>
				<verse number="5">哈琳 、 米利末 、 俄巴底亞 、</verse>
				<verse number="6">但以理 、 近頓 、 巴錄 、</verse>
				<verse number="7">米書蘭 、 亞比雅 、 米雅民 、</verse>
				<verse number="8">瑪西亞 、 璧該 、 示瑪雅 。</verse>
				<verse number="9">利未 人有： 亞散尼 个孻仔 耶書亞 ， 希拿達 宗族个 賓內 ，還有 甲篾 、</verse>
				<verse number="10">示巴尼 、 荷第雅 、 基利他 、 比萊雅 、 哈難 、</verse>
				<verse number="11">米迦 、 利合 、 哈沙比雅 、</verse>
				<verse number="12">撒刻 、 示利比 、 示巴尼 、</verse>
				<verse number="13">荷第雅 、 巴尼 、 比尼努 。</verse>
				<verse number="14">人民个領袖有： 巴錄 、 巴哈‧摩押 、 以攔 、 薩土 、 巴尼 、</verse>
				<verse number="15">布尼 、 押甲 、 比拜 、</verse>
				<verse number="16">亞多尼雅 、 比革瓦伊 、 亞丁 、</verse>
				<verse number="17">亞特 、 希西家 、 押朔 、</verse>
				<verse number="18">荷第雅 、 哈順 、 比賽 、</verse>
				<verse number="19">哈拉 、 亞拿突 、 尼拜 、</verse>
				<verse number="20">抹比押 、 米書蘭 、 希悉 、</verse>
				<verse number="21">米示薩別 、 撒督 、 押杜亞 、</verse>
				<verse number="22">比拉提 、 哈難 、 亞奈雅 、</verse>
				<verse number="23">何細亞 、 哈拿尼雅 、 哈述 、</verse>
				<verse number="24">哈羅黑 、 比利哈 、 朔百 、</verse>
				<verse number="25">利宏 、 哈沙拿 、 瑪西雅 、</verse>
				<verse number="26">亞希雅 、 哈難 、 亞難 、</verse>
				<verse number="27">瑪鹿 、 哈琳 、 巴拿 。</verse>
				<verse number="28">𠊎這兜 以色列 人：祭司、 利未 人、聖殿守衛、聖殿歌手、聖殿工人，就㧯一切住在𠊎等土地个外族人分開。𠊎這兜遵從上帝法律个人、𠊎等个𡜵娘㧯所有明白事理个細人仔，</verse>
				<verse number="29">在這位㧯𠊎等个領袖共下發誓，若係違背就會受咒詛。𠊎等一定愛照上帝通過佢个僕人 摩西 所賜个法律來生活。𠊎等愛聽從上主 — 𠊎等个主給𠊎等个命令；𠊎等愛遵守佢所有个法律㧯規定。</verse>
				<verse number="30">𠊎等毋㧯住在𠊎等土地个外族人通婚。</verse>
				<verse number="31">若係住在這位个外族人在安息日抑係其他个聖日帶五榖抑係別个東西來賣給𠊎等，𠊎等毋向佢等買。 堵到第七年，𠊎等毋耕種土地，也毋討轉所有个債。</verse>
				<verse number="32">逐年，𠊎等逐儕愛奉獻五公克銀仔，幫助付上帝聖殿个費用。</verse>
				<verse number="33">𠊎等愛負責聖殿敬拜所用个供餅、逐日个素祭、逐日个燒化祭、安息日个聖祭、逐月初一㧯其他節期个逐種聖祭、為 以色列 贖罪个祭，㧯聖殿所需要个一切東西。</verse>
				<verse number="34">𠊎這兜人、祭司，㧯 利未 人愛照法律个規定，逐年抽籤決定㖠宗族應該負責供給柴，來燒牲儀獻給上主 — 𠊎等个上帝。</verse>
				<verse number="35">逐年，𠊎等愛將地上最先收成个農作物㧯樹頂最先收成个水果帶到上主个聖殿。</verse>
				<verse number="36">𠊎等逐儕愛照法律所寫个將頭胎个孻仔帶到聖殿，交給事奉上帝个祭司，獻給上帝；也愛將頭胎个牛羊帶去獻給上帝。</verse>
				<verse number="37">逐年，𠊎等愛將該用最先收成个農作物做个麵團帶到聖殿祭司該位；也愛將新酒、橄欖油，㧯逐種水果獻上。 𠊎等愛將土地收成个十分之一帶給 利未 人，因為 利未 人在𠊎等个農村收十分之一奉獻。</verse>
				<verse number="38">收十分之一奉獻个時， 亞倫 後代該兜祭司當中愛有一儕㧯 利未 人共下，然後， 利未 人對收來个十分之一奉獻當中拿出十分之一來，送入聖殿倉庫做聖殿个費用。</verse>
				<verse number="39">以色列 人㧯 利未 人又愛將獻出來个五榖、新酒、橄欖油送入放聖殿器皿个倉庫，就係值班个祭司、聖殿守衛，㧯聖殿歌手住个所在。 𠊎等絕對毋會毋顧𠊎等上帝个聖殿。</verse>
			</chapter>
			<chapter number="11">
				<verse number="1">人民个領袖全部住在 耶路撒冷 ；其他个人民抽籤，十個家族選出一家住在聖城 耶路撒冷 ，賸个九家就住在其他城鎮。</verse>
				<verse number="2">自願住在 耶路撒冷 个人，全部得到眾人个稱讚。</verse>
				<verse number="3">以色列 人、祭司、 利未 人、聖殿工人，㧯 所羅門 僕人个後代住在 猶大 省其他城鎮，就係佢等自家祖公業个所在。 下背係住在 耶路撒冷 該兜 猶大 省領袖个名單：</verse>
				<verse number="4">猶大 支族个族人有： 亞他雅 — 佢係 烏西雅 个孻仔， 撒迦利雅 个孫仔。佢个祖先還有 亞瑪利雅 、 示法提雅 ，㧯 瑪勒列 ；佢等全部係 猶大 个孻仔 法勒斯 个後代。</verse>
				<verse number="5">瑪西雅 — 佢係 巴錄 个孻仔， 谷‧何西 个孫仔。佢个祖先還有 哈塞亞 、 亞大雅 、 約雅立 ，㧯 撒迦利雅 ；佢等全部係 猶大 个孻仔 示羅尼 个後代。</verse>
				<verse number="6">法勒斯 个後代有四百六十八名勇士住在 耶路撒冷 。</verse>
				<verse number="7">便雅憫 支族个族人有： 撒路 — 佢係 米書蘭 个孻仔， 約葉 个孫仔。佢个祖先還有 比大雅 、 哥賴雅 、 瑪西雅 、 以鐵 㧯 耶篩亞 。</verse>
				<verse number="8">迦拜 㧯 撒萊 — 佢等係 撒路 个近親 。 總共有九百二十八個 便雅憫 人住在 耶路撒冷 。</verse>
				<verse number="9">細基利 个孻仔 約珥 係佢等个監督。 哈西努亞 个孻仔 猶大 係這城肚个副監督。</verse>
				<verse number="10">祭司有： 約雅立 个孻仔 耶大雅 ，還有 雅斤 。</verse>
				<verse number="11">大祭司 西萊雅 — 佢係 希勒家 个孻仔， 米書蘭 个孫仔。佢个祖先還有 撒督 、 米拉約 㧯 亞希突 。</verse>
				<verse number="12">這宗族總共有八百二十二名在聖殿當職。 亞大雅 — 佢係 耶羅罕 个孻仔， 比拉利 个孫仔。佢个祖先還有 暗洗 、 撒迦利亞 、 巴施戶珥 㧯 瑪基雅 。</verse>
				<verse number="13">這宗族總共有兩百四十二名係家族長。 亞瑪帥 — 佢係 亞薩列 个孻仔， 亞哈賽 个孫仔。佢个祖先還有 米實利末 㧯 音麥 。</verse>
				<verse number="14">這宗族有一百二十八名係當會相㓾个勇士。佢等个監督係 撒巴第業 ；佢係 哈基多琳 个孻仔。</verse>
				<verse number="15">利未 人有： 示瑪雅 — 佢係 哈述 个孻仔， 押利甘 个孫仔。佢个祖先還有 哈沙比雅 㧯 布尼 。</verse>
				<verse number="16">沙比太 㧯 約撒拔 — 佢等係盡優秀个 利未 人，監督上帝聖殿外个事情。</verse>
				<verse number="17">瑪他尼 — 佢係 米迦 个孻仔， 撒底 个孫仔， 亞薩 个後代。佢帶領聖殿詩班唱感謝个祈禱。 八布迦 — 佢係 瑪他尼 个助手。 押太 — 佢係 沙母亞 个孻仔， 加拉 个孫仔， 耶杜頓 个後代。</verse>
				<verse number="18">利未 人總共有兩百八十四名住在聖城 耶路撒冷 。</verse>
				<verse number="19">聖殿守衛有： 亞谷 、 達們 ，㧯佢等个親屬總共一百七十二名。</verse>
				<verse number="20">其他个 以色列 人、祭司、 利未 人留在 猶大 个其他城鎮、佢等个老屋。</verse>
				<verse number="21">聖殿工人住在 耶路撒冷 个 俄斐勒 ； 西哈 㧯 基斯帖 管理佢等。</verse>
				<verse number="22">住在 耶路撒冷 个 利未 人，佢等个監督係 哈沙比雅 个孫仔， 巴尼 个孻仔 烏西 。佢个祖先係 瑪他尼 㧯 米迦 ，屬 亞薩 宗族，就係在上帝个聖殿負責音樂个宗族。</verse>
				<verse number="23">王有命令，規定這宗族應該樣般輪流帶領逐日个聖殿音樂。</verse>
				<verse number="24">米示薩別 个孻仔 比他希雅 屬 謝拉 宗族、 猶大 支族；佢幫助 波斯 皇帝辦理 猶大 人个事。</verse>
				<verse number="25">盡多人住在佢等農村附近个鄉鎮。 猶大 支族个人住在 基列‧亞巴 、 底本 、 葉甲薛 ，㧯這兜城附近个村莊。</verse>
				<verse number="26">佢等也有人住在 耶書亞 、 摩拉大 、 伯‧帕列 、</verse>
				<verse number="27">哈薩‧書亞 、 別是巴 㧯周圍个村莊。</verse>
				<verse number="28">佢等住在 洗革拉 城，在 米哥拿 㧯周圍个村莊，</verse>
				<verse number="29">在 音‧臨門 、 瑣拉 、 耶末 、</verse>
				<verse number="30">撒挪亞 、 亞杜蘭 ，㧯這兜鄉鎮附近个村莊。佢等住在 拉吉 㧯附近个農村， 亞西加 㧯周圍个村莊。也就係講， 猶大 人住个所在係對 別是巴 直到 欣嫩 山壢。</verse>
				<verse number="31">便雅憫 支族个人住在 迦巴 、 密抹 、 艾 、 伯特利 㧯周圍个村莊、</verse>
				<verse number="32">亞拿突 、 挪伯 、 亞難雅 、</verse>
				<verse number="33">夏瑣 、 拉瑪 、 基他音 、</verse>
				<verse number="34">哈疊 、 洗編 、 尼八拉 、</verse>
				<verse number="35">羅德 、 阿挪 ，㧯 師傅 个山壢。</verse>
				<verse number="36">有兜識住在 猶大 土地个 利未 人受派㧯 便雅憫 人共下住。</verse>
			</chapter>
			<chapter number="12">
				<verse number="1">下背係祭司㧯 利未 人个名單；佢等全部係㧯 撒拉鐵 个孻仔 所羅巴伯 並大祭司 耶書亞 共下對流亡轉來个人。</verse>
				<verse number="2">祭司有： 西萊雅 、 耶利米 、 以斯拉 、 亞瑪利雅 、 瑪鹿 、 哈突 、</verse>
				<verse number="3">示迦尼 、 利宏 、 米利末 、</verse>
				<verse number="4">易多 、 近頓 、 亞比雅 、</verse>
				<verse number="5">米雅民 、 瑪底雅 、 璧迦 、</verse>
				<verse number="6">示瑪雅 、 約雅立 、 耶大雅 、</verse>
				<verse number="7">撒路 、 亞木 、 希勒家 㧯 耶大雅 。 這兜人在 耶書亞 時代係祭司當中个領袖。</verse>
				<verse number="8">利未 人有：負責主唱感謝詩歌个 耶書亞 、 賓內 、 甲篾 、 示利比 、 猶大 、 瑪他尼 ；</verse>
				<verse number="9">在詩班肚負責對唱个有 八布迦 、 烏尼 ，㧯佢等个同事 利未 人。</verse>
				<verse number="10">耶書亞 係 約雅金 个阿爸； 約雅金 係 以利亞實 个阿爸； 以利亞實 係 耶何耶大 个阿爸；</verse>
				<verse number="11">耶何耶大 係 約拿單 个阿爸； 約拿單 係 押杜亞 个阿爸。</verse>
				<verse number="12">約雅金 做大祭司个時，下背个祭司係祭司宗族个族長： 西萊雅 族个 米拉雅 、 耶利米 族个 哈拿尼雅 、</verse>
				<verse number="13">以斯拉 族个 米書蘭 、 亞瑪利雅 族个 約哈難 、</verse>
				<verse number="14">米利古 族个 約拿單 、 示巴尼 族个 約瑟 、</verse>
				<verse number="15">哈琳 族个 押拿 、 米拉約 族个 希勒愷 、</verse>
				<verse number="16">易多 族个 撒迦利亞 、 近頓 族个 米書蘭 、</verse>
				<verse number="17">亞比雅 族个 細基利 、 米拿民 族个某人 、 摩亞底 族个 比勒太 、</verse>
				<verse number="18">璧迦 族个 沙母亞 、 示瑪雅 族个 約拿單 、</verse>
				<verse number="19">約雅立 族个 瑪特乃 、 耶大雅 族个 烏西 、</verse>
				<verse number="20">撒來 族个 加萊 、 亞木 族个 希伯 、</verse>
				<verse number="21">希勒家 族个 哈沙比雅 、 耶大雅 族个 拿坦業 。</verse>
				<verse number="22">在 以利亞實 、 耶何耶大 、 約哈難 、 押杜亞 做大祭司个時， 利未 家族㧯祭司家族个族長有記錄下來。這記錄係在 大流士 做 波斯 皇帝時完成个。</verse>
				<verse number="23">總係，記在官方記錄上个 利未 家族族長只有到 以利亞實 个孫仔 約哈難 个時代。</verse>
				<verse number="24">利未 人个族長係 哈沙比雅 、 示利比 、 約書亞 、 賓內 、 甲篾 ，㧯佢等共下事奉个兄弟，一班對一班，照神人 — 大衛 王个指示，一唱一和讚美、感謝上帝。</verse>
				<verse number="25">負責看守聖殿門堘頭倉庫个守衛： 瑪他尼 、 八布迦 、 俄巴底亞 、 米書蘭 、 達們 、 亞谷 。</verse>
				<verse number="26">這兜人係 約撒達 个孫仔、 耶書亞 个孻仔 約雅金 時代个人，也係省長 尼希米 㧯經學專家祭司 以斯拉 時代个人。</verse>
				<verse number="27">當 耶路撒冷 城牆舉行奉獻禮个時， 利未 人對佢等住个所在被人請轉去 耶路撒冷 參加奉獻典禮。佢等用感謝个詩歌、鑇仔、豎琴㧯七弦琴歡歡喜喜來慶祝。</verse>
				<verse number="28">唱歌个 利未 家族對 耶路撒冷 周圍个地區、 尼陀法 附近个村莊，</verse>
				<verse number="29">並對 伯‧吉甲 、 迦巴 、 押瑪弗 恁多地方聚集，因為唱歌个人在 耶路撒冷 四周圍為自家建立村莊。</verse>
				<verse number="30">祭司㧯 利未 人為自家㧯民眾、城門、城牆主持潔淨个儀式。</verse>
				<verse number="31">𠊎召集 猶大 个領袖上城牆頂，喊佢等帶領兩大隊民眾遊行𫟧城，感謝上帝。 一隊向右，在城牆頂 垃圾門 前進 。</verse>
				<verse number="32">在佢等个後背有 何沙雅 㧯 猶大 領袖个一半。</verse>
				<verse number="33">又有 亞撒利雅 、 以斯拉 、 米書蘭 、</verse>
				<verse number="34">猶大 、 便雅憫 、 示瑪雅 㧯 耶利米 。</verse>
				<verse number="35">還有該兜歕喇叭祭司个子孫，並 撒迦利亞 ；佢係 約拿單 个孻仔， 示瑪雅 个孫仔。佢个祖先包含 亞薩 宗族个 瑪他尼 、 米該亞 㧯 撒刻 。</verse>
				<verse number="36">撒迦利亞 个後背跈等共下事奉个兄弟：有 示瑪雅 、 亞撒利 、 米拉萊 、 基拉萊 、 瑪艾 、 拿坦業 、 猶大 㧯 哈拿尼 。佢等全部拿等神人 — 大衛 王所彈該種樂器。經學專家 以斯拉 𢱋這隊前進。</verse>
				<verse number="37">在 泉水門 該位，佢等對 大衛 城个石段仔一直行上去，經過 大衛 王宮个牆頂，然後轉到城東片个 水門 該位。</verse>
				<verse number="38">第二隊感謝个人向左行，順等城牆頂前進，𠊎㧯另外一半个民眾跈佢等。𠊎等經過 爐樓 ，來到 闊牆 ，</verse>
				<verse number="39">又行過 以法蓮 門、 耶沙拿門 、 魚門 、 哈楠業樓 、 百樓 ，直到 羊門 。𠊎等行到 守衛門 就結束遊行。</verse>
				<verse number="40">恁樣，感謝上帝个兩隊人來到聖殿該位。 除了㧯𠊎共下个領袖以外，</verse>
				<verse number="41">𠊎這隊還包含以下歕等喇叭个祭司： 以利亞金 、 瑪西雅 、 米拿民 、 米該雅 、 以利約乃 、 撒迦利亞 、 哈楠尼亞 。</verse>
				<verse number="42">佢等後背有 瑪西雅 、 示瑪雅 、 以利亞撒 、 烏西 、 約哈難 、 瑪基雅 、 以攔 、 以謝 。 伊斯拉希雅 帶領詩班大聲唱歌。</verse>
				<verse number="43">該日，𠊎等舉行盛大个獻祭；民眾全部非常歡喜，因為上帝使佢等大大快樂。婦女㧯細人仔也參加慶祝。 耶路撒冷 歡喜快樂个聲盡遠就聽得到。</verse>
				<verse number="44">該時，有兜人受派掌倉庫，就係放逐年新出个五榖、水果㧯十分之一奉獻个所在。這兜人愛負責對逐城附近个田莊，收集法律規定給祭司㧯 利未 人个奉獻禮物。 猶大 所有个人民全部當滿意祭司㧯 利未 人个事奉，</verse>
				<verse number="45">因為佢等有守服事上帝个禮儀㧯潔淨个禮儀。聖殿詩班㧯聖殿守衛也照 大衛 王㧯厥孻仔 所羅門 个規定執行任務。</verse>
				<verse number="46">對 大衛 王㧯音樂家 亞薩 个時代以來，詩班一直係領導唱歌頌讚、感謝上帝个人。</verse>
				<verse number="47">所羅巴伯 時代㧯 尼希米 時代， 以色列 人逐日將奉獻禮物送給聖殿詩班㧯守衛。又給 利未 人應當得个奉獻禮物； 利未 人再給 亞倫 該兜祭司應當得个一份。</verse>
			</chapter>
			<chapter number="13">
				<verse number="1">該日，有人大聲讀 摩西 个法律書給眾人聽；佢等讀到一段講：絕對不准 亞捫 人㧯 摩押 人加入屬上帝个會眾。</verse>
				<verse number="2">這係因為 以色列 人在出 埃及 个路項， 亞捫 人㧯 摩押 人毋單淨無用食物㧯水來迎接 以色列 人，反轉請 巴蘭 來咒詛佢等；總係𠊎等个上帝使該咒詛變做祝福。</verse>
				<verse number="3">以色列 人民聽到這段法律，就將所有个外族人對佢等當中分開。</verse>
				<verse number="4">管理聖殿倉庫个祭司 以利亞實 盡久以來㧯 多比雅 有當好个交情。</verse>
				<verse number="5">佢准 多比雅 用一間大房間；該房間本來係放獻素祭用个五榖㧯香料、聖殿中个東西、給祭司个祭物、並給 利未 人、聖殿詩班、聖殿守衛个十分之一捐 (就係對五榖、酒、橄欖油收成个十分之一)。</verse>
				<verse number="6">發生這事个時，𠊎無在 耶路撒冷 ；因為 亞達薛西 做 巴比倫 王 个第三十二年，𠊎轉去向佢報告。過無幾久，𠊎得到王个許可，</verse>
				<verse number="7">倒轉去 耶路撒冷 。𠊎正發現這件壞事，就係 以利亞實 准 多比雅 用上帝聖殿肚个一間大房間。</verse>
				<verse number="8">𠊎當譴，將 多比雅 个東西全部㧹出去。</verse>
				<verse number="9">𠊎下令拚淨這房間，將上帝聖殿个器皿、素祭㧯香料放轉去。</verse>
				<verse number="10">𠊎又聽講聖殿詩班㧯其他个 利未 人已經離開 耶路撒冷 ，轉去佢等个田莊，因為人民無供給佢等罅額个食物維持生活。</verse>
				<verse number="11">𠊎責備該兜官長，樣做得由在聖殿荒掉。𠊎將 利未 人㧯詩班喊轉來聖殿復職。</verse>
				<verse number="12">恁樣所有 猶大 人民就再將五榖、酒、橄欖油个十分之一帶到聖殿个倉庫。</verse>
				<verse number="13">𠊎派兜人掌倉庫；佢等係：祭司 示利米雅 、經學專家 撒督 、 利未 人 比大雅 。佢等个助手係 瑪他尼 个孫仔、 撒刻 个孻仔 哈難 。𠊎信任這兜人；佢等係負責分東西給佢等个同工。</verse>
				<verse number="14">𠊎个上帝啊，求你因為這件事來紀念𠊎，記得𠊎為你个聖殿㧯敬拜个禮儀所做个好事。</verse>
				<verse number="15">該站時間，𠊎在 猶大 看到有人在安息日做酒，也有人將五榖、酒、葡萄、無花果，㧯其他東西捆在驢仔背頂，運到 耶路撒冷 去。𠊎警告佢等做毋得在安息日做生理。</verse>
				<verse number="16">有兜 泰爾 城來个人住在 耶路撒冷 ；佢等將魚仔㧯逐種貨物帶入城肚，在安息日賣給𠊎等个人民。</verse>
				<verse number="17">𠊎責備 猶太 人个貴族講：「你等樣敢做這壞事，犯到安息日呢？</verse>
				<verse number="18">這敢毋係上帝刑罰你等祖先、毀滅這城个原因？你等這下又犯到安息日，會害 以色列 人更加惹上帝大發譴。」</verse>
				<verse number="19">所以，𠊎下令，在逐個安息日前，臨暗仔 一到， 耶路撒冷 个城門就愛關起來，直到安息日過掉正做得打開。𠊎派幾個僕人守在城門口，毋准人在安息日帶貨物入來。</verse>
				<verse number="20">有一兩擺，該兜賣貨物个生理人在 耶路撒冷 城外過夜。</verse>
				<verse number="21">𠊎就警告佢等講：「你等做麼介在城外過夜呢？若係你等再恁樣，𠊎愛對付你等。」對該時起，佢等在安息日就無再過來了。</verse>
				<verse number="22">𠊎吩咐 利未 人愛潔淨自家，然後去看守城門，使人民確實守安息日做聖日。 𠊎个上帝啊，求你為到這件事記得𠊎，又因為你个大慈愛憐憫𠊎。</verse>
				<verse number="23">在該站時間，𠊎也發現盡多 猶太 人討 亞實突 、 亞捫 、 摩押 个婦女做𡜵娘。</verse>
				<verse number="24">佢等个子女一半講 亞實突 話抑係別種語言，毋會講𠊎等自家 猶大 个話。</verse>
				<verse number="25">𠊎就責備佢等，咒詛佢等，打佢等幾個人，挷佢等个頭那毛。𠊎喊佢等奉上帝个名發誓，不准佢等將自家个子女㧯外族人通婚。</verse>
				<verse number="26">𠊎對佢等講：「敢毋係外族婦女使 以色列 王 所羅門 犯罪嗎？雖然 所羅門 王比其他國家个君王偉大，上帝惜佢，使佢統治全 以色列 ，佢還係被外族婦女引誘犯這種罪。</verse>
				<verse number="27">敢講𠊎等愛學你等个壞樣，去㧯外族婦女結婚來違背上帝係麼？」</verse>
				<verse number="28">耶何耶大 係大祭司 以利亞實 个孻仔。總係佢有一個孻仔討 和倫 人 參巴拉 个妹仔，所以𠊎喊佢離開 耶路撒冷 。</verse>
				<verse number="29">𠊎个上帝啊，求你記得這兜人樣般打垃圾祭司个職務，違背你㧯祭司、 利未 人所立个約。</verse>
				<verse number="30">恁樣𠊎就潔淨人民，使佢等離開所有外族个東西。𠊎為祭司㧯 利未 人制定職務，使逐儕人全部知自家个工作。</verse>
				<verse number="31">𠊎也安排好，愛人民照時將獻祭用个柴、新出个五榖、水果帶來。 𠊎个上帝啊，求你紀念𠊎，施恩給𠊎。</verse>
			</chapter>
		</book>
		<book number="17">
			<chapter number="1">
				<verse number="1">亞哈隨魯 做王 个時代，統治 印度 到 古實 一百二十七省。</verse>
				<verse number="2">該時，佢在首都 書珊 城个王宮登基。</verse>
				<verse number="3">亞哈隨魯 做王个第三年，佢為所有个貴族㧯行政官員辦大筵席。 波斯 㧯 米底亞 个文武百官，並各省个省長㧯貴族全部參加。</verse>
				<verse number="4">足足有六隻月，佢常常向佢等展佢王國个好額、昌盛㧯威嚴。</verse>
				<verse number="5">接等王又為到首都 書珊 全城个男人，無論貧賤富貴，在王宮个花園辦筵席，連續七日。</verse>
				<verse number="6">這花園用藍色㧯白色个布簾佈置，用紫色个麻紗帶仔將布簾固定在大理石𣎴仔項个銀圈。金銀做个眠椅放在鋪等白色、紅色、綠色大理石㧯珍珠殼个地上。</verse>
				<verse number="7">啉酒用个杯仔係各種無共花色个金杯。所啉个酒係王家用个，準備非常多，表現王个誠意。</verse>
				<verse number="8">王吩咐宮中个僕人，俾大家隨意啉，做毋得勉強人。</verse>
				<verse number="9">同時，在王宮內，王后 華實蒂 也為婦女辦筵席。</verse>
				<verse number="10">在筵席个第七日， 亞哈隨魯 王啉酒到當歡喜，就吩咐服事佢个七個太監 米戶幔 、 比斯他 、 哈波拿 、 比革他 、 亞拔他 、 西達 㧯 甲迦 ，</verse>
				<verse number="11">去請王后 華實蒂 戴等冕旒入來。王后係一個盡靚个婦人家；王想愛向官員、貴賓展王后个美貌。</verse>
				<verse number="12">總係，太監將王个命令傳給王后 華實蒂 个時，姖毋肯來。王大發譴，閼到火當𤏸。</verse>
				<verse number="13">王逐擺堵到法律抑係正義个問題，就會問專家个意見，所以佢召集顧問團來。</verse>
				<verse number="14">佢最親信个顧問係： 甲示拿 、 示達 、 押瑪他 、 他施斯 、 米力 、 瑪西拿 㧯 米慕干 。這兜人係 波斯 㧯 米底亞 个七個大臣，長透接近王，在國內坐最高个地位。</verse>
				<verse number="15">亞哈隨魯 王問佢等：「𠊎派太監傳命令給王后 華實蒂 ，總係姖毋肯聽從。照法律，𠊎等愛樣般辦姖？」</verse>
				<verse number="16">米慕干 在王㧯其他官員面前應講：「王后 華實蒂 毋單淨侮辱王，也侮辱到王逐省个官員㧯人民！</verse>
				<verse number="17">國內个婦人家若係聽到王后所做个事，就會看毋起自家个老公。姖等會講：『 亞哈隨魯 王命令王后 華實蒂 去見佢，總係姖毋去。』</verse>
				<verse number="18">波斯 㧯 米底亞 該兜官員个𡜵娘一聽到王后這種行為，當遽就會照樣對待姖等个老公；恁樣一定會發生盡多个藐視㧯不滿。</verse>
				<verse number="19">若係國王認為恁樣好，請頒佈命令：對這下開始，不准 華實蒂 再來見王。還愛將這命令寫下來，定做 波斯 㧯 米底亞 个法律，永遠做毋得改。又請國王將王后个地位賜給比姖較好个人。</verse>
				<verse number="20">國王个命令公佈到全國以後，雖然國境恁闊，逐個婦人家，無論老公係貧賤、係富貴，一定會好好尊敬自家个老公。」</verse>
				<verse number="21">王㧯佢个大臣全部認為這個意見當好，就照 米慕干 个建議去做。</verse>
				<verse number="22">王命令用逐省逐族个語言㧯文字通知逐省逐族：做老公應該係厥屋下个主人；佢个話有絕對个權柄 。</verse>
			</chapter>
			<chapter number="2">
				<verse number="1">後來， 亞哈隨魯 王个發譴過掉，就盡思念 華實蒂 ，總係又想到姖反抗命令㧯受處罰个事。</verse>
				<verse number="2">王親信个顧問對王建議講：「樣般毋尋兜後生又靚个童女來呢？</verse>
				<verse number="3">請王在全國逐省指派官員，喊佢等將所有靚个細妹仔帶到首都 書珊 个後宮來，交給總管宮女个太監 希該 ，供給姖等化粧品。</verse>
				<verse number="4">以後，王做得選盡合意个細妹仔，立做王后，來代 華實蒂 。」 王歡喜這建議，就照恁樣去做。</verse>
				<verse number="5">在 書珊 ，有一個 猶太 人安到 末底改 。佢屬 便雅憫 支族，係 基士 㧯 示每 个後代， 睚珥 个孻仔。</verse>
				<verse number="6">當 巴比倫 王 尼布甲尼撒 對 耶路撒冷 將 猶大 王 耶哥尼雅 捉走个時，也捉走一群人， 末底改 个祖先 也在當中。</verse>
				<verse number="7">末底改 有一個叔伯老妹安到 以斯帖 ， 希伯來 名安到 哈大沙 ；姖係一個盡靚个細妹仔，又有真好个身材。厥爺𡟓死後， 末底改 收養姖做自家个妹仔，將姖𢱋大。</verse>
				<verse number="8">王个新命令頒佈以後，盡多當靚个細妹仔被人帶到首都 書珊 來； 以斯帖 也被人帶入王宮，交給管後宮个太監 希該 。</verse>
				<verse number="9">希該 當惜 以斯帖 ，款待姖特別好，黏時供給姖化粧品㧯特別个食物，又對王宮選出七個宮女來服事姖，又給姖後宮最好个房間。</verse>
				<verse number="10">以斯帖 聽從 末底改 个指示，無將自家个種族㧯親戚講給人知。</verse>
				<verse number="11">末底改 逐日在後宮个庭院前行來行去，愛知 以斯帖 个情形，事情會有麼介發展。</verse>
				<verse number="12">照規定，該兜細妹仔愛經過一年个美容保養正做得見王：前六隻月用沒藥油，後六隻月用香膏㧯化粧品美容。經過這段時間以後，逐個細妹仔就會輪流被人帶去見 亞哈隨魯 王。</verse>
				<verse number="13">細妹仔對後宮入去王宮个時，做得照自家个意思打扮，姖所需要个，全部給姖。</verse>
				<verse number="14">姖愛在王宮歇一暗晡，第二朝晨就被人帶到另外一個後宮去，交給管嬪妃个太監 沙甲 照顧；若毋係王特別中意姖，指名喊姖，姖就無機會再轉到王該位去。</verse>
				<verse number="15">以斯帖 見王个日期到了。姖係 亞比亥 个妹仔、 末底改 个叔伯老妹，後來做 末底改 个養女。看過 以斯帖 个人全部感覺姖當得人惜。輪到姖見王个時間，除了照總管內宮个太監 希該 所建議个打扮以外，無特別要求麼介。</verse>
				<verse number="16">亞哈隨魯 做王个第七年十月，就係提別月， 以斯帖 被人帶入王宮。</verse>
				<verse number="17">王中意 以斯帖 贏過其他所有个婦女；姖比其他个童女得到王較多个痛惜。對恁樣，王將王后个冕旒戴在姖个頭那頂，立姖做王后，來代 華實蒂 。</verse>
				<verse number="18">接等，王為 以斯帖 辦大筵席，邀請所有个貴族㧯行政官員前來參加。該日，佢宣佈全國逐省休假 ，又當慨送出當多禮物。</verse>
				<verse number="19">王第二擺召集童女个時， 末底改 已經在王宮得到一個職位。</verse>
				<verse number="20">以斯帖 聽 末底改 个吩咐，對頭到尾無將自家个種族㧯親戚講給人知。 以斯帖 聽從 末底改 ，就像 末底改 養育姖个時一樣。</verse>
				<verse number="21">末底改 在王宮做官个期間，有兩個看守宮門个太監 — 辟探 㧯 提列 非常惱 亞哈隨魯 王，想愛暗殺佢。</verse>
				<verse number="22">末底改 發現這陰謀，就㧯王后 以斯帖 講。 以斯帖 就用 末底改 个名義㧯王講。</verse>
				<verse number="23">這件事經過調查係事實；這兩個人就被人吊死在絞刑架頂。王命令將這件事記錄在官方个歷史底背。</verse>
			</chapter>
			<chapter number="3">
				<verse number="1">這兜事以後， 亞哈隨魯 王提升 亞甲 人 哈米大他 个孻仔 哈曼 做宰相。</verse>
				<verse number="2">王命令所有王宮个守衛，喊佢等愛向 哈曼 跪拜，表示尊敬。佢等全部遵從王个命令，只有 末底改 毋肯跪拜。</verse>
				<verse number="3">王宮中其他个官員問 末底改 ，樣毋服從王个命令。</verse>
				<verse number="4">佢等日日勸佢，總係佢還係毋聽。後來，佢私下向佢等講：「𠊎係 猶太 人，做毋得向 哈曼 跪拜。」所以佢等去㧯 哈曼 講，看佢忍得下 末底改 个行為麼。</verse>
				<verse number="5">哈曼 知 末底改 毋肯向佢跪拜，就大發脾氣。</verse>
				<verse number="6">當佢又知 末底改 係 猶太 人，就決定毋單淨除掉 末底改 一儕；佢計劃好勢，愛滅掉 亞哈隨魯 王國內所有个 猶太 人，就係 末底改 个本族人。</verse>
				<verse number="7">亞哈隨魯 王統治个第十二年正月，就係尼散月， 哈曼 命令人在佢面前抽籤 (又喊做抽普珥)，抽出个籤指明十二月 (亞達月) 十三日 ，進行佢个計劃。</verse>
				<verse number="8">哈曼 㧯 亞哈隨魯 王講：「有一個民族分散住在王國逐省。佢等有自家个風俗習慣，㧯所有其他个民族無共樣；毋單淨恁樣，佢等也毋遵守王个法律。留恁樣个人對國王無好處。</verse>
				<verse number="9">若係國王看做好，請下命令消滅佢等。𠊎保證有可能得到三十四萬公斤个銀仔，來增加國庫个收入。」</verse>
				<verse number="10">所以，王剝下佢手指戴等个印仔交給 猶太 人个對敵 — 亞甲 人 哈米大他 个孻仔 哈曼 。</verse>
				<verse number="11">王對佢講：「這兜人㧯佢等个銀仔全部交給你；你愛樣般做就樣般做！」</verse>
				<verse number="12">正月十三， 哈曼 就喊王个書記來，愛佢等發出通告，用該時王國內逐省逐族个文字寫下來，給所有个省長、總督，㧯各族个族長。這通告係奉 亞哈隨魯 王个名寫个，頓等王手指所戴个印仔。</verse>
				<verse number="13">送信个人將通告送到王國个逐省去，限定大家愛在十二月 (亞達月) 十三這一日將所有个 猶太 人，無論男女老幼，全部㓾掉、滅淨淨，並愛沒收佢等个財物。</verse>
				<verse number="14">通告送到逐省，愛俾民眾知，好在該日到來个時，逐個人全部準備好。</verse>
				<verse number="15">照王个命令，送信个人趕緊出發，也將這通告在首都 書珊 公佈。 書珊 城个人全部著驚亂掉去，總係王㧯 哈曼 坐下來啉酒。</verse>
			</chapter>
			<chapter number="4">
				<verse number="1">末底改 知這兜事以後，非常痛心，扯裂衫，換等麻衫，將灰委在頭那頂，在城中行來行去，開聲大噭。</verse>
				<verse number="2">佢來到王宮个門口，無入去，因為照規定著麻衫个人做毋得入王宮。</verse>
				<verse number="3">王个通告無論傳到㖠省，該位个 猶太 人就盡悲傷。佢等禁食、開聲大噭；盡多人著等麻衫，睡在火灰肚。</verse>
				<verse number="4">服事 以斯帖 王后个宮女㧯太監來將 末底改 做个事㧯姖講，姖非常憂愁，就送兜衫給 末底改 ，希望佢將麻衫脫下來，總係 末底改 毋肯接受。</verse>
				<verse number="5">以斯帖 就喊王派來服事姖个太監 哈他革 來，愛佢到 末底改 該位去查看發生麼介事，係樣般發生个。</verse>
				<verse number="6">哈他革 到王宮門口个廣場去見 末底改 。</verse>
				<verse number="7">末底改 將所發生个事全部㧯佢講，又講， 哈曼 保證若係將 猶太 人滅掉，佢就會捐盡多錢來增加國庫个收入。</verse>
				<verse number="8">末底改 又交給佢一份在 書珊 公佈个通告，頂高有消滅 猶太 人个命令。 末底改 請佢將這份通告交給 以斯帖 ，向 以斯帖 說明情形，喊姖入去向王懇求，為自家个同胞求情救命。</verse>
				<verse number="9">哈他革 轉去，將 末底改 个話㧯 以斯帖 講。</verse>
				<verse number="10">以斯帖 又派佢傳話給 末底改 講：</verse>
				<verse number="11">「無分男女，無論係麼人，無得到王个召見就自家入去見王个，一定會判死刑。這係法律，全國上下，無論係王个顧問抑係逐省个人民全部知。只有一個情形例外；若係王向無得到召見个人伸出金杖，該人就毋使死。總係王已經有一隻月無召見𠊎了。」</verse>
				<verse number="12">末底改 接到 以斯帖 个消息以後，</verse>
				<verse number="13">就託人轉去，警告 以斯帖 講：「你毋好恅到你在王宮肚就會比其他个 猶太 人較安全。</verse>
				<verse number="14">你在恁樣个時節恬恬毋講話， 猶太 人一定會對別位得到拯救，總係你㧯你个家族會滅亡。麼人知，你有好做王后敢毋係為到這個時機！」</verse>
				<verse number="15">以斯帖 託人㧯 末底改 講：</verse>
				<verse number="16">「你去召集 書珊 城所有个 猶太 人，為𠊎禁食祈禱，三日三夜毋食毋啉；𠊎㧯𠊎个宮女也愛恁樣。然後，𠊎正去見王；雖然這係違法个，𠊎還係愛去。若係死，死就算了。」</verse>
				<verse number="17">末底改 離開以後，就照 以斯帖 要求佢个話去做。</verse>
			</chapter>
			<chapter number="5">
				<verse number="1">在 以斯帖 禁食个第三日，姖著王后个禮服入王宮，企在王宮个內院，面向王个大殿。王坐在寶座頂，面向殿門。</verse>
				<verse number="2">王看到王后 以斯帖 企在外背，就滿心歡喜，伸出金杖。 以斯帖 就向前去摸杖頭。</verse>
				<verse number="3">王問姖：「王后 以斯帖 啊，有麼介事係麼？你愛求麼介，𠊎全部會給你。就係𠊎王國个一半，𠊎也肯賜給你。」</verse>
				<verse number="4">以斯帖 應講：「國王若歡喜，就請王㧯 哈曼 今暗晡來參加𠊎特別準備个筵席。」</verse>
				<verse number="5">王吩咐人喊 哈曼 遽遽來，共下去參加 以斯帖 个筵席。所以王㧯 哈曼 共下去。</verse>
				<verse number="6">啉酒个時，王又問 以斯帖 ：「你愛求麼介，𠊎全部會給你。就係王國个一半，𠊎也肯賜給你。」</verse>
				<verse number="7">以斯帖 講：</verse>
				<verse number="8">「若係𠊎得到國王个愛惜，准𠊎要求，請王㧯 哈曼 天光日再來參加𠊎特別準備个筵席。該時，𠊎正㧯王講𠊎有麼介請求。」</verse>
				<verse number="9">哈曼 心情當快樂，歡頭喜面離開筵席。總係佢經過王宮門口个時，看到 末底改 坐在該位毋企起來，全無一些仔尊敬，就閼 末底改 到火當𤏸。</verse>
				<verse number="10">總係 哈曼 還係忍等自家个怒氣，轉到屋下，然後請朋友到厥屋下，也喊厥𡜵娘 細利斯 出來。</verse>
				<verse number="11">哈曼 向佢等展自家个好額㧯盡多个子女，又講王樣般提升看重佢，使佢超過所有个大臣㧯官員。</verse>
				<verse number="12">哈曼 又講：「毋單淨恁樣，王后 以斯帖 還特別為王㧯𠊎一儕準備筵席，又請𠊎㧯王天光日再去呢！</verse>
				<verse number="13">總係，逐擺𠊎看到該隻 猶太 人 末底改 坐在王宮門口，𠊎就感覺這所有个榮華富貴對𠊎全無麼介意思。」</verse>
				<verse number="14">佢个𡜵娘 細利斯 㧯所有个朋友向佢建議講：「你做得搭一座二十二公尺高个絞刑架！天光朝晨，你要求王將 末底改 吊在頂高。恁樣你就會快快樂樂㧯王共下去坐桌了。」 哈曼 認為這係當好个主意，就喊人搭絞刑架。</verse>
			</chapter>
			<chapter number="6">
				<verse number="1">該暗晡，王睡毋落覺，就命令人將官方个歷史拿來讀給佢聽。</verse>
				<verse number="2">佢等讀个記錄有一段恁樣講：「兩個掌門个太監 辟探 㧯 提列 ，計謀暗殺 亞哈隨魯 王， 末底改 將這事發覺報告。」</verse>
				<verse number="3">王問：「𠊎等有為這事給 末底改 麼介尊榮抑係地位麼？」 王个僕人應講：「麼介都無。」</verse>
				<verse number="4">王問：「有麼人在宮廷肚？」 這時， 哈曼 堵好入到宮廷外，愛求王將 末底改 吊在佢所預備个絞刑架頂。</verse>
				<verse number="5">僕人就應講：「 哈曼 在這位，愛見王。」 王講：「帶佢入來！」</verse>
				<verse number="6">哈曼 入來。王對佢講：「有一個人，𠊎當想愛賜佢尊榮；𠊎愛樣般做呢？」 哈曼 心肚想：「王想愛賜佢尊榮个人還有麼人呢？當然係𠊎啊！」</verse>
				<verse number="7">所以， 哈曼 向王建議：「王愛恁樣獎賞佢想愛賜佢尊榮个人：</verse>
				<verse number="8">喊人帶一身王著過个王袍來，還愛牽一隻王騎過个馬仔來、頭愛戴等王馬个冕旒，</verse>
				<verse number="9">然後命令王最尊貴个大臣㧯這個人著王袍，扶佢上馬，並為佢牽馬在城肚个廣場遊行。佢等遊行个時，這大臣愛在佢頭前喊講：『看啊，王恁樣獎賞佢想愛賜佢尊榮个人！』」</verse>
				<verse number="10">王對 哈曼 講：「趕緊將王袍㧯馬仔準備好勢，照你个建議，將尊榮賜給該坐在王宮門口个 猶太 人 末底改 ，一樣也做毋得少！」</verse>
				<verse number="11">所以， 哈曼 將王袍㧯馬仔準備好勢。佢㧯 末底改 著王袍，扶佢上馬，並為佢牽馬在城肚个廣場遊行，在頭前緊行緊向民眾喊：「看啊，王恁樣獎賞佢想愛賜佢尊榮个人！」</verse>
				<verse number="12">遊行結束， 末底改 轉到王宮門口，總係 哈曼 心肝艱苦到擎頭毋起，遽遽轉屋下去。</verse>
				<verse number="13">佢將所有个事講給𡜵娘 細利斯 㧯所有个朋友聽。厥𡜵娘㧯該兜聰明个朋友講：「你已經奈毋何 末底改 了。就算佢係 猶太 人，你也無辦法對付佢；在佢面前，你一定會橫到貼貼。」</verse>
				<verse number="14">佢等講等話个時，王宮个太監來到，催 哈曼 趕緊去參加 以斯帖 个筵席。</verse>
			</chapter>
			<chapter number="7">
				<verse number="1">王㧯 哈曼 又去參加王后 以斯帖 第二擺个筵席。</verse>
				<verse number="2">啉酒个時，王又問 以斯帖 ：「王后 以斯帖 啊，這下㧯𠊎講，你愛求麼介，𠊎全部會給你。就係王國个一半，𠊎也肯給你。」</verse>
				<verse number="3">王后 以斯帖 應講：「𠊎若得到國王个愛惜，王若係歡喜，請答應𠊎一個要求。𠊎求你饒𠊎个性命，也饒𠊎同胞个性命。</verse>
				<verse number="4">𠊎㧯𠊎个同胞全部被人出賣了。若係𠊎等只有被人賣去做奴才，𠊎一定會恬恬，絕對毋會開嘴為這事攪躁國王 ；總係，𠊎等會被人消滅掉，會受到絕種个災禍了！」</verse>
				<verse number="5">亞哈隨魯 王問王后 以斯帖 ：「麼人敢做這種事？這個人在㖠位？」</verse>
				<verse number="6">以斯帖 應講：「迫害𠊎等个敵人就係這個壞人 哈曼 ！」 哈曼 在王㧯王后面前黏時驚到愊愊掣。</verse>
				<verse number="7">王譴到企起來，離開酒席到外背个花園去。 哈曼 看出王決心愛為這事刑罰佢，就留下來求王后 以斯帖 救佢个命。</verse>
				<verse number="8">王對花園轉到酒席个所在，看到 哈曼 伏在 以斯帖 坐个眠椅頂。王看到這個情形，就大發譴講：「這個人還敢在王宮肚、在𠊎个面前侮辱王后嗎！」 王一講出這話，太監黏時將 哈曼 个面揞起來。</verse>
				<verse number="9">其中有一個太監安到 哈波拿 ，行前講：「 哈曼 有在厥屋下搭好一座二十二公尺高个絞刑架，準備愛拿來吊死救過王性命个 末底改 ！」 王下令：「將 哈曼 吊在該頂高！」</verse>
				<verse number="10">所以， 哈曼 被人吊在佢愛吊死 末底改 个絞刑架頂；恁樣王个怒氣正消掉。</verse>
			</chapter>
			<chapter number="8">
				<verse number="1">該日， 亞哈隨魯 王將 猶太 人个敵人 哈曼 所有个財產全部交給王后 以斯帖 。 末底改 被人傳到王个面前，因為 以斯帖 㧯王講， 末底改 係姖个親戚。</verse>
				<verse number="2">王將手指戴等个印仔剝下來，就係佢對 哈曼 該位拿轉來个，交給 末底改 。 以斯帖 也派 末底改 管理 哈曼 个財產。</verse>
				<verse number="3">後來， 以斯帖 又伏落在王腳前，緊噭緊求王阻止 亞甲 人 哈曼 愛消滅 猶太 人个陰謀。</verse>
				<verse number="4">王向 以斯帖 伸出金杖， 以斯帖 就企起來，講：</verse>
				<verse number="5">「𠊎若得到國王个愛惜，王若肯，認為𠊎个要求妥當，請下一條命令，撤消 亞甲 人 哈米大他 个孻仔 哈曼 發出个命令，就係愛消滅國內逐省所有 猶太 人个命令。</verse>
				<verse number="6">𠊎樣拌得看等𠊎个同胞受災難呢？𠊎樣拌得看等𠊎个親屬被人消滅呢？」</verse>
				<verse number="7">亞哈隨魯 王對王后 以斯帖 㧯 猶太 人 末底改 講：「你看！因為 哈曼 陰謀愛害死 猶太 人，𠊎已經吊死佢，又將佢个財產交給 以斯帖 。</verse>
				<verse number="8">𠊎准你等照你等个意思發通告給 猶太 人；你等也做得用𠊎个名義發出，又頓王印。因為用王个名義發出个通告，頂高有王个印仔，係做毋得撤消个。」</verse>
				<verse number="9">所以，在三月，就係西彎月二十三日， 末底改 召來王个書記，喊佢等發通告給 猶太 人，還有對 印度 到 古實 總共一百二十七省个省長、總督㧯行政官員。這通告係用逐省逐族个文字㧯 猶太 人个語文寫个。</verse>
				<verse number="10">末底改 用 亞哈隨魯 王个名義，頓王印，頒佈這份通告，又命令送信个人騎王宮最遽个馬送去逐所在。</verse>
				<verse number="11">這命令講：王准逐城市个 猶太 人組織起來保護自家。佢等做得除掉該兜愛攻打 猶太 人个一切對敵，連該兜人个𡜵娘子女也做得消滅，又做得搶走該兜人所有个財物。</verse>
				<verse number="12">這命令愛傳到全國逐省，在十二月，就係亞達月十三、原來決定除掉 猶太 人該日開始有效。</verse>
				<verse number="13">這命令愛像頒佈法律共樣公佈出去，使逐省逐族个人全部知。恁樣， 猶太 人做得準備好勢，在該日向佢等个敵人報仇。</verse>
				<verse number="14">所以，送信个人奉王个命令，騎王宮最好个馬，用最遽个速度去傳命令；這命令也傳遍首都 書珊 城。</verse>
				<verse number="15">末底改 著等藍色白色个朝服，披等紫色幼麻紗个外袍，戴等金个冕旒離開王宮； 書珊 城全城歡喜吶天。</verse>
				<verse number="16">對 猶太 人來講，這實在係歡喜、快樂、尊貴、光榮个事。</verse>
				<verse number="17">王个命令傳到逐省逐城， 猶太 人就歡喜快樂，辦桌席、像過節恁樣來慶祝。盡多个人因為驚 猶太 人就入 猶太 籍。</verse>
			</chapter>
			<chapter number="9">
				<verse number="1">十二月，就係亞達月十三到了；這係王个命令開始有效个日仔，也係 猶太 人个仇敵原來想愛消滅佢等个日仔。總係，該日， 猶太 人反轉贏過佢等。</verse>
				<verse number="2">猶太 人在全國逐省、佢等所住个城肚組織起來，攻擊想愛害佢等个人。逐所在个人全部驚佢等，無人有辦法抵抗佢等。</verse>
				<verse number="3">逐省个官員、省長、總督㧯王家代表，全部幫助 猶太 人，因為佢等驚 末底改 。</verse>
				<verse number="4">全國个人知：這下 末底改 在王宮係一個當有權力个人，佢个權力又越來越大。</verse>
				<verse number="5">所以 猶太 人照自家个意思對待佢等个仇敵，用刀劍攻擊，㓾掉佢等。</verse>
				<verse number="6">猶太 人在首都 書珊 城就㓾掉五百人。</verse>
				<verse number="7">哈曼 个十個孻仔也被佢等㓾死： 巴珊大他 、 達分 、 亞斯帕他 、</verse>
				<verse number="8">破拉他 、 亞大利雅 、 亞利大他 、</verse>
				<verse number="9">帕瑪斯他 、 亞利賽 、 亞利代 、 瓦耶撒他 。</verse>
				<verse number="10">哈曼 係 哈米大他 个孻仔，係 猶太 人个對敵。總係 猶太 人無將財物搶走。</verse>
				<verse number="11">該日，首都 書珊 城被人㓾死个人數報到王該位，</verse>
				<verse number="12">王就對王后 以斯帖 講：「 猶太 人在 書珊 城就㓾掉五百人， 哈曼 个十個孻仔也被佢等㓾死。在𠊎其他个逐省，毋知㓾掉幾多人！你這下有麼介要求？㧯𠊎講，𠊎一定也賜給你。」</verse>
				<verse number="13">以斯帖 應講：「王若准𠊎个要求，天光日請俾 書珊 城个 猶太 人再照今晡日所做个去做，又將 哈曼 十個孻仔个身屍吊在絞刑架頂。」</verse>
				<verse number="14">王就恁樣下令；佢个命令傳遍 書珊 城。 哈曼 十個孻仔个身屍就被人吊在絞刑架頂公開示眾。</verse>
				<verse number="15">亞達月十四， 書珊 城个 猶太 人又再聚集，在城肚㓾掉三百儕，總係佢等還係無搶財物。</verse>
				<verse number="16">其他逐省个 猶太 人在亞達月十三，也組織起來保護自家；佢等為到除滅仇敵，㓾死恨佢等个人總共七萬五千儕，總係全部無出手搶財物。</verse>
				<verse number="17">第二日，亞達月十四，佢等就無再㓾人；佢等定這日做辦筵席歡喜慶祝个日仔。</verse>
				<verse number="18">總係 書珊 城个 猶太 人定十五做節日；因為佢等係在十三、十四兩日㓾仇敵，在十五該日正無㓾人。</verse>
				<verse number="19">所以，住在莊下个 猶太 人將亞達月十四定做辦筵席歡喜慶祝个節日，互相送禮物。</verse>
				<verse number="20">末底改 將這兜事全部記錄下來，又發信仔給 亞哈隨魯 王全國逐省个 猶太 人，</verse>
				<verse number="21">吩咐佢等，逐年全部愛遵守亞達月十四㧯十五做節日，</verse>
				<verse number="22">因為這兩日係 猶太 人脫離仇敵个日仔；這隻月係 猶太 人對悲傷、絕望轉做歡喜、快樂个月份。佢等愛守這節日，辦筵席歡喜慶祝，互相送禮物，也愛救濟窮苦人。</verse>
				<verse number="23">猶太 人遵從 末底改 个指示，所以佢等逐年在這節日慶祝。</verse>
				<verse number="24">猶太 人个仇敵， 亞甲 人 哈米大他 个孻仔 哈曼 ，識計劃除掉 猶太 人。佢用抽籤 (又喊做抽「普珥」) 來決定一個日仔，愛消滅 猶太 人。</verse>
				<verse number="25">總係因為 以斯帖 到王該位去懇求，王就頒佈命令，使 哈曼 个計謀歸到自家个身上，就係佢㧯佢个孻仔全部被人吊在絞刑架頂。</verse>
				<verse number="26">這就係「普珥節」个來源。 猶太 人因為 末底改 所寫个信仔，並佢等所堵到个事，</verse>
				<verse number="27">就為自家、後代、㧯該兜可能歸順佢等个人，定一個規矩，愛照 末底改 个指示，逐年紀念這兩日。</verse>
				<verse number="28">無論在㖠省㖠城，逐個 猶太 家庭愛世世代代永遠紀念遵守這「普珥節。」</verse>
				<verse number="29">亞比亥 个妹仔 — 王后 以斯帖 也寫一封信仔，用王后个全權支持 末底改 所寫該封有關普珥節个信仔。</verse>
				<verse number="30">這信仔係寫給 亞哈隨魯 王統治个一百二十七省所有个 猶太 人。信仔底背祝福 猶太 人和平、安全，</verse>
				<verse number="31">又指示佢等㧯後代愛照時遵守普珥節，像佢等遵守禁食㧯哀求个規定共樣。這係 猶太 人 末底改 㧯王后 以斯帖 共同發出个命令。</verse>
				<verse number="32">以斯帖 个命令確定了普珥節；這命令也寫在書卷底背。</verse>
			</chapter>
			<chapter number="10">
				<verse number="1">亞哈隨魯 王命令沿海㧯內地个人民全部愛進貢。</verse>
				<verse number="2">佢大有權柄个作為，㧯佢牽成 末底改 使佢大有尊貴个事，全部記在 米底亞 㧯 波斯 王个官方歷史。</verse>
				<verse number="3">猶太 人 末底改 做 亞哈隨魯 王个宰相。佢也得到同胞 猶太 人个尊敬㧯歡喜；因為佢為同胞爭取福利，也為佢等个子子孫孫求到和平幸福。</verse>
			</chapter>
		</book>
		<book number="18">
			<chapter number="1">
				<verse number="1">有一個人安到 約伯 ，住在 烏斯 地區 ；佢係一個好人，做人正直，敬畏上帝，遠離壞事。</verse>
				<verse number="2">佢有七個孻仔，三個妹仔。</verse>
				<verse number="3">佢有七千隻羊，三千隻駱駝，五百對牛，五百隻驢乸；還有盡多个僕人。在東方人當中，佢算係最發个。</verse>
				<verse number="4">約伯 該兜孻仔常常輪流在自家屋下辦桌，也派人去請佢等个三個姊妹共下來啉食。</verse>
				<verse number="5">逐擺筵席个日期過後， 約伯 就打早䟘起來，為逐個子女獻燒化祭，喊佢等行潔淨个禮儀。佢常常恁樣做，因為佢想：「驚怕𠊎該兜子女有犯罪，在心肚咒罵上帝。」</verse>
				<verse number="6">有一日，天頂个眾神子 來朝見上主，撒但 也在佢等當中。</verse>
				<verse number="7">上主問撒但：「你對㖠位來啊？」 撒但應講：「𠊎在地上逐位行來行去，然後轉到這位來。」</verse>
				<verse number="8">上主問撒但：「你有注意到𠊎个僕人 約伯 麼？世間無一儕像佢恁好：做人正直，又敬畏𠊎，遠離壞事。」</verse>
				<verse number="9">撒但應講：「 約伯 敬畏上帝，敢係無原因？</verse>
				<verse number="10">你敢毋係在四周圍保護佢、㧯佢个家，並佢所有个一切？你賜福給佢，使佢凡事順利；佢个頭牲多到滿遍係。</verse>
				<verse number="11">總係你若係出手，將佢所有个全部拿走，佢一定會當面咒罵你！」</verse>
				<verse number="12">上帝對撒但講：「好啊，佢所有个全部在你手中，總係不准你傷害佢本身。」撒但就對上主面前出去了。</verse>
				<verse number="13">有一日， 約伯 个子女全部在大哥屋下食飯啉酒，</verse>
				<verse number="14">有報信个走來㧯 約伯 講：「牛當犁田，驢在旁邊食草个時，</verse>
				<verse number="15">示巴 人 忽然間來攻擊，將頭牲全部搶走，㓾掉你所有个僕人，只有𠊎一儕逃走，來向你報信。」</verse>
				<verse number="16">佢還吂講煞，另外一個僕人走等來，講：「上帝對天頂降火下來，燒掉羊群㧯掌羊个，只有𠊎一儕逃走，來向你報信。」</verse>
				<verse number="17">佢還講等話个時，又有一個僕人走等來，講：「 迦勒底 人 分三隊，忽然間攻擊𠊎等，將駱駝全部搶走，㓾掉所有个僕人，只有𠊎一儕逃走，來向你報信。」</verse>
				<verse number="18">佢還吂講煞，另外又有一個僕人走等來，講：「你該兜子女在大哥屋下食飯啉酒，</verse>
				<verse number="19">忽然間有大風對曠野吹來，將屋吹橫，屋肚个後生人全部磧死，只有𠊎一儕逃走，來向你報信。」</verse>
				<verse number="20">約伯 就企起來，扯爛自家个外衫，剃掉頭那毛，伏在地上敬拜，</verse>
				<verse number="21">講： 「𠊎赤身露體出母胎， 也愛赤身露體倒轉去； 賞賜个係上主， 收轉去个也係上主。 上主个名應當得到頌讚！」</verse>
				<verse number="22">雖然堵到這一切个事情， 約伯 並無犯罪，無怪怨上帝做毋著。</verse>
			</chapter>
			<chapter number="2">
				<verse number="1">又有一日，天頂个眾神子 再來朝見上主，撒但也在佢等當中。</verse>
				<verse number="2">上主問撒但：「你對㖠位來啊？」 撒但應講：「𠊎在地上逐位行來行去，然後轉到這位來。」</verse>
				<verse number="3">上主問撒但：「你有注意到𠊎个僕人 約伯 麼？世間無一儕像佢恁好：做人正直，敬畏𠊎，遠離壞事。你雖然激𠊎攻擊佢，無緣無故蹧踏佢，總係佢還係像頭擺恁樣對𠊎忠心。」</verse>
				<verse number="4">撒但應講：「『用皮換皮！』人放掉所有个一切來換自家个生命，逐儕乜甘願。</verse>
				<verse number="5">總係你若係出手傷害佢个身體，佢一定會當面咒罵你！」</verse>
				<verse number="6">上主對撒但講：「好啊，佢在你个手中，總係愛留佢个生命。」</verse>
				<verse number="7">撒但就對上主面前出去，開始打擊 約伯 ，使佢對腳底到頭那頂發毒瘡。</verse>
				<verse number="8">約伯 去坐在火灰肚，拿一垤瓦析刮自家身項个毒瘡。</verse>
				<verse number="9">厥𡜵娘對佢講：「你到這下還堅持你个忠心嗎？咒罵上帝，去死好哪！」</verse>
				<verse number="10">約伯 應講：「你這個婦人家樣會恁憨蚩！敢講上帝賜福給𠊎等，𠊎等就歡喜，佢降災禍，𠊎等就咒罵佢係麼？」雖然 約伯 堵到恁多痛苦，佢還係毋開嘴咒罵上帝來犯罪。</verse>
				<verse number="11">約伯 有三個朋友，就係 提幔 人 以利法 、 書亞 人 比勒達 ，㧯 拿瑪 人 瑣法 。佢等聽到 約伯 堵到這一切个災禍，逐儕就離開屋下，湊等去看佢，安慰佢。</verse>
				<verse number="12">佢等遠遠就看到 約伯 ，總係認毋出係佢，等到認出係佢，就開聲大噭，逐儕扯爛自家个外衫，向天頂委塵灰，委在自家頭那頂。</verse>
				<verse number="13">然後佢等同 約伯 共下坐在地上，七日七夜無講一句話，因為佢等看到 約伯 个痛苦恁大！</verse>
			</chapter>
			<chapter number="3">
				<verse number="1">最後， 約伯 開嘴咒詛自家个生日。</verse>
				<verse number="2">願𠊎出世該日、 㧯𠊎成做男胎該暗晡無掉去。</verse>
				<verse number="3"></verse>
				<verse number="4">願該日變做烏暗； 願上帝莫紀念該日， 莫俾光照它。</verse>
				<verse number="5">願它成做烏暗死蔭个一日。 願烏雲遮蓋它， 願天狗食日來嚇它。</verse>
				<verse number="6">願該暗晡被烏暗捉走， 無算在年肚个日仔㧯月份中。</verse>
				<verse number="7">願該暗晡無生育个事， 也無歡喜快樂个聲。</verse>
				<verse number="8">願該兜會喊醒海怪 个人， 該兜變邪術个人出來咒詛該暗晡。</verse>
				<verse number="9">願該暗晡个天光星變暗； 也看毋到天光日出。</verse>
				<verse number="10">因為該暗晡無將懷𠊎个子宮門關掉， 卻害𠊎堵到恁多苦難。</verse>
				<verse number="11">做麼介𠊎毋一出世就斷氣？ 抑係吂出母胎就死掉？</verse>
				<verse number="12">做麼介吾姆將𠊎揇在膝頭頂？ 做麼介姖有乳給𠊎食？</verse>
				<verse number="13">若係𠊎該時死掉， 這下早就安息，</verse>
				<verse number="14">㧯世間為自家重起王宮个君王、官員共下睡，</verse>
				<verse number="15">㧯歸屋裝滿金銀个王子共下安息，</verse>
				<verse number="16">㧯落胎、吂見光个孲𤘅仔共樣。</verse>
				<verse number="17">在墳墓肚，壞人停止作惡， 操勞个人得到安息。</verse>
				<verse number="18">連被人捉去个人也享受自由， 毋會再聽到監工喝喝咄咄；</verse>
				<verse number="19">無分貴賤大細，全部在該位， 連奴才也得到自由。</verse>
				<verse number="20">做麼介俾艱苦个人還有日光？ 做麼介俾憂傷个人還有生命？</verse>
				<verse number="21">該兜人想愛死，偏偏毋會死； 佢等想尋死，贏過尋財寶。</verse>
				<verse number="22">佢等入到墳墓， 正有正經个喜樂。</verse>
				<verse number="23">前途茫茫个人， 四面被上帝圍困等， 做麼介有光賜給佢？</verse>
				<verse number="24">𠊎透大氣準飯食； 𠊎緊噌像水流毋會斷。</verse>
				<verse number="25">𠊎最驚个事全部出現； 所驚个事偏偏臨到𠊎。</verse>
				<verse number="26">𠊎無平安，得毋到安息； 總係，操煩毋識停過。</verse>
			</chapter>
			<chapter number="4">
				<verse number="1">提幔 人 以利法 應 約伯 講：</verse>
				<verse number="2">人愛㧯你講話，你無耐心來聽係麼？ 總係麼人忍得住毋講話呢？</verse>
				<verse number="3">你識教過盡多人， 使軟弱个手有力。</verse>
				<verse number="4">你个話識俾會跌倒个人得到鼓勵， 使衰弱个膝頭勇健起來。</verse>
				<verse number="5">這下災禍臨到你身上， 你就驚到無勇氣擔當。</verse>
				<verse number="6">你个敬虔無帶給你信心係麼？ 你無好嫌个行為無帶給你希望係麼？</verse>
				<verse number="7">你想看啊：㖠有無罪个人滅亡？ 㖠有正直个人行到絕路去呢？</verse>
				<verse number="8">照𠊎看，耕邪惡、委毒个人， 佢等所收成个就係惡毒。</verse>
				<verse number="9">上帝个透氣使佢等滅亡； 上帝个發譴使佢等消滅。</verse>
				<verse number="10">大獅仔个吼聲全部恬掉； 細獅仔个牙齒全部敲掉。</verse>
				<verse number="11">老獅仔無好食就餓死； 細獅仔也全部散淨淨。</verse>
				<verse number="12">有一擺𠊎暗中聽到消息， 𠊎耳公聽到盡細个聲；</verse>
				<verse number="13">大家當好睡个時， 有異象來攪躁𠊎。</verse>
				<verse number="14">𠊎驚到愊愊掣； 𠊎全身个骨頭悸悸顫。</verse>
				<verse number="15">一陣風吹過𠊎个面， 使𠊎歸身起寒毛菇。</verse>
				<verse number="16">𠊎看到一種形像停在𠊎面前， 總係認毋出它係麼介。 這時，在恬靜中，𠊎聽到盡細个聲音講：</verse>
				<verse number="17">在上帝面前，麼人堪得稱做義人？ 在創造主面前，有麼人係純潔个？</verse>
				<verse number="18">連天頂个僕人，上帝也倚恃毋得； 佢識指出該兜天使个過失。</verse>
				<verse number="19">人係用泥做个、像住在泥屋肚， 比蛀蟲較容易磧死； 敢講上帝做得倚恃𠊎等？</verse>
				<verse number="20">人朝晨頭還生，臨暗仔就死掉； 佢永遠滅亡，也無人插佢！</verse>
				<verse number="21">厥帳篷个索仔挷斷掉； 佢死，也係無智慧來死。</verse>
			</chapter>
			<chapter number="5">
				<verse number="1">約伯 啊，做你盡喊，看有麼人應你呢； 你會向㖠個天使求幫助呢？</verse>
				<verse number="2">發閼會害死戇檔人； 嫉妒會使無知个人無命。</verse>
				<verse number="3">𠊎看過戇檔人打拚愛安居樂業， 總係災難忽然間臨到佢个屋下；</verse>
				<verse number="4">佢个子女無麼介安全， 在法庭被人欺負，無人代佢等講話。</verse>
				<verse number="5">佢个收成被肚飢个人搶去食， 連該兜竻藪肚个也摘去食淨淨； 佢个財產被饑渴个人吞掉。</verse>
				<verse number="6">災禍毋會對泥塥肚生出來； 苦難也毋係對泥下爆出來。</verse>
				<verse number="7">人一出世就會有苦難， 就像火花對火飛出來。</verse>
				<verse number="8">若係𠊎，𠊎愛尋求上帝， 向佢申訴𠊎个問題。</verse>
				<verse number="9">佢所做个大事𠊎等毋了解； 佢奇妙个作為算毋出恁多。</verse>
				<verse number="10">佢落雨在地面； 佢送水到田肚。</verse>
				<verse number="11">上帝使卑微个人高升起來， 將哀傷个人帶到安穩所在。</verse>
				<verse number="12">佢破壞搞怪人个計謀， 使佢等手所做个毋會成功。</verse>
				<verse number="13">佢使聰明人陷入自家个詭計， 佢使狡猾人个陰謀全部失敗。</verse>
				<verse number="14">佢等日時頭堵到烏暗， 當晝頭像暗晡時摸來摸去。</verse>
				<verse number="15">上帝拯救窮苦人 脫離強暴人个統治。</verse>
				<verse number="16">佢使窮苦人有盼望， 俾邪惡个人無話講。</verse>
				<verse number="17">上帝所管教个人有福氣； 全能者个責備毋好看輕。</verse>
				<verse number="18">上帝傷到人，也會㧯人包好； 佢打傷人，佢个手也會醫好。</verse>
				<verse number="19">佢時時刻刻愛拯救你； 佢會一直救你離開災難。</verse>
				<verse number="20">飢荒个時，佢愛救你脫離死亡； 戰爭个時，佢會救你離開刀劍。</verse>
				<verse number="21">佢會保護你，使你毋會受譭謗， 災禍臨到个時，你也毋使著驚。</verse>
				<verse number="22">飢荒、暴亂中，你還係滿面笑容； 野獸个傷害，你也完全毋使驚。</verse>
				<verse number="23">你耕種个田地毋會有石頭； 野地个畜牲也毋會傷害你。</verse>
				<verse number="24">該時你會知，住在若帳篷肚有平安； 你查看你个羊群，連一隻也無失掉。</verse>
				<verse number="25">你會看到若子孫興旺， 像草坪个青草恁茂盛。</verse>
				<verse number="26">你會盡長壽滿足正歸土， 像麥仔成熟照時好收成。</verse>
				<verse number="27">約伯 啊，這係𠊎等所查考个真理； 為到你个好處，你應該愛聽。</verse>
			</chapter>
			<chapter number="6">
				<verse number="1">約伯 應講：</verse>
				<verse number="2">願有人將𠊎个憂愁秤看仔， 有人將𠊎个災難放在天平；</verse>
				<verse number="3">它兜比海滣个沙還較重； 所以，毋好怪𠊎講話粗俗。</verse>
				<verse number="4">全能个上帝用箭射到𠊎； 箭頭个毒遰到𠊎个身心靈。 上帝用各種得人驚个災難打擊𠊎。</verse>
				<verse number="5">野驢有青草就滿足； 牛有草好食就恬恬。</verse>
				<verse number="6">食物無鹹無味樣食得？ 卵白敢有麼介味緒呢？</verse>
				<verse number="7">這種食物𠊎無愛食， 一下落嘴就想愛嘔。</verse>
				<verse number="8">願上帝賜給𠊎所祈求个， 賞賜𠊎所盼望个。</verse>
				<verse number="9">願上帝將𠊎磧糜， 出手將𠊎剪除！</verse>
				<verse number="10">恁樣，𠊎還係會得到安慰； 苦難重到會死，𠊎還會歡喜， 因為𠊎從來毋識違背神聖上帝个命令。</verse>
				<verse number="11">𠊎㖠有元氣緊等等下去呢？ 𠊎毋知結局，愛樣般忍耐呢？</verse>
				<verse number="12">敢講𠊎係石頭做个？ 敢講𠊎个身體係銅打个？</verse>
				<verse number="13">𠊎實在無辦法好救自家； 𠊎毋知愛去㖠位求幫助。</verse>
				<verse number="14">該兜無用慈愛對待朋友个， 就係豁掉對全能者个敬畏 。</verse>
				<verse number="15">𠊎个兄弟啊，你等像溪水靠毋得， 一下無落雨，水就燥掉。</verse>
				<verse number="16">寒天落雪个時， 溪水就結冰。</verse>
				<verse number="17">在熱天需要水个時， 它又燥掉。</verse>
				<verse number="18">歸隊生理人尋水源卻迷路， 佢等行毋著路就死在曠野。</verse>
				<verse number="19">歸隊 提瑪 个生理人去尋水； 示巴 个旅客緊等也緊希望。</verse>
				<verse number="20">佢等个盼望變做痛苦； 佢等尋毋到水就失望。</verse>
				<verse number="21">對𠊎來講，你等就像這溪水； 看到𠊎个情況，就著驚倒退。</verse>
				<verse number="22">𠊎敢識向你等求麼介禮物， 抑係愛你等為𠊎去收買人？</verse>
				<verse number="23">抑係要求救𠊎離開仇敵个手， 抑係贖𠊎離開該兜強暴个手？</verse>
				<verse number="24">好啊，請你教𠊎，𠊎會恬恬聽； 使𠊎了解自家㖠位毋著。</verse>
				<verse number="25">講話公當就會使人信服； 總係你等到底責備麼介？</verse>
				<verse number="26">𠊎絕望个話你等看做像風； 做麼介還想愛責備改正𠊎？</verse>
				<verse number="27">你等抽籤，愛得到孤兒來做奴才， 想愛賺錢，你等還敢出賣好朋友。</verse>
				<verse number="28">請你等面對面來看𠊎， 𠊎絕對毋會講花撩。</verse>
				<verse number="29">你等愛回心轉意，毋好恁無公平； 愛再想看仔，因為𠊎正直無虛假。</verse>
				<verse number="30">𠊎个舌乸敢識講花撩， 𠊎敢毋會分別是非嗎？</verse>
			</chapter>
			<chapter number="7">
				<verse number="1">人在世間，就像做兵揹重擔， 日日過像工人勞苦个生活，</verse>
				<verse number="2">像奴才渴慕日頭落山， 像請个工人等發工錢。</verse>
				<verse number="3">𠊎註定過困苦个日月； 逐暗晡只有憂愁痛苦。</verse>
				<verse number="4">𠊎橫落去睡目，感覺暗晡時樣會恁長， 翻過來翻過去，一直到天光睡毋落覺。</verse>
				<verse number="5">𠊎歸身生蟲、訌膿； 皮肉收口又爛掉。</verse>
				<verse number="6">𠊎个日仔比梭較遽， 全部在失望中過掉。</verse>
				<verse number="7">上帝啊，求你記得， 𠊎个生命就賸到一口氣； 𠊎毋會再看到幸福个日仔。</verse>
				<verse number="8">你這下看等𠊎，無幾久會看𠊎毋到； 若係想愛尋𠊎，該時𠊎已經無在了。</verse>
				<verse number="9">像雲散掉一樣， 人一死就毋會倒轉來；</verse>
				<verse number="10">佢毋會再轉到厥屋下， 故鄉个人也毋記得佢。</verse>
				<verse number="11">因為恁樣，𠊎無愛再恬恬！ 𠊎愛講出𠊎心靈个憂愁； 𠊎愛道嘆𠊎內心个痛苦。</verse>
				<verse number="12">上帝啊，你做麼介監視𠊎？ 敢講你將𠊎準做海怪嗎？</verse>
				<verse number="13">𠊎上眠床想歇睏一下， 希望會減輕𠊎个痛苦；</verse>
				<verse number="14">你卻用惡夢來使𠊎著驚， 用得人驚个異象來嚇𠊎。</verse>
				<verse number="15">所以，𠊎甘願哽死， 較贏留等一身骨頭。</verse>
				<verse number="16">𠊎當想愛死，𠊎个生命無半點生趣； 求你莫插𠊎，𠊎个人生完全無意義。</verse>
				<verse number="17">人算麼介，你恁看重佢？ 你樣會將佢放在心上？</verse>
				<verse number="18">你逐朝晨鑒察佢， 時時刻刻考驗佢。</verse>
				<verse number="19">你愛到幾時正肯放過𠊎， 俾𠊎吞一下口潾好麼？</verse>
				<verse number="20">鑒察人个主啊， 敢講𠊎个罪礙到你係麼？ 做麼介將𠊎準箭靶來射？ 𠊎成做你恁大个重擔嗎？</verse>
				<verse number="21">你樣毋赦免𠊎个過失？ 你樣毋除掉𠊎个罪惡？ 𠊎無幾久就會入墳墓； 你尋𠊎，𠊎已經無在了。</verse>
			</chapter>
			<chapter number="8">
				<verse number="1">接等， 書亞 人 比勒達 應講：</verse>
				<verse number="2">這種話你愛講到幾時呢？ 你講个像風差恁樣亂吹！</verse>
				<verse number="3">敢講上帝會顛倒是非嗎？ 敢講全能者會違背公義？</verse>
				<verse number="4">你个子女一定係得罪佢， 所以佢就使佢等受報應。</verse>
				<verse number="5">你應該面向上帝， 迫切懇求全能者。</verse>
				<verse number="6">若係你恁純潔正直， 上帝一定會幫助你， 回復你个田園家室。</verse>
				<verse number="7">你起初雖然微細， 到尾必定大興旺。</verse>
				<verse number="8">請你查看古代个智慧， 研究𠊎等祖先个經驗。</verse>
				<verse number="9">𠊎等个生命當短，又懵懵懂懂； 日仔緊過像影仔，一下就無掉。</verse>
				<verse number="10">𠊎等个祖先敢毋會指教你？ 愛聽佢等對心肚所講个話。</verse>
				<verse number="11">蒲草無泥敢會生？ 蘆竹無水敢會旺？</verse>
				<verse number="12">水一燥掉，它兜最先死掉； 若係還嫩，割下來也無用。</verse>
				<verse number="13">無敬虔个人㧯蒲草共樣； 毋記得上帝，就無希望了。</verse>
				<verse number="14">佢等信賴該會斷个絲， 佢等倚靠个係蜘蛛網。</verse>
				<verse number="15">佢等憑等網仔，總係蜘蛛網敢毋會爛掉？ 佢等揪等網仔，蜘蛛網敢能俾佢等倚恃？</verse>
				<verse number="16">壞人像日頭下个雜草， 藤葉盡靚，遰到滿園。</verse>
				<verse number="17">它个根纏等巖石， 釘入石縫肚。</verse>
				<verse number="18">總係，若係將它挷出來， 無人知它識在該位生根。</verse>
				<verse number="19">看啊，這就係壞人在世間个喜樂； 以後別人會代佢等个地位。</verse>
				<verse number="20">總係，上帝永遠毋會㧒掉完全人， 也絕對毋會幫助壞人。</verse>
				<verse number="21">佢還愛使你開聲大笑； 佢還愛使你歡喜吶天。</verse>
				<verse number="22">佢會使恨你个人見笑； 佢會俾壞人个家消滅。</verse>
			</chapter>
			<chapter number="9">
				<verse number="1">約伯 接等應講：</verse>
				<verse number="2">係啊，這道理𠊎全部知； 總係在上帝面前，人樣會稱做義人呢？</verse>
				<verse number="3">麼人能㧯佢辯論呢？ 佢提出一千隻問題， 一隻都無人會回答。</verse>
				<verse number="4">上帝大有智慧、大有能力； 麼人抵抗佢還能平安呢？</verse>
				<verse number="5">佢徙大山，山也全無感覺； 佢一發譴，連山都揙轉來。</verse>
				<verse number="6">佢使地挺動，離開原位； 佢使地个柱仔搖動。</verse>
				<verse number="7">佢喊日頭莫出來， 又使星仔無發光。</verse>
				<verse number="8">佢自家鋪設穹蒼， 腳踏在海浪頂高 。</verse>
				<verse number="9">佢在天頂安星仔 — 北斗、獵戶星、昴星、㧯南極个星群。</verse>
				<verse number="10">𠊎等無法了解佢所做个大事； 佢奇妙个作為無窮無盡。</verse>
				<verse number="11">上帝對𠊎塍頭過，𠊎看毋到佢； 佢對𠊎面前行過，𠊎也無感覺。</verse>
				<verse number="12">佢隨意拿走佢所愛个，無人能阻擋； 麼人敢問佢講：你在該位做麼介呢？</verse>
				<verse number="13">上帝个怒氣毋會停止； 該兜幫助海怪 拉哈伯 个人全部伏在佢个腳下。</verse>
				<verse number="14">𠊎樣敢應上帝？ 𠊎樣敢㧯佢拗？</verse>
				<verse number="15">𠊎雖然無罪，也毋敢應佢； 𠊎只能向上帝 — 𠊎个審判者求憐憫。</verse>
				<verse number="16">就算𠊎求喊佢，佢正經答應𠊎， 𠊎乜毋敢相信佢肯聽𠊎个聲。</verse>
				<verse number="17">佢用暴風打擊𠊎， 無緣無故傷害𠊎。</verse>
				<verse number="18">佢毋俾𠊎透一口氣， 反轉使痛苦充滿𠊎。</verse>
				<verse number="19">若係𠊎用暴力，麼人有佢恁大力！ 若係上法庭，麼人敢傳佢 出庭？</verse>
				<verse number="20">𠊎雖然無罪，𠊎个話還係定𠊎有罪； 𠊎雖然清白，佢還係愛證明𠊎个過失。</verse>
				<verse number="21">𠊎無罪，總係有麼介用呢？ 𠊎已經看輕𠊎个生命。</verse>
				<verse number="22">有罪無罪全部係共樣， 總講上帝愛毀滅𠊎等。</verse>
				<verse number="23">若係忽然間堵到災禍來死掉， 上帝就恥笑無罪个人所受到个絕望。</verse>
				<verse number="24">上帝將世界交在壞人个手中； 佢使地上个審判官全部像青盲一樣。 這毋係上帝做个，係麼人做个呢？</verse>
				<verse number="25">𠊎个日仔比送快信个走較遽， 像飛等過去，無看到麼介福樂。</verse>
				<verse number="26">𠊎个生命像快艇走當遽， 就像鷹鳥捉食物衝等下。</verse>
				<verse number="27">𠊎就算勉強歡笑， 想毋記得自家个痛苦，</verse>
				<verse number="28">所有个災難還係害𠊎無葛無煞； 因為𠊎知上帝毋會看𠊎做無罪。</verse>
				<verse number="29">既然佢愛判𠊎有罪， 𠊎樣使白白伸冤呢？</verse>
				<verse number="30">就算𠊎用雪水洗身， 就算𠊎拿茶籸洗手，</verse>
				<verse number="31">上帝還愛將𠊎㧒落垃圾窟； 連𠊎个衫褲也全部會嫌𠊎。</verse>
				<verse number="32">若係上帝㧯𠊎共樣係人，𠊎做得㧯佢辯論； 𠊎做得㧯佢共下去法院，兩儕當面來對質。</verse>
				<verse number="33">總係，佢㧯𠊎之間無公當个裁判； 無人做得在上帝㧯𠊎之間做調解。</verse>
				<verse number="34">上帝啊，求你毋好再責罰𠊎！ 求你毋好再恐嚇𠊎。</verse>
				<verse number="35">恁樣，𠊎就敢大膽講話，全毋使驚你； 總係，這下𠊎个情形並毋係恁樣 。</verse>
			</chapter>
			<chapter number="10">
				<verse number="1">𠊎盡惱自家个生命。 𠊎愛講出𠊎个哀怨； 𠊎愛將內心个痛苦全部拚出來。</verse>
				<verse number="2">上帝啊，毋好定𠊎有罪； 㧯𠊎講，你愛告𠊎麼介？</verse>
				<verse number="3">親手所創造个，你壓制又看輕， 壞人所計謀个，你笑瞇瞇贊成。 你恁樣做敢有合理？</verse>
				<verse number="4">你个看法㧯人个看法共樣係麼？</verse>
				<verse number="5">敢講你个壽命㧯人个壽命平長？</verse>
				<verse number="6">恁樣，你做麼介查𠊎个罪？ 你做麼介尋𠊎个過失？</verse>
				<verse number="7">你明明知𠊎無罪； 你知無人能救𠊎脫離你个手。</verse>
				<verse number="8">你親手創造𠊎、使𠊎有人形； 這下轉過來，愛親手毀滅𠊎。</verse>
				<verse number="9">求你毋好毋記得你係用泥造𠊎 ； 你這下又愛使𠊎歸轉塵土係麼？</verse>
				<verse number="10">你毋係將𠊎像乳倒出來， 使𠊎像乳酪凝結成胎嗎？</verse>
				<verse number="11">你用筋骨將𠊎全身連結起來； 你又用肉㧯皮包等𠊎个筋骨。</verse>
				<verse number="12">你賜給𠊎生命㧯慈愛； 你看顧保全𠊎个心靈。</verse>
				<verse number="13">這下𠊎正知你个心意； 你早就打算愛傷害𠊎。</verse>
				<verse number="14">你注意𠊎係毋係有犯罪； 若係有罪，你毋肯赦免𠊎。</verse>
				<verse number="15">𠊎一下犯罪，黏時就受責罰， 無犯罪，頭那也毋敢擎起來； 因為𠊎滿心見笑，食盡苦難。</verse>
				<verse number="16">𠊎當得意，你就像獅仔愛捉𠊎； 你甚至還係用神蹟來傷害𠊎。</verse>
				<verse number="17">你總係有打擊𠊎个證據； 你對𠊎个受氣有加無減， 像派軍隊輪等來攻擊𠊎。</verse>
				<verse number="18">上帝啊，你做麼介俾𠊎出母胎呢？ 人吂看到𠊎以前，樣毋俾𠊎斷氣？</verse>
				<verse number="19">𠊎一出母胎就被人送去墳墓， 就像無出世，恁樣敢毋會較好？</verse>
				<verse number="20">𠊎个一生敢毋係愛結束了？放𠊎過哪！ 求你俾𠊎在賸到个日仔有一些安樂。</verse>
				<verse number="21">𠊎愛走了，無可能倒轉來； 𠊎愛去死蔭烏暗个所在。</verse>
				<verse number="22">該片只有烏暗、死蔭、無秩序； 在該位，連光也還係暗疏疏。</verse>
			</chapter>
			<chapter number="11">
				<verse number="1">接等， 拿瑪 人 瑣法 應講：</verse>
				<verse number="2">這一大堆个憨蚩話無人應係麼？ 多嘴个人敢就證明佢有理係麼？</verse>
				<verse number="3">約伯 啊，你亂講話，無人能回答你係麼？ 你嘲謔上帝个時，無人敢責備你係麼？</verse>
				<verse number="4">你恅到自家个道理全部著， 你在上帝面前係淨淨浰浰。</verse>
				<verse number="5">總係，願上帝應你； 願佢開嘴攻擊你。</verse>
				<verse number="6">佢會指示你智慧个各種奧妙； 有兜事情忒深，人無法度了解。 愛知，上帝無全部算你个罪過！</verse>
				<verse number="7">你有辦法了解上帝个奧妙麼？ 你敢看得透全能者个無限麼？</verse>
				<verse number="8">佢个智慧 比天還較高，你摸毋到； 比陰間還較深，所以你毋會了解；</verse>
				<verse number="9">比地還較長， 比海還較闊。</verse>
				<verse number="10">若係上帝愛捉你去關，審判你， 麼人有辦法阻擋佢呢？</verse>
				<verse number="11">佢就知㖠兜人虛虛假假； 佢看清楚佢等个壞行為。</verse>
				<verse number="12">野驢仔𫱔出來就會順服嗎？ 憨蚩个人也無法度變聰明。</verse>
				<verse number="13">約伯 啊，你愛存心正直； 你愛擎手祈求上帝。</verse>
				<verse number="14">愛徹底除掉你手項个邪惡； 毋好俾不義留在你个屋下。</verse>
				<verse number="15">恁樣，你會企到在在，毋驚麼介； 就做得光明正大來面對世界。</verse>
				<verse number="16">你會毋記得你所有个災禍， 就算想起，也會像水流等走。</verse>
				<verse number="17">你个人生會比當晝个日頭較光， 就算有烏暗，還會像朝晨頭恁光。</verse>
				<verse number="18">你會享受安全，因為有盼望； 上帝愛保護你，使你安心睡。</verse>
				<verse number="19">你睡下去，毋使驚有敵人； 盡多人會來向你求幫助。</verse>
				<verse number="20">總係壞人目珠花花， 尋毋到逃走个出路； 佢等个希望就係死。</verse>
			</chapter>
			<chapter number="12">
				<verse number="1">約伯 應講：</verse>
				<verse number="2">你等確實係最有智慧个人噢！ 你等一死，智慧就會共下滅掉！</verse>
				<verse number="3">總係𠊎㧯你等共樣有聰明， 𠊎个智慧並毋會較輸你等。 你等所講个，有麼人毋知呢？</verse>
				<verse number="4">這下連𠊎个朋友也嘲謔𠊎； 𠊎正直清白，佢等還嘲謔𠊎； 總係上帝也識聽𠊎个祈禱。</verse>
				<verse number="5">無災禍个人看輕堵到災禍个人； 這種人常常打擊該會跌倒个人。</verse>
				<verse number="6">強盜个帳篷反轉穩固， 惹上帝發譴个人反轉平安； 佢等將本事準做神明 。</verse>
				<verse number="7">你去請教走獸，牠兜會教你； 你去問空中个飛鳥，牠兜會㧯你講。</verse>
				<verse number="8">就係㧯大地講，它也會教你， 海肚个魚仔也會㧯你說明。</verse>
				<verse number="9">係上主个手創造牠兜， 牠兜當中敢有毋知个？</verse>
				<verse number="10">生物个命全部在上帝个手中； 人个透氣也在佢个掌管之中。</verse>
				<verse number="11">耳公愛分別話語个內容， 就像舌乸試食物个滋味。</verse>
				<verse number="12">老年人有智慧， 總係上帝有智慧又有能力。 老人家有見識， 總係上帝有見識又有實行个能力。</verse>
				<verse number="13"></verse>
				<verse number="14">上帝拆掉个，麼人有辦法重建？ 佢關禁个人，麼人有辦法釋放？</verse>
				<verse number="15">上帝毋落雨，就會有天旱； 佢放開水源，地就做大水。</verse>
				<verse number="16">上帝有權能，從頭到尾贏過一切； 騙人个㧯被人騙个，全在佢手中。</verse>
				<verse number="17">佢搶走謀士个智慧， 又使審判官像戇仔。</verse>
				<verse number="18">佢廢掉君王个權柄， 又使佢等成做犯人。</verse>
				<verse number="19">佢搶走祭司个職務； 佢推翻揢大權个人。</verse>
				<verse number="20">佢使信用个人無話講； 佢搶走老人家个智慧。</verse>
				<verse number="21">佢使尊貴个人見笑， 使有權勢个人衰敗。</verse>
				<verse number="22">佢使奧妙對烏暗中顯明出來； 佢使烏暗顯出光明。</verse>
				<verse number="23">佢使列國強大、興旺， 然後又打擊它兜，消滅它兜。</verse>
				<verse number="24">佢使人民个領袖愚戇， 俾佢等迷失在混亂中；</verse>
				<verse number="25">佢等像食酒醉个人， 在烏暗中偏來偏去。</verse>
			</chapter>
			<chapter number="13">
				<verse number="1">這所有个𠊎全部看過了； 𠊎也全部聽過，全部明白。</verse>
				<verse number="2">你等知个，𠊎也知； 𠊎毋會較輸你等。</verse>
				<verse number="3">𠊎愛㧯全能者講，毋㧯你等拗； 𠊎愛㧯上帝來辯論𠊎个案情。</verse>
				<verse number="4">你等自家造花撩； 你等係無用个醫生。</verse>
				<verse number="5">若係你等願意恬恬莫講話， 你等就算做盡有智慧个人！</verse>
				<verse number="6">這下請聽𠊎个辯論， 愛注意聽𠊎个申訴。</verse>
				<verse number="7">你等做麼介為上帝講不義个話？ 你等樣般愛為佢講詭詐个話呢？</verse>
				<verse number="8">你等斷真愛看上帝个情面嗎？ 你等愛去法院為佢辯論係麼？</verse>
				<verse number="9">若係上帝調查你等，你等正經有恁好麼？ 你等恅到做得騙上帝，像騙人恁樣係麼？</verse>
				<verse number="10">你等若暗中對人偏心， 佢也一定會責備你等。</verse>
				<verse number="11">上帝个威嚴敢毋會使你等大著驚？ 佢恁得人驚敢毋會使你等愊愊掣？</verse>
				<verse number="12">你等所講个格言像塵灰恁無用； 你等辯論个理由像湳泥恁軟弱。</verse>
				<verse number="13">你等恬恬，由在𠊎講話； 後果樣般，𠊎自家承擔。</verse>
				<verse number="14">樣般好哪？𠊎甘願冒危險 ， 𠊎準備拿𠊎个生命來拚！</verse>
				<verse number="15">𠊎已經無希望，就算上帝愛㓾𠊎又樣般？ 𠊎一定愛在佢面前為自家个所行來辯論。</verse>
				<verse number="16">撿採𠊎个勇氣會救到𠊎， 因為壞人毋敢面對上帝。</verse>
				<verse number="17">這下請注意聽𠊎个話， 恬恬聽𠊎為自家辯論。</verse>
				<verse number="18">𠊎已經準備好𠊎个案件， 𠊎知會判無罪。</verse>
				<verse number="19">上帝啊，你正經愛告𠊎係麼？ 斷真恁樣，𠊎就恬恬，甘願死。</verse>
				<verse number="20">除非你同意𠊎兩項要求， 𠊎就毋對你面前囥起來：</verse>
				<verse number="21">求你莫責罰𠊎； 求你毋好嚇𠊎。</verse>
				<verse number="22">上帝啊，你告𠊎，𠊎來回答； 抑係𠊎告你，你來回答。</verse>
				<verse number="23">𠊎到底犯到麼介罪？做麼介壞事？ 求你俾𠊎知𠊎个過犯，𠊎个罪名。</verse>
				<verse number="24">你做麼介揞面毋搭𠊎？ 你做麼介看𠊎做敵人？</verse>
				<verse number="25">𠊎像被風吹个落葉，你還愛嚇𠊎係麼？ 𠊎像燥掉个禾稈碎，你還愛追𠊎係麼？</verse>
				<verse number="26">你記錄𠊎个罪狀嚴嚴指責𠊎， 愛𠊎擔當後生時所犯个過失。</verse>
				<verse number="27">你用鐵鍊鎖等𠊎个腳， 監視𠊎所行每一步路， 甚至檢查𠊎个腳跡印。</verse>
				<verse number="28">你使𠊎像糜掉个東西， 像一領被蟲咬爛个衫。</verse>
			</chapter>
			<chapter number="14">
				<verse number="1">𠊎等出世就係軟弱个， 過等短暫、苦難个生活。</verse>
				<verse number="2">𠊎等像花開恁樣、盡遽就謝掉； 又像影仔恁樣、一下仔就走掉。</verse>
				<verse number="3">上帝啊，像𠊎恁樣个人， 你還肯擘目看𠊎一下， 帶𠊎入法院受審判麼？</verse>
				<verse number="4">屙糟人敢會出淨浰个東西？ 毋會，絕對無可能！</verse>
				<verse number="5">人个壽命早就註定好勢； 佢在世个日仔係你決定。 你定个界限無人能超過。</verse>
				<verse number="6">求你莫看等佢，莫管佢 ， 俾佢像請來个工人做完佢个工。</verse>
				<verse number="7">樹仔若係被人斬下來， 樹頭還有生芽爆筍个希望。</verse>
				<verse number="8">就算根在地泥下老掉， 樹頭在泥肚燥掉，</verse>
				<verse number="9">水份充足，還係會生芽爆筍， 像新種个樹苗爆筍一樣。</verse>
				<verse number="10">總係人一死，就係佢个結局； 佢斷氣以後，愛到㖠位去呢？</verse>
				<verse number="11">就像湖無水， 河壩水燥掉，</verse>
				<verse number="12">人一死，就毋會返生； 天落下，佢也毋會䟘， 直直睡，喊也毋會醒。</verse>
				<verse number="13">願你將𠊎囥在陰間， 囥到你个怒氣消掉， 正定日期來紀念𠊎。</verse>
				<verse number="14">人若死掉，還會返生嗎？ 𠊎就愛等到釋放該日， 忍到災難个日仔過去。</verse>
				<verse number="15">到該時，你一喊，𠊎就會應你； 你會歡喜你手所創造个𠊎。</verse>
				<verse number="16">該時，你會查看𠊎个腳步， 總係你毋追究𠊎个過犯。</verse>
				<verse number="17">你會將𠊎个過失封入袋肚， 將𠊎所有个罪惡全部遮蓋。</verse>
				<verse number="18">就像山一崩掉， 巖石也徙走去，</verse>
				<verse number="19">流水磨損石頭， 大水沖走土地； 你也恁樣毀滅人个希望。</verse>
				<verse number="20">你永遠贏過人，使佢死掉， 使佢面貌改變，將佢逐走。</verse>
				<verse number="21">厥孻仔得到好名聲，佢毋知； 佢等降做卑微，佢也無感覺。</verse>
				<verse number="22">佢只知自家身項个痛苦； 佢只有為自家怨嘆悲哀！</verse>
			</chapter>
			<chapter number="15">
				<verse number="1">接等， 提幔 人 以利法 應 約伯 講：</verse>
				<verse number="2">聰明人會講空虛个話麼？ 佢敢會緊講肨風个話麼？</verse>
				<verse number="3">佢絕對毋會像你講無利益个話， 毋會講無價值个話為自家辯論。</verse>
				<verse number="4">像你恁樣，愛樣般敬畏上帝？ 人㖠有可能在佢面前祈禱？</verse>
				<verse number="5">你所講个話顯出你个邪惡； 你想用詭詐个話保護自家。</verse>
				<verse number="6">樣愛使𠊎來指出你个毋著？ 你个話已經定你自家有罪。</verse>
				<verse number="7">你恅到自家係世間第一個出世个人？ 上帝創造高山个時你已經在場係麼？</verse>
				<verse number="8">敢講你聽過上帝个計劃嗎？ 人類个智慧愛你正有係麼？</verse>
				<verse number="9">有麼介事你知，總係𠊎等毋知？ 有麼介事你明白，𠊎等毋明白？</verse>
				<verse number="10">𠊎等係㧯頭那毛白个老人家學个； 佢等比若爸還較老呢！</verse>
				<verse number="11">你樣般愛拒絕上帝个安慰呢？ 你看輕𠊎等溫和个勸話係麼？</verse>
				<verse number="12">你个心做麼介無平安？ 你个目珠做麼介發火？</verse>
				<verse number="13">你恁樣係向上帝發譴呢！ 你樣做得對佢講該種話？</verse>
				<verse number="14">世間人係麼介，敢有人正經淨浰？ 婦人家所𫱔个，敢有人可能無罪？</verse>
				<verse number="15">上帝連該兜天使也毋信任； 在佢看來，天乜無淨浰。</verse>
				<verse number="16">何況犯罪像啉水个世間人； 人樣般得人惱，樣般敗壞啊！</verse>
				<verse number="17">約伯 啊，你愛聽𠊎个勸話； 𠊎愛將𠊎个經驗㧯你講。</verse>
				<verse number="18">這兜係祖先傳下來个真理， 該兜智慧人全無保留教𠊎。</verse>
				<verse number="19">佢等个土地無被外族統治； 也無外族人㧯佢等住共下。</verse>
				<verse number="20">壞人一生个日仔受盡痛苦， 強暴人一生个年日也共樣。</verse>
				<verse number="21">得人驚个聲常常在厥耳公肚， 佢恅到安全个時，強盜就來到。</verse>
				<verse number="22">佢毋信做得對烏暗逃走， 因為有刀劍等等愛㓾佢，</verse>
				<verse number="23">鷹鳥等等愛食佢个屍體 。 佢知頭前只有烏暗个日仔；</verse>
				<verse number="24">災難、困苦像一個強大个王， 等等愛來嚇佢，愛攻打佢。</verse>
				<verse number="25">因為佢反抗上帝， 驕傲藐視全能者。</verse>
				<verse number="26">佢硬頸毋肯順服， 擎盾牌攻擊上帝。</verse>
				<verse number="27">佢个面皮油濟濟； 佢个腰圈肚弛弛。</verse>
				<verse number="28">佢像一個人搶到城市， 佔領無人住个屋仔， 後來个戰爭還係會打壞這兜城市㧯屋仔。</verse>
				<verse number="29">佢豐富个財產留毋會久， 連產業个影仔也會無掉。</verse>
				<verse number="30">佢無法度對烏暗逃走； 佢愛像樹枝被火燒掉； 它个花 被風吹毋見掉。</verse>
				<verse number="31">佢若係倚恃虛假欺騙自家， 將來虛假會成做佢个報應。</verse>
				<verse number="32">日期吂到，佢會先燥掉 ， 像樹枝燥掉，毋會青綠。</verse>
				<verse number="33">佢會像葡萄樹，葡萄吂熟就落粒， 又像橄欖樹，一開花黏時就謝掉。</verse>
				<verse number="34">無敬畏上帝个人將會無子孫； 靠歪哥來起个屋會被火燒掉。</verse>
				<verse number="35">這兜人設計謀，又做壞事； 心肝肚所預備个係詭詐。</verse>
			</chapter>
			<chapter number="16">
				<verse number="1">約伯 應講：</verse>
				<verse number="2">這種話𠊎已經聽多了； 你等个安慰反轉帶來痛苦。</verse>
				<verse number="3">這兜空話還講毋會煞係麼？ 這兜話你莫講敢做毋得麼？</verse>
				<verse number="4">若係換你等堵到𠊎所堵到个， 你等所講个該兜話𠊎乜會講。 𠊎共樣會像你等恁樣緊搖頭， 編一大堆个理論來責備你等。</verse>
				<verse number="5">𠊎會用好聽个話鼓勵你等， 也會用嘴唇皮來安慰你等。</verse>
				<verse number="6">𠊎雖然講話，痛苦毋會停； 若係恬恬，𠊎个痛苦還在。</verse>
				<verse number="7">上帝啊，你使𠊎痶到半生死； 你使𠊎家破人亡。</verse>
				<verse number="8">係你捉到𠊎； 係你攻擊𠊎。 這下𠊎只有賸到皮包骨； 別人就講這證明𠊎有罪。</verse>
				<verse number="9">上帝在發譴中擘爛𠊎； 佢咬牙切齒來攻擊𠊎； 𠊎个仇敵目瞋瞋看𠊎。</verse>
				<verse number="10">人一開嘴黏時嘲謔𠊎。 佢等打𠊎嘴角侮辱𠊎； 佢等聯合起來攻擊𠊎。</verse>
				<verse number="11">上帝將𠊎交給罪人； 將𠊎㧒落壞人手中。</verse>
				<verse number="12">𠊎本來生活安定，總係上帝攻擊𠊎； 佢揢等𠊎个頸筋，將𠊎㧹到碎碎。 佢將𠊎準箭靶，</verse>
				<verse number="13">佢个弓箭手四面包圍𠊎； 佢个箭射到𠊎个腰圈， 𠊎个肝膽流到地泥下； 該時佢還係無憐憫𠊎。</verse>
				<verse number="14">佢一擺又一擺打傷𠊎； 佢像勇士恁樣攻擊𠊎。</verse>
				<verse number="15">𠊎悲傷，袈等一領麻衫； 𠊎失志，坐在火灰當中。</verse>
				<verse number="16">𠊎噭到面紅紅； 𠊎个目珠腫腫， 目珠圈也烏烏。</verse>
				<verse number="17">總係𠊎並無犯麼介大罪； 𠊎个祈禱也係誠心實意。</verse>
				<verse number="18">地啊，毋好將𠊎个血揜等！ 莫俾𠊎喊个冤枉聲恬掉！</verse>
				<verse number="19">𠊎个證人這下在天頂； 𠊎个中保愛為𠊎講話。</verse>
				<verse number="20">𠊎該兜朋友一直恥笑𠊎； 𠊎在上帝面前目汁濫泔。</verse>
				<verse number="21">希望中保為𠊎向上帝辯護， 像人為佢个朋友辯護恁樣。</verse>
				<verse number="22">因為過幾年，𠊎就愛行該條路； 人行該條路，一定毋會倒轉來。</verse>
			</chapter>
			<chapter number="17">
				<verse number="1">𠊎會死了，會斷氣了； 墳墓已經為𠊎準備好了。</verse>
				<verse number="2">逐所在有人嘲謔𠊎； 𠊎歸日被佢等㩢耍。</verse>
				<verse number="3">上帝啊，求你來做𠊎个保證人； 你以外，無別人肯證明𠊎个話。</verse>
				<verse number="4">你使佢等个理性無掉去； 求你毋好俾佢等贏過𠊎。</verse>
				<verse number="5">古人講：為金錢出賣朋友个人， 佢个子孫會受到連累 。</verse>
				<verse number="6">這下佢等拿這句話來攻擊𠊎 ； 佢等呸口潾在𠊎个面項。</verse>
				<verse number="7">悲傷險險害𠊎變做瞙目； 𠊎个身體瘦到像一支骨。</verse>
				<verse number="8">恅到自家正直个人全部驚到； 佢等責備𠊎無敬虔。</verse>
				<verse number="9">恅到自家高尚个人越有信心； 恅到自家清白个人越有勇氣。</verse>
				<verse number="10">總係俾佢等全部來企在𠊎面前； 𠊎一定尋毋出有一個賢明个人。</verse>
				<verse number="11">𠊎个日仔過去，計劃失敗； 𠊎个希望也已經無掉去。</verse>
				<verse number="12">𠊎該兜朋友將暗晡頭看做日時頭； 佢等講光明近了，其實還係烏暗。</verse>
				<verse number="13">𠊎惟一个盼望係落陰間， 在該位个烏暗中睡長覺。</verse>
				<verse number="14">𠊎愛喊墳墓做阿爸， 喊屍蟲做阿姆、抑係姊妹。</verse>
				<verse number="15">𠊎个希望在㖠位呢？ 麼人看出𠊎有希望？</verse>
				<verse number="16">𠊎落陰間个時節， 「希望」會共下去麼？</verse>
			</chapter>
			<chapter number="18">
				<verse number="1">接等， 書亞 人 比勒達 應 約伯 講：</verse>
				<verse number="2">你少講兜話好麼？ 你安靜下來想，𠊎等正有辦法㧯你講話。</verse>
				<verse number="3">你恅到𠊎等像頭牲仔？ 𠊎等像禽獸恁戇係麼？</verse>
				<verse number="4">你个發譴傷害你自家定定； 敢講因為你發譴地會荒掉？ 上帝應當移山來滿足你嗎？</verse>
				<verse number="5">壞人个光一定會烏掉； 佢个火絕對毋會再𤏸。</verse>
				<verse number="6">佢帳篷肚个燈定著變暗； 掛在頂高个燈也會烏掉。</verse>
				<verse number="7">佢穩定个腳步開始搖搖擺擺； 佢被自家个詭計絆倒。</verse>
				<verse number="8">佢自家陷入羅網肚； 佢个腳被網仔纏等。</verse>
				<verse number="9">羅網䌈到佢个腳㬹； 機關將佢挾到𢫮𢫮。</verse>
				<verse number="10">有陷阱埋在地泥下； 佢行个路鋪等羅網。</verse>
				<verse number="11">恐怖對周圍攻擊佢， 步步迫等佢个腳㬹。</verse>
				<verse number="12">佢以前好額，這下強強會餓到； 災禍一直在佢个身邊等等佢。</verse>
				<verse number="13">致命个病痛纏身； 佢个手腳糜糜酪酪。</verse>
				<verse number="14">佢對安居个帳篷肚被人拖出來， 然後被人帶到陰間个王該位去。</verse>
				<verse number="15">佢个帳篷用硫磺 消毒， 然後就交給別人去住。</verse>
				<verse number="16">佢下背个樹根枯燥； 佢頂高个枝葉燥掉。</verse>
				<verse number="17">地上無人會記得佢； 同胞毋記得佢个名。</verse>
				<verse number="18">佢愛對世間被逐出去， 對光明中被逐入烏暗。</verse>
				<verse number="19">佢在本族中無子無孫； 佢住个所在無留半儕。</verse>
				<verse number="20">西方个人聽到佢个命運感覺著驚； 東方个人知佢所堵到个就嚇倒。</verse>
				<verse number="21">這就係壞人个結局； 毋敬畏上帝个人最尾就係恁樣。</verse>
			</chapter>
			<chapter number="19">
				<verse number="1">約伯 應講：</verse>
				<verse number="2">你等愛害𠊎悲傷到幾時？ 用話語來蹧踏𠊎到幾久？</verse>
				<verse number="3">你等一擺又一擺侮辱𠊎； 恁樣欺負𠊎乜毋會見笑。</verse>
				<verse number="4">就算𠊎正經有毋著， 𠊎个毋著自家承擔。</verse>
				<verse number="5">你等恅到自家比𠊎較良善， 將𠊎个痛苦準做𠊎犯罪个證據。</verse>
				<verse number="6">愛知係上帝使𠊎受苦 ； 係佢鋪羅網來包圍𠊎。</verse>
				<verse number="7">𠊎喊冤枉，無人應𠊎； 𠊎求公正，無人插𠊎。</verse>
				<verse number="8">上帝攔等𠊎，毋俾𠊎過； 佢使烏暗遮等𠊎个路。</verse>
				<verse number="9">佢搶𠊎个尊榮， 破壞𠊎个名聲。</verse>
				<verse number="10">佢對四面八方攻擊𠊎， 將𠊎个希望連根挷掉。</verse>
				<verse number="11">上帝向𠊎發譴， 將𠊎準做仇敵。</verse>
				<verse number="12">佢派軍隊歸陣來攻擊𠊎， 在𠊎帳篷堘安營圍困𠊎。</verse>
				<verse number="13">上帝使𠊎該兜兄弟離開𠊎； 𠊎熟事个人看𠊎做過路客。</verse>
				<verse number="14">𠊎个親人全部㧯𠊎無來往， 𠊎个朋友攏總毋記得𠊎了。</verse>
				<verse number="15">住過𠊎屋下个人客看𠊎做外人； 連該兜使女也將𠊎看做生份人。</verse>
				<verse number="16">𠊎喊僕人，佢毋應𠊎； 求佢幫助，也毋搭𠊎。</verse>
				<verse number="17">𠊎透氣當臭，吾𡜵娘鼻到驚； 𠊎个兄弟也毋願意行兼𠊎。</verse>
				<verse number="18">連細人仔也全部看輕𠊎； 𠊎一䟘起來，佢等就笑𠊎。</verse>
				<verse number="19">𠊎最相好个朋友惱𠊎； 最惜个人也對𠊎變面。</verse>
				<verse number="20">𠊎歸身皮包骨， 賸一口氣定定。</verse>
				<verse number="21">𠊎个朋友啊，可憐𠊎！可憐𠊎！ 因為上帝个手已經打橫𠊎。</verse>
				<verse number="22">做麼介你等愛像上帝恁樣刑罰𠊎？ 你等加給𠊎个痛苦還毋罅重係麼？</verse>
				<verse number="23">𠊎十分希望有人記錄𠊎講過个話， 將𠊎个話全部寫做書！</verse>
				<verse number="24">抑係用鐵雕刻，用鉛鑄字， 鑲在磐石頂，保存到永遠。</verse>
				<verse number="25">總係，𠊎知𠊎个救贖主 還在； 最後，佢會來為𠊎伸冤。</verse>
				<verse number="26">就算𠊎个皮肉被病痛敗壞， 斷氣以前 ，𠊎還係會看到上帝。</verse>
				<verse number="27">𠊎會親目看到佢， 佢對𠊎並無生份。 𠊎个心肝渴慕到昏掉！</verse>
				<verse number="28">你等樣講：「𠊎等愛樣般來蹧踏佢？ 佢堵到災禍原因還係在佢自家。」</verse>
				<verse number="29">𠊎警告你等：愛驚刀劍； 這刀劍帶來上帝對罪个大發譴。 你等愛知有一位審判个上帝 。</verse>
			</chapter>
			<chapter number="20">
				<verse number="1">接等， 拿瑪 人 瑣法 應 約伯 講：</verse>
				<verse number="2">你使𠊎心肝煩躁， 𠊎忍毋住了，一定愛應你。</verse>
				<verse number="3">你責備𠊎个話實在當侮辱人， 總係𠊎有靈性知樣般來應你。</verse>
				<verse number="4">你敢毋知，自古以來， 有人類在地上開始，</verse>
				<verse number="5">壞人个歡喜全部係暫時个， 無虔誠个人快樂也擋毋久。</verse>
				<verse number="6">就算佢自高，高到會堵天， 佢个頭那擎到會揬到雲，</verse>
				<verse number="7">佢到尾會像糞土恁樣被人掃掉； 識佢个人全部會問，佢走㖠去了。</verse>
				<verse number="8">佢像夢恁樣消失，永遠毋會再看到； 佢像暗晡頭个異象，一下仔就無掉。</verse>
				<verse number="9">看過佢个人毋會再看到佢； 佢愛對佢所住个所在消失。</verse>
				<verse number="10">佢个子女苦到愛去向窮苦人求情； 佢愛親手將剝削得來个財物還人。</verse>
				<verse number="11">佢雖然還當後生紮磳， 總係無幾久會成做泥。</verse>
				<verse number="12">佢恅到邪惡盡甘甜， 將它囥在舌乸底下，</verse>
				<verse number="13">啣在嘴孔肚， 嘗它个味道；</verse>
				<verse number="14">總係食物在肚笥變酸， 變到像毒蛇个汁恁毒。</verse>
				<verse number="15">壞人吞食个財富還會嘔出來； 上帝愛對佢肚笥底背撈出來。</verse>
				<verse number="16">壞人啜毒蛇个毒汁； 毒蛇个舌乸毒死佢。</verse>
				<verse number="17">佢無命好看到橄欖油像河壩水流等下， 也看毋到乳㧯蜂糖像溪水流出來。</verse>
				<verse number="18">佢愛放掉勞苦得來、吂欣賞个一切； 佢無機會好享受佢所得到个財富，</verse>
				<verse number="19">因為佢壓迫、拒絕窮苦人， 又霸佔別人所起个屋舍。</verse>
				<verse number="20">因為佢盡貪心，永遠毋知好滿足， 佢合意个東西連一項也無法保留。</verse>
				<verse number="21">佢食淨淨，麼介都無留下， 所以佢个幸福毋會長久。</verse>
				<verse number="22">在佢最滿足成就个時， 一切个災禍會接等來。</verse>
				<verse number="23">由在佢盡食个時節， 上帝愛向佢大發譴， 像風差恁樣攻擊佢。</verse>
				<verse number="24">佢愛閃開鐵劍个時， 卻被銅箭將佢射穿。</verse>
				<verse number="25">佢將箭對背後一抽， 皓光箭頭對膽中出； 佢就驚到面色癧青。</verse>
				<verse number="26">佢个財寶全部消滅淨淨； 並毋係人个手所點个火， 將佢全家㧯財產燒光光。</verse>
				<verse number="27">天愛顯明佢个罪； 地愛做證攻擊佢。</verse>
				<verse number="28">上帝大發譴个時節， 佢个家業會損淨淨。</verse>
				<verse number="29">這係壞人對上帝所得个結局， 就係上帝為佢所決定个報應。</verse>
			</chapter>
			<chapter number="21">
				<verse number="1">約伯 應講：</verse>
				<verse number="2">請你等認真聽𠊎个話； 這係你等做得給𠊎惟一个安慰。</verse>
				<verse number="3">拜託，請給𠊎一個講話个機會， 𠊎講煞，你等正來恥笑𠊎還毋會慢。</verse>
				<verse number="4">𠊎所拗个並毋係對人； 所以𠊎正會恁著急啊！</verse>
				<verse number="5">看等𠊎，你等敢毋會發癡驚？ 你等敢毋係嚇到無話講！</verse>
				<verse number="6">想到𠊎所堵到个一切， 𠊎就驚到歸身愊愊掣。</verse>
				<verse number="7">壞人做麼介繼續生下去？ 做麼介享長壽、興旺、發達？</verse>
				<verse number="8">佢等毋單淨子孫滿堂， 還親目看等後代長大。</verse>
				<verse number="9">佢等个屋下平安，毋使驚麼介； 上帝責罰个棍仔無臨到佢等。</verse>
				<verse number="10">佢等个牛牯傳種一定成功； 佢等个牛乸𫱔子毋會落胎。</verse>
				<verse number="11">佢等个子女出去聊，自由自在像羊群； 佢該兜細人仔歡喜到緊走、緊跳。</verse>
				<verse number="12">佢等和等鈴鼓㧯琴來唱歌； 佢等跈等歕笛个聲來歡呼。</verse>
				<verse number="13">佢等一生人豐豐富富， 平平安安入到墳墓 去。</verse>
				<verse number="14">壞人對上帝講：「遠遠離開𠊎等！ 𠊎等一生人無愛尋你个旨意。</verse>
				<verse number="15">全能者係麼人，有麼介好敬拜？ 𠊎等向佢祈禱又有麼介好處？」</verse>
				<verse number="16">壞人看自家个成功係打拚來个； 總係這種想法𠊎絕對毋會贊成。</verse>
				<verse number="17">敢講壞人个燈識烏掉嗎？ 敢講災難識臨到佢等嗎？ 上帝識發譴責罰壞人嗎？</verse>
				<verse number="18">佢敢識將佢等吹散，像大風吹散禾稈？ 佢敢識將佢等捲走，像狂風捲走礱糠？</verse>
				<verse number="19">你等講，因為壞人積惡，上帝定著會責罰佢等个子女； 𠊎認為，上帝愛責罰罪人本身， 俾佢等承擔自家个罪過正著。</verse>
				<verse number="20">罪人應該承受自家愛受个責罰； 俾佢等親身體驗全能者个發譴。</verse>
				<verse number="21">人在世間个年日會結束个時， 還能照顧自家子女个幸福嗎？</verse>
				<verse number="22">連坐大位个人也會被上帝審判， 人个智識樣有可能來教上帝呢？</verse>
				<verse number="23">有兜人一生人勇健， 到死享受平安幸福。</verse>
				<verse number="24">佢等个肚笥膕膕； 骨髓也得到滋潤。</verse>
				<verse number="25">有兜人到死心肝痛苦， 一生人毋識享受快樂。</verse>
				<verse number="26">總係這兩種人共樣會死，愛埋， 身屍共樣會在泥塥肚被蟲食。</verse>
				<verse number="27">𠊎知你等心肚所想个， 知你等陷害𠊎个陰謀。</verse>
				<verse number="28">你等問：「該隻霸王住在㖠位？ 該隻壞東西个屋下在㖠位？」</verse>
				<verse number="29">你等敢毋識問過路人？ 你等敢毋知佢等帶轉來个報告？</verse>
				<verse number="30">在上帝發譴責罰人个日仔， 壞人常常閃走、顛倒無事情。</verse>
				<verse number="31">敢有麼人當面責備壞人？ 抑係照佢所做个報復佢？</verse>
				<verse number="32">就係佢被人扛到墓地， 葬在有人掌个墳墓時，</verse>
				<verse number="33">有一大陣个人去送葬， 連墓地个泥也盡燥爽。</verse>
				<verse number="34">你等樣還講空話來安慰𠊎！ 你等講个話逐句都係憨蚩！</verse>
			</chapter>
			<chapter number="22">
				<verse number="1">接等， 提幔 人 以利法 應 約伯 講：</verse>
				<verse number="2">人對上帝敢有麼介路用呢？ 最聰明个對上帝有好處麼？</verse>
				<verse number="3">你正直个行為會俾全能者歡喜麼？ 你个良善敢會俾上帝得到利益嗎？</verse>
				<verse number="4">上帝敢會因為你敬畏佢 來責罰你、審判你嗎？</verse>
				<verse number="5">毋會！佢責罰你係因為你个罪盡重， 你个罪惡多端。</verse>
				<verse number="6">你為到愛向兄弟討債， 迫佢將衫褲脫到光光。</verse>
				<verse number="7">嘴燥个人你毋給佢水啉； 肚笥枵个人你毋給佢食。</verse>
				<verse number="8">你利用你个勢力㧯地位 佔領所有个土地。</verse>
				<verse number="9">你喊寡婦空手轉去； 你打斷孤兒个手骨。</verse>
				<verse number="10">因為恁樣，這下你周圍有陷阱； 得人驚个事會忽然間包圍你。</verse>
				<verse number="11">烏暗遮等你，使你看毋到； 大水會浸掉你！</verse>
				<verse number="12">上帝敢毋係在高天个頂高？ 佢低頭下來看最高个星仔。</verse>
				<verse number="13">總係你大膽問：「上帝知麼介呢？ 佢敢會穿過雲層來審判𠊎等？」</verse>
				<verse number="14">你恅到有烏雲遮等佢，使佢看毋到； 你認為佢在穹蒼頂高行來行去定定。</verse>
				<verse number="15">壞人行過个老路， 你愛跈等行係麼？</verse>
				<verse number="16">佢等个死期還吂到， 就被大水連根打走。</verse>
				<verse number="17">佢等對上帝講：「你閃開！ 全能者能拿𠊎等樣般？」</verse>
				<verse number="18">總係，使佢等興旺个係上帝； 壞人个想法，𠊎無法度贊成。</verse>
				<verse number="19">義人看到佢等个結局就歡喜； 無辜个人一看到就恥笑佢等。</verse>
				<verse number="20">壞人个財產全部消滅掉去， 賸到个一切也被火燒淨淨。</verse>
				<verse number="21">所以， 約伯 啊，你愛順從上帝，㧯佢和好， 恁樣，佢就會賜福給你。</verse>
				<verse number="22">你愛接受佢个教訓， 將佢个話記在心肚。</verse>
				<verse number="23">你若係轉到全能者該位， 除掉你屋下所有不義个行為， 上帝就會使你興旺。</verse>
				<verse number="24">愛將你个黃金豁在湳泥肚， 將精金㧒到燥掉个河壩底。</verse>
				<verse number="25">全能者就會做你貴重个黃金， 也會像白銀高高為你囤起來。</verse>
				<verse number="26">恁樣，你就會仰望全能者， 同時會對上帝得到喜樂。</verse>
				<verse number="27">你向佢祈禱，佢會聽你个祈求； 你也愛還你所許个願。</verse>
				<verse number="28">你所做个工作全部會成功； 你所行个路一定光明燦爛。</verse>
				<verse number="29">上帝打橫驕傲个人， 佢愛拯救謙卑个人。</verse>
				<verse number="30">你無罪 ，佢就救你； 你做人正直，就會得到拯救。</verse>
			</chapter>
			<chapter number="23">
				<verse number="1">約伯 應講：</verse>
				<verse number="2">今晡日𠊎還係當毋甘願，怪怨上帝； 佢个責罰實在忒重，害𠊎噌到會死。</verse>
				<verse number="3">𠊎當希望知愛去㖠位尋佢， 知愛樣般到佢所住个地方。</verse>
				<verse number="4">𠊎愛向佢申訴案情， 為𠊎自家辯解。</verse>
				<verse number="5">𠊎愛看佢樣般回答𠊎； 𠊎愛聽佢㧯𠊎講麼介。</verse>
				<verse number="6">上帝會用佢个大權能壓𠊎麼？ 絕對毋會！佢一定會聽𠊎辯解。</verse>
				<verse number="7">𠊎做人正直，佢會俾𠊎㧯佢理論； 到尾佢會做裁決，佢會判𠊎無罪 。</verse>
				<verse number="8">總係，𠊎向東尋，上帝無在該位； 𠊎向西尋，也尋毋到佢。</verse>
				<verse number="9">上帝在南片工作，𠊎看毋到佢； 佢在北片做事，𠊎也見毋到佢。</verse>
				<verse number="10">雖然恁樣，佢清楚知𠊎所行个逐步路； 佢考驗𠊎以後，就會知𠊎像黃金恁純。</verse>
				<verse number="11">𠊎緊跈等佢个腳步； 𠊎遵守佢个道路，毋敢偏離。</verse>
				<verse number="12">𠊎時時刻刻遵守佢个命令； 𠊎遵守佢个旨意，無從自家个慾望。</verse>
				<verse number="13">佢永遠無變，無人能抵抗佢； 佢心所願个，就行出來。</verse>
				<verse number="14">佢愛完成對𠊎所計劃个； 佢還有盡多恁樣个計劃。</verse>
				<verse number="15">𠊎在佢面前驚到愊愊掣， 𠊎一想到佢就驚到會死。</verse>
				<verse number="16">上帝使𠊎个膽嚇到爛掉； 全能者使𠊎驚到愊愊掣。</verse>
				<verse number="17">就算烏暗俾𠊎个目珠看毋到， 使𠊎著驚个毋係烏暗，係上帝。</verse>
			</chapter>
			<chapter number="24">
				<verse number="1">全能者做麼介毋將審判个日期定下來？ 做麼介毋俾認識佢个人看到正義臨到？</verse>
				<verse number="2">有兜人徙地界來侵佔土地， 有兜人搶別人个羊群來畜。</verse>
				<verse number="3">有兜人搶走孤兒个驢仔， 強拉寡婦个牛仔做抵押。</verse>
				<verse number="4">佢等強迫貧窮人離開大路， 該位个窮苦人嚇到走去囥。</verse>
				<verse number="5">窮苦人像野驢恁樣，需要去曠野尋食物； 無其他地方好尋食物來畜佢等个子女。</verse>
				<verse number="6">佢等無奈何在別人个田地收割 ， 在邪惡人个葡萄園摘葡萄來食。</verse>
				<verse number="7">佢等打赤膊睡，因為無衫好著； 寒天个暗晡時，也無被骨好蓋。</verse>
				<verse number="8">佢等在山頂被落大水涿到澇澇， 無麼介所在好閃，就尖在巖石下。</verse>
				<verse number="9">壞人將寡婦揇等个細子搶走， 愛將窮苦人个子女捉去堵債。</verse>
				<verse number="10">窮人到處流浪，無衫好著； 餓肚笥，還愛㧯人揹榖包。</verse>
				<verse number="11">佢等在壞人个圍牆內榨橄欖油； 緊踏葡萄來做酒，還係無法止渴。</verse>
				<verse number="12">城肚當多會死个人緊噌， 有重傷个人喊救命， 總係上帝毋搭該兜人个祈禱。</verse>
				<verse number="13">有兜人毋接受光； 毋認識光明个道， 也毋行光明个路。</verse>
				<verse number="14">天吂光㓾人个就䟘床； 佢等出去殺害窮苦人， 暗晡頭又出去做賊仔。</verse>
				<verse number="15">淫亂个人等到斷烏， 又將自家个面遮等， 講：「莫俾人看到正好！」</verse>
				<verse number="16">暗晡頭賊仔入人屋下， 佢等日時頭就囥起來， 因為佢等當驚看到光。</verse>
				<verse number="17">暗晡時像係佢等个朝晨， 當慣勢得人驚个暗晡頭。 ( 瑣法 開嘴講：)</verse>
				<verse number="18">壞人一下仔就被大水打走。 佢等个土地受到上帝咒詛； 所以無人轉葡萄園去工作。</verse>
				<verse number="19">就像天旱㧯熱天會將冰雪溶掉， 陰間也共樣會將犯罪个人吞掉。</verse>
				<verse number="20">連𫱔佢等个阿姆也毋記得佢等； 佢等會被蟲仔食掉，無人記得佢等； 壞人會像樹仔斬斷掉。</verse>
				<verse number="21">這係因為佢等壞款待寡婦， 對毋會𫱔个婦女全無愛心。</verse>
				<verse number="22">上帝用佢个大能消滅強暴个人； 佢一行動，壞人个性命就無掉去。</verse>
				<verse number="23">上帝暫時俾佢等平安，無愁煩， 總係佢个目珠看佢等个所行所做。</verse>
				<verse number="24">該兜壞人雖然一時當興旺， 總係一下仔就像草木燥掉， 又像禾仔早慢愛被人割掉。</verse>
				<verse number="25">麼人能證明這毋係事實？ 麼人敢講𠊎个話無根據？</verse>
			</chapter>
			<chapter number="25">
				<verse number="1">接等， 書亞 人 比勒達 應講：</verse>
				<verse number="2">上帝掌大權，萬民愛敬畏佢； 佢在天頂建立和平个秩序。</verse>
				<verse number="3">麼人算得出佢个天軍有幾多？ 有麼介所在佢个光照毋到呢？</verse>
				<verse number="4">在上帝面前麼人係正直个呢？ 對婦女𫱔个人㖠有淨浰个呢？</verse>
				<verse number="5">在上帝看來，就算月光也無光， 星仔也無明；</verse>
				<verse number="6">何況世間人像蟲仔， 在上帝看來算麼介呢？</verse>
			</chapter>
			<chapter number="26">
				<verse number="1">約伯 應講：</verse>
				<verse number="2">你對𠊎這無能个人幫助還多噢！ 𠊎這手骨無力个人，你還肯拯救！</verse>
				<verse number="3">像𠊎恁無智慧个人， 你還給𠊎恁寶貴个指教！</verse>
				<verse number="4">總係你想，有麼人會聽你个話？ 到底麼人感動你講恁樣个話？ ( 比勒達 講：)</verse>
				<verse number="5">在地底下个深水中， 死人个陰魂愊愊掣。</verse>
				<verse number="6">陰間在上帝面前顯明； 地獄也無辦法遮得住。</verse>
				<verse number="7">上帝鋪設北極个天空， 將地球掛在太空當中。</verse>
				<verse number="8">上帝囤水在烏雲當中， 雲無因為水重就裂掉。</verse>
				<verse number="9">佢將雲鋪設在月光 个面頂， 用雲將歸隻月光遮到密密。</verse>
				<verse number="10">佢在海面畫地平線， 成做光㧯暗个界限。</verse>
				<verse number="11">佢一指責天个柱仔， 它兜就驚到緊顫。</verse>
				<verse number="12">佢用大能使大海平靜下來， 佢用聰明打碎海怪 拉哈伯 。</verse>
				<verse number="13">佢歕一口氣，雲就開、天就清； 佢个手㓾掉走當遽个海蛇。</verse>
				<verse number="14">看哪，這兜係上帝工作个一部份， 𠊎等只有聽到佢當細个聲定定。 佢大能个雷聲麼人能明白呢？</verse>
			</chapter>
			<chapter number="27">
				<verse number="1">約伯 接等又講：</verse>
				<verse number="2">上帝無用公當對待𠊎； 全能者使𠊎心中艱苦。 𠊎指等永生个上帝發誓：</verse>
				<verse number="3">當𠊎个命還在， 上帝給𠊎還有一口氣，</verse>
				<verse number="4">𠊎个嘴唇絕對毋講白賊， 𠊎个舌乸絕對毋講花撩。</verse>
				<verse number="5">𠊎絕對毋承認你等有理； 𠊎到死乜愛堅持𠊎無罪。</verse>
				<verse number="6">𠊎確信自家無毋著，毋會放掉這立場； 𠊎還在世間个日仔，𠊎堅持良心清白。</verse>
				<verse number="7">願𠊎个敵人堵到壞人應該受个報應； 願攻擊𠊎个像不義个人恁樣受刑罰。</verse>
				<verse number="8">毋敬畏上帝个人有麼介好希望呢？ 上帝愛收佢个命，佢還有麼介盼望？</verse>
				<verse number="9">災難臨到佢身上个時， 上帝敢愛聽佢个求喊？</verse>
				<verse number="10">佢敢會因為全能者來喜樂？ 佢敢會常常向上帝來祈禱？</verse>
				<verse number="11">𠊎愛指教你等上帝个權能有幾大； 𠊎也愛㧯你等說明全能者个旨意。</verse>
				<verse number="12">你等逐儕敢毋係全部看過嗎！ 做麼介緊講無搭無碓个話呢？ ( 瑣法 講：)</verse>
				<verse number="13">上帝給壞人所定个命運， 全能者愛刑罰殘暴个人， 就係恁樣：</verse>
				<verse number="14">佢就算有盡多孻仔，逐個也會被人㓾死； 佢个子孫也會食毋飽。</verse>
				<verse number="15">該兜賸到个人會發瘟死掉； 佢等个寡婦也毋會為佢等噭。</verse>
				<verse number="16">壞人雖然銀仔多到算毋出， 又還有著毋掉恁多个衫褲，</verse>
				<verse number="17">總係義人愛來著佢个衫褲， 無罪个人愛來分佢个銀仔。</verse>
				<verse number="18">壞人个屋像鳥藪 無堅固， 也像奴才守望用个茅寮。</verse>
				<verse number="19">總有一日，去睡个時還當發， 睡醒个時，佢个財富就無了。</verse>
				<verse number="20">得人驚个事像大水逐到佢， 大風差在暗晡頭將佢吹走。</verse>
				<verse number="21">東風一吹， 將佢對屋下吹走。</verse>
				<verse number="22">狂風愛攻擊佢，全無留情； 佢拚命走，想愛走出風差个範圍。</verse>
				<verse number="23">人 愛拍手來嘲謔佢， 出聲逐佢離開本地。</verse>
			</chapter>
			<chapter number="28">
				<verse number="1">銀有生產个礦場； 金有提煉个所在。</verse>
				<verse number="2">人對地泥下挖出鐵， 也對石頭肚提煉銅。</verse>
				<verse number="3">人走到最暗个所在去採礦， 佢到地層盡深个所在去尋， 愛對烏暗中將礦石挖出來。</verse>
				<verse number="4">佢就在無人住个地方開礦； 在罕得有人到个所在工作， 在礦坑底背吊等搖來搖去。</verse>
				<verse number="5">地面出產糧食， 地底下卻熱到像火爐。</verse>
				<verse number="6">石頭肚囥等藍寶石， 地泥下有金沙。</verse>
				<verse number="7">鷹鳥毋知入礦場个路； 鷂婆个目珠也無看過。</verse>
				<verse number="8">兇惡个野獸毋識踏過， 兇猛个獅仔也毋識經過。</verse>
				<verse number="9">人鑿開盡硬个石頭， 將歸隻山揙轉來。</verse>
				<verse number="10">佢在巖石當中挖山窿， 發現窿肚逐樣个寶石。</verse>
				<verse number="11">佢將水源頭堵等， 使寶藏顯露出來。</verse>
				<verse number="12">總係，愛去㖠位尋智慧呢？ 去㖠位正學得到聰明呢？</verse>
				<verse number="13">智慧个價值無人知， 在世間無人尋得到。</verse>
				<verse number="14">深淵講：智慧無在𠊎這位； 大海講：智慧無㧯𠊎共下。</verse>
				<verse number="15">金仔買毋到智慧； 較多个銀仔也換毋到。</verse>
				<verse number="16">純金㧯貴重个珠寶， 共樣也㧯它比毋得。</verse>
				<verse number="17">黃金㧯寶玉無辦法㧯它比； 純金个器皿也換毋到。</verse>
				<verse number="18">智慧个價值贏過珊瑚㧯水晶； 有智慧遠遠超過得到紅寶石。</verse>
				<verse number="19">古實 个黃玉㧯它个價值比毋得； 最純个金仔也無法度㧯它比價。</verse>
				<verse number="20">恁樣，智慧个源頭在㖠位？ 去㖠位正學得到聰明呢？</verse>
				<verse number="21">動物个目珠看毋到它； 空中个飛鳥也看毋到。</verse>
				<verse number="22">就算毀滅㧯死亡也承認， 只有聽過它个風聲定定。</verse>
				<verse number="23">單單上帝知該條路， 知愛去㖠位尋智慧；</verse>
				<verse number="24">因為佢个目珠看得到地極， 佢查看普天下个萬事萬物。</verse>
				<verse number="25">上帝賜威力給風， 為大海決定水量，</verse>
				<verse number="26">規定落雨个時節， 定響雷公个路線，</verse>
				<verse number="27">該時佢看到智慧，測量它， 堅定它，又鑒察它个價值。</verse>
				<verse number="28">上帝向世間人講： 「敬畏上主就係智慧； 離開邪惡就係聰明。」</verse>
			</chapter>
			<chapter number="29">
				<verse number="1">約伯 接等又講：</verse>
				<verse number="2">𠊎樣般希望年月會像頭擺恁樣， 像過去上帝保守𠊎个年日共樣。</verse>
				<verse number="3">該樣時，佢个燈照在𠊎个頭那頂； 佢个光帶𠊎行過烏暗。</verse>
				<verse number="4">該樣時，𠊎還後生，當強壯； 上帝个慈愛庇蔭吾屋下。</verse>
				<verse number="5">全能者㧯𠊎共下； 𠊎个子女全部圍等𠊎。</verse>
				<verse number="6">𠊎所到个地方有食毋掉个乳， 連巖石也湧出橄欖油像河壩水恁多。</verse>
				<verse number="7">𠊎出去到城門集會个所在， 人就在廣場為𠊎預備座位。</verse>
				<verse number="8">後生人看到𠊎就讓𠊎先行； 老人家看到𠊎全部企起來；</verse>
				<verse number="9">領袖講等話也停下來， 又用手揞等自家个嘴。</verse>
				<verse number="10">連貴族也毋敢講話， 全部恬恬無出聲。</verse>
				<verse number="11">聽到𠊎个人攏總祝福𠊎， 看到𠊎个人全部稱讚𠊎。</verse>
				<verse number="12">窮苦人愛𠊎𢯭手，𠊎就幫助； 孤兒來求𠊎救濟，𠊎無拒絕。</verse>
				<verse number="13">會滅亡个人為𠊎來祝福； 𠊎使寡婦个心歡喜唱歌。</verse>
				<verse number="14">𠊎將正義準做衫褲來著； 公平係𠊎个外衫㧯帽仔。</verse>
				<verse number="15">𠊎做瞙目人个目珠； 𠊎做跛腳人个腳骨。</verse>
				<verse number="16">𠊎做窮人个阿爸； 𠊎為生份人伸冤。</verse>
				<verse number="17">𠊎毀壞強暴个勢力， 救被佢等欺負个人。</verse>
				<verse number="18">𠊎想𠊎會好死在屋下； 𠊎个歲數會像泥沙恁多。</verse>
				<verse number="19">𠊎像樹根伸到水邊， 暗晡時有露水滋潤𠊎个枝葉。</verse>
				<verse number="20">儕儕都一直稱讚𠊎， 𠊎个元氣毋識衰退。</verse>
				<verse number="21">人人等候聽𠊎个話， 恬恬領受𠊎个教導。</verse>
				<verse number="22">𠊎講煞，大家就無話好補充； 𠊎个話像雨水落在佢等身項。</verse>
				<verse number="23">佢等還盡想愛聽𠊎教導， 嘴勺勺像農民盼望春雨。</verse>
				<verse number="24">佢等失志个時，𠊎安慰佢等； 𠊎用滿面个笑容鼓勵佢等。</verse>
				<verse number="25">𠊎做佢等个領袖，決定愛行个路； 𠊎帶領佢等，像係君王帶領軍隊， 在佢等失望个時，𠊎就安慰佢等。</verse>
			</chapter>
			<chapter number="30">
				<verse number="1">總係這下，比𠊎較後生个人卻嘲謔𠊎； 佢等个阿爸本來係𠊎盡看毋上眼个人， 連俾佢等㧯狗仔共下去掌羊，𠊎都無愛。</verse>
				<verse number="2">佢等盡衰弱，雙手無力； 佢等對𠊎無麼介用。</verse>
				<verse number="3">佢等因為貧窮飢餓，身體瘦弱， 暗晡頭在偏僻个地方挖草根充飢。</verse>
				<verse number="4">佢等在草藪中尋鹹草葉， 連苦澀个羅騰樹根也拿來做食物。</verse>
				<verse number="5">佢等被人趕出； 人喊佢等像捉賊仔恁樣。</verse>
				<verse number="6">高不將，佢等走到山壢肚， 住在石窿㧯地窿个底背。</verse>
				<verse number="7">佢等在荒埔像野獸噦噦嘶嘶， 在竻藪个下背尖做一堆。</verse>
				<verse number="8">佢等係下賤个廢物， 被人鞭打，逐出境外。</verse>
				<verse number="9">這下，這兜人唱歌來嘲謔𠊎； 𠊎變做佢等个笑談。</verse>
				<verse number="10">佢等惱𠊎，閃到遠遠； 看到𠊎就呸𠊎口潾。</verse>
				<verse number="11">上帝使𠊎衰弱無力， 佢等就放勢侮辱𠊎。</verse>
				<verse number="12">這群下流个人走到右片攻擊𠊎； 佢等使𠊎逃走； 佢等準備對𠊎做最後个攻擊。</verse>
				<verse number="13">佢等切斷𠊎个退路， 想盡辦法愛消滅𠊎； 無一個人阻擋 佢等。</verse>
				<verse number="14">佢等攻破𠊎个防備， 重重磧在𠊎个身上。</verse>
				<verse number="15">恐怖像城牆揜到𠊎， 𠊎个榮光隨風飛走， 富貴像雲恁樣消散。</verse>
				<verse number="16">這下𠊎差毋多會無命； 痛苦个日仔將𠊎捉住。</verse>
				<verse number="17">暗晡頭𠊎全身骨頭痠痛， 大痛苦咬等𠊎一直無停。</verse>
				<verse number="18">上帝用大力將𠊎个衫領仔拉到𢫮𢫮， 又扭等𠊎个衫。</verse>
				<verse number="19">佢將𠊎㧒在泥漿底背； 𠊎像泥粉㧯火灰一樣。</verse>
				<verse number="20">上帝啊，𠊎求你，你毋應； 𠊎向你祈禱，你毋插𠊎。</verse>
				<verse number="21">你對𠊎變心，對𠊎恁殘忍； 你用大能个手來壓迫𠊎。</verse>
				<verse number="22">你用風差將𠊎打來打去， 俾𠊎在暴風中㧹來㧹去。</verse>
				<verse number="23">𠊎知你想愛俾𠊎下去陰間， 𢱋𠊎到人死掉愛去个所在。</verse>
				<verse number="24">你做麼介攻擊一個衰敗个人呢？ 堵到災難，佢只有向你求憐憫。</verse>
				<verse number="25">敢講𠊎無㧯堵到災難个人共下噭？ 敢講𠊎毋識為到窮苦个人憂愁過？</verse>
				<verse number="26">𠊎盼望蒙福反轉受到災禍； 𠊎期待光明反轉堵到烏暗。</verse>
				<verse number="27">𠊎因為困苦愁煩心肝當痛； 災難一日過一日毋識停過。</verse>
				<verse number="28">𠊎在烏暗中來行，看毋到光明； 𠊎企在會眾面前迫切求幫助。</verse>
				<verse number="29">𠊎个聲音像野狗吠； 也像鴕鳥噭个聲音。</verse>
				<verse number="30">𠊎个皮膚變烏烏、𢫫掉； 𠊎發燒到骨頭像𤏸火。</verse>
				<verse number="31">𠊎彈琴也無喜樂， 歕簫仔乜出噭聲。</verse>
			</chapter>
			<chapter number="31">
				<verse number="1">𠊎識㧯𠊎个目珠立約， 看細妹仔絕對做毋得帶邪念。</verse>
				<verse number="2">至上个上帝為𠊎等所定个報應係麼介？ 至高个全能者係樣般報答人个行為呢？</verse>
				<verse number="3">佢敢毋係愛降災難給不義个人？ 敢毋係愛使災禍臨到作惡个人？</verse>
				<verse number="4">佢敢毋係查看𠊎所行个道路？ 佢敢毋係點算𠊎一切个腳步？</verse>
				<verse number="5">𠊎敢發誓，𠊎從來毋識作惡； 𠊎也毋識欺詐別人。</verse>
				<verse number="6">願上帝用公當个天平來秤𠊎； 佢就會知𠊎正經無犯麼介罪。</verse>
				<verse number="7">若係𠊎个腳偏離正路， 心被所看个惡吸引去， 手又被罪惡來打垃圾，</verse>
				<verse number="8">就俾別人收割𠊎个出產， 俾別人享受𠊎種个產物。</verse>
				<verse number="9">若係𠊎對鄰舍个𡜵娘有邪念， 埋伏在佢个門口等機會，</verse>
				<verse number="10">就俾吾𡜵娘去㧯別人煮飯， 就俾別个男人㧯姖共下睡。</verse>
				<verse number="11">這係嚴重个罪； 應當愛判死刑。</verse>
				<verse number="12">這個罪會像毀滅个大火， 將𠊎所有个產物燒淨淨。</verse>
				<verse number="13">𠊎个僕人對𠊎表示不滿个時， 𠊎就詳細聽，用公道對待佢等。</verse>
				<verse number="14">若毋係恁樣，𠊎樣能面對上帝呢？ 上帝審問𠊎个時，𠊎愛講麼介呢？</verse>
				<verse number="15">創造𠊎个上帝敢毋係也創造佢等？ 創造𠊎等个敢毋係共一個上帝呢？</verse>
				<verse number="16">𠊎敢識毋肯救濟窮苦人麼？ 𠊎敢識俾寡婦失望過係麼？</verse>
				<verse number="17">𠊎敢識自家食到飽飽， 總係由在孤兒餓肚笥？</verse>
				<verse number="18">𠊎長透照顧孤兒，像係厥爸； 𠊎一生人常扶持幫助寡婦。</verse>
				<verse number="19">𠊎若堵到人無衫著、冷到會死， 𠊎若看到窮苦人無衫褲好著，</verse>
				<verse number="20">𠊎就拿自家出產个羊毛衫給佢等著燒。 佢等攏總誠心感謝𠊎。</verse>
				<verse number="21">若係𠊎在法院有朋友， 就靠勢力去欺負孤兒，</verse>
				<verse number="22">願𠊎个肩頭𢫫腕， 願𠊎个手骨斷掉。</verse>
				<verse number="23">因為𠊎當驚上帝个責罰， 因佢个威嚴，𠊎毋敢亂來！</verse>
				<verse number="24">𠊎從來毋識倚靠金錢， 也絕對毋會信賴黃金。</verse>
				<verse number="25">𠊎毋識因為錢財驕傲， 也毋會因為富足歡喜。</verse>
				<verse number="26">𠊎毋識因為日頭恁光， 抑係因為月光恁明亮，</verse>
				<verse number="27">就受引誘去歌頌它兜， 抑係唚手 來表示尊敬。</verse>
				<verse number="28">恁樣做就係悖逆至高个上帝； 這係罪大惡極，應該愛判死刑。</verse>
				<verse number="29">𠊎從來毋識看敵人受苦就快樂， 毋識看到佢等堵到災難就歡喜；</verse>
				<verse number="30">毋准𠊎个嘴犯罪， 咒詛人「孤盲絕代」。</verse>
				<verse number="31">所有在𠊎屋下做過長工个人， 毋識講𠊎無好好來接待佢等。</verse>
				<verse number="32">𠊎請過路个旅客到吾屋下來， 從來毋識俾佢等在街項過夜。</verse>
				<verse number="33">人常常愛將自家个過犯遮等； 總係𠊎無將自家个過失囥等。</verse>
				<verse number="34">𠊎從來就毋驚親族外人講𠊎个閒話， 無因為驚人罵就毋敢講話，毋敢出門。</verse>
				<verse number="35">敢講無人肯聽𠊎說明嗎！ 𠊎發誓，𠊎个話逐句真實； 願全能个上帝肯回答𠊎！ 願該告𠊎个寫出𠊎个罪， 將寫好个狀仔拿給𠊎看。</verse>
				<verse number="36">𠊎愛將它貼在肩頭頂高， 抑係做冕旒戴在頭那頂。</verse>
				<verse number="37">𠊎愛向上帝說明𠊎所做个一切， 像王子大大方方來到佢个面前。</verse>
				<verse number="38">若係𠊎識霸佔別人个田地， 田地會大聲喊，犁溝也會噭；</verse>
				<verse number="39">若係𠊎食田產無付錢， 抑係害耕種个人餓死，</verse>
				<verse number="40">願該垤田生滿竻仔㧯野草， 小麥大麥全部毋會再出產。 約伯 个話講煞了。</verse>
			</chapter>
			<chapter number="32">
				<verse number="1">因為 約伯 堅持自家無罪，這三個人就無再應佢。</verse>
				<verse number="2">總係有一個人在塍頭，佢安到 以利戶 ( 以利戶 係 布西 後代 蘭 族人 巴拉迦 个孻仔)；因為 約伯 認為自家無罪又怪怨上帝，佢忍毋住就向 約伯 發譴。</verse>
				<verse number="3">佢也向 約伯 个三個朋友發譴，認為佢等毋知愛樣般回答 約伯 ，硬講 約伯 毋著 。</verse>
				<verse number="4">因為 以利戶 比佢等後生，毋敢搶等㧯 約伯 講話；</verse>
				<verse number="5">看到佢等三儕無話好應 約伯 ，就當閼。</verse>
				<verse number="6">所以， 以利戶 就講： 𠊎最後生，你等係長輩； 本來𠊎毋敢講吾意見。</verse>
				<verse number="7">𠊎想，𠊎應該愛讓長輩講話， 俾年老个傳授佢等个智慧。</verse>
				<verse number="8">其實，只有全能上帝个靈 正能將智慧賜給世間人。</verse>
				<verse number="9">年紀大無一定就較有智慧； 較多歲也無一定明白是非。</verse>
				<verse number="10">所以，𠊎請你等聽𠊎講； 𠊎也愛講𠊎个意見。</verse>
				<verse number="11">你等个談論𠊎全部認真聽， 緊等你等會講出明智个話。</verse>
				<verse number="12">𠊎注意聽你等个話， 發現你等全部失敗； 連一儕都拗 約伯 毋贏。</verse>
				<verse number="13">你等樣般做得講，已經尋到智慧呢？ 上帝正有辦法說服 約伯 ，人做毋到。</verse>
				<verse number="14">約伯 毋係向𠊎爭論； 𠊎乜毋會像你等恁樣應佢。</verse>
				<verse number="15">約伯 啊，佢等對你無話好應； 佢等無辦法給你麼介答案。</verse>
				<verse number="16">佢等企在該位，已經無麼介話好講了； 佢等恬恬毋講話，𠊎還愛等等下去嗎？</verse>
				<verse number="17">做毋得，𠊎這下愛回答你； 𠊎愛將𠊎个想法㧯你講。</verse>
				<verse number="18">𠊎有當多話一定愛講， 𠊎个心迫𠊎愛講出來。</verse>
				<verse number="19">若係𠊎毋尋機會將話講出來， 𠊎會像裝滿新酒个皮袋爆掉。</verse>
				<verse number="20">𠊎忍毋住愛講話； 𠊎一定愛拚出來。</verse>
				<verse number="21">𠊎在你等个辯論中， 毋會偏心、巴結麼人。</verse>
				<verse number="22">𠊎毋知愛樣般奉承人； 若係𠊎恁樣做，創造主一定會黏時責罰𠊎。</verse>
			</chapter>
			<chapter number="33">
				<verse number="1">約伯 啊，這下請聽𠊎个話； 注意聽𠊎所愛講个一切。</verse>
				<verse number="2">𠊎這下開嘴， 用舌乸講話。</verse>
				<verse number="3">𠊎愛講出真心話； 𠊎講个係誠實話。</verse>
				<verse number="4">𠊎係上帝个靈創造个； 全能者个氣給𠊎生命。</verse>
				<verse number="5">你若係有話愛講， 做你提出來反駁。</verse>
				<verse number="6">𠊎在上帝面前㧯你共樣； 𠊎乜係用泥造个。</verse>
				<verse number="7">所以你毋使驚𠊎； 𠊎毋會給你壓力。</verse>
				<verse number="8">你講个這兜話， 𠊎親耳聽到了。</verse>
				<verse number="9">你講：「𠊎無罪，無做麼介毋著； 𠊎清白，無犯麼介罪孽。</verse>
				<verse number="10">總係，上帝尋機會打擊𠊎， 將𠊎看做仇敵。</verse>
				<verse number="11">佢用鐵鍊鎖等𠊎个雙腳； 佢注意看𠊎所有个行踏。」</verse>
				<verse number="12">總係 約伯 啊，𠊎㧯你講，你毋著了； 無論麼介人，上帝比佢還較偉大。</verse>
				<verse number="13">你做麼介怪怨上帝， 講佢毋應你个申訴？</verse>
				<verse number="14">上帝一直用各種方法講話， 總係無人注意聽佢講麼介。</verse>
				<verse number="15">暗晡頭人當好睡个時節， 上帝託夢在異象中講話。</verse>
				<verse number="16">佢打開人个耳公， 用警告來嚇佢等。</verse>
				<verse number="17">上帝講話，喊人離開罪惡， 使佢等毋會自高自大。</verse>
				<verse number="18">佢毋願看到佢等落陰間； 佢愛拯救佢等脫離死亡。</verse>
				<verse number="19">上帝用病痛來責罰人个過失， 俾人病到睡在眠床，來管教佢。</verse>
				<verse number="20">發病个人麼介都毋想食， 連盡好食个也全無胃口。</verse>
				<verse number="21">佢瘦夾夾、無半點肉， 厥骨頭全部突出來。</verse>
				<verse number="22">佢个靈魂接近陰府； 佢个生命離死無遠。</verse>
				<verse number="23">上帝个千萬天使當中， 或者有一位傳話个， 來指示人應該盡个本份。</verse>
				<verse number="24">天使憐憫佢，講：「放佢走！ 佢毋使落去死个深坑； 𠊎有錢贖轉佢个自由。」</verse>
				<verse number="25">佢个身體會恢復到像細人仔； 佢會變到像後生个時恁勇健。</verse>
				<verse number="26">佢祈禱，上帝就會歡喜應佢； 佢愛用快樂个心敬拜上帝； 上帝愛㧯佢恢復好个關係。</verse>
				<verse number="27">佢會公開承認： 「𠊎有犯罪，顛倒是非； 總係上帝並無照𠊎个罪來責罰𠊎。</verse>
				<verse number="28">佢救𠊎，使𠊎毋使落死个深坑； 使𠊎个生命還做得看到光明。」</verse>
				<verse number="29">上帝一擺又一擺， 為人做這一切事，</verse>
				<verse number="30">愛救人離開死个深坑， 使佢享受生命个光明。</verse>
				<verse number="31">這下， 約伯 啊，你愛聽𠊎个話， 你愛恬恬，好好聽𠊎講話。</verse>
				<verse number="32">你若係有話愛講，就做得應𠊎； 你盡量講，𠊎願意將你當做有理个。</verse>
				<verse number="33">若係你毋講，就恬恬聽； 𠊎愛將智慧教導你。</verse>
			</chapter>
			<chapter number="34">
				<verse number="1">以利戶 繼續講：</verse>
				<verse number="2">你等有智慧个人請聽𠊎个話； 你等有智識个人注意聽𠊎講。</verse>
				<verse number="3">耳公愛分別話語个內容， 就像舌乸試食物个滋味。</verse>
				<verse number="4">是非愛𫣆等自家來判斷； 善惡也愛𫣆自家來決定。</verse>
				<verse number="5">約伯 識講：「𠊎無罪， 總係上帝無用公當對待𠊎。</verse>
				<verse number="6">雖然𠊎正直有理，卻算做講花撩！ 𠊎無罪，總係受到个傷害無好醫。」</verse>
				<verse number="7">你等看過像 約伯 這種人麼？ 佢嘲謔上帝，像食水恁隨便。</verse>
				<verse number="8">佢盡歡喜㧯壞人來往； 佢㧯做壞事个人共下。</verse>
				<verse number="9">佢講：「做俾上帝歡喜， 這敢有麼介利益呢？」</verse>
				<verse number="10">你等明理个人，愛聽𠊎講： 上帝絕對毋會做壞事！ 全能者絕對毋會不義！</verse>
				<verse number="11">佢照人个行為報應人， 照人所應得个對待人。</verse>
				<verse number="12">正經，上帝絕對毋會做壞事； 全能者絕對毋會顛倒是非。</verse>
				<verse number="13">上帝敢有對麼人領受權力？ 敢有麼人設立佢管理世界？</verse>
				<verse number="14">若係上帝決心收轉生命， 若係佢收回氣息，</verse>
				<verse number="15">所有血氣个全部會消滅， 世間人攏總會變轉泥粉。</verse>
				<verse number="16">你若係明理，請聽𠊎講， 請注意聽𠊎所講个話。</verse>
				<verse number="17">上帝掌權，絕對無可能怨恨公平！ 佢有公義、權能，你愛定佢有罪嗎？</verse>
				<verse number="18">上帝做得對君王講：你無下落！ 佢也做得對貴族講：你係壞人！</verse>
				<verse number="19">佢毋會顛倒是非、對統治者偏心， 也毋會巴結有錢人、藐視窮苦人； 因為人類全部係佢親手所造个。</verse>
				<verse number="20">人可能在暗晡頭忽然間死掉。 上帝一攻擊，就將佢等消滅掉； 佢毋使出手，就除掉最強个人。</verse>
				<verse number="21">佢注意人所行个道路； 佢鑒察逐儕人个腳步。</verse>
				<verse number="22">就算係烏暗㧯死个陰影， 也無法度將罪人囥起來。</verse>
				<verse number="23">上帝毋使㧯人定日仔， 喊人到佢面前受審判。</verse>
				<verse number="24">佢毋使調查就除掉強人， 佢設立別人來代理佢等。</verse>
				<verse number="25">佢早就注意佢等个行為， 一暗晡將佢等推翻消滅。</verse>
				<verse number="26">佢在眾人面前鞭打佢等， 係為到佢等所做个壞事，</verse>
				<verse number="27">因為佢等毋順從佢， 藐視佢一切个命令。</verse>
				<verse number="28">窮苦人被佢等迫到去求上帝； 上帝有聽到佢等求喊个哀聲。</verse>
				<verse number="29">無論係國家抑係人民， 上帝若係恬恬，麼人做得怪怨佢呢？ 若係佢揞面毋插，麼人能得到幫助？</verse>
				<verse number="30">佢使無敬虔个人無法度做王， 免得人民受到災難。</verse>
				<verse number="31">樣有人對上帝講： 「𠊎已經受到責罰， 毋會再過犯罪了。</verse>
				<verse number="32">𠊎無看到个，你㧯𠊎講啊； 就算𠊎有罪，毋會再犯了。」</verse>
				<verse number="33">你既然反對上帝个作為， 佢敢愛照你个要求施行報應？ 愛做決定个係你，毋係𠊎； 將你个想法㧯𠊎等講啊！</verse>
				<verse number="34">所有明理个人會同意𠊎个話； 所有智慧个人聽到一定會講：</verse>
				<verse number="35">「 約伯 講話無智識； 佢个話全無意義。」</verse>
				<verse number="36">願 約伯 徹底受到試驗， 因為佢回答當像壞人。</verse>
				<verse number="37">佢毋單淨犯罪，事後還繼續悖逆； 佢在大家面前加講話侮辱上帝。</verse>
			</chapter>
			<chapter number="35">
				<verse number="1">以利戶 又對 約伯 講：</verse>
				<verse number="2">你緊講在上帝面前無麼介罪； 你恅到自家恁樣講有理係麼？</verse>
				<verse number="3">你問上帝：「𠊎个罪㧯你有麼介關係？ 𠊎若無犯罪有麼介好處？」</verse>
				<verse number="4">𠊎這下愛回答你， 也回答你該兜朋友。</verse>
				<verse number="5">你昂頭看天， 看你頭那頂个雲有幾高。</verse>
				<verse number="6">你若係犯罪，對上帝有麼介影響？ 就算你緊犯罪，敢會傷害到佢麼？</verse>
				<verse number="7">就算你公正，對上帝有麼介幫助？ 你做个好事，敢對佢有利益係麼？</verse>
				<verse number="8">你个罪只有害到㧯你共樣个人類受苦； 你个好行為也只有俾世間人得到利益。</verse>
				<verse number="9">人受到壓迫个時，就緊哀求； 佢等被人欺負，就去求幫助。</verse>
				<verse number="10">總係無人講：「創造𠊎个上帝在㖠位？ 佢使𠊎在暗晡時還會唱歌。</verse>
				<verse number="11">上帝教導𠊎等，賜給𠊎等智慧， 遠遠超過所有个飛鳥㧯走獸。」</verse>
				<verse number="12">佢等哀求，總係上帝無應， 因為佢這兜壞人盡驕傲。</verse>
				<verse number="13">佢等虛假个求喊無效果， 上帝毋聽，全能者也毋插。</verse>
				<verse number="14">約伯 啊，何況你講你看毋到上帝； 你个案仔擺在佢面前，愛耐心等。</verse>
				<verse number="15">你恅到上帝毋會責罰； 你認為佢毋會插罪惡。</verse>
				<verse number="16">你講恁樣个話無搭無碓， 講恁多，毋知自家講麼介。</verse>
			</chapter>
			<chapter number="36">
				<verse number="1">以利戶 繼續講：</verse>
				<verse number="2">請你耐心聽𠊎解釋； 𠊎愛為上帝講加兜。</verse>
				<verse number="3">𠊎所知个範圍當闊，愛拿來引用； 𠊎愛說明𠊎个創造主係公正个。</verse>
				<verse number="4">𠊎所講个話正經毋係歕雞頦； 在你面前个係大有智慧个人。</verse>
				<verse number="5">看啊！上帝大有能力， 總係佢毋會藐視人； 佢个心思非常精明。</verse>
				<verse number="6">佢無愛由在壞人生下去； 佢愛為窮苦人伸張正義。</verse>
				<verse number="7">佢看顧正直人，又設立佢等坐大位； 就像君王恁樣，佢等永遠受人尊敬。</verse>
				<verse number="8">人若係被鍊仔捆等， 被苦難个索仔䌈等，</verse>
				<verse number="9">上帝愛指出佢等所犯个罪惡， 使佢等知自家个驕傲㧯自大。</verse>
				<verse number="10">佢使佢等个耳公聽到警告， 吩咐佢等離開邪惡个道路。</verse>
				<verse number="11">若係佢等順服上帝，事奉佢， 佢等就能享受平安个日仔， 佢等个人生也會滿有幸福。</verse>
				<verse number="12">若無順服，佢等會無智無識， 然後就經過死河、進入陰間。</verse>
				<verse number="13">毋敬畏上帝个人受到上帝責罰； 佢等緊想緊譴，總係毋求佢幫助。</verse>
				<verse number="14">佢等盡後生就死掉， 生命在污穢 中喪掉。</verse>
				<verse number="15">總係，上帝用苦難來救苦難中个人， 用災難使人个耳公聽得入佢个話。</verse>
				<verse number="16">上帝對災難中引帶你出來， 使你進入當闊當平安个地， 使你桌席擺滿滿、十分滂沛。</verse>
				<verse number="17">這下你堵到壞人个報應； 你已經受到公義个審判。</verse>
				<verse number="18">愛細膩，毋好被人个財寶引誘； 也毋好被人貼後手受到拐騙 。</verse>
				<verse number="19">你个財富 對災難有麼介用？ 你所有个勢力敢會幫助你？</verse>
				<verse number="20">毋使盼望該暗晡來到； 毋使緊等眾人會消滅。</verse>
				<verse number="21">細膩噢，毋好向邪惡行等去； 你个苦難警告你愛離開它。</verse>
				<verse number="22">愛記得上帝个權力有幾大； 敢有像佢恁偉大个指導者？</verse>
				<verse number="23">麼人做得指定佢愛做麼介？ 麼人能責備佢講：「你做毋著」？</verse>
				<verse number="24">佢所做个永遠受到頌讚； 你也毋好毋記得讚美佢。</verse>
				<verse number="25">萬民看到佢个所做； 世人對當遠來查看 。</verse>
				<verse number="26">上帝有幾偉大，𠊎等無法度了解； 𠊎等也算毋出佢到底有幾多歲。</verse>
				<verse number="27">上帝對地上吸收水氣， 將它變做雲肚个雨水。</verse>
				<verse number="28">雨點對雲落下， 就滋潤全人類。</verse>
				<verse number="29">麼人明白上帝樣般散佈雲彩？ 樣般對佢住个行宮發出雷聲？</verse>
				<verse number="30">佢用𥍉爧照天空， 用海水遮蓋海底。</verse>
				<verse number="31">佢就係恁樣治理萬民， 又賜佢等豐富个食物。</verse>
				<verse number="32">佢親手掌管𥍉爧， 命令它去打目標。</verse>
				<verse number="33">佢打雷公表示會落大雨， 連頭牲乜清楚知愛閃開。</verse>
			</chapter>
			<chapter number="37">
				<verse number="1">因為恁樣，𠊎个心搏搏跳， 強強會跳離開它个原位。</verse>
				<verse number="2">聽啊，你等全部愛聽上帝个聲， 聽佢嘴肚所發出𠾐𠾐滾个聲。</verse>
				<verse number="3">佢差𥍉爧穿過天空， 對天這片𥍉到該片。</verse>
				<verse number="4">隨後，人聽到佢𠾐𠾐滾个聲 — 雷公威嚴个響聲， 同時𥍉爧也緊𥍉無停。</verse>
				<verse number="5">上帝發出奇妙个雷聲； 佢做个大事，𠊎等無法理解。</verse>
				<verse number="6">佢命令雪落在地上， 也使大水落到無停。</verse>
				<verse number="7">佢停止人个工作， 使人知佢个所做。</verse>
				<verse number="8">野獸走入窿底背， 囥在牠兜个孔肚。</verse>
				<verse number="9">風差對南方出， 寒流對北方來。</verse>
				<verse number="10">上帝歕氣，水就結凍， 一大片个水就結做冰。</verse>
				<verse number="11">佢使雲充滿水氣， 使𥍉爧對雲發出。</verse>
				<verse number="12">它兜跈等上帝个指揮遊行轉動， 在全世界遵行上帝一切个命令。</verse>
				<verse number="13">上帝落水滋潤地面， 顯明佢對人个慈愛； 佢也落大水責罰人。</verse>
				<verse number="14">約伯 啊，注意聽噢！ 請安靜一下仔，思考上帝奇妙个所做。</verse>
				<verse number="15">你敢知上帝樣般下命令， 樣般使𥍉爧對雲中發射？</verse>
				<verse number="16">你敢知滿有智慧上帝奇妙个所做， 樣般使雲浮在天空中嗎？</verse>
				<verse number="17">你敢知南風吹來，大地就燒暖， 這時你著个幾領衫會熱起來？</verse>
				<verse number="18">你會協助上帝鋪開穹蒼， 使它就像銅鏡恁硬係麼？</verse>
				<verse number="19">請你教𠊎等㧯上帝愛講麼介； 𠊎等戇戇檔檔，毋知愛樣般講。</verse>
				<verse number="20">𠊎毋敢要求㧯上帝講話； 敢有人想愛自家尋死路？</verse>
				<verse number="21">事實上，風一吹，雲就散， 天頂光到非常恁刺目； 無人能昂頭去看該光。</verse>
				<verse number="22">北方有金色个大光出現； 上帝个威嚴使𠊎等敬畏。</verse>
				<verse number="23">全能者大有能力，𠊎等無法度接近； 總係佢有公義㧯正直，毋會欺負人。</verse>
				<verse number="24">因為恁樣，大家攏總敬畏佢； 總係佢毋搭自作聰明个人 。</verse>
			</chapter>
			<chapter number="38">
				<verse number="1">後來，上主對大風當中回答 約伯 講：</verse>
				<verse number="2">你係麼人，敢懷疑𠊎个旨意？ 你樣會講恁無智識个話啊？</verse>
				<verse number="3">企起來，像一個勇敢个人； 𠊎問你，你來指教𠊎。</verse>
				<verse number="4">𠊎創造世界个時，你在㖠位？ 你若係正經恁聰明，講看仔！</verse>
				<verse number="5">你敢知係麼儕定它个大細？ 麼儕在它个頂高拉線測量？</verse>
				<verse number="6">大地个基礎 安在㖠位？ 世界个基石麼儕放个？</verse>
				<verse number="7">該日天光星共下唱歌； 天頂眾神子 大聲歡呼。</verse>
				<verse number="8">大海 對地泥下爆出來个時， 麼儕關水門，俾它停下來呢？</verse>
				<verse number="9">係𠊎用雲遮蓋大海， 將它包在大濛煙中。</verse>
				<verse number="10">𠊎為海水定好界限， 並安水門又閂起來。</verse>
				<verse number="11">𠊎㧯它講：你到這位就好，做毋得超過； 你兇狂个大浪一定愛在這位停下來。</verse>
				<verse number="12">約伯 啊，朝晨頭个日光對㖠位出來？ 你一生人當中敢識對它下過命令？</verse>
				<verse number="13">你敢有辦法吩咐日頭照大地， 將囥在烏暗中个壞人逐出來？</verse>
				<verse number="14">日頭緊照，地上个山岡山壢變形， 像鑿出來个模仔，像摺好个衫褲。</verse>
				<verse number="15">大光一照，該兜壞人就毋敢亂來， 佢等擎起來个手毋敢攻擊人。</verse>
				<verse number="16">你識落去過海底麼？ 你識在深淵肚行麼？</verse>
				<verse number="17">有人指示你死亡个門麼？ 你敢識看過陰間个門麼？</verse>
				<verse number="18">你知這世界有幾大麼？ 若係你知就㧯𠊎講啊！</verse>
				<verse number="19">你知光對㖠位來麼？ 烏暗个源頭在㖠位？</verse>
				<verse number="20">你會帶它兜轉原位去麼？ 你知帶它兜轉去个路麼？</verse>
				<verse number="21">這兜事你應當知，因為你恁老了； 世界受創造个時，你已經出世了！</verse>
				<verse number="22">你敢識入去放雪个倉庫， 抑係看過冰雹个倉庫麼？</verse>
				<verse number="23">𠊎囤這兜， 準備在降災難㧯戰爭个日仔來用。</verse>
				<verse number="24">光係對㖠位散開來？ 東風對㖠位吹過來？</verse>
				<verse number="25">麼儕為大雨分水路？ 麼儕為𥍉爧開路線？</verse>
				<verse number="26">麼儕落水在無人住个所在？ 在無人到个荒地？</verse>
				<verse number="27">麼儕滋潤天旱个地， 使土地又生出青草？</verse>
				<verse number="28">雨水有阿爸麼？ 露水係麼儕𫱔个呢？</verse>
				<verse number="29">麼儕係冰个阿姆？ 天頂个霜係麼人𫱔个？</verse>
				<verse number="30">麼儕使水變像石頭恁硬？ 使海面結冰？</verse>
				<verse number="31">你有辦法將昴星䌈共下麼？ 你有辦法解開獵戶星个帶仔麼？</verse>
				<verse number="32">你有辦法照時帶群星麼？ 你會𢱋大細北斗星麼？</verse>
				<verse number="33">你知天體運行个規則麼？ 你會決定大地个法則麼？</verse>
				<verse number="34">你有辦法使雲聽你發出个命令麼？ 你會喊大雨像倒等下來个水麼？</verse>
				<verse number="35">若係你向𥍉爧發出命令， 它會到你个面前應講：「𠊎在這位」麼？</verse>
				<verse number="36">麼儕俾朱鷺鳥有智慧講 尼羅 河幾時會做大水？ 麼儕賜聰明給雞公啼講會天光了？</verse>
				<verse number="37">麼儕有智慧去算雲團有幾蕊？ 麼儕有辦法使雲變雨倒等下來？</verse>
				<verse number="38">麼儕有辦法使灰塵結矻？ 麼儕有辦法使泥粉結團？</verse>
				<verse number="39">獅仔在窿肚跍等， 抑係在草藪肚伏等； 你有辦法為獅乸捉到獵物麼？ 你有辦法使細獅仔食飽麼？</verse>
				<verse number="40"></verse>
				<verse number="41">烏鴉餓到飛來飛去， 細烏鴉向𠊎求食物， 該時麼儕去餵飽牠兜呢？</verse>
			</chapter>
			<chapter number="39">
				<verse number="1">你知野山羊幾時𫱔子麼？ 你看過野鹿樣般𫱔子麼？</verse>
				<verse number="2">牠兜懷胎有幾久？ 你知牠兜幾時會𫱔麼？</verse>
				<verse number="3">你知牠兜受生產个痛苦愛幾久， 正跍落去將子𫱔下來麼？</verse>
				<verse number="4">牠兜个細子在野外漸漸大， 後來就走掉無再轉來。</verse>
				<verse number="5">麼人將野驢放走？ 麼人解開䌈等牠兜个索仔？</verse>
				<verse number="6">𠊎將曠野俾牠兜住， 使牠兜住在鹽地。</verse>
				<verse number="7">牠兜非常惱城市个吵鬧， 無愛被人大聲咄來咄去。</verse>
				<verse number="8">山野滿遍都係牠兜个牧場； 牠兜在該位尋青色个食料。</verse>
				<verse number="9">野牛肯被你駛麼？ 牠肯在你个牛欄過夜麼？</verse>
				<verse number="10">你有辦法用索仔拉野牛犁田， 抑係䌠 牠去田肚拖鐵耙麼？</verse>
				<verse number="11">你做得倚恃牠个氣力當大， 將盡重个工作交給牠做麼？</verse>
				<verse number="12">你能倚恃牠將收成帶轉屋下， 代你收禾埕个榖麼？</verse>
				<verse number="13">鴕鳥會打開翼胛盡擛， 總係牠毋會像白鸛恁樣飛。</verse>
				<verse number="14">鴕鳥生卵在地上， 使卵得到泥沙个燒氣。</verse>
				<verse number="15">牠毋知有可能會被腳踏爛， 抑係被野獸踏掉。</verse>
				<verse number="16">牠對待細鳥子就像毋係牠自家个， 也毋關心自家个辛苦係毋係無採工；</verse>
				<verse number="17">因為𠊎無給牠智慧， 也無將悟性賜給牠。</verse>
				<verse number="18">總係牠打開翼胛一走， 就恥笑馬仔㧯騎馬个人。</verse>
				<verse number="19">約伯 啊，係你使馬仔恁紮麼？ 係你給牠恁靚个鬃毛係麼？</verse>
				<verse number="20">係你使牠兜像草蜢跳來跳去， 使牠兜嘶起來俾人當著驚麼？</verse>
				<verse number="21">牠兜歡喜出大力蹶泥； 牠兜相爭𢲾背上戰場。</verse>
				<verse number="22">牠兜恥笑得人驚个事，麼介都毋驚； 刀劍也毋會使牠兜倒退。</verse>
				<verse number="23">戰士所帶个箭袋鏗鏗鏘鏘； 矛㧯槍在日頭下金光閃閃。</verse>
				<verse number="24">戰馬起性體，激動到向前猋； 羊角一歕，牠兜就衝等上陣。</verse>
				<verse number="25">聽到羊角聲，牠兜就緊嘶噴氣； 牠兜遠遠就鼻到戰爭个氣氛， 也聽得到軍官大聲喊个命令。</verse>
				<verse number="26">鷹鳥打開翼胛向南飛； 敢講這係你教牠个嗎？</verse>
				<verse number="27">大鷹鳥飛高，在山壁做藪； 這敢係照你个命令？</verse>
				<verse number="28">牠在崩崗頂歇睏， 在尖尖个巖石頂做城堡。</verse>
				<verse number="29">牠對該頂高看下去， 尋看有麼介好食麼。</verse>
				<verse number="30">有屍體个所在鷹鳥就聚集， 連牠个細鷹鳥也跈來食血。</verse>
			</chapter>
			<chapter number="40">
				<verse number="1">上主繼續㧯 約伯 講：</verse>
				<verse number="2">好拗个 約伯 啊，你愛㧯全能者理論； 你敢㧯𠊎辯駁，這下你做得應𠊎啊。</verse>
				<verse number="3">約伯 回答上主講：</verse>
				<verse number="4">𠊎算麼介？ 還愛樣般應你呢？ 𠊎揞等嘴，毋敢再講了。</verse>
				<verse number="5">講一擺就罅了； 𠊎無愛加講了。</verse>
				<verse number="6">所以，上主對大風當中㧯 約伯 講：</verse>
				<verse number="7">企起來，像一個勇敢个人； 𠊎問你，你來指教𠊎。</verse>
				<verse number="8">你想愛證明𠊎無公當、定𠊎有罪， 來顯出自家正著係麼？</verse>
				<verse number="9">你有像𠊎恁大个能力麼？ 你會發出打雷公个聲麼？</verse>
				<verse number="10">你若係會，就去用尊貴㧯莊嚴來打扮， 用尊嚴㧯光榮做衫褲。</verse>
				<verse number="11">你看該兜驕傲个人； 你去大發譴，㩢衰佢等啊！</verse>
				<verse number="12">你去將你所看到該兜驕傲个人拉下來； 將做壞事个人踐踏在佢等个本地。</verse>
				<verse number="13">去將佢等全部埋葬； 將佢等捆在陰間啊！</verse>
				<verse number="14">若係恁樣，𠊎就會讚美你， 承認你自家有能力得到勝利 。</verse>
				<verse number="15">看該恁大个河馬 啊； 𠊎造牠，也造你。 牠像牛恁樣食草；</verse>
				<verse number="16">牠个氣力在當紮个腰間！ 牠个能力在結實个肚笥！</verse>
				<verse number="17">牠个尾翹起來像香柏樹； 牠大腳髀个肉樣般勇健！</verse>
				<verse number="18">牠个骨頭像銅管； 牠个腳像鐵棍仔。</verse>
				<verse number="19">𠊎所創造个百獸中牠盡特別； 只有牠个創造者正能打贏牠。</verse>
				<verse number="20">在野獸活動个山林中， 有生當多牠愛食个草。</verse>
				<verse number="21">牠睡在蓮花葉下背， 伏在蘆竹㧯湳泥肚。</verse>
				<verse number="22">蓮花个葉做得㧯牠遮涼， 河壩滣个柳樹也圍等牠。</verse>
				<verse number="23">河壩做大水个時，牠毋會緊張； 約旦 河个水漲到牠个嘴唇，牠也安然自在。</verse>
				<verse number="24">麼人能去揞牠个目珠捉牠？ 麼人能用鉤仔牶牠个鼻孔？</verse>
			</chapter>
			<chapter number="41">
				<verse number="1">你能用魚鉤仔將海怪 拉起來， 抑係用索仔去䌈牠个舌乸麼？</verse>
				<verse number="2">你有辦法用索仔牶牠个鼻孔， 抑係用鉤仔穿過牠个下頷麼？</verse>
				<verse number="3">牠會緊求你放牠走， 抑係求你憐憫牠無？</verse>
				<verse number="4">牠敢會㧯你立約， 肯永遠服事你麼？</verse>
				<verse number="5">你敢會將牠準鳥仔搞麼？ 你能將牠紽等，俾你个細阿妹仔搞麼？</verse>
				<verse number="6">打魚个能將牠準貨物來論價麼？ 生理人敢能將牠剖開來賣麼？</verse>
				<verse number="7">你敢能用捉魚个長槍刺牠个皮， 抑係用魚叉刺穿牠个頭那麼？</verse>
				<verse number="8">你想愛將牠撳等，再一擺就毋敢了； 你永遠毋會毋記得㧯牠拚係樣般得人驚。</verse>
				<verse number="9">看過海怪个人全部嚇倒； 無人敢制伏牠。</verse>
				<verse number="10">牠一受到刺激，就惡擎擎； 麼人敢企在牠个面前呢？</verse>
				<verse number="11">就像恁樣，天下萬物攏總係𠊎个啊！ 麼人㧯𠊎作對，還愛喊𠊎賠佢呢？</verse>
				<verse number="12">講到海怪，𠊎毋講你敢會清楚？ 你敢知牠幾有力，係樣般強大？</verse>
				<verse number="13">麼人有辦法剝牠个外衫， 抑係刺穿牠所著个鐵甲 ？</verse>
				<verse number="14">麼人有辦法喊牠嘴打開來？ 牠个牙齒四周圍盡得人驚。</verse>
				<verse number="15">牠个背囊 有一排一排个鱗甲， 𢫮𢫮黏共下，像石頭恁硬。</verse>
				<verse number="16">逐片鱗甲相連共下， 連空氣都透毋落去。</verse>
				<verse number="17">它兜互相黏到當住， 無麼介能將它兜擘開。</verse>
				<verse number="18">牠一下打哈啾就會發出光； 目珠像天曚光个日頭恁金。</verse>
				<verse number="19">牠个嘴會歕火， 有火花飛出來。</verse>
				<verse number="20">牠个鼻孔也會歕煙出來， 像鑊頭下燒蘆竹草引起个煙。</verse>
				<verse number="21">牠歕个氣使火𤏸起來； 火就對牠个嘴噴出來。</verse>
				<verse number="22">牠个頸筋當硬又非常有力； 堵到牠个全部驚到跳起來。</verse>
				<verse number="23">牠个外殼當結實， 硬到無人挷得挺動。</verse>
				<verse number="24">牠个心硬到像石頭， 像磨石恁硬。</verse>
				<verse number="25">牠一䟘起來，連勇士 也著驚， 無葛無煞，打卵退。</verse>
				<verse number="26">刀劍無法度傷害牠； 槍㧯箭對牠也無效。</verse>
				<verse number="27">對牠來講，鐵像燥草， 銅也像歿掉个樹仔。</verse>
				<verse number="28">弓箭無法度將牠逐走； 拿石頭㧹牠，像禾稈打到全無礙到。</verse>
				<verse number="29">在牠看來，棍仔就像禾稈； 牠笑飛過來个槍，連看都毋看。</verse>
				<verse number="30">牠个肚笥皮像當尖个瓦析； 它兜像鐵耙恁樣緊耙地泥。</verse>
				<verse number="31">牠摝大海，水就緊滾， 像鑊頭肚个油盡滾。</verse>
				<verse number="32">牠一泅過，水面就像會發光； 牠使海水留下白色个水泡。</verse>
				<verse number="33">地上無其他動物能㧯牠比； 牠麼介都毋驚。</verse>
				<verse number="34">連最高大个動物牠也看輕； 牠係所有野獸个王。</verse>
			</chapter>
			<chapter number="42">
				<verse number="1">約伯 回答上主講：</verse>
				<verse number="2">𠊎知你萬事全部做得到； 你有辦法實現所有个計劃。</verse>
				<verse number="3">你問過：「麼人恁無智識，懷疑𠊎个旨意？」 有影，𠊎所講个，連自家也毋係恁明白； 這兜事情實在奇妙，超過𠊎能了解个。</verse>
				<verse number="4">你識對𠊎講： 「你愛注意聽𠊎个話； 𠊎問你，你來指教𠊎。」</verse>
				<verse number="5">有影，以前𠊎識聽過你； 總係這下，𠊎親目看到你！</verse>
				<verse number="6">所以，𠊎想到自家 又閼又見笑， 就坐在泥粉㧯火灰當中後悔 。</verse>
				<verse number="7">上主對 約伯 講這兜話以後，就對 提幔 人 以利法 講：「𠊎對你㧯你兩個朋友當火大，因為你等議論𠊎个話無比𠊎个僕人 約伯 所講个較正確。</verse>
				<verse number="8">這下，你等愛拿七隻牛牯、七隻羊牯，到𠊎个僕人 約伯 該位去，為你等自家獻燒化祭。𠊎个僕人 約伯 愛為你等祈求；𠊎會歡喜接納佢个祈求，毋照你等个糊塗責罰你等。你等對𠊎个議論，無比𠊎个僕人 約伯 講个較正確。」</verse>
				<verse number="9">後來 提幔 人 以利法 、 書亞 人 比勒達 、 拿瑪 人 瑣法 照上主所吩咐个去做。上主接納 約伯 个祈求。</verse>
				<verse number="10">約伯 為三個朋友祈禱以後，上主恢復佢个情況，使佢个財產比以前加倍興旺。</verse>
				<verse number="11">佢个兄弟、姊妹，㧯以前个朋友全部來看佢，在厥屋下共下食飯。佢等對佢表示同情，為到佢對上主該位所受到个一切災難，來安慰佢。逐儕送佢一隻銀幣㧯一隻金環。</verse>
				<verse number="12">在 約伯 年老个時，上主賜福給佢，比佢以前所得到个還較多。 約伯 得到一萬四千隻羊仔，六千隻駱駝，一千對牛，一千隻驢乸。</verse>
				<verse number="13">佢也有七個孻仔，三個妹仔。</verse>
				<verse number="14">佢將大个妹仔安到 耶米瑪 ，第二個妹仔安到 基洗亞 ，第三個妹仔安到 基蓮‧哈樸 。</verse>
				<verse number="15">世間無其他个婦女像 約伯 該兜妹仔恁靚。姖等个阿爸使姖等㧯該兜兄弟共樣分財產。</verse>
				<verse number="16">這以後， 約伯 再食一百四十歲，親目看到自家个四代子孫。</verse>
				<verse number="17">恁樣， 約伯 享長壽，日仔滿足來離開世間。</verse>
			</chapter>
		</book>
		<book number="19">
			<chapter number="1">
				<verse number="1">這種人係實在有福氣个人 ： 佢毋從壞人个計謀， 毋跈罪人个腳步， 毋㧯藐視上帝个人做伴。</verse>
				<verse number="2">佢只有歡喜上主个教示， 日夜思想研究。</verse>
				<verse number="3">佢像種在河壩滣个果子樹， 照時節結果子， 樹葉毋會燥掉。 佢所做个事全部順利！</verse>
				<verse number="4">壞人就毋係恁樣： 佢等像礱糠被風吹散。</verse>
				<verse number="5">所以，在審判个時，壞人會企毋住； 罪人在義人个集會中也係恁樣。</verse>
				<verse number="6">上主看顧義人所行个路； 總係壞人个路透到滅亡。</verse>
			</chapter>
			<chapter number="2">
				<verse number="1">列國做麼介妄想反叛？ 萬民做麼介空空計謀？</verse>
				<verse number="2">世上个王䟘起來準備， 掌權个官同心計謀， 想愛攻擊上主㧯佢所選立个王。</verse>
				<verse number="3">佢等講：「𠊎等來掣斷佢等个鎖鍊！ 𠊎等來推翻佢等个統治！」</verse>
				<verse number="4">該坐在天頂寶座个卻好笑； 上主笑佢等个計謀係妄想。</verse>
				<verse number="5">該時，佢發譴來警告佢等， 佢个大發譴使佢等盡著驚。</verse>
				<verse number="6">佢講：「在 錫安 𠊎个聖山頂， 𠊎已經設立屬𠊎个君王。」</verse>
				<verse number="7">該君王講：「𠊎愛宣佈上主个命令。 上主㧯𠊎講：『你係𠊎个孻仔； 今晡日開始，𠊎做你个阿爸。</verse>
				<verse number="8">你求，𠊎就將列國賜給你做領土， 將全世界交給你做田產。</verse>
				<verse number="9">你愛用鐵恁硬个手腕統治佢等； 你愛打爛佢等，像打爛缶仔一樣。』」</verse>
				<verse number="10">這下，你等做王个啊，愛細膩噢！ 在世間掌權个啊，愛聽警告！</verse>
				<verse number="11">愛用敬畏个心服事上主！ 愛驚鹿鹿仔，也盡歡喜！</verse>
				<verse number="12">愛服事佢个孻仔 ； 若係無，上主會大發譴， 你等就會忽然滅亡； 因為佢个怒氣會即時臨到！ 總係，求佢保佑个人全部有福氣！</verse>
			</chapter>
			<chapter number="3">
				<verse number="1">上主啊，𠊎个仇敵實在真多！ 有盡多人䟘起來攻擊𠊎！</verse>
				<verse number="2">恁多人議論𠊎，講： 「上帝毋會拯救佢！」</verse>
				<verse number="3">總係上主啊，你就係保護𠊎个盾牌； 你俾𠊎得勝，又使𠊎个頭那擎起來。</verse>
				<verse number="4">𠊎出聲求喊上主， 佢就對佢个聖山應𠊎。</verse>
				<verse number="5">𠊎攋下來，就睡掉； 𠊎再醒起來，因為上主一直保護𠊎。</verse>
				<verse number="6">就算有幾下萬个仇敵圍等來攻擊𠊎， 𠊎乜毋驚。</verse>
				<verse number="7">上主啊，求你䟘起來！ 𠊎个上帝啊，來救𠊎！ 你打𠊎一切仇敵个嘴角， 敲掉所有邪惡人个牙齒。</verse>
				<verse number="8">拯救係對上主該位來个； 願你賜福給你个子民！</verse>
			</chapter>
			<chapter number="4">
				<verse number="1">𠊎个上帝，𠊎个辯護者啊， 𠊎求喊个時，求你應𠊎！ 𠊎識在患難中得到你个透放； 這下，求你憐憫𠊎，聽𠊎个祈禱！</verse>
				<verse number="2">你這兜人啊，你等將𠊎个榮光變做侮辱愛到幾時呢？ 你等愛虛假，好花撩，愛到幾時呢？</verse>
				<verse number="3">愛知，上主分別敬虔个人歸屬佢； 上主一定會聽𠊎个求喊。</verse>
				<verse number="4">你等愛驚鹿鹿仔，莫再犯罪 ； 在眠床頂个時，愛恬恬反省。</verse>
				<verse number="5">愛獻上應當獻个祭， 一心一意信靠上主。</verse>
				<verse number="6">盡多人講：「麼人會使𠊎等尋到福氣呢？」 上主啊，求你用慈愛光照𠊎等！</verse>
				<verse number="7">你賜給𠊎內心个歡喜， 贏過佢等个五榖豐登、新酒滿槽。</verse>
				<verse number="8">𠊎一眠下去，就平平安安睡到天光； 上主啊，使𠊎住到安安全全个就係你。</verse>
			</chapter>
			<chapter number="5">
				<verse number="1">上主啊，求你聽𠊎个話； 求你留意聽𠊎个歎息。</verse>
				<verse number="2">𠊎个王，𠊎个上帝啊， 留心聽𠊎求喊个聲； 因為𠊎係向你祈禱！</verse>
				<verse number="3">上主啊，天曚光你聽到𠊎个聲； 打早𠊎就對你懇求 ，等候你。</verse>
				<verse number="4">你係無歡喜罪惡个上帝； 你不准邪惡人同你共下。</verse>
				<verse number="5">驕傲个人，在你眼前企毋住； 所有作惡个人，你怨恨佢等。</verse>
				<verse number="6">講花撩个，你一定會毀滅佢等； 好流人血㧯詭詐个，上主當惱佢等。</verse>
				<verse number="7">總係𠊎，因為你豐盛个慈愛， 𠊎做得入去你个聖所； 𠊎愛恭恭敬敬伏等， 在你个聖殿敬拜你。</verse>
				<verse number="8">上主啊，因為𠊎个對敵看等𠊎， 求你帶領𠊎，俾𠊎實行你个旨意， 俾𠊎直直行你為𠊎安排个道路。</verse>
				<verse number="9">仇敵个話全部係信毋得个； 佢等个心所想个只有毀滅。 佢等个喉嗹像打開个墳墓， 嘴甜舌滑，專門講詭詐个話。</verse>
				<verse number="10">上帝啊，求你定佢等个罪， 使佢等中到自家个詭計。 求你對你面前將佢等逐走， 因為佢等悖逆你，罪惡滿滿。</verse>
				<verse number="11">願得到你庇佑个人全部快樂， 願佢等一直歡喜來吟詩唱歌。 求你保護該兜敬愛你个人， 使佢等歡喜頌讚你。</verse>
				<verse number="12">上主啊，你定著會賜福給正義个人； 你个憐憫像盾牌會四面保佑佢等。</verse>
			</chapter>
			<chapter number="6">
				<verse number="1">上主啊，求你毋好發譴來責備𠊎； 也毋好在大發譴之中來責罰𠊎！</verse>
				<verse number="2">上主啊，求你憐憫𠊎， 因為𠊎个身體非常軟弱； 上主啊，求你醫治𠊎， 因為𠊎个骨頭驚到緊顫。</verse>
				<verse number="3">𠊎个身心也盡著驚； 上主啊，愛繼續到幾時呢？</verse>
				<verse number="4">上主啊，求你回心轉意來救𠊎！ 因為你不變个慈愛，求你拯救𠊎！</verse>
				<verse number="5">過身个人無可能紀念你！ 敢有麼人在陰間頌讚你？</verse>
				<verse number="6">𠊎緊噌，噌到無半滴力； 逐暗晡，𠊎个目汁像做大水， 淹到歸眠床，被骨也濕𣽛𣽛。</verse>
				<verse number="7">𠊎傷心噭到無目汁、目珠腫腫； 該兜對敵害𠊎眼目昏花。</verse>
				<verse number="8">你這兜作惡个人啊，閃走！ 因為上主聽到𠊎个噭聲了。</verse>
				<verse number="9">上主已經聽到𠊎个懇求； 上主定著接受𠊎个祈禱。</verse>
				<verse number="10">𠊎个對敵全部會盡見笑，非常著驚； 佢等會忽然間受盡侮辱，走到淨淨。</verse>
			</chapter>
			<chapter number="7">
				<verse number="1">上主 — 𠊎个上帝啊，你係𠊎避難个所在； 求你救𠊎脫離該兜追𠊎个人，搶救𠊎。</verse>
				<verse number="2">若無，佢等會像獅仔恁樣將𠊎扯裂， 將𠊎扯到碎碎，該時就無人能救𠊎。</verse>
				<verse number="3">上主 — 𠊎个上帝啊，論到做人， 𠊎若係不義，雙手染到罪惡，</verse>
				<verse number="4">壞款待對𠊎有恩情个朋友， 同𠊎作對个，𠊎佻佻欺負佢，</verse>
				<verse number="5">恁樣，就由在對敵追𠊎，捉𠊎； 由在佢將𠊎踏死在地上， 使𠊎个尊榮埋在泥灰肚。</verse>
				<verse number="6">上主啊，求你在發譴中䟘起來， 企起來阻擋該兜敵人對𠊎个大發譴。 好醒了，來幫助𠊎！ 求你施行正義！</verse>
				<verse number="7">願萬民攏總圍等你； 願你在高位掌權統治佢等。</verse>
				<verse number="8">上主審判萬民； 上主啊，求你照𠊎个公義、 㧯𠊎心中个純正審判𠊎。</verse>
				<verse number="9">公義个上帝， 察驗人心㧯意念个啊！ 壞人作惡，求你即時阻止； 義人行善，求你使佢等企穩。</verse>
				<verse number="10">上帝係保護𠊎个盾牌； 佢拯救心肝正直个人。</verse>
				<verse number="11">上帝係公義个審判者； 佢逐日責罰作惡个人。</verse>
				<verse number="12">人若係毋肯悔改， 佢就磨利佢个劍； 佢就拉弓準備好勢，</verse>
				<verse number="13">準備好致命个武器， 點𤏸佢所愛射个火箭。</verse>
				<verse number="14">看啊，壞人樣般圖謀邪惡， 佢心懷惡毒，行事奸詐。</verse>
				<verse number="15">佢挖陷阱愛害別人， 自家反轉跌落去！</verse>
				<verse number="16">佢个惡毒會轉頭害到佢自家； 佢个強暴會落在自家个頭頂。</verse>
				<verse number="17">𠊎愛因為上主个公義感謝佢； 𠊎愛歌頌上主 — 至高者个名！</verse>
			</chapter>
			<chapter number="8">
				<verse number="1">上主 — 𠊎等个主啊， 你个名在全世界係樣般个偉大！ 頌讚你个聲音傳遍滿天 ；</verse>
				<verse number="2">連孲𤘅㧯細人仔也一同唱歌。 你用佢等个歌聲建立能力，防備你个敵人； 你阻止仇敵對你个攻擊。</verse>
				<verse number="3">𠊎昂頭看你親手創造个天， 看你所排列个月光㧯星辰。</verse>
				<verse number="4">啊！人算麼介，你顧念佢！ 會朽壞个人 算麼介，你看顧佢！</verse>
				<verse number="5">你造佢只有比你自家 較細一些仔定定； 你用榮光尊貴做佢个冕旒。</verse>
				<verse number="6">你俾佢管理你手所造个萬物， 將一切放在佢个腳下：</verse>
				<verse number="7">牛、羊、野生个禽獸、</verse>
				<verse number="8">天空个飛鳥、水中个魚、 海肚个生物，全部交給佢管理。</verse>
				<verse number="9">上主 — 𠊎等个主啊， 你个名在全世界係樣般个偉大！</verse>
			</chapter>
			<chapter number="9">
				<verse number="1">上主啊，𠊎愛一心一意感謝你； 𠊎愛傳揚你一切奇妙个作為。</verse>
				<verse number="2">𠊎愛因為你來歡喜快樂； 至高者啊，𠊎愛歌頌你个名！</verse>
				<verse number="3">你一顯現，𠊎个仇敵就退走； 在你面前，佢等就橫下滅亡。</verse>
				<verse number="4">你坐在寶座上，照公義來審判； 你為𠊎伸冤，為𠊎个案件辯護。</verse>
				<verse number="5">你責備列邦，消滅邪惡个人； 你拭掉佢等个名，直到永遠。</verse>
				<verse number="6">𠊎个仇敵已經滅淨淨了； 佢等个城市被你毀滅掉； 也無人再過紀念佢等了。</verse>
				<verse number="7">總係，上主愛掌權到永遠； 佢已經為審判設立佢个寶座。</verse>
				<verse number="8">佢用公義審判世界； 佢照公平統治萬民。</verse>
				<verse number="9">上主係受壓迫个人个避難所， 係佢急難時逃難个城堡。</verse>
				<verse number="10">上主啊，認識你个人愛倚靠你， 因為你毋識棄絕該兜尋求你个人。</verse>
				<verse number="11">愛頌讚在 錫安 掌權个上主！ 愛在萬國中間傳揚佢个作為！</verse>
				<verse number="12">上帝紀念苦難中个人； 佢無毋記得佢等个哀求， 愛責罰迫害佢等个人。</verse>
				<verse number="13">上主啊，求你憐憫𠊎！ 你看，怨恨𠊎个人樣般迫害𠊎！ 上主啊，求你對死門挷𠊎上來，</verse>
				<verse number="14">使𠊎企在 鍚安 城个門口， 對人講起𠊎頌讚你个一切， 又因為你个拯救歡喜快樂。</verse>
				<verse number="15">外邦人陷在自家挖个坑肚， 腳被自家所設个羅網纏到。</verse>
				<verse number="16">上主通過公正个審判彰顯佢自家； 壞人被自家个手所做个纏到死死。</verse>
				<verse number="17">壞人㧯所有毋搭上帝个外邦人， 佢等全部愛落陰間。</verse>
				<verse number="18">窮苦人，上帝一定毋會永遠毋記得佢等； 受迫害个，佢等个心願也毋會一直落空。</verse>
				<verse number="19">上主啊，䟘起來，莫俾世間人贏過你！ 求你帶外邦人到你面前，審判佢等。</verse>
				<verse number="20">上主啊，使佢等大大著驚； 俾佢等知自家係人定定！</verse>
			</chapter>
			<chapter number="10">
				<verse number="1">上主啊，你做麼介企到恁遠呢？ 在患難个時，你做麼介毋出面？</verse>
				<verse number="2">壞人因為驕傲迫窮苦人到無路好走； 願佢等陷落在自家所設个羅網底背。</verse>
				<verse number="3">壞人誇口自家邪惡个慾望； 貪心个人拒絕並藐視上主。</verse>
				<verse number="4">壞人將佢个面傲到高高，講： 「上主毋會尋𠊎算數， 事實上乜無上帝啊！」 佢心中所想个就係恁樣。</verse>
				<verse number="5">壞人个行事常常順利。 佢無了解上帝个審判； 佢嘲謔佢所有个對敵。</verse>
				<verse number="6">佢心肝想：「𠊎永遠毋會失敗； 𠊎世世代代毋會堵到災難。」</verse>
				<verse number="7">佢滿嘴咒罵、詭詐、喝喝咄咄， 舌乸好講怨恨㧯邪惡个話。</verse>
				<verse number="8">佢埋伏在村莊个底背； 佢等機會殺害無罪个人。 佢个目珠偷看無倚靠个人，</verse>
				<verse number="9">佢像獅仔埋伏在草藪肚； 佢等機會愛捉窮苦人， 網到以後就將佢捉去。</verse>
				<verse number="10">窮苦人在佢个壓迫之下， 只有低頭降服佢个暴力。</verse>
				<verse number="11">壞人心肝想：「上帝毋記得了； 佢揞等目珠，永遠看毋到𠊎！」</verse>
				<verse number="12">上主啊，求你䟘起來！ 上帝啊，好出手了！ 莫毋記得受苦个人！</verse>
				<verse number="13">壞人做麼介敢藐視上帝， 心肝講：「佢毋會尋𠊎算數」？</verse>
				<verse number="14">其實，一切在你个鑒察中； 你出手關心苦難㧯憂愁。 窮苦無倚靠个人投靠你； 你一直就係幫助孤兒个。</verse>
				<verse number="15">求你消滅惡人㧯壞人个勢力； 求你責罰佢等个罪，徹底算數。</verse>
				<verse number="16">上主永永遠遠做王掌權； 外邦會對佢个土地消滅。</verse>
				<verse number="17">上主啊，你已經聽到窮苦人个心願； 你會加添佢等个勇氣，聽佢等祈禱。</verse>
				<verse number="18">你會代孤兒㧯受壓迫个伸冤， 使世間人毋會再過恐嚇別人。</verse>
			</chapter>
			<chapter number="11">
				<verse number="1">上主就係𠊎个避難所。 你等樣般做得對𠊎講： 「你愛像鳥仔飛入深山 ，</verse>
				<verse number="2">因為該兜壞人開弓搭箭， 愛暗中射心肝正直个人。</verse>
				<verse number="3">根基若係被人毀滅， 義人還能做麼介呢？」</verse>
				<verse number="4">上主在佢个聖殿當中； 上主个寶座設在天頂。 佢个目珠看等世間人， 鑒察佢等个所行所做。</verse>
				<verse number="5">上主考驗義人㧯壞人； 佢當怨恨好強暴个人。</verse>
				<verse number="6">佢愛將石炭火 㧯硫磺火降在壞人身上， 用熱死人个燒風來報應佢等。</verse>
				<verse number="7">上主係公義个，佢歡喜公正个行為； 正直个人一定會朝見佢个面。</verse>
			</chapter>
			<chapter number="12">
				<verse number="1">上主啊，幫助𠊎等！ 虔誠人絕掉了； 在世間已經尋毋到忠心个人囉！</verse>
				<verse number="2">大家互相講花撩， 嘴甜舌滑，心懷兩意。</verse>
				<verse number="3">願上主封掉奉承个嘴唇， 割掉所有講大話个舌乸。</verse>
				<verse number="4">佢等講：「舌乸係𠊎等得勝个武器； 嘴係𠊎等个，麼人管得到呢？」</verse>
				<verse number="5">總係，上主講：「這下，𠊎愛䟘起來！ 因為該兜軟弱个人受到壓迫， 該兜窮苦人噌聲透大氣； 𠊎愛救佢等脫離迫佢等个人 。」</verse>
				<verse number="6">上主个應許最真實，全無缺點， 像火爐中煉過七擺个銀恁純。</verse>
				<verse number="7">邪惡人四處橫打直過； 下流个人反轉受尊重。 上主啊，你一定會保護𠊎等， 救𠊎等永遠脫離這世代个人。</verse>
				<verse number="8"></verse>
			</chapter>
			<chapter number="13">
				<verse number="1">上主啊，你毋記得𠊎愛到幾時呢？愛到永遠係麼？ 你揞等面毋搭𠊎愛到幾時呢？</verse>
				<verse number="2">𠊎忍氣吞聲，日夜憂愁愛到幾時呢？ 仇敵高高在上贏過𠊎，愛到幾時呢？</verse>
				<verse number="3">上主 — 𠊎个上帝啊，求你看顧𠊎，應𠊎； 求你使𠊎重見光明，免得睡死掉去。</verse>
				<verse number="4">莫俾仇敵對𠊎講： 「𠊎贏過佢了！」 莫俾𠊎个敵人因為𠊎橫落去歡喜。</verse>
				<verse number="5">總講，𠊎倚靠你不變个慈愛； 𠊎个心因為你个拯救會快樂。</verse>
				<verse number="6">𠊎愛唱歌頌讚上主， 因為佢大施恩，好款待𠊎。</verse>
			</chapter>
			<chapter number="14">
				<verse number="1">戇人心內講： 「無上帝！」 佢等盡腐敗，專門做可惡个事； 佢等無一儕行善。</verse>
				<verse number="2">上主對天頂看世間人， 愛看敢有明理个人， 有尋求上帝个人麼。</verse>
				<verse number="3">總係，佢等全部偏走， 攏總共樣腐敗。 佢等無人行善， 連一個乜無。</verse>
				<verse number="4">上主講：「做壞事个人樣般恁無智識？ 佢等吞食𠊎个子民，就像食飯一樣； 佢等從來毋識求問𠊎。」</verse>
				<verse number="5">總講，佢等會驚到愊愊掣， 因為上帝同義人共下。</verse>
				<verse number="6">你等壞人想害窮苦人个計劃失敗； 總係上主做佢个避難所。</verse>
				<verse number="7">願 以色列 个拯救對 錫安 出來！ 上主回復佢子民个產業該時， 雅各 个子孫愛大歡喜， 以色列 个人民愛快樂。</verse>
			</chapter>
			<chapter number="15">
				<verse number="1">上主啊，麼人做得入你个聖殿 ？ 麼人做得住在你个聖山？</verse>
				<verse number="2">就係行為正直， 做事公義个人。 佢講話誠實，心口合一，</verse>
				<verse number="3">舌乸也毋會譭謗別人。 佢毋會壞款待朋友， 毋會生話中傷鄰舍。</verse>
				<verse number="4">佢藐視犯罪作惡个， 尊重敬畏上主个人。 佢遵守自家所發个誓， 因為恁樣食虧也甘願。</verse>
				<verse number="5">佢借錢給人，毋收人个利息； 毋被人收買來害無罪个人。 行這兜事个人永遠企在在。</verse>
			</chapter>
			<chapter number="16">
				<verse number="1">上帝啊，求你保護𠊎， 因為𠊎倚靠你。</verse>
				<verse number="2">𠊎對上主講：「你係𠊎个主； 你係𠊎一切福氣个源頭。」</verse>
				<verse number="3">上主忠心个子民係樣般个高貴啊！ 同佢等共下係𠊎最歡喜个事。</verse>
				<verse number="4">服事別个神明个人， 反轉惹到無限个災禍； 𠊎一定無愛參加佢等个獻祭， 一定毋拜佢等个神明。</verse>
				<verse number="5">上主啊，你係𠊎个產業、𠊎个福杯； 𠊎个命運在你个手中。</verse>
				<verse number="6">你用索仔量給𠊎个田全部係好田； 𠊎係樣般合意你所賜个產業！</verse>
				<verse number="7">𠊎頌讚上主，因為佢指導𠊎， 暗晡時，𠊎个良心也提醒𠊎。</verse>
				<verse number="8">𠊎常常有上主在𠊎面前； 因為佢在𠊎个塍頭，𠊎就毋會搖動。</verse>
				<verse number="9">所以，𠊎个心歡喜，𠊎个靈快樂； 𠊎个身體安然自在；</verse>
				<verse number="10">因為你毋會俾𠊎落陰間， 也毋會俾你忠心个僕人下陰府。</verse>
				<verse number="11">你會指示𠊎生命个路。 在你面前𠊎有滿足个喜樂； 在你右手𠊎有永遠个幸福。</verse>
			</chapter>
			<chapter number="17">
				<verse number="1">上主啊，求你垂聽𠊎要求公義个呼聲！ 求你留心聽𠊎个哀求； 求你聽𠊎誠心个祈禱！</verse>
				<verse number="2">願你宣判𠊎做無罪； 願你个目珠看顧正直。</verse>
				<verse number="3">你試驗𠊎个內心， 暗晡時也鑒察𠊎； 你盡徹底考驗𠊎， 總係尋無麼介壞念頭。 𠊎識立志毋俾嘴犯罪；</verse>
				<verse number="4">𠊎行事為人照你个教訓， 遠離強暴人所行个道路。</verse>
				<verse number="5">𠊎一直行你所指定个道路； 𠊎个腳步也從來毋識走趲。</verse>
				<verse number="6">上帝啊，𠊎求你，因為你會應𠊎； 求你耳公側側，來聽𠊎个祈禱。</verse>
				<verse number="7">求你顯出奇妙个慈愛， 伸你个右手來拯救𠊎； 囥在你底背避難个人， 就能脫離仇敵个攻擊。</verse>
				<verse number="8">求你保護𠊎，像保護目珠仁； 將𠊎囥在你翼胛个陰影下，</verse>
				<verse number="9">俾𠊎脫離該兜壞人个攻擊。 仇敵圍困𠊎，想愛害死𠊎；</verse>
				<verse number="10">佢等个心盡硬，無憐憫； 佢等講話驕傲。</verse>
				<verse number="11">無論閃去㖠位，佢等還係圍困𠊎； 佢等目瞋瞋，想愛將𠊎㩳橫落去。</verse>
				<verse number="12">像獅仔一樣，佢等想愛將𠊎扯爛， 像少壯獅仔，在暗暗个所在埋伏。</verse>
				<verse number="13">上主啊，䟘起來，當面制伏佢等！ 求你用你个劍救𠊎脫離壞人。</verse>
				<verse number="14">求你用你个大權能來拯救𠊎， 俾𠊎脫離該兜今生富足个人。 求你用大災難來責罰該兜人； 俾佢等个子女共樣受盡刑罰， 連佢等个子孫也承到屙糟災 。</verse>
				<verse number="15">因為𠊎正直，𠊎一定會有好朝見你个面； 𠊎一睡醒，你个同在就會使𠊎心滿意足。</verse>
			</chapter>
			<chapter number="18">
				<verse number="1">上主，𠊎敬愛你！ 你係𠊎个力量！</verse>
				<verse number="2">上主係𠊎个巖石，𠊎个城堡，𠊎个救主； 𠊎个上帝係𠊎个磐石，𠊎避難个所在； 佢係𠊎个盾牌，拯救个角，㧯要塞。</verse>
				<verse number="3">𠊎求喊應當受讚美个上主， 𠊎就得拯救脫離𠊎个仇敵。</verse>
				<verse number="4">死亡个絞索圍等𠊎； 毀滅个急流沖等𠊎。</verse>
				<verse number="5">陰間个絞索纏等𠊎； 死亡个羅網揜過來。</verse>
				<verse number="6">在急難中𠊎求喊上主； 𠊎求𠊎个上帝拯救𠊎。 佢在佢个聖殿肚聽到𠊎个聲； 𠊎求喊个聲音傳入佢个耳公。</verse>
				<verse number="7">該時，就有大地動； 群山个根基搖動， 因為上帝大發譴！</verse>
				<verse number="8">佢个鼻公有煙衝等出來， 嘴歕出烈火㧯𤏸等个火炭。</verse>
				<verse number="9">佢打開天，親自降臨； 有賁賁个烏雲在佢个腳下。</verse>
				<verse number="10">佢騎等基路伯來飛， 藉風个翼胛飛盡遽。</verse>
				<verse number="11">佢用烏暗像布篷遮等自家； 有盡賁个雲㧯水氣圍等佢；</verse>
				<verse number="12">冰雹㧯𥍉爧對佢面前个榮光出來， 穿過賁賁个烏雲射出來。</verse>
				<verse number="13">上主對天頂打雷公； 至高者發出佢个聲 。</verse>
				<verse number="14">佢射箭逐走佢个仇敵； 佢緊𥍉爧使佢等亂掉。</verse>
				<verse number="15">上主啊，你一下大聲咄， 鼻公个氣一下歕出來， 水就分開，海底現出來， 大地个根基也露出來。</verse>
				<verse number="16">上主對頂高伸手捉等𠊎， 將𠊎對大水中間拉出來。</verse>
				<verse number="17">佢救𠊎脫離盡兇个對敵， 脫離一切怨恨𠊎个敵人； 因為佢等全部比𠊎較強。</verse>
				<verse number="18">𠊎堵到災難个時節， 當日佢等就來攻擊； 好得有上主保護𠊎。</verse>
				<verse number="19">佢帶𠊎到當闊个所在； 佢救𠊎，因為佢歡喜𠊎。</verse>
				<verse number="20">上主照𠊎个正直報答𠊎， 佢賜福給𠊎，因為𠊎雙手淨浰。</verse>
				<verse number="21">𠊎遵行上主个道路， 毋識悖逆𠊎个上帝。</verse>
				<verse number="22">𠊎遵行佢一切个法律； 也毋識違背佢个命令。</verse>
				<verse number="23">𠊎在佢面前無污點； 𠊎有遠遠離開罪惡。</verse>
				<verse number="24">所以上主照𠊎个正直報答𠊎， 因為佢看𠊎做雙手淨浰个人。</verse>
				<verse number="25">上主啊，對信實个人，你顯明你个信實； 對無污點个，你顯明你个完全。</verse>
				<verse number="26">對純潔个人，你顯明你个純潔； 對詭詐个人，你顯明你个精明。</verse>
				<verse number="27">你拯救謙卑个人； 你降低驕傲个人。</verse>
				<verse number="28">上主 — 𠊎个上帝啊， 係你使𠊎个燈𤏸起來， 將𠊎个烏暗變做光明！</verse>
				<verse number="29">同𠊎共下攻入敵人軍隊个就係你； 同𠊎共下跳過圍牆个係𠊎个上帝！</verse>
				<verse number="30">論到上帝， 佢所行个極圓滿！ 佢講个話最真實！ 一切求佢庇佑个人， 佢就做佢等个盾牌。</verse>
				<verse number="31">除了上主，無別个上帝； 唯有上帝係保護𠊎等个磐石。</verse>
				<verse number="32">係上帝賜給𠊎力量； 佢使𠊎个道路平安。</verse>
				<verse number="33">佢使𠊎个腳像鹿仔个腳， 使𠊎在高山頂企到在在。</verse>
				<verse number="34">佢訓練𠊎个手，俾𠊎知愛樣般相㓾， 使𠊎个手骨拉得開銅弓。</verse>
				<verse number="35">上主啊，你賜給𠊎得救个盾牌； 你用右手來支持𠊎； 你庇佑𠊎，使𠊎興旺。</verse>
				<verse number="36">你使𠊎所行个路變闊， 使𠊎个腳毋會打盪溜。</verse>
				<verse number="37">𠊎追敵人个時，一定追得到， 無打贏佢等，𠊎絕對毋轉頭。</verse>
				<verse number="38">𠊎將佢等打到䟘毋起來； 佢等全部橫在𠊎个腳下。</verse>
				<verse number="39">你賜𠊎相㓾个力量； 使𠊎个敵人降服𠊎。</verse>
				<verse number="40">你使𠊎个對敵翻轉身逃走； 𠊎將該兜怨恨𠊎个人消滅。</verse>
				<verse number="41">佢等喊救命，總係無人來救佢等； 佢等求喊上主，總係佢毋應佢等。</verse>
				<verse number="42">𠊎打碎佢等，像塵灰被風吹散； 𠊎抔走佢等，像掃街項个泥糜。</verse>
				<verse number="43">百姓背叛，你拯救𠊎， 你立𠊎做列國个頭； 連𠊎毋識个人民也服事𠊎。</verse>
				<verse number="44">佢等一聽到係𠊎就歸順； 外族人降服在𠊎个面前。</verse>
				<verse number="45">佢等个勇氣毋見掉淨淨， 愊愊掣走出佢等个營房。</verse>
				<verse number="46">上主係永生个！ 愛頌讚𠊎个磐石！ 上帝係𠊎个拯救者！ 愛傳揚佢个偉大！</verse>
				<verse number="47">佢就係為𠊎伸冤个上帝； 使萬族降服𠊎个就係佢，</verse>
				<verse number="48">救𠊎脫離敵人个也係佢。 上主啊，你使𠊎贏過對敵； 你拯救𠊎脫離強暴个人。</verse>
				<verse number="49">所以，𠊎愛在列國中讚美你； 𠊎愛吟詩唱歌頌讚你个名。</verse>
				<verse number="50">上主使佢所立个王得到大勝利； 佢賜不變个慈愛給佢膏油所設立个， 就係給 大衛 㧯佢个後代， 一直到永遠。</verse>
			</chapter>
			<chapter number="19">
				<verse number="1">普天傳揚上帝个榮光； 穹蒼顯明佢手所做个。</verse>
				<verse number="2">日日講起， 夜夜傳揚；</verse>
				<verse number="3">毋使言語， 毋使音響。</verse>
				<verse number="4">它兜个信息 傳到人間； 它兜个話語傳遍天下。 上帝在天頂為到日頭搭帳篷；</verse>
				<verse number="5">日頭像新郎歡歡喜喜出洞房， 又係像勇士快快樂樂走相逐。</verse>
				<verse number="6">它對天个這片出來， 𫟧到天个該片去； 萬物全部得到它个熱氣。</verse>
				<verse number="7">上主个教示完全， 會使人个生命換新； 上主个法令信實， 會使單純人得到智慧；</verse>
				<verse number="8">上主个教訓公正， 會使人个心有快樂； 上主个誡命清明， 會使人个目珠光明。</verse>
				<verse number="9">敬畏上主係純潔个事 ， 永遠存留； 上主个法則正直， 攏總公當。</verse>
				<verse number="10">這兜比金仔較寶貴， 贏過上等个金仔； 比蜂糖較甜， 贏過最純个蜂糖。</verse>
				<verse number="11">這兜使你个僕人明白 ； 小心遵守，好處無限。</verse>
				<verse number="12">總係麼人會看到自家个毋著啊？ 求你赦免𠊎無意中所犯个過失。</verse>
				<verse number="13">求你使你个僕人莫故意犯罪， 莫俾罪惡控制𠊎。 恁樣，𠊎正會做一個無好嫌个人， 免得犯悖逆个大罪。</verse>
				<verse number="14">上主 — 𠊎个磐石，𠊎个救贖者啊， 願𠊎个言行思想得到你个鑒納。</verse>
			</chapter>
			<chapter number="20">
				<verse number="1">願上主在你患難該日應你 ！ 願 雅各 个上帝保護你！</verse>
				<verse number="2">願佢對佢个聖所幫助你！ 願佢對 錫安 山頂扶持你！</verse>
				<verse number="3">願佢紀念你所獻个供物， 接納你个燒化祭。</verse>
				<verse number="4">願佢成全你个心願， 成就你一切个計劃。</verse>
				<verse number="5">𠊎等就會為你个勝利歡呼， 奉𠊎等上帝个名擎起得勝大旗。 願上主成全你一切所求个！</verse>
				<verse number="6">這下，𠊎知： 上主愛賜勝利給佢設立个王； 佢愛對佢至聖个天頂答應佢， 用佢个大能力使佢得到勝利。</verse>
				<verse number="7">有兜人倚靠戰車，有兜人倚靠馬； 總係𠊎等信靠上主 — 𠊎等个上帝！</verse>
				<verse number="8">佢等全部會跪下來，伏到貼貼； 總係𠊎等會䟘起來，企到在在！</verse>
				<verse number="9">上主啊，求你使王得到勝利； 𠊎等求喊个時，求你應𠊎等 ！</verse>
			</chapter>
			<chapter number="21">
				<verse number="1">上主啊，王因為你賜个力量歡喜； 佢因為你所賜个勝利非常快樂。</verse>
				<verse number="2">佢个心願，你為佢成全； 嘴所求个，你也答應佢。</verse>
				<verse number="3">你賜給佢極大个幸福接待佢， 又將金冕旒戴在佢个頭那頂。</verse>
				<verse number="4">佢對你求壽年，你就賜給佢； 你使佢長壽，延到永永遠遠。</verse>
				<verse number="5">佢因為你所賜个勝利滿有榮光； 你又將尊榮㧯威嚴加給佢。</verse>
				<verse number="6">你賜佢个大福氣無窮無盡； 你㧯佢同在使佢充滿快樂。</verse>
				<verse number="7">因為王有信靠上主； 通過至高者个慈愛， 佢个王權毋會搖動。</verse>
				<verse number="8">你愛出手對付你一切个仇敵； 你个右手愛捉該兜恨你个人。</verse>
				<verse number="9">你一出現，愛使佢等像落在火爐底背。 上主愛大發譴來吞滅佢等； 烈火愛將佢等燒到淨淨。</verse>
				<verse number="10">你愛對地上滅盡佢等个子孫； 你愛對人間㓾掉佢等个後代。</verse>
				<verse number="11">就算仇敵設詭計愛對付你， 佢等个陰謀也無可能成功。</verse>
				<verse number="12">你一拉弓對準佢等个頭那， 佢等就會轉身走到淨淨。</verse>
				<verse number="13">上主啊，願你顯明你个力量！ 𠊎等愛吟詩歌頌你个權能。</verse>
			</chapter>
			<chapter number="22">
				<verse number="1">𠊎个上帝！𠊎个上帝！ 你做麼介放掉𠊎？ 做麼介離開恁遠， 無救𠊎，無聽𠊎个噌聲？</verse>
				<verse number="2">𠊎个上帝啊，𠊎日時頭求喊，你毋應； 𠊎暗晡時緊求，也得毋到安息。</verse>
				<verse number="3">總係，你係至聖个，係坐寶座个； 以色列 人頌讚个就係你 。</verse>
				<verse number="4">你就係𠊎等祖先所信靠个； 佢等信靠你，你就拯救佢等。</verse>
				<verse number="5">佢等求喊你，就得到拯救； 佢等信靠你，從來無失望。</verse>
				<verse number="6">總係，𠊎像蟲，無像人， 被人侮辱藐視。</verse>
				<verse number="7">看到𠊎个人全部嘲謔𠊎； 佢等笑到嘴弛弛，搖頭講：</verse>
				<verse number="8">「佢倚靠上主，看上主樣般拯救佢！ 上主既然合意佢，看佢樣般救佢！」</verse>
				<verse number="9">上主啊，係你使𠊎平安出母胎个啊； 還在阿姆个懷中，你就做𠊎个倚靠。</verse>
				<verse number="10">𠊎一出世，就交在你个手中； 離開母胎，你就係𠊎个上帝。</verse>
				<verse number="11">求你毋好離開𠊎恁遠！ 災難來到，無人幫助𠊎。</verse>
				<verse number="12">盡多敵人像牛包圍𠊎， 像 巴珊 大力个牛牯圍困𠊎。</verse>
				<verse number="13">佢等像吼吼滾个獅仔， 嘴擘到大大想愛吞滅。</verse>
				<verse number="14">𠊎像水潑在泥下，軟濟濟； 𠊎个骨頭像係𢫫腕一樣； 心肝像蠟，在肚笥內溶掉。</verse>
				<verse number="15">𠊎个精力像泥罐燥掉； 舌乸黏在上齶。 你由在𠊎橫在泥下等死。</verse>
				<verse number="16">壞人湊等來圍困𠊎， 像癲狗歸群圍等𠊎； 佢等將𠊎个手腳扯裂 ；</verse>
				<verse number="17">𠊎算得到自家个骨頭。 仇敵目瞋瞋看𠊎；</verse>
				<verse number="18">佢等分𠊎个外衫， 為𠊎个內衫抽籤。</verse>
				<verse number="19">上主啊，求你毋好離開𠊎恁遠！ 𠊎个救主啊，求你遽遽來幫助𠊎！</verse>
				<verse number="20">求你救𠊎个命脫離刀劍； 俾𠊎脫離該群癲狗个轄制。</verse>
				<verse number="21">求你救𠊎脫離這兜獅仔个嘴； 你已經救𠊎 脫離野牛个角！</verse>
				<verse number="22">𠊎愛對𠊎个同胞傳揚你个名； 𠊎愛在佢等个聚會中讚美你：</verse>
				<verse number="23">敬畏上主个啊，你等愛讚美佢！ 雅各 个後代啊，你等愛榮光佢！ 以色列 人民啊，你等愛敬畏佢！</verse>
				<verse number="24">因為佢無藐視窮苦人， 無毋記得佢个困苦； 佢無揞等面毋搭佢， 反轉應答佢个求喊。</verse>
				<verse number="25">𠊎愛在全會眾面前頌讚你个作為， 在敬畏你个人面前還𠊎所許个願。</verse>
				<verse number="26">願窮苦个人有好食飽， 尋求上主个人讚美佢。 願你等永遠心存希望！</verse>
				<verse number="27">願地上个萬民攏總紀念上主，歸順佢； 願萬邦萬國所有个宗族全部跪拜佢。</verse>
				<verse number="28">因為王權屬於上主； 佢係萬國个統治者。</verse>
				<verse number="29">地上所有富足个人愛食飽又跪拜佢； 所有愛歸土个，就係性命難保个人也愛伏拜佢。</verse>
				<verse number="30">世世代代个人愛事奉佢， 也愛將主个事傳給佢等个後代。</verse>
				<verse number="31">佢等愛繼續傳揚佢个拯救， 使子子孫孫全部聽到佢所行个。</verse>
			</chapter>
			<chapter number="23">
				<verse number="1">上主係𠊎个牧者； 𠊎無欠麼介。</verse>
				<verse number="2">佢俾𠊎在青草地上休息， 帶𠊎到安靜个水邊。</verse>
				<verse number="3">佢使𠊎个生命換新； 因為佢个名， 帶𠊎行正直个路。</verse>
				<verse number="4">雖然行過死蔭个山壢， 𠊎也毋驚災害， 因為你㧯𠊎同在。 你用牧杖引導𠊎， 用棍仔保護𠊎。</verse>
				<verse number="5">在𠊎敵人个面前， 你為𠊎辦桌席； 你款待𠊎像貴賓， 為𠊎斟滿𠊎个杯仔 。</verse>
				<verse number="6">𠊎確信，𠊎一生人會享受你个恩惠㧯不變个慈愛； 𠊎愛永遠住在上主个聖殿中。</verse>
			</chapter>
			<chapter number="24">
				<verse number="1">世界㧯其中个一切， 全部係上主个； 大地㧯地上个萬物， 也係佢个。</verse>
				<verse number="2">佢將大地建立在深海个頂高， 將地个根基安在深水个底背。</verse>
				<verse number="3">麼人做得上去上主个山？ 麼人做得進入佢个聖殿？</verse>
				<verse number="4">就係雙手清潔，心肝淨浰， 無拜偶像，發誓無做假个人。</verse>
				<verse number="5">這種人，上主愛賜福給佢； 拯救佢个上帝愛判佢無罪。</verse>
				<verse number="6">這兜人愛來朝見上主， 來到 雅各 个上帝面前。</verse>
				<verse number="7">城門啊，打開來！ 永久个門啊，打開來！ 榮光个君王愛入來！</verse>
				<verse number="8">這榮光个君王係麼人？ 佢就係堅強有大能力个上主， 就係在戰場逐擺打贏个上主！</verse>
				<verse number="9">城門啊，打開來！ 永久个門啊，打開來！ 榮光个君王愛入來！</verse>
				<verse number="10">這榮光个君王係麼人？ 上主 — 萬軍个元帥， 佢就係榮光个君王！</verse>
			</chapter>
			<chapter number="25">
				<verse number="1">上主啊，𠊎个心仰望你！</verse>
				<verse number="2">𠊎个上帝啊，𠊎倚靠你！ 求你莫使𠊎堵到見笑， 莫俾仇敵贏𠊎來誇口。</verse>
				<verse number="3">凡仰望你个確實毋會見笑； 無緣無故悖逆你个會失盡面子。</verse>
				<verse number="4">上主啊，求你將你个道路指示𠊎， 將你个細路教示𠊎。</verse>
				<verse number="5">求你用你个真道帶領𠊎，教示𠊎， 因為你係拯救𠊎个上帝； 𠊎日夜所仰望个就係你。</verse>
				<verse number="6">上主啊，莫毋記得你个痛惜㧯不變个慈愛， 因為該兜係你對古早以來就有个。</verse>
				<verse number="7">求你莫記等𠊎後生个時所犯个罪㧯過失； 上主啊，求你因為你个恩惠，用你个慈愛顧念𠊎！</verse>
				<verse number="8">上主係至善个、最正直个， 所以佢指示罪人應當行个路。</verse>
				<verse number="9">佢帶領謙卑个人行正路， 將佢自家个旨意教佢等。</verse>
				<verse number="10">所有遵守佢个約㧯法令个， 上主用慈愛㧯信實帶領佢等。</verse>
				<verse number="11">上主啊，雖然𠊎个罪惡非常大， 總係，因為你个名，求你赦免𠊎。</verse>
				<verse number="12">麼人敬畏上主， 上主就指示佢應當擇个路。</verse>
				<verse number="13">佢一生人會享受福氣； 佢个子孫會承接佢个土地。</verse>
				<verse number="14">上主同敬畏佢个人親密交通； 佢使佢等認識佢个約。</verse>
				<verse number="15">𠊎个目珠一直仰望上主； 只有佢能救𠊎脫離羅網。</verse>
				<verse number="16">上主啊，轉身來憐憫𠊎， 因為𠊎又孤單又困苦。</verse>
				<verse number="17">𠊎心中个憂愁緊來緊多； 求你救𠊎脫離這兜患難。</verse>
				<verse number="18">求你看顧𠊎个艱難痛苦； 求你赦免𠊎一切个罪過。</verse>
				<verse number="19">你看，𠊎个仇敵有恁多！ 你看，佢等怨恨𠊎恁深！</verse>
				<verse number="20">求你保護𠊎个性命， 求你拯救𠊎； 求你莫使𠊎見笑， 因為𠊎倚靠你。</verse>
				<verse number="21">願誠實㧯正直做𠊎个保護， 因為𠊎仰望你！</verse>
				<verse number="22">上帝啊，求你救贖 以色列 ， 使佢等脫離一切个患難！</verse>
			</chapter>
			<chapter number="26">
				<verse number="1">上主啊，求你宣判𠊎無罪， 因為𠊎做人正直； 𠊎倚靠上主，就毋驚跌倒。</verse>
				<verse number="2">上主啊，求你鑒察𠊎，考驗𠊎； 求你察驗𠊎个心思㧯意念。</verse>
				<verse number="3">你不變个慈愛常在𠊎面前； 𠊎一直照你个信實來行 。</verse>
				<verse number="4">𠊎毋同虛虛假假个人來往， 也毋同該兜假好个人做伴。</verse>
				<verse number="5">𠊎盡惱邪惡人个集會， 也無愛同佢等坐共下。</verse>
				<verse number="6">上主啊，𠊎洗手來表明清白， 然後正𫟧等你个祭壇來行；</verse>
				<verse number="7">𠊎大聲唱感謝个詩歌， 講起你一切奇妙个作為。</verse>
				<verse number="8">上主啊，𠊎盡愛你住个聖殿， 就係你榮光顯現个所在。</verse>
				<verse number="9">求你莫將𠊎个靈魂同罪人共下除掉； 莫使𠊎个性命同好㓾人个共下滅亡。</verse>
				<verse number="10">佢等个行事充滿詭詐， 又常常接受人个收買。</verse>
				<verse number="11">總係，𠊎照正直來行； 求你救贖𠊎，憐憫𠊎！</verse>
				<verse number="12">𠊎个腳企在平平个地方； 𠊎愛在公共个聚會中頌讚上主！</verse>
			</chapter>
			<chapter number="27">
				<verse number="1">上主係𠊎个光，𠊎个拯救； 𠊎還愛驚麼人？ 上主係𠊎生命个保護者； 𠊎有麼介好驚啊？</verse>
				<verse number="2">壞人，就係𠊎个仇敵，攻擊𠊎，想愛害死𠊎个時節， 自家反轉跌倒橫落去。</verse>
				<verse number="3">就係有千軍萬馬圍困𠊎， 𠊎个心也毋驚； 就算發動戰爭攻擊𠊎， 𠊎還係靠主安穩自在。</verse>
				<verse number="4">𠊎對上主求一項事， 只有這項事係𠊎个願望： 就係一生人住在上主个屋下， 仰望上主个榮光、美善， 在聖殿底背尋求佢个帶領。</verse>
				<verse number="5">在患難个時節，佢會保佑𠊎， 將𠊎安安全全囥在佢个聖帳篷肚， 俾𠊎穩穩當當高高企在磐石面頂。</verse>
				<verse number="6">恁樣，𠊎一定會得勝，贏過𠊎周圍个仇敵。 𠊎愛在佢个聖帳篷歡歡喜喜來獻祭； 𠊎愛唱歌讚美上主！</verse>
				<verse number="7">上主啊，求你聽𠊎个祈求！ 求你憐憫𠊎，應𠊎！</verse>
				<verse number="8">你識對𠊎講：「愛仰望𠊎！」 上主啊，你就係𠊎所仰望个！</verse>
				<verse number="9">這下，求你毋好揞等面毋搭𠊎！ 求你毋好發譴逐你个僕人走！ 你一直係𠊎个幫助。 拯救𠊎个上帝啊， 求你毋好離開𠊎，毋好放掉𠊎！</verse>
				<verse number="10">就算𠊎个爺𡟓放掉𠊎， 上主還愛照顧𠊎。</verse>
				<verse number="11">上主啊，求你指示𠊎應當行个路； 因為有盡多敵人想愛害𠊎， 求你帶𠊎行平安个路。</verse>
				<verse number="12">敵人做假見證害𠊎，恐嚇𠊎； 求你毋好俾𠊎落在佢等个手中。</verse>
				<verse number="13">𠊎確信，在有生之日， 𠊎會看到上主賞賜个恩惠。</verse>
				<verse number="14">愛仰望上主！ 愛剛強壯膽！ 愛仰望上主！</verse>
			</chapter>
			<chapter number="28">
				<verse number="1">上主啊，𠊎求喊个就係你！ 𠊎个磐石啊，求你莫塞等耳公毋聽𠊎！ 你若係繼續恬恬毋搭𠊎， 𠊎會像別人共樣落陰間。</verse>
				<verse number="2">求你聽𠊎个求喊來幫助𠊎！ 𠊎向你个至聖所擎手祈禱， 該時，求你憐憫𠊎，聽𠊎懇求！</verse>
				<verse number="3">莫將𠊎同壞人共下定罪， 抑係同作惡个人共下除掉； 佢等㧯鄰舍講話盡和氣， 總係佢等个心充滿奸詐。</verse>
				<verse number="4">求你責罰佢等个行為， 照佢等个邪惡對待佢等； 求你照佢等雙手所做个， 照佢等應得个報應佢等。</verse>
				<verse number="5">因為佢等藐視上主个作為， 又看輕佢个手所做个工作； 所以，上主愛毀壞佢等， 使佢等永遠興毋起來。</verse>
				<verse number="6">上主係應當得到頌讚个， 因為佢聽𠊎求憐憫个聲。</verse>
				<verse number="7">上主係𠊎个力量，𠊎个盾牌； 𠊎全心信靠佢，就得到幫助。 𠊎个心歡喜快樂， 𠊎愛唱歌感謝佢！</verse>
				<verse number="8">上主係佢子民个力量； 佢庇佑拯救佢所選立个王。</verse>
				<verse number="9">上主啊，拯救你个子民， 賜福給屬你自家个人。 求你牧養佢等， 扶持佢等，直到永遠。</verse>
			</chapter>
			<chapter number="29">
				<verse number="1">神个眾子啊 ，你等愛頌讚上主， 愛頌讚上主个榮光㧯大權能！</verse>
				<verse number="2">你等愛歸榮光給上主个尊名； 你等愛跪拜聖潔威嚴个上主 。</verse>
				<verse number="3">上主个聲音傳遍海洋； 榮光个上帝響雷公， 上主个聲音響遍大海。</verse>
				<verse number="4">上主个聲音大有能力； 上主个聲音滿有威嚴。</verse>
				<verse number="5">上主个聲音將香柏樹打斷掉； 連 黎巴嫩 个香柏樹被上主打碎掉。</verse>
				<verse number="6">佢使 黎巴嫩 像細牛緊跳， 使 黑門 山像野牛牯緊跳。</verse>
				<verse number="7">上主个聲音𥍉出火光。</verse>
				<verse number="8">上主个聲音震動曠野； 上主搖動 加底斯 个曠野。</verse>
				<verse number="9">上主个聲音使橡樹緊顫 ； 樹仔也落葉，歸樹林光光。 在佢聖殿中个，全部喊講： 「榮光歸給上主！」</verse>
				<verse number="10">做大水个時，上主坐等做王； 上主坐等做王，到永永遠遠。</verse>
				<verse number="11">願上主賜能力給佢个子民！ 願上主用平安賜福給佢等！</verse>
			</chapter>
			<chapter number="30">
				<verse number="1">上主啊，𠊎愛稱你做至高个， 因為你識對深淵救𠊎出來， 毋俾敵人對𠊎誇口。</verse>
				<verse number="2">上主 — 𠊎个上帝啊， 𠊎求你幫助，你就醫好𠊎。</verse>
				<verse number="3">上主啊，你識將𠊎對陰間救上來， 又恢復𠊎个生命，毋使落陰府 。</verse>
				<verse number="4">上主忠心个子民啊，愛歌頌佢； 你等愛感謝至聖者个聖名！</verse>
				<verse number="5">因為，佢个怒氣一下就過掉； 總係，佢个恩典透到一生人。 雖然歸暗晡目汁濫泔， 天一光就有歡喜快樂。</verse>
				<verse number="6">𠊎識心神在在講： 「𠊎永遠毋會搖動。」</verse>
				<verse number="7">上主啊，因為你識恩待𠊎， 你就使𠊎像高山企到在在； 總係，你揞等面毋搭𠊎， 𠊎就愊愊掣無葛無煞。</verse>
				<verse number="8">上主啊，𠊎求喊你； 𠊎懇求你幫助，講：</verse>
				<verse number="9">「𠊎流血到死有麼介好處呢？ 𠊎入墳墓敢有較好嗎？ 變做泥个人敢還會頌讚你？ 死人敢會傳揚你个信實嗎？</verse>
				<verse number="10">上主啊，聽𠊎求，憐憫𠊎！ 上主啊，求你來幫助𠊎！」</verse>
				<verse number="11">你將𠊎个悲傷變做歡喜跳舞； 你使𠊎脫掉麻衫，著快樂靚衫。</verse>
				<verse number="12">恁樣，𠊎毋敢恬恬， 𠊎愛唱歌頌讚你； 上主 — 𠊎个上帝啊， 𠊎愛永遠感謝你！</verse>
			</chapter>
			<chapter number="31">
				<verse number="1">上主啊，𠊎尋求你个庇佑； 求你永遠莫俾𠊎見笑。 你係公義个上帝； 求你一定愛救𠊎！</verse>
				<verse number="2">求你聽𠊎祈求， 遽遽來拯救𠊎！ 求你做𠊎个磐石來保護𠊎， 求你做𠊎个城堡來拯救𠊎。</verse>
				<verse number="3">你係𠊎个磐石，𠊎个城堡； 求你因為你个名帶領𠊎。</verse>
				<verse number="4">救𠊎脫離害𠊎个羅網， 因為你係𠊎个避難所。</verse>
				<verse number="5">𠊎將𠊎个靈魂交在你个手中； 上主 — 信實个上帝啊，你係一直救贖𠊎个。</verse>
				<verse number="6">𠊎惱死該兜拜假神个人； 總係𠊎的確信靠上主。</verse>
				<verse number="7">因為你不變个慈愛， 𠊎愛歡喜快樂。 你看到𠊎个痛苦， 知𠊎心神个艱難。</verse>
				<verse number="8">你毋識俾𠊎落在仇敵个手中； 你使𠊎企在安全又闊个地方。</verse>
				<verse number="9">上主啊，求你憐憫𠊎， 因為𠊎在患難中； 𠊎噭到目珠腫腫， 身體靈魂也枯燥。</verse>
				<verse number="10">𠊎个生命緊愁緊弱； 𠊎个壽年緊噌緊少。 患難 害𠊎緊來緊無元氣； 𠊎个骨頭也緊來緊硬鉸。</verse>
				<verse number="11">該兜仇敵全部侮辱𠊎， 連隔壁鄰舍也嘲謔𠊎； 知己个朋友盡驚見𠊎， 在路上堵到𠊎就閃走。</verse>
				<verse number="12">𠊎像已經過身个人， 無人記得𠊎，顧念𠊎； 𠊎就像打爛个缶仔。</verse>
				<verse number="13">𠊎聽到盡多譭謗个話， 周圍充滿得人驚个聲。 佢等共下參詳愛害𠊎， 陰謀愛收掉𠊎个性命。</verse>
				<verse number="14">總係，上主啊，𠊎信靠你； 𠊎講：「你係𠊎个上帝！」</verse>
				<verse number="15">𠊎一生人个事完全在你个手中； 求你救𠊎脫離敵人㧯迫害𠊎个人。</verse>
				<verse number="16">求你个面光照你个僕人； 求你照你不變个慈愛拯救𠊎。</verse>
				<verse number="17">上主啊，𠊎已經對你求喊； 求你毋好使𠊎堵到見笑。 求你使邪惡个人堵到見笑； 願佢等落陰間，全無話好講。</verse>
				<verse number="18">願你塞等該兜講花撩个人个嘴； 使驕傲、自誇、攻擊義人个恬下來。</verse>
				<verse number="19">你為敬畏你个人所存个， 你為倚靠你个人所行个， 在世間人个面前， 實在好到講毋掉！</verse>
				<verse number="20">你將佢等囥在你面前安全个所在， 免得佢等堵到敵人个暗算； 你保守佢等在你个屋肚， 免得佢等被人咒罵。</verse>
				<verse number="21">愛頌讚上主！ 𠊎在城肚被人圍困个時， 佢對𠊎顯出奇妙个慈愛！</verse>
				<verse number="22">上主啊，𠊎心肝著急个時識講： 「𠊎對你个面前被你逐到遠遠」； 總係𠊎一求你幫助， 你就施恩聽𠊎求喊。</verse>
				<verse number="23">上主忠心个子民啊， 你等愛敬愛上主！ 上主保佑對佢誠心个子民， 總係嚴嚴責罰行事驕傲个人。</verse>
				<verse number="24">所有仰望上主个人啊， 你等愛剛強，也愛勇敢！</verse>
			</chapter>
			<chapter number="32">
				<verse number="1">過犯得到原諒、罪惡得到赦免个人， 佢係樣般有福氣啊！</verse>
				<verse number="2">心中無詭詐、無被上主定罪个， 這人實在有福氣噢！</verse>
				<verse number="3">𠊎个嘴合等，毋肯認罪个時節， 因為歸日哀傷，致到骨頭枯燥。</verse>
				<verse number="4">上主啊，你日夜責罰𠊎； 𠊎个氣力消散，像水氣在大熱天燥掉一樣。</verse>
				<verse number="5">然後，𠊎對你承認𠊎个罪， 無再將自家个過失囥等。 𠊎決定：「𠊎愛對上主承認𠊎个過犯」； 你就赦免𠊎所有个罪。</verse>
				<verse number="6">所以，一切敬虔个人， 應當在尋得到你个時 對你祈求； 災難像做大水个時節， 佢正毋會浸到。</verse>
				<verse number="7">你係𠊎个避難所； 你一定會救𠊎脫離災難。 你用得救歡喜个歌聲四面圍等𠊎。</verse>
				<verse number="8">上主講：「𠊎愛教你， 指示你應當行个路； 𠊎愛勸話你，看顧你。</verse>
				<verse number="9">莫戇到像馬抑係像騾仔恁樣， 愛用馬啣鐵㧯嘴籠仔約束牠，正肯順服。」</verse>
				<verse number="10">邪惡人一定會堵到種種个痛苦； 總係，信靠上主个人有不變个慈愛四面圍等佢。</verse>
				<verse number="11">義人啊，愛因為上主所做个來歡喜快樂； 心肝正直个人啊，你等全部愛大聲歡呼。</verse>
			</chapter>
			<chapter number="33">
				<verse number="1">義人啊，你等愛因為上主歡喜唱歌； 正直个人啊，你等頌讚佢係應當个。</verse>
				<verse number="2">愛彈琴感謝上主， 用十弦琴歌頌佢。</verse>
				<verse number="3">愛唱新个詩歌讚美佢； 愛彈到盡好，大聲來唱。</verse>
				<verse number="4">因為上主个話正直； 佢所做个全部信實。</verse>
				<verse number="5">上主歡喜正義㧯公平； 佢不變个慈愛充滿全地。</verse>
				<verse number="6">諸天係通過上主个命令來創造个； 日、月、星辰也係通過佢个話造成个。</verse>
				<verse number="7">佢將海水聚集共下； 佢用大海來做水庫。</verse>
				<verse number="8">願全世界敬畏上主！ 願世間个萬民驚佢！</verse>
				<verse number="9">佢一出聲就有世界； 佢一命令萬有就企在。</verse>
				<verse number="10">上主破壞萬國个陰謀； 佢使萬民个計謀失效。</verse>
				<verse number="11">上主个計劃永遠長存； 佢个旨意萬代不變。</verse>
				<verse number="12">尊上主做上帝个國家實在有福氣！ 佢所揀選歸屬佢个子民真有福氣！</verse>
				<verse number="13">上主對天頂看下來； 佢看到全世界个人。</verse>
				<verse number="14">佢對自家个寶座 看等世間个萬民。</verse>
				<verse number="15">人个心全部係佢造个； 人个行為佢全部鑒察。</verse>
				<verse number="16">君王得勝毋係靠兵刀； 戰士打贏毋係靠力大。</verse>
				<verse number="17">靠戰馬來得勝係妄想； 馬个力大無辦法救人。</verse>
				<verse number="18">上主親眼看顧敬畏佢个人； 佢看顧仰望佢慈愛个人。</verse>
				<verse number="19">佢救佢等，使佢等脫離死亡， 天旱个時，保留佢等个性命。</verse>
				<verse number="20">𠊎等心所仰望个就係上主； 佢幫助𠊎等，做𠊎等个盾牌。</verse>
				<verse number="21">𠊎等个心愛因為佢歡喜， 因為𠊎等信靠佢个聖名。</verse>
				<verse number="22">上主啊，𠊎等仰望你； 願你不變个慈愛㧯𠊎等同在！</verse>
			</chapter>
			<chapter number="34">
				<verse number="1">𠊎愛常常頌讚上主； 𠊎个嘴愛一直讚美佢。</verse>
				<verse number="2">𠊎个心愛因為上主來誇口； 願受迫害个人聽了就歡喜。</verse>
				<verse number="3">來同𠊎共下傳揚上主个偉大； 𠊎等共下來頌讚佢至高个名。</verse>
				<verse number="4">𠊎尋求上主，佢就應𠊎， 救𠊎脫離一切个著驚。</verse>
				<verse number="5">仰望佢个人就有光明； 佢等毋會再滿面見笑。</verse>
				<verse number="6">這困苦人求喊，上主就垂聽， 救佢脫離一切个患難。</verse>
				<verse number="7">上主个使者保佑敬畏佢个人， 在佢等周圍紮營來拯救佢等。</verse>
				<verse number="8">上主个美善你等愛嘗看仔！ 倚靠佢个人實在真有福氣！</verse>
				<verse number="9">上主个聖民啊，愛敬畏上主！ 敬畏佢个人無欠半項。</verse>
				<verse number="10">就係獅仔也有欠缺㧯肚飢个時節， 總係尋求上主个人麼介好處都毋會欠。</verse>
				<verse number="11">後生人啊，你等愛來聽𠊎講！ 𠊎愛教你等樣般敬畏上主。</verse>
				<verse number="12">有人愛惜生命麼？ 追求長壽福樂麼？</verse>
				<verse number="13">莫俾你个舌乸出惡言； 莫俾你个嘴唇講詭詐。</verse>
				<verse number="14">愛棄絕邪惡，做好事； 愛追求和平，煞猛行。</verse>
				<verse number="15">上主个目珠看顧義人； 佢个耳公聽佢等求喊。</verse>
				<verse number="16">上主對做壞事个人變面， 愛對世間除掉佢等个名。</verse>
				<verse number="17">義人求喊上主，佢就聽， 救佢等脫離一切患難。</verse>
				<verse number="18">上主親近灰心失志个； 佢拯救心靈受苦个人。</verse>
				<verse number="19">義人有盡多苦難， 總係上主愛救佢脫離這一切。</verse>
				<verse number="20">上主愛保全佢个骨頭， 連一支也毋會被人打斷。</verse>
				<verse number="21">罪惡會害死邪惡人； 恨義人个愛受責罰。</verse>
				<verse number="22">上主愛救贖佢僕人个性命； 倚靠佢个人全部毋會受責罰。</verse>
			</chapter>
			<chapter number="35">
				<verse number="1">上主啊，求你做𠊎該兜對敵个對敵！ 求你攻擊該兜攻擊𠊎个人！</verse>
				<verse number="2">求你拿等大細个盾牌， 䟘起來幫助𠊎。</verse>
				<verse number="3">求你擎起你个長矛㧯大斧頭， 攻擊該兜追𠊎个人。 求你對𠊎保證講： 「𠊎會救你。」</verse>
				<verse number="4">願想愛收𠊎命个人失望見笑！ 願設計愛害𠊎个人澇潰受侮辱！</verse>
				<verse number="5">上主个使者逐佢等个時， 願佢等像礱糠被風吹散。</verse>
				<verse number="6">上主个使者追佢等个時， 願佢等走个路又暗又滑。</verse>
				<verse number="7">佢等無緣無故設羅網愛捉𠊎； 佢等無緣無故挖陷阱愛害𠊎。</verse>
				<verse number="8">願災難忽然之間臨到佢等； 願佢等被自家个羅網纏到， 跌落自家挖个陷阱來滅亡。</verse>
				<verse number="9">該時，𠊎愛因為上主來歡喜， 因為佢拯救𠊎來快樂！</verse>
				<verse number="10">𠊎愛對心底向上主告白講： 「上主啊，麼人做得同你比呢？ 你保護軟弱个人免受強暴者个欺負； 你保護軟弱窮苦个人免受壓迫者个剝削。」</verse>
				<verse number="11">當惡个人䟘起來做假見證； 佢等盤問𠊎並無犯過个罪。</verse>
				<verse number="12">佢等用惡報善， 害𠊎心神孤單絕望！</verse>
				<verse number="13">先前，佢等發病个時， 𠊎著麻衫表示哀傷， 𠊎禁食來刻苦自家； 𠊎為佢等祈禱个時，頭那攋攋，</verse>
				<verse number="14">像係為到朋友抑係兄弟悲傷； 𠊎出入哀傷，行路背痀痀， 像人為到自家个阿姆哀悼一樣。</verse>
				<verse number="15">總係，𠊎堵到災難个時， 佢等卻聚集來嘲謔𠊎； 連𠊎毋識个人也來攻擊𠊎， 佢等緊攻擊𠊎，像愛扯掉𠊎。</verse>
				<verse number="16">就像無天良个人嘲謔跛腳个 ， 佢等還怨恨𠊎，對𠊎咬牙切齒。</verse>
				<verse number="17">上主啊，你愛看到幾時正出手？ 求你拯救𠊎脫離佢等个迫害， 對這群獅仔中搶救𠊎个性命！</verse>
				<verse number="18">恁樣，𠊎就在聚會中感謝你； 𠊎愛在會眾个面前讚美你。</verse>
				<verse number="19">莫俾該兜花撩个仇敵因為𠊎个失敗笑咪咪！ 莫俾無緣無故恨𠊎个因為𠊎个痛苦打眼拐！</verse>
				<verse number="20">因為佢等無講和平个話， 反轉設計害該兜老實伯。</verse>
				<verse number="21">佢等惡擎擎誣告𠊎，講： 「噯，噯！𠊎等親眼看到了！」</verse>
				<verse number="22">上主啊，你已經看到了； 求你毋好恬恬毋出聲！ 主啊，毋好離開𠊎恁遠！</verse>
				<verse number="23">𠊎个上帝啊，好醒了，為𠊎來辯護； 𠊎个主啊，好䟘了，為𠊎來伸冤！</verse>
				<verse number="24">上主 — 𠊎个上帝啊，求你照你个公義判𠊎無罪； 求你毋好俾該兜仇敵對𠊎誇口。</verse>
				<verse number="25">莫俾佢等心肝想： 「啊哈！這就係𠊎等所愛个！」 莫俾佢等講： 「𠊎等已經將佢吞掉了！」</verse>
				<verse number="26">願所有歡喜𠊎受苦个人澇潰受侮辱！ 願所有向𠊎自高自大个人見笑失面子！</verse>
				<verse number="27">願該兜歡喜𠊎得到伸冤个歡呼快樂！ 願佢等緊講： 「上主係應當受尊崇个， 因為佢歡喜佢个僕人平安！」</verse>
				<verse number="28">恁樣，𠊎就愛講起你个公義； 無論日夜，𠊎愛讚美你！</verse>
			</chapter>
			<chapter number="36">
				<verse number="1">罪在壞人个心底緊講； 在佢看來，毋使驚上帝。</verse>
				<verse number="2">罪人自高自大， 恅到上帝毋會發覺、毋會責罰佢个罪 。</verse>
				<verse number="3">佢滿嘴係邪惡㧯詭詐； 佢早就無智慧，無行善。</verse>
				<verse number="4">佢上床後還係圖謀壞事， 所愛行个全部毋係好事； 佢從來毋識拒絕罪惡。</verse>
				<verse number="5">上主啊，你不變个慈愛高到堵天； 你个信實達到穹蒼。</verse>
				<verse number="6">你个公義像高山穩固； 你个判斷像深淵難測。 無論係人抑係頭牲， 上主啊，你全部看顧！</verse>
				<verse number="7">上帝啊，你不變个慈愛實在寶貴！ 世間人在你个翼胛下尋到庇佑。</verse>
				<verse number="8">佢等在你个屋下享受筵席； 你給佢等啉你快樂个泉水。</verse>
				<verse number="9">你就係一切生命个源頭； 在你个光中，𠊎等看到光。</verse>
				<verse number="10">求你一直痛惜認識你个人； 求你繼續給正直个人公道。</verse>
				<verse number="11">莫俾驕傲个人蹧踏到𠊎； 莫俾邪惡个人將𠊎逐走。</verse>
				<verse number="12">你看，作惡个人橫落去了； 已經㩳橫了，䟘毋起來了！</verse>
			</chapter>
			<chapter number="37">
				<verse number="1">毋使因為作惡个人發閼； 也毋使嫉妒行不義个人。</verse>
				<verse number="2">佢等會像草當遽枯掉； 佢等會像植物盡遽燥掉。</verse>
				<verse number="3">愛信靠上主，盡力行善； 愛在這地上安居樂業。</verse>
				<verse number="4">愛因為上主歡歡喜喜； 佢就將你心所愛个賜給你。</verse>
				<verse number="5">愛將萬事交託上主； 信靠佢，佢就會成全。</verse>
				<verse number="6">佢會使你个正義像光恁樣發出； 佢會使你个公正像當晝个日頭。</verse>
				<verse number="7">愛恬恬在上主面前，耐心等候佢； 毋好因為別人行事順利就發閼， 莫因為壞人个計謀成功來不平。</verse>
				<verse number="8">毋好發譴，也毋好惱人； 莫發閼，免得你卻做壞。</verse>
				<verse number="9">做壞个人一定會受剪除； 總係，仰望上主个人就能承接土地 。</verse>
				<verse number="10">一𥍉目，壞人就消滅掉去； 你想愛尋佢等，也尋毋到。</verse>
				<verse number="11">謙卑个人正能承接土地； 佢等會享受無窮个幸福！</verse>
				<verse number="12">壞人謀害義人， 向佢咬牙切齒。</verse>
				<verse number="13">總係主愛笑壞人， 因為佢知佢等个末日會到了。</verse>
				<verse number="14">壞人挷出刀劍，拉開佢等个弓箭， 愛打橫窮苦个人，殺害正直个人。</verse>
				<verse number="15">總係，佢等个刀劍會刺穿自家个心； 還有，佢等个弓箭會被人拗斷掉去。</verse>
				<verse number="16">義人所有个雖然少， 贏過壞人財產盡多。</verse>
				<verse number="17">因為壞人个權勢會破滅； 總係上主愛扶持義人。</verse>
				<verse number="18">上主知完全人个壽年； 佢等个產業永遠長存。</verse>
				<verse number="19">佢等在患難个日毋會失望， 飢荒个時節還係有好飽足。</verse>
				<verse number="20">總係，作惡个人最後會滅亡。 上主个對敵會像野花謝掉； 佢等會像雲煙共樣消散掉。</verse>
				<verse number="21">壞人借錢毋還； 總係義人大方施捨。</verse>
				<verse number="22">上主賜福个人會承接土地； 佢所咒詛个一定會受剪除。</verse>
				<verse number="23">上主若歡喜麼人所行个路， 就使佢个腳步穩當；</verse>
				<verse number="24">萬一跌倒，也毋會跌到貼貼， 因為上主扶等佢个手。</verse>
				<verse number="25">𠊎從細到這下，已經食到恁老， 吂識看過有義人被上主放掉， 毋識看到義人个子孫做乞食。</verse>
				<verse number="26">佢一直救濟人，樂意借給人； 佢个子孫也全部得到福氣！</verse>
				<verse number="27">你等愛離惡行善， 就做得永遠安居樂業。</verse>
				<verse number="28">因為上主所愛个就係公義； 佢毋會放掉佢忠心个子民。 佢等會永遠得到佢个保佑； 總係，壞人个子孫會受剪除。</verse>
				<verse number="29">一切个義人會承接土地， 子子孫孫永久住在這位。</verse>
				<verse number="30">義人个嘴發出智慧个話； 佢个舌乸講論公義个事。</verse>
				<verse number="31">佢个心中有上帝个教示； 佢个腳步一定毋會溜倒。</verse>
				<verse number="32">壞人緊偷看義人， 愛尋機會殺害佢；</verse>
				<verse number="33">總係上主毋會放掉義人， 毋會俾佢落在仇敵手中， 受審判也毋會致到定罪。</verse>
				<verse number="34">愛仰望上主，遵行佢个道路！ 佢會高升你，俾你承接土地； 你會看到作惡个人受剪除。</verse>
				<verse number="35">𠊎識看過一個當惡个壞人， 像 黎巴嫩 个香柏樹 恁高大；</verse>
				<verse number="36">後來𠊎經過个時，佢卻毋見掉 ； 𠊎尋來又尋去，總係尋佢毋到。</verse>
				<verse number="37">注意完全人，看正直人； 愛和平个人子孫興旺；</verse>
				<verse number="38">總係悖逆个人會全部消滅； 壞人个後代會受剪除！</verse>
				<verse number="39">上主係義人个拯救者， 佢等患難時个避難所。</verse>
				<verse number="40">上主幫助佢等，拯救佢等； 佢救佢等脫離邪惡个人， 因為佢等尋求佢个庇佑。</verse>
			</chapter>
			<chapter number="38">
				<verse number="1">上主啊，毋好發譴來責備𠊎； 求你毋好大發譴來責罰𠊎！</verse>
				<verse number="2">你个箭射入𠊎恁深； 你个手磧等𠊎恁重。</verse>
				<verse number="3">你大發譴使𠊎滿身著傷； 𠊎个罪惡害𠊎骨頭痠痛。</verse>
				<verse number="4">𠊎个罪疊起來比𠊎个頭那較高； 罪孽个重擔將𠊎磧到企毋起來。</verse>
				<verse number="5">因為𠊎个戇檔， 傷口生膿臭掉。</verse>
				<verse number="6">𠊎痛到肚笥揇等，背痀痀， 歸日無葛無煞，行來行去。</verse>
				<verse number="7">𠊎个腰身像被火燒， 致到滿身著傷。</verse>
				<verse number="8">𠊎歸身無力，軟濟濟； 心肝鬱啐，痛到緊噌。</verse>
				<verse number="9">主啊，你知𠊎个心願； 你聽到𠊎大聲歎息。</verse>
				<verse number="10">𠊎心肝搏搏跳，全無元氣； 𠊎个目珠也緊來緊矇。</verse>
				<verse number="11">親戚朋友毋肯面對𠊎个病痛； 隔壁鄰舍也係共樣企到遠遠。</verse>
				<verse number="12">尋機會收𠊎命个設羅網； 想愛傷害𠊎个又緊嚇𠊎， 從早到暗設詭計對付𠊎。</verse>
				<verse number="13">𠊎像耳聾个，無法度聽， 又像嘴啞个，無法度講；</verse>
				<verse number="14">𠊎成做聽毋到个人， 連𠊎个嘴也毋會應。</verse>
				<verse number="15">上主啊，𠊎所仰望个就係你！ 主 — 𠊎个上帝啊，你定著會應𠊎！</verse>
				<verse number="16">因為𠊎識求： 「莫俾對敵因為𠊎發病洋洋得意； 莫俾佢等因為𠊎橫落去來誇口。」</verse>
				<verse number="17">因為痛苦一直無離開𠊎， 𠊎隨時都有可能橫落去。</verse>
				<verse number="18">𠊎承認自家个罪惡， 又因為𠊎个罪憂愁。</verse>
				<verse number="19">𠊎个對敵勇壯又當有力； 無緣無故怨恨𠊎个盡多。</verse>
				<verse number="20">以惡報善个人同𠊎作對， 因為𠊎所追求个係良善。</verse>
				<verse number="21">上主啊，求你毋好放掉𠊎！ 𠊎个上帝啊，毋好離開𠊎恁遠！</verse>
				<verse number="22">主啊，𠊎个拯救者啊， 求你遽遽來幫助𠊎！</verse>
			</chapter>
			<chapter number="39">
				<verse number="1">𠊎識講： 「𠊎愛謹慎𠊎个行為， 免得𠊎个舌乸犯罪； 壞人在𠊎面前个時， 𠊎愛封等嘴毋出聲。」</verse>
				<verse number="2">𠊎恬恬無出聲，好話也毋講； 總係𠊎个痛苦越來越厲害，</verse>
				<verse number="3">連𠊎个底背也充滿心火。 𠊎想來想去，心火緊𤏸， 𠊎就開嘴講：</verse>
				<verse number="4">「上主啊，𠊎有好食到幾多歲？ 求你指示𠊎幾時愛過身呢？ 俾𠊎知𠊎个人生到底幾短！」</verse>
				<verse number="5">看啊，你使𠊎个人生只有幾巴掌長！ 在你看來，𠊎一生个時間差毋多係零。 事實上，人生就像透一口氣恁久定定！</verse>
				<verse number="6">人生實際就係浮雲： 無閒直掣，總係結局也係虛空； 積存財寶，毋知會被麼人接去。</verse>
				<verse number="7">主啊，𠊎還仰望麼介？ 𠊎所有个盼望在你！</verse>
				<verse number="8">求你救𠊎脫離一切過犯， 毋好俾戇檔人來嘲謔𠊎。</verse>
				<verse number="9">𠊎愛恬恬，無愛開嘴， 因為係你使𠊎受苦。</verse>
				<verse number="10">求你毋好繼續責罰𠊎； 𠊎被你打到半生半死！</verse>
				<verse number="11">你責罰人个罪惡來管教佢， 使佢合意个像被蛀蟲蛀掉。 實在噢，人生就像透一口氣！</verse>
				<verse number="12">上主啊，求你聽𠊎个祈禱， 求你留心來聽𠊎个求喊； 求你毋好恬恬由在𠊎噭！ 因為，在你面前𠊎就係一個出外人， 像𠊎个列祖一樣，係世間个過路客。</verse>
				<verse number="13">求你毋好目瞋瞋緊䁯𠊎！ 在𠊎離開，無在世間以前， 𠊎正有好小可享受安樂！</verse>
			</chapter>
			<chapter number="40">
				<verse number="1">𠊎耐心仰望上主； 佢垂聽𠊎个祈求。</verse>
				<verse number="2">佢將𠊎對深坑㧯泥糜底背拉出來； 佢將𠊎放在磐石頂，又安全又妥當。</verse>
				<verse number="3">佢教𠊎唱新个詩歌， 就係讚美𠊎等上帝个詩歌。 盡多看到个人會敬服， 願意來倚靠上主。</verse>
				<verse number="4">全心倚靠上主个人，實在有福氣噢！ 佢毋拜偶像，也毋同拜假神个人共下。</verse>
				<verse number="5">上主 — 𠊎个上帝啊， 你識為𠊎等做恁多大事， 無人有法度㧯你比！ 你為𠊎等所做㧯計劃个奇妙事情， 實在真多，講毋盡。</verse>
				<verse number="6">你無愛祭物㧯供物； 你也無愛燒化祭㧯贖罪祭。 反轉，你賜給𠊎聽從个耳公，</verse>
				<verse number="7">所以𠊎應你講：「看啊，𠊎來了！ 你對𠊎个指示有記在法律个書中 。</verse>
				<verse number="8">𠊎个上帝啊，𠊎非常樂意遵行你个旨意！ 𠊎將你个教示記在𠊎个心中。」</verse>
				<verse number="9">上主啊，在你子民个聚會中， 𠊎識傳揚你拯救个好消息； 你知，𠊎定著會一直緊傳揚。</verse>
				<verse number="10">𠊎毋識將你拯救个信息暗暗囥在心中， 反轉常常講起你个信實㧯救恩； 𠊎毋識在大會中將你不變个慈愛㧯信實囥等。</verse>
				<verse number="11">上主啊，你定著毋會收回你對𠊎个痛惜； 你不變个慈愛㧯信實會一直做𠊎个保護。</verse>
				<verse number="12">算毋盡个患難圍困𠊎； 𠊎个罪逐到𠊎，使𠊎个頭那擎毋起； 𠊎个罪過比頭那毛還較多， 害𠊎心寒膽顫！</verse>
				<verse number="13">上主啊，求你施恩拯救𠊎！ 求你遽遽來幫助𠊎！</verse>
				<verse number="14">願該兜想愛收𠊎命个人失敗見笑！ 願想愛看𠊎受害个人退走受侮辱！</verse>
				<verse number="15">願該兜嘲謔𠊎講： 「啊哈！好勢了！」个人， 自家見笑來打亂退！</verse>
				<verse number="16">願所有尋求你个人因為你歡喜快樂！ 願一切愛慕你拯救个人緊講： 「上主真偉大！」</verse>
				<verse number="17">𠊎係盡軟弱又窮苦个人， 主啊，總係你還係顧念𠊎。 你係𠊎个幫助，𠊎个拯救者； 𠊎个上帝啊，求你毋好停跎！</verse>
			</chapter>
			<chapter number="41">
				<verse number="1">關心窮苦人个，實在有福氣！ 堵到患難个時，上主會救佢。</verse>
				<verse number="2">上主愛庇佑並保全佢个性命， 使佢在這地上享受幸福； 上主毋會將佢放掉， 毋會俾佢落在對敵手中。</verse>
				<verse number="3">佢發病个時，上主愛醫治佢， 俾佢恢復健康，來離開病床。</verse>
				<verse number="4">𠊎識講：「上主啊，求你憐憫𠊎； 醫治𠊎，因為𠊎識得罪你。」</verse>
				<verse number="5">𠊎該兜對敵壞心議論𠊎講： 「佢幾時會死，被人毋記得呢？」</verse>
				<verse number="6">佢等來看𠊎，就講假話； 心內想愛尋𠊎个把柄； 然後出去逐所在譭謗。</verse>
				<verse number="7">怨恨𠊎个彼此嚌嚌咀咀； 佢等圖謀詭計愛陷害𠊎 。</verse>
				<verse number="8">佢等講：「佢著到絕症； 一定無可能䟘床了！」</verse>
				<verse number="9">連𠊎所信靠，最知己个朋友， 食過𠊎个飯个，也用腳踢𠊎。</verse>
				<verse number="10">上主啊，求你憐憫𠊎； 使𠊎勇健起來，好報復佢等！</verse>
				<verse number="11">𠊎个對敵無贏過𠊎， 所以𠊎就知你惜𠊎。</verse>
				<verse number="12">因為𠊎純正，你就扶持𠊎， 使𠊎永遠企在你面前。</verse>
				<verse number="13">願上主 — 以色列 个上帝受稱頌， 對古早直到永遠！ 阿愐！阿愐！</verse>
			</chapter>
			<chapter number="42">
				<verse number="1">上帝啊，𠊎係樣般个渴慕你， 就像鹿仔嘴燥想清涼个溪水一樣。</verse>
				<verse number="2">𠊎切切想念上帝，就係永生个上帝； 𠊎幾時正做得到上帝面前朝拜佢呢？</verse>
				<verse number="3">𠊎日夜傷心，用目汁準飯食； 有人一直問𠊎，講： 「你个上帝在㖠位？」</verse>
				<verse number="4">想到頭擺个情形，𠊎有講毋出个傷心： 該時，𠊎同大家共下去上帝个聖殿， 帶領該兜朝聖个人， 歸路歡喜唱歌感謝上帝。</verse>
				<verse number="5">𠊎个心啊，做麼介恁傷心？ 做麼介噌無停？ 愛仰望上帝，再一擺頌讚佢； 佢係𠊎个救主，𠊎个上帝。</verse>
				<verse number="6">流亡到這位，𠊎个心破碎，所以𠊎想到上帝。 佢使煩躁像深淵中个大水聲； 憂愁像波浪會浸死𠊎。 𠊎个心情像對 黑門 山㧯 米薩 嶺沖到 約旦 河个瀑布一樣。</verse>
				<verse number="7"></verse>
				<verse number="8">願上主日時頭給𠊎享受佢不變个慈愛， 暗晡頭俾𠊎唱歌祈求賜𠊎生命个上帝。</verse>
				<verse number="9">𠊎㧯上帝，𠊎个磐石講： 「你做麼介毋記得𠊎？ 𠊎做麼介堵到仇敵个迫害，食恁多苦？」</verse>
				<verse number="10">佢等侮辱𠊎像打碎𠊎个骨頭； 佢等問無停： 「你个上帝在㖠位？」</verse>
				<verse number="11">𠊎个心啊，做麼介恁傷心？ 做麼介噌無停？ 愛仰望上帝，再一擺頌讚佢； 佢係𠊎个救主，𠊎个上帝。</verse>
			</chapter>
			<chapter number="43">
				<verse number="1">上帝啊，求你宣判𠊎無罪， 在毋敬虔个人中間為𠊎辯護； 求你救𠊎脫離詭詐邪惡个人。</verse>
				<verse number="2">你係庇佑𠊎个上帝； 你做麼介將𠊎放掉呢？ 𠊎做麼介堵到仇敵个迫害，食恁多苦？</verse>
				<verse number="3">求你顯出你个光㧯真理來引導𠊎， 帶𠊎轉去你个聖山 錫安 ， 到你所住个聖所去！</verse>
				<verse number="4">恁樣，上帝啊，𠊎愛去你个祭壇前， 去到賜𠊎歡喜快樂个上帝面前。 上帝，𠊎个上帝啊， 𠊎愛彈琴頌讚你！</verse>
				<verse number="5">𠊎个心啊，做麼介恁傷心？ 做麼介噌無停？ 愛仰望上帝，再一擺頌讚佢； 佢係𠊎个救主，𠊎个上帝。</verse>
			</chapter>
			<chapter number="44">
				<verse number="1">上帝啊，𠊎等識親耳聽過， 𠊎等个祖先㧯𠊎等講過： 頭擺，在佢等个時代， 你所行个一切大事。</verse>
				<verse number="2">你用你个權能將外族人逐出去， 在佢等个土地上栽培𠊎等个祖先； 你責罰該兜外族个人， 反轉使𠊎等个祖先得到興旺。</verse>
				<verse number="3">𠊎等个祖先毋係靠刀劍征服該地， 也毋係靠自家个能力得到勝利； 係靠你个手，你个能力，你个同在， 因為你惜佢等。</verse>
				<verse number="4">你係𠊎个王，𠊎个上帝； 你使 雅各 你个子民打贏。</verse>
				<verse number="5">通過你个大能，𠊎等將敵人打橫； 靠你个名，𠊎等踐踏攻擊𠊎等个。</verse>
				<verse number="6">𠊎無倚靠自家个弓； 𠊎个劍也毋會救𠊎。</verse>
				<verse number="7">只有你救𠊎等脫離敵人， 使該兜怨恨𠊎等个澇潰。</verse>
				<verse number="8">𠊎等愛常常讚美上帝！ 𠊎等愛永遠感謝你！</verse>
				<verse number="9">這下，你卻放掉𠊎等，使𠊎等受侮辱； 你無愛再同𠊎等个軍隊共下出戰。</verse>
				<verse number="10">你使𠊎等在仇敵个面前打輸退後； 該兜怨恨𠊎等个將𠊎等搶到淨淨。</verse>
				<verse number="11">你使𠊎等像羊仔被人㓾， 將𠊎等分散在列國當中。</verse>
				<verse number="12">你將自家个子民便宜賣掉； 你無因為恁樣得到麼介利益 。</verse>
				<verse number="13">你使𠊎等受鄰國个羞辱； 周圍个人嘲謔𠊎等，笑𠊎等。</verse>
				<verse number="14">你使𠊎等成做列國个笑話； 萬國个人全部搖頭笑𠊎等。</verse>
				<verse number="15">羞辱常常在𠊎面前， 𠊎滿面被見笑遮等；</verse>
				<verse number="16">因為聽到个係嘲謔譭謗个聲， 看到个係對敵㧯愛報仇个人。</verse>
				<verse number="17">這兜事情發生在𠊎等个身上， 總係，𠊎等從來毋識毋記得你，無違背你个約。</verse>
				<verse number="18">𠊎等毋識對你無忠心， 也毋識反抗你个命令；</verse>
				<verse number="19">總係你磧碎𠊎等，又放𠊎等在野狗个中間， 俾𠊎等在死亡个陰影中。</verse>
				<verse number="20">𠊎等若毋記得𠊎等个上帝， 向外族人个神明祈禱，</verse>
				<verse number="21">上帝一定會查出來， 因為佢深知人心个祕密。</verse>
				<verse number="22">事實上，𠊎等為你个緣故歸日等死； 人看𠊎等像係愛㓾个羊。</verse>
				<verse number="23">主啊，好醒了！樣般還睡目呢？ 好䟘了！毋好永遠拒絕𠊎等！</verse>
				<verse number="24">你做麼介揞等你个面毋搭𠊎等呢？ 樣會毋記得𠊎等受个苦難㧯迫害？</verse>
				<verse number="25">𠊎等橫在地上， 歸身仆到貼貼。</verse>
				<verse number="26">求你䟘起來幫助𠊎等！ 因為你不變个慈愛，求你救贖𠊎等！</verse>
			</chapter>
			<chapter number="45">
				<verse number="1">𠊎个心有盡靚个話衝等出來， 為到王吟唱美妙个詩歌； 𠊎个舌乸就像作家流利个筆。</verse>
				<verse number="2">在萬人中，你第一斯文； 你个講話也滿有恩惠； 上帝就永遠賜福給你！</verse>
				<verse number="3">偉大个王啊，願你腰間佩劍！ 願你顯出你个尊榮㧯威嚴！</verse>
				<verse number="4">為到維護真理㧯正義 ， 在威嚴中勇敢向前！ 你个右手愛做出得人驚个事。</verse>
				<verse number="5">你个箭又尖又利，射入敵人个心； 萬邦全部降服在你个腳前。</verse>
				<verse number="6">上帝賜你个寶座 永遠長存； 正直係你治理國家个根據。</verse>
				<verse number="7">你歡喜公義，怨恨邪惡； 所以上帝 — 就係你个上帝選立你， 使你充滿喜樂，贏過同伴。</verse>
				<verse number="8">你个衫發出沒藥、沉香㧯肉桂个香味； 象牙宮肚傳出弦琴个音樂，使你歡喜。</verse>
				<verse number="9">你个嬪妃中有好多係列國个公主； 王后帶等純金个裝飾企在你右片。</verse>
				<verse number="10">王个新娘啊，愛聽，愛想，愛恬恬聽： 毋好懷念你个本族㧯你个親戚！</verse>
				<verse number="11">恁樣，你个美貌正會使王戀慕你； 因為佢係你个主人，你愛順服佢！</verse>
				<verse number="12">泰爾 个人會帶等禮物來見你； 有錢人會想愛得到你个歡喜。</verse>
				<verse number="13">在宮中，公主著到非常靚！ 姖所著个衫係用金線繡个。</verse>
				<verse number="14">姖披上禮服，被人帶到王个面前； 女儐相㧯使女也跈等去你該位。</verse>
				<verse number="15">姖等全部歡喜快樂， 共下入去王个宮殿。</verse>
				<verse number="16">王啊，你將來會有當多 子孫承接列祖个王位； 你會使佢等統治全地。</verse>
				<verse number="17">𠊎个詩會使你个名聲傳到萬代； 萬民會一直稱頌你到永永遠遠。</verse>
			</chapter>
			<chapter number="46">
				<verse number="1">上帝係𠊎等个避難所㧯力量， 係𠊎等患難中及時个幫助。</verse>
				<verse number="2">所以，雖然有大地動， 高山崩掉，落到海中， 雖然海浪滔天，群山搖動， 𠊎等也毋驚。</verse>
				<verse number="3"></verse>
				<verse number="4">有一條河壩將喜樂帶到上帝个城， 到至高者住个聖所。</verse>
				<verse number="5">上帝在城中，城就毋會橫掉； 天一光，上帝个援助就會到。</verse>
				<verse number="6">萬邦騷動，列國橫掉； 上帝響雷公，大地就溶掉。</verse>
				<verse number="7">上主 — 萬軍个元帥㧯𠊎等同在； 雅各 个上帝係𠊎等个城堡！</verse>
				<verse number="8">來啊，來看上主个作為； 看佢在地上所做个奇事。</verse>
				<verse number="9">佢平定世界个戰亂； 佢拗斷弓箭，將槍斬斷，火燒盾牌。</verse>
				<verse number="10">佢講：「恬恬！愛知𠊎係上帝！ 在萬國中𠊎係至尊个， 在全地上𠊎係至高个。」</verse>
				<verse number="11">上主 — 萬軍个元帥㧯𠊎等同在； 雅各 个上帝係𠊎等个城堡！</verse>
			</chapter>
			<chapter number="47">
				<verse number="1">萬民啊，愛拍手大聲喊！ 愛大聲唱歌，頌讚上帝！</verse>
				<verse number="2">至高个上主係得人敬畏个； 佢係大君王，統治全世界。</verse>
				<verse number="3">佢使萬民降服𠊎等； 又使萬邦伏在𠊎等腳下。</verse>
				<verse number="4">佢為到𠊎等擇一垤住个土地， 做佢所惜个 雅各 得意个產業。</verse>
				<verse number="5">上帝在歡喜喊个聲中登寶座； 上主在羊角个聲音中坐王位！</verse>
				<verse number="6">你等愛唱歌頌讚上帝！ 愛唱歌頌讚𠊎等个王！</verse>
				<verse number="7">因為上帝係全世界个王； 你等應當吟詩來頌讚佢！</verse>
				<verse number="8">上帝坐在佢聖个寶座上； 佢做王統治萬國。</verse>
				<verse number="9">列國个領袖聚集共下， 愛做 亞伯拉罕 个上帝个子民； 因為地上个王 攏總屬上帝； 佢遠遠超過萬有。</verse>
			</chapter>
			<chapter number="48">
				<verse number="1">上主至大！ 在𠊎等上帝个城內， 在佢个聖山頂， 佢應當受最大个讚美！</verse>
				<verse number="2">上帝个 錫安 山盡靚盡高； 大君王个城使萬民歡喜。</verse>
				<verse number="3">上帝在城个宮殿底背； 佢顯明自家係避難所。</verse>
				<verse number="4">列邦个王聚集共下， 相共來攻打 錫安 山。</verse>
				<verse number="5">佢等一看到這城就大著驚； 佢等驚到無葛煞，遽遽逃走。</verse>
				<verse number="6">在該位佢等又著驚又痛苦， 像婦人家𫱔子个時恁艱苦，</verse>
				<verse number="7">像 他施 个貨船被東風打爛恁慘。</verse>
				<verse number="8">在上主、萬軍个元帥 — 𠊎等上帝个城內， 頭擺𠊎等所聽講个，這下𠊎等看到了； 上帝一定會保護這城，直到永遠。</verse>
				<verse number="9">上帝啊，在你个聖殿中， 𠊎等想念你不變个慈愛。</verse>
				<verse number="10">上帝啊，滿天下个人頌讚你； 你个名傳遍全世界！ 你用正義統治；</verse>
				<verse number="11">願 錫安 山歡喜！ 願 猶大 个城市快樂， 因為你个審判公正！</verse>
				<verse number="12">你等愛𫟧等 錫安 來行， 算它个城樓看有幾多；</verse>
				<verse number="13">愛詳細看城牆㧯城堡， 好㧯你等个後代傳講：</verse>
				<verse number="14">這上帝永永遠遠係𠊎等个上帝； 佢一定會世世代代帶領𠊎等。</verse>
			</chapter>
			<chapter number="49">
				<verse number="1">萬民啊，你等愛聽好！ 世間人啊，愛留心聽！</verse>
				<verse number="2">無論係貧賤富貴， 攏總愛側耳來聽！</verse>
				<verse number="3">𠊎个嘴愛講智慧个話； 𠊎个心愛想通達个事。</verse>
				<verse number="4">𠊎个耳公愛細膩聽比喻； 𠊎愛彈琴解明𠊎个鈴仔。</verse>
				<verse number="5">在災難臨到該兜日仔， 仇敵圍困等𠊎該樣時， 𠊎做麼介愛使著驚呢？</verse>
				<verse number="6">佢等不過係靠錢財个人， 所誇口个係財產多定定。</verse>
				<verse number="7">人無法度贖轉自家个兄弟， 也無法代佢納贖價給上帝。</verse>
				<verse number="8">生命个贖價極貴， 絕對無人付得出。</verse>
				<verse number="9">想愛永遠生生，毋使死， 這係絕對無可能个事。</verse>
				<verse number="10">愛看清楚，有智慧个人會死， 戇戇檔檔个人共樣會滅亡； 佢等攏總將錢財留給別人。</verse>
				<verse number="11">雖然佢等識有自家个土地， 總係永遠个家係塚埔 定定； 佢等愛一直留在塚埔底背。</verse>
				<verse number="12">人雖然住在尊貴中還係會死； 佢㧯會死个禽獸無麼介分別。</verse>
				<verse number="13">看啊，倚靠自家个人，佢等个命運樣般； 看該兜誇口得到財產个人結局樣般 。</verse>
				<verse number="14">佢等㧯羊仔一樣註定落陰間； 「死亡」定著會成做佢等个牧者。 佢等个身屍也愛在塚埔底背糜掉； 天光个時，該兜義人就愛贏過佢等。</verse>
				<verse number="15">總係上帝會救贖𠊎个靈魂； 佢會救𠊎脫離陰間个權勢。</verse>
				<verse number="16">看到人發財、緊來緊有錢， 毋使發咄愕；</verse>
				<verse number="17">佢死个時麼介也帶毋走； 錢財也毋會跈佢下去。</verse>
				<verse number="18">就算佢一生人盡得意， 名聲受到別人个稱讚，</verse>
				<verse number="19">佢最後還係愛跈祖先去， 永遠無法度再看到光明。</verse>
				<verse number="20">人雖然住在尊貴中，若無覺悟， 佢㧯會死个禽獸無麼介分別。</verse>
			</chapter>
			<chapter number="50">
				<verse number="1">上主 — 全能个上帝出聲講話， 對日出到日落之地發出呼喊。</verse>
				<verse number="2">對該十分靚个 鍚安 城， 上帝个榮光射等出來。</verse>
				<verse number="3">𠊎等个上帝愛降臨， 毋係恬恬無出聲。 佢个頭前有烈火； 佢个周圍有暴風。</verse>
				<verse number="4">佢愛傳天地做證人， 來審判自家个子民。</verse>
				<verse number="5">佢講：「召集𠊎忠心个子民來𠊎這位， 就係該兜用牲儀來同𠊎立約个人。」</verse>
				<verse number="6">諸天宣佈上帝係公義个； 上帝佢自家就係審判者。</verse>
				<verse number="7">上帝講： 「𠊎个子民啊，聽好，𠊎愛講； 以色列 啊，𠊎愛控告你。 𠊎係上帝，就係你个上帝。</verse>
				<verse number="8">𠊎責備你，毋係因為你个牲儀， 也毋係因為你一直獻个燒化祭。</verse>
				<verse number="9">𠊎無需要你牛欄肚个公牛， 也無欠用你羊圈肚个山羊；</verse>
				<verse number="10">因為樹林中个獸類攏總屬𠊎； 千山頂个頭牲也全部係𠊎个。</verse>
				<verse number="11">山中所有个飛鳥係屬𠊎； 平地一切个動物係𠊎个。</verse>
				<verse number="12">「就算𠊎有肚飢个時，𠊎也毋使㧯你講， 因為，世界㧯其中个一切全部係𠊎个。</verse>
				<verse number="13">敢講𠊎愛食公牛个肉？ 敢講𠊎愛啉山羊个血？</verse>
				<verse number="14">你愛用感謝做祭物獻給上帝 ； 你愛對至高者還你所許个願。</verse>
				<verse number="15">患難臨到个時節，你愛求𠊎； 𠊎會拯救你，你也愛榮光𠊎。」</verse>
				<verse number="16">總係，上帝對作惡个人講： 「你有麼介權利好背誦𠊎个誡命？ 你係麼介人，樣敢談論𠊎个約啊？</verse>
				<verse number="17">你惱𠊎个管教； 你拒絕𠊎个話。</verse>
				<verse number="18">你堵到賊仔就同佢做伴； 你也同人共下去犯姦淫。</verse>
				<verse number="19">「你由在你个嘴去講壞話； 你个舌乸也時常講花撩。</verse>
				<verse number="20">你隨便譭謗弟兄， 尋親兄弟个毛病。</verse>
				<verse number="21">你做這兜事，𠊎恬恬無出聲， 你就恅到𠊎同你共樣，係麼？ 其實𠊎這下愛責備你， 將你个罪擺在你面前。</verse>
				<verse number="22">「你等毋記得𠊎个人啊，愛聽清楚， 免得𠊎將你等扯裂，無人好救你等。</verse>
				<verse number="23">用感謝做祭物个人，就係尊崇𠊎； 照正路來行个，𠊎一定會拯救佢。」</verse>
			</chapter>
			<chapter number="51">
				<verse number="1">上帝啊，求你憐憫𠊎， 因為你有不變个慈愛！ 求你拭掉𠊎个過犯， 因為你有豐盛个慈悲！</verse>
				<verse number="2">求你洗掉𠊎个罪過， 洗淨𠊎一切个罪惡！</verse>
				<verse number="3">因為，𠊎知自家个過犯； 𠊎个罪惡常在𠊎面前。</verse>
				<verse number="4">𠊎所犯个罪就係獨獨得罪你； 𠊎所做个係你看做邪惡个事。 所以，你審判𠊎係理所當然个； 你責罰𠊎也係𠊎罪有應得个。</verse>
				<verse number="5">𠊎一出世就係罪人， 還在母胎已經有罪。</verse>
				<verse number="6">你所要求个係內在个誠實； 求你教𠊎，使𠊎心中得到智慧。</verse>
				<verse number="7">求你拭掉𠊎个罪， 使𠊎得到淨浰； 求你洗淨𠊎， 使𠊎比雪較白。</verse>
				<verse number="8">求你俾𠊎聽到歡喜快樂个聲； 雖然你有打碎𠊎，求你使𠊎重新得到快樂。</verse>
				<verse number="9">求你揞面，毋好看𠊎个罪， 拭掉𠊎一切个罪惡。</verse>
				<verse number="10">上帝啊，求你為𠊎造純潔个心， 賜給𠊎全新㧯忠誠个靈。</verse>
				<verse number="11">求你毋好逐𠊎離開你个面前； 毋好將你个聖靈對𠊎收轉去。</verse>
				<verse number="12">再一擺將你救恩个歡喜賜給𠊎， 使𠊎个靈樂意來順服你。</verse>
				<verse number="13">恁樣，𠊎愛將你个道路指示罪人； 佢等就會歸順你。</verse>
				<verse number="14">上帝啊，你係拯救𠊎个上帝； 求你赦免𠊎个死罪 ； 𠊎就愛大聲歌頌你个公義。</verse>
				<verse number="15">主啊，求你開𠊎个嘴， 𠊎就會傳揚你个好名聲。</verse>
				<verse number="16">你無歡喜祭物， 若係愛，𠊎就會獻； 燒化祭也毋係你所合意个。</verse>
				<verse number="17">上帝啊，𠊎所獻个祭 就係憂傷破碎个靈； 上帝啊，憂傷悔改个心，你毋會拒絕。</verse>
				<verse number="18">上帝啊，求你用慈愛好款待 錫安 ； 求你重建 耶路撒冷 个城牆。</verse>
				<verse number="19">該時，你就會悅納公義个牲儀㧯全牲个燒化祭； 該時，就會有公牛獻在你个祭壇頂。</verse>
			</chapter>
			<chapter number="52">
				<verse number="1">有權勢个人啊，你做麼介誇口所做个壞事呢？ 上帝个慈愛係永遠毋會改變个。</verse>
				<verse number="2">你个舌乸像磨利个剃頭刀； 你一直製造是非傷害別人。</verse>
				<verse number="3">你好邪惡，惱良善； 你愛虛假，恨真理。</verse>
				<verse number="4">你這個花撩牯啊， 樣恁愛中傷別人！</verse>
				<verse number="5">因為恁樣，上帝愛徹底消滅你； 佢愛捉你，將你對屋下揪出來， 將你對世人中連頭帶根挷掉。</verse>
				<verse number="6">義人看到就會著驚； 佢等會笑你，講：</verse>
				<verse number="7">「看啊，這就係無倚靠上帝个人； 佢倚靠自家个錢多，做壞事堅立自家。」</verse>
				<verse number="8">總係𠊎，𠊎像種在上帝屋下茂盛个橄欖樹； 𠊎永永遠遠倚靠上帝不變个慈愛。</verse>
				<verse number="9">上帝啊，𠊎愛永遠感謝你所做个一切； 𠊎愛在你忠心个子民中傳揚你个好名聲。</verse>
			</chapter>
			<chapter number="53">
				<verse number="1">戇人心內講： 「無上帝！」 佢等盡腐敗，專門做可惡个事； 佢等無一儕行善。</verse>
				<verse number="2">上帝對天頂看世間人， 愛看敢有明理个人， 有尋求上帝个人麼。</verse>
				<verse number="3">總係，佢等全部行偏差， 攏總共樣腐敗。 佢等無人行善， 連一個乜無。</verse>
				<verse number="4">上帝講：「做壞事个人樣般恁無智識？ 佢等吞食𠊎个子民，就像食飯一樣； 佢等從來毋識求問𠊎。」</verse>
				<verse number="5">總講，佢等會驚到愊愊掣， 經歷從來吂識有个著驚； 因為上帝愛打散佢子民仇敵个骸骨。 佢愛棄絕佢等，使佢等失望澇潰。</verse>
				<verse number="6">願 以色列 个拯救對 錫安 出來！ 上帝回復佢子民个產業該時， 雅各 个子孫愛大歡喜， 以色列 个人民愛快樂。</verse>
			</chapter>
			<chapter number="54">
				<verse number="1">上帝啊，求你因為你个名拯救𠊎； 求你用你个大能為𠊎伸冤。</verse>
				<verse number="2">上帝啊，求你聽𠊎个祈禱； 求你側耳來聽𠊎个懇求。</verse>
				<verse number="3">生份人愛攻擊𠊎； 強暴人愛殺害𠊎。 佢等眼中無上帝。</verse>
				<verse number="4">其實，上帝係𠊎个幫助； 主扶持𠊎个生命。</verse>
				<verse number="5">願上帝報應𠊎个敵人所做个壞事； 主啊，求你照自家个信實消滅佢等。</verse>
				<verse number="6">上主啊，𠊎愛甘心樂意獻祭給你； 𠊎愛感謝你，因為你係至善。</verse>
				<verse number="7">上主已經救𠊎脫離一切患難； 𠊎親眼看到仇敵失敗。</verse>
			</chapter>
			<chapter number="55">
				<verse number="1">上帝啊，求你側耳聽𠊎个祈禱； 毋好毋搭𠊎，由在𠊎緊求。</verse>
				<verse number="2">求你留心聽𠊎，應𠊎； 𠊎煩躁到無葛無煞。</verse>
				<verse number="3">仇敵恐嚇𠊎， 壞人壓迫𠊎； 佢等製造災難害𠊎； 佢等大發譴，想愛謀害𠊎。</verse>
				<verse number="4">𠊎个心充滿痛苦； 驚死个感覺緊迫𠊎。</verse>
				<verse number="5">𠊎歸身驚到愊愊掣， 像係會被著驚浸死。</verse>
				<verse number="6">𠊎講：「真希望𠊎有翼胛，像月鴿仔一樣！ 𠊎就做得飛去尋休息个所在。</verse>
				<verse number="7">𠊎一定會飛到遠遠个地方， 去曠野歇。</verse>
				<verse number="8">𠊎會遽遽尋一個避難所， 好在該位閃避狂風暴雨。」</verse>
				<verse number="9">主啊，求你變亂敵人个腔口； 因為𠊎看到城內有暴動㧯相爭。</verse>
				<verse number="10">佢等日夜在城牆頂高巡來巡去； 城內充滿罪惡㧯災難。</verse>
				<verse number="11">逐所在有破壞个行動； 街項充滿欺壓㧯奸詐。</verse>
				<verse number="12">若係對敵㩢耍𠊎， 𠊎還有辦法忍受； 若係敵人攻擊𠊎， 𠊎還做得閃避佢。</verse>
				<verse number="13">無想到係你 — 𠊎个同伴， 𠊎个知己，𠊎親密个朋友！</verse>
				<verse number="14">𠊎等識互相交談到盡有搭碓， 𠊎等識同眾人共下在聖殿敬拜交陪。</verse>
				<verse number="15">願𠊎个仇敵忽然死掉！ 願佢等生生跌落陰間！ 因為佢等个屋下㧯心肝攏總充滿邪惡。</verse>
				<verse number="16">總係，𠊎愛求喊上帝； 上主一定會拯救𠊎。</verse>
				<verse number="17">無論朝晨、當晝、暗晡頭， 𠊎緊求喊、又緊透大氣； 佢一定會聽𠊎个噌聲。</verse>
				<verse number="18">雖然有一大群个敵人同𠊎相㓾， 佢會拯救𠊎平安對戰場倒轉來。</verse>
				<verse number="19">上帝對古早就一直係掌權者； 佢一定會聽到，使佢等降服， 因為佢等毋肯改變，也毋驚上帝。</verse>
				<verse number="20">𠊎个同伴攻擊朋友； 佢違背自家个契約。</verse>
				<verse number="21">佢个嘴比乳油較滑， 總係心肚想个係爭鬥。 佢个話比油還較軟， 其實係挷出个利劍。</verse>
				<verse number="22">你應當將重擔交給上主， 佢就會扶持你； 佢永遠毋會俾義人失敗。</verse>
				<verse number="23">總係上帝啊，你愛將兇惡个人㧒落陰間； 你愛使行事詭詐个人夭折。 論到𠊎，𠊎愛全心信靠你。</verse>
			</chapter>
			<chapter number="56">
				<verse number="1">上帝啊，憐憫𠊎，因為𠊎被人攻擊； 𠊎个仇敵歸日攻擊𠊎來壓迫𠊎。</verse>
				<verse number="2">𠊎个敵人一直攻擊𠊎； 做𠊎對敵个有非常多！</verse>
				<verse number="3">至高者啊，在𠊎著驚个時節， 𠊎愛倚靠你！</verse>
				<verse number="4">𠊎信靠上帝，讚美佢个應許； 𠊎倚靠上帝，就毋使驚麼介。 血肉个人還能對𠊎樣般呢？</verse>
				<verse number="5">𠊎个仇敵歸日想愛破壞𠊎； 佢等想盡一切辦法愛害𠊎。</verse>
				<verse number="6">佢等聚集、埋伏，打探𠊎行个路； 佢等个目的就係愛收𠊎个命。</verse>
				<verse number="7">上帝啊，求你責罰佢等个罪惡； 求你對佢等大發譴，打橫佢等。</verse>
				<verse number="8">你清楚知𠊎所堵到个災難； 你將𠊎个目汁裝在你个皮袋肚。 這一切敢無記在你个書底背嗎？</verse>
				<verse number="9">所以，𠊎一求喊你，仇敵就退走； 恁樣，𠊎就知，上帝係幫助𠊎个。</verse>
				<verse number="10">𠊎信靠上帝，讚美佢个應許； 𠊎信靠上主，讚美佢个應許。</verse>
				<verse number="11">𠊎倚靠上帝，就毋使驚麼介。 血肉个人還能對𠊎樣般呢？</verse>
				<verse number="12">上帝啊，𠊎愛對你還願； 𠊎愛對你獻感謝个祭。</verse>
				<verse number="13">因為你救𠊎脫離死亡， 使𠊎企到在在，無橫掉， 有好生活在上帝面前， 在該賜生命个光明中。</verse>
			</chapter>
			<chapter number="57">
				<verse number="1">上帝啊，憐憫𠊎，求你憐憫𠊎， 因為𠊎倚靠你。 𠊎愛囥在你个翼胛下求你保佑， 等到所有个災難過去。</verse>
				<verse number="2">𠊎愛大聲求喊至高个上帝， 就係賜𠊎一切需要个上帝。</verse>
				<verse number="3">佢會對天頂伸手救𠊎； 佢會逐走壓迫𠊎个人。 上帝會對𠊎顯出佢不變个慈愛㧯信實。</verse>
				<verse number="4">𠊎被仇敵圍困； 佢等像愛食人个獅仔。 佢等个牙齒像槍、像箭； 佢等个舌乸像利劍。</verse>
				<verse number="5">上帝啊，願你个尊榮超過諸天！ 願你个榮光充滿全地！</verse>
				<verse number="6">敵人設羅網愛捉𠊎； 𠊎被災難壓到背痀痀。 佢等在𠊎个面前挖陷阱， 自家反轉跌落去。</verse>
				<verse number="7">上帝啊，𠊎心堅定，𠊎心堅定； 𠊎愛吟詩，𠊎愛唱歌頌讚你！</verse>
				<verse number="8">𠊎个心神啊，好醒了！ 琴啊，瑟啊，好醒了！ 𠊎愛喊日頭䟘起來！</verse>
				<verse number="9">主啊，𠊎愛在列國中感謝你！ 𠊎愛在萬民中唱歌頌讚你！</verse>
				<verse number="10">你不變个慈愛大到堵天； 你个信實達到穹蒼。</verse>
				<verse number="11">上帝啊，願你个尊榮超過諸天！ 願你个榮光充滿全地！</verse>
			</chapter>
			<chapter number="58">
				<verse number="1">統治者 啊，你等正經講正義係麼？ 你等正經照公當審判人民係麼？</verse>
				<verse number="2">毋係！你等一心想愛作惡； 你等在世間行強暴个事。</verse>
				<verse number="3">作惡个人一出世就迷失方向； 講花撩个離開母胎就行差路。</verse>
				<verse number="4">佢等非常惡毒，像毒蛇一樣； 塞等耳公，像耳聾个飯匙銃，</verse>
				<verse number="5">聽毋到搞蛇人歕笛仔个聲， 也聽毋到魔術師唸咒个聲。</verse>
				<verse number="6">上帝啊，求你敲斷佢等嘴肚个毒牙！ 上主啊，求你挷掉該兜獅仔个大牙！</verse>
				<verse number="7">願佢等像河壩水燥掉， 像細路个草被人踐踏 。</verse>
				<verse number="8">願佢等像蝓螺恁樣糜掉， 像落掉个胎無見到日頭。</verse>
				<verse number="9">你等用竻樹來燒火，鑊仔還吂燒， 大風將青青吂燥个㧯燒等个共下吹走； 像恁樣，願佢等遽遽受消滅 。</verse>
				<verse number="10">義人看到罪人受報應就歡喜吶天； 佢等愛在作惡个人血河中行倒轉來。</verse>
				<verse number="11">恁樣，人愛講：「義人正經有善報； 斷真有一位上帝在審判世界！」</verse>
			</chapter>
			<chapter number="59">
				<verse number="1">𠊎个上帝啊，求你拯救𠊎脫離仇敵； 求你保護𠊎脫離該兜攻擊𠊎个人。</verse>
				<verse number="2">求你拯救𠊎脫離作惡个人， 使𠊎脫離好流人血个兇手。</verse>
				<verse number="3">看啊，佢等埋伏愛攻擊𠊎； 殘暴个人歸群同𠊎作對。 毋係因為𠊎有麼介過犯， 也毋係𠊎有做麼介壞事。</verse>
				<verse number="4">上主啊，佢等遽遽準備，愛來攻擊𠊎， 並毋係因為𠊎犯了麼介過失。</verse>
				<verse number="5">上主 — 萬軍个元帥上帝啊，䟘起來幫助𠊎！ 以色列 个上帝啊，求你親自來鑒察！ 求你䟘起來責罰列邦； 毋好對悖逆你个壞人發出慈悲！</verse>
				<verse number="6">佢等暗晡時正轉來， 就像野狗恁樣緊吠， 在城底背逛來逛去。</verse>
				<verse number="7">你聽佢等个侮辱㧯恐嚇； 佢等个舌乸像利劍對嘴歕出來一樣； 佢等一直講：「有麼人聽到？」</verse>
				<verse number="8">總係上主啊，你笑佢等； 你愛嘲謔列國。</verse>
				<verse number="9">𠊎个力量啊，𠊎倚靠你； 上帝啊，你係𠊎个城堡。</verse>
				<verse number="10">𠊎个上帝惜𠊎，佢在𠊎頭前行； 上帝愛俾𠊎看𠊎个仇敵失敗。</verse>
				<verse number="11">上帝啊，毋好消滅佢等， 免得𠊎个人民毋記得。 求你用你个大能使佢等四散漂流！ 保護𠊎等个主啊，求你打橫佢等！</verse>
				<verse number="12">佢等滿嘴罪惡，舌乸也盡毒； 願佢等被自家个驕傲纏等！ 因為佢等咒罵，欺騙，</verse>
				<verse number="13">求你大發譴來消滅佢等； 求你將佢等毀滅到淨淨！ 萬民正會知治理 以色列 个， 佢就係統治全世界个上帝。</verse>
				<verse number="14">𠊎个仇敵暗晡時正轉來， 就像野狗恁樣緊吠， 在城底背逛來逛去。</verse>
				<verse number="15">像野狗走上走下尋食物， 佢等若無食飽就噭無停。</verse>
				<verse number="16">總係𠊎愛唱歌頌讚你个力量； 逐朝晨𠊎愛大聲歌唱你不變个慈愛。 你一直係𠊎个城堡， 𠊎患難中个避難所。</verse>
				<verse number="17">𠊎个力量啊，𠊎愛唱歌頌讚你； 上帝係𠊎个城堡， 係痛惜𠊎个上帝。</verse>
			</chapter>
			<chapter number="60">
				<verse number="1">上帝啊，你識拒絕𠊎等，破壞𠊎等； 你識對𠊎等發譴，這下求你復興𠊎等！</verse>
				<verse number="2">你使大地顫到盡厲害，使它裂開； 這下，求你修補，因為它會碎掉了！</verse>
				<verse number="3">你使你个子民堵到艱難困苦； 你使𠊎等像啉釅酒橫來橫去。</verse>
				<verse number="4">你識為敬畏你个人插一支旗仔， 俾佢等聚集在旗下，來閃開弓箭。</verse>
				<verse number="5">為到愛使你所惜个子民得救， 求你應𠊎等，用大能拯救𠊎等。</verse>
				<verse number="6">上帝對佢个聖所宣告講 ： 「𠊎愛打贏，𠊎愛分裂 示劍 ， 將 疏割 山壢分給𠊎个子民。</verse>
				<verse number="7">基列 係屬𠊎个， 瑪拿西 也屬𠊎； 以法蓮 係𠊎个頭盔； 猶大 就係𠊎个權杖。</verse>
				<verse number="8">摩押 係𠊎个洗腳盆； 以東 就係𠊎个地盤； 非利士 係𠊎个手下敗將。」</verse>
				<verse number="9">麼人能帶𠊎打入這堅固个城？ 麼人能帶領𠊎去到 以東 个地？</verse>
				<verse number="10">上帝啊，你正經將𠊎等㧒掉了係麼？ 你毋同𠊎等个軍隊共下出戰係麼？</verse>
				<verse number="11">求你幫助𠊎等攻擊敵人， 因為人个幫助全無路用。</verse>
				<verse number="12">有上帝共下，𠊎等就會勝利； 佢一定會踐踏𠊎等个仇敵。</verse>
			</chapter>
			<chapter number="61">
				<verse number="1">上帝啊，求你聽𠊎个求喊； 求你側耳垂聽𠊎个祈禱。</verse>
				<verse number="2">𠊎在遠離家門个地極， 𠊎心肝鬱啐，𠊎求喊你。 求你帶𠊎到安全个避難所！</verse>
				<verse number="3">事實上你就係𠊎个保護者， 係𠊎抵抗敵人堅強个城堡。</verse>
				<verse number="4">求你俾𠊎永遠住在你个帳篷肚； 俾𠊎在你个翼胛下背得到庇佑。</verse>
				<verse number="5">上帝啊，因為你有聽𠊎所許个願； 你賜𠊎敬畏你个人應得个產業。</verse>
				<verse number="6">求你增加國王个壽年， 使佢長命到萬世萬代！</verse>
				<verse number="7">上帝啊，願佢在你个面前永遠做王； 願你用信實㧯不變个慈愛保護佢。</verse>
				<verse number="8">恁樣，𠊎就永遠唱歌頌讚你个名； 𠊎還愛逐日對你還𠊎所許个願。</verse>
			</chapter>
			<chapter number="62">
				<verse number="1">𠊎心神恬恬等候上帝； 𠊎个拯救係對佢來个。</verse>
				<verse number="2">唯有佢係𠊎个磐石，𠊎个救主； 佢係𠊎个城堡，𠊎就毋會搖動。</verse>
				<verse number="3">你等全體攻擊一個人，愛到幾時呢？ 佢像斜走个圍牆、會橫个籬笆定定。</verse>
				<verse number="4">大家一心一意想愛將佢對大位拉下來； 佢等好講花撩，滿嘴祝福，總係心咒罵佢。</verse>
				<verse number="5">𠊎个心啊，恬恬等候上帝， 因為佢係𠊎惟一个希望。</verse>
				<verse number="6">唯有佢係𠊎个磐石，𠊎个救主； 佢係𠊎个城堡，𠊎就毋會搖動。</verse>
				<verse number="7">𠊎个拯救㧯光榮全部係在上帝； 佢係𠊎堅固个磐石，𠊎个避難所。</verse>
				<verse number="8">眾百姓啊，愛時常信靠上帝， 將心意全部擺在佢个面前， 因為上帝係𠊎等个避難所。</verse>
				<verse number="9">卑賤个人盡虛空； 富貴个人當虛假。 用秤仔來秤，全無半點重； 佢等攏總比空氣還較輕。</verse>
				<verse number="10">你等定著毋好倚靠惡勢力， 也毋好妄想靠搶人來發財； 就算發起來， 你等个心也毋好倚靠錢財。</verse>
				<verse number="11">𠊎再三聽上帝講過， 一切權能係屬佢个；</verse>
				<verse number="12">主啊，不變个慈愛也係屬你个。 你一定會照逐儕所行个報應佢等。</verse>
			</chapter>
			<chapter number="63">
				<verse number="1">上帝啊，你係𠊎个上帝； 𠊎迫切尋求你！ 像天旱、燥燥、無水个荒地， 𠊎个心神想念你，渴慕你。</verse>
				<verse number="2">你識俾𠊎在聖所朝見你， 俾𠊎看你个大能㧯榮光。</verse>
				<verse number="3">你不變个慈愛比生命較好； 所以𠊎个嘴愛唱歌頌讚你。</verse>
				<verse number="4">𠊎一生人攏總愛感謝你； 𠊎愛擎起雙手對你祈禱。</verse>
				<verse number="5">𠊎个心神會盡滿足，像食滂沛； 𠊎个嘴愛對你吟唱歡樂頌讚个詩歌。</verse>
				<verse number="6">𠊎在眠床項思念你； 𠊎歸暗晡緊想念你。</verse>
				<verse number="7">因為你時常幫助𠊎， 𠊎在你个翼胛下歡喜唱歌。</verse>
				<verse number="8">𠊎个心兼兼跈等你； 你个右手也扶持𠊎。</verse>
				<verse number="9">該兜尋機會殺害𠊎个， 佢等攏總會落陰間去。</verse>
				<verse number="10">佢等會死在刀劍下， 身屍被野狗喫淨淨。</verse>
				<verse number="11">總係，王會因為上帝歡喜快樂； 對上帝許願个攏總會讚美佢； 該時，講花撩个嘴一定會塞住。</verse>
			</chapter>
			<chapter number="64">
				<verse number="1">上帝啊，求你聽𠊎緊噌个聲！ 求你救𠊎脫離仇敵个恐嚇！</verse>
				<verse number="2">求你保護𠊎莫被壞人暗算， 也毋好被陰險个人陷害。</verse>
				<verse number="3">佢等磨利舌乸，就像磨刀仔， 像射箭恁樣，發出惡毒个話。</verse>
				<verse number="4">佢等暗中埋伏，愛射無罪个人； 開弓就射，全無顧慮。</verse>
				<verse number="5">佢等彼此教唆，陰謀做壞事； 佢等計劃將羅網設到盡祕密， 講：「這兜羅網麼人看得到呢？」</verse>
				<verse number="6">佢等逐擺設好詭計就講： 「這計謀係𠊎等用盡心機設計个！」 人个心思意念實在真難理解！</verse>
				<verse number="7">總係，上帝愛用箭射佢等； 佢等會在忽然之間著傷。</verse>
				<verse number="8">佢愛因為佢等个話消滅佢等； 看到佢等个人全部會緊搖頭。</verse>
				<verse number="9">大家攏總會愊愊掣， 傳講上帝个工作， 也思想佢个作為。</verse>
				<verse number="10">義人因為上主就歡喜，並倚靠佢； 一切心肝正直个人也愛頌讚佢。</verse>
			</chapter>
			<chapter number="65">
				<verse number="1">上帝啊，𠊎等應當在 錫安 讚美你； 𠊎等應當對你還所許个願。</verse>
				<verse number="2">聽人祈禱个主啊， 人人應當就近你。</verse>
				<verse number="3">罪惡贏過𠊎等 个時， 你赦免𠊎等个過犯。</verse>
				<verse number="4">你所揀選、帶來住在你聖所个人， 實在有福氣噢！ 𠊎等會享受你聖所个豐盛到心滿意足， 就係你聖殿个福氣！</verse>
				<verse number="5">拯救𠊎等个上帝啊， 你用奇妙个作為來應𠊎等个祈禱，給𠊎等勝利。 世間个萬民㧯天涯海角个人全部信靠你！</verse>
				<verse number="6">你彰顯你个大能， 用力量安定群山。</verse>
				<verse number="7">你平靜大海个吼聲， 波浪个吵鬧， 㧯萬民个騷動。</verse>
				<verse number="8">全世界因為你所成就个大事來敬畏你； 對日出到日落之地个人因為你个作為來歡呼。</verse>
				<verse number="9">你看顧土地，落甘霖來滋潤它； 你使土地得到滋養，俾它肥起來。 你所賜个河壩，雨水滿滿； 你使大地繼續出產五榖。</verse>
				<verse number="10">你使耕地雨水充足， 用水滋潤田地； 你落雨俾燥泥鬆軟， 使農作物得到生長。</verse>
				<verse number="11">你个恩典使𠊎等年年豐收； 有你腳跡个所在就有富足。</verse>
				<verse number="12">牧場中牛羊成群； 山嶺間歡聲滿遍。</verse>
				<verse number="13">牛羊滿山，五榖滿坑； 萬物一同歡呼歌唱！</verse>
			</chapter>
			<chapter number="66">
				<verse number="1">全世界愛歡喜 大聲頌讚上帝！</verse>
				<verse number="2">愛唱歌頌讚佢榮光个名！ 愛獻讚美个詩來榮耀佢！</verse>
				<verse number="3">愛對上帝講：「你所做个實在奇妙！ 你个能力大到連仇敵也降服你！</verse>
				<verse number="4">全世界攏總愛敬拜你， 對你唱歌，頌讚你个名。」</verse>
				<verse number="5">來啊，來看上帝所做个大事； 來看佢在人間奇妙个作為。</verse>
				<verse number="6">佢識將海變做燥地， 使𠊎等个祖先行等過河壩； 𠊎等在該位因為佢快樂。</verse>
				<verse number="7">佢憑自家个大能掌權到永遠； 佢用佢个目珠鑒察萬邦萬國； 悖逆个人啊，毋好自高自大噢！</verse>
				<verse number="8">萬民啊，愛頌讚𠊎等个上帝， 俾讚美佢个聲音傳遍四方。</verse>
				<verse number="9">佢有保守𠊎等个生命， 使𠊎等个腳無打盪溜。</verse>
				<verse number="10">上帝啊，你識考驗𠊎等； 你鍛鍊𠊎等，像煉銀仔。</verse>
				<verse number="11">你使𠊎等陷落羅網底背； 你用重擔磧𠊎等个背囊。</verse>
				<verse number="12">你准仇敵坐戰車輾𠊎等个頭那； 𠊎等又經歷水深火熱个試煉； 然後你帶𠊎等到豐盛个所在。</verse>
				<verse number="13">𠊎愛帶燒化祭入你个聖殿， 對你還𠊎所許个願，</verse>
				<verse number="14">就係患難中𠊎親口許个願。</verse>
				<verse number="15">𠊎愛獻肥肥个頭牲做燒化祭； 𠊎愛將綿羊牯、牛牯㧯山羊牯， 做香香个燒化祭獻給你。</verse>
				<verse number="16">敬畏上帝个人啊，你等來聽！ 𠊎愛講起佢為𠊎所做个奇事。</verse>
				<verse number="17">𠊎識開嘴求喊佢； 𠊎也出聲頌讚佢。</verse>
				<verse number="18">𠊎若係心懷罪惡， 主一定毋聽𠊎求。</verse>
				<verse number="19">總係上帝實在聽到了； 佢留心聽𠊎祈禱个聲。</verse>
				<verse number="20">上帝係應當得到稱頌个， 因為佢無拒絕𠊎个祈禱， 也無收轉佢不變个慈愛。</verse>
			</chapter>
			<chapter number="67">
				<verse number="1">上帝啊，憐憫𠊎等； 求你賜福給𠊎等， 用慈愛對待𠊎等；</verse>
				<verse number="2">好使全世界知你个旨意， 萬國攏總清楚你个救恩。</verse>
				<verse number="3">上帝啊，願萬民頌讚你； 願世間人攏總頌讚你！</verse>
				<verse number="4">願萬邦歡喜快樂來唱歌； 因為你用公正審判萬民， 你帶領世間个萬邦萬國。</verse>
				<verse number="5">上帝啊，願萬民頌讚你； 願世間人攏總頌讚你！</verse>
				<verse number="6">土地有出產五榖； 上帝 — 𠊎等个上帝有賜福給𠊎等 。</verse>
				<verse number="7">願上帝賜福給𠊎等； 願天下萬民敬畏佢！</verse>
			</chapter>
			<chapter number="68">
				<verse number="1">願上帝䟘起來，使佢个仇敵四散； 願該兜怨恨佢个對佢面前逃走。</verse>
				<verse number="2">願佢等被上帝逐走， 就像煙被風吹散一樣； 願壞人在上帝面前消滅， 像蠟堵到火就溶掉一樣。</verse>
				<verse number="3">總係義人愛歡喜唱歌， 在上帝面前歡喜快樂。</verse>
				<verse number="4">愛對上帝唱詩，頌讚佢个名； 愛為到該坐雲个 預備道路。 佢个名係安到上主； 你等愛在佢面前歡喜快樂！</verse>
				<verse number="5">上帝住在佢个聖殿肚； 佢做孤兒个阿爸，為寡婦伸冤。</verse>
				<verse number="6">上帝使孤單个人有屋下好轉， 使被人關个得到自由快樂； 總係悖逆个住在燥熻个地。</verse>
				<verse number="7">上帝啊，你在你子民个頭前行， 你帶領佢等行過曠野个時節，</verse>
				<verse number="8">大地震動，天也落雨， 因為 西奈 个上帝 出現， 以色列 个上帝降臨了。</verse>
				<verse number="9">上帝啊，你降下大雨； 你使燥燥个土地得到滋潤。</verse>
				<verse number="10">你个子民就住在該位； 上帝啊，你用慈悲款待窮苦人。</verse>
				<verse number="11">主一下令， 歸群个婦女就傳講：</verse>
				<verse number="12">「該兜王㧯軍隊逃走了！」 在屋下个婦女分到戰利品；</verse>
				<verse number="13">有包白銀个月鴿仔个雕像， 牠兜个翼胛有黃金緊閃光。 (戰爭中樣有人囥在羊圈肚？)</verse>
				<verse number="14">全能个上帝逐散該兜王个時， 佢喊 大雪落在 撒們 山頂高。</verse>
				<verse number="15">巴珊 个山實在真莊嚴； 巴珊 山有盡多座山峰。</verse>
				<verse number="16">你等多峰多嶺个山啊， 做麼介嫉妒上帝所選所住个 錫安 山？ 上主愛永遠住在 錫安 山頂！</verse>
				<verse number="17">上帝个戰車有千千萬萬； 主帶它兜對 西奈 入聖所 。</verse>
				<verse number="18">佢升上去到高高个所在， 帶等盡多捉來个人； 佢接受人獻个禮物， 甚至悖逆者个禮物。 主上帝愛住在該所在。</verse>
				<verse number="19">愛頌讚主，就係救𠊎等个上帝， 因為佢逐日揹等𠊎等个重擔。</verse>
				<verse number="20">𠊎等个上帝係拯救个上帝； 上主係救𠊎等脫離死亡个主。</verse>
				<verse number="21">上帝一定愛打爛佢仇敵个頭那， 該兜硬硬愛犯罪个人个頭那殼。</verse>
				<verse number="22">主講過： 「𠊎愛將你等个仇敵對 巴珊 帶來； 𠊎愛帶佢等對深海个當中過來，</verse>
				<verse number="23">好俾你等對佢等个血中行等過， 也好俾你等个狗來舐佢等个血。」</verse>
				<verse number="24">上帝啊，大家攏總看到你得勝个行列； 佢等看等𠊎个上帝 — 𠊎个王進入聖所。</verse>
				<verse number="25">詩班在前，樂隊在後， 打鈴鼓个童女在中央。</verse>
				<verse number="26">你等愛在大聚會中頌讚上帝； 以色列 个子孫啊，你等愛頌讚上主！</verse>
				<verse number="27">最細个支族 便雅憫 行最頭前， 然後， 猶大 个眾領袖㧯隨從跈等， 接等係 西布倫 㧯 拿弗他利 个眾領袖。</verse>
				<verse number="28">上帝啊，求你顯出你个大能， 就係你為到𠊎等用過个能力！</verse>
				<verse number="29">因為你在 耶路撒冷 个聖殿， 列王愛帶禮物獻給你。</verse>
				<verse number="30">求你責罰 埃及 — 該隻蘆竹中个禽獸； 責罰列國 — 該群牛牯㧯牠兜个細牛， 直到佢等低頭降服，對你獻上銀仔。 求你將該兜盡好相㓾个民族打散！</verse>
				<verse number="31">會有大使對 埃及 前來； 古實 人會擎手獻禮物給上帝。</verse>
				<verse number="32">地上萬國啊，愛歌頌上帝； 你等愛唱詩歌來頌讚主！</verse>
				<verse number="33">愛歌頌該坐在萬古高天上个主！ 聽啊，佢發出个聲音滿有權能。</verse>
				<verse number="34">愛傳揚上帝个大權能； 佢个威嚴大過 以色列 ； 佢个大權能充滿穹蒼。</verse>
				<verse number="35">上帝啊，你在你个聖所中係真得人敬畏个！ 以色列 个上帝賜力量㧯權能給佢个子民。 你等愛頌讚上帝！</verse>
			</chapter>
			<chapter number="69">
				<verse number="1">上帝啊，求你拯救𠊎！ 水浸到𠊎个頸筋囉！</verse>
				<verse number="2">𠊎陷在湳仔底背，無踏腳个地方； 𠊎落在深水中，大水會浸死𠊎囉！</verse>
				<verse number="3">𠊎喊救命，喊到無力，喉嗹燥燥； 𠊎仰望𠊎个上帝到目珠花花。</verse>
				<verse number="4">無緣無故怨恨𠊎个人比𠊎个頭那毛較多； 無因無端對敵𠊎、愛消滅𠊎个人實在真強。 佢等樣做得喊𠊎交出𠊎無偷無搶个東西？</verse>
				<verse number="5">上帝啊，你知𠊎个戇直； 𠊎个罪過也瞞你毋過。</verse>
				<verse number="6">至高个上主 — 萬軍个元帥啊， 莫俾仰望你个人因為𠊎見笑。 以色列 个上帝啊，莫俾尋你个人因為𠊎受侮辱。</verse>
				<verse number="7">𠊎就係為到你被人辱罵， 滿面見笑。</verse>
				<verse number="8">𠊎該兜兄弟看𠊎做生份人； 連𠊎个親兄弟也看𠊎做外人。</verse>
				<verse number="9">𠊎為你个聖殿大發熱心，就像火燒； 別人對你个辱罵全部落在𠊎个身上。</verse>
				<verse number="10">𠊎禁食來刻苦自家 ， 佢等卻反轉侮辱𠊎。</verse>
				<verse number="11">𠊎著麻衫表示哀傷， 佢等就嘲謔𠊎。</verse>
				<verse number="12">佢等在街頭巷尾談論𠊎， 連酒醉个也捉𠊎準歌唱。</verse>
				<verse number="13">總係𠊎，上主啊，𠊎愛求喊你； 上帝啊，因為你豐盛个慈愛， 因為你真實个救恩， 求你允准𠊎个祈禱。</verse>
				<verse number="14">求你救𠊎脫出湳泥， 莫俾𠊎沈下去； 求你救𠊎離開深水， 脫離怨恨𠊎个。</verse>
				<verse number="15">求你莫俾大水淹死𠊎， 也毋好俾深潭吞滅𠊎， 還有，莫俾墳墓埋到𠊎。</verse>
				<verse number="16">上主啊，求你應𠊎，因為你个慈愛係最好； 求你照你豐盛个慈悲轉面過來、看顧𠊎。</verse>
				<verse number="17">求你莫揞等面毋搭你个僕人； 𠊎在急難中，求你遽遽回答𠊎。</verse>
				<verse number="18">求你行近來救𠊎个性命； 求你對仇敵手中救贖𠊎。</verse>
				<verse number="19">你知𠊎被人罵、被人欺負、受侮辱； 𠊎个仇敵係㖠兜人，你全部清楚。</verse>
				<verse number="20">辱罵使𠊎非常傷心，又絕望。 𠊎希望有人會同情，總係無； 𠊎希望得到安慰，也得毋到。</verse>
				<verse number="21">𠊎肚飢，佢等給𠊎苦膽食； 𠊎嘴燥，佢等給𠊎酸醋啉。</verse>
				<verse number="22">願佢等个筵席成做佢等个羅網； 願佢等个慶祝變做佢等个陷阱。</verse>
				<verse number="23">願佢等目珠青盲、看毋到； 願佢等腰骨痠痛到緊掣。</verse>
				<verse number="24">願你對佢等大發譴； 願你个責罰逐到佢等。</verse>
				<verse number="25">願佢等个營房荒涼掉； 願佢等个布篷無人住。</verse>
				<verse number="26">佢等壓迫你所責罰个人； 佢等嘲謔你所打傷个人。</verse>
				<verse number="27">求你嚴嚴責罰佢等个罪， 莫俾佢等承受你个拯救。</verse>
				<verse number="28">願佢等个名對生命冊拭掉； 願佢等無在義人个名單中。</verse>
				<verse number="29">𠊎還在憂傷㧯困苦之中； 上帝啊，求你保護𠊎，救𠊎！</verse>
				<verse number="30">𠊎愛用詩歌來讚美上帝个名； 𠊎愛用感謝來宣揚佢个偉大。</verse>
				<verse number="31">這件事比獻牛， 抑係獻有角有蹄个牛牯， 使上主還較歡喜。</verse>
				<verse number="32">受壓迫个人看到就快樂； 尋求上帝个人，願你等个心得到鼓勵。</verse>
				<verse number="33">因為上主留心聽困苦人个祈禱； 佢毋會毋搭監獄肚佢个子民。</verse>
				<verse number="34">願天㧯地攏總讚美上帝！ 海㧯其中个生物讚美佢！</verse>
				<verse number="35">上帝愛拯救 錫安 ，重建 猶大 該兜城； 佢个子民愛住在該位，承接做家業。</verse>
				<verse number="36">佢僕人个後代愛承接該地； 敬愛佢名个人會住在該位。</verse>
			</chapter>
			<chapter number="70">
				<verse number="1">上帝啊，求你拯救𠊎！ 上主啊，求你遽遽來幫助𠊎！</verse>
				<verse number="2">願該兜想愛收𠊎命个人失敗見笑！ 願想愛看𠊎受害个人退走受侮辱！</verse>
				<verse number="3">願該兜嘲謔𠊎講： 「啊哈！好勢了！」个人， 自家見笑來打亂退！</verse>
				<verse number="4">願所有尋求你个人因為你歡喜快樂！ 願一切愛慕你拯救个人緊講： 「上帝真偉大！」</verse>
				<verse number="5">𠊎係盡軟弱又窮苦个人； 上帝啊，求你遽遽到𠊎這位來。 你係𠊎个幫助，𠊎个拯救者； 上主啊，求你毋好停跎！</verse>
			</chapter>
			<chapter number="71">
				<verse number="1">上主啊，𠊎尋求你个庇佑； 求你永遠莫俾𠊎見笑。</verse>
				<verse number="2">你係公義个，求你救𠊎，透放𠊎； 求你耳公側側來聽𠊎，拯救𠊎。</verse>
				<verse number="3">求你做𠊎避難个巖石， 𠊎隨時做得去个所在； 也求你下命令來救𠊎， 因為你係𠊎个磐石㧯城堡。</verse>
				<verse number="4">𠊎个上帝啊，救𠊎脫離壞人个手； 使𠊎脫離殘暴邪惡个人个勢力。</verse>
				<verse number="5">至高个上主啊，你係𠊎个希望； 𠊎從細到這下就一直信靠你。</verse>
				<verse number="6">𠊎一生所倚靠个就係你； 使𠊎平安出母胎个係你。 𠊎愛一生人讚美你無停！</verse>
				<verse number="7">盡多人認為𠊎个一生非常奇怪， 總係你 一直係𠊎堅固个避難所。</verse>
				<verse number="8">𠊎一開嘴就讚美你， 歸日宣揚你个榮光。</verse>
				<verse number="9">求你毋好在𠊎年老个時節㧒掉𠊎； 求你毋好在𠊎無氣力个時放掉𠊎。</verse>
				<verse number="10">𠊎个仇敵議論𠊎、打探𠊎； 佢等彼此計謀想愛害𠊎。</verse>
				<verse number="11">佢等講：「上帝已經將佢㧒掉了； 𠊎等來去捉佢，無人能救佢了！」</verse>
				<verse number="12">上帝啊，求你毋好離開𠊎恁遠； 𠊎个上帝啊，求你遽遽幫助𠊎！</verse>
				<verse number="13">願該兜攻擊𠊎个人失敗消滅； 願想愛害𠊎个人見笑受侮辱。</verse>
				<verse number="14">總係𠊎，𠊎愛一直盼望； 𠊎愛更加煞猛讚美你！</verse>
				<verse number="15">𠊎愛日夜講起你个公義㧯救恩， 雖然該兜遠遠超過𠊎所能了解。</verse>
				<verse number="16">至高个上主啊，𠊎愛來頌讚你个大能； 𠊎所愛宣揚个，係你自家个公義定定。</verse>
				<verse number="17">上帝啊，𠊎從細時就得到你个教導； 直到這下，𠊎還傳揚你奇妙个作為。</verse>
				<verse number="18">這下𠊎人老，頭那毛白白， 上帝啊，求你毋好放掉𠊎！ 𠊎愛先對下代傳揚你个能力， 將你个大權能指示後代个人。</verse>
				<verse number="19">上帝啊，你个公義比天較高！ 你所成个大事，無人比抑得！</verse>
				<verse number="20">你使𠊎經歷多多災難痛苦； 總係你會再回復𠊎个元氣； 你會對陰間底背救𠊎上來。</verse>
				<verse number="21">你會使𠊎比先前較有尊榮； 你定著會再過一擺安慰𠊎。</verse>
				<verse number="22">𠊎个上帝啊，𠊎愛彈琴頌讚你个信實！ 以色列 个至聖者啊，𠊎愛彈琴歌頌你！</verse>
				<verse number="23">𠊎頌讚你个時，愛大聲歡喜； 𠊎愛唱歌，因為你有拯救𠊎。</verse>
				<verse number="24">𠊎歸日愛講起你个公義， 因為想愛害𠊎个人已經失敗見笑。</verse>
			</chapter>
			<chapter number="72">
				<verse number="1">上帝啊，求你教導國王， 使佢照你个公義來審判； 求你將你个公義賜給王子。</verse>
				<verse number="2">恁樣佢就會用正義治理你个子民， 照公當對待該兜屬你个窮苦人。</verse>
				<verse number="3">願大山細山因為公義， 使全國人民享受太平。</verse>
				<verse number="4">願王照公當庇佑窮苦人， 援助有欠缺無人幫助个， 同時打擊欺壓佢等个人。</verse>
				<verse number="5">就算日頭還發光，月光也還在， 願你个子民世世代代敬畏你！</verse>
				<verse number="6">願王像雨水落在草埔； 願王像甘霖滋潤大地。</verse>
				<verse number="7">願佢在位个日仔正義伸張； 願國泰民安就像月光長存。</verse>
				<verse number="8">佢个國對這隻海透到該隻海， 對 幼發拉底 河一直透到地極。</verse>
				<verse number="9">住在曠野个會向佢行禮； 佢个仇敵會伏下降服佢。</verse>
				<verse number="10">他施 㧯列島該兜王會對佢獻上貢物； 示巴 㧯 西巴 个眾王也帶禮物來。</verse>
				<verse number="11">列王會跪拜佢； 萬國會服事佢。</verse>
				<verse number="12">佢透放對佢求喊个窮苦人， 透放受壓迫㧯無人幫助个人。</verse>
				<verse number="13">佢憐憫軟弱窮苦个人； 佢拯救窮苦人个性命。</verse>
				<verse number="14">佢救佢等脫離壓迫㧯強暴； 佢看佢等个生命做盡寶貴。</verse>
				<verse number="15">願王萬歲！ 願佢得到 示巴 个金仔； 願有人時常緊代佢祈禱， 求上帝一直賜福給佢！</verse>
				<verse number="16">願土地五榖豐登， 有豐富个收成； 山頭果子滿遍， 就像 黎巴嫩 一樣； 願城市个人興旺， 像野地生滿青草。</verse>
				<verse number="17">願佢个名永遠被人紀念； 願佢个名聲像日頭長存。 願萬民對佢得到福氣； 願萬國稱佢真有福氣。</verse>
				<verse number="18">愛頌讚上主 — 以色列 个上帝！ 唯有佢正行得出奇妙个事。</verse>
				<verse number="19">愛永遠頌讚佢榮耀个名！ 願佢个榮光充滿全世界！ 阿愐！阿愐！</verse>
				<verse number="20">耶西 个孻仔 大衛 个祈禱結束。</verse>
			</chapter>
			<chapter number="73">
				<verse number="1">上帝確實恩待 以色列 ， 好款待心肝淨浰个人。</verse>
				<verse number="2">總係𠊎險險打盪溜， 𠊎个腳險險企毋在；</verse>
				<verse number="3">因為𠊎嫉妒驕傲个人興旺， 看到壞人富貴𠊎盡毋甘願。</verse>
				<verse number="4">佢等無堵到麼介痛苦； 佢等个身體也盡勇健。</verse>
				<verse number="5">佢等毋使像別人恁辛苦； 佢等無像別人堵到災難。</verse>
				<verse number="6">所以，佢等就將驕傲準脖鍊戴； 佢等也將暴力準衫褲著。</verse>
				<verse number="7">佢等个目珠顯出貪心； 佢等个意念充滿詭詐。</verse>
				<verse number="8">佢等嘲謔別人，講人个壞話； 佢等自高自大，圖謀壓制人。</verse>
				<verse number="9">佢等用嘴褻瀆上天， 用舌乸教唆世間人；</verse>
				<verse number="10">致到連上帝个子民也跈佢等， 一心一意信從佢等所講个話 。</verse>
				<verse number="11">佢等講：「上帝樣會知？ 至高者敢有智識嗎？」</verse>
				<verse number="12">看啊，壞人就係恁樣； 佢等當好彩，緊來緊發。</verse>
				<verse number="13">𠊎堅持純潔，毋敢犯罪； 這實在係浪費精神个！</verse>
				<verse number="14">因為𠊎歸日堵到災難； 逐日朝晨就受到責罰！</verse>
				<verse number="15">𠊎若係講： 「𠊎愛繼續恁樣講」， 𠊎就毋係你忠實个子民。</verse>
				<verse number="16">𠊎盡想愛了解這個事， 總係𠊎傷腦筋也無用；</verse>
				<verse number="17">直到𠊎進入上帝个聖殿， 𠊎正明白壞人个結局。</verse>
				<verse number="18">你實在將佢等放在滑溜溜个所在； 你使佢等橫落滅亡之中。</verse>
				<verse number="19">佢等會在𥍉目之間滅掉； 佢等會被大災難掃淨淨。</verse>
				<verse number="20">像人發夢，一醒過來，夢就無掉去， 主啊，你一醒，佢等就無蹤無跡了。</verse>
				<verse number="21">𠊎本來心懷不平， 𠊎个心肝受傷害。</verse>
				<verse number="22">𠊎像禽獸恁戇； 𠊎對你無了解。</verse>
				<verse number="23">總係，𠊎一直同你共下， 因為你牽等𠊎个右手。</verse>
				<verse number="24">你係用勸話來輔導𠊎， 到尾你也會帶𠊎入榮光。</verse>
				<verse number="25">除了你，在天頂𠊎還有麼人？ 𠊎有你，在世間𠊎無再有好欣慕个。</verse>
				<verse number="26">𠊎个肉體㧯心神緊來緊腐敗； 總係上帝就係𠊎心內个力量， 又係𠊎个福份直到永永遠遠。</verse>
				<verse number="27">該兜離開你个人一定會滅亡； 所有背叛你个人會被你消滅。</verse>
				<verse number="28">論到𠊎，親近上帝就係𠊎个福氣！ 𠊎靠至高个上主做𠊎个避難所； 𠊎愛恁樣來宣揚你一切个作為。</verse>
			</chapter>
			<chapter number="74">
				<verse number="1">上帝啊，你做麼介㧒掉𠊎等恁久？ 你愛永遠對你牧養个羊群譴到發火嗎？</verse>
				<verse number="2">愛記得你古時代揀選个子民， 就係你所贖、歸你自家个民族； 求你紀念你識住過个 錫安 山。</verse>
				<verse number="3">𠊎等个仇敵已經將聖殿毀滅掉囉； 求你徙腳步過來看這荒涼个所在。</verse>
				<verse number="4">你个仇敵在你个聖殿肚大聲喊； 佢等將佢等得勝个旗仔擎起來。</verse>
				<verse number="5">佢等像斬樹仔个人， 拿等斧頭緊劈緊斬。</verse>
				<verse number="6">聖殿肚所有雕刻个柱𣎴， 全部用斧頭㧯鐵鎚敲掉。</verse>
				<verse number="7">佢等還放火燒你个聖殿； 佢等褻瀆敬拜你个所在，拆到貼貼。</verse>
				<verse number="8">佢等決心講：「𠊎等來將佢等徹底消滅」； 佢等就將這地方逐間聖所燒淨淨。</verse>
				<verse number="9">神聖个記號全部毋見掉了； 也無一個先知了； 𠊎等當中無人知這災難愛到幾時。</verse>
				<verse number="10">上帝啊，仇敵笑你愛到幾時呢？ 敢講敵人會永遠褻瀆你个名係麼？</verse>
				<verse number="11">你做麼介毋伸右手幫助𠊎等？ 求你對懷中伸手消滅佢等。</verse>
				<verse number="12">上帝啊，自古以來你係𠊎个王； 在這世間，施行拯救个就係你。</verse>
				<verse number="13">你用大能分開海水； 你打爛海怪个頭那。</verse>
				<verse number="14">你將大海怪 个頭那打到糜糜， 將牠个肉分給曠野个動物 食。</verse>
				<verse number="15">係你使泉水緊湧等出來； 係你使大河壩个水燥掉。</verse>
				<verse number="16">日夜个變化係你个旨意； 日頭㧯月光係你排列个。</verse>
				<verse number="17">大地个界限係你設立个； 熱天㧯寒天係你安排个。</verse>
				<verse number="18">上主啊，毋好毋記得你个仇敵嘲謔你； 毋好毋記得無敬虔个人樣般藐視你个名。</verse>
				<verse number="19">毋好將你純良个子民 交給殘暴个敵人； 毋好永遠毋記得你這兜受壓迫个子民。</verse>
				<verse number="20">求你紀念你同𠊎等所立个契約， 因為地上烏暗个所在充滿暴力。</verse>
				<verse number="21">求你莫俾受壓迫个人堵到侮辱； 愛俾窮苦無人幫助个人頌讚你。</verse>
				<verse number="22">上帝啊，求你䟘起來爭取你自家个正義； 求你毋好毋記得無敬虔个人歸日笑你。</verse>
				<verse number="23">毋好毋記得你个仇敵得意个笑聲； 毋好毋記得你个敵人無停个吵鬧。</verse>
			</chapter>
			<chapter number="75">
				<verse number="1">上帝啊，𠊎等感謝你， 𠊎等感謝你！ 𠊎等宣揚你个偉大， 講說 你奇妙个作為！</verse>
				<verse number="2">上帝講：「𠊎已經定好日仔； 𠊎愛用公當來施行審判。</verse>
				<verse number="3">雖然地㧯住在地上个人搖動， 𠊎還愛使地个根基得到堅固。</verse>
				<verse number="4">𠊎喊驕傲个人莫驕傲； 𠊎喊兇惡个人莫好鬥；</verse>
				<verse number="5">莫自大頭昂昂， 莫講話頸橫橫。」</verse>
				<verse number="6">人得到高升毋係對東方抑係西方來个， 也毋係對曠野來个；</verse>
				<verse number="7">唯有上帝斷定一切； 佢使一儕降下，一儕高升。</verse>
				<verse number="8">上主个手中拿等一隻杯仔， 底背裝滿佢大發譴个釅酒； 佢倒出來， 世上邪惡个人攏總愛啉， 一直啉到最後一滴。</verse>
				<verse number="9">總係𠊎愛宣揚 雅各 个上帝； 𠊎愛唱歌頌讚佢直到永遠。</verse>
				<verse number="10">佢愛打碎壞人个權勢； 佢愛加添義人个力量。</verse>
			</chapter>
			<chapter number="76">
				<verse number="1">上帝在 猶大 ，逐個人認識佢； 在 以色列 ，人人尊重佢个名。</verse>
				<verse number="2">佢在 耶路撒冷 有聖帳篷； 佢在 錫安 山有住个所在。</verse>
				<verse number="3">在該位，佢拗斷弓箭， 毀壞盾牌、刀劍㧯武器。</verse>
				<verse number="4">上帝啊，你實在真光榮！ 你打贏敵人，對群山轉來个時，實在真威嚴！</verse>
				<verse number="5">佢等个勇士所搶到个，又被人搶走； 佢等个戰士睡到死死，無力好抵抗。</verse>
				<verse number="6">雅各 个上帝啊，你咄一聲， 佢等个馬㧯騎兵就斷氣。</verse>
				<verse number="7">上帝啊，只有你係得人敬畏个！ 你一發譴，麼人在你面前企得住呢？</verse>
				<verse number="8">你對天頂宣佈判決； 你䟘起來施行審判， 愛拯救一切受壓迫个人， 該時全地敬畏，毋敢出聲。</verse>
				<verse number="9"></verse>
				<verse number="10">人个憤怒會變做對你个頌讚； 你會平伏賸下來个怒氣。</verse>
				<verse number="11">愛對上主 — 你等个上帝許願，並愛還願； 鄰國也攏總愛前來進貢，敬拜可畏个主。</verse>
				<verse number="12">佢滅該兜王子个威風； 佢使地上个君王著驚。</verse>
			</chapter>
			<chapter number="77">
				<verse number="1">𠊎對上帝出聲求喊； 𠊎大聲求上帝，求佢垂聽。</verse>
				<verse number="2">患難个時，𠊎尋求主； 𠊎歸暗晡擎手祈禱， 𠊎个心毋肯受人个安慰。</verse>
				<verse number="3">𠊎思念上帝就緊歎息； 𠊎恬恬緊想就緊傷心。</verse>
				<verse number="4">你使𠊎歸暗晡睡毋落覺； 𠊎憂愁操煩到講毋出話。</verse>
				<verse number="5">𠊎想念過去个日仔， 想起先前該兜年日。</verse>
				<verse number="6">𠊎透夜緊想 ； 𠊎心肝緊問：</verse>
				<verse number="7">「敢講主愛永遠㧒掉𠊎等？ 佢永遠無愛再施恩係麼？</verse>
				<verse number="8">佢不變个慈愛就永遠停掉嗎？ 佢个應許就萬代落空係麼？</verse>
				<verse number="9">敢講上帝已經毋記得樣般施恩？ 敢講佢个憐憫被怒氣塞掉係麼？」</verse>
				<verse number="10">𠊎就講：「這係𠊎最傷心个事情， 至高者个右手已經無共樣了。」</verse>
				<verse number="11">上主啊，𠊎愛想念你偉大个作為； 𠊎愛想起你往時所成就个奇事。</verse>
				<verse number="12">𠊎愛愐想你一切个所做； 𠊎愛緊唸你大能个作為。</verse>
				<verse number="13">上帝啊，你所做个一切係聖潔个； 其他个神明，㖠一個同你比抑得！</verse>
				<verse number="14">你係行神蹟奇事个上帝； 你向列國顯出你个大能。</verse>
				<verse number="15">你用大力救贖你个子民， 拯救 雅各 㧯 約瑟 个後代。</verse>
				<verse number="16">上帝啊，海水看到你就著驚； 深淵見到你，共樣也緊掣。</verse>
				<verse number="17">烏雲降下大雨； 天空緊響雷公； 𥍉爧射來射去。</verse>
				<verse number="18">你个雷公𠾐𠾐滾； 𥍉爧照光全世界； 大地驚到緊顫緊掣。</verse>
				<verse number="19">你行過大海，你越過深淵， 總係無人看到你个腳跡。</verse>
				<verse number="20">你識通過 摩西 㧯 亞倫 个手， 像牧者恁樣帶領你个子民。</verse>
			</chapter>
			<chapter number="78">
				<verse number="1">𠊎个子民啊，愛留心聽𠊎个教導； 你等愛側耳聽𠊎所講个話。</verse>
				<verse number="2">𠊎愛用比喻來說明； 𠊎愛講歷史个奧妙：</verse>
				<verse number="3">就係𠊎等所聽過所知个事， 係𠊎等个祖先㧯𠊎等講个。</verse>
				<verse number="4">𠊎等無愛對子孫囥等這兜事情； 𠊎等一定愛對下一代个人說明： 上主个美善、佢个大能、 㧯佢一切奇妙个作為。</verse>
				<verse number="5">佢頒佈法令給 雅各 个後代； 佢制定誡命給 以色列 人民。 佢下命令給𠊎等个祖先， 愛將佢个法律傳給子孫，</verse>
				<verse number="6">使後代人有好學習， 又傳給佢等个子孫。</verse>
				<verse number="7">恁樣，佢等也會信靠上帝， 毋會毋記得上帝所做个事， 反轉會遵守佢个誡命。</verse>
				<verse number="8">佢等正毋會像祖先一樣； 佢等係硬頸悖逆个百姓， 對上帝無堅定个信心， 對佢也無永久个忠心。</verse>
				<verse number="9">以法蓮 个子孫雖然有弓箭， 總係開戰該日就轉身逃走。</verse>
				<verse number="10">佢等無遵守上帝个約； 佢等毋服從佢个教示。</verse>
				<verse number="11">佢等毋記得佢所做該兜事情， 毋記得佢行給佢等看个神蹟。</verse>
				<verse number="12">上帝在 瑣安 个平原，在 埃及 ， 在佢等祖先个面前行神蹟。</verse>
				<verse number="13">佢將海分開，帶領佢等過去； 佢使海水像牆壁恁樣企等。</verse>
				<verse number="14">日時頭，佢用雲彩帶領佢等； 暗晡時，佢用火光引導佢等。</verse>
				<verse number="15">佢在曠野使磐石裂開， 給佢等有像深淵恁多个水好啉。</verse>
				<verse number="16">佢使磐石噴出盡多水， 像河壩水恁樣流等下。</verse>
				<verse number="17">總係，佢等還繼續得罪上帝， 在曠野悖逆至高者。</verse>
				<verse number="18">佢等故意試探上帝， 隨心所愛个討食物。</verse>
				<verse number="19">佢等褻瀆上帝，講： 「上帝能在曠野辦桌席嗎？</verse>
				<verse number="20">有影，佢實在有打磐石， 使水噴出，像河壩水流等下； 總係佢還有辦法給𠊎等糧食嗎？ 佢有法度為佢个子民預備肉嗎？」</verse>
				<verse number="21">上主聽到這個話就大發譴。 佢用火攻擊佢个子民 雅各 ； 佢對 以色列 譴到火氣當𤏸；</verse>
				<verse number="22">因為佢等毋相信上帝， 也毋倚靠佢个拯救。</verse>
				<verse number="23">總係，佢還係向天下令， 吩咐打開天門；</verse>
				<verse number="24">佢對天頂賜佢等糧食， 降下嗎哪來養育佢等。</verse>
				<verse number="25">人就食到天使个食物； 係上帝使佢等得到飽足。</verse>
				<verse number="26">佢先使天空吹起東風， 又用權能喊南風吹來。</verse>
				<verse number="27">佢使肉像塵灰恁樣降下來， 使飛鳥像海沙恁多賜給佢等；</verse>
				<verse number="28">佢使飛鳥落在營房中， 在佢等布篷个四周圍。</verse>
				<verse number="29">佢等全部有好食，食到飽𩜰𩜰； 上帝照佢等所貪愛个賜給佢等。</verse>
				<verse number="30">總係佢等還當貪食， 佢等个嘴還嚼等个時，</verse>
				<verse number="31">上帝就對佢等大發譴， 㓾死佢等當中个好漢， 收掉 以色列 最優秀个後生人。</verse>
				<verse number="32">雖然經歷這一切， 佢等還係繼續犯罪； 就算發生這兜奇事， 佢等還係毋肯相信。</verse>
				<verse number="33">所以佢使佢等个年日變做虛空， 使佢等个生命忽然間堵到災難。</verse>
				<verse number="34">佢一㓾人个時，佢等就求喊佢； 佢等悔改，迫切尋求上帝。</verse>
				<verse number="35">佢等想起上帝係佢等个磐石， 至高个上帝係佢等个救贖者。</verse>
				<verse number="36">總係佢等講花撩騙佢； 佢等對佢講虛假个話。</verse>
				<verse number="37">佢等對佢盡無忠心， 也無真實守佢个約。</verse>
				<verse number="38">雖然恁樣，上帝痛惜佢个子民： 佢赦免佢等个罪，無消滅佢等； 一擺又一擺，佢忍等無大發譴。</verse>
				<verse number="39">佢體恤佢等不過係肉身定定， 像一陣風，吹過去就無倒轉來。</verse>
				<verse number="40">佢等在曠野再三悖逆上帝； 佢等一直在沙漠使佢傷心！</verse>
				<verse number="41">佢等一擺又一擺試探上帝， 惹 以色列 个至聖者大發譴。</verse>
				<verse number="42">佢等毋記得佢無窮个大能， 並佢救佢等脫離仇敵个日仔。</verse>
				<verse number="43">佢等毋記得佢在 埃及 行个神蹟， 並佢在 瑣安 平原所做个奇事：</verse>
				<verse number="44">佢將河壩个水變做血， 使 埃及 人啉毋得。</verse>
				<verse number="45">佢使烏蠅歸群來拑啄佢等， 使蝦蟆蹧踏佢等个田地。</verse>
				<verse number="46">佢使佢等个五榖被細草蜢食掉， 喊大草蜢將佢等个田園損淨淨。</verse>
				<verse number="47">佢用冰雹毀滅佢等个葡萄樹， 落霜來打壞佢等个無花果樹。</verse>
				<verse number="48">佢用冰雹㧹死佢等个牛群， 又用𥍉爧 傷害佢等个羊群。</verse>
				<verse number="49">佢向佢等發出烈怒、受氣、災禍； 佢个大發譴像死个使者一樣打擊佢等。</verse>
				<verse number="50">佢無再忍等佢个怒氣； 佢毋肯饒佢等个性命； 佢使佢等發瘟來死掉。</verse>
				<verse number="51">佢㓾死 埃及 逐家个長子， 就係 含 屋下勇壯个頭胎。</verse>
				<verse number="52">後來，佢就像牧者一樣， 將自家个子民帶出來， 也帶領佢等經過曠野。</verse>
				<verse number="53">在佢个帶領之下，佢等盡平安，無驚無愁； 總係佢等个敵人就被海水浸死淨淨。</verse>
				<verse number="54">佢𢱋佢等到佢个聖地， 來到佢親自征服个山。</verse>
				<verse number="55">佢在佢子民个面前將外族人逐走， 將該土地分配給佢个子民， 將外族人个家園交給 以色列 个各支族。</verse>
				<verse number="56">總係，佢等試探至高个上帝， 悖逆佢，毋肯服從佢个誡命。</verse>
				<verse number="57">佢等同祖先一樣悖逆，無忠心； 佢等像鬆掉个弓一樣靠毋得。</verse>
				<verse number="58">佢等起外邦神明个祭壇來惹佢發譴； 佢等用雕刻个偶像來引起佢个嫉妒。</verse>
				<verse number="59">上帝一聽到就發譴， 將 以色列 完全棄絕。</verse>
				<verse number="60">佢㧒掉該起在 示羅 个聖所， 就係佢在人間所搭个帳篷。</verse>
				<verse number="61">該彰顯佢个權能㧯榮光个約櫃， 佢由在它被敵人搶走。</verse>
				<verse number="62">佢對自家个子民發譴， 俾佢等死在刀劍之下。</verse>
				<verse number="63">佢等个後生被戰火燒滅； 佢等个妹仔尋無人好嫁。</verse>
				<verse number="64">佢等个祭司被刀劍㓾死； 佢等中間个寡婦無法噭。</verse>
				<verse number="65">最後，主像睡醒一樣， 像勇士酒後清醒。</verse>
				<verse number="66">佢打退佢个敵人， 使佢等永遠見笑。</verse>
				<verse number="67">佢棄絕 約瑟 个後代， 無揀選 以法蓮 支族。</verse>
				<verse number="68">佢揀選个係 猶大 支族， 還有佢所惜个 錫安 山。</verse>
				<verse number="69">佢在該位起聖殿，高到堵天， 像大地企到在在，直到永遠。</verse>
				<verse number="70">佢揀選佢个僕人 大衛 ， 對羊欄當中擇佢出來，</verse>
				<verse number="71">使佢毋使再掌羊群， 立佢做 以色列 个王， 做上帝子民个牧者。</verse>
				<verse number="72">大衛 全心牧養佢等； 佢盡精明帶領佢等。</verse>
			</chapter>
			<chapter number="79">
				<verse number="1">上帝啊，外族人侵入你个土地。 佢等打垃圾你个聖殿， 使 耶路撒冷 變做荒涼。</verse>
				<verse number="2">佢等拿你僕人个身屍給鷹鳥食； 佢等將你聖民个身屍㧒給野獸。</verse>
				<verse number="3">佢等使你个子民血流成河， 血像水恁樣淹等 耶路撒冷 ， 無留下一個人好埋葬屍體。</verse>
				<verse number="4">鄰國侮辱𠊎等； 周圍个人笑𠊎等，嘲謔𠊎等。</verse>
				<verse number="5">上主啊，還愛幾久呢？ 你愛發譴到永遠嗎？ 你个怒氣愛像火燒到幾時呢？</verse>
				<verse number="6">求你將怒氣轉向毋敬畏你个國家， 拚在該兜毋求喊你名个人民身上；</verse>
				<verse number="7">因為佢等吞滅 雅各 个後代， 使佢等个鄉土變做荒涼。</verse>
				<verse number="8">求你莫記等𠊎等祖先个罪， 毋好對𠊎等討佢等个罪債。 求你遽遽施恩來憐憫𠊎等， 因為𠊎等已經無半些希望。</verse>
				<verse number="9">拯救𠊎等个上帝啊， 求你為到你榮光个名來幫助𠊎等； 求你為到你个名透放𠊎等， 赦免𠊎等个罪。</verse>
				<verse number="10">做麼介俾列國緊問： 「你等个上帝在㖠位哪？」 俾𠊎等看到你責罰列國， 因為佢等流你僕人个血。</verse>
				<verse number="11">被人捉去關个，願你垂聽佢等个噌聲； 被人定死罪个，願你用大能透放佢等。</verse>
				<verse number="12">主啊，鄰國樣般羞辱你， 求你用七倍還給佢等。</verse>
				<verse number="13">恁樣，𠊎這兜做你个子民、你牧養个羊群， 𠊎等愛永遠感謝你； 𠊎等愛頌讚你，直到世世代代！</verse>
			</chapter>
			<chapter number="80">
				<verse number="1">以色列 个牧者啊，你帶領 約瑟 像帶羊群一樣， 求你側耳來聽！ 坐在基路伯寶座上个主啊， 求你顯出你个榮光！</verse>
				<verse number="2">在 以法蓮 、 便雅憫 、 瑪拿西 面前， 求你彰顯你个大能來救𠊎等！</verse>
				<verse number="3">上帝啊，求你復興𠊎等！ 求你顯出慈愛， 𠊎等就會得救！</verse>
				<verse number="4">主上帝 — 萬軍个元帥啊， 你个子民祈禱求喊你， 你還愛發閼到幾時呢？</verse>
				<verse number="5">你使佢等用目汁準飯來食， 使佢等啉掉一大杯个目汁。</verse>
				<verse number="6">你使鄰國在𠊎等个土地交戰； 𠊎等个仇敵也隨意㩢耍𠊎等。</verse>
				<verse number="7">上帝 — 萬軍个元帥啊， 求你復興𠊎等！ 求你顯出慈愛， 𠊎等就會得救！</verse>
				<verse number="8">你對 埃及 徙一頭葡萄樹出來； 你逐走列國，將這頭樹種下去。</verse>
				<verse number="9">你為它開墾一大片个土地， 它就釘根盡深，遰到全地。</verse>
				<verse number="10">群山被它个陰影遮等； 它个樹枝揜過香柏樹。</verse>
				<verse number="11">它个樹枝探到 地中海 ； 樹根伸入 幼發拉底 河。</verse>
				<verse number="12">你做麼介拆掉它个籬笆， 由在過路人摘它个葡萄？</verse>
				<verse number="13">樹林中个山豬入來蹧踏它， 荒山中个野獸入來吞食它。</verse>
				<verse number="14">上帝 — 萬軍个元帥啊， 求你回心轉意！ 求你對天頂看下來！ 求你照顧這葡萄樹，</verse>
				<verse number="15">就係你親手種个葡萄樹， 你所照顧俾它長大个幼枝 。</verse>
				<verse number="16">𠊎等个仇敵將這頭樹斬去燒掉； 求你對佢等發譴，來消滅佢等！</verse>
				<verse number="17">求你庇佑你所設立个國家， 保護你自家所揀選个子民 。</verse>
				<verse number="18">𠊎等絕對毋會再離開你； 給𠊎等生命，𠊎等就會求喊你个名。</verse>
				<verse number="19">主上帝 — 萬軍个元帥啊， 求你復興𠊎等！ 求你顯出慈愛， 𠊎等就會得救！</verse>
			</chapter>
			<chapter number="81">
				<verse number="1">愛對上帝𠊎等个力量歡喜唱歌！ 愛大聲頌讚 雅各 个上帝！</verse>
				<verse number="2">愛唱歌，打鈴鼓， 愛用琴㧯弦來彈好聽个音樂。</verse>
				<verse number="3">初一該日愛歕羊角， 十五過節時也愛歕。</verse>
				<verse number="4">這係給 以色列 个規則， 係 雅各 个上帝命令个。</verse>
				<verse number="5">佢出發攻擊 埃及 个時， 將這法令交給 約瑟 个後代。 𠊎聽到𠊎無明白个聲音講：</verse>
				<verse number="6">「係𠊎將你肩頭頂个重擔徙走； 𠊎使你放下裝滿磚仔个畚箕。</verse>
				<verse number="7">你在急難中求𠊎，𠊎就救你。 𠊎在響雷公个密雲中應你， 在 米利巴 个泉水滣考驗你。</verse>
				<verse number="8">𠊎个子民啊，愛聽𠊎个勸話！ 以色列 啊，希望你會聽從𠊎！</verse>
				<verse number="9">你絕對做毋得事奉外邦人个神明； 𠊎以外，你千萬做毋得跪拜別个神。</verse>
				<verse number="10">𠊎係上主 — 你个上帝； 𠊎對 埃及 帶你出來。 打開你个嘴，𠊎會餵飽你。</verse>
				<verse number="11">「總係𠊎个子民毋聽𠊎个話； 以色列 人毋肯完全服從𠊎。</verse>
				<verse number="12">所以𠊎由在佢等硬頸， 去照佢等个戇檔行事。</verse>
				<verse number="13">真希望𠊎个子民會聽𠊎个話！ 真希望 以色列 會遵行𠊎个道！</verse>
				<verse number="14">𠊎會盡遽制伏佢等个仇敵， 攻擊所有㧯佢等作對个人。</verse>
				<verse number="15">恨𠊎个會降服在𠊎面前； 佢等會受責罰直到永遠。</verse>
				<verse number="16">總係，𠊎會用最好个麥仔來養育你等， 也賜你等石縫中个蜂糖，使你等飽足。」</verse>
			</chapter>
			<chapter number="82">
				<verse number="1">上帝主持天庭个聚會， 在該兜神當中做決裁。</verse>
				<verse number="2">佢講：「你等愛停止無公平个審判！ 你等看壞人个情面愛到幾時呢？</verse>
				<verse number="3">愛維護窮苦人㧯孤兒个權利； 對待困苦㧯受壓迫个人愛公當。</verse>
				<verse number="4">愛援助窮苦㧯無倚靠个人， 愛透放佢等脫離壞人个欺負。</verse>
				<verse number="5">「這兜神全無智識也無明白！ 佢等在烏暗中行來行去； 世間正義个根基就搖動。</verse>
				<verse number="6">「𠊎恅到你等係神， 全部係至高者个孻仔。</verse>
				<verse number="7">總係你等同世間人共樣會死； 你等會像逐個王子恁樣橫掉。」</verse>
				<verse number="8">上帝啊，求你䟘起來審判世界， 因為萬國全部係屬你个。</verse>
			</chapter>
			<chapter number="83">
				<verse number="1">上帝啊，求你毋好恬恬毋開嘴！ 上帝啊，求你毋好恬恬毋出聲！</verse>
				<verse number="2">看啊，你个仇敵這下當造反； 怨恨你个人頭那昂到高高。</verse>
				<verse number="3">佢等陰謀愛同你个子民作對； 佢等設計陷害你所庇佑个人。</verse>
				<verse number="4">佢等講：「來啊，來消滅佢等个國家， 使 以色列 个名永遠無人再紀念！」</verse>
				<verse number="5">佢等同心共下參詳， 彼此結盟愛反抗你：</verse>
				<verse number="6">就係 以東 人、 以實瑪利 人， 還有 摩押 人㧯 夏甲 人，</verse>
				<verse number="7">有 迦巴勒 人、 亞捫 人、 亞瑪力 人， 同時還有 非利士 人㧯 泰爾 人。</verse>
				<verse number="8">亞述 人也同佢等勾結， 做 羅得 後代个聯盟。</verse>
				<verse number="9">求你對付佢等，像對付 米甸 人一樣， 像在 基順 河滣對付 西西拉 㧯 耶賓 。</verse>
				<verse number="10">你在 隱‧多珥 將佢等消滅； 佢等个身屍在地上糜掉。</verse>
				<verse number="11">求你對付佢等个將軍， 像對付 俄立 㧯 西伊伯 ； 也消滅佢等个統治者， 像消滅 西巴 㧯 撒慕拿 ；</verse>
				<verse number="12">因為佢等講：「𠊎等來去搶， 來去佔該屬上帝个土地。」</verse>
				<verse number="13">𠊎个上帝啊，打散佢等，像吹散塵灰； 求你使佢等像礱糠被風捲走一樣。</verse>
				<verse number="14">像火燒光樹林， 火焰燒遍山嶺，</verse>
				<verse number="15">照樣，求你用狂風來追佢等， 用暴雨來使佢等驚到會死。</verse>
				<verse number="16">上主啊，求你使佢等滿面見笑， 恁樣，佢等正會承認你偉大个名。</verse>
				<verse number="17">願佢等永遠失敗著驚！ 願佢等在羞辱中滅亡！</verse>
				<verse number="18">願佢等知：只有你 — 上主， 係全地个至高者！</verse>
			</chapter>
			<chapter number="84">
				<verse number="1">上主 — 萬軍个元帥啊， 你个聖所實在真好！</verse>
				<verse number="2">𠊎想愛去上主个聖殿，想到昏掉； 𠊎愛用全部个身心大聲頌讚永生个上帝。</verse>
				<verse number="3">上主 — 萬軍个元帥、 𠊎个王、𠊎个上帝啊， 在你个祭壇堘頭， 連屋簷鳥也為自家做藪， 燕仔也尋到孵子个所在。</verse>
				<verse number="4">住在你聖殿肚个人實在有福氣噢！ 佢等一直在該位讚美你。</verse>
				<verse number="5">倚靠你得到氣力、 熱心愛去 錫安 山朝聖个人， 佢等實在真有福氣噢！</verse>
				<verse number="6">佢等經過燥燥个山壢， 它就變做泉水之地； 連秋雨也落下來， 使山壢到處成做陂塘。</verse>
				<verse number="7">佢等越行越有氣力， 最後會到 錫安 朝見至尊个上帝。</verse>
				<verse number="8">主上帝 — 萬軍个元帥啊， 求你聽𠊎个祈禱！ 雅各 个上帝啊，求你側耳來聽！</verse>
				<verse number="9">上帝啊，求你看顧𠊎等个盾牌； 求你照顧你所選立个王！</verse>
				<verse number="10">在你个聖殿住一日， 贏過在別位住千日； 𠊎甘願企在𠊎上帝聖殿个門口 ， 也無愛住在邪惡人个帳篷肚。</verse>
				<verse number="11">因為主上帝係日頭，係盾牌； 佢會賜恩惠㧯尊榮給𠊎等。 上主毋會將最好个留等 毋給該兜行為正直个人。</verse>
				<verse number="12">上主 — 萬軍个元帥啊， 信靠你个人實在有福氣噢！</verse>
			</chapter>
			<chapter number="85">
				<verse number="1">上主啊，你一直顧念你个土地； 你識俾 以色列 重建家園。</verse>
				<verse number="2">你赦免你子民个罪， 饒佢等一切个過犯。</verse>
				<verse number="3">你無再對佢等發譴； 你收轉你个大發譴。</verse>
				<verse number="4">救𠊎等个上帝啊，復興𠊎等； 求你停止你對𠊎等个憤怒！</verse>
				<verse number="5">敢講你愛永遠對𠊎等發譴？ 敢講你愛譴到世世代代嗎？</verse>
				<verse number="6">求你再一擺俾𠊎等強盛起來； 你个子民就會頌讚你。</verse>
				<verse number="7">上主啊，對𠊎等顯出你不變个慈愛； 懇求你將你个拯救賜給𠊎等。</verse>
				<verse number="8">𠊎愛聽主上帝所講个話。 佢應許愛賜平安給佢忠心个子民， 總係佢等做毋得倒轉去行戇路。</verse>
				<verse number="9">佢定著會救該兜敬畏佢个人； 佢个榮光會充滿𠊎等个土地。</verse>
				<verse number="10">慈愛㧯忠心 互相迎接； 公義㧯和平彼此相親。</verse>
				<verse number="11">人个忠心對地上生出； 上帝个公義對天頂顯現。</verse>
				<verse number="12">上主愛使𠊎等盡富足； 𠊎等个土地會有豐收。</verse>
				<verse number="13">公義會行在上主面前， 為佢預備愛行个道路。</verse>
			</chapter>
			<chapter number="86">
				<verse number="1">上主啊，求你側耳來聽𠊎，應𠊎， 因為𠊎窮苦，無人幫助。</verse>
				<verse number="2">保護𠊎个性命，因為𠊎對你忠心； 𠊎个上帝啊，求你拯救這信靠你个僕人！</verse>
				<verse number="3">主啊，求你憐憫𠊎， 因為𠊎歸日求喊你。</verse>
				<verse number="4">主啊，求你使你个僕人歡喜， 因為𠊎个心所仰望个就係你。</verse>
				<verse number="5">主啊，你係至善个，係樂意赦免人个； 求喊你个就會得到你豐盛个慈愛。</verse>
				<verse number="6">上主啊，求你側耳聽𠊎个祈禱； 求你留心聽𠊎求喊个聲。</verse>
				<verse number="7">在患難當中𠊎愛求喊你， 因為你會答應𠊎。</verse>
				<verse number="8">主啊，無別个神同你比抑得； 佢等个作為同你个比毋得。</verse>
				<verse number="9">主啊，你所造个萬國會來跪拜你； 佢等會榮耀你个尊名。</verse>
				<verse number="10">因為你最偉大，又行奇事； 唯有你正係上帝。</verse>
				<verse number="11">上主啊，求你將你个道路指示𠊎， 𠊎愛照你个真理來行； 求你使𠊎一心敬畏你。</verse>
				<verse number="12">主 — 𠊎个上帝啊，𠊎愛全心感謝你； 𠊎愛榮光你个名直到永遠。</verse>
				<verse number="13">你對𠊎个慈愛恁大； 你拯救𠊎脫離陰間。</verse>
				<verse number="14">上帝啊，驕傲个人攻擊𠊎； 歸黨兇惡个暴徒想愛殺害𠊎， 佢等全無將你放在眼中。</verse>
				<verse number="15">主啊，你係有憐憫㧯恩典个上帝； 你無隨便發譴，有豐盛个慈愛㧯信實。</verse>
				<verse number="16">求你轉身面向𠊎，憐憫𠊎； 將你个力量賜給你个僕人，拯救𠊎， 因為𠊎像吾姆恁樣事奉你。</verse>
				<verse number="17">上主啊，對𠊎顯出你个良善， 使恨𠊎个人看到憑據來見笑， 因為你確實幫助𠊎，安慰𠊎。</verse>
			</chapter>
			<chapter number="87">
				<verse number="1">上主在聖山頂 建造自家个城。</verse>
				<verse number="2">佢對 耶路撒冷 个痛惜， 贏過 以色列 別个城市。</verse>
				<verse number="3">上帝个城啊，請聽佢所講， 關係你該兜光榮个事情：</verse>
				<verse number="4">「𠊎愛將 埃及 㧯 巴比倫 記在順服𠊎个名單中； 非利士 人、 泰爾 人㧯 古實 人， 𠊎愛算佢等做 耶路撒冷 人。」</verse>
				<verse number="5">論到 錫安 ，愛恁樣講： 「萬國愛做它个公民」； 因為至高者愛使它強盛。</verse>
				<verse number="6">上主愛登記萬民个戶口， 算佢等做 耶路撒冷 个公民。</verse>
				<verse number="7">佢等攏總會跳舞唱歌，講： 「𠊎等幸福个泉源在 錫安 ！」</verse>
			</chapter>
			<chapter number="88">
				<verse number="1">上主 — 拯救𠊎个上帝啊， 𠊎日夜在你面前求喊。</verse>
				<verse number="2">求你聽𠊎个祈禱； 側耳聽𠊎个求喊！</verse>
				<verse number="3">恁多災難落在𠊎个身上； 𠊎个性命已經接近陰間。</verse>
				<verse number="4">𠊎同所有臨終个人共樣， 全部个元氣已經消淨淨 。</verse>
				<verse number="5">𠊎被人㧒在死人个當中， 像被人㓾死个睡在墳墓， 無可能再得到你个紀念， 無可能再得到你个扶持。</verse>
				<verse number="6">你將𠊎㧒在深坑肚， 盡深又盡暗个所在。</verse>
				<verse number="7">你个怒氣恁重磧等𠊎； 你用一切个波浪打𠊎。</verse>
				<verse number="8">你使𠊎个朋友離開𠊎， 使𠊎成做佢等所惱个。 𠊎被人關等，無辦法脫身；</verse>
				<verse number="9">𠊎个目珠因為傷心矇掉。 上主啊，𠊎逐日求喊你； 𠊎對你擎手，迫切祈禱。</verse>
				<verse number="10">你愛行奇事給死人看係麼？ 死佬敢會䟘起來頌讚你嗎？</verse>
				<verse number="11">麼人會在墳墓肚講起你个慈愛？ 麼人會在陰間宣揚你个信實？</verse>
				<verse number="12">在該位暗摸摸，樣看得到你行个奇事？ 在該位萬事休，樣還會想念你个公義？</verse>
				<verse number="13">上主啊，係𠊎懇求你來幫助； 逐日天一光，𠊎就對你祈禱。</verse>
				<verse number="14">上主啊，你做麼介棄絕𠊎？ 你做麼介揞等面毋搭𠊎？</verse>
				<verse number="15">𠊎從細就受盡多苦，險險無命； 你對𠊎个責罰，使𠊎身心絕望。</verse>
				<verse number="16">你个大發譴淹過𠊎个身體； 你用得人驚个打擊毀滅𠊎。</verse>
				<verse number="17">苦難像大水歸日將𠊎圍等； 患難做一下對四面圍困𠊎。</verse>
				<verse number="18">你使𠊎个朋友鄰舍離開𠊎； 烏暗就成做𠊎惟一个同伴 。</verse>
			</chapter>
			<chapter number="89">
				<verse number="1">上主啊，𠊎愛永遠歌唱你不變个慈愛； 𠊎愛開嘴傳揚你个信實直到萬代。</verse>
				<verse number="2">𠊎講，你个慈愛永遠長存； 你个信實堅定，像天一樣。</verse>
				<verse number="3">你講：「𠊎識同𠊎所揀選个人立約； 𠊎識應許𠊎个僕人 大衛 講：</verse>
				<verse number="4">『𠊎愛使你个後代永遠做王； 𠊎愛堅固你个王位到萬代。』」</verse>
				<verse number="5">上主啊，諸天頌讚你奇妙个作為； 聖者在天庭唱歌讚美你个信實。</verse>
				<verse number="6">天頂敢有同上主比抑得个？ 神个眾子 當中無一個做得同上主擺共下。</verse>
				<verse number="7">在聖者个聚會中，上帝最受尊重； 佢等在佢个周圍，全部敬畏佢。</verse>
				<verse number="8">主上帝 — 萬軍个元帥啊， 麼人像你恁有權能？ 上主啊，你在所有个事情上顯出你个信實。</verse>
				<verse number="9">你管制大海； 你平靜波浪。</verse>
				<verse number="10">你打碎海怪 拉哈伯 ，㓾死牠； 你用大權能个手打散你个仇敵。</verse>
				<verse number="11">天係你个，地也共樣係你个； 世界㧯其中个萬物係你創造个。</verse>
				<verse number="12">對南極到北極，全部係你造个； 他泊 山、 黑門 嶺攏總對你歡呼。</verse>
				<verse number="13">你个手骨樣般有力！ 你个權能樣般強大！</verse>
				<verse number="14">你个國係用正義㧯公當做根基； 你所做个一切顯出慈愛㧯信實。</verse>
				<verse number="15">用詩歌敬拜你个人實在有福氣！ 上主啊，佢等生活在你个光明中。</verse>
				<verse number="16">因為你，佢等歸日歡喜快樂； 佢等所頌讚个係你个公義。</verse>
				<verse number="17">你係佢等个榮光㧯力量； 你施恩，𠊎等就得到勝利。</verse>
				<verse number="18">𠊎等个盾牌實在係上主揀選个； 𠊎等个王係 以色列 个聖者設立个。</verse>
				<verse number="19">該時，你在異象中對你忠心个子民講： 「𠊎已經將冕旒賜給一個出名个勇士； 𠊎將王位賜給𠊎對人民中選出來个人。</verse>
				<verse number="20">𠊎已經揀選𠊎个僕人 大衛 ， 用聖油膏佢，立佢做你等个王。</verse>
				<verse number="21">𠊎个能力愛時常同佢共下； 𠊎个權能會使佢變盡強壯。</verse>
				<verse number="22">佢个仇敵永遠無辦法贏佢； 邪惡个人也無法度害到佢。</verse>
				<verse number="23">𠊎愛打碎同佢作對个人； 𠊎愛打橫一切恨佢个人。</verse>
				<verse number="24">𠊎愛用信實㧯慈愛款待佢； 靠𠊎个名，佢就會得到勝利。</verse>
				<verse number="25">𠊎愛使佢个國土緊來緊大， 對 地中海 到 幼發拉底 河。</verse>
				<verse number="26">佢會對𠊎講： 『你係吾爸，𠊎个上帝； 你係拯救𠊎个磐石！』</verse>
				<verse number="27">𠊎愛設立佢做長子， 做世間最偉大个王。</verse>
				<verse number="28">𠊎對佢个慈愛毋會改變； 𠊎同佢立个約永遠有效。</verse>
				<verse number="29">𠊎愛使佢个後代永遠掌權； 佢个寶座會像天恁樣長存。</verse>
				<verse number="30">「佢个後代若棄絕𠊎个教示， 行事為人毋遵照𠊎个法則，</verse>
				<verse number="31">佢等若違悖𠊎个規則， 佢等若毋守𠊎个誡命，</verse>
				<verse number="32">𠊎就愛用棍仔來責罰佢等个過犯； 𠊎也愛用鞭仔來責罰佢等个罪孽。</verse>
				<verse number="33">總係，𠊎對 大衛 个慈愛毋會收回； 𠊎對佢个信實永遠毋會變質。</verse>
				<verse number="34">𠊎毋會廢掉同佢所立个約， 也毋會改變𠊎給佢个應許。</verse>
				<verse number="35">「𠊎指自家个聖名發誓， 𠊎發誓一擺永遠有效： 𠊎絕對毋會欺騙 大衛 ！</verse>
				<verse number="36">佢个後代會一代傳一代，直到永遠； 𠊎愛看顧佢个寶座，使它像日頭長存。</verse>
				<verse number="37">佢个寶座會像月光恁堅定； 月光係天空忠實个見證者。」</verse>
				<verse number="38">結果你卻拒絕佢，放掉佢； 你非常譴你所選立个王。</verse>
				<verse number="39">你取消同你僕人所立个約； 你將佢个冕旒㧒落湳泥肚。</verse>
				<verse number="40">你拆掉佢所有个城牆， 使佢个城堡成做荒地。</verse>
				<verse number="41">過路个人全部搶佢； 鄰國也相爭侮辱佢。</verse>
				<verse number="42">你使佢个仇敵攏總打贏佢； 你使佢个敵人全部真歡喜。</verse>
				<verse number="43">你使佢个武器失效， 使佢在戰場企毋住。</verse>
				<verse number="44">你搶走佢个權杖 ， 將佢个寶座㩳橫。</verse>
				<verse number="45">你使佢未老先衰； 你使佢受盡一切个羞辱。</verse>
				<verse number="46">上主啊，你囥等毋搭𠊎等，愛到永遠嗎？ 你个怒氣像火當𤏸，愛到幾時呢？</verse>
				<verse number="47">求你愛記得𠊎个人生係幾短； 你所創造个人類係樣般虛空！</verse>
				<verse number="48">㖠有人長生不老呢？ 麼人逃得過陰間个權勢呢？</verse>
				<verse number="49">主啊，你用信實向 大衛 所應許个， 你先前个慈愛在㖠位？</verse>
				<verse number="50">主啊，求你毋好毋記得你个僕人所承受个羞辱； 求你毋好毋記得𠊎樣般忍受外邦个欺負 。</verse>
				<verse number="51">上主啊，你个仇敵侮辱你設立个王； 無論佢去到㖠位，佢等總係侮辱佢。</verse>
				<verse number="52">願上主永遠得到頌讚！ 阿愐！阿愐！</verse>
			</chapter>
			<chapter number="90">
				<verse number="1">主啊，你世世代代 係𠊎等个歸宿。</verse>
				<verse number="2">群山吂有受創造， 你還吂使大地㧯世界成形， 對上古直到永遠， 你係上帝。</verse>
				<verse number="3">你使人歸於塵土，又講： 「你等世間人愛轉去。」</verse>
				<verse number="4">在你看來，千年如一日， 就像已經過去个昨晡日， 又像暗晡時个一更。</verse>
				<verse number="5">你使人像被大水打走一樣； 佢等个生命像發夢恁短。 佢等像朝晨頭發芽生出來个草，</verse>
				<verse number="6">朝晨頭生長開花， 暗晡時枯燥死掉。</verse>
				<verse number="7">𠊎等被你个發譴所消滅； 𠊎等因為你个大發譴就著驚。</verse>
				<verse number="8">你將𠊎等个罪惡擺在你面前， 將𠊎等囥等个罪過顯明出來。</verse>
				<verse number="9">𠊎等个壽命因為你个發譴就縮短； 𠊎等个生命像透一口大氣就過掉。</verse>
				<verse number="10">𠊎等个一生只有七十歲， 若係勇健可能到八十歲； 總係所誇口个不過係勞苦愁煩； 轉眼成空，就像雲霧飛走。</verse>
				<verse number="11">麼人會明白你發譴个力量？ 麼人會知你个大發譴係樣般得人驚？</verse>
				<verse number="12">求你教𠊎等計算自家个年日， 好使𠊎等得到智慧个心。</verse>
				<verse number="13">上主啊，求你回心轉意！ 你愛發譴到幾時呢？ 求你憐憫你个僕人。</verse>
				<verse number="14">逐朝晨，求你用你不變个慈愛滿足𠊎等， 給𠊎等一生人歡喜快樂。</verse>
				<verse number="15">你使𠊎等一生堵到幾多个苦難， 求你也給𠊎等享受到幾多快樂。</verse>
				<verse number="16">願你个僕人看到你大能个作為， 俾𠊎等个子孫也看到你榮光个權能。</verse>
				<verse number="17">主 — 𠊎等个上帝啊，求你賜福給𠊎等！ 求你使𠊎等所有个工作順利！ 求你使𠊎等所做个一切成功！</verse>
			</chapter>
			<chapter number="91">
				<verse number="1">無論麼人，對至高者尋求安全， 抑係住在全能者个庇佑之下，</verse>
				<verse number="2">全部做得對上主講： 「你係𠊎个避難所㧯城堡； 你係𠊎个上帝，𠊎信靠你。」</verse>
				<verse number="3">佢會救你脫離一切个羅網， 並脫離一切致命个傳染病。</verse>
				<verse number="4">佢會用自家个翼胛庇佑你； 得到佢个看顧，你一定安全； 佢个信實會像盾牌保護你。</verse>
				<verse number="5">暗晡時，你毋使驚麼介危險， 日時頭，你毋使驚堵到攻擊；</verse>
				<verse number="6">你毋使驚烏暗中流行致命个傳染病， 也毋使驚當晝頭毀滅性个災害。</verse>
				<verse number="7">雖然有歸千人橫在你左片， 有歸萬人死在你个右片， 這個災難也無可能臨到你。</verse>
				<verse number="8">你打開目珠親眼來看， 就會看到壞人受責罰。</verse>
				<verse number="9">因為你靠上主做你个避難所， 既然至高者就係你住个所在，</verse>
				<verse number="10">災難一定毋會臨到你， 災禍毋會接近若屋下。</verse>
				<verse number="11">上帝會差派天使看顧你， 在你所行个路上保護你。</verse>
				<verse number="12">佢等會用雙手來扶等你， 使你个腳毋會撞到石頭。</verse>
				<verse number="13">你會將獅仔㧯毒蛇踏在腳下； 你會蹬死兇惡个獅仔㧯大蛇。</verse>
				<verse number="14">上帝講：「𠊎愛拯救該兜專心敬愛𠊎个人； 𠊎愛保護尊𠊎做主个人。</verse>
				<verse number="15">佢等求喊𠊎个時節， 𠊎會應佢等； 佢等在患難中， 𠊎愛同佢等共下。 𠊎愛拯救佢等， 使佢等得到光榮。</verse>
				<verse number="16">𠊎愛使佢等享受長壽， 俾佢等看到𠊎个救恩。」</verse>
			</chapter>
			<chapter number="92">
				<verse number="1">上主啊，對你獻上感謝實在真好！ 至高者啊，歌頌你个名實在真好！</verse>
				<verse number="2">𠊎逐朝晨愛傳揚你不變个慈愛， 𠊎逐暗晡愛講說你个信實，</verse>
				<verse number="3">愛用十弦琴來伴奏， 用豎琴美妙个聲音來和。</verse>
				<verse number="4">上主啊，你个作為使𠊎得到歡喜； 𠊎愛因為你个手所做个來歡呼。</verse>
				<verse number="5">上主啊，你所行个真偉大！ 你个意念實在非常深！</verse>
				<verse number="6">𤘅呾个毋會了解， 戇仔也毋會明白這件事：</verse>
				<verse number="7">雖然壞人像野草恁會生， 行事積惡个興旺一時， 佢等最後會完全消滅；</verse>
				<verse number="8">總係，上主啊， 你永遠係至高無上个！</verse>
				<verse number="9">上主啊，𠊎等清楚知： 你該兜仇敵定著會滅亡； 行事積惡个全部會四散。</verse>
				<verse number="10">你使𠊎像野牛恁強壯； 你賜給𠊎極大个幸福。</verse>
				<verse number="11">𠊎親目看到𠊎个仇敵失敗； 𠊎親耳聽到攻擊𠊎个壞人噭吱。</verse>
				<verse number="12">正直个人會像棕樹恁茂盛， 像 黎巴嫩 个香柏樹恁高大。</verse>
				<verse number="13">佢等像種在上主聖殿肚个樹仔， 在𠊎等上帝个庭院肚緊來緊旺，</verse>
				<verse number="14">到老還係會結果子， 枝葉拶拶，永遠青翠。</verse>
				<verse number="15">這證明上主係公正个， 𠊎个磐石全無不義。</verse>
			</chapter>
			<chapter number="93">
				<verse number="1">上主掌權，佢用威嚴做衫； 上主著好，用能力做腰帶。 世界就堅固，毋會搖動。</verse>
				<verse number="2">上主啊，你个寶座自古就有； 在上古以前，你早就存在。</verse>
				<verse number="3">上主啊，深淵發出聲音； 大水吼吼滾，波浪滔天。</verse>
				<verse number="4">上主在天頂，至尊無對， 權柄贏過大水个吼聲， 能力大過海上个波浪。</verse>
				<verse number="5">上主啊，你个法令堅定； 你个聖殿確實係神聖， 直到永遠！</verse>
			</chapter>
			<chapter number="94">
				<verse number="1">上主啊，你係伸冤个上帝； 伸冤个上帝啊，你好發火了！</verse>
				<verse number="2">你係全人類个審判者； 求你䟘起來報應驕傲个人！</verse>
				<verse number="3">上主啊，壞人个日仔有幾多？ 佢等洋洋得意愛到幾時呢？</verse>
				<verse number="4">作惡个人誇口愛到幾時？ 佢等還愛驕傲到幾時呢？</verse>
				<verse number="5">上主啊，佢等壓制你个子民； 佢等迫害該兜屬你个人。</verse>
				<verse number="6">佢等殺害寡婦㧯孤兒， 又謀殺暫住个生份人。</verse>
				<verse number="7">佢等講：「上主毋會看到； 雅各 个上帝毋會關心。」</verse>
				<verse number="8">你等野蠻人啊，樣般恁𤘅呾？ 你等戇檔人啊，幾時正明白？</verse>
				<verse number="9">上帝造𠊎等个耳公， 佢敢毋會聽？ 上帝造𠊎等个目珠， 佢敢毋會看？</verse>
				<verse number="10">佢管理萬國， 敢毋會責罰人？ 佢係人類个導師， 敢會無智識？</verse>
				<verse number="11">上主清楚人个心思； 佢等所想全係虛空。</verse>
				<verse number="12">上主啊，你所管教个人有福氣， 就係你用教示來指導个人！</verse>
				<verse number="13">佢在患難中，你使佢平安， 直到壞人跌落深坑滅亡。</verse>
				<verse number="14">上主毋會㧒掉佢个子民； 佢毋會放掉屬佢个人。</verse>
				<verse number="15">公義定著會在法庭再出現； 正直个人攏總會維護正義。</verse>
				<verse number="16">麼人為到𠊎䟘起來攻擊壞人？ 麼人企在𠊎這片對抗作惡个人？</verse>
				<verse number="17">上主若無幫助𠊎， 𠊎早就落陰間 囉！</verse>
				<verse number="18">逐擺，𠊎講：「𠊎个腳打盪溜了！」 上主啊，你不變个慈愛就扶持𠊎。</verse>
				<verse number="19">𠊎操煩憂愁个時節， 你安慰𠊎，使𠊎快樂。</verse>
				<verse number="20">你同腐敗个官員無來往； 佢等使不義个成做合法。</verse>
				<verse number="21">佢等勾結謀害義人， 將無罪个人判死刑。</verse>
				<verse number="22">總係上主係𠊎个要塞； 𠊎个上帝係𠊎避難个磐石。</verse>
				<verse number="23">佢愛因為佢等个邪惡報應佢等， 照佢等所犯个罪來消滅佢等； 上主 — 𠊎等个上帝愛消滅佢等。</verse>
			</chapter>
			<chapter number="95">
				<verse number="1">來啊，𠊎等來頌讚上主！ 來向拯救𠊎等个保護者歡呼！</verse>
				<verse number="2">𠊎等愛用感謝个心來到佢面前； 𠊎等愛向佢唱歡喜頌讚个詩歌。</verse>
				<verse number="3">因為上主係大能个上帝， 係超過所有神明个大君王。</verse>
				<verse number="4">佢統治全地， 從地个深淵到山个高峰。</verse>
				<verse number="5">佢管理自家所造个大海； 佢管理親手創造个陸地。</verse>
				<verse number="6">來啊，𠊎等來伏等敬拜佢！ 來跪拜創造𠊎等个上主！</verse>
				<verse number="7">佢係𠊎等个上帝； 𠊎等係佢看顧个子民， 係佢牧養个羊群。 今晡日，你等愛聽佢个話：</verse>
				<verse number="8">「毋好恁硬頸！ 莫像頭擺你等个祖先在 米利巴 恁樣， 毋好像佢等在 瑪撒 曠野个時節恁樣；</verse>
				<verse number="9">雖然佢等看到𠊎為佢等所做个事， 佢等還係在該位惹𠊎、試探𠊎。</verse>
				<verse number="10">經過四十年，𠊎盡惱該時代个人。 𠊎講：『佢等一直恁毋忠心！ 佢等毋服從𠊎个命令！』</verse>
				<verse number="11">所以𠊎在怒氣中發誓講： 『佢等絕對做毋得入去該地方 享受𠊎所賜个安息！』」</verse>
			</chapter>
			<chapter number="96">
				<verse number="1">愛唱新个詩歌讚美上主！ 全世界都愛來歌頌上主！</verse>
				<verse number="2">愛對上主唱歌，愛頌讚佢个名！ 愛逐日傳揚佢拯救个福音！</verse>
				<verse number="3">愛對萬國宣傳佢个榮光！ 愛對萬民講起佢偉大个作為！</verse>
				<verse number="4">上主係最偉大个，應當受最大个讚美； 佢應當比所有个神明得到較多个敬畏。</verse>
				<verse number="5">列國所有个神明不過係偶像； 總係創造諸天个就係上主。</verse>
				<verse number="6">榮光、威嚴在佢个面前； 大能、榮華充滿佢个聖所。</verse>
				<verse number="7">地上个萬族啊，應當頌讚上主！ 你等愛頌讚佢个榮光㧯大能！</verse>
				<verse number="8">愛頌讚上主榮光个名； 愛帶祭物來進入佢个聖殿。</verse>
				<verse number="9">愛用聖潔个打扮來跪拜上主 ； 全地愛在佢个面前愊愊掣！</verse>
				<verse number="10">愛向萬國宣佈：「上主掌權！ 大地堅固，毋會搖動； 佢愛用公正來審判萬民。」</verse>
				<verse number="11">諸天愛歡喜，大地愛快樂！ 海㧯其中个生物啊，愛大聲歡呼！</verse>
				<verse number="12">田園㧯其中个出產啊，愛歡喜起來！ 該時，樹林中个樹木愛在上主面前歡喜唱歌；</verse>
				<verse number="13">因為上主愛來， 佢愛來治理天下。 佢愛用公義統治世界； 佢愛用信實對待萬民。</verse>
			</chapter>
			<chapter number="97">
				<verse number="1">上主掌權！ 大地啊，愛歡喜起來！ 所有个海島啊，愛歡喜快樂！</verse>
				<verse number="2">雲堆㧯烏暗在佢周圍； 正義㧯公當係佢國度个基礎。</verse>
				<verse number="3">有火行在佢个頭前， 燒滅佢周圍个仇敵。</verse>
				<verse number="4">佢个𥍉爧照亮世界； 大地看到緊顫緊掣。</verse>
				<verse number="5">群山在上主面前， 在全地个主面前， 就像蠟恁樣鎔掉。</verse>
				<verse number="6">諸天宣揚佢个公義； 萬民看到佢个榮光。</verse>
				<verse number="7">一切敬拜偶像个人會見笑； 靠假神來誇口个人會澇潰； 萬神攏總愛伏 在上主面前。</verse>
				<verse number="8">上主啊，因為你个判斷公正， 錫安 个人民聽到就大歡喜； 連 猶大 該兜城市也盡快樂。</verse>
				<verse number="9">上主啊，你係至高个， 你統治天下； 你係至尊無對个， 你超過萬神。</verse>
				<verse number="10">上主痛惜該兜惱邪惡个人 ； 佢保護佢忠心子民个生命， 拯救佢等脫離壞人个勢力。</verse>
				<verse number="11">義人會得到光明照亮； 心肝正直个會大歡喜。</verse>
				<verse number="12">義人啊，你等愛因為上主歡喜！ 你等愛感謝佢，頌讚佢个聖名！</verse>
			</chapter>
			<chapter number="98">
				<verse number="1">愛對上主唱新个詩歌， 因為佢有行奇妙个事！ 佢用大能㧯神聖个力量得勝。</verse>
				<verse number="2">上主彰顯佢个勝利； 佢對萬國顯明佢个救恩。</verse>
				<verse number="3">佢照佢對 以色列 人所應許个， 用不變个慈愛㧯信實款待佢等。 全世界看到𠊎等上帝个拯救。</verse>
				<verse number="4">天下萬民啊，愛對上主歡呼！ 你等愛用詩歌大聲頌讚佢！</verse>
				<verse number="5">愛唱歌頌讚上主！ 愛彈豎琴頌讚佢！</verse>
				<verse number="6">愛吹號筒㧯羊角， 在上主 — 𠊎等个王面前歡呼！</verse>
				<verse number="7">大海㧯其中个生物啊， 愛大聲歡呼！ 大地㧯地上个萬物啊， 愛大聲唱歌！</verse>
				<verse number="8">在上主面前，河壩愛拍手， 群山也愛同聲歡喜唱歌，</verse>
				<verse number="9">因為佢愛來治理天下。 佢愛用公義統治世界； 佢愛用公平對待萬民。</verse>
			</chapter>
			<chapter number="99">
				<verse number="1">上主掌權！ 萬民愛愊愊掣！ 佢坐在基路伯寶座上， 大地愛搖動！</verse>
				<verse number="2">上主在 錫安 大有能力； 佢係至高、超過天下萬國。</verse>
				<verse number="3">萬民愛頌讚佢个名； 佢个名偉大又威嚴。 佢係至聖个！</verse>
				<verse number="4">大能个王 啊，你歡喜公義； 你建立公平； 你在 以色列 家伸張公義、維護公道。</verse>
				<verse number="5">愛頌讚上主 — 𠊎等个上帝！ 愛在佢个寶座前跪拜！ 佢係至聖个！</verse>
				<verse number="6">在佢个祭司中有 摩西 㧯 亞倫 ， 在求喊佢名个人中有 撒母耳 ； 佢等求上主，佢就應佢等。</verse>
				<verse number="7">佢在雲柱个底背對佢等講話； 佢等服從佢頒佈个法令㧯規則。</verse>
				<verse number="8">上主 — 𠊎等个上帝啊， 你聽你子民个求喊； 你係赦免佢等个上帝， 總係你照佢等个過犯報應佢等。</verse>
				<verse number="9">愛頌讚上主 — 𠊎等个上帝！ 愛在佢个聖山頂敬拜佢！ 上主 — 𠊎等个上帝係至聖个！</verse>
			</chapter>
			<chapter number="100">
				<verse number="1">普天下愛向上主歡呼！</verse>
				<verse number="2">愛歡歡喜喜來敬拜上主！ 愛唱快樂个詩歌來到佢个面前！</verse>
				<verse number="3">愛知上主係上帝！ 𠊎等係佢創造个， 係屬佢个； 𠊎等係佢个子民， 係佢牧養个羊群。</verse>
				<verse number="4">愛用感謝个心來進入佢个聖殿！ 愛用頌讚來進入佢个聖所！ 愛感謝佢，頌讚佢个名！</verse>
				<verse number="5">因為上主係至善； 佢个慈愛永遠長存； 佢个信實萬代不變。</verse>
			</chapter>
			<chapter number="101">
				<verse number="1">𠊎愛歌頌你个慈愛㧯公義； 上主啊，𠊎愛唱歌來頌讚你！</verse>
				<verse number="2">𠊎愛細膩行人生完全个路。 你愛到幾時正來𠊎這位呢？ 𠊎在王宮底背愛過純潔个生活；</verse>
				<verse number="3">𠊎絕對毋俾邪惡發生在𠊎眼前。 𠊎盡惱悖逆上帝个人所做个； 𠊎絕對毋俾佢等个行為遰到。</verse>
				<verse number="4">𠊎毋俾𠊎个心肝歪走 ； 𠊎絕對毋搭邪惡个事 。</verse>
				<verse number="5">𠊎愛消滅暗中譭謗朋友个人； 𠊎不准有麼人驕傲、自高自大。</verse>
				<verse number="6">𠊎愛看顧對上帝忠心个人， 𠊎愛俾佢等住在𠊎个王宮； 行為完全个正做得服事𠊎。</verse>
				<verse number="7">詭詐个人做毋得住在𠊎个王宮； 假好个人做毋得企在𠊎个面前。</verse>
				<verse number="8">𠊎逐日天一光愛消滅國內所有个壞人； 𠊎愛將一切作惡个人對上主个城剪除。</verse>
			</chapter>
			<chapter number="102">
				<verse number="1">上主啊，求你聽𠊎个祈禱； 求你聽𠊎求喊个聲！</verse>
				<verse number="2">𠊎陷在患難中个時節， 求你毋好揞等面毋搭𠊎！ 求你側耳來聽𠊎个祈禱； 𠊎求你个時節，遽遽應𠊎！</verse>
				<verse number="3">𠊎个年日像煙恁樣消失； 𠊎个骨頭像在爐中燒等个火炭。</verse>
				<verse number="4">𠊎个心受傷，像草燥掉； 𠊎甚至連食飯也毋記得。</verse>
				<verse number="5">𠊎透大氣緊噌， 歸身只有皮包骨。</verse>
				<verse number="6">𠊎像曠野个鳥仔， 像野地个貓頭鳥。</verse>
				<verse number="7">𠊎一直睡毋落覺； 𠊎像屋頂孤單个鳥仔。</verse>
				<verse number="8">𠊎个仇敵從早到暗辱罵𠊎； 㩢耍𠊎个人指等𠊎來咒詛。</verse>
				<verse number="9">因為你个發譴㧯憤怒， 𠊎食火灰，像食飯一樣， 用目汁摻等飲料來啉。 你將𠊎擎起來又抨掉。</verse>
				<verse number="10"></verse>
				<verse number="11">𠊎个年日像臨暗个身影， 也像草轉黃燥掉。</verse>
				<verse number="12">總係，上主啊，你永遠掌權； 你个名被人紀念直到萬代。</verse>
				<verse number="13">你一定會䟘起來憐憫 錫安 ， 因為你憐憫它个時節到了， 你所定个時間已經成熟了。</verse>
				<verse number="14">該兜石頭係你个僕人所歡喜个； 連城中个泥也係佢等所痛惜个。</verse>
				<verse number="15">天下萬國定著會敬畏上主个名； 地上萬王會因為佢个榮光著驚。</verse>
				<verse number="16">上主重建 錫安 个時節， 佢个榮光會顯明出來。</verse>
				<verse number="17">佢愛垂聽窮苦人个求喊； 佢毋會藐視佢等个祈禱。</verse>
				<verse number="18">愛為後代將上主个作為記錄下來， 俾該兜還吂出世个人曉得頌讚佢。</verse>
				<verse number="19">上主對至高个聖所看下來； 佢對天頂觀察人間个一切。</verse>
				<verse number="20">佢聽該兜犯人个噌聲； 佢透放被人判死刑个。</verse>
				<verse number="21">恁樣，萬民聚集共下， 萬國敬拜上主个時， 人會在 錫安 傳揚上主个名； 佢等會在 耶路撒冷 頌讚佢。</verse>
				<verse number="22"></verse>
				<verse number="23">上主縮短𠊎个年日， 使𠊎未老先衰。</verse>
				<verse number="24">𠊎講：「𠊎个上帝啊， 毋好使𠊎中年過身。」 上主啊，你萬世永存！</verse>
				<verse number="25">你在上古定大地个根基； 諸天也係你親手創造个。</verse>
				<verse number="26">天地會消滅，總係你永遠長存； 它兜會像衫褲爛掉恁樣消失。 你愛改變天地，像換衫一樣； 它兜就會消失。</verse>
				<verse number="27">總係，你永遠毋會改變； 你个壽年無窮無盡。</verse>
				<verse number="28">你這兜僕人个子孫會安居樂業； 佢等个後代會堅立在你面前。</verse>
			</chapter>
			<chapter number="103">
				<verse number="1">𠊎个心啊，愛頌讚上主！ 𠊎个身心靈愛頌讚佢个聖名！</verse>
				<verse number="2">𠊎个心啊，愛頌讚上主！ 毋好毋記得佢一切个恩惠！</verse>
				<verse number="3">佢赦免𠊎所有个罪惡； 佢醫好𠊎一切个病痛。</verse>
				<verse number="4">佢救𠊎脫離死亡； 佢用慈愛㧯憐憫做𠊎个冕旒。</verse>
				<verse number="5">佢用最好个東西來滿足𠊎， 使𠊎一直青春，勇健像鷹鳥。</verse>
				<verse number="6">上主代受壓迫个伸冤； 佢為到佢等伸張公義。</verse>
				<verse number="7">佢對 摩西 啟示佢个計劃， 使 以色列 人知佢个作為。</verse>
				<verse number="8">上主有憐憫㧯恩典， 無隨便發譴，滿有不變个慈愛。</verse>
				<verse number="9">佢毋會一直責備； 佢毋會永遠發閼。</verse>
				<verse number="10">佢無照𠊎等个罪過責罰𠊎等； 佢也無因為𠊎等个罪惡報應𠊎等。</verse>
				<verse number="11">天離地有幾高， 對敬畏佢个人，佢个慈愛也有幾大！</verse>
				<verse number="12">東離西有幾遠， 佢使𠊎等个過犯離開𠊎等也有恁遠！</verse>
				<verse number="13">阿爸係樣般痛惜自家个子女， 上主也樣般痛惜敬畏佢个人。</verse>
				<verse number="14">佢知𠊎等个本質； 佢記得𠊎等不過係泥做个。</verse>
				<verse number="15">論到世人，佢等个生命就像草。 佢等像野地个花，生到恁靚；</verse>
				<verse number="16">被風一吹就無掉去， 無人再尋得到它。</verse>
				<verse number="17">總係上主个慈愛歸給敬畏佢个人，對上古到永遠； 佢个公義也歸給佢等个子子孫孫，</verse>
				<verse number="18">就係該兜誠心守佢个契約、 忠實遵行佢誡命个人。</verse>
				<verse number="19">上主在天頂設寶座； 佢做王統治所有个一切。</verse>
				<verse number="20">大有能力个天使啊， 聽佢命令、順從佢旨意个使者啊， 你等愛頌讚上主！</verse>
				<verse number="21">天頂一切有權能、 遵行佢旨意个奴僕啊， 你等愛頌讚上主！</verse>
				<verse number="22">一切佢所創造个啊， 愛頌讚上主！ 愛在佢統治个逐所在頌讚佢！ 𠊎个心啊，愛頌讚上主！</verse>
			</chapter>
			<chapter number="104">
				<verse number="1">𠊎个心啊，愛頌讚上主！ 上主 — 𠊎个上帝啊，你真偉大！ 你著等榮光㧯威嚴；</verse>
				<verse number="2">你用光做長袍披等。 你安設穹蒼，像搭帳篷一樣；</verse>
				<verse number="3">你在高天个水面頂起住所。 你用雲做戰車， 藉風个翼胛來飛。</verse>
				<verse number="4">你用風做使者， 用𥍉爧做僕人。</verse>
				<verse number="5">你將大地安在堅固个根基頂高， 使它永遠毋會搖動。</verse>
				<verse number="6">你用大海像外袍包等地面； 大水就將群山淹等。</verse>
				<verse number="7">你大聲一咄，水就趕緊退走； 你大聲一喝，水就瀉走。</verse>
				<verse number="8">大水越過山嶺，流入山壢， 到你為它兜設定个所在。</verse>
				<verse number="9">你劃定界限，毋准水弛過來， 喊它兜毋好再將大地淹等。</verse>
				<verse number="10">你使泉水在山壢湧出， 在群山中間流等下。</verse>
				<verse number="11">走獸有水好啉， 野驢有好止渴。</verse>
				<verse number="12">飛鳥在水邊做藪， 在樹枝个中間唱歌。</verse>
				<verse number="13">你對天頂落雨在山嶺頂； 因為你工作个結果，大地就豐足。</verse>
				<verse number="14">你使青草生出來， 給頭牲食； 你使青菜長大， 給人做食物； 你俾人在土地上耕種五榖：</verse>
				<verse number="15">焗酒來俾人心歡喜， 製造油來滋潤面貌， 做糧食來加添體力。</verse>
				<verse number="16">上主種在 黎巴嫩 个香柏樹， 全部得到豐富个雨水滋潤。</verse>
				<verse number="17">鳥仔在該兜樹頂做藪； 松樹頂也有白鶴个藪。</verse>
				<verse number="18">野山羊住在高山頂； 石獾囥在石窿底背。</verse>
				<verse number="19">你造月光來定節令； 日頭知幾時愛落山。</verse>
				<verse number="20">你使烏暗臨到，成做暗晡頭， 樹林中所有个野獸就出來。</verse>
				<verse number="21">獅仔吼吼滾，出來打獵， 愛尋上帝所賜个食物。</verse>
				<verse number="22">日頭一出，牠兜就閃走， 倒轉山窿底背去睡目。</verse>
				<verse number="23">然後，人出去做事， 勞勞碌碌到斷烏。</verse>
				<verse number="24">上主啊，你个創造實在真多！ 它兜全部係你用智慧造个； 大地充滿你所創造个萬物。</verse>
				<verse number="25">該片有海，又大又闊， 其中有無數个生物， 大个細个全部都有；</verse>
				<verse number="26">海面有盡多船來來去去， 你造个大海怪在海肚搞水。</verse>
				<verse number="27">牠兜全部係倚靠你， 靠你照時供給食物。</verse>
				<verse number="28">你賜麼介給牠兜，牠兜就領受； 你个手一打開，牠兜就得到飽足。</verse>
				<verse number="29">你若係揞面毋搭牠兜， 牠兜就著驚； 你收轉牠兜个氣， 牠兜就死掉，歸土。</verse>
				<verse number="30">你對牠兜歕氣， 牠兜就受造； 你使大地時常換新。</verse>
				<verse number="31">願上主个榮光永遠長存！ 願上主歡喜自家所造个！</verse>
				<verse number="32">佢看大地，地就震動； 佢摸群山，山就出煙。</verse>
				<verse number="33">𠊎一生人愛唱歌來讚美上主！ 𠊎有生之日愛歌頌𠊎个上帝！</verse>
				<verse number="34">願佢因為𠊎个詩歌歡喜， 因為𠊎个快樂係對佢來。</verse>
				<verse number="35">願罪人對世間消滅； 願壞人毋會再出現。 𠊎个心啊，愛頌讚上主！ 哈利路亞！</verse>
			</chapter>
			<chapter number="105">
				<verse number="1">你等愛感謝上主，求喊佢个名； 愛向萬國傳揚佢个作為！</verse>
				<verse number="2">你等愛唱歌來頌讚佢！ 愛講說佢奇妙个作為！</verse>
				<verse number="3">你等愛因為佢个聖名快樂！ 願一切尋求上主个人歡喜！</verse>
				<verse number="4">愛求上主幫助； 愛時常敬拜佢。</verse>
				<verse number="5">上帝个僕人 亞伯拉罕 个後代啊， 雅各 个子孫，佢所揀選个子民啊， 你等愛記得佢所做奇妙个作為， 佢所行个神蹟㧯所講起个審判。</verse>
				<verse number="6"></verse>
				<verse number="7">佢係上主 — 𠊎等个上帝； 佢个審判傳遍全世界。</verse>
				<verse number="8">佢會永遠守佢个約； 佢所講个應許直到千代。</verse>
				<verse number="9">佢記得同 亞伯拉罕 所立个約， 還有佢發誓賜給 以撒 个應許。</verse>
				<verse number="10">上主同 雅各 堅定這約做條例， 就係佢給 以色列 永久个契約。</verse>
				<verse number="11">佢講：「𠊎愛將 迦南 地賜給你， 全部愛做你等个產業。」</verse>
				<verse number="12">該時，上帝子民个人丁有限，數目盡少， 在 迦南 地暫時住。</verse>
				<verse number="13">佢等對這族漂流到該族， 對這國流浪到該國。</verse>
				<verse number="14">總係上帝不准外人欺負佢等； 為到佢等，佢警告外族該兜王。</verse>
				<verse number="15">佢講：「做毋得為難𠊎所揀選个； 你等做毋得傷害𠊎个先知！」</verse>
				<verse number="16">上主使該地方堵到飢荒； 佢切斷佢等糧食个來源。</verse>
				<verse number="17">總係佢差 約瑟 為佢等先行； 約瑟 被人賣做奴才。</verse>
				<verse number="18">佢个雙腳被腳鐐鎖等， 佢个頸筋帶等鐵枷鎖。</verse>
				<verse number="19">上主个話緊試煉佢， 直到佢所預言个事實現。</verse>
				<verse number="20">埃及 个王就派人去將佢釋放； 統治人民个就恢復佢个自由，</verse>
				<verse number="21">派佢做王宮个掌管， 喊佢治理佢所有个一切，</verse>
				<verse number="22">給佢自由管理文武百官， 有權將智慧教該兜元老。</verse>
				<verse number="23">後來 以色列 去到 埃及 ， 雅各 暫住在 含 个地方。</verse>
				<verse number="24">上主使佢个子民增加， 使佢等比敵人較強盛。</verse>
				<verse number="25">佢使 埃及 人怨恨佢个子民； 佢等用詭計對付佢个僕人。</verse>
				<verse number="26">佢就差佢个僕人 摩西 ， 又派佢所揀選个 亞倫 。</verse>
				<verse number="27">佢等顯出上帝个神蹟， 在 含 个地方行大奇事。</verse>
				<verse number="28">上帝使該位充滿烏暗， 總係 埃及 人毋聽佢个命令 。</verse>
				<verse number="29">佢將佢等个河水變做血， 使佢等个魚全部死淨淨。</verse>
				<verse number="30">佢等國內逐位係蝦蟆， 連王宮底背也係共樣。</verse>
				<verse number="31">上帝下令，烏蠅歸群飛來， 蝨乸也係共樣，遍滿全地。</verse>
				<verse number="32">佢降冰雹像落雨， 使𥍉爧到處緊𥍉。</verse>
				<verse number="33">佢打壞葡萄樹㧯無花果樹， 打斷佢等國內所有个樹木。</verse>
				<verse number="34">佢一出聲，草蜢就飛來， 千千萬萬，無辦法好算。</verse>
				<verse number="35">牠兜將國內个青菜喫淨淨， 將田園所有个五榖食光光。</verse>
				<verse number="36">佢㓾死國內所有个長子， 就係該兜人頭胎个孻仔。</verse>
				<verse number="37">然後，佢就帶領 以色列 人出來； 佢等帶等金銀，各支族儕儕勇健。</verse>
				<verse number="38">佢等離開个時， 埃及 人非常歡喜， 因為佢等驚 以色列 人驚到會死。</verse>
				<verse number="39">上帝用雲遮等佢个子民， 暗晡時用火來照光佢等。</verse>
				<verse number="40">佢等 要求，佢就使鵪鶉飛來； 又對天頂降糧食滿足佢等。</verse>
				<verse number="41">佢打開磐石，使泉水湧出來， 水像河壩流在燥燥个曠野。</verse>
				<verse number="42">因為佢記得佢神聖个應許， 就係對佢僕人 亞伯拉罕 所講个。</verse>
				<verse number="43">佢帶佢个子民歡歡喜喜出來； 佢所揀選个子民歡呼又唱歌。</verse>
				<verse number="44">佢將列國个土地賜給佢等， 使佢等承受外族人个田園，</verse>
				<verse number="45">好俾佢个子民守佢个規則， 並遵行佢一切个教示。 愛讚美上主！</verse>
			</chapter>
			<chapter number="106">
				<verse number="1">哈利路亞！ 愛感謝上主，因為佢係至善； 佢个慈愛永遠長存！</verse>
				<verse number="2">上主所做个大事，麼人講得盡？ 有麼人能講明佢一切个美善？</verse>
				<verse number="3">行事公平、一直伸張公義个， 這種个人實在有福氣！</verse>
				<verse number="4">上主啊，你好款待你子民个時， 求你顧念𠊎； 你拯救佢等个時， 求你幫助𠊎。</verse>
				<verse number="5">求你俾𠊎看到你選民个幸福， 也愛俾𠊎分享你子民个歡喜， 俾𠊎同屬你个人共下頌讚你。</verse>
				<verse number="6">𠊎等同祖先一樣犯了罪； 𠊎等攏總作惡、做壞事。</verse>
				<verse number="7">𠊎等个祖先在 埃及 个時， 毋明白上帝奇妙个作為； 佢等毋記得佢豐盛个慈愛， 反轉在 紅海 前就悖逆全能者 。</verse>
				<verse number="8">總係，上帝還係因為佢个名救佢等， 為到愛顯明佢自家个大權能。</verse>
				<verse number="9">佢責備 紅海 ，海水就燥掉； 佢帶佢等對海底行過去，像行燥地。</verse>
				<verse number="10">佢救佢等脫離怨恨佢等个人； 佢對仇敵个手中救佢等出來。</verse>
				<verse number="11">水將仇敵淹死； 連一儕也無賸。</verse>
				<verse number="12">該時，佢等正相信佢个應許； 因為恁樣，佢等唱歌頌讚佢。</verse>
				<verse number="13">佢等盡遽就毋記得佢个作為； 佢等黏時就毋肯等候佢个旨意。</verse>
				<verse number="14">在曠野，佢等充滿貪食个心， 在沙漠，佢等試探上帝。</verse>
				<verse number="15">佢照佢等所求个賜給佢等； 總係，佢也降下病痛在佢等中間。</verse>
				<verse number="16">在營房中佢等嫉妒 摩西 ， 㧯上主分別為聖个 亞倫 。</verse>
				<verse number="17">地就裂開，將 大坍 吞落去， 將 亞比蘭 㧯佢全家生埋。</verse>
				<verse number="18">有火降在佢等同伴个身上， 將該兜作惡个人燒死淨淨。</verse>
				<verse number="19">佢等在 何烈 山鑄造牛像， 跪拜人个手所做个偶像。</verse>
				<verse number="20">佢等將上帝个榮光， 換做食草个牛个像。</verse>
				<verse number="21">佢等毋記得救佢等个上帝， 就係在 埃及 行大事个上帝。</verse>
				<verse number="22">佢識在 含 个地方行神蹟， 識在 紅海 行得人驚个事。</verse>
				<verse number="23">上帝講佢愛消滅佢个子民該時， 佢揀選个僕人 摩西 企在佢面前， 同佢爭論，求佢收回佢个大發譴， 正解除 以色列 人受消滅个危機。</verse>
				<verse number="24">後來，佢等藐視該美好个地； 佢等對上帝个應許無信心。</verse>
				<verse number="25">佢等在自家个帳篷肚埋怨， 毋肯聽從上主个話。</verse>
				<verse number="26">佢就嚴嚴警告佢等： 愛使佢等橫在曠野，</verse>
				<verse number="27">使佢等个子孫散到列國， 使佢等流亡到外國去。</verse>
				<verse number="28">後來，上帝个子民在 批珥 拜 巴力 ， 食該兜拜過死人 个祭物。</verse>
				<verse number="29">佢等个行為惹上主大發譴， 就有瘟疫在佢等當中流行。</verse>
				<verse number="30">總係 非尼哈 䟘起來刑罰罪， 恁樣，瘟疫正無繼續遰下去。</verse>
				<verse number="31">這件事就算做佢个義， 對該時直到世世代代。</verse>
				<verse number="32">佢等也在 米利巴 泉水該位， 激上主發譴，害 摩西 受連累。</verse>
				<verse number="33">因為佢等刺傷 摩西 个心 ， 害到佢講無應該講个話。</verse>
				<verse number="34">佢等違背上主个命令， 無將該兜外族人消滅，</verse>
				<verse number="35">反轉去㧯佢等通婚， 學佢等个風俗習慣。</verse>
				<verse number="36">上帝个子民還去拜偶像， 這就係佢等滅亡个原因。</verse>
				<verse number="37">佢等將親生个子女犧牲， 做祭物獻給 迦南 个鬼神。</verse>
				<verse number="38">佢等㓾無辜个人， 流自家子女个血， 將佢等獻給 迦南 个偶像， 該地方被所流个血打垃圾。</verse>
				<verse number="39">佢等个行為也將自家打垃圾， 在上帝面前做悖逆變節个人。</verse>
				<verse number="40">所以，上主對佢等發譴； 佢盡惱佢自家个子民。</verse>
				<verse number="41">佢使佢等落在外族人个手中； 佢由在佢等个敵人轄制佢等。</verse>
				<verse number="42">佢等被仇敵欺壓， 被仇敵撳到貼貼。</verse>
				<verse number="43">上主拯救佢等盡多擺， 總係佢等計謀悖逆佢， 陷落罪惡中，緊來緊深。</verse>
				<verse number="44">總係，佢顧念佢等个苦難； 佢等一求喊，佢就聽佢等。</verse>
				<verse number="45">為到佢等，上主想起佢个契約； 照佢豐盛个慈愛，佢回心轉意。</verse>
				<verse number="46">佢使捉佢等去个人全部憐憫佢等。</verse>
				<verse number="47">上主 — 𠊎等个上帝啊，拯救𠊎等！ 求你將𠊎等對列國聚集起來， 使𠊎等有好頌讚你个聖名， 用感謝你來做𠊎等个榮光！</verse>
				<verse number="48">願上主 — 以色列 个上帝受稱頌， 對永遠到永遠！ 願萬民同聲來講： 「阿愐！」 哈利路亞！</verse>
			</chapter>
			<chapter number="107">
				<verse number="1">「愛感謝上主，因為佢係至善； 佢个慈愛永遠長存！」</verse>
				<verse number="2">上主所救贖个人啊， 你等愛恁樣緊講！ 佢救你等脫離仇敵个手；</verse>
				<verse number="3">佢對東、西、南 、北， 帶你等對各地方倒轉來。</verse>
				<verse number="4">有兜人迷失在無人住个曠野， 尋毋到路好去有人住个城市。</verse>
				<verse number="5">佢等肚飢又嘴燥， 全無半些个希望。</verse>
				<verse number="6">在急難中，佢等求喊上主， 佢就拯救佢等脫離苦難。</verse>
				<verse number="7">佢帶領佢等行直路， 去到有人住个城市。</verse>
				<verse number="8">佢等應當感謝上主不變个慈愛， 頌讚佢為到世間人所行个奇事。</verse>
				<verse number="9">佢使嘴燥个人得到滿足， 使肚飢个食盡好又盡飽。</verse>
				<verse number="10">有兜人生活在烏暗㧯死蔭中， 佢等受盡痛苦又被鐵鍊捆等，</verse>
				<verse number="11">因為佢等悖逆上帝个話， 藐視至高者个旨意。</verse>
				<verse number="12">上帝用勞苦降服佢等个心； 佢等橫倒，總係無人來扶。</verse>
				<verse number="13">在急難中，佢等求喊上主， 佢就拯救佢等脫離苦難。</verse>
				<verse number="14">佢帶佢等對烏暗㧯死蔭出來， 又挷斷該兜捆等佢等个鎖鍊。</verse>
				<verse number="15">佢等應當感謝上主不變个慈愛， 頌讚佢為到世間人所行个奇事。</verse>
				<verse number="16">佢打爛銅門， 斬斷鐵門閂。</verse>
				<verse number="17">有兜人因為自家个過犯發病 ， 又因為自家个罪惡受苦；</verse>
				<verse number="18">佢等對食物全無胃口， 緊來就緊近死亡个門。</verse>
				<verse number="19">在急難中，佢等求喊上主， 佢就拯救佢等脫離苦難。</verse>
				<verse number="20">佢講一句話就醫好佢等， 救佢等脫離死亡。</verse>
				<verse number="21">佢等應當感謝上主不變个慈愛， 頌讚佢為到世間人所行个奇事。</verse>
				<verse number="22">佢等應當愛對佢獻感謝个祭， 用歡喜个詩歌講說佢个作為！</verse>
				<verse number="23">有兜人坐船出海， 在大海當中謀生。</verse>
				<verse number="24">佢等看到上主个作為， 佢在深海所行个奇事。</verse>
				<verse number="25">佢一命令，就起狂風， 使海浪激到半天高。</verse>
				<verse number="26">一下沖到高高，一下落到深深， 危急至極，佢等驚到神魂消散。</verse>
				<verse number="27">佢等橫來橫去，像食酒醉； 佢等个才調完全展毋出。</verse>
				<verse number="28">在急難中，佢等求喊上主， 佢就拯救佢等脫離苦難。</verse>
				<verse number="29">佢使狂風平靜， 使海浪恬下來。</verse>
				<verse number="30">佢等歡喜吶天，因為風平浪靜； 佢就渡佢等到所愛去个海港。</verse>
				<verse number="31">佢等應當感謝上主不變个慈愛， 頌讚佢為到世間人所行个奇事。</verse>
				<verse number="32">佢等應當在長老个議會中讚美佢， 在人民个大會中傳揚佢个偉大。</verse>
				<verse number="33">上主使河壩變做曠野， 使泉水燥掉成做旱地，</verse>
				<verse number="34">使盡肥个土地變做鹽地， 因為住在該位个人盡壞。</verse>
				<verse number="35">佢使沙漠逐位有陂塘， 使旱地成做泉水之地。</verse>
				<verse number="36">佢使肚飢个人住在該位； 該兜人就起一座城來住。</verse>
				<verse number="37">佢等耕田委種、種葡萄， 得到非常豐富个收成。</verse>
				<verse number="38">佢賜福使佢等个子孫緊多； 佢使佢等个頭牲有加無減。</verse>
				<verse number="39">後來因為被人欺負、受苦受難， 上帝个子民就緊減少、緊衰過。</verse>
				<verse number="40">上帝使統治者堵到侮辱， 使佢等漂流在無人住个曠野。</verse>
				<verse number="41">總係，佢拯救窮苦人脫離苦難， 使佢等个家族像羊群恁興旺。</verse>
				<verse number="42">正直个人看到就盡歡喜； 總係壞人全部啞口無言。</verse>
				<verse number="43">願有智慧个人注意這兜事情； 願佢等思念上主不變个慈愛。</verse>
			</chapter>
			<chapter number="108">
				<verse number="1">上帝啊，𠊎个心堅定； 𠊎愛全心唱歌頌讚你！</verse>
				<verse number="2">琴啊，瑟啊，好醒了！ 𠊎愛喊日頭䟘起來！</verse>
				<verse number="3">上主啊，𠊎愛在列國中感謝你！ 𠊎愛在萬民中唱歌頌讚你！</verse>
				<verse number="4">你不變个慈愛大到堵天； 你个信實達到穹蒼。</verse>
				<verse number="5">上帝啊，願你个尊榮超過諸天！ 願你个榮光充滿全地！</verse>
				<verse number="6">為到愛使你所惜个子民得救， 求你應𠊎等，用大能拯救𠊎等。</verse>
				<verse number="7">上帝對佢个聖所宣告講 ： 「𠊎愛打贏，𠊎愛分裂 示劍 ， 將 疏割 山壢分給𠊎个子民。</verse>
				<verse number="8">基列 係屬𠊎个， 瑪拿西 也屬𠊎； 以法蓮 係𠊎个頭盔； 猶大 就係𠊎个權杖。</verse>
				<verse number="9">摩押 係𠊎个洗腳盆； 以東 就係𠊎个地盤； 非利士 係𠊎个手下敗將。」</verse>
				<verse number="10">麼人能帶𠊎打入這堅固个城？ 麼人能帶領𠊎去到 以東 个地？</verse>
				<verse number="11">上帝啊，你正經將𠊎等㧒掉了係麼？ 你毋同𠊎等个軍隊共下出戰係麼？</verse>
				<verse number="12">求你幫助𠊎等攻擊敵人， 因為人个幫助全無路用。</verse>
				<verse number="13">有上帝共下，𠊎等就會勝利； 佢一定會踐踏𠊎等个仇敵。</verse>
			</chapter>
			<chapter number="109">
				<verse number="1">𠊎所頌讚个上帝啊， 求你毋好一直恬恬。</verse>
				<verse number="2">邪惡詭詐个人攻擊𠊎。 佢等講花撩來譭謗𠊎，</verse>
				<verse number="3">用惡毒个話來中傷𠊎； 佢等無緣無故攻擊𠊎。</verse>
				<verse number="4">𠊎惜佢等，為佢等祈禱， 總係，佢等卻同𠊎作對。</verse>
				<verse number="5">佢等用惡報善， 用怨恨報愛心。</verse>
				<verse number="6">求你派無公正个法官來審判𠊎个仇敵， 用一個同佢作對个人來告佢。</verse>
				<verse number="7">願佢受審判，被人定罪； 願佢个祈禱也算犯罪！</verse>
				<verse number="8">願佢个壽命縮短， 別人搶佢个職位！</verse>
				<verse number="9">願佢个子女變孤兒， 佢个𡜵娘成做寡婦！</verse>
				<verse number="10">願佢个子女流浪做乞食， 對乞食寮底背被人逐出來 ！</verse>
				<verse number="11">願債主拿走佢所有个財產， 生份人搶走佢勞碌所得个！</verse>
				<verse number="12">願佢得毋到人个慈悲， 佢个孤兒得毋到憐憫！</verse>
				<verse number="13">願佢个後代全部絕掉， 佢个姓傳毋到第二代！</verse>
				<verse number="14">願上主記等厥祖先个罪惡， 莫毋記得厥姆个過犯！</verse>
				<verse number="15">願上主永遠記等佢等个罪， 使世間人完全毋記得佢等！</verse>
				<verse number="16">因為佢從來毋識想到慈悲， 只有知壓迫衰過个窮苦人， 甚至殺害傷心無倚靠个人。</verse>
				<verse number="17">佢盡好咒詛，願咒詛臨到佢！ 佢毋肯祝福，願祝福遠離佢！</verse>
				<verse number="18">佢用咒詛來裝備自家，像著外袍； 願咒詛像水一樣流入佢个身體， 像油恁樣一直透入佢个骨頭！</verse>
				<verse number="19">願咒詛像衫恁樣黏等佢， 像腰帶一樣常常捆等佢！</verse>
				<verse number="20">願上主恁樣責罰𠊎該兜對敵， 報應該兜講壞話攻擊𠊎个人。</verse>
				<verse number="21">總係，至高个上主啊， 求你因為你个名來幫助𠊎， 照你至善个慈愛來拯救𠊎！</verse>
				<verse number="22">因為𠊎窮苦無倚靠； 𠊎个內心傷痛至極。</verse>
				<verse number="23">𠊎像臨暗个日影漸漸消失， 像一隻草蜢一樣被人拂掉。</verse>
				<verse number="24">𠊎禁食到膝頭痠軟， 身體瘦到賸皮包骨。</verse>
				<verse number="25">仇敵看到𠊎就笑𠊎； 佢等緊搖頭侮辱𠊎。</verse>
				<verse number="26">上主 — 𠊎个上帝啊，求你幫助𠊎； 求你照你不變个慈愛拯救𠊎！</verse>
				<verse number="27">俾𠊎个仇敵知這係你个大能， 這件事係你 — 上主自家所行个。</verse>
				<verse number="28">就算佢等咒詛𠊎， 你還係愛祝福𠊎。 願迫害𠊎个人見笑 ， 你个僕人卻得到歡喜。</verse>
				<verse number="29">願𠊎該兜仇敵著等羞辱， 被見笑像外袍恁樣包等。</verse>
				<verse number="30">𠊎愛出聲大大感謝上主； 𠊎愛在大聚會中讚美佢，</verse>
				<verse number="31">因為佢為窮苦个人伸冤， 救佢脫離定佢死罪个人。</verse>
			</chapter>
			<chapter number="110">
				<verse number="1">上主㧯𠊎个主講： 「你坐在𠊎个右片， 等𠊎使你个仇敵伏在你个腳下。」</verse>
				<verse number="2">上主愛對 錫安 擴展你个王權。 你愛在你个敵人中掌權。</verse>
				<verse number="3">你同敵人作戰个時節， 你个人民會自願從軍； 你个後生人會到聖山來就你， 就像朝晨頭个甘露恁多 。</verse>
				<verse number="4">上主已經發誓，絕對無反悔，佢講： 「你愛照 麥基洗德 个體制， 永遠做祭司。」</verse>
				<verse number="5">主在你个右片； 佢發譴該日愛打擊列王。</verse>
				<verse number="6">佢愛審判萬國，將身屍堆起來； 佢愛打擊全地个統治者。</verse>
				<verse number="7">𠊎个王會在路堘啉溪水， 能力就恢復，得到大勝利。</verse>
			</chapter>
			<chapter number="111">
				<verse number="1">愛讚美上主！ 在正直人个聚會㧯議會中， 𠊎愛全心全意來感謝上主。</verse>
				<verse number="2">上主个作為實在偉大； 凡喜愛个就默想研究。</verse>
				<verse number="3">佢个作為滿有榮光、威嚴； 佢个公義長存，直到永遠。</verse>
				<verse number="4">上主行奇事，使人紀念； 佢滿有恩惠，又有憐憫。</verse>
				<verse number="5">佢賜食物給敬畏佢个人； 佢永遠記等佢所立个約。</verse>
				<verse number="6">佢對佢个子民顯示大能， 將外邦个土地賜給佢等。</verse>
				<verse number="7">佢个手所做个全部信實公正； 佢一切个教訓確實可靠。</verse>
				<verse number="8">它兜永遠有效， 係照信實㧯公義設立个。</verse>
				<verse number="9">佢為佢个子民施行救贖； 佢同佢等立永遠个契約。 佢个名係神聖得人畏个！</verse>
				<verse number="10">敬畏上主係智慧个開頭 ； 遵行佢誡命个就有聰明。 愛讚美上主，直到永遠！</verse>
			</chapter>
			<chapter number="112">
				<verse number="1">愛讚美上主！ 敬畏上主，盡歡喜遵行佢誡命个， 這種人實在有福氣噢！</verse>
				<verse number="2">佢个子孫在地上會盡強盛； 義人个後代一定會受祝福。</verse>
				<verse number="3">佢个家族會興旺富足； 佢个善行會永遠長存。</verse>
				<verse number="4">佢像光 ，為到義人照在烏暗中； 佢滿有恩惠、憐憫㧯公義。</verse>
				<verse number="5">對人大方，肯借給人， 經營事業非常公平， 這種人實在有福氣！</verse>
				<verse number="6">佢的確永遠毋會失敗； 義人會永遠得到紀念。</verse>
				<verse number="7">佢毋會被壞消息驚到； 佢个心堅定，信靠上主。</verse>
				<verse number="8">佢个心在在，全無驚麼介； 最尾，佢會看到敵人失敗。</verse>
				<verse number="9">佢慷慨救濟窮苦人， 佢个仁義永遠長存； 佢會強盛，受人敬重。</verse>
				<verse number="10">壞人看到恁樣就盡譴； 佢等咬牙切齒閼到會死； 佢等个希望完全落空。</verse>
			</chapter>
			<chapter number="113">
				<verse number="1">哈利路亞！ 上主个僕人啊，愛讚美， 你等愛讚美上主个名！</verse>
				<verse number="2">上主个名應該受頌讚， 對這下直到永永遠遠！</verse>
				<verse number="3">對日出到日落个所在， 上主个名應該受讚美！</verse>
				<verse number="4">上主超過天下萬國， 佢个榮光比天較高。</verse>
				<verse number="5">麼人像上主 — 𠊎等个上帝呢？ 佢个寶座設在至高个所在，</verse>
				<verse number="6">總係，佢低頭觀察， 看顧諸天㧯大地。</verse>
				<verse number="7">佢對泥粉中高升窮苦人， 佢對屎堆肚牽起困苦人；</verse>
				<verse number="8">佢使佢等同眾王子做朋友， 同佢等本國个王子坐共下。</verse>
				<verse number="9">佢使毋會𫱔个婦女在家中受尊重， 賜給姖子女，使姖歡喜快樂。 哈利路亞！</verse>
			</chapter>
			<chapter number="114">
				<verse number="1">以色列 个人民一離開 埃及 ， 雅各 个子孫一出外邦个地，</verse>
				<verse number="2">猶大 就成做上帝个聖地， 以色列 成做佢治理个國。</verse>
				<verse number="3">紅海 一看到，水就逃走； 約旦 河个水也顛倒流。</verse>
				<verse number="4">大山像公羊緊跳； 細山像細羊緊跳。</verse>
				<verse number="5">紅海 啊，你做麼介愛逃走？ 約旦 河啊，你樣般顛倒流？</verse>
				<verse number="6">大山啊，你做麼介像公羊緊跳？ 細山啊，你樣般像細羊緊跳？</verse>
				<verse number="7">大地啊，主到个時節你愛緊顫， 在 雅各 个上帝面前你愛緊掣！</verse>
				<verse number="8">佢使磐石成做陂塘， 使巖石沖出泉水來。</verse>
			</chapter>
			<chapter number="115">
				<verse number="1">上主啊，榮光毋好歸給𠊎等， 毋好歸給𠊎等！ 榮光愛因為你个慈愛㧯信實歸在你个名下！</verse>
				<verse number="2">做麼介俾列國緊問𠊎等： 「你等个上帝在㖠位呢？」</verse>
				<verse number="3">𠊎等个上帝在天頂； 佢照自家个旨意行事。</verse>
				<verse number="4">佢等个偶像係金銀做个， 係人个雙手製造出來个。</verse>
				<verse number="5">它兜有嘴，也毋會講話； 雖然有目珠，乜毋會看；</verse>
				<verse number="6">有耳公，也毋會聽； 有鼻公，乜毋會鼻；</verse>
				<verse number="7">有手，總係毋會摸； 有腳，也係毋會行； 喉嗹，乜毋會出聲。</verse>
				<verse number="8">願一切 製造㧯信靠偶像个人， 攏總同佢等所做个偶像共樣。</verse>
				<verse number="9">以色列 人啊，愛信靠上主！ 佢係你等个幫助㧯盾牌。</verse>
				<verse number="10">亞倫 家个眾祭司啊，愛信靠上主！ 佢係你等个幫助㧯盾牌。</verse>
				<verse number="11">敬畏上主个啊，愛信靠佢！ 佢係你等个幫助㧯盾牌。</verse>
				<verse number="12">上主一直顧念𠊎等； 佢還愛賜福給𠊎等； 佢愛賜福給 以色列 家个人民； 佢愛賜福給 亞倫 家个眾祭司。</verse>
				<verse number="13">上主愛賜福給敬畏佢个人， 無論地位高低攏總有份。</verse>
				<verse number="14">願上主加添子女給你等， 使你等个子孫越來越多。</verse>
				<verse number="15">願上主賜福給你等； 佢係創造天地个主！</verse>
				<verse number="16">天，就係上主个天； 地，佢就賜給人類。</verse>
				<verse number="17">死人毋會讚美上主； 落陰府个也係共樣。</verse>
				<verse number="18">總係，𠊎等生生个人愛頌讚上主， 對這下直到永永遠遠！ 哈利路亞！</verse>
			</chapter>
			<chapter number="116">
				<verse number="1">𠊎敬愛上主， 因為佢聽𠊎个聲㧯𠊎个懇求。</verse>
				<verse number="2">𠊎逐擺求喊佢， 佢就側耳聽𠊎。</verse>
				<verse number="3">死亡个絞索纏等𠊎； 陰間个痛苦逐到𠊎； 𠊎驚到會死，非常憂愁。</verse>
				<verse number="4">𠊎就求喊上主，講： 「上主啊，求你救𠊎！」</verse>
				<verse number="5">上主有恩惠，又有公義； 𠊎等个上帝滿有憐憫。</verse>
				<verse number="6">上主保護單純个人； 𠊎卑微軟弱，佢就救𠊎。</verse>
				<verse number="7">𠊎个心啊，你愛安靜下來， 因為上主一直好款待你。</verse>
				<verse number="8">上主救𠊎个命脫離死亡； 𠊎个目珠毋使再流目汁， 𠊎个腳也毋會再打盪溜。</verse>
				<verse number="9">所以𠊎愛在上主面前， 在生人个世界來出入。</verse>
				<verse number="10">𠊎講過： 「𠊎非常困苦。」 著急个時，𠊎講： 「無可靠个人。」 就算恁樣，𠊎還係保持信心。</verse>
				<verse number="11"></verse>
				<verse number="12">上主賜給𠊎个一切大恩， 𠊎愛樣般報答呢？</verse>
				<verse number="13">𠊎愛擎起救恩个杯， 來求喊上主个聖名。</verse>
				<verse number="14">𠊎愛在佢子民个面前， 對上主還𠊎所許个願。</verse>
				<verse number="15">上主忠心个子民過身， 係佢看做極寶貴个事 。</verse>
				<verse number="16">上主啊，𠊎係你个僕人； 𠊎㧯吾姆共樣服事你。 你已經解開𠊎个鎖鍊。</verse>
				<verse number="17">上主啊，𠊎愛對你獻感謝个祭； 𠊎愛求喊你个名。</verse>
				<verse number="18">𠊎愛在 耶路撒冷 ， 在聖殿个庭院肚， 在上主子民个面前， 對佢還𠊎所許个願。 愛讚美上主！</verse>
				<verse number="19"></verse>
			</chapter>
			<chapter number="117">
				<verse number="1">列國啊，你等愛讚美上主！ 萬民啊，你等愛頌讚佢！</verse>
				<verse number="2">佢對𠊎等个慈愛盡大； 上主个信實永遠長存。 哈利路亞！</verse>
			</chapter>
			<chapter number="118">
				<verse number="1">愛感謝上主，因為佢係至善； 佢个慈愛永遠長存！</verse>
				<verse number="2">願 以色列 人講： 「佢个慈愛永遠長存！」</verse>
				<verse number="3">願 亞倫 家个眾祭司講： 「佢个慈愛永遠長存！」</verse>
				<verse number="4">願所有敬畏上主个人講： 「佢个慈愛永遠長存！」</verse>
				<verse number="5">𠊎在急難中求上主； 佢就應𠊎，給𠊎自由。</verse>
				<verse number="6">上主㧯𠊎同在，𠊎就毋使驚； 人能對𠊎樣般哪？</verse>
				<verse number="7">上主同𠊎共下，佢幫助𠊎； 𠊎會看到敵人个失敗。</verse>
				<verse number="8">求上主庇佑， 贏過倚靠世人。</verse>
				<verse number="9">求上主庇佑， 贏過倚靠王子。</verse>
				<verse number="10">列國包圍𠊎； 𠊎倚靠上主个名剿滅佢等！</verse>
				<verse number="11">佢等對四面包圍𠊎； 𠊎倚靠上主个名剿滅佢等！</verse>
				<verse number="12">佢等像蜂仔弛崗打陣包圍𠊎， 又像竻叢𤏸火緊燒； 𠊎倚靠上主个名剿滅佢等！</verse>
				<verse number="13">佢等盡命攻擊𠊎，愛打橫𠊎； 總係上主幫助𠊎。</verse>
				<verse number="14">上主係𠊎个力量，𠊎个詩歌 ； 佢係𠊎个救主！</verse>
				<verse number="15">上主子民个帳篷肚， 有歡呼勝利个聲講： 「上主顯出佢个大能了！</verse>
				<verse number="16">上主个能力使𠊎等打贏； 上主顯出佢个大能了！」</verse>
				<verse number="17">𠊎毋會致到死，𠊎會生下去， 來宣揚上主个作為。</verse>
				<verse number="18">上主識嚴嚴刑罰𠊎， 總係無使𠊎死掉。</verse>
				<verse number="19">為𠊎打開聖殿个門 ； 𠊎愛入去感謝上主！</verse>
				<verse number="20">這門係上主个門； 只有義人正做得入去。</verse>
				<verse number="21">上主啊，𠊎愛感謝你，因為你應𠊎； 你係𠊎个救主！</verse>
				<verse number="22">泥水師傅所㧒掉个這垤石頭， 已經成做地基中最重要个。</verse>
				<verse number="23">這係上主个作為， 係樣般奇妙个事啊！</verse>
				<verse number="24">這係上主所定 个日子； 𠊎等愛歡歡喜喜來慶祝！</verse>
				<verse number="25">上主啊，𠊎等求你，求你來拯救！ 上主啊，求你使𠊎等順利成功！</verse>
				<verse number="26">願上主賜福給該奉主名來个！ 𠊎等對上主个聖殿祝福你等！</verse>
				<verse number="27">上主係上帝； 佢賜給𠊎等光明。 愛拿等樹枝開始𠊎等个慶典， 行到祭壇堘去 。</verse>
				<verse number="28">你係𠊎个上帝，𠊎愛感謝你！ 𠊎个上帝啊，𠊎愛宣揚你个偉大！</verse>
				<verse number="29">愛感謝上主，因為佢係至善； 佢个慈愛永遠長存！</verse>
			</chapter>
			<chapter number="119">
				<verse number="1">行為無好嫌、遵行上主教示个， 這種人實在有福氣噢！</verse>
				<verse number="2">聽從上主个法令、 全心尋求佢个， 這種人實在有福氣噢！</verse>
				<verse number="3">這種人絕對毋做壞事； 單單遵行上主个道路。</verse>
				<verse number="4">上主啊，你頒佈教訓給𠊎等， 喊𠊎等認真遵行。</verse>
				<verse number="5">𠊎真希望能行事堅定， 遵行你所規定个！</verse>
				<verse number="6">𠊎若看重你所有个誡命， 就毋會堵到見笑。</verse>
				<verse number="7">𠊎緊學會你公正个法則， 就會用正直个心頌讚你。</verse>
				<verse number="8">𠊎愛遵行你个規則； 求你毋好放掉𠊎！</verse>
				<verse number="9">後生人愛樣般過純潔个生活啊？ 就係愛遵行你个話！</verse>
				<verse number="10">𠊎全心尋求你； 求你毋好俾𠊎違背你个誡命。</verse>
				<verse number="11">𠊎將你个話記在心中， 免得𠊎得罪你。</verse>
				<verse number="12">上主啊，𠊎頌讚你！ 求你教𠊎你个規則。</verse>
				<verse number="13">𠊎愛大聲傳揚 你所立一切个法則。</verse>
				<verse number="14">𠊎喜愛你个法令， 贏過一切个財寶。</verse>
				<verse number="15">𠊎默想你个教訓； 𠊎看重你个道路。</verse>
				<verse number="16">𠊎非常歡喜你个規則； 𠊎毋會毋記得你个話。</verse>
				<verse number="17">求你恩待你个僕人， 賜𠊎生命來遵行你个話。</verse>
				<verse number="18">求你打開𠊎个目珠， 使𠊎看出你教示中奧妙个真理。</verse>
				<verse number="19">𠊎在世間做人客； 求你毋好對𠊎囥等你个誡命。</verse>
				<verse number="20">𠊎个心時常著急， 當渴慕你个法則。</verse>
				<verse number="21">你責備驕傲个人， 咒詛悖逆你誡命个人。</verse>
				<verse number="22">求你除掉𠊎所受个羞辱㧯藐視， 因為𠊎謹守你个法令。</verse>
				<verse number="23">雖然統治者坐共下，想盡辦法愛害𠊎， 𠊎係你个僕人，還係愛默想你个規則。</verse>
				<verse number="24">你个法令使𠊎歡喜， 係𠊎个良師益友。</verse>
				<verse number="25">𠊎个生命險險歸土； 求你照你个應許使𠊎返生！</verse>
				<verse number="26">𠊎告白𠊎所行个，你就應𠊎； 求你教𠊎你个規則！</verse>
				<verse number="27">求你使𠊎了解你个教訓； 𠊎愛默想你奇妙个作為。</verse>
				<verse number="28">𠊎憂愁到緊流目汁； 求你照你个應許使𠊎堅強起來。</verse>
				<verse number="29">求你使𠊎離開虛假个路， 開恩將你个教示賜給𠊎。</verse>
				<verse number="30">𠊎所選个係真理个路； 𠊎將你个法則擺在面前。</verse>
				<verse number="31">上主啊，𠊎堅持遵行你个法令； 求你毋好俾𠊎堵到見笑。</verse>
				<verse number="32">𠊎非常熱心遵行你个誡命， 因為你使𠊎个心大有智慧。</verse>
				<verse number="33">上主啊，求你將你規則个意義教𠊎； 𠊎願意遵行到底。</verse>
				<verse number="34">求你使𠊎明白你个教示； 𠊎就一心遵行。</verse>
				<verse number="35">求你帶𠊎行你誡命个路， 因為這係𠊎所歡喜个。</verse>
				<verse number="36">求你使𠊎樂意遵行你个法令， 贏過愛慕錢財。</verse>
				<verse number="37">求你使𠊎無看重虛空个事； 求你俾𠊎行你个道路， 換新𠊎个生命。</verse>
				<verse number="38">你對敬畏你个人所應許个， 求你實現在你个僕人身上。</verse>
				<verse number="39">求你使𠊎所驚个羞辱離開𠊎， 因為你个法則恁好。</verse>
				<verse number="40">你个教訓係𠊎所渴慕个； 求你因為你个公義賜𠊎新生命！</verse>
				<verse number="41">上主啊，求你對𠊎顯出你个慈愛， 求你照你个應許拯救𠊎；</verse>
				<verse number="42">𠊎就有話好應侮辱𠊎个人， 因為𠊎信靠你个話。</verse>
				<verse number="43">求你使𠊎个嘴無離開真理， 因為𠊎个希望係在你个法則。</verse>
				<verse number="44">𠊎愛繼續遵行你个教示， 直到永永遠遠。</verse>
				<verse number="45">𠊎會自由自在來生活， 因為𠊎遵行你个教訓。</verse>
				<verse number="46">𠊎會對君王講論你个法令， 𠊎也毋會堵到見笑。</verse>
				<verse number="47">𠊎遵行你个誡命就盡快樂， 因為𠊎愛慕你个誡命。</verse>
				<verse number="48">𠊎尊重又愛慕你个誡命； 𠊎也愛默想你个規則。</verse>
				<verse number="49">求你記得你對僕人个應許， 因為你个話使𠊎得到希望。</verse>
				<verse number="50">就係在患難中𠊎也得到安慰， 因為你个應許換新𠊎个生命。</verse>
				<verse number="51">驕傲个人一直盡命侮辱𠊎， 總係𠊎毋識偏離你个教示。</verse>
				<verse number="52">𠊎記得你早先个法則； 上主啊，你个法則使𠊎得到安慰。</verse>
				<verse number="53">看到壞人棄絕你个教示， 𠊎就心火大𤏸。</verse>
				<verse number="54">𠊎在世上做人客； 你个規則成做𠊎个詩歌。</verse>
				<verse number="55">上主啊，連暗晡時𠊎也紀念你个名； 𠊎愛謹守你个教示。</verse>
				<verse number="56">順從你个教訓， 就係𠊎个快樂。</verse>
				<verse number="57">上主啊，你係𠊎个福份； 𠊎決心愛遵行你个話。</verse>
				<verse number="58">𠊎全心求你開恩， 求你照你个應許憐憫𠊎！</verse>
				<verse number="59">𠊎反省自家所行个路， 就轉向你个法令。</verse>
				<verse number="60">𠊎遵行你个誡命， 毋敢停跎延遲。</verse>
				<verse number="61">做壞事个人用索仔捆等𠊎， 𠊎還係無毋記得你个教示。</verse>
				<verse number="62">因為你公義个法則， 𠊎半夜䟘起來感謝你。</verse>
				<verse number="63">敬畏你、順從你教訓个人， 全部係𠊎个朋友。</verse>
				<verse number="64">上主啊，你个慈愛充滿全地； 求你教𠊎你个規則。</verse>
				<verse number="65">上主啊，照你所應許个， 你一直好款待你个僕人。</verse>
				<verse number="66">求你賜𠊎智慧㧯智識， 因為𠊎信從你个誡命。</verse>
				<verse number="67">你責罰𠊎以前，𠊎常常行差路， 總係這下𠊎遵行你个話。</verse>
				<verse number="68">你係至善，所行个全係好事； 求你教𠊎你个規則。</verse>
				<verse number="69">驕傲个人講花撩攻擊𠊎， 𠊎還係一心一意遵守你个教訓。</verse>
				<verse number="70">佢等个心懵懵懂懂； 總係𠊎盡歡喜你个教示。</verse>
				<verse number="71">𠊎所受个責罰對𠊎有利益， 因為會使𠊎學習你个規則。</verse>
				<verse number="72">你頒佈个教示係𠊎个寶貝， 贏過千千萬萬个金銀。</verse>
				<verse number="73">係你个手創造𠊎，又扶持𠊎； 求你給𠊎智慧，好學習你个誡命。</verse>
				<verse number="74">敬畏你个人一看到𠊎就歡喜， 因為𠊎仰望你个話。</verse>
				<verse number="75">上主啊，𠊎知你个審判盡公當； 你責罰𠊎，係照你个信實。</verse>
				<verse number="76">求你照你對僕人所應許个， 用你个慈愛安慰𠊎。</verse>
				<verse number="77">求你憐憫𠊎，留𠊎个命， 因為𠊎盡歡喜你个教示。</verse>
				<verse number="78">願該兜驕傲个人見笑； 佢等無緣無故冤枉𠊎； 論到𠊎，𠊎愛默想你个教訓。</verse>
				<verse number="79">願該兜敬畏你个人轉𠊎這位來， 認識你法令个人愛同𠊎共下 。</verse>
				<verse number="80">願𠊎一心一意遵行你个規則， 恁樣𠊎正毋會致到見笑。</verse>
				<verse number="81">𠊎个心渴慕你个救恩， 𠊎仰望你个話。</verse>
				<verse number="82">𠊎个目珠盼望你个應許到花掉； 𠊎緊問講：「你幾時正愛安慰𠊎呢？」</verse>
				<verse number="83">雖然𠊎像一隻舊个爛酒袋， 𠊎還係無毋記得你个規則。</verse>
				<verse number="84">你个僕人還愛等幾久呢？ 你幾時正愛審判迫害𠊎个人呢？</verse>
				<verse number="85">驕傲个人挖陷阱愛害𠊎； 佢等係毋遵守你教示个人。</verse>
				<verse number="86">你个誡命全部信實可靠！ 該兜人無緣無故迫害𠊎； 求你幫助𠊎！</verse>
				<verse number="87">佢等險險將𠊎對世間除掉， 總係𠊎還係無離開你个教訓。</verse>
				<verse number="88">求你照你个慈愛救𠊎个生命， 好使𠊎遵行你所頒佈个法令。</verse>
				<verse number="89">上主啊，你个話永遠長存 ， 在天頂非常堅定。</verse>
				<verse number="90">你个信實萬代長存； 你建立地，地就一直存在。</verse>
				<verse number="91">萬有照你个安排，到今還在， 因為萬物係你个奴僕。</verse>
				<verse number="92">𠊎若毋係歡喜你个教示， 早就在苦難中滅亡囉！</verse>
				<verse number="93">𠊎永遠毋會毋記得你个教訓， 因為你通過它兜賜𠊎生命。</verse>
				<verse number="94">𠊎係屬你个，求你救𠊎， 因為𠊎尋求你个教訓。</verse>
				<verse number="95">壞人等等愛將𠊎滅掉， 𠊎還係思想你个法令。</verse>
				<verse number="96">𠊎看出一切圓滿个事還係有限； 唯有你个誡命係無窮个。</verse>
				<verse number="97">𠊎係樣般愛慕你个教示啊！ 𠊎歸日默想它。</verse>
				<verse number="98">你个誡命時常在𠊎个心中， 使𠊎比仇敵較聰明。</verse>
				<verse number="99">𠊎比𠊎所有个先生還較靈通， 因為𠊎默想你个法令。</verse>
				<verse number="100">𠊎比老人家較有智慧， 因為𠊎遵守你个教訓。</verse>
				<verse number="101">𠊎棄絕一切个壞行為， 因為𠊎愛遵守你个話。</verse>
				<verse number="102">𠊎無離開你个法則， 因為教導𠊎个係你。</verse>
				<verse number="103">你个話對𠊎來講實在真甜， 在𠊎口中比蜂糖還較甜！</verse>
				<verse number="104">你个教訓使𠊎明白是非， 所以𠊎怨恨一切壞行為。</verse>
				<verse number="105">你个話係𠊎腳前个燈， 係𠊎路上个光。</verse>
				<verse number="106">𠊎識發誓，一定愛遵守， 愛遵行你公義个法則。</verse>
				<verse number="107">上主啊，𠊎所受个苦盡重； 求你照你个應許換新𠊎个生命。</verse>
				<verse number="108">上主啊，接納𠊎感謝个祈禱； 求你教𠊎你个法則。</verse>
				<verse number="109">𠊎个生命時常有危險， 總係𠊎 無毋記得你个教示。</verse>
				<verse number="110">壞人設羅網來害𠊎， 𠊎還係無偏離你个教訓。</verse>
				<verse number="111">你个法令係𠊎永久个產業， 係𠊎心肝所歡喜个。</verse>
				<verse number="112">𠊎決心遵行你个規則， 直到𠊎離開這世間。</verse>
				<verse number="113">𠊎怨恨心懷兩意个人； 𠊎愛慕个係你个教示。</verse>
				<verse number="114">你係𠊎个避難所，𠊎个盾牌； 𠊎仰望你个話。</verse>
				<verse number="115">作惡个人啊，離開𠊎！ 𠊎愛遵守𠊎上帝个誡命。</verse>
				<verse number="116">求你照你个應許扶持𠊎、留𠊎个命； 求你毋好使𠊎失望見笑。</verse>
				<verse number="117">你扶持𠊎，𠊎就會得救； 𠊎愛時常注意你个規則。</verse>
				<verse number="118">你棄絕偏離你規則个人； 佢等所圖謀个全係虛空。</verse>
				<verse number="119">你看世上个壞人做垃圾， 所以𠊎愛慕你个法令。</verse>
				<verse number="120">𠊎驚你到歸身愊愊掣； 𠊎盡驚你个審判。</verse>
				<verse number="121">𠊎一直照公正㧯公義行事； 求你毋好俾𠊎落在仇敵个手中！</verse>
				<verse number="122">求你保證你僕人个幸福； 求你毋好俾驕傲个人欺負𠊎！</verse>
				<verse number="123">因為盼望你个救恩、 等候你所應許个拯救， 𠊎个目珠望到花掉。</verse>
				<verse number="124">求你照你个慈愛恩待你个僕人； 求你教𠊎你个規則。</verse>
				<verse number="125">𠊎係你个僕人； 求你賜𠊎智慧，使𠊎明白你个法令。</verse>
				<verse number="126">上主啊，你審判个時間到了， 因為人全部悖逆你个教示。</verse>
				<verse number="127">𠊎愛慕你个誡命贏過黃金， 甚至贏過精練个純金；</verse>
				<verse number="128">所以，𠊎順從你一切个教訓； 𠊎也盡惱一切虛假个行為。</verse>
				<verse number="129">你个法令實在奇妙， 所以𠊎全心順服。</verse>
				<verse number="130">你个話一解釋就發出光， 使單純个人得到智慧。</verse>
				<verse number="131">𠊎嘴勺勺、氣急急， 因為𠊎渴慕你个誡命。</verse>
				<verse number="132">求你轉身向𠊎，憐憫𠊎， 像你對該兜敬愛你个人恁樣。</verse>
				<verse number="133">求你照你个應許使𠊎腳步穩定， 莫俾罪惡轄制𠊎。</verse>
				<verse number="134">求你救𠊎脫離壓制𠊎个人， 使𠊎有好遵行你个教訓。</verse>
				<verse number="135">求你面向你个僕人，光照𠊎； 求你教𠊎你个規則。</verse>
				<verse number="136">𠊎个目汁像河壩水流等下， 因為人毋肯遵守你个教示。</verse>
				<verse number="137">上主啊，你係公義个； 你个法則係公正个。</verse>
				<verse number="138">你所頒佈个法令， 完全公義，絕對可靠。</verse>
				<verse number="139">𠊎當譴，火盡大， 因為𠊎个仇敵看輕你个話。</verse>
				<verse number="140">你个應許完全純真， 係你个僕人所愛慕个。</verse>
				<verse number="141">𠊎盡卑賤又被人看輕， 總係𠊎無毋記得你个教訓。</verse>
				<verse number="142">你个公義永遠長存； 你个教示就係真理。</verse>
				<verse number="143">𠊎堵到患難㧯困苦， 總係你个誡命帶給𠊎快樂。</verse>
				<verse number="144">你个法令永遠公正； 求你使𠊎了解，留𠊎个生命。</verse>
				<verse number="145">上主啊，𠊎全心求喊，求你應𠊎； 𠊎一定會順從你个規則。</verse>
				<verse number="146">𠊎求喊你，求你拯救𠊎； 𠊎一定會遵行你个法令。</verse>
				<verse number="147">天吂光𠊎就䟘起來求喊你； 𠊎仰望你个話。</verse>
				<verse number="148">𠊎歸夜目金金， 默想你个應許。</verse>
				<verse number="149">上主啊，求你照你个慈愛聽𠊎个祈求； 求你照你个公義賜𠊎新生命。</verse>
				<verse number="150">用詭計迫害𠊎个人已經接近𠊎； 佢等遠離你个教示。</verse>
				<verse number="151">總係，上主啊，你在𠊎个身邊； 你个誡命逐句係真理。</verse>
				<verse number="152">𠊎早就學習你个法令； 𠊎知你使它兜永遠堅定。</verse>
				<verse number="153">求你重視𠊎所受个苦難，求你救𠊎， 因為𠊎毋識忽略你个教示。</verse>
				<verse number="154">求你為𠊎伸冤，透放𠊎； 照你个應許救𠊎个命。</verse>
				<verse number="155">救恩離開壞人盡遠， 因為佢等毋尋求你个規則。</verse>
				<verse number="156">總係，上主啊，你个慈悲極大； 求你照你个公義賜𠊎新生命。</verse>
				<verse number="157">迫害𠊎、對敵𠊎个人盡多， 𠊎還係無偏離你个法令。</verse>
				<verse number="158">𠊎看到悖逆个人就盡惱， 因為佢等毋遵守你个話。</verse>
				<verse number="159">上主啊，你看𠊎樣般愛慕你个教訓！ 求你照你不變个慈愛救𠊎个生命！</verse>
				<verse number="160">你个話全部係真理； 你公義个法則攏總存到永遠！</verse>
				<verse number="161">該兜有權勢个人無緣無故迫害𠊎， 總係𠊎个心尊重你个話。</verse>
				<verse number="162">𠊎因為你个應許非常歡喜， 像人發現多多个寶物。</verse>
				<verse number="163">虛虛假假係𠊎所怨恨、𠊎所惱个， 總係你个教示係𠊎所愛慕个。</verse>
				<verse number="164">因為你公義个法則， 𠊎逐日讚美你七擺。</verse>
				<verse number="165">愛慕你教示个人會有大平安， 無麼介能使佢等跌倒。</verse>
				<verse number="166">上主啊，𠊎等候你个拯救； 𠊎遵行你个誡命。</verse>
				<verse number="167">𠊎遵守你个法令； 𠊎全心愛慕它兜。</verse>
				<verse number="168">𠊎遵行你个教訓㧯法令， 因為你清楚𠊎一切个行為。</verse>
				<verse number="169">上主啊，願𠊎个求喊達到你面前； 求你照你个話賜給𠊎智慧。</verse>
				<verse number="170">願𠊎个祈禱達到你面前； 求你照你个應許拯救𠊎。</verse>
				<verse number="171">𠊎个嘴愛時常讚美你， 因為你教𠊎你个規則。</verse>
				<verse number="172">𠊎个舌乸愛唱歌頌讚你个應許， 因為你个誡命全部係公義个。</verse>
				<verse number="173">求你隨時伸手幫助𠊎， 因為𠊎決心遵從你个教訓。</verse>
				<verse number="174">上主啊，𠊎渴慕你个救恩！ 你个教示係𠊎所歡喜个。</verse>
				<verse number="175">求你留𠊎个命，好使𠊎讚美你！ 願你个法則幫助𠊎！</verse>
				<verse number="176">𠊎像迷失个羊行毋著路； 求你來尋你个僕人， 因為𠊎毋識毋記得你个誡命。</verse>
			</chapter>
			<chapter number="120">
				<verse number="1">𠊎在患難中求喊上主， 佢就應𠊎。</verse>
				<verse number="2">上主啊，求你救𠊎， 救𠊎脫離花撩詭詐个人。</verse>
				<verse number="3">詭詐个人啊，上帝愛樣般對付你啊？ 佢愛樣般刑罰你啊？</verse>
				<verse number="4">佢愛用戰士磨利个箭， 用燒到盡紅个火炭來刑罰你。</verse>
				<verse number="5">𠊎做人客住在 米設 人當中，實在真慘！ 𠊎樣般恁衰，住在 基達 人 个中間！</verse>
				<verse number="6">這兜人盡惱和平； 𠊎同佢等住共下忒久了！</verse>
				<verse number="7">𠊎盡好和平； 總係𠊎一開嘴，佢等就想愛相㓾。</verse>
			</chapter>
			<chapter number="121">
				<verse number="1">𠊎愛昂頭望群山； 𠊎个幫助對㖠位來？</verse>
				<verse number="2">𠊎个幫助係對上主來； 佢係創造天地个主。</verse>
				<verse number="3">佢毋會俾你跌倒； 你个保護者毋會啄目睡！</verse>
				<verse number="4">看啊， 以色列 个保護者， 佢毋會啄目睡，也毋會睡掉去。</verse>
				<verse number="5">上主愛保護你； 佢在你个身邊保佑你。</verse>
				<verse number="6">日時頭，日頭毋會傷到你； 暗晡時，月光也毋會害你。</verse>
				<verse number="7">上主愛保護你，免受一切个災難； 佢愛保護你个生命。</verse>
				<verse number="8">你出、你入，上主愛保護你， 對這下直到永永遠遠！</verse>
			</chapter>
			<chapter number="122">
				<verse number="1">有人對𠊎講： 「𠊎等來去上主个聖殿！」 該時，𠊎實在當歡喜！</verse>
				<verse number="2">這下，𠊎等來到這位， 雙腳企在 耶路撒冷 个城門內。</verse>
				<verse number="3">耶路撒冷 已經起好了， 係一座連結整齊个城。</verse>
				<verse number="4">各支族，就係屬上主个各支族，攏總上去， 照 以色列 所領受个法令頌讚上主个名。</verse>
				<verse number="5">這位有設伸張正義个寶座， 就係 大衛 家个寶座。</verse>
				<verse number="6">愛為 耶路撒冷 求和平，講： 「願愛惜你个人攏總興旺！</verse>
				<verse number="7">願你个城肚有和平！ 願你个宮內盡興旺！」</verse>
				<verse number="8">為到𠊎个親戚朋友， 𠊎愛對 耶路撒冷 講： 「願你平安！」</verse>
				<verse number="9">為到上主 — 𠊎等上帝个聖殿， 𠊎愛為你个幸福祈禱！</verse>
			</chapter>
			<chapter number="123">
				<verse number="1">在天頂掌權个主啊， 𠊎仰望你。</verse>
				<verse number="2">像奴僕倚靠頭家， 像使女倚靠頭家娘， 𠊎等仰望上主 — 𠊎等个上帝， 直到佢憐憫𠊎等。</verse>
				<verse number="3">上主啊，求你憐憫，憐憫𠊎等！ 因為𠊎等受盡各種个藐視。</verse>
				<verse number="4">𠊎等被有錢閒亍亍个人㩢耍到當痶， 被驕傲个人欺負到盡厲害。</verse>
			</chapter>
			<chapter number="124">
				<verse number="1">以色列 啊，你講看仔！ 上主若無幫助𠊎等， 你講，𠊎等會樣般呢？</verse>
				<verse number="2">「若毋係上主幫助𠊎等， 恁樣，當仇敵攻擊𠊎等、</verse>
				<verse number="3">對𠊎等大發譴个時節， 早就將𠊎等生生吞掉；</verse>
				<verse number="4">大水早就將𠊎等打走， 波浪早就將𠊎等淹過，</verse>
				<verse number="5">急流早就淹死𠊎等囉！」</verse>
				<verse number="6">𠊎等愛感謝上主！ 佢無由在𠊎等被仇敵食掉。</verse>
				<verse number="7">𠊎等像鳥仔對獵人个羅網逃走； 網仔裂掉，𠊎等就得到自由。</verse>
				<verse number="8">𠊎等个幫助對上主來； 佢係創造天地个主宰。</verse>
			</chapter>
			<chapter number="125">
				<verse number="1">信靠上主个人像 錫安 山， 永遠企到在在，毋會搖動！</verse>
				<verse number="2">像群山圍等 耶路撒冷 ， 上主也恁樣圍等佢个子民， 對這下直到永永遠遠。</verse>
				<verse number="3">上帝分給義人个土地毋會永遠被壞人管制； 免得佢等也學壞人、伸手去做壞事。</verse>
				<verse number="4">上主啊，求你好款待該兜行善㧯心肝正直个人。</verse>
				<verse number="5">總係該兜行為偏差、做事彎曲个人， 上主愛使佢等同作惡个人共下滅亡。 願 以色列 享受太平！</verse>
			</chapter>
			<chapter number="126">
				<verse number="1">上主帶𠊎等轉 錫安 个時 ， 𠊎等就像發一隻夢一樣！</verse>
				<verse number="2">𠊎等開嘴大笑，歡呼唱歌！ 列國中間留傳一句話講： 「上主為佢等成就大事！」</verse>
				<verse number="3">著，上主為𠊎等成就大事； 𠊎等係樣般个快樂啊！</verse>
				<verse number="4">上主啊，求你再使𠊎等復興 ， 像雨水倒轉去燥掉个河壩。</verse>
				<verse number="5">目汁濫泔去委種个人， 就會歡呼來收成五榖！</verse>
				<verse number="6">該流等目汁、帶種子出去委種个人， 轉來个時會歡喜唱歌、揇禾捆入門！</verse>
			</chapter>
			<chapter number="127">
				<verse number="1">若毋係上主起屋， 起屋个人就打喪工； 若毋係上主保護城市， 看守个人也無路用。</verse>
				<verse number="2">早早䟘，暗暗睡， 為到食歸日勞碌， 這係無採工； 因為上主在佢所痛惜个人睡目个時已經賜給佢等 。</verse>
				<verse number="3">子女係上主所賜个產業； 婦女懷胎係佢賜个福氣。</verse>
				<verse number="4">後生時所𫱔个子女， 就像戰士手中个箭。</verse>
				<verse number="5">箭袋裝滿這種箭个人實在有福氣噢！ 佢在城門口同對手爭論就毋會見笑。</verse>
			</chapter>
			<chapter number="128">
				<verse number="1">敬畏上主、遵行佢道路个， 這種人實在有福氣噢！</verse>
				<verse number="2">你勞碌得到个罅你用； 你就會快樂，凡事順利。</verse>
				<verse number="3">你个𡜵娘在你屋下， 像結子多多个葡萄樹； 你个子女圍等你个桌仔， 像細頭个橄欖樹。</verse>
				<verse number="4">敬畏上主个人， 的確會恁樣得到福氣！</verse>
				<verse number="5">願上主對 錫安 賜福給你！ 願你一生人看到 耶路撒冷 興旺！</verse>
				<verse number="6">願你看得到你个子子孫孫！ 願 以色列 享受太平！</verse>
			</chapter>
			<chapter number="129">
				<verse number="1">以色列 啊，你講看仔； 從細，仇敵樣般迫害你。</verse>
				<verse number="2">「從細，仇敵迫害𠊎盡厲害， 總係，佢等並無得到勝利。</verse>
				<verse number="3">佢等在𠊎个背囊留下盡深个傷口， 像犁田个人所犁出來長長个泥溝。</verse>
				<verse number="4">總係，公義个上主透放𠊎； 佢將捆等𠊎个索仔斬斷。」</verse>
				<verse number="5">願該兜恨 錫安 个人， 全部堵到見笑退走。</verse>
				<verse number="6">願佢等像屋頂个草， 還吂大就燥掉，</verse>
				<verse number="7">毋罅俾割草个人揢一揢， 就係捆起來也無一捆。</verse>
				<verse number="8">路過个人連一個也毋會講： 「願上主賜个福氣臨到你等！ 𠊎等奉上主个名祝福你等！」</verse>
			</chapter>
			<chapter number="130">
				<verse number="1">上主啊，𠊎在絕望中求喊你！</verse>
				<verse number="2">主啊，求你聽𠊎个聲音！ 求你側耳聽𠊎个哀求來幫助𠊎！</verse>
				<verse number="3">上主啊，若係你記錄人个罪惡， 麼人閃得開你个責罰哪？</verse>
				<verse number="4">總係你赦免人， 所以人會敬畏你。</verse>
				<verse number="5">𠊎等候上主， 𠊎个心等候佢， 𠊎仰望佢个話。</verse>
				<verse number="6">𠊎仰望主， 比掌更个人等天光還較著急， 比掌夜个人等天光還較迫切！</verse>
				<verse number="7">以色列 啊，愛仰望上主， 因為上主有不變个慈愛， 又有豐盛个救恩。</verse>
				<verse number="8">佢的確愛拯救 以色列 民 離開佢等一切个罪惡。</verse>
			</chapter>
			<chapter number="131">
				<verse number="1">上主啊，𠊎个心毋敢驕傲， 連𠊎个目珠也毋敢自高； 𠊎毋敢忒自信能做大事， 也毋敢誇口愛行大奇事。</verse>
				<verse number="2">𠊎个心平靜又自在， 像斷乳个孲𤘅仔在厥姆懷中恬恬； 𠊎个心也像斷乳个孲𤘅仔安寧自在。</verse>
				<verse number="3">以色列 啊，愛仰望上主， 對這下直到永永遠遠！</verse>
			</chapter>
			<chapter number="132">
				<verse number="1">上主啊，毋好毋記得 大衛 ； 愛記得佢受个一切艱苦。</verse>
				<verse number="2">上主啊，愛記得佢對你所許个願； 佢對 雅各 个全能者發誓講：</verse>
				<verse number="3">「𠊎絕對毋轉屋下抑係上床，</verse>
				<verse number="4">𠊎絕對毋睡目抑係啄目睡，</verse>
				<verse number="5">直到𠊎為上主尋到地方， 為 雅各 个全能者尋到住个所在。」</verse>
				<verse number="6">𠊎等聽講約櫃在 以法他 ； 𠊎等在 雅珥 田間尋到它。</verse>
				<verse number="7">𠊎等講：「來去上主住个所在； 𠊎等來去佢个寶座前跪拜。」</verse>
				<verse number="8">上主啊，䟘起來，進入你休息个地方， 同顯示你大能个約櫃共下入聖所。</verse>
				<verse number="9">願你个祭司著上公義； 願你忠心个子民歡呼。</verse>
				<verse number="10">求你因為你僕人 大衛 个緣故， 毋好轉過身毋搭你選立个王。</verse>
				<verse number="11">上主用信實對 大衛 發誓， 絕對毋會收轉去；佢講： 「𠊎愛立你一個孻仔做王； 𠊎愛使佢承接你个王位。</verse>
				<verse number="12">你个子孫若遵守𠊎个約， 實行𠊎教佢等个法令， 佢等个子孫也會永永遠遠承接你个王位。」</verse>
				<verse number="13">上主已經揀選 錫安 ； 佢愛該地方做佢住个所在。</verse>
				<verse number="14">佢講：「𠊎愛永遠住在這位； 這位係𠊎中意愛掌權个所在。</verse>
				<verse number="15">𠊎愛供給 錫安 一切个需要； 𠊎愛使其中个窮苦人得到飽足。</verse>
				<verse number="16">𠊎愛使眾祭司著上𠊎个救恩； 城內忠心个人民愛大聲歡呼！</verse>
				<verse number="17">𠊎愛在這位興起 大衛 个一個後代，使佢做王； 𠊎愛庇佑𠊎所選立个王，使佢个王權堅固。</verse>
				<verse number="18">𠊎愛使佢个仇敵失敗見笑， 總係佢个國度愛興旺昌明。」</verse>
			</chapter>
			<chapter number="133">
				<verse number="1">看啊，兄弟姊妹和和睦睦共下住， 係何等个美善，何等个快樂！</verse>
				<verse number="2">這就像係寶貴个香油， 對 亞倫 个頭那頂流下， 流到鬍鬚，又流到衫領。</verse>
				<verse number="3">這像 黑門 山个甘露， 落在 錫安 个群山頂。 在該位上主應許愛賜福， 就係愛賜下永遠个生命！</verse>
			</chapter>
			<chapter number="134">
				<verse number="1">上主个眾僕人啊， 你等愛頌讚上主！ 在上主聖殿當夜班个啊， 你等愛頌讚佢！</verse>
				<verse number="2">你等愛向聖所擎手祈禱； 你等愛頌讚上主！</verse>
				<verse number="3">願創造天地个上主 對 錫安 賜福給你等！</verse>
			</chapter>
			<chapter number="135">
				<verse number="1">哈利路亞！ 愛讚美上主个名！ 上主个僕人啊， 在上主个聖殿當班个啊， 在𠊎等上帝个聖殿外院事奉个人啊， 你等愛讚美佢！</verse>
				<verse number="2"></verse>
				<verse number="3">你等愛讚美上主，因為上主係至善； 愛歌頌佢个名，因為佢係慈愛个 。</verse>
				<verse number="4">上主為自家揀選 雅各 ， 擇 以色列 做佢寶貝个子民。</verse>
				<verse number="5">𠊎知上主係至大个； 𠊎等个主超過萬神。</verse>
				<verse number="6">在天，在地，在大海，在深淵， 上主照自家个旨意行事。</verse>
				<verse number="7">佢使雲霧對地極升上去， 使𥍉爧同暴雨共下來， 使風對佢个倉庫吹出。</verse>
				<verse number="8">佢在 埃及 㓾死所有頭胎个， 無論係人，係頭牲，全部㓾掉。</verse>
				<verse number="9">在該位，佢施行神蹟奇事， 責罰 埃及 王㧯佢个部下。</verse>
				<verse number="10">佢消滅盡多國， 㓾死當厲害个王：</verse>
				<verse number="11">有 亞摩利 王 西宏 ， 巴珊 王 噩 ，㧯所有 迦南 个王。</verse>
				<verse number="12">佢將佢等个土地賜給佢自家个子民， 賜給 以色列 人做產業。</verse>
				<verse number="13">上主啊，你个名永遠長存！ 萬世萬代攏總愛紀念你！</verse>
				<verse number="14">上主愛為佢个子民伸冤； 佢對佢个僕人慈悲滿滿。</verse>
				<verse number="15">列國个偶像係金銀做个， 係人个雙手製造出來个。</verse>
				<verse number="16">它兜有嘴，也毋會講話， 有目珠，也毋會看，</verse>
				<verse number="17">有耳公，也毋會聽， 有鼻孔，也毋會透氣。</verse>
				<verse number="18">願一切 製造㧯信靠偶像个人， 攏總同佢等所做个偶像共樣。</verse>
				<verse number="19">以色列 人啊，你等愛頌讚上主！ 亞倫 家个眾祭司啊，愛頌讚佢！</verse>
				<verse number="20">利未 人啊，你等愛頌讚上主！ 敬畏上主个人啊，愛頌讚佢！</verse>
				<verse number="21">你等在 錫安 个啊，愛頌讚上主！ 愛頌讚住在 耶路撒冷 个上主！ 哈利路亞！</verse>
			</chapter>
			<chapter number="136">
				<verse number="1">愛感謝上主，因為佢係至善； 佢个慈愛永遠長存。</verse>
				<verse number="2">愛感謝萬神个上帝； 佢个慈愛永遠長存。</verse>
				<verse number="3">愛感謝萬主个主宰； 佢个慈愛永遠長存。</verse>
				<verse number="4">唯有佢能行大神蹟； 佢个慈愛永遠長存。</verse>
				<verse number="5">佢用自家个智慧創造諸天； 佢个慈愛永遠長存。</verse>
				<verse number="6">佢在深水个頂高鋪設大地； 佢个慈愛永遠長存。</verse>
				<verse number="7">佢創造日頭㧯月光； 佢个慈愛永遠長存。</verse>
				<verse number="8">佢造日頭管理日時頭； 佢个慈愛永遠長存。</verse>
				<verse number="9">月光㧯星辰管理暗晡時； 佢个慈愛永遠長存。</verse>
				<verse number="10">佢㓾死 埃及 所有頭胎个； 佢个慈愛永遠長存。</verse>
				<verse number="11">佢帶領 以色列 人出 埃及 ； 佢个慈愛永遠長存。</verse>
				<verse number="12">佢伸出大能个手㧯手髀； 佢个慈愛永遠長存。</verse>
				<verse number="13">佢分開 紅海 个水； 佢个慈愛永遠長存。</verse>
				<verse number="14">佢帶領 以色列 人行過去； 佢个慈愛永遠長存。</verse>
				<verse number="15">佢將 埃及 王㧯佢个軍隊淹死在 紅海 ； 佢个慈愛永遠長存。</verse>
				<verse number="16">佢帶領佢个子民經過曠野； 佢个慈愛永遠長存。</verse>
				<verse number="17">佢㓾死該兜勇壯个王； 佢个慈愛永遠長存。</verse>
				<verse number="18">佢㓾死該兜出名个王； 佢个慈愛永遠長存。</verse>
				<verse number="19">佢㓾死 亞摩利 王 西宏 ； 佢个慈愛永遠長存。</verse>
				<verse number="20">佢㓾死 巴珊 王 噩 ； 佢个慈愛永遠長存。</verse>
				<verse number="21">佢將佢等个土地賜給佢个子民做產業； 佢个慈愛永遠長存。</verse>
				<verse number="22">佢將佢等个土地賜給佢个僕人 以色列 ； 佢个慈愛永遠長存。</verse>
				<verse number="23">𠊎等失敗个時，佢無放掉𠊎等； 佢个慈愛永遠長存。</verse>
				<verse number="24">佢救𠊎等脫離仇敵个手； 佢个慈愛永遠長存。</verse>
				<verse number="25">佢賜食物給人㧯動物； 佢个慈愛永遠長存。</verse>
				<verse number="26">愛感謝天頂个上帝； 佢个慈愛永遠長存。</verse>
			</chapter>
			<chapter number="137">
				<verse number="1">𠊎等坐在 巴比倫 个河壩滣， 一想到 錫安 就忍毋住噭出來！</verse>
				<verse number="2">在河壩滣个柳樹頂， 𠊎等將豎琴掛起來。</verse>
				<verse number="3">捉𠊎等來个人喊𠊎等唱歌； 蹧踏𠊎等个人喊𠊎等娛樂佢等。 佢等講：「來！為𠊎等唱一條 錫安 歌！」</verse>
				<verse number="4">𠊎等身在外邦个土地上， 樣做得唱上主个詩歌呢？</verse>
				<verse number="5">耶路撒冷 啊，若係𠊎毋記得你， 願𠊎个右手瘸掉，毋會再彈琴！</verse>
				<verse number="6">𠊎若係毋記得 耶路撒冷 ， 若無看你做最大个快樂， 願𠊎个舌乸黏上齶， 永遠不能吟詩唱歌！</verse>
				<verse number="7">上主啊，莫毋記得 以東 人个惡噢！ 佢等在 耶路撒冷 淪陷該日盡喊講： 「拆掉它！拆掉它！ 連根挷掉它！將它踏到貼貼！」</verse>
				<verse number="8">巴比倫 啊，你會被人毀滅了！ 報復你，像你恁樣對待𠊎等个， 佢係樣般有福氣啊！</verse>
				<verse number="9">將你个孲𤘅仔捉去， 將佢等抨在石頭頂个人， 佢係樣般有福氣啊！</verse>
			</chapter>
			<chapter number="138">
				<verse number="1">上主啊，𠊎全心感謝你， 在眾神明面前歌頌你。</verse>
				<verse number="2">𠊎愛向你个聖所跪拜； 𠊎愛因為你个慈愛㧯信實頌讚你个名； 因為你有使你个名㧯你个話超越一切 。</verse>
				<verse number="3">𠊎求喊个時，你就應𠊎； 你用你个大能鼓勵𠊎。</verse>
				<verse number="4">上主啊，地上个君王愛頌讚你， 因為佢等有聽到你所講个話。</verse>
				<verse number="5">佢等愛歌頌上主个作為， 因為上主个榮光十分大。</verse>
				<verse number="6">上主至高，總係看顧卑微个人； 相離盡遠，總係佢知麼人驕傲。</verse>
				<verse number="7">𠊎被患難圍困，總係你庇佑𠊎，使𠊎安全； 仇敵對𠊎發譴，你伸手阻擋，用大能救𠊎。</verse>
				<verse number="8">上主一定會成全佢對𠊎个應許！ 上主啊，你个慈愛永遠長存！ 求你毋好放掉你親手所做个！</verse>
			</chapter>
			<chapter number="139">
				<verse number="1">上主啊，你有試驗𠊎， 你認識𠊎。</verse>
				<verse number="2">𠊎个一舉一動，你全部知； 離開恁遠，你也知𠊎个心思。</verse>
				<verse number="3">無論𠊎做事抑係休息， 你一直看顧𠊎； 𠊎一切所做个，你全部知。</verse>
				<verse number="4">上主啊，𠊎吂講， 你就知𠊎个意思。</verse>
				<verse number="5">你在𠊎四周圍保護𠊎； 你用你个權能保佑𠊎。</verse>
				<verse number="6">你認識𠊎非常徹底， 超過𠊎所能理解个。</verse>
				<verse number="7">𠊎愛去㖠位正閃得開你个靈？ 𠊎愛走到㖠位正閃得開你个面？</verse>
				<verse number="8">𠊎若係上到天頂， 你一定在該位； 𠊎若係下到陰間， 你也會在該位。</verse>
				<verse number="9">𠊎就係飛到東片个天涯， 抑係住在西片个海角，</verse>
				<verse number="10">你个手也一定會在該位帶領𠊎； 你个右手絕對會在該位扶持𠊎。</verse>
				<verse number="11">𠊎若係講：「烏暗一定會遮等𠊎， 𠊎周圍个光明會變做烏暗」，</verse>
				<verse number="12">總係對你來講，烏暗毋算烏暗， 暗晡頭㧯日時頭共樣恁光。 烏暗㧯光明對你來看係共樣个。</verse>
				<verse number="13">𠊎个五臟六腑 係你造个； 在母胎中你使𠊎成形。</verse>
				<verse number="14">𠊎頌讚你，因為𠊎个受造得人畏又神奇； 你个作為實在奇妙， 這係𠊎个心深知个！</verse>
				<verse number="15">𠊎在母胎个底背恬恬成形，你也盡清楚； 像係在盡深个地底下製造个，也瞞你毋過。</verse>
				<verse number="16">𠊎出世以前，你个目珠已經看到𠊎个形體； 人生吂開始，你就為𠊎打算，記在你个書項。</verse>
				<verse number="17">上帝啊，你个意念實在深奧 ！ 你个心思實在真難推算！</verse>
				<verse number="18">𠊎若係算看仔，一定比海沙較多； 就係算到底、無清楚 ，𠊎還係㧯你同在。</verse>
				<verse number="19">上帝啊，𠊎真希望你將壞人收掉！ 𠊎盡希望你使兇惡个人離開𠊎！</verse>
				<verse number="20">佢等講壞話惹你； 佢等開嘴褻瀆你。</verse>
				<verse number="21">上主啊，𠊎樣般怨恨該兜怨恨你个人！ 𠊎樣般惱該兜悖逆你个人！</verse>
				<verse number="22">𠊎怨恨佢等到底， 將佢等看做仇敵。</verse>
				<verse number="23">上帝啊，求你試驗𠊎，了解𠊎个心思； 考驗𠊎，明白𠊎个意念。</verse>
				<verse number="24">看𠊎底背有麼介壞心思無； 求你帶領𠊎行永生个道路 。</verse>
			</chapter>
			<chapter number="140">
				<verse number="1">上主啊，求你救𠊎脫離壞人； 保守𠊎，莫被兇惡个人陷害。</verse>
				<verse number="2">佢等一心圖謀壞事； 佢等逐日惹起紛爭。</verse>
				<verse number="3">佢等个舌乸像毒蛇， 滿嘴飯匙銃个毒氣。</verse>
				<verse number="4">上主啊，救𠊎脫離壞人个權勢； 保守𠊎，莫被兇惡个人陷害； 佢等圖謀愛害𠊎跌倒。</verse>
				<verse number="5">該兜驕傲个人設機關愛害𠊎； 佢等用索仔設落仔， 歸路裝羅網愛捉𠊎。</verse>
				<verse number="6">𠊎對上主講：「你係𠊎个上帝！」 上主啊，求你側耳聽𠊎懇求个聲！</verse>
				<verse number="7">至高个上主、𠊎大能个拯救者啊， 當相㓾該日，你有保護𠊎个頭那。</verse>
				<verse number="8">上主啊，莫俾壞人个心願實現； 求你莫俾佢等个陰謀成功， 免得佢等自高自大。</verse>
				<verse number="9">求你使圍困𠊎个人頭眩腦揙， 使佢等个咒詛臨到自家身上。</verse>
				<verse number="10">願𤏸當猛个火炭落在佢等身上； 願佢等陷落深坑，永遠跋毋起來。</verse>
				<verse number="11">願譭謗人个在世間企毋住； 願兇惡个人被災難打橫掉。</verse>
				<verse number="12">上主啊，𠊎知你愛為弱小个人主持公道； 你定著會為窮苦人伸張正義。</verse>
				<verse number="13">義人一定會頌讚你个名； 正直个人會住在你面前。</verse>
			</chapter>
			<chapter number="141">
				<verse number="1">上主啊，𠊎求喊你； 遽遽來幫助𠊎！ 𠊎求喊你个時，求你側耳垂聽𠊎个聲！</verse>
				<verse number="2">願𠊎个祈禱像燒香个煙衝到你面前； 願𠊎擎手祈禱，像係臨暗仔獻个祭。</verse>
				<verse number="3">上主啊，管制𠊎个嘴； 求你守等𠊎个嘴孔。</verse>
				<verse number="4">毋好使𠊎个心歪走， 莫㧯作惡个人共下做壞事； 禁止𠊎參加佢等个筵席。</verse>
				<verse number="5">𠊎甘願接受義人愛心个責打； 總係𠊎毋肯接受壞人个尊敬， 反轉常在祈禱中反對佢等个壞行為。</verse>
				<verse number="6">佢等个領袖被人抨落山巖下个時， 大家就會承認𠊎所講个話係真實。</verse>
				<verse number="7">佢等个骨頭會被人㧒在塚埔堘， 像係斬斷破碎个柴散到滿地 。</verse>
				<verse number="8">總係，至高个上主啊， 𠊎个目珠仰望你； 𠊎尋求你个庇佑； 求你毋好放掉𠊎！</verse>
				<verse number="9">求你毋好俾𠊎陷入佢等个機關； 救𠊎脫離該兜壞人所挖个陷阱。</verse>
				<verse number="10">願壞人陷落自家个羅網， 𠊎就有好平平安安經過。</verse>
			</chapter>
			<chapter number="142">
				<verse number="1">𠊎出聲哀求上主； 𠊎大聲對佢懇求。</verse>
				<verse number="2">𠊎對佢拚出𠊎所有个苦情， 將𠊎一切个患難講給佢聽。</verse>
				<verse number="3">𠊎个心神發咄愕个時， 係佢清楚知𠊎个道路。 在𠊎所行个路上， 仇敵設好機關愛害𠊎。</verse>
				<verse number="4">𠊎看來看去， 尋無人好𢯭手； 𠊎也尋無路好逃走； 無人關心𠊎个生死。</verse>
				<verse number="5">上主啊，𠊎對你哀求，講： 「你係𠊎个避難所， 係𠊎今生一切个福份。」</verse>
				<verse number="6">求你聽𠊎求喊个聲， 因為𠊎在絕望中。 求你救𠊎脫離迫害𠊎个人， 因為佢等比𠊎較強盛。</verse>
				<verse number="7">求你救𠊎脫離災難 ， 好俾𠊎頌讚你个名。 義人就會圍等𠊎， 因為你施恩好款待𠊎。</verse>
			</chapter>
			<chapter number="143">
				<verse number="1">上主啊，求你聽𠊎个祈禱！ 求你側耳來聽𠊎个懇求！ 求你照你个信實㧯公義來應𠊎！</verse>
				<verse number="2">求你毋好審判𠊎 — 你个僕人， 因為在你面前無一儕係義个。</verse>
				<verse number="3">𠊎个仇敵迫害𠊎， 將𠊎打橫到貼貼。 佢將𠊎關在烏暗个地方， 𠊎像係已經死盡久个人。</verse>
				<verse number="4">所以𠊎个心神發咄愕； 𠊎个內心也著驚絕望。</verse>
				<verse number="5">𠊎回想先前該兜日仔； 𠊎愐想你所做个一切， 𠊎緊唸你个手所做个。</verse>
				<verse number="6">𠊎對你擎手祈禱； 𠊎个心當渴慕你， 像旱地緊等雨水。</verse>
				<verse number="7">上主啊，求你遽遽應𠊎哪！ 𠊎个心神等到會昏掉囉！ 求你毋好揞面毋搭𠊎， 免得𠊎像該兜等死个人。</verse>
				<verse number="8">使𠊎天一光就得到你个慈愛， 因為𠊎所信靠个就係你。 求你指示𠊎應當行个路， 因為𠊎个心神仰望你。</verse>
				<verse number="9">上主啊，𠊎尋求你个庇佑； 求你救𠊎脫離𠊎个仇敵！</verse>
				<verse number="10">你係𠊎个上帝； 求你教𠊎遵行你个旨意。 你个靈係至善； 求你帶領𠊎行平直个路。</verse>
				<verse number="11">上主啊，為到你个名， 求你拯救𠊎； 求你照你个公義救𠊎脫離患難！</verse>
				<verse number="12">因為你不變个慈愛， 求你剪除𠊎个仇敵， 滅盡所有壓迫𠊎个； 因為𠊎係你个僕人。</verse>
			</chapter>
			<chapter number="144">
				<verse number="1">願頌讚歸給上主 — 𠊎个磐石！ 佢訓練𠊎个手戰爭， 訓練𠊎个手指相㓾。</verse>
				<verse number="2">佢係𠊎慈愛个主，𠊎个城堡， 𠊎个避難所，𠊎个拯救者， 𠊎个盾牌，𠊎所倚靠个； 佢使列國 降服𠊎。</verse>
				<verse number="3">上主啊，人算麼介哪？ 你關心佢！ 會朽壞个人算麼介？ 你顧念佢！</verse>
				<verse number="4">人像一口氣定定； 佢个年日就像影飛等過去。</verse>
				<verse number="5">上主啊，求你打開天，親自降臨； 求你摸該兜山，使山出煙。</verse>
				<verse number="6">求你發出𥍉爧，趕散仇敵； 求你射出箭，使佢等混亂。</verse>
				<verse number="7">求你對天頂伸手救𠊎， 對大水个當中拯救𠊎， 救𠊎脫離外來个強敵。</verse>
				<verse number="8">佢等个嘴專門講花撩， 擎右手發誓也係虛假。</verse>
				<verse number="9">上帝啊，𠊎愛對你唱新歌； 𠊎愛彈十弦琴來頌讚你！</verse>
				<verse number="10">使眾王得勝个就係你； 你拯救你个僕人 大衛 。</verse>
				<verse number="11">求你救𠊎脫離殘暴个刀劍， 救𠊎脫離該兜外來个強敵。 佢等个嘴專門講花撩， 擎右手發誓也係虛假。</verse>
				<verse number="12">願𠊎等个孻仔在後生个時 就盡紮磳像大樹； 願𠊎等个妹仔美貌 像宮殿轉角雕刻个石柱。</verse>
				<verse number="13">願𠊎等个倉庫滿滿， 囤各種个五榖； 願𠊎等牧場个羊群 生產千千萬萬。</verse>
				<verse number="14">願𠊎等个牛群繁殖多多， 無落胎个，也無被人搶走 。 願𠊎等个街項無大噭聲。</verse>
				<verse number="15">享受這種情況个國家實在有福氣！ 尊上主做佢等个上帝， 這人民係樣般有福氣啊！</verse>
			</chapter>
			<chapter number="145">
				<verse number="1">𠊎个上帝、𠊎个王啊， 𠊎愛傳揚你个偉大！ 𠊎愛頌讚你个名， 直到永永遠遠！</verse>
				<verse number="2">𠊎愛逐日頌讚你； 𠊎愛讚美你个名直到永遠！</verse>
				<verse number="3">上主至大，最堪得受讚美； 佢个偉大，無人測量得出。</verse>
				<verse number="4">世世代代愛宣揚你个作為； 佢等愛傳講你大能个工作。</verse>
				<verse number="5">佢等愛講起你个榮光㧯尊嚴； 𠊎愛緊唸你奇妙个作為。</verse>
				<verse number="6">佢等愛講論你得人驚个作為樣般有能力； 𠊎愛宣揚你个偉大。</verse>
				<verse number="7">佢等愛傳揚你豐盛个良善， 歡喜唱歌來頌讚你个公義。</verse>
				<verse number="8">上主有恩典㧯憐憫， 無隨便發譴，滿有不變个慈愛。</verse>
				<verse number="9">上主恩待萬有， 憐憫佢所造个一切。</verse>
				<verse number="10">上主啊，你所造个一切愛感謝你； 你忠心个子民愛頌讚你。</verse>
				<verse number="11">佢等愛講起你王權个榮光， 談論你个大能；</verse>
				<verse number="12">佢等愛使世間人知你大能个作為， 認識你國度个榮光㧯尊嚴。</verse>
				<verse number="13">你个國度永遠長存； 你个王權直到萬代。 上主个應許全部信實可靠； 佢所做个一切顯出佢个慈愛 。</verse>
				<verse number="14">會跌倒个，上主扶等佢等； 被人壓制个，佢扶持佢等。</verse>
				<verse number="15">眾生个目珠全部仰望你； 你照時節賜食物給佢等。</verse>
				<verse number="16">你个手一下打開， 眾生就得到飽足。</verse>
				<verse number="17">上主所行个作為全部係公義； 佢所做个一切顯出佢个慈愛。</verse>
				<verse number="18">上主親近所有求喊佢个人， 就係一切誠心求喊佢个人。</verse>
				<verse number="19">佢愛成全敬畏佢个人个心願； 佢愛聽佢等个求喊，拯救佢等。</verse>
				<verse number="20">上主保護一切敬愛佢个人； 總係佢愛消滅所有邪惡个人。</verse>
				<verse number="21">𠊎愛開嘴讚美上主； 願一切受造个頌讚佢个聖名， 直到永永遠遠。</verse>
			</chapter>
			<chapter number="146">
				<verse number="1">哈利路亞！ 𠊎个心啊，你愛讚美上主！</verse>
				<verse number="2">𠊎還生个時節愛讚美上主！ 𠊎一生人愛歌頌𠊎个上帝！</verse>
				<verse number="3">你等毋好倚靠有權勢个人， 毋好倚靠世間人； 佢一些仔都不能幫助。</verse>
				<verse number="4">佢等个氣一斷就歸土； 佢等个計劃當日就無用。</verse>
				<verse number="5">得到 雅各 个上帝來幫助个人，真有福氣噢！ 仰望上主 — 佢个上帝， 這人實在有福氣噢！</verse>
				<verse number="6">上帝創造天、地、海㧯其中个萬物； 佢持守信實直到永遠。</verse>
				<verse number="7">佢為到該兜受欺壓个主持公道； 佢給肚飢个人有好食。 上主使該兜被人關个得到自由；</verse>
				<verse number="8">上主使瞙目个人看得到。 上主扶持該兜受壓制个人； 上主痛惜正直个人。</verse>
				<verse number="9">上主保護出外人， 扶持孤兒寡婦； 總係佢愛破壞惡人个詭計。</verse>
				<verse number="10">上主愛做王到永遠！ 錫安 啊，你个上帝愛掌權到萬代！ 哈利路亞！</verse>
			</chapter>
			<chapter number="147">
				<verse number="1">哈利路亞！ 唱歌頌讚𠊎等个上帝係樣般美善！ 讚美佢係盡快樂，也係盡適當个事！</verse>
				<verse number="2">將 耶路撒冷 重新起起來个就係上主； 召集流亡个 以色列 人轉來个也係佢。</verse>
				<verse number="3">佢醫好心肝破碎个人， 將佢等个傷口包起來。</verse>
				<verse number="4">佢制定星辰个數目， 為它兜每一個安名。</verse>
				<verse number="5">𠊎等个主最大，滿有能力； 佢个智慧無人能推測。</verse>
				<verse number="6">上主扶持卑微个人； 佢使壞人橫到貼貼。</verse>
				<verse number="7">愛用感謝个心唱歌頌讚上主， 彈豎琴奏樂歌頌𠊎等个上帝。</verse>
				<verse number="8">佢使烏雲遮天， 落雨滋潤大地， 使群山生青草。</verse>
				<verse number="9">佢賜食物給獸類， 㧯緊噭个細烏鴉。</verse>
				<verse number="10">佢無中意馬仔个力大， 無合意人个腳盡會走。</verse>
				<verse number="11">上主歡喜敬畏佢个人， 喜愛仰望佢慈愛个人。</verse>
				<verse number="12">耶路撒冷 啊，愛頌讚上主！ 錫安 啊，愛讚美你个上帝！</verse>
				<verse number="13">佢使你个城門堅固； 佢賜福給你个子女。</verse>
				<verse number="14">佢保守你个邊界平靜； 佢俾你食上等个麥仔到飽飽。</verse>
				<verse number="15">佢向大地發出命令； 佢个話黏時就傳遍。</verse>
				<verse number="16">佢降个雪像羊毛； 佢委个霜像塵灰。</verse>
				<verse number="17">佢使冰雹像石仔落下； 佢吹寒風，麼人企得住？</verse>
				<verse number="18">佢一命令，霜雪冰雹就溶掉； 佢用風一吹，水就流動。</verse>
				<verse number="19">佢將佢个話啟示給 雅各 ， 將佢个規定㧯法則傳給 以色列 。</verse>
				<verse number="20">佢無恁樣對待別个國家； 佢等全無了解佢个法則。 哈利路亞！</verse>
			</chapter>
			<chapter number="148">
				<verse number="1">哈利路亞！ 你等愛對天頂讚美上主！ 你等愛在至高个所在讚美佢！</verse>
				<verse number="2">佢个眾天使啊，你等愛讚美佢！ 佢个眾天軍啊，你等愛讚美佢！</verse>
				<verse number="3">日頭啊，月光啊，愛讚美佢！ 緊𥍉个星辰啊，愛讚美佢！</verse>
				<verse number="4">天頂个諸天啊，愛讚美佢！ 天頂个眾水啊，愛讚美佢！</verse>
				<verse number="5">願這兜讚美上主个名！ 佢一下令，就造出一切。</verse>
				<verse number="6">佢將這兜各就各位，永遠堅固； 佢定了界限，不能超過 。</verse>
				<verse number="7">你等愛對地上讚美上主！ 大海怪啊，深淵啊，</verse>
				<verse number="8">𥍉爧、冰雹、雪㧯雲霧啊， 遵行佢命令个大風啊，</verse>
				<verse number="9">所有个大山㧯細山啊， 果子樹㧯各種个樹啊，</verse>
				<verse number="10">野獸㧯頭牲啊， 爬蟲㧯飛禽啊， 你等攏總愛讚美佢！</verse>
				<verse number="11">世上个君王啊，天下萬民啊， 大臣啊，世上一切掌權个啊，</verse>
				<verse number="12">細阿哥仔啊，細阿妹仔啊， 老人家啊，細人仔啊， 你等攏總愛讚美佢！</verse>
				<verse number="13">願全世界个一切攏總讚美上主个名！ 佢个名係至尊个； 佢个榮光超過天地。</verse>
				<verse number="14">佢使佢个子民強盛 ， 俾佢心所愛个子民， 就係忠心个 以色列 人， 攏總讚美佢！ 哈利路亞！</verse>
			</chapter>
			<chapter number="149">
				<verse number="1">哈利路亞！ 你等愛唱一首新歌來讚美上主， 在佢忠心子民个聚會中讚美佢！</verse>
				<verse number="2">以色列 啊，愛因為你等个創造主歡喜！ 錫安 个子女啊，愛因為你等个王快樂！</verse>
				<verse number="3">愛跳舞來讚美佢个名！ 愛打鼓彈琴來歌頌佢！</verse>
				<verse number="4">上主非常歡喜佢个子民； 佢拯救謙卑个人，賜佢勝利。</verse>
				<verse number="5">願佢忠心个子民因為得勝快樂； 願佢等透夜大聲歡喜唱歌。</verse>
				<verse number="6">願佢等大聲歡呼頌讚上帝， 佢等个手擎等兩邊利个劍，</verse>
				<verse number="7">好對列國報冤仇， 刑罰萬民，</verse>
				<verse number="8">將佢等个王用鐵鍊捆起來， 用鐵手銬鎖等佢等个大臣，</verse>
				<verse number="9">照上帝所定个來刑罰列國。 這係做上帝忠心子民个光榮。 哈利路亞！</verse>
			</chapter>
			<chapter number="150">
				<verse number="1">哈利路亞！ 愛在上帝个聖所讚美佢！ 愛在顯出佢大能个穹蒼讚美佢！</verse>
				<verse number="2">愛讚美佢大能个作為！ 愛讚美佢个至尊無對！</verse>
				<verse number="3">愛歕羊角來讚美佢！ 愛彈琴奏瑟讚美佢！</verse>
				<verse number="4">愛打鼓跳舞讚美佢！ 愛挨弦歕簫讚美佢！</verse>
				<verse number="5">愛用當響个銅鑼讚美佢！ 愛用大聲个鑇仔讚美佢！</verse>
				<verse number="6">一切有生命个啊， 你等愛讚美上主！ 哈利路亞！</verse>
			</chapter>
		</book>
		<book number="20">
			<chapter number="1">
				<verse number="1">大衛 个孻仔， 以色列 王 所羅門 个箴言：</verse>
				<verse number="2">這兜箴言會俾人認識智慧， 得到教訓，理解格言个意思。</verse>
				<verse number="3">它兜會教人樣般過明智个生活， 樣般做公義、公平㧯正直个人。</verse>
				<verse number="4">它兜會俾戇直个人 變做精明， 使後生人有智識，曉得分別是非。</verse>
				<verse number="5">有智慧个聽到，就更加有學問， 明理个人聽到，就得到引導，</verse>
				<verse number="6">來了解箴言㧯比喻， 來明白智慧人个話㧯鈴仔。</verse>
				<verse number="7">敬畏上主係智識个開頭 。 戇檔人 看輕智慧㧯教訓。</verse>
				<verse number="8">孻仔啊 ，愛聽若爸个教訓， 毋好離開若姆个教示；</verse>
				<verse number="9">因為它兜像係你所戴盡靚个帽仔， 像係你頸項寶貝个脖鍊。</verse>
				<verse number="10">孻仔啊，若係有壞人來引誘你， 千萬毋好跈佢等。</verse>
				<verse number="11">若係佢等講： 「共下來去，埋伏㓾過路人， 無論佢係麼人，毋使理由，照打！</verse>
				<verse number="12">𠊎等愛像陰間將佢等生生吞落去， 完全食掉，就像人跌落深坑肚！</verse>
				<verse number="13">𠊎等會得到各種个財寶， 屋肚會裝滿搶來个東西！</verse>
				<verse number="14">來鬥股噢， 大家共下用一隻錢袋！」</verse>
				<verse number="15">孻仔啊，毋好㧯佢等共下行， 愛禁止你个腳行佢等个路；</verse>
				<verse number="16">佢等个腳走等去行邪路， 佢等遽遽想愛害人流血。</verse>
				<verse number="17">鳥仔看等个時，來設羅網， 這係無採工个；</verse>
				<verse number="18">總係這兜壞人所設个羅網， 係流自家个血，害自家个命。</verse>
				<verse number="19">一切貪財个人所堵到个 就係恁樣； 貪財个心搶走个係佢等个命。</verse>
				<verse number="20">智慧 在街巷呼喊， 在大眾場所緊喊，</verse>
				<verse number="21">在鬧熱个街頭大聲嘶， 在城門旁邊緊出聲講：</verse>
				<verse number="22">「戇直个人啊， 你等歡喜戇直愛到幾時？ 傲慢人 歡喜傲慢， 戇檔人惱智識愛到幾久？</verse>
				<verse number="23">你等愛聽𠊎个勸話； 𠊎愛將𠊎个心思對你等顯明， 將𠊎个話教你等明白。</verse>
				<verse number="24">𠊎喊你等，你等毋聽； 𠊎擛你等，你等毋搭；</verse>
				<verse number="25">反轉看輕𠊎一切个勸話， 毋願意接受𠊎个責備。</verse>
				<verse number="26">因為恁樣， 你等堵到災難个時， 𠊎就愛笑你等； 你等驚到愊愊掣， 𠊎也愛嘲謔你等。</verse>
				<verse number="27">著驚像大風臨到你等， 災難像狂風來到， 急難痛苦降下个時， 𠊎還係愛嘲謔你等。</verse>
				<verse number="28">「該時，佢等會求喊𠊎， 總係𠊎無愛應； 佢等會尋𠊎， 總係尋毋到。</verse>
				<verse number="29">佢等惱智識， 也毋識決心敬畏上主；</verse>
				<verse number="30">佢等從來毋聽𠊎个勸話， 反轉看輕𠊎一切个責備。</verse>
				<verse number="31">所以，佢等愛食自家所結个果子， 被自家所設个計謀撐到飽飽。</verse>
				<verse number="32">戇直个人因為行歪路喪失生命； 戇檔人因為隨便過日害死自家。</verse>
				<verse number="33">總係聽從𠊎个，會安全過日； 佢等會享受平安，毋驚災禍。」</verse>
			</chapter>
			<chapter number="2">
				<verse number="1">孻仔啊，你愛接受𠊎个話， 愛將𠊎个命令記在心肚。</verse>
				<verse number="2">愛側耳來聽智慧， 愛專心來求聰明。</verse>
				<verse number="3">愛大聲追求見識， 愛出聲尋求聰明。</verse>
				<verse number="4">愛像尋金銀恁熱心， 愛像尋囥等个財寶恁認真。</verse>
				<verse number="5">恁樣，你就會曉得敬畏上主， 了解愛樣般認識上帝。</verse>
				<verse number="6">因為賞賜智慧个就係上主， 智識㧯聰明攏係對佢來个。</verse>
				<verse number="7">佢為正直个人存留真智慧， 佢做行為純正个人个盾牌。</verse>
				<verse number="8">佢保守義人个道， 保護虔誠人个路。</verse>
				<verse number="9">然後你就會了解公義、公平㧯正直， 知一切當行个路。</verse>
				<verse number="10">智慧會進入你个心肚， 智識會使你个靈快樂。</verse>
				<verse number="11">見識會庇佑你， 聰明會保守你，</verse>
				<verse number="12">愛使你脫離壞人个路， 離開講話無是非个人；</verse>
				<verse number="13">該兜人離開正道， 專門行烏暗个路，</verse>
				<verse number="14">歡喜做壞事， 作惡來快樂；</verse>
				<verse number="15">佢等行彎曲个路， 常常做奸詐个事。</verse>
				<verse number="16">智慧會救你脫離淫婦， 就係盡會引誘你、嘴甜舌滑个婦女。</verse>
				<verse number="17">姖離開後生時所嫁个老公， 毋記得姖在上帝面前所立个婚約 。</verse>
				<verse number="18">去姖屋下就會沈淪到死； 行姖个路就會跌落陰間。</verse>
				<verse number="19">去姖該位个人無一儕會倒轉來； 佢等也無法度再尋到生命个路。</verse>
				<verse number="20">所以，你愛行好人个道， 愛謹慎遵行義人个路。</verse>
				<verse number="21">正直个人會在世上安居； 行為無好嫌个人會在地上長壽。</verse>
				<verse number="22">總係壞人會對世上剪除； 奸詐个人會對地上挷掉。</verse>
			</chapter>
			<chapter number="3">
				<verse number="1">孻仔啊，毋好毋記得𠊎个教示； 你愛時時想起𠊎教你个誡命。</verse>
				<verse number="2">它兜會使你享受長壽， 四季平安。</verse>
				<verse number="3">毋好俾忠誠、信實離開你； 愛將這兜䌈在頸項，刻在心版。</verse>
				<verse number="4">恁樣，你在上帝㧯人面前 就會得到歡喜㧯好名聲。</verse>
				<verse number="5">你愛專心來信靠上主， 毋好倚靠自家个聰明。</verse>
				<verse number="6">你行事做人全部愛仰望主， 佢就會指示你行正直个路。</verse>
				<verse number="7">毋好恅到自家有智慧； 愛敬畏上主，遠離邪惡。</verse>
				<verse number="8">恁樣做，就會醫治你个身體， 滋養你个筋骨。</verse>
				<verse number="9">你愛用財產㧯田園最好个出產 獻給上主，表示對佢个尊敬；</verse>
				<verse number="10">恁樣，你个倉庫就會充滿五榖， 酒桶裝个新酒會多到淰出來。</verse>
				<verse number="11">孻仔啊，毋好看輕上主个管教， 也毋好惱佢个責備；</verse>
				<verse number="12">因為上主管教佢所痛惜个人， 就像阿爸管教所歡喜个子女。</verse>
				<verse number="13">尋到智慧、得到聰明个， 這兜人實在有福氣噢！</verse>
				<verse number="14">智慧比買賣賺到个銀仔較有價值， 比黃金所生个利息較多好處。</verse>
				<verse number="15">智慧比珠寶還較寶貝； 你所合意个無一項㧯姖比抑得。</verse>
				<verse number="16">智慧个右手有長壽， 左手有富貴㧯尊榮。</verse>
				<verse number="17">智慧使你生活快樂， 帶領你行平安个路。</verse>
				<verse number="18">對謹守姖个人，姖像生命樹； 留得姖住个人，就會有福氣。</verse>
				<verse number="19">上主用智慧固定大地； 佢識用聰明安設天空。</verse>
				<verse number="20">佢用智識使深淵湧出大水， 使烏雲降下甘霖。</verse>
				<verse number="21">孻仔啊，愛謹守真智慧㧯見識， 毋好俾姖等離開你个面前；</verse>
				<verse number="22">姖等會俾你个生命得到元氣， 也成做你頸項个寶貝。</verse>
				<verse number="23">你就會行平安个路， 你个腳也毋會跌倒。</verse>
				<verse number="24">你會安心睡目， 一覺睡到天光。</verse>
				<verse number="25">你毋使驚忽然間來到个災難， 也毋使愁該臨到壞人个災禍；</verse>
				<verse number="26">因為上主係你所倚靠个； 佢毋會俾你跌落羅網中。</verse>
				<verse number="27">愛盡力幫助需要幫助个人； 你若有力量，毋好推辭行善。</verse>
				<verse number="28">你這下有力量幫助鄰舍，就毋好對佢講： 「轉去，天光日正來，𠊎就會給你。」</verse>
				<verse number="29">鄰舍在你附近安居， 就毋好設計來害佢。</verse>
				<verse number="30">別人毋識傷害你， 莫無故㧯佢相爭。</verse>
				<verse number="31">毋好欣慕強暴个人， 毋好跈佢所行个路；</verse>
				<verse number="32">因為上主盡惱橫行个人， 總係佢親近正直个人。</verse>
				<verse number="33">上主咒詛邪惡人个家庭； 佢賜福給正直人个屋下。</verse>
				<verse number="34">佢嘲謔該兜嘲謔別人个， 總係賜恩典給謙卑个人。</verse>
				<verse number="35">智慧人會得到好名聲； 總係戇檔人加添見笑。</verse>
			</chapter>
			<chapter number="4">
				<verse number="1">孻仔啊，愛聽阿爸个教訓； 你等愛專心來得到聰明。</verse>
				<verse number="2">𠊎給你等个教訓攏總係好个， 所以，你等毋好偏離𠊎个教示。</verse>
				<verse number="3">𠊎在阿爸面前係孝子， 在阿姆眼中係得人惜个單丁子；</verse>
				<verse number="4">該時，吾爸就教𠊎講： 「你个心愛記得𠊎个話； 愛遵守𠊎个誡命， 你就會有豐富个生命。</verse>
				<verse number="5">愛尋求智慧，愛追求聰明； 莫毋記得抑係違背𠊎个話。</verse>
				<verse number="6">莫離開智慧，姖會保護你； 你惜姖，姖一定會保守你。</verse>
				<verse number="7">智慧係最重要个，所以愛尋求智慧 ； 你愛用你所有个一切來得到聰明。</verse>
				<verse number="8">你看重智慧，智慧就會使你高升； 你揇等智慧，姖就會使你有尊榮。</verse>
				<verse number="9">智慧會將靚帽仔戴在你頭那頂， 將光榮个冕旒送給你。」</verse>
				<verse number="10">孻仔啊，聽𠊎講，接受𠊎个話， 你就會享受長壽。</verse>
				<verse number="11">𠊎已經教你行智慧个道， 已經帶領你行正直个路。</verse>
				<verse number="12">你行个時，步步順利； 你走个時，毋會跌倒。</verse>
				<verse number="13">愛穩穩捉住教訓，毋好放掉姖； 愛謹守姖，因為姖係你个生命。</verse>
				<verse number="14">毋好行邪惡人个道； 也毋好踏壞人个路。</verse>
				<verse number="15">愛閃開，做毋得經過！ 愛轉身離開，閃過去！</verse>
				<verse number="16">壞人無做兜壞事，就睡毋落覺； 佢等若無害人跌倒，就睡毋得；</verse>
				<verse number="17">因為邪惡係佢等食个飯， 殘暴係佢等啉个酒。</verse>
				<verse number="18">義人个路像打早个光， 緊來緊光，直到當晝頭。</verse>
				<verse number="19">邪惡人个道像暗晡頭个烏暗； 佢等跌倒，還毋知被麼介逕倒。</verse>
				<verse number="20">孻仔啊，愛注意聽𠊎个話， 愛側耳聽𠊎个教訓。</verse>
				<verse number="21">莫俾它兜對若面前閃走， 愛一直記在你个心肝肚；</verse>
				<verse number="22">因為尋到它兜个，就係得到生命， 全身也會得到醫治。</verse>
				<verse number="23">你愛謹慎你个心思超過一切； 因為生命个泉源係對心湧出。</verse>
				<verse number="24">愛除掉彎曲个話， 愛遠離花撩个嘴。</verse>
				<verse number="25">你个目珠愛單單向前看； 你个目珠愛直直看頭前。</verse>
				<verse number="26">愛修平 你个腳所行个路， 你所做个一切就會穩當。</verse>
				<verse number="27">毋好向左或向右偏走； 愛使你个腳遠離邪惡。</verse>
			</chapter>
			<chapter number="5">
				<verse number="1">孻仔啊，愛看重𠊎个智慧， 愛認真聽𠊎聰明个話語；</verse>
				<verse number="2">恁樣，你就會謹慎行事， 你个嘴唇會滿有智識。</verse>
				<verse number="3">淫婦个嘴唇滴下蜂糖， 姖个嘴比橄欖油較滑；</verse>
				<verse number="4">總係最尾姖比黃蓮較苦， 也比兩邊个刀劍還較利。</verse>
				<verse number="5">姖个腳行死亡个路； 姖个腳步直向陰間。</verse>
				<verse number="6">姖無注意行生命个路， 腳步行差，自家乜毋知。</verse>
				<verse number="7">孻仔啊，這下愛聽從𠊎； 你等毋好違背𠊎个話。</verse>
				<verse number="8">愛遠遠離開淫婦！ 千萬毋好行近姖个門口！</verse>
				<verse number="9">驚怕你會將好名聲送給別人， 將青春个年日交給兇惡个人；</verse>
				<verse number="10">驚怕生份人就來搶走你个財產， 你勞碌得來个會落入外人个家。</verse>
				<verse number="11">你臨終个時，血氣消盡， 會緊噌無停，講：</verse>
				<verse number="12">「𠊎做麼介恁怨恨管教？ 𠊎个心樣會藐視勸話？</verse>
				<verse number="13">𠊎當時毋聽師傅个話， 完全毋搭𠊎該兜先生。</verse>
				<verse number="14">𠊎這下在公共場所眾人个面前， 見笑到會死！」</verse>
				<verse number="15">你愛啉自家陂塘中个水， 啉你自家井肚流出个水。</verse>
				<verse number="16">你个泉源敢做得流到街項？ 你个泉水敢做得湧到廣場？</verse>
				<verse number="17">你个泉源愛單單歸屬你； 絕對做毋得㧯外人摻雜。</verse>
				<verse number="18">願你个泉源蒙福； 願你歡喜後生時所討个𡜵娘。</verse>
				<verse number="19">姖像得人惜又當靚个鹿仔； 願姖个胸懷時常使你心滿意足， 願姖个愛情一直使你神魂顛倒。</verse>
				<verse number="20">孻仔啊，做麼介愛被別个婦人家迷到？ 做麼介愛揇淫婦个胸懷？</verse>
				<verse number="21">人所行个道，在上主眼前； 人一切个路，佢攏總鑒察。</verse>
				<verse number="22">邪惡人个罪像羅網， 將自家捆到𢫮𢫮； 佢所犯个罪像索仔， 將自家纏到死死。</verse>
				<verse number="23">佢因為毋受管教，就喪失生命； 因為戇檔至極，佢必定行差路。</verse>
			</chapter>
			<chapter number="6">
				<verse number="1">孻仔啊，你若答應代鄰舍做擔保， 抑係代毋識个人扼手簽約還債，</verse>
				<verse number="2">你就被自家講過个話纏到， 被自家答應个話落到。</verse>
				<verse number="3">孻仔，你既然落在鄰舍个手中， 愛恁樣來救自家： 愛遽遽謙卑下來， 求對方解除契約。</verse>
				<verse number="4">你做毋得睡目， 也毋好啄目睡。</verse>
				<verse number="5">愛救自家， 像鹿仔閃開打獵人个手， 像鳥仔脫離捉鳥仔个手。</verse>
				<verse number="6">懶尸人啊，愛去尋蟻公； 查看牠兜樣般生活， 好成做有智慧个人。</verse>
				<verse number="7">蟻公無領袖， 無官長，無統治者；</verse>
				<verse number="8">總係，牠兜在熱天預備食物， 在收割个時節囤積糧食。</verse>
				<verse number="9">懶尸人啊，你愛睡到幾時？ 你幾多點鐘正愛䟘床呢？</verse>
				<verse number="10">你講：「俾𠊎啄痀休息一下， 睡加一下仔，揇等手歇睏一下。」</verse>
				<verse number="11">總係，貧窮會忽然間像強盜來搶你； 缺乏會像土匪來攻打你。</verse>
				<verse number="12">該兜毋做正當事業个壞人， 行來行去講花撩話欺騙人。</verse>
				<verse number="13">佢等用目珠、手腳， 打暗號來欺騙你。</verse>
				<verse number="14">佢等个壞心術時時設計， 製造紛爭。</verse>
				<verse number="15">所以，災難會遽遽臨到佢等； 佢等會忽然敗壞，無法好救。</verse>
				<verse number="16">上主所怨恨个有六項， 連佢所惱个共有七項，</verse>
				<verse number="17">就係：驕傲个目珠， 講肨風个舌乸， 殺害無辜个手，</verse>
				<verse number="18">詭計多端个心， 奔走邪路个腳，</verse>
				<verse number="19">肨風講謠言做假見證， 在朋友中間教唆是非。</verse>
				<verse number="20">孻仔啊，愛謹守若爸个誡命， 毋好離開若姆个教示；</verse>
				<verse number="21">愛一直刻在心肚， 掛在你个頸筋項。</verse>
				<verse number="22">佢等个教訓會帶領你所行个路， 暗晡時保守你， 日時頭交帶你。</verse>
				<verse number="23">因為誡命係燈，教示係光， 教訓㧯責備會指示你人生个道路，</verse>
				<verse number="24">會保守你遠離壞婦人家， 㧯嘴甜舌滑个淫婦。</verse>
				<verse number="25">你心中毋好被姖个美色迷到， 也毋好被姖个眼拐捉去；</verse>
				<verse number="26">因為妓女會害你到只賸一垤餅， 別人个𡜵娘也會將你个老命收掉。</verse>
				<verse number="27">人若係將火囥在懷中， 敢毋會燒掉自家个衫？</verse>
				<verse number="28">人在燒等个火炭中行， 腳敢有可能毋會燒傷？</verse>
				<verse number="29">同鄰舍个𡜵娘共下睡个，也像恁樣； 親近別人个𡜵娘个，一定會受責罰。</verse>
				<verse number="30">賊仔因為肚飢偷拿食物充飢， 人較毋會藐視佢；</verse>
				<verse number="31">總係被人捉到，就愛賠人七倍， 將佢家中所有个，全部賠出來。</verse>
				<verse number="32">同別人个𡜵娘通姦實在當戇； 恁樣做个人定著會害死自家。</verse>
				<verse number="33">佢一定會受羞辱被人打； 佢个見笑永遠也洗毋淨；</verse>
				<verse number="34">因為嫉妒會使老公大發譴， 報仇个時，佢一定毋會留情。</verse>
				<verse number="35">佢無愛接受遮羞費， 較多禮物佢也毋收。</verse>
			</chapter>
			<chapter number="7">
				<verse number="1">孻仔啊，愛遵守𠊎个話， 毋好毋記得𠊎个誡命。</verse>
				<verse number="2">遵守𠊎个誡命， 你就會有豐盛个生命； 愛守𠊎个教示， 像保護自家个目珠仁。</verse>
				<verse number="3">愛䌈在你个手指頭， 愛刻在你个心版項。</verse>
				<verse number="4">愛對智慧講：「你係𠊎个姊妹」； 愛將見識準做你个親人。</verse>
				<verse number="5">姖等就會幫助你遠離淫婦， 離開別人嘴甜舌滑个𡜵娘。</verse>
				<verse number="6">有一擺，𠊎在屋肚對窗門看下去，</verse>
				<verse number="7">看到盡多戇直个後生人； 𠊎特別注意其中一個頭腦簡單个。</verse>
				<verse number="8">佢在街路近轉角个地方， 行入一個淫婦住个巷肚，</verse>
				<verse number="9">日頭落山後，天暗了， 在暗疏疏當中， 行近姖个門口。</verse>
				<verse number="10">𠊎看到一個婦女出來迎接佢， 打扮像娼妓，有詭詐个心思。</verse>
				<verse number="11">姖一溜裡放蕩毋知見笑， 時常在街項行來行去，</verse>
				<verse number="12">有時在街頭巷尾， 有時在市場肚引誘人。</verse>
				<verse number="13">姖拉到該後生人，㧯佢唚嘴， 毋知見笑對佢講：</verse>
				<verse number="14">「𠊎今晡日還願獻祭， 屋下還賸盡多牲儀，</verse>
				<verse number="15">所以𠊎出來尋你， 盡想愛㧯你見面， 無想到在這位堵到你！</verse>
				<verse number="16">𠊎已經拿 埃及 彩色床單 鋪好𠊎个眠床，</verse>
				<verse number="17">用沒藥、沉香、桂皮， 將眠床薰到香香。</verse>
				<verse number="18">來啊，𠊎等享受愛情， 盡情歡樂，直到天光。</verse>
				<verse number="19">𠊎个老公無在屋下， 去盡遠个地方旅行。</verse>
				<verse number="20">佢帶一大筆錢去， 到月半正會轉來。」</verse>
				<verse number="21">女人用阿媚奉承引誘佢， 用嘴甜舌滑个話迷惑佢。</verse>
				<verse number="22">後生人即時跈等姖行， 像牛被人牽去屠宰場， 又像鹿仔跌落陷阱肚 ，</verse>
				<verse number="23">直到利箭射穿佢个心肝； 佢像鳥仔飛入羅網， 完全毋知自家个生命在危險中。</verse>
				<verse number="24">孻仔啊，你等這下愛聽從𠊎， 愛注意聽𠊎所講个話。</verse>
				<verse number="25">毋好俾淫婦迷惑你等个心； 毋好戇神戇神跈等姖去。</verse>
				<verse number="26">姖已經使好多人橫倒， 有盡多男人被姖害死。</verse>
				<verse number="27">你去厥屋下， 係行黃泉路， 落死亡陰間。</verse>
			</chapter>
			<chapter number="8">
				<verse number="1">聽噢，智慧呼喊， 聰明出聲緊喊。</verse>
				<verse number="2">姖在山岡頂个路堘， 又在十字路口企等；</verse>
				<verse number="3">姖在城門口， 在城門堘，大聲喊講：</verse>
				<verse number="4">「眾人啊，𠊎向你等呼喊； 𠊎向世間人出聲盡喊。</verse>
				<verse number="5">你等戇直个人啊， 愛學較精兜仔！ 你等戇檔个人啊， 愛較上教兜仔！</verse>
				<verse number="6">聽噢，因為𠊎愛講高貴个話； 𠊎㧯你等講个係正直个事。</verse>
				<verse number="7">𠊎嘴所講个攏總係真理； 𠊎絕對無愛講邪惡个話。</verse>
				<verse number="8">𠊎个話攏係真實無假， 無彎曲，無乖僻。</verse>
				<verse number="9">對聰明个人來講， 一切清楚； 對通達个人來講， 全部正確。</verse>
				<verse number="10">應當擇𠊎个教訓， 無愛拿白銀； 應當選智識， 無愛拿黃金；</verse>
				<verse number="11">因為智慧好過珠寶； 你所想愛个無一項比抑得。</verse>
				<verse number="12">「𠊎係智慧，𠊎有見識； 𠊎有智識㧯正確个判斷力。</verse>
				<verse number="13">敬畏上主就係怨恨邪惡； 驕傲、拗蠻、惡霸㧯花撩， 𠊎全部盡惱。</verse>
				<verse number="14">𠊎有計劃㧯真智識； 𠊎有聰明，𠊎有能力。</verse>
				<verse number="15">𠊎幫助君王統治， 協助掌權者定公當个法律。</verse>
				<verse number="16">所有个統治者攏總倚靠𠊎； 執政者㧯審判官通過𠊎掌權。</verse>
				<verse number="17">惜𠊎个，𠊎也惜佢； 迫切尋𠊎个，一定尋得到。</verse>
				<verse number="18">好額㧯好名聲係𠊎賞賜； 富貴㧯成功也在𠊎手中。</verse>
				<verse number="19">𠊎所結出个果子贏過純金； 𠊎个出產贏過最好个銀仔。</verse>
				<verse number="20">𠊎在正直个路上行， 在公義个路項前進。</verse>
				<verse number="21">𠊎賜財富給惜𠊎个人； 𠊎使佢等个倉庫滿滿。</verse>
				<verse number="22">「上主在太初創造个時， 佢在起頭創造萬物以前， 已經有𠊎 。</verse>
				<verse number="23">在太初，大地吂成形以前， 對盡古早，𠊎已經受設立。</verse>
				<verse number="24">大海還吂出現， 大水个泉源吂有以前， 𠊎已經𫱔出來。</verse>
				<verse number="25">大山還吂堅定， 細山還吂有以前， 𠊎已經𫱔出來。</verse>
				<verse number="26">該時，上主還吂造大地㧯田園， 連一揢泥都還吂有。</verse>
				<verse number="27">佢設立天空， 佢在海面定地平線个時， 𠊎已經在該位。</verse>
				<verse number="28">佢在天空佈置雲， 在海底開發水源，</verse>
				<verse number="29">佢為大海定出界限， 使海水毋會超出範圍； 佢為大地建立根基， 該時，𠊎已經在該位。</verse>
				<verse number="30">𠊎在佢个塍頭像一個工程師 逐日給佢歡喜； 𠊎一直在佢面前盡快樂，</verse>
				<verse number="31">當歡喜佢个世界， 盡歡喜世上个人。</verse>
				<verse number="32">「孻仔啊，你等這下愛聽𠊎个話； 遵守𠊎道个人，就會得到幸福。</verse>
				<verse number="33">愛聽從𠊎个教訓成做有智慧， 毋好忽略它。</verse>
				<verse number="34">聽從𠊎个話， 逐日在𠊎門口仰望， 在𠊎屋下門邊等候个， 這人實在有福氣噢！</verse>
				<verse number="35">因為尋到𠊎个， 就係尋到生命； 佢也會得到上主个恩惠。</verse>
				<verse number="36">無尋到𠊎个， 就係自家害自家； 怨恨𠊎个， 攏總係想愛死个人。」</verse>
			</chapter>
			<chapter number="9">
				<verse number="1">智慧起自家个屋仔， 頓七支柱𣎴，</verse>
				<verse number="2">㓾牛羊，調美酒，辦桌席。</verse>
				<verse number="3">姖差派使女出去湊人， 自家在城肚最高个地方喊講：</verse>
				<verse number="4">「戇直个人啊，到𠊎這位來！」 姖又對無智識个人講：</verse>
				<verse number="5">「來啊，來食𠊎个滂沛， 來啉𠊎調製个美酒。</verse>
				<verse number="6">愛離開戇直，好好生活， 愛行聰明个道路。」</verse>
				<verse number="7">糾正傲慢人个，會惹到羞辱； 責備邪惡人个，會傷害自家。</verse>
				<verse number="8">毋好責備傲慢人个過錯， 因為佢會恨你。 你若係責備有智慧个人， 佢就會敬愛你。</verse>
				<verse number="9">勸話智慧人，佢就更加有智慧； 教導正直人，佢就會增加學問。</verse>
				<verse number="10">敬畏上主係智慧个開頭； 認識至聖者就係聰明。</verse>
				<verse number="11">智慧會增加你个日子， 也會使你享受長壽。</verse>
				<verse number="12">你若有智慧，得到好處个係你自家； 你若存傲慢，損失係你自家來擔當。</verse>
				<verse number="13">戇檔个婦女吵吵鬧鬧， 姖係當戇，麼介都毋知。</verse>
				<verse number="14">姖坐在自家屋下門口， 坐在城肚最高个地方，</verse>
				<verse number="15">對該兜過路个人， 對當趕路个人喊講：</verse>
				<verse number="16">「戇直个人啊，到𠊎這位來！」 姖又對無智識个人講：</verse>
				<verse number="17">「偷來个水較甜， 偷食个餅較香。」</verse>
				<verse number="18">總係戇人毋知有陰魂在姖該位； 姖个人客已經跌落陰間个深壢。</verse>
			</chapter>
			<chapter number="10">
				<verse number="1">下背係 所羅門 个箴言： 智慧个孻仔使阿爸快樂； 戇檔个孻仔害阿姆憂愁。</verse>
				<verse number="2">不義个錢財無麼介好處； 公義正能救人脫離死亡。</verse>
				<verse number="3">上主毋會使正直人肚笥枵； 佢使邪惡人所想望个落空。</verse>
				<verse number="4">懶尸个手害人窮苦； 煞猛个手帶來富足。</verse>
				<verse number="5">照時節來收割个，係聰明个孻仔； 收成个時睡目个，係見笑个孻仔。</verse>
				<verse number="6">正直人个頭頂有祝福； 邪惡人个嘴囥等殘暴 。</verse>
				<verse number="7">正直人會被人紀念； 邪惡人會留下臭名。</verse>
				<verse number="8">智慧人个心服從命令； 糮糝講話个，自惹失敗。</verse>
				<verse number="9">行正路个，生活安安穩穩； 行歪路个，一定顯露原形。</verse>
				<verse number="10">用目珠打暗號个，惹起麻煩； 糮糝講話个，自惹失敗 。</verse>
				<verse number="11">正直人个嘴係生命泉； 邪惡人个嘴囥等殘暴。</verse>
				<verse number="12">仇恨惹起爭端； 仁愛遮蓋過錯。</verse>
				<verse number="13">明理人个嘴講出智慧个話； 無常識个人背囊愛受鞭打。</verse>
				<verse number="14">智慧人認真吸收智識； 戇檔人開嘴就惹災禍。</verse>
				<verse number="15">財富係有錢人个城堡； 貧窮係窮苦人个爛攤。</verse>
				<verse number="16">正直人个工價係生命； 邪惡人个收入係死亡 。</verse>
				<verse number="17">遵守教訓个，行生命个路； 拒絕責備个，就走入迷途。</verse>
				<verse number="18">心肚囥等怨恨个係落仔； 唆是非講謠言个係戇仔。</verse>
				<verse number="19">多言多語難免犯罪； 約束嘴唇就係智慧。</verse>
				<verse number="20">正直人个話像特選个銀仔； 邪惡人个心思無半些價值。</verse>
				<verse number="21">正直人个話會栽培盡多人； 戇檔人因無常識害死自家。</verse>
				<verse number="22">上主賜福，使人好額； 自家勞碌，財富有限 。</verse>
				<verse number="23">戇檔人做壞事像準搞个； 聰明个人看智慧做快樂。</verse>
				<verse number="24">邪惡人所驚个偏偏臨到佢； 正直人个願望定著會達成。</verse>
				<verse number="25">風差一過，邪惡人就無掉； 總係，正直人會永遠企在。</verse>
				<verse number="26">請懶尸人去做事，會被佢閼死， 像牙齒淋到酸醋，目珠燻到煙。</verse>
				<verse number="27">敬畏上主，延年益壽； 邪惡个人，命短福薄。</verse>
				<verse number="28">正直人个希望帶來喜樂； 邪惡人个期待變做空空。</verse>
				<verse number="29">上主个道係誠實人个保障， 總係使作惡个人致到滅亡。</verse>
				<verse number="30">正直人永遠毋會流離失所； 邪惡人一定無法安居樂業。</verse>
				<verse number="31">正直人个話語帶來智慧； 邪惡人个舌乸會受割斷。</verse>
				<verse number="32">正直人會講適當个話； 邪惡人講話充滿欺騙。</verse>
			</chapter>
			<chapter number="11">
				<verse number="1">上主盡惱無準个秤仔； 佢當歡喜公當个秤砣。</verse>
				<verse number="2">驕傲來，見笑跈等來； 有謙卑，就會有智慧。</verse>
				<verse number="3">正直个人有誠實引導佢等； 奸詐个人因虛假致到滅亡。</verse>
				<verse number="4">在審判个日財產無麼介用； 唯有公義能救人脫離死亡。</verse>
				<verse number="5">無好嫌个人有正義為佢鋪平平个路； 邪惡人被佢自家所做个壞事來逕倒。</verse>
				<verse number="6">正直人个義氣會拯救佢等； 奸詐人个貪心會害死自家。</verse>
				<verse number="7">邪惡人一死，佢个希望就消滅； 佢所倚靠个勢力也變做空空。</verse>
				<verse number="8">正直人能對患難中得救； 邪惡人反轉代佢走入去。</verse>
				<verse number="9">無敬虔个人用佢个話害死鄰舍； 正直个人因為有智識就會得救。</verse>
				<verse number="10">正直人享福，全城快樂； 邪惡人滅亡，大家歡喜。</verse>
				<verse number="11">因為正直人帶來祝福， 城市就興旺； 因為邪惡人所講个話， 城市就毀滅。</verse>
				<verse number="12">嘲謔鄰舍个盡無常識； 明理个人毋會加講話。</verse>
				<verse number="13">好傳閒話个人，毋會守祕密； 心肚誠實个人，就做得信賴。</verse>
				<verse number="14">策略少，國家定著衰敗； 參謀多，人民就有安全。</verse>
				<verse number="15">為生份人擔保，會受虧損； 拒絕做擔保个，平安無事。</verse>
				<verse number="16">賢慧个婦女受到人个敬重； 強暴个男人單淨得到錢財。</verse>
				<verse number="17">仁慈个人自家得好處； 殘忍个人反轉害自家。</verse>
				<verse number="18">邪惡人所賺个，係虛假个工價； 委公義種子个，得真實个報賞。</verse>
				<verse number="19">盡力行善，必得生命； 追求邪惡，必致死亡。</verse>
				<verse number="20">心肝邪惡个，上主盡惱； 行為無好嫌个，主盡歡喜。</verse>
				<verse number="21">邪惡人一定會受到刑罰； 正直人个子孫必蒙拯救 。</verse>
				<verse number="22">當靚總係無見識个婦女， 就像豬鼻孔牶等个金環。</verse>
				<verse number="23">正直人个心願結出善果； 邪惡人个希望惹起憤怒。</verse>
				<verse number="24">樂善好施，緊來緊富足； 齧擦過度，反轉變貧窮。</verse>
				<verse number="25">慷慨施捨，更加發達； 使人滿足，自家蒙福。</verse>
				<verse number="26">囤糧毋賣，受人咒詛； 甘願賣糧，人人祝福。</verse>
				<verse number="27">渴慕良善，必得恩惠； 尋求邪惡，禍患臨頭。</verse>
				<verse number="28">倚靠錢財，像秋天落葉； 義人興旺，像青葉茂盛。</verse>
				<verse number="29">攪亂家庭个會繼承空空个風； 戇檔人會成做明理人个奴僕。</verse>
				<verse number="30">義人个果子就係生命樹； 智慧人當得人心 。</verse>
				<verse number="31">正直人在世間有報應， 何況邪惡人㧯罪人呢！</verse>
			</chapter>
			<chapter number="12">
				<verse number="1">歡喜受管教个，就係愛慕智識； 當惱人責備个，就係憨蚩个人。</verse>
				<verse number="2">上主施恩給良善个人； 佢刑罰詭計多端个人。</verse>
				<verse number="3">人倚靠惡行無法企穩； 義人个根基毋會搖動。</verse>
				<verse number="4">賢慧个𡜵娘係厥老公頭那頂个冕旒； 毋知見笑个𡜵娘像丈夫骨中个毒瘤。</verse>
				<verse number="5">正直人个計劃公正； 邪惡人个計謀奸詐。</verse>
				<verse number="6">邪惡人个話像羅網會害人； 正直人所講个話會拯救人。</verse>
				<verse number="7">邪惡人一橫，橫到貼貼； 正直人个家，企到穩穩。</verse>
				<verse number="8">人得到稱讚係因為有智慧； 心術邪惡个就會被人藐視。</verse>
				<verse number="9">地位雖然低總係有僕人 ， 贏過硬展排場餓等肚笥。</verse>
				<verse number="10">正直人體恤頭牲个需要； 邪惡人个憐憫還係殘忍。</verse>
				<verse number="11">煞猛耕種个，糧食充足； 追求虛榮个，全無常識。</verse>
				<verse number="12">邪惡人貪壞人搶到个錢財 ； 正直人个根帶來好个結果 。</verse>
				<verse number="13">邪惡人因為佢犯罪个話跌落陷阱； 總係正直人定著會安然脫離患難。</verse>
				<verse number="14">人因為講話結个果子充滿福氣； 人因為手所做个會得好个報賞。</verse>
				<verse number="15">戇檔人恅到自家所做个盡著； 總係智慧人會聽別人个勸話。</verse>
				<verse number="16">戇檔人容易發閼； 精明人忍受侮辱。</verse>
				<verse number="17">講誠實話，彰顯公義； 做假見證，顯出詭詐。</verse>
				<verse number="18">糮糝講話像利劍刺傷人； 智慧人个舌乸能醫治人。</verse>
				<verse number="19">誠實个言語永遠受紀念； 騙人个花撩盡遽就無效。</verse>
				<verse number="20">想做壞事个，心存詭詐； 勸人和睦个，充滿喜樂。</verse>
				<verse number="21">正直人毋會有災害； 邪惡人一直有禍患。</verse>
				<verse number="22">講花撩个嘴唇，上主盡惱； 行為誠實个，係主所歡喜。</verse>
				<verse number="23">聰明人無展自家智識； 戇檔人宣傳佢个憨蚩。</verse>
				<verse number="24">煞猛人个手會掌權； 懶尸人會變做苦力。</verse>
				<verse number="25">人心憂慮，像㧡重擔； 一句好話，使人歡樂。</verse>
				<verse number="26">正直人為鄰舍帶路； 邪惡人害佢入迷途。</verse>
				<verse number="27">懶尸人無米煮； 煞猛人會富足。</verse>
				<verse number="28">正義个路帶來生命； 這條路上並無死亡。</verse>
			</chapter>
			<chapter number="13">
				<verse number="1">智慧个孻仔聽從阿爸个教訓； 總係傲慢人毋肯聽人个責備。</verse>
				<verse number="2">嘴出良言个人享受美福； 奸詐人个慾望就係強暴。</verse>
				<verse number="3">謹慎講話，保全生命； 好講大話，自取滅亡。</verse>
				<verse number="4">懶尸人妄想總係一無所得； 煞猛人个心願會得到滿足。</verse>
				<verse number="5">正直人盡惱花撩个話； 邪惡人留臭名又見笑。</verse>
				<verse number="6">正義保護行為純正个； 總係邪惡使罪人橫倒。</verse>
				<verse number="7">有人假發，其實無半滴； 有人詐窮，其實真好額。</verse>
				<verse number="8">有錢人用錢贖命； 窮苦人免受恐嚇。</verse>
				<verse number="9">正直人个光盡明亮； 邪惡人个燈會烏掉。</verse>
				<verse number="10">驕傲只會惹起爭端； 接受勸話正係智慧。</verse>
				<verse number="11">橫財會像水流沙 ； 血汗錢日日增加。</verse>
				<verse number="12">願望無實現，會害人傷心； 美夢一成真，就像生命樹。</verse>
				<verse number="13">藐視教訓，自招災禍； 聽從誡命，會有好報。</verse>
				<verse number="14">智慧人个教示係生命个泉源， 有可能使人離開死亡个羅網。</verse>
				<verse number="15">明理人到處受人尊敬； 奸詐人个路寸步難行。</verse>
				<verse number="16">聰明人逐儕靠智識行事； 戇檔人表現佢毋知頭天。</verse>
				<verse number="17">奸詐个使者帶來災禍； 忠心个使者帶來和平。</verse>
				<verse number="18">拒絕管教，帶來窮苦㧯見笑； 謙卑接受勸話，會受人尊敬。</verse>
				<verse number="19">願望實現，心肚就當甘甜； 離開邪惡，係戇人所惱个。</verse>
				<verse number="20">同智慧人共下行，能得智慧； 㧯戇檔人做朋友，會受連累。</verse>
				<verse number="21">災禍緊追罪人； 義人必得善報。</verse>
				<verse number="22">好人將產業留給子子孫孫； 罪人積存錢財反轉歸義人。</verse>
				<verse number="23">窮人个田地，會五榖豐登； 不義一來到，就剝削淨淨。</verse>
				<verse number="24">毋管教子女，就係無惜佢等 ； 惜子女，就應該愛注意 管教。</verse>
				<verse number="25">正直人食到心滿意足； 邪惡人反轉枵腸餓肚。</verse>
			</chapter>
			<chapter number="14">
				<verse number="1">智慧个婦女建立家庭； 戇檔个婦人親手拆散。</verse>
				<verse number="2">行為正直个人敬畏上主； 行事詭詐个人就藐視佢。</verse>
				<verse number="3">戇人因為驕傲多嘴受鞭打； 智慧人个言語會保護自家。</verse>
				<verse number="4">無牛好耕種，五榖欠收； 有牛𢯭出力，五榖豐登。</verse>
				<verse number="5">誠實个證人毋會講花撩； 做假見證个專門講白賊。</verse>
				<verse number="6">傲慢人尋智慧總係尋毋到； 明理个人較容易得到智識。</verse>
				<verse number="7">你愛遠離戇檔人， 因為對佢个嘴得毋到智識。</verse>
				<verse number="8">聰明人个智慧使佢知當行个路； 戇檔人戇到自家騙自家。</verse>
				<verse number="9">戇檔人將還罪債看做好笑 ； 正直人曉得互相施恩。</verse>
				<verse number="10">心肝肚个愁苦自家正知； 心肝肚个喜樂別人無份。</verse>
				<verse number="11">邪惡人个房屋一定橫掉； 正直人个屋下定著興旺。</verse>
				<verse number="12">有一條路看來盡直， 總係最尾透到死亡。</verse>
				<verse number="13">歡笑當中，心也會傷痛； 歡樂過去，還係會憂愁。</verse>
				<verse number="14">惡 有惡報； 善有善報。</verse>
				<verse number="15">戇直人事事相信； 精明人步步小心。</verse>
				<verse number="16">智慧人行事小心，遠離禍端； 戇檔人魯夫又硬頸。</verse>
				<verse number="17">當遽發閼个人做事糊塗； 心懷詭計个人盡得人惱。</verse>
				<verse number="18">戇直个人自家承受戇檔个結果； 通達个人得到智識做佢个冕旒。</verse>
				<verse number="19">壞人在好人面前低頭； 邪惡人降服在正直人門口。</verse>
				<verse number="20">窮苦人連鄰舍都惱佢； 好額人朋友緊來緊多。</verse>
				<verse number="21">藐視鄰舍个有罪； 憐憫窮苦个有福。</verse>
				<verse number="22">想做壞事个，敢毋會陷入迷途？ 想愛行善个，得到仁慈㧯忠誠。</verse>
				<verse number="23">煞猛工作，帶來財富， 歸日空談，致到窮苦。</verse>
				<verse number="24">智慧人个財富做佢等个冕旒； 戇檔人个愚戇結局還係愚戇。</verse>
				<verse number="25">誠實个見證救人生命； 虛假个見證會傷害人。</verse>
				<verse number="26">敬畏上主个就有倚靠； 佢个子女也有避難所。</verse>
				<verse number="27">敬畏上主係生命个泉源， 會使人離開死亡个羅網。</verse>
				<verse number="28">人民多係君王个光榮； 人民少象徵王室衰敗。</verse>
				<verse number="29">無隨便發譴，大有聰明； 忒容易發閼，加添戇檔。</verse>
				<verse number="30">心平氣和身體康健； 嫉妒害人身心敗壞。</verse>
				<verse number="31">欺負窮苦人係侮辱創造主； 憐憫艱苦个人就係尊敬主。</verse>
				<verse number="32">邪惡人在患難中定著會逕倒 ； 正直人臨終个時還有好倚靠 。</verse>
				<verse number="33">智慧在聰明人个心中安居， 在戇檔人心中無顯明出來 。</verse>
				<verse number="34">正義使國家強盛； 罪惡使民族蒙羞。</verse>
				<verse number="35">明理个僕人蒙君王褒獎； 行事見笑个定著受責罰。</verse>
			</chapter>
			<chapter number="15">
				<verse number="1">應答溫和，平息憤怒； 言語粗暴，惹人發譴。</verse>
				<verse number="2">智慧人个舌乸傳講智識； 戇檔人个嘴唇吐出戇話。</verse>
				<verse number="3">上主个目珠看到逐所在； 壞人㧯好人佢攏總鑒察。</verse>
				<verse number="4">溫和个舌乸帶給人生命 ； 奸詐个話語會害人心碎。</verse>
				<verse number="5">戇檔人看輕阿爸个管教； 聽從勸話个就係精明人。</verse>
				<verse number="6">正直人家中財產多多； 邪惡人得利帶來煩勞。</verse>
				<verse number="7">智慧人个嘴宣揚智識； 戇檔人个心毋係恁樣。</verse>
				<verse number="8">上主盡惱邪惡人个獻祭； 佢當歡喜正直人个祈禱；</verse>
				<verse number="9">上主盡惱邪惡人个行為； 佢當歡喜追求正義个人。</verse>
				<verse number="10">背離正道，愛受嚴嚴个責罰； 拒絕勸話，一定會喪失生命。</verse>
				<verse number="11">陰間㧯滅亡都在上主鑒察下； 世間人个心樣般能囥得住呢？</verse>
				<verse number="12">傲慢人無愛聽勸話； 佢無愛親近智慧人。</verse>
				<verse number="13">心中喜樂，面帶笑容； 心肚憂愁，心神損傷。</verse>
				<verse number="14">聰明人个心尋求智識； 戇檔人个嘴豺食憨蚩。</verse>
				<verse number="15">困苦个人毋得晝暗； 樂線个人逐日滂沛。</verse>
				<verse number="16">寧可財產無多，敬畏上主， 贏過家財萬貫，煩勞不安。</verse>
				<verse number="17">單淨粗茶淡飯，大家相惜， 贏過酒肉滿桌，彼此冤家。</verse>
				<verse number="18">脾氣火暴惹起爭端； 心平氣和平息紛爭。</verse>
				<verse number="19">懶尸人个路竻藪塞塞； 正直人个道平平順順。</verse>
				<verse number="20">智慧个孻仔使爺仔歡喜； 戇戇个孻仔看輕厥𡟓仔。</verse>
				<verse number="21">無智識个人看愚戇做快樂； 有見識个人照等正直行事。</verse>
				<verse number="22">無先參詳，一定失敗； 大家研究，正會成功。</verse>
				<verse number="23">曉得應對，俾人爽快； 講話合時，實在還好。</verse>
				<verse number="24">聰明人對生命个路上去， 愛遠遠離開下背个陰間。</verse>
				<verse number="25">上主愛拆驕傲人个屋； 佢愛保守寡婦个家產。</verse>
				<verse number="26">上主盡惱邪惡个陰謀； 佢當歡喜純潔个言語。</verse>
				<verse number="27">貪愛橫財會害到自家个家庭； 拒絕不義个紅包會享受長壽。</verse>
				<verse number="28">正直人三思以後正答應人； 邪惡人个嘴隨便吐出壞話。</verse>
				<verse number="29">上主離開邪惡人遠遠； 佢愛聽正直人个祈禱。</verse>
				<verse number="30">歡頭喜面，人心滿足； 聽好消息，筋骨爽快。</verse>
				<verse number="31">聽從造就人生命个責備， 就會住在智慧人个中間。</verse>
				<verse number="32">拒絕管教，係看輕自家； 聽從勸話，就得到智慧。</verse>
				<verse number="33">智慧教人敬畏上主； 尊榮以前必有謙卑。</verse>
			</chapter>
			<chapter number="16">
				<verse number="1">謀事在人； 成事在天。</verse>
				<verse number="2">人恅到自家所做个全著； 總係上主審察佢个動機。</verse>
				<verse number="3">你所做个事愛交託上主； 你所計劃个定著會成功。</verse>
				<verse number="4">上主所造个係愛達到各種个目的； 甚至邪惡人乜係為患難个日造个。</verse>
				<verse number="5">上主當惱所有驕傲个人； 佢等絕對無法閃避責罰。</verse>
				<verse number="6">忠誠信實，罪得赦免； 敬畏上主，遠離壞事 。</verse>
				<verse number="7">行為若得上主歡喜， 主使仇敵成做朋友。</verse>
				<verse number="8">甘願行公義，收入少， 贏過行不義，橫財多。</verse>
				<verse number="9">人心計劃自家个道路； 總係上主引帶厥腳步。</verse>
				<verse number="10">君王个話有神啟示； 佢个判斷毋會差錯。</verse>
				<verse number="11">公平个秤㧯磅屬於上主； 袋肚个秤砣全係佢做个。</verse>
				<verse number="12">君王無法度忍受邪惡个事 ， 因為政權係靠正義做根基。</verse>
				<verse number="13">君王歡喜聽正直个話； 佢盡惜講誠實話个人。</verse>
				<verse number="14">君王个憤怒像死亡个使者； 有智慧个會平息王个受氣。</verse>
				<verse number="15">君王个笑容使人有生命； 佢个施恩像雲帶來春雨。</verse>
				<verse number="16">得智慧贏過得黃金； 選聰明贏過選白銀。</verse>
				<verse number="17">正直人个道路遠離邪惡； 謹慎行正路能保全生命。</verse>
				<verse number="18">驕傲在敗壞頭前； 自大在跌倒以前。</verse>
				<verse number="19">存心謙卑㧯窮苦人來往， 贏過㧯驕傲人平分搶來个錢財。</verse>
				<verse number="20">聽從教訓，必得好處； 信靠上主，實在有福。</verse>
				<verse number="21">心中有智慧，稱做通達人； 講話越文雅，越使人心服。</verse>
				<verse number="22">人有智慧就有生命个泉源； 愚戇就係給戇檔人个責罰。</verse>
				<verse number="23">智慧人个心使佢个嘴通達， 又俾佢講个話較使人心服。</verse>
				<verse number="24">親切个語言，像蜂糖共樣， 使心靈甘甜，使身體強壯。</verse>
				<verse number="25">有一條路看來盡直； 總係最尾透到死亡。</verse>
				<verse number="26">工人勞碌為口腹； 口腹催佢多勞碌。</verse>
				<verse number="27">鱸鰻人圖謀惡事； 講話像火燒傷人。</verse>
				<verse number="28">搬弄是非，製造紛爭； 背後中傷，破壞友情。</verse>
				<verse number="29">強暴人迷惑鄰舍， 引誘佢去行邪路。</verse>
				<verse number="30">目珠捩捩轉，心術毋好； 沉毒毋講話，想做壞事。</verse>
				<verse number="31">白頭那毛係光榮个冕旒， 經過公義个生活正得到。</verse>
				<verse number="32">無隨便發譴，贏過勇士； 能管制自家，贏過搶城。</verse>
				<verse number="33">抽籤在人； 決定在神 。</verse>
			</chapter>
			<chapter number="17">
				<verse number="1">有一口飯好食，全家平安， 贏過滿桌滂沛，相爭𢲾背。</verse>
				<verse number="2">精明个僕人會管主人無像樣个子， 還有好在佢等个兄弟中分到家業。</verse>
				<verse number="3">金銀受爐火鍛鍊； 人心被上主考驗。</verse>
				<verse number="4">做壞个聽從奸詐个話； 花撩牯好聽害人个話。</verse>
				<verse number="5">嘲謔窮苦人个，係侮辱造佢个主； 恥笑別人受苦个，難免愛受責罰。</verse>
				<verse number="6">子孫係老人家个冕旒； 爺𡟓係細人仔个光榮。</verse>
				<verse number="7">戇檔人講文雅个話無合宜； 高貴人講花撩還較無合適。</verse>
				<verse number="8">不義个紅包，送个人看做萬能； 佢恅到一切計謀个攏總會通。</verse>
				<verse number="9">赦免過錯，促進友愛； 紀念舊恨，破壞友情。</verse>
				<verse number="10">對明理个人講一句責備个話， 比打戇檔人一百下還較有效。</verse>
				<verse number="11">邪惡个人只有存心悖逆； 嚴厲个使者會來對付佢。</verse>
				<verse number="12">寧可堵到失掉熊子个熊乸， 毋愛堵到糊做亂來个戇人。</verse>
				<verse number="13">以惡報善个人， 家庭不離災禍。</verse>
				<verse number="14">相爭一開始就像大水穿壆； 所以相吵吂爆發前愛停止。</verse>
				<verse number="15">判惡人為義，定義人為惡， 這兩項都係上主所惱个。</verse>
				<verse number="16">戇檔人拿錢買智慧敢有用？ 佢根本無心來學習！</verse>
				<verse number="17">朋友時常彼此相惜； 兄弟出世分擔苦難。</verse>
				<verse number="18">只有無常識个人， 正會㧯鄰舍擔保。</verse>
				<verse number="19">好犯罪个人歡喜紛爭； 展風神个人 惹來災禍。</verse>
				<verse number="20">心術無正个，尋毋到幸福； 講話奸詐个，常堵到災難。</verse>
				<verse number="21">𫱔戇檔个孻仔，害阿姆憂傷； 悖逆个孻仔，害阿爸無歡喜。</verse>
				<verse number="22">歡喜个心係一帖良藥； 憂愁个靈害骨頭燥掉。</verse>
				<verse number="23">壞人暗中被人收買， 害正義無法度伸張。</verse>
				<verse number="24">聰明人面向智慧； 戇檔人昂頭妄想。</verse>
				<verse number="25">戇檔个孻仔害阿爸憂愁， 乜害阿姆痛苦。</verse>
				<verse number="26">刑罰無罪个人係毋著个； 鞭打正直个領袖乜毋著。</verse>
				<verse number="27">明理人講話細膩； 聰明人頭腦冷靜。</verse>
				<verse number="28">憨蚩个人若無講話，也算有智慧； 佢若係恬恬莫開嘴，也算有聰明。</verse>
			</chapter>
			<chapter number="18">
				<verse number="1">孤老个人關心自家定定； 別人好个意見，佢總愛反對。</verse>
				<verse number="2">戇檔人無歡喜智識； 單單好展自家定定。</verse>
				<verse number="3">邪惡來，侮辱跈等來； 見笑到，羞恥共下到。</verse>
				<verse number="4">口中个言語像大海恁深； 智慧个泉源像溪水湧流。</verse>
				<verse number="5">縱容邪惡係不公； 冤枉無辜乜不義。</verse>
				<verse number="6">戇人講話引起爭端； 佢一開嘴就惹人打。</verse>
				<verse number="7">戇檔人个嘴敗壞佢自家； 厥嘴唇係佢生命个陷阱。</verse>
				<verse number="8">背後个閒話像食滂沛； 一落嘴就吞到腸肚去。</verse>
				<verse number="9">懶尸做事个㧯言行敗壞个，係好兄弟。</verse>
				<verse number="10">上主个名係堅固个城堡； 義人走入去就得到安全。</verse>
				<verse number="11">好額人將佢个財富看做城堡， 恅到係高大堅固个銅牆鐵壁。</verse>
				<verse number="12">敗壞先前，人心驕傲； 尊榮以前，必有謙卑。</verse>
				<verse number="13">吂聽清楚，就搶先回答， 這係戇檔，會堵到見笑。</verse>
				<verse number="14">求生存个心志，能忍受病痛； 意志若係消沉，麼人捱得過？</verse>
				<verse number="15">聰明人个心愛得智識； 智慧人个耳公求智識。</verse>
				<verse number="16">人个禮物為佢開路， 𢱋佢到大人物面前。</verse>
				<verse number="17">先告狀个，看像有理； 對方來到，查出是非。</verse>
				<verse number="18">抽籤可以平息冤家， 也能解開兩強纏鬥。</verse>
				<verse number="19">兄弟結冤仇，當像堅固个城牆盡難破； 恁樣个爭吵，像城堡閂等个門盡難通。</verse>
				<verse number="20">人講話所帶來个結果， 大大影響佢个一生； 人个話所產生个果效， 會使佢食到飽飽。</verse>
				<verse number="21">或生或死，在舌乸个權下； 好講話个，後果自家承受。</verse>
				<verse number="22">討到好𡜵娘十分幸福， 也係得到上主个恩惠。</verse>
				<verse number="23">貧窮人个懇求，低聲下氣； 有錢人个回答，十分魯夫。</verse>
				<verse number="24">酒肉朋友，情薄過紙 ； 知己朋友，贏過兄弟。</verse>
			</chapter>
			<chapter number="19">
				<verse number="1">行為無好嫌个窮苦人， 贏過講話詭詐个戇仔。</verse>
				<verse number="2">熱心無智識盡毋好； 行動忒遽容易行錯。</verse>
				<verse number="3">人个愚戇敗壞佢个前途； 佢个心肝反轉埋怨上主。</verse>
				<verse number="4">錢財多朋友增加； 窮苦人朋友遠離。</verse>
				<verse number="5">做假見證个，會受責罰； 好講花撩个，難逃罪責。</verse>
				<verse number="6">地位高貴个，多人求佢个恩情； 大方施捨个，大家㧯佢做朋友。</verse>
				<verse number="7">人窮兄弟乜毋搭， 朋友走到還較遠； 逐等去開聲盡喊， 佢等已經走淨淨 ！</verse>
				<verse number="8">得到智慧个，愛惜生命； 持守聰明个，幸福無窮。</verse>
				<verse number="9">做假見證个，會受責罰； 好講花撩个，自取滅亡。</verse>
				<verse number="10">戇人享安樂係無合適； 奴才管頭家較無適當。</verse>
				<verse number="11">人有見識，無隨便發譴； 饒赦過失，自家有榮光。</verse>
				<verse number="12">君王發譴，像吼吼滾个獅仔； 君王施恩，像青草上个甘露。</verse>
				<verse number="13">戇檔个孻仔成做阿爸个災禍； 吵鬧个𡜵娘像屋頂漏雨緊滴。</verse>
				<verse number="14">房屋㧯財產係祖先留下个； 賢慧个𡜵娘係上主所賜个。</verse>
				<verse number="15">懶尸个人好睡目； 閒亍亍个餓肚笥。</verse>
				<verse number="16">遵守上帝誡命个，會保守生命； 看輕上主道路个，一定會滅亡。</verse>
				<verse number="17">救濟窮人，就係借錢給上主； 佢个好行為，上主會報答佢。</verse>
				<verse number="18">還有盼望个時，愛管教你个子女； 總係毋好忒嚴，驚怕害佢等一生 。</verse>
				<verse number="19">脾氣暴烈个人，必定受刑罰 ； 你若愛救佢，必須一救再救。</verse>
				<verse number="20">愛聽人勸話，接受指導； 你最後會成做智慧人。</verse>
				<verse number="21">謀事在人， 成事在天 。</verse>
				<verse number="22">做人忠誠係人所渴慕个 ； 窮苦人贏過花撩牯。</verse>
				<verse number="23">敬畏上主个人，享受長壽； 佢會永久安居，遠離災難。</verse>
				<verse number="24">懶尸人伸手拿盤肚个食物， 懶到連跔手送落嘴乜毋肯。</verse>
				<verse number="25">責打傲慢人，戇直人就學到精明； 勸話聰明人，佢就得到智識。</verse>
				<verse number="26">孻仔若苦毒爺仔、逐走𡟓仔， 係帶來見笑、羞辱个不孝子。</verse>
				<verse number="27">孻仔啊，你若毋接受管教， 就會失落智識个言語。</verse>
				<verse number="28">奸詐个證人看公義做笑話； 邪惡个人將不義食到滿嘴。</verse>
				<verse number="29">審判係為傲慢人來準備个； 鞭刑係為戇人个背囊設个。</verse>
			</chapter>
			<chapter number="20">
				<verse number="1">淡酒害人傲慢，釅酒害人胡鬧； 好酒行差路个人，實在無智慧。</verse>
				<verse number="2">王个發譴像獅仔大聲嘶； 惹王受氣喪失自家生命。</verse>
				<verse number="3">人能避免紛爭就係光榮； 戇人全部盡好惹人冤家。</verse>
				<verse number="4">懶尸个耕種人無照節氣； 收成个時佢就一無所得。</verse>
				<verse number="5">人个心思像深井肚个水， 聰明人正知樣般打出來。</verse>
				<verse number="6">盡多人自誇做人忠誠， 總係麼人尋得到正經信實个人呢？</verse>
				<verse number="7">正直个人行事完全純正， 佢个子孫係樣般有福氣！</verse>
				<verse number="8">君王坐在審判台頂高， 厥目珠鑒察一切邪惡。</verse>
				<verse number="9">麼人敢講：「𠊎已經洗淨𠊎个心， 𠊎係純潔無罪个」？</verse>
				<verse number="10">用兩種秤仔、兩樣升斗來騙人， 這係上主盡惱个。</verse>
				<verse number="11">細人仔个品行係純潔係正直， 對佢个行為乜可以看得出來。</verse>
				<verse number="12">會聽个耳公，會看个目珠， 兩樣都係上主所創造个。</verse>
				<verse number="13">毋好貪睡，正毋會變窮苦； 煞猛做事，就會得到飽足。</verse>
				<verse number="14">買貨嫌貨：「毋好！毋好！」 買轉就講：「盡好！盡好！」</verse>
				<verse number="15">黃金萬兩，珠寶滿箱， 毋當一句智慧良言。</verse>
				<verse number="16">麼人為生份人擔保， 你就愛拿佢 个外衫做抵押； 麼人為外族人 擔保， 你就愛喊佢承擔一切後果。</verse>
				<verse number="17">騙來个食物特別好食； 過後就感覺滿嘴砂石。</verse>
				<verse number="18">有計劃个事一定成功； 無策略个戰爭毋好打。</verse>
				<verse number="19">多講閒話，難守祕密； 多嘴朋友，毋好結交。</verse>
				<verse number="20">咒罵爺𡟓个人， 佢个生命會像燈火在烏暗中烏掉。</verse>
				<verse number="21">忒早繼承祖公業， 最尾對佢毋係福。</verse>
				<verse number="22">你毋好講：「𠊎愛報仇！」 你愛等候上主，佢會為你伸冤。</verse>
				<verse number="23">無準个秤砣，上主盡惱； 詭詐个秤仔，十分毋好。</verse>
				<verse number="24">人个腳步係上主所安排个； 麼人能知佢人生个道路呢？</verse>
				<verse number="25">向上帝許願前愛三思， 免得後來會陷入羅網。</verse>
				<verse number="26">智慧个王簸出壞人， 就用碌碡來碾佢等。</verse>
				<verse number="27">上主个燈鑒察人个心 ， 查明心底一切个念頭。</verse>
				<verse number="28">仁慈㧯信實係君王个保障； 佢也用仁慈穩固佢个政權。</verse>
				<verse number="29">身強力壯係後生人个榮耀； 白頭那毛係老人家个尊榮。</verse>
				<verse number="30">嚴刑除掉人个罪惡； 鞭打洗淨人个內心。</verse>
			</chapter>
			<chapter number="21">
				<verse number="1">上主隨意指揮君王个心， 就像佢轉變河流个方向。</verse>
				<verse number="2">人看自家所行个攏總著， 總係上主查驗佢个動機。</verse>
				<verse number="3">行仁義㧯公平， 比獻祭更蒙上主接納。</verse>
				<verse number="4">藐視个目珠，驕傲个心， 壞人所耕種个 ，全係罪。</verse>
				<verse number="5">煞猛計劃个，一定會好額； 行事急性个，必致到窮苦。</verse>
				<verse number="6">詐欺騙來个財寶， 就像飄散个雲煙， 又像死亡个羅網。</verse>
				<verse number="7">邪惡人个強暴行為將自家拖累到死， 因為佢等毋肯照公平行事。</verse>
				<verse number="8">犯罪个人，路係彎曲； 純潔个人，行為正直。</verse>
				<verse number="9">甘願單獨在屋頂个一角， 無愛㧯潑婦共下住大屋。</verse>
				<verse number="10">邪惡人緊想做壞事； 對鄰舍無憐憫个心。</verse>
				<verse number="11">傲慢人受到責罰， 戇直人就得智慧； 智慧人得到教育， 佢就會增加智識。</verse>
				<verse number="12">公義者鑒察壞人个家； 佢愛使邪惡个人滅亡。</verse>
				<verse number="13">耳公塞等毋聽窮苦人哀求个， 佢將來求幫助也無人愛搭佢。</verse>
				<verse number="14">暗中送禮物能平息憤怒； 貼後手也可以壓制烈怒。</verse>
				<verse number="15">實行公義，義人歡喜， 作惡个人，驚到會死。</verse>
				<verse number="16">人若離開明理个路， 會去同陰魂共下住。</verse>
				<verse number="17">歡喜宴樂，必致貧窮； 貪食酒肉，不能富足。</verse>
				<verse number="18">邪惡人想愛陷害正直人， 災禍反轉臨到自家身項。</verse>
				<verse number="19">甘願住在偏僻無人邸个曠野， 無愛㧯好冤家个潑婦共下住。</verse>
				<verse number="20">智慧人屋下積存寶物㧯油； 戇檔人一下得到就用淨淨。</verse>
				<verse number="21">盡心盡意愛行公義㧯仁慈， 就會得到長壽公義㧯尊榮。</verse>
				<verse number="22">靠智慧正能佔領勇士掌个城， 將佢等所倚靠个城堡搶過來。</verse>
				<verse number="23">人能謹慎佢所講个話， 會保守自家免受災難。</verse>
				<verse number="24">驕傲又嘲謔人个，安到「傲慢人」； 佢行事做人，時常過頭驕傲。</verse>
				<verse number="25">懶尸人个妄想會害死佢， 因為佢个手毋願意做工；</verse>
				<verse number="26">佢歸日貪心到無限度； 總係義人施捨，無齧擦。</verse>
				<verse number="27">上主盡恨壞人个獻祭； 何況佢存壞意來獻呢！</verse>
				<verse number="28">做假見證个人，佢一定會大失敗； 親耳聽實話个，佢个見證會成功。</verse>
				<verse number="29">邪惡人詐意有膽量； 正直人行事有考慮。</verse>
				<verse number="30">人个智慧、聰明、謀略， 攏總無法度㧯上主對抗。</verse>
				<verse number="31">人為到相㓾該日招兵買馬， 總係輸贏全由上主來決定。</verse>
			</chapter>
			<chapter number="22">
				<verse number="1">好名聲贏過家業大； 受尊重強過金銀多。</verse>
				<verse number="2">好額人㧯窮苦人共樣， 兩種人全係上主造个。</verse>
				<verse number="3">精明个人看到危險就閃開； 戇直个人直頭直路受災害。</verse>
				<verse number="4">存心謙卑，敬畏上主， 就會富足、光榮、長壽。</verse>
				<verse number="5">奸詐人个路充滿竻仔㧯羅網； 想保守自家生命个就愛遠離。</verse>
				<verse number="6">教養訓練細人仔行正路， 從細到老就毋會偏差。</verse>
				<verse number="7">窮苦人被好額人管轄； 欠債个係債主个奴才。</verse>
				<verse number="8">委不義个種子，定著收災禍； 佢欺壓个勢力，早慢會失效。</verse>
				<verse number="9">慷慨救濟人个必定得祝福； 因為佢將食物分給窮苦人。</verse>
				<verse number="10">將傲慢人逐走就會消除糾紛； 爭吵㧯羞辱个事情也會煞掉。</verse>
				<verse number="11">心肚純潔講話溫柔个人， 君王一定會㧯佢做朋友。</verse>
				<verse number="12">上主个目珠看顧真理； 佢推翻奸詐人个言論。</verse>
				<verse number="13">懶尸人講：「外背有獅仔！ 𠊎去街項會被牠食掉！」</verse>
				<verse number="14">淫亂婦女个嘴碼像陷阱； 上主所惱个人會跌落去。</verse>
				<verse number="15">愚戇纏等細人仔个心； 用竹修仔管教正解得開。</verse>
				<verse number="16">剝削窮苦人來發財个， 㧯送禮巴結好額人个， 到尾必定會了到淨淨。</verse>
				<verse number="17">你愛認真聽智慧人个話， 專心領受𠊎所傳个智識。</verse>
				<verse number="18">你若記在心肚，隨時講出引用， 這就係盡歡喜个事。</verse>
				<verse number="19">𠊎今晡日將這兜話特別指教你， 好俾你全心倚靠上主。</verse>
				<verse number="20">𠊎為你寫下三十條， 勸話㧯智識个箴言，</verse>
				<verse number="21">用恁樣來給你知麼介係真實可靠个話， 好俾你用信實个話回覆派你出來个人。</verse>
				<verse number="22">窮苦人無能力保護佢自家， 你做毋得靠勢就搶厥東西； 也毋好在法院 壓迫困苦人。</verse>
				<verse number="23">上主愛為佢等來伸冤； 若有麼人害佢等个命， 上主愛收該兜人个命。</verse>
				<verse number="24">毋好㧯好發譴个人做朋友， 也毋好㧯性體烈个人來往，</verse>
				<verse number="25">免得你遰到佢个壞習慣， 就跌落羅網來害死自家。</verse>
				<verse number="26">毋好隨便承擔責任為人擔保； 也毋好為別人个債務做擔保人。</verse>
				<verse number="27">到時你若係無錢好還人， 連你个眠床也會被人扛走！</verse>
				<verse number="28">祖先所定个老地界， 你做毋得將它徙走。</verse>
				<verse number="29">你看過做事精明个人麼？ 佢會企在君王面前服事， 毋係服事普普通通个人。</verse>
			</chapter>
			<chapter number="23">
				<verse number="1">你㧯大人物共桌食飯个時節， 愛記得坐在若面前个係麼人。</verse>
				<verse number="2">若係你飯量大， 就愛約束自家 。</verse>
				<verse number="3">毋好貪食佢个滂沛； 驚怕這係佢个陰謀。</verse>
				<verse number="4">你愛聰明兜仔， 莫過勞、死愛錢。</verse>
				<verse number="5">錢財一𥍉目就消失； 因為錢財會生翼胛， 就像鷂婆飛到天頂。</verse>
				<verse number="6">莫食齧擦人个飯， 毋好貪佢个滂沛。</verse>
				<verse number="7">佢講：「毋使細膩，食啊，啉啊」， 總係佢心肚另外有打算。 佢做人，心肚專門計較錢 。</verse>
				<verse number="8">你所食个一些東西會嘔出來； 你所講个靚話也會變做空空。</verse>
				<verse number="9">你毋好講話給戇人聽； 佢會藐視你智慧个話。</verse>
				<verse number="10">毋好徙古時个地界， 毋好佔孤兒个田地；</verse>
				<verse number="11">因為佢等个保護者大有能力， 佢愛做你个對頭，為佢等伸冤。</verse>
				<verse number="12">愛專心接受教訓， 認真聽智識个話。</verse>
				<verse number="13">毋好毋管教細人仔； 用竹修仔毋會打死；</verse>
				<verse number="14">你用竹修仔打佢， 正會救佢个生命。</verse>
				<verse number="15">孻仔啊，你若有智慧， 𠊎係樣般歡喜快樂！</verse>
				<verse number="16">你一講正直个話， 𠊎个心肝就當暢！</verse>
				<verse number="17">你毋好嫉妒罪人， 愛日夜敬畏上主；</verse>
				<verse number="18">恁樣，你个前途就光明， 你个將來也毋會絕望。</verse>
				<verse number="19">孻仔啊，聽𠊎个話來得到智慧； 愛留心行正路。</verse>
				<verse number="20">好啉酒个，貪食肉个， 毋好同佢等做朋友；</verse>
				<verse number="21">因為好酒貪食个，會變窮苦人； 好睡目个人，一定會著爛衫褲。</verse>
				<verse number="22">應該聽從𫱔你个爺𡟓； 就算老了，也毋好看輕佢等。</verse>
				<verse number="23">你愛付代價來得到真理、智慧、教訓㧯見識； 千萬毋好將它兜賣掉。</verse>
				<verse number="24">義人个爺仔，定著會非常快樂； 孻仔有智慧，𫱔佢个就盡歡喜。</verse>
				<verse number="25">應當俾你个爺𡟓快樂； 愛俾𫱔你个阿姆歡喜！</verse>
				<verse number="26">孻仔啊，愛全心向𠊎學習， 愛注意看𠊎个模樣。</verse>
				<verse number="27">妓女係無底深坑； 淫婦係致命陷阱。</verse>
				<verse number="28">姖等像埋伏个強盜， 使更多个人變奸詐。</verse>
				<verse number="29">麼人有災禍？ 麼人有憂傷？ 麼人有相爭？ 麼人有埋怨？ 麼人無故受傷？ 麼人目珠赤赤？</verse>
				<verse number="30">就係該兜流連醉鄉， 好酒貪杯个人。</verse>
				<verse number="31">毋好貪愛杯中又紅又靚、 在喉嗹中又醇又順个酒。</verse>
				<verse number="32">最後酒會像蛇哥纏你， 像毒蛇咬你。</verse>
				<verse number="33">你會目花花，頭昏昏，亂講話。</verse>
				<verse number="34">你會醉到浮浮，像在海中， 又像睡在船个桅杆頂高。</verse>
				<verse number="35">你會講： 「𠊎被人捶，毋會痛， 被人打，無感覺。 𠊎樣醒毋過來？ 𠊎愛再啉一杯！」</verse>
			</chapter>
			<chapter number="24">
				<verse number="1">毋好嫉妒壞人， 毋好想愛同佢等做伴；</verse>
				<verse number="2">因為佢等个心計謀兇暴个事， 佢等所講个全係傷害人个話。</verse>
				<verse number="3">家庭係用智慧來建造， 係通過了解得到穩固；</verse>
				<verse number="4">因為有智識， 屋肚也充滿各種珍奇美好个寶物。</verse>
				<verse number="5">有智慧个人大有能力； 有智識个人力上加力。</verse>
				<verse number="6">相㓾愛有好計謀； 參謀多就能打贏。</verse>
				<verse number="7">智慧係超過戇人所能了解个； 佢等在會議中 毋敢開嘴講話。</verse>
				<verse number="8">計謀做壞事个， 就安到陰謀家。</verse>
				<verse number="9">戇檔人个計謀就係罪惡； 傲慢人盡得人惱。</verse>
				<verse number="10">你在患難个時若係失志無膽， 你个力量就盡有限。</verse>
				<verse number="11">人無辜判死刑，你愛去搶救； 佢被人拉去愛㓾，你愛拉轉來。</verse>
				<verse number="12">你若係講：「這事情𠊎等毋知」； 敢講該鑒察人心个上帝會毋知係麼？ 保護你生命个，佢非常清楚！ 佢愛照逐儕所行个來報應。</verse>
				<verse number="13">孻仔啊，愛食蜂糖，因為對你有好處； 食蜂藪滴下个蜂糖，你會感覺甘甜。</verse>
				<verse number="14">你也愛知，智慧對你个心靈也係恁樣； 你若尋到，前途就光明， 你个將來也毋會絕望。</verse>
				<verse number="15">惡棍啊，毋好埋伏攻擊義人个家； 毋好破壞佢个屋；</verse>
				<verse number="16">因為義人雖然跌倒七擺，佢還會䟘起來； 總係，災禍一到，邪惡个人就會橫到貼貼。</verse>
				<verse number="17">看到你个仇敵跌倒，毋好歡喜； 佢逕倒个時，你个心毋好快樂；</verse>
				<verse number="18">驚怕上帝看到你个壞心就無歡喜， 然後將佢个怒氣對仇敵身項徙走。</verse>
				<verse number="19">毋好因為壞人生活好勢來發閼； 也毋好嫉妒邪惡个人；</verse>
				<verse number="20">因為壞人無前途， 邪惡个人無指望 。</verse>
				<verse number="21">孻仔啊，愛敬畏上主，尊敬君王； 也毋好同悖逆个人共下結交，</verse>
				<verse number="22">因為這兜人一下仔就會滅亡。 你敢毋知上帝㧯君王會降災難係麼？</verse>
				<verse number="23">下背也係智慧人个箴言： 審判个時毋好看人个情面。</verse>
				<verse number="24">麼人對壞人講：「你無罪」， 萬民會咒詛佢，列國會攻擊佢。</verse>
				<verse number="25">總係責罰犯罪个會凡事順利； 各樣个祝福也會臨到佢身項。</verse>
				<verse number="26">誠實个回答表示真實个友情 。</verse>
				<verse number="27">愛先有謀生个把握， 田園也愛整理好勢， 正來起屋，成家立業。</verse>
				<verse number="28">毋好隨便做證來害鄰舍； 也毋好用嘴欺騙人。</verse>
				<verse number="29">毋好講：「人對𠊎恁樣， 𠊎也愛對佢恁樣！ 𠊎愛照佢所行个報復佢！」</verse>
				<verse number="30">𠊎路過懶尸人个田地、 無常識个人个葡萄園；</verse>
				<verse number="31">看竻仔當多， 雜草滿遍係， 石牆也崩掉。</verse>
				<verse number="32">𠊎緊看緊想个時， 就得到一個教訓：</verse>
				<verse number="33">你睡加一下仔， 啄痀休息一下仔， 揇等手歇睏一下仔；</verse>
				<verse number="34">總係貧窮會忽然間像強盜來搶你， 缺乏會像土匪來攻打你。</verse>
			</chapter>
			<chapter number="25">
				<verse number="1">以下所寫个也係 所羅門 个箴言， 係 猶大 王 希西家 宮廷个人所抄个。</verse>
				<verse number="2">將事情囥起來係上帝个榮耀； 將事情查清楚係君王个光榮。</verse>
				<verse number="3">君王个心盡難了解； 像天恁高，像地恁賁。</verse>
				<verse number="4">先除去銀仔个雜質， 銀匠正能打做東西；</verse>
				<verse number="5">先除去君王面前个奸臣， 政府正能企在正義頂高。</verse>
				<verse number="6">你毋好在王面前展奢鼻， 毋好在大官个位仔企等。</verse>
				<verse number="7">等人來對你講：「請坐上橫頭」， 贏過人來喊你讓位給大人物。</verse>
				<verse number="8">毋好隨便出庭做證； 若有別人指出你个證言錯誤、使你見笑， 你愛樣般正好呢？</verse>
				<verse number="9">你㧯鄰舍發生爭執， 最好私下和解； 毋好洩漏別人个祕密，</verse>
				<verse number="10">免得聽到个人就侮辱你， 你个臭名就無法度除掉。</verse>
				<verse number="11">一句話講到當好勢， 就像金蘋果放在銀盤肚。</verse>
				<verse number="12">智慧人个勸話對聽從个人來講， 比金耳環㧯純金个妝飾品較有價值。</verse>
				<verse number="13">忠誠个使者使差派佢个人心神爽快， 就像熱天割禾時節个涼水一樣。</verse>
				<verse number="14">誇口愛送禮，無實行个， 就像有風有雲，無落雨。</verse>
				<verse number="15">耐心个勸話會說服掌權个人； 溫柔能贏過剛強 。</verse>
				<verse number="16">尋到蜂糖食罅就好； 食忒多你就會嘔掉。</verse>
				<verse number="17">毋好常常過家尋鄰舍， 勞攪佢忒多佢會惱你。</verse>
				<verse number="18">做假見證陷害鄰舍， 就像棍仔、刀劍㧯利箭會害死人。</verse>
				<verse number="19">患難个時，投靠無忠誠个人， 就像蛀牙咬東西，跛腳行路。</verse>
				<verse number="20">對傷心个人唱歌， 就像冷天脫厥衫， 又像在傷口委鹽 。</verse>
				<verse number="21">你个敵人若係肚飢，愛拿飯給佢食， 若係嘴燥，愛拿水給佢啉；</verse>
				<verse number="22">你恁樣行會使佢見笑到無葛無煞 ； 上主也會獎賞你。</verse>
				<verse number="23">唆慫是非惹起怒氣， 就像北風帶來大雨。</verse>
				<verse number="24">甘願單獨在屋頂个一角， 無愛㧯潑婦共下住大屋。</verse>
				<verse number="25">聽到遠方來个好消息， 就像嘴燥个時食涼水。</verse>
				<verse number="26">義人在邪惡人面前低頭讓步， 像摝渾个泉水、㩢屙糟个井水。</verse>
				<verse number="27">食忒多蜂糖毋好； 展風神也係有害。</verse>
				<verse number="28">毋曉得節制个人， 像拆掉圍牆个城。</verse>
			</chapter>
			<chapter number="26">
				<verse number="1">好名聲配戇檔人當毋登對， 像夏天落雪秋收落雨共樣。</verse>
				<verse number="2">無理个咒詛像屋簷鳥㧯燕仔飛來飛去， 毋會落在人个身項。</verse>
				<verse number="3">用皮鞭打馬，用嘴落駛驢， 愛用棍仔打戇檔人个背囊。</verse>
				<verse number="4">毋好照戇人个戇話應佢， 驚怕你也同佢共樣。</verse>
				<verse number="5">愛照戇人个戇話堵佢， 免得佢恅到自家有智慧。</verse>
				<verse number="6">喊戇人傳話个， 就像斬斷自家个腳，招來損害。</verse>
				<verse number="7">像瘸仔个腳全無路用， 戇人講箴言也係恁樣。</verse>
				<verse number="8">將尊榮給戇人， 像石頭䌈在彈弓上，射毋出去。</verse>
				<verse number="9">戇檔人講箴言， 像酒醉个人拿等竻樹桍亂打人。</verse>
				<verse number="10">隨便請戇人㧯過路人做工个， 會使所有个同工全部受損害 。</verse>
				<verse number="11">戇檔人一擺又一擺做戇事， 像狗回頭食牠所嘔出來个。</verse>
				<verse number="12">你看自家恅到有智慧个人嗎？ 連戇檔个人比佢還較有希望。</verse>
				<verse number="13">懶尸人留到屋下妄想講： 「路項有獅仔，街項有獅仔！」</verse>
				<verse number="14">懶尸人賴床翻來翻去， 就像門鉸仔轉來轉去。</verse>
				<verse number="15">懶尸个人伸手到盤肚拿食物， 懶到連跔手送落嘴也嫌費氣。</verse>
				<verse number="16">懶尸人恅到自家比七個盡會應對人个還較有智慧。</verse>
				<verse number="17">去插無干涉自家个爭吵， 就像揪到過路狗个耳公。</verse>
				<verse number="18">騙鄰舍然後講：「𠊎係㧯你賭搞个噢！」 這人就像癲仔，將致命个火把㧯箭射出去。</verse>
				<verse number="19"></verse>
				<verse number="20">無柴來燒，火定著會烏掉； 無人傳話，冤家就停下來。</verse>
				<verse number="21">好冤家个就會煽動紛爭， 就像火堆添炭，火上加柴。</verse>
				<verse number="22">背後个閒話像食滂沛； 一落嘴就吞到腸肚去。</verse>
				<verse number="23">嘴甜舌滑總係心肝邪惡， 就像粗缶仔包一層白銀。</verse>
				<verse number="24">敵人講奉承人个話， 總係心肚囥等奸詐。</verse>
				<verse number="25">聲音雖然溫柔，毋好相信佢， 因為佢个心肝肚充滿惡毒 。</verse>
				<verse number="26">雖然佢千方百計愛將佢个怨恨囥起來， 總係佢个邪惡會在眾人面前顯露出來。</verse>
				<verse number="27">挖陷阱个，自家會跌落去； 翻石頭个，會被石頭磡到。</verse>
				<verse number="28">虛假个舌乸害它所惱个人； 阿媚奉承个嘴會帶來敗壞。</verse>
			</chapter>
			<chapter number="27">
				<verse number="1">毋好為天光日來誇口， 因為一日會發生麼介事你都毋知。</verse>
				<verse number="2">毋好講自家恁會，愛等別人誇獎你； 毋好自誇，愛等毋熟事个人稱讚你。</verse>
				<verse number="3">石頭㧯沙仔兩項盡重， 總係戇檔人惹起个患難還較重。</verse>
				<verse number="4">發譴會害人，發閼會傷人， 嫉妒若來到，麼人擋得住？</verse>
				<verse number="5">公開个責備 贏過囥等个愛心。</verse>
				<verse number="6">朋友傷害你係出於忠誠； 仇敵反轉㧯你連連唚嘴。</verse>
				<verse number="7">食飽个人，連蜂糖佢乜無想食； 肚飢个人，連苦个也感覺盡甜。</verse>
				<verse number="8">離家出外流浪个人， 就像鳥仔離藪遠飛。</verse>
				<verse number="9">香油㧯香料俾人个心當爽快； 朋友真心个勸話也係恁甘甜 。</verse>
				<verse number="10">毋好㧒掉你个朋友㧯若爸个朋友； 堵到災難个時毋使向親人求幫助， 因為遠親不如近鄰。</verse>
				<verse number="11">孻仔啊，愛做智慧人來使𠊎歡喜， 使𠊎有話好應嘲謔𠊎个人。</verse>
				<verse number="12">精明个人看到危險就閃開； 戇直个人直頭直路受災害。</verse>
				<verse number="13">麼人為生份人擔保， 你就愛拿佢 个外衫做抵押； 麼人為外族人 擔保， 你就愛喊佢承擔一切後果。</verse>
				<verse number="14">打早䟘床吵醒朋友， 大聲為佢祝福， 當像係咒詛佢。</verse>
				<verse number="15">㘙㘙唸唸个𡜵娘， 㧯滴滴𣽛𣽛个落雨天共樣；</verse>
				<verse number="16">想愛禁止姖个， 像愛攔阻狂風， 也像右手揢油。</verse>
				<verse number="17">朋友互相研究 ， 像鐵磨鐵越磨越利。</verse>
				<verse number="18">照顧無花果樹个，有無花果好食； 服事主人个，也能得到尊榮。</verse>
				<verse number="19">靜水能照面，面面相對； 人心對人心，也係恁樣。</verse>
				<verse number="20">陰間㧯滅亡个深淵一直坉毋會滿； 人个慾望也共樣永遠無辦法滿足。</verse>
				<verse number="21">爐火鍛鍊金銀， 稱讚考驗人品。</verse>
				<verse number="22">你就係將戇人放在舂臼肚，㧯麥仔共下舂碎， 戇檔還係離毋開佢。</verse>
				<verse number="23">愛小心看好你个羊群， 愛細膩照顧你个頭牲；</verse>
				<verse number="24">因為錢財毋係永久能保存， 冕旒也毋會存到世世代代。</verse>
				<verse number="25">燥草割掉，嫩草出現， 山邊野草收集个時，</verse>
				<verse number="26">你做得剪羊毛做衫褲， 用賣山羊个錢買土地；</verse>
				<verse number="27">山羊乳會罅你一家人食， 又好維持你使女个生活。</verse>
			</chapter>
			<chapter number="28">
				<verse number="1">邪惡人雖然無人追也在逃命； 總係正直人像獅仔無驚麼介。</verse>
				<verse number="2">國家充滿罪惡，掌權者就緊換； 國有賢明領袖，政權正能長久。</verse>
				<verse number="3">大官 欺負窮苦人， 像大水打走五榖。</verse>
				<verse number="4">毋守法律个講壞人當會； 遵守法律个㧯佢等對抗。</verse>
				<verse number="5">壞人毋知麼介係正義； 尋求上主个明白一切。</verse>
				<verse number="6">行為純正个窮苦人， 贏過奸詐个好額人。</verse>
				<verse number="7">遵守法律个就係聰明个孻仔； 㧯好食懶做个人結朋友，會使厥爸見笑。</verse>
				<verse number="8">靠高利息成做好額人， 佢个錢財到尾會落在憐憫窮苦人个手中。</verse>
				<verse number="9">人若係塞耳毋肯聽教示， 連佢个祈禱上帝也盡惱。</verse>
				<verse number="10">引誘正直人行邪惡个路， 這人會跌落自家个陷阱； 總係純潔个人會得福份。</verse>
				<verse number="11">好額人恅到自家盡有智慧； 明理个窮人看穿佢个虛假。</verse>
				<verse number="12">正直人掌權，人人大歡喜； 邪惡人興起，儕儕走去囥。</verse>
				<verse number="13">將自家罪過遮等个，毋會成功； 承認過失來悔改个，上帝會憐憫佢。</verse>
				<verse number="14">常常敬畏上主實在有福氣； 硬心硬殼个人會陷落災禍。</verse>
				<verse number="15">壞个執政者壓迫窮苦人， 就像大聲吼吼滾个獅仔， 也像肚當枵又當惡个熊。</verse>
				<verse number="16">無明理个執政者會成做暴君； 無貪不義个錢財正會享長壽。</verse>
				<verse number="17">犯㓾人罪个，定著逃命到死； 無論你係麼人，毋好幫助佢。</verse>
				<verse number="18">行為完全，得到拯救； 做人奸詐，盡遽跌倒。</verse>
				<verse number="19">煞猛耕種，糧食充足； 浪費光陰，難免窮苦。</verse>
				<verse number="20">誠實个人充滿幸福； 想發橫財難免受罰。</verse>
				<verse number="21">做毋得偏心來看人个情面； 總係有人為一垤餅去犯法。</verse>
				<verse number="22">顧賺錢想遽遽發財个， 毋知窮苦跈等就到來。</verse>
				<verse number="23">勸話人个，到尾會得到歡迎， 較贏該講話阿媚奉承人个。</verse>
				<verse number="24">偷拿爺𡟓个，又講：「這毋係罪」， 這隻人㧯強盜無麼介差別。</verse>
				<verse number="25">自私个人惹起紛爭； 倚靠上主的確豐盛。</verse>
				<verse number="26">心肝單單靠自家个，這就係戇人； 照智慧行事做人个，會得到拯救。</verse>
				<verse number="27">救濟窮苦个，毋會缺乏； 詐毋知个，會多受咒詛。</verse>
				<verse number="28">邪惡人掌權，儕儕走去囥； 佢等滅亡，正直人就增加。</verse>
			</chapter>
			<chapter number="29">
				<verse number="1">越受責罰就越硬頸个人， 會即時敗壞，無法度好醫。</verse>
				<verse number="2">正直人增加，人民歡喜快樂； 邪惡人執政，人民悲傷道嘆。</verse>
				<verse number="3">愛慕智慧个，使阿爸歡喜； 結交妓女个，財產了淨淨。</verse>
				<verse number="4">君王行事公義，國家就堅定； 若係貪污腐敗，國家就滅亡。</verse>
				<verse number="5">凡係阿媚奉承鄰舍个， 就係設羅網絆佢 个腳。</verse>
				<verse number="6">邪惡人犯罪，陷入羅網； 正直人唱歌，歡喜快樂。</verse>
				<verse number="7">正直人尊重窮苦人个權利； 邪惡人就無恁樣个同情心。</verse>
				<verse number="8">傲慢人在城肚製造混亂； 智慧人平息百姓个憤怒。</verse>
				<verse number="9">智慧人控告戇人完全無效； 戇人毋係發譴就大笑大鬧。</verse>
				<verse number="10">好㓾人个盡恨完全人， 乜想愛害正直人个命。</verse>
				<verse number="11">戇檔人閼到就拚出來； 智慧人曉得控制脾氣。</verse>
				<verse number="12">執政者若歡喜聽肨風个話， 佢个部下一定會變做奸臣。</verse>
				<verse number="13">窮苦人㧯欺負人个在世間堵到， 上主使兩儕个目珠平平看得到。</verse>
				<verse number="14">君王用公正判斷窮苦人， 佢个王位就會一直堅定。</verse>
				<verse number="15">用竹修管教能加添智慧； 放蕩个子女使阿姆見笑。</verse>
				<verse number="16">邪惡人緊多，罪惡緊增加； 正直人會看等佢等衰敗。</verse>
				<verse number="17">愛管教你个孻仔， 佢就使你有平安， 也使你个心快樂。</verse>
				<verse number="18">若無上帝个異象，人民就糮糝來； 遵守上帝教示个，實在有福氣噢！</verse>
				<verse number="19">單單用講話，管教僕人無效； 雖然佢了解，還係無愛插你。</verse>
				<verse number="20">你看到講話隨便个人麼？ 戇檔人比佢還較有希望。</verse>
				<verse number="21">人將僕人從細縱到大， 這僕人到尾就會霸佔佢个財產 。</verse>
				<verse number="22">容易發譴个會惹起相爭， 盡遽發脾氣个多多犯罪。</verse>
				<verse number="23">人个驕傲使佢降卑； 心存謙卑受人尊重。</verse>
				<verse number="24">人㧯賊仔結黨，就係害自家； 佢在法庭發誓，毋敢講實話。</verse>
				<verse number="25">人所驚个，會成做佢个陷阱； 信靠上主，佢就得安然自在。</verse>
				<verse number="26">人人想求統治者个恩惠； 其實只有上主伸張正義。</verse>
				<verse number="27">義人惱不義个人； 惡人恨正直个人。</verse>
			</chapter>
			<chapter number="30">
				<verse number="1">下背係 雅基 个孻仔 亞古珥 个箴言；這人對 以鐵 㧯 烏甲 講：</verse>
				<verse number="2">𠊎像頭牲，無別人恁聰明； 世間人个智慧，𠊎攏總無。</verse>
				<verse number="3">𠊎毋識學過智慧， 也毋認識至聖者。</verse>
				<verse number="4">麼人上過天頂又下來？ 麼人能用手巴掌捉風？ 麼人有辦法用衫包水？ 有麼人定過地个界限？ 佢係麼人，名安到麼介？ 厥孻仔个名安到麼介？ 假使你知，拜託㧯𠊎講！</verse>
				<verse number="5">上帝个話逐句全部係純潔个； 佢像盾牌保護所有投靠佢个。</verse>
				<verse number="6">佢所講个話語，你做毋得加添麼介， 驚怕佢會責備你，指出你係花撩牯。</verse>
				<verse number="7">上帝啊，有兩項事情， 求你在𠊎吂死以前答應𠊎：</verse>
				<verse number="8">求你使虛假㧯花撩遠離𠊎； 使𠊎毋會忒苦也毋會忒發； 賜給𠊎所需要个飲食就好，</verse>
				<verse number="9">驚怕𠊎忒好額，會毋認你， 就講：「上主係麼人呢？」 又驚怕𠊎忒苦，會去偷拿， 就羞辱𠊎上帝个名。</verse>
				<verse number="10">毋好對做主人个批評佢个僕人， 驚怕僕人咒罵你，你也愛受責罰。</verse>
				<verse number="11">有兜人咒罵爺仔， 也毋肯祝福阿姆。</verse>
				<verse number="12">有兜人恅到自家盡淨浰； 其實滿身無洗淨盡屙糟。</verse>
				<verse number="13">有兜人恅到自家盡完美， 總係佢个目珠顯出驕傲。</verse>
				<verse number="14">有兜人尖牙利齒， 愛吞食地上个困苦人㧯世間个貧窮人。</verse>
				<verse number="15">湖蜞有兩個妹仔， 緊講：「給𠊎！給𠊎！」 毋會滿足个有三項， 連毋講「罅」个共有四項，</verse>
				<verse number="16">就係：陰間， 毋會𫱔个婦人家， 天旱無水个土地， 毋會講「罅了！」个火。</verse>
				<verse number="17">嘲謔阿爸，藐視又毋聽從阿姆个， 厥目珠會被山壢个烏鴉啄出來、被細鷹鳥食掉。</verse>
				<verse number="18">𠊎想毋解奇妙个事有三項， 連𠊎所毋了解个共有四項，</verse>
				<verse number="19">就係：鷹鳥在空中飛个路， 蛇哥在大石頂爬个路， 船仔在海上行个路， 男女交往个路。</verse>
				<verse number="20">淫婦个路係恁樣： 姖食了，將嘴一拭就講： 「𠊎無做壞事！」</verse>
				<verse number="21">使大地搖動个有三項， 連地㧡毋贏个共有四項，</verse>
				<verse number="22">就係：奴才做王， 戇檔人得到飽，</verse>
				<verse number="23">當得人惱个細妹仔出嫁， 使女爭到頭家娘个地位。</verse>
				<verse number="24">地上有四種細个動物， 總係非常聰明：</verse>
				<verse number="25">蟻公毋係有力个動物， 總係它知夏天預備食物；</verse>
				<verse number="26">石獾毋係強壯个動物， 總係牠會在巖石中做竇；</verse>
				<verse number="27">草蜢無王， 總係它兜會擺陣前進；</verse>
				<verse number="28">壁蛇，人用手捉得到它， 總係它會住在王宮肚。</verse>
				<verse number="29">腳步威風个有三項， 連行動威風个共有四項，</verse>
				<verse number="30">就係：獸類中最強壯， 無驚麼介个獅仔；</verse>
				<verse number="31">盡風神个雞公； 山羊牯； 㧯統領大軍个君王。</verse>
				<verse number="32">假使你做戇檔个事， 自高自大，抑係陰謀壞事， 就愛用手揞嘴！</verse>
				<verse number="33">摝牛乳，會得到乳油； 打鼻公，鼻公會出血； 撩人發譴，會惹起爭端。</verse>
			</chapter>
			<chapter number="31">
				<verse number="1">下背係 利慕伊勒 王个話，係佢个阿姆教訓佢个箴言：</verse>
				<verse number="2">𠊎个孻仔，𠊎親生个孻仔， 𠊎祈禱許願得來个孻仔， 𠊎愛樣般教你正好呢？</verse>
				<verse number="3">你毋好在女人身上耗費你个精力； 這種事識害盡多君王失敗。</verse>
				<verse number="4">君王做毋得噢， 利慕伊勒 啊， 君王做毋得啉酒； 王子做毋得貪釅酒。</verse>
				<verse number="5">佢等若係啉酒，會毋記得國法， 也會剝削一切困苦人个權利。</verse>
				<verse number="6">釅酒係給面對死个人， 葡萄酒係給傷心个人；</verse>
				<verse number="7">俾佢等啉，俾佢等毋記得自家个窮苦； 俾佢等毋使緊想自家个不幸。</verse>
				<verse number="8">你愛為無權出聲个人講話， 也愛為一切衰過个人伸冤。</verse>
				<verse number="9">你愛代佢等出聲，愛公當判斷， 愛維護貧窮人㧯艱苦人个權利。</verse>
				<verse number="10">賢慧个𡜵娘實在盡難得噢！ 姖个價值比珠寶還較貴重！</verse>
				<verse number="11">姖个老公做得放心信賴姖， 收入定著毋會毋罅用。</verse>
				<verse number="12">姖一生人使老公得到好處， 一直毋會使佢有麼介損害。</verse>
				<verse number="13">姖尋羊毛㧯麻紗， 歡喜煞猛做衫褲。</verse>
				<verse number="14">姖也像商船共樣， 對遠方運糧食來。</verse>
				<verse number="15">姖天還吂光就䟘床， 為全家人準備食物， 指點分配使女工作。</verse>
				<verse number="16">姖看中意个田地就買下來， 用自家个力量耕種葡萄園。</verse>
				<verse number="17">姖繫𢫮腰帶，煞猛做事， 雙手盡出力，勞碌工作。</verse>
				<verse number="18">姖知自家所經營个有錢賺， 屋下个燈火點光光做到半夜。</verse>
				<verse number="19">姖為自家紡線， 又為自家經布。</verse>
				<verse number="20">姖大方救濟貧窮人， 伸雙手幫助困苦人。</verse>
				<verse number="21">落雪天姖毋使為屋下人愁， 因為全家人有過冬个衫褲。</verse>
				<verse number="22">姖為自家做好繡花毯仔， 著麻紗㧯紫色布做个衫。</verse>
				<verse number="23">姖个老公受人尊重，係地方領袖， 在城門口同本地个長老共下坐。</verse>
				<verse number="24">姖做幼麻布个衫去賣， 又做腰帶賣給生理人。</verse>
				<verse number="25">能力㧯尊貴做姖个衫褲； 想到將來姖就歡頭喜面。</verse>
				<verse number="26">姖講个話語當有智慧， 所講个係慈愛个教訓。</verse>
				<verse number="27">姖關心家務， 毋肯食閒飯。</verse>
				<verse number="28">姖个子女大聲講，姖係有福氣个人； 姖个老公也誐𧩣姖，講：</verse>
				<verse number="29">「賢慧个婦女有盡多， 總係你超過姖等儕。」</verse>
				<verse number="30">美貌係靠毋住个，人靚也係暫時个； 只有敬畏上主个婦女應當受稱讚。</verse>
				<verse number="31">願姖享受勞碌所得个； 願姖个成就公開表揚。</verse>
			</chapter>
		</book>
		<book number="21">
			<chapter number="1">
				<verse number="1">在 耶路撒冷 做王、 大衛 个孻仔、傳道者 个話。</verse>
				<verse number="2">傳道者講：空虛 ，空虛，十分空虛， 萬事全部係空虛。</verse>
				<verse number="3">人个一生，在日頭下勞勞碌碌， 到底有麼介價值？</verse>
				<verse number="4">一代過去，一代又來， 世界還係共樣。</verse>
				<verse number="5">日頭出來，日頭落山， 當遽倒轉它出來个地方。</verse>
				<verse number="6">風向南吹，又轉向北， 吹來吹去，還係轉到原來个路線。</verse>
				<verse number="7">江河流入大海，海一直毋會滿； 江河對㖠流出來，還係倒轉去。</verse>
				<verse number="8">人因為萬事操煩： 講話，也講毋會煞； 目珠看，看毋會飽； 耳公聽，聽毋會罅。</verse>
				<verse number="9">發生過个事還係會發生； 做過个事還係再做。 日頭下無一項新个事。</verse>
				<verse number="10">有㖠項事人做得講：「看啊，這係新个」？ 事實上，在𠊎等出世以前早就有了。</verse>
				<verse number="11">古早个世代，無人記得； 將來个世代，後來个人也毋會記得。</verse>
				<verse number="12">𠊎係傳道者；𠊎在 耶路撒冷 做過 以色列 个王。</verse>
				<verse number="13">𠊎專心用智慧尋求、研究天下一切發生个事。 上帝給世間人个重擔樣會恁重！</verse>
				<verse number="14">𠊎看過日頭下發生个一切；全部係空虛，係捉風。</verse>
				<verse number="15">彎个無辦法變直； 無个做毋得算有。</verse>
				<verse number="16">𠊎心肚恁樣想：「𠊎个智慧高過所有以前統治過 耶路撒冷 个人。𠊎个心了解當多智慧㧯智識。」</verse>
				<verse number="17">𠊎用心愛分別智慧㧯戇檔、智識㧯癲狂，正知這也係捉風。</verse>
				<verse number="18">智慧越高，煩勞越多； 智識越多，傷心越大。</verse>
			</chapter>
			<chapter number="2">
				<verse number="1">𠊎心肚想：「來享樂試看啊！來享福噢！」總係這也係空虛。</verse>
				<verse number="2">𠊎發現賭搞就像癲狂，享樂又有麼介利益呢？</verse>
				<verse number="3">𠊎心肚想：「為到追求智慧个心願，𠊎愛用酒尋求快樂，啉到醉摸摸仔。」𠊎想，或者這係人生在世間短短个年日中最好个生活方式。</verse>
				<verse number="4">𠊎就做大工程，為自家起屋，種葡萄。</verse>
				<verse number="5">𠊎修建庭院果園，種各種果樹。</verse>
				<verse number="6">𠊎挖水池，好俾樹仔淹水。</verse>
				<verse number="7">𠊎有盡多奴僕㧯奴婢，有兜係買來个，有兜係在吾屋下出世个。𠊎比所有以前在 耶路撒冷 住過个人有還較多个牛羊。</verse>
				<verse number="8">𠊎為自家積存金銀，又收集君王个財寶㧯逐省个財寶。𠊎有盡多唱歌个男女㧯細姐，𠊎想愛麼介，就有麼介。</verse>
				<verse number="9">無毋著，𠊎盡強大，贏過所有以前在 耶路撒冷 住過个人；毋單淨恁樣，𠊎一直當有智慧。</verse>
				<verse number="10">𠊎个目珠想愛看个，𠊎个心想愛享受个快樂，就盡命享受，無受約束。𠊎享受自家勞碌得到个快樂；這係𠊎應該得到个福份。</verse>
				<verse number="11">總係，當𠊎回想自家个成就，想到所付出个勞碌，𠊎就知這一切係空虛，全部係捉風；在日頭下攏總無麼介價值。</verse>
				<verse number="12">總講，一個君王所能做个，全部係頭擺个君王做過个。 所以，𠊎又重新思想智慧、癲狂、戇檔有麼介分別。</verse>
				<verse number="13">恁樣，𠊎正看出智慧贏過戇檔，就像光明贏過烏暗。</verse>
				<verse number="14">聰明人看清楚頭前个道路；戇檔人在烏暗中摸無路。總係，𠊎也知佢等个命運到尾全部共樣。</verse>
				<verse number="15">𠊎心肚想：「戇檔人堵到个，𠊎也一定會堵到。𠊎盡聰明又有麼介好處呢？」𠊎心肚講：「無半滴，全部係空虛！」</verse>
				<verse number="16">聰明人㧯戇檔人共樣，無人會久久紀念佢等；因為在將來个日仔，佢等全部會被人毋記得。無論係精係戇，全部會死掉。</verse>
				<verse number="17">所以，𠊎盡惱人生；日頭下所做个事只有使𠊎操煩定定。全部係空虛，全部係捉風。</verse>
				<verse number="18">日頭下勞碌得來个一切𠊎也盡惱；因為𠊎定著愛將得到个留給後來个人，</verse>
				<verse number="19">該人係精係戇，麼人知？總係，佢會掌管𠊎在日頭下用勞碌、智慧得到个一切成果。這也係空虛。</verse>
				<verse number="20">所以，𠊎對頭擺在日頭下个勞碌非常失望。</verse>
				<verse number="21">人用佢个智慧、智識、本事所得來个，全部愛留下來，俾毋識勞碌个人承接。這也係空虛，盡無公平！</verse>
				<verse number="22">人在日頭下个操心、辛苦、勞碌，到底有麼介價值呢？</verse>
				<verse number="23">人一生所做个攏總係勞苦愁煩，連暗晡時也無平安。這也係空虛。</verse>
				<verse number="24">人會食會啉，享受自家勞碌个成果，就算幸福了。𠊎看這也係上帝賞賜个。</verse>
				<verse number="25">若毋係上帝賞賜个，麼人會有好食？麼人享受得到呢？</verse>
				<verse number="26">上帝賜智慧、智識㧯喜樂給該兜得佢歡喜个人；總係佢使罪人操勞，將佢等所積存个全部留給該兜得佢歡喜个人。這也係空虛，也係捉風。</verse>
			</chapter>
			<chapter number="3">
				<verse number="1">天下萬事攏總有定期， 全有上帝特別个時間：</verse>
				<verse number="2">出世有時，死亡有時； 栽種有時，挷掉有時；</verse>
				<verse number="3">殺害有時，醫治有時； 拆掉有時，起造有時；</verse>
				<verse number="4">噭吱有時，歡笑有時； 哀傷有時，跳舞有時；</verse>
				<verse number="5">同房有時，分房有時 ； 親密有時，冷落有時；</verse>
				<verse number="6">尋求有時，失落有時； 保存有時，豁掉有時；</verse>
				<verse number="7">扯爛有時，攣補有時； 恬靜有時，講話有時；</verse>
				<verse number="8">痛惜有時，怨恨有時； 戰爭有時，和平有時。</verse>
				<verse number="9">恁樣，做事个人所有个勞碌有麼介價值呢？</verse>
				<verse number="10">𠊎看出上帝使世間人揹當重个擔頭。</verse>
				<verse number="11">上帝造个萬物攏總有適當个時間，來顯出萬物个奇妙。佢也使世間人有永生个觀念，總係佢對頭到尾所做个，人無辦法完全明白。</verse>
				<verse number="12">所以𠊎知，一生人歡喜快樂，又做好事，世間無比這較幸福个。</verse>
				<verse number="13">𠊎等大家有好食有好啉，享受勞碌个成果，這也係上帝个恩賜。</verse>
				<verse number="14">𠊎知，上帝所做个一切永遠長存；人無法對上帝个作為增加抑係減少。上帝恁樣做，係愛人敬畏佢。</verse>
				<verse number="15">這下个事抑係將來會發生个事，頭擺早就有了；因為上帝使共樣个事重複出現。</verse>
				<verse number="16">另外，在日頭下，應該愛有公道㧯正義个所在，𠊎看到个反轉係邪惡。</verse>
				<verse number="17">𠊎心肚想：「好人、壞人，上帝全部愛審判；因為逐件事情、各種行為个時間全部定好了。」</verse>
				<verse number="18">𠊎心肚也想：上帝考驗世間人，係愛使𠊎等知，𠊎等無比禽獸較高明。</verse>
				<verse number="19">人㧯禽獸个命運結局共樣：全部愛透氣，共樣也會死。人並無比禽獸較強；因為全部係空虛。</verse>
				<verse number="20">全部愛轉到共一個所在；佢等對泥土來，也愛歸轉泥土去。</verse>
				<verse number="21">麼人知人个靈會上天，禽獸个魂會落地底下呢？</verse>
				<verse number="22">所以𠊎看，人享受佢勞碌个成果，世間無比這較幸福个；這就係佢个命運。麼人能使佢看到身後个事呢？</verse>
			</chapter>
			<chapter number="4">
				<verse number="1">𠊎又看到日頭下所有無公平个事。被人欺負个流目汁，無人安慰佢等。佢等得毋到安慰，因為欺負佢等个人有權有勢。</verse>
				<verse number="2">𠊎欣慕該兜死掉个人，佢等比還生个人較幸福。</verse>
				<verse number="3">總係，吂出世、吂看過日頭下所發生無公平个事个人，比以上兩種人還較幸福。</verse>
				<verse number="4">𠊎又發現：人勞碌工作，追求功名，係因為愛㧯鄰舍競爭。這也係空虛，也係捉風。</verse>
				<verse number="5">有人講：「戇人閒亍亍，餓死自家。」</verse>
				<verse number="6">總係，一手捧滿滿，平安享受，贏過雙手捧滿滿，勞碌捉風。</verse>
				<verse number="7">𠊎又看到日頭下有兜空虛个事：</verse>
				<verse number="8">有人孤單一儕，無孻仔，也無兄弟，總係歸日勞碌，自從毋識滿足所得到个財富。佢講：「𠊎辛辛苦苦，犧牲享受，到底係為麼人呢？」這也係空虛，也當衰過。</verse>
				<verse number="9">兩儕比一儕較好，因為兩儕合作效果較好。</verse>
				<verse number="10">一儕跌倒，另外一儕做得扶佢䟘起來。若係孤單一儕，跌倒个時無人扶佢䟘起來，佢就當衰過了。</verse>
				<verse number="11">兩儕共下睡較燒暖，一儕自家睡樣會燒呢？</verse>
				<verse number="12">兩儕團結能打贏一儕个攻擊，單獨一儕抵抗就無把扼。三股个索仔無恁遽拉斷。</verse>
				<verse number="13">對監獄出來个後生人有可能做王，出身窮苦个也有可能做王 ；窮苦總係有智慧个後生人，贏過年老个時毋肯接受勸話个戇檔王。</verse>
				<verse number="14"></verse>
				<verse number="15">𠊎發現住在這世間，有一大群人跈等該 後生人活動；佢䟘起來做王，將舊王換掉。</verse>
				<verse number="16">這個新王雖然有辦法管理盡多个人民；總係後來个人還係毋滿意佢个統治。這也係空虛，也係捉風。</verse>
			</chapter>
			<chapter number="5">
				<verse number="1">你到上帝个聖殿去，愛謹慎自家个腳步。行前去聽從上帝，較贏該兜無明白是非个戇仔所獻个祭。</verse>
				<verse number="2">你開嘴前愛先想一下，毋好隨便向上帝許願。佢在天頂，你在地上，所以你毋使講恁多話。</verse>
				<verse number="3">事情多，夢就多；講多，戇話就走出來。</verse>
				<verse number="4">你向上帝許願，愛遽遽還願；因為佢無歡喜戇人，所以你許願就愛還願。</verse>
				<verse number="5">許願毋還，就莫許願較好。</verse>
				<verse number="6">毋好俾你自家个話害你犯罪，也毋好到上帝个祭司 面前講你許毋著願了。做麼介惹上帝發譴呢？做麼介俾佢毀壞你手所做个工作呢？</verse>
				<verse number="7">發夢多，講話多，全部係空虛；你只愛敬畏上帝。</verse>
				<verse number="8">你看到政府欺負窮苦人，無用公道款待佢等，毋尊重佢等个權利，你毋使恁著驚。逐個官員全部有比佢地位較高个在保護佢，佢等逐儕也愛受還較高个官員个保護。</verse>
				<verse number="9">無論人民抑係君王，全部愛靠田地个出產來得利益 。</verse>
				<verse number="10">愛錢个人毋會滿足佢个財富；想愛發財个人毋會滿足佢个收入。這也係空虛。</verse>
				<verse number="11">你越好額，靠你食飯个人越多。你个錢財對你有麼介利益呢？俾你看定定。</verse>
				<verse number="12">勞動个人無論食多食少，還係當好睡；有錢人个豐富顛倒害佢睡毋落覺。</verse>
				<verse number="13">在日頭下𠊎看到一件悲慘个事：有人積存錢財，反轉害到自家。</verse>
				<verse number="14">事業做無順，了掉財富，結果無財產留給子孫。</verse>
				<verse number="15">佢赤身露體出母胎，也愛赤身露體倒轉去。無論在世樣般勞碌，麼介東西也帶毋走。</verse>
				<verse number="16">這也係當悲慘个事。來个時樣般，去个時也樣般。操心勞苦去捉風，到底有麼介價值呢？</verse>
				<verse number="17">總係，佢一生人在烏暗、憂愁中，有當多操煩、病痛、㧯發閼。</verse>
				<verse number="18">𠊎个看法係：美好个人生就係在上帝所賜短暫个一生中有好食，有好啉，享受在日頭下勞碌得个成果；這就係人个命運。</verse>
				<verse number="19">若係上帝賜給人錢財產業，俾佢享受，佢就應當接受這個福份，在勞碌中歡喜快樂。這係上帝个恩賜。</verse>
				<verse number="20">既然上帝俾佢恁歡喜快樂，佢毋使緊愁自家一生个年日。</verse>
			</chapter>
			<chapter number="6">
				<verse number="1">𠊎發現在日頭下有一項悲慘个事重重磧在人身上。</verse>
				<verse number="2">上帝賜給某人錢財、產業㧯好名聲，佢想愛个無欠一項，總係上帝無俾佢享受，反轉俾生份人享受。這係空虛，也係當悲慘个事。</verse>
				<verse number="3">若係有人𫱔一百個子女，在世長壽，總係無享受到麼介福份，死後又無得到安葬；𠊎想，該落胎个孲𤘅仔還比佢較贏。</verse>
				<verse number="4">落胎个孲𤘅仔還吂出世就恬恬仔走掉，無人記得佢。</verse>
				<verse number="5">佢無看過日頭，麼介也毋知；總係佢比該人較平安。</verse>
				<verse number="6">該無享受到福氣个人，就算食兩千歲，到尾敢毋係也愛去共一個所在嗎？</verse>
				<verse number="7">人為到口腹勞碌，總係佢个肚笥毋會滿足。</verse>
				<verse number="8">聰明人比戇檔人有麼介較贏呢？窮人在眾人面前知樣般㧯人交往有麼介好處呢？</verse>
				<verse number="9">目珠看到个比心肚妄想个較贏。這也係空虛，係捉風。</verse>
				<verse number="10">所有存在个東西早就已經安名了；𠊎等知人係麼介 ，佢無法度㧯比自家較強大个相爭。</verse>
				<verse number="11">因為話越多就越空虛，對人有麼介好處呢？</verse>
				<verse number="12">在這短暫、空虛、就像影仔經過个人生中，麼人知對佢最有價值个事係麼介呢？佢死後世間會發生麼介事，敢有人能㧯佢講？</verse>
			</chapter>
			<chapter number="7">
				<verse number="1">好名聲贏過貴重个香水； 死日比生日較重要。</verse>
				<verse number="2">去喪家贏過去辦喜事个家庭； 因為死係逐個人个結局， 生人愛將這事放在心肚。</verse>
				<verse number="3">憂傷贏過歡笑； 面項雖然帶等愁容， 總係人心會得到好處。</verse>
				<verse number="4">智慧人較愛去喪家； 戇人只想去快樂个家。</verse>
				<verse number="5">聽智慧人个責備， 贏過聽戇人个讚美。</verse>
				<verse number="6">戇人个笑聲， 就像竻仔在鑊頭下燒个嗶啪聲。 這也係空虛。</verse>
				<verse number="7">智慧人詐欺別人个時， 佢就變做戇人。 收買人會敗壞人心。</verse>
				<verse number="8">好頭不如好尾。 忍耐贏過驕傲。</verse>
				<verse number="9">你个心毋好著急到發譴； 受氣留在戇人个心胸。</verse>
				<verse number="10">毋好講： 「做麼介頭擺个日仔比這下較好過？」 恁樣問係無智慧个。</verse>
				<verse number="11">智慧㧯祖產共樣盡好， 對生人盡有價值。</verse>
				<verse number="12">智慧㧯金錢共樣會庇蔭人。 總係智慧會保全智慧人个生命； 這就係有智識个好處。</verse>
				<verse number="13">愛思想上帝个作為。佢拗彎个，麼人做得使它變直呢？</verse>
				<verse number="14">事事順利个時，你愛歡喜快樂；患難个時，毋好毋記得：喜樂㧯患難攏總有上帝个旨意。無人知將來个事會變做樣般。</verse>
				<verse number="15">在空虛个人生𠊎看過盡多个事。好人行善，反轉早死；壞人作惡，顛倒長壽。</verse>
				<verse number="16">行善毋好過頭，也毋好聰明過頭，害到自家有麼介好處呢？</verse>
				<verse number="17">毋好緊做壞事，也毋好做戇人，恁早死做麼介呢？</verse>
				<verse number="18">敬畏上帝个人這兩項原則攏總愛遵守，毋好單單守一項。</verse>
				<verse number="19">智慧給人个能力贏過城肚十個官員个能力。</verse>
				<verse number="20">世上無好人一直行善又毋識犯過罪。</verse>
				<verse number="21">毋好將別人个話全部放在心肚；驚怕你會聽到僕人咒罵你。</verse>
				<verse number="22">因為你心肚知，你也識輒輒咒罵別人。</verse>
				<verse number="23">𠊎識用𠊎个智慧試過這所有个事。𠊎決心尋求智慧，總係智慧還係離𠊎當遠。</verse>
				<verse number="24">麼人做得尋出生命个意義呢？這係忒深，當難了解。</verse>
				<verse number="25">𠊎一心一意愛知、愛研究、愛尋智慧㧯萬事个理由；𠊎又愛了解邪惡、無知、戇檔㧯癲狂。</verse>
				<verse number="26">𠊎發現該婦人家 比死還較得人驚：姖个愛情像陷阱、像羅網；姖个手像鎖鍊恁樣揇等你。上帝所歡喜个人就會脫離姖个手，總係有罪个人會被姖纏到。</verse>
				<verse number="27">傳道者 講：這係𠊎尋答案个時，一些一些仔發現出來个。</verse>
				<verse number="28">𠊎想愛尋出其他个答案，總係尋毋到。有人講： 「在一千個男人中，𠊎尋到一個正直个人，總係在女人中，一個也尋毋到。」</verse>
				<verse number="29">總係，𠊎所學到个只有一件事：上帝所造个人本來係正直个，總係佢等想出盡多詭計。</verse>
			</chapter>
			<chapter number="8">
				<verse number="1">麼人像智慧人呢？ 麼人知事情个意義？ 人个智慧使佢个面會發光， 也使佢个氣質改變。</verse>
				<verse number="2">愛遵守王个命令；這係你向上帝許願過个。</verse>
				<verse number="3">毋好隨便離開王个面前，也毋好㧯佢作對，因為王做得隨意做事。</verse>
				<verse number="4">王个話當有權柄，麼人敢問佢講「你做麼介？」</verse>
				<verse number="5">遵從佢个命令，正有安全。聰明人知做事个時機㧯方法。</verse>
				<verse number="6">雖然人个苦難重重壓在佢个身項，各樣事全部有適當个時機㧯方法。</verse>
				<verse number="7">無人知將來會發生麼介事，也無人有辦法㧯佢講。</verse>
				<verse number="8">無人做得掌管生命个氣，也無人做得決定自家个死期；因為生死係人無法閃開个戰爭；壞人用邪惡乜無法救自家。</verse>
				<verse number="9">日頭下發生个一切事，𠊎全部有去看，也用心研究。有兜人有權有勢，另外有兜人被佢等管到盡艱苦。</verse>
				<verse number="10">𠊎看到壞人死後還係得到埋葬。佢等生前出入聖所；死後𠊎聽到人在佢等作惡个所在誐𧩣佢等 。這也係空虛。</verse>
				<verse number="11">做麼介世間人恁大膽犯罪？因為罪無黏時受到刑罰。</verse>
				<verse number="12">罪人雖然犯罪一百擺，還係食到盡長命，𠊎確實相信：「敬畏上帝个人會凡事順利；</verse>
				<verse number="13">總係作惡个人無福氣。佢等个生命像影仔；佢等會夭折，因為佢等毋敬畏上帝。」</verse>
				<verse number="14">世間還有一件空虛个事：有時，義人受到壞人應該受个責罰；壞人反轉得到義人應得个報賞。𠊎講，這也係空虛。</verse>
				<verse number="15">所以，𠊎認為人應該享樂；因為在日頭下佢所有个歡樂就係啉食㧯享受。這係人在上帝所賜短暫个生命中，勞碌所得到个一些仔享受。</verse>
				<verse number="16">𠊎專心追求智慧，想愛研究世間所發生个事，該時𠊎知，人就算日夜思想，</verse>
				<verse number="17">也無辦法明白上帝个作為。佢無論樣般研究，想愛知在日頭下所發生个事，也尋毋到答案。智慧人恅到自家盡知，其實並毋知。</verse>
			</chapter>
			<chapter number="9">
				<verse number="1">𠊎一直研究這一切，看出義人㧯智慧人並佢等个行為全部在上帝个手中；到底係愛惜抑係怨恨，乜無人知。</verse>
				<verse number="2">所有个事全部係空虛 ，因為逐儕有共樣个命運：無論係義人抑係不義个人，好人抑係壞人，虔誠个抑係無虔誠个，獻祭个抑係無獻祭个，全部共樣。好人所堵到个無一定比罪人好；發誓个無一定比驚發誓个較好。</verse>
				<verse number="3">逐儕个命運共樣；這也係日頭下所發生一件無公當个事。人還生个時，心肚充滿邪惡㧯癲狂，到尾全部死掉。</verse>
				<verse number="4">無論麼人，還生个至少還有希望；還生个狗仔比死掉个獅仔較好。</verse>
				<verse number="5">還生个人知佢等會死；死掉个人麼介都毋知。佢等毋會再得到獎賞；佢等个名無人會記得。</verse>
				<verse number="6">佢等个愛惜、怨恨、還有嫉妒，攏總㧯佢等共下消失。在日頭下所發生个事，佢等永遠無份了。</verse>
				<verse number="7">去啊，歡歡喜喜去食飯，快快樂樂去啉酒；因為上帝已經歡喜接納你个工作。</verse>
				<verse number="8">愛著白淨个衫褲，頭那愛常常膏油。</verse>
				<verse number="9">盡你一生空虛个日仔，就係上帝賜給你在日頭下个日仔，㧯你所惜个𡜵娘享受人生个快樂，因為這係你在日頭下勞碌所應該得个福份。</verse>
				<verse number="10">你無論做麼介事，愛煞猛做；因為你所愛去个陰間無工作，無計劃，無智識，也無智慧。</verse>
				<verse number="11">𠊎又發現一件事：在日頭下，盡會走个人無一定得獎，勇士無一定打贏，智慧人無一定有飯食，精明人無一定好額，有學問个人無一定坐大位。時機㧯運氣決定一切。</verse>
				<verse number="12">無人知自家个時機㧯運氣。就像魚仔被魚網網到，鳥仔被網仔捉到，全無想到个時，壞運忽然臨頭。</verse>
				<verse number="13">𠊎又看到日頭下一件有關智慧个事，感覺當有意思。</verse>
				<verse number="14">有一座無幾多人住个細城，有一個強國个王來攻擊；佢包圍該城，起高高个土堆來攻打，準備破城。</verse>
				<verse number="15">城肚有一個人當苦，總係當有智慧，佢用智慧解救該城。總係，無人紀念佢。</verse>
				<verse number="16">𠊎常常講，智慧贏過武力，總係窮人个智慧受藐視，佢个話無人愛聽。</verse>
				<verse number="17">其實，聽智慧人細聲講幾句話，贏過聽戇檔个統治者大聲喊。</verse>
				<verse number="18">智慧會比武器有更大个成就；總係一個罪人會破壞盡多好事。</verse>
			</chapter>
			<chapter number="10">
				<verse number="1">死烏蠅使歸罌个香水臭掉； 一些仔戇檔會破壞智慧㧯尊榮。</verse>
				<verse number="2">智慧人个心肝正直； 戇檔人个心思偏差。</verse>
				<verse number="3">戇檔人連行路个時也無定性， 大家一下就看出佢个戇檔。</verse>
				<verse number="4">若係掌權者對你發譴，毋好離開你个職位； 你若冷靜溫和，就算嚴重个過失也會得到赦免。</verse>
				<verse number="5">𠊎又看到日頭下一件無公當个事， 這係統治者个毋著：</verse>
				<verse number="6">佢俾盡多戇檔人坐高位； 富足个人反轉坐低位。</verse>
				<verse number="7">𠊎看到奴才騎馬， 王子反轉像奴才行路。</verse>
				<verse number="8">挖陷阱个，自家有可能跌落去； 拆圍牆个，有可能被毒蛇咬到。</verse>
				<verse number="9">打石个，有可能被石頭傷到； 剖柴个，有可能被柴析打傷。</verse>
				<verse number="10">斧頭鈍掉若無磨利，就愛使較大力； 用智慧做事，正會成功。</verse>
				<verse number="11">吂唸咒就被蛇咬到， 恁樣唸咒有麼介用呢？</verse>
				<verse number="12">智慧人个話帶來恩惠； 戇檔人个話害死自家。</verse>
				<verse number="13">戇檔人一開嘴就講戇話， 講到尾係害人个癲話。</verse>
				<verse number="14">戇檔人講當多話； 總係人毋知將來會有麼介事， 佢過身以後个事麼人有辦法㧯佢講呢？</verse>
				<verse number="15">戇檔人拚命做事， 連入城个路也毋知。</verse>
				<verse number="16">君王還細，大臣打早就宴樂， 國家就有災禍了。</verse>
				<verse number="17">君王係尊貴个人， 官員照時啉食補充體力，毋會酒醉， 該國家就有福氣了。</verse>
				<verse number="18">因為懶尸，屋頂會落掉； 因為手懶，屋就會漏。</verse>
				<verse number="19">擺筵席使人歡笑， 食美酒使人快樂， 有錢能使萬事通。</verse>
				<verse number="20">毋好批評君王，心肚怪怨也做毋得； 連在房間肚也做毋得咒罵有錢人。 空中个鳥仔會將你个話傳出去， 有翼胛个會將你个話報出來。</verse>
			</chapter>
			<chapter number="11">
				<verse number="1">愛將你个糧食委在水面 ， 因為將來會收轉來。</verse>
				<verse number="2">愛將你个額分做七份，抑係八份， 因為你毋知在這世上會堵到麼介災禍。</verse>
				<verse number="3">樹仔無論向南向北橫下， 橫到㖠位，就放在該位。 雲个水氣充足，雨就落下來。</verse>
				<verse number="4">若係你愛等風調雨順正來耕種， 你就毋使委種，你也毋會有好收割。</verse>
				<verse number="5">風吹个路線你毋知；你也無辦法知孲𤘅 樣般在婦人家个肚笥成形；你還較無辦法明白創造萬物个上帝樣般工作。</verse>
				<verse number="6">你朝晨暗晡全部愛去委種；因為你毋知所委个種係毋係全部會生，也毋知朝晨頭委个會比暗晡頭委个較好，抑係共樣。</verse>
				<verse number="7">光係盡好，看得到日光係樣般快樂啊！</verse>
				<verse number="8">人食幾多歲，就做得享受幾多年。總係愛記得，死後个烏暗還較長。將會來个事全部係空虛。</verse>
				<verse number="9">後生人哪，快樂過你个青春！趕還後生歡喜快樂啊！照你心所想㧯目珠所看个去做你歡喜个事！總係愛記得，上帝愛照你所有个行為審判你。</verse>
				<verse number="10">所以你愛對心肚除掉煩勞，對肉體除掉痛苦，因為後生㧯青春係空虛个。</verse>
			</chapter>
			<chapter number="12">
				<verse number="1">趕你還後生、衰老个日仔還吂到， 就係你講：「做人全無生趣」 該兜年日吂到以前， 愛記得創造你个主。</verse>
				<verse number="2">日頭、光明、月光、星辰還吂變烏暗， 雨後个雲還吂倒轉來个時， 你愛記得佢。</verse>
				<verse number="3">該時，掌屋个人會愊愊掣， 強壯个人也會變痀腰； 挨磨石个婦女減少致到停工， 對窗門看出去个會矇矇看毋清楚 。</verse>
				<verse number="4">街路个門全部關等 ； 挨磨石个聲抑係細阿妹仔唱歌个聲緊來緊細聲。 總係屋簷鳥一出聲，人就醒。</verse>
				<verse number="5">人毋敢上較高个所在， 也當驚路項个危險。 冷天杏樹開白花， 草蜢跳毋挺動 ， 人無半點性慾、全無辦法了。 逐儕全部緊來緊近永遠个家鄉， 該時，送葬个人會在街項來來去去。</verse>
				<verse number="6">到該時，就像銀鍊仔挷斷掉， 金碗打爛掉， 泉水滣个水罌仔打爛掉， 天車也在井堘㧹爛掉，</verse>
				<verse number="7">人个身體會歸還泥土， 靈魂會歸轉賜生命个上帝。</verse>
				<verse number="8">傳道者 講：空虛，空虛，萬事全部係空虛。</verse>
				<verse number="9">傳道者毋單淨自家有智慧，佢還繼續將智識教導人民。佢研究、考查並編集盡多箴言。</verse>
				<verse number="10">傳道者尋出激勵人心个話，用心將事實寫下來。</verse>
				<verse number="11">智慧人所講个話會責備、管教人，就像有竻个牧杖；佢等編集个箴言就像釘到𢫮𢫮个釘仔恁堅固，全部係大牧者上帝所賜个。</verse>
				<verse number="12">後生人 啊，還有一件事你愛留意：寫書永遠寫毋會掉；書讀忒多，身體會當𤸁。</verse>
				<verse number="13">𠊎个話全部講煞了，總講一句：愛敬畏上帝，謹守佢个命令，因為這係逐個人應該盡个義務。</verse>
				<verse number="14">𠊎等所做个一切，無論好壞，連囥等無人知个事，上帝全部愛審判。</verse>
			</chapter>
		</book>
		<book number="22">
			<chapter number="1">
				<verse number="1">所羅門 个詩歌 ，係詩歌中最靚个詩歌。</verse>
				<verse number="2">願佢用佢个嘴唇唚𠊎！ 你个愛情比好酒較香。</verse>
				<verse number="3">你个身體有香膏个香味； 你个名像香膏發出清香， 當然細妹仔全部恁愛慕你。</verse>
				<verse number="4">願你牽等𠊎，𠊎等遽遽來去走； 做𠊎个君王，𢱋𠊎入你个間房。 𠊎等愛共下來享受歡喜快樂； 有你个愛情，𠊎較贏享受好酒。 難怪細妹仔全部恁愛慕你！</verse>
				<verse number="5">耶路撒冷 个細妹仔啊， 𠊎雖然較烏，總係當靚 ， 像 基達 个烏羊毛帳篷， 像 所羅門 宮中个布簾。</verse>
				<verse number="6">毋好因為𠊎恁烏就看輕𠊎， 係日頭將𠊎曬到恁烏个啊！ 因為𠊎共𡟓个兄弟向𠊎發譴， 䌠𠊎在葡萄園工作， 𠊎連自家个葡萄園 卻無照顧到！</verse>
				<verse number="7">𠊎个愛人啊，請㧯𠊎講， 你在㖠位掌羊？ 當晝在㖠位俾羊歇睏？ 𠊎做麼介愛在你同伴个羊群塍， 像揞等面紗个人緊尋你呢？</verse>
				<verse number="8">最靚个細妹仔啊， 你若毋知該所在， 跈羊群个腳跡去， 在掌羊个帳篷堘， 俾你个山羊食草。</verse>
				<verse number="9">𠊎个情妹啊， 你像 埃及 王戰車个駿馬恁靚。</verse>
				<verse number="10">你兩片个面頰卵因為掛耳環非常靚， 頸筋戴等脖鍊也盡靚。</verse>
				<verse number="11">𠊎等來為你打金鍊仔， 為你鑲銀仔个妝飾品。</verse>
				<verse number="12">𠊎个君王坐席个時， 𠊎个香水發出香味。</verse>
				<verse number="13">𠊎个情郎常常靠在𠊎个胸前； 佢就像𠊎帶等一袋沒藥恁香。</verse>
				<verse number="14">𠊎个情郎像一串鳳仙花， 開在 隱‧基底 个葡萄園肚。</verse>
				<verse number="15">𠊎个情妹啊，你實在非常靚！ 你个目珠像月鴿仔恁溫柔。</verse>
				<verse number="16">情郎啊，你當斯文，當得人惜！ 𠊎等做得用青草來準眠床，</verse>
				<verse number="17">用香柏樹做屋頂个棟樑， 用松樹準做屋頂个桷仔。</verse>
			</chapter>
			<chapter number="2">
				<verse number="1">𠊎係 沙崙 个玫瑰花， 係山壢肚个百合花。</verse>
				<verse number="2">𠊎个情妹在該兜細妹仔當中， 就像竻藪肚个一蕊百合花。</verse>
				<verse number="3">𠊎个情郎在男人當中， 就像樹林肚个蘋果樹； 𠊎歡喜坐在它个樹影下， 它个果子當甜，合𠊎口味。</verse>
				<verse number="4">佢帶𠊎入佢宴會个廳下， 在𠊎頂高有愛情个旗仔。</verse>
				<verse number="5">求你用葡萄乾來補𠊎个元氣， 也用蘋果來恢復𠊎个精神， 因為𠊎著到相思病噢！</verse>
				<verse number="6">佢用左手托等𠊎个頭那， 用右手揇等𠊎。</verse>
				<verse number="7">耶路撒冷 个細妹仔啊，請答應𠊎， 請指等羚羊㧯鹿乸發誓； 莫吵𠊎等，毋好㩢耍𠊎等， 俾𠊎等个愛情自由發展 。</verse>
				<verse number="8">聽啊！𠊎情郎个聲！ 看啊！佢攀山過嶺向𠊎走來。</verse>
				<verse number="9">𠊎个情郎像羚羊，像細鹿仔。 佢企等，在𠊎屋下个壁後背； 佢對窗門外背看入來， 對窗格仔向底背偷看。</verse>
				<verse number="10">𠊎个情郎㧯𠊎講話： 䟘起來噢，𠊎个情妹啊！ 𠊎个美人，㧯𠊎共下來去噢！</verse>
				<verse number="11">你看，寒冬已經過掉了； 落雨个時節也過掉了。</verse>
				<verse number="12">在野外百花已經盡開； 鳥仔唱歌个時節到了， 田野聽得到班鳩个聲。</verse>
				<verse number="13">無花果開始熟了； 葡萄樹也開花發出香味了。 䟘起來噢，𠊎个情妹啊！ 𠊎个美人，㧯𠊎共下來去噢！</verse>
				<verse number="14">𠊎个月鴿仔啊，你離𠊎恁遠， 像在巖石个窿肚一樣； 俾𠊎看你个面， 俾𠊎聽你个聲； 因為你个面盡靚， 你个聲乜當好聽。</verse>
				<verse number="15">愛捉狐狸，就係該兜毀壞葡萄園个細狐狸 ， 因為𠊎个葡萄樹堵堵當開花！</verse>
				<verse number="16">𠊎个情郎屬𠊎，𠊎也屬佢。 佢在百合花當中掌羊仔，</verse>
				<verse number="17">等到清早个涼風吹來， 烏暗漸漸仔離開个時。 𠊎个情郎啊，好轉去了， 就像 比特 山頂 个羚羊、 抑係細鹿仔走等轉去。</verse>
			</chapter>
			<chapter number="3">
				<verse number="1">𠊎暗晡頭睡在眠床頂， 尋𠊎个愛人； 𠊎尋佢，總係尋毋到。</verse>
				<verse number="2">𠊎想：「𠊎愛䟘起來行透該城， 穿過大街小巷， 去尋𠊎个愛人。」 𠊎尋佢，總係尋毋到。</verse>
				<verse number="3">城肚該兜巡邏掌更个人堵到𠊎， 𠊎就問：「你等有看到𠊎个愛人麼？」</verse>
				<verse number="4">𠊎一離開佢等，就尋到佢。 𠊎將佢拉等，毋肯放佢走， 一直帶佢入吾姆个屋下， 最尾入到𠊎出世个房間。</verse>
				<verse number="5">耶路撒冷 个細妹仔啊，請答應𠊎， 請指等羚羊㧯鹿乸發誓； 莫吵𠊎等，毋好㩢耍𠊎等， 俾𠊎等个愛情自由發展。</verse>
				<verse number="6">該對曠野上來，看像煙柱， 用生理人賣个乳香㧯沒藥薰到香香个，係麼人呢？</verse>
				<verse number="7">看哪，該係 所羅門 个轎仔， 四圍有六十個士兵保護， 係 以色列 最優秀个勇士。</verse>
				<verse number="8">佢等全部當會使劍； 佢等攏總當會相㓾。 逐儕腰間佩帶利劍， 防備暗晡頭个危險。</verse>
				<verse number="9">所羅門 王用 黎巴嫩 个樹仔， 為自家製造轎仔。</verse>
				<verse number="10">轎仔个柱仔用銀仔做个， 轎底 用金仔做个； 坐墊用紫色个料仔做个， 係 耶路撒冷 細妹仔用愛情織起來个。</verse>
				<verse number="11">錫安 个細妹仔啊，來看 所羅門 王！ 佢頭那戴等冠冕， 係佢結婚該日， 佢歡喜快樂該日， 厥姆為佢戴个。</verse>
			</chapter>
			<chapter number="4">
				<verse number="1">𠊎个情妹啊，你實在非常靚！ 你个目珠在面紗後背像月鴿仔恁溫柔。 你个頭那毛像一群烏山羊， 對 基列 山頂緊行等下來个樣。</verse>
				<verse number="2">你个牙齒像正剪過毛个羊， 全部洗到白淨白淨上來； 它兜雙雙對對排等， 一支牙齒都無缺掉。</verse>
				<verse number="3">你个嘴唇像紅色个絲帶， 開嘴講話个時盡得人惜。 你兩片个面頰卵在面紗後背， 紅潤到像分做兩析个石榴。</verse>
				<verse number="4">你个頸筋像 大衛 个高塔， 起到當堅固又非常高貴； 你个頸筋所掛等个脖鍊， 就像歸千隻勇士个盾牌。</verse>
				<verse number="5">你个兩粒乳菇像一對細鹿仔， 像雙生个羚羊在百合花當中食草。</verse>
				<verse number="6">𠊎愛去沒藥山， 到乳香岡頂高， 等到清早个涼風吹來， 烏暗漸漸仔離開个時。</verse>
				<verse number="7">𠊎个情妹啊，你實在盡靚！ 你完全無一些缺點！</verse>
				<verse number="8">𠊎个新娘啊，請㧯𠊎共下離開 黎巴嫩 山， 㧯𠊎共下對 黎巴嫩 下來 。 請你遽遽對 亞瑪拿 个山頂， 對 示尼珥 山㧯 黑門 山下來， 就係獅仔㧯豹仔住个所在。</verse>
				<verse number="9">𠊎个阿妹 ，𠊎个新娘啊， 你个目珠一打眼拐， 你頸筋个脖鍊一搖， 𠊎个魂就被你鉤走了！</verse>
				<verse number="10">𠊎个阿妹，𠊎个新娘啊， 你个愛情實在盡甜。 你个愛情比酒還較香； 你膏油个香味贏過所有个香料。</verse>
				<verse number="11">𠊎个新娘，你个嘴唇甜到像蜂糖； 你个舌乸有蜂糖㧯乳个味道。 你衫褲个香氣像 黎巴嫩 个香氣。</verse>
				<verse number="12">𠊎个阿妹，𠊎个新娘， 你像係鎖等个花園、 圍等个井、封掉个泉源。</verse>
				<verse number="13">園中果子樹盡多， 有石榴樹結盡靚个果子； 有鳳仙花、哪噠樹，</verse>
				<verse number="14">有哪噠、番紅花、菖蒲、肉桂， 㧯逐樣乳香木， 還有沒藥、沉香， 㧯各種高貴个香料。</verse>
				<verse number="15">你係園中个泉水， 係湧出个井水， 係對 黎巴嫩 山流下來个溪水。</verse>
				<verse number="16">北風啊，好醒了， 南風啊，吹入𠊎个花園來， 使空氣充滿香味。 願𠊎个情郎入到佢个園中， 食園肚最好个果子。</verse>
			</chapter>
			<chapter number="5">
				<verse number="1">𠊎个阿妹，𠊎个新娘， 𠊎入到𠊎个園中， 摘沒藥㧯香料， 食𠊎个蜂房㧯蜂糖， 啉𠊎个酒㧯乳。 愛人哪，食啊！啉啊！ 直到你等醉在愛情中！</verse>
				<verse number="2">𠊎雖然睡等，總係心還無睡； 𠊎聽到𠊎个情郎搉門： 𠊎个阿妹，㧯𠊎開門啊， 𠊎完美个情妹，𠊎个月鴿仔啊！ 𠊎滿頭那露水； 頭那毛被暗晡時个露水打濕了。</verse>
				<verse number="3">𠊎已經脫衫了， 樣愛𠊎䟘起來著轉去呢？ 𠊎个腳已經洗淨浰囉， 樣好過打垃圾呢？</verse>
				<verse number="4">𠊎个情郎對門縫伸手入來， 𠊎个心就搏搏跳。</verse>
				<verse number="5">𠊎䟘起來開門俾情郎入來； 𠊎揢等門閂， 𠊎个雙手有沒藥流下來， 沒藥汁對手指頭滴等下。</verse>
				<verse number="6">𠊎為𠊎个情郎開門， 總係佢已經走掉去了。 看毋到佢，𠊎無葛無煞 ！ 𠊎緊尋佢，總係尋毋到； 𠊎緊喊佢，總係佢無應。</verse>
				<verse number="7">城肚巡邏掌更个人堵到𠊎； 佢等就打𠊎，將𠊎打到著傷； 掌城牆个將𠊎个外衫搶走。</verse>
				<verse number="8">耶路撒冷 个細妹仔啊，請答應𠊎！ 若係你等看到𠊎个情郎， 請㧯佢講，𠊎發相思病了。</verse>
				<verse number="9">你這在細妹仔當中最靚个啊， 你个情郎比別人个敢有較好？ 佢到底有麼介特別个所在呢？ 𠊎等樣般愛答應你个要求呢？</verse>
				<verse number="10">𠊎个情郎緣投又健康， 在萬人中無人比抑得。</verse>
				<verse number="11">佢个頭那像純金； 佢个頭那毛像波浪， 像烏鴉恁烏。</verse>
				<verse number="12">佢个目珠像溪水滣个月鴿仔， 在乳汁當中洗身，企在溪水滣。</verse>
				<verse number="13">佢个面頰卵像歸廂个香花， 也像歸臺个香草。 佢个嘴唇像百合花， 滴下沒藥汁。</verse>
				<verse number="14">佢个雙手像金仔做个管仔， 鑲等寶石。 佢个身體像光滑个象牙， 鑲等藍寶石。</verse>
				<verse number="15">佢个雙腳像白玉柱， 安在純金个座臺頂。 佢个外貌像 黎巴嫩 山恁雄壯， 也像香柏樹恁竳線。</verse>
				<verse number="16">佢个嘴唚起來盡甜； 佢實在當得人惜噢！ 耶路撒冷 个細妹仔啊， 佢就係𠊎个情郎，𠊎个朋友！</verse>
			</chapter>
			<chapter number="6">
				<verse number="1">細妹仔當中最靚个， 你个情郎走㖠位去？ 你个情郎對㖠條路去， 𠊎等好㧯你共下去尋佢。</verse>
				<verse number="2">𠊎个情郎去自家个園肚 ， 花園當開等香花。 佢在園肚掌羊仔， 摘百合花。</verse>
				<verse number="3">𠊎屬𠊎个情郎，吾情郎也屬𠊎； 佢在百合花當中掌羊仔。</verse>
				<verse number="4">𠊎个情妹，你像 得撒 恁靚！ 也像 耶路撒冷 恁得人惜！ 像擎大旗个軍隊恁威風！</verse>
				<verse number="5">你个目珠莫恁樣緊看𠊎， 因為會害𠊎心肝亂躁躁。 你个頭那毛像一群烏山羊， 對 基列 山頂緊行等下來个樣。</verse>
				<verse number="6">你个牙齒像正剪過毛个羊， 全部洗到白淨白淨上來； 它兜雙雙對對排等， 一支牙齒都無缺掉。</verse>
				<verse number="7">你兩片个面頰卵在面紗後背， 紅潤到像分做兩析个石榴。</verse>
				<verse number="8">君王有王后六十個，嬪妃八十個， 還有無數个宮女。</verse>
				<verse number="9">總係𠊎只有愛𠊎情妹一儕； 姖像月鴿仔恁得人惜。 姖係厥姆獨一个寶貝， 厥姆最惜个。 該兜細妹仔看到姖全部講姖當有福氣； 該兜王后㧯嬪妃也攏總讚美姖。</verse>
				<verse number="10">該出現就像朝晨頭个光係麼人呢？ 像月光恁靚！像日頭恁光！ 像擎大旗个軍隊恁威風！</verse>
				<verse number="11">𠊎下去到杏樹園， 愛巡山壢肚个樹秧， 看葡萄樹綻筍吂， 看石榴樹開花吂。</verse>
				<verse number="12">毋多知仔，𠊎心所想个使𠊎就像勇士盡趕戰車愛去上戰場。</verse>
				<verse number="13">轉來啊，轉來啊， 書拉蜜 个細妹仔啊， 轉來 俾𠊎等看到你。 你等做麼介愛緊看等𠊎這 書拉蜜 个細妹仔啊， 就像𠊎在兩隊人中間跳舞呢？</verse>
			</chapter>
			<chapter number="7">
				<verse number="1">像公主恁高貴个細妹仔啊， 你著涼鞋个腳實在非常靚！ 你圓滑个腳髀像寶貝个玉石， 絕對係藝術家傑出个作品！</verse>
				<verse number="2">你个肚臍當像圓酒杯， 底背裝等滿滿个好酒。 你个腰身像一堆麥仔， 四周圍有百合花圈等。</verse>
				<verse number="3">你个乳菇像一對細鹿仔， 也像雙生个羚羊。</verse>
				<verse number="4">你个頸筋像象牙塔； 你个目珠像 希實本 城、 巴特‧拉併 門堘个水池。 你个鼻公像對等 大馬士革 城个 黎巴嫩 塔。</verse>
				<verse number="5">你个頭那在你身上像 迦密 山； 你个頭那毛烏金烏金， 君王 个心已經被它迷到了。</verse>
				<verse number="6">你實在盡靚，實在得人惜！ 親愛个啊，你 俾𠊎歡喜快樂！</verse>
				<verse number="7">你个身材像棕樹恁直； 你个乳菇像樹頂歸葩个果子。</verse>
				<verse number="8">𠊎愛爬上棕樹頂去摘果子。 𠊎看你个乳菇像兩串葡萄； 你透出來个氣像蘋果恁香；</verse>
				<verse number="9">㧯你唚嘴就像啉上好个酒。 俾好酒流入𠊎情郎个嘴肚， 流在佢个嘴唇㧯牙齒之間 。</verse>
				<verse number="10">𠊎屬𠊎个情郎； 吾情郎戀慕𠊎。</verse>
				<verse number="11">情郎啊，𠊎等來去野外， 共下在鄉下 該位過夜。</verse>
				<verse number="12">𠊎等愛打早䟘起來，去葡萄園， 看葡萄綻筍、開花吂， 看石榴花開吂； 在該位，𠊎愛將𠊎个愛情獻給你。</verse>
				<verse number="13">你會鼻到催情果个香味； 逐樣上好个果子堆在𠊎等个門口。 𠊎个情郎，無論新个舊个， 𠊎全部為你留等！</verse>
			</chapter>
			<chapter number="8">
				<verse number="1">願你像吾親兄弟， 食過吾姆个乳； 恁樣，𠊎在街項堵到你个時， 㧯你唚嘴，就無人會看輕𠊎。</verse>
				<verse number="2">𠊎愛𢱋你入吾姆个屋下， 俾你來教𠊎愛樣般惜你。 𠊎愛給你啉𠊎石榴做个酒， 這個酒係有摻香料去做个。</verse>
				<verse number="3">佢用左手托等𠊎个頭那， 用右手揇等𠊎。</verse>
				<verse number="4">耶路撒冷 个細妹仔啊，請答應𠊎， 莫吵𠊎等，毋好㩢耍𠊎等， 俾𠊎等个愛情自由發展。</verse>
				<verse number="5">該憑等姖个情郎， 對曠野上來个人係麼人呢？ 在蘋果樹下，𠊎將你喊醒。 在該位，若姆將你𫱔出來， 若姆為到𫱔你忍受痛苦。</verse>
				<verse number="6">求你將𠊎像印仔掛在若胸前， 像禁指印仔戴在若手指項。 愛情就像死恁堅強； 戀情像陰間恁堅固 。 它所爆出來个火花， 就像烈火恁樣盡燒 。</verse>
				<verse number="7">水潑毋烏个愛情， 大水也無法浸掉。 若用全部家產換愛情， 這人 一定會被人藐視。</verse>
				<verse number="8">𠊎等屋下有個老妹， 姖个乳菇還吂發育。 後生人來提親該日， 𠊎等愛樣般正好呢？</verse>
				<verse number="9">姖若係圍牆， 𠊎等愛在圍牆頂起銀塔； 姖若係一扇門， 𠊎等愛用香柏樹枋來圍等姖。</verse>
				<verse number="10">𠊎就係圍牆， 𠊎个乳菇像頂高个高塔。 𠊎个情郎知， 𠊎會帶來 美滿幸福。</verse>
				<verse number="11">所羅門 在 巴力‧哈們 有一垤葡萄園， 佢將這葡萄園租給耕種人； 該兜人逐儕愛納一千隻銀幣。</verse>
				<verse number="12">所羅門 哪，一千隻銀幣歸給你， 兩百隻銀幣歸給耕種个人； 總係𠊎得到𠊎自家个葡萄園！</verse>
				<verse number="13">𠊎个情妹，你住在園中， 朋友全部聽你講話， 求你使𠊎也聽得到你个聲。</verse>
				<verse number="14">𠊎个情郎，遽遽來啊， 像一隻羚羊， 像一隻細鹿仔， 在香草山頂。</verse>
			</chapter>
		</book>
		<book number="23">
			<chapter number="1">
				<verse number="1">烏西雅 、 約坦 、 亞哈斯 㧯 希西家 做 猶大 王 个時， 亞摩斯 个孻仔 以賽亞 看到有關 猶大 㧯 耶路撒冷 个異象。</verse>
				<verse number="2">上主講：「天哪，地啊，全部來聽！𠊎親自扶養𢱋大个子女反轉悖逆𠊎。</verse>
				<verse number="3">牛認識主人，驢仔知主人餵牠个槽；總係𠊎个子民 以色列 毋認識𠊎，毋曉得想！」</verse>
				<verse number="4">嗐！犯罪个國家，罪惡當重个人民，做壞事个種類，敗壞个子女！你等拒絕上主，藐視 以色列 神聖个上帝；你等㧯佢緊來緊生疏。</verse>
				<verse number="5">你等做麼介緊悖逆呢？你等所受个責罰還毋罅麼？ 以色列 啊，你等已經歸頭那著傷，滿心衰弱。</verse>
				<verse number="6">對頭到腳，無一垤好，歸身烏青，全部糜糜。無人㧯你等洗淨，包好，也無人為你等膏藥仔。</verse>
				<verse number="7">你等个土地荒廢；城市被火燒掉。你等看等你等个田地被外族人侵佔、破壞，已經荒淨淨。</verse>
				<verse number="8">只有賸到 鍚安 城 ，連它也被人圍困，像葡萄園肚个茅寮，像瓜田中个草寮，無麼介安全。</verse>
				<verse number="9">若毋係上主 — 萬軍个元帥為𠊎等留兜人个性命，𠊎等早就像 所多瑪 㧯 蛾摩拉 恁樣毀滅了。</verse>
				<verse number="10">耶路撒冷 啊，你等个官長㧯人民就像 所多瑪 㧯 蛾摩拉 个人恁壞。你等愛聽上主个話，愛留心聽𠊎等上帝个教示。</verse>
				<verse number="11">上主講：「你等獻恁多个祭物對𠊎有麼介利益呢？你等所獻燒化祭个羊㧯肥頭牲个油，𠊎已經罅了。你等所獻个牛、羊㧯山羊个血，𠊎全無歡喜。</verse>
				<verse number="12">你等敬拜𠊎个時，麼人㧯你等討這兜頭牲呢？麼人喊你等恁樣做來蹧踏𠊎个聖殿呢？</verse>
				<verse number="13">毋好再獻該兜全無意思个祭物！𠊎無愛再鼻你等所燒个香；𠊎當惱你等初一、安息日㧯宗教个聚會，一片犯罪，一片聚會，𠊎實在無辦法忍受。</verse>
				<verse number="14">𠊎當惱你等初一个祭物㧯各種宗教个節期；它兜成做𠊎个重擔，𠊎無愛再揹了。</verse>
				<verse number="15">「你等擎手祈禱，𠊎無愛看；無論你等祈禱幾多，𠊎全部無愛聽；因為你等雙手血漬漬。</verse>
				<verse number="16">你等愛將自家洗淨浰，毋好俾𠊎再看到你等犯罪，毋好再做壞事！</verse>
				<verse number="17">你等愛學習做好事，伸張正義，幫助被人欺負个，為孤兒伸冤，為寡婦辯護。」</verse>
				<verse number="18">上主講：「來啊，𠊎等來理論！雖然你等个罪像硃紅，會變像雪恁白。雖然你等个罪像胭脂，會變像羊毛恁白。</verse>
				<verse number="19">若係你等願意服從𠊎，就能食地上美好个產物。</verse>
				<verse number="20">若係你等拒絕𠊎，悖逆𠊎，就愛被刀劍㓾掉。𠊎係上主，𠊎恁樣宣佈。」</verse>
				<verse number="21">這城本來係忠貞个，樣會變做妓女！頭擺住等个全部係公平正直个人民，這下只有兇手。</verse>
				<verse number="22">耶路撒冷 啊，你識像純銀，這下變做雜質；你識像美酒，總係這下摻到水。</verse>
				<verse number="23">你个官長悖逆𠊎，㧯賊仔共黨，逐個好拿不義个紅包，硬討禮物；總係毋保護孤兒，也毋代寡婦伸冤。</verse>
				<verse number="24">因為恁樣，至高个上主 — 萬軍个元帥、 以色列 大能个上帝宣佈講：「嗐！𠊎愛向𠊎个對頭報復，向𠊎个仇敵報仇！</verse>
				<verse number="25">𠊎愛對付你等：𠊎愛用火鎔化你等、煉淨你等，愛除掉你等所有个雜質。</verse>
				<verse number="26">𠊎愛重新設立你等个審判官㧯顧問，像頭擺共樣。恁樣， 耶路撒冷 就做得稱做正義㧯忠實个城。」</verse>
				<verse number="27">錫安 會因為上主公平个審判得到拯救；城肚悔改个人會因為佢个公義得到拯救。</verse>
				<verse number="28">總係犯罪㧯悖逆个人佢愛打碎；拒絕上主个人佢愛消滅。</verse>
				<verse number="29">你這兜選地來做神聖花園 、又將中意个橡樹準神明拜个人，一定會堵到見笑、受侮辱。</verse>
				<verse number="30">你等會像葉仔燥掉个橡樹，像無水个花園。</verse>
				<verse number="31">有權勢个人會像鋸屎，佢等所做个像火花；全部會燒到淨淨，無人能救佢等。</verse>
			</chapter>
			<chapter number="2">
				<verse number="1">下背係上帝給 亞摩斯 个孻仔 以賽亞 个異象，係有關 猶大 㧯 耶路撒冷 个信息。</verse>
				<verse number="2">到最尾个日仔， 上主聖殿个山定著會建立在群山个頂高， 高高在上，超過眾山。 萬國全部會流向這山。</verse>
				<verse number="3">盡多民族會聚集前來，講： 來啊，𠊎等共下上去上主个山 ， 共下來去 雅各 上帝个聖殿。 佢會指教𠊎等應該行个道； 𠊎等也愛行佢所指示个路。 上主个教訓對 錫安 發出； 佢个信息對 耶路撒冷 傳出來。</verse>
				<verse number="4">佢會解決國際間个糾紛， 調解民族間个爭端。 佢等會將刀劍打做犁頭， 將矛槍打做鐮仔。 國際間毋會有相㓾， 佢等也毋使再學習戰爭。</verse>
				<verse number="5">雅各 个後代啊！來啊，𠊎等在上主个光明中行！</verse>
				<verse number="6">上帝啊，你已經㧒掉你个子民 — 雅各 个後代；因為國內逐所在有對東方㧯 非利士 人來个邪術；人民全部跈外族个風俗。</verse>
				<verse number="7">佢等國內金銀滿地，財寶多到算毋出；佢等境內滿遍係戰馬，還有算毋盡个戰車。</verse>
				<verse number="8">佢等个所在充滿偶像；佢等拜自家用手雕刻个東西。</verse>
				<verse number="9">卑賤人跪拜，尊貴人也跪下，自願敗壞。上主啊，求你毋好赦免佢等！</verse>
				<verse number="10">佢等應當愛閃到巖石下，囥到地窿肚，想愛閃上主个發譴㧯佢威嚴个榮光。</verse>
				<verse number="11">日仔將到，驕傲个人會受壓制，自大个人會降做卑賤；只有上主受尊敬。</verse>
				<verse number="12">在該日，上主 — 萬軍个元帥愛將有權勢、自誇㧯驕傲个人降做卑賤。</verse>
				<verse number="13">佢愛斬掉 黎巴嫩 高大个香柏樹，毀掉 巴珊 个橡樹；</verse>
				<verse number="14">削平大細山岡，</verse>
				<verse number="15">㩳橫高塔㧯堅固个城牆；</verse>
				<verse number="16">沈掉 他施 盡靚个大船。</verse>
				<verse number="17">在該日，驕傲个人會受壓制，自大个人會降做卑賤，只有上主受尊敬。</verse>
				<verse number="18">偶像也會被佢完全除掉。</verse>
				<verse number="19">上主搖動地基个時，人愛閃到巖石下，囥到地窿肚，想愛閃上主个發譴㧯佢威嚴个榮光。</verse>
				<verse number="20">到該日，佢等愛㧹掉自家製造个金銀偶像，㧒給田鼠㧯蝠婆仔。</verse>
				<verse number="21">上主搖動地基个時，人愛囥在山窿抑係巖石个縫肚，想愛閃上主个發譴㧯佢威嚴个榮光。</verse>
				<verse number="22">毋好偎靠世間人，因為佢等會死，佢等算麼介呢？</verse>
			</chapter>
			<chapter number="3">
				<verse number="1">至高个上主 — 萬軍个元帥愛將 耶路撒冷 㧯 猶大 人民日常所需要个全部拿走；佢愛拿走佢等所偎靠个食物㧯水。</verse>
				<verse number="2">佢愛消滅佢等个英雄㧯戰士，法官㧯先知，算命个㧯長老，</verse>
				<verse number="3">軍事家㧯民間領袖，參謀、手藝師傅㧯行邪術个人。</verse>
				<verse number="4">上主愛用後生人做佢等个領袖，俾無經驗个細人仔管佢等。</verse>
				<verse number="5">人民逐儕會欺負來、欺負去；後生人看輕老人家；卑賤个侮辱尊貴个。</verse>
				<verse number="6">到該日，會有人在佢自家个家族中選出一儕，講：「你還有面衫好著，你來做𠊎等个領袖！這敗壞个所在給你管好哪！」</verse>
				<verse number="7">該人會大聲應：「毋好選𠊎做人民个領袖；𠊎無法醫好你等个傷害。𠊎屋下無食个，也無著个。」</verse>
				<verse number="8">耶路撒冷 會橫！ 猶大 會倒！因為佢等所講个話，所做个事無一樣無違背上主；佢等公開侮辱上帝个榮光。</verse>
				<verse number="9">對佢等个面色就看得出佢等个壞心術。佢等㧯 所多瑪 人共樣，公開犯罪。佢等會堵到災難了；佢等惡有惡報。</verse>
				<verse number="10">愛向正直个人講，佢等會事事順利；佢等會享受自家工作个成果。</verse>
				<verse number="11">總係做壞事个人會堵到災禍；佢等會因為自家所做个壞事受到報應。</verse>
				<verse number="12">論到𠊎个子民，佢等會被細人仔欺負，被婦女管制。 𠊎个子民啊，你等个領袖𢱋毋著路，害你等行差路。</verse>
				<verse number="13">上主愛來辯論；佢愛企起來宣判萬民。</verse>
				<verse number="14">上主進入法庭審判佢子民中个長老㧯領袖，宣判佢等个罪，講：「你等破壞葡萄園；你等屋肚堆滿對窮苦人搶來个東西。</verse>
				<verse number="15">你等做麼介欺壓𠊎个子民，卸窮苦人个面皮呢？𠊎 — 至高个上主、萬軍个元帥恁樣講。」</verse>
				<verse number="16">上主講：「你等看， 錫安 个婦女樣般驕傲！姖等行路，頭那擎高高。姖等目珠打眼拐，行路無正經，腳鈪叮叮噹噹。</verse>
				<verse number="17">所以，𠊎一定愛責罰姖等；使姖等發臭頭，赤身露體。」</verse>
				<verse number="18">在該日，主愛將 錫安 婦女打扮个東西全部拿走，就係姖等腳鈪、頭那毛網、金簪㧯月型个脖鍊、</verse>
				<verse number="19">耳環、手鈪、幪面紗、</verse>
				<verse number="20">姖等个帽仔、腳鍊、花帶、香包、符袋、</verse>
				<verse number="21">禁指、鼻環、</verse>
				<verse number="22">禮服、外套、披肩、錢包、</verse>
				<verse number="23">手鏡仔、麻紗手帕、包頭巾、幪身帕。</verse>
				<verse number="24">姖等無再用香水，身體發出臭味；無再繫盡靚个腰帶，換粗麻索束腰；無再䌈盡靚个髻鬃，反轉變光頭；無盡靚个衫褲好著，反轉繫麻布衫；靚靚个面反轉㸐到媸媸。</verse>
				<verse number="25">城肚个男人會橫在刀下，勇士會死在戰場。</verse>
				<verse number="26">錫安 个城門會傷心大噭；城市會荒涼到像婦女，衫褲被人脫淨淨，坐在地泥下。</verse>
			</chapter>
			<chapter number="4">
				<verse number="1">該時，七個婦女愛拉等一個男人，講：「𠊎等做得食自家、著自家；你肯做𠊎等名義上个老公就好。求你除掉𠊎等个羞恥！」</verse>
				<verse number="2">到該日，上主愛使這土地逐頭果樹个樹苗、各種植物个嫩筍生到又高又靚。 以色列 賸到个人民會因為土地个出產來誇口，感覺盡有體面。</verse>
				<verse number="3">該兜賸在 錫安 、留在 耶路撒冷 个人，全部會被人看做係聖潔个。佢等住在 耶路撒冷 ，佢等个名記錄在生命冊上。</verse>
				<verse number="4">主个靈愛來審判、焚燒，來潔淨 錫安 个婦女，又將 耶路撒冷 个污穢㧯血洗淨。</verse>
				<verse number="5">該時，在 錫安 山頂，大家聚集个所在，上主會在日時頭用雲遮等佢等，在暗晡時用煙火照等佢等。上帝个榮光會像帳篷保護全城；</verse>
				<verse number="6">佢个榮光會在日時頭當做遮日頭个涼亭，在狂風暴雨个時做避難所。</verse>
			</chapter>
			<chapter number="5">
				<verse number="1">𠊎來為𠊎所親愛个唱一首歌， 一首有關𠊎所親愛个㧯佢个葡萄園： 在盡肥个山岡頂， 𠊎所親愛个開一垤葡萄園。</verse>
				<verse number="2">佢挖鬆泥，拈掉石頭， 種品種優良个葡萄。 佢在園中起一座守望台， 又鑿一個醡酒池。 佢一心希望它會打當好个葡萄， 無想到打个葡萄品質當差。</verse>
				<verse number="3">𠊎所親愛个就講：「 耶路撒冷 㧯 猶大 个人民啊，你等來為葡萄園㧯𠊎个事評理看仔。</verse>
				<verse number="4">係毋係𠊎無照顧好勢？樣般𠊎希望它會打當好个葡萄，偏偏打當差个葡萄？</verse>
				<verse number="5">「這下𠊎㧯你等講！𠊎愛恁樣來處理𠊎个葡萄園：𠊎愛拆掉籬笆，由在它荒廢，拆掉圍牆，由在走獸蹧踏它。</verse>
				<verse number="6">𠊎愛由在它荒廢；無愛修剪葡萄藤，也毋挖鬆土地；𠊎愛俾地上生滿蒺藜㧯竻仔。𠊎甚至愛命令雲莫落水在園項。」</verse>
				<verse number="7">以色列 就係上主 — 萬軍元帥个葡萄園； 猶大 人民就係佢歡歡喜喜種个葡萄樹。 佢盼望佢等實行正義， 總係看到个係㓾人流血！ 佢盼望佢等行為公正， 反轉逐所在有喊冤枉个聲！</verse>
				<verse number="8">你等慘了！你等田連田、屋接屋，全部佔等自家用，毋肯留一個位所給別人。</verse>
				<verse number="9">𠊎聽到上主 — 萬軍个元帥恁樣講：「這兜當大當靚个屋全部會荒掉，無人住。</verse>
				<verse number="10">十公頃个葡萄園正榨出十公升个酒；十籃麥種收毋到一籃麥仔。」</verse>
				<verse number="11">你等慘了！你等打早䟘起來就啉釅酒，啉到半夜醉天醉地。</verse>
				<verse number="12">在酒席中，你等彈琴、彈瑟、打鼓、歕簫、啉酒，總係無關心也無尊重上主所做个。</verse>
				<verse number="13">所以，𠊎个人民會因為無知被人捉走；佢等个領袖會餓死，人民會渴死。</verse>
				<verse number="14">陰間會打開大嘴愛吞滅佢等，將在 耶路撒冷 歡樂中个尊貴人㧯人民全部吞掉去。</verse>
				<verse number="15">逐個人全部會當見笑；尊貴㧯驕傲个人會降做卑微。</verse>
				<verse number="16">上主 — 萬軍个元帥主持公義顯出自家个偉大；神聖个上帝用審判來顯出自家个神聖。</verse>
				<verse number="17">該時，好額人个地會生滿野草，細羊仔在該位食草，就像在自家个草場，細山羊也會來該位尋食。</verse>
				<verse number="18">你等慘了！你等已經被罪惡過犯落到了。</verse>
				<verse number="19">你等講：「由在上主趕緊做佢愛做个；𠊎等想愛看佢个所做。由在 以色列 神聖个上帝實行佢个計劃；𠊎等想愛知佢个意念。」</verse>
				<verse number="20">你等慘了！你等顛倒善惡，顛倒光暗，乜顛倒甜苦。</verse>
				<verse number="21">你等慘了！你等還自家恅到有聰明智慧！</verse>
				<verse number="22">你等慘了！你等拚酒逞英雄，調酒打頭名。</verse>
				<verse number="23">你等被人收買，將壞人準做義人，反轉將義人个公義搶走。</verse>
				<verse number="24">就像燥草被猛火燒掉，你等个根會爛掉，你等个花會像塵灰飛走；因為你等藐視 以色列 神聖上帝个法律，拒絕上主 — 萬軍元帥个教導。</verse>
				<verse number="25">所以，上主愛向佢个子民大發譴；佢愛伸手來打佢等。山愛震動，屍體堆在街路，㧯垃圾共樣。雖然恁樣，上主个受氣還吂煞；佢還係愛擎手打佢等。</verse>
				<verse number="26">上主愛搖大旗，呼召一個遠遠个國家 ；佢愛歕口哨對地極將佢等喊來。看啊，佢等會遽遽趕等來。</verse>
				<verse number="27">佢等當中無𤸁个、無跌倒个、無啄痀个，也無睡目个。佢等个腰帶繫𢫮𢫮，鞋帶䌈好好。</verse>
				<verse number="28">佢等个箭當利；佢等个弓拉𢫮。佢等个馬蹄比石頭還較硬；佢等戰車个輪仔像捲風轉恁轂。</verse>
				<verse number="29">佢等大聲嘶，像獅仔盡吼，像細獅仔打到野獸啣等走，無人能救轉來。</verse>
				<verse number="30">到該日，佢等會對 以色列 大聲嘶，像大海發出吼聲。你等看這垤土地！逐所在充滿烏暗㧯艱苦！光明被烏雲遮掉變暗了。</verse>
			</chapter>
			<chapter number="6">
				<verse number="1">烏西雅 王過身該年，𠊎看到主高高坐在寶座，佢个長袍衫裾遮蓋歸座聖殿。</verse>
				<verse number="2">在佢周圍有天使 撒拉弗 事奉，逐個有六隻翼胛：兩隻遮面，兩隻遮腳，兩隻用來飛个。</verse>
				<verse number="3">佢等有兜唱、有兜和，講： 「聖哉，聖哉，聖哉！ 上主 — 萬軍个元帥！ 佢个榮光充滿全世界。」</verse>
				<verse number="4">佢等唱和个聲使門柱个根基震動；聖殿肚就充滿濛煙。</verse>
				<verse number="5">𠊎講：「𠊎慘了！𠊎會死了！因為𠊎係講話無淨浰个人；𠊎也住在講話無淨浰个人當中；又因為𠊎還親眼看到君王 — 上主、萬軍个元帥！」</verse>
				<verse number="6">所以，有一個天使 撒拉弗 向𠊎飛過來，拿等一支火鉗，夾等祭壇頂燒𤏸个火炭，</verse>
				<verse number="7">佢將火炭揬𠊎个嘴唇，講：「看哪，這垤火炭揬你个嘴唇，你个過犯全部除掉了；你个罪就赦免了。」</verse>
				<verse number="8">然後，𠊎聽到主講：「𠊎做得差遣麼人？麼人肯代𠊎等去呢？」 𠊎應講：「𠊎來去！請差遣𠊎！」</verse>
				<verse number="9">所以，佢講：「你去㧯這個子民講：你等聽了又聽，總係毋會入耳；看了又看，總係毋會了解。」</verse>
				<verse number="10">接等，佢對𠊎講：「愛俾這子民个心盡鈍，耳公背背，目珠眨眨。若毋係恁樣，佢等个目珠會看得到，耳公會聽得入耳，心也會明白，佢等就會回心轉意，來得到醫治。」</verse>
				<verse number="11">𠊎問：「主啊，恁樣个情形愛幾久呢？」 佢應講：「直到城市毀滅，無人住，屋仔空空，土地全部荒掉。</verse>
				<verse number="12">𠊎 — 上主愛將人民徙到遠方去，大部份个土地會無人用。</verse>
				<verse number="13">若係國內還有十分之一个人，也會被人消滅；佢等會像橡樹被人斬掉，賸到樹頭定定。這樹頭代表𠊎个子民新个開始。」</verse>
			</chapter>
			<chapter number="7">
				<verse number="1">在 烏西雅 个孫仔、 約坦 个孻仔 亞哈斯 做 猶大 王个時，戰爭發生了。 敘利亞 王 利汛 㧯 利瑪利 个孻仔 以色列 王 比加 聯合起來，攻打 耶路撒冷 ，總係無法度攻下來。</verse>
				<verse number="2">敘利亞 軍隊來到 以色列 境內个消息傳到 猶大 王 該位，王㧯人民非常著驚，就像樹仔在狂風中搖來搖去。</verse>
				<verse number="3">所以，上主對 以賽亞 講：「帶等你个孻仔 施亞雅述 去見 亞哈斯 ；佢在上陂塘圳溝个出口，就係在染布工廠个大路項。</verse>
				<verse number="4">你去㧯佢講，愛注意，愛安靜，毋使驚 利汛 王个 敘利亞 軍隊。 利汛 王㧯 利瑪利 个孻仔，佢兩個人个怒氣就像兩支燒等个火把所衝出來个煙定定。</verse>
				<verse number="5">敘利亞 㧯 以色列 並 利瑪利 个孻仔結盟，設計來害你。</verse>
				<verse number="6">佢等想愛攻打 猶大 ，來迫 猶大 人投降，然後設立 他比勒 个孻仔做王。</verse>
				<verse number="7">「總係𠊎 — 至高个上主恁樣宣佈：佢等个計謀一定毋會實現。</verse>
				<verse number="8">因為 大馬士革 不過係 敘利亞 个首都； 利汛 王不過係 大馬士革 个領袖定定；無麼介了不起。論到 以色列 ，它在六十五年內也愛被人打敗，亡國。</verse>
				<verse number="9">撒馬利亞 不過係 以色列 个首都； 利瑪利 个孻仔不過係 撒馬利亞 个領袖定定。無麼介了不起。 「若係你等个信心無堅強，你等一定企毋住。」</verse>
				<verse number="10">上主又對 亞哈斯 講：</verse>
				<verse number="11">「你應該向上主 — 你个上帝求一個記號；該記號可能對陰間來，也可能對天頂來。」</verse>
				<verse number="12">亞哈斯 講：「𠊎無愛求記號；𠊎毋試探上主。」</verse>
				<verse number="13">所以， 以賽亞 講：「 大衛 个子孫啊，你等愛聽！敢講你等俾人惱，還毋罅擺嗎？還愛俾𠊎个上帝惱係麼？</verse>
				<verse number="14">恁樣，主愛親自賜給你等一個記號：有人家女 會懷胎𫱔孻仔 ，將佢个名安到『以馬內利』 。</verse>
				<verse number="15">到孻仔會分別是非善惡个時，佢愛 用乳油㧯蜂糖做食物。</verse>
				<verse number="16">因為到這細孻仔會分別是非善惡以前，該兩個暴君个國家全部會荒掉。</verse>
				<verse number="17">「上主愛降災給你、你个人民，㧯你个家族；這種災難，自 以色列 國對 猶大 國分裂出來後，無發生過；佢愛使 亞述 皇帝來攻打你个國家。</verse>
				<verse number="18">「該時，上主愛歕口哨呼喊 埃及 人來，像烏蠅對遠遠个 尼羅 河源頭飛來；佢也愛喊 亞述 人像蜂仔恁樣對佢等个本土來。</verse>
				<verse number="19">佢等會歸群飛來，充滿山壢、山窿㧯巖石；佢等會遮掉所有个竻篷㧯所有个草原。</verse>
				<verse number="20">「該時節，主愛對 幼發拉底 河該片請一個剃頭師傅來 — 就係 亞述 皇帝。佢愛剃掉你等个頭那毛、腳毛㧯鬍鬚。</verse>
				<verse number="21">「該時節，一個農民做得保留一隻牛乸㧯兩隻山羊乸；</verse>
				<verse number="22">佢會有足額个乳㧯乳油食。凡係在這擺國難中賸到个人全部會有乳油㧯蜂糖好食。</verse>
				<verse number="23">「該時節，種過一千頭葡萄樹、價值一千銀仔个好果園，也會生滿竻仔㧯蒺藜。</verse>
				<verse number="24">人會帶弓箭入去打獵，因為滿地係竻仔㧯蒺藜。</verse>
				<verse number="25">以前用钁頭耕種个山岡，你會驚竻仔㧯蒺藜，卻毋敢到該位去，只有用來畜牛羊、由在牠兜去踐踏。」</verse>
			</chapter>
			<chapter number="8">
				<verse number="1">上主對𠊎講：「拿一垤大枋仔來，用筆 寫等『搶劫會到』。</verse>
				<verse number="2">去尋兩個信用好个人來做證人，就係祭司 烏利亞 㧯 耶比利家 个孻仔 撒迦利亞 。」</verse>
				<verse number="3">過無幾久，𠊎㧯𡜵娘 同房；姖懷胎，𫱔一個孻仔。上主就㧯𠊎講：「㧯佢安到『搶劫會到』；</verse>
				<verse number="4">因為在這細人仔會喊阿爸、阿姆以前， 大馬士革 所有个財寶㧯 撒馬利亞 个戰利品全部愛被 亞述 皇帝搶淨淨。」</verse>
				<verse number="5">上主又對𠊎講：</verse>
				<verse number="6">「因為這兜人無愛 西羅亞 溪 慢慢流个水，反轉歡喜 利汛 王㧯 利瑪利 个孻仔 比加 王；</verse>
				<verse number="7">所以，𠊎 — 你个主愛帶 亞述 皇帝㧯佢个軍隊來攻打 猶大 ；佢等个攻打會像 幼發拉底 河个大水沖來，超過所有个河壩，𨃟過兩片个河壩滣。</verse>
				<verse number="8">佢等會像做大水，浸到人个頸筋，吞掉歸隻 猶大 。」 總係以馬內利，上帝㧯𠊎等同在！佢會打開翼胛，保護𠊎等全國个土地 。</verse>
				<verse number="9">列國个人民啊，由在你等噦噦嘶嘶，到尾一定會澇潰。遠方个人哪，愛聽啊！去準備戰爭啊，總係一定會澇潰！無毋著，由在你等去準備戰爭！總係一定會澇潰！</verse>
				<verse number="10">由在你等煞猛計劃，總係毋會成功；由在你等煞猛參詳，總係毋會有結果，因為上帝㧯𠊎等同在。</verse>
				<verse number="11">上主用佢大能个手警告𠊎，做毋得行這兜人民所行个道路。佢講：</verse>
				<verse number="12">「這兜人民聚集同謀，你等毋好參加；佢等所驚个，你等毋使驚，毋使愁。</verse>
				<verse number="13">總係愛記得𠊎 — 上主、萬軍个元帥係神聖个；只有𠊎係你等應該驚个、應該敬畏个。</verse>
				<verse number="14">𠊎係你等个避難所 ；總係𠊎也像一垤絆腳石，使 猶大 㧯 以色列 兩家个人民絆倒；𠊎又像陷阱抑係羅網，捉到 耶路撒冷 个人民。</verse>
				<verse number="15">盡多人會恁樣逕倒、跌倒受傷；佢等會被人網到、捉到。」</verse>
				<verse number="16">𠊎个學生啊，你等愛將𠊎个信息捲起來，將𠊎个教訓封起來。</verse>
				<verse number="17">雖然上主在佢个子民 面前將自家囥起來，總係𠊎還係愛等候佢；𠊎定著愛仰望佢。</verse>
				<verse number="18">上主 — 萬軍个元帥坐在 錫安 山。上主使𠊎㧯佢所賜給𠊎个子女在 以色列 人當中成做記號㧯神蹟。</verse>
				<verse number="19">有人對你等講：「你等去問該兜嘴項㘙㘙唸唸，就係該兜跳童、行邪術个；人敢做毋得向佢个神明請教，為生人求問死人嗎？」</verse>
				<verse number="20">你等愛恁樣應佢等講：「愛聽上主个教訓㧯信息！」佢等所講个，若無照這標準，佢等就看毋到朝晨个光。</verse>
				<verse number="21">人會流浪到逐所在，去經驗受苦㧯肚飢。在佢等肚飢个時，佢等會發譴咒罵佢等个國王㧯上帝。</verse>
				<verse number="22">佢等會緊望天又緊看地，總係麼介也看毋到，只有患難㧯烏暗，最後佢等會被人逐到烏暗中。</verse>
			</chapter>
			<chapter number="9">
				<verse number="1">總係該受過苦難个人，毋會再看到烏暗了。 以前 西布倫 㧯 拿弗他利 兩支族所住个地方識被人看輕；總係將來這地區，就係對 地中海 直到 約旦 河東片，包含外族人住个 加利利 ，全部會得到光榮。</verse>
				<verse number="2">生活在烏暗中个人， 已經看到大光； 住在死蔭之地个人， 這下有光照佢等。</verse>
				<verse number="3">上主啊，你賜給佢等極大个喜樂 ； 你增加佢等个歡喜。 佢等在你面前就像人收成農作物恁歡喜， 又像人分享戰利品恁快樂。</verse>
				<verse number="4">因為你已經除掉佢等个重軛， 扭斷打佢等个皮鞭， 拗斷欺負佢等用个棍仔， 就像你以前打贏 米甸 軍隊共樣。</verse>
				<verse number="5">侵略者著个鞋， 膏當多血跡个衫， 全部愛燒掉， 像柴恁樣燒掉。</verse>
				<verse number="6">有一個孲𤘅仔為𠊎等出世！ 有一個孻仔賜給𠊎等！ 佢來係愛統治𠊎等。 佢个名安到： 「奇妙 个導師」， 「全能个上帝」， 「永遠个阿爸」， 「和平个君王」。</verse>
				<verse number="7">佢个主權會繼續增長； 佢个王國永享和平。 佢愛承接 大衛 个王位； 佢愛用公平㧯正義來做統治个基礎， 對這下直到永遠。 上主 — 萬軍个元帥愛熱心成就這事。</verse>
				<verse number="8">主已經對 以色列 — 就係 雅各 个子孫宣判。</verse>
				<verse number="9">全 以色列 人民，包含所有住在 撒馬利亞 个人，全部愛知上帝恁樣宣判了。佢等个心當驕傲，自誇講：</verse>
				<verse number="10">「磚屋橫掉，𠊎等來起石屋；桑仔樹做个大樑斷掉，𠊎等來換最好个香柏樹。」</verse>
				<verse number="11">所以，上主發動佢等个敵人 來攻擊佢等。</verse>
				<verse number="12">敘利亞 人在東片， 非利士 人在西片；全部打開嘴想愛吞 以色列 。雖然恁樣，上主个受氣還吂煞；佢還係愛擎手打佢等。</verse>
				<verse number="13">雖然上主 — 萬軍个元帥責罰 以色列 人民，佢等還係毋肯悔改，毋肯轉到上主面前。</verse>
				<verse number="14">上主愛在一日當中責罰 以色列 个領袖㧯人民；佢愛將佢等个頭㧯尾 全部剁掉。</verse>
				<verse number="15">較多歲、有名聲个人就係頭，講花撩教人个先知就係尾。</verse>
				<verse number="16">原來應該領導人民个反轉將人民帶入差路，害佢等受迷惑。</verse>
				<verse number="17">所以，主絕對毋會放過佢等个後生人，也毋會憐憫佢等个寡婦㧯孤兒；因為所有个人無敬畏上主，無論做事抑係講話攏總像戇仔共樣。雖然恁樣，上主个受氣還吂煞；佢還係愛擎手打佢等。</verse>
				<verse number="18">人民个邪惡就像火燒竻仔㧯蒺藜，又遰到樹林，大火𤏸到當猛，捲起一團一團个烏煙，衝等上天。</verse>
				<verse number="19">因為上主 — 萬軍个元帥大發譴，佢个責罰像火，全地燒起來，人民成做柴緊燒等去；無人會憐憫兄弟。</verse>
				<verse number="20">在國內个逐所在，人尋來尋去，搶東西食，還係食毋飽；逐儕會食自家个鄰舍 。</verse>
				<verse number="21">瑪拿西 人㧯 以法蓮 人互相攻擊，佢等又聯合起來攻擊 猶大 。雖然恁樣，上主个受氣還吂煞；佢還係愛擎手打佢等。</verse>
			</chapter>
			<chapter number="10">
				<verse number="1">你等慘了！你等制定無公平个法律㧯假審判來欺負𠊎个子民。</verse>
				<verse number="2">你等用這方法剝削窮人个權利，使佢等得毋到公平；你等用這方法侵佔寡婦㧯孤兒个產業。</verse>
				<verse number="3">上帝責罰你等个時，你等愛樣般正好呢？佢通過遠方个國家帶給你等災難个時，你等愛樣般正好呢？你等愛到㖠位去求幫助？你等个財產愛囥在㖠位？</verse>
				<verse number="4">你等若毋係死在戰場就會被人捉走。雖然恁樣，上主个受氣還吂煞；佢還係愛擎手打你等。</verse>
				<verse number="5">上主講：「𠊎用 亞述 做棍仔來打該兜惹𠊎發譴个人。</verse>
				<verse number="6">𠊎派 亞述 去攻擊無敬畏上帝个國家㧯惹𠊎發譴个人民。𠊎派佢等去搶劫、去捉人，去踐踏該兜人民，像蹂路項个泥糜。」</verse>
				<verse number="7">總係 亞述 皇帝有佢自家个打算。佢決心愛消滅盡多國家。</verse>
				<verse number="8">佢誇口講：「𠊎逐個元帥都做得做一國个君王！</verse>
				<verse number="9">𠊎征服 迦勒挪 㧯 迦基米施 个城。𠊎征服 哈馬 㧯 亞珥拔 个城。𠊎也征服 撒馬利亞 㧯 大馬士革 。</verse>
				<verse number="10">𠊎伸手責罰該兜國家，因為佢等拜偶像；該兜國家个偶像比 耶路撒冷 㧯 撒馬利亞 个還較多。</verse>
				<verse number="11">𠊎消滅 撒馬利亞 㧯該位个偶像，也愛照樣消滅 耶路撒冷 㧯該位个偶像。」</verse>
				<verse number="12">總係主講：「𠊎在 錫安 山㧯 耶路撒冷 个工作完成以後，𠊎愛責罰 亞述 皇帝个自大㧯驕傲。」</verse>
				<verse number="13">亞述 皇帝誇口講：「這全部係𠊎一儕个成就。𠊎恁強大，恁精明能幹！𠊎廢掉這兜國家个國界，也將它兜所有个財富搶淨淨。𠊎像強壯个牛恁樣踐踏該兜地方个人民 。</verse>
				<verse number="14">𠊎个手將所有國家个財富拿走，像在鳥藪肚拈卵恁容易。無一個翼胛敢對𠊎震動；無一張嘴敢出聲。」</verse>
				<verse number="15">總係上主講：「斧頭會比使斧頭个較偉大嗎？鋸仔會比用鋸仔个較重要嗎？敢講棍仔會拿起該拿棍仔个？敢講杖仔會擎起該毋係用樹仔做个？」</verse>
				<verse number="16">所以，至高个上主 — 萬軍个元帥愛用病痛來責罰該兜飽足个勇士，使肥肥个人變到瘦夾夾。在佢等个身體底背會有猛猛个火一直緊燒。</verse>
				<verse number="17">以色列 个光會成做火； 以色列 神聖个上帝愛成做火焰。在一日當中，佢愛將所有个燒淨淨，連竻仔㧯蒺藜也燒掉。</verse>
				<verse number="18">亞述 當靚个樹林㧯盡肥个田地，全部會徹底被上主毀滅，就像一個發病个人漸漸衰弱到死。</verse>
				<verse number="19">樹林中賸到个樹仔會無幾多，連細人仔也能算得出。</verse>
				<verse number="20">大災難後，還生个 以色列 人轉來个時，佢等毋會再去倚靠將佢等毀滅个國家；佢等會誠心誠意信靠上主 — 以色列 神聖个上帝。</verse>
				<verse number="21">賸到个 以色列 人，就係 雅各 个後代所賸下來个，會轉到大能个上帝該位。</verse>
				<verse number="22">雖然 以色列 人像海滣个沙仔恁多，只有賸到个人正能倒轉來。人民定著會受消滅，應得个報應會像大水浸死佢等。</verse>
				<verse number="23">至高个上主 — 萬軍个元帥決定愛毀滅全國。</verse>
				<verse number="24">至高个上主 — 萬軍个元帥對 錫安 个人民恁樣講：「雖然 亞述 人識像 埃及 人恁樣迫害你等，攻打你等，你等毋使驚佢等。</verse>
				<verse number="25">無幾久後，等𠊎對你等个受氣消掉，𠊎就向佢等發譴，消滅佢等。</verse>
				<verse number="26">𠊎 — 上主、萬軍个元帥愛用皮鞭打佢等，像以前在 俄立 巖石該位打 米甸 人共樣；𠊎愛責罰 亞述 人，像以前在 紅海 伸出柺棍仔責罰 埃及 人共樣。</verse>
				<verse number="27">在該日，𠊎愛對 亞述 个強權下將你等解救出來；佢等个軛毋會再成做你等肩頭頂个重擔 。」</verse>
				<verse number="28">仇敵攻下 艾 城 ！佢等經過 米磯崙 ；佢等將補給品放在 密抹 ！</verse>
				<verse number="29">佢等已經通過山壢，在 迦巴 安營。 拉瑪 城个人盡著驚； 掃羅 王故鄉个 基比亞 人全部逃走了。</verse>
				<verse number="30">迦琳 人啊，你等大聲喊啊！ 萊煞 人啊，你等愛注意聽！可憐个 亞拿突 人啊，你等愛應聲啊！</verse>
				<verse number="31">瑪得米那 人逃走， 基柄 人全部走去囥命。</verse>
				<verse number="32">今晡日敵人在 挪伯 安營；佢等擎起拳頭乸愛打 錫安 山㧯 耶路撒冷 。</verse>
				<verse number="33">看啊，至高个上主 — 萬軍个元帥愛攻擊佢等，用得人驚个大能將佢等當中最驕傲最強大个，全部愛斬下來，像人將樹桍剁下來共樣。</verse>
				<verse number="34">上主愛將佢等斬淨淨，像人用斧頭將大樹林斬掉，連 黎巴嫩 个大樹也全部斬橫下來！</verse>
			</chapter>
			<chapter number="11">
				<verse number="1">對 耶西 个樹頭愛發出嫩芽； 有一個新王愛對佢个後代興起來 。</verse>
				<verse number="2">上主个靈愛降在佢个身上， 給佢有智慧㧯聰明， 給佢有策略㧯能力， 給佢有智識㧯敬畏上主个心。</verse>
				<verse number="3">敬畏上主係佢所歡喜个： 佢毋會照外貌來審判； 佢毋會聽風聲來斷案。</verse>
				<verse number="4">佢愛照公當審判窮苦人； 佢愛保護卑微人个權利。 佢愛下令刑罰犯罪个人； 佢愛將邪惡个人處死刑。</verse>
				<verse number="5">佢愛用公義統治人民； 佢愛用信實對待佢等。</verse>
				<verse number="6">豺狼㧯細綿羊會共下住； 豹仔㧯細山羊共下睡。 細牛仔㧯細獅仔共下食乳 ； 細人仔也做得掌牠兜。</verse>
				<verse number="7">牛乸㧯熊乸共下食東西； 連牛子㧯熊子會共下睡。 獅仔也會像牛共樣食草。</verse>
				<verse number="8">食乳个孲𤘅仔做得在毒蛇个窿堘搞； 斷乳个細人仔手伸入蛇窿肚也無事。</verse>
				<verse number="9">在 錫安 — 上帝个聖山頂， 這一切毋會有傷害，也毋會有邪惡； 就像大海充滿海水， 世界會充滿對上主个認識。</verse>
				<verse number="10">到該日， 耶西 个後代會有一個新王興起 。佢定著會成做列國个大旗；萬民會來歸向佢；佢个京城會有大榮光。</verse>
				<verse number="11">到該日，主愛再一擺用佢个權柄使佢流亡个子民賸到个轉家鄉；佢等會對 亞述 㧯 埃及 ，對 巴特羅 、 古實 、 以攔 、 巴比倫 、 哈馬 㧯沿海逐海島轉來。</verse>
				<verse number="12">上主愛向列國搖大旗，將分散在四面八方个 以色列 人㧯 猶大 人聚集起來，帶佢等轉到故鄉。</verse>
				<verse number="13">以色列 毋會再嫉妒 猶大 ； 猶大 也毋會再看 以色列 做仇敵。</verse>
				<verse number="14">佢等會聯合起來，攻擊西片个 非利士 人，去搶東片个人。佢等會佔領 以東 㧯 摩押 ； 亞捫 人會降服佢等。</verse>
				<verse number="15">上主愛吹燥 埃及 个海；佢愛用熱風吹燥 幼發拉底 河，使大河分做七條細河，俾人做得著鞋行過去。</verse>
				<verse number="16">會有一條盡平个大路俾該兜賸到在 亞述 个 以色列 人行轉來，就像 以色列 人个祖先對 埃及 出來該日一樣。</verse>
			</chapter>
			<chapter number="12">
				<verse number="1">到該日，你等會講： 上主啊，𠊎感謝你！ 雖然你識對𠊎發譴， 總係你个受氣已經煞了； 你這下已經安慰𠊎。</verse>
				<verse number="2">看啊！上帝係𠊎个救主； 𠊎愛信賴佢，𠊎麼介都毋驚。 上主係𠊎个力量，主係𠊎个詩歌 ； 佢係𠊎个救主。</verse>
				<verse number="3">就像泉水使嘴燥个人歡喜， 上帝个子民也因為佢个拯救快樂！</verse>
				<verse number="4">到該日，你等會講： 愛感謝上主，頌讚佢个名！ 愛將佢个所做報給萬國知； 愛向萬民傳揚佢个聖名。</verse>
				<verse number="5">愛向上主唱歌，因為佢成就大事； 愛俾全世界聽到這好消息！</verse>
				<verse number="6">住在 錫安 个人愛大聲歡喜唱歌！ 以色列 神聖个上帝樣般偉大啊！ 佢住在你等當中！</verse>
			</chapter>
			<chapter number="13">
				<verse number="1">這係上帝給 亞摩斯 个孻仔 以賽亞 个啟示，係有關 巴比倫 个信息。</verse>
				<verse number="2">愛在光光个山岡頂插一支戰旗。愛向戰士擛手、大聲發出命令，喊佢等攻入該兜貴族个門。</verse>
				<verse number="3">上主已經點齊該兜充滿信心个勇士，喊佢等去打贏這場聖戰；佢愛責罰該兜惹佢發譴个國家。</verse>
				<verse number="4">聽啊！山頂有盡多吵鬧个聲；該係萬民大聲喊个聲，係盡多國家集合个聲。上主 — 萬軍个元帥已經點齊軍隊，準備相㓾。</verse>
				<verse number="5">佢等係對天邊、對遠遠个國家過來个。上主愛在大發譴中毀滅全國。</verse>
				<verse number="6">大聲盡噭啊！上主个日仔近了！全能个上帝施行毀滅个日仔到了！</verse>
				<verse number="7">逐儕个手軟軟無力；逐個人無半點勇氣！</verse>
				<verse number="8">佢等非常著驚；佢等受盡痛苦，像婦女生產時个陣痛。佢等你看𠊎、𠊎看你，緊看緊驚；面紅際炸。</verse>
				<verse number="9">上主个日仔會到了！一定會有殘忍、痛恨㧯大發譴！全世界會成做荒地；逐個罪人全部會滅亡。</verse>
				<verse number="10">天頂个星仔全部毋會發光；日頭一出就暗掉，月光乜朦朦無光。</verse>
				<verse number="11">上主講：「𠊎愛使這世界因為充滿壞行為受責罰，使壞人因為所犯个罪受責罰。𠊎愛結束驕傲人个自大，制伏殘忍㧯強暴个人。</verse>
				<verse number="12">贏過這試煉个人會比純金較少。</verse>
				<verse number="13">𠊎愛使天挺動、地搖動；因為這係𠊎 — 上主、萬軍个元帥受氣㧯大發譴个日仔。</verse>
				<verse number="14">「住在這位个外國人會走轉自家个家鄉，四散逃走，像被獵人逐个鹿群，像無牧人照顧个羊群。</verse>
				<verse number="15">被人逐到个全部會被人㓾死；被人捉到个全部會死在刀下。</verse>
				<verse number="16">佢等个孲𤘅仔會在佢等面前被人㧹死；佢等个屋仔被人搶奪；佢等个𡜵娘受人侮辱。」</verse>
				<verse number="17">上主講：「𠊎愛唆慫 米底亞 人 去攻打 巴比倫 。 米底亞 人毋貪白銀，無愛黃金。</verse>
				<verse number="18">佢等愛用箭射死後生人；佢等毋會憐憫孲𤘅仔，也毋會體恤細人仔。</verse>
				<verse number="19">巴比倫 本來係像寶石恁靚个王國，係 巴比倫 人个光榮。總係𠊎 — 上帝愛毀滅它，就像𠊎識毀滅 所多瑪 㧯 蛾摩拉 一樣。</verse>
				<verse number="20">永遠毋會再有人在該位住；毋會有 阿拉伯 人在該位搭帳篷，也毋會有牧人在該位掌羊。</verse>
				<verse number="21">該所在會被野獸佔去住；貓頭鳥會在該位做藪，鴕鳥住在該位，野山羊在該位跳來跳去，</verse>
				<verse number="22">豺狼會在守衛所大聲噭，野狗在華麗个王宮肚緊吠。 巴比倫 大難臨頭了！它个日仔無久了！」</verse>
			</chapter>
			<chapter number="14">
				<verse number="1">上主愛再一擺對 雅各 个後代顯出慈愛，選 以色列 人歸屬自家，俾佢等在自家个土地安居；盡多外族人愛㧯佢等共下住，並歸屬佢等。</verse>
				<verse number="2">盡多國家會協助佢等，帶佢等轉到上帝所賜个土地，也有盡多國家个人會成做佢等个奴婢。以前捉過 以色列 人个，這下反轉成做 以色列 人个奴才； 以色列 人愛管以前欺負佢等个人。</verse>
				<verse number="3">上主除掉 以色列 人个悲傷㧯痛苦該時，就毋會再有人強迫佢等做苦工了。</verse>
				<verse number="4">上主為佢等成就這一切以後，佢等會做詩嘲謔 巴比倫 王講： 「暴君已經橫落去了！佢毋會再欺負人了！</verse>
				<verse number="5">上主已經拗斷壞人个棍仔，打碎統治者个權杖。</verse>
				<verse number="6">這兜人在憤怒中一直欺壓人民，又在烈怒中迫害所佔領个國家。</verse>
				<verse number="7">這下全世界正有安定㧯和平；逐個人歡喜快樂唱歌。</verse>
				<verse number="8">連 黎巴嫩 个松樹㧯香柏樹也會因為你橫落去來歡喜，因為你已經橫掉，毋會再有人來斬它兜。</verse>
				<verse number="9">「陰間震動愛盡歡迎 巴比倫 王。在世上做過領袖該兜人个陰魂全部會驚到䟘起來；在世上做過列國君王个陰魂全部會對寶座頂企起來。</verse>
				<verse number="10">佢等攏總會對佢講：『這下你變軟弱，㧯𠊎等相像，完全共樣了！</verse>
				<verse number="11">以前人彈琴頌讚你个功德，這下你也到陰間！蟲堆係你个眠床，屍蟲係你蓋个被。』</verse>
				<verse number="12">「 巴比倫 王啊 ，你這明亮个天光星！你已經對天頂跌下來！你佔領過列國，總係這下被上帝㧹在地上。</verse>
				<verse number="13">你心肚識想：『𠊎愛上到天頂，將𠊎个寶座放在上帝个眾星頂高；𠊎愛坐在北極个山頂，就係眾神聚會个地方。</verse>
				<verse number="14">𠊎愛爬上雲頂，在該位㧯至高者平高了。』</verse>
				<verse number="15">總係你卻跌落陰間，跌落深淵。</verse>
				<verse number="16">「死人會目金金看等你，問講：『這敢毋係使大地著驚，使列國愊愊掣个人嗎？</verse>
				<verse number="17">這敢毋係毀滅盡多城市，使世界變做荒地，毋肯將捉來个人放掉，毋准佢等轉屋下个人嗎？』</verse>
				<verse number="18">「列國个君王全部睡在佢等富麗堂皇个墳墓肚。</verse>
				<verse number="19">總係你無墳墓，你被人㧒在野地；你个身屍頂高堆滿戰死士兵个骨骸，共下㧹落深坑肚，由在人踐踏，像無人愛个。</verse>
				<verse number="20">你無像其他个君王，死後有人埋葬；因為你毀滅自家个國家，㓾自家个人民。你做恁壞个事，你子孫个名，永久無人提起。</verse>
				<verse number="21">「你等準備去剿滅佢个子孫啊！這係佢等祖先留下來个罪債；佢等當中毋會再有人興起來統治世界，也毋會在這世上建立城市了。」</verse>
				<verse number="22">上主 — 萬軍个元帥恁樣講：「𠊎愛攻擊 巴比倫 ，將它毀滅。𠊎愛使該所在寸草不留；無子孫，無後代。𠊎 — 上主恁樣宣佈了。</verse>
				<verse number="23">𠊎愛使 巴比倫 變做一窟湳仔，成做貓頭鳥个藪。𠊎愛用掃把清除 巴比倫 ，將一切掃淨淨。𠊎 — 上主、萬軍个元帥恁樣宣佈了。」</verse>
				<verse number="24">上主 — 萬軍个元帥發誓講：「𠊎个計劃一定會實現；𠊎愛做个事一定會成。</verse>
				<verse number="25">𠊎愛在𠊎个土地毀滅 亞述 人，在𠊎个山頂踐踏佢等。𠊎愛使𠊎个子民對 亞述 个軛下得自由，佢等所揹个重擔會離開佢等个肩頭。</verse>
				<verse number="26">這係𠊎對全世界个計劃；𠊎愛伸手來攻擊列國。」</verse>
				<verse number="27">上主 — 萬軍个元帥決定恁樣做了；佢已經伸手來責罰了；無人能阻擋佢。</verse>
				<verse number="28">亞哈斯 王死掉該年，上帝宣佈下背个信息：</verse>
				<verse number="29">非利士 人啊，打你个棍仔已經拗斷掉，總係你毋使歡喜。一尾蛇死掉，總係一尾還較毒个蛇等在後背；該尾毒蛇个卵孵出會飛个火蛇 ！</verse>
				<verse number="30">上主愛使窮苦人得到牧養，困苦个人平安過日。總係佢愛使 非利士 人堵到飢荒；賸到个人也會死淨淨。</verse>
				<verse number="31">非利士 个城市啊，你等會大聲噭了！ 非利士 人啊，你等全部會愊愊掣了！對北方有一陣煙吹過來了，該係一群當勇又當會相㓾个敵人。</verse>
				<verse number="32">𠊎等愛樣般回答 非利士 人派來求救命个使者呢？𠊎等愛㧯佢等講，上主已經建立 錫安 ；佢該兜受盡痛苦个人民會在該位得到保護了。</verse>
			</chapter>
			<chapter number="15">
				<verse number="1">下背係有關 摩押 个信息。 亞珥 城㧯 基珥 城一暗晡就滅掉了。 摩押 地做一暗晡廢掉了。</verse>
				<verse number="2">底本 人 爬上山，在佢等个神廟肚哀傷大噭； 摩押 人為到 尼波 㧯 米底巴 城傷心盡噭；佢等悲哀到剃掉頭那毛，刮掉鬍鬚。</verse>
				<verse number="3">在街路行个人民全部著麻衫；廣場㧯屋頂个人全部目汁濫泔大聲噭。</verse>
				<verse number="4">希實本 㧯 以利亞利 人全部大噭；佢等个噭聲連 雅雜 个人民也聽到了。所以 摩押 个士兵也全部著驚、失掉勇氣。</verse>
				<verse number="5">𠊎个心為 摩押 悲傷！該地方个難民已經走到 瑣珥 㧯 伊基拉‧施利施亞 去了。有兜人爬上 魯希坡 ，緊走緊噭；有兜人逃走到 何羅念 ，開聲大噭。</verse>
				<verse number="6">寧林 个河壩無水，河壩滣个草燥掉，植物死掉，無半些青青个東西。</verse>
				<verse number="7">所以，佢等帶等積存个財物，過 柳樹 坑壢逃難去了。</verse>
				<verse number="8">在 摩押 邊界，逐所在聽得到大噭个聲，連住在 以基蓮 㧯 比珥‧以琳 个人也全部聽到了。</verse>
				<verse number="9">底們 城个河壩水全部係血；上帝還愛向 底們 个人民降下更大个災難。對 摩押 逃出來个難民全部會被獅仔食掉，該地所賸到个人也會共樣。</verse>
			</chapter>
			<chapter number="16">
				<verse number="1">摩押 个難民 對曠野个 西拉 城送一隻細羊 給 錫安 山當權个人做禮物。</verse>
				<verse number="2">這兜難民在 亞嫩 河壩滣个渡船頭，像被人逐出藪个鳥子，飛來飛去，毋知樣般正好。</verse>
				<verse number="3">佢等問 猶大 人：「請指教𠊎等，𠊎等應該樣般做？求你等保護𠊎等，在當晝頭也有陰影像暗晡頭共樣，將𠊎等難民囥起來；莫俾人尋到𠊎等。</verse>
				<verse number="4">𠊎等對 摩押 被人逐出來，愛去住在你等个當中。請保護𠊎等，使𠊎等能脫離毀滅者个手。」 (欺負㧯毀滅定著會停掉；侵略者一定會消滅。</verse>
				<verse number="5">然後有一個 大衛 个子孫會做王；佢愛用信實㧯慈愛來統治人民。佢愛尋求公道，趕緊實行正義。)</verse>
				<verse number="6">猶大 个人民講：「𠊎等聽講 摩押 人民非常驕傲。佢等自高自大，總係佢等个誇口全部係肨風个。」</verse>
				<verse number="7">摩押 人民會為 摩押 个災難來悲傷。佢等回想在 吉珥‧哈列設 食葡萄餅个時，儕儕流目汁噭，全部悲傷絕望。</verse>
				<verse number="8">希實本 个田園㧯 西比瑪 个葡萄園全部毀滅掉。該兜葡萄園所焗个酒，識使各國个統治者醉到橫下去。有一時期，它兜个葡萄藤一直向北伸到 雅謝 ，向東伸到曠野，向西伸到 死海 對面；</verse>
				<verse number="9">這下𠊎為 西比瑪 个葡萄樹悲傷，像為 雅謝 人哀傷一樣。𠊎為 希實本 㧯 以利亞利 目汁流到像落水一樣，因為在佢等收成果子㧯五榖个時，戰爭个嘶聲忽然臨到。</verse>
				<verse number="10">毋會再有人為田園當肥來歡喜；毋會再有人為葡萄園歡喜唱歌；毋會再有人在醡酒池踏葡萄。歡喜快樂个聲已經煞掉了 。</verse>
				<verse number="11">𠊎个心為 摩押 像琴出聲，為 吉珥‧哈列設 傷心。</verse>
				<verse number="12">摩押 人民常常到山頂逐個神廟去祈求，求到會痶死，總係完全無效。</verse>
				<verse number="13">以上係上主以前所宣告有關 摩押 个信息。</verse>
				<verse number="14">這下，上主講：「三年內，照長工个年限， 摩押 个榮光全部會喪失，只有少數个人民有好存留；佢等也賸無幾多，十分衰弱。」</verse>
			</chapter>
			<chapter number="17">
				<verse number="1">下背係有關 大馬士革 个信息。上主講：「 大馬士革 將來毋會再係一個城市；它會變做荒涼个土堆。</verse>
				<verse number="2">敘利亞 所有个城市會永遠荒掉 ，成做牛羊休息个所在，毋會有人來逐牠兜。</verse>
				<verse number="3">以色列 會失掉保障； 大馬士革 會喪失獨立。該兜賸到个 敘利亞 人會像 以色列 人共樣受盡羞辱。𠊎 — 上主、萬軍个元帥恁樣宣佈了。」</verse>
				<verse number="4">上主講：「到該日， 雅各 後代个榮光就會弱掉去；佢等會對富足變做貧窮。</verse>
				<verse number="5">以色列 將來會像一垤收割過个田地，光光像 利乏音 山壢正收割過个田地。</verse>
				<verse number="6">以色列 人中只有少數人還有命；佢等就像被人摘過个橄欖樹，樹尾只賸兩三粒，下背个樹桍也賸四、五粒个橄欖。𠊎 — 上主、 以色列 个上帝恁樣宣佈了。」</verse>
				<verse number="7">到該日，人愛轉向創造佢等个主，全心仰望 以色列 神聖个上帝。</verse>
				<verse number="8">佢等毋會再倚賴自家个手所造个祭壇，也毋信任自家个手指所做个，就係該兜 亞舍拉 女神个柱仔㧯香壇。</verse>
				<verse number="9">到該日，防備堅固个城市會被人廢掉，成做荒埔，像 希未 人㧯 亞摩利 人 在 以色列 人面前逃走㧒掉个城共樣。</verse>
				<verse number="10">以色列 人民啊，你等已經毋記得該拯救你等、像堅固个巖石保護你等个上帝；你等反轉為到愛拜外國个偶像，建設神聖花園 。</verse>
				<verse number="11">就算你等栽種該日它兜就爆芽開花，也無可能有收成。你等只有憂愁絕望痛苦。</verse>
				<verse number="12">唉！萬民个吵聲像海水恁大聲，像海浪恁吵。</verse>
				<verse number="13">列國像波浪攻打過來；總係上帝大聲咄它兜，使它兜退到遠遠，像山頂風中个泥粉，像暴風中个燥草。</verse>
				<verse number="14">暗晡頭它兜使人著驚，第二朝晨就無蹤無影。這係搶劫𠊎等土地个人所受到个命運！</verse>
			</chapter>
			<chapter number="18">
				<verse number="1">唉！ 古實 个河壩該片有一垤地，在該位會聽到擛翼胛个響聲。</verse>
				<verse number="2">外交使者坐等蒲草船，對該位順等 尼羅 河下來。你這兜使者愛遽遽帶信息轉你等个老屋去！就係河壩分開个地方，人民又高大又皮膚光滑，全世界人所驚个該隻強大个國家。</verse>
				<verse number="3">地上所有个人民啊，愛注意看山頂升起个大旗！愛注意聽羊角个響聲！</verse>
				<verse number="4">上主對𠊎講：「𠊎愛恬恬對天頂看下來，就像收成時節个露水，又像熱天个大日頭。</verse>
				<verse number="5">葡萄收成以前，花謝掉、葡萄差毋多會熟个時，仇敵愛來攻打 古實 ，像用禾鐮割葡萄藤恁容易。</verse>
				<verse number="6">佢等士兵个屍體全部橫在外背，給飛鳥野獸做食物；飛鳥歸隻熱天有好食，野獸還有好食到過冬。」</verse>
				<verse number="7">到該時，該隻河壩分開个地方，全世界人所驚个該隻強大个國家，它該兜又高大又皮膚光滑个人民愛向上主 — 萬軍个元帥獻禮物。佢等愛到 錫安 山，就係敬拜上主 — 萬軍个元帥个地方。</verse>
			</chapter>
			<chapter number="19">
				<verse number="1">下背係有關 埃及 个信息。 看啊，上主坐當遽个雲到 埃及 來。 埃及 个偶像在佢面前愊愊掣； 埃及 个人民會驚到無半點勇氣。</verse>
				<verse number="2">上主講：「𠊎愛激 埃及 發生內戰，使兄弟打兄弟，鄰舍打鄰舍，城市㧯城市相㓾，王㧯王戰爭。</verse>
				<verse number="3">𠊎愛使 埃及 人个心神混亂、計謀失效。佢等會向偶像求幫助，求問變邪術个、算命先生㧯鬼魂。</verse>
				<verse number="4">𠊎愛將 埃及 人交給一個暴君；一個當殘忍个王愛來管理佢等。𠊎 — 至高个上主、萬軍个元帥恁樣宣佈了。」</verse>
				<verse number="5">尼羅 河个水位會降低，河壩燥掉。</verse>
				<verse number="6">埃及 个運河㧯河壩因為燥掉就發出臭味，蘆竹㧯燈心草也枯燥；</verse>
				<verse number="7">尼羅 河兩片河壩滣个農作物燥掉，被風吹淨淨。</verse>
				<verse number="8">在 尼羅 河壩滣靠打魚生活个人全部會傷心到面憂憂；佢等个釣梹㧯魚網全部用毋到。</verse>
				<verse number="9">紡麻紗㧯織棉布个人全部會失望；</verse>
				<verse number="10">紡織工人㧯其他有技術个工人一個一個失業。</verse>
				<verse number="11">瑣安 城个領袖盡戇！ 埃及 王最聰明个參謀也無麼介好辦法！佢等樣敢在國王面前講自家係古代學者㧯君王个子孫呢？</verse>
				<verse number="12">埃及 王啊，你該兜聰明个顧問走㖠去了？無一定佢等會㧯你講，上主 — 萬軍个元帥對 埃及 有麼介計劃！</verse>
				<verse number="13">瑣安 㧯 孟斐斯 个領袖全部係戇仔，佢等應該領導國家，總係佢等𢱋毋著路。</verse>
				<verse number="14">上主使佢等講出糊塗个主張，致到 埃及 所做个事全部毋著；國家無安定，像一個食酒醉个人在自家嘔出來个垃圾底背打盪溜。</verse>
				<verse number="15">在 埃及 ，無論係好額个、窮苦个、高貴个、卑賤个，無一個有辦法。</verse>
				<verse number="16">到該時， 埃及 个男人會像婦人家恁無膽。佢等看到上主 — 萬軍元帥个手擎起來愛責罰佢等，就全部愊愊掣無葛無煞。</verse>
				<verse number="17">埃及 人一想到 猶大 國，就全部盡著驚。這係因為上主 — 萬軍个元帥樣般安排 埃及 人个命運。</verse>
				<verse number="18">該日仔一到， 埃及 个五隻城市全部會講 希伯來 話。它兜个人民會奉上主 — 萬軍元帥个名發誓。其中一個城會安到「日頭城」。</verse>
				<verse number="19">該日仔一到， 埃及 地中會有一座為上主起个祭壇； 埃及 个邊界會有為上主頓个石𣎴。</verse>
				<verse number="20">這兜全部係代表上主 — 萬軍个元帥住在 埃及 人當中个記號。佢等受到欺負、向上主求幫助个時，上主會差派一個拯救者又係保護者來救佢等。</verse>
				<verse number="21">上主愛向 埃及 人顯明，使 埃及 人承認佢，敬拜佢，獻牲儀㧯祭物給佢。佢等會在佢面前還願。</verse>
				<verse number="22">上主愛責罰 埃及 人，也愛醫治佢等。佢等會倒轉來歸屬上主。佢會聽佢等个祈禱，醫治佢等。</verse>
				<verse number="23">該日仔一到， 埃及 透到 亞述 會有一條大路。兩國个人民來往旅行； 埃及 人㧯 亞述 人會共下敬拜上主。</verse>
				<verse number="24">該日仔一到， 以色列 會㧯 埃及 、 亞述 平等；這三大國會使全世界人民得到福氣。</verse>
				<verse number="25">上主 — 萬軍个元帥愛賜福它兜，講：「 埃及 — 𠊎个子民， 亞述 — 𠊎創造个， 以色列 — 𠊎个產業，𠊎愛賜福給你等！」</verse>
			</chapter>
			<chapter number="20">
				<verse number="1">亞述 皇帝 撒珥根 命令佢个元帥攻打 非利士 个 亞實突 城，佔領該城。</verse>
				<verse number="2">這件事發生前三年，上主識命令 亞摩斯 个孻仔 以賽亞 脫掉佢身項个麻衫㧯腳項个鞋。佢聽從上主个話，打赤膊，打赤腳行路。</verse>
				<verse number="3">亞實突 被人佔領个時，上主講：「𠊎个僕人 以賽亞 已經打赤膊、打赤腳行三年久；這就係共樣个事愛發生在 埃及 㧯 古實 个兆頭。</verse>
				<verse number="4">亞述 皇帝愛對這兩個國家當中將人民捉走，剝光佢等个衫褲；該時，無論老人細子，全部愛打赤膊，打赤腳，露出下身，使 埃及 當見笑。</verse>
				<verse number="5">該兜信賴 古實 㧯誇口 埃及 个人會失志絕望。</verse>
				<verse number="6">該時，住在 非利士 海滣个人會講：『看啊，𠊎等所倚靠、愛幫助𠊎等抵抗 亞述 皇帝个人樣般係恁樣定定！𠊎等敢有辦法逃走呢？』」</verse>
			</chapter>
			<chapter number="21">
				<verse number="1">下背係有關 巴比倫 个信息。 就像狂風掃過沙漠，災難會對得人驚个地方來到。</verse>
				<verse number="2">𠊎看到悲慘个異象接等發生 — 詭詐个還係詭詐；破壞个繼續破壞。 以攔 个軍隊啊，衝鋒噢！ 米底亞 个軍隊，攻城噢！上帝愛停止 巴比倫 帶給人个痛苦。</verse>
				<verse number="3">𠊎一看到這狀況，聽到這話，就著驚艱苦，像婦人家𫱔細人仔个陣痛共樣。𠊎驚到麼介都看毋到，麼介也聽毋到。</verse>
				<verse number="4">𠊎个頭那昏昏；𠊎驚到愊愊掣。𠊎平常希望臨暗仔遽遽來到好歇睏，總係這下臨暗仔俾𠊎還較著驚。</verse>
				<verse number="5">在這異象中，𠊎看到筵席準備好勢，地毯也為人客鋪好了；佢等又啉又食。忽然間，有命令傳來：「各位軍官，拿盾牌 ，準備相㓾！」</verse>
				<verse number="6">該時，主對𠊎講：「你去，派人守望，吩咐佢將所看到个隨時報告。</verse>
				<verse number="7">若係佢看到有騎兵兩個兩個過來，還有人騎等驢仔㧯駱駝，就愛注意看詳細。」</verse>
				<verse number="8">守望个人 大聲喊講：「主啊，𠊎會日夜在這位企衛兵！」</verse>
				<verse number="9">忽然間，有騎兵兩個兩個上來；守望个人就報告講：「 巴比倫 橫掉了！橫掉了！佢等所拜个偶像全部被人敲碎在地上。」</verse>
				<verse number="10">𠊎个 猶大 同胞啊！你等一溜裡像被人用篩仔篩个麥仔一樣；總係這下𠊎已經報告你等一個好消息，就係𠊎對上主 — 萬軍个元帥、 以色列 个上帝該位聽來个。</verse>
				<verse number="11">下背係有關 以東 个信息。 有人對 以東 問𠊎：「掌更个啊！暗晡頭會過吂？暗晡時還有幾久？」</verse>
				<verse number="12">𠊎應講：「天會光了，總係暗晡頭還會來。若係你還愛問，下二擺正來問。」</verse>
				<verse number="13">下背係有關 阿拉伯 个信息。 底但 个人民啊，在 阿拉伯 沙漠个樹林中搭帳篷个商隊啊！</verse>
				<verse number="14">有嘴燥个人到你等面前來，你等愛拿水給佢等啉！在 提瑪 个人民啊，有難民來到，你等愛拿給佢等食！</verse>
				<verse number="15">這兜人全部係無被刀仔㓾到、無被弓箭射到，在戰爭中逃命出來个難民。</verse>
				<verse number="16">所以主對𠊎講：「在一年內，照長工个年限， 基達 部落个興旺就愛停掉。</verse>
				<verse number="17">基達 人中最勇敢个係弓箭手；佢等个數目也會減少，賸無幾個。𠊎 — 上主、 以色列 个上帝恁樣宣佈了。」</verse>
			</chapter>
			<chapter number="22">
				<verse number="1">下背係有關「異象山壢」个信息。 發生麼介事？全城个人做麼介上屋頂去呢？</verse>
				<verse number="2">全城鬧鬧熱熱，逐所在充滿歡喜。 你等个同胞死掉，並毋係死在刀劍㧯戰場。</verse>
				<verse number="3">你等个領袖吂射一枝箭就被人捉到；逃到遠方个戰士也被人捉轉來。</verse>
				<verse number="4">這下毋好來插𠊎，由在𠊎大聲噭！毋好來安慰𠊎，因為𠊎个同胞全部死掉了。</verse>
				<verse number="5">在「異象山壢」中，這係著驚、失敗、混亂个日仔；這係至高个上主 — 萬軍个元帥所加給𠊎等个。𠊎等个城牆被人攻橫，求救命个聲在山壢中緊應聲。</verse>
				<verse number="6">以攔 个騎兵㧯戰車來了，箭袋肚裝滿箭。 吉珥 个步兵也拿等盾牌前來。</verse>
				<verse number="7">猶大 盡肥个山壢中滿滿係戰車；騎兵在 耶路撒冷 城門前擺陣、準備相㓾。</verse>
				<verse number="8">猶大 个防線被人攻破。 該時，你等倚靠兵器倉庫拿出來个武器。</verse>
				<verse number="9">你等看到 大衛 城个城牆有盡多爛孔，等等你等去補。你等巡查 耶路撒冷 所有个屋仔，拆掉一部份，拿拆下來个石頭補城牆爛孔个所在。為到積存罅額个水，</verse>
				<verse number="10"></verse>
				<verse number="11">你等在兩扇城牆之間挖一個水池，將舊水池个水透到該位去。所有這兜事情上帝早就安排好勢、也做到當好；總係你等毋聽佢个話、毋插佢。</verse>
				<verse number="12">該時，至高个上主 — 萬軍个元帥喊你等哀傷大噭，剃光頭那毛，著麻衫。</verse>
				<verse number="13">總係，你等還在歡喜快樂。你等㓾牛羊，大食大啉。你等講：「現食現好，會死韶早。」</verse>
				<verse number="14">𠊎親耳聽到上主 — 萬軍个元帥㧯𠊎講：「佢等一日還在，𠊎就一日毋赦免佢等个罪惡。𠊎 — 至高个上主、萬軍个元帥恁樣宣佈了。」</verse>
				<verse number="15">至高上主 — 萬軍个元帥吩咐𠊎去見宮廷个事務大臣 舍伯那 ，警告佢：</verse>
				<verse number="16">「你係麼人，樣敢在山邊个磐石中為自家挖墳墓？</verse>
				<verse number="17">你自家恅到係重要个人物；總係上主愛將你拈起來又㧒出去，</verse>
				<verse number="18">將你捲做一團，㧒到一個大國去。你會死在該位，死在你一直恅到當光榮个戰車堘。你恁樣羞辱王室！</verse>
				<verse number="19">上主毋准你坐高位，愛將你拉下來。」</verse>
				<verse number="20">上主對 舍伯那 講：「該時，𠊎愛將𠊎个僕人 — 希勒家 个孻仔 以利亞敬 喊來。</verse>
				<verse number="21">𠊎愛拿你个朝服給佢著，拿你个腰帶被佢繫；𠊎愛將你个權力全部交給佢。佢會像阿爸恁樣看顧 耶路撒冷 㧯 猶大 个人民。</verse>
				<verse number="22">𠊎愛將 大衛 王朝个鎖匙交給佢。佢所打開个，無人能關；佢關掉个，無人能開。</verse>
				<verse number="23">𠊎愛將佢放在穩固个所在，像用釘仔釘住住恁樣；佢个全家會因為佢來得到榮耀。</verse>
				<verse number="24">「總係，厥爸屋下个子子孫孫會成做佢个重擔。佢等全部倚賴佢，像鑊仔㧯酒罌掛在樹釘頂高一樣。</verse>
				<verse number="25">有一日，該當紮个樹釘會因為忒重磧到斜斜，致到斷截；掛在樹釘頂高个東西全部會跌下來。」上主 — 萬軍个元帥恁樣宣佈了。</verse>
			</chapter>
			<chapter number="23">
				<verse number="1">下背係有關 泰爾 个信息。 他施 个船仔該兜船員啊，愛盡噭噢！你等家鄉个 泰爾 港已經毀滅了，屋㧯海港也打壞了。你等个船仔對 塞浦路斯 轉來个時，就會聽到這個消息。</verse>
				<verse number="2">海滣个人民， 西頓 个生理人啊，你等愛偷偷仔噭，</verse>
				<verse number="3">雖然你等過海去做生理，將 埃及 出產个五榖賣給各國。</verse>
				<verse number="4">總係 西頓 城啊，你會感覺當見笑；因為深海㧯大海毋認你，講：「𠊎無辛苦𢱋過細人仔，也無𫱔過子女。」</verse>
				<verse number="5">連 埃及 人聽到 泰爾 毀滅个消息也會當著驚。</verse>
				<verse number="6">腓尼基 人啊，你等愛傷心盡噭，你等會想愛逃到 他施 去！</verse>
				<verse number="7">這係歷史當久、繁榮个 泰爾 城麼？係識送人到外國去建立殖民地个城麼？</verse>
				<verse number="8">泰爾 係京城；它个生理人係出名个貴族。係麼人使它變到恁衰呢？</verse>
				<verse number="9">這係上主 — 萬軍个元帥所計劃个；佢愛廢掉佢等一切个驕傲，使地上有名望个人全部變做謙卑。</verse>
				<verse number="10">在 他施 殖民地个人啊，你等會像 尼羅 河个水恁樣到處流浪，無人會保護你等了 。</verse>
				<verse number="11">上主个手已經伸過大海，去打擊該片个國家。佢命令毀滅 腓尼基 个商業中心 。</verse>
				<verse number="12">西頓 城啊，你个好日仔已經過掉了！你个人民會受欺壓，就算佢等走到 塞浦路斯 去，也得毋到安全。</verse>
				<verse number="13">(該群帶等野獸來吞食 泰爾 个，係 巴比倫 人，毋係 亞述 人。 巴比倫 人準備愛攻破 泰爾 个城堡城牆，使該城變做荒埔 。)</verse>
				<verse number="14">他施 个船仔該兜船員啊，愛傷心盡噭！你等所倚靠个城市已經毀滅了。</verse>
				<verse number="15">泰爾 城被人毋記得个時節會到了；它會被人毋記得七十年，堵好係一個國王个壽年。七十年後， 泰爾 會像該詩歌所描寫个妓女：</verse>
				<verse number="16">拿起你个豎琴，到城肚去𫟧； 你這可憐、被人毋記得个妓女， 彈你个琴、唱你个歌！ 無一定你該兜情郎還會轉來！</verse>
				<verse number="17">七十年過後，上主愛俾 泰爾 恢復貿易。 泰爾 會㧯世界盡多國家做生理 。</verse>
				<verse number="18">它會將做生理賺个錢奉獻給上主。它毋會再偷偷仔囥錢銀；它个錢反轉會交給敬拜上主个人，使佢等食飽飽、著靚靚。</verse>
			</chapter>
			<chapter number="24">
				<verse number="1">上主愛毀滅大地，使它荒涼。佢愛將土地揙轉過來，將人民分散出去。</verse>
				<verse number="2">無論人民抑係祭司，奴才抑係主人，買个抑係賣个，債主抑係欠債个，窮苦个抑係富足个，全部會受到共樣个命運。</verse>
				<verse number="3">土地荒涼，一些仔出產也無。上主恁樣宣佈了。</verse>
				<verse number="4">土地變盡瘦盡燥；全世界敗壞掉去；連世上坐大位个人也變腐敗。</verse>
				<verse number="5">地上个人毋遵守法律，違反上帝所立永遠个約，打衊佢等所住个土地。</verse>
				<verse number="6">所以，上帝咒詛土地，使它敗壞。人民付出佢等所做所行个代價。地上个人像被火燒，賸下來个人越來越少了。</verse>
				<verse number="7">葡萄藤枯燥，新酒也盡少。心中歡樂變做悲傷；</verse>
				<verse number="8">琴聲、鼓聲全部停掉；歡樂个聲音也無了。</verse>
				<verse number="9">無人再啉酒作樂，無人嘗得出酒个甘甜。</verse>
				<verse number="10">城肚一片混亂，家家戶戶門鎖到𢫮𢫮，驚人偷入去。</verse>
				<verse number="11">有人在街項吵愛啉酒；一切个歡樂無掉去，地上無麼介生趣。</verse>
				<verse number="12">城肚荒涼，城門完全毀壞。</verse>
				<verse number="13">世上列國全部會有共樣个災難，就像收成後，橄欖樹頂無橄欖，葡萄藤項無葡萄。</verse>
				<verse number="14">災難過後還生个人會歡喜快樂唱歌。西方个人愛稱讚上主个偉大；</verse>
				<verse number="15">東方个人愛頌讚佢；住在海島个人也愛讚美上主 — 以色列 个上帝。</verse>
				<verse number="16">對天涯海角𠊎等聽到有人唱歌，講：「榮耀歸給公義个上主 。」 總係𠊎認為𠊎會有災難了，𠊎壞了！𠊎慘了！詭詐个人緊來緊詭詐；佢等个行為得人驚到至極。</verse>
				<verse number="17">地上个人民啊，有災難、陷阱、羅網等等你等。</verse>
				<verse number="18">閃過災難个人會跌落陷阱；爬出陷阱个人會被羅網纏到；因為天頂个水門全打開來，地个根基也緊顫。</verse>
				<verse number="19">地面會裂開、碎掉、崩掉。</verse>
				<verse number="20">大地會搖動，像啉酒醉个人橫來橫去，像風差中个茅寮搖搖擺擺。大地被重罪磧到落掉、永遠毋會再企起來。</verse>
				<verse number="21">到該日，上主愛責罰天界个掌權者㧯地上个列王。</verse>
				<verse number="22">佢等會像犯人恁樣被人喊過來，逐入地牢。上主愛將佢等關在該位，等到責罰个時節來到。</verse>
				<verse number="23">月光會見笑到毋會發光，日頭會壞勢到烏掉；因為上主 — 萬軍个元帥會在 耶路撒冷 ，在 錫安 山頂掌權；民間个領袖全部會看到佢个榮光。</verse>
			</chapter>
			<chapter number="25">
				<verse number="1">上主啊，你係𠊎个上帝； 𠊎愛尊敬你，稱頌你个名。 因為你係信實个，你行神蹟奇事； 你實現古早已經定好个計劃。</verse>
				<verse number="2">你使城市變做石堆； 你使城堡變做荒埔。 外邦人起个宮殿已經荒廢， 永遠無法度重建起來。</verse>
				<verse number="3">所以，剛強个人民會讚美你； 強國个城市會敬畏你。</verse>
				<verse number="4">貧窮个人倚靠你， 困苦个人對你得到安全。 你做佢等暴風雨中个避難所， 使佢等在熱天个日頭下遮涼。 殘暴人个攻擊像冬天个狂風 ，</verse>
				<verse number="5">也當像沙漠底背迫人个熱氣。 總係上主啊，你塞敵人个嘴； 你阻止外邦暴民个吵鬧， 就像雲个陰影除掉熱氣。</verse>
				<verse number="6">在 錫安 山，上主 — 萬軍个元帥愛為天下萬國準備筵席，有滂沛个食物，盡香盡好个老酒。</verse>
				<verse number="7">在這山頂，佢愛拉下萬民悲傷幪面个面帕，除掉揜等列國頭那頂个布篷。</verse>
				<verse number="8">佢愛將死亡永遠除掉！至高个上主愛拭燥逐儕个目汁，除掉佢子民在各國所受到个羞恥。上主恁樣宣佈了。</verse>
				<verse number="9">該時，逐儕愛講：「佢確實係𠊎等个上帝；𠊎等一直信靠佢，佢就拯救𠊎等。佢係上主，𠊎等一直信靠佢。𠊎等愛歡喜快樂，因為佢已經拯救𠊎等。」</verse>
				<verse number="10">上主愛保護 錫安 山；總係 摩押 人會被人踐踏，像禾稈被人㧒落糞堆中做肥。</verse>
				<verse number="11">佢等會在糞堆中伸出手來，像人愛泅水；總係上帝愛羞辱佢等，使佢等驕傲个手軟下來。</verse>
				<verse number="12">上帝愛毀壞 摩押 人个城堡，拆掉城牆，拆到平平，成做泥粉。</verse>
			</chapter>
			<chapter number="26">
				<verse number="1">該日，人民愛在 猶大 地唱這首歌： 𠊎等个城牆樣般堅固！ 上帝親自保護這個城！</verse>
				<verse number="2">城門打開來！ 俾正義个國家入來！ 俾忠信个人民落來！</verse>
				<verse number="3">上主啊，你將完全个平安 賜給心意堅強个人， 賜給信靠你个人。</verse>
				<verse number="4">愛永遠信靠上主， 因為上主係永久个磐石。</verse>
				<verse number="5">佢使驕傲个人謙卑； 佢破壞堅固个城市，拆掉城牆， 拆到平平，成做泥粉。</verse>
				<verse number="6">被人欺負个會企在磚截堆頂高； 窮苦个人會踐踏橫下來个城牆。</verse>
				<verse number="7">公義个上主啊， 你使公平个人行平路； 你使正直个人行直路。</verse>
				<verse number="8">上主啊，𠊎等等候你，順從你个旨意； 你个名㧯名望係𠊎等心靈个願望。</verse>
				<verse number="9">在暗晡時𠊎欣慕你， 𠊎全心全意尋求你。 在你審判世界个時節， 地上个萬民就學習正義。</verse>
				<verse number="10">雖然你用仁慈對待壞人， 佢等還係毋肯學做善事； 在公義个地佢等行事不義， 佢等全無注意到你个威嚴。</verse>
				<verse number="11">上主啊，你个仇敵毋知你愛責罰佢等。 俾佢等看到你恁熱心惜你个子民來感覺見笑； 俾佢等受到你早就為你敵人準備好个責罰。</verse>
				<verse number="12">上主啊，求你使𠊎等興旺； 𠊎等个成就全部係你賞賜个。</verse>
				<verse number="13">上主 — 𠊎等个上帝啊， 𠊎等識被別个主管制； 總係你正係𠊎等个主。</verse>
				<verse number="14">佢等已經死掉，變做陰魂了，無可能返生； 佢等被你責罰，完全消滅，毋會有人紀念。</verse>
				<verse number="15">上主啊，你使𠊎等个國家興旺， 使𠊎等个國民緊多、土地緊闊， 因為恁樣，你个名就得到榮光。</verse>
				<verse number="16">上主啊，你識責罰你个子民； 在苦難中佢等全心求喊你 。</verse>
				<verse number="17">上主啊，你使𠊎等大聲盡喊，盡嘶， 像生產个婦人家在陣痛中緊噌。</verse>
				<verse number="18">𠊎等識像生產恁樣盡喊、盡嘶， 所𫱔个不過係風定定。 𠊎等毋識為國家打贏戰爭； 𠊎等毋識使世間人失落跌倒 。</verse>
				<verse number="19">總係𠊎等死掉个同胞會復活！ 佢等个身體會再得到生命！ 睡在墳墓中个人啊，愛返生大聲歡唱！ 就像地上朝晨頭个露水帶來生命， 上主愛俾死掉个人再返生過來。</verse>
				<verse number="20">𠊎个同胞，入你等个屋肚去！門關好，暫時囥起來，直到上帝个怒氣消掉。</verse>
				<verse number="21">上主愛對佢所住个天頂降臨，責罰世間人个罪。人間个兇殺全部會顯露出來；地面上毋會再囥等被人㓾死个屍體。</verse>
			</chapter>
			<chapter number="27">
				<verse number="1">到該日，上主愛用又硬又利个大劍刑罰大海怪，就係該彎彎斡斡善變个古蛇；佢愛㓾死大海中个惡龍 。</verse>
				<verse number="2">到該日，上主愛提起佢所歡喜个葡萄園，講：</verse>
				<verse number="3">「𠊎看守它，照時淹水；日夜看守，無人能破壞它。</verse>
				<verse number="4">𠊎無愛再對𠊎个葡萄園發譴。若係園肚有竻仔㧯蒺藜，𠊎一定會挷掉，將它兜燒淨淨。</verse>
				<verse number="5">若係𠊎子民个敵人愛𠊎保護，就愛先㧯𠊎和好。無毋著，佢等愛先㧯𠊎和好。」</verse>
				<verse number="6">將來 雅各 个子孫會像樹仔恁樣釘根； 以色列 人民會發芽、開花，在全世界結滿果子。</verse>
				<verse number="7">上主責罰 以色列 人，無像佢責罰佢等个敵人恁嚴。佢㓾掉个 以色列 人，也無像佢等个敵人被佢消滅恁多。</verse>
				<verse number="8">上主用戰爭來對付佢个子民，將佢等逐走；佢對東方吹來一陣狂風，將佢等捲走 。</verse>
				<verse number="9">除非 雅各 个子孫將佢等為外邦神明起个祭壇全部拆掉，將 亞舍拉 女神个柱仔㧯香壇全部㩳橫，佢等个罪絕對毋會得到赦免。</verse>
				<verse number="10">堅固个城廢掉了，屋仔無人住，像曠野一樣；細牛仔在該位食草、歇睏，連樹个枝葉也食掉。</verse>
				<verse number="11">樹枝全部枯燥拗斷，婦人家去拈來做柴燒。因為人民戇檔無智識，佢等个上帝無愛再憐憫佢等，佢等个創造主也無愛再施恩給佢等。</verse>
				<verse number="12">以色列 民啊，到該日，上主愛對 幼發拉底 河到 埃及 邊界將你等一個一個召集起來，就像打榖个人收精榖共樣。</verse>
				<verse number="13">到該日，歕羊角个聲會將流亡在 亞述 㧯 埃及 个 以色列 人全部喊轉來。佢等會在 耶路撒冷 — 上主个聖山頂敬拜佢。</verse>
			</chapter>
			<chapter number="28">
				<verse number="1">撒馬利亞 會堵到災難了！它像花做个冕旒， 以色列 該兜酒鬼啉到醉醉緊誇口它；它像在盡肥山壢頂个花，盡靚又光榮，總係盡遽會謝掉。</verse>
				<verse number="2">看哪，主準備強大有力个人來攻擊這城。佢來个時，像起大風、落冰雹，像做大水沖入全地。</verse>
				<verse number="3">撒馬利亞 像 以色列 个酒鬼所誇口个冕旒，會被人踐踏，㧒在地上；</verse>
				<verse number="4">它像在盡肥山壢頂个花，盡靚又光榮，總係盡遽會謝掉；它又像熱天一到就打子个無花果，惹人注目，一熟就被人摘下來食掉。</verse>
				<verse number="5">在該日，上主 — 萬軍个元帥會像盡靚又光榮个冕旒，戴在災難過掉還賸到个子民頭那頂。</verse>
				<verse number="6">佢愛賜公正个心給法官，賜勇氣給防守城門、打退強敵个人。</verse>
				<verse number="7">先知㧯祭司也醉到橫笐橫袋；佢等啉酒啉到糊裏糊塗。該兜先知全部醉到毋明白上帝給佢等个異象，該兜祭司也啉到無法度分別是非。</verse>
				<verse number="8">筵席个桌頂盡亂，全部係嘔出來个垃圾東西。</verse>
				<verse number="9">大家怪怨𠊎講：「這先知到底教麼介？麼人愛聽佢講个呢？佢愛去講給堵堵斷乳个細人仔聽正著！</verse>
				<verse number="10">佢敢想愛一隻一隻字、一隻一隻音，這一些仔、該一些仔 來教𠊎等！」</verse>
				<verse number="11">若係你等毋聽𠊎个話，上帝愛派外國人，用打結个舌乸講奇怪个話來教訓你等。</verse>
				<verse number="12">佢識對你等講：「你等愛使痶个人得到安息，恁樣你等在這所在正會得到安息，得到爽快」，總係你等毋聽佢个話。</verse>
				<verse number="13">所以，上主愛一隻一隻字、一隻一隻音，這一些仔、該一些仔來教你等。該時，你等會行一步，橫一擺；你等會跌倒受傷，被人網到、捉到。</verse>
				<verse number="14">你這兜在 耶路撒冷 管理人民，當傲慢个領袖啊，愛聽上主對你等講个話！</verse>
				<verse number="15">你等恅到已經㧯死亡簽契約，㧯陰間 打合同了，所以自認在敵軍經過个時就毋會死；你等恅到講花撩㧯欺騙人也會平安無事。</verse>
				<verse number="16">這下至高个上主愛對你等講：「𠊎在 錫安 建立堅強穩固个地基，在該位放貴重个房角石；有信心个人就毋使著急。</verse>
				<verse number="17">在這基礎頂，𠊎愛用公義做量索，用誠實做線鉈。」 冰雹會打爛你等所倚靠个花撩；大水會浸掉你等个安全。</verse>
				<verse number="18">你等㧯死亡簽个契約會廢除，㧯陰間打个合同會取消。敵軍經過个時，你等就被人踐踏。</verse>
				<verse number="19">這災難一擺又一擺來打擊你等，你等會日夜繼續忍受痛苦。上帝逐擺給你等新个信息，全部會帶來新个著驚！</verse>
				<verse number="20">你等就像俗語所描寫个：「眠床忒短，伸腳毋得；被骨忒狹，蓋毋到全身。」</verse>
				<verse number="21">上主愛像佢在 比拉心 山㧯 基遍 山壢相㓾所做个恁樣，起來完成佢个工，係希奇个工；佢一定會成就佢个事，係奇怪个事。</verse>
				<verse number="22">毋好看輕𠊎對你等个警告！若無，你等就毋使想愛閃掉這個壞運。𠊎已經聽到了，至高个上主 — 萬軍个元帥決定愛毀掉歸隻國家。</verse>
				<verse number="23">你等愛留心聽𠊎个話，注意聽𠊎㧯你等講个。</verse>
				<verse number="24">敢講在耕種个時單淨犁田㧯鬆泥就做得係麼？</verse>
				<verse number="25">耕田人有一日將田地犁好耙平，就委種，種大茴香抑係細茴香。佢愛種一行一行个小麥抑係大麥，並在田个邊堘種較特別个五榖。</verse>
				<verse number="26">佢知愛樣般耕種，因為上帝有教佢。</verse>
				<verse number="27">佢毋會用大棍仔打大茴香抑係細茴香；佢用个係堵好大个棍仔。</verse>
				<verse number="28">佢也毋會一直使用風車，毋肯停，造成麥仔个損害。佢知愛樣般用打榖車，輕輕仔輾過麥堆，使麥稈㧯麥仔分開，毋會損壞麥仔。</verse>
				<verse number="29">這種智慧全部係上主 — 萬軍个元帥賜給佢个。上帝个計劃樣般奇妙；佢个智慧樣般偉大。</verse>
			</chapter>
			<chapter number="29">
				<verse number="1">上帝个祭壇 ，就係 耶路撒冷 本身，也會堵到災難了！ 大衛 識安營个城會承受災難了！就算一年一年過去，節期照常輪流下去，</verse>
				<verse number="2">上帝還係愛向這稱做「上帝祭壇」个城降災難。會有悲傷哀噭个聲音；全城會變做一座血漬漬个大祭壇！</verse>
				<verse number="3">上帝愛在四周圍安營攻擊這城，圍困這城，起高臺來攻擊它。</verse>
				<verse number="4">耶路撒冷 个人毋敢出聲，就跍在地上，用喉嗹細聲講話，像鬼講話恁樣對地泥下傳出來。</verse>
				<verse number="5">耶路撒冷 啊，歸群攻擊你个仇敵全部會像塵灰一樣被風吹散；該兜得人驚个軍隊會像礱糠被風吹走。這事忽然間會臨到，</verse>
				<verse number="6">上主 — 萬軍个元帥愛用大雷公、大地動㧯盡大个聲，愛派龍捲風、大風差㧯烈火來拯救你。</verse>
				<verse number="7">該時，來攻擊上帝祭壇个各國軍隊全部會失敗；佢等个武器㧯軍備全部會像發夢，像暗晡時个異象恁樣消失。</verse>
				<verse number="8">像餓到會死个人在夢中緊食，醒過來个時還係肚飢；像渴到會死个人在夢中大口啉水，醒過來个時共樣嘴燥；攻擊 錫安 山个各國軍隊也係恁樣。</verse>
				<verse number="9">你等繼續做戇檔个事啊！繼續揞目珠像青盲个人啊！你等還吂啉酒已經酒醉，一滴酒還吂啉已經搖搖擺擺！</verse>
				<verse number="10">上主使你等頭昏昏想愛睡；佢揞等你等个目珠。先知、先見應該係人民个目珠，總係上帝遮等佢等个目珠。</verse>
				<verse number="11">所有異象个意義全部對你等囥起來，像一本封等个書卷。你等拿這書卷去請有學問个人讀，佢一定會㧯你等講，佢無法度讀，因為這書卷係封等个。</verse>
				<verse number="12">你等請毋識字个人讀，佢會㧯你講，佢毋會讀。</verse>
				<verse number="13">主講：「這兜人民認為佢等在該位敬拜𠊎呢！佢等用嘴唇皮尊敬𠊎，總係佢等个心遠遠離開𠊎。佢等个宗教係人間个規條、傳統，讀到熟熟、背起來定定。</verse>
				<verse number="14">所以，𠊎愛在想毋到个時節打擊佢等，使佢等著驚。佢等當中，聰明人个聰明會全無價值；精明人个精明會完全無用。」</verse>
				<verse number="15">該兜將計謀囥等毋俾上主知个人會堵到災難了！佢等在暗中計劃，恅到無人看到，無人知佢等在該位做麼介。</verse>
				<verse number="16">佢等顛倒是非。到底燒缶師傅較大呢，抑係缶仔較大呢？受造个東西樣能對製造人講：「你並無造𠊎」？抑係對佢講：「你無罅聰明」？</verse>
				<verse number="17">就像俗語講： 「過一站時間， 黎巴嫩 个樹林會變做肥田；肥田會變做樹林。」</verse>
				<verse number="18">到該日，耳聾个會聽到讀書个聲；一直在烏暗中个瞙目个會看得到。</verse>
				<verse number="19">卑微个人會接受上主所賜个喜樂；窮苦个人會頌讚 以色列 神聖个上帝。</verse>
				<verse number="20">欺負人个會被人除滅；得罪上帝个會受責罰；罪人全部會受消滅。</verse>
				<verse number="21">譭謗別人个，阻擋公道个，冤枉誠實人个，全部會被上帝消滅。</verse>
				<verse number="22">所以，該識拯救 亞伯拉罕 个上主對 雅各 个後代 — 以色列 恁樣講：「𠊎个子民啊，你等毋使再受羞辱了，你等个面毋使再見笑到面紅際炸了。</verse>
				<verse number="23">你等看到𠊎賜給你等个子孫，你等就會承認𠊎係 以色列 神聖个上帝。你等會尊敬𠊎，敬畏𠊎。</verse>
				<verse number="24">迷迷糊糊个人會學精；嫌東嫌西个人會接受教導。」</verse>
			</chapter>
			<chapter number="30">
				<verse number="1">上主恁樣講：「治理 猶大 个人 會堵到災難了，因為佢等悖逆𠊎。佢等毋跈𠊎，自家定計劃，㧯人簽違背𠊎旨意个條約，罪上加罪。</verse>
				<verse number="2">佢等無求問𠊎就向 埃及 求幫助。佢等要求 埃及 个保護；佢等倚靠 埃及 王。</verse>
				<verse number="3">總係 埃及 王無力量好保護佢等； 埃及 个保護到尾會帶來見笑，帶來羞辱。</verse>
				<verse number="4">雖然 猶大 个使者已經到 埃及 个 瑣安 㧯 哈內斯 城；</verse>
				<verse number="5">猶大 人民將來會因為信賴一個靠毋得个國家來後悔。佢等無得到麼介好處，只有見笑、失望。」</verse>
				<verse number="6">這係上帝所講有關 猶大 南方野獸个話：「 猶大 个使者在一個危險个地區旅行；該位有獅仔、毒蛇㧯會飛个火蛇 。佢等个驢仔㧯駱駝載滿貴重个禮物，愛去獻給一個無辦法幫助佢等个國家。</verse>
				<verse number="7">埃及 个幫助空空、無麼介路用。所以，𠊎㧯 埃及 安一個偏名，喊它『毋會挺動个 拉哈伯 』。」</verse>
				<verse number="8">上帝愛𠊎將佢子民个行動記錄在書上，刻在枋仔頂，使後代个人永遠記得佢等个邪惡。</verse>
				<verse number="9">佢等係一群悖逆上主个人，好講花撩个子女，一直毋聽上主个教訓。</verse>
				<verse number="10">佢等對先見講：「毋好看異象」，又對先知講：「毋好㧯𠊎等講應該做麼介；單單講𠊎等歡喜聽个話㧯虛假个事就好了。</verse>
				<verse number="11">走開！毋好擋到𠊎等个路。𠊎等無愛聽有關 以色列 神聖个上帝。」</verse>
				<verse number="12">總係 以色列 神聖个上帝恁樣講：「你等毋聽𠊎㧯你等講个話，反轉倚靠武力㧯詐欺。</verse>
				<verse number="13">你等犯罪了。你等像一扇有裂縫个高牆，會忽然間橫下來。</verse>
				<verse number="14">你等像打碎个缶仔，打到碎碎，無一析做得拿來裝火爐肚个火炭，抑係拿來舀水缸肚个水。」</verse>
				<verse number="15">至高个上主 — 以色列 神聖个上帝對佢个子民講：「轉來哪，安心信靠𠊎，你等就會得救；安靜心等候𠊎，你等就有力量。」總係你等毋願意。</verse>
				<verse number="16">你等想愛騎快馬走俾敵人來逐。無毋著，你等一定愛逃走！你等恅到自家个馬仔走當遽，總係敵人个馬仔比你等走還較遽！</verse>
				<verse number="17">就算你等有一千儕，聽到一個敵人咄一聲，你等就跋起來走；若有五個敵人喝喝咄咄，你等就全軍走淨淨。到尾，你等个軍隊就賸山頂孤單个一支旗篙！</verse>
				<verse number="18">總係上主還在該位等，愛施恩給你等；佢愛興起，愛憐憫你等，因為上主係公正个上帝。等候佢个人全部樣般幸福啊！</verse>
				<verse number="19">你等住在 錫安 、在 耶路撒冷 个人民啊，毋好再噭了。上主係慈愛个；你等向佢求幫助，佢就答應。</verse>
				<verse number="20">主雖然給你等艱難準飯食，困苦準水啉，總係佢還係在旁邊教你等；你等定著會看到你等个教師。</verse>
				<verse number="21">若係你等毋知愛行左片抑係右片，你等會聽到後背有聲音講：「路在這位，行這片來。」</verse>
				<verse number="22">你等愛將包金抑係鑲銀个偶像做垃圾㧹掉，大聲喊：「閃較遠兜仔！」</verse>
				<verse number="23">你等委種个時，上主會落雨，使種子生長，使你等豐收；你等个牛群會在盡闊个草原食草。</verse>
				<verse number="24">為你等犁田个牛仔㧯驢仔會有最好个草料。</verse>
				<verse number="25">你等个敵人被人㓾掉，佢等个城堡橫掉个時，你等所有个大山㧯細山會有泉水湧出，水多到變做河壩。</verse>
				<verse number="26">月光會像日頭恁光；日頭个光會比以前加七倍，就像七日个光在一日做一下射出來！在上主包好佢子民个傷口、醫治佢等對佢受重傷該日，這兜事全部會發生。</verse>
				<verse number="27">看啊，上主个大能㧯榮耀 對遠方來了！佢譴到發火，火煙像雲柱。佢滿嘴憤怒；佢个話像烈火。</verse>
				<verse number="28">佢歕氣像做大水，浸到人个頸筋；佢愛毀滅列國，像用篩仔篩它兜。佢用馬啣鐵放在它兜人民个嘴肚，使佢等行死路。</verse>
				<verse number="29">總係你等會快樂唱歌，像朝聖者在過節个暗晡時恁樣。你等會心中歡喜，像朝聖者在吹笛聲中上去上主个山，到 以色列 个磐石該位去。</verse>
				<verse number="30">上主愛使逐儕聽得到佢威嚴个聲音；佢愛用火、烏雲、冰雹、㧯大雨使人知佢个大發譴㧯責罰。</verse>
				<verse number="31">亞述 人聽到上主个聲音就愊愊掣；因為上主愛責罰佢等。</verse>
				<verse number="32">上主逐擺攻打 亞述 人个時，佢个子民就打鼓彈琴來和。戰爭中上主愛親自攻擊 亞述 人。</verse>
				<verse number="33">上主早就準備好一個所在 — 陀斐特 ，有大火愛燒 亞述 皇帝；該係一個闊闊个所在，頂高堆滿柴。上主愛歕一口氣，像硫磺火將該堆柴燒𤏸起來。</verse>
			</chapter>
			<chapter number="31">
				<verse number="1">該兜到 埃及 去求幫助个人會堵到災難了！佢等倚靠 埃及 強大个軍力 — 戰馬、戰車㧯騎兵，總係毋倚靠 以色列 神聖个上帝，毋求上主个幫助。</verse>
				<verse number="2">其實，上帝大有智慧；佢愛責罰作惡个人㧯該兜𢯭手作惡个人。佢決定愛降災禍，絕對毋會改變。</verse>
				<verse number="3">埃及 人並毋係神；佢等係人定定！佢等个馬仔係血肉个，並毋係靈！上主一伸手，強國也會跌倒，它所幫助个弱國也會橫掉；它兜會共下滅亡。</verse>
				<verse number="4">上主恁樣對𠊎講：「就像獅仔抑係細獅仔捉到獵物，由在歸群掌羊个樣般大聲咄，牠兜毋會著驚也毋會縮縮。共樣，𠊎 — 上主、萬軍个元帥愛降臨、保護 錫安 山；無人做得阻擋。</verse>
				<verse number="5">就像鳥仔打開翼胛保護鳥子，𠊎 — 上主、萬軍个元帥也愛保護 耶路撒冷 ，愛保護它，拯救它，𨃟過它，毋俾它受傷害。」</verse>
				<verse number="6">以色列 人啊，你等識完全悖逆上主。這下愛歸向佢！</verse>
				<verse number="7">到該時，你等逐儕會㧹掉你等親手用金銀所鑄造該兜邪惡个偶像。</verse>
				<verse number="8">上主講：「 亞述 人會在刀下橫掉，並毋係人个刀仔；有刀仔愛將佢等吞滅，也毋係人个刀仔。 亞述 人會因為這個刀仔逃走；佢等个後生人會被人捉去做奴才。</verse>
				<verse number="9">佢等个皇帝 會驚到逃走；該兜軍官會慌張撤退，連軍旗也豁掉。」上主恁樣宣佈了。佢有火在 錫安 ，有爐在 耶路撒冷 。</verse>
			</chapter>
			<chapter number="32">
				<verse number="1">有一日，會有用正義掌權个國王㧯用公平治理國家个領袖出現。</verse>
				<verse number="2">佢等逐儕都像做大風、落大水个時，俾人囥一下个所在；在沙漠中像泉水俾人止渴，在旱地中像大磐石个陰影俾人透涼。</verse>
				<verse number="3">看得到个人，毋會再目珠眨眨；聽得到个人，毋會再耳公背背。</verse>
				<verse number="4">急性个人會有智識，結舌个人講話會變清清楚楚。</verse>
				<verse number="5">毋會再有人喊戇檔人做高明，也無人稱搞怪个人做君子。</verse>
				<verse number="6">戇檔人講戇話，專門想愛做壞事；佢个言行舉止常常侮辱上主。佢從來毋給肚飢个人食飯，毋給嘴燥个人啉水。</verse>
				<verse number="7">搞怪个人手段惡毒；佢用詭計剝削窮苦人；佢講花撩，害窮苦个人得毋到公平。</verse>
				<verse number="8">總係高明个人計劃高明个事；佢對頭到尾堅持做高明个事。</verse>
				<verse number="9">你這兜無愁無慮、生活安樂个婦女啊，愛注意聽𠊎个話。</verse>
				<verse number="10">這下你等可能平安滿足；總係明年這個時節，你等會無葛無煞，因為無葡萄好收成了。</verse>
				<verse number="11">你等一直無愁無慮，過安樂个生活；到時就會無葛無煞。你等會脫掉靚衫，用爛布繫在腰圈。</verse>
				<verse number="12">你等會捶心肝哀傷，因為盡好个農場㧯收成豐富个葡萄園全部毀滅了。</verse>
				<verse number="13">在𠊎子民个土地上，會生滿竻仔㧯蒺藜。你等會為到本來歡喜快樂个家庭㧯繁榮个城市捶心肝哀傷。</verse>
				<verse number="14">王宮會荒廢，鬧熱个城市無人住。山頂个城堡㧯城樓永遠成做荒山。野驢仔盡好在該位搞，羊群在該位食草。</verse>
				<verse number="15">總係上帝愛再一擺差遣佢个靈來到𠊎等當中。荒地會變做肥田；肥田變做茂盛个樹林。</verse>
				<verse number="16">該時，無論在荒埔抑係肥田攏總會有公平㧯正義。</verse>
				<verse number="17">公平會帶來平安；正義會帶來永遠安居樂業。</verse>
				<verse number="18">上帝子民个家園非常安全、滿有平安，無愁無慮。</verse>
				<verse number="19">(總係冰雹會降在樹林中；城會被人拆掉！)</verse>
				<verse number="20">該兜在水邊安心耕種、由在牛仔㧯驢仔在草場食草个人實在有福氣噢！</verse>
			</chapter>
			<chapter number="33">
				<verse number="1">𠊎等个敵人會堵到災難了！佢等緊去搶別人，毋識被人搶過；佢等詐欺人，毋識被人詐欺。總係等到佢等無法度去搶人、再詐欺人个時，佢等就會被人搶、被人詐欺了。</verse>
				<verse number="2">上主啊，求你憐憫𠊎等。𠊎等將希望交託你。求你日日保護𠊎等，在𠊎等危險个時拯救𠊎等。</verse>
				<verse number="3">你為𠊎等戰爭，萬國就會四散，相㓾个聲一發出，眾敵人就會逃走。</verse>
				<verse number="4">佢等个戰利品全部被人搶走，像農作物被經過个草蜢食淨淨一樣。</verse>
				<verse number="5">上主實在偉大！佢對天頂管理萬物。佢使 錫安 充滿正義㧯公平，</verse>
				<verse number="6">又使國泰民安。佢永遠保護佢个子民，賜佢等智慧㧯見識。敬畏上主就係佢等最大个財寶。</verse>
				<verse number="7">看哪，勇士在街項呼求幫助；尋求和平个使者發出痛苦个噭聲。</verse>
				<verse number="8">大路危險，無人敢行。條約廢掉、合同無效；人㧯人互相無信任。</verse>
				<verse number="9">土地荒涼； 黎巴嫩 个樹林枯燥； 沙崙 个山壢荒掉； 巴珊 㧯 迦密 山个樹葉全部落淨淨。</verse>
				<verse number="10">上主對萬國講：「這下𠊎愛開始行動！𠊎愛俾你等看到𠊎个力量有幾大！</verse>
				<verse number="11">你等个計劃係礱糠；你等个行動係禾稈。𠊎个靈愛 像火恁樣將你等所做个燒掉！</verse>
				<verse number="12">你等會像石頭燒掉，成做石灰，像割下來个竻仔被火燒掉，成做火灰。</verse>
				<verse number="13">遠方个人啊，你等愛聽𠊎所做个一切；附近个人啊，你等愛承認𠊎个權能。」</verse>
				<verse number="14">在 錫安 个罪人會著驚、無敬虔个人會驚到愊愊掣。佢等講：「上帝个審判像永遠毋會烏掉个火，𠊎等中間有麼人毋會被這個火燒掉呢？」</verse>
				<verse number="15">若係你等行為正派，講話誠實，你等就能生存。毋好欺負窮苦人；毋好被人收買；毋好參加㓾人个計謀；毋好做壞事。</verse>
				<verse number="16">恁樣，你等就會有安全，像住在堅固个城堡中恁穩當。你等个糧食充足，水源毋會燥掉。</verse>
				<verse number="17">你等會再看到一個君王个榮光、㧯當闊个國土。</verse>
				<verse number="18">你等會回想頭擺得人驚个事，自家問自家講：「收數个在㖠位，打稅个在㖠位，掌城門个在㖠位？」</verse>
				<verse number="19">你等毋會再看到該兜強暴个人講你等聽毋識个外國話。</verse>
				<verse number="20">你等看 錫安 ！它係𠊎等慶祝節期个城。你等看 耶路撒冷 ！𠊎等在這底背樣般安全！它會像永遠毋會徙走个帳篷；它个矛釘毋使再挷出來，索仔永遠毋會拉斷。</verse>
				<verse number="21">上主愛在該位顯明佢个榮光。𠊎等會住在河壩當闊个河滣；敵人撐个大船毋會在該位經過。</verse>
				<verse number="22">就算敵人个船仔駛入𠊎等个港口，桅杆个索仔會襛掉，布篷打毋開；船頂个貨成做𠊎等个戰利品，連跛腳个也有一份。上主係𠊎等个審判者；上主係𠊎等个立法者；上主係𠊎等个王；佢愛拯救𠊎等。</verse>
				<verse number="23"></verse>
				<verse number="24">住在𠊎等國內 个人毋會再有病痛个艱苦；城內人民个罪也全部得到赦免。</verse>
			</chapter>
			<chapter number="34">
				<verse number="1">列國个人民啊，全部來啊！你等全部來聽。全世界个人愛到𠊎面前來聽。</verse>
				<verse number="2">上主對各國㧯佢等个軍隊大發譴，將佢等交給人㓾，徹底消滅佢等。</verse>
				<verse number="3">佢等个身屍被人亂㧒，糜到臭味衝天；滿山係血。</verse>
				<verse number="4">天上个萬象全部會消散掉。天會像捲起來个書卷；星仔跌下來，像無花果㧯葡萄樹个葉仔跌下來一樣。</verse>
				<verse number="5">上主在天頂个寶劍已經準備好勢 ；這下佢愛㓾掉佢早就決定愛滅亡个 以東 人。</verse>
				<verse number="6">上主个劍愛膏滿佢等个血㧯油，像獻祭用个細羊㧯山羊个血，並綿羊牯腰仔个油。上主愛在 波斯拉 城獻祭，在 以東 進行大屠殺。</verse>
				<verse number="7">人民會像野牛㧯細牛牯共樣死在地上；佢等个土地逐位係血，滿遍油濟濟。</verse>
				<verse number="8">這係上主為到拯救 錫安 、來向仇敵報仇个日仔。</verse>
				<verse number="9">以東 个河壩會變做馬膠，泥變做硫磺；土地像燒𤏸个馬膠，</verse>
				<verse number="10">日夜𤏸火，濃煙衝天。這垤土地會世世代代荒廢，永遠無人經過。</verse>
				<verse number="11">該所在只有鵜鶘、箭豬、貓頭鳥、㧯烏鴉還住在該位。上主愛使它空虛到毋成形，像世界創造以前共樣。</verse>
				<verse number="12">無王，也無長官治理這垤土地。</verse>
				<verse number="13">王宮㧯城牆全部生滿竻仔、蒺藜，只有野狗㧯鴕鳥住在該位。</verse>
				<verse number="14">豺狼、野山羊、㧯其他野獸在該位趖來趖去，發出怪聲招伴；也有暗晡頭个妖怪 出來尋歇睏个地方。</verse>
				<verse number="15">貓頭鳥在該位做藪、生卵、孵子。鷹鳥雙雙對對飛來，聚集在該位。</verse>
				<verse number="16">你等去研究上主个書，看書底背樣般寫。這兜動物全部無漏掉，牠兜愛在該位做伴配對。這係上主親自吩咐个；主个靈愛將牠兜聚集共下。</verse>
				<verse number="17">主用拈鬮㧯量尺分配這垤土地給牠兜；牠兜會世世代代住在該位。這地會永遠屬牠兜。</verse>
			</chapter>
			<chapter number="35">
				<verse number="1">沙漠㧯旱地會歡喜快樂； 曠野開滿玫瑰花。</verse>
				<verse number="2">沙漠花花綠綠、萬紫千紅， 大聲歡喜唱歌。 它會像 黎巴嫩 个榮光， 像 迦密 㧯 沙崙 恁靚。 逐個人會看到上主个榮光， 看到𠊎等上帝个威嚴。</verse>
				<verse number="3">你等愛使軟弱个手勇健， 使無力个膝頭堅強起來。</verse>
				<verse number="4">愛㧯無膽个人講： 「愛堅強，毋使驚！ 上帝愛來拯救你等； 佢愛為你等報仇。」</verse>
				<verse number="5">該時，瞙目个會看得到， 耳聾个會聽得到，</verse>
				<verse number="6">跛腳个會像鹿仔跳舞， 啞口會大聲唱歌。 曠野會湧出泉水； 沙漠會有河壩。</verse>
				<verse number="7">會熝人个沙埔會變成陂塘； 旱地會有水源。 野狗睡个所在， 會生出青草、蘆竹㧯蒲草。</verse>
				<verse number="8">會有一條大路， 愛稱做「聖潔个路」。 無淨浰个人做毋得行這條路， 愛專門俾上帝个子民 行； 路項个旅客，甚至戇檔人， 也毋會行差路。</verse>
				<verse number="9">該所在無獅仔， 也無野獸。 只有上主拯救个人， 在這條大路項行。</verse>
				<verse number="10">上主救贖个人一定會轉來； 佢等會快樂大聲唱歌， 歡歡喜喜來到 錫安 。 佢等會永遠歡喜快樂， 毋會再憂愁歎息。</verse>
			</chapter>
			<chapter number="36">
				<verse number="1">希西家 王在位第十四年， 亞述 皇帝 西拿基立 攻打 猶大 所有个防衛城，將它兜佔領。</verse>
				<verse number="2">然後 亞述 皇帝命令佢个大將帶一大隊个兵仔對 拉吉 去 耶路撒冷 ，愛 希西家 王投降。佢等擺陣在上池水溝滣，在通到染布工廠个大路項。</verse>
				<verse number="3">三個 猶大 代表出來談判；佢等係 希勒家 个孻仔王宮總管 以利亞敬 ，王室書記 舍伯那 ，㧯 亞薩 个孻仔歷史官 約亞 。</verse>
				<verse number="4">亞述 个大將對佢等講：「你等去㧯 希西家 講， 亞述 大皇帝恁樣講：『你憑麼介恁有把扼？</verse>
				<verse number="5">你恅到賣嘴花就有相㓾个計謀㧯能力係麼？你靠麼人想愛反𠊎？</verse>
				<verse number="6">你毋使想 埃及 會來幫助你，該就像拄等一支玭掉个蘆竹準做柺棍仔行路；它會刺穿人个手。 埃及 王對付所有投靠佢个人就係恁樣。</verse>
				<verse number="7">可能你等會對𠊎講：𠊎等倚靠上主 — 𠊎等个上帝。總係， 希西家 敢毋係廢掉佢山頂个廟㧯祭壇？佢敢毋係吩咐 猶大 㧯 耶路撒冷 个人民，單淨做得在一個祭壇前敬拜上主嗎？』</verse>
				<verse number="8">這下𠊎用吾主 亞述 皇帝个名義㧯你賭：若係你能尋出兩千騎兵，𠊎就送你兩千隻戰馬！</verse>
				<verse number="9">其實，你連 亞述 軍隊中最細个軍官也打毋贏，你還妄想愛靠 埃及 个戰車騎兵！</verse>
				<verse number="10">這下𠊎來攻打毀滅你个國家，敢毋係上主个意思？上主親自吩咐𠊎來攻打毀滅這個國家。」</verse>
				<verse number="11">然後， 以利亞敬 、 舍伯那 、㧯 約亞 對該大將講：「先生，請用 亞蘭 話㧯僕人講話；𠊎等聽得識。毋好用 希伯來 話講，因為城樓頂个人民全部在該位聽。」</verse>
				<verse number="12">大將講：「你等恅到皇帝喊𠊎單單對你等㧯王講這兜話麼？𠊎也敢毋係對該兜坐在城樓頂个人民講，佢等㧯你等共樣，全部會食自家个屎，啉自家个尿？」</verse>
				<verse number="13">所以，大將企出來，用 希伯來 話大聲喊講：「你等愛聽 亞述 大皇帝个話！</verse>
				<verse number="14">皇帝警告你等：毋好被 希西家 欺騙； 希西家 無辦法救你等。</verse>
				<verse number="15">希西家 雖然一直講：『上主一定會拯救𠊎等，這個城毋會交在 亞述 皇帝个手中』，總係你等毋好被佢騙去倚靠上主。</verse>
				<verse number="16">毋好聽 希西家 个話！ 亞述 皇帝命令你等出來講和投降。恁樣，你等還係做得食自家个葡萄、自家个無花果，啉自家井肚个水。</verse>
				<verse number="17">直到皇帝將你等徙到另外一個地方，㧯你等這地方共樣，有五榖、葡萄，有餅、美酒。</verse>
				<verse number="18">你等毋好被 希西家 騙去，恅到上主會來拯救你等。你等看過有㖠隻國家个神明拯救自家个國家脫離 亞述 皇帝个手？</verse>
				<verse number="19">哈馬 㧯 亞珥拔 个神明這下在㖠位？ 西法瓦音 个神明又在㖠位？佢等敢有來救 撒馬利亞 脫離𠊎个手？</verse>
				<verse number="20">有㖠兜神明識對𠊎个手拯救佢等个國家？上主敢會救 耶路撒冷 脫離𠊎个手？」</verse>
				<verse number="21">人民全部恬恬，無應半句話；因為 希西家 王識下令，講：「毋好應佢！」</verse>
				<verse number="22">該時， 希勒家 个孻仔王宮總管 以利亞敬 、王室書記 舍伯那 、㧯 亞薩 个孻仔歷史官 約亞 悲傷到扯爛衫，轉去將 亞述 大將个話向 希西家 王報告。</verse>
			</chapter>
			<chapter number="37">
				<verse number="1">希西家 王一聽到佢等个報告，非常悲傷，就扯爛衫，著麻衫，入去上主个聖殿。</verse>
				<verse number="2">佢派王宮總管 以利亞敬 、王室書記 舍伯那 、㧯該兜老輩个祭司，佢等全部著麻衫去見 亞摩斯 个孻仔先知 以賽亞 。</verse>
				<verse number="3">佢等對 以賽亞 講：「 希西家 恁樣講：今晡日係國難个日仔；𠊎等全部受到侮辱㧯刑罰。𠊎等像難產个婦人家，無力好𫱔。</verse>
				<verse number="4">亞述 皇帝派佢个大將來侮辱永生个上帝。願上主 — 你个上帝聽到這兜褻瀆个話，責罰講這話个人。所以，請你為𠊎這兜賸到个人大聲祈禱。」</verse>
				<verse number="5">希西家 王个官員來見 以賽亞 ，</verse>
				<verse number="6">以賽亞 就對佢等講：「去㧯你等个主人恁樣講：『上主恁樣講：你等毋使因為聽到 亞述 人講侮辱𠊎个話就恁著驚。</verse>
				<verse number="7">𠊎愛使 亞述 皇帝相信所聽到个風聲，催迫佢趕轉本國去，在該位被人㓾死。』」</verse>
				<verse number="8">亞述 个大將聽講 亞述 皇帝已經徙營離開 拉吉 、去攻打附近个 立拿 城，佢就去該位見佢。</verse>
				<verse number="9">亞述 皇帝聽到風聲講， 古實 王 特哈加 帶 埃及 軍隊來攻打佢。所以皇帝就派兜使者帶信仔去㧯 猶大 王 希西家 講：</verse>
				<verse number="10">「毋好聽你所倚靠个神騙你講：『 耶路撒冷 毋會交在 亞述 皇帝个手中。』</verse>
				<verse number="11">你一定聽過， 亞述 歷代个皇帝係樣般徹底毀滅所有个國家！你恅到你還有救，係麼？</verse>
				<verse number="12">𠊎个祖先識毀滅 歌散 、 哈蘭 、 利色 ，消滅住在 提拉撒 个 伊甸 人；佢等个神明敢有救佢等麼？</verse>
				<verse number="13">哈馬 、 亞珥拔 、 西法瓦音 城、 希拿 、㧯 以瓦 該兜所在个王攏總在㖠位呢？」</verse>
				<verse number="14">希西家 對使者手中將信仔接過來，讀了後就到聖殿去，在上主面前將信仔掀開。</verse>
				<verse number="15">希西家 向上主祈禱講：</verse>
				<verse number="16">「在兩隻基路伯中央坐寶座个上主 — 萬軍个元帥、 以色列 个上帝啊，你係天下萬國獨一个上帝，天地係你創造个。</verse>
				<verse number="17">上主啊，求你聽𠊎个祈禱！上主啊，求你看顧𠊎等！ 西拿基立 派使者所講、侮辱你 — 永生上帝个話，你全部聽看仔！</verse>
				<verse number="18">上主啊， 亞述 歷代个皇帝將列國變做荒地，這係事實。</verse>
				<verse number="19">佢等還燒掉逐國个神明；其實它兜毋係真神，係人个手用樹仔、石頭做个偶像定定，所以就會被人除掉。</verse>
				<verse number="20">上主 — 𠊎等个上帝啊，這下求你對 亞述 皇帝个手中拯救𠊎等；恁樣，世界逐國就會知只有你正係上主。」</verse>
				<verse number="21">亞摩斯 个孻仔 以賽亞 派人去㧯 希西家 講：「上主 — 以色列 个上帝恁樣講：『有關 亞述 皇帝 西拿基立 个事，你緊求𠊎，你个祈禱𠊎聽到了。』</verse>
				<verse number="22">上主論到 西拿基立 講：『 鍚安 城个子女在該位嘲謔你，藐視你； 耶路撒冷 个人民向你拂頭。</verse>
				<verse number="23">你敢知，你大聲侮辱个係麼人？恁驕傲嘲謔个係麼人？看毋起个係麼人？係𠊎 — 以色列 神聖个上帝！</verse>
				<verse number="24">你派使者來罵𠊎，還誇口你个戰車征服高山，甚至佔領 黎巴嫩 最高个山頭。你誇口講，你在該位斬下最高个香柏樹㧯最好个松樹，又深入到樹林最深个所在。</verse>
				<verse number="25">你誇口講，你識打井啉水，你个士兵將 埃及 个河壩全部踏燥。</verse>
				<verse number="26">「『你敢毋識聽講𠊎古早以來就計劃這一切？𠊎這下在執行中。𠊎給你力量使該兜堅固个城堡成做荒埔、石堆。</verse>
				<verse number="27">𠊎使住在該位个人失掉力量，驚到無葛無煞。佢等像野生个菜㧯屋頂个雜草，給燒燒个東風一吹就全部燥掉。</verse>
				<verse number="28">「『你坐下來、你出去、你入來，𠊎全部知。𠊎也知你向𠊎發譴。</verse>
				<verse number="29">𠊎早就聽到你盡驕傲，還向𠊎發譴。這下𠊎愛用鉤仔穿過你个鼻孔，拿馬啣鐵卡你个嘴；你對㖠條路來，就將你對該條路拉轉去。』</verse>
				<verse number="30">「 希西家 啊，上主愛給你這個兆頭：今年㧯明年，你等只有野生个植物好食。到後年，你等就做得委種，收成；也做得種葡萄，食園中出產个葡萄。</verse>
				<verse number="31">猶大 國在患難後賸到个人還係會像植物向下釘根，向上結果。</verse>
				<verse number="32">在 耶路撒冷 ，在 錫安 山頂，患難後還係會有賸到个人住在該位，因為上主 — 萬軍个元帥愛熱心成就這事。</verse>
				<verse number="33">「論到 亞述 皇帝，上主恁樣講：『佢無法度入這城，也無辦法射一枝箭入來。拿盾牌个士兵無可能行近這城，也無法度起土堆圍城。</verse>
				<verse number="34">佢對㖠條路來，也會對該條路轉去；佢無可能入這城。這係𠊎 — 上主所宣佈个。</verse>
				<verse number="35">為到𠊎自家个緣故，也為到吾僕人 大衛 个緣故，𠊎愛親自保護這城，拯救這城。』」</verse>
				<verse number="36">結果，上主个天使入去 亞述 人个營中，㓾掉十八萬五千個士兵。第二日打早，有人䟘起來看到滿地係屍體。</verse>
				<verse number="37">亞述 皇帝 西拿基立 高不將就退兵轉 尼尼微 去。</verse>
				<verse number="38">有一日，佢在廟肚拜佢个神 尼斯洛 个時，厥兩個孻仔 亞得米勒 㧯 沙利色 將佢㓾死，逃走到 亞拉臘 去。另外一個孻仔 以撒哈頓 承接佢做皇帝。</verse>
			</chapter>
			<chapter number="38">
				<verse number="1">該時， 希西家 王病到會死。 亞摩斯 个孻仔先知 以賽亞 去見王，對佢講：「上主恁樣講：『你愛留遺言、交帶後事，因為你个病毋會好，一定會死。』」</verse>
				<verse number="2">希西家 翻身面向壁，祈禱講：</verse>
				<verse number="3">「上主啊，求你紀念𠊎識誠心誠意事奉你，做你看做著个事。」 希西家 忍毋住就開聲大噭。</verse>
				<verse number="4">所以，上主吩咐 以賽亞 講：</verse>
				<verse number="5">「你去 希西家 該位，對佢講：『上主 — 若祖先 大衛 个上帝恁樣講：𠊎已經聽到你个祈禱，也看到你个目汁；𠊎愛俾你食加十五年。</verse>
				<verse number="6">𠊎也愛拯救你㧯 耶路撒冷 脫離 亞述 皇帝个手；𠊎愛繼續保護這城。』」</verse>
				<verse number="7">以賽亞 講：「這係上主給你个兆頭，來證明佢一定會成就佢所講个：</verse>
				<verse number="8">在 亞哈斯 王所造个日晷 ，上主愛使日頭影倒退十步。」果然，日晷个日頭影倒退十步。</verse>
				<verse number="9">猶大 王 希西家 病好以後，寫一首讚美詩，講：</verse>
				<verse number="10">雖然𠊎个年日還像當晝个日頭， 𠊎恅到當遽就會入去陰間， 無法度享受天年了。</verse>
				<verse number="11">𠊎恅到在這世間 毋會再見到上主， 也毋會再看到所有還在世間个人。</verse>
				<verse number="12">𠊎个生命會離開肉身了， 像掌羊个人帳篷被人拆掉， 像布仔被人對織布機割下。 𠊎想上主愛結束𠊎个生命， 𠊎毋會有天光日、天光暗晡了 。</verse>
				<verse number="13">𠊎歸暗晡痛苦到緊噌， 𠊎所有个骨頭像被獅仔咬碎； 𠊎想上主愛結束𠊎个生命， 𠊎毋會有天光日、天光暗晡了。</verse>
				<verse number="14">𠊎求幫助个聲 像燕仔啾啾袞， 像白鶴仔緊噭， 像月鴿仔齁齁袞。 𠊎个目珠因為望天看到當𤸁。 主啊，𠊎在困苦中，求你來救𠊎。</verse>
				<verse number="15">上主照佢所講个做； 𠊎有麼介好講呢？ 𠊎个心艱苦到睡毋落覺 。</verse>
				<verse number="16">主啊，人會生係因為你， 𠊎个靈㧯生命也係因為你； 求你醫治𠊎，俾𠊎繼續生下去！</verse>
				<verse number="17">看啊，𠊎受个苦會使𠊎得到平安； 你惜𠊎，就救𠊎脫離滅亡个陷阱， 因為你赦免𠊎所有个罪過。</verse>
				<verse number="18">因為陰間無人會感謝你； 死掉个人毋會讚美你； 落陰間个人毋會仰望你个信實。</verse>
				<verse number="19">只有還生个人 — 還生个人正會讚美你， 就像𠊎這下讚美你。 做阿爸个愛㧯子女講， 你係樣般信實！</verse>
				<verse number="20">上主愛救𠊎！ 𠊎等愛彈琴、唱歌讚美佢； 還有生命个日， 𠊎等愛在上主个聖殿中讚美佢。</verse>
				<verse number="21">以賽亞 已經吩咐王个僕人，愛拿一垤無花果膏藥來，貼在粒仔頂，王就會好。</verse>
				<verse number="22">希西家 已經問過：「有麼介兆頭好證明𠊎還能到上主个聖殿去敬拜呢？」</verse>
			</chapter>
			<chapter number="39">
				<verse number="1">這時， 巴拉但 个孻仔 巴比倫 王 米羅達‧巴拉但 聽到 希西家 王發病，又回復健康，特別送來問安信㧯禮物。</verse>
				<verse number="2">希西家 歡迎使者，又向佢等展佢个財富 — 金、銀、香料、香水㧯所有个軍備；佢將全國逐所在个寶庫㧯佢王宮肚所有个全部俾佢等看。</verse>
				<verse number="3">事後，先知 以賽亞 去見 希西家 王，問佢：「這兜人對㖠位來？佢等㧯你講麼介？」 希西家 應講：「佢等係對一個當遠个國家 巴比倫 來見𠊎。」</verse>
				<verse number="4">以賽亞 問：「佢等在王宮肚看到麼介？」 希西家 應講：「𠊎所有个，佢等全部看到；𠊎將寶庫个各樣東西全部給佢等看。」</verse>
				<verse number="5">所以， 以賽亞 對 希西家 講：「你愛聽上主 — 萬軍元帥个話：</verse>
				<verse number="6">『時間一定會到，你王宮肚所有个東西，㧯若祖先留下來个逐項東西，全部會被人搬到 巴比倫 去，無留半項。』這係上主講个。</verse>
				<verse number="7">『連你个後代有兜也會被人捉去，在 巴比倫 王宮肚做太監。』」</verse>
				<verse number="8">希西家 想，這預言係講到在佢還生个日仔，佢還做得享受和平㧯安全，所以佢應 以賽亞 講：「你所傳上主个話當好！」</verse>
			</chapter>
			<chapter number="40">
				<verse number="1">你等个上帝講： 你等愛安慰𠊎个子民， 愛安慰佢等。</verse>
				<verse number="2">愛鼓勵 耶路撒冷 个人民， 㧯佢等講：佢等个苦難已經罅了； 佢等个罪已經得到赦免 。 𠊎 — 上主已經加倍責罰佢等一切个罪。</verse>
				<verse number="3">有一個聲喊講： 愛在荒埔為上主預備道路 ； 愛在沙漠為𠊎等个上帝開大路。</verse>
				<verse number="4">所有个山壢全部愛坉滿； 大細山岡全部愛削平。 高低無平个地愛成做平平； 山地愛成做平原。</verse>
				<verse number="5">該時，上主个榮光愛顯明出來； 全人類一定會共下看到。 因為上主恁樣宣佈了。</verse>
				<verse number="6">有一個聲喊講：去報消息！ 𠊎問：報麼介消息？ 愛宣佈講：逐個人攏總像草共樣； 佢等盡靚像野地个花。</verse>
				<verse number="7">上主吹一陣風， 草就枯燥，花也謝掉。 人實在㧯花草當相像；</verse>
				<verse number="8">草會燥掉，花會謝掉， 總係𠊎等上帝个話永遠毋會改變！</verse>
				<verse number="9">錫安 哪，愛上高山； 愛報好消息！ 耶路撒冷 啊，愛大聲喊； 愛報好消息！ 愛大聲喊，毋使驚。 㧯 猶大 个大細村莊講： 「你等个上帝會來了！」</verse>
				<verse number="10">看哪，至高个上主愛帶等權柄來； 佢愛用權能治理天下。 佢愛施行報應； 佢愛拯救佢等。</verse>
				<verse number="11">佢愛像牧人掌羊群； 佢愛聚集細羊仔， 用雙手將牠兜揇在胸前； 佢愛用慈愛帶領餵乳个羊乸。</verse>
				<verse number="12">麼人做得用手巴掌量海水？ 麼人做得用手指量高天？ 麼人做得用斗量大地个泥？ 麼人做得用天平秤山嶺？</verse>
				<verse number="13">麼人揣得出上主个心意？ 麼人有資格教佢？指導佢？</verse>
				<verse number="14">敢有人識教佢，指導佢， 使佢知公正个路， 使佢得到智識， 指示佢通達个道？</verse>
				<verse number="15">在上主來看，列國係水桶中个一滴水， 係天平頂个泥粉； 海島係秤盤頂个塵灰定定。</verse>
				<verse number="16">黎巴嫩 个樹林毋罅做獻祭个柴； 該位个走獸毋罅做燒化祭。</verse>
				<verse number="17">列國對佢來講毋算麼介， 像無存在个東西，就係虛空。</verse>
				<verse number="18">麼人㧯上帝比抑得？ 你等愛用麼介代表佢个形像？</verse>
				<verse number="19">佢無像偶像； 師傅造好偶像後， 又為它包金身， 然後掛幾條銀鍊。</verse>
				<verse number="20">該買毋起金銀个人 就用毋會歿掉个樹頭。 佢尋來一個手藝當好个師傅， 雕刻一個毋會橫掉个偶像。</verse>
				<verse number="21">你等敢毋知？你等敢無聽到？ 毋係有人早就㧯你等講過？ 你等敢毋知這世界係樣般開始？</verse>
				<verse number="22">上帝坐在大地个穹蒼頂高； 在佢來看，地上个人像草蜢一樣。 佢掀開天像打開布簾， 像展開人所住个帳篷。</verse>
				<verse number="23">佢消滅有權勢个君王， 使地上个審判官變無掉去。</verse>
				<verse number="24">佢等像還當細頭个植物， 正發芽生根。 上主吹一陣風，佢等就全部枯燥； 大風一捲，佢等就像禾稈被風吹散。</verse>
				<verse number="25">麼人做得㧯神聖个上帝比呢？ 世間敢有人像佢麼？</verse>
				<verse number="26">你等昂頭看天頂！ 麼人創造這兜星辰？ 係上帝！佢帶領它兜像帶領軍隊。 佢知它兜个數目； 佢一個一個點名。 佢个權能極大無比， 連一個也毋會毋見掉。</verse>
				<verse number="27">以色列 啊，你做麼介怪怨： 恅到上主毋知你个艱苦？ 認為上帝無關心你所受个冤枉？</verse>
				<verse number="28">你敢毋知？你敢無聽講？ 上主係永生个上帝！ 佢創造全世界。 佢毋會𤸁，也毋會痶； 佢个智慧高深，人無法了解。</verse>
				<verse number="29">𤸁个人，佢賜力量給佢等； 痶个人，佢賜氣力給佢等。</verse>
				<verse number="30">後生人會𤸁也會痶； 強壯个青年也會跌倒橫下去。</verse>
				<verse number="31">總係倚靠上主个人， 會重新得到力量。 佢等會像鷹鳥打開翼胛飛到高高； 佢等走毋會𤸁， 行也毋會痶。</verse>
			</chapter>
			<chapter number="41">
				<verse number="1">上帝講： 眾海島啊，愛恬恬，來聽𠊎个話！ 萬民啊，你等愛重新得到力量！ 攏總行兼來講話； 𠊎等共下來辯論是非。</verse>
				<verse number="2">麼人對東方興起一個人 ， 使佢全無失敗？ 麼人使佢打贏盡多國家、 盡多君王？ 佢个刀㓾人，剁到像泥粉； 佢个箭射人，使佢等像風吹禾稈。</verse>
				<verse number="3">佢逐佢等，進行非常順利； 佢走起來像兩腳無貼地！</verse>
				<verse number="4">麼人使這事發生？ 麼人決定歷史个方向？ 係𠊎 — 上主對開始就在該位， 結束个時，𠊎也在該位！</verse>
				<verse number="5">眾海島看到就著驚； 地極个人也全部驚到愊愊掣。 佢等全部行兼來。</verse>
				<verse number="6">佢等互相幫助， 鼓勵自家个兄弟講： 「愛較好膽兜仔！」</verse>
				<verse number="7">木匠鼓勵打金師傅講： 「還係你个手藝較幼！」 造偶像个師傅緊奢釘釘仔个木匠講： 「你做到當好！」 佢等用釘仔將偶像固定好， 使它毋會搖動。</verse>
				<verse number="8">總係， 以色列 — 𠊎个僕人啊， 雅各 — 𠊎所揀選个子民啊， 你係𠊎个朋友 亞伯拉罕 个子孫。</verse>
				<verse number="9">𠊎對天涯海角將你帶來； 𠊎對遠遠个所在喊你。 𠊎對你講：你係𠊎个僕人。 𠊎揀選你，𠊎就毋會㧒掉你。</verse>
				<verse number="10">毋使驚，𠊎㧯你同在； 𠊎係你个上帝，你還驚麼介呢？ 𠊎愛使你堅強，幫助你； 𠊎愛用公義㧯大能來扶持你。</verse>
				<verse number="11">該兜對你發譴个人會澇潰、堵到見笑； 欺負你个人會消滅、毋見掉。</verse>
				<verse number="12">你去尋㧯你相㓾个人，總係尋毋到； 你个敵人全部會消滅了。</verse>
				<verse number="13">因為𠊎 — 上主你个上帝，愛賜給你力量。 𠊎㧯你講：毋使驚，𠊎一定幫助你。</verse>
				<verse number="14">上主講： 以色列 — 𠊎个子民啊， 雅各 个後代啊， 你雖然像蟲仔恁弱小，也毋使驚！ 𠊎係救贖主 — 以色列 神聖个上帝； 𠊎愛幫助你。</verse>
				<verse number="15">𠊎愛將你準做打榖機， 安又新又利个齒； 你會打碎山嶺，使它兜成做泥粉； 你會打爛山岡，使它兜像礱糠。</verse>
				<verse number="16">你會將它兜簸起來，俾風吹散， 俾大風將它兜掃走。 你就會當歡喜，因為𠊎係你个上主； 你會讚美𠊎 — 以色列 神聖个上帝。</verse>
				<verse number="17">𠊎窮苦个子民尋毋到水啉， 佢等當嘴燥个時， 𠊎 — 上主愛聽佢等个祈禱； 𠊎 — 以色列 个上帝一定毋會㧒掉佢等。</verse>
				<verse number="18">𠊎愛使大河出現在荒山中， 使泉水在山壢中湧出來。 𠊎愛使沙漠有陂塘， 使旱地有水源。</verse>
				<verse number="19">𠊎愛在沙漠中種香柏樹㧯金合歡木， 也種石榴樹㧯橄欖樹。 曠野中會生有松樹、杉仔、㧯黃楊樹。</verse>
				<verse number="20">大家一看就會知，一想就會了解： 𠊎係上主；這兜事係𠊎个手完成个， 這兜係 以色列 神聖个上帝創造个。</verse>
				<verse number="21">上主向假神挑戰講： 你等愛為自家辯護！ 雅各 个王恁樣宣佈： 將你等最有力个理由提出來！</verse>
				<verse number="22">你等來預言會發生个事， 解釋先前事情个意義。 來指示𠊎等， 使𠊎等有辦法想到這兜事情个結局， 抑係指示𠊎等將來个事件。</verse>
				<verse number="23">俾𠊎等明白將來會樣般， 𠊎等就知你等係神。 你等降福抑係降災， 來使𠊎等又慌張又著驚。</verse>
				<verse number="24">你等算麼介東西！ 你等所做个全部係空空； 拜你等个人非常可惡！</verse>
				<verse number="25">𠊎已經在東方興起一個人 ， 佢會靠𠊎个名祈求。 𠊎愛喊佢對北方來攻擊你等； 佢會踐踏君王像蹂泥， 就像燒缶師傅踏泥。</verse>
				<verse number="26">你等當中敢有麼儕預言這事會發生， 好使𠊎等講佢無毋著呢？ 你等當中確實無一儕提起恁樣个事； 無人聽到你等講過恁樣个話！</verse>
				<verse number="27">𠊎 — 上主最先㧯 錫安 講： 看啊，你等看該兜事 ！ 𠊎將一個報好消息个賜給 耶路撒冷 。</verse>
				<verse number="28">𠊎看所有个神明， 無一個有話好講； 無一個有辦法應𠊎个問題。</verse>
				<verse number="29">所有个神明全部無影無跡； 所有个偶像全部像風、係虛空！ 無一件事情做成功。</verse>
			</chapter>
			<chapter number="42">
				<verse number="1">上主講： 看哪，𠊎个僕人，𠊎扶持佢； 𠊎揀選佢，佢係𠊎心所歡喜个。 𠊎將𠊎个靈賜給佢； 佢愛為萬國帶來正義。</verse>
				<verse number="2">佢毋會盡喊，也毋會吵鬧； 佢毋會在街項大聲講話。</verse>
				<verse number="3">磧壞个蘆竹，佢毋會將它拗斷； 會烏个燈火，佢毋會將它歕掉。 佢愛忠心將正義帶來。</verse>
				<verse number="4">佢毋會失望也毋會失志； 佢愛在地上建立正義； 海島个人攏總仰望佢个法律。</verse>
				<verse number="5">上帝創造諸天，鋪設穹蒼； 佢造大地㧯地上所有个生物； 佢賜給人生命，使人會透氣。 主上帝向佢个僕人恁樣宣佈：</verse>
				<verse number="6">𠊎 — 上主照公義來呼召你； 𠊎會牽等你个手，保守你。 𠊎愛通過你㧯世間人立約 ； 𠊎愛使你成做萬國个光。</verse>
				<verse number="7">你愛去開瞙目个目珠， 𢱋坐監个人出監獄， 使烏暗地牢中个人得自由。</verse>
				<verse number="8">𠊎係上主，這係𠊎个名。 𠊎定著毋將𠊎个榮耀歸給假神， 也毋將愛給𠊎个稱讚歸給雕刻个偶像。</verse>
				<verse number="9">看哪，𠊎所預言个事已經實現。 這下𠊎愛㧯你等講兜新个事， 在事發生以前，𠊎先㧯你等講明。</verse>
				<verse number="10">愛向上主唱一首新歌； 全世界愛頌讚佢！ 大海㧯其中个生物全部愛讚美佢； 海島㧯島上个人民全部愛頌揚佢！</verse>
				<verse number="11">沙漠㧯其中个城市全部愛大聲唱歌； 基達 个人民愛讚美佢； 住在 西拉 个人全部愛歡呼， 在山頂大聲喊。</verse>
				<verse number="12">海島个人民全部愛榮光上主； 佢等愛頌讚佢！</verse>
				<verse number="13">上主像勇士出去相㓾； 佢軍裝著好，激動熱心去。 佢大聲盡喊，出戰攻擊敵人。</verse>
				<verse number="14">上帝講： 𠊎已經盡久無出聲， 恬恬無搭𠊎个子民。 這下𠊎愛行動了， 像𫱔子个婦人家盡命仔喊。</verse>
				<verse number="15">𠊎愛使大細山岡荒廢， 使草木枯燥。 𠊎愛使河壩變做沙埔 ， 使陂塘燥掉。</verse>
				<verse number="16">𠊎愛𢱋瞙目个子民， 行毋識行个路； 𠊎愛使佢等面前个烏暗變做光明， 使彎斡个路變平平个大路。 𠊎愛實現這兜事，絕對毋會豁掉佢等。</verse>
				<verse number="17">該兜相信假神个人一定會打輸； 倚靠偶像个人一定會堵到見笑。</verse>
				<verse number="18">上主講： 你等耳聾个啊，愛聽！ 你等青盲个啊，愛看！</verse>
				<verse number="19">世上有麼人比𠊎个僕人還較青盲？ 有麼人比𠊎个使者還較耳聾？ 到底有麼人比𠊎揀選个子民、上主个僕人還較青盲？</verse>
				<verse number="20">以色列 啊，你看過盡多，總係看毋清楚； 你聽過盡多，總係聽無了解。</verse>
				<verse number="21">上主一心愛伸張正義； 佢歡喜使法律得到尊重、發揚光大。</verse>
				<verse number="22">總係佢个子民被人搶劫； 佢等被人關在地牢肚， 被人囥在監獄中。 佢等被人搶，無人救； 佢等被人捉走，無人放佢等轉來。</verse>
				<verse number="23">你等當中有人愛聽這兜話麼？ 從今以後會注意聽麼？</verse>
				<verse number="24">係麼人將 以色列 交給侵略者？ 係麼人將 雅各 交給搶劫个人？ 敢毋係上主，因為𠊎等全部得罪佢。 𠊎等毋肯行佢个道路； 𠊎等無遵守佢个法律。</verse>
				<verse number="25">所以，佢向𠊎等大發譴， 使𠊎等受到戰爭个痛苦。 戰爭圍困𠊎等，𠊎等還係無學到教訓； 烈火燒到𠊎等，𠊎等還係無半點感覺。</verse>
			</chapter>
			<chapter number="43">
				<verse number="1">雅各 啊，創造你个上主恁樣講； 以色列 啊，使你成做人个上主這下恁樣宣佈： 毋使驚！因為𠊎救贖你； 𠊎指名喊你，你係屬𠊎个。</verse>
				<verse number="2">你對水中經過，𠊎愛㧯你共下； 你過大河壩，水毋會打走你。 你對火中行過，毋會被火熝到， 火焰也毋會燒到你。</verse>
				<verse number="3">因為𠊎係上主 — 你个上帝； 𠊎係 以色列 神聖个上帝 — 你个救主。 𠊎愛拿 埃及 來贖轉你个自由； 𠊎愛拿 古實 㧯 西巴 來代你還債。</verse>
				<verse number="4">在𠊎看來，你係樣般寶貴； 𠊎惜你，𠊎看重你。 𠊎甘願犧牲其他國家來拯救你， 犧牲別人來換你个生命。</verse>
				<verse number="5">毋使驚，因為𠊎㧯你共下！ 對遠遠个東方、西方， 𠊎愛𢱋你个子孫轉來故鄉。</verse>
				<verse number="6">𠊎愛命令北方放佢等走； 𠊎愛指示南方毋好強留佢等。 俾𠊎个子女對天涯海角， 轉到自家个故鄉。</verse>
				<verse number="7">佢等係𠊎个子民， 係𠊎為到自家个榮光創造个， 係𠊎自家所造成个。</verse>
				<verse number="8">上主講： 將𠊎个子民傳到法庭來。 佢等有目珠，總係看毋到！ 佢等有耳公，總係聽毋到！</verse>
				<verse number="9">將世界萬國萬民全部傳到法庭來。 㖠國个神明識預言這下所發生个事？ 㖠個識預言先前所發生个事？ 喊該兜神明帶佢等个證人來， 證明佢等無毋著， 證實佢等个話真實可靠。</verse>
				<verse number="10">以色列 人啊，你等係𠊎个證人； 𠊎選你等做𠊎个僕人， 愛俾你等認識𠊎，相信𠊎， 知𠊎係惟一个上帝。 除了𠊎，無別个上帝； 過去無，將來也毋會有。</verse>
				<verse number="11">只有𠊎係上主； 𠊎以外無救主。</verse>
				<verse number="12">𠊎識啟示，𠊎識拯救，𠊎識講過； 在你等中間無別个神明做過恁樣个事。 𠊎 — 上主這下宣告： 只有𠊎係真神！你等係𠊎个證人。</verse>
				<verse number="13">𠊎永遠係上帝。 無一儕能救人脫離𠊎个手； 無一儕能改變𠊎所做个。</verse>
				<verse number="14">上主 — 你等个救贖主、 以色列 神聖个上帝恁樣講： 為到愛拯救你等，𠊎會派軍隊攻打 巴比倫 ； 𠊎會攻破它个城門； 巴比倫 人民个歡呼會變做哀傷。</verse>
				<verse number="15">𠊎係上主 — 你等神聖个上帝， 係 以色列 个創造者 — 你等个君王。</verse>
				<verse number="16">古時節，上主在海洋中開一條路， 在波浪中開一條大路。</verse>
				<verse number="17">佢使強大个軍隊 — 戰車㧯戰馬全部毀滅。 佢等全部橫落去，䟘毋起來了； 佢等像燈心剪掉，火就烏掉。</verse>
				<verse number="18">總係上主講： 毋好緊唸先前个事； 毋好緊愐古早个事。</verse>
				<verse number="19">看啊，𠊎愛做一件新个事， 事情已經發生，敢講你等還毋知！ 𠊎愛在曠野開大路， 在沙漠挖河壩。</verse>
				<verse number="20">野獸、野狗㧯鴕鳥全部會敬重𠊎； 因為𠊎在曠野開水源， 使沙漠有河壩， 使𠊎揀選个子民有水啉。</verse>
				<verse number="21">佢等係𠊎為自家造个子民； 佢等會向𠊎唱讚美个詩歌！</verse>
				<verse number="22">上主講： 總係 雅各 啊，你無敬拜𠊎； 以色列 啊，你想到𠊎就當懶頭 。</verse>
				<verse number="23">你無向𠊎獻燒化祭个羊， 也無獻尊敬𠊎个祭物。 𠊎無要求祭物，增加你个負擔， 也無要求乳香，來麻煩你。</verse>
				<verse number="24">你並無為𠊎買菖蒲， 也無用祭物个油使𠊎飽足。 反轉，你个罪惡成做𠊎个負擔； 你个過犯帶給𠊎麻煩。</verse>
				<verse number="25">總係，𠊎係惟一个上帝。 𠊎會為自家个名赦免你个過犯； 𠊎無愛報應你个罪惡了。</verse>
				<verse number="26">𠊎等共下來去法庭；你做得申訴。 你做得提出理由，證明你有理。</verse>
				<verse number="27">你个祖先 犯罪， 你該兜領袖悖逆𠊎。</verse>
				<verse number="28">所以，𠊎使聖殿个官長見笑； 𠊎徹底毀滅 以色列 ， 使 雅各 受到侮辱。</verse>
			</chapter>
			<chapter number="44">
				<verse number="1">上主講： 𠊎个僕人 雅各 ， 𠊎个選民 以色列 啊， 這下你愛聽！</verse>
				<verse number="2">𠊎係創造你个上主， 對你一出世，𠊎就幫助你。 毋使驚！你係𠊎个僕人， 你係 𠊎所惜个選民。</verse>
				<verse number="3">𠊎愛降雨給燥旱个土地， 愛使沙漠湧出泉水。 𠊎愛將𠊎个靈降給你个後代， 愛賜福給你个子孫。</verse>
				<verse number="4">佢等會生長像水邊个青草， 茂盛像河壩滣个柳樹。</verse>
				<verse number="5">有人講：「𠊎屬上主」； 也有人自稱係屬 雅各 个人民； 又有人在手項寫等：「歸給上主个」； 佢等攏總愛參加 以色列 个行列。</verse>
				<verse number="6">上主 — 以色列 个君王， 萬軍个元帥 — 救贖主恁樣講： 𠊎係開始，𠊎係結束； 𠊎以外無上帝。</verse>
				<verse number="7">麼人㧯𠊎比抑得，佢做得出來講明！ 麼人有辦法做𠊎做過个事？ 麼人有法度預言將來个事？ 佢做得將會發生个事講出來啊！</verse>
				<verse number="8">𠊎个子民啊，毋好著驚！ 𠊎毋係早就將古早个事全部預言過？ 你等就係𠊎个證人。 𠊎以外，還有別个上帝麼？ 無半個！實在無其他个磐石！</verse>
				<verse number="9">雕刻偶像个人全部係虛空、又打喪工；佢等所認為當有價值个偶像事實上無半些價值。拜該兜神明个人看毋到真相、麼介都毋知；佢等必定會堵到見笑。</verse>
				<verse number="10">係麼人製造神像，鑄造無用个偶像？</verse>
				<verse number="11">看啊，所有拜偶像个會堵到見笑；造偶像个也係人定定。就算佢等全部聚集企共下，佢等面對𠊎也全部會著驚、會見笑。</verse>
				<verse number="12">打鐵个拿一垤鐵放在火肚燒，用強壯个手拿起鐵鎚，將鐵仔鎚成形。佢出力打，到肚飢無力，又無水啉就當𤸁當痶。</verse>
				<verse number="13">做木匠个取樹料，用墨斗彈線，用鉋仔鉋平，用圓尺畫模型，刻做人个形像，又靚又像，愛放在廟肚。</verse>
				<verse number="14">佢做得去斬香柏樹，抑係取樹林中个橡樹抑係檜木來用。佢也做得種松樹，等到落雨使它大頭起來。</verse>
				<verse number="15">人可能將這樹个一部份做柴來燒，拿一部份起火來焙燒抑係焙餅，另外一部份刻做神明俾人拜。</verse>
				<verse number="16">佢拿樹仔來燒，在該頂高焙肉，食到飽飽。佢也可能燒樹仔來焙火，講：「啊！有火盡好，盡燒暖！」</verse>
				<verse number="17">最後，佢用賸到个一部份刻偶像來跪拜，祈禱講：「你係𠊎个神明，求你來救𠊎！」</verse>
				<verse number="18">佢等實在無智識又毋曉得！佢等目珠揞等毋看，頭腦塞等毋想。</verse>
				<verse number="19">只愛製造偶像个人頭腦挺動一下、想一下，就會講：「𠊎用共頭樹个樹料，一部份做柴來燒，焙餅，焙肉來食；另外一部份用來刻偶像，𠊎還愛跪拜這垤樹杚頭嗎？」</verse>
				<verse number="20">這敢毋係像拿火灰充飢？佢个戇檔使佢行為偏差，無辦法救自家；佢毋承認手做个偶像係虛假个。</verse>
				<verse number="21">上主講： 雅各 啊，愛記得這兜事； 以色列 啊，你係𠊎个僕人。 𠊎造你，愛你做𠊎个僕人； 𠊎永遠毋會毋記得你。</verse>
				<verse number="22">𠊎赦免你个過犯㧯罪惡， 使它兜像烏雲㧯濛煙散掉一樣； 你愛歸向𠊎，因為𠊎救贖你。</verse>
				<verse number="23">天啊，愛歡呼！ 地最深个所在啊，愛大聲唱！ 群山啊，全部愛歡呼！ 樹林㧯其中个樹仔啊，全部來唱歌！ 上主已經救贖 雅各 ； 佢已經通過 以色列 顯出榮光。</verse>
				<verse number="24">上主 — 你个救贖者講， 對母胎創造你个上帝恁樣宣佈： 𠊎係上主，創造萬物个主宰。 𠊎自家展開天空； 𠊎親自鋪設大地。</verse>
				<verse number="25">𠊎使卜卦个人癲狂， 使算命个判斷失效。 𠊎贏過聰明人， 指出佢等个「智慧」全部係戇檔。</verse>
				<verse number="26">總係，𠊎个僕人講預言、 𠊎个使者計劃該時， 𠊎使該兜預言㧯計劃全部實現。 𠊎㧯 耶路撒冷 講， 還會有人在該位住； 𠊎㧯 猶大 講， 𠊎愛對荒涼中重建 猶大 个城市。</verse>
				<verse number="27">𠊎命令海水燥掉； 𠊎命令河壩變做旱地。</verse>
				<verse number="28">𠊎對 波斯 王 塞魯士 講： 你愛照顧𠊎个羊群， 執行𠊎个旨意。 你愛下令重建 耶路撒冷 ； 你愛命令建立聖殿个基礎。</verse>
			</chapter>
			<chapter number="45">
				<verse number="1">上主膏油設立 波斯 王 塞魯士 ，揀選佢做皇帝。 上主指派佢佔領列國，派佢去減少該兜王个權力。 上主愛列國為 塞魯士 大開城門，毋會再關起來。 上主對佢恁樣講：</verse>
				<verse number="2">𠊎愛親自為你開路， 為你削平大細山岡。 𠊎愛攻破銅門， 斬斷鐵閂。</verse>
				<verse number="3">𠊎愛將暗中囥等个寶物、 倉庫囤等个財富全部賜給你； 𠊎愛你知𠊎係上主， 也知 以色列 个上帝指名呼召你。</verse>
				<verse number="4">𠊎指定你幫助𠊎个僕人 雅各 ， 扶持𠊎所揀選个 以色列 。 𠊎指名呼召你； 你雖然毋認識𠊎、𠊎還係愛賜你名號。</verse>
				<verse number="5">𠊎係上主，獨一無二个； 𠊎以外無別个上帝。 雖然你毋認識𠊎， 𠊎還係愛賜你力量。</verse>
				<verse number="6">𠊎恁樣做，係愛使普天下， 對日出到日落之地个人，全部知： 𠊎以外無別个神； 𠊎係上主，獨一無二个。</verse>
				<verse number="7">𠊎造光明，也造烏暗； 𠊎降福，也降禍。 𠊎係上主；這一切係𠊎做个。</verse>
				<verse number="8">𠊎使公義像甘霖對天降下， 大地就裂開來承接， 開出自由㧯正義个花。 𠊎係上主；𠊎愛使這個事實現。</verse>
				<verse number="9">㧯創造主對抗个人慘了！ 缶仔敢做得㧯造它个師傅辯論？ 泥敢做得問師傅愛將它做成麼介？ 它敢做得怪怨師傅个手藝毋高明嗎？</verse>
				<verse number="10">敢有人向爺𡟓抗議講： 「做麼介將𠊎𫱔做恁樣？」 這種人慘了！</verse>
				<verse number="11">上主 — 以色列 神聖个上帝、 就係掌管未來个創造主恁樣講： 無人有權問𠊎子女个事， 無人有權管𠊎愛做麼介！</verse>
				<verse number="12">𠊎親自創造這個大地； 𠊎創造地上个人類。 𠊎親手展開天空， 𠊎管理日、月、星辰。</verse>
				<verse number="13">𠊎照公義使 波斯 王 塞魯士 興起； 𠊎愛修直佢行个路。 𠊎愛佢重建𠊎个城市 耶路撒冷 ， 幫助𠊎該兜被人捉去个子民得到自由。 佢做這事毋係為工錢，也毋係為獎賞。 上主 — 萬軍个元帥恁樣宣佈了。</verse>
				<verse number="14">上主對 以色列 恁樣講： 埃及 㧯 古實 个財產全部會歸你； 高大个 西巴 人會做你个奴才， 帶等鎖鍊跈在你後背。 佢等會跪在你面前承認講： 上帝斷真㧯你同在，並無別个神； 佢以外無別个上帝。</verse>
				<verse number="15">該拯救 以色列 人民个上帝， 係將自家囥起來个上帝。</verse>
				<verse number="16">製造偶像个人會澇潰了； 佢等全部會堵到見笑、羞辱了。</verse>
				<verse number="17">總係 以色列 蒙上主拯救； 佢等會得到永久个救恩， 永遠毋會見笑。</verse>
				<verse number="18">上主創造天； 只有佢係上帝。 佢造大地， 堅固它个根基。 佢無愛俾地荒掉， 就使它成做有人住个地方。 佢講：𠊎係上主，並無別个。</verse>
				<verse number="19">𠊎毋係囥等、在烏暗个地方講話； 𠊎並無喊 以色列 人民在渺渺茫茫中尋𠊎个旨意。 𠊎係上主； 𠊎講真理；𠊎傳揚公義。</verse>
				<verse number="20">上主講： 共下來啊！ 對列國逃轉來个人全部來！ 該兜扛等偶像在街路遊行、 向毋會救佢等个神明祈禱个， 全部係無智識个人！</verse>
				<verse number="21">由在被告个人共下參詳， 到法庭來說明！ 係麼人早就預言會發生个事？ 毋係𠊎 — 上主嗎？ 𠊎以外，並無上帝； 𠊎係公正、拯救个上帝， 𠊎以外無別个神。</verse>
				<verse number="22">全世界个人啊， 你等歸向𠊎就會得救。 𠊎係上帝，以外無別个神。</verse>
				<verse number="23">𠊎講話實在， 𠊎个應許毋會廢掉。 𠊎指等自家來發誓： 逐儕愛跪落去拜𠊎； 大家愛發誓對𠊎盡忠。</verse>
				<verse number="24">佢等會講， 只有上主有公義㧯力量， 所以人愛歸向上主； 恨佢个人全部會見笑。</verse>
				<verse number="25">所有 以色列 个子孫會因為上主得到拯救， 大大歡喜。</verse>
			</chapter>
			<chapter number="46">
				<verse number="1">巴比倫 个偶像 彼勒 伏落去， 尼波 跍下去， 被人放在獸類㧯頭牲个背囊頂， 成做重擔，害牠兜當痶。</verse>
				<verse number="2">偶像攏總跍下去、伏落去， 無辦法救自家； 它兜成做戰利品，被人捉走了。</verse>
				<verse number="3">雅各 个子孫啊，愛聽𠊎个話； 賸到个 以色列 人啊，全部愛聽。 你等一出世，一出母胎， 𠊎就揇等你、關心你等。</verse>
				<verse number="4">直到你等年老頭那毛變白个時， 𠊎一直看顧你等。 𠊎造你等，也愛養育你等； 𠊎愛揇你等，拯救你等。</verse>
				<verse number="5">上主講：你等愛將𠊎㧯麼人來比？ 有麼人㧯𠊎比抑得！ 敢有人恁像𠊎嗎？ 𠊎等做得來比看仔啊！</verse>
				<verse number="6">有人打開皮袋仔，倒出一些金仔， 又用天平秤一些仔銀仔； 佢等請打金師傅打做偶像， 然後向它跪拜！</verse>
				<verse number="7">佢等用肩頭將它扛起來， 放在安裝个所在，俾它企在該位， 它就毋會挺動。 有人向它祈禱，它毋會應佢； 它也毋會救人離開苦難。</verse>
				<verse number="8">悖逆个人啊，愛記在心中， 你等愛認真回想這兜事。</verse>
				<verse number="9">愛記得先前發生个事； 𠊎係上帝，並無別个神； 𠊎係上帝，無別个神㧯𠊎比抑得。</verse>
				<verse number="10">一開始，𠊎就指明將來个結局； 𠊎古早就講明將來會發生个事。 𠊎講，𠊎个計劃一定會完成； 𠊎所歡喜个事，𠊎一定會實現。</verse>
				<verse number="11">𠊎愛對東方召來一儕； 佢愛像鷹鳥對遠方來， 完成𠊎个計劃。 𠊎已經恁樣宣佈了，𠊎一定會做到； 𠊎所計劃个，𠊎一定使它實現！</verse>
				<verse number="12">硬心个人啊，離開公義恁遠个人啊 ， 愛聽𠊎个話！</verse>
				<verse number="13">𠊎愛親自將𠊎个公義 帶來， 該日仔無幾久了。 𠊎个救贖一定毋會延纏。 𠊎愛拯救 錫安 ， 使 以色列 得到𠊎个榮光。</verse>
			</chapter>
			<chapter number="47">
				<verse number="1">上主講： 巴比倫 啊，下來！ 對你个寶座頂下來！ 坐在地面个塵灰頂。 頭擺你像吂出嫁个細妹仔， 係無人佔領過个城。 總係，人毋會再講你係溫柔幼秀个； 你已經成做人个奴才！</verse>
				<verse number="2">你愛㩳磨石，磨麵粉！ 拿掉面紗！ 拉起長裙，露出腳髀來過河壩 ！</verse>
				<verse number="3">人會看到你赤身露體， 看到你个見笑。 𠊎愛報復； 無人能阻擋𠊎。</verse>
				<verse number="4">以色列 神聖个上帝救贖𠊎等； 佢个名係上主 — 萬軍个元帥！</verse>
				<verse number="5">上主對 巴比倫 講： 不准你出聲，去坐在烏暗中！ 毋會再有人稱你做「萬國个王后」。</verse>
				<verse number="6">𠊎識對𠊎个子民發譴， 使𠊎个產業受侮辱。 𠊎識將佢等交在你个手中； 你對佢等全無憐憫， 連老人家你也將盡重个擔頭放在佢等身項。</verse>
				<verse number="7">你恅到做得永遠做王后， 無將這兜事放在心上， 也無想這兜事个結局。</verse>
				<verse number="8">你這好享樂个人啊，這下愛聽𠊎講！ 你恅到你个地位堅固； 你認為自家㧯上帝共樣偉大， 你恅到無人奈得你何。 你講自家毋會成做寡婦， 也毋會喪掉子女。</verse>
				<verse number="9">無想到，有一日忽然間， 這兩樣事全部會發生。 無論你用麼介邪術， 樣般畫符唸咒， 你還係會死子女、做寡婦！</verse>
				<verse number="10">你當有自信，亂來亂做， 恅到無人看到你做壞事。 你被自家个聰明㧯智識害到。 你認為自家㧯上帝共樣偉大， 你恅到無人奈得你何。</verse>
				<verse number="11">總係，災禍會降到你身上了， 邪術救你毋到； 災難會臨到你頭那頂了， 你唸咒也無法度消災。 你無想到个時，毀滅忽然間會臨到！</verse>
				<verse number="12">做你繼續用邪術啊！ 做你繼續畫符唸咒啊！ 你對後生个時就用慣了， 可能這兜對你還有用， 做得拿來嚇你个仇敵。</verse>
				<verse number="13">你做恁多个計劃係加痶定定； 俾該兜看天象㧯星宿个來救你較贏哪！ 佢等敢毋係在逐隻月頭向你報告，㧯你講會發生个事？</verse>
				<verse number="14">看啊，佢等會像禾稈恁樣， 一陣火就燒淨淨。 佢等連自家也救毋到； 這火絕對毋係像焙燒个火炭火， 也毋係人做得坐在堘頭个細火。</verse>
				<verse number="15">你一生人偎靠星象家个計謀； 佢等反轉害你行死路。 佢等隨人尋出路走了， 一個也無留下來救你。</verse>
			</chapter>
			<chapter number="48">
				<verse number="1">雅各 家个人啊，愛聽這個話！ 你等稱做 以色列 人， 係 猶大 个子孫。 你等指上主个名發誓， 自稱係敬拜 以色列 个上帝； 其實你等無誠實，也無正直。</verse>
				<verse number="2">你等還恅到自家係聖城个人民， 所倚靠个係 以色列 个上帝 — 上主、萬軍个元帥。</verse>
				<verse number="3">上主對 以色列 講： 𠊎早就預言先前个事； 𠊎講出嘴，又講到明明； 到時𠊎忽然間出手，使該兜事情完成。</verse>
				<verse number="4">𠊎知你盡硬殼， 頸筋像鐵，額頭像銅恁硬。</verse>
				<verse number="5">𠊎早就預言你个將來， 在事情發生前已經宣佈， 使你做毋得講這兜事係假神做个， 係你自家雕刻㧯鑄造个偶像所註定个。</verse>
				<verse number="6">𠊎所預言个事全部發生了； 你愛承認𠊎个預言正確。 這下𠊎愛㧯你講將來个新事， 係頭擺囥等你毋知个事。</verse>
				<verse number="7">𠊎到這下正使這兜新事發生； 這兜事從古到今你毋識聽過； 所以你做毋得講，你早就知了。</verse>
				<verse number="8">無毋著，你無聽過； 無毋著，你並毋知； 無毋著，你个耳公從來毋識打開。 𠊎早就知你个詭詐； 你一出世就係悖逆个人。</verse>
				<verse number="9">為到愛使人讚美𠊎个名， 𠊎暫時忍等𠊎个受氣； 𠊎強強忍等，無愛毀滅你。</verse>
				<verse number="10">𠊎試煉你，總係無像在火爐中煉銀仔； 𠊎係用苦難做火爐來鍛鍊你。</verse>
				<verse number="11">𠊎恁樣做係為到𠊎自家。 𠊎無愛俾自家个名受到褻瀆； 𠊎定著毋將𠊎个榮耀歸給假神。</verse>
				<verse number="12">雅各 家啊，聽𠊎講！ 𠊎所呼召个 以色列 人啊，愛聽𠊎講！ 𠊎係上主 — 獨一無二个上帝， 𠊎係開始个，也係結束个。</verse>
				<verse number="13">𠊎親手建立地个基礎； 𠊎用正手展開天空。 𠊎召集天㧯地， 天㧯地就黏時企在𠊎面前。</verse>
				<verse number="14">你等全部愛集合，來聽𠊎講話！ 毋識有神明預言， 𠊎所選立个人會攻擊 巴比倫 人； 佢會照𠊎个旨意在 巴比倫 行事。</verse>
				<verse number="15">係𠊎對佢講話，呼召佢； 𠊎帶佢出來，使佢興旺。</verse>
				<verse number="16">行兼到𠊎面前來，聽𠊎講話！ 𠊎一開始就公開向你等講話， 又使𠊎个話句句實現 。 這下至高个上主已經將佢个靈賜給𠊎， 差派𠊎。</verse>
				<verse number="17">以色列 神聖个上帝， 拯救你个上主恁樣講： 𠊎係上主 — 你个上帝； 為到你个利益，𠊎教你； 𠊎指示你應該行个路。</verse>
				<verse number="18">𠊎樣般希望你一直聽𠊎个命令啊！ 若係你聽𠊎个命令， 平安就像河壩水恁樣，毋會斷掉； 公義就像海浪恁樣，一陣又一陣接等來。</verse>
				<verse number="19">你个子孫會像沙仔恁多； 𠊎永遠毋會俾佢等个名滅掉。</verse>
				<verse number="20">你等愛對 巴比倫 出來！ 對 巴比倫 人當中離開！ 大聲歡喜來報這好消息； 到天涯海角去傳揚講： 上主已經拯救佢个僕人 以色列 ！</verse>
				<verse number="21">上主帶領佢个子民行過沙漠个時， 佢等並無渴死； 因為佢使磐石流出水來； 佢打裂磐石，泉水就湧出來。</verse>
				<verse number="22">上主講： 作惡个人毋會有平安！</verse>
			</chapter>
			<chapter number="49">
				<verse number="1">眾海島个人啊，你等來聽！ 遠方个萬民啊，你等全部來聽𠊎講！ 𠊎出世以前，上主已經揀選𠊎； 𠊎還在母胎肚，佢已經喊𠊎个名。</verse>
				<verse number="2">佢使𠊎个話像利劍； 佢親手保護𠊎 。 佢將𠊎造成像磨尖个箭， 囥在佢个箭袋肚。</verse>
				<verse number="3">佢對𠊎講： 以色列 啊，你係𠊎个僕人； 𠊎定著會因為你得到榮光。</verse>
				<verse number="4">𠊎就講：𠊎煞猛做事，總係全無效果； 𠊎盡力做，還係無採工。 總係上主會給𠊎公平个論斷； 𠊎个上帝定著會獎賞𠊎。</verse>
				<verse number="5">在𠊎出世以前， 上主已經指派𠊎做佢个僕人； 愛𠊎使 雅各 家歸向佢， 使四散个 以色列 人民聚集在佢个面前。 上主看𠊎做尊貴； 𠊎个上帝係𠊎个力量。</verse>
				<verse number="6">上主對𠊎講： 𠊎个僕人啊， 𠊎愛你復興 雅各 个逐支族， 將賸到个 以色列 子孫帶轉來。 𠊎還愛你成做萬國个光， 使𠊎个救恩達到地極。</verse>
				<verse number="7">以色列 个救贖者 — 神聖个上帝恁樣講： 該被人看輕、 被萬國所惱个、 被統治者看做奴僕个， 這下君王會在你面前企起來致敬； 官長也會向你跪拜。 這事一定會成就， 因為 以色列 神聖个上帝揀選你； 上主定著會實現佢个應許。</verse>
				<verse number="8">上主對佢个子民恁樣講： 接納个時節一到，𠊎就答應你； 拯救个日仔一來，𠊎就幫助你。 𠊎愛保護你，看顧你， 通過你㧯萬民立約 。 𠊎愛俾你轉到該荒掉个地方， 俾你重建家園。</verse>
				<verse number="9">𠊎愛對被人捉去个講：你等自由了！ 對烏暗中个人講：你等重見光明了！ 佢等會像羊仔在草埔食草； 原旦光光个高山成做牠兜个草場。</verse>
				<verse number="10">佢等毋會餓肚也毋會嘴渴。 日頭當𤊶乜毋會傷害佢等； 因為該痛惜佢等个愛帶領佢等； 佢愛𢱋佢等到有泉水个所在。</verse>
				<verse number="11">𠊎愛在眾山頂開路， 𠊎个大路也愛坉到高高。</verse>
				<verse number="12">看啊！𠊎个子民會對遠方來； 對西，對北，又對 希尼 个地方來。</verse>
				<verse number="13">天啊，愛歡喜唱歌！ 地啊，愛快樂歡呼！ 眾山啊，愛大聲頌揚！ 因為上主愛安慰佢个子民， 愛憐憫佢受苦个子民。</verse>
				<verse number="14">總係 耶路撒冷 个人民 講： 上主已經㧒掉𠊎等！ 𠊎等个主已經毋記得𠊎等！</verse>
				<verse number="15">所以，上主應講： 阿姆會毋記得姖食乳个孲𤘅仔麼？ 姖會毋惜親生个孻仔麼？ 就算阿姆毋記得自家个細人仔， 𠊎也定著毋會毋記得你！</verse>
				<verse number="16">耶路撒冷 啊，𠊎將你个名刻在巴掌心； 你个城牆一直在𠊎眼前。</verse>
				<verse number="17">愛重建你个 當遽就會轉來了； 愛毀滅你个㧯害你荒涼个當遽就會離開你。</verse>
				<verse number="18">打開目珠四面看看仔啊！ 你个同胞已經集合， 愛倒轉你這位來了！ 𠊎 — 上主指等𠊎个生命保證： 你會看自家个同胞做尊貴， 就像新娘展繫在姖腰間个珠寶。</verse>
				<verse number="19">你个國家識受到破壞； 這下它忒狹、容納毋落轉來个人住。 以前侵略你个人定著會遠遠離開你。</verse>
				<verse number="20">該兜你恅到喪掉个，佢等个子女會倒轉來對你講： 這垤土地實在忒狹了； 𠊎等需要較大个地方！</verse>
				<verse number="21">該時你會對自家講： 麼人為𠊎𫱔這恁多細人仔？ 𠊎个細人仔全部夭折，𠊎已經毋會𫱔了； 𠊎逃走在外背，逐所在流浪， 係麼人𢱋大這兜細人仔呢？ 在𠊎孤單个時， 這兜細人仔對㖠位來个？</verse>
				<verse number="22">至高个上主對佢个子民講： 看啊！𠊎愛向列國擎手、向萬民搖大旗； 佢等會揇等你个孻仔， 揹等你个妹仔轉來。</verse>
				<verse number="23">列國个君王會做你子女个養爺； 佢等个王后會做你細人仔个乳𡟓。 佢等會在你面前跪拜， 舐你腳項个塵灰。 該時你就會知𠊎係上主； 等𠊎幫助个人絕對毋會失望。</verse>
				<verse number="24">你對勇士手中樣搶得轉戰利品呢？ 你對佔領者手中救得轉被佢捉去个人嗎？</verse>
				<verse number="25">上主恁樣應講： 這種事會發生了。 勇士搶去个戰利品會搶轉來； 佔領者捉去个人會救轉來。 你个對敵就係𠊎个對敵； 你个子女𠊎愛拯救。</verse>
				<verse number="26">𠊎愛使欺負你个人食自家个肉； 佢等愛啉自家个血，醉到橫橫落去。 該時普天下全部會知， 𠊎係拯救你个上主； 𠊎係你个救贖主， 係 雅各 大能个上帝。</verse>
			</chapter>
			<chapter number="50">
				<verse number="1">上主恁樣講： 你等恅到𠊎逐走你等个阿姆； 㧯𠊎講，離婚書在㖠位？ 你等恅到𠊎出賣你等給債主； 到底𠊎將你等賣給麼人呢？ 你等被人出賣係因為你等个罪； 你等个阿姆被人㧒掉係因為你等个罪過。</verse>
				<verse number="2">𠊎來救你等个時，做麼介無人在？ 𠊎喊你等，做麼介毋應𠊎？ 你等恅到𠊎个手忒短、忒軟弱，無力好救你等係麼？ 看啊！𠊎發出命令，海就會燥掉； 𠊎使大河壩變做沙漠， 使魚類因為無水就死掉、臭掉。</verse>
				<verse number="3">𠊎有辦法使天變烏暗， 像著麻衫為死人哀傷。</verse>
				<verse number="4">至高个上主教𠊎應該講个話， 使𠊎知愛樣般安慰憂傷个人。 逐朝晨，佢喊醒𠊎， 使𠊎盡想愛聽佢个教示。</verse>
				<verse number="5">至高个上主使𠊎聽到佢个教示； 𠊎並無違背，也無退走。</verse>
				<verse number="6">𠊎由在人打𠊎个背囊， 挷𠊎个鬍鬚， 呸口潾在𠊎个面項； 𠊎一直忍受人个侮辱。</verse>
				<verse number="7">佢等个侮辱毋會傷害𠊎， 因為至高个上主幫助𠊎。 𠊎當勇敢來忍受一切， 知𠊎毋會致到見笑。</verse>
				<verse number="8">因為上帝在𠊎身邊，代𠊎伸冤， 有麼人敢來㧯𠊎打官司？ 𠊎等做得共下來去尋審判官！ 盡量告𠊎啊！</verse>
				<verse number="9">至高个上主愛親自代𠊎辯護； 麼人有辦法證明𠊎有罪呢？ 告𠊎个人全部會消滅， 像舊衫褲被蟲蛀掉。</verse>
				<verse number="10">你等當中，麼人係尊重上主、 聽從佢僕人教訓个人呢？ 就係在烏暗中行， 還係會信靠上主，倚靠上帝。</verse>
				<verse number="11">想愛謀害別人个， 會被自家个陰謀害到。 上主恁樣規定： 這種人一定會堵到災難！</verse>
			</chapter>
			<chapter number="51">
				<verse number="1">上主講： 追求公義、尋求上主个人啊， 愛聽𠊎个話。 你等愛想看仔， 你等像係對石頭爆出來个， 對石坑 挖出來个。</verse>
				<verse number="2">回想你等个祖先 亞伯拉罕 ； 回想𫱔你等个 莎拉 。 當𠊎呼召 亞伯拉罕 个時， 佢並無孻仔； 總係𠊎賜福給佢， 使佢有當多个子孫。</verse>
				<verse number="3">𠊎定著愛憐憫 耶路撒冷 ， 愛安慰住在 錫安 荒埔个人。 𠊎愛使該曠野變做像 伊甸 園； 𠊎愛使沙漠成做上主个花園。 該位會有快樂、歡喜， 㧯讚美感謝个歌聲。</verse>
				<verse number="4">𠊎个子民啊，愛聽！ 𠊎个國民啊，愛注意聽： 𠊎愛將𠊎个法律賜給萬國； 𠊎个公義會帶給佢等光明。</verse>
				<verse number="5">𠊎主持公義个時間到了， 𠊎个救恩已經發出。 𠊎愛親自統治萬民； 眾海島攏總等等𠊎， 盼望𠊎去拯救它兜。</verse>
				<verse number="6">你等昂頭望天空，低頭看大地。 天空會像煙雲消散； 大地會像衫褲爛掉； 地上个人民也會像烏蠅死掉。 總係𠊎个拯救永遠長存； 𠊎个公義定著毋會廢掉。</verse>
				<verse number="7">知麼介係公正、 記得𠊎教訓个人啊， 你等愛聽𠊎个話！ 毋使驚別人个侮辱㧯嘲謔；</verse>
				<verse number="8">佢等會像衫褲被蛀蟲蛀掉， 像羊毛被蟲仔食掉。 總係𠊎个公義永遠長存， 𠊎个拯救直到萬代。</verse>
				<verse number="9">上主啊，擎起來！ 將你滿有能力个手擎起來！ 就像古早該兜日仔共樣。 敢毋係你將海怪 拉哈伯 剁到碎碎？ 敢毋係你刺死該惡龍 ？</verse>
				<verse number="10">你識使大海燥掉， 使深潭變做旱地， 在深海中開大路， 俾你所救贖个人通過。</verse>
				<verse number="11">該兜你所救贖个人一定會轉來； 佢等會快樂大聲唱歌， 歡歡喜喜來到 錫安 。 佢等會永遠歡喜快樂， 毋會再憂愁歎息。</verse>
				<verse number="12">上主講： 係𠊎，安慰你个就係𠊎！ 你樣愛使驚該兜會死个人？ 驚該兜生命像草个世間人？</verse>
				<verse number="13">你毋記得造你个上主係麼？ 敢毋記得係麼人開天、闢地？ 你做麼介歸日驚迫害你个人， 驚想愛毀滅你个人大發譴？ 這下佢等个大發譴在㖠位呢？</verse>
				<verse number="14">被人壓迫个當遽會得到自由了； 佢等毋會落陰間、也毋會欠食物。</verse>
				<verse number="15">𠊎係上主，你个上帝； 𠊎攪動大海，使海浪吼吼滾。 𠊎个名係上主 — 萬軍个元帥！</verse>
				<verse number="16">𠊎愛將𠊎个話傳給你， 𠊎愛用𠊎个手遮等你。 𠊎就係該開天闢地个， 又對 錫安 講： 你係𠊎个子民！</verse>
				<verse number="17">耶路撒冷 啊，䟘起來！ 䟘起來，企正來！ 上主責罰你个時， 使你啉大發譴个杯， 使你啉到跉跉傾傾。</verse>
				<verse number="18">你養育个子民， 無一個引導你； 在你畜大个子民當中， 也無一個牽你个手。</verse>
				<verse number="19">你个土地受到毀滅、破壞， 你个人民堵到飢荒、戰爭； 這兩種災禍臨到你， 無人為你悲傷， 無人來安慰你 。</verse>
				<verse number="20">你个子民在街頭巷尾昏倒； 佢等像羚羊落在羅網肚。 佢等啉滿上主个大發譴， 承受上帝个責備。</verse>
				<verse number="21">耶路撒冷 受苦个子民啊， 你等个醉毋係因為啉酒醉； 這下你等愛聽好！</verse>
				<verse number="22">至高个上主 — 為你等辯護个上帝，恁樣講： 看啊，𠊎已經將該使你等跉跉傾傾个杯仔拿走； 該係𠊎發譴个時給你等个杯； 你等毋使再啉了。</verse>
				<verse number="23">𠊎愛將這杯轉給欺負你等个人； 佢等識對你等講：「伏下來，俾𠊎等踏過去！」 你等就乖乖將背囊準路被人行。</verse>
			</chapter>
			<chapter number="52">
				<verse number="1">錫安 啊，䟘起來！ 再堅強起來！ 耶路撒冷 聖城啊， 將你高貴个衫褲著起來！ 無受割禮、無淨浰个人毋會再入你个城門了。</verse>
				<verse number="2">耶路撒冷 啊，撥淨塵灰！ 䟘起來，倒轉去坐你个寶座！ 錫安 被人捉走个人民啊， 解開䌈等你頸筋个鎖鍊！</verse>
				<verse number="3">上主對佢个子民恁樣講：「你等被人賣做奴才，無人付代價給你等；共樣，你等得自由也毋使付錢。</verse>
				<verse number="4">你等頭擺到 埃及 暫住係自願个；後來 亞述 人用武力將你等捉去，一個銀也無付給你等。</verse>
				<verse number="5">這下，在 巴比倫 發生共樣个事。你等係無緣無故被人捉去个人；佢等並無付麼介工錢給你等。統治你等个人非常驕傲，一直藐視𠊎个名。</verse>
				<verse number="6">𠊎个子民將來會知𠊎正係上帝，因為講過這兜話个就係𠊎。」</verse>
				<verse number="7">該攀山過嶺來个使者， 佢个腳跡還靚噢！ 佢來報好消息 — 就係和平个消息，得救个好消息。 佢對 錫安 講： 你个上帝掌權了！</verse>
				<verse number="8">城頂个守望者會大聲喊； 佢等也會共下大聲歡喜唱歌！ 因為上主轉到 錫安 个時， 佢等會親目看到。</verse>
				<verse number="9">耶路撒冷 荒掉个所在啊， 愛大聲喊，大聲唱歌！ 上主愛救贖佢个城， 愛安慰佢个子民。</verse>
				<verse number="10">上主愛在萬國个面前，用聖手拯救佢个子民； 普天下个人全部會看到𠊎等上帝个救恩。</verse>
				<verse number="11">好離開了！遽遽離開！對 巴比倫 出來！ 扛上主聖殿用品个人啊， 毋好摸到無淨浰个東西！ 離開个時愛保持聖潔！</verse>
				<verse number="12">你等離開个時，毋使著急； 你等毋係逃命。 上主愛在頭前𢱋你等； 以色列 个上帝也會在後背保護你等。</verse>
				<verse number="13">上主講： 看啊，𠊎个僕人盡有智慧、完成使命； 佢會受人尊重，得到最大个光榮。</verse>
				<verse number="14">盡多看到佢个人攏總當著驚， 無人个面貌像佢个恁毋好看， 差毋多毋成人形。</verse>
				<verse number="15">因為恁樣，佢會使盡多國家个人著驚； 盡多君王會驚到揞自家个嘴。 因為，佢等會看到從來毋識聽過个， 明白毋識有人㧯佢等講過个事。</verse>
			</chapter>
			<chapter number="53">
				<verse number="1">佢个子民應講： 麼人會相信𠊎等這下所講个呢？ 麼人會想到這係上主所做个事？</verse>
				<verse number="2">僕人在上主面前像新芽爆出來， 像花草在燥泥底背生根。 佢無派頭，也毋緣投， 毋會吸引𠊎等个注意； 佢个外表平常， 毋會得到𠊎等个欣慕。</verse>
				<verse number="3">佢被人藐視，被人豁掉； 佢忍受痛苦，常常憂愁。 像人揞等面，無人愛搭佢， 人人看輕佢； 𠊎等也毋尊敬佢。</verse>
				<verse number="4">其實，佢係承受𠊎等當受个憂愁； 佢擔當𠊎等所應當受个痛苦。 總係𠊎等恅到佢應該受責罰， 應該被上帝鞭打、刑罰！</verse>
				<verse number="5">為到𠊎等个罪惡佢受刺傷； 為到𠊎等个過犯佢受毒打。 因為佢受責罰，𠊎等得到平安； 因為佢受鞭打，𠊎等得到醫好。</verse>
				<verse number="6">𠊎等像迷路个羊群， 逐儕行自家个路。 總係𠊎等一切个過失， 上主使佢代𠊎等擔當。</verse>
				<verse number="7">佢被人迫害忍受艱苦， 總係恬恬無講半句話。 佢像被人牽去㓾个細羊， 又像被人剪毛个羊， 佢一句話也毋講。</verse>
				<verse number="8">佢被人捉去關，受審判，處死刑。 該時代个人無人想得到： 佢係為到𠊎子民个罪惡被人鞭打， 為𠊎子民个過犯被人對世間剪除。</verse>
				<verse number="9">雖然佢毋識有暴力个行為， 也無講過花撩， 總係佢㧯邪惡个人埋共下； 佢㧯財主用共隻墓地。</verse>
				<verse number="10">佢受害、受痛苦係上主个旨意； 佢个死係贖罪个祭。 佢會看到自家个後代； 佢會享長壽。 通過佢，上主愛實現佢个計劃。</verse>
				<verse number="11">經驗過一生个痛苦以後， 佢就心滿意足； 因為佢知自家个受苦係有效果个。 上主講： 𠊎公義个僕人愛使盡多人成做義人； 佢愛擔當佢等个罪。</verse>
				<verse number="12">所以，𠊎愛使佢在偉大个人當中坐大位， 在強壯个人當中分戰利品。 佢自願犧牲生命， 承擔罪人个命運。 佢擔當眾人个罪， 為佢等个過犯祈禱 。</verse>
			</chapter>
			<chapter number="54">
				<verse number="1">耶路撒冷 啊，愛歡喜唱歌； 你像係毋會𫱔个婦人家， 毋識因為𫱔子痛到盡嘶， 總係這下你愛歡喜唱歌，大聲盡喊。 該受冷落孤單个婦人家會有盡多子孫， 比一直有老公共下个婦人家𫱔還較多！ 這係上主講个。</verse>
				<verse number="2">你搭帳篷个地愛較大兜仔， 你搭个帳篷愛較闊兜仔， 索仔愛較長兜仔，杚仔愛釘較住兜仔。</verse>
				<verse number="3">愛向左右擴張你个土地。 列國佔去个土地，你个子孫會倒轉來住； 荒涼个城市會有盡多人住。</verse>
				<verse number="4">毋使驚，你毋會再堵到見笑； 你毋會再被人侮辱。 你會毋記得後生時堵到个見笑， 你毋會再想起做寡婦時所受个侮辱。</verse>
				<verse number="5">你个創造主係若老公； 佢个名係上主 — 萬軍个元帥。 以色列 神聖个上帝係你个救贖者； 佢係統治全世界个神。</verse>
				<verse number="6">以色列 啊，你像一個後生个𡜵娘人， 被老公㧒掉，當傷心又盡憂愁。 總係上主愛喊你轉來， 你个上帝恁樣講：</verse>
				<verse number="7">𠊎雖然暫時離開你， 總係𠊎非常痛惜你，愛接你轉來。</verse>
				<verse number="8">𠊎大發譴、揞面毋搭你係一下仔定定； 總係𠊎愛用永遠个慈愛憐憫你。 上主 — 你个救贖者恁樣宣佈了。</verse>
				<verse number="9">在 挪亞 个時，𠊎識發誓， 毋會再用發大水來浸掉世界。 這下𠊎發誓毋會再向你發譴， 毋會再責備你。</verse>
				<verse number="10">大山會挺動，細山也做得徙開； 總係𠊎不變个慈愛毋會離開你， 𠊎平安个約也一定毋會改變。 憐憫你个上主恁樣宣佈了。</verse>
				<verse number="11">上主講： 耶路撒冷 ，你這被大風吹打困苦个城啊， 無人來安慰你。 看啊，𠊎愛用彩色个石頭來重建你， 用寶石來打你个地基。</verse>
				<verse number="12">𠊎愛用紅寶石起你个城樓， 用會發亮光个寶石做城門； 四圍个城牆全部鑲滿珠寶。</verse>
				<verse number="13">上主愛親自教導你个子女， 賜佢等大平安。</verse>
				<verse number="14">施行正義會使你變盡強大， 毋會再有人來侵略你，害你著驚； 你毋會再堵到得人驚个事， 得人驚个事會遠遠離開你。</verse>
				<verse number="15">𠊎毋會俾人攻擊你； 㧯你相㓾个一定會向你投降。</verse>
				<verse number="16">𠊎創造打鐵師傅， 俾佢歕火爐，打造武器。 該㓾人、毀滅人个， 也係𠊎創造个。</verse>
				<verse number="17">總係無一樣武器有可能傷害你； 在審判个時告你个人， 你定著會打贏佢。 這一切係上主僕人个產業， 係佢等對𠊎得到个正義 。 𠊎 — 上主恁樣宣佈了。</verse>
			</chapter>
			<chapter number="55">
				<verse number="1">上主講： 嘴燥个人啊，全部來！ 這位有水好啉！ 無錢个人啊，也做得來！ 來買東西食！ 毋使錢，毋使代價， 來買酒㧯乳！</verse>
				<verse number="2">做麼介了錢去買食毋得个東西？ 做麼介打喪勞碌賺來个工錢，還係得毋到飽足？ 愛留意聽從𠊎个話， 你等就會享受最好个食物， 使你等心靈得到飽足、滿有歡喜。</verse>
				<verse number="3">𠊎个子民啊，愛聽𠊎个話，到𠊎這位來。 注意聽𠊎个話，你等就會得生命！ 𠊎愛㧯你等立永遠个約， 將𠊎應許給 大衛 該可靠不變个慈愛賜給你等。</verse>
				<verse number="4">看啊，𠊎已經立佢向萬民做𠊎个見證， 設立佢做萬國个領袖㧯元帥。</verse>
				<verse number="5">你定著會召集你毋識个列國， 該毋識你个列國會來投靠你。 𠊎 — 上主、你等个上帝愛成就這事； 因為 以色列 神聖个上帝已經賜給你光榮。</verse>
				<verse number="6">愛在還尋得到上主个時去尋佢； 愛在上主還親近个時去求佢。</verse>
				<verse number="7">壞人愛離開邪惡个道路； 犯罪个人愛回心轉意。 佢等應該轉向上主，來承受佢个憐憫； 愛歸向𠊎等个上帝，因為佢愛施行大赦免。</verse>
				<verse number="8">上主講：𠊎个想法毋係你等个想法； 𠊎个道路毋係你等个道路。</verse>
				<verse number="9">就像天比地高加盡多， 𠊎个道路比你等个道路高加盡多； 𠊎个想法比你等个想法高加盡多。</verse>
				<verse number="10">像雪㧯雨對天頂落下來， 並無倒轉天頂去，係愛滋潤大地， 使五榖發芽生長， 俾委種个有種子， 俾人有五榖好食，</verse>
				<verse number="11">𠊎个話就係恁樣。 𠊎講出个話絕對毋會空空倒轉來， 一定會成就𠊎个計劃， 達成𠊎所頒佈个旨意。</verse>
				<verse number="12">你等會歡歡喜喜出來， 平平安安被上帝引導 。 你等行過大山細山， 它兜會歡喜唱歌； 你等行過田野， 連樹仔也盡命拍手！</verse>
				<verse number="13">原旦生竻仔个所在這下變做生松柏； 原旦生蒺藜个所在這下變做生石榴。 這愛做永遠不能除掉个記號， 來紀念𠊎 — 上主个聖名。</verse>
			</chapter>
			<chapter number="56">
				<verse number="1">上主對佢个子民恁樣講：「你等愛守公平行公義，因為𠊎个救恩近了，𠊎个公義會顯明。</verse>
				<verse number="2">𠊎愛賜福給該兜確實遵守安息日毋肯違犯个人；𠊎愛賜福給一切遠離邪惡个人。」</verse>
				<verse number="3">改信上主个外族人毋好講：「上主絕對毋會俾𠊎㧯佢个子民共下做禮拜。」 太監也毋好講：「看啊，𠊎係一頭燥樹仔。」</verse>
				<verse number="4">因為上主恁樣講：「若係你等太監謹守𠊎个安息日，做𠊎所歡喜个事，又堅定遵守𠊎个約，</verse>
				<verse number="5">𠊎就俾你等个名在𠊎个聖殿㧯𠊎个子民中間受人紀念，贏過有盡多个子女个。你等永遠毋會被人除名。」</verse>
				<verse number="6">有兜外族人已經改信上主，愛服事佢，愛稱頌上主个名，愛做佢个僕人，又確實遵守安息日毋肯違犯，堅定遵守上主个約个，</verse>
				<verse number="7">上主講：「𠊎愛帶佢等到𠊎个聖山 錫安 ，使佢等在𠊎祈禱个殿中有喜樂。𠊎愛接受佢等在祭壇頂所獻个燒化祭㧯牲儀；因為𠊎个聖殿愛稱做萬民祈禱个殿。」</verse>
				<verse number="8">至高个上主 — 就係將被人逐散个 以色列 人帶轉家鄉个，恁樣講：「𠊎還愛聚集其他个人民也來加入佢等个行列。」</verse>
				<verse number="9">上主識喊外國人像山野㧯樹林中个野獸恁樣相爭來吞食佢个子民！</verse>
				<verse number="10">佢講：「所有个守望者全部係青盲；佢等完全看毋出危險，毋知愛警告𠊎个子民。佢等係一群毋會吠个狗，歸日睡等發夢！</verse>
				<verse number="11">佢等像貪食个狗，食毋知飽；佢等原來係牧人，總係麼介都毋知，逐儕偏行自家个路，追求自家个利益。</verse>
				<verse number="12">佢等講：『來！𠊎來去拿酒！𠊎等來放勢啉釅酒；天光日毋會無掉去，無一定會比今晡日還較好！』」</verse>
			</chapter>
			<chapter number="57">
				<verse number="1">上主講：好人死掉，無人放在心上；虔誠人過身，也無人了解，佢等死掉，反轉係脫離災禍。</verse>
				<verse number="2">行為正直个人過身該時，安然睡在自家个眠床，事實上佢等係進入平安个所在。</verse>
				<verse number="3">總係，你這兜人就像係仙姑个孻仔，姦夫、妓女个子孫。行近來接受審判！</verse>
				<verse number="4">你等愛嘲謔麼人？你等變鬼變怪愛㩢耍麼人？你等敢毋係悖逆人个後代，落仔个子孫？</verse>
				<verse number="5">你等在橡樹中間，在逐頭大樹下行姦淫，拜繁殖个神明！你等在山壢中个石窿肚將自家个細人仔㓾來獻祭。</verse>
				<verse number="6">你等拜山壢中光滑个石頭，獻酒做祭酒，又獻素祭。這兜事愛喊𠊎樣般忍受？</verse>
				<verse number="7">你等上到高山頂行姦淫，又在該位獻祭。</verse>
				<verse number="8">你等在自家屋肚个大門㧯門框後背安外邦邪淫个記號。你等就像背等𠊎、脫光衫褲，上大眠床，㧯花錢召來个情人睡目。你等貪戀佢等个眠床，來滿足自家个慾望。</verse>
				<verse number="9">你等還帶香油去拜 摩洛 神，又獻盡多香料，也派使者到遠遠个所在去，甚至到陰間去尋神明。</verse>
				<verse number="10">因為路途當遠，你等感覺當𤸁當痶，還係毋死心。你等恅到尋這兜邪神會給你等得到氣力，你等就毋會恁痶。</verse>
				<verse number="11">你等驚麼人？你等因為驚神明卻來對𠊎講花撩，毋記得𠊎，也無將𠊎放在心上。係毋係因為𠊎對你等恬恬恁久，你等就毋驚𠊎？</verse>
				<verse number="12">你等卻恅到自家做當著。𠊎愛指出你等所做个罪惡，你等拜偶像對自家無半些幫助。</verse>
				<verse number="13">你等求幫助个時，看該兜收來个偶像會來救你等麼！其實，一陣風就會將它兜吹走，一口氣就會將它兜歕走！總係該兜信靠𠊎个人會承接這垤土地；佢等會得到𠊎个聖山做產業。</verse>
				<verse number="14">上主講：「地愛坉高、路愛整好勢，為𠊎个子民清除杈路个東西！</verse>
				<verse number="15">「𠊎係至高無上、永遠存在、神聖个上帝。𠊎住在至高神聖个所在，也住在真心悔改㧯謙卑个人當中。𠊎使謙卑个人恢復信心，使真心悔改个人重新得到希望。</verse>
				<verse number="16">𠊎毋會永遠責備，也毋會永遠發譴；因為𠊎若恁樣做，𠊎造个子民一定會在𠊎面前滅掉。</verse>
				<verse number="17">𠊎向佢等發譴，因為佢等貪心犯罪；所以𠊎揞等面責罰佢等。佢等還係硬頸，繼續行自家个路。</verse>
				<verse number="18">「𠊎有看到佢等个行為，總係𠊎還係愛醫治佢等。𠊎愛帶領佢等，俾佢等重新得到安慰；該傷心个人嘴唇會發出讚美。」</verse>
				<verse number="19">上主講：「平安！平安！無論遠近个人，𠊎愛賜佢等平安；𠊎愛醫治佢等。</verse>
				<verse number="20">總係壞人像無平靜个海面，有得人驚个大海浪；佢等个人生湧出垃圾㧯屙糟个東西。」</verse>
				<verse number="21">𠊎个上帝講：「作惡个人毋會有平安！」</verse>
			</chapter>
			<chapter number="58">
				<verse number="1">上主講：「你愛大聲嘶，像羊角恁響、毋好停。愛向𠊎个子民 以色列 宣佈佢等个悖逆㧯罪過。</verse>
				<verse number="2">佢等日日求𠊎，當像愛知𠊎个道路；佢等个國家也當像有行正義，服從𠊎个法律。佢等求𠊎給佢等公正个法律，表示佢等歡喜親近𠊎。」</verse>
				<verse number="3">以色列 人問：「做麼介𠊎等禁食，你無愛看？做麼介𠊎等刻苦修行，你也無愛插？」 上主對佢等講：「看啊！你等禁食个日仔，還係追求享樂，還係欺負工人。</verse>
				<verse number="4">你等个禁食使你等還較惡，挺動到就相吵相打。你等个禁食係恁樣，你等還恅到𠊎會聽你等个祈禱嗎？</verse>
				<verse number="5">你等禁食个時，蹧踏自家个膚身，看起來就像頭攋攋會燥掉个花草。你等在地上鋪麻布，委火灰，然後睡在頂高。這敢係禁食？你等恅到𠊎會歡喜恁樣个禁食係麼？</verse>
				<verse number="6">「𠊎所歡喜个禁食係：解開欺負人个鎖鍊㧯無公當个軛；釋放受欺負个人，拗斷一切个軛。</verse>
				<verse number="7">愛將你等个食物分給肚飢个人；將你等个屋開放給無屋好住个窮苦人；拿衫褲給無好著个人；親人求你幫助，毋好拒絕。</verse>
				<verse number="8">「恁樣，𠊎就會歡喜你等，像朝晨頭个日頭照你等；你等个傷口就會黏時得到醫治。𠊎會行在你等个頭前主持公義，𠊎个榮光愛在後背保護你等。</verse>
				<verse number="9">你等祈禱，𠊎一定會聽；你等求幫助，𠊎一定答應。 「若係你等無再欺負人，責備人，糮糝講人个壞話，</verse>
				<verse number="10">若係你等拿給肚飢个人食，使窮苦人得到滿足，你等个光會使周圍个烏暗變做光明，暗晡頭會變做當晝頭。</verse>
				<verse number="11">𠊎 — 上主會繼續帶領你等，賜好東西使你心滿意足，使你等个骨頭強壯有力；就係在燥旱个地，你等也會像水源充足个果園，有永遠毋會燥掉个泉水。</verse>
				<verse number="12">你等會在荒埔頂重建，將毀壞盡久个根基重新起起來。後代會紀念你等係修補城牆爛孔个人，你等又將橫掉个屋仔重新整給人住。」</verse>
				<verse number="13">上主講：「若係你等守安息日做聖日，無在該日做自家歡喜个事；若係你等歡喜又尊重𠊎个聖日，無在該日旅行、工作、講閒話，</verse>
				<verse number="14">你等就會對𠊎得到喜樂。𠊎愛使你等在世上受人尊重，你等會在𠊎賜給你等祖先 雅各 个土地上享受福樂。𠊎 — 上主恁樣宣佈了。」</verse>
			</chapter>
			<chapter number="59">
				<verse number="1">毋好恅到上主个手忒短、無辦法救你等，抑係耳聾聽毋到你等个求喊！</verse>
				<verse number="2">佢揞面毋聽，係因為你等个罪；你等个罪害你等㧯上帝隔絕，使你等个敬拜變無效。</verse>
				<verse number="3">你等雙手膏到血，手指被罪打垃圾；你等个嘴唇講花撩，舌乸講兇惡个話。</verse>
				<verse number="4">你等上法院，總係無照公道行，也無講誠實話。你等靠講花撩打官司；你等心肝惡毒、行事積惡。</verse>
				<verse number="5">你等就像毒蛇孵卵，像𬠏䗁經網。人食到這卵就無命；卵打爛掉，毒蛇就趖出來。</verse>
				<verse number="6">你等个陰謀遮毋掉自家个污穢，像𬠏䗁網無辦法準衫褲著；你等个行為當壞，手段殘暴。</verse>
				<verse number="7">你等時時計劃做壞事，遽遽去流無辜人个血。你等个思想全部係罪惡；你等所經過个地方定著受到破壞㧯毀滅。</verse>
				<verse number="8">你等去到麼介所在，該所在就無平安。你等所做个全部盡無公平；你等造彎彎斡斡个路、充滿邪惡；行這條路个人全部無安全。</verse>
				<verse number="9">以色列 人講：「這下𠊎等正知做麼介公義離𠊎等恁遠，公平毋跈等𠊎等。𠊎等尋求光明，總係只有烏暗；希望得到亮光，顛倒行在烏暗中。</verse>
				<verse number="10">𠊎等像瞙目个摸等壁行，在日時頭像在暗晡時共樣；𠊎等看起來像盡紮磳个人，事實上㧯死人差毋多。</verse>
				<verse number="11">𠊎等像熊仔恁樣緊吼，像月鴿仔恁樣緊噭；盡想愛有公平，總係得毋到；希望得到救恩，總係救恩離𠊎等盡遠。</verse>
				<verse number="12">「上主啊，在你面前，𠊎等有盡多个過犯；𠊎等个罪在控告𠊎等；𠊎等知自家積當多罪惡。</verse>
				<verse number="13">𠊎等反抗你，悖逆你，毋跈𠊎等个上帝。𠊎等欺負別人，反對你。𠊎等个心肝詭詐，所講个全部係花撩。</verse>
				<verse number="14">公平受迫退走，正義企到遠遠；真理在街項企毋住，誠實無法度進入𠊎等當中。</verse>
				<verse number="15">尋毋到真理；毋做壞事个人反轉被人欺負。」 上主看到這一切个事；佢看到公平毋見掉就無歡喜。</verse>
				<verse number="16">佢感覺盡奇怪，被人欺負个樣會無人幫助。所以，佢愛用自家大能个手拯救佢等，用正義扶持佢等。</verse>
				<verse number="17">佢愛著公義个戰甲，戴救恩个鐵帽仔。佢愛著報仇个衫褲，用熱心做長袍。</verse>
				<verse number="18">佢愛照逐儕个行為報應佢等，用大發譴來報復敵人；住在海島个人也會受到報應。</verse>
				<verse number="19">對日出到日落个所在，佢等全部會敬畏上主个名㧯佢个榮耀；因為上主會像狂風大水恁樣來到 。</verse>
				<verse number="20">上主對佢个子民講：「𠊎愛來救贖 錫安 ，拯救 以色列 離開罪惡个人。</verse>
				<verse number="21">這係𠊎親自㧯你等立个約：𠊎个靈㧯你等共下；𠊎傳給你等个話也定著毋會離開你等个嘴，也毋會離開你等子子孫孫个嘴，從今直到永遠。」</verse>
			</chapter>
			<chapter number="60">
				<verse number="1">耶路撒冷 啊，䟘起來，像日頭發光； 因為上主个榮光出現照等你了！</verse>
				<verse number="2">看啊，烏暗遮等大地； 大烏暗遮蓋萬民。 總係上主愛出現來照你了； 佢个榮光愛顯現在你身上。</verse>
				<verse number="3">萬國愛來接近你个光； 萬王愛來就近你發出个光。</verse>
				<verse number="4">頭那擎起來看你周圍發生麼介事！ 大家集合，愛轉到你這位來。 你个孻仔會對遠遠个所在轉來； 你个妹仔會像孲𤘅仔被人揇轉來。</verse>
				<verse number="5">該時你看到這一切會滿面歡喜， 你个心會搏搏跳。 會有豐富个財寶對大海該片帶入來； 萬國个財富會入到你手中。</verse>
				<verse number="6">在你个土地上，歸大陣對 米甸 㧯 以法 來个駱駝滿遍係； 牠兜會帶等 示巴 个黃金㧯乳香來。 人民會來頌讚上主个作為。</verse>
				<verse number="7">基達 个羊群全部被人帶到你面前， 尼拜約 个羊牯全部愛做牲儀， 獻在祭壇頂，使上主歡喜。 上主愛榮光佢榮耀个聖殿。</verse>
				<verse number="8">該兜像雲飛等來， 又像月鴿仔飛轉藪个，係麼介？</verse>
				<verse number="9">它兜係對遠遠个海島轉來个大船仔， 對 他施 轉來个船仔在最頭前行。 它兜將上帝个子民㧯金銀帶等轉來， 愛榮耀上主 — 以色列 神聖个上帝； 因為佢已經榮耀你了。</verse>
				<verse number="10">上主對 耶路撒冷 講： 外族人會來為你起城牆； 佢等个國王會來服事你。 𠊎識發譴責罰你， 總係這下𠊎愛施恩憐憫你。</verse>
				<verse number="11">你个城門愛日夜打開開， 好俾列國个君王將財寶帶入來給你。</verse>
				<verse number="12">毋服事你个民族㧯國家全部愛滅亡； 該兜國家會荒廢。</verse>
				<verse number="13">黎巴嫩 个名產， 最好个松樹、柏樹、黃楊樹， 全部愛運來， 將𠊎个聖殿裝璜到盡靚， 使𠊎踏腳个所在富麗堂皇。</verse>
				<verse number="14">識欺負你个人，佢等个子孫會向你行禮； 所有藐視過你个人，也全部會跪拜你。 佢等會稱你做「上主个城」， 稱你做「 以色列 神聖上帝个 鍚安 城」。</verse>
				<verse number="15">你毋會再被人㧒掉、被人惱， 毋會再無人經過。 𠊎愛使你變做永遠个榮華， 成做萬代个喜樂。</verse>
				<verse number="16">萬國會歡喜照顧你， 列王會來養育你。 該時你就會知𠊎係拯救你个上主； 𠊎係你个救贖主，係 雅各 大能个上帝。</verse>
				<verse number="17">𠊎愛拿黃金準銅， 銀準鐵， 銅準樹料， 鐵準石頭。 𠊎愛使你等个官長用和平來管理， 你等个領袖用正義來治理。</verse>
				<verse number="18">你國內毋會再聽到強暴个事； 你个境內毋會再受到毀滅。 你定著會講， 你个城牆代表上主个拯救， 你个城門象徵上帝應當受讚美。</verse>
				<verse number="19">日時頭，你無需要日頭做你个光； 暗晡時，你無需要月光發光照你。 𠊎 — 你个上主係你永遠个光； 𠊎 — 你个上帝愛做你个榮光。</verse>
				<verse number="20">你个日頭永遠毋會落山， 你个月光永遠毋會缺掉； 𠊎 — 你个上主愛做你永遠个光； 你悲傷个日仔會結束。</verse>
				<verse number="21">你个人民全部會做義人； 佢等會永遠承受這地。 佢等係𠊎親手種个嫩芽， 係𠊎親手做个作品， 為到愛顯明𠊎个榮光。</verse>
				<verse number="22">你等最細个家庭會成做大族， 最弱个家族會成做強國。 𠊎係上主； 在時機成熟个時， 𠊎愛使這事遽遽實現。</verse>
			</chapter>
			<chapter number="61">
				<verse number="1">至高上主个靈臨到𠊎； 因為上主用油膏𠊎，來揀選𠊎， 喊𠊎向窮苦个人傳福音。 佢派𠊎醫治傷心个人； 喊𠊎宣佈： 被人捉个，會得到釋放； 被人關个，會得到自由。</verse>
				<verse number="2">佢派𠊎宣佈： 上主賜福个禧年來了； 上帝責罰仇敵个日仔到了。 佢派𠊎去安慰悲傷个人；</verse>
				<verse number="3">佢愛使 錫安 悲傷个人 戴冕旒代換塵灰， 膏喜樂油代換憂傷， 著頌讚个衫代換憂愁个心。 佢等會被人看做上主所種个橡樹，結公義个果子； 上主會因為自家所做个得到頌讚。</verse>
				<verse number="4">佢等會重建荒廢久久个地方， 將原旦荒涼个所在再建設起來； 佢等會重新起歷代毀壞橫掉个城。</verse>
				<verse number="5">𠊎个子民啊，外族人會來代你等掌羊； 佢等會代你耕種， 照顧你等个葡萄園。</verse>
				<verse number="6">人會稱你等係上主个祭司， 係服事𠊎等上帝个僕人。 你等會有好享受萬國个財富， 因為得到萬國个榮華來誇口。</verse>
				<verse number="7">你等毋會再受到侮辱； 你等會再住在自家个土地上。 你等會得到加倍个福份； 你等會享受永遠个喜樂。</verse>
				<verse number="8">因為𠊎 — 上主歡喜正義； 盡惱搶劫㧯罪惡。 𠊎愛實實在在獎賞𠊎个子民； 𠊎愛㧯佢等立永遠个約。</verse>
				<verse number="9">佢等个子孫在萬國中會當有名； 佢等个後代在萬民中受人尊重。 看到佢等个人全部承認： 佢等係得到上主賜福个子民。</verse>
				<verse number="10">𠊎因為上主大大歡喜， 𠊎个心靠上帝得到快樂； 因為佢用救恩做衫俾𠊎著， 用公義做外袍俾𠊎袈等， 像新郎戴禮帽、新娘戴珠寶。</verse>
				<verse number="11">就像田地樣般使五榖發芽， 種子樣般在園中生長， 至高个上主也愛使公義顯明出來， 使萬國攏總頌讚佢。</verse>
			</chapter>
			<chapter number="62">
				<verse number="1">𠊎愛講話鼓勵 錫安 ， 𠊎為到 耶路撒冷 一定毋會恬恬， 直到它个公義像日頭出來， 它个救恩像火把𤏸當猛。</verse>
				<verse number="2">耶路撒冷 啊，萬國全部會看到你个得勝； 所有个君王會看到你个榮光。 你會有一個新名， 係上主親口安个。</verse>
				<verse number="3">你會成做上主手中盡靚个冕旒， 在上帝手中成做王帽。</verse>
				<verse number="4">人毋會再講你係「被人㧒掉个」， 你个土地也毋會再被人喊做「荒埔」。 你會被人喊做「上主所歡喜个」； 你个土地會成做「有歸屬个」。 因為上主歡喜你； 你个土地定著會歸屬佢。</verse>
				<verse number="5">就像細孻仔討細妹仔， 該造就你个愛討你。 就像新郎中意佢个新娘， 你个上帝也中意你。</verse>
				<verse number="6">耶路撒冷 啊，在你个城牆頂， 𠊎有派守望个人。 佢等毋會日夜恬恬無出聲； 佢等毋肯休息、緊提醒上主佢所應許个。</verse>
				<verse number="7">佢等毋俾上主歇睏， 直到佢重建 耶路撒冷 ， 使 耶路撒冷 在全地受人稱讚。</verse>
				<verse number="8">上主已經伸出佢个正手， 憑佢个大能發誓講： 𠊎毋會再將你个農作物給敵人做糧食； 外族人毋會再啉你勞碌得來个新酒。</verse>
				<verse number="9">你等耕種，會有好收成， 收割个會有好食， 並讚美上主。 你等種葡萄，也會有好收成， 在𠊎聖殿个庭院肚會有酒好啉。</verse>
				<verse number="10">你等愛遽遽出城門， 出去為轉來个人民開路； 煞猛將地坉高， 煞猛整大路，將石頭清掉， 為萬國个人民插大旗。</verse>
				<verse number="11">看啊，上主識向普天下宣佈： 你等愛㧯 錫安 个人民講： 看啊，你个拯救者來囉！ 看啊，佢愛將佢所拯救个子民𢱋轉來。</verse>
				<verse number="12">佢等會被人喊做「上帝神聖个子民」， 喊做「上主所救贖个子民」。 耶路撒冷 會被人安到「上帝所關心个城」， 安到「上帝無豁掉个城」。</verse>
			</chapter>
			<chapter number="63">
				<verse number="1">「該對 以東 个 波斯拉 城來、著紅衫打扮當派頭个係麼人？該盡威風、大步行路个係麼人？」 就係有拯救大能个上主，佢來宣告佢个勝利。</verse>
				<verse number="2">「做麼介佢著紅衫，像踏葡萄焗酒个人？」</verse>
				<verse number="3">上主應講：「𠊎踐踏萬國，像踏葡萄一樣；無人來㧯𠊎𢯭手。𠊎發譴來踏佢等；𠊎大受氣來毀壞佢等；佢等个血打垃圾𠊎个衫。</verse>
				<verse number="4">𠊎拯救吾子民个日仔一直在𠊎心中；𠊎責罰吾子民仇敵个日仔到了。</verse>
				<verse number="5">𠊎看來看去，無人來幫助𠊎，無人來支持𠊎！𠊎越發譴，𠊎就越堅強，𠊎親手來打贏這場戰爭。</verse>
				<verse number="6">𠊎發譴來踏萬國，大受氣來毀壞佢等；𠊎使佢等血流成河。」</verse>
				<verse number="7">𠊎愛講起上主不變个慈愛； 𠊎愛讚美佢在𠊎等身上所做个事。 照佢个痛惜㧯豐盛个慈愛， 佢將盡多當好个福氣賜給 以色列 人。</verse>
				<verse number="8">上主講：「佢等確實係𠊎个子民，係毋會行虛假个子民。」所以佢做佢等个救主。</verse>
				<verse number="9">在佢等个苦難中，佢也受苦。拯救佢等个毋係天使，係上主自家 。因為佢个慈愛㧯憐憫，佢救贖佢等。佢頭擺時常將佢等揇等來揹，</verse>
				<verse number="10">總係佢等悖逆佢，使佢个聖靈傷心。所以，上主變做佢等个仇敵，親自攻擊佢等。</verse>
				<verse number="11">總係，佢个子民還係記得頭擺个事，記得 摩西 个日仔。佢等問：「上主在㖠位呢？佢識對海中救佢个子民㧯佢等个領袖。這下這個將佢个聖靈賜給 摩西 个上主在㖠位呢？</verse>
				<verse number="12">佢識用佢个大能，通過 摩西 來行神蹟，將水分開，𢱋佢个子民經過深海，使人永遠記得佢个名。這下，佢在㖠位呢？」 上主識帶領佢个子民，使佢等个腳步穩定，就像馬在曠野，毋會絆倒。</verse>
				<verse number="13"></verse>
				<verse number="14">像帶牛群下到山壢，上主个靈俾佢等歇睏。佢恁樣帶領自家个子民，使自家个名得到稱頌。</verse>
				<verse number="15">上主啊，求你對天頂看顧𠊎等；求你對神聖、榮光个寶座關心𠊎等。你个大能㧯熱心在㖠位？你个慈愛憐憫在㖠位呢？求你毋好毋插𠊎等！</verse>
				<verse number="16">你係𠊎等个阿爸。就算𠊎等个祖先 亞伯拉罕 㧯 雅各 毋承認𠊎等；總係上主啊，你係𠊎等个阿爸，對古早到這下，你係𠊎等个救贖主。</verse>
				<verse number="17">上主啊，你做麼介由在𠊎等離開你个道路？做麼介由在𠊎等恁硬頸，毋敬畏你呢？為到你該兜僕人，為到該兜一直屬你个人，求你回心轉意！</verse>
				<verse number="18">𠊎等係你神聖个子民。𠊎等識被敵人逐出去；接等佢等就踐踏你个聖所。</verse>
				<verse number="19">你對待𠊎等，就像你自從毋識治理過𠊎等，就像𠊎等從來毋係你个子民。</verse>
			</chapter>
			<chapter number="64">
				<verse number="1">上主啊，願你俾天裂開，親身降臨人間！高山看到你就會愊愊掣，</verse>
				<verse number="2">像火燒燥柴，像烈火將水煮滾。求你向你个敵人顯明你个名，使萬國在你面前愊愊掣！</verse>
				<verse number="3">你以前識降臨，做恁得人驚个事，係𠊎等毋識想到个；高山看到你就愊愊掣。</verse>
				<verse number="4">自古以來無人看過，也無人聽過像你恁樣个神，毋識有其他个神為服事佢个人做過恁大个事。</verse>
				<verse number="5">歡喜行善、記得你教訓个，這種人正係你愛親近个人；總係，𠊎等犯罪惹你發譴已經盡久了，𠊎等樣有可能得救呢？</verse>
				<verse number="6">𠊎等攏總有罪，連𠊎等个好行為也像屙糟个衫褲。因為𠊎等个罪，𠊎等像燥掉个樹葉被風吹散。</verse>
				<verse number="7">無人向你祈禱；無人向你求幫助。因為𠊎等个罪，你揞面毋搭𠊎等；你將𠊎等㧒掉 。</verse>
				<verse number="8">總係上主啊，你係𠊎等个阿爸。𠊎等像泥，你係燒缶師傅；𠊎等全部係你親手造个。</verse>
				<verse number="9">上主啊，求你毋好向𠊎等大發譴；求你毋好永遠記得𠊎等个罪。𠊎等全部係你个子民；求你看顧𠊎等。</verse>
				<verse number="10">你神聖个城 — 錫安 已經變做曠野； 耶路撒冷 已經成做荒埔。</verse>
				<verse number="11">該最神聖，最靚个聖殿 — 𠊎等个祖先識在該位頌讚你个所在，已經被人燒掉了。𠊎等所寶貝个土地全部荒掉了。</verse>
				<verse number="12">上主啊，發生這兜事情，你還忍得住麼？你還恬恬、毋幫助𠊎等係麼？你給𠊎等个苦難樣恁多呢？</verse>
			</chapter>
			<chapter number="65">
				<verse number="1">上主講：「𠊎準備好勢愛聽佢等个祈求，總係佢等毋求。𠊎緊等佢等來尋𠊎；總係佢等毋尋。𠊎緊喊：『𠊎在這位！𠊎在這位！』總係這個國家一直毋肯向𠊎祈禱。</verse>
				<verse number="2">𠊎歸日擛手喊該兜悖逆个子民，總係佢等當硬頸，隨自家个意思做壞事。</verse>
				<verse number="3">佢等時常當𠊎个面，惹𠊎發譴。佢等在『神聖花園 』肚、在外教个祭壇頂燒香、獻祭。</verse>
				<verse number="4">暗晡頭，佢等坐在塚埔、在山窿肚過夜，在該位問鬼神。佢等食豬肉，啉無淨浰个湯，</verse>
				<verse number="5">然後對別人講：『閃開！毋好接近𠊎等噢；𠊎等這下比你等聖潔！』主講：『𠊎實在無辦法忍受這兜人个行為；𠊎愛大發火了。』</verse>
				<verse number="6">「看啊，𠊎寫好判決書。𠊎絕對毋會恬恬，𠊎一定會在佢等身項施行報應。</verse>
				<verse number="7">𠊎愛因為佢等㧯佢等祖先所犯个罪報應佢等。佢等在山頂个廟肚燒香，在該位嘲謔𠊎，所以𠊎愛照佢等个壞行為責罰佢等。」</verse>
				<verse number="8">上主恁樣講：「一串葡萄中還有做得做酒个，人就講：『毋好將它㧒掉，因為當中還有好个。』共樣，因為𠊎該兜僕人个緣故，𠊎也毋毀滅𠊎所有个子民。</verse>
				<verse number="9">𠊎愛賜福給 雅各 个後代，使 猶大 支族个人承受𠊎該兜山。𠊎个選民會承受該地，𠊎該兜僕人會住在該位。</verse>
				<verse number="10">佢等會在西片个 沙崙 平原上掌羊仔，在東片个 亞割 山壢中掌牛仔；這兜係𠊎愛給尋求𠊎个子民个。</verse>
				<verse number="11">「總係，你這兜離開上主个人，又毋記得 錫安 — 𠊎个聖山，你等為 迦狄 㧯 米尼 ，就係稱做『幸運』㧯『命運』个神明擺上調好个酒。</verse>
				<verse number="12">你等註定愛慘死在刀下；因為𠊎喊你等，你等毋應𠊎；𠊎講話，你等毋聽。𠊎眼中看做壞个事，你等反轉去行；𠊎所惱个事，你等偏偏當好。</verse>
				<verse number="13">所以，𠊎 — 至高个上主㧯你等講，𠊎該兜僕人會有罅額个飲食，總係你等會又飢又渴。𠊎該兜僕人會歡喜，總係你等會見笑。</verse>
				<verse number="14">𠊎該兜僕人會歡喜到唱歌，總係你等會傷心到大噭，心肝痛到盡喊。</verse>
				<verse number="15">𠊎个選民會將你等个名看做咒詛。𠊎 — 至高个上主愛㓾死你等，總係𠊎該兜僕人，𠊎愛賜給佢等新个名。</verse>
				<verse number="16">在這垤土地上，所有求福个人全部愛到信實个上帝面前來求。所有發誓个人全部愛奉信實个上帝發誓。因為頭擺个困難全部毋記得，也看毋到了。」</verse>
				<verse number="17">上主講：「𠊎愛創造新天新地。先前个事全部毋會再受紀念，也毋記得了。</verse>
				<verse number="18">你等愛因為𠊎所創造个永永遠遠歡喜快樂。看啊，𠊎所創造个新 耶路撒冷 會充滿喜樂，城肚个人民會歡喜快樂。</verse>
				<verse number="19">𠊎自家也會因為 耶路撒冷 㧯城肚个人民來喜樂。在該位，毋會再聽到大噭㧯盡喊个聲。</verse>
				<verse number="20">在該位，毋會再有出世幾日就夭折个孲𤘅仔；老人家全部會享長壽。食到一百歲死个，還算係後生；吂滿一百歲死个，做得講係受𠊎咒詛个。</verse>
				<verse number="21">佢等會起屋，自家住；佢等會種葡萄，自家食。</verse>
				<verse number="22">佢等毋會起屋，別人卻來住；佢等毋會種葡萄，別人卻來食。𠊎个子民會像樹仔恁長命。𠊎个選民會長長久久享受自家工作个成果。</verse>
				<verse number="23">佢等个勞碌毋會空空；所𫱔个子女毋會堵到災難。𠊎 — 上主愛賜福給佢等㧯佢等个子子孫孫。</verse>
				<verse number="24">佢等還吂求，𠊎已經應了；佢等祈禱還吂煞，𠊎已經答應了。</verse>
				<verse number="25">豺狼㧯羊仔會共下食；獅仔像牛仔共樣食草；蛇會食泥、毋會咬人。在 錫安 — 𠊎聖山个逐所在，毋會再有傷害㧯邪惡个事。」上主恁樣宣佈了。</verse>
			</chapter>
			<chapter number="66">
				<verse number="1">上主恁樣講：「天係𠊎个寶座，地係𠊎个踏凳。你等愛在㖠位為𠊎起聖殿呢？㖠位愛做𠊎休息个所在呢？</verse>
				<verse number="2">𠊎親手創造宇宙萬物，俾一切存在！𠊎看顧謙卑㧯真心悔改个人，也保護敬畏聽從𠊎話个人。</verse>
				<verse number="3">「總係該㓾牛仔做牲儀、又去㓾人个；該獻細羊仔、又㓾狗仔來獻祭个；該獻素祭、又獻豬血个；該燒乳香、又去拜偶像个；佢等選自家个路，心肚歡喜所做積惡个事。</verse>
				<verse number="4">所以，𠊎愛特別降下佢等最驚个災禍。因為𠊎喊佢等，佢等毋應；𠊎㧯佢等講話，佢等毋聽；𠊎看做壞个事，佢等反轉去行；𠊎所惱个事，佢等偏偏當好。」</verse>
				<verse number="5">敬畏聽從上主个人啊，你等愛聽佢个話。佢講：「因為𠊎个名个緣故，你等个同胞當中有兜人來恨你等，逐你等走。佢等笑你等講：『請你等个上主顯出佢个偉大，使𠊎等看出你等會有幾歡喜！』總係佢等反轉會盡見笑！</verse>
				<verse number="6">聽啊！城肚有吵鬧个聲音，係對聖殿發出來个，係上主報應仇敵个聲音！</verse>
				<verse number="7">「𠊎个聖城就像一個吂經過陣痛忽然就𫱔孻仔个婦女；</verse>
				<verse number="8">你等敢識聽過抑係看過恁奇妙个事？有㖠個國家係在一日內、一下仔就𫱔出來？總係 錫安 像吂痛到就𫱔子女恁樣建立起來了。</verse>
				<verse number="9">𠊎敢會俾姖產期已經到還𫱔毋出來？」上主恁樣講了。</verse>
				<verse number="10">你等愛㧯 耶路撒冷 共下歡喜快樂！ 所有惜這城个人應該為姖歡喜！ 你等識為姖悲傷个人， 這下愛㧯姖共下歡喜快樂！</verse>
				<verse number="11">你等愛歡喜享受姖个繁榮， 就像孲𤘅仔在阿姆安慰个胸前食乳食到飽飽。</verse>
				<verse number="12">上主恁樣講：「𠊎愛使姖得到平安像長流水；得到萬國个財富像大水流到姖該位。你等會像一個阿姆餵食乳个細人仔，被阿姆揇在懷中，放在膝頭頂來惜。</verse>
				<verse number="13">𠊎愛在 耶路撒冷 安慰你等，像阿姆安慰自家个細人仔。</verse>
				<verse number="14">你等看到這所有个事發生个時，你等个心會歡喜快樂；你等个骨頭會得到滋潤，像嫩草靚起來。該時，你等就會知𠊎 — 上主親身幫助𠊎該兜僕人；總係𠊎愛對𠊎个敵人發譴。」</verse>
				<verse number="15">看哪，上主在火中降臨；佢該兜戰車像龍捲風，帶來佢个大發譴，用大火責罰佢等。</verse>
				<verse number="16">上主愛用火㧯劍責罰所有犯罪个人；被上主㓾死个人盡多。</verse>
				<verse number="17">上主講：「該兜自家講係分別為聖、潔淨自家，排等到『神聖花園 』去食豬肉、老鼠肉、㧯其他無淨浰食物个人，佢等个末日到了。</verse>
				<verse number="18">𠊎知 佢等个行為㧯想法。𠊎愛來召集萬國萬族；佢等聚集前來个時，就會看到𠊎个榮光。</verse>
				<verse number="19">𠊎愛在佢等當中行神蹟，責罰佢等。 「總係，𠊎愛對賸下來个人當中，派人到逐國㧯遠遠个海島去；該兜所在自從毋識有人聽過𠊎个名，無人看過𠊎个榮光。𠊎愛派賸下來个人到 他施 、 利比亞 、也有當會射箭个 呂底亞 、 土巴 、㧯 希臘 去。佢等會在列國中宣揚𠊎个榮光。</verse>
				<verse number="20">轉來个時，佢等會對逐國帶轉你等个同胞，做獻給𠊎个禮物。佢等帶轉來个人騎等馬仔、驢仔、駱駝，坐戰車㧯轎仔到𠊎个聖山 — 耶路撒冷 ，就像 以色列 人拿淨浰个器皿到𠊎个聖殿去獻素祭共樣。</verse>
				<verse number="21">𠊎愛設立佢等當中有兜人做祭司㧯 利未 人。」</verse>
				<verse number="22">上主講：「就像𠊎創造个新天新地永久長存，你等个子孫㧯你等个名也會長長久久流傳。</verse>
				<verse number="23">逐隻月初一㧯安息日，普天下个人全部會到 耶路撒冷 來敬拜𠊎。」上主恁樣宣佈了。</verse>
				<verse number="24">「佢等出去个時，會看到該兜悖逆𠊎个人个屍體。食佢等屍體个蟲仔永遠毋會死；燒佢等个火永遠毋會烏掉；普天下个人全部會惱佢等。」</verse>
			</chapter>
		</book>
		<book number="24">
			<chapter number="1">
				<verse number="1">這卷書記載 耶利米 所講个話。 耶利米 个阿爸 希勒家 係 便雅憫 地 亞拿突 城个一個祭司。</verse>
				<verse number="2">猶大 王 亞們 个孻仔 約西亞 做王个第十三年，上主向 耶利米 講話；</verse>
				<verse number="3">約西亞 个孻仔 約雅敬 治理 猶大 國期間，上主又向 耶利米 講話。對該時以後上主常常向佢講話，一直到 約西亞 个另外一個孻仔 西底家 做 猶大 王个第十一年五月，該時 耶路撒冷 人被人捉到 巴比倫 去。</verse>
				<verse number="4">上主對𠊎講：</verse>
				<verse number="5">「𠊎使你在阿姆个肚笥成胎以前，𠊎已經認識你；你還吂出世，𠊎已經將你分別做聖，指定你做萬國个先知。」</verse>
				<verse number="6">𠊎應講：「至高个上主啊，𠊎忒後生；𠊎無嘴碼。」</verse>
				<verse number="7">總係上主對𠊎講：「你毋好講自家忒後生。無論𠊎派你到麼人該位去，你就去；𠊎吩咐你講麼介，你就講麼介！</verse>
				<verse number="8">你毋使驚佢等；因為𠊎㧯你共下，𠊎會救你。𠊎 — 上主恁樣宣佈了！」</verse>
				<verse number="9">然後，上主伸手摸𠊎个嘴，對𠊎講：「你看，𠊎將𠊎个話放在若嘴肚。</verse>
				<verse number="10">𠊎今晡日將權柄交給你；你愛在萬國萬民中做挷出、拆掉、破壞、推翻、重建、㧯栽種个工作。」</verse>
				<verse number="11">上主問𠊎：「 耶利米 啊，你看到麼介？」 𠊎應講：「𠊎看到一支杏樹桍。」</verse>
				<verse number="12">上主講：「無毋著！𠊎一直關心留意 ，愛使𠊎个話得到實現。」</verse>
				<verse number="13">上主又問𠊎：「你還看到麼介？」 𠊎應講：「𠊎看到燒等滾水个鑊頭，對北方向這片倒過來。」</verse>
				<verse number="14">上主對𠊎講：「會有災難對北方來，臨到住在這地方所有个人民。</verse>
				<verse number="15">因為𠊎愛召集北方所有个國家；它兜个君王會來佔領 耶路撒冷 ，統治歸隻城㧯 猶大 國所有个城市。</verse>
				<verse number="16">𠊎愛責罰𠊎子民所犯一切个罪惡；佢等離開𠊎，去燒香給別个神明，拜自家手所造个偶像。</verse>
				<verse number="17">耶利米 啊，你愛準備好，企起來，將𠊎命令你講个一切話㧯佢等講。毋好驚佢等；若無，𠊎就使你在佢等面前著驚。</verse>
				<verse number="18">耶利米 啊，你注意聽！ 猶大 全國 — 君王、官長、祭司㧯人民全部會反對你。總係，𠊎今晡日愛賜給你力量抵抗佢等；你會像城堡、鐵柱、銅牆恁堅固。</verse>
				<verse number="19">佢等無可能贏過你；因為有𠊎㧯你共下，𠊎會救你。𠊎 — 上主恁樣宣佈了。」</verse>
			</chapter>
			<chapter number="2">
				<verse number="1">上主吩咐𠊎</verse>
				<verse number="2">去向 耶路撒冷 个人民恁樣講： 𠊎記得，你後生時㧯𠊎樣般恩愛！ 新婚期間，你樣般惜𠊎！ 你跈等𠊎行過曠野， 經過無耕種个所在。</verse>
				<verse number="3">以色列 啊，你係𠊎神聖个子民， 係屬𠊎个，係最先熟个果子； 麼人吞食你，𠊎就定佢等有罪，降災禍給佢等。 𠊎 — 上主恁樣宣佈了。</verse>
				<verse number="4">雅各 个後代， 以色列 个逐支族啊，你等愛留心聽上主个話！</verse>
				<verse number="5">上主恁樣講： 到底你等个祖先看到𠊎有麼介毋著， 佢等樣會離開𠊎恁遠， 去跈虛空个偶像， 使自家成做虛虛假假个人呢？</verse>
				<verse number="6">佢等也毋問： 「該救𠊎等離開 埃及 ， 𢱋𠊎等經過曠野， 有深壢个沙漠， 燥旱烏暗个荒地， 無人住，無人行个所在， 該上主在㖠位？」</verse>
				<verse number="7">𠊎將佢等帶到盡肥个土地去， 俾佢等享受果子㧯豐盛个出產。 總係佢等蹧踏𠊎个土地， 打垃圾𠊎賜給佢等个產業。</verse>
				<verse number="8">祭司毋識問：「上主在㖠位？」 教法律書个毋認識𠊎。 領袖悖逆𠊎； 先知奉 巴力 个名講預言， 拜全無利益个偶像。</verse>
				<verse number="9">所以，𠊎 — 上主愛告自家个子民㧯佢等个後代。</verse>
				<verse number="10">你等到西片个 塞浦路斯 去看！ 你等派人到東片个 基達 去探查！ 看識發生恁樣个事麼？</verse>
				<verse number="11">雖然偶像毋係真神， 敢有國家將它个神明換掉？ 𠊎係榮光个上帝， 𠊎个子民反轉將𠊎換做無用个偶像。</verse>
				<verse number="12">上主講： 諸天愛因為恁樣著驚， 驚到愊愊掣！</verse>
				<verse number="13">因為𠊎个子民犯兩樣个罪： 佢等離開𠊎 — 生命水个泉源； 自家去挖水窟， 係破裂無法囤水个水窟。</verse>
				<verse number="14">以色列 敢係奴才？ 敢係奴才𫱔个？ 做麼介敵人愛來捉佢呢？</verse>
				<verse number="15">敵人像獅仔向佢吼吼滾， 使佢个好田變做荒埔， 將佢个城燒掉，變做無人住。</verse>
				<verse number="16">孟斐斯 人㧯 答比匿 人 將佢个頭那剃光光。</verse>
				<verse number="17">以色列 啊，敢毋係你自家惹禍上身嗎！ 𠊎一路帶領你个時， 你敢毋係離開𠊎 — 上主、你个上帝嗎？</verse>
				<verse number="18">這下你做麼介愛去 埃及 ？ 想愛啉 尼羅 河个水係麼？ 做麼介愛去 亞述 ？ 想愛啉 幼發拉底 河个水係麼？</verse>
				<verse number="19">你自家个罪惡會責罰你； 你个悖逆會責備你。 你愛知，愛明白： 離開𠊎 — 上主、你个上帝， 毋敬畏𠊎，係樣般艱苦个壞事！ 𠊎 — 至高个上主、萬軍个元帥恁樣宣佈了。</verse>
				<verse number="20">至高个上主講： 以色列 啊，你早就拗斷你个軛， 解開你个索仔，毋肯事奉𠊎。 你在逐座高山頂，逐頭大樹下， 拜神明犯淫亂。</verse>
				<verse number="21">𠊎栽種你，像種特選个葡萄樹； 𠊎全部係用最好个葡萄種。 總係你樣般會變做最差个野葡萄呢？</verse>
				<verse number="22">就算你用最好个茶籸洗淨， 𠊎還係看出你罪惡个污點。</verse>
				<verse number="23">你樣做得講你無污穢自家， 無跈過 巴力 ？ 看你留在山壢个腳跡， 回想你做過麼介事！ 你就像亂猋个駱駝乸，</verse>
				<verse number="24">像情慾衝動个野驢， 走醒个時無法度控制。 公驢愛追牠全無困難； 交配期間黏時就尋得到牠。</verse>
				<verse number="25">以色列 啊，毋好跈別个神明， 毋好跈到鞋爛掉，追到喉嗹燥！ 總係你講：「講乜無效了！ 𠊎中意到外國人个神明；𠊎愛跈到底！」</verse>
				<verse number="26">上主講：「賊仔被人捉到係樣般見笑； 以色列 人啊，你等㧯你等个君王、領袖、祭司、先知全部也會恁見笑。</verse>
				<verse number="27">你這兜認樹仔做阿爸，喊石頭做阿姆个，你等背向𠊎，毋係面向𠊎。總係你等堵到災難个時，又求𠊎來拯救！</verse>
				<verse number="28">「你等為自家造个神明在㖠位呢？若係它兜能救你等，堵到患難个時，俾它兜來救你等就好哪！ 猶大 人啊，你等个神明㧯你等个城市平多。</verse>
				<verse number="29">你等全部悖逆𠊎！做麼介還㧯𠊎拗呢？</verse>
				<verse number="30">𠊎責罰你等全無效果，因為你等毋受教。像發狂个獅仔共樣，你等㓾自家个先知。</verse>
				<verse number="31">這世代个人啊，你等愛明白𠊎 — 上主个話！對 以色列 人來講，𠊎敢識像曠野？敢像烏暗陰險个所在嗎？做麼介𠊎个子民愛講：『𠊎等愛照自家个意思行，無愛轉你該位去啊』？</verse>
				<verse number="32">細妹仔會毋記得自家个珠寶麼？新娘敢會毋記得姖个禮服麼？總係𠊎个子民毋記得𠊎，已經算毋出有幾久！</verse>
				<verse number="33">你等當精通求愛个方法噢！連最壞个細妹仔也愛學你等。</verse>
				<verse number="34">你等个衫褲膏到窮人㧯無罪个人个血，總係佢等並無挖你个屋偷東西！ 「雖然恁樣，</verse>
				<verse number="35">你等還係講：『𠊎係無罪个；上主對𠊎个發譴已經無掉去了。』看啊，𠊎 — 上主一定愛責罰你等，因為你等毋承認自家个罪！</verse>
				<verse number="36">你等做麼介走來走去，四處去尋別个神明 呢？ 埃及 會俾你等失望，像 亞述 識俾你等失望共樣。</verse>
				<verse number="37">你等會雙手揇等頭那當見笑對 埃及 出來。因為𠊎 — 上主豁掉你等所倚靠个偶像 ；你等毋會對它兜得到麼介幫助。」</verse>
			</chapter>
			<chapter number="3">
				<verse number="1">上主講：「若係男人㧯𡜵娘離婚，𡜵娘離開佢去㧯別人結婚，佢樣做得將𡜵娘再接轉來呢？佢恁樣做就會打垃圾𠊎个土地。 以色列 啊，雖然你㧯恁多情郎行姦淫，總係這下你還想愛轉來尋𠊎係麼！</verse>
				<verse number="2">你昂頭看該兜光光个山！敢能尋到一垤你毋識打垃圾个土地麼？你坐在路堘等情郎，就像 阿拉伯 人在曠野伏等愛搶劫一樣。你个淫亂㧯邪惡已經打垃圾土地；</verse>
				<verse number="3">所以甘霖停止，春雨毋落。你還係有一副妓女个樣像，完全毋知見笑。</verse>
				<verse number="4">「 以色列 啊，這下你反轉對𠊎講：『你係𠊎个阿爸，對𠊎後生个時你就痛惜𠊎。</verse>
				<verse number="5">你敢會對𠊎發譴到永久嗎？』這係你所講个話，總係你還一直盡命做壞事。」</verse>
				<verse number="6">約西亞 做 猶大 王个時，上主對𠊎講：「你看到該無貞節个 以色列 所行个麼？姖上到逐座高山頂，在逐頭大樹下行姦淫。</verse>
				<verse number="7">𠊎恅到，姖做這一切以後，會轉到𠊎這位來；總係姖無轉來；姖無貞節个姊妹 猶大 也看到了。</verse>
				<verse number="8">𠊎離掉無貞節个 以色列 ，給姖離婚證書，因為姖行姦淫；該無貞節个姊妹 猶大 看到，總係姖並毋驚，還係去行姦淫，</verse>
				<verse number="9">一些仔都無感覺見笑。姖打垃圾土地；姖拜石頭、樹仔，對𠊎無守貞節。</verse>
				<verse number="10">做這一切以後， 以色列 無貞節个姊妹 猶大 詐意轉來，毋係真心愛歸向𠊎。𠊎 — 上主恁樣宣佈了。」</verse>
				<verse number="11">上主又㧯𠊎講， 以色列 雖然無貞節，總係比無貞節个 猶大 有較好兜仔。</verse>
				<verse number="12">所以，上主命令𠊎到北方，去向 以色列 講：「對𠊎無忠心个 以色列 啊，轉到𠊎這位來！𠊎毋會對你變面，𠊎對你个痛惜無改變；𠊎毋會永久向你發譴。</verse>
				<verse number="13">你定著愛承認自家个罪過，承認你得罪上主 — 你个上帝，識照自家个意思走來走去，在逐頭大樹下拜外國个神明，違背𠊎个命令。𠊎 — 上主恁樣宣佈了。」</verse>
				<verse number="14">上主講：「對𠊎無忠心个子民啊，倒轉來！𠊎係你等个老公。𠊎愛對你等个逐隻城選出一儕，每宗族選出兩儕，帶轉 錫安 去。</verse>
				<verse number="15">𠊎愛賜給你等合𠊎心意个統治者，佢等會用聰明㧯智慧來統治你等。</verse>
				<verse number="16">到你等在這垤土地上生養眾多个時，人民毋會再提起𠊎 — 上主个約櫃，毋使再想到，也毋使再紀念。佢等已經無需要約櫃，也毋使另外製造。</verse>
				<verse number="17">到該時，佢等會稱 耶路撒冷 做『上主个寶座』；萬國萬民全部會聚集在該位敬拜𠊎。佢等毋會再硬頸照邪惡个心去行事。</verse>
				<verse number="18">該時， 以色列 會㧯 猶大 聯合；佢等會共下對北方轉到𠊎賜給你等祖先做產業个土地。」</verse>
				<verse number="19">上主講： 以色列 啊，𠊎樂意認你做孻仔， 將全世界最好个土地 — 該盡肥个，賜給你做產業。 𠊎恅到你定著會喊𠊎「阿爸」， 永遠毋會再悖逆𠊎。</verse>
				<verse number="20">總係你對𠊎無忠心， 像無貞節个𡜵娘跈人走。 𠊎 — 上主恁樣宣佈了。</verse>
				<verse number="21">聽啊，光光个山頂有求喊聲， 係 以色列 人噭吱哀求个聲音； 因為佢等偏離正路， 毋記得上主 — 佢等个上帝。</verse>
				<verse number="22">你等無忠心个人啊，倒轉來！ 𠊎 — 上主愛醫治你等，使你等毋會再悖逆。 你等應講：「係哦！𠊎等愛轉到上主該位，因為佢係𠊎等个上帝。</verse>
				<verse number="23">𠊎等在大山㧯細山頂拜偶像，事實上無得到一些仔幫助。只有上主 — 𠊎等个上帝正能拯救 以色列 。</verse>
				<verse number="24">總係𠊎等從細拜 巴力 — 該見笑个偶像，所以𠊎等个羊群、牛群、子女，就係𠊎等祖先自古以來勞碌建立个家業全部了淨淨。</verse>
				<verse number="25">𠊎等應該見笑到橫落去，用羞恥來遮身。𠊎等㧯𠊎等个祖先長透得罪上主 — 𠊎等个上帝；𠊎等一直毋聽從上主 — 𠊎等上帝个命令。」</verse>
			</chapter>
			<chapter number="4">
				<verse number="1">上主恁樣講：「 以色列 人啊，若係你等肯回頭，就倒轉𠊎這位來！若係你等肯對𠊎面前除掉𠊎所惱个偶像，無三心兩意，</verse>
				<verse number="2">你等就會有好用誠實、公平、公義个態度指等𠊎 — 永生上主个名發誓。恁樣萬國全部會因為𠊎得到福氣，也會來榮耀𠊎。」</verse>
				<verse number="3">上主對 猶大 人㧯 耶路撒冷 人恁樣講：「你等愛開墾無犁過个土地，毋好在竻藪肚委種。</verse>
				<verse number="4">猶大 㧯 耶路撒冷 个人民啊，你等个心靈愛受割禮，除掉心肚个垃圾，將自家獻給𠊎 — 你等个上主。若無，你等个壞行為會惹𠊎發火，無人能打烏。」</verse>
				<verse number="5">愛向全國歕羊角，發出警報， 愛對 猶大 㧯 耶路撒冷 人大聲喊： 集合起來，遽遽走入防衛城去！</verse>
				<verse number="6">愛將去 錫安 个路標頓起來！ 毋好緊拖，愛遽遽逃命！ 上主愛降大災禍； 大毀滅會對北方臨到。</verse>
				<verse number="7">該毀滅萬國个已經對佢个本國出發， 就像獅仔走出山林。 佢會使 猶大 个土地荒掉， 城鎮破壞到無人住。</verse>
				<verse number="8">所以，你等愛著麻衫，緊喊緊噭， 因為上主對𠊎等个發譴還吂消。</verse>
				<verse number="9">上主講：「該時，君王㧯官長會失掉勇氣；祭司會大著驚；先知也會發咄愕。」</verse>
				<verse number="10">𠊎講：「嗐！至高个上主啊，你正經欺騙這兜人㧯 耶路撒冷 ！你講會有平安，其實刀劍指等佢等个喉嗹 。」</verse>
				<verse number="11">到該時，上主會對這兜人㧯 耶路撒冷 講：「有當燒个風對曠野光光个山頂向你等吹來，毋係為到簸榖，也毋係愛將冇仔吹淨，</verse>
				<verse number="12">係𠊎將該強烈个風吹過來！係𠊎自家愛審判𠊎个子民。」</verse>
				<verse number="13">看啊！敵人像烏雲揜過來；佢个戰車像龍捲風掃等來，佢个戰馬比鷹鳥較遽！𠊎等慘了！𠊎等無命了！</verse>
				<verse number="14">耶路撒冷 啊，愛洗掉心中个罪惡，你就會得救。壞心術留在你个心肚愛到幾時呢？</verse>
				<verse number="15">聽啊，有使者對北片 但 支族个地區一直向南到 以法蓮 山區來報壞消息。</verse>
				<verse number="16">佢等向各國講，也提醒 耶路撒冷 ：「有敵人對遠遠个所在來。佢等大聲嘶，來攻打 猶大 逐隻城市。</verse>
				<verse number="17">佢等會包圍 耶路撒冷 ，像看守个人監視田園。」這係因為 猶大 个人民悖逆𠊎。𠊎 — 上主恁樣宣佈了。</verse>
				<verse number="18">猶大 啊，你个所行所做給你自家惹來恁大个災禍。你个罪害你受苦，刺穿你个心！</verse>
				<verse number="19">𠊎个心啊！𠊎个心啊！𠊎樣會恁艱苦？ 𠊎个心肝煩躁，無辦法恬恬毋講話， 因為𠊎聽到羊角个響聲㧯相㓾个聲。</verse>
				<verse number="20">災難不斷； 全國荒廢。 𠊎个帳篷忽然間橫掉， 帳篷个布簾一下仔就裂掉。</verse>
				<verse number="21">𠊎看到軍旗， 聽到羊角个聲，愛到幾時呢？</verse>
				<verse number="22">上主講：「𠊎个子民戇檔； 佢等毋認識𠊎。 佢等像無知个細人仔， 無半些智慧。 佢等當會做壞事， 毋知樣般做好事。」</verse>
				<verse number="23">𠊎看地，地係空空無成形； 𠊎看天，天也無光。</verse>
				<verse number="24">𠊎看山，大山緊顫， 細山也搖來搖去。</verse>
				<verse number="25">𠊎看毋到人影； 連天頂个鳥仔也全部飛走。</verse>
				<verse number="26">𠊎看到好田變荒地； 城市全部橫到像土堆， 因為上主大發譴。</verse>
				<verse number="27">上主恁樣講： 「全地一定會荒涼， 總係𠊎毋會徹底毀滅。</verse>
				<verse number="28">地會悲傷， 天會變烏。 𠊎已經講了，已經定著了， 絕對毋會後悔，也毋會改變。」</verse>
				<verse number="29">先知講： 逐城市个人一聽到騎兵㧯箭手个聲， 全部盡命逃難。 有兜走入樹林； 有兜爬到石縫肚囥。 人走淨淨，城市空空！</verse>
				<verse number="30">耶路撒冷 啊，你壞掉了！ 你樣愛使著高貴个紅衫？ 樣愛使戴珠寶金器？ 樣愛使膏粉畫眉呢？ 你打扮恁靚有麼介用呢？ 你个情郎藐視你， 還想愛收你个命呢！</verse>
				<verse number="31">𠊎聽到像生產个婦人家陣痛个喊聲， 像𫱔頭胎恁樣盡嘶。 原來係 錫安 个噭聲； 姖緊透大氣、伸開雙手，講： 「唉！𠊎今就慘了！ 佢等愛來㓾𠊎！ 𠊎驚到強強會昏掉了。」</verse>
			</chapter>
			<chapter number="5">
				<verse number="1">你等在 耶路撒冷 个街巷行來行去， 詳細查看，去廣場尋看仔哪， 看尋得到一個行正義、追求誠實个人麼？ 你等若尋得到， 𠊎就赦免 耶路撒冷 。</verse>
				<verse number="2">佢等雖然指等永生个上主發誓， 總係所發个誓係假个。</verse>
				<verse number="3">上主啊，你敢毋係愛尋看有誠實个人無？ 你打佢等，佢等無反應， 你責罰佢等，佢等也毋接受管教。 佢等頸筋比石頭較硬，毋肯悔改。</verse>
				<verse number="4">所以𠊎想： 佢等係窮苦又戇檔个人民； 佢等毋知上主个道路， 毋知上帝个法則。</verse>
				<verse number="5">𠊎愛來去見佢等个領袖，㧯佢等講看仔； 佢等一定知上主个道路， 㧯上帝个法則。 總係佢等攏總將軛拗斷， 將索仔挷掉，毋肯順服。</verse>
				<verse number="6">所以，獅仔會對樹林出來攻擊佢等； 豺狼會對曠野出來殺害佢等； 豹仔會在城市周圍伏等等機會； 麼人出去，就會被牠擘碎。 因為佢等一擺又一擺悖逆上帝； 佢等个罪惡當多。</verse>
				<verse number="7">上主講： 𠊎做麼介愛赦免你等？ 你等个子女已經悖逆𠊎去拜假神。 𠊎俾佢等食飽， 佢等卻去犯姦淫， 歸群去尋妓女。</verse>
				<verse number="8">佢等就像食到飽飽个馬仔當雄頭、發嘶聲， 逐儕當想愛去拐鄰舍个𡜵娘。</verse>
				<verse number="9">𠊎敢無應該為這兜事責罰佢等嗎？ 像恁樣个國家，𠊎敢毋使親自報復嗎？</verse>
				<verse number="10">𠊎愛命令敵人講： 「你等進入𠊎子民个葡萄園，去毀壞它， 總係毋好全部打壞淨淨。 你等愛斬掉葡萄樹个枝仔， 因為這兜毋係屬上主个。」</verse>
				<verse number="11">以色列 人㧯 猶大 人攏總對𠊎非常無忠心。 𠊎 — 上主恁樣宣佈了。</verse>
				<verse number="12">上主个子民毋承認上主。佢等講：「上主㧯𠊎等無關係 。𠊎等毋會堵到災難、戰亂抑係飢荒。」</verse>
				<verse number="13">佢等又講：「先知个話當肨風；毋係上主个道；願佢等个話實現在佢等自家身上。」</verse>
				<verse number="14">所以主上帝 — 萬軍个元帥恁樣對𠊎講：「 耶利米 啊，這兜人既然講這種話，𠊎愛將𠊎个話放在你口中。𠊎个話像火，佢等像柴；火愛將佢等燒淨淨。」</verse>
				<verse number="15">上主講：「 以色列 人啊，𠊎愛使一個國家對遠遠个所在來攻打你等。這個國家當強，也有當久个歷史；佢等講个話你等聽毋識，也毋了解。</verse>
				<verse number="16">佢等全部像勇敢个戰士，佢等个箭袋像係嘴開開个墳墓。</verse>
				<verse number="17">佢等會食掉你等个五榖、糧食；佢等會㓾死你等个子女、你等个牛羊；佢等會食淨你等个葡萄㧯無花果。佢等个軍隊會拆掉你等所偎靠个城堡。」</verse>
				<verse number="18">上主講：「就係在該時，𠊎也毋會將𠊎个子民全部消滅。</verse>
				<verse number="19">耶利米 啊，若係佢等問起：『上主 — 𠊎等个上帝做麼介恁樣對待𠊎等？』你愛㧯佢等講，因為佢等離開𠊎，在自家个國家服事別國个神明，所以佢等會在外國服事外國人。」</verse>
				<verse number="20">上主講：「愛通知 雅各 个後代，在 猶大 宣佈講：</verse>
				<verse number="21">你等戇檔毋知頭天个人啊，愛注意聽！你等有目珠總係毋會看；有耳公總係毋會聽！</verse>
				<verse number="22">𠊎係上主。你等做麼介毋敬畏𠊎？在𠊎面前，做麼介無愊愊掣？𠊎用沙灘做大海永遠个界限，大海就毋敢超過這界限。海水盡沖也毋敢𨃟過；大浪翻滾也毋敢越過。</verse>
				<verse number="23">總係你這兜人硬頸又悖逆！你等悖逆𠊎、離開𠊎。</verse>
				<verse number="24">雖然𠊎照時節賜給你等春雨秋雨，使你等到時就有好收成，總係你等從來毋識敬畏𠊎 — 上主你等个上帝。</verse>
				<verse number="25">你等个罪惡使你等無風調雨順；你等个罪過害你等得毋到福氣。</verse>
				<verse number="26">「在𠊎子民个當中有壞人。佢等設詭計陷害人，就像捉鳥仔个人安羅網。</verse>
				<verse number="27">佢等个屋下充滿用詭詐㩢來个東西，就像獵人个籠仔裝滿鳥仔。所以，佢等有錢有勢，</verse>
				<verse number="28">紅光滿面又盡大箍。佢等壞事做盡，毋為孤兒伸冤，毋代窮苦人主持公道。</verse>
				<verse number="29">「所以，𠊎 — 上主愛親身為這兜事責罰佢等；𠊎愛使恁樣个國家受到報應。</verse>
				<verse number="30">這隻國家樣般會發生恁得人驚、恁可惡个事！</verse>
				<verse number="31">該兜先知所講个攏總係假預言；該兜祭司專門為自家爭權奪利；𠊎个子民也歡喜恁樣！到𠊎責罰該日，佢等愛樣般好呢？」</verse>
			</chapter>
			<chapter number="6">
				<verse number="1">便雅憫 人啊，遽遽離開 耶路撒冷 逃命噢！你等愛在 提哥亞 歕羊角警告，在 伯‧哈基琳 點𤏸烽火！因為會有大災難㧯大毀滅對北方來了。</verse>
				<verse number="2">鍚安 城雖然像細妹仔盡靚又溫柔，𠊎定著愛毀滅姖！</verse>
				<verse number="3">列國个君王會帶領佢等个軍隊，在城个周圍佔地安營，親像牧人帶領佢等个羊群到該位來搶草食。</verse>
				<verse number="4">佢等會命令：「準備攻打！在當晝頭發動攻城！」後來佢等又講：「慘了，日頭个影仔拖當長了，日頭會落山了。</verse>
				<verse number="5">總係暗晡頭𠊎等乜愛攻城，毀壞姖个城堡。」</verse>
				<verse number="6">上主 — 萬軍个元帥命令列國个君王斬樹仔、起土堆來圍攻 耶路撒冷 。佢講：「這隻城充滿暴力，𠊎愛責罰姖。</verse>
				<verse number="7">就像井一直湧出泉水，這隻城也一直增加罪惡。𠊎聽到城肚發出暴力毀滅个聲；𠊎也隨時看到病痛㧯傷害。</verse>
				<verse number="8">耶路撒冷 人啊，你等愛對這兜苦難得到教訓。若無，𠊎愛㧒掉你等，使你等个城荒廢，無人住。」</verse>
				<verse number="9">上主 — 萬軍个元帥恁樣講：「敵人會來捉賸到个 以色列 人走，就像摘葡萄个人摘了又摘，將所有个葡萄摘淨淨。所以，你愛把扼機會，盡量搶救賸到个人！」</verse>
				<verse number="10">𠊎應講：「𠊎向佢等傳你講个話，警告佢等，有麼人願意接受呢？佢等塞等 耳公，毋肯接受你个話。佢等無歡喜你吩咐𠊎講个話，認為𠊎係侮辱佢等。</verse>
				<verse number="11">上主啊，你个大發譴也充滿在𠊎身上，𠊎忍毋住了！」 所以上主㧯𠊎講：「將𠊎个大發譴倒在街頭巷尾个細人仔㧯成群結黨个後生人身上。公婆會共下被人捉走，連壽年當高个老人家也係共樣。</verse>
				<verse number="12">佢等个屋仔連同佢等个田地、𡜵娘全部會歸別人 。𠊎愛伸手責罰這地方个人民；</verse>
				<verse number="13">因為佢等無論地位高低全部貪不義个錢財，連先知㧯祭司也詐欺人民。</verse>
				<verse number="14">𠊎子民个著傷，佢等也無認真醫治。佢等講：『平安！平安！』其實無平安。</verse>
				<verse number="15">佢等做這恁得人惱个事應該知見笑，總係佢等毋知見笑也毋會面紅。所以，佢等會㧯別人共樣跌倒。𠊎責罰佢等个時，佢等就會橫到貼貼。𠊎 — 上主恁樣宣佈了。」</verse>
				<verse number="16">上主對佢个子民恁樣講：「你等愛企在十字路口去看。在該兜舊路中，看㖠條係最好个路。行該條路，你等就會有平安。」 總係佢等應講：「無愛！𠊎等無愛行該條路！」</verse>
				<verse number="17">上主還派守望者給佢等，喊佢等愛注意聽警報个羊角，總係佢等講：「𠊎等無愛聽！」</verse>
				<verse number="18">所以，上主講：「列國啊，你等愛聽！眾人啊，愛知佢等會堵到麼介事！</verse>
				<verse number="19">大地啊，愛聽！𠊎愛降災禍給𠊎个子民，就係佢等詭計多端所結个果子；因為佢等拒絕𠊎个教訓，毋聽從𠊎个話。</verse>
				<verse number="20">佢等獻給𠊎 示巴 个乳香，帶給𠊎遠方个菖蒲。𠊎無合意！𠊎毋接受佢等个燒化祭，也無歡喜佢等个祭物。</verse>
				<verse number="21">所以，𠊎 — 上主恁樣宣佈：𠊎愛將絆腳石放在這兜人面前，俾佢等絆倒。父子，連鄰舍、親友也全部愛滅亡。」</verse>
				<verse number="22">上主恁樣講：「看啊，有一個民族對北方來；在遠方有一隻強國準備來相㓾。</verse>
				<verse number="23">佢等用箭用刀裝備自家；佢等當殘忍、無憐憫个心。佢等騎馬个聲像海浪吼吼滾。佢等準備好愛來攻擊 鍚安 城。」</verse>
				<verse number="24">耶路撒冷 人講：「𠊎等聽到戰爭个風聲，手腳就軟掉。𠊎等非常痛苦，像產婦个陣痛。</verse>
				<verse number="25">𠊎等毋敢到野外，也毋敢上街路；因為逐所在有擎刀帶劍个敵人，四周圍都恁得人驚。</verse>
				<verse number="26">同胞啊，愛著麻衫，在火灰肚輾來輾去。愛當悲哀，像喪失單丁子恁樣來艱苦到大噭，因為該毀滅者會忽然間來攻擊𠊎等。」</verse>
				<verse number="27">上主對 耶利米 講：「𠊎愛使你做𠊎子民个煉金師傅，使你知樣般試驗佢等个行為。</verse>
				<verse number="28">佢等全部係硬頸个叛徒，像銅鐵恁硬。佢等逐所在去搬弄是非，所做个非常敗壞。</verse>
				<verse number="29">風箱盡吹，爐火當猛，鉛鐵也會鎔化。總係𠊎个子民受到恁多試煉還係枉然，作惡个人還係吂除掉。</verse>
				<verse number="30">人會將佢等看做㧒掉个銀渣，因為𠊎 — 上主已經將佢等豁掉。」</verse>
			</chapter>
			<chapter number="7">
				<verse number="1">上主个話臨到 耶利米 ，</verse>
				<verse number="2">喊佢去企在上主聖殿个門口，在該位宣佈講：「你等入這兜門去敬拜上主个 猶大 人啊，愛聽上主个話。</verse>
				<verse number="3">上主 — 萬軍个元帥、 以色列 个上帝恁樣講：你等愛棄邪歸正！恁樣，𠊎就俾你等住在這垤土地。</verse>
				<verse number="4">毋好再相信該兜騙人个話，講：『𠊎等當安全！這係上主个聖殿；這係上主个聖殿；這係上主个聖殿！』</verse>
				<verse number="5">「你等斷真愛棄邪歸正，互相公平款待。</verse>
				<verse number="6">毋好再欺負外族人、孤兒㧯寡婦；愛停止在這垤地上㓾無罪个人；毋好再拜別个神明，害到自家。</verse>
				<verse number="7">若係你等正經棄邪歸正，𠊎就俾你等繼續住在這位，就係以前𠊎賜給你等祖先做永久產業个土地。</verse>
				<verse number="8">「總講，你等偎靠該騙人个話係無利益个。</verse>
				<verse number="9">你等做賊、㓾人、犯姦淫、發假誓、向 巴力 燒香，拜你等毋識个神明。</verse>
				<verse number="10">你等做這一切𠊎當惱个事，然後來到𠊎个聖殿，企在𠊎面前，講：『𠊎等當安全！』</verse>
				<verse number="11">你等將𠊎个聖殿看做賊竇係麼？𠊎清清楚楚看到你等个所行所做。</verse>
				<verse number="12">你等到 示羅 去，看𠊎頭擺所選个受人敬拜个地方，你等就知：𠊎因為吾子民 以色列 个罪樣般對付該所在。</verse>
				<verse number="13">你等犯這恁多个罪；𠊎 — 上主早就一直勸你等，總係你等毋聽；𠊎喊你等，總係你等毋應。</verse>
				<verse number="14">所以，𠊎愛對付你等所倚靠、屬𠊎个聖殿，㧯𠊎賜給你等並你等祖先个所在，像𠊎以前對付 示羅 共樣。</verse>
				<verse number="15">𠊎愛對𠊎面前將你等逐走，像𠊎以前逐走你等个兄弟 以色列 北國个人民 共樣。𠊎 — 上主恁樣宣佈了。」</verse>
				<verse number="16">上主講：「 耶利米 啊，毋好為這兜人祈禱，也毋好為佢等大聲哀求。你毋好代佢等向𠊎懇求，因為𠊎一定毋聽。</verse>
				<verse number="17">佢等在 猶大 个逐城市㧯在 耶路撒冷 个街項所做个事，你無看到係麼？</verse>
				<verse number="18">佢等个子女撿柴，阿爸燒火，阿姆攪麵粉做餅，獻給佢等个天后女神。佢等也向別个神明獻酒，佻佻惹𠊎發譴。</verse>
				<verse number="19">事實上，佢等傷到个敢係𠊎？佢等傷到个係佢等自家，害自家到盡見笑。</verse>
				<verse number="20">所以，𠊎 — 至高个上主恁樣宣佈：𠊎愛將受氣拚在這地方，也愛拚在人、動物、樹仔、㧯五榖頂高。𠊎个大發譴像火當猛𤏸起來，毋會烏掉。」</verse>
				<verse number="21">上主 — 萬軍个元帥、 以色列 个上帝恁樣講：「𠊎个子民啊，做你等將燒化祭㧯平安祭个肉拿去食掉。</verse>
				<verse number="22">𠊎帶領你等个祖先出 埃及 个時，𠊎並無命令佢等獻燒化祭抑係其他祭物。</verse>
				<verse number="23">𠊎只有命令佢等聽從𠊎；恁樣，𠊎就做佢等个上帝，佢等做𠊎个子民。𠊎愛佢等遵行𠊎个道路；恁樣，佢等就會萬事順利。</verse>
				<verse number="24">總係，佢等毋聽從，也毋搭𠊎，反轉照自家硬頸邪惡个心去做，離開𠊎越來越遠。</verse>
				<verse number="25">對你等祖先離開 埃及 該日開始直到這下，𠊎逐日一擺又一擺差派𠊎个僕人 — 眾先知向你等傳話，</verse>
				<verse number="26">總係無人搭𠊎，也無人聽話。你等比你等个祖先還較硬頸，還較作惡。</verse>
				<verse number="27">「所以， 耶利米 啊，你愛向𠊎个子民傳這兜話，雖然佢等毋會聽；你愛喊佢等，雖然佢等毋會應。</verse>
				<verse number="28">總係你愛責備佢等：佢等个國家毋接受管教，毋聽從𠊎 — 上主、佢等个上帝。誠實 早就毋見掉了，連提也無人提！</verse>
				<verse number="29">「 耶路撒冷 人啊， 愛剃光頭那毛，將它㧒掉！ 愛上光光个山頂去唱哀歌！ 因為𠊎 — 上主已經豁掉惹𠊎受氣个子民了。</verse>
				<verse number="30">上主講：「 猶大 人做一件𠊎看做盡惡个壞事。佢等將𠊎當惱个偶像放在𠊎个聖殿底背，打垃圾𠊎个聖所。</verse>
				<verse number="31">佢等在 欣嫩子 山壢造 陀斐特 祭壇，將自家个子女放在頂高用火燒來獻祭。𠊎並無命令佢等獻這種祭，連想也無想過。</verse>
				<verse number="32">所以，有一日，該所在毋會再喊做 陀斐特 抑係 欣嫩子 山壢，會喊做『㓾人个山壢』。人會在 陀斐特 埋葬身屍，因為已經無位所好埋了。</verse>
				<verse number="33">天空个飛鳥㧯地上个野獸會來食身屍，無人來逐。</verse>
				<verse number="34">𠊎愛使 猶大 逐隻城市㧯 耶路撒冷 个街項毋會再有歡喜快樂个聲，也毋會再有新郎㧯新娘个聲，因為這垤土地定著會荒掉。」</verse>
			</chapter>
			<chapter number="8">
				<verse number="1">上主講：「到該日，敵人會將 猶大 个王、官長、祭司、先知，㧯 耶路撒冷 人民个骨骸，全部對墳墓肚挖出來，</verse>
				<verse number="2">擺在日頭、月光、㧯星仔下背。這兜天體就係佢等生前所愛慕、服事、跈從、卜卦、敬拜个。這兜骨骸無人會去收集起來埋掉，全部會變做地面上个垃圾。</verse>
				<verse number="3">這隻邪惡民族賸到个人會在𠊎分散佢等去个所在，求死毋求生。𠊎 — 上主、萬軍个元帥恁樣宣佈了。」</verse>
				<verse number="4">上主吩咐𠊎向佢个子民恁樣講：「人跌倒，敢無想愛䟘起來？人行差路，敢無想愛回頭？</verse>
				<verse number="5">你這兜 耶路撒冷 人啊，你等做麼介悖逆到底呢？你等一直行詭詐，毋肯轉到𠊎這位來。</verse>
				<verse number="6">𠊎當注意聽，總係你等無講老實話。無人為自家个壞行為悔改；無人自家反省講：『𠊎到底做麼介毋著？』逐儕人照自家个意思去做，就像馬仔走等去戰場。</verse>
				<verse number="7">連空中个鸛鳥都知來去个節期，定期飛轉來；班鳩、燕仔、白鶴仔也全部照時節遷徙。總係𠊎个子民啊，你等偏偏毋知𠊎个法則！</verse>
				<verse number="8">你等樣做得自誇聰明、講你等明白𠊎个法律呢？其實，𠊎个法律已經被詭詐个經學教師改做假个法律了。</verse>
				<verse number="9">你等个聰明人會堵到見笑，驚到愊愊掣，被人捉到。佢等拒絕𠊎个話，還有麼介智慧好講呢？</verse>
				<verse number="10">所以，𠊎愛將佢等个𡜵娘送給別人，田地也交給新个主人；因為佢等無論地位高低全部貪不義个錢財，連先知㧯祭司也全部詐欺人民。</verse>
				<verse number="11">𠊎子民个著傷，佢等也無認真醫治。佢等講：『平安！平安！』其實無平安。</verse>
				<verse number="12">佢等做恁得人惱个事應當知見笑，總係佢等毋知見笑，也毋會面紅。所以，佢等會㧯別人共樣跌倒。𠊎責罰佢等个時，佢等就會橫到貼貼。𠊎 — 上主恁樣宣佈了。」</verse>
				<verse number="13">上主講：「𠊎愛將佢等所有个全部搶走，交給該兜來佔領這地方个人；到尾，葡萄樹頂毋會有葡萄，無花果樹頂也毋會有無花果，連葉仔也全部燥掉 。」</verse>
				<verse number="14">上帝个子民問：「𠊎等做麼介還坐等毋挺動呢？䟘起來，入來去防衛个城，就係死在該位也好！上主 — 𠊎等个上帝已經定𠊎等死罪。佢給𠊎等毒水啉，因為𠊎等得罪佢。</verse>
				<verse number="15">𠊎等期待平安，希望得到醫治，總係無效果，反轉嚇到會死。</verse>
				<verse number="16">敵人已經到 但 ，𠊎等聽到戰馬噴氣。戰馬大聲嘶，全地大震動。敵人會來打壞𠊎等个土地㧯地上个一切；佢等會來消滅𠊎等个城市㧯住在其中个人民。」</verse>
				<verse number="17">上主講：「看啊，𠊎愛將毒蛇放在你等當中，用法術也逐牠兜毋走；牠兜會咬你等。」</verse>
				<verse number="18">𠊎个心非常悲傷，無法度醫好， 像會昏掉一樣。</verse>
				<verse number="19">𠊎遠遠就聽到同胞悲傷个聲講： 「上主無在 錫安 係麼？ 錫安 个王無在城肚係麼？」 上主講：「佢等做麼介拜偶像？ 做麼介拜外國虛假个神明，來惹𠊎發譴呢？」</verse>
				<verse number="20">人民講： 「熱天過掉，收成結束了， 𠊎等還係吂得救！」</verse>
				<verse number="21">耶利米 講： 同胞受傷害，𠊎也受傷害； 𠊎非常悲傷，著驚到會死。</verse>
				<verse number="22">敢講 基列 無膏藥係麼？ 敢講該位無醫生係麼？ 做麼介𠊎个同胞無得到醫治呢？</verse>
			</chapter>
			<chapter number="9">
				<verse number="1">願𠊎个頭那係水井， 目珠係目汁个泉源！ 𠊎做得日夜為被人㓾死个同胞來噭。</verse>
				<verse number="2">願𠊎在曠野有出外人歇睏个所在， 使𠊎做得遠遠避開同胞。 因為佢等全係行姦淫、 係全無忠心个一群。</verse>
				<verse number="3">佢等个舌乸彎來彎去像弓一樣， 佢等隨時講花撩像射箭共樣； 佢等得到權勢毋係靠講真實話， 完全係用騙个。 上主講： 「𠊎个子民長透做壞事， 根本毋認識𠊎。」</verse>
				<verse number="4">逐個人全部愛提防親友， 親兄弟也信用毋得； 因為兄弟全部㧯 雅各 共樣恁詭詐， 朋友來往全部搬弄是非。</verse>
				<verse number="5">逐儕騙朋友； 無人講老實話； 佢等教人講花撩。 佢等一直犯罪， 𤸁到毋知愛悔改；</verse>
				<verse number="6">佢等一日到暗詐欺人、欺負人。 上主講： 「佢等根本毋肯承認𠊎。」</verse>
				<verse number="7">所以，上主 — 萬軍个元帥恁樣講： 「看啊，𠊎愛鍛鍊𠊎个子民，考驗佢等。 𠊎个子民做恁壞个事， 若無責備佢等，樣做得呢？</verse>
				<verse number="8">佢等个舌乸像㓾人个利箭； 佢等緊講花舌。 逐儕對鄰舍嘴講平安个話， 總係心肚設計愛陷害佢。</verse>
				<verse number="9">𠊎樣做得無為這兜事來責罰佢等呢？ 𠊎樣做得無報應像恁樣个國家呢？」</verse>
				<verse number="10">𠊎講：𠊎愛為山來悲哀大噭， 為曠野个草埔唱悲傷个歌； 因為它兜燒到光光， 無人經過， 也聽毋到牛羊个聲音， 連飛鳥野獸全部走淨淨。</verse>
				<verse number="11">上主講：𠊎愛使 耶路撒冷 變做亂石堆， 成做野狗个竇； 𠊎愛使 猶大 个城鎮荒廢， 毋會再有人住。</verse>
				<verse number="12">𠊎問：「上主啊，做麼介這土地會荒廢，像沙漠恁燥旱，無人經過呢？麼人有恁聰明，會明白這道理呢？你識向麼人說明，使佢會向別人解釋這道理呢？」</verse>
				<verse number="13">上主應講：「這係因為𠊎个子民豁掉𠊎為佢等設立个教訓，毋聽從𠊎个話，毋實行𠊎个命令。</verse>
				<verse number="14">佢等當硬頸，強強愛跈祖先所教个去拜眾 巴力 。</verse>
				<verse number="15">所以，𠊎 — 上主、萬軍个元帥、 以色列 个上帝恁樣宣佈：𠊎愛使這子民食苦果，啉毒水。</verse>
				<verse number="16">𠊎愛將佢等分散到各國，到佢等㧯祖先全毋識聽過个所在去。𠊎愛使敵人逐佢等，將佢等全部㓾死。」</verse>
				<verse number="17">上主 — 萬軍个元帥恁樣講： 你等愛想看仔： 愛請代人噭个婦人家來噭， 請專門唱哀歌个細妹仔來唱。</verse>
				<verse number="18">人民講： 愛催姖等遽遽來為𠊎等唱哀歌， 唱到𠊎等大噭、目汁雙流！</verse>
				<verse number="19">鍚安 城傳出哀傷个聲講： 樣會恁澇潰！ 樣會恁見笑！ 𠊎等無離開家鄉做毋得； 𠊎等个屋被人拆掉了。</verse>
				<verse number="20">𠊎講： 婦人家啊，愛聽上主个話； 你等愛注意聽佢个話。 愛教你等个妹仔樣般噭， 逐儕愛互相學唱哀歌。</verse>
				<verse number="21">死亡對窗門爬入來， 進入𠊎等个城堡； 死亡打橫街路个細人仔， 消滅廣場个後生人。</verse>
				<verse number="22">滿遍橫等屍體， 像田野个糞堆， 又像割跌掉个麥串，無人來拈。 上主命令𠊎恁樣宣佈了。</verse>
				<verse number="23">上主恁樣講： 聰明人毋好誇口自家个聰明； 勇士毋好誇口自家个勇氣； 有錢人毋好誇口自家个錢財。</verse>
				<verse number="24">人若愛誇口， 應該誇口了解𠊎、認識𠊎； 因為𠊎係上主，𠊎實行不變个慈愛。 在世間𠊎執行公平，伸張正義； 因為這兜事係𠊎所歡喜个。 𠊎 — 上主恁樣宣佈了。</verse>
				<verse number="25">上主講：「看啊，日仔會到了！𠊎愛責罰所有單單肉體受割禮、總係心靈無受割禮个人：</verse>
				<verse number="26">就係 埃及 人、 猶大 人、 以東 人、 亞捫 人、 摩押 人、㧯該兜住在曠野剃掉頭那周圍个頭那毛个民族 。因為各國个人雖然肉體都受割禮，總係佢等㧯 以色列 人个心靈也全部無受割禮，無遵守割禮所象徵个約。」</verse>
			</chapter>
			<chapter number="10">
				<verse number="1">以色列 人啊，你等愛聽上主向你等講个話。</verse>
				<verse number="2">上主恁樣講： 你等毋好學列國个風俗習慣， 也毋好像列國恁樣被天頂个萬象嚇倒。</verse>
				<verse number="3">佢等所信奉个全係虛空， 不過係對樹林中斬下來个樹仔， 木匠師傅用刀仔雕刻个作品，</verse>
				<verse number="4">然後鑲金鑲銀來打扮， 用釘仔㧯鎚仔來固定， 使它兜毋會橫掉。</verse>
				<verse number="5">佢等个偶像像瓜田肚用禾稈紮个人： 它兜毋會講話， 毋會行路，愛人扛等行。 所以毋使驚它兜！ 它兜毋會降災， 也無能力降福。</verse>
				<verse number="6">上主啊，無人㧯你比抑得； 你當偉大，你个聖名大有能力。</verse>
				<verse number="7">你係萬國个君王，麼人敢毋敬畏？ 你應該受尊敬。 列國个智慧人㧯君王無一儕㧯你比抑得。</verse>
				<verse number="8">佢等全部戇戇檔檔； 佢等對樹仔刻个偶像領受虛假个教訓。</verse>
				<verse number="9">佢等个偶像鑲等對 他施 進口个銀仔， 㧯對 烏法 進口个金仔， 全部係木匠㧯銀匠个手工。 它兜著藍色、紫色个衫褲， 全部係手藝盡好个人刺个。</verse>
				<verse number="10">上主啊，只有你係真神， 係永生个上帝，永遠个君王。 你一發譴，大地就緊顫； 你一受氣，萬國就企毋住。</verse>
				<verse number="11">𠊎个子民啊，你等愛向佢等宣告，偶像毋係創造天地个神；它兜一定會對天地間消滅。</verse>
				<verse number="12">上主用能力創造大地； 佢用智慧建立世界， 用聰明展開天空。</verse>
				<verse number="13">佢一響雷公，天空个水就吼吼滾； 佢使雲對地平線衝等上。 佢使𥍉爧在雨中發光； 佢使風對自家个倉庫吹出。</verse>
				<verse number="14">人對這光景全部戇檔，無智識； 打金師傅造偶像，反轉無面子， 因為佢等造个神明係假个，毋會透氣。</verse>
				<verse number="15">偶像全係虛空，係當見笑个東西； 上主審判个時，它兜全部會消滅。</verse>
				<verse number="16">雅各 个上帝毋係像這兜偶像： 佢創造萬物， 揀選 以色列 做自家个子民。 上主 — 萬軍个元帥係佢个名。</verse>
				<verse number="17">受包圍个 耶路撒冷 人啊，將你等愛帶走个東西收好。</verse>
				<verse number="18">因為上主這下愛將你等對這土地拂出去。佢愛降災難在你等身項，你等會被人捉走。上主恁樣宣佈了。</verse>
				<verse number="19">耶利米 代表 耶路撒冷 人講： 慘了！𠊎樣會著傷到恁嚴重？ 總係𠊎也會想： 「這个痛苦係𠊎一定愛忍受个。」</verse>
				<verse number="20">𠊎个帳篷被人破壞， 帳篷个索仔全部斷掉。 子女離開𠊎走淨淨了； 毋會再有人來㧯𠊎搭帳篷， 也無人來㧯𠊎吊布簾。</verse>
				<verse number="21">因為𠊎等个領袖無智識； 佢等毋尋求上主。 所以，佢等失敗， 人民全部四散掉。</verse>
				<verse number="22">聽啊！有風聲傳來講： 「有看到一大群軍隊對北方來， 會使 猶大 逐隻城市荒掉， 成做野狗个竇。」</verse>
				<verse number="23">上主啊，𠊎知無人能決定自家个命運； 無人能安排自家个前途。</verse>
				<verse number="24">上主啊，求你照公當來管教𠊎等； 求你毋好在發譴中消滅𠊎等。</verse>
				<verse number="25">求你將大發譴倒在毋承認你个列國， 㧯毋敬拜你个人身上。 因為佢等㓾 雅各 个後代； 佢等徹底毀滅𠊎等， 使𠊎等个家園荒廢。</verse>
			</chapter>
			<chapter number="11">
				<verse number="1">上主對 耶利米 講：</verse>
				<verse number="2">「你愛聽清楚這契約个內容，然後向 猶大 人民㧯住在 耶路撒冷 个人宣佈。</verse>
				<verse number="3">愛對佢等講，𠊎 — 上主、 以色列 个上帝恁樣講：毋遵行這個契約个人，就會受咒詛。</verse>
				<verse number="4">𠊎對 埃及 ，對該燒鐵个火爐中將你等个祖先帶出來時，𠊎㧯佢等打這個契約。𠊎吩咐佢等服從𠊎，遵守𠊎一切个命令。𠊎㧯佢等講，佢等若服從𠊎就係𠊎个子民，𠊎愛做佢等个上帝。</verse>
				<verse number="5">恁樣，𠊎就實現𠊎對佢等个祖先所發个誓，將這流乳㧯蜜當肥个土地賜給佢等，就像今晡日共樣。」 𠊎應講：「上主啊！阿愐！」</verse>
				<verse number="6">上主又對𠊎講：「你愛在 猶大 逐城市㧯 耶路撒冷 个大街小巷，向人民宣佈這一切个話，喊佢等愛聽從又遵行這個契約。</verse>
				<verse number="7">自從𠊎將你等个祖先帶出 埃及 該日直到今晡日，𠊎一擺又一擺警戒佢等講：『你等愛聽從𠊎个話。』</verse>
				<verse number="8">總係佢等毋聽也毋搭𠊎，反轉硬頸照自家个壞心思去行。𠊎吩咐佢等遵守這個契約，總係佢等毋去行。所以，𠊎照這契約所有个規定責罰佢等。」</verse>
				<verse number="9">上主又對𠊎講：「 猶大 人民㧯住在 耶路撒冷 个人同謀悖逆𠊎。</verse>
				<verse number="10">佢等又倒轉去犯祖先所犯个罪，毋聽從𠊎个話，去拜別个神明。 以色列 㧯 猶大 个人民全部破壞𠊎㧯佢等祖先所立个契約。</verse>
				<verse number="11">所以，𠊎 — 上主恁樣講：𠊎定著愛降災難給佢等；這係佢等無法度走閃个。雖然佢等向𠊎哀求，𠊎一定毋聽。</verse>
				<verse number="12">該時， 猶大 㧯 耶路撒冷 个人會去求佢等燒香服事過个神明。總係該兜神明在災難臨到个時完全無辦法幫助佢等。</verse>
				<verse number="13">猶大 人个神明㧯佢等个城市平多； 耶路撒冷 人為到該當見笑个 巴力 所起燒香个祭壇也㧯佢等个街路平多。</verse>
				<verse number="14">耶利米 啊，你毋好為這兜人祈禱，也毋好為佢等大聲哀求；因為佢等堵到災難个時向𠊎求幫助，𠊎一定毋聽。」</verse>
				<verse number="15">上主講：「𠊎所惜个子民既然罪大惡極，還有麼介資格到𠊎个聖殿來呢？佢等恅到許願、獻 牲儀就可以消災係麼？就做得享受快樂係麼？</verse>
				<verse number="16">𠊎識將佢等安到『好个橄欖樹』，果子打到結結，樹身當靚，總係這下𠊎愛用大風差來拗斷它个樹桍、響雷公來燒它。</verse>
				<verse number="17">「𠊎 — 上主、萬軍个元帥栽種這個橄欖樹，總係這下𠊎愛降災難攻擊它；因為 以色列 人㧯 猶大 人攏總做壞事，向 巴力 燒香，惹𠊎發譴。」</verse>
				<verse number="18">該時上主指點𠊎，將敵人个陰謀指給𠊎看，𠊎正知佢等愛㓾𠊎。</verse>
				<verse number="19">𠊎像一隻溫純个細羊牯被人牽到屠宰場，總係𠊎毋知佢等个陰謀。佢等講：「𠊎等愛將這頭樹㧯果子，連頭並根挷掉。來啊，𠊎等來將佢㓾掉，使佢个名消失，無人記得佢。」</verse>
				<verse number="20">所以𠊎祈禱講：「上主 — 萬軍个元帥啊，你係公正个審判官；你鑒察人个心思意念。𠊎將𠊎个案件交在你手中；求你俾𠊎看到你為𠊎伸冤。」</verse>
				<verse number="21">上主恁樣講：「該兜愛收你命个 亞拿突 人威脅你，喊你毋好再奉上主个名講預言，正毋會死在佢等个手頭。</verse>
				<verse number="22">所以𠊎 — 上主、萬軍个元帥恁樣講：看啊，𠊎愛責罰佢等！佢等个後生人會死在戰場，佢等个細人仔會因為飢荒餓死。</verse>
				<verse number="23">𠊎已經選定時間降災難在 亞拿突 人身上；該時，佢等會死到無賸半儕。」</verse>
			</chapter>
			<chapter number="12">
				<verse number="1">上主啊，𠊎到你面前辯論案情， 逐擺都係你著！ 雖然恁樣，𠊎還係愛㧯你討論： 到底麼介係公正呢？ 做麼介壞人還係凡事順利？ 做麼介詭詐个人安穩過日？</verse>
				<verse number="2">你栽種佢等，佢等就生根、 長大、打子。 佢等个嘴親近你， 總係心離你盡遠。</verse>
				<verse number="3">上主啊，你認識𠊎； 你了解𠊎， 查驗𠊎對你个心意。 求你將壞人拉出來， 像羊仔拉去屠宰場， 將佢等分別關等， 留到愛㓾个日仔。</verse>
				<verse number="4">𠊎等个土地還愛旱幾久呢？ 田園个草愛燥到幾時呢？ 飛鳥走獸全部死淨淨了， 因為𠊎个同胞做當多壞事； 佢等講：上帝看毋到𠊎等个行為 。</verse>
				<verse number="5">上主講： 耶利米 啊，若係你㧯人走相逐會痶， 㧯馬仔比賽你愛樣般呢？ 若係你在平地正感覺有平安 ， 在 約旦 河滣个樹林肚你愛樣般呢？</verse>
				<verse number="6">連你个兄弟㧯親人也出賣你； 佢等在後背大聲反對你。 就算佢等來㧯你講好話， 你也毋好相信佢等。</verse>
				<verse number="7">上主講： 𠊎豁掉𠊎个家 以色列 ， 𠊎放掉𠊎个產業。 𠊎將心愛个子民交給敵人。</verse>
				<verse number="8">𠊎个選民悖逆𠊎； 佢等像樹林中个獅仔向𠊎吼吼滾， 因為恁樣𠊎當惱佢等。</verse>
				<verse number="9">𠊎个選民像一隻鳥仔被鷹鳥圍等來攻擊； 鷹鳥也喊野獸來共下食牠个肉。</verse>
				<verse number="10">列國个統治者來踏壞𠊎个葡萄園； 佢等踏掉𠊎个田園， 使𠊎所愛个田園荒廢。</verse>
				<verse number="11">佢等使田地成做曠野； 𠊎个面前滿遍荒涼。 土地全部荒廢掉， 總係無人關心。</verse>
				<verse number="12">毀滅者𨃟過曠野光光个山頂； 𠊎使戰爭臨到全地； 無人有可能享受太平。</verse>
				<verse number="13">𠊎个子民種麥仔，收到个係竻仔； 佢等辛苦耕種，全無得到利益。 𠊎一發譴， 佢等就無好收成。</verse>
				<verse number="14">上主恁樣講：「論到該兜鄰國，因為侵佔𠊎賜給吾子民 以色列 个土地，𠊎愛對本地將佢等連根挷掉；𠊎愛對佢等當中將 猶大 个人民搶救出來。</verse>
				<verse number="15">總係，𠊎挷出佢等以後，還係會憐憫佢等，俾佢等轉到自家个故鄉。</verse>
				<verse number="16">若係佢等誠心接受𠊎子民个信仰，指等𠊎 — 永生上主个名發誓，就像佢等以前教𠊎子民指等 巴力 个名發誓，佢等就能㧯𠊎子民共下生存，享受繁榮。</verse>
				<verse number="17">若係佢等毋聽從𠊎，𠊎就會將該隻國連根挷掉，徹底消滅。𠊎 — 上主恁樣宣佈了。」</verse>
			</chapter>
			<chapter number="13">
				<verse number="1">上主恁樣吩咐𠊎：「去買一條麻紗腰帶 繫起來；總係毋好浸在水中。」</verse>
				<verse number="2">所以𠊎照上主个吩咐買一條腰帶繫起來。</verse>
				<verse number="3">上主第二擺㧯𠊎講：</verse>
				<verse number="4">「你到 幼發拉底 河 去，將你所繫个腰帶囥在石縫肚。」</verse>
				<verse number="5">𠊎就照上主个命令到 幼發拉底 河去，將腰帶囥在該位。</verse>
				<verse number="6">過了一站時間，上主吩咐𠊎：「你到 幼發拉底 河去拿該條𠊎吩咐你囥起來个腰帶。」</verse>
				<verse number="7">𠊎就轉到該位，將囥等个腰帶挖出來；腰帶已經糜掉，用毋得了。</verse>
				<verse number="8">接等，上主又㧯𠊎講話。佢講：</verse>
				<verse number="9">「𠊎愛照恁樣破壞 猶大 㧯 耶路撒冷 人民个大驕傲。</verse>
				<verse number="10">這班人民當壞，毋肯聽從𠊎个命令。佢等還係硬頸邪惡，還去敬拜、服事別个神明。所以，佢等會像這條腰帶恁樣變無路用。</verse>
				<verse number="11">就像腰帶黏等人个身體，𠊎本來愛所有 以色列 人㧯 猶大 人黏等𠊎。𠊎愛佢等做𠊎个子民，好俾𠊎个聖名受稱讚，得榮耀；總係佢等毋肯聽。」</verse>
				<verse number="12">上主 — 以色列 个上帝㧯𠊎恁樣講：「 耶利米 啊，你愛對 以色列 人講：逐隻酒缸全部愛裝滿酒。若係佢等應講：『𠊎等樣毋知逐隻酒缸愛裝滿酒？』</verse>
				<verse number="13">然後，你正㧯佢等講：𠊎 — 上主愛用酒灌醉這地方所有个人民； 大衛 王朝个君王、祭司、先知，㧯 耶路撒冷 个人民全部會像食酒醉。</verse>
				<verse number="14">𠊎愛打碎佢等，使佢等就算係爺𡟓㧯子女也會逆到，像酒缸相磕到碎掉。𠊎絕對毋憐憫佢等，毋惜佢等，毋同情佢等；𠊎一定愛消滅佢等。」</verse>
				<verse number="15">以色列 人啊，上主已經恁樣宣佈了。 你等愛謙卑，愛注意聽佢个話。</verse>
				<verse number="16">烏暗還吂到以前， 你等還吂在暗暗个深山跌倒以前， 愛榮光上主 — 你等个上帝。 上主還吂將你等所盼望个 光明變做烏暗以前， 你等愛榮光上主 — 你等个上帝。</verse>
				<verse number="17">若係你等毋聽， 𠊎愛因為你等个驕傲偷噭； 𠊎會噭到目汁濫泔； 因為上主个羊群會被人捉走了。</verse>
				<verse number="18">上主㧯𠊎講：「去喊王㧯太后 謙卑對寶座頂下來！因為佢等頭那頂盡靚个冕旒會跌下來了。</verse>
				<verse number="19">猶大 南部逐隻城市會被敵人圍等；無人能代佢等解圍。 猶大 个人民全部會被人捉走。」</verse>
				<verse number="20">耶路撒冷 啊，你看！敵人對北方來囉！交託你看顧个羊群、你所誇口个羊仔這下在㖠位呢？</verse>
				<verse number="21">你所結交、一直看做好朋友个，反轉來征服你、愛統治你；你還有麼介話好講呢？你會像產婦陣痛恁樣痛苦。</verse>
				<verse number="22">若係你想愛知，你做麼介會堵到這個災難，做麼介裙仔被人掀起來、被人侮辱，這係因為你犯當多罪所惹來个。</verse>
				<verse number="23">古實 人敢能改變皮膚个色？花豹敢能除掉牠个斑點？這兜事若係有可能，你這兜做慣壞事个人正有可能做好事。</verse>
				<verse number="24">所以，上主愛打散你等，就像曠野个風將冇仔吹走。</verse>
				<verse number="25">佢講，這係你个報應。佢決定恁樣對付你，因為你毋記得佢，反轉去信假神。</verse>
				<verse number="26">上主愛親自掀你个裙仔，來幪你个面，使你見笑。</verse>
				<verse number="27">因為佢有看到你做佢所惱个事；看到你在山頂、田項拜別个神明、像婦人家犯姦淫、發淫聲、行毋知見笑个淫亂。 耶路撒冷 啊，你慘了！你無淨浰愛到幾時呢？</verse>
			</chapter>
			<chapter number="14">
				<verse number="1">上主㧯 耶利米 講會做天旱。佢講：</verse>
				<verse number="2">猶大 盡悲哀，城市冷落。 人民坐在地上哀傷； 耶路撒冷 嘶天噦地大噭。</verse>
				<verse number="3">有錢人派僕人去打水； 佢等到囤水窟總係尋無水， 就帶等空水罐仔轉來。 佢等幪等頭那， 感覺盡失望，毋知樣般正好。</verse>
				<verse number="4">天毋落水，地燥到裂掉； 耕種人揇等頭那，失望到無葛無煞。</verse>
				<verse number="5">野地个鹿乸會㧒掉正𫱔个細鹿仔， 因為無草好食。</verse>
				<verse number="6">野驢企在光光个山頂， 像野狗恁樣嘴擘擘緊透大氣； 因為無草好食， 牠兜肚飢到目珠花花。</verse>
				<verse number="7">𠊎个子民向𠊎呼求： 「上主啊，𠊎等个罪做證來告𠊎等， 總係因為你个名， 這下還係求你施行拯救。 𠊎等常常犯罪離開你； 𠊎等確實得罪你。</verse>
				<verse number="8">你係 以色列 惟一个希望， 係𠊎等堵到災難時个救主。 你在𠊎等當中做麼介像生份人？ 像過路个旅客入來歇一夜定定？</verse>
				<verse number="9">做麼介你像人著驚到發咄愕， 像無能力救人个戰士？ 總係，上主啊，𠊎等知， 你確實有㧯𠊎等同在！ 𠊎等係你个子民； 求你毋好㧒掉𠊎等。」</verse>
				<verse number="10">上主恁樣講：「這兜人當好亂行，隨自家个意思流浪。所以，𠊎當惱佢等；𠊎愛記得佢等个罪過，責罰佢等个罪惡。」</verse>
				<verse number="11">上主對𠊎講：「你毋使為這兜人求福氣。</verse>
				<verse number="12">就算佢等禁食，𠊎也毋聽佢等个求喊；就算佢等獻燒化祭㧯素祭，𠊎也毋接受。𠊎反轉愛用戰爭、飢荒、㧯發瘟來消滅佢等。」</verse>
				<verse number="13">𠊎就講：「唉！至高个上主啊，該兜先知預言講毋會有戰爭，毋會有飢荒。佢等講，你應許愛俾𠊎等在自家个土地上享受太平。」</verse>
				<verse number="14">總係上主應講：「該兜先知借𠊎个名講花撩。其實，𠊎並無派佢等，也無命令佢等，連向佢等講過一句話也無。佢等个異象係虛假个；佢等个卜卦係無效个；佢等个預言係佢等自家个戇想。</verse>
				<verse number="15">所以，𠊎 — 上主恁樣㧯你講：𠊎愛對付該兜毋係𠊎派个假先知；佢等借𠊎个名預言這地方毋會有戰爭，毋會有飢荒。總係𠊎愛用戰爭㧯飢荒來消滅該兜先知。</verse>
				<verse number="16">該兜聽佢等講預言个人也會受到共樣个結局。佢等个身屍㧯佢等𡜵娘子女个身屍，全部會被人㧒在 耶路撒冷 个街路，無人埋葬。𠊎愛佢等為自家个罪惡受到報應。」</verse>
				<verse number="17">上主吩咐𠊎向人民講起𠊎个憂傷： 𠊎个目汁日夜緊流！ 𠊎噭無停！ 因為𠊎所惜个同胞著傷； 佢等受盡大个打擊。</verse>
				<verse number="18">𠊎到野外， 看到被刀仔㓾死个身屍； 𠊎入到城肚， 看到餓到半生死个人民。 先知㧯祭司在國內出出入入照常工作， 總係毋知自家無閒麼介 。</verse>
				<verse number="19">上主啊，你敢完全㧒掉 猶大 係麼？ 你敢盡惱 錫安 个人民？ 你做麼介打𠊎等， 打到無好醫？ 𠊎等希望平安，總係看毋到好光景； 𠊎等希望得到醫治，反轉堵到著驚。</verse>
				<verse number="20">上主啊，𠊎等確實有得罪你。 𠊎等承認自家个罪過， 也承認𠊎等祖先个罪惡。</verse>
				<verse number="21">求你記得你自家个應許，毋好㧒掉𠊎等； 毋好俾人看輕你榮光个寶座 — 耶路撒冷 ； 求你毋好廢掉你㧯𠊎等所立个約。</verse>
				<verse number="22">列國虛空个偶像敢會使天落水？ 天空自家會降甘霖麼？ 上主 — 𠊎等个上帝啊， 有能力做這兜事个，敢毋係你定定！ 𠊎等个希望在你， 因為這一切只有你正會做。</verse>
			</chapter>
			<chapter number="15">
				<verse number="1">上主又㧯𠊎講：「就算 摩西 㧯 撒母耳 企在𠊎面前求𠊎，𠊎也毋憐憫這兜人。對𠊎面前將佢等逐走！喊佢等走開！</verse>
				<verse number="2">若係佢等問，佢等愛走到㖠位去，你愛㧯佢等講，上主恁樣講： 應該病死个，就病死！ 應該戰死个，就戰死！ 應該餓死个，就餓死！ 應該被人捉走个，就被人捉走！</verse>
				<verse number="3">「𠊎 — 上主決定使佢等受四種災害：被刀劍㓾死；身屍被野狗拖走；被天空个飛鳥並地上个野獸吞食、滅屍。</verse>
				<verse number="4">因為 猶大 王 希西家 个孻仔 瑪拿西 在 耶路撒冷 个所做，𠊎愛使天下萬國个人一看到佢等就惱到會死。」</verse>
				<verse number="5">上主講： 耶路撒冷 人啊，麼人會可憐你等？ 麼人會為你等悲傷？ 麼人會轉身來向你等問安？</verse>
				<verse number="6">你等豁掉𠊎； 你等翻轉身去毋插𠊎。 所以𠊎愛伸手毀滅你等； 𠊎無愛繼續憐憫你等。</verse>
				<verse number="7">𠊎愛在國內逐隻城市个門口， 像用簸箕恁樣將你等簸出去。 𠊎个子民啊，𠊎愛消滅你等； 𠊎愛㓾你等个子女， 因為你等還毋悔改；</verse>
				<verse number="8">你等个𡜵娘變寡婦个會比海沙較多。 𠊎㓾死強壯个後生人， 打擊佢等个阿姆。 𠊎愛使痛苦㧯著驚忽然間臨到姖等。</verse>
				<verse number="9">該喪掉七個子女个阿姆昏掉， 強強氣會斷掉； 姖个希望像當晝頭个日頭忽然落山， 姖受羞辱，失望見笑。 𠊎愛使姖等个敵人將賸到个人㓾淨淨。 𠊎 — 上主恁樣宣佈了。</verse>
				<verse number="10">𠊎今就慘了！吾姆做麼介𫱔𠊎？害𠊎愛㧯國內所有个人冤家！𠊎無借錢給別人，也無向別人借錢，總係逐儕都咒罵𠊎。</verse>
				<verse number="11">上主啊，若係𠊎無盡責任事奉你，若係𠊎个敵人堵到困苦个時，𠊎無代佢等祈求，就由在佢等个咒罵實現！</verse>
				<verse number="12">(無人拗得斷鐵棍，特別係對北方來个摻銅鐵棍。)</verse>
				<verse number="13">上主對𠊎講：「為到𠊎子民在全國逐所在所犯个罪，𠊎愛使佢等个財寶白白被人搶走。</verse>
				<verse number="14">𠊎愛使佢等到生份个所在去做敵人个奴才；因為𠊎發譴到火當著，愛將佢等燒掉。」</verse>
				<verse number="15">然後𠊎講：「上主啊，麼介你都知。求你紀念𠊎，幫助𠊎，向迫害𠊎个人報仇！求你毋好忍等毋發譴；毋好俾佢等有機會㓾𠊎。你愛知，𠊎受侮辱係為到你个緣故。</verse>
				<verse number="16">主上帝 — 萬軍个元帥啊，你啟示个話係𠊎心靈个糧食，你个話使𠊎心充滿喜樂，因為𠊎係屬你个。</verse>
				<verse number="17">𠊎無去坐在享樂人个會中共下鬧熱歡笑。因為順從你个帶領，𠊎孤單坐等；你使𠊎充滿受氣。</verse>
				<verse number="18">𠊎做麼介一直受苦？做麼介𠊎个傷口無得到醫治？敢講你對待𠊎像會騙人个細河壩，一下有水一下無水，倚恃毋得？」</verse>
				<verse number="19">上主恁樣應𠊎講：「若係你倒轉來，𠊎會收留你，使你重新做𠊎个僕人。若係你毋加講話，單單傳講有價值个信息，你就做得做𠊎个代言人。人民會歸向你；你毋好去順佢等。</verse>
				<verse number="20">𠊎愛使你在群眾面前像堅固个銅牆鐵壁。佢等攻擊你，總係無辦法贏過你。𠊎愛㧯你共下，拯救你，保護你。</verse>
				<verse number="21">𠊎愛對強暴个壞人手中將你救出來。𠊎 — 上主恁樣宣佈了。」</verse>
			</chapter>
			<chapter number="16">
				<verse number="1">上主又對𠊎講：</verse>
				<verse number="2">「在這位，你毋好討𡜵娘，毋好𫱔子女。</verse>
				<verse number="3">𠊎愛㧯你講有關在這位出世个細人仔㧯佢等爺𡟓將會堵到个事情。</verse>
				<verse number="4">佢等全部會發瘟來死；無人悲傷、無人埋葬佢等。佢等个身屍會像肥料堆在地上。佢等若毋係餓死，就係戰死；身屍成做飛鳥走獸个食物。」</verse>
				<verse number="5">上主恁樣對𠊎講：「你毋好去喪家，毋好為佢等傷心流目汁。𠊎毋會再賜平安給𠊎个子民，也毋會用慈愛憐憫對待佢等。</verse>
				<verse number="6">無論貧賤富貴，攏總會死在這位，無人埋葬，也無人傷心噭佢等。無人會割傷自家抑係剃光頭來表示悲傷。</verse>
				<verse number="7">無人會㧯喪家共下食飯，無人會去安慰佢等，連死爺死𡟓个人也無人送一杯酒去表示同情。</verse>
				<verse number="8">「你也毋好去請人客个屋下，㧯佢等共下坐桌、啉食。</verse>
				<verse number="9">𠊎 — 上主、萬軍个元帥、 以色列 个上帝恁樣講：𠊎愛使這地方毋會再有歡喜快樂个聲，也毋會再有新郎㧯新娘个聲。你等還在世間个時就會親身看到這兜事。</verse>
				<verse number="10">「你向佢等傳這兜話个時，佢等會問你：『上主做麼介用恁大个災難來責罰𠊎等呢？𠊎等到底犯麼介罪過？𠊎等樣般得罪上主 — 𠊎等个上帝？』</verse>
				<verse number="11">你就應佢等講，上主恁樣講：『你等个祖先離開𠊎去敬拜服事別个神明。佢等悖逆𠊎，毋聽從𠊎个教訓。</verse>
				<verse number="12">總係你等比佢等還較可惡。你等一直硬頸，逐儕照邪惡个心行事，毋聽從𠊎。</verse>
				<verse number="13">所以𠊎愛將你等對這所在㧹出去，將你等逐到你等㧯你等个祖先攏總毋熟事个所在去。在該位，你等會日夜拜別个神明；因為𠊎毋會再向你等施恩。』」</verse>
				<verse number="14">上主講：「有一日，人發誓个時，毋會再指等該帶領 以色列 人出 埃及 个永生上主發誓；</verse>
				<verse number="15">反轉會指等該帶領 以色列 人離開該北方个土地、離開佢逐佢等去各國个永生上主發誓。因為𠊎愛帶領佢等轉故鄉，轉到𠊎賜給佢等祖先个土地。𠊎 — 上主恁樣宣佈了。」</verse>
				<verse number="16">上主講：「看啊，𠊎愛派盡多打魚个人來捉這兜人，然後愛派盡多打獵个人到大細山頭㧯巖石窿肚去捉佢等。</verse>
				<verse number="17">𠊎看到佢等所做个一切；佢等無辦法在𠊎面前將罪惡遮起來。</verse>
				<verse number="18">𠊎愛使佢等因自家个邪惡㧯罪過加倍受責罰；因為佢等拜該兜毋會透氣、像死屍共樣个偶像，打垃圾𠊎个土地。佢等在這地方滿遍設立可惡个假神。」</verse>
				<verse number="19">上主啊，你係𠊎个力量㧯城堡；你係𠊎苦難時个避難所。列國一定會對世界各地來到你面前，講：「𠊎等个祖先拜假神，攏總係虛假無利益个偶像。</verse>
				<verse number="20">人敢有可能為自家製造神明麼？其實它兜毋係真神。」</verse>
				<verse number="21">上主講：「所以，𠊎這擺一定愛使列國知𠊎个大能大力；佢等就會知𠊎个名係上主。」</verse>
			</chapter>
			<chapter number="17">
				<verse number="1">上主講：「 猶大 个人民啊，你等个罪係用鐵筆、用金鋼鑽刻在你等个心肚㧯你等个祭壇角面頂。</verse>
				<verse number="2">連你等个子女也在國內个大樹下、高山頂為女神 亞舍拉 起祭壇㧯柱像。</verse>
				<verse number="3">因為你等在全國逐所在犯罪，𠊎愛將𠊎田野个山、你等个財產、一切寶物 ，交給敵人搶走。</verse>
				<verse number="4">你等一定會失掉𠊎賜給你等个土地；𠊎愛將你等逐到生份个所在去做敵人个奴才。因為你等惹𠊎發譴，使𠊎个火當著，到永遠毋會烏掉。」</verse>
				<verse number="5">上主講： 信賴世間人， 倚恃人血肉个力量， 佢个心離開𠊎 — 上主个人， 這種人應該受咒詛。</verse>
				<verse number="6">佢像沙漠中个矮樹： 生在燥旱个曠野， 在荒涼个鹽地； 看毋到繁榮个時節來到。</verse>
				<verse number="7">專心信靠𠊎 — 上主个， 這種人樣般有福氣！</verse>
				<verse number="8">佢像種在河壩滣个樹： 樹根伸到河壩， 毋驚熱氣、也毋驚燥旱， 樹葉穠穠，打子無停。</verse>
				<verse number="9">人心比萬物詭詐， 壞到無好醫； 麼人看得透呢？</verse>
				<verse number="10">𠊎 — 上主鑒察人个心腸， 試驗人个心意； 𠊎照逐儕个行為㧯佢應該受个報應佢。</verse>
				<verse number="11">用無正當个手段發財个人， 像一隻鵓鴣仔孵毋係自家生个卵。 佢會在中年失掉財富； 到尾成做戇仔。</verse>
				<verse number="12">𠊎等个聖殿係上主榮耀个寶座， 一開始就起在高山頂。</verse>
				<verse number="13">上主啊，你係 以色列 个盼望； 離開你个人全部會見笑。 悖逆你个人，佢等會進入陰間 ， 因為佢等離開上主 — 生命水个源頭。</verse>
				<verse number="14">上主啊，求你醫𠊎，𠊎就會好；求你救𠊎，𠊎就會得救。你係𠊎愛頌讚个。</verse>
				<verse number="15">看啊，人㧯𠊎講：「上主个話在㖠位？做它來實現啊！」</verse>
				<verse number="16">上帝啊，𠊎從來毋識求你降災禍在佢等身上 ，也無希望災難个日仔來到。這係你所知个；你明白𠊎講个話。</verse>
				<verse number="17">求你毋好俾𠊎著驚，因為你係𠊎堵到災難時惟一个避難所。</verse>
				<verse number="18">求你使迫害𠊎个人見笑，毋好俾𠊎見笑；求你使佢等著驚，毋好俾𠊎著驚。求你使佢等堵到災難，徹底消滅佢等。</verse>
				<verse number="19">上主對𠊎恁樣講：「 耶利米 啊，你到 猶大 个君王出入 耶路撒冷 个『人民門』去，也企在 耶路撒冷 逐個城門口，</verse>
				<verse number="20">對佢等講：『 猶大 个君王、人民，㧯所有出入 耶路撒冷 這兜城門个人啊！你等愛聽上主个話。</verse>
				<verse number="21">上主恁樣講：為到自家个生命，你等愛細膩噢！做毋得在安息日搬東西，做毋得搬運東西入 耶路撒冷 个城門。</verse>
				<verse number="22">做毋得在安息日搬東西出門，做毋得做事。你等愛遵行𠊎給你等祖先个誡命，守安息日做聖日。』</verse>
				<verse number="23">佢等个祖先毋單淨毋注意聽，反轉硬頸毋肯聽，毋肯接受管教。」</verse>
				<verse number="24">上主講：「你等愛服從𠊎。莫在安息日搬運東西入這城。守安息日做聖日；毋做一切个事。</verse>
				<verse number="25">恁樣，坐 大衛 王位个君王㧯該兜領袖就能坐戰車抑係騎馬入 耶路撒冷 个城門。佢等㧯 猶大 个人民，並所有住在 耶路撒冷 个人會共下入城。這城永遠會有人住。</verse>
				<verse number="26">人民會對 猶大 个逐城市、 耶路撒冷 周圍逐村莊、 便雅憫 地區、西片个高原、山地，㧯 猶大 个南部，來 耶路撒冷 。佢等會帶等燒化祭、牲儀、素祭、乳香、㧯感恩祭來到𠊎 — 上主个聖殿。</verse>
				<verse number="27">總係，你等若毋聽從𠊎个命令，毋守安息日做聖日，在安息日搬運東西入 耶路撒冷 个城門，𠊎就在各城門點火；火會將 耶路撒冷 个王宮燒掉，無人有辦法打烏。」</verse>
			</chapter>
			<chapter number="18">
				<verse number="1">上主對 耶利米 講：</verse>
				<verse number="2">「你䟘起來，到該燒缶師傅个屋下去；在該位𠊎有話吩咐你。」</verse>
				<verse number="3">所以𠊎到燒缶師傅个屋下去。𠊎看到佢堵堵轉等輪盤在該位做事。</verse>
				<verse number="4">佢用泥做缶仔，做壞掉个時，佢就用該垤泥做別个用品，完全照自家个意思去做。</verse>
				<verse number="5">後來，上主又對𠊎講：</verse>
				<verse number="6">「敢講𠊎做毋得照燒缶師傅个方法來對待你等 以色列 人係麼？你等在𠊎手中就像泥在燒缶師傅个手中。</verse>
				<verse number="7">無論麼介時節，𠊎宣佈愛挷出，拆掉，抑係毀滅一個國家，</verse>
				<verse number="8">若係該國家離開罪惡，𠊎就會回心轉意，毋降災難。</verse>
				<verse number="9">無論麼介時節，𠊎宣佈愛栽種，建立一個國家，</verse>
				<verse number="10">若係該國家毋服從𠊎，專門做壞事，𠊎就會改變心意，毋將𠊎所講个福氣賜給佢等。</verse>
				<verse number="11">所以，你愛恁樣㧯 猶大 並 耶路撒冷 个人民講：𠊎計劃愛降災禍攻打佢等，準備愛責罰佢等。你愛勸佢等毋好再做壞事，逐儕愛遽遽改正自家个所做。</verse>
				<verse number="12">總係佢等會講：『毋使加講！𠊎等樣愛使改過？𠊎等愛照自家个意思，照自家硬頸个本性做壞事。』」</verse>
				<verse number="13">所以，上主恁樣講： 你等去問各國看， 有麼人聽過恁樣个事呢？ 𠊎所惜个 以色列 人民做一件非常可惡个事。</verse>
				<verse number="14">黎巴嫩 巖石頂个雪識溶掉麼？ 山頂流下來清涼个水識燥掉麼？</verse>
				<verse number="15">總係，𠊎个子民毋記得𠊎； 佢等向虛假个偶像燒香。 佢等在所行个路項跌倒， 毋肯再行該條舊路； 佢等去行吂整好个細路。</verse>
				<verse number="16">佢等將這垤土地變做荒涼、得人驚个所在， 永遠被人看毋起； 過路人看到定著會嚇倒、緊搖頭。</verse>
				<verse number="17">𠊎愛在敵人面前逐𠊎个子民走， 像東風吹散塵灰。 災難來到个時， 𠊎愛背向佢等，毋係面向佢等。</verse>
				<verse number="18">然後人民講：「來啊，𠊎等來設計對付 耶利米 ！隨時乜有祭司來教導𠊎等，有智慧个人來幫助𠊎等，有先知來傳講上帝个信息。𠊎等講話來攻擊 耶利米 ，毋好再聽佢个話。」</verse>
				<verse number="19">因為恁樣，𠊎祈禱：「上主啊，求你聽𠊎个報告，也聽𠊎敵人控告𠊎个話。</verse>
				<verse number="20">好心無好報，係麼？若無，佢等樣會挖陷阱來害𠊎啊！求你想看仔，𠊎在你面前為佢等求過；𠊎識求你毋好在大發譴中來對付佢等。</verse>
				<verse number="21">這下愛樣般正好？上主啊，𠊎求你：俾佢等个子女餓死；俾佢等戰死；俾佢等个婦人家死老公、子女夭折；俾佢等个壯丁發瘟來死，後生人死在戰場。</verse>
				<verse number="22">求你派土匪忽然間來到，搶劫佢等个家園，使佢等著驚盡嘶；因為佢等挖陷阱愛害𠊎，張羅網愛捉𠊎。</verse>
				<verse number="23">上主啊，佢等想愛㓾𠊎个陰謀，你盡清楚。求你毋好赦免佢等所做个壞事，毋好塗掉佢等个罪過。求你使佢等在你面前跌倒；求你在大發譴時來責罰佢等。」</verse>
			</chapter>
			<chapter number="19">
				<verse number="1">上主吩咐𠊎去買一隻缶罌仔，又喊𠊎帶民間个長老㧯老祭司</verse>
				<verse number="2">行過「爛缶門」到 欣嫩子 山壢去。佢愛𠊎在該位宣佈佢交帶𠊎个信息。</verse>
				<verse number="3">上主喊𠊎恁樣講：「 猶大 个君王㧯 耶路撒冷 人啊，你等愛注意聽；你等愛聽𠊎 — 上主、萬軍个元帥、 以色列 上帝个話。𠊎愛降大災難在這所在，使聽到這事个人全部著驚、耳公咻咻滾。</verse>
				<verse number="4">𠊎恁樣做係因為𠊎个子民離開𠊎；佢等在這位向別个神明獻祭，打垃圾這土地。佢等拜个神明係佢等㧯佢等祖先毋識个， 猶大 个君王也毋識。佢等在這所在滿遍流無罪个人个血，</verse>
				<verse number="5">為 巴力 起祭壇，在頂高用火燒自家个子女做牲儀來獻給 巴力 。𠊎毋識命令佢等恁樣做；𠊎連想也無想過這個事。</verse>
				<verse number="6">所以，有一日這所在毋會再喊做 陀斐特 抑係 欣嫩子 山壢，反轉愛喊做『㓾人个山壢』。</verse>
				<verse number="7">𠊎愛在這位破壞 猶大 㧯 耶路撒冷 人民一切个計劃。𠊎愛使敵人打贏佢等，㓾死佢等。𠊎愛將佢等个身屍給飛鳥走獸做食物。</verse>
				<verse number="8">𠊎愛使這城受到當得人畏个毀滅；逐個過路人看到定著會嚇倒，也會看毋起這城市。</verse>
				<verse number="9">敵人會來包圍這城，亂㓾人民。城肚个人會因為被人包圍、致到無好食，高不將食鄰舍人个肉，甚至食親生子女个肉！」</verse>
				<verse number="10">接等，上主吩咐𠊎在共下行个人面前打爛該隻缶罌仔，</verse>
				<verse number="11">向佢等宣佈：「上主 — 萬軍个元帥恁樣講：𠊎愛消滅這人民，打爛這城，像人打爛缶罌仔，無辦法修補。人愛將佢等个身屍葬在 陀斐特 ，因為別个所在埋到滿滿，無位所好埋佢等。</verse>
				<verse number="12">𠊎愛照恁樣對付這城㧯這位个人民，使這城變做像 陀斐特 一樣。</verse>
				<verse number="13">耶路撒冷 个屋舍， 猶大 國王个王宮，㧯識在屋頂向星宿燒香、向神明獻酒个屋仔，全部會像 陀斐特 一樣，成做無淨浰个所在。」</verse>
				<verse number="14">所以 耶利米 離開 陀斐特 ，就係上主派佢去宣佈這信息个所在。佢轉到聖殿，企在庭院中向眾人宣佈講：</verse>
				<verse number="15">「上主 — 萬軍个元帥、 以色列 个上帝恁樣講：『𠊎愛照𠊎講過个話降大災難在這城㧯周圍个村莊，因為你等硬頸毋聽從𠊎个話。』」</verse>
			</chapter>
			<chapter number="20">
				<verse number="1">音麥 个孻仔，總管聖殿个祭司 巴施戶珥 一聽到 耶利米 宣佈這兜話，</verse>
				<verse number="2">就打先知 耶利米 ，在聖殿北片个 便雅憫 門內用枷將佢鎖等。</verse>
				<verse number="3">第二朝晨， 巴施戶珥 放佢出來。 耶利米 就對佢講：「上主並無將你安到 巴施戶珥 。佢給你个名係『四圍得人驚』。</verse>
				<verse number="4">因為上主恁樣講：『𠊎愛使你自家㧯你个朋友全部因為你驚到無葛無煞；你會親目看到佢等死在敵人个刀劍下。𠊎會將所有个 猶大 人交給 巴比倫 王統治；佢會將佢等捉到 巴比倫 去，抑係㓾死佢等。</verse>
				<verse number="5">𠊎愛俾敵人搶劫城肚个財富，將城肚積存个寶物搶走，連 猶大 王个寶貝也搶走。佢等會將逐項東西搬到 巴比倫 去。</verse>
				<verse number="6">論到你， 巴施戶珥 ，你㧯你全家會被人捉到 巴比倫 去。你會死在該位，葬在該位；時常聽你講假預言該兜朋友也會㧯你堵到共樣个結局。』」</verse>
				<verse number="7">上主啊，你㩢耍𠊎；𠊎被你㩢耍到。 你比𠊎較強，你贏過𠊎。 逐儕全部㩢衰𠊎； 佢等歸日將𠊎當做笑科。</verse>
				<verse number="8">𠊎逐擺開嘴，定著愛大聲喊， 大聲講：暴力！毀滅！ 上主啊，𠊎宣佈你个信息， 總係惹來嘲謔、藐視。</verse>
				<verse number="9">𠊎若講：「𠊎無愛再提起上主， 無愛再奉佢个名宣講」， 你个話就會像火在𠊎心肚燒， 鑽入𠊎个骨頭。 𠊎樣般都忍毋住； 𠊎高不將講出來。</verse>
				<verse number="10">𠊎聽到盡多人細聲講： 「四圍得人驚」个來了； 𠊎等來告佢！ 連知己个朋友也全部等等看𠊎澇潰。 佢等講：「無一定佢會被人落到！ 𠊎等就有可能贏過佢，向佢報仇。」</verse>
				<verse number="11">總係上主啊，你㧯𠊎共下； 你大有能力，非常得人畏。 壓迫𠊎个人全部會失敗； 佢等个陰謀會澇潰。 佢等會非常見笑，因為佢等失敗了； 人永遠毋會毋記得佢等个羞辱。</verse>
				<verse number="12">上主 — 萬軍个元帥啊，你个裁決公當； 你看穿人个心腸。 求你俾𠊎看到你報復𠊎个敵人， 因為𠊎將𠊎个案件交給你。</verse>
				<verse number="13">愛唱歌頌讚上主！ 愛讚美上主！ 佢救窮苦人个命脫離壞人个手。</verse>
				<verse number="14">願𠊎个生日受咒詛！ 願𠊎出母胎該日無受祝福！</verse>
				<verse number="15">願該向吾爸報消息个人受咒詛！ 佢對吾爸報好消息講： 「恭喜你𫱔孻仔！」</verse>
				<verse number="16">願該人像被上主毀滅个城 ， 得毋到上主个憐憫。 願佢朝晨頭聽到盡嘶个聲， 當晝頭聽到戰爭个嘶聲；</verse>
				<verse number="17">因為上主 無使𠊎死在母胎， 無俾母胎成做𠊎个墳墓， 吾姆个肚笥就一直擐等𠊎。</verse>
				<verse number="18">𠊎做麼介愛出世呢？ 敢係為到經驗勞苦、憂傷， 在見笑中結束𠊎一生个年日嗎？</verse>
			</chapter>
			<chapter number="21">
				<verse number="1">猶大 王 西底家 派 瑪基雅 个孻仔 巴施戶珥 㧯 瑪西雅 个孻仔祭司 西番雅 去見 耶利米 。佢等要求：</verse>
				<verse number="2">「 巴比倫 王 尼布甲尼撒 正帶領軍隊來攻打這城。請代𠊎等祈求上主。可能佢會為𠊎等來行神蹟，迫 尼布甲尼撒 撤退。」</verse>
				<verse number="3">所以， 耶利米 將上主㧯佢講个話轉告佢等，喊佢等㧯 西底家 講：</verse>
				<verse number="4">「上主 — 以色列 个上帝恁樣講：看啊，𠊎愛將你等手中拿个武器，就係你等用來㧯城外包圍你等个 巴比倫 王並 巴比倫 人 相㓾个武器，搶轉來堆在城中心。</verse>
				<verse number="5">𠊎愛用大能大力，在發閼、發譴㧯大受氣之下伸手，親身攻擊你等。</verse>
				<verse number="6">𠊎愛攻擊這城肚所有个人民；人㧯動物全部會發瘟死掉。</verse>
				<verse number="7">猶大 王 西底家 啊，論到你，你个官員㧯經驗過戰爭、飢荒㧯發瘟還賸到个人民，𠊎全部愛交給 巴比倫 王 尼布甲尼撒 㧯想愛將你等㓾淨淨个敵人。 尼布甲尼撒 王毋會憐憫你等，同情你等；佢會將你等个命收掉。𠊎 — 上主恁樣宣佈了。」</verse>
				<verse number="8">接等，上主吩咐 耶利米 對人民恁樣講：「看哪，𠊎 — 上主將生路㧯死路擺在你等面前，俾你等擇。</verse>
				<verse number="9">留在這城肚个人若毋係戰死，就係餓死抑係發瘟來死。總係到城外向包圍你等个 巴比倫 人投降个，毋會死，會有機會救自家个命。</verse>
				<verse number="10">𠊎決定愛責罰這座城，降禍無降福。𠊎愛將它交給 巴比倫 王；佢愛用火燒掉這座城。𠊎 — 上主恁樣宣佈了。」</verse>
				<verse number="11">上主吩咐 耶利米 恁樣㧯 大衛 个後代 — 猶大 王个家族講：「你等愛注意聽𠊎 — 上主个話。你等逐朝晨愛執行公正个審判，對欺負人个手中解救被人壓迫个人。若無，你等个壞行為會惹𠊎發火，無人能打烏。</verse>
				<verse number="12"></verse>
				<verse number="13">耶路撒冷 啊，𠊎愛對付你！你起在山壢㧯高原當中个山頂，像巖石恁樣企在在。你自誇無人能攻打你，進入你个防線；</verse>
				<verse number="14">總係𠊎愛因為你个行為責罰你。𠊎愛在王宮中 放火，火會燒掉周圍个一切。𠊎 — 上主恁樣宣佈了。」</verse>
			</chapter>
			<chapter number="22">
				<verse number="1">上主吩咐 耶利米 下到 猶大 王宮，去㧯 大衛 王朝个君王、佢个官員、並對 耶路撒冷 各城門出入个人民講，上主恁樣講：</verse>
				<verse number="2"></verse>
				<verse number="3">「𠊎 — 上主命令你等執行公正个審判，伸張正義，對欺負人个手中解救被人壓迫个。你等做毋得壞款待抑係壓迫外族人、孤兒㧯寡婦；也做毋得在這所在流無罪个人个血。</verse>
				<verse number="4">若係你等遵守𠊎个命令， 大衛 个後代就會繼續做王。佢等㧯佢等个官員、還有人民，全部做得坐戰車、騎馬，經過這兜城門，入到王宮。</verse>
				<verse number="5">若係你等毋服從𠊎个命令，𠊎指等𠊎自家个名發誓，這王宮會變做荒埔。𠊎 — 上主恁樣宣佈了。</verse>
				<verse number="6">「在𠊎看來， 猶大 王室个王宮像 基列 ，又像 黎巴嫩 山頂恁靚；總係𠊎愛使它變做曠野、無人住个城市。</verse>
				<verse number="7">𠊎愛派人毀滅它。佢等全部會帶斧頭來，斬斷該兜盡靚个香柏樹柱仔，㧒落火竇肚去。</verse>
				<verse number="8">「後來，盡多外國人會經過這所在，大家會問，上主做麼介恁樣對付這座大城？</verse>
				<verse number="9">然後佢等又自家應講：因為這座城个人違背上主 — 佢等个上帝㧯佢等立个約，去服事拜別个神。」</verse>
				<verse number="10">猶大 人民啊，毋好為死掉个王噭； 毋好為到 約西亞 王悲傷。 愛為佢个孻仔 約哈斯 來噭； 佢被人捉走，永遠毋會轉來， 毋會再看到自家个故鄉了。</verse>
				<verse number="11">有關承接厥爸 約西亞 做 猶大 王个 約哈斯 ，上主恁樣講：「佢被人捉走、離開這所在，永遠毋會轉來。</verse>
				<verse number="12">佢會死在被人捉去个所在，毋會再看到這個地方了。」</verse>
				<verse number="13">慘了，這儕人有災禍了！ 佢用不義个手段為自家起王宮， 用無公正个方法起當多樓房； 佢強迫人民做白工， 毋付工錢。</verse>
				<verse number="14">慘了，這儕人有災禍了！ 佢講：「𠊎愛起盡偉大个王宮， 起盡闊个樓房。」 佢開當大个窗門， 用香柏樹做天花板， 漆大紅个油漆。</verse>
				<verse number="15">敢講你起比別人較高貴个香柏樹王宮， 就表示你係一位賢明个君王係麼？ 若爸一生人享福、又食又啉。 佢做人做事照公平公義來行； 佢所做个全部順利。</verse>
				<verse number="16">佢為窮苦無人幫助个伸冤； 佢所做个一切順利。 這係表示佢認識上主。</verse>
				<verse number="17">總係你當貪心，單單顧自家个利益； 你流無罪个人个血， 用暴力壓制人民。 𠊎 — 上主恁樣宣佈了。</verse>
				<verse number="18">所以，有關 約西亞 个孻仔 猶大 王 約雅敬 ，上主恁樣講： 無人會為佢哀傷講： 「唉哉，𠊎个兄弟姊妹啊，還慘噢！」 無人會為佢傷心噭講： 「𠊎个主！𠊎个王啊！」</verse>
				<verse number="19">佢會被人拖走， 被人㧒到 耶路撒冷 城外， 就像埋葬一隻驢仔。</verse>
				<verse number="20">耶路撒冷 个人民啊， 上到 黎巴嫩 山頂去喊！ 到 巴珊 去大聲噭！ 對 摩押 个山頂喊！ 因為你等个同盟國全部被人打輸囉。</verse>
				<verse number="21">你等繁榮个時上主警告你等， 總係你等講：「𠊎等無愛聽！」 你等從細就毋聽講； 自從毋識正經服從上主。</verse>
				<verse number="22">你等个領袖會被狂風捲走； 你等个同盟國會被人捉走； 你等全部會堵到見笑，被人侮辱； 因為你等做恁多个壞事。</verse>
				<verse number="23">你等住在用 黎巴嫩 香柏樹起个王宮， 你等自家恅到當安全， 總係大難臨到該時， 你等係樣般可憐啊！ 你等會像𫱔細人仔个婦人家恁樣大聲緊噌。</verse>
				<verse number="24">上主對 猶大 王 約雅敬 个孻仔 約雅斤 講：「𠊎 — 永生个上帝發誓：就算你係𠊎正手所戴印仔用个禁指，𠊎也愛將你剝掉，</verse>
				<verse number="25">交給你所驚、愛收若命个人。𠊎愛將你交給 巴比倫 王 尼布甲尼撒 㧯佢个軍隊。</verse>
				<verse number="26">𠊎愛將你㧯若姆逐到外國去，到該毋係你等出世个所在去；你等會死在該位。</verse>
				<verse number="27">你等盡想愛轉來，總係永遠無辦法轉來。」</verse>
				<verse number="28">有人講：「 約雅斤 王敢毋係像一隻無人愛个爛罌仔？若毋係，做麼介佢㧯佢个子女全部被人㧒掉，逐到外邦去呢？」</verse>
				<verse number="29">大地啊！大地啊！大地啊！ 愛聽上主个話。</verse>
				<verse number="30">上主恁樣講： 愛將這人登記做無子女， 佢一生人無半點成就！ 佢毋會有後代好承接 大衛 个王位； 無一個會做王統治 猶大 。</verse>
			</chapter>
			<chapter number="23">
				<verse number="1">上主講：「該兜迫害逐走𠊎子民个統治者慘了！佢等就像牧人迫害逐走𠊎个羊群共樣。」</verse>
				<verse number="2">上主 — 以色列 个上帝對該兜牧人恁樣講：「你等原來應該照顧𠊎个羊群，反轉逐散佢等。看啊，𠊎愛因為你等个壞行為責罰你等。</verse>
				<verse number="3">𠊎愛將𠊎羊群中所賸到个子民，對𠊎逐散佢等去个各國召集起來，帶佢等轉來故鄉。佢等會多子多孫，人數增加盡多。</verse>
				<verse number="4">𠊎愛派牧人正經照顧佢等。𠊎个羊仔毋會再著驚；佢等連一個也毋會失掉 。𠊎 — 上主恁樣宣佈了。」</verse>
				<verse number="5">上主講：「看啊，日仔會到，𠊎愛為 大衛 興起正義个『樹枝』。佢个王權賢明；佢愛在這垤土地用公平正義治理國家。</verse>
				<verse number="6">在佢統治个日仔， 猶大 人民會安居樂業， 以色列 人民會享受太平。佢會稱做『上主 — 𠊎等个正義』。」</verse>
				<verse number="7">上主講：「看啊，日仔會到，人發誓个時，毋會再講：『𠊎指等該帶領 以色列 人出 埃及 个永生上主發誓』，</verse>
				<verse number="8">總係愛講：『𠊎指等該帶領 以色列 人个後代離開北方个土地，離開佢逐散佢等去个各國个永生上主發誓。』該時，佢等會在自家个故鄉安居樂業。」</verse>
				<verse number="9">論到該兜假先知， 𠊎个心破碎； 𠊎全身愊愊掣。 上主㧯佢神聖个話使𠊎像酒醉个人， 使𠊎像被人用盡多酒灌到醉醉个人。</verse>
				<verse number="10">這土地滿遍係對上主無忠心个人。 佢等將權力拿來亂用， 所行所做也當積惡。 因為上主个咒詛， 土地荒涼，牧場枯燥。</verse>
				<verse number="11">上主講： 先知㧯祭司攏總全無敬虔； 就係在𠊎聖殿肚，𠊎也看到佢等做壞事。</verse>
				<verse number="12">佢等行个路又滑又暗； 𠊎愛使佢等溜到橫倒。 佢等受責罰个時間到了； 𠊎愛降災難在佢等身上。 𠊎 — 上主恁樣宣佈了。</verse>
				<verse number="13">𠊎看到 撒馬利亞 該兜先知个罪過： 佢等奉 巴力 神明个名講預言， 使𠊎个子民 以色列 行差路。</verse>
				<verse number="14">𠊎看到 耶路撒冷 該兜先知還較壞： 佢等行姦淫、講花舌， 唆慫人做壞事； 所以無人棄邪歸正。 在𠊎看來佢等全部㧯 所多瑪 人共樣恁壞， 㧯 蛾摩拉 人共樣腐敗。</verse>
				<verse number="15">所以，論到 耶路撒冷 該兜先知，𠊎 — 上主、萬軍个元帥恁樣講： 𠊎愛使佢等食苦果，啉毒水， 因為佢等使全國流傳無敬虔个風俗。</verse>
				<verse number="16">上主 — 萬軍个元帥對 耶路撒冷 人民恁樣講：「毋好聽信這兜先知个話；佢等給你等个係假个希望。佢等憑自家个妄想講預言，毋係傳講𠊎个話。</verse>
				<verse number="17">佢等一直對該兜藐視𠊎个人講：『上主講，你等會平安無事！』又對該兜硬頸个人講：『你等毋會堵到災難。』」</verse>
				<verse number="18">耶利米 講：「其實，這兜先知中，有麼人識企在上主个天庭親身聽佢講話呢？有麼人認真聽佢个話呢？</verse>
				<verse number="19">看啊，上主个大發譴會像狂風發生，像龍捲風恁樣在壞人頭那頂捩捩轉。</verse>
				<verse number="20">上主个憤怒毋會收轉去，直到佢完成自家所有个計劃；該時，你等正會完全明白這個事。」</verse>
				<verse number="21">上主講：「𠊎無派這兜先知，係佢等自家走去个；𠊎無給佢等信息，總係佢等用𠊎个名講預言。</verse>
				<verse number="22">若係佢等識像企在𠊎个天庭恁樣接受𠊎个話，佢等就會向𠊎个子民傳講𠊎个信息，使佢等離開邪惡个路，毋做壞事。」</verse>
				<verse number="23">上主恁樣講：「𠊎係無所不在个上帝。</verse>
				<verse number="24">無人有辦法囥起來，使𠊎看佢毋到。無論在天涯海角，𠊎 — 上主攏總在該位。</verse>
				<verse number="25">𠊎聽到該兜先知用𠊎个名騙人，佢等自家講係在夢中得到𠊎个信息。</verse>
				<verse number="26">該兜先知講花撩，照自家心中个詭詐來騙人；佢等愛騙到幾時呢？</verse>
				<verse number="27">佢等將自家發个夢互相傳來傳去，愛使𠊎个子民毋記得𠊎，就像佢等个祖先因為 巴力 毋記得𠊎。</verse>
				<verse number="28">發夢个先知應該講佢係發夢定定；總係聽到𠊎信息个先知應該忠實來傳講𠊎个信息。禾稈㧯麥仔樣般比抑得呢？</verse>
				<verse number="29">𠊎个信息像當猛个火，也像打碎巖石个大鐵鎚。</verse>
				<verse number="30">所以，𠊎 — 上主恁樣講：聽啊，𠊎愛對付這班先知。佢等大家拿對方个話，準做𠊎个話來傳講。</verse>
				<verse number="31">聽啊，𠊎愛對付這班先知。佢等也將自家講个話當做𠊎个話。</verse>
				<verse number="32">聽啊，𠊎愛對付這班先知。佢等个夢全部係騙人个。佢等講起這兜夢，用花撩㧯誇口个話將𠊎个子民帶入差路。𠊎並無派佢等，也無吩咐佢等。佢等對𠊎个子民全無好處。𠊎 — 上主恁樣宣佈了。」</verse>
				<verse number="33">上主對 耶利米 講：「若係𠊎个子民，抑係先知，抑係祭司問你：『上主有麼介默示？』你愛㧯佢講：『你等就係上主个重擔 ；佢愛將你等㧒掉。』</verse>
				<verse number="34">若係有先知、祭司，抑係𠊎个子民用『這係上主个默示』這句話，𠊎就愛責罰佢㧯佢全家个人。</verse>
				<verse number="35">逐儕應該問佢个鄰舍㧯兄弟：『上主樣般回答？上主講麼介？』</verse>
				<verse number="36">佢等做毋得再過用『這係上主个默示』這句話；麼人再過用，𠊎就將𠊎个默示變做佢个重擔！佢等恁樣就係糮糝用佢等个上帝 — 上主、萬軍个元帥、永生上帝个話語了。</verse>
				<verse number="37">耶利米 啊，你愛問該班先知：『上主應你等个係麼介？上主向你等講麼介？』</verse>
				<verse number="38">若係佢等違背𠊎个命令，用『這係上主个默示』這句話，你就㧯佢等講，</verse>
				<verse number="39">𠊎一定會將佢等準做重擔擎起來 ，將佢等連𠊎賜給佢等㧯佢等祖先个城市全部對𠊎面前㧒出去。</verse>
				<verse number="40">𠊎愛使佢等永久見笑，永遠受侮辱，係無辦法毋記得个侮辱。」</verse>
			</chapter>
			<chapter number="24">
				<verse number="1">巴比倫 王 尼布甲尼撒 對 耶路撒冷 將 約雅敬 个孻仔 猶大 王 約雅斤 、 猶大 个官員、打鐵師傅㧯工人捉到 巴比倫 去。這事以後，上主俾𠊎看到聖殿頭前擺等兩籃無花果。</verse>
				<verse number="2">第一籃裝滿新出个好無花果；還有一籃裝滿食毋得个壞無花果。</verse>
				<verse number="3">上主問𠊎：「 耶利米 啊，你看到麼介？」 𠊎應講：「無花果。好个當好，壞个當壞，壞到食毋得。」</verse>
				<verse number="4">接等上主對𠊎講：</verse>
				<verse number="5">「𠊎 — 上主、 以色列 个上帝愛將該兜被人捉去个 猶大 人民，就係𠊎逐佢等離開這地方到 巴比倫 去个人，看做好个無花果，愛好好款待佢等。</verse>
				<verse number="6">𠊎愛特別看顧佢等，帶佢等轉到這垤土地。𠊎愛重建佢等，毋係拆掉佢等；𠊎愛栽培佢等，毋係挷掉佢等。</verse>
				<verse number="7">𠊎愛使佢等个心會了解，知𠊎正係上主。佢等愛做𠊎个子民，𠊎愛做佢等个上帝，因為佢等定著會一心一意歸向𠊎。</verse>
				<verse number="8">「論到 猶大 王 西底家 ，還有佢左右个官員㧯賸到个 耶路撒冷 人，無論係留在這位，抑係住在 埃及 个，𠊎 — 上主愛將佢等看做壞到食毋得个無花果。</verse>
				<verse number="9">𠊎愛使佢等堵到大災難，俾世界各國人越看越著驚。在𠊎逐佢等去个所在，別人會羞辱、恥笑、嘲謔、咒詛佢等。</verse>
				<verse number="10">在𠊎賜給佢等㧯佢等祖先个土地，𠊎愛用戰爭、飢荒、㧯發瘟來消滅佢等。」</verse>
			</chapter>
			<chapter number="25">
				<verse number="1">約西亞 个孻仔 約雅敬 做王統治 猶大 个第四年，就係 尼布甲尼撒 做 巴比倫 王个第一年， 耶利米 對上主領受佢愛給 猶大 眾人个信息。</verse>
				<verse number="2">先知 耶利米 就去向 猶大 全國人民㧯 耶路撒冷 个眾人講：</verse>
				<verse number="3">「對 亞們 个孻仔 約西亞 做王統治 猶大 國个第十三年到今晡日，總共二十三年，上主常常向𠊎講話，𠊎也一直向你等傳佢个話，總係你等毋聽。</verse>
				<verse number="4">上主早就一直派佢个僕人 — 該兜先知向你等傳話，總係你等毋聽，也毋搭佢。</verse>
				<verse number="5">佢等勸你等逐儕離開邪惡个生活，改變罪惡个行為，恁樣你等正做得永遠留在上主賜給你等㧯你等祖先个土地。</verse>
				<verse number="6">佢等也勸你等毋好敬拜服事別个神，毋好拜你等所造个偶像來惹上主發譴，佢就毋會責罰你等。</verse>
				<verse number="7">總係，上主宣佈講，你等毋單淨毋聽佢，反轉用自家个手所造个偶像來惹佢發譴，害到自家。</verse>
				<verse number="8">「因為你等毋聽從佢，所以上主 — 萬軍个元帥恁樣講：</verse>
				<verse number="9">『看啊，𠊎愛派北方該兜民族㧯𠊎个僕人 巴比倫 王 尼布甲尼撒 來攻擊這地方㧯所有个人民，也愛攻擊周圍所有个國家。𠊎愛消滅佢等，使這地方㧯周圍个國家永遠荒涼，成做害人驚到發咄愕、被人嘲謔个所在。𠊎 — 上主恁樣宣佈了。</verse>
				<verse number="10">𠊎愛使佢等毋會再有歡喜快樂个聲，也無再有新郎㧯新娘个聲音；佢等个磨石無聲，燈盞無油。</verse>
				<verse number="11">這片土地會荒涼，成做害人驚到發咄愕个所在。這兜國家會被 巴比倫 王管七十年。</verse>
				<verse number="12">滿七十年以後，𠊎愛因為 巴比倫 㧯它个王所犯个罪責罰佢等。𠊎愛使佢等个地永遠荒涼。</verse>
				<verse number="13">𠊎愛用𠊎所宣佈一切个話，就係 耶利米 寫在這書底背、攻擊列國个預言，來責罰 巴比倫 。</verse>
				<verse number="14">𠊎愛照 巴比倫 人所行所做个來報應佢等；佢等會做當多強國㧯大君王个奴才。』」</verse>
				<verse number="15">上主 — 以色列 个上帝恁樣㧯𠊎講：「你愛將對𠊎手中接過去、裝滿大發譴个酒杯，交給𠊎差派你去个各國，給佢等啉。</verse>
				<verse number="16">佢等啉了以後全部會偏來偏去，像發酒癲，因為𠊎愛用戰爭來對付佢等。」</verse>
				<verse number="17">所以，𠊎對上主手中接過這酒杯，將它交給上主派𠊎去个各國，給佢等啉。</verse>
				<verse number="18">𠊎給 耶路撒冷 、 猶大 該兜城市，連它兜个君王、官員全部啉這酒，使它兜成做荒涼、害人驚到發咄愕、被人嘲謔、咒詛个對象。 (今晡日个情形也係共樣。)</verse>
				<verse number="19">下背所列个也全部應該啉這酒： 埃及 王，佢个官員㧯領袖； 所有 埃及 人㧯住在 埃及 个外國人； 烏斯 所有个君王； 非利士 該兜城市： 亞實基倫 、 迦薩 、 以革倫 所有个君王，㧯 亞實突 賸到个人民； 以東 人、 摩押 人，㧯 亞捫 人； 泰爾 㧯 西頓 所有个君王； 地中海 該片个君王； 底但 、 提瑪 ，㧯 布斯 該兜城市个人； 所有修剪頭那毛來尊敬神明个民族； 阿拉伯 所有个君王； 沙漠地區各部落个族長； 心利 、 以攔 ，㧯 米底亞 所有个君王； 北方遠近所有个君王。 地上各國全部愛啉這酒。最後， 巴比倫 王 也愛啉這酒。</verse>
				<verse number="20"></verse>
				<verse number="21"></verse>
				<verse number="22"></verse>
				<verse number="23"></verse>
				<verse number="24"></verse>
				<verse number="25"></verse>
				<verse number="26"></verse>
				<verse number="27">接等，上主對𠊎講：「你愛㧯佢等講，𠊎 — 上主、萬軍个元帥、 以色列 个上帝命令佢等啉這杯酒，俾佢等酒醉，盡嘔，橫落去，爬毋起來，因為𠊎使佢等堵到戰爭。</verse>
				<verse number="28">若係佢等毋肯對你个手接這杯去啉，你就㧯佢等講：上主 — 萬軍个元帥恁樣講：『你等一定愛啉。』</verse>
				<verse number="29">因為𠊎愛先毀滅𠊎自家个城，佢等還閃得開責罰嗎？佢等閃毋開，一定愛受責罰，因為𠊎愛用戰爭消滅地上所有个人民。𠊎 — 上主、萬軍个元帥恁樣宣佈了。</verse>
				<verse number="30">「 耶利米 啊，你一定愛將𠊎㧯你講个話全部㧯佢等講： 上主愛對天頂像獅仔吼吼滾， 對佢个聖所發出大發譴个聲， 向佢个子民大聲咄， 像踏葡萄个人緊踏緊喊。 佢个聲音傳到天邊海角； 地上所有个人全部聽得到。 上主愛告列國。 佢愛審判萬民， 將壞人交給刀劍。 上主恁樣宣佈了。」</verse>
				<verse number="31"></verse>
				<verse number="32">上主 — 萬軍个元帥恁樣講：災難會來了，對這國到另外一國，像對地極吹一陣大狂風。</verse>
				<verse number="33">該日，對地球个這片到另外一片，到處係被上主㓾掉个人个身屍。無人為佢等悲傷，無人收屍，也無人埋佢等。佢等个身屍分散在地面上，成做糞堆。</verse>
				<verse number="34">人民个領袖啊，𠊎子民个牧者啊，你等愛大聲噭，在地泥下緊碾。你等被人㓾个時間會到了；你等會像羊牯被人㓾 ，</verse>
				<verse number="35">連一個牧者也無法度逃走。</verse>
				<verse number="36">你這兜牧者會大聲盡噭，因為上主愛在大發譴之下消滅你等个國家，使你等安樂个牧場變做荒埔。</verse>
				<verse number="37"></verse>
				<verse number="38">上主離開佢个子民 ，像獅仔離開牠个窿。戰爭个得人驚㧯上主个大發譴使這個國家變做荒埔。</verse>
			</chapter>
			<chapter number="26">
				<verse number="1">約西亞 个孻仔 約雅敬 開始做王統治 猶大 國个時，上主个話臨到 耶利米 。</verse>
				<verse number="2">上主恁樣講：「你愛企在聖殿个庭院肚，將𠊎命令你講个話向該兜對 猶大 各城鎮前來禮拜个群眾宣佈，一句也做毋得漏掉。</verse>
				<verse number="3">若係佢等肯聽，逐儕肯離開邪惡个道路，𠊎就會取消因為佢等个壞行為愛加給佢等个災難。</verse>
				<verse number="4">你愛對佢等講：『上主恁樣講：你等毋遵行𠊎賜給你等个法律，毋聽從𠊎僕人 — 該兜先知个話，毋服從𠊎。𠊎一擺又一擺派𠊎个僕人 — 該兜先知向你等傳話，總係你等毋聽。</verse>
				<verse number="5"></verse>
				<verse number="6">若係你等繼續違背，𠊎就愛毀滅這聖殿，像𠊎以前毀滅 示羅 共樣。世界各國全部會看這城做受咒詛个鑑戒。』」</verse>
				<verse number="7">祭司、先知㧯大眾全部聽到 耶利米 在上主个聖殿肚講這兜話。</verse>
				<verse number="8">耶利米 一講煞，佢等就捉等佢，對佢講：「你真該死！</verse>
				<verse number="9">你做麼介奉上主个名宣佈這聖殿會像 示羅 共樣毀滅，又講這城會成做無人住个荒埔？」所以大眾將 耶利米 包圍起來。</verse>
				<verse number="10">有兜 猶大 國个官員聽到這件事，就對王宮上到上主个聖殿來，在「新門」開庭。</verse>
				<verse number="11">該兜祭司㧯先知向官員㧯大眾告 耶利米 ；佢等講：「這人應該判死刑，因為佢講預言攻擊這城；你等全部親耳聽到了。」</verse>
				<verse number="12">耶利米 就對所有个官員㧯大眾講：「上主派𠊎來宣佈咒詛聖殿㧯這城个這兜話，你等全部聽到了。</verse>
				<verse number="13">這下你等愛棄邪歸正，服從上主 — 你等个上帝。恁樣，佢就會取消本來愛加給你等个災難。</verse>
				<verse number="14">論到𠊎，𠊎在你等手中！你等認為樣般對待𠊎正好，正公當，照恁樣對待𠊎就好了。</verse>
				<verse number="15">毋過你等一定愛知：若係你等㓾𠊎，你等㧯這城，並城肚个人民，全部愛賠償㓾無罪人个血債，因為𠊎確實係上主派來个，愛將這一切个話傳到你等个耳公。」</verse>
				<verse number="16">所以該兜官員㧯大眾對該兜祭司㧯先知講：「這個人無應該判死刑，因為佢係奉上主 — 𠊎等上帝个名向𠊎等講話。」</verse>
				<verse number="17">接等，長老當中有幾儕企起來對大眾講：</verse>
				<verse number="18">「頭擺，在 希西家 王統治 猶大 時， 摩利沙 人先知 彌迦 識向 猶大 人民宣佈，上主 — 萬軍个元帥恁樣講： 錫安 會像田地被人犁揙轉來； 耶路撒冷 會變做荒埔； 起聖殿个山會變做樹林 。</verse>
				<verse number="19">猶大 王 希西家 㧯 猶大 人民敢有將 彌迦 處死呢？ 希西家 敢毋係敬畏上主、到上主面前求佢施恩憐憫？所以上主改變心意，無將所宣佈个災難降在佢等身上。總係這下𠊎等卻想愛惹這個大災難，害死自家！」</verse>
				<verse number="20">(該時，有一個 基列‧耶琳 人 — 示瑪雅 个孻仔 烏利亞 ；這人㧯 耶利米 共樣奉上主个名講預言，攻擊這城㧯這國家。</verse>
				<verse number="21">約雅敬 王㧯佢个士兵、官員，聽到 烏利亞 个話，就想愛㓾佢。 烏利亞 知這個陰謀，驚到趕緊走去 埃及 。</verse>
				<verse number="22">約雅敬 王派 亞革波 个孻仔 以利拿單 帶領一隊人逐到 埃及 去。</verse>
				<verse number="23">佢等捉到 烏利亞 ，將佢帶到 約雅敬 王面前。王用刀仔㓾死佢，將佢个身屍㧒在平民个墓地。)</verse>
				<verse number="24">總係 耶利米 得到 沙番 个孻仔 亞希甘 个保護，無人將佢交給人民處死。</verse>
			</chapter>
			<chapter number="27">
				<verse number="1">約西亞 个孻仔 西底家 做王統治 猶大 初期， 耶利米 對上主領受這个信息：</verse>
				<verse number="2">上主吩咐𠊎用皮帶㧯樹仔做一隻軛，掛在頸筋項。</verse>
				<verse number="3">接等，上主吩咐𠊎，通過該兜來 耶路撒冷 訪問 西底家 王个大使，將軛个信息轉給 以東 王、 摩押 王、 亞捫 王、 泰爾 王，㧯 西頓 王。</verse>
				<verse number="4">上主吩咐𠊎命令逐個大使將佢个話㧯佢等个主人講：上主 — 萬軍个元帥、 以色列 个上帝恁樣講：</verse>
				<verse number="5">「𠊎用大能大力个手創造大地，還有地上个人類㧯所有个動物。𠊎愛將地交給𠊎看做最妥當个人。</verse>
				<verse number="6">這下𠊎愛親身將這兜國家交給𠊎个僕人 巴比倫 王 尼布甲尼撒 ，俾佢統治，連野獸也交給佢管理。</verse>
				<verse number="7">所有个國家全部愛事奉佢㧯佢个孻仔、孫仔，直到佢个帝國衰敗。該時，佢會事奉列國㧯該兜大君王。</verse>
				<verse number="8">「無論㖠邦㖠國，凡係毋肯服事 巴比倫 王 尼布甲尼撒 ，毋肯揹佢加在佢等頸筋項个軛，𠊎就愛用戰爭、飢荒、㧯發瘟刑罰該國，直到𠊎使 尼布甲尼撒 將該國完全消滅。</verse>
				<verse number="9">論到你等，你等做毋得聽信你等个先知、卜卦个、解夢个、算命个、㧯行邪術个話。這兜人喊你等毋好服事 巴比倫 王，</verse>
				<verse number="10">其實佢等向你等講个係假預言，會害你等被人捉走，遠離家鄉；𠊎會逐你等走；你等會被人消滅。</verse>
				<verse number="11">總係，無論㖠國肯揹 巴比倫 王加給它个軛，肯服從佢，𠊎就俾該國个人民平安住在本地，耕種自家个土地。𠊎 — 上主恁樣宣佈了。」</verse>
				<verse number="12">𠊎也向 猶大 王 西底家 講共樣个話：「你等愛揹 巴比倫 王加給你等个軛，服事佢㧯佢个人民；恁樣，你等正有可能生存下去。</verse>
				<verse number="13">你㧯你个人民樣愛使惹起戰爭、飢荒、㧯發瘟來死？上主明明講過，㖠國毋肯服事 巴比倫 王，該國家就會堵到這兜災難。</verse>
				<verse number="14">你等毋好聽信勸你等毋使服事 巴比倫 王个該兜先知。佢等係欺騙你等个。</verse>
				<verse number="15">上主親身講過，佢並無派佢等，係佢等借佢个名講假預言。若係你等聽信佢等，上主就逐走你等；你等㧯騙你等个先知全部會滅亡。」</verse>
				<verse number="16">然後，𠊎去㧯祭司並人民講上主个話：「你等毋好聽信講聖殿个寶物無幾久會對 巴比倫 搬轉來个該兜先知。佢等係向你等講假預言。</verse>
				<verse number="17">你等毋好信佢等个話！你等愛服事 巴比倫 王正會生存下去！這城樣好變做荒埔呢？</verse>
				<verse number="18">若係佢等係真先知，有𠊎个信息，佢等就應當向𠊎 — 上主、萬軍个元帥祈求，求𠊎毋好俾人將留在聖殿、 猶大 王宮、㧯 耶路撒冷 个寶物運到 巴比倫 去。」</verse>
				<verse number="19">( 巴比倫 王 尼布甲尼撒 將 猶大 王 約雅敬 个孻仔 約雅斤 、㧯 猶大 、 耶路撒冷 該兜領袖捉到 巴比倫 去个時，留下聖殿个銅柱、銅海、銅座，也賸到多少其他个寶物。)</verse>
				<verse number="20"></verse>
				<verse number="21">有關留在上主个聖殿肚、 猶大 王个王宮肚、㧯 耶路撒冷 城肚个寶物，上主 — 萬軍个元帥、 以色列 个上帝恁樣講：</verse>
				<verse number="22">「這兜東西全部會被人搬到 巴比倫 ，留在該位，直到𠊎將它兜收轉來个時。該時，𠊎愛將它兜運轉來，放轉原來个地方。𠊎 — 上主恁樣宣佈了。」</verse>
			</chapter>
			<chapter number="28">
				<verse number="1">該年，就係 西底家 做 猶大 王初期个第四年五月， 基遍 人 押朔 个孻仔先知 哈拿尼雅 在上主个聖殿肚㧯𠊎講話。</verse>
				<verse number="2">佢在該兜祭司並眾人面前㧯𠊎講：「上主 — 萬軍个元帥、 以色列 个上帝恁樣講：𠊎已經打碎 巴比倫 王个軛。</verse>
				<verse number="3">兩年內，𠊎愛將 巴比倫 王 尼布甲尼撒 搶到 巴比倫 去个聖殿用品全部運轉來這所在。</verse>
				<verse number="4">𠊎也愛將 猶大 王 約雅敬 个孻仔 約雅斤 ，還有㧯佢共下被人捉到 巴比倫 个 猶大 人全部帶轉來。𠊎確實愛打碎 巴比倫 王个軛。𠊎 — 上主恁樣宣佈了。」</verse>
				<verse number="5">接等，在該兜祭司㧯在聖殿肚企等个眾人面前，先知 耶利米 向先知 哈拿尼雅 講：</verse>
				<verse number="6">「阿愐！願上主照你个話來成就這個事！𠊎希望上主會實現你个預言，將聖殿个寶物㧯所有被人捉去个人對 巴比倫 帶轉這所在。</verse>
				<verse number="7">總係你愛注意聽𠊎向你㧯眾人講个話。</verse>
				<verse number="8">自古以來，在你𠊎以前該兜先知預言有戰爭、災難、並發瘟會臨到盡多地方㧯強國。</verse>
				<verse number="9">所以，預言和平个先知定著愛等到預言實現，人正會承認佢確實係上主所派个先知。」</verse>
				<verse number="10">然後，先知 哈拿尼雅 將先知 耶利米 頸筋項个軛拿下來，拗斷掉，</verse>
				<verse number="11">在眾人面前講：「上主講過，佢愛照樣拗斷 巴比倫 王 尼布甲尼撒 加給各國个軛；佢會在兩年內實現這事。」先知 耶利米 就離開該所在。</verse>
				<verse number="12">先知 哈拿尼雅 將先知 耶利米 頸筋項个軛拗斷後，上主喊 耶利米</verse>
				<verse number="13">去㧯 哈拿尼雅 講：「上主講，雖然你拗得斷樹仔做个軛，總係佢 會另外做一隻鐵个軛來換。</verse>
				<verse number="14">上主 — 萬軍个元帥、 以色列 个上帝講過，佢愛將鐵做个軛加給各國；它兜會服事 巴比倫 王 尼布甲尼撒 。上主講，佢連野獸也愛交給 尼布甲尼撒 王管理。」</verse>
				<verse number="15">先知 耶利米 又向先知 哈拿尼雅 講：「 哈拿尼雅 啊，你聽好！上主並無派你，總係你害這兜人相信你講个花撩。</verse>
				<verse number="16">所以上主講，佢愛消滅你。你今年內就會無命，因為你講悖逆上主个話。」</verse>
				<verse number="17">該年七月，先知 哈拿尼雅 斷真就死掉。</verse>
			</chapter>
			<chapter number="29">
				<verse number="1">先知 耶利米 寫一封信仔給該兜對 耶路撒冷 被 尼布甲尼撒 捉去 巴比倫 還生个長老，並祭司、先知、㧯民眾。</verse>
				<verse number="2">這封信仔係在 約雅斤 王 、太后、該兜太監、 猶大 地方㧯 耶路撒冷 个官員、打鐵師傅，㧯技術人員全部離開 耶路撒冷 以後寫个。</verse>
				<verse number="3">該時， 猶大 王 西底家 派 沙番 个孻仔 以利亞撒 㧯 希勒家 个孻仔 基瑪利 到 巴比倫 去見 尼布甲尼撒 王。這封信仔係交給佢兩儕帶去个。信仔个內容係恁樣寫：</verse>
				<verse number="4">「上主 — 萬軍个元帥、 以色列 个上帝㧯所有對 耶路撒冷 被佢捉到 巴比倫 去个人恁樣講：</verse>
				<verse number="5">『你等愛起屋，好住下來；愛耕種，好食田園个出產。</verse>
				<verse number="6">你等愛結婚，𫱔子女；你等个子女也愛結婚，𫱔子女，使你等在該位會興旺，人口增加，毋會減少。</verse>
				<verse number="7">你等愛為𠊎逐你等去个該兜城市謀福利，為它兜个繁榮向𠊎祈求；該兜所在有平安，你等正會有平安。</verse>
				<verse number="8">𠊎 — 上主、萬軍个元帥、 以色列 个上帝警告你等：毋好俾你等當中該兜先知，抑係自誇會卜卦个人騙走；也毋好相信佢等發夢看到个。</verse>
				<verse number="9">佢等借𠊎个名講假預言來騙你等；𠊎並無派佢等。𠊎 — 上主恁樣宣佈了。』</verse>
				<verse number="10">「上主恁樣講：『經過 巴比倫 統治七十年以後，𠊎會顧念你等，實現𠊎對你等所講恩惠个話，將你等帶轉這所在。</verse>
				<verse number="11">只有𠊎知𠊎為你等安排个計劃：係平安，毋係災難；𠊎愛使你等有前途有盼望。</verse>
				<verse number="12">該時，你等會求喊𠊎，向𠊎祈禱，𠊎也會聽你等个祈求。</verse>
				<verse number="13">你等尋𠊎，一定尋得到；你等若專心尋𠊎，</verse>
				<verse number="14">𠊎保證俾你等尋到。你等雖然被𠊎捉走，𠊎愛俾你等轉故鄉。𠊎愛對逐你等去个各國各所在將你等集合起來，帶你等轉到你等被𠊎捉走所離開个故鄉。𠊎 — 上主恁樣宣佈了。』</verse>
				<verse number="15">「因為你等講：『上主在 巴比倫 有為𠊎等興起先知』，</verse>
				<verse number="16">所以，有關 大衛 王室个君王㧯該兜留在這城、無㧯你等共下被人捉去个同胞，</verse>
				<verse number="17">上主 — 萬軍个元帥恁樣講：『𠊎愛使佢等堵到戰爭、飢荒㧯發瘟。𠊎愛使佢等像壞到食毋得个無花果。</verse>
				<verse number="18">𠊎愛用戰爭、飢荒㧯發瘟來逐佢等。無論𠊎逐佢等到麼介所在去，世界各國个人全部會當惱佢等，將佢等看做受咒詛，害人發咄愕，被人看輕、侮辱个對象；</verse>
				<verse number="19">因為佢等毋聽從𠊎个話。𠊎一擺又一擺派𠊎个僕人 — 該兜先知向佢等傳話，總係佢等完全毋聽。</verse>
				<verse number="20">所以，𠊎對 耶路撒冷 逐走，被人捉到 巴比倫 去个人啊，你等愛注意聽𠊎 — 上主个話。』</verse>
				<verse number="21">「有關借上主个名講假預言騙你等該 哥賴雅 个孻仔 亞哈 ，㧯 瑪西雅 个孻仔 西底家 ，上主 — 萬軍个元帥、 以色列 个上帝講：佢愛將這兩儕交給 巴比倫 王 尼布甲尼撒 手中。 尼布甲尼撒 會在你等面前將佢等處死。</verse>
				<verse number="22">你這兜對 猶大 被人捉到 巴比倫 去个人愛咒詛別人个時，你等會講：『願上主對付你，像佢對付被 巴比倫 王生生燒死个 西底家 㧯 亞哈 一樣！』</verse>
				<verse number="23">因為佢等在 以色列 犯悖逆个罪 — 㧯鄰舍个𡜵娘行姦淫，又借上主个名講花撩。上主知佢等个行為，又親目珠看到佢等个所做 。上主恁樣宣佈了。」</verse>
				<verse number="24">上主 — 萬軍个元帥、 以色列 个上帝喊𠊎傳話給 尼希蘭 人 示瑪雅 。 示瑪雅 識用自家个名寫信仔給 瑪西雅 个孻仔祭司 西番雅 、㧯其他祭司、並 耶路撒冷 所有个人民。佢在信仔底背向 西番雅 恁樣講：</verse>
				<verse number="25"></verse>
				<verse number="26">「上主已經指派你做祭司來代 耶何耶大 ；你這下係聖殿个監督。你个責任係處罰逐個封自家做先知个狂人，用鐵鍊鎖等，用枷將佢等个頸筋卡起來。</verse>
				<verse number="27">這下，你等當中有一個 亞拿突 人 耶利米 ，自家封自家做先知；你做麼介毋盡責任處罰佢呢？</verse>
				<verse number="28">佢識寫信仔㧯𠊎這兜在 巴比倫 个同胞講，𠊎等流亡个時間會當長，所以吩咐𠊎等愛起屋，好住下來；也愛耕種，好食田園个出產。」</verse>
				<verse number="29">祭司 西番雅 將這封信讀給𠊎聽。</verse>
				<verse number="30">上主就吩咐𠊎</verse>
				<verse number="31">寫信仔給所有被人捉去 巴比倫 个同胞，提起 尼希蘭 人 示瑪雅 个事，講：「𠊎 — 上主愛責罰 尼希蘭 人 示瑪雅 㧯佢个子子孫孫。𠊎並無派佢，總係佢封自家做先知，向你等講話，喊你等聽信佢个花撩。佢毋會有子孫好住在你等當中，也無可能在生前看到𠊎賜給𠊎子民个福氣，因為佢講悖逆上主个話。𠊎 — 上主恁樣宣佈了。」</verse>
				<verse number="32"></verse>
			</chapter>
			<chapter number="30">
				<verse number="1">上主个話臨到 耶利米 ，講：</verse>
				<verse number="2">「上主 — 以色列 个上帝恁樣講：你愛將𠊎㧯你講過所有个話全部寫在書底背，</verse>
				<verse number="3">因為時間會到，𠊎个子民對 猶大 㧯 以色列 被人捉走个，𠊎愛俾佢等轉到故鄉，重整家園。𠊎愛帶佢等轉到𠊎賜給佢等祖先个土地；佢等會重新得到這土地。𠊎 — 上主恁樣宣佈了。」</verse>
				<verse number="4">上主對 以色列 㧯 猶大 个人民講：</verse>
				<verse number="5">𠊎聽到會俾人愊愊掣个聲， 這係得人驚个聲，無平安个聲！</verse>
				<verse number="6">去問看仔，係毋係有男人愛𫱔細人仔？ 做麼介𠊎看到逐個男人用雙手揇等肚笥， 像係愛𫱔个婦人家？ 做麼介逐個男人面色癧青呢？</verse>
				<verse number="7">慘了！得人驚个日仔會到了！ 吂識有恁樣个日仔； 這係𠊎子民 雅各 受難个時期， 總係佢等一定會得救。</verse>
				<verse number="8">上主 — 萬軍个元帥恁樣講：「到該日，𠊎愛拗斷掛在佢等頸筋个軛，挷斷佢等身上个鎖鍊，佢等毋會再做外國人个奴才。</verse>
				<verse number="9">佢等愛事奉𠊎 — 上主、佢等个上帝，㧯𠊎為佢等興起來承接 大衛 个王。</verse>
				<verse number="10">𠊎个僕人 雅各 啊，毋使驚； 以色列 人啊，毋使著驚。 𠊎愛對遠遠个地方， 你等被人捉去个國家將你等个子孫救出來。 雅各 愛轉來故鄉， 安居樂業，無驚麼介。</verse>
				<verse number="11">因為𠊎㧯你共下，愛拯救你。 𠊎愛將𠊎逐你去个該兜國家完全消滅； 總係𠊎毋會消滅你。 𠊎愛用公正管教你， 做毋得毋責罰你。 𠊎 — 上主恁樣宣佈了。」</verse>
				<verse number="12">上主恁樣講： 你个受傷無辦法醫， 傷口無法度醫好了。</verse>
				<verse number="13">你个案仔無人會代你出頭， 像無藥好膏，無藥好醫。</verse>
				<verse number="14">愛惜你个人 全部毋記得你； 佢等毋會再來關心你。 𠊎愛像攻擊敵人恁樣攻擊你， 當殘忍來責罰你； 因為你當積惡，罪當重。</verse>
				<verse number="15">做麼介還為你个受傷緊噭？ 你个傷口無法度醫好了。 因為你當積惡，罪當重， 𠊎正恁樣責罰你。</verse>
				<verse number="16">總係，吞食你个，會被人食掉； 你所有个敵人會被人捉走。 欺負你个，會被人欺負； 搶你个，會被人搶。</verse>
				<verse number="17">雖然你个敵人講： 「 錫安 係被人㧒掉个，無人關心个」； 總係𠊎愛醫你个傷口， 使你好起來。 𠊎 — 上主恁樣宣佈了。</verse>
				<verse number="18">上主恁樣講： 看啊，𠊎愛復興 雅各 个帳篷， 也愛憐憫佢个家園； 𠊎愛使佢重建 耶路撒冷 ， 在原來个地方起王宮。</verse>
				<verse number="19">佢等會發出感謝个歌聲； 佢等會歡喜快樂。 𠊎愛使佢等个人口增加，毋會減少。 𠊎愛使佢等有尊榮，毋會再受侮辱。</verse>
				<verse number="20">佢等个子孫會像老頭擺恁蒙恩， 佢等个國家定著會在𠊎面前企起來； 𠊎愛責罰所有欺負佢等个人。</verse>
				<verse number="21">佢等自家人做統治者； 佢等个領袖係本族人。 𠊎喊佢到𠊎面前來， 佢就來親近𠊎； 無受邀請个， 麼人敢自家來接近𠊎呢？ 佢等愛做𠊎个子民； 𠊎愛做佢等个上帝。 𠊎 — 上主恁樣宣佈了。</verse>
				<verse number="22"></verse>
				<verse number="23">看啊，上主个大發譴會像狂風發生，像龍捲風恁樣在壞人頭那頂捩捩轉。上主个大發譴毋會收轉去，直到佢完成自家所有个計劃。該時，你等就會明白這事。</verse>
				<verse number="24"></verse>
			</chapter>
			<chapter number="31">
				<verse number="1">上主恁樣講：「到該時，𠊎愛做 以色列 逐族个上帝；佢等愛做𠊎个子民。</verse>
				<verse number="2">在曠野，𠊎憐憫該兜無被刀劍㓾死个人。在 以色列 人盡想安息个時，</verse>
				<verse number="3">𠊎對遠遠个地方 向佢等 顯現。 以色列 人啊，𠊎永遠痛惜你等，𠊎還愛用不變个慈愛痛惜你等。</verse>
				<verse number="4">𠊎愛重新建立你等。你等會再拿起鈴鼓，大聲唱歌跳舞。</verse>
				<verse number="5">你等會在 撒馬利亞 个山頂重新種葡萄；種个人會享受到園肚个出產。</verse>
				<verse number="6">有一日，守望个人會在 以法蓮 山頂大聲喊：『來噢！𠊎等到 錫安 去朝見上主 — 𠊎等个上帝。』」</verse>
				<verse number="7">上主恁樣講： 你等愛為 以色列 大聲唱歌， 為最偉大个國家大聲盡喊， 你等愛唱頌讚个歌講： 「上主啊，求你拯救你个子民， 就係 以色列 賸到个人民。」</verse>
				<verse number="8">看啊，𠊎愛對北方將佢等帶轉來， 對天涯海角將佢等聚集起來。 瞙目个、跛腳个、有身項个、𫱔細人仔个， 也全部會弛崗打陣共下轉來。</verse>
				<verse number="9">看啊，𠊎个子民會一路噭等轉來； 佢等會跈等𠊎行，透路祈禱。 𠊎愛帶佢等經過溪水邊， 𢱋佢等行平平个直路， 使佢等毋會跌倒。 𠊎係 以色列 个阿爸； 以法蓮 係𠊎个長子。</verse>
				<verse number="10">上主講： 萬國啊，你等愛注意聽𠊎个話， 你等愛在遠遠个海島傳𠊎个話。 𠊎逐散 以色列 — 𠊎个子民， 總係𠊎愛再聚集佢等； 𠊎愛保護佢等，像牧人保護羊群。</verse>
				<verse number="11">𠊎愛救贖 雅各 个後代， 對強國手中將佢等救出來。</verse>
				<verse number="12">佢等會轉來，在 錫安 山頂歡喜唱歌； 佢等會滿面歡喜，享受𠊎豐富个恩惠： 就係五榖、新酒、橄欖油、牛羊。 佢等會像水源充足个田園； 毋會再愁麼介、欠麼介。</verse>
				<verse number="13">該時，細妹仔會歡喜跳舞； 老人家㧯後生人會共下快樂。 𠊎愛使佢等个悲傷變做歡喜， 𠊎愛安慰佢等，使佢等个憂愁變做快樂。</verse>
				<verse number="14">𠊎愛使該兜祭司有豐足个食物，心滿意足； 𠊎愛使𠊎个子民全無欠缺。 𠊎 — 上主恁樣宣佈了。</verse>
				<verse number="15">上主恁樣講： 在 拉瑪 有聽到噦天噦地个噭聲； 係 蕾潔 為姖个子女大噭，毋肯接受安慰， 因為佢等全部無掉去了。</verse>
				<verse number="16">上主恁樣講： 毋好噭了！拭燥目汁！ 你个辛苦會得到報賞； 佢等會對敵人个國家轉來。</verse>
				<verse number="17">你个前途充滿希望； 你个子女會轉來故鄉。 𠊎 — 上主恁樣宣佈了。</verse>
				<verse number="18">𠊎聽到 以法蓮 悲傷講： 上主啊，𠊎等就像吂教乖个細牛牯， 總係你訓練𠊎等，使𠊎等順服。 求你帶𠊎等轉來，𠊎等愛歸向你， 因為你係上主 — 𠊎等个上帝。</verse>
				<verse number="19">雖然𠊎等悖逆離開你， 𠊎等即時就想愛回頭。 你个管教使𠊎等後悔，悲傷到捶心肝； 𠊎等因為後生時个罪感覺盡見笑、受到侮辱。</verse>
				<verse number="20">上主講： 以法蓮 啊，你係𠊎最惜个孻仔， 係𠊎个心肝寶貝。 𠊎逐擺責備你， 還係盡顧念你 。 𠊎惜你惜入骨； 𠊎一定會憐憫你。</verse>
				<verse number="21">你愛插好指路標，頓好路牌； 你愛尋你行過个該條大路。 𠊎所惜个 以色列 人啊，好轉來了！ 轉到你等个故鄉！</verse>
				<verse number="22">悖逆个人啊，你捩去捩轉愛到幾時呢？ 𠊎在地上行一項新个事： 婦女愛保護男人。</verse>
				<verse number="23">上主 — 萬軍个元帥、 以色列 个上帝恁樣講：「𠊎俾捉來个子民轉到故鄉个時，佢等會在 猶大 國內逐隻城市再講： 『公義个住所， 錫安 聖山啊， 願上主賜福給你。』</verse>
				<verse number="24">猶大 个土地㧯國內逐隻城市將來會有盡多个農民、㧯帶等羊群个牧羊人共下住在該位。</verse>
				<verse number="25">𠊎愛使痶个人精神恢復，使憂悶个人心滿意足。</verse>
				<verse number="26">因為恁樣人民會講 ：『𠊎睡醒个時，感覺睡到盡鬆爽。』</verse>
				<verse number="27">「𠊎 — 上主講，日仔會到，𠊎愛使 以色列 㧯 猶大 个人口增加，頭牲興旺。</verse>
				<verse number="28">𠊎頭擺樣般用心將佢等挷掉、拆掉、推翻、破壞，並降災；𠊎也愛樣般用心栽培佢等、建立佢等。</verse>
				<verse number="29">該時，人毋會再講： 『爺𡟓食酸葡萄， 卻酸到子女个牙齒。』</verse>
				<verse number="30">反轉，麼人食酸葡萄，就酸到麼人个牙齒；逐儕愛因為自家个罪來死。」</verse>
				<verse number="31">上主講：「日仔會到，𠊎愛㧯 以色列 並 猶大 个人民立新个約。</verse>
				<verse number="32">毋像𠊎牽等佢等祖先个手帶領佢等出 埃及 个時，㧯佢等所立个約。在該契約中，𠊎係佢等个老公，總係佢等違背該約。</verse>
				<verse number="33">到該日以後，𠊎愛㧯 以色列 人民立个新約係恁樣：𠊎愛將𠊎个法律放入佢等个心肚，寫在佢等个心上。𠊎愛做佢等个上帝，佢等愛做𠊎个子民。</verse>
				<verse number="34">佢等毋會再教鄰舍㧯自家个兄弟講：『愛認識上主』，因為對最細个到最大个，佢等攏總會認識𠊎。𠊎愛赦免佢等个罪，毋會再記得佢等个過犯。𠊎 — 上主恁樣宣佈了。」</verse>
				<verse number="35">上主指定日頭在日時頭發光， 派月光星仔做暗晡頭个光。 佢攪動大海，使海浪吼吼滾。 佢个名係上主 — 萬軍个元帥。</verse>
				<verse number="36">佢講：若係這兜定律在𠊎面前廢掉， 以色列 个後代也就在𠊎面前 永遠毋會成做國家。</verse>
				<verse number="37">上主又恁樣講： 若係人有辦法量出天有幾高， 測出地个根基有幾深， 𠊎正會因為 以色列 个後代 一切所行个來豁掉佢等。</verse>
				<verse number="38">上主講：「看啊，日仔會到，歸座 耶路撒冷 城，愛為𠊎重新建造，對 哈楠業樓 到 角門 。</verse>
				<verse number="39">城个西片還愛向外量到 迦立 山，又捩到 歌亞 。</verse>
				<verse number="40">歸隻堆等身屍㧯塵灰个山壢，還有 汲淪 溪到東片 馬門 轉角一切个荒地，全部愛分別做聖，歸入上主个聖城。這城絕對毋會挷掉，永遠毋會橫掉。」</verse>
			</chapter>
			<chapter number="32">
				<verse number="1">西底家 做 猶大 王个第十年，也係 尼布甲尼撒 王統治 巴比倫 个第十八年，上主向 耶利米 講話。</verse>
				<verse number="2">該時， 巴比倫 王个軍隊堵好當圍攻 耶路撒冷 ，先知 耶利米 關在 猶大 王宮禁衛隊个拘留所。</verse>
				<verse number="3">猶大 王 西底家 將佢關起來，責備佢講：「你做麼介預言，上主恁樣講：『𠊎愛將這城交在 巴比倫 王手中，俾佢佔領。</verse>
				<verse number="4">猶大 王 西底家 無辦法對 巴比倫 人个手中走掉；一定會將佢交在 巴比倫 王个手中，使佢面對面㧯 尼布甲尼撒 講話。</verse>
				<verse number="5">西底家 會被人帶到 巴比倫 ，留在該位，直到𠊎責罰 佢个時。若係你等㧯 巴比倫 人相㓾，你等也無辦法打贏。𠊎 — 上主恁樣宣佈了。』」</verse>
				<verse number="6">上主㧯𠊎講，</verse>
				<verse number="7">吾叔 沙龍 个孻仔 哈拿默 會來看𠊎，愛𠊎將佢在 亞拿突 城該垤田地買下來；因為𠊎係佢个至親，𠊎有贖轉來个義務㧯買个權利。</verse>
				<verse number="8">斷真，就像上主講个，吾叔个孻仔 哈拿默 來到禁衛隊个拘留所，㧯𠊎講：「𠊎在 便雅憫 地區 亞拿突 該垤地，求你買下來，因為你有繼承㧯贖轉來个權利。」恁樣，𠊎就知這件事就係上主講个話。</verse>
				<verse number="9">𠊎就向吾叔个孻仔 哈拿默 買 亞拿突 城該垤地，秤十七垤銀仔給佢。</verse>
				<verse number="10">𠊎請人做證，簽地契、封好、秤銀仔。</verse>
				<verse number="11">然後，𠊎將有標題㧯條件个地契，一份封好，一份打開，</verse>
				<verse number="12">在吾叔个孻仔 哈拿默 㧯簽名在地契頂高个證人、並禁衛隊拘留所底背所有 猶大 人面前，交給 瑪西雅 个孫仔 尼利亞 个孻仔 巴錄 。</verse>
				<verse number="13">𠊎在佢等面前向 巴錄 講：</verse>
				<verse number="14">「上主 — 萬軍个元帥、 以色列 个上帝命令你將這兩份地契，封好个㧯打開个全部囥在缶罌肚，好保存久久。</verse>
				<verse number="15">因為上主 — 萬軍个元帥、 以色列 个上帝恁樣講過，人會重新在這所在買屋、買田㧯葡萄園。」</verse>
				<verse number="16">𠊎將地契交給 尼利亞 个孻仔 巴錄 以後，就向上主祈禱講：</verse>
				<verse number="17">「至高个上主啊，你用自家个大能大力創造天地；對你來講，無做毋到个事。</verse>
				<verse number="18">你識用不變个慈愛痛惜千萬人；總係你也因為阿爸所犯个罪報應子女。你係全能、至大个上帝；你个名係上主 — 萬軍个元帥。</verse>
				<verse number="19">你个計劃偉大，你个行事大有權能；你目瞋瞋看人个一舉一動，照逐儕所行所做報應佢。</verse>
				<verse number="20">你識在 埃及 行神蹟奇事；你也在 以色列 㧯列國當中行神蹟奇事直到今晡日。所以，你在世間有大名聲。</verse>
				<verse number="21">你用神蹟奇事使𠊎等个敵人驚到愊愊掣，又用大能大力帶你个子民 以色列 出 埃及 。</verse>
				<verse number="22">你遵守自家向佢等祖先所立个約，將這流乳㧯蜜當肥个土地賜給佢等。</verse>
				<verse number="23">總係佢等一入來，得到這垤土地以後，就毋順從你个命令，毋遵行你个教訓。你命令佢等做个，佢等全部毋做，所以你使佢等受這一切个災難。</verse>
				<verse number="24">「看啊， 巴比倫 人已經起好攻城个土堆，開始攻打。這城會因為戰爭、飢荒、㧯發瘟來陷落在敵人手中。你所講个已經實現，你也親目看到了。</verse>
				<verse number="25">至高个上主啊，雖然 巴比倫 人差毋多會攻下這城，你還係命令𠊎在證人面前用銀仔來買該垤田地。」</verse>
				<verse number="26">所以上主對𠊎講：</verse>
				<verse number="27">「𠊎係上主，係全人類个上帝。對𠊎來講敢有做毋到个事？</verse>
				<verse number="28">𠊎愛將這城交在 巴比倫 王 尼布甲尼撒 㧯佢帶領个軍隊手中，佢等會佔領這城。</verse>
				<verse number="29">攻城个 巴比倫 人會入城，放火燒這城，連 以色列 人在屋頂向 巴力 燒過香、向神明獻過酒來惹𠊎發譴該兜屋舍，全部會燒掉。</verse>
				<verse number="30">以色列 人㧯 猶大 人從細一直做𠊎看做壞个事；佢等當會惹𠊎發譴。</verse>
				<verse number="31">對 耶路撒冷 建城以來，人民也一直惹𠊎受氣、大發譴。𠊎已經決定毀滅這城；</verse>
				<verse number="32">因為 以色列 㧯 猶大 个人民攏總做當邪惡个事惹𠊎發譴，連佢等个君王、領袖、祭司、先知也共樣；特別係 猶大 人㧯 耶路撒冷 人。</verse>
				<verse number="33">佢等悖逆𠊎，變面毋認𠊎；𠊎早就教了又教，總係佢等毋聽，毋肯受教。</verse>
				<verse number="34">佢等將𠊎當惱个偶像放在敬拜𠊎个聖殿肚，來打垃圾聖殿。</verse>
				<verse number="35">佢等在 欣嫩子 山壢為 巴力 造祭壇，拿自家个子女燒給邪神 摩洛 。𠊎並無命令佢等做這兜事，也無想到佢等會做這恁邪惡个事，害 猶大 人民犯罪。」</verse>
				<verse number="36">上主 — 以色列 个上帝對𠊎恁樣講：「 耶利米 啊，你等講戰爭、飢荒、㧯發瘟會害這城陷在 巴比倫 王手中。這下，你注意聽𠊎講。</verse>
				<verse number="37">𠊎識在發閼、受氣、㧯大發譴中將𠊎个子民逐到各國去。這下𠊎愛對該兜所在將佢等聚集起來，𢱋佢等轉來，在這所在安居樂業。</verse>
				<verse number="38">該時，佢等愛做𠊎个子民，𠊎愛做佢等个上帝。</verse>
				<verse number="39">𠊎愛賜給佢等專心一意，一生人敬畏𠊎，使佢自家㧯子孫得到幸福。</verse>
				<verse number="40">𠊎愛㧯佢等立永遠个約，一直賜福給佢等，使佢等專心敬畏𠊎，毋會再離開𠊎。</verse>
				<verse number="41">𠊎會歡歡喜喜賜福給佢等，實實在在、全心全意將佢等在這垤土地上釘根。」</verse>
				<verse number="42">上主恁樣講：「𠊎識使這子民受這一切个大災難，𠊎也愛照𠊎个應許將所有幸福賜給佢等。</verse>
				<verse number="43">你等講，這垤土地會荒掉，無人，也無動物；已經交在 巴比倫 人手中。總係𠊎講，將來會有人重新在這所在買田地。</verse>
				<verse number="44">人愛在 便雅憫 地區逐所在、 耶路撒冷 四周圍个城市、 猶大 逐城、山區个鄉鎮、西片高原个村莊、㧯 猶大 南部逐城市，用銀仔買賣田地，簽地契，揝印仔封地契，請人做證。𠊎愛使𠊎个子民重新得到佢等个產業。𠊎 — 上主恁樣宣佈了。」</verse>
			</chapter>
			<chapter number="33">
				<verse number="1">耶利米 還關在禁衛隊个拘留所个時，上主第二擺㧯佢講。</verse>
				<verse number="2">創造大地个係上主，使萬有成形又得到建立个也係上主。佢个名係上主。佢恁樣講：</verse>
				<verse number="3">「你求𠊎，𠊎就應你；𠊎愛將你所毋知該兜當大又難明白个事㧯你講。</verse>
				<verse number="4">𠊎 — 上主、 以色列 个上帝講： 耶路撒冷 城肚个屋㧯 猶大 个王宮，為到抵擋敵人攻城个土堆㧯刀劍，就被人拆掉。</verse>
				<verse number="5">有兜人出城去對抗 巴比倫 人； 巴比倫 人愛將𠊎在大發譴之下所㓾死个人个身屍堆滿這兜屋 。因為城肚个人所做个壞事，𠊎就揞面毋看顧這城。</verse>
				<verse number="6">總係，看啊！𠊎愛醫治這城个人民，使佢等恢復健康。𠊎還愛俾佢等享受和平㧯安全。</verse>
				<verse number="7">𠊎愛將被人捉走个 猶大 㧯 以色列 人民帶轉故鄉，重整家園；</verse>
				<verse number="8">𠊎愛洗淨佢等得罪𠊎所犯一切个罪過，赦免佢等悖逆𠊎个一切个罪惡。</verse>
				<verse number="9">耶路撒冷 會使𠊎有好名聲，帶給𠊎快樂、尊重㧯榮光。世界各國聽到𠊎賜福給 耶路撒冷 人民，使這城重新繁榮个時，全部會驚到愊愊掣。」</verse>
				<verse number="10">上主恁樣講：「你等全部講這垤土地會成做荒地，無人，也無動物。無毋著！ 猶大 逐座城㧯 耶路撒冷 个大街小巷全部會荒掉，無動物，也無人住。總係你等愛在這兜所在再一擺聽到</verse>
				<verse number="11">有歡喜快樂个聲、新郎㧯新娘个聲。你等也會聽到人在聖殿肚獻感恩祭个歌聲；佢等會唱： 『愛感謝上主 — 萬軍个元帥！ 因為上主係至善； 佢个慈愛永遠長存。』 𠊎愛俾你等轉到故鄉，重整家園。𠊎 — 上主恁樣宣佈了。」</verse>
				<verse number="12">上主 — 萬軍个元帥恁樣講：「在這垤荒廢、無人無動物个土地，所有个城市定著會再有牧場，牧人使羊群在該位休息。</verse>
				<verse number="13">在山區个鄉鎮、西片高原个村莊、 猶大 南部逐所在、 便雅憫 地區逐所在、 耶路撒冷 周圍个村莊、㧯 猶大 地逐座城，牧人會再一擺點算佢等个羊。𠊎 — 上主恁樣宣佈了。」</verse>
				<verse number="14">上主講：「看啊，時節會到了，𠊎愛實現𠊎對 以色列 㧯 猶大 人民好个應許。</verse>
				<verse number="15">該時，𠊎愛為 大衛 興起正義个『樹枝』；佢會在這片土地用公平正義來統治國家。</verse>
				<verse number="16">該時， 猶大 人民一定會得救， 耶路撒冷 人會安居樂業。這城會被人安做『上主 — 𠊎等个正義』。</verse>
				<verse number="17">𠊎 — 上主恁樣應許： 大衛 个後代會永遠有人坐 以色列 个王位；</verse>
				<verse number="18">做祭司个 利未 人也一定會有人在𠊎面前獻燒化祭、素祭，日日辦理獻祭个事。」</verse>
				<verse number="19">上主㧯 耶利米 講：</verse>
				<verse number="20">「𠊎 — 上主恁樣講：你等若係有辦法廢掉𠊎㧯日時頭並暗晡頭立个約，使日夜無照時運轉，</verse>
				<verse number="21">恁樣，𠊎㧯𠊎个僕人 大衛 立个約正做得廢掉，使佢个後代無人坐王位；還有𠊎㧯做祭司服事𠊎个 利未 人立个約，正做得廢掉。</verse>
				<verse number="22">𠊎愛使𠊎僕人 大衛 个後代㧯做祭司服事𠊎个 利未 人數目增加，像天頂个星仔無法度算，像海滣个沙仔無法度量。」</verse>
				<verse number="23">上主㧯 耶利米 講：</verse>
				<verse number="24">「你知麼？有人恁樣講：『上主㧒掉自家揀選个兩隻國家 — 以色列 㧯 猶大 。』這兜人恁樣藐視𠊎个子民，無將佢等看做國家。</verse>
				<verse number="25">總係，𠊎 — 上主恁樣講：𠊎若無㧯日夜立約，無設立天地个定律，</verse>
				<verse number="26">𠊎就會拒絕 雅各 个後代㧯𠊎僕人 大衛 个後代；無對 大衛 个後代選立君王，管理 亞伯拉罕 、 以撒 㧯 雅各 个後代。總講，𠊎愛憐憫佢等，俾佢等轉到故鄉，重整家園。」</verse>
			</chapter>
			<chapter number="34">
				<verse number="1">巴比倫 王 尼布甲尼撒 㧯佢个軍隊，並佢所統治各國逐族个軍隊在圍攻 耶路撒冷 㧯周圍城鎮个時，上主向 耶利米 講話。</verse>
				<verse number="2">上主 — 以色列 个上帝吩咐佢去㧯 猶大 王 西底家 講：「𠊎 — 上主愛將這城交給 巴比倫 王；佢愛放火燒城。</verse>
				<verse number="3">你絕對走毋掉；你會被人捉到，交在 巴比倫 王手中。你會親目看到佢，佢會面對面㧯你講話，然後你一定會被人帶到 巴比倫 去。</verse>
				<verse number="4">「 猶大 王 西底家 啊，你還愛聽𠊎 — 上主个話！論到你，𠊎㧯你講：你毋會被人㓾死；</verse>
				<verse number="5">你會平安過身。人會埋葬你，為你燒香料，像你个祖先，就係該兜在你以前个王，有人埋葬佢等，為佢等燒香料共樣。人會為你唱哀歌講：『唉哉！𠊎等个王啊！』𠊎 — 上主恁樣宣佈了。」</verse>
				<verse number="6">所以，先知 耶利米 在 耶路撒冷 將這兜話㧯 猶大 王 西底家 講。</verse>
				<verse number="7">該時， 巴比倫 王帶領个軍隊堵好在圍攻 耶路撒冷 㧯 猶大 賸到个兩座城 — 拉吉 㧯 亞西加 ，因為 猶大 有設防衛个城只賸到這兩座。</verse>
				<verse number="8">西底家 王識㧯 耶路撒冷 人民立約，發出『自由个宣言』。</verse>
				<verse number="9">希伯來 奴才，無論男女，全部愛放走，做毋得使任何一個 猶大 同胞做奴才。</verse>
				<verse number="10">所有簽約个人民㧯官員全部同意放自家个奴才走，做毋得再管制佢等。這兜人全部有守約，將奴才放走。</verse>
				<verse number="11">總係後來佢等又變主意，將該兜奴才捉轉來，再強迫佢等做奴才。</verse>
				<verse number="12">所以，上主又向 耶利米 講話。</verse>
				<verse number="13">上主 — 以色列 个上帝喊佢㧯人民恁樣講：「𠊎對 埃及 — 你等祖先做奴才个所在 — 將佢等搶救出來个時，㧯佢等立約，講：</verse>
				<verse number="14">『若係有一個 希伯來 同胞賣給你，服事你六年，第七年你愛俾佢自由出去。』總係你等个祖先毋搭𠊎，毋聽𠊎个話。</verse>
				<verse number="15">這下，你等已經悔改，做𠊎所歡喜个事，逐儕向同胞宣佈愛俾所有个人自由，又來到𠊎面前，在敬拜𠊎个聖殿肚立約。</verse>
				<verse number="16">總係你等又改變主意，侮辱𠊎。你等將該兜被人放走、得到自由个奴才捉轉來，再迫佢等做奴才。</verse>
				<verse number="17">「所以，𠊎 — 上主講：你等無服從𠊎，無照向同胞、鄰舍所宣佈个俾所有个人自由。看啊，𠊎向你等宣佈另外一種个『自由』，𠊎愛由在你等堵到戰爭、發瘟、㧯飢荒來死。𠊎愛使天下萬國看到你等所堵到个來著驚。</verse>
				<verse number="18">猶大 㧯 耶路撒冷 个領袖、宮廷个官員、祭司、並所有這地个眾民，識㧯𠊎立過約；佢等將細牛牯剖做兩析，對中央行過去，表示立約成立。總係佢等破壞𠊎个約，無遵守這約个規定，所以𠊎愛將佢等剖開，像佢等剖開細牛牯一樣。</verse>
				<verse number="19"></verse>
				<verse number="20">𠊎愛將佢等交給想愛㓾佢等个敵人手中；佢等个身屍會成做飛鳥㧯走獸个食物。</verse>
				<verse number="21">𠊎愛將 猶大 王 西底家 㧯佢个官員全部交給想愛㓾佢等个敵人手中；𠊎愛將佢等交給這下暫時撤退个 巴比倫 王軍隊手中。</verse>
				<verse number="22">𠊎愛下令 巴比倫 軍隊開轉來這城。佢等會攻擊，佔領，燒掉這城。𠊎愛使 猶大 逐座城市全部荒廢，無人住。𠊎 — 上主恁樣宣佈了。」</verse>
			</chapter>
			<chapter number="35">
				<verse number="1">約西亞 个孻仔 約雅敬 做 猶大 王个時，上主對 耶利米 講：</verse>
				<verse number="2">「你去 利甲 族人該位，請佢等過來，並帶佢等到聖殿个一隻房間肚，給佢等酒啉。」</verse>
				<verse number="3">所以𠊎將 利甲 全族个人 — 哈巴洗尼雅 个孫仔， 雅利米雅 个孻仔 雅撒尼亞 㧯佢所有个兄弟㧯孻仔，</verse>
				<verse number="4">全部帶入上主个聖殿。𠊎𢱋佢等到 伊基大利 个孻仔神人 哈難 該兜孻仔个房間肚去。該隻房間係在 沙龍 个孻仔 — 掌門个 瑪西雅 个房間頂高，在其他官員房間个旁邊。</verse>
				<verse number="5">然後𠊎將酒杯㧯裝滿酒个酒壺放在 利甲 族人面前，對佢等講：「請啉酒！」</verse>
				<verse number="6">總係佢等講：「𠊎等毋啉酒。𠊎等个祖先 利甲 个孻仔 約拿達 命令𠊎等㧯𠊎等个後代永遠做毋得啉酒，</verse>
				<verse number="7">做毋得起屋，做毋得委種，也做毋得種葡萄。佢命令𠊎等一生人住帳篷，使𠊎等在這暫住个所在住到年長月久。</verse>
				<verse number="8">𠊎等遵守祖先 利甲 个孻仔 約拿達 給𠊎等所有个指示，一生人毋識啉過酒；𠊎等个𡜵娘子女也無啉過酒。</verse>
				<verse number="9">𠊎等無起屋來住，無葡萄園㧯田地，也無委種。</verse>
				<verse number="10">𠊎等服從祖先 約拿達 个命令，遵守佢所有个指示，一直住帳篷。</verse>
				<verse number="11">總係， 巴比倫 王 尼布甲尼撒 攻打這地方个時，𠊎等決定到 耶路撒冷 去，好閃開 巴比倫 㧯 敘利亞 个軍隊。恁樣，𠊎等正會住在 耶路撒冷 。」</verse>
				<verse number="12">接等，上主 — 萬軍个元帥、 以色列 个上帝喊 耶利米 去㧯 猶大 並 耶路撒冷 人民講：「𠊎 — 上主問你等，你等做麼介毋受管教，毋服從𠊎个話呢？</verse>
				<verse number="13"></verse>
				<verse number="14">利甲 个孻仔 約拿達 个子孫一直遵守 約拿達 个命令，到今晡日無人啉過酒。總係𠊎早就派𠊎个僕人 — 該兜先知一擺又一擺㧯你等講，勸你等離開罪惡个生活，做正直个事。佢等警告你等做毋得敬拜服事別个神明，好使你等繼續住在𠊎賜給你等㧯你等祖先个土地。總係你等毋搭𠊎，一直毋聽從𠊎。</verse>
				<verse number="15"></verse>
				<verse number="16">利甲 个孻仔 約拿達 个子孫遵守佢等祖先个命令，總係你這兜人民毋聽從𠊎。</verse>
				<verse number="17">所以，𠊎 — 上主、萬軍个元帥、 以色列 个上帝愛照𠊎所講个，降大災難在 猶大 㧯 耶路撒冷 个人民身上。因為𠊎對你等講話，總係你等毋聽；𠊎喊你等，總係你等毋搭𠊎。」</verse>
				<verse number="18">後來， 耶利米 㧯 利甲 族人講：「上主 — 萬軍个元帥、 以色列 个上帝恁樣講：你等聽從祖先 約拿達 个命令，遵守佢所有个指示，實行佢一切个話。</verse>
				<verse number="19">所以，𠊎 — 上主、萬軍个元帥、 以色列 个上帝恁樣應許： 利甲 个孻仔 約拿達 个家族永遠會有人事奉𠊎。」</verse>
			</chapter>
			<chapter number="36">
				<verse number="1">約西亞 个孻仔 約雅敬 做 猶大 王个第四年，上主對 耶利米 講：</verse>
				<verse number="2">「你拿書卷來，將𠊎㧯你講有關 以色列 、 猶大 㧯各國个逐項事全部記錄下來。對 約西亞 王个時代到今晡日，𠊎㧯你講過个話，你全部愛寫下來。</verse>
				<verse number="3">猶大 人民一聽到𠊎愛向佢等降災難，可能大家會離開罪惡个道路。恁樣𠊎就赦免佢等个罪惡㧯過犯。」</verse>
				<verse number="4">所以， 耶利米 請 尼利亞 个孻仔 巴錄 來，將上主㧯佢講過个話全部講給 巴錄 聽； 巴錄 就記錄在書卷底背。</verse>
				<verse number="5">耶利米 吩咐 巴錄 講：「𠊎被人禁止，無辦法入上主个聖殿去。</verse>
				<verse number="6">所以你愛在禁食个日仔到聖殿去，向眾人讀你記錄在這書卷底背个話，俾佢等聽上主向𠊎講過个話。你愛大聲讀給該兜對逐城市來个 猶大 人民全部聽到。</verse>
				<verse number="7">可能佢等會向上主祈求，大家就離開佢等罪惡个道路，因為上主所講對付這兜人民愛發出个怒氣係非常个厲害。」</verse>
				<verse number="8">尼利亞 个孻仔 巴錄 就照先知 耶利米 个一切指示，在聖殿中對書卷底背讀上主个話。</verse>
				<verse number="9">這事發生在 約西亞 个孻仔 約雅敬 做 猶大 王个第五年九月；該時所有 耶路撒冷 人㧯對 猶大 逐城市來个人在上主面前宣佈禁食。</verse>
				<verse number="10">巴錄 當眾讀 耶利米 講過、記錄在書卷底背个話；該時佢係在聖殿底背、宮廷書記 沙番 个孻仔 基瑪利雅 个房間肚。這房間在上層个庭院，聖殿「新門」个入口附近。</verse>
				<verse number="11">沙番 个孫仔， 基瑪利雅 个孻仔 米該亞 聽到書卷底背所有上主个話，</verse>
				<verse number="12">佢就下到宮廷書記个房間去。佢看到所有个官員全部在該位坐等：有宮廷書記 以利沙瑪 、 示瑪雅 个孻仔 第來雅 、 亞革波 个孻仔 以利拿單 、 沙番 个孻仔 基瑪利雅 、 哈拿尼雅 个孻仔 西底家 ，其他官員也全部在場。</verse>
				<verse number="13">然後， 米該亞 將所聽到、就係 巴錄 當眾讀个話全部向佢等報告。</verse>
				<verse number="14">所以佢等派 古示 个曾孫， 示利米雅 个孫仔， 尼探雅 个孻仔 猶底 到 巴錄 該位講：「你當眾讀个，該書卷帶過來。」 尼利亞 个孻仔 巴錄 就將該書卷帶到佢等該位去。</verse>
				<verse number="15">佢等對佢講：「請坐，讀給𠊎等聽！」 巴錄 就讀給佢等聽。</verse>
				<verse number="16">佢等聽了，逐儕就盡著驚，你看𠊎，𠊎看你，對 巴錄 講：「𠊎等一定愛將這兜話㧯國王報告。」</verse>
				<verse number="17">佢等查問佢：「㧯𠊎等講，你樣會寫這兜話？係 耶利米 親嘴講个麼？」</verse>
				<verse number="18">巴錄 應講：「全部係 耶利米 親嘴㧯𠊎講个；𠊎用墨水記錄在這書卷面頂。」</verse>
				<verse number="19">該兜官員㧯 巴錄 講：「你㧯 耶利米 兩儕愛遽遽囥起來；毋好俾人知你等囥在㖠位。」</verse>
				<verse number="20">佢等將該書卷留在宮廷書記 以利沙瑪 个房間，然後到王宮去，將這件事全部向王報告。</verse>
				<verse number="21">王派 猶底 去拿該書卷。 猶底 就到宮廷書記 以利沙瑪 个房間去拿轉來，讀給王㧯王左右个官員聽。</verse>
				<verse number="22">該時係九月，王在佢个冬宮肚，坐在火爐前焙火。</verse>
				<verse number="23">猶底 讀三四段，王就用祕書个刀仔將該書卷割到爛爛，一垤一垤㧒落火爐肚，一直到歸卷書在火爐肚燒淨淨。</verse>
				<verse number="24">王㧯佢个官員聽到書卷底背記錄个話，無半儕驚，也無扯爛衫來表示傷心。</verse>
				<verse number="25">雖然 以利拿單 、 第來雅 㧯 基瑪利雅 求王毋好燒該書卷，王毋聽佢等，</verse>
				<verse number="26">反轉命令王子 耶拉篾 㧯 亞斯烈 个孻仔 西萊雅 、並 亞伯疊 个孻仔 示利米雅 來捉祕書 巴錄 㧯先知 耶利米 。總係上主已經將佢等囥起來。</verse>
				<verse number="27">約雅敬 王將 耶利米 親嘴所講、 巴錄 所記錄該書卷燒掉以後，上主㧯 耶利米 講：</verse>
				<verse number="28">「你將 猶大 王 約雅敬 先前燒掉該書卷底背一切个話，重新寫在另外一卷書底背。</verse>
				<verse number="29">論到 猶大 王 約雅敬 ，你愛對佢講：『上主恁樣講：你燒掉該書卷，又查問 耶利米 做麼介在書卷底背寫講 巴比倫 王一定會來毀壞這地、消滅人民㧯頭牲。</verse>
				<verse number="30">所以， 約雅敬 王啊，𠊎 — 上主㧯你講：你毋會有後代好承接 大衛 个王位。你个身屍愛豁在野外，日時頭被日頭㸐，暗晡時被寒霜凍。</verse>
				<verse number="31">因為你等犯个一切罪過，𠊎愛責罰你、你个子孫㧯你个官員。你㧯 耶路撒冷 並 猶大 人民全部毋聽𠊎个警告，所以𠊎愛照𠊎所講个降大災難在你等身上。』」</verse>
				<verse number="32">所以， 耶利米 再拿書卷給 尼利亞 个孻仔祕書 巴錄 ；佢就將 耶利米 親嘴所講个話全部記錄下來。佢將 猶大 王 約雅敬 燒掉該書卷底背所有个話重新寫下來，並加盡多相像个話。</verse>
			</chapter>
			<chapter number="37">
				<verse number="1">巴比倫 王 尼布甲尼撒 立 約西亞 个孻仔 西底家 代 約雅敬 个孻仔 約雅斤 做 猶大 王。</verse>
				<verse number="2">總係 西底家 㧯佢个官員、並人民全部毋聽從上主吩咐先知 耶利米 講个話。</verse>
				<verse number="3">西底家 王派 示利米雅 个孻仔 猶甲 㧯 瑪西雅 个孻仔祭司 西番雅 來見先知 耶利米 ，講：「請你為𠊎等向上主 — 𠊎等个上帝祈禱。」</verse>
				<verse number="4">該時， 耶利米 還吂被人關入監獄，做得自由在民間出入。</verse>
				<verse number="5">該樣時， 巴比倫 个軍隊包圍 耶路撒冷 ，總係佢等一聽到 埃及 王个軍隊已經對 埃及 出發个消息，就對 耶路撒冷 撤退。</verse>
				<verse number="6">上主 — 以色列 个上帝吩咐先知 耶利米 ，</verse>
				<verse number="7">去㧯該差派佢求問上帝个 猶大 王 西底家 恁樣講：「 埃及 王个軍隊出發來幫助你等，總係一定會半路倒轉 埃及 本地去。</verse>
				<verse number="8">巴比倫 个軍隊會倒轉來攻城；佢等會佔領這城，放火將城燒掉。</verse>
				<verse number="9">𠊎 — 上主警告你，毋好騙自家，恅到 巴比倫 人一定會離開；其實佢等一定毋會離開。</verse>
				<verse number="10">就算你打贏來攻擊你个 巴比倫 軍隊，賸到睡在營肚个傷兵定定，佢等還係會䟘起來，放火燒掉這城。」</verse>
				<verse number="11">因為 埃及 軍隊緊來緊近， 巴比倫 軍隊就對 耶路撒冷 撤走，</verse>
				<verse number="12">所以 耶利米 準備離開 耶路撒冷 到 便雅憫 地方去，在親族中承接佢分到个產業。</verse>
				<verse number="13">總係， 耶利米 來到 便雅憫 門个時， 哈拿尼亞 个孫仔， 示利米雅 个孻仔，掌門个隊長 伊利雅 捉到佢。佢㧯先知 耶利米 講：「你想愛向 巴比倫 人投降，係麼！」</verse>
				<verse number="14">耶利米 應講：「毋係，𠊎毋係愛去投降 巴比倫 人！」總係 伊利雅 毋聽，就將 耶利米 捉起來，交給官員。</verse>
				<verse number="15">該兜官員向 耶利米 大發譴，喊人打佢，將佢關在宮廷書記 約拿單 个屋肚；這間屋舍已經改做監獄。</verse>
				<verse number="16">耶利米 被人關在地牢，關盡久。</verse>
				<verse number="17">後來， 西底家 王派人帶 耶利米 到佢該位去。佢在王宮私下問 耶利米 ：「有上主个信息麼？」 耶利米 應講：「有！你會被人交在 巴比倫 王个手中。」</verse>
				<verse number="18">接等， 耶利米 問 西底家 王：「𠊎麼介所在得罪你㧯你个官員抑係人民呢？你等做麼介將𠊎關在監獄肚呢？</verse>
				<verse number="19">該兜預言 巴比倫 王絕對毋會來攻打你等，毋會來侵佔這國家个先知這下在㖠位呢？</verse>
				<verse number="20">𠊎个主，𠊎个王啊，求你聽𠊎請求，毋好將𠊎送轉書記 約拿單 个屋下去，免得𠊎死在該位。」</verse>
				<verse number="21">所以， 西底家 王命令將 耶利米 關在禁衛隊个拘留所；佢留在該位，日日分到一垤對做餅街送來个餅，直到城肚个餅全部食淨淨。恁樣， 耶利米 就留在禁衛隊个拘留所。</verse>
			</chapter>
			<chapter number="38">
				<verse number="1">馬坦 个孻仔 示法提雅 、 巴施戶珥 个孻仔 基大利 、 示利米雅 个孻仔 猶甲 、 瑪基雅 个孻仔 巴施戶珥 聽到 耶利米 向群眾所講个話。</verse>
				<verse number="2">佢講：「上主講：『麼人留在這城，麼人就會因為戰爭、飢荒、發瘟來死。總係，麼人向 巴比倫 人投降，麼人就毋會被人㓾死，命會得保留，像拈到命共樣。』</verse>
				<verse number="3">上主又恁樣講：『𠊎一定愛將這城交給 巴比倫 王个軍隊；佢等定著會來佔領這城。』」</verse>
				<verse number="4">所以該兜官員去見王，對佢講：「求你處死這個人；因為佢唆慫在城肚个士兵㧯人民投降，使佢等手軟腳攋。佢所求个毋係使人民得平安，反轉會害佢等受災難。」</verse>
				<verse number="5">西底家 王應講：「好啊！佢在你等手中，無論你等樣般處理，𠊎無法干涉。」</verse>
				<verse number="6">所以佢等將 耶利米 捉起來，用索仔將佢縋落王子 瑪基雅 个囤水窟肚。這囤水窟在王宮禁衛隊个拘留所底背，囤水窟無水，只有湳泥， 耶利米 就陷在湳泥肚。</verse>
				<verse number="7">該時，堵好王在 便雅憫 門開庭。宮廷太監， 古實 人 以伯‧米勒 聽講佢等將 耶利米 縋落囤水窟肚个消息，</verse>
				<verse number="8">就出王宮去向王陳情講：</verse>
				<verse number="9">「𠊎个主，𠊎个王啊，這兜人恁樣對待先知 耶利米 當可惡。佢等將佢縋落囤水窟肚，佢一定會餓死在該位，因為城肚已經無糧食了。」</verse>
				<verse number="10">所以王命令 以伯‧米勒 帶三十儕去，在 耶利米 吂死以前將佢救出來。</verse>
				<verse number="11">以伯‧米勒 就帶這兜人到宮廷个倉庫去，尋兜爛布爛衫，然後用索仔縋落囤水窟肚，</verse>
				<verse number="12">喊 耶利米 將這兜爛布爛衫貼在脇下，免得索仔𢲸傷佢； 耶利米 就恁樣做。</verse>
				<verse number="13">佢等就對囤水窟肚將 耶利米 拉出來。這事以後，佢等還係將 耶利米 留在禁衛隊个拘留所。</verse>
				<verse number="14">後來， 西底家 王喊人帶先知 耶利米 到上主个聖殿个第三隻門口見佢。佢對 耶利米 講：「𠊎問你一個問題；你定著愛老老實實㧯𠊎講。」</verse>
				<verse number="15">耶利米 應 西底家 講：「若係𠊎老實講，你一定會㓾𠊎；若係𠊎提出意見，你也毋會聽。」</verse>
				<verse number="16">所以 西底家 王私下對 耶利米 發誓：「𠊎指等永生上主 — 創造𠊎等生命个上帝發誓，𠊎絕對毋會㓾你，也毋會將你交給想愛㓾你个人。」</verse>
				<verse number="17">耶利米 就㧯 西底家 講：「上主 — 萬軍个元帥、 以色列 个上帝恁樣講：若係你出去向 巴比倫 王个將軍投降，你就還有命；這城也毋會被人燒掉。你㧯你全家个人全部毋使死。</verse>
				<verse number="18">若係你毋肯出去投降，這城會落在 巴比倫 人个手中。佢等會放火燒城；你也無法度脫離佢等个手。」</verse>
				<verse number="19">總係王應講：「𠊎驚該兜投降 巴比倫 个 猶大 人民。 巴比倫 人可能將𠊎交給佢等，佢等會將𠊎㩢到半生死。」</verse>
				<verse number="20">耶利米 講：「 巴比倫 人毋會將你交給佢等。求你聽從上主喊𠊎㧯你講个話，你就會平安無事，救到性命。</verse>
				<verse number="21">上主已經指示𠊎，若係你毋出去投降，</verse>
				<verse number="22">留在 猶大 王宮个宮女會被人帶到 巴比倫 王个將軍面前。姖等會緊講： 王被身邊親信个人騙到； 佢等左右佢。 這下佢雙腳踏在湳泥肚； 身邊个人全部離開佢。」</verse>
				<verse number="23">耶利米 又講：「你个王妃、子女全部會被人帶到 巴比倫 人該位；你自家也無法度逃走。你會被 巴比倫 王捉到；這城會被火燒掉。」</verse>
				<verse number="24">西底家 對 耶利米 講：「毋好俾人知𠊎等講个話，你正毋會死。</verse>
				<verse number="25">若係有官員知𠊎㧯你講過話，佢等會來尋你，對你講：『你對王講麼介，王對你講麼介，你愛老實講，𠊎等就毋會㓾你。』</verse>
				<verse number="26">該時，你愛㧯佢等講：『𠊎懇求王毋好將𠊎送轉 約拿單 个監獄，死在該位。』」</verse>
				<verse number="27">後來，所有个官員斷真全部來查問 耶利米 ，佢就照王命令佢講个話應佢等。佢等無話好講，因為王㧯佢講話个內容無人聽到。</verse>
				<verse number="28">恁樣， 耶利米 被人留在禁衛隊个拘留所，直到 耶路撒冷 被人佔領該日。</verse>
			</chapter>
			<chapter number="39">
				<verse number="1">西底家 做 猶大 王个第九年十月， 巴比倫 王 尼布甲尼撒 帶領大軍來包圍 耶路撒冷 。</verse>
				<verse number="2">在 西底家 做王个第十一年四月初九， 耶路撒冷 城牆被佢等攻橫掉了。</verse>
				<verse number="3">耶路撒冷 被人佔領个時 ， 巴比倫 王所有个高級將官全部到 中門 ，在該位開庭。這兜將官包含： 尼甲‧沙利薛 、 三甲‧尼波 、 撒西金 㧯另外一個 尼甲‧沙利薛 。</verse>
				<verse number="4">猶大 王 西底家 㧯佢个禁衛隊看到這情形，透夜逃出城外。佢等經過王宮花園，走過連接兩扇城牆个通路，向 約旦 山壢方向逃走。</verse>
				<verse number="5">總係 巴比倫 个軍隊追佢等，在 耶利哥 附近个平原追到 西底家 。佢等將佢捉起來，帶到 巴比倫 王 尼布甲尼撒 該位。該時 尼布甲尼撒 在 哈馬 地區个 利比拉 ；佢就在該位審判 西底家 。</verse>
				<verse number="6">巴比倫 王在 利比拉 當 西底家 个目珠前㓾掉佢所有个孻仔，也㓾掉 猶大 所有个貴族，</verse>
				<verse number="7">然後將 西底家 个兩隻目珠挖出來，用銅鍊仔鎖等佢，愛帶到 巴比倫 去。</verse>
				<verse number="8">巴比倫 人放火燒掉王宮㧯民房，拆掉 耶路撒冷 个城牆。</verse>
				<verse number="9">最尾，侍衛長 尼布撒拉旦 將留在城肚㧯向佢投降个人全部捉到 巴比倫 去。</verse>
				<verse number="10">佢將該兜最窮苦、無財產个人留在 猶大 ，將葡萄園㧯田地分給佢等。</verse>
				<verse number="11">巴比倫 王 尼布甲尼撒 命令侍衛長 尼布撒拉旦 講：</verse>
				<verse number="12">「將 耶利米 尋來，好好款待佢，做毋得傷害佢。佢有麼介要求，就照佢个要求去辦理。」</verse>
				<verse number="13">所以侍衛長 尼布撒拉旦 㧯高級將官 尼布沙斯班 、 尼甲‧沙利薛 ，㧯 巴比倫 王其他个官員喊人去，</verse>
				<verse number="14">將 耶利米 對王宮禁衛隊个拘留所放出來，交給 沙番 个孫仔， 亞希甘 个孻仔 基大利 ，吩咐佢安排 耶利米 轉屋下； 耶利米 就轉去，住在同胞當中。</verse>
				<verse number="15">耶利米 還被人關在王宮禁衛隊个拘留所个時，上主吩咐佢</verse>
				<verse number="16">去㧯 古實 人 以伯‧米勒 講：「上主 — 萬軍个元帥、 以色列 个上帝恁樣講：𠊎愛照𠊎宣佈个話毀滅這城，毋俾它繁榮。你會親目看到這件事發生。</verse>
				<verse number="17">總係到該日，𠊎 — 上主愛保護你；你毋會被人交給你所驚个人手中。</verse>
				<verse number="18">𠊎定著愛保護你个安全；你毋會死在刀下。你一定會保留生命，因為你信靠𠊎。𠊎 — 上主恁樣宣佈了。」</verse>
			</chapter>
			<chapter number="40">
				<verse number="1">耶利米 被 尼布甲尼撒 个侍衛長 尼布撒拉旦 在 拉瑪 放掉以後，上主對佢講話。 耶利米 識被鍊仔鎖等，㧯所有被人捉到 巴比倫 去个 耶路撒冷 並 猶大 人民共下被人帶到 拉瑪 。</verse>
				<verse number="2">侍衛長將 耶利米 喊到塍頭，對佢講：「上主 — 你个上帝宣佈愛毀滅這所在，</verse>
				<verse number="3">這下上主已經照佢所講个做，使災禍臨到了；因為你等得罪上主，毋聽從佢个命令。</verse>
				<verse number="4">這下𠊎解開你手項个鎖鍊，俾你自由。若係你想愛去 巴比倫 ，做得㧯𠊎共下來去，𠊎會好好照顧你。若係你毋想愛去，就毋使去。全地攏總在你面前，你看麼介所在較好，就做你去！」</verse>
				<verse number="5">耶利米 還吂應佢， 尼布撒拉旦 又講 ：「你轉到 沙番 个孫仔， 亞希甘 个孻仔 基大利 該位去較好！ 巴比倫 王已經指派佢做 猶大 地區該兜城市个總督。你做得留在佢該位，住在你同胞當中。若係你歡喜到別个所在，也做得隨你个意思去。」侍衛長就送 耶利米 禮物㧯糧食，放佢走。</verse>
				<verse number="6">耶利米 就到 米斯巴 去尋 亞希甘 个孻仔 基大利 ，㧯佢並留在該地方个同胞共下住。</verse>
				<verse number="7">該兜無投降个 猶大 官員㧯士兵聽到 巴比倫 王指派 亞希甘 个孻仔 基大利 做 猶大 地區个總督，管理無被人捉到 巴比倫 去个男人、婦女、細人仔，就係該兜最窮苦个人。</verse>
				<verse number="8">所以這兜官員 — 包含 尼探雅 个孻仔 以實瑪利 、 加利亞 兩個孻仔 約哈難 㧯 約拿單 、 單戶默 个孻仔 西萊雅 、 尼陀法 人 以斐 該兜孻仔，㧯 瑪迦 人 耶撒尼亞 — 帶領部下到 米斯巴 去見 基大利 。</verse>
				<verse number="9">沙番 个孫仔、 亞希甘 个孻仔 基大利 向佢等保證講：「你等毋使驚愛服事 巴比倫 人；做你等住在這位，服事 巴比倫 王，就會平安無事。</verse>
				<verse number="10">𠊎愛親身留在 米斯巴 ； 巴比倫 人來个時，𠊎會做你等个代表。你等做得收存酒、熱天个果子、橄欖油，住在你等所佔个城鎮。」</verse>
				<verse number="11">這時，走到 摩押 、 亞捫 、 以東 、㧯其他逐所在一切个 猶大 人，聽講 巴比倫 王准賸到个 猶大 人住在 猶大 地區，並設立 沙番 个孫仔、 亞希甘 个孻仔 基大利 做佢等个總督，</verse>
				<verse number="12">大家就對逃難个逐所在，轉到 猶大 地區。佢等到 米斯巴 去見 基大利 ，又在 猶大 收盡多酒㧯熱天个果子。</verse>
				<verse number="13">這事以後， 加利亞 个孻仔 約哈難 㧯無投降个軍隊指揮官到 米斯巴 去見 基大利 ，</verse>
				<verse number="14">㧯佢講：「你知 亞捫 人个王 巴利斯 派 尼探雅 个孻仔 以實瑪利 來暗殺你嗎？」 亞希甘 个孻仔 基大利 毋相信這個話。</verse>
				<verse number="15">後來， 加利亞 个孻仔 約哈難 在 米斯巴 暗中㧯 基大利 講：「請准𠊎去將 尼探雅 个孻仔 以實瑪利 㓾掉，無人會知係麼人做个。樣好由在佢暗殺你呢？若係你被人㓾死，在你周圍个人會散掉去；賸到个 猶大 人民全部會滅亡。」</verse>
				<verse number="16">總係 亞希甘 个孻仔 基大利 對 加利亞 个孻仔 約哈難 講：「𠊎毋准你恁樣做。你冤枉 以實瑪利 了！」</verse>
			</chapter>
			<chapter number="41">
				<verse number="1">該年七月，王族个後代，也係王个一位官員， 以利沙瑪 个孫仔 — 尼探雅 个孻仔 以實瑪利 ，帶等十個人到 米斯巴 去見 亞希甘 个孻仔 基大利 總督。佢等共下食飯个時，</verse>
				<verse number="2">尼探雅 个孻仔 以實瑪利 㧯跈佢共下來个十個人用刀仔，將 沙番 个孫仔 — 亞希甘 个孻仔 基大利 㓾掉； 基大利 就係 巴比倫 王指定做管理這地方个總督。</verse>
				<verse number="3">以實瑪利 也㓾掉㧯 基大利 留在 米斯巴 个 猶大 人，並當時在場个 巴比倫 軍人。</verse>
				<verse number="4">第二日，在無人知 基大利 被人㓾掉以前，</verse>
				<verse number="5">有八十個人對 示劍 、 示羅 㧯 撒馬利亞 來。佢等剃掉鬍鬚，扯爛衫，割傷自家个身體，並帶來素祭㧯乳香，愛到上主个聖殿去。</verse>
				<verse number="6">尼探雅 个孻仔 以實瑪利 對 米斯巴 出來，緊行緊噭去迎接佢等。佢一看到佢等，就㧯佢等講：「請來看 亞希甘 个孻仔 基大利 ！」</verse>
				<verse number="7">佢等一入城， 尼探雅 个孻仔 以實瑪利 㧯佢个部下就出手㓾佢等，將身屍㧒落窟肚。</verse>
				<verse number="8">佢等當中有十個人向 以實瑪利 哀求：「毋好㓾𠊎等！𠊎等有盡多大麥、小麥、橄欖油㧯蜂糖，囥在田項。」 以實瑪利 就無㓾佢等。</verse>
				<verse number="9">以實瑪利 將㓾死个身屍㧒落窟肚，該窟仔非常大 。這係頭擺 亞撒 王為到防備 以色列 王 巴沙 个攻擊挖个。 以實瑪利 用該兜人个身屍將窟仔坉滿起來。</verse>
				<verse number="10">接等， 以實瑪利 將國王該兜妹仔㧯所有留在 米斯巴 个人捉起來，愛帶到 亞捫 人該位去。這兜人係侍衛長 尼布撒拉旦 交給 亞希甘 个孻仔 基大利 管。</verse>
				<verse number="11">加利亞 个孻仔 約哈難 㧯跈佢該兜軍官聽到 尼探雅 个孻仔 以實瑪利 所犯个罪，</verse>
				<verse number="12">就帶領部下追 尼探雅 个孻仔 以實瑪利 ，愛㧯佢相㓾，在 基遍 附近大陂塘滣追到佢。</verse>
				<verse number="13">被 以實瑪利 捉去該兜人民看到 加利亞 个孻仔 約哈難 㧯跈佢个軍官，就非常歡喜。</verse>
				<verse number="14">恁樣， 以實瑪利 對 米斯巴 捉去个所有人民就轉身走到 加利亞 个孻仔 約哈難 該位去。</verse>
				<verse number="15">總係 尼探雅 个孻仔 以實瑪利 㧯佢八個部下對 約哈難 个手下逃走，到 亞捫 人該位去。</verse>
				<verse number="16">恁樣， 加利亞 个孻仔 約哈難 㧯跈佢該兜軍官對 以實瑪利 手中將 以實瑪利 暗殺 基大利 以後對 米斯巴 捉走該兜人民對 基遍 救轉來，其中有軍人、婦女、細人仔㧯太監。</verse>
				<verse number="17">佢等當驚 巴比倫 人，因為 尼探雅 个孻仔 以實瑪利 暗殺 巴比倫 王所指定做管理這地方个總督，就係 亞希甘 个孻仔 基大利 。為到閃開 巴比倫 人，佢等愛到 埃及 去，在 伯利恆 附近个 金罕 館 停留下來。</verse>
				<verse number="18"></verse>
			</chapter>
			<chapter number="42">
				<verse number="1">後來，所有个軍官 — 包含 加利亞 个孻仔 約哈難 㧯 何沙雅 个孻仔 耶撒利雅 — 並所有个人民對最細到最大共下行前來，</verse>
				<verse number="2">對先知 耶利米 講：「請答應𠊎等个要求！代𠊎等向上主 — 你个上帝祈求。求你為𠊎這兜賸到个人祈禱。你親目看到，以前𠊎等有盡多人，這下賸無幾多儕。</verse>
				<verse number="3">求上主 — 你个上帝指示𠊎等應該行个路，應該做个事。」</verse>
				<verse number="4">先知 耶利米 應講：「好！𠊎知了，𠊎答應你等个要求。𠊎會向上主 — 你等个上帝祈禱。無論上主講麼介，𠊎會全無保留㧯你等講。」</verse>
				<verse number="5">所以佢等又對 耶利米 講：「若係𠊎等毋遵守上主 — 你个上帝差派你給𠊎等一切个命令，願上主做誠實可靠个證人來對付𠊎等。</verse>
				<verse number="6">𠊎等這下請你向上主 — 𠊎等个上帝祈求；無論佢个話係福氣抑係災禍，𠊎等一定愛聽從。𠊎等若係聽從上主 — 𠊎等个上帝，全部定著會順利。」</verse>
				<verse number="7">十日以後，上主㧯 耶利米 講話。</verse>
				<verse number="8">所以佢召集 加利亞 个孻仔 約哈難 㧯所有跈佢个軍官，並所有个人民，對最細到最大全部來，</verse>
				<verse number="9">對佢等講：「上主 — 以色列 个上帝，就係你等喊𠊎在佢面前為你等祈求个上帝，恁樣講：</verse>
				<verse number="10">『若係你等決心繼續住在這所在，𠊎會建立你等，毋會拆掉你等；𠊎會栽培你等，毋會挷掉你等；因為𠊎為到向你等降个災難，回心轉意了。</verse>
				<verse number="11">你等毋使驚 巴比倫 王。毋好驚佢！因為𠊎㧯你等同在，𠊎會救你等脫離佢个手。</verse>
				<verse number="12">𠊎既然憐憫你等，𠊎也會喊佢憐憫你等，俾你等轉到故鄉。』</verse>
				<verse number="13">「總係，你等毋聽從上主 — 你等上帝个話，自家決定毋留在這所在，</verse>
				<verse number="14">講：『𠊎等無愛留在這所在！𠊎等愛到 埃及 去。在該位，𠊎等毋會堵到戰爭，毋會聽到羊角个聲，也毋會因為無食物來餓肚笥；𠊎等愛住在該位。』</verse>
				<verse number="15">你等賸到个 猶大 人民既然講這種話，上主 — 萬軍个元帥、 以色列 个上帝恁樣講：『若係你等堅持一定愛去 埃及 ，住在該位，</verse>
				<verse number="16">你等所驚个戰爭會在 埃及 追到你等；你等所驚个飢荒會跈等來；你等會死在 埃及 。</verse>
				<verse number="17">所有決定到 埃及 去住个人，若毋係戰死，餓死，就係發瘟來死。無人能繼續生存，無人閃得開𠊎愛降在佢等身上个災難。』</verse>
				<verse number="18">「上主 — 萬軍个元帥、 以色列 个上帝恁樣講：『以前𠊎將𠊎个受氣㧯大發譴倒在 耶路撒冷 人民身上；若係你等到 埃及 去，𠊎也愛將𠊎个發譴倒在你等身上。你等會成做該位人所惱、所驚、咒詛、㧯羞辱个對象。你等絕對毋會再看到這所在。』</verse>
				<verse number="19">「上主識吩咐你這兜賸到个 猶大 人民講：『毋好到 埃及 去。』𠊎這下嚴嚴警告你等：</verse>
				<verse number="20">你等犯了致命个錯誤。你等假意請𠊎代你等向上主 — 𠊎等个上帝祈禱，並答應愛遵行佢一切个命令。</verse>
				<verse number="21">今晡日𠊎㧯你等講上主 — 你等个上帝愛𠊎㧯你等講个一切話，總係你等毋肯聽從佢。</verse>
				<verse number="22">這下你等愛確實知：你等會在自家決定愛去个所在受到戰爭、飢荒、抑係發瘟來死。」</verse>
			</chapter>
			<chapter number="43">
				<verse number="1">上主 — 佢等个上帝派 耶利米 㧯佢等講个一切話， 耶利米 向所有个人民一講煞，</verse>
				<verse number="2">何沙雅 个孻仔 亞撒利雅 、 加利亞 个孻仔 約哈難 ，並所有驕傲个人就對 耶利米 講：「你講花撩！上主 — 𠊎等个上帝並無派你來講：『你等做毋得去 埃及 住。』</verse>
				<verse number="3">這係 尼利亞 个孻仔 巴錄 煽動你出來反對𠊎等，愛將𠊎等交給 巴比倫 人个手中，由在佢等㓾，抑係將𠊎等捉到 巴比倫 去。」</verse>
				<verse number="4">所以， 加利亞 个孻仔 約哈難 、所有个軍官，㧯其他个人全部毋肯聽從上主喊佢等住在 猶大 地區个命令。</verse>
				<verse number="5">加利亞 个孻仔 約哈難 㧯所有个軍官將賸到个 猶大 人，就係對各國轉來个難民全部帶到 埃及 去；</verse>
				<verse number="6">其中包含男女、細人仔，㧯該兜公主。佢等也將侍衛長 尼布撒拉旦 留給 沙番 个孫仔、 亞希甘 个孻仔 基大利 管理个眾人，㧯先知 耶利米 ，並 尼利亞 个孻仔 巴錄 ，全部帶走。</verse>
				<verse number="7">佢等毋聽從上主个命令，就入去 埃及 ，到 答比匿 。</verse>
				<verse number="8">在 答比匿 ，上主對 耶利米 講：</verse>
				<verse number="9">「你愛在 猶大 人面前，搬兜大石頭來，埋在 答比匿 王宮門前廣場个地泥下。</verse>
				<verse number="10">然後向大家講：『𠊎 — 上主、萬軍个元帥、 以色列 个上帝恁樣講：𠊎愛帶𠊎个僕人 巴比倫 王 尼布甲尼撒 到這位來。𠊎愛在所埋个石頭頂，安佢个寶座；佢愛搭天篷揜等寶座。</verse>
				<verse number="11">尼布甲尼撒 會來攻打 埃及 。該兜該當病死个，會病死；該兜該當被人捉走个，會被人捉走；該兜該當被刀仔㓾个，會被刀仔㓾。</verse>
				<verse number="12">𠊎愛放火燒掉 埃及 該兜神廟 — 巴比倫 王會燒掉佢等个神廟，將神像搶走。佢愛掃淨 埃及 地，就像牧人撥淨外衫个跳蚤，然後安然離開。</verse>
				<verse number="13">佢會打碎 埃及 日頭神廟个石柱，燒掉 埃及 个神廟。』」</verse>
			</chapter>
			<chapter number="44">
				<verse number="1">有關該兜被人帶到 埃及 ，住在 密奪 、 答比匿 、 孟斐斯 ，㧯 埃及 南部該兜 猶大 人民个命運，上主向 耶利米 講話。</verse>
				<verse number="2">上主 — 萬軍个元帥、 以色列 个上帝恁樣講：「你等親目看到𠊎降在 耶路撒冷 㧯 猶大 逐隻城市个災難。直到今晡日，這兜城市還係荒涼，無人住；</verse>
				<verse number="3">因為城肚个人行為當壞，惹𠊎發譴。佢等燒香敬拜別个神明，就係佢等㧯你等、並你等个祖先全部毋認識个神明。</verse>
				<verse number="4">𠊎一擺又一擺派𠊎个僕人 — 該兜先知去警告你等做毋得做𠊎所惱這可惡个事，</verse>
				<verse number="5">總係你等毋聽，也毋搭𠊎，毋肯放掉向別个神明燒香个惡行。</verse>
				<verse number="6">所以，𠊎將𠊎个大受氣㧯大發譴倒在 猶大 逐隻城市㧯 耶路撒冷 个街巷，放火將它兜燒掉。到今晡日，這兜所在還係盡荒涼。</verse>
				<verse number="7">「𠊎 — 上主、萬軍个元帥、 以色列 个上帝愛問你等：這下，你等做麼介還做恁大个壞事來惹該得人驚个災禍呢？敢講你等愛害你等个男女、細人仔，㧯孲𤘅仔全部對 猶大 人中消滅，連一個也無留下來係麼？</verse>
				<verse number="8">你等做麼介在 埃及 — 你等寄留个所在 — 還拜偶像、向別个神明燒香，來惹𠊎發譴呢？你等愛害死自家，俾世界各國將你等看做咒詛侮辱个對象係麼？</verse>
				<verse number="9">你等毋記得你等个祖先、 猶大 君王、王后、你等自家㧯𡜵娘在 猶大 地區㧯 耶路撒冷 个街巷所做个壞行為係麼？</verse>
				<verse number="10">直到今晡日，你等還無謙卑悔改，還係毋敬畏𠊎，毋遵行𠊎給你等㧯你等祖先个法律誡命。</verse>
				<verse number="11">「所以，𠊎 — 上主、萬軍个元帥、 以色列 个上帝愛向你等變面降災禍，來除滅 猶大 所有个人民。</verse>
				<verse number="12">強強走到 埃及 去住該兜賸到个 猶大 人，𠊎也愛將佢等全部消滅。佢等無論地位高低全部會在 埃及 戰死抑係餓死。佢等會被人咒罵、害人著驚、被人咒詛、羞辱。</verse>
				<verse number="13">𠊎識用戰爭、飢荒、㧯發瘟來責罰 耶路撒冷 ，𠊎也愛照恁樣責罰該兜到 埃及 去住个人。</verse>
				<verse number="14">該兜賸到个 猶大 人，走到 埃及 去住个，無一儕做得走閃。無人有可能生生轉到 猶大 ，就係佢等盡想愛轉去住个故鄉。除了少數个難民逃走，無人有可能轉去。」</verse>
				<verse number="15">該時，知自家个𡜵娘向別个神明燒過香个該兜男人，㧯一大群企在該位个婦人家，包含住在 埃及 南部个 猶大 人，應 耶利米 講：</verse>
				<verse number="16">「𠊎等毋聽你奉上主个名向𠊎等講个話。</verse>
				<verse number="17">𠊎等一定愛照𠊎等所許个願去做。以前，𠊎等㧯𠊎等个祖先，𠊎等个君王㧯官員，在 猶大 逐隻城市㧯 耶路撒冷 街巷向天后女神燒香獻酒；這下𠊎等愛照恁樣做。該時，𠊎等食得飽、享福氣、無災禍。</verse>
				<verse number="18">總係，自從𠊎等停止向天后女神燒香獻酒，𠊎等反轉樣樣欠缺；𠊎等个同胞毋係戰死，就係餓死。」</verse>
				<verse number="19">該兜婦人家又講：「𠊎等个老公也贊成𠊎等照天后女神个形像做餅，去向姖燒香獻酒。」</verse>
				<verse number="20">所以， 耶利米 對所有講這種話應佢个男女講：</verse>
				<verse number="21">「你等㧯你等个祖先、君王、官員、並全國人民在 猶大 逐隻城市㧯 耶路撒冷 街巷燒過香，你等恅到上主毋知抑係毋記得係麼？</verse>
				<verse number="22">今晡日，你等个土地荒廢，無人住，成做人著驚、咒詛个對象，這係因為上主無辦法忍受你等所做可惡个壞事。</verse>
				<verse number="23">你等今晡日堵到這種災難，係因為你等向別个神明燒香，毋聽從上主个話，毋遵守上主个法律、誡命㧯規矩，得罪佢。」</verse>
				<verse number="24">耶利米 又對所有个男女講：「你等住在 埃及 个 猶大 人啊，愛聽上主个話。</verse>
				<verse number="25">上主 — 萬軍个元帥、 以色列 个上帝恁樣講：你等講，你等㧯你等个𡜵娘全部識向天后女神許願，愛燒香獻酒給姖，你等堅持愛照自家所發个誓去做。若係恁樣，做你等照自家所發个誓去還你等个願啊！</verse>
				<verse number="26">總係所有住在 埃及 个 猶大 人啊，愛聽上主个話。看啊，𠊎 — 上主指等𠊎至高个聖名發誓：在 埃及 全地，𠊎毋會再准任何 猶大 人奉𠊎个名發誓講：『𠊎指等永生个上主發誓！』</verse>
				<verse number="27">𠊎一定愛使你等堵到災禍，得毋到福氣。所有在 埃及 地个 猶大 人毋係戰死，就係餓死，直到全部消滅。</verse>
				<verse number="28">總係，你等當中有少數人還能生生對 埃及 轉到 猶大 去。恁樣，這兜住在 埃及 賸到个 猶大 人就會知，到底係𠊎个話抑係佢等个話正著。</verse>
				<verse number="29">𠊎 — 上主愛給你等一隻記號，俾你等知𠊎愛在這所在責罰你等，𠊎宣佈愛消滅你等个話一定實現。</verse>
				<verse number="30">𠊎識將 猶大 王 西底家 交給想愛收佢命个敵人，就係 巴比倫 王 尼布甲尼撒 ；𠊎也愛照恁樣將 埃及 王 合弗拉 交給想愛收厥性命个敵人。𠊎 — 上主恁樣宣佈了。」</verse>
			</chapter>
			<chapter number="45">
				<verse number="1">約西亞 个孻仔 約雅敬 做 猶大 王个第四年， 尼利亞 个孻仔 巴錄 將先知 耶利米 所講个話寫在書項。後來， 耶利米 㧯佢講：</verse>
				<verse number="2">「上主 — 以色列 个上帝恁樣㧯你講： 巴錄 啊，</verse>
				<verse number="3">你自家識講：『𠊎慘了！上主加添𠊎个悲傷痛苦。𠊎噌到身體當𤸁當痶，無法度得到平安！』</verse>
				<verse number="4">「總係，上主喊𠊎㧯你講：『𠊎 — 上主愛將𠊎所起个拆掉，將𠊎所種个挷掉。𠊎愛在全世界恁樣行。</verse>
				<verse number="5">你想愛為自家成就大事係麼？毋使想！𠊎愛降災難給全人類；總係你無論到㖠位去，𠊎會俾你拈轉自家个命。𠊎 — 上主恁樣宣佈了。』」</verse>
			</chapter>
			<chapter number="46">
				<verse number="1">上主向先知 耶利米 講起有關列國个事。</verse>
				<verse number="2">有關 埃及 ：佢提到 埃及 王 尼哥 个軍隊，在 猶大 王 約西亞 个孻仔 約雅敬 做王个第四年，被 巴比倫 王 尼布甲尼撒 在 幼發拉底 河附近个 迦基米施 打輸。上主講：</verse>
				<verse number="3">埃及 个軍官發命令： 準備大細盾牌！ 向戰場前進！</verse>
				<verse number="4">落馬鞍，騎戰馬！ 就定位，戴鐵帽！ 磨利槍，著鐵甲！</verse>
				<verse number="5">總係上主問： 𠊎看到麼介呢？ 佢等驚到打亂退； 佢等个戰士被人打輸， 盡命走、毋敢斡頭， 感覺四圍當得人驚！</verse>
				<verse number="6">最會走个也走毋掣； 戰士全部走毋掉。 在北方， 幼發拉底 河壩滣， 佢等全部跌到貼貼。</verse>
				<verse number="7">像 尼羅 河个水漲起來个係麼人呢？ 像河壩發大水个係麼人呢？</verse>
				<verse number="8">係 埃及 像 尼羅 河个水漲起來， 像河壩發大水。 埃及 講：「𠊎愛漲起來，將全地浸掉； 𠊎愛毀滅城市㧯其中个人民。</verse>
				<verse number="9">騎兵衝鋒，戰車進攻！ 古實 人㧯 弗 人帶等盾牌； 呂底亞 人拿等弓箭。 這兜勇士全部出去相㓾！」</verse>
				<verse number="10">總係，這係至高个上主 — 萬軍元帥个日仔： 今晡日，佢愛報仇； 今晡日，佢愛責罰敵人。 佢个寶劍愛食敵人个肉到飽， 啉敵人个血到足。 今晡日，至高个上主、萬軍个元帥 愛在北方个 幼發拉底 河壩滣， 將敵人當做牲儀。</verse>
				<verse number="11">埃及 人啊，上 基列 去！ 到該位去尋膏藥！ 你所有个藥仔全部無效； 無辦法醫好你。</verse>
				<verse number="12">列國聽到你个見笑； 全地充滿你个噭聲。 戰士㧯戰士相撞； 兩儕共下橫倒。</verse>
				<verse number="13">巴比倫 王 尼布甲尼撒 愛去攻打 埃及 个時，上主對先知 耶利米 講：</verse>
				<verse number="14">愛在 埃及 逐城市宣佈， 在 密奪 、 孟斐斯 、 答比匿 宣告講： 䟘起來，準備相㓾！ 戰爭會吞滅你个一切。</verse>
				<verse number="15">你等个大牛神 亞比士 做麼介會伏落去？ 係上主將它㩳橫！</verse>
				<verse number="16">你等个戰士撞來撞去、橫倒。 佢等大家講： 「䟘起來！轉老屋去！ 轉到本族該位， 遠遠離開敵人个刀劍！」</verse>
				<verse number="17">佢等㧯 埃及 王另外取一個名， 安到：「雞頦仙，佢个機會失掉去了。」</verse>
				<verse number="18">𠊎个名係上主 — 萬軍个元帥， 𠊎係大君王。 𠊎指等𠊎个永生發誓： 尼布甲尼撒 來侵犯个大軍 會像高過群山个 他泊 山， 像企在海滣个 迦密 山。</verse>
				<verse number="19">埃及 人啊，包袱愛捆好，準備逃命！ 孟斐斯 會被人燒掉、變做荒埔，全無人住。</verse>
				<verse number="20">埃及 像一隻盡肥个牛乸， 被北方飛來个螰虻攻擊。</verse>
				<verse number="21">姖請來个兵仔像牛欄肚肥肥个細牛牯， 攏總轉身逃走， 無一個敢企出來相㓾。 佢等堵到災難个日仔到了； 佢等受責罰个時節到了！</verse>
				<verse number="22">埃及 逃走个聲， 像蛇哥逃走个聲。 敵軍來攻擊姖， 像倒樹个人用斧頭斬斷樹仔。</verse>
				<verse number="23">埃及 雖然像茂盛个樹林， 總係會被敵人斬掉， 因為敵軍比草蜢還較多，多到算毋出。</verse>
				<verse number="24">埃及 人會堵到羞辱； 佢等會被北方來个人佔領。 𠊎 — 上主恁樣宣佈了。</verse>
				<verse number="25">上主 — 萬軍个元帥、 以色列 个上帝講：「𠊎愛責罰 底比斯 个神明 亞捫 、 埃及 王、㧯 埃及 全地，也愛責罰 埃及 所有个神明㧯該兜分封个王。</verse>
				<verse number="26">𠊎愛將 埃及 王㧯所有投靠佢个人，全部交給想愛毀滅佢等性命个 巴比倫 王 尼布甲尼撒 㧯佢个軍隊。總係過一站時間， 埃及 會像頭擺共樣有人住。𠊎 — 上主恁樣宣佈了。」</verse>
				<verse number="27">𠊎个僕人 雅各 啊，毋使驚； 以色列 人啊，毋使著驚。 𠊎愛對遠遠个地方， 你等被人捉去个國家將你等个子孫救出來。 雅各 愛轉來故鄉， 安居樂業，無驚麼介。</verse>
				<verse number="28">𠊎个僕人 雅各 啊，毋使驚， 因為𠊎㧯你共下。 𠊎愛將𠊎逐你去个該兜國家完全消滅； 總係𠊎毋會消滅你。 𠊎愛用公正管教你， 做毋得毋責罰你。 𠊎 — 上主恁樣宣佈了。</verse>
			</chapter>
			<chapter number="47">
				<verse number="1">在 埃及 王攻打 迦薩 以前，上主對先知 耶利米 講起有關 非利士 个事。</verse>
				<verse number="2">上主講： 看啊，河壩水會對北方漲起來， 造成水災。 大水會浸掉全地㧯其中所有个， 吞掉城市㧯城肚个人民。 人會大聲喊救命； 所有个人民會大噭。</verse>
				<verse number="3">佢等會聽到戰馬猋个聲， 戰車𠾐𠾐滾，車輪仔轆轆滾个聲！ 做阿爸个雙手痠軟無力， 無辦法看顧自家个子女。</verse>
				<verse number="4">毀滅一切 非利士 人个日仔到了； 頭擺幫助 泰爾 、 西頓 个人， 愛消滅佢等个時間到了。 𠊎 — 上主愛消滅 非利士 人， 消滅對 克里特 島 海滣來个賸到个人。</verse>
				<verse number="5">迦薩 人剃光頭表示悲傷。 亞實基倫 恬恬像死城一樣。 平原賸到个 非利士 人啊， 還愛割傷自家 悲傷幾久呢？</verse>
				<verse number="6">你等喊講：「上主个刀劍啊， 你愛㓾幾久正停呢？ 收劍入刀鞘， 俾它歇睏啊！」</verse>
				<verse number="7">總係，𠊎喊它攻擊， 它樣做得停呢？ 𠊎命令它攻擊 亞實基倫 ， 㓾掉海滣个人民。</verse>
			</chapter>
			<chapter number="48">
				<verse number="1">有關 摩押 ，上主 — 萬軍个元帥、 以色列 个上帝恁樣講： 尼波 慘了；它會荒廢！ 基列亭 會受侮辱，會被人佔領。 它个城堡會被人拆掉， 人民會受到羞辱。</verse>
				<verse number="2">摩押 毋會再受人稱讚了。 敵人佔領 希實本 ， 計謀消滅 摩押 人个國家。 瑪得緬 會恬恬毋敢講話； 它个人民會被刀劍追殺。</verse>
				<verse number="3">何羅念 个人民會大聲噭： 「荒廢了，毀滅了！」</verse>
				<verse number="4">摩押 毀滅了； 它个細人仔大聲盡噭。</verse>
				<verse number="5">在上 魯希 个崎頂， 會聽到佢等个噭聲； 在下 何羅念 个路項， 會聽到佢等痛苦到緊噌个聲。</verse>
				<verse number="6">你等愛逃走，遽遽逃命噢！ 像曠野个野驢盡命仔走 ！</verse>
				<verse number="7">摩押 啊，你識倚靠自家个軍力㧯財力， 這下，你自家也會被人佔領。 你个神明 基抹 會㧯它个祭司、官員共下被人捉去。</verse>
				<verse number="8">所有个城市全部會毀滅， 一座也無留下來； 山壢會被人踐踏， 平原會受毀壞。 𠊎 — 上主恁樣宣佈了。</verse>
				<verse number="9">愛在 摩押 地委鹽使土地用毋得， 因為它一定會毀滅 。 它个城市會成做荒埔， 毋會再有人住了。</verse>
				<verse number="10">(毋專心做上主工作个人愛受咒詛！毋擎起刀劍㓾敵人个人愛受咒詛！)</verse>
				<verse number="11">上主講：「自從成做國家以來， 摩押 常常享受安樂，毋識被人捉走。 摩押 像封在酒罌肚个酒，無被人倒來倒去，一直香馥馥，酒味無走掉。</verse>
				<verse number="12">「看啊，日仔會到，𠊎愛派人將 摩押 倒掉，像倒酒恁樣。佢等會將酒罌倒到淨淨，又愛㧹碎酒罌。</verse>
				<verse number="13">摩押 人會因為佢等个神明 基抹 感覺當見笑，像 以色列 人因為佢等所偎靠个神明 貝特利 感覺當見笑。」</verse>
				<verse number="14">摩押 人啊，樣會自家講係英雄？ 樣會自家講係當會相㓾个勇士？</verse>
				<verse number="15">摩押 會被人毀滅，它个城市會被人佔領； 它最精良个青年軍會被人消滅。 𠊎个名安到上主 — 萬軍个元帥，𠊎係大君王； 𠊎恁樣宣佈了。</verse>
				<verse number="16">摩押 个災禍迫近了； 它个苦難當遽會到了。</verse>
				<verse number="17">摩押 四周圍个國家啊， 聽過它名聲个民族啊， 你等愛悲傷講： 專制个霸權橫掉了！ 它威嚴个榮光毋見了！</verse>
				<verse number="18">住在 底本 个人啊， 對你等光榮个所在下來， 坐在燥燥个地上！ 因為愛毀滅 摩押 个人到了； 佢已經毀壞 摩押 个城堡。</verse>
				<verse number="19">亞羅珥 个人民啊， 企在路堘看， 去問該兜逃難个人， 到底發生麼介事情？</verse>
				<verse number="20">佢等會應講： 摩押 受羞辱、被敵人打橫了！ 愛為它悲傷大噭！ 你等愛在 亞嫩 河岸宣告： 摩押 滅亡了！</verse>
				<verse number="21">「審判已經臨到平原各城市，就係： 何倫 、 雅雜 、 米法押 、</verse>
				<verse number="22">底本 、 尼波 、 伯‧低比拉太音 、</verse>
				<verse number="23">基列亭 、 伯‧迦末 、 伯‧米恩 、</verse>
				<verse number="24">加略 、 波斯拉 。審判已經臨到 摩押 逐隻城市，無論遠近。</verse>
				<verse number="25">摩押 个武力被人廢掉，它个霸權被人破壞。𠊎 — 上主恁樣宣佈了。」</verse>
				<verse number="26">上主講：「你等愛使 摩押 酒醉，因為它自高自大，悖逆𠊎。 摩押 會橫在自家嘔出來个東西底背，被人恥笑。</verse>
				<verse number="27">摩押 啊，你記得麼？你識嘲謔 以色列 人，逐擺講起佢等，你就搖頭，看佢等像捉到个賊仔。</verse>
				<verse number="28">「 摩押 人啊，你等愛遽遽離開城市，去住在山巖肚！像月鴿仔在深山肚做藪！</verse>
				<verse number="29">摩押 人非常驕傲自大。𠊎聽人講過佢等係樣般驕傲，看人毋起，恅到自家當會！</verse>
				<verse number="30">𠊎 — 上主知佢等个驕傲。其實，佢等所誇口个全部係虛假个，所做个事全部盡無實在。</verse>
				<verse number="31">所以，𠊎愛為所有个 摩押 人㧯 吉珥‧哈列設 人傷心大噭。</verse>
				<verse number="32">𠊎愛為 西比瑪 人盡噭，比為 雅謝 人噭到還較悽慘。 西比瑪 城啊，你像一頭葡萄樹，樹枝伸過 死海 ，直到 雅謝 。總係，毀滅个人來打壞你成熟个果子㧯你个葡萄。</verse>
				<verse number="33">摩押 盡肥个土地毋會再有歡喜快樂个聲。𠊎使醡酒池毋會再流出美酒；人會聽到盡喊个聲，總係毋係榨酒歡喜个聲！</verse>
				<verse number="34">「 希實本 人㧯 以利亞利 人在該位傷心大噭。佢等个噭聲傳到 雅雜 ； 瑣珥 人也聽得到，連 何羅念 人㧯 伊基拉‧施利施亞 人也全部聽得到；因為連 寧林 个河壩水也全部燥掉了。</verse>
				<verse number="35">𠊎絕對無俾 摩押 人繼續在祭壇頂獻燒化祭，毋俾佢等向自家个神明燒香。𠊎 — 上主恁樣宣佈了。</verse>
				<verse number="36">「𠊎个心為 摩押 人㧯 吉珥‧哈列設 人悲傷，就像人用笛仔歕哀歌，因為佢等所有个財產無掉去了。</verse>
				<verse number="37">佢等剃掉頭那毛，剃光鬍鬚。佢等割傷自家个手，著麻衫。</verse>
				<verse number="38">摩押 地區所有个屋頂㧯廣場，全部有大噭个聲；因為𠊎打擊 摩押 ，就像㧹碎無人愛个罌仔。</verse>
				<verse number="39">佢等開聲大噭！ 摩押 被人打碎了！ 摩押 受侮辱了！ 摩押 荒掉；周圍个國家全部嘲謔它、看到它堵到个災難就盡著驚。𠊎 — 上主恁樣宣佈了。」</verse>
				<verse number="40">上主講：「會有一個國家像鷹鳥打開翼胛，飛下來攻擊 摩押 ，</verse>
				<verse number="41">佔領它个城市㧯軍事設備。該時， 摩押 个戰士心肝會像陣痛个產婦恁樣無葛無煞。</verse>
				<verse number="42">摩押 會被人滅掉，毋會再成做國家，因為它自高自大，悖逆𠊎。</verse>
				<verse number="43">恐怖、陷阱、羅網會等等 摩押 人。𠊎 — 上主恁樣宣佈了。</verse>
				<verse number="44">想愛走閃恐怖个，會跌落陷阱；爬出陷阱个，會落入羅網；因為𠊎 — 上主已經決定責罰 摩押 个日仔。</verse>
				<verse number="45">當𤸁當痶个難民想愛走到 希實本 去要求保護，總係 西宏 王統治過个這座城已經燒做灰 。火將作亂个 摩押 人个防線㧯城堡燒到淨淨。</verse>
				<verse number="46">摩押 人慘了！拜 基抹 神明个人知死了！佢等个子女全部會被人捉走。</verse>
				<verse number="47">「總係有一日，𠊎愛俾 摩押 人轉去，重整家園。𠊎 — 上主恁樣宣佈了。」 以上係上主所講 摩押 會受到个審判。</verse>
			</chapter>
			<chapter number="49">
				<verse number="1">有關 亞捫 人，上主恁樣講：「 以色列 个男人在㖠位？ 以色列 个後代在㖠位？做麼介由在該兜拜 米勒公 个人承接 迦得 支族个土地，住在其中个城市呢？</verse>
				<verse number="2">看啊，日仔會到，𠊎 — 上主愛使住在首都 拉巴 个 亞捫 人聽到戰亂中盡喊个聲。 拉巴 會成做荒埔，屬它个鄉村會被火燒掉。然後 以色列 人會對侵略佢等个人手中收轉自家个土地。𠊎 — 上主恁樣宣佈了。</verse>
				<verse number="3">希實本 人啊，愛傷心盡噭！因為 艾 城毀滅了！ 拉巴 个婦人家啊，愛大聲噭！愛著麻衫哀傷，在城牆內到處撞來撞去！你等个神明 米勒公 㧯佢个祭司、領袖會共下被人捉走。</verse>
				<verse number="4">悖逆个國民啊，做麼介誇口你等个力量像山壢充滿水呢？ 做麼介偎靠自家个財寶，恅到無人敢來搶？</verse>
				<verse number="5">𠊎 — 至高个上主、萬軍个元帥愛使得人畏个事圍等你，你等全部會逃走。逐儕顧自家个命，無人有辦法將失敗个軍隊重新組織起來。</verse>
				<verse number="6">「總係，有一日，𠊎愛俾 亞捫 人轉去，重整家園。𠊎 — 上主恁樣宣佈了。」</verse>
				<verse number="7">有關 以東 ，上主 — 萬軍个元帥恁樣講：「在 以東 無辦法再尋到智慧係麼？佢等當中賢能个人無辦法再㧯佢等講愛樣般做係麼？佢等个智慧全部無掉去係麼？</verse>
				<verse number="8">底但 人啊，愛轉身逃走！去尋所在囥起來！因為𠊎責罰 以掃 後代个日仔到了；𠊎愛消滅佢等！</verse>
				<verse number="9">人摘葡萄个時，會留兜葡萄在樹頂；暗晡頭賊仔入來，單淨偷佢等所愛个定定。</verse>
				<verse number="10">總係𠊎愛將 以掃 个後代剝到光光，露出佢等囥身个所在，使佢等無法度好囥。 以東 人並佢等个親族㧯鄰舍全部消滅了，無留一儕。</verse>
				<verse number="11">將你等个孤兒交給𠊎，𠊎會保護佢等；你等个寡婦也做得倚靠𠊎。」</verse>
				<verse number="12">上主恁樣講：「看啊，若係連該兜無應該受責罰个人全部愛啉責罰个杯，你等敢有可能毋使受責罰嗎？無可能！你等一定愛啉這個杯。</verse>
				<verse number="13">𠊎指自家發誓講， 波斯拉 城會變做荒地，成做害人著驚、被人侮辱、咒詛个所在。它附近所有个城市會永遠荒廢。𠊎 — 上主恁樣宣佈了。」</verse>
				<verse number="14">𠊎講：「 以東 啊，𠊎對上主該位得到一個消息。佢派使者到列國，喊佢等召集軍隊，準備攻擊你。</verse>
				<verse number="15">上主愛使你成做最弱个國家；無人會看重你。</verse>
				<verse number="16">你當驕傲，恅到自家盡威風；其實，你並無像自家所想恁受人敬畏。就算你住在山頂个崩崗，就算你像鷹鳥在盡高个所在做藪，上主也愛將你拉下來。上主恁樣宣佈了。」</verse>
				<verse number="17">上主講：「 以東 會受到得人畏个毀滅；逐個過路人看到定著會嚇倒，也會看毋起它。</verse>
				<verse number="18">頭擺 所多瑪 、 蛾摩拉 、㧯周圍个村莊樣般滅掉， 以東 也會恁樣被人滅掉，毋會再有人住。</verse>
				<verse number="19">看啊，就像獅仔對 約旦 河滣个樹林走出來，去到青翠个牧場；共樣，𠊎愛忽然間迫 以東 人逃走離開佢等个國家。然後𠊎所選立來做王个，就會統治這國家。麼人做得㧯𠊎比？麼人敢惹𠊎？㖠個統治者敢反對𠊎？</verse>
				<verse number="20">所以，你等愛聽𠊎 — 上主个計劃：𠊎愛㧯 以東 做對敵，對付 提幔 城个人。連佢等个細人仔全部會被人拉走，逐所在充滿大著驚。</verse>
				<verse number="21">以東 橫落去个響聲會使全地緊顫，無葛無煞个噭聲會傳到 紅海 。</verse>
				<verse number="22">看啊，敵人就像鷹鳥打開翼胛，忽然衝下來攻擊 波斯拉 。該日， 以東 个勇士會像陣痛个產婦恁樣無葛無煞。」</verse>
				<verse number="23">有關 大馬士革 ，上主講：「 哈馬 㧯 亞珥拔 城个人無平安，因為佢等聽到壞消息。佢等个憂愁像大海浪，害佢等無法度平靜。</verse>
				<verse number="24">大馬士革 人失掉勇氣，轉身逃走。佢等像產婦陣痛，非常憂傷痛苦。</verse>
				<verse number="25">這座識帶給人歡喜快樂，盡有名聲个城，會完全荒掉了 。</verse>
				<verse number="26">城肚个後生人會在街巷被人㓾死；所有个戰士全部共日斷氣、毋會出聲。</verse>
				<verse number="27">𠊎愛用火燒 大馬士革 个城牆，將 便‧哈達 王个城堡燒掉。𠊎 — 上主、萬軍个元帥恁樣宣佈了。」</verse>
				<verse number="28">有關被 巴比倫 王 尼布甲尼撒 打輸个 基達 族㧯 夏瑣 城周圍个部落，上主恁樣講：「䟘起來！去攻擊 基達 人，剿滅東方人！</verse>
				<verse number="29">搶佢等个帳篷㧯羊群，拿走帳篷个布簾㧯底背一切个用品。帶走佢等个駱駝，㧯佢等講：『四周圍盡得人驚！』</verse>
				<verse number="30">「 夏瑣 人啊，𠊎 — 上主警告你等，遽遽逃走！走到遠遠个所在，去囥起來！ 巴比倫 王 尼布甲尼撒 已經計劃愛攻打你等，佢已經決定了。」</verse>
				<verse number="31">上主講：「䟘起來！去攻打該兜恅到自家當安全毋使愁个人民！佢等个城無城門，也無門閂，全無防備。</verse>
				<verse number="32">去搶佢等个駱駝㧯所有个牛群！𠊎愛將該兜修剪頭那毛來尊敬神明个人逐散到四方去；𠊎愛對四周圍帶災難給佢等。</verse>
				<verse number="33">夏瑣 城會永遠荒廢，成做野狗个竇，無人住。𠊎 — 上主恁樣宣佈了。」</verse>
				<verse number="34">西底家 做 猶大 王个初期，上主 — 萬軍个元帥㧯先知 耶利米 講起有關 以攔 个事。</verse>
				<verse number="35">佢講：「𠊎愛拗斷 以攔 最主要个勢力 — 弓箭。</verse>
				<verse number="36">𠊎愛使風對四面八方去攻擊 以攔 ，將它个子民逐散到各地，各國全部會有它个難民去到。</verse>
				<verse number="37">𠊎愛使 以攔 人驚該兜想愛㓾佢等个敵人。𠊎 — 上主愛大發譴降災禍給 以攔 人，用戰爭徹底消滅佢等。</verse>
				<verse number="38">𠊎 — 上主愛除滅佢等个君王㧯官長，在 以攔 建立𠊎个寶座。</verse>
				<verse number="39">總係有一日，𠊎愛俾 以攔 人轉去，重整家園。𠊎 — 上主恁樣宣佈了。」</verse>
			</chapter>
			<chapter number="50">
				<verse number="1">有關 巴比倫 㧯 巴比倫 人个土地，上主對先知 耶利米 恁樣講：</verse>
				<verse number="2">愛向列國宣佈這個消息！ 愛擎起大旗！ 愛發出公告，公開傳報： 巴比倫 陷落了！ 姖个神明 馬杜克 驚到了！ 巴比倫 个偶像受到羞辱； 姖可惡个神像被人㧹碎了！</verse>
				<verse number="3">「有一個國家對北方來攻打 巴比倫 ，使姖全地荒廢，無人住；人㧯野獸全部走淨淨。」</verse>
				<verse number="4">上主講：「到該時， 以色列 㧯 猶大 个人民會共下來，緊行緊噭來尋𠊎 — 佢等个上帝。</verse>
				<verse number="5">佢等會問愛樣般轉去 錫安 。佢等會照該方向來，㧯𠊎立永遠个約，永遠毋會毋記得。</verse>
				<verse number="6">「𠊎个子民像迷路个羊。佢等个牧人害佢等在山中迷失，對一個山頭流浪到另外一個山頭，尋毋到自家个羊寮。</verse>
				<verse number="7">所有堵到佢等个就將佢等食掉。佢等个敵人講：『𠊎等恁樣做並無毋著，因為佢等得罪上主。佢等个祖先信靠上主，佢等也應該對上主忠實。』</verse>
				<verse number="8">「 以色列 人啊，愛遽遽對 巴比倫 逃命！你等愛像山羊牯恁樣行在羊群面前，帶頭對 巴比倫 人个地方走出來！</verse>
				<verse number="9">𠊎愛發動北方个大國聯合起來，攻打 巴比倫 。佢等會擺陣進攻，將 巴比倫 打下來。佢等个箭像神箭手射个箭，支支射到目標。</verse>
				<verse number="10">巴比倫 會被人搶淨淨；搶姖个攏總會搶到當滿足。𠊎 — 上主恁樣宣佈了。」</verse>
				<verse number="11">上主講：「 巴比倫 人啊，你等識搶𠊎个產業，搶到當歡喜，像在牧場踏榖个牛牸仔，又像緊嘶个馬；</verse>
				<verse number="12">總係該像阿姆生養你个大城會被人羞辱。 巴比倫 會變做最弱个國家，成做曠野、旱地、沙漠。</verse>
				<verse number="13">因為𠊎大發譴，無人有可能繼續住在 巴比倫 。姖會完全荒廢；逐個過路人全部會被姖所受个災難嚇倒，也會看毋起姖。</verse>
				<verse number="14">「弓箭手啊，愛擺陣進攻，包圍 巴比倫 ！愛開弓，將箭對準 巴比倫 ，毋好毋拌得你个箭，因為姖得罪𠊎 — 上主。</verse>
				<verse number="15">愛在 巴比倫 个四周圍大聲喊！ 巴比倫 已經投降了，姖个守望塔落掉，姖个城牆被人拆掉了。因為𠊎愛報復 巴比倫 人，你等也愛向佢等報仇；佢等樣般對待別人，你等也愛照恁樣對待佢等。</verse>
				<verse number="16">毋好俾 巴比倫 人委種，也毋好俾佢等擎禾鐮收割。城肚所有个外國人為到愛閃侵犯个軍隊全部愛走轉本族、本地去了。」</verse>
				<verse number="17">上主講：「 以色列 人像被獅仔逐散个羊群。 亞述 王先食佢等个肉；最後 巴比倫 王 尼布甲尼撒 喫佢等个骨頭。</verse>
				<verse number="18">為到這緣故，𠊎 — 上主、萬軍个元帥、 以色列 个上帝愛責罰 巴比倫 王㧯佢个國家，像𠊎以前責罰 亞述 王一樣。</verse>
				<verse number="19">𠊎愛帶領 以色列 人轉到佢等个故鄉。佢等會有好食 迦密 山㧯 巴珊 个土產，享受 以法蓮 山區㧯 基列 地區出產个五榖。</verse>
				<verse number="20">到該時，在 以色列 尋毋到麼介罪孽；在 猶大 也查毋出麼介罪惡；因為𠊎所賸下來个子民，𠊎愛赦免佢等。𠊎 — 上主恁樣宣佈了。」</verse>
				<verse number="21">上主講：「你等愛去攻擊 米拉大翁 人㧯住在 比割 个人民，追佢等，將佢等剿滅。你等愛照𠊎个命令執行。𠊎 — 上主恁樣宣佈了。</verse>
				<verse number="22">巴比倫 國內會聽到戰爭个聲，係大毀滅个聲。</verse>
				<verse number="23">巴比倫 識像大鐵鎚征服全世界，總係這下這鐵鎚會被人斬斷打爛。列國因為看到姖个荒涼就盡著驚。</verse>
				<verse number="24">巴比倫 啊，你㧯𠊎做對敵；你被𠊎捉到；你已經跌落𠊎為你設个羅網，總係你還毋知。</verse>
				<verse number="25">𠊎已經打開倉庫，搬出𠊎發譴个時用个武器；因為𠊎 — 至高个上主、萬軍个元帥愛對付 巴比倫 。</verse>
				<verse number="26">你等愛對四面來進攻！打開姖个榖倉，將戰利品堆起來，就像堆榖共樣！愛將一切滅淨淨，麼介都毋好留下來！</verse>
				<verse number="27">㓾死佢等个士兵！將佢等像牛牯牽到屠宰場全部消滅！ 巴比倫 人慘了！佢等受責罰个日仔到了！」</verse>
				<verse number="28">(對 巴比倫 逃出來个難民轉到 錫安 以後，佢等有講起上主 — 𠊎等个上帝因為 巴比倫 人燒掉佢个聖殿樣般施行報復。)</verse>
				<verse number="29">「愛召集弓箭手進攻 巴比倫 ；喊所有會射箭个全部來安營包圍這城，毋准一儕走掉。愛照姖應該受个報復姖；姖樣般對待別人，就照恁樣對待姖，因為姖驕傲悖逆𠊎 — 上主、 以色列 个聖者。</verse>
				<verse number="30">姖个後生人會在街巷被人㓾死；所有个戰士全部共日斷氣、毋會出聲。𠊎 — 上主恁樣宣佈了。</verse>
				<verse number="31">「 巴比倫 啊，你忒驕傲了！𠊎 — 至高个上主、萬軍个元帥愛㧯你做對敵！𠊎責罰你个日仔到了。</verse>
				<verse number="32">你這驕傲个國家會跌倒，無人扶你䟘起來。𠊎愛放火燒你个城市，連周圍个一切也會燒到淨淨。」</verse>
				<verse number="33">上主 — 萬軍个元帥講：「 以色列 㧯 猶大 人民全部被人欺負。捉佢等个人將佢等𢫮𢫮捉等，毋肯放佢等走。</verse>
				<verse number="34">總係佢等个救贖者大有能力；佢个名係上主 — 萬軍个元帥。佢愛徹底為佢等伸冤，使全地得到平安；總係，佢愛使 巴比倫 人民驚到全無平安。」</verse>
				<verse number="35">上主講： 巴比倫 會滅亡了！ 會有刀劍臨到 巴比倫 个人民、統治者㧯謀士！</verse>
				<verse number="36">會有刀劍臨到姖个假先知， 使佢等變到像大戇番！ 會有刀劍臨到姖个戰士， 使佢等驚到愊愊掣！</verse>
				<verse number="37">會有刀劍攻擊姖个馬隊㧯戰車， 連外國請來个兵仔也會被人㓾死； 佢等會變做像婦女恁軟弱！ 戰亂會毀滅姖个財寶， 搶走姖所有个東西！</verse>
				<verse number="38">會有旱災降在姖个河壩， 使河壩全部燥掉！ 巴比倫 係偶像盡多个國家； 偶像害人民發癲。</verse>
				<verse number="39">「所以，曠野个走獸、野狗㧯鴕鳥會在 巴比倫 出入；永遠毋會有人住，世世代代毋會再有人住在該位。</verse>
				<verse number="40">頭擺𠊎 — 上帝毀滅 所多瑪 、 蛾摩拉 、並周圍个村莊， 巴比倫 也會恁樣受到毀滅，毋會再有人在該位住。𠊎 — 上主恁樣宣佈了。」</verse>
				<verse number="41">看啊，有一個民族對北方來， 係遠方一個強大个國家； 也有盡多君王準備來相㓾。</verse>
				<verse number="42">佢等用弓箭㧯刀劍裝備自家； 佢等當殘忍、無憐憫个心。 佢等騎馬个聲， 像海浪吼吼滾； 佢等擺陣好勢愛攻打 巴比倫 。</verse>
				<verse number="43">巴比倫 王聽到這風聲，雙手就軟掉； 佢就像產婦陣痛，非常痛苦。</verse>
				<verse number="44">「看啊，就像獅仔對 約旦 河滣个樹林走出來，去到青翠个牧場；共樣，𠊎愛忽然間迫 巴比倫 人逃走離開佢等个國家。然後𠊎所選立來做王个，就會統治這國家。麼人做得㧯𠊎比？麼人敢惹𠊎？㖠個統治者敢反對𠊎？</verse>
				<verse number="45">所以，你等愛聽𠊎 — 上主个計劃：𠊎愛㧯 巴比倫 做對敵，對付 巴比倫 个人民，連佢等个細人仔也全部會被人拉走；逐所在會充滿大著驚。</verse>
				<verse number="46">巴比倫 被人佔領个時會有大聲音，連地也緊顫，無葛無煞个噭聲會傳到其他个國家。」</verse>
			</chapter>
			<chapter number="51">
				<verse number="1">上主恁樣講：「看啊，𠊎愛派有毀滅性个風差 去攻擊 巴比倫 㧯住在 立加米 个人。</verse>
				<verse number="2">𠊎愛使外國人來毀滅 巴比倫 ，像風差將麥稈吹走。毀滅个日仔一到，佢等會對四面八方來攻擊 巴比倫 ，使姖个土地變荒涼。</verse>
				<verse number="3">毋俾姖个戰士有機會射箭，毋俾佢等有時間裝備自家。連該兜後生人个命也毋肯放佢等過！愛將 巴比倫 全軍消滅！</verse>
				<verse number="4">佢等一定會在 巴比倫 个地方、在自家个街巷被人㓾掉。</verse>
				<verse number="5">雖然 以色列 㧯 猶大 充滿違背 以色列 聖者个罪，總係𠊎 — 上主、萬軍个元帥、佢等个上帝並無㧒掉佢等。</verse>
				<verse number="6">逃命啊，你等愛遽遽逃出 巴比倫 ！毋好㧯姖个罪共下死。因為𠊎這下愛照 巴比倫 所應該受个報應責罰姖。</verse>
				<verse number="7">巴比倫 頭擺像𠊎 — 上主手中个金杯，使天下个人全部酒醉了。列國啉姖个酒就癲掉。</verse>
				<verse number="8">這下 巴比倫 忽然間陷落、毀滅了！你等愛為姖傷心大噭！尋乳香來膏姖个傷口，無一定姖還會醫好。</verse>
				<verse number="9">住在 巴比倫 个外國人講：『𠊎等想愛醫 巴比倫 ，總係醫毋好。這下𠊎等愛離開姖，逐儕轉故鄉去！因為姖个罪惡堵天，定著愛受當重个責罰 。』」</verse>
				<verse number="10">上主講：「𠊎个子民會大聲喊講：『上主已經為𠊎等伸冤。來啊！𠊎等到 錫安 去，在該位宣揚上主 — 𠊎等个上帝所做个事。』」</verse>
				<verse number="11">上主愛毀滅 巴比倫 ，為自家受毀壞个聖殿報復。佢就激 米底亞 該兜王發命令講：「磨利箭頭！捉住盾牌！</verse>
				<verse number="12">軍旗擎起來，準備攻打 巴比倫 个城牆！加強防備！派出巡邏兵！設好埋伏！」 上主已經照佢所講个旨意對付 巴比倫 人民。</verse>
				<verse number="13">雖然 巴比倫 有盡多河壩、盡多財寶，總係姖个結局定著了，除滅姖个時到了。</verse>
				<verse number="14">上主 — 萬軍个元帥指佢自家發誓講：「𠊎愛召集大軍，像草蜢恁樣，歸群來攻打佔領 巴比倫 ；佢等會因為勝利歡喜到盡嘶。」</verse>
				<verse number="15">上主用能力創造大地； 佢用智慧建立世界， 用聰明展開天空。</verse>
				<verse number="16">佢一響雷公，天空个水就吼吼滾； 佢使雲對地平線衝等上。 佢使𥍉爧在雨中發光； 佢使風對自家个倉庫吹出。</verse>
				<verse number="17">人對這光景全部戇檔，無智識； 打金師傅造偶像，反轉無面子， 因為佢等造个神明係假个，毋會透氣。</verse>
				<verse number="18">偶像全係虛空，係當見笑个東西； 上主審判个時，它兜全部會消滅。</verse>
				<verse number="19">雅各 个上帝毋係像這兜偶像； 佢創造萬物， 揀選 以色列 做自家个子民。 上主 — 萬軍个元帥係佢个名。</verse>
				<verse number="20">上主講： 巴比倫 啊，你係𠊎个大鐵鎚，係𠊎个武器。 𠊎用你打擊萬邦，毀滅列國。</verse>
				<verse number="21">𠊎用你打死戰馬㧯騎士， 將戰車㧯戰士打到糜糜。</verse>
				<verse number="22">𠊎用你打死男女老幼， 打死細阿哥仔㧯細阿妹仔。</verse>
				<verse number="23">𠊎用你打死牧人㧯羊群， 打死農民㧯耕田个牛。 𠊎用你打死省長㧯官員。</verse>
				<verse number="24">上主講：「 猶大 人民啊，你等會親目看到𠊎向 巴比倫 㧯姖个人民報復，因為佢等做壞事傷害 錫安 。</verse>
				<verse number="25">巴比倫 啊，你係毀滅大地个山嶺；總係𠊎 — 上主愛㧯你做對敵。𠊎愛將你拉下來，削平，將你燒掉。</verse>
				<verse number="26">你底背个石頭毋會再拿來做屋角石抑係做石腳。你愛永遠荒廢。𠊎 — 上主恁樣宣佈了。</verse>
				<verse number="27">「愛擎起你等个軍旗！去到列國歕羊角！召集萬國去攻打 巴比倫 ！召集 亞拉臘 、 米尼 、㧯 亞實基拿 該兜國家共下去攻打。指定軍長去指揮相㓾，調派像草蜢恁多个兵馬去攻打。</verse>
				<verse number="28">召集萬國，去攻打 巴比倫 。召集 米底亞 該兜王、佢等个省長、官員、㧯佢等所治理各國个軍隊去攻打。</verse>
				<verse number="29">大地盡顫盡搖，因為𠊎 — 上主在執行𠊎个旨意，愛使 巴比倫 荒廢，無人住。</verse>
				<verse number="30">巴比倫 个勇士放掉武器，囥在城堡底背。佢等失掉勇氣，像婦女恁軟弱。城門个門閂全部斷掉！屋仔𤏸火燒！</verse>
				<verse number="31">報信个人一個接一個向 巴比倫 王報告：『京城四圍被人佔領了！</verse>
				<verse number="32">敵人佔領渡船頭，放火燒掉城堡 ！戰士驚到愊愊掣！』</verse>
				<verse number="33">無幾久，敵人會消滅佢等； 巴比倫 會像曬榖个禾埕恁樣被人踏來踏去。𠊎 — 上主、萬軍个元帥、 以色列 个上帝恁樣宣佈了。」</verse>
				<verse number="34">巴比倫 王 尼布甲尼撒 將 耶路撒冷 吞掉， 將城搶到淨淨， 使姖變到像空罌仔共樣。 佢像大海怪恁樣吞食 耶路撒冷 个財寶， 將城寶貴个東西吞落去， 將賸到个呸出去。</verse>
				<verse number="35">錫安 个人民全部會講： 巴比倫 對待𠊎等恁壞； 𠊎等應該愛報復姖！ 耶路撒冷 人全部會講： 巴比倫 人流𠊎等个血； 𠊎等應該向佢等討血債！</verse>
				<verse number="36">所以上主對 耶路撒冷 人民講：「𠊎愛為你伸冤，為你等報仇。𠊎愛使 巴比倫 个水源燥掉，河壩變無水。</verse>
				<verse number="37">巴比倫 會成做荒埔，成做野狗个竇，成做害人驚到發咄愕、被人嘲謔个所在，無人住。</verse>
				<verse number="38">巴比倫 人會像獅仔歸群吼吼滾，像細獅仔歸隊大聲嘶。</verse>
				<verse number="39">佢等食到當興个時，𠊎愛為佢等準備筵席，使佢等啉到酒醉，歡喜到睡毋知醒，永遠毋會䟘。</verse>
				<verse number="40">𠊎愛帶佢等去被人㓾，像逐細羊仔、綿羊牯、山羊牯入屠宰場。𠊎 — 上主恁樣宣佈了。」</verse>
				<verse number="41">上主講：「 巴比倫 樣會被人打橫，全世界所讚美个大城樣會被人佔領！ 巴比倫 成做害列國驚到發咄愕个國家。</verse>
				<verse number="42">海水會漲起來，大浪會浸掉 巴比倫 。</verse>
				<verse number="43">城市會變做荒地、旱地、沙漠；無人住，也毋會有人經過。</verse>
				<verse number="44">𠊎愛責罰 巴比倫 个神明 彼勒 ，迫它嘔出所吞个財物。列國毋會再去拜它。 「 巴比倫 个城牆橫掉了！</verse>
				<verse number="45">𠊎个子民啊，遽遽走，離開該所在！愛逃命，閃開𠊎个大發譴！</verse>
				<verse number="46">毋好因為聽到地方上个謠言嚇到無膽；逐年有無共樣个風聲傳來 — 謠傳國內會有戰亂，官長互相鬥爭。</verse>
				<verse number="47">看啊，日仔會到，𠊎愛責罰 巴比倫 个偶像。歸隻國家會受到羞辱，被人㓾死个身屍橫到滿遍係。</verse>
				<verse number="48">北方个毀滅者會來毀滅 巴比倫 ；該時，天地㧯其中所有个會歡呼唱歌。</verse>
				<verse number="49">巴比倫 識在全地㓾死當多人，特別係 以色列 人；這下姖个人民也會照樣被人㓾，姖定著會橫落去。𠊎 — 上主恁樣宣佈了。」</verse>
				<verse number="50">上主對住在 巴比倫 个 以色列 人講：「你等識逃過刀劍个傷害，這下愛遽遽走，毋好再等了！雖然你等遠離故鄉，總係你等愛想念𠊎 — 你等个上主，也愛懷念 耶路撒冷 。</verse>
				<verse number="51">你等講：『𠊎等聽到侮辱个話，感覺盡見笑，因為外國人進入上主聖殿个聖所。』</verse>
				<verse number="52">所以𠊎 — 上主講，日仔會到，𠊎愛責罰 巴比倫 个偶像；國內逐所在會有受傷个人緊噌。</verse>
				<verse number="53">就算 巴比倫 跋上天，在高高个所在起堅固个城堡，𠊎還係愛派毀滅者對付姖。𠊎 — 上主恁樣宣佈了。」</verse>
				<verse number="54">上主講： 聽啊， 巴比倫 有傷心盡噭个聲！ 有大毀滅个聲傳出來。</verse>
				<verse number="55">𠊎當毀滅 巴比倫 个時， 會使城肚吵鬧个聲停掉。 敵人个軍隊會像吼吼滾个大浪打等來。</verse>
				<verse number="56">毀滅者愛來消滅 巴比倫 。 姖个勇士會被人捉到； 佢等个弓會被人拗斷。 𠊎係行報應个上帝； 𠊎一定會向 巴比倫 報仇。</verse>
				<verse number="57">𠊎愛使姖个領袖、謀士、省長、 官員㧯勇士全部啉酒醉； 佢等睡到毋知醒，永遠毋會䟘。 𠊎个名安到上主 — 萬軍个元帥，𠊎係大君王； 𠊎恁樣宣佈了。</verse>
				<verse number="58">巴比倫 賁賁个城牆會橫到貼貼； 高大个門樓會被火燒掉。 列國所有个努力全部變空空； 佢等一切个勞碌會燒淨淨。 𠊎 — 上主、萬軍个元帥恁樣宣佈了。</verse>
				<verse number="59">瑪西雅 个孫仔， 尼利亞 个孻仔 西萊雅 係 西底家 王个行宮總管 。 西底家 做 猶大 王个第四年， 西萊雅 愛跈王到 巴比倫 去。該時，先知 耶利米 有話吩咐佢。</verse>
				<verse number="60">耶利米 將 巴比倫 會受到一切个災難㧯有關 巴比倫 个事全部寫在書卷底背。</verse>
				<verse number="61">耶利米 㧯 西萊雅 講：「到 巴比倫 以後，你一定愛將這書卷所有个話讀給人民聽。</verse>
				<verse number="62">然後你愛祈禱講：『上主啊，你識親身宣佈愛毀滅這所在，使姖永遠荒廢，無人住，連野獸乜無。』</verse>
				<verse number="63">西萊雅 啊，這卷書讀完以後，你愛將這卷書㧯石頭捆共下，豁到 幼發拉底 河，</verse>
				<verse number="64">然後講：『 巴比倫 愛像這卷書共樣沈落去，毋會再浮上來，因為上主愛降災難給姖 。』」 耶利米 个話記錄到這位止。</verse>
			</chapter>
			<chapter number="52">
				<verse number="1">西底家 二十一歲个時做 猶大 王；佢在 耶路撒冷 統治十一年。厥姆安到 哈慕她 ，係 立拿 城 葉利米 个妹仔。</verse>
				<verse number="2">西底家 行上主看做邪惡个事，像 約雅敬 所做个共樣。</verse>
				<verse number="3">上主對 耶路撒冷 㧯 猶大 个人民發譴，對自家面前將佢等逐出去。 西底家 反 巴比倫 王 尼布甲尼撒 ，</verse>
				<verse number="4">所以 尼布甲尼撒 帶領全軍來攻打 耶路撒冷 ；該時係 西底家 在位第九年十月初十。佢等安營在城外，在城牆四周圍起土堆來攻城，</verse>
				<verse number="5">一直包圍到 西底家 王在位第十一年。</verse>
				<verse number="6">該年四月初九，因為城內飢荒非常嚴重，人民已經無東西好食，</verse>
				<verse number="7">最尾，城牆被人攻破。雖然 巴比倫 軍隊還包圍城，該暗晡王㧯防守个軍隊也全部逃走。佢等對王宮花園無幾遠該條路，穿過兩座城牆中間个門，向 約旦 山壢方向逃走。</verse>
				<verse number="8">總係 巴比倫 軍隊逐 西底家 王，在 耶利哥 附近个平原逐到佢。該時佢个軍隊全部離開佢，散掉去了。</verse>
				<verse number="9">佢等捉到佢，將佢帶到 尼布甲尼撒 王該位去。該時 尼布甲尼撒 王在 哈馬 地區个 利比拉 ；佢就在該位審判 西底家 。</verse>
				<verse number="10">在 利比拉 ， 巴比倫 王當 西底家 眼前，將 西底家 該兜孻仔全部㓾死，也㓾死所有 猶大 个領袖。</verse>
				<verse number="11">接等，佢將 西底家 个兩隻目珠挖出來，用銅鍊仔䌈等佢，將佢帶到 巴比倫 去。 西底家 被人關在 巴比倫 个監獄，直到佢死該日。</verse>
				<verse number="12">巴比倫 王 尼布甲尼撒 个十九年五月初十，王个顧問兼侍衛長 尼布撒拉旦 來到 耶路撒冷 。</verse>
				<verse number="13">佢放火將上主个聖殿、王宮㧯 耶路撒冷 所有个屋舍燒掉，連該兜大官个屋也燒淨淨。</verse>
				<verse number="14">跈侍衛長來个部隊將 耶路撒冷 四周圍个城牆全部拆掉。</verse>
				<verse number="15">然後，侍衛長 尼布撒拉旦 將留在城肚个人 — 最窮苦个人、投降 巴比倫 个人、㧯該兜賸到有手藝个人全部捉到 巴比倫 去。</verse>
				<verse number="16">總係佢將其他最窮苦个人留在 猶大 ，喊佢等在葡萄園㧯田肚工作。</verse>
				<verse number="17">巴比倫 人敲碎上主聖殿肚个銅柱、銅盆座㧯銅海，將所有个銅帶到 巴比倫 去。</verse>
				<verse number="18">佢等也將清潔祭壇用个鏟仔㧯裝灰个鑊仔、燭花剪刀、裝牲儀个血用个大碗、盤仔、㧯禮拜用个各種銅器全部帶走。</verse>
				<verse number="19">侍衛長又帶走金銀做个各種用品：有細盆仔、裝火炭个爐仔、裝牲儀个血用个大碗、鑊仔、燈臺、盤仔㧯敬神个酒杯。</verse>
				<verse number="20">所羅門 王為聖殿所鑄造个銅器有：兩支銅柱、十隻銅盆座、一隻銅海、撐銅海个十二隻銅牛；這兜銅器多到無法度來秤。</verse>
				<verse number="21">兩支銅柱平大支，逐支高八公尺，周圍五公尺三公寸。柱仔係空心个，銅皮有七十五公釐賁。</verse>
				<verse number="22">逐支銅柱个頂高有柱頭，高兩公尺兩公寸，周圍裝飾銅製个網仔㧯銅石榴。</verse>
				<verse number="23">逐個柱頭面頂个網仔周圍有一百隻石榴，對地面上看得到九十六隻。</verse>
				<verse number="24">尼布撒拉旦 侍衛長也捉走祭司長 西萊雅 、副祭司長 西番亞 、㧯三個在聖殿掌門个。</verse>
				<verse number="25">佢又在城肚捉走一個指揮官、七個留在城肚个王室顧問、一個專管軍隊文件个書記官，㧯六十個地方上重要个人物。</verse>
				<verse number="26">尼布撒拉旦 侍衛長將佢等帶到 巴比倫 王面前；該時，王在 哈馬 地區个 利比拉 。</verse>
				<verse number="27">王就在該位打佢等，將佢等㓾死。 恁樣， 猶大 人民被人捉走，離開本國。</verse>
				<verse number="28">下背係 尼布甲尼撒 捉走个人數：佢在位第七年捉走三千零二十三個 猶大 人；</verse>
				<verse number="29">第十八年對 耶路撒冷 捉走八百三十二個人；</verse>
				<verse number="30">第二十三年，侍衛長 尼布撒拉旦 捉走七百四十五個 猶大 人。總數係四千六百個人。</verse>
				<verse number="31">以未‧米羅達 做 巴比倫 王該年，佢好款待 猶大 王 約雅斤 ，放佢出監獄。這事發生在 約雅斤 被人捉走以後个第三十七年十二月二十五。</verse>
				<verse number="32">以未‧米羅達 也恩待 約雅斤 ，俾佢个身份高過該兜被人捉到 巴比倫 去个其他國王。</verse>
				<verse number="33">約雅斤 脫掉犯人个衫，一生人㧯 巴比倫 王共桌食飯。</verse>
				<verse number="34">佢還生个年日， 巴比倫 王又賜給佢逐日个生活費用，直到佢死該日。</verse>
			</chapter>
		</book>
		<book number="25">
			<chapter number="1">
				<verse number="1">慘了！ 以前盡多人住个城市， 這下孤單橫在該位！ 以前在各國中做大个， 這下像寡婦！ 以前係各省个女王， 這下做奴婢。</verse>
				<verse number="2">姖歸暗晡大噭， 目汁流到滿面。 以前該兜親愛个朋友， 這下無一儕來安慰姖。 姖个同伴全部出賣姖， 全部成做姖个仇敵！</verse>
				<verse number="3">猶大 人民係可憐个奴才， 被人迫到離開家鄉 。 佢等流浪到外邦， 無地方好安心住。 佢等在苦難中， 被人追到無路好走。</verse>
				<verse number="4">愛去 錫安 个街路淒涼； 因為無人去該位過節。 聖殿唱歌个細妹仔悲傷； 該兜祭司只有哀傷歎息。 城門冷落； 錫安 悲哀！</verse>
				<verse number="5">敵人變做姖个主人； 姖个仇敵安樂自在。 因為姖个罪惡盡多， 上主正會使姖受苦； 姖个子女被敵人捉走。</verse>
				<verse number="6">鍚安 城 已經失掉姖个光榮。 姖个領袖像尋毋到草場个鹿仔； 打獵个人來逐佢等，佢等無力好走。</verse>
				<verse number="7">耶路撒冷 在淒涼荒廢个當中， 正想到頭擺一切个榮華富貴。 姖个人民落在敵人手中个時， 也無一個人來幫助姖。 仇敵看到這情形， 就嘲謔姖个滅亡。</verse>
				<verse number="8">耶路撒冷 罪惡當大， 成做無淨浰个東西。 原來尊敬姖个， 看到姖赤身露體，就看輕姖。 姖只有透大氣， 轉身毋敢見人。</verse>
				<verse number="9">姖个屙糟膏到裙； 姖無考慮自家个將來。 姖大失敗； 也無人安慰姖。 姖講：上主啊，看𠊎个苦難， 因為敵人得勝了。</verse>
				<verse number="10">仇敵搶走姖所有个財寶； 姖看到佢等撞等入聖殿， 就係你 — 上主禁止外邦人入去个所在。</verse>
				<verse number="11">人民緊透大氣，去逐所在尋食个東西； 佢等拿寶物去換食物，想愛維持生命。 全城祈求： 上主啊，求你來看，求你來想； 𠊎係樣般被人看輕！</verse>
				<verse number="12">你這兜過路人啊，這事你等無關心係麼！ 你等愛注意看。 自從毋識有人像𠊎受到恁樣个痛苦； 這係上主大發譴个時加給𠊎个痛苦。</verse>
				<verse number="13">𠊎个骨頭像被火燒到， 係佢對天頂降下來个。 佢安羅網，使𠊎逕跌倒。 佢㧒掉𠊎，使𠊎歸日頭那昏昏。</verse>
				<verse number="14">佢將𠊎个過犯， 拿來䌈做一串， 像軛恁樣掛在𠊎个頸筋， 將𠊎磧到盡痶。 主將𠊎交給仇敵； 𠊎無力量來抵抗。</verse>
				<verse number="15">𠊎所有个勇士，主無看在眼中； 佢派大軍來攻擊𠊎个後生人。 主踐踏 猶大 个人民 ， 就像踏葡萄共樣。</verse>
				<verse number="16">𠊎為這兜事緊噭， 𠊎个目汁流無停。 無人有辦法安慰𠊎； 無人能給𠊎勇氣。 仇敵打贏𠊎； 𠊎个人民麼介都無了。</verse>
				<verse number="17">錫安 伸手求幫助， 總係無人肯𢯭手。 上主命令仇敵， 對四面八方來包圍 雅各 个後代； 佢等看 耶路撒冷 做屙糟个東西。</verse>
				<verse number="18">上主係公義个， 佢恁樣對待𠊎，係 因為𠊎違背佢个命令。 各地个人民啊，愛注意聽； 看清楚𠊎所受个痛苦。 𠊎个青年男女被人捉走了！</verse>
				<verse number="19">𠊎求該兜親愛个朋友幫助， 總係佢等全部欺騙𠊎。 為到愛尋食个東西維持生命， 𠊎該兜祭司㧯領袖也死在街項。</verse>
				<verse number="20">上主啊，求你看𠊎个憂愁！ 請看𠊎心靈所受个痛苦！ 𠊎个心腸破碎痛苦， 因為𠊎大大悖逆你。 外背有兇殺，屋肚有死失。</verse>
				<verse number="21">有人聽到𠊎个歎息， 總係無人安慰𠊎。 仇敵因為你向𠊎降災難 就來歡喜快樂。 願你宣告个日仔遽遽來到； 願該兜仇敵㧯𠊎受共樣个苦難。</verse>
				<verse number="22">願你責備佢等个罪惡； 求你責罰佢等， 就像你因為𠊎个罪責罰𠊎共樣。 𠊎艱苦到緊噌， 𠊎个心肝非常痛苦！</verse>
			</chapter>
			<chapter number="2">
				<verse number="1">慘了！ 主大發譴，用烏雲遮等 鍚安 城！ 佢將 以色列 个光彩對天頂㧹下來； 在佢發譴个日，連自家个聖殿 也毋顧。</verse>
				<verse number="2">主毀滅 雅各 个逐隻村莊， 無半些憐憫。 佢在大發譴之下將保護 猶大 个城堡全部拆掉。 佢使這國㧯該兜領袖受到侮辱。</verse>
				<verse number="3">佢譴到將 以色列 所有个力量消滅； 仇敵來攻擊个時，佢毋肯出手拯救。 佢像火恁樣吞滅 雅各 ， 將所有个燒淨淨。</verse>
				<verse number="4">佢向𠊎等開弓搭箭， 就像愛射仇敵共樣。 佢㓾掉𠊎等所看重个人； 佢向歸隻 耶路撒冷 大發火。</verse>
				<verse number="5">主像仇敵恁樣愛來消滅 以色列 ； 佢使 以色列 个城堡、王宮全部變做荒埔； 佢使 猶大 人民加添多多个傷心㧯大噭。</verse>
				<verse number="6">佢破壞自家个帳篷， 像荒廢个園仔共樣， 拆掉𠊎等聚會敬拜个聖殿； 上主廢掉在 錫安 个節期㧯安息日。 佢在大發譴之下棄絕君王㧯祭司。</verse>
				<verse number="7">主豁掉自家个祭壇㧯聖所； 佢准敵人拆掉宮殿个圍牆； 在上主个聖殿底背， 佢等像過節恁樣大聲吵鬧！</verse>
				<verse number="8">上主決心愛拆掉 錫安 个城牆； 佢彈墨斗線做記號，出手來毀滅它。 佢使城樓㧯城牆悲哀，做一下橫掉。</verse>
				<verse number="9">城門埋在泥堆肚； 佢將門杠毀壞又拗斷。 君王㧯貴族被人逐到外國去。 無人再傳講法律； 先知也得毋到對上主來个異象。</verse>
				<verse number="10">鍚安 城个父老坐在地上， 無人出聲。 佢等全部著麻衫，委塵灰在頭那頂； 耶路撒冷 該兜細妹仔頭那攋到貼地。</verse>
				<verse number="11">𠊎个目珠噭到會青盲； 𠊎个心肝痛到會裂掉。 𠊎因為同胞个受迫害就非常哀傷； 𠊎看到細人仔㧯孲𤘅仔在街路昏掉！</verse>
				<verse number="12">佢等像著傷个人恁樣橫在路項， 佢等斷氣前還在阿姆个胸脯中緊問： 㖠位正有好食？㖠位正有好啉？</verse>
				<verse number="13">耶路撒冷 人啊，𠊎愛講麼介呢？ 𠊎愛拿麼介㧯你比呢？ 錫安 个人民 啊，𠊎愛樣般安慰你呢？ 有麼人像你受到恁大个災難？ 你个傷口像大海恁闊； 麼人有辦法醫好你呢？</verse>
				<verse number="14">你个先知專門講花撩； 佢等个異象也係假个。 佢等講道無責備你个罪惡， 免得你等被人捉走； 所看到个啟示也無影無跡， 害你行毋著个路。</verse>
				<verse number="15">過路个人全部拍手嘲謔你； 佢等緊搖頭笑 耶路撒冷 ，講： 這就係該座完美个城係麼？ 這就係全世界歡喜个城嗎？</verse>
				<verse number="16">所有个仇敵開嘴㩢耍你； 佢等咬牙切齒來嘲謔你。 佢等講：𠊎等將它毀滅了！ 𠊎等所盼望个日到了！ 這下𠊎等親眼看到了！</verse>
				<verse number="17">上主已經實行自家个計劃， 係成就佢頭擺對𠊎等个警告； 佢將𠊎等滅掉，無一些毋拌得。 佢俾𠊎等个仇敵贏過𠊎等； 佢俾𠊎等个仇敵歡喜吶天。</verse>
				<verse number="18">人民个心向主哀求。 錫安 个城牆啊， 願你个目汁日夜像河壩水恁樣緊流； 願你目珠流目汁，絕對毋會停下來！</verse>
				<verse number="19">暗晡頭逐擺換更个時， 你愛䟘起來向主求喊； 愛在主面前全心緊求， 像流水一直無停； 愛為你該兜細人仔擎手祈禱； 佢等已經在街頭巷尾餓到昏掉。</verse>
				<verse number="20">上主啊，求你來看，求你來想！ 敢有人像恁樣被你責罰過？ 慘了，婦人家食自家所𫱔所惜个孲𤘅仔！ 慘了，祭司㧯先知在主个聖殿被人㓾死！</verse>
				<verse number="21">老人家㧯後生人共樣橫在街項； 青年男女死在敵人个刀劍下背。 你在發譴个日仔㓾掉佢等， 全無留情。</verse>
				<verse number="22">你喊來个仇敵像來過節樣， 在𠊎四周圍嚇𠊎； 在你 — 上主發譴个日仔， 無人閃得走，無人留到生命。 𠊎所惜所養育个子女， 全部被仇敵㓾淨淨。</verse>
			</chapter>
			<chapter number="3">
				<verse number="1">上帝發譴个時𠊎被佢責備， 𠊎係經驗這苦難个人。</verse>
				<verse number="2">佢將𠊎逐到烏暗中， 毋俾𠊎留在光明中。</verse>
				<verse number="3">佢斷真一擺又一擺打擊𠊎， 歸日無停。</verse>
				<verse number="4">佢使𠊎个皮肉老衰； 佢拗斷𠊎个骨頭。</verse>
				<verse number="5">佢在𠊎个四圍起高牆， 用艱難痛苦來包圍𠊎。</verse>
				<verse number="6">佢迫𠊎住在烏暗中， 像死盡久个人一樣。</verse>
				<verse number="7">佢用當重个鐵鍊捆等𠊎； 𠊎成做犯人，無法度逃走。</verse>
				<verse number="8">𠊎大聲盡喊救命， 總係上帝毋聽𠊎个祈禱。</verse>
				<verse number="9">佢用大石擋𠊎个路， 使𠊎个路彎彎斡斡。</verse>
				<verse number="10">佢像熊仔恁樣䀯等𠊎， 也像獅仔囥在暗中等等𠊎。</verse>
				<verse number="11">佢逐𠊎離開大路， 將𠊎擘到爛爛㧒掉。</verse>
				<verse number="12">佢拉開弓搭上箭， 拿𠊎準箭靶來射。</verse>
				<verse number="13">佢拿箭袋个箭， 射入𠊎个內臟。</verse>
				<verse number="14">該兜人歸日嘲謔𠊎； 𠊎成做大家个笑科。</verse>
				<verse number="15">佢迫𠊎食苦菜， 強灌𠊎啉苦酒。</verse>
				<verse number="16">佢將𠊎个面撳在地泥下； 佢用石頭敲斷𠊎个牙齒。</verse>
				<verse number="17">𠊎个生活無平安； 𠊎毋記得福氣係麼介。</verse>
				<verse number="18">𠊎在世間个日仔無多了； 𠊎對上主个盼望也無了。</verse>
				<verse number="19">想到𠊎个痛苦㧯流浪， 就像苦膽㧯毒藥共樣。</verse>
				<verse number="20">𠊎一直想這兜事情， 𠊎个心靈艱苦憂傷！</verse>
				<verse number="21">總係𠊎想到另外一件事， 𠊎就重新有希望：</verse>
				<verse number="22">上主个慈愛永遠毋會斷掉； 佢个憐憫也永遠毋會停掉；</verse>
				<verse number="23">逐朝晨這兜全部係新个， 你个信實極大無比！</verse>
				<verse number="24">𠊎想：上主係𠊎个一切； 所以，𠊎一定愛仰望佢。</verse>
				<verse number="25">尋求佢，信靠佢个人， 上主愛施恩給佢等。</verse>
				<verse number="26">所以𠊎等應當仰望佢， 耐心等候上主个救恩。</verse>
				<verse number="27">𠊎等應該在後生个時 學習揹重擔 。</verse>
				<verse number="28">主賜𠊎等苦難个時， 自家應該恬恬坐等。</verse>
				<verse number="29">𠊎等應該低頭順服， 無定著還有希望。</verse>
				<verse number="30">由在人打嘴角， 定著愛忍到底。</verse>
				<verse number="31">因為主滿有慈愛， 佢毋會永遠㧒掉𠊎等。</verse>
				<verse number="32">佢雖然使𠊎等憂愁， 總係對𠊎等个痛惜毋會改變。</verse>
				<verse number="33">佢毋係存心愛𠊎等受苦， 也無愛使𠊎等憂愁。</verse>
				<verse number="34">在監獄肚被人踏到腳底下， 主定著會關心！</verse>
				<verse number="35">剝削至高上帝賜个人權， 主定著會關心！</verse>
				<verse number="36">在法庭被人冤枉， 主定著會關心！</verse>
				<verse number="37">若毋係主下命令， 無人能成就麼介。</verse>
				<verse number="38">係禍患抑係福氣， 全部愛看至高者个命令。</verse>
				<verse number="39">還生个人因為犯罪受責罰， 還有麼介好怪怨呢？</verse>
				<verse number="40">𠊎等應該反省自家个行為， 回頭歸向上主。</verse>
				<verse number="41">𠊎等應該打開心門， 擎手向天頂个上帝講：</verse>
				<verse number="42">𠊎等犯罪悖逆你， 你正無赦免𠊎等。</verse>
				<verse number="43">你大發譴將𠊎等逐走； 你剿滅𠊎等全無留情。</verse>
				<verse number="44">你用烏雲遮等自家， 使𠊎等个祈禱無辦法達到你面前。</verse>
				<verse number="45">你使𠊎等在萬民中成做垃圾， 被人㧒掉。</verse>
				<verse number="46">𠊎等个仇敵嘲謔𠊎等， 全部開嘴㩢耍𠊎等。</verse>
				<verse number="47">𠊎等堵到著驚㧯陷害， 受到災難㧯滅亡。</verse>
				<verse number="48">為到同胞受到个滅亡， 𠊎个目汁像河壩水流無停。</verse>
				<verse number="49">𠊎个目汁緊流， 停毋下來，</verse>
				<verse number="50">緊等上主个看顧， 望佢對天頂鑒察。</verse>
				<verse number="51">𠊎看到城中个婦女受到災難， 𠊎个心就悲傷痛苦。</verse>
				<verse number="52">敵人無緣無故捉𠊎， 像捉鳥仔一樣。</verse>
				<verse number="53">佢等將𠊎生生㧒落囤水窟， 頂高還用大石頭揜等 。</verse>
				<verse number="54">水浸到𠊎个頭那； 𠊎想：𠊎會無命了！</verse>
				<verse number="55">上主啊，在深深个窟肚， 𠊎求喊你个名。</verse>
				<verse number="56">求你聽𠊎求救个聲， 求你毋好塞等耳公。</verse>
				<verse number="57">𠊎求你个時，你親近𠊎， 應𠊎講：「毋使驚！」</verse>
				<verse number="58">主啊，你代𠊎伸冤； 你救贖𠊎个性命。</verse>
				<verse number="59">上主啊，你看到𠊎受个冤枉； 求你判𠊎無罪！</verse>
				<verse number="60">你看到仇敵樣般恨𠊎， 樣般謀害𠊎。</verse>
				<verse number="61">上主啊，你聽到佢等亂罵𠊎； 你知佢等愛謀害𠊎。</verse>
				<verse number="62">對敵歸日參詳愛攻擊𠊎， 設計愛陷害𠊎。</verse>
				<verse number="63">你看，佢等無論坐等抑係企等， 一直編歌仔來嘲謔𠊎。</verse>
				<verse number="64">上主啊，求你責罰佢等， 照佢等所做个報應佢等。</verse>
				<verse number="65">求你咒詛佢等， 使佢等絕望。</verse>
				<verse number="66">求你發譴逐走佢等， 使佢等對普天下消滅！</verse>
			</chapter>
			<chapter number="4">
				<verse number="1">慘了！ 𠊎等个純金變質、全無光彩！ 聖殿个石頭被人㧒在街路！</verse>
				<verse number="2">錫安 青年本來像純金恁高貴， 總係這下被人看做粗缶一樣。</verse>
				<verse number="3">野狗還知愛俾幼子食乳， 總係𠊎个人民像曠野个鴕鳥恁無情。</verse>
				<verse number="4">佢等由在孲𤘅仔嘴燥到會死； 細人仔討食，也無人拿給佢等。</verse>
				<verse number="5">一溜裡食山珍海味个人， 這下在街頭巷尾無人插； 一溜裡過奢華生活个人， 這下橫在垃圾堆尋食物。</verse>
				<verse number="6">𠊎个人民所承受个責罰， 比 所多瑪 人民所受个還較重 。 所多瑪 一𥍉目就消滅掉， 毋使受到麼介攻擊。</verse>
				<verse number="7">𠊎等个貴族一溜裡比雪比乳較白淨； 佢等个面色紅潤，身強力壯 。</verse>
				<verse number="8">這下佢等在街項無人識； 佢等个面比火炭還較烏， 皮包骨，瘦到像燥柴一樣。</verse>
				<verse number="9">被刀劍㓾死个，比餓死个人較幸福； 餓死个愛忍受枵个痛苦，慢慢拖到死。</verse>
				<verse number="10">𠊎个人民所受个災難非常得人驚， 慈愛个阿姆親手煮自家个細人仔來食！</verse>
				<verse number="11">上主將佢个大發譴盡拚出來； 佢點𤏸烈火將 錫安 燒做平地。</verse>
				<verse number="12">世間無人相信， 連列國个君王也毋相信： 侵略者能進入 耶路撒冷 个城門。</verse>
				<verse number="13">總係恁樣个事正經發生； 這係因為姖个先知㧯祭司犯罪， 在城肚將無罪个人處死刑。</verse>
				<verse number="14">姖該兜領袖像瞙目个在街項撞來撞去； 佢等膏到滿身个血， 無人敢去摸到佢等。</verse>
				<verse number="15">人民大聲盡咄佢等講： 「走開，你這兜屙糟東西！ 做毋得行兼𠊎這位來！」 因為恁樣，佢等到處流浪， 無一個國家肯收留佢等。</verse>
				<verse number="16">上主無愛再關心佢等； 佢自家將佢等逐出去。 人民無看重祭司， 也無好款待領袖。</verse>
				<verse number="17">𠊎等盼望有人來幫助， 總係盼望到目珠花掉。 根本無國家有力幫助𠊎等！ 𠊎等還一直在守望台緊望。</verse>
				<verse number="18">仇敵像打獵恁樣追𠊎等， 致到𠊎等毋敢在街項行。 𠊎等个日仔滿了！ 𠊎等个結局到了。</verse>
				<verse number="19">追𠊎等个人比空中个鷹鳥還較遽； 佢等在山頂追𠊎等，在曠野䀯等𠊎等。</verse>
				<verse number="20">佢等捉到上主膏油所立个王， 就像收走𠊎等透个氣。 𠊎等原旦確信佢會保護𠊎等； 佢會救𠊎等脫離強敵个君王。</verse>
				<verse number="21">住在 烏斯 个 以東 人啊， 做你等盡量歡喜快樂！ 苦難个酒杯也會傳給你等， 你等會像人醉到赤身露體。</verse>
				<verse number="22">錫安 个罪惡已經受到責罰； 上主毋會使𠊎等長久流亡 。 總係 以東 啊，上主愛責罰你； 佢愛將你个罪惡顯明出來！</verse>
			</chapter>
			<chapter number="5">
				<verse number="1">上主啊，求你記得𠊎等所堵到个事， 鑒察𠊎等所受个侮辱。</verse>
				<verse number="2">𠊎等个產業全部落在外族人手中； 外國人強佔𠊎等个屋舍。</verse>
				<verse number="3">𠊎等成做無爺个孤兒； 𠊎等个阿姆成做寡婦。</verse>
				<verse number="4">𠊎等愛付錢正有水啉， 𠊎等燒柴也愛用買。</verse>
				<verse number="5">𠊎等像揹等牛軛 被人逐來逐去， 勞碌到當𤸁，毋使想愛歇睏。</verse>
				<verse number="6">為到愛有糧食充飢， 𠊎等就伸手向 埃及 人㧯 亞述 人求討。</verse>
				<verse number="7">𠊎等个祖先犯罪，這下佢等無在了， 𠊎等卻因為佢等个罪惡來受責罰。</verse>
				<verse number="8">𠊎等這下被奴才來管； 無人能救𠊎等離開佢等个手。</verse>
				<verse number="9">在曠野有盡多㓾人个兇手； 𠊎等愛冒生命个危險來尋食。</verse>
				<verse number="10">𠊎等因為飢餓來發燒， 皮肉發熱到像火爐一樣。</verse>
				<verse number="11">𠊎等个婦人家在 錫安 被人強姦； 𠊎等个人家女在 猶大 个城鎮也被人侮辱。</verse>
				<verse number="12">𠊎等个領袖雙手被人䌈等吊起來； 𠊎等个老人家無被人尊敬。</verse>
				<verse number="13">𠊎等个後生人被人迫去拉磨石； 𠊎等个細人仔揹柴揹到橫下去。</verse>
				<verse number="14">老人家無再坐在城門口； 後生人也無再彈琴奏樂。</verse>
				<verse number="15">𠊎等个心中無半些快樂； 跳舞變做悲傷。</verse>
				<verse number="16">𠊎等个冕旒對頭那頂跌下來； 𠊎等犯罪，這下𠊎等承受災難！</verse>
				<verse number="17">𠊎等為到這兜事變無頭神； 目汁流到𠊎等个目珠矇矇。</verse>
				<verse number="18">因為 錫安 山變當荒涼， 野狗在荒埔肚出入。</verse>
				<verse number="19">總係上主啊，你永遠掌權； 你个統治世世代代無停。</verse>
				<verse number="20">你愛永久毋記得𠊎等係麼？ 你做麼介㧒掉𠊎等恁久呢？</verse>
				<verse number="21">上主啊，求你使𠊎等回心轉意來歸向你。 求你回復𠊎等个光榮像頭擺該兜日仔！</verse>
				<verse number="22">敢講你愛永遠拒絕𠊎等？ 敢講你个發譴永久無停？</verse>
			</chapter>
		</book>
		<book number="26">
			<chapter number="1">
				<verse number="1">第三十年 四月初五，𠊎㧯被人捉去个 猶大 人住在 巴比倫 个 迦巴魯 河壩滣。該時天打開來，𠊎看到上帝个異象。</verse>
				<verse number="2">(這件事發生在 約雅斤 王被人捉去个第五年。)</verse>
				<verse number="3">𠊎 — 布西 个孻仔，祭司 以西結 — 在 巴比倫 个 迦巴魯 河壩滣聽到上主㧯𠊎講話，又感覺到上主个能力充滿𠊎。</verse>
				<verse number="4">𠊎一看，看到狂風對北方吹來；有𥍉爧對一大堆雲出來，雲个四圍非常光，在𥍉爧當中就像有發光个純金 。</verse>
				<verse number="5">𠊎看到狂風中央有四個生物；佢等看起來像係人，</verse>
				<verse number="6">總係逐個生物有四隻面，四隻翼胛。</verse>
				<verse number="7">佢等个腳直直，腳盤像牛蹄，全部像拭到金金个銅恁樣皓光。</verse>
				<verse number="8">逐個生物有四隻面、四隻翼胛以外，逐隻翼胛下還有一隻人个手。</verse>
				<verse number="9">逐個生物向外伸出兩隻翼胛，㧯隔壁生物个翼胛接等，成做四角形；四個共下徙挺動，毋使轉身。</verse>
				<verse number="10">四個生物攏總有四隻面：頭前像人个面，右片像獅仔个面，左片像牛个面，後背像鷹鳥个面。</verse>
				<verse number="11">佢等个翼胛一對在頂高打開來飛，㧯隔壁生物个翼胛接等，一對在下背遮等自家个身體。</verse>
				<verse number="12">逐個生物个面向等四方；靈向㖠位行，佢等就向㖠位行，毋使轉身。</verse>
				<verse number="13">四個生物个當中 像有𤏸等个火炭，像火把恁樣徙來徙去；火把噴出火，發出電光。</verse>
				<verse number="14">生物飛來飛去，像𥍉爧恁遽。</verse>
				<verse number="15">𠊎看等生物个時，看到逐個生物个塍頭 各有一隻輪仔貼等地面。</verse>
				<verse number="16">四隻輪仔个外形㧯做法全部共樣，像寶石恁樣皓光。逐隻輪仔落等另外一隻輪仔，直角相切；</verse>
				<verse number="17">恁樣，四隻輪仔做得向所有个方向挺動，毋使轉向。</verse>
				<verse number="18">輪框高到得人驚，四隻輪框有盡多目珠。</verse>
				<verse number="19">四個生物徙挺動，四隻輪仔跈等挺動；生物離開地面，輪仔跈等離開地面。</verse>
				<verse number="20">靈到㖠位，生物就到㖠位；生物上到㖠位，輪仔也共樣上到㖠位，因為生物个靈在輪仔當中。</verse>
				<verse number="21">所以，逐擺生物徙挺動、停止、抑係離開地面，輪仔就跈等挺動、停止、抑係離開地面，因為生物个靈在輪仔當中。</verse>
				<verse number="22">四個生物頭那頂有穹蒼个形狀，像刺目个水晶恁光。</verse>
				<verse number="23">在穹蒼下背企等這四個生物；佢等伸出一對翼胛，㧯隔壁个翼胛接等，又用另外一對翼胛遮蓋自家个身體。</verse>
				<verse number="24">𠊎聽到佢等飛个時翼胛所發出个聲；就像大水个聲音，也像大軍在大聲嘶，又像全能上帝个聲音。佢等停下來个時就將翼胛收起來，</verse>
				<verse number="25">總係還有聲對佢等頭那頂个穹蒼頂高傳來。</verse>
				<verse number="26">穹蒼个頂高有一座像係用藍寶石造个寶座；頂高坐等个當像係人。</verse>
				<verse number="27">𠊎看到佢个腰圈以上就像係發光个純金，內外全部像火；佢个腰圈下背像火，四圍全部發光。</verse>
				<verse number="28">這光彩㧯落雨天雲中个虹共樣。這就係顯明上主臨到个榮光。𠊎一看到這光景就伏落在地上。接等，𠊎又聽到一個講話个聲。</verse>
			</chapter>
			<chapter number="2">
				<verse number="1">這個聲對𠊎講：「人子啊 ，企起來！𠊎愛㧯你講話。」</verse>
				<verse number="2">這個聲對𠊎講話該時，上帝个靈入到𠊎底背，將𠊎扶起來。𠊎聽到這聲音繼續對𠊎講：</verse>
				<verse number="3">「人子啊，𠊎愛派你到悖逆个國民 以色列 人該位去。佢等㧯佢等个祖先共樣悖逆𠊎，離開𠊎，到這下還係違背𠊎。</verse>
				<verse number="4">佢等硬頸又硬殼，毋尊重𠊎，所以𠊎愛派你去，將𠊎 — 至高个上主愛㧯佢等講个話對佢等講。</verse>
				<verse number="5">無論該兜悖逆个人愛聽抑毋聽，佢等應該知有一個先知在佢等當中。</verse>
				<verse number="6">「總係，人子啊，你毋使驚佢等，也毋使驚佢等講个話。佢等會反抗你，看毋起你，就像竻仔㧯蒺藜刺你，害你像住在蠍仔當中。佢等係悖逆个人，總係你毋使驚佢等講个話，也毋使被佢等个面色嚇倒。</verse>
				<verse number="7">無論佢等愛聽抑毋聽，你愛將𠊎个話㧯佢等講。愛知佢等係悖逆个人。</verse>
				<verse number="8">「人子啊，你愛注意聽𠊎㧯你講个話；做毋得像佢等恁樣悖逆。你个嘴打開來，將𠊎愛給你个東西食落去。」</verse>
				<verse number="9">然後𠊎看到有一隻手向𠊎伸過來，手項拿等書卷。</verse>
				<verse number="10">佢打開該書卷；𠊎看到書卷个正反兩面全部寫等字，頂高所寫个係哀傷、歎息㧯痛心个話。</verse>
			</chapter>
			<chapter number="3">
				<verse number="1">上帝講：「人子啊，將這書卷食落去，然後去向 以色列 人講話。」</verse>
				<verse number="2">所以𠊎打開嘴；佢將該書卷交給𠊎食，</verse>
				<verse number="3">講：「人子啊，將𠊎給你个這書卷食落去，裝滿肚笥。」𠊎就食；這書卷像蜂糖恁甜。</verse>
				<verse number="4">接等上帝講：「人子啊，你到 以色列 人該位去，將𠊎个話㧯佢等講。</verse>
				<verse number="5">𠊎毋係派你到該兜講話你聽毋識个人該位去；𠊎係派你去 以色列 人當中。</verse>
				<verse number="6">若係𠊎派你到該兜國家，到該兜講話你聽毋識个人該位去，佢等還會聽你个話。</verse>
				<verse number="7">總係， 以色列 人絕對毋會聽你个話；因為佢等連𠊎个話也毋肯聽。佢等全部當硬頸又硬殼。</verse>
				<verse number="8">你看，𠊎愛使你比佢等還較硬殼，使你个額頭硬過佢等个額頭。</verse>
				<verse number="9">𠊎愛使你个額頭像鑽石，比火石還較硬。你毋使驚該兜悖逆个人，也毋使被佢等个面色嚇倒。」</verse>
				<verse number="10">上帝繼續講：「人子啊，你愛注意聽𠊎一切个話，也愛記在心肚。</verse>
				<verse number="11">你愛去被人捉去个同胞該位，無論佢等愛聽抑毋聽，將𠊎 — 至高个上主愛對佢等講个話全部㧯佢等講。」</verse>
				<verse number="12">接等，上帝个靈將𠊎擎起來，𠊎就聽到在𠊎後背有𠾐𠾐滾个聲音講：「愛頌讚天頂上主个榮光！」</verse>
				<verse number="13">𠊎又聽到該四個生物翼胛憑到个聲，也聽到輪仔挺動、像地動發出恁響个聲。</verse>
				<verse number="14">上主个能力大大充滿𠊎；佢个靈將𠊎擎起來帶走个時，𠊎感覺盡艱苦又盡譴。</verse>
				<verse number="15">所以，𠊎來到 迦巴魯 河壩滣个 提勒‧亞筆 ，就係被人捉去个同胞住个所在。𠊎在該位有七日久，被看到㧯所聽到个事嚇到戇神。</verse>
				<verse number="16">七日後，上主㧯𠊎講：</verse>
				<verse number="17">「人子啊，𠊎派你做 以色列 人个守望者。你愛將𠊎親身㧯你講个話警告佢等。</verse>
				<verse number="18">若係𠊎宣佈某一個壞人一定愛死，你毋去警告佢，勸佢棄邪歸正來救自家，這個人雖然會因為自家个罪死掉，𠊎卻愛追究你流厥血个責任。</verse>
				<verse number="19">若係你警告該壞人，佢毋肯改過，還係做壞事，佢愛因為自家个罪死掉，總係你會救到自家个命。</verse>
				<verse number="20">「若係好人離開正路，開始做壞事，𠊎會使佢堵到災難 ，佢一定會死。因為你毋警告佢，佢就會因為自家个罪來死，𠊎毋會紀念佢做過个好事；𠊎卻愛追究你流厥血个責任。</verse>
				<verse number="21">若係你警告該好人做毋得犯罪，佢接受你个警告，無再犯罪，佢一定毋會死，你也會救到自家个命。」</verse>
				<verse number="22">𠊎感覺到上主个能力大大充滿𠊎，又聽到佢㧯𠊎講：「企起來到山壢肚去，𠊎愛在該位對你講話。」</verse>
				<verse number="23">所以，𠊎到山壢肚去，在該位看到上主个榮光，㧯𠊎在 迦巴魯 河壩滣所看到个共樣。𠊎伏在地上；</verse>
				<verse number="24">上帝个靈入到𠊎个底背，將𠊎扶起來。上主㧯𠊎講：「轉屋下去，將你自家關在屋肚。</verse>
				<verse number="25">人子啊，別人愛用索仔將你捆起來，使你無法度出到佢等當中。</verse>
				<verse number="26">𠊎愛使你變做啞口，使你無法度警告這兜悖逆个人民。</verse>
				<verse number="27">後來，𠊎愛再對你講話，開你个嘴。該時，你愛將𠊎 — 至高个上主所講个話㧯佢等講。有兜肯聽，有兜毋肯聽，因為佢等係悖逆个人民。」</verse>
			</chapter>
			<chapter number="4">
				<verse number="1">上主講：「人子啊，拿一垤磚仔放在你面前，在頂高畫一座城代表 耶路撒冷 ，</verse>
				<verse number="2">又在城个周圍造高臺，起土堆，安營，搭攻城个槌仔，代表城被人包圍。</verse>
				<verse number="3">然後，你愛拿一垤鐵盤立在你㧯城之間做鐵牆。你愛面對這座城，表示城被人包圍，圍城个就係你。這就係𠊎給 以色列 人个兆頭。</verse>
				<verse number="4">「接等，你愛向左片打側睡；𠊎愛將 以色列 个罪磧在你身上。你愛在該位睡三百九十日，為佢等犯个罪受苦。𠊎喊你睡个日期係𠊎判佢等應該受責罰个刑期，一日準一年。</verse>
				<verse number="5"></verse>
				<verse number="6">這刑期滿以後，你愛向右片打側睡四十日，為 猶大 个罪受苦，一日準一年。</verse>
				<verse number="7">「你愛面向 耶路撒冷 ，對等受包圍个城出拳，講預言攻擊這城。</verse>
				<verse number="8">𠊎愛將你捆起來，使你無辦法翻身，一直到圍城个日期滿。</verse>
				<verse number="9">「接等，你愛拿兜小麥、大麥、豆仔、紅豆、細米、粗麥裝在器皿中，用來做餅。這就係你向左片打側睡該三百九十日个食物，</verse>
				<verse number="10">逐日做得食兩百三十公克定定，愛照時食。</verse>
				<verse number="11">你逐日做得食兩杯水定定，愛照時食。</verse>
				<verse number="12">你愛在民眾面前，燒人屎來焙餅食。」</verse>
				<verse number="13">上主講：「這表示𠊎將 以色列 人逐到外國去个時，佢等愛食法律所禁止無淨浰个東西。」</verse>
				<verse number="14">總係，𠊎應講：「唉！至高个上主啊，𠊎毋識打垃圾自家，從細就無食自然死掉个抑係被野獸咬死个動物。𠊎無食過無淨浰个食物。」</verse>
				<verse number="15">所以上帝講：「好啊，你做得將人屎換做牛屎拿來燒，在頂高焙你个餅。」</verse>
				<verse number="16">佢又講：「人子啊，𠊎愛使 耶路撒冷 斷糧、斷水。逐擺人民照配給个份量食餅、食水个時，佢等會愁到無葛無煞。</verse>
				<verse number="17">佢等會食到無餅無水，彼此著驚，因為自家个罪衰弱到死。」</verse>
			</chapter>
			<chapter number="5">
				<verse number="1">上主講：「人子啊，你愛拿一支利劍準剃頭刀，刮你个鬍鬚，剃你个頭那毛，將鬚㧯毛拿去用天平秤，然後分做三份。</verse>
				<verse number="2">城受包圍个日期滿以後，你愛拿三分之一个鬚㧯毛在城肚燒；拿另外三分之一到城外，緊行緊剁；又拿賸到个三分之一委在空中俾風吹散；𠊎還愛用𠊎个劍去逐。</verse>
				<verse number="3">你愛留一些仔鬚㧯毛，用衫角包等，</verse>
				<verse number="4">然後拿幾條鬚㧯毛出來，㧒到火肚燒。火愛對這幾條鬚㧯毛遰到 以色列 全國。」</verse>
				<verse number="5">至高个上主講：「這就係 耶路撒冷 ！𠊎將它放在世界个中央，列國在它个四圍。</verse>
				<verse number="6">總係 耶路撒冷 違背𠊎个誡命，比列國還較壞，比四圍个國家還較悖逆。 耶路撒冷 毋遵守𠊎个誡命，廢掉𠊎个法律。</verse>
				<verse number="7">所以， 耶路撒冷 啊，你愛聽𠊎 — 至高个上主所講个話。你毋遵守𠊎个誡命，廢掉𠊎个法律，去跈列國个風俗習慣，為自家惹到个麻煩比鄰國還較多。</verse>
				<verse number="8">所以，𠊎 — 至高个上主宣佈，𠊎自家愛做你个對敵；𠊎愛在列國面前審判你。</verse>
				<verse number="9">因為你做个事全部係𠊎所怨恨个，所以𠊎愛責罰你。𠊎從來毋識恁樣責罰過你，以後也毋會再恁樣責罰你。</verse>
				<verse number="10">到最尾，在你个當中，爺𡟓愛食子女，子女愛食爺𡟓。𠊎愛責罰你，也愛將所賸个人全部逐到逐所在去。</verse>
				<verse number="11">「所以，𠊎 — 至高个上主指等𠊎永遠个生命發誓：你既然用一切可惡个偶像，又做𠊎所怨恨个事來污穢𠊎个聖殿，𠊎就愛使你人數減少，𠊎毋饒你，也毋憐憫你。</verse>
				<verse number="12">三分之一个人民愛在城肚病死、餓死；另外三分之一愛在城外被刀劍㓾死；𠊎愛將所賸个三分之一分散到四方，用𠊎个劍逐佢等。</verse>
				<verse number="13">「𠊎愛將所有个發譴拚在你个身項，拚到淨淨𠊎正滿足。恁樣，你就會知，𠊎 — 上主所講个話係出於嫉妒个心 。</verse>
				<verse number="14">鄰國个人民經過該位，全部愛嘲謔你，遠遠離開你。</verse>
				<verse number="15">「𠊎發譴、大大責罰你个時，你四圍个國家全部會盡著驚。佢等看到這得人驚个情形就會恥笑你，嘲謔你，將你當做警戒。</verse>
				<verse number="16">𠊎愛切斷你个糧食，使你餓肚笥，俾你知肚笥枵个痛苦，就像當利个箭愛消滅你。</verse>
				<verse number="17">𠊎愛用飢荒㧯野獸消滅你个子女，又用發瘟、暴力㧯戰爭㓾你。𠊎 — 上主恁樣宣佈了。」</verse>
			</chapter>
			<chapter number="6">
				<verse number="1">上主㧯𠊎講話；</verse>
				<verse number="2">佢講：「人子啊，你愛面向 以色列 該兜山，向它兜傳𠊎个信息。</verse>
				<verse number="3">愛喊 以色列 个山岡注意聽至高上主个話。𠊎 — 至高个上主對大山、細山、山排、山壢恁樣講：𠊎愛用刀劍毀壞人民在你等該位拜偶像个所在。</verse>
				<verse number="4">祭壇愛拆掉，香壇愛打爛。𠊎愛將該兜人全部在偶像面前㓾死。</verse>
				<verse number="5">𠊎愛使 以色列 人个屍體橫在偶像个面前，使佢等个骨頭散在祭壇个四圍。</verse>
				<verse number="6">以色列 所有个城市會被人毀滅。恁樣，佢等全部个祭壇㧯偶像就會被人毀壞，香壇會被人打爛。佢等所製造个全部愛敲掉。</verse>
				<verse number="7">逐所在有人被人㓾死，賸到个人就會知𠊎係上主。</verse>
				<verse number="8">「有兜人𠊎愛俾佢脫離刀劍，四散到逐國，</verse>
				<verse number="9">過流亡个生活。在該位，佢等就會想到𠊎，正知𠊎个心樣般破碎，係因為佢等个心離開𠊎，對𠊎無忠心，歡喜偶像贏過敬愛𠊎。佢等會因為自家所做个壞事㧯邪惡个行為來怪怨自家。</verse>
				<verse number="10">佢等就會知𠊎係上主；𠊎警告愛使這災難臨到佢等个話毋係空空个。」</verse>
				<verse number="11">至高个上主恁樣講：「你愛拍手，蹬腳，為 以色列 人所做个邪惡㧯得人惱个事盡哀傷。佢等愛死在戰場、餓死、抑係病死。</verse>
				<verse number="12">去到遠方个人會發病來死；留在附近个人會死在戰場。賸下來个人會餓死。𠊎愛向佢等拚淨𠊎个大發譴。</verse>
				<verse number="13">佢等个屍體愛散在偶像當中，在祭壇四圍，在逐座大山、逐個山頂，在逐頭大樹㧯橡樹下背，在佢等向偶像獻過祭个所在。恁樣，佢等就會知𠊎係上主。</verse>
				<verse number="14">𠊎一定愛伸手消滅佢等个國家。𠊎愛使它荒廢，對南片个曠野一直到北片个 第伯拉他 城 ； 以色列 人住个所在無一位無荒廢。恁樣，佢等就會知𠊎係上主。」</verse>
			</chapter>
			<chapter number="7">
				<verse number="1">上主㧯𠊎講話；</verse>
				<verse number="2">佢講：「人子啊，這就係𠊎 — 至高个上主愛對 以色列 地宣佈个話： 以色列 該死了，全地个結束近了！</verse>
				<verse number="3">「 以色列 啊，你个結束到了。𠊎愛向你發出𠊎个大發譴。𠊎愛因為你所做个事審判你；𠊎愛因為你邪惡个行為責罰你。</verse>
				<verse number="4">𠊎毋饒你，也毋憐憫你。𠊎愛因為你所做邪惡个事責罰你。恁樣，你就會知𠊎係上主。」</verse>
				<verse number="5">至高个上主恁樣講：「災難愛一擺又一擺 臨到你。</verse>
				<verse number="6">該死了，結局近了。你知死了！</verse>
				<verse number="7">以色列 人民个結局到了。山頂个祭壇毋會再有歡樂，只有混亂；該日仔會到了。</verse>
				<verse number="8">「𠊎當遽就愛向你拚出𠊎个大發譴。𠊎愛照你所做个事審判你；𠊎愛照你所做邪惡个事責罰你。</verse>
				<verse number="9">𠊎毋饒你，也毋憐憫你。𠊎愛照你所做邪惡个事責罰你。恁樣，你就會知係𠊎上主在責罰你。」</verse>
				<verse number="10">災難个日仔到了。逐位都有暴力㧯驕傲个事發生。</verse>
				<verse number="11">殘暴成做壞人个權勢。 以色列 人个財產、體面、光彩全部無了。</verse>
				<verse number="12">時機到了，日仔近了；買个人毋使歡喜，賣个人也毋使憂愁；因為上帝个大發譴會臨到逐儕个身項。</verse>
				<verse number="13">無一個生理人在還生个時賺得轉佢所損失个，因為上帝个大發譴會臨到逐儕个身項。壞人做毋得生存。</verse>
				<verse number="14">號角響了；逐儕準備好了。總係無人出去相㓾，因為上帝个大發譴會臨到逐儕个身項。</verse>
				<verse number="15">外背有戰爭，內肚有發瘟、飢荒。城外个人全部愛死在刀劍下；城肚个人全部愛病死、餓死。</verse>
				<verse number="16">有兜人愛像山壢肚著驚个月鴿仔逃到山頂去。佢等全部為自家个罪盡噌。</verse>
				<verse number="17">逐儕全部手軟腳攋。</verse>
				<verse number="18">佢等愛著麻衫，全身愊愊掣，剃光頭，盡見笑。</verse>
				<verse number="19">佢等愛將金銀㧹到街項，就像豁掉垃圾。因為在上主大發譴个日仔，金銀救毋到佢等。金銀無法度滿足佢等个慾望，也無法度使佢等个肚笥食飽。金銀反轉引誘佢等犯罪。</verse>
				<verse number="20">佢等識誇口佢等个珠寶盡靚，總係佢等用該兜珠寶造邪惡个偶像。所以，上主使佢等看自家个珠寶做垃圾。</verse>
				<verse number="21">上主講：「𠊎愛俾外國人來搶佢等，喊無天良个人搶奪佢等个珠寶，又大大侮辱。</verse>
				<verse number="22">𠊎所寶貴个聖殿被人褻瀆个時，強盜入去、侮辱它个時，𠊎絕對毋會干涉。</verse>
				<verse number="23">「全國混亂 。地面上兇殺充滿，城市肚殘暴个事滿遍係。</verse>
				<verse number="24">𠊎愛將盡惡个民族帶到這位來，佔領你等个屋仔。𠊎俾列國褻瀆你等敬拜場所个時，你等盡強个勇士也無半些膽量。</verse>
				<verse number="25">毀滅个時到了！你等愛求和平，總係毋會有和平。</verse>
				<verse number="26">災難緊發生；壞消息連連來。你等會尋先知求異象；祭司無麼介好教人；長老也毋會計劃。</verse>
				<verse number="27">君王緊噌，領袖當失望；人民著驚到愊愊掣。𠊎愛因為你等所做个事責罰你等；你等樣般審判別人，𠊎也愛樣般審判你等。恁樣，你等就會知𠊎係上主。」</verse>
			</chapter>
			<chapter number="8">
				<verse number="1">𠊎等被人捉來个第六年，六月初五，該兜對 猶大 被人捉來个長老到吾屋下來看𠊎。至高上主个能力忽然間臨到𠊎。</verse>
				<verse number="2">𠊎一看，看到一個形像像人个樣仔；佢个身體腰圈下背像火，腰圈以上像發光个純金 。</verse>
				<verse number="3">佢伸出一隻像手个樣仔，捉等𠊎个頭那毛。接等，在異象中，上帝个靈將𠊎擎到空中，帶𠊎到 耶路撒冷 ，到聖殿北門內院个入口。該位有一隻惹上帝發譴个偶像。</verse>
				<verse number="4">在該位，𠊎看到 以色列 上帝个榮光，就像𠊎在 迦巴魯 河壩滣所看到个共樣。</verse>
				<verse number="5">上帝㧯𠊎講：「人子啊，你向北看！」𠊎就向北看，就看到在走廊入口个祭壇堘頭，該位有一隻惹上帝發譴个偶像。</verse>
				<verse number="6">上帝㧯𠊎講：「人子啊，你看到佢等做麼介麼？你看， 以色列 人在這位做恁邪惡个事，迫𠊎離開𠊎个聖所遠遠。總係，你會看到比這還較邪惡个事。」</verse>
				<verse number="7">佢帶𠊎去外院个入口，看到圍牆有一隻孔仔。</verse>
				<verse number="8">佢講：「人子啊，你愛在圍牆這位挖一隻大孔仔。」𠊎挖一隻大孔仔，看到有一隻門。</verse>
				<verse number="9">佢㧯𠊎講：「入去，看佢等在該位所做邪惡个壞事。」</verse>
				<verse number="10">𠊎就入去看；看到滿壁畫當多蛇㧯其他無淨浰个動物，還有 以色列 人所拜个偶像。</verse>
				<verse number="11">有七十個 以色列 長老在該位， 沙番 个孻仔 雅撒尼亞 也在當中。逐儕㨮等一隻香爐，煙个香味衝等上。</verse>
				<verse number="12">上帝㧯𠊎講：「人子啊，你有看到 以色列 个長老偷偷仔做麼介麼？佢等在充滿偶像个房間肚禮拜。佢等尋理由講：『上主看毋到𠊎等；佢㧒掉這所在了。』」</verse>
				<verse number="13">接等，上主㧯𠊎講：「你還會看到佢等做比這還較邪惡个事。」</verse>
				<verse number="14">然後佢帶𠊎到聖殿北門，俾𠊎看一群婦人家；姖等堵好坐在該位為 搭模斯 神 个死噭吱。</verse>
				<verse number="15">上主講：「人子啊，你有看到麼？你還會看到比這還較邪惡个事。」</verse>
				<verse number="16">然後佢帶𠊎到聖殿个內院。在聖殿內院个入口，在祭壇㧯走廊中間，大約有二十五個人，背向內院，面向東方，在拜正出來个日頭。</verse>
				<verse number="17">上主㧯𠊎講：「人子啊，你有看到麼？你看，這兜 猶大 人在全國逐所在行暴力个事還毋滿足，還愛走到聖殿肚來做這邪惡个事來惹𠊎發譴。看啊，佢等用最無禮个行動 侮辱𠊎。</verse>
				<verse number="18">所以，𠊎愛向佢等大發譴。𠊎毋饒佢等，也毋憐憫佢等。就算佢等大聲喊來求𠊎，𠊎也毋聽。」</verse>
			</chapter>
			<chapter number="9">
				<verse number="1">以後，𠊎聽到上帝大聲喊：「你等受派來責罰這城市个人啊，帶你等个武器來！」</verse>
				<verse number="2">即時有六個人帶等武器對聖殿外院个北門過來；其中有另外一個著麻紗个衫、帶等筆墨。佢等入來，企在銅个祭壇堘頭。</verse>
				<verse number="3">以色列 上帝个榮光離開基路伯，徙到聖殿个入口；這榮光本來停在基路伯頂高。上主喊該著麻紗个衫、帶等筆墨个，㧯佢講：</verse>
				<verse number="4">「你去，行透全 耶路撒冷 ，堵到因為城肚發生可惡个事悲傷歎息个人，愛在佢等額頭做記號。」</verse>
				<verse number="5">𠊎又聽到上帝㧯其他个人講：「你等愛跈在佢後背，行透全城去㓾人，出手盡㓾，毋好放過一個人，毋使憐憫。</verse>
				<verse number="6">無論係老人家、後生人、細妹仔、婦人家抑係孲𤘅仔，全部愛㓾掉；總係做毋得㓾該兜額頭有記號个人。這下就對𠊎个聖所這位開始出手！」所以佢等對企在聖殿肚个長老開始㓾。</verse>
				<verse number="7">上帝對佢等講：「將屍體堆滿聖殿个庭院，將聖殿打垃圾！這下就出去！」所以佢等就出去在城肚㓾人。</verse>
				<verse number="8">佢等去㓾人个時，𠊎自家一儕留下來。𠊎伏在地泥下喊：「至高个上主啊，你斷真愛向 耶路撒冷 拚淨大發譴、將 以色列 賸下來个人全部滅淨淨係麼？」</verse>
				<verse number="9">上帝應講：「 以色列 人㧯 猶大 人个罪惡盡重。全國逐所在都有兇殺； 耶路撒冷 充滿冤枉。佢等講，𠊎 — 上主㧒掉佢等个國家了，毋看顧佢等。</verse>
				<verse number="10">所以，𠊎還係毋饒佢等，毋憐憫佢等。佢等樣般款待別人，𠊎也愛樣般款待佢等。」</verse>
				<verse number="11">後來，該著麻紗个衫、帶等筆墨个轉來，向上主報告：「𠊎已經照你个命令做了！」</verse>
			</chapter>
			<chapter number="10">
				<verse number="1">𠊎昂頭看基路伯頭那頂个穹蒼，頂高有一座就像係用藍寶石造个寶座。</verse>
				<verse number="2">上帝對該著麻紗衫个人講：「你入去，對基路伯下背个輪仔當中用手捧出𤏸等个火炭，然後將火炭委在城肚。」 𠊎看到佢入去。</verse>
				<verse number="3">佢入去个時，基路伯企在聖殿个南片；有雲充滿內院。</verse>
				<verse number="4">上主个榮光離開基路伯，停在聖殿門口；接等，有雲充滿聖殿。上主个榮光充滿歸隻庭院。</verse>
				<verse number="5">基路伯个翼胛所發出个聲在外院也做得聽到；當像全能上帝講話个聲音。</verse>
				<verse number="6">上主命令該著麻紗衫个人，去基路伯下背个輪仔當中拿火；佢就入去，企在其中个一個輪仔堘頭。</verse>
				<verse number="7">其中一個基路伯伸手到佢等中間个火堆，拿兜火炭放在該著麻紗衫个人手項。佢一拿到就離開。</verse>
				<verse number="8">𠊎看到該兜基路伯个逐隻翼胛下有一隻手，就像人个手。</verse>
				<verse number="9">𠊎又看到四隻共樣个輪仔，逐個基路伯堘頭有一隻輪仔像寶石恁金；</verse>
				<verse number="10">逐隻輪仔旁邊另外有一隻輪仔，輪仔㧯輪仔互相直角相切。</verse>
				<verse number="11">基路伯愛徙挺動个時，做得向逐方向徙，毋使轉身；佢等毋使轉身，歸隻就能照自家个意思徙挺動。</verse>
				<verse number="12">佢等个身體、背囊、手、翼胛㧯輪仔全部滿有目珠。</verse>
				<verse number="13">講到這兜輪仔，𠊎耳公聽到講：它兜係第一個異象中共樣會挺動个輪仔。</verse>
				<verse number="14">逐個基路伯有四隻面：第一隻像牛 个面，第二隻像人个面，第三隻像獅仔个面，第四隻像鷹鳥个面。</verse>
				<verse number="15">基路伯飛上去了；佢等就係𠊎在 迦巴魯 河壩滣所看到个生物。</verse>
				<verse number="16">基路伯行个時，輪仔在旁邊行；基路伯打開翼胛飛上去个時，輪仔也跈在佢等旁邊。</verse>
				<verse number="17">佢等停下來，輪仔也停下來。佢等飛上去，輪仔也跈在佢等旁邊，因為基路伯个靈在輪仔當中。</verse>
				<verse number="18">後來，上主个榮光離開聖殿个入口，徙到基路伯頂高。</verse>
				<verse number="19">𠊎看等个時，佢等打開翼胛飛上去；輪仔全部跈在佢等旁邊。佢等停在上主聖殿个東門， 以色列 上帝个榮光在佢等頂高。</verse>
				<verse number="20">𠊎認出這兜基路伯，係𠊎在 迦巴魯 河壩滣所看到个，就係在 以色列 上帝下背个生物。</verse>
				<verse number="21">逐個基路伯有四隻面，四隻翼胛；逐隻翼胛下有一隻像人个手。</verse>
				<verse number="22">佢等个面㧯𠊎在 迦巴魯 河壩滣所看到个完全共樣。逐個基路伯攏總係向頭前直行。</verse>
			</chapter>
			<chapter number="11">
				<verse number="1">上主个靈將𠊎擎起來，帶𠊎到聖殿个東門。𠊎在東門附近看到二十五個人，當中有兩個民間領袖 — 押朔 个孻仔 雅撒尼亞 㧯 比拿雅 个孻仔 比拉提 。</verse>
				<verse number="2">上主㧯𠊎講：「人子啊，這兜人在城肚計劃奸詐个事，詭計多端。</verse>
				<verse number="3">佢等講：『𠊎等無幾久就愛重建家園 。這座城像鑊頭，𠊎等像底背个肉，得到鑊頭个保護 。』</verse>
				<verse number="4">所以，人子啊，你愛講預言、用𠊎个話責備佢等。」</verse>
				<verse number="5">上主个靈忽然間臨到𠊎。上主㧯𠊎講，愛向人民傳這信息：「 以色列 人啊，你等个嘴所講、心所想个，𠊎全部知。</verse>
				<verse number="6">你等在這城肚㓾死恁多人，街路項堆滿屍體。</verse>
				<verse number="7">「所以，𠊎 — 至高个上主恁樣講：無毋著，這座城就係鑊頭；鑊頭肚个肉係你等㓾死个屍體。你等毋會在城肚，因為𠊎愛將你等㧒出城外。</verse>
				<verse number="8">你等驚刀劍麼？𠊎愛用刀劍攻打你等。</verse>
				<verse number="9">𠊎愛帶你等到城外，將你等交給外國人。𠊎已經判你等死刑。</verse>
				<verse number="10">你等愛因為戰爭死在自家个國家。恁樣你等就會知𠊎係上主。</verse>
				<verse number="11">這座城絕對無辦法保護你等，像鑊頭保護鑊頭肚个肉恁樣。無論你等在 以色列 麼介所在，𠊎全部愛責罰你等。</verse>
				<verse number="12">你等愛知𠊎係上主。你等跈鄰國个風俗習慣就係犯𠊎个法律，違背𠊎个命令。」</verse>
				<verse number="13">𠊎正講預言个時， 比拿雅 个孻仔 比拉提 忽然間死掉。𠊎伏在地上大聲喊：「至高个上主啊，連 以色列 賸下來个人，你也愛全部消滅係麼？」</verse>
				<verse number="14">上主㧯𠊎講話；</verse>
				<verse number="15">佢講：「人子啊， 耶路撒冷 个人民講到你同你共下被人捉去个 以色列 同胞个時，佢等講：『該兜被人捉去个同胞離開上主个聖所忒遠了。上主已經將這垤土地賜給𠊎等。』</verse>
				<verse number="16">「所以，你愛將𠊎个話傳給㧯你共下被人捉去个同胞。雖然𠊎將佢等逐到遠遠个列國，四散在無共樣个所在；總係𠊎還係愛㧯佢等共下，在佢等被人捉去个所在，做佢等暫時个聖所。</verse>
				<verse number="17">「所以，你愛將𠊎 — 至高个上主所講个話㧯佢等講。𠊎識將佢等四散到列國去；𠊎愛將佢等集合起來，帶佢等離開該位；𠊎愛將 以色列 个土地還佢等。</verse>
				<verse number="18">佢等倒轉去以後一定愛除掉所有邪惡个偶像。</verse>
				<verse number="19">𠊎愛將合一 个心賜給佢等，將新个靈放在佢等底背；𠊎愛除掉佢等像石頭恁硬个心，賜給佢等有血有肉个心。</verse>
				<verse number="20">恁樣，佢等就會遵守𠊎个法律，忠心順服𠊎所有个命令。佢等愛做𠊎个子民；𠊎愛做佢等个上帝。</verse>
				<verse number="21">講到該兜心中歡喜拜邪惡偶像个人，𠊎愛責罰佢等。𠊎愛照佢等个行為責罰佢等。」至高个上主恁樣宣佈了。</verse>
				<verse number="22">基路伯打開翼胛，輪仔跈等佢等； 以色列 上帝个榮光在佢等頂高。</verse>
				<verse number="23">上主个榮光升上去，離開城，停在城東片該座山頂。</verse>
				<verse number="24">在異象中，上帝个靈將𠊎擎起來，帶轉被人捉去 巴比倫 个同胞該位。然後𠊎所看到个異象就毋見掉了。</verse>
				<verse number="25">𠊎就將上主指示𠊎所有个事情㧯被人捉去該位个同胞講。</verse>
			</chapter>
			<chapter number="12">
				<verse number="1">上主㧯𠊎講話；</verse>
				<verse number="2">佢講：「人子啊，你住在悖逆个人當中。佢等有目珠，總係看毋到，有耳公，總係聽毋到，因為佢等係悖逆个人。</verse>
				<verse number="3">「所以，人子啊，你愛準備逃難愛用个包袱，在斷烏以前出發。你愛當佢等个面前離開，到另外一個所在去。希望該兜悖逆个人會注意到你个行動 。</verse>
				<verse number="4">你愛在日時頭準備好逃難愛用个包袱，好俾佢等看到你所做个。到臨暗仔，你愛在佢等个目珠前離開，就像愛逃難恁樣。</verse>
				<verse number="5">佢等還看等个時，你愛將若屋下个壁挖一隻孔仔，對該隻孔仔將包袱帶出去。</verse>
				<verse number="6">你愛在佢等面前將包袱揹在肩頭，揞等目珠行出去。你所表演个就係𠊎愛給 以色列 人个警告。」</verse>
				<verse number="7">𠊎照上主所吩咐个去做。該日，𠊎準備好逃難愛用个包袱，一到臨暗仔，𠊎就用手將壁挖一隻孔仔，然後在佢等个目珠前揹等包袱離開。</verse>
				<verse number="8">第二朝晨，上主㧯𠊎講話；</verse>
				<verse number="9">佢講：「人子啊，該兜悖逆个 以色列 人敢毋係問你，愛知你做麼介？</verse>
				<verse number="10">你愛將𠊎 — 至高个上主愛對佢等講个話㧯佢等講。這係有關在 耶路撒冷 統治个領袖㧯佢周圍 以色列 人民个信息。</verse>
				<verse number="11">愛㧯佢等講，你所做个係一種兆頭，表示愛發生在佢等身項个事。佢等愛被人捉去做難民。</verse>
				<verse number="12">佢等中間个領袖愛在斷烏个時揹起包袱，對佢等為佢挖開个壁孔仔逃走。佢愛揞等目珠，看毋到愛去个所在。</verse>
				<verse number="13">𠊎愛打開𠊎个羅網捉佢，將佢帶去 巴比倫 城。佢雖然死在該位，也毋會看到該城。</verse>
				<verse number="14">𠊎愛將佢旁邊所有个人，包含顧問㧯軍隊四散到列國去。𠊎愛在逐所在逐佢等，㓾佢等。</verse>
				<verse number="15">「𠊎將佢等逐走、四散在外國以後，佢等就會知𠊎係上主。</verse>
				<verse number="16">總係，𠊎愛在佢等當中留下少數个人，毋使受到戰亂、飢荒、發瘟个災害。恁樣，該兜賸到个人愛在被人捉去个逐國，講起自家以前所做个係樣般積惡，又愛承認𠊎係上主。」</verse>
				<verse number="17">上主㧯𠊎講話；</verse>
				<verse number="18">佢講：「人子啊，你愛緊食緊顫；緊啉緊驚、無葛無煞。</verse>
				<verse number="19">你愛對全國个人民講，這係至高个上主愛㧯留在 以色列 本土所賸个 耶路撒冷 人講个話。佢等愛緊食緊顫，緊啉緊驚、無葛無煞。佢等个土地愛荒廢，因為人民全部無王無法。</verse>
				<verse number="20">人口多个城市會荒掉，村莊變做曠野。恁樣，佢等就會知𠊎係上主。」</verse>
				<verse number="21">上主㧯𠊎講話；</verse>
				<verse number="22">佢講：「人子啊， 以色列 人做麼介流傳講『一日又過一日，異象全無實現』這句俗語呢？</verse>
				<verse number="23">你愛㧯佢等講，𠊎 — 至高个上主恁樣講：𠊎愛結束這句俗語； 以色列 當中毋會再流傳這句話。你反轉愛㧯佢等講：『日仔到了，異象愛實現了！』</verse>
				<verse number="24">「在 以色列 人當中毋會再有假異象㧯迷惑人个預言。</verse>
				<verse number="25">𠊎 — 上主自家愛對佢等講話；𠊎講个話一定愛實現，絕對毋會停跎。悖逆个人啊，𠊎對你等發出个警告，一定愛在你等還生个時執行。𠊎 — 至高个上主恁樣宣佈了。」</verse>
				<verse number="26">上主又㧯𠊎講話；</verse>
				<verse number="27">佢講：「人子啊， 以色列 人恅到你所看到个異象、所講个預言，全部係指等當久以後个事。</verse>
				<verse number="28">所以，你愛㧯佢等講，𠊎 — 至高个上主恁樣講：𠊎个話連一句毋會再停跎；𠊎講个話一定愛實現。𠊎 — 至高个上主恁樣宣佈了。」</verse>
			</chapter>
			<chapter number="13">
				<verse number="1">上主㧯𠊎講話；</verse>
				<verse number="2">佢講：「人子啊，你愛講預言；你愛責備 以色列 該兜靠自家講預言个先知。㧯佢等講，愛注意聽上主个話。」</verse>
				<verse number="3">至高个上主恁樣講：「這兜戇先知慘了！佢等个靈感係照自家个妄想；佢等个異象係自家編个。</verse>
				<verse number="4">以色列 人啊，你該兜先知㧯在荒埔出入个野狗 共樣。</verse>
				<verse number="5">裂縫佢等毋去補；橫掉个牆，佢等毋去整。所以，上主个日仔來到、戰爭發生个時， 以色列 人就企毋住。</verse>
				<verse number="6">佢等个異象係假个；佢等个預言係騙人个；佢等恅到自家係傳講𠊎个信息，其實，𠊎並無派佢等。佢等樣還希望所講个話會實現！</verse>
				<verse number="7">𠊎㧯佢等講：『你等所看到个異象係假个；你等个預言係騙人个。你等恅到這兜話係𠊎講个，其實，𠊎並無㧯你等講麼介！』」</verse>
				<verse number="8">至高个上主又㧯佢等講：「你等所講个話係騙人个；你等所看到个異象係假个；所以𠊎反對你等。</verse>
				<verse number="9">你這兜看到假異象、亂講預言个先知啊，𠊎愛責罰你等！你等做毋得參加吾子民个聚會；你等个名做毋得登記在 以色列 家个名冊底背。你等絕對做毋得轉到 以色列 个故鄉。恁樣，你等就會知𠊎係至高个上主。</verse>
				<verse number="10">「先知欺騙𠊎个子民，講：『平安！』其實無平安。𠊎个子民起無堅固个圍牆，先知就用白灰抹上去。</verse>
				<verse number="11">你愛㧯該兜先知講，佢等所抹个圍牆愛橫掉。𠊎愛使狂風大雨㧯大冰雹吹打圍牆，</verse>
				<verse number="12">圍牆就橫掉。有人會問：『你等抹圍牆有麼介用呢？』」</verse>
				<verse number="13">所以，至高个上主恁樣講：「𠊎愛發譴，用狂風大雨㧯大冰雹來打壞這圍牆。</verse>
				<verse number="14">𠊎愛拆掉你等抹過个圍牆，拆到貼貼，俾地基顯出來；圍牆愛橫掉，會磧死你等。恁樣，你等就會知𠊎係上主。</verse>
				<verse number="15">「𠊎愛在圍牆㧯抹圍牆个人身項將𠊎个大發譴拚到淨淨。𠊎愛㧯你等宣佈，圍牆㧯抹圍牆个人全部無掉去了。</verse>
				<verse number="16">該兜在無平安个情況之下，㧯 耶路撒冷 保證平安个 以色列 先知全部無掉去了。」至高个上主恁樣宣佈了。</verse>
				<verse number="17">上主講：「人子啊，這下你愛責備在人民當中亂講預言个婦女。</verse>
				<verse number="18">你愛㧯姖等講，至高个上主恁樣講： 『你這兜婦女慘了！你等逐個人在手腕項攣行邪術个帶仔，戴揜頭那个頭巾做符筊，來控制人个生命。你等想愛得到一種能力，控制吾子民个生死，來求自家个利益嗎？</verse>
				<verse number="19">你等為到幾揢大麥、幾垤餅，就在𠊎个子民面前侮辱𠊎。應該生个，你等㓾掉；該死个，你等留等。你等㧯𠊎个子民講花撩，佢等也相信你等。』」</verse>
				<verse number="20">所以，至高个上主恁樣講：「𠊎惱你等拿來控制人生命个行邪術个帶仔。𠊎愛對你等个手腕揪掉該兜邪術个帶仔，救該兜被你等控制个人。</verse>
				<verse number="21">𠊎愛揪掉你等个做符筊个頭巾，救𠊎个子民，使佢等永遠毋會再受到你等个控制。恁樣，你等就會知𠊎係上主。</verse>
				<verse number="22">「𠊎無愛俾好人傷心，你等顛倒講花撩害佢等失望。你等毋俾壞人棄邪歸正來得救。</verse>
				<verse number="23">所以，你等自家所想出來个假異象，㧯亂編个預言全部愛結束了。𠊎愛救𠊎个子民離開你等个控制。恁樣，你等就會知𠊎係上主。」</verse>
			</chapter>
			<chapter number="14">
				<verse number="1">有幾個 以色列 个長老來坐到𠊎面前問𠊎。</verse>
				<verse number="2">該時，上主㧯𠊎講話；</verse>
				<verse number="3">佢講：「人子啊，這兜人當迷信，拜偶像，將害佢等犯罪个絆腳石擺在佢等面前。𠊎敢愛搭佢等个求問嗎？</verse>
				<verse number="4">「你愛㧯佢等講，𠊎 — 至高个上主恁樣講：若有 以色列 人迷信，拜偶像，將害佢犯罪个絆腳石擺在佢面前，然後又來求問先知，𠊎愛因為佢拜恁多偶像來報應佢！</verse>
				<verse number="5">所以該兜因為偶像來離開𠊎个 以色列 人，𠊎愛將佢等个心再揪轉來。</verse>
				<verse number="6">「所以，你愛㧯 以色列 人講，𠊎 — 至高个上主恁樣講：倒轉來！離開你等个偶像，離開該兜邪惡个東西！</verse>
				<verse number="7">「無論係 以色列 人抑係住在你等當中个外族人，凡離開𠊎，迷信去拜偶像，敗壞，犯罪，然後又來求問先知个，𠊎自家愛教訓佢！</verse>
				<verse number="8">𠊎愛責罰佢，拿佢來示眾，用佢來警告眾人。𠊎愛對𠊎个子民當中除掉佢。恁樣，你等就會知𠊎係上主。</verse>
				<verse number="9">「若係有先知被人騙走，回答人个時講毋著話，該係因為𠊎 — 上主由在佢被人騙走。𠊎愛責罰該先知，對 以色列 人當中除掉佢。</verse>
				<verse number="10">先知㧯請教佢个人愛受共樣个責罰。</verse>
				<verse number="11">𠊎恁樣做係愛使 以色列 人毋會再離開𠊎，毋會再犯罪，侮辱自家。佢等愛做𠊎个子民；𠊎愛做佢等个上帝。」至高个上主恁樣宣佈了。</verse>
				<verse number="12">上主㧯𠊎講話；</verse>
				<verse number="13">佢講：「人子啊，若係有一隻國家犯罪，對𠊎無忠心，𠊎愛伸手切斷佢等糧食个來源；𠊎愛使飢荒臨到，使人㧯頭牲全部餓死。</verse>
				<verse number="14">就算 挪亞 、 但以理 㧯 約伯 三儕全部住在該位，佢等个義也單淨救得到自家个命定定。」至高个上主恁樣宣佈了。</verse>
				<verse number="15">「𠊎若係使野獸在該國亂走害人，俾人驚到，毋敢經過該位，該地變做荒地，</verse>
				<verse number="16">𠊎 — 至高个上主指等𠊎永遠个生命發誓，就算該三個人住在該位，佢等也救毋到自家个子女；佢等單淨救得到自家定定，土地也會荒掉去。</verse>
				<verse number="17">「𠊎若係使該所在受到戰亂，當利个刀劍將人㧯頭牲全部㓾淨淨，</verse>
				<verse number="18">𠊎 — 至高个上主指等𠊎永遠个生命發誓，就算該三個人住在該位，佢等也救毋到自家个子女；佢等單淨救得到自家定定。</verse>
				<verse number="19">「𠊎若係使發瘟在該位流行，在大發譴當中消滅一切，將人㧯頭牲全部㓾淨淨，</verse>
				<verse number="20">𠊎 — 至高个上主指等𠊎永遠个生命發誓，就算 挪亞 、 但以理 㧯 約伯 全部住在該位，佢等也救毋到自家个子女；佢等个義單淨救得到自家定定。」</verse>
				<verse number="21">至高个上主恁樣講：「還會較慘噢！𠊎愛用戰亂、飢荒、野獸㧯發瘟這四種盡得人驚个災難來責罰 耶路撒冷 ，將人㧯頭牲全部消滅。</verse>
				<verse number="22">若係有人無死，又救出自家个子女，佢等走到你等該位个時，你等愛注意看佢等有幾壞！恁樣，你等就會明白𠊎責罰 耶路撒冷 係應該个。</verse>
				<verse number="23">你等也會了解𠊎所做个一切係有理个。」至高个上主恁樣宣佈了。</verse>
			</chapter>
			<chapter number="15">
				<verse number="1">上主㧯𠊎講話；</verse>
				<verse number="2">佢講：「人子啊，葡萄樹㧯別个樹仔樣比抑得呢？葡萄樹个枝仔㧯樹林肚个樹仔樣比抑得呢？</verse>
				<verse number="3">你做得拿它來做麼介？你做得拿它來做掛東西个樹釘仔麼？</verse>
				<verse number="4">它單淨做得拿來燒火。它兩頭已經燒掉，中央也燒到烏烏，你還做得拿它來做麼介呢？</verse>
				<verse number="5">就算還吂燒，它乜無麼介用；燒掉，燒到烏烏，還較無用。」</verse>
				<verse number="6">所以，至高个上主恁樣講：「𠊎愛將 耶路撒冷 个人民逐出來，責罰佢等，就像𠊎對樹林肚將葡萄樹擇出來燒恁樣。就算佢等閃過一場火災，還有另外一場大火愛將佢等燒淨淨。𠊎責罰佢等个時，你等就會知𠊎係上主。</verse>
				<verse number="7"></verse>
				<verse number="8">佢等對𠊎無忠心，所以𠊎愛使佢等个土地荒廢。」至高个上主恁樣宣佈了。</verse>
			</chapter>
			<chapter number="16">
				<verse number="1">上主又㧯𠊎講話；</verse>
				<verse number="2">佢講：「人子啊，你愛指出 耶路撒冷 所做个事係樣般可惡。</verse>
				<verse number="3">愛講，至高个上主對 耶路撒冷 恁樣講： 「 迦南 人个地係你个故鄉；你在該位出世。若爸係 亞摩利 人，若姆係 赫 人 。</verse>
				<verse number="4">你出世个時，無人㧯你剪臍帶、洗身、用鹽拭身體，用布仔包起來。</verse>
				<verse number="5">孲𤘅仔出世个時應該得到个照顧，你一些仔也無得到。你𫱔下來，無人惜你；反轉被人㧒在野外。</verse>
				<verse number="6">「後來，𠊎對該位經過，看到你在血藪肚蠕蠕動，就㧯你講：你雖然滿身血，總係你一定愛生存下去！</verse>
				<verse number="7">𠊎養育你，就像照顧田肚个花草。你緊來緊大，成做盡靚个細妹仔，乳菇漸漸大，毛也生出來，還係赤身露體。</verse>
				<verse number="8">「𠊎又經過該位，發現你已經到談情說愛个年紀。𠊎用外衫遮等你个膚身，㧯你發誓。𠊎 — 至高个上主㧯你立約，你就成做𠊎个𡜵娘。</verse>
				<verse number="9">「後來，𠊎用水洗掉你膚身个血，又用橄欖油膏你个身體。</verse>
				<verse number="10">𠊎給你著繡花个衫，著盡好个皮鞋，也給你麻紗做个幪頭帕㧯絲綢做个外衫。</verse>
				<verse number="11">𠊎㧯你打扮，給你珠寶 — 手鈪、脖鍊、</verse>
				<verse number="12">鼻環、耳環，也用冕旒戴在你頭那頂。</verse>
				<verse number="13">你戴金銀个妝飾品，著繡花个麻紗个衫㧯絲綢外衫。你食最好个麵粉做个餅、蜂糖㧯橄欖油。無人比你較靚，你就像王后恁高貴。</verse>
				<verse number="14">因為𠊎 — 至高个上主使你變到盡靚，你生到恁靚个名聲就傳到列國。</verse>
				<verse number="15">「你反轉利用自家个靚㧯名聲來行姦淫，放蕩到㧯所有過路个人勾結。</verse>
				<verse number="16">你將自家个衫褲拿去打扮拜神明个地方，像神廟娼妓在該位㧯逐儕行姦淫。恁樣个事應該無發生，也一定毋好再做。</verse>
				<verse number="17">你拿𠊎送給你个金銀珠寶去打造男性个人公仔，然後㧯它兜行姦淫。</verse>
				<verse number="18">你用𠊎給你个繡花衫褲袈在這兜偶像身上，又將𠊎給你个橄欖油㧯香料獻給它兜。</verse>
				<verse number="19">𠊎 — 至高个上主給你个糧食 — 上等麵粉、橄欖油、蜂糖，你拿去做祭物獻給偶像，為到愛得它兜个歡喜。</verse>
				<verse number="20">「你又拿你為𠊎𫱔个子女做牲儀獻給偶像；你行這兜姦淫，毋係小可个事！</verse>
				<verse number="21">你還㓾死𠊎个子女做牲儀獻給偶像。</verse>
				<verse number="22">你做妓女、做下賤个事，自從毋識回想正出世時赤身露體、在血藪肚蠕蠕動个情況。」</verse>
				<verse number="23">至高个上主又講：「你慘了！會堵到災難了！你做這恁多壞事以後，</verse>
				<verse number="24">又在街頭巷尾起拜偶像个場所，並在該位賣淫。</verse>
				<verse number="25">你盡靚个名聲變做壞名聲；所有過路个人，你都㧯佢等行姦淫，越來越厲害。</verse>
				<verse number="26">你㧯該放蕩个鄰舍 埃及 人睡共頂眠床；你一直行姦淫來惹𠊎受氣。</verse>
				<verse number="27">「所以，𠊎伸手來責罰你，搶走𠊎賜給你个恩典。𠊎將你交給怨恨你个 非利士 人；佢等盡惱你毋知見笑个行為。</verse>
				<verse number="28">「總係，你還無滿足，又愛跈 亞述 人走，做佢个情婦；總係佢也無法度滿足你个慾望。</verse>
				<verse number="29">所以你又去尋該商業國家 巴比倫 私通；你還係無滿足。」</verse>
				<verse number="30">至高个上主恁樣講：「你个心恁敗壞 ！你像毋知見笑个妓女做這一切个壞事。</verse>
				<verse number="31">你在街頭巷尾起拜偶像个場所，在該位行姦淫。總係你毋係像妓女恁樣為金錢來賣身。</verse>
				<verse number="32">你係淫婦！你甘願㧯外人私通，無愛自家个老公！</verse>
				<verse number="33">妓女向人討價錢，你反轉送禮物貼契哥；你巴結佢等，引誘佢等對逐所在來㧯你行姦淫。</verse>
				<verse number="34">你㧯一般妓女顛倒：無人迫你做妓女；你毋收錢，反轉出錢貼契哥。你實在㧯一般妓女顛倒噢！」</verse>
				<verse number="35">所以，淫婦 耶路撒冷 啊，你愛聽上主所講个話。</verse>
				<verse number="36">至高个上主恁樣講：「你像妓女衫褲脫淨淨，將自家交給該兜契哥㧯偶像。你㓾自家个子女，將佢等做牲儀獻給邪惡个偶像。</verse>
				<verse number="37">所以，𠊎愛召集你以前个契哥，無論你所愛所惱个全部調來。𠊎愛喊佢等對逐所在來，將你圍起來，然後在佢等面前將你剝到光光，俾佢等看到你赤身露體。</verse>
				<verse number="38">𠊎愛責罰你犯姦淫㧯㓾人个罪，愛在大發譴之下判你死刑。</verse>
				<verse number="39">𠊎愛將你交在佢等手中；佢等愛拆掉你拜偶像、行姦淫个所在，搶走你个衫褲㧯珠寶，使你个膚身光光。</verse>
				<verse number="40">「佢等愛煽動群眾拿石頭㧹死你，用劍將你剁到糜糜。</verse>
				<verse number="41">佢等愛放火燒你个屋仔，俾歸群个婦人家看到你受刑罰。𠊎愛使你毋會再做妓女，毋會再貼契哥。</verse>
				<verse number="42">恁樣，𠊎个受氣正會消掉，心平氣和，無再發譴，也無再嫉妒。</verse>
				<verse number="43">因為你毋記得你後生个時𠊎樣般款待你，反轉做這兜事來惹𠊎受氣，所以𠊎恁樣報應你。你已經做盡多可惡个壞事，做麼介還愛加添行姦淫个罪惡呢？」至高个上主恁樣宣佈了。</verse>
				<verse number="44">上主講：「 耶路撒冷 啊，別人愛用這句俗語指等你講：『有恁樣个𡟓仔正會𫱔恁樣个妹仔！』</verse>
				<verse number="45">你確實係若姆个妹仔，㧯姖共樣；姖惱自家个老公㧯子女。你也像若姊妹，惱自家个老公㧯子女。你㧯你該兜姊妹城市全部係 赫 人阿姆㧯 亞摩利 人阿爸𫱔个。</verse>
				<verse number="46">「你个阿姊係 撒馬利亞 ；姖㧯周圍个村莊係在你个北方。你个老妹係 所多瑪 ；姖㧯周圍个村莊係在你个南方。</verse>
				<verse number="47">你跈姖等个腳步，學姖等可惡个行為；你學罅吂？毋單淨恁樣！你一切所行个比姖等還較積惡。</verse>
				<verse number="48">「𠊎 — 至高个上主指等𠊎永遠个生命發誓：你个老妹 所多瑪 㧯姖周圍个村莊無犯過你㧯你周圍个村莊所犯个罪惡。</verse>
				<verse number="49">所多瑪 㧯姖个妹仔米糧充足，過安樂个生活，就驕傲起來，毋照顧該兜窮苦个人。</verse>
				<verse number="50">姖等驕傲，做𠊎所怨恨个事，所以𠊎將姖等消滅。這係你所知个。</verse>
				<verse number="51">「 撒馬利亞 所犯个罪惡還無你所犯个一半。你所做个比姖所做个還較壞。你積惡个程度㧯你个姊妹來比，姖等還算較單純。</verse>
				<verse number="52">這下你愛為到自家个罪惡來受羞辱。你犯个罪比若姊妹犯个還較得人惱，㧯你來比姖等就加盡得人惜。你應該面紅際炸，因為你使若姊妹㧯你來比姖等就加盡純潔。」</verse>
				<verse number="53">上主對 耶路撒冷 講：「𠊎愛使 所多瑪 㧯 撒馬利亞 並周圍个村莊重新繁榮。𠊎也愛使你復興起來，</verse>
				<verse number="54">你就會知見笑；你堵到个羞辱會使你个姊妹感覺比你較好。</verse>
				<verse number="55">姖等愛重新繁榮；你㧯你周圍个村莊也愛復興起來。</verse>
				<verse number="56">你个罪惡吂被人發現以前，你當驕傲該站期間，你敢毋係識拿 所多瑪 來嘲謔？這下你㧯姖共樣； 以東 人、 非利士 人，㧯你周圍惱你个人全部愛嘲謔你。</verse>
				<verse number="57"></verse>
				<verse number="58">你一定愛為到自家个放蕩㧯所做个壞事來擔當一切个責任。」上主恁樣宣佈了。</verse>
				<verse number="59">至高个上主恁樣講：「𠊎愛照你个行為報應你，因為你輕看發誓、違背契約。</verse>
				<verse number="60">總係𠊎愛紀念你後生个時𠊎㧯你所立个約，重新㧯你立永遠个約。</verse>
				<verse number="61">你接納你个姊妹轉來以後，會想到你所行所做來感覺見笑。雖然這件事無包含在以前𠊎㧯你立个約底背，𠊎愛將姖等交給你，做你个妹仔。</verse>
				<verse number="62">𠊎愛重新㧯你立約，你就會知𠊎係上主。</verse>
				<verse number="63">𠊎愛赦免你所犯所有个罪過，總係你還係會想到這兜事，見笑到毋敢再講話。」至高个上主恁樣宣佈了。</verse>
			</chapter>
			<chapter number="17">
				<verse number="1">上主㧯𠊎講話；</verse>
				<verse number="2">佢講：「人子啊，你愛對 以色列 人做一個鈴仔、講一個比喻，</verse>
				<verse number="3">俾佢等明白𠊎 — 至高个上主愛向佢等講个話：有一隻大鷹鳥，翼胛當大、尾盡長、毛當靚。牠打開翼胛，飛到 黎巴嫩 山頂，啄斷香柏樹幼嫩个樹尾，</verse>
				<verse number="4">將它帶到商業中心，生理發達个城市。</verse>
				<verse number="5">然後，牠將 以色列 出產个一頭樹苗徙到一垤盡肥个土地，該位有罅額个水使它生長。</verse>
				<verse number="6">這頭樹抽筍生長，變成一頭矮矮、枝葉茂盛个葡萄樹。它个枝仔伸向該隻鷹鳥，樹根在牠个底下，成做枝葉靚靚个葡萄樹。</verse>
				<verse number="7">「另外有一隻大鷹鳥，也有一對當大个翼胛，毛當靚。這頭葡萄樹將根㧯枝仔全部伸向這隻鷹鳥，想對牠得到比果園還較豐富个水源。</verse>
				<verse number="8">其實，這頭葡萄樹早已經種在盡肥又多水个園肚，有罅額个條件使它生枝、結果，成做品種盡好个葡萄樹。</verse>
				<verse number="9">「所以，𠊎 — 至高个上主問：這頭葡萄樹會大到當茂盛麼？敢講第一隻鷹鳥毋會將它連根挷起來，摘淨葡萄，打斷枝仔，使它燥掉麼？毋使強大个國家也有辦法隨意將它連根挷掉。</verse>
				<verse number="10">無毋著，它斷真被人換來這位種，總係會大、會靚起來麼？它堪得起東風个吹打麼？敢毋會在該園肚燥掉麼？」</verse>
				<verse number="11">上主㧯𠊎講：</verse>
				<verse number="12">「你問該兜悖逆个人，看佢等了解這比喻个意思麼？㧯佢等講， 巴比倫 王到 耶路撒冷 將佢等个王㧯佢个官員捉到 巴比倫 去，</verse>
				<verse number="13">對王族中選出一儕來㧯佢立約，喊佢發誓愛忠心。 巴比倫 王又捉兜貴族來做人質，</verse>
				<verse number="14">來防止這國家復興，使姖確實遵守條約。</verse>
				<verse number="15">總係 猶大 王悖逆。佢派使者到 埃及 要求派戰馬㧯大軍前來幫助。佢有可能成功麼？佢走得掉麼？佢廢約敢有可能毋使受刑罰麼？」</verse>
				<verse number="16">至高个上主恁樣講：「𠊎指等𠊎永遠个生命發誓：這個王一定愛死在 巴比倫 。因為 巴比倫 王立佢做王，總係佢背誓，廢掉㧯 巴比倫 王所結个約。</verse>
				<verse number="17">巴比倫 王來攻城，起土堆，造高臺，進行屠殺个時，就算 埃及 王派最精良个軍隊來乜無法度救佢。</verse>
				<verse number="18">佢背誓廢約。佢做這一切个事，這下走毋掉了。」</verse>
				<verse number="19">所以，至高个上主恁樣講：「𠊎指等𠊎永遠个生命發誓：𠊎愛責罰佢；因為佢看輕自家指等𠊎个名所發个誓，破壞指等𠊎个名所結个約。</verse>
				<verse number="20">𠊎愛打開羅網捉佢，帶佢到 巴比倫 去，在該位責罰佢，因為佢對𠊎無忠心。</verse>
				<verse number="21">佢最精良个戰士全部愛戰死；打輸个兵仔愛四處逃走。該時你等就會知𠊎 — 上主恁樣宣佈了。」</verse>
				<verse number="22">至高个上主恁樣講： 𠊎愛拗斷香柏樹个樹尾， 拗斷它个嫩枝； 𠊎愛將它種在高山頂，</verse>
				<verse number="23">在 以色列 最高个山頂。 它會大起來、結果子， 成做一頭當靚个香柏樹。 各種鳥仔飛來做藪， 在樹影下尋到安身个所在。</verse>
				<verse number="24">田野所有个樹仔全部會知： 𠊎 — 上主斬斷大樹，使細樹仔大起來； 𠊎使青翠个樹枯燥，使枯燥个樹茂盛。 𠊎 — 上主恁樣宣佈了。𠊎講過个，𠊎一定會實行。</verse>
			</chapter>
			<chapter number="18">
				<verse number="1">上主㧯𠊎講話；</verse>
				<verse number="2">佢講：「 以色列 國內流傳个這句俗語係麼介意思？你等講： 爺𡟓食酸葡萄， 卻酸到子女个牙齒。」</verse>
				<verse number="3">至高个上主恁樣講：「𠊎指等𠊎永遠个生命發誓： 以色列 國內絕對毋會再流傳這句俗語。</verse>
				<verse number="4">逐儕个生命全部係𠊎个；無論係爺𡟓抑係子女个生命全部屬𠊎。麼人犯罪，麼人就愛死。</verse>
				<verse number="5">「若係有一個誠實、公正个好人，</verse>
				<verse number="6">佢毋拜 以色列 人个偶像，毋去山頂个神廟食祭物，毋拐別人个𡜵娘，毋㧯經期中个婦女同房，</verse>
				<verse number="7">毋欺負人，毋搶別人个東西。佢將抵押个東西還給人，拿東西給肚飢个人食，拿衫褲給無衫好著个人著。</verse>
				<verse number="8">佢借錢給人毋拿利息，借東西毋會討加兜轉去，毋做壞事，處理糾紛當公當。</verse>
				<verse number="9">這種人服從𠊎个誡命，認真遵行𠊎个法律。佢就係義人；佢一定會有命。」至高个上主恁樣宣佈了。</verse>
				<verse number="10">「若係這個人有一個孻仔，佢搶劫、㓾人，做厥爸毋識做過个壞事，總係好事就無去做。佢去山頂神廟食祭物，拐別人个𡜵娘。</verse>
				<verse number="11"></verse>
				<verse number="12">佢欺負窮苦人、搶人个東西，毋將抵押个東西還人。佢拜偶像，做可惡个事，</verse>
				<verse number="13">借錢給人愛拿利息，借東西給人愛討加兜轉去。這種人敢做得俾佢生？佢絕對會死！佢做這一切恁壞个事，一定愛死；佢个死係自家做來个。</verse>
				<verse number="14">「若係這個人有一個孻仔，佢看到阿爸所有个罪惡，總係毋跈阿爸个壞模樣。</verse>
				<verse number="15">佢毋拜 以色列 人个偶像，毋去山頂神廟食祭物。佢毋拐別人个𡜵娘，</verse>
				<verse number="16">毋欺負人，毋搶別人个東西。佢將抵押个東西還給人，拿東西給肚飢个人食，拿衫褲給無衫好著个人著。</verse>
				<verse number="17">佢毋做壞事 ，借錢給人毋拿利息，借東西給人毋會討加兜東西轉去。佢遵行𠊎个法律，服從𠊎个誡命。佢毋使因為厥爸所犯个罪來死，佢一定會有命。</verse>
				<verse number="18">總係厥爸欺詐人，搶人个東西，在眾人中間無好行為，佢愛因為自家所犯个罪來喪失生命。</verse>
				<verse number="19">「你等還問：孻仔做麼介毋使承擔阿爸所犯个罪呢？𠊎个回答係：孻仔有做正當合理个事；佢遵守𠊎个法律，實行法律个要求，所以佢一定會有命。</verse>
				<verse number="20">只有犯罪个人一定愛死。孻仔毋使承擔阿爸个罪；阿爸也毋使承擔孻仔个罪。義人因為行善得報賞；壞人因為作惡受責罰。</verse>
				<verse number="21">「若係壞人悔改，離開佢所行个罪惡來遵行𠊎个法律，做正當合理个事，佢就毋使死，一定會有命。</verse>
				<verse number="22">佢所犯个罪全部會得到赦免；因為佢做應該做个事，佢一定會有命。</verse>
				<verse number="23">你等恅到𠊎 — 至高个上主歡喜看壞人死掉係麼？毋係恁樣！𠊎甘願看到佢因為悔改還有生命。</verse>
				<verse number="24">「若係好人毋肯再做好事，反轉做壞人所做得人惱个壞事，佢敢做得還有命？毋使想！佢以前所做个好事毋會受紀念。佢愛因為背信、犯罪喪失生命。</verse>
				<verse number="25">「總係你等講：『主恁樣做係無公平个！』 以色列 人啊，注意聽啊！你等恅到𠊎恁樣做係無公平係麼？其實，你等所做个正係無公平！</verse>
				<verse number="26">好人毋肯再做好事，反轉去做壞事，佢愛因為自家做壞事喪失生命。</verse>
				<verse number="27">壞人悔改，開始做正當合理个事，就救到自家个命。</verse>
				<verse number="28">佢反省、悔改，所以毋使死，反轉會有生命。</verse>
				<verse number="29">以色列 人啊，你等講：『主恁樣做係無公平个！』你等恅到𠊎恁樣做係無公平係麼？其實，你等所做个正係無公平！</verse>
				<verse number="30">「所以， 以色列 人啊，𠊎 — 至高个上主恁樣㧯你等講：𠊎愛照你等逐儕个行為審判你等。你等愛悔改，離開一切个罪惡，免得你等个罪毀滅你等。</verse>
				<verse number="31">愛豁掉你等所做一切个壞事，換一個新个心、新个靈！ 以色列 人啊，樣愛使去死哪？</verse>
				<verse number="32">𠊎毋歡喜任何人死；所以你等愛悔改，就會有生命！」至高个上主恁樣宣佈了。</verse>
			</chapter>
			<chapter number="19">
				<verse number="1">上帝喊𠊎為 以色列 个眾王子做這首哀歌：</verse>
				<verse number="2">若姆係獅乸，伏在歸群公獅中； 牠在少壯獅仔當中畜細獅仔。</verse>
				<verse number="3">牠畜大一隻細獅仔成做少壯獅仔； 少壯獅仔學會打獵，學會食人。</verse>
				<verse number="4">列國聽到，將牠拐入深坑； 佢等用鉤仔將牠拖到 埃及 。</verse>
				<verse number="5">獅乸等到心著急絕望； 牠又另外畜大一隻細獅仔成做少壯獅仔。</verse>
				<verse number="6">少壯獅仔跈等歸群獅仔逐所在走來走去； 牠也學會打獵，學會食人。</verse>
				<verse number="7">牠破壞城堡 ，打壞城市； 牠大聲吼，全地个人驚到愊愊掣。</verse>
				<verse number="8">列國對四面八方來圍牠； 佢等打開羅網，將牠拐入深坑。</verse>
				<verse number="9">佢等用鉤仔將牠拖入籠仔，帶到 巴比倫 王該位； 佢等將牠關入監獄， 以色列 个群山無再聽到牠盡嘶个聲。</verse>
				<verse number="10">若姆像一頭種在溪水滣个葡萄樹， 因為水豐富，枝葉拶拶，果子當結。</verse>
				<verse number="11">它个樹桍盡硬，好做王个杖仔； 它个樹身高大，超過其他樹仔个枝葉； 它个樹尾高到堵天，遠遠就看得到。</verse>
				<verse number="12">總係，有發譴个手將它連根挷起， 豁在地上，被東風吹燥， 樹桍拗斷，果子燥掉，被火燒淨淨。</verse>
				<verse number="13">這下它被人種在曠野， 當燥無水个所在。</verse>
				<verse number="14">樹梗𤏸火，樹桍㧯果子全部燒掉； 它卻無盡硬个樹桍，好做王个杖仔。 這係一首哀歌；這首哀歌一直流傳。</verse>
			</chapter>
			<chapter number="20">
				<verse number="1">𠊎等被人捉去个第七年五月初十，有兜 以色列 个長老來坐到𠊎面前，向𠊎問上主个旨意。</verse>
				<verse number="2">該時，上主㧯𠊎講話；</verse>
				<verse number="3">佢講：「人子啊，愛㧯 以色列 个長老講，至高个上主恁樣講：『你等來問𠊎个旨意係麼？𠊎指等𠊎永遠个生命發誓：毋準你等問。𠊎 — 至高个上主恁樣宣佈了。』</verse>
				<verse number="4">「人子啊，你有預備好愛宣告佢等个罪無？好去宣告了！俾佢等想到佢等个祖先所做該兜邪惡个事。</verse>
				<verse number="5">你愛㧯佢等講，𠊎 — 至高个上主恁樣講：𠊎揀選 以色列 — 雅各 个後代該時，識向佢等發誓；𠊎識在 埃及 向佢等顯明自家，發誓講：『𠊎係上主 — 你等个上帝。』</verse>
				<verse number="6">該時，𠊎應許佢等，愛𢱋佢等出 埃及 ，帶佢等到𠊎為佢等所選該垤流乳㧯蜜當肥个土地，就係世界出產最豐富个土地。</verse>
				<verse number="7">𠊎命令佢等，逐儕愛㧒掉佢等所歡喜該兜邪惡个偶像，毋好拜 埃及 个假神來打垃圾自家，因為𠊎係上主 — 佢等个上帝。</verse>
				<verse number="8">總係佢等悖逆𠊎，毋聽𠊎講。佢等無豁掉該兜邪惡个偶像，也無㧒掉 埃及 个假神。該時，𠊎愛對佢等大發譴，在 埃及 向佢等拚𠊎个受氣。</verse>
				<verse number="9">總係𠊎無恁樣做。𠊎無愛𠊎个聖名變做壞名聲；因為𠊎識在佢等暫邸該所在个人民面前向 以色列 宣佈講，𠊎愛𢱋佢等出 埃及 。</verse>
				<verse number="10">「所以，𠊎𢱋佢等出 埃及 ，帶佢等到曠野。</verse>
				<verse number="11">𠊎將𠊎个誡命賜給佢等，將𠊎个法律教導佢等，使遵行个人全部會有命。</verse>
				<verse number="12">𠊎也命令佢等愛守𠊎个安息日，做𠊎等立約个記號，好提醒佢等，係𠊎 — 上主使佢等成做神聖个子民。</verse>
				<verse number="13">總係 以色列 人在曠野就悖逆𠊎。佢等毋遵行𠊎个法律，豁掉𠊎个誡命 — 雖然遵行个人會有命。佢等徹底打垃圾𠊎个安息日。𠊎本來想愛在曠野將𠊎个大發譴向佢等拚到淨淨，將佢等消滅掉。</verse>
				<verse number="14">總係𠊎無恁樣做。𠊎無愛𠊎个聖名變做壞名聲，因為列國全部看到𠊎𢱋 以色列 人出 埃及 。</verse>
				<verse number="15">所以，𠊎在曠野發誓，𠊎毋𢱋佢等到𠊎愛賜給佢等該垤流乳㧯蜜个土地，就係世界出產最豐富个土地。</verse>
				<verse number="16">𠊎恁樣發誓；因為佢等豁掉𠊎个誡命，毋遵行𠊎个法律，打垃圾𠊎个安息日。佢等總係愛拜佢等个偶像。</verse>
				<verse number="17">「雖然恁樣，𠊎還係憐憫佢等，決定無愛在曠野消滅佢等。</verse>
				<verse number="18">𠊎在曠野警告佢等个後生人講：毋好守祖先所定个例規；毋好跈佢等个風俗；毋好拜偶像來打垃圾自家。</verse>
				<verse number="19">𠊎係上主 — 你等个上帝。你等愛遵從𠊎个法律、誡命，</verse>
				<verse number="20">守𠊎个安息日做神聖个日仔，做𠊎等立約个記號，好提醒你等，𠊎係上主 — 你等个上帝。</verse>
				<verse number="21">「總係，該代人也悖逆𠊎。佢等毋遵行𠊎个法律、誡命 — 雖然遵行个人會有命。佢等也打垃圾𠊎个安息日。𠊎本來想愛在曠野將𠊎个大發譴向佢等拚到淨淨，將佢等消滅掉，</verse>
				<verse number="22">總係𠊎無恁樣做。𠊎無愛𠊎个聖名變做壞名聲，因為列國全部看到𠊎𢱋 以色列 人出 埃及 。</verse>
				<verse number="23">所以，𠊎在曠野又發誓，愛將佢等分散到全世界。</verse>
				<verse number="24">𠊎恁樣做係因為佢等毋遵行𠊎个法律㧯誡命，打垃圾𠊎个安息日，拜佢等祖先拜過个偶像。</verse>
				<verse number="25">「後來，𠊎由在佢等行毋好个例規，守毋會給人有生命个誡命，</verse>
				<verse number="26">俾佢等用自家个祭物打垃圾自家，也俾佢等獻自家个長子做牲儀。這係愛刑罰佢等，使佢等知𠊎係上主。</verse>
				<verse number="27">「所以，人子啊，愛㧯 以色列 人講，𠊎 — 至高个上主恁樣講：你等个祖先對𠊎無忠心，再一擺侮辱𠊎。</verse>
				<verse number="28">𠊎帶領佢等到𠊎應許給佢等个土地。佢等一看到大山㧯盡靚个樹仔，就在該位獻祭。佢等所獻清香个牲儀㧯敬神个酒惹𠊎受氣。</verse>
				<verse number="29">𠊎責備佢等：你等去个該兜高地做麼介？對恁樣，該兜所在就一直安到『高地 』。</verse>
				<verse number="30">所以，你愛轉告 以色列 人，𠊎 — 至高个上帝恁樣講：你等做麼介還係犯你等祖先犯過个罪、拜佢等拜過个偶像？</verse>
				<verse number="31">就算今晡日，你等還係獻佢等所獻个牲儀，將自家个孻仔當做牲儀燒給佢等所拜个偶像來打垃圾自家。你這兜 以色列 人還敢來求問𠊎个旨意！𠊎 — 至高个上主指等𠊎永遠个生命向你等發誓：毋准你等求問！</verse>
				<verse number="32">你等已經決定學列國，像外國人民恁樣拜樹頭㧯石頭。你等這種心意絕對毋會實現！</verse>
				<verse number="33">「𠊎 — 至高个上主指等𠊎永遠个生命向你等發誓：𠊎警告你等，𠊎愛用大權能个手、責罰个手、盡拚大發譴來統治你等。</verse>
				<verse number="34">𠊎將你等集合起來，對四散个各國𢱋轉來个時，𠊎愛喊你等體驗到𠊎大權能个手、責罰个手，㧯盡拚个大發譴。</verse>
				<verse number="35">𠊎愛將你等帶到『萬民个曠野 』，在該位當面審判你等。</verse>
				<verse number="36">𠊎以前樣般在 埃及 个曠野責罰你等个祖先，這下𠊎愛照樣責罰你等。」至高个上主恁樣宣佈了。</verse>
				<verse number="37">「𠊎愛嚴格來管你等，使你等遵守𠊎个約。</verse>
				<verse number="38">𠊎愛對你等當中除掉悖逆㧯得罪𠊎个人。𠊎愛將佢等徙走，使佢等離開這下暫邸个所在；總係𠊎絕對毋會俾佢等轉到 以色列 故鄉。恁樣，你等就會知𠊎係上主。」</verse>
				<verse number="39">至高个上主恁樣講：「所有个 以色列 人啊，由在你等繼續拜你等个偶像啊！總係𠊎警告你等，以後，你等一定會服從𠊎，無再獻祭給偶像來侮辱𠊎个聖名。</verse>
				<verse number="40">你等所有 以色列 人愛在𠊎个聖山頂，就係 以色列 个高山，敬拜𠊎。𠊎會歡喜在該位接納你等，等等你等帶祭物、最好个祭品，㧯神聖个禮物來獻給𠊎。</verse>
				<verse number="41">𠊎愛𢱋你等離開被人捉去个所在，將你等對外國集合起來；𠊎愛接納你等像清香个牲儀；列國也會知𠊎係神聖个。</verse>
				<verse number="42">𠊎𢱋你等轉到 以色列 ，到𠊎應許給你等祖先个土地以後，你等就會知𠊎係上主。</verse>
				<verse number="43">該時，你等會想到頭擺所做一切見笑个事，發現你等係樣般打垃圾自家。你等愛因為自家所做該兜壞事當惱自家。</verse>
				<verse number="44">𠊎用行動來維持𠊎个聖名時，你這兜 以色列 人就會知𠊎係上主，因為𠊎毋照你等个壞行為㧯敗壞來責罰你等。」至高个上主恁樣宣佈了。</verse>
				<verse number="45">上主㧯𠊎講話；</verse>
				<verse number="46">佢講：「人子啊，你向南看！面對南方个樹林講預言。</verse>
				<verse number="47">對南方个樹林講，愛聽至高个上主所講个話。看啊，𠊎愛放火！愛燒淨樹林肚个樹仔，無論係青个抑係燥个，全部燒光光。火當猛打毋烏，對南方一直燒到北方，逐儕个面會被大火㸐到。</verse>
				<verse number="48">佢等全部會知，該係𠊎 — 上主所放个火，無人能打烏。」</verse>
				<verse number="49">𠊎就講：「至高个上主啊，佢等會指等𠊎講：『佢敢毋係又在講比喻了！』」</verse>
			</chapter>
			<chapter number="21">
				<verse number="1">上主㧯𠊎講話；</verse>
				<verse number="2">佢講：「人子啊，你愛面向 耶路撒冷 ，指責該兜聖所，講預言警告 以色列 地。</verse>
				<verse number="3">𠊎 — 上主恁樣講：𠊎愛做你等个對敵；𠊎愛挷出劍來㓾你等，無論好人壞人全部愛㓾淨淨。</verse>
				<verse number="4">𠊎愛用𠊎个劍㓾人，對南到北攻擊一切个人。</verse>
				<verse number="5">所有个人就會知，𠊎 — 上主挷出劍，一定毋會收轉來。</verse>
				<verse number="6">「人子啊，你愛道嘆，像傷心失望个人；你愛在大眾面前道嘆。</verse>
				<verse number="7">佢等問你做麼介道嘆，你就㧯佢等講，你道嘆係因為聽到壞消息。一聽到該壞消息，佢等全部會心肝亂淨淨，兩手軟軟，膝頭愊愊掣，無半些勇氣。時間一到，災難就到！」至高个上主恁樣宣佈了。</verse>
				<verse number="8">上主㧯𠊎講：</verse>
				<verse number="9">「人子啊，你愛講預言，愛㧯人民講，𠊎 — 上主恁樣講： 一支劍，一支當利皓光个劍，</verse>
				<verse number="10">磨利以後愛㓾人， 拭金到會皓光像𥍉爧。 𠊎个子民毋聽警告，毋驚責罰； 佢等樣會有快樂呢 ！</verse>
				<verse number="11">劍已經拭到金金，做得用了； 劍已經磨到利利，做得交給㓾人个人了。</verse>
				<verse number="12">人子啊，愛盡噭盡喊！ 這係為𠊎子民磨利个劍； 這係為 以色列 个領袖拭金个劍。 佢等㧯𠊎个子民會共下被人㓾死。 你會絕望到捶心肝了。</verse>
				<verse number="13">考驗一定會來； 若係 猶大 王該藐視个權杖無掉了， 又樣般呢？ 」 至高个上主恁樣宣佈了。</verse>
				<verse number="14">「所以，人子啊，你愛講預言。你愛拍手，這支劍就會緊刺人。這係一支㓾人个劍，會使人著驚个劍。</verse>
				<verse number="15">這支劍會使𠊎个子民失志，跌倒。𠊎愛用這皓光像𥍉爧、準備㓾人个劍來嚇佢等个城市。</verse>
				<verse number="16">當利个劍啊，由在你左片㓾右片㓾！想愛㓾㖠位，就向㖠位㓾過去。</verse>
				<verse number="17">𠊎也愛拍手，𠊎个大發譴就會煞掉。𠊎 — 上主恁樣宣佈了。」</verse>
				<verse number="18">上主㧯𠊎講話；佢講：</verse>
				<verse number="19">「人子啊，你愛畫出 巴比倫 王帶劍攻打个兩條路線；這兩條路全部愛用共隻國家做起點。你愛在這條路分岔个所在為王設立路標，</verse>
				<verse number="20">一條指向 亞捫 人个 拉巴 城，一條指向 猶大 ，透到堅固个 耶路撒冷 城。</verse>
				<verse number="21">巴比倫 王到分岔路口，企在路標頭前卜卦。佢用箭做籤來抽，求問佢个偶像，查看獻祭頭牲个肝。</verse>
				<verse number="22">佢正手抽到个箭寫等『 耶路撒冷 』。這係指示佢一定愛向 耶路撒冷 前進。佢愛裝備撞城个槌仔，用它攻打城門；愛起土堆，造高臺，大聲喊『㓾啊！』</verse>
				<verse number="23">耶路撒冷 人會想這卜卦係騙人个，因為佢等識㧯 巴比倫 人立約。總係 巴比倫 王會使佢等記得自家所犯个罪，然後將佢等捉走。</verse>
				<verse number="24">這就係𠊎 — 至高个上主講个話：你等个罪過被人發現了。逐儕都知你等罪孽當重，所做所行全部顯出罪惡。你等一定愛受責罰；𠊎愛將你等交給敵人。</verse>
				<verse number="25">「你這積惡該死个 以色列 領袖啊，你个死日到了；你愛面對最尾个審判。</verse>
				<verse number="26">𠊎 — 至高个上主恁樣宣佈了：將你个冕旒㧯禮帽拿下來啊！一切變淨淨了。無權柄个人會高升，統治者會被人㩳下臺。</verse>
				<verse number="27">橫掉了，橫掉了，這城橫掉了。等到𠊎所選來責罰這城个人來到，這事正會發生。該時𠊎愛將這城交給佢。」</verse>
				<verse number="28">「人子啊，你愛講預言；你愛宣佈𠊎 — 至高个上主向侮辱 以色列 个 亞捫 人講个話。你愛㧯佢等講： 㓾人个劍已經挷出來了； 劍已經拭到金金，皓光像𥍉爧，愛㓾人了。</verse>
				<verse number="29">你等所看到个異象係虛假个；你等所講个預言係花撩。你等積惡該死，你等个死日到了。你等愛面對最尾个審判。劍愛架在你等个頸筋了。</verse>
				<verse number="30">「將劍收入刀鞘啊！𠊎愛在你等个故鄉 — 你等出世个所在審判你等。</verse>
				<verse number="31">𠊎當閼，愛將大發譴向你等拚到淨淨。𠊎愛將你等交給盡殘忍个人㓾。</verse>
				<verse number="32">你等愛被火燒淨淨。你等个血愛流在本國个土地上，無人會再想到你等。」上主恁樣宣佈了。</verse>
			</chapter>
			<chapter number="22">
				<verse number="1">上主㧯𠊎講話；</verse>
				<verse number="2">佢講：「人子啊，你有準備愛審判這座充滿兇手个城麼？你愛指出它所做一切邪惡个事。</verse>
				<verse number="3">㧯這座城講，愛聽𠊎 — 至高个上主恁樣講：因為你㓾死盡多同胞，又拜偶像來打垃圾自家，所以你个死日到了。</verse>
				<verse number="4">你犯㓾人个罪，又被你自家所造个偶像打垃圾了；恁樣你个死日近了，你个結尾到了。所以，𠊎愛使列國侮辱你，使萬邦恥笑你。</verse>
				<verse number="5">遠近个國家全部會恥笑你个混亂㧯臭名。</verse>
				<verse number="6">看啊， 以色列 个領袖㧯官長逐儕在你个當中亂用權柄、流人个血。</verse>
				<verse number="7">城肚無人孝敬爺𡟓。有人欺負外族人，壓迫孤兒寡婦。</verse>
				<verse number="8">你看輕𠊎个聖物，毋守𠊎个安息日。</verse>
				<verse number="9">在你个當中有人常常講花撩，為到愛流人个血；有人在山頂食祭物；有人當好行淫亂；</verse>
				<verse number="10">有人㧯阿爸个𡜵娘細姐同床；有人強強㧯經期中个婦人家同房；</verse>
				<verse number="11">有人㧯別人个𡜵娘行姦淫；有人強姦自家个心舅；也有㧯共爺無共𡟓、共𡟓無共爺个姊妹亂倫。</verse>
				<verse number="12">在你个當中有人被人請去㓾人；有人放高利貸，向同胞討利息，剝削佢等來發財。你完全將𠊎毋記得。」至高个上主恁樣宣佈了。</verse>
				<verse number="13">「看啊，因為你貪不義个錢財，流人个血，𠊎愛出手攻擊你。</verse>
				<verse number="14">𠊎㧯你算數个時，你還有勇氣麼？還有力量麼？𠊎 — 上主恁樣宣佈了。𠊎講過个，𠊎一定會實行。</verse>
				<verse number="15">𠊎愛將你个人民逐散到各國，除掉你等个垃圾。</verse>
				<verse number="16">在列國面前受到侮辱个時，你就會知𠊎係上主。」</verse>
				<verse number="17">上主㧯𠊎講話；佢講：</verse>
				<verse number="18">「人子啊， 以色列 人係一堆廢物。佢等就像煉銀个時在爐中分出來無用个銅、錫、鐵、鉛這兜廢物。</verse>
				<verse number="19">所以，𠊎 — 至高个上主㧯佢等講，佢等就像該兜銀礦中个壞銅壞鐵共樣無麼介路用。𠊎愛將佢等集中在 耶路撒冷 ，</verse>
				<verse number="20">用𠊎个大發譴將佢等燒到鎔掉，就像人收集內肚有銀、銅、鐵、鉛、錫个礦石放在爐中來煉共樣。</verse>
				<verse number="21">𠊎一定愛將佢等集中在 耶路撒冷 ，用𠊎大發譴个火來煉佢等。</verse>
				<verse number="22">佢等愛在 耶路撒冷 燒到鎔掉，就像銀仔个礦石在煉爐中燒到鎔掉。恁樣，佢等就會知𠊎 — 上主向佢等拚出大發譴。」</verse>
				<verse number="23">上主㧯𠊎講話；</verse>
				<verse number="24">佢講：「人子啊，愛㧯 以色列 人講，佢等个土地係無淨浰个。所以，𠊎愛發譴責罰佢等，毋落水給佢等。</verse>
				<verse number="25">佢等个領袖 陰謀作惡，像吼吼滾个獅仔扯裂所捉到个動物。佢等㓾人，搶財寶，害盡多婦人家成做寡婦。</verse>
				<verse number="26">祭司違背𠊎个法律，打垃圾𠊎个聖物。佢等無分別麼介係神聖个，麼介係世俗个，也無教人分別淨浰个㧯無淨浰个，又藐視𠊎个安息日。結果， 以色列 人全部毋尊敬𠊎。</verse>
				<verse number="27">領袖㧯官長就像狼群扯裂所捉到个動物；佢等專門靠流人个血來發不義个錢財。</verse>
				<verse number="28">先知為佢等遮罪惡，就像人用石灰水粉壁。佢等个異象係假个；佢等个預言係花撩个。佢等自家講係傳至高上主个話，其實，𠊎 — 上主並無對佢等講話。</verse>
				<verse number="29">有錢人欺負、剝削、壞款待窮苦人，無公平對待外族人。</verse>
				<verse number="30">𠊎在佢等當中尋，看有人會整城牆，企在城牆爛孔个所在麼？在𠊎發譴愛毀滅這城个時會好來保護它，總係𠊎連一個也尋毋到。</verse>
				<verse number="31">所以，𠊎愛向佢等拚出𠊎个大發譴；𠊎大發譴个火愛將佢等燒到淨淨，照佢等所做个報應佢等。」至高个上主恁樣宣佈了。</verse>
			</chapter>
			<chapter number="23">
				<verse number="1">上主㧯𠊎講話；佢講：</verse>
				<verse number="2">「人子啊，以前有兩個共𡟓个姊妹住在 埃及 。</verse>
				<verse number="3">姖等後生个時就放蕩像妓女，乳菇被人搞，喪失童貞。</verse>
				<verse number="4">阿姊个名安到 阿荷拉 — 代表 撒馬利亞 ；老妹个名安到 阿荷利巴 — 代表 耶路撒冷 。𠊎討姖兩姊妹；姖兩儕㧯𠊎𫱔細人仔。</verse>
				<verse number="5">阿荷拉 㧯𠊎結婚後還係像妓女。姖貪戀該兜 亞述 个情郎。</verse>
				<verse number="6">佢等全部係著藍色制服个貴族㧯官長；佢等全部盡後生又斯文，係騎兵隊个勇士。</verse>
				<verse number="7">姖㧯所有个 亞述 軍官行姦淫，做佢等个情婦，拜佢等个偶像來打垃圾自家。</verse>
				<verse number="8">姖還無放掉在 埃及 所行个淫亂。姖還後生个時，就有男人㧯姖睡，將姖準做妓女，摸姖个乳菇，㧯姖行姦淫。</verse>
				<verse number="9">所以，𠊎將姖交給姖所貪戀个 亞述 情郎。</verse>
				<verse number="10">佢等將姖脫光光，捉姖个子女，然後用劍刺死姖。姖悲慘个報應成做婦人家个笑科。</verse>
				<verse number="11">「厥老妹 阿荷利巴 雖然看到這報應，總係比厥姊 阿荷拉 還較壞、還較放蕩。</verse>
				<verse number="12">姖也貪戀該兜 亞述 个貴族㧯官長 — 著靚靚制服个軍人 — 㧯騎兵隊个軍官；佢等全部係斯文个青年。</verse>
				<verse number="13">𠊎看到姖被人蹧踏，姖㧯厥姊共樣放蕩。</verse>
				<verse number="14">「姖个放蕩有加無減。姖甚至被雕刻在壁頂該兜 巴比倫 軍官个像迷到；該兜人个像係用朱紅色畫个，</verse>
				<verse number="15">腰間全部繫等腰帶，頭那帶等有花邊个包頭巾，該兜人係 迦勒底 个 巴比倫 軍官。</verse>
				<verse number="16">姖一下看到該兜像就愛到佢等，派人到 巴比倫 去看佢等。</verse>
				<verse number="17">巴比倫 人來㧯姖共下睡，盡量蹧踏姖；姖被人侮辱後，就當惱佢等。</verse>
				<verse number="18">姖在大眾面前行淫亂、無著衫褲，大家全部認為姖係娼妓。𠊎當惱姖，像以前惱厥姊共樣。</verse>
				<verse number="19">姖還無放掉後生時在 埃及 所行个淫亂，一直行姦淫。</verse>
				<verse number="20">姖被該兜身體像野驢恁雄頭、精力像野馬恁勇个情郎迷到。</verse>
				<verse number="21">( 阿荷利巴 啊，你盡想過後生時在 埃及 行姦淫、被人搞乳菇、失掉童貞該種放蕩个生活。)</verse>
				<verse number="22">「所以， 阿荷利巴 啊，𠊎 — 至高个上主對你恁樣講：你惱頭擺个該兜情郎，總係𠊎愛使佢等發譴，帶佢等來圍攻你。</verse>
				<verse number="23">𠊎愛帶領所有个 巴比倫 人㧯 迦勒底 人、 比割 人、 書亞 人、 哥亞 人，㧯所有个 亞述 人來。𠊎愛召集所有後生斯文个貴族、官長、重要官員，㧯高級軍官全部騎等馬來。</verse>
				<verse number="24">佢等愛帶領大軍、準備戰車㧯運糧車，對北方 攻擊你。佢等愛用大大細細个盾牌㧯鐵帽防身，來圍攻你。𠊎愛喊佢等來刑罰你，照佢等个法律審判你。</verse>
				<verse number="25">因為你惹𠊎發譴，𠊎愛俾佢等對你大發譴。佢等愛割掉你个鼻公㧯耳公，捉走你个子女；無被人㓾掉个人，會被人生生燒死。</verse>
				<verse number="26">佢等愛脫光你个衫褲，搶走你个珠寶。</verse>
				<verse number="27">𠊎愛除掉你个淫亂，結束你在 埃及 學到个放蕩生活，使你無再仰望你个情郎 ，也無再紀念 埃及 。」</verse>
				<verse number="28">至高个上主恁樣講：「𠊎愛將你交給你所惱、你所怨恨个人。</verse>
				<verse number="29">佢等因為怨恨你，愛搶走你煞猛打拚得來个財物，將你剝光，使你無著衫褲，像妓女共樣。這全部係你个淫亂㧯放蕩惹來个。</verse>
				<verse number="30">你㧯列國行姦淫，你拜佢等个偶像來打垃圾自家。</verse>
				<verse number="31">你跈若姊行个路，所以𠊎愛將姖啉過責罰个酒杯交給你啉。」</verse>
				<verse number="32">至高个上主恁樣講： 你愛啉若姊个酒杯； 這隻杯仔又深又大。 人愛嘲謔你； 這杯仔裝滿責罰。</verse>
				<verse number="33">若姊 撒馬利亞 个酒杯， 就係盡得人驚、淒涼个酒杯， 愛使你致到酒醉、悲慘。</verse>
				<verse number="34">你愛啉這杯，連粕也吞掉； 杯仔个碎片愛割爛你个乳菇。 𠊎 — 至高个上主恁樣宣佈了。</verse>
				<verse number="35">所以，至高个上主恁樣講：「因為你毋記得𠊎，㧒掉𠊎，你愛因為你个淫亂㧯放蕩受盡痛苦。」</verse>
				<verse number="36">上主㧯𠊎講：「人子啊，你有準備好愛審判 阿荷拉 㧯 阿荷利巴 麼？你愛指出姖等邪惡个行為。</verse>
				<verse number="37">姖等行姦淫㧯㓾人个罪 — 就係拜偶像，㓾姖等㧯𠊎𫱔个子女。姖等將𠊎个子女做牲儀燒獻給姖等个偶像。</verse>
				<verse number="38">毋單淨恁樣，姖等還打垃圾𠊎个聖殿，違犯𠊎所制定个安息日。</verse>
				<verse number="39">姖等㓾𠊎个子女、將佢等做牲儀燒獻給偶像；共日，姖等又入到𠊎个聖殿去，將它打垃圾！</verse>
				<verse number="40">「姖等一擺又一擺派使者到遠遠个所在去請人來，該兜人就來。兩姊妹就洗身、打扮、畫目眉毛、戴珠寶。</verse>
				<verse number="41">姖等坐在盡靚个眠床，頭前擺等一張桌，桌頂擺滿𠊎送給姖等个香料㧯橄欖油。</verse>
				<verse number="42">一群對曠野來个鱸鰻㧯酒鬼同姖等共下作樂吵鬧。佢等將手鈪戴在兩姊妹手項，將靚帽仔戴在姖兩儕頭那頂。</verse>
				<verse number="43">𠊎心肝想：『佢等像係㧯年老衰弱个妓女行姦淫』 。</verse>
				<verse number="44">這兜人一擺又一擺來尋 阿荷拉 㧯 阿荷利巴 行姦淫，就像㧯妓女行姦淫共樣。</verse>
				<verse number="45">公正个人愛判姖等行姦淫㧯㓾人个罪；因為姖等係淫婦，滿手膏等㓾人个血。」</verse>
				<verse number="46">至高个上主恁樣講：「愛召集盡多人來恐嚇姖等，搶姖等。</verse>
				<verse number="47">該兜人用石頭㧹姖等，用劍刺姖等，又㓾死姖等个子女，放火燒掉姖等个屋。</verse>
				<verse number="48">𠊎愛除掉全國淫亂个生活，來警告所有婦人家做毋得學姖等个放蕩。</verse>
				<verse number="49">你兩姊妹啊，𠊎愛責罰你等个淫亂㧯拜偶像个罪。恁樣，你等就會知𠊎係至高个上主。」</verse>
			</chapter>
			<chapter number="24">
				<verse number="1">𠊎等被人捉去个第九年十月初十，上主㧯𠊎講話。</verse>
				<verse number="2">佢講：「人子啊，你愛將今晡日這日仔記下來，因為今晡日 巴比倫 王開始圍攻 耶路撒冷 。</verse>
				<verse number="3">你愛向𠊎悖逆个子民講這比喻。愛㧯佢等講，𠊎 — 至高个上主恁樣講： 將鑊頭放在火頂高， 鑊頭肚愛裝水。</verse>
				<verse number="4">將上等个腳髀肉、肩頭肉放落鑊頭肚， 將特選个骨頭也放落鑊頭，放到滿滿。</verse>
				<verse number="5">將最好个羊肉放落鑊頭肚， 鑊頭下愛堆滿柴； 將水燒滾來煮骨頭㧯肉。」</verse>
				<verse number="6">至高个上主恁樣講：「充滿流人血个城會堵到災難了。這座城像無洗過、生鹵个鑊頭，底背个肉愛一垤一垤隨便挾出來，一垤也無留。</verse>
				<verse number="7">這城有㓾人流血个事，血倒在光光个大石頂，毋係倒在有泥粉好壅个地上。</verse>
				<verse number="8">將血倒在無法度壅个大石頂有𠊎个旨意；這血跡惹𠊎發譴，要求𠊎報仇。」</verse>
				<verse number="9">所以，至高个上主恁樣講：「充滿流人血个城會堵到災難了！𠊎愛親身來堆柴。</verse>
				<verse number="10">愛添柴、撥火、煮肉，將湯煮燥，連骨頭也燒到臭火燒！</verse>
				<verse number="11">然後愛將拚淨个銅鑊頭放在火炭火頂高燒到紅紅，雖然銅鹵無法度完全燒掉，總係鑊頭就淨浰了。</verse>
				<verse number="12"></verse>
				<verse number="13">耶路撒冷 啊，你放蕩个生活將自家打垃圾。雖然𠊎識設法使你淨浰，總係你還係恁屙糟。等到𠊎將大發譴拚在你身上以前，你就無可能再淨浰了。</verse>
				<verse number="14">𠊎 — 上主恁樣宣佈了。𠊎愛採取行動个時節到了。𠊎絕對毋會毋插你个罪過；𠊎的確毋會憐憫，也毋後悔。你愛因為你个所行所做受責罰。」至高个上主恁樣宣佈了。</verse>
				<verse number="15">上主㧯𠊎講話；</verse>
				<verse number="16">佢講：「人子啊，𠊎愛忽然間將你最惜个人搶走。你毋好哀傷、大聲噭，毋好流目汁。</verse>
				<verse number="17">毋好俾人聽到為死人悲傷大噭个聲。還愛照常頭巾著等鞋。毋好幪面，也毋好食別人為喪家預備个食物。」</verse>
				<verse number="18">該日朝晨，𠊎㧯人民講起這個事；該暗晡，𠊎个𡜵娘就死掉。第二日，𠊎照上主个命令去做。</verse>
				<verse number="19">人問𠊎：「你恁樣做係愛㧯𠊎等講麼介呢？」</verse>
				<verse number="20">𠊎㧯佢等講：「上主㧯𠊎講話；</verse>
				<verse number="21">佢愛𠊎向你等 以色列 人傳講這信息。至高个上主恁樣講：『你等將聖殿準做驕傲个力量，目珠所歡喜个㧯心靈所關心个；總係𠊎愛侮辱𠊎个聖殿。你等留在 耶路撒冷 个子女全部會被人㓾掉。』</verse>
				<verse number="22">該時，你等愛照𠊎 — 以西結 所做个去做。你等毋好幪面，也毋好食別人為喪家預備个食物，</verse>
				<verse number="23">你等个頭那愛纏頭巾，腳愛著鞋，毋好悲傷，毋使噭。你等愛因為自家个罪滿面憂愁，面對面緊透大氣，衰弱來死。</verse>
				<verse number="24">𠊎 — 以西結 就係你等事先看到个兆頭；𠊎所做个，你等全部愛照恁樣做。上主講，到該時，你等就會知佢係至高个上主。」</verse>
				<verse number="25">上主講：「人子啊，𠊎愛搶走佢等个城堡 — 佢等所誇口、目珠所歡喜、心靈所關心个聖殿。𠊎也愛搶走佢等个子女。</verse>
				<verse number="26">該時，脫離災難个人會來向你說明當時个情形。</verse>
				<verse number="27">該日，你毋會像啞口；你會開嘴向佢講話。恁樣，你愛做佢等个兆頭，佢等就會知𠊎係上主。」</verse>
			</chapter>
			<chapter number="25">
				<verse number="1">上主㧯𠊎講話；</verse>
				<verse number="2">佢講：「人子啊，你愛講預言責備 亞捫 人。</verse>
				<verse number="3">愛喊佢等聽𠊎 — 至高个上主所講个話。𠊎恁樣講：你等歡喜看到𠊎个聖殿被人侮辱，歡喜看到 以色列 个土地荒廢， 猶大 人被人捉走。</verse>
				<verse number="4">因為你等歡喜看人堵到災難，𠊎愛俾東方曠野來个民族佔領你等。佢等定著會在你等个土地安營，住在該位，食你等出產个水果，啉你等出產个乳。</verse>
				<verse number="5">𠊎愛使 拉巴 城變做畜駱駝个所在，使 亞捫 全國成做羊群睡个牧場。恁樣，你等就會知𠊎係上主。</verse>
				<verse number="6">「至高个上主恁樣講：因為你等歡喜到跳舞拍手，看人堵到災難就快樂，藐視 以色列 个土地，</verse>
				<verse number="7">𠊎愛伸手攻擊你等，將你等交給外國人；佢等會來將你等个東西搶淨淨。𠊎愛消滅你等，使你等分散到毋成一個國家，毋會再有自家个土地。恁樣，你等就會知𠊎係上主。」</verse>
				<verse number="8">至高个上主恁樣講：「因為 摩押 講 猶大 國㧯別个國家全無差別，</verse>
				<verse number="9">𠊎愛使 摩押 邊界个城市被人攻擊，連佢等最誇口个城堡 — 伯‧耶西末 、 巴力‧免 、 基列亭 全部會被人攻擊。</verse>
				<verse number="10">𠊎愛俾東片曠野來个民族佔領 摩押 ，連 亞捫 人共下佔領，使 摩押 被列國毋記得。</verse>
				<verse number="11">𠊎一定愛責罰 摩押 。恁樣，佢等就會知𠊎係上主。」</verse>
				<verse number="12">至高个上主恁樣講：「 以東 人惡擎擎來向 猶大 人報復，佢等个罪惡極大。</verse>
				<verse number="13">所以𠊎 — 至高个上主恁樣宣佈：𠊎愛伸手攻擊 以東 ，將人㧯頭牲全部消滅。對 提幔 到 底但 个土地全部愛荒廢；所有个人全部會被人㓾掉。</verse>
				<verse number="14">𠊎个子民 以色列 愛代𠊎向 以東 報仇。佢等愛照𠊎个大發譴來對付 以東 。恁樣， 以東 就會知𠊎在向佢報仇。」至高个上主恁樣宣佈了。</verse>
				<verse number="15">至高个上主恁樣講：「 非利士 人惡擎擎向佢等古早以來个仇敵 來報仇，存怨恨个心愛毀滅敵人。</verse>
				<verse number="16">所以𠊎 — 至高个上主恁樣宣佈：𠊎愛伸手攻擊 非利士 人，消滅佢等，連在 非利士 平原賸到个人全部也愛消滅。</verse>
				<verse number="17">𠊎愛大大責罰佢等，將大發譴拚給佢等，來報冤仇。恁樣，佢等就會知𠊎係上主。」</verse>
			</chapter>
			<chapter number="26">
				<verse number="1">𠊎等被人捉去个第十一年十一月 初一，上主㧯𠊎講話。</verse>
				<verse number="2">佢講：「人子啊， 泰爾 城个人民當歡喜盡喊：『啊哈！ 耶路撒冷 毀滅了！姖失掉做生理个能力！姖毋會再做𠊎等競爭个對手了！』</verse>
				<verse number="3">「所以，𠊎 — 至高个上主恁樣講： 泰爾 城啊，𠊎愛㧯你做對敵！𠊎愛召集列國像大波浪來攻打你。</verse>
				<verse number="4">佢等愛破壞你个城牆，拆掉你个城堡。連泥粉𠊎也愛㧯它刮到淨淨，只有留下光光个大石頭。</verse>
				<verse number="5">泰爾 會孤單企在海中；打魚个會在該島項曬魚網。𠊎 — 至高个上主恁樣宣佈了。列國會來將姖个東西搶淨淨；</verse>
				<verse number="6">佢等會用劍㓾死內陸城市个人民。恁樣， 泰爾 就會知𠊎係上主。」</verse>
				<verse number="7">至高个上主恁樣講：「𠊎愛喊世界最大个國王 — 巴比倫 个 尼布甲尼撒 王來攻打 泰爾 。佢帶領大軍對北方來，有兵馬、戰車、㧯騎兵。</verse>
				<verse number="8">內陸城市个人民全部會被人㓾死。敵人會來造高臺，起土堆，擎盾牌攻打你。</verse>
				<verse number="9">佢等會用攻城个槌仔撞橫城牆，用鐵棍拆掉城樓。</verse>
				<verse number="10">一大群个戰馬走過去，泥粉飛到滿天滿地；騎兵大聲嘶，戰車𠾐𠾐滾，震動城牆。佢等直直衝入城門，就像衝入有破口个城。</verse>
				<verse number="11">騎兵在你个大街小巷亂撞，用劍㓾人。你神廟堅固个柱仔會被人㩳橫。</verse>
				<verse number="12">敵人愛搶你个財寶，㩳橫城牆，毀壞盡靚个屋仔，將碎石、斷掉个樹節仔㧹入海肚。</verse>
				<verse number="13">𠊎愛使你等个歌聲㧯琴聲攏總停掉。</verse>
				<verse number="14">𠊎愛使這座城變做光光个巖石，單淨做得給打魚个人在面頂曬網仔；你無法度重建。𠊎 — 至高个上主恁樣宣佈了。」</verse>
				<verse number="15">至高个上主對 泰爾 恁樣講：「你被人佔領个時，人民會被人㓾掉；海滣个人民聽到佢等大聲喊救命，就會盡著驚。</verse>
				<verse number="16">海滣該兜王全部會離開佢等个寶座，脫下王服㧯繡花个衫，盡著驚坐在地泥下。你个命運害佢等驚到一直緊顫。</verse>
				<verse number="17">佢等會為你唱這首悲哀个歌： 出名个城市毀滅了！ 姖該兜在海上个船仔全部被人消滅。 姖个人民識在海上做王， 海滣个人民儕儕都驚姖。</verse>
				<verse number="18">總係，姖橫掉該日， 眾海島全部愊愊掣， 島上个人民全部因為恁樣个結局非常著驚。」</verse>
				<verse number="19">至高个上主恁樣講：「𠊎愛使你荒廢，像無人住个城。𠊎愛用深淵大海个水將你浸掉。</verse>
				<verse number="20">𠊎愛將你㩳落陰間，使你㧯死人共下。𠊎愛將你關在陰間，在該永遠荒涼个城㧯死人共下。你絕對毋會重新出現在人間；一定毋會再有人住在你該位。</verse>
				<verse number="21">𠊎愛使你堵到得人驚个結局，毋會再有你个存在。若係有人來尋你，絕對尋毋到。」至高个上主恁樣宣佈了。</verse>
			</chapter>
			<chapter number="27">
				<verse number="1">上主㧯𠊎講話；佢講：</verse>
				<verse number="2">「人子啊，你愛為 泰爾 唱哀歌，</verse>
				<verse number="3">追悼該企在港口、㧯盡多海島國家做生理个港口。愛㧯 泰爾 講，至高个上主恁樣講： 泰爾 啊，你誇口自家 係十全十美个城市。</verse>
				<verse number="4">你將大海當做屋下； 你被人起到像係盡靚个船仔。</verse>
				<verse number="5">佢等用 黑門 山个松樹做船枋， 用 黎巴嫩 个香柏樹做船柱。</verse>
				<verse number="6">佢等用 巴珊 个橡樹做船槳， 用 塞浦路斯 个松樹鑲象牙做船面頂个枋。</verse>
				<verse number="7">你个帆布用上等个繡花麻紗做个， 係 埃及 出產个， 遠遠看去就當明顯。 你个篷布用最好个布料做个， 係對 以利沙 島運來个藍色、紫色布。</verse>
				<verse number="8">為你撐船个係 西頓 人、 亞發 人； 為你捍舵个係本地師傅。</verse>
				<verse number="9">船頂个木匠係 迦巴勒 來个老手路， 都在你个中間做補船縫个工作； 海上个船㧯船員全部在你个店肚做生理。</verse>
				<verse number="10">「你个軍隊有 波斯 、 呂底亞 㧯 弗 請來个戰士。佢等將盾牌㧯鐵帽掛在你个營房。佢等為你爭取光榮。</verse>
				<verse number="11">亞發 㧯 基利家 來个戰士為你掌城牆； 迦瑪底 來个戰士代你保護城樓。佢等將盾牌掛在你个牆頭頂。佢等使你十全十美。</verse>
				<verse number="12">「你㧯 他施 人做生理，用你豐富个財物交換佢等个銀、鐵、錫㧯鉛。</verse>
				<verse number="13">你㧯 希臘 人、 土巴 人、 米設 人做生理，用你个貨物交換佢等个奴才㧯銅器。</verse>
				<verse number="14">你㧯 陀迦瑪 人做生理，用你个貨物交換佢等个馬、戰馬㧯騾仔。</verse>
				<verse number="15">你㧯 羅德 人 做生理，用你个貨物交換海滣各地个象牙㧯烏心石个樹料。</verse>
				<verse number="16">你㧯 亞蘭 人做生理，用你充足个製品交換佢等个綠寶石、紫色布、繡花布、上等麻紗、珊瑚㧯紅寶石。</verse>
				<verse number="17">你㧯 猶大 人並 以色列 人做生理，用你个貨物交換佢等个大麥 、蜂糖、橄欖油㧯香料。</verse>
				<verse number="18">你㧯 大馬士革 人做生理，用你盡多个製品交換佢等 黑本 出產个酒㧯 沙哈 出產个羊毛。</verse>
				<verse number="19">佢等 也用盡好个機器㧯香料交換你个貨物。</verse>
				<verse number="20">底但 人用鋪馬鞍个毯仔交換你个貨物。</verse>
				<verse number="21">阿拉伯 人㧯 基達 一帶个領袖用細羊仔、綿羊牯、山羊交換你个貨物。</verse>
				<verse number="22">示巴 㧯 拉瑪 个生理人用珠寶、金㧯高級香料交換你个貨物。</verse>
				<verse number="23">哈蘭 、 干尼 、 伊甸 該兜城、 示巴 个生理人、 亞述 㧯 基抹 該兜城全部㧯你做生理。</verse>
				<verse number="24">佢等將奢華个衫褲、紫色布、繡花布、彩色个地毯、盡靚个帶仔，用索仔捆等賣給你。</verse>
				<verse number="25">你用 他施 最大个商船組成船隊裝運貨物。 你像在海上行船个大船， 裝滿貨物。</verse>
				<verse number="26">撐船个將你撐到外海； 東風在海上攻擊你。</verse>
				<verse number="27">沈船个時， 所有貴重个貨物， 全部船員㧯捍舵个人， 船頂个木匠㧯生理人， 船頂所有个軍人㧯人民， 全部沈到海底去。</verse>
				<verse number="28">沈船个時， 船員喊救命个聲 致到在海滣个地皮也會顫。</verse>
				<verse number="29">所有个船仔全部被人㧒掉； 逐個船員㧯撐船个人全部爬上海滣。</verse>
				<verse number="30">佢等為你開聲大噭， 委泥粉在頭那頂， 在火灰當中輾來輾去。</verse>
				<verse number="31">佢等剃光頭，著麻衫； 佢等為你傷心盡噭。</verse>
				<verse number="32">佢等為你唱這首哀歌： 㖠座城做得㧯 泰爾 比呢？ 㖠隻城做得㧯該沈到海底个 泰爾 比呢？</verse>
				<verse number="33">你向海外運送貨物个時， 列國全部得到供應。 你个財富㧯貨物 使地上个君王變好額。</verse>
				<verse number="34">這下，你堵到海難； 你沈到海底。 你所有个貨物㧯你个眾人 全部㧯你共下沈到海肚去。</verse>
				<verse number="35">「眾海島个人全部因為你个命運著驚；佢等个君王也全部驚到滿面憂愁。</verse>
				<verse number="36">你慘了，永遠滅亡了！世間逐所在个生理人全部著驚，驚怕會堵到㧯你共樣个命運。」</verse>
			</chapter>
			<chapter number="28">
				<verse number="1">上主㧯𠊎講話；</verse>
				<verse number="2">佢講：「人子啊，愛㧯 泰爾 王講，𠊎 — 至高个上主恁樣講：你誇口講，你係神，你像神明坐在海中央个寶座頂。雖然你看自家像神明共樣恁聰明，其實，你係人，毋係神。</verse>
				<verse number="3">你自認比 但以理 聰明，明白囥等个祕密。</verse>
				<verse number="4">你用聰明㧯智識賺盡多錢，寶庫肚積存盡多金銀。</verse>
				<verse number="5">你盡知做生理个方法，緊來緊好額。你因為自家个好額心肚驕傲！</verse>
				<verse number="6">「所以，𠊎 — 至高个上主恁樣講：因為你看自家像神明共樣恁聰明，</verse>
				<verse number="7">𠊎愛帶領列國中最兇惡个敵人來攻打你。你用聰明㧯智識所得到个該兜靚个寶物，全部會被佢等用刀仔毀壞掉，使你个榮光受羞辱。</verse>
				<verse number="8">佢等會將你㓾死，㧒到海肚去。</verse>
				<verse number="9">佢等來㓾你个時，你還敢看自家做神明麼？你面對㓾你个人該時，你就會知自家係人，毋係神。</verse>
				<verse number="10">你愛死在無敬虔个外國人手中。𠊎 — 至高个上主恁樣宣佈了。」</verse>
				<verse number="11">上主又㧯𠊎講話；</verse>
				<verse number="12">佢講：「人子啊，你愛為 泰爾 王唱哀歌。愛㧯佢講，𠊎 — 至高个上主恁樣講：你以前係完美个模範，非常聰明又好看。</verse>
				<verse number="13">你住在上帝个 伊甸 園肚，用紅寶石、鑽石、黃寶石、水蒼玉、紅瑪瑙、碧玉、藍寶石、綠寶石㧯紅玉來打扮自家，也用金器打扮。你受造該日，𠊎就為你準備好勢。</verse>
				<verse number="14">𠊎設立一個基路伯去保護你 ；𠊎俾你住在𠊎个聖山頂，在會皓光个珠寶當中行來行去。</verse>
				<verse number="15">對你受創造到敗壞以前，你个行為係無好嫌个。</verse>
				<verse number="16">到你生理發達賺大錢，你就充滿暴力，常常犯罪。所以，𠊎迫你離開𠊎个聖山；該保護你个基路伯逐你 離開會皓光个珠寶當中。</verse>
				<verse number="17">你因為自家恁緣投就驕傲；你為到名聲害自家戇檔腐敗。所以𠊎將你抨在地泥下，用恁樣來警告列王。</verse>
				<verse number="18">你壞事做盡，做生理無公道，致到打垃圾你該兜聖所。所以𠊎放火燒你，使你變做火灰來俾人看。</verse>
				<verse number="19">你慘了，永遠滅亡了。認識你个國家全部會著驚，驚佢等會堵到㧯你共樣个結局。」</verse>
				<verse number="20">上主㧯𠊎講話；佢講：</verse>
				<verse number="21">「人子啊，你愛講預言責備 西頓 城。</verse>
				<verse number="22">愛㧯佢等講，𠊎 — 至高个上主恁樣講： 西頓 啊，𠊎愛㧯你做對敵！人愛因為𠊎責罰你來稱頌𠊎。𠊎一顯明𠊎个神聖，施行審判，佢等就會知𠊎係上主。</verse>
				<verse number="23">𠊎愛使全城發瘟，血流滿街。敵人會對四面八方來攻打你，㓾掉你个人民。恁樣，你就會知𠊎係上主。」</verse>
				<verse number="24">上主講：「本來看輕 以色列 四圍个國家，毋會再像竻仔恁樣刺傷 以色列 ；人就會知𠊎係至高个上主。」</verse>
				<verse number="25">至高个上主恁樣講：「𠊎愛將四散在各國个 以色列 人帶轉來；恁樣，列國就會知𠊎係神聖个。 以色列 人會住在佢等自家个土地上，就係𠊎賜給𠊎僕人 雅各 个土地。</verse>
				<verse number="26">佢等會起屋仔、開墾葡萄園，在該位安居樂業。𠊎愛責罰看輕 以色列 个鄰國， 以色列 就會享受平安。恁樣，佢等就會知𠊎係上主 — 佢等个上帝。」</verse>
			</chapter>
			<chapter number="29">
				<verse number="1">𠊎等被人捉去个第十年十月十二，上主㧯𠊎講話。</verse>
				<verse number="2">佢講：「人子啊，你愛向 埃及 王講預言；你愛責備佢㧯 埃及 全國。</verse>
				<verse number="3">愛㧯佢講，至高个上主恁樣講： 埃及 王啊，𠊎愛㧯你做對敵！你像囥在河壩肚个大鱷魚。你講 尼羅 河係你个，係你造个。</verse>
				<verse number="4">𠊎愛用鉤仔鉤你个頦鰓，使河壩肚个魚黏等你个鱗甲，然後將你拉出 尼羅 河，連該兜黏等你个魚也共下拉出來。</verse>
				<verse number="5">𠊎愛將你㧯魚全部豁到曠野。你个屍體會橫在荒地，無人埋葬。𠊎愛用你个屍體餵飛鳥走獸。</verse>
				<verse number="6">恁樣，所有个 埃及 人就會知𠊎係上主。」 上主講：「 埃及 人啊， 以色列 人倚靠你等；其實，你等係一支蘆竹做个拄杖定定。</verse>
				<verse number="7">佢等一拄等你等，你等就斷掉，又刺傷佢等个脇下，佢等个腰骨也閃到。</verse>
				<verse number="8">所以，𠊎 — 至高个上主恁樣講：𠊎愛使你等堵到戰爭，人㧯頭牲全部被人㓾淨淨。</verse>
				<verse number="9">埃及 个土地會荒廢。恁樣，你等就會知𠊎係上主。 「因為你講 尼羅 河係你个，係你造个，</verse>
				<verse number="10">𠊎愛㧯你並你个 尼羅 河做對敵。𠊎愛使 埃及 个土地，對北部个 密奪 城，到南部个 色弗尼 城 ，一直到 古實 交界，全部荒廢，</verse>
				<verse number="11">看毋到人，也看毋到野獸經過。四十年久， 埃及 會無人住。</verse>
				<verse number="12">𠊎愛使 埃及 成做全世界最荒涼个所在；四十年久， 埃及 个城鎮會比任何荒涼个城還較淒涼。𠊎愛使 埃及 人變做難民，逃難到各國，住在外國人當中。」</verse>
				<verse number="13">至高个上主恁樣講：「四十年後，𠊎愛將 埃及 人對分散个各國集合起來，</verse>
				<verse number="14">𢱋佢等轉到 埃及 南部个家鄉。在該位，佢等愛組織一個細國家，</verse>
				<verse number="15">係世界上最細个王國；它絕對無辦法再統治別个國家。𠊎愛使它降做全無地位个細國，毋使想愛統治別个國家。</verse>
				<verse number="16">以色列 人絕對毋會再倚靠它个支持。 埃及 个結局使 以色列 人想到倚靠人係樣般大个錯誤。恁樣，佢等就會知𠊎係至高个上主。」</verse>
				<verse number="17">𠊎等被人捉去个第二十七年正月初一，上主㧯𠊎講話。</verse>
				<verse number="18">佢講：「人子啊， 巴比倫 王 尼布甲尼撒 攻打 泰爾 。佢使軍隊揹重擔，致到頭那毛𢫫淨淨，肩頭溜皮，總係王㧯軍隊全部無得到麼介工錢。</verse>
				<verse number="19">所以，𠊎 — 至高个上主恁樣講：𠊎愛將 埃及 个土地交給 巴比倫 王 尼布甲尼撒 。佢會盡命搶 埃及 ，將帶得走个攏總搶走；這兜戰利品做得做佢軍隊个工錢。</verse>
				<verse number="20">𠊎將 埃及 交給佢做工錢，因為佢个軍隊代𠊎做事。𠊎 — 至高个上主恁樣宣佈了。</verse>
				<verse number="21">「該時，𠊎愛使 以色列 強壯起來；𠊎愛使你 — 以西結 在逐儕全部聽得到个所在講話。恁樣，佢等就會知𠊎係上主。」</verse>
			</chapter>
			<chapter number="30">
				<verse number="1">上主又㧯𠊎講話；</verse>
				<verse number="2">佢講：「人子啊，你愛講預言，宣佈𠊎 — 至高个上主愛講个話。你愛大聲喊： 慘了，得人畏个日仔到了！</verse>
				<verse number="3">上主愛行動个日仔到了； 該係烏暗、列國受責罰个日仔。</verse>
				<verse number="4">埃及 會堵到戰亂； 古實 會有苦難。 埃及 全地有屍體； 全國被人搶，變做平地。</verse>
				<verse number="5">「對 古實 、 弗 、 呂底亞 、 阿拉伯 、 故普 ，甚至對𠊎子民當中請來个兵仔全部會戰死。」</verse>
				<verse number="6">上主恁樣講：「對北部个 密奪 到南部个 色弗尼 ，所有保衛 埃及 个人全部會戰死； 埃及 最強个軍隊全部會被人消滅。𠊎 — 至高个上主恁樣宣佈了。</verse>
				<verse number="7">埃及 會變做世界上最荒涼个土地； 埃及 个城市會比所有荒涼个城還較淒涼。</verse>
				<verse number="8">𠊎放火燒 埃及 ，將保護城个軍隊㓾淨淨以後，佢等就會知𠊎係上主。</verse>
				<verse number="9">「 埃及 毀滅該日，𠊎愛派使者坐船去擾亂無愁無慮个 古實 人，使佢等驚到會死。該日已經到了！」</verse>
				<verse number="10">至高个上主恁樣講：「𠊎愛用 巴比倫 王 尼布甲尼撒 个手搶走 埃及 个財富。</verse>
				<verse number="11">佢愛帶領當惡个軍隊來，攻打 埃及 。佢等愛用刀劍攻擊，使 埃及 滿遍有屍體。</verse>
				<verse number="12">𠊎愛使 尼羅 河燥掉，將 埃及 交在壞人手中。𠊎愛用外國人來破壞全國。𠊎 — 上主恁樣宣佈了。」</verse>
				<verse number="13">至高个上主恁樣講：「𠊎愛破壞在 孟斐斯 个偶像㧯假神。 埃及 會無人來統治；𠊎愛使 埃及 人驚到會死。</verse>
				<verse number="14">𠊎愛使 埃及 南部荒涼；𠊎愛放火燒北部个 瑣安 城，責罰首都 底比斯 。</verse>
				<verse number="15">𠊎愛向 埃及 最堅固个保護城 — 訓 城，拚出𠊎个大發譴，消滅 底比斯 个財富。</verse>
				<verse number="16">𠊎愛放火燒 埃及 ； 訓 城會堵到大災難。 底比斯 个城牆會被人打橫掉； 孟斐斯 會長透被敵人攻打。</verse>
				<verse number="17">希利坡里 城㧯 比伯實 城个青年全部會戰死；其他个人全部會被人捉走。</verse>
				<verse number="18">𠊎收掉 埃及 个力量、消滅姖所誇口最好个軍隊時，烏暗會將 答比匿 揜起來。烏雲愛遮等這城，周圍逐城市个人民全部會被人捉走去。</verse>
				<verse number="19">𠊎恁樣責罰 埃及 ，佢等就會知𠊎係上主。」</verse>
				<verse number="20">𠊎等被人捉去个第十一年正月初七，上主㧯𠊎講話。</verse>
				<verse number="21">佢講：「人子啊，𠊎打斷 埃及 王个手骨，無人代佢包傷膏藥，醫好佢，使佢會再擎劍。</verse>
				<verse number="22">所以，𠊎 — 至高个上主恁樣講：𠊎愛㧯 埃及 王做對敵；𠊎愛打斷佢个雙手 — 無論好好个抑係斷掉个全部打斷，使佢手中个劍跌下去。</verse>
				<verse number="23">𠊎愛將 埃及 人分散到全世界。</verse>
				<verse number="24">然後，𠊎愛使 巴比倫 王个手骨強壯起來，將𠊎个劍交在佢手中。總係，𠊎愛打斷 埃及 王个手骨，佢會在敵人面前噌到會死。</verse>
				<verse number="25">𠊎一定愛使 埃及 王衰弱，使 巴比倫 王強壯。𠊎將𠊎个劍交給 巴比倫 王以後，佢會將劍指向 埃及 ，逐儕就會知𠊎係上主。</verse>
				<verse number="26">𠊎愛將 埃及 人分散到全世界；該時，佢等就會知𠊎係上主。」</verse>
			</chapter>
			<chapter number="31">
				<verse number="1">𠊎等被人捉去个第十一年三月初一，上主㧯𠊎講話。</verse>
				<verse number="2">佢講：「人子啊，你愛向 埃及 王㧯佢所有个人民講： 你恁強大噢！ 麼人做得來㧯你比呢？</verse>
				<verse number="3">你看 亞述 王以前像生在 黎巴嫩 个香柏樹， 樹桍盡靚、樹葉拶拶， 樹尾高到堵天。</verse>
				<verse number="4">泉水滋潤它； 地下水使它緊來緊大。 河壩水流到樹林肚， 分岔出來个細坑水， 滋潤樹林肚个逐頭樹。</verse>
				<verse number="5">所以，它生到比其他个樹仔較高； 它个樹枝又長又密。</verse>
				<verse number="6">飛鳥在樹頂做藪； 野獸在樹下生產； 各國在它樹影下安居。</verse>
				<verse number="7">啊，樣般恁靚个大樹！ 樹生到高高，樹桍伸到長長； 樹根釘到深深，深到地底下个水源。</verse>
				<verse number="8">上帝園肚个香柏樹無比它較高； 松樹个樹桍無比它較長； 楓樹个枝桍也無贏過它。 上帝園肚个樹仔無一頭像它恁靚。</verse>
				<verse number="9">𠊎使它生到盡靚，枝葉茂盛； 上帝 伊甸 園肚个樹仔全部嫉妒它。</verse>
				<verse number="10">「所以，𠊎 — 至高个上主恁樣講：因為這頭樹恁高大，樹尾高到堵天，它越高大就越驕傲，</verse>
				<verse number="11">𠊎就將它交給列國中最強个統治者來辦它；𠊎因它个罪惡已經逐走它。</verse>
				<verse number="12">當惡个外國人斬斷它，㧒掉它，使大樹桍散在國內个山頂㧯山壢中，細樹枝聚集在該地方个河壩滣。在它樹影下住个各國人民全部離開。</verse>
				<verse number="13">空中个飛鳥停在橫掉个樹仔頂高落腳；野獸睡在樹桍中。</verse>
				<verse number="14">以後，無論水源樣般充足，毋會再有一頭樹會生到恁高恁驕傲，樹尾高到堵天。所有个樹仔一定會燥掉，像人會死掉，落到陰間，㧯死人共下。」</verse>
				<verse number="15">至高个上主恁樣講：「該頭大樹落陰間个時，𠊎喊地底下个水浸掉它，表示哀傷。𠊎塞掉江河，使溪水停流。𠊎使烏暗遮等 黎巴嫩 山，使樹林肚个樹仔全部燥掉。</verse>
				<verse number="16">𠊎將它㧒入陰間，它跌落去个響聲震動列國。已經在陰間个樹仔，就係 伊甸 園个樹仔㧯 黎巴嫩 水分充足、盡好个樹仔，全部因為它跌落去得到安慰。</verse>
				<verse number="17">這兜樹仔全部㧯該頭大樹落到陰間，㧯該兜被刀㓾死个人共下。所有識住在該頭樹影下个人全部被人捉到各國去 。</verse>
				<verse number="18">「 埃及 王啊， 伊甸 園肚个樹仔全部無比你較高較靚。總係，你愛㧯 伊甸 園肚个樹仔共樣落到陰間，㧯該兜無敬虔、被刀㓾死个人共下。 「這就係 埃及 王㧯佢人民个結局。」至高个上主恁樣宣佈了。</verse>
			</chapter>
			<chapter number="32">
				<verse number="1">𠊎等被人捉去个第十二年十二月初一，上主㧯𠊎講話。</verse>
				<verse number="2">佢講：「人子啊，你愛警告 埃及 王，為佢做哀歌，向佢傳𠊎个話講：以前你在列國中像少壯獅仔；這下你較像係河壩肚个鱷魚定定。你在河壩肚摝水，用腳攪河壩肚个泥，使河壩水變渾渾。</verse>
				<verse number="3">盡多國家个人民聚集个時，𠊎 — 至高个上主愛委𠊎个網仔捉你，喊佢等將網仔拉上來。</verse>
				<verse number="4">𠊎愛將你㧒在地上，豁在荒地，喊所有空中个飛鳥㧯地上个走獸來食你。</verse>
				<verse number="5">𠊎愛用你糜掉个屍體鋪滿山嶺，坉滿山壢；</verse>
				<verse number="6">𠊎愛用你流出个血，拿去滿遍緊潑，使它對山頂一直流入河壩。</verse>
				<verse number="7">𠊎毀滅你个時愛遮等天，使星仔暗掉，用烏雲抵等日頭，月光也無發光。</verse>
				<verse number="8">𠊎愛關掉天頂所有个光，使你个土地變做烏暗。𠊎 — 至高个上主恁樣宣佈了。</verse>
				<verse number="9">「𠊎將你滅亡个消息傳到你毋識个國家，該兜人民个心會當憂愁。</verse>
				<verse number="10">𠊎在盡多國民㧯國王面前向你比一下劍，該兜國王㧯國民就會著驚起來。佢等看到𠊎樣般消滅你，一想到自家个命運就無葛無煞。」</verse>
				<verse number="11">至高个上主講：「你一定會承到 巴比倫 王个刀劍。</verse>
				<verse number="12">𠊎愛喊該兜當惡个國家來攻打你；佢等个勇士愛用劍㓾掉你个人民。 埃及 所有个人民㧯 埃及 所誇口个一切全部愛消滅掉。</verse>
				<verse number="13">𠊎愛在河壩滣㓾掉你个頭牲；毋會再有人抑係頭牲來攪河壩肚个泥，使河壩水變渾渾。</verse>
				<verse number="14">𠊎愛使 尼羅 河个水變清；𠊎愛使河壩水像油流恁慢。𠊎 — 至高个上主恁樣宣佈了。</verse>
				<verse number="15">𠊎使 埃及 荒廢、使這地所充滿个絕掉、消滅姖个人民該時，佢等就會知𠊎係上主。</verse>
				<verse number="16">這警告會成做一首哀歌。各國个婦人家全部愛為 埃及 㧯姖个人民唱這首哀歌。𠊎 — 至高个上主恁樣宣佈了。」</verse>
				<verse number="17">𠊎等被人捉去个第十二年十二月 十五，上主㧯𠊎講話。</verse>
				<verse number="18">佢講：「人子啊，你愛為 埃及 个人民大噭，然後將 埃及 㩳入陰間；俾姖㧯該兜強國个人民共樣落去陰間最深个所在，同所有落在該底背个人共下。</verse>
				<verse number="19">你愛對佢等講： 你恅到你比別人較靚係麼？ 落去陰間，㧯無敬虔个人橫共下。</verse>
				<verse number="20">「 埃及 人愛㧯該兜被刀劍㓾死个人橫共下。 埃及 一定愛死在刀下；愛將姖㧯屬姖个眾人拖出去。</verse>
				<verse number="21">最勇个戰士愛在陰間迎接 埃及 人㧯幫助 埃及 个人。佢等喊：『該兜無敬虔、被刀劍㓾死个人全部落到陰間來了；佢等全部橫在這位！』</verse>
				<verse number="22">「 亞述 在該位，周圍全部係姖戰士个塚埔。佢等全部係被刀劍㓾死个。</verse>
				<verse number="23">佢等个塚埔在陰間最深个所在。姖所有个戰士全部係被刀劍㓾死个，佢等个塚埔圍等姖个墳墓。佢等還生个時害人驚到愊愊掣。</verse>
				<verse number="24">「 以攔 在該位，周圍全部係姖人民个塚埔。佢等落到陰間係被刀劍㓾死个；佢等係無敬虔个人。佢等還生个時，識害人驚到愊愊掣，這下㧯落在陰間个人共下受侮辱。</verse>
				<verse number="25">以攔 橫在戰死个人當中，周圍全部係姖人民个塚埔。佢等全部係無敬虔、被刀劍㓾死个。佢等還生个時，識害人驚到愊愊掣，這下㧯落在陰間个人共下受侮辱。</verse>
				<verse number="26">「 米設 㧯 土巴 也在該位，周圍全部係佢等人民个塚埔。佢等全部係無敬虔、被刀劍㓾死个。佢等還生个時，識害人驚到愊愊掣。</verse>
				<verse number="27">佢等無像頭擺 个英雄，葬禮盡有哀榮，著全副武裝，頭枕刀劍，胸蓋盾牌 ，橫在陰間。這兜英雄還生个時十分威風，識害人驚到愊愊掣。</verse>
				<verse number="28">「 埃及 王啊，你會照樣受毀滅，橫在該兜無敬虔、被刀劍㓾死个人當中。</verse>
				<verse number="29">「 以東 在該位；姖个君王㧯統治者全部係最勇敢个戰士。這下佢等㧯該兜無敬虔、被刀劍㓾死个人共下橫在陰間。</verse>
				<verse number="30">「所有北方个領袖全部在該位； 西頓 人也在該位。佢等个勢力識害人驚到愊愊掣。這下佢等㧯該兜無敬虔、被刀劍㓾死个人共下到陰間受侮辱，橫在該位。」</verse>
				<verse number="31">至高个上主講：「 埃及 王㧯佢个軍隊因為看到這兜被刀劍㓾死个人，就會得到安慰。</verse>
				<verse number="32">「𠊎識用 埃及 王害還生个人驚到愊愊掣，總係佢㧯佢个軍隊全部愛被刀劍㓾死，㧯該兜無敬虔、被刀劍㓾死个人橫共下。」至高个上主恁樣宣佈了。</verse>
			</chapter>
			<chapter number="33">
				<verse number="1">上主㧯𠊎講話；</verse>
				<verse number="2">佢講：「人子啊，愛㧯你个同胞講，逐擺𠊎使一個國家堵到戰亂，該國个人民會選出一儕來做守望者。</verse>
				<verse number="3">守望者看到敵人來攻擊該地，就歕羊角警告人民。</verse>
				<verse number="4">若係有人聽到警報毋搭它，被敵人㓾死，佢个罪就歸自家。</verse>
				<verse number="5">因為佢毋搭警報，佢个罪就歸自家。若係佢接受警報，佢一定會救到自家个命。</verse>
				<verse number="6">總係，守望者若係看到敵人來攻擊該地，無歕羊角，敵人來到，㓾死佢等當中个人，就算被敵人㓾死个係罪人，𠊎也愛向守望者來討血債。</verse>
				<verse number="7">「人子啊，𠊎這下派你做 以色列 人个守望者。你一定愛將𠊎親身㧯你講个話警告佢等。</verse>
				<verse number="8">若係𠊎宣佈某一個壞人一定愛死，你毋去警告佢，勸佢棄邪歸正，佢雖然會因為自家个罪死掉，𠊎卻愛追究你流厥血个責任。</verse>
				<verse number="9">若係你警告該壞人，佢毋肯改過，還係做壞事，佢愛因為自家个罪死掉，總係你會救到自家个命。」</verse>
				<verse number="10">上主㧯𠊎講：「人子啊，你愛對 以色列 人講：『你等常常講：𠊎等个罪惡過犯就像擔頭磧在𠊎等身上，𠊎等定著會漸漸消滅掉，樣能生存下去呢？』</verse>
				<verse number="11">㧯佢等講，𠊎 — 至高个上主指等𠊎永遠个生命發誓，𠊎毋歡喜看到壞人死掉，𠊎較歡喜看到佢悔改來生存。 以色列 人啊，你等愛悔改，離開壞行為！你等樣愛使去死哪？</verse>
				<verse number="12">「人子啊，愛㧯 以色列 人講，好人犯罪，佢以前所做个好事無法度救佢。壞人悔改，毋使受刑罰；好人犯罪，也做毋得因為佢識行過好事就毋使死。</verse>
				<verse number="13">就算𠊎應許好人佢一定會有生命，若係佢恅到自家已經做盡多好事就開始犯罪，𠊎絕對毋會紀念佢以前个好行為。佢一定愛因為自家个罪來死。</verse>
				<verse number="14">就算𠊎警告壞人佢一定會死，若係佢悔改，做正直公當个事，</verse>
				<verse number="15">就像將人拿來抵押个東西歸還原主，抑係將偷來个東西歸還原主 — 佢悔改，遵行賜生命个法律，佢就毋會死，反轉會有生命。</verse>
				<verse number="16">𠊎愛赦免佢所犯个一切罪；佢一定愛因為自家所做正直公當个事來生存。</verse>
				<verse number="17">「雖然你个同胞講𠊎恁樣做無公平，其實，佢等所做个正係無公平。</verse>
				<verse number="18">好人無再做好事，反轉去做壞事，佢一定會因為恁樣來死。</verse>
				<verse number="19">壞人悔改，做正直公當个事，佢就一定會因為恁樣來救到生命。</verse>
				<verse number="20">以色列 人啊，你等講：『主恁樣做無公平。』總係𠊎愛照你等逐儕个行為來審判你等。」</verse>
				<verse number="21">𠊎等被人捉去个第十二年十月初五，有一個對 耶路撒冷 走出來个難民來㧯𠊎講：「 耶路撒冷 陷落了！」</verse>
				<verse number="22">這個人來个前一暗晡，上主个靈降 在𠊎身上，開𠊎个嘴。第二朝晨，這個人來到以前，上主已經恢復𠊎講話个能力。</verse>
				<verse number="23">上主㧯𠊎講話；</verse>
				<verse number="24">佢講：「人子啊， 以色列 境內該兜荒涼所在个人民講：『 亞伯拉罕 一儕就得到這垤土地，𠊎等人數恁多，還較應該得到這垤土地做產業。』</verse>
				<verse number="25">「你愛㧯佢等講，𠊎 — 至高个上主恁樣講：你等食帶血个肉，拜偶像，㓾人流血，你等憑麼介還敢講這垤土地係你等个呢？</verse>
				<verse number="26">你等倚靠武力，做邪惡个事，儕儕強姦鄰舍个𡜵娘，你等憑麼介還敢講這垤土地係你等个呢？</verse>
				<verse number="27">「你愛㧯佢等講，𠊎 — 至高个上主指等𠊎永遠个生命發誓講：住在荒涼所在个人民會被人㓾死；住在野外个人會被野獸食掉；囥在山頂要塞抑係山窿肚个人會發瘟死掉。</verse>
				<verse number="28">𠊎愛使這地徹底荒廢；佢等所誇口个力量全部會無掉。 以色列 个山地會徹底荒掉，無人經過該位。</verse>
				<verse number="29">𠊎因為佢等所行一切邪惡个事，使土地徹底荒廢个時，佢等就會知𠊎係上主。」</verse>
				<verse number="30">上主講：「人子啊，你个同胞在城牆堘抑係屋門口聚集个時，全部在該位講你。佢等互相講：『𠊎等來去聽看，上主愛講麼介話！』</verse>
				<verse number="31">所以𠊎个子民弛崗打陣，愛聽你講。總係佢等聽了，毋去實行。佢等嘴講欣慕你个話，還係共樣過貪心个生活。</verse>
				<verse number="32">在佢等來看，你係一個歌手定定，單淨會唱情歌，彈豎琴。你个話，佢等逐句有聽到，總係一句也毋去實行。</verse>
				<verse number="33">當你所講个話實現了 — 看啊，一定會實現 — 該時佢等就會知有一個先知在佢等當中。」</verse>
			</chapter>
			<chapter number="34">
				<verse number="1">上主㧯𠊎講話；</verse>
				<verse number="2">佢講：「人子啊，你愛責備 以色列 个統治者，向佢等講預言。你愛㧯佢等講，𠊎 — 至高个上主對佢等恁樣講： 以色列 个牧人啊，你等會堵到災難了！你等只有顧自家，牧人敢毋係愛牧養羊群嗎？</verse>
				<verse number="3">你等啉羊乳，著羊毛衫，㓾盡肥个羊，食羊肉，總係從來毋去照顧羊群。</verse>
				<verse number="4">軟弱个，你等無畜到強壯；發病个，你等無醫治；受傷个，你等無包好勢；迷路个，你等無𢱋轉來；失落个，你等無去尋轉來。你等反轉用暴力壓制牠兜。</verse>
				<verse number="5">因為無牧人，羊群就分散，成做野獸个食物；</verse>
				<verse number="6">致到𠊎个羊群流浪在山中，又在高山頂，分散全地，無人照顧，也無人去尋。</verse>
				<verse number="7">「所以，牧人啊，你等愛聽𠊎 — 上主个話：</verse>
				<verse number="8">𠊎 — 至高个上主指等𠊎永遠个生命發誓：𠊎个羊群因為無牧人就被野獸吞食掉。𠊎个牧人毋去尋；佢等只有顧自家，毋牧養𠊎个羊群。</verse>
				<verse number="9">所以，你這兜牧人啊，聽𠊎講！</verse>
				<verse number="10">𠊎 — 至高个上主愛㧯你等做對敵。𠊎愛收轉𠊎个羊群，毋准你等再做牠兜个牧人，也毋俾你等繼續只有顧自家。𠊎愛對你等个嘴孔救𠊎个羊，毋准你等食牠兜个肉。」</verse>
				<verse number="11">「𠊎 — 至高个上主恁樣講，𠊎愛親自將𠊎个羊群尋轉來。</verse>
				<verse number="12">牧人樣般尋轉失散个羊，𠊎也愛照樣尋𠊎个羊轉來。牠兜在烏天暗地、多災多難个時，被人逐到各所在，𠊎愛對該兜所在將牠兜救轉來。</verse>
				<verse number="13">𠊎愛𢱋牠兜離開外國，將牠兜集合起來，帶轉故鄉。𠊎愛𢱋牠兜轉到 以色列 个山頂㧯溪水邊，並在一切盡肥个草場牧養牠兜。</verse>
				<verse number="14">𠊎愛在 以色列 山頂个草原畜牠兜，俾牠兜在山頂㧯該兜又肥又靚个草場安心食草。</verse>
				<verse number="15">𠊎愛親自做𠊎羊群个牧人，為牠兜尋做得安心歇睏个所在。𠊎 — 至高个上主恁樣宣佈了。</verse>
				<verse number="16">「失落个，𠊎愛尋轉來；迷路个，𠊎愛𢱋轉來；受傷个，𠊎愛包好勢；發病个，𠊎愛醫好來。總係該兜肥壯个，𠊎愛毀滅，因為𠊎愛照公道牧養羊群。</verse>
				<verse number="17">「講到𠊎个羊群，𠊎 — 至高个上主恁樣講：𠊎愛在羊㧯羊中間、綿羊牯㧯山羊牯中間施行審判。</verse>
				<verse number="18">你等當中有兜食上等个草料還毋知足，反轉蹧踏食賸个草！你啉清水，轉過來又用腳將啉賸个水來摝渾渾。</verse>
				<verse number="19">𠊎其他个羊仔高不將食你等蹧踏過个草，啉你等摝渾个水。</verse>
				<verse number="20">「所以，𠊎 — 至高个上主恁樣講：𠊎愛在你這兜肥壯㧯瘦弱个羊中間主持公道。</verse>
				<verse number="21">你等用肩頭㩳軟弱个、尖牠兜，用角鬥牠兜，將牠兜逐散到各所在。</verse>
				<verse number="22">總係，𠊎愛救𠊎个羊，毋俾牠兜再被人壓制。𠊎愛在羊㧯羊中間施行審判。</verse>
				<verse number="23">𠊎愛為佢等設立一個像𠊎僕人 大衛 恁樣个君王，佢會做佢等个牧人，牧養佢等。</verse>
				<verse number="24">𠊎 — 上主愛做佢等个上帝；像𠊎个僕人 大衛 恁樣个君王會來統治佢等。𠊎 — 上主恁樣宣佈了。</verse>
				<verse number="25">𠊎愛㧯佢等立平安个約。𠊎愛除掉國內兇惡个野獸，使𠊎个羊安全在曠野食草，在樹林中歇睏。</verse>
				<verse number="26">「𠊎愛賜福給佢等，俾佢等在𠊎聖山个四周圍安居樂業。𠊎愛照時節落水，也愛降下福氣像甘霖。</verse>
				<verse number="27">田園个果樹會結滿果子，地會出產五榖；逐儕會有好安心住在自家个土地上。𠊎斬斷𠊎子民个鎖鍊，對統治佢等个人手中釋放佢等个時，佢等就會知𠊎係上主。</verse>
				<verse number="28">列國毋會再搶劫佢等；野獸也毋會再吞食佢等。佢等會有好安居樂業，毋會再受到恐嚇。</verse>
				<verse number="29">𠊎愛使佢等个土地變做當有名、好耕種个所在；佢等个國內毋會再有飢荒。列國毋會再侮辱佢等。</verse>
				<verse number="30">以色列 人會知𠊎 — 上主、佢等个上帝㧯佢等共下；佢等就係𠊎个子民。𠊎 — 至高个上主恁樣宣佈了。</verse>
				<verse number="31">「你等係𠊎个羊，係𠊎草場上个羊群。你等係𠊎个子民，𠊎係你等个上帝。」至高个上主恁樣宣佈了。</verse>
			</chapter>
			<chapter number="35">
				<verse number="1">上主㧯𠊎講話；</verse>
				<verse number="2">佢講：「人子啊，你愛講預言責備 以東 ，</verse>
				<verse number="3">對佢等講，𠊎 — 至高个上主恁樣講： 以東 山啊，𠊎愛㧯你做對敵！ 𠊎愛伸手攻打你，使你荒廢。</verse>
				<verse number="4">𠊎愛使你个城市荒廢； 𠊎愛使你个土地荒涼； 恁樣，你就會知𠊎係上主。</verse>
				<verse number="5">「你㧯 以色列 世世代代有冤仇。 以色列 因為自家个罪堵到災難、受最尾審判个時，你將佢交在敵人个刀劍之下。</verse>
				<verse number="6">所以，𠊎 — 至高个上主指等𠊎永遠个生命發誓：你註定會滅亡，走毋掉。你犯㓾人个罪，血債一定愛用血賠償。</verse>
				<verse number="7">𠊎愛使 以東 山徹底荒掉，㓾死所有路過該位个人。</verse>
				<verse number="8">𠊎愛使 以東 山滿遍係屍體，使山岡、山壢、河壩，逐所在有戰死个人。</verse>
				<verse number="9">𠊎愛使你永遠荒掉，你个城市毋會再有人住。恁樣，你就會知𠊎係上主。</verse>
				<verse number="10">「事實上，𠊎 — 上主係 猶大 㧯 以色列 兩國个上帝，你樣敢講佢等係你个，愛佔領佢等个土地！</verse>
				<verse number="11">所以，𠊎 — 至高个上主指等𠊎永遠个生命發誓：你樣般怨恨、嫉妒、惱𠊎个子民，𠊎也愛照恁樣對付你。佢等愛知，𠊎恁樣責罰你係代佢等伸冤。</verse>
				<verse number="12">該時你就會知，𠊎 — 上主識聽到你譭謗 以色列 講：『這兜山全部荒掉了，會被𠊎等食掉。』</verse>
				<verse number="13">你開嘴講自大个話攻擊𠊎，𠊎全部聽到了。」</verse>
				<verse number="14">至高个上主講：「全世界歡呼个時節，𠊎會使你變荒涼。</verse>
				<verse number="15">你識因為 以色列 人个土地變荒涼來歡喜，所以𠊎愛照你所行个對待你。 西珥 山啊、 以東 全地啊，你等會變荒涼。該時，儕儕就會知𠊎係上主。」</verse>
			</chapter>
			<chapter number="36">
				<verse number="1">上主講：「人子啊，你愛向 以色列 个山傳講𠊎个信息，喊佢等聽𠊎个話。</verse>
				<verse number="2">𠊎 — 至高个上主恁樣講： 以色列 个敵人識恥笑你等講：『還好噢！該兜古老个山嶺全部歸𠊎等了！』</verse>
				<verse number="3">「所以，你愛講預言，宣佈𠊎 — 至高个上主恁樣講：四圍个國家踐踏你等，使你等荒涼，佔領你等，你等被人嘲謔、譭謗。</verse>
				<verse number="4">所以， 以色列 你這兜大山、細山、河壩、山壢、無用个荒埔㧯被四圍个國家佔領侮辱个城市啊，你等全部愛聽𠊎 — 至高个上主對你等講个話。</verse>
				<verse number="5">「𠊎 — 至高个上主發譴責備四圍个國家，特別係 以東 。佢等歡喜吶天、當看輕𠊎，佔領𠊎个土地，準做自家个產業。</verse>
				<verse number="6">「所以，你愛對 以色列 个土地講預言；愛㧯大山細山、河壩、山壢講：因為佢等被列國侮辱，𠊎 — 至高个上主當發譴。</verse>
				<verse number="7">所以𠊎 — 至高个上主擎手發誓講：你四圍个國家一定愛受侮辱。</verse>
				<verse number="8">總係， 以色列 个山啊，你等个樹仔會再一擺靚起來，為𠊎个子民結出果子。𠊎个子民啊，你等當遽就會轉故鄉了。</verse>
				<verse number="9">𠊎愛幫助你等，轉向你等；𠊎保證你等个土地會有好犁田委種。</verse>
				<verse number="10">𠊎愛使你等个人口增加；你等愛住在城肚，重建家園。</verse>
				<verse number="11">𠊎愛使人㧯六畜興旺；你等會多子多孫，人口比以前加盡多。𠊎愛俾你等住在以前住過个所在，使你等比以前更加繁榮。恁樣，你等就會知𠊎係上主。</verse>
				<verse number="12">𠊎个子民 以色列 啊，𠊎愛帶你等轉來，俾你等重新住在 以色列 个土地。它會成做你等自家个土地，毋會再俾你等个子女餓到。</verse>
				<verse number="13">「𠊎 — 至高个上主講：人民講這垤土地會食人，係會害人亡國、絕子絕孫个土地。</verse>
				<verse number="14">總係，從今以後這垤土地毋會再食人，毋會再害你等亡國、絕子絕孫。𠊎 — 至高个上主恁樣宣佈了。</verse>
				<verse number="15">這垤土地毋會再害你等被外國人侮辱，被人嘲謔，也毋會再害你等亡國。𠊎 — 至高个上主恁樣宣佈了。」</verse>
				<verse number="16">上主又㧯𠊎講話；</verse>
				<verse number="17">佢講：「人子啊， 以色列 人住在佢等本國个時，佢等个生活㧯行為打垃圾該垤土地。在𠊎眼中，佢等个行為當像經期中个婦人家恁樣無淨浰 。</verse>
				<verse number="18">佢等在該垤土地上㓾人，拜偶像，打垃圾土地，所以𠊎向佢等拚出𠊎个大發譴。</verse>
				<verse number="19">𠊎因為佢等無淨浰个生活㧯行為責罰佢等，將佢等逐到外國去，分散到天下。</verse>
				<verse number="20">佢等無論到㖠位就害𠊎个聖名受羞辱；該兜人議論講：『這兜人敢毋係上主个子民，樣會離開上主个土地呢？』</verse>
				<verse number="21">以色列 人無論流浪到㖠位，就害𠊎个聖名受羞辱，總係𠊎還係惜𠊎个聖名。</verse>
				<verse number="22">「所以，你愛㧯 以色列 人講，𠊎 — 至高个上主恁樣講： 以色列 人啊，𠊎愛做个事毋係為你等，係為𠊎自家个聖名，就係你等在各國所羞辱个名。</verse>
				<verse number="23">你等識在列國中害𠊎个聖名受羞辱；𠊎愛用你等證明，給佢等看𠊎个名係神聖个。恁樣，列國就會知𠊎係上主。𠊎 — 至高个上主恁樣宣佈了。</verse>
				<verse number="24">𠊎愛帶領你等離開各國；𠊎愛對逐所在將你等召集起來，帶你等轉故鄉。</verse>
				<verse number="25">𠊎愛用淨浰个水洒你等，俾你等淨浰。𠊎愛洗掉你等所有个屙糟，除掉你等所有个偶像。</verse>
				<verse number="26">𠊎愛賜給你等新个心，將新个靈放在你等底背；𠊎愛除掉你等像石頭恁硬个心，賜給你等有血有肉个心。</verse>
				<verse number="27">𠊎愛將𠊎个靈放在你等底背，使你等會遵行𠊎个法律，專心服從𠊎个誡命。</verse>
				<verse number="28">恁樣，你等就會住在該垤𠊎賜給你等祖先个土地上。你等愛做𠊎个子民；𠊎愛做你等个上帝。</verse>
				<verse number="29">𠊎愛救你等脫離所有个污穢。𠊎愛喊五榖豐收，𠊎毋會再俾你等堵到飢荒。</verse>
				<verse number="30">𠊎愛使你等个果樹結果子多多，田園增加生產，你等就毋會再因為飢荒受到列國个侮辱。</verse>
				<verse number="31">你等會想到自家个壞行為㧯所犯个過失，又因為自家个罪惡盡惱自家。</verse>
				<verse number="32">以色列 人啊，𠊎 — 至高个上主愛你等知，𠊎做這一切毋係為到你等。你等愛為自家所做个感覺盡見笑。」</verse>
				<verse number="33">至高个上主恁樣講：「𠊎洗淨你等个罪以後，愛俾你等住在城肚，重建家園。</verse>
				<verse number="34">以前，過路个人全部講你等个土地樣會恁荒涼，總係𠊎愛俾你等重新耕種這田地。</verse>
				<verse number="35">佢等會講，以前像曠野个田地，這下像 伊甸 園；以前被人廢掉、破壞个荒城，這下人口眾多，城堡堅固了。</verse>
				<verse number="36">該時，四圍還吂滅亡个鄰國就會知𠊎 — 上主重新建設荒城，重新耕種荒地。𠊎 — 上主恁樣宣佈了。𠊎講過个，𠊎一定會實行。」</verse>
				<verse number="37">至高个上主恁樣講：「𠊎愛喊 以色列 人再向𠊎祈求幫助；𠊎愛使佢等个人口像羊群恁樣增加。</verse>
				<verse number="38">荒掉个城市會充滿人群，就像以前 耶路撒冷 在節期个時尖滿獻祭用个羊群共樣。恁樣，佢等就會知𠊎係上主。」</verse>
			</chapter>
			<chapter number="37">
				<verse number="1">上主个大能臨到𠊎身上；佢个靈帶𠊎到山壢肚。該山壢肚滿遍係骨骸。</verse>
				<verse number="2">佢帶𠊎經過該兜骨骸當中，𠊎看到山壢肚堆滿盡燥个骨頭。</verse>
				<verse number="3">佢㧯𠊎講：「人子啊，這兜骨骸會返生麼？」 𠊎應講：「至高个上主啊，只有你正知！」</verse>
				<verse number="4">佢講：「愛向這兜骨骸講預言，㧯燥骨骸講，愛聽上主个話。</verse>
				<verse number="5">愛㧯佢等講，𠊎 — 至高个上主對佢等講：𠊎愛歕氣入你等底背，使你等返生。</verse>
				<verse number="6">𠊎愛使你等生筋又生肉，然後包一層皮。𠊎愛歕氣入你等底背，使你等返生。恁樣，你等就會知𠊎係上主。」</verse>
				<verse number="7">所以，𠊎照上主个命令講預言。𠊎講个時，𠊎聽到挺動个聲，看到骨頭㧯骨頭連結起來。</verse>
				<verse number="8">𠊎當看个時，骨頭開始生筋又生肉，然後包一層皮，總係身體還毋會透氣。</verse>
				<verse number="9">上主㧯𠊎講：「人子啊，你愛向風 講預言，㧯它講，至高个上主恁樣講：對四面八方吹來，吹入這兜被人㓾死个，使佢等返生。」</verse>
				<verse number="10">所以，𠊎照上主个命令講預言，氣進入到佢等底背，佢等就返生過來，又企起來。佢等就成做極大个軍隊。</verse>
				<verse number="11">上主㧯𠊎講：「人子啊， 以色列 全國人就像這兜骨骸。佢等認為自家骨頭燥掉，已經無希望，被人消滅淨淨。</verse>
				<verse number="12">所以，你愛向𠊎个子民 以色列 講預言，㧯佢等講，𠊎 — 至高个上主恁樣講：𠊎愛打開你等个墳墓，使你等䟘起來，𢱋你等轉到 以色列 本地。</verse>
				<verse number="13">𠊎打開你等个墳墓，使你等䟘起來以後，你等就會知𠊎係上主。</verse>
				<verse number="14">𠊎愛將𠊎个靈歕入你等底背，使你等返生，俾你等住在自家个土地。恁樣，你等就會知𠊎係上主。𠊎講過个，𠊎一定會實行。𠊎 — 上主恁樣宣佈了。」</verse>
				<verse number="15">上主又㧯𠊎講話；</verse>
				<verse number="16">佢講：「人子啊，你拿一支樹棍仔來，頂高寫『 猶大 王國 』，又拿另外一支樹棍仔來，頂高寫『 以色列 王國 』，</verse>
				<verse number="17">然後將兩支樹棍仔揢在手中，兩頭相接、連做一支樹棍仔。</verse>
				<verse number="18">若係你个同胞問你，這係麼介意思，</verse>
				<verse number="19">你就㧯佢等講，𠊎 — 至高个上主愛將代表 以色列 該支樹棍仔㧯代表 猶大 該支樹棍仔接共下，使兩支樹棍仔在𠊎手中成做一支。</verse>
				<verse number="20">「你愛在人民面前將該兩支有寫字个樹棍仔揢在手中，俾佢等看到。</verse>
				<verse number="21">然後，你愛㧯佢等講，𠊎 — 至高个上主愛將𠊎个子民對佢等被人捉去个各國帶出來，對四圍集合佢等，然後𢱋佢等轉到本國。</verse>
				<verse number="22">𠊎愛在該位，在 以色列 該兜山頂，將佢等聯合起來，成做一個國家。佢等會受一個君王个統治，毋會再分做兩隻國家。</verse>
				<verse number="23">佢等毋會再拜邪惡个偶像打垃圾自家，也毋會再敗壞犯罪。𠊎愛救佢等離開犯罪㧯悖逆个生活。𠊎愛洗淨佢等。佢等愛做𠊎个子民；𠊎愛做佢等个上帝。</verse>
				<verse number="24">會有一個像𠊎僕人 大衛 个君王出現；佢會做佢等个王，做佢等个牧人。佢等會誠心遵行𠊎个法律㧯誡命。</verse>
				<verse number="25">佢等會住在𠊎賜給𠊎僕人 雅各 該垤土地，就係佢等个祖先住過个土地。佢等㧯佢等个後代會永遠住在該位。會有一個像𠊎僕人 大衛 个君王永遠統治佢等。</verse>
				<verse number="26">𠊎愛㧯佢等立平安个約，係永遠个約。𠊎愛施恩照顧佢等，俾佢等人口增加，又愛使𠊎个聖殿永遠設立在佢等个土地。</verse>
				<verse number="27">𠊎愛㧯佢等住在該位。𠊎愛做佢等个上帝；佢等愛做𠊎个子民。</verse>
				<verse number="28">𠊎使𠊎个聖殿永遠設立在佢等當中个時，萬國就會知𠊎 — 上主揀選 以色列 ，使佢分別為聖做𠊎个子民。」</verse>
			</chapter>
			<chapter number="38">
				<verse number="1">上主㧯𠊎講話；</verse>
				<verse number="2">佢講：「人子啊，你愛責備 瑪各 地區 米設 㧯 土巴 兩國个統治者 歌革 。你愛講預言責備佢，</verse>
				<verse number="3">㧯佢講，𠊎 — 至高个上主恁樣講： 歌革 啊，𠊎愛㧯你做對敵。</verse>
				<verse number="4">𠊎愛將你捩轉頭來，用鉤仔鉤你个頦鰓，將你㧯你帶領个軍隊共下拉走。你个軍隊有當多戰馬㧯裝備整齊个騎兵。逐個兵仔全部有盾牌㧯劍。</verse>
				<verse number="5">你个軍隊中還有對 波斯 、 古實 㧯 弗 請來个兵仔；佢等全部拿等盾牌，戴等鐵帽。</verse>
				<verse number="6">另外還有對 歌篾 㧯北方个 陀迦瑪 來个軍隊，並對其他各國來个軍隊。</verse>
				<verse number="7">你愛聚集軍隊，將佢等訓練好，你自家愛做佢等个指揮官。</verse>
				<verse number="8">過幾年，𠊎愛派你去佔領一個國家；該國个人民係對各國轉來个，這下享受太平。你愛佔領 以色列 該兜山；這所在以前被人㧒掉，非常荒涼，總係這下有盡多對各國轉來个人在該位安居。</verse>
				<verse number="9">你所帶領个軍隊、㧯對各國來同你共下个軍隊，會像烏雲遮等這垤土地，像狂風攻擊全地。」</verse>
				<verse number="10">至高个上主對 歌革 講：「到該時，你會有壞心術、陰謀詭計，</verse>
				<verse number="11">侵略該兜無設防个鄉村 — 該兜無城牆、無門閂、人民安享太平个鄉村。</verse>
				<verse number="12">你會想搶劫並出手攻擊以前荒掉、這下盡多人住个所在。該兜人民係對各國聚集到這世界个中心來住个。佢等有得到盡多頭牲㧯財物。</verse>
				<verse number="13">示巴 人、 底但 人、㧯對 他施 逐城市來个生理人會問你：『你召集大軍來攻打係為到愛搶劫係麼？你想愛搶金銀、帶走頭牲、搶走一切个財物做戰利品係麼？』</verse>
				<verse number="14">「所以，人子啊，你愛講預言，對 歌革 講，𠊎 — 至高个上主恁樣講：𠊎个子民 以色列 還安居樂業个時，你愛出發 。</verse>
				<verse number="15">你愛離開最北方个本土，帶領各國聯合組成、大陣又當強个騎兵隊，</verse>
				<verse number="16">去攻打𠊎个子民 以色列 ；你个軍隊會像烏雲恁樣將全地遮掉。該時，𠊎愛派你上去侵略𠊎个土地，使列國認識𠊎；𠊎也愛用你所做个向佢等證明𠊎係神聖个。</verse>
				<verse number="17">你就係𠊎以前所預告愛來个人。該時，𠊎通過𠊎个僕人 — 以色列 該兜先知宣告講，將來𠊎愛喊一個人來攻打 以色列 。」至高个上主恁樣宣佈了。</verse>
				<verse number="18">至高个上主講：「 歌革 侵略 以色列 該日，𠊎愛大發譴。</verse>
				<verse number="19">𠊎非常受氣、大發火、宣佈講：在該日， 以色列 會有大地動。</verse>
				<verse number="20">海肚个魚、空中个鳥仔、地上个大細動物，㧯人類全部會因為驚𠊎就愊愊掣。該兜山㧯山巖會崩裂，城牆會橫掉。</verse>
				<verse number="21">𠊎愛用各種災難 攻擊 歌革 。𠊎 — 至高个上主恁樣宣佈了。𠊎愛使佢个軍隊發生內亂，各人殘殺同胞。</verse>
				<verse number="22">𠊎愛用發瘟㧯流血个事件來責罰佢。𠊎愛用大水、冰雹、大火、硫磺降落在佢㧯佢帶領个軍隊並佢指揮个各國軍隊身上。</verse>
				<verse number="23">𠊎愛用恁樣來向列國證明𠊎係偉大、神聖个上帝。該時，佢等就會知𠊎係上主。」</verse>
			</chapter>
			<chapter number="39">
				<verse number="1">至高个上主講：「人子啊，你愛講預言責備 米設 㧯 土巴 兩國个統治者 歌革 。愛㧯佢講，𠊎 — 至高个上主恁樣講：𠊎愛㧯你做對敵。</verse>
				<verse number="2">𠊎愛將你捩轉頭來，帶你離開北方个所在，𢱋你到 以色列 个群山頂。</verse>
				<verse number="3">然後，𠊎愛打掉你左手揢等个弓，右手拿等个箭。</verse>
				<verse number="4">你㧯你个軍隊，並各國个聯軍全部會死在 以色列 該兜山頂。𠊎愛將你等个屍體給飛鳥㧯野獸做食物。</verse>
				<verse number="5">你等个屍體會橫在野外。𠊎 — 至高个上主恁樣宣佈了。</verse>
				<verse number="6">𠊎愛放火燒 瑪各 个土地㧯在海滣安居樂業个人民。恁樣，佢等就會知𠊎係上主。</verse>
				<verse number="7">𠊎愛𠊎个子民 以色列 認識𠊎个聖名，𠊎絕對毋會再俾𠊎个聖名受到侮辱。恁樣，列國就會知𠊎 — 上主係 以色列 神聖个上帝。」</verse>
				<verse number="8">至高个上主講：「𠊎所預言該日一定會來到。</verse>
				<verse number="9">以色列 逐城市个人民愛出去拈被人㧒掉个武器當做柴。佢等愛拿盾牌、弓、箭、棍仔、矛槍當做柴來燒；這兜東西多到罅佢等燒七年。</verse>
				<verse number="10">佢等毋使到野外去拈柴，也毋使到樹林去斬樹仔，因為佢等有被人㧒掉个武器好做柴。佢等愛搶該兜來搶佢等个人，劫該兜來劫佢等个人。」至高个上主恁樣宣佈了。</verse>
				<verse number="11">上主講：「這事發生以後，𠊎愛在 以色列 ，在 死海 東片个『 旅客 山壢』尋一垤塚埔給 歌革 。過路个旅客會行毋過去，因為 歌革 㧯佢个軍隊全部會被人葬在該位。這山壢就愛喊做『 歌革軍 山壢』。</verse>
				<verse number="12">以色列 人愛用七隻月个時間埋葬所有个屍體，來使該垤土地得到淨浰。</verse>
				<verse number="13">佢等愛集合全國个人來做埋葬个工作；在𠊎得榮耀个日仔，佢等會因為這個事變當有好名聲。𠊎 — 至高个上主恁樣宣佈了。</verse>
				<verse number="14">七隻月後，佢等愛派人繼續巡查逐所在，㧯過路个人共下將該兜還在地面上个屍體埋好，恁樣佢等正能使土地得到淨浰。</verse>
				<verse number="15">佢等在全國巡查，一看到有死人个骨頭就在骨骸堘頭做記號，等埋葬个人將它葬在『 歌革軍 山壢』。</verse>
				<verse number="16">(附近有一個村莊會用這軍隊安名 哈摩那 。) 恁樣，土地就得到淨浰了。」</verse>
				<verse number="17">至高个上主㧯𠊎講：「人子啊，你愛對四面八方喊各種飛禽走獸來食𠊎為牠兜準備个祭肉。 以色列 該兜山頂會有大獻祭个筵席，牠兜愛在該位食肉啉血。</verse>
				<verse number="18">牠兜愛食勇士个肉，啉世間該兜領袖个血。這兜軍人會像綿羊牯、細羊仔、山羊牯、牛牯，全部像 巴珊 个肥牛恁樣被人㓾來食。</verse>
				<verse number="19">𠊎㓾這兜勇士像㓾獻祭个頭牲以後，飛禽走獸做得盡量食肉，啉血，直到撐飽啉醉。</verse>
				<verse number="20">牠兜愛在𠊎个飯桌頂食戰馬、騎兵、㧯所有士兵个肉，食到飽𩜰𩜰。𠊎 — 至高个上主恁樣宣佈了。」</verse>
				<verse number="21">上主講：「𠊎愛俾列國看到𠊎个榮光，俾佢等看到𠊎樣般出手執行𠊎公正个審判。</verse>
				<verse number="22">從該日以後， 以色列 人會知𠊎係上主 — 佢等个上帝。</verse>
				<verse number="23">列國會知 以色列 人係因為得罪𠊎正被人捉走。𠊎揞面毋看顧佢等，使敵人打敗佢等，㓾掉佢等。</verse>
				<verse number="24">𠊎對佢等个污穢㧯過犯施行報應。𠊎揞面毋看顧佢等。」</verse>
				<verse number="25">至高个上主恁樣講：「總係𠊎愛憐憫 雅各 个後代 — 以色列 人，俾佢等重整 家園，𠊎愛維護𠊎个聖名。</verse>
				<verse number="26">佢等重新安居在自家个土地，毋會再有人來威脅佢等个時，佢等就會毋記得 因為悖逆𠊎所受个侮辱。</verse>
				<verse number="27">為到愛俾列國知𠊎係神聖个，𠊎愛對萬民中、對敵人該位將佢等帶轉本國。</verse>
				<verse number="28">該時，𠊎个子民就會認識𠊎係上主 — 佢等个上帝；因為以前𠊎使佢等分散到列國，這下𠊎又召集佢等，將佢等帶轉本國，連一個也無留在外國。</verse>
				<verse number="29">𠊎愛將𠊎个靈倒在 以色列 人；𠊎絕對毋會再揞面毋看顧佢等。𠊎 — 至高个上主恁樣宣佈了。」</verse>
			</chapter>
			<chapter number="40">
				<verse number="1">𠊎等被人捉去个第二十五年，也就係 耶路撒冷 被人佔領个第十四年正月初十，上主个大能臨到𠊎身上，佢將𠊎帶走。</verse>
				<verse number="2">在異象中，上帝帶𠊎到 以色列 地，將𠊎放在一座高山頂。𠊎看到南片當像起有一座城。</verse>
				<verse number="3">佢帶𠊎到該位；𠊎看到一個人就像銅恁樣發光，手中拿等麻索㧯測量用个尺，企在門口。</verse>
				<verse number="4">該人對𠊎講：「人子啊，你愛詳細看，側耳聽，專心注意𠊎給你个指示，因為這係上帝帶你到這位來个目的。你愛將你所看到个一切㧯 以色列 人講。」</verse>
				<verse number="5">𠊎看到个係聖殿，四面有圍牆。該人手中拿等一支三公尺長測量用个尺，在該位量圍牆。圍牆高三公尺，賁三公尺。</verse>
				<verse number="6">接等，佢到向東个門，上門段，在門段頂量外玄關，有三公尺深。</verse>
				<verse number="7">過玄關有走廊；走廊兩片各有三間守衛室。逐間守衛室全部係三公尺四方；房間全部有壁隔等，相隔兩公尺半。通過這兜守衛室，另外有三公尺深个內玄關，透到一間門廊；這門廊面對等聖殿。</verse>
				<verse number="8">佢量這門廊，有四公尺深。這門廊係在走廊个尾節，在偎近聖殿該頭；走廊兩片壁个柱𣎴賁一公尺。</verse>
				<verse number="9"></verse>
				<verse number="10">走廊兩片各有守衛室三間，大細共樣，隔間壁个柱𣎴大細也共樣。</verse>
				<verse number="11">該人量大門个入口，闊五公尺，走廊闊六公尺半。</verse>
				<verse number="12">逐個守衛室頭前全部有矮牆：高五十公分，賁五十公分。房間全部係三公尺四方。</verse>
				<verse number="13">佢又量兩間相對个守衛室外壁㧯外壁當中个距離，有十二公尺半。</verse>
				<verse number="14">走廊盡尾个門廊透到外院；佢量這門廊，闊十公尺 。</verse>
				<verse number="15">走廊，對大門口這片到門廊个後壁，長二十五公尺。</verse>
				<verse number="16">逐間守衛室个外壁全部有細窗門，壁个柱𣎴㧯壁个柱𣎴中間也有細窗門，門廊周圍也全部有細窗門。走廊兩片壁个柱𣎴全部有雕刻棕樹。</verse>
				<verse number="17">該人帶𠊎入到外院。外院周圍有三十間房間憑等外壁，房間頭前有鋪石頭个路，</verse>
				<verse number="18">路在逐隻門个兩片，路闊㧯門平長。外院比內院較低。</verse>
				<verse number="19">內院有一隻門，比外院个門較高；這門係對外院通內院用个。該人量這兩隻門个距離，長五十公尺 。</verse>
				<verse number="20">該人量外院向北該隻門。</verse>
				<verse number="21">走廊兩片各有三間守衛室。兩片守衛室、壁个柱𣎴、並門廊个尺寸㧯東門个共樣。走廊長二十五公尺，闊十二公尺半。</verse>
				<verse number="22">門廊、窗門、並雕刻有棕樹个壁个柱𣎴全部㧯東門共樣。走廊个門口有七隻段仔上北門，走廊个盡尾有一隻門廊向外院。</verse>
				<verse number="23">這門隔等外院，對面有另外一隻門，通到內院，北片㧯東片共樣。該人量這兩隻門个距離，長五十公尺。</verse>
				<verse number="24">該人帶𠊎到南片；𠊎等看到向南个門。佢量這門；守衛室、壁个柱𣎴、並門廊个尺寸㧯其他个門共樣。</verse>
				<verse number="25">這門㧯門廊四周圍全部有細窗門，㧯其他个門个窗門共樣。走廊長二十五公尺，闊十二公尺半。</verse>
				<verse number="26">走廊个門口有七隻段仔上南門，走廊个盡尾有一隻門廊向外院。兩片有壁个柱𣎴，柱𣎴頂雕刻有棕樹。</verse>
				<verse number="27">這門對等透到內院个南門。該人量這兩隻南門之間个距離，長五十公尺。</verse>
				<verse number="28">該人帶𠊎對南門入內院。佢量內院个南門，大細㧯外院其他个門共樣。</verse>
				<verse number="29">這位也有守衛室、門廊、並壁个柱𣎴，大細全部㧯其他个門共樣。門㧯門廊四圍全部有細窗門。走廊長二十五公尺，闊十二公尺半。</verse>
				<verse number="30"></verse>
				<verse number="31">門廊向等外院；走廊兩片个壁頂全部雕刻有棕樹。上這門有八段个石段。</verse>
				<verse number="32">該人帶𠊎到內院个東門。佢量內院个東門，大細㧯其他个共樣。</verse>
				<verse number="33">這位也有守衛室、門廊、並壁个柱𣎴，大細全部㧯其他个門共樣。門㧯門廊四圍全部有細窗門。走廊長二十五公尺，闊十二公尺半。</verse>
				<verse number="34">門廊向等外院；走廊兩片个壁頂全部雕刻有棕樹。上這門有八段个石段。</verse>
				<verse number="35">該人帶𠊎到北門。佢量內院个北門，大細㧯其他个共樣。</verse>
				<verse number="36">這位也有守衛室、壁个柱𣎴，㧯門廊。門㧯門廊四周圍全部有細窗門。走廊長二十五公尺，闊十二公尺半。</verse>
				<verse number="37">門廊向等外院；走廊兩片个壁頂雕刻有棕樹。上這門有八段个石段。</verse>
				<verse number="38">外院有一間有門个橫屋，㧯透到內院个北門个門廊連接，祭司會在該位洗燒化祭个頭牲。</verse>
				<verse number="39">門廊肚擺等四張桌仔，這片有兩張，該片有兩張，做得在這兜桌頂㓾燒化祭、贖罪祭㧯贖過失祭个頭牲。</verse>
				<verse number="40">門廊外个北門口有四張桌仔，這片有兩張，該片有兩張。</verse>
				<verse number="41">恁樣，總共有八張桌仔做得用來㓾獻祭个頭牲，門廊肚四張，門廊外四張。</verse>
				<verse number="42">門廊肚个四張桌仔係㓾燒化祭个頭牲用个。這兜桌仔係用石頭鑿成个，高五十公分，桌面七十五公分四方。㓾頭牲用个東西全部放在桌頂。</verse>
				<verse number="43">桌仔四片各有七公分半闊个槽仔 。獻祭用个肉全部放在桌頂。</verse>
				<verse number="44">該人帶𠊎到內院。內院有兩隻間房，一隻在北門堘頭，向南，另外一隻在南門堘頭，向北 。</verse>
				<verse number="45">該人㧯𠊎講，向南个房間係給在聖殿工作个祭司用个，</verse>
				<verse number="46">向北个間房係給在祭壇前工作个祭司用个。所有个祭司全部係 撒督 个後代。在 利未 支族中，只有佢等正做得到上主面前事奉佢。</verse>
				<verse number="47">該人量內院，係五十公尺四方，聖殿頭前有一隻祭壇。</verse>
				<verse number="48">接等，佢帶𠊎到聖殿个前堂。佢量前堂个門口，深兩公尺半，闊七公尺 ，兩片个壁个柱𣎴賁各一公尺半。</verse>
				<verse number="49">前堂闊十公尺，深六公尺 。上前堂有十隻 段仔。前堂門口兩片壁个柱𣎴堘各有一支柱仔。</verse>
			</chapter>
			<chapter number="41">
				<verse number="1">接等，該人帶𠊎到聖所。佢量聖所个門口，深三公尺 ，</verse>
				<verse number="2">闊五公尺，兩片壁个柱𣎴共樣賁兩公尺半。佢又量聖所，長二十公尺，闊十公尺。</verse>
				<verse number="3">然後，佢到內殿去。佢量內殿个門口，深一公尺，闊三公尺，兩片壁个柱𣎴共樣賁三公尺半。</verse>
				<verse number="4">佢又量內殿，係十公尺四方。佢㧯𠊎講：「這係至聖所。」</verse>
				<verse number="5">該人量聖殿个壁，賁三公尺。聖殿周圍个壁外向有橫屋，逐間闊兩公尺。</verse>
				<verse number="6">橫屋有三層，逐層有三十隻間房。聖殿个壁外向个逐層全部比下一層跔兜落去，上一層就比下一層較薄兜仔，所以橫屋个樑榫做得放在下一層較闊个壁頂高，毋使用釘仔固定。</verse>
				<verse number="7">恁樣，對外背看聖殿个壁，對頂高到下背，當像全部平賁。憑等聖殿外壁㧯這兜橫屋外片有兩個闊闊个樓梯，人做得對一樓上到二樓，再到三樓。</verse>
				<verse number="8">這兜橫屋外向个壁賁兩公尺半。聖殿个北片有一隻門做得通到橫屋，南片也有一隻門通到橫屋。𠊎看到聖殿周圍有兩公尺半闊个騎樓；這騎樓離地面三公尺，㧯憑等聖殿外向壁頂高該兜房間个地基平高。在聖殿三面个騎樓㧯祭司用个房間之間有空地，闊十公尺。</verse>
				<verse number="9"></verse>
				<verse number="10"></verse>
				<verse number="11"></verse>
				<verse number="12">聖殿西片空地个盡尾有一座屋，長四十五公尺，闊三十五公尺，四周圍个壁賁兩公尺半。</verse>
				<verse number="13">該人量聖殿，長五十公尺。對聖殿後壁到空地盡尾西片該座屋个後壁，有五十公尺。</verse>
				<verse number="14">聖殿个頭前㧯兩片个空地長也係五十公尺。</verse>
				<verse number="15">佢又量西片該座屋，包含兩片个走廊，也係五十公尺。</verse>
				<verse number="16">聖殿个前堂、聖所、㧯至聖所，對地面到窗門口个壁全部鑲樹枋。這兜窗門做得關起來 。</verse>
				<verse number="17">聖殿四周圍个壁，對地面到門个頂高 ，</verse>
				<verse number="18">內外全部雕刻基路伯㧯棕樹。基路伯㧯棕樹一隻隔一隻排等。逐隻基路伯全部有兩隻面：</verse>
				<verse number="19">像人个面向等這片个棕樹，像獅仔个面向等該片个棕樹。壁个四圍，對地面到門个頂高全部係恁樣。</verse>
				<verse number="20"></verse>
				<verse number="21">聖所个門柱係四方个。</verse>
				<verse number="22">在至聖所个門口頭前有一隻樹料做个祭壇，高一公尺半，闊一公尺。祭壇四角个柱仔、壇面，㧯壇堘全部係樹料做个。該人㧯𠊎講：「這係擺在上主面前个桌仔。」</verse>
				<verse number="23">聖所㧯至聖所个門口各有兩層門。</verse>
				<verse number="24">逐層門全部係雙扇个，逐扇門做得自由開闔。</verse>
				<verse number="25">聖所个門面頂雕刻有棕樹㧯基路伯，像壁項个共樣。前堂門个門楣外向有用枋仔遮等。</verse>
				<verse number="26">前堂兩片全部有細窗門，壁項有雕刻棕樹 。</verse>
			</chapter>
			<chapter number="42">
				<verse number="1">該人帶𠊎到外院，入聖殿北片个一座屋；這座屋一片向聖殿个空地，一片向北片个屋。</verse>
				<verse number="2">這座屋長五十公尺，闊二十五公尺，有向北个門。</verse>
				<verse number="3">它一面向聖殿堘頭十公尺闊个空地，另外一面向鋪石頭个外院。這座屋有三層，上層比下層較狹。</verse>
				<verse number="4">屋仔北片有通路，闊五公尺，長五十公尺 ，門向北片。</verse>
				<verse number="5">最上層个間房比中層个㧯底層个較狹，因為上層个走廊比下層个走廊佔較多地方。</verse>
				<verse number="6">這兜間房全部無柱𣎴，無像外院肚其他个屋仔需要柱𣎴來堵等，所以上層就比中層㧯下層較狹。</verse>
				<verse number="7">底層个外壁長二十五公尺，房間也長二十五公尺。向等聖殿个間房長五十公尺。</verse>
				<verse number="8"></verse>
				<verse number="9">這兜間房下背，對東片開始，有門做得通到外院。 聖殿南片 有屋，一片向聖殿个空地，一片向南片个屋。</verse>
				<verse number="10"></verse>
				<verse number="11">房間頭前有通路，㧯北片該座屋共樣。屋个尺寸、設計、㧯門全部㧯該座共樣。</verse>
				<verse number="12">南片該兜房間个門，㧯北片个共樣，對東牆頭開始个所在也有門做得入去。</verse>
				<verse number="13">該人㧯𠊎講：「南片㧯北片這兜間房全部係至聖个。入去上主面前个祭司在這位食至聖个祭物。因為房間係聖个，祭司愛將至聖个祭物 — 素祭、贖罪祭、㧯贖過失祭留在該位。</verse>
				<verse number="14">祭司入聖殿後，愛再到外院時，佢等一定愛將事奉上主時著个聖衫留在這位。佢等一定愛著別種衫褲正做得到人民聚集个所在。」</verse>
				<verse number="15">該人量好聖殿內部个尺寸後，就帶𠊎穿過東門，去量聖殿个四圍。</verse>
				<verse number="16">佢用測量尺去量，東片長兩百五十公尺，</verse>
				<verse number="17">又量北片、南片、西片，逐片長兩百五十公尺。</verse>
				<verse number="18"></verse>
				<verse number="19"></verse>
				<verse number="20">有圍牆圍等這垤兩百五十公尺四方形个地。這圍牆將聖地㧯俗地隔開來。</verse>
			</chapter>
			<chapter number="43">
				<verse number="1">該人又帶𠊎到向東个門。</verse>
				<verse number="2">𠊎看到 以色列 上帝个榮光對東方來。佢个聲像吼吼滾个大水聲；地就因為佢个榮耀發光。</verse>
				<verse number="3">這個異象㧯以前𠊎看到上帝毀滅 耶路撒冷 个異象，並𠊎在 迦巴魯 河壩滣看到个異象共樣。所以𠊎就伏在地上。</verse>
				<verse number="4">上主个榮光通過東門進入聖殿。</verse>
				<verse number="5">上主个靈將𠊎擎起來，帶𠊎到內院。在該位，𠊎看到聖殿充滿上主个榮光。</verse>
				<verse number="6">該人企在𠊎堘頭；𠊎聽到上主對聖殿肚向𠊎講話。</verse>
				<verse number="7">佢講：「人子啊，這所在係𠊎个寶座，𠊎踏腳个所在；𠊎愛永遠住在 以色列 人當中統治佢等。 以色列 人㧯佢等个君王全部毋會再去拜偶像，抑係為已經死掉个君王立紀念碑，來侮辱𠊎个聖名。</verse>
				<verse number="8">佢等王宮个門檻㧯門柱憑等𠊎聖殿門檻㧯門柱，𠊎等當中只有隔一扇壁。佢等識用邪惡个行為侮辱𠊎，所以𠊎大發譴，將佢等消滅掉。</verse>
				<verse number="9">這下佢等一定愛停止拜偶像，愛拆掉佢等為先王所立个紀念碑，恁樣，𠊎就永遠住在佢等當中。</verse>
				<verse number="10">「人子啊，你愛將聖殿个設計㧯 以色列 人講，俾佢等研究。愛使佢等因為自家个罪惡來感覺到見笑。</verse>
				<verse number="11">若係佢等感覺自家見笑，你就向佢等說明這聖殿个設計：包含聖殿个模型、出入口、外形、內部个佈置，㧯所有个條例規則。你愛在佢等面前將這兜寫下來，俾佢等知應該樣般佈置，又照條例規則執行。</verse>
				<verse number="12">聖殿个規定係恁樣：聖殿愛起在山頂，聖殿个四周圍全部係聖地。」</verse>
				<verse number="13">祭壇个大細係恁樣：量祭壇个尺寸㧯量聖殿个尺寸共樣。祭壇个壇底四圍有槽，深五十公分，闊五十公分，外緣有二十五公分高个邊。</verse>
				<verse number="14">祭壇个底層對槽底算起有一公尺高；中層對底層个外緣向內跔入五十公分，有兩公尺高。上層也對中層外緣向內跔入五十公分。</verse>
				<verse number="15">上層，就係燒牲儀个所在，也係兩公尺高，四角頭有突出來个角。</verse>
				<verse number="16">祭壇个上層係四方个，逐片長六公尺。</verse>
				<verse number="17">中層也係四方个，逐片長七公尺，外緣有邊，高二十五公分。 (四周圍有槽，闊五十公分。) 上祭壇个段仔向東片。</verse>
				<verse number="18">至高个上主對𠊎講：「人子啊，愛注意聽！下背係有關奉獻祭壇个條文。祭壇做好以後，你愛在祭壇頂獻燒化祭，洒牲儀个血。</verse>
				<verse number="19">只有 利未 支族、 撒督 後代个祭司正做得到𠊎面前事奉𠊎。這係𠊎 — 至高上主个命令。你愛給佢等一隻細牛牯做贖罪祭。</verse>
				<verse number="20">你愛用這牲儀个血膏在上層突出來該四隻角、中層个四隻角，㧯外緣个邊。你愛恁樣潔淨祭壇，分別它為聖。</verse>
				<verse number="21">你愛將贖罪祭个細牛牯，帶到聖殿外背指定个所在燒。</verse>
				<verse number="22">第二日你愛用無缺點个山羊牯做贖罪祭。你愛用牠个血潔淨祭壇，像你用細牛牯个血潔淨祭壇共樣。</verse>
				<verse number="23">祭壇潔淨以後，你愛帶一隻無缺點个細牛牯㧯綿羊牯</verse>
				<verse number="24">到𠊎面前來。祭司愛將鹽委在牠兜身上，做燒化祭獻給𠊎。</verse>
				<verse number="25">七日內，你愛逐日獻一隻細牛牯、山羊牯、綿羊牯做贖罪祭。這兜頭牲一定愛無缺點个。</verse>
				<verse number="26">七日內，祭司愛潔淨祭壇，將它分別為聖。</verse>
				<verse number="27">對第八日起，祭司愛在祭壇頂為人民獻燒化祭㧯平安祭。恁樣，𠊎就會接納你等。𠊎 — 至高个上主恁樣宣佈了。」</verse>
			</chapter>
			<chapter number="44">
				<verse number="1">該人帶𠊎轉到聖殿外院个東門。這門係關等个。</verse>
				<verse number="2">上主㧯𠊎講：「這門一定愛永遠關等，做毋得打開來。所有个人做毋得對這門出入，因為𠊎 — 上主、 以色列 个上帝已經對這門入去。這門愛永遠關等。</verse>
				<verse number="3">只有在位个君王，佢做得到這位來，坐在𠊎面前食供餅。佢一定愛對外院个門廊出入。」</verse>
				<verse number="4">接等，該人帶𠊎通過北門，來到聖殿頭前。𠊎一看，就看到上主个榮光充滿佢个聖殿；𠊎就伏在地上。</verse>
				<verse number="5">上主㧯𠊎講：「人子啊，愛注意你所看到、所聽到个一切。𠊎愛將這聖殿个規則條例㧯你講。你愛注意㖠種人做得入去聖殿，㖠種人做毋得入去聖殿。</verse>
				<verse number="6">「你愛㧯該兜悖逆个 以色列 人講，𠊎 — 至高个上主毋會再吞忍佢等所做一切邪惡个事。</verse>
				<verse number="7">佢等向𠊎獻牲儀个油㧯血个時，也俾該兜無接受割禮、毋服從𠊎个外族人入到聖殿，來打垃圾𠊎个聖殿。𠊎个子民做這一切邪惡个事，違背𠊎个約。</verse>
				<verse number="8">佢等自家無在𠊎个聖殿執行有關聖物个規矩，反轉喊外族人來負責。</verse>
				<verse number="9">「𠊎 — 至高个上主恁樣宣佈：無接受割禮、毋服從𠊎个外族人，做毋得入去𠊎个聖殿，連住在 以色列 人當中个外族人也做毋得入去。」</verse>
				<verse number="10">上主㧯𠊎講：「有兜 利未 支族个人跈其他个 以色列 人行差路、離開𠊎遠遠、去拜偶像，佢等一定愛擔當自家个罪過。</verse>
				<verse number="11">佢等做得在𠊎个聖殿做掌門个，在聖殿做工人。佢等做得代人民㓾頭牲做燒化祭㧯其他个祭物，輪班企等為人民服務。</verse>
				<verse number="12">總係，佢等識代 以色列 人主持拜偶像个事，害人民犯罪，所以，𠊎 — 至高个上主發誓，佢等一定愛擔當自家个罪過。</verse>
				<verse number="13">佢等做毋得做祭司來事奉𠊎，也做毋得接近𠊎个聖物抑係入去至聖所。這就係佢等做該兜邪惡个事應該受个刑罰。</verse>
				<verse number="14">𠊎愛派佢等做工人，掌聖殿，並辦理其中一切个事物。」</verse>
				<verse number="15">至高个上主講：「其他 以色列 人離開𠊎个時， 利未 支族、 撒督 後代个祭司繼續在聖殿誠心事奉𠊎。所以，這下只有佢等正做得接近𠊎，事奉𠊎。佢等愛在𠊎面前獻牲儀个油㧯血。</verse>
				<verse number="16">只有佢等正做得入去聖殿，在𠊎个祭壇前事奉，執行𠊎所吩咐个責任。</verse>
				<verse number="17">佢等入內院个門，一定愛著麻紗个衫褲。佢等在內院肚抑係聖殿值班个時，絕對做毋得著羊毛个衫褲。</verse>
				<verse number="18">佢等愛用麻紗包頭那，著麻紗褲，總係做毋得著會使身體出汗个衫褲。</verse>
				<verse number="19">佢等到外院㧯人民接近，愛先脫掉在聖殿值班時所著个禮服，放在聖殿个橫屋，著別个衫褲，正毋會使聖服傷害人民 。</verse>
				<verse number="20">「祭司做毋得剃光頭抑係留長頭那毛。頭那毛愛修剪。</verse>
				<verse number="21">祭司入去內院以前，所有个酒做毋得啉。</verse>
				<verse number="22">祭司做毋得㧯寡婦抑係離婚个婦人家結婚。祭司單淨做得㧯 以色列 个童貞女抑係祭司个寡婦結婚。</verse>
				<verse number="23">「祭司愛教導𠊎个子民分別聖㧯俗，禮儀上淨浰个抑係無淨浰个東西。</verse>
				<verse number="24">祭司愛照𠊎个法律判斷糾紛。佢等愛照𠊎个規則條例遵守宗教節期，守安息日做聖日。</verse>
				<verse number="25">「除了自家个爺𡟓、子女、兄弟，抑係無出嫁姊妹个屍體以外，祭司因為摸到別人个屍體會使自家在禮儀上無淨浰。</verse>
				<verse number="26">佢淨浰以後，一定愛等七日。</verse>
				<verse number="27">佢入去聖殿个內院，在聖殿事奉該日，愛先為自家獻贖罪祭。𠊎 — 至高个上主恁樣宣佈了。</verse>
				<verse number="28">「祭司所分到个產業就係祭司个職份。佢等做毋得在 以色列 中分土地做產業。𠊎係佢等个產業。</verse>
				<verse number="29">素祭、贖罪祭，㧯贖過失祭全部愛給祭司做食物。 以色列 中所有獻給𠊎个東西全部愛給佢等。</verse>
				<verse number="30">逐年第一擺收成个農作物㧯獻給𠊎特別个禮物全部愛給祭司。人民焙餅个時，愛將第一垤給祭司，恁樣，𠊎就賜福給佢等个家。</verse>
				<verse number="31">祭司做毋得食自然死掉抑係被野獸咬死个鳥仔㧯頭牲。」</verse>
			</chapter>
			<chapter number="45">
				<verse number="1">分土地給逐支族个時，愛留一份獻給上主。這垤土地愛有十二公里半長，十公里 闊；歸垤地區係聖區。</verse>
				<verse number="2">愛對其中分出四方个地做聖殿个用地，逐片長兩百五十公尺，四周圍加二十五公尺闊个空地。</verse>
				<verse number="3">愛畫出長十二公里半、闊五公里做聖殿个用地，這係至聖个地。</verse>
				<verse number="4">在全國當中，這垤地係聖區，係分給在聖殿肚親近事奉上主个祭司个；底背有佢等个屋仔㧯聖殿个用地。</verse>
				<verse number="5">另外一垤土地，長十二公里半、闊五公里，愛分給在聖殿事奉个 利未 人，底背有 利未 人个房屋區 。</verse>
				<verse number="6">又愛在聖區隔壁畫一垤土地，長十二公里半，闊兩公里半，做 以色列 人个房屋區。</verse>
				<verse number="7">愛畫出一垤土地給君王。這垤土地愛對聖區个西片達到西片个邊界，對聖區个東片達到東片个邊界，㧯 以色列 逐支族分到个土地平長。</verse>
				<verse number="8">這垤地係君王在 以色列 中分到个產業。恁樣，𠊎設立个君王就毋會再欺負𠊎个子民；佢愛將全國其他个土地分給 以色列 逐支族。</verse>
				<verse number="9">至高个上主恁樣講：「 以色列 个君王啊，罅擺了！毋好再專權霸道，欺負人民；愛伸張正義，主持公道。你等做毋得再霸佔𠊎子民个土地。𠊎 — 至高个上主恁樣宣佈了。</verse>
				<verse number="10">「大家愛用標準公當个尺斗秤。</verse>
				<verse number="11">「量硬質用个『伊法』愛㧯量流質用个『罷特』平大，係用『賀梅珥』 做標準單位： 一『賀梅珥』㧯十『伊法』平多， 也㧯十『罷特』平多。</verse>
				<verse number="12">「量重个單位係： 一『舍客勒』 㧯二十『季拉』平重； 一『彌那』㧯六十『舍客勒』平重。</verse>
				<verse number="13">「你等愛照下背个規定奉獻： 小麥：收成个六十分之一。 大麥：收成个六十分之一。 橄欖油：收成个百分之一。 (橄欖油愛用『罷特』來量：十『罷特』㧯一『賀梅珥』平多，也㧯一『柯珥』平多。) 羊：在 以色列 牧場个羊，兩百隻愛獻上一隻。 「你等愛獻素祭、燒化祭、平安祭，恁樣，你等个罪就會得到赦免。𠊎 — 至高个上主恁樣宣佈了。</verse>
				<verse number="14"></verse>
				<verse number="15"></verse>
				<verse number="16">「全國人民一定愛帶這兜祭物到 以色列 个君王該位去。</verse>
				<verse number="17">逐隻月初一、安息日、㧯其他 以色列 个節期，王愛負責全國人民所獻燒化祭个牲儀、素祭、㧯祭酒。佢愛準備贖罪祭、素祭、燒化祭、㧯平安祭个祭物，為 以色列 人民贖罪。」</verse>
				<verse number="18">至高个上主恁樣講：「正月初一，你愛獻一隻無缺點个細牛牯，來潔淨聖殿。</verse>
				<verse number="19">祭司愛拿贖罪祭个血來膏聖殿个門柱、祭壇个四隻角、㧯內院大門个門柱。</verse>
				<verse number="20">該隻月初七，你也愛照樣為該兜毋係故意抑係因為無知來犯罪个人獻祭。恁樣，你就做得保持聖殿个聖潔。</verse>
				<verse number="21">「對正月十四開始，你愛守𨃟過節七日。在這七日當中，逐個人全部愛食無酵餅。</verse>
				<verse number="22">節期第一日，君王一定愛為自家㧯全國人民獻一隻牛牯做贖罪祭。</verse>
				<verse number="23">在七日節期內，佢逐日愛向上主獻無缺點个牛牯七隻、綿羊牯七隻做燒化祭。佢逐日也愛獻一隻山羊牯做贖罪祭。</verse>
				<verse number="24">逐隻牛牯，逐隻綿羊牯全部愛㧯十七公升半个素祭，三公升个橄欖油共下獻。</verse>
				<verse number="25">「在搭寮仔節，就係對七月十五開始个七日期間，君王愛照𨃟過節个條例逐日獻贖罪祭、燒化祭、素祭、㧯橄欖油。」</verse>
			</chapter>
			<chapter number="46">
				<verse number="1">至高个上主恁樣講：「在一禮拜工作个六日中，內院東門一定愛關等。總係在安息日㧯初一，東門愛打開來。</verse>
				<verse number="2">祭司為君王獻燒化祭抑係平安祭个時，君王愛對這門个走廊入來，企在門柱堘頭。佢愛在該位禮拜，禮拜後就出去。這隻門愛一直打開來，臨暗仔以前做毋得關掉。</verse>
				<verse number="3">逐個安息日㧯初一，全國人民全部愛在這門前敬拜上主。</verse>
				<verse number="4">在安息日，君王愛向上主獻無缺點个細羊牯六隻、綿羊牯一隻做燒化祭。</verse>
				<verse number="5">該隻綿羊牯愛㧯十七公升半个素祭共下獻；該兜細羊牯所配合个素祭做得隨君王个意思獻。十七公升半个素祭愛㧯三公升个橄欖油共下獻。</verse>
				<verse number="6">初一，佢愛獻無缺點个細牛牯一隻、細羊牯六隻、綿羊牯一隻。</verse>
				<verse number="7">該隻牛牯、該隻綿羊牯全部愛㧯十七公升半个素祭共下獻；該兜細羊牯所配合个素祭做得隨君王个意思獻。十七公升半个素祭愛㧯三公升个橄欖油共下獻。</verse>
				<verse number="8">王愛對這門个走廊出入。</verse>
				<verse number="9">「無論㖠隻節期，人民來敬拜上主个時，對北門入去个，愛對南門出來；對南門入去个，愛對北門出來。麼人都做毋得對共隻門出入，一定愛對相對該隻門出去。</verse>
				<verse number="10">人民入來个時，王也愛入來；人民出去个時，王也愛出去。</verse>
				<verse number="11">在節期㧯大會个日，逐擺獻一隻牛牯，逐擺獻一隻綿羊牯，全部愛㧯十七公升半个素祭共下獻。逐隻細羊牯所配合个素祭做得隨獻祭个人个意思獻。十七公升半个素祭愛㧯三公升个橄欖油共下獻。</verse>
				<verse number="12">「在王用燒化祭抑係平安祭向上主獻甘心祭个時，愛為佢打開通向內院个東門。佢愛照安息日个條例獻燒化祭㧯平安祭。佢離開以後，門愛關起來。」</verse>
				<verse number="13">上主講：「逐朝晨愛獻一隻無缺點一歲个細羊牯做燒化祭給上主。逐日都愛獻這種祭。</verse>
				<verse number="14">逐朝晨也愛獻三公升麵粉㧯一公升橄欖油做素祭；油係摻在麵粉肚用个。獻素祭給上主係永久个條例。</verse>
				<verse number="15">逐朝晨愛獻細羊牯、麵粉、㧯橄欖油給上主做燒化祭，做毋得停。」</verse>
				<verse number="16">至高个上主恁樣講：「若係君王將自家个土地賜給王子，該垤地就歸屬王子，永遠做佢个產業。</verse>
				<verse number="17">若係君王將自家个土地賜給佢个官員，該垤地係暫時歸屬官員定定，到『自由年 』，官員愛將該垤地還君王。因為這係王族个產業，只有王子正做得承接這土地。</verse>
				<verse number="18">君王做毋得侵佔人民个產業。佢一定愛對王族个產業分土地給王子；做毋得欺負人民、侵佔𠊎子民个土地、迫佢等離開自家个產業。」</verse>
				<verse number="19">後來，該人帶𠊎過接近內院北門个通路 ，到向北該兜房間个門口；屋底背个房間係聖个，係給祭司用个。佢指這兜房間西片个一個所在俾𠊎看。</verse>
				<verse number="20">佢講：「這所在係給祭司煮贖罪祭㧯贖過失祭个肉用个，也係焙素祭用个。恁樣，佢等就毋使將聖物帶到外院，傷害到人民。」</verse>
				<verse number="21">接等，佢帶𠊎到外院，指給𠊎看外院个四隻角頭，逐隻角頭全部有細庭院，長二十公尺，闊十五公尺。</verse>
				<verse number="22"></verse>
				<verse number="23">逐隻庭院全部有石牆，石牆下有灶頭。</verse>
				<verse number="24">該人㧯𠊎講：「這兜所在係灶下。聖殿个工作人員在這位煮人民所獻个祭物。」</verse>
			</chapter>
			<chapter number="47">
				<verse number="1">該人帶𠊎轉到聖殿門口。有泉水對門檻下背向東流，因為聖殿係向東个。水對聖殿南片个地泥下經過祭壇南片流出來。</verse>
				<verse number="2">接等，該人帶𠊎對北門出來，帶𠊎𫟧外背轉到向東个外門。看到有水對門个南片流出來。</verse>
				<verse number="3">該人用尺去量，對門向東量五百公尺；佢喊𠊎在該有水个地方行過去，水就到𠊎个腳目。</verse>
				<verse number="4">佢對該位再向前量五百公尺，水到𠊎个膝頭。佢對該位又向前量五百公尺，水到𠊎个腰圈。</verse>
				<verse number="5">佢再對該位向前量五百公尺，河壩水深到行毋過去，泅水正過得去。</verse>
				<verse number="6">佢㧯𠊎講：「人子啊，你愛注意看！」 後來，該人帶𠊎轉到河壩滣。</verse>
				<verse number="7">𠊎在該位看到河壩兩片有當多樹仔。</verse>
				<verse number="8">佢㧯𠊎講：「這條河壩向東流過 約旦 河谷，流入 死海 。河壩水流入 死海 ，會使鹹水變做淡水。</verse>
				<verse number="9">這條河壩經過个所在會有各種生物㧯魚類。河壩水使 死海 个水變好水，水流到个所在全部會有生命。</verse>
				<verse number="10">河壩滣會有人企等打魚；對 隱‧基底 到 隱‧以革蓮 全部會有曬網仔个所在。 死海 會像 地中海 共樣有盡多魚類。</verse>
				<verse number="11">總係附近个湳仔㧯濕地个水還係當鹹；做得製鹽。</verse>
				<verse number="12">這條河壩兩片會生各種果樹，果子打到結結，好做食物。樹葉毋會燥掉，果子無時斷。逐隻月會有新出个果子，因為這河壩水係對聖殿流出來个。果子可以做食物，葉仔可以做藥材。」</verse>
				<verse number="13">至高个上主恁樣講：「你等愛照地界將土地分給 以色列 十二支族； 約瑟 支族愛得兩份 。</verse>
				<verse number="14">𠊎識向你等个祖先發誓愛將這垤土地賜給佢等做產業。這下你等愛公平來分這垤土地。</verse>
				<verse number="15">「北片个地界：對 地中海 向東經過 希特倫 ，再到 哈馬 隘口、 西達達 、</verse>
				<verse number="16">比羅他 、 西伯蓮 (這兜城市在 大馬士革 王國㧯 哈馬 王國之間)、 哈撒‧哈提干 (在 浩蘭 王國堘頭)。</verse>
				<verse number="17">北片个地界對 地中海 向東直到 哈薩‧以難 ，用 大馬士革 㧯 哈馬 南片做界。</verse>
				<verse number="18">「東片个地界： 大馬士革 㧯 浩蘭 个交界向南，順等 約旦 河 (河西係 以色列 ，河東係 基列 ) 直到 死海 个 他瑪 。</verse>
				<verse number="19">「南片个地界：對 他瑪 向西南到 米利巴‧加低斯 个河壩，再轉向西北，順等 埃及 邊界細河壩到 地中海 。</verse>
				<verse number="20">「西片个地界：對 地中海 向北到 哈馬 隘口西片對面个所在。</verse>
				<verse number="21">「你等愛照 以色列 逐支族分這垤土地。</verse>
				<verse number="22">你等愛抽籤分這垤土地做產業。住在你等當中个外族人㧯佢等在這位出世个子女全部愛分到土地。你等愛款待佢等像 以色列 人共樣，俾佢等在 以色列 逐支族中抽籤分土地。</verse>
				<verse number="23">外族人暫時住在㖠一支族，就在該支族中分土地。𠊎 — 至高个上主恁樣宣佈了。」</verse>
			</chapter>
			<chapter number="48">
				<verse number="1">土地北片个地界係對 地中海 向東經過 希特倫 、 哈馬 隘口、 哈薩‧以難 ，直到 大馬士革 王國㧯 哈馬 王國个交界。逐支族愛在這垤土地 — 對東片个邊界到西片个 地中海 ，照 但 、 亞設 、 拿弗他利 、 瑪拿西 、 以法蓮 、 呂便 、 猶大 个順序，對北到南各分到一份土地。</verse>
				<verse number="2"></verse>
				<verse number="3"></verse>
				<verse number="4"></verse>
				<verse number="5"></verse>
				<verse number="6"></verse>
				<verse number="7"></verse>
				<verse number="8">愛在 猶大 南片畫出一垤土地做特別用途。這垤土地對北到南闊十二公里半，對東到西㧯逐支族分到个土地平闊。聖殿愛起在這地當中。</verse>
				<verse number="9">在這垤土地个中心愛留一片長十二公里半、闊十公里 个地獻給上主。</verse>
				<verse number="10">祭司愛得這垤聖區个一部份土地。佢等所分到个，對東到西十二公里半，對北到南五公里。上主个聖殿在這區个中央。</verse>
				<verse number="11">這聖區係給 撒督 後代做祭司个。佢等忠心事奉𠊎，無像 利未 支族个人去跈 以色列 人悖逆𠊎。</verse>
				<verse number="12">所以，佢等愛在 利未 支族个堘頭分一份土地；這特區个土地係至聖个。</verse>
				<verse number="13">利未 支族愛在祭司个土地堘頭分到一特區，對東到西十二公里半，對北到南五公里。</verse>
				<verse number="14">獻給上主个這區係全國最好个土地，做毋得買賣、交換，抑係送人。這垤土地係聖个，係屬上主个。</verse>
				<verse number="15">特區還賸一垤長十二公里半、闊兩公里半个土地；這垤地毋係聖地，一般人做得住，做得使用。城愛起在這區个中央。</verse>
				<verse number="16">城係四方形个，逐片長兩千兩百五十公尺。</verse>
				<verse number="17">城个四周圍愛留空地，逐片闊一百二十五公尺。</verse>
				<verse number="18">城起好所賸个聖區南片一垤土地，東片長五公里、闊兩公里半，西片長五公里、闊兩公里半；這垤地係給城肚个人民耕種用个。</verse>
				<verse number="19">所有在城肚工作个人，無論佢屬 以色列 㖠支族，全部做得耕種這地。</verse>
				<verse number="20">恁樣，所畫出个地个中心係特別地區，係四方形个，逐片係十二公里半，底背有聖區㧯城市用地。</verse>
				<verse number="21">這特別地區包含聖殿、祭司个土地、 利未 支族个土地、城市、㧯城市用地。這地區个東片㧯西片所賸到个地全部歸屬王，向東到東片个地界，向西到 地中海 ，北片㧯 猶大 个地界連接，南片㧯 便雅憫 个地界連接。</verse>
				<verse number="22"></verse>
				<verse number="23">愛將特區南片个土地分給其他各支族；對東片个地界到西片个 地中海 ，照 便雅憫 、 西緬 、 以薩迦 、 西布倫 、 迦得 个順序，對北到南各得一份。</verse>
				<verse number="24"></verse>
				<verse number="25"></verse>
				<verse number="26"></verse>
				<verse number="27"></verse>
				<verse number="28">迦得 支族南片个地界係對 他瑪 向西南經過 米利巴‧加低斯 个河壩，再向西北跈等 埃及 邊界个細河壩，直到 地中海 。</verse>
				<verse number="29">至高个上主恁樣講：「愛用抽籤个方法將這垤土地分給 以色列 各支族，做佢等个產業。」</verse>
				<verse number="30">該城市總共有十二個城門。四面个城牆各長兩千兩百五十公尺，各有三個城門。逐個門照 以色列 支族安名。北牆个三隻門係 呂便 、 猶大 、 利未 ；東牆个三隻門係 約瑟 、 便雅憫 、 但 ；南牆个三隻門係 西緬 、 以薩迦 、 西布倫 ；西牆个三隻門係 迦得 、 亞設 、 拿弗他利 。</verse>
				<verse number="31"></verse>
				<verse number="32"></verse>
				<verse number="33"></verse>
				<verse number="34"></verse>
				<verse number="35">城牆四周圍一共長九千公尺。從今以後，這城愛喊做『上主在該位。』</verse>
			</chapter>
		</book>
		<book number="27">
			<chapter number="1">
				<verse number="1">猶大 王 約雅敬 做王个第三年， 巴比倫 王 尼布甲尼撒 攻打 耶路撒冷 ，包圍歸隻城。</verse>
				<verse number="2">主准佢將 約雅敬 王捉去，又搶走上帝聖殿一部份个東西。佢將捉到个人帶到 巴比倫 个神廟，又將搶來个寶物放在神廟个倉庫肚。</verse>
				<verse number="3">尼布甲尼撒 王命令佢个太監總管 亞施比拿 ，對 以色列 捉來个王親貴族當中選出幾個青年。</verse>
				<verse number="4">為到愛俾佢等在王宮服事，這兜青年一定愛身體無破相、愛斯文、聰明、學識高深、才智過人正有資格。 亞施比拿 愛喊人教佢等學習 巴比倫 个語言、文字。</verse>
				<verse number="5">王也命令愛逐日供給佢等王宮享用个食物㧯酒。恁樣訓練三年後，佢等正做得在王面前服事。</verse>
				<verse number="6">選到个人當中，有 但以理 、 哈拿尼雅 、 米沙利 、 亞撒利雅 ，全部係 猶大 支族个人。</verse>
				<verse number="7">太監總管為佢等安新名，喊做 伯提沙撒 、 沙得拉 、 米沙 、 亞伯尼歌 。</verse>
				<verse number="8">但以理 決心毋食王宮个食物㧯酒，免得自家在禮儀上成做無淨浰个人；所以佢求太監總管，莫迫佢打垃圾自家。</verse>
				<verse number="9">上帝使 但以理 得到太監總管个歡喜㧯同情，</verse>
				<verse number="10">總係太監總管對 但以理 講：「𠊎毋敢悖逆𠊎个王，佢已經規定你等愛啉食个東西，若係你等个面色無像其他个後生人恁好看，王會剁𠊎个頭。」</verse>
				<verse number="11">所以， 但以理 去見太監總管所派來管佢㧯其他三個朋友个守衛，</verse>
				<verse number="12">對佢講：「請你俾𠊎等食青菜啉水，試看仔，十日以後將𠊎等㧯該兜食王宮食物个後生人比看仔，然後照你所看到个做決定！」</verse>
				<verse number="13"></verse>
				<verse number="14">守衛答應俾佢等試十日。</verse>
				<verse number="15">十日過後，佢等看起來比所有食王宮食物个後生人還較健康，還較好看。</verse>
				<verse number="16">所以，守衛俾佢等繼續食青菜，毋使食王所供給个食物㧯酒。</verse>
				<verse number="17">上帝使這四個青年精通各種文字㧯學問，又賜給 但以理 有解釋異象㧯夢个才能。</verse>
				<verse number="18">王所規定个三年期限到了，太監總管帶所有个後生人去見 尼布甲尼撒 王。</verse>
				<verse number="19">王㧯佢等講話；佢對 但以理 、 哈拿尼雅 、 米沙利 、 亞撒利雅 印象特別好，所以留這四個人在王宮服事王。</verse>
				<verse number="20">王無論問麼介，抑係提出麼介難題，就知佢等个聰明智慧比國內所有算命个㧯會法術个好十倍。</verse>
				<verse number="21">到 波斯 王 塞魯士 第一年， 但以理 還在。</verse>
			</chapter>
			<chapter number="2">
				<verse number="1">尼布甲尼撒 在位个第二年，佢發一隻夢；這夢害佢心肝亂淨淨，睡毋落覺。</verse>
				<verse number="2">所以，佢派人喊算命个、會法術个、行邪術个，㧯星象家 來為佢解夢。這兜人來到，企在王面前个時，</verse>
				<verse number="3">王對佢等講：「𠊎發一隻夢，心肝亂淨淨，𠊎愛知該隻夢个意思。」</verse>
				<verse number="4">這兜人用 亞蘭 話對王講： 「願王萬歲！請將該隻夢㧯僕人講，𠊎等就來為王解釋。」</verse>
				<verse number="5">王應講：「𠊎已經決定：你等若無將夢㧯𠊎講，並將夢个意思㧯𠊎解釋，𠊎愛斬斷你等个手腳，又愛使你等个屋成做垃圾堆。</verse>
				<verse number="6">若係你等將𠊎个夢講出來，又解釋夢个意思，𠊎就獎賞你等，又賜尊榮名聲給你等。這下，好將𠊎个夢講出來，解釋給𠊎聽。」</verse>
				<verse number="7">佢等再應王一擺，講：「請國王將夢㧯僕人講，𠊎等正有辦法為王解釋。」</verse>
				<verse number="8">這時，王大聲講：「𠊎早就知你等會想愛拖時間，因為你等知𠊎已經決定了：</verse>
				<verse number="9">若係你等講毋出𠊎个夢，𠊎只有一個辦法對付你等。你等大家講好，想愛亂講欺騙𠊎，愛等到情況改變。這下遽遽將𠊎个夢講出來，𠊎就知你等斷真會解夢。」</verse>
				<verse number="10">佢等應王講：「世界上無人有可能將國王所問个事講出來。從來毋識有一個王對算命个、會法術个，抑係星象家恁樣要求；就算盡偉大、盡有權力个王也毋識恁樣。</verse>
				<verse number="11">國王所問个實在忒難回答了。除了神明以外，無人有辦法回答，總係神明並無住在人間。」</verse>
				<verse number="12">王大發譴，命令將 巴比倫 王宮所有个顧問全部處死。</verse>
				<verse number="13">所以王个命令發出，愛㓾全部个顧問，人也去尋 但以理 㧯佢該兜朋友，愛㓾佢等。</verse>
				<verse number="14">但以理 去見該執行王命令个侍衛長 亞略 。</verse>
				<verse number="15">但以理 盡精靈好嘴問 亞略 ，做麼介王發出恁嚴个命令。 亞略 就將事情个經過㧯佢講。</verse>
				<verse number="16">但以理 就入去求王給佢時間，好使佢為王解釋該隻夢。</verse>
				<verse number="17">然後 但以理 轉去屋下，將事情个經過㧯佢个朋友 哈拿尼雅 、 米沙利 㧯 亞撒利雅 講。</verse>
				<verse number="18">佢要求佢等向天頂个上帝祈禱，求佢憐憫，啟示這夢个奧秘，免得佢等㧯其他 巴比倫 王宮个顧問共下死。</verse>
				<verse number="19">該暗晡， 但以理 在異象中得到奧秘个啟示。所以，佢頌讚天頂个上帝，講：</verse>
				<verse number="20">願上帝个名得到稱頌， 世世代代無停！ 因為智慧㧯權能全部屬佢。</verse>
				<verse number="21">佢改變時間、四季； 佢廢掉王，設立王； 佢賜智識給聰明人， 賜智慧給通達人。</verse>
				<verse number="22">佢啟示奧秘个事； 佢知暗中所有个事； 光一直㧯佢同在。</verse>
				<verse number="23">𠊎祖先个上帝啊， 𠊎感謝你，頌讚你！ 你賜給𠊎智慧㧯力量； 你聽𠊎个祈求， 指示𠊎等愛樣般向王解夢。</verse>
				<verse number="24">所以， 但以理 去見該執行王命令个 亞略 ，對佢講：「求你毋好㓾掉 巴比倫 王宮个顧問；帶𠊎去見王，𠊎會為王解釋佢个夢。」</verse>
				<verse number="25">亞略 即時帶 但以理 到 尼布甲尼撒 王面前，對王講：「𠊎在該兜對 猶大 捉來个人當中，尋到一儕有法度解釋王个夢。」</verse>
				<verse number="26">王對 但以理 (又喊做 伯提沙撒 ) 講：「你有法度將𠊎發个夢講出來，又解釋夢个意思，係麼？」</verse>
				<verse number="27">但以理 應講：「國王啊，王宮个顧問、會法術个、行邪術个、抑係算命个，全部無法度向你解明這奧秘个事；</verse>
				<verse number="28">總係，天頂有一個啟示奧秘个上帝，佢已經將日後愛發生个事指示 尼布甲尼撒 王。這下𠊎愛將王个夢，就係王睡掉个時得到个異象向王解釋。</verse>
				<verse number="29">「國王啊，你睡掉个時，夢到將來个事。啟示奧秘个上帝將愛發生个事指示王。</verse>
				<verse number="30">這奧秘个事，𠊎已經得到啟示；這並毋係因為𠊎比別人較聰明，係愛俾王知這夢个意思㧯你心肚想愛明白个事。</verse>
				<verse number="31">「國王啊，你在異象中看到在你面前有一座當高當大个像，非常刺目，形仔當得人驚。</verse>
				<verse number="32">這像个頭那係用純金做个，胸脯㧯手髀係銀仔做个，腰身㧯大腳髀全部係銅做个，</verse>
				<verse number="33">腳脛係鐵做个，腳盤係半鐵半泥做个。</verse>
				<verse number="34">你看等个時，有一隻毋係用人个手鑿出來个大石頭對山頂輾下來，撞到該座像，將該雙半鐵半泥个腳盤撞碎掉。</verse>
				<verse number="35">該泥、鐵、銅、銀、金黏時也做一下碎掉，像熱天禾埕个礱糠，被風吹散，全尋毋到。總係該大石頭越來越大，變做一座大山，揜等全地。</verse>
				<verse number="36">「這就係國王發个夢。這下𠊎等愛向你解釋。</verse>
				<verse number="37">國王啊，你係所有君王中最偉大个王。天頂个上帝設立你做王，賜給你國度、權柄、能力㧯尊榮。</verse>
				<verse number="38">佢使你統治人類所住个世界，管理飛鳥、走獸。你係該座像个金頭。</verse>
				<verse number="39">在你以後會有另外一隻帝國出現，總係無你个國恁大；後來又有第三隻帝國出現，就係銅个帝國，愛統治全世界。</verse>
				<verse number="40">後來有第四隻帝國，它像鐵仔恁堅強，能打碎所有个東西。就像鐵仔打爛東西共樣，它愛打橫所有以前个帝國。</verse>
				<verse number="41">你所看到該半泥半鐵个腳盤㧯腳趾，係表示該隻帝國會分裂；它有鐵个力量，因為它係半鐵半泥个。</verse>
				<verse number="42">半鐵半泥个腳趾係表示該隻帝國會一半強一半弱。</verse>
				<verse number="43">你看到鐵㧯泥摻共下；這係表示該隻帝國个統治者想愛用通婚來統一逐民族 ，總係無辦法聯合起來，就像鐵㧯泥做毋得合共下。</verse>
				<verse number="44">當該兜王在位期間，天頂个上帝愛建立一個永遠个國。這國絕對毋會被人佔領，反轉愛徹底毀滅所有个帝國來永遠長存。</verse>
				<verse number="45">你看到一隻毋係用人个手鑿出來个大石頭，對山頂輾下來；你又看到它撞碎金、銀、銅、鐵㧯泥做个像。偉大个上帝愛俾國王知將來愛發生个事。這夢係真實个，解釋係可靠个。」</verse>
				<verse number="46">尼布甲尼撒 王伏在地上，拜 但以理 ，又命令向佢獻禮物㧯香。</verse>
				<verse number="47">王對 但以理 講：「因為你解釋這奧秘个事，𠊎知你个上帝係眾神底背最偉大个神，係萬王个主，係啟示奧秘个上帝。」</verse>
				<verse number="48">然後，王賞賜 但以理 盡多貴重个禮物，又升佢个官位，派佢管理 巴比倫 省，並設立佢做王宮顧問个總管。</verse>
				<verse number="49">王答應 但以理 个請求，派 沙得拉 、 米沙 、 亞伯尼歌 管理 巴比倫 省个事務；總係 但以理 本人還留在王宮服事王。</verse>
			</chapter>
			<chapter number="3">
				<verse number="1">尼布甲尼撒 王造一座金像，高二十七公尺，闊三公尺，安在 巴比倫 省个 杜拉 平原。</verse>
				<verse number="2">王召集所有个大臣，包含總督、省長、副省長、參謀、財政大臣、法官、地方官㧯逐省所有其他个官員，喊佢等參加 尼布甲尼撒 王安這座金像个開光典禮。</verse>
				<verse number="3">所以所有个總督、省長、副省長、參謀、財政大臣、法官、地方官㧯逐省所有其他个官員全部聚集來參加典禮。佢等企在 尼布甲尼撒 王安个金像頭前个時，</verse>
				<verse number="4">傳令官大聲宣佈：「逐國、逐族、講逐種話个人啊，有命令傳給你等：</verse>
				<verse number="5">你等一聽到羊角、簫、七弦琴、古箏、豎琴、笙㧯所有其他樂器个聲音，全部愛伏落去拜 尼布甲尼撒 王安个金像。</verse>
				<verse number="6">麼人毋伏落去拜，就愛黏時被人㧒落盡猛个火爐底背。」</verse>
				<verse number="7">所以，聽到樂器一響，逐國、逐族、講逐種話个人，全部伏落去拜 尼布甲尼撒 王所安个金像。</verse>
				<verse number="8">該時，有兜 巴比倫 人來控告 猶太 人。</verse>
				<verse number="9">佢等對 尼布甲尼撒 王講：「願王萬歲！</verse>
				<verse number="10">國王啊，你識命令，聽到該兜樂器一響，所有个人全部愛伏落去拜金像；</verse>
				<verse number="11">麼人毋伏落去拜，就愛黏時被人㧒落盡猛个火爐底背。</verse>
				<verse number="12">王所派去管理 巴比倫 省事務个 猶太 人 — 沙得拉 、 米沙 、 亞伯尼歌 這三儕違背王个命令。佢等毋服事王个神明，也毋伏落去拜王所安个金像。」</verse>
				<verse number="13">尼布甲尼撒 聽到這事，就大發譴，命令將這三個人帶到佢面前來。</verse>
				<verse number="14">尼布甲尼撒 對佢等講：「 沙得拉 、 米沙 、 亞伯尼歌 ，你等斷真毋服事𠊎个神明？毋伏落去拜𠊎安个金像係麼？</verse>
				<verse number="15">這下，你等一聽到羊角、簫、七弦琴、古箏、豎琴，笙㧯所有其他樂器个聲音，就愛伏落去拜𠊎所造个金像；毋拜个人黏時愛被人㧒落盡猛个火爐底背。敢有麼介神明能救你等脫離𠊎个手呢？」</verse>
				<verse number="16">沙得拉 、 米沙 、 亞伯尼歌 應王講：「 尼布甲尼撒 啊，𠊎等毋使為自家辯護。</verse>
				<verse number="17">𠊎等所事奉个上帝能救𠊎等離開盡猛个火爐，也會救𠊎等離開你个手 。</verse>
				<verse number="18">王啊，就算佢毋救𠊎等，你愛知，𠊎等也絕對毋服事你个神明，毋伏落去拜你所立个金像。」</verse>
				<verse number="19">尼布甲尼撒 聽到就變面，向 沙得拉 、 米沙 、 亞伯尼歌 大發譴。所以佢命令將火爐燒到比平常加猛七倍，</verse>
				<verse number="20">又命令軍隊底背盡強壯个士兵將這三儕捆起來，㧒落火爐底背。</verse>
				<verse number="21">士兵就將這三個人捆起來，將佢等㧒落去。該時這三儕還著等衫褲、外袍，也戴等帽仔。</verse>
				<verse number="22">因為王个命令盡嚴，火爐燒到非常猛，對火爐底背噴出个火舌，卻將執行命令个士兵燒死。</verse>
				<verse number="23">該時， 沙得拉 、 米沙 、 亞伯尼歌 還係被人捆等，㧒落盡猛个火爐底背。</verse>
				<verse number="24">忽然， 尼布甲尼撒 王著驚到跳起來，問佢个大臣：「𠊎等敢毋係將三個人捆起來，㧒落猛火个火爐底背？」 佢等應講：「國王，係啊！」</verse>
				<verse number="25">王問：「𠊎樣會看到有四個人在火底背行來行去呢？佢等全部無被人捆等，也全無燒到个樣仔；該第四个看起來像係神明 。」</verse>
				<verse number="26">所以， 尼布甲尼撒 行近盡猛个火爐口，大聲喊：「 沙得拉 ！ 米沙 ！ 亞伯尼歌 ！至高上帝个僕人，請你等出來！」佢等黏時對火底背出來。</verse>
				<verse number="27">所有个總督、省長、副省長、㧯王其他个官員全部圍過來看這三個人，看到佢等一些仔也無燒傷；頭那毛無燒到，衫褲全無變色，身上也無臭火煙。</verse>
				<verse number="28">尼布甲尼撒 王講：「願 沙得拉 、 米沙 、 亞伯尼歌 个上帝得到稱頌！佢派天使來解救信靠佢个僕人。佢等甘願冒生命个危險反抗𠊎个命令，也毋肯伏落去拜麼介神明；佢等專心敬拜佢等个上帝。</verse>
				<verse number="29">「這下𠊎命令：無論㖠國、㖠族、講㖠種話个人，所有譭謗 沙得拉 、 米沙 、 亞伯尼歌 个上帝个，全部愛斬斷手腳，佢个家愛成做垃圾堆；因為無別個神明有辦法像恁樣施行拯救。」</verse>
				<verse number="30">所以，王高升 沙得拉 、 米沙 、 亞伯尼歌 三儕个官位，在 巴比倫 省擔任較高个職位。</verse>
			</chapter>
			<chapter number="4">
				<verse number="1">尼布甲尼撒 王向世界逐國、逐族、講逐種話个人發出下背个通知： 「願你等大享平安！</verse>
				<verse number="2">𠊎願意將至高上帝向𠊎顯明个神蹟奇事講出來。</verse>
				<verse number="3">上帝个神蹟樣會恁偉大！ 佢行个奇事樣恁有權能！ 佢个主權永永遠遠； 佢个統治直到萬代！</verse>
				<verse number="4">「𠊎 — 尼布甲尼撒 在王宮肚住到平安好勢，享受榮華富貴；</verse>
				<verse number="5">總係𠊎發一個惡夢，看到得人驚个異象。</verse>
				<verse number="6">𠊎召集 巴比倫 王宮所有个顧問到𠊎面前來，愛佢等為𠊎解夢。</verse>
				<verse number="7">所有算命个、會法術个、行邪術个、㧯星象家全部來。𠊎將𠊎發个夢㧯佢等講，總係佢等無法度為𠊎解釋。</verse>
				<verse number="8">後來 但以理 入來。 (佢又安到 伯提沙撒 ，係照𠊎神明个名安个。) 佢心肚有至聖神明 个靈。所以𠊎將夢㧯佢講：</verse>
				<verse number="9">『算命个領袖 伯提沙撒 啊，𠊎知你心肚有至聖神明个靈，你知所有奧秘个事。這就係𠊎發个夢，請你為𠊎解釋。』</verse>
				<verse number="10">「𠊎當好睡个時，看到一隻異象：在大地个中央有一頭大樹，</verse>
				<verse number="11">它越來越大，又當強壯，高到堵天；世上所有个人全部看得到。</verse>
				<verse number="12">它个樹葉盡靚，樹頂結滿果子，罅全世界个人食。野獸在它樹影下歇睏，飛鳥在樹枝頂做藪；各種生物都食它个果子。</verse>
				<verse number="13">「𠊎在眠床頂愐這異象个時，看到一個看守个天使對天頂下來。</verse>
				<verse number="14">佢大聲喊：『倒橫樹仔，剁掉樹桍，搖𢫫樹葉，打下果子。將樹下个野獸㧯樹頂个飛鳥逐走。</verse>
				<verse number="15">留樹頭在地泥下，用銅條鐵鍊圍等，放在野外个青草當中。 「『將這個人留在野外；俾佢㧯野獸共下食草，由在露水打濕。</verse>
				<verse number="16">有七年 久，佢毋會有人个心智，毋會再有人个思想；佢就像野獸。</verse>
				<verse number="17">這係看守个天使宣告个裁決，為到愛使世間人知，人个國家係至高上帝掌管个；上帝有權將國權賜給佢所揀選个人，就算係卑微个人，上帝也使佢掌權。』」</verse>
				<verse number="18">尼布甲尼撒 王講：「這就係𠊎發个夢。 伯提沙撒 啊，請為𠊎解夢。王宮顧問當中無一個人能為𠊎解夢；總係你做得到，因為你心肚有至聖神明 个靈。」</verse>
				<verse number="19">但以理 ，又安到 伯提沙撒 ，一聽到這話，驚到講毋出話。王講：「 伯提沙撒 啊，毋好俾這夢㧯它个信息嚇倒。」 伯提沙撒 應講：「𠊎个主啊，願這夢㧯它个意思係指你个仇敵！</verse>
				<verse number="20">你所看到該頭樹仔，越來越大，又當強壯，高到堵天，世上所有个人全部看得到；</verse>
				<verse number="21">它个樹葉盡靚，樹頂个果子盡多，罅全世界个人食。野獸在它下背歇睏，飛鳥在它樹枝頂做藪。</verse>
				<verse number="22">「王啊，你就係該頭大樹，又高又壯。你个權勢大到堵天；你个統治達到全世界。</verse>
				<verse number="23">王當看个時，有一個看守个天使對天頂下來，講：『將這樹倒下來，毀掉它，只有留樹頭在地泥下，用銅條鐵鍊圍等，放在野外个青草當中；由在露水打濕這個人，俾佢㧯野獸共下生活七年。』</verse>
				<verse number="24">「王啊，這就係夢个意思；這將愛發生在𠊎主𠊎王身上个事係至高上帝个裁決：</verse>
				<verse number="25">你愛對人群中被人逐走，㧯野獸共下生活；你愛像牛恁樣食草，睡在野外，由在露水打濕。七年後，你正會承認係至高上帝掌管人類所有个國家；佢有權將國家賜給佢所揀選个人。</verse>
				<verse number="26">天使命令將樹頭留在地泥下；該係說明，在你承認天頂个上帝掌管全世界以後，你會再一擺做王。</verse>
				<verse number="27">所以，王啊，請聽𠊎个勸話：做毋得再犯罪，愛憑公義行事，憐憫窮人；恁樣，你可能會繼續強盛。」</verse>
				<verse number="28">這兜事全部在 尼布甲尼撒 王身上實現了。</verse>
				<verse number="29">十二隻月以後，佢在 巴比倫 王宮个涼臺頂散步个時，</verse>
				<verse number="30">佢講：「看啊， 巴比倫 城樣般雄壯！𠊎用權勢建設這城做京城，來顯明𠊎个榮光㧯威嚴。」</verse>
				<verse number="31">佢這個話還吂講煞，天頂就發出聲音講：「 尼布甲尼撒 王，你聽！你个王權這下離開你了。</verse>
				<verse number="32">你愛對人群中被人逐走，㧯野獸共下生活，像牛恁樣食草。七年後，你正會承認至高上帝有權掌管人類所有个國家，有權將國家賜給佢所揀選个人。」</verse>
				<verse number="33">這兜話即時就實現。 尼布甲尼撒 對人群中被人逐走，像牛恁樣食草，由在露水打濕。佢个毛生到像鷹鳥个毛，手指甲、腳指甲生到像鳥仔个爪。</verse>
				<verse number="34">王講：「七年過去了，𠊎 — 尼布甲尼撒 注目望天；𠊎个聰明恢復了。𠊎頌讚至高个上帝，將榮光尊貴歸給永生个上帝。 佢个統治永永遠遠； 佢个主權直到萬代。</verse>
				<verse number="35">在佢眼中，地上个人民卑微； 天使㧯世間人全部係佢掌管个。 麼人敢攔等佢个手？ 麼人敢對佢講：『你做麼介？』</verse>
				<verse number="36">「𠊎个聰明恢復轉來該時，𠊎个光榮、威嚴，㧯王國个榮光也全部歸還𠊎。𠊎个參謀㧯大臣全部擁護𠊎；𠊎重新得到个權勢比以前還較大。</verse>
				<verse number="37">「這下，𠊎 — 尼布甲尼撒 稱頌、尊崇、敬拜天頂个君王。佢个所做正直公平；佢能降低驕傲个人。」</verse>
			</chapter>
			<chapter number="5">
				<verse number="1">有一暗晡， 伯沙撒 王邀請一千個大臣來參加盛大个筵席，共下啉酒作樂。</verse>
				<verse number="2">佢啉酒个時， 伯沙撒 命令將厥爸 尼布甲尼撒 對 耶路撒冷 聖殿搶來个金杯銀碗搬出來，好俾佢㧯佢个大臣、王后、嬪妃啉酒用。</verse>
				<verse number="3">僕人就將 耶路撒冷 上帝聖殿該兜金杯銀碗搬出來，俾佢等啉酒用。</verse>
				<verse number="4">佢等緊啉酒，緊頌讚該兜用金、銀、銅、鐵、樹頭、石頭製造个神明。</verse>
				<verse number="5">忽然間，有一隻人手出現，用手指在王宮粉過个壁頂、燈臺對面个所在寫字。王看到該寫字个手，</verse>
				<verse number="6">面色一下仔就變到癧青，驚到兩腳愊愊掣，膝頭顫到相磕。</verse>
				<verse number="7">佢盡命喊，命令人將行邪術个、會法術个、㧯星象家喊來。佢等一到，王對 巴比倫 這兜鰲人講：「麼人會讀壁頂个字，解釋它个意思，𠊎就賜佢著王个紫袍，戴金脖鍊，在王國內坐第三隻高位。」</verse>
				<verse number="8">王宮顧問全部行前去；總係無一儕會讀該兜字，也無人有辦法㧯王解釋它个意思。</verse>
				<verse number="9">伯沙撒 王非常著驚，面色大變；眾大臣全部無葛無煞。</verse>
				<verse number="10">太后聽到王㧯大臣盡命喊个聲，就入到筵席大廳，對王講：「願王萬歲！毋使驚到面無血色。</verse>
				<verse number="11">你國內有一個人，佢心肚有至聖神明 个靈。若爸在位个時，這個人識表現超過凡人个才能、智識㧯像神明該種个智慧。若爸 尼布甲尼撒 王 設立佢做所有算命个、行邪術个、會法術个，㧯星象家个領袖。</verse>
				<verse number="12">佢个能力非常厲害，有智慧又有特別个才能，會解夢、解答疑難、解釋奧秘个事。所以，請派人喊佢來。佢个名安到 但以理 ；王又㧯佢安到 伯提沙撒 。佢會為你解釋這兜字个意思。」</verse>
				<verse number="13">但以理 就被人帶到王面前。王問佢：「你係 但以理 ，係吾父王對 猶大 捉來个 猶太 人係麼？</verse>
				<verse number="14">𠊎聽講你心肚有神明个靈；你有特別个才能、智識㧯智慧。</verse>
				<verse number="15">𠊎喊這兜顧問㧯行邪術个來，愛佢等讀這壁頂高个字，為𠊎解釋字个意思；總係佢等全部做毋到。</verse>
				<verse number="16">𠊎聽講你當會解釋奧秘，也會解答疑難。若係你有辦法讀這兜字，為𠊎解釋字个意思，你就會得到獎賞，著王个紫袍，戴金脖鍊，在王國內坐第三隻高位。」</verse>
				<verse number="17">但以理 應講：「請王將獎賞留等，抑係賞給別人。總係，𠊎還係會為王讀這兜字，並解釋字个意思。</verse>
				<verse number="18">「王啊，至高个上帝識將國位、大權、榮耀㧯威嚴賜給若爸 尼布甲尼撒 ；</verse>
				<verse number="19">所以，逐國、逐族、講逐種話个人全部盡驚佢。佢管生死大權，也有權照自家个意思提高抑係降低人个地位。</verse>
				<verse number="20">總係，佢驕傲、頑固、殘忍个時，佢被人解除王位，失掉光榮。</verse>
				<verse number="21">佢對人群中被人逐走，佢个心變像野獸一樣。佢㧯野驢共下生活，像牛恁樣食草，睡在野外，由在露水打濕。最尾，佢承認至高上帝有權掌管人个國家，有權將國權賜給佢所揀選个人。</verse>
				<verse number="22">「 伯沙撒 啊，你係 尼布甲尼撒 个孻仔 ，你雖然知這一切，總係毋知謙卑，</verse>
				<verse number="23">反轉驕傲，㧯天頂个主做對敵。你將對佢聖殿搶來个杯碗搬出來，給你自家㧯你个大臣、王后、嬪妃啉酒用，又頌讚該兜用金、銀、銅、鐵、樹頭、石頭製造个神明，就係該兜毋會看，毋會聽，麼介也毋知个偶像。你無尊敬該決定你生死，掌管你行動个上帝，</verse>
				<verse number="24">所以，上帝派一隻手來寫這兜字。</verse>
				<verse number="25">「這兜字係： 『算數，算數，秤砣，分裂 。』</verse>
				<verse number="26">『算數』，意思係：上帝已經算好你國家个年日，使國運終止。</verse>
				<verse number="27">『秤砣』，意思係：上帝已經將你放在秤仔頂高，秤出你个份量毋罅。</verse>
				<verse number="28">『分裂』，意思係：你个國愛分裂，歸給 米底亞 人㧯 波斯 人 。」</verse>
				<verse number="29">所以， 伯沙撒 就命令僕人給 但以理 著王个紫袍，戴金脖鍊，又宣佈佢在王國內坐第三隻高位。</verse>
				<verse number="30">該暗晡， 巴比倫 王 伯沙撒 被人暗殺。</verse>
				<verse number="31">六十二歲个 米底亞 人 大流士 得到統治權。</verse>
			</chapter>
			<chapter number="6">
				<verse number="1">大流士 王決定派一百二十個省長治理全帝國。</verse>
				<verse number="2">另外，佢又指派 但以理 㧯其他兩個人監督這群省長，來維護王个權利。</verse>
				<verse number="3">但以理 當遽就表現出佢比其他監督抑係省長還較會管理。因為 但以理 優秀个才能，王想愛設立佢治理歸隻帝國。</verse>
				<verse number="4">所以，其他个監督㧯省長想盡辦法在佢處理个國政上尋過失，總係全部尋毋到，因為 但以理 誠實可靠，無半點錯誤。</verse>
				<verse number="5">佢等就大家參詳講：「除了對這 但以理 个宗教信仰下手，𠊎等一定尋毋出任何控告佢个理由。」</verse>
				<verse number="6">所以，佢等湊等去見王，對佢講：「 大流士 王萬歲！</verse>
				<verse number="7">𠊎這兜監督、省長、副省長，㧯所有个官員全部同意請國王宣佈一條禁令，無論麼人，在三十日內做毋得向任何个神明祈禱，抑係向一切个人求麼介，單淨做得向國王一儕祈求。麼人違犯這禁令，麼人就愛被人㧹入獅仔窟。</verse>
				<verse number="8">請國王頒佈這條禁令，並加頓王印，使它有效。照 米底亞 㧯 波斯 个法律，恁樣个命令係做毋得改變个。」</verse>
				<verse number="9">所以 大流士 王在這聖旨面頂加頓王印。</verse>
				<verse number="10">但以理 聽到這命令已經加頓王印，就轉屋下去。佢个樓頂有一個房間，窗門面向 耶路撒冷 。 但以理 在開等个窗仔前跪下去，照佢平常个習慣，逐日三擺向上帝獻上感謝㧯祈禱。</verse>
				<verse number="11">但以理 个敵人湊等去，看到佢向上帝祈禱，</verse>
				<verse number="12">就共下到王該位告佢。佢等對王講：「國王啊，你識宣佈一條禁令，規定無論麼人，在三十日內做毋得向任何个神明祈禱，抑係向一切个人求麼介，單淨做得向國王一儕祈求。麼人違犯這禁令，麼人就愛被人㧹入獅仔窟。」 王講：「無毋著；這係一條聖旨；照 米底亞 㧯 波斯 个法律，做毋得改變。」</verse>
				<verse number="13">所以佢等對王講：「對 猶大 捉來个 但以理 ，佢毋尊重國王，毋服從國王宣佈个命令，還係照常一日祈禱三擺。」</verse>
				<verse number="14">王聽這話，心肝非常艱苦，決心愛救 但以理 ，歸日想辦法，直到臨暗仔。</verse>
				<verse number="15">後來該兜人又湊等來向王講：「國王知，照 米底亞 㧯 波斯 个法律，王所發出个聖旨係做毋得改變个。」</verse>
				<verse number="16">所以，王下令，人就將 但以理 捉起來，㧹入獅仔窟。王對 但以理 講：「願你所忠心事奉个上帝救你。」</verse>
				<verse number="17">窟口用一垤大石頭揜等；王用王印㧯該兜大臣个印仔加封，表示處罰 但以理 个事做毋得改變。</verse>
				<verse number="18">王轉到王宮，歸夜食毋落，睡毋掉，也無愛一切个娛樂。</verse>
				<verse number="19">天一光，王就䟘起來，趕緊走到獅仔窟堘。</verse>
				<verse number="20">王一到窟堘，就哀傷盡喊：「 但以理 ，永生上帝个僕人啊！你忠心事奉个上帝有救你離開該兜獅仔麼？」</verse>
				<verse number="21">但以理 應講：「願王萬歲！</verse>
				<verse number="22">𠊎个上帝派天使來封等這兜獅仔个嘴，使牠兜無辦法傷害𠊎。上帝恁樣做，因為佢知𠊎無罪，𠊎也無做麼介得罪國王个事。」</verse>
				<verse number="23">王非常歡喜，命令僕人將 但以理 救出來。因為恁樣，佢等將 但以理 對窟底拉上來，看到佢一些仔也無受傷，因為佢信靠上帝。</verse>
				<verse number="24">後來，王命令將所有告 但以理 个人捉起來，將佢等㧯佢等个𡜵娘、子女全部㧹入獅仔窟肚。佢等還吂落到窟底，獅仔就遽遽猋上去、咬碎佢等个骨頭。</verse>
				<verse number="25">事後， 大流士 王通告世界逐國、逐族、講逐種話个人民講： 「願你等大享平安！</verse>
				<verse number="26">𠊎這下命令，𠊎治理个帝國人民，全部愛敬畏、尊崇 但以理 个上帝！ 佢係永生个上帝； 佢个統治永遠無停。 佢个主權永遠長存； 佢个權柄直到萬代。</verse>
				<verse number="27">佢解救人、幫助人， 在天頂㧯地面行神蹟奇事。 佢拯救 但以理 離開獅仔个嘴。」</verse>
				<verse number="28">對恁樣， 但以理 在 大流士 㧯 波斯 王 塞魯士 在位个時凡事順利。</verse>
			</chapter>
			<chapter number="7">
				<verse number="1">在 伯沙撒 做 巴比倫 王个第一年，有一暗晡，𠊎 — 但以理 發一隻夢，看到一個異象。𠊎將該暗晡所看到个記錄下來： 有一陣風對四面八方吹來，打到大海面頂。</verse>
				<verse number="2"></verse>
				<verse number="3">又有形狀無共樣个四隻盡大个野獸對海肚上來。</verse>
				<verse number="4">第一隻野獸像獅仔，總係有鷹鳥个翼胛。𠊎又看到，牠个翼胛剝掉了；牠企起來，像人恁樣兩腳企在地面上；又給牠有人个心。</verse>
				<verse number="5">第二隻野獸像人熊，用兩隻後腳企起來；牠个牙齒咬等三支膁𥯟骨。有聲音對牠講：「食啊，盡量食肉！」</verse>
				<verse number="6">𠊎又看到，另外一隻野獸出現。牠像豹仔，總係背囊有四隻翼胛，像鳥仔个翼胛，又有四隻頭；牠得到統治權。</verse>
				<verse number="7">𠊎又看到，第四隻野獸出現了。牠當強壯，又盡得人驚。牠用大鐵牙咬碎獵物，然後用腳蹂踏。牠㧯頭前三隻野獸無共樣，牠有十支角。</verse>
				<verse number="8">𠊎緊看這兜角个時，角中間生出另外一支細角；這細角將原來有个十支角挷掉三支。這支細角有像人个目珠㧯一張講大話个嘴。</verse>
				<verse number="9">𠊎又看到，有設立幾隻寶座，頂高坐等該萬古永存个。佢个衫像雪恁白，頭那毛像當白个羊毛。佢个寶座係火，寶座个輪仔像烈火。</verse>
				<verse number="10">對佢面前噴出烈火，像一條大河壩。在寶座前服事佢个有千千；企在佢面前个有萬萬。佢宣佈開庭，書卷也打開來。</verse>
				<verse number="11">𠊎注意看个時，又聽到該支細角講大話。𠊎注目一看，第四隻野獸㓾掉了，身屍受毀壞、又㧒落火中燒掉。</verse>
				<verse number="12">賸下來該三隻野獸，牠兜个權柄搶走了，總係還留牠兜个生命，直到所定个時期。</verse>
				<verse number="13">在暗晡時出現个異象中，𠊎看到有一位當像人子，坐等雲來，到該萬古永存个面前，</verse>
				<verse number="14">接受權柄、榮光㧯王權，使逐國、逐族、講逐種話个人全部服事佢。佢个統治會永遠長存；佢个主權永遠無窮盡。</verse>
				<verse number="15">𠊎 — 但以理 所看到个異象害𠊎憂愁，操煩無平安。</verse>
				<verse number="16">𠊎行到一個侍從面前，請佢為𠊎解釋這一切个事。所以佢為𠊎解釋這異象。</verse>
				<verse number="17">佢講：「這四隻大野獸係指將來世界上會興起四個帝國。</verse>
				<verse number="18">總係至高上帝个聖民會接受王權，掌管這王權直到永永遠遠。」</verse>
				<verse number="19">𠊎想愛較清楚知第四隻野獸个事，因為這隻盡得人驚个野獸㧯其他三隻野獸無共樣。牠用銅爪鐵齒咬碎獵物，然後用腳蹂踏。</verse>
				<verse number="20">𠊎也想愛知牠頭那頂个十支角㧯後來正生出來、挷掉另外三支角該支細角係麼介意思。該支細角有目珠㧯講大話个嘴，看起來比其他个角還較得人驚。</verse>
				<verse number="21">接等𠊎又看到，該支細角㧯上帝个聖民相㓾，打贏佢等，</verse>
				<verse number="22">直到該萬古永存个來到，為至高上帝个聖民伸冤。上帝聖民接受王權个時節就到了。</verse>
				<verse number="23">該侍從又對𠊎解釋講：「該第四隻野獸係指將來世界上興起个第四個帝國。它㧯其他个帝國無共樣，它會吞掉全世界，蹂踏、打碎全地。</verse>
				<verse number="24">該十支角係指接等統治這帝國个十個君王。後來另外一個王興起來，㧯以前个王無共樣；佢會征服其中三個王。</verse>
				<verse number="25">佢會講悖逆个話，㧯至高个上帝做對頭，又迫害上帝个聖民。佢想愛改變佢等个宗教法律㧯節期。上帝个聖民會受佢統治一時期、兩時期、又過半時期 。</verse>
				<verse number="26">後來，天頂个審判者愛開庭審判，將佢个統治權搶走，徹底消滅它。</verse>
				<verse number="27">至高个上帝愛將天下个國家、王權㧯能力賜給佢个聖民。佢等个王權永遠無窮；世界所有个統治者全部愛服事並順服佢等 。」</verse>
				<verse number="28">這件事到這為止。𠊎 — 但以理 非常著驚，面色變到癧青。𠊎將這一切个事全部放在心肚。</verse>
			</chapter>
			<chapter number="8">
				<verse number="1">伯沙撒 王在位个第三年，𠊎 — 但以理 看到第二隻異象 。</verse>
				<verse number="2">在異象中，𠊎忽然發現自家在 以攔 省个京城 書珊 。𠊎企在 烏萊 河壩滣，</verse>
				<verse number="3">看到一隻綿羊牯企在該位，牠有兩支長角，總係長短無共樣，較長个角係較慢生出來个。</verse>
				<verse number="4">𠊎看到綿羊牯用角向西片、北片、南片鬥過去；所有个動物全部無法度抵抗牠，也無法度閃開牠个威力。牠歡喜樣般做就樣般做，越來越強大。</verse>
				<verse number="5">𠊎當想該係麼介意思个時，忽然看到一隻山羊牯對西片走過來，行過全地，遽到像腳無貼地。牠兩隻目珠中間生一支盡惹目个角。</verse>
				<verse number="6">牠向𠊎頭下看到該隻企在河壩滣兩支角个綿羊牯發譴撞等過去。</verse>
				<verse number="7">𠊎看到牠攻擊綿羊牯，發譴來撞牠，撞斷綿羊牯个兩支角。綿羊牯無力好抵抗，橫在地上，受蹂踏，無人能救綿羊牯脫離牠个手。</verse>
				<verse number="8">該山羊牯緊自高自大；總係當牠个權力達到最強个時，牠个角斷掉。在原來个所在另外生出四支盡惹目个角，指向天个四方。</verse>
				<verse number="9">對這四支角中間个一支角又生出一支細角；這細角向南片、東片、㧯該當靚个地 擴張勢力。</verse>
				<verse number="10">牠个力量強大到能攻擊天軍㧯星辰，將有兜天軍㧯星辰㧹到地上，並蹂踏它兜。</verse>
				<verse number="11">牠甚至公然對抗天軍个元帥，逐日阻擋人向佢獻祭，又毀壞佢个聖殿。</verse>
				<verse number="12">牠迫人民在該位犯罪，逐日獻無應該獻个祭 ，將真理㧒落在地上。這細角一切个所做全部順利。</verse>
				<verse number="13">接等，𠊎聽到一個天使問另外一個天使：「在異象中出現个這兜事愛繼續幾久呢？逐日應該獻个祭，換做該得人惱个罪惡愛到幾久呢？天軍㧯聖殿被牠蹂踏愛到幾時呢？ 」</verse>
				<verse number="14">佢應講 ：「這兜事愛繼續兩千三百個暗晡㧯朝晨 ，聖殿正會恢復淨浰。」</verse>
				<verse number="15">𠊎 — 但以理 當想愛了解這異象到底係麼介意思，忽然間有一個外貌像人个企在𠊎个面前。</verse>
				<verse number="16">𠊎聽到對 烏萊 河有人聲喊講：「 加百列 啊，㧯這個人講這異象个意思！」</verse>
				<verse number="17">加百列 行到𠊎塍頭；𠊎當驚，就伏在地上。 佢對𠊎講：「人子啊，你愛了解這異象。這異象係有關歷史个結局。」</verse>
				<verse number="18">佢講話个時，𠊎伏在地上，毋知人事。總係佢將𠊎扶起來，</verse>
				<verse number="19">對𠊎講：「𠊎愛指示你上帝个發譴到最尾會樣般；這異象係有關佢所定个結局。</verse>
				<verse number="20">「你所看到該有兩支角个綿羊牯係指 米底亞 㧯 波斯 帝國。</verse>
				<verse number="21">山羊牯係指 希臘 帝國，牠兩隻目珠中間該支盡惹目个角係指第一個王。</verse>
				<verse number="22">該支角拗斷以後正生出來个四支角係指這帝國愛分做四個王國，總係它兜个力量無法度㧯原來个帝國比。</verse>
				<verse number="23">「這兜王國个末期，罪惡當滿个時，有一個兇惡、詭詐个王會出現。</verse>
				<verse number="24">佢个勢力越來越大，總係毋係靠自家个能力。佢愛造成極大个毀滅；佢所做个一定成功。佢愛消滅該兜當強又當有力个人㧯上帝个聖民。</verse>
				<verse number="25">因為佢搞怪，佢个詭計項項成功。佢自高自大，在人無提防个時忽然間出手，消滅盡多人。佢甚至公開㧯萬王之王做對敵，總係佢最尾會被超過人个力量消滅。</verse>
				<verse number="26">有關暗晡㧯朝晨个異象 已經向你解釋了。這異象一定會實現；總係你這下愛保守祕密，因為它係指遠遠个日仔講个。」</verse>
				<verse number="27">𠊎 — 但以理 心肚當操煩，病倒幾日。以後𠊎䟘起來，轉到工作所在，辦理王指派給𠊎个事務；總係𠊎被這個異象摝到無葛無煞，毋明白其中个意思。</verse>
			</chapter>
			<chapter number="9">
				<verse number="1">米底亞 族 亞哈隨魯 个孻仔 大流士 做王統治 巴比倫 國。</verse>
				<verse number="2">佢在位个第一年，𠊎 — 但以理 研讀聖經，了解上主㧯先知 耶利米 講个有關 耶路撒冷 會荒廢、直到滿七十年个話 。</verse>
				<verse number="3">𠊎禁食，著麻衫，坐在塵灰肚，面向主上帝迫切祈禱。</verse>
				<verse number="4">𠊎向上主 — 𠊎个上帝祈禱，為𠊎个同胞認罪。 𠊎講：「主啊，你係至大个上帝；𠊎等敬畏你。你守你个約，向該兜愛你、遵守你命令个人顯明不變个慈愛。</verse>
				<verse number="5">「𠊎等犯罪做壞事，常常悖逆，偏離你个誡命律例。</verse>
				<verse number="6">你个僕人，就係該兜先知，識奉你个名向𠊎等个君王、領袖、祖先，㧯全國个人講話；總係𠊎等毋聽。</verse>
				<verse number="7">主啊，你係公正个，總係𠊎這兜 猶大 㧯 耶路撒冷 个人民，並該兜悖逆你、被你逐散到遠方、抑係附近逐國个 以色列 人，全部因為對你無忠心，今晡日正會恁見笑。</verse>
				<verse number="8">上主啊，𠊎等㧯𠊎等个君王、領袖，並祖先全部得罪你，𠊎等个見笑係自家惹來个。</verse>
				<verse number="9">主 — 𠊎等个上帝啊，雖然𠊎等悖逆你，你還係憐憫𠊎等，赦免𠊎等。</verse>
				<verse number="10">上主 — 𠊎等个上帝啊，你通過你个僕人，就係該兜先知，向𠊎等宣佈法律，愛𠊎等遵守；總係𠊎等毋聽你个話。</verse>
				<verse number="11">以色列 人全部悖逆你个法律，偏離你，無聽從你。所以，該兜記在你僕人 摩西 法律書个咒詛㧯審判全部落在𠊎等身上，因為𠊎等實在得罪你。</verse>
				<verse number="12">你在𠊎等㧯𠊎等个統治者身上實現你講過个話。你用大災禍責罰 耶路撒冷 係天下所有个城市吂有施行過个。</verse>
				<verse number="13">你將 摩西 法律書上所寫一切个災禍全部降在𠊎等身上。總係，上主 — 𠊎等个上帝啊，𠊎等還係無俾你歡喜，𠊎等還係無離開罪惡，無看重你个真理。</verse>
				<verse number="14">上主 — 𠊎等个上帝啊，你識準備愛責罰𠊎等。事實上，你已經責罰𠊎等了；因為你從頭到尾公正，總係𠊎等毋聽你个話。</verse>
				<verse number="15">「主 — 𠊎等个上帝啊，你用大能个手帶領你个子民出 埃及 ；你个名聲流傳到今晡日。𠊎等確實有犯罪、做壞事。</verse>
				<verse number="16">主啊，求你照你一切个公義，這下毋好向你个聖山 耶路撒冷 城發譴。因為𠊎等犯罪、𠊎等祖先做壞事， 耶路撒冷 㧯你个子民就被四周圍个人侮辱。</verse>
				<verse number="17">這下，𠊎等个上帝啊，求你聽你僕人个祈禱㧯哀求。求你光照，再看顧你該座荒廢个聖殿，使人知你係主。</verse>
				<verse number="18">上帝啊，求你聽𠊎等个祈求！求你看顧𠊎等㧯屬你名下荒廢个城！𠊎等向你懇求毋係靠自家个公義，係靠你个大憐憫。</verse>
				<verse number="19">主啊，求你聽！主啊，求你赦免！主啊，求你答應來聽並施行拯救！𠊎个上帝啊，為到使人知你係上帝，求你毋好延纏；因為這座城係你个城，這兜人係你个子民。」</verse>
				<verse number="20">𠊎繼續祈禱，承認𠊎㧯𠊎同胞 以色列 个罪，又為上帝个聖山向上主 — 𠊎个上帝懇求。</verse>
				<verse number="21">𠊎祈禱个時，先前出現在𠊎異象中个 加百列 盡遽飛到𠊎這位來；該樣時係臨暗仔獻祭个時間。</verse>
				<verse number="22">加百列 向𠊎解釋講：「 但以理 ，𠊎這下來，俾你有智慧好明白。</verse>
				<verse number="23">你開始向上帝祈求个時，佢就答應你了。佢合意你，所以𠊎來向你傳佢个話。這下請你注意聽𠊎解釋異象个意思：</verse>
				<verse number="24">「七十個七年係上帝所定愛解救你同胞㧯聖城離開罪惡个時間。該時，佢愛赦免罪惡，帶來永久个正義，使異象㧯預言實現 ，並使聖殿重新奉獻 。</verse>
				<verse number="25">你愛知，愛了解：對宣佈復興重建 耶路撒冷 个命令到上帝揀選个領袖出現，期間一定愛經過七個七年。 耶路撒冷 城會重建，有街路㧯堅固个防備；期間係六十二個七年，總係 該係一站困苦个期間。</verse>
				<verse number="26">過了這期間，上帝揀選个領袖會被人㓾掉，一無所有 ；這城㧯聖殿會被一個君王个軍隊毀壞。這結局會像大水沖來，將上帝所準備个戰爭㧯毀滅帶來。</verse>
				<verse number="27">該君王會㧯當多人結盟約七年，總係七年過掉一半，佢就禁止人獻祭、獻禮物。該時，該『毀滅性、邪惡个東西』 會被人放在祭壇个角上 ，留在該位，一直到將它放在該位个人受到上帝為佢所定个災難為止。」</verse>
			</chapter>
			<chapter number="10">
				<verse number="1">塞魯士 做 波斯 王个第三年，上帝向又安到 伯提沙撒 个 但以理 啟示一個信息。這信息係真實个，總係當難了解 。 但以理 在異象中得到了解。</verse>
				<verse number="2">該時，𠊎 — 但以理 悲傷三個禮拜。</verse>
				<verse number="3">𠊎三禮拜無食滂沛，無食肉，無啉酒，無膏油，也無梳頭。</verse>
				<verse number="4">正月二十四 ，𠊎企在 底革里斯 大河壩滣。</verse>
				<verse number="5">𠊎昂頭看，看到有一儕著細麻紗个衫，繫等黃金做个腰帶。</verse>
				<verse number="6">佢个身體像寶石發光，面像𥍉爧；目珠像火把盡光，手腳像拭金个銅；佢講話个聲量像歸群人喊个聲。</verse>
				<verse number="7">只有𠊎 — 但以理 一儕看到這異象。㧯𠊎共下个人並無看到麼介；總係佢等全部非常著驚，就走去囥。</verse>
				<verse number="8">𠊎一儕留在該位，看到這奇妙个光景。𠊎全身無力，面無血色，強強企毋住。</verse>
				<verse number="9">一聽到佢个聲音，𠊎就伏在地上，毋知人事。</verse>
				<verse number="10">忽然間，有一隻手扶等𠊎，使𠊎用手㧯膝頭撐起來；總係𠊎還係全身愊愊掣。</verse>
				<verse number="11">天使對𠊎講：「上帝所惜个 但以理 啊，企起來，注意聽𠊎㧯你講个話；𠊎係受派到你這位來个。」佢講煞，𠊎還緊顫企起來。</verse>
				<verse number="12">佢就對𠊎講：「 但以理 啊，毋使驚！自從第一日你謙卑在上帝面前祈求愛明白這異象个意思，佢就聽你个祈禱。𠊎就係來為你解釋个。</verse>
				<verse number="13">總係 波斯 个護國天使阻擋𠊎二十一日。因為𠊎留在 波斯 王該位，有一位天使長 米迦勒 來幫助𠊎。</verse>
				<verse number="14">這下𠊎來，係為你解釋將來你个同胞所愛堵到个事；這係有關將來个異象。」</verse>
				<verse number="15">佢對𠊎講話个時，𠊎面伏地泥，恬恬無講話。</verse>
				<verse number="16">所以該款式像人个天使伸手摸𠊎个嘴唇，𠊎就開嘴，對佢講：「吾主啊，𠊎看到這異象就全身無力，一直愊愊掣。</verse>
				<verse number="17">𠊎像一個奴才企在主人面前；𠊎樣做得㧯你講話呢？𠊎已經無力，無辦法透氣。」</verse>
				<verse number="18">佢再一擺扶𠊎，使𠊎恢復元氣。</verse>
				<verse number="19">佢講：「上帝所惜个人啊，毋使驚！願你平安！你愛堅強！」 佢講這個話以後，𠊎就感覺有力了。𠊎講：「吾主啊，你使𠊎个力量恢復；你做得㧯𠊎講話了！」</verse>
				<verse number="20">佢講：「你知𠊎做麼介到這位來麼？𠊎來係愛將真理个書所寫个㧯你講。這下𠊎一定愛轉去，㧯 波斯 个護國天使相㓾。以後， 希臘 个護國天使會出現。除了 以色列 个護國天使 米迦勒 ，無人幫助𠊎抵擋這兩個護國天使。」</verse>
				<verse number="21"></verse>
			</chapter>
			<chapter number="11">
				<verse number="1">佢又講：「在 米底亞 人 大流士 做王个第一年，𠊎負責幫助 米迦勒 ，使佢堅強。</verse>
				<verse number="2">𠊎這下愛㧯你講个話還係真實个。」 該天使講：「 波斯 還愛經歷三個王个統治，直到第四個王出現。這第四個王比其他个王會加盡好額。在佢最有權勢、最富強个時，佢會惹起全國攻擊 希臘 國。</verse>
				<verse number="3">「然後有一個勇敢个王會出現；佢會照自家个意思來統治極大个帝國 。</verse>
				<verse number="4">總係，當佢个權勢到最強盛个時，佢个帝國就會分裂做四部份。佢个後代無法度承接佢个王位，佢个王國會換別人統治，總係無像佢統治个時恁強。</verse>
				<verse number="5">「 埃及 王 會變當強，總係佢个將軍當中有一個比佢還較強个會出現，所統治个王國會還較大。</verse>
				<verse number="6">盡多年後， 埃及 王會㧯 敘利亞 王 結盟，將妹仔嫁給佢。總係這聯盟毋會維持長久。這個 埃及 公主㧯姖个老公、細人仔 ，並同姖共下去个僕人全部會被人㓾掉。</verse>
				<verse number="7">無幾久後，姖个一個親戚會做 埃及 王，並攻擊 敘利亞 王个軍隊，進入佢等个城堡，打贏佢等。</verse>
				<verse number="8">佢會將佢等个神像㧯神廟肚个金器、銀器全部帶轉 埃及 。經過幾年个太平日仔後，</verse>
				<verse number="9">敘利亞 王會去侵略 埃及 ，總係最後會被人逐轉去。</verse>
				<verse number="10">「 敘利亞 該兜王子會好好準備相㓾，召集極多个軍隊。其中一個王子會像大水恁樣攻打敵人个城堡。</verse>
				<verse number="11">埃及 王會大發譴，帶領軍隊出去相㓾，攻打 敘利亞 王，捉到佢極多个軍隊。</verse>
				<verse number="12">埃及 王會因為消滅歸萬人得到勝利，就變到非常驕傲，總係佢个勝利毋會維持盡久。</verse>
				<verse number="13">「 敘利亞 王會轉去召集比以前較多較強大个軍隊；時機一到，佢會帶領裝備良好个強大軍隊倒轉來。</verse>
				<verse number="14">該時，會有盡多人悖逆 埃及 王。 但以理 啊，你同胞中有兜暴徒也會悖逆，使異象實現；總係佢等會被人打輸。</verse>
				<verse number="15">敘利亞 王會圍攻並佔領防衛个城鎮； 埃及 最精良个軍隊也無法度抵抗佢。</verse>
				<verse number="16">敘利亞 王个侵略會當順利，無人有辦法反抗。佢會佔領該當靚个地 ，完全控制它。</verse>
				<verse number="17">「 敘利亞 王會計劃出動全軍去征服 埃及 。為到愛消滅 埃及 ，佢計劃先㧯 埃及 結盟，將自家个妹仔嫁過去；總係佢个計劃對佢無利益，毋會成功。</verse>
				<verse number="18">後來，佢會攻打海滣該兜國家，並佔領其中盡多國。總係有一個外國將軍會打贏佢，阻止佢个惡行，使佢个惡行變成自家个損害。</verse>
				<verse number="19">佢會撤退轉去自家个城堡，到尾被人消滅；這就係佢个結局。</verse>
				<verse number="20">「佢以後會有另外一個王接佢个位；這王為到愛增加王國个財富，就派一儕去負責抽當重个稅來壓迫人民。總係無幾久這王就會被人暗殺，毋係死在戰場上。」</verse>
				<verse number="21">該天使繼續解釋講：「這事以後，有一個邪惡个人會搶到 敘利亞 个王位。佢無權利承接王位，總係在人無提防个時節，用詭詐个手段搶到政權。</verse>
				<verse number="22">佢會徹底消滅所有反對个勢力，連上帝个大祭司也在內。</verse>
				<verse number="23">佢用結約來欺騙別國；佢所統治个雖然係一個細國，總係越來越強大。</verse>
				<verse number="24">佢會在人無提防个時節侵入國中最豐富个所在，做佢祖先自從毋識做過个事。佢會將戰利品分給部下。佢會計劃攻打城堡，總係佢个日仔並毋會長久。</verse>
				<verse number="25">「佢會盡勇敢帶領大軍攻打 埃及 王； 埃及 王也會用強大个軍隊來㧯佢相㓾，總係毋會成功，因為佢會被叛徒謀害。</verse>
				<verse number="26">佢最親信个人想愛消滅佢；佢个軍隊會被人消滅，盡多人會在戰場被人㓾死。</verse>
				<verse number="27">這以後个兩個王會共桌食飯，總係佢等心存惡意，互相欺騙。佢等毋會達成心願，因為指定个日期還吂到。</verse>
				<verse number="28">敘利亞 王會滿載戰利品轉去本國；佢決心愛消滅上帝子民个信仰，就隨自家个意思亂做，然後正轉去本國。</verse>
				<verse number="29">「到了指定个日期，佢會再向 埃及 前進；總係這擺个情況㧯以前無共樣。</verse>
				<verse number="30">羅馬 人 个戰船會來攻打佢，害佢驚到無葛無煞。 「 敘利亞 王會當怨嘆撤退，並拿破壞上帝子民个信仰來出大氣。佢會聽信該兜悖逆信仰个人个建議。</verse>
				<verse number="31">佢派來个軍隊會褻瀆聖殿，禁止逐日應該獻个祭，又將該『毀滅性、邪惡个東西』放在聖殿底背。</verse>
				<verse number="32">佢會用詭計來騙到違背聖約者个支持；總係該兜忠心跈上帝个人會剛強起來反抗。</verse>
				<verse number="33">民間該兜聰明个領袖會教導眾人，使佢等明白；總係，會有一站時間，有兜人會戰死，被火燒死，被人搶劫，被人捉走。</verse>
				<verse number="34">屠殺進行个時，上帝个子民會得到一些仔幫助定定；雖然盡多人來㧯佢等結盟，總係無誠實。</verse>
				<verse number="35">有兜聰明个領袖會被人㓾掉，總係佢等个犧牲會洗淨、鍛鍊人民，使佢等成做純潔。這事會繼續，直到上帝所定个結局來到。</verse>
				<verse number="36">「 敘利亞 王會隨意亂做，自誇佢比所有神明還較偉大，甚至高過萬神个神 — 上帝。佢會繼續恁樣亂講，直到上帝責罰佢个日仔。上帝一定會實現佢个計劃，絕對毋會改變。</verse>
				<verse number="37">這個王毋會敬重祖先所拜个神明，也毋會尊重該兜婦人家所愛个神明。其實，佢毋會尊敬所有个神明，因為佢自家恅到比所有个神明還較偉大。</verse>
				<verse number="38">佢反轉會去拜祖先無拜過、該保護城堡个城隍。佢向這神明獻金、銀、寶石，㧯其他貴重个禮物。</verse>
				<verse number="39">佢會用信奉異教神明个軍隊保守佢个城堡。中意佢統治个人，佢會賜佢等高官地位治理民眾，又分封土地，來做報賞。</verse>
				<verse number="40">「結局來到个時， 埃及 王會出兵攻打 敘利亞 王。 敘利亞 王會集合佢所有个軍力，用戰車、戰馬，㧯船隊像暴風來攻擊轉去。佢會侵略盡多國家，像做大水沖到滿地，</verse>
				<verse number="41">甚至會侵入該當靚个地 ，㓾死歸萬人；總係 以東 人、 摩押 人，㧯大部份个 亞捫 人會脫離佢个手。</verse>
				<verse number="42">佢攻打該兜國家个時，連 埃及 也毋會漏掉。</verse>
				<verse number="43">佢會管理 埃及 貯存个金銀財寶㧯其他貴重个東西。佢會征服 利比亞 㧯 古實 。</verse>
				<verse number="44">後來對東片㧯北片傳來个風聲害佢盡著驚；佢會大發譴來出兵，愛將盡多人㓾死滅絕。</verse>
				<verse number="45">佢會在大海㧯盡靚个聖山之間將王宮个大帳篷搭起來。總係佢个死期到了，無人能幫助佢。」</verse>
			</chapter>
			<chapter number="12">
				<verse number="1">該著細麻紗个衫个天使講： 「該時，保護你同胞个天使長 米迦勒 會出現。然後會有一站災難期間，係立國以來最大个災難。在該時期，你同胞中有名登記在生命冊个，全部會得到拯救。</verse>
				<verse number="2">已經死掉个人有盡多會復活。有兜愛享受永遠个生命；有兜愛受永遠个羞辱。</verse>
				<verse number="3">該兜聰明个領袖會像天頂个光體共樣發光。該兜教導盡多人行公義个，會像星仔共樣永遠發光。</verse>
				<verse number="4">「 但以理 啊，你這下愛將這卷書合起來，封起來，一直到世界个末日。會有盡多人走來走去，想愛增加智識。」</verse>
				<verse number="5">接等，𠊎 — 但以理 看到兩個人，一個企在河壩這片，另外一個在河壩該片。</verse>
				<verse number="6">其中一個問河壩較上頭、著細麻紗个衫个天使講：「這兜奇妙个事愛等幾久正會結束？」</verse>
				<verse number="7">在河壩較上頭、著細麻紗个衫个天使擎起雙手，指向天頂，奉永生上帝个名發誓。𠊎聽到佢講：「愛經過一時期、兩時期、半時期 。上帝聖民所受个迫害結束个時，這兜事全部就實現了 。</verse>
				<verse number="8">𠊎聽到佢講个話，總係毋明白係麼介意思。所以𠊎問：「𠊎个主啊，這兜事个結局係樣般呢？」</verse>
				<verse number="9">佢講：「 但以理 啊，你好走了，因為這兜話愛囥等封起來直到末日。</verse>
				<verse number="10">盡多人會受鍛鍊，變做清白純潔。壞人會繼續做壞事；佢等毋會明白，只有聰明个人正會明白。</verse>
				<verse number="11">「自從逐日个獻祭受廢掉該日，也就係對安放該『毀滅性、邪惡个東西』開始，愛經過一千兩百九十日。</verse>
				<verse number="12">該兜忠心等到一千三百三十五日个人，係樣般有福氣啊！</verse>
				<verse number="13">「 但以理 啊，你好去了，愛忠心到底。以後你會安息；總係在末日你會復活，享受你个獎賞。」</verse>
			</chapter>
		</book>
		<book number="28">
			<chapter number="1">
				<verse number="1">上主啟示 備利 个孻仔 何西阿 該站期間， 烏西雅 、 約坦 、 亞哈斯 、 希西家 接等做 猶大 國个王； 以色列 國係 約華施 个孻仔 耶羅波安 二世做王。下背个記載係上主向 何西阿 講个話。</verse>
				<verse number="2">上主第一擺通過 何西阿 向 以色列 人講話个時，佢對 何西阿 講：「你去結婚啊！你討个𡜵娘會對你無守貞節；你等个子女也會像姖恁樣對你無忠實 。照樣， 以色列 全國上下㧯該淫婦共樣，盡行淫亂，離開𠊎 — 上主。」</verse>
				<verse number="3">所以， 何西阿 去㧯 滴拉音 个妹仔 歌蜜 結婚。姖有身項，㧯 何西阿 𫱔一個孻仔。</verse>
				<verse number="4">上主對 何西阿 講：「㧯佢安到 耶斯列 ；因為無幾久𠊎就愛責罰 耶戶 个王室，討佢等祖先在 耶斯列 㓾人个血債 。𠊎愛結束 以色列 王國。</verse>
				<verse number="5">該日，𠊎一定愛在 耶斯列 山壢毀滅 以色列 个軍隊。」</verse>
				<verse number="6">歌蜜 又有身項，𫱔一個妹仔。上主㧯 何西阿 講：「㧯姖安到 羅‧露哈瑪 ；因為𠊎絕對無愛再憐憫 以色列 這一家，無愛再赦免佢等。</verse>
				<verse number="7">總係，𠊎愛痛惜 猶大 這一家。𠊎係上主，係佢等个上帝；𠊎愛拯救佢等；總係𠊎毋係用戰爭、弓箭、刀劍、軍馬、騎兵拯救佢等。」</verse>
				<verse number="8">歌蜜 在厥妹仔 羅‧露哈瑪 斷乳後，又有身項，𫱔一個孻仔。</verse>
				<verse number="9">上主㧯 何西阿 講：「㧯佢安到 羅‧阿米 ；因為 以色列 人毋係𠊎个子民，𠊎也毋係佢等个上帝。」</verse>
				<verse number="10">總係， 以色列 个人數愛增加，像海沙共樣無法度算，無法度量。原旦上帝在㖠位對佢等講：「你等毋係𠊎个子民」；有一日，佢也愛在該位對佢等講：「你等係永生上帝个子女。」</verse>
				<verse number="11">猶大 家㧯 以色列 家會聯合起來，為自家推選一個領袖。佢等會轉到自家个土地重新繁榮起來。 耶斯列 个日仔確實會成做一個大日。</verse>
			</chapter>
			<chapter number="2">
				<verse number="1">所以， 以色列 人啊，你等愛向自家个兄弟講：「你等係上帝个子民」；向姊妹講：「你等係上主所痛惜个。」</verse>
				<verse number="2">愛㧯你等个阿姆辯論，因為姖已經毋係𠊎个𡜵娘，𠊎也毋係厥老公。愛勸姖除掉滿面个淫亂，毋好再顯出胸脯去引誘人。</verse>
				<verse number="3">若係姖毋聽，𠊎愛脫掉姖个衫褲，使姖赤身露體，像正出世該時共樣。𠊎愛使姖像曠野，像沙漠，使姖嘴燥到死。</verse>
				<verse number="4">𠊎無愛惜姖个子女，因為佢等係淫婦𫱔个。</verse>
				<verse number="5">佢等个阿姆犯姦淫，係毋知見笑个妓女 。姖㘙㘙唸唸講：「𠊎愛去靠該兜情郎；因為𠊎个食物、水、羊毛、布料、橄欖油㧯酒全部係佢等給𠊎个。」</verse>
				<verse number="6">所以，𠊎愛用竻仔做籬笆塞等姖个路；𠊎愛做圍牆，使姖連細路也尋毋到。</verse>
				<verse number="7">姖想愛㧯契哥偷走，總係逐毋到佢等；姖逐所在去尋，總係尋毋到。所以姖講：「𠊎還係轉到原旦个老公該位去！以前㧯佢共下个光景比這下較好！」</verse>
				<verse number="8">姖毋承認給姖五榖、新酒㧯橄欖油个係𠊎；其實連姖獻給 巴力 神明个金銀也係𠊎大方給姖个。</verse>
				<verse number="9">所以，到收割个時，𠊎愛拿轉𠊎給姖个五榖，到做酒个時節，𠊎愛收轉𠊎給姖个新酒；𠊎也愛搶轉𠊎給姖遮膚身个羊毛㧯布料。</verse>
				<verse number="10">𠊎愛在姖該兜契哥面前將姖个衫褲脫淨淨；無人做得對𠊎手中將姖救走。</verse>
				<verse number="11">𠊎愛停掉姖所有个歡樂，禁止姖个年節、月初、安息日，㧯一切个宗教大會。</verse>
				<verse number="12">𠊎愛敗壞姖个葡萄樹㧯無花果樹，因為姖講：「這兜係𠊎該兜情郎賞給𠊎个。」𠊎愛使姖个果園成做荒林；野獸愛來食該兜果子。</verse>
				<verse number="13">𠊎愛判姖；因為姖在節日向該兜 巴力 燒香，用耳環㧯珠寶來打扮，跈契哥走，卻將𠊎毋記得。𠊎 — 上主恁樣宣佈了。</verse>
				<verse number="14">看啊，𠊎愛帶姖到曠野，安慰姖，好嘴勸姖。</verse>
				<verse number="15">𠊎愛將葡萄園還姖，使「災難山壢」成做「希望門」；在該位，姖會聽𠊎个話，像姖後生離開 埃及 个時共樣。</verse>
				<verse number="16">該時，姖會承認𠊎 — 上主做姖个老公，無再將𠊎喊做 巴力 。</verse>
				<verse number="17">𠊎愛喊姖將該兜 巴力 放毋記得，絕對做毋得再提起它兜个名。</verse>
				<verse number="18">該時，𠊎愛㧯飛禽、走獸、爬蟲立約，喊牠兜毋好傷害𠊎个子民。𠊎愛毀滅弓箭、刀劍，停止戰爭，俾𠊎个子民享受太平。</verse>
				<verse number="19">以色列 啊，𠊎愛討你永遠做𠊎个𡜵娘。 𠊎愛用公義、公平、慈愛㧯憐憫做聘金來討你。</verse>
				<verse number="20">𠊎也愛用誠實來討你； 你就會正經認識𠊎 — 上主。</verse>
				<verse number="21">該時，𠊎愛聽𠊎子民 以色列 个祈禱； 𠊎愛喊天降甘露滋潤大地， 地就會出產五榖、新酒㧯橄欖油。</verse>
				<verse number="22"></verse>
				<verse number="23">𠊎愛將𠊎个子民種在這垤土地； 𠊎愛對「無受到憐憫」个施行憐憫； 𠊎愛對「毋係𠊎子民」个講：「你等係𠊎个子民」。 佢等定著會講：「你係𠊎等个上帝。」</verse>
			</chapter>
			<chapter number="3">
				<verse number="1">上主又對𠊎講：「去惜 若𡜵娘 ，就係該被別人惜、又犯姦淫个婦人家。你愛惜姖，像𠊎惜 以色列 人共樣。雖然佢等離開𠊎，去拜別个神明，當愛拜過偶像个葡萄餅 ，𠊎還係惜佢等。」</verse>
				<verse number="2">所以，𠊎用十五隻銀幣㧯一百五十公斤大麥个代價將吾𡜵娘 贖轉來。</verse>
				<verse number="3">𠊎對姖講：「你愛㧯𠊎共下住一站盡長个時間，毋好去做妓女、犯姦淫，總係這站時間𠊎做毋得㧯你同房。」</verse>
				<verse number="4">共樣，有一站相當長个時間， 以色列 人會無君王㧯領袖，無獻祭，無石柱，無偶像㧯卜卦个聖筊仔。</verse>
				<verse number="5">這站期間過去， 以色列 人會回心轉意 ，尋求上主 — 佢等个上帝，回復佢等个君王 大衛 个家。恁樣，在將來个日仔，佢等會敬畏上主，領受佢个恩惠。</verse>
			</chapter>
			<chapter number="4">
				<verse number="1">以色列 人啊，你等愛注意聽上主對這地方人民个責備。佢講：「這位个人無誠實，也無愛心；佢等毋承認𠊎係上帝。</verse>
				<verse number="2">佢等假發誓、講花撩、兇殺、做賊、行姦淫；佢等一直犯罪，血案連連。</verse>
				<verse number="3">所以，這地方會做天旱；人民全部會渴死。所有飛禽走獸，甚至水肚个魚類，全部會消滅。」</verse>
				<verse number="4">上主講：「祭司啊，你等毋好責備人民，也毋使控告佢等，因為𠊎愛控告个就係你等 。</verse>
				<verse number="5">你等个行為企毋正，無分日夜，該兜先知也共樣跌倒。𠊎愛消滅你等个阿姆 — 以色列 。</verse>
				<verse number="6">𠊎个子民愛滅亡，因為佢等毋承認𠊎。你這兜祭司毋承認𠊎，又拒絕𠊎 — 上帝个教訓。所以𠊎愛拒絕你等，毋俾你等个子孫做𠊎个祭司。</verse>
				<verse number="7">「你等這群祭司，你等人越多就越敢得罪𠊎，所以𠊎愛使你等个光榮變做見笑。</verse>
				<verse number="8">𠊎个子民犯罪，卻畜肥你等，所以你等愛佢等多多犯罪。</verse>
				<verse number="9">將來你等一定愛㧯人民共樣受責罰，照你等个所行所做共樣堵到報應。</verse>
				<verse number="10">你等好食，總係食毋飽；你等行姦淫，總係子孫無較多；因為你等離開𠊎 — 上主，去跈別个神明。」</verse>
				<verse number="11">上主講：「新酒㧯老酒害𠊎个子民頭腦無清楚。</verse>
				<verse number="12">佢等去求問樹頭，聽從樹枝个指示。淫亂个心靈迷惑佢等去行姦淫，遠離佢等个上帝。</verse>
				<verse number="13">佢等在山頂獻祭，在山岡頂个大樹下燒香，因為佢等在樹影下感覺涼爽。 「所以，你等个妹仔去做妓女；你等个心舅㧯人行姦淫。</verse>
				<verse number="14">總係，𠊎無責罰姖等，因為你等也㧯神廟个妓女行姦淫，㧯姖等共下向神明獻祭。就像俗語講个：『無智識个人民一定會衰。』</verse>
				<verse number="15">「雖然你這兜 以色列 人悖逆𠊎，𠊎希望 猶大 人毋會犯共樣个罪。你等毋好去 吉甲 ，也毋好上去 伯‧亞文 禮拜，毋好在該兜所在指等𠊎 — 永生上主个聖名發誓。</verse>
				<verse number="16">以色列 人㧯牛乸共樣恁硬頸，𠊎樣能牧養佢等，像在草場牧養羊群一樣呢？</verse>
				<verse number="17">以色列 人 被偶像迷到。由在佢等行差路！</verse>
				<verse number="18">佢等㧯酒醉个人做朋友。佢等繼續過放蕩淫亂个生活，歡喜做見笑个事，卻無歡喜得到尊榮。</verse>
				<verse number="19">佢等會被淫亂捉去，像被龍捲風捲走；佢等會向該兜神明獻祭致到見笑。」</verse>
			</chapter>
			<chapter number="5">
				<verse number="1">「祭司啊，你等愛聽！ 以色列 人啊，你等愛注意！王親國族啊，你等也愛側耳來聽！這下你等愛受審判了；因為你等已經成做安在 米斯巴 个機關，揜在 他泊 山个羅網，</verse>
				<verse number="2">挖在 什亭 深深个陷阱 。𠊎一定愛責罰你等大家。</verse>
				<verse number="3">𠊎當了解 以色列 人；佢等瞞毋到𠊎。佢等這下行姦淫，對𠊎無忠心，無資格敬拜𠊎。」</verse>
				<verse number="4">以色列 人个壞行為害佢等無法度歸向上帝。淫亂个心靈害佢等拜偶像，恁樣就毋認識上主。</verse>
				<verse number="5">以色列 人个驕傲成做佢等犯罪个證據。佢等个罪惡害佢等跌倒； 猶大 人也跈等佢等跌倒。</verse>
				<verse number="6">佢等向上主獻牛羊，總係這對佢等無麼介好處。佢等尋毋到上主，因為上主已經離開佢等。</verse>
				<verse number="7">佢等對上主當無誠實；佢等所𫱔个係私生子。所以，到月初，佢等㧯佢等个土地會被人吞滅。</verse>
				<verse number="8">你等愛在 基比亞 歕羊角，在 拉瑪 發出警報，在 伯‧亞文 大聲喊。 便雅憫 人啊，你等个仇敵在你後背了！</verse>
				<verse number="9">責罰个日仔到了； 以色列 愛滅亡了。 以色列 人啊，這事一定會發生。</verse>
				<verse number="10">上主講：「𠊎愛向 猶大 个領袖發譴，像做大水恁樣責罰佢等，因為佢等侵佔 以色列 个土地。</verse>
				<verse number="11">以色列 被人欺負，受盡痛苦，失掉𠊎所賜个土地，因為姖一擺又一擺向該無麼介用个 鄰國求幫助。</verse>
				<verse number="12">所以，𠊎愛毀壞 以色列 ，像被蟲蛀掉一樣，也愛消滅 猶大 ，像歿掉个樹頭！</verse>
				<verse number="13">「當 以色列 發覺自家个病恁嚴重， 猶大 看到自家个傷恁厲害， 以色列 人就去見 亞述 个大王，求佢幫助；總係佢無法度醫好佢等，也無法度包佢等个傷口。</verse>
				<verse number="14">𠊎愛像獅仔攻擊 以色列 人，像當惡个獅仔扯裂 猶大 人。𠊎愛親自扯爛佢等，將佢等拖走，無人有可能救佢等。</verse>
				<verse number="15">「𠊎愛離開𠊎个子民，等佢等承認自家有罪，轉到𠊎面前來；在患難中，佢等就會迫切尋求𠊎。」</verse>
			</chapter>
			<chapter number="6">
				<verse number="1">以色列 人講：「來啊，𠊎等愛歸向上主！佢扯爛𠊎等，佢也會醫好𠊎等；佢打傷𠊎等，佢也會包𠊎等个傷口。</verse>
				<verse number="2">兩日後，佢會賜給𠊎等新力量，第三日，佢會使𠊎等䟘起來，𠊎等就做得常常在佢面前。</verse>
				<verse number="3">𠊎等愛熱心追求，來認識上主。佢定著會來，像朝晨頭个日頭出來，像春天个雨水滋潤大地。」</verse>
				<verse number="4">總係上主講：「 以色列 人啊， 猶大 人啊，𠊎應該愛樣般對待你等呢？你等對𠊎个忠心就像朝晨頭个濛煙，一下仔就散掉，像露水，天一光就無掉。</verse>
				<verse number="5">所以，𠊎派眾先知㧯你等講，𠊎愛斬掉你等，毀滅你等，𠊎个審判會像𥍉爧恁遽臨到你等。</verse>
				<verse number="6">𠊎所愛个係慈悲 ，毋係獻祭；愛你等認識𠊎 — 上帝，贏過獻燒化祭。</verse>
				<verse number="7">「總係這兜人像 亞當 恁樣 悖逆𠊎，違背𠊎㧯佢等所立个約。</verse>
				<verse number="8">基列 係充滿邪惡个城市，滿遍係血。</verse>
				<verse number="9">祭司㧯強盜共樣，成群結黨，埋伏打劫，在愛去 示劍 該條路項謀財害命。</verse>
				<verse number="10">𠊎在 以色列 看到盡邪惡个事：𠊎个子民在該位行姦淫、拜偶像，打垃圾自家。</verse>
				<verse number="11">「講到你這兜 猶大 人，𠊎也已經安排責罰你等个日期。」</verse>
			</chapter>
			<chapter number="7">
				<verse number="1">「𠊎想愛復興 以色列 、醫治𠊎子民个時，𠊎就看到佢等在國內㧯 撒馬利亞 城个罪惡：佢等欺騙、做賊，在街路打劫；</verse>
				<verse number="2">佢等無想到𠊎會記得這一切个罪惡；佢等罪惡滿滿，全部顯明在𠊎个面前。」</verse>
				<verse number="3">上主講：「佢等做壞事來使君王歡喜，講花撩來使領袖快樂。</verse>
				<verse number="4">佢等全部悖逆、無忠心。佢等个罪惡像火爐肚熻等个火，做餅師傅在麵團發起來以前，還毋敢去攪挺動，俾火猛起來。</verse>
				<verse number="5">國王有喜事个時，佢等使領袖啉釅酒到發酒癲，連國王也被佢等騙到，去㧯背叛个人牽手。</verse>
				<verse number="6">佢等个陰謀像熻在火爐肚个火，歸暗晡出煙，天光火𤏸到當猛。</verse>
				<verse number="7">「佢等像當猛个火將佢等个領袖燒掉。君王也一個一個被佢等打橫掉，總係無一儕向𠊎求幫助。」</verse>
				<verse number="8">上主講：「 以色列 人㧯外邦人摻雜共下，像焙个餅無揙面、半生熟。</verse>
				<verse number="9">佢等倚靠周圍个國家，反轉被所倚靠个勢力吞食掉。佢等像頭那毛緊白，也毋知自家个死期會到了。</verse>
				<verse number="10">以色列 人个驕傲就係佢等得罪个證據。雖然恁樣，佢等還係毋歸向𠊎 — 上主，佢等个上帝，還係毋尋求𠊎。</verse>
				<verse number="11">以色列 人像戇月鴿仔飛來飛去；佢等向 埃及 求幫助，又向 亞述 求幫助。</verse>
				<verse number="12">𠊎愛在路項設羅網，像捉鳥仔恁樣來捉佢等。𠊎聽佢等在聚集簽約个時，𠊎愛責罰佢等。</verse>
				<verse number="13">「慘了！佢等愛堵到災難了！因為佢等離開𠊎。佢等會被人毀滅了，因為佢等悖逆𠊎。𠊎想愛拯救佢等，總係佢等講白賊反對𠊎。</verse>
				<verse number="14">佢等毋係真心向𠊎祈求，反轉學異教徒在眠床頂盡喊盡嘶；佢等割傷自家，來求五榖美酒。佢等實在係叛徒！</verse>
				<verse number="15">係𠊎養育佢等，使佢等強壯，總係佢等顛倒圖謀反抗𠊎。</verse>
				<verse number="16">佢等一直悖逆𠊎，去跈該兜無路用个神明 。佢等㧯扭歪掉个弓共樣用毋得。佢等个領袖會死在刀下，因為佢等講驕傲个話。這事愛成做 埃及 人个笑柄。」</verse>
			</chapter>
			<chapter number="8">
				<verse number="1">上主講：「愛歕羊角啊！敵人就像鷹鳥攻擊𠊎个土地。𠊎个子民已經違背𠊎㧯佢等所立个約，違犯𠊎个教訓。</verse>
				<verse number="2">雖然佢等向𠊎哀求，講：『𠊎等个上帝啊，𠊎等 以色列 人認識你！』</verse>
				<verse number="3">總係佢等拒絕良善。所以，敵人一定會逐到佢等。</verse>
				<verse number="4">「佢等毋照𠊎个意思選立君王；指派領袖乜無得到𠊎个同意。佢等用金銀製造偶像，害自家惹來滅亡。</verse>
				<verse number="5">撒馬利亞 人啊，𠊎愛抨掉你等所拜个金牛像；𠊎對拜偶像个人大發譴。你等愛到幾時正會豁掉偶像呢？</verse>
				<verse number="6">以色列 个師傅製造偶像，總係這偶像並毋係神。 撒馬利亞 个金牛像一定愛打到碎碎。</verse>
				<verse number="7">佢等委个係風，收个係狂風！發芽總係毋會打子，也磨毋出麵粉；就算做成麵粉，也會被外國人食掉。</verse>
				<verse number="8">以色列 被人食掉；這下在列國中，像爛掉个缶仔，無半些路用。</verse>
				<verse number="9">佢等像野驢恁硬頸行自家个路；佢等去靠 亞述 國，又拿錢收買外國來保護佢。</verse>
				<verse number="10">總係𠊎愛將佢等全部集共下，刑罰佢等。當 亞述 个大王壓迫佢等个時，佢等就愛漸漸衰弱。</verse>
				<verse number="11">「為到愛除掉自家个罪， 以色列 人起盡多祭壇；祭壇越多，反轉犯越多罪。</verse>
				<verse number="12">𠊎為佢等寫盡多法律，總係佢等全無看重，就像㧯佢等無關係共樣。</verse>
				<verse number="13">佢等向𠊎獻祭，貪食祭過个肉；總係𠊎 — 上主毋單淨無歡喜這兜祭，反轉愛記得佢等个罪，責罰佢等；𠊎愛將佢等送轉 埃及 。</verse>
				<verse number="14">「 以色列 人起當多王宮，總係毋記得佢等个創造主； 猶大 人起當多堅固个城堡。總係𠊎愛降火燒掉佢等个王宮㧯城堡。」</verse>
			</chapter>
			<chapter number="9">
				<verse number="1">以色列 人啊，毋好再㧯異教徒共樣恁歡喜慶祝你等个節期。你等已經離開你等个上帝，對佢不忠。你等在逐個禾埕，像妓女恁樣歡喜賣身賺食。</verse>
				<verse number="2">總係，禾埕个五榖㧯油槽个橄欖油無罅你等食；盼望得新酒也空空。</verse>
				<verse number="3">以色列 人做毋得繼續住在上主賜給佢等个土地上；佢等愛倒轉去 埃及 ，也愛在 亞述 食無淨浰个食物 。</verse>
				<verse number="4">該時，佢等無可能斟酒獻給上主，也無可能向佢獻祭。佢等食个東西像喪家个食物，會打垃圾食个人。佢等个食物做得食飽定定，做毋得帶入上主个聖殿做祭物。</verse>
				<verse number="5">恁樣，在指定敬拜上主个節期，佢等還做得做麼介呢？</verse>
				<verse number="6">因為，災難會到，佢等愛逃走；總係 埃及 人愛將佢等个屍體收轉去，喊 孟斐斯 人將佢等埋掉！佢等个家園，囥財寶个所在，將來會生滿雜草㧯竻仔。</verse>
				<verse number="7">責罰个日仔到了！報應个日仔到了！這事發生个時， 以色列 就知了！你等講：「這先知係大戇牯；這被靈感動个人係癲仔。」你等罪大惡極，正恁樣惱𠊎。</verse>
				<verse number="8">𠊎係㧯上帝同行个先知，就係 以色列 个守望者。總係，𠊎無論到麼介所在去，佢等設羅網愛害𠊎，像捉鳥仔共樣。在上帝个土地，堵到𠊎个竟然全部看𠊎做敵人。</verse>
				<verse number="9">這兜人已經沈落罪惡當中，就像佢等以前在 基比亞 个時共樣。上帝一定會記得佢等个罪惡，責罰佢等。</verse>
				<verse number="10">上主講：「𠊎頭擺堵到 以色列 ，就像在曠野發現葡萄；𠊎頭擺堵到你等个祖先，就像在無花果樹頂尋到新出个果子。總係，佢等一來到 批珥 山，就開始拜 巴力 這恁見笑个神明，當遽就變做㧯佢等所愛个神明共樣邪惡。</verse>
				<verse number="11">以色列 个光榮會像鳥仔飛走。在國內，婦人家毋會再𫱔，毋會再懷胎，也毋會再有身項。</verse>
				<verse number="12">就算姖等有養育細人仔，𠊎也愛使佢等个子女死掉，一個也無留。𠊎離開𠊎个子民，該時佢等就有災禍了！」</verse>
				<verse number="13">上主啊！𠊎看到 以色列 个子女註定愛被人捉去 ，愛被人㓾。</verse>
				<verse number="14">恁樣，𠊎應該樣般求你對待你个子民呢？求你使佢等个婦人家落胎，也無乳水！</verse>
				<verse number="15">上主講：「 以色列 人在 吉甲 行一切个惡事，𠊎就係在該位開始恨佢等。因為佢等所做个壞事，𠊎愛將佢等逐出𠊎个土地。𠊎毋會再惜佢等，因為佢等所有个官長全部悖逆𠊎。</verse>
				<verse number="16">以色列 人愛受責罰像樹頭燥掉，毋會結果子。佢等毋會有後代；就算佢等𫱔細人仔，𠊎也一定愛將佢等所愛个子女㓾掉。」</verse>
				<verse number="17">𠊎所事奉个上帝愛豁掉佢个子民。因為佢等毋聽從佢；佢等愛在列國中流浪。</verse>
			</chapter>
			<chapter number="10">
				<verse number="1">以色列 人係多產个葡萄樹。佢等越繁榮，祭壇越增加；佢等个土地出產越豐富，所拜个石柱像也打扮到越靚。</verse>
				<verse number="2">佢等心懷詭詐，所以這下一定愛因自家个罪受責罰。上帝愛拆掉佢等个祭壇，打壞佢等所拜个石柱像。</verse>
				<verse number="3">佢等就會講：「𠊎等無君王，因為𠊎等毋敬畏上主。總係，君王到底能為𠊎等做麼介呢？」</verse>
				<verse number="4">佢等講空話，立假誓，定無效个條約。難怪，人打官司就像毒草生滿犁好个田。</verse>
				<verse number="5">撒馬利亞 个人民愛為到 伯‧亞文 个金牛像當著驚。佢等㧯中意這偶像个祭司，全部愛因金牛像失掉原旦个光榮就盡悲傷。</verse>
				<verse number="6">這偶像會被人帶到 亞述 ，做禮物獻給 亞述 大王。 以色列 會盡見笑，佢等會因為拜偶像堵到見笑。</verse>
				<verse number="7">撒馬利亞 个君王會被人捉去，像細樹桍被水沖走。</verse>
				<verse number="8">伯‧亞文 山岡頂个祭壇，就係 以色列 人犯罪个所在，全部愛毀滅。佢等个祭壇會生滿竻仔㧯蒺藜。佢等會向大山講：「將𠊎等揜等！」對細山講：「磧在𠊎等身上啊！」</verse>
				<verse number="9">上主講：「自從在 基比亞 犯罪以後， 以色列 人一直得罪𠊎，佢等恅到對付邪惡人民个戰爭毋會臨到佢等。</verse>
				<verse number="10">𠊎愛隨意責罰佢等。列國愛聯合起來攻打佢等；佢等愛因為種種个罪受責罰。</verse>
				<verse number="11">「 以色列 原旦像一條乖个牛乸，隨時願意踏榖。𠊎就將牛軛放在牠又肥又靚个頸筋，來駛牠。𠊎喊 猶大 犁田，喊 以色列 耙地。</verse>
				<verse number="12">𠊎講：『你等愛為自家開荒地，委公義，收成慈愛。𠊎係上主，這下就係你等尋求𠊎个時節，等𠊎來到，愛降下公義像落大雨。』</verse>
				<verse number="13">總係你等毋聽，反轉委邪惡，收成罪孽，食花撩个惡果。 「因為你等倚靠自家个力量㧯大陣个軍隊，</verse>
				<verse number="14">戰爭愛臨到人民，城堡全部會毀壞。該情況會像 沙勒幔 王毀壞 伯‧阿比勒 城共樣恁悽慘：做阿姆个㧯姖等个子女全部會被人㧹死。</verse>
				<verse number="15">伯特利 人啊！因為你等所犯个大罪，你等也愛受到共樣个災難。戰爭一發生， 以色列 个君王就會被人滅掉。」</verse>
			</chapter>
			<chapter number="11">
				<verse number="1">上主講： 以色列 還細个時，𠊎就惜佢； 𠊎將𠊎个孻仔，對 埃及 帶出來。</verse>
				<verse number="2">總係，𠊎越喊佢，佢越離開𠊎 。 𠊎个子民向 巴力 獻祭； 佢等向偶像燒香。</verse>
				<verse number="3">係𠊎教 以色列 人行路， 用雙手將佢等揇在胸前， 醫好佢等个病，總係佢等完全毋承認。</verse>
				<verse number="4">𠊎用慈悲个索仔、痛惜个帶仔牽等佢等； 𠊎將佢等肩頭頂个牛軛拿下來， 又跍下來餵佢等。</verse>
				<verse number="5">「因為 以色列 人毋肯悔改歸向𠊎，佢等敢毋會轉去 埃及 ； 亞述 人敢毋會 做佢等个王？</verse>
				<verse number="6">戰爭愛臨到佢等个城市，破壞佢等个城門，消滅佢等，因為佢等自作聰明。</verse>
				<verse number="7">𠊎个子民佻佻愛悖逆𠊎；到尾，佢等愛為到加在肩頭个牛軛緊噌，總係無人能為佢等解開來 。</verse>
				<verse number="8">以色列 人啊，𠊎樣拌得豁掉你等？ 𠊎樣會㧒掉你等？ 𠊎會像消滅 押瑪 恁樣毀滅你等麼？ 𠊎敢會像對待 洗扁 恁樣對待你等？ 毋會！𠊎已經回心轉意， 因為𠊎非常痛惜你等。</verse>
				<verse number="9">𠊎毋會在大發譴之下責罰你等； 𠊎毋會反過來消滅 以色列 。 因為𠊎係上帝，毋係世間人。 𠊎係在你等當中个聖者； 𠊎毋會在大發譴之下審判你等。</verse>
				<verse number="10">「𠊎愛像獅仔大聲吼，𠊎个子民就會來跈𠊎。𠊎一下吼，佢等會對西方遽遽轉來。</verse>
				<verse number="11">佢等會像鳥仔，當遽就對 埃及 飛轉來，又像月鴿仔，對 亞述 飛轉來。𠊎愛帶𠊎个子民重新轉佢等个家鄉。𠊎 — 上主恁樣宣佈了。」</verse>
				<verse number="12">上主講：「 以色列 人用花撩詭詐欺騙𠊎； 猶大 人也悖逆𠊎 — 信實、神聖个上帝 。」</verse>
			</chapter>
			<chapter number="12">
				<verse number="1">「 以色列 人所做所行全部係捕風捉影；佢等當中，詭詐、暴行一直增加。佢等㧯 亞述 立條約，又將油送給 埃及 。」</verse>
				<verse number="2">上主愛控告 猶大 人。佢也愛照 以色列 人所做个報應佢等，責罰佢等。</verse>
				<verse number="3">𠊎等个祖先 雅各 還在母胎个時，就捉等厥哥个腳㬹，成人後又㧯上帝相爭。</verse>
				<verse number="4">佢㧯天使揇腰跤仔揇贏，又噭等懇求天使祝福佢。上帝在 伯特利 堵到𠊎等个祖先 雅各 ，就通過佢向𠊎等講話。</verse>
				<verse number="5">這就係上主 — 萬軍个元帥上帝；上主係佢个名。</verse>
				<verse number="6">所以， 雅各 个後代啊，你等愛信靠上帝，歸向佢；愛實行不變个愛，伸張正義，一直仰望你等个上帝。</verse>
				<verse number="7">上主講：「 以色列 人像 迦南 个生理人共樣無誠實；佢等愛用無公當个秤仔騙人。</verse>
				<verse number="8">佢等講：『𠊎等有錢了；𠊎等發財了！無人尋得到𠊎等得橫財个罪。』</verse>
				<verse number="9">𠊎係上主，係𢱋你等出 埃及 个上帝。𠊎愛使你等再住帳篷，像在指定過節个時共樣。</verse>
				<verse number="10">「𠊎向先知講話，使佢等看到盡多異象，又通過佢等講比喻，來警告𠊎个子民。</verse>
				<verse number="11">總係 基列 還係充滿罪惡；該兜拜偶像个人到尾也係虛空。佢等在 吉甲 獻牛牯做祭物；佢等个祭壇會變做像石堆放在田溝。」</verse>
				<verse number="12">頭擺 雅各 逃難到 美索不達米亞 ；為到討𡜵娘，在該位㧯人掌羊。</verse>
				<verse number="13">上主派一位先知 去 埃及 ，將 以色列 人救出來，通過佢照顧佢等。</verse>
				<verse number="14">總係 以色列 人惹上主大發譴；佢等个血債愛歸到佢等身項。佢等藐視主，所以佢愛重重刑罰佢等。</verse>
			</chapter>
			<chapter number="13">
				<verse number="1">以前， 以法蓮 支族講話个時， 以色列 其他个支族全部愊愊掣；佢等全部敬重 以法蓮 。總係 以法蓮 拜 巴力 ，犯了罪，就滅亡了。</verse>
				<verse number="2">這下，佢等繼續犯罪，照自家个想法㧯技術，用銀仔鑄造偶像，然後講：「向它兜獻祭啊！」佢等竟然㧯牛像唚嘴 ！</verse>
				<verse number="3">所以，這兜人全部愛像打早个濛紗煙㧯露水，日頭一出來就無掉。佢等愛像禾埕个冇仔，又像火煙被風捲走。</verse>
				<verse number="4">上主講：「𠊎係上主，係𢱋你等出 埃及 个上帝。除了𠊎，你等無別个上帝；只有𠊎係你等个救主。</verse>
				<verse number="5">在當燥个曠野，𠊎親身看顧你等；</verse>
				<verse number="6">總係你等一入到這盡肥个土地，因為無愁食無愁著就自滿驕傲。然後，你等就毋記得𠊎了。</verse>
				<verse number="7">所以，𠊎愛像獅仔攻擊你等，像豹仔埋伏在路堘等等你等。</verse>
				<verse number="8">𠊎愛像失落細熊子个熊乸攻擊你等，扯裂你等。𠊎愛像兇惡个獅仔當場吞食你等，像野獸將你等扯到爛爛。</verse>
				<verse number="9">「 以色列 人啊，𠊎愛毀滅你等！因為你等反對𠊎，就係反對你等个幫助者。</verse>
				<verse number="10">你等識向𠊎要求設立君王㧯逐城市个官長。佢等有救過你等麼？這下你等个君王㧯官長在㖠位呢？</verse>
				<verse number="11">𠊎在發譴个當中給你等君王，也在大發譴中將佢等廢掉。</verse>
				<verse number="12">「 以色列 人个罪惡、過犯全部有記錄，係封等囥起來个。</verse>
				<verse number="13">以色列 人還有機會，總係佢等無智慧，竟然無把扼這機會。佢等像產期到个孲𤘅仔，毋肯出母胎。</verse>
				<verse number="14">𠊎敢愛對陰間將 以色列 人救出來？𠊎敢愛 對死个權勢之下將佢等放出來？死亡啊，你个災害在㖠位？陰間啊，你个毀滅在㖠位？𠊎無愛再憐憫這兜人民了。</verse>
				<verse number="15">雖然 以色列 像野草遰到滿遍係 ，𠊎愛喊東風對曠野吹來，將水源㧯井水吹燥；𠊎愛搶走佢等所有个財寶。</verse>
				<verse number="16">撒馬利亞 愛因為悖逆𠊎受責罰。該位个人愛因為戰爭死掉；孲𤘅仔愛被人㧹死；有身項个婦女也愛被人破肚笥。」</verse>
			</chapter>
			<chapter number="14">
				<verse number="1">以色列 人啊，你等个罪使你等跌倒了；你等愛歸向上主 — 你等个上帝。</verse>
				<verse number="2">你等愛轉到上主這位，向佢祈禱講：「求你赦免𠊎等所有个罪過，聽𠊎等个祈禱，俾𠊎等用嘴頌讚來代牛牯獻上。</verse>
				<verse number="3">亞述 人無可能救𠊎等；戰馬也無可能保護𠊎等。𠊎等無愛再向偶像講：『你係𠊎等个上帝。』上主啊，𠊎等知，孤兒做得在你該位得到憐憫。」</verse>
				<verse number="4">上主講： 𠊎愛醫𠊎子民悖逆所受个傷害， 甘心惜佢等； 𠊎無愛再向佢等發譴。</verse>
				<verse number="5">𠊎係 以色列 人燥地个甘露。 佢等愛像開等个百合花， 像 黎巴嫩 个大樹深深釘根在泥肚。</verse>
				<verse number="6">佢等愛爆新芽， 像橄欖樹恁靚； 佢等愛發出香味， 像 黎巴嫩 个香柏樹。</verse>
				<verse number="7">人會再一擺住在佢等个樹影下。 佢等會五榖豐登， 興旺像出產多多个葡萄園。 佢等个名聲會像 黎巴嫩 个美酒。</verse>
				<verse number="8">以色列 人愛㧯偶像切斷關係 。 𠊎愛聽 以色列 人个祈禱，照顧佢等。 𠊎愛像長青樹庇蔭佢等； 佢等會對𠊎得到一切个福氣。</verse>
				<verse number="9">願聰明智慧个人全部明白這本書个記載；願佢等記在心中。上主个道路係正直个；正直个人遵行這道路，總係罪人因為藐視這道路就跌倒。</verse>
			</chapter>
		</book>
		<book number="29">
			<chapter number="1">
				<verse number="1">下背係上主給 比土珥 个孻仔 約珥 个信息。</verse>
				<verse number="2">長老 啊，你等愛聽， 猶大 个人民啊，愛注意聽！ 你等个時代抑係祖先个時代敢有發生過這種事？</verse>
				<verse number="3">㧯你等个子女講， 好俾佢等㧯佢等个子女講， 世世代代，流傳下去。</verse>
				<verse number="4">一群一群个草蜢停在農作物面頂。 大草蜢食賸个，細草蜢來食； 細草蜢食賸个，幼草蜢來食； 幼草蜢食賸个，禾蝦來食。</verse>
				<verse number="5">酒醉个人啊，好醒過來噭了！ 好酒个人啊，愛哀傷大噭！ 因為焗新酒个葡萄無半滴了。</verse>
				<verse number="6">有一隊草蜢侵犯𠊎等个土地。 牠兜當強大，多到無法度算； 牠兜个牙齒像獅仔个牙齒恁利。</verse>
				<verse number="7">牠兜毀壞𠊎等个葡萄樹， 將無花果樹食到光光。 牠兜連樹梗个皮也喫到淨淨， 使樹梗變做白白。</verse>
				<verse number="8">你等愛盡噭！ 像細妹仔因為未婚夫死掉著麻衫大噭。</verse>
				<verse number="9">聖殿肚毋會再有五榖㧯美酒， 祭司因為無祭物好獻給上主來悲傷。</verse>
				<verse number="10">田園荒掉， 大地淒涼； 因為五榖毀壞， 全無新酒， 橄欖油也當欠。</verse>
				<verse number="11">耕種人啊，你等會當失望！ 掌葡萄園个啊，你等會大噭！ 因為大麥、小麥， 㧯所有農作物全部毀壞淨淨。</verse>
				<verse number="12">葡萄樹、無花果樹燥掉； 石榴樹、棕樹、蘋果樹 㧯所有个果樹全部燥掉； 人个喜樂也全部消失了。</verse>
				<verse number="13">在祭壇服事个祭司啊， 你等愛著麻衫大噭！ 愛入聖殿歸暗晡噭吱！ 因為毋會再有五榖、美酒好獻給你等个上帝了。</verse>
				<verse number="14">你等愛宣佈禁食，舉行神聖个聚會！ 愛召集該兜長老㧯 猶大 所有个人民， 進入上主 — 你等上帝个聖殿， 向上主哀求！</verse>
				<verse number="15">上主个日仔會到了！ 全能者愛降災難了！ 該日仔係樣般得人驚啊！</verse>
				<verse number="16">農作物在𠊎等眼前毀壞了； 𠊎等上帝个聖殿無歡喜快樂。</verse>
				<verse number="17">種子全部在泥塥肚糜掉了， 無榖好囤； 榖倉全部無用掉去了。</verse>
				<verse number="18">頭牲盡噦盡噭。 牛群衝上衝下， 因為尋無草好食； 羊群也共樣受苦。</verse>
				<verse number="19">上主啊，𠊎向你哀求， 因為火燒掉野地个草場， 火焰燒淨田園个樹仔。</verse>
				<verse number="20">野獸也向你嘴勺勺； 因為河壩水燥掉， 火將草場燒掉了。</verse>
			</chapter>
			<chapter number="2">
				<verse number="1">在 錫安 歕羊角啊！ 在上帝个聖山大聲歕啊！ 猶大 个人民啊，愛愊愊掣！ 上主个日仔會到了。</verse>
				<verse number="2">該係烏暗、得人驚个日仔， 係烏天暗地个日仔。 有一大群个草蜢 會來到， 就像烏暗遮蓋山頭。 以前毋識恁樣， 以後也毋會再有。</verse>
				<verse number="3">草蜢 像火燒恁樣將所有个植物喫到淨淨。 牠兜吂到以前土地像 伊甸 園， 經過以後就變做荒廢个曠野； 牠兜麼介乜無放過。</verse>
				<verse number="4">牠兜看起來像馬仔， 走起來像戰馬。</verse>
				<verse number="5">牠兜在山頂跳个聲， 就像戰車个聲， 又像燥草𤏸火个聲。 牠兜像軍隊排列好勢， 像準備相㓾个大軍。</verse>
				<verse number="6">牠兜一到，逐儕驚到會死， 面色癧青。</verse>
				<verse number="7">牠兜像勇士攻打， 像戰士爬牆。 牠兜勇敢向前， 路線毋會偏走，</verse>
				<verse number="8">也毋會尖來尖去。 牠兜歸群通過防線， 麼人也無辦法抵抗。</verse>
				<verse number="9">牠兜攻入城肚， 𨃟過城牆， 爬上屋頂， 像賊仔對窗門入來。</verse>
				<verse number="10">牠兜一到，天搖地動， 日月無光，星辰烏暗。</verse>
				<verse number="11">係上主命令佢个軍隊。 佢个軍力強大， 召集个軍隊盡多。 上主審判个日仔樣般得人驚！ 麼人㧡得起呢？</verse>
				<verse number="12">上主講：就算這下， 你等還係做得禁食、流目汁、盡噭， 誠心悔改，歸向𠊎。</verse>
				<verse number="13">你等毋好單淨扯爛衫； 愛誠心悲傷悔改。 愛歸向上主 — 你等个上帝！ 佢有恩典，充滿憐憫； 佢無隨便發譴，有豐盛个慈愛； 佢願意赦免，毋降災禍。</verse>
				<verse number="14">可能上主 — 你等个上帝會改變主意， 豐豐富富賜福給你等； 該時你等就會有好向佢獻五榖、美酒。</verse>
				<verse number="15">在 錫安 山歕羊角啊！ 宣佈禁食，舉行神聖个聚會！</verse>
				<verse number="16">愛召集民眾， 準備參加聖會。 愛帶等老老嫩嫩，揇等孲𤘅仔， 新婚夫婦也愛行出新娘間來。</verse>
				<verse number="17">服事上主个祭司啊， 你等愛在祭壇㧯聖殿个廊下中間哀求，講： 上主啊，求你可憐你个子民。 毋好俾列國藐視𠊎等； 毋好俾佢等嘲謔𠊎等，講： 「你等个上帝在㖠位？」</verse>
				<verse number="18">上主會再一擺關心佢个土地， 憐憫佢个子民。</verse>
				<verse number="19">上主會應佢等講： 𠊎愛賜給你等五榖、新酒、橄欖油； 你等會得到滿足； 𠊎毋會再俾列國藐視你等。</verse>
				<verse number="20">𠊎愛使北方來个一大隊遠遠離開你等； 𠊎愛將牠兜 逐到荒掉个所在， 前隊逐入 死海 ， 後隊逐入 地中海 ； 牠兜个屍體臭氣衝天， 因為牠兜恁積惡。</verse>
				<verse number="21">土地啊，毋使驚，愛歡喜快樂！ 因為有上主為你等做大事。</verse>
				<verse number="22">走獸啊，毋使驚！ 因為野地个草靚起來了， 樹仔結滿果子， 無花果樹、葡萄樹也共樣結當多果子。</verse>
				<verse number="23">錫安 个人民啊，愛歡喜快樂！ 為上主 — 你等个上帝來歡喜。 佢賜給你等及時个雨水 ， 佢㧯以前共樣降下春雨㧯秋雨。</verse>
				<verse number="24">禾埕會堆滿五榖； 酒槽、油槽會有淰淰个新酒㧯橄欖油。</verse>
				<verse number="25">𠊎有派大軍隊到你等中間， 就係一大群个草蜢； 牠兜恁多年食掉个農作物，𠊎愛補還你等。</verse>
				<verse number="26">你等會有充足个食物，食到飽飽； 你等愛讚美𠊎 — 上主、你等个上帝。 𠊎為你等做奇妙个事； 𠊎个子民永遠毋會再被人藐視。</verse>
				<verse number="27">以色列 啊，該時你等就會知 𠊎在你等當中； 𠊎係上主 — 你等个上帝； 除了𠊎以外無別个神。 𠊎个子民永遠毋會再被人藐視。</verse>
				<verse number="28">日後，𠊎愛將𠊎个靈倒給所有个人： 你等个子女會宣告𠊎个信息； 你等个老人家會發奇妙个夢； 你等个後生人會看到異象。</verse>
				<verse number="29">該時，𠊎甚至愛將𠊎个靈 倒出來給僕人㧯使女。</verse>
				<verse number="30">𠊎愛在天頂地下顯神蹟， 有血，有火，有大濛煙。</verse>
				<verse number="31">日頭卻毋會發光； 月光會像血恁紅。 在上主偉大得人驚个日仔來到以前， 這一切全部會發生。</verse>
				<verse number="32">凡求喊上主聖名个人一定得救。 就像上主所講： 在 錫安 山， 耶路撒冷 會有逃走个人； 在所賸个人當中會有𠊎所揀選个人。</verse>
			</chapter>
			<chapter number="3">
				<verse number="1">上主講： 在該日， 𠊎愛使 猶大 㧯 耶路撒冷 重新得到繁榮。</verse>
				<verse number="2">𠊎愛召集萬國萬民下到「審判山壢」； 𠊎愛因為佢等加給𠊎子民个傷害審判佢等。 佢等識將 以色列 人分散到列國， 分割𠊎个土地 以色列 。</verse>
				<verse number="3">佢等抽籤決定， 看麼人得到捉來个人。 佢等用細阿哥仔換妓女， 賣細阿妹仔去買酒啉。</verse>
				<verse number="4">「 泰爾 、 西頓 ，㧯 非利士 逐所在个人啊，你等想愛向𠊎報復係麼？若係想，𠊎當遽就會向你等報復。</verse>
				<verse number="5">你等搶𠊎个金銀，搶𠊎个財寶，將它兜放在你等个神廟肚。</verse>
				<verse number="6">你等將 猶大 㧯 耶路撒冷 个人民賣給 希臘 人，使佢等遠離自家个家鄉。</verse>
				<verse number="7">𠊎黏時愛將佢等對你等賣去个所在帶轉來。𠊎愛照你等款待佢等个方法對付你等。</verse>
				<verse number="8">𠊎愛將你等个子女賣給 猶大 人；佢等會將你等个子女轉賣給遠方个 示巴 人。𠊎係上主；𠊎恁樣宣佈了。」</verse>
				<verse number="9">你等愛在萬國中宣佈： 準備相㓾！ 召集戰士！ 集合所有个軍兵前進！</verse>
				<verse number="10">愛將犁頭打做刀劍； 將鐮仔打做槍。 較軟弱个人也愛做勇士出陣。</verse>
				<verse number="11">四圍个列國啊，遽遽來！ 集合在山壢中。 上主啊，求你派你个軍隊攻打佢等！</verse>
				<verse number="12">萬國愛準備好， 到「審判山壢」來。 𠊎 — 上主愛坐在該位， 審判四圍个列國。</verse>
				<verse number="13">佢等罪大惡極； 所以，愛斬死佢等， 像收割五榖恁樣。 愛踏糜佢等， 像葡萄在酒槽被人踏糜， 直到酒槽淰出來。</verse>
				<verse number="14">千千萬萬个人聚集在「審判山壢」； 因為上主審判个日仔就愛在該位臨到。</verse>
				<verse number="15">日月無光， 星辰烏暗。</verse>
				<verse number="16">上主對 錫安 像獅仔吼吼滾， 對 耶路撒冷 像雷公𠾐𠾐滾。 天㧯地全部愊愊掣， 總係上主愛保護佢个子民， 做 以色列 人个避難所。</verse>
				<verse number="17">上主講： 該時你等就會知𠊎係上主 — 你等个上帝。 𠊎住在𠊎个聖山 錫安 ； 耶路撒冷 會成做聖城， 外族人永遠毋會再佔領它。</verse>
				<verse number="18">到該時，大山會滴酒，細山流乳； 猶大 个溪水會流無停。 有泉水愛對上主个聖殿流出來， 淹到 什亭 山壢。</verse>
				<verse number="19">埃及 會成做荒地； 以東 會成做曠野。 因為佢等識用強暴對付 猶大 ， 流無罪人个血。</verse>
				<verse number="20">𠊎愛為受害个人報仇 ； 𠊎絕對毋會放過該兜兇犯。 總係 猶大 永遠會有人住， 耶路撒冷 會代代相傳。 𠊎 — 上主愛住在 錫安 山。</verse>
				<verse number="21"></verse>
			</chapter>
		</book>
		<book number="30">
			<chapter number="1">
				<verse number="1">在 烏西雅 做 猶大 王， 約華施 个孻仔 耶羅波安 二世做 以色列 王个期間，大地動前兩年， 提哥亞 村一個牧羊人 阿摩司 看到上帝啟示有關 以色列 个異象。下背个記載係 阿摩司 个話。</verse>
				<verse number="2">佢講： 上主對 錫安 像獅仔吼吼滾， 對 耶路撒冷 像雷公𠾐𠾐滾。 牧場个青草轉黃； 迦密 山个樹林枯燥。</verse>
				<verse number="3">上主講：「 大馬士革 人再三犯罪，𠊎一定愛責罰佢等。佢等像用有鐵齒个打榖機打五榖恁樣，用殘忍个方法攻打 基列 人。</verse>
				<verse number="4">所以𠊎愛放火燒 哈薛 王个王宮，將 便‧哈達 王个宮殿燒掉。</verse>
				<verse number="5">𠊎愛敲掉 大馬士革 个城門，消滅住在 亞文 平原个人民㧯 伯‧伊甸 个領袖。 敘利亞 个人民愛被人捉到 吉珥 。」上主恁樣宣佈了。</verse>
				<verse number="6">上主講：「 迦薩 人再三犯罪，𠊎一定愛責罰佢等。佢等將鄰國个人民捉去，賣給 以東 人做奴才。</verse>
				<verse number="7">所以𠊎愛放火燒 迦薩 个城牆，將王宮燒掉。</verse>
				<verse number="8">𠊎愛消滅住在 亞實突 个人㧯 亞實基倫 个領袖。𠊎愛責罰 以革倫 城；所有留在城肚个 非利士 人全部會死。」至高个上主恁樣宣佈了。</verse>
				<verse number="9">上主恁樣講：「 泰爾 人再三犯罪，𠊎一定愛責罰佢等。佢等毋遵守㧯同盟簽个條約，反轉將鄰國个人民賣給 以東 人做奴才。</verse>
				<verse number="10">所以𠊎愛放火燒 泰爾 个城牆，將王宮燒掉。」</verse>
				<verse number="11">上主恁樣講：「 以東 人再三犯罪，𠊎一定愛責罰佢等。佢等全無憐憫个心，用刀劍迫害佢等个親族 以色列 人。佢等个發譴一直無停；佢等閼到毋肯煞。</verse>
				<verse number="12">所以𠊎愛放火燒 提幔 个城市，將 波斯拉 个王宮燒掉。」</verse>
				<verse number="13">上主講：「 亞捫 人再三犯罪，𠊎一定愛責罰佢等。為到發展土地，佢等甚至剖開 基列 地懷胎婦女个肚笥。</verse>
				<verse number="14">所以𠊎愛放火燒 拉巴 个城牆，將王宮燒掉。戰爭發生个時，會有相㓾鬥打个聲，像狂風暴雨。</verse>
				<verse number="15">佢等个國王㧯官長全部會被人捉走。」上主恁樣宣佈了。</verse>
			</chapter>
			<chapter number="2">
				<verse number="1">上主講：「 摩押 人再三犯罪，𠊎一定愛責罰佢等。佢等將 以東 國王个屍骨燒做灰。</verse>
				<verse number="2">所以𠊎愛放火燒 摩押 ，將 加略 个王宮燒掉。軍隊大聲喊、羊角聲盡響个時， 摩押 人一定會在戰場死掉。</verse>
				<verse number="3">𠊎愛除滅 摩押 个領袖，㓾掉它所有个官長。」上主恁樣宣佈了。</verse>
				<verse number="4">上主恁樣講：「 猶大 人再三犯罪，𠊎一定愛責罰佢等。佢等拒絕𠊎个教訓，毋遵守𠊎个誡命。佢等被祖先所信个假神引誘，離開正道。</verse>
				<verse number="5">所以𠊎愛放火燒 猶大 ，將 耶路撒冷 个王宮燒掉。」</verse>
				<verse number="6">上主恁樣講：「 以色列 人再三犯罪，𠊎一定愛責罰佢等。佢等為到錢銀將義人賣掉，為到一雙草鞋將窮人賣掉 。</verse>
				<verse number="7">佢等將窮苦人个頭那踏到泥塥肚，將路項求幫助个人㩳開。甚至兩子爺㧯共一個使女 行姦淫，侮辱𠊎个聖名。</verse>
				<verse number="8">佢等在逐祭壇堘，睡在窮苦人抵押給佢等个衫褲面頂；佢等還在神廟肚，食人受罰拿來个酒。</verse>
				<verse number="9">「𠊎个子民啊， 亞摩利 人雖然像香柏樹恁高大、像橡樹恁強壯，為到你等𠊎還係將佢等連根㧯果子徹底消滅了。</verse>
				<verse number="10">𠊎對 埃及 將你等𢱋出來，在曠野帶領你等四十年，將 亞摩利 人个土地賜給你等。</verse>
				<verse number="11">𠊎對你等个子弟當中揀選先知，對你等个青年當中培養離俗人 。 以色列 人啊，𠊎 — 上主講這兜話，敢講毋著嗎？</verse>
				<verse number="12">總係你等勉強離俗人啉酒，毋准先知傳𠊎个話。</verse>
				<verse number="13">看啊，𠊎愛將你等壓到橫在地上，像載忒多五榖个車仔磧到落下去。</verse>
				<verse number="14">就算係走相逐个選手也走毋掣；大力士也會失去力量；軍人連自家个性命也難保。</verse>
				<verse number="15">弓箭手个腳企毋在；走盡遽个戰士也走毋掣；騎馬个也救毋到自家个命。</verse>
				<verse number="16">在該日，連最勇敢个戰士也會脫掉戰袍來逃命。」上主恁樣宣佈了。</verse>
			</chapter>
			<chapter number="3">
				<verse number="1">以色列 人啊，你等愛聽上主攻擊你等全國人民所講个話。上主識對 埃及 將你等𢱋出來；</verse>
				<verse number="2">佢講：「在全世界恁多國家中，𠊎只有選你等，你等還犯恁多个罪；所以𠊎一定愛責罰你等。」</verse>
				<verse number="3">兩儕若毋相湊， 樣會共下行呢？</verse>
				<verse number="4">獅仔若無捉到獵物， 樣會在樹林中吼吼滾？ 勇壯个獅仔無捉到東西， 樣會在窿肚盡吼？</verse>
				<verse number="5">若係捉鳥仔个機關無放食物， 樣般捉得到鳥仔？ 若係無東西動到機關， 它樣會跳起來？</verse>
				<verse number="6">作戰个警報一響， 城肚个人敢會毋驚？ 若毋係上主个旨意， 災禍會臨到該城嗎？</verse>
				<verse number="7">至高个上主愛有行動个時， 一定先將計劃㧯佢个僕人 — 該兜先知講。</verse>
				<verse number="8">獅仔吼吼滾个時， 麼人毋驚？ 至高个上主講話个時， 麼人敢毋傳預言呢？</verse>
				<verse number="9">你去向該兜住在 埃及 㧯 亞實突 王宮肚个人宣佈：「你等愛在 撒馬利亞 个山頂集合，看城肚所發生混亂、欺壓个事。」</verse>
				<verse number="10">上主恁樣講：「該兜人在佢等个城堡堆滿搶來㧯剝削个財物；佢等毋知麼介安到公當。</verse>
				<verse number="11">所以，敵人會包圍佢等个城市，破壞佢等个防線，搶佢等个城堡。」</verse>
				<verse number="12">上主恁樣講：「就像牧羊人只有對獅仔个嘴肚搶轉兩支羊腳抑係半隻耳公定定，在 撒馬利亞 過奢華生活 个 以色列 人也只有少數有可能對災難中得到拯救。」</verse>
				<verse number="13">至高个上主 — 萬軍个元帥上帝講：「愛聽！愛警告 雅各 个後代：</verse>
				<verse number="14">𠊎責罰 以色列 所犯个罪時，𠊎愛拆掉 伯特利 城个祭壇；祭壇个四隻角會被人敲掉，跌在地上。</verse>
				<verse number="15">𠊎愛拆掉佢等避暑个別莊㧯避寒个暖房；象牙裝璜个屋㧯盡靚个大屋全部會橫到貼貼。」上主恁樣宣佈了。</verse>
			</chapter>
			<chapter number="4">
				<verse number="1">住在 撒馬利亞 个婦人家啊，愛聽𠊎个話！你等肥到像 巴珊 个牛乸。你等欺負艱苦人，壓迫窮苦人，喊老公斟酒給你等啉！</verse>
				<verse number="2">至高个上主指等自家个聖名發誓，講：「該日一定會來，有人會用鉤仔將你等鉤出去，就像魚仔被鉤仔鉤到。</verse>
				<verse number="3">你等會一個一個被人拖到最近个城牆缺口，豁出城外 。」上主恁樣宣佈了。</verse>
				<verse number="4">至高个上主恁樣講：「 以色列 人啊，做你等到 伯特利 去犯罪啊！做你等到 吉甲 去盡量犯罪啊！做你等逐朝晨獻牲儀，三日奉獻一擺所得个十分之一啊！</verse>
				<verse number="5">做你等去獻有酵个餅做感恩个祭啊！做你等誇口恁大方个甘心祭啊！反正這兜事係你等自家盡好做个！</verse>
				<verse number="6">「係𠊎 — 上主將飢荒降到你等逐隻城肚，使你等个糧食斷絕。總係你等還毋歸向𠊎。</verse>
				<verse number="7">你等个農作物收割前三隻月最需要雨水个時節，𠊎毋落雨。𠊎在這城落雨，在該城毋落雨；𠊎使這家田地有雨，使該家田地枯燥。</verse>
				<verse number="8">有兩三城个人民嘴燥到軟怠怠，到附近个城市尋水也無法度解渴！總係你等還係毋歸向𠊎。</verse>
				<verse number="9">「𠊎 — 上主使你等个五榖發病、發蟲；𠊎派草蜢食淨你等个青菜、葡萄、橄欖、㧯無花果。總係你等還係毋歸向𠊎。</verse>
				<verse number="10">「𠊎 — 上主使你等發瘟，像以前降給 埃及 人共樣。𠊎在戰場將你等个青年㓾淨淨，搶走你等个戰馬 。𠊎使你等鼻孔被營中死屍个臭味沖到會死。總係你等還係毋歸向𠊎。」</verse>
				<verse number="11">上主恁樣講：「𠊎已經消滅你等當中个人，就像𠊎 毀滅 所多瑪 㧯 蛾摩拉 共樣。你這兜賸到無死个人就像對火堆肚抽出來个一支柴。總係你等還係毋歸向𠊎。</verse>
				<verse number="12">所以， 以色列 人啊，𠊎愛責罰你等。因為𠊎愛對付你等，你等愛準備好勢來見𠊎 — 你等个上帝！」</verse>
				<verse number="13">看啊，上帝造山，也造風， 將自家个旨意㧯人講； 佢將日時頭變做暗晡頭， 佢腳踏高地，統治普天下。 佢个名安到上主 — 萬軍个元帥上帝。</verse>
			</chapter>
			<chapter number="5">
				<verse number="1">聽啊， 以色列 人，𠊎愛為你等唱一首哀歌：</verse>
				<verse number="2">人家女 以色列 已經跌倒， 䟘毋起來了。 姖被人㧒在地上， 無人將姖扶起來。</verse>
				<verse number="3">至高个上主恁樣講：「 以色列 个城，派出一千個兵仔，賸一百個轉來；派出一百儕，賸十儕轉來。」</verse>
				<verse number="4">上主向 以色列 人講：「愛尋𠊎正有生路。</verse>
				<verse number="5">毋好到 別是巴 去禮拜。毋好到 伯特利 去尋𠊎；因為 伯特利 會無掉。毋好去 吉甲 ；因為 吉甲 个人會被人捉去。」</verse>
				<verse number="6">愛尋上主，你等正有生路。若係你等毋去尋佢，佢會像一陣火將 約瑟 个後代燒掉。這陣火會將 伯特利 个人民燒掉，無人會打烏。</verse>
				<verse number="7">你等會堵到災難了！因為你等歪曲正義，蹧踏人民个權利！</verse>
				<verse number="8">上主創造星辰， 造昴星㧯參星。 佢喊日時頭變做暗晡頭， 將烏暗變做光明。 佢將海洋个水倒在地上。 佢个名係上主。</verse>
				<verse number="9">佢使勢力強大个滅亡， 使城堡被人打橫掉。</verse>
				<verse number="10">你等當惱別人在法庭主持公道、公正無私。</verse>
				<verse number="11">你等欺負窮苦人，搶佢等个糧食；你等用石頭起盡靚个大屋，總係絕對無法度住；你等耕種盡靚个葡萄園，總係絕對無法度啉所出个酒。</verse>
				<verse number="12">𠊎知你等个罪過當多，罪惡當大。你等欺負好人，被人收買，在法庭冤枉窮苦人。</verse>
				<verse number="13">這係邪惡个時代；莫怪聰明人全部毋講話了。</verse>
				<verse number="14">愛追求良善，脫離邪惡，你等正有生路。恁樣，就照你等講个，上主 — 萬軍个元帥上帝正會正經㧯你等共下。</verse>
				<verse number="15">惱邪惡，愛良善，在法庭伸張正義。恁樣，可能上主 — 萬軍个元帥上帝就會向 約瑟 後代賸到个人施恩。</verse>
				<verse number="16">所以，至高个上主 — 萬軍个元帥上帝恁樣講：「街路逐所在會有悲傷大噭个聲，講：『唉哉！唉哉！』唱哀歌个人全部被人請掉了，只有去拉耕種人來𢯭手代噭。</verse>
				<verse number="17">葡萄園肚只有聽到悲傷个噭聲。這兜事一定會發生，因為𠊎愛來責罰你等。」上主恁樣宣佈了。</verse>
				<verse number="18">等上主个日仔來到个人啊，你等慘了！上主个日仔對你等有麼介好處呢？上主个日仔對你等係烏暗，毋係光明。</verse>
				<verse number="19">該日仔到个時，你等無所在好走閃，像一個人閃過獅仔，又堵到熊！又像一個人轉到屋下，當痶个時，用手扶壁，又給蛇咬到。</verse>
				<verse number="20">上主个日仔會帶來烏暗，毋係光明；該係傷心个日仔，無一些仔希望。</verse>
				<verse number="21">上主恁樣講：「𠊎盡惱你等个節期，忍毋下你等个大會！</verse>
				<verse number="22">你等獻个燒化祭㧯素祭，𠊎毋接受；獻當肥个頭牲做平安祭，𠊎也無愛看。</verse>
				<verse number="23">𠊎無歡喜你等吵鬧个歌聲，也無愛聽你等彈奏个琴聲。</verse>
				<verse number="24">反轉，愛俾公平像大水滾滾沖等下！愛俾公義像溪水直直流等去！</verse>
				<verse number="25">「 以色列 人啊，在曠野該四十年，你等並無獻麼介牲儀抑係禮物給𠊎！</verse>
				<verse number="26">這下你等揹起自家雕刻个偶像 — 撒固 王神㧯 迦溫 星神。</verse>
				<verse number="27">所以𠊎愛將你等逐到 大馬士革 外背遠遠个所在去。」上主恁樣宣佈了；佢个名係萬軍个元帥上帝。</verse>
			</chapter>
			<chapter number="6">
				<verse number="1">住在 錫安 享受安樂个人，㧯在 撒馬利亞 山頂恅到安全个人啊，你等慘了！你這兜大 以色列 國內个名人，受人尊敬个人啊，你等慘了！</verse>
				<verse number="2">你等到 甲尼 城去看，也到大 哈馬 市，然後到 非利士 人个 迦特 城去看哪！這兜國家當中，有㖠個無比 猶大 㧯 以色列 較強？它兜个土地，㖠個無比你等个較闊？</verse>
				<verse number="3">你等恅到大難臨頭个日仔還盡遠；事實上，你等使殘暴个統治緊來緊近。</verse>
				<verse number="4">你這兜人慘了！你等只有知橫在象牙个眠床頂，抑係坐在安樂椅，食等細牛㧯肥羊个肉；</verse>
				<verse number="5">唱等新編个歌，像 大衛 恁樣用豎琴伴奏；</verse>
				<verse number="6">一碗又一碗个好酒緊啉，還膏上等个香水。你等恁樣享福，總係無為 約瑟 後代个衰微來悲傷。</verse>
				<verse number="7">所以，你等會最先被人逐出國外去；你等放蕩宴樂个生活就恁樣結束了。</verse>
				<verse number="8">至高个上主 — 萬軍个元帥上帝指等自家發誓，講：「𠊎盡惱 以色列 人 个驕傲；𠊎盡恨佢等住个像宮殿个屋。𠊎愛將佢等个京城㧯底背所有个交給敵人。」</verse>
				<verse number="9">若係一間屋還賸十個人，這十個人到尾也會無命。</verse>
				<verse number="10">死人个親族來拖身屍去燒 个時，佢會對屋肚最尾間个人講：「有人㧯你共下麼？」 該人會應講：「無了。」 親族講：「毋好出聲，𠊎等做毋得講起上主个名。」</verse>
				<verse number="11">看哪！上主一命令，大間、細間个屋仔全部會橫淨淨，成做垃圾堆。</verse>
				<verse number="12">馬會在巖石頂走麼？人會在海肚 駛牛耕種麼？總係，你等將公平變做毒藥，將正義變做苦藥。</verse>
				<verse number="13">你等自誇打橫 羅‧底巴 。你等講：「𠊎等敢毋係靠自家个力量佔領 加寧 ！」</verse>
				<verse number="14">上主 — 萬軍个元帥上帝恁樣講：「 以色列 人啊，𠊎愛使外國个軍隊佔領你等个國家；北對 哈馬 隘口，南到 亞拉巴 海滣 ，佢等愛來踐踏你等。」</verse>
			</chapter>
			<chapter number="7">
				<verse number="1">至高个上主俾𠊎看到一個光景：佢造一群草蜢。該時，第一期納給王个農作物已經收割，第二期个新筍當抽芽。</verse>
				<verse number="2">𠊎看到草蜢飛來，將地上个農作物全部食淨淨。所以𠊎講：「至高个上主啊，求你赦免你个子民！ 雅各 个後代又微細又軟弱，樣般受得住呢？」</verse>
				<verse number="3">上主个心就軟下來。上主講：「恁樣，你所看到个事毋會發生了！」</verse>
				<verse number="4">至高个上主俾𠊎看到一個光景：佢愛用火來責罰佢个子民。火將地泥底下个水源全部燒燥以後，又開始燒地面上所有个東西。</verse>
				<verse number="5">所以𠊎講：「至高个上主啊，請停下來！你个子民 — 雅各 个後代又微細又軟弱，樣般受得住呢？」</verse>
				<verse number="6">上主个心就軟下來。至高个上主講：「恁樣，你所看到个事毋會發生了！」</verse>
				<verse number="7">主俾𠊎看到一個光景：𠊎看到主企在一扇起好个牆頭堘，手項拿等線鉈。</verse>
				<verse number="8">上主問𠊎：「 阿摩司 ，你看到麼介？」 𠊎應講：「線鉈！」 所以主講：「𠊎愛將線鉈吊起來，俾𠊎个子民 以色列 知佢等就像一扇會橫个牆。這擺𠊎絕對毋會赦免佢等了！</verse>
				<verse number="9">以撒 後代禮拜个所在一定會被人拆掉； 以色列 人个聖所全部會受到破壞。𠊎愛用戰爭使 耶羅波安 个王朝滅亡。」</verse>
				<verse number="10">伯特利 城个祭司 亞瑪謝 派人去向 以色列 王 耶羅波安 報告，講：「 阿摩司 在煽動你个人民，愛佢等悖逆你；佢个言論對國家傷害相當大。</verse>
				<verse number="11">佢講：『 耶羅波安 會在戰場被人㓾死； 以色列 人一定會被人逐出本地，捉到外國去。』」</verse>
				<verse number="12">亞瑪謝 向 阿摩司 講：「先見啊，好走了！轉 猶大 去講預言，在該位賺口飯食！</verse>
				<verse number="13">伯特利 係宮廷个聖殿，係國家禮拜个中心，毋准你繼續在這位講預言。」</verse>
				<verse number="14">阿摩司 應 亞瑪謝 講：「𠊎原來毋係先知，𠊎也毋係先知个學生 。𠊎係牧羊人 ，也係管理無花果樹㧯桑樹个農民。</verse>
				<verse number="15">總係，在𠊎掌羊个時，上主親身呼召𠊎，對𠊎講：『愛去向𠊎个子民 以色列 講預言。』</verse>
				<verse number="16">所以， 亞瑪謝 啊，你愛聽上主對𠊎講个話。你毋准𠊎向 以色列 人講預言，也毋准𠊎向 以撒 个後代講攻擊个話 。</verse>
				<verse number="17">所以上主恁樣講：『若𡜵娘會在城肚做娼妓；你个子女全部會在戰場死掉。你个田地會被人丈量分掉；你本人會死在外邦。 以色列 人一定會被人逐出本地，捉到外國去。』」</verse>
			</chapter>
			<chapter number="8">
				<verse number="1">至高个上主俾𠊎看到一個光景：𠊎看到一籃當熟个水果。</verse>
				<verse number="2">佢問𠊎：「 阿摩司 ，你看到麼介？」 𠊎應講：「一籃當熟个水果。」 上主對𠊎講：「𠊎子民 以色列 个末期 已經到了。這擺𠊎絕對毋會赦免佢等！</verse>
				<verse number="3">該日，宮廷个歌聲會變做悲哀个噭聲；身屍㧒到滿遍係。毋好出聲。」</verse>
				<verse number="4">你這兜踐踏艱苦人，剝削窮苦人个，你等愛聽！</verse>
				<verse number="5">你等自家講：「初一个節日樣毋遽遽過去，好俾𠊎等去糶穀？安息日樣毋遽遽結束，好俾𠊎等去做生理？𠊎等做得提高價錢，用假秤砣、細升斗去騙人客了。</verse>
				<verse number="6">𠊎等來賣壞掉个麥仔；𠊎等用錢銀買窮苦人，用一雙草鞋換貧窮人 。」</verse>
				<verse number="7">上主 — 以色列 个上帝 發誓講：「𠊎絕對毋會毋記得 以色列 人个壞行為。</verse>
				<verse number="8">為到恁樣，𠊎敢毋會使地動發生？所有住這地方个人敢毋會悲傷歎息？大地會震動，像 尼羅 河个河水恁樣浮起沈落。</verse>
				<verse number="9">到該日，𠊎愛使日頭還當晝就落山，日時頭變做暗摸摸。這係𠊎 — 至高个上主講个。</verse>
				<verse number="10">𠊎愛使你等个慶典變做葬禮，歡樂个歌聲變做傷心大噭。𠊎愛使你等剃光頭、著麻衫。你等會傷心到像死單丁子恁樣，歸日非常痛苦。</verse>
				<verse number="11">「日仔會到了，𠊎愛使 以色列 全地飢荒。佢等肚飢，毋係因為無餅好食；佢等嘴燥，毋係因為無水好啉；係因為聽毋到上主个話。這係𠊎 — 至高个上主講个。</verse>
				<verse number="12">佢等會對南到北行上行下，對東到西走來走去，逐所在尋上主个話，總係尋毋到。</verse>
				<verse number="13">在該日，連盡靚个細妹仔㧯強壯个青年也會因為嘴燥來昏掉。</verse>
				<verse number="14">該兜拜過 撒馬利亞 个偶像 、向 但 㧯 別是巴 个神明許過願个人，全部會橫落去，永遠䟘毋起來。」</verse>
			</chapter>
			<chapter number="9">
				<verse number="1">𠊎看到主企在祭壇个堘頭；佢講：「𠊎愛敲聖殿个棟樑，使歸間屋落下來，打爛逐儕个頭那。𠊎愛用刀劍㓾死其他个人，無一儕閃得開，無一儕走得去。</verse>
				<verse number="2">就算佢等挖地窿，鑽入陰間，𠊎也愛將佢等揪出來！就算佢等跋上天，𠊎也愛將佢等拉下來！</verse>
				<verse number="3">就係佢等走到 迦密 山頂，𠊎也愛去搜山，將佢等尋出來！就算佢等囥在海底，𠊎也愛喊海蛇咬佢等 ！</verse>
				<verse number="4">就算佢等已經被人捉走，𠊎也愛喊敵人㓾死佢等！𠊎愛用目珠䁯佢等，𠊎愛降災禍，無愛降福氣。」</verse>
				<verse number="5">至高个上主 — 萬軍个元帥一摸到地， 地就鎔掉； 地上个人民全部傷心大噭， 地像 尼羅 河个水浮起沈落。</verse>
				<verse number="6">上主在天頂起宮殿， 將穹蒼安在大地个頂高， 佢吩咐大海个水， 倒在地上。 佢个名係上主。</verse>
				<verse number="7">上主講：「 以色列 人哪，𠊎乜關心 古實 人，就像𠊎關心你等。𠊎乜𢱋 非利士 人出 克里特 ，𢱋 敘利亞 人出 吉珥 ，就像𠊎對 埃及 將你等𢱋出來。</verse>
				<verse number="8">𠊎 — 至高个上主用目珠䁯這罪大惡極个 以色列 國。𠊎愛對地面上將它除掉，總係𠊎毋會將 雅各 个後代全部消滅。</verse>
				<verse number="9">「𠊎愛命令，將 以色列 人放在列國當中篩，像放入篩仔，將敗類全部篩掉。</verse>
				<verse number="10">在𠊎个子民當中，該兜講：『苦難毋會臨到𠊎等』个罪人，全部會死在刀劍之下。」</verse>
				<verse number="11">上主講：「有一日，𠊎愛重建 大衛 該破碎个王國。𠊎愛修整它个城牆；𠊎愛將它重新起到㧯頭擺完全共樣；</verse>
				<verse number="12">𠊎愛使 以色列 人有能力攻打所賸个 以東 人，收復屬𠊎名下所有个國。」這個話係做這兜事个上主講个。</verse>
				<verse number="13">上主講： 看啊，該日會到了， 五榖豐登吂割揪，就到蒔田个時， 葡萄滿棚吂踏揪，又到委種个時 。 大山流出好酒，流過該兜細山。</verse>
				<verse number="14">𠊎愛𢱋𠊎个子民 以色列 人轉來本地； 佢等愛重建破碎个城市， 永久住在該位。 佢等愛重新耕種葡萄園， 啉自家所焗个酒； 佢等愛重新經營果子園， 食其中出產个水果。</verse>
				<verse number="15">𠊎愛將𠊎个子民種在𠊎賜給佢等个土地； 佢等絕對毋會再被人連根挷掉。 上主 — 你等个上帝恁樣宣佈了。</verse>
			</chapter>
		</book>
		<book number="31">
			<chapter number="1">
				<verse number="1">下背係 俄巴底亞 所看到个異象，係至高个上主論 以東 个話。 上主差派使者到列國去； 𠊎等聽到使者所傳个信息。 佢講：䟘起來噢！ 𫣆等愛㧯 以東 相㓾！</verse>
				<verse number="2">上主對 以東 講： 𠊎愛使你在列國中成做最弱个， 被人大大看輕。</verse>
				<verse number="3">你驕傲个心欺騙自家。 你个京城係巖石起个城堡； 你住在高山頂， 所以你就對自家講： 「麼人有辦法將𠊎拉下來？」</verse>
				<verse number="4">你雖然像大鷂婆飛盡高， 做藪在星辰間， 𠊎也愛將你拉下來。</verse>
				<verse number="5">賊仔來，抑係強盜暗晡頭來， 佢等會拿走所愛个東西定定； 來摘葡萄个人， 佢等還會留兜仔； 總係你个仇敵會將你搶到淨淨。</verse>
				<verse number="6">以掃 个子孫啊， 你囥个財寶已經被人搜出來搶走！</verse>
				<verse number="7">㧯你結約个全部出賣你， 將你逐出自家个國家； 㧯你相好个，這下征服你； 食若飯个人，設機關陷害你。 佢等恥笑你講： 「你个聰明在㖠位？」</verse>
				<verse number="8">上主講： 𠊎責罰 以東 該日， 𠊎愛除掉佢等个聰明人， 對 以掃 山消滅佢等个智慧人。</verse>
				<verse number="9">提幔 个戰士會驚到會死， 以掃 山个人全部會被人㓾淨淨。</verse>
				<verse number="10">因為你對你个兄弟 雅各 恁殘忍， 你會被羞辱遮等，永遠被人消滅。</verse>
				<verse number="11">敵人入 雅各 个城門來搶佢个時， 你企在塍頭看鬧熱； 外族人拈鬮來分對 耶路撒冷 搶到个財寶時， 你當像係㧯佢等共黨个人。</verse>
				<verse number="12">你个兄弟堵到災難該日， 你無應該目珠金金看等佢等。 猶大 人滅亡該日， 你無應該像當歡喜。 佢等堵到災難該日， 你無應該講嘲謔个話。</verse>
				<verse number="13">𠊎个子民堵到災難該日， 你無應該入佢等个城門。 佢等堵到災難該日， 你無應該目金金看佢等受苦。 佢等堵到災難該日， 你無應該搶佢等个財產。</verse>
				<verse number="14">你無應該企在叉路口， 捉該兜逃難个人。 你無應該在佢等堵到災難該日， 將賸到个人交給仇敵。</verse>
				<verse number="15">𠊎 — 上主審判萬國个日仔會到了。 以東 啊，你會照你所做个得到報應； 你所做个，一定會歸到你个頭那頂。</verse>
				<verse number="16">像𠊎个子民在𠊎个聖山 啉苦杯， 萬國愛啉還較苦个杯； 佢等愛啉了又啉，啉到燥燥， 然後佢等就消失掉。</verse>
				<verse number="17">總係 錫安 山頂一定會有人逃難出來； 這山會成做聖山。 雅各 家會重新得到原來个產業。</verse>
				<verse number="18">雅各 家會成做大火， 約瑟 家會成做火焰， 佢等愛將 以掃 家燒掉， 像火燒禾稈。 以掃 个後代無留半儕。 𠊎係上主，𠊎恁樣宣佈了。</verse>
				<verse number="19">猶大 南片个人愛佔領 以掃 山； 西片山腳下个人愛攻取 非利士 。 以色列 人愛佔領 以法蓮 㧯 撒馬利亞 个土地； 便雅憫 人愛得到 基列 。</verse>
				<verse number="20">北國 以色列 个流亡軍隊， 愛轉來征服 腓尼基 ，直到 撒勒法 ； 對 耶路撒冷 流亡到 薩狄斯 个人， 愛佔領 猶大 南部个城市。</verse>
				<verse number="21">該兜打贏个人愛上去 錫安 山， 統治 以掃 山 。 上主自家愛做王。</verse>
			</chapter>
		</book>
		<book number="32">
			<chapter number="1">
				<verse number="1">有一日，上主向 亞米太 个孻仔 約拿 講：</verse>
				<verse number="2">「你去 尼尼微 該座大城，公開責備該位个人，因為佢等个邪惡達到𠊎个面前！」</verse>
				<verse number="3">總係 約拿 向相反个方向行，想愛逃走離開上主。佢到 約帕 港，尋到一條愛駛去 他施 个船。佢付錢上船，愛㧯船員共下去 他施 ，來閃上主。</verse>
				<verse number="4">總係，上主使海上起大風，狂風大浪打該條船，船強強像會打壞。</verse>
				<verse number="5">船員全部非常著驚，逐儕向自家个神明哀求。為到愛減輕船个重量，佢等就將船頂个貨物㧒落海肚。 約拿 早就下到船底，橫在該位睡到毋知醒。</verse>
				<verse number="6">船長去到佢該位對佢講：「你樣般還在這位睡呢？䟘起來，求你个神明！無一定佢會可憐𠊎等，來救𠊎等。」</verse>
				<verse number="7">船頂个人大家參詳：「𠊎等來抽籤，看係麼人个罪惡害𠊎等堵到這災難。」佢等就抽籤，抽到 約拿 。</verse>
				<verse number="8">佢等問佢：「㧯𠊎等講，這災難係毋係你惹起个？你食麼介頭路？對㖠位來？係㖠國㖠族个人？」</verse>
				<verse number="9">約拿 應講：「𠊎係 希伯來 人。𠊎敬畏上主。佢係天頂个上帝，係大海㧯陸地个創造主。」</verse>
				<verse number="10">約拿 又㧯佢等講，佢這下就係愛逃走離開這位上主。 船員聽到這兜話，非常著驚，就對佢講：「你樣會恁樣呢！」</verse>
				<verse number="11">因為風浪越來越大，佢等就問佢：「𠊎等愛樣般處理你，正能使風浪平靜下來呢？」</verse>
				<verse number="12">約拿 應講：「將𠊎扛起來，㧹落海肚，風浪就會平靜；因為𠊎知係𠊎个罪過使你等堵到這个風差。」</verse>
				<verse number="13">船員反轉出力撐船，愛將船撐到海滣去。總係風浪越來越強，佢等無法前進。</verse>
				<verse number="14">所以佢等求喊上主，講：「上主啊，求你毋好因為這人个罪 使𠊎等死掉，也毋好因為這人个死來討𠊎等个命。上主啊，這一切全部係照你自家个意思做个。」</verse>
				<verse number="15">話講煞，佢等就將 約拿 扛起來，㧹落海肚；風浪黏時平靜下來。</verse>
				<verse number="16">船員全部因為這件事大大敬畏上主，向上主獻祭，又許願愛事奉佢。</verse>
				<verse number="17">這時，上主安排一條大魚，將 約拿 吞落去。 約拿 在魚肚笥三日三夜。</verse>
			</chapter>
			<chapter number="2">
				<verse number="1">約拿 在魚肚笥向上主 — 佢个上帝祈禱：</verse>
				<verse number="2">上主啊，𠊎堵到災難个時求喊你， 你有答應𠊎。 𠊎對陰間肚向你懇求， 你聽𠊎个祈求。</verse>
				<verse number="3">你將𠊎㧹落深海， 到深深个海底； 大水包圍𠊎， 你个大浪揜等𠊎。</verse>
				<verse number="4">𠊎想，𠊎已經對你面前被你逐走， 總係𠊎還愛仰望你个聖殿 。</verse>
				<verse number="5">大水揜等𠊎，害𠊎透氣毋出； 𠊎陷在大海盡深个所在； 海草纏住𠊎个頭那。</verse>
				<verse number="6">𠊎下到眾山个腳下， 來到門閂永遠鎖等个陰間。 總係上主 — 𠊎个上帝啊， 你對陰間个底背將𠊎生生救出來。</verse>
				<verse number="7">𠊎感覺自家个生命會無掉个時， 上主啊，𠊎就想念你； 𠊎个祈禱入到你个聖殿， 達到你个面前。</verse>
				<verse number="8">該兜敬拜虛假偶像个， 佢等已經豁掉對你个誠心 。</verse>
				<verse number="9">總係𠊎愛唱歌感謝你； 𠊎愛向你獻祭， 還一切所許个願。 拯救係對上主來！</verse>
				<verse number="10">後來，上主命令該條大魚將 約拿 呸在沙灘，大魚就照恁樣做。</verse>
			</chapter>
			<chapter number="3">
				<verse number="1">上主第二擺向 約拿 講話。</verse>
				<verse number="2">佢講：「你去 尼尼微 該座大城，向該位个人宣佈𠊎吩咐你講个話。」</verse>
				<verse number="3">約拿 服從上主个命令，就去 尼尼微 。該係一座盡大个城 ，需要三日个時間正捩得透。</verse>
				<verse number="4">約拿 入城，行一日个路程，佢宣佈講：「再過四十日， 尼尼微 城就會受毀滅！」</verse>
				<verse number="5">尼尼微 城个人信上帝个話。所以佢等決定愛禁食；城肚所有个人，無論大細全部著麻衫表示悔改。</verse>
				<verse number="6">尼尼微 王一聽到這消息，就離開寶座，脫下王袍，著麻衫，坐在火灰當中。</verse>
				<verse number="7">佢向 尼尼微 人發出通告，講：「這係王㧯佢个大臣公佈个命令：人、㧯頭牲、牛羊，全部不准食，也不准啉。</verse>
				<verse number="8">人㧯頭牲全部愛著麻布。逐儕一定愛迫切向上帝祈禱，也愛離開壞行為，毋好做暴力个事。</verse>
				<verse number="9">可能上帝會改變佢个心意，無繼續發譴，𠊎等就毋會滅亡！」</verse>
				<verse number="10">上帝看到佢等所做个一切，看到佢等離開壞行為，佢就改變心意，無將佢以前宣佈个災難降給佢等。</verse>
			</chapter>
			<chapter number="4">
				<verse number="1">對這件事， 約拿 盡無歡喜，當閼。</verse>
				<verse number="2">所以佢祈禱講：「上主啊，𠊎離開家鄉以前，毋係㧯你講過，你一定會恁樣做嗎？就係因為恁樣，𠊎正會拚命逃到 他施 去！𠊎知你係有恩典、有憐憫个上帝；你無隨便發譴，有豐盛个慈愛；你願意回心轉意，毋責罰人。</verse>
				<verse number="3">所以，上主啊，俾𠊎死好了！𠊎還係死較好！」</verse>
				<verse number="4">上主應講：「你恁樣發譴敢有理？」</verse>
				<verse number="5">所以 約拿 到城外去，在城个東片坐下來。佢搭一隻寮仔，坐在它个陰影下，愛看 尼尼微 城會發生麼介事。</verse>
				<verse number="6">後來，主上帝安排一頭蓖麻樹，使它生到比 約拿 較高，樹影遮等佢个頭那，使佢感覺涼爽。 約拿 非常歡喜這頭樹。</verse>
				<verse number="7">總係，第二日打早，上帝安排一尾蟲仔來咬這頭樹仔，樹仔就燥死掉。</verse>
				<verse number="8">日頭出來以後，上帝又安排燒風對東方吹過來。因為日頭當𤊶，直接曬 約拿 个頭那，佢被日頭曬到強強會昏掉，所以佢就求死。佢講：「𠊎還係死較好！」</verse>
				<verse number="9">總係上帝對佢講：「你為這頭蓖麻樹恁發譴敢有理？」 約拿 應講：「𠊎發譴到會死乜有理！」</verse>
				<verse number="10">上主對佢講：「這頭樹仔一暗晡就大起來，第二日就燥死掉；你雖然無種它，也無𢯭手使它大起來，你還為它感覺可惜。</verse>
				<verse number="11">恁樣，𠊎毋係還較應該憐憫 尼尼微 這座大城嗎？在這城肚有超過十二萬連左手右手都分毋出个人，又還有當多頭牲！」</verse>
			</chapter>
		</book>
		<book number="33">
			<chapter number="1">
				<verse number="1">在 約坦 、 亞哈斯 、 希西家 做 猶大 王个期間，上主向 摩利沙 人 彌迦 啟示有關 撒馬利亞 㧯 耶路撒冷 个事。下背个記載係上主㧯 彌迦 講个話。</verse>
				<verse number="2">列國啊，你等全部愛聽！ 世間人哪，你等愛注意聽！ 至高个上主愛告你等； 主愛對天庭做證。</verse>
				<verse number="3">看哪，上主對天庭行出來； 佢愛降臨在地上，腳踏在該兜山頂。</verse>
				<verse number="4">群山在佢腳下崩掉，就像蠟被火鎔掉； 巖石變做土石流，親像大水沖入溪肚。</verse>
				<verse number="5">這兜事一定會發生，因為 以色列 人悖逆上帝，得罪佢。麼人應該為 以色列 个悖逆受責罰呢？首都 撒馬利亞 應該承擔！麼人應該為 猶大 拜偶像个罪負責呢？首都 耶路撒冷 應該負責！</verse>
				<verse number="6">所以上主講：「𠊎愛使 撒馬利亞 成做垃圾堆，成做種葡萄个所在。𠊎愛將姖个城牆㩳落山壢，露出姖个地基。</verse>
				<verse number="7">城肚所有个偶像全部會被人敲到碎碎；通過神女所得个財物全部會被人燒掉；𠊎愛使所有个偶像成做廢物。 撒馬利亞 像娼妓收集這兜偶像準做繁殖个神明，最後它兜會被敵人搶走，帶給別個所在个娼妓去拜。」</verse>
				<verse number="8">所以 彌迦 講：「𠊎愛為這事傷心大噭；𠊎愛赤身露體、打赤腳，行來行去；𠊎愛像野狗出聲，像鴕鳥緊噭。</verse>
				<verse number="9">撒馬利亞 个著傷醫毋到了； 猶大 个傷也毋會好了。災難迫近 耶路撒冷 城門，會到𠊎同胞个家園。」</verse>
				<verse number="10">毋好在 迦特 宣佈你等已經戰敗；毋好俾敵人看到你等傷心流目汁。 伯‧亞弗拉 个人民啊，傷心到在地上緊碾！</verse>
				<verse number="11">沙斐 个人民啊，你等會受侮辱，赤身露體，流亡到外國去！ 撒南 个人民毋敢出來。你等聽到 伯‧以薛 个人民傷心大噭个時，就知城肚無避難个所在。</verse>
				<verse number="12">瑪律 个人民非常痛苦，盡希望有辦法解決，因為上主已經將災難帶到 耶路撒冷 个城門了！</verse>
				<verse number="13">拉吉 个人民啊，你等愛牽會走个馬仔來拉戰車，準備逃難！因為 錫安 子民个罪對你開始； 以色列 个壞行為在你該位全部尋到了。</verse>
				<verse number="14">所以， 猶大 个人啊，你等愛告別 摩利沙‧迦特 城。 以色列 該兜王絕對毋會對 亞革悉 得到幫助。</verse>
				<verse number="15">瑪利沙 个人民啊，上主愛將你等交給征服者； 以色列 个貴族愛走到 亞杜蘭 山窿避難。</verse>
				<verse number="16">猶大 个人啊，愛剃光頭，為你等所愛个子女悲傷；愛剃到像禿鷹个頭恁光，因為佢等會被人捉到外國去。</verse>
			</chapter>
			<chapter number="2">
				<verse number="1">慘了，該兜睡在眠床頂計謀作惡个人！因為佢等手頭揢有權，天一光，就去做壞事。</verse>
				<verse number="2">佢等貪田地，就去侵佔；愛屋仔，就去霸佔。佢等欺壓人，搶劫人个家庭㧯財產。</verse>
				<verse number="3">所以，上主恁樣講：「𠊎計劃愛將災難降在你等身上；你等無法度逃走，你等行路無恁威風了，因為你等災禍臨到了。</verse>
				<verse number="4">該時人家會作詩嘲謔你等、編寫哀歌來唱： 𠊎等完全破產了！ 上主拿走𠊎等个田地， 交給將𠊎等捉走个人 。」</verse>
				<verse number="5">所以，上主个子民收轉土地个時，你等全部無份。</verse>
				<verse number="6">該兜人 對𠊎發譴喊講：「毋好向𠊎等說教！毋好講恁衰个事！上帝毋會使𠊎等恁無面子。</verse>
				<verse number="7">敢講 以色列 人會受咒詛嗎？ 上主敢會恁無度量！佢斷真會做這種事嗎？佢个話對行為正直个人敢無好處？」</verse>
				<verse number="8">上主應講：「你等像敵人共樣攻擊𠊎个子民 。對戰場轉來个人，安然經過个時，你等卻將佢等个外衫剝走。</verse>
				<verse number="9">你等將𠊎子民中个婦人家對姖等快樂个家庭逐走，又將𠊎个福氣對姖等个子女永遠搶走。</verse>
				<verse number="10">䟘起來！遽遽走噢！這位已經毋係安居个所在！你等个污穢帶給這所在悲慘个大毀滅。</verse>
				<verse number="11">「若有人到處去講肨風、騙人講：『𠊎預言你等會有啉毋掉个淡酒㧯釅酒』，佢就會成做這民眾所歡喜个先知！</verse>
				<verse number="12">「 雅各 个後代、 以色列 還賸个人民啊，𠊎一定愛將你等集合起來，像掌羊个將羊群帶轉羊欄。你等个土地會再一擺人丁興旺，像牧場有盡多个羊群，盡鬧熱。」</verse>
				<verse number="13">上帝愛為佢等開路，帶佢等撞開城門，通過城門出去外背。佢等个君王，就係上主，自家會在頭前帶領佢等。</verse>
			</chapter>
			<chapter number="3">
				<verse number="1">𠊎講： 以色列 个領袖啊，你等愛聽！你等本來就應該主持正義，</verse>
				<verse number="2">總係你等反轉惱善良，歡喜罪惡。你等將𠊎个子民生生剝皮，又對佢等个骨頭刮下肉來。</verse>
				<verse number="3">你等食𠊎子民个肉，剝佢等个皮，打碎佢等个骨頭，像切肉落鑊恁樣剁糜糜。</verse>
				<verse number="4">有一日，你等愛求喊上主，總係佢毋搭你等。該時佢會揞面毋聽你等个祈禱，因為你等做當多壞事。</verse>
				<verse number="5">該兜先知迷惑𠊎个子民。有一口飯好食，佢等就講：「天下太平」；總係對該兜無給佢等飯食个，佢等就用戰爭來嚇人。上主對這種先知講：</verse>
				<verse number="6">「先知啊，日頭落山了，你等个好日仔過掉了。你等烏暗个日仔到了，你等會無異象好看，無預言好講。」</verse>
				<verse number="7">該兜行邪術个㧯卜卦个，會因為所預言个事無實現就失面子，因為所求个事無得到上帝个應答就當見笑。</verse>
				<verse number="8">論到𠊎，上主个靈㧯能力充滿𠊎。佢賜給𠊎正義㧯勇氣，來指責 以色列 人个罪。</verse>
				<verse number="9">以色列 个領袖啊，聽𠊎講！你等惱正義，顛倒是非。</verse>
				<verse number="10">你等將上帝个城 耶路撒冷 改建做流人血㧯罪惡个城。</verse>
				<verse number="11">城肚个官員為到紅包辦事，祭司為到工錢講解法律，先知為到金錢卜卦。佢等還恅到上主係佢等个靠山。佢等講：「上主敢毋係㧯𠊎等共下？𠊎等毋會堵到災難。」</verse>
				<verse number="12">所以，因為你等， 錫安 會像田地被人犁揙轉來； 耶路撒冷 會變做荒埔；起聖殿个山會變做樹林 。</verse>
			</chapter>
			<chapter number="4">
				<verse number="1">到最尾个日仔， 上主聖殿个山定著會建立在群山个頂高， 高高在上，超過眾山。 盡多民族全部會流向這山；</verse>
				<verse number="2">萬國會聚集前來，講： 來啊，𠊎等共下上去上主个山 ， 共下來去 雅各 上帝个聖殿。 佢會指教𠊎等應該行个道； 𠊎等也愛行佢所指示个路。 上主个教訓對 錫安 發出； 佢个信息對 耶路撒冷 傳出來。</verse>
				<verse number="3">佢會解決民族間个糾紛， 為遠方強盛个國調解爭端。 佢等會將刀劍打做犁頭， 將矛槍打做鐮仔。 國際間毋會有相㓾， 佢等也毋使再學習戰爭。</verse>
				<verse number="4">逐儕愛在自家个葡萄園中， 在無花果樹下，享受太平； 無人會害佢等著驚。 上主 — 萬軍个元帥恁樣應許了。</verse>
				<verse number="5">雖然列國全部敬拜、服事佢等自家个神明，總係𠊎等愛敬拜、服事上主 — 𠊎等个上帝，直到永永遠遠。</verse>
				<verse number="6">上主講：「𠊎責罰𠊎个子民，總係到該日，𠊎愛將流亡在各國个子民聚集做一下。</verse>
				<verse number="7">𠊎愛使所賸个子民成做復興个種子，軟弱失散个，成做強盛个國家。𠊎自家愛在 錫安 山統治佢等，從今直到永遠。」</verse>
				<verse number="8">耶路撒冷 啊，你像守望台㧯城堡保護上帝个羊群；你將來會復國；你愛重新成做京城。</verse>
				<verse number="9">這下你做麼介大聲盡噭？做麼介像產婦陣痛到無葛無煞？你無君王係麼？你个參謀全部死淨淨係麼？</verse>
				<verse number="10">錫安 个人民啊，你等愛像產婦陣痛，非常痛苦；因為你等就愛離開這城，去住在荒地。你等一定會被人捉到 巴比倫 去；總係在該位，上主會拯救你等，對敵人手中將你等救贖出來。</verse>
				<verse number="11">這下盡多國家聯合起來攻擊你。佢等講：「𠊎等來打垃圾 耶路撒冷 ！𠊎等愛看等 錫安 毀滅！」</verse>
				<verse number="12">總係佢等毋知上主个計劃，毋知上主將佢等聚集共下係愛責罰佢等，像農民將禾把收到打榖場去打共樣。</verse>
				<verse number="13">上主講：「 錫安 个人民啊，䟘起來！像牛踏榖恁樣去刑罰你等个敵人！𠊎愛使你等強壯到像生鐵角銅蹄个牛牯。你等愛消滅盡多國家，將佢等用暴力搶來个財物獻給𠊎 — 天下个主宰。」</verse>
			</chapter>
			<chapter number="5">
				<verse number="1">耶路撒冷 个軍隊啊，愛團結起來！𠊎等被人包圍！敵人用杖仔打 以色列 領袖个嘴角。</verse>
				<verse number="2">上主講：「 以法他 地區个 伯利恆 啊，在 猶大 這兜城中，你係一個細城。總係𠊎愛對你該位，為 以色列 選立一個領袖；佢个家系對太初就有。」</verse>
				<verse number="3">所以，上主愛將佢个子民交給佢等个敵人，直到該差毋多會生產个婦人家𫱔孻仔。然後，佢个同胞愛對被人捉去个所在轉到 以色列 人該位。</verse>
				<verse number="4">佢愛䟘起來，愛像牧人照顧羊群恁樣；佢愛用上主所賜个大能，奉上主 — 佢上帝聖名个威嚴來統治佢个子民。佢等愛享受太平，因為該時全世界个人全部會承認佢个偉大。</verse>
				<verse number="5">佢愛帶來和平。 亞述 人侵佔𠊎等个土地，攻破𠊎等城堡个時，𠊎等愛派盡多最強个大將㧯佢等相㓾。</verse>
				<verse number="6">這兜大將會用武力佔領 亞述 — 寧錄 个地。當 亞述 人侵略𠊎等國家个時，佢 會救𠊎等。</verse>
				<verse number="7">在萬民中，還賸个該兜 以色列 人像係上主降下來个露水，像滋潤草木个甘霖。佢等倚靠上帝，毋倚靠人。</verse>
				<verse number="8">在列國中， 以色列 還賸个人像係雄獅在樹林个百獸中，像係細獅仔撞入羊群中，去扯裂吞食，麼人也無法度抵擋。</verse>
				<verse number="9">以色列 愛征服敵人，完全毀滅佢等。</verse>
				<verse number="10">上主講：「該時，𠊎愛滅掉你等个兵馬，打壞你等个戰車。</verse>
				<verse number="11">𠊎愛毀滅你等國內个城市，拆掉所有个城堡。</verse>
				<verse number="12">𠊎愛消滅你等个邪術，毋留下一個卜卦个。</verse>
				<verse number="13">𠊎愛除滅你等所雕刻个偶像㧯石柱；你等毋會再拜自家个手所製造个東西。</verse>
				<verse number="14">𠊎愛拆掉你等國內个 亞舍拉 女神像，毀滅你等个城市。</verse>
				<verse number="15">𠊎愛大發譴來報復所有毋服從𠊎个國家。」</verse>
			</chapter>
			<chapter number="6">
				<verse number="1">愛聽上主个話。佢講：「 彌迦 啊，䟘起來！愛在大山㧯細山面前講𠊎个案情。」</verse>
				<verse number="2">群山哪，大地堅固个基石啊！你等愛聽上主所講个案情！上主愛告佢个子民，愛告 以色列 。</verse>
				<verse number="3">上主恁樣講：「𠊎个子民啊，𠊎有麼介對毋起你等个？𠊎敢恁得人惱？你等放勢講啊！</verse>
				<verse number="4">𠊎對 埃及 將你等𢱋出來，拯救你等脫離做奴才个所在。𠊎派 摩西 、 亞倫 、 美莉安 去領導你等。</verse>
				<verse number="5">𠊎个子民啊，愛回想該時 摩押 王 巴勒 个陰謀㧯 比珥 个孻仔 巴蘭 應佢个話；愛回想對 什亭 到 吉甲 當中所發生个事。你等就明白𠊎所做个全部係為到拯救你等。」</verse>
				<verse number="6">有人問：「𠊎應該帶麼介禮物來見上主呢？𠊎應該樣般來敬拜天頂个上帝呢？𠊎帶最好个細牛牯做燒化祭來獻給佢，做得麼？</verse>
				<verse number="7">上主敢會歡喜𠊎獻幾千隻羊牯，抑係幾萬條河壩恁多个橄欖油？佢敢會歡喜𠊎獻長子來代𠊎贖罪？」</verse>
				<verse number="8">世間人啊，上主已經指示你麼介係良善。佢對你个要求係：行公義，好憐憫 ，存謙卑㧯你个上帝共下行。</verse>
				<verse number="9">敬畏上主係最聰明个。上主向城肚个眾人呼喊：「在城肚个眾支族㧯議會 ，你等愛聽！</verse>
				<verse number="10">壞人屋下个財物係用無誠實个手段得來个。佢等使用兩樣个秤仔㧯升斗；這係𠊎盡惱个。</verse>
				<verse number="11">用兩樣秤仔、袋等詭詐秤砣个人，𠊎樣能算佢無罪呢？</verse>
				<verse number="12">城肚个有錢人剝削窮人；底背个人民全部係落仔，緊講花撩。</verse>
				<verse number="13">因為你等犯罪，𠊎已經開始打擊你等，使你等受重傷。</verse>
				<verse number="14">你等食，總係食毋飽，肚笥還係空个。你等搶東西，總係保毋住；因為你等搶出來个，𠊎愛用戰爭來毀滅。</verse>
				<verse number="15">你等委種，總係無收成；你等榨橄欖油，總係無機會用；你等焗酒，總係享受毋到。</verse>
				<verse number="16">你等學 暗利 王㧯厥孻仔 亞哈 王个壞行為，繼續佢等个作風。所以𠊎愛使你等衰敗；別人愛藐視你等，侮辱你等 。」</verse>
			</chapter>
			<chapter number="7">
				<verse number="1">情形實在當慘！𠊎像一個餓肚笥个人，對無花果樹頂尋毋到賸下來个果子，在葡萄園尋毋到留下來个葡萄。所有个葡萄㧯初熟个無花果全部被人摘淨淨。</verse>
				<verse number="2">在這垤土地上，所有誠實正直个人全部死掉了；連一個對上帝忠心个人乜無。人人埋伏愛㓾人；儕儕愛鋪羅網害死自家个同胞。</verse>
				<verse number="3">佢等全部係做壞事个專家；官員㧯法官全部討紅包、由在人收買。有權勢个人㧯佢等結黨派，壞事行盡。</verse>
				<verse number="4">在佢等中間，就係最好心、最誠實个，也㧯竻仔共樣無麼介價值。 上帝審判佢个子民个日仔已經到了，這係佢以前識通過守望者 — 該兜先知向佢个子民警告个，這下佢等開始驚到無葛無煞。</verse>
				<verse number="5">你等毋好相信鄰舍，也毋好信任朋友，連對自家个𡜵娘講話都愛小心。</verse>
				<verse number="6">孻仔藐視阿爸；妹仔反對阿姆；心舅對抗家娘；你等个對敵就係自家屋下个人。</verse>
				<verse number="7">論到𠊎，𠊎愛仰望上主；𠊎愛等候上帝 — 𠊎个救主。𠊎个上帝會聽𠊎个祈禱。</verse>
				<verse number="8">𠊎等个敵人毋使偷偷仔歡喜。雖然𠊎等跌倒了，𠊎等還愛企起來。這下𠊎等雖然在烏暗中，總係上主愛做𠊎等个光。</verse>
				<verse number="9">𠊎等識得罪上主，所以，𠊎等這下一定愛忍受佢个大發譴。總係最尾，佢會代𠊎等辯護，為𠊎等伸冤。佢會帶𠊎等進入光明；𠊎等會親身看到佢个拯救。</verse>
				<verse number="10">該時，𠊎等个敵人看到，一定會感覺見笑。佢等識問𠊎等：「上主 — 你等个上帝在㖠位？」𠊎等會親目看到佢等被人打橫，像街路上个泥糜由在人踐踏。</verse>
				<verse number="11">耶路撒冷 人啊，重建城牆个時間會到了！該時，你等國家个土地會加盡大。</verse>
				<verse number="12">你等个同胞愛對逐所在轉來。佢等對東方个 亞述 、南方个 埃及 、 幼發拉底 河个地區、大海該片、山嶺該片，全部趕轉來。</verse>
				<verse number="13">總係，該兜所在愛變做荒地，因為該位个人民全部邪惡。</verse>
				<verse number="14">上主啊，求你牧養你自家所選个子民！佢等孤孤單單住在樹林中，無好享受四周圍盡肥个牧場。求你俾佢等去 巴珊 㧯 基列 ，像以前共樣，在豐富个草場得到牧養。</verse>
				<verse number="15">上主啊，求你為𠊎等顯出神蹟，像以前你帶𠊎等出 埃及 个時共樣。</verse>
				<verse number="16">雖然列國有強大个力量，總係佢等看到你个大能力就會嚇倒見笑，毋敢講、毋敢聽。</verse>
				<verse number="17">佢等會像蛇哥舐泥、在地上趖；佢等會驚到爬出城堡，在上主 — 𠊎等个上帝面前愊愊掣。</verse>
				<verse number="18">上帝啊，無其他个神㧯你比抑得；你赦免還賸个子民。你無永遠發譴；你歡喜用不變个慈愛款待𠊎等。</verse>
				<verse number="19">你愛再一擺痛惜𠊎等。你愛將𠊎等个罪踏在腳下，㧹入海底。</verse>
				<verse number="20">就像頭擺你應許𠊎等个祖先，你愛對 亞伯拉罕 㧯 雅各 个後代顯明信實㧯不變个慈愛。</verse>
			</chapter>
		</book>
		<book number="34">
			<chapter number="1">
				<verse number="1">下背係有關 尼尼微 个信息，係記錄 伊勒歌斯 人 那鴻 所看到个異象。</verse>
				<verse number="2">上主係當惱邪惡个上帝，毋准人㧯佢對立； 上主實行報復，譴起來非常厲害。 佢責罰㧯佢作對个人； 佢向佢个仇敵大發譴。</verse>
				<verse number="3">上主無隨便發譴，總係大有能力； 佢絕對毋會將有罪个準做無罪。 上主行過个所在，就捲起暴風㧯龍捲風； 雲係佢經過个時腳下个灰塵。</verse>
				<verse number="4">佢責備海，海就燥掉； 佢使江河變到燥燥。 佢使 巴珊 个草場枯乾， 迦密 山變黃， 黎巴嫩 个花謝掉。</verse>
				<verse number="5">群山在上主面前緊顫； 山岡也在佢个面前鎔掉。 上主出現，地就震動； 全世界攏總愊愊掣。</verse>
				<verse number="6">佢一發譴，麼人企得住呢？ 佢个怒氣，麼人奈得何呢？ 佢个發譴像火燒到當猛； 巖石在佢面前裂到碎碎。</verse>
				<verse number="7">上主係至善个， 佢保護在患難中个子民； 佢照顧該兜信靠佢个人。</verse>
				<verse number="8">佢像發大水，徹底消滅佢个敵人 ； 佢將㧯佢作對个人逐入去陰間。</verse>
				<verse number="9">你等設麼介陰謀來反對上主呢？ 佢定著會將你等毀滅到淨淨； 無人有可能再反抗佢一擺。</verse>
				<verse number="10">像繷絞絞个竻仔㧯燥燥个麥稈， 你等酒醉个人會被火燒淨淨！</verse>
				<verse number="11">尼尼微 啊，對你該位有一個詭計多端个人出來，陰謀攻擊上主。</verse>
				<verse number="12">上主對佢个子民 猶大 恁樣講：「 亞述 人雖然又強又多，佢等會受毀滅，被人除掉。𠊎个子民啊，𠊎識使你等受苦，總係𠊎毋會再喊你等受苦了。</verse>
				<verse number="13">𠊎這下愛結束 亞述 對你等个管轄，打斷捆你等个鎖鍊。」</verse>
				<verse number="14">下背係上主關係 亞述 人个宣告：「屬你等名下个人無好傳種。𠊎愛除掉你等神廟中个偶像。𠊎愛為你等預備塚埔，因為你等壞到無資格生存！」</verse>
				<verse number="15">看啊，有報好消息个人攀山過嶺來！佢來報和平个好消息！ 猶大 人啊，愛慶祝你等个節期，向上帝還你等所起个願！壞人毋會再來侵犯你等个土地。佢等已經全部消滅了。</verse>
			</chapter>
			<chapter number="2">
				<verse number="1">尼尼微 啊， 該愛毀滅你个來攻擊你了！ 愛集中全力，顧好城堡！ 愛嚴防通路，準備相㓾！</verse>
				<verse number="2">(上主愛恢復 雅各 个光榮，像 以色列 个光榮共樣，雖然打劫个將佢等打劫到淨淨，將佢等个葡萄園毀壞了。)</verse>
				<verse number="3">敵人个軍隊拿等紅盾牌，著紅制服； 佢等當準備愛進攻。 佢等个戰車金到皓光！ 佢等个戰馬雄壯緊猋 ！</verse>
				<verse number="4">戰車在街項猋到像飛， 在廣場頂高撞來撞去。 它兜个形狀像火把， 又像𥍉爧恁樣飛射。</verse>
				<verse number="5">官長被王喊去； 佢等搖搖擺擺走等來。 侵入者盡撞城牆， 佢等就架起保護个大盾牌。</verse>
				<verse number="6">水庫崩裂； 王宮橫掉。</verse>
				<verse number="7">王后被人侮辱、捉走； 宮女捶心肝悲傷緊噭， 噭聲像月鴿仔。</verse>
				<verse number="8">尼尼微 城像水庫崩掉共樣， 人民逃難像水庫水大瀉。 有人緊喊：毋好走！毋好走！ 總係無人回頭。</verse>
				<verse number="9">搶銀仔！ 搶金仔！ 城肚有堆山个財寶！ 到處有逐樣个寶物！</verse>
				<verse number="10">尼尼微 毀滅了，滿片空空荒涼！ 人心嚇到跔掉， 膝頭緊顫，氣力消失， 面色癧青。</verse>
				<verse number="11">該隻大城這下在㖠位？ 該隻像獅仔个窿、 餵細獅仔个地方在㖠位？ 公獅母獅出入、 細獅仔自由自在个地方在㖠位？</verse>
				<verse number="12">公獅打來个獵物， 擘給母獅㧯細獅仔； 窿肚堆滿正擘碎个肉。</verse>
				<verse number="13">上主 — 萬軍个元帥講：「 尼尼微 啊，𠊎係你个敵人；𠊎愛燒掉你个戰車。你該兜少壯獅仔愛被刀劍吞滅；𠊎愛將你對別人該位搶來个東西搶走。無人再聽到你該兜使者个聲了。」</verse>
			</chapter>
			<chapter number="3">
				<verse number="1">慘了，這流人血个城市！ 全城充滿詐欺㧯強暴； 滿遍有人搶劫，毋識停。</verse>
				<verse number="2">鞭聲嗶啪響！車輪𠾐𠾐滾！ 戰馬猋像飛！戰車呯呯走！</verse>
				<verse number="3">騎兵衝鋒，刀光劍影！ 身屍堆山，屍骨無數； 人行挺動，就逕跌倒。</verse>
				<verse number="4">妓女 尼尼微 愛受責罰； 姖打扮到靚靚來迷人。 姖个淫亂引誘列國； 姖行邪術欺騙萬族。</verse>
				<verse number="5">上主 — 萬軍个元帥講： 尼尼微 啊，𠊎係你个敵人； 𠊎愛掀你个裙仔，來幪你个面， 俾列國看到你赤身露體， 俾萬民看到你恁見笑。</verse>
				<verse number="6">𠊎愛將屙糟東西豁在你身上， 恁樣羞辱你； 人愛目盯盯看等你。</verse>
				<verse number="7">看到你个人嚇到打亂退。 佢等講： 尼尼微 荒掉了！ 有麼人同情姖呢？ 麼人肯安慰姖呢？</verse>
				<verse number="8">尼尼微 啊，你有比 埃及 个首都 底比斯 較強麼？姖有一條河溝圍等姖，像城牆恁樣保護姖 — 尼羅 河係姖个防備。</verse>
				<verse number="9">古實 㧯 埃及 係姖个力量；姖个權力無窮。 弗 㧯 利比亞 係姖个同盟國。</verse>
				<verse number="10">總係 底比斯 个人民卻被人捉到外國去了。佢等个孲𤘅仔在街頭巷尾被人抨死；佢等个大官貴人被鐵鍊鎖等，被人用拈鬮來分配、然後帶走。</verse>
				<verse number="11">尼尼微 啊，你也會醉到迷迷痴痴；你也會想愛閃你个敵人。</verse>
				<verse number="12">你个城堡全部像無花果樹，滿滿熟水个果子，樹一搖，果子就跌落人个嘴孔肚！</verse>
				<verse number="13">你个戰士全部像軟弱个細妹仔。你無法度在敵人面前保衛城門；你个門閂會被火燒掉。</verse>
				<verse number="14">你愛囤水，防備敵人包圍！你愛加強防備！你愛踏泥做磚，預備磚模！</verse>
				<verse number="15">你無論樣般做，還係愛被人燒死，抑係被人㓾死。你會像農作物被草蜢食到光光。 頭擺你𫱔子像草蜢恁遽恁多；</verse>
				<verse number="16">你做生理个人比天頂个星仔較多！總係這下全部像草蜢退殼飛走了 。</verse>
				<verse number="17">你个領袖像一群草蜢，寒天囥在牆縫肚，日頭一出來就全部飛走；無人知牠兜到㖠位去。</verse>
				<verse number="18">亞述 皇帝啊，你該兜大臣全部橫掉；你个官員全部睡死了。你个人民分散在山肚，無人帶佢等轉來。</verse>
				<verse number="19">你个損傷無法度補救；你个傷口無法度醫好。所有聽到你壞消息个人全部歡喜拍手。你長久个暴行，有麼人無受過你个屙糟災呢？</verse>
			</chapter>
		</book>
		<book number="35">
			<chapter number="1">
				<verse number="1">下背係上主向先知 哈巴谷 所啟示个信息。</verse>
				<verse number="2">上主啊，𠊎愛求你幫助幾久，你正會聽？𠊎愛大聲喊你幾久，你正會救𠊎等離開強暴呢？</verse>
				<verse number="3">你做麼介愛𠊎看到恁罪惡个事？你樣般做得由在這種壞事發生呢？在𠊎面前全部係毀壞、強暴，逐所在攏總係相爭、相打。</verse>
				<verse number="4">法律無效，無實行出來；正義一直得毋到伸張。壞人欺負義人，正義受歪曲。</verse>
				<verse number="5">上主對佢个子民講：「注意看你等四周圍个國家，你等會當著驚。𠊎愛在你等个時代做一件事，你等聽到个時會毋敢相信。</verse>
				<verse number="6">𠊎愛使當兇、殘暴个 巴比倫 人強盛起來。佢等愛征服世界，佔領別人个土地。</verse>
				<verse number="7">佢等威武殘忍、盡得人驚；佢等目中無人，自家个意思當做法律。</verse>
				<verse number="8">「佢等个馬比豹仔走較遽，比肚飢个豺狼還較惡。佢等个騎兵對遠方來；佢等猋等來，就像鷂婆衝下來挾食物。</verse>
				<verse number="9">「佢等个軍隊威風凜凜向前進，所到个地方，逐儕驚到會死 。佢等捉到个人像沙仔恁多。</verse>
				<verse number="10">佢等嘲謔君王㧯官長。所有个防備全部擋佢等毋住；佢等起土堆，將城堡攻下來。</verse>
				<verse number="11">佢等像風差恁樣掃過去；這兜罪人將自家个力量準做神明。」</verse>
				<verse number="12">上主啊，你對太初就係上帝。你係𠊎个上帝，係神聖个，永遠个。上主 — 𠊎个保護者啊，你揀選 巴比倫 人，使佢等強壯，來責罰𠊎等。</verse>
				<verse number="13">總係，你樣般做得由在這兜悖逆、邪惡个人呢？你个目珠當聖潔；你絕對毋會看等罪惡，由在人民做壞事。恁樣，佢等毀滅比自家較公正个人，你做麼介毋講話呢？</verse>
				<verse number="14">你樣般做得將人民準做海肚个魚，抑係一群無領袖指揮个爬蟲呢？</verse>
				<verse number="15">巴比倫 人用鉤仔鉤人，像釣魚仔共樣；佢等用網仔網人，網到人就歡喜快樂！</verse>
				<verse number="16">佢等甚至拜佢等个網仔，向網仔獻祭燒香，因為該兜網仔帶給佢等豐富个生活㧯食物。</verse>
				<verse number="17">敢講愛由在佢等一直將網仔拚淨，㓾萬民，無半點憐憫个心嗎？</verse>
			</chapter>
			<chapter number="2">
				<verse number="1">𠊎愛企在守望台，等等看上主愛對𠊎講麼介，看佢 愛樣般回答𠊎个怪怨。</verse>
				<verse number="2">上主恁樣應𠊎：「你愛將𠊎所啟示你个清清楚楚寫在石版上，俾報消息个人緊走緊讀出來 。</verse>
				<verse number="3">𠊎喊你先寫下來，因為啟示實現个日期還吂到。總係時間就會到了，𠊎所指示給你个當遽就會實現。你可能會感覺忒慢，總係等等來看啊，事情一定會發生，毋會延纏。</verse>
				<verse number="4">這係𠊎啟示你个信息：『自高自大个人，心肚無正直 ；總係義人會因為有信心 來得到生命。』」</verse>
				<verse number="5">財富 使人奸詐、驕傲，得毋到安息。佢等个貪心像陰間恁大，像死个權勢恁樣，永遠毋會滿足。莫怪佢等愛佔領萬國、統一萬民。</verse>
				<verse number="6">被佢等佔領个人民愛咒詛、嘲謔佢等講：「你等佔別人个東西變做自家个，你等會有災難了！你等收高利息、發橫財還愛到幾久呢？」</verse>
				<verse number="7">在你無想到个時，你這佔領別人个人會變做揹債个人，會被人強迫還高利。仇敵會來㩢衰你；佢等會來搶你！</verse>
				<verse number="8">你識搶盡多國家个人民，這下該兜還生个人愛來搶你。這個事會發生；因為你㓾人，你侵犯佢等个土地㧯城市，並所有住在其中个人。</verse>
				<verse number="9">你會有災難了！你用搶劫使自家好額。你在高高个所在做竇想愛逃避災難。</verse>
				<verse number="10">總係你个詭計害你个家堵到見笑；你毀滅盡多國家个人民，反轉自家招來毀滅。</verse>
				<verse number="11">連牆頭頂个石頭也盡喊愛攻擊你，棟樑也共下應聲。</verse>
				<verse number="12">你會有災難了！你用罪惡起城，用兇殺建立都市。</verse>
				<verse number="13">列國个打拚、萬民个勞碌做一下被火燒淨淨，全部變做空空。這係上主 — 萬軍元帥个作為。</verse>
				<verse number="14">總係，就像大海充滿海水，大地會充滿對上主榮光个認識。</verse>
				<verse number="15">你會有災難了！你發譴个時迫你个鄰舍食酒醉，愛看佢赤身露體。</verse>
				<verse number="16">你也會盡見笑，光榮毋見掉。你自家愛醉到顛來顛去 。上主愛使你啉你受責罰个杯；你个光榮會變做見笑。</verse>
				<verse number="17">你斬掉 黎巴嫩 个樹林，這下你愛被人斬掉。你殺害樹林中个動物，這下你愛被動物害死 。這個事會發生；因為你㓾人，你侵犯佢等个土地㧯城市，並所有住在其中个人。</verse>
				<verse number="18">偶像有麼介用呢？它係人所刻个；引誘人講花撩定定。造它个人去相信它，到底有麼介好處呢？它連講話都毋會！</verse>
				<verse number="19">你會有災難了！你對一垤樹頭講：「好醒了！」對一垤啞仔石頭講：「䟘起來啊！」偶像能啟示你麼介呢？愛知，它雖然外表用金銀包等，底背卻無生命。</verse>
				<verse number="20">總係上主在佢个聖殿當中； 地上萬民愛在佢面前恬靜！</verse>
			</chapter>
			<chapter number="3">
				<verse number="1">這係先知 哈巴谷 个祈禱，調用流離歌：</verse>
				<verse number="2">上主啊，𠊎聽到你个名聲， 心中就充滿敬畏。 求你在𠊎等个時代重新做你做過个大事， 在這兜年間顯明出來； 求你在大發譴个時還記得憐憫。</verse>
				<verse number="3">上帝愛再對 以東 來； 神聖个上帝愛對 巴蘭 山來。 佢个榮光遮蓋天； 大地充滿頌讚佢个聲音。</verse>
				<verse number="4">佢燦爛親像日頭。 佢个手中囥等大能力； 光線對佢手中射出來。</verse>
				<verse number="5">在佢頭前有發瘟； 在佢後背有致死个病。</verse>
				<verse number="6">佢一停下來，大地就挺動； 佢一注目看，萬國就緊顫。 長久存留个群山會崩掉； 一直存在个山岡會沈掉； 這兜係佢古時行過个所在 。</verse>
				<verse number="7">𠊎看到 古珊 人在帳篷肚有災難， 米甸 人在帳幕中愊愊掣。</verse>
				<verse number="8">上主啊，係毋係河壩惹你發譴？ 係毋係大海激你受氣？ 你騎等雲像騎馬來， 駛等烏雲个戰車， 愛帶勝利給你个子民。</verse>
				<verse number="9">你抽出弓，準備射箭； 你用河壩使大地裂開。</verse>
				<verse number="10">群山一看到你，就緊顫； 大水對天頂倒等下來。 深淵吼吼滾， 波浪沖上天。</verse>
				<verse number="11">你个快箭一射，𥍉爧个槍一動， 日頭㧯月光全部停下來。</verse>
				<verse number="12">你在發譴之下𨃰過大地； 你在憤怒當中踐踏萬國。</verse>
				<verse number="13">你出去拯救你个子民， 去拯救你選立个君王 。 你打橫壞人个領袖， 徹底消滅佢个部下 。</verse>
				<verse number="14">佢个軍隊像大風差吹散𠊎等， 像惡霸歡喜吞食囥等个窮人； 總係你用佢个槍 刺穿佢个將軍 。</verse>
				<verse number="15">你騎馬踐踏大海， 海水就翻滾。</verse>
				<verse number="16">𠊎一聽到就全身緊顫， 嘴唇也愊愊掣。 𠊎个骨頭鬆掉， 腳步行毋在。 𠊎只有恬恬等災難个日仔來到， 該時上帝愛責罰攻擊𠊎等个人民。</verse>
				<verse number="17">就算無花果樹無結果子， 葡萄樹也無打葡萄； 就算橄欖樹無打橄欖， 田地無出產五榖； 就算羊群死淨淨， 牛欄肚無半隻牛；</verse>
				<verse number="18">𠊎還係愛因為上主歡喜， 因為上帝 — 𠊎个救主快樂。</verse>
				<verse number="19">至高个上主賜給𠊎力量。 佢使𠊎像鹿乸腳步安穩； 佢使𠊎在高山頂自由自在。 這歌交給聖歌隊長，用絲弦个樂器伴奏。</verse>
			</chapter>
		</book>
		<book number="36">
			<chapter number="1">
				<verse number="1">下背係 亞們 个孻仔 約西亞 做 猶大 王个時代，上主啟示給 西番雅 个信息。 西番雅 係 古示 个孻仔， 基大利 个孫仔， 亞瑪利雅 个曾孫， 希西家 王 个玄孫。</verse>
				<verse number="2">上主講：「𠊎愛徹底對地上除滅萬物。</verse>
				<verse number="3">𠊎愛除滅人類㧯走獸，空中个鳥仔㧯海肚个魚。𠊎愛使壞人橫掉 ；𠊎愛將人類對地上剪除。𠊎 — 上主恁樣宣佈了。</verse>
				<verse number="4">「𠊎愛伸手責罰住在 耶路撒冷 㧯 猶大 个百姓。𠊎愛剪除該地方拜 巴力 个情況，無人會記得該兜事奉 巴力 个祭司。</verse>
				<verse number="5">𠊎愛消滅該兜上到屋頂去拜日、月、星辰个人。𠊎也愛消滅該兜敬拜𠊎、向𠊎發誓，又向 米勒公 發誓个人。</verse>
				<verse number="6">𠊎愛消滅該兜斡頭無愛再跈𠊎、㧯該兜毋尋𠊎、毋求𠊎个人。」</verse>
				<verse number="7">愛在至高个上主面前恬靜，因為上主審判个日仔會到了。上主準備牲儀，將佢个人客分別為聖了。</verse>
				<verse number="8">上主講：「在𠊎拿自家个子民來獻祭該日，𠊎愛責罰領袖、王子，㧯一切學外邦風俗个人。</verse>
				<verse number="9">在該日，𠊎愛責罰該兜敬畏假神、入神廟毋敢踏門檻个人 ；佢等想愛將強暴㧯詭詐搶來个東西堆滿佢等个神廟 。」</verse>
				<verse number="10">上主講：「在該日，你等會聽到在 耶路撒冷 个 魚門 有哀噭个聲，在城个新區有盡嘶个噭聲，山岡頂有崩山个大響聲。</verse>
				<verse number="11">住在低窩地區个人啊，愛大聲噭！因為 迦南 个生理人攏總會滅亡，用銀仔做買賣个全部受剪除。</verse>
				<verse number="12">「該時，𠊎愛用燈火搜查 耶路撒冷 。𠊎會責罰該兜自滿、像清酒留在沈底个酒渣頂个人；佢等心肚想：『上主毋會賜福，也毋會降禍。』</verse>
				<verse number="13">佢等个財寶會被人搶走，佢等个屋被人拆掉；佢等永遠無法度住自家所起个屋，啉毋到自家葡萄園出產个酒。」</verse>
				<verse number="14">上主个大日仔會到了，盡遽就會到！該日係悲慘个一日。該時，連最勇敢个戰士也會痛苦到喊阿姆𡟓噢！</verse>
				<verse number="15">該日係發譴个日仔，係急難痛苦个日仔，係荒廢滅亡个日仔，係烏天暗地个日仔，係烏雲遮滿大地个日仔。</verse>
				<verse number="16">該日會充滿相㓾个聲，係攻擊堅固城㧯高塔个日仔。</verse>
				<verse number="17">上主講：「𠊎愛降這兜災難在人个身項，使佢等像瞙目个人尋無路好行共樣。佢等得罪𠊎，所以佢等个血會像垃圾水被人倒掉，佢等个身屍會像糞被人㧒掉。」</verse>
				<verse number="18">在上主發譴个日仔，佢等个金銀救佢等毋到。佢熱情个火愛盡遽燒掉全世界，徹底消滅世間人。</verse>
			</chapter>
			<chapter number="2">
				<verse number="1">毋知見笑个國民啊，愛聚集共下，好醒了！</verse>
				<verse number="2">趕審判吂判決以前，就像礱糠吂掃掉以前，在上主大發譴个日仔吂臨到你等以前，遽遽醒過來！</verse>
				<verse number="3">世上所有謙卑聽從佢命令个人啊，愛尋上主！愛追求公義，在上主面前謙卑，恁樣在上主發譴个日仔，你等可能會得到庇佑。</verse>
				<verse number="4">迦薩 城會被人廢掉， 亞實基倫 會變荒涼。 亞實突 人會在當晝被人逐走；住在 以革倫 个人也會被人逐出城外。</verse>
				<verse number="5">住在海滣个 基利提 族啊，你等慘了！ 迦南 — 非利士 人个土地啊，上主已經向你宣判，佢愛消滅你，毋留半儕。</verse>
				<verse number="6">你等海滣个地區愛變做草場，頂高有牧人个草寮㧯羊欄。</verse>
				<verse number="7">還賸个 猶大 人會佔領你等个土地；佢等會在該位畜羊，暗晡頭在 亞實基倫 个屋肚睡目。上主 — 佢等个上帝愛看顧佢等，俾佢等倒轉來重整家園。</verse>
				<verse number="8">上主 — 萬軍个元帥恁樣講：「𠊎聽到 摩押 人个嘲謔，㧯 亞捫 人个譭謗；佢等嘲謔𠊎个子民，誇口講愛霸佔佢等个土地。</verse>
				<verse number="9">𠊎係 以色列 永生个上帝；𠊎發誓： 摩押 一定會像 所多瑪 ， 亞捫 會像 蛾摩拉 ，全部變做鹽窟，永遠荒廢，雜草滿地。𠊎該兜還賸个子民愛搶佢等，得到佢等个土地。」</verse>
				<verse number="10">摩押 㧯 亞捫 个人會恁樣受責罰；因為佢等驕傲、自誇，又侮辱上主 — 萬軍元帥个子民。</verse>
				<verse number="11">上主會使佢等驚到愊愊掣。佢愛除掉世上所有个神明，恁樣列國㧯海島个人逐儕就會在自家个地方敬拜佢。</verse>
				<verse number="12">上主也愛㓾掉 古實 人。</verse>
				<verse number="13">上主愛伸手攻打北方，消滅 亞述 ；佢愛使 尼尼微 城變做荒涼，像當燥个曠野。</verse>
				<verse number="14">尼尼微 會成做牛羊㧯各種走獸歇睏个所在；貓頭鳥會在爛屋肚个柱頭做藪，在窗門口咕咕滾；烏鴉也在壞門段前亂吵；香柏樹樑柱露出來 。</verse>
				<verse number="15">這一切會發生在這个城，因為姖誇口自家个能力，恅到自家最安全，對自家講：「𠊎係世上最偉大个城。」總係，姖愛變做荒涼，變做走獸歇睏个所在；逐個過路人指指點點嘲謔姖。</verse>
			</chapter>
			<chapter number="3">
				<verse number="1">這悖逆、腐敗、欺負人个城慘了！</verse>
				<verse number="2">姖毋聽從上主个命令，也毋接受佢个管教。姖毋倚靠上主，也毋親近姖个上帝。</verse>
				<verse number="3">姖該兜做官个像吼吼滾个獅仔；姖該兜審判官貪心到像暗晡時當枵个豺狼，連一枝骨頭乜無留到天光。</verse>
				<verse number="4">姖該兜先知無負責任，又詭詐；姖該兜祭司打垃圾聖物，曲解上帝个法律。</verse>
				<verse number="5">總係上主還係在這城肚；佢行公義，絕對毋會做不義个事。逐朝晨，佢向佢个子民顯明公義，從來毋識停止；總係不義个人民繼續犯罪，毋知見笑。</verse>
				<verse number="6">上主講：「𠊎消滅列國，蹂踏佢等个城市，將佢等个城樓變做石堆，路項無人上下。𠊎使佢等个城市荒涼，街路空空，無留半儕。</verse>
				<verse number="7">𠊎恅到該時𠊎个子民一定會尊敬𠊎，接受管教，永遠記得𠊎給佢等个教訓！總係過無幾久，佢等又還較厲害做壞事了！」</verse>
				<verse number="8">上主講：「你等定著愛等，等𠊎䟘起來告列國該日。𠊎已經決定召集列國萬邦前來，將𠊎个大發譴全部倒在佢等身上。𠊎熱情个火愛燒滅全世界。</verse>
				<verse number="9">「該時，𠊎愛改變萬民，俾佢等全部用淨浰个話來祈求𠊎，同心合意事奉𠊎。</verse>
				<verse number="10">𠊎所分散个子民，連在遠遠个 古實 河壩該位个，也愛倒轉來向𠊎獻祭。</verse>
				<verse number="11">到該時，𠊎个子民啊，你等毋使因為悖逆𠊎个事感覺到見笑；因為𠊎愛對你等中間除掉所有驕傲个人。在𠊎个聖山，你等毋會再自高自大。</verse>
				<verse number="12">𠊎愛在你等當中留下謙卑、困苦个人；佢等會到𠊎面前來求𠊎保護。</verse>
				<verse number="13">所賸个該兜 以色列 人，毋會再做壞事，毋會講花撩，乜無詭詐。佢等會安居樂業，毋會再驚麼人。」</verse>
				<verse number="14">錫安 个子民啊，應當唱歌！ 以色列 人啊，應當大聲喊！ 耶路撒冷 个百姓啊， 應當滿心歡喜快樂。</verse>
				<verse number="15">上主已經解除你个責罰， 已經逐走你所有个仇敵。 上主 — 以色列 个王㧯你共下， 你毋使再驚會有麼介災禍。</verse>
				<verse number="16">在該日會有人對 耶路撒冷 講： 錫安 啊，毋使驚！ 毋使驚到手軟腳攋！</verse>
				<verse number="17">上主 — 你个上帝㧯你共下； 佢个大能使你得勝。 佢愛在你當中歡喜快樂； 佢个痛惜愛賜你新个生命 。 佢愛因你歡喜唱歌，</verse>
				<verse number="18">像人在過節个時恁歡喜 。 上主講：𠊎已經停掉災禍个威脅， 除掉你个見笑 。</verse>
				<verse number="19">時節到了！ 𠊎愛責罰一切欺負你个人； 𠊎愛拯救軟弱、失散个人， 使流亡个人倒轉自家个家園。 𠊎愛使佢等个見笑變做榮耀； 佢等在全世界會有好名聲。</verse>
				<verse number="20">時節到了！ 𠊎愛將你等四散个子民𢱋轉來； 𠊎愛在你等眼前恢復你等个產業， 使你等个名聲傳到天下萬民。 上主恁樣宣佈了。</verse>
			</chapter>
		</book>
		<book number="37">
			<chapter number="1">
				<verse number="1">大流士 做 波斯 皇帝个第二年六月初一 ，上主通過先知 哈該 向 撒拉鐵 个孻仔 猶大 省長 所羅巴伯 㧯 約撒答 个孻仔大祭司 約書亞 講話。</verse>
				<verse number="2">上主 — 萬軍个元帥對 哈該 恁樣講：「這兜人民講：『這下毋係重建上主聖殿个時節。』」</verse>
				<verse number="3">該時，上主通過先知 哈該 將以下个話㧯人民講。</verse>
				<verse number="4">佢講：「你等住恁靚个屋仔，總係𠊎个聖殿還恁荒涼！</verse>
				<verse number="5">這下𠊎 — 上主、萬軍个元帥愛你等反省自家个行為。</verse>
				<verse number="6">你等委種多，總係收成少；你等有飯食，總係食毋飽；你等有酒啉，總係啉毋罅；你等有衫著，總係著毋燒；做工賺到个錢，總係毋罅生活 。</verse>
				<verse number="7">「𠊎 — 上主、萬軍个元帥愛你等反省自家个行為。</verse>
				<verse number="8">這下你等愛上山取樹料，來起聖殿；恁樣，𠊎就歡喜，又得到尊榮。這係𠊎 — 上主講个。</verse>
				<verse number="9">「你等望豐收，結果收成少；收成帶轉屋下，𠊎一歕就無半些。𠊎 — 上主、萬軍个元帥愛問：麼介理由呢？因為𠊎个聖殿荒涼，總係你等全部為到自家个屋舍無閒直掣。</verse>
				<verse number="10">所以，因為你等个緣故，天毋降甘露，地毋出土產。</verse>
				<verse number="11">𠊎命令旱災臨到大地，包含山、田、葡萄園、橄欖園、地上个出產、人民、頭牲、㧯人手中勞碌得來个一切。」</verse>
				<verse number="12">該時， 所羅巴伯 、大祭司 約書亞 㧯所有賸下來个人民聽從上主 — 佢等上帝个命令，也聽從上主个使者 — 先知 哈該 个話去做；人民就敬畏上主。</verse>
				<verse number="13">上主个使者 哈該 向人民宣告上主个信息，講：「𠊎 — 上主㧯你等共下。」</verse>
				<verse number="14">上主感動 猶大 省長 所羅巴伯 、大祭司 約書亞 ，㧯所有賸下來个人民；佢等就來為到上主、萬軍个元帥 — 佢等个上帝開工重建聖殿。</verse>
				<verse number="15">該時係 大流士 做皇帝个第二年六月二十四日。</verse>
			</chapter>
			<chapter number="2">
				<verse number="1">該年七月二十一，上主又通過先知 哈該 講話。</verse>
				<verse number="2">佢愛 哈該 去㧯 猶大 省長 所羅巴伯 、大祭司 約書亞 ，並該兜賸下來个人民講：</verse>
				<verse number="3">「你等當中有麼人還記得這聖殿頭擺係樣般榮光？這下係樣般形？敢毋係當看毋上眼？</verse>
				<verse number="4">總係， 所羅巴伯 啊，𠊎 — 上主勸你，你愛剛強！大祭司 約書亞 啊，你也愛剛強！這地方个人民啊，𠊎 — 上主乜勸你等，你等愛剛強，愛煞猛做工，因為𠊎 — 上主、萬軍个元帥㧯你等共下。</verse>
				<verse number="5">你等个祖先對 埃及 出來个時節，𠊎識㧯佢等 立這個約。𠊎个靈這下還係㧯你等共下，所以毋使驚。</verse>
				<verse number="6">「過無幾久，𠊎 — 上主、萬軍个元帥愛再一擺搖動天地、大海㧯陸地。</verse>
				<verse number="7">𠊎愛搖動萬國，將萬國个寶物帶到這位來，使這聖殿充滿榮耀。這係𠊎 — 上主、萬軍个元帥講个。</verse>
				<verse number="8">世間所有个銀仔、金仔全部屬𠊎 — 上主、萬軍个元帥。</verse>
				<verse number="9">這新起个聖殿會比舊个還較榮光；𠊎愛俾𠊎个人民在這位過安居樂業个生活。𠊎 — 上主、萬軍个元帥恁樣宣佈了。」</verse>
				<verse number="10">大流士 做皇帝第二年九月二十四日，上主 — 萬軍个元帥又㧯先知 哈該 講話。</verse>
				<verse number="11">佢講：「你去請教該兜祭司有關法律个問題：</verse>
				<verse number="12">若係有人拿出一垤分別為聖个肉，用佢个衫帕包起來，後來這衫帕憑到餅、湯、酒、橄欖油抑係別个食物，這兜食物算係聖物無？」 祭司應講：「毋算。」</verse>
				<verse number="13">哈該 又問：「若係有人憑到屍體，打垃圾自家，以後佢摸到這兜食物，這兜食物就算無淨浰係麼？」 祭司應講：「算無淨浰。」</verse>
				<verse number="14">所以， 哈該 就講：「上主講：『這情況做得適用在這國家个人民㧯佢等各樣个工作；佢等獻在祭壇頂个逐項東西全部係無淨浰个。』」</verse>
				<verse number="15">上主講：「今晡日，你等愛好好想看仔！吂開始重建聖殿以前个情形，</verse>
				<verse number="16">在該時節，有人來到榖堆，希望得到兩百公斤，正得到一百公斤。有人來到酒楻，想愛得到一百公升酒，正得到四十公升。</verse>
				<verse number="17">你等手所做个工作，𠊎用燒風、生菇、冰雹攻擊你等，你等還係毋肯悔改。</verse>
				<verse number="18">今晡日係九月二十四日 ，係聖殿打地基个日仔。你等愛好好想看仔！</verse>
				<verse number="19">雖然榖倉肚吂有榖，葡萄樹、無花果樹、石榴樹、橄欖樹還吂結果子，總係對今晡日開始，𠊎愛賜福給你等。」</verse>
				<verse number="20">共日，就係九月二十四該日，上主第二擺㧯 哈該 講話，</verse>
				<verse number="21">喊佢㧯 猶大 省長 所羅巴伯 講：「𠊎愛搖動天地。</verse>
				<verse number="22">𠊎愛推翻萬國，消滅佢等个勢力。𠊎愛㩳橫佢等个戰車㧯駛車个人；馬仔也愛橫死淨淨，騎兵互相殘殺。</verse>
				<verse number="23">𠊎个僕人 所羅巴伯 啊，在該日，𠊎 — 上主、萬軍个元帥愛選召你。像國王頓王印來統治，𠊎愛指派你，奉𠊎个名來統治，因為你係𠊎所揀選个。𠊎 — 上主、萬軍个元帥恁樣宣佈了。」</verse>
			</chapter>
		</book>
		<book number="38">
			<chapter number="1">
				<verse number="1">大流士 做 波斯 皇帝第二年八月，上主將下背个信息啟示給 易多 个孫仔、 比利家 个孻仔先知 撒迦利亞 。</verse>
				<verse number="2">上主 — 萬軍个元帥喊 撒迦利亞 傳話㧯人民講：「𠊎 — 上主、萬軍个元帥識向你等个祖先大發譴；總係𠊎這下對你等講：『你等愛轉向𠊎，𠊎就轉向你等。</verse>
				<verse number="3"></verse>
				<verse number="4">你等毋好像你等个祖先。以前个先知將𠊎 — 上主、萬軍元帥个信息㧯佢等講，喊佢等毋好再繼續過邪惡、犯罪个生活；總係佢等毋聽，也毋搭𠊎。</verse>
				<verse number="5">你等个祖先這下在㖠位呢？該兜先知會生到永遠嗎？</verse>
				<verse number="6">其實，𠊎通過𠊎个僕人，就係該兜先知，所命令又警告你等祖先个話，全部發生在佢等个身上。佢等正悔改；佢等承認𠊎 — 上主、萬軍个元帥係照自家个計劃，照佢等所行所做个責罰佢等了。』」</verse>
				<verse number="7">大流士 做皇帝个第二年十一月，就係細罷特月二十四 ，上主用異象將信息交給 易多 个孫仔、 比利家 个孻仔先知 撒迦利亞 。</verse>
				<verse number="8">在該暗晡𠊎看到一個人 騎等紅馬，停在山壢个石榴樹園中；佢後背有一群紅色、黃色㧯白色个馬。</verse>
				<verse number="9">有一個天使㧯𠊎講話；𠊎問佢：「主啊，該兜係麼介意思？」 佢講：「𠊎愛指示你該係麼介意思。」</verse>
				<verse number="10">然後，該停 在石榴樹園中个人講：「這兜係上主派來地上巡查个。」</verse>
				<verse number="11">該兜騎馬个就向企在石榴樹園中上主个天使報告，講：「𠊎等巡行全世界，發現全世界攏總平安無事。」</verse>
				<verse number="12">然後，上主个天使講：「上主 — 萬軍个元帥啊，你向 耶路撒冷 㧯 猶大 各城發譴已經七十年了，還愛過幾久正會憐憫它兜呢？」</verse>
				<verse number="13">上主用溫柔安慰个話回答該㧯𠊎講話个天使。</verse>
				<verse number="14">該天使就喊𠊎宣告：「上主 — 萬軍个元帥恁樣講：𠊎深深痛惜 耶路撒冷 — 𠊎个聖城 錫安 ，</verse>
				<verse number="15">總係𠊎對該兜享受安樂个國家大發譴。因為𠊎對𠊎子民略略仔發譴，它兜就增加𠊎子民个痛苦。</verse>
				<verse number="16">所以，𠊎轉到 耶路撒冷 ，愛憐憫這城。𠊎个聖殿一定愛重建，聖城一定愛整好。這係𠊎 — 上主、萬軍个元帥講个。」</verse>
				<verse number="17">天使又喊𠊎宣告：「上主 — 萬軍个元帥恁樣講：𠊎在 猶大 該兜城愛重新繁榮起來；𠊎愛再一擺安慰 錫安 ，揀選 耶路撒冷 做𠊎自家个城。」</verse>
				<verse number="18">𠊎在另外一個異象中看到四支角。</verse>
				<verse number="19">𠊎問先前㧯𠊎講話个天使：「這兜角有麼介意思？」 佢應講：「這兜角係打散 猶大 、 以色列 㧯 耶路撒冷 人民个勢力。」</verse>
				<verse number="20">後來上主又俾𠊎看到四個師傅。</verse>
				<verse number="21">𠊎問：「這兜人來做麼介？」 佢應講：「這兜師傅係來恐嚇列國並推翻它兜个勢力；因為列國破壞 猶大 个土地，打散 猶大 个人民。」</verse>
			</chapter>
			<chapter number="2">
				<verse number="1">在另外一個異象中，𠊎看到一個人，手拿等一條測量索。</verse>
				<verse number="2">𠊎問佢：「你愛去㖠位？」 佢講：「𠊎愛去量 耶路撒冷 ，看它有幾長、幾闊。」</verse>
				<verse number="3">㧯𠊎講話个天使行出去个時節，另外一個天使迎接佢。</verse>
				<verse number="4">頭一個天使對第二個天使講：「遽遽走去㧯該拿等測量索个青年講：『 耶路撒冷 會有盡多人㧯頭牲來住；它會像一個無城牆个城。</verse>
				<verse number="5">上主已經答應，佢愛成做一座火牆，圍等這城，保護它，也愛做它當中个榮光。』」</verse>
				<verse number="6">上主對佢个人民講：「𠊎識將你等分散到四面八方去。總係你這兜流亡个人啊，愛遽遽脫離 巴比倫 ，轉 耶路撒冷 來。</verse>
				<verse number="7"></verse>
				<verse number="8">麼人攻擊你等，就係攻擊到𠊎个目珠仁。」 所以，榮光个上主 — 萬軍个元帥差派𠊎將以下个信息㧯該兜搶佢人民个國家講：</verse>
				<verse number="9">「看啊，𠊎 — 上主愛親自攻擊你等；以前服事過你等个人愛搶劫你等。」 該時節，你等就會知上主 — 萬軍个元帥差派𠊎。</verse>
				<verse number="10">上主講：「 錫安 个人民啊，愛歡喜唱歌！因為𠊎愛來住在你等當中。」</verse>
				<verse number="11">該時，盡多國家愛歸向上主，成做佢个人民。佢愛住在你等當中，你等就會知上主 — 萬軍个元帥差派𠊎到你等該位去。</verse>
				<verse number="12">猶大 愛重新做屬上主个聖地；佢愛再一擺揀選 耶路撒冷 做聖城。</verse>
				<verse number="13">全人類應該在上主面前恭敬恬靜，因為上主對佢个聖所出來！</verse>
			</chapter>
			<chapter number="3">
				<verse number="1">在另外一個異象中，上主俾𠊎看到大祭司 約書亞 企在上主个天使面前，撒但 企在 約書亞 个右片，準備愛告 約書亞 。</verse>
				<verse number="2">上主个天使 㧯撒但講：「撒但，上主愛責備你！就係揀選 耶路撒冷 个上主愛責備你！這個人敢毋係像對火中抽出來个一支柴嗎？」</verse>
				<verse number="3">約書亞 著等屙糟个衫褲企在天使面前。</verse>
				<verse number="4">天使吩咐企在佢面前个部下講：「將這個人个屙糟衫褲脫掉。」又對 約書亞 講：「𠊎已經除掉你个罪，愛俾你著高貴个衫褲。」</verse>
				<verse number="5">𠊎出聲講：「愛將淨浰个帽仔戴在佢个頭那頂。」部下就將淨浰个帽仔戴在 約書亞 个頭那頂，㧯佢著高貴个衫褲；該時，上主个天使企在堘頭。</verse>
				<verse number="6">上主个天使警告 約書亞 講：</verse>
				<verse number="7">「上主 — 萬軍个元帥恁樣講：若係你遵守𠊎个法律，實行𠊎派你个任務，你就可以繼續管理𠊎个聖殿㧯庭院。𠊎也會給你權利出入𠊎个面前，像這兜企在𠊎面前个天使共樣。</verse>
				<verse number="8">大祭司 約書亞 啊，你愛聽！你个同伴，就係該兜成做好兆頭个祭司，也愛聽！𠊎愛啟示𠊎个僕人，就係被人喊做『樹枝』个 。</verse>
				<verse number="9">𠊎愛在 約書亞 面前放一垤寶石，這寶石有七面 。𠊎 — 上主、萬軍个元帥愛親自在這寶石面頂刻字 。𠊎也愛在一日內除掉這地方个罪惡。</verse>
				<verse number="10">到該日，你等逐儕愛請鄰舍來，到葡萄樹㧯無花果樹下背坐聊。這係上主 — 萬軍个元帥講个。」</verse>
			</chapter>
			<chapter number="4">
				<verse number="1">頭下㧯𠊎講話个天使又來喊醒𠊎，像睡當落覺被人喊醒。</verse>
				<verse number="2">佢問𠊎：「你看到麼介？」 𠊎應講：「一座純金个燈臺，頂高有一隻裝油个碗，燈臺頂有七盞燈，逐盞燈有七支燈心管。</verse>
				<verse number="3">油碗兩片有橄欖樹，一頭在右片，一頭在左片。」</verse>
				<verse number="4">𠊎問㧯𠊎講話个天使：「主啊，這兜東西代表麼介？」</verse>
				<verse number="5">㧯𠊎講話个天使應𠊎講：「你毋知這兜係麼介嗎？」 𠊎應講：「主啊，𠊎毋知。」</verse>
				<verse number="6">佢對𠊎講：「這係上主愛指示 所羅巴伯 个話。上主 — 萬軍个元帥講：『毋係靠權勢，毋係靠才能，只有靠𠊎个靈 。』</verse>
				<verse number="7">大山啊，你算麼介？在 所羅巴伯 面前，你定著會變做平地。佢將聖殿最後一垤石頭疊上去个時，眾人一定會大聲歡喜喊講：『還靚噢！願上主賜福！』」</verse>
				<verse number="8">上主个話又臨到𠊎講：</verse>
				<verse number="9">「 所羅巴伯 个手打好這聖殿个地基，佢也定著會親手完成這項工程。該時，你等 就會知係上主 — 萬軍个元帥差𠊎到你等這位來。</verse>
				<verse number="10">麼人失望因為這兜事情進行忒慢？佢等一看到 所羅巴伯 手拿線鉈起工，該時，佢等就會大歡喜。」 天使又對𠊎講：「這七盞燈代表上主个目珠，愛鑒察全世界。」</verse>
				<verse number="11">𠊎又問天使：「燈臺兩片，該兩頭橄欖樹又係麼介意思呢？</verse>
				<verse number="12">斟橄欖油个兩支金管个旁邊，該兩枝橄欖樹枝又係麼介意思？」</verse>
				<verse number="13">佢問𠊎：「你毋知這係麼介？」 𠊎講：「主啊，𠊎毋知。」</verse>
				<verse number="14">佢講：「這係兩個擇出來接受膏油个，愛來事奉普天下个主。」</verse>
			</chapter>
			<chapter number="5">
				<verse number="1">𠊎又看，這擺𠊎看到一卷書卷飛過天空。</verse>
				<verse number="2">天使問𠊎：「你看到麼介？」 𠊎應講：「𠊎看到一卷飛等个書卷，長有九公尺，闊有四公尺半。」</verse>
				<verse number="3">佢對𠊎講：「這係愛送去全世界个咒詛。一面寫等：『所有做賊个人，愛照書卷所寫个除掉』；一面寫等：『所有發假誓个人，也愛照書卷所寫个除掉。』</verse>
				<verse number="4">上主 — 萬軍个元帥恁樣講：𠊎愛將這兜咒詛發出去，進入做賊个㧯糮糝用𠊎名發假誓个人屋下。這咒詛愛留在佢等个屋下，將屋仔、連大樑、石頭全部毀滅。」</verse>
				<verse number="5">㧯𠊎講話个天使又出現，對𠊎講：「你目珠看頂高，又有東西出來囉！」</verse>
				<verse number="6">𠊎問：「這係麼介東西？」 佢講：「這係一隻量東西个籃仔；它代表全世界个罪惡 。」</verse>
				<verse number="7">這籃仔有一隻鉛做个蓋仔。𠊎看个時節，這蓋仔打開來，底背坐等一個女人！</verse>
				<verse number="8">天使講：「這女人就係代表邪惡。」佢就將這女人㩳入籃肚，將鉛蓋揜好。</verse>
				<verse number="9">接等𠊎又昂頭看，看到兩個女人向𠊎飛過來；姖等有當大个翼胛，像鸛鳥个翼胛。姖等將籃仔扛起來，飛到天空。</verse>
				<verse number="10">𠊎問㧯𠊎講話个天使：「姖等愛將籃仔扛到㖠位去？」</verse>
				<verse number="11">佢應講：「到 巴比倫 去。姖等愛在該位為到這籃仔起一座殿。殿起好以後，籃仔愛放在底背俾人拜。」</verse>
			</chapter>
			<chapter number="6">
				<verse number="1">𠊎又昂頭看到另外一個異象，看到有四輛戰車對兩座銅个山中間出來。</verse>
				<verse number="2">拖第一輛戰車个係紅馬，拖第二輛戰車个係烏馬。</verse>
				<verse number="3">拖第三輛个係白馬，拖第四輛个係有斑點个馬；逐隊个馬全部盡強壯。</verse>
				<verse number="4">𠊎就問㧯𠊎講話个天使講：「主啊，這兜戰車係麼介意思？」</verse>
				<verse number="5">天使應𠊎講：「這兜係天頂來个四陣風，係對普天下个主面前出來个。」</verse>
				<verse number="6">烏馬愛拖向北方到 巴比倫 去，白馬向西方去，有斑點个馬向南方去。</verse>
				<verse number="7">這兜強壯个馬一出來，就當想愛去全世界。天使吩咐牠兜講：「你等去巡查全世界！」牠兜就照吩咐去。</verse>
				<verse number="8">天使又大聲對𠊎講：「看啊！向北方到 巴比倫 去个馬，已經在該位俾上主个大受氣平靜下來！」</verse>
				<verse number="9">上主个話又臨到𠊎講：</verse>
				<verse number="10">「該兜倒轉來个人當中，你愛將 黑玳 、 多比雅 㧯 耶大雅 所獻个禮物，黏時帶到 西番雅 个孻仔 約西亞 个屋下去；這三儕係對 巴比倫 轉來个。</verse>
				<verse number="11">你愛用佢等所獻个金銀做一頂冕旒，戴在 約撒答 个孻仔大祭司 約書亞 个頭那頂。</verse>
				<verse number="12">你愛㧯佢講：上主 — 萬軍个元帥恁樣講：『看啊，該喊做「樹枝」个人 ，佢愛在自家个地方生出去，並重建上主个聖殿。</verse>
				<verse number="13">佢就係該愛起上主个聖殿、接受王个榮耀、坐在寶座頂、統治佢子民个該儕人。有一個祭司愛企在佢个寶座旁邊；佢兩儕會在和平中共下打拚 。』</verse>
				<verse number="14">這頂冕旒愛留在上主个聖殿做紀念品，紀念 黑玳 、 多比雅 、 耶大雅 㧯 西番雅 个孻仔 約西亞 。」</verse>
				<verse number="15">住在遠方个人愛轉來協助重建上主个聖殿。聖殿重建以後，你等就會知係上主 — 萬軍个元帥差派𠊎到你等這位來。若係你等完全遵守上主 — 你等上帝个命令，這事一定會實現。</verse>
			</chapter>
			<chapter number="7">
				<verse number="1">大流士 做皇帝个第四年九月，就係基斯流月初四 ，上主个話傳給 撒迦利亞 。</verse>
				<verse number="2">該時， 伯特利 人已經差派 沙利色 、 利堅‧米勒 㧯跈等佢等个人，到上主 — 萬軍个元帥个聖殿去，祈求上主賜福，</verse>
				<verse number="3">並向祭司㧯先知求問：「𠊎等係毋係愛像往年，在五月間禁食，為到聖殿被人毀掉來哀傷？」</verse>
				<verse number="4">以下係上主 — 萬軍个元帥傳給𠊎个話。</verse>
				<verse number="5">佢講：「你去㧯這地方个人民並祭司講，這七十年來，佢等在五月㧯七月禁食表示哀傷，敢有真心尊敬𠊎？</verse>
				<verse number="6">佢等食，佢等啉，全部係為到滿足佢等自家。」</verse>
				<verse number="7">這係上主通過以前个先知所警告个話。該時 耶路撒冷 當繁榮，逐位當多人；毋單淨在它四周圍个鄉鎮有人住，連南片地區㧯西片地區也攏總有人住。</verse>
				<verse number="8">以下係上主傳給 撒迦利亞 个話。佢講：</verse>
				<verse number="9">「𠊎 — 上主、萬軍个元帥識對你等个祖先吩咐講：『你等愛公正審判；大家用慈愛憐憫互相款待。</verse>
				<verse number="10">毋好欺負孤兒、寡婦、外族人㧯窮苦人；麼人都毋好存心害別人。』</verse>
				<verse number="11">「總係，佢等毋肯聽，做佢等斡頭，耳公塞等毋聽。</verse>
				<verse number="12">佢等个心像金剛石恁硬，毋遵守法律，又藐視𠊎 — 上主、萬軍个元帥用靈感動以前个先知所傳个教訓；所以𠊎向佢等大發譴。</verse>
				<verse number="13">𠊎㧯佢等講話，佢等毋聽；所以佢等向𠊎祈求，𠊎乜毋搭。</verse>
				<verse number="14">𠊎像係用狂風將佢等吹散到遠遠生份个國家去。恁樣，佢等使這恁好个土地變做一片荒涼、無人來往經過个所在。」</verse>
			</chapter>
			<chapter number="8">
				<verse number="1">上主 — 萬軍个元帥傳給 撒迦利亞 以下个話。</verse>
				<verse number="2">佢講：「 錫安 係𠊎深深痛惜个；因為𠊎當惜它个人民，所以𠊎對它个仇敵大發譴。」</verse>
				<verse number="3">上主又講：「𠊎這下愛轉到 錫安 山，住在 耶路撒冷 。人愛稱 耶路撒冷 做『誠實个城』，將上主 — 萬軍元帥个山稱做『聖山』。」</verse>
				<verse number="4">上主 — 萬軍个元帥恁樣講：「將來會再有老阿公、老阿婆坐在 耶路撒冷 街項，逐儕攏總手拄等杖仔。</verse>
				<verse number="5">城肚、街項會有當多个細阿哥仔、細阿妹仔在該位搞。」</verse>
				<verse number="6">上主 — 萬軍个元帥恁樣講：「到該日，所賸个人民會認為這種情況係無可能發生个事；總係對𠊎來講，這毋係無可能个。」這係上主 — 萬軍个元帥講个。</verse>
				<verse number="7">上主 — 萬軍个元帥恁樣講：「𠊎愛對東片、西片个國家將𠊎个人民拯救出來。</verse>
				<verse number="8">𠊎愛帶佢等轉來，俾佢等住在 耶路撒冷 城肚。佢等愛做𠊎个子民；𠊎愛做佢等个上帝，照信實、公平治理佢等。」</verse>
				<verse number="9">上主 — 萬軍个元帥恁樣講：「愛堅強！你等這下所聽到个話，就係重建𠊎个聖殿、開工打地基个時先知所講過个話。</verse>
				<verse number="10">在該日以前，無論係人抑係頭牲，做工拿毋到工錢；又因為敵人个緣故，出入無平安，因為𠊎使眾人互相攻擊。</verse>
				<verse number="11">總係這下𠊎無像以前恁樣對待所賸个人民。這係𠊎 — 上主、萬軍个元帥講个。</verse>
				<verse number="12">佢等會平平安安去委種；葡萄樹會結葡萄，土地會出產五榖，雨水充足。𠊎愛將這兜福氣賜給所賸个人民。</verse>
				<verse number="13">猶大 家㧯 以色列 家啊，過去在外族人中，你等樣般成做受咒詛个；總係，𠊎愛拯救你等，人愛稱你等做有福氣个。所以，你等愛堅強，毋使驚！」</verse>
				<verse number="14">上主 — 萬軍个元帥恁樣講：「你等个祖先惹𠊎發譴个時，𠊎決定降災難在佢等个身上，無改變心意。</verse>
				<verse number="15">這下𠊎照樣決定愛賜福給 耶路撒冷 㧯 猶大 个人民。所以你等毋使驚。</verse>
				<verse number="16">你等應當恁樣做：大家講話愛誠實；在城門口審判个時愛公正，使人和睦；</verse>
				<verse number="17">毋好存心害別人；毋好做假見證。這兜事全係𠊎 — 上主所惱个。」</verse>
				<verse number="18">上主 — 萬軍个元帥又將話傳給𠊎。佢講：</verse>
				<verse number="19">「在四月、五月、七月、十月个禁食，愛成做 猶大 人歡喜快樂个節期。你等愛歡喜誠實㧯和平。」</verse>
				<verse number="20">上主 — 萬軍个元帥恁樣講：「將來會有列國个人民㧯當多城市个人來到 耶路撒冷 。</verse>
				<verse number="21">這城个人會㧯該城个人講：『𠊎等遽遽來去敬拜上主 — 萬軍个元帥，求佢賜福。𠊎乜愛來去！』</verse>
				<verse number="22">會有盡多民族㧯強大个國家來到 耶路撒冷 敬拜上主 — 萬軍个元帥，求佢賜福。</verse>
				<verse number="23">到該時，會有十個外國人拉等一個 猶太 人个衫尾，講：『𠊎等愛㧯你等共下去，因為𠊎等聽講上帝㧯你等同在。』」這係上主 — 萬軍个元帥講个。</verse>
			</chapter>
			<chapter number="9">
				<verse number="1">這係上主啟示个話： 佢已經宣佈愛責罰 哈得拉 地㧯 大馬士革 城。毋單淨 以色列 各支族屬上主， 敘利亞 个京城也屬上主 。</verse>
				<verse number="2">還有 哈得拉 邊界个 哈馬 ，並 泰爾 、 西頓 兩城个人，不管佢等有幾大个才能，也係屬上主。</verse>
				<verse number="3">泰爾 為自家起城堡，積存金銀，多到像街路个泥沙。</verse>
				<verse number="4">總係，主愛將它所有个全部拿走，毀掉它海上个權利 ；這城會被火燒掉。</verse>
				<verse number="5">該時， 亞實基倫 看到就著驚； 迦薩 看到就痛苦至極； 以革倫 也共樣失望到見笑。 迦薩 會失掉君王； 亞實基倫 會無人住。</verse>
				<verse number="6">外族人會住在 亞實突 。上主講：「𠊎愛使驕傲个 非利士 人變卑微。</verse>
				<verse number="7">佢等毋會再食帶血个肉，牙齒縫毋會有得人惱个食物。所賸个人會成做𠊎个子民，像 猶大 个一族。 以革倫 人會成做𠊎个子民，㧯 耶布斯 人 共樣。</verse>
				<verse number="8">𠊎愛在𠊎个家園四圍安營，毋俾軍隊侵入來踐踏。𠊎毋准有人再欺負𠊎个子民，因為這下𠊎認真看等𠊎个家。」</verse>
				<verse number="9">住在 錫安 个人啊，愛歡喜快樂！ 耶路撒冷 个人民啊，愛歡喜吶天！ 看啊，你个君王來了！ 佢係公義个，佢係得勝个， 總係盡謙卑騎等驢仔來， 騎等一條細驢仔。</verse>
				<verse number="10">上主講： 𠊎愛拿走 以法蓮 个戰車， 除掉 耶路撒冷 个戰馬； 戰場个弓也愛拗掉。 你等个王愛向各國講和平； 佢愛統治這海到該海， 對 幼發拉底 河到地極。</verse>
				<verse number="11">上主講： 因為𠊎識用血㧯你立約， 𠊎愛將你等被人捉去關个， 對燥水窟底背放出來。</verse>
				<verse number="12">被人關還有指望个人啊， 愛轉來！轉到安全个城堡！ 𠊎今晡日㧯你等講， 𠊎愛加倍賜福來補償你等。</verse>
				<verse number="13">𠊎愛用 猶大 做𠊎个弓， 用 以法蓮 做𠊎个箭； 錫安 啊，𠊎愛使你个人民䟘起來， 像勇士个刀，去攻打 希臘 人。</verse>
				<verse number="14">上主愛在佢子民个頂高顯現； 佢射个箭像𥍉爧。 至高个上主愛歕羊角； 佢愛坐等南片个暴風雨來。</verse>
				<verse number="15">上主 — 萬軍个元帥愛保護佢个子民； 佢等愛消滅對敵， 踏等敵人㧒過來个石頭 ， 大聲噦嘶，像食酒醉个人。 佢等愛像獻祭時裝血个碗公共樣、滿身係敵人个血； 血流等下，像頭牲个血在祭壇个四隻角流等下 。</verse>
				<verse number="16">在該日，上主 — 佢等个上帝愛拯救佢等， 像牧人救羊群脫離危險。 佢等會在佢个土地上發光， 像冕旒頂个寶石一樣。</verse>
				<verse number="17">佢等係樣般个靚 ！ 有五榖使少年身體紮磳， 有新酒使少女容貌變靚。</verse>
			</chapter>
			<chapter number="10">
				<verse number="1">在春天你等愛向造𥍉爧个上主求雨。佢就會落充足个雨水，使眾人个田園生產農作物。</verse>
				<verse number="2">因為向偶像㧯卜卦个求問，所得个回答係虛假个。有兜人講無影無跡个夢，佢等个安慰攏總無用。所以人民流離失所，像羊仔無牧人受苦受難。</verse>
				<verse number="3">上主講：「𠊎向該兜統治𠊎子民个外族人發譴；𠊎愛責罰佢等。𠊎 — 上主、萬軍个元帥愛照顧自家个羊群，就係 猶大 个人民，使佢等成做𠊎強壯个戰馬。</verse>
				<verse number="4">在佢等當中愛產生掌權个領袖，像屋仔个房角石、釘仔、㧯戰爭个弓。</verse>
				<verse number="5">佢等會像勇士，在戰場制伏仇敵，像在街路踐踏泥糜。佢等愛去相㓾，因為𠊎 — 上主㧯佢等同在；佢等會打贏敵人个騎兵。</verse>
				<verse number="6">𠊎愛使 猶大 家強盛， 拯救 約瑟 个家。 𠊎愛憐憫佢等，帶領佢等轉來； 佢等會像毋識被𠊎㧒掉一樣。 因為𠊎係上主 — 佢等个上帝， 𠊎一定會聽佢等个祈禱。</verse>
				<verse number="7">以法蓮 人會像勇士； 佢等會像啉酒个人恁樣，心中爽快。 佢等个子女也會因為這擺个勝利來快樂； 佢等个心會因為上主所做个大大歡喜。</verse>
				<verse number="8">𠊎愛發出信號，聚集佢等。 𠊎愛救贖佢等， 使佢等个人數增加， 像以前恁樣緊增加。</verse>
				<verse number="9">雖然𠊎將佢等分散到列國中， 佢等在遠方還係會紀念𠊎。 佢等㧯佢等个子女會繼續生存， 有好共下轉來故鄉。</verse>
				<verse number="10">𠊎愛對 埃及 將佢等帶轉來， 對 亞述 帶領佢等出來。 𠊎愛𢱋佢等到 基列 㧯 黎巴嫩 ； 這兜地方到尾會毋罅佢等住。</verse>
				<verse number="11">佢等 經過苦海个時， 𠊎愛打海浪， 尼羅 河會燥掉。 驕傲个 亞述 會變做謙卑； 強大个 埃及 會變無力量。</verse>
				<verse number="12">𠊎愛使𠊎个子民倚靠𠊎來強盛； 佢等所行所做攏總愛奉𠊎个名。」 上主恁樣宣佈了。</verse>
			</chapter>
			<chapter number="11">
				<verse number="1">黎巴嫩 啊，打開你个門， 俾火燒淨你个香柏樹！</verse>
				<verse number="2">松樹啊，大噭噢！ 因為香柏樹已經橫下來； 該兜高大个樹仔毀掉了。 巴珊 个橡樹啊，大噭噢！ 因為又拶又靚个樹林已經斬掉了。</verse>
				<verse number="3">你等聽該兜牧者噭个聲， 因為佢等茂盛个草場毀壞了！ 也愛聽該兜少壯獅仔噭个聲， 因為 約旦 河邊个樹林荒廢了！</verse>
				<verse number="4">上主 — 𠊎个上帝恁樣講：「你去牧養該群將愛㓾个羊。</verse>
				<verse number="5">買羊个㓾牠兜，認為自家無罪；賣羊个講：『讚美上主，𠊎等好額了！』連牠兜个牧者也無可憐牠兜。」</verse>
				<verse number="6">上主講：「𠊎無愛再憐憫住這地方个人了；𠊎愛將這兜人交給佢等个鄰舍㧯佢等个王手中。佢等愛糟滅這地方；𠊎也無愛救這兜人脫離佢等个手。」</verse>
				<verse number="7">恁樣，𠊎就為到該兜買賣羊群个人牧養這群將愛㓾个羊。𠊎拿等兩支牧杖，一支安到「恩惠」，一支安到「合一」，就開始照顧羊群。</verse>
				<verse number="8">在一個月內，𠊎除掉三個牧者，因為𠊎个心無法度忍佢等，佢等也當惱𠊎。</verse>
				<verse number="9">𠊎對羊群 講：「𠊎無愛再做你等个牧者了。愛死个，由在牠死；愛滅亡个，做牠去滅亡；賸个，由在牠兜互相吞食。」</verse>
				<verse number="10">然後𠊎將安到「恩惠」个杖拗斷，表明𠊎廢掉㧯萬國所立个約。</verse>
				<verse number="11">當日，該約就廢掉了。該兜買賣羊群个人注意看𠊎，佢等就知係上主通過𠊎來傳話。</verse>
				<verse number="12">𠊎對佢等講：「若係你等看做好，就給𠊎工錢，毋好就算了！」佢等就給𠊎三十個銀仔，做𠊎恁少个工錢。</verse>
				<verse number="13">上主對𠊎講：「將這兜錢放入聖殿个銀庫 。」𠊎就將這三十個銀仔，就係佢等認為𠊎應得恁好个工價，放入聖殿个銀庫。</verse>
				<verse number="14">然後𠊎將第二支安到「合一」个杖拗斷，表明切斷 猶大 㧯 以色列 之間个兄弟情。</verse>
				<verse number="15">上主對𠊎講：「你再拿壞牧者所用个用器。</verse>
				<verse number="16">𠊎愛在這地興起一個牧者，喊佢掌𠊎个羊群；總係佢毋幫助該兜滅亡个，毋去尋毋見掉个，毋醫治受傷个，也毋餵該兜強壯个；佢反轉食掉最肥个羊，還擘掉牠兜个蹄。</verse>
				<verse number="17">該豁掉羊群、無路用个牧者慘了！ 戰爭愛徹底消滅佢个勢力。 佢个手定著會完全枯燥； 佢右片个目珠會全部看毋到。」</verse>
			</chapter>
			<chapter number="12">
				<verse number="1">以下係上主所啟示有關 以色列 个話： 上主鋪開穹蒼，建立大地，賜生命給人類。佢講：</verse>
				<verse number="2">「𠊎愛使 耶路撒冷 像一杯酒，它周圍个國家啉這杯酒後，會像酒醉个人捩來捩去。佢等包圍 耶路撒冷 个時節，也會圍攻 猶大 其他个城市。</verse>
				<verse number="3">該日，𠊎愛使 耶路撒冷 像一垤大石牯，所有想愛擎起這垤石牯个國家會受重傷。世上所有个國家愛聯合起來攻打 耶路撒冷 。</verse>
				<verse number="4">到該日，𠊎 — 上主愛使佢等一切个馬仔著驚，使騎馬个發癲。𠊎愛看顧 猶大 家，使列國所有个馬仔青盲。</verse>
				<verse number="5">該時， 猶大 該兜族長心肚就會講：『 耶路撒冷 个人民倚靠上主 — 萬軍个元帥、佢等个上帝；這就成做𠊎等个力量。』</verse>
				<verse number="6">「該日，𠊎愛使 猶大 該兜族長像樹林个火、禾稈堆底背个火把；佢等愛向左向右燒滅四圍个列國，總係 耶路撒冷 人還係安全住在城內。</verse>
				<verse number="7">「𠊎 — 上主愛先使 猶大 軍隊得勝，俾 大衛 个後代㧯 耶路撒冷 个人民所得个光榮，毋會超過 猶大 。</verse>
				<verse number="8">到該日，𠊎 — 上主愛保護 耶路撒冷 人；佢等當中盡軟弱个，也會像 大衛 恁堅強。 大衛 个後代會帶領佢等，像𠊎 — 上帝、像𠊎 — 上主个天使帶領佢等一樣。</verse>
				<verse number="9">該日，𠊎愛消滅一切來攻擊 耶路撒冷 个外國人。」</verse>
				<verse number="10">「𠊎愛使 大衛 个後代㧯 耶路撒冷 人充滿憐憫㧯祈禱个靈。佢等愛仰望該被佢等刺死个，為佢傷心大噭，像喪掉獨生子个人一樣；佢等愛為佢噭到盡痛苦，像死長子个人一樣。</verse>
				<verse number="11">該日， 耶路撒冷 會有人噭到非常悽慘，像人在 米吉多 平原為到 哈達‧臨門 恁樣傷心大噭。</verse>
				<verse number="12">該日，這地方每一個家族會傷心大噭： 大衛 家个男人在一個位所，女人在另外一個位所； 拿單 家个男人在一個位所，女人也在另外一個位所；</verse>
				<verse number="13">利未 家个男人在一個位所，女人也在另外一個位所； 示每 家个男人在一個位所，女人也在另外一個位所。</verse>
				<verse number="14">其他所有个家族也係男人在一個位所，女人也在另外一個位所。」</verse>
			</chapter>
			<chapter number="13">
				<verse number="1">「該日，𠊎愛為 大衛 个後代㧯 耶路撒冷 人開一個泉源，將佢等个罪惡㧯垃圾洗到淨淨。」</verse>
				<verse number="2">上主 — 萬軍个元帥講：「該日，𠊎愛將偶像个名對這個地方除掉，無人會再紀念。𠊎也愛對這個地方除滅假先知㧯邪靈。</verse>
				<verse number="3">若係還有人硬頸緊講假預言，𫱔佢个爺𡟓愛㧯佢講：『你該死了，因為你借上主个名講預言，實際上係騙人。』佢講等預言个時，佢个爺𡟓愛將佢刺死。</verse>
				<verse number="4">「到該日，逐個假先知會為自家所講个異象感覺見笑，也毋會再著皮毛个衫來欺騙人。</verse>
				<verse number="5">佢會講：『𠊎毋係先知；𠊎係耕田人，從細就耕田 。』</verse>
				<verse number="6">若有人問佢：『你背囊 个傷口係樣般來个？』佢會應講：『係在朋友屋下受傷个。』」</verse>
				<verse number="7">上主 — 萬軍个元帥講：「刀劍啊，䟘起來！攻擊𠊎个牧者 — 𠊎个同伴！打牧者，羊群就四散。𠊎也愛出手打該兜軟弱个羊。</verse>
				<verse number="8">全地三分之二个人會無命，三分之一个人會生等。</verse>
				<verse number="9">𠊎愛俾這三分之一个人經過考驗，使佢等純淨，像銀仔經過火。𠊎愛試煉佢等，像煉金仔一樣；然後佢等會向𠊎祈禱，𠊎就會聽。𠊎愛㧯佢等講，佢等係𠊎个子民；佢等愛承認，𠊎 — 上主係佢等个上帝。」</verse>
			</chapter>
			<chapter number="14">
				<verse number="1">上主審判个日仔會到了，該時 耶路撒冷 會被人搶；人會在你等面前分搶來个東西。</verse>
				<verse number="2">上主愛聚集所有个國家㧯 耶路撒冷 相㓾。這城會被人攻破，房屋會被人搶，婦女會被人強姦；城肚一半个人會被人捉走，賸下來个會留在城肚。</verse>
				<verse number="3">然後，上主愛出去㧯該兜國家相㓾，像佢以前恁樣。</verse>
				<verse number="4">該日，佢个腳愛企在 耶路撒冷 東片个 橄欖 山頂。 橄欖 山會在中央裂開，對東到西成做大山壢，山个一半向北徙，另外一半向南徙。</verse>
				<verse number="5">你等愛對上主个山壢逃走，因為這山壢直透到 亞薩 。你等會逃走，像你等个祖先在 猶大 王 烏西雅 个時逃閃大地動恁樣。然後上主 — 𠊎个上帝愛降臨，帶等所有个聖者共下來。</verse>
				<verse number="6">該日，毋會再有光、寒冷、落霜 ，</verse>
				<verse number="7">也無烏暗；無分日時頭，也無分暗晡頭，就算暗晡時還會有光明。這日仔只有上主正知。</verse>
				<verse number="8">在該日，會有生命水對 耶路撒冷 流出來，一半流入 死海 ，一半流入 地中海 ；連較燥旱个熱天抑係冬天，還係共樣有這水。</verse>
				<verse number="9">上主一定會做全世界个王。該日，儕儕攏總愛承認佢係獨一無二个上主；佢个名也係獨一無二个。</verse>
				<verse number="10">對北片个 迦巴 到 耶路撒冷 南片个 臨門 ，全地區愛變做平地。 耶路撒冷 會比周圍个地較高；城會對 便雅憫 門直透到 角門 (這地方以前有一個舊門)，對 哈楠業樓 到王个酒窟。</verse>
				<verse number="11">人民會安居樂業住在 耶路撒冷 ，毋會再有被人滅亡个危險。</verse>
				<verse number="12">上主愛使該兜㧯 耶路撒冷 相㓾个國家人民發瘟。佢等企等好好个時，肉就糜掉，目珠仁塌掉，舌乸也爛掉。</verse>
				<verse number="13">在該日，上主愛使佢等大亂、大著驚；儕儕揪來揪去、打來打去。</verse>
				<verse number="14">猶大 人愛為 耶路撒冷 爭戰；佢等會搶走四圍各國个財寶，有當多个金仔、銀仔㧯衫褲。</verse>
				<verse number="15">列國个馬仔、騾仔、駱駝、驢仔㧯營地所有个動物，也全部會發瘟。</verse>
				<verse number="16">後來，所有來攻打 耶路撒冷 个列國，還生个人年年愛上來敬拜大君王 — 上主、萬軍个元帥，並守搭寮仔節。</verse>
				<verse number="17">地上萬族中若係有毋上來 耶路撒冷 敬拜大君王 — 上主、萬軍个元帥个，雨水就毋會落在佢等个土地上。</verse>
				<verse number="18">若係 埃及 人毋上來，雨水也毋會落在該地上，反轉會發瘟，因為上主愛攻擊該兜無來守搭寮仔節个列國。</verse>
				<verse number="19">這就係 埃及 㧯所有毋上來守搭寮仔節个國家愛受个責罰。</verse>
				<verse number="20">在該日，連馬仔个玲琅會刻等『歸上主為聖』這句話。聖殿肚个鑊頭也會像祭壇前个碗共樣係聖个。</verse>
				<verse number="21">所有在 耶路撒冷 㧯 猶大 个鑊頭，全部愛歸上主 — 萬軍个元帥為聖。獻祭个人攏總愛用這鑊頭來煮祭肉。在該日，上主 — 萬軍元帥个聖殿肚，毋會再有做生理个人 。</verse>
			</chapter>
		</book>
		<book number="39">
			<chapter number="1">
				<verse number="1">以下係上主通過 瑪拉基 啟示給 以色列 人个話。</verse>
				<verse number="2">上主講：「𠊎一直痛惜你等。」 總係你等應講：「你識樣般痛惜𠊎等呢？」 上主講：「 以掃 敢毋係 雅各 个兄弟？總係，𠊎惜 雅各 ，</verse>
				<verse number="3">惱 以掃 ，使 以掃 个山荒涼，將佢个土地交給曠野个野狗。」</verse>
				<verse number="4">若係 以掃 个後代 以東 人講：「𠊎等个城市受破壞，總係𠊎等愛將它重建起來」；上主 — 萬軍个元帥愛恁樣講：「由在佢等重建；總係，𠊎一定會將它拆掉。別人會喊佢等安到『罪惡个國』也係『上主永遠所惱个人民。』</verse>
				<verse number="5">「你等 以色列 人定著會親眼看到這事，也會講：『上主在 以色列 國外乜受尊重！』」</verse>
				<verse number="6">上主 — 萬軍个元帥對祭司講：「孻仔尊敬阿爸，僕人敬畏主人。𠊎係你等个阿爸，你等樣般毋尊敬𠊎？𠊎係你等个主人，你等樣毋敬畏𠊎？你等祭司藐視𠊎个名，還應講：『𠊎等㖠有藐視你个名？』</verse>
				<verse number="7">你等將無淨浰个食物獻在𠊎个祭壇頂，還問：『𠊎等㖠有褻瀆你呢？』係因為你等想：『上主个桌仔係做得藐視个。』</verse>
				<verse number="8">你等將瞙目个、跛腳个㧯有病个頭牲帶來獻給𠊎；這敢毋係可惡嗎？你等將恁樣个動物送給你个省長試看，看佢會歡喜麼？會看做係你个好意麼？」這係上主 — 萬軍个元帥講个。</verse>
				<verse number="9">你這兜祭司啊，去懇求上帝施恩給𠊎等！你等既然將恁樣个祭物獻給佢，佢一定毋會聽你等个祈禱！</verse>
				<verse number="10">上主 — 萬軍个元帥講：「𠊎當希望你等有人將聖殿个門關起來，你等就毋會在𠊎个祭壇頂點無用个火。𠊎無歡喜你等，也無愛接受你等个手所獻个祭物。</verse>
				<verse number="11">對日出到日落之地，萬國攏總尊敬𠊎。佢等在各地方向𠊎燒香，獻淨浰个祭物，因為𠊎 — 上主、萬軍元帥个聖名在萬國中受尊敬。</verse>
				<verse number="12">你等反轉褻瀆𠊎，講：『主个桌仔係垃圾个；桌頂个食物係𠊎等看毋上眼个。』</verse>
				<verse number="13">你等又講：『唉！還費氣噢！』就鼻孔翹翹毋插𠊎 — 上主、萬軍个元帥。你等將搶來个、跛腳个、有病个動物獻給𠊎。𠊎 — 上主敢會對你等个手接受恁樣个東西嗎？</verse>
				<verse number="14">人許願愛將羊群中个好公羊獻給𠊎，反轉獻發病無正常个，恁樣欺騙个人應當受咒詛。因為𠊎係大君王！世上萬國攏總敬畏𠊎。𠊎 — 上主、萬軍个元帥恁樣宣佈了。」</verse>
			</chapter>
			<chapter number="2">
				<verse number="1">上主 — 萬軍个元帥對該兜祭司講：「這係給你等个命令：</verse>
				<verse number="2">你等一定愛用行為尊敬𠊎。你等毋聽從，也毋將命令放在心肚，𠊎就使咒詛臨到你等身上，將你等个福份 變做咒詛；事實上，𠊎已經咒詛了，因為你等毋看重𠊎个命令。</verse>
				<verse number="3">看啊！𠊎愛責罰你等个子女，將你等在節期中所獻頭牲腸肚个屎，膏你等个面；人愛將你等㧯屎共下㧒掉。</verse>
				<verse number="4">該時，你等就會知，𠊎識給你等這個誡命；恁樣，𠊎㧯 利未 後代个祭司所立个約就永遠有效。𠊎 — 上主、萬軍个元帥恁樣宣佈了。</verse>
				<verse number="5">「在𠊎个約底背，𠊎識答應賜給佢等生命㧯平安。𠊎將這兜給佢等个目的，係愛佢等尊敬𠊎。以前佢等確實尊敬𠊎，敬畏𠊎个名。</verse>
				<verse number="6">佢等傳講真理，毋講不義个話。佢等㧯𠊎共下行平安正直个路，也使盡多人離開罪惡。</verse>
				<verse number="7">祭司个嘴愛保存有關𠊎个真智識；人民愛對佢等个口中尋求𠊎个教示，因為佢等係𠊎 — 上主、萬軍元帥个使者。</verse>
				<verse number="8">「總係，你這兜祭司已經離開正道；你等个教導害盡多人跌倒；你等廢掉𠊎㧯 利未 所立个約。</verse>
				<verse number="9">所以，𠊎愛使你等俾眾人藐視，看做下賤；因為你等毋遵行𠊎个道，又在執行法律个時節，看情面、有私心。」這係上主 — 萬軍个元帥所講个。</verse>
				<verse number="10">𠊎等敢毋係共一個阿爸嗎？毋係共一個上帝造𠊎等嗎？𠊎等當中做麼介毋互相守信用？做麼介藐視上帝㧯𠊎等祖先所立个約？</verse>
				<verse number="11">猶大 人無忠心，在全國㧯 耶路撒冷 做一項邪惡个事；因為 猶大 人打垃圾上主所愛个聖殿，將拜外邦神明个女子討來做𡜵娘。</verse>
				<verse number="12">所有做這事个人，無論麼人，就算獻禮物給上主 — 萬軍个元帥，願上主從 雅各 个後代中將佢除掉，使佢永遠做毋得向上主獻祭。</verse>
				<verse number="13">你等又做另外一項事：你等用噭㧯歎息遮蓋上主个祭壇；因為上主無再看重禮物，也毋接納你等手所獻个。</verse>
				<verse number="14">你等還問：「樣會恁樣？」因為，你㧯後生時所討个𡜵娘，上主係證婚人。若𡜵娘係佢配給你个伴，你又發誓愛對姖忠心，總係你無照恁樣做。</verse>
				<verse number="15">上帝毋係使你㧯姖成做一體嗎？ 上帝恁樣做係愛你等有虔誠个後代。所以你等愛謹慎你等个心，毋好對你等後生時所討个𡜵娘無忠心。</verse>
				<verse number="16">上主 — 以色列 个上帝講：「休妻㧯用強暴對待𡜵娘个人係𠊎當恨个！所以愛謹慎你等个心，毋好做人無忠心。」這係上主 — 萬軍个元帥所講个。</verse>
				<verse number="17">你等所講个話，上主聽到盡煩！你等還問：「𠊎等做麼介事俾佢恁煩呢？」就係因為你等講：「上主將所有做壞事个人全部準做好人；佢歡喜佢等。」抑係因為你等講：「公義个上帝在㖠位？」</verse>
			</chapter>
			<chapter number="3">
				<verse number="1">上主 — 萬軍个元帥講：「看啊，𠊎愛派𠊎个使者為𠊎預備道路。然後你等所尋个主會忽然間來到佢个聖殿；看啊，你等所渴慕立約个使者，佢會來了！」</verse>
				<verse number="2">總係，佢來个日仔，麼人奈得何呢？佢出現个時節，麼人企得在呢？因為佢像鹼當重个茶籸，像煉金用个火。</verse>
				<verse number="3">佢愛來審判，像煉銀仔个人；佢愛潔淨 利未 後代个祭司，煉淨佢等像煉金銀；恁樣佢等就會知向上主獻合適个祭物。</verse>
				<verse number="4">該時， 猶大 㧯 耶路撒冷 人民所獻个祭物，正會得上主个歡喜，就像頭擺个年日一樣。</verse>
				<verse number="5">上主 — 萬軍个元帥講：「𠊎愛到你等該位去，執行審判。𠊎愛遽遽做證，來告該兜行邪術个、犯姦淫个、做假見證个、剝削工錢个、欺負孤兒寡婦个、冤枉外族人个，㧯所有無敬畏𠊎个人。」</verse>
				<verse number="6">「因為𠊎係上主，𠊎永遠無改變；所以， 雅各 个子孫啊，你等還吂完全消滅。</verse>
				<verse number="7">㧯你等个祖先共樣，你等常常偏離𠊎个法律，無愛遵守。𠊎 — 上主、萬軍个元帥講：你等愛轉向𠊎，𠊎就轉向你等。你等反轉問：『𠊎等愛樣般做正算轉向你呢？』</verse>
				<verse number="8">𠊎問你等：人做得騙上帝麼？當然做毋得！總係你等騙𠊎！你等問講：『𠊎等樣般騙你呢？』𠊎講：就係在應該納个十分之一，㧯應該獻个祭物上騙𠊎。</verse>
				<verse number="9">咒詛會臨到你等，因為你等全國个人民攏總騙𠊎。</verse>
				<verse number="10">你等愛將十分之一全數送入𠊎个倉庫，使聖殿 — 𠊎个屋下有豐富个糧食。𠊎係上主 — 萬軍个元帥；試看𠊎啊！𠊎係毋係會將天頂个窗門為你等打開來，將各樣个福份豐豐富富倒給你等。</verse>
				<verse number="11">𠊎 — 上主、萬軍个元帥毋俾害蟲毀壞你等个農作物。你等个葡萄園會結滿葡萄。</verse>
				<verse number="12">該時，萬國个人會講你等係有福氣个，因為你等个土地會成做安居樂業个地方。」這係上主 — 萬軍个元帥所講个。</verse>
				<verse number="13">上主講：「你等講魯夫話堵𠊎。你等還問：『𠊎等講麼介話堵你呢？』</verse>
				<verse number="14">你等講：『事奉上帝係無意無思个。𠊎等遵行佢所吩咐个，抑係在上主 — 萬軍个元帥面前表示哀傷，有麼介用呢？</verse>
				<verse number="15">這下照𠊎等看，驕傲个人有福氣，作惡个人興旺；雖然佢等試探上帝，還係毋使堵到災難。』」</verse>
				<verse number="16">該時，敬畏上主个人共下談論；上主也認真聽佢等个話。在佢面前有一卷紀念冊，登記敬畏上主㧯尊重上主聖名个人。</verse>
				<verse number="17">上主 — 萬軍个元帥講：「在𠊎所定个日仔，佢等愛屬𠊎，做𠊎寶貝个子民。𠊎愛痛惜佢等，像阿爸痛惜該服事佢个孻仔。</verse>
				<verse number="18">該時，你等會再一擺看出，義人㧯壞人中間有麼介無共樣，服事𠊎㧯無服事𠊎个人有麼介差別。」</verse>
			</chapter>
			<chapter number="4">
				<verse number="1">上主 — 萬軍个元帥講：「看啊，該日仔會到了，會像燒紅个火爐。所有驕傲个人㧯壞人全部會像禾稈；在該日，佢等會頭尾燒到淨淨。</verse>
				<verse number="2">總係，為到你這兜敬畏𠊎个人，會有公義 个日頭出現；它个光有醫治个功效。你等會像關在牛欄放出來个細牛仔恁樣，盡猋盡跳。</verse>
				<verse number="3">在𠊎所定个日仔，你等愛踐踏壞人；佢等會成做你等腳下个塵灰。」這係上主 — 萬軍个元帥所講个。</verse>
				<verse number="4">「你等愛記得𠊎个僕人 摩西 个教訓，就係𠊎在 何烈 山為到所有 以色列 人交給佢个誡命法律。</verse>
				<verse number="5">「看啊，在上主盡大盡得人驚个日仔吂到以前，𠊎愛派先知 以利亞 到你等該位去。</verse>
				<verse number="6">佢愛使爺𡟓个心轉向子女，子女个心轉向爺𡟓，免得𠊎來用咒詛毀滅全地。」</verse>
			</chapter>
		</book>
	</testament>
	<testament name="New">
		<book number="40">
			<chapter number="1">
				<verse number="1">耶穌基督係 大衛 个後代， 大衛 係 亞伯拉罕 个後代。 耶穌个家譜係恁樣：</verse>
				<verse number="2">亞伯拉罕 𫱔 以撒 ， 以撒 𫱔 雅各 ， 雅各 𫱔 猶大 㧯佢个兄弟。</verse>
				<verse number="3">猶大 同 塔瑪 𫱔 法勒斯 㧯 謝拉 ， 法勒斯 𫱔 希斯崙 ， 希斯崙 𫱔 亞蘭 ，</verse>
				<verse number="4">亞蘭 𫱔 亞米拿達 ， 亞米拿達 𫱔 拿順 ， 拿順 𫱔 撒門 ，</verse>
				<verse number="5">撒門 同 喇合 𫱔 波阿斯 ， 波阿斯 同 路得 𫱔 俄備得 ， 俄備得 𫱔 耶西 ，</verse>
				<verse number="6">耶西 𫱔 大衛 王。 大衛 同 烏利亞 个𡜵娘𫱔 所羅門 ，</verse>
				<verse number="7">所羅門 𫱔 羅波安 ， 羅波安 𫱔 亞比雅 ， 亞比雅 𫱔 亞撒 ，</verse>
				<verse number="8">亞撒 𫱔 約沙法 ， 約沙法 𫱔 約何蘭 ， 約何蘭 𫱔 烏西雅 ，</verse>
				<verse number="9">烏西雅 𫱔 約坦 ， 約坦 𫱔 亞哈斯 ， 亞哈斯 𫱔 希西家 ，</verse>
				<verse number="10">希西家 𫱔 瑪拿西 ， 瑪拿西 𫱔 亞們 ， 亞們 𫱔 約西亞 。</verse>
				<verse number="11">以色列 族被人捉去 巴比倫 个期間， 約西亞 𫱔 約雅斤 㧯佢个兄弟。</verse>
				<verse number="12">被人捉到 巴比倫 後， 約雅斤 𫱔 撒拉鐵 ， 撒拉鐵 𫱔 所羅巴伯 ，</verse>
				<verse number="13">所羅巴伯 𫱔 亞比玉 ， 亞比玉 𫱔 以利亞敬 ， 以利亞敬 𫱔 亞所 ，</verse>
				<verse number="14">亞所 𫱔 撒督 ， 撒督 𫱔 亞金 ， 亞金 𫱔 以律 ，</verse>
				<verse number="15">以律 𫱔 以利亞撒 ， 以利亞撒 𫱔 馬但 ， 馬但 𫱔 雅各 ，</verse>
				<verse number="16">雅各 𫱔 約瑟 ，就係 馬利亞 个老公。該稱做基督个耶穌係對 馬利亞 出世个。</verse>
				<verse number="17">恁樣算起來，對 亞伯拉罕 到 大衛 一共有十四代，對 大衛 到 以色列 人被人捉到 巴比倫 也係十四代，對被人捉个時到基督个出世也係十四代。</verse>
				<verse number="18">耶穌基督出世个經過係恁樣：佢个阿姆 馬利亞 已經㧯 約瑟 定親，總係在結婚以前， 馬利亞 就對聖靈懷胎。</verse>
				<verse number="19">姖个未婚夫 約瑟 做人正直，總係又無愛公開羞辱姖，想愛祕密解除婚約。</verse>
				<verse number="20">佢當考慮這事个時節，主个天使在夢中對佢顯現，講：「 大衛 个後代 約瑟 ，毋使驚，做你討 馬利亞 做𡜵娘，因為姖係對聖靈懷胎个。</verse>
				<verse number="21">姖會𫱔一個孻仔，你愛將佢个名安到耶穌，因為佢愛拯救自家个子民脫離佢等个罪。」</verse>
				<verse number="22">這一切事个發生係愛應驗主通過先知所講个話：</verse>
				<verse number="23">有童貞女會懷胎𫱔孻仔， 佢个名愛喊做以馬內利。 (「以馬內利」个意思就係「上帝㧯𠊎等同在。」)</verse>
				<verse number="24">約瑟 醒過來，就照主个天使所吩咐个去做，㧯 馬利亞 結婚；</verse>
				<verse number="25">總係在姖𫱔孻仔以前，無㧯姖同房。細人仔出世， 約瑟 就將佢个名安到耶穌。</verse>
			</chapter>
			<chapter number="2">
				<verse number="1">希律 做王个時，耶穌出世在 猶太 个 伯利恆 城。有幾個星象家對東方來到 耶路撒冷 ；</verse>
				<verse number="2">佢等問講：「該出世做 猶太 人个王个在㖠位？𠊎等在東方看到佢个星仔，特別來拜佢。」</verse>
				<verse number="3">希律 王聽到這個話，心肝盡著急；全 耶路撒冷 城个人也係共樣。</verse>
				<verse number="4">希律 就召集所有个祭司長㧯民間个經學教師來，問佢等講：「基督愛在麼介所在出世？」</verse>
				<verse number="5">佢等應講：「在 猶太 个 伯利恆 ，因為先知有恁樣寫等，講：</verse>
				<verse number="6">猶大 地區个 伯利恆 城啊， 你在 猶大 這兜城中並毋係最細个； 因為有一個領袖會對你該位出來， 佢愛牧養𠊎个子民 以色列 。」</verse>
				<verse number="7">所以， 希律 暗中召見這幾個對東方來个星象家，對佢等查問該粒星仔出現个確實日期。</verse>
				<verse number="8">然後佢吩咐佢等去 伯利恆 ，講：「你等去，詳細尋該細人仔，尋到以後就來報給𠊎知，恁樣𠊎也好去拜佢。」</verse>
				<verse number="9">聽了王个話，佢等就離開。該時，佢等在東方看到个該粒星仔又出現，在佢等个頭前行，一直到細人仔住个所在，就在頂高停下來。</verse>
				<verse number="10">佢等看到該粒星仔，歡喜到講毋得。</verse>
				<verse number="11">佢等入去屋肚，看到細人仔㧯厥姆 馬利亞 ，就伏落去拜細人仔，然後打開寶盒，拿出黃金、乳香、沒藥做禮物來獻給佢。</verse>
				<verse number="12">在夢中，上帝指示佢等莫轉去見 希律 ；佢等就對另外一條路轉去佢等个家鄉。</verse>
				<verse number="13">佢等離開以後，主个天使在 約瑟 个夢中顯現，講：「䟘起來！帶等細人仔㧯厥姆逃難去 埃及 ，住在該位，直到𠊎再指示你；因為 希律 愛搜查這細人仔來殺害佢。」</verse>
				<verse number="14">所以， 約瑟 就䟘起來，透夜帶等細人仔㧯厥姆逃走去 埃及 ，</verse>
				<verse number="15">住在該位，直到 希律 死掉。這個事應驗主通過先知所講个話：「𠊎喊𠊎个孻仔對 埃及 出來。」</verse>
				<verse number="16">希律 發現自家受星象家个作弄，非常譴，就照佢對星象家所探到該粒星仔出現个時期，派人將 伯利恆 㧯附近地區兩歲以內个細孻仔全部㓾掉。</verse>
				<verse number="17">這個事應驗先知 耶利米 所講个：</verse>
				<verse number="18">在 拉瑪 有聽到一個聲， 係噦天噦地个大噭聲； 係 蕾潔 為姖个子女大噭， 毋肯接受安慰， 因為佢等全部無掉去了。</verse>
				<verse number="19">希律 死後，在 埃及 ，主个天使在 約瑟 个夢中顯現，</verse>
				<verse number="20">講：「䟘起來！帶等細人仔㧯厥姆轉去 以色列 ，因為該兜想愛殺害這細人仔个已經死掉了。」</verse>
				<verse number="21">約瑟 就出發，帶等細人仔㧯厥姆轉去 以色列 。</verse>
				<verse number="22">約瑟 因為聽講 亞基老 繼承厥爸 希律 做 猶太 王，就毋敢去該位。後來，主又在 約瑟 个夢中指示佢，佢就閃到 加利利 省去，</verse>
				<verse number="23">住在安到 拿撒勒 个城肚。這就應驗先知所講个話：「佢愛稱做 拿撒勒 人。」</verse>
			</chapter>
			<chapter number="3">
				<verse number="1">該時，施洗 約翰 來到 猶太 个曠野傳道。</verse>
				<verse number="2">佢講：「你等愛棄絕罪惡，因為天國會實現了！」</verse>
				<verse number="3">約翰 就係先知 以賽亞 所講个人；佢講： 在曠野有人喊講： 「愛準備好勢主个道路， 修直佢所愛行个細路！」</verse>
				<verse number="4">約翰 著等駱駝毛做个衫，腰圈䌈等皮帶；食草蜢㧯野蜂糖過日仔。</verse>
				<verse number="5">眾人對 耶路撒冷 、 猶太 全地，㧯 約旦 河一帶地方來到佢面前。</verse>
				<verse number="6">佢等承認自家个罪； 約翰 就在 約旦 河為佢等行洗禮。</verse>
				<verse number="7">約翰 看到盡多法利賽人㧯撒都該人也來要求領洗禮，就對佢等講：「你這兜毒蛇啊！上帝个審判會到了，你等恅到閃得開嗎？</verse>
				<verse number="8">愛用行為來證明你等已經棄絕罪惡。</verse>
				<verse number="9">毋好恅到 亞伯拉罕 係你等个祖先就做得免受審判。𠊎㧯你等講，上帝能對這兜石頭為 亞伯拉罕 造出子孫來！</verse>
				<verse number="10">斧頭已經放在樹根頂囉，凡無結好果子个樹仔全部愛斬掉，㧒落火底背。</verse>
				<verse number="11">𠊎用水為你等行洗禮，表示你等已經悔改；總係，該比𠊎較慢來个，愛用聖靈㧯火為你等行洗禮。佢比𠊎偉大盡多，𠊎就係代佢擐鞋也係無資格。</verse>
				<verse number="12">佢个手拿等簸箕，愛將打麥場拚淨，將麥仔收入倉庫，將冇仔用永遠不滅个火燒掉！」</verse>
				<verse number="13">該時，耶穌對 加利利 去 約旦 河見 約翰 ，愛對佢領洗禮。</verse>
				<verse number="14">約翰 想愛改變佢个主意，就講：「𠊎應當接受你个洗禮，你樣般反轉來就𠊎！」</verse>
				<verse number="15">總係耶穌應講：「這下愛恁樣行，因為𠊎等恁樣做係實行上帝个旨意。」所以， 約翰 就順佢个意思。</verse>
				<verse number="16">耶穌領洗禮以後，即時對水中上來，天就為佢開；佢看到上帝个靈像月鴿仔恁樣降下來，落在佢个身上。</verse>
				<verse number="17">同時，對天頂有聲音講：「這係𠊎所惜个孻仔，𠊎所歡喜个。」</verse>
			</chapter>
			<chapter number="4">
				<verse number="1">後來，耶穌被聖靈帶去曠野，受魔鬼个試探。</verse>
				<verse number="2">禁食四十日夜以後，耶穌就肚飢。</verse>
				<verse number="3">該試探人个進前來，對佢講：「你若係上帝个孻仔，命令這兜石頭變做麵包啊！」</verse>
				<verse number="4">耶穌應講：「聖經講：『人个生存毋係單淨靠食物，係靠上帝所講个逐句話。』」</verse>
				<verse number="5">魔鬼又帶耶穌去聖城，喊佢企在聖殿最高个所在，</verse>
				<verse number="6">對佢講：「你若係上帝个孻仔，跳下去；因為聖經有講： 上帝會為你吩咐佢个天使， 用佢等个手扶等你， 使你个腳毋會撞到石頭。」</verse>
				<verse number="7">耶穌應講：「總係聖經也講：『做毋得試探主 — 你个上帝。』」</verse>
				<verse number="8">最後，魔鬼帶耶穌上一座盡高个山，俾佢看世間萬國㧯它兜个榮華富貴。</verse>
				<verse number="9">魔鬼講：「你若係跪下來拜𠊎，𠊎就將這一切全部給你。」</verse>
				<verse number="10">耶穌講：「撒但，閃開！聖經講：『愛拜主 — 你个上帝，單單事奉佢。』」</verse>
				<verse number="11">恁樣，魔鬼就離開耶穌，有天使來服事佢。</verse>
				<verse number="12">耶穌聽到 約翰 被人關在監獄肚，就閃到 加利利 去。</verse>
				<verse number="13">佢毋住在 拿撒勒 ，反轉去住在 迦百農 。該城在 西布倫 㧯 拿弗他利 个地區，接近 加利利 湖。</verse>
				<verse number="14">這就應驗先知 以賽亞 个話：</verse>
				<verse number="15">西布倫 㧯 拿弗他利 个地方， 在沿海个大路上， 在 約旦 河對面該片， 外邦人个 加利利 ！</verse>
				<verse number="16">住在烏暗中个人 已經看到大光； 住在死蔭之地个人 有光照佢等。</verse>
				<verse number="17">對該時開始，耶穌傳道理講：「你等愛棄絕罪惡，因為天國會實現了！」</verse>
				<verse number="18">耶穌順 加利利 湖邊行，看到兩個打魚个兄弟， 西門 (偏名 彼得 ) 㧯厥老弟 安德烈 ，當在湖中委網打魚。</verse>
				<verse number="19">耶穌對佢等講：「來跈𠊎！𠊎愛使你等得到人像打到魚一樣。」</verse>
				<verse number="20">佢等即時放下網仔，跈耶穌去。</verse>
				<verse number="21">耶穌又向前行，看到另外兩個兄弟，就係 西庇太 个孻仔 雅各 㧯 約翰 ；佢等同阿爸共下在船頂整理魚網。耶穌呼召佢兩儕，</verse>
				<verse number="22">佢等即時離開船㧯阿爸，跈耶穌去。</verse>
				<verse number="23">耶穌行遍 加利利 全地，在各地方个會堂教訓人，宣傳天國个福音，醫好民間逐樣个病。</verse>
				<verse number="24">佢个名聲傳遍 敘利亞 ，所以該位个人民將各種个病人，經歷各樣痛苦个人，像被鬼附身个、豬乸瘵个、癱風个，全部帶來佢面前；佢攏總醫好佢等。</verse>
				<verse number="25">歸群个人對 加利利 、 十邑 、 耶路撒冷 、 猶太 㧯 約旦 河東片來跈佢。</verse>
			</chapter>
			<chapter number="5">
				<verse number="1">耶穌看到一大群人，就上山，坐下來；厥學生圍在佢个旁邊。</verse>
				<verse number="2">佢就教訓佢等，講：</verse>
				<verse number="3">「承認自家靈性窮苦个人實在有福氣； 佢等係天國个子民！</verse>
				<verse number="4">「為到罪來悲傷个人實在有福氣； 上帝愛安慰佢等！</verse>
				<verse number="5">「謙卑个人實在有福氣； 佢等會得到上帝應許个土地！</verse>
				<verse number="6">「饑渴欣慕上帝旨意个人實在有福氣； 上帝愛使佢等得到滿足！</verse>
				<verse number="7">「用慈悲款待人个實在有福氣； 上帝也愛用慈悲款待佢等！</verse>
				<verse number="8">「內心純潔个人實在有福氣； 佢等會看到上帝！</verse>
				<verse number="9">「為到和平盡心盡力个人實在有福氣； 上帝愛稱佢等做子女！</verse>
				<verse number="10">「因為實行上帝个旨意來受迫害个人實在有福氣； 佢等就係天國个子民！</verse>
				<verse number="11">「因為你等跈𠊎，別人就侮辱你等，迫害你等，講各樣壞話譭謗你等，你等實在有福氣噢！</verse>
				<verse number="12">應當愛歡喜快樂，因為在天頂有為你等準備豐富个獎賞；頭擺个先知也係恁樣被人迫害。</verse>
				<verse number="13">「你等係人間个鹽；總係鹽若失掉鹹味，愛樣般使它再鹹呢？既然成做廢物，只有㧒掉，由在人踐踏。</verse>
				<verse number="14">「你等係世間个光。起在山頂个城係無法度遮起來个。</verse>
				<verse number="15">無人點燈放在斗底下，一定係放在燈臺頂，正會照光全家个人。</verse>
				<verse number="16">共樣，你等个光也應該照在人个面前，俾佢等看到你等个好行為，來頌讚你等在天頂个阿爸。</verse>
				<verse number="17">「莫想𠊎來係愛廢除 摩西 个法律㧯先知个教訓。𠊎毋係來廢除，係來成全它兜个意義。</verse>
				<verse number="18">𠊎實在㧯你等講，天地還在，法律个一筆一畫就做毋得廢掉，直到萬事个結尾 。</verse>
				<verse number="19">所以，就算違犯最細个一條誡命，又教別人也恁樣做个，在天國愛成做最尾个人。遵守法律，又教別人也共樣遵守个，在天國愛成做最大个人。</verse>
				<verse number="20">所以，𠊎㧯你等講，你等若係無比經學教師㧯法利賽人還較忠心來實行上帝个旨意，一定毋會入天國。</verse>
				<verse number="21">「你等識聽講，有禁止古人个話，講：『做毋得㓾人；㓾人个愛受審判。』</verse>
				<verse number="22">總係𠊎㧯你等講，對兄弟抑係姊妹發譴个 ，也愛受審判；罵兄弟抑係姊妹『廢人』个，就愛上法院；罵兄弟抑係姊妹『大戇番』个，免不了愛受地獄个火燒。</verse>
				<verse number="23">因為恁樣，你在祭壇前愛獻禮物給上帝个時節，若係想起有兄弟抑係姊妹對你不滿，</verse>
				<verse number="24">你就愛將禮物留在祭壇前，黏時去同佢講和，然後正倒轉來獻禮物給上帝。</verse>
				<verse number="25">「若係有人愛告你，拉你上法院，你就愛把扼時間，在吂到法院以前同佢和解。若係無，入去法院以後，佢就會將你交給法官，法官交給法警，關你入監獄。</verse>
				<verse number="26">𠊎實在㧯你講，你愛坐監，到你納清罰金个最後一分錢。</verse>
				<verse number="27">「你等聽過古時代有恁樣个教訓講：『做毋得犯姦淫。』</verse>
				<verse number="28">總係𠊎㧯你等講，看到婦女就生出邪念个，在佢个心中已經同姖犯姦淫。</verse>
				<verse number="29">若係你个右眼害你犯罪，將它挖出來，㧒掉它！損失身體个一部份比歸身落地獄好加盡多。</verse>
				<verse number="30">若係你个右手害你犯罪，將它斬下來，㧒掉它！損失一個肢體比歸身落地獄好加盡多。</verse>
				<verse number="31">「又有恁樣个教訓講：『凡係愛離掉𡜵娘个，一定愛寫離婚書給姖。』</verse>
				<verse number="32">總係𠊎㧯你等講，除了佢个𡜵娘無守貞節，老公就做毋得離掉姖。因為，若係佢个𡜵娘再嫁人，佢就係害佢个𡜵娘犯姦淫；討姖个男人也係算犯姦淫。</verse>
				<verse number="33">「你等乜聽過有教訓古人个話，講：『做毋得違背所發个誓；在主个面前所發个誓一定愛實行。』</verse>
				<verse number="34">總係𠊎㧯你等講，根本做毋得發誓。做毋得對天發誓，因為天係上帝个寶座；</verse>
				<verse number="35">做毋得指地發誓，因為地係上帝个腳踏；也做毋得對 耶路撒冷 發誓，因為該係大君王个城；</verse>
				<verse number="36">連指自家个頭那發誓也做毋得，因為你無辦法使自家个一條頭那毛變烏抑係變白。</verse>
				<verse number="37">你等講話，係，就講『係』，毋係，就講『毋係』；加講个就係對該邪惡者來个。</verse>
				<verse number="38">「你等聽過這種个教訓講：『目珠賠目珠，牙齒賠牙齒。』</verse>
				<verse number="39">總係𠊎㧯你等講，做毋得報復欺負你等个人。有人打你嘴角个右片，連左片也俾佢打！</verse>
				<verse number="40">有人拉你上法院，愛拿你个內衫，連外衫也給佢！</verse>
				<verse number="41">若係有人強迫你代佢揹東西行一里路，你就為佢加行一里。</verse>
				<verse number="42">有人對你求麼介，就愛給佢；有人對你借麼介，就愛借給佢。</verse>
				<verse number="43">「你等又聽過恁樣个教訓講：『惜你个朋友，怨恨你个仇敵。』</verse>
				<verse number="44">總係𠊎㧯你等講，愛惜你等个仇敵，為迫害你等个人祈禱。</verse>
				<verse number="45">恁樣，你等正可以做天父个子女。因為天父用日頭照好人，也照壞人；落雨給行善个，也給作惡个。</verse>
				<verse number="46">若係你等只有惜該兜惜你等个人，上帝樣愛使獎賞你等哪？連稅棍乜恁樣行。</verse>
				<verse number="47">若係你等只有對朋友請安，有麼介了不起哪？異教徒敢毋係恁樣行？</verse>
				<verse number="48">你等愛完全，就像你等个天父係完全个一樣。」</verse>
			</chapter>
			<chapter number="6">
				<verse number="1">「你等愛細膩，毋好在別人面前展自家个虔誠，佻佻做給人看。恁樣做，你等就毋使想愛對天父該位得到麼介獎賞。</verse>
				<verse number="2">「所以，你救濟人个時，毋好歕喇叭宣傳，像該兜假好个人在會堂抑係街項所做个，愛得到別人个誇獎。𠊎實在㧯你等講，佢等恁樣做，已經得到佢等个報答了。</verse>
				<verse number="3">你救濟人个時，右手所做个，莫給左手知，</verse>
				<verse number="4">愛在暗中行善。恁樣，你个天父，就係看得到你在暗中做事个，佢的確會獎賞你。</verse>
				<verse number="5">「你等祈禱个時節，毋好像假好个人恁樣，好企在會堂抑係十字路口祈禱，佻佻做給人看。𠊎實在㧯你等講，佢等恁樣做，已經得到佢等个報答了。</verse>
				<verse number="6">你祈禱个時，愛入自家个間肚，關等門，向暗中个天父祈禱。恁樣，你个天父，就係看得到你在暗中做事个，佢的確會獎賞你。</verse>
				<verse number="7">「你等祈禱个時，毋好像異教徒恁樣用盡多重複無意思个話。佢等恅到用長篇大論，上帝正會聽。</verse>
				<verse number="8">毋好像佢等恁樣；你等吂求，你等个天父已經知你等所需要个。</verse>
				<verse number="9">所以，你等愛恁樣祈禱： 𠊎等在天頂个阿爸： 願你个聖名受尊重；</verse>
				<verse number="10">願你在世間掌權； 願你个旨意實現在地上， 就像在天頂一樣。</verse>
				<verse number="11">賜𠊎等今晡日 所需要个飲食。</verse>
				<verse number="12">饒赦𠊎等个虧欠， 就像𠊎等饒赦虧欠𠊎等个人 。</verse>
				<verse number="13">毋好俾𠊎等堵到忒重个考驗； 救𠊎等脫離該邪惡者个手 。</verse>
				<verse number="14">「你等赦免別人个過犯，你等个天父也會赦免你等；</verse>
				<verse number="15">你等毋赦免別人个過犯，你等个天父也毋會赦免你等个過犯。</verse>
				<verse number="16">「你等禁食个時節，毋好像假好个人；佢等詐意憂愁，面裝到盡媸，佻佻俾人看出佢等當在禁食。𠊎實在㧯你等講，佢等恁樣做，已經得到佢等个報答了。</verse>
				<verse number="17">你禁食个時，愛梳頭洗面，</verse>
				<verse number="18">莫給別人看出你在禁食；在暗中个天父看到就罅了！恁樣，你个天父，就係看得到你在暗中做事个，佢的確會獎賞你。</verse>
				<verse number="19">「毋好為自家積存財寶在地上；因為有蟲仔來蛀，也會生鹵，又有賊仔打壞門入來偷。</verse>
				<verse number="20">愛為自家積存財寶在天頂；該位無蟲仔來蛀，毋會生鹵，也無賊仔打壞門入來偷。</verse>
				<verse number="21">因為你个財寶在㖠位，你个心也在該位。</verse>
				<verse number="22">「目珠可比身體个燈。目珠若係好，你全身就會有光明；</verse>
				<verse number="23">目珠若壞掉，你全身就會烏暗。共樣，你底背个光若係變做烏暗，該種个烏暗係樣般得人驚啊！</verse>
				<verse number="24">「無人能服事兩個主人。毋係惱這個、愛該個，就係看重這個、看輕該個。你等無可能同時做上帝个僕人，又做金錢个奴才。</verse>
				<verse number="25">「所以，𠊎㧯你等講，毋好為到生活所需要个飲食，抑係身體所愛著个衫褲來操心。生命敢無比飲食較重要？身體敢無比衫褲較要緊？</verse>
				<verse number="26">你等看天頂个鳥仔：牠兜無種，無收，也無將糧食囤在榖倉；你等在天頂个阿爸還係畜牠兜！你等敢毋係比鳥仔較貴重嗎？</verse>
				<verse number="27">你等當中麼人能用憂愁食加幾日 呢？</verse>
				<verse number="28">「樣愛為到衫褲來操心？你等看野生个百合花樣般靚起來！它兜無做事，也無做衫；</verse>
				<verse number="29">總係𠊎㧯你等講，就係 所羅門 極榮華富貴个時，佢个打扮也無一蕊野花恁靚。</verse>
				<verse number="30">野生个花草今晡日生出來，天光日就燥掉，被人㧒落火爐去燒，上帝還恁樣為它兜打扮，佢敢毋會將衫褲賜給你等？你等个信心實在忒細！</verse>
				<verse number="31">所以，毋好憂愁講：『𠊎等愛食麼介？愛啉麼介？愛著麼介？』</verse>
				<verse number="32">這兜事係毋信个人所追求个。你等天頂个阿爸知這兜全部係你等所需要个。</verse>
				<verse number="33">你等愛先追求上帝國个實現，並遵行佢个旨意，佢就會將這一切全部賜給你等。</verse>
				<verse number="34">總講，你等毋好為到天光日來憂愁，因為天光日有天光日个憂愁；一日擔當一日个艱苦就罅了。」</verse>
			</chapter>
			<chapter number="7">
				<verse number="1">「毋好論斷別人，上帝就毋會審判你等。</verse>
				<verse number="2">因為上帝愛用你等論斷別人个標準來審判你等；你等用麼介東西量給別人，上帝也愛用共樣个東西量給你等。</verse>
				<verse number="3">你做麼介單淨看到若兄弟目珠底背个草屑仔，總係無想到自家目珠底背个大樑呢？</verse>
				<verse number="4">你自家目珠底背有大樑，樣般做得對若兄弟講：『你目珠底背个草屑仔，𠊎代你挑出來』哪？</verse>
				<verse number="5">假好个人啊，先將你自家目珠底背个大樑徙走，正看得清楚來挑若兄弟目珠底背个草屑仔。</verse>
				<verse number="6">「毋好將神聖个東西㧒給狗仔，牠兜會轉過來咬你等；毋好將珍珠㧒給豬仔，牠兜會踐踏珍珠。</verse>
				<verse number="7">「你等求，就會得到；尋，就會尋到；掽門，門就會為你等開。</verse>
				<verse number="8">因為每一個求个，就得到；尋个，就尋到；掽門个，門就為佢開。</verse>
				<verse number="9">你等當中有麼人，孻仔討麵包，反轉拿石頭給佢？</verse>
				<verse number="10">討魚仔，反轉拿蛇哥給佢？</verse>
				<verse number="11">你等雖然壞，還知拿好東西給自家个子女；恁樣，你等在天頂个阿爸敢毋係還較愛將好東西賜給求佢个人嗎？</verse>
				<verse number="12">「你等愛別人樣般對待你等，就愛樣般對待佢等；這就係 摩西 法律㧯先知教訓个真意義。</verse>
				<verse number="13">「你等愛對狹門入去；因為該透到滅亡个門係闊个，路係好行个，行該條路个人也盡多。</verse>
				<verse number="14">該透到永生个門係狹个，路係難行个，尋到个人也盡少。</verse>
				<verse number="15">「你等愛提防假先知。佢等出現在你等面前，外表看起來像綿羊，總係底背係兇惡个豺狼。</verse>
				<verse number="16">你等看佢等个行為就會認出佢等。竻樹毋會結葡萄，蒺藜也毋會結無花果。</verse>
				<verse number="17">好樹結好果子；壞樹結壞果子。</verse>
				<verse number="18">好樹毋會結壞果子；壞樹也毋會結好果子。</verse>
				<verse number="19">無結好果子个樹仔就斬掉，㧒落火底背。</verse>
				<verse number="20">所以，看佢等个行為，你等就會認出假先知。</verse>
				<verse number="21">「該兜喊𠊎『主啊，主啊！』个人並毋係攏總會入天國；只有實行𠊎天父旨意个人正做得入去。</verse>
				<verse number="22">末日來个時，盡多人會對𠊎講：『主啊，主啊！𠊎等識奉你个名傳上帝个福音，也識奉你个名逐鬼、行盡多神蹟！』</verse>
				<verse number="23">該時，𠊎愛明明對佢等講：『𠊎從來毋識你等；你這兜作惡个，閃開！』</verse>
				<verse number="24">「所以，聽𠊎這兜話就去行个人，就像聰明人起屋在磐石頂；</verse>
				<verse number="25">就算受到風吹，雨淋，水沖，該屋也毋會橫掉，因為地基在磐石頂。</verse>
				<verse number="26">總係，聽𠊎這兜話毋去行个，就像戇仔起屋在泥沙頂，</verse>
				<verse number="27">受到風吹，雨淋，水沖，屋就橫掉，又橫到貼貼！」</verse>
				<verse number="28">耶穌講了這兜話，眾人對佢个教訓感覺非常奇怪；</verse>
				<verse number="29">因為佢教訓佢等个時盡有權柄，㧯佢等个經學教師無共樣。</verse>
			</chapter>
			<chapter number="8">
				<verse number="1">耶穌對山頂下來个時，弛崗打陣个人跈等佢。</verse>
				<verse number="2">有一個發癩个人來拜佢，講：「主啊，你若係肯，就會使𠊎淨浰。」</verse>
				<verse number="3">耶穌伸手摸佢，講：「𠊎肯，你淨浰了！」佢个癩即時無掉去，佢就得到淨浰。</verse>
				<verse number="4">然後，耶穌對佢講：「毋好㧯別人講；直接去見祭司，俾佢檢查，然後照 摩西 所定个規矩獻祭物，來對人證明你已經淨浰了。」</verse>
				<verse number="5">耶穌來到 迦百農 ，有一個 羅馬 軍官來求佢，講：</verse>
				<verse number="6">「主啊，𠊎个僕人發癱風，睡在屋肚，非常痛苦。」</verse>
				<verse number="7">耶穌講：「𠊎來去醫好佢。」</verse>
				<verse number="8">該軍官講：「主啊，你去吾屋下，𠊎當毋起；只愛你講一句話，𠊎个僕人就會好。</verse>
				<verse number="9">就像𠊎頂高有指揮官，下背也有受𠊎指揮个兵仔。𠊎命令這個兵仔去，佢就去；命令該個來，佢就來；對𠊎个奴僕講『做這個事』，佢就去做。」</verse>
				<verse number="10">耶穌聽到這個話，非常希奇，對跈佢个人講：「𠊎實在㧯你等講，像恁樣个信心，就係在 以色列 人當中，𠊎也從來吂識看過！</verse>
				<verse number="11">𠊎㧯你等講，將來會有非常多个人對東、對西來，同 亞伯拉罕 、 以撒 、 雅各 共下在天國坐席。</verse>
				<verse number="12">該兜本來愛做天國子民个人，反轉會被人逐到外背个烏暗肚；在該位，佢等會大噭，咬牙切齒。」</verse>
				<verse number="13">然後，耶穌對該軍官講：「轉去，照你个信心成全你！」 厥僕人个病就在該時完全好了。</verse>
				<verse number="14">耶穌來到 彼得 个屋下，看到佢个丈人𡟓發燒，睡在眠床頂。</verse>
				<verse number="15">耶穌摸姖个手，燒就退掉，姖就䟘起來接待耶穌。</verse>
				<verse number="16">臨暗仔个時，有人帶盡多被鬼附身个人來見耶穌。耶穌講一句話就將鬼逐走；佢也醫好所有个病人。</verse>
				<verse number="17">佢恁樣做，係應驗先知 以賽亞 所講个： 「佢承受𠊎等个軟弱， 擔當𠊎等个病痛。」</verse>
				<verse number="18">耶穌看到盡多人圍等佢，就吩咐學生渡到湖个對面去。</verse>
				<verse number="19">有一個經學教師來見佢，對佢講：「先生，你無論去到㖠位，𠊎一定愛跈你。」</verse>
				<verse number="20">耶穌講：「狐狸有窿，鳥仔有藪，總係人子連墊頭个所在也無。」</verse>
				<verse number="21">另外有一個學生講：「主啊，准𠊎先轉去埋葬吾爸。」</verse>
				<verse number="22">耶穌講：「做你跈𠊎，俾死人去埋葬佢等个死人！」</verse>
				<verse number="23">耶穌上船，厥學生跈等佢去。</verse>
				<verse number="24">忽然，有一陣暴風在湖面吹等來，船被浪激到，總係耶穌在該位睡目。</verse>
				<verse number="25">學生來喊醒佢，講：「主啊，救命！𠊎等會無命囉！」</verse>
				<verse number="26">耶穌應講：「樣愛使恁驚？你等个信心樣會恁細！」然後佢䟘起來，責備風㧯浪，風浪就停下來，湖面大大平靜。</verse>
				<verse number="27">大家非常著驚，講：「這係樣仔个人？連風㧯浪也聽從佢！」</verse>
				<verse number="28">耶穌來到湖對面个 加太拉 地方；有兩個對塚埔出來个人堵到佢。因為這兩個人被鬼附身，盡惡，致到無人敢行這條路。</verse>
				<verse number="29">佢等看到耶穌，就喊講：「上帝个孻仔，你做麼介愛干涉𠊎等？你愛提早來蹧踏𠊎等係麼？」</verse>
				<verse number="30">離好遠有一大群豬仔在該位食東西。</verse>
				<verse number="31">鬼就求耶穌，講：「你若係愛逐𠊎等出去，就准𠊎等入去這群豬仔底背。」</verse>
				<verse number="32">耶穌講：「去啊！」鬼就出來，入去該群豬仔底背；歸群豬仔衝下崩崗，跌落湖底背，全部浸死。</verse>
				<verse number="33">掌豬仔个人就走掉，入去城肚，將這件事个經過㧯被鬼附身个人所堵到个全部對大家報告。</verse>
				<verse number="34">全城个人就出來見耶穌；佢等看到佢，就要求佢離開佢等个地方。</verse>
			</chapter>
			<chapter number="9">
				<verse number="1">耶穌上船，渡過湖，轉到自家个城。</verse>
				<verse number="2">黏時有人用門枋扛等一個癱風病人來佢个面前。耶穌看出佢等个信心，就對癱風病人講：「細子啊，安心，你个罪得到赦免了！」</verse>
				<verse number="3">有幾個經學教師心中想：「這個人講侮辱上帝个話！」</verse>
				<verse number="4">耶穌知佢等想麼介，就問講：「你等樣般心懷惡念呢？</verse>
				<verse number="5">對這個人講：『你个罪得到赦免』容易呢？抑係講：『䟘起來行』較容易呢？</verse>
				<verse number="6">這下𠊎愛對你等證明，人子在地上有赦罪个權柄。」就對癱風病人講：「䟘起來，擎你个門枋轉去屋下！」</verse>
				<verse number="7">該人就䟘起來，轉去厥屋下。</verse>
				<verse number="8">眾人一看到就著驚；佢等又頌讚上帝，因為佢賜給人這種个權柄。</verse>
				<verse number="9">耶穌離開該位向前行，看到一個稅務員，名安到 馬太 ，坐在稅關。耶穌對佢講：「來跈𠊎！」 馬太 就䟘起來跈佢。</verse>
				<verse number="10">耶穌在 馬太 屋下食飯个時，盡多稅務員㧯無守教規个人也來；佢等同耶穌㧯厥學生共下食飯。</verse>
				<verse number="11">有兜法利賽人看到，就對耶穌个學生講：「你等个先生樣般同稅棍㧯壞人共下食飯呢？」</verse>
				<verse number="12">耶穌聽到這個話，就講：「健康个人毋使醫生，有病个人正愛。</verse>
				<verse number="13">聖經講：『𠊎所愛个係慈悲，毋係獻祭。』你等去研究看這句話个意思！因為𠊎來个目的毋係愛呼召義人，係愛呼召罪人。」</verse>
				<verse number="14">有一擺，施洗 約翰 个學生來問耶穌講：「𠊎等㧯法利賽人常常禁食，你个學生無禁食，係為到麼介呢？」</verse>
				<verse number="15">耶穌應講：「新郎還在婚姻个筵席中，人客敢愛使傷心嗎？當然毋使。總係時間會到，新郎會被人對佢等當中帶走，該時佢等就愛禁食。</verse>
				<verse number="16">「無人用新布補舊衫，因為新補个布會扯裂衫，使爛孔還較大。</verse>
				<verse number="17">也無人將新酒裝在舊皮袋肚；若係恁樣，皮袋會裂開，酒會漏出來，連皮袋也壞掉去。愛將新酒裝在新皮袋肚；恁樣，兩樣就得到保全。」</verse>
				<verse number="18">耶穌正對佢等講這兜話个時，有一個會堂个管理員來見佢，在佢面前跪落去，講：「吾妹仔堵堵過身，求你來去為姖按手，姖就會返生過來。」</verse>
				<verse number="19">耶穌就䟘起來，跈佢去；耶穌个學生也共下去。</verse>
				<verse number="20">有一個婦人家，發血漏病十二年；姖行到耶穌个後背，摸佢个衫尾。</verse>
				<verse number="21">姖心肝想：「𠊎只有摸到佢个衫，一定會得到醫好。」</verse>
				<verse number="22">耶穌轉身，看到姖，就對姖講：「妹仔啊，安心，你个信心救到你了！」對該時，這婦人家个病就好了。</verse>
				<verse number="23">耶穌來到該管理員个屋下，看到吹笛仔个㧯亂吵吵个人群，</verse>
				<verse number="24">就對佢等講：「你等全部出去，這細阿妹仔並無死，係睡掉定定！」 大家就笑佢。</verse>
				<verse number="25">將該兜人逐出去以後，耶穌入細阿妹仔个間肚，牽等姖个手，姖就䟘起來。</verse>
				<verse number="26">這消息就傳遍該所在。</verse>
				<verse number="27">耶穌離開該所在，又向前行。有兩個瞙目个人跈等佢，喊講：「 大衛 个子孫啊，可憐𠊎等！」</verse>
				<verse number="28">耶穌入去屋肚，兩個瞙目个來到佢面前，佢就問佢等講：「你等相信𠊎有能力做這件事嗎？」 佢等講：「主啊，𠊎等信。」</verse>
				<verse number="29">所以，耶穌摸佢等个目珠，講：「照你等个信心成全你等！」</verse>
				<verse number="30">佢等个目珠就好了。耶穌嚴嚴吩咐佢等講：「毋好對別人講起這件事！」</verse>
				<verse number="31">總係，佢等一出去，就將耶穌个名聲傳遍該地方。</verse>
				<verse number="32">佢等出去个時，有人帶一個被鬼附身个啞仔來耶穌面前。</verse>
				<verse number="33">鬼一逐出去，該人就出聲講話。大家盡著驚，講：「在 以色列 ，𠊎等吂識看過恁樣个事。」</verse>
				<verse number="34">總係，法利賽人講：「佢係靠鬼王來逐鬼个。」</verse>
				<verse number="35">耶穌行遍各鄉鎮，在逐個會堂教訓人，宣傳天國个福音，又醫好各種个病。</verse>
				<verse number="36">佢看到一群一群个人，就憐憫佢等，因為佢等盡艱苦、無人照顧，像無牧人个羊群共樣。</verse>
				<verse number="37">所以，佢對學生講：「愛收成个盡多，總係收割个人忒少。</verse>
				<verse number="38">你等愛祈求田主加派工人來收割。」</verse>
			</chapter>
			<chapter number="10">
				<verse number="1">耶穌喊十二個學生來，賜佢等逐邪靈㧯醫各種病个權柄。</verse>
				<verse number="2">這十二個使徒个名：頭一個安到 西門 (偏名 彼得 )，還有厥老弟 安德烈 ， 西庇太 个孻仔 雅各 ，㧯 雅各 个老弟 約翰 ；</verse>
				<verse number="3">又有 腓力 㧯 巴多羅買 ； 多馬 㧯稅務員 馬太 ； 亞勒腓 个孻仔 雅各 㧯 達太 ；</verse>
				<verse number="4">激進黨个 西門 㧯出賣耶穌个 加略 人 猶大 。</verse>
				<verse number="5">耶穌派這十二個使徒出去，吩咐佢等講：「莫去外邦人个地方，莫入 撒馬利亞 人个城市。</verse>
				<verse number="6">你等愛去 以色列 人失落个羊群該位。</verse>
				<verse number="7">去到逐所在，愛宣傳講：『天國會實現了！』</verse>
				<verse number="8">你等愛醫好病人，喊死人復活，使發癩个人淨浰，並逐鬼。你等係白白得到个，也愛白白給人。</verse>
				<verse number="9">錢袋仔毋好帶金、銀、銅錢；</verse>
				<verse number="10">出去毋好帶旅行袋抑係加帶一領內衫，也毋好帶鞋㧯柺棍仔。因為工人得到供給係應當个。</verse>
				<verse number="11">「你等去到一個城市抑係村莊个時，愛先打探在該位有麼人堪得接待你等，就去住在厥屋下，直到你等離開該地方。</verse>
				<verse number="12">你等入去人屋下个時，愛講：『願你等平安。』</verse>
				<verse number="13">若係該家人堪得接待你等，你等為佢等求个平安就會臨到該家庭。若係佢等堪毋得，你等就收轉你等个祝福。</verse>
				<verse number="14">該毋歡迎你等、毋聽你等話个家庭抑係城市，你等就離開該位，將腳項个泥粉蹬掉。</verse>
				<verse number="15">𠊎實在㧯你等講，在審判該日， 所多瑪 㧯 蛾摩拉 所受个責罰，會比該城市所受个輕盡多！」</verse>
				<verse number="16">「你等愛聽好！𠊎派你等出去，像送羊入狼群一樣。所以，你等愛像蛇恁精靈，像月鴿仔恁溫柔。</verse>
				<verse number="17">愛細膩，因為有人會捉你等，送你等上法院，也會在佢等个會堂鞭打你等。</verse>
				<verse number="18">為到𠊎个緣故，你等會被人送到統治者㧯君王个面前去受審判，來對佢等㧯外邦人做見證。</verse>
				<verse number="19">你等受審問个時，毋使愁愛講麼介話，抑係愛樣般回答；到該時，上帝會指示你等應當講个話。</verse>
				<verse number="20">因為你等所愛講个，毋係自家个話，係你等天父个靈愛通過你等講个。</verse>
				<verse number="21">「兄弟會出賣兄弟來害死佢等；阿爸也會恁樣對待子女；子女也會同爺𡟓作對來害死佢等。</verse>
				<verse number="22">為到𠊎，大家會怨恨你等；總係忍耐到底个人定著會得救。</verse>
				<verse number="23">佢等若係在這城肚迫害你等，你等就逃走去別个城。𠊎實在㧯你等講， 以色列 个城市你等還吂行透，人子就會到。</verse>
				<verse number="24">「學生無比先生較大，奴僕也無比主人較大。</verse>
				<verse number="25">因為恁樣，學生所堵到个㧯先生共樣，奴僕所堵到个㧯主人共樣，就愛知足。若係一家之主被人看做鬼王 別西卜 ，屋下其他个人敢毋係愛受還較大个侮辱嗎？</verse>
				<verse number="26">「所以，毋使驚麼人；一切遮等个事有一日會變做公開，祕密个事也會被人知到。</verse>
				<verse number="27">𠊎在暗中㧯你等講个，你等愛在光天白日之下講出來；你等私下聽到个，愛在屋頂宣佈出來。</verse>
				<verse number="28">只有㓾死肉體、無法滅靈魂个，毋使驚佢等；所愛驚个係上帝，只有佢正能將人个肉體㧯靈魂全部㧒落地獄去。</verse>
				<verse number="29">兩隻屋簷鳥仔雖然正賣一角銀，總係你等个天父若毋肯，一隻也毋會跌下地泥來。</verse>
				<verse number="30">連你等个頭那毛逐條佢乜算過囉！</verse>
				<verse number="31">所以，毋使驚，你等比一大群个屋簷鳥仔加盡貴重！</verse>
				<verse number="32">「在人个面前認𠊎个，在𠊎天父个面前𠊎也愛認佢；</verse>
				<verse number="33">在人个面前毋認𠊎个，在𠊎天父个面前𠊎也毋認佢。</verse>
				<verse number="34">「毋好恅到𠊎來係帶給世間和平；𠊎所帶來个並毋係和平，反轉係刀劍。</verse>
				<verse number="35">𠊎來係愛使 孻仔反對厥爸， 妹仔反對厥姆， 心舅反對家娘。</verse>
				<verse number="36">人个對敵就係佢屋下个人。</verse>
				<verse number="37">「敬愛爺𡟓贏過敬愛𠊎个，堪毋得做𠊎个學生；惜子女贏過敬愛𠊎个，堪毋得做𠊎个學生；</verse>
				<verse number="38">毋肯擎自家个十字架來跈𠊎个，也堪毋得做𠊎个學生。</verse>
				<verse number="39">想愛保全自家生命个人，反轉會喪失生命；為到𠊎喪失生命个，反轉會得到生命。</verse>
				<verse number="40">「接待你等个，就係接待𠊎；接待𠊎，就係接待該差𠊎來个。</verse>
				<verse number="41">因為某人係上帝个使者就接待佢个，定著會得到愛賞給使者共樣个獎賞；因為某人係義人就接待佢个，一定會得到愛賞給義人共樣个獎賞。</verse>
				<verse number="42">𠊎實在㧯你等講，無論係麼人，就算拿一杯冷水給最微細个一儕啉，只係因為這儕係𠊎个學生，就一定會得到獎賞。」</verse>
			</chapter>
			<chapter number="11">
				<verse number="1">耶穌指示十二學生个話講了後，就離開該地方，繼續去附近个各鄉鎮教訓人並傳福音。</verse>
				<verse number="2">施洗 約翰 在監獄聽到關係基督个工作，就派厥學生去見耶穌，</verse>
				<verse number="3">問佢講：「你就係 約翰 所講，該無幾久愛來个，抑係𠊎等還愛等別人啊？」</verse>
				<verse number="4">耶穌應講：「你等轉去，將你等所聽到、所看到个，報告 約翰 ，</verse>
				<verse number="5">就係：瞙目个看到，跛腳个行路，發癩个得到淨浰，耳聾个聽到，死人返生，窮苦人聽到福音。</verse>
				<verse number="6">無疑狐𠊎个人就有福氣！」</verse>
				<verse number="7">約翰 个學生離開後，耶穌對眾人講起 約翰 ，佢講：「你等頭擺去曠野尋 約翰 个時，想愛看麼介？看被風吹挺動个蘆竹係麼？</verse>
				<verse number="8">你等到底出去做麼介哪？去看著靚衫个人係麼？總係，著靚衫个人住在王宮。</verse>
				<verse number="9">恁樣，你等出去看麼介哪？係看先知麼？𠊎㧯你等講，無毋著，總係佢比先知還較大。</verse>
				<verse number="10">佢就係聖經所講个人。 上帝講： 『看啊，𠊎愛差派𠊎个使者做你个先鋒； 佢愛為你開路。』」</verse>
				<verse number="11">耶穌又講：「𠊎實在㧯你等講，世間無人比施洗 約翰 較偉大，總係在天國，最微細个也比佢較大！</verse>
				<verse number="12">對施洗 約翰 傳道到今晡日，天國有受到暴力个攻擊 ，強暴个人想愛搶它。</verse>
				<verse number="13">因為所有先知書㧯 摩西 个法律講預言到 約翰 為止；</verse>
				<verse number="14">所以，你等若係肯領受佢等个預言， 約翰 就係該愛來个 以利亞 。</verse>
				<verse number="15">有耳公好聽个人，就愛聽！</verse>
				<verse number="16">「𠊎愛用麼介來比喻這世代个人呢？佢等像坐在市場个細人仔對同伴喊講：</verse>
				<verse number="17">『𠊎等為你等歕婚禮个歌曲， 你等毋跳舞！ 𠊎等唱喪禮个哀歌， 你等也毋噭！』</verse>
				<verse number="18">約翰 來，毋食也毋啉，大家就講：『佢被鬼附身了！』</verse>
				<verse number="19">人子來，也食也啉，大家又講：『佢係貪食好酒个人，專門同稅棍㧯壞人做朋友！』總係，真實个智慧係用它个結果來顯明个。」</verse>
				<verse number="20">該時，耶穌責備該兜看過佢行盡多神蹟个城市，因為該兜人無離開佢等个罪惡。</verse>
				<verse number="21">佢講：「 哥拉汛 啊，你壞了！ 伯賽大 啊，你慘了！𠊎在你等中間所行个神蹟，若係行在 泰爾 㧯 西頓 ，該位个人早就著麻衫，委火灰在頭那頂來表示悔改囉！</verse>
				<verse number="22">𠊎實在㧯你等講，在審判該日， 泰爾 㧯 西頓 所受个責罰會比你等所受个還較輕！</verse>
				<verse number="23">若係你， 迦百農 啊，你想愛高高在上嗎？總係，你將來會跌落地獄去！因為，𠊎在你該位行過个神蹟若係行在 所多瑪 ，它今晡日一定還在！</verse>
				<verse number="24">𠊎實在㧯你等講，在審判該日， 所多瑪 所受个責罰會比你所受个還較輕！」</verse>
				<verse number="25">該時，耶穌講：「阿爸，天地个主啊，𠊎感謝你，因為你將這兜事囥等毋給聰明有學問个人知，反轉顯明給細人仔。</verse>
				<verse number="26">阿爸啊，無毋著，這種安排係你所歡喜个旨意。</verse>
				<verse number="27">「吾爸已經將一切賜給𠊎了！除了阿爸，無人識孻仔；除了孻仔㧯孻仔所愛啟示个人，也無人會識阿爸。</verse>
				<verse number="28">「來啊，勞苦揹重擔个人啊，你等全部來就近𠊎，𠊎愛使你等得到休息。</verse>
				<verse number="29">你等愛揹𠊎个軛來學𠊎，因為𠊎个心係溫柔又謙卑个；恁樣，你等个心神就會得到休息。</verse>
				<verse number="30">因為𠊎个軛係好揹个；𠊎个擔係輕可个。」</verse>
			</chapter>
			<chapter number="12">
				<verse number="1">無幾久以後，耶穌在一個安息日經過麥田。厥學生肚飢，就捋兜麥串來食。</verse>
				<verse number="2">有兜法利賽人看到就對耶穌講：「你看，你个學生做安息日禁止做个事！」</verse>
				<verse number="3">耶穌應講：「 大衛 㧯跈佢个人肚飢个時做麼介，你等無讀過係麼？</verse>
				<verse number="4">佢入去上帝个聖殿，食獻給上帝个餅；佢㧯跈佢个人食該種餅仔係違法个，因為只有祭司正做得食。</verse>
				<verse number="5">敢講你等無讀過 摩西 个法律所記載个？逐個安息日，祭司在聖殿攏總違犯安息日个規矩，總係毋算犯罪。</verse>
				<verse number="6">𠊎㧯你等講，在這位有比聖殿還較重要个。</verse>
				<verse number="7">聖經講：『𠊎所愛个係慈悲，毋係獻祭。』你等若係正經明白這句話个意思，就毋會定無罪个人做有罪。</verse>
				<verse number="8">因為人子係安息日个主。」</verse>
				<verse number="9">耶穌離開該所在，去 猶太 人个會堂。</verse>
				<verse number="10">在該位有一個人，佢个一支手瘸掉。有兜人想愛尋耶穌个把柄來告佢，就問佢講：「在安息日醫病合法麼？」</verse>
				<verse number="11">耶穌應講：「你等當中，若係有人有一隻羊，該隻羊在安息日跌落窟肚去，愛樣般呢？佢敢毋係將羊仔拉上來？</verse>
				<verse number="12">人比羊仔貴重加盡多呢！所以，在安息日做好事係合法个。」</verse>
				<verse number="13">接等，耶穌對該人講：「手伸出來！」 該人一伸手，手就復原到像另外該支手一樣。</verse>
				<verse number="14">法利賽人出去，就參詳愛樣般對付耶穌來殺害佢。</verse>
				<verse number="15">耶穌聽到這個消息，就離開該位，盡多人跈等佢。佢醫好該兜有病个人，</verse>
				<verse number="16">總係吩咐佢等，做毋得將佢个名傳出去。</verse>
				<verse number="17">這係應驗先知 以賽亞 所講个話： 上帝講：</verse>
				<verse number="18">「看哪，這係𠊎所揀選个僕人； 𠊎惜佢，佢係𠊎心所歡喜个。 𠊎愛將𠊎个靈賜給佢； 佢愛對萬民宣告𠊎个正義。</verse>
				<verse number="19">佢毋會相爭，毋會大聲喊， 街項也無人聽到佢个聲音。</verse>
				<verse number="20">磧壞个蘆竹，佢毋會將它拗斷， 會烏个燈火，佢毋會將它歕掉。 佢會堅持行正義， 一直到正義得勝。</verse>
				<verse number="21">全世界所有个人 攏總愛仰望佢！」</verse>
				<verse number="22">該時，有人帶一個被鬼附身又瞙目个啞仔來耶穌面前。耶穌醫好佢，使佢會講話也看得到。</verse>
				<verse number="23">眾人盡著驚，講：「這敢毋係 大衛 个子孫嗎？」</verse>
				<verse number="24">法利賽人聽到這個話就講：「佢係靠鬼王 別西卜 逐鬼，若無，佢就無辦法！」</verse>
				<verse number="25">耶穌知佢等个意思，就對佢等講：「一個國家自相紛爭，該國家一定會敗掉；城市抑係家庭自相紛爭，定著會企毋住。</verse>
				<verse number="26">假使撒但逐撒但，就係自相紛爭，佢个國樣般會企得住哪？</verse>
				<verse number="27">𠊎逐鬼若係靠 別西卜 ，恁樣，你等个子弟逐鬼又係靠麼儕哪？你等个子弟會證明係你等毋著！</verse>
				<verse number="28">其實，𠊎逐鬼若係靠上帝个靈，就係證明上帝已經在你等當中掌權了。</verse>
				<verse number="29">「敢有人能進入勇士个屋下去搶佢个財產？除了先將勇士捆起來，正有法度搶佢个東西。</verse>
				<verse number="30">「毋同𠊎共下个，就係反對𠊎个；毋同𠊎共下收集个，就係打散个。</verse>
				<verse number="31">所以，𠊎㧯你等講，人所犯一切个罪㧯所講一切譭謗个話 ，全部可以得到赦免；總係褻瀆聖靈个人無可能得到赦免。</verse>
				<verse number="32">講話犯到人子个，還有可能得到赦免；總係褻瀆聖靈个，無論在今生抑係來世，無可能得到赦免。</verse>
				<verse number="33">「好个果子樹正會結好果子；壞个果子樹一定結壞果子。看所結个果子就做得認出果子樹个好壞。</verse>
				<verse number="34">你這兜毒蛇啊！你等本來係惡毒个，樣般會講好話呢？因為心肝所裝滿个，嘴就講出來。</verse>
				<verse number="35">好人心肝積善就發出善；壞人積惡就發出惡。</verse>
				<verse number="36">「𠊎㧯你等講，在審判該日，人所講个閒話，逐句攏總愛供出來。</verse>
				<verse number="37">因為，上帝愛用你自家个話來宣佈你無罪，也愛用你个話來定你有罪。」</verse>
				<verse number="38">該時，有幾個經學教師㧯法利賽人來對耶穌講：「先生，𠊎等希望看你行神蹟。」</verse>
				<verse number="39">耶穌就應佢等講：「一個邪惡毋信个世代正要求神蹟；總係，除了先知 約拿 个神蹟以外，無別个神蹟好給你等看。</verse>
				<verse number="40">約拿 識在大魚个肚笥三日三夜，人子也愛在地最深个所在三日三夜。</verse>
				<verse number="41">在審判該日， 尼尼微 人會企起來告你等這代个人，因為佢等聽到 約拿 所傳个就棄邪歸正。𠊎㧯你等講，在這位有比 約拿 還較偉大个。</verse>
				<verse number="42">在審判該日，南方个女王會企起來告你等這代个人，因為姖對恁遠來聽 所羅門 王智慧个話。𠊎㧯你等講，在這位有比 所羅門 王還較偉大个。</verse>
				<verse number="43">「邪靈離開所附身个人，在燥爽个地方行來行去，尋休息个所在，總係尋無，</verse>
				<verse number="44">就講：『𠊎愛轉原來个屋肚去。』佢就倒轉去，看到該屋閒等，拚到淨浰淨浰，又整理到盡好勢。</verse>
				<verse number="45">佢就出去，帶七個比佢還較惡个邪靈倒轉來，同佢共下入去住。恁樣，該人後來个情形就比先前還較慘。這邪惡个世代也會恁樣。」</verse>
				<verse number="46">耶穌還對眾人講話个時，厥姆㧯厥老弟來。佢等企在外背，愛㧯佢講話。</verse>
				<verse number="47">有人對耶穌講：「看啊，若姆㧯若老弟企在外背，愛㧯你講話。」</verse>
				<verse number="48">耶穌回答該人講：「麼人係𠊎个阿姆？麼人係𠊎个兄弟？」</verse>
				<verse number="49">佢又指等佢个學生講：「看啊，𠊎个阿姆，𠊎个兄弟在這位！</verse>
				<verse number="50">凡實行𠊎天父旨意个就係𠊎个兄弟、姊妹，㧯阿姆。」</verse>
			</chapter>
			<chapter number="13">
				<verse number="1">該日，耶穌離開屋下去到湖滣，坐在該位。</verse>
				<verse number="2">有一大群人聚集到佢面前來，所以佢上船去坐等；眾人企在湖滣。</verse>
				<verse number="3">佢就用比喻對佢等講盡多道理。 佢講：「有一個委種个出去委種。</verse>
				<verse number="4">佢委个時，有兜種子落在路堘，鳥仔飛來將它兜食掉。</verse>
				<verse number="5">有兜落在泥盡淺个石頭地上；因為泥盡淺，種子盡遽就爆芽出來；</verse>
				<verse number="6">日頭出來一曬，嫩芽就枯燥掉去，因為根無罅深。</verse>
				<verse number="7">有兜落在竻仔底背，竻仔大起來，將秧仔拮等。</verse>
				<verse number="8">另外有兜種子落在好泥底背，長大結子，有兜收成一百倍，有兜六十倍，有兜三十倍。」</verse>
				<verse number="9">耶穌結論講：「有耳公好聽个人，就愛聽！」</verse>
				<verse number="10">學生來見耶穌，對佢講：「你對大眾講話樣般愛用比喻呢？」</verse>
				<verse number="11">耶穌應講：「關係天國个奧秘只有給你等知，總係無給佢等知。</verse>
				<verse number="12">因為已經有个，愛給佢還較多，俾佢有好賸；無个，連佢所有个一些些仔也愛搶走。</verse>
				<verse number="13">為到這個緣故，𠊎用比喻對佢等講話；因為佢等看也看毋識，聽也聽毋入耳，心也毋會明白。</verse>
				<verse number="14">這係應驗先知 以賽亞 个預言；佢傳上帝个話講： 你等聽了又聽，總係毋會入耳； 看了又看，總係毋會了解。</verse>
				<verse number="15">因為這子民个心盡鈍； 佢等又耳公背背， 目珠眨眨。 若毋係恁樣，佢等个目珠會看得到， 耳公會聽得入耳， 心也會明白， 佢等就會回心轉意， 𠊎就會醫好佢等。</verse>
				<verse number="16">「總係，你等係有福氣个人！因為你等个目珠看得到，耳公也聽得到。</verse>
				<verse number="17">𠊎實在㧯你等講，頭擺有盡多先知㧯義人想愛看你等所看到个，總係無看到；想愛聽你等所聽到个，也無聽到。</verse>
				<verse number="18">「所以，你等愛明白這委種个比喻係麼介意思。</verse>
				<verse number="19">該聽了天國个真道總係無明白个人，就像委在路堘个種子；該邪惡者來到，就將委在佢心中个真道搶走。</verse>
				<verse number="20">該委在石頭地上个種子係指人聽了真道，黏時歡喜接受，</verse>
				<verse number="21">總係真道在佢心中釘根無深，存無幾久，一下為到真道堵到困難抑係迫害，盡遽就跌倒。</verse>
				<verse number="22">該委在竻仔底背个種子係指人聽了真道以後，生活个操心㧯錢財个誘惑將真道歙等，無法度結果子。</verse>
				<verse number="23">該委在好泥底背个種子係指人聽了真道，有了解，就結果子；有兜收成一百倍，有兜六十倍，有兜三十倍。」</verse>
				<verse number="24">耶穌另外對佢等講一個比喻。佢講：「天國可比有人將好麥種委在田項。</verse>
				<verse number="25">有一暗晡，大家睡目个時，對敵來，委稗仔在麥仔中間，就走掉。</verse>
				<verse number="26">到麥仔打串个時，稗仔也大起來。</verse>
				<verse number="27">田主个僕人來對佢講：『頭家，你委在田項个敢毋係好麥種嗎？這兜稗仔到底係對㖠位來个？』</verse>
				<verse number="28">佢應講：『這係敵人做个。』僕人就問講：『你愛𠊎等去將稗仔挷掉麼？』</verse>
				<verse number="29">佢講：『毋使！因為你等挷稗仔个時，驚怕會連麥仔也挷到。</verse>
				<verse number="30">由在麥仔同稗仔共下大；等收割个時，𠊎會吩咐收割个工人先將稗仔挷出來，捆等，㧒在火中去燒，然後正割麥仔，收入𠊎个倉庫。』」</verse>
				<verse number="31">耶穌另外對佢等講一個比喻。佢講：「天國可比一粒芥菜子，有人將它種在田肚。</verse>
				<verse number="32">這種子比其他一切个種子較細，總係大起來後就比別樣菜較高大；它成做一頭樹，連飛鳥也在它个樹枝頂高做藪。」</verse>
				<verse number="33">耶穌用另外一個比喻對佢等講：「天國可比發酵，有婦人家拿來放在四十公升个麵肚，使歸團麵全部發起來。」</verse>
				<verse number="34">這兜道理耶穌攏總係用比喻對眾人講个；無一擺佢毋係用比喻對佢等講。</verse>
				<verse number="35">佢恁樣做，係愛應驗先知所講過个話：「𠊎愛用比喻對佢等講，將創造世界以來囥等个事講給佢等聽。」</verse>
				<verse number="36">耶穌離開眾人，入屋肚去。學生又來問佢講：「請㧯𠊎等講，田肚个稗仔這個比喻係麼介意思？」</verse>
				<verse number="37">耶穌應講：「該委好種个係人子；</verse>
				<verse number="38">田係這個世界；好種係屬天國个人；稗仔係屬該邪惡者个人；</verse>
				<verse number="39">委稗仔个對敵就係魔鬼；收割个時節係世界个末日；收割个工人係天使。</verse>
				<verse number="40">到末日，作惡个人愛像稗仔共樣被人挷出來，㧒落火中去燒。</verse>
				<verse number="41">人子愛派佢个天使，將佢个國底背該兜害人犯罪㧯一切作惡个人攏總捉起來，</verse>
				<verse number="42">㧒落火爐。在該位，佢等會大噭，咬牙切齒。</verse>
				<verse number="43">該時，義人在佢等天父个國底背，會發光像日頭一樣。有耳公好聽个人，就愛聽！</verse>
				<verse number="44">「天國可比財寶囥在田肚。有人發現，就將它揜起來，然後歡歡喜喜將自家所有个全部賣掉，去買該田。</verse>
				<verse number="45">「天國又可比一個生理人尋貴重个珍珠。</verse>
				<verse number="46">佢尋到一粒非常貴重个珍珠，就去賣佢所有个一切，來買該粒珍珠。</verse>
				<verse number="47">「天國又可比魚網委在湖內來打各種个魚。</verse>
				<verse number="48">網仔一滿，打魚个將它拉上來，坐在岸上，將魚仔分類，擇好个放落桶肚，將壞个㧒掉。</verse>
				<verse number="49">世界个末日也係像恁樣：天使愛出去，將壞人對好人當中分別出來，</verse>
				<verse number="50">㧒落火爐底背。在該位，佢等會大噭，咬牙切齒。」</verse>
				<verse number="51">耶穌問佢等講：「這兜話你等全部了解麼？」 佢等應講：「了解。」</verse>
				<verse number="52">耶穌講：「恁樣，每一個經學教師成做天國个學生，就像一家之主對佢个倉庫將新㧯舊个東西全部搬出來。」</verse>
				<verse number="53">耶穌講了這兜比喻，就離開該地方，</verse>
				<verse number="54">轉到自家个家鄉，在會堂教訓人；聽到个人攏總盡奇怪，講：「這儕人對㖠位得到這樣个智慧，又會行神蹟哪？</verse>
				<verse number="55">這敢毋係該木匠个孻仔嗎？厥姆毋係安到 馬利亞 嗎？ 雅各 、 約瑟 、 西門 㧯 猶大 毋係厥老弟嗎？</verse>
				<verse number="56">佢該兜老妹敢毋係住在𠊎等這位嗎？這人到底係對㖠位得到這一切呢？」</verse>
				<verse number="57">佢等就拒絕佢。 耶穌對佢等講：「除了在自家个本鄉、本家以外，先知全部受人尊敬。」</verse>
				<verse number="58">因為佢等毋肯信，耶穌在該位就無行盡多神蹟。</verse>
			</chapter>
			<chapter number="14">
				<verse number="1">該時， 加利利 个 希律 王聽到耶穌个事，</verse>
				<verse number="2">就對大臣講：「這個人定著係施洗 約翰 返生，正會有行這兜神蹟个能力。」</verse>
				<verse number="3">原來， 希律 為到厥兄弟 腓力 个𡜵娘 希羅底 个緣故，識下令捉 約翰 ，將佢䌈等關在監獄肚。</verse>
				<verse number="4">因為 約翰 再三責備 希律 講：「你佔 希羅底 做𡜵娘係違法个。」</verse>
				<verse number="5">希律 想愛㓾佢，總係驚人民，因為佢等相信 約翰 係先知。</verse>
				<verse number="6">希律 做生日該日， 希羅底 个妹仔在人客面前跳舞，使 希律 盡歡喜。</verse>
				<verse number="7">希律 就對姖發誓，應許照姖所要求个賞給姖。</verse>
				<verse number="8">受到厥姆个教唆，姖要求講：「求你即時將施洗 約翰 个頭那放在盤肚給𠊎！」</verse>
				<verse number="9">王感覺非常為難，總係佢已經在人客面前發誓，只有下令照姖所要求个給姖。</verse>
				<verse number="10">所以， 希律 派人去監獄，斬 約翰 个頭那，</verse>
				<verse number="11">放在盤肚，㨮給細阿妹仔；姖就交給厥姆。</verse>
				<verse number="12">約翰 个學生來，將身屍領去埋葬；然後去將這件事㧯耶穌講。</verse>
				<verse number="13">耶穌聽到這消息，就上船離開該位，自家一儕去偏僻个所在。眾人聽講，就對逐個城市行路跈等佢去。</verse>
				<verse number="14">耶穌一上岸，看到這一大群人，就憐憫佢等，醫好佢等當中个病人。</verse>
				<verse number="15">臨暗仔个時，學生來見耶穌，對佢講：「天暗囉，這位又係偏僻个所在，請喊大家離開，好俾佢等去附近个村莊買東西食。」</verse>
				<verse number="16">耶穌應講：「毋使喊大家離開；你等給佢等食！」</verse>
				<verse number="17">學生講：「𠊎等這位只有五隻餅㧯兩尾魚。」</verse>
				<verse number="18">耶穌講：「拿來給𠊎。」</verse>
				<verse number="19">佢吩咐眾人坐在草坪頂，然後將五隻餅㧯兩尾魚拿起來，昂頭望天，感謝上帝，然後擘開餅仔，交給學生；學生就分給眾人。</verse>
				<verse number="20">大家全部食到飽；學生將所賸个碎仔拈起來，裝滿十二隻籃仔。</verse>
				<verse number="21">食个人，婦人家㧯細人仔以外，約有五千儕。</verse>
				<verse number="22">事後，耶穌黏時催學生上船，先到對面該片去，等佢喊眾人轉去。</verse>
				<verse number="23">眾人離開以後，佢自家一儕上山去祈禱；到暗晡頭佢一儕還留在該位。</verse>
				<verse number="24">該時，船離岸已經盡遠，被浪打到橫來橫去，因為船係逆風行。</verse>
				<verse number="25">天曚光个時，耶穌在湖面行等去學生該位。</verse>
				<verse number="26">學生看到佢在湖面行，非常著驚，講：「係鬼！」佢等就驚到喊起來。</verse>
				<verse number="27">耶穌即時對佢等講：「安心，係𠊎，毋使驚！」</verse>
				<verse number="28">彼得 講：「主啊，若正經係你，請喊𠊎行水面去你該位！」</verse>
				<verse number="29">耶穌講：「來！」 彼得 就對船頂下去，在水面行等去耶穌該位。</verse>
				<verse number="30">總係，因為看到風盡大，心肝著驚，就開始沈等落去；佢大聲喊講：「主啊，救𠊎！」</verse>
				<verse number="31">耶穌黏時伸手拉等佢，講：「你个信心忒細了，做麼介疑狐哪？」</verse>
				<verse number="32">佢等上了船，風就停下來。</verse>
				<verse number="33">船頂个學生就跪拜佢，講：「你實在係上帝个孻仔。」</verse>
				<verse number="34">佢等過了湖，在 革尼撒勒 上岸。</verse>
				<verse number="35">該位个人一認出耶穌，就派人去附近个地方，帶所有个病人來耶穌个面前。</verse>
				<verse number="36">佢等求耶穌准病人單淨摸佢个衫尾；所有摸到个人全部得到醫好。</verse>
			</chapter>
			<chapter number="15">
				<verse number="1">有幾個法利賽人㧯經學教師對 耶路撒冷 來見耶穌，問佢講：</verse>
				<verse number="2">「樣般你个學生違背𠊎等祖先个傳統？佢等食飯前無照規矩洗手！」</verse>
				<verse number="3">耶穌應講：「你等樣般為到遵守傳統來違背上帝个命令呢？</verse>
				<verse number="4">上帝講：『愛孝敬爺𡟓』；又講：『咒罵爺𡟓个，愛判佢死刑。』</verse>
				<verse number="5">你等偏偏講，無論麼人對爺𡟓講：『𠊎將奉養你等个東西準做禮物獻給上帝』，</verse>
				<verse number="6">佢就毋使孝敬爺𡟓。像恁樣，你等拿傳統來廢掉上帝个話。</verse>
				<verse number="7">假冒為善个人啊， 以賽亞 指你等所講个預言實在無毋著！佢講：</verse>
				<verse number="8">上帝恁樣講： 『這兜人用嘴唇皮尊敬𠊎， 總係佢等个心遠遠離開𠊎。</verse>
				<verse number="9">佢等將人个規定準做𠊎个命令來教人； 佢等敬拜𠊎也係空空。』」</verse>
				<verse number="10">耶穌召集眾人到佢面前，對佢等講：「你等愛聽𠊎个話，也愛明白！</verse>
				<verse number="11">對嘴入去个東西毋會使人無淨浰；對嘴出來个正會使人無淨浰。」</verse>
				<verse number="12">後來，學生進前對耶穌講：「法利賽人聽了你个話盡毋服，你知麼？」</verse>
				<verse number="13">耶穌應講：「毋係𠊎天頂个阿爸所種个植物，攏總愛連根挷掉。</verse>
				<verse number="14">莫搭佢等！佢等係瞙目个，愛樣般為人帶路；瞙目个帶瞙目个，兩儕攏總會跌落窟肚去。」</verse>
				<verse number="15">彼得 講：「請㧯𠊎等解釋這比喻个意思。」</verse>
				<verse number="16">耶穌講：「到這下你等還係同別人共樣無明白嗎？</verse>
				<verse number="17">敢講你等毋知？一切對嘴入去个東西，係到肚笥底背去，然後又屙出來。</verse>
				<verse number="18">總係對嘴出來个係對心出來；該兜正會使人無淨浰。</verse>
				<verse number="19">因為對人心中出來个，有種種个惡念；這兜惡念會使佢犯兇殺、姦淫、通姦、偷拿、講花撩、譭謗等罪惡。</verse>
				<verse number="20">這兜正正經會使人無淨浰。像無先照規矩洗手就食飯這兜事，毋會使人無淨浰。」</verse>
				<verse number="21">耶穌離開該所在，閃到 泰爾 㧯 西頓 附近个地方去。</verse>
				<verse number="22">該位有一個 迦南 个婦人家來見佢，喊講：「主啊， 大衛 个子孫，可憐𠊎！吾妹仔被鬼附身，非常艱苦！」</verse>
				<verse number="23">耶穌一句話也毋應姖。學生前來求佢講：「請喊姖走！姖跈等𠊎等，歸路緊喊！」</verse>
				<verse number="24">耶穌應講：「𠊎只有受差派去 以色列 人當中尋迷路个羊。」</verse>
				<verse number="25">該婦人家一聽到這個話，就來跪拜佢，講：「主啊，求你幫助𠊎！」</verse>
				<verse number="26">耶穌應講：「拿子女食个餅仔㧒給狗仔食係毋著个。」</verse>
				<verse number="27">該婦人家講：「主啊，無毋著，總係狗仔乜食主人桌頂跌下來个餅碎仔啊！」</verse>
				<verse number="28">耶穌就應姖講：「婦人家，你个信心真大！照你所愛个成全你！」厥妹仔在該時就好了。</verse>
				<verse number="29">耶穌離開該地方，來到 加利利 湖附近；佢上山，坐在該位。</verse>
				<verse number="30">眾人又來尋佢，也帶來跛腳个、瞙目个、殘障个、啞仔，㧯好多別樣个病人，擺在耶穌个腳前；耶穌一一醫好佢等。</verse>
				<verse number="31">該群人看到啞仔講話，殘障个復原，跛腳个行路，瞙目个看得到，感覺非常奇怪，就頌讚 以色列 个上帝。</verse>
				<verse number="32">耶穌喊學生來，對佢等講：「𠊎代這群人盡擔心，因為佢等同𠊎共下已經三日，這下無東西好食囉。𠊎無愛佢等餓肚笥轉去，驚怕佢等在路上會餓到半生死。」</verse>
				<verse number="33">學生講：「在這偏僻个所在，𠊎等愛去㖠位尋恁多个食物給這一大群人食飽呢？」</verse>
				<verse number="34">耶穌講：「你等有幾多餅？」 佢等應講：「七隻，還有幾尾細魚仔。」</verse>
				<verse number="35">耶穌吩咐眾人坐在地上，</verse>
				<verse number="36">拿起該七隻餅仔㧯幾尾魚仔，感謝上帝後，就擘開，交給學生；學生就分給眾人。</verse>
				<verse number="37">大家全部食到飽。學生拈食賸个碎仔，裝滿七隻籃仔。</verse>
				<verse number="38">食个人，婦人家㧯細人仔以外，有四千儕。</verse>
				<verse number="39">耶穌就喊眾人散開，然後上船，去 馬加丹 个地方。</verse>
			</chapter>
			<chapter number="16">
				<verse number="1">有幾個法利賽人㧯撒都該人來見耶穌，想愛害佢，就要求佢行一個神蹟，來證明佢所做个係對上帝來个。</verse>
				<verse number="2">耶穌講：「臨暗仔，你等講：『天光日定著好天，因為天邊牽紅霞。』</verse>
				<verse number="3">朝晨頭，你等講：『今晡日會有風雨，因為天烏烏。』你等盡會看天色，總係看毋出這時代个兆頭 ！</verse>
				<verse number="4">一個邪惡毋信个世代正要求神蹟；總係，除了 約拿 个神蹟以外，無別个神蹟好給你等看。」 耶穌講了，就離開佢等。</verse>
				<verse number="5">學生渡到湖對面去，毋記得帶餅仔。</verse>
				<verse number="6">耶穌㧯佢等講：「你等愛細膩，愛提防法利賽人㧯撒都該人个發酵！」</verse>
				<verse number="7">佢等彼此暗中議論講：「佢講這個話，怕係因為𠊎等無帶餅仔。」</verse>
				<verse number="8">耶穌知佢等所講个，就問佢等講：「你等樣般議論無餅仔這件事呢？你等个信心忒細了！</verse>
				<verse number="9">樣般到這下還無明白！敢講你等毋記得用五隻餅給五千人食飽个事嗎？該時你等拈幾多籃个碎仔？</verse>
				<verse number="10">還有，用七隻餅給四千儕食飽該擺，你等又拈幾多籃个碎仔？</verse>
				<verse number="11">樣般還毋明白𠊎毋係同你等講餅仔个事？你等愛提防法利賽人㧯撒都該人个發酵！」</verse>
				<verse number="12">學生這時正知耶穌並毋係喊佢等提防餅仔底背个發酵，係愛佢等提防法利賽人㧯撒都該人个教訓。</verse>
				<verse number="13">耶穌到 凱撒利亞‧腓立比 个地方；在該位，佢問學生講：「一般人講人子係麼儕？」</verse>
				<verse number="14">佢等應講：「有兜講係施洗 約翰 ；有兜講係 以利亞 ；也有兜講係 耶利米 抑係其他先知个一個。」</verse>
				<verse number="15">耶穌問佢等講：「你等呢？你等講𠊎係麼人？」</verse>
				<verse number="16">西門‧彼得 應講：「你係基督，係永生上帝个孻仔。」</verse>
				<verse number="17">耶穌對佢講：「 約拿 个孻仔 西門 ，你真有福氣；因為這毋係人指示你个，係𠊎天頂个阿爸啟示你个。</verse>
				<verse number="18">𠊎㧯你講，你係 彼得 ，係磐石；在這磐石頂，𠊎愛建立𠊎个教會，連死个權勢也無可能贏過它。</verse>
				<verse number="19">𠊎愛將天國个鎖匙交給你，你在地上所禁止个，在天頂也愛禁止；你在地上所批准个，在天頂也愛批准。」</verse>
				<verse number="20">然後，耶穌吩咐學生，絕對毋好㧯麼儕講佢就係基督。</verse>
				<verse number="21">對該時開始，耶穌明明指示學生，佢一定愛上 耶路撒冷 去，對該兜長老、祭司長㧯經學教師受盡多个苦難，也會被人殺害，總係第三日佢會復活。</verse>
				<verse number="22">彼得 拉等耶穌，開始勸佢講：「主啊，做毋得！這件事千萬做毋得臨到你身上！」</verse>
				<verse number="23">耶穌轉身對 彼得 講：「撒但，閃開！你係𠊎个絆腳石；因為你个想法毋係對上帝來个，係人个想法。」</verse>
				<verse number="24">然後，耶穌對學生講：「想愛跈𠊎个人，就愛放掉自家，擎起佢个十字架來跈𠊎。</verse>
				<verse number="25">因為想愛救自家生命个人，反轉會喪失生命；為到𠊎喪失生命个人，反轉會得到生命。</verse>
				<verse number="26">人若係賺到全世界，總係喪失自家个生命，有麼介路用呢？當然無！佢愛拿麼介來換自家个生命呢？</verse>
				<verse number="27">人子愛在厥爸个榮光中，同佢个天使共下來。該時，佢愛照各人个行為施行報應。</verse>
				<verse number="28">𠊎實在㧯你等講，企在這位个人，有兜在死以前會看到人子臨到佢等當中來掌權。」</verse>
			</chapter>
			<chapter number="17">
				<verse number="1">六日以後，耶穌帶等 彼得 ，㧯 雅各 、 約翰 兩兄弟，恬恬仔上一座高山。</verse>
				<verse number="2">在佢等面前，耶穌个形像改變：佢个面發光像日頭，衫也像光恁白。</verse>
				<verse number="3">忽然，三個學生看到 摩西 㧯 以利亞 在該位同耶穌講話。</verse>
				<verse number="4">彼得 對耶穌講：「主啊，𠊎等在這位盡好！你若係愛，𠊎在這位搭三間寮仔，一間給你，一間給 摩西 ，一間給 以利亞 。」</verse>
				<verse number="5">彼得 个話還吂講煞，有一垤燦爛个雲出現，遮等佢等。忽然有聲對雲中傳出來講：「這係𠊎所惜个孻仔，𠊎所歡喜个。你等愛聽從佢！」</verse>
				<verse number="6">學生聽到這個聲，就伏落去，非常著驚。</verse>
				<verse number="7">耶穌行過來，拍佢等，講：「䟘起來，毋使驚！」</verse>
				<verse number="8">佢等昂頭一看，無看到別人，只有耶穌在該位。</verse>
				<verse number="9">佢等下山个時，耶穌吩咐佢等講：「人子吂對死復活以前，千萬毋好將所看到个異象講給人聽。」</verse>
				<verse number="10">學生問佢講：「經學教師樣會講， 以利亞 定著愛先來呢？」</verse>
				<verse number="11">耶穌講：「有影， 以利亞 愛先來使萬事復原。</verse>
				<verse number="12">總係𠊎㧯你等講， 以利亞 已經來了，可惜人毋認識佢，反轉隨心所愛來對待佢。共樣，人子也會受佢等个苦毒。」</verse>
				<verse number="13">這時，學生正知耶穌所講个，係指施洗 約翰 。</verse>
				<verse number="14">佢等轉到眾人該位个時，有一個人進前來，跪在耶穌面前，</verse>
				<verse number="15">講：「主啊，求你可憐吾孻仔！佢發豬乸瘵，非常痛苦，常常跌落火底背抑係水中去。</verse>
				<verse number="16">𠊎帶佢來見你个學生，總係佢等無辦法醫好佢。」</verse>
				<verse number="17">耶穌應講：「你等這世代个人樣般恁無信心，恁腐敗！𠊎還愛在你等這位幾久呢？還愛忍耐你等幾久呢？將細人仔帶來𠊎這位！」</verse>
				<verse number="18">然後，耶穌責備該鬼；鬼一出來，細人仔个病即時就好了。</verse>
				<verse number="19">事後，學生暗中來問耶穌講：「𠊎等樣般無法度將該鬼逐出去呢？」</verse>
				<verse number="20">耶穌應講：「因為你等个信心忒細。𠊎實在㧯你等講，你等个信心若係有一粒芥菜子恁大，就係對這座山講：『對這位徙到該位去！』它也會徙過去。無麼介事係你等做毋到个。」</verse>
				<verse number="21"></verse>
				<verse number="22">學生攏總聚集在 加利利 个時，耶穌對佢等講：「人子會被人交在人个手中；</verse>
				<verse number="23">佢等會殺害佢，總係第三日佢會復活。」 學生聽到，非常憂愁。</verse>
				<verse number="24">耶穌㧯學生來到 迦百農 个時，有幾個收聖殿稅个人來見 彼得 ，問佢講：「你等个先生毋係愛納聖殿稅嗎？」</verse>
				<verse number="25">彼得 講：「當然愛納。」 彼得 入屋肚去个時，耶穌先問佢講：「 西門 ，納關稅抑係人頭稅給這世間个君王个，係本國个公民抑係外國人？你想樣般？」</verse>
				<verse number="26">彼得 講：「係外國人！」耶穌講：「既然係恁樣，本國个公民就毋使納稅。</verse>
				<verse number="27">總係，𠊎等莫犯到這兜人。你去湖邊釣魚，將釣到个頭一尾魚仔捉來，打開魚嘴，你會看到一個銀幣；該錢就係你㧯𠊎兩儕愛納个聖殿稅，你就拿去給佢等。」</verse>
			</chapter>
			<chapter number="18">
				<verse number="1">該時，學生來問耶穌講：「在天國底背麼人最偉大？」</verse>
				<verse number="2">耶穌喊一個細人仔來，俾佢企在佢等个中間，</verse>
				<verse number="3">講：「𠊎實在㧯你等講，除了你等變到像細人仔恁樣，你等絕對無可能成做天國个子民。</verse>
				<verse number="4">像這個細人仔恁謙卑个，在天國底背就係最偉大个。</verse>
				<verse number="5">為到𠊎个名接待一個像這細人仔个，就係接待𠊎。</verse>
				<verse number="6">「無論麼人害信徒中任何一個微細个人離開𠊎，佢最好被人用大磨石紽等頸筋，㧒落深海浸死。</verse>
				<verse number="7">這世間慘了，因為有害人離開𠊎个事！發生恁樣个事係難免个，總係使這個事發生个人慘了！</verse>
				<verse number="8">「若係你个一支手抑係一支腳害你犯罪，將它斬下來，㧒掉它。少一支手抑係一支腳來得到永遠个生命，較贏雙手雙腳好好卻㧒落永遠不滅个烈火中。</verse>
				<verse number="9">若係你个一隻目珠害你犯罪，將它挖出來，㧒掉它。少一隻目珠來得到永遠个生命，較贏雙目好好卻㧒落地獄个火底背。</verse>
				<verse number="10">「你等愛細膩，毋好看輕任何一個微細个人。𠊎㧯你等講，在天頂，佢等个天使常常企在𠊎天頂个阿爸面前。</verse>
				<verse number="11"></verse>
				<verse number="12">「你等想看仔，若係一個人有一百隻羊，其中一隻行迷路，佢敢毋會將九十九隻放在山排頂，去尋該隻迷路个羊嗎？</verse>
				<verse number="13">𠊎實在㧯你等講，佢若係尋到該隻迷路个羊一定非常歡喜，比九十九隻無迷路个羊歡喜還較大！</verse>
				<verse number="14">共樣，你等 在天頂个阿爸也無愛任何一個微細个人喪失掉。</verse>
				<verse number="15">「若係你个兄弟抑係姊妹得罪你 ，你就去見佢，指出佢个毋著；總係愛在單淨佢一儕同你共下个時正好恁樣做。若係佢聽你个勸話，你就係重新得到你个兄弟抑係姊妹。</verse>
				<verse number="16">若係佢毋聽，你就另外請一兩儕共下去；恁樣，每一句責備个話就有兩三儕好做證。</verse>
				<verse number="17">若係佢還係毋聽，就將這件事个頭尾報告教會。教會佢也毋聽，你就看佢做外邦人抑係稅棍。</verse>
				<verse number="18">「𠊎實在㧯你等講，你等在地上所禁止个，在天頂也愛禁止；你等在地上所批准个，在天頂也愛批准。</verse>
				<verse number="19">「𠊎再㧯你等講，你等在地上，若係有兩個人同心合意祈禱，無論求麼介，𠊎在天頂个阿爸的確會成全你等。</verse>
				<verse number="20">因為，無論在㖠位，有兩三儕奉𠊎个名來聚集，𠊎就在佢等中間。」</verse>
				<verse number="21">該時， 彼得 來問耶穌講：「主啊，𠊎个兄弟抑係姊妹得罪𠊎，𠊎愛饒佢幾多擺？七擺罅麼？」</verse>
				<verse number="22">耶穌應講：「毋係七擺。𠊎㧯你講，係七十個七擺 。</verse>
				<verse number="23">因為天國可比這個故事：有一個王愛㧯佢个僕人算數。</verse>
				<verse number="24">佢開始算數个時節，有人將一個欠佢幾下千萬銀仔个僕人帶到佢面前來。</verse>
				<verse number="25">因為這個人無錢好還，主人就下令將佢㧯佢个𡜵娘子女全部賣給人做奴才，連佢所有个一切也攏總賣掉來還債。</verse>
				<verse number="26">該僕人在王面前跪下來，求講：『寬容𠊎一擺哪！𠊎定著會將一切債務還清。』</verse>
				<verse number="27">該僕人个主人就可憐佢，放佢走，又免掉佢个債。</verse>
				<verse number="28">「該僕人出來後，堵到一個同佢共下做事个伴。這同伴欠佢幾個銀仔，佢就揪等佢，揢佢个喉嗹，講：『欠𠊎个錢還𠊎！』</verse>
				<verse number="29">佢个同伴跪下來，求佢講：『寬容𠊎一擺哪！𠊎定著會還清！』</verse>
				<verse number="30">總係佢毋肯，反轉將同伴關在監獄，等佢還清債務。</verse>
				<verse number="31">其他个同伴看到這個事，心盡艱苦；佢等去見主人，將這事个頭尾對佢報告。</verse>
				<verse number="32">主人就喊該僕人來，對佢講：『你這壞心个僕人！你求𠊎，𠊎就免你所有个債，</verse>
				<verse number="33">你敢無應該憐憫你个同伴，像𠊎憐憫你共樣嗎？』</verse>
				<verse number="34">主人非常譴，將佢關在監獄受刑罰，等佢還清全部个債。」</verse>
				<verse number="35">耶穌講：「若係你等逐儕毋肯對內心饒赦兄弟抑係姊妹，𠊎在天頂个阿爸也愛恁樣對待你等。」</verse>
			</chapter>
			<chapter number="19">
				<verse number="1">耶穌講了這兜話，就離開 加利利 ，來到 約旦 河東片个 猶太 地區。</verse>
				<verse number="2">一大群人跈等佢；在該位，佢醫好佢等當中个病人。</verse>
				<verse number="3">有兜法利賽人來見耶穌，想愛害佢，問佢講：「請教你，無論理由係麼介，𠊎等个法律准老公離掉𡜵娘，係麼？」</verse>
				<verse number="4">耶穌應講：「你等無讀過這站經文係麼？太初，創造主所造个人，『有男也有女』。</verse>
				<verse number="5">上帝講：『因為恁樣，男人愛離開爺𡟓，㧯𡜵娘結合，兩儕成做一體。』</verse>
				<verse number="6">既然係恁樣，夫妻就毋係兩個人，係一體。所以，上帝所配合个，人做毋得拆開。」</verse>
				<verse number="7">法利賽人又問講：「恁樣， 摩西 做麼介給𠊎等一條誡命講，做老公个寫一張離婚書給𡜵娘就做得離掉姖呢？」</verse>
				<verse number="8">耶穌應講：「 摩西 准你等離掉𡜵娘，係因為你等个心盡硬；總係在世界創造个起頭並毋係恁樣。</verse>
				<verse number="9">𠊎㧯你等講，除了做𡜵娘个違犯貞節，無論麼人離掉𡜵娘，重新㧯別个婦人家結婚，就係犯姦淫。」</verse>
				<verse number="10">學生對耶穌講：「老公㧯𡜵娘个關係若係恁樣，無結婚反轉較好。」</verse>
				<verse number="11">耶穌講：「這種講法毋係逐個人會接受，只有得到上帝特別恩賜个人正會。</verse>
				<verse number="12">因為人無結婚个理由盡多：有兜係出世就結婚毋得；有兜係人為个原因無結婚个；另外有兜係為到天國个緣故無愛結婚。有法度接受个人就接受。」</verse>
				<verse number="13">有人帶細人仔來見耶穌，希望耶穌為佢等按手祈禱；總係學生責備該兜人。</verse>
				<verse number="14">耶穌講：「俾細人仔來𠊎這位，毋好禁止佢等，因為天國个子民就像這種个人。」</verse>
				<verse number="15">耶穌就為佢等按手祝福，然後離開該所在。</verse>
				<verse number="16">有一擺，有人來見耶穌，講：「先生，𠊎愛做麼介善事正做得承受永遠个生命啊？」</verse>
				<verse number="17">耶穌應講：「你樣般問𠊎關係『善』个事呢？只有一位係善个。你若係想愛承受永遠个生命，就愛遵守誡命。」</verse>
				<verse number="18">佢就問講：「麼介誡命？」 耶穌講：「做毋得㓾人；做毋得犯姦淫；做毋得偷拿；做毋得做假見證；</verse>
				<verse number="19">愛孝敬爺𡟓；愛惜鄰舍，就像惜自家一樣。」</verse>
				<verse number="20">該後生人應講：「這兜誡命，𠊎全部已經遵守了，還愛做麼介呢？」</verse>
				<verse number="21">耶穌講：「你若係愛做完全个人，去賣你所有个產業，將錢送給窮苦人，你就會有財產積存在天頂；然後你來跈𠊎。」</verse>
				<verse number="22">該後生人一聽到這個話，就心情沈重來離開，因為佢个產業盡多。</verse>
				<verse number="23">耶穌就對學生講：「𠊎實在㧯你等講，有錢人愛做天國个子民，真難噢！</verse>
				<verse number="24">𠊎再㧯你等講，有錢人愛做上帝國个子民，比駱駝穿過針鼻還較難！」</verse>
				<verse number="25">學生聽到這個話，十分奇怪，就問：「恁樣，麼人有可能得救呢？」</verse>
				<verse number="26">耶穌注目看佢等，講：「在人這係無可能，總係在上帝萬事都能。」</verse>
				<verse number="27">該時， 彼得 對佢講：「你看，𠊎等已經放掉一切來跈你，𠊎等將來會得到麼介呢？」</verse>
				<verse number="28">耶穌對佢等講：「𠊎實在㧯你等講，在將來个新時代，人子坐在佢榮耀个寶座上个時，你等跈𠊎个人會坐在十二隻寶座上，來審判 以色列 个十二支族。</verse>
				<verse number="29">無論麼人，為到𠊎个緣故來放掉房屋、兄弟、姊妹、爺𡟓、子女、抑係田地，攏總會得到百倍个獎賞，又會得到永遠个生命。</verse>
				<verse number="30">總係，盡多在最頭前个會做背尾；盡多在最背尾个會做頭前。」</verse>
			</chapter>
			<chapter number="20">
				<verse number="1">「天國可比這個故事：有一個葡萄園个主人打早出去，請工人去佢个葡萄園做事。</verse>
				<verse number="2">佢同佢等講好，一日个工錢係一隻銀錢，就喊佢等入葡萄園去做事。</verse>
				<verse number="3">朝晨頭九點鐘左右，佢又去市場，看到有兜人在該位閒閒企等，</verse>
				<verse number="4">就對佢等講：『你等也入去葡萄園做事；𠊎會給你等公當个工錢。』</verse>
				<verse number="5">佢等就去。後來，當晝十二點，㧯下晝頭三點鐘，佢又出去，照樣又請兜工人來。</verse>
				<verse number="6">下晝頭會五點鐘，佢又出去，看到還有人閒閒企在該位，就問佢等講：『你等做麼介歸日閒閒企在這位？』</verse>
				<verse number="7">佢等應講：『因為無人請𠊎等。』佢就對佢等講：『恁樣，你等也入去葡萄園做事。』</verse>
				<verse number="8">「到臨暗仔，園主對工頭講：『喊工人全部來，發工錢給佢等，對最尾入來个先分，到最先入來个。』</verse>
				<verse number="9">該兜五點鐘正來做事个，每一個人領到一隻銀錢。</verse>
				<verse number="10">輪到該兜最先來做事个人領工錢，佢等恅到一定會得到較多，總係逐儕也係領到一隻銀錢。</verse>
				<verse number="11">佢等領錢後，就埋怨主人，</verse>
				<verse number="12">講：『該兜最尾入來个正做一點鐘个事，總係𠊎等歸日在𤊶𤊶个日頭下做到會死，你給佢等个卻同給𠊎等个平多！』</verse>
				<verse number="13">園主應佢等中間个一儕講：『朋友，𠊎並無虧欠你。你㧯𠊎敢毋係講好，每日个工錢係一隻銀錢？</verse>
				<verse number="14">拿你个工錢轉去！𠊎愛給該最尾來个，同給你个平多；</verse>
				<verse number="15">敢講𠊎無權好用𠊎自家个錢嗎？因為𠊎對人大方，你就目赤赤係麼？』」</verse>
				<verse number="16">耶穌結論講：「像恁樣，該兜在最背尾个會做頭前；在最頭前个會做背尾。」</verse>
				<verse number="17">耶穌去 耶路撒冷 个時，帶十二個學生到路堘，對佢等講：</verse>
				<verse number="18">「看啊，𠊎等這下愛上 耶路撒冷 去；人子會被人交在祭司長㧯經學教師个手中。佢等會判佢死刑，</verse>
				<verse number="19">然後將佢交給外邦人。佢等會㩢耍佢，鞭打佢，將佢釘十字架；總係，第三日佢會復活。」</verse>
				<verse number="20">該時， 西庇太 个𡜵娘帶等兩個孻仔來見耶穌，跪下來，求佢一件事。</verse>
				<verse number="21">耶穌問姖講：「你愛麼介？」 姖講：「求你答應，在你做王个時，俾𠊎這兩個孻仔一個坐在你个右片，一個坐在你个左片。」</verse>
				<verse number="22">耶穌應講：「你等毋知自家所求个係麼介。𠊎一定愛啉个苦杯，你等有法度啉麼？」 佢等講：「𠊎等有法度！」</verse>
				<verse number="23">耶穌講：「你等確實愛啉𠊎个苦杯；總係麼人坐在𠊎个左右，就毋係𠊎做得決定个。這兜座位，吾爸為麼人準備，就愛賜給麼人。」</verse>
				<verse number="24">其他十個學生聽到這個事，就當閼佢兩兄弟。</verse>
				<verse number="25">耶穌喊佢等全部到佢面前來，對佢等講：「你等知，外邦人个統治者有權管轄佢等，佢等个領袖也有權指揮佢等；</verse>
				<verse number="26">總係，在你等當中做毋得恁樣。你等中間想愛做大人物个，就愛做你等个僕人；</verse>
				<verse number="27">想愛做頭个，就愛做你等个奴僕；</verse>
				<verse number="28">就像人子來，毋係愛被人服事，係來服事人，也愛為到救贖眾人來犧牲自家个生命。」</verse>
				<verse number="29">佢等離開 耶利哥 个時，一大群人跈等耶穌。</verse>
				<verse number="30">有兩個瞙目个坐在路堘，一聽講係耶穌經過，就大聲喊講：「主啊 ， 大衛 个子孫啊，可憐𠊎等！」</verse>
				<verse number="31">大家責備佢等，喊佢等毋好吵；總係佢等還較大聲喊講：「主啊， 大衛 个子孫啊，可憐𠊎等！」</verse>
				<verse number="32">耶穌停下來，喊佢等過來，問講：「你等愛𠊎為你等做麼介？」</verse>
				<verse number="33">佢等應講：「主啊，求你使𠊎等目珠看得到！」</verse>
				<verse number="34">耶穌就憐憫佢等，摸佢等个目珠；佢等黏時看得到，就跈等耶穌。</verse>
			</chapter>
			<chapter number="21">
				<verse number="1">佢等行會到 耶路撒冷 ，到 伯法其 ，在 橄欖 山，耶穌喊兩個學生先行，</verse>
				<verse number="2">吩咐佢等講：「你等去頭前个村莊。你等黏時會看到一隻驢仔㧯一隻細驢仔紽共下；將牠兜解開，牽來給𠊎。</verse>
				<verse number="3">若係有人對你等講麼介，就㧯佢講：『主 愛用牠兜』；該人黏時會准你等牽來。」</verse>
				<verse number="4">這件事係愛實現先知所講个：</verse>
				<verse number="5">去㧯 鍚安 城个子女講： 「看啊，你等个君王來了！ 佢盡謙卑騎等驢仔來， 騎等一條細驢仔。」</verse>
				<verse number="6">兩個學生就照耶穌个話去做。</verse>
				<verse number="7">佢等將驢仔㧯細驢仔牽來，將自家个衫搭在牠兜个背囊頂，耶穌就騎上去。</verse>
				<verse number="8">一大群人將自家个衫鋪在路上，也有兜人斬下樹枝，拿來鋪在路上。</verse>
				<verse number="9">頭前行㧯後背跈个人群大聲喊講： 「和散那！頌讚歸給 大衛 个子孫！ 願上帝賜福給該奉主名來个！ 和散那！頌讚歸給至高个上帝！」</verse>
				<verse number="10">耶穌入 耶路撒冷 个時，全城就踩起來。有人問講：「這個人到底係麼人？」</verse>
				<verse number="11">眾人應講：「佢係 加利利 省 拿撒勒 个先知耶穌。」</verse>
				<verse number="12">耶穌入去聖殿，將所有在聖殿肚做生理个人逐出去。佢㩳橫換錢个人个桌仔㧯賣月鴿仔个人个凳仔，</verse>
				<verse number="13">對佢等講：「聖經記載上帝个話講：『𠊎个聖殿愛做祈禱个殿』，你等卻將它變做賊竇！」</verse>
				<verse number="14">有瞙目个㧯跛腳个來聖殿肚尋耶穌；佢就醫好佢等。</verse>
				<verse number="15">祭司長㧯經學教師看到耶穌所行个神蹟，又聽到細人仔在聖殿肚喊講：「和散那！頌讚歸給 大衛 个子孫！」就盡譴。</verse>
				<verse number="16">佢等問耶穌講：「你聽到佢等喊麼介麼？」 耶穌應講：「𠊎當然有聽到。聖經講：『你使細人仔㧯孲𤘅仔發出美妙个頌讚』這句話，敢講你等無讀過係麼？」</verse>
				<verse number="17">佢就離開佢等，出城去 伯大尼 ，在該位過夜。</verse>
				<verse number="18">第二日打早，在轉城个路上，耶穌肚飢。</verse>
				<verse number="19">佢看到路堘有一頭無花果樹，就行前去，總係尋毋到麼介，只有葉仔。佢就對該頭樹仔講：「你永遠毋會再結果子了！」該頭無花果樹黏時就燥掉。</verse>
				<verse number="20">學生看到這個情形，感覺盡奇怪。佢等問講：「這頭無花果樹樣般會黏時燥掉啊？」</verse>
				<verse number="21">耶穌應講：「𠊎實在㧯你等講，你等若係有信心，無疑狐，𠊎對這頭無花果樹所做个，你等也做得到。毋單淨恁樣，你等就係對這座山講：『徙開，落海肚去！』也一定會實現。</verse>
				<verse number="22">只愛有信心，你等祈禱所求个一切全部會得到。」</verse>
				<verse number="23">耶穌入去聖殿，當教示人个時，祭司長㧯民間个長老來見佢，問講：「你靠麼介權柄做這兜事？麼人給你這權柄呢？」</verse>
				<verse number="24">耶穌應講：「𠊎先問你等一句話，若係你等回答𠊎，𠊎就㧯你等講𠊎靠麼介權柄做這兜事。</verse>
				<verse number="25">約翰 行洗禮个權柄係對㖠位來个？係對上帝抑係對人來个？」 佢等就彼此爭論，講：「若係𠊎等講：『對上帝來个』，佢會講：『恁樣，你等做麼介毋信 約翰 呢？』</verse>
				<verse number="26">若係𠊎等講：『對人來个』，驚怕眾人會對付𠊎等，因為佢等攏總相信 約翰 係先知。」</verse>
				<verse number="27">對恁樣，佢等應耶穌講：「𠊎等毋知。」 耶穌對佢等講：「恁樣，𠊎也毋㧯你等講𠊎靠麼介權柄做這兜事情。」</verse>
				<verse number="28">耶穌又講：「你等个意見樣般？某人有兩個孻仔。佢對大个孻仔講：『孻仔啊，你今晡日去葡萄園做事。』</verse>
				<verse number="29">佢應講：『𠊎毋去。』總係後來佢改變主意，就去。</verse>
				<verse number="30">該阿爸也對第二個孻仔講共樣个話。第二個孻仔應講：『好，阿爸，𠊎去。』總係佢無去。</verse>
				<verse number="31">這兩個孻仔到底㖠個遵行阿爸个意思呢？」 佢等應講：「係大个孻仔。」 耶穌講：「𠊎實在㧯你等講，稅棍㧯妓女會比你等先做上帝國个子民。</verse>
				<verse number="32">因為施洗 約翰 來，佢指示你等應當行个正路，你等毋相信佢；總係稅棍㧯妓女反轉信佢。你等看到後，還係無改變心意，還係毋相信佢。」</verse>
				<verse number="33">耶穌又講：「你等再聽另外一個比喻！有一個園主，開一垤葡萄園，周圍用籬笆圍等，又在園中挖一隻醡酒池，起一座守望台，然後將葡萄園租給佃農，自家出外去旅行。</verse>
				<verse number="34">收果子个時節會到了，佢派僕人去對該兜佃農收佢應得个果子。</verse>
				<verse number="35">該兜佃農揪等佢該兜僕人，打傷一個，㓾死一個，又用石頭㧹另外一個。</verse>
				<verse number="36">園主又派其他个僕人去，人數比先前較多；該兜佃農照樣對付佢等。</verse>
				<verse number="37">最後，園主派自家个孻仔去。佢心肝想：『最少，佢等乜會尊重𠊎个孻仔。』</verse>
				<verse number="38">總係該兜佃農看到厥孻仔个時，彼此講：『這人係園主个繼承人；來啊，𠊎等㓾死佢，來佔佢个產業！』</verse>
				<verse number="39">佢等就揪等佢，將佢㩳出園外，㓾死佢。</verse>
				<verse number="40">「恁樣，葡萄園个主人來个時，佢會樣般對付該兜佃農呢？」</verse>
				<verse number="41">佢等應耶穌講：「佢一定會出手滅掉該兜壞人，將葡萄園另外租給該兜照時交果子个佃農。」</verse>
				<verse number="42">耶穌對佢等講：「聖經个話你等無讀過係麼？ 泥水師傅所㧒掉个這垤石頭， 已經成做地基中最重要个 。 這係主个作為， 係樣般奇妙个事啊！」</verse>
				<verse number="43">耶穌又講：「所以，𠊎㧯你等講，上帝愛將佢个國對你等中間搶走，賜給該兜會結果子个外邦人。</verse>
				<verse number="44">麼人跌在這石頭頂，佢就會粉身碎骨；這石頭跌落麼人个身上，也會將佢磧到糜糜。」</verse>
				<verse number="45">該兜祭司長㧯法利賽人聽到耶穌講這兜比喻，知佢係指佢等講个，</verse>
				<verse number="46">就想愛捉佢。總係佢等驚眾人，因為眾人看耶穌係先知。</verse>
			</chapter>
			<chapter number="22">
				<verse number="1">耶穌又用比喻對佢等講：</verse>
				<verse number="2">「天國可比一個國王為自家个孻仔準備婚姻个筵席。</verse>
				<verse number="3">佢派僕人去催佢所請个人客來參加筵席，總係佢等毋肯來。</verse>
				<verse number="4">佢另外又派一兜僕人去，吩咐佢等㧯人客講：『𠊎个桌席已經擺好了，牛牯㧯肥个頭牲也㓾好，一切全部準備好勢了，請你等來參加婚姻个筵席。』</verse>
				<verse number="5">總係，該兜受邀請个人客還係毋搭佢，逐儕無閒自家个事情：一個去田項，一個去做生理，</verse>
				<verse number="6">其他个就捉該兜僕人，侮辱佢等，將佢等打死。</verse>
				<verse number="7">國王非常發譴，就派兵去除滅該兜兇手，放火燒佢等个城市。</verse>
				<verse number="8">然後，佢對僕人講：『婚姻个筵席已經擺好，總係先前所請个人無資格了。</verse>
				<verse number="9">這下你等去大街，將所堵到个人全部請來參加婚姻个筵席。』</verse>
				<verse number="10">所以僕人就去街路，將所看到个人，無論好壞攏總請來，使婚姻个桌席坐到滿滿。</verse>
				<verse number="11">「國王出來看人客个時，看到一個無著禮服个人，</verse>
				<verse number="12">就對佢講：『朋友，你來這位，樣般無著禮服啊？』該人恬恬無出聲。</verse>
				<verse number="13">國王就吩咐僕人：『將佢个手腳䌈起來，㧒到外背个烏暗中。在該位，佢會大噭，咬牙切齒。』」</verse>
				<verse number="14">耶穌結論講：「受邀請个人多，總係得到揀選个人少！」</verse>
				<verse number="15">法利賽人出去，彼此參詳愛樣般對耶穌个話尋把柄來害佢。</verse>
				<verse number="16">佢等派自家个學生，同 希律 黨个人共下去見耶穌，問講：「先生，𠊎等知你係誠實个人；你忠實將上帝个道理教示人，毋管人樣般想，因為你毋會看人个情面。</verse>
				<verse number="17">請㧯𠊎等講你个意見：納稅給 羅馬 皇帝係違背𠊎等个法律麼？」</verse>
				<verse number="18">耶穌知佢等个壞心術，就講：「假好个人啊，樣般想愛害𠊎？</verse>
				<verse number="19">拿一隻納稅个銀幣給𠊎看！」 佢等就拿一隻銀幣給佢。</verse>
				<verse number="20">耶穌問佢等講：「這個像㧯名號係麼人个？」</verse>
				<verse number="21">佢等應講：「係皇帝个。」 耶穌就對佢等講：「既然係恁樣，將皇帝个東西歸給皇帝，將上帝个東西歸給上帝。」</verse>
				<verse number="22">佢等聽到這個話，非常希奇，就離開佢。</verse>
				<verse number="23">在該日，有兜毋相信復活這件事个撒都該人來見耶穌，問佢講：</verse>
				<verse number="24">「先生， 摩西 講：『若係有一個人過身，總係無子女，厥老弟一定愛討守寡个阿嫂做𡜵娘，代阿哥傳宗接代。』</verse>
				<verse number="25">頭擺，在𠊎等這位識有七個兄弟：大哥結婚後，吂有子女就過身，留下𡜵娘給厥老弟；</verse>
				<verse number="26">第二個㧯第三個也係恁樣，一直到第七個，情形全部共樣。</verse>
				<verse number="27">最尾，該婦人家也過身。</verse>
				<verse number="28">請問，在復活个時節，七個人中姖愛算係㖠一儕个𡜵娘呢？因為佢等全部識㧯姖結婚。」</verse>
				<verse number="29">耶穌應佢等講：「你等毋著了！你等無明白聖經，也無清楚上帝个權能。</verse>
				<verse number="30">佢等對死復活个時，係㧯天頂个天使共樣，無討也無嫁。</verse>
				<verse number="31">關係死人復活个事，你等無讀過上帝㧯你等講个話係麼？</verse>
				<verse number="32">上帝講：『𠊎係 亞伯拉罕 个上帝， 以撒 个上帝， 雅各 个上帝。』這意思係講，上帝毋係死人个上帝，係生人个上帝。」</verse>
				<verse number="33">眾人聽到恁樣个教訓，感覺盡希奇。</verse>
				<verse number="34">法利賽人聽講耶穌將撒都該人堵到恬恬，就聚集共下。</verse>
				<verse number="35">其中有一個法律教師想愛用一個問題來害耶穌，就問佢講：</verse>
				<verse number="36">「先生， 摩西 个法律當中，㖠條誡命係最重要个？」</verse>
				<verse number="37">耶穌講：「『你愛用全部个心志、情感㧯理智敬愛主 — 你个上帝。』</verse>
				<verse number="38">這係誡命中最大㧯第一重要个。</verse>
				<verse number="39">第二條也係共樣重要：『你愛惜鄰舍，就像惜自家一樣。』</verse>
				<verse number="40">全部 摩西 个法律㧯先知个教訓，就係用這兩條誡命做根據。」</verse>
				<verse number="41">法利賽人聚集共下个時，耶穌問佢等：</verse>
				<verse number="42">「你等對基督个看法係樣般？佢係麼人个子孫？」 佢等應講：「佢係 大衛 个子孫。」</verse>
				<verse number="43">耶穌講：「恁樣， 大衛 受聖靈个感動，樣般還稱佢做『主』呢？ 大衛 講：</verse>
				<verse number="44">主對𠊎个主講： 『你坐在𠊎个右片， 等𠊎使你个仇敵伏在你个腳下。』</verse>
				<verse number="45">既然 大衛 稱佢做『主』，基督樣會又係 大衛 个子孫呢？」</verse>
				<verse number="46">無人能講半句話來應耶穌。對該日以後，也無人敢再問佢麼介難題。</verse>
			</chapter>
			<chapter number="23">
				<verse number="1">耶穌對眾人㧯厥學生講：</verse>
				<verse number="2">「經學教師㧯法利賽人坐在解釋 摩西 法律个位仔頂高，</verse>
				<verse number="3">所以，你等愛聽從並遵行佢等个教訓；總係毋好學佢等个所做，因為佢等會講，毋會行。</verse>
				<verse number="4">佢等將難㧡个重擔捆起來，放在別人个肩頭頂，總係自家連伸一支手指𢯭手也毋肯。</verse>
				<verse number="5">佢等所做一切个事情，攏總係做給別人看个。佢等將戴在額頭㧯手項个經文袋做較大兜，也將衫繸仔 做較長兜；</verse>
				<verse number="6">佢等盡愛坐筵席中个大位㧯會堂肚个特別座位；</verse>
				<verse number="7">佢等盡愛別人在公共場所對佢等致敬請安，喊佢等『先生』。</verse>
				<verse number="8">其實，你等無應該被人稱做『先生』，因為你等只有一位先生；你等全部係兄弟姊妹。</verse>
				<verse number="9">你等毋好稱世間个人做『阿爸』，因為你等只有一位阿爸，就係在天頂个阿爸。</verse>
				<verse number="10">「你等也無應該被人稱做『師傅』，因為你等只有一位師傅，就係基督。</verse>
				<verse number="11">你等中間麼人係最偉大个，就愛做你等个僕人。</verse>
				<verse number="12">上帝愛將自高个人降做卑微，也愛高升甘心謙卑个人。</verse>
				<verse number="13">「你等這班假好个經學教師㧯法利賽人慘了！你等當人个面將天國个門關起來，自家毋入去，也毋俾想愛入个人入去！</verse>
				<verse number="14"></verse>
				<verse number="15">「你等這班假好个經學教師㧯法利賽人慘了！你等行遍天涯海角，勸一個人入教，等到佢入教以後，你等卻使佢變做比你等加倍壞，比你等更加當受地獄个刑罰。</verse>
				<verse number="16">「你這兜青盲个帶路人慘了！你等講：『人若係指等聖殿發誓，這無麼介要緊；總係指等聖殿肚个金仔發誓个，佢就愛遵守。』</verse>
				<verse number="17">你這兜青盲个戇仔啊！借問，金仔較重要？抑係使金仔成做聖物个聖殿較重要啊？</verse>
				<verse number="18">你等又講：『人若係指等祭壇發誓，這無麼介要緊；總係指等祭壇頂个祭物發誓个，佢就愛遵守。』</verse>
				<verse number="19">你這兜青盲仔啊！到底係祭物較重要？抑係使祭物成做聖个祭壇較重要啊？</verse>
				<verse number="20">總講，人指等祭壇發誓，就係指等祭壇㧯祭壇頂所有个祭物發誓；</verse>
				<verse number="21">指等聖殿發誓，就係指等聖殿㧯住在底背个上帝發誓；</verse>
				<verse number="22">指等天發誓，就係指等上帝个寶座㧯坐在頂高个上帝發誓。</verse>
				<verse number="23">「你等這班假好个經學教師㧯法利賽人慘了！你等連薄荷、八角、茴香這兜香料也獻十分之一給上帝；總係法律中較重要个，像公義、慈悲、信實，你等反轉忽略。其實，這兜正係你等應當盡力去行个；其他个，也做毋得忽略。</verse>
				<verse number="24">你這兜青盲个帶路人啊！你等對飲料中將蚊屑仔濾出來，總係駱駝你等反轉吞落去！</verse>
				<verse number="25">「你等這班假好个經學教師㧯法利賽人慘了！你等將杯仔㧯盤仔个外背洗到淨淨，底背反轉裝滿貪心㧯放蕩。</verse>
				<verse number="26">青盲个法利賽人啊！杯仔个底背先洗給它淨，恁樣，外背就會淨浰。</verse>
				<verse number="27">「你等這班假好个經學教師㧯法利賽人慘了！你等像粉白个墳墓，外背盡靚，總係底背係死人骨頭㧯各種屙糟東西。</verse>
				<verse number="28">共樣，你等表面看起來十分公正，總係內心裝滿虛假㧯邪惡。</verse>
				<verse number="29">「你等這班假好个經學教師㧯法利賽人慘了！你等重建先知个墳墓，整理義人个碑石，</verse>
				<verse number="30">又講：『𠊎等若係生在祖先个時代，絕對毋會像佢等恁樣殺害先知！』</verse>
				<verse number="31">恁樣，你等已經承認自家就係該兜殺害先知个人个子孫！</verse>
				<verse number="32">由在你等繼續去做，去補滿你等祖先積惡个份額！</verse>
				<verse number="33">你這兜毒蛇、毒蛇个子孫啊，你等愛樣般閃開地獄个刑罰啊？</verse>
				<verse number="34">看啊！因為恁樣，𠊎會派先知、智慧人㧯教師來你等這位；當中，有兜會被你等㓾死抑係釘十字架，有兜會在你等个會堂被你等鞭打，對這城迫到別城去。</verse>
				<verse number="35">恁樣，世間所有殺害無辜个血債，就係對殺害無辜个 亞伯 到 撒迦利亞 為止一切个血債，攏總會臨在你等个身上。 撒迦利亞 就係 巴拉加 个孻仔，被你等㓾死在聖殿㧯祭壇中間个。</verse>
				<verse number="36">𠊎實在㧯你等講，這兜事情攏總會臨在這代人个身上。</verse>
				<verse number="37">「 耶路撒冷 啊！ 耶路撒冷 啊！你殺害先知，又用石頭㧹死上帝所差派來你這位个使者！𠊎樣般多擺愛保護你个子女，像雞乸聚集雞子在翼胛下一樣；總係你等無愛！</verse>
				<verse number="38">看啊，你等个家園會變做荒涼个所在。</verse>
				<verse number="39">𠊎㧯你等講，從今以後，你等會看𠊎毋到，直到你等講：『願上帝賜福給該奉主名來个！』」</verse>
			</chapter>
			<chapter number="24">
				<verse number="1">耶穌對聖殿出來，行等離開个時，學生來到佢个面前，指等聖殿个建築喊佢看。</verse>
				<verse number="2">耶穌對佢等講：「你等敢毋係看到這兜建築嗎？𠊎實在㧯你等講，這所在个每一垤石頭全部會被人拆下來，無一垤石頭會疊在另外一垤个頂高。」</verse>
				<verse number="3">耶穌坐在 橄欖 山頂，學生暗中來問佢講：「請㧯𠊎等講，這個事幾時會發生呢？你个再臨㧯世界个結尾會有麼介兆頭？」</verse>
				<verse number="4">耶穌應講：「你等愛細膩，毋好被人迷惑。</verse>
				<verse number="5">因為有盡多人會假冒𠊎个名來，講：『𠊎就係基督！』對恁樣迷惑盡多人。</verse>
				<verse number="6">你等會聽到附近相㓾个風聲㧯遠方戰爭个消息。你等毋使驚，這兜事定著會發生；總係這毋係講末日已經到了。</verse>
				<verse number="7">民族會㧯民族相㓾；國家會㧯國家戰爭；逐所在會有飢荒㧯地動。</verse>
				<verse number="8">這一切事情个發生就像產婦生產前个陣痛一樣。</verse>
				<verse number="9">「該時，你等會被人捉去，受苦刑，被人殺害。為到𠊎个名，天下萬民攏總會怨恨你等。</verse>
				<verse number="10">該時，盡多人會放掉佢等个信仰，彼此出賣，互相怨恨。</verse>
				<verse number="11">盡多假先知會出現，來迷惑盡多人。</verse>
				<verse number="12">因為邪惡氾濫，盡多人个愛心會漸漸冷掉去。</verse>
				<verse number="13">總係，忍耐到底个人定著會得救。</verse>
				<verse number="14">天國个福音愛先傳遍天下，對全人類做見證，然後末日正會到。</verse>
				<verse number="15">「你等看到先知 但以理 所講个該『毀滅性、邪惡个東西』企在神聖个所在个時 (讀个人愛了解這句話个意思)，</verse>
				<verse number="16">住在 猶太 地區个，愛走去山頂避難；</verse>
				<verse number="17">在屋頂个，毋好下來入去屋肚拿東西；</verse>
				<verse number="18">在田項个，毋好轉去拿外衫。</verse>
				<verse number="19">在該兜日仔，懷胎个婦人家㧯給孲𤘅仔食乳个阿姆就慘了！</verse>
				<verse number="20">你等愛祈求上帝，毋好俾你等在寒天抑係安息日避難。</verse>
				<verse number="21">因為該兜日仔个大災難係創造世界以來毋識有个，將來也毋會再有。</verse>
				<verse number="22">若係上帝無減少該兜災難个日仔，無人能生存下去。總係，為到佢所揀選个子民，上帝會減少該兜日仔。</verse>
				<verse number="23">「若係有人㧯你等講：『你看，基督在這位！』抑係『基督在該位！』毋好相信。</verse>
				<verse number="24">因為假基督㧯假先知會出現，佢等會行大神蹟㧯大奇事，盡佢所能來迷惑上帝所揀選个子民。</verse>
				<verse number="25">看啊，𠊎已經先㧯你等講過了。</verse>
				<verse number="26">「若係有人㧯你等講：『看啊，基督在曠野！』你等毋好出去；抑係講：『看啊，佢在屋肚！』你等也毋好相信。</verse>
				<verse number="27">因為人子个再臨會像𥍉爧一樣，一下仔就對天个東片照到西片去。</verse>
				<verse number="28">「身屍在㖠位，鷹鳥也會聚集在該位。</verse>
				<verse number="29">「該兜災難个日仔一過去，日頭會變烏，月光毋會再光，星仔會對天頂跌下來，太空个系統也會搖動。</verse>
				<verse number="30">該時，人子再臨个兆頭會在天邊出現。地上个萬族萬民攏總會大噭；佢等會看到人子大有能力㧯榮耀坐等天頂个雲降臨。</verse>
				<verse number="31">號筒个聲會大響，佢愛差天使到天涯海角去，對世界這片到世界該片，召集佢所揀選个子民。</verse>
				<verse number="32">「你等愛對無花果樹學教訓。當樹枝轉青，生出新葉个時，你等就知熱天會到了。</verse>
				<verse number="33">共樣，你等看到這一切个現象，就愛知時間會到 ，已經在門口了。</verse>
				<verse number="34">𠊎實在㧯你等講，這代人還吂攏總過身以前，這一切个事就會發生。</verse>
				<verse number="35">天㧯地會無掉，總係𠊎个話永遠毋會無掉。</verse>
				<verse number="36">「總係該愛來个日仔㧯時間，無人知；天頂个天使也毋知，孻仔也毋知 ，只有阿爸知。</verse>
				<verse number="37">人子个再臨會像 挪亞 時代所發生个事一樣。</verse>
				<verse number="38">大水吂來以前，人人照常食啉嫁娶，直到 挪亞 入大船該日；</verse>
				<verse number="39">佢等麼介都毋知，直到大水來到，將佢等全部打走。人子个再臨也會恁樣。</verse>
				<verse number="40">該時，兩個人在田項做事，一個會受接走，一個會留下來；</verse>
				<verse number="41">兩個婦人家挨磨石，一個會受接走，一個會留下來。</verse>
				<verse number="42">所以，你等愛警醒，因為毋知你等个主愛在㖠日再臨。</verse>
				<verse number="43">你等愛知：一家个主人若係知賊仔暗晡頭幾時會來，佢一定會警醒，毋俾賊仔挖孔仔入來。</verse>
				<verse number="44">像恁樣，你等也應當隨時準備好勢，因為人子會在你等無想到个時忽然降臨。</verse>
				<verse number="45">「恁樣，麼人係忠心又精明个僕人啊？就係主人指派佢管理其他僕人个時，佢就照時分配糧食个人。</verse>
				<verse number="46">主人轉來个時，看到佢恁樣行，這僕人係樣般有福氣啊！</verse>
				<verse number="47">𠊎實在㧯你等講，主人會派佢管理所有个產業。</verse>
				<verse number="48">總係，佢若係壞僕人，心中想：『𠊎个主人會較慢正轉來』，</verse>
				<verse number="49">就出手打佢个同伴，又去同酒醉个人共下食啉，</verse>
				<verse number="50">在佢無想到个日仔，在佢毋知个時間，該僕人个主人會轉來，</verse>
				<verse number="51">將佢打到半生死 ，使佢㧯假好个人共下受刑罰；在該位佢會大噭，咬牙切齒。」</verse>
			</chapter>
			<chapter number="25">
				<verse number="1">「在該日，天國可比這個故事：有十個細阿妹仔擐等油燈，出去迎接新郎。</verse>
				<verse number="2">其中五個係戇个，五個係聰明个。</verse>
				<verse number="3">戇个擐等燈，總係無另外帶油；</verse>
				<verse number="4">聰明个擐等燈，另外又帶幾罐油。</verse>
				<verse number="5">新郎停跎个時，細阿妹仔全部啄目睡到睡掉去。</verse>
				<verse number="6">「到半夜，有人喊講：『新郎來囉，你等出來迎接佢！』</verse>
				<verse number="7">十個細阿妹仔攏總䟘起來，將油燈挑較光兜。</verse>
				<verse number="8">該時，戇个對聰明个講：『拜託，分一些油給𠊎等，因為𠊎等个油燈會烏掉了！』</verse>
				<verse number="9">該兜聰明个應講：『做毋得噢，𠊎等个油分給你等，驚怕大家會毋罅用；你等自家去店項買。』</verse>
				<verse number="10">戇个細阿妹仔去買油个時節，新郎就到了。該五個有準備个細阿妹仔就跈等新郎入去，共下參加筵席；門就關起來。</verse>
				<verse number="11">「其他个細阿妹仔無幾久也到；姖等喊講：『主啊，主啊！請㧯𠊎等開門！』</verse>
				<verse number="12">新郎應講：『𠊎實在㧯你等講，𠊎根本毋識你等。』」</verse>
				<verse number="13">耶穌講：「所以，你等愛警醒，因為你等毋知該日仔、該時間幾時會到。</verse>
				<verse number="14">「天國又可比這個故事：有一個人愛出去旅行，佢喊僕人來，將產業交給佢等。</verse>
				<verse number="15">佢照佢等逐儕个才調，一個給五千隻銀幣，一個給兩千，一個給一千，然後就出發 。</verse>
				<verse number="16">該領五千个，黏時去做生理，賺到五千隻銀幣。</verse>
				<verse number="17">該領兩千个，也共樣恁樣賺到兩千隻銀幣。</verse>
				<verse number="18">總係該領一千个出去，在地泥下挖一個孔仔，將主人个錢埋起來。</verse>
				<verse number="19">「過盡久，該幾個僕人个主人轉來，同佢等算數。</verse>
				<verse number="20">該領五千个，帶等另外个五千入來，講：『頭家，你給𠊎五千隻銀幣；你看，𠊎又賺到五千。』</verse>
				<verse number="21">主人講：『盡好，你這好又忠心个僕人！你在細細个事頂高有忠心，𠊎愛委託你經營大事。入來同你个主人共下享受快樂噢！』</verse>
				<verse number="22">「該領兩千个，也入來，講：『頭家，你給𠊎兩千隻銀幣；你看，𠊎又賺到兩千。』</verse>
				<verse number="23">主人講：『盡好，你這好又忠心个僕人！你在細細个事頂高有忠心，𠊎愛委託你經營大事。入來同你个主人共下享受快樂噢！』</verse>
				<verse number="24">「該時，該領一千个也入來，講：『頭家，𠊎知你係厲害个人；你無種个地方也愛收割，無委種个所在也愛收成。</verse>
				<verse number="25">𠊎盡驚，就將你个錢埋在地泥下。請看，你个錢在這位。』</verse>
				<verse number="26">「佢个主人講：『你這壞又懶尸个僕人！既然你知𠊎無種个地方也愛收割，無委種个所在也愛收成，</verse>
				<verse number="27">你就應該將𠊎个錢存入銀行，等𠊎轉來个時，好連本帶利共下領轉來。</verse>
				<verse number="28">你等將佢个錢拿給該有一萬隻銀幣个。</verse>
				<verse number="29">因為已經有个，愛給佢還較多，俾佢有好賸；無个，連佢所有个一些些仔也愛搶走。</verse>
				<verse number="30">這個無用个僕人，你等將佢逐到外背个烏暗肚去；俾佢在該位大噭，咬牙切齒。』</verse>
				<verse number="31">「當人子在佢个榮光中降臨个時，眾天使同佢共下，佢愛坐在榮耀个寶座頂；</verse>
				<verse number="32">萬民全部愛聚集在佢个面前。佢愛將佢等分做兩群，像掌羊个人將綿羊對山羊中分開來一樣。</verse>
				<verse number="33">佢愛將綿羊放在右片，山羊放在左片。</verse>
				<verse number="34">然後，王會對在佢右片个人講：『得到吾爸賜福个人啊，你等來！來承受對創造世界以來就為你等準備个國。</verse>
				<verse number="35">因為𠊎肚飢，你等給𠊎食；𠊎嘴燥，你等給𠊎啉；𠊎出外流浪，你等接待𠊎去你等屋下；</verse>
				<verse number="36">𠊎打赤膊，你等給𠊎著；𠊎發病，你等照顧𠊎；𠊎坐監，你等來看𠊎。』</verse>
				<verse number="37">「該時，該兜義人會應講：『主啊，𠊎等幾時看到你肚飢，給你食；抑係嘴燥，給你啉？</verse>
				<verse number="38">幾時看到你出外流浪，接待你去𠊎等屋下；抑係看到你打赤膊，給你著？</verse>
				<verse number="39">幾時看到你發病抑係坐監，𠊎等去看顧你啊？』</verse>
				<verse number="40">王會應講：『𠊎實在㧯你等講，你等樣般對待𠊎這兄弟姊妹中最微細个一儕，就係對待𠊎一樣！』</verse>
				<verse number="41">「然後，王會對在佢左片个人講：『受到上帝咒詛个人啊，你等離開𠊎！入去為魔鬼㧯佢个爪牙所準備永遠不滅个火底背！</verse>
				<verse number="42">因為𠊎肚飢，你等無給𠊎食；嘴燥，你等無給𠊎啉；</verse>
				<verse number="43">𠊎出外流浪，你等無接待𠊎去你等屋下；𠊎打赤膊，你等無給𠊎著；𠊎發病抑係坐監，你等無看顧𠊎。』</verse>
				<verse number="44">「這時，佢等會講：『主啊，𠊎等幾時看到你肚飢抑係嘴燥，抑係出外流浪，抑係打赤膊，抑係發病抑係坐監，無服事你啊？』</verse>
				<verse number="45">王會應佢等講：『𠊎實在㧯你等講，你等毋幫助這兜人中間最微細个一儕，就係毋幫助𠊎。』</verse>
				<verse number="46">這種个人愛受永遠个刑罰；總係該兜義人，佢等一定會得到永遠个生命。」</verse>
			</chapter>
			<chapter number="26">
				<verse number="1">耶穌講了這兜話，就對學生講：</verse>
				<verse number="2">「你等知，加兩日就係𨃟過節，人子會被人出賣，去釘十字架。」</verse>
				<verse number="3">該時，祭司長㧯民間个長老在大祭司 該亞法 个官廳聚會，</verse>
				<verse number="4">共下陰謀愛祕密捉耶穌，將佢㓾死。</verse>
				<verse number="5">總係佢等講：「𠊎等毋好在節期中下手，免得惹起民眾个暴動。」</verse>
				<verse number="6">耶穌在 伯大尼 發癩个 西門 屋下；</verse>
				<verse number="7">有一個婦人家帶一隻玉罐仔來，底背裝盡珍貴个香油。耶穌食飯个時，該婦人家將香油倒在耶穌个頭那頂。</verse>
				<verse number="8">學生看到，盡無歡喜，講：「樣般恁打喪呢？</verse>
				<verse number="9">這香油做得賣盡多錢來救濟窮苦人啊！」</verse>
				<verse number="10">耶穌知佢等所講个，就對佢等講：「做麼介為難這婦人家哪？姖為𠊎做个係一件盡靚个事。</verse>
				<verse number="11">因為常常有窮苦人同你等共下，總係𠊎毋係常常同你等共下。</verse>
				<verse number="12">姖將這香油倒在𠊎个身上係為𠊎个埋葬做準備。</verse>
				<verse number="13">𠊎實在㧯你等講，普天下，無論這福音傳到麼介所在，逐儕都愛講起姖所做个事，來紀念姖。」</verse>
				<verse number="14">耶穌十二個學生當中，有一個 加略 人 猶大 ；佢去見祭司長，</verse>
				<verse number="15">講：「若係𠊎將耶穌交給你等，你等愛給𠊎麼介？」佢等就拿三十隻銀錢 給佢。</verse>
				<verse number="16">對該時起， 猶大 就尋機會愛出賣耶穌。</verse>
				<verse number="17">除酵節个第一日，學生來問耶穌講：「你愛𠊎等在㖠位為你準備𨃟過節个晚餐？」</verse>
				<verse number="18">耶穌應講：「你等入城去見某人，對佢講：『先生講：𠊎个時機已經近了；𠊎愛㧯𠊎个學生在若屋下守𨃟過節。』」</verse>
				<verse number="19">學生就照耶穌所吩咐个去準備𨃟過節个晚餐。</verse>
				<verse number="20">臨暗仔，耶穌㧯十二個學生圍等桌仔坐等。</verse>
				<verse number="21">食个時節，耶穌講：「𠊎實在㧯你等講，你等當中有一個人愛出賣𠊎。」</verse>
				<verse number="22">學生就盡憂愁，一個一個問佢講：「主啊，敢係𠊎？」</verse>
				<verse number="23">耶穌應講：「㧯𠊎用共隻盤仔搵餅个，就係愛出賣𠊎个人。</verse>
				<verse number="24">照聖經所講，人子會受害；總係出賣人子个人有災禍了！佢莫出世還較好！」</verse>
				<verse number="25">出賣耶穌个 猶大 也開口講：「先生，敢係𠊎？」耶穌講：「你已經講了！」</verse>
				<verse number="26">佢等食个時節，耶穌拿起餅仔，感謝上帝後，就擘開，分給學生，講：「拿來食；這係𠊎个身體。」</verse>
				<verse number="27">佢又拿起杯仔，感謝上帝後，交給佢等，講：「你等全部愛啉；</verse>
				<verse number="28">這係𠊎个血，係證明上帝㧯人立約个血，為到使盡多人个罪得到赦免來流出个。</verse>
				<verse number="29">𠊎㧯你等講，𠊎絕對毋會再啉這葡萄酒，直到𠊎㧯你等在吾爸个國啉新酒該日。」</verse>
				<verse number="30">佢等唱一首詩，就出來，到 橄欖 山去。</verse>
				<verse number="31">然後，耶穌對佢等講：「今暗晡，你等攏總會為𠊎个緣故離開𠊎；因為聖經記載： 上帝講： 『𠊎愛攻擊牧人， 羊群就分散掉去。』</verse>
				<verse number="32">總係𠊎復活以後，愛比你等先去 加利利 。」</verse>
				<verse number="33">彼得 對耶穌講：「就算別人因為你个緣故全部離開你，𠊎永遠毋會離開你！」</verse>
				<verse number="34">耶穌對佢講：「𠊎實在㧯你講，今暗晡，雞仔啼以前，你會三擺毋認𠊎。」</verse>
				<verse number="35">彼得 應講：「就算𠊎一定愛同你共下死，𠊎也絕對毋會毋認你！」 其他个學生也全部恁樣講。</verse>
				<verse number="36">耶穌㧯學生來到一個所在，名安到 客西馬尼 ；佢對佢等講：「你等在這位坐，𠊎愛去該片祈禱。」</verse>
				<verse number="37">然後佢帶等 彼得 㧯 西庇太 个兩個孻仔共下去。佢開始感覺盡憂傷痛苦，</verse>
				<verse number="38">對佢等講：「𠊎个心艱苦到會死。你等留在這位，愛同𠊎共下警醒噢！」</verse>
				<verse number="39">佢行前兜仔，就伏在地上，祈禱講：「阿爸啊，若係做得，求你毋好俾𠊎啉這個苦杯！總係，毋好照𠊎个意思，愛照你个旨意。」</verse>
				<verse number="40">佢倒轉三個學生該位，發現佢等睡掉，就㧯 彼得 講：「實在噢，你等無法度同𠊎共下警醒一點鐘久嗎？</verse>
				<verse number="41">愛警醒祈禱，免得陷落迷惑。你等確實心靈甘願，總係肉體軟弱。」</verse>
				<verse number="42">耶穌第二擺又去祈禱，講：「阿爸啊，若係這苦杯做毋得離開𠊎，定著愛𠊎啉，願你个旨意成全！」</verse>
				<verse number="43">佢又倒轉學生該位，看到佢等又睡掉，因為佢等个目珠擘毋開。</verse>
				<verse number="44">耶穌又離開佢等，第三擺去祈禱，還係講共樣个話。</verse>
				<verse number="45">然後佢又倒轉學生該位，講：「你等還睡目，還在該位休息嗎？看啊，時間到了，人子已經被人出賣到罪人手中囉。</verse>
				<verse number="46">䟘起來，𠊎等來去！看啊，出賣𠊎个人到了！」</verse>
				<verse number="47">耶穌還講等話个時，十二個學生中个 猶大 來到。有一大群人帶等刀仔、棍仔同佢共下來；佢等係祭司長㧯民間个長老派來个。</verse>
				<verse number="48">出賣耶穌个人事前給佢等一隻暗號，講：「𠊎唚麼人，佢就係你等所想愛个人；你等就捉佢。」</verse>
				<verse number="49">猶大 即時行到耶穌面前，喊講：「先生，平安！」又唚佢。</verse>
				<verse number="50">耶穌講：「朋友，你所愛做个，就做！」 所以，該兜人就進前來，下手捉耶穌。</verse>
				<verse number="51">同耶穌共下个人當中，有一儕挷出刀仔，對大祭司个僕人劈過去，將佢个耳公削掉一隻。</verse>
				<verse number="52">耶穌㧯佢講：「刀仔收起來；因為凡動刀个，一定會死在刀下。</verse>
				<verse number="53">敢講你毋知𠊎做得求吾爸，佢會黏時差超過十二營个天使來嗎？</verse>
				<verse number="54">𠊎若恁樣做，聖經所講、事情一定會恁樣發生个話愛樣般來實現哪？」</verse>
				<verse number="55">當時，耶穌對該群人講：「你等帶等刀仔㧯棍仔出來捉𠊎，看𠊎做強盜係麼？𠊎逐日坐在聖殿肚教人，你等並無捉𠊎。</verse>
				<verse number="56">總係，這一切事情个發生，攏總係愛實現先知在聖經所講个話。」 這時，所有个學生全部離開佢逃走。</verse>
				<verse number="57">該兜捉耶穌个人帶耶穌到大祭司 該亞法 該位去；經學教師㧯長老已經聚集在該位。</verse>
				<verse number="58">彼得 遠遠跈等耶穌，直到大祭司个庭院。 彼得 入庭院肚去，同警衛坐共下，愛看這事情个結局到底會樣般。</verse>
				<verse number="59">祭司長㧯全議會想盡辦法尋假證據愛告耶穌，來定佢死刑；</verse>
				<verse number="60">雖然有好多假个見證人出來告耶穌，總係拿毋出麼介證據來。最尾，有兩個人進前來告佢，講：</verse>
				<verse number="61">「這個人識講：『𠊎有辦法拆掉上帝个聖殿，三日內又將它重建起來。』」</verse>
				<verse number="62">大祭司企起來，問耶穌講：「這兜人告你个，你無麼介話好應係麼？」</verse>
				<verse number="63">耶穌恬恬毋出聲。大祭司又對佢講：「𠊎指等永生上帝个名命令你發誓㧯𠊎等講，你係基督、上帝个孻仔麼？」</verse>
				<verse number="64">耶穌應講：「這係你講个。總係𠊎㧯你等講，日後，你等會看到人子坐在全能者个右片，坐等天頂个雲降臨！」</verse>
				<verse number="65">大祭司就扯裂自家个衫，講：「佢侮辱上帝！𠊎等毋使別个證人了！你等已經聽到佢侮辱上帝个話；</verse>
				<verse number="66">你等講愛樣般判佢？」 佢等應講：「佢該死！」</verse>
				<verse number="67">佢等就呸口潾在佢个面項，又用拳頭乸打佢。有兜人用巴掌乸搧佢，</verse>
				<verse number="68">講：「基督啊，你係先知，試揣看，係麼人打你？」</verse>
				<verse number="69">彼得 坐在外背个庭院肚；有一個使女行過來，講：「你乜係同 加利利 个耶穌共下个。」</verse>
				<verse number="70">彼得 當大家个面否認，講：「𠊎毋知你講麼介。」</verse>
				<verse number="71">後來，佢出去，行到庭院門口，又有一個使女看到佢，對企在該位个人講：「這個人同 拿撒勒 个耶穌係共下个。」</verse>
				<verse number="72">彼得 又否認一擺，發誓講：「𠊎根本毋識該人！」</verse>
				<verse number="73">過一下仔，塍頭企等个人又來對 彼得 講：「你確實係佢等當中个一個，聽你个腔就知！」</verse>
				<verse number="74">彼得 就發誓咒詛講：「𠊎毋識該儕人！」 即時，雞仔就啼。</verse>
				<verse number="75">彼得 正想起耶穌所講个話：「雞仔啼以前，你會三擺毋認𠊎。」佢就走出去，噭到非常傷心。</verse>
			</chapter>
			<chapter number="27">
				<verse number="1">天光个時，所有个祭司長㧯民間个長老參詳，愛害死耶穌。</verse>
				<verse number="2">佢等將耶穌䌈起來，解送，交給 羅馬 總督 彼拉多 。</verse>
				<verse number="3">出賣耶穌个 猶大 看到耶穌受定罪，就後悔，將三十隻銀錢拿去還祭司長㧯長老，</verse>
				<verse number="4">講：「𠊎出賣無罪个人，害佢死；𠊎有罪了！」佢等應講：「這係你自家个事情，㧯𠊎等有麼介關係？」</verse>
				<verse number="5">猶大 就將銀錢㧒在聖殿肚，出去吊頸自殺。</verse>
				<verse number="6">祭司長將錢拈起來，講：「這係血錢，拿來放落奉獻箱係違法个。」</verse>
				<verse number="7">參詳个結果，佢等同意拿這錢去買燒缶師傅个地，做埋葬外鄉人个墓地。</verse>
				<verse number="8">恁樣，到今晡日大家還喊該地做「血田」。</verse>
				<verse number="9">這件事个經過，應驗先知 耶利米 所講个話：「佢等拿三十隻銀錢，就係 以色列 人所同意為佢付出个價錢，</verse>
				<verse number="10">去買燒缶師傅个地；這係照主所命令𠊎个。」</verse>
				<verse number="11">耶穌企在總督面前，總督問佢講：「你係 猶太 人个王麼？」 耶穌應講：「這係你講个。」</verse>
				<verse number="12">祭司長㧯長老告佢个時，佢全部毋應。</verse>
				<verse number="13">所以 彼拉多 對佢講：「佢等告你恁多事，你無聽到係麼？」</verse>
				<verse number="14">耶穌還係毋應，連一句話也無講；總督感覺非常个奇怪。</verse>
				<verse number="15">逐年𨃟過節，總督會照慣例為大眾放一個佢等所愛个囚犯。</verse>
				<verse number="16">該時，堵好有一個出名个囚犯，安到 耶穌‧巴拉巴 。</verse>
				<verse number="17">所以，大眾聚集个時， 彼拉多 問佢等：「你等愛𠊎為你等放㖠個呢？ 耶穌‧巴拉巴 呢？抑係該稱做基督个耶穌呢？」</verse>
				<verse number="18">彼拉多 明明知佢等係因為嫉妒正將耶穌交給佢个。</verse>
				<verse number="19">彼拉多 開庭个時，佢个𡜵娘派人來見佢講：「你千萬莫插該義人个事；𠊎昨暗晡在夢中因為佢受盡多苦。」</verse>
				<verse number="20">祭司長㧯長老教唆大眾來要求釋放 巴拉巴 ，處死耶穌。</verse>
				<verse number="21">所以，總督問佢等講：「這兩個人當中，你等愛𠊎為你等放㖠個呢？」佢等就應講：「 巴拉巴 ！」</verse>
				<verse number="22">彼拉多 又問佢等講：「恁樣，該稱做基督个耶穌，𠊎愛樣般處理佢哪？」 佢等全部講：「將佢釘十字架！」</verse>
				<verse number="23">彼拉多 問講：「佢到底做麼介壞事？」 佢等還較大聲喊講：「將佢釘十字架！」</verse>
				<verse number="24">彼拉多 看到這個情形，知加講也無用，反轉會惹起暴動，就拿水在眾人面前洗手，講：「流這人 个血，毋係𠊎个罪，你等自家負責！」</verse>
				<verse number="25">眾人齊聲講：「這人个血債，算在𠊎等㧯𠊎等子孫个身上！」</verse>
				<verse number="26">彼拉多 就放 巴拉巴 給佢等，又命令將耶穌鞭打，然後交給人去釘十字架。</verse>
				<verse number="27">總督个兵仔將耶穌帶入總督府；全隊集合在耶穌周圍。</verse>
				<verse number="28">佢等脫下耶穌个衫，㧯佢著一領朱紅色个長袍，</verse>
				<verse number="29">用竻仔編一頂冕旒，㧯佢戴等，拿一支藤條放在佢个右手，跪在佢面前㩢耍佢，講：「 猶太 人个王萬歲！」</verse>
				<verse number="30">佢等又用口潾呸佢，拿藤條緊打佢个頭那。</verse>
				<verse number="31">㩢耍煞，佢等將佢身上个長袍脫下來，㧯佢著自家个衫，然後帶佢出去釘十字架。</verse>
				<verse number="32">佢等出來个時，堵到一個 古利奈 人，名安到 西門 ，就強迫佢代耶穌擎十字架。</verse>
				<verse number="33">佢等來到一個地方，安到 各各他 ，意思就係「頭那殼个山頭」。</verse>
				<verse number="34">佢等拿摻苦膽个酒給耶穌啉；耶穌一下，就毋啉。</verse>
				<verse number="35">佢等就將耶穌釘在十字架頂，又抽籤仔來分佢个衫，</verse>
				<verse number="36">然後坐在該位掌等佢。</verse>
				<verse number="37">佢等在佢頭那个頂高安一垤牌仔寫等佢个罪名：「這係 猶太 人个王耶穌。」</verse>
				<verse number="38">佢等又將兩個強盜同耶穌共下釘十字架，一個在佢个右片，一個在佢个左片。</verse>
				<verse number="39">對該位經過个人侮辱耶穌，搖頭，</verse>
				<verse number="40">講：「你這愛拆聖殿，三日內將它重建起來个！你若係上帝个孻仔，救你自家，對十字架頂下來啊！」</verse>
				<verse number="41">祭司長、經學教師，㧯長老也共樣恥笑佢，講：</verse>
				<verse number="42">「佢救了別人，卻無法度救自家！佢係 以色列 个王噢！若係佢這下對十字架頂下來，𠊎等就信佢！</verse>
				<verse number="43">佢倚靠上帝；若係上帝合意佢，這下就可以救佢；因為佢識講：『𠊎係上帝个孻仔。』」</verse>
				<verse number="44">同耶穌共下釘十字架个強盜也恁樣嘲謔佢。</verse>
				<verse number="45">當晝个時，大地烏暗，約有三點鐘久。</verse>
				<verse number="46">到下晝三點鐘个時，耶穌大聲喊講：「以利！以利！拉馬撒巴各大尼？」意思係講：「𠊎个上帝，𠊎个上帝，你做麼介放掉𠊎？」</verse>
				<verse number="47">塍頭企等个人，有兜聽到就講：「這個人喊 以利亞 ！」</verse>
				<verse number="48">其中有一儕黏時走過去，拿一垤海綿浸酸葡萄酒，然後䌈在藤條頂，愛拿給佢啉。</verse>
				<verse number="49">其他个人講：「等一下仔，𠊎等看 以利亞 會來救佢無！」</verse>
				<verse number="50">耶穌又大喊一聲，就斷氣死掉。</verse>
				<verse number="51">這時，掛在聖殿肚个布簾，對頂高到底下裂做兩析。大地震動，磐石裂開，</verse>
				<verse number="52">墳墓也開了，盡多過身个聖徒返生過來。</verse>
				<verse number="53">耶穌復活以後，佢等離開墳墓，入去聖城；盡多人看到佢等。</verse>
				<verse number="54">掌耶穌个軍官㧯兵仔看到地動並所發生个事，就大著驚，講：「佢實在係上帝个孻仔！」</verse>
				<verse number="55">在該位，還有好多婦人家遠遠企等看；姖等係對 加利利 跈等耶穌來服事佢个。</verse>
				<verse number="56">其中有 抹大拉 个 馬利亞 ， 雅各 㧯 約瑟 个阿姆 馬利亞 ，並 西庇太 兩個孻仔个阿姆。</verse>
				<verse number="57">臨暗仔，有一個 亞利馬太 个有錢人來；佢个名安到 約瑟 ，也係耶穌个學生。</verse>
				<verse number="58">佢去見 彼拉多 ，要求收殮耶穌个遺體； 彼拉多 就吩咐將耶穌个遺體交給佢。</verse>
				<verse number="59">約瑟 領到遺體後，用淨浰个麻紗包好，</verse>
				<verse number="60">放在佢新做个墳墓底背；這墳墓係佢對石壁鑿成个。佢又將一垤大石頭碾過來，塞等墓門，然後正離開。</verse>
				<verse number="61">該時， 抹大拉 个 馬利亞 㧯另外一個 馬利亞 坐在墳墓對面。</verse>
				<verse number="62">第二日，就係禮拜六个朝晨 ，祭司長同法利賽人共下去見 彼拉多 ，</verse>
				<verse number="63">講：「大人，𠊎等記得該隻騙人个落仔還生个時節識講：『三日後𠊎愛復活。』</verse>
				<verse number="64">所以，請你下令嚴嚴掌好墳墓，直到第三日，驚怕佢个學生來將佢偷走，然後去對人講：『佢對死復活了。』若係恁樣，後來个欺騙會比先前个還較厲害。」</verse>
				<verse number="65">彼拉多 對佢等講：「帶一隊衛兵去，照你等所知妥當个辦法去掌！」</verse>
				<verse number="66">佢等就去，用盡辦法嚴守墳墓，在石頭頂加封條，又命令衛兵掌等。</verse>
			</chapter>
			<chapter number="28">
				<verse number="1">安息日過去，禮拜日天曚光个時， 抹大拉 个 馬利亞 同另外一個 馬利亞 共下去看墳墓。</verse>
				<verse number="2">忽然，發生大地動，因為有主个天使對天頂下來，將石頭徙開，坐在該頂高。</verse>
				<verse number="3">佢个面貌像𥍉爧，衫像雪恁白。</verse>
				<verse number="4">該兜衛兵驚到愊愊掣，像嚇到會死个人一樣。</verse>
				<verse number="5">天使對該兜婦人家講：「毋使驚；𠊎知你等係尋該被人釘十字架个耶穌。</verse>
				<verse number="6">佢無在這位，照佢所講个，佢已經復活了。你等過來，看安葬佢个所在。</verse>
				<verse number="7">你等遽遽去㧯厥學生講：『佢已經對死復活了；佢愛比你等先去 加利利 ；在該位，你等會見到佢。』愛記得𠊎㧯你等講个話。」</verse>
				<verse number="8">該兜婦人家就趕緊離開墳墓，又驚又盡歡喜，走等去愛㧯厥學生講。</verse>
				<verse number="9">忽然，耶穌堵到姖等，講：「願你等平安！」姖等就進前，揇等佢个腳，拜佢。</verse>
				<verse number="10">耶穌㧯姖等講：「毋使驚；去㧯𠊎个兄弟講，喊佢等去 加利利 ；在該位，佢等會見到𠊎。」</verse>
				<verse number="11">該兜婦人家去个時節，有兜掌墳墓个兵仔轉城肚去，對祭司長報告所發生个一切事。</verse>
				<verse number="12">祭司長㧯長老參詳後，拿一大袋錢給兵仔，</verse>
				<verse number="13">對佢等講：「你等愛恁樣講：『佢該兜學生暗晡時來，在𠊎等睡掉个時將佢个身屍偷走。』</verse>
				<verse number="14">若係總督聽到這件事，𠊎等會代你等講話，保證你等無事。」</verse>
				<verse number="15">所以，兵仔就拿該兜錢，照所吩咐佢等个去做。這謠言就流傳在 猶太 人个中間，直到今晡日。</verse>
				<verse number="16">十一個學生去 加利利 ，到耶穌吩咐佢等去个山頂。</verse>
				<verse number="17">佢等一見到耶穌，就拜佢；總係還有人疑狐。</verse>
				<verse number="18">耶穌行過來，對佢等講：「上帝已經將天頂㧯地上所有个權柄賜給𠊎。</verse>
				<verse number="19">所以，你等愛去全世界，使萬民全部做𠊎个學生，奉父、子、聖靈个名㧯佢等行洗禮，</verse>
				<verse number="20">教佢等遵守一切𠊎所命令你等个。愛記得！𠊎會常常㧯你等同在，直到世界个末日。」</verse>
			</chapter>
		</book>
		<book number="41">
			<chapter number="1">
				<verse number="1">上帝个孻仔 ，耶穌基督个福音係恁樣開始个。</verse>
				<verse number="2">像先知 以賽亞 在佢个書底背所寫个： 上帝講： 「看啊，𠊎愛差派𠊎个使者做你个先鋒； 佢愛為你開路。」</verse>
				<verse number="3">在曠野有人喊講： 「愛準備好勢主个道路， 修直佢所愛行个細路！」</verse>
				<verse number="4">約翰 就係恁樣在曠野出現，為人行洗禮。佢宣佈講 ：「你等愛棄絕罪惡，接受洗禮，上帝就會赦免你等个罪。」</verse>
				<verse number="5">非常多个人對 猶太 个逐所在㧯全 耶路撒冷 來到 約翰 个面前。佢等承認自家个罪； 約翰 就在 約旦 河為佢等行洗禮。</verse>
				<verse number="6">約翰 著等駱駝毛做个衫，腰圈䌈等皮帶；食草蜢㧯野蜂糖過日仔。</verse>
				<verse number="7">佢宣佈講：「有一個人，比𠊎較慢來个，佢比𠊎偉大盡多。𠊎就係跍下來㧯佢脫鞋也無資格。</verse>
				<verse number="8">𠊎係用水為你等行洗禮，總係佢愛用聖靈為你等行洗禮。」</verse>
				<verse number="9">無幾久以後，耶穌對 加利利 省个 拿撒勒 來， 約翰 就在 約旦 河為佢行洗禮。</verse>
				<verse number="10">耶穌對水中一上來，就看到天開，聖靈像月鴿仔一樣，降在佢个身上；</verse>
				<verse number="11">對天頂有聲音傳下來，講：「你係𠊎所惜个孻仔，𠊎所歡喜个。」</verse>
				<verse number="12">聖靈即時催迫耶穌去到曠野。</verse>
				<verse number="13">佢在曠野四十日，受撒但个試探；佢㧯野獸共下，並有天使來服事佢。</verse>
				<verse number="14">約翰 被人關在監獄以後，耶穌去到 加利利 ，宣傳上帝个福音。</verse>
				<verse number="15">佢講：「時間已經到了，上帝个國會實現了！你等愛棄絕罪惡，信從這個福音。」</verse>
				<verse number="16">耶穌在 加利利 湖邊行个時，看到兩個打魚个人 — 西門 㧯厥老弟 安德烈 — 在湖中委網打魚。</verse>
				<verse number="17">耶穌對佢等講：「來跈𠊎！𠊎愛使你等得到人像打到魚一樣。」</verse>
				<verse number="18">佢等即時放下網仔，跈耶穌去。</verse>
				<verse number="19">向前行無幾遠，耶穌又看到 西庇太 个孻仔 雅各 㧯 約翰 ；佢兩兄弟在船頂整理魚網。</verse>
				<verse number="20">耶穌即時呼召佢兩儕，佢等就將阿爸 西庇太 㧯工人留在船頂，跈耶穌去。</verse>
				<verse number="21">佢等來到 迦百農 城，耶穌就在安息日入去會堂，在該位教人。</verse>
				<verse number="22">聽到佢教訓个人攏總感覺非常奇怪，因為佢教訓佢等个時盡有權柄，㧯一般个經學教師無共樣。</verse>
				<verse number="23">堵好，在佢等个會堂肚有一個邪靈附身个人喊講：</verse>
				<verse number="24">「 拿撒勒 个耶穌，你樣般來干涉𠊎等？你來消滅𠊎等係麼？𠊎知你係麼人；你係上帝个聖者！」</verse>
				<verse number="25">耶穌命令該隻邪靈講：「恬恬，對這人身上出來！」</verse>
				<verse number="26">邪靈使該人全身愊愊掣，然後大噭一聲，就對厥身上出來。</verse>
				<verse number="27">眾人非常著驚，偷偷議論講：「這到底係麼介事情！實在係新个教訓！佢竟然有權柄指揮邪靈，邪靈也正經服從佢个命令！」</verse>
				<verse number="28">恁樣，耶穌个名聲盡遽就傳遍 加利利 个所在。</verse>
				<verse number="29">佢等一離開會堂，就到 西門 㧯 安德烈 个屋下去； 雅各 㧯 約翰 也共下去。</verse>
				<verse number="30">西門 个丈人𡟓堵堵發燒，睡在眠床頂；耶穌一到，佢等就將姖个病㧯耶穌講。</verse>
				<verse number="31">耶穌去看姖，牽姖个手，扶姖䟘起來。姖个燒就退掉；姖䟘起來招待佢等。</verse>
				<verse number="32">到臨暗仔，日頭落山个時，有盡多人帶各種个病人㧯被鬼附身个人來到耶穌个面前；</verse>
				<verse number="33">城內个人全部聚集到門前來。</verse>
				<verse number="34">耶穌醫好各種病症个人，也逐走盡多鬼。佢不准鬼講話，因為佢等知佢係麼人。</verse>
				<verse number="35">第二日打早，天還吂光，耶穌就䟘床，出去外背偏僻个所在，在該位祈禱。</verse>
				<verse number="36">西門 㧯佢个同伴出去尋佢；</verse>
				<verse number="37">尋到以後，就對佢講：「大家全部在該位尋你！」</verse>
				<verse number="38">耶穌講：「𠊎等來去附近个村莊，𠊎也應當愛在該兜所在傳道，因為這係𠊎來个目的。」</verse>
				<verse number="39">恁樣，耶穌行遍 加利利 全地，在各地方个會堂傳道，又逐鬼。</verse>
				<verse number="40">有一個發癩个人來到耶穌个面前，跪落去求佢講：「你若係肯，就會使𠊎淨浰。」</verse>
				<verse number="41">耶穌心中充滿憐憫 ，伸手摸佢，應佢講：「𠊎肯，你淨浰了！」</verse>
				<verse number="42">佢身上个癩即時無掉去，佢就得到淨浰。</verse>
				<verse number="43">耶穌黏時喊佢離開，也再三吩咐佢講：</verse>
				<verse number="44">「毋好將這件事㧯別人講；直接去見祭司，俾佢檢查，然後照 摩西 所定个規矩獻祭物，來對人證明你已經淨浰了。」</verse>
				<verse number="45">總係這個人一出去，反轉四處宣傳這項事情，害耶穌無法度再公開入城，只有住在城外偏僻个所在。眾人還係對四圍來尋佢。</verse>
			</chapter>
			<chapter number="2">
				<verse number="1">過無幾日，耶穌又轉到 迦百農 城；大家聽講佢在屋下个消息。</verse>
				<verse number="2">盡多人就聚集來，連門前也無空位。耶穌對佢等講道个時節，</verse>
				<verse number="3">有四個人扛一個癱風病人來見耶穌。</verse>
				<verse number="4">總係因為人盡多，佢等無法度將佢扛到耶穌面前。所以佢等就在耶穌停留个所在，對屋頂拆一隻孔仔；然後，將病人連佢所睡个草蓆，縋下去。</verse>
				<verse number="5">耶穌看到這兜人个信心，就對癱風病人講：「細子啊，你个罪得到赦免了。」</verse>
				<verse number="6">有幾個經學教師坐在該位，心中議論講：</verse>
				<verse number="7">「這個人講話樣敢恁過份！佢講侮辱上帝个話！除了上帝以外，麼人有赦罪个權柄呢？」</verse>
				<verse number="8">耶穌即時知佢等心中想麼介，就對佢等講：「你等樣般恁樣想呢？</verse>
				<verse number="9">對這個癱風病人講：『你个罪得到赦免』容易呢？抑係講：『䟘起來，拿你个草蓆行轉去』較容易呢？</verse>
				<verse number="10">這下𠊎愛對你等證明，人子在地上有赦罪个權柄。」就對癱風病人講：</verse>
				<verse number="11">「𠊎吩咐你䟘起來，拿你个草蓆轉去屋下！」</verse>
				<verse number="12">該人就䟘起來，拿起草蓆，在大家面前行出去。眾人就非常著驚，頌讚上帝講：「𠊎等從來吂識看到恁樣个事！」</verse>
				<verse number="13">耶穌又倒轉 加利利 湖邊，一大群人去到佢該位，佢就教訓佢等。</verse>
				<verse number="14">佢再向前行，看到一個稅務員，就係 亞勒腓 个孻仔 利未 ，坐在稅關。耶穌對佢講：「來跈𠊎！」 利未 就䟘起來跈佢。</verse>
				<verse number="15">後來耶穌在 利未 个屋下食飯，盡多稅務員㧯無守教規个人也跈等佢來，當中也有盡多同耶穌㧯厥學生共下食飯。</verse>
				<verse number="16">有兜法利賽人中个經學教師看到耶穌同壞人㧯稅棍共下食飯，就質問厥學生講：「佢樣般同稅棍㧯壞人共下食飯呢？」</verse>
				<verse number="17">耶穌聽到，就應講：「健康个人毋使醫生，有病个人正愛。𠊎來个目的毋係愛呼召義人，係愛呼召罪人。」</verse>
				<verse number="18">有一擺，施洗 約翰 个學生㧯法利賽人當在該位禁食，有人來問耶穌講：「施洗 約翰 个學生㧯法利賽人个學生禁食，你个學生無禁食，係為到麼介呢？」</verse>
				<verse number="19">耶穌應講：「新郎還在婚姻个筵席中，人客敢愛使禁食？新郎同佢等共下个時，佢等就毋使禁食。</verse>
				<verse number="20">總係時間會到，新郎會被人對佢等當中帶走，該時佢等就愛禁食。</verse>
				<verse number="21">「無人用新布補舊衫；若係恁樣，新補个布會扯裂舊衫，爛孔就還較大。</verse>
				<verse number="22">也無人將新酒裝在舊皮袋肚；若係恁樣，新酒會脹裂皮袋，酒㧯皮袋全部會打喪掉。新酒愛裝在新皮袋肚正著！」</verse>
				<verse number="23">有一個安息日，耶穌經過麥田，厥學生也同佢共下行；佢等一片行一片捋兜麥串。</verse>
				<verse number="24">法利賽人對耶穌講：「你看，你个學生樣般做安息日禁止做个事？」</verse>
				<verse number="25">耶穌應講：「 大衛 㧯跈佢个人欠缺又肚飢个時做麼介，你等無讀過係麼？</verse>
				<verse number="26">佢入去上帝个聖殿，食獻給上帝个餅。這個事發生在 亞比亞他 做大祭司个時節。照𠊎等个法律，只有祭司正做得食這個餅仔；總係 大衛 拿來食，又分給跈佢个人食。」</verse>
				<verse number="27">耶穌結論講：「安息日係為到人設个；人毋係為到安息日來存在个。</verse>
				<verse number="28">所以人子也係安息日个主。」</verse>
			</chapter>
			<chapter number="3">
				<verse number="1">耶穌又入去會堂；在該位有一個人，佢个一支手瘸掉。</verse>
				<verse number="2">有兜人想愛尋耶穌个把柄來告佢，就在塍頭掌等，愛看佢在安息日會為人醫病麼。</verse>
				<verse number="3">耶穌㧯該手瘸掉个人講：「䟘起來，到頭前來。」</verse>
				<verse number="4">然後，問大家講：「關係安息日，𠊎等个法律係樣般規定？愛做好事，抑係做壞事？愛救人，抑係㓾人？」 大家恬恬毋出聲。</verse>
				<verse number="5">耶穌就發譴，用目珠䁯佢等，同時心中為到這兜人悲傷，因為佢等个心肝恁硬。佢㧯該人講：「手伸出來！」該人將手一伸出來，佢个手就好了。</verse>
				<verse number="6">法利賽人出去，就㧯 希律 黨个人參詳愛樣般對付耶穌來殺害佢。</verse>
				<verse number="7">耶穌㧯厥學生離開該位到 加利利 湖該片去，有一大群人跈等佢。這兜人係對 加利利 、 猶太 、</verse>
				<verse number="8">耶路撒冷 、 以土買 、 約旦 河東片，並 泰爾 㧯 西頓 附近个城市來个。佢等來尋耶穌係因為聽到耶穌所做个一切事情。</verse>
				<verse number="9">因為人盡大群，耶穌就吩咐學生準備一隻船，免得大家尖等佢。</verse>
				<verse number="10">因為佢醫好盡多病人，所有發病个人全部想愛尖到頭前來摸佢。</verse>
				<verse number="11">該兜被邪靈附身个人一看到佢，就伏在佢个面前，喊講：「你係上帝个孻仔！」</verse>
				<verse number="12">耶穌嚴嚴命令邪靈，做毋得將佢个名傳出去。</verse>
				<verse number="13">耶穌上一座山頂，召集佢所合意个人來跈佢。佢等來到佢个面前，</verse>
				<verse number="14">耶穌就選出十二個人，喊佢等做使徒，愛佢等常常同佢共下，也愛派佢等去傳道，</verse>
				<verse number="15">又給佢等逐鬼个權柄。</verse>
				<verse number="16">耶穌所揀選个十二個人係： 西門 (耶穌又同佢安名 彼得 )，</verse>
				<verse number="17">西庇太 个孻仔 雅各 㧯 雅各 个老弟 約翰 (耶穌又同佢等安名 半尼其 ，意思係「性情暴烈，像雷公个人」)，</verse>
				<verse number="18">又有 安德烈 ， 腓力 ， 巴多羅買 ， 馬太 ， 多馬 ， 亞勒腓 个孻仔 雅各 ， 達太 ，激進黨个 西門 ，</verse>
				<verse number="19">㧯出賣耶穌个 加略 人 猶大 。</verse>
				<verse number="20">耶穌倒轉去屋肚；又有一大群个人來聚集，害佢㧯學生連食飯个時間也無。</verse>
				<verse number="21">耶穌屋下个人聽講這個情形，出來愛阻擋佢，因為有人講：「佢發癲了！」</verse>
				<verse number="22">有兜對 耶路撒冷 來个經學教師講：「佢係被 別西卜 附身！佢係靠鬼王逐鬼！」</verse>
				<verse number="23">耶穌喊這兜人來，用比喻對佢等講：「撒但樣會逐撒但呢？</verse>
				<verse number="24">一個國家自相紛爭，該國家一定會企毋住。</verse>
				<verse number="25">一個家庭自相紛爭，該家庭定著會企毋住。</verse>
				<verse number="26">恁樣，假使撒但自相紛爭，佢个國決定企毋住，會滅亡掉去。</verse>
				<verse number="27">「無人能進入勇士个屋下去搶佢个財產；除了先將勇士捆起來，正有法度搶佢个東西。</verse>
				<verse number="28">「𠊎實在㧯你等講，人所犯一切个罪，㧯所講一切譭謗个話 ，全部可以得到赦免；</verse>
				<verse number="29">總係褻瀆聖靈个人永遠無可能得到赦免，因為佢所犯个係永遠个罪。」</verse>
				<verse number="30">(耶穌講這個話係因為有人講：「佢係被邪靈附身。」)</verse>
				<verse number="31">這時，耶穌个阿姆㧯老弟來到；佢等企在外背，喊人傳話給耶穌，講佢等愛見佢。</verse>
				<verse number="32">有一大群人圍等，坐在耶穌个身邊；佢等㧯佢講：「看啊，若姆㧯若老弟在外背，愛見你！」</verse>
				<verse number="33">耶穌講：「麼人係𠊎个阿姆？麼人係𠊎个兄弟？」</verse>
				<verse number="34">佢看等坐在周圍个人，講：「看啊，𠊎个阿姆，𠊎个兄弟在這位！</verse>
				<verse number="35">凡實行上帝旨意个就係𠊎个兄弟、姊妹，㧯阿姆。」</verse>
			</chapter>
			<chapter number="4">
				<verse number="1">耶穌又在 加利利 湖滣教訓眾人。有一大群人聚集到佢面前來，所以佢上船去坐等。船停在湖中，眾人企在湖个滣頭。</verse>
				<verse number="2">耶穌就用比喻教佢等盡多道理；其中，佢有講：</verse>
				<verse number="3">「你等注意聽啊！有一個委種个出去委種。</verse>
				<verse number="4">佢委个時，有兜種子落在路堘，鳥仔飛來將它兜食掉。</verse>
				<verse number="5">有兜落在泥盡淺个石頭地上；因為泥盡淺，種子盡遽就爆芽出來；</verse>
				<verse number="6">日頭出來一曬，嫩芽就枯燥掉去，因為根無罅深。</verse>
				<verse number="7">有兜落在竻仔底背，竻仔大起來，將秧仔拮等，就無法度結子。</verse>
				<verse number="8">另外有兜種子落在好泥底背，長大成熟，就結盡多子，有兜收成三十倍，有兜六十倍，有兜一百倍。」</verse>
				<verse number="9">耶穌結論講：「有耳公好聽个人，就愛聽！」</verse>
				<verse number="10">耶穌單淨一儕个時節，有兜聽過佢講道个人㧯十二個學生共下來見佢，請教佢這兜比喻个意思。</verse>
				<verse number="11">耶穌講：「對你等，上帝國个奧秘係用明講个；若係對外人，一切就愛用比喻。</verse>
				<verse number="12">像聖經所講： 佢等看了又看， 總係毋會了解， 聽了又聽， 總係毋會入耳； 若毋係恁樣，佢等回心轉意， 上帝就會赦免佢等。」</verse>
				<verse number="13">耶穌問佢等講：「你等無明白這個比喻係麼？恁樣，樣會明白其他个比喻？</verse>
				<verse number="14">委種个人所委个就係上帝个真道。</verse>
				<verse number="15">有兜人像落在路堘个種子；佢等一聽到真道，撒但即時就來，將委在佢等心中个真道搶走。</verse>
				<verse number="16">又有兜人像落在石頭地上个種子；佢等一聽到真道即時歡喜接受，</verse>
				<verse number="17">總係真道在佢等心中釘根無深，存無幾久，一下為到真道堵到困難抑係迫害，盡遽就跌倒。</verse>
				<verse number="18">還有兜人像委在竻仔底背个種子；佢等有聽到真道，</verse>
				<verse number="19">總係生活个操心、錢財个誘惑，㧯各種个慾望入來將真道歙等，無法度結果子。</verse>
				<verse number="20">總係，有兜人像委在好泥底背个種子；佢等聽到真道就接受，並結果子，有兜收成三十倍，有兜六十倍，有兜一百倍。」</verse>
				<verse number="21">耶穌又對佢等講：「有麼人點燈，拿來放在斗底下抑係眠床下？敢毋係愛放在燈臺頂嗎？</verse>
				<verse number="22">逐項隱藏个事最後會顯明出來；囥等个事最後也會被人挖出來。</verse>
				<verse number="23">有耳公好聽个人，就愛聽！」</verse>
				<verse number="24">佢又㧯佢等講：「你等所聽个愛留心！你等用麼介東西量給別人，上帝也愛用共樣个東西量給你等，甚至愛還較多。</verse>
				<verse number="25">有个，愛給佢還較多；無个，連佢所有个一些些仔也愛搶走。」</verse>
				<verse number="26">耶穌繼續講：「上帝个國像一個人委種在地上。</verse>
				<verse number="27">佢暗晡頭睡目，日時頭䟘床，該兜種子爆芽長大，樣般會恁樣，佢毋知。</verse>
				<verse number="28">泥自然會使植物生長結子：先爆芽，然後打串，最後結盡多子。</verse>
				<verse number="29">五榖熟了，佢就用禾鐮收割，因為收成个時節到了。」</verse>
				<verse number="30">耶穌講：「𠊎等講上帝个國像麼介呢？𠊎等做得用麼介比喻來說明呢？</verse>
				<verse number="31">上帝个國可比一粒芥菜子，係世間最細个種子。有人將它種在泥肚，</verse>
				<verse number="32">過無幾久，它就大起來，比別樣菜較高大；它生出粗枝，飛鳥在它陰涼个所在做藪。」</verse>
				<verse number="33">耶穌用盡多像恁樣个比喻對眾人講道，照佢等所能明白个來教佢等。</verse>
				<verse number="34">佢對佢等講道盡愛用比喻；總係單淨同學生共下个時，佢就全部解釋給佢等聽。</verse>
				<verse number="35">該日暗晡，耶穌㧯學生講：「𠊎等坐船來去湖對面該片。」</verse>
				<verse number="36">佢等就離開眾人。耶穌已經在船頂坐好勢，學生就開船；另外也有別个船共下去。</verse>
				<verse number="37">忽然，有一陣暴風吹等來，波浪盡大，打入船肚，船肚个水差毋多會淰起來。</verse>
				<verse number="38">該時，耶穌還在船尾，墊等枕頭睡目。佢等喊醒佢，講：「先生，𠊎等會無命囉，你無愛搭𠊎等係麼？」</verse>
				<verse number="39">耶穌醒過來，責備風講：「停下來！」又吩咐浪講：「恬恬！」風就停下來，湖面就大大平靜。</verse>
				<verse number="40">耶穌問佢等講：「做麼介恁驚？你等還無信心係麼？」</verse>
				<verse number="41">佢等就盡驚，彼此講：「這個人到底係麼人，連風㧯浪也聽從佢！」</verse>
			</chapter>
			<chapter number="5">
				<verse number="1">佢等來到 加利利 湖對面該片，屬 革拉森 人个地區。</verse>
				<verse number="2">耶穌一下船，就堵到一個對塚埔出來个人；這人被邪靈附身，</verse>
				<verse number="3">一直住在塚埔，無人能控制佢，用鐵鍊也捆佢毋住。</verse>
				<verse number="4">盡多擺有人用腳鐐手銬鎖等佢，總係腳鐐卻被佢打碎掉去，手銬卻被佢扭斷掉去。無人有罅力來制伏佢！</verse>
				<verse number="5">佢日夜在塚埔㧯山肚盡喊，又拿石頭敲自家。</verse>
				<verse number="6">佢遠遠看到耶穌，就走過來，跪在佢个面前，</verse>
				<verse number="7">大聲喊講：「至高上帝个孻仔耶穌，你做麼介愛干涉𠊎呢？𠊎奉上帝个名求你，莫蹧踏𠊎！」</verse>
				<verse number="8">(佢講這個話係因為耶穌已經吩咐佢講：「邪靈啊，對這個人身上出來！」)</verse>
				<verse number="9">耶穌問佢講：「你安到麼介名？」 佢應講：「𠊎安到『大群』，因為𠊎等盡多！」</verse>
				<verse number="10">佢再三求耶穌莫逐佢等離開該地方。</verse>
				<verse number="11">在附近山排頂，堵好有一大群豬仔在該位食東西；</verse>
				<verse number="12">邪靈就求耶穌講：「准𠊎等入豬群，俾𠊎等附在豬仔底背。」</verse>
				<verse number="13">耶穌准佢等；邪靈就對該人身上出來，入去豬群；歸群豬仔 (約兩千隻) 衝下崩崗，跌落湖底背，全部浸死。</verse>
				<verse number="14">掌豬仔个人就走掉；佢等去城肚㧯周圍个鄉村講起這個事。眾人就出來看，到底發生麼介事情。</verse>
				<verse number="15">佢等來到耶穌該位，看到該被鬼附身个人，就係頭擺被大群鬼附身个，坐等，著好衫褲，頭腦清醒；佢等就盡著驚。</verse>
				<verse number="16">看到這事情經過个人，將發生在被鬼附身个人身上㧯豬群个事㧯大家講。</verse>
				<verse number="17">佢等就要求耶穌離開佢等个地方。</verse>
				<verse number="18">耶穌上船个時，該識被鬼附身个人來求耶穌講：「𠊎跈你去好麼？」</verse>
				<verse number="19">耶穌毋肯，總係㧯佢講：「轉去若屋下，㧯親族講，主樣般用慈愛對待你，並佢為你所做个事係樣般个大。」</verse>
				<verse number="20">該人就離開，即時在 十邑 个地方宣傳耶穌為佢所做个事情係樣般个大；所有聽到个人全部感覺盡奇怪。</verse>
				<verse number="21">耶穌又坐船轉到湖該片去；在湖邊有一大群人來到佢个面前聚集。</verse>
				<verse number="22">該所在有一個會堂个管理員，名安到 葉魯 ，也來。佢一看到耶穌，就伏在佢个腳前，</verse>
				<verse number="23">求佢講：「𠊎个滿女病到會死，求你來去為姖按手，醫好姖，救姖一命！」</verse>
				<verse number="24">耶穌就同佢去。盡多人也尖等跈佢去。</verse>
				<verse number="25">該所在有一個婦人家，發血漏病十二年，</verse>
				<verse number="26">看過盡多个醫生，在佢等个手下受盡多个苦，所有个錢財也用掉去；總係姖个病毋單淨無好，反轉還較嚴重。</verse>
				<verse number="27">姖識聽過耶穌个事，所以尖在人群中，行到耶穌个後背，摸佢个衫，</verse>
				<verse number="28">心肝想：「𠊎只有摸到佢个衫，一定會得到醫好。」</verse>
				<verse number="29">姖个血漏黏時就停止，感覺身上个病已經好了。</verse>
				<verse number="30">耶穌即時感覺有能力從自家身上出去，就在人群中轉過身來，講：「麼人摸𠊎个衫？」</verse>
				<verse number="31">厥學生應佢講：「你看，恁多人尖等你，你還問：『麼人摸𠊎』嗎？」</verse>
				<verse number="32">總係耶穌四面緊尋，愛看麼人摸佢。</verse>
				<verse number="33">該婦人家知自家身上所發生个事，就愊愊掣，來到耶穌个面前跪落去，照實㧯佢講。</verse>
				<verse number="34">耶穌對姖講：「妹仔啊，你个信心救到你！安心轉去，你个病已經好了。」</verse>
				<verse number="35">耶穌還講等這句話个時，有人對會堂管理員个屋下趕來，㧯 葉魯 講：「若妹仔已經死掉，樣般還勞動先生呢？」</verse>
				<verse number="36">耶穌毋搭 佢等所講个話，對會堂个管理員講：「毋使驚，只愛信！」</verse>
				<verse number="37">然後佢帶等 彼得 、 雅各 ，㧯 雅各 个老弟 約翰 共下去，毋肯俾別人跈等佢。</verse>
				<verse number="38">佢等來到會堂管理員个屋下，耶穌看到大家亂吵吵，大聲噭。</verse>
				<verse number="39">耶穌入去對佢等講：「你等做麼介亂吵吵大聲噭呢？細人仔並無死，係睡掉定定。」</verse>
				<verse number="40">佢等就笑佢。 耶穌將佢等逐出去，就帶等細人仔个爺𡟓㧯佢三個學生入去細阿妹仔个房間。</verse>
				<verse number="41">佢牽等細阿妹仔个手，對姖講：「大利沙，古米！」意思就係：「細阿妹仔，𠊎吩咐你，䟘起來！」</verse>
				<verse number="42">細阿妹仔黏時就䟘起來行。 (姖已經十二歲)。這個事，使大家非常希奇！</verse>
				<verse number="43">耶穌嚴嚴吩咐佢等，毋好宣傳這個事情，又交帶拿兜東西給細阿妹仔食。</verse>
			</chapter>
			<chapter number="6">
				<verse number="1">耶穌離開該地方，倒轉去自家个家鄉；厥學生也跈等佢。</verse>
				<verse number="2">到安息日，佢在會堂教訓人。當多人聽到佢个話就盡奇怪，講：「這儕人對㖠位得到這個本事呢？麼人給佢這個智慧呢？無想到佢還會行神蹟噢！</verse>
				<verse number="3">佢敢毋係木匠？佢毋係 馬利亞 个孻仔， 雅各 、 約瑟 、 猶大 㧯 西門 个阿哥嗎？佢該兜老妹毋係住在𠊎等這位嗎？」佢等就拒絕佢。</verse>
				<verse number="4">耶穌對佢等講：「除了在自家个本鄉、本族、本家以外，先知全部受人尊敬。」</verse>
				<verse number="5">恁樣，佢在該位就無法度行麼介神蹟，只有按手在一兜病人个身上，來醫好佢等。</verse>
				<verse number="6">因為該兜人毋肯信，佢感覺非常奇怪。 耶穌繼續在附近逐個村莊教訓人。</verse>
				<verse number="7">佢喊十二個學生來，派佢等兩儕兩儕共下出去。佢賜佢等逐邪靈个權柄，</verse>
				<verse number="8">又吩咐佢等講：「出外个時，除了一支柺棍仔，毋好帶麼介東西；毋好帶食物㧯旅行袋，衫袋肚也毋好帶錢；</verse>
				<verse number="9">愛著鞋，總係毋好加帶一領內衫。」</verse>
				<verse number="10">佢又對佢等講：「你等去到一個所在，㖠家人肯接待你等，就住在該位，直到你等離開該所在。</verse>
				<verse number="11">無論到麼介所在，若係該位个人毋接待你等，也毋聽你等个話，你等就離開該所在，也愛將腳項个泥粉蹬掉，來表示對佢等个警告。」</verse>
				<verse number="12">學生就出去傳道，勸人棄邪歸正。</verse>
				<verse number="13">佢等也逐走盡多鬼，用油膏盡多病人，醫好佢等。</verse>
				<verse number="14">關係耶穌个一切事， 希律 王全部有聽到，因為耶穌个名聲已經傳到逐所在。有人講：「佢係行洗禮个 約翰 返生，正會有行這兜神蹟个能力。」</verse>
				<verse number="15">有人講：「佢係 以利亞 。」 也有人講：「佢係先知，像古時代个先知。」</verse>
				<verse number="16">總係 希律 聽到這兜話，就講：「佢就係被𠊎斬頭个 約翰 返生了！」</verse>
				<verse number="17">原來， 希律 識喊人去捉 約翰 ，將佢䌈等，關在監獄肚。 希律 做這個事係愛給 希羅底 歡喜； 希羅底 係 希律 个兄弟 腓力 个𡜵娘，總係被佢佔來做𡜵娘。</verse>
				<verse number="18">約翰 再三責備 希律 講：「你佔兄弟个𡜵娘係違法个！」</verse>
				<verse number="19">因為恁樣， 希羅底 心中怨恨佢，想愛害死佢，總係無機會；</verse>
				<verse number="20">因為 希律 知 約翰 係正直聖潔个人，所以就敬重保護佢。 希律 逐擺聽到 約翰 所講个話，心中就無平安，總係又盡歡喜聽佢講論。</verse>
				<verse number="21">希羅底 所等个機會到了。 希律 生日个時，舉行盛大个宴會，辦桌招待文武百官㧯 加利利 民間个領袖。</verse>
				<verse number="22">筵席中， 希羅底 个妹仔 入來跳舞； 希律 㧯人客全部盡歡喜。所以王對細阿妹仔講：「由在你對𠊎要求麼介，𠊎一定會賞你。」</verse>
				<verse number="23">佢又發誓講：「無論你求麼介，就係𠊎个一半江山，𠊎也會給你！」</verse>
				<verse number="24">該細阿妹仔出去問厥姆，講：「𠊎愛求麼介正好呢？」 厥姆講：「施洗 約翰 个頭那。」</verse>
				<verse number="25">細阿妹仔黏時倒轉來見王，求講：「求王即時將施洗 約翰 个頭那放在盤肚給𠊎！」</verse>
				<verse number="26">王聽到這個請求，非常為難；總係佢已經在人客面前發誓，就無想愛拒絕細阿妹仔个請求。</verse>
				<verse number="27">所以，佢即時命令衛兵去拿 約翰 个頭那來。衛兵就去到監獄，斬 約翰 个頭那，</verse>
				<verse number="28">放在盤肚，㨮給細阿妹仔；姖就交給厥姆。</verse>
				<verse number="29">約翰 个學生聽到這個消息，就來將 約翰 个身屍領走，葬在墳墓底背。</verse>
				<verse number="30">使徒倒轉來見耶穌，將佢等所做所傳个一切，全部對佢報告。</verse>
				<verse number="31">因為來來去去个人盡多，耶穌㧯學生無閒到無時間好食飯，所以佢對佢等講：「你等跈𠊎來，𠊎等來去偏僻个所在休息一下。」</verse>
				<verse number="32">佢等就坐船出發，恬恬仔去偏僻个所在。</verse>
				<verse number="33">總係，有盡多人看到佢等離開，黏時認到係佢等。眾人就對逐個城出來，相爭𢲾背趕去，比耶穌㧯學生先到該所在。</verse>
				<verse number="34">耶穌一上岸，看到這一大群人，就憐憫佢等，因為佢等像無牧人个羊群共樣；佢就教佢等盡多道理。</verse>
				<verse number="35">臨暗仔个時，學生來見耶穌，對佢講：「天暗囉，這位又係偏僻个所在，</verse>
				<verse number="36">請喊大家離開，好俾佢等去附近个村莊買東西食。」</verse>
				<verse number="37">總係耶穌應講：「你等給佢等食！」 佢等講：「你愛𠊎等用兩百隻銀錢 去買餅仔給佢等食係麼？」</verse>
				<verse number="38">耶穌㧯佢等講：「你等去尋看哪，總共有幾多餅仔？」 佢等尋倒轉來講：「只有五隻餅，兩尾魚。」</verse>
				<verse number="39">耶穌吩咐學生喊眾人分開坐在草坪頂。</verse>
				<verse number="40">眾人就坐下來，有兜一排一百儕，有兜五十儕。</verse>
				<verse number="41">耶穌將五隻餅㧯兩尾魚拿起來，昂頭望天，感謝上帝，然後擘開餅仔，交給學生；學生就分給眾人。像恁樣，佢也將兩尾魚仔分給大家。</verse>
				<verse number="42">大家全部食到飽；</verse>
				<verse number="43">學生將所賸个餅碎仔㧯魚碎仔拈起來，裝滿十二隻籃仔。</verse>
				<verse number="44">食餅仔个男人共有五千儕。</verse>
				<verse number="45">事後，耶穌黏時催厥學生上船，先去對面个 伯賽大 ，等佢喊眾人轉去。</verse>
				<verse number="46">離開大家後，佢就上山去祈禱。</verse>
				<verse number="47">到暗晡頭个時，船已經撐到湖中，耶穌一儕還留在岸上。</verse>
				<verse number="48">佢看到學生撐船盡辛苦，因為船逆風行。天曚光个時，耶穌在湖面行等去學生該位，想愛對佢等旁邊過去 。</verse>
				<verse number="49">學生看到佢在湖面行，恅到係鬼，就喊起來；</verse>
				<verse number="50">因為佢等大家看到佢，也驚到會死。 耶穌即時對佢等講：「安心，係𠊎，毋使驚！」</verse>
				<verse number="51">佢上去同佢等共下坐船，風就停下來。學生嚇到戇戇，</verse>
				<verse number="52">因為佢等無了解分餅這件事个意思；佢等个頭腦盡鈍。</verse>
				<verse number="53">佢等過了湖，在 革尼撒勒 靠岸，將船䌈好。</verse>
				<verse number="54">佢等一下船，眾人就認出耶穌。</verse>
				<verse number="55">眾人行遍該所在，聽到耶穌在㖠位，佢等就將病人用草蓆扛到佢面前來。</verse>
				<verse number="56">無論耶穌去到鄉下、城肚、抑係村莊，眾人就將病人放在街路，求耶穌准病人單淨摸佢个衫尾；所有摸到个人全部得到醫好。</verse>
			</chapter>
			<chapter number="7">
				<verse number="1">法利賽人㧯幾個對 耶路撒冷 來个經學教師共下來見耶穌。</verse>
				<verse number="2">佢等看到耶穌个學生中有人用無淨浰个手食飯，無像法利賽人恁樣先洗手。</verse>
				<verse number="3">(原來法利賽人㧯一般个 猶太 人全部遵守祖先个傳統，若係無照規定个方法先洗手就毋食飯；</verse>
				<verse number="4">對街路買來个東西，若無先洗過也毋食 。佢等還遵守盡多其他傳統个規定，像愛樣般洗杯仔、鑊仔、銅器㧯眠床 等等。)</verse>
				<verse number="5">所以法利賽人㧯經學教師問耶穌講：「樣般你个學生無遵守𠊎等祖先个傳統，反轉用無淨浰个手食飯呢？」</verse>
				<verse number="6">耶穌講：「 以賽亞 指你等這種假冒為善个人所講个預言實在無毋著！像聖經所記： 上帝恁樣講： 『這兜人用嘴唇皮尊敬𠊎， 總係佢等个心遠遠離開𠊎。</verse>
				<verse number="7">佢等將人个規定準做𠊎个命令來教人； 佢等敬拜𠊎也係空空。』」</verse>
				<verse number="8">耶穌講：「你等遵守古早人个傳統，總係違反上帝个命令。」</verse>
				<verse number="9">佢又講：「你等用盡高明个藉口來拒絕上帝个命令，目的就係愛保守自家个傳統。</verse>
				<verse number="10">摩西 講：『愛孝敬爺𡟓』；又講：『咒罵爺𡟓个，愛判佢死刑。』</verse>
				<verse number="11">你等偏偏講，無論麼人對爺𡟓講：『𠊎將奉養你等个東西準做可板』 (意思係獻給上帝个東西)，</verse>
				<verse number="12">佢就毋使奉養爺𡟓。</verse>
				<verse number="13">你等恁樣做，就係拿你等教人个傳統來廢掉上帝个話。你等還做盡多像這種个事。」</verse>
				<verse number="14">耶穌又召集眾人到佢面前，對佢等講：「你等大家愛聽𠊎个話，也愛明白。</verse>
				<verse number="15">對外背入到人底背个，毋會使人無淨浰；反轉，對底背出來个正會使人無淨浰。 」</verse>
				<verse number="16"></verse>
				<verse number="17">耶穌離開眾人入去屋肚个時，厥學生問佢這比喻个意思。</verse>
				<verse number="18">耶穌㧯佢等講：「你等同佢等共樣無明白嗎？敢講你等毋知？對外背入去个毋會使人無淨浰；</verse>
				<verse number="19">因為對外背入去个毋係到佢个心中，係到佢个腸肚底背，然後就屙出來。」 (耶穌講這個話，意思係講一切食物全部係淨浰个。)</verse>
				<verse number="20">佢繼續講：「使人無淨浰个係對人底背出來个。</verse>
				<verse number="21">因為對人心中出來个，有種種个惡念；這兜惡念會使佢犯通姦、偷拿、兇殺、姦淫、</verse>
				<verse number="22">貪心、邪惡、詭詐、放蕩、嫉妒、譭謗、驕傲、癲狂等罪惡。</verse>
				<verse number="23">這一切个邪惡全部係對人底背出來，也正經會使人無淨浰个。」</verse>
				<verse number="24">耶穌離開該所在，到 泰爾 城附近个地方去。佢住在一個人家，無愛俾人知，總係囥毋住。</verse>
				<verse number="25">有一個婦人家，姖个妹仔被邪靈附身。姖聽到耶穌个事，即時來見佢，跪在佢个腳前。</verse>
				<verse number="26">這婦人家係一個外國人，在 敘利亞 个 腓尼基 出世个。姖求耶穌將厥妹仔身上个鬼逐出去。</verse>
				<verse number="27">耶穌對姖講：「愛給子女先食飽；拿子女食个餅仔㧒給狗仔食係毋著个。」</verse>
				<verse number="28">該婦人家應講：「主啊，無毋著，總係桌底下个狗仔乜食子女所賸个餅碎仔啊！」</verse>
				<verse number="29">耶穌對姖講：「憑這句話，你好轉去了；鬼已經對若妹仔身上出去了！」</verse>
				<verse number="30">該婦人家就轉屋下，看到妹仔睡在眠床頂；鬼已經離開姖。</verse>
				<verse number="31">耶穌離開 泰爾 附近个地方，經過 西頓 ，對 十邑 轉到 加利利 湖。</verse>
				<verse number="32">有人將一個又聾又啞个人帶到耶穌面前來，求耶穌為佢按手。</verse>
				<verse number="33">耶穌帶佢離開人群，到堘頭去，用自家个手指探佢个耳公，又用口潾膏佢个舌乸。</verse>
				<verse number="34">耶穌昂頭望天，深深透一口大氣，對該人講：「爾發大！」意思就係「打開來！」</verse>
				<verse number="35">該人个耳公就打開來，舌乸筋也襛下來，佢就開口講話，全無困難。</verse>
				<verse number="36">耶穌吩咐大家千萬毋好對人講起這項事；總係佢越吩咐，佢等就越宣傳。</verse>
				<verse number="37">所有聽到个人全部十分奇怪；佢等講：「佢逐樣事情全部做到恁好！佢甚至使耳聾个聽到，使啞仔講話！」</verse>
			</chapter>
			<chapter number="8">
				<verse number="1">過無幾久，另外一大群人聚集共下。佢等無麼介好食；耶穌喊學生來，對佢等講：</verse>
				<verse number="2">「𠊎代這群人盡擔心，因為佢等同𠊎共下已經三日，這下無東西好食囉。</verse>
				<verse number="3">若係𠊎喊佢等餓肚笥轉去，佢等在路上會餓到半生死，因為佢等有兜係對盡遠來个。」</verse>
				<verse number="4">厥學生就問佢講：「在這偏僻个所在，𠊎等愛去㖠位尋恁多个食物給這兜人食飽呢？」</verse>
				<verse number="5">耶穌問佢等講：「你等有幾多餅？」 佢等應講：「七隻。」</verse>
				<verse number="6">耶穌吩咐眾人坐在地上，然後拿起該七隻餅仔，感謝上帝後，就擘開，交給學生，喊佢等傳給大家；學生就分給眾人。</verse>
				<verse number="7">佢等也有幾尾細魚仔；耶穌獻上感謝，吩咐學生也分給大家。</verse>
				<verse number="8">大家全部食到飽。學生拈食賸个碎仔，裝滿七隻籃仔。</verse>
				<verse number="9">該兜人大約有四千儕。耶穌就喊眾人散開，</verse>
				<verse number="10">黏時㧯學生上船，去 大瑪努他 个地方。</verse>
				<verse number="11">有兜法利賽人來見耶穌，㧯佢辯論。佢等想愛害佢，就要求佢行一個神蹟，來證明佢所做个係對上帝來个。</verse>
				<verse number="12">耶穌深深透一口大氣講：「這世代个人樣般愛要求神蹟呢？𠊎實在㧯你等講，無麼介神蹟好給這世代个人看！」</verse>
				<verse number="13">佢就離開佢等，又上船過去湖个對面。</verse>
				<verse number="14">學生毋記得帶加兜餅仔，船頂只有賸一隻餅仔，無別个食物。</verse>
				<verse number="15">耶穌警告佢等講：「你等愛細膩，愛提防法利賽人个發酵㧯 希律 个發酵。」</verse>
				<verse number="16">佢等彼此暗中議論講：「佢講這個話，怕係因為𠊎等無加帶餅仔。」</verse>
				<verse number="17">耶穌知佢等所講个，就對佢等講：「你等樣般討論無餅仔這件事呢？敢講你等還吂了解，還無明白係麼？你等个頭腦敢恁鈍？</verse>
				<verse number="18">你等有目珠，敢看毋到？有耳公，敢聽毋到？你等敢毋記得去了？</verse>
				<verse number="19">𠊎擘開五隻餅仔分給五千人食个時，你等將食賸个碎仔裝滿幾多籃仔？」 佢等應講：「十二籃。」</verse>
				<verse number="20">耶穌又問講：「𠊎擘開七隻餅仔分給四千人食个時，你等又裝滿幾多籃仔？」 佢等應講：「七籃。」</verse>
				<verse number="21">然後，耶穌講：「恁樣，你等還毋會明白係麼？」</verse>
				<verse number="22">佢等來到 伯賽大 ，有人帶一個瞙目个到耶穌面前來，要求耶穌摸佢。</verse>
				<verse number="23">耶穌牽瞙目个手，帶佢到村莊外背去，呸口潾在佢个目珠項，然後按手在佢个身上，問佢講：「你有看到東西麼？」</verse>
				<verse number="24">佢昂頭來看，講：「𠊎有看到人；佢等像樹仔，行來行去。」</verse>
				<verse number="25">耶穌又用手摸佢个目珠。該瞙目个擘開目珠來看，就完全恢復，逐樣東西看到清清楚楚。</verse>
				<verse number="26">耶穌喊佢轉去，又吩咐佢講：「連這村莊也毋好再入去。」</verse>
				<verse number="27">耶穌㧯學生去 凱撒利亞‧腓立比 附近个村莊。在路上，佢問佢等講：「一般人講𠊎係麼人？」</verse>
				<verse number="28">佢等應講：「有兜講你係施洗 約翰 ；有兜講你係 以利亞 ；也有兜講你係先知中个一個。」</verse>
				<verse number="29">耶穌又問佢等講：「你等呢？你等講𠊎係麼人？」 彼得 講：「你就係基督。」</verse>
				<verse number="30">然後，耶穌警告佢等，一定毋好對別人講佢个身份。</verse>
				<verse number="31">耶穌就開始教示學生，人子一定愛受盡多个苦難；佢會被長老、祭司長㧯經學教師棄絕，也會被人殺害，總係第三日佢會復活。</verse>
				<verse number="32">佢將這兜事講到清清楚楚。 彼得 就拉等耶穌，開始勸佢。</verse>
				<verse number="33">耶穌轉身，看等學生，責備 彼得 講：「撒但，閃開！你个想法毋係對上帝來个，係人个想法。」</verse>
				<verse number="34">然後，耶穌喊眾人㧯學生到佢面前來，㧯佢等講：「想愛跈𠊎个人，就愛放掉自家，擎起佢个十字架來跈𠊎。</verse>
				<verse number="35">因為想愛救自家生命个人，反轉會喪失生命；為到𠊎㧯𠊎个福音喪失生命个人，反轉會得到生命。</verse>
				<verse number="36">人若係賺到全世界，總係喪失自家个生命，有麼介路用呢？當然無！</verse>
				<verse number="37">佢愛拿麼介來換自家个生命呢？</verse>
				<verse number="38">對這淫亂㧯邪惡个世代，無論麼人，因為𠊎㧯𠊎个教訓感覺見笑，人子在厥爸个榮光中，同佢个聖天使共下降臨該時，也愛看佢做見笑个人。」</verse>
			</chapter>
			<chapter number="9">
				<verse number="1">耶穌又對佢等講：「𠊎實在㧯你等講，企在這位个人，有兜在死以前會看到上帝个主權大有能力來實現。」</verse>
				<verse number="2">六日以後，耶穌帶等 彼得 、 雅各 㧯 約翰 ，恬恬仔上一座高山。在佢等面前，耶穌个形像改變：</verse>
				<verse number="3">佢个衫發光，非常个白，世間無人能將布仔漂到恁白。</verse>
				<verse number="4">三個學生忽然看到 以利亞 㧯 摩西 在該位同耶穌講話。</verse>
				<verse number="5">彼得 對耶穌講：「先生，𠊎等在這位盡好！𠊎等來搭三間寮仔，一間給你，一間給 摩西 ，一間給 以利亞 。」</verse>
				<verse number="6">因為三個學生盡驚， 彼得 毋知愛講麼介正好。</verse>
				<verse number="7">這時有雲出現，遮等佢等。忽然有聲對雲中傳出來講：「這係𠊎所惜个孻仔。你等愛聽從佢！」</verse>
				<verse number="8">佢等趕緊四面緊尋，總係無看到別人，只有耶穌同佢等共下。</verse>
				<verse number="9">佢等下山个時，耶穌吩咐佢等講：「人子吂對死復活以前，千萬毋好將所看到个事㧯別人講。」</verse>
				<verse number="10">佢等遵守耶穌个話，總係彼此討論講：「對死復活到底係麼介意思？」</verse>
				<verse number="11">佢等又問耶穌講：「經學教師樣會講， 以利亞 定著愛先來呢？」</verse>
				<verse number="12">耶穌應講：「有影， 以利亞 愛先來使萬事復原；總係聖經樣般又講，人子必定會受盡多苦並被人棄絕呢？</verse>
				<verse number="13">總係𠊎㧯你等講， 以利亞 已經來了；佢等也隨心所愛來對待佢，像聖經所講關係佢个話一樣。」</verse>
				<verse number="14">佢等倒轉去其他學生該位个時，看到一大群人圍等佢等。有兜經學教師在該位同學生辯論。</verse>
				<verse number="15">眾人一看到耶穌，全部非常奇怪，就走等去迎接佢。</verse>
				<verse number="16">耶穌問學生講：「你等同佢等辯論麼介？」</verse>
				<verse number="17">人群中有一個人應講：「先生，𠊎帶等𠊎个孻仔來尋你；因為佢被啞仔鬼附身，無法度講話。</verse>
				<verse number="18">逐擺鬼攻擊佢个時，就將佢抨落地泥下，使佢嘴緊浡泡，咬𢫮牙鉸，歸身硬硬。𠊎要求若學生逐這個鬼走，總係佢等無辦法。」</verse>
				<verse number="19">耶穌對佢等講：「你等這世代个人樣般恁無信心！𠊎還愛在你等這位幾久呢？還愛忍耐你等幾久呢？將細人仔帶來𠊎這位！」</verse>
				<verse number="20">佢等就將細人仔帶過來。 該鬼一看到耶穌，就使細人仔大抽筋，橫在地上滾來滾去，嘴緊浡泡。</verse>
				<verse number="21">耶穌問佢个阿爸講：「佢發這個病有幾久了？」 佢應講：「從細就有囉。</verse>
				<verse number="22">鬼盡多擺想愛害死佢，將佢抨到火底背，㩳落水中。你若有辦法，求你憐憫𠊎等，幫助𠊎等！」</verse>
				<verse number="23">耶穌講：「係噢，你若有辦法！有信心个人，麼介事情都有可能。」</verse>
				<verse number="24">細人仔个阿爸黏時大聲講：「𠊎信，總係𠊎个信心毋罅，求你幫助𠊎！」</verse>
				<verse number="25">耶穌看到眾人圍等來，就嚴嚴責備該邪靈講：「你這聾啞鬼，𠊎命令你對這細人仔身上出來，不准你再入去！」</verse>
				<verse number="26">該鬼大喊一聲，使細人仔大抽筋一陣仔，就出來。細人仔卻像死掉一樣；大家講：「佢死掉囉！」</verse>
				<verse number="27">總係耶穌牽等佢个手，扶佢䟘起來，佢就企起來。</verse>
				<verse number="28">耶穌一入去屋肚，學生就暗中問佢講：「𠊎等樣般無法度將該鬼逐出去呢？」</verse>
				<verse number="29">耶穌應講：「只有靠祈禱正逐得走這種个鬼，以外無別个辦法。」</verse>
				<verse number="30">佢等離開該地方，經過 加利利 。耶穌無愛俾人知佢去㖠，</verse>
				<verse number="31">因為佢在該位教學生。佢講：「人子會被人交在人个手中；佢等會殺害佢；死後第三日佢會復活。」</verse>
				<verse number="32">總係佢等毋會了解這話个意思，又毋敢問佢。</verse>
				<verse number="33">佢等來到 迦百農 ，入去屋肚後，耶穌問厥學生講：「你等在路上爭論麼介哪？」</verse>
				<verse number="34">佢等毋敢出聲，因為佢等歸路爭無停：麼人最偉大。</verse>
				<verse number="35">耶穌坐下來，喊十二個學生到佢面前來，對佢等講：「想愛做頭个，佢就愛做最細个，做眾人个僕人。」</verse>
				<verse number="36">然後佢喊一個細人仔來到佢等當中，揇等佢，對佢等講：</verse>
				<verse number="37">「為到𠊎个名接待一個像這細人仔个，就係接待𠊎。接待𠊎个，毋係單淨接待𠊎，也係接待該差𠊎來个。」</verse>
				<verse number="38">約翰 對耶穌講：「先生，𠊎等看到有人奉你个名逐鬼，𠊎等就禁止佢，因為佢毋係跈𠊎等个。」</verse>
				<verse number="39">耶穌講：「毋好禁止佢；因為無人會奉𠊎个名行神蹟，黏時又反過來講壞話攻擊𠊎。</verse>
				<verse number="40">毋係反對𠊎等个，就係贊成𠊎等个。</verse>
				<verse number="41">𠊎實在㧯你等講，無論麼人，因為你等屬基督，拿一杯水給你等啉，佢一定會得到獎賞。」</verse>
				<verse number="42">耶穌講：「無論麼人害信徒中任何一個微細个人離開𠊎，佢最好被人用大磨石紽等頸筋，㧒落海肚去。</verse>
				<verse number="43">若係你个一支手害你犯罪，斬掉它！少一支手來得到永遠个生命，較贏雙手好好落地獄，落在永遠不滅个烈火中。</verse>
				<verse number="44"></verse>
				<verse number="45">若係你个一支腳害你犯罪，斬掉它！少一支腳來得到永遠个生命，較贏雙腳好好卻㧒落地獄。</verse>
				<verse number="46"></verse>
				<verse number="47">若係你个一隻目珠害你犯罪，將它挖出來！少一隻目珠入上帝个國，較贏雙目好好卻㧒落地獄。</verse>
				<verse number="48">在該位，蟲仔毋會死，烈火永遠不滅。</verse>
				<verse number="49">「每一個人會被火試煉，像被鹽鹵一樣。</verse>
				<verse number="50">鹽係好个，總係鹽若失掉鹹味，愛樣般使它再鹹呢？你等愛有鹽个作用，又愛彼此和睦。」</verse>
			</chapter>
			<chapter number="10">
				<verse number="1">耶穌離開該地方，來到 猶太 地區㧯 約旦 河東片。眾人又聚集到佢該位去，佢就照常教訓佢等。</verse>
				<verse number="2">有兜法利賽人來見耶穌，想愛害佢，就問佢講：「請教你，𠊎等个法律准老公離掉𡜵娘麼？」</verse>
				<verse number="3">耶穌反問講：「 摩西 个命令係樣般講？」</verse>
				<verse number="4">佢等應講：「 摩西 准老公寫一張離婚書給𡜵娘，就做得離掉姖。」</verse>
				<verse number="5">耶穌對佢等講：「 摩西 寫這條誡命給你等係因為你等个心盡硬。</verse>
				<verse number="6">總係在太初，上帝創造世界个時，所造个人『有男也有女』；</verse>
				<verse number="7">『因為恁樣，男人愛離開佢个爺𡟓，㧯𡜵娘結合，</verse>
				<verse number="8">兩儕成做一體。』既然係恁樣，夫妻就毋係兩個人，係一體。</verse>
				<verse number="9">所以，上帝所配合个，人做毋得拆開。」</verse>
				<verse number="10">佢等倒轉去屋肚个時，學生又問起這件事。</verse>
				<verse number="11">耶穌㧯佢等講：「無論麼人離掉𡜵娘，重新㧯別个婦人家結婚，就係犯姦淫，虧欠佢个𡜵娘；</verse>
				<verse number="12">𡜵娘若離掉老公，再去㧯別人結婚，也係犯姦淫。」</verse>
				<verse number="13">有兜人帶細人仔來見耶穌，希望佢摸佢等；總係學生責備該兜人。</verse>
				<verse number="14">耶穌看到就發譴，對學生講：「俾細人仔來𠊎這位，毋好禁止佢等，因為上帝國个子民就像這種个人。</verse>
				<verse number="15">𠊎實在㧯你等講，無論麼人，若毋係像細人仔恁樣來接受上帝个主權，佢絕對無可能成做上帝个子民。」</verse>
				<verse number="16">講了，佢就揇等細人仔，一個一個按手，為佢等祝福。</verse>
				<verse number="17">耶穌堵堵正出去，有一個人走過來，跪在佢个面前，問佢講：「良善个先生，𠊎愛做麼介正做得承受永遠个生命啊？」</verse>
				<verse number="18">耶穌問佢講：「你樣般喊𠊎做良善个呢？上帝以外，無再有良善个。</verse>
				<verse number="19">你知該兜誡命：『做毋得㓾人；做毋得犯姦淫；做毋得偷拿；做毋得做假見證；做毋得詐欺；愛孝敬爺𡟓。』」</verse>
				<verse number="20">該人應講：「先生，這兜誡命𠊎全部從細就已經遵守了。」</verse>
				<verse number="21">耶穌注目看等佢，盡惜佢，就講：「你還欠一樣。去賣你所有个產業，將錢送給窮苦人，你就會有財產積存在天頂；然後你來跈𠊎。」</verse>
				<verse number="22">該人一聽到這個話，就面色癧青，心情沈重來離開，因為佢个產業盡多。</verse>
				<verse number="23">耶穌看等學生，㧯佢等講：「有錢人愛做上帝國个子民，實在真難噢！」</verse>
				<verse number="24">學生因為佢个話感覺盡奇怪；總係耶穌又講：「細子啊，愛做上帝國个子民就盡難！</verse>
				<verse number="25">有錢人愛做上帝國个子民，比駱駝穿過針鼻還較難！」</verse>
				<verse number="26">這時，學生十分奇怪，彼此問講：「恁樣，麼人有可能得救呢？」</verse>
				<verse number="27">耶穌注目看佢等，講：「在人係無可能，總係在上帝就毋係恁樣，因為上帝萬事都能。」</verse>
				<verse number="28">彼得 接嘴講：「你看，𠊎等已經放掉一切來跈你。」</verse>
				<verse number="29">耶穌對佢等講：「𠊎實在㧯你等講，為到𠊎抑係福音來放掉房屋、兄弟、姊妹、爺𡟓、子女、抑係田地个人，</verse>
				<verse number="30">在今世雖然會堵到迫害，總係會得到百倍个房屋、兄弟、姊妹、爺𡟓、子女、抑係田地；在來生會得到永遠个生命。</verse>
				<verse number="31">總係，盡多在最頭前个會做背尾；盡多在最背尾个會做頭前。」</verse>
				<verse number="32">在佢等去 耶路撒冷 个路上，耶穌在頭前行。學生心中充滿疑狐；其他跈等个人也盡驚。耶穌喊十二個學生到佢面前來，再一擺㧯佢等講起無幾久以後愛發生在佢身上个事。</verse>
				<verse number="33">佢講：「看啊，𠊎等這下愛上 耶路撒冷 去；人子會被人交在祭司長㧯經學教師个手中。佢等會判佢死刑，然後將佢交給外邦人。</verse>
				<verse number="34">佢等會㩢耍佢，呸佢口潾，鞭打佢，最後殺害佢；總係，第三日佢會復活。」</verse>
				<verse number="35">西庇太 个孻仔 雅各 㧯 約翰 來見耶穌，講：「先生，𠊎等有一個要求，希望你答應。」</verse>
				<verse number="36">耶穌問講：「愛𠊎為你等做麼介？」</verse>
				<verse number="37">佢等講：「你坐榮耀寶座个時，希望你俾𠊎等同你共下坐，一個在你个右片，一個在你个左片。」</verse>
				<verse number="38">耶穌對佢等講：「你等毋知自家所求个係麼介。𠊎所啉个苦杯，你等有法度啉麼？𠊎所受个洗禮，你等有法度承受麼？」</verse>
				<verse number="39">佢等講：「𠊎等有法度！」 耶穌講：「𠊎所啉个苦杯，你等確實愛啉，𠊎所受个洗禮，你等確實愛承受；</verse>
				<verse number="40">總係麼人坐在𠊎个左右，就毋係𠊎做得決定个。這兜座位，上帝為麼人準備，就愛賜給麼人。」</verse>
				<verse number="41">其他十個學生聽到這個事，就當閼 雅各 㧯 約翰 。</verse>
				<verse number="42">耶穌喊佢等全部到佢面前來，對佢等講：「你等知，外邦人所認為个統治者有權管轄佢等，佢等个領袖也有權指揮佢等；</verse>
				<verse number="43">總係，在你等當中就毋係恁樣。你等中間想愛做大人物个，就愛做你等个僕人；</verse>
				<verse number="44">想愛做頭个，就愛做大家个奴僕。</verse>
				<verse number="45">因為人子來，毋係愛被人服事，係來服事人，也愛為到救贖眾人來犧牲自家个生命。」</verse>
				<verse number="46">佢等來到 耶利哥 城。耶穌㧯厥學生同一大群人離開 耶利哥 个時，有一個瞙目个乞食仔 — 底買 个孻仔 巴底買 ，坐在路堘。</verse>
				<verse number="47">佢一聽講係 拿撒勒 个耶穌，就大聲喊講：「 大衛 个子孫耶穌啊，可憐𠊎！」</verse>
				<verse number="48">盡多人責備佢，喊佢毋好吵。總係佢還較大聲喊講：「 大衛 个子孫啊，可憐𠊎！」</verse>
				<verse number="49">耶穌就停下來，講：「喊佢過來。」 佢等就對瞙目个講：「毋使緊張，䟘起來，佢喊你過去！」</verse>
				<verse number="50">瞙目个即時脫下外衫，跳起來，行到耶穌个面前。</verse>
				<verse number="51">耶穌問佢講：「你愛𠊎為你做麼介？」 瞙目个應講：「先生，𠊎愛看得到！」</verse>
				<verse number="52">耶穌就對佢講：「你做得離開了！你个信心已經醫好你了。」 瞙目个黏時看得到，就跈等耶穌共下行。</verse>
			</chapter>
			<chapter number="11">
				<verse number="1">耶穌㧯學生行會到 耶路撒冷 ，將近 伯法其 㧯 伯大尼 ，在 橄欖 山，耶穌喊兩個學生先行，</verse>
				<verse number="2">吩咐佢等講：「你等去頭前个村莊。你等一入去，就會看到一隻還吂有人騎過个細驢仔紽在該位。你等將牠解開，牽來這位。</verse>
				<verse number="3">若係有人問你等：『樣般做這個事？』你等就㧯佢講：『主 愛用牠；佢黏時會送轉來。』」</verse>
				<verse number="4">佢等就去，看到路堘有一隻細驢仔紽在門口，就將牠解開。</verse>
				<verse number="5">企在該位个人問佢等講：「你等做麼介解開細驢仔？」</verse>
				<verse number="6">佢等就照耶穌所吩咐个回答；該兜人就准佢等將細驢仔牽走。</verse>
				<verse number="7">佢等將細驢仔牽到耶穌該位，將自家个衫搭在驢仔个背囊頂，耶穌就騎上去。</verse>
				<verse number="8">有盡多人用自家个衫鋪在路上，也有人拿野地斬來个樹枝鋪在路上。</verse>
				<verse number="9">頭前行㧯後背跈个人大聲喊講： 「和散那！頌讚上帝！ 願上帝賜福給該奉主名來个！</verse>
				<verse number="10">願上帝賜福給𠊎等祖先 大衛 个國， 就係無幾久會臨到个！ 和散那！頌讚歸給至高个上帝！」</verse>
				<verse number="11">耶穌到 耶路撒冷 ，入去聖殿，四周圍看一下。因為天已經暗，佢就㧯十二個學生出城到 伯大尼 去。</verse>
				<verse number="12">第二日，佢等對 伯大尼 倒轉城肚去；在路上，耶穌肚飢。</verse>
				<verse number="13">佢看到頭前無幾遠个所在有一頭無花果樹，葉仔拶拶，就行過去，想愛看有果子無。佢行到樹前，看到只有葉仔，因為該時毋係無花果个時節。</verse>
				<verse number="14">耶穌就對該頭樹仔講：「從今以後，毋會再有人食你个果子！」 厥學生攏總聽到這個話。</verse>
				<verse number="15">佢等來到 耶路撒冷 ，耶穌一入聖殿就將所有在聖殿肚做生理个人逐出去。佢㩳橫換錢个人个桌仔㧯賣月鴿仔个人个凳仔，</verse>
				<verse number="16">也毋准有人扛東西在聖殿行來行去。</verse>
				<verse number="17">佢教訓佢等講：「聖經敢毋係記載上帝个話講：『𠊎个聖殿愛做萬民祈禱个殿』，你等卻將它變做賊竇！」</verse>
				<verse number="18">祭司長㧯經學教師聽到這個話，就想辦法愛殺害耶穌。總係佢等驚佢，因為眾人都欽服佢个教訓。</verse>
				<verse number="19">臨暗仔，耶穌就㧯學生去城外。</verse>
				<verse number="20">第二日打早，耶穌㧯學生又對該條路經過，看到該頭無花果樹連根全部燥掉。</verse>
				<verse number="21">彼得 想起這件事个經過，就對耶穌講：「先生，你看，你所咒詛个無花果樹燥掉囉。」</verse>
				<verse number="22">耶穌回答講：「對上帝愛有信心！</verse>
				<verse number="23">𠊎實在㧯你等講，你等若係對這座山講：『徙開，落海肚去！』心中無疑狐，確信所講个一定會實現，這個事就會為到你等來實現。</verse>
				<verse number="24">所以，𠊎㧯你等講，你等祈禱个時，相信你等所求个係已經得到，就會得到。</verse>
				<verse number="25">你等企等祈禱个時，愛先赦免得罪你等个人；恁樣，你等在天頂个阿爸正會赦免你等个過犯。」</verse>
				<verse number="26"></verse>
				<verse number="27">佢等又來到 耶路撒冷 。耶穌在聖殿肚行个時，祭司長、經學教師，㧯長老來見佢，</verse>
				<verse number="28">問佢講：「你靠麼介權柄做這兜事？麼人給你這權柄做這兜事呢？」</verse>
				<verse number="29">耶穌應講：「𠊎先問你等一句話，若係你等回答𠊎，𠊎就㧯你等講，𠊎靠麼介權柄做這兜事。</verse>
				<verse number="30">㧯𠊎講， 約翰 行洗禮个權柄，係對上帝來个，抑係對人來个？」</verse>
				<verse number="31">佢等就彼此爭論，講：「若係𠊎等講：『對上帝來个』，佢會講：『恁樣，你等做麼介毋信 約翰 呢？』</verse>
				<verse number="32">若係𠊎等講：『對人來个』，𠊎等个問題就當大了 。」 (佢等驚人民會對付佢等，因為眾人攏總相信 約翰 係先知。)</verse>
				<verse number="33">對恁樣，佢等應耶穌講：「𠊎等毋知。」 耶穌對佢等講：「恁樣，𠊎也毋㧯你等講𠊎靠麼介權柄做這兜事情。」</verse>
			</chapter>
			<chapter number="12">
				<verse number="1">耶穌又用比喻對佢等講：「有一個人開一垤葡萄園，周圍用籬笆圍等，又在園中挖一隻醡酒池，起一座守望台，然後將葡萄園租給佃農，自家出外去旅行。</verse>
				<verse number="2">到收葡萄个時節，佢派一個僕人去對該兜佃農收佢應得个果子。</verse>
				<verse number="3">該兜佃農將該僕人捉來打，逐佢空手轉去。</verse>
				<verse number="4">園主又派另外一個僕人去；佢等卻將佢个頭那打爛孔，又侮辱佢。</verse>
				<verse number="5">園主再過派一個僕人去，佢等就將佢㓾死。佢等又像恁樣對付盡多人，有兜被佢等打，有兜被佢等㓾死。</verse>
				<verse number="6">園主只有賸佢所惜个孻仔好派。最後，佢就派佢去，心肝想：『最少，佢等乜會尊重𠊎个孻仔。』</verse>
				<verse number="7">總係該兜佃農彼此參詳講：『這人係園主个繼承人；來啊，𠊎等來㓾死佢，佢个產業就變做𠊎等个了！』</verse>
				<verse number="8">佢等就揪等佢，㓾死佢，將佢个身屍㧒到園外。」</verse>
				<verse number="9">耶穌問講：「恁樣，葡萄園个主人會樣般做呢？佢一定會來㓾死該兜佃農，將葡萄園租給別人。</verse>
				<verse number="10">你等無讀過這站聖經係麼？ 泥水師傅所㧒掉个這垤石頭， 已經成做地基中最重要个 。</verse>
				<verse number="11">這係主个作為， 係樣般奇妙个事啊！」</verse>
				<verse number="12">因為 猶太 人个領袖知耶穌所講个比喻係責備佢等，就想愛捉佢。總係佢等驚眾人，高不將就離開佢。</verse>
				<verse number="13">有兜法利賽人㧯 希律 黨个人奉命來見耶穌，想愛對佢个話尋把柄來害佢。</verse>
				<verse number="14">佢等對佢講：「先生，𠊎等知你係誠實个人；毋管人樣般想，你也毋會看人个情面，總係忠實將上帝个道理教示人。納稅給 羅馬 皇帝係違背𠊎等个法律麼？</verse>
				<verse number="15">𠊎等愛納抑係毋使納？」 耶穌看出佢等个詭計，就應講：「你等樣般想愛害𠊎呢？拿一隻銀幣給𠊎看！」</verse>
				<verse number="16">佢等拿一隻銀幣給佢。耶穌問佢等講：「這個像㧯名號係麼人个？」 佢等應講：「係皇帝个。」</verse>
				<verse number="17">耶穌對佢等講：「既然係恁樣，將皇帝个東西歸給皇帝，將上帝个東西歸給上帝。」 佢等聽到這個話，就對佢盡希奇。</verse>
				<verse number="18">有兜毋相信復活這件事个撒都該人來見耶穌，問佢講：</verse>
				<verse number="19">「先生， 摩西 為𠊎等立法講：『若係有一個人過身，留下佢个𡜵娘，總係無子女，佢个老弟一定愛討守寡个阿嫂做𡜵娘，代阿哥傳宗接代。』</verse>
				<verse number="20">識有七個兄弟：大哥討𡜵娘後，無留下子女就過身；</verse>
				<verse number="21">二哥討守寡个阿嫂後，也無留下子女就過身；第三個也係恁樣。</verse>
				<verse number="22">七個兄弟全部討過該婦人家，攏總無留下子女就過身。最尾，該婦人家也過身。</verse>
				<verse number="23">恁樣，在復活个時節，這個婦人家愛算係麼人个𡜵娘呢？因為七個兄弟全部識㧯姖結婚。」</verse>
				<verse number="24">耶穌應佢等講：「你等毋著了，樣般講呢？因為你等無明白聖經，也無清楚上帝个權能。</verse>
				<verse number="25">佢等對死復活个時，係㧯天頂个天使共樣，無討也無嫁。</verse>
				<verse number="26">關係死人復活个事，你等無讀過 摩西 个書所寫竻樹𤏸火个故事係麼？上帝㧯 摩西 講：『𠊎係 亞伯拉罕 个上帝， 以撒 个上帝， 雅各 个上帝。』</verse>
				<verse number="27">這意思係講，上帝毋係死人个上帝，係生人个上帝。你等完全毋著了！」</verse>
				<verse number="28">有一個經學教師聽到佢等个辯論，感覺耶穌盡會回答問題，就進前來問耶穌講：「誡命中㖠條係第一重要个？」</verse>
				<verse number="29">耶穌應講：「第一重要个就係：『 以色列 啊，你愛注意聽！主 — 𠊎等个上帝係惟一个主。</verse>
				<verse number="30">你愛用全部个心志、情感、理智㧯力量敬愛主 — 你个上帝。』</verse>
				<verse number="31">第二係：『你愛惜鄰舍，就像惜自家一樣。』無比這兩條還較重要个誡命了。」</verse>
				<verse number="32">該經學教師對耶穌講：「先生，你所講个盡著！就像你所講，上帝係惟一个主，除了佢以外無別个上帝。</verse>
				<verse number="33">愛用全部个心志、理智㧯力量敬愛上帝；也愛惜鄰舍，就像惜自家一樣。遵守這兩條誡命，比獻燒化祭㧯其他个祭物給上帝還較重要。」</verse>
				<verse number="34">耶穌看出佢个回答滿有智慧，就對佢講：「你離上帝个國無幾遠了。」 對該時以後，無人敢再問耶穌麼介難題。</verse>
				<verse number="35">耶穌在聖殿肚教示人个時，提出一個問題，講：「經學教師樣般講基督係 大衛 个子孫呢？</verse>
				<verse number="36">大衛 自家識受聖靈个感動講： 主對𠊎个主講： 『你坐在𠊎个右片， 等𠊎使你个仇敵伏在你个腳下。』</verse>
				<verse number="37">大衛 自家稱佢做『主』，基督樣會又係 大衛 个子孫呢？」 眾人全部盡歡喜聽耶穌講論。</verse>
				<verse number="38">在教示佢等个時，佢講：「愛提防經學教師；佢等好著長袍，招搖過街，愛別人在公共場所對佢等致敬請安，</verse>
				<verse number="39">又盡愛坐會堂肚个特別座位㧯筵席中个大位。</verse>
				<verse number="40">佢等吞食寡婦个產業，然後在人个面前表演長篇个祈禱。佢等一定會受到較重个責罰！」</verse>
				<verse number="41">耶穌坐在聖殿銀庫个對面，看大家樣般放錢落奉獻箱。當多有錢人放盡多錢落去；</verse>
				<verse number="42">後來有一個窮苦个寡婦行過來，放兩隻細銅錢落去，差毋多係一文錢定定。</verse>
				<verse number="43">耶穌喊厥學生過來，對佢等講：「𠊎實在㧯你等講，這窮苦个寡婦放落奉獻箱个比眾人所獻个較多。</verse>
				<verse number="44">因為別人係奉獻佢等用賸个一部份；總係姖係在無罅用个當中，將全部个生活費獻出來。」</verse>
			</chapter>
			<chapter number="13">
				<verse number="1">耶穌對聖殿出來个時，佢一個學生對佢講：「先生，你看，這兜石頭實在盡大，這兜建築樣會恁靚！」</verse>
				<verse number="2">耶穌對佢講：「你緊看這兜偉大个建築係麼？這所在个每一垤石頭全部會被人拆下來，無一垤石頭會疊在另外一垤个頂高。」</verse>
				<verse number="3">耶穌在 橄欖 山頂，面對聖殿坐等。 彼得 、 雅各 、 約翰 㧯 安德烈 暗中來問佢講：</verse>
				<verse number="4">「請㧯𠊎等講，這個事幾時會發生呢？這一切發生个時節會有麼介兆頭？」</verse>
				<verse number="5">耶穌㧯佢等講：「你等愛細膩，毋好被人迷惑。</verse>
				<verse number="6">有盡多人會假冒𠊎个名來，講：『𠊎就係基督！』對恁樣迷惑盡多人。</verse>
				<verse number="7">你等聽到附近相㓾个風聲㧯遠方戰爭个消息，該時，毋使驚。這兜事定著會發生；總係這毋係講末日已經到了。</verse>
				<verse number="8">民族會㧯民族相㓾；國家會㧯國家戰爭；逐所在會有地動㧯飢荒。這兜事个發生就像產婦生產前个陣痛一樣。</verse>
				<verse number="9">「你等自家愛細膩，因為有人會捉你等，送你等上法院；你等也會在會堂肚被人鞭打。為到𠊎个緣故，你等會企在統治者㧯君王个面前受審判，來對佢等做見證。</verse>
				<verse number="10">總講，福音一定愛先傳給萬民。</verse>
				<verse number="11">你等被人捉到，送去法院个時，毋使先愁愛講麼介話；到該時上帝指示麼介，你等就講麼介；因為你等所愛講个，毋係自家个話，係聖靈愛通過你等講个。</verse>
				<verse number="12">該時，兄弟會出賣兄弟來害死佢等；阿爸也會恁樣對待子女；子女也會同爺𡟓作對來害死佢等。</verse>
				<verse number="13">為到𠊎个名，大家會怨恨你等；總係忍耐到底个人定著會得救。</verse>
				<verse number="14">「你等看到該『毀滅性、邪惡个東西』企在它無應該企个所在个時 (讀个人愛了解這句話个意思)，住在 猶太 地區个，愛走去山頂避難；</verse>
				<verse number="15">在屋頂个，毋好下來，也毋好入去屋肚拿麼介東西；</verse>
				<verse number="16">在田項个，毋好轉去拿外衫。</verse>
				<verse number="17">在該兜日仔，懷胎个婦人家㧯給孲𤘅仔食乳个阿姆就慘了！</verse>
				<verse number="18">你等愛祈求上帝，毋好俾這兜事在寒天發生！</verse>
				<verse number="19">因為該兜日仔个災難係對上帝創造世界以來毋識有个，將來也毋會再有。</verse>
				<verse number="20">若係主無減少該兜災難个日仔，無人能生存下去。總係，為到佢所揀選个子民，主已經減少該兜日仔。</verse>
				<verse number="21">「若係有人㧯你等講：『你看，基督在這位！』抑係『基督在該位！』毋好相信。</verse>
				<verse number="22">因為假基督㧯假先知會出現；佢等會行神蹟奇事，盡佢所能來迷惑上帝所揀選个子民。</verse>
				<verse number="23">你等愛細膩！𠊎已經先將這一切个事攏總㧯你等講過了。</verse>
				<verse number="24">「該兜災難个日仔過掉以後，日頭會變烏，月光毋會再光，</verse>
				<verse number="25">星仔會對天頂跌下來，太空个系統也會搖動。</verse>
				<verse number="26">該時，佢等會看到人子大有能力㧯榮耀坐雲降臨。</verse>
				<verse number="27">佢愛差天使到天涯海角去，對世界這片到世界該片，召集佢所揀選个子民。</verse>
				<verse number="28">「你等愛對無花果樹學教訓。當樹枝轉青，生出新葉个時，你等就知熱天會到了。</verse>
				<verse number="29">共樣，你等看到這一切个現象，就愛知時間會到 ，已經在門口了。</verse>
				<verse number="30">𠊎實在㧯你等講，這代人還吂攏總過身以前，這一切个事就會發生。</verse>
				<verse number="31">天㧯地會無掉，總係𠊎个話永遠毋會無掉。</verse>
				<verse number="32">「總係該愛來个日仔㧯時間，無人知；天頂个天使也毋知，孻仔也毋知，只有阿爸知。</verse>
				<verse number="33">你等愛細膩，愛警醒，因為你等毋知該時間幾時會到。</verse>
				<verse number="34">這個事親像一個人出外旅行，將家務交給僕人管理，分配每一個人个工作，又吩咐掌門个愛注意。</verse>
				<verse number="35">所以，你等愛警醒，因為你等毋知主人幾時會轉來，係臨暗仔抑係半夜，係天曚光抑係日頭出來以後。</verse>
				<verse number="36">若係佢忽然轉來，毋好俾佢看到你等在睡目！</verse>
				<verse number="37">𠊎㧯你等講个話，也係㧯大家講个：你等愛警醒！」</verse>
			</chapter>
			<chapter number="14">
				<verse number="1">𨃟過節㧯除酵節个前兩日，祭司長㧯經學教師陰謀愛祕密捉耶穌，將佢㓾死。</verse>
				<verse number="2">佢等講：「𠊎等毋好在節期中下手，免得惹起民眾个暴動。」</verse>
				<verse number="3">耶穌在 伯大尼 發癩个 西門 屋下；食飯个時，有一個婦人家帶一隻玉罐仔來，底背裝盡珍貴个純哪噠香油。姖打破玉罐，將香油倒在耶穌个頭那頂。</verse>
				<verse number="4">筵席中个人有兜盡無歡喜，彼此議論講：「樣般恁打喪呢？</verse>
				<verse number="5">這香油做得賣三百零隻銀錢 ，拿來救濟窮苦人啊！」佢等就責備該婦人家。</verse>
				<verse number="6">總係耶穌講：「由在姖！做麼介為難姖哪？姖為𠊎做个係一件盡靚个事。</verse>
				<verse number="7">因為常常有窮苦人同你等共下，若係愛，你等隨時做得救濟佢等；總係𠊎毋係常常同你等共下。</verse>
				<verse number="8">姖已經盡所能个做了；姖將這香油倒在𠊎个身上係為𠊎个埋葬先做準備。</verse>
				<verse number="9">𠊎實在㧯你等講，普天下，無論福音傳到麼介所在，逐儕都愛講起姖所做个事，來紀念姖。」</verse>
				<verse number="10">耶穌十二個學生當中，有一個 加略 人 猶大 ；佢去見祭司長，愛將耶穌交給佢等。</verse>
				<verse number="11">佢等聽到 猶大 所講个，就非常歡喜，又答應拿錢給佢。對該時起， 猶大 就尋機會愛出賣耶穌。</verse>
				<verse number="12">除酵節个第一日，就係㓾𨃟過節羔羊該日，學生來問耶穌講：「你愛𠊎等去㖠位為你準備𨃟過節个晚餐呢？」</verse>
				<verse number="13">耶穌就派兩個學生，吩咐佢等講：「你等入城去，會堵到一個人帶等一罐水，你等就跈等佢；</verse>
				<verse number="14">佢去到㖠家，你等就問該家个主人講：『先生講：𠊎㧯𠊎个學生食𨃟過節晚餐个客廳在㖠位？』</verse>
				<verse number="15">佢會帶你等去看樓頂一間佈置好个大房間；你等就在該位代𠊎等準備。」</verse>
				<verse number="16">兩個學生出去，入去城肚；所堵到个全部㧯耶穌對佢等講个共樣；佢等就在該位準備𨃟過節个晚餐。</verse>
				<verse number="17">臨暗仔，耶穌㧯十二個學生全部到齊。</verse>
				<verse number="18">佢等坐下來食个時節，耶穌講：「𠊎實在㧯你等講，你等當中同𠊎共下食个，有一個人愛出賣𠊎。」</verse>
				<verse number="19">學生就盡憂愁，一個一個問佢講：「敢係𠊎？」</verse>
				<verse number="20">耶穌應講：「係你等十二儕當中个一儕；㧯𠊎用共隻盤仔搵餅个，佢就係。</verse>
				<verse number="21">照聖經所講，人子會受害；總係出賣人子个人有災禍了！佢莫出世還較好！」</verse>
				<verse number="22">佢等食个時節，耶穌拿起餅仔，感謝上帝後，就擘開，分給佢等，講：「拿來食；這係𠊎个身體。」</verse>
				<verse number="23">佢又拿起杯仔，感謝上帝後，交給佢等；佢等全部就啉。</verse>
				<verse number="24">耶穌講：「這係𠊎个血，係證明上帝㧯人立約个血，為盡多人來流出个。</verse>
				<verse number="25">𠊎實在㧯你等講，𠊎絕對毋會再啉這葡萄酒，直到在上帝个國啉新酒該日。」</verse>
				<verse number="26">佢等唱一首詩，就出來，到 橄欖 山去。</verse>
				<verse number="27">耶穌對佢等講：「你等攏總會離開𠊎，因為聖經記載： 上帝講： 『𠊎愛攻擊牧人， 羊群就分散掉去。』</verse>
				<verse number="28">總係𠊎復活以後，愛比你等先去 加利利 。」</verse>
				<verse number="29">彼得 講：「就算別人全部離開你，𠊎絕對毋會離開你！」</verse>
				<verse number="30">耶穌對佢講：「𠊎實在㧯你講，今暗晡，雞仔啼第二擺 以前，你會三擺毋認𠊎。」</verse>
				<verse number="31">彼得 用還較堅定个口氣講：「就算𠊎一定愛同你共下死，𠊎也絕對毋會毋認你！」 其他个學生也全部恁樣講。</verse>
				<verse number="32">佢等來到一個所在，名安到 客西馬尼 ；耶穌㧯學生講：「你等在這位坐，等𠊎去祈禱。」</verse>
				<verse number="33">然後佢帶 彼得 、 雅各 㧯 約翰 共下去。佢開始感覺盡憂傷痛苦，</verse>
				<verse number="34">對佢等講：「𠊎个心艱苦到會死。你等留在這位，愛警醒噢！」</verse>
				<verse number="35">佢行前兜仔，就伏在地上，懇求上帝，若係做得，毋使俾佢經歷這個痛苦。</verse>
				<verse number="36">佢講：「阿爸，𠊎个爺啊，在你凡事都能。求你將這個苦杯徙走；總係，毋好照𠊎个意思，愛照你个旨意。」</verse>
				<verse number="37">佢倒轉來个時，發現三個學生睡掉，就㧯 彼得 講：「 西門 ，你在這睡目係麼？無法度警醒一點鐘久嗎？</verse>
				<verse number="38">你等愛警醒祈禱，免得陷落迷惑。你等確實心靈甘願，總係肉體軟弱。」</verse>
				<verse number="39">佢又行過去，還係用共樣个話祈禱。</verse>
				<verse number="40">然後佢又倒轉學生該位，看到佢等又睡掉，因為佢等个目珠擘毋開；佢等也毋知愛㧯佢講麼介正好。</verse>
				<verse number="41">耶穌第三擺倒轉來，㧯佢等講：「你等還睡目，還在該位休息嗎？罅擺了，時間到了，看啊，人子已經被人出賣到罪人手中囉。</verse>
				<verse number="42">䟘起來，𠊎等來去！看啊，出賣𠊎个人到了！」</verse>
				<verse number="43">耶穌還講等話个時，十二個學生中个 猶大 來到。有一大群人帶等刀仔、棍仔同佢共下來；佢等係祭司長、經學教師，㧯長老派來个。</verse>
				<verse number="44">出賣耶穌个人事前給佢等一隻暗號，講：「𠊎唚麼人，佢就係你等所想愛个人。你等愛捉到佢，嚴嚴看守，將佢帶走。」</verse>
				<verse number="45">猶大 一到，即時行到耶穌面前，喊講：「先生！」又唚佢。</verse>
				<verse number="46">所以佢等就下手捉耶穌。</verse>
				<verse number="47">企在塍頭个人當中，有一儕挷出刀仔，對大祭司个僕人劈過去，將佢个耳公削掉一隻。</verse>
				<verse number="48">耶穌對佢等講：「你等帶等刀仔㧯棍仔出來捉𠊎，看𠊎做強盜係麼？</verse>
				<verse number="49">𠊎逐日在聖殿肚教人，常常同你等共下，你等並無捉𠊎。總係，這個事係愛應驗聖經所講个話。」</verse>
				<verse number="50">這時，所有个學生全部離開佢逃走。</verse>
				<verse number="51">有一個後生人，身上單淨披等一垤麻布，跈在耶穌个後背；佢等就想愛捉佢，</verse>
				<verse number="52">總係佢㧒掉該垤布仔，打赤膊走掉。</verse>
				<verse number="53">佢等將耶穌帶到大祭司該位去；所有个祭司長、長老，㧯經學教師全部聚集在該位。</verse>
				<verse number="54">彼得 遠遠跈等耶穌，直到大祭司个庭院肚，坐在警衛个當中焙火。</verse>
				<verse number="55">祭司長㧯全議會想盡辦法尋證據告耶穌，來定佢死刑，總係尋毋到麼介證據。</verse>
				<verse number="56">好多人出面做假見證告佢，總係佢等所講个鬥毋到。</verse>
				<verse number="57">後來有幾個人企起來，做假見證告耶穌講：</verse>
				<verse number="58">「𠊎等聽到佢講過：『𠊎愛將這座人手所起个聖殿拆掉，三日內起一座毋係人手所做个聖殿。』」</verse>
				<verse number="59">連這個控告，佢等所講个也鬥毋到。</verse>
				<verse number="60">所以大祭司在大家面前企起來，問耶穌講：「這兜人告你个，你無麼介話好應係麼？」</verse>
				<verse number="61">耶穌恬恬，一句話也毋講。大祭司又問佢：「你係毋係基督，係該應當受稱頌个上帝个孻仔麼？」</verse>
				<verse number="62">耶穌應講：「𠊎係！你等會看到人子坐在全能者个右片，坐等天頂个雲降臨！」</verse>
				<verse number="63">大祭司就扯裂自家个衫，講：「𠊎等毋使別个證人了！</verse>
				<verse number="64">你等有聽到佢侮辱上帝个話。你等講愛樣般判佢？」 佢等全部判佢有罪，應當處死刑。</verse>
				<verse number="65">有兜人就對佢呸口潾，又揞等佢个目珠，用拳頭乸打佢，問佢講：「先知啊，試揣看，係麼人打你？」該兜警衛也拉等佢，用巴掌乸搧佢。</verse>
				<verse number="66">該時， 彼得 還留在下背个庭院肚。有大祭司个一個使女行過來，</verse>
				<verse number="67">看到 彼得 在該位焙火，就看等佢，講：「你乜係同 拿撒勒 个耶穌共下个。」</verse>
				<verse number="68">彼得 否認講：「𠊎毋知，也無了解你講麼介。」然後，佢出去前院。這時，雞仔就啼 。</verse>
				<verse number="69">過一下仔，該使女又看到佢，就㧯企在塍頭个人講：「這儕係佢等當中个一個！」</verse>
				<verse number="70">彼得 又否認一擺。 又過一下仔，塍頭企等个人再一擺對 彼得 講：「你確實係佢等當中个一個，因為你也係 加利利 人！」</verse>
				<verse number="71">彼得 就發誓咒詛講：「𠊎毋識你等所講个人！」</verse>
				<verse number="72">即時，雞仔就啼第二擺 ； 彼得 正想起耶穌對佢講過个話：「雞仔啼兩擺 以前，你會三擺毋認𠊎。」 彼得 就忍毋住，噭出來。</verse>
			</chapter>
			<chapter number="15">
				<verse number="1">第二日打早，祭司長趕緊同長老、經學教師，㧯議會全體參詳，議定計劃。佢等將耶穌䌈起來，解送，交給 彼拉多 。</verse>
				<verse number="2">彼拉多 問佢講：「你係 猶太 人个王麼？」 耶穌應講：「這係你講个。」</verse>
				<verse number="3">祭司長告耶穌盡多事情，</verse>
				<verse number="4">所以 彼拉多 又問耶穌講：「你看，佢等告你恁多罪名，你無愛回答嗎？」</verse>
				<verse number="5">耶穌還係毋講一句話； 彼拉多 感覺奇怪。</verse>
				<verse number="6">逐年𨃟過節， 彼拉多 照眾人个要求放一個囚犯。</verse>
				<verse number="7">堵好有一個人名安到 巴拉巴 ，佢同該兜在暴亂中㓾人个叛徒關共下。</verse>
				<verse number="8">大眾聚集，要求 彼拉多 照慣例為佢等辦這件事个時節，</verse>
				<verse number="9">彼拉多 問佢等講：「你等愛𠊎為你等放 猶太 人个王係麼？」</verse>
				<verse number="10">其實 彼拉多 明明知，祭司長係因為嫉妒正將耶穌交給佢个。</verse>
				<verse number="11">總係祭司長煽動眾人，要求 彼拉多 為佢等放 巴拉巴 。</verse>
				<verse number="12">彼拉多 又問眾人講：「恁樣，你等稱做 猶太 人个王个，𠊎愛樣般處理佢哪？」</verse>
				<verse number="13">佢等大聲喊講：「將佢釘十字架！」</verse>
				<verse number="14">彼拉多 問講：「佢到底做麼介壞事？」 佢等還較大聲喊講：「將佢釘十字架！」</verse>
				<verse number="15">彼拉多 為到愛得到眾人个歡喜，就放 巴拉巴 給佢等，又命令將耶穌鞭打，然後交給人去釘十字架。</verse>
				<verse number="16">兵仔將耶穌帶入總督府个庭院肚，又喊全隊集合。</verse>
				<verse number="17">佢等㧯耶穌著一領紫色个長袍，又用竻仔編一頂冕旒，㧯佢戴等，</verse>
				<verse number="18">然後對佢行禮講：「 猶太 人个王萬歲！」</verse>
				<verse number="19">佢等又用藤條緊打佢个頭那，用口潾呸佢，跪落去拜佢。</verse>
				<verse number="20">㩢耍煞，佢等將佢个紫色長袍脫下來，㧯佢著自家个衫，然後帶佢出去釘十字架。</verse>
				<verse number="21">在路上，佢等堵到一個人，名安到 西門 ，堵好對鄉下入城來，佢等強迫佢代耶穌擎十字架。 ( 西門 係 古利奈 人，係 亞歷山大 㧯 魯孚 个阿爸。)</verse>
				<verse number="22">佢等將耶穌帶到一個地方，安到 各各他 ，意思就係「頭那殼个山頭」。</verse>
				<verse number="23">在該位，佢等拿摻沒藥个酒給耶穌啉，總係耶穌毋啉。</verse>
				<verse number="24">然後佢等將耶穌釘在十字架頂，又抽籤仔來分佢个衫。</verse>
				<verse number="25">朝晨頭九點鐘个時，佢等將耶穌釘十字架。</verse>
				<verse number="26">有一垤牌仔寫等佢个罪名講：「 猶太 人个王。」</verse>
				<verse number="27">佢等又將兩個強盜同耶穌共下釘十字架，一個在佢个右片，一個在佢个左片。</verse>
				<verse number="28"></verse>
				<verse number="29">對該位經過个人侮辱耶穌，搖頭講：「嗐，你這愛拆聖殿，三日內將它重建起來个！</verse>
				<verse number="30">這下，救你自家，對十字架頂下來啊！」</verse>
				<verse number="31">祭司長㧯經學教師也共樣恥笑佢，彼此講：「佢救了別人，卻無法度救自家！</verse>
				<verse number="32">基督， 以色列 个王啊，這下對十字架頂下來給𠊎等看，𠊎等就相信！」 同耶穌共下釘十字架个人也恁樣嘲謔佢。</verse>
				<verse number="33">當晝个時，大地烏暗，約有三點鐘久。</verse>
				<verse number="34">到下晝三點鐘个時，耶穌大聲喊講：「以羅伊！以羅伊！拉馬撒巴各大尼？」意思係講：「𠊎个上帝，𠊎个上帝，你做麼介放掉𠊎？」</verse>
				<verse number="35">塍頭企等个人，有兜聽到就講：「聽啊，佢喊 以利亞 ！」</verse>
				<verse number="36">有一個人走過去，拿一垤海綿浸酸葡萄酒，然後䌈在藤條頂，拿給佢啉，講：「等一下仔，𠊎等看 以利亞 會來救佢下來無！」</verse>
				<verse number="37">耶穌大喊一聲，就斷氣死掉。</verse>
				<verse number="38">掛在聖殿肚个布簾，對頂高到底下裂做兩析。</verse>
				<verse number="39">企在十字架前个一個軍官，看到耶穌大聲喊㧯 死个情形，就講：「這人實在係上帝个孻仔！」</verse>
				<verse number="40">還有兜婦人家遠遠企等看；其中有 抹大拉 个 馬利亞 ，又有細 雅各 㧯 約瑟 个阿姆 馬利亞 ，同 撒羅米 。</verse>
				<verse number="41">耶穌在 加利利 个時，姖等就跈等佢，也服事佢。還有其他好多婦人家係同耶穌共下來 耶路撒冷 个。</verse>
				<verse number="42">臨暗仔， 亞利馬太 人 約瑟 來到；佢係一個受人尊重个議員，也一直盼望上帝國个實現。該日係預備日，就係安息日个前一日。 約瑟 大膽去見 彼拉多 ，要求收殮耶穌个遺體。</verse>
				<verse number="43"></verse>
				<verse number="44">彼拉多 聽到耶穌已經死掉，感覺盡奇怪。佢喊軍官來，問佢耶穌係毋係死掉盡久。</verse>
				<verse number="45">對軍官了解實情後， 彼拉多 就將耶穌个遺體交給 約瑟 。</verse>
				<verse number="46">約瑟 買了麻紗，將耶穌个遺體取下來，用麻紗包好，放在石壁鑿成个墳墓底背，又將一垤大石頭碾過來，塞等門口。</verse>
				<verse number="47">抹大拉 个 馬利亞 㧯 約瑟 个阿姆 馬利亞 有看到安葬耶穌个所在。</verse>
			</chapter>
			<chapter number="16">
				<verse number="1">安息日一過， 抹大拉 个 馬利亞 、 雅各 个阿姆 馬利亞 ，㧯 撒羅米 買兜香料，愛去膏耶穌个遺體。</verse>
				<verse number="2">禮拜日打早，日頭正出來，姖等就去墓地。</verse>
				<verse number="3">在路上，姖等心中想：「有麼人好𢯭手將墓門口个石頭徙開哪？」 (因為該係一隻大石頭。) 總係姖等擎頭一看，石頭已經徙開了。</verse>
				<verse number="4"></verse>
				<verse number="5">姖等行入墳墓，看到一個後生人坐在右片，身上著等白色个長袍；姖等非常著驚。</verse>
				<verse number="6">該後生人講：「毋使驚，𠊎知你等係尋被人釘十字架个 拿撒勒 人耶穌。佢無在這位，已經復活了！你等看，這係佢等安葬佢个所在。</verse>
				<verse number="7">你等去㧯厥學生，特別係 彼得 ，講：『佢愛比你等先去 加利利 ；在該位你等會見到佢，就像佢以前㧯你等講个。』」</verse>
				<verse number="8">姖等愊愊掣又感覺奇怪，黏時離開墳墓，蹌等走。姖等無將這個事㧯麼人講，因為姖等盡驚。 該兜婦人家去見 彼得 㧯佢个朋友，將所聽到个全部㧯佢等講。事後，耶穌親身差派厥學生，從東到西，傳這神聖、不滅、使人得到永遠拯救个道理。阿愐！</verse>
				<verse number="9">禮拜日打早，耶穌復活後，最先對 抹大拉 个 馬利亞 顯現。 (耶穌識對姖身上逐出七個鬼。)</verse>
				<verse number="10">姖去㧯該兜跈耶穌个人講；佢等當在該位傷心流目汁。</verse>
				<verse number="11">佢等聽到耶穌復活㧯 馬利亞 已經看到佢个消息，總係無人相信。</verse>
				<verse number="12">這事以後，耶穌用另外一種方式對兩個愛去鄉下个學生顯現。</verse>
				<verse number="13">這兩儕倒轉來㧯其他个學生講，佢等還係毋信。</verse>
				<verse number="14">最後，十一個學生坐等食飯个時，耶穌對佢等顯現。佢責備佢等，因為佢等毋單淨無信心，又硬頸，毋信佢復活後看到佢个人所見證个。</verse>
				<verse number="15">佢對佢等講：「你等愛去普天下，對全人類傳福音。</verse>
				<verse number="16">信又接受洗禮个，定著得救；毋信个，會受定罪。</verse>
				<verse number="17">信个人會有行這兜神蹟个能力：佢等會奉𠊎个名逐鬼；講新个靈語；</verse>
				<verse number="18">用手捉蛇；啉到有毒个東西也毋會受傷害；按手在病人身上，病人就會得到醫治。」</verse>
				<verse number="19">主耶穌㧯佢等講這兜話以後，受接到天頂去，坐在上帝个右片。</verse>
				<verse number="20">學生出去，逐所在傳福音；主㧯佢等同工，用佢等所行个神蹟來證明佢等所傳个道係真實个。</verse>
			</chapter>
		</book>
		<book number="42">
			<chapter number="1">
				<verse number="1">提阿非羅 大人： 已經有好多人提筆寫書，講起在𠊎等當中所發生 个事情。</verse>
				<verse number="2">佢等所寫个，係照該兜一開始就親目看到又傳過這道理个人所講个。</verse>
				<verse number="3">這一切，𠊎對頭到尾全部詳細查過，所以𠊎想愛照順序來對你報告，</verse>
				<verse number="4">目的係愛俾你知你所學个道理係確實个。</verse>
				<verse number="5">希律 王統治 猶太 个時，有一個祭司，名安到 撒迦利亞 ，係屬 亞比雅 祭司該班个；厥𡜵娘安到 伊利莎白 ，也係祭司 亞倫 家族个後代。</verse>
				<verse number="6">在上帝看來，佢兩公婆係正直个人，嚴格遵守主个一切誡命㧯規定。</verse>
				<verse number="7">佢等無細人仔，因為 伊利莎白 毋會𫱔；佢兩儕也已經老了。</verse>
				<verse number="8">有一日， 撒迦利亞 當班，在上帝面前執行祭司个職務。</verse>
				<verse number="9">照祭司个慣例，抽籤仔个結果，佢入去主个聖殿燒香。</verse>
				<verse number="10">佢燒香个時，眾人在外背祈禱。</verse>
				<verse number="11">忽然，主个天使企在香壇个右片對佢顯現；</verse>
				<verse number="12">撒迦利亞 看到，嚇一下，也盡著驚。</verse>
				<verse number="13">總係該天使對佢講：「 撒迦利亞 ，毋使驚！上帝聽到你个祈禱了；若𡜵娘 伊利莎白 會為你𫱔一個孻仔，你愛將佢个名安到 約翰 。</verse>
				<verse number="14">你會歡喜快樂；盡多人也會為到佢个出世來歡喜。</verse>
				<verse number="15">將來，佢在主个面前會做偉大个人物。淡酒㧯烈酒，佢攏總做毋得啉；在阿姆个胎肚，佢就會被聖靈充滿。</verse>
				<verse number="16">佢將來愛帶領盡多 以色列 人歸主 — 佢等个上帝。</verse>
				<verse number="17">佢愛做主个先鋒，堅強有大能力，像先知 以利亞 一樣。佢愛使爺𡟓㧯子女重新和好，使悖逆个人回頭，行義人智慧个路；佢愛幫助人民來迎接主。」</verse>
				<verse number="18">撒迦利亞 對天使講：「𠊎愛樣般正會知這係事實？𠊎係一個老人家，𠊎𡜵娘也恁老了。」</verse>
				<verse number="19">天使應講：「𠊎係企在上帝面前个 加百列 ；𠊎受派傳話給你，報你這好消息。</verse>
				<verse number="20">總係，因為你毋信𠊎所講、時機成熟个時會實現个這兜話，你會變做啞仔；等到應許實現該日，你正會講話。」</verse>
				<verse number="21">大家緊等 撒迦利亞 ，毋知佢在聖殿肚做麼介延纏恁久。</verse>
				<verse number="22">到佢出來，毋會㧯佢等講話，佢等正知佢在聖殿肚看到異象。佢比手畫腳對大家表示意思，一直毋會講話。</verse>
				<verse number="23">在聖殿事奉个日期一滿， 撒迦利亞 就轉屋下去。</verse>
				<verse number="24">過無幾久，厥𡜵娘 伊利莎白 正經有身項，在屋肚囥五個月。</verse>
				<verse number="25">姖講：「恁久起來，最後主還係好款待𠊎，除掉𠊎在人面前个見笑。」</verse>
				<verse number="26">伊利莎白 懷胎六個月个時，上帝差天使 加百列 去 加利利 省个一座安到 拿撒勒 个城，</verse>
				<verse number="27">傳話給一個童貞女，名安到 馬利亞 ；這童貞女已經㧯 大衛 家族一個名安到 約瑟 个男人定親。</verse>
				<verse number="28">天使到姖个面前，講：「願你平安！主㧯你同在，大大賜福給你！」</verse>
				<verse number="29">馬利亞 因為天使个話，十分著驚，反覆思想這話係麼介意思。</verse>
				<verse number="30">天使對姖講：「 馬利亞 ，毋使驚，因為上帝已經賜恩典給你。</verse>
				<verse number="31">你會懷胎，𫱔一個孻仔；你愛將佢个名安到耶穌。</verse>
				<verse number="32">佢會成做偉大个人物，稱做至高上帝个孻仔。主 — 上帝愛將佢个祖先 大衛 个王位賜給佢。</verse>
				<verse number="33">佢愛永遠做 雅各 个子孫个王；佢个王權無窮無盡。」</verse>
				<verse number="34">馬利亞 對天使講：「𠊎還吂嫁人，樣般會有恁樣个事啊？」</verse>
				<verse number="35">天使應講：「聖靈會降在你个身上；至高上帝个權能會庇蔭你。所以，對你來出世个孲𤘅仔係聖个，係上帝个孻仔。</verse>
				<verse number="36">你看，你个親戚 伊利莎白 ，姖雖然恁老，別人講姖毋會𫱔了，總係姖這下已經有六個月个身項。</verse>
				<verse number="37">因為在上帝無一件事係做毋到个。」</verse>
				<verse number="38">馬利亞 講：「𠊎係主个使女；願照你个話成就在𠊎个身上。」恁樣，天使就離開姖。</verse>
				<verse number="39">無幾久後， 馬利亞 出發，趕緊去 猶大 山肚个一座城。</verse>
				<verse number="40">姖入去 撒迦利亞 个屋下，對 伊利莎白 請安。</verse>
				<verse number="41">伊利莎白 一聽到 馬利亞 个請安，姖所懷个胎就緊跳。 伊利莎白 被聖靈充滿，</verse>
				<verse number="42">大聲喊講：「你係婦女當中最有福氣个！你懷个胎也係有福氣个！</verse>
				<verse number="43">𠊎个主个阿姆來看𠊎，𠊎樣般堪得哪？</verse>
				<verse number="44">因為你請安个聲一入𠊎个耳公，𠊎所懷个胎就歡喜到緊跳。</verse>
				<verse number="45">你確信主對你講个話一定會實現；你實在有福氣啊！」</verse>
				<verse number="46">馬利亞 講： 「𠊎个心尊主為大；</verse>
				<verse number="47">𠊎个靈因為上帝 — 𠊎个救主來歡喜；</verse>
				<verse number="48">因為佢顧念佢卑微个使女。 從今以後，萬民會稱𠊎係有福氣个，</verse>
				<verse number="49">因為全能个上帝為𠊎成大事。 佢个名係神聖个；</verse>
				<verse number="50">佢對敬畏佢个人顯出慈悲， 直到世世代代。</verse>
				<verse number="51">佢伸出大有權能个手， 逐走心中驕傲个人。</verse>
				<verse number="52">佢將有勢力个王㩳下寶座， 高升卑微个人。</verse>
				<verse number="53">佢賜好食个給肚飢个食到飽， 喊富足个空手轉去。</verse>
				<verse number="54">照佢對𠊎等个祖先所講个， 佢幫助佢个僕人 以色列 ， 來紀念佢對 亞伯拉罕 㧯厥子孫个應許， 就係愛用慈悲款待佢等，直到永遠！」</verse>
				<verse number="55"></verse>
				<verse number="56">馬利亞 同 伊利莎白 共下住差毋多三個月，然後就轉屋下去。</verse>
				<verse number="57">伊利莎白 个產期到，就𫱔一個孻仔。</verse>
				<verse number="58">鄰舍㧯親戚聽到主賜給姖恁大个慈悲，就同姖共下歡喜。</verse>
				<verse number="59">孲𤘅仔出世滿一禮拜，佢等就來為佢行割禮，想愛用厥爸个名喊佢 撒迦利亞 。</verse>
				<verse number="60">總係厥姆講：「做毋得！佢愛喊做 約翰 。」</verse>
				<verse number="61">親友對姖講：「你个親族當中無人安恁樣个名。」</verse>
				<verse number="62">佢等就用手比問厥爸，愛㧯孲𤘅仔安麼介名。</verse>
				<verse number="63">撒迦利亞 就討一垤寫字个枋仔，寫講：「佢个名安到 約翰 。」大家就盡奇怪。</verse>
				<verse number="64">撒迦利亞 黏時就會講話，開嘴頌讚上帝。</verse>
				<verse number="65">鄰舍全部盡著驚。這消息傳遍全 猶太 个山區；</verse>
				<verse number="66">聽到个人攏總想：「這個孲𤘅仔將來會成做樣般个人呢？」因為事實盡明，有主个權能㧯佢同在。</verse>
				<verse number="67">約翰 个阿爸 撒迦利亞 被聖靈充滿，就傳上帝个話，講：</verse>
				<verse number="68">「愛頌讚主 — 以色列 个上帝！ 因為佢看顧佢个子民，也救贖佢等。</verse>
				<verse number="69">佢對佢僕人 大衛 个家中， 為𠊎等興起一個全能个救主。</verse>
				<verse number="70">頭擺，佢識通過聖先知預言：</verse>
				<verse number="71">佢愛拯救𠊎等脫離仇敵， 離開一切怨恨𠊎等个人个權勢。</verse>
				<verse number="72">佢對𠊎等个祖先顯出慈悲， 來紀念佢聖个契約。</verse>
				<verse number="73">佢應許𠊎等个祖先 亞伯拉罕 ， 發誓愛拯救𠊎等脫離仇敵， 使𠊎等一生人在佢个面前， 用聖潔㧯正直來服事佢， 全無驚麼介。」</verse>
				<verse number="74"></verse>
				<verse number="75"></verse>
				<verse number="76">撒迦利亞 又預言講： 「𠊎个細子啊， 你會被人稱做至高上帝个先知。 你愛做主个先鋒，為佢準備道路；</verse>
				<verse number="77">愛去㧯佢个子民講： 因為佢等个罪得到赦免， 佢等會得到拯救。</verse>
				<verse number="78">𠊎等个上帝有慈悲㧯憐憫； 佢愛使拯救个光 對高天臨到𠊎等，</verse>
				<verse number="79">光照一切在死个陰影底下个人， 帶𠊎等行平安个路。」</verse>
				<verse number="80">孲𤘅仔漸漸大，身心勇健。佢住在曠野，直到佢在 以色列 人面前公開活動个時。</verse>
			</chapter>
			<chapter number="2">
				<verse number="1">該時， 羅馬 皇帝 奧古斯都 下令，喊 羅馬 帝國个全體人民登記戶口。</verse>
				<verse number="2">這係頭一擺个戶口登記，係在 居里扭 做 敘利亞 總督个時。</verse>
				<verse number="3">大家攏總轉本鄉去辦理登記。</verse>
				<verse number="4">約瑟 也對 加利利 省个 拿撒勒 城去 猶太 ，到 大衛 个城，名安到 伯利恆 ；因為 約瑟 係屬 大衛 个宗族。</verse>
				<verse number="5">佢愛同佢个未婚妻 馬利亞 共下去登記。 馬利亞 已經有身項；</verse>
				<verse number="6">佢等在 伯利恆 个時，姖个產期就到。</verse>
				<verse number="7">姖𫱔頭胎个孻仔，用布包起來，放在馬槽底背，因為旅舍無所在好俾佢等住。</verse>
				<verse number="8">在 伯利恆 个野外，有兜掌羊个人暗晡頭住在該位，輪流掌羊。</verse>
				<verse number="9">主个天使對佢等顯現，主个榮光四面照等佢等，佢等就非常著驚。</verse>
				<verse number="10">天使對佢等講：「毋使驚！𠊎愛報你等好消息；這消息會帶給萬民極大个歡喜。</verse>
				<verse number="11">今晡日，在 大衛 个城肚，有一位救主為到你等出世，就係主基督。</verse>
				<verse number="12">你等會看到一個孲𤘅仔，用布包等，睡在馬槽底背；該就係記號。」</verse>
				<verse number="13">忽然，有一大隊个天軍出現，同該天使共下，頌讚上帝講：</verse>
				<verse number="14">願榮光歸給在天頂至高个上帝； 願平安賜給地上佢所歡喜个人。</verse>
				<verse number="15">天使離開佢等、轉去天頂个時，掌羊个人彼此講：「𠊎等來去 伯利恆 ，看主所指示𠊎等已經發生个事。」</verse>
				<verse number="16">所以，佢等就趕緊去，尋到 馬利亞 、 約瑟 ，㧯睡在馬槽底背个孲𤘅仔。</verse>
				<verse number="17">掌羊个人看到後，就將天使所講關係孲𤘅仔个事㧯大家講。</verse>
				<verse number="18">所有聽到个人攏總盡奇怪掌羊个人對佢等講个話。</verse>
				<verse number="19">總係 馬利亞 將這一切个事記在心中，反覆思想。</verse>
				<verse number="20">掌羊个人轉去，就榮光上帝、頌讚佢，因為佢等所看到个事，㧯對天使聽到个完全共樣。</verse>
				<verse number="21">八日後，孲𤘅仔行割禮个日仔到了，就為佢安名喊耶穌；這個名係佢吂成胎以前天使代佢安个。</verse>
				<verse number="22">照 摩西 法律个規定，潔淨个日期滿後， 約瑟 㧯 馬利亞 帶孲𤘅仔去 耶路撒冷 ，愛將佢奉獻給主。</verse>
				<verse number="23">(這係照主个法律所寫：「凡係頭胎个孻仔，一定愛奉獻給主。」)</verse>
				<verse number="24">佢等也愛照主个法律所規定个，獻一對个班鳩抑係兩隻細月鴿仔做祭物。</verse>
				<verse number="25">當時，在 耶路撒冷 有一個人，名安到 西面 。佢係敬畏上帝个義人，時刻盼望 以色列 个安慰者來到。聖靈㧯佢同在；</verse>
				<verse number="26">佢已經得到聖靈个啟示，知自家在離開世間以前會看到主所應許个基督。</verse>
				<verse number="27">聖靈感動佢，佢就入去聖殿。這時，耶穌个爺𡟓堵好揇等孲𤘅仔耶穌入來，愛行法律所規定个事。</verse>
				<verse number="28">西面 將孲𤘅仔揇在胸前，頌讚上帝講：</verse>
				<verse number="29">主啊，你所應許个已經實現； 這下，好俾你个僕人平安離開世間。</verse>
				<verse number="30">𠊎親眼看到你个拯救，</verse>
				<verse number="31">就係你為萬民準備个：</verse>
				<verse number="32">佢愛成做啟示外邦人个光， 做你个子民 以色列 个光榮。</verse>
				<verse number="33">孲𤘅仔个爺𡟓對 西面 所講關係佢个事感覺盡奇怪。</verse>
				<verse number="34">西面 為佢等祝福，又對孲𤘅仔个阿姆 馬利亞 講：「這孲𤘅仔被上帝揀選，係為到 以色列 中盡多人个滅亡，㧯盡多人个得救。佢會成做盡多人譭謗个對象，</verse>
				<verse number="35">用恁樣來顯出這兜人心中个意念。憂傷會像利劍刺穿你个心。」</verse>
				<verse number="36">又有一個女先知，名安到 安娜 ，係 亞設 支族 法內力 个妹仔。姖已經盡老。姖結過婚，同姖个老公共下生活七年久，</verse>
				<verse number="37">後來就守寡，這下係八十四歲 。姖毋肯離開聖殿，日夜敬拜上帝，禁食祈禱。</verse>
				<verse number="38">這時，姖堵好也來感謝上帝。姖對所有等候上帝救贖 耶路撒冷 个人講起這孲𤘅仔个事。</verse>
				<verse number="39">約瑟 㧯 馬利亞 照主个法律行一切所規定个事後，就轉 加利利 ，到佢等个本鄉 拿撒勒 去。</verse>
				<verse number="40">細人仔漸漸大，勇健又滿有智慧；上帝个恩典㧯佢同在。</verse>
				<verse number="41">耶穌个爺𡟓逐年去 耶路撒冷 守𨃟過節。</verse>
				<verse number="42">耶穌十二歲个時節，佢等照常去守節。</verse>
				<verse number="43">節期過掉，佢等就起身轉去，總係少年耶穌留在 耶路撒冷 ；佢个爺𡟓毋知這件事，</verse>
				<verse number="44">恅到佢在同行个人群中間；行一日个路程後，正在親友个中間尋佢。</verse>
				<verse number="45">佢等尋佢毋到，就倒轉 耶路撒冷 去尋。</verse>
				<verse number="46">到第三日，佢等正在聖殿肚尋到佢。該時佢坐在 猶太 教師个中間，一面聽，一面問；</verse>
				<verse number="47">所有聽到佢个人攏總盡希奇佢个聰明㧯回答。</verse>
				<verse number="48">佢个爺𡟓看到佢，感覺盡奇怪。厥姆對佢講：「孻仔啊，你做麼介恁樣對待𠊎等呢？你看，若爸㧯𠊎逐所在尋你，愁到會死！」</verse>
				<verse number="49">耶穌應講：「做麼介尋𠊎？敢講你等毋知𠊎應當愛在吾爸个屋下 ？」</verse>
				<verse number="50">總係佢等毋了解佢這句話个意思。</verse>
				<verse number="51">耶穌就跈佢等共下轉去 拿撒勒 城，凡事順從爺𡟓。厥姆將這一切个事全部記在心中。</verse>
				<verse number="52">耶穌个身體緊來緊高大，智慧也跈等緊增加，上帝㧯人也越來越惜佢。</verse>
			</chapter>
			<chapter number="3">
				<verse number="1">羅馬 皇帝 提庇留 在位第十五年， 龐修‧彼拉多 做 猶太 个總督， 希律 做 加利利 分封个王，佢个兄弟 腓力 做 以土利亞 㧯 特拉可尼 分封个王， 呂撒聶 做 亞比利尼 分封个王，</verse>
				<verse number="2">亞那 㧯 該亞法 做大祭司。該時， 撒迦利亞 个孻仔 約翰 在曠野，上帝个話臨到佢。</verse>
				<verse number="3">約翰 就行遍 約旦 河一帶地區，宣佈講：「你等愛棄絕罪惡，接受洗禮，上帝就會赦免你等个罪。」</verse>
				<verse number="4">像先知 以賽亞 个書所記載个： 在曠野有人喊講： 「愛準備好勢主个道路， 修直佢所愛行个細路！</verse>
				<verse number="5">一切山壢全部愛坉滿， 大細山岡全部愛削低！ 彎彎个細路愛修給它直； 高低个道路愛整給它平！</verse>
				<verse number="6">全人類攏總會看到上帝个救恩！」</verse>
				<verse number="7">人群尖等出來，愛接受 約翰 个洗禮。 約翰 對佢等講：「你這兜毒蛇啊！上帝个審判會到了，你等恅到閃得開嗎？</verse>
				<verse number="8">愛用行為來證明你等已經棄絕罪惡。毋好恅到 亞伯拉罕 係你等个祖先就做得免受審判。𠊎㧯你等講，上帝能對這兜石頭為 亞伯拉罕 造出子孫來！</verse>
				<verse number="9">斧頭已經放在樹根頂囉，凡無結好果子个樹仔全部愛斬掉，㧒落火底背。」</verse>
				<verse number="10">眾人問佢講：「恁樣，𠊎等愛做麼介呢？」</verse>
				<verse number="11">約翰 應講：「有兩領內衫个，愛分一領給無个；有食物个，也愛恁樣。」</verse>
				<verse number="12">有兜稅務員也來愛接受洗禮；佢等問 約翰 講：「先生，𠊎等愛做麼介呢？」</verse>
				<verse number="13">佢㧯佢等講：「規定个稅金以外，毋好加收。」</verse>
				<verse number="14">有兜當兵个也來問佢講：「𠊎等呢？愛做麼介？」 佢對佢等講：「毋好用恐嚇拿人个錢，也毋好敲人个油；愛滿足所領个錢糧。」</verse>
				<verse number="15">人民緊來緊期待，大家心肝想，無一定 約翰 就係基督。</verse>
				<verse number="16">因為恁樣， 約翰 㧯佢等講：「𠊎係用水為你等行洗禮；總係，有一個能力比𠊎還較大个愛來，𠊎就係㧯佢脫鞋也無資格。佢愛用聖靈㧯火為你等行洗禮。</verse>
				<verse number="17">佢个手拿等簸箕，愛將打麥場拚淨，將麥仔收入倉庫，將冇仔用永遠不滅个火燒掉。」</verse>
				<verse number="18">約翰 對人民傳福音，用盡多無共樣个方法勸話佢等。</verse>
				<verse number="19">總係 約翰 責備分封个王 希律 ，因為 希律 討厥老弟心舅 希羅底 ，又做盡多壞事。</verse>
				<verse number="20">後來佢做一件還較嚴重个壞事，就係將 約翰 關在監獄肚。</verse>
				<verse number="21">一般人民攏總領洗禮，耶穌也來領洗禮。佢在祈禱个時，天就開，</verse>
				<verse number="22">聖靈有形狀像月鴿仔一樣，降在佢个身上。對天頂有聲音傳下來，講：「你係𠊎所惜个孻仔，𠊎所歡喜个。」</verse>
				<verse number="23">耶穌開始傳道个時，約三十歲。在人看來，佢係 約瑟 个孻仔， 約瑟 係 希里 个孻仔，</verse>
				<verse number="24">希里 係 瑪塔 个孻仔， 瑪塔 係 利未 个孻仔， 利未 係 麥基 个孻仔， 麥基 係 雅拿 个孻仔， 雅拿 係 約瑟 个孻仔，</verse>
				<verse number="25">約瑟 係 瑪他提亞 个孻仔， 瑪他提亞 係 亞摩斯 个孻仔， 亞摩斯 係 拿鴻 个孻仔， 拿鴻 係 以斯利 个孻仔， 以斯利 係 拿該 个孻仔，</verse>
				<verse number="26">拿該 係 瑪押 个孻仔， 瑪押 係 瑪他提亞 个孻仔， 瑪他提亞 係 西美 个孻仔， 西美 係 約色克 个孻仔， 約色克 係 約大 个孻仔，</verse>
				<verse number="27">約大 係 約亞拿 个孻仔， 約亞拿 係 利撒 个孻仔， 利撒 係 所羅巴伯 个孻仔， 所羅巴伯 係 撒拉鐵 个孻仔， 撒拉鐵 係 尼利 个孻仔，</verse>
				<verse number="28">尼利 係 麥基 个孻仔， 麥基 係 亞底 个孻仔， 亞底 係 哥桑 个孻仔， 哥桑 係 以摩當 个孻仔， 以摩當 係 珥 个孻仔，</verse>
				<verse number="29">珥 係 約細 个孻仔， 約細 係 以利以謝 个孻仔， 以利以謝 係 約令 个孻仔， 約令 係 瑪塔 个孻仔， 瑪塔 係 利未 个孻仔，</verse>
				<verse number="30">利未 係 西緬 个孻仔， 西緬 係 猶大 个孻仔， 猶大 係 約瑟 个孻仔， 約瑟 係 約南 个孻仔， 約南 係 以利亞敬 个孻仔，</verse>
				<verse number="31">以利亞敬 係 米利亞 个孻仔， 米利亞 係 買南 个孻仔， 買南 係 瑪達他 个孻仔， 瑪達他 係 拿單 个孻仔， 拿單 係 大衛 个孻仔，</verse>
				<verse number="32">大衛 係 耶西 个孻仔， 耶西 係 俄備得 个孻仔， 俄備得 係 波阿斯 个孻仔， 波阿斯 係 撒門 个孻仔， 撒門 係 拿順 个孻仔，</verse>
				<verse number="33">拿順 係 亞米拿達 个孻仔， 亞米拿達 係 亞民 个孻仔， 亞民 係 亞尼 个孻仔， 亞尼 係 希斯崙 个孻仔， 希斯崙 係 法勒斯 个孻仔， 法勒斯 係 猶大 个孻仔，</verse>
				<verse number="34">猶大 係 雅各 个孻仔， 雅各 係 以撒 个孻仔， 以撒 係 亞伯拉罕 个孻仔， 亞伯拉罕 係 他拉 个孻仔， 他拉 係 拿鶴 个孻仔，</verse>
				<verse number="35">拿鶴 係 西鹿 个孻仔， 西鹿 係 拉吳 个孻仔， 拉吳 係 法勒 个孻仔， 法勒 係 希伯 个孻仔， 希伯 係 沙拉 个孻仔，</verse>
				<verse number="36">沙拉 係 該南 个孻仔， 該南 係 亞法撒 个孻仔， 亞法撒 係 閃 个孻仔， 閃 係 挪亞 个孻仔， 挪亞 係 拉麥 个孻仔，</verse>
				<verse number="37">拉麥 係 瑪土撒拉 个孻仔， 瑪土撒拉 係 以諾 个孻仔， 以諾 係 雅列 个孻仔， 雅列 係 瑪勒列 个孻仔， 瑪勒列 係 該南 个孻仔，</verse>
				<verse number="38">該南 係 以挪士 个孻仔， 以挪士 係 塞特 个孻仔， 塞特 係 亞當 个孻仔， 亞當 係上帝个孻仔。</verse>
			</chapter>
			<chapter number="4">
				<verse number="1">耶穌被聖靈充滿，對 約旦 河轉來。聖靈帶佢到曠野，</verse>
				<verse number="2">在該位四十日，受魔鬼个試探。該兜日仔，佢麼介也無食，日期一過，佢就肚飢。</verse>
				<verse number="3">魔鬼對佢講：「你若係上帝个孻仔，命令這石頭變做麵包啊！」</verse>
				<verse number="4">耶穌應講：「聖經講：『人个生存毋係單淨靠食物。』」</verse>
				<verse number="5">魔鬼又帶佢到一個盡高个所在，𥍉目之間將天下萬國指給佢看，對佢講：</verse>
				<verse number="6">「若係你拜𠊎，𠊎就將這一切權柄㧯榮華全部給你；因為這一切攏總已經交給𠊎，𠊎愛給麼人就給麼人。」</verse>
				<verse number="7"></verse>
				<verse number="8">耶穌應講：「聖經講：『愛拜主 — 你个上帝，單單事奉佢。』」</verse>
				<verse number="9">魔鬼又帶耶穌去 耶路撒冷 ，喊佢企在聖殿最高个所在，對佢講：「你若係上帝个孻仔，對這位跳下去；</verse>
				<verse number="10">因為聖經有講： 『上帝會吩咐佢个天使保護你』；</verse>
				<verse number="11">又講：『佢等會用手扶等你， 使你个腳毋會撞到石頭。』」</verse>
				<verse number="12">耶穌應講：「聖經講：『做毋得試探主 — 你个上帝。』」</verse>
				<verse number="13">魔鬼用盡各種个試探，就暫時離開耶穌。</verse>
				<verse number="14">耶穌轉到 加利利 ；聖靈个能力㧯佢同在。佢个名聲傳遍周圍个所在。</verse>
				<verse number="15">佢在逐個會堂教人，大家攏總稱讚佢。</verse>
				<verse number="16">耶穌來到 拿撒勒 ，就係佢長大个地方，在安息日照佢平常个規矩入會堂去。佢企起來，愛讀聖經，</verse>
				<verse number="17">有人拿先知 以賽亞 个書給佢。佢打開書卷，尋到一個所在寫等：</verse>
				<verse number="18">主个靈臨到𠊎， 因為佢用油膏𠊎，來揀選𠊎， 喊𠊎向窮苦个人傳福音。 佢派𠊎來宣佈： 被人捉个，得到釋放； 瞙目个人，得到光明； 愛𠊎使受壓制个得到自由；</verse>
				<verse number="19">並宣佈講： 主賜福个禧年來了。</verse>
				<verse number="20">耶穌將書卷捲起來，交還會堂个助理，然後坐下來。全會堂个人注目看等佢，</verse>
				<verse number="21">佢就對佢等講：「今晡日，你等所聽到个這站經文已經應驗了。」</verse>
				<verse number="22">大家盡欣賞佢，也奇怪佢恁會講話。佢等講：「這個人敢毋係 約瑟 个孻仔嗎？」</verse>
				<verse number="23">耶穌㧯佢等講：「你等一定想愛用這句俗語對𠊎講：『醫生啊，醫你自家哪！』你等還想愛對𠊎講：『𠊎等聽講你在 迦百農 所做个事，也應該行在你自家个家鄉啊！』」</verse>
				<verse number="24">耶穌接等講：「𠊎實在㧯你等講，先知在自家个家鄉從來係無受歡迎个。</verse>
				<verse number="25">「𠊎㧯你等講，事實上，在先知 以利亞 个時代， 以色列 中有盡多寡婦。該時，連續三年半久天旱無落雨，逐位大飢荒。</verse>
				<verse number="26">總係， 以利亞 並無奉差派去尋姖等當中个任何人，反轉去 西頓 地區个 撒勒法 ，到一個寡婦屋下。</verse>
				<verse number="27">在先知 以利沙 个時代， 以色列 中有盡多發癩个，總係，除了 敘利亞 个 乃縵 ，也無一個人得到淨浰。」</verse>
				<verse number="28">聽了這個話，全會堂个人就大發譴。</verse>
				<verse number="29">佢等䟘起來，拉佢去城外，帶佢到崩岡堘 (佢等个城起在山頂)，愛㩳佢下去。</verse>
				<verse number="30">總係耶穌對佢等當中穿過去，做佢走了。</verse>
				<verse number="31">耶穌去到 加利利 省个 迦百農 城。在安息日，佢在該位教人。</verse>
				<verse number="32">聽到佢教訓个人攏總感覺非常奇怪，因為佢个話盡有權柄。</verse>
				<verse number="33">在會堂肚，有一個邪靈附身个人，大聲喊講：</verse>
				<verse number="34">「 拿撒勒 个耶穌啊，你樣般來干涉𠊎等？你來消滅𠊎等係麼？𠊎知你係麼人；你係上帝个聖者！」</verse>
				<verse number="35">耶穌命令該隻邪靈講：「恬恬，對這人身上出來！」鬼使該人在眾人面前抨下去，就對佢个身上出來，一些仔也無傷到佢。</verse>
				<verse number="36">眾人非常著驚，彼此議論講：「這到底係麼介話呢！佢竟然有權柄㧯能力指揮邪靈，邪靈也正經出來！」</verse>
				<verse number="37">恁樣，耶穌个名聲就傳遍周圍个所在。</verse>
				<verse number="38">耶穌離開會堂，去到 西門 屋下。 西門 个丈人𡟓著到熱病，發燒盡厲害；佢等求耶穌醫姖。</verse>
				<verse number="39">耶穌去看姖，企在姖个塍頭，責備熱病，燒就退掉。姖黏時䟘起來，招待佢等。</verse>
				<verse number="40">日頭落山个時，盡多發各種病个人被親友帶來見耶穌；耶穌一一為佢等按手，醫好佢等。</verse>
				<verse number="41">也有鬼對好多人身上出來，喊講：「你係上帝个孻仔！」 耶穌責備該兜鬼，不准佢等講話，因為佢等知佢就係基督。</verse>
				<verse number="42">天光个時，耶穌出城去偏僻个所在。眾人四處尋佢，尋到後，想愛留佢，無愛俾佢離開。</verse>
				<verse number="43">總係耶穌對佢等講：「𠊎也應當去別个城傳上帝國个福音，因為這係𠊎受差派个目的。」</verse>
				<verse number="44">所以，耶穌繼續在 猶太 逐個會堂傳道。</verse>
			</chapter>
			<chapter number="5">
				<verse number="1">有一擺，耶穌企在 革尼撒勒 湖滣頭，人群尖等來，愛聽佢講上帝个話。</verse>
				<verse number="2">佢看到兩隻船停在湖滣，打魚个人離開船，在該位洗魚網仔。</verse>
				<verse number="3">其中一隻船係 西門 个；耶穌就上去，喊佢將船撐開，離岸較遠兜。耶穌坐下來，對船頂教導眾人。</verse>
				<verse number="4">講了後，佢對 西門 講：「將船駛到水深个所在去，然後你㧯你个同伴放網仔打魚。」</verse>
				<verse number="5">西門 講：「先生，𠊎等歸夜辛苦，無打到半尾；既然你恁樣講，𠊎就放網仔落去！」</verse>
				<verse number="6">佢等放落去後，網到一大群个魚，網仔險險裂掉。</verse>
				<verse number="7">佢等就擛手喊別隻船个同伴來𢯭手。佢等來到，將兩隻船裝到滿滿，差毋多會沈下去。</verse>
				<verse number="8">西門‧彼得 看到這個情形，就跪在耶穌面前，講：「主啊，請你離開𠊎，𠊎係罪人！」</verse>
				<verse number="9">西門 同該兜共下个人，因為打到恁多个魚，非常著驚。</verse>
				<verse number="10">佢个同伴 西庇太 个孻仔 雅各 㧯 約翰 也盡著驚。耶穌對 西門 講：「毋使驚，從今以後，你會得到人像打到魚一樣。」</verse>
				<verse number="11">佢等將船駛轉岸邊，就放掉所有个，跈耶穌去。</verse>
				<verse number="12">有一擺，耶穌在一個城肚，在該位有一個人全身發癩。佢一看到耶穌，就伏在佢面前，求佢講：「主啊，你若係肯，就會使𠊎淨浰。」</verse>
				<verse number="13">耶穌伸手摸佢，講：「𠊎肯，你淨浰了！」佢身上个癩即時就無掉去。</verse>
				<verse number="14">耶穌吩咐佢講：「毋好㧯別人講；直接去見祭司，俾佢檢查，然後照 摩西 所定个規矩獻祭物，來對人證明你已經淨浰了。」</verse>
				<verse number="15">總係，耶穌个名聲緊傳緊遠。有盡大群个人常常聚集，愛聽佢講道，也希望佢醫好佢等當中个病人。</verse>
				<verse number="16">耶穌卻照常退到偏僻个地方去祈禱。</verse>
				<verse number="17">有一日，耶穌在教導人个時，有兜對 加利利 个各鄉鎮㧯 猶太 、 耶路撒冷 來个法利賽人同經學教師也坐在塍頭。主个能力同耶穌共下，使佢會醫好病人。</verse>
				<verse number="18">有幾個人，扛一個睡在門枋頂个癱風病人來，想愛將佢扛到屋肚去，放在耶穌个面前。</verse>
				<verse number="19">總係，因為人當多，佢等無法度扛佢入去，就將佢扛到屋頂去，拆開瓦仔，將佢連門枋縋到人群中，放在耶穌个面前。</verse>
				<verse number="20">耶穌看到佢等个信心，就對癱風病人講：「朋友，你个罪得到赦免了。」</verse>
				<verse number="21">該兜經學教師㧯法利賽人議論講：「這個人係麼人？樣般敢講侮辱上帝个話！除了上帝以外，麼人有赦罪个權柄呢？」</verse>
				<verse number="22">耶穌知佢等想麼介，就對佢等講：「你等樣般恁樣想呢？</verse>
				<verse number="23">對這個人講：『你个罪得到赦免』容易呢？抑係講：『䟘起來行』較容易呢？</verse>
				<verse number="24">這下𠊎愛對你等證明，人子在地上有赦罪个權柄。」就對癱風病人講：「𠊎吩咐你䟘起來，擎你个門枋轉去屋下！」</verse>
				<verse number="25">該人即時在大家面前䟘起來，擎自家所睡个門枋轉去，歸路頌讚上帝。</verse>
				<verse number="26">大家非常著驚，滿心敬畏，頌讚上帝講：「今晡日𠊎等看到真奇妙个事了！」</verse>
				<verse number="27">這個事以後，耶穌出去，看到一個稅務員，名安到 利未 ，坐在稅關。耶穌對佢講：「來跈𠊎！」</verse>
				<verse number="28">利未 就䟘起來，放掉一切，去跈耶穌。</verse>
				<verse number="29">利未 在自家屋下為耶穌大擺筵席；盡多稅務員㧯其他个人也來共下食飯。</verse>
				<verse number="30">有兜法利賽人㧯佢等共派个經學教師對耶穌个學生發怨言講：「你等樣般同稅棍㧯壞人共下飲食呢？」</verse>
				<verse number="31">耶穌對佢等講：「健康个人毋使醫生，有病个人正愛。</verse>
				<verse number="32">𠊎來个目的毋係愛呼召義人，係愛呼召罪人悔改。」</verse>
				<verse number="33">有人對耶穌講：「施洗 約翰 个學生常常禁食祈禱，法利賽人个學生也係恁樣，只有你个學生又食又啉。」</verse>
				<verse number="34">耶穌應講：「新郎還在婚姻个筵席中，你等敢做得喊人客禁食？當然做毋得！</verse>
				<verse number="35">總係時間會到，新郎會被人對佢等當中帶走，該時佢等就愛禁食。」</verse>
				<verse number="36">耶穌又設比喻對佢等講：「無人將新衫扯一垤下來，拿去補舊衫；若係恁樣，新衫扯爛掉，扯下來个新布同舊衫也合毋到。</verse>
				<verse number="37">也無人將新酒裝在舊皮袋肚；若係恁樣，新酒會脹裂皮袋，酒會漏出來，連皮袋也壞掉去。</verse>
				<verse number="38">新酒愛裝在新皮袋肚正著。</verse>
				<verse number="39">你等啉老酒以後，無想愛啉新酒；你等 總講：『還係老酒較好。』」</verse>
			</chapter>
			<chapter number="6">
				<verse number="1">有一個安息日，耶穌經過麥田；厥學生捋兜麥串，用手挼來食。</verse>
				<verse number="2">有兜法利賽人講：「你等樣般做安息日禁止做个事？」</verse>
				<verse number="3">耶穌應講：「 大衛 㧯跈佢个人肚飢个時做麼介，你等無讀過係麼？</verse>
				<verse number="4">佢入去上帝个聖殿，拿獻給上帝个餅來食，又分給跈佢个人食；食這個餅仔係違法个，因為只有祭司正做得食。」</verse>
				<verse number="5">耶穌結論講：「人子就係安息日个主。」</verse>
				<verse number="6">又有一個安息日，耶穌去會堂教示人；在該位有一個人，佢个右手瘸掉。</verse>
				<verse number="7">有兜經學教師㧯法利賽人想愛尋耶穌个把柄來告佢，就在塍口掌等，愛看佢在安息日會為人醫病麼。</verse>
				<verse number="8">耶穌知佢等个心思，就對該手瘸掉个人講：「䟘起來，企到頭前來！」該人就䟘起來企等。</verse>
				<verse number="9">然後，耶穌對佢等講：「𠊎問你等，關係安息日，𠊎等个法律係樣般規定？愛做好事，抑係做壞事？愛救人，抑係㓾人？」</verse>
				<verse number="10">佢用目珠䁯周圍所有个人，然後對該人，講：「手伸出來！」該人將手一伸出來，佢个手就好了。</verse>
				<verse number="11">佢等非常譴，彼此參詳愛樣般來對付耶穌。</verse>
				<verse number="12">有一日，耶穌上山去祈禱，在該位歸夜祈禱上帝。</verse>
				<verse number="13">天光个時，佢召集學生到佢个面前來，對佢等當中選出十二個人，喊佢等做使徒。</verse>
				<verse number="14">佢等係： 西門 (耶穌又同佢安名 彼得 ) 還有厥老弟 安德烈 ，又有 雅各 ， 約翰 ， 腓力 ， 巴多羅買 ，</verse>
				<verse number="15">馬太 ， 多馬 ， 亞勒腓 个孻仔 雅各 ，被人喊做激進黨个 西門 ，</verse>
				<verse number="16">雅各 个孻仔 猶大 ，㧯後來出賣耶穌个 加略 人 猶大 。</verse>
				<verse number="17">耶穌㧯使徒下山後，同盡多學生共下企在一個平个所在。有一大群个人對 猶太 全地、 耶路撒冷 㧯海滣个城市 泰爾 、 西頓 等地方來到該位，</verse>
				<verse number="18">愛聽佢講道，也希望佢醫好佢等當中个病人；連該兜被邪靈㩢耍个也來，並得到醫好。</verse>
				<verse number="19">大家攏總想愛摸佢，因為有能力對佢身上出來，醫好佢等。</verse>
				<verse number="20">耶穌看等學生，對佢等講： 「你這兜窮苦人實在有福氣， 因為你等係上帝國个子民！</verse>
				<verse number="21">「這下肚飢个人實在有福氣， 因為你等會有好食飽！ 「這下哀傷流目汁个人實在有福氣， 因為你等會有大歡喜！</verse>
				<verse number="22">「為到人子个緣故，有人怨恨你等，拒絕你等，侮辱你等，看你等做壞人，你等實在有福氣！</verse>
				<verse number="23">頭擺，佢等个祖先也係恁樣對待先知。該日，你等愛歡喜快樂，因為在天頂有為你等準備豐富个獎賞。</verse>
				<verse number="24">「總係，有錢个人慘了！ 因為你等已經享受安樂！</verse>
				<verse number="25">「這下飽足个人慘了！ 因為你等將來會餓肚笥！ 「這下大歡喜个人慘了！ 因為你等將來會哀傷流目汁！</verse>
				<verse number="26">「大家攏總稱讚你等个時，你等就慘了！因為佢等个祖先對假先知也識講共樣个話。</verse>
				<verse number="27">「總係，你這兜聽个人啊，𠊎㧯你等講：愛惜你等个仇敵，好款待怨恨你等个人；</verse>
				<verse number="28">愛為咒詛你等个人祝福，為侮辱你等个祈禱。</verse>
				<verse number="29">有人打你這片个嘴角，連該片也俾佢打！有人拿你个外衫，連內衫也給佢！</verse>
				<verse number="30">凡求你个，就愛給佢；拿你東西个，莫去拿轉來。</verse>
				<verse number="31">你等愛別人樣般對待你等，就愛樣般對待佢等。</verse>
				<verse number="32">「若係你等只有惜該兜惜你等个人，有麼介功德呢？連壞人乜惜該兜惜佢等个人！</verse>
				<verse number="33">若係你等只有好款待該兜好款待你等个人，有麼介功德呢？連壞人乜恁樣行！</verse>
				<verse number="34">若係你等只有借錢給有可能還錢个人，有麼介功德呢？連壞人乜借錢給壞人，後來正喊佢等還清所借个債！</verse>
				<verse number="35">總講，你等愛惜仇敵，好款待佢等；借錢給人，毋好希望收轉來。恁樣，你等會得到豐富个獎賞，同時，你等就正經係至高上帝个子女，因為佢也用慈悲款待該兜忘恩背義㧯邪惡个人。</verse>
				<verse number="36">你等愛慈悲，就像你等个天父係慈悲个。</verse>
				<verse number="37">「毋好論斷別人，上帝就毋會審判你等；毋好定人个罪，上帝就毋會定你等个罪；愛赦免人，上帝就會赦免你等。</verse>
				<verse number="38">你等給別人，上帝就會給你等，並用大个斗，連搖帶撳，湓流八線來倒給你等。你等用麼介東西量給別人，上帝也愛用共樣个東西量給你等。」</verse>
				<verse number="39">耶穌又用比喻對佢等講：「瞙目个敢做得為瞙目个帶路嗎？若係恁樣，兩儕攏總會跌落窟肚去。</verse>
				<verse number="40">學生無比先生較大，總係出師以後，就會像厥先生。</verse>
				<verse number="41">「你做麼介單淨看到若兄弟目珠底背个草屑仔，總係無想到自家目珠底背个大樑呢？</verse>
				<verse number="42">你無看到自家目珠底背有大樑，樣般做得對若兄弟講：『兄弟，你目珠底背个草屑仔，𠊎代你挑出來』哪？假好个人啊，先將你自家目珠底背个大樑徙走，正看得清楚來挑若兄弟目珠底背个草屑仔。</verse>
				<verse number="43">「好樹毋會結壞果子，壞樹也毋會結好果子。</verse>
				<verse number="44">逐種个樹仔，對它个果子就做得認識它。你等毋會在竻叢中摘無花果，也毋會在蒺藜底背摘葡萄。</verse>
				<verse number="45">好人心肝積善就發出善；壞人積惡就發出惡。因為心肝所裝滿个，嘴就講出來。</verse>
				<verse number="46">「你等做麼介喊𠊎『主啊，主啊』，總係毋照𠊎个話去行呢？</verse>
				<verse number="47">𠊎㧯你等講，逐個就近𠊎，聽𠊎个話去行个，係像㖠種个人呢？</verse>
				<verse number="48">佢像一個起屋个人，將地泥挖深，將根基放在磐石頂。發大水个時，屋被水沖到，總係毋會挺動，因為屋起到盡扎。</verse>
				<verse number="49">總係，聽𠊎个話毋去行个人，係像一個人起屋在地上，無打地基，被水一沖，就橫掉，又橫到貼貼！」</verse>
			</chapter>
			<chapter number="7">
				<verse number="1">耶穌對眾人講這兜話後，就去到 迦百農 。</verse>
				<verse number="2">在該位，有一個 羅馬 軍官，佢有一個所看重个僕人發大病，差毋多會死了。</verse>
				<verse number="3">軍官聽講耶穌个事，就託幾個 猶太 人个長老去請耶穌來醫佢个僕人。</verse>
				<verse number="4">佢等去到耶穌該位，迫切求佢講：「這個人確實堪得你个幫助；</verse>
				<verse number="5">佢惜𠊎等 猶太 人，識代𠊎等起會堂。」</verse>
				<verse number="6">耶穌就跈佢等去。會到个時，軍官託幾個朋友去㧯耶穌講：「主啊，毋使恁勞煩你！你來吾屋下，𠊎當毋起；</verse>
				<verse number="7">𠊎就係親身去見你也無資格。你講一句話，𠊎个僕人就會好。</verse>
				<verse number="8">就像𠊎頂高有指揮官，下背也有受𠊎指揮个兵仔。𠊎命令這個兵仔去，佢就去；命令該個來，佢就來；對𠊎个奴僕講『做這個事』，佢就去做。」</verse>
				<verse number="9">耶穌聽到這個話，非常希奇，轉身對跈佢个大眾講：「𠊎㧯你等講，像恁樣个信心，就係在 以色列 人當中，𠊎也從來吂識看過！」</verse>
				<verse number="10">該兜受託个人倒轉去軍官屋下，看到佢个僕人已經好了。</verse>
				<verse number="11">過無幾久 ，耶穌去 拿因 城；厥學生㧯歸大陣个人也跈等佢去。</verse>
				<verse number="12">佢去到城門口，看到一隊送葬个人群。死掉个係一個寡婦个單丁子；城內盡多人同該寡婦共下出來送葬。</verse>
				<verse number="13">主看到該寡婦，就憐憫姖，對姖講：「毋好噭！」</verse>
				<verse number="14">接等，耶穌進前捍等棺木，抬重个人就停下來。耶穌講：「後生人，𠊎吩咐你，䟘起來！」</verse>
				<verse number="15">該死人就坐起來，也開嘴講話。耶穌將佢交還厥姆。</verse>
				<verse number="16">大家非常著驚；佢等頌讚上帝講：「有偉大个先知出現在𠊎等中間囉！」又講：「上帝來拯救佢个子民囉！」</verse>
				<verse number="17">耶穌這件事个風聲就傳遍 猶太 㧯附近个地區。</verse>
				<verse number="18">施洗 約翰 个學生將這一切个事攏總㧯 約翰 講。 約翰 就喊兩個學生來，</verse>
				<verse number="19">派佢等去見主，喊佢等問佢，講：「你就係 約翰 所講，該無幾久愛來个，抑係𠊎等還愛等別人啊？」</verse>
				<verse number="20">佢等去到耶穌該位，就講：「施洗 約翰 派𠊎等來問你：『你就係佢所講，該無幾久愛來个，抑係𠊎等還愛等別人啊？』」</verse>
				<verse number="21">該時，耶穌堵堵醫好盡多發病、殘障，㧯被邪靈附身个人，也使盡多瞙目个看得到。</verse>
				<verse number="22">所以，佢應佢等講：「你等轉去，將你等所看到、所聽到个，報告 約翰 ，就係：瞙目个看到，跛腳个行路，發癩个得到淨浰，耳聾个聽到，死人返生，窮苦人聽到福音。</verse>
				<verse number="23">無疑狐𠊎个人就有福氣！」</verse>
				<verse number="24">約翰 派來个人離開後，耶穌對眾人講起 約翰 ，佢講：「你等頭擺去曠野尋 約翰 个時，想愛看麼介？看被風吹挺動个蘆竹係麼？</verse>
				<verse number="25">你等到底出去做麼介哪？去看著靚衫个人係麼？總係衣裳講究，奢華宴樂个人係住在王宮啊！</verse>
				<verse number="26">恁樣，你等出去看麼介哪？係看先知麼？𠊎㧯你等講，無毋著，總係佢比先知還較大。</verse>
				<verse number="27">佢就係聖經所講个人。 上帝講： 『看啊，𠊎愛差派𠊎个使者做你个先鋒； 佢愛為你開路。』」</verse>
				<verse number="28">耶穌又講：「𠊎㧯你等講，世間無人比 約翰 較偉大；總係在上帝國，最微細个也比佢較大！」</verse>
				<verse number="29">一般人民，包含稅務員，聽到耶穌所講个話，就講上帝盡公義，因為佢等識領 約翰 个洗禮。</verse>
				<verse number="30">總係法利賽人㧯法律教師就拒絕上帝為佢等安排个計劃，因為佢等無領過 約翰 个洗禮。</verse>
				<verse number="31">耶穌又講：「恁樣，𠊎愛用麼介來比喻這世代个人呢？佢等到底像麼介呢？</verse>
				<verse number="32">佢等像坐在市場个細人仔，這群對該群喊講： 『𠊎等為你等歕婚禮个歌曲， 你等毋跳舞！ 𠊎等唱喪禮个哀歌， 你等也毋噭！』</verse>
				<verse number="33">施洗 約翰 來，毋食餅也毋啉酒，你等就講：『佢被鬼附身了！』</verse>
				<verse number="34">人子來，也食也啉，你等又講：『佢係貪食好酒个人，專門同稅棍㧯壞人做朋友！』</verse>
				<verse number="35">總係，真實个智慧係對所有接受智慧个人身上來顯明个。」</verse>
				<verse number="36">有一個法利賽人請耶穌同佢共下食飯；耶穌就去厥屋下坐桌。</verse>
				<verse number="37">城內有一個婦人家，一直過等罪惡个生活。姖聽講耶穌在該法利賽人屋下食飯，就帶一隻裝滿香油个玉罐仔來。</verse>
				<verse number="38">姖憑等耶穌伸到後背个腳，企等噭。姖个目汁打濕耶穌个腳，就用自家个頭那毛拭燥，又用嘴去唚，然後用香油去膏。</verse>
				<verse number="39">請耶穌食飯个法利賽人看到，心肝想：「這人若正經係先知，佢應當知摸佢个係樣般个婦人家；姖係有罪个人！」</verse>
				<verse number="40">耶穌就對佢講：「 西門 ，𠊎有幾句話愛㧯你講。」 西門 應講：「先生，請你講。」</verse>
				<verse number="41">耶穌講：「有兩個人，欠共一個債主个錢，一個欠佢五百隻銀錢 ，另外一個欠佢五十隻。</verse>
				<verse number="42">兩個人攏總無辦法好還，債主就免佢兩儕个債。你想，佢兩儕㖠個會較愛佢呢？」</verse>
				<verse number="43">西門 應講：「𠊎想係得到較多赦免个人。」 耶穌講：「你講个盡著。」</verse>
				<verse number="44">然後耶穌轉身向該婦人家，對 西門 講：「你看到這個婦人家麼？𠊎入若屋下，你無拿水給𠊎洗腳；總係姖用目汁洗𠊎个腳，又用姖个頭那毛拭燥。</verse>
				<verse number="45">你無唚𠊎來歡迎𠊎；總係𠊎一入來，姖就一直唚𠊎个腳。</verse>
				<verse number="46">你無用油膏𠊎个頭那；總係，姖用香油膏𠊎个腳。</verse>
				<verse number="47">所以，𠊎㧯你講，姖顯出恁深个愛，證明姖多多个罪已經得到赦免了！得到較少赦免个人，顯出个愛就較淺。」</verse>
				<verse number="48">接等，耶穌對該婦人家講：「你所有个罪得到赦免了。」</verse>
				<verse number="49">共桌个人心中議論講：「這個人係麼儕？敢赦免人个罪！」</verse>
				<verse number="50">耶穌對該婦人家講：「你个信心已經救到你；安心轉去！」</verse>
			</chapter>
			<chapter number="8">
				<verse number="1">過一站時間，耶穌行遍逐個城市㧯鄉村，傳上帝國个福音；十二個學生也跈等佢。</verse>
				<verse number="2">另外還有兜婦人家，全部係識因為邪靈附身抑係發病被耶穌醫好个；其中有 抹大拉 个 馬利亞 ，姖身上識有七個鬼被耶穌逐出去；</verse>
				<verse number="3">還有 希律 官廳个官員 苦撒 个𡜵娘 約亞娜 ，㧯 蘇撒娜 ，並其他好多婦人家。姖等攏總拿自家个東西供給耶穌㧯厥學生。</verse>
				<verse number="4">歸大陣个人對逐位城市出來就近耶穌个時，耶穌用這個比喻對佢等講：</verse>
				<verse number="5">「有一個委種个出去委種。佢委个時，有兜種子落在路堘，被人踐踏，鳥仔飛來將它兜食掉。</verse>
				<verse number="6">有兜落在石頭地上，種子爆芽後就枯燥掉去，因為無水分个滋潤。</verse>
				<verse number="7">有兜落在竻仔底背，竻仔跈等大起來，將秧仔拮等。</verse>
				<verse number="8">另外有兜種子落在好泥底背，爆芽，大起來，結子百倍。」 耶穌講煞這兜話，就大聲講：「有耳公好聽个人，就愛聽！」</verse>
				<verse number="9">耶穌个學生來問佢這比喻个意思。</verse>
				<verse number="10">佢講：「對你等，上帝國个奧秘係用明講个；若係對別人，就愛用比喻，使佢等看也看毋識，聽也毋會明白。</verse>
				<verse number="11">「這比喻个意思係恁樣：種子係指上帝个真道。</verse>
				<verse number="12">落在路堘个種子係指人一聽到真道，魔鬼即時就來，將佢等心中个真道搶走，使佢等無法度因信來得救。</verse>
				<verse number="13">落在石頭地上个種子係指人一聽到真道即時歡喜接受，總係真道在佢等心中釘根無深；佢等暫時相信，總係一堵到考驗就跌倒。</verse>
				<verse number="14">落在竻仔底背个種子係指人聽了真道後，生活个操心、錢財㧯享樂个誘惑，將佢等歙等，無法度結熟个果子。</verse>
				<verse number="15">落在好泥底背个種子係指人聽了真道以後，用良善㧯誠實个心來保守，耐心等下去，直到佢結出果子。</verse>
				<verse number="16">「無人點燈，然後用斗將它揜起來，抑係放在眠床下。佢一定係將燈放在燈臺頂，使入來个人看得到光。</verse>
				<verse number="17">逐項隱藏个事最後會顯明出來；囥等个事最後也會被人挖出來，公開俾人知。</verse>
				<verse number="18">「所以，你等愛細膩樣般來聽；因為有个，愛給佢還較多；無个，連佢自家恅到有个一些些仔，也愛搶走。」</verse>
				<verse number="19">耶穌个阿姆㧯老弟來看佢，總係因為人盡多，無法度接近佢。</verse>
				<verse number="20">有人㧯耶穌講：「看啊，若姆㧯若老弟企在外背，愛見你！」</verse>
				<verse number="21">耶穌對佢等講：「該兜聽上帝个道理就實行个人，就係𠊎个阿姆㧯兄弟！」</verse>
				<verse number="22">有一日，耶穌㧯學生上船；佢㧯佢等講：「𠊎等來去湖對面該片！」佢等就出發。</verse>
				<verse number="23">船行个時，耶穌睡掉。忽然，有一陣暴風在湖面吹等來，佢等被浪激到歸身，非常危險。</verse>
				<verse number="24">學生來喊醒佢，講：「先生，先生，𠊎等會無命囉！」 耶穌醒過來，責備風㧯大浪，風浪就停下來，湖面平靜。</verse>
				<verse number="25">耶穌問佢等講：「你等个信心㖠位去？」 佢等盡希奇又著驚，彼此講：「這個人到底係麼人？佢命令風㧯浪，風浪也聽從佢！」</verse>
				<verse number="26">佢等過了 加利利 湖，去到對面 革拉森 人个地區。</verse>
				<verse number="27">耶穌一上岸，就堵到一個被鬼附身个城內人，對面行等來。這人盡久以來就毋著衫，毋住人屋，反轉住在塚埔。</verse>
				<verse number="28">佢一看到耶穌，就喊起來，伏在耶穌面前，大聲講：「至高上帝个孻仔耶穌，你做麼介愛干涉𠊎呢？𠊎求你莫蹧踏𠊎！」</verse>
				<verse number="29">佢恁樣講，係因為耶穌有吩咐邪靈對該人身上出來。原來該人被邪靈附身盡多擺，被人捉去關，用手銬腳鐐鎖等；總係邪靈上身个時節，手銬腳鐐卻被佢扭斷，鬼就帶佢走去曠野。</verse>
				<verse number="30">耶穌問佢講：「你安到麼介名？」 佢應講：「𠊎安到『大群』」，因為有盡多鬼附在佢个身上。</verse>
				<verse number="31">鬼求耶穌，莫逐佢等入去無底坑。</verse>
				<verse number="32">在附近山排頂，堵好有一大群豬仔在該位食東西。鬼求耶穌准佢等入去豬群；耶穌准佢等。</verse>
				<verse number="33">鬼就對該人身上出來，入去豬群；歸群豬仔衝下崩崗，跌落湖底背，全部浸死。</verse>
				<verse number="34">掌豬仔个人看到這個事就走掉；佢等去城肚㧯周圍个鄉村講起這個事。</verse>
				<verse number="35">眾人就出來看，到底發生麼介事情。佢等來到耶穌該位，看到鬼所離開个該人坐在耶穌个腳前，著好衫褲，頭腦清醒；佢等就盡著驚。</verse>
				<verse number="36">看到這事情个人，將該原來被鬼附身个人得到醫好个經過對大家講。</verse>
				<verse number="37">格拉森 地區个人全部要求耶穌離開該位，因為佢等非常驚；耶穌就上船倒轉去。</verse>
				<verse number="38">該鬼已經對佢身上出來个人求耶穌講：「𠊎跈你去好無？」 總係耶穌喊佢轉去，講：</verse>
				<verse number="39">「轉去若屋下，去㧯人講，上帝為你所做个事係樣般个大。」 佢就離開，行遍全城，宣傳耶穌為佢所做个事情係樣般个大。</verse>
				<verse number="40">耶穌轉到湖對面个時，眾人歡歡喜喜迎接佢，因為佢等全部在該位等等佢。</verse>
				<verse number="41">有一個會堂个管理員，名安到 葉魯 ，也來。佢伏在耶穌个腳前，求耶穌去厥屋下，</verse>
				<verse number="42">因為佢有一個差毋多十二歲个獨生女，會斷氣了。 耶穌去个時，眾人尖等佢。</verse>
				<verse number="43">有一個婦人家，發血漏病十二年，被盡多醫生看過，用盡姖所有个錢財 ，無人醫得好姖。</verse>
				<verse number="44">姖行到耶穌个後背，摸耶穌个衫尾；姖个血漏黏時就停止。</verse>
				<verse number="45">耶穌問講：「麼人摸𠊎？」 眾人無一個承認。 彼得 講：「先生，大家圍圍𢵸𢵸，尖等你啊！」</verse>
				<verse number="46">總係耶穌講：「有人摸𠊎，因為𠊎感覺有能力對𠊎个身上出去！」</verse>
				<verse number="47">該婦人家知自家已經被人發覺，就愊愊掣，來到耶穌个面前跪落去，在大家面前㧯佢講，做麼介摸佢，又樣般黏時得到醫好。</verse>
				<verse number="48">耶穌對姖講：「妹仔啊，你个信心救到你！安心轉去！」</verse>
				<verse number="49">耶穌還講等這句話个時，有人對會堂管理員个屋下趕來，㧯 葉魯 講：「若妹仔已經死掉，毋使勞動先生了！」</verse>
				<verse number="50">耶穌聽到，就對 葉魯 講：「毋使驚，只愛信！若妹仔就會得到救。」</verse>
				<verse number="51">耶穌到 葉魯 屋下个時，除了 彼得 、 約翰 、 雅各 並細阿妹仔个爺𡟓，毋肯別人跈佢共下入去。</verse>
				<verse number="52">眾人為到細阿妹仔个緣故，攏總在該位亂吵吵大聲噭。耶穌講：「毋好噭！姖並無死，係睡掉定定。」</verse>
				<verse number="53">大家就笑佢，因為佢等知細阿妹仔已經死掉了。</verse>
				<verse number="54">耶穌牽等姖个手，喊講：「細阿妹仔，䟘起來！」</verse>
				<verse number="55">細阿妹仔就返生，黏時䟘起來。耶穌交帶佢等拿兜東西給姖食。</verse>
				<verse number="56">細阿妹仔个爺𡟓非常希奇；耶穌嚴嚴吩咐佢等，毋好對別人講起這個事情。</verse>
			</chapter>
			<chapter number="9">
				<verse number="1">耶穌召集十二個學生來，賜給佢等能力㧯權柄，逐鬼並醫好各種个病，</verse>
				<verse number="2">然後派佢等出去傳上帝國个福音，也醫治病人。</verse>
				<verse number="3">佢㧯佢等講：「你等出外个時，毋好帶麼介東西：毋好帶柺棍仔，毋好帶旅行袋，毋好帶食物抑係錢，也毋好加帶一領內衫。</verse>
				<verse number="4">無論㖠家人肯接待你等，就住在該位，直到你等離開該所在。</verse>
				<verse number="5">若係該位个人毋接待你等，你等就離開該城市，也愛將腳項个泥粉蹬掉，來表示對佢等个警告。」</verse>
				<verse number="6">學生就出去，行遍各鄉村，逐所在宣傳福音並醫病。</verse>
				<verse number="7">加利利 个 希律 王聽到所發生个一切事，就盡操煩；因為有人講，係施洗 約翰 返生；</verse>
				<verse number="8">有人講，係 以利亞 顯現；也有人講，係古時代个一個先知返生了。</verse>
				<verse number="9">希律 講：「 約翰 已經被𠊎斬頭，這個人又係麼人哪？樣般𠊎聽到恁多關係佢个事情？」所以佢一直想愛見耶穌。</verse>
				<verse number="10">使徒倒轉來，將佢等所做个一切全部報告耶穌。耶穌就帶等佢等，恬恬仔去到名安到 伯賽大 个城市。</verse>
				<verse number="11">眾人一知，就跈等佢去。耶穌就歡迎佢等，對佢等講論關係上帝國个事，又醫好該兜需要醫个人。</verse>
				<verse number="12">日頭落山个時，十二個學生來見耶穌，對佢講：「請喊大家離開，好俾佢等去附近个村莊尋食个東西㧯住个所在，因為這位盡偏僻。」</verse>
				<verse number="13">總係耶穌對佢等講：「你等給佢等食！」 學生講：「𠊎等只有五隻餅㧯兩尾魚。敢講你愛𠊎等去買給這恁大群个人食嗎？」</verse>
				<verse number="14">(該兜人，單淨男人就約有五千儕。) 耶穌對學生講：「喊眾人一排一排坐等，逐排約五十儕。」</verse>
				<verse number="15">學生照佢个話去做，喊眾人坐下去。</verse>
				<verse number="16">耶穌將五隻餅㧯兩尾魚拿起來，昂頭望天，感謝上帝，然後擘開，交給學生；學生就分給眾人。</verse>
				<verse number="17">大家全部食到飽；學生將所賸个碎仔拈起來，裝滿十二隻籃仔。</verse>
				<verse number="18">有一擺，耶穌單淨一儕祈禱个時，學生也同佢在該位。佢問佢等講：「眾人講𠊎係麼人？」</verse>
				<verse number="19">佢等應講：「有兜講你係施洗 約翰 ；有兜講你係 以利亞 ；也有兜講你係古時代个一個先知返生了。」</verse>
				<verse number="20">耶穌又問佢等講：「你等呢？你等講𠊎係麼人？」 彼得 講：「上帝設立个基督！」</verse>
				<verse number="21">然後，耶穌嚴嚴警告佢等，毋好將這件事對別人講。</verse>
				<verse number="22">接等，佢又講：「人子一定愛受盡多个苦難；佢會被長老、祭司長㧯經學教師棄絕，也會被人殺害，總係第三日佢會復活。」</verse>
				<verse number="23">耶穌又對大家講：「想愛跈𠊎个人，就愛放掉自家，逐日擎起佢个十字架來跈𠊎。</verse>
				<verse number="24">因為想愛救自家生命个人，反轉會喪失生命；為到𠊎喪失生命个人，反轉會得到生命。</verse>
				<verse number="25">人若係賺到全世界，總係喪失抑係損害自家个生命，有麼介路用呢？當然無！</verse>
				<verse number="26">無論麼人，因為𠊎㧯𠊎个教訓感覺見笑，人子在佢㧯厥爸並聖天使个榮光中降臨該時，也愛看佢做見笑个人。</verse>
				<verse number="27">𠊎實在㧯你等講，企在這位个人，有兜在死以前會看到上帝个主權實現！」</verse>
				<verse number="28">講這兜話約八日後，耶穌帶等 彼得 、 約翰 㧯 雅各 去山頂祈禱。</verse>
				<verse number="29">耶穌祈禱个時，佢个面貌改變，衫白到發光。</verse>
				<verse number="30">忽然，有兩個人出現同佢講話，就係 摩西 㧯 以利亞 。</verse>
				<verse number="31">佢兩儕在榮光中出現，同耶穌講論佢愛在 耶路撒冷 用死來完成个事。</verse>
				<verse number="32">彼得 㧯兩個同伴已經睡掉去；佢等清醒後，就看到耶穌个榮耀㧯同佢共下企等个兩個人。</verse>
				<verse number="33">該兩個人愛離開耶穌个時， 彼得 對耶穌講：「先生，𠊎等在這位盡好！𠊎等來搭三間寮仔，一間給你，一間給 摩西 ，一間給 以利亞 。」 (佢正經毋知自家係講麼介。)</verse>
				<verse number="34">佢還講等話个時，有雲出現，遮等佢等。佢等被雲包等个時，學生就盡著驚。</verse>
				<verse number="35">忽然有聲對雲中傳出來，講：「這係𠊎个孻仔，係𠊎所揀選个。你等愛聽從佢！」</verse>
				<verse number="36">該聲音停掉以後，只有耶穌一儕在該位。在該兜日仔中，學生恬恬毋識對麼人講起佢等所看到个事。</verse>
				<verse number="37">第二日，佢等對山頂下來个時，有一大群人來迎接耶穌。</verse>
				<verse number="38">人群中，有一個人喊講：「先生，求你救吾孻仔，因為𠊎只有佢一個孻仔！</verse>
				<verse number="39">邪靈攻擊佢个時節，使佢忽然間盡喊，害佢歸身抽筋，嘴緊浡泡。邪靈常常恁樣傷害佢，毋肯放佢煞！</verse>
				<verse number="40">𠊎求若學生逐這個邪靈走，總係佢等無辦法。」</verse>
				<verse number="41">耶穌應講：「你等這世代个人樣般恁無信心，恁腐敗！𠊎還愛在你等這位幾久呢？還愛忍耐你等幾久呢？」接等，佢對該人講：「將若孻仔帶來這位！」</verse>
				<verse number="42">細人仔行等來个時，鬼將佢抨落地上，使佢緊抽筋。耶穌就責備該邪靈，醫好細人仔，將佢交還厥爸。</verse>
				<verse number="43">大家攏總盡希奇上帝个大能。 大家對耶穌所做个一切還在希奇个時，耶穌又對厥學生講：</verse>
				<verse number="44">「毋好毋記得𠊎愛㧯你等講个話：人子會被人交在人个手中。」</verse>
				<verse number="45">總係佢等毋會了解這話个意思；因為含意不明，佢等無法度想像。佢等又毋敢問佢到底講麼介。</verse>
				<verse number="46">學生互相議論，佢等當中到底麼人最偉大。</verse>
				<verse number="47">耶穌知佢等心中所想个，就喊一個細人仔來，俾佢企在自家个塍頭，</verse>
				<verse number="48">然後對佢等講：「為到𠊎个名接待這細人仔个，就係接待𠊎；接待𠊎个，就係接待該差𠊎來个。你等當中，麼人係最微細个，麼人就係最偉大个。」</verse>
				<verse number="49">約翰 對耶穌講：「先生，𠊎等看到有人奉你个名逐鬼，𠊎等就禁止佢，因為佢毋係跈𠊎等个。」</verse>
				<verse number="50">耶穌就對佢講：「毋好禁止佢，因為毋係反對你等个，就係贊成你等个。」</verse>
				<verse number="51">耶穌受接升天个日仔會到了，佢決心愛去 耶路撒冷 ，</verse>
				<verse number="52">就派使者先行。佢等去到 撒馬利亞 个一隻村莊，愛為耶穌準備。</verse>
				<verse number="53">總係該地方个人毋歡迎耶穌，因為佢愛去 耶路撒冷 。</verse>
				<verse number="54">厥學生 雅各 㧯 約翰 看到這個情形，就講：「主啊，你愛𠊎等喊 天頂个火下來燒滅佢等麼？」</verse>
				<verse number="55">耶穌轉身責備佢等 。</verse>
				<verse number="56">佢等就去別个村莊。</verse>
				<verse number="57">在佢等所行个路上，有一個人對耶穌講：「你無論去到㖠位，𠊎一定愛跈你。」</verse>
				<verse number="58">耶穌講：「狐狸有窿，鳥仔有藪，總係人子連墊頭个所在也無。」</verse>
				<verse number="59">耶穌又對另外一個人講：「你來跈𠊎。」 總係該人講：「主啊，准𠊎先轉去埋葬吾爸。」</verse>
				<verse number="60">耶穌講：「俾死人去埋葬佢等个死人！若係你，你愛去傳上帝國个福音。」</verse>
				<verse number="61">又有一個人講：「主啊，𠊎愛跈你，總係准𠊎先轉去同屋下人辭別。」</verse>
				<verse number="62">耶穌對佢講：「手捍等犁仔耕田又緊看後背个人，堪毋得做上帝國个人。」</verse>
			</chapter>
			<chapter number="10">
				<verse number="1">過一站時間，主另外揀選七十二個人 ，派佢等出去，一組兩個人，先去佢愛訪問个城市㧯村莊。</verse>
				<verse number="2">佢對佢等講：「愛收成个盡多，總係收割个人忒少。你等愛祈求田主加派工人來收割。</verse>
				<verse number="3">你等去！𠊎派你等出去，像送細羊仔入狼群一樣。</verse>
				<verse number="4">毋好帶錢包，毋好帶旅行袋，毋好帶鞋仔，也毋好了時間在路上同人請安。</verse>
				<verse number="5">你等無論到㖠家，愛先講：『願你全家平安！』</verse>
				<verse number="6">該位若有歡喜平安个人，你等所求个平安就會臨到佢；若無，該祝福就歸轉你等。</verse>
				<verse number="7">你等愛住在該家，食啉佢等所供給个，因為工人得工錢係合理个；毋好對這家徙到別家去。</verse>
				<verse number="8">你等無論去到㖠座城市，若有人歡迎你等，為你等準備麼介食个，你等就食麼介；</verse>
				<verse number="9">也愛醫好該地方个病人，並對佢等講：『上帝个國會在你等中間實現了！』</verse>
				<verse number="10">總係，若係你等去到一座城市，該位个人毋歡迎你等，你等就去大街宣佈講：</verse>
				<verse number="11">『連你等這城肚个泥粉，黏在𠊎等腳項个，𠊎等也愛蹬掉，表示對你等个警告。總係你等愛記得，上帝个主權會實現了！』</verse>
				<verse number="12">𠊎㧯你等講，在審判該日， 所多瑪 所受个責罰會比該城市所受个輕盡多！</verse>
				<verse number="13">「 哥拉汛 啊，你壞了！ 伯賽大 啊，你慘了！𠊎在你等中間所行个神蹟，若係行在 泰爾 㧯 西頓 ，該位个人早就坐在地上，著麻衫，委火灰在頭那頂來表示悔改囉！</verse>
				<verse number="14">在審判該日， 泰爾 㧯 西頓 所受个責罰會比你等所受个還較輕！</verse>
				<verse number="15">若係你， 迦百農 啊，你想愛高高在上嗎？總係，你將來會跌落地獄去！」</verse>
				<verse number="16">耶穌又對厥學生講：「聽從你等个，就係聽從𠊎；拒絕你等个，就係拒絕𠊎；拒絕𠊎个，也就係拒絕該差𠊎來个。」</verse>
				<verse number="17">該七十二個人歡歡喜喜轉來，報告講：「主啊！𠊎等用你个名命令，連鬼也服從𠊎等！」</verse>
				<verse number="18">耶穌對佢等講：「𠊎看到撒但像𥍉爧恁樣對天頂抨下來。</verse>
				<verse number="19">聽好噢！𠊎已經賜你等權柄，好踐踏蛇㧯蠍仔，也能贏過仇敵一切个力量；無麼介能害你等了。</verse>
				<verse number="20">總係，毋好因為邪靈降服你等來歡喜；愛因為你等个名記錄在天頂來歡喜。」</verse>
				<verse number="21">就在該時，耶穌因為聖靈 个感動，充滿歡喜，就講：「阿爸，天地个主啊，𠊎感謝你，因為你將這兜事囥等毋給聰明有學問个人知，反轉顯明給細人仔。阿爸啊，無毋著，這種安排係你所歡喜个旨意。</verse>
				<verse number="22">「吾爸已經將一切賜給𠊎了！除了阿爸，無人識孻仔；除了孻仔㧯孻仔所愛啟示个人，也無人會識阿爸。」</verse>
				<verse number="23">然後，耶穌轉身向學生，私下對佢等講：「你等个目珠看到這一切事情，實在真有福氣啊！</verse>
				<verse number="24">𠊎㧯你等講，頭擺有盡多先知㧯君王想愛看你等所看到个，總係無看到；想愛聽你等所聽到个，也無聽到。」</verse>
				<verse number="25">有一個法律教師䟘起來試探耶穌，講：「先生，𠊎愛做麼介正做得承受永遠个生命？」</verse>
				<verse number="26">耶穌講：「法律書樣般講？你所研究个結論係麼介？」</verse>
				<verse number="27">該人應講：「你愛用全部个心志、情感、力量㧯理智敬愛主 — 你个上帝；也愛惜鄰舍，就像惜自家一樣。」</verse>
				<verse number="28">耶穌對佢講：「你个回答盡著，照恁樣做，你就會承受永遠个生命。」</verse>
				<verse number="29">該法律教師想愛顯明自家有理，就問耶穌講：「麼人係𠊎个鄰舍啊？」</verse>
				<verse number="30">耶穌應講：「有一個人對 耶路撒冷 下去 耶利哥 ，路上堵到強盜。佢等剝掉佢个衫，將佢打到半生死，㧒在該位。</verse>
				<verse number="31">堵好，有一個祭司也對該條路下去；佢一看到該人，就閃開，對另外一片過去。</verse>
				<verse number="32">共樣，有一個 利未 人也經過該位，看一下，也閃開，對另外一片過去。</verse>
				<verse number="33">總係，有一個 撒馬利亞 人路過該位；佢一看到該人，就憐憫佢。</verse>
				<verse number="34">佢進前，用油㧯酒倒在該人个傷口，代佢包好，然後扶佢上自家个驢仔，帶佢去到一間旅舍，在該位照顧佢。</verse>
				<verse number="35">第二日，佢拿兩隻銀錢 交給旅舍个主人，講：『請你照顧佢，等𠊎倒轉來經過這位个時，𠊎會納清全部个所費。』」</verse>
				<verse number="36">接等，耶穌問講：「照你个看法，這三個人當中，㖠個係堵到強盜个人个鄰舍呢？」</verse>
				<verse number="37">法律教師應講：「係該用慈悲對待佢个人。」 耶穌講：「你去，照恁樣去做！」</verse>
				<verse number="38">耶穌㧯學生繼續向前行，來到一隻村莊。在該位有一個名安到 馬大 个婦人家，接待耶穌去厥屋下。</verse>
				<verse number="39">馬大 有一個老妹，安到 馬利亞 。 馬利亞 來坐在主个腳前，緊聽佢講道理。</verse>
				<verse number="40">馬大 因為接待个事盡無閒，心肝當亂，就進前來講：「主啊，𠊎老妹放𠊎一儕恁無閒，你看做得嗎？喊姖來同𠊎𢯭手啊！」</verse>
				<verse number="41">主應講：「 馬大 ， 馬大 ，你為到恁多事情操心煩勞，</verse>
				<verse number="42">總係只有一件事係做毋得無个。 馬利亞 所選个係最好个部份，係毋會被人搶走个。」</verse>
			</chapter>
			<chapter number="11">
				<verse number="1">有一擺，耶穌在一個所在祈禱。祈禱後，有一個學生對佢講：「主啊，請教𠊎等祈禱，像 約翰 教佢个學生一樣。」</verse>
				<verse number="2">耶穌㧯佢等講：「你等愛恁樣祈禱： 阿爸啊： 願你个聖名受尊重； 願你在世間掌權。</verse>
				<verse number="3">賜𠊎等逐日 所需要个飲食。</verse>
				<verse number="4">赦免𠊎等个罪過， 因為𠊎等也赦免所有得罪 𠊎等个人。 毋好俾𠊎等堵到忒重个考驗。」</verse>
				<verse number="5">接等，耶穌㧯佢等講：「假使你等中間有人半夜去到朋友屋下，對佢講：『朋友，請借𠊎三隻餅仔；</verse>
				<verse number="6">因為有一個朋友旅行來吾屋下，𠊎無麼介食个好招待佢。』</verse>
				<verse number="7">若係你个朋友對屋肚應講：『莫吵𠊎！門已經關好，𠊎㧯𠊎个子女也已經上床了，𠊎無法度䟘起來拿給你。』</verse>
				<verse number="8">愛樣般正好呢？𠊎㧯你等講，就算佢無因為該人係厥朋友，䟘起來拿餅仔給佢，也會因為該人迫切緊求，䟘起來拿佢所需要个東西給佢。</verse>
				<verse number="9">「所以，𠊎㧯你等講：你等求，就會得到；尋，就會尋到；掽門，門就會為你等開。</verse>
				<verse number="10">因為每一個求个，就得到；尋个，就尋到；掽門个，門就為佢開。</verse>
				<verse number="11">你等當中做阿爸个，孻仔討魚仔个時，有麼人反轉拿蛇哥給佢？</verse>
				<verse number="12">討雞卵个時，反轉拿蠍仔給佢呢？</verse>
				<verse number="13">你等雖然壞，還知拿好東西給自家个子女；恁樣，在天頂个阿爸敢毋係還較愛將聖靈賜給求佢个人嗎？」</verse>
				<verse number="14">耶穌逐走一個啞仔鬼，鬼出去後，該人就講話。眾人攏總盡著驚，</verse>
				<verse number="15">總係佢等中間有人講：「佢係靠鬼王 別西卜 逐鬼。」</verse>
				<verse number="16">也有兜人想愛害耶穌，要求佢行一個神蹟，來證明佢所做个係對上帝來个。</verse>
				<verse number="17">耶穌知佢等个意思，就對佢等講：「一個國家自相紛爭，該國家一定會敗掉。一個家庭自相紛爭，該家庭定著會破碎掉去。</verse>
				<verse number="18">假使撒但自相紛爭，佢个國樣般會企得住哪？你等講𠊎逐鬼係靠 別西卜 。</verse>
				<verse number="19">若係恁樣，你等个子弟逐鬼又係靠麼儕哪？你等个子弟會證明係你等毋著！</verse>
				<verse number="20">其實，𠊎逐鬼若係靠上帝个能力 ，就係證明上帝已經在你等當中掌權了。</verse>
				<verse number="21">「手拿武器个勇士掌等佢自家个屋，該時佢个東西就盡安全。</verse>
				<verse number="22">總係，比佢還較有力个勇士來到，制伏佢，就將佢所靠个武器搶走，又將佢所搶來个東西分掉。</verse>
				<verse number="23">「毋同𠊎共下个，就係反對𠊎个；毋同𠊎共下收集个，就係打散个。</verse>
				<verse number="24">「邪靈離開所附身个人，在燥爽个地方行來行去，尋休息个所在，總係尋無，就講：『𠊎愛轉原來个屋肚去。』</verse>
				<verse number="25">佢就倒轉去，看到該屋拚到淨浰淨浰，又整理到盡好勢。</verse>
				<verse number="26">佢就出去，帶七個比佢還較惡个邪靈倒轉來，同佢共下入去住。恁樣，該人後來个情形就比先前還較慘。」</verse>
				<verse number="27">耶穌講等這個話，人群中有一個婦人家大聲對佢講：「𫱔你、俾你食乳个人，實在有福氣噢！」</verse>
				<verse number="28">耶穌講：「聽上帝个話就遵行个人，還較有福氣噢！」</verse>
				<verse number="29">眾人聚集越來越多，耶穌就講：「這世代个人恁邪惡噢！你等想愛看神蹟，總係，除了 約拿 个神蹟以外，無別个神蹟好給你等看。</verse>
				<verse number="30">約拿 樣般成做 尼尼微 人眼中个神蹟，人子也愛成做這世代人眼中个神蹟。</verse>
				<verse number="31">在審判該日，南方个女王會企起來告你等這代个人，因為姖對恁遠來聽 所羅門 王智慧个話。𠊎㧯你等講，在這位有比 所羅門 王還較偉大个。</verse>
				<verse number="32">在審判該日， 尼尼微 人會企起來告你等這代个人，因為佢等聽到 約拿 所傳个就棄邪歸正。𠊎㧯你等講，在這位有比 約拿 還較偉大个。</verse>
				<verse number="33">「無人點燈囥在無人看到个所在，抑係放在斗底下；佢一定係放在燈臺頂，俾入來个人看得到光。</verse>
				<verse number="34">目珠可比身體个燈。目珠若係好，你全身就會有光明；目珠若壞掉，你个身體就會烏暗。</verse>
				<verse number="35">所以，愛細膩，驚怕你底背个光變做烏暗。</verse>
				<verse number="36">若係你全身充滿光明，無半點烏暗，就會光明燦爛，像被燈个光照等一樣。」</verse>
				<verse number="37">耶穌講這兜話後，有一個法利賽人請佢食飯；佢就入去坐桌。</verse>
				<verse number="38">這法利賽人看到耶穌食飯前無先照規矩洗手，就非常奇怪。</verse>
				<verse number="39">主對佢講：「你等法利賽人將杯仔㧯盤仔个外背洗到淨淨，總係你等个底背反轉裝滿貪心㧯邪惡。</verse>
				<verse number="40">你這兜戇仔啊，造外背个上帝敢毋係也造底背嗎？</verse>
				<verse number="41">只愛將杯盤底背个東西送給窮苦人，恁樣，一切對你等來講就算淨浰了。</verse>
				<verse number="42">「你等法利賽人慘了！你等連薄荷、芸香，㧯其他个香料也獻十分之一給上帝，總係忽略公義㧯敬愛上帝个事。其實，這兜正係你等應當盡力去行个；其他个，也做毋得忽略。</verse>
				<verse number="43">「你等法利賽人慘了！你等愛坐會堂肚个特別座位，愛別人在公共場所對你等致敬請安。</verse>
				<verse number="44">你等慘了！因為你等像無做記號个墳墓，對該頂高行過去，無人知係墳墓。」</verse>
				<verse number="45">有一個法律教師對耶穌講：「先生，你恁樣講，連𠊎等也被你侮辱到了！」</verse>
				<verse number="46">耶穌應講：「你等這班法律教師乜慘了！你等將難㧡个重擔放在別人个肩頭頂，總係自家連伸一支手指𢯭手也毋肯。</verse>
				<verse number="47">你等慘了！你等整理先知个墳墓，該兜先知正係你等个祖先所殺害个。</verse>
				<verse number="48">恁樣，你等證明又贊成你等祖先所做个事；佢等殺害先知，你等就整理先知个墳墓。</verse>
				<verse number="49">所以，上帝个智慧識講：『𠊎愛派先知㧯使徒到佢等該位去；有兜會被佢等㓾死，有兜會被佢等迫害。』</verse>
				<verse number="50">因為恁樣，對創造世界以來，所有殺害先知个罪，</verse>
				<verse number="51">對殺害 亞伯 ，直到在祭壇㧯聖所中間殺害 撒迦利亞 為止所有个血債，這世代个人一定愛還。𠊎實在㧯你等講，這世代个人一定愛為到這一切受責罰！</verse>
				<verse number="52">「你等這班法律教師慘了！你等將打開智識寶庫个鎖匙搶走，自家毋入去，也阻擋想愛入个人入去！」</verse>
				<verse number="53">耶穌離開該位以後，經學教師㧯法利賽人開始激烈批評佢，拿盡多難題來問佢，</verse>
				<verse number="54">想愛對佢个話尋把柄來害佢。</verse>
			</chapter>
			<chapter number="12">
				<verse number="1">該時，有幾萬人聚集在該位，一行就會踏到人。耶穌先對學生講：「你等愛提防法利賽人个發酵，就係佢等个假冒為善。</verse>
				<verse number="2">一切遮等个事有一日會變做公開，祕密个事也會被人知到。</verse>
				<verse number="3">所以，你等在暗中所講个話，會在光天白日之下被人聽到；你等在間肚、在人个耳公塍講个，也會被人在屋頂宣佈出來。</verse>
				<verse number="4">「親愛个朋友啊，𠊎㧯你等講，只有㓾死肉體，無法進一步害你等个，毋使驚佢等。</verse>
				<verse number="5">𠊎愛指示你等所愛驚个係麼儕：你等所愛驚个係上帝；佢治死人以後，又有權好將人㧒落地獄去。𠊎再講，你等所愛驚个就係佢！</verse>
				<verse number="6">「五隻屋簷鳥仔雖然正賣兩角銀，總係上帝無一隻會毋記得；</verse>
				<verse number="7">連你等个頭那毛逐條佢乜算過囉！所以，毋使驚，你等比一大群个屋簷鳥仔加盡貴重！</verse>
				<verse number="8">「𠊎㧯你等講，在人个面前認𠊎个，人子在上帝个天使面前也愛認佢；</verse>
				<verse number="9">在人个面前毋認𠊎个，人子在上帝个天使面前也毋認佢。</verse>
				<verse number="10">「講話犯到人子个，還有可能得到赦免；總係褻瀆聖靈个，無可能得到赦免。</verse>
				<verse number="11">「人帶你等去會堂，甚至帶去官長抑係統治者面前受審問个時，你等毋使愁愛樣般辯護，抑係愛講麼介話；</verse>
				<verse number="12">到該時，聖靈會指示你等應當講个話。」</verse>
				<verse number="13">眾人當中，有一個人對耶穌講：「先生，請喊𠊎个兄弟同𠊎分吾爸个遺產。」</verse>
				<verse number="14">耶穌應講：「朋友，麼人設立𠊎為你等斷事情抑係分遺產哪？」</verse>
				<verse number="15">然後，佢繼續對眾人講：「你等愛謹慎！愛約束自家，毋好貪心；因為人个生命不在家產豐富。」</verse>
				<verse number="16">耶穌就對佢等講一個比喻。佢講：「有一個財主，佢个田園出產豐富；</verse>
				<verse number="17">佢想來想去，講：『𠊎無罅大个所在好收藏所有个五榖，愛樣般正好呢？』</verse>
				<verse number="18">佢應自家講：『𠊎愛恁樣做：𠊎愛將原來个倉庫拆掉，起還較大个，來囥五榖㧯其他个貨物；</verse>
				<verse number="19">然後，𠊎愛對自家講：好命人啊！你有恁多好東西，做盡多年个路用。做你安心休息，由在你愛食、愛啉、快樂享受人生噢！』</verse>
				<verse number="20">總係，上帝對佢講：『你這隻戇仔啊，今暗晡就愛收你个命；你所準備个愛歸給麼人呢？』」</verse>
				<verse number="21">耶穌結論講：「為到自家積存財產，總係在上帝面前毋係富足个人，也係恁樣。」</verse>
				<verse number="22">耶穌又對學生講：「所以，𠊎㧯你等講，毋好為到生活所需要个食物，抑係身體所愛著个衫褲來操心。</verse>
				<verse number="23">生命比食物較重要；身體比衫褲較要緊。</verse>
				<verse number="24">你等看該兜烏鴉：牠兜無種，無收，也無榖倉抑係倉庫，上帝還係畜牠兜；你等比鳥仔貴重加盡多！</verse>
				<verse number="25">你等當中麼人能用憂愁食加幾日 呢？</verse>
				<verse number="26">連這種細事情你等也做毋到，做麼介還愛為其他个事操心呢？</verse>
				<verse number="27">你等看百合花樣般靚起來！它兜無做事，也無做衫；總係𠊎㧯你等講，就係 所羅門 極榮華富貴个時，佢个打扮也無一蕊野花恁靚。</verse>
				<verse number="28">野生个花草今晡日生出來，天光日就燥掉，被人㧒落火爐去燒，上帝還恁樣為它兜打扮，佢敢毋會將衫褲賜給你等？你等个信心實在忒細！</verse>
				<verse number="29">所以，你等毋好操心愛食麼介，啉麼介，為這兜事來憂愁。</verse>
				<verse number="30">這兜事係世間毋信个人所追求个。你等个阿爸知這兜全部係你等所需要个。</verse>
				<verse number="31">你等愛追求上帝國个實現，佢就會將這一切全部賜給你等。</verse>
				<verse number="32">「你等細群啊，毋使驚，因為你等个阿爸盡歡喜將佢个國賜給你等。</verse>
				<verse number="33">愛賣你等所有个，將錢拿去救濟窮苦人；愛為自家準備毋會爛个錢袋仔，將財寶積存在天頂。在該位，財寶毋會無掉；因為賊仔無法度去該位，也無蟲仔來蛀。</verse>
				<verse number="34">因為你等个財寶在㖠位，你等个心也在該位。</verse>
				<verse number="35">「你等愛隨時準備好勢，䌈等腰帶，點等燈，</verse>
				<verse number="36">就像僕人等主人對婚姻个筵席轉來。主人轉來掽門个時，佢等即時就為佢開門。</verse>
				<verse number="37">主人轉來，看到這兜僕人恁警醒，佢等就有福氣了！𠊎實在㧯你等講，主人會䌈等腰帶，喊佢等坐下來食飯，親身服事佢等。</verse>
				<verse number="38">若係主人延纏到半夜抑係天曚光正轉來，看到僕人還係警醒，佢等就有福氣了！</verse>
				<verse number="39">你等愛知：一家个主人若係知賊仔幾時會來，佢一定毋會俾賊仔挖孔仔入來。</verse>
				<verse number="40">你等也應當隨時準備好勢，因為人子會在你等無想到个時忽然降臨。」</verse>
				<verse number="41">彼得 講：「主啊，你這比喻係對𠊎等講个，抑係對大眾講个？」</verse>
				<verse number="42">主講：「你等想，麼人係忠心又精明个僕人啊？就係主人指派佢管理其他僕人个時，佢就照時分配糧食个人。</verse>
				<verse number="43">主人轉來个時，看到佢恁樣行，這僕人係樣般有福氣啊！</verse>
				<verse number="44">𠊎實在㧯你等講，主人會派佢管理所有个產業。</verse>
				<verse number="45">總係，該僕人若係心中想：『𠊎个主人會較慢正轉來』，就出手打其他个僕人抑係使女，又盡食盡啉到酒醉，</verse>
				<verse number="46">在佢無想到个日仔，在佢毋知个時間，該僕人个主人會轉來，將佢打到半生死 ，使佢㧯無忠心个人共下受刑罰。</verse>
				<verse number="47">「僕人知主人愛佢做麼介，總係無準備，抑係毋照主人个意思做；恁樣，佢會受到盡重个鞭打。</verse>
				<verse number="48">若係毋知主人个意思，總係做應當愛受鞭打个事，該僕人所受个鞭打會較輕。給麼人較多，就愛對佢收較多；交託麼人較多，對佢个要求也較大。</verse>
				<verse number="49">「𠊎到世間來係愛點火；𠊎係樣般盼望火已經𤏸起來！</verse>
				<verse number="50">𠊎有應當愛受个洗禮；完成這苦難个洗禮以前，𠊎係樣般著急啊！</verse>
				<verse number="51">你等毋好恅到𠊎來係帶給世間和平；𠊎㧯你等講，𠊎所帶來个並毋係和平，反轉係分裂。</verse>
				<verse number="52">從今以後，一家五個人會分裂，三個㧯兩個相爭，兩個㧯三個作對。</verse>
				<verse number="53">阿爸㧯孻仔相爭，孻仔反對阿爸；阿姆㧯妹仔相爭，妹仔反對阿姆；家娘㧯心舅相爭，心舅反對家娘。」</verse>
				<verse number="54">耶穌又對眾人講：「你等看到西片有雲出現，就講：『會落雨囉』，正經就落雨。</verse>
				<verse number="55">南風一吹，你等就講：『會熻熱囉』，正經就熻熱。</verse>
				<verse number="56">假冒為善个人啊！你等盡會看天色，樣般毋識這個時代呢？</verse>
				<verse number="57">「你等樣般自家毋判斷麼介係合理个事呢？</verse>
				<verse number="58">若係有人愛告你，拉你上法院，你愛盡量在吂到法院以前同佢和解，免得佢將你交給法官，法官交給法警，法警就關你入監獄。</verse>
				<verse number="59">𠊎㧯你講，你愛坐監，到你納清罰金个最後一分錢。」</verse>
			</chapter>
			<chapter number="13">
				<verse number="1">當時，在該位有人㧯耶穌講，有兜 加利利 人向上帝獻祭个時被 彼拉多 殺害。</verse>
				<verse number="2">耶穌講：「因為這兜 加利利 人慘死，你等就恅到佢等比其他个 加利利 人罪較重係麼？</verse>
				<verse number="3">𠊎㧯你等講，毋係恁樣；除了你等悔改，你等个結局共樣也係滅亡。</verse>
				<verse number="4">西羅亞 塔橫掉个時，所磧死个十八儕，你等恅到佢等比其他住在 耶路撒冷 个人較壞係麼？</verse>
				<verse number="5">𠊎㧯你等講，毋係恁樣；除了你等悔改，你等个結局共樣也係滅亡。」</verse>
				<verse number="6">接等，耶穌對佢等講一個比喻：「有一個人在自家个葡萄園種一頭無花果樹。佢想愛在樹頂尋果子，總係尋毋到。</verse>
				<verse number="7">所以，佢對掌園个講：『你看，三年來，𠊎在這頭無花果樹頂高尋果子，麼介也尋無。斬掉它！樣愛使俾它佔等土地哪？』</verse>
				<verse number="8">掌園个講：『頭家，今年暫時留等，等𠊎挖鬆它堘頭个泥，加兜肥。</verse>
				<verse number="9">明年若係結果子就好了；若係無，正斬掉它。』」</verse>
				<verse number="10">有一個安息日，耶穌在一個會堂教人。</verse>
				<verse number="11">有一個婦人家被邪靈附身，病十八年，腰骨彎彎，無法度企直起來。</verse>
				<verse number="12">耶穌看到姖，就喊姖，對姖講：「婦人家，你个病離開你了！」</verse>
				<verse number="13">耶穌用手捍等姖，姖个腰骨即時直起來；姖就頌讚上帝。</verse>
				<verse number="14">會堂个管理員看到耶穌在安息日醫病，盡譴，就對大家講：「𠊎等有六日好做事；你等有病愛醫个，應該在這六日當中來，無應當在安息日！」</verse>
				<verse number="15">主應佢講：「你這兜假冒為善个人啊！敢講你等逐儕在安息日就無解開槽邊个牛抑係驢仔，牽去啉水嗎？</verse>
				<verse number="16">這婦人家係 亞伯拉罕 个後代，姖被撒但捆等十八年；敢講在安息日就無應該解開姖个鎖鍊嗎？」</verse>
				<verse number="17">耶穌這個話使所有㧯佢作對个人感覺盡見笑；同時，眾人對佢所做一切个奇事非常歡喜。</verse>
				<verse number="18">耶穌講：「上帝个國像麼介呢？𠊎做得用麼介來比呢？</verse>
				<verse number="19">上帝个國可比一粒芥菜子，有人將它種在自家个園肚。芥菜大起來，成做一頭樹，連飛鳥也在它个樹枝頂高做藪。」</verse>
				<verse number="20">耶穌又講：「𠊎愛拿麼介來比上帝个國呢？</verse>
				<verse number="21">它像發酵，有婦人家拿來放在四十公升个麵肚，使歸團麵全部發起來。」</verse>
				<verse number="22">耶穌往 耶路撒冷 去个時，經過盡多城市㧯村莊，歸路教訓人。</verse>
				<verse number="23">有人問佢講：「主啊，得救个人盡少係麼？」</verse>
				<verse number="24">耶穌應講：「你等愛盡力對狹門入去。𠊎㧯你等講，有盡多人想愛入，總係無法度入去。</verse>
				<verse number="25">等到家主䟘起來關好門，你等正企在門外掽門，講：『主啊，請㧯𠊎等開門！』佢會應講：『𠊎毋知你等係對㖠位來个！』</verse>
				<verse number="26">你等會講：『𠊎等識同你共下食啉；你也識在𠊎等个大街項教過𠊎等。』</verse>
				<verse number="27">總係，佢會講：『𠊎毋知你等係對㖠位來个。你這兜作惡个人，閃開！』</verse>
				<verse number="28">你等會看到 亞伯拉罕 、 以撒 、 雅各 ，㧯所有个先知在上帝个國，總係你等反轉受拒絕在外背；在該位，你等就會大噭，咬牙切齒了！</verse>
				<verse number="29">對東、西、南、北，逐所在會有人來參加上帝國个筵席。</verse>
				<verse number="30">事實上，該兜在最背尾个會做頭前；該兜在最頭前个會做背尾。」</verse>
				<verse number="31">就在該時，有幾個法利賽人來見耶穌，對佢講：「你愛離開這位去別个所在，因為 希律 想愛㓾你。」</verse>
				<verse number="32">耶穌應講：「你等去㧯該隻狐狸講：『你看！今晡日㧯天光日𠊎愛逐鬼㧯醫病，第三日𠊎就愛完成𠊎个工作。』</verse>
				<verse number="33">雖然係恁樣，今晡日、天光日、㧯後日，𠊎定著愛向前行，因為先知在 耶路撒冷 以外个所在被人㓾死係毋著个。</verse>
				<verse number="34">「 耶路撒冷 啊！ 耶路撒冷 啊！你殺害先知，又用石頭㧹死上帝所差派來你這位个使者！𠊎樣般多擺愛保護你个子女，像雞乸聚集雞子在翼胛下一樣；總係你等無愛！</verse>
				<verse number="35">看啊，你等个家園會變做一片荒涼。𠊎㧯你等講，從今以後，你等會看𠊎毋到，直到你等講：『願上帝賜福給該奉主名來个！』」</verse>
			</chapter>
			<chapter number="14">
				<verse number="1">有一個安息日，耶穌去到一個法利賽人領袖个屋下食飯；有兜人在塍頭看等佢。</verse>
				<verse number="2">堵好，在佢面前有一個發水腫病个人。</verse>
				<verse number="3">耶穌就問該兜法律教師㧯法利賽人講：「𠊎等个法律准人在安息日醫病麼？」</verse>
				<verse number="4">佢等攏總恬恬毋出聲。耶穌就扶等該人，醫好佢，喊佢走。</verse>
				<verse number="5">然後，佢對大家講：「你等當中有麼人，孻仔抑係牛在安息日跌落井肚去，毋係黏時將佢拉上來呢？」</verse>
				<verse number="6">佢等對耶穌所問个話全部無話好應。</verse>
				<verse number="7">耶穌注意到有兜人客為自家選筵席中个大位，就用比喻對大家講：</verse>
				<verse number="8">「你被人請去參加婚姻筵席个時，毋好坐大位，驚怕所請个人客有比你較受尊重个。</verse>
				<verse number="9">請你兩儕个主人會行前來對你講：『拜託讓位給這個人！』該時，你會感覺盡無面子，退到壁角去坐。</verse>
				<verse number="10">你被人請个時，愛坐細位，恁樣，主人來對你講：『朋友，請坐大位。』該時，你在人客面前就盡有體面。</verse>
				<verse number="11">因為上帝愛將自高个人降做卑微，也愛高升甘心謙卑个人。」</verse>
				<verse number="12">耶穌又對請佢个主人講：「你請人食晝抑係食夜个時，毋好請你个朋友、兄弟姊妹、親戚、抑係有錢个鄰舍，驚怕佢等後來也請你，你个人情就得到報答了。</verse>
				<verse number="13">你愛請人客，就愛請該兜窮苦个、殘障个、跛腳个、瞙目个；</verse>
				<verse number="14">恁樣，你就有福氣了，因為該兜人無麼介好報答你。在義人復活个時，上帝會親自報答你。」</verse>
				<verse number="15">共桌有一個人聽到這兜話，就對耶穌講：「有好在上帝个國享受筵席个人係樣般有福氣啊！」</verse>
				<verse number="16">耶穌對佢講：「有人大擺筵席，請盡多人客。</verse>
				<verse number="17">會到開桌个時，佢派僕人去對所請个人客講：『請你等來，逐項準備好勢囉！』</verse>
				<verse number="18">總係佢等開始一個一個推辭。頭一個講：『𠊎有買一坵田，無去看做毋得。請原諒，𠊎去毋得。』</verse>
				<verse number="19">另外一個講：『𠊎有買五對牛，愛去試看仔；請原諒𠊎，失禮。』</verse>
				<verse number="20">又有一個講：『𠊎正結婚，實在無法度去。』</verse>
				<verse number="21">該僕人倒轉去，將這情形報告主人。這家个主人大發譴，就對僕人講：『遽遽出去，到城內个大街小巷，帶該兜窮苦个、殘障个、瞙目个、跛腳个全部來。』</verse>
				<verse number="22">無幾久，僕人倒轉來，講：『頭家，你所吩咐个已經辦好了，總係還係有盡多空位！』</verse>
				<verse number="23">主人就對僕人講：『你到街路㧯籬笆堘个巷肚去，勉強請人入來，坐滿𠊎个屋。</verse>
				<verse number="24">𠊎㧯你等講，該兜先前所請个人，一個也毋使想愛食𠊎个筵席！』」</verse>
				<verse number="25">非常多个人跈等耶穌共下行。耶穌轉身對佢等講：</verse>
				<verse number="26">「到𠊎這位來个人，若毋係敬愛𠊎贏過自家个爺𡟓，抑係贏過惜𡜵娘、子女、兄弟、姊妹、甚至自家，佢就無法度做𠊎个學生。</verse>
				<verse number="27">毋肯擎自家个十字架來跈𠊎个人，也無法度做𠊎个學生。</verse>
				<verse number="28">你等中間有麼人想愛起大樓，敢毋係先坐下來好好計算一下，看有完成全部工程个費用麼？</verse>
				<verse number="29">若毋係恁樣，驚怕地基打好，大樓卻無法度完工，看到个人全部會笑佢，</verse>
				<verse number="30">講：『這個人開工，總係無法度完工！』</verse>
				<verse number="31">假使有一個國王，帶一萬人个軍隊，愛去㧯另外一個帶兩萬人軍隊个國王相㓾，佢敢毋係先坐下來愐看仔，有可能打贏麼？</verse>
				<verse number="32">若係無可能，佢就會趕緊在敵人還盡遠个時，派使者去談和平个條件。</verse>
				<verse number="33">共樣，你等無論麼人，若無放掉自家所有个一切，就無法度做𠊎个學生。</verse>
				<verse number="34">「鹽係好个，總係鹽若失掉鹹味，愛樣般使它再鹹呢？</verse>
				<verse number="35">委落園肚抑係摻在肥料中，攏總無合，只有㧒掉。有耳公好聽个人，就愛聽！」</verse>
			</chapter>
			<chapter number="15">
				<verse number="1">有一擺，好多稅棍㧯壞人來聽耶穌講道。</verse>
				<verse number="2">法利賽人㧯經學教師發怨言講：「這個人樣會接待壞人，又同佢等共下食飯！」</verse>
				<verse number="3">因為恁樣，耶穌講一個比喻給佢等聽；佢講：</verse>
				<verse number="4">「若係你等中間某人有一百隻羊，失落其中一隻，佢敢毋會將其他个九十九隻放在草埔，去尋該隻失落个，直到尋到嗎？</verse>
				<verse number="5">尋到以後，佢盡歡喜，就將羊仔放在肩頭頂，</verse>
				<verse number="6">轉屋下去，然後請朋友㧯鄰舍來，對佢等講：『𠊎還歡喜噢！𠊎失落个羊仔尋到了！你等來同𠊎𢯭歡喜！』</verse>
				<verse number="7">像恁樣，𠊎㧯你等講，一個罪人悔改，在天頂也愛為到佢歡喜；該種个歡喜，贏過九十九個毋使悔改个義人！</verse>
				<verse number="8">「若係一個婦人家有十隻銀錢 ，失落一隻，姖敢毋會點燈來拚屋，逐所在詳細尋，直到尋到嗎？</verse>
				<verse number="9">尋到以後，姖就會請朋友㧯鄰舍來，對姖等講：『𠊎還歡喜噢！𠊎失落个銀錢尋到了！你等來同𠊎𢯭歡喜！』</verse>
				<verse number="10">像恁樣，𠊎㧯你等講，上帝个天使也愛為到一個罪人个悔改來歡喜。」</verse>
				<verse number="11">耶穌繼續講：「某人有兩個孻仔。</verse>
				<verse number="12">細个孻仔對阿爸講：『阿爸，求你這下就將𠊎應得个產業分給𠊎。』阿爸就將產業分給佢兩個孻仔。</verse>
				<verse number="13">過幾日，細个孻仔就將所分到个產業賣掉，帶等錢離開屋下。佢去到盡遠个地方，在該位浪費錢財，過放蕩个生活。</verse>
				<verse number="14">佢將所有个一切花淨淨後，又堵到該位大飢荒，佢就苦到講毋得。</verse>
				<verse number="15">所以，佢去求當地一個人給佢事做；該人喊佢去農場畜豬仔。</verse>
				<verse number="16">佢餓到連豬仔食个豆筴也想愛拿來食；還係無人拿麼介東西給佢食。</verse>
				<verse number="17">最後，佢分醒過來，講：『吾爸有請恁多工人，佢等糧食充足又有賸，𠊎反轉在這位餓死！</verse>
				<verse number="18">𠊎愛䟘起來，轉去吾爸該位，對佢講：阿爸，𠊎得罪天，也得罪你。</verse>
				<verse number="19">𠊎已經無資格稱做若孻仔；求你看𠊎做你請來个工人。』</verse>
				<verse number="20">佢就起身轉厥爸該位去。 「離屋下還盡遠，厥爸看到佢，就憐憫佢，走等過去，揇等佢个頸筋，緊唚佢。</verse>
				<verse number="21">孻仔講：『阿爸，𠊎得罪天，也得罪你；已經無資格做若孻仔！』</verse>
				<verse number="22">總係該阿爸喊僕人講：『遽遽拿最好个長袍來給佢著，拿禁指給佢戴，拿鞋給佢著，</verse>
				<verse number="23">然後將該隻肥个細牛牯牽來㓾。𠊎等來辦桌，歡歡喜喜來慶祝！</verse>
				<verse number="24">因為𠊎這個孻仔係死掉又復活、失落又尋到个。』大家就開始慶祝。</verse>
				<verse number="25">「該時，大个孻仔還在田項做事；到佢轉來，離屋下無幾遠个時，聽到音樂㧯跳舞个聲，</verse>
				<verse number="26">就喊一個僕人過來，問佢發生麼介事情。</verse>
				<verse number="27">僕人應講：『若老弟轉來了！若爸因為佢平安勇健轉來，就㓾該隻肥个細牛牯。』</verse>
				<verse number="28">「無想到，大孻仔卻發譴，毋肯入去；厥爸就出來勸佢。</verse>
				<verse number="29">總係佢對厥爸講：『你看，恁多年來，𠊎像奴才恁樣服事你，毋識違背你个命令，你識給𠊎麼介哪？連一隻細山羊也毋識給𠊎同朋友共下歡喜。</verse>
				<verse number="30">總係你這隻孻仔，佢將你个財產亂用在妓女个身上；這下佢轉來，你就為佢㓾該隻肥个細牛牯！』</verse>
				<verse number="31">厥爸就對佢講：『細子啊，你常常同𠊎共下，𠊎一切所有个，全係你个。</verse>
				<verse number="32">總係你這個老弟係死掉又復活、失落又尋到个；所以，𠊎等應當歡喜慶祝。』」</verse>
			</chapter>
			<chapter number="16">
				<verse number="1">耶穌㧯厥學生講：「有一個財主，佢有一個管家；別人對佢報告講，厥管家浪費佢个財產。</verse>
				<verse number="2">主人就喊管家來，對佢講：『𠊎有聽到關係你个事情，到底係樣般呢？將你所管个點清楚，因為你做毋得再做𠊎个管家了！』</verse>
				<verse number="3">該管家心肝想：『頭家愛辭𠊎个頭路！𠊎愛做麼介正好呢？擎钁頭，𠊎無力；做乞食，又驚見笑。</verse>
				<verse number="4">係哪！𠊎知愛樣般做，等到𠊎失業个時，朋友正會接𠊎到佢等个屋下去住。』</verse>
				<verse number="5">「所以，佢將厥頭家个債主一個一個喊來。佢對頭一個講：『你欠𠊎頭家幾多？』</verse>
				<verse number="6">該人應講：『一百桶橄欖油。』管家講：『這係你个借條，拿去，坐下來，遽遽寫做五十桶。』</verse>
				<verse number="7">佢又問另外一個講：『你呢，你欠幾多？』該人應講：『一百石麥仔。』管家講：『這係你个借條，拿去，寫做八十石。』</verse>
				<verse number="8">「主人就誇獎這不義个管家做事精明。因為處理世間个事，世俗个人比光明个人較精明。」</verse>
				<verse number="9">接等，耶穌又講：「𠊎㧯你等講，愛用現世个金錢交朋友，恁樣，金錢無用个時，你等就會受接到永遠个家鄉去。</verse>
				<verse number="10">「一個人對細事忠實，對大事也會忠實；一個人對細事無老實，對大事也毋會老實。</verse>
				<verse number="11">若係你等處理世間个錢財就無忠實，麼人會將該真實个財寶交託你等呢？</verse>
				<verse number="12">若係你等對屬別人个東西無忠實，麼人會將你等自家个東西交給你等呢？</verse>
				<verse number="13">「無一個僕人能服事兩個主人。毋係惱這個、愛該個，就係看重這個、看輕該個。你等無可能同時做上帝个僕人，又做金錢个奴才。」</verse>
				<verse number="14">該兜愛錢个法利賽人聽到這兜話，就笑耶穌。</verse>
				<verse number="15">耶穌對佢等講：「你等在人个面前自稱係正人君子，總係上帝清楚知你等个內心；因為人看做盡高貴个，在上帝來看反轉係邪惡个。</verse>
				<verse number="16">「 摩西 个法律㧯先知个書，它兜个效力係到施洗 約翰 為止；對該時開始，上帝國个福音就傳出來，逐儕全部爭等入去。</verse>
				<verse number="17">總係天地無掉去，比法律个一筆一畫失效還較容易呢！</verse>
				<verse number="18">「無論麼人離掉𡜵娘，重新㧯別个婦人家結婚，就係犯姦淫；討被人離掉个婦人家也係犯姦淫。</verse>
				<verse number="19">「頭擺有一個財主，逐日著等紫色高貴个靚衫，過奢華宴樂个日仔。</verse>
				<verse number="20">又有一個窮苦人，名安到 拉撒路 ，歸身發瘡，常常被人帶到財主个門口，</verse>
				<verse number="21">希望拈兜財主桌頂跌下來个東西來止飢；連狗也來舐佢个瘡。</verse>
				<verse number="22">「後來，這窮苦人死掉，天使帶佢去坐在 亞伯拉罕 个塍頭，享受天頂个筵席；該財主也死掉，並埋葬。</verse>
				<verse number="23">財主在陰間非常痛苦；佢昂頭看到 亞伯拉罕 在盡遠个所在，又看到 拉撒路 坐在塍頭，</verse>
				<verse number="24">就喊講：『𠊎个祖公 亞伯拉罕 啊，可憐𠊎啊！求你喊 拉撒路 用手指頭蘸兜水來涼𠊎个舌乸，因為𠊎在這火焰中非常痛苦！』</verse>
				<verse number="25">「總係 亞伯拉罕 應佢講：『細子啊，你應當還記得，你還生个時節享盡福樂，總係 拉撒路 過盡艱苦个日仔；這下佢在這位得到安慰，你卻落在痛苦中。</verse>
				<verse number="26">毋單淨恁樣，在你等㧯𠊎等中間有深淵隔等，人無可能對這片去你等該片；愛對該片來𠊎等這片也無可能。』</verse>
				<verse number="27">財主講：『𠊎个祖公啊，既然係恁樣，𠊎求你喊 拉撒路 去吾爸个屋下；</verse>
				<verse number="28">因為𠊎還有五個兄弟，佢做得警告佢等，免得佢等也來到這恁痛苦个所在。』</verse>
				<verse number="29">「 亞伯拉罕 講：『你个兄弟有 摩西 㧯先知个話好聽，佢等做得聽啊！』</verse>
				<verse number="30">財主講：『𠊎个祖公 亞伯拉罕 啊，恁樣毋罅！若係有人對死復活，到佢等該位去，佢等就會悔改。』</verse>
				<verse number="31">總係 亞伯拉罕 講：『若係佢等毋聽 摩西 㧯先知个話，就算有人對死復活，也無法度說服佢等！』」</verse>
			</chapter>
			<chapter number="17">
				<verse number="1">耶穌㧯厥學生講：「害人犯罪个事係難免个，總係使這個事發生个人壞了！</verse>
				<verse number="2">佢被人用大磨石紽等頸筋㧒落海肚去，較贏佢害任何一個最微細个人犯罪。</verse>
				<verse number="3">你等自家愛細膩！ 「假使你个兄弟抑係姊妹犯罪，愛勸話佢；佢若係悔改，就愛赦免佢。</verse>
				<verse number="4">若係佢在一日當中得罪你七擺，逐擺倒轉來對你講：『𠊎悔改了』，你也愛赦免佢。」</verse>
				<verse number="5">該兜使徒對主講：「求你使𠊎等有較大个信心！」</verse>
				<verse number="6">主講：「若係你等有像一粒芥菜子恁大个信心，就係對這頭桑樹講：『連根挷起來，去種在海中！』它也會聽從你等。</verse>
				<verse number="7">「假使你等當中某人有一個耕田抑係掌羊个僕人，佢對田園轉來个時，你敢會對佢講：『遽遽坐下來食飯！』</verse>
				<verse number="8">當然毋會！你敢毋係對佢講：『為𠊎準備食个，然後繫等圍裙來服事𠊎，等𠊎食飽，你正去食！』</verse>
				<verse number="9">僕人照主人个吩咐做事，敢講主人還愛感謝佢嗎？</verse>
				<verse number="10">你等也係共樣；當你等做好上帝所吩咐个一切事情，就愛講：『𠊎等係無路用个僕人；𠊎等所做个係盡本份定定。』」</verse>
				<verse number="11">耶穌在愛去 耶路撒冷 个路上，經過 撒馬利亞 㧯 加利利 當中个所在。</verse>
				<verse number="12">佢入一個村莊个時，有十個發癩个人對面行等來。佢等遠遠企等，</verse>
				<verse number="13">大聲喊講：「耶穌，先生啊，可憐𠊎等！」</verse>
				<verse number="14">耶穌看到，就對佢等講：「你等去俾祭司檢查身體！」 佢等在去个路上，就得到淨浰。</verse>
				<verse number="15">其中一儕看到自家已經好了，遽遽就倒轉來，大聲頌讚上帝，</verse>
				<verse number="16">又伏在耶穌个腳前感謝佢。這個人係 撒馬利亞 人。</verse>
				<verse number="17">耶穌講：「得到醫好个人敢毋係有十儕？另外九個在㖠位呢？</verse>
				<verse number="18">樣般只有這別族个人倒轉來感謝上帝呢？」</verse>
				<verse number="19">耶穌就對佢講：「䟘起來，好去了！你个信心醫好你了！」</verse>
				<verse number="20">有兜法利賽人來問耶穌，愛知上帝个國幾時會降臨。耶穌應講：「上帝國个降臨並毋係目珠所看得到个。</verse>
				<verse number="21">無人能講：『看啊，在這位！』抑係『在該位！』因為上帝个國就在你等个心中 ！」</verse>
				<verse number="22">接等，佢又對學生講：「時間會到，你等會盡想愛看人子掌權个時節，總係連一日也看毋到。</verse>
				<verse number="23">有人會對你等講：『看啊，在這位！』抑係『看啊，在該位！』你等毋好出去看，也毋好跈佢等去。</verse>
				<verse number="24">像𥍉爧一下仔對天个這片照到天个該片去，人子再臨該日也會恁樣。</verse>
				<verse number="25">總係佢一定會先受盡多苦難，被這世代个人棄絕。</verse>
				<verse number="26">像 挪亞 時代个情形，人子再臨个時節也會恁樣。</verse>
				<verse number="27">該時代个人照常食啉嫁娶，直到 挪亞 入大船該日，大水來到，將佢等全部滅掉。</verse>
				<verse number="28">人子再臨个時節，又會像 羅得 時代个情形；該時代个人照常食啉、買賣，照常耕種、起屋。</verse>
				<verse number="29">到 羅得 離開 所多瑪 該日，火㧯硫磺就對天頂降下來，將佢等全部滅掉。</verse>
				<verse number="30">人子顯現該日也會恁樣。</verse>
				<verse number="31">「該日，在屋頂个，毋好下來入去屋肚拿佢个東西；共樣，在田項个，也毋好轉去。</verse>
				<verse number="32">愛記得 羅得 个𡜵娘來做警戒！</verse>
				<verse number="33">想愛保全自家生命个，反轉會喪失生命；喪失生命个，反轉會保全生命。</verse>
				<verse number="34">𠊎㧯你等講，該日暗晡，兩個人睡共頂眠床，一個會受接走，一個會留下來；</verse>
				<verse number="35">兩個婦人家共下挨磨石，一個會受接走，另外一個會留下來。 」</verse>
				<verse number="36"></verse>
				<verse number="37">學生問講：「主啊，這兜事情會發生在㖠位呢？」 耶穌應講：「身屍在㖠位，鷹鳥也會聚集在該位。」</verse>
			</chapter>
			<chapter number="18">
				<verse number="1">耶穌對學生講一個比喻，教佢等愛常常祈禱，毋好灰心。</verse>
				<verse number="2">佢講：「某城有一個法官，佢毋驚上帝，也無尊重人。</verse>
				<verse number="3">該城內有一個寡婦，常常去尋佢，講：『𠊎有一個對敵，求你主持公道，代𠊎伸冤。』</verse>
				<verse number="4">這法官一直毋搭姖，總係後來就想：『𠊎雖然毋驚上帝，也無尊重人，</verse>
				<verse number="5">總係這個寡婦緊來吵𠊎，𠊎還係代姖出頭較贏，免得姖常常來纏𠊎！』」</verse>
				<verse number="6">主繼續講：「這不義个法官所講个話，你等聽看仔！</verse>
				<verse number="7">上帝个選民日夜對佢祈求，佢敢會毋代佢等伸冤嗎？佢敢會忍等毋搭佢等嗎？</verse>
				<verse number="8">𠊎㧯你等講，佢一定會盡遽代佢等伸冤。問題係人子來个時，在世間敢尋得到恁樣个信心嗎？」</verse>
				<verse number="9">耶穌又設另外一個比喻，來教訓該兜確信自家係義人又看輕別儕个人。佢講：</verse>
				<verse number="10">「有兩個人去聖殿祈禱：一個係法利賽人，一個係稅務員。</verse>
				<verse number="11">該法利賽人昂頭企等，祈禱講 ：『上帝啊，𠊎感謝你，因為𠊎無像別人恁樣貪污、不義、淫亂，也無像這隻稅棍。</verse>
				<verse number="12">𠊎逐禮拜禁食兩擺，又奉獻全部收入个十分之一。』</verse>
				<verse number="13">總係該稅務員遠遠企等，連頭那也毋敢擎起來望天，只有捶心肝講：『上帝啊，開恩憐憫𠊎這個罪人！』</verse>
				<verse number="14">𠊎㧯你等講，這兩個人轉去个時，上帝愛稱稅務員做義人，法利賽人反轉卻毋係。因為上帝愛將自高个人降做卑微，也愛高升甘心謙卑个人。」</verse>
				<verse number="15">有兜人帶細人仔連孲𤘅仔來見耶穌，希望佢摸佢等。學生看到就責備該兜人。</verse>
				<verse number="16">總係耶穌喊佢等來佢个面前，講：「俾細人仔來𠊎這位，毋好禁止佢等，因為上帝國个子民就像這種个人。</verse>
				<verse number="17">𠊎實在㧯你等講，無論麼人，若毋係像細人仔恁樣來接受上帝个主權，佢絕對無可能成做上帝个子民。」</verse>
				<verse number="18">有一個 猶太 人个領袖來請教耶穌，講：「良善个先生，𠊎愛做麼介正做得承受永遠个生命啊？」</verse>
				<verse number="19">耶穌問佢講：「你樣般喊𠊎做良善个呢？上帝以外，無再有良善个。</verse>
				<verse number="20">你知該兜誡命：『做毋得犯姦淫；做毋得㓾人；做毋得偷拿；做毋得做假見證；愛孝敬爺𡟓。』」</verse>
				<verse number="21">該人應講：「這兜誡命𠊎全部從細就已經遵守了。」</verse>
				<verse number="22">耶穌聽到這句話，就對佢講：「你還欠一樣。去賣你所有个產業，將錢分給窮苦人，你就會有財產積存在天頂；然後你來跈𠊎。」</verse>
				<verse number="23">該人聽到這個話，就盡傷心，因為佢盡有錢。</verse>
				<verse number="24">耶穌看到佢恁樣，就講：「有錢人愛做上帝國个子民，實在真難噢！</verse>
				<verse number="25">有錢人愛做上帝國个子民，比駱駝穿過針鼻還較難！」</verse>
				<verse number="26">聽到這句話个人就問講：「恁樣，麼人有可能得救呢？」</verse>
				<verse number="27">耶穌講：「在人無可能个事，在上帝都能。」</verse>
				<verse number="28">這時， 彼得 講：「你看，𠊎等已經放掉自家所有个來跈你。」</verse>
				<verse number="29">耶穌對佢等講：「𠊎實在㧯你等講，為到上帝个國來放掉自家个房屋、𡜵娘、兄弟、爺𡟓、抑係子女个人，</verse>
				<verse number="30">一定會在今世得到加盡多倍，在來生也會得到永遠个生命。」</verse>
				<verse number="31">耶穌帶等十二個學生，對佢等講：「看啊，𠊎等這下愛上 耶路撒冷 去；先知書所寫關係人子个每一件事全部會實現。</verse>
				<verse number="32">佢會被人交在外邦人个手中；佢等會㩢耍佢，侮辱佢，呸佢口潾，</verse>
				<verse number="33">還愛鞭打佢，殺害佢；總係，第三日佢會復活。」</verse>
				<verse number="34">學生對這兜事情全無了解，因為這教訓个意思係隱藏等个；所以耶穌所講个話佢等也聽毋識。</verse>
				<verse number="35">耶穌來到近 耶利哥 个所在，有一個瞙目个人坐在路堘討食。</verse>
				<verse number="36">佢聽到一大群人經過，就問係麼介事情。</verse>
				<verse number="37">有人㧯佢講：「係 拿撒勒 个耶穌對這位經過。」</verse>
				<verse number="38">佢就喊講：「 大衛 个子孫耶穌啊，可憐𠊎！」</verse>
				<verse number="39">行在耶穌頭前个人責備佢，喊佢毋好吵。總係佢還較大聲喊講：「 大衛 个子孫啊，可憐𠊎！」</verse>
				<verse number="40">耶穌就停下來，吩咐人將瞙目个帶到佢面前來。佢行近个時，耶穌問佢講：</verse>
				<verse number="41">「你愛𠊎為你做麼介？」 佢應講：「主啊，𠊎愛看得到！」</verse>
				<verse number="42">耶穌就對佢講：「你看得到了！你个信心已經醫好你了。」</verse>
				<verse number="43">瞙目个黏時看得到，就跈等耶穌，歸路頌讚上帝。眾人看到這個事，也攏總讚美上帝。</verse>
			</chapter>
			<chapter number="19">
				<verse number="1">耶穌入去 耶利哥 城，愛對該位經過。</verse>
				<verse number="2">該位有一個稅務長，名安到 撒該 ，係一個盡有錢个人。</verse>
				<verse number="3">撒該 盡想愛看耶穌係樣般个人，總係佢身材矮細，在人群中看毋到耶穌。</verse>
				<verse number="4">為到愛看耶穌，佢就走到大家个頭前去，爬上一頭桑樹；因為耶穌會對該條路經過。</verse>
				<verse number="5">耶穌行到該位，昂頭看 撒該 ，對佢講：「 撒該 ，遽遽下來！今晡日𠊎一定愛住在若屋下。」</verse>
				<verse number="6">撒該 就遽遽下來，歡歡喜喜接待耶穌。</verse>
				<verse number="7">眾人看到，就緊唸講：「佢樣做得入罪人个屋下做人客！」</verse>
				<verse number="8">撒該 企等對主講：「主啊，𠊎將𠊎个財產分一半給窮苦人；𠊎若識敲麼人个油，𠊎就賠佢四倍。」</verse>
				<verse number="9">耶穌對佢講：「今晡日救恩臨到這家了，因為這個人共樣也係 亞伯拉罕 个子孫。</verse>
				<verse number="10">人子來，係愛尋迷失个人，來救佢。」</verse>
				<verse number="11">大家緊聽這兜話，耶穌又對佢等講另外一個比喻。這時，耶穌已經會到 耶路撒冷 ，大家恅到上帝个國黏時就會出現了。</verse>
				<verse number="12">所以，耶穌講：「有一個貴族愛去遠方，接受封立做王，然後正倒轉來。</verse>
				<verse number="13">出外以前，佢喊十個僕人來，逐儕給一隻銀幣 ，對佢等講：『𠊎無在个時，你等拿這個錢去做生理。』</verse>
				<verse number="14">佢本國个人一直怨恨佢，就派使者跈在佢个後尾，講：『𠊎等無愛這個人做𠊎等个王。』</verse>
				<verse number="15">「該貴族接受封立做王轉來以後，即時吩咐人喊該兜領銀幣个僕人來佢个面前，愛知佢等逐儕做生理賺幾多。</verse>
				<verse number="16">頭一個來講：『主人，𠊎用你給𠊎个銀幣賺到十隻銀幣。』</verse>
				<verse number="17">主人講：『盡好！你係一個好僕人；你既然在細細个事項忠心，𠊎愛委派你管理十座城。』</verse>
				<verse number="18">第二個僕人來講：『主人，𠊎用你給𠊎个銀幣賺到五隻銀幣。』</verse>
				<verse number="19">主人講：『你也愛管五座城。』</verse>
				<verse number="20">「又有一個僕人來講：『主人，你个銀幣在這位；𠊎用手帕將它包到好好。</verse>
				<verse number="21">𠊎一直驚你，因為你係一個厲害个人：無放个，你也愛收；無種个，你也愛割。』</verse>
				<verse number="22">主人對佢講：『你這個壞僕人啊！𠊎愛用你自家个話來定你个罪！你既然知𠊎係一個厲害个人：無放个，𠊎也愛收；無種个，𠊎也愛割。</verse>
				<verse number="23">恁樣，你做麼介毋將𠊎个錢放在銀行，等𠊎轉來个時，做得連本帶利收轉來呢？』</verse>
				<verse number="24">「佢就對企在塍頭个人講：『將佢个銀幣拿給該有十隻銀幣个僕人！』</verse>
				<verse number="25">佢等對佢講：『主人，佢已經有十隻銀幣了！』</verse>
				<verse number="26">主人講：『𠊎㧯你等講，已經有个，愛給佢還較多；無个，連佢所有个一些些仔也愛搶走。</verse>
				<verse number="27">還有，該兜對敵無愛𠊎做王來管佢等，將佢等帶來，在𠊎个面前處死！』」</verse>
				<verse number="28">講了這兜話，耶穌就帶頭行，去 耶路撒冷 。</verse>
				<verse number="29">會到 伯法其 㧯 伯大尼 ，在 橄欖 山个時，耶穌喊兩個學生先行，</verse>
				<verse number="30">吩咐佢等講：「你等去頭前个村莊。你等一入去，就會看到一隻還吂有人騎過个細驢仔紽在該位。你等將牠解開，牽來這位。</verse>
				<verse number="31">若係有人問你等：『做麼介解開細驢仔？』你等就講：『主 愛用牠。』」</verse>
				<verse number="32">佢等就去，所堵到个情形㧯耶穌對佢等講个完全共樣。</verse>
				<verse number="33">佢等將細驢仔解開个時，驢仔个主人問佢等講：「你等做麼介解開細驢仔？」</verse>
				<verse number="34">佢等就應講：「主愛用牠。」</verse>
				<verse number="35">然後，佢等將細驢仔牽到耶穌該位，將自家个衫搭在驢仔个背囊頂，扶耶穌騎上去。</verse>
				<verse number="36">耶穌向前行个時，大家用自家个衫鋪在路上。</verse>
				<verse number="37">佢行會到 耶路撒冷 ，愛對 橄欖 山个山排下去个時，歸陣學生因為所看過个一切奇事就歡喜感謝上帝，大聲喊講：</verse>
				<verse number="38">願上帝賜福給奉主名來个王！ 天頂有平安，榮光歸給至高个上帝！</verse>
				<verse number="39">人群中有幾個法利賽人對耶穌講：「先生，你愛責備你个學生，喊佢等恬恬！」</verse>
				<verse number="40">耶穌應講：「𠊎㧯你等講，佢等若係毋出聲，這兜石頭就會喊起來。」</verse>
				<verse number="41">近 耶路撒冷 个時，耶穌看到該城，就為到它噭，</verse>
				<verse number="42">講：「你今晡日若係知該兜有關你和平个事就好了！可惜，你這下看毋出該兜事。</verse>
				<verse number="43">日仔會到，該時你个仇敵會起泥牆包圍你，對四面圍近來，將你困到死死。</verse>
				<verse number="44">佢等會徹底消滅你㧯你城牆肚个人民，一垤石頭也毋會疊在另外一垤石頭个頂高，因為你無認出上帝來拯救个時機。」</verse>
				<verse number="45">耶穌一入聖殿，就將做生理个人逐出去，</verse>
				<verse number="46">對佢等講：「聖經記載上帝个話講：『𠊎个聖殿愛做祈禱个殿』，你等卻將它變做賊竇！」</verse>
				<verse number="47">耶穌逐日在聖殿肚教示人。祭司長、經學教師，㧯民間个領袖想愛殺害佢，</verse>
				<verse number="48">總係毋知愛樣般下手；因為眾人盡愛聽佢講話，聽到耳側側。</verse>
			</chapter>
			<chapter number="20">
				<verse number="1">有一日，耶穌在聖殿肚教示人，宣傳福音。祭司長、經學教師，㧯長老來見佢，</verse>
				<verse number="2">問佢講：「你靠麼介權柄做這兜事？麼人給你這權柄呢？你㧯𠊎等講！」</verse>
				<verse number="3">耶穌應講：「𠊎先問你等一句話；㧯𠊎講，</verse>
				<verse number="4">約翰 行洗禮个權柄係對上帝來个，抑係對人來个？」</verse>
				<verse number="5">佢等就彼此商量，講：「若係𠊎等講：『對上帝來个』，佢會講：『恁樣，你等做麼介毋信 約翰 呢？』</verse>
				<verse number="6">若係𠊎等講：『對人來个』，眾人會拿石頭㧹𠊎等，因為佢等攏總相信 約翰 係先知。」</verse>
				<verse number="7">對恁樣，佢等應講：「𠊎等毋知係對㖠位來个。」</verse>
				<verse number="8">耶穌對佢等講：「恁樣，𠊎也毋㧯你等講𠊎靠麼介權柄做這兜事情。」</verse>
				<verse number="9">接等，耶穌對眾人講這個比喻：「有一個人開一垤葡萄園，將它租給佃農，自家出外去旅行一站時間。</verse>
				<verse number="10">到收葡萄个時節，佢派一個僕人去對該兜佃農收佢應得个果子。總係該兜佃農將該僕人捉來打，逐佢空手轉去。</verse>
				<verse number="11">園主又派另外一個僕人去；佢等照樣捉佢來打，又侮辱佢，逐佢空手轉去。</verse>
				<verse number="12">園主第三擺又派一個僕人去；佢等還係打傷佢，將佢㩳出園外。</verse>
				<verse number="13">葡萄園个主人講：『𠊎愛樣般正好呢？𠊎愛派𠊎所惜个孻仔去，或者佢等會尊重佢。』</verse>
				<verse number="14">總係該兜佃農一看到園主个孻仔，就彼此講：『這人係園主个繼承人；𠊎等來㓾死佢，佢个產業就變做𠊎等个了！』</verse>
				<verse number="15">佢等就將佢㩳出園外，㓾死佢。 「恁樣，葡萄園个主人會樣般對付該兜佃農呢？</verse>
				<verse number="16">佢一定會來㓾死該兜佃農，將葡萄園租給別人。」 眾人聽了，就講：「絕對做毋得有恁樣个事！」</verse>
				<verse number="17">耶穌注目看佢等，問講：「聖經講： 泥水師傅所㧒掉个這垤石頭， 已經成做地基中最重要个 。 這係麼介意思呢？</verse>
				<verse number="18">麼人跌在該石頭頂，佢就會粉身碎骨；該石頭跌落麼人个身上，也會將佢磧到糜糜。」</verse>
				<verse number="19">經學教師㧯祭司長知耶穌這比喻係責備佢等，當場就想愛捉耶穌；總係又驚眾人。</verse>
				<verse number="20">佢等就一方面掌等佢；一方面收買一兜人，假正經來請教耶穌問題，想愛對佢个話來捉把柄，好將佢交給總督來辦。</verse>
				<verse number="21">這兜奸細對耶穌講：「先生，𠊎等知你所講所教个話盡合情理，也知你毋會看人个情面，總係忠實將上帝个道理教示人。</verse>
				<verse number="22">納稅給 羅馬 皇帝係違背𠊎等个法律麼？」</verse>
				<verse number="23">耶穌看出佢等个詭計，就對佢等講：</verse>
				<verse number="24">「拿一隻銀幣給𠊎看！這個像㧯名號係麼人个？」 佢等應講：「係皇帝个。」</verse>
				<verse number="25">耶穌對佢等講：「既然係恁樣，將皇帝个東西歸給皇帝，將上帝个東西歸給上帝。」</verse>
				<verse number="26">佢等在眾人个面前無法度對耶穌所講个話捉到麼介把柄；同時，佢等對耶穌个回答感覺盡希奇，就肅恬。</verse>
				<verse number="27">有兜否認有復活這件事个撒都該人來見耶穌，問佢講：</verse>
				<verse number="28">「先生， 摩西 為𠊎等立法講：『若係有一個人過身，留下佢个𡜵娘，總係無子女，厥老弟一定愛討守寡个阿嫂做𡜵娘，代阿哥傳宗接代。』</verse>
				<verse number="29">頭擺，識有七個兄弟：大哥討𡜵娘後，無留下子女就過身；</verse>
				<verse number="30">二哥就討守寡个阿嫂；</verse>
				<verse number="31">後來，第三個也討姖；像恁樣，一直到第七個，全部討過姖，攏總無留下子女就過身。</verse>
				<verse number="32">最尾，該婦人家也過身。</verse>
				<verse number="33">請問，在復活个時節，這個婦人家愛算係麼人个𡜵娘呢？因為七個兄弟全部識㧯姖結婚。」</verse>
				<verse number="34">耶穌應佢等講：「今生个人有討也有嫁；</verse>
				<verse number="35">總係該兜有資格對死復活，並生在來生个人，無討也無嫁；</verse>
				<verse number="36">因為佢等毋會再死，㧯天使共樣。佢等係上帝个子女，因為佢等已經對死復活。</verse>
				<verse number="37">連 摩西 乜證明有死人復活這件事；在竻樹𤏸火个故事底背，佢識講：主係『 亞伯拉罕 个上帝， 以撒 个上帝， 雅各 个上帝。』</verse>
				<verse number="38">這意思係講，上帝毋係死人个上帝，係生人个上帝；因為對上帝來看，佢等攏總係生人。」</verse>
				<verse number="39">有兜經學教師講：「先生，你講个盡著！」</verse>
				<verse number="40">因為恁樣，佢等無一個敢再問耶穌麼介難題。</verse>
				<verse number="41">總係，耶穌對佢等講：「樣般有人講基督係 大衛 个子孫呢？</verse>
				<verse number="42">大衛 自家識在《詩篇》講： 主對𠊎个主講： 『你坐在𠊎个右片，</verse>
				<verse number="43">等𠊎使你个仇敵伏在你个腳下。』</verse>
				<verse number="44">大衛 既然稱佢做『主』，基督樣會又係 大衛 个子孫呢？」</verse>
				<verse number="45">眾人全部聽到盡入神个時節，耶穌對厥學生講：</verse>
				<verse number="46">「愛提防經學教師；佢等好著長袍，招搖過街，盡愛別人在公共場所對佢等致敬請安，又盡愛坐會堂肚个特別座位㧯筵席中个大位。</verse>
				<verse number="47">佢等吞食寡婦个產業，然後在人个面前表演長篇个祈禱。佢等一定會受到較重个責罰！」</verse>
			</chapter>
			<chapter number="21">
				<verse number="1">耶穌昂頭，看到一兜有錢人將佢等个獻金放落聖殿个奉獻箱。</verse>
				<verse number="2">佢也看到一個窮苦个寡婦放兩隻細銅錢落去。</verse>
				<verse number="3">然後，佢講：「𠊎實在㧯你等講，這窮苦个寡婦所放落奉獻箱个比其他个人較多。</verse>
				<verse number="4">因為別人係奉獻佢等用賸个一部份；總係姖係在無罅用个當中，將全部个生活費獻出來。」</verse>
				<verse number="5">有兜人在談論聖殿係用盡靚个石頭㧯還願个禮物所裝飾个；耶穌就講：</verse>
				<verse number="6">「論到你等這下所看个這兜東西：日仔會到，該時，這所在个每一垤石頭全部會被人拆下來，無一垤石頭會疊在另外一垤个頂高。」</verse>
				<verse number="7">佢等就問講：「先生，這個事幾時會發生呢？這一切發生个時節會有麼介兆頭？」</verse>
				<verse number="8">耶穌講：「你等愛細膩，毋好被人迷惑；因為有盡多人會假冒𠊎个名來，講：『𠊎就係基督！』又講：『時機近了！』你等毋好跈佢等去。</verse>
				<verse number="9">你等聽到戰爭㧯暴動个風聲，該時節毋使驚。這兜事定著會先發生；總係這毋係講末日黏時會到了。」</verse>
				<verse number="10">接等，耶穌又講：「民族會㧯民族相㓾，國家會㧯國家戰爭；</verse>
				<verse number="11">逐所在會有大地動、飢荒㧯發瘟；天頂也會有得人驚个奇事㧯異象出現。</verse>
				<verse number="12">總係，在這一切事情發生以前，你等會被人捉去，也受迫害；人會將你等送去會堂受審問，害你等坐監牢。為到𠊎个緣故，你等會被人帶到君王㧯統治者个面前受審判。</verse>
				<verse number="13">這就係你等做見證个機會。</verse>
				<verse number="14">所以，你等个心愛堅定，毋使先想愛樣般為自家辯護；</verse>
				<verse number="15">因為𠊎會賜你等口才㧯智慧，使你等个敵人無一個有法度好反對抑係辯駁。</verse>
				<verse number="16">連你等个爺𡟓、兄弟姊妹、親戚、朋友，也會出賣你等；你等中間有兜人還會被佢等害死。</verse>
				<verse number="17">為到𠊎个名，大家會怨恨你等；</verse>
				<verse number="18">總係，你等个頭那毛連一條也毋會無掉去。</verse>
				<verse number="19">你等愛忍耐，就會救到自家个生命。</verse>
				<verse number="20">「你等看到 耶路撒冷 被敵人个軍隊圍困个時，你等就知它被人毀滅个時節到了。</verse>
				<verse number="21">該時，住在 猶太 地區个，愛走去山頂避難；住在城肚个，愛出來；住在鄉下个，毋好入城。</verse>
				<verse number="22">因為這係『報應个日仔』，愛使聖經所有个話得到應驗。</verse>
				<verse number="23">在該兜日仔，懷胎个婦人家㧯給孲𤘅仔食乳个阿姆就慘了！大災難會臨到這地方，上帝个怒氣會臨到這人民个身上。</verse>
				<verse number="24">佢等會死在刀劍之下，抑係被人捉去多多个國家。 耶路撒冷 會被外邦人踐踏，直到外邦人个期限滿了。</verse>
				<verse number="25">「該時，日頭、月光，㧯星仔攏總會出現奇怪个兆頭。地上个萬國全部會因為大海个吼聲㧯波浪个翻騰，驚到無葛無煞。</verse>
				<verse number="26">太空个系統也會搖動，人類就驚到會死，又因為等候所愛發生在世間个事昏昏掉去。</verse>
				<verse number="27">該時，佢等會看到人子大有能力㧯榮耀坐雲降臨。</verse>
				<verse number="28">這兜事發生个時節，你等愛挺胸、頭那擎起來，因為你等得救个時節緊來緊近了！」</verse>
				<verse number="29">耶穌又㧯佢等講一個比喻：「你等看無花果樹㧯其他各種个樹仔。</verse>
				<verse number="30">它兜一生出新葉，你等看就知熱天會到了。</verse>
				<verse number="31">共樣，你等看到這一切个現象，就愛知上帝个國會實現了。</verse>
				<verse number="32">「𠊎實在㧯你等講，這代人還吂攏總過身以前，這一切个事就會發生。</verse>
				<verse number="33">天㧯地會無掉，總係𠊎个話永遠毋會無掉。</verse>
				<verse number="34">「你等自家愛謹慎！你等个心毋好俾酒肉㧯生活个操心打亂掉去，驚怕該日仔忽然臨到你等；</verse>
				<verse number="35">因為該日仔會像網仔一樣，落在全世界所有个人身上。</verse>
				<verse number="36">你等愛隨時警醒，常常祈禱，使你等有能力好渡過這一切愛發生个事，有好企在人子个面前。」</verse>
				<verse number="37">日時頭，耶穌在聖殿教示人；暗晡時，佢就出城，去 橄欖 山過夜。</verse>
				<verse number="38">眾人打早就去聖殿尋耶穌，愛聽佢講道。</verse>
			</chapter>
			<chapter number="22">
				<verse number="1">除酵節 (又安到𨃟過節) 會到了。</verse>
				<verse number="2">祭司長㧯經學教師因為驚民眾，就陰謀愛樣般殺害耶穌。</verse>
				<verse number="3">該時，撒但進入 加略 人 猶大 个心。 ( 猶大 係耶穌十二個學生个一個。)</verse>
				<verse number="4">猶大 去同祭司長㧯聖殿个警衛長參詳，愛樣般將耶穌交給佢等。</verse>
				<verse number="5">佢等非常歡喜，又答應拿錢給佢。</verse>
				<verse number="6">猶大 就同意，開始尋機會，愛在無眾人在場个時節出賣耶穌。</verse>
				<verse number="7">除酵節期間，㓾𨃟過節羔羊該日到了。</verse>
				<verse number="8">耶穌派 彼得 㧯 約翰 出去，吩咐佢等講：「你等去代𠊎等準備𨃟過節个晚餐。」</verse>
				<verse number="9">佢等問講：「你愛𠊎等在㖠位準備？」</verse>
				<verse number="10">耶穌講：「你等入城去，會堵到一個人帶等一罐水；你等就跈等佢，到佢入去个屋肚，</verse>
				<verse number="11">問該家个主人講：『先生講：𠊎㧯𠊎个學生食𨃟過節晚餐个客廳在㖠位？』</verse>
				<verse number="12">佢會帶你等去看樓頂一間佈置好个大房間；你等就在該位準備。」</verse>
				<verse number="13">佢等就去；所堵到个全部㧯耶穌對佢等講个共樣；佢等就在該位準備𨃟過節个晚餐。</verse>
				<verse number="14">食夜个時間到了，耶穌入去，使徒也同佢共下坐桌。</verse>
				<verse number="15">佢對佢等講：「𠊎一直希望在受難以前同你等共下食這𨃟過節个晚餐。</verse>
				<verse number="16">𠊎㧯你等講，無等到這晚餐个意義實現在上帝國，𠊎絕對毋會再食這個晚餐。」</verse>
				<verse number="17">然後，耶穌接過杯仔，感謝上帝後，講：「你等拿去，大家分等啉。</verse>
				<verse number="18">𠊎㧯你等講，從今以後，無等到上帝个國臨到，𠊎絕對毋會再啉這葡萄酒。」</verse>
				<verse number="19">接等，佢拿起餅仔，感謝上帝後，就擘開，分給佢等，講：「這係𠊎个身體，係為你等犧牲个；你等愛恁樣行，來紀念𠊎。」</verse>
				<verse number="20">食飽後，佢照樣拿起杯仔，講：「這杯係上帝个新約，係用𠊎為你等流出个血所設立个。</verse>
				<verse number="21">「你等看，出賣𠊎个人同𠊎共桌！</verse>
				<verse number="22">人子確實愛照上帝个安排來受害，總係出賣佢个人有災禍了！」</verse>
				<verse number="23">佢等就彼此緊問，到底係麼人愛做這件事。</verse>
				<verse number="24">學生中間發生爭論，到底麼人最大。</verse>
				<verse number="25">耶穌對佢等講：「外邦人个君王有權管轄佢等；佢等个統治者又被人稱做救星；</verse>
				<verse number="26">總係你等毋係恁樣。你等當中最大个，反轉愛像最細个；做領袖个，應該像僕人。</verse>
				<verse number="27">係坐桌个較大，抑係服事佢个較大呢？敢毋係坐桌个較大嗎？總係，𠊎在你等中間係服事人个。</verse>
				<verse number="28">「𠊎受磨煉个時，你等一直同𠊎共下。</verse>
				<verse number="29">吾爸有賜𠊎一個國，這下，𠊎共樣也愛將這國个統治權賜給你等。</verse>
				<verse number="30">你等愛在𠊎个國底背同𠊎共下啉食，也愛坐在寶座頂高審判 以色列 个十二支族。」</verse>
				<verse number="31">耶穌又講：「 西門 ， 西門 ！撒但已經要求試探你等，像耕種人篩麥仔恁樣來篩你等。</verse>
				<verse number="32">總係，𠊎已經為你祈禱，使你个信心毋會無掉去。你倒轉來歸𠊎以後，就愛堅固你該兜兄弟。」</verse>
				<verse number="33">彼得 講：「主啊，𠊎甘願跈你去坐監，同你共下死！」</verse>
				<verse number="34">耶穌講：「 彼得 ，𠊎㧯你講，今晡日雞仔啼以前，你會三擺講你毋識𠊎。」</verse>
				<verse number="35">耶穌又對佢等講：「頭擺，𠊎派你等出去，喊你等毋好帶錢包，毋好帶旅行袋抑係鞋仔，你等識欠麼介麼？」 佢等應講：「毋識。」</verse>
				<verse number="36">耶穌講：「總係這下，有錢包抑係旅行袋个，愛帶等；無刀仔个，愛賣衫去買一支。</verse>
				<verse number="37">𠊎㧯你等講，聖經所講：『佢承擔罪人个命運』該句話，一定愛實現在𠊎个身上。事實上，所有關係𠊎个記載已經應驗等了。」</verse>
				<verse number="38">學生講：「主啊，你看，這位有兩支刀仔。」 耶穌講：「罅了！」</verse>
				<verse number="39">耶穌出城，照常去 橄欖 山；學生也跈等佢去。</verse>
				<verse number="40">到該所在，耶穌對佢等講：「你等愛祈禱，免得陷落迷惑。」</verse>
				<verse number="41">然後，耶穌離開佢等，約有㧹一隻石頭恁遠，跪下去祈禱，</verse>
				<verse number="42">講：「阿爸啊，你若係肯，請將這個苦杯徙走；總係，毋好照𠊎个意思，愛成全你个旨意。」</verse>
				<verse number="43">有一個天使對天頂向佢顯現，來加添佢个力量。</verse>
				<verse number="44">在極痛苦之中，耶穌還較迫切祈禱；佢个汗水像大點个血滴等落地泥。</verse>
				<verse number="45">祈禱後，耶穌䟘起來，轉到學生該位，發現佢等憂傷過度就睡掉去。</verse>
				<verse number="46">佢對佢等講：「你等做麼介睡掉去呢？䟘起來，愛祈禱，免得陷落迷惑。」</verse>
				<verse number="47">耶穌還講等話个時，有一群人來到。十二個學生中个 猶大 在頭前帶路，佢進前愛唚耶穌。</verse>
				<verse number="48">耶穌對佢講：「 猶大 ，你用唚𠊎來出賣人子係麼？」</verse>
				<verse number="49">同耶穌共下个學生看到這個情形，就講：「主啊，𠊎等做得使刀仔麼？」</verse>
				<verse number="50">其中一個挷出刀仔，對大祭司个僕人劈過去，削掉佢右片个耳公。</verse>
				<verse number="51">耶穌講：「莫再動手！」跈等，佢伸手摸該人个耳公，醫好佢。</verse>
				<verse number="52">然後，耶穌對該兜來捉佢个祭司長、聖殿个警衛長，㧯長老講：「你等帶等刀仔㧯棍仔出來捉𠊎，看𠊎做強盜係麼？</verse>
				<verse number="53">𠊎逐日同你等共下在聖殿肚，你等並無下手捉𠊎；總係，這下係你等橫行个時節，烏暗掌權了。」</verse>
				<verse number="54">佢等捉等耶穌，帶佢去大祭司个屋肚； 彼得 遠遠跈等去。</verse>
				<verse number="55">佢等在庭院肚起一堆火，大家圍等火坐等， 彼得 也坐在佢等中間。</verse>
				<verse number="56">有一個使女看到 彼得 坐在該位焙火，就注目看等佢，講：「這個人也係同佢共下个。」</verse>
				<verse number="57">彼得 否認講：「婦人家，𠊎毋識佢！」</verse>
				<verse number="58">過無幾久，又有人注意到佢，講：「你乜係佢等當中个一個。」 彼得 講：「先生，𠊎毋係！」</verse>
				<verse number="59">差毋多一點鐘後，另外有一個人用堅定个口氣講：「絕對毋會差，佢乜係同該人共下个，因為佢係 加利利 人！」</verse>
				<verse number="60">總係 彼得 講：「你這個人啊，𠊎毋知你講麼介！」 佢个話還吂講煞，雞仔就啼。</verse>
				<verse number="61">主轉身，注目看 彼得 ； 彼得 正想起主對佢所講个話：「今晡日雞仔啼以前，你會三擺毋認𠊎。」</verse>
				<verse number="62">彼得 就走出去，噭到非常傷心。</verse>
				<verse number="63">掌耶穌个人㩢耍佢，打佢；</verse>
				<verse number="64">揞等佢个目珠，問佢講：「先知啊，試揣看，係麼人打你？」</verse>
				<verse number="65">佢等又講盡多話來侮辱佢。</verse>
				<verse number="66">天光个時， 猶太 人个長老、祭司長，㧯經學教師全部聚集共下，然後帶耶穌到佢等个議會去。</verse>
				<verse number="67">佢等問佢講：「㧯𠊎等講，你係毋係基督？」 佢應講：「𠊎就係㧯你等講，你等也毋會相信；</verse>
				<verse number="68">若係𠊎問你等，你等乜會毋回答。</verse>
				<verse number="69">總係，從今以後，人子愛坐在全能上帝个右片。」</verse>
				<verse number="70">大家講：「恁樣，你係上帝个孻仔囉？」 耶穌講：「𠊎係，這係你等講个！」</verse>
				<verse number="71">佢等就講：「𠊎等敢還愛使其他个證據呢？𠊎等已經聽到佢親口講个話了！」</verse>
			</chapter>
			<chapter number="23">
				<verse number="1">議會全體䟘起來，將耶穌解送到 彼拉多 个面前去，</verse>
				<verse number="2">告佢講：「𠊎等發現這個人煽動𠊎等个同胞，喊𠊎等毋好納稅給皇帝，又自稱係基督，係王。」</verse>
				<verse number="3">彼拉多 問耶穌講：「你係 猶太 人个王麼？」 耶穌應講：「這係你講个。」</verse>
				<verse number="4">因為恁樣， 彼拉多 就對祭司長㧯眾人講：「𠊎查毋出這個人有麼介罪。」</verse>
				<verse number="5">總係，佢等越發堅持講：「佢借傳教个名，在 猶太 全地煽動民眾，對 加利利 開始，這下來到這位。」</verse>
				<verse number="6">彼拉多 一聽到這個話，就問講：「這個人係 加利利 人嗎？」</verse>
				<verse number="7">佢一知耶穌係對 希律 管轄个地區來个，就將佢送到 希律 該位去。 (該時， 希律 也在 耶路撒冷 。)</verse>
				<verse number="8">希律 看到耶穌，非常歡喜；因為佢聽過關係耶穌个事情，早就想愛見佢，希望看耶穌行神蹟。</verse>
				<verse number="9">所以，佢問耶穌好多問題，總係耶穌一句話也毋應佢。</verse>
				<verse number="10">該兜祭司長㧯經學教師進前來，盡力告佢。</verse>
				<verse number="11">希律 㧯佢个兵仔就㩢耍佢，並侮辱佢。然後，佢等拿一領盡靚个長袍著在佢身上，送佢倒轉 彼拉多 該位去。</verse>
				<verse number="12">在該日， 希律 㧯 彼拉多 成做朋友；佢兩儕本來係冤家。</verse>
				<verse number="13">彼拉多 召集祭司長、民間个領袖，㧯眾人來，</verse>
				<verse number="14">對佢等講：「你等將這個人解送到𠊎這位來，告佢煽動民眾；𠊎在你等个面前審問佢，總係查毋出佢有犯你等所告佢个任何罪名。</verse>
				<verse number="15">連 希律 也查毋出佢有麼介罪，所以將佢送倒轉這位來。恁樣看來，佢並無做麼介該死个事情。</verse>
				<verse number="16">𠊎愛喊人鞭打佢，然後放佢走。」</verse>
				<verse number="17"></verse>
				<verse number="18">無想到，眾人卻齊聲喊講：「除掉佢！放 巴拉巴 給𠊎等！」</verse>
				<verse number="19">( 巴拉巴 識在城肚作亂，也㓾過人，所以被人關在監獄肚。)</verse>
				<verse number="20">彼拉多 想愛放耶穌，就再一擺勸眾人。</verse>
				<verse number="21">總係佢等還較大聲喊講：「將佢釘十字架！將佢釘十字架！」</verse>
				<verse number="22">彼拉多 第三擺又問佢等講：「佢到底做麼介壞事？𠊎查毋出佢有麼介該死个罪。𠊎愛喊人鞭打佢，然後放佢走。」</verse>
				<verse number="23">眾人繼續大聲喊，堅持愛將耶穌釘十字架；最尾，佢等个大聲就得到勝利。</verse>
				<verse number="24">因為恁樣， 彼拉多 照佢等个要求宣判，</verse>
				<verse number="25">將佢等所求个，該作亂㓾人、關在監獄个兇手，放出來，將耶穌交給佢等，由在佢等處理。</verse>
				<verse number="26">兵仔將耶穌帶走，在路上堵到一個對鄉下入城个 古利奈 人，名安到 西門 个；佢等捉到佢，勉強佢擎十字架，跈等耶穌行。</verse>
				<verse number="27">有一大群个人跈等耶穌，其中有兜婦女為佢傷心大噭。</verse>
				<verse number="28">耶穌轉身，對姖等講：「 耶路撒冷 个婦女啊，毋使為𠊎噭，愛為你等自家㧯你等个子女噭！</verse>
				<verse number="29">因為日仔會到，人會講：『無𫱔、無懷胎、無給孲𤘅仔食乳个，真有福氣噢！』</verse>
				<verse number="30">該時，人會對大山講：『磧在𠊎等身上啊！』又對細山講：『將𠊎等揜等！』</verse>
				<verse number="31">樹仔青青个時節，佢等還恁樣蹧踏它，樹仔枯燥个時，佢等个結局會樣般呢？」</verse>
				<verse number="32">佢等也帶兩個囚犯來，愛同耶穌共下處死刑。</verse>
				<verse number="33">佢等到一個地方，安到「頭那殼个山頭」，在該位，佢等將耶穌釘在十字架頂，同時也釘該兩個囚犯，一個在佢个右片，一個在佢个左片。</verse>
				<verse number="34">耶穌講：「阿爸啊，赦免佢等，因為佢等毋知自家做麼介。」 佢等抽籤仔來分耶穌个衫。</verse>
				<verse number="35">眾人企在該位看。 猶太 人个領袖也恥笑佢，講：「佢救了別人！佢若正經係上帝所揀選个基督，救佢自家嘛！」</verse>
				<verse number="36">該兜兵仔也㩢耍佢。佢等進前拿酸葡萄酒給佢啉，</verse>
				<verse number="37">講：「你若係 猶太 人个王，救你自家嘛！」</verse>
				<verse number="38">在佢頭那个頂高有牌仔寫講：「這係 猶太 人个王。」</verse>
				<verse number="39">兩個同佢共下釘十字架个囚犯，有一個也開嘴侮辱佢，講：「你毋係基督嗎？救你自家，也救𠊎等嘛！」</verse>
				<verse number="40">另外一個就責備該囚犯，講：「你既然係共下受刑罰个，敢毋驚上帝嗎？</verse>
				<verse number="41">𠊎等受刑罰係應該个，因為𠊎等所受个係𠊎等个報應；總係這個人毋識行一件壞事。」</verse>
				<verse number="42">然後佢就對耶穌講：「耶穌啊，你做王降臨个時，求你毋好毋記得𠊎！」</verse>
				<verse number="43">耶穌對佢講：「𠊎實在㧯你講，今晡日你會同𠊎共下在樂園！」</verse>
				<verse number="44">大約係當晝个時，天烏地暗，直到下晝頭三點鐘。掛在聖殿肚个布簾裂做兩析。</verse>
				<verse number="45"></verse>
				<verse number="46">耶穌大聲喊講：「阿爸啊，𠊎个靈魂交在你个手中！」講了這個話，佢就斷氣死掉。</verse>
				<verse number="47">該軍官看到這事个經過，就頌讚上帝講：「這個人實在係義人！」</verse>
				<verse number="48">圍等看个眾人看到這一切，全部捶等心肝轉去。</verse>
				<verse number="49">所有同耶穌熟事个人，㧯對 加利利 跈等佢來个婦人家，全部遠遠企等看這兜事个經過。</verse>
				<verse number="50">有一個名安到 約瑟 个人，係議會个議員，做人良善又正直；</verse>
				<verse number="51">議會个計謀㧯所做个，佢並無贊成。佢本來係 猶太 地方 亞利馬太 城个人，一直盼望上帝國个實現。</verse>
				<verse number="52">佢去見 彼拉多 ，要求收殮耶穌个遺體，</verse>
				<verse number="53">然後去將遺體取下來，用麻紗包好，放在石壁鑿成个墳墓底背；這墳墓吂識葬過人。</verse>
				<verse number="54">該日係預備日，安息日就會開始了。</verse>
				<verse number="55">該兜對 加利利 跈耶穌來个婦人家同 約瑟 共下去，有看到該墳墓，也清楚耶穌个遺體係樣般安葬个。</verse>
				<verse number="56">姖等就轉去，為佢个遺體準備香料㧯香油。 照法律个規定，姖等在安息日該日就休息。</verse>
			</chapter>
			<chapter number="24">
				<verse number="1">禮拜日打早，該兜婦人家帶等所準備个香料去墓地。</verse>
				<verse number="2">姖等發現石頭已經對墓門徙開，</verse>
				<verse number="3">就行入去，總係無看到主耶穌个遺體。</verse>
				<verse number="4">姖等發咄愕个時，忽然有兩個衫發光个人企在姖等塍頭；</verse>
				<verse number="5">姖等非常著驚，就伏在地上。該兩個人對姖等講：「你等做麼介在死人中尋生人哪？</verse>
				<verse number="6">佢無在這位，已經復活了！愛記得佢還在 加利利 个時節識對你等講：</verse>
				<verse number="7">『人子一定會被人交在罪人个手中，釘死在十字架頂，第三日愛復活。』」</verse>
				<verse number="8">姖等這時正想起耶穌个話，</verse>
				<verse number="9">就對墳墓轉去，將所堵到个一切事情報給十一個使徒㧯其他个人知。</verse>
				<verse number="10">對使徒報告這一切个婦人家係： 抹大拉 个 馬利亞 、 約亞娜 、 雅各 个阿姆 馬利亞 ，㧯別个婦人家。</verse>
				<verse number="11">該兜使徒恅到這兜婦人家亂講，就毋信姖等所講个話。</verse>
				<verse number="12">總係 彼得 䟘起來，走到墓地去，探身看墳墓底背，看到只有賸麻紗。佢就倒轉去，非常希奇所發生个事。</verse>
				<verse number="13">共日，學生中有兩個人愛去一個村莊。這村莊名安到 以馬忤斯 ，離 耶路撒冷 約十一公里。</verse>
				<verse number="14">佢兩儕透路討論所發生个一切事情。</verse>
				<verse number="15">緊講緊論个時，耶穌親身行近佢等，同佢等共下行；</verse>
				<verse number="16">佢等面對佢，總係目珠矇矇毋識佢。</verse>
				<verse number="17">耶穌問佢等講：「你等緊行緊講个係麼介事情？」 佢等就停下來，面帶憂愁。</verse>
				<verse number="18">其中一個名安到 革流巴 个，問耶穌講：「這幾日在 耶路撒冷 發生个事情，敢講只有你一個做人客个毋知係麼？」</verse>
				<verse number="19">耶穌講：「麼介事情？」 佢等應講：「係 拿撒勒 人耶穌个事啊！佢係一個先知，在上帝㧯眾人个面前，無論講話抑係做事攏總盡有能力；</verse>
				<verse number="20">該兜祭司長㧯𠊎等个領袖卻解送佢去判死刑，釘佢在十字架頂。</verse>
				<verse number="21">𠊎等原來希望佢就係該愛來拯救 以色列 个！毋單淨恁樣，這事情个發生已經經過三日。</verse>
				<verse number="22">還有，𠊎等當中有幾個婦人家，使𠊎等盡著驚。姖等打早去墳墓該位，</verse>
				<verse number="23">總係無看到佢个遺體。姖等倒轉來報告講，姖等看到天使出現，天使㧯姖等講，耶穌已經復活了。</verse>
				<verse number="24">𠊎等中間有人去墳墓看，所看到个同該兜婦人家所講个共樣，只係無看到佢。」</verse>
				<verse number="25">該時，耶穌對佢等講：「你等樣般恁鈍！先知所講个話，你等樣般恁難相信呢？</verse>
				<verse number="26">基督毋係定著愛經歷這一切苦難，然後正進入佢个榮耀嗎？」</verse>
				<verse number="27">接下去，佢照 摩西 㧯眾先知所寫个開始，對佢等解釋聖經所記關係佢自家个一切事情。</verse>
				<verse number="28">佢等行近所愛去个村莊，耶穌像還愛繼續向前行，</verse>
				<verse number="29">佢等就強強留佢，講：「日頭已經落山，天會暗了，同𠊎等共下住哪！」耶穌就入去，同佢等共下住。</verse>
				<verse number="30">佢等坐下來食夜个時，耶穌拿起餅仔，感謝上帝後，就擘開，交給佢等。</verse>
				<verse number="31">佢等个目珠忽然金起來，正認到佢；總係耶穌一下就毋見掉去。</verse>
				<verse number="32">佢等彼此講：「佢在路上㧯𠊎等講話，為𠊎等解釋聖經个時，𠊎等个心毋係像火恁樣𤏸起來嗎？」</verse>
				<verse number="33">佢等黏時就出發，轉 耶路撒冷 去。在該位，佢等看到十一個使徒㧯另外一兜人聚集共下，</verse>
				<verse number="34">堵好在該位講：「主斷真復活了；佢已經顯現給 西門 看了！」</verse>
				<verse number="35">該兩儕也將路上所堵到个，並佢等樣般在主擘開餅仔个時認到佢个經過，㧯大家講。</verse>
				<verse number="36">佢等講等這兜事，耶穌親身企在佢等中間，對佢等講：「願你等平安！」</verse>
				<verse number="37">佢等驚到愊愊掣，恅到係看到魂魄。</verse>
				<verse number="38">耶穌對佢等講：「你等做麼介恁愁呢？樣般心肝疑狐呢？</verse>
				<verse number="39">看𠊎个手，𠊎个腳！確實係𠊎！摸𠊎看仔，你等就知；魂魄無肉也無骨，你等看，𠊎兩樣都有。」</verse>
				<verse number="40">講了，佢就將手㧯腳給佢等看 。</verse>
				<verse number="41">佢等忒歡喜又想毋通，還係毋敢相信。佢問佢等講：「你等這位有麼介好食个麼？」</verse>
				<verse number="42">佢等拿一垤焙好个魚給佢。</verse>
				<verse number="43">佢就接過來，在佢等个面前食。</verse>
				<verse number="44">然後，耶穌對佢等講：「這一切就係頭擺𠊎同你等共下个時㧯你等講个： 摩西 个法律、先知个書，㧯《詩篇》所寫个，關係𠊎个逐件事情一定愛實現。」</verse>
				<verse number="45">耶穌就開佢等个心竅，使佢等了解聖經个話，</verse>
				<verse number="46">又對佢等講：「照聖經所寫个，基督定著會受害，第三日對死復活，</verse>
				<verse number="47">人也愛奉佢个名傳悔改㧯赦罪个道理，對 耶路撒冷 開始，直到萬國。</verse>
				<verse number="48">你等就係這兜事个見證人。</verse>
				<verse number="49">𠊎愛將吾爸所應許个，親自賜給你等；你等愛在城內等候，直到該對頂高來个能力臨到你等。」</verse>
				<verse number="50">接等，耶穌帶佢等出城，去到 伯大尼 。在該位，佢擎手為佢等祝福。</verse>
				<verse number="51">祝福个時節，佢就離開佢等，受接上天頂去 。</verse>
				<verse number="52">佢等就敬拜佢，滿心歡喜轉 耶路撒冷 去，</verse>
				<verse number="53">常常在聖殿肚頌讚上帝。</verse>
			</chapter>
		</book>
		<book number="43">
			<chapter number="1">
				<verse number="1">太初有道，道㧯上帝同在，道就係上帝。</verse>
				<verse number="2">佢在太初㧯上帝同在。</verse>
				<verse number="3">上帝通過佢創造萬有；所有受創造个，無一樣毋係通過佢造个。</verse>
				<verse number="4">道就係生命个源頭，這生命將光賜給人類。</verse>
				<verse number="5">光照在烏暗中，烏暗從來毋識贏過 光。</verse>
				<verse number="6">有一個人，名安到 約翰 ，係上帝所差派个使者。</verse>
				<verse number="7">佢來為該光做證，愛使大家聽到佢个道理來信。</verse>
				<verse number="8">佢本身毋係該光，係愛為光做證。</verse>
				<verse number="9">該光係真光，來到世間光照全人類。</verse>
				<verse number="10">道在世間，上帝係通過佢創造世界，總係世間人毋識佢。</verse>
				<verse number="11">佢來到自家个地方，自家个人卻毋接受佢。</verse>
				<verse number="12">總係凡接受佢个，就係信佢个人，佢就賜佢等做上帝子女个權利。</verse>
				<verse number="13">這兜人做上帝个子女毋係因為血統關係，像對人个性慾抑係對男人个意思來𫱔个，係對上帝𫱔个。</verse>
				<verse number="14">道成做肉身，住在𠊎等个當中，充滿恩典㧯真理。𠊎等有看到佢个榮光，這係阿爸獨一个孻仔 正有个榮光。</verse>
				<verse number="15">約翰 為佢做證，喊講：「關係佢，𠊎識講：『佢比𠊎較慢來，總係比𠊎較偉大；因為𠊎吂出世，佢已經存在。』」</verse>
				<verse number="16">對佢个豐盛，𠊎等全部有領受到恩典，並恩上加恩。</verse>
				<verse number="17">上帝通過 摩西 頒佈法律，總係恩典㧯真理係通過耶穌基督來个。</verse>
				<verse number="18">從來毋識有人看到上帝，只有獨一个孻仔上帝 就係在阿爸懷中个，將佢啟示出來。</verse>
				<verse number="19">以下係 約翰 个見證。當時， 猶太 人个領袖 對 耶路撒冷 派兜祭司㧯 利未 人去見 約翰 ，問佢講：「你係麼人？」</verse>
				<verse number="20">約翰 無拒絕回答，反轉坦白㧯佢等講：「𠊎並毋係基督。」</verse>
				<verse number="21">佢等就問：「恁樣，你係麼人？係 以利亞 嗎？」 約翰 應講：「𠊎毋係。」 佢等又問：「係該先知嗎？」 佢又應講：「毋係。」</verse>
				<verse number="22">佢等接等講：「請你㧯𠊎等講，你到底係麼人，𠊎等好回覆派𠊎等來个人。你自家講，你係麼人？」</verse>
				<verse number="23">約翰 用先知 以賽亞 个話回答，講： 「在曠野有人喊講： 『為主修直佢所愛行个道路！』 𠊎就係這個人。」</verse>
				<verse number="24">法利賽人所派來个該兜人</verse>
				<verse number="25">質問 約翰 講：「你既然毋係基督，毋係 以利亞 ，也毋係該先知，恁樣，你做麼介行洗禮哪？」</verse>
				<verse number="26">約翰 應講：「𠊎係用水行洗禮；總係有一個企在你等當中，你等毋識个，</verse>
				<verse number="27">佢比𠊎較慢來，𠊎就係㧯佢脫鞋也無資格。」</verse>
				<verse number="28">這兜事發生在 約旦 河東片个 伯大尼 ，就係 約翰 行洗禮个所在。</verse>
				<verse number="29">第二日， 約翰 看到耶穌對佢行等過來，就講：「看啊，上帝个羔羊，除掉世間人个罪个！</verse>
				<verse number="30">這個人就係𠊎識講个：『佢比𠊎較慢來，總係比𠊎較偉大；因為𠊎還吂出世，佢已經存在。』</verse>
				<verse number="31">𠊎並毋識佢；總係𠊎來，用水行洗禮，為到愛俾 以色列 人認識佢。」</verse>
				<verse number="32">約翰 又做證講：「𠊎看到聖靈像月鴿仔對天頂降臨，落在佢个身上。</verse>
				<verse number="33">𠊎還係毋識佢，總係差𠊎用水行洗禮个上帝㧯𠊎講：『你看到聖靈降臨，落在麼人个身上，這儕就係用聖靈行洗禮个。』</verse>
				<verse number="34">𠊎已經看到了，所以對你等做證，佢就係上帝个孻仔。」</verse>
				<verse number="35">又過一日， 約翰 㧯厥兩個學生又企在該位；</verse>
				<verse number="36">佢看到耶穌經過，就講：「看啊，上帝个羔羊！」</verse>
				<verse number="37">該兩個學生一聽到這個話，就去跈耶穌。</verse>
				<verse number="38">耶穌轉身，看到佢等跈等佢，就問講：「你等尋麼介？」 佢等應講：「拉比，你住在㖠位？」 (「拉比」个意思就係「先生」。)</verse>
				<verse number="39">耶穌講：「你等來看！」佢等跈佢去，看到佢住个所在，該日就同佢共下住。 (該時大約係下晝四點鐘。)</verse>
				<verse number="40">聽到 約翰 个話就跈耶穌个兩儕中，有一個係 西門‧彼得 个老弟 安德烈 。</verse>
				<verse number="41">佢先尋到佢个阿哥 西門 ，㧯佢講：「𠊎等已經尋到彌賽亞了。」 (「彌賽亞」个意思就係「基督」。)</verse>
				<verse number="42">然後佢就帶 西門 去見耶穌。 耶穌注目看佢，講：「你係 約翰 个孻仔 西門 ，總係你會被人喊做 磯法 。」 ( 磯法 㧯 彼得 意思共樣，就係「磐石」。)</verse>
				<verse number="43">又過一日，耶穌決定去 加利利 省。佢尋到 腓力 ，對佢講：「來跈𠊎！」</verse>
				<verse number="44">( 腓力 係 伯賽大 人，㧯 安德烈 並 彼得 同鄉。)</verse>
				<verse number="45">腓力 尋到 拿但業 ，㧯佢講：「 摩西 在法律書中所寫㧯眾先知所記載个該儕，𠊎等已經尋到了。佢就係 約瑟 个孻仔， 拿撒勒 人耶穌。」</verse>
				<verse number="46">拿但業 就對佢講：「 拿撒勒 敢會出麼介好个嗎？」 腓力 講：「你來看！」</verse>
				<verse number="47">耶穌看到 拿但業 對佢行等過來，就講：「看啊，佢係一個真實个 以色列 人；佢个心中無詭詐！」</verse>
				<verse number="48">拿但業 問佢講：「你樣會識𠊎？」 耶穌應講：「你在無花果樹下， 腓力 吂喊你，𠊎已經看到你。」</verse>
				<verse number="49">拿但業 講：「先生，你係上帝个孻仔；你係 以色列 个君王！」</verse>
				<verse number="50">耶穌講：「因為𠊎㧯你講，𠊎看到你在無花果樹下，你就信係麼？你會看到比這還較大个事情！」</verse>
				<verse number="51">耶穌又講：「𠊎實在㧯你等講，你等會看到天開，上帝个天使在人子身項上去下來。」</verse>
			</chapter>
			<chapter number="2">
				<verse number="1">兩日後，在 加利利 个 迦拿 城，有人結婚。耶穌个阿姆在該位；</verse>
				<verse number="2">耶穌㧯厥學生也被佢等請去參加婚姻个筵席。</verse>
				<verse number="3">酒啉淨淨，耶穌个阿姆㧯佢講：「佢等無酒囉。」</verse>
				<verse number="4">耶穌講：「阿姆 ，這㧯𠊎兩儕有麼介關係，𠊎个時節還吂到。」</verse>
				<verse number="5">耶穌个阿姆就吩咐僕人講：「佢喊你等做麼介，就照佢个話去做。」</verse>
				<verse number="6">在該位有六隻石醃缸，係 猶太 人行潔淨禮个時用个，每隻可以裝大約一百公升个水。</verse>
				<verse number="7">耶穌㧯僕人講：「將這兜醃缸裝滿水。」佢等就倒水入去，直到淰起來。</verse>
				<verse number="8">耶穌又講：「這下，舀兜出來，送給管筵席个。」佢等就送過去。</verse>
				<verse number="9">管筵席个試啉該已經變做酒个水，毋知這酒係對㖠位來个 (只有舀水个僕人知)，就喊新郎來，</verse>
				<verse number="10">㧯佢講：「別人全部係先上好酒，等人客啉到差毋多正上普通个酒；你反轉將最好个酒留到這下！」</verse>
				<verse number="11">這係耶穌所行个第一個神蹟，係在 加利利 个 迦拿 城行个。這個事顯出佢个榮光；厥學生就信佢。</verse>
				<verse number="12">這事以後，耶穌㧯厥姆、老弟，並學生下去 迦百農 ，在該位住幾日。</verse>
				<verse number="13">猶太 人个𨃟過節會到了，耶穌上 耶路撒冷 去。</verse>
				<verse number="14">在聖殿底背，佢看到有人在該位賣牛、羊、月鴿仔，也有兌換銀錢个人坐在該位。</verse>
				<verse number="15">佢就拿索仔做鞭仔，將牛羊逐到聖殿外背去，又到換錢个人該位，倒出佢等个銀錢，㩳橫佢等个桌仔。</verse>
				<verse number="16">然後佢對賣月鴿仔个人講：「將這兜東西搬走，莫將吾爸个聖殿變做市場！」</verse>
				<verse number="17">厥學生想起聖經有話講：「上帝啊，𠊎為你个聖殿大發熱心，就像火燒！」</verse>
				<verse number="18">猶太 人个領袖就質問佢講：「你能顯麼介神蹟給𠊎等看，來證明你有權好做這兜事呢？」</verse>
				<verse number="19">耶穌應講：「你等拆掉這聖殿，三日內，𠊎會將它重建起來。」</verse>
				<verse number="20">佢等講：「這聖殿已經起了四十六年，你三日內就會重建起來係麼？」</verse>
				<verse number="21">其實，耶穌所講个聖殿係指佢自家个身體。</verse>
				<verse number="22">所以，耶穌對死復活以後，厥學生想起佢所講過个這句話，就信聖經㧯耶穌所講个。</verse>
				<verse number="23">耶穌在 耶路撒冷 過𨃟過節个時，盡多人看到佢所行个神蹟，就信佢。</verse>
				<verse number="24">總係耶穌對佢等毋放心，因為佢對所有个人有盡深个認識。</verse>
				<verse number="25">佢無需要麼人㧯佢講關係人个事，因為佢深深了解人个內心。</verse>
			</chapter>
			<chapter number="3">
				<verse number="1">有一個法利賽人，名安到 尼哥德慕 ，係 猶太 人个領袖。</verse>
				<verse number="2">佢在暗晡時來見耶穌，講：「先生，𠊎等知你係對上帝該位來个教師。你所行个神蹟，若毋係有上帝同在，無人能行。」</verse>
				<verse number="3">耶穌應講：「𠊎實在㧯你講，人若係無重生 ，就看毋到上帝个國實現。」</verse>
				<verse number="4">尼哥德慕 問講：「人只有緊來緊老，樣會重生呢？佢能倒轉母胎再𫱔出來係麼？」</verse>
				<verse number="5">耶穌應講：「𠊎實在㧯你講，人若毋係對水㧯聖靈來重生，就無可能成做上帝國个子民。</verse>
				<verse number="6">人个肉身係對爺𡟓𫱔个，佢个靈性係對聖靈𫱔个。</verse>
				<verse number="7">毋好因為𠊎講『你等一定愛重生 』感覺奇怪。</verse>
				<verse number="8">風 照自家个意思吹，你聽到它个聲，總係毋知它對㖠位來，愛去㖠位。每一個對聖靈𫱔个，也係恁樣。」</verse>
				<verse number="9">尼哥德慕 問佢講：「樣會有恁樣个事呢？」</verse>
				<verse number="10">耶穌應講：「你係 以色列 个教師，連這兜事也毋會明白嗎？</verse>
				<verse number="11">𠊎實在㧯你講，𠊎等講論𠊎等所知个，𠊎等見證𠊎等所看到个；總係你等偏偏毋肯領受𠊎等个見證。</verse>
				<verse number="12">𠊎㧯你等講這世間个事，你等都毋信；𠊎若係㧯你等講天頂个事，你等樣會信哪？</verse>
				<verse number="13">除了對天頂降下來个人子，從來毋識有人上過天。</verse>
				<verse number="14">就像 摩西 在曠野擎起銅蛇，人子也一定愛被人擎起來，</verse>
				<verse number="15">使所有信佢个人得到永遠个生命。</verse>
				<verse number="16">「因為上帝痛惜世間人，所以將佢獨一个孻仔 賜給佢等，愛使一切信佢个人毋會滅亡，反轉得到永遠个生命。</verse>
				<verse number="17">「因為上帝差佢个孻仔到世間來，毋係愛定世間人个罪，係愛通過佢來拯救世間人。</verse>
				<verse number="18">信孻仔个人毋會受定罪；毋信个人已經受定罪，因為佢毋信上帝獨一个孻仔 。</verse>
				<verse number="19">光來到世界，世間人因為自家个壞行為，毋愛光，反轉愛烏暗；佢等受定罪个原因就在這位。</verse>
				<verse number="20">做壞事个，全部恨光，毋愛接近光，因為驚佢个壞行為顯明出來。</verse>
				<verse number="21">總係，照真理做事个，就接近光，愛俾光顯明佢所做个一切係照上帝个旨意做个。」</verse>
				<verse number="22">這事以後，耶穌㧯學生到 猶太 地區去。佢在該位㧯佢等住一站時間，又行洗禮。</verse>
				<verse number="23">約翰 在離開 撒冷 無幾遠个 哀嫩 也行洗禮，因為該位水盡多；大家接等去領洗禮。</verse>
				<verse number="24">(該時 約翰 還吂被人關起來。)</verse>
				<verse number="25">約翰 个幾個學生㧯一個 猶太 人為潔淨禮開始辯論。</verse>
				<verse number="26">佢等去見 約翰 ，對佢講：「先生，你看，以前㧯你在 約旦 河東片、你為佢做見證个，這下也行洗禮，大家全部去就佢囉！」</verse>
				<verse number="27">約翰 講：「若毋係天賜下个，人就無法度得到麼介。</verse>
				<verse number="28">𠊎識講過：『𠊎毋係基督；𠊎不過係奉差派做佢个先鋒。』這話你等可以為𠊎做證。</verse>
				<verse number="29">討新娘个係新郎；新郎个朋友企在塍頭，一聽到新郎个聲就歡喜快樂。像恁樣，𠊎已經得到完全个喜樂。</verse>
				<verse number="30">佢一定會一日一日興旺，總係𠊎會一日一日衰微。」</verse>
				<verse number="31">從天頂來个，超過萬有。從地上來个，係屬於地，佢所講个也係地上个事；總係從天頂來个，超過萬有。</verse>
				<verse number="32">佢為所看到㧯所聽到个做證，總係無人接受佢个見證。</verse>
				<verse number="33">該接受厥見證个，就係證明上帝係信實个。</verse>
				<verse number="34">上帝所差派个，傳上帝个話，因為上帝豐豐富富將聖靈賜給佢。</verse>
				<verse number="35">阿爸惜佢个孻仔，已經將萬有交在厥手中。</verse>
				<verse number="36">信孻仔个，就有永遠个生命；毋信從孻仔个，毋會有生命，會繼續留在上帝个憤怒之下。</verse>
			</chapter>
			<chapter number="4">
				<verse number="1">法利賽人聽講耶穌收學生㧯行洗禮比 約翰 較多。</verse>
				<verse number="2">(其實，耶穌毋識親身為麼人行洗禮，係厥學生行洗禮。)</verse>
				<verse number="3">耶穌知有這個傳說，就離開 猶太 ，倒轉去 加利利 ；</verse>
				<verse number="4">佢所行个路一定愛經過 撒馬利亞 。</verse>
				<verse number="5">佢來到 撒馬利亞 个 敘加 城，離 雅各 給厥孻仔 約瑟 个土地無幾遠；</verse>
				<verse number="6">雅各 井就係在該位。耶穌因為行路盡𤸁，就坐在井堘；該時差毋多係當晝。</verse>
				<verse number="7">有一個 撒馬利亞 个婦人家來打水；耶穌㧯姖講：「請你分兜水𠊎啉。」</verse>
				<verse number="8">(厥學生已經去街路買食物。)</verse>
				<verse number="9">撒馬利亞 个婦人家應耶穌講：「你係 猶太 人，𠊎係 撒馬利亞 个婦人家，你樣會㧯𠊎討水啉哪？」 (原來 猶太 人㧯 撒馬利亞 人無來往。)</verse>
				<verse number="10">耶穌應講：「若係你知上帝个恩典㧯這下對你討水啉个係麼人，你早就會求佢，佢也早就會將生命个水給你。」</verse>
				<verse number="11">該婦人家講：「先生，你無打水个東西，井又恁深，你愛去㖠位拿生命个水呢？</verse>
				<verse number="12">𠊎等个祖先 雅各 留這口井給𠊎等；佢自家、厥子女，㧯佢个頭牲全部啉這口井个水；敢講你恅到你比佢還較大係麼？」</verse>
				<verse number="13">耶穌應講：「啉這水个人全部還會再嘴燥；</verse>
				<verse number="14">總係啉𠊎所給佢个水，該人就永遠毋會再渴。𠊎所賜个水會在佢底背成做泉源，一直湧出生命个水，使佢得到永遠个生命。」</verse>
				<verse number="15">該婦人家講：「先生，請你將這個水給𠊎，使𠊎永遠毋會渴，也毋使再來這位打水。」</verse>
				<verse number="16">耶穌㧯姖講：「去喊若老公，正倒轉來。」</verse>
				<verse number="17">該婦人家應講：「𠊎無老公。」 耶穌講：「你講你無老公，無毋著。</verse>
				<verse number="18">你識有五個老公，這下同你共下个乜毋係若老公。你講个盡著。」</verse>
				<verse number="19">婦人家講：「先生，𠊎看出你係一個先知。</verse>
				<verse number="20">𠊎等 撒馬利亞 人个祖先在這山頂敬拜上帝，你等 猶太 人就講 耶路撒冷 正係敬拜上帝个所在。」</verse>
				<verse number="21">耶穌㧯姖講：「婦人家，愛信𠊎！時間會到了，你等毋會再來這山頂抑係去 耶路撒冷 敬拜天父。</verse>
				<verse number="22">你等 撒馬利亞 人毋知你等所拜个係麼人，𠊎等 猶太 人知𠊎等所拜个係麼人，因為救恩係對 猶太 人來个。</verse>
				<verse number="23">總係時間會到了，這下就係，真實敬拜天父个，愛用心靈㧯誠實敬拜，因為天父愛這種个人敬拜佢。</verse>
				<verse number="24">上帝係靈，敬拜佢个人一定愛用心靈㧯誠實來敬拜。」</verse>
				<verse number="25">婦人家㧯佢講：「𠊎知該稱做基督个彌賽亞愛來，佢來就會將一切个事㧯𠊎等講。」</verse>
				<verse number="26">耶穌應講：「𠊎，這下㧯你講話个，就係佢！」</verse>
				<verse number="27">這時，耶穌个學生倒轉來。佢等看到佢㧯一個婦人家講話，感覺盡奇怪，總係無人問該婦人家：「你愛麼介？」抑係問耶穌：「你做麼介㧯姖講話？」</verse>
				<verse number="28">該婦人家放下姖个水罐仔，轉去城內，對大家講：</verse>
				<verse number="29">「你等來看！有一個人將𠊎一生所做个事全部㧯𠊎講出來；佢敢係基督嗎？」</verse>
				<verse number="30">大家就出城去看耶穌。</verse>
				<verse number="31">這時，學生喊耶穌講：「先生，請食兜東西。」</verse>
				<verse number="32">耶穌應講：「𠊎有東西好食，係你等所毋知个。」</verse>
				<verse number="33">學生就彼此議論講：「敢講有人拿東西給佢食係麼？」</verse>
				<verse number="34">耶穌㧯佢等講：「𠊎个食物就係遵行『差𠊎來个』个旨意，又完成佢交給𠊎个工作。</verse>
				<verse number="35">你等講：『加四個月正係收成个時節。』𠊎㧯你等講，昂頭看該兜田；五榖已經熟了，做得收割了！</verse>
				<verse number="36">收割个人得到工錢，為永遠个生命積存五榖，使委種个㧯收割个一同快樂。</verse>
				<verse number="37">『前人栽種，後人收成』這句話係真實个。</verse>
				<verse number="38">𠊎差你等去收割毋係你等耕个田；別人辛苦，你等享受佢等辛苦个成果。」</verse>
				<verse number="39">該城有盡多 撒馬利亞 人信耶穌，因為該婦人家講：「佢將𠊎一生所做个事全部㧯𠊎講出來。」</verse>
				<verse number="40">該兜 撒馬利亞 人看到耶穌，就要求佢同佢等共下住；所以耶穌在該位住兩日。</verse>
				<verse number="41">因為耶穌所講个道理，信佢个人就還較多。</verse>
				<verse number="42">佢等㧯該婦人家講：「𠊎等這下信，毋係因為你所講个話，係因為𠊎等親身聽到佢个話，知佢實在係世界个救主。」</verse>
				<verse number="43">耶穌在該位住兩日以後，就去 加利利 。</verse>
				<verse number="44">佢自家識講：「先知在自家个家鄉係毋會受人尊重个。」</verse>
				<verse number="45">耶穌一到 加利利 ，該位个人全部盡歡迎佢；因為佢等在 耶路撒冷 過𨃟過節个時，有看到佢所做一切个事。</verse>
				<verse number="46">耶穌又倒轉去 加利利 个 迦拿 ，就係頭擺佢變水做酒个所在。該地方有一個大官，厥孻仔在 迦百農 發病。</verse>
				<verse number="47">佢一聽到耶穌對 猶太 來到 加利利 ，就去見佢，求佢去 迦百農 醫好厥病到會死个孻仔。</verse>
				<verse number="48">耶穌㧯佢講：「你等若毋係看到神蹟奇事，總係毋信。」</verse>
				<verse number="49">該大官應講：「先生，求你在吾孻仔吂死以前同𠊎共下來去。」</verse>
				<verse number="50">耶穌對佢講：「轉去，若孻仔好了！」 該人信耶穌个話就轉去。</verse>
				<verse number="51">在路上，厥僕人堵到佢，㧯佢講：「你个孻仔好了！」</verse>
				<verse number="52">佢問佢等，厥孻仔係幾時好起來个。佢等回答講：「昨晡日下晝一點鐘个時，燒就退。」</verse>
				<verse number="53">做阿爸个想起，堵好係耶穌對佢講：「若孻仔好了」該時節。所以，佢㧯佢一家人全部就信。</verse>
				<verse number="54">這係耶穌對 猶太 倒轉 加利利 後所行个第二個神蹟。</verse>
			</chapter>
			<chapter number="5">
				<verse number="1">這事以後，堵好係 猶太 人个一個節期，耶穌就上 耶路撒冷 去。</verse>
				<verse number="2">在 耶路撒冷 ，有一口水池在 羊門 个附近， 希伯來 話安到 畢士大 ，滣頭有五隻廊仔 。</verse>
				<verse number="3">在廊仔底背有一群病人睡在該位，有瞙目个、跛腳个、發癱風个。</verse>
				<verse number="4"></verse>
				<verse number="5">在該位有一個人已經發病三十八年久。</verse>
				<verse number="6">耶穌看到佢睡在該位，知佢發病盡多年，就問佢講：「你愛得到醫好麼？」</verse>
				<verse number="7">該病人回答講：「先生，水挺動个時節無人幫助𠊎，將𠊎放落水池去；等𠊎想愛落去，別人已經先落去。」</verse>
				<verse number="8">耶穌㧯佢講：「䟘起來，將若草蓆拿起來行！」</verse>
				<verse number="9">該人个病即時好了，佢將厥草蓆拿起來，行等走。 該日堵好係安息日，</verse>
				<verse number="10">所以 猶太 人个領袖對該得到醫好个人講：「今晡日係安息日，你拿等草蓆係違背法律个。」</verse>
				<verse number="11">佢講：「該醫好𠊎个人吩咐𠊎講：『將若草蓆拿起來行！』」</verse>
				<verse number="12">佢等問講：「該吩咐你將草蓆拿起來行个係麼人？」</verse>
				<verse number="13">總係該得到醫好个人毋知耶穌係麼人；因為該地方人盡多，耶穌又已經閃開。</verse>
				<verse number="14">事後，耶穌在聖殿肚尋到佢，㧯佢講：「你已經完全好了，毋好再犯罪，免得惹到還較大个災禍。」</verse>
				<verse number="15">該人離開耶穌以後，去㧯 猶太 人个領袖講，醫好佢个係耶穌。</verse>
				<verse number="16">所以 猶太 人个領袖開始迫害耶穌，因為佢在安息日醫病。</verse>
				<verse number="17">耶穌對佢等講：「吾爸一直工作，𠊎也照樣工作。」</verse>
				<verse number="18">這個話更加使 猶太 人个領袖決心愛殺害佢；因為佢毋單淨破壞安息日个誡命，又講上帝係佢自家个阿爸，將自家看做㧯上帝平等。</verse>
				<verse number="19">接等，耶穌對佢等講：「𠊎實在㧯你等講，孻仔靠自家不能做麼介；佢看阿爸做麼介，正能做麼介。阿爸所做个，孻仔也做。</verse>
				<verse number="20">阿爸惜孻仔，將自家所做个指示孻仔。佢愛將比這還較大个事指示孻仔，俾你等感覺希奇。</verse>
				<verse number="21">阿爸樣般使死人復活，賜生命給佢等；共樣，孻仔也愛照自家个意思賜生命給人。</verse>
				<verse number="22">阿爸自家毋審判人；佢將審判个權柄交給孻仔，</verse>
				<verse number="23">為到愛使人攏總尊敬孻仔，像尊敬阿爸一樣。毋尊敬孻仔个，就係毋尊敬差佢來个阿爸。</verse>
				<verse number="24">「𠊎實在㧯你等講，聽𠊎个話、又信該『差𠊎來个』，就有永遠个生命。佢毋會受定罪，係已經出死入生了。</verse>
				<verse number="25">𠊎實在㧯你等講，時間會到了，這下就係，死人會聽到上帝孻仔个聲；該兜聽從个，會得到生命。</verse>
				<verse number="26">像阿爸本身係生命个源頭，佢也使孻仔成做生命个源頭。</verse>
				<verse number="27">佢又將審判个權柄賜給孻仔，因為佢就係人子。</verse>
				<verse number="28">你等毋好為到這個來希奇；因為時間會到，所有在墳墓底背个人攏總會聽到佢个聲音，</verse>
				<verse number="29">也會對墳墓底背出來：行善个，會復活來得到生命；作惡个，會復活來受定罪。</verse>
				<verse number="30">「𠊎靠自家不能做麼介；𠊎照上帝个旨意來審判；𠊎个審判也係公當个，因為𠊎毋係追求自家所愛个，只有行『差𠊎來个』个旨意。</verse>
				<verse number="31">「假使𠊎為自家做證，𠊎个話就毋罅使人相信。</verse>
				<verse number="32">總係，有另外一個也為𠊎做證个，𠊎知佢為𠊎所做个見證係真實个。</verse>
				<verse number="33">你等識派人去見 約翰 ，佢就為真理來做證。</verse>
				<verse number="34">其實，𠊎並無需要人个見證；𠊎講起這個事，係愛使你等得救。</verse>
				<verse number="35">約翰 可比一盞𤏸等又照明个燈，你等願意暫時享受佢个光明。</verse>
				<verse number="36">總係𠊎有比 約翰 還較有力个證據，就係𠊎所做个工作，係吾爸交給𠊎愛完成个。這兜工作可以證明阿爸有差派𠊎。</verse>
				<verse number="37">差派𠊎來个阿爸也為𠊎做證。你等從來毋識聽過佢个聲，毋識見過佢个形像，</verse>
				<verse number="38">也無將佢个話放在心中，因為你等毋信佢所差來个。</verse>
				<verse number="39">你等研究聖經，認為在該底背可以尋到永遠个生命；其實聖經个話就係為𠊎做見證个！</verse>
				<verse number="40">總係，你等還毋肯就近𠊎來得到生命。</verse>
				<verse number="41">「𠊎毋係追求人个稱讚。</verse>
				<verse number="42">總係，𠊎對你等盡了解，你等並毋係正經敬愛上帝 。</verse>
				<verse number="43">𠊎奉吾爸个名來，你等毋接納𠊎；若有人奉自家个名來，你等反轉接納佢。</verse>
				<verse number="44">你等盡愛彼此接受讚美，總係毋求對獨一無二个上帝該位來个稱讚；恁樣，你等樣會信𠊎呢？</verse>
				<verse number="45">毋好認為𠊎會在吾爸个面前告你等；愛告你等个就係你等所仰望个 摩西 。</verse>
				<verse number="46">假使你等真實相信 摩西 ，你等就會信𠊎，因為佢个書有記載𠊎个事。</verse>
				<verse number="47">你等既然毋信佢所寫个，樣會信𠊎个話呢？」</verse>
			</chapter>
			<chapter number="6">
				<verse number="1">後來，耶穌渡過 加利利 湖 (又安到 提比哩亞 湖)。</verse>
				<verse number="2">有一大群人跈等佢，因為佢等看過佢醫病个神蹟。</verse>
				<verse number="3">耶穌上山，同厥學生共下坐等。</verse>
				<verse number="4">該時 猶太 人个𨃟過節會到了。</verse>
				<verse number="5">耶穌昂頭，看到一大群人來到佢个面前，就對 腓力 講：「𠊎等愛去㖠位買食物，俾這兜人食飽呢？」</verse>
				<verse number="6">(佢講這個話係愛試驗 腓力 ；佢自家已經知愛樣般辦理。)</verse>
				<verse number="7">腓力 回答：「就係用兩百隻銀錢 去買餅仔，每一個人分一些些仔，也係毋罅！」</verse>
				<verse number="8">另外一個學生，就係 西門‧彼得 个老弟 安德烈 ，㧯耶穌講：</verse>
				<verse number="9">「這位有一個細阿哥仔帶五隻大麥餅㧯兩尾魚仔，總係樣會罅分給恁多人呢？」</verse>
				<verse number="10">耶穌吩咐佢等講：「喊大家坐落去。」 (該地方有盡多草。) 大家就坐落去，單淨男人約有五千儕。</verse>
				<verse number="11">耶穌拿起餅仔來，感謝上帝後，就分給坐等个人；魚仔也係恁樣分；大家全部得到所需要个。</verse>
				<verse number="12">佢等食飽以後，耶穌吩咐學生講：「將所賸个餅碎仔全部拈起來，毋好打喪。」</verse>
				<verse number="13">佢等就將五隻大麥餅个碎仔，就係大家食賸个，拈起來，總共裝滿十二隻籃仔。</verse>
				<verse number="14">大家看到耶穌所行个神蹟，就講：「這個人一定係該愛來世間个先知！」</verse>
				<verse number="15">耶穌知佢等愛拉佢，強迫佢做王，佢自家一個人又閃到山頂去。</verse>
				<verse number="16">臨暗仔，耶穌个學生來到湖滣，</verse>
				<verse number="17">上船，向湖對面个 迦百農 出發。該時天已經暗，耶穌還吂來到佢等該位。</verse>
				<verse number="18">忽然起狂風，波浪盡激。</verse>
				<verse number="19">學生搖槳，大約行五六公里，看到耶穌在湖面向船行等過來，就盡著驚。</verse>
				<verse number="20">耶穌㧯佢等講：「係𠊎，毋使驚！」</verse>
				<verse number="21">佢等就歡歡喜喜接佢上船；船即時就到目的地。</verse>
				<verse number="22">第二日，留在湖對面个一大群人想到原來該位只有一隻細船仔；佢等知耶穌並無同學生共下上船，該兜學生係自家離開个。</verse>
				<verse number="23">有幾隻對 提比哩亞 來个細船仔停在湖邊，就係主感謝後分餅仔給大家食个地方个附近。</verse>
				<verse number="24">這群人發現耶穌㧯厥學生無在該位，就上船去 迦百農 尋佢。</verse>
				<verse number="25">佢等在湖个對面尋到耶穌，問佢講：「先生，你幾時來到這位哪？」</verse>
				<verse number="26">耶穌應講：「𠊎實在㧯你等講，你等尋𠊎，毋係因為看到神蹟，係因為有食到餅仔，又得到飽足。</verse>
				<verse number="27">毋好為到會腐爛个食物操勞，愛為該存到永生个食物打拚。這食物就係人子愛賜給你等个，因為人子係阿爸上帝所印證个。」</verse>
				<verse number="28">佢等就問講：「𠊎等愛做麼介正算係做上帝个工作哪？」</verse>
				<verse number="29">耶穌應講：「信上帝所差來个，這就係上帝愛你等做个工作。」</verse>
				<verse number="30">佢等又問講：「恁樣，你愛行麼介神蹟給𠊎等看來信你哪？你个工作到底係麼介哪？</verse>
				<verse number="31">𠊎等个祖先在曠野有食過嗎哪，像聖經所記載个：『佢將對天頂來个糧食賜給佢等食。』」</verse>
				<verse number="32">耶穌講：「𠊎實在㧯你等講，毋係 摩西 賜給你等對天頂來个糧食；只有吾爸正賜給你等該對天頂來个真糧食。</verse>
				<verse number="33">因為上帝所賜个糧食就係該對天頂降臨、將生命賜給世界个。」</verse>
				<verse number="34">佢等講：「先生，請常常將這糧食賜給𠊎等！」</verse>
				<verse number="35">耶穌㧯佢等講：「𠊎就係生命个糧食。到𠊎這位來个，永遠毋會飢；信𠊎个，永遠毋會渴。</verse>
				<verse number="36">總係𠊎識㧯你等講，你等已經看到𠊎，還係毋信。</verse>
				<verse number="37">凡係阿爸所賜給𠊎个人攏總會到𠊎這位來。到𠊎這位來个，𠊎絕對毋會拒絕佢；</verse>
				<verse number="38">因為𠊎對天頂下來，毋係愛照𠊎自家个意思行事，係愛實行該『差𠊎來个』个旨意。</verse>
				<verse number="39">該『差𠊎來个』个旨意，就係愛𠊎保守佢所賜給𠊎个人，連一個也毋會失落，反轉，𠊎在末日愛使佢等復活。</verse>
				<verse number="40">因為阿爸个旨意係愛使所有看到孻仔並信佢个人得到永遠个生命；在末日，𠊎愛使佢等復活。」</verse>
				<verse number="41">猶太 人因為耶穌講：「𠊎係對天頂降下來个糧食」，就暗中議論講：</verse>
				<verse number="42">「這個人敢毋係 約瑟 个孻仔耶穌嗎？𠊎等認識佢个爺𡟓。這下，佢樣敢講佢係對天頂降下來个！」</verse>
				<verse number="43">耶穌講：「你等莫暗中議論。</verse>
				<verse number="44">若毋係該差𠊎來个阿爸吸引人，無人會到𠊎這位來；到𠊎這位來个，在末日𠊎愛使佢復活。</verse>
				<verse number="45">先知个書記載講：『逐個人會得到上帝个教示。』所有聽從阿爸又接受厥教示个，攏總愛到𠊎這位來。</verse>
				<verse number="46">這毋係講有麼人看過阿爸；只有對上帝該位來个正看過阿爸。</verse>
				<verse number="47">𠊎實在㧯你等講，信个人就有永遠个生命。</verse>
				<verse number="48">𠊎就係生命个糧食。</verse>
				<verse number="49">你等个祖先在曠野食過嗎哪，還係死掉；</verse>
				<verse number="50">總係該對天頂降下來个糧食係愛使食个人毋會死。</verse>
				<verse number="51">𠊎就係對天頂降下來、該賜生命个糧食；食這糧食个人永遠毋會死。𠊎所愛賜給人个糧食就係𠊎个肉，係愛使世間人得到生命个。」</verse>
				<verse number="52">這個話在 猶太 人當中引起激烈个爭論。佢等講：「這個人樣般做得用自家个肉給𠊎等食呢？」</verse>
				<verse number="53">耶穌㧯佢等講：「𠊎實在㧯你等講，你等若毋食人子个肉，啉佢个血，你等就毋會有真个生命。</verse>
				<verse number="54">食𠊎个肉、啉𠊎个血个，就有永遠个生命；在末日𠊎愛使佢復活。</verse>
				<verse number="55">𠊎个肉係正經做得食个，𠊎个血係正經做得啉个。</verse>
				<verse number="56">該食𠊎个肉、啉𠊎个血个，佢就在𠊎底背，𠊎也在佢底背，兩儕成做一體。</verse>
				<verse number="57">永生个阿爸有差派𠊎，𠊎也因為佢來生；共樣，食吾肉个人也愛因為𠊎來生。</verse>
				<verse number="58">這就係對天頂降下來个糧食。這糧食毋係像你等个祖先食過个，佢等食嗎哪，還係死掉；總係食這糧食个人會生到永遠。」</verse>
				<verse number="59">這兜話係耶穌在 迦百農 會堂教示人講个。</verse>
				<verse number="60">好多學生聽到這兜話，就講：「這教訓恁硬，麼人聽得入耳？」</verse>
				<verse number="61">耶穌知厥學生暗中議論這件事，就對佢等講：「這話害你等信心搖動係麼？</verse>
				<verse number="62">若係你等看到人子升上去佢原來个所在，又樣般呢？</verse>
				<verse number="63">給人生命个係聖靈，肉體係無麼介路用个；𠊎㧯你等講个話會使你等得到賜生命个靈 。</verse>
				<verse number="64">總係你等當中有人毋信。」 (耶穌早就知㖠兜人毋信，麼人會出賣佢。)</verse>
				<verse number="65">佢講：「所以，𠊎識㧯你等講，若毋係吾爸个恩賜，無人會到𠊎這位來。」</verse>
				<verse number="66">對該時起，跈佢个人當中有好多人退出去，無愛再跈佢共下去。</verse>
				<verse number="67">耶穌就問厥十二個學生講：「你等哪？你等也愛退出嗎？」</verse>
				<verse number="68">西門‧彼得 應講：「主啊，你有永生个話，𠊎等還愛跈麼人呢？</verse>
				<verse number="69">𠊎等信，也知你就係對上帝該位來个聖者。」</verse>
				<verse number="70">耶穌講：「𠊎敢毋係揀選你等十二個人嗎？總係你等當中有一個係魔鬼！」</verse>
				<verse number="71">耶穌這句話係指 加略 人 西門 个孻仔 猶大 講个。 猶大 係十二個學生个一個，就係後來出賣耶穌个人。</verse>
			</chapter>
			<chapter number="7">
				<verse number="1">事後，耶穌在 加利利 省來來去去，無愛去 猶太 地區，因為 猶太 人个領袖想愛殺害佢。</verse>
				<verse number="2">猶太 人个搭寮仔節會到了，</verse>
				<verse number="3">所以耶穌个老弟㧯佢講：「你愛離開這位，去 猶太 ，好俾若學生看你所行个奇事。</verse>
				<verse number="4">人愛出名，就毋好在暗中做事。你既然能行這兜奇事，就應該在世人面前表現出來！」</verse>
				<verse number="5">(原來連厥老弟也無信佢。)</verse>
				<verse number="6">耶穌對佢等講：「你等隨時盡方便；總係𠊎个時機還吂成熟。</verse>
				<verse number="7">世人毋會怨恨你等，總係會怨恨𠊎，因為𠊎常常指證佢等个作為係邪惡个。</verse>
				<verse number="8">你等自家去過節，𠊎這下毋去 ，因為𠊎个時機還吂成熟。」</verse>
				<verse number="9">耶穌㧯佢等講這兜話以後，還係留在 加利利 。</verse>
				<verse number="10">耶穌个老弟去過節以後，耶穌也跈等去。佢毋係公開去，係暗中去个。</verse>
				<verse number="11">節期中， 猶太 人个領袖逐所在尋耶穌，緊問：「佢在㖠位？」</verse>
				<verse number="12">眾人為到佢議論紛紛；有兜講：「佢係一個好人！」有兜講：「毋係！佢在煽動眾人。」</verse>
				<verse number="13">總係大家毋敢公開談論佢，因為佢等驚 猶太 人个領袖。</verse>
				<verse number="14">節期過掉一半，耶穌就上去聖殿教訓人。</verse>
				<verse number="15">猶太 人个領袖感覺盡奇怪，講：「這個人無受麼介教育，樣會恁有學問啊？」</verse>
				<verse number="16">耶穌講：「𠊎个教示毋係𠊎自家个，係對該差𠊎个上帝來个。</verse>
				<verse number="17">人若係決心愛行上帝个旨意，就會知𠊎个教示係對上帝來个，抑係照𠊎自家个意思講个。</verse>
				<verse number="18">照自家个意思講話个，係想愛榮光自家；唯有想愛榮光該差佢來个，正係真實無虛假个人。</verse>
				<verse number="19">摩西 毋係將法律交給你等嗎？總係你等無一儕遵守法律。你等做麼介想愛㓾𠊎呢？」</verse>
				<verse number="20">眾人回答講：「你被鬼附身了！麼人想愛㓾你哪？」</verse>
				<verse number="21">耶穌講：「𠊎在安息日行一個神蹟，你等全部看做怪事。</verse>
				<verse number="22">摩西 吩咐你等行割禮 (其實割禮毋係對 摩西 ，係對先祖開始个)，你等就在安息日為人行割禮。</verse>
				<verse number="23">若係人在安息日行割禮，目的係維護 摩西 个法律，恁樣，𠊎在安息日使一個人完全恢復健康，你等做麼介責備𠊎呢？</verse>
				<verse number="24">毋好照外表斷是非，愛照公當个標準來判斷正著。」</verse>
				<verse number="25">有兜 耶路撒冷 人講：「這個人敢毋係佢等想愛㓾个嗎？</verse>
				<verse number="26">你看，佢公開講話，卻無人出來反駁佢！敢講𠊎等个領袖確認佢就係基督嗎？</verse>
				<verse number="27">事實上，基督出現个時，無人會知佢係對㖠位來个，總係這個人个來歷𠊎等非常清楚。」</verse>
				<verse number="28">當時，耶穌在聖殿底背教訓人，佢大聲宣告講：「你等正經認識𠊎，知𠊎對㖠位來嗎？𠊎來，並毋係照自家个意思。該『差𠊎來个』係真實个。你等毋認識佢，</verse>
				<verse number="29">總係𠊎認識佢；因為𠊎對佢該位來，係佢差派𠊎。」</verse>
				<verse number="30">佢等就想愛捉佢，總係無人下手，因為佢个時機還吂到。</verse>
				<verse number="31">眾人當中也有好多人信佢；佢等講：「基督來个時，會比這個人行還較多个神蹟嗎？」</verse>
				<verse number="32">法利賽人聽到眾人恁樣紛紛議論耶穌个事，佢等㧯祭司長就派警衛去捉耶穌。</verse>
				<verse number="33">耶穌講：「𠊎還有多少仔時間同你等共下，然後愛倒轉『差𠊎來个』該位去。</verse>
				<verse number="34">你等會尋𠊎，總係尋毋到；因為𠊎愛去个所在，你等做毋得去。」</verse>
				<verse number="35">該兜 猶太 人个領袖彼此問講：「這個人想愛去㖠位，使𠊎等尋佢毋到呢？敢講佢愛到分散在 希臘 人中个 猶太 僑民該位去，教 希臘 人係麼？</verse>
				<verse number="36">佢講『你等會尋𠊎，總係尋毋到』又講『𠊎愛去个所在，你等做毋得去』，這個話係麼介意思呢？」</verse>
				<verse number="37">節期个最尾一日，就係最莊嚴个一日，耶穌企起來，大聲宣告講：「人若係嘴燥，就應該到𠊎這位來啉。</verse>
				<verse number="38">信𠊎个人，照聖經所講 ：『對厥內肚會有江河流出生命个水。』」</verse>
				<verse number="39">耶穌這個話係指信佢个人所愛接受个聖靈講个。該時聖靈吂有降臨，因為耶穌還吂得到榮光。</verse>
				<verse number="40">眾人當中有盡多人聽到這個話，就講：「這個人確實係該先知！」</verse>
				<verse number="41">也有人講：「佢係基督！」 總係有人講：「基督樣會對 加利利 來？</verse>
				<verse number="42">聖經敢毋係記載，基督係 大衛 个後代，愛降生在 大衛 个本鄉 伯利恆 嗎？」</verse>
				<verse number="43">眾人就為到耶穌紛爭。</verse>
				<verse number="44">有兜人想愛捉佢，總係無人下手。</verse>
				<verse number="45">該兜警衛倒轉去見祭司長㧯法利賽人；佢等問：「做麼介無將佢帶轉來呢？」</verse>
				<verse number="46">該兜警衛應講：「從來吂識有人像佢恁樣講話个！」</verse>
				<verse number="47">法利賽人講：「你等也被佢騙走係麼？</verse>
				<verse number="48">𠊎等个領袖抑係法利賽人敢有信佢个嗎？</verse>
				<verse number="49">這兜無明白 摩西 法律个百姓係受咒詛个！」</verse>
				<verse number="50">佢等當中有 尼哥德慕 ，佢以前識去見耶穌。佢提醒佢等，講：</verse>
				<verse number="51">「照𠊎等个法律，吂審問抑係查明人所做个事，敢做得定佢个罪嗎？」</verse>
				<verse number="52">佢等講：「敢講你也係 加利利 人嗎？你去查聖經看，就知 加利利 毋會出先知。」</verse>
			</chapter>
			<chapter number="8">
				<verse number="1">總係耶穌去 橄欖 山。</verse>
				<verse number="2">第二日打早，佢倒轉去聖殿；眾人全部來就近佢，佢就坐下來，開始教佢等。</verse>
				<verse number="3">經學教師㧯法利賽人帶一個婦人家來；姖係在行姦淫个時節被人捉到个。佢等迫姖企在當中，</verse>
				<verse number="4">就對耶穌講：「先生，這個婦人家行姦淫个時被人捉到。</verse>
				<verse number="5">摩西 在法律中命令𠊎等，這種个婦人家應該用石頭㧹死。你講愛樣般？」</verse>
				<verse number="6">佢等想愛用這個話害耶穌，尋把柄告佢。耶穌彎腰用手指在地上寫字。</verse>
				<verse number="7">佢等繼續問無停，耶穌就企直起來，對佢等講：「你等當中麼人毋識犯罪个，就做得先用石頭㧹姖。」</verse>
				<verse number="8">講了這個話，佢又彎腰在地上寫字。</verse>
				<verse number="9">佢等聽到這個話，就對老个開始，一個一個退走，只有賸耶穌㧯企在佢面前个婦人家。</verse>
				<verse number="10">耶穌企直起來，問姖講：「婦人家，佢等走去㖠位？無人留下來定你个罪係麼？」</verse>
				<verse number="11">姖講：「先生，無。」 耶穌講：「好，𠊎也毋定你个罪。轉去，毋好再犯罪！」 ]</verse>
				<verse number="12">耶穌又對大家講：「𠊎係世間个光；跈𠊎个會得到生命个光，絕對毋會在烏暗中行。」</verse>
				<verse number="13">法利賽人對佢講：「你為你自家做證；你个見證就無效。」</verse>
				<verse number="14">耶穌講：「就算𠊎為自家做證，𠊎个見證也係真實个；因為𠊎知𠊎對㖠位來，愛去㖠位。你等毋知𠊎對㖠位來，愛去㖠位。</verse>
				<verse number="15">你等係用人个標準來判斷人；總係𠊎毋判斷人。</verse>
				<verse number="16">假使𠊎判斷人，𠊎个判斷也係正確个；因為𠊎毋係自家判斷，係該差𠊎來个阿爸同𠊎共下判斷。</verse>
				<verse number="17">你等个法律書記載講，有兩個人做證，佢等个見證符合，就算有效。</verse>
				<verse number="18">𠊎為自家做見證；該差𠊎來个阿爸也為𠊎做證。」</verse>
				<verse number="19">佢等就問佢講：「若爸在㖠位？」 耶穌應講：「你等毋識𠊎，也毋識吾爸；假使你等識𠊎，就會認識吾爸。」</verse>
				<verse number="20">這兜話係耶穌在聖殿个銀庫該位教訓人个時講个。當時無人捉佢，因為佢个時機還吂到。</verse>
				<verse number="21">耶穌又㧯佢等講：「𠊎愛離開，你等也會尋𠊎，總係你等會死在自家个罪中。𠊎去个地方，你等做毋得去。」</verse>
				<verse number="22">猶太 人个領袖就講：「佢講『𠊎去个地方，你等做毋得去』，敢講佢愛自殺係麼？」</verse>
				<verse number="23">耶穌講：「你等係對地上來个，𠊎係對天頂來个；你等屬這世界，𠊎毋係屬這世界。</verse>
				<verse number="24">所以𠊎講，你等會死在自家个罪中。假使你等毋信𠊎就係該『自有永有』个，你等就會死在自家个罪中。」</verse>
				<verse number="25">佢等就問：「你到底係麼人？」 耶穌應講：「𠊎一開始就㧯你等講。</verse>
				<verse number="26">關係你等，有盡多事𠊎應當愛講，應當愛斷。總係，該『差𠊎來个』係真實可靠个；𠊎只有將對佢該位聽到个㧯世間人講。」</verse>
				<verse number="27">佢等無明白耶穌所講个係關係阿爸个事。</verse>
				<verse number="28">所以耶穌㧯佢等講：「你等將人子擎起來以後，你等正會知𠊎就係該『自有永有』个，並知𠊎無靠自家做麼介，𠊎只有講阿爸所教𠊎个。</verse>
				<verse number="29">該差派𠊎來个㧯𠊎同在；佢無放𠊎孤單，因為𠊎一直行佢所歡喜个事。」</verse>
				<verse number="30">盡多人聽到耶穌這兜話就信佢。</verse>
				<verse number="31">耶穌對信佢个 猶太 人講：「你等若常常遵守𠊎个教訓，就正經係𠊎个學生；</verse>
				<verse number="32">你等會認識真理，真理會使你等得到自由。」</verse>
				<verse number="33">佢等回答講：「𠊎等係 亞伯拉罕 个子孫；𠊎等從來毋識做過麼人个奴僕。你講『你等會得到自由』，這句話係麼介意思呢？」</verse>
				<verse number="34">耶穌對佢等講：「𠊎實在㧯你等講，每一個犯罪个人就係罪个奴僕。</verse>
				<verse number="35">奴僕在家庭中無一定像孻仔一直屬於家庭。</verse>
				<verse number="36">假使上帝个孻仔使你等得到自由，你等就正經係自由人。</verse>
				<verse number="37">𠊎知你等係 亞伯拉罕 个子孫；總係你等還想愛㓾𠊎，因為你等毋接受𠊎个教訓。</verse>
				<verse number="38">𠊎所講个係吾爸指示𠊎个，你等所做个係你等个祖先㧯你等講个。」</verse>
				<verse number="39">佢等回答講：「𠊎等个祖先就係 亞伯拉罕 。」 耶穌講：「假使你等正經係 亞伯拉罕 个子孫，你等个行事一定會㧯 亞伯拉罕 共樣。</verse>
				<verse number="40">𠊎只有將𠊎對上帝該位聽到个真理㧯你等講，你等卻想愛㓾𠊎。 亞伯拉罕 毋識做過這種个事啊！</verse>
				<verse number="41">你等係做你等个阿爸所做个事。」 佢等應講：「上帝係𠊎等惟一个阿爸；𠊎等並毋係私生子啊！」</verse>
				<verse number="42">耶穌對佢等講：「上帝若真實係你等个阿爸，你等一定會惜𠊎；因為𠊎係對上帝該位來到這位个。𠊎毋係自家來个，係佢差𠊎來个。</verse>
				<verse number="43">你等樣毋會明白𠊎个話呢？因為𠊎个話，你等聽毋入耳。</verse>
				<verse number="44">你等係魔鬼个子女，偏偏愛照你等阿爸个私慾行事。對古早以來，佢一直係謀害人个，毋識企在真理這片，因為佢根本無真理。佢講花撩係佢个本性；因為佢本來就係花撩牯，也係一切虛假个源頭。</verse>
				<verse number="45">就係因為𠊎講真理，所以你等正毋信𠊎。</verse>
				<verse number="46">你等當中麼人能指證𠊎有罪呢？既然𠊎係講真理，你等樣般毋信𠊎呢？</verse>
				<verse number="47">所有屬上帝个子女，定著會聽上帝个話。你等毋聽，因為你等毋係屬上帝个。」</verse>
				<verse number="48">猶太 人个領袖問耶穌：「𠊎等講你係 撒馬利亞 人，又被鬼附身，敢講毋著嗎？」</verse>
				<verse number="49">耶穌講：「𠊎並無被鬼附身；𠊎尊敬吾爸，你等卻侮辱𠊎。</verse>
				<verse number="50">𠊎無追求自家个榮光，總係有一位代𠊎尋求、為𠊎主持公道个。</verse>
				<verse number="51">𠊎實在㧯你等講，遵守吾教訓个人一定永遠毋會死。」</verse>
				<verse number="52">猶太 人个領袖對佢講：「這下𠊎等確實知你係被鬼附身个！ 亞伯拉罕 已經死掉，該兜先知也死掉，總係你講：『遵守吾教訓个人一定永遠毋會死。』</verse>
				<verse number="53">大家轉屋下去； 敢講你比𠊎等个祖先 亞伯拉罕 還較偉大嗎？ 亞伯拉罕 已經死掉，該兜先知也已經死掉，你看自家算麼介？」</verse>
				<verse number="54">耶穌應講：「假使𠊎榮光自家，𠊎个光榮就無麼介價值。榮光𠊎个係吾爸，就係你等所講係你等个上帝。</verse>
				<verse number="55">你等從來毋識佢，總係𠊎認識佢。假使𠊎講𠊎毋識佢，𠊎就㧯你等共樣係講花撩个。事實上，𠊎認識佢，也遵守佢个教訓。</verse>
				<verse number="56">你等个祖先 亞伯拉罕 識歡歡喜喜仰望𠊎來个日仔；佢有看到，也非常快樂。」</verse>
				<verse number="57">猶太 人个領袖對佢講：「你還吂五十歲，你見過 亞伯拉罕 嗎？」</verse>
				<verse number="58">耶穌應講：「𠊎實在㧯你等講， 亞伯拉罕 出世以前，𠊎就係該『自有永有』个。」</verse>
				<verse number="59">因為恁樣，佢等拿石頭愛㧹佢；總係耶穌閃走，離開聖殿。</verse>
			</chapter>
			<chapter number="9">
				<verse number="1">耶穌在路上看到一個出世就瞙目个人。</verse>
				<verse number="2">厥學生問佢講：「先生，這個人出世就瞙目，係麼人个罪造成个？係佢自家个罪，抑係厥爺𡟓个罪呢？」</verse>
				<verse number="3">耶穌應講：「佢个瞙目㧯自家抑係爺𡟓个罪攏總無關係，係愛在厥身上彰顯上帝个作為。</verse>
				<verse number="4">日時頭，𠊎等應當愛做該『差𠊎來个』个工作；暗晡時一到，就無人能工作。</verse>
				<verse number="5">𠊎在世間个時，就係世間个光。」</verse>
				<verse number="6">講這個話以後，耶穌呸口潾在地上，用口潾攪泥，膏瞙目个目珠，</verse>
				<verse number="7">㧯佢講：「你去 西羅亞 个水池洗。」 ( 西羅亞 个意思係「奉差派」。) 佢就去洗，倒轉來个時，已經看得到了。</verse>
				<verse number="8">佢个鄰舍㧯該兜常常看到佢討食个人講：「這個人毋係平常坐在這位討食个嗎？」</verse>
				<verse number="9">有兜講：「就係佢！」也有兜講：「毋係佢，㧯佢相像定定。」 該人自家講：「係𠊎。」</verse>
				<verse number="10">佢等問佢講：「若目珠樣般看得到呢？」</verse>
				<verse number="11">佢應講：「有一個名安到耶穌个，用湳泥膏𠊎个目珠，㧯𠊎講：『你去 西羅亞 个水池洗。』𠊎就去，一洗就看得到。」</verse>
				<verse number="12">佢等問講：「該人在㖠位？」 佢應講：「𠊎毋知。」</verse>
				<verse number="13">佢等帶該頭擺瞙目个人去見法利賽人。</verse>
				<verse number="14">耶穌攪泥醫好厥目珠，該日係安息日。</verse>
				<verse number="15">法利賽人又查問該人係樣般看得到个。佢㧯佢等講：「佢用湳泥膏𠊎个目珠，𠊎一洗就看得到。」</verse>
				<verse number="16">有兜法利賽人講：「做這個事个人無可能係對上帝該位來个，因為佢無遵守安息日个規定。」 另外有兜人講：「有罪个人樣會行恁樣个神蹟呢？」佢等中間就發生紛爭。</verse>
				<verse number="17">所以，該兜法利賽人又問瞙目个人講：「既然佢醫好若目珠，你講佢係樣般个人？」 佢應講：「佢係一個先知。」</verse>
				<verse number="18">該兜 猶太 人个領袖毋肯信佢頭擺係瞙目个，這下已經看得到；等到將佢个爺𡟓尋來，</verse>
				<verse number="19">佢等就問講：「這係若孻仔麼？你等毋係講佢一出世就瞙目嗎？恁樣，這下樣會看得到呢？」</verse>
				<verse number="20">佢个爺𡟓應講：「佢係𠊎等个孻仔，𠊎等也知佢一出世就瞙目。</verse>
				<verse number="21">佢這下樣般看得到，係麼人醫好厥目珠，𠊎等就毋知。佢已經大了，你等去問佢，佢自家會講！」</verse>
				<verse number="22">佢个爺𡟓恁樣講，係因為驚 猶太 人个領袖；當時 猶太 人个領袖已經講好，假使有人承認耶穌係基督，就愛將佢逐出會堂。</verse>
				<verse number="23">所以佢个爺𡟓應講：「佢已經大了，你等去問佢！」</verse>
				<verse number="24">佢等再一擺將該出世就瞙目个人喊來，對佢講：「在上帝个面前，你一定愛講實話！𠊎等知該隻人係一個罪人。」</verse>
				<verse number="25">佢應講：「佢係毋係罪人，𠊎毋知；總係𠊎知一項事：𠊎本來係瞙目个，這下看得到！」</verse>
				<verse number="26">佢等問講：「佢對你做麼介？佢樣般醫好若目珠？」</verse>
				<verse number="27">佢應講：「𠊎㧯你等講過，你等毋愛聽。做麼介這下又愛聽呢？敢講你等也想愛做厥學生係麼？」</verse>
				<verse number="28">佢等就罵佢講：「你正係該隻人个學生！𠊎等係 摩西 个學生！</verse>
				<verse number="29">𠊎等知上帝識㧯 摩西 講過話；總係該隻人，𠊎等根本毋知佢係對㖠位來个！」</verse>
				<verse number="30">佢應講：「這就奇怪了！佢醫好𠊎个目珠，總係你等毋知佢係對㖠位來个！</verse>
				<verse number="31">𠊎等知上帝毋愛聽罪人个祈求；佢只有聽該敬拜佢、並實行佢旨意个人。</verse>
				<verse number="32">創造世界以來，出世就瞙目个，吂識聽過有人醫好厥目珠。</verse>
				<verse number="33">這個人若毋係對上帝來个，佢麼介都無法度做。」</verse>
				<verse number="34">佢等責備佢講：「你這出世在罪惡中个東西，樣般敢教訓𠊎等！」佢等就將佢逐出會堂。</verse>
				<verse number="35">耶穌聽講佢等將佢逐出會堂个事，就尋到佢，問佢講：「你信人子麼？」</verse>
				<verse number="36">佢應講：「先生，請㧯𠊎講麼人係人子，𠊎就信佢！」</verse>
				<verse number="37">耶穌㧯佢講：「你已經看到佢，這下㧯你講話个就係佢。」</verse>
				<verse number="38">佢講：「主啊，𠊎信！」就拜耶穌。</verse>
				<verse number="39">耶穌講：「𠊎來世間个目的係愛審判，俾瞙目个看得到，看得到个反轉變做瞙目。」</verse>
				<verse number="40">在厥身邊，有兜法利賽人聽到這個話，就問佢講：「敢講你將𠊎等也看做瞙目个係麼？」</verse>
				<verse number="41">耶穌應講：「你等若係瞙目个，你等就無罪；這下你等講『𠊎等看得到』，恁樣，你等還係在罪中。」</verse>
			</chapter>
			<chapter number="10">
				<verse number="1">耶穌又講：「𠊎實在㧯你等講，入羊欄，無對門，反轉對別位𨃟過去个，就係賊仔，係強盜。</verse>
				<verse number="2">對門入去个，正係羊个牧者。</verse>
				<verse number="3">掌門个為佢開門；佢个羊認識佢个聲。佢照名仔喊自家个羊，帶牠兜出來。</verse>
				<verse number="4">佢將自家个羊全部帶出來，就在牠兜个頭前行；佢个羊仔跈等佢，因為牠兜認識佢个聲。</verse>
				<verse number="5">牠兜毋愛跈生份人，反轉會閃走，因為毋識生份人个聲。」</verse>
				<verse number="6">耶穌㧯佢等講這個比喻，總係佢等毋會明白佢所講个係麼介意思。</verse>
				<verse number="7">所以，耶穌又㧯佢等講：「𠊎實在㧯你等講，𠊎就係羊个門。</verse>
				<verse number="8">比𠊎先來个，全部係賊仔，係強盜；總係羊仔毋聽從佢等。</verse>
				<verse number="9">𠊎就係門；對𠊎入來个，一定會得救，自由出入，尋到草埔。</verse>
				<verse number="10">賊仔入來，就係愛偷，愛㓾，愛毀滅。𠊎來个目的係愛使𠊎个羊仔 得到生命，就係豐豐富富个生命。</verse>
				<verse number="11">「𠊎係好牧者；好牧者為到羊犧牲生命。</verse>
				<verse number="12">若係請來个工人，毋係牧者，羊仔也毋係佢个，佢一看到豺狼來，就放掉羊仔逃走；豺狼攻擊羊群，趕散牠兜。</verse>
				<verse number="13">工人逃走，因為佢係請來个，無關心羊群。</verse>
				<verse number="14">「𠊎係好牧者。像阿爸認識𠊎，𠊎也認識阿爸；共樣，𠊎認識𠊎个羊，𠊎个羊也認識𠊎。𠊎為到牠兜犧牲生命。</verse>
				<verse number="15"></verse>
				<verse number="16">𠊎還有其他个羊，無在這羊欄中；𠊎一定愛將牠兜尋轉來，牠兜也會聽𠊎个聲；兩群愛合做一群，同屬一個牧者。</verse>
				<verse number="17">「阿爸惜𠊎，因為𠊎甘願犧牲𠊎个生命，為到愛再得到生命。</verse>
				<verse number="18">無人能將𠊎个生命搶走，係𠊎自願犧牲个；𠊎有權犧牲，也有權再得到它。這係𠊎對吾爸領受个命令。」</verse>
				<verse number="19">猶太 人又為到這兜話引起紛爭。</verse>
				<verse number="20">佢等當中有好多人講：「佢被鬼附身！佢發癲了！樣愛使聽佢？」</verse>
				<verse number="21">也有兜人講：「被鬼附身个人無可能講出這種个話！鬼會醫好瞙目个目珠嗎？」</verse>
				<verse number="22">在 耶路撒冷 ，慶祝獻殿節个時到了；該時係冬天。</verse>
				<verse number="23">耶穌在聖殿个 所羅門 廊下行；</verse>
				<verse number="24">猶太 人圍等佢，對佢講：「你愛𠊎等疑狐到幾時呢？坦白㧯𠊎等講，你係基督麼？」</verse>
				<verse number="25">耶穌應講：「𠊎早就㧯你等講過，總係你等毋肯信。𠊎奉吾爸个名所做个事就係𠊎个證據；</verse>
				<verse number="26">總係你等毋信，因為你等毋係𠊎个羊。</verse>
				<verse number="27">𠊎个羊聽𠊎个聲；𠊎認識牠兜，牠兜也跈等𠊎。</verse>
				<verse number="28">𠊎賜佢等永遠个生命，佢等毋會滅亡；無人能將佢等對𠊎个手中搶走。</verse>
				<verse number="29">吾爸將佢等賜給𠊎，佢比麼介都還較大 ，無人能將佢等對阿爸个手中搶走。</verse>
				<verse number="30">阿爸㧯𠊎係一體。」</verse>
				<verse number="31">這時， 猶太 人又拿石頭愛㧹佢。</verse>
				<verse number="32">耶穌對佢等講：「𠊎識顯明阿爸愛𠊎做个多多善事給你等看；你等到底為㖠項事愛拿石頭㧹𠊎？」</verse>
				<verse number="33">猶太 人講：「𠊎等毋係為到善事來㧹你，係因為你侮辱上帝！你不過係人，還敢自家當做上帝！」</verse>
				<verse number="34">耶穌講：「你等个法律書敢毋係有寫，上帝識講：『你等係神』？</verse>
				<verse number="35">𠊎等知聖經个話係永遠毋會改變个。連該兜接受上帝真道个人，上帝也稱佢等做神；</verse>
				<verse number="36">𠊎係阿爸所揀選又差派來世間个；𠊎講𠊎係上帝个孻仔，你等樣般又講𠊎侮辱上帝呢？</verse>
				<verse number="37">若係𠊎無行吾爸个事，你等就毋使信𠊎；</verse>
				<verse number="38">若係𠊎有行，你等雖然毋信𠊎，也應當信𠊎所做个，好使你等確實知：阿爸在𠊎底背，𠊎也在阿爸底背。」</verse>
				<verse number="39">因為恁樣，佢等又想愛捉佢，總係佢對佢等个手中閃走。</verse>
				<verse number="40">耶穌又轉到 約旦 河个對面，到 約翰 頭擺行洗禮个所在，住在該位。</verse>
				<verse number="41">有盡多人來就近佢。佢等講：「 約翰 毋識行過神蹟，總係佢所講關係這人个話全部係確實个。」</verse>
				<verse number="42">在該位，有盡多人就信耶穌。</verse>
			</chapter>
			<chapter number="11">
				<verse number="1">有一個病人，名安到 拉撒路 ，住在 伯大尼 ； 馬利亞 㧯姖个阿姊 馬大 也住在這村莊。</verse>
				<verse number="2">(這 馬利亞 就係用香油膏主个腳，又用自家个頭那毛拭燥个。發病个 拉撒路 就係厥老弟。)</verse>
				<verse number="3">該兩姊妹喊人去見耶穌，講：「主啊，你所惜个朋友發病了。」</verse>
				<verse number="4">耶穌聽到這消息就講：「 拉撒路 毋會因為這個病來死；這件事發生係愛榮光上帝，使上帝个孻仔得到榮光。」</verse>
				<verse number="5">耶穌盡惜 馬大 㧯厥老妹，並 拉撒路 。</verse>
				<verse number="6">佢聽到 拉撒路 發病个消息後，又在所住个地方停兩日。</verse>
				<verse number="7">然後佢正㧯學生講：「𠊎等倒轉去 猶太 。」</verse>
				<verse number="8">厥學生講：「先生，前無幾久， 猶太 人愛拿石頭㧹你，你還想愛再去該位嗎？」</verse>
				<verse number="9">耶穌講：「日時頭毋係有十二點鐘嗎？人在日時頭行路就毋會跌倒，因為佢看得到這世間个光。</verse>
				<verse number="10">人在暗晡頭行路就會跌倒，因為佢無光。」</verse>
				<verse number="11">耶穌講這兜話以後，又講：「𠊎等个朋友 拉撒路 睡掉了；𠊎愛去喊佢䟘起來。」</verse>
				<verse number="12">學生講：「主啊，佢若係睡掉，就會好起來。」</verse>
				<verse number="13">其實，耶穌个意思係講 拉撒路 已經死掉；佢等恅到佢係講平常个睡目。</verse>
				<verse number="14">所以耶穌明明㧯佢等講：「 拉撒路 已經死掉；</verse>
				<verse number="15">為到你等个緣故，好在𠊎無在該位，恁樣你等就會信。這下，𠊎等來去佢該位。」</verse>
				<verse number="16">多馬 (偏名雙生仔) 對其他个學生講：「𠊎等共下來去，好同先生共下死！」</verse>
				<verse number="17">耶穌到 伯大尼 ，就知 拉撒路 已經在四日前埋掉。</verse>
				<verse number="18">伯大尼 離開 耶路撒冷 將近三公里遠；</verse>
				<verse number="19">有好多 猶太 人來看 馬大 㧯 馬利亞 ，為到姖等老弟个死來安慰姖等。</verse>
				<verse number="20">馬大 聽到耶穌會到了，就出去迎接佢；總係 馬利亞 留在屋肚坐等。</verse>
				<verse number="21">馬大 對耶穌講：「主啊，你若係在這位，吾老弟就毋會死！</verse>
				<verse number="22">總係𠊎知，就係這下，無論你對上帝求麼介，佢也會賜給你。」</verse>
				<verse number="23">耶穌㧯姖講：「若老弟一定會復活。」</verse>
				<verse number="24">馬大 講：「𠊎知，在末日復活个時節，佢會復活。」</verse>
				<verse number="25">耶穌講：「𠊎就係復活，就係生命。信𠊎个人，雖然死掉，一定會生過來；</verse>
				<verse number="26">生前信𠊎个人一定永遠毋會死。你相信這兜話麼？」</verse>
				<verse number="27">馬大 講：「主啊，𠊎信！𠊎信你就係該愛來世間个基督，上帝个孻仔。」</verse>
				<verse number="28">馬大 講了這個話，就轉去屋下，細聲㧯厥老妹 馬利亞 講：「先生來了，佢喊你。」</verse>
				<verse number="29">馬利亞 聽到這個話，即時就䟘起來，去見耶穌。</verse>
				<verse number="30">(該時，耶穌還吂入村莊，還在 馬大 迎接佢个地方。)</verse>
				<verse number="31">該兜到屋下來安慰 馬利亞 个 猶太 人，看到姖趕緊䟘起來出去，就跈等姖，恅到姖愛去墳墓該位噭。</verse>
				<verse number="32">馬利亞 來到耶穌該位，一看到佢，就伏在厥腳前，講：「主啊，你若係在這位，吾老弟就毋會死！」</verse>
				<verse number="33">耶穌看到 馬利亞 噭，又看到跈姖共下來个 猶太 人也噭，心中非常悲傷，強強會忍毋住，</verse>
				<verse number="34">就問佢等講：「你等將佢葬在㖠位？」 佢等講：「主啊，請你來看。」</verse>
				<verse number="35">耶穌噭出來。</verse>
				<verse number="36">所以 猶太 人講：「你看，佢還惜這個人噢！」</verse>
				<verse number="37">總係有兜人講：「佢既然醫好瞙目个目珠，敢無法度使 拉撒路 莫死嗎？」</verse>
				<verse number="38">耶穌心中又非常悲傷。佢來到墳墓前；該墓係一隻山窿，入口有一垤大石頭塞等。</verse>
				<verse number="39">耶穌吩咐講：「將石頭徙開！」 死人个阿姊 馬大 講：「主啊，佢已經埋掉四日，身屍都臭掉了！」</verse>
				<verse number="40">耶穌㧯姖講：「𠊎毋係識㧯你講，你若係信，就會看到上帝个榮光嗎？」</verse>
				<verse number="41">佢等就將石頭徙開。耶穌昂頭望天，講：「阿爸啊，𠊎感謝你，因為你已經聽𠊎。</verse>
				<verse number="42">𠊎知你時常聽𠊎；總係𠊎講這個話係為到塍頭這兜人，愛使佢等信係你差𠊎來个。」</verse>
				<verse number="43">講了，耶穌就大聲喊講：「 拉撒路 ，出來！」</verse>
				<verse number="44">該死人就出來；厥手腳纏等布條，面包等布仔。耶穌吩咐佢等講：「解開，俾佢行！」</verse>
				<verse number="45">盡多來看 馬利亞 个 猶太 人看到耶穌所做个事，就信佢。</verse>
				<verse number="46">總係也有兜人去見法利賽人，將耶穌所做个事對佢等報告。</verse>
				<verse number="47">所以，法利賽人㧯該兜祭司長召開議會，在會中講：「這個人行恁多神蹟，𠊎等愛樣般正好呢？</verse>
				<verse number="48">假使𠊎等由在佢㩢下去，大家都會信佢， 羅馬 人就會來毀滅𠊎等个聖殿 㧯民族！」</verse>
				<verse number="49">佢等當中有一個人，名安到 該亞法 ，係該年做大祭司个。佢講：「你等樣會恁戇！</verse>
				<verse number="50">一個人代全國个人死，免得全民族受消滅，這敢毋係對你等最有利益个事嗎？」</verse>
				<verse number="51">其實，這個話毋係佢自家个意思；總係，身為當年个大祭司，佢係在預言耶穌愛代 猶太 人死，</verse>
				<verse number="52">毋單淨代佢等死，也愛將散在各地方上帝个子女召集共下，合做一群。</verse>
				<verse number="53">對該時開始， 猶太 人个領袖就計劃愛殺害耶穌。</verse>
				<verse number="54">因為恁樣，耶穌無愛在 猶太 地區公開行動。佢到曠野附近一個安到 以法蓮 个村莊去，在該位同學生共下住。</verse>
				<verse number="55">猶太 人个𨃟過節會到了。節期以前，盡多人對鄉下上 耶路撒冷 去，愛在該位守潔淨禮。</verse>
				<verse number="56">佢等就緊尋耶穌；佢等聚集在聖殿个時，彼此問講：「你等認為樣般，佢敢毋會來過節嗎？」</verse>
				<verse number="57">該時，祭司長㧯法利賽人早已經下命令講：假使有人知耶穌在㖠位，一定愛報告，好俾佢等去捉佢。</verse>
			</chapter>
			<chapter number="12">
				<verse number="1">𨃟過節前六日，耶穌到 伯大尼 ，就係 拉撒路 住个地方 (耶穌識在這位喊 拉撒路 復活)。</verse>
				<verse number="2">在該位有人請耶穌食夜； 馬大 𢯭手招待， 拉撒路 㧯其他个人客同耶穌共下坐席。</verse>
				<verse number="3">這時， 馬利亞 拿一罐半斤重極寶貴个純哪噠香油，來膏耶穌个腳，又用自家个頭那毛拭；屋肚就充滿香味。</verse>
				<verse number="4">耶穌个一個學生，就係愛出賣佢个 加略 人 猶大 ，講：</verse>
				<verse number="5">「樣般毋拿這香油去賣三百隻銀錢 來分給窮苦人呢？」</verse>
				<verse number="6">(佢講這個話，並毋係正經關心窮苦人，係因為佢係賊仔；佢管錢，常常偷拿公款。)</verse>
				<verse number="7">總係耶穌講：「由在姖！這係姖留下來為到𠊎安葬該日用个。</verse>
				<verse number="8">窮苦人常常同你等共下，總係𠊎毋係常常同你等共下！」</verse>
				<verse number="9">一大群 猶太 人聽講耶穌在 伯大尼 ，就到佢該位去。佢等毋單淨係為到耶穌去，也係想愛看耶穌喊佢對死返生个 拉撒路 。</verse>
				<verse number="10">所以，該兜祭司長就計謀愛連 拉撒路 也共下㓾掉，</verse>
				<verse number="11">因為盡多 猶太 人為到佢个緣故離開佢等，去信耶穌。</verse>
				<verse number="12">第二日，歸大陣到 耶路撒冷 過節个人聽講耶穌愛入城。</verse>
				<verse number="13">佢等就拿等棕樹枝出去迎接佢，大聲喊講： 和散那！頌讚上帝！ 願上帝賜福給該奉主名來个！ 願上帝賜福給 以色列 个王！</verse>
				<verse number="14">耶穌尋到一隻細驢仔，騎上去，就像聖經所記載个：</verse>
				<verse number="15">鍚安 城个子女啊，毋使驚！ 看啊，你等个君王騎等細驢仔來了！</verse>
				<verse number="16">該時，厥學生無了解這事情个意思；到耶穌得到榮光以後，佢等正想到聖經个話就係指佢講个，佢等也正經照所預言个行。</verse>
				<verse number="17">耶穌喊 拉撒路 對死返生、對墳墓出來个時，該兜在場个人繼續將所看到个事傳開來。</verse>
				<verse number="18">這就係有恁多人去迎接耶穌个原因，因為佢等聽到佢所行个這神蹟。</verse>
				<verse number="19">法利賽人就彼此講：「𠊎等所做个全無效；看啊，全世界攏總跈佢去囉！」</verse>
				<verse number="20">節期中，到 耶路撒冷 做禮拜个人當中，有兜 希臘 人。</verse>
				<verse number="21">佢等來見 加利利 个 伯賽大 人 腓力 ，要求佢講：「先生，𠊎等想愛見耶穌。」</verse>
				<verse number="22">腓力 去㧯 安德烈 講，兩個人就共下去㧯耶穌講。</verse>
				<verse number="23">耶穌應講：「人子得榮耀个時節到了！</verse>
				<verse number="24">𠊎實在㧯你等講，一粒麥仔無落在泥肚來死，還係一粒；若係死掉，就會結子多多。</verse>
				<verse number="25">惜自家生命个人，會失落生命；甘願犧牲自家在這世間个生命个，佢个生命反轉會保存到永生。</verse>
				<verse number="26">愛服事𠊎个人，就愛跈𠊎；𠊎在㖠位，𠊎个僕人也愛在㖠位。服事𠊎个人，吾爸一定會重用佢。</verse>
				<verse number="27">「這下，𠊎个心盡愁，𠊎愛講麼介呢？𠊎敢愛求阿爸救𠊎脫離這個時節麼？總係，𠊎就係為這來个，一定愛經歷這苦難个時節。</verse>
				<verse number="28">阿爸啊，願你榮光你个名！」 當時，有聲音對天頂下來，講：「𠊎已經榮光𠊎个名，還愛再榮光！」</verse>
				<verse number="29">企在該位个眾人聽到這個聲，就講：「打雷公囉！」也有兜人講：「係天使㧯佢講話！」</verse>
				<verse number="30">耶穌㧯佢等講：「這聲音毋係為到𠊎，係為到你等來个。</verse>
				<verse number="31">這下，這世界愛受審判；這下，世間个統治者會被上帝逐走了。</verse>
				<verse number="32">𠊎自家被人對地上擎起來个時，會吸引萬人來歸𠊎。」</verse>
				<verse number="33">(佢講這個話係指佢自家會樣般死講个。)</verse>
				<verse number="34">眾人應講：「𠊎等个法律㧯𠊎等講，基督係永遠長存个；你樣般講人子一定愛被人擎起來？這人子係麼人呢？」</verse>
				<verse number="35">耶穌講：「光在你等當中个時間無幾久了；你等愛趕還有光个時繼續行，免得烏暗逐到你等，因為在烏暗中行个人毋知佢會去到㖠位。</verse>
				<verse number="36">趕你等還有光个時愛信這光，好俾你等成做光明个人。」 講了這兜話，耶穌就離開佢等，囥起來。</verse>
				<verse number="37">佢雖然在佢等面前識行盡多神蹟，佢等還係毋信佢。</verse>
				<verse number="38">這係愛應驗先知 以賽亞 識講个話： 主啊，有麼人信𠊎等所傳个道理呢？ 主个權能對麼人顯明呢？</verse>
				<verse number="39">所以佢等無法信；因為 以賽亞 也識講：</verse>
				<verse number="40">上帝使佢等青盲， 使佢等硬心， 免得佢等个目珠看得到， 佢等个心明白。 所以上帝講：佢等毋會轉向𠊎， 來俾𠊎醫好佢等。</verse>
				<verse number="41">以賽亞 講這兜話係因為佢看到耶穌个榮光，指佢來講个。</verse>
				<verse number="42">雖然恁樣， 猶太 人个領袖中也有好多信耶穌个，總係因為驚法利賽人，毋敢公開承認，免得被人逐出會堂。</verse>
				<verse number="43">佢等愛得到人个稱讚，贏過愛得到上帝个稱讚。</verse>
				<verse number="44">耶穌大聲喊講：「信𠊎个，毋單淨係信𠊎，也係信該『差𠊎來个』。</verse>
				<verse number="45">看到𠊎，也係看到該『差𠊎來个』。</verse>
				<verse number="46">𠊎做光，來到世間，係愛使所有信𠊎个人毋會住在烏暗中。</verse>
				<verse number="47">該聽𠊎个話、毋遵守个人，𠊎毋會審判佢。𠊎來个目的毋係愛審判世間人，係愛拯救佢等。</verse>
				<verse number="48">拒絕𠊎、毋接受吾話个人，自有審判佢个；在末日，𠊎所講个道理會審判佢！</verse>
				<verse number="49">因為𠊎毋係靠自家个權柄來講，反轉係差𠊎來个阿爸命令𠊎講麼介，傳麼介。</verse>
				<verse number="50">𠊎知佢个命令會帶來永遠个生命。所以，𠊎所講个就係照阿爸㧯𠊎講个。」</verse>
			</chapter>
			<chapter number="13">
				<verse number="1">𨃟過節前，耶穌知佢離開這世界轉阿爸該位去个時節到了。佢一直惜在世間屬佢自家个人，佢就惜佢等到底。</verse>
				<verse number="2">耶穌㧯厥學生食夜个時，魔鬼已經控制 加略 人 西門 个孻仔 猶大 个心，使佢決心出賣耶穌。</verse>
				<verse number="3">耶穌知阿爸已經將一切个權柄交給佢；佢知自家係對上帝該位來个，愛倒轉上帝該位去。</verse>
				<verse number="4">佢䟘起來，離開座位，脫下外衫，拿一條手帕圍在腰圈，</verse>
				<verse number="5">然後倒水落腳盆，開始洗學生个腳，又用該手帕拭燥。</verse>
				<verse number="6">佢來到 西門‧彼得 个面前， 彼得 對佢講：「主啊，你愛洗𠊎个腳係麼？」</verse>
				<verse number="7">耶穌應講：「𠊎所做个，你這下無了解，將來你就會明白。」</verse>
				<verse number="8">彼得 講：「𠊎絕對毋俾你洗𠊎个腳！」 耶穌講：「假使𠊎無洗你个腳，你㧯𠊎就無麼介關係。」</verse>
				<verse number="9">西門‧彼得 講：「主啊，毋單淨𠊎个腳，連手㧯頭那也愛洗！」</verse>
				<verse number="10">耶穌講：「身洗好个人，全身就淨浰，洗腳就罅 。你等係淨浰个，總係毋係逐個人淨浰。」</verse>
				<verse number="11">(耶穌已經知麼人愛出賣佢，所以佢講：「毋係逐個人淨浰。」)</verse>
				<verse number="12">耶穌洗好佢等个腳，就將外衫著起來，坐倒轉去。佢問厥學生講：「頭下，𠊎為你等所做个，你等了解麼？</verse>
				<verse number="13">你等喊𠊎做先生，做主，盡著，𠊎本來就係。</verse>
				<verse number="14">𠊎係你等个主，你等个先生，還洗你等个腳，你等也應當彼此洗腳。</verse>
				<verse number="15">𠊎做你等个榜樣，係愛你等照𠊎所做个去行。</verse>
				<verse number="16">𠊎實在㧯你等講，奴僕無比主人較大，受派个人也無比派佢个人較大。</verse>
				<verse number="17">你等知這個道理，若係去實行就盡有福氣！</verse>
				<verse number="18">「𠊎這個話毋係指你等全體講个；𠊎認識𠊎所揀選个人。總係聖經所講『該同𠊎共下食飯个人，卻用腳踢𠊎』，這句話必定會實現。</verse>
				<verse number="19">𠊎在事情還吂發生以前就㧯你等講，係愛使你等在事情發生个時，信𠊎就係該『自有永有』个。</verse>
				<verse number="20">𠊎實在㧯你等講，接待𠊎所派个，就係接待𠊎；接待𠊎个，就係接待該『差𠊎來个』。」</verse>
				<verse number="21">耶穌講了這個話，心中非常痛苦，就宣佈講：「𠊎實在㧯你等講，你等當中有一個人愛出賣𠊎。」</verse>
				<verse number="22">學生彼此相看，毋知佢係指麼人講个。</verse>
				<verse number="23">有一個耶穌所惜个學生，側身靠在耶穌个懷中。</verse>
				<verse number="24">西門‧彼得 暗示佢講：「問佢看，佢係講麼人。」</verse>
				<verse number="25">該學生就探身問耶穌講：「主啊，係麼人？」</verse>
				<verse number="26">耶穌應講：「𠊎搵一垤餅仔給麼人，佢就係。」講了，佢就搵一垤餅仔，拿給 加略 人 西門 个孻仔 猶大 。</verse>
				<verse number="27">猶大 一接過餅仔，魔鬼就入佢个心。耶穌對佢講：「你愛做个，趕緊去做！」</verse>
				<verse number="28">在座个人，無人知耶穌做麼介對佢講這個話。</verse>
				<verse number="29">因為 猶大 係管錢个，有兜學生想耶穌係吩咐佢去買過節用个東西，抑係喊佢帶兜東西去給窮苦人。</verse>
				<verse number="30">猶大 食該垤餅仔後，即時就出去。該時係暗晡頭。</verse>
				<verse number="31">猶大 出去以後，耶穌講：「這下人子已經得到榮耀了；上帝个榮耀也顯明在人子个身上。</verse>
				<verse number="32">既然上帝个榮耀通過人子來顯明，佢也愛親自榮光人子，即時就愛榮光佢。</verse>
				<verse number="33">細子啊，𠊎同你等共下个時間無幾久了。你等會尋𠊎，總係𠊎㧯你等講，就像𠊎㧯 猶太 人个領袖講過个：『𠊎愛去个所在，你等做毋得去。』</verse>
				<verse number="34">𠊎給你等一條新命令：你等愛彼此相惜；𠊎樣般惜你等，你等也愛樣般彼此相惜。</verse>
				<verse number="35">若係你等彼此相惜，世間人就會認出你等係𠊎个學生。」</verse>
				<verse number="36">西門‧彼得 問耶穌講：「主啊，你愛去㖠位？」 耶穌講：「𠊎所愛去个所在，你這下做毋得跈𠊎去，總係較慢兜仔你就會跈𠊎去。」</verse>
				<verse number="37">彼得 講：「主啊，做麼介這下𠊎做毋得跈你去呢？𠊎肯為你拚命到死！」</verse>
				<verse number="38">耶穌講：「你肯為𠊎拚命到死嗎？𠊎實在㧯你講，雞仔啼以前，你會三擺毋認𠊎。」</verse>
			</chapter>
			<chapter number="14">
				<verse number="1">耶穌又㧯佢等講：「你等毋使愁；你等愛信上帝 ，也愛信𠊎。</verse>
				<verse number="2">在吾爸个屋下有盡多房間，𠊎去係愛為你等準備所在；若毋係恁樣，𠊎就毋會恁樣講。</verse>
				<verse number="3">𠊎去為你等準備所在以後，愛倒轉來，接你等到𠊎該位去；恁樣，𠊎在㖠位，你等也會在該位。</verse>
				<verse number="4">𠊎愛去个所在，該條路你等知。」</verse>
				<verse number="5">多馬 對佢講：「主啊，𠊎等毋知你愛去㖠位，樣會知該條路呢？」</verse>
				<verse number="6">耶穌講：「𠊎就係道路、真理、生命；若毋係通過𠊎，無人能到阿爸該位去。</verse>
				<verse number="7">既然你等識𠊎，你等也會識吾爸 。從今以後，你等識佢，也已經看到佢。」</verse>
				<verse number="8">腓力 對耶穌講：「主啊，將阿爸顯給𠊎等看，𠊎等就滿足。」</verse>
				<verse number="9">耶穌應講：「 腓力 ，𠊎同你等共下恁久，你還毋識𠊎嗎？看到𠊎个人，就係看到阿爸。你樣會講『將阿爸顯給𠊎等看』呢？</verse>
				<verse number="10">𠊎在阿爸底背，阿爸在𠊎底背，你毋信嗎？𠊎㧯你等講个話毋係𠊎自家个意思，係住在𠊎底背个阿爸做佢自家个事。</verse>
				<verse number="11">你等愛信𠊎，𠊎在阿爸底背，阿爸在𠊎底背；若係毋信這個話，也愛因為𠊎所做个事來信。</verse>
				<verse number="12">𠊎實在㧯你等講，信𠊎个人也會做𠊎所做个事，甚至愛做還較大个事；因為𠊎愛去阿爸該位。</verse>
				<verse number="13">你等奉𠊎个名，無論求麼介，𠊎一定會成全你等，使阿爸个榮光通過孻仔顯明出來。</verse>
				<verse number="14">你等奉𠊎个名，無論對𠊎求麼介，𠊎一定會成全。</verse>
				<verse number="15">「你等若係敬愛𠊎，就愛遵守𠊎个命令。</verse>
				<verse number="16">𠊎愛求阿爸，佢就會另外賜你等一位保惠師 ，永遠同你等共下。</verse>
				<verse number="17">佢就係真理个靈。世間人毋接受佢，因為佢等看毋到佢，也毋識佢。總係你等識佢，因為佢常常㧯你等同在，也愛在你等个生命中。</verse>
				<verse number="18">「𠊎毋會將你等㧒下做孤兒，𠊎會倒轉來你等這位。</verse>
				<verse number="19">加無幾久，世間人就看𠊎毋到，總係你等會看得到𠊎，又因為𠊎繼續生等，你等也會生等。</verse>
				<verse number="20">該日來到个時，你等就會知𠊎在吾爸底背，你等也在𠊎底背，像𠊎在你等个生命中一樣。</verse>
				<verse number="21">「接受吾命令又遵守个人，就係敬愛𠊎个人。敬愛𠊎个人，吾爸必定會惜佢；𠊎也會惜佢，又親自對佢顯現。」</verse>
				<verse number="22">猶大 (毋係 加略 人 猶大 ) 問講：「主啊，樣般單淨對𠊎等顯現，毋對世間人顯現呢？」</verse>
				<verse number="23">耶穌應講：「敬愛𠊎个人正會遵守𠊎个話。吾爸必定會惜佢；吾爸㧯𠊎也會去佢該位，同佢共下住。</verse>
				<verse number="24">毋敬愛𠊎个人就毋會遵守𠊎个話。你等所聽到个話毋係𠊎自家个意思，係差𠊎來个阿爸个意思。</verse>
				<verse number="25">「𠊎還同你等共下个時，已經將這兜話㧯你等講。</verse>
				<verse number="26">總係該保惠師，就係阿爸因為𠊎个名愛差來个聖靈，佢會將所有个事教導你等，又使你等記得𠊎㧯你等講過个一切話。</verse>
				<verse number="27">「𠊎留下平安給你等；𠊎將𠊎个平安賜給你等。𠊎所給你等个，㧯世間人所給个無共樣。你等毋使愁，也毋使驚。</verse>
				<verse number="28">你等聽𠊎講過：『𠊎去，總係還愛倒轉來你等這位。』假使你等敬愛𠊎，你等會因為𠊎轉去阿爸該位來歡喜，因為阿爸比𠊎較大。</verse>
				<verse number="29">𠊎在這兜事還吂發生以前先㧯你等講，愛使你等在事情發生个時會信。</verse>
				<verse number="30">𠊎這下毋愛㧯你等加講，因為這世間个統治者會到了。對𠊎來講，佢毋算麼介；</verse>
				<verse number="31">總係世間人應當知𠊎敬愛吾爸，所以阿爸吩咐𠊎麼介，𠊎就做麼介。 「䟘起來，𠊎等來去！」</verse>
			</chapter>
			<chapter number="15">
				<verse number="1">「𠊎係真个葡萄樹；吾爸係栽種个人。</verse>
				<verse number="2">所有屬𠊎又無結果子个樹枝，佢就剪掉；總係結果子个樹枝，佢就修剪到清淨，使它結果子還較多。</verse>
				<verse number="3">𠊎㧯你等講个道理已經使你等淨浰。</verse>
				<verse number="4">你等愛一直生在𠊎底背 ，𠊎就生在你等底背。若係無㧯𠊎結連，你等就毋會結果子，像樹枝無㧯葡萄樹接等就毋會結果子一樣。</verse>
				<verse number="5">「𠊎係葡萄樹；你等係樹枝。生在𠊎底背，𠊎也生在佢底背个人，正會結果子多多；因為離開𠊎，你等就無法度做麼介。</verse>
				<verse number="6">無生在𠊎底背个人，佢會像樹枝被人㧒掉一樣，然後燥掉，被人㧒落火底背燒掉。</verse>
				<verse number="7">假使你等一直生在𠊎底背，𠊎个話也時常記在你等个心中，你等無論想愛麼介，求，就會得到。</verse>
				<verse number="8">你等結果子多多，又繼續做 𠊎个學生，吾爸就會因為恁樣得到榮光。</verse>
				<verse number="9">就像阿爸惜𠊎，𠊎也惜你等；你等愛生在𠊎个痛惜中。</verse>
				<verse number="10">你等若係遵守𠊎个命令，就會生在𠊎个痛惜中，像𠊎遵守吾爸个命令，就生在佢个痛惜中一樣。</verse>
				<verse number="11">「𠊎㧯你等講這兜話，係愛使你等得到𠊎个快樂，使你等个快樂淰出來。</verse>
				<verse number="12">這係𠊎个命令：你等愛彼此相惜，像𠊎惜你等一樣。</verse>
				<verse number="13">為到朋友犧牲自家个生命，人間个愛惜無比這較偉大个。</verse>
				<verse number="14">你等若遵守𠊎个命令，就係𠊎个朋友。</verse>
				<verse number="15">𠊎無再看你等做奴僕，因為奴僕毋知主人所做个事。𠊎將你等看做朋友，因為𠊎已經將𠊎對吾爸該位聽到个一切全部俾你等知。</verse>
				<verse number="16">毋係你等選𠊎，係𠊎選你等。𠊎設立你等，係愛你等出去結永存个果子。恁樣，你等奉𠊎个名，無論對阿爸求麼介，佢一定會賜給你等。</verse>
				<verse number="17">𠊎命令你等个這兜話，係愛你等彼此相惜。</verse>
				<verse number="18">「假使世間人怨恨你等，你等愛知，佢等已經先怨恨𠊎。</verse>
				<verse number="19">假使你等屬這世界，世間人一定會惜你等，像惜佢等自家个人。總係𠊎將你等對這世間選出來，你等就毋係屬世界；所以世間人怨恨你等。</verse>
				<verse number="20">你等愛記得𠊎㧯你等講過个話：『奴僕無比主人較大。』若係佢等迫害𠊎，佢等也會迫害你等；若係佢等遵守𠊎个話，佢等也會遵守你等个話。</verse>
				<verse number="21">為到𠊎个緣故，佢等會對你等做這一切个事，因為佢等毋識該『差𠊎來个。』</verse>
				<verse number="22">若係𠊎毋識來過，毋識教佢等，佢等就無罪；總係，這下佢等个罪係推毋掉个。</verse>
				<verse number="23">怨恨𠊎个，也怨恨吾爸。</verse>
				<verse number="24">假使𠊎在佢等當中無做該兜從來毋識有人做過个事，佢等就無罪。事實上，佢等有看到𠊎所做个，還係怨恨𠊎，也怨恨吾爸。</verse>
				<verse number="25">這係愛應驗佢等个法律書所寫个：『佢等無緣無故怨恨𠊎！』</verse>
				<verse number="26">「總係，該對阿爸來个保惠師會到；佢就係真理个靈。𠊎派佢對阿爸該位來个時，佢愛為𠊎做見證。</verse>
				<verse number="27">共樣，你等也愛為𠊎做見證，因為你等對開始就同𠊎共下。</verse>
			</chapter>
			<chapter number="16">
				<verse number="1">「𠊎將這兜事㧯你等講，愛使你等个信心毋會搖動。</verse>
				<verse number="2">佢等會將你等逐出會堂。這時節就會到了，該兜殺害你等个人會認為佢等所做个事情係忠心事奉上帝。</verse>
				<verse number="3">其實，佢等會恁樣做係因為佢等毋識阿爸，也毋識𠊎。</verse>
				<verse number="4">𠊎㧯你等講這兜事，係愛俾你等在這時節來到个時想到𠊎識㧯你等講過。 「𠊎當初無㧯你等講這兜事，因為𠊎一直同你等共下。</verse>
				<verse number="5">這下𠊎愛倒轉該『差𠊎來个』該位去；你等當中並無人問𠊎：『你愛去㖠位？』</verse>
				<verse number="6">反轉因為𠊎識將這兜事㧯你等講過，你等就滿心憂愁。</verse>
				<verse number="7">事實上，𠊎㧯你等講，𠊎轉去，對你等較好；𠊎無轉去，該保惠師就毋會來你等這位；𠊎轉去，就差佢來。</verse>
				<verse number="8">佢來个時，佢愛對世間人證明：佢等對罪、對義、對上帝審判个看法全部毋著淨淨。</verse>
				<verse number="9">佢等對罪个看法毋著，因為佢等毋信𠊎；</verse>
				<verse number="10">佢等對義个看法毋著，因為𠊎轉去阿爸該位，你等毋會再看到𠊎；</verse>
				<verse number="11">佢等對上帝審判个看法毋著，因為這世界个王已經受審判。</verse>
				<verse number="12">「𠊎還有盡多事愛㧯你等講，總係你等這下揹毋贏。</verse>
				<verse number="13">等到賜真理个聖靈來到，佢會帶你等進入所有个真理。佢毋會照自家个意思講話，只有將佢所聽到个㧯你等講，也會對你等講將來个事。</verse>
				<verse number="14">佢會榮耀𠊎，因為佢會將佢對𠊎所領受个㧯你等講。</verse>
				<verse number="15">吾爸所有个一切全部係𠊎个；所以𠊎講，聖靈會將佢對𠊎所領受个㧯你等講。</verse>
				<verse number="16">「過無幾久，你等就看𠊎毋到；再過無幾久，你等又會看到𠊎。」</verse>
				<verse number="17">學生當中有幾個人彼此講：「佢㧯𠊎等講『過無幾久，你等就看𠊎毋到；再過無幾久，你等又會看到𠊎』又講『因為𠊎轉去阿爸該位』；這兜話到底係麼介意思呢？」</verse>
				<verse number="18">佢等又問：「佢所講个『過無幾久』係指麼介呢？𠊎等毋知佢講麼介！」</verse>
				<verse number="19">耶穌知佢等想愛問佢，就㧯佢等講：「𠊎講『過無幾久，你等就看𠊎毋到；再過無幾久，你等又會看到𠊎』；你等因為這句話問來問去係麼？</verse>
				<verse number="20">𠊎實在㧯你等講，你等會傷心大噭，總係世間人會歡喜快樂；你等會憂愁，總係你等个憂愁會變做快樂。</verse>
				<verse number="21">婦人家生產以前會憂愁，因為受苦个時間到了；總係孲𤘅仔𫱔出來以後，就毋記得痛苦，因為姖歡喜孲𤘅仔已經出世。</verse>
				<verse number="22">你等也係恁樣：這下你等有憂愁，總係𠊎再見到你等个時，你等就會滿心快樂；你等个快樂係無人搶得走个。</verse>
				<verse number="23">到該日，你等就毋會再問𠊎麼介。 「𠊎實在㧯你等講，你等奉𠊎个名，無論對阿爸求麼介，佢一定會賜給你等 。</verse>
				<verse number="24">到這下，你等毋識奉𠊎个名求過麼介；從今以後，你等求，就會得到，使你等个快樂滿滿。</verse>
				<verse number="25">「𠊎用比喻㧯你等講這兜事。總係時間會到了，𠊎無再用比喻，係愛明明將阿爸个事㧯你等講。</verse>
				<verse number="26">到該日，你等愛奉𠊎个名求；𠊎毋係講𠊎愛代你等對阿爸求，</verse>
				<verse number="27">因為阿爸自家惜你等。佢惜你等，因為你等敬愛𠊎，又信𠊎係對上帝 該位來个。</verse>
				<verse number="28">𠊎對阿爸該位來到這世界；這下𠊎愛離開這世界，轉阿爸該位去。」</verse>
				<verse number="29">學生對佢講：「你看，這下你係明明講，並無用麼介比喻。</verse>
				<verse number="30">這下𠊎等知，你無所不知，無需要人對你講出佢个問題。因為恁樣，𠊎等信你係對上帝該位來个。」</verse>
				<verse number="31">耶穌講：「這下你等正信嗎？</verse>
				<verse number="32">看啊，時節會到了，這下就係，你等全部會分散，逐儕轉去自家个地方，留下𠊎自家一儕。其實，𠊎毋係自家一儕，因為有阿爸同𠊎共下。</verse>
				<verse number="33">𠊎將這兜事㧯你等講，係愛你等因為生在𠊎底背 有平安。在這世間你等有苦難；總係你等愛勇敢，𠊎已經贏過這世間。」</verse>
			</chapter>
			<chapter number="17">
				<verse number="1">耶穌講了這兜話，就昂頭望天，講：「阿爸啊，時節已經到了，求你榮光你个孻仔，俾孻仔也好榮光你。</verse>
				<verse number="2">你有將管理全人類个權柄賜給佢，使佢將永生賜給你所交託佢个人。</verse>
				<verse number="3">永生就係認識你 — 惟一个真神，又認識你所差來个耶穌基督。</verse>
				<verse number="4">𠊎已經在地上榮光你；𠊎已經完成你所交託个使命。</verse>
				<verse number="5">阿爸啊，這下求你在你自家个面前榮光𠊎，將該吂有世界以前，𠊎同你共有个榮光賜給𠊎！</verse>
				<verse number="6">「𠊎已經將你顯明給該兜你對世間擇出來交給𠊎个人。佢等本來係屬你个，你將佢等賜給𠊎；佢等也有遵守你个話。</verse>
				<verse number="7">這下佢等知，你所賜給𠊎个一切，全部係對你該位來个；</verse>
				<verse number="8">因為你所交給𠊎个道理，𠊎已經賜給佢等，佢等也有接受。佢等確實知𠊎係對你該位來个，也信係你差𠊎來。</verse>
				<verse number="9">「𠊎為到佢等求你。𠊎毋係為世間人求，反轉係為你所賜𠊎个人求，因為佢等係屬你个。</verse>
				<verse number="10">𠊎所有个全部係你个，你所有个也係𠊎个；𠊎个榮光係通過佢等顯明出來。</verse>
				<verse number="11">𠊎這下愛去你該位，無再留在世間，總係佢等愛留在世間。聖潔个阿爸啊！求你用你个名，就係你賜給𠊎个名，保守佢等 ，使佢等合做一體，像你㧯𠊎共樣。</verse>
				<verse number="12">𠊎同佢等共下个時，𠊎用你个名，就係你所賜給𠊎个名，保守佢等 。𠊎也保護佢等；除了該註定愛滅亡个一儕以外，無一個失掉，恁樣來應驗聖經个話。</verse>
				<verse number="13">這下，𠊎愛去你該位；𠊎還在這世間个時講這兜話，係愛使佢等个心充滿𠊎个快樂。</verse>
				<verse number="14">𠊎將你个話賜給佢等；世間人就怨恨佢等，因為佢等毋係屬這世間，像𠊎毋係屬這世間一樣。</verse>
				<verse number="15">𠊎毋係求你將佢等對這世間帶走，𠊎係求你保守佢等脫離該邪惡者。</verse>
				<verse number="16">就像𠊎毋係屬這世間，佢等也毋係屬這世間。</verse>
				<verse number="17">求你用真理使佢等將自家奉獻給你；你个話 就係真理。</verse>
				<verse number="18">像你差𠊎入世間，𠊎也派佢等入世間。</verse>
				<verse number="19">為到佢等，𠊎將自家奉獻給你，使佢等也會誠心奉獻給你。</verse>
				<verse number="20">「𠊎毋單淨為佢等求，也為該兜接受佢等个話來信𠊎个人求。</verse>
				<verse number="21">願佢等全部合做一體。阿爸啊，願佢等生在𠊎等底背，像你在𠊎底背，𠊎在你底背一樣。願佢等全部合做一體，使世間人信𠊎係你所差來个。</verse>
				<verse number="22">你賜給𠊎个榮光，𠊎也賜給佢等，使佢等合做一體，像𠊎等合做一體共樣。</verse>
				<verse number="23">𠊎在佢等底背，你在𠊎底背，使佢等完全合做一體，俾世間人知係你差𠊎來，也知你惜佢等，像你惜𠊎一樣。</verse>
				<verse number="24">「阿爸啊，你所賜給𠊎个人，𠊎在㖠位，𠊎愛佢等也同𠊎共下在該位，使佢等看到你賜𠊎个榮光；因為在創造世界以前，你就惜𠊎。</verse>
				<verse number="25">公義个阿爸啊，世間人毋識你，總係𠊎識你；這兜人也知係你差𠊎來。</verse>
				<verse number="26">𠊎已經將你顯明給佢等；𠊎還愛繼續恁樣做，為到使你對𠊎个痛惜充滿佢等个生命，𠊎也生在佢等个生命中。」</verse>
			</chapter>
			<chapter number="18">
				<verse number="1">耶穌恁樣祈禱以後，就同學生共下出去，過 汲淪 溪。該地方有一個橄欖園，耶穌㧯學生攏總入去。</verse>
				<verse number="2">出賣耶穌个 猶大 也知該所在，因為耶穌常常㧯厥學生聚集在該位。</verse>
				<verse number="3">猶大 帶一隊 羅馬 个兵仔，湊等祭司長㧯法利賽人所派聖殿个衛兵，共下入園去。佢等帶等武器，也拿等燈籠㧯火把。</verse>
				<verse number="4">耶穌知會發生在厥身上个一切事情，就進前問佢等講：「你等尋麼人？」</verse>
				<verse number="5">佢等應講：「 拿撒勒 人耶穌。」 耶穌講：「𠊎就係。」 該時，出賣耶穌个 猶大 也同佢等企共下。</verse>
				<verse number="6">耶穌一講「𠊎就係」，佢等就打亂退，橫在地上。</verse>
				<verse number="7">耶穌又問講：「你等尋麼人？」 佢等應講：「 拿撒勒 人耶穌。」</verse>
				<verse number="8">耶穌講：「𠊎㧯你等講過，𠊎就係。假使你等係尋𠊎，就俾這兜人走。」</verse>
				<verse number="9">耶穌恁樣講，係愛應驗佢以前講過个話：「阿爸啊，你所交給𠊎个人，𠊎連一個也無失落。」</verse>
				<verse number="10">西門‧彼得 帶等一支刀仔；佢將刀仔挷出來，對大祭司个僕人 馬勒古 劈過去，將佢右片个耳公削下來。</verse>
				<verse number="11">耶穌對 彼得 講：「將刀仔收起來！吾爸交給𠊎个苦杯，你恅到𠊎毋願意啉嗎？」</verse>
				<verse number="12">該隊 羅馬 兵㧯隊長，連 猶太 人聖殿个衛兵就將耶穌捉起來，䌈等，</verse>
				<verse number="13">先將佢解送到 亞那 个面前去； 亞那 係該年个大祭司 該亞法 个丈人老。</verse>
				<verse number="14">這 該亞法 識對 猶太 人个領袖建議講，一個人代全國个人死係最有利益个事。</verse>
				<verse number="15">西門‧彼得 㧯另外一個學生跈等耶穌；該學生㧯大祭司相識，佢就跈等耶穌入去大祭司个庭院肚。</verse>
				<verse number="16">彼得 留在門外。該㧯大祭司相識个學生又出來，㧯掌門个使女講，就帶 彼得 入去。</verse>
				<verse number="17">該掌門个使女對 彼得 講：「你也係該人个學生，敢毋係？」 彼得 講：「𠊎毋係！」</verse>
				<verse number="18">該時天氣盡寒，該兜僕人㧯衛兵用火炭起火，大家企等焙火； 彼得 也行前，同佢等共下企等焙火。</verse>
				<verse number="19">大祭司盤問耶穌關係厥學生㧯佢个教訓。</verse>
				<verse number="20">耶穌應講：「𠊎㧯人講話從來都係公開个。𠊎常常在會堂㧯聖殿，就係 猶太 人聚會个所在教訓人，毋識在暗中講麼介。</verse>
				<verse number="21">你做麼介盤問𠊎呢？去問該兜聽過𠊎講話个人，佢等知𠊎識講麼介。」</verse>
				<verse number="22">耶穌講了這個話，塍頭一個衛兵就搧佢个嘴角，講：「你恁樣應大祭司嗎！」</verse>
				<verse number="23">耶穌講：「𠊎若係講毋著，你指證，毋著在㖠位！若係無毋著，你打𠊎做麼介？」</verse>
				<verse number="24">這時，耶穌還被佢等䌈等； 亞那 就將佢解送到大祭司 該亞法 該位去。</verse>
				<verse number="25">這時， 西門‧彼得 還企等焙火。有人對佢講：「你也係該人个學生，敢毋係？」 彼得 否認講：「𠊎毋係！」</verse>
				<verse number="26">大祭司个一個僕人，就係被 彼得 削掉耳公該儕个親戚，佢講：「𠊎看到你同該人共下在橄欖園底背，敢毋係？」</verse>
				<verse number="27">彼得 又否認。該時，雞仔就啼。</verse>
				<verse number="28">佢等對 該亞法 該位將耶穌帶到總督府。該時天曚光。 猶太 人个領袖毋入總督府去，因為佢等愛在節期中保持淨浰，正做得食𨃟過節个筵席。</verse>
				<verse number="29">所以 彼拉多 出來見佢等，問講：「你等用麼介罪名告這人？」</verse>
				<verse number="30">佢等應講：「佢若係無做壞事，𠊎等就毋會將佢交給你。」</verse>
				<verse number="31">彼拉多 對佢等講：「你等將佢帶轉去，照你等自家个法律審判佢就好了。」 猶太 人个領袖應講：「𠊎等無權好判人死刑。」</verse>
				<verse number="32">(這應驗耶穌所講過、佢會樣般死个話。)</verse>
				<verse number="33">彼拉多 就入總督府去，喊耶穌來，問佢講：「你係 猶太 人个王麼？」</verse>
				<verse number="34">耶穌應講：「這係你自家愛問个，抑係因為有人對你講過，你正恁樣問呢？」</verse>
				<verse number="35">彼拉多 講：「你恅到𠊎係 猶太 人嗎？係你本國个人㧯該兜祭司長將你交給𠊎。你到底做麼介事啊？」</verse>
				<verse number="36">耶穌講：「𠊎个國毋係這世間个國；假使𠊎个國係這世間个國，𠊎个子民一定會為𠊎相㓾，𠊎就毋會落在該兜 猶太 人个手中。總係，𠊎个國毋係這世間个國！」</verse>
				<verse number="37">彼拉多 講：「恁樣講，你係王囉？」 耶穌應講：「係你講𠊎係王。𠊎為到這個出世，也為到這個來到世間，係愛為真理做見證。凡係屬真理个人一定會聽𠊎个話。」</verse>
				<verse number="38">彼拉多 講：「真理係麼介？」 彼拉多 就出來，對 猶太 人講：「𠊎查毋出這人有麼介罪。</verse>
				<verse number="39">總係你等有一個慣例，愛𠊎在𨃟過節為你等放一個囚犯。你等愛𠊎為你等放 猶太 人个王嗎？」</verse>
				<verse number="40">佢等就大聲喊講：「毋愛佢！𠊎等愛 巴拉巴 ！」 ( 巴拉巴 係一個強盜。)</verse>
			</chapter>
			<chapter number="19">
				<verse number="1">所以， 彼拉多 下令鞭打耶穌。</verse>
				<verse number="2">兵仔用竻仔編一頂冕旒，戴在佢个頭那頂，又㧯佢著紫色个長袍。</verse>
				<verse number="3">佢等進前對佢講：「 猶太 人个王萬歲！」然後用巴掌乸搧佢。</verse>
				<verse number="4">彼拉多 又出來對眾人講：「你等看，𠊎帶佢出來到你等面前，俾你等知，𠊎查毋出佢有麼介罪。」</verse>
				<verse number="5">耶穌就出來，戴等竻仔个冕旒，著等紫色个長袍。 彼拉多 對佢等講：「看啊，這個人！」</verse>
				<verse number="6">祭司長㧯聖殿个衛兵一看到耶穌，就大聲喊講：「將佢釘十字架！將佢釘十字架！」 彼拉多 對佢等講：「你等自家帶佢去釘十字架。𠊎查毋出佢有麼介罪。」</verse>
				<verse number="7">猶太 人講：「𠊎等有一條法律，照該條法律，佢係該死个，因為佢自稱係上帝个孻仔。」</verse>
				<verse number="8">彼拉多 聽到佢等恁樣講，就越驚；</verse>
				<verse number="9">再倒轉去總督府。 佢問耶穌講：「你到底係對㖠位來个？」總係耶穌無應佢。</verse>
				<verse number="10">彼拉多 對佢講：「你毋應𠊎嗎？你愛知噢，𠊎有權好放你，也有權好將你釘十字架。」</verse>
				<verse number="11">耶穌講：「若毋係上帝將這權柄交給你，你就無權好判𠊎。所以，將𠊎交給你个人，佢个罪還較重。」</verse>
				<verse number="12">彼拉多 聽到這個話，越想愛放耶穌。總係 猶太 人盡喊講：「你若係放佢，就毋係皇帝个朋友！麼人自稱係王，麼人就係皇帝个敵人。」</verse>
				<verse number="13">彼拉多 聽到佢等恁樣講，就帶等耶穌出來，在「 石階 」 ( 希伯來 話安到「 枷巴他 」) 个所在開庭審問 。</verse>
				<verse number="14">該日係𨃟過節个預備日，臨當晝， 彼拉多 對 猶太 人講：「看啊，你等个王！」</verse>
				<verse number="15">佢等就盡喊講：「除掉佢！㓾死佢！將佢釘十字架！」 彼拉多 問佢等講：「愛𠊎將你等个王釘十字架嗎？」 祭司長應講：「皇帝正係𠊎等个王！」</verse>
				<verse number="16">因為恁樣， 彼拉多 將耶穌交給佢等去釘十字架。 佢等就將耶穌帶走。</verse>
				<verse number="17">耶穌出來，擎等自家个十字架，來到名安到「頭那殼个山頭」 ( 希伯來 話安到「 各各他 」)。</verse>
				<verse number="18">在該位，佢等將佢釘在十字架頂；另外還釘兩個人，一片一個，耶穌在中央。</verse>
				<verse number="19">彼拉多 又寫一垤牌仔，喊人釘在十字架頂高。該牌仔寫等：「 拿撒勒 人耶穌， 猶太 人个王。」</verse>
				<verse number="20">有盡多 猶太 人看到這牌仔所寫个，因為耶穌釘十字架个所在離開城無幾遠；這牌仔係用 希伯來 、 拉丁 ，㧯 希臘 三種字寫个。</verse>
				<verse number="21">猶太 人个祭司長對 彼拉多 講：「莫寫『 猶太 人个王』，愛寫『這人自稱係 猶太 人个王』。」</verse>
				<verse number="22">彼拉多 講：「𠊎所寫个，做毋得改！」</verse>
				<verse number="23">兵仔釘耶穌在十字架頂以後，就將佢个外衫分做四垤，一儕一垤。佢等又拿佢个內衫；這內衫毋係用線合起來个，係歸垤布仔刺成个。</verse>
				<verse number="24">所以，兵仔彼此商量講：「𠊎等毋好將它扯開；來抽籤仔，看麼人得到。」這應驗聖經所講个： 佢等分𠊎个外衫， 為𠊎个內衫抽籤。 該兜兵仔正經就恁樣做。</verse>
				<verse number="25">企在耶穌个十字架堘頭个，有耶穌个阿姆㧯厥姆个老妹，還有 革羅罷 个𡜵娘 馬利亞 ，㧯 抹大拉 个 馬利亞 。</verse>
				<verse number="26">耶穌看到厥姆㧯佢所惜个學生企在塍頭，就對厥姆講：「阿姆 ，你看，若孻仔。」</verse>
				<verse number="27">佢又對該學生講：「你看，若姆。」對該時開始，該學生就接耶穌个阿姆到自家个屋下去住。</verse>
				<verse number="28">耶穌知一切个事已經成就，為到愛應驗聖經个話，就講：「𠊎嘴燥了。」</verse>
				<verse number="29">在該位，有一隻罐仔，裝等酸葡萄酒；佢等就拿海綿浸酸葡萄酒，䌈在牛膝草个莖頂高，送到厥嘴唇。</verse>
				<verse number="30">耶穌一下，就講：「完成了！」 跈等，佢个頭那攋下來，就斷氣死掉。</verse>
				<verse number="31">該日係𨃟過節个預備日，第二日个安息日係神聖个大日仔。 猶太 人个領袖毋愛安息日有身屍留在十字架頂，就要求 彼拉多 喊人打斷受刑人个腳，將身屍解下來。</verse>
				<verse number="32">兵仔奉命就去，將該同耶穌共下釘十字架个頭一儕㧯另外一儕个腳打斷。</verse>
				<verse number="33">佢等行近耶穌，看到佢已經死掉，就無打斷佢个腳。</verse>
				<verse number="34">總係，有一個兵仔用槍刺佢个脇下，黏時血㧯水就流出來。</verse>
				<verse number="35">(看到个人就做見證，愛使你等也信。佢知佢所見證个係確實个，因為係佢親眼看到个。)</verse>
				<verse number="36">因為這兜事愛應驗聖經所講个話：「佢个骨頭連一支也毋會被人打斷。」</verse>
				<verse number="37">聖經又有一句話講：「佢等愛仰望自家用槍所刺个人。」</verse>
				<verse number="38">這兜事以後，有一個 亞利馬太 人 約瑟 請求 彼拉多 ，准佢將耶穌个身屍領去。 ( 約瑟 係耶穌个學生；佢因為驚 猶太 人个領袖，毋敢公開。) 彼拉多 答應佢个請求， 約瑟 就將耶穌个身屍領去。</verse>
				<verse number="39">該識在暗晡時來見耶穌个 尼哥德慕 同 約瑟 共下去。佢帶等沒藥㧯沉香合个香料，約有三十公斤。</verse>
				<verse number="40">佢兩儕用抹等香料个麻紗將耶穌个身體纏好；這係 猶太 人葬禮个規矩。</verse>
				<verse number="41">在耶穌釘十字架个地方有一垤園仔，底背有一隻毋識葬過人个新墳墓。</verse>
				<verse number="42">因為該日係 猶太 人个預備日，該墳墓又盡近，佢等就將耶穌葬在該位。</verse>
			</chapter>
			<chapter number="20">
				<verse number="1">禮拜日打早，天還吂光， 抹大拉 个 馬利亞 就去墳墓，看到封等墓門个石頭已經徙開。</verse>
				<verse number="2">姖就走去尋 西門‧彼得 㧯耶穌所惜个該學生，㧯佢等講：「有人將主對墳墓徙走，𠊎等毋知佢等將佢放在㖠位！」</verse>
				<verse number="3">彼得 㧯該學生就去墓地。</verse>
				<verse number="4">兩儕共下走，總係該學生比 彼得 走較遽，先到墳墓。</verse>
				<verse number="5">佢探身看入去，看到麻紗還留在該位，總係佢無入去。</verse>
				<verse number="6">西門‧彼得 跈等也趕到；佢直接入去墳墓底背，看到麻紗還留在該位，</verse>
				<verse number="7">又看到耶穌个頭巾也留在該位，總係無同麻紗共下，係捲等在別位。</verse>
				<verse number="8">該先到个學生也跈等入墳墓；佢一看到就信。</verse>
				<verse number="9">(佢等還係無明白聖經所講，佢的確愛對死復活个意思。)</verse>
				<verse number="10">然後，兩個學生就轉去屋下。</verse>
				<verse number="11">馬利亞 還企在墳墓外噭。姖緊噭緊探頭看墳墓底背。</verse>
				<verse number="12">姖看到兩個著白衫个天使，坐在本來放耶穌身屍个所在，一個在頭這片，一個在腳該片。</verse>
				<verse number="13">佢等問 馬利亞 講：「婦人家，你噭麼介？」 姖應講：「佢等將𠊎个主徙走，毋知佢等將佢放在㖠位！」</verse>
				<verse number="14">講了， 馬利亞 轉身，看到耶穌企在該位，總係還毋知佢就係耶穌。</verse>
				<verse number="15">耶穌問姖講：「婦人家，你噭麼介？你尋麼人？」 馬利亞 恅到佢係管園仔个人，所以對佢講：「先生，若係你將佢徙走，請㧯𠊎講，你將佢放在㖠位，𠊎好將佢徙轉來。」</verse>
				<verse number="16">耶穌講：「 馬利亞 ！」 馬利亞 轉身，用 希伯來 話對佢講：「拉波尼！」 (意思就係「先生」。)</verse>
				<verse number="17">耶穌講：「毋好拉等𠊎，因為𠊎還吂上去見吾爸。你去𠊎个兄弟該位，㧯佢等講：『𠊎愛上去見吾爸，就係你等个阿爸，見𠊎个上帝，就係你等个上帝。』」</verse>
				<verse number="18">所以， 抹大拉 个 馬利亞 就去㧯學生講：「𠊎已經看到主了！」姖又將主對姖講个話報給佢等知。</verse>
				<verse number="19">該禮拜日暗晡，耶穌个學生聚集共下，門關到𢫮𢫮，因為佢等驚 猶太 人个領袖。該時，耶穌顯現，企在佢等當中，講：「願你等平安！」</verse>
				<verse number="20">講了這個話，佢將手㧯脇下給佢等看。學生看到主，就非常歡喜。</verse>
				<verse number="21">耶穌又對佢等講：「願你等平安！像阿爸差派𠊎，𠊎也照樣差派你等。」</verse>
				<verse number="22">講了，佢向佢等歕一口氣，講：「領受聖靈！</verse>
				<verse number="23">你等赦免麼人个罪，佢等个罪就會得到赦免；你等毋赦免麼人个罪，佢等个罪就毋會得到赦免。」</verse>
				<verse number="24">耶穌顯現个時節，十二個學生當中个 多馬 (偏名雙生仔) 無同佢等共下。</verse>
				<verse number="25">所以其他个學生就㧯 多馬 講：「𠊎等已經看到主了！」 多馬 對佢等講：「除了𠊎親眼看到厥手項个釘跡，用𠊎个手指摸該釘跡，又用𠊎个手探佢个脇下，𠊎絕對毋信。」</verse>
				<verse number="26">一禮拜以後，學生又在屋肚聚集； 多馬 也同佢等共下。門關等，總係耶穌忽然顯現，企在佢等个當中，講：「願你等平安！」</verse>
				<verse number="27">然後佢對 多馬 講：「伸若手指來，摸看𠊎个手；伸若手來，探𠊎个脇下。毋好疑狐，愛信！」</verse>
				<verse number="28">多馬 講：「𠊎个主，𠊎个上帝！」</verse>
				<verse number="29">耶穌講：「因為看到𠊎，你正信係麼？該兜無看到就信个人係樣般有福氣啊！」</verse>
				<verse number="30">耶穌在厥學生面前還行盡多神蹟，總係無記錄在這本書底背。</verse>
				<verse number="31">寫這本書个目的係愛你等信 耶穌係基督，係上帝个孻仔，也愛你等因為信佢來得到生命。</verse>
			</chapter>
			<chapter number="21">
				<verse number="1">這兜事以後，在 提比哩亞 湖邊 ，耶穌又對學生顯現。這擺顯現个經過係恁樣个：</verse>
				<verse number="2">該時， 西門‧彼得 、偏名雙生仔个 多馬 、 加利利 个 迦拿 人 拿但業 、 西庇太 个兩個孻仔，㧯另外兩個學生共下在該位。</verse>
				<verse number="3">西門‧彼得 對佢等講：「𠊎愛去打魚仔。」 佢等講：「𠊎等也跈你去。」所以佢等出去，上船；總係歸暗晡無打到半尾。</verse>
				<verse number="4">天一光，耶穌企在湖滣，總係學生毋知佢係耶穌。</verse>
				<verse number="5">耶穌對佢等講：「朋友，你等有打到魚仔無？」 佢等講：「無。」</verse>
				<verse number="6">耶穌講：「將網仔委在船个右片，就會打到。」佢等就照佢个話委網仔下去，結果拉毋上來，因為網到忒多魚仔。</verse>
				<verse number="7">耶穌所惜个該學生對 彼得 講：「係主！」 西門‧彼得 一聽講係主，黏時拿一領衫圍等 (該時佢打赤膊)，跳落水底背。</verse>
				<verse number="8">其他个學生將船仔撐近湖滣，將歸網魚仔拖過來。當時佢等離湖滣無幾遠，差毋多一百公尺。</verse>
				<verse number="9">佢等上岸，看到一堆火炭火，頂高有魚仔，又有餅仔。</verse>
				<verse number="10">耶穌㧯佢等講：「拿幾尾你等正打到个魚仔來。」</verse>
				<verse number="11">西門‧彼得 上船去，將網仔拖上陸地；網肚有一百五十三尾大魚。雖然有恁多魚仔，總係網無爛掉。</verse>
				<verse number="12">耶穌㧯佢等講：「你等來食朝。」無一個學生敢問佢講：「你係麼人？」因為佢等知佢就係主。</verse>
				<verse number="13">耶穌就行過去，拿餅仔分給佢等，然後又拿魚仔分給佢等。</verse>
				<verse number="14">這係耶穌對死復活後，第三擺對學生顯現。</verse>
				<verse number="15">佢等食飽以後，耶穌問 西門‧彼得 講：「 約翰 个孻仔 西門 ，你愛𠊎比這兜較多麼？」 佢應講：「主啊，係，你知𠊎愛你。」 耶穌講：「你愛飼𠊎个細羊仔。」</verse>
				<verse number="16">耶穌第二擺問：「 約翰 个孻仔 西門 ，你愛𠊎麼？」 佢應講：「主啊，係，你知𠊎愛你。」 耶穌㧯佢講：「你愛掌𠊎个羊仔。」</verse>
				<verse number="17">耶穌第三擺又問佢：「 約翰 个孻仔 西門 ，你愛𠊎麼？」 彼得 因為耶穌連連三擺問佢，「你愛𠊎麼？」就憂愁；佢對耶穌講：「主啊，你無所不知，你知𠊎愛你。」 耶穌講：「你愛飼𠊎个羊仔。</verse>
				<verse number="18">𠊎實在㧯你講，你後生个時，自家繫腰帶，自由來去；總係年老个時，你會伸出手來，別人會將你䌈等，帶你到你無愛去个所在。」</verse>
				<verse number="19">(耶穌講這個話係指 彼得 會樣般死，來榮光上帝。) 接等，耶穌又㧯佢講：「你來跈𠊎！」</verse>
				<verse number="20">彼得 轉身，看到耶穌所惜个該學生跈等來。 (該學生識在食夜个時探身問耶穌講：「主啊，愛出賣你个係麼人？」)</verse>
				<verse number="21">彼得 看等佢，問耶穌講：「主啊，這人將來樣般？」</verse>
				<verse number="22">耶穌應講：「𠊎若愛留佢个命到𠊎再來，干你麼介事？你跈𠊎就著！」</verse>
				<verse number="23">所以，這個話流傳在跈耶穌个人當中，講該學生毋會死。其實，耶穌並無講佢毋會死，只有講：「𠊎若愛留佢个命到𠊎再來，干你麼介事？」</verse>
				<verse number="24">這個學生就係為這兜事做見證个人；佢將這兜事記下來。𠊎等知佢个見證係真个。</verse>
				<verse number="25">耶穌還做盡多別个事，若係一一記下來，𠊎想世界也無法度容納恁多書。</verse>
			</chapter>
		</book>
		<book number="44">
			<chapter number="1">
				<verse number="1">提阿非羅 先生： 在𠊎所寫个第一本書底背，𠊎已經將耶穌个一切事情㧯教訓，對佢開始工作，</verse>
				<verse number="2">到佢受接升天該日，全部講過。在升天以前，佢通過聖靈指示自家所揀選个使徒盡多事情。</verse>
				<verse number="3">被人害死以後四十日中，佢識對佢等顯現好多擺，用各種个方法證明自家還生生；佢親身俾佢等看到，又對佢等講論上帝國个事情。</verse>
				<verse number="4">佢等共下个時 ，佢吩咐佢等講：「毋好離開 耶路撒冷 。照𠊎㧯你等講過个，愛等吾爸所應許个。</verse>
				<verse number="5">約翰 用水行洗禮，總係幾日以後你等會領聖靈个洗禮。」</verse>
				<verse number="6">使徒㧯耶穌聚集个時，問耶穌講：「主啊，這下你愛恢復 以色列 國个主權係麼？」</verse>
				<verse number="7">耶穌㧯佢等講：「時間㧯日期係吾爸照自家个權柄所定个，毋係你等个事。</verse>
				<verse number="8">總係聖靈臨到你等个時，你等會滿有能力，並愛在 耶路撒冷 、 猶太 㧯 撒馬利亞 全地，直到天涯海角，為𠊎做見證。」</verse>
				<verse number="9">講了這個話，耶穌在佢等个注目中受接升天；佢升到雲頂高去，佢等就看佢毋到。</verse>
				<verse number="10">佢離開个時，佢等注目望天。忽然，有兩個著白衫个人企在佢等塍頭，</verse>
				<verse number="11">講：「 加利利 人啊，做麼介企在這位望天呢？這個離開你等、受接升天个耶穌，你等看到佢樣般升天，佢也會恁樣倒轉來。」</verse>
				<verse number="12">使徒就對 橄欖 山轉 耶路撒冷 去； 橄欖 山離城無幾遠，約有一公里。</verse>
				<verse number="13">一入城，佢等就上所住个樓頂；在該位有 彼得 、 約翰 、 雅各 㧯 安德烈 、 腓力 㧯 多馬 、 巴多羅買 㧯 馬太 、 亞勒腓 个孻仔 雅各 、激進黨个 西門 ，㧯 雅各 个孻仔 猶大 。</verse>
				<verse number="14">佢等常常共下同心祈禱；當中也有幾個婦人家㧯耶穌个阿姆 馬利亞 ，並耶穌該兜老弟。</verse>
				<verse number="15">過了幾日，有信徒个聚會，約有一百二十儕參加。 彼得 企起來，講：</verse>
				<verse number="16">「各位兄弟！聖靈通過 大衛 个嘴在聖經所預言，關係 猶大 帶人捉耶穌个事，一定愛實現。</verse>
				<verse number="17">這 猶大 本來受揀選來分擔𠊎等个工作，係𠊎等當中个一個。」</verse>
				<verse number="18">( 猶大 用佢作惡所得个錢買一垤田；在該位，佢顛倒頭仆下來，肚裂腸流，現死。</verse>
				<verse number="19">住在 耶路撒冷 个人全部有聽到這件事，所以用佢等个話喊該垤地做 亞革大馬 ，意思就係「血田」。)</verse>
				<verse number="20">「就像《詩篇》所寫个： 願佢个住所荒涼掉， 無人住在該底背。 又有一句寫等講： 願別人得佢个職份。」</verse>
				<verse number="21">彼得 繼續講：「所以，一定愛另外揀選一個人加入𠊎等，共下做主耶穌復活个見證人。這人一定愛係主耶穌在𠊎等當中出入个時，對 約翰 行洗禮開始到耶穌受接升天這站時間，頭尾㧯𠊎等共下个人。」</verse>
				<verse number="22"></verse>
				<verse number="23">因為恁樣，大家推選兩個人，就係 約瑟 (偏名 巴撒巴 ，又安到 猶士都 ) 㧯 馬提亞 。</verse>
				<verse number="24">佢等祈禱講：「主啊，你知每一個人个心；求你指示𠊎等，這兩儕當中麼人係你所揀選，</verse>
				<verse number="25">愛佢接這使徒職份个。這職份 猶大 已經放掉，到佢應該去个所在了。」</verse>
				<verse number="26">講了這個話，佢等就抽籤仔，在兩儕當中抽出 馬提亞 來；佢就㧯其他十一儕共下算做使徒。</verse>
			</chapter>
			<chapter number="2">
				<verse number="1">五旬節該日，信徒全部聚集在共一個地方。</verse>
				<verse number="2">忽然有聲對天頂下來，像一陣大風吹過个聲，充滿佢等所坐个歸間屋。</verse>
				<verse number="3">佢等又看到像火舌个形仔，分開，落在每一個人身上。</verse>
				<verse number="4">佢等全部就被聖靈充滿，照聖靈所賜个才能講出別種个話。</verse>
				<verse number="5">該時，有虔誠个 猶太 人對世界各國轉來，住在 耶路撒冷 。</verse>
				<verse number="6">佢等一聽到這響聲，其中一大群人就來聚集。大家感覺盡奇怪，因為每一個人聽到信徒用佢在外國个腔口講話。</verse>
				<verse number="7">佢等感覺非常希奇，彼此講：「你看，這兜講話个人敢毋係 加利利 人嗎？</verse>
				<verse number="8">𠊎等逐儕樣般聽到佢等講𫣆自家个阿姆話呢？</verse>
				<verse number="9">𠊎等當中有 帕提亞 人、 米底亞 人、 以攔 人；還有對 美索不達米亞 、 猶太 、 加帕多家 、 本都 、 亞細亞 、</verse>
				<verse number="10">弗呂家 、 旁非利亞 、 埃及 ，㧯 古利奈 附近个 利比亞 一帶地方來个人；也有對 羅馬 來个，</verse>
				<verse number="11">包含 猶太 人㧯信 猶太 教个外邦人；另外有 克里特 人㧯 阿拉伯 人。無想到，𠊎等全部聽到佢等用𫣆在外國講个話，來傳上帝偉大个作為！」</verse>
				<verse number="12">佢等攏總感覺又希奇又迷惑，彼此問講：「這到底係麼介意思呢？」</verse>
				<verse number="13">總係，有兜人笑信徒講：「這兜人係酒食忒多了！」</verse>
				<verse number="14">這時， 彼得 㧯其他十一個使徒企起來。佢大聲對大家講：「 猶太 同胞㧯所有住在 耶路撒冷 个人啊，你等愛知，注意聽𠊎講。</verse>
				<verse number="15">你等恅到這兜人係食酒醉嗎？毋係，因為這下正朝晨頭九點鐘。</verse>
				<verse number="16">這個現象就係先知 約珥 所講个：</verse>
				<verse number="17">上帝講： 這係𠊎在世界末期所愛做个： 𠊎愛將𠊎个靈倒給所有个人。 你等个子女會宣告𠊎个信息 ； 你等个後生人會看到異象； 你等个老人家會發奇妙个夢。</verse>
				<verse number="18">在該兜日仔當中， 𠊎愛將𠊎个靈倒出來， 甚至給𠊎个僕人㧯使女； 佢等會宣告𠊎个信息。</verse>
				<verse number="19">𠊎愛在天頂顯神蹟， 在地上行奇事； 有血，有火，有大濛煙；</verse>
				<verse number="20">日頭卻毋會發光； 月光會像血恁紅； 在主偉大光榮个日仔來到以前， 這一切全部會發生。</verse>
				<verse number="21">到該時， 凡求喊主名个人一定得救。</verse>
				<verse number="22">「 以色列 同胞啊，你等愛聽𠊎个話。 拿撒勒 人耶穌个神聖使命，因為上帝通過佢所行个神蹟、大能、奇事，已經盡清楚對你等顯明出來。這事你等自家知，因為係發生在你等當中个。</verse>
				<verse number="23">上帝照自家个旨意㧯先見，早就決定將耶穌交給你等；你等就通過不法个人將佢釘在十字架頂，害死佢。</verse>
				<verse number="24">總係上帝使佢對死復活，除掉死个痛苦，因為死不能控制佢。</verse>
				<verse number="25">大衛 識講到佢： 𠊎看到主常常在𠊎面前； 因為佢在𠊎个塍頭，𠊎就毋會搖動。</verse>
				<verse number="26">所以，𠊎个心肝歡喜， 𠊎个話滿有快樂。 雖然𠊎个肉體會死， 𠊎還會生在希望中。</verse>
				<verse number="27">因為你毋會俾𠊎落陰間， 也毋會俾你忠心个僕人糜掉。</verse>
				<verse number="28">你已經指示𠊎生命个路； 你个同在會使𠊎充滿歡喜。</verse>
				<verse number="29">「各位兄弟，關係先祖 大衛 个事，𠊎老實㧯你等講。佢毋單淨死掉，也埋掉去；佢个墳墓到今晡日還保存在𠊎等這位。</verse>
				<verse number="30">佢既然係先知，就知上帝對佢个應許：上帝識發誓愛對佢个子孫中設立一個王來坐佢个寶座。</verse>
				<verse number="31">大衛 預先知上帝个計劃，所以論到關係基督个復活，佢講： 佢無被人㧒落陰間； 佢个肉體也無糜掉。</verse>
				<verse number="32">這個耶穌，上帝已經使佢復活；𠊎等全部係這件事个見證人。</verse>
				<verse number="33">佢已經高升到上帝个右片，並對厥爸接受所應許个聖靈。你等這下所看到所聽到个，就係佢所倒給𠊎等个恩賜 。</verse>
				<verse number="34">大衛 自家並無上到天頂去，總係佢講： 主對𠊎个主講： 你坐在𠊎个右片，</verse>
				<verse number="35">等𠊎使你个仇敵伏在你个腳下。</verse>
				<verse number="36">「所以， 以色列 个全體同胞啊，你等確實愛知，你等釘在十字架頂這個耶穌，上帝已經設立佢做主，做基督！」</verse>
				<verse number="37">大家聽到這個話，感覺盡刺心，就對 彼得 㧯其他个使徒講：「兄弟啊，𠊎等愛樣般正好呢？」</verse>
				<verse number="38">彼得 㧯佢等講：「你等每一個人愛離開罪惡，又愛奉耶穌基督个名領洗禮，好俾你等个罪得到赦免，你等就會得到上帝所賜个聖靈。</verse>
				<verse number="39">因為上帝个應許係愛給𠊎等个主上帝所呼召个人，就係你等、你等个子女，㧯一切在遠方个人。」</verse>
				<verse number="40">彼得 又用盡多話對佢等做見證，勸佢等講：「你等愛救自家脫離這腐敗个世代！」</verse>
				<verse number="41">盡多人接受佢个話，並領洗禮；該日，信徒約增加三千人。</verse>
				<verse number="42">佢等專心對使徒領受教訓，參加團契生活，分享愛个筵席，共下祈禱。</verse>
				<verse number="43">使徒行盡多神蹟奇事；眾人就非常欽服。</verse>
				<verse number="44">全體信徒繼續共下過團契个生活，所有个東西大家公用。</verse>
				<verse number="45">佢等又賣田產家業，照逐儕个需要將錢分給大家。</verse>
				<verse number="46">佢等同心合意，逐日在聖殿聚會，又在逐儕个屋下分享愛个筵席，用歡喜純潔个心共下食飯，</verse>
				<verse number="47">頌讚上帝，㧯每一個人保持和睦个關係。主使得救个人數逐日增加。</verse>
			</chapter>
			<chapter number="3">
				<verse number="1">有一日，下晝三點鐘祈禱个時， 彼得 㧯 約翰 上聖殿去。</verse>
				<verse number="2">在該安到 美門 个所在，有一個出世就瘸腳个人，逐日被人扛來放在門口，對入聖殿个人討食。</verse>
				<verse number="3">佢看到 彼得 㧯 約翰 愛入聖殿去，就求佢等救濟佢。</verse>
				<verse number="4">佢等注神看佢； 彼得 講：「你看𠊎等！」</verse>
				<verse number="5">佢就注意看佢等，希望會得到麼介東西。</verse>
				<verse number="6">彼得 對佢講：「金銀𠊎全部無，總係𠊎愛將𠊎所有个給你：𠊎奉 拿撒勒 人耶穌基督个名吩咐你，䟘起來行！」</verse>
				<verse number="7">然後 彼得 牽等佢个右手，扶佢䟘起來。該人个腳㧯腳㬹骨黏時得到氣力，</verse>
				<verse number="8">就跳起來，企等，開始行路。佢同佢等共下入去聖殿；佢緊行緊跳，頌讚上帝。</verse>
				<verse number="9">眾人全部看到佢一片行，一片頌讚上帝；</verse>
				<verse number="10">佢等一認出佢就係該坐在聖殿个 美門 口个乞食仔，就因為所發生个事感覺非常希奇。</verse>
				<verse number="11">在 所羅門 廊下，該人牽等 彼得 㧯 約翰 ；在場个人感覺盡奇怪，全部走去看。</verse>
				<verse number="12">彼得 看到，就對佢等講：「 以色列 同胞啊，做麼介看這件事做奇怪呢？做麼介緊注目看𠊎等呢？你等恅到𠊎等係靠自家个能力抑係虔誠使這個人行路嗎？</verse>
				<verse number="13">亞伯拉罕 、 以撒 、 雅各 个上帝，就係𠊎等祖先个上帝，已經榮耀佢个僕人耶穌；這耶穌，你等將佢交給官府； 彼拉多 決定愛放佢，總係你等在 彼拉多 个面前卻棄絕佢。</verse>
				<verse number="14">佢係聖潔公義个，你等卻棄絕佢，要求 彼拉多 透放一個㓾人个兇手給你等。</verse>
				<verse number="15">恁樣，你等將生命个主害死；總係上帝使佢對死復活。𠊎等就係這件事个見證人。</verse>
				<verse number="16">這瘸腳个人得到勇健，就係因為耶穌个名所發出个能力。這個人，你等識佢。你等所看到發生在佢身上个事，係因為佢信耶穌个名。因為信耶穌，佢正會完全好起來；這係你等親眼看到个。</verse>
				<verse number="17">「這下，兄弟啊，𠊎知你等㧯你等个官長恁樣對待耶穌，係因為無了解。</verse>
				<verse number="18">上帝早就通過眾先知預言基督的確會受苦；這預言已經實現。</verse>
				<verse number="19">所以，你等愛悔改，轉向上帝，佢就會赦免你等个罪。</verse>
				<verse number="20">恁樣，主會賞賜你等靈力換新个日仔；該時，佢愛差遣耶穌降臨，就係佢為你等所選个基督。</verse>
				<verse number="21">基督一定愛留在天頂，直到萬物復興个時節；這係上帝在古早通過佢个聖先知个嘴所宣佈个。</verse>
				<verse number="22">摩西 講過：『主 — 你等个上帝愛對你等个兄弟中為你等興起一個先知，像佢興起𠊎一樣 。佢對你等所講个話，你等全部愛聽。</verse>
				<verse number="23">毋聽從這先知个人，就愛對上帝个子民中除掉。』</verse>
				<verse number="24">所有講預言个先知，連 撒母耳 㧯在佢後背來个，全部有宣佈這兜日仔所愛發生个事情。</verse>
				<verse number="25">你等係先知个繼承人；你等承接上帝㧯你等个祖先所立个契約。上帝對 亞伯拉罕 講過：『𠊎愛通過你个後代賜福給地上个萬民。』</verse>
				<verse number="26">所以，上帝興起佢个僕人，先差佢到你等這位來，賜福給你等，使你等每一個人回頭，離開邪惡个道路。」</verse>
			</chapter>
			<chapter number="4">
				<verse number="1">彼得 㧯 約翰 還對眾人講話个時，有兜祭司 、聖殿个警衛長，㧯撒都該人忽然來到。</verse>
				<verse number="2">因為兩個使徒教訓人，講耶穌已經復活，用恁樣來證明死人復活个事，這兜人非常譴，</verse>
				<verse number="3">所以就捉佢等，將佢等關在監獄到天光，因為該時天已經暗。</verse>
				<verse number="4">總係，該兜聽道理个人有盡多相信；信徒个總數單淨男仔人就將近五千人。</verse>
				<verse number="5">第二日， 猶太 人个領袖、長老，㧯經學教師在 耶路撒冷 聚集開會。</verse>
				<verse number="6">大祭司 亞那 㧯 該亞法 ，並 約翰 㧯 亞歷山大 ，還有大祭司个親戚全部在該位。</verse>
				<verse number="7">佢等喊使徒企在佢等个面前，問講：「你等靠麼介能力，奉麼人个名做這事呢？」</verse>
				<verse number="8">彼得 被聖靈充滿，應講：「民間个領袖㧯長老啊，</verse>
				<verse number="9">若係𠊎等今晡日受審問係關係這瘸腳个人樣般得到醫好這件好事，</verse>
				<verse number="10">你等大家㧯所有个 以色列 人應當知：這企在你等面前个人，佢完全得到醫好，係因為 拿撒勒 人耶穌基督个名所發出个能力。耶穌被你等釘死在十字架頂，總係上帝已經使佢對死復活。</verse>
				<verse number="11">關係這位耶穌，聖經講過： 你等个泥水師傅所㧒掉个這垤石頭， 已經成做地基中最重要个 。</verse>
				<verse number="12">只有通過耶穌，正有拯救；因為在天下人間，上帝無賜別个名，使𠊎等做得靠它來得救。」</verse>
				<verse number="13">該兜議員看到 彼得 㧯 約翰 恁勇敢，又知佢等係無受麼介教育个普通人，就感覺盡奇怪。佢等知佢兩儕識跈過耶穌；</verse>
				<verse number="14">總係，佢等無話好講，因為佢等看到該得到醫好个人企在 彼得 㧯 約翰 个塍頭。</verse>
				<verse number="15">該兜議員就命令佢兩儕出去議會个外背，然後參詳，</verse>
				<verse number="16">講：「𠊎等愛樣般對付佢等呢？佢等明明行一個大神蹟，住在 耶路撒冷 个人全部知這件事，𠊎等也無法度否認。</verse>
				<verse number="17">總係，為到愛避免這個事在民間越傳越闊，𠊎等來警告佢等，做毋得再用該儕个名對人講麼介。」</verse>
				<verse number="18">佢等就喊佢兩儕倒轉來，警告佢等無論樣般做毋得再用耶穌个名講道抑係教訓人。</verse>
				<verse number="19">總係 彼得 㧯 約翰 應佢等講：「在上帝面前，聽從你等較著，抑係聽從上帝較著呢？你等自家想看仔！</verse>
				<verse number="20">𠊎等所看到、所聽到个，做毋得無講。」</verse>
				<verse number="21">因為恁樣，議會就再一擺嚴嚴警告佢等，然後放佢等出來。議會想毋出愛樣般刑罰佢等，因為眾人攏總為所發生个事頌讚上帝。</verse>
				<verse number="22">同時，在這個神蹟中得到醫好个人已經四十零歲。</verse>
				<verse number="23">彼得 㧯 約翰 一下得到釋放，黏時轉信徒該位去，將祭司長㧯長老所講个話對大家報告。</verse>
				<verse number="24">佢等聽到，就同心大聲祈禱上帝，講：「創造天、地、海，㧯其中萬物个主宰啊！</verse>
				<verse number="25">你識通過聖靈，用你个僕人 — 𠊎等个祖先 大衛 个嘴講： 列國做麼介妄想反叛？ 萬民做麼介空空計謀？</verse>
				<verse number="26">世上个王䟘起來準備； 掌權个官也聚集共下， 想愛攻擊主㧯佢个受膏者基督。</verse>
				<verse number="27">事實就係恁樣， 希律 㧯 龐修‧彼拉多 在本城㧯外邦人並 以色列 人勾結，愛攻擊你神聖个僕人耶穌，就係你所選立个基督。</verse>
				<verse number="28">佢等同謀，照你个大能㧯旨意所預定愛實現个一切去做。</verse>
				<verse number="29">主啊，佢等恐嚇𠊎等，這下求你鑒察，並使𠊎等，就係你个僕人，會勇敢傳你个道理。</verse>
				<verse number="30">求你伸手醫治病痛，也使𠊎等會通過你神聖个僕人耶穌个名行神蹟奇事。」</verse>
				<verse number="31">佢等祈禱後，聚會个地方就搖動；佢等全部被聖靈充滿，勇敢傳上帝个道理。</verse>
				<verse number="32">這群信徒全部同心合意，無一個人講佢所有个財產係屬自家个；所有个東西大家公用。</verse>
				<verse number="33">該兜使徒用大能力見證主耶穌个復活；上帝大大賜福給每一個人。</verse>
				<verse number="34">在佢等當中，無人欠麼介。該兜有田有屋个，就將賣田產家業个錢帶來，</verse>
				<verse number="35">放在使徒个面前，分給每一個需要个人。</verse>
				<verse number="36">有一個在 塞浦路斯 出世个 利未 人，名安到 約瑟 ，使徒喊佢 巴拿巴 (意思就係「鼓勵者」)；</verse>
				<verse number="37">佢賣掉佢个一垤田地，將錢帶來，交給使徒。</verse>
			</chapter>
			<chapter number="5">
				<verse number="1">另外有一個人，名安到 亞拿尼亞 ；佢㧯厥𡜵娘 撒非喇 賣掉一兜田產。</verse>
				<verse number="2">佢暗中留下一兜錢，將賸个交給使徒；這件事厥𡜵娘也知。</verse>
				<verse number="3">彼得 對佢講：「 亞拿尼亞 ，你做麼介俾撒但控制你个心，來騙聖靈，將賣田產个錢暗中留下一兜呢？</verse>
				<verse number="4">田產吂賣，係你个；賣掉以後，錢還係你管个。你樣般存心恁樣做呢？你毋係騙人，係騙上帝！」</verse>
				<verse number="5">亞拿尼亞 一聽到這個話，就橫落去，死掉。所有聽到這件事个人全部大著驚。</verse>
				<verse number="6">有幾個後生人入來，將佢个屍體包起來，扛出去埋。</verse>
				<verse number="7">大約過三點鐘，厥𡜵娘也入來；姖還毋知所發生个事。</verse>
				<verse number="8">彼得 對姖講：「你㧯𠊎講，你等賣田產个錢就係這兜嗎？」 姖應講：「係，全部在這位。」</verse>
				<verse number="9">彼得 講：「你等做麼介同心試探主个靈呢？你看，埋若老公个人已經到門口，佢等也愛將你扛出去！」</verse>
				<verse number="10">姖黏時也橫在 彼得 个腳前，死掉。該兜後生人入來，看到姖已經死掉，就將姖扛出去，埋在厥老公个堘頭。</verse>
				<verse number="11">全教會㧯所有聽到這兜事个人攏總非常著驚。</verse>
				<verse number="12">有盡多神蹟奇事通過使徒个手，在民間發生；所有个信徒同心合意在 所羅門 廊下聚集。</verse>
				<verse number="13">雖然一般民眾尊重佢等，總係除了信徒以外，無人敢接近佢等。</verse>
				<verse number="14">該時，信主个人緊來緊多，男女都有。</verse>
				<verse number="15">因為使徒行盡多神蹟，有兜人就將病人扛到街路，放在眠床頂抑係草蓆頂，希望 彼得 行過去个時，佢个影仔會遮到一兜人个身上。</verse>
				<verse number="16">還有一大群人帶等病人㧯邪靈附身个人，對 耶路撒冷 附近个鄉鎮來；這兜病人全部得到醫好。</verse>
				<verse number="17">大祭司㧯該兜同佢共黨个人，就係當地个撒都該人，對使徒非常嫉妒；所以佢等就決心愛採取行動。</verse>
				<verse number="18">佢等下手捉使徒，將佢等關在監獄。</verse>
				<verse number="19">總係該暗晡，主个天使打開監門，帶使徒出來，㧯佢等講：</verse>
				<verse number="20">「你等去，企在聖殿肚，對民眾傳關係這新生命个道理。」</verse>
				<verse number="21">使徒聽從這個話，天曚光个時，佢等就入去聖殿教訓人。 大祭司㧯佢个同黨召集議會所有 以色列 人个長老來舉行大會，然後喊人去監獄將使徒帶來。</verse>
				<verse number="22">總係，警衛去到个時，發現該兜使徒無在監獄肚，就倒轉去議會報告，講：</verse>
				<verse number="23">「𠊎等去到監獄，看到監門鎖到好好，看守个人也在門外掌等；總係𠊎等打開監門，發現底背連一個人也無！」</verse>
				<verse number="24">聖殿个警衛長㧯該兜祭司長聽到這個報告，無葛無煞，毋知這件事會樣般。</verse>
				<verse number="25">這時，有一個人入來報告講：「你等關在監獄肚个人，這下企在聖殿肚教訓民眾！」</verse>
				<verse number="26">所以該警衛長帶等部下去，將使徒帶轉來。佢等無用暴力，因為驚民眾用石頭㧹佢等。</verse>
				<verse number="27">佢等將使徒帶來，喊佢等企在議會前。大祭司審問佢等，</verse>
				<verse number="28">講：「𠊎等識嚴嚴禁止你等，做毋得用這人个名教訓人，你等反轉將你等這個道理傳遍 耶路撒冷 ，想愛將殺害這人个血債歸在𠊎等个身上！」</verse>
				<verse number="29">彼得 㧯其他个使徒應講：「順服上帝，毋順服人，這係應當个！</verse>
				<verse number="30">你等所釘死在十字架頂个耶穌，𠊎等祖先个上帝已經使佢復活。</verse>
				<verse number="31">上帝高升佢，使佢在自家个右片做領袖，做救主，愛給 以色列 人有悔改个機會，使佢等个罪得到赦免。</verse>
				<verse number="32">𠊎等就係這兜事个見證人；上帝賜給順服佢个人个聖靈也㧯𠊎等共下做證。」</verse>
				<verse number="33">議會个議員聽了這個話，非常譴，想愛殺害該兜使徒。</verse>
				<verse number="34">總係，佢等當中有一個法利賽人，名安到 迦瑪列 ，係眾人非常敬重个經學教師；佢在議會中企起來，吩咐人帶使徒出去一下，</verse>
				<verse number="35">然後對議員講：「 以色列 同胞啊，你等處理這兜人个事，一定愛細膩！</verse>
				<verse number="36">以前， 杜達 興起來，自稱做大，約有四百儕跈佢。最尾，佢被人㓾死，跈佢个人也散掉去，暴亂就平靜下去。</verse>
				<verse number="37">以後又有 加利利 个 猶大 在戶口調查个時興起來，引誘好多人跈佢；佢也被人㓾死，跈佢个人也散掉去。</verse>
				<verse number="38">對眼前這件事，𠊎㧯你等講，莫㧯佢等作對，由在佢等！若係佢等所計劃、所做个，係人个意思，一定會失敗；</verse>
				<verse number="39">假使係上帝个旨意，你等就無法度打橫佢等。你等所做个，驚怕反轉係攻擊上帝！」 議會接納 迦瑪列 个意見，</verse>
				<verse number="40">就喊使徒入來，鞭打佢等，又命令佢等做毋得再用耶穌个名講道理，然後透放佢等。</verse>
				<verse number="41">使徒離開議會，因為堪得為耶穌个名受侮辱，心肝非常歡喜。</verse>
				<verse number="42">佢等還係逐日在聖殿肚㧯人屋下繼續教訓人，傳揚有關耶穌係基督个福音。</verse>
			</chapter>
			<chapter number="6">
				<verse number="1">這時，信徒个數目日日增加；該兜講 希臘 話个 猶太 人對講 希伯來 話个 猶太 人發怨言，講：在供給逐日个生活這件事頂高，佢等當中个寡婦受忽略。</verse>
				<verse number="2">十二使徒就召集全體信徒，對佢等講：「喊𠊎等放下傳上帝道理个工作，去料理生活个事務，係毋著个。</verse>
				<verse number="3">所以，各位兄弟，請對你等當中選出七個有名望、被聖靈充滿、又有智慧个人來，𠊎等好喊佢等管這兜事。</verse>
				<verse number="4">論到𠊎等，𠊎等愛專心祈禱㧯傳道。」</verse>
				<verse number="5">使徒个建議得到全體个贊成。所以大家選 司提反 ，一個信心堅定、被聖靈充滿个人；又選出 腓利 、 伯羅哥羅 、 尼迦挪 、 提門 、 巴米拿 ，㧯入過 猶太 教个 安提阿 人 尼哥拉 ，</verse>
				<verse number="6">請佢等企在使徒个面前；使徒祈禱以後，就㧯佢等行按手禮。</verse>
				<verse number="7">上帝个道理越傳越闊；在 耶路撒冷 个信徒，數目增加盡多，好多祭司也接受這個信仰。</verse>
				<verse number="8">司提反 滿有上帝个恩賜㧯能力，在民間行大奇事㧯神蹟。</verse>
				<verse number="9">總係有兜人反對佢；這兜人係所謂「自由人」會堂个會員，包含對 古利奈 㧯 亞歷山大 來个 猶太 人。佢等㧯其他對 基利家 並 亞細亞 來个 猶太 人，全部同 司提反 辯論。</verse>
				<verse number="10">聖靈賜智慧給 司提反 ，所以佢等無法度反駁佢所講个話。</verse>
				<verse number="11">佢等就教唆一兜人出來告佢講：「𠊎等識聽這個人講過譭謗 摩西 㧯褻瀆上帝个話！」</verse>
				<verse number="12">佢等用恁樣來煽動眾人、長老㧯經學教師，就來捉 司提反 ，帶佢到議會去。</verse>
				<verse number="13">佢等所教唆个假證人出來講：「這個人常常講話攻擊𠊎等个聖殿㧯 摩西 个法律。</verse>
				<verse number="14">𠊎等識聽佢講過：這個 拿撒勒 人耶穌愛拆掉聖殿，愛改變 摩西 傳給𠊎等个風俗習慣！」</verse>
				<verse number="15">所有在議會中坐等个人就注目看 司提反 ，看到佢个面貌像天使个面貌一樣。</verse>
			</chapter>
			<chapter number="7">
				<verse number="1">大祭司問 司提反 講：「正經有這個事嗎？」</verse>
				<verse number="2">司提反 應講：「各位父老兄弟，請聽𠊎講！𠊎等个祖先 亞伯拉罕 住在 美索不達米亞 ，還吂徙去 哈蘭 住个時，榮光个上帝對佢顯現，</verse>
				<verse number="3">㧯佢講：『你愛離開你个故鄉㧯親族，到𠊎所愛指示你去个地方。』</verse>
				<verse number="4">恁樣， 亞伯拉罕 就離開 迦勒底 人个所在，去住在 哈蘭 。厥爸死掉以後，上帝喊佢徙到這位來，就係你等這下所住个所在。</verse>
				<verse number="5">該時，上帝還吂賜佢麼介產業，連企腳个所在乜無；總係上帝應許愛賜這垤土地給佢，做佢㧯後代个產業，雖然該時佢還吂有孻仔。</verse>
				<verse number="6">上帝㧯佢恁樣講：『你个後代會住在外國，在該位做奴才，受蹧踏四百年。</verse>
				<verse number="7">總係，使佢等做奴才个國家會被𠊎責罰。以後佢等會離開該所在，來這位服事𠊎。』</verse>
				<verse number="8">上帝就㧯 亞伯拉罕 立約，用割禮做記號。因為恁樣， 亞伯拉罕 𫱔 以撒 以後，第八日就㧯佢行割禮；照樣， 以撒 㧯 雅各 行割禮， 雅各 㧯十二個族長行割禮。</verse>
				<verse number="9">「該兜族長嫉妒 約瑟 ，將佢賣到 埃及 去；總係上帝同佢共下，</verse>
				<verse number="10">救佢脫離一切个災難。佢企在 埃及 王法老面前个時，上帝賜佢恩典㧯智慧。法老設立佢做國家个宰相㧯王宮个總管。</verse>
				<verse number="11">無幾久後， 埃及 㧯 迦南 全地堵到嚴重个天旱，生活非常艱難；𠊎等个祖先也無麼介糧食。</verse>
				<verse number="12">雅各 聽講 埃及 有糧食，就喊佢該兜孻仔，就係𠊎等个祖先，去該位；這係第一擺。</verse>
				<verse number="13">第二擺佢等去个時， 約瑟 㧯佢該兜兄弟相認；法老正認識 約瑟 个屋下人。</verse>
				<verse number="14">約瑟 派人去見厥爸 雅各 ，請佢帶等全家到 埃及 來；攏總有七十五儕。</verse>
				<verse number="15">雅各 就南下到 埃及 ；佢㧯其他个祖先死在該位。</verse>
				<verse number="16">佢等个遺體被人送到 示劍 ，葬在 亞伯拉罕 用錢對 哈抹 个子孫買來个墳墓底背。</verse>
				<verse number="17">「上帝向 亞伯拉罕 所應許个時間來到以前， 以色列 族在 埃及 个人數已經增加盡多，</verse>
				<verse number="18">直到有一個完全毋識 約瑟 个王開始統治 埃及 。</verse>
				<verse number="19">該王用詭計對付𠊎等个同胞，苦毒𠊎等个祖先，強迫佢等㧒掉佢等个孲𤘅仔，毋俾孲𤘅仔生存。</verse>
				<verse number="20">就在該時， 摩西 出世；佢生到盡得人惜，在厥爸个屋下養育三個月。</verse>
				<verse number="21">佢被人㧒掉个時，法老个妹仔拈來，揇轉去做自家个孻仔。</verse>
				<verse number="22">摩西 就接受 埃及 一切个教育，盡有口才㧯辦事个能力。</verse>
				<verse number="23">「 摩西 四十歲个時節，想愛去看 以色列 同胞个情形。</verse>
				<verse number="24">佢看到一個同胞被 埃及 人欺負，就進前保護佢，為佢伸冤，將該 埃及 人㓾死。</verse>
				<verse number="25">佢認為同胞會明白上帝愛用佢來救佢等，無想到佢等全毋會了解。</verse>
				<verse number="26">第二日，佢看到兩個 以色列 人相打。佢想愛調解，就勸佢等講：『你等係自家人，做麼介彼此欺負呢？』</verse>
				<verse number="27">該欺負同胞个將 摩西 㩳走，講：『麼人設立你做𠊎等个領袖㧯判官呢？</verse>
				<verse number="28">你也愛㓾𠊎，像昨晡日㓾該 埃及 人共樣係麼？』</verse>
				<verse number="29">摩西 聽到這個話就偷走，離開 埃及 ，去暫時住在 米甸 。在該位，佢𫱔兩個孻仔。</verse>
				<verse number="30">「四十年後，在 西奈 山附近个曠野，有一個天使在竻樹个火焰中對 摩西 顯現。</verse>
				<verse number="31">摩西 看到這異象，心中非常奇怪，就行前去，想愛看到底發生麼介事情。該時，佢聽到主个聲講：</verse>
				<verse number="32">『𠊎係若祖先个上帝，就係 亞伯拉罕 、 以撒 、 雅各 个上帝。』 摩西 驚到愊愊掣，毋敢看。</verse>
				<verse number="33">主又㧯佢講：『脫下你个鞋仔！因為你所企个所在係聖地。</verse>
				<verse number="34">𠊎个子民在 埃及 所受个苦難，𠊎有看到清清楚楚；𠊎也有聽到佢等个歎息。𠊎下來，就係愛救佢等。來！𠊎派你去 埃及 。』</verse>
				<verse number="35">「這 摩西 就係 以色列 人所棄絕、被人講：『麼人設立你做𠊎等个領袖㧯判官呢？』通過在竻樹中顯現个天使，上帝派佢做領袖、做拯救者。</verse>
				<verse number="36">佢帶領人民出 埃及 ；佢在 埃及 、在 紅海 ，㧯在曠野个四十年間，行盡多神蹟奇事。</verse>
				<verse number="37">就係這個 摩西 㧯 以色列 人講：『上帝愛對你等个同胞中間為你等興起一個先知，像佢興起𠊎一樣 。』</verse>
				<verse number="38">就係佢在曠野同 以色列 會眾共下生活；佢同在 西奈 山㧯佢講話个天使並𠊎等个祖先共下；佢領受上帝永生个道理，將這道理傳給𠊎等。</verse>
				<verse number="39">「總係，𠊎等个祖先毋肯聽從佢，反轉棄絕佢，心肝想念 埃及 。</verse>
				<verse number="40">佢等對 亞倫 講：『為𠊎等造兜神明來帶領𠊎等。因為帶𠊎等出 埃及 个該隻 摩西 ，𠊎等毋知佢堵到麼介事情。』</verse>
				<verse number="41">該時，佢等就鑄造一隻細牛仔，對這偶像獻祭，為自家个手所做个東西歡喜慶祝。</verse>
				<verse number="42">上帝就轉身毋搭佢等，由在佢等去拜天頂个星辰，像先知書所講： 以色列 人啊，在曠野該四十年， 你等並無獻麼介牲儀抑係禮物給𠊎！</verse>
				<verse number="43">你等扛等摩洛神个帳篷， 又扛等理番神个星辰像， 就係你等做來拜个偶像。 所以，𠊎愛將你等徙到 巴比倫 外背去！</verse>
				<verse number="44">「𠊎等个祖先在曠野有表示上帝臨在个聖帳篷 (底背放約櫃)，係上帝吩咐 摩西 照佢所指示个模型造个。</verse>
				<verse number="45">後來，𠊎等个祖先繼承這聖帳篷。上帝在佢等面前逐走外邦人、佔領該土地个時， 約書亞 㧯佢等將這聖帳篷徙去該位，直到 大衛 个時代。</verse>
				<verse number="46">大衛 得到上帝个恩典。佢就求上帝准佢為佢，就係 雅各 个上帝，起一座聖殿 ；</verse>
				<verse number="47">總係，後來為上帝起聖殿个係 所羅門 。</verse>
				<verse number="48">「其實，至高个上帝並毋係住在人手所起个聖殿，像先知所講：</verse>
				<verse number="49">主講：天係𠊎个寶座； 地係𠊎个踏凳。 你等愛為𠊎起㖠種个聖殿呢？ 㖠位愛做𠊎休息个所在呢？</verse>
				<verse number="50">這一切敢毋係𠊎親手創造个嗎？</verse>
				<verse number="51">「你這兜硬頸个人啊，心肝硬、耳公塞等 毋肯聽上帝个話！你等㧯你等个祖先共樣，一直同聖靈作對！</verse>
				<verse number="52">㖠個先知毋識受到你等祖先个迫害呢？該兜先知宣佈講，該公義个僕人愛來，你等个祖先卻將佢等㓾掉；這下，你等又出賣這僕人，殺害佢。</verse>
				<verse number="53">你等係承接上帝法律个人；這法律係天使傳下來个，總係你等毋肯遵守法律！」</verse>
				<verse number="54">眾議員聽了 司提反 這兜話，譴到咬牙切齒。</verse>
				<verse number="55">總係， 司提反 被聖靈充滿，昂頭望天，看到上帝个榮光，又看到耶穌企在上帝个右片，</verse>
				<verse number="56">就講：「𠊎看到天開了，人子企在上帝个右片！」</verse>
				<verse number="57">佢等就大聲喊，用手揞耳公，歸下圍上去，捉 司提反 ，</verse>
				<verse number="58">將佢㩳到城外，用石頭㧹佢。該兜證人將自家个外衫交給一個名安到 掃羅 个青年掌等。</verse>
				<verse number="59">佢等㧹等石頭个時， 司提反 大聲對主求講：「主耶穌啊，求你接納𠊎个靈魂！」</verse>
				<verse number="60">佢又跪下來，大聲喊講：「主啊，毋好將這個罪歸給佢等！」佢講煞，就死掉。</verse>
			</chapter>
			<chapter number="8">
				<verse number="1">殺害 司提反 這件事， 掃羅 盡贊成。 對該日開始， 耶路撒冷 个教會受到非常厲害个迫害。使徒以外，所有个信徒分散到 猶太 㧯 撒馬利亞 个各所在去。</verse>
				<verse number="2">有兜虔誠个人將 司提反 埋起來，為佢傷心大噭。</verse>
				<verse number="3">這時， 掃羅 就進行迫害教會个工作；佢一家一家去搜查，捉男女信徒，拉去坐監。</verse>
				<verse number="4">該兜分散个信徒去到逐所在傳福音。</verse>
				<verse number="5">腓利 到 撒馬利亞 个一座城去，向該位个人傳基督个事。</verse>
				<verse number="6">眾人全部認真聽 腓利 所講个話。佢等一片聽，一片看佢所行个神蹟。</verse>
				<verse number="7">盡多邪靈大聲喊，對所附身个人底背出來；盡多癱風个、瘸腳个，也全部得到醫好。</verse>
				<verse number="8">該城就充滿歡喜。</verse>
				<verse number="9">有一個人，名安到 西門 ，佢在該城行邪術，使 撒馬利亞 个人民盡希奇。佢恅到自家盡會；</verse>
				<verse number="10">所有个人，無論大大細細，全部聽從佢，講：「這個人有上帝个能力，係『大能者』。」</verse>
				<verse number="11">因為佢行邪術迷惑佢等有盡久个時間，所以佢等聽從佢。</verse>
				<verse number="12">總係，到佢等相信 腓利 所傳關係上帝國个福音㧯耶穌基督个名，佢等無論男女就攏總領洗禮。</verse>
				<verse number="13">西門 自家也相信；佢領洗禮後，常常同 腓利 共下。佢看到 腓利 所行个神蹟㧯大奇事，就盡希奇。</verse>
				<verse number="14">在 耶路撒冷 个使徒聽到 撒馬利亞 人接受上帝个道理，就派 彼得 㧯 約翰 到佢等該位去。</verse>
				<verse number="15">兩個人一到，就為信徒祈禱，愛俾佢等領受聖靈，</verse>
				<verse number="16">因為該時聖靈還吂臨到佢等當中任何一個人；佢等只有奉主耶穌个名接受洗禮定定。</verse>
				<verse number="17">所以 彼得 㧯 約翰 為佢等按手，佢等就領受聖靈。</verse>
				<verse number="18">西門 看到使徒一按手，人就領受到聖靈，佢就拿錢給使徒，</verse>
				<verse number="19">講：「請將這能力也給𠊎，使𠊎為麼人按手，麼人就會領受聖靈。」</verse>
				<verse number="20">總係 彼得 對佢講：「你同你个錢共下毀滅了！你樣會妄想上帝个恩賜做得用錢來買啊！</verse>
				<verse number="21">𠊎等个工作你無份；因為在上帝个面前，你个心無正。</verse>
				<verse number="22">所以你愛悔改，離開這個罪惡，並懇求主；或者你心中个意念會得到赦免。</verse>
				<verse number="23">𠊎看得出，你充滿嫉妒个艱苦，被罪惡捆綁。」</verse>
				<verse number="24">西門 對 彼得 㧯 約翰 講：「求你等為𠊎向主祈禱，使你等所講个事，毋會發生在𠊎个身上。」</verse>
				<verse number="25">彼得 㧯 約翰 在該位做見證，傳主个道理，然後倒轉去 耶路撒冷 。路上，佢等也在 撒馬利亞 个多多村莊傳福音。</verse>
				<verse number="26">有主个一個天使㧯 腓利 講：「䟘起來，向南片行，到該條對 耶路撒冷 透到 迦薩 个路上去。」 (這條路已經無人行 。)</verse>
				<verse number="27">腓利 就出發去。在該條路上，佢堵到一個太監，係 衣索匹亞 个大官，在 衣索匹亞 女王 甘太基 个手下管錢；佢已經上 耶路撒冷 去敬拜上帝，</verse>
				<verse number="28">該時愛轉去，坐在馬車頂讀先知 以賽亞 个書。</verse>
				<verse number="29">聖靈㧯 腓利 講：「你過去，在車仔堘頭行。」</verse>
				<verse number="30">腓利 就走過去，聽到太監讀先知 以賽亞 个書，就問佢：「你所讀个，有明白麼？」</verse>
				<verse number="31">佢應講：「無人教𠊎，樣會明白？」佢就請 腓利 上車，同佢共下坐。</verse>
				<verse number="32">佢所讀該段聖經係： 佢像被人牽去㓾个羊仔， 又像被人剪毛个細羊仔恬恬； 佢也係恁樣，一句話毋講。</verse>
				<verse number="33">佢被人欺負； 無人代佢主持公義。 無人講得出佢个後代， 因為佢个生命已經被人對世間除掉。</verse>
				<verse number="34">太監問 腓利 講：「請問，先知這話係指麼人講个？係講佢自家，抑係別人？」</verse>
				<verse number="35">腓利 就開口，對這段聖經開始，㧯佢講關係耶穌个福音。</verse>
				<verse number="36">佢等經過一個地方，路堘有水，太監講：「這位有水，𠊎領洗禮敢做毋得？」</verse>
				<verse number="37"></verse>
				<verse number="38">太監就吩咐停車； 腓利 同佢共下落去水中，為佢行洗禮。</verse>
				<verse number="39">佢等對水中上來以後，主个靈將 腓利 忽然帶走；太監無再看到佢，就歡歡喜喜繼續趕路。</verse>
				<verse number="40">後來，有人在 亞鎖都 堵到 腓利 ；佢行遍該一帶地方，在逐個鄉鎮傳福音，直到 凱撒利亞 。</verse>
			</chapter>
			<chapter number="9">
				<verse number="1">同時， 掃羅 繼續用兇惡个口氣恐嚇信主个人。佢去見大祭司，</verse>
				<verse number="2">要求發給 大馬士革 各 猶太 會堂个文書，准佢搜查信奉這道个人，無論男女，將佢等捉起來，送去 耶路撒冷 。</verse>
				<verse number="3">佢去 大馬士革 个路上，會到城个時節，忽然有大光對天頂下來，四面照等佢。</verse>
				<verse number="4">佢橫在地上，聽到有聲對佢講：「 掃羅 ， 掃羅 ！你做麼介迫害𠊎？」</verse>
				<verse number="5">佢問講：「主啊，你係麼人？」 該聲應講：「𠊎就係你所迫害个耶穌。</verse>
				<verse number="6">䟘起來，入城去，有人會將你應當做个事㧯你講。」</verse>
				<verse number="7">跈 掃羅 共下行个人企在該位，講毋出話；佢等聽到聲，總係無看到人。</verse>
				<verse number="8">掃羅 對地上䟘起來，擘開目珠，麼介都看毋到。佢等就牽等佢个手，帶佢入 大馬士革 城。</verse>
				<verse number="9">三日中間，佢看毋到；無食，也無啉。</verse>
				<verse number="10">在 大馬士革 有一個信徒，名安到 亞拿尼亞 。主在異象中喊佢講：「 亞拿尼亞 ！」佢應講：「主啊，𠊎在這位。」</verse>
				<verse number="11">主講：「你黏時去 直街 ，在 猶大 屋下尋一個 大數 人，名安到 掃羅 。佢在該位祈禱；</verse>
				<verse number="12">掃羅 在異象中已經看到一個名安到 亞拿尼亞 个人，入來為佢按手，俾佢看得到。」</verse>
				<verse number="13">亞拿尼亞 應講：「主啊，盡多人㧯𠊎講過，這個人在 耶路撒冷 係樣般惡毒來迫害你个聖徒。</verse>
				<verse number="14">這擺佢來 大馬士革 ，帶等祭司長給佢个權柄，愛捉所有敬拜你个人。」</verse>
				<verse number="15">主㧯佢講：「做你去！因為𠊎已經揀選佢來事奉𠊎。佢愛在外邦人、君王，㧯 以色列 人个面前宣傳𠊎个名。</verse>
				<verse number="16">𠊎愛指示佢，為到𠊎个緣故，佢一定會堵到種種个苦難。」</verse>
				<verse number="17">所以 亞拿尼亞 就去。佢入去該人屋下，按手在 掃羅 个身上，講：「 掃羅 兄弟啊，在你來這位个路上對你顯現个主耶穌親自派𠊎來，愛俾你再過看得到，並被聖靈充滿。」</verse>
				<verse number="18">即時，有像魚鱗个東西對 掃羅 个目珠跌下來，佢就再看得到。所以佢䟘起來，接受洗禮；</verse>
				<verse number="19">食過東西以後，佢个氣力就回復。 掃羅 在 大馬士革 同信徒共下住一站時間。</verse>
				<verse number="20">佢黏時去各會堂宣傳耶穌，講：「佢就係上帝个孻仔。」</verse>
				<verse number="21">所有聽到个人就感覺盡奇怪，講：「這人毋係在 耶路撒冷 殺害該兜祈求該隻名个人嗎？佢來這位，敢毋係愛捉信徒，將佢等送給該兜祭司長嗎？」</verse>
				<verse number="22">總係 掃羅 个講道反轉更加有力；佢用盡強个論證來證明耶穌係基督，使 大馬士革 个 猶太 人無法度㧯佢辯論。</verse>
				<verse number="23">過一站時間， 猶太 人陰謀愛將 掃羅 㓾掉。</verse>
				<verse number="24">有人將佢等个計劃㧯 掃羅 講。該時，佢等日夜在城門口掌等，想愛㓾佢。</verse>
				<verse number="25">總係，有一暗晡，厥學生用大籃仔將佢對城牆頂縋落去。</verse>
				<verse number="26">掃羅 來到 耶路撒冷 ，想愛同信徒來往；總係大家全部驚佢，毋相信佢係信徒。</verse>
				<verse number="27">唯有 巴拿巴 接納佢，帶佢去見使徒，對佢等說明 掃羅 樣般在路上堵到主，主係樣般㧯佢講話，又㧯佢等講起 掃羅 在 大馬士革 奉耶穌个名傳道个時係樣般个勇敢。</verse>
				<verse number="28">恁樣， 掃羅 就同使徒共下出入，在 耶路撒冷 奉主个名大膽傳道。</verse>
				<verse number="29">佢也對講 希臘 話个 猶太 人傳道，同佢等辯論；佢等卻想愛㓾佢。</verse>
				<verse number="30">兄弟知這個事，佢等就帶佢到 凱撒利亞 ，送佢去 大數 。</verse>
				<verse number="31">該時，在 猶太 、 加利利 ，㧯 撒馬利亞 逐位个教會，全部有平安。因為敬畏主，也得到聖靈个幫助，教會就建立起來，人數日日增加。</verse>
				<verse number="32">彼得 行遍逐所在。有一擺，佢訪問住在 呂大 个聖徒；</verse>
				<verse number="33">在該位，佢堵到一個人，名安到 以尼雅 。這個人發癱風，睡草蓆八年，無法度䟘起來。</verse>
				<verse number="34">彼得 對佢講：「 以尼雅 ，耶穌基督醫好你了。䟘起來，將你个被骨收好！」 以尼雅 黏時就䟘起來。</verse>
				<verse number="35">所有住在 呂大 㧯 沙崙 个人都看到佢，佢等就相信主。</verse>
				<verse number="36">在 約帕 有一個女信徒，名安到 大比大 ( 希臘 文个發音係 多加 ，意思係「羚羊」)。姖行過盡多好事，常常幫助窮苦人。</verse>
				<verse number="37">有一日，姖發病，死掉。人將姖个屍體洗淨，停在樓頂个間肚。</verse>
				<verse number="38">約帕 離 呂大 無幾遠。在 約帕 个信徒聽到 彼得 在 呂大 ，就派兩個人去見佢，要求佢講：「請你趕緊來𠊎等這位！」</verse>
				<verse number="39">彼得 即時出發，同佢等共下去。 彼得 一到，人就帶佢上樓頂个間肚去。所有个寡婦圍等 彼得 緊噭，又將 多加 生前所做个內衫㧯外衫拿給佢看。</verse>
				<verse number="40">彼得 吩咐大家出去，就跪下去祈禱，然後面對屍體，講：「 大比大 ，䟘起來！」姖擘開目珠，看到 彼得 ，就坐起來。</verse>
				<verse number="41">彼得 伸手扶姖䟘起來，又喊該兜聖徒㧯寡婦入來，將 多加 生生交給佢等。</verse>
				<verse number="42">這消息傳遍 約帕 ，有盡多人就信主。</verse>
				<verse number="43">彼得 在 約帕 一個製皮師傅 西門 个屋下住好多日。</verse>
			</chapter>
			<chapter number="10">
				<verse number="1">在 凱撒利亞 有一個人安到 哥尼流 ，係 羅馬 軍隊「 意大利 營」个軍官。</verse>
				<verse number="2">佢係一個虔誠人；佢㧯佢全家人都敬畏上帝；佢盡大方救濟窮苦个 猶太 人，常常熱心對上帝祈禱。</verse>
				<verse number="3">有一日下晝，三點鐘左右，佢得到一個異象；在異象中，佢清清楚楚看到上帝个一個使者入來，喊佢：「 哥尼流 ！」</verse>
				<verse number="4">佢注目看等天使，非常著驚，講：「主啊，麼介事？」 天使講：「上帝已經聽你个祈禱，也紀念你所做救濟人个好事。</verse>
				<verse number="5">這下你愛派人去 約帕 ，請該喊做 彼得 个 西門 來。</verse>
				<verse number="6">佢住在一個製皮師傅 西門 个屋下； 西門 个屋就在海滣。」</verse>
				<verse number="7">該㧯佢講話个天使離開以後， 哥尼流 喊兩個僕人㧯平常服事佢个一個虔誠个侍衛來，</verse>
				<verse number="8">將所堵到个事㧯佢等講，然後派佢等去 約帕 。</verse>
				<verse number="9">第二日，佢等行路將近 約帕 。差毋多當晝个時， 彼得 去屋頂祈禱。</verse>
				<verse number="10">佢肚飢，想愛食東西；該家人準備食晝个時， 彼得 入神看到一個異象。</verse>
				<verse number="11">佢看到天開，有東西降下來，像一垤大布仔，四隻角䌈等，縋到地上，</verse>
				<verse number="12">底背有地上各種四腳个走獸、爬蟲，也有天頂个飛鳥。</verse>
				<verse number="13">有聲對佢講：「 彼得 ，䟘起來，㓾來食！」</verse>
				<verse number="14">總係 彼得 應講：「主啊，絕對做毋得！𠊎從來無食過禮儀上麼介污穢無淨浰个東西。」</verse>
				<verse number="15">該聲第二擺對佢講：「上帝所潔淨个，你做毋得看做無淨浰。」</verse>
				<verse number="16">恁樣一連三擺，該東西就收轉天頂去。</verse>
				<verse number="17">彼得 當疑狐所看到个異象係麼介意思个時， 哥尼流 所派來个人已經尋到 西門 个屋下來，企在門口，</verse>
				<verse number="18">大聲喊講：「有一個喊做 彼得 个 西門 住在這位麼？」</verse>
				<verse number="19">彼得 還在該位想，該異象到底係麼介意思，聖靈㧯佢講：「有三個人 來尋你！</verse>
				<verse number="20">你下去，同佢等共下去，毋使懷疑，因為係𠊎差佢等來个。」</verse>
				<verse number="21">所以 彼得 下去，㧯該兜人講：「𠊎就係你等所愛尋个人。你等係為到麼介來呢？」</verse>
				<verse number="22">佢等應講：「係軍官 哥尼流 派𠊎等來个；佢係敬畏上帝个義人， 猶太 个人民全部盡尊敬佢。有一個聖天使指示佢，請你去厥屋下，愛聽你个教訓。」</verse>
				<verse number="23">彼得 就請佢等入去，留佢等過夜。 第二日， 彼得 䟘身同佢等共下去；有幾個 約帕 个兄弟也同佢等去。</verse>
				<verse number="24">又過一日，佢等就到 凱撒利亞 。 哥尼流 已經請佢个親戚㧯好朋友來到，在厥屋下等等。</verse>
				<verse number="25">彼得 一入門， 哥尼流 就進前，伏在佢个腳前拜佢。</verse>
				<verse number="26">彼得 遽遽扶佢䟘起來，講：「請䟘起來，𠊎自家也係人。」</verse>
				<verse number="27">彼得 一片㧯 哥尼流 講話，一片行等入去屋肚；佢看到有盡多人聚集在該位。</verse>
				<verse number="28">佢㧯佢等講：「你等知，照𠊎等个規矩， 猶太 人係做毋得同外邦人親近抑係來往个；總係上帝已經指示𠊎，毋好將任何人看做粗俗抑係無淨浰个。</verse>
				<verse number="29">所以你等差人去請𠊎个時，𠊎無推辭就來。這下，請問，你等係為到麼介原因喊𠊎來？」</verse>
				<verse number="30">哥尼流 講：「四日前，共樣係下晝三點鐘个時，𠊎在屋下祈禱。忽然有一個人，衫褲皓光，企在𠊎面前，</verse>
				<verse number="31">講：『 哥尼流 ！上帝已經聽你个祈禱，也紀念你所做救濟人个好事。</verse>
				<verse number="32">你愛派人去 約帕 ，請該喊做 彼得 个 西門 來。佢住在製皮師傅 西門 个屋下； 西門 个屋就在海滣。』</verse>
				<verse number="33">所以，𠊎黏時派人去請你；你肯光臨，實在盡好。這下，𠊎等全部在上帝个面前，愛聽主所吩咐你講一切个話。」</verse>
				<verse number="34">彼得 開口講：「𠊎這下確實知：上帝對待所有个人全部平等。</verse>
				<verse number="35">一切敬畏佢、行為正直个人，無論係麼介種族，全部係佢所歡喜个。</verse>
				<verse number="36">你等知，佢通過萬民个主 — 耶穌基督，傳給 以色列 人个真道係和平个福音。</verse>
				<verse number="37">約翰 宣傳洗禮以來，該對 加利利 開始傳遍 猶太 全地个道理，你等全部知。</verse>
				<verse number="38">你等也聽過：上帝係樣般用聖靈㧯能力充滿 拿撒勒 人耶穌。佢去到逐所在行好事，醫好所有被魔鬼控制个人，因為上帝㧯佢同在。</verse>
				<verse number="39">佢在 耶路撒冷 㧯其他 猶太 人个地方所做个一切事，有𠊎等做見證人。佢等將佢釘死在十字架頂；</verse>
				<verse number="40">總係，第三日，上帝使佢對死復活，並對人顯現。</verse>
				<verse number="41">佢毋係顯現給所有个人看，只有給𠊎這兜上帝先揀選來做見證个人看。佢對死復活以後，𠊎等識同佢共下食共下啉。</verse>
				<verse number="42">佢命令𠊎等將福音傳給眾人，證明佢就係上帝所設立、愛做生人㧯死人个審判者。</verse>
				<verse number="43">所有个先知也為佢做見證；佢等講：凡信佢个，就做得通過佢个名得到赦罪。」</verse>
				<verse number="44">彼得 還講等道理个時，聖靈降在所有領受道理个人身上。</verse>
				<verse number="45">該兜跈 彼得 對 約帕 來个 猶太 信徒，看到上帝將聖靈个恩賜也倒在外邦人个身上，就感覺盡奇怪；</verse>
				<verse number="46">因為佢等聽到這兜人用屬靈个語言講話，也頌讚上帝為大。所以 彼得 就講：</verse>
				<verse number="47">「這兜人已經領受聖靈，同𠊎等共樣；麼人做得禁止佢等領受水个洗禮呢？」</verse>
				<verse number="48">因為恁樣，佢吩咐佢等奉耶穌基督个名領洗禮。佢等又要求 彼得 同佢等共下住幾日。</verse>
			</chapter>
			<chapter number="11">
				<verse number="1">使徒㧯在 猶太 全地个信徒聽到有兜外邦人也接受上帝个道這件事。</verse>
				<verse number="2">所以， 彼得 到 耶路撒冷 个時，該兜主張外邦人也愛領受割禮个人就批評佢講：</verse>
				<verse number="3">「你樣般去無受割禮个外邦人屋下做人客，又同佢等共下食飯啊！」</verse>
				<verse number="4">彼得 就將事情个經過一一㧯佢等說明。</verse>
				<verse number="5">佢講：「在 約帕 城肚祈禱个時，𠊎入神看到一個異象。有東西對天頂降下來，像一垤大布仔，四隻角䌈等，縋落在𠊎个面前。</verse>
				<verse number="6">𠊎注意看，底背有地上四腳个頭牲、野獸、爬蟲，也有天頂个飛鳥。</verse>
				<verse number="7">𠊎又聽到有聲對𠊎講：『 彼得 ，䟘起來，㓾來食！』</verse>
				<verse number="8">𠊎講：『主啊，絕對做毋得！𠊎從來無食過禮儀上麼介污穢無淨浰个東西。』</verse>
				<verse number="9">對天頂來个聲又講：『上帝所潔淨个，你做毋得看做無淨浰。』</verse>
				<verse number="10">恁樣一連三擺；最後，該東西就收轉天頂去。</verse>
				<verse number="11">堵堵在該時，受派對 凱撒利亞 來尋𠊎該三個人，到𠊎所住該家人个屋下。</verse>
				<verse number="12">聖靈指示𠊎同佢等共下去，毋使懷疑。這六個 約帕 个兄弟也同𠊎共下去；𠊎等攏總入去 哥尼流 个屋肚。</verse>
				<verse number="13">哥尼流 㧯𠊎等講，佢樣般看到一個天使企在佢个屋肚，對佢講：『你愛派人去 約帕 ，請該喊做 彼得 个 西門 來。</verse>
				<verse number="14">佢有話愛對你講，使你㧯你个全家得救。』</verse>
				<verse number="15">𠊎一開始講道，聖靈就降臨在佢等个身上，像頭一擺降臨在𠊎等身上共樣。</verse>
				<verse number="16">𠊎就想起主識講過：『 約翰 用水行洗禮，總係你等會領受聖靈个洗禮。』</verse>
				<verse number="17">既然上帝將這個恩賜也賜給該兜外邦人，像𠊎等信主耶穌基督个時佢賜給𠊎等个共樣；𠊎係麼人，敢做得阻擋上帝嗎？」</verse>
				<verse number="18">佢等聽到這兜話，就無再過批評，只有頌讚上帝講：「恁樣看起來，上帝也賜恩典給外邦人，使佢等因悔改得到生命！」</verse>
				<verse number="19">這時，該兜信徒因為 司提反 殉道所引起个迫害，分散到 腓尼基 、 塞浦路斯 ，㧯 安提阿 ；佢等只有對 猶太 人傳道。</verse>
				<verse number="20">總係，有兜住在 塞浦路斯 㧯 古利奈 个信徒來到 安提阿 ；佢等也向 希臘 人傳主耶穌个福音。</verse>
				<verse number="21">主个能力同佢等共下，就有盡多人相信來歸主。</verse>
				<verse number="22">這消息傳到 耶路撒冷 个教會，佢等就派 巴拿巴 去 安提阿 。</verse>
				<verse number="23">巴拿巴 去到个時，看到上帝賜福給該兜人，就盡歡喜；佢勸佢等大家愛專心一意信靠主。</verse>
				<verse number="24">巴拿巴 係一個好人，被聖靈充滿，有堅強个信心。因為恁樣，就有盡多个人歸屬主。</verse>
				<verse number="25">後來， 巴拿巴 去 大數 尋 掃羅 ；</verse>
				<verse number="26">尋到以後，就帶佢轉 安提阿 。足足有一年个時間，佢兩儕同教會个會友共下聚會，也教訓多多个人。信徒被人喊做「基督徒」就係對 安提阿 開始个。</verse>
				<verse number="27">該時，有幾個先知對 耶路撒冷 來到 安提阿 。</verse>
				<verse number="28">其中有一個名安到 亞迦布 ；佢得到聖靈个指示，䟘起來預言天下會有嚴重个飢荒。 (這個事到 克勞第 掌權个時正經發生。)</verse>
				<verse number="29">所以信徒決定，照逐儕个力量，出錢幫助住在 猶太 个兄弟姊妹。</verse>
				<verse number="30">佢等就照恁樣行，託 巴拿巴 㧯 掃羅 將錢帶去交給教會个眾長老。</verse>
			</chapter>
			<chapter number="12">
				<verse number="1">該時， 希律 王下手迫害教會个一兜人。</verse>
				<verse number="2">佢用刀仔㓾死 約翰 个阿哥 雅各 。</verse>
				<verse number="3">佢看 猶太 人盡歡喜這個事，又去捉 彼得 。 (這個事發生在除酵節个期間。)</verse>
				<verse number="4">佢捉到 彼得 後，將佢關在監獄肚，交給四班个警衛看守，每班有四個人。 希律 計劃在𨃟過節後將佢帶出來，當眾審判佢。</verse>
				<verse number="5">所以， 彼得 在監獄肚被人掌到死死；總係，教會个兄弟姊妹為佢對上帝迫切祈禱。</verse>
				<verse number="6">希律 愛將 彼得 帶出來審判个前一暗晡， 彼得 睡在兩個警衛个當中，有兩條鐵鍊仔鎖等佢，門外又有警衛掌等。</verse>
				<verse number="7">忽然，主个一個天使企在佢塍頭，有光照在監牢肚。天使拍 彼得 个肩頭，喊醒佢，講：「遽遽䟘起來！」該鐵鍊仔就對 彼得 个手𢫫下來。</verse>
				<verse number="8">天使㧯佢講：「腰帶繫好，鞋仔著起來。」 彼得 就照恁樣做。天使又講：「外衫袈等，跈𠊎來。」</verse>
				<verse number="9">彼得 跈等佢行出監獄，還毋知天使所做个係真實个事，恅到係看到異象。</verse>
				<verse number="10">佢等通過第一關个警衛，又過第二關，最後，來到直接透到城肚个鐵門；該門自家打開來。佢等出來，行過一條街路；天使忽然間就離開 彼得 。</verse>
				<verse number="11">這時， 彼得 正清醒過來；佢講：「這下𠊎正知這係真實个；主差佢个天使來，救𠊎脫離 希律 个手㧯 猶太 人所期待一切个陷害。」</verse>
				<verse number="12">了解這個情形以後，佢就去 約翰‧馬可 个阿姆 馬利亞 个屋下；有好多人聚集在該位祈禱。</verse>
				<verse number="13">彼得 掽外門，有一個名安到 羅大 个使女出來聽看仔。</verse>
				<verse number="14">姖認出係 彼得 个聲音，歡喜到毋記得開門，就走去㧯大家講 彼得 企在門外。</verse>
				<verse number="15">佢等講：「你發癲係麼！」該使女堅持講正經有這個事。佢等就講：「怕係佢个天使！」</verse>
				<verse number="16">彼得 繼續緊掽門。佢等打開門，看到正經係 彼得 ，就著驚又歡喜。</verse>
				<verse number="17">彼得 用手做記號，喊佢等莫出聲，然後㧯佢等說明：主係樣般帶佢出監獄个。 彼得 又吩咐佢等：「將消息同 雅各 㧯眾兄弟講」；佢就離開，去別个所在。</verse>
				<verse number="18">天光个時，警衛亂到無葛無煞，毋知 彼得 到底發生麼介事情。</verse>
				<verse number="19">希律 下令搜查，總係無 彼得 个影跡；佢就審問警衛，吩咐將佢等拉去㓾死。 這個事以後， 希律 離開 猶太 ，去 凱撒利亞 ，住在該位。</verse>
				<verse number="20">希律 對 泰爾 㧯 西頓 个人民大發譴；所以，佢等推派代表團去見 希律 。佢等先得到宮廷个總管 伯拉斯都 个同情，然後對 希律 求和，因為佢等个糧食係對王所管个所在來得到供給。</verse>
				<verse number="21">在所定个日仔， 希律 著等王服，坐在王位，對人民演講。</verse>
				<verse number="22">佢等大聲喊講：「這係神明个聲，毋係人个聲！」</verse>
				<verse number="23">因為 希律 無將榮光歸給上帝，主个天使即時就責罰佢。佢就被蟲仔咬死。</verse>
				<verse number="24">上帝个道繼續發展，日日興旺。</verse>
				<verse number="25">巴拿巴 㧯 掃羅 辦好受交託个事以後，就對 耶路撒冷 倒轉去 ；佢等也帶 約翰‧馬可 共下去。</verse>
			</chapter>
			<chapter number="13">
				<verse number="1">在 安提阿 教會中，有幾個先知㧯教師，就係 巴拿巴 ， 西面 (偏名「烏漢」)， 古利奈 人 路求 ，同分封个王 希律 共下長大个 馬念 ，還有 掃羅 。</verse>
				<verse number="2">佢等敬拜主、禁食个時，聖靈㧯佢等講：「你等愛為𠊎派 巴拿巴 㧯 掃羅 ，去做𠊎呼召佢等擔任个工作。」</verse>
				<verse number="3">所以，佢等禁食祈禱後，就為 巴拿巴 㧯 掃羅 按手，派佢等出去。</verse>
				<verse number="4">巴拿巴 㧯 掃羅 既然受聖靈差派，就下 西流基 去，對該位坐船去 塞浦路斯 。</verse>
				<verse number="5">佢等一到 撒拉米 ，就在 猶太 人个各會堂傳上帝个道。 約翰‧馬可 在該位協助佢等工作。</verse>
				<verse number="6">佢等行遍全島，一直到 帕弗 ，在該位堵到一個名安到 巴‧耶穌 个術士；佢係一個 猶太 人，也係假先知。</verse>
				<verse number="7">佢㧯島上个總督 士求‧保羅 盡有交情。總督係聰明人；佢請 巴拿巴 㧯 掃羅 來，愛聽上帝个道。</verse>
				<verse number="8">總係，術士 以呂馬 ( 以呂馬 係佢 希臘 个名) 反對佢等；佢想愛阻止總督接受這個信仰。</verse>
				<verse number="9">這時， 掃羅 — 又安到 保羅 ，被聖靈充滿，就䁯該術士，</verse>
				<verse number="10">講：「你這魔鬼个孻仔，一切正義个仇敵，充滿各種邪惡㧯詭詐个人！你歪曲主个真道，還毋肯停嗎！</verse>
				<verse number="11">這下主愛責罰你；你會青盲，暫時看毋到日光。」 以呂馬 个目珠即時矇矇烏暗；佢四處緊摸，求人牽佢。</verse>
				<verse number="12">總督看到所發生个事，對主个道理感覺盡希奇，就相信。</verse>
				<verse number="13">保羅 㧯佢个同伴對 帕弗 開船，來到 旁非利亞 个 別加 ； 約翰‧馬可 在該位離開佢等，轉 耶路撒冷 去。</verse>
				<verse number="14">佢等對 別加 繼續向前行，到 彼西底 个 安提阿 。在安息日，佢等去到 猶太 人个會堂參加禮拜。</verse>
				<verse number="15">讀了 摩西 个法律㧯先知个書以後，管會堂个喊人去㧯佢等講：「兩位兄弟，若係你等有勉勵眾人个話，請講！」</verse>
				<verse number="16">保羅 就企起來，比手勢，講： 「 以色列 同胞㧯所有敬畏上帝个外邦人啊，請聽𠊎講！</verse>
				<verse number="17">以色列 人个上帝揀選𠊎等个祖先。佢等住在 埃及 做外國人个時，上帝使佢等成做大个民族，用大權能个手帶佢等出 埃及 。</verse>
				<verse number="18">在曠野，佢忍耐 佢等四十年。</verse>
				<verse number="19">佢消滅 迦南 地七個民族，將該土地交給佢等做產業。</verse>
				<verse number="20">這兜事个經過大約有四百五十年。 「以後，上帝又為佢等設立士師，直到先知 撒母耳 个時。</verse>
				<verse number="21">後來，佢等討愛有一個王，上帝就對 便雅憫 支族選出 基士 个孻仔 掃羅 ，立佢做佢等个王，共四十年久。</verse>
				<verse number="22">廢掉 掃羅 後，上帝又選立 大衛 做佢等个王。關係 大衛 ，上帝講：『𠊎已經尋到 耶西 个孻仔 大衛 ；佢係合𠊎心意个人，佢會遵行𠊎一切个旨意。』</verse>
				<verse number="23">對佢个後代，上帝照自家个應許為 以色列 人設立一個救主，就係耶穌。</verse>
				<verse number="24">耶穌開始工作以前， 約翰 對全體 以色列 人傳道，喊佢等離開罪惡，接受洗禮。</verse>
				<verse number="25">約翰 个使命會完成以前，佢對 以色列 人講：『你等想𠊎係麼人？𠊎並毋係你等所期待个；總係，佢就會到了，𠊎連㧯佢脫鞋也無資格。』</verse>
				<verse number="26">「各位同胞 — 亞伯拉罕 个子孫，㧯所有敬畏上帝个外邦人啊！這拯救个真道就係愛傳給𠊎等个！</verse>
				<verse number="27">總係，住在 耶路撒冷 个人㧯佢等个領袖毋知佢係救主，也無明白每一個安息日所讀个先知書。佢等將耶穌定罪，堵堵好應驗先知个預言。</verse>
				<verse number="28">雖然佢等尋毋到判佢死刑个理由，還係要求 彼拉多 治死佢。</verse>
				<verse number="29">佢等做了先知書所寫關係耶穌一切个事以後，就將佢對十字架頂取下來，放在墳墓肚。</verse>
				<verse number="30">總係，上帝使佢對死復活；</verse>
				<verse number="31">在一站時間當中，佢好多擺顯現給該兜識同佢共下對 加利利 到 耶路撒冷 去个人看。這兜人目前在民間係佢个見證人。</verse>
				<verse number="32">𠊎等這下報你等好消息：通過耶穌个復活，上帝頭擺對𠊎等个祖先所應許个，這下已經對𠊎等做子孫个實現了。像《詩篇》第二篇所講： 你係𠊎个孻仔； 今晡日開始，𠊎做你个阿爸。</verse>
				<verse number="33"></verse>
				<verse number="34">論到使佢對死復活、永遠毋會再死个事，上帝恁樣講過： 𠊎愛將神聖確實个恩典賜給你等， 就係𠊎所應許愛給 大衛 个。</verse>
				<verse number="35">在另外一篇，《詩篇》个作者也講： 你毋會俾你忠心个僕人糜掉。</verse>
				<verse number="36">大衛 在世間个時，實行上帝个旨意；佢死後，被人埋在祖先个堘頭，已經糜掉。</verse>
				<verse number="37">總係，上帝使佢對死復活个該一位，就無糜掉。</verse>
				<verse number="38">所以兄弟啊，你等愛知：這赦罪个福音就係耶穌傳給你等个。</verse>
				<verse number="39">你等靠 摩西 个法律在無法度得到稱義个一切事上，每一個信靠耶穌个人全部會得到稱義。</verse>
				<verse number="40">所以，你等愛細膩，驚怕先知所講个話發生在你等个身上：</verse>
				<verse number="41">看啊，褻瀆上帝个人啊， 你等會大著驚，會死掉！ 因為𠊎在你等个時代所做个事， 雖然有人㧯你等講起， 你等總係毋信！」</verse>
				<verse number="42">保羅 㧯 巴拿巴 愛離開會堂个時，大家請佢等下一個安息日再來，對佢等講解這兜事。</verse>
				<verse number="43">散會後，盡多 猶太 人㧯入 猶太 教个外邦人跈等 保羅 㧯 巴拿巴 去。佢兩儕就鼓勵佢等愛在生活上繼續倚靠上帝个恩典。</verse>
				<verse number="44">下一個安息日，差毋多全城个人攏總來到，愛聽主个道理。</verse>
				<verse number="45">猶太 人看到恁大群个人，就盡嫉妒；佢等硬㧯 保羅 拗，又譭謗佢。</verse>
				<verse number="46">總係， 保羅 㧯 巴拿巴 還較勇敢來宣傳講：「上帝个道先傳給你等係應當个；總係你等毋接受，斷定自家無資格得永生。所以，𠊎等愛離開你等，去外邦人該位；</verse>
				<verse number="47">因為主識吩咐𠊎等講： 𠊎已經設立你做外邦人个光， 喊你將救恩帶到天涯海角去。」</verse>
				<verse number="48">外邦人聽了這個話，就盡歡喜，頌讚主个道理；該兜上帝所揀選來接受永生个人，攏總成做信徒。</verse>
				<verse number="49">主个道理就傳遍該一帶个所在。</verse>
				<verse number="50">總係， 猶太 人煽動上流社會中虔誠个婦人家，㧯當地有地位个人士，同心迫 保羅 㧯 巴拿巴 ，逐佢等離開該位。</verse>
				<verse number="51">佢兩儕將腳項个泥粉蹬掉來警告佢等，然後就去 以哥念 。</verse>
				<verse number="52">在 彼西底 个 安提阿 ，該兜信徒滿心歡喜，又被聖靈充滿。</verse>
			</chapter>
			<chapter number="14">
				<verse number="1">在 以哥念 也發生共樣个事。 保羅 㧯 巴拿巴 去 猶太 人个會堂；佢等个講道使盡多 猶太 人㧯外邦人成做信徒。</verse>
				<verse number="2">總係該兜毋信个 猶太 人煽動外邦人，使佢等惱信徒。</verse>
				<verse number="3">佢兩儕在該位住好久，大膽談論主个事。主賜給佢等行神蹟㧯奇事个能力，用恁樣證明佢等所傳關係主恩典个信息係真實个。</verse>
				<verse number="4">城肚个眾人就分派，有兜扶 猶太 人，有兜扶使徒。</verse>
				<verse number="5">該時，外邦人㧯 猶太 人並佢等个領袖決心愛傷害使徒，用石頭㧹死佢等。</verse>
				<verse number="6">使徒知這個事就閃走，去 呂高尼 个 路司得 城㧯 特庇 城，並附近个地區，</verse>
				<verse number="7">在該兜地方繼續傳福音。</verse>
				<verse number="8">在 路司得 城肚有一個人，出世就瘸腳，從來毋識行過路。</verse>
				<verse number="9">佢坐在該位聽 保羅 講道。 保羅 注目看佢，看出佢有信心，會得到醫好，</verse>
				<verse number="10">就大聲講：「你䟘起來，企直！」該人就跳起來，開始行路。</verse>
				<verse number="11">眾人看到 保羅 所做个事，就用 呂高尼 話大聲喊講：「神明化身變做人，降臨在𠊎等个中間囉！」</verse>
				<verse number="12">佢等就喊 巴拿巴 「宙斯」，喊 保羅 「希耳米」，因為佢帶頭講話。</verse>
				<verse number="13">城外 宙斯 廟个祭司牽等牛，帶等花，來到城門口，愛同眾人共下獻祭給使徒。</verse>
				<verse number="14">巴拿巴 㧯 保羅 聽到佢等想愛做个事，就扯爛衫，跳入人群，大聲講：</verse>
				<verse number="15">「各位，你等做麼介做這兜事呢？𠊎等㧯你等共樣，也係人！𠊎等來這位傳福音，係愛喊你等離開拜偶像這兜虛空个事，來信該創造天、地、海，㧯其中萬物个永生上帝。</verse>
				<verse number="16">在過去个世代，佢由在萬民行自家个路；</verse>
				<verse number="17">總係，佢一直行各樣个好事來證明自家个存在，就像：使風調雨順，五榖豐登，俾你等豐衣足食，心滿意足。」</verse>
				<verse number="18">雖然使徒恁樣講，也險險無法度阻止眾人向佢等獻祭。</verse>
				<verse number="19">該時，有兜 猶太 人對 彼西底 个 安提阿 㧯 以哥念 來到；佢等教唆眾人用石頭㧹 保羅 ，恅到佢死掉，就將佢拖到城外去。</verse>
				<verse number="20">該兜信徒圍等佢个時，無想到，佢又䟘起來，行轉城內去。第二日，佢同 巴拿巴 共下去 特庇 。</verse>
				<verse number="21">保羅 㧯 巴拿巴 在 特庇 傳福音，使盡多人成做信徒。後來，佢等就轉頭，經過 路司得 㧯 以哥念 ，去到 彼西底 个 安提阿 。</verse>
				<verse number="22">佢等沿路堅固信徒个心，鼓勵佢等繼續信靠耶穌。佢等講：「愛入上帝个國，𠊎等一定愛經歷多多个苦難。」</verse>
				<verse number="23">佢兩儕也為各教會設立長老，禁食祈禱後，將佢等交託給佢等所信靠个主。</verse>
				<verse number="24">佢兩儕經過 彼西底 个地區，去到 旁非利亞 。</verse>
				<verse number="25">佢等也在 別加 傳福音，以後就去 亞大利 ，</verse>
				<verse number="26">對該位坐船轉 安提阿 。當初，就係在這個所在，佢等被人交託在上帝个恩典中去工作；這個工作這下已經完成了。</verse>
				<verse number="27">佢等轉到 安提阿 ，就聚集教會个兄弟姊妹，對佢等報告，講起上帝樣般同佢等共下工作，上帝又樣般開門使外邦人相信。</verse>
				<verse number="28">佢等在該位同信徒共下住好久。</verse>
			</chapter>
			<chapter number="15">
				<verse number="1">有兜人對 猶太 來到 安提阿 ，教訓兄弟講：「除了你等照 摩西 个法律接受割禮，你等就毋會得救。」</verse>
				<verse number="2">為到這個問題， 保羅 㧯 巴拿巴 兩儕同佢等發生激烈个辯論。所以，大家決定派 保羅 㧯 巴拿巴 ，同當地教會幾個人上 耶路撒冷 去，請教使徒㧯長老這件事。</verse>
				<verse number="3">教會就送佢等出發。在路上，佢等經過 腓尼基 㧯 撒馬利亞 ，逐所在報告外邦人歸主个事情。聽到這個消息，所有个信徒全部盡歡喜。</verse>
				<verse number="4">佢等到 耶路撒冷 个時，得到教會、使徒㧯長老个接待。佢等就向大家報告上帝通過佢等所做一切个事。</verse>
				<verse number="5">總係有兜法利賽派个信徒企起來講：「外邦人一定愛接受割禮，也一定愛遵守 摩西 个法律。」</verse>
				<verse number="6">所以，使徒㧯長老就開會討論這個問題。</verse>
				<verse number="7">辯論盡久以後， 彼得 企起來講：「各位兄弟，你等知，上帝早就對你等當中揀選𠊎，喊𠊎將這福音个道理傳給外邦人，俾佢等聽到來相信。</verse>
				<verse number="8">鑒察人心个上帝將聖靈賜給外邦人，像賜給𠊎等共樣，用恁樣來證明佢也接納外邦人。</verse>
				<verse number="9">上帝並無分別𠊎等㧯佢等；因為佢等信，佢就潔淨佢等个心。</verse>
				<verse number="10">既然係恁樣，這下你等做麼介試探上帝，將𠊎等个祖先㧯𠊎等自家㧡毋贏个擔仔，放在外邦信徒个肩頭頂呢？</verse>
				<verse number="11">這係毋著个！𠊎等相信，𠊎等得救係通過主耶穌个恩典，同佢等共樣。」</verse>
				<verse number="12">大家就恬恬，聽 巴拿巴 㧯 保羅 報告上帝通過佢等在外邦人當中所行一切个神蹟奇事。</verse>
				<verse number="13">佢等講煞， 雅各 也講：「各位兄弟，請聽𠊎講！</verse>
				<verse number="14">頭下 西門 說明上帝樣般關心外邦人，對佢等當中揀選人來歸佢自家。</verse>
				<verse number="15">先知所講个話，意思也係共樣。像聖經所記載：</verse>
				<verse number="16">主講： 事後𠊎愛倒轉來， 重建 大衛 橫掉个王朝； 𠊎愛重建該被人破壞个， 𠊎愛俾它重新企起來。</verse>
				<verse number="17">恁樣，其他所有个人類， 𠊎揀選歸𠊎个外邦人， 全部就會尋求𠊎。</verse>
				<verse number="18">這係在上古就顯明這兜事情个主所講个。」</verse>
				<verse number="19">雅各 繼續講：「照𠊎个看法，𠊎等無應該為難該兜歸向上帝个外邦人。</verse>
				<verse number="20">𠊎等做得寫信仔，吩咐佢等：毋好食拜過偶像無淨浰个食物，毋好行淫亂个事，毋好食揢死个頭牲，毋好食血。</verse>
				<verse number="21">因為自古以來，每一個安息日，在逐個會堂有人讀 摩西 个法律，在逐個城肚也有人宣揚佢个教訓。」</verse>
				<verse number="22">所以，眾使徒㧯長老，並全教會就決定推派代表，派佢等同 保羅 㧯 巴拿巴 共下去 安提阿 。佢等選偏名 巴撒巴 个 猶大 㧯 西拉 。佢兩儕係眾兄弟平常所尊重个人。</verse>
				<verse number="23">佢等帶去个信仔係恁樣寫个： 「使徒㧯做長老个眾兄弟，對住在 安提阿 、 敘利亞 㧯 基利家 所有个外邦信徒請安！</verse>
				<verse number="24">𠊎等聽講有兜人對𠊎等這位出去；佢等所講个話害你等毋知樣般正好。其實，𠊎等並無喊佢等去講該兜話。</verse>
				<verse number="25">所以𠊎等共下參詳，大家同意選派代表去你等該位。佢等愛同𠊎等所親愛个朋友 巴拿巴 㧯 保羅 共下去；</verse>
				<verse number="26">這兩儕識為到事奉𠊎等个主耶穌基督冒生命个危險。</verse>
				<verse number="27">所以𠊎等選派 猶大 㧯 西拉 去；佢等會當面㧯你等說明這兜事情。</verse>
				<verse number="28">因為聖靈㧯𠊎等攏總同意，除了一兜必要个例規以外，毋愛將其他个重擔加給你等。</verse>
				<verse number="29">你等毋好食拜過偶像个食物；毋好食血抑係揢死个頭牲；也毋好行淫亂个事。這幾件，你等莫犯就好。願你等平安！」</verse>
				<verse number="30">該兜代表奉命出發，去到 安提阿 ，在該位聚集全體信徒，將信仔交給佢等。</verse>
				<verse number="31">佢等讀信仔个時，因為所鼓勵个話就非常歡喜。</verse>
				<verse number="32">猶大 㧯 西拉 也係先知；佢等對信徒講盡多鼓勵个話，來堅固佢等个信心。</verse>
				<verse number="33">在該位住一站時間以後，信徒就歡送佢兩儕，祝福佢等平平安安轉去差派佢等个眾人該位去。</verse>
				<verse number="34"></verse>
				<verse number="35">總係 保羅 㧯 巴拿巴 繼續留在 安提阿 ；佢等同其他好多人共下教訓人，並傳主个道。</verse>
				<verse number="36">一站時間以後， 保羅 對 巴拿巴 講：「𠊎等倒轉頭擺傳主道理个逐村莊去，看信徒个情形。」</verse>
				<verse number="37">巴拿巴 想愛帶 約翰‧馬可 共下去，</verse>
				<verse number="38">總係 保羅 毋贊成；因為上擺佢毋肯留下來同佢等共下工作，在 旁非利亞 離開佢等。</verse>
				<verse number="39">佢兩儕為這件事激烈爭論，最後分開。 巴拿巴 帶等 約翰‧馬可 坐船去 塞浦路斯 ，</verse>
				<verse number="40">總係 保羅 揀選 西拉 ；信徒將佢等交在主个恩典中，佢等就出發。</verse>
				<verse number="41">佢行遍 敘利亞 㧯 基利家 ，堅固各教會兄弟姊妹个信心。</verse>
			</chapter>
			<chapter number="16">
				<verse number="1">保羅 來到 特庇 㧯 路司得 。在 路司得 有一個信徒，名安到 提摩太 。厥姆係 猶太 人，也係信徒，總係厥爸係 希臘 人。</verse>
				<verse number="2">在 路司得 㧯 以哥念 个眾信徒盡稱讚 提摩太 。</verse>
				<verse number="3">保羅 想愛帶 提摩太 共下去，就㧯佢行割禮，因為該所在个 猶太 人全部知厥爸係 希臘 人。</verse>
				<verse number="4">佢等經過逐個城，就將 耶路撒冷 个眾使徒㧯長老所定个例規交給佢等，吩咐佢等遵守。</verse>
				<verse number="5">因為恁樣，各教會个信心越發堅固，信徒日日增加。</verse>
				<verse number="6">佢等經過 弗呂家 㧯 加拉太 地區，因為聖靈毋肯佢等在 亞細亞 省傳福音。</verse>
				<verse number="7">佢等到 每西亞 邊界个時，想愛入去 庇推尼 省，總係耶穌个靈禁止佢等，</verse>
				<verse number="8">所以佢等𫟧過 每西亞 ，去 特羅亞 。</verse>
				<verse number="9">該暗晡， 保羅 看到一個異象：有一個 馬其頓 人企在該位，求佢講：「請你來 馬其頓 幫助𠊎等！」</verse>
				<verse number="10">保羅 一看到這個異象，𠊎等就黏時準備去 馬其頓 ，因為𠊎等確信係上帝呼召𠊎等去傳福音給該所在个人。</verse>
				<verse number="11">𠊎等坐船對 特羅亞 出發，直接駛到 撒摩特喇 ，第二日到 尼亞坡里 。</verse>
				<verse number="12">𠊎等對該位行到 馬其頓 頭一區个一個城市 腓立比 ；這城市也係 羅馬 个殖民區。𠊎等在該位住幾日。</verse>
				<verse number="13">安息日，𠊎等出城去河壩滣，心內想， 猶太 人可能會來這地方祈禱。𠊎等坐下來，對聚集在該位个婦女傳道理。</verse>
				<verse number="14">當中有一個對 推雅推喇 城來个婦女，名安到 呂底亞 ，係賣紫色布个。姖係敬拜上帝个人；主開姖个心，俾姖留心聽 保羅 所講个話。</verse>
				<verse number="15">姖㧯姖全家人攏總領洗禮。事後，姖請求𠊎等講：「你等若係認為𠊎係誠心信主，請來吾屋下住。」姖就強強留𠊎等。</verse>
				<verse number="16">有一日，𠊎等去該祈禱个所在，有一個使女對面行等來。這使女有邪靈附身，會卜卦算命，所以代厥主人賺盡多錢。</verse>
				<verse number="17">姖歸路跈等 保羅 㧯𠊎等，大聲喊講：「這兜人係至高上帝个僕人，愛對你等宣佈得救个道路！」</verse>
				<verse number="18">姖連連好多日恁樣緊喊；最後 保羅 感覺盡惱，就轉身，對該邪靈講：「𠊎奉耶穌基督个名，命令你對厥身上出來！」該邪靈黏時就出來。</verse>
				<verse number="19">使女个主人知佢等个財源斷掉去了，就揪等 保羅 㧯 西拉 ，拉佢等去廣場見官府个人。</verse>
				<verse number="20">佢等帶佢等到 羅馬 官長个面前，告佢等講：「這兜人係 猶太 人，來擾亂𠊎等个城市。</verse>
				<verse number="21">佢等提倡違法个規矩，係𠊎等 羅馬 人做毋得接受，做毋得實行个！」</verse>
				<verse number="22">眾人也相爭攻擊佢等；該兜官長就吩咐脫佢等个衫，鞭打佢等。</verse>
				<verse number="23">兵仔將 保羅 㧯 西拉 打到盡厲害，然後將佢等關在監獄肚，命令看守个人嚴嚴掌好。</verse>
				<verse number="24">看守个接到命令，將佢等關在監獄內層，兩腳用枷鎖等。</verse>
				<verse number="25">大約在半夜， 保羅 㧯 西拉 在該位祈禱、吟詩頌讚上帝，其他个囚犯聽到耳側側。</verse>
				<verse number="26">忽然，有大地動，連監獄个地基也搖動；一下仔，所有个監門全部打開來，囚犯个鎖鍊也𢫫下來。</verse>
				<verse number="27">看守个醒過來，看到監獄个門全部大開，恅到所有个囚犯已經逃走，就挷出刀仔來，想愛自殺。</verse>
				<verse number="28">保羅 看到，大聲喊講：「毋好傷害自家，𠊎等全部還在這位！」</verse>
				<verse number="29">看守个喊人擎火把來，就撞入去，伏在 保羅 㧯 西拉 个腳前，愊愊掣。</verse>
				<verse number="30">然後，佢帶佢等出來，問講：「兩位先生，𠊎愛做麼介正會得救？」</verse>
				<verse number="31">佢等講：「信主耶穌，你㧯你全家人就會得救。」</verse>
				<verse number="32">兩儕又對佢㧯佢全屋下人講解主个道理。</verse>
				<verse number="33">該暗晡，當時，看守个帶佢等去洗傷口；佢㧯佢全家人黏時領洗禮。</verse>
				<verse number="34">佢請 保羅 㧯 西拉 去厥屋下，擺桌請佢等食。佢㧯全家人因為信上帝，就充滿歡喜。</verse>
				<verse number="35">第二日打早， 羅馬 个官長派警官去講：「將該兩儕放出去！」</verse>
				<verse number="36">看守个㧯 保羅 講：「官長派人來，愛放你㧯 西拉 ，你等這下做得出去，安心離開。」</verse>
				<verse number="37">總係， 保羅 對警官講：「𠊎等係 羅馬 个公民，並無定罪，佢等就當眾鞭打𠊎等，又將𠊎等關在監獄肚；這下佢等想愛將𠊎等偷偷送走嗎？這係做毋得个！喊 羅馬 官長自家來帶𠊎等出去！」</verse>
				<verse number="38">警官將這兜話報告官長。佢等一聽講 保羅 㧯 西拉 係 羅馬 个公民，就盡驚，</verse>
				<verse number="39">來到監獄，㧯佢等會失禮，帶佢等出來，請佢等離開該城市。</verse>
				<verse number="40">保羅 㧯 西拉 離開監獄，就去 呂底亞 个屋下，在該位見到眾兄弟姊妹，並勸勉佢等，然後就離開。</verse>
			</chapter>
			<chapter number="17">
				<verse number="1">保羅 㧯 西拉 繼續向前行，經過 暗妃坡里 、 亞波羅尼亞 ，來到 帖撒羅尼迦 ，在該位有 猶太 人个會堂。</verse>
				<verse number="2">保羅照佢平常个習慣入去會堂，連續三個安息日，根據聖經㧯人辯論，</verse>
				<verse number="3">講解並證明基督的確愛受害，然後對死復活。佢講：「𠊎傳給你等个這個耶穌，就係基督。」</verse>
				<verse number="4">其中有兜 猶太 人相信，就順從 保羅 㧯 西拉 ；也有好多敬拜上帝个 希臘 人相信，婦女界个領袖也毋會少。</verse>
				<verse number="5">總係，該兜毋信个 猶太 人心內嫉妒，聚集一兜鱸鰻，弛崗打陣，在城肚引起暴動。佢等撞入 耶孫 个屋下，愛尋 保羅 㧯 西拉 ，將佢等拉去交給暴民；</verse>
				<verse number="6">總係尋毋到，就將 耶孫 㧯其他幾個信徒拉去見地方官，告佢等講：「該兜擾亂天下个人，這下來到本城，</verse>
				<verse number="7">耶孫 在厥屋下接待佢等！佢等違悖皇帝个聖旨，講有另外一個王，名安到耶穌。」</verse>
				<verse number="8">這兜話害眾人㧯地方官無葛無煞。</verse>
				<verse number="9">地方官命令 耶孫 㧯其他个人寫切結書，然後正放佢等。</verse>
				<verse number="10">天一暗，信徒就送 保羅 㧯 西拉 去 庇哩亞 。佢等去到該位，就入去 猶太 人个會堂。</verse>
				<verse number="11">這位个人比 帖撒羅尼迦 人較開明。佢等熱心聽福音，逐日研究聖經，愛知 保羅 所講个有影麼。</verse>
				<verse number="12">佢等中間有盡多 猶太 人相信； 希臘 上流社會个婦女㧯 希臘 个男人也毋會少。</verse>
				<verse number="13">總係， 帖撒羅尼迦 个 猶太 人一聽講 保羅 又在 庇哩亞 傳上帝个道理，就去到該位吵鬧，煽動眾人。</verse>
				<verse number="14">信徒即時就送 保羅 去海滣；總係 西拉 㧯 提摩太 留在 庇哩亞 。</verse>
				<verse number="15">送 保羅 个人直直送佢到 雅典 ，然後正倒轉 庇哩亞 ；佢等帶轉 保羅 个吩咐，喊 西拉 㧯 提摩太 趕緊去佢該位，同佢見面。</verse>
				<verse number="16">保羅 在 雅典 等 西拉 㧯 提摩太 个時，看到滿城个偶像，心肝非常艱苦。</verse>
				<verse number="17">所以，佢在會堂同 猶太 人㧯敬拜上帝个外邦人辯論，逐日也在街項个廣場同所堵到个人辯論。</verse>
				<verse number="18">有兜 伊壁鳩魯 派㧯 斯多亞 派个哲學家也來同佢辯論。有兜講：「這憨蚩牯到底撮麼介把戲？」也有兜講：「佢像係傳外國个神明。」佢等恁樣講，係因為 保羅 傳耶穌㧯佢復活个福音。</verse>
				<verse number="19">佢等就帶 保羅 到 亞略巴古 个議會去，講：「𠊎等做得知你所講个新道理麼？</verse>
				<verse number="20">有兜事情𠊎等聽起來感覺盡奇怪，想愛知到底係麼介意思。」</verse>
				<verse number="21">(原來 雅典 人㧯所有來住在該位个外國人，全部盡好歸日講新聞聽消息。)</verse>
				<verse number="22">保羅 企在 亞略巴古 議會中講：「 雅典 人啊！𠊎看你等逐樣事都顯出對宗教个熱誠。</verse>
				<verse number="23">𠊎在城肚四位行來行去，看你等拜神个所在，發現有一座祭壇，頂高刻等『獻給毋識个神』。你等所敬拜毋識个神，𠊎這下愛講給你等知。</verse>
				<verse number="24">佢係創造宇宙㧯其中萬物个上帝；佢既然係天地个主，就毋住在人手所起个廟，</verse>
				<verse number="25">也無需要人用麼介來事奉佢；反轉係佢自家將生命、空氣，㧯萬物賜給人類。</verse>
				<verse number="26">佢對一個人造出萬族，使佢等分散住在全地，又預定佢等个年限㧯所住个地界。</verse>
				<verse number="27">佢恁樣做係愛佢等尋上帝，或者就會對恁樣來體驗到佢。其實，上帝同𠊎等每一個人離無幾遠。</verse>
				<verse number="28">有人講：『𠊎等个生活、行動、生存全部在佢个手中。』又像你等當中某一個詩人講个：『𠊎等也係佢个子女。』</verse>
				<verse number="29">既然𠊎等係上帝个子女，𠊎等就無應該恅到上帝个神性像人用手藝㧯心思所刻个金銀抑係石頭偶像。</verse>
				<verse number="30">當人類懵懂無智識个時，上帝並毋愛追究；總係這下佢命令全人類愛離開邪惡个路、歸向佢。</verse>
				<verse number="31">因為佢已經定日仔，愛通過佢所設立个一個人，用公義來審判全世界。佢使這個人對死復活，就係將證據給全人類看。」</verse>
				<verse number="32">聽到 保羅 講起死人復活个事，有兜人就笑佢；也有兜人講：「𠊎等希望再聽你講這件事。」</verse>
				<verse number="33">所以， 保羅 離開議會。</verse>
				<verse number="34">有兜人順從佢，成做信徒；其中有 亞略巴古 个議員 丟尼修 ，又有一個名安到 大馬哩 个婦人家，另外還有一兜人。</verse>
			</chapter>
			<chapter number="18">
				<verse number="1">這事以後， 保羅 離開 雅典 ，來到 哥林多 。</verse>
				<verse number="2">佢在該位堵到一個在 本都 出世个 猶太 人，名安到 亞居拉 ，同厥𡜵娘 百基拉 最近正對 意大利 來，因為皇帝 克勞第 命令所有 猶太 人離開 羅馬 。 保羅 就去看佢等。</verse>
				<verse number="3">佢留下來同佢等共下做事，因為 保羅 係靠製造帳篷生活个，㧯佢等係同業。</verse>
				<verse number="4">每一個安息日， 保羅 就去會堂，㧯人辯論，勸 猶太 人㧯 希臘 人信主。</verse>
				<verse number="5">西拉 㧯 提摩太 對 馬其頓 來到个時， 保羅 就用全部个時間傳道，對 猶太 人見證耶穌係基督。</verse>
				<verse number="6">總係，佢等反對佢、譭謗佢个時，佢就撥掉衫頂高个泥粉，對佢等講：「你等若係滅亡，㧯𠊎無干涉，你等自家愛負責！從今以後，𠊎愛去外邦人該位。」</verse>
				<verse number="7">保羅 就離開佢等，去住在一個敬畏上帝、名安到 提多‧猶士都 个人屋下，厥屋下在會堂隔壁。</verse>
				<verse number="8">會堂个主管 基利司布 㧯佢全家人信了主；還有盡多 哥林多 人聽到福音後也信，並接受洗禮。</verse>
				<verse number="9">有一暗晡， 保羅 得到一個異象。主在異象中對佢講：「毋使驚，做你講，毋好恬恬，</verse>
				<verse number="10">有𠊎㧯你同在，無人能害你，因為在這城肚𠊎還有盡多个子民。」</verse>
				<verse number="11">保羅 就在該位住一年半，用上帝个道教佢等。</verse>
				<verse number="12">當 迦流 接任做 亞該亞 總督个時， 猶太 人聯合起來攻擊 保羅 ，拉佢上法院，</verse>
				<verse number="13">告佢講：「這個人教唆別人用無合法个方式敬拜上帝！」</verse>
				<verse number="14">保羅 正想愛開口， 迦流 就對 猶太 人講：「這若係一件冤枉抑係犯法个事，你這兜 猶太 人啊，𠊎當然愛耐心聽你等；</verse>
				<verse number="15">既然所爭論个係有關用字、名目㧯你等个法律，愛摳字眼你等自家去解決。𠊎毋愛審判這種个事！」</verse>
				<verse number="16">佢就將佢等逐出法院。</verse>
				<verse number="17">眾人就揪等會堂个主管 所提尼 ，在法院前打佢。這個事， 迦流 也毋管。</verse>
				<verse number="18">保羅 在 哥林多 同信徒又共下住好多日仔，然後正離開佢等，同 百基拉 㧯 亞居拉 共下坐船向 敘利亞 去。出發以前，佢在 堅革哩 將頭那毛剪掉，因為佢識許願。</verse>
				<verse number="19">到 以弗所 ， 保羅 就將 百基拉 㧯 亞居拉 留在該位。佢自家入去會堂㧯 猶太 人辯論。</verse>
				<verse number="20">大家請佢留下來住加幾日，總係 保羅 毋肯。</verse>
				<verse number="21">離別个時，佢㧯佢等講：「若係上帝个意思，𠊎會倒轉來你等這位。」所以， 保羅 又坐船離開 以弗所 。</verse>
				<verse number="22">保羅 一到 凱撒利亞 ，就上 耶路撒冷 去㧯教會請安，然後去 安提阿 ，</verse>
				<verse number="23">在該位住一站時間正離開。佢行遍 加拉太 㧯 弗呂家 ，逐所在堅固信徒个信心。</verse>
				<verse number="24">有一個 猶太 人名安到 亞波羅 ，來到 以弗所 。佢在 亞歷山大 出世，係一個有學問 个人，對聖經有非常深个了解。</verse>
				<verse number="25">有關主个道，佢識受相當多个訓練。佢盡熱心，常常教人關係耶穌个事，講到盡詳細。總係，佢單淨知 約翰 个洗禮定定。</verse>
				<verse number="26">佢開始去會堂好膽講道； 百基拉 㧯 亞居拉 聽到，就請佢去佢等屋下，將上帝个道更加正確來講解給佢聽。</verse>
				<verse number="27">後來， 亞波羅 決定愛去 亞該亞 ， 以弗所 个兄弟姊妹就鼓勵佢，又寫信仔給 亞該亞 个信徒，請佢等接待佢。佢去到該位，對該兜蒙恩信主个人幫助盡大。</verse>
				<verse number="28">佢常常在公開个辯論中盡有能力來駁倒 猶太 人，根據聖經證明耶穌係基督。</verse>
			</chapter>
			<chapter number="19">
				<verse number="1">亞波羅 在 哥林多 个時， 保羅 旅行經過內地來到 以弗所 。在該位，佢堵到一兜信徒，</verse>
				<verse number="2">就問佢等講：「你等信主个時，有領受聖靈無？」 佢等應講：「無，連麼介係聖靈𠊎等也毋識聽過。」</verse>
				<verse number="3">保羅 又問：「恁樣，你等所領个係麼介洗禮？」 佢等講：「係 約翰 个洗禮。」</verse>
				<verse number="4">保羅 講：「 約翰 个洗禮係為該兜悔改个人行个；佢㧯 以色列 人講，愛信該在佢以後愛來个，就係耶穌。」</verse>
				<verse number="5">佢等一聽到這個話，就奉主耶穌个名領洗禮。</verse>
				<verse number="6">保羅 為佢等按手，聖靈降在佢等身上；佢等就講屬靈个語言，又宣佈上帝个話。</verse>
				<verse number="7">佢等一共約有十二個人。</verse>
				<verse number="8">連等三隻月， 保羅 照常去到會堂，大膽講道，㧯人辯論上帝國个事，勸人相信。</verse>
				<verse number="9">佢等中間有兜人硬頸毋肯信，在會眾面前譭謗主个道。所以 保羅 帶等信徒離開佢等，逐日 在 推喇奴 講堂㧯人討論。</verse>
				<verse number="10">恁樣繼續工作兩年久，所以住在 亞細亞 省个人，無論 猶太 人抑係外邦人，全部聽過主个道理。</verse>
				<verse number="11">上帝通過 保羅 行一兜非常希奇个神蹟；</verse>
				<verse number="12">甚至有人拿佢用過个手巾抑係圍身裙去放在病人个身上，也會使病痛消除，使邪靈對所附身个人身上出來。</verse>
				<verse number="13">有兜逐所在去作法逐鬼个 猶太 人也想愛借主耶穌个名來行這個事。佢等對邪靈講：「𠊎奉 保羅 所傳个耶穌个名，命令你等出來。」</verse>
				<verse number="14">行這事个人係 猶太 祭司長 士基瓦 个七個孻仔。</verse>
				<verse number="15">總係，邪靈應佢等講：「𠊎識耶穌， 保羅 𠊎也知；總係，你等係麼人？」</verse>
				<verse number="16">該被邪靈附身个人就跳到佢等个身上來制伏佢等。佢等攏總受傷，赤身露體，對該屋肚逃走出去。</verse>
				<verse number="17">所有住在 以弗所 个 猶太 人㧯外邦人聽到這件事，全部盡著驚；主耶穌个名對該時更加受人尊重。</verse>
				<verse number="18">有盡多信徒就將佢等頭擺做過个事公開承認出來。</verse>
				<verse number="19">盡多行邪術个人帶佢等个書來，堆做一堆，當眾放火燒。佢等算這兜書个價錢，總共大約五萬隻銀錢 。</verse>
				<verse number="20">因為這兜事，主个道理滿遍傳開，日日興旺。</verse>
				<verse number="21">這兜事情過掉， 保羅 決定 愛經過 馬其頓 㧯 亞該亞 去 耶路撒冷 。佢講：「到該位以後，𠊎也一定愛去 羅馬 訪問。」</verse>
				<verse number="22">所以佢派佢兩個助手 提摩太 㧯 以拉都 去 馬其頓 ；佢自家暫時留在 亞細亞 省。</verse>
				<verse number="23">就在該時，因為主个道， 以弗所 發生一件嚴重个動亂。</verse>
				<verse number="24">有一個名安到 底米丟 个銀匠，佢係用銀製造 亞底米 女神廟模型个人；這種頭路使盡多師傅大賺錢。</verse>
				<verse number="25">底米丟 召集這兜工人㧯所有个同業，對佢等講：「各位，你等知𠊎等係靠這頭路賺錢个。</verse>
				<verse number="26">這下，你等看到也聽到這隻 保羅 在該位做麼介。佢講：『人手所做个神像毋係神明！』佢已經害盡多在 以弗所 㧯差毋多全 亞細亞 省个人受迷惑。</verse>
				<verse number="27">照恁樣看，𠊎等个頭路會有被人看輕个危險。毋單淨恁樣，連大女神 亞底米 个廟也會被人藐視，在 亞細亞 省㧯普天下受人敬拜个女神个尊榮也會受到破壞！」</verse>
				<verse number="28">眾人一聽到這兜話就非常譴，大聲喊講：「 以弗所 人个 亞底米 係最偉大个！」</verse>
				<verse number="29">對恁樣，暴動遰到全城。暴民捉到跈 保羅 共下來个 馬其頓 人 該猶 㧯 亞里達古 ，拉等佢兩儕撞入戲院肚。</verse>
				<verse number="30">保羅 想愛去眾人个頭前，總係該兜信徒毋俾佢入去。</verse>
				<verse number="31">還有 亞細亞 省个幾個領袖，係 保羅 个朋友，也喊人去勸 保羅 ，毋好冒險入去戲院肚。</verse>
				<verse number="32">這時，全場亂吵吵，有兜喊東，有兜喊西，大部份毋知佢等係為麼介來該位聚集。</verse>
				<verse number="33">猶太 人將 亞歷山大 㩳到頭前去，有兜人就認為佢應該為這件事負責任。 亞歷山大 比手勢，愛對眾人講話來申訴。</verse>
				<verse number="34">總係，大家一認出佢係 猶太 人，就同聲盡喊講：「 以弗所 人个 亞底米 係最偉大个！」恁樣緊喊大約有兩點鐘久。</verse>
				<verse number="35">最後，該城肚个書記官正使眾人恬下來。佢講：「 以弗所 人啊！麼人毋知 以弗所 城係看守大 亞底米 女神廟㧯該隻對天頂降下來个聖石呢！</verse>
				<verse number="36">既然無人能否認這兜事，你等就應該恬恬，毋好亂來。</verse>
				<verse number="37">你等將這兜人帶到這位來，總係，佢等並無偷廟底背个東西，也無褻瀆𠊎等个女神。</verse>
				<verse number="38">若係 底米丟 㧯佢个同業愛告麼人，自有規定開庭个日仔㧯聽訟个官長，佢等做得去對質。</verse>
				<verse number="39">若係有其他个事，也做得在合法个會議中解決。</verse>
				<verse number="40">像今晡日个暴動，𠊎等難免會被人追究責任。這一切个擾亂係毋著个，𠊎等自家也講毋出麼介理由。」</verse>
				<verse number="41">講這兜話以後，佢就喊眾人散會。</verse>
			</chapter>
			<chapter number="20">
				<verse number="1">暴動停下來後， 保羅 召集信徒，鼓勵佢等，也同佢等辭別。然後，佢離開該位，去 馬其頓 。</verse>
				<verse number="2">佢行遍該兜所在，對信徒講盡多鼓勵个話，然後去到 希臘 ，</verse>
				<verse number="3">在該位住三隻月。 保羅 準備坐船去 敘利亞 个時，發現 猶太 人愛謀害佢，所以決定對 馬其頓 該條路轉去。</verse>
				<verse number="4">同佢共下行个人有 庇哩亞 人 畢羅斯 个孻仔 所巴特 ， 帖撒羅尼迦 人 亞里達古 㧯 西公都 ， 特庇 人 該猶 ，還有 提摩太 ，並 亞細亞 人 推基古 㧯 特羅非摩 。</verse>
				<verse number="5">佢等歸陣先行，在 特羅亞 等𠊎等。</verse>
				<verse number="6">過了除酵節，𠊎等對 腓立比 開船，五日後到 特羅亞 ，同佢等會合，在該位住一禮拜。</verse>
				<verse number="7">拜六暗晡 ，𠊎等共下聚會，分享愛个筵席。 保羅 因為第二日愛出發，就對大家講道，一直講到半夜。</verse>
				<verse number="8">𠊎等在樓頂个房間聚會，有點好多个燈火。</verse>
				<verse number="9">有一個名安到 猶推古 个後生人坐在窗門項， 保羅 講道講盡久，佢緊來緊想愛睡，後來就睡落覺，對三層樓頂跌下去。大家扶佢䟘起來，看到佢已經死掉。</verse>
				<verse number="10">保羅 下樓，伏在佢个身上，揇等佢，講：「毋使緊張，佢還有性命！」</verse>
				<verse number="11">佢又上樓頂去，擘餅來食。佢繼續談論盡久，到天光正離開。</verse>
				<verse number="12">佢等將該後生人生生送轉厥屋下，大家就大受安慰。</verse>
				<verse number="13">𠊎等先上船，駛去 亞朔 ，準備在該位接 保羅 。這係佢所安排个，因為佢自家愛行路去。</verse>
				<verse number="14">佢在 亞朔 同𠊎等相會，𠊎等就接佢上船，然後向 米推利尼 出發。</verse>
				<verse number="15">𠊎等又對該位開船，第二日到 基阿 个對岸；又過一日，在 撒摩 停船，再過一日到 米利都 。</verse>
				<verse number="16">保羅 早就決定毋停在 以弗所 ，免得在 亞細亞 省延纏時間。佢趕緊愛去 耶路撒冷 ，希望盡量在五旬節前趕到。</verse>
				<verse number="17">保羅 對 米利都 派人去尋 以弗所 教會个長老，請佢等來見佢。</verse>
				<verse number="18">佢等來到， 保羅 對佢等講： 「你等知，𠊎到 亞細亞 省个第一日開始，一直樣般同你等共下，</verse>
				<verse number="19">𠊎事奉主个時節，凡事謙卑，常常流目汁，又因為 猶太 人个陷害，經歷盡多磨煉。</verse>
				<verse number="20">你等也知，無論在眾人面前，抑係在你等個人屋下，𠊎傳、𠊎教个時，凡係對你等有利益个，𠊎就無保留。</verse>
				<verse number="21">無論對 猶太 人抑係外邦人，𠊎攏總認真勸佢等，愛離開罪惡，轉向上帝，信𠊎等个主耶穌。</verse>
				<verse number="22">這下，為到順服聖靈，𠊎愛上 耶路撒冷 去。𠊎毋知在該位會堵到麼介事；</verse>
				<verse number="23">𠊎只有知，聖靈在逐個城市指示𠊎，有監獄㧯災難等等𠊎。</verse>
				<verse number="24">總係，𠊎所關心个，並毋係自家个生命，只有全心完成𠊎个使命，成就主耶穌所交給𠊎个工作，就係為上帝恩典个福音做見證。</verse>
				<verse number="25">「𠊎在各位當中同大家共下出入來往，宣傳上帝个國。這下𠊎知，你等以後無法度再見到𠊎。</verse>
				<verse number="26">所以，𠊎今晡日正式㧯你等講，若係你等中間有人沈淪，毋係𠊎个罪；</verse>
				<verse number="27">因為𠊎已經將上帝个旨意傳給你等，完全無保留。</verse>
				<verse number="28">你等自家愛細膩，也愛為聖靈所交託你等照顧个全群來細膩。愛牧養上帝 个教會，就係佢通過自家孻仔个死 所救贖个 。</verse>
				<verse number="29">𠊎知，𠊎離開以後，會有兇惡个豺狼混入你等中間來傷害羊群。</verse>
				<verse number="30">就係在你等中間，也有人會講花撩，愛迷惑信徒去跈佢等。</verse>
				<verse number="31">所以，你等愛警醒！愛記得在過去个三年中，𠊎樣般日夜用目汁勸話、教導你等每一個人。</verse>
				<verse number="32">「這下，𠊎將你等交在上帝个手㧯佢恩典个道理底背。這道理會堅定你等个信心，又使你等承接上帝為佢所有个聖徒所準備个福氣。</verse>
				<verse number="33">𠊎從來毋識貪麼人个金銀抑係衫褲。</verse>
				<verse number="34">你等知，𠊎用這雙手做事來供給𠊎㧯同工个需要。</verse>
				<verse number="35">𠊎凡事做你等个模範，愛俾你等知，應當恁樣認真做事來幫助軟弱个人。愛記得主耶穌親身講過个話：『給人比領受較有福氣。』」</verse>
				<verse number="36">講這兜話以後， 保羅 就㧯佢等全體跪下來祈禱。</verse>
				<verse number="37">眾人大噭，揇等佢，唚佢來辭別。</verse>
				<verse number="38">佢等非常傷心，因為 保羅 講，以後無法度再見到佢。佢等就送佢上船。</verse>
			</chapter>
			<chapter number="21">
				<verse number="1">𠊎等離開眾人，就開船直直去 哥士島 。第二日到 羅底 ，又對該位去到 帕大喇 。</verse>
				<verse number="2">在 帕大喇 堵到一隻愛去 腓尼基 个船，𠊎等就上船出發。</verse>
				<verse number="3">駛到有看到 塞浦路斯 ，船就對南片行過，向 敘利亞 去。𠊎等在 泰爾 上陸，因為船愛在這位下貨。</verse>
				<verse number="4">𠊎等在這位尋到一兜信徒，就同佢等共下住七日。佢等得到聖靈个指示，勸 保羅 毋好上去 耶路撒冷 。</verse>
				<verse number="5">總係，停跎幾日後，𠊎等還係繼續原來个旅程。該兜信徒㧯佢等个𡜵娘子女全部送𠊎等到城外。大家在沙灘跪下來祈禱。</verse>
				<verse number="6">彼此辭別以後，𠊎等上船，佢等就轉去屋下。</verse>
				<verse number="7">𠊎等繼續向前，對 泰爾 到 多利買 ，向該位个信徒請安，同佢等共下住一日。</verse>
				<verse number="8">第二日，𠊎等離開該位，去到 凱撒利亞 ，就去傳道人 腓利 个屋下，住在該位。佢係在 耶路撒冷 被人選出七個執事中个一個。</verse>
				<verse number="9">佢有四個吂出嫁个妹仔，全部有講預言个恩賜。</verse>
				<verse number="10">𠊎等在該位住幾日後，有一個先知名安到 亞迦布 ，對 猶太 省來。</verse>
				<verse number="11">佢來看𠊎等，拿 保羅 个腰帶，䌈等自家个手腳，講：「聖靈恁樣講：『這腰帶个主人會在 耶路撒冷 被 猶太 人像恁樣䌈起來，交給外邦人。』」</verse>
				<verse number="12">𠊎等一聽到這個話，就㧯當地个人共下勸 保羅 莫去 耶路撒冷 。</verse>
				<verse number="13">總係，佢講：「你等做麼介噭到恁樣，害𠊎傷心？𠊎為到主耶穌个名，莫講在 耶路撒冷 被人䌈起來，就係死在該位，𠊎也甘願。」</verse>
				<verse number="14">𠊎等無法度勸服佢，就恬下來，只有講：「願主个旨意得到成就。」</verse>
				<verse number="15">在該位住幾日後，𠊎等就打包袱，上 耶路撒冷 去。</verse>
				<verse number="16">有兜對 凱撒利亞 來个信徒同𠊎等共下去，帶𠊎等去一個 塞浦路斯 人 拿孫 个屋下住；佢成做信徒已經盡久。</verse>
				<verse number="17">𠊎等到 耶路撒冷 ，信徒歡歡喜喜接待𠊎等。</verse>
				<verse number="18">第二日， 保羅 同𠊎等共下去見 雅各 ；教會所有个長老也在場。</verse>
				<verse number="19">保羅 對佢等請安，然後將上帝樣般用佢在外邦人中間所做一切个事全部對佢等報告。</verse>
				<verse number="20">佢等聽了就頌讚上帝，然後對 保羅 講：「兄弟啊，你看，情形係恁樣： 猶太 人中間有幾下萬人信主，攏總也熱心遵守 摩西 个法律。</verse>
				<verse number="21">佢等聽講，你教訓所有住在外邦个 猶太 人放掉 摩西 个法律，喊佢等莫㧯細人仔行割禮，也毋使遵守 猶太 人个規矩。</verse>
				<verse number="22">佢等一定會聽到你已經來這位个消息；𠊎等愛樣般正好哪？</verse>
				<verse number="23">這下，請你照𠊎等个話去做！這位有四個人識許願。</verse>
				<verse number="24">你愛帶等佢等，同佢等共下去接受潔淨禮，代佢等納潔淨禮个所費；恁樣，佢等就做得將頭那毛剪掉。你恁樣做，大家就會知佢等所聽到關係你个事毋係事實，也會知你自家也係遵守 摩西 法律个人。</verse>
				<verse number="25">關係信主个外邦人，𠊎等已經寫信仔吩咐佢等，毋好食拜過偶像个食物，毋好食血抑係揢死个頭牲，也毋好行淫亂个事。」</verse>
				<verse number="26">因為恁樣，第二日 保羅 就帶等該兜人，共下去行潔淨禮。佢到聖殿去報告潔淨期滿个日仔，就係祭司愛為佢等每一個人獻祭該日。</verse>
				<verse number="27">七日个期間會滿以前，有兜對 亞細亞 省來个 猶太 人看到 保羅 在聖殿肚，就煽動大眾去捉 保羅 。</verse>
				<verse number="28">佢等喊講：「 以色列 人啊，大家來𢯭手！這人逐所在教人反對 以色列 人、 摩西 个法律，㧯這聖殿。佢又帶 希臘 人入聖殿來，褻瀆這聖个所在！」</verse>
				<verse number="29">(佢等恁樣講，係因為看到 以弗所 人 特羅非摩 㧯 保羅 共下在城肚，恅到 保羅 識帶佢入去聖殿。)</verse>
				<verse number="30">這時，全城騷動，眾人歸下走過來，捉等 保羅 ，將佢對聖殿肚拉出去；聖殿个門即時就關起來。</verse>
				<verse number="31">暴民堵堵想愛㓾 保羅 个時，有人報告 羅馬 駐軍个指揮官，講 耶路撒冷 全城在暴動中。</verse>
				<verse number="32">指揮官黏時帶領軍隊㧯幾個軍官，走等去眾人該位。暴民一看到指揮官㧯軍隊，就無再過打 保羅 。</verse>
				<verse number="33">指揮官進前揪等 保羅 ，吩咐用兩條鐵鍊仔鎖等佢。佢問講：「這個人係麼人？佢做了麼介事哪？」</verse>
				<verse number="34">人群中，有人喊東，有人喊西，亂做一團；指揮官無法度查出真相，就命令部下帶 保羅 入營房。</verse>
				<verse number="35">保羅 行等上石崁个時，因為眾人尖到盡兇，兵仔只有將 保羅 擎等過去。</verse>
				<verse number="36">眾人跈在後背，大聲喊：「除掉佢！」</verse>
				<verse number="37">會到營房个時， 保羅 對指揮官講：「𠊎做得㧯你講一句話麼？」 指揮官講：「你也會講 希臘 話？</verse>
				<verse number="38">恁樣，你就毋係前無幾久作亂、帶四千個暴徒逃走去曠野个 埃及 人囉？」</verse>
				<verse number="39">保羅 應講：「𠊎係 猶太 人，出世在 基利家 个 大數 ，並毋係無名小城个公民。請你准𠊎對大眾講話。」</verse>
				<verse number="40">指揮官准佢。 保羅 就企在石崁頂，對眾人擛手；大家恬下來後， 保羅 就用 希伯來 話對佢等講話。</verse>
			</chapter>
			<chapter number="22">
				<verse number="1">保羅 講：「各位父老兄弟，請聽𠊎个辯護。」</verse>
				<verse number="2">佢等一聽到 保羅 用 希伯來 話對佢等講話，就還較恬。 保羅 繼續講：</verse>
				<verse number="3">「𠊎係 猶太 人，出世在 基利家 个 大數 ，總係在 耶路撒冷 長大个，係 迦瑪列 个學生，接受祖先一切法律个嚴格訓練，熱心事奉上帝，同你等今晡日在場个每一個人共樣。</verse>
				<verse number="4">𠊎識將遵行這道个人迫到死，也搜查男女信徒，捉佢等，關在監獄肚。</verse>
				<verse number="5">大祭司㧯全議會个長老做得證明𠊎所講个話係實在个。𠊎對佢等拿到給 大馬士革 个 猶太 同胞个信仔，所以𠊎去該位，愛捉該兜人，將佢等䌈等，帶轉 耶路撒冷 來接受刑罰。</verse>
				<verse number="6">「𠊎會到 大馬士革 个時，約在當晝頭，忽然有大光對天頂下來，照在𠊎个周圍。</verse>
				<verse number="7">𠊎橫在地上，聽到有聲對𠊎講：『 掃羅 ， 掃羅 ！你做麼介迫害𠊎？』</verse>
				<verse number="8">𠊎問講：『主啊，你係麼人？』佢講：『𠊎就係你所迫害个 拿撒勒 人耶穌。』</verse>
				<verse number="9">該兜同𠊎共下去个人看到該光，總係無聽明該對𠊎講話个聲。</verse>
				<verse number="10">𠊎又問：『主啊，𠊎愛做麼介正好？』主對𠊎講：『䟘起來，入 大馬士革 城去，在該位有人會㧯你講上帝愛你做个一切事。』</verse>
				<verse number="11">因為該光盡強，害𠊎个目珠看毋到，同𠊎共下去个人就牽等𠊎个手，帶𠊎入 大馬士革 城。</verse>
				<verse number="12">「在該位，有一個人名安到 亞拿尼亞 。佢係虔誠、嚴守法律个人，盡受 大馬士革 所有 猶太 人个尊重。</verse>
				<verse number="13">佢來看𠊎，企在𠊎个身邊，講：『 掃羅 兄弟啊，願你看得到！』該時，𠊎个目珠好了，𠊎就看到佢。</verse>
				<verse number="14">佢講：『𠊎等祖先个上帝已經揀選你，愛使你明白佢个旨意，可以看到佢公義个僕人，也聽到佢親口所講个聲音。</verse>
				<verse number="15">因為你愛為佢做見證，將你所看到所聽到个㧯萬民講。</verse>
				<verse number="16">這下，你還延纏麼介？䟘起來，求喊佢个名，來領洗禮，使你个罪得到洗淨！』</verse>
				<verse number="17">「後來，𠊎轉到 耶路撒冷 ；在聖殿肚祈禱个時，𠊎入神得到一個異象，</verse>
				<verse number="18">在異象中，𠊎看到主。佢對𠊎講：『遽遽離開 耶路撒冷 ，因為這地方个人毋會接受你為𠊎所做个見證。』</verse>
				<verse number="19">𠊎講：『主啊，佢等攏總知𠊎識入各會堂，捉信你个人去關，並鞭打佢等。</verse>
				<verse number="20">你个見證人 司提反 受害流血到死个時，𠊎也在場，贊成該件事，還代該兜害死佢个人掌衫。』</verse>
				<verse number="21">主㧯𠊎講：『你去！𠊎愛派你去遠方，到外邦人該位。』」</verse>
				<verse number="22">眾人本來恬恬聽 保羅 講話；總係一聽到這句話，就大聲喊講：「除掉佢！㓾死佢！這種人係該死个！」</verse>
				<verse number="23">佢等就一片吵，一片將衫抨掉，又向天委泥粉。</verse>
				<verse number="24">羅馬 个指揮官就命令將 保羅 帶入營房，又吩咐兵仔鞭打拷問佢，愛查出眾人為麼介對佢恁樣盡喊。</verse>
				<verse number="25">佢等將佢捆起來愛打个時， 保羅 對企在身邊个一個軍官講：「對一個 羅馬 公民，無經過審判，你等就鞭打佢，這係合法个嗎？」</verse>
				<verse number="26">該軍官一聽到這句話，就去見指揮官，對佢講：「你想樣般正好？該人係 羅馬 个公民！」</verse>
				<verse number="27">指揮官去見 保羅 ，問佢講：「㧯𠊎講，你係 羅馬 公民無？」 保羅 應講：「係。」</verse>
				<verse number="28">指揮官講：「𠊎用一大筆个錢，正得到公民个身份。」 保羅 講：「𠊎出世就係。」</verse>
				<verse number="29">所以，該兜愛拷問 保羅 个人遽遽閃開；指揮官一知 保羅 係 羅馬 公民，又因為識捆過 保羅 ，就著驚起來。</verse>
				<verse number="30">該指揮官想愛知 猶太 人告 保羅 實在个原因，所以，第二日，佢解開 保羅 个鎖鍊，召集祭司長㧯全議會，然後將 保羅 帶出來，喊佢企在佢等面前。</verse>
			</chapter>
			<chapter number="23">
				<verse number="1">保羅 注目看議會个人，講：「各位兄弟，𠊎行事為人係在上帝个面前照良心來做，直到今晡日。」</verse>
				<verse number="2">大祭司 亞拿尼亞 吩咐企在身邊个人搧 保羅 个嘴角。</verse>
				<verse number="3">保羅 對佢講：「你這隻粉白个壁啊，上帝會修理你！你坐在該位係愛照法律審判𠊎，你樣做得違背法律，喊佢等打𠊎啊！」</verse>
				<verse number="4">企在塍頭个人講：「你樣做得侮辱上帝个大祭司啊！」</verse>
				<verse number="5">保羅 講：「各位兄弟，𠊎毋知佢係大祭司；聖經講過：『毋好譭謗治理人民个官長。』」</verse>
				<verse number="6">保羅 看出這群人當中，有兜係撒都該黨个人，有兜係法利賽派个人；佢就在議會中大聲講：「兄弟啊，𠊎係一個法利賽人，係法利賽人个子孫。𠊎今晡日在這位受審問係因為𠊎盼望死人復活！」</verse>
				<verse number="7">佢一講這句話，法利賽人㧯撒都該人就相爭，議會分做兩派。</verse>
				<verse number="8">因為撒都該人毋相信復活，也毋信有天使㧯鬼魂，總係法利賽人三樣攏總信。</verse>
				<verse number="9">吵鬧个聲越來越大，有兜法利賽派个經學教師企起來，強烈爭論講：「𠊎等尋毋到這個人有麼介毋著！無一定正經有鬼魂抑係天使㧯佢講話噢！」</verse>
				<verse number="10">冤家越來越厲害，指揮官驚怕 保羅 被佢等扯爛，就命令兵仔下去，對人群中將 保羅 搶出來，帶入營房去。</verse>
				<verse number="11">該暗晡，主企在 保羅 身邊，講：「你愛好膽！你已經在 耶路撒冷 為𠊎做見證，共樣，你也一定愛在 羅馬 做見證。」</verse>
				<verse number="12">第二日打早， 猶太 人共下計謀，發誓在㓾掉 保羅 以前，毋食也毋啉。</verse>
				<verse number="13">同謀个人有四十零儕。</verse>
				<verse number="14">佢等去見祭司長㧯長老，講：「𠊎等已經發盡重个誓，毋食麼介東西，直到㓾死 保羅 ！</verse>
				<verse number="15">這下，你等㧯議會愛請求指揮官，帶 保羅 來這位，詐意愛更加詳細來查問佢个事情；𠊎等會準備好勢，在佢來到這位以前㓾死佢。」</verse>
				<verse number="16">保羅 个外甥聽到這陰謀，就入營房去㧯 保羅 講。</verse>
				<verse number="17">保羅 請一個軍官來，對佢講：「請帶這後生人去見指揮官；佢有事情愛報佢知。」</verse>
				<verse number="18">該軍官就帶這後生人去見指揮官，講：「囚犯 保羅 請𠊎過去，要求𠊎帶這後生人來見你，因為佢有事情愛㧯你講。」</verse>
				<verse number="19">指揮官就牽佢个手，帶佢去堘頭，問佢講：「你有麼介事情愛報告？」</verse>
				<verse number="20">佢應講：「 猶太 人已經參詳好勢，準備要求你天光日帶 保羅 去議會，詐意愛詳細查問佢个事情。</verse>
				<verse number="21">求你毋好答應佢等，因為有四十零儕會埋伏等等佢。佢等發過誓，毋食也毋啉，直到佢等㓾死 保羅 。這下，佢等已經準備好勢，等你个批准。」</verse>
				<verse number="22">指揮官吩咐這後生人講：「莫俾別人知你已經將這個事情報告𠊎。」然後喊佢離開。</verse>
				<verse number="23">接等，指揮官喊兩個軍官來，吩咐講：「準備兩百個步兵，七十個騎兵，長槍手兩百儕，今暗晡九點鐘出發去 凱撒利亞 ；</verse>
				<verse number="24">也愛為 保羅 準備騎个馬，護送佢去 腓力斯 總督該位。」</verse>
				<verse number="25">指揮官又寫好公文，內容講：</verse>
				<verse number="26">「 克勞第‧呂西亞 㧯總督 腓力斯 大人請安：</verse>
				<verse number="27">猶太 人捉到這個人，正愛㓾死佢，𠊎聽講佢係 羅馬 公民，就帶兵去搶救。</verse>
				<verse number="28">𠊎想愛查明佢等告佢个原因，所以帶佢到佢等个議會去。</verse>
				<verse number="29">𠊎發現佢並無麼介該死抑係愛關个罪名；佢等告佢，就係為到佢等法律个問題。</verse>
				<verse number="30">後來有人對𠊎報告，有人愛謀殺佢；𠊎黏時就決定送佢到你該位去，同時，吩咐該兜原告去你面前申告。」</verse>
				<verse number="31">該兜兵仔照所吩咐个，將 保羅 帶去，透夜送佢去 安提帕底 。</verse>
				<verse number="32">第二日，騎兵繼續護送 保羅 ，其他个軍兵就回營去。</verse>
				<verse number="33">騎兵來到 凱撒利亞 ，將公文呈給總督，又將 保羅 交給佢。</verse>
				<verse number="34">總督讀了公文，又問 保羅 係㖠省个人，知佢係 基利家 个人，</verse>
				<verse number="35">就講：「等原告來到，𠊎就處理你个案件。」然後命令將 保羅 關在 希律 个官府底背。</verse>
			</chapter>
			<chapter number="24">
				<verse number="1">過五日，大祭司 亞拿尼亞 㧯幾個長老，同一個名安到 帖土羅 个律師，來到 凱撒利亞 。佢等在總督 腓力斯 个面前告 保羅 。</verse>
				<verse number="2">保羅 被人喊到公堂； 帖土羅 就告佢講： 「 腓力斯 大人啊！因為你賢明个治理，𠊎等正有長期个太平，國家个行政有盡大个改革。</verse>
				<verse number="3">你个德政，𠊎等隨時隨地滿心感謝無停。</verse>
				<verse number="4">𠊎毋敢加講來勞攪你，只有求你施恩聽𠊎等簡單个申告：</verse>
				<verse number="5">𠊎等發現這個人像發瘟个人共樣。佢在全世界 猶太 人个中間製造混亂，係 拿撒勒 黨个一個頭目，</verse>
				<verse number="6">連聖殿也敢褻瀆，𠊎等就將佢捉起來。</verse>
				<verse number="7"></verse>
				<verse number="8">你審問佢就會知𠊎等告佢个一切理由。」</verse>
				<verse number="9">在場个 猶太 人也同聲告佢講，事實就係恁樣。</verse>
				<verse number="10">這時，總督指示 保羅 講話。 保羅 就講： 「𠊎知你在本國辦案仔盡多年，所以𠊎樂意在你面前為自家辯護。</verse>
				<verse number="11">你查就知，𠊎上 耶路撒冷 去禮拜，到這下正十二日定定。</verse>
				<verse number="12">佢等並無看到𠊎在聖殿肚㧯麼人辯論，也無看到𠊎在會堂抑係城肚煽動大眾。</verse>
				<verse number="13">佢等無法度對你提出告𠊎个證據。</verse>
				<verse number="14">總係，有一件事𠊎愛承認：佢等喊做異端个道，就係𠊎敬拜𠊎等祖先个上帝个根據。𠊎也相信 摩西 个法律㧯先知書所記个一切。</verse>
				<verse number="15">𠊎㧯佢等對上帝有共樣个盼望，就係希望所有个人，無論善惡，攏總會對死復活。</verse>
				<verse number="16">所以，𠊎勉勵自家，在上帝㧯人个面前，常常保持清白个良心。</verse>
				<verse number="17">「𠊎離開 耶路撒冷 已經有好多年。𠊎這擺去，係將救濟同胞个錢帶轉去，也愛在該位獻祭。</verse>
				<verse number="18">佢等在聖殿肚看到𠊎个時，𠊎已經行潔淨禮，堵堵獻等祭；𠊎並無聚集眾人，也無作亂。</verse>
				<verse number="19">若有，就係幾個對 亞細亞 省去个 猶太 人在該位；該兜人若係愛告𠊎，應該來你面前申告。</verse>
				<verse number="20">若無，喊這兜當時在場个人自家講看仔，𠊎在議會申訴个時，佢等發現𠊎有麼介罪。</verse>
				<verse number="21">𠊎企在佢等面前个時，只有大聲講過一句話，就係：『𠊎今晡日受你等審問，係因為𠊎相信死人復活。』」</verse>
				<verse number="22">腓力斯 對這道本來有相當个認識，就宣佈退堂講：「等指揮官 呂西亞 來到，𠊎正來判斷你等个事。」</verse>
				<verse number="23">佢命令該軍官看守 保羅 ，給佢較自由兜仔，准親友來供給佢所需要个東西。</verse>
				<verse number="24">幾日後， 腓力斯 㧯佢个 猶太 夫人 土西拉 共下來。佢喊 保羅 來，聽佢講論有關基督耶穌个信仰。</verse>
				<verse number="25">保羅 也講到有關公義、節制、將來个審判等教訓； 腓力斯 感覺盡驚，就對 保羅 講：「你暫時倒轉去，有機會𠊎正喊你來。」</verse>
				<verse number="26">因為 腓力斯 盡希望 保羅 會送錢給佢，所以常常喊佢來，㧯佢談論。</verse>
				<verse number="27">過兩年， 波求‧非斯都 接 腓力斯 个位做總督。 腓力斯 為到愛得到 猶太 人个歡喜，就將 保羅 繼續留在監獄肚。</verse>
			</chapter>
			<chapter number="25">
				<verse number="1">非斯都 到任三日後，對 凱撒利亞 上 耶路撒冷 去。</verse>
				<verse number="2">祭司長㧯 猶太 人个領袖向佢告 保羅 。佢等請求 非斯都 ，</verse>
				<verse number="3">恩准將 保羅 送去 耶路撒冷 ；事實上，佢等陰謀愛在路上埋伏㓾死佢。</verse>
				<verse number="4">非斯都 應佢等講：「 保羅 這下拘留在 凱撒利亞 ，𠊎無幾久愛轉去該位。</verse>
				<verse number="5">你等个領袖做得㧯𠊎共下去，若係該人有做麼介犯法个事，就在該位告佢。」</verse>
				<verse number="6">非斯都 在佢等該位住十頭八日就轉 凱撒利亞 去。第二日佢就開庭，命令人帶 保羅 來。</verse>
				<verse number="7">保羅 來到，該兜對 耶路撒冷 來个 猶太 人圍圍遒企等，用盡多嚴重个罪名告佢，總係全部拿毋出證據來。</verse>
				<verse number="8">保羅 為自家辯護講：「無論係違背 猶太 人个法律，褻瀆聖殿，抑係冒犯 羅馬 皇帝，這兜事𠊎一件也毋識犯過。」</verse>
				<verse number="9">總係 非斯都 愛俾 猶太 人歡喜，就問 保羅 ：「你願意上 耶路撒冷 ，在該位接受𠊎對這件案仔个審判麼？」</verse>
				<verse number="10">保羅 講：「這下𠊎就係企在皇帝个法庭，這位就係𠊎應當受審判个所在。𠊎對 猶太 人並毋識做過麼介毋著个事，這也係你自家明明知个。</verse>
				<verse number="11">若係𠊎犯法，有麼介該死个罪，𠊎絕對毋會逃避刑罰。若係佢等告𠊎个毋係事實，無人做得將𠊎交給佢等。𠊎愛對皇帝上訴！」</verse>
				<verse number="12">非斯都 㧯佢个參謀商量後，就講：「既然你對皇帝上訴，你就去皇帝該位！」</verse>
				<verse number="13">過一站日仔以後， 亞基帕 王㧯 百妮基 來 凱撒利亞 拜訪 非斯都 ，表示歡迎。</verse>
				<verse number="14">在該位住幾日後， 非斯都 將 保羅 个事對 亞基帕 王講：「這位有一個人，係 腓力斯 留下來个囚犯。</verse>
				<verse number="15">上擺𠊎去 耶路撒冷 ，該片 猶太 人个祭司長㧯長老來告佢，要求𠊎將佢定罪。</verse>
				<verse number="16">𠊎㧯佢等講，照 羅馬 人个規矩，被告吂同原告對質，還吂有機會為自家辯護以前，做毋得定罪。</verse>
				<verse number="17">等佢等來到這位以後，𠊎無延纏時間，第二日就開庭，命令將該人帶來。</verse>
				<verse number="18">原告全部企起來告佢，總係所告个並毋係𠊎想像个罪。</verse>
				<verse number="19">佢等㧯佢爭論个係關係宗教个問題，還有一個名安到耶穌个人；這人已經死掉，總係 保羅 講佢還生生。</verse>
				<verse number="20">這個案仔𠊎毋知愛樣般判正好。𠊎問 保羅 係毋係願意上 耶路撒冷 ，在該位受審判。</verse>
				<verse number="21">總係， 保羅 請求將佢留下來，佢愛上訴到皇帝該位去。所以𠊎命令將佢留在監獄肚，等候押送去皇帝該位。」</verse>
				<verse number="22">亞基帕 王對 非斯都 講：「𠊎也想愛親身聽這人講看仔。」 非斯都 講：「天光日你就做得聽佢講。」</verse>
				<verse number="23">第二日， 亞基帕 王㧯 百妮基 大擺排場，帶等一群指揮官㧯城內个貴族，共下入去大廳。 非斯都 一命令， 保羅 就被人帶入來。</verse>
				<verse number="24">非斯都 講：「 亞基帕 王，在座个各位！請看這個人；佢就係在這位㧯 耶路撒冷 所有个 猶太 人對𠊎申告，極力要求𠊎愛給佢死个。</verse>
				<verse number="25">總係，𠊎查毋出佢犯到麼介該死个罪；同時，佢既然愛對皇帝上訴，𠊎就決定押送佢去。</verse>
				<verse number="26">關係這個人，𠊎無麼介確實个資料可以奏明皇帝；所以，𠊎帶佢到各位面前來，特別係 亞基帕 王个面前，查明案情後，𠊎正有好上奏。</verse>
				<verse number="27">照𠊎看，押送囚犯無指出罪名係無合理个。」</verse>
			</chapter>
			<chapter number="26">
				<verse number="1">亞基帕 王對 保羅 講：「准你為自家辯護。」 保羅 就伸手，為自家辯護。</verse>
				<verse number="2">佢講：「 亞基帕 王啊，𠊎今晡日有好在你面前，為 猶太 人告𠊎个一切事來辯護，感覺實在萬幸！</verse>
				<verse number="3">特別係你盡熟 猶太 人个規矩㧯所爭論个問題。所以，𠊎求你耐心聽𠊎个申訴。</verse>
				<verse number="4">「𠊎從細到這下个做人係樣般， 猶太 人全部知，因為𠊎一直生活在本國人民个中間，後來也識住在 耶路撒冷 。</verse>
				<verse number="5">若係佢等肯做證，佢等最清楚，𠊎一開始就係屬𠊎等宗教中最嚴格个宗派，做一個法利賽人。</verse>
				<verse number="6">這下𠊎企在這位受審判，係因為盼望上帝對𠊎等祖先所應許个。</verse>
				<verse number="7">這應許係𠊎等十二支族个同胞日夜熱心敬拜上帝，所盼望愛得到个。王啊，就係因為這個盼望， 猶太 人正告𠊎！</verse>
				<verse number="8">你等樣會想上帝使死人復活係無可能个事呢？</verse>
				<verse number="9">「𠊎頭擺也認為應該盡力反對 拿撒勒 人耶穌个名。</verse>
				<verse number="10">𠊎在 耶路撒冷 就係恁樣做。𠊎對祭司長領受權柄，將多多个聖徒捉來關；毋單淨恁樣，𠊎也贊成佢等被人判死刑。</verse>
				<verse number="11">另外，𠊎在各會堂也多多擺刑罰佢等，強迫佢等放掉信仰。𠊎非常惱佢等，甚至去外國个城市迫害佢等。</verse>
				<verse number="12">「有一擺，𠊎帶等祭司長給𠊎个權柄㧯命令去 大馬士革 。</verse>
				<verse number="13">王啊，當晝个時，𠊎在路上看到大光，比日頭个光還較強，對天頂照在𠊎㧯共下去个人周圍。</verse>
				<verse number="14">𠊎等攏總橫落地上。𠊎聽到一個聲，用 希伯來 話對𠊎講：『 掃羅 ， 掃羅 ！你做麼介迫害𠊎？你只有傷害自家，像牛用腳掉主人有竻仔个棍仔一樣。』</verse>
				<verse number="15">𠊎問講：『主啊，你係麼人？』主講：『𠊎就係你所迫害个耶穌。</verse>
				<verse number="16">䟘起來，企等！𠊎對你顯現係愛設立你做𠊎个僕人，派你去為到今晡日你看到𠊎个事㧯將來𠊎愛指示你个事做見證。</verse>
				<verse number="17">𠊎會將你對 以色列 人㧯外邦人手中救出來。𠊎差派你去佢等中間，</verse>
				<verse number="18">來開佢等个目珠，使佢等對烏暗中轉向光明，對撒但个權勢之下歸向上帝；恁樣，佢等就會因為信𠊎來得到赦罪，也會在上帝个選民中得到地位。』</verse>
				<verse number="19">「所以， 亞基帕 王啊，𠊎無違背對天頂來个異象。</verse>
				<verse number="20">𠊎先在 大馬士革 㧯 耶路撒冷 ，然後在全 猶太 㧯外邦人中間勸佢等悔改，歸向上帝，行事為人愛合佢等悔改个心志。</verse>
				<verse number="21">就係為到恁樣，𠊎在聖殿底背个時， 猶太 人就捉𠊎，想愛㓾𠊎。</verse>
				<verse number="22">總係，直到今晡日，得到上帝个幫助，𠊎還企在這位，對所有个人做見證，無論佢等係尊貴抑係卑微个。𠊎所講个就係先知㧯 摩西 所講愛發生个事，</verse>
				<verse number="23">就係基督定著會受害，又會最先對死復活，向 猶太 人㧯外邦人宣佈拯救个光已經來到。」</verse>
				<verse number="24">因為 保羅 个申訴恁樣講， 非斯都 就大聲對佢講：「 保羅 ，你發癲了！你个學問忒大，卻害你發癲了！」</verse>
				<verse number="25">保羅 講：「 非斯都 大人！𠊎無發癲；𠊎所講个話係真實又合理个。</verse>
				<verse number="26">亞基帕 王也清楚這兜事情，所以𠊎正對王大膽直講。𠊎相信這兜事情，無一件係王毋知个，因為毋係在暗中發生个。</verse>
				<verse number="27">亞基帕 王啊，你相信先知麼？𠊎知你相信！」</verse>
				<verse number="28">亞基帕 王對 保羅 講：「你恅到勸𠊎一下仔，𠊎就會變做基督徒係麼？」</verse>
				<verse number="29">保羅 講：「無論勸多勸少，𠊎對上帝所求个，就係你㧯所有今晡日在場聽𠊎講話个人，全部會變做㧯𠊎共樣，總係莫像𠊎有這兜鎖鍊！」</verse>
				<verse number="30">王、總督、 百妮基 ，㧯其他个人就企起來。</verse>
				<verse number="31">佢等行出去以後，彼此講：「這個人並無犯麼介該死抑係愛關个罪。」</verse>
				<verse number="32">亞基帕 對 非斯都 講：「這個人若係無對皇帝上訴，就做得放佢走。」</verse>
			</chapter>
			<chapter number="27">
				<verse number="1">既然決定愛𠊎等行水路去 意大利 ，佢等就將 保羅 㧯其他囚犯交給 羅馬 皇軍个軍官 猶流 。</verse>
				<verse number="2">有一隻對 亞大米田 來个船，愛順 亞細亞 省个幾個港口行。𠊎等上了船，就出發。有一個 馬其頓 个 帖撒羅尼迦 人，名安到 亞里達古 ，同𠊎等共下去。</verse>
				<verse number="3">第二日去到 西頓 ， 猶流 寬待 保羅 ，准佢去尋朋友，受朋友个招待。</verse>
				<verse number="4">𠊎等又對該位開航，因為風毋順，船就行 塞浦路斯 背風該片。</verse>
				<verse number="5">𠊎等渡過 基利家 、 旁非利亞 一帶海面，去到 呂家 个 每拉 。</verse>
				<verse number="6">在該位，軍官 猶流 尋到一隻對 亞歷山大 來个船，愛去 意大利 ，就喊𠊎等上船。</verse>
				<verse number="7">一連好多日，船行盡慢，駛到非常艱苦正到 革尼土 鎮附近。因為風个阻擋，𠊎等無辦法繼續照原來个方向前行，就行 克里特 島背風該片，對 撒摩尼 角經過。</verse>
				<verse number="8">𠊎等順海岸前進，勉強正到離 拉西亞 城無幾遠个「佳澳港」。</verse>
				<verse number="9">𠊎等已經延纏好多時間，禁食个節期也已經過掉，行船緊來緊危險；所以 保羅 就勸大家，</verse>
				<verse number="10">講：「各位，𠊎看對這位繼續行船係盡危險个事；毋單淨貨物㧯船會大受傷害，連𠊎等个生命也難保。」</verse>
				<verse number="11">總係，軍官情願信船長㧯船主个話，毋愛信 保羅 所講个。</verse>
				<verse number="12">這港口也毋係過冬理想个所在；所以大部份个人贊成開船，愛想辦法駛到 菲尼基 去過冬。 菲尼基 係 克里特 島个港口，面向西南㧯西北。</verse>
				<verse number="13">當時，有一陣南風順順仔吹過來，大家恅到做得照原來个計劃行船，就將錨拉起來開船，偎近 克里特 島行。</verse>
				<verse number="14">無幾久，有一陣安到「東北風」个狂風對島上吹下來。</verse>
				<verse number="15">船被風吹到橫來橫去，𠊎等無法度，只有由在暴風吹等走。</verse>
				<verse number="16">船吹到一個細島背風該片；該島安到 高大 。𠊎等想盡辦法正保全該隻救生艇。</verse>
				<verse number="17">船員將該隻救生艇拖上大船，又用大索仔𫟧到大船底紽好。佢等又驚船撞到 賽耳底 个沙洲，就將大帆布放下來，俾船順風漂流。</verse>
				<verse number="18">暴風繼續吹等來，第二日，佢等就開始將貨物㧒落海中去，</verse>
				<verse number="19">又過一日，連船頂用个工具也親手㧒掉。</verse>
				<verse number="20">好多日，𠊎等無看到日頭㧯星仔；大風浪繼續催迫，最後，𠊎等連得救个希望也落空了。</verse>
				<verse number="21">船頂个人已經盡多日無食東西， 保羅 企在佢等面前講：「各位，你等若係早兜聽𠊎个話，莫對 克里特 島開船，就毋會致到恁慘个損失。</verse>
				<verse number="22">這下，𠊎勸你等愛勇敢，你等毋會有人喪失性命，只有這隻船會損失。</verse>
				<verse number="23">因為𠊎所屬、所敬拜个上帝，昨暗晡差佢个天使對𠊎講：</verse>
				<verse number="24">『 保羅 ，毋使驚！你一定會企在皇帝个面前。毋單淨恁樣，因為上帝个慈愛，佢已經決定愛保守所有同你共船个人个性命。』</verse>
				<verse number="25">所以各位，愛勇敢；𠊎相信上帝一定會實現佢對𠊎所講个話。</verse>
				<verse number="26">總係，𠊎等一定會漂到一個島上去。」</verse>
				<verse number="27">到第十四日暗晡，𠊎等个船還在 亞得里亞 海漂來漂去。到半夜，船員恅到𠊎等已經近陸地，</verse>
				<verse number="28">就放下索仔去探水个深淺，結果係四十公尺；又向前，再探，係三十公尺。</verse>
				<verse number="29">佢等驚船撞到礁石，就對船尾放四隻錨下去，望天光。</verse>
				<verse number="30">船員想愛偷走，將救生艇縋落海面，詐意愛對船頭放錨落海。</verse>
				<verse number="31">保羅 對軍官㧯兵仔講：「這兜船員若無留在船頂，你等就會無救。」</verse>
				<verse number="32">兵仔就斬斷救生艇个索仔，由在它漂走。</verse>
				<verse number="33">天曚光个時， 保羅 勸大家食兜東西。佢講：「你等愁腸擘肚，毋食毋啉，已經十四日囉。</verse>
				<verse number="34">這下𠊎勸你等，為到保命，食兜東西，因為你等逐儕連一條頭那毛也毋會損失。」</verse>
				<verse number="35">講了這個話， 保羅 拿兜麵包，在大家面前向上帝感謝，然後擘開來食。</verse>
				<verse number="36">大家就安心，自家也拿兜來食。</verse>
				<verse number="37">𠊎等在船頂个總共有兩百七十六儕。</verse>
				<verse number="38">大家食飽後，為到減輕船个負擔，又將船頂个麥仔㧒落海中去。</verse>
				<verse number="39">天光个時，船員毋識該所在，總係發現一個海灣，又有沙灘，就決定想辦法將船駛上去。</verse>
				<verse number="40">佢等先斬斷大索，將錨㧒在海中，同時解開船舵个索仔，拉起船頭个帆布，俾風將船吹到岸邊去。</verse>
				<verse number="41">總係，船卻衝到沙洲，船頭卡死，無法度轉頭，船尾卻被大浪沖壞掉去。</verse>
				<verse number="42">兵仔想愛將囚犯㓾掉，驚怕有兜會汨水偷走。</verse>
				<verse number="43">總係，軍官愛救 保羅 ，不准佢等亂來，就下令喊會泅水个人先跳下去，泅水上岸；</verse>
				<verse number="44">其他个人正利用枋仔㧯船頂个東西上岸。恁樣，大家攏總安全上岸。</verse>
			</chapter>
			<chapter number="28">
				<verse number="1">𠊎等平安上岸以後，正知該島安到 馬耳他 。</verse>
				<verse number="2">住在島上个人對𠊎等盡熱情。因為該時落雨，天氣又冷，佢等就起火來接待𠊎等。</verse>
				<verse number="3">保羅 拈一把柴，放在火底背。有一尾毒蛇，因為盡燒就鑽出來，纏等佢个手。</verse>
				<verse number="4">島上个人看到該尾蛇吊在 保羅 个手項，就彼此講：「這人一定係兇手，雖然對海底背得救上來，天理還係毋准佢生。」</verse>
				<verse number="5">總係 保羅 將該尾蛇拂落火底背去，並無受傷害。</verse>
				<verse number="6">大家等等佢个手腫起來，抑係忽然橫落去死掉；總係等盡久，看佢平安無事，就改變想法，講：「佢係神明！」</verse>
				<verse number="7">離該地方無幾遠，酋長 部百流 有兜田產。佢歡迎𠊎等，誠心款待𠊎等三日。</verse>
				<verse number="8">該時， 部百流 个阿爸熱到又屙痢肚，睡在眠床。 保羅 去佢个房間，為佢祈禱，按手，醫好佢。</verse>
				<verse number="9">因為恁樣，島上所有个病人就攏總來，全部也得到醫好。</verse>
				<verse number="10">佢等送𠊎等盡多禮物；到開船个時，又將𠊎等路上所需要个東西送到船頂。</verse>
				<verse number="11">過三個月，𠊎等坐上一隻對 亞歷山大 來个船；這隻船用「宙斯个雙胞胎」做記號，係停在該海島過冬个。</verse>
				<verse number="12">船到 敘拉古 ，𠊎等在該位停跎三日，</verse>
				<verse number="13">然後又開船，到 利基翁 。第二日有南風，所以兩日內就到 部丟利 ，</verse>
				<verse number="14">在該位堵到一兜兄弟姊妹；佢等請𠊎等停留一禮拜。然後，𠊎等就去 羅馬 。</verse>
				<verse number="15">羅馬 个兄弟姊妹聽到𠊎等到个消息，就到 亞比烏 市㧯 三館 來迎接𠊎等。 保羅 一看到佢等就感謝上帝，更加得到勇氣。</verse>
				<verse number="16">𠊎等到 羅馬 以後， 保羅 得到許可，㧯該看守佢个兵仔住在另外一個所在。</verse>
				<verse number="17">過三日， 保羅 請當地 猶太 人个領袖來相見。佢等來到， 保羅 對佢等講：「各位兄弟啊，雖然𠊎無做麼介事來得罪同胞，抑係違背祖先个規矩，無想到𠊎卻在 耶路撒冷 被人捉來關，又押送去交給 羅馬 當局。</verse>
				<verse number="18">佢等審問𠊎，總係尋毋到𠊎有麼介該死个罪，想愛放𠊎。</verse>
				<verse number="19">總係 猶太 人反對，迫到無辦法，𠊎只有上訴皇帝，並毋係𠊎愛告同胞麼介。</verse>
				<verse number="20">為到這個緣故，𠊎要求同你等見面講話。𠊎所以帶等這鎖鍊，原來係為到 以色列 人所盼望个該儕。」</verse>
				<verse number="21">佢等對 保羅 講：「關係你个事，𠊎等無對 猶太 接到麼介信仔，也無兄弟對該位帶麼介消息來，乜無講你麼介壞話。</verse>
				<verse number="22">總係，𠊎等想愛聽你親口講你个看法，因為𠊎等知你所屬个教派係在逐所在受人攻擊个。」</verse>
				<verse number="23">所以，佢等㧯 保羅 約定日仔來聚會。該日有盡多人來 保羅 住个所在；從早到暗，佢對佢等講解上帝國个道理，並引證 摩西 个法律㧯先知書，勸佢等信耶穌。</verse>
				<verse number="24">有兜人信佢所講个，有兜人毋信。</verse>
				<verse number="25">彼此意見毋合，佢等就散會。吂散開以前， 保羅 講一句話，講：「聖靈通過先知 以賽亞 對你等祖先所講个無毋著！</verse>
				<verse number="26">你去㧯這個子民講： 你等聽了又聽，總係毋會入耳； 看了又看，總係毋會了解。</verse>
				<verse number="27">因為這子民个心盡鈍； 佢等又耳公背背， 目珠眨眨。 若毋係恁樣，佢等个目珠會看得到， 耳公會聽得入耳， 心也會明白， 佢等就會回心轉意， 𠊎就會醫好佢等。」</verse>
				<verse number="28">保羅 結論講：「所以，你等應當知，上帝拯救个道理已經傳給外邦人；佢等反轉會聽！」</verse>
				<verse number="29"></verse>
				<verse number="30">保羅 在自家所稅來个屋住兩年。所有來訪問个人，佢攏總接待。</verse>
				<verse number="31">佢大膽宣傳上帝國个道理，將關係主耶穌基督个事情教示人，無受到麼介阻礙。</verse>
			</chapter>
		</book>
		<book number="45">
			<chapter number="1">
				<verse number="1">𠊎係基督耶穌个僕人 保羅 ；上帝呼召𠊎做使徒，特別派𠊎傳佢个福音。</verse>
				<verse number="2">這福音係上帝在盡久以前通過佢个眾先知在聖經底背所應許个，內容係有關佢个孻仔 — 𠊎等个主耶穌基督。照血統來講，佢係 大衛 个後代；照聖潔个神性來講，因為上帝使佢對死復活，用大能顯明佢係上帝个孻仔。</verse>
				<verse number="3"></verse>
				<verse number="4"></verse>
				<verse number="5">通過佢，𠊎得到特別个恩典，為佢个名做使徒，帶領各國个人來信從佢。</verse>
				<verse number="6">這當然包含你這兜在 羅馬 、得到上帝揀選來歸屬耶穌基督个人。</verse>
				<verse number="7">所有在 羅馬 、上帝所惜、所揀選做聖徒个人，𠊎對你等請安。 願𠊎等个阿爸上帝㧯主耶穌基督賜恩典、平安給你等！</verse>
				<verse number="8">一開始，𠊎愛通過耶穌基督，為你等大家感謝𠊎个上帝，因為你等个信心已經傳遍天下。</verse>
				<verse number="9">上帝知𠊎常常在祈禱中想念你等。𠊎全心全意事奉上帝，傳有關佢个孻仔个福音；佢做得證明𠊎所講个話係有影个。</verse>
				<verse number="10">𠊎求上帝，照佢美好个旨意為𠊎開路，俾𠊎最後會有機會去訪問你等。</verse>
				<verse number="11">𠊎非常希望見到你等，同你等分享屬靈个恩賜，好使你等个靈性堅強起來；</verse>
				<verse number="12">也可以講，𠊎在你等中間个時，因為你等㧯𠊎彼此个信心，𠊎等會互相得到鼓勵。</verse>
				<verse number="13">兄弟姊妹啊，𠊎愛你等知，有好多擺𠊎計劃愛去訪問你等，總係逐擺都有事情阻擋，害𠊎無法度去。𠊎个目的係愛在你等中間帶領人歸主，像在其他个外邦人中間一樣。</verse>
				<verse number="14">因為無論對麼介人，係文明人抑係吂開化个，係聰明人抑係愚戇个，𠊎攏總欠佢等个債。</verse>
				<verse number="15">所以，𠊎迫切愛將這福音也傳給你等在 羅馬 个人。</verse>
				<verse number="16">𠊎無看福音做見笑；這福音係上帝个大能，愛拯救一切信个人，先係 猶太 人，然後係外邦人。</verse>
				<verse number="17">因為這福音啟示𠊎等，上帝樣般使人同佢有正確个關係：從頭到尾係通過信。像聖經所講：「通過信同上帝有正確關係个人一定會得到真个生命 。」</verse>
				<verse number="18">原來，上帝个發譴對天頂顯明在一切無敬虔㧯不義个人身上，就係該兜用不義壓制真理个人。</verse>
				<verse number="19">上帝責罰佢等，因為關係佢个事，已經照人所能理解个，清清楚楚顯明在佢等个面前；這係上帝親自為佢等顯明个。</verse>
				<verse number="20">有關上帝个一切，本來毋係人看得到个，總係通過世界个創造，人看到佢所造个萬物，就認出佢永遠个大能㧯神性。所以，人無麼介藉口好推辭。</verse>
				<verse number="21">佢等雖然認識上帝，總係毋將榮光歸給佢，也毋感謝佢；佢等个思想虛空，糊塗个心變做烏暗。</verse>
				<verse number="22">佢等自認盡聰明，其實盡戇。</verse>
				<verse number="23">佢等毋拜永生个上帝，反轉去拜偶像，就係該兜照會死个人、飛禽、走獸、昆蟲等形像造出來个。</verse>
				<verse number="24">所以，上帝由在佢等跈等心中个慾念去做下流个事，彼此蹧踏自家个身體。</verse>
				<verse number="25">佢等棄絕上帝个真理，甘願接受虛假：佢等敬拜服事受造个東西，總係毋敬拜服事造物之主 — 佢正係應該永遠受讚美个。阿愐！</verse>
				<verse number="26">因為恁樣，上帝由在佢等放縱自家个情慾；毋單淨婦女打亂正常个關係，行違反自然个性行為，</verse>
				<verse number="27">連男人也棄絕同婦人家个正當關係，同性相戀，做出毋知見笑个事，結果，受到應得个責罰。</verse>
				<verse number="28">既然人故意毋承認上帝，上帝就由在佢等存敗壞个心，做該兜無應該做个事。</verse>
				<verse number="29">佢等行盡各種个不義、邪惡、貪心㧯惡毒；滿心係嫉妒、兇殺、相爭、詭詐㧯陰謀。佢等製造謠言，</verse>
				<verse number="30">彼此譭謗。佢等怨恨上帝，互相侮辱，驕傲，自誇，好惹是非，毋孝敬爺𡟓，</verse>
				<verse number="31">全無天良，講話無信用，無愛心，也無同情心。</verse>
				<verse number="32">佢等知，照上帝个命令，行這種事个人係該死个；總係，佢等毋單淨自家去行，也贊成別人恁樣行。</verse>
			</chapter>
			<chapter number="2">
				<verse number="1">朋友啊，論斷人个，無論你係麼人，毋使想愛推辭。你論斷別人，總係自家所做个又同佢等共樣，恁樣，你就係定自家个罪。</verse>
				<verse number="2">𠊎等知，行這種事情个人，上帝會照公當審判佢等。</verse>
				<verse number="3">總係，朋友啊，你所論斷个，別人所行个該兜事情，就係你所行个啊！你想，你閃得開上帝个審判嗎？</verse>
				<verse number="4">抑係你看輕佢豐盛个慈愛、寬容㧯忍耐？你應該知上帝个慈愛，因為佢愛你悔改！</verse>
				<verse number="5">總係你个硬心㧯毋肯悔改，為你自家招來更多个憤怒，致到上帝為公義發譴㧯審判个日仔來到个時，受還較重个責罰。</verse>
				<verse number="6">因為上帝愛照逐儕个行為報應佢。</verse>
				<verse number="7">有兜人堅持行善，追求對上帝來个尊貴、榮光，㧯毋會敗壞个生命；這種人，上帝會用永遠个生命賜給佢等。</verse>
				<verse number="8">總係，該兜自私个人，佢等拒絕真理去跈不義，上帝个發譴㧯責罰一定會臨到佢等。</verse>
				<verse number="9">所有作惡个人會堵到患難㧯痛苦，先係 猶太 人，然後係外邦人。</verse>
				<verse number="10">總係，所有行善个人，佢會賜佢等尊貴、榮光㧯平安，先係 猶太 人，然後係外邦人。</verse>
				<verse number="11">因為，無論對麼人，上帝毋會偏心。</verse>
				<verse number="12">外邦人無 摩西 个法律，佢等犯罪就會在這法律之外滅亡； 猶太 人有這法律，佢等犯罪就愛照這法律來受審判。</verse>
				<verse number="13">因為被上帝判無罪个，毋係該兜聽到法律个人，係該兜實行法律个人。</verse>
				<verse number="14">外邦人雖然無這個法律，總係，佢等若係照天性去行合這法律个事，佢等還係有自家个法律。</verse>
				<verse number="15">佢等个表現顯明這法律个命令係寫在佢等个心肚；佢等个良心就係證明這個事實；因為，佢等个心有時會責備自家，有時會為自家辯護。</verse>
				<verse number="16">照𠊎所傳个福音，在末日，上帝通過基督耶穌審判个時，就係愛照恁樣來審判人心中一切个祕密。</verse>
				<verse number="17">總係，你講你係 猶太 人，你倚靠法律，又誇口同上帝有特別个關係。</verse>
				<verse number="18">你已經接受法律个教訓，知上帝愛你做麼介，也曉得分別是非。</verse>
				<verse number="19">你深信自家係為瞙目个帶路个人，係該兜在烏暗中个人个光，</verse>
				<verse number="20">係戇仔个指導者，係後生人个先生。你又認為，因為你有 摩西 个法律，就對智識㧯真理有把扼。</verse>
				<verse number="21">你教別人，樣般毋教自家呢？你教訓人做毋得偷拿，自家卻偷拿嗎？</verse>
				<verse number="22">你講做毋得犯姦淫，自家卻去犯嗎？你惱偶像，自家卻偷拿宮廟肚个東西嗎？</verse>
				<verse number="23">你誇口你有上帝个法律，自家反轉破壞上帝个法律來侮辱佢嗎？</verse>
				<verse number="24">聖經講：「為到你等个緣故，上帝个名被外邦人侮辱。」</verse>
				<verse number="25">你若係遵行法律，你个割禮就有價值；你若違犯法律，你个割禮就無半些路用。</verse>
				<verse number="26">恁樣看來，一個無受割禮个人若遵行法律个命令，上帝敢毋會算佢做受割禮个人嗎？</verse>
				<verse number="27">你等 猶太 人會被外邦人定罪！因為你等領受法律條文，又接受割禮，總係你等違犯法律；佢等个身體雖然無受割禮，總係佢等遵行法律。</verse>
				<verse number="28">其實，麼人正算係真个 猶太 人，正經受割禮个人呢？毋係外表做 猶太 人、身體接受割禮个。</verse>
				<verse number="29">總講，內肚做 猶太 人个，正係真个 猶太 人；共樣，毋係因為法律條文，係通過聖靈个工作，心肝接受割禮个，正係真个割禮。這種人所得到个稱讚，毋係對人，係對上帝來个。</verse>
			</chapter>
			<chapter number="3">
				<verse number="1">照恁樣來講， 猶太 人有麼介較贏外邦人呢？割禮又有麼介價值呢？</verse>
				<verse number="2">事實上，逐方面都有。第一，上帝將佢个真道交給 猶太 人。</verse>
				<verse number="3">就算佢等中間有背信个，上帝敢會因為恁樣就無信實嗎？</verse>
				<verse number="4">當然毋會！就算人人攏總變做花撩，上帝還係真實个；就像聖經所講： 你講話个時，無包好捉， 被人告个時，定著會贏。</verse>
				<verse number="5">若係𠊎等个不義會顯明上帝个公義，𠊎等愛樣般講呢？上帝責罰𠊎等，係佢个不義嗎？ (𠊎係照人个想法講个。)</verse>
				<verse number="6">當然毋係！上帝若係不義，佢樣般做得審判世間呢？</verse>
				<verse number="7">若係𠊎講花撩會使上帝个真實還較顯明，更加得榮光，𠊎愛樣般講呢？做麼介𠊎還被人定做罪人呢？</verse>
				<verse number="8">做麼介毋講：「𠊎等做得行惡來顯善」呢？有兜人譭謗𠊎，講𠊎識講這種个話；佢等受定罪係應該个。</verse>
				<verse number="9">恁樣，𠊎等 猶太 人比外邦人較好係麼？當然毋係恁樣！𠊎已經指出， 猶太 人㧯外邦人共樣係在罪惡个權勢之下。</verse>
				<verse number="10">像聖經所講： 無義人， 連一個乜無。</verse>
				<verse number="11">無聰明人， 也無尋上帝个人。</verse>
				<verse number="12">人人離開上帝， 全部行毋著路； 無行善个， 連一個乜無。</verse>
				<verse number="13">佢等个喉嗹像打開个墳墓； 佢等个舌乸盡講詭詐个話； 對嘴唇出个像係蛇个毒氣；</verse>
				<verse number="14">佢等个嘴充滿惡毒个咒罵。</verse>
				<verse number="15">愛去害人抑係㓾人， 佢等走到像飛恁遽；</verse>
				<verse number="16">無論佢等去到㖠位， 就會有破壞㧯悲慘。</verse>
				<verse number="17">佢等毋知平安个路；</verse>
				<verse number="18">也無學到敬畏上帝。</verse>
				<verse number="19">𠊎等知，法律个命令係對在法律底下个人講个，愛給全世界个人伏在上帝个審判台前，無一儕有話好講。</verse>
				<verse number="20">因為無人能靠行法律來被上帝定做義；法律个目的係愛使人知自家有罪。</verse>
				<verse number="21">總係這下，上帝樣般使人同佢有正確个關係已經啟示出來；同法律全無關係。 摩西 个法律㧯眾先知就係證據。</verse>
				<verse number="22">上帝使人同佢有正確个關係，係因為佢等信耶穌基督 。無論係麼人，只有信基督，上帝正會恁樣對待佢等：</verse>
				<verse number="23">因為世間人全部犯了罪，虧欠上帝个榮光。</verse>
				<verse number="24">這下，上帝白白施恩，通過基督耶穌來救贖佢等，使佢等同佢有正確个關係。</verse>
				<verse number="25">上帝犧牲耶穌做贖罪祭，通過佢流血來死，使人因為信佢來得到赦罪。上帝恁樣做係愛顯明佢个公義。</verse>
				<verse number="26">先前，因為佢个忍耐，佢寬容人个罪；總係這下，佢取消人个罪來顯明佢个公義。恁樣，上帝顯明佢自家係公義个，也稱一切信耶穌个人係義人。</verse>
				<verse number="27">恁樣，𠊎等有麼介好誇口呢？一些仔乜無！樣般講呢？係對遵行法律嗎？毋係！係對信來个。</verse>
				<verse number="28">𠊎等个結論係：人同上帝有正確个關係只有通過信，毋係通過遵行法律。</verse>
				<verse number="29">敢講上帝單淨係 猶太 人个上帝嗎？佢也敢毋係外邦人个上帝嗎？當然係！</verse>
				<verse number="30">既然上帝只有一位，佢就愛使 猶太 人通過信同佢有正確个關係，對外邦人也係共樣。</verse>
				<verse number="31">恁樣來講，𠊎等个信害 摩西 个法律失效係麼？當然毋係！顛倒，𠊎等使法律還較有效。</verse>
			</chapter>
			<chapter number="4">
				<verse number="1">論到𠊎等血統个祖先 亞伯拉罕 ，關係佢个經驗，𠊎等愛樣般講呢？</verse>
				<verse number="2">若係佢被上帝稱做義人係因為佢个行為，佢就有好誇口；總係，在上帝个面前，佢無麼介好誇口。</verse>
				<verse number="3">聖經講：「 亞伯拉罕 信上帝，因為佢个信，上帝就算佢做義人。」</verse>
				<verse number="4">做事个人得到工錢，毋算恩典，係佢應該得个。</verse>
				<verse number="5">總係，有權好判罪人做無罪个係上帝；信佢个人有好同佢有正確个關係，毋係因為行為，係因為信。</verse>
				<verse number="6">大衛 所講，該毋係靠行為被上帝算做義个人有福氣，就係這個意思。佢講：</verse>
				<verse number="7">過犯得到原諒、 罪惡得到赦免个人， 佢係樣般有福氣啊！</verse>
				<verse number="8">無被主定罪个人， 這人實在有福氣噢！</verse>
				<verse number="9">大衛 所講个福氣單淨屬受割禮个人嗎？毋係！它也係屬無受割禮个人；因為𠊎等已經引用聖經个話，講：「 亞伯拉罕 信上帝，因為佢个信，上帝就算佢做義人。」</verse>
				<verse number="10">這係在麼介情形之下發生个呢？係在 亞伯拉罕 受割禮以前，抑係以後呢？係在以前，毋係以後。</verse>
				<verse number="11">佢後來正接受割禮；這係一種記號，證明佢在接受割禮以前已經因為信被上帝算做義人了。所以，對所有無受割禮、總係因為信被上帝算做義个人來講， 亞伯拉罕 係屬靈个阿爸。</verse>
				<verse number="12">佢也係已經受割禮个人个阿爸，毋單淨係因為佢等領受割禮，最重要个係因為佢等跈等𠊎等个祖先 亞伯拉罕 ，過佢在吂受割禮以前該種信心个生活。</verse>
				<verse number="13">上帝應許 亞伯拉罕 並佢个子孫，講佢會承受這世界。這應許毋係因為 亞伯拉罕 遵行法律，係因為佢信，就被上帝稱做義人。</verse>
				<verse number="14">若係上帝个應許係給遵行 摩西 法律个人，人个信就無意思，上帝个應許也無價值。</verse>
				<verse number="15">上帝个發譴係對法律來个；無法律，就無違犯法律个事。</verse>
				<verse number="16">所以，應許係用信做根據个；這係上帝應許个保證：佢會白白施恩給 亞伯拉罕 所有个子孫，毋單淨係遵行法律个，也包含該兜像 亞伯拉罕 恁樣信上帝个人。因為 亞伯拉罕 係𠊎等大家屬靈个阿爸。</verse>
				<verse number="17">像聖經所講：「𠊎立你做盡多國个阿爸。」在上帝面前，這應許係有效个； 亞伯拉罕 所信个就係使死人復活、對無創造萬有个上帝。</verse>
				<verse number="18">在無盼望个時， 亞伯拉罕 還係盼望，還係信，所以正成做「盡多國个阿爸」。像聖經所講：「你定著會有盡多子孫。」</verse>
				<verse number="19">該時， 亞伯拉罕 會一百歲了。佢自家个身體像係死人， 莎拉 生育个機能也已經喪失，總係，佢个信心並無因為恁樣就減少。</verse>
				<verse number="20">佢無喪失信心，也無懷疑上帝个應許；佢个信心反轉還較堅固，將榮光歸給上帝。</verse>
				<verse number="21">佢確信上帝定著會成就佢所應許个。</verse>
				<verse number="22">這就係 亞伯拉罕 樣般因為信「被上帝算做義人」个原因。</verse>
				<verse number="23">總係，「算做義人」這句話，毋單淨係講論佢，</verse>
				<verse number="24">也係為𠊎等來講个。因為𠊎等信使𠊎等个主耶穌對死復活个上帝，所以佢算𠊎等做義人。</verse>
				<verse number="25">主耶穌被人交在人个手中，為到𠊎等个罪來死；上帝使佢復活，為到使𠊎等同上帝有正確个關係。</verse>
			</chapter>
			<chapter number="5">
				<verse number="1">既然𠊎等因為信被上帝稱做義人，就通過𠊎等个主耶穌基督㧯上帝有和好个關係。</verse>
				<verse number="2">𠊎等又通過基督，因為信，進入這下所享受上帝个恩典；因為恁樣，𠊎等歡歡喜喜 盼望分享上帝个榮光！</verse>
				<verse number="3">就係在患難中，𠊎等還係歡喜 ；因為𠊎等知，患難會養成忍耐，</verse>
				<verse number="4">忍耐會生出老練，老練會帶來盼望。</verse>
				<verse number="5">這盼望毋會使𠊎等失望；因為上帝通過佢賜給𠊎等个聖靈，將佢个痛惜倒在𠊎等个心中。</verse>
				<verse number="6">當𠊎等還軟弱个時，基督就照上帝所定个日仔為罪人死。</verse>
				<verse number="7">為義人死就盡難得；為好人死，或者有人敢做。</verse>
				<verse number="8">唯獨上帝對𠊎等表明佢講毋盡个痛惜：在𠊎等還做罪人个時，基督就已經為𠊎等死！</verse>
				<verse number="9">因為佢流血來死，𠊎等這下就同上帝有正確个關係；將來，佢過較愛救𠊎等脫離上帝个發譴。</verse>
				<verse number="10">𠊎等原來係上帝个仇敵；總係通過厥孻仔个死，佢使𠊎等成做佢个朋友。既然成做佢个朋友，𠊎等還較愛通過基督个生命來得救！</verse>
				<verse number="11">毋單淨恁樣，既然主耶穌基督使𠊎等這下就做上帝个朋友，𠊎等就通過佢歡歡喜喜來榮光上帝。</verse>
				<verse number="12">罪通過一個人來入世界，因為恁樣，死也通過罪跈等來；結果，死就臨到全人類，因為每一個人攏總犯了罪。</verse>
				<verse number="13">在法律頒佈以前，世界就有罪个存在；總係，無法律，人就無照法律个標準來接受刑罰。</verse>
				<verse number="14">雖然恁樣，對 亞當 到 摩西 ，人類還係被死管轄，就算無像 亞當 恁樣犯到毋服從上帝个罪，人還係無法度閃開死个權勢。 亞當 係以後正愛來該儕个預表。</verse>
				<verse number="15">總係，兩儕並毋係完全共樣，因為上帝白白个恩賜㧯 亞當 个罪係大有分別个。雖然有盡多人因為 亞當 一儕个罪來死；總係，上帝个恩典大加盡多。佢通過耶穌基督一儕白白賜給眾人个恩賜也係恁樣。</verse>
				<verse number="16">上帝个恩賜㧯一個人犯罪个結果有盡大个差別。因為一個人犯罪，就帶來「有罪」个判決；總係，多多人犯罪，卻得到「無罪」个宣告，這就係堪毋得个恩賜！</verse>
				<verse number="17">雖然因為一個人犯罪，死就管轄世間人，總係耶穌基督一儕所成就个還較大！所有領受上帝豐盛个恩典、白白得到稱義个人，攏總會通過基督得到生命來掌權。</verse>
				<verse number="18">總講，因為一個人犯罪，眾人就全部受定罪；共樣，因為一個人所行个義，眾人就攏總得到宣告無罪來承受生命。</verse>
				<verse number="19">因為一個人違悖命令，眾人就成做罪人；像恁樣，一個人順服，眾人就成做義人。</verse>
				<verse number="20">法律一制定，過犯就增加；總係罪越多，上帝个恩典也越豐盛。</verse>
				<verse number="21">罪係通過死來管轄，像恁樣，上帝个恩典係通過公義來統治，愛使𠊎等通過𠊎等个主耶穌基督來得到永生。</verse>
			</chapter>
			<chapter number="6">
				<verse number="1">恁樣，𠊎等愛樣般講呢？𠊎等做得繼續生活在罪个底背，來俾上帝个恩典增加嗎？</verse>
				<verse number="2">當然做毋得！對罪來講，𠊎等已經死掉。𠊎等樣般做得繼續生活在罪个底背呢？</verse>
				<verse number="3">你等敢毋知，𠊎等領洗禮來同基督耶穌結連，就係領洗禮來加入佢个死嗎？</verse>
				<verse number="4">通過洗禮，𠊎等已經同佢共下死，共下埋葬了！這係為到愛使𠊎等過新个生活；像天頂个阿爸用佢榮耀个大能，使基督對死復活共樣。</verse>
				<verse number="5">若係𠊎等㧯基督合而為一，經歷佢个死，𠊎等定著也會㧯佢合而為一，經歷佢个復活。</verse>
				<verse number="6">𠊎等知，𠊎等个舊人已經同基督共下釘十字架，係愛毀滅𠊎等有罪个身體，使𠊎等毋會再做罪个奴隸；</verse>
				<verse number="7">因為人一死，就脫離罪个權勢。</verse>
				<verse number="8">𠊎等若係同基督共下死，𠊎等確信，𠊎等也會同基督共下生。</verse>
				<verse number="9">因為𠊎等知，基督已經對死復活，佢毋會再死了；死不能再控制佢了。</verse>
				<verse number="10">佢个死，係同罪切斷關係，一擺就圓滿；佢這下生等，係為上帝來生。</verse>
				<verse number="11">共樣，對罪這方面來講，你等愛看自家係死掉个，總係在基督耶穌个生命底背，你等係為上帝來生。</verse>
				<verse number="12">所以，你等會死个身體毋好再俾罪管轄，去順從身體个情慾。</verse>
				<verse number="13">你等身體个每一部份也毋好向罪投降，去做邪惡个器皿。顛倒，你等愛將自家獻給上帝，像對死復活个人，將歸個人奉獻給佢，做公義个器皿。</verse>
				<verse number="14">罪定著毋會管轄你等；因為你等已經毋係在法律底下，係在上帝个恩典之下。</verse>
				<verse number="15">恁樣來講，因為𠊎等無在法律底下，係在上帝个恩典之下，𠊎等就做得犯罪嗎？絕對做毋得！</verse>
				<verse number="16">你等敢毋知，你等做人个奴僕就愛服從主人；服從麼人，你等就係佢个奴僕。這就係講，你等做罪个奴僕，結果就係死；你等順從上帝，就成做義人。</verse>
				<verse number="17">感謝上帝！雖然你等識做罪个奴僕，總係這下，你等一心順從所傳給你等个教訓。</verse>
				<verse number="18">你等已經對罪中釋放出來，成做義个奴僕。</verse>
				<verse number="19">𠊎驚你等毋了解𠊎个意思，正用普通个例仔來對你等講。頭擺你等放縱情慾，違悖法律，做罪个奴僕；這下，你等愛將自家歸個人獻做義个奴僕，使你等成做聖潔。</verse>
				<verse number="20">你等做罪个奴僕个時，你等毋接受義个約束。</verse>
				<verse number="21">你等這下看做見笑个事，該時做了，結果得到麼介好處呢？不過係死定定！</verse>
				<verse number="22">這下，你等已經對罪中釋放出來，成做上帝个奴僕；結果你等將生命完全獻給佢，所收成个就係永生。</verse>
				<verse number="23">因為罪个代價就係死；總係上帝所賜个恩典就係俾𠊎等同𠊎等个主基督耶穌合而為一，來得到永生。</verse>
			</chapter>
			<chapter number="7">
				<verse number="1">兄弟姊妹啊，你等係了解法律个人，一定會明白𠊎所愛講个：法律對人个約束，係在人還生个時正有效。</verse>
				<verse number="2">比論來講，一個結婚个婦人家，厥老公還生，姖就在法律个約束之下，做毋得離開老公；老公若過身，姖就毋使再受這法律个限制。</verse>
				<verse number="3">所以，老公還生个時，姖若同別个男人同居，就愛看姖做淫婦。若係厥老公過身掉去，在法律上姖就係一個自由人，若係同別个男人結婚，也毋算犯姦淫。</verse>
				<verse number="4">兄弟姊妹啊，你等个情形也係恁樣。照法律來講，你等係已經死掉个人，因為你等係基督身體个一部份；你等這下已經歸屬對死復活个主，使𠊎等做得好好為上帝工作。</verse>
				<verse number="5">𠊎等還照肉體生活个時， 摩西 个法律激起𠊎等个邪念，在𠊎等个肢體中發作，結果就係死。</verse>
				<verse number="6">總係，對管轄𠊎等个法律來講，𠊎等係已經死掉个人；這下，法律已經無法度約束𠊎等了。𠊎等事奉上帝係照聖靈个新指示，毋係再照法律條文个舊樣式。</verse>
				<verse number="7">恁樣，𠊎等做得講法律本身係罪麼？當然做毋得！顛倒，通過法律，𠊎正知罪係麼介。若毋係法律講「做毋得貪心」，𠊎就毋知貪心係麼介。</verse>
				<verse number="8">罪通過法律个命令尋到機會，在𠊎底背激起各種个貪念。無法律，罪就無效力。</verse>
				<verse number="9">𠊎本來生活在法律之外；後來法律个命令來到，罪就發生效力，結果𠊎就在罪中死掉。</verse>
				<verse number="10">法律个命令原來係愛使人得到生命个；總係，對𠊎來講，它反轉卻帶來滅亡。</verse>
				<verse number="11">因為罪通過法律个命令尋到機會誘惑𠊎，也通過法律个命令害死𠊎。</verse>
				<verse number="12">摩西 个法律本身係神聖个；法律个命令係神聖、公平㧯良善个。</verse>
				<verse number="13">恁樣講，係該良善个害死𠊎嗎？當然毋係！係罪！總係，罪係通過該良善个正顯出原形，結果就帶來死。通過法律个命令，罪个惡質就越來越明顯。</verse>
				<verse number="14">𠊎等知， 摩西 个法律係屬靈个；總係，𠊎係屬肉體个，已經賣給罪做奴隸。</verse>
				<verse number="15">𠊎所做个，𠊎自家無明白：因為𠊎所願意个，偏偏毋去行；𠊎所惱个，反轉去做。</verse>
				<verse number="16">𠊎若係做𠊎毋願意做个事，𠊎就係承認法律係著个。</verse>
				<verse number="17">既然恁樣，𠊎所做个，並毋係正經𠊎做个，係在𠊎底背个罪做个。</verse>
				<verse number="18">𠊎也知，在𠊎底背，就係在𠊎肉體个底背，無良善。因為，𠊎有行善个心，總係無行善个能力。</verse>
				<verse number="19">𠊎所願意个善，𠊎偏偏毋行；𠊎所毋願意个罪惡，𠊎偏偏去做。</verse>
				<verse number="20">既然𠊎做𠊎所毋願意个，就表示這毋係𠊎做个，係在𠊎底背个罪所做个。</verse>
				<verse number="21">因為恁樣，𠊎發現有一個法則在作怪：在𠊎愛行善个時，邪惡總係纏等𠊎。</verse>
				<verse number="22">𠊎个內心係合意上帝个規則；</verse>
				<verse number="23">總係，𠊎看出𠊎个肢體被另外一個法則控制等；這法則同𠊎內心所合意个規則交戰，害𠊎無辦法脫離在𠊎底背作怪个罪个法則。</verse>
				<verse number="24">𠊎還艱苦噢！麼人能救𠊎脫離這害死𠊎个身體呢？</verse>
				<verse number="25">感謝上帝，通過𠊎等个主耶穌基督，佢就能救𠊎。 𠊎个情形係恁樣：𠊎自家只能用心靈順從上帝个規則；總係，𠊎个肉體卻降服罪个法則。</verse>
			</chapter>
			<chapter number="8">
				<verse number="1">這下，該兜生在基督耶穌生命底背个人就毋使受定罪了。</verse>
				<verse number="2">因為聖靈个規則，就係使人同基督耶穌結連得到生命个，已經將你 對罪㧯死个法則之下釋放出來。</verse>
				<verse number="3">因為肉體个軟弱， 摩西 个法律無法度成就个，上帝已經親自成就了。上帝差派自家个孻仔，使佢同𠊎等人類共樣有罪个肉體，為到愛定肉體底背个罪，將罪除掉。</verse>
				<verse number="4">上帝恁樣行，係愛使法律个正當要求實現在𠊎這兜毋降服肉體，只有順從聖靈个人身上。</verse>
				<verse number="5">因為，降服肉體个人心肝所想个就係肉體个事；順從聖靈个人心肝所想个就係聖靈所要求个事。</verse>
				<verse number="6">心向等肉體，結果就係死；心向等聖靈，正會得到生命㧯平安。</verse>
				<verse number="7">所以，心向等肉體个人就係同上帝作對；因為佢毋順從上帝个規則，事實上也做毋到。</verse>
				<verse number="8">降服肉體个人，得毋到上帝个歡喜。</verse>
				<verse number="9">論到你等，若係上帝个靈正經住在你等底背，你等个生活就毋會受肉體个支配，唯有受聖靈个管理。人無基督个靈，就毋係屬佢。</verse>
				<verse number="10">總係，基督若住在你等底背，就算你等个身體會因為罪來死，上帝个靈也會使你等得到生命 ，因為上帝已經使你等成做義人了。</verse>
				<verse number="11">上帝个靈使耶穌對死復活；這個靈若住在你等底背，恁樣，這個使基督對死復活个上帝，也會通過住在你等底背个聖靈，將生命賜給你等會死个身體。</verse>
				<verse number="12">所以，兄弟姊妹啊，𠊎等个生活毋應該再被肉體支配了。</verse>
				<verse number="13">你等若降服肉體，定著會滅亡；你等若靠聖靈治死罪惡个行為，的確會得到生命。</verse>
				<verse number="14">被上帝个靈帶領个人，佢等就係上帝个子女。</verse>
				<verse number="15">因為，上帝所賜个靈毋係愛使你等做奴隸來著驚；係愛使你等做上帝个子女。通過聖靈，𠊎等喊上帝：「阿爸！𠊎个爺！」</verse>
				<verse number="16">上帝个靈㧯𠊎等个靈相共證明𠊎等係上帝个子女。</verse>
				<verse number="17">既然係上帝个子女，𠊎等就有好享受上帝為佢个子民所預備个福氣，也愛同基督共下享受上帝為佢所保留个；因為，若係𠊎等分擔基督个苦難，𠊎等就有好分享佢个榮光。</verse>
				<verse number="18">𠊎想，𠊎等這下个苦難，同將來愛顯明給𠊎等个榮光來比，實在毋算麼介。</verse>
				<verse number="19">一切受造个，攏總熱誠盼望上帝个眾子女顯明出來。</verse>
				<verse number="20">因為歸個受造个變做虛空，毋係本身个意思，係上帝个旨意。總係，受造个還係在盼望，</verse>
				<verse number="21">有一日會脫離敗壞个轄制，得到同上帝个子女分享光榮个自由。</verse>
				<verse number="22">𠊎等知，直到這下，一切受造个全部在痛苦中緊噌，像生產前个陣痛。</verse>
				<verse number="23">毋單淨受造个恁樣，𠊎這兜有聖靈做最先熟个果子个人，也係心肝歎息，等候上帝收養𠊎等做佢个子女，好使自家歸個人得到自由。</verse>
				<verse number="24">𠊎等得救係因為盼望。𠊎等所盼望个，若係已經看到，還安到麼介盼望哪！麼人還盼望佢所看到个呢？</verse>
				<verse number="25">𠊎等若係盼望吂看到个，𠊎等就會忍耐來等。</verse>
				<verse number="26">共樣，𠊎等个軟弱有聖靈幫助。𠊎等本來毋知愛樣般祈禱；總係，聖靈親自用講毋出个歎息來為𠊎等對上帝祈求。</verse>
				<verse number="27">鑒察人心个上帝知聖靈个意思，因為聖靈照上帝个旨意，代聖徒祈求。</verse>
				<verse number="28">𠊎等知，上帝同該兜敬愛佢个人，就係佢照自家个旨意所呼召个，共下工作，使萬事攏總有利益 。</verse>
				<verse number="29">因為上帝預先認識佢等，預先將佢等揀選出來，愛使佢等同佢个孻仔有共樣个特質，好俾佢个孻仔在多多兄弟姊妹中做長子。</verse>
				<verse number="30">上帝所預先揀選个人，佢就呼召佢等；佢所呼召个人，佢就宣判佢等做義人；佢宣判做義人个，佢就俾佢等分享榮光。</verse>
				<verse number="31">既然恁樣，𠊎等愛樣般講呢？上帝若在𠊎等這片，麼人能同𠊎等作對呢？</verse>
				<verse number="32">連自家个孻仔，佢也拌得犧牲，賜給𠊎等眾人。敢講佢毋會將萬物也白白賜給𠊎等嗎？</verse>
				<verse number="33">麼人會告上帝所揀選个人呢？上帝已經宣佈佢等無罪了！</verse>
				<verse number="34">恁樣，還有麼人會定佢等个罪呢？敢係過身个基督耶穌嗎？無可能！事實上，佢早就復活，這下坐在上帝个右片，在該位代𠊎等祈求！</verse>
				<verse number="35">既然恁樣，有麼人能使𠊎等同基督个痛惜隔絕呢？係患難嗎？係困苦嗎？係迫害嗎？係肚飢嗎？係窮苦嗎？係危險嗎？係刀劍嗎？</verse>
				<verse number="36">像聖經所講： 為到你个緣故，𠊎等歸日等死； 人看𠊎等像係愛㓾个羊。</verse>
				<verse number="37">攏總毋係！在這一切事情頂高，𠊎等靠痛惜𠊎等个主已經穩贏了！</verse>
				<verse number="38">因為𠊎確信，無麼介能使𠊎等同上帝个痛惜隔絕：不管係死，抑係生；係天使，抑係其他在天頂掌權个；係這下个，抑係將來个；</verse>
				<verse number="39">係在高天个，抑係在深淵个；抑係受造个宇宙中一切个東西。無麼介能使𠊎等同上帝个痛惜隔絕；佢个痛惜係通過𠊎等个主基督耶穌賜給𠊎等个。</verse>
			</chapter>
			<chapter number="9">
				<verse number="1">𠊎講真心話；𠊎係屬基督个人，毋會講花撩。𠊎个良心在聖靈个光照之下也證明𠊎無講花撩：</verse>
				<verse number="2">𠊎十分憂愁，𠊎个心一直痛到講毋得！</verse>
				<verse number="3">為到𠊎个同胞，𠊎个骨肉之親，就係𠊎本身被上帝咒詛，同基督隔絕，𠊎也甘願。</verse>
				<verse number="4">佢等係 以色列 人、上帝个選民；上帝賜佢等子女个名份，有好分享佢个榮耀。上帝同佢等立約，賜佢等法律；佢等知愛樣般敬拜上帝，也接受了佢个應許。</verse>
				<verse number="5">佢等係眾族長个子孫；照血統來講，基督同佢等係共族。願統治萬有个上帝 永遠得到頌讚！阿愐。</verse>
				<verse number="6">𠊎毋係講上帝个應許已經落空。因為， 以色列 人無全部係上帝个選民；</verse>
				<verse number="7">亞伯拉罕 个子孫也無全部係佢个真子女。上帝識對 亞伯拉罕 講：「唯有對 以撒 出个，正算係你个子孫。」</verse>
				<verse number="8">這就係講，自然生育所𫱔个，無一定係上帝个子女；唯有對上帝个應許來𫱔个，正算係上帝个子女。</verse>
				<verse number="9">因為上帝个應許係恁樣講个：「時機成熟个時，𠊎愛倒轉來， 莎拉 會𫱔一個孻仔。」</verse>
				<verse number="10">毋單淨恁樣， 麗百加 个兩個孻仔，也係對共一個阿爸，就係𠊎等个先祖 以撒 來𫱔个。</verse>
				<verse number="11">總係，為到愛表示佢照自家个旨意已經揀選其中一個孻仔，上帝對 麗百加 講：「大个孻仔愛服事細个孻仔。」佢講這句話个時，佢等還吂出世，還吂行善抑係作惡；可見，上帝个揀選係照佢自家个旨意，同佢等个行為無關係。</verse>
				<verse number="12"></verse>
				<verse number="13">就像聖經所講：「𠊎惜 雅各 ，惱 以掃 。」</verse>
				<verse number="14">恁樣，𠊎等做得講上帝無公平係麼？當然做毋得！</verse>
				<verse number="15">因為佢識對 摩西 講： 「𠊎愛憐憫麼人，就憐憫麼人， 愛痛惜麼人，就痛惜麼人！」</verse>
				<verse number="16">可見，上帝个揀選毋係照人个心願抑係打拚，係照佢个憐憫來个。</verse>
				<verse number="17">聖經底背，上帝對 埃及 王講：「𠊎立你做王，係愛用你來彰顯𠊎个權能，使𠊎个名傳遍天下。」</verse>
				<verse number="18">恁樣講來，上帝愛憐憫麼人，就憐憫麼人；佢愛使麼人硬頸，就使麼人硬頸。</verse>
				<verse number="19">可能你會對𠊎講：「既然恁樣，上帝樣般還做得怪人？麼人能抵抗佢个旨意啊？」</verse>
				<verse number="20">總係朋友啊，你係麼人？樣般敢撐上帝个話呢！缶仔樣般做得對造它个人講：「你做麼介造𠊎像恁樣呢？」</verse>
				<verse number="21">敢講燒缶師傅無權拿泥來造佢所愛造个東西嗎？佢敢做毋得用共團泥來製造兩隻器皿，一隻貴重个，一隻普通个嗎？</verse>
				<verse number="22">上帝所做个也係恁樣。佢愛顯示佢公義个發譴，彰顯佢个權能；總係，佢又愛用耐心寬容佢發譴个對象，就係該兜本來應當愛打爛个器皿。</verse>
				<verse number="23">同時，佢還愛將佢豐盛个榮耀對𠊎等來顯明；𠊎等係佢憐憫个對象，係佢所預備愛接受佢榮耀个人。</verse>
				<verse number="24">𠊎等毋單淨係佢對 猶太 人底背，也係對外邦人當中，呼召出來个。</verse>
				<verse number="25">這就係佢在《何西阿書》底背所講个： 本來毋係𠊎子民个， 𠊎愛稱佢等做「𠊎个子民」， 本來𠊎無合意个邦國， 𠊎愛稱它做「𠊎所惜个」。</verse>
				<verse number="26">頭擺𠊎識對佢等講： 你等毋係𠊎个子民； 總係這下，佢等愛稱做 「永生上帝个子女」。</verse>
				<verse number="27">關係 以色列 人， 以賽亞 識大聲喊講：「 以色列 人雖然像海沙恁多，總係只有賸下个少數人會得救，</verse>
				<verse number="28">因為主愛當遽又徹底來審判全人類。」</verse>
				<verse number="29">又像 以賽亞 頭擺所講：「若毋係主 — 萬軍个元帥為𠊎等留下一兜後代，𠊎等早就像 所多瑪 㧯 蛾摩拉 恁樣囉！」</verse>
				<verse number="30">恁樣，𠊎等愛樣般講呢？外邦人本來無尋上帝个義，卻因為信來成做義人；</verse>
				<verse number="31">總係， 以色列 人追求通過法律來成做義人，反轉無達成目的。</verse>
				<verse number="32">樣般會恁樣呢？因為佢等毋靠信心，反轉靠行為，結果就跌在該「絆腳石」頂高。</verse>
				<verse number="33">像聖經所講： 看啊，𠊎在 錫安 放一垤絆腳个石頭， 係會使人跌倒个大石頭！ 總係，信靠佢个人就毋會失望。</verse>
			</chapter>
			<chapter number="10">
				<verse number="1">兄弟姊妹啊，𠊎樣般熱誠盼望𠊎个同胞會得救；為這件事，𠊎也一直懇求上帝！</verse>
				<verse number="2">𠊎做得做證，佢等對上帝確實非常熱心，可惜佢等个熱心毋係用真智識做基礎。</verse>
				<verse number="3">佢等無明白上帝个義，想愛立自家个義，毋肯順從上帝个義。</verse>
				<verse number="4">其實，基督已經使法律个功效停止，使一切信佢个人攏總得到成做義人。</verse>
				<verse number="5">有關通過遵守法律來成做義人這件事， 摩西 識恁樣寫：「遵守法律命令个人，會因為法律得到生命。」</verse>
				<verse number="6">總係，因為信來成做義人這件事，聖經恁樣講：「你毋好心肝講：麼人愛上去天頂啊？」 (這就係講，麼人愛去帶基督下來呢？)</verse>
				<verse number="7">「也毋好講：麼人愛下去陰間啊？」 (這就係講，麼人愛去將基督對死人中帶上來呢？)</verse>
				<verse number="8">這兜話个意思係講：「上帝个真道離你無幾遠，就在你口中，在你个心內。」換句話來講，就係在𠊎等所傳「信个真道」底背。</verse>
				<verse number="9">你若係嘴承認耶穌做主，心相信上帝使佢對死復活，你就會得救。</verse>
				<verse number="10">因為𠊎等心恁樣相信，就會得到成做義人；嘴恁樣承認，就會得救。</verse>
				<verse number="11">聖經講：「凡信靠佢个人就毋會失望。」</verse>
				<verse number="12">這句話係指所有个人講个，因為無 猶太 人㧯外邦人个分別；上帝係萬人个主，佢愛豐豐富富賜福給所有求喊佢个人。</verse>
				<verse number="13">就像聖經所講：「凡求喊主名个人一定得救。」</verse>
				<verse number="14">總係，佢等無信佢，樣般會求喊佢呢？無聽到，樣般會信呢？無人傳，樣般會有好聽呢？</verse>
				<verse number="15">無人奉差派，樣般會有人傳呢？像聖經所講：「傳福音个人，佢等个腳跡還靚噢！」</verse>
				<verse number="16">總係，並毋係每一個人全部接受福音，因為 以賽亞 識講：「主啊，𠊎等所傳个，有麼人信呢？」</verse>
				<verse number="17">可見，信係對聽來个，聽係對傳揚基督來个。</verse>
				<verse number="18">總係，𠊎愛質問：佢等正經無聽過嗎？當然聽過！像聖經所講： 佢等个聲傳到人間； 佢等个話傳遍天下。</verse>
				<verse number="19">𠊎再質問： 以色列 人正經毋知嗎？最先， 摩西 用上帝个話已經回答這個問題，講： 𠊎愛用『毋算係子民』个民族來激你等嫉妒， 𠊎愛用戇檔个國惹你等受氣。</verse>
				<verse number="20">以賽亞 還較大膽傳上帝个話講： 吂識尋𠊎个人， 𠊎俾佢等發現， 吂識求𠊎个人， 𠊎對佢等顯現。</verse>
				<verse number="21">總係，關係 以色列 人，佢講： 對這悖逆好拗个子民， 𠊎歸日伸出𠊎个雙手， 喊佢等轉來同𠊎講和。</verse>
			</chapter>
			<chapter number="11">
				<verse number="1">恁樣，𠊎愛問：上帝棄絕佢个子民了，係麼？當然毋係！𠊎自家就係一個 以色列 人，係 亞伯拉罕 个後代，屬 便雅憫 个支族。</verse>
				<verse number="2">上帝無棄絕佢對古早就揀選个子民。你等知，聖經記載講， 以利亞 對上帝告 以色列 人个時，</verse>
				<verse number="3">佢講：「主啊，佢等㓾掉你所有个先知，拆掉你个祭壇；只有賸𠊎一個人，佢等還係愛尋𠊎，收𠊎个命。」</verse>
				<verse number="4">上帝樣般回答佢呢？佢講：「𠊎有為自家留下七千人，佢等攏總無拜過假神 巴力 。」</verse>
				<verse number="5">這下个情形也係共樣：上帝照自家个恩典所揀選个人只有賸少數。</verse>
				<verse number="6">上帝个揀選係出於佢个恩典，毋係看人个行為；若係看人个行為，所謂恩典就毋算恩典了。</verse>
				<verse number="7">結果樣般呢？ 以色列 人得毋到佢等所尋求个，總係上帝所揀選个少數人尋到了；其他个就硬頸毋聽上帝个呼召。</verse>
				<verse number="8">就像聖經所講：「上帝使佢等个心靈麻痺掉去；直到這下，佢等个目珠還看毋到，耳公聽毋到。」</verse>
				<verse number="9">大衛 也識講： 願佢等个筵席成做羅網，變做陷阱； 願佢等絆倒，受盡刑罰！</verse>
				<verse number="10">願佢等个目珠矇矇， 看也看毋到； 願佢等个背囊痀痀， 一直到永遠！</verse>
				<verse number="11">𠊎還愛問： 猶太 人一失足，就一直䟘毋起了，係麼？當然毋係！因為佢等个過犯，拯救就臨到外邦人，來使 猶太 人嫉妒，直到佢等奮發起來。</verse>
				<verse number="12">既然 猶太 人个過犯帶給世間豐盛个福氣，佢等靈性个貧窮反轉使外邦人富足；恁樣，若係 猶太 人全體得救，敢毋係會帶來還較大个福氣嗎？</verse>
				<verse number="13">這下，𠊎愛㧯你等外邦人講：既然𠊎係外邦人个使徒，𠊎當然看𠊎个職份做榮光；</verse>
				<verse number="14">𠊎希望因為恁樣會激起𠊎同胞个嫉妒來奮發，使佢等當中有兜人會得到拯救。</verse>
				<verse number="15">若係佢等受棄絕，反轉使世間人成做上帝个朋友；恁樣，佢等受接納，敢毋係會使死人得到生命嗎？</verse>
				<verse number="16">麵團个第一垤若獻給上帝，歸團就係屬佢个。樹頭若獻給上帝，恁樣，連樹枝也係屬佢个了。</verse>
				<verse number="17">橄欖樹部份个枝仔被佢拗下來，接上野生橄欖樹个枝仔；你等外邦人就像野生个橄欖樹，這下分享 猶太 人豐盛个生命。</verse>
				<verse number="18">所以，你等毋好看輕該兜像枝仔被佢拗下來个人。你等係枝仔定定，樣般做得自誇呢？愛知，毋係你等托等樹頭，係你等被樹頭托等！</verse>
				<verse number="19">可能你會講：「該兜枝仔被佢拗下來，係因為愛將𠊎接上去。」</verse>
				<verse number="20">無毋著。佢等因為毋信，就被佢拗下來；你等因為信，就企得在。所以你等毋好驕傲，反轉愛存敬畏个心。</verse>
				<verse number="21">既然 猶太 人係原來个枝仔，上帝還毋肯饒佢等；你等恅到上帝會饒你等嗎？</verse>
				<verse number="22">對恁樣，𠊎等就知，上帝係慈悲又嚴厲个。對該兜失足跌倒个人，佢係嚴厲个；對你等，佢就係慈悲个，總係你等愛繼續生活在佢个慈悲之中；若無，你等也會被佢拗下來。</verse>
				<verse number="23">論到 猶太 人，佢等若毋係堅持毋信，就會得到回復原來个地位，因為上帝能將佢等接轉去。</verse>
				<verse number="24">你等外邦人像係對野生个橄欖樹拗下來个枝仔，還做得強強接到好个橄欖樹頂高去； 猶太 人像係上帝所栽種个橄欖樹，上帝愛將對這頭樹仔拗下來个枝仔接倒轉去，敢毋係還較容易嗎？</verse>
				<verse number="25">兄弟姊妹啊，有一個奧秘个真理，𠊎希望你等愛知，免得你等恅到自家盡聰明。這真理就係：有兜 以色列 人个硬頸原來毋係永久个，係愛等外邦人歸向上帝个數目滿額了。</verse>
				<verse number="26">恁樣，全體 以色列 人定著會得救。就像聖經所講： 拯救者愛對 錫安 出來， 除掉 雅各 子孫个罪惡。</verse>
				<verse number="27">上帝講： 這就係𠊎所愛同佢等立个約； 該時，𠊎愛赦免佢等个罪。</verse>
				<verse number="28">猶太 人拒絕福音，成做上帝个敵人，結果使你等外邦人得到利益。總係，照上帝个揀選，因為上帝對該兜族長个應許， 猶太 人仍然係上帝个朋友。</verse>
				<verse number="29">因為上帝个恩典㧯揀選係毋會改變个。</verse>
				<verse number="30">頭擺，你等外邦人毋順從上帝；總係這下，因為 猶太 人个毋順從，你等就得到上帝个憐憫。</verse>
				<verse number="31">共樣， 猶太 人這下毋順從，好使佢等因為你等得到憐憫，這下也 得到上帝个憐憫。</verse>
				<verse number="32">上帝使全人類困在毋順服个當中，為到愛憐憫所有个人。</verse>
				<verse number="33">上帝个豐盛、智慧㧯智識實在還深噢！麼人能解釋佢个決裁？麼人能探查佢个道路？</verse>
				<verse number="34">像聖經所講： 麼人知主个心意呢？ 麼人做過佢个參謀呢？</verse>
				<verse number="35">麼人識送佢麼介， 使佢做毋得無報答呢？</verse>
				<verse number="36">因為萬物係對佢來个，通過佢，也係為到佢來存在个。願榮光歸給上帝，直到永遠！阿愐。</verse>
			</chapter>
			<chapter number="12">
				<verse number="1">所以，兄弟姊妹啊，既然上帝憐憫𠊎等，𠊎勸你等愛將自家準做生生个祭物獻給上帝，專心服事佢，來得到佢个歡喜。這係你等應該獻个，係真實个敬拜。</verse>
				<verse number="2">毋好學這個世間，反轉愛俾上帝完全改變你等个心思意念，你等就會查明上帝个旨意，知麼介係良善个、係完美个、係佢所歡喜个。</verse>
				<verse number="3">靠上帝給𠊎个恩賜，𠊎愛對你等逐個人講：毋好看自家忒高，反轉愛謙卑，逐儕照上帝所賜个信心來量自家个重輕。</verse>
				<verse number="4">一個身體有好多个肢體，逐個肢體有無共樣个功能。</verse>
				<verse number="5">像恁樣，雖然𠊎等係盡多人，𠊎等在基督个底背係一體个；身為佢身體个肢體，𠊎等係互相結連个。</verse>
				<verse number="6">既然上帝賜𠊎等逐儕無共樣个恩賜，𠊎等就愛好好運用，來做應該做个事。上帝所賜个恩賜，若係講預言，就愛照信心个程度去講；</verse>
				<verse number="7">若係服務，就愛去服務；若係教導，就愛去教人；</verse>
				<verse number="8">若係勸勉，就愛去勸勉；若係救濟，就愛大方；若係做領袖，就愛認真打拚；若係憐憫人，就愛歡歡喜喜。</verse>
				<verse number="9">惜別人愛真心。愛惱邪惡，親近良善。</verse>
				<verse number="10">愛相親相愛，像惜兄弟姊妹一樣；愛誠心誠意來互相尊重。</verse>
				<verse number="11">毋好懶尸，愛認真打拚，用火熱个心服事主。</verse>
				<verse number="12">在盼望中愛歡歡喜喜；在患難中愛忍耐；祈禱愛迫切。</verse>
				<verse number="13">愛同窮苦个兄弟姊妹分享你所有个；愛接待外鄉人。</verse>
				<verse number="14">愛祝福迫害你个人；無毋著，愛祝福，毋好咒詛。</verse>
				<verse number="15">愛同歡喜个人共下歡喜，同噭个人共下噭。</verse>
				<verse number="16">無論對麼人，愛彼此同心。毋好驕傲，反轉愛就近卑微；也毋好恅到自家盡聰明。</verse>
				<verse number="17">壞款待你个，你毋好壞款待佢；大家看做好个事，愛煞猛去做。</verse>
				<verse number="18">愛用你全部个本事去㧯大家和好。</verse>
				<verse number="19">朋友啊，毋好為自家報冤仇，等到上帝發譴个時，佢正代你伸冤較贏，因為聖經講：「主講：伸冤在𠊎；𠊎一定會報應。」</verse>
				<verse number="20">聖經又講：「你个敵人若係肚飢，愛拿給佢食，嘴燥，愛拿給佢啉；你恁樣行，會使佢見笑到無葛無煞 。」</verse>
				<verse number="21">總講，毋好被壞贏走去；愛用好來贏過壞。</verse>
			</chapter>
			<chapter number="13">
				<verse number="1">人人愛服從國家个權力機關，因為權力个存在係上帝所批准个；掌權者个權力係對上帝來个。</verse>
				<verse number="2">所以，抵抗掌權者个就係抵擋上帝个命令；這種人難免受審判。</verse>
				<verse number="3">統治者毋係愛使行善个人驚，係愛使作惡个人驚。你想愛毋驚掌權者麼？行善，佢就會稱讚你；</verse>
				<verse number="4">因為佢係上帝所用个人，佢个工作係愛利益你。你若係做壞事，你就愛驚佢，因為佢有刑罰个權毋係做搞个。佢做上帝所用个人，係愛執行上帝對該兜作惡个人个責罰。</verse>
				<verse number="5">所以，你等一定愛服從掌權者，毋單淨係因為驚上帝个責罰，也係為到自家良心个平安。</verse>
				<verse number="6">你等納稅，也係為到共樣个理由，因為掌權者執行任務个時係為上帝工作。</verse>
				<verse number="7">所以，應當愛納麼介稅，你等就愛聽佢等个話去納，無論係人丁稅抑係產業稅；應當敬畏个人，就愛對佢等敬畏；應當尊重个人，就愛對佢等尊重。</verse>
				<verse number="8">千萬毋好欠債！彼此相惜正係你等應該欠个債。所有惜別人个，就係遵守法律。</verse>
				<verse number="9">法律个命令規定：「做毋得犯姦淫；做毋得㓾人；做毋得偷拿；做毋得貪心。」這一切㧯其他个命令全部係包含在「惜別人像自家」這條命令底背。</verse>
				<verse number="10">惜別人个，就毋會做傷害別人个事；所以，有愛心正會使法律得到圓滿。</verse>
				<verse number="11">你等一定愛恁樣行，因為你等知應該睡醒个時節到了。𠊎等得救，這下比初信个時還較接近。</verse>
				<verse number="12">暗晡時會過，天會光了。𠊎等毋好再做烏暗个事；愛帶等光明个武器來作戰。</verse>
				<verse number="13">𠊎等个行事為人愛光明正大，像生活在日時頭个人共樣。毋好盡食盡啉，毋好好色放蕩，毋好冤家嫉妒。</verse>
				<verse number="14">總講，你等愛著上主耶穌基督；毋好想愛滿足肉體个情慾！</verse>
			</chapter>
			<chapter number="14">
				<verse number="1">信心軟弱个人，你等愛接納佢；意見無共樣，也毋好同佢辯論。</verse>
				<verse number="2">有信心个人，麼介都食；信心軟弱个人單淨食菜。</verse>
				<verse number="3">麼介都食个人毋好看輕毋食个人；單淨食菜个人也毋好論斷麼介都食个人；因為上帝已經接納佢。</verse>
				<verse number="4">你係麼人，樣敢論斷別人个僕人？佢係成功抑係失敗，有佢个主人來管。佢會成功，因為主會幫助佢，使佢企得正。</verse>
				<verse number="5">有人認為這日比別日較重要；也有人認為逐日全部共樣恁重要。每一個人攏總應該有自家个意見。</verse>
				<verse number="6">特別看重某日个，係表示佢對主个尊崇。麼介都食个，也係表示佢對主个尊崇，因為佢為到所食个感謝上帝；有兜食物毋食个，共樣也係表示佢對主个尊崇，佢乜感謝上帝。</verse>
				<verse number="7">𠊎等當中，無人係單淨為到自家來生，也無人係單淨為到自家來死；</verse>
				<verse number="8">𠊎等若係生，係為到主來生；若係死，也係為到主來死。恁樣來講，無論係生抑係死，𠊎等攏總係屬主个人。</verse>
				<verse number="9">基督所以死又復活，目的就係愛做生人㧯死人个主。</verse>
				<verse number="10">既然係恁樣，你做麼介論斷你个兄弟姊妹啊？你做麼介看輕你个兄弟姊妹啊？𠊎等將來攏總愛企在上帝个面前，接受佢个審判；</verse>
				<verse number="11">因為聖經講： 主講：𠊎指等𠊎个生命發誓， 逐個人攏總愛跪落去拜𠊎； 人類全部愛承認𠊎係上帝。</verse>
				<verse number="12">恁樣來講，𠊎等每一個人定著愛將自家个事在上帝个面前交帶清楚。</verse>
				<verse number="13">所以，𠊎等毋好繼續彼此論斷下去；應該下決心，毋做會害兄弟姊妹跌倒犯罪个事。</verse>
				<verse number="14">憑𠊎㧯主耶穌个親密關係，𠊎確實知，食物本身全部係淨浰个；總係，若係有人相信某種食物係無淨浰个，對佢來講，該種食物就係無淨浰个了。</verse>
				<verse number="15">你若係因為食物傷到兄弟姊妹个心，你就毋係照愛心行事。基督已經為佢死，你毋好因為你个食物來敗壞佢！</verse>
				<verse number="16">毋好因為你看做好个事，害你自家被人批評。</verse>
				<verse number="17">因為順從上帝个主權毋係靠食物，係靠聖靈所賜个公正、和平，㧯喜樂。</verse>
				<verse number="18">恁樣服事基督个人，一定會得到上帝个歡喜㧯人个稱讚。</verse>
				<verse number="19">所以，𠊎等愛追求和睦㧯彼此造就个事。</verse>
				<verse number="20">毋好因為食物破壞上帝个工作。一切食物全部做得食，總係因為食來害別人跌倒，就盡毋好。</verse>
				<verse number="21">若係恁樣，最好莫食肉，莫啉酒；莫做害你兄弟姊妹跌倒个事。</verse>
				<verse number="22">你對這兜事情樣般相信，你在上帝个面前就樣般去行！認定係著个，就照恁樣去行，也毋會自責个，係有福氣个人！</verse>
				<verse number="23">總係，心肝還疑狐就拿來食，上帝會定佢个罪，因為無照信心來食。行事無照信心做个，全部係罪。</verse>
			</chapter>
			<chapter number="15">
				<verse number="1">𠊎等有堅強信心个人應該幫助信心軟弱个人，分擔佢等个重擔，毋好求滿足自家。</verse>
				<verse number="2">𠊎等逐儕愛為到其他信徒个利益設想，來建立共同个信心生活。</verse>
				<verse number="3">因為基督並無求滿足自家，反轉像聖經所講：「該兜辱罵你个人所發出个辱罵全部落在𠊎个身上。」</verse>
				<verse number="4">聖經个話攏總係為到教𠊎等來寫个，目的係愛𠊎等對聖經所教个忍耐㧯鼓勵來得到希望。</verse>
				<verse number="5">願賜忍耐㧯鼓勵个上帝幫助你等，使你等通過學基督耶穌个榜樣，會有共樣个心意，</verse>
				<verse number="6">使你等大家會同心齊聲頌讚𠊎等主耶穌基督个阿爸上帝。</verse>
				<verse number="7">所以，你等愛彼此接納，像基督接納你等一樣，來榮光上帝。</verse>
				<verse number="8">𠊎㧯你等講，基督為到愛顯明上帝个信實，識做過 猶太 人个僕人，使上帝對該兜族長个應許得到實現，</verse>
				<verse number="9">同時，使外邦人也會頌讚上帝个憐憫。像聖經所講： 所以，𠊎愛在外邦人中頌讚你； 𠊎愛唱歌頌讚你个名。</verse>
				<verse number="10">聖經又講： 外邦人啊， 愛同上帝个子民共下歡喜。</verse>
				<verse number="11">又講： 所有个外邦人啊，愛頌讚主； 天下萬民啊，你等愛頌讚佢！</verse>
				<verse number="12">以賽亞 也講： 會有 耶西 个後代出來， 佢愛興起來統治外邦； 外邦人攏總會仰望佢！</verse>
				<verse number="13">願賜希望个上帝，因為你等對佢个信心，使你等充滿各種个歡喜㧯平安，通過聖靈个能力，使你等个希望一直增加。</verse>
				<verse number="14">兄弟姊妹啊，𠊎本身深信你等自家滿有好德行，有豐富个智識，也會互相勸勉。</verse>
				<verse number="15">總係，在這封信仔底背，有兜問題𠊎還係好膽提醒你等。𠊎恁樣實話直講，係因為上帝特別施恩給𠊎，</verse>
				<verse number="16">使𠊎做基督耶穌个僕人，在外邦人个中間工作。𠊎像祭司一樣講論上帝个福音，係愛使外邦人通過聖靈个聖化，成做上帝歡喜接納个祭物。</verse>
				<verse number="17">結果，𠊎因為在基督耶穌个名下對上帝个事奉卻有好誇口。</verse>
				<verse number="18">𠊎敢大膽講个只有一樣：基督使外邦人歸順上帝，係通過𠊎个所講㧯所做，</verse>
				<verse number="19">用神蹟奇事㧯上帝个靈个能力來完成个。恁樣，𠊎對 耶路撒冷 到 以利哩古 一帶，𠊎逐所在去傳基督个福音。</verse>
				<verse number="20">𠊎決心去還吂聽過基督个地方傳福音，免得𠊎个工作建立在別人个基礎頂高。</verse>
				<verse number="21">像聖經所講： 吂認識佢个人會看到； 吂聽過佢个人會明白。</verse>
				<verse number="22">𠊎好多擺愛去你等該位，總係堵到阻擋。</verse>
				<verse number="23">這下，既然𠊎已經完成這一帶个工作，訪問你等又係𠊎多年來个心願，</verse>
				<verse number="24">𠊎希望在去 西班牙 个時，順路去看你等，同你等歡喜聚集一站時間，然後正在你等个幫助之下繼續向前。</verse>
				<verse number="25">總係這下，為到供給聖徒个事，𠊎一定愛先去 耶路撒冷 。</verse>
				<verse number="26">因為 馬其頓 㧯 亞該亞 个教會有樂捐一筆錢，愛幫助 耶路撒冷 聖徒中个窮苦人。</verse>
				<verse number="27">佢等盡歡喜恁樣行，其實也係佢等个義務：既然 猶太 人基督徒俾外邦人分享屬靈个恩賜，外邦人也應該用物質來幫助佢等。</verse>
				<verse number="28">等𠊎辦好這件事，將佢等所捐个錢交帶清楚，𠊎就會經過你等該位，去 西班牙 。</verse>
				<verse number="29">𠊎知，𠊎去探訪你等，一定會帶給你等基督豐盛个祝福。</verse>
				<verse number="30">兄弟姊妹啊，靠𠊎等个主耶穌基督，通過聖靈所賜个愛心，𠊎求你等同𠊎共下迫切為𠊎懇求上帝：</verse>
				<verse number="31">使𠊎毋會被在 猶太 該兜毋信个人害到，也使𠊎在 耶路撒冷 个救濟工作會得到聖徒个歡喜接納。</verse>
				<verse number="32">上帝若肯，𠊎就會歡歡喜喜去看你等，在你等該位休息一站時間。</verse>
				<verse number="33">願賜平安个上帝同你大家共下！阿愐。</verse>
			</chapter>
			<chapter number="16">
				<verse number="1">𠊎對你等介紹𠊎等个姊妹 菲比 ；姖一旦係在 堅革哩 教會做執事。</verse>
				<verse number="2">你等愛照主个名㧯聖徒个本份好好接待姖；無論姖有麼介需要，請幫助姖。姖識熱誠幫助盡多人，𠊎自家也識得到姖个幫助。</verse>
				<verse number="3">請問候事奉基督耶穌个同工 百基拉 㧯 亞居拉 兩公婆；</verse>
				<verse number="4">佢等識為𠊎冒生命个危險；毋單淨𠊎盡感謝佢等，外邦个各教會也非常感激。</verse>
				<verse number="5">也問候在佢等屋下聚會个教會。 請問候𠊎親愛个朋友 以拜尼土 ；佢係 亞細亞 省第一個歸屬基督个人。</verse>
				<verse number="6">也問候為你等辛苦工作个 馬利亞 。</verse>
				<verse number="7">請問候識同𠊎共下坐監个 猶太 同胞 安多尼古 㧯 猶尼亞 ；佢等在使徒中係盡出名个人，也比𠊎先歸屬基督。</verse>
				<verse number="8">請問候主內親愛个朋友 暗伯利 ；</verse>
				<verse number="9">也問候事奉基督个同工 耳巴努 㧯𠊎親愛个朋友 士大古 。</verse>
				<verse number="10">請問候受過考驗、對基督忠心到底个 亞比利 ；也問候 亞利多布 一家人。</verse>
				<verse number="11">請問候 猶太 同胞 希羅天 ；也問候 拿其數 一家信主个眾兄弟姊妹。</verse>
				<verse number="12">請問候為主辛苦工作个女同工 杜菲娜 㧯 杜富姍 ；也問候為主煞猛工作親愛个女信徒 彼息 。</verse>
				<verse number="13">請問候 魯孚 ；佢係主內一個傑出个工人；也問候厥姆，姖一旦對待𠊎像自家个孻仔。</verse>
				<verse number="14">請問候 亞遜其土 、 弗勒干 、 黑米 、 八羅巴 、 黑馬 ，㧯其他同佢等共下个眾兄弟姊妹。</verse>
				<verse number="15">請問候 非羅羅古 㧯 猶莉亞 ， 尼利亞 㧯厥老妹，並 阿林巴 ，㧯同佢等共下个眾聖徒。</verse>
				<verse number="16">你等愛聖潔相唚彼此請安。基督个各教會全部對你等請安。</verse>
				<verse number="17">兄弟姊妹啊，𠊎勸你等，愛提防該兜製造分裂、動搖別人信心、同你等所受个教訓對立个人；愛離開佢等遠遠。</verse>
				<verse number="18">因為這種人毋係事奉𠊎等个主基督，係在滿足自家个肚笥。佢等嘴甜舌滑係愛迷惑老實人个心。</verse>
				<verse number="19">大家攏總聽講你等係樣般順從福音；所以𠊎為你等盡歡喜！願你等對好事聰明，對壞事單純。</verse>
				<verse number="20">賜平安个上帝就會踐踏撒但，喊佢降服在你等个腳下。 願𠊎等个主耶穌賜恩典給你等！</verse>
				<verse number="21">𠊎个同工 提摩太 ，並 猶太 同胞 路求 、 耶孫 、 所西巴德 ，攏總問候你等。</verse>
				<verse number="22">𠊎 — 這代筆寫信仔个 德提 ，也在主內問候你等。</verse>
				<verse number="23">該猶 接待𠊎 — 保羅 ，又俾教會在厥屋下聚會，佢也問候你等。城內管銀庫个 以拉都 㧯𠊎等个兄弟 括土 也問候你等。</verse>
				<verse number="24"></verse>
				<verse number="25">願榮光歸給上帝！佢能照𠊎所傳个福音堅定你等个信心。這福音係有關耶穌基督个真道，啟示自古以來囥等个奧秘。</verse>
				<verse number="26">這奧秘已經通過眾先知个書顯明出來，也照永生上帝个命令指示萬國，使萬民對信來順從。</verse>
				<verse number="27">願榮光通過耶穌基督歸給獨一全智个上帝，直到永遠！阿愐。</verse>
			</chapter>
		</book>
		<book number="46">
			<chapter number="1">
				<verse number="1">𠊎係 保羅 ；對上帝个旨意，𠊎蒙召做基督耶穌个使徒。𠊎㧯 所提尼 兄弟，</verse>
				<verse number="2">寫信仔給在 哥林多 城上帝个教會。你等㧯在逐所在求喊𠊎等主耶穌基督个名个人，共樣係在基督耶穌底背神聖、蒙召做聖徒來歸屬上帝个。基督係佢等个主，也係𠊎等个主。</verse>
				<verse number="3">願𠊎等个阿爸上帝㧯主耶穌基督賜恩典、平安給你等。</verse>
				<verse number="4">𠊎常常為你等感謝𠊎个上帝，因為佢通過基督耶穌賜恩典給你等，</verse>
				<verse number="5">使你等在基督底背逐方面富足，也盡有智識㧯口才。</verse>
				<verse number="6">有關𠊎為基督所做个見證，已經堅立在你等个當中，</verse>
				<verse number="7">所以，在等𠊎等个主耶穌基督顯現个時，你等一樣恩賜也無少。</verse>
				<verse number="8">主一定會堅固你等到底，使你等在𠊎等个主耶穌基督降臨該日無好嫌。</verse>
				<verse number="9">上帝係信實可靠个；佢呼召你等，使你等同佢个孻仔 — 𠊎等个主耶穌基督共下享受團契个生活。</verse>
				<verse number="10">兄弟姊妹啊，𠊎奉𠊎等个主耶穌基督个名勸你等：大家愛講一樣个話，毋好分裂；愛團結，想法㧯目標愛共樣。</verse>
				<verse number="11">𠊎个兄弟姊妹啊，有女信徒 革來 屋下該兜人識㧯𠊎講，你等中間有相爭。</verse>
				<verse number="12">𠊎个意思係，你等一儕講一樣。有人講「𠊎屬 保羅 」；有人講「𠊎屬 亞波羅 」；有人講「𠊎屬 彼得 」；有人講「𠊎屬基督」。</verse>
				<verse number="13">基督卻被你等分做幾下析！敢係 保羅 代你等釘死在十字架頂嗎？你等敢係奉 保羅 个名領洗禮嗎？</verse>
				<verse number="14">𠊎感謝上帝，除了 基利司布 㧯 該猶 ，𠊎並無為你等中間个一儕行洗禮，</verse>
				<verse number="15">所以，無人能講，你等係奉𠊎个名領洗禮个。</verse>
				<verse number="16">(還有，𠊎也為 司提法那 㧯厥屋下个人行過洗禮，其他還為麼人行過洗禮，𠊎就毋記得了。)</verse>
				<verse number="17">基督派𠊎，毋係愛𠊎行洗禮，係愛𠊎傳福音，毋用人類智慧个言論，免得基督在十字架頂个死失效。</verse>
				<verse number="18">因為基督死在十字架頂个道理，對該兜向滅亡行等去个人來看，係戇檔个；總係對𠊎等得救个人來講，係上帝个大能。</verse>
				<verse number="19">因為聖經講： 𠊎愛除滅聰明人个智慧； 𠊎也愛廢掉學者个學問。</verse>
				<verse number="20">聰明人在㖠位呢？學者在㖠位呢？世間个辯論家在㖠位呢？上帝已經使這世間个智慧成做戇檔了！</verse>
				<verse number="21">上帝照自家个智慧，使世間人無法度用自家个智慧來認識佢；顛倒，上帝決定愛通過𠊎等所傳、人看做「戇檔」个道理來拯救相信个人。</verse>
				<verse number="22">猶太 人求神蹟， 希臘 人尋智慧，</verse>
				<verse number="23">總係𠊎等傳釘死在十字架頂个基督。這個道理，對 猶太 人來看係絆腳石，對外邦人來看係戇檔；</verse>
				<verse number="24">總係上帝選召个人，無論係 猶太 人抑係外邦人，對佢等來講，基督係上帝个大能，係上帝个智慧。</verse>
				<verse number="25">因為，「上帝个戇檔」贏過人个智慧；「上帝个軟弱」也贏過人个堅強。</verse>
				<verse number="26">兄弟姊妹啊，愛記得上帝呼召你等个時，你等个情形係樣般。照人个看法，你等有智慧个毋多，有能力个毋多，社會地位高个也毋多。</verse>
				<verse number="27">總係，上帝偏偏揀選世間人看做無智慧个，來使有智慧个人見笑；上帝揀選世間人看做軟弱个，來使堅強个人見笑。</verse>
				<verse number="28">上帝也揀選世間人所看輕、所惱、看做小可个，來廢掉該兜人看做重要个，</verse>
				<verse number="29">使所有个人在上帝个面前誇口毋得。</verse>
				<verse number="30">係上帝使你等有好同基督耶穌結連，又使佢成做𠊎等个智慧；通過佢，𠊎等同上帝有正確个關係，成做上帝聖潔个子民，也得到自由。</verse>
				<verse number="31">就像聖經所講：「愛誇口个人，就愛誇口主。」</verse>
			</chapter>
			<chapter number="2">
				<verse number="1">兄弟姊妹啊，𠊎頭擺去你等該位，並無用麼介靚个話抑係高深个學問來對你等傳揚上帝个奧妙 。</verse>
				<verse number="2">因為𠊎決意，同你等共下个時，除了耶穌基督㧯佢死在十字架頂个事情以外，麼介都毋提。</verse>
				<verse number="3">還有，在你等該位个時，𠊎感覺盡軟弱，心內盡驚，大大著急。</verse>
				<verse number="4">𠊎所講个道理，所傳个福音，攏總無用好聽有智慧个話，只有靠聖靈个大能來見證真理，</verse>
				<verse number="5">使你等个信仰無根據人个智慧，係根據上帝个大能。</verse>
				<verse number="6">其實，對該兜靈性成熟个人，𠊎等也講智慧。總係，毋係講這世間个智慧，也毋係這世間統治者个智慧；佢等个權勢漸漸會消滅掉去。</verse>
				<verse number="7">𠊎等所講个智慧係上帝奧妙个智慧，本來對人係囥等个，就係在世界創造以前上帝已經預定愛使𠊎等得榮光个智慧。</verse>
				<verse number="8">世間个統治者無一個知這智慧；若係知，佢等就毋會將榮光个主釘在十字架頂了。</verse>
				<verse number="9">像聖經所講： 上帝為敬愛佢个人所預備个， 係人目珠吂識看過， 耳公吂識聽過， 人心吂識想過个！</verse>
				<verse number="10">總係，上帝通過自家个靈將佢个奧妙啟示𠊎等。聖靈能看透所有个事，連上帝深深囥等个心意，佢也知。</verse>
				<verse number="11">人个心思，只有自家底背个靈正知。共樣，上帝个事，也只有上帝个靈正清楚。</verse>
				<verse number="12">𠊎等所領受个靈毋係這世間个靈，係上帝所派來个靈，好俾𠊎等知上帝所賜𠊎等个一切恩賜。</verse>
				<verse number="13">所以，𠊎等講道毋係用人个智慧所教个話，係用聖靈所教个話，對屬聖靈个人 講論屬靈个真理。</verse>
				<verse number="14">總係，該兜無上帝个靈个人無法度領受上帝个靈所給个恩賜。這種人無可能明白這兜事，佢等看做係戇檔个；因為這兜事个價值愛用屬靈个目珠正看得出。</verse>
				<verse number="15">屬聖靈个人能判斷萬事个價值，總係無人能判斷佢。</verse>
				<verse number="16">像聖經所講： 麼人知主个心呢？ 麼人會教導佢呢？ 總係，𠊎等屬聖靈个人有基督个心。</verse>
			</chapter>
			<chapter number="3">
				<verse number="1">兄弟姊妹啊，老實講，𠊎對你等講話，一旦無看你等做屬聖靈个，係看你等做屬肉體个，係基督信仰个孲𤘅仔。</verse>
				<verse number="2">𠊎用乳餵你等，無用飯，因為你等還吂會食飯。就係這下，你等也還毋會食飯，</verse>
				<verse number="3">因為你等還係屬肉體个。你等中間有嫉妒，有相爭；這敢毋係證明你等係屬肉體个、行為像一般人嗎？</verse>
				<verse number="4">你等中間有人講：「𠊎屬 保羅 」；也有人講：「𠊎屬 亞波羅 」。像恁樣，你等同一般人有麼介無共樣呢？</verse>
				<verse number="5">總講， 亞波羅 算麼介？ 保羅 算麼介？𠊎等不過係上帝个僕人，帶領你等相信上帝。𠊎等逐儕係照主个分派來工作：</verse>
				<verse number="6">𠊎栽種， 亞波羅 淋水，總係使它大个係上帝。</verse>
				<verse number="7">栽種个㧯淋水个毋算麼介；一切全看使它大个上帝。</verse>
				<verse number="8">栽種个㧯淋水个有共一個目標；上帝又會照逐儕个工作報答佢。</verse>
				<verse number="9">𠊎等係上帝个同工；你等係上帝个田園。 你等也係上帝所起个屋。</verse>
				<verse number="10">𠊎用上帝給𠊎个恩賜，像一個內行个工頭打好地基，別人在該頂高起屋。總係，每一個人愛想清楚自家樣般來起。</verse>
				<verse number="11">因為上帝已經立耶穌基督做惟一个根基，無人能立其他个根基。</verse>
				<verse number="12">在這根基頂高，有人可能會用金、銀、抑係寶石來起；也有人會用樹仔、草、抑係禾稈來起。</verse>
				<verse number="13">到審判該日，逐儕个工程好壞全部會顯明出來；因為逐儕个工程攏總愛經歷大火个考驗，來證明工程个品質。</verse>
				<verse number="14">經歷考驗以後，所起个工程若還在，該人就會得到獎賞。</verse>
				<verse number="15">所起个工程若被火燒掉，該人个損失就盡大；佢本身會得救，總係像對大火底背走出來一樣。</verse>
				<verse number="16">敢毋知你等係上帝个殿，上帝个靈住在你等底背嗎？</verse>
				<verse number="17">若有人毀壞上帝个殿，上帝一定會毀滅該人；因為上帝个殿係聖个。你等就係上帝个殿。</verse>
				<verse number="18">毋好騙自家。你等當中若有人照世間个標準看自家做有智慧，願佢變做戇仔，好成做正經有智慧个人。</verse>
				<verse number="19">因為這世間所認定个智慧，照上帝來看反轉係戇檔。像聖經所講：「上帝使有智慧个人中到自家个詭計。」</verse>
				<verse number="20">另一節聖經也講：「主知智慧个人所想个係虛空。」</verse>
				<verse number="21">所以，無論麼人，毋好因為屬麼人來誇口。事實上，萬有全係屬你等个：</verse>
				<verse number="22">保羅 、 亞波羅 、 彼得 、這世界、生抑係死、這下个事抑係將來个事，這一切全部係屬你等个；</verse>
				<verse number="23">你等係屬基督个，基督係屬上帝个。</verse>
			</chapter>
			<chapter number="4">
				<verse number="1">你等應該看𠊎等做基督个僕人，係上帝个奧妙个管家。</verse>
				<verse number="2">主人對管家所要求个，就係佢个忠心。</verse>
				<verse number="3">你等抑係麼人論斷𠊎，𠊎全部看做小事情；事實上，𠊎自家也毋論斷自家。</verse>
				<verse number="4">𠊎自家感覺良心清白，總係做毋得因為恁樣證明𠊎無罪。主正有權論斷𠊎。</verse>
				<verse number="5">所以，時間吂到，你等毋好論斷；等到主再來，會有最後个審判。該時，佢愛將囥在烏暗中个祕密掀開來，將人心中个動機挖出來。該時，每一個人會對上帝得到應得个稱讚。</verse>
				<verse number="6">兄弟姊妹啊，為你等个緣故，𠊎用 亞波羅 㧯𠊎自家做例仔來講起這兜事情，係愛你等對𠊎等來學「毋好超過聖經所記个」這句話个意思；免得你等自高，看重這個，看輕該個。</verse>
				<verse number="7">麼人使你贏過別人呢？你所有个，敢毋係上帝賜个嗎？既然係上帝賜个，你做麼介還誇口，像係你所有个毋係上帝賜个呢？</verse>
				<verse number="8">你等已經樣樣有了！你等已經富足了！你等毋搭𠊎等，自立做王！好啊！𠊎真希望你等正經做王，俾𠊎等也同你等共下做王！</verse>
				<verse number="9">因為，照𠊎看，上帝明明將𠊎這兜做使徒个列在背尾，像係判死刑个犯人，在天地間成做一齣戲，俾天使㧯世間人看。</verse>
				<verse number="10">為到基督个緣故，𠊎等成做戇仔，總係你等在基督个底背做聰明人噢！𠊎等軟弱，總係你等堅強噢！𠊎等被人看輕，總係你等受尊重噢！</verse>
				<verse number="11">直到這下，𠊎等常常肚飢，嘴燥，無衫好著，又被人打，四處漂流，</verse>
				<verse number="12">還愛辛辛苦苦親手做事來塞肚笥。被人罵，𠊎等就祝福；被人壓迫，𠊎等就忍耐；</verse>
				<verse number="13">被人侮辱，𠊎等就好嘴回答。到這下，𠊎等還被人看做地面上个垃圾，世間个廢物。</verse>
				<verse number="14">𠊎寫這兜，毋係愛喊你等見笑，係愛勸話你等，像勸𠊎所惜个子女一樣。</verse>
				<verse number="15">在基督徒个人生中，你等可能會有歸萬个導師，總係只有𠊎一儕係你等个阿爸；因為係𠊎傳福音給你等，𠊎在基督耶穌个底背就成做你等个阿爸。</verse>
				<verse number="16">所以，𠊎勸你等愛學𠊎个榜樣。</verse>
				<verse number="17">因為恁樣，𠊎派 提摩太 去你等該位；在主底背佢係𠊎親愛又忠心个孻仔。佢會對你等講起𠊎信基督耶穌以後个所行所做，就係𠊎在逐位各教會所教个。</verse>
				<verse number="18">你等當中，有兜人想𠊎無可能去你等該位了，就自高自大。</verse>
				<verse number="19">其實，主若係肯，毋使幾久𠊎就會去看你等。該時，𠊎毋單淨愛聽該兜驕傲个人所講个，也愛看佢等到底有麼介權能。</verse>
				<verse number="20">因為上帝个國毋係在乎言語，係在乎權能。</verse>
				<verse number="21">你等愛麼介？愛𠊎帶等棍仔去，抑係愛𠊎帶慈愛溫柔个心去啊？</verse>
			</chapter>
			<chapter number="5">
				<verse number="1">𠊎正經聽講你等中間有淫亂个事；這種淫亂連異教徒中間也無。𠊎聽講有人同到厥後𡟓！</verse>
				<verse number="2">你等還自高自大！你等應該感覺痛心，將行這種事个人對你等當中逐出去！</verse>
				<verse number="3">雖然𠊎个身體離開你等盡遠，總係𠊎个心同你等共下。𠊎已經奉𠊎等主耶穌个名定行這種淫亂个人做有罪，像𠊎係在你等該位共樣。你等在聚會中，𠊎㧯你等同心。靠𠊎等主耶穌个權能，</verse>
				<verse number="4"></verse>
				<verse number="5">你等應該將這人交給撒但，俾撒但毀滅佢个肉體，使佢个靈魂在主再來該日會得救。</verse>
				<verse number="6">你等自誇係盡毋著个！你等敢毋知，一些仔發酵就會使歸團麵發起來？</verse>
				<verse number="7">你等既然係無發酵个麵，愛除掉罪，像除掉舊發酵一樣；你等正會像無發酵个新麵團一樣，完全淨浰。𠊎等𨃟過節个筵席已經準備好了，因為基督 — 𨃟過節个羔羊已經為𠊎等犧牲。</verse>
				<verse number="8">所以，𠊎等過𨃟過節个時，做毋得用舊發酵，就係有罪㧯邪惡个發酵；愛用無發酵个餅仔，就係有純潔㧯真理个餅仔。</verse>
				<verse number="9">以前寫給你等个信仔，𠊎識警戒你等，毋好同淫亂个人來往。</verse>
				<verse number="10">𠊎毋係指這世間一切淫亂、貪心、做賊、抑係拜偶像个人來講；除非離開世間，愛同這兜人隔開係無可能个。</verse>
				<verse number="11">這下，𠊎寫信仔㧯你等講：毋好同自稱信徒又犯淫亂、貪心、拜偶像、辱罵人、酒醉、抑係做賊个人來往；就係同這種人共桌食飯也做毋得。</verse>
				<verse number="12">𠊎做麼介愛使審判教會外个人呢？上帝自然會審判佢等。總係，教會內个人你等敢毋使審判嗎？像聖經所講：「愛將該邪惡个人對你等當中逐出去！」</verse>
				<verse number="13"></verse>
			</chapter>
			<chapter number="6">
				<verse number="1">在你等中間，聖徒彼此爭論个事，樣敢告到無信主个法官面前去呢？樣般毋請聖徒代你等解決？</verse>
				<verse number="2">敢講你等毋知聖徒愛審判世界嗎？既然你等愛審判世界，敢無法度解決該兜小事情嗎？</verse>
				<verse number="3">連天使也愛接受𠊎等个審判，你等敢毋知嗎？還愛使講世間个事情嗎？</verse>
				<verse number="4">既然係恁樣，若係有爭論个事，你等樣般做得去求該兜教會無看重个人來處理呢？</verse>
				<verse number="5">實在還見笑噢！敢講你等當中無一個有智慧个人好代信徒解決紛爭嗎？</verse>
				<verse number="6">無想到，係兄弟告兄弟，還敢告到無信主个人面前去！</verse>
				<verse number="7">你等告來告去，證明你等已經完全失敗了。被人冤枉，做麼介毋甘願？食虧有麼介相干呢？</verse>
				<verse number="8">你等反轉冤枉人、虧負人，連對自家个兄弟姊妹也係恁樣。</verse>
				<verse number="9">敢講你等毋知邪惡个人不能做上帝國个子民嗎？毋好自家騙自家！該兜犯淫亂、拜偶像、行姦淫、做孌童、親男色、</verse>
				<verse number="10">偷拿、貪心、酒醉、譭謗人、抑係勒索人个，全部不能做上帝國个子民。</verse>
				<verse number="11">你等中間，有兜人以前就係恁樣。總係，通過主耶穌基督个名㧯𠊎等上帝个靈，你等已經洗淨，已經聖化歸上帝，已經同上帝有正確个關係了。</verse>
				<verse number="12">有人會講：「無麼介事𠊎做毋得个！」無毋著；總係，毋係逐樣事全部有利益。𠊎也做得講：「無麼介事𠊎做毋得个」，總係，𠊎毋被任何一件事來控制。</verse>
				<verse number="13">有人會講：「食物係為到肚笥，肚笥係為到食物。」無毋著；總係有一日，上帝會使這兩樣攏總毀壞掉去。愛細膩噢！身體毋係為到行淫亂，係為到主來存在个；主會供給身體个需要。</verse>
				<verse number="14">上帝已經使主對死復活；佢也愛用自家个大能使𠊎等復活。</verse>
				<verse number="15">你等敢毋知，你等个身體係基督个肢體嗎？恁樣，𠊎樣般做得拿基督个肢體來做妓女个肢體嗎？絕對做毋得！</verse>
				<verse number="16">你等也一定愛知，同妓女結連个，就係同姖成做一體。因為聖經講：「兩個人愛成做一體。」</verse>
				<verse number="17">總係，同主結連个人，就係在靈性上同主合而為一。</verse>
				<verse number="18">所以，你等愛避免淫亂。人無論犯麼介罪，全部在身體以外；唯有犯淫亂个人係得罪自家个身體。</verse>
				<verse number="19">敢毋知你等个身體係聖靈个殿嗎？聖靈住在你等底背，係上帝所賜个。你等毋係屬自家，係屬上帝，</verse>
				<verse number="20">因為你等係佢盡貴買來个。所以，你等愛用身體來榮光上帝。</verse>
			</chapter>
			<chapter number="7">
				<verse number="1">這下來討論你等信仔底背所提个事情。 𠊎同意，男人能莫結婚係好事。</verse>
				<verse number="2">總係，既然有恁多淫亂个事發生，男人應該有自家个𡜵娘；女人也應該有自家个老公。</verse>
				<verse number="3">老公對𡜵娘愛盡夫妻个責任；𡜵娘對老公也愛盡夫妻个責任。</verse>
				<verse number="4">𡜵娘對自家个身體並無主權，主權係在老公；共樣，老公對自家个身體也無主權，主權係在𡜵娘。</verse>
				<verse number="5">夫妻做毋得忽略對方个需要，除非係愛專心祈禱个緣故，彼此同意暫時分房；總係後來還係愛恢復正常个關係，免得你等因為無法度節制，受撒但个誘惑。</verse>
				<verse number="6">𠊎恁樣講，毋係命令你等，係勉強同意你等个看法定定。</verse>
				<verse number="7">事實上，𠊎願意大家像𠊎恁樣莫結婚；總係，逐儕對上帝所領受个恩賜無共樣，有人个恩賜係這樣，有人係該樣。</verse>
				<verse number="8">這下，𠊎愛對無結婚个人㧯寡婦講：能像𠊎恁樣過獨身个生活也好。</verse>
				<verse number="9">總係，你等若無法度控制情慾，就結婚好了。結婚比慾火難捱較好。</verse>
				<verse number="10">已經結婚个人，𠊎也愛吩咐你等；其實這毋係𠊎个意思，係主个命令：做𡜵娘个毋好離開老公；</verse>
				<verse number="11">若係離開，就毋好再嫁；若無，就愛倒轉來同老公和好。做老公个也做毋得離掉𡜵娘。</verse>
				<verse number="12">對其他个人，𠊎也有話愛講 (毋係主講个)：老公係基督徒，總係𡜵娘無信主，厥𡜵娘若歡喜繼續同佢共下生活，佢就做毋得離掉𡜵娘。</verse>
				<verse number="13">𡜵娘係基督徒，總係老公無信主，厥老公若歡喜繼續同姖共下生活，姖也做毋得離掉老公。</verse>
				<verse number="14">因為，無信主个老公因為𡜵娘信主，已經得到上帝个接納；共樣，無信主个𡜵娘因為老公信主，已經得到上帝个接納。若毋係恁樣，佢等个子女樣般有可能得到接納呢？事實上，佢等係上帝所接納个。</verse>
				<verse number="15">萬一，無信主个堅持愛離開，就由在佢去。只有在這種情形之下，信主个，無論係做老公个抑係做𡜵娘个，正做得自由。因為上帝呼召你等，係愛你等有和平。</verse>
				<verse number="16">信主个𡜵娘人啊，你樣般敢確定無法度救若老公啊？信主个男仔人啊，你樣般敢確定無法度救若𡜵娘啊？</verse>
				<verse number="17">每一個人愛照主个恩賜來生活，也愛配合上帝呼召佢个目的。這係𠊎在各教會教導人个原則。</verse>
				<verse number="18">已經受割禮个，蒙召以後毋使除掉割禮个記號；蒙召个時吂受割禮个，也毋使受割禮。</verse>
				<verse number="19">因為有受割禮抑係無，毋算麼介；重要个係服從上帝个命令。</verse>
				<verse number="20">每一個人應該保持佢蒙召个時个身份。</verse>
				<verse number="21">你蒙召个時个身份若係奴隸，也無相干；總係，一有機會好得到自由，你就愛爭取。</verse>
				<verse number="22">因為奴隸蒙主呼召就係主所釋放个人；共樣，自由人蒙召就係基督个奴隸。</verse>
				<verse number="23">你等係上帝用重價買來个，所以毋好做人个奴隸。</verse>
				<verse number="24">兄弟姊妹啊，你等每一個人，在上帝面前，全部愛保持蒙召該時个身份。</verse>
				<verse number="25">關係獨身个問題，𠊎無得到主个指示。總係，𠊎得到上帝个憐憫，成做堪得信賴个人；𠊎就用這種身份來對各位提出𠊎个看法。</verse>
				<verse number="26">想到目前个艱難，𠊎認為人最好還係保持原狀。</verse>
				<verse number="27">人若有𡜵娘，毋好想愛脫離；若無𡜵娘，也無需要去尋一個。</verse>
				<verse number="28">你若結婚，並毋係犯罪；吂嫁个婦女若結婚，乜無麼介毋著。總係，結婚个人有肉身个纏絆；𠊎希望你等毋使像佢等恁樣。</verse>
				<verse number="29">兄弟姊妹啊，𠊎所愛講个就係：時間毋多了。從今以後，有𡜵娘个，愛像無𡜵娘；</verse>
				<verse number="30">噭吱个，愛像無噭；歡喜个，愛像毋歡喜；盡好買个，愛像無半樣；</verse>
				<verse number="31">好插世事个，愛像無插。因為這世界个樣像會過掉了。</verse>
				<verse number="32">𠊎希望你等全無掛慮。男人無結婚係關心主个事，專心來想樣般俾主歡喜；</verse>
				<verse number="33">總係，結婚个人就係關心世間个事，想辦法俾𡜵娘歡喜，</verse>
				<verse number="34">難免分心。無老公㧯守獨身个婦女所關心个係主个事；因為姖願意奉獻自家个身心靈；總係，做人𡜵娘个就係關心世間个事，想辦法俾老公歡喜。</verse>
				<verse number="35">𠊎恁樣講，係愛幫助你等，毋係愛限制你等。𠊎个目的係愛你等行合適个事，為主个工作完全奉獻自家，全無保留。</verse>
				<verse number="36">論到該已經定親，後來卻決定毋結婚个人，男人若感覺自家對不起未婚妻，為到性慾个需要，自認結婚較著，佢等就應當結婚；恁樣行，毋算犯罪。</verse>
				<verse number="37">總係，一個男人若係佢个心非常堅定毋結婚， (毋係人壓迫佢，係佢自家決心愛恁樣行)，又能節制自家，在這種情形之下，無同未婚妻結婚就係好事。</verse>
				<verse number="38">總講，同未婚妻結婚係好事；堅持毋結婚還較好。</verse>
				<verse number="39">老公還在，做𡜵娘个係受約束个；老公若過身，姖就有自由好同合意个男人結婚，總係愛嫁信徒正做得。</verse>
				<verse number="40">照𠊎看，姖莫嫁人較有福氣；𠊎也想，這係上帝个靈指示𠊎个。</verse>
			</chapter>
			<chapter number="8">
				<verse number="1">關係拜過偶像个食物，𠊎等知，「𠊎等攏總有這方面个智識」。總係，這種智識會害人自高自大；唯有愛心正會造就人。</verse>
				<verse number="2">人若自認佢知麼介，照所應該知个，佢還係有所毋知。</verse>
				<verse number="3">總係，人若敬愛上帝，這人就係上帝所認識个。</verse>
				<verse number="4">恁樣，關係食拜過偶像个食物這個問題，𠊎等知，偶像所代表个係無存在个東西；𠊎等也知，上帝只有一個。</verse>
				<verse number="5">雖然天上人間也有所謂「神明」个， (有盡多个「神明」㧯「主」)，</verse>
				<verse number="6">總係對𠊎等來講，只有一個上帝，就係天頂个阿爸 — 萬物个創造者；𠊎等係為到佢來生存个。還有，只有一個主，就係耶穌基督；萬物係通過佢來造个，𠊎等也係通過佢來生存个。</verse>
				<verse number="7">總係，毋係每一個人全部有這種个智識。有兜人以前常常拜偶像，到今晡日，逐擺食這種食物還會感覺係食偶像个東西。佢等个良心本來就軟弱，因為食這種食物，就變做垃圾。</verse>
				<verse number="8">其實，食物並不能改善𠊎等同上帝个關係；毋食無麼介損失，食也無麼介利益。</verse>
				<verse number="9">愛細膩噢！毋好因為你等自家个自由害信心軟弱个人跌倒。</verse>
				<verse number="10">若有人在這件事情上良心軟弱，看到你這「智識豐富」个人在宮廟肚坐席，這敢毋係鼓勵佢食拜過偶像个食物嗎？</verse>
				<verse number="11">恁樣，這軟弱个兄弟姊妹，就係基督為佢死个人，會因為你个「智識」來滅亡了！</verse>
				<verse number="12">你等恁樣行，得罪兄弟姊妹，傷害佢等軟弱个良心，就係得罪基督。</verse>
				<verse number="13">所以，若係食物會害𠊎个兄弟姊妹跌倒，𠊎就永遠毋食肉，免得𠊎使佢等跌倒。</verse>
			</chapter>
			<chapter number="9">
				<verse number="1">𠊎敢毋係自由个人？敢毋係使徒嗎？𠊎無見過𠊎等个主耶穌嗎？你等毋係𠊎為主做工所結个果子嗎？</verse>
				<verse number="2">就算別人毋看𠊎做使徒，你等總愛看𠊎做使徒！因為你等成做主个信徒，這個事實就係𠊎做使徒个證據。</verse>
				<verse number="3">別人批評𠊎个時，𠊎就恁樣辯護講：</verse>
				<verse number="4">敢講𠊎等無權利好靠福音食飯嗎？</verse>
				<verse number="5">敢講𠊎等做毋得像其他个使徒，像主个老弟，像 彼得 一樣，帶等信主个𡜵娘共下旅行嗎？</verse>
				<verse number="6">敢講唯有 巴拿巴 㧯𠊎就一定愛靠做事來維持生活嗎？</verse>
				<verse number="7">麼人做兵自備糧食啊？麼人種葡萄無食自家園肚出產个葡萄啊？麼人畜羊無食羊群个乳啊？</verse>
				<verse number="8">𠊎所講个，敢只有照人个意見；法律敢毋係也恁樣講嗎？</verse>
				<verse number="9">摩西 个法律講：「牛踏榖个時，毋好籠等牠个嘴。」上帝所關心个敢係牛？</verse>
				<verse number="10">佢敢毋係為到𠊎等來講嗎？這當然係為𠊎等寫个！因為耕種个㧯收割个出去做事，攏總希望分到佢等所應得个五榖。</verse>
				<verse number="11">𠊎等識在你等當中委屬靈个種子。就算𠊎等將你等供給个物質算做收成，敢會忒過份嗎？</verse>
				<verse number="12">別人若有權利享受你等个東西，𠊎等敢毋係還較有這個權利嗎？ 總係，𠊎等從來毋識用過這個權利，反轉凡事忍等，免得基督个福音受到阻礙。</verse>
				<verse number="13">你等應該知，在聖殿底背服事个人就享受聖殿內所供給个食物；在祭壇獻祭个人也有祭物好分。</verse>
				<verse number="14">共樣，主也恁樣吩咐：傳福音个人應該靠福音來維持生活。</verse>
				<verse number="15">總係，𠊎吂識用過這兜權利；這下，𠊎寫這兜話也毋係愛爭取這種个權利。𠊎死乜毋甘願使𠊎所誇口个落空！</verse>
				<verse number="16">𠊎傳福音並無麼介好誇口，因為𠊎係奉命去傳个。𠊎毋傳福音就慘了！</verse>
				<verse number="17">𠊎若係甘心樂意傳福音，就會有報賞；總係，既然上帝將這任務交給𠊎，𠊎就認為這係一種責任。</verse>
				<verse number="18">恁樣，𠊎个報賞係麼介呢？傳福音給人，俾人毋使用錢就得到福音，無用𠊎傳福音應得个權利，這就係𠊎个光榮。</verse>
				<verse number="19">𠊎係自由个人，毋係麼人个奴隸；總係𠊎甘願做大眾个僕人，為到愛得到更多个人。</verse>
				<verse number="20">同 猶太 人共下，𠊎就像 猶太 人恁樣生活，為到愛得到 猶太 人；同該兜在法律之下个人共下，雖然𠊎無受 摩西 法律个轄制，總係𠊎還係像在法律之下个人恁樣生活，為到愛得到法律之下个人。</verse>
				<verse number="21">共樣，同法律之外个人共下，𠊎就像法律之外个人，無受 猶太 法律个約束，為到愛得到法律之外个人。總係，這毋係講𠊎毋服從上帝个法律；事實上，𠊎係受基督法律个約束。</verse>
				<verse number="22">在信心軟弱个人當中，𠊎就做軟弱个人，為到愛得到軟弱个人。總講，在麼介樣个人中間，𠊎就做麼介樣个人；無論用麼介方法，𠊎總愛救兜人。</verse>
				<verse number="23">𠊎做這一切个事，係為福音个緣故，目的係愛同別人共下分享福音个好處。</verse>
				<verse number="24">你等敢毋知，在運動場走相逐个人盡多，總係得獎个只有一儕。所以，你等愛用決心來走，正會得獎賞。</verse>
				<verse number="25">每一個參加比賽个，一定愛接受嚴格个訓練，這係為到愛得到會壞个冕旒定定；總係𠊎等所做个係為到愛得到毋會壞个冕旒。</verse>
				<verse number="26">所以，像恁樣，𠊎一直向目標緊走；𠊎又像打拳个人，毋愛打空拳。</verse>
				<verse number="27">𠊎嚴嚴操練自家个身體，係愛完全控制它，免得𠊎傳福音給別人後，自家反轉受淘汰了。</verse>
			</chapter>
			<chapter number="10">
				<verse number="1">兄弟姊妹啊，𠊎毋愛你等毋知，𠊎等个祖先跈 摩西 在曠野所經歷个事。佢等全部在雲个保護之下平安經過 紅海 。</verse>
				<verse number="2">在雲中、在海肚，佢等攏總領洗禮同 摩西 結連。</verse>
				<verse number="3">佢等全部食共樣个靈糧，</verse>
				<verse number="4">啉共樣个靈水。這靈水係對同佢等共下行个屬靈个磐石流出來个；該磐石就係基督。</verse>
				<verse number="5">總係，佢等當中，大部份係上帝無歡喜个人，所以佢等个身屍橫在曠野。</verse>
				<verse number="6">這一切事係𠊎等个鑑戒，警告𠊎等毋好像佢等恁樣迷戀邪惡个事。</verse>
				<verse number="7">佢等中間有兜人拜偶像；你等毋好像佢等恁樣拜偶像。像聖經所講：「這群人民坐下來大食大啉，企起來狂歡暢樂。」</verse>
				<verse number="8">佢等中間有兜人行淫亂个事，𠊎等毋好像佢等恁樣淫亂；佢等因為淫亂，一日之內，死掉兩萬三千儕。</verse>
				<verse number="9">𠊎等毋好像佢等中間有兜人恁樣試探基督 ；佢等因為試探佢被蛇咬死。</verse>
				<verse number="10">你等毋好像佢等中間有兜人恁樣發怨言；佢等因為發怨言被執行毀滅个天使㓾死。</verse>
				<verse number="11">佢等所堵到个這兜事全部係一種个鑑戒，記下來係愛做𠊎等个警戒，因為𠊎等係在末世个時代。</verse>
				<verse number="12">所以，自認企得住个人就愛細膩，正毋會跌倒。</verse>
				<verse number="13">你等所堵到个試探，無一樣係人捱毋住个。上帝係信實个；佢一定毋會俾你等堵到超過你等所能忍受个試探。試探來个時，佢會賜你等力量，使你等捱得住，代你等開一條出路。</verse>
				<verse number="14">所以，𠊎親愛个朋友，你等愛遠離拜偶像个事。</verse>
				<verse number="15">𠊎係看你等做明理个人來講話；你等自家也做得判斷，𠊎講个著抑係毋著。</verse>
				<verse number="16">𠊎等啉祝謝過个杯，敢毋係分享基督个血嗎？𠊎等食擘開个餅，敢毋係分享基督个身體嗎？</verse>
				<verse number="17">因為𠊎等只有一隻餅仔，所分享个係共隻餅仔；所以，𠊎等人雖然多，還係一體。</verse>
				<verse number="18">請看 以色列 人；該兜食祭物个，就同祭壇發生關係。</verse>
				<verse number="19">𠊎恁樣講係麼介意思呢？敢正經認為偶像㧯祭物本身係恁重要嗎？</verse>
				<verse number="20">當然毋係！𠊎所愛講个就係：在異教个祭壇頂所獻个祭物係獻給鬼个，毋係獻給上帝个。𠊎毋愛你等同鬼相交。</verse>
				<verse number="21">你等做毋得啉主个杯又啉鬼个杯，做毋得參加主个桌席又參加鬼个桌席。</verse>
				<verse number="22">𠊎等愛惹主發譴係麼？𠊎等比佢較強係麼？</verse>
				<verse number="23">有兜人講：「麼介事乜做得。」這個話無毋著。總係，毋係逐樣事全部有利益。「麼介事乜做得。」總係，毋係逐樣事攏總會造就人。</verse>
				<verse number="24">無論麼人，毋好求自家个利益，愛關心別人个利益。</verse>
				<verse number="25">市場所賣个肉，你等攏總做得食，毋使為良心个緣故查查問問。</verse>
				<verse number="26">因為聖經講：「地上㧯其中个萬物全部係主个。」</verse>
				<verse number="27">若有毋信主个人請你等食飯，你等也想愛去，恁樣，桌頂所擺个食物，放心去食，毋使為良心个緣故查查問問。</verse>
				<verse number="28">總係，若有人對你等講，「該兜食物拜過偶像」，為到對你等講話个人，也為良心个緣故，你等就莫食。</verse>
				<verse number="29">𠊎所講个，毋係指你等个良心，係該人个良心。因為，𠊎做麼介愛為到自家个自由被別人个良心來論斷呢？</verse>
				<verse number="30">既然𠊎係存感謝个心來享受食物，做麼介愛俾別人因為𠊎所感謝个食物來批評𠊎呢？</verse>
				<verse number="31">總講，你等無論做麼介，係食抑係啉，攏總愛為榮光上帝來做。</verse>
				<verse number="32">無論係 猶太 人、外邦人、抑係上帝个教會，你等毋好害佢等跌倒。</verse>
				<verse number="33">你等愛像𠊎恁樣行，無論麼介事情，愛使大家歡喜；𠊎毋係求自家个利益，只有關心眾人个利益，為到使佢等得救。</verse>
			</chapter>
			<chapter number="11">
				<verse number="1">你等愛學𠊎，像𠊎學基督一樣。</verse>
				<verse number="2">𠊎稱讚你等，因為你等常常記得𠊎，也遵守𠊎傳給你等个教訓。</verse>
				<verse number="3">總係，𠊎希望你等明白，基督係每一個人个頭；老公係𡜵娘个頭；上帝係基督个頭。</verse>
				<verse number="4">男人祈禱抑係宣傳上帝个話 ，若將頭那幪等就係羞辱基督。</verse>
				<verse number="5">總係，婦人家祈禱抑係宣傳上帝个話，若無幪等頭那就係羞辱自家个老公。這種婦人家同剃掉頭那毛个婦人家無麼介分別。</verse>
				<verse number="6">婦人家若係毋幪頭，姖就愛剃掉頭那毛；既然認為剃光頭抑係剪掉頭那毛係見笑个事，姖就應該幪等頭。</verse>
				<verse number="7">男人毋使幪頭，因為佢係上帝个形像㧯榮光；總係，女人係男人个榮光。</verse>
				<verse number="8">因為男人毋係對女人造个，顛倒，女人係對男人來造个；</verse>
				<verse number="9">男人毋係為女人造个，總係，女人係為到男人來造个。</verse>
				<verse number="10">所以，為到天使个緣故，婦人家應該愛幪頭巾，來表示姖順服老公个權威 。</verse>
				<verse number="11">其實，在主个底背，男人㧯女人互相倚靠，彼此需要。</verse>
				<verse number="12">因為女人係對男人來造个，同時男人係對婦人家來出世个，總係萬物全部係對上帝來个。</verse>
				<verse number="13">你等自家判斷！女人向上帝祈禱，毋幪頭著麼？</verse>
				<verse number="14">你等个本性敢毋係指示你等，男人留長頭那毛係佢个見笑，</verse>
				<verse number="15">總係女人留長頭那毛就係姖个榮光嗎？因為長頭那毛做得遮等姖个頭那。</verse>
				<verse number="16">若有人愛辯駁，𠊎只有講，𠊎等㧯上帝个眾教會無別个規定。</verse>
				<verse number="17">下背，𠊎所愛吩咐个，毋係愛稱讚你等，因為你等个聚會實在有損害無利益。</verse>
				<verse number="18">第一，𠊎聽講，你等在教會聚會个時結黨分派。𠊎相信這個話有一部份係有影个。</verse>
				<verse number="19">(你等中間有分派係難免个；這反轉會顯出麼人个主張較著。)</verse>
				<verse number="20">恁樣，你等聚會个時，就毋係食主个晚餐。</verse>
				<verse number="21">因為你等食个時，逐儕先食自家帶來个東西，結果有兜人餓肚笥，有兜人食酒醉。</verse>
				<verse number="22">你等愛食愛啉，做麼介毋愛在屋下？抑係你等故意愛藐視上帝个教會，同時愛使窮苦人見笑係麼？𠊎對你等愛樣般講呢？愛稱讚你等嗎？𠊎實在無法度稱讚你等！</verse>
				<verse number="23">𠊎所傳給你等个，係𠊎對主領受个：主耶穌被人出賣該暗晡，拿起餅仔，</verse>
				<verse number="24">感謝上帝後，就擘開，講：「這係𠊎个身體，係為你等犧牲个；你等愛恁樣行，來紀念𠊎。」</verse>
				<verse number="25">食飽後，佢照樣拿起杯仔，講：「這杯係上帝用𠊎个血所立个新約；你等逐擺啉个時，愛恁樣行，來紀念𠊎。」</verse>
				<verse number="26">所以，你等逐擺食這個餅，啉這個杯，係宣告主个死，直到主再來。</verse>
				<verse number="27">所以，無論麼人，若無用敬虔个心食主个餅，啉主个杯，佢就係得罪主个身體㧯主个血。</verse>
				<verse number="28">每一個人應當先省察自家，然後正食這個餅，啉這個杯。</verse>
				<verse number="29">若係佢食這餅啉這杯个時，無確認所食所啉个同主身體个關係，佢就係自惹審判。</verse>
				<verse number="30">就係因為恁樣，你等中間正會有恁多人身體軟弱、發病，死掉个也有。</verse>
				<verse number="31">𠊎等若先反省自家，就毋會受審判。</verse>
				<verse number="32">總係，𠊎等受審判，係被主管教，愛使𠊎等毋使同世間人共下受定罪。</verse>
				<verse number="33">所以，𠊎个兄弟姊妹啊，你等聚集來食主个晚餐个時，應當彼此等候。</verse>
				<verse number="34">若有人肚飢，應該在屋下先食，免得聚會个時，受上帝審判。其他个事，等𠊎到，正來解決。</verse>
			</chapter>
			<chapter number="12">
				<verse number="1">兄弟姊妹啊，關係聖靈个恩賜，𠊎希望你等會明白。</verse>
				<verse number="2">你等知，你等頭擺信異教个時，常常受迷惑行到叉路去，受該兜無生命个偶像轄制。</verse>
				<verse number="3">𠊎㧯你等講，每一個被上帝个靈感動个人一定毋會講「耶穌應該受咒詛」。共樣，若毋係聖靈感動，也無人能承認「耶穌係主」。</verse>
				<verse number="4">恩賜有盡多種，總係賜恩賜个係共一位聖靈。</verse>
				<verse number="5">事奉有盡多種，總係所事奉个係共一位主。</verse>
				<verse number="6">工作有盡多種，總係在萬民中間使萬事運行个係共一位上帝。</verse>
				<verse number="7">聖靈顯明在逐儕身上个方式雖然無共樣，總係目的係共樣，係愛使大家得到利益。</verse>
				<verse number="8">聖靈賜這人智慧个信息；總係共一位聖靈賜另外一個人智識个信息。</verse>
				<verse number="9">共一位聖靈賜這個人信心，賜另外一個人醫病个能力；</verse>
				<verse number="10">共一位聖靈賜給這個人行神蹟个能力，給另外一個人傳上帝道理个恩賜；有人得到分別眾靈个能力；有人會講屬靈个語言；也有人會解釋屬靈个語言。</verse>
				<verse number="11">總係，這一切係共一位、獨一个聖靈所運行，照自家个旨意賜給逐儕个。</verse>
				<verse number="12">人只有一個身體，總係有盡多肢體；肢體雖然盡多，還係一個身體。基督个身體也係像恁樣。</verse>
				<verse number="13">毋單淨恁樣，𠊎等無論係 猶太 人抑係外邦人，係做奴隸个抑係自由人，全部已經通過共一位聖靈來領洗禮，成做一個身體，共下享受共一位聖靈。</verse>
				<verse number="14">身體毋係只有一個肢體，還係有盡多肢體。</verse>
				<verse number="15">若係腳講：「𠊎毋係手，所以𠊎無屬身體」，它毋會因為恁樣就無屬身體。</verse>
				<verse number="16">若係耳公講：「𠊎毋係目珠，所以𠊎無屬身體」，它也毋會因為恁樣就無屬身體。</verse>
				<verse number="17">若係歸身通體係目珠，愛樣般聽呢？若係歸身通體係耳公，愛樣般鼻呢？</verse>
				<verse number="18">總係，上帝照自家个旨意，將該兜無共樣个肢體全部安在人个身上。</verse>
				<verse number="19">若係歸身个肢體全部共樣，樣般做得算做身體呢？</verse>
				<verse number="20">事實上，肢體有盡多，身體只有一個。</verse>
				<verse number="21">所以，目珠做毋得對手講：「𠊎無需要你！」頭那也做毋得對腳講：「𠊎無需要你！」</verse>
				<verse number="22">顛倒，身上該兜像係較軟弱个肢體，還較係做毋得缺少个。</verse>
				<verse number="23">𠊎等个身體，該兜看來無恁重要个部份，反轉得到𠊎等特別个照顧；該兜無體面个部份，反轉得到𠊎等个關心；</verse>
				<verse number="24">該兜較好看个部份，就無需要打扮。上帝就係恁樣安排𠊎等个身體，使該兜較媸个肢體反轉有較大个光榮；</verse>
				<verse number="25">佢个目的係愛使身體毋會分裂，各肢體反轉會互相照顧。</verse>
				<verse number="26">一個肢體受苦，所有个肢體就相共受苦；一個肢體得光榮，所有个肢體就相共快樂。</verse>
				<verse number="27">你等就係基督个身體，每一個人係身體个肢體。</verse>
				<verse number="28">在教會底背，上帝所安排个，第一係使徒，第二係先知，第三係教師；接下去係行神蹟个，有醫病恩賜个；還有幫助人个，管理事務个，並講屬靈語言个。</verse>
				<verse number="29">毋係大家全部做使徒，做先知，抑係做教師；也毋係全部有能力行神蹟，</verse>
				<verse number="30">醫病，講屬靈个語言，抑係解釋屬靈个語言。</verse>
				<verse number="31">雖然係恁樣，你等愛迫切追求該兜較重要个恩賜。 接下去，𠊎愛指示你等至善个道路。</verse>
			</chapter>
			<chapter number="13">
				<verse number="1">𠊎就係會講世間各種个話，甚至係天使个話，若係無愛心，𠊎个話就像吵人个銅鑼㧯響个鑇仔共樣。</verse>
				<verse number="2">𠊎就係有先知講道个才調，又會了解各種奧妙㧯智識，甚至有堅強个信心會移山倒海，若係無愛心，𠊎就毋算麼介。</verse>
				<verse number="3">𠊎就係將所有个財產拿來救濟人，甚至犧牲自家个身體被人燒 ，若係無愛心，𠊎所做个就無麼介利益。</verse>
				<verse number="4">有愛心就會有吞忍㧯慈悲；有愛心就毋會嫉妒，毋會誇口，毋會驕傲，</verse>
				<verse number="5">毋會做見笑个事，毋會自私，毋會隨便發譴，無記等別人个過失，</verse>
				<verse number="6">毋歡喜不義，只有歡喜真理。</verse>
				<verse number="7">有愛心就會包容一切，凡事有信心，事事存希望，樣樣能忍耐。</verse>
				<verse number="8">愛心永遠存在。講道个才調係暫時个；屬靈个語言有一日會停止；智識也會無路用。</verse>
				<verse number="9">因為𠊎等个智識有限，講道个恩賜也有限；</verse>
				<verse number="10">總係，完全个一來到，有限个就會無掉去。</verse>
				<verse number="11">𠊎做細人仔个時節，講話像細人仔，心思像細人仔，意念像細人仔；成人以後，𠊎就將細人仔个事㧒掉去。</verse>
				<verse number="12">𠊎等這下所看到个，就像照銅鏡所看到个影像，濛濛；將來就會面對面看到清清楚楚。𠊎這下對上帝个認識無完全；將來就會完全，就像上帝完全認識𠊎一樣。</verse>
				<verse number="13">信心、希望、㧯愛心，這三樣係永遠存在个；其中最重要个係愛心。</verse>
			</chapter>
			<chapter number="14">
				<verse number="1">你等愛追求愛心。你等也愛渴慕聖靈个恩賜，特別係傳講上帝真道 个恩賜。</verse>
				<verse number="2">該用屬靈个語言講話个，毋係對人講話，係對上帝講，因為無人聽抑識；佢係通過聖靈个能力講奧妙个事。</verse>
				<verse number="3">總係，傳講上帝真道个，係對人講話，來造就、鼓勵、㧯安慰佢等。</verse>
				<verse number="4">用屬靈个語言來講个係造就自家，總係傳講上帝真道个係造就教會。</verse>
				<verse number="5">𠊎希望你等全部會講屬靈个語言，總係𠊎還較愛你等有傳講上帝真道个恩賜。因為，用屬靈个語言講話，愛有人翻譯，教會正會得到造就；若無翻譯，傳講上帝真道个就贏過講屬靈語言个。</verse>
				<verse number="6">兄弟姊妹啊，𠊎去你等該位个時，若只有用屬靈个語言講話，無對你等講上帝个啟示、智識、預言、抑係教示，對你等有麼介利益呢？</verse>
				<verse number="7">連該兜無生命个樂器，像笛仔抑係弦琴，所發出个聲若無高低个分別，所歕个抑係所彈个樣會聽抑識係麼介呢？</verse>
				<verse number="8">號筒歕出來个音若無準，麼人知愛準備相㓾呢？</verse>
				<verse number="9">共樣，你等用舌乸講話，若無用人聽抑識个話講，麼人知你等講麼介呢？你等就係對空氣講話了！</verse>
				<verse number="10">世間有盡多無共樣个語言，總係無一樣毋係愛表達意思个。</verse>
				<verse number="11">若係𠊎聽毋識該種語言，對講該種話个人來講，𠊎係外國人，對𠊎來講，佢也係外國人。</verse>
				<verse number="12">既然你等渴慕聖靈个恩賜，你等就應當多追求該兜造就教會个恩賜。</verse>
				<verse number="13">所以，講屬靈語言个，就愛求上帝賜佢翻譯个能力。</verse>
				<verse number="14">若係𠊎用屬靈个語言祈禱，𠊎係用𠊎个靈祈禱，總係𠊎个理智並無作用。</verse>
				<verse number="15">愛樣般正好呢？𠊎愛用靈祈禱，也愛用理智祈禱；𠊎愛用靈唱歌，也愛用理智唱歌。</verse>
				<verse number="16">若毋係恁樣，你單淨用靈感謝上帝个時，在聚會中聽毋識屬靈語言个人，佢既然毋知你講麼介，愛樣般㧯你同心講「阿愐」呢？</verse>
				<verse number="17">恁樣，就算你對上帝感謝个祈禱係盡好个，別人也毋會得到造就。</verse>
				<verse number="18">𠊎感謝上帝，𠊎講屬靈个語言比你等大家較多。</verse>
				<verse number="19">總係，在教會个聚會中，𠊎較愛講人聽抑識个話；用理智講五句教導人个話較贏講千萬句屬靈个語言。</verse>
				<verse number="20">兄弟姊妹啊，你等个思想毋好像細人仔。在壞事方面愛像細人仔，總係思想愛像大人恁成熟。</verse>
				<verse number="21">聖經有記載： 主講： 𠊎愛通過外國人个嘴唇， 對這人民講別樣个語言； 總係，佢等還係毋聽從𠊎。</verse>
				<verse number="22">恁樣看來，講屬靈个語言毋係為到信徒，係愛給毋信个人做記號。總係，傳講上帝个真道毋係為到毋信个人，係愛給信徒做記號。</verse>
				<verse number="23">假使全教會聚會个時，大家攏總講屬靈个語言，一般人抑係毋信个人入來，敢毋係會講你等發癲了係麼？</verse>
				<verse number="24">若係大家全部傳講上帝个真道，毋信个人抑係一般人入來，佢會因為所聽到个話來反省自家个罪，良心受責備；</verse>
				<verse number="25">心內囥等个事一顯明出來，佢就會伏等敬拜上帝，承認講：「上帝正經在你等中間！」</verse>
				<verse number="26">兄弟姊妹啊，𠊎个意思係麼介呢？你等聚會个時，有人獻詩，有人教訓，有人得到上帝个啟示，有人講屬靈个語言，也有人翻譯。一切愛為到造就教會來做正著。</verse>
				<verse number="27">若有人愛講屬靈个語言，最多兩三個人講就好了，愛輪流來講，也愛有人翻譯。</verse>
				<verse number="28">若係無人翻譯，講屬靈語言个在會中就愛恬恬，自家㧯上帝講就好。</verse>
				<verse number="29">傳講上帝真道个，也係兩三儕講就好，其他个人就愛認真判斷佢等所講个。</verse>
				<verse number="30">在座个，若另外有人得到上帝个啟示，先講个就愛恬下來。</verse>
				<verse number="31">你等愛一儕一儕輪等來講上帝个真道，恁樣，大家就互相得到學習，得到鼓勵。</verse>
				<verse number="32">傳講上帝真道个人，應當約束自家个恩賜；</verse>
				<verse number="33">因為上帝所愛个毋係混亂，係和平。 恁樣，就㧯眾聖徒个各教會共樣，</verse>
				<verse number="34">婦人家在聚會中愛恬恬；因為照 猶太 人个法律所規定，姖等愛順從，做毋得講話。</verse>
				<verse number="35">姖等若想愛明白麼介事情，轉去正問老公就好；因為姖等在聚會中講話係盡無禮貌个事。</verse>
				<verse number="36">上帝个真道敢係對你等來个？敢係單單傳給你等？</verse>
				<verse number="37">若有人自認係傳講上帝真道个，抑係認為佢有屬靈个恩賜，佢就應該承認𠊎寫給你等个係主所命令个。</verse>
				<verse number="38">若係佢毋承認，你等就毋使搭佢。</verse>
				<verse number="39">總講，𠊎个兄弟姊妹啊，你等應該追求傳講上帝真道个恩賜，也毋好反對人講屬靈个語言。</verse>
				<verse number="40">凡事愛照秩序，規規矩矩來做。</verse>
			</chapter>
			<chapter number="15">
				<verse number="1">兄弟姊妹啊，𠊎愛你等記得𠊎以前傳給你等个福音；這福音你等已經領受，也用它來做信心个基礎。</verse>
				<verse number="2">若係你等執守這福音，就係𠊎所傳給你等个道理，你等一定會得救；除非你等个信係盡盡採採个 。</verse>
				<verse number="3">𠊎所領受个道理，𠊎已經傳給你等，最重要个就係：照聖經所講，基督已經為𠊎等个罪死了，</verse>
				<verse number="4">並被人埋葬了；又照聖經所講，第三日復活了。</verse>
				<verse number="5">佢識顯現俾 彼得 看，又顯現俾十二個使徒看。</verse>
				<verse number="6">以後，佢識一擺對五百零個跈佢个人顯現；這兜人大部份還在，雖然有兜已經過身了。</verse>
				<verse number="7">後來，佢顯現給 雅各 看，又對所有个使徒顯現。</verse>
				<verse number="8">最尾，佢也顯現給𠊎看；𠊎像係一個吂足月就出世个人 。</verse>
				<verse number="9">在使徒中間，𠊎係最細个，堪毋得稱做使徒，因為𠊎識迫害上帝个教會。</verse>
				<verse number="10">總係，𠊎成做今晡日个𠊎，係照上帝个恩典。佢賜給𠊎个恩典無落空；反轉，𠊎比其他个使徒還較辛苦工作；其實，毋係𠊎，係上帝个恩典同𠊎共下工作。</verse>
				<verse number="11">結果共樣，無論係𠊎抑係別个使徒，𠊎等恁樣傳，你等也恁樣信。</verse>
				<verse number="12">既然𠊎等傳講基督已經對死復活，樣般你等中間有人講無死人復活這件事呢？</verse>
				<verse number="13">若係無死人復活這件事，基督就無復活了。</verse>
				<verse number="14">基督若無復活，𠊎等所傳个就係空个，你等所信个也係空个。</verse>
				<verse number="15">假使無死人復活這件事，上帝就無使基督復活了，因為，若係無死人復活這件事，基督就無復活了。恁樣，𠊎等見證上帝已經使基督復活，就變做𠊎等係為上帝做假見證了。</verse>
				<verse number="16"></verse>
				<verse number="17">基督若無復活，你等个信仰就無價值，你等還迷失在罪个底背。</verse>
				<verse number="18">這意思就係，該兜過身个基督徒也攏總滅亡了。</verse>
				<verse number="19">𠊎等信基督个人若只有在今生有希望 ，𠊎等就比世間其他个人還較可憐了。</verse>
				<verse number="20">事實上，基督已經對死復活；這係愛保證過身掉个人也愛跈佢復活。</verse>
				<verse number="21">既然死係對一個人來，死人个復活也係對一個人來。</verse>
				<verse number="22">共樣，眾人个死係因為佢等同 亞當 結連，眾人个復活係因為佢等同基督結連。</verse>
				<verse number="23">總係，逐儕愛照順序來復活：頭一個係基督；然後，在佢再來个時，正係屬佢个人。</verse>
				<verse number="24">然後末期會到；該時基督愛消滅一切靈界个執政者、掌權者，㧯有能力个，將王權交還阿爸上帝。</verse>
				<verse number="25">因為基督的確愛掌權，直到上帝贏過一切仇敵，使佢等降服在佢个腳下。</verse>
				<verse number="26">最尾受毀滅个仇敵就係死。</verse>
				<verse number="27">因為聖經講：「上帝使萬物全部降服在佢个腳下。」盡明顯个，這位所講个「萬物」無包含上帝自家，因為使萬物降服在基督腳下个就係佢。</verse>
				<verse number="28">到萬物降服基督个時，孻仔本身也愛順服使萬物降服佢个上帝，好俾上帝完全統治一切 。</verse>
				<verse number="29">若毋係恁樣，該兜代死人領受洗禮个有麼介意思呢？佢等所希望个係麼介呢？若係無死人復活這件事，佢等樣般還代死人領受洗禮做麼介？</verse>
				<verse number="30">𠊎等又樣般愛時時刻刻冒險呢？</verse>
				<verse number="31">兄弟姊妹啊，𠊎逐日都面對死！𠊎敢恁樣講，因為𠊎所誇口个係你等同𠊎共下在𠊎等主基督耶穌生命底背。</verse>
				<verse number="32">𠊎在 以弗所 同該兜喊做「野生个禽獸」拚命，若係照人个動機，對𠊎有麼介利益呢？若無死人復活這件事，𠊎等像俗語所講：「現食現好，會死韶早！」恁樣行就好了。</verse>
				<verse number="33">毋好被人騙去；愛記得：「壞朋友會敗壞好德行！」</verse>
				<verse number="34">好醒了，愛行正路，毋好再犯罪；因為你等中間有人無認識上帝。𠊎講這個話係愛俾你等知見笑。</verse>
				<verse number="35">有人會問：「死人愛樣般復活呢？佢等會有樣般个形體呢？」</verse>
				<verse number="36">你樣恁戇！你委在泥底背个種子，若無先死掉，就無法度生出來。</verse>
				<verse number="37">你所委个係麥仔，抑係別樣个種子，攏總係一粒一粒个，並毋係後來所生出來个形體。</verse>
				<verse number="38">總係，上帝照自家个意思給它形體；佢使各樣種子有各樣个形體。</verse>
				<verse number="39">各樣个動物也有無共樣个肉體：人有人體，禽獸有禽獸个形體，飛鳥有飛鳥个形體，魚有魚个形體。</verse>
				<verse number="40">還有天頂个形體，㧯地上个形體；總係天頂个形體有一種个榮光，地上个形體有另外一種个靚。</verse>
				<verse number="41">日頭有日頭个光，月光有月光个光，星仔有星仔个光；甚至這隻星仔㧯該隻星仔个光也無共樣。</verse>
				<verse number="42">死人个復活也係恁樣。埋葬个身體係會腐爛个；復活後个身體係毋會朽爛个。</verse>
				<verse number="43">埋落去个係盡無體面个，復活个係盡榮光个；埋落去个係軟弱个，復活个係強壯个；</verse>
				<verse number="44">埋落去个係血肉个身體，復活个係屬靈个身體。既然有血肉个身體，也就有屬靈个身體。</verse>
				<verse number="45">聖經恁樣講：「頭一個人 亞當 受造成做有生命个人」；總係，末後个 亞當 係賜生命个靈。</verse>
				<verse number="46">毋係先有屬靈个；係先有血肉个，然後正有屬靈个。</verse>
				<verse number="47">頭一個 亞當 係用地上个泥做个；第二個 亞當 係對天頂來个。</verse>
				<verse number="48">該用泥做个樣般，該兜屬泥个人也樣般；該對天頂來个樣般，該兜屬天个人也樣般。</verse>
				<verse number="49">𠊎等已經有屬泥个人个形像，將來也會有 該對天頂來个人个形像。</verse>
				<verse number="50">兄弟姊妹啊，𠊎所愛講个係：血㧯肉个身體做毋得承受上帝个國，會腐爛个做毋得承受毋會朽爛个。</verse>
				<verse number="51">你等愛注意聽這件奧妙个事：𠊎等並毋係全部會死；在一下仔，一𥍉目之間，最後一擺號筒響个時節，𠊎等全部會改變。最後一擺號筒一響，死人會復活成做毋會朽爛个，𠊎等還生个人也會改變。</verse>
				<verse number="52"></verse>
				<verse number="53">因為會腐爛个愛變做毋會朽爛个，會死个愛變做毋會死个。</verse>
				<verse number="54">到會腐爛个一變做毋會朽爛个，該會死个一變做毋會死个，聖經所講這句話就實現了：「死亡已經被勝利吞滅了！」</verse>
				<verse number="55">死啊！你个勝利在㖠位？ 死啊！你个毒竻在㖠位？</verse>
				<verse number="56">死个毒竻係對罪來个，罪个權勢係對法律來个。</verse>
				<verse number="57">總係，感謝上帝！佢使𠊎等通過𠊎等个主耶穌基督得到勝利了！</verse>
				<verse number="58">所以，親愛个兄弟姊妹啊，你等愛企在，毋好搖動。愛常常認真做主个工作；因為知，你等為主所做个工作一定毋會空空。</verse>
			</chapter>
			<chapter number="16">
				<verse number="1">關係募款幫助信徒个事情，𠊎頭擺識吩咐 加拉太 个各教會，你等也愛照恁樣去做。</verse>
				<verse number="2">逐禮拜日，你等逐儕愛照自家个收入比例撥出一兜錢，貯起來，毋好等𠊎去到个時臨時正尋錢。</verse>
				<verse number="3">𠊎去到个時，會派你等所信任个人，給佢等介紹信，喊佢等將你等个捐款帶去 耶路撒冷 。</verse>
				<verse number="4">若需要𠊎也去，佢等做得同𠊎共下去。</verse>
				<verse number="5">𠊎想愛路過 馬其頓 。𠊎訪問 馬其頓 以後，就愛去你等該位。</verse>
				<verse number="6">𠊎可能會在你等該位住一站時間，或者會在該位過冬，然後正繼續𠊎个旅程。恁樣，無論𠊎愛去㖠位，你等做得為𠊎送行。</verse>
				<verse number="7">𠊎這下無愛單單順路去看你等，即時就離開；主若肯，𠊎希望留下來同你等共下住一站時間。</verse>
				<verse number="8">總係，𠊎還愛留在 以弗所 ，直到五旬節；</verse>
				<verse number="9">因為，雖然有盡多人反對，這位个門開盡大，有盡好个機會好工作。</verse>
				<verse number="10">提摩太 若去到你等該位，希望你等好好接待佢，使佢無驚麼介，因為佢同𠊎共樣係為主工作个。</verse>
				<verse number="11">做毋得有人看輕佢；愛送佢平安上路繼續佢个旅程，俾佢轉到𠊎這位來，因為𠊎這下等佢同眾兄弟共下來。</verse>
				<verse number="12">講到 亞波羅 兄弟，𠊎再三鼓勵佢同其他个兄弟共下去訪問你等，總係佢感覺這下去無盡好 ，有機會佢一定會去。</verse>
				<verse number="13">你等愛警醒，愛在信仰頂高企在，愛勇敢，愛堅強。</verse>
				<verse number="14">無論麼介事情，全部愛用愛心去做。</verse>
				<verse number="15">兄弟姊妹啊，𠊎愛勸話你等。你等知 司提法那 㧯佢一家人；佢等係 亞該亞 地方最先成做基督徒个一家，非常熱心服事眾聖徒。</verse>
				<verse number="16">你等愛聽從這種个人㧯一切煞猛工作个同工。</verse>
				<verse number="17">司提法那 、 福徒拿都 ，㧯 亞該古 到𠊎這位來，𠊎盡歡喜。佢等堵好補滿你等無在這位个欠缺。</verse>
				<verse number="18">佢等使𠊎心靈歡喜，就像使你等心靈歡喜一樣。你等愛敬重這種个人。</verse>
				<verse number="19">亞細亞 省个各教會攏總對你等請安； 亞居拉 㧯 百基拉 兩公婆，並在佢等屋下个教會，在主底背熱烈對你等請安。</verse>
				<verse number="20">這位个眾兄弟姊妹也對你等請安。 你等愛聖潔相唚彼此請安。</verse>
				<verse number="21">𠊎 — 保羅 親筆對你等請安。</verse>
				<verse number="22">若有毋敬愛主个人，佢係應該受咒詛个。 主啊，願你來！</verse>
				<verse number="23">願主耶穌賜恩典給你等！</verse>
				<verse number="24">願𠊎个痛惜同你等所有屬基督耶穌个人共下。</verse>
			</chapter>
		</book>
		<book number="47">
			<chapter number="1">
				<verse number="1">𠊎係 保羅 ；𠊎奉上帝个旨意做基督耶穌个使徒。𠊎㧯𠊎等个兄弟 提摩太 寫信仔給在 哥林多 城上帝个教會㧯全 亞該亞 所有个聖徒。</verse>
				<verse number="2">願𠊎等个阿爸上帝㧯主耶穌基督賜恩典、平安給你等。</verse>
				<verse number="3">頌讚歸給𠊎等主耶穌基督个阿爸上帝！佢係慈愛个天父，也係賜一切安慰个上帝。</verse>
				<verse number="4">𠊎等在各種个患難中，佢安慰𠊎等，使𠊎等能用佢賜給𠊎等个安慰去安慰在各種患難中个人。</verse>
				<verse number="5">因為𠊎等有份基督个各種苦難，像恁樣，𠊎等也通過基督得到盡多安慰。</verse>
				<verse number="6">𠊎等若堵到苦難，係愛使你等得到安慰，得到拯救；𠊎等若得到安慰，係愛使你等得到安慰，同時得到力量來忍受同𠊎等所堵到共樣个苦難。</verse>
				<verse number="7">𠊎等確信你等毋會使𠊎等失望；因為𠊎等知，就像你等分擔𠊎等个苦難，你等也會分享𠊎等所得到个安慰。</verse>
				<verse number="8">兄弟姊妹啊，𠊎等無愛你等毋知，𠊎等頭擺在 亞細亞 省所堵到个患難。磧在𠊎等身上个重擔超過人所能負擔个，害𠊎等連生存个希望也無掉去；</verse>
				<verse number="9">𠊎等感覺到像已經被人判死刑。因為恁樣，𠊎等知，𠊎等做毋得靠自家，一定愛靠使死人復活个上帝。</verse>
				<verse number="10">佢識救𠊎等脫離死亡个危險，將來還愛拯救；只愛你等用祈禱幫助𠊎等，𠊎等確信，將來佢也會拯救𠊎等。恁樣，有幾多人為𠊎等祈禱，就會有幾多人因為𠊎等个蒙恩來感謝上帝。</verse>
				<verse number="11"></verse>
				<verse number="12">𠊎等所誇口个，𠊎等个良心所證明个就係：在這世間，特別係對你等，𠊎等係用上帝所賜个單純 㧯誠懇來做人；𠊎等恁樣行係靠上帝个恩典，毋係靠世間人个智慧。</verse>
				<verse number="13">𠊎等寫給你等个，係你等所能讀、所能明白个。你等這下對𠊎等有毋了解个所在，𠊎希望你等最後會完全了解。恁樣，在𠊎等个主耶穌再來該日，你等會因為𠊎等來誇口，像𠊎等因為你等誇口一樣。</verse>
				<verse number="14"></verse>
				<verse number="15">𠊎既然有這種个確信，早就計劃愛先去訪問你等，使你等得到加倍个祝福。</verse>
				<verse number="16">𠊎去 馬其頓 个時，原來計劃愛先對你等該位經過，然後對 馬其頓 轉頭，再去你等該位一擺，好俾你等幫助𠊎去 猶太 。</verse>
				<verse number="17">𠊎恁樣計劃，麼人能批評𠊎無慎重呢？敢講𠊎恁樣計劃係出於自私，一下講愛，黏時又講無愛，是非不分嗎？</verse>
				<verse number="18">𠊎指信實个上帝講，對你等講話，𠊎毋識一下講「係」，黏時又講「毋係」。</verse>
				<verse number="19">因為𠊎、 西拉 ，㧯 提摩太 傳給你等个，就係上帝个孻仔耶穌基督，佢並毋係「係」又「毋係」个；顛倒，佢就係上帝个「係」。</verse>
				<verse number="20">上帝一切个應許全部在基督个身上成做「係」了。所以，𠊎等通過佢講「阿愐」來榮光上帝。</verse>
				<verse number="21">在基督底背使𠊎等㧯你等相共得到堅固，又使𠊎等聖別出來个，就係上帝。</verse>
				<verse number="22">係佢在𠊎等身上揝印，又賜聖靈在𠊎等心內，做佢為𠊎等所準備一切个擔保。</verse>
				<verse number="23">𠊎求上帝做證；𠊎若講花撩，佢會責罰𠊎！𠊎無去 哥林多 係寬容你等。</verse>
				<verse number="24">𠊎等毋係愛勉強你等信麼介；顛倒，係愛同你等合作，使你等歡喜，因為你等在信仰上已經企穩。</verse>
			</chapter>
			<chapter number="2">
				<verse number="1">因為恁樣，𠊎決心下一擺正訪問你等，免得害你等再憂愁。</verse>
				<verse number="2">若係𠊎害你等憂愁，有麼人能使𠊎快樂呢？敢毋係你這兜因為𠊎憂愁个人嗎？</verse>
				<verse number="3">所以，𠊎寫該封信仔給你等，免得𠊎到你等該位个時，該兜應該使𠊎快樂个人反轉害𠊎憂愁。𠊎深信，𠊎个歡喜就係你等大家个歡喜。</verse>
				<verse number="4">𠊎以前在憂傷痛苦當中，緊流目汁，寫該封信仔給你等，毋係愛害你等憂愁，係愛你等知𠊎係樣般痛惜你等！</verse>
				<verse number="5">恁樣，若係有人害人憂愁，佢毋係害𠊎憂愁，係害你等大家憂愁，最少係害你等當中有兜人憂愁。𠊎恁樣講，係因為𠊎無愛對這種人講忒重个話。</verse>
				<verse number="6">這種人被大部份人責備已經罅了。</verse>
				<verse number="7">顛倒，你等愛赦免佢，安慰佢，免得佢忒傷心卻絕望。</verse>
				<verse number="8">所以，𠊎勸你等，愛俾佢確實知你等惜佢。</verse>
				<verse number="9">𠊎以前寫該封信仔給你等，係愛知你等係毋係有辦法贏過考驗，係毋係肯凡事順服𠊎。</verse>
				<verse number="10">你等赦免麼人，𠊎就赦免麼人。若係𠊎赦免麼人，係因為你等个緣故在基督面前赦免佢，</verse>
				<verse number="11">免得𠊎等被撒但較贏，因為𠊎等盡清楚撒但个詭計。</verse>
				<verse number="12">𠊎到 特羅亞 傳基督福音个時，主已經為𠊎打開工作个門。</verse>
				<verse number="13">可惜，因為無堵到𠊎个兄弟 提多 ，所以𠊎个心非常著急；𠊎就辭別該位个人，去 馬其頓 。</verse>
				<verse number="14">總係，感謝上帝！佢時常帶領𠊎等，喊𠊎這兜被基督捉到个人有好參加基督勝利个行列。佢通過𠊎等將認識基督正有个香味傳到逐所在去。</verse>
				<verse number="15">𠊎等可比基督獻給上帝个香味，傳到該兜得救个人身上㧯滅亡个人中間。</verse>
				<verse number="16">對該兜滅亡个人來講，這氣味成做會害死人个臭味；對該兜得救个人來講，這氣味成做生命个香味。麼人做得擔當這重大个任務呢？</verse>
				<verse number="17">盡多人將上帝个道理準做東西來賣；𠊎等毋係恁樣，因為上帝指派𠊎等，俾𠊎等在佢面前，用基督奴僕个身份，老老實實傳講。</verse>
			</chapter>
			<chapter number="3">
				<verse number="1">𠊎等敢係再一擺推薦自家嗎？敢講𠊎等也愛像有兜人恁樣，需要拿推薦書給你等，抑係對你等討推薦書係麼？</verse>
				<verse number="2">你等就係𠊎等个推薦書，寫在𠊎等个心內，係大家所知、大家所讀个。</verse>
				<verse number="3">非常明顯，你等就係基督所寫个信仔，𠊎等係傳送个人。這封信仔毋係用墨汁寫在石版頂个，係用永生上帝个靈寫在人心肚个。</verse>
				<verse number="4">𠊎等通過基督在上帝个面前有這種信心。</verse>
				<verse number="5">這毋係講，𠊎等自家有麼介才調好做這個工作；𠊎等个才能係對上帝來个。</verse>
				<verse number="6">係佢使𠊎等有才能好做新約个僕人；這約毋係字面上个法律，係聖靈个約。字面上个法律所帶來个係死，總係聖靈所賜个係生命。</verse>
				<verse number="7">法律係用文字刻在石版頂个，頒佈个時，有上帝个榮光顯現出來。雖然射在 摩西 面頂个榮光漸漸消失，佢面頂个光還係恁強，使 以色列 人無法度注目看佢。這帶死來个事工有恁大个榮光，</verse>
				<verse number="8">恁樣，聖靈个事工敢毋係還較有榮光嗎？</verse>
				<verse number="9">連定人死罪个事工有榮光；該宣佈人無罪个事工當然還較有榮光！</verse>
				<verse number="10">其實，𠊎等做得講，既然這下有過較大个榮光，該頭擺有榮光个，就毋算麼介了。</verse>
				<verse number="11">連漸漸失效个也有榮光，這長存个就當然有還較大个榮光。</verse>
				<verse number="12">既然𠊎等有這種个盼望，𠊎等就還較大膽。</verse>
				<verse number="13">𠊎等毋使像 摩西 恁樣，佢的確愛用面帕幪等自家个面，使 以色列 人無法度注目看佢个面，直到該光漸漸消失。</verse>
				<verse number="14">總係佢等个心思卻硬化掉去；到今晡日，佢等讀舊約个時，佢等个心還係幪等共樣个帕仔。因為人只有同基督結連，佢心中个帕仔正會掀開。</verse>
				<verse number="15">就係在今晡日，佢等逐擺讀 摩西 个法律，佢等个心還係幪等帕仔。</verse>
				<verse number="16">總係，人幾時轉向主，帕仔幾時就掀開 。</verse>
				<verse number="17">這位所講个「主」就係聖靈。主个靈在㖠位，㖠位就有自由。</verse>
				<verse number="18">𠊎等大家个面全部無幪帕仔，就反射 主个榮光；主 — 就係聖靈 — 所發出个榮光緊改變𠊎等，使𠊎等成做佢个樣式，越來越有榮光。</verse>
			</chapter>
			<chapter number="4">
				<verse number="1">既然上帝憐憫𠊎等，將這職務交給𠊎等，𠊎等就無失志。</verse>
				<verse number="2">𠊎等拒絕一切毋知見笑毋敢見人个事；𠊎等無行詭詐个事，也無曲解上帝个道理。反轉，在上帝面前，𠊎等使真理公開顯明出來，用自家个行為來啟發逐儕个良心。</verse>
				<verse number="3">就算𠊎等所傳个福音有難了解个所在 ，也只有該兜向滅亡走等去个人正毋了解。</verse>
				<verse number="4">該兜人毋信，係因為這世間个神明使佢等个心眼青盲，害佢等看毋到福音个光；福音所顯出个就係基督个榮光，基督係上帝个真相。</verse>
				<verse number="5">𠊎等毋係傳自家，𠊎等所傳个就係「耶穌基督係主」；為到耶穌个緣故，𠊎等成做你等个僕人。</verse>
				<verse number="6">吩咐「愛有光對烏暗中照出來」个上帝，就係照光𠊎等內心个上帝；佢使𠊎等認識上帝个榮光，顯在耶穌基督个面頂。</verse>
				<verse number="7">總係𠊎等係泥做个缶仔，底背竟然裝等這屬靈个寶貝；這就係顯明，這無比个大能係屬上帝个，毋係屬𠊎等个。</verse>
				<verse number="8">𠊎等堵到各種个困難，總係無被它磧碎；常常疑狐，總係無絕望；</verse>
				<verse number="9">有盡多對敵，總係無受棄絕；被人打橫，總係無死。</verse>
				<verse number="10">𠊎等个身體常常帶等耶穌个死，使耶穌个生命也顯明在𠊎等个身上。</verse>
				<verse number="11">因為，𠊎等還生个時節，為耶穌个緣故常常有死亡个危險，為到使耶穌个生命在𠊎等會朽爛个身上顯明出來。</verse>
				<verse number="12">這就係講，𠊎等常常面對死亡，你等卻得到生命。</verse>
				<verse number="13">聖經講：「𠊎信，所以𠊎宣揚。」照這種信仰个精神，𠊎等也信，所以𠊎等也宣揚。</verse>
				<verse number="14">𠊎等知，使主耶穌復活个上帝也一定會使𠊎等同耶穌共下復活，也帶𠊎等同你等共下到佢个面前。</verse>
				<verse number="15">這一切攏總係為到你等；恁樣，上帝个恩典臨到越多人，就會有越多人獻上佢等个感謝來彰顯上帝个榮光。</verse>
				<verse number="16">因為恁樣，𠊎等無失志。雖然𠊎等外在个身體漸漸敗壞，總係𠊎等內在个生命日日換新。</verse>
				<verse number="17">𠊎等所堵到這暫時小可个痛苦會為𠊎等帶來貴重、無比、永遠个榮光。</verse>
				<verse number="18">𠊎等所注目个毋係看得到个，係看毋到个；因為看得到个係暫時个，看毋到个正係永遠个。</verse>
			</chapter>
			<chapter number="5">
				<verse number="1">𠊎等知，𠊎等所住、在這地上个帳篷若係拆掉，上帝會賜𠊎等天頂个屋，係佢所起、永遠存在个。</verse>
				<verse number="2">𠊎等這下在這位透大氣，盡想愛住天頂个屋，像愛著衫一樣；</verse>
				<verse number="3">著好後，就毋會打赤膊。</verse>
				<verse number="4">𠊎等住在這地上个帳篷肚，像係揹等重擔，透大氣；這毋係講愛脫下地上个身體，係愛著屬天个身體，使會朽爛个被生命吞滅。</verse>
				<verse number="5">上帝親自造就𠊎等來接受這個變化；佢賜聖靈給𠊎等做擔保。</verse>
				<verse number="6">所以，𠊎等一直恁好膽。𠊎等知，住在這身體底背，𠊎等就係離開主為𠊎等準備个住所遠遠。</verse>
				<verse number="7">因為𠊎等行事做人係憑信心，毋係憑所看个。</verse>
				<verse number="8">𠊎等盡好膽，樂意離開這地上个身體，去同主共下住。</verse>
				<verse number="9">最重要个係，無論住在這地上个身體底背，抑係著屬天个身體，𠊎等決心愛俾主歡喜。</verse>
				<verse number="10">因為𠊎等攏總愛企在基督个面前，受佢審判。逐個人愛照本身在世間个行為，係善抑係惡，接受報應。</verse>
				<verse number="11">𠊎等既然知愛樣般敬畏主，就勸話人。上帝完全認識𠊎等；𠊎希望你等也對心內認識𠊎。</verse>
				<verse number="12">𠊎等毋係愛對你等再推薦自家，係愛俾你等有誇口𠊎等个理由，俾你等有話好應看重外表、看輕內心該兜人。</verse>
				<verse number="13">𠊎等若發癲，係為到上帝个緣故；𠊎等若清醒，係為到你等个關係。</verse>
				<verse number="14">因為基督个痛惜催迫𠊎等；𠊎等清楚知，一個人代眾人死，所以眾人攏總死了。</verse>
				<verse number="15">佢代眾人死，愛使該兜生等个人無再為自家生，愛為該代佢等死又復活个基督來生。</verse>
				<verse number="16">所以，𠊎等從今以後毋用人个標準來看人。雖然𠊎等識用人个標準來看基督，總係這下𠊎等無再恁樣做了。</verse>
				<verse number="17">無論麼人，若同基督結連，就係新創造个人；舊个已經過去，全部變做新个了。</verse>
				<verse number="18">這一切攏總係上帝做个；佢通過基督使𠊎等㧯佢和好，又將勸人㧯佢和好个職務賜給𠊎等。</verse>
				<verse number="19">佢喊𠊎等傳个就係：上帝通過基督同人類建立和好个關係 ；佢無愛追究佢等个過犯。佢也將這和好个道理交託𠊎等。</verse>
				<verse number="20">所以，𠊎等做基督个大使，就像上帝通過𠊎等來勸你等一樣。𠊎等代基督求你等：愛㧯上帝和好！</verse>
				<verse number="21">基督係無罪个，總係為到𠊎等，上帝喊佢揹𠊎等个罪，使𠊎等通過佢同上帝有正確个關係。</verse>
			</chapter>
			<chapter number="6">
				<verse number="1">𠊎等係上帝个同工；𠊎等愛勸你等：既然接受上帝个恩典，就毋好使這恩典落空。</verse>
				<verse number="2">因為上帝講： 在接納个時節，𠊎有聽你； 在拯救該日，𠊎有幫助你。 看啊！這下就係接納个時節，今晡日就係拯救个日仔！</verse>
				<verse number="3">𠊎等無愛別人譭謗𠊎等个職份，所以𠊎等也一定毋礙到麼人；</verse>
				<verse number="4">反轉，為到在逐樣事上表明𠊎等係上帝个僕人，𠊎等忍受各種个患難、艱難，㧯困苦。</verse>
				<verse number="5">𠊎等識被人鞭打、坐監，被暴民擾亂；𠊎等辛苦，睡毋得，又肚飢。</verse>
				<verse number="6">𠊎等用純潔、智識、忍耐㧯仁愛，通過聖靈、無假个痛惜、</verse>
				<verse number="7">真理个話，㧯上帝个大能，來表明𠊎等係上帝个僕人。𠊎等用正義做武器來攻擊敵人，也保護自家。</verse>
				<verse number="8">𠊎等受尊敬，也被人侮辱；被人罵，也受稱讚。有人講𠊎等係落仔，其實𠊎等係誠實个；</verse>
				<verse number="9">像係無麼介名，其實人人認識𠊎等；有人講𠊎等已經死掉，總係你等看啊，𠊎等還生生噢。𠊎等識受刑罰，總係無被人㓾死；</verse>
				<verse number="10">識憂傷，總係常常快樂；識欠缺，總係使盡多人富足；像係無半樣，總係樣樣有。</verse>
				<verse number="11">哥林多 个朋友啊，𠊎等對你等直腸直肚大度大量。</verse>
				<verse number="12">毋係𠊎等个心肝狹，係你等个心肝狹。</verse>
				<verse number="13">𠊎像對自家个子女恁樣㧯你等講：𠊎等對你等肚量恁大，共樣，你等對𠊎等也愛大量兜仔！</verse>
				<verse number="14">毋好同毋信个人結連共下；佢等个軛㧯你等个軛無共樣。正義㧯邪惡樣做得合作呢？光明㧯烏暗樣做得共存呢？</verse>
				<verse number="15">基督㧯魔鬼㖠有協調个可能呢？信主个㧯毋信主个有麼介相干呢？</verse>
				<verse number="16">上帝个聖殿㧯偶像有麼介相同呢？永生上帝个聖殿就係𠊎等。像上帝所講： 𠊎愛住在𠊎个子民中間， 在佢等个當中來來去去。 𠊎愛做佢等个上帝； 佢等愛做𠊎个子民。</verse>
				<verse number="17">所以，主講： 你等的確愛離開佢等， 對佢等當中分別出來； 毋好摸無淨浰个東西， 𠊎就會接納你等。</verse>
				<verse number="18">𠊎愛做你等个阿爸； 你等愛做𠊎个子女。 這係全能个主講个。</verse>
			</chapter>
			<chapter number="7">
				<verse number="1">親愛个朋友，既然𠊎等得到這兜應許，𠊎等就應該潔淨自家，除掉一切打垃圾身體㧯心靈个事物，用敬畏上帝个生活來達成完全个聖潔。</verse>
				<verse number="2">請你等愛大量兜仔接納𠊎等。𠊎等無做過對毋起人个事；毋識破壞麼人，也毋識批麼人。</verse>
				<verse number="3">𠊎恁樣講，毋係責備你等。𠊎已經講過，𠊎等係樣般惜你等；𠊎等甘願同你等共生死。</verse>
				<verse number="4">𠊎對你等盡有信心，盡誇獎你等，滿有安慰；在𠊎等一切患難中，𠊎大大快樂。</verse>
				<verse number="5">來到 馬其頓 後，𠊎等還係無好休息。逐所在都有困難，外有相爭，內有著驚。</verse>
				<verse number="6">總係，俾灰心失志个人得到鼓勵个上帝，使𠊎等因為 提多 來到就得到鼓勵。</verse>
				<verse number="7">佢毋單淨人來，還㧯𠊎等講，佢樣般對你等得到鼓勵，還有，你等係樣般想念𠊎，樣般傷心，樣般迫切為𠊎辯駁；這一切攏總使𠊎得到還較大个歡喜。</verse>
				<verse number="8">關係𠊎以前寫給你等个信仔，雖然害你等憂愁，𠊎也無後悔。𠊎知該封信仔害你等憂愁个時，盡毋過意；總係後來就無再後悔，因為𠊎看出你等係暫時憂愁定定。</verse>
				<verse number="9">𠊎這下盡歡喜，毋係因為害你等憂愁，係因為憂愁致到你等悔改。上帝善用你等个憂愁，所以𠊎等所做个無傷害到你等。</verse>
				<verse number="10">上帝所善用个憂愁會改變人心，使人得救；這係永遠毋會後悔个！總係，屬世界个憂愁會害人喪失生命。</verse>
				<verse number="11">你等看，上帝樣般善用你等个憂愁，使你等樣般煞猛，又為自家辯駁，也顯出義个憤怒、驚心、切望、熱心，又刑罰不義！在各方面你等證明自家係清白个。</verse>
				<verse number="12">所以，𠊎雖然寫該封信仔給你等，總係𠊎毋係為做毋著个人寫个，也毋係為受冤枉个人寫个。𠊎个目的係愛在上帝个面前，將你等對𠊎等个熱情表明出來。</verse>
				<verse number="13">因為恁樣，𠊎等已經得到鼓勵。 毋單淨恁樣， 提多 个歡喜也使𠊎等加倍歡喜；因為你等大家幫助佢，使佢快樂。</verse>
				<verse number="14">𠊎頭擺識在佢面前稱讚你等，你等並無使𠊎見笑。𠊎等一旦對你等講實話；共樣，𠊎等對 提多 誇獎你等个話也係實在个。</verse>
				<verse number="15">所以， 提多 一想起你等大家係樣般順服，樣般用恭恭敬敬个態度接待佢，佢對你等个愛心就較深了。</verse>
				<verse number="16">𠊎這下非常歡喜，因為𠊎做得對你等完全放心了！</verse>
			</chapter>
			<chapter number="8">
				<verse number="1">兄弟姊妹啊，𠊎等希望你等知，上帝樣般恩待 馬其頓 个各教會。</verse>
				<verse number="2">佢等堵到患難，受盡嚴重个考驗；總係佢等滿心歡喜，雖然非常窮苦，還係大方樂捐，像係有錢人。</verse>
				<verse number="3">𠊎做得證明，佢等个樂捐係盡所能个，甚至超過佢等个力量。佢等自動自發，</verse>
				<verse number="4">再三懇求𠊎等，俾佢等有份在救濟 耶路撒冷 个聖徒這件善事。</verse>
				<verse number="5">佢等所做个超過𠊎等所希望个。佢等係先將自家獻給主，然後又照上帝个旨意㧯𠊎等𢯭手。</verse>
				<verse number="6">像恁樣，𠊎等鼓勵 提多 繼續協助你等，完成佢所開始个這件善事。</verse>
				<verse number="7">你等所有个，無論係信心、口才、智識、幫助人个熱誠，㧯對𠊎等个愛心 ，全部恁豐盛；𠊎希望你等在這件善事上也愛特別出色。</verse>
				<verse number="8">𠊎毋係對你等下命令，係愛你等知別人樣般熱心幫助人，用恁樣來考驗你等个愛心有實在無。</verse>
				<verse number="9">你等知𠊎等主耶穌基督个恩典：佢本來係富足个，總係為到你等个緣故，佢使自家成做窮苦，目的係愛使你等因為佢个窮苦成做富足。</verse>
				<verse number="10">這件事情，照𠊎看：你等舊年就開始个樂捐，最好目前愛完成。你等毋單淨最先開始進行，也係最先響應。</verse>
				<verse number="11">你等所做个，愛即時做給它完成！你等愛用一開始發動該樣時个熱心，照你等這下所有个，來完成這件事。</verse>
				<verse number="12">你等若真心樂捐，上帝一定會接納；佢愛你等獻你等所有个，毋係你等所無个。</verse>
				<verse number="13">𠊎毋係想愛加重你等个負擔，來減輕別人个負擔。既然你等這下恁富足，就應該幫助該兜窮苦个。到佢等富足，你等有欠缺个時，佢等也會幫助你等。恁樣，雙方都有機會幫助對方。</verse>
				<verse number="14"></verse>
				<verse number="15">像聖經所講： 拈較多个無好賸， 拈較少个也無欠。</verse>
				<verse number="16">感謝上帝，佢使 提多 同𠊎等共樣恁熱心來協助你等！</verse>
				<verse number="17">佢毋單係因為𠊎等个鼓勵，也係因為佢盡熱心，自動愛去你等該位。</verse>
				<verse number="18">𠊎等另外派一個兄弟同佢共下去；這個兄弟在傳福音个工作上盡受各教會个稱讚。</verse>
				<verse number="19">毋單淨恁樣，各教會也選派佢做𠊎等旅途个同伴，共同進行這件善事；恁樣做个目的係愛榮光主个名，也表示樂捐係大家歡喜甘願做个。</verse>
				<verse number="20">𠊎等保管這筆出手大方个樂捐，一直非常細膩，免得惹人加講話；</verse>
				<verse number="21">因為𠊎等決定做善事，毋單淨在主面前恁樣，在人面前也係恁樣。</verse>
				<verse number="22">𠊎等又派另外一個兄弟同佢等共下去。這個兄弟，𠊎等考驗佢好多擺，知佢盡熱心幫助別人。這下，佢因為對你等有信心，盡想愛去幫助你等。</verse>
				<verse number="23">論到 提多 ，佢係𠊎个同伴，㧯𠊎共下協助你等。同佢共下去个另外兩個兄弟係各教會个代表，係基督个榮光。</verse>
				<verse number="24">所以，你等愛在各教會个面前，將你等對佢等个痛惜實行出來，俾各教會知，𠊎等對你等个誇獎係確實个。</verse>
			</chapter>
			<chapter number="9">
				<verse number="1">關係救濟 耶路撒冷 聖徒个事，𠊎毋使寫信仔給你等。</verse>
				<verse number="2">𠊎知你等盡熱心想愛進行，就對 馬其頓 人誇獎你等。𠊎講：「 亞該亞 个信徒舊年就準備囉。」你等个熱心感動盡多人。</verse>
				<verse number="3">這下𠊎派幾個兄弟去，希望你等像𠊎所講个，早兜將捐款準備好勢，使𠊎等在這件事上對你等个稱讚毋會落空。</verse>
				<verse number="4">萬一有 馬其頓 人同𠊎共下去，發現你等還吂準備好，𠊎等會盡見笑，因為𠊎等忒信用你等；毋使𠊎等講，你等當然也會盡見笑！</verse>
				<verse number="5">所以，𠊎認為需要鼓勵這幾個兄弟先去你等該位。你等所答應个捐款愛先收齊，在𠊎去到以前準備好勢；恁樣，做得表示你等係甘心樂意拿出來个，毋係出於勉強。</verse>
				<verse number="6">愛記得噢！少種个少收；多種个多收。</verse>
				<verse number="7">逐儕愛照自家个心意樂捐，毋好毋拌得，也毋使勉強，因為上帝惜甘心樂意奉獻个人。</verse>
				<verse number="8">上帝能將各樣个恩惠豐豐富富賜給你等，使你等毋單淨凡事充足，還有能力去行各樣个善事。</verse>
				<verse number="9">像聖經所講： 佢慷慨救濟窮苦人； 佢个仁義永遠長存。</verse>
				<verse number="10">賜種子給委種个，又賜食物給人食个上帝，一定會將你等所需要个種子賜給你等，又使它長大，使你等結還較多仁義个果子。</verse>
				<verse number="11">佢會使你等樣樣富足，隨時有能力大方幫助人，使多多人因為對𠊎等个手接受到你等个禮物來感謝上帝。</verse>
				<verse number="12">因為你等个供給毋單淨補足該兜信徒个需要，也使多多人越發感謝上帝。</verse>
				<verse number="13">這件慈善个工作證明你等順服基督，對所告白个福音忠心，也對佢等㧯眾人大大方方來分享；因為恁樣，盡多人會歸榮光給上帝。</verse>
				<verse number="14">佢等也會因為上帝將這極大个恩典賜給你等，更加想念你等，常常為你等祈禱。</verse>
				<verse number="15">𠊎等愛感謝上帝，因為佢个恩典講毋盡！</verse>
			</chapter>
			<chapter number="10">
				<verse number="1">𠊎 — 保羅 親自勸話你等。你等認為𠊎同你等共下个時節盡謙和，無在你等中間个時節就盡嚴；這下，𠊎用基督个溫柔㧯慈悲求你等：</verse>
				<verse number="2">𠊎去到个時節，拜託毋好迫𠊎對你等無客氣；該兜批評𠊎等係憑血氣行事个人，𠊎會對佢等毋客氣。</verse>
				<verse number="3">𠊎等雖然生活在世間，總係𠊎等毋係憑血氣戰爭。</verse>
				<verse number="4">因為𠊎等相㓾所用个毋係這世間个武器，係上帝大能个武器，能毀滅堅固个城堡。𠊎等毀滅一切虛假个辯論，</verse>
				<verse number="5">打橫所有興起來阻擋人認識上帝个自高个論說；𠊎等也捉轉逐個人个思想來歸順基督。</verse>
				<verse number="6">等到你等完全順服个時節，𠊎等就愛責罰一切毋順服个人。</verse>
				<verse number="7">你等係看事情个外表定定。若係有人自認係屬基督个，佢應該再想看仔，佢屬基督，𠊎等乜共樣屬基督。</verse>
				<verse number="8">主賜給𠊎等个職權係愛造就你等，毋係愛破壞你等。所以，就算𠊎忒過份誇口這個職權，𠊎也毋會感覺見笑。</verse>
				<verse number="9">你等毋好認為𠊎寫信仔係愛嚇你等。</verse>
				<verse number="10">有人講：「 保羅 寫信仔，話講到恁嚴重恁強；總係，佢本人看起來又恁軟弱，講話恁粗俗！」</verse>
				<verse number="11">講這種話个人愛知，𠊎等無在你等該位个時，在信仔底背樣般講話，去到你等該位个時，也會恁樣行事。</verse>
				<verse number="12">𠊎等當然毋敢同該兜自命不凡个人擺共下，抑係同佢等比。佢等實在真無智識，竟然用自家个標準量自家，拿自家同自家比！</verse>
				<verse number="13">若係𠊎等，𠊎等毋敢誇口過頭，只有在上帝交託𠊎等个工作範圍底背誇口；你等也係在這個範圍底背。</verse>
				<verse number="14">因為𠊎等早就將基督个福音傳給你等，所以你等係在這個範圍底背；既然恁樣，𠊎等就毋算超過範圍。</verse>
				<verse number="15">在𠊎等个範圍以外，該兜別人所完成个工作，𠊎等毋敢誇口。𠊎等只有希望你等个信心緊來緊大，使𠊎等在自家个範圍內越發擴展在你等中間个工作；</verse>
				<verse number="16">恁樣，𠊎等做得將福音傳到你等以外个其他地區去；因為𠊎等無愛拿別人範圍內所完成个工作來誇口。</verse>
				<verse number="17">像聖經所講：「愛誇口个人，就愛誇口主！」</verse>
				<verse number="18">因為受接納个，毋係稱讚自家个人，係主所稱讚个人。</verse>
			</chapter>
			<chapter number="11">
				<verse number="1">𠊎希望你等會忍𠊎小可个戇直；事實上，你等已經恁樣做。</verse>
				<verse number="2">𠊎惜你等到嫉妒个程度，像上帝惜你等一樣；因為你等像貞節个童貞女，𠊎將你等過定給一個老公，就係基督。</verse>
				<verse number="3">𠊎盡驚你等个心受到敗壞，向基督純潔專一个愛心變質掉去；像 夏娃 被蛇用詭計誘惑去一樣。</verse>
				<verse number="4">因為，無論麼人去到，就算佢所傳个耶穌同𠊎等所傳个毋係共儕；或者你等領受到个靈毋係你等頭擺所領受个；或者你等接受到个福音同你等頭擺所接受个無共樣，你等竟然恁忍耐！</verse>
				<verse number="5">𠊎毋相信𠊎有㖠一點比毋上該兜所謂个「超級使徒」！</verse>
				<verse number="6">𠊎可能講話較毋曉得，總係𠊎个智識毋會比別人較差；𠊎對你等所做个各樣事情，已經證明這係事實个。</verse>
				<verse number="7">𠊎傳上帝个福音給你等，毋識對你等討過麼介；𠊎恁樣謙卑自家來提高你等，敢講這係𠊎个過失嗎？</verse>
				<verse number="8">在你等中間工作个時節，係別个教會供給𠊎；𠊎像係偷佢等个工錢來服事你等一樣。</verse>
				<verse number="9">同你等共下个時，無論有麼介需要，𠊎從來毋識求你等个幫助。𠊎所需要个一切，全部係對 馬其頓 來个眾兄弟供給𠊎。以前係恁樣，將來也共樣；𠊎絕對毋會成做你等个重擔！</verse>
				<verse number="10">𠊎敢指等在𠊎心中基督个真理來講，在 亞該亞 地區，𠊎定著會一直恁樣誇口。</verse>
				<verse number="11">𠊎做麼介恁樣講呢？敢係𠊎毋惜你等嗎？上帝知，𠊎盡惜你等！</verse>
				<verse number="12">𠊎這下所做个，還愛繼續做下去，來切斷該兜所謂「使徒」个機會，俾佢等無機會好再誇口，講佢等个工作同𠊎等个完全共樣。</verse>
				<verse number="13">該班人係假使徒；佢等詐意工作，化裝做基督个使徒。</verse>
				<verse number="14">其實，這也無麼介好奇怪，連撒但自家乜會化裝做光明个天使！</verse>
				<verse number="15">所以，若係撒但个部下化裝做仁義个僕人，這也毋係麼介大新聞。佢等个結局一定會照佢等所做个。</verse>
				<verse number="16">𠊎再講：無人應該看𠊎做戇仔；總係，你等若愛看𠊎做戇仔，就愛對待𠊎像對待戇仔一樣，來俾𠊎有多少仔好誇口！</verse>
				<verse number="17">𠊎這下愛講个，毋係主喊𠊎講个；係像戇仔恁樣，自信滿滿講大話。</verse>
				<verse number="18">既然有恁多人拿屬世界个事情來誇口，𠊎乜愛誇口一下。</verse>
				<verse number="19">你等恁聰明，還歡喜忍受該兜戇仔！</verse>
				<verse number="20">有人壓制你等做奴隸，剝削你等，陷害你等，看毋起你等，抑係打你等个嘴角，你等還吞聲忍氣！</verse>
				<verse number="21">𠊎盡見笑講，這種事情𠊎等就做毋到囉！ 總係，若有人敢誇口麼介，𠊎戇直對你等講：𠊎乜敢！</verse>
				<verse number="22">佢等係 希伯來 人嗎？𠊎乜係。佢等係 以色列 人嗎？𠊎乜係。佢等係 亞伯拉罕 个子孫嗎？𠊎乜係。</verse>
				<verse number="23">佢等係基督个僕人嗎？講一句狂話，𠊎還較係！𠊎還較辛苦工作，坐監還較多擺，還較常被人鞭打，冒還較多死个危險。</verse>
				<verse number="24">𠊎識被 猶太 人鞭打五擺，逐擺打三十九下；</verse>
				<verse number="25">被 羅馬 人用棍仔打過三擺，被人用石頭㧹一擺，堵到三擺海難，有一擺在深海一日一夜險消掉。</verse>
				<verse number="26">在恁多擺旅行中，𠊎經歷過江河个危險，強盜个危險，對 猶太 人㧯外邦人來个危險，城市肚个危險，曠野个危險，大海个危險，㧯假兄弟姊妹个危險。</verse>
				<verse number="27">𠊎个工作勞碌又艱苦，常常睡毋得，又飢又渴，無好食，無好住，無好著。</verse>
				<verse number="28">毋單淨恁樣，𠊎還愛為各教會个事掛慮，像重擔一樣逐日磧等𠊎。</verse>
				<verse number="29">有麼人軟弱，𠊎毋會感覺軟弱呢？有麼人跌倒犯罪，𠊎毋會急到𤏸火呢？</verse>
				<verse number="30">若係無誇口做毋得，𠊎就愛誇口該兜顯明𠊎自家軟弱个事情。</verse>
				<verse number="31">應該永遠受稱頌个、𠊎等主耶穌个阿爸上帝，佢知𠊎無講花撩。</verse>
				<verse number="32">𠊎在 大馬士革 个時， 亞哩達 王手下个總督派警衛掌等城門，想愛捉𠊎。</verse>
				<verse number="33">總係，有人用大籃仔將𠊎對城牆頂个窗門縋下來，使𠊎脫離佢个手。</verse>
			</chapter>
			<chapter number="12">
				<verse number="1">雖然自誇無麼介利益，總係𠊎誇口還係無奈何个；𠊎的確愛講起主賜給𠊎个異象㧯啟示。</verse>
				<verse number="2">𠊎知有一個屬基督个人，十四年前，佢受提到天頂个最高一層去 (𠊎毋知佢係肉身上去，抑係在異象中上去，只有上帝知)。</verse>
				<verse number="3">𠊎再講一擺，𠊎確實知這個人受提到樂園 (𠊎毋知佢係肉身上去，抑係在異象中上去，只有上帝知)。在該位，佢聽到無法度表達个話語、人做毋得說明个事情。</verse>
				<verse number="4"></verse>
				<verse number="5">論到這個人，𠊎愛誇口；總係，關係𠊎自家，除了𠊎个軟弱以外，𠊎就無麼介好誇口。</verse>
				<verse number="6">其實，𠊎就係誇口，也毋算係憨蚩，因為𠊎所講个係事實。總係，𠊎無愛誇口，免得人將𠊎看到忒高，超過佢在𠊎身上所看到抑係聽到个。</verse>
				<verse number="7">為到毋愛使𠊎因為得到恁多特別个啟示就奢鼻，有一枝竻仔 刺等𠊎个身體，像係被撒但个使者纏身一樣，使𠊎毋敢驕傲。</verse>
				<verse number="8">為到這件事，𠊎識三擺求主將這竻仔挷掉，</verse>
				<verse number="9">總係主應𠊎講：「𠊎个恩典罅你用；因為𠊎个能力係在人軟弱个時完全顯明出來。」因為恁樣，𠊎特別歡喜誇口𠊎个軟弱，好俾基督个能力臨到𠊎身上。</verse>
				<verse number="10">為到基督个緣故，𠊎歡喜忍受軟弱、侮辱、困苦、艱難㧯迫害；因為𠊎麼介時節軟弱，麼介時節就堅強。</verse>
				<verse number="11">𠊎本來應該得到你等个稱讚正著，總係你等迫𠊎做戇仔。就算𠊎無麼介了不起，𠊎還係無輸給該兜所謂个「超級使徒」。</verse>
				<verse number="12">在你等當中，𠊎已經用最大个忍耐，通過神蹟奇事㧯大能，將𠊎使徒个身份證明出來。</verse>
				<verse number="13">除了𠊎毋識成做你等个重擔以外，請問，你等有㖠點輸給別个教會呢？因為𠊎對你等恁無公平，請原諒𠊎噢！</verse>
				<verse number="14">這下𠊎準備愛第三擺去訪問你等。𠊎毋會成做你等个重擔；因為𠊎所愛个係你等，毋係你等个金錢。細人仔本來就毋使奉養爺𡟓，爺𡟓正愛養育細人仔。</verse>
				<verse number="15">為到你等个靈魂，𠊎甘願付出𠊎所有个一切，甚至𠊎个生命。敢講𠊎越惜你等，得到你等个愛惜就越少係麼？</verse>
				<verse number="16">恁樣，你等愛承認，𠊎無成做你等个重擔；總係，還係有人講𠊎係用詭詐个手段來拐你等。</verse>
				<verse number="17">𠊎派去你等該位个人，𠊎敢識利用佢等來批你等麼介麼？</verse>
				<verse number="18">𠊎鼓勵 提多 去訪問你等，還派一個兄弟共下去。 提多 識批你等麼介麼？佢㧯𠊎所做个，動機敢毋係共樣嗎？𠊎等个行事敢無共樣嗎？</verse>
				<verse number="19">你等一直恅到𠊎等就係恁樣為自家辯護嗎？事實毋係恁樣！在上帝个面前，𠊎等係講基督愛𠊎等講个。親愛个朋友啊，𠊎等所做个一切無一樣毋係為到愛造就你等！</verse>
				<verse number="20">𠊎驚怕𠊎去到个時，發現你等無符合𠊎所希望个，你等看到𠊎也無符合你等所希望个。𠊎也驚看到相爭、嫉妒、大發譴、自私、譭謗、講人个是非、自高自大，㧯混亂。</verse>
				<verse number="21">𠊎也驚，下一擺去个時，𠊎个上帝會使𠊎在你等面前連頭那都擎毋起來；𠊎會傷心流目汁，因為盡多以前犯罪个人還係無悔改佢等所行个污穢、淫亂㧯放蕩。</verse>
			</chapter>
			<chapter number="13">
				<verse number="1">這係𠊎第三擺去訪問你等。聖經識講：「任何个控告一定愛有兩三個人做證，正做得成立。」</verse>
				<verse number="2">對該兜頭擺就犯了罪个，㧯其他个人，𠊎在第二擺訪問个時已經警告你等，這下無在你等該位，𠊎愛再一擺警告你等，講：「下一擺𠊎去到个時節，絕對毋饒佢等。」</verse>
				<verse number="3">你等一定會有基督通過𠊎講話个證據。基督對待你等毋係軟弱个；顛倒，佢在你等當中係大有能力个。</verse>
				<verse number="4">雖然佢在軟弱中被人釘死在十字架頂，總係，因為上帝个大能，佢這下還係生等。共樣，𠊎等同佢結連也係軟弱个，總係為到你等个緣故，𠊎等愛靠上帝个大能同佢共下生等。</verse>
				<verse number="5">你等愛考驗自家，看你等所過个係信心个生活無；你等愛省察自家！你等敢毋知在你等底背个係耶穌基督嗎？除非你等係企毋住个人。</verse>
				<verse number="6">𠊎希望你等會知，𠊎等毋係企毋住个人。</verse>
				<verse number="7">𠊎等求上帝莫俾你等做麼介壞事。目的毋係愛顯明𠊎等个成功，係愛你等行事正直；𠊎等就係被人看做係失敗个也無相干。</verse>
				<verse number="8">𠊎等絕對不能悖逆真理來行事，只有為到真理來打拚。</verse>
				<verse number="9">𠊎等軟弱，你等剛強，𠊎等也歡喜。𠊎等个祈禱就係愛你等成做完全个人。</verse>
				<verse number="10">因為恁樣，無在你等該位个時，𠊎正寫這封信仔，希望𠊎去到你等該位个時，毋使用主給𠊎个職權來嚴嚴對待你等。主給𠊎職權係愛造就你等，毋係愛破壞你等。</verse>
				<verse number="11">總講，兄弟姊妹啊，你等愛歡歡喜喜。愛做完全人。你等愛接受𠊎个勸話；大家愛同心，彼此和睦。恁樣，慈愛㧯賜平安个上帝一定會㧯你等同在！</verse>
				<verse number="12">你等愛聖潔相唚彼此請安！ 所有个聖徒全部對你等請安！</verse>
				<verse number="13">願主耶穌基督个恩典、上帝个慈愛、聖靈个相通，㧯你等大家同在！</verse>
			</chapter>
		</book>
		<book number="48">
			<chapter number="1">
				<verse number="1">𠊎係使徒 保羅 。𠊎做使徒毋係對人个揀選，也毋係人所指派个，係耶穌基督㧯使佢對死復活个阿爸上帝所指派个。</verse>
				<verse number="2">𠊎㧯同𠊎共下个兄弟姊妹寫信仔給 加拉太 个各教會。</verse>
				<verse number="3">願𠊎等个阿爸上帝㧯主耶穌基督賜恩典、平安給你等！</verse>
				<verse number="4">基督為到愛救𠊎等脫離這邪惡个時代，遵從𠊎等阿爸上帝个旨意，識為𠊎等个罪犧牲自家。</verse>
				<verse number="5">願榮光歸給上帝，直到世世代代！阿愐。</verse>
				<verse number="6">𠊎盡著驚！你等樣會恁遽就離開通過基督个恩典呼召你等个上帝，去跈別个福音！</verse>
				<verse number="7">其實，該並毋係福音。𠊎恁樣講，因為有人來攪亂你等，想愛改變基督个福音。</verse>
				<verse number="8">其實，就算係𠊎等，抑係天頂來个天使，若係對你等傳別个福音，同𠊎等頭擺所傳給你等个無共樣，佢就應當受咒詛！</verse>
				<verse number="9">𠊎等識講過，這下𠊎再講：無論麼人，若係對你等傳別个福音，同你等頭擺所領受个無共樣，佢應當受咒詛！</verse>
				<verse number="10">𠊎恁樣講，敢係愛被人稱讚嗎？毋係！𠊎所愛个係上帝个稱讚！𠊎敢係愛得人个歡喜嗎？𠊎若係還想愛得人个歡喜，𠊎就毋係基督个僕人了。</verse>
				<verse number="11">兄弟姊妹啊，𠊎愛你等知，𠊎所傳个福音毋係人想出來个。</verse>
				<verse number="12">這個福音，𠊎毋係對人領受个，也毋係有麼人教𠊎个，係耶穌基督親自啟示𠊎个。</verse>
				<verse number="13">𠊎頭擺信 猶太 教个時所做个，你等識聽過。𠊎迫害上帝个教會到盡厲害，盡所能愛消滅教會。</verse>
				<verse number="14">共輩个 猶太 人當中，𠊎比大部份人較認真遵行 猶太 教个規矩，較熱心遵守𠊎祖先个傳統。</verse>
				<verse number="15">總係，上帝施恩給𠊎，在𠊎出世以前，佢已經揀選𠊎，呼召𠊎來事奉佢。</verse>
				<verse number="16">當佢樂意將佢个孻仔啟示給𠊎，喊𠊎在外邦人中間傳關係基督个福音，該樣時，𠊎並無去請教麼人，</verse>
				<verse number="17">也無去 耶路撒冷 見該兜比𠊎先做使徒个人，反轉黏時去 阿拉伯 ，然後再轉去 大馬士革 。</verse>
				<verse number="18">三年後，𠊎正去 耶路撒冷 見 彼得 ，同佢共下住十五日。</verse>
				<verse number="19">𠊎無看到別个使徒，只有主个老弟 雅各 。</verse>
				<verse number="20">𠊎所寫个係真實个；在上帝面前，𠊎毋敢講花撩。</verse>
				<verse number="21">後來，𠊎去到 敘利亞 㧯 基利家 个一帶。</verse>
				<verse number="22">該時， 猶太 省各教會个基督徒全部毋識𠊎。</verse>
				<verse number="23">佢等單淨聽講：「該頭擺迫害𠊎等个人，這下反轉傳佢過去想愛消滅个信仰！」</verse>
				<verse number="24">恁樣，佢等就因為𠊎个緣故頌讚上帝！</verse>
			</chapter>
			<chapter number="2">
				<verse number="1">十四年後，𠊎㧯 巴拿巴 又轉去 耶路撒冷 ，並帶等 提多 共下去；</verse>
				<verse number="2">𠊎倒轉去 耶路撒冷 ，係照主个啟示。𠊎私下去見該兜有名望个領袖，對佢等說明𠊎在外邦人中間所傳个福音；因為𠊎無愛𠊎先前抑係這下煞猛做个成做空空。</verse>
				<verse number="3">同𠊎共下去个 提多 ，雖然係 希臘 人，也無人勉強佢接受割禮；</verse>
				<verse number="4">喊佢接受割禮个，係該兜假做兄弟、偷偷加入教會个人。該兜人像偵探一樣偷入來，愛探𠊎等信基督耶穌所得到个自由；佢等个目的係愛喊𠊎等做奴隸。</verse>
				<verse number="5">對該班人，𠊎等從來毋識讓步；𠊎等恁樣做，係愛為你等保存福音个真理。</verse>
				<verse number="6">論到該兜被人看做有名望个領袖 (佢等个地位高低對𠊎並無爭差，因為上帝毋係憑外表來判斷人)，𠊎係講，該兜有名望个人並無喊𠊎接受麼介新个指示；</verse>
				<verse number="7">顛倒，佢等看出來：上帝將傳福音給外邦人个任務交給𠊎，就像佢將傳福音給 猶太 人个任務交給 彼得 一樣。</verse>
				<verse number="8">因為，上帝用佢个權能使𠊎成做外邦人个使徒，就像佢使 彼得 成做 猶太 人个使徒一樣。</verse>
				<verse number="9">雅各 、 彼得 、 約翰 ，這三個有名望个教會石柱，既然知上帝將這特別个使命交給𠊎，就同𠊎㧯 巴拿巴 扼手，表示合作；大家同意： 巴拿巴 㧯𠊎應該去外邦人中間做工，佢等在 猶太 人中間工作。</verse>
				<verse number="10">佢等要求𠊎等个只有一項，就係關心 耶路撒冷 信徒中該兜窮苦人；這本來就係𠊎一旦熱心所做个事。</verse>
				<verse number="11">後來， 彼得 來到 安提阿 ；因為佢有明顯个毋著，𠊎就當眾責備佢。</verse>
				<verse number="12">事情係恁樣：在 雅各 所派來个人吂到以前， 彼得 同外邦信徒共下食飯；總係該兜人一到，佢就閃走，假做無同佢等共下食飯，因為佢驚該兜主張外邦人愛接受割禮个人。</verse>
				<verse number="13">其他个 猶太 信徒也跈等 彼得 做樣仔，像無原則个人；甚至連 巴拿巴 也受佢等个影響做假。</verse>
				<verse number="14">𠊎一看到佢等無照福音个真理行正路，就當眾對 彼得 講：「你係 猶太 人，總係你个做人像外邦人，毋像 猶太 人。恁樣，你樣般做得勉強外邦人學 猶太 人呢？」</verse>
				<verse number="15">無毋著，𠊎這兜人出世就係 猶太 人，毋係稱做「外邦个罪人」。</verse>
				<verse number="16">總係，𠊎等知，上帝使人同佢有正確个關係，稱做義人，係通過信耶穌基督 ，毋係靠遵行 摩西 个法律。𠊎等也信了基督耶穌，係愛通過信基督 被上帝稱做義人，毋係靠遵行法律；因為無人做得靠遵行法律來被上帝稱做義人。</verse>
				<verse number="17">恁樣，𠊎這兜追求因為信基督來被上帝稱做義个人，結果若同外邦人共樣還係罪人，這敢毋係講基督害𠊎等犯罪嗎？絕對毋係！</verse>
				<verse number="18">因為，𠊎若重建自家所拆掉个，就證明𠊎係違犯法律个人。</verse>
				<verse number="19">對法律來講，𠊎係被法律處死个人；恁樣，𠊎就做得為上帝來生。𠊎已經同基督共下釘死在十字架頂，</verse>
				<verse number="20">所以，這下生等个毋係𠊎自家，係基督生在𠊎底背。𠊎這下在肉身个生命係通過信上帝个孻仔來生个；佢惜𠊎，為𠊎捨掉生命。</verse>
				<verse number="21">𠊎毋拒絕上帝个恩典；若係人做得通過法律來同上帝有正確个關係，基督就係白死了！</verse>
			</chapter>
			<chapter number="3">
				<verse number="1">戇 加拉太 人啊！係麼人迷惑你等啊？耶穌基督被人釘死在十字架頂个事，敢毋係像一幅圖畫，明明在你等个目珠前嗎？</verse>
				<verse number="2">𠊎只愛問你等一件事：你等接受上帝个靈係因為遵行法律，抑係通過聽信福音啊？</verse>
				<verse number="3">你等樣會恁戇啊？你等既然通過上帝个靈來開始，樣般這下想愛靠自家个能力去完成呢？</verse>
				<verse number="4">你等所經歷个一切攏總無採工係麼？敢係空空！</verse>
				<verse number="5">上帝賜你等聖靈，又在你等中間行各種个神蹟，係因為你等遵行法律，抑係因為你等聽信福音啊？</verse>
				<verse number="6">像聖經論 亞伯拉罕 个時講：「佢信上帝，因為佢个信，上帝就算佢做義人。」</verse>
				<verse number="7">恁樣，你等愛知，有信心个人正係 亞伯拉罕 个子孫。</verse>
				<verse number="8">聖經預先看到，上帝愛使外邦人因為信來同佢有正確个關係，所以早就傳這福音給 亞伯拉罕 ，講：「萬民攏總會通過你得到上帝个賜福！」</verse>
				<verse number="9">亞伯拉罕 因為信就得到福氣；恁樣，一切信个人也愛同佢共下得到福氣！</verse>
				<verse number="10">用遵行法律做倚靠个人全部係生在咒詛之下；因為聖經講：「法律書所規定个每一項事，無一直遵行个人，就愛受上帝咒詛。」</verse>
				<verse number="11">事實上，無人能靠遵行法律在上帝面前被佢稱做義人；因為聖經講：「通過信被上帝稱做義个人一定會得到生命 。」</verse>
				<verse number="12">總係，法律个根據並毋係信；顛倒，聖經恁樣講：「遵守法律命令个人，會因為法律得到生命。」</verse>
				<verse number="13">基督已經為𠊎等擔當咒詛，用恁樣來救贖𠊎等脫離法律个咒詛；因為聖經講：「所有被人吊死在樹仔頂高个人，全部受上帝个咒詛。」</verse>
				<verse number="14">基督恁樣做个目的係愛使上帝所應許賜給 亞伯拉罕 个福氣，通過基督耶穌來賜給外邦人；所以，𠊎等正做得通過信來領受上帝所應許个聖靈。</verse>
				<verse number="15">兄弟姊妹啊，𠊎用日常生活个事舉例來講：兩個人同意一件事，又打契約，就無人做得違約抑係加減麼介。</verse>
				<verse number="16">共樣，上帝已經對 亞伯拉罕 㧯佢个子孫立了應許。聖經並毋係用「對子子孫孫」來指當多人；係講「對你个子孫」，單單指一個人，就係基督。</verse>
				<verse number="17">𠊎个意思係講：上帝立了契約，又答應愛守這個契約。四百三十年後正出現个法律做毋得破壞這個契約，來廢掉上帝个應許。</verse>
				<verse number="18">因為上帝所賜个產業若係用法律做根據，就毋係照應許了；總係，上帝施恩賜產業給 亞伯拉罕 係照佢个應許。</verse>
				<verse number="19">恁樣，法律个目的係麼介呢？法律係為到指出麼介係過犯來設个，直到該應許給 亞伯拉罕 个「子孫」來到就結束。法律係通過天使，透過一個中間人來頒佈个。</verse>
				<verse number="20">總係，單方面个事就毋使中間人；上帝个應許係單方面个事 。</verse>
				<verse number="21">恁樣來講，法律係反對上帝个應許嗎？絕對毋係！若係法律个頒佈能為人類帶來生命，人就做得靠法律來同上帝有正確个關係了。</verse>
				<verse number="22">總係聖經講，全世界攏總在罪个權勢之下；因為恁樣，上帝愛用耶穌基督个信實 做領受應許个基礎；這應許係賜給所有相信个人。</verse>
				<verse number="23">總係，「信」个時代吂到以前，法律係掌管𠊎等个，像掌犯人一樣，直到「信」顯明出來該時。</verse>
				<verse number="24">所以，法律係做𠊎等个監護人，直到基督來到 ，恁樣，𠊎等就因為「信」來被上帝稱做義人。</verse>
				<verse number="25">既然這下係「信」个時代，𠊎等就無再受法律个監護了。</verse>
				<verse number="26">你等大家全部係通過信基督耶穌來成做上帝个子女 。</verse>
				<verse number="27">你等領洗禮歸入基督，著上基督就像著衫一樣。</verse>
				<verse number="28">無分 猶太 人抑係外邦人，奴隸抑係自由人，男人抑係女人，在基督耶穌个生命底背，你等全部成做一體了。</verse>
				<verse number="29">你等若係屬基督，你等就係 亞伯拉罕 个後代了，會領受上帝所應許个產業。</verse>
			</chapter>
			<chapter number="4">
				<verse number="1">還有，愛繼承阿爸產業个孻仔，雖然所有个產業全部係佢个，總係還做細人仔个時節，佢㧯奴僕無麼介分別。</verse>
				<verse number="2">在佢還細个時節，有人照顧佢，代佢管理家業，一直等到厥爸為佢所定个日仔來到。</verse>
				<verse number="3">共樣，𠊎等个靈性還像細人仔个時節，也係被宇宙間所謂星宿个神靈 支配做奴才。</verse>
				<verse number="4">總係，時機成熟个時，上帝就差派自家个孻仔，對女人來出世，又生活在法律之下，</verse>
				<verse number="5">目的係愛救贖生活在法律之下个人，使𠊎等有好成做上帝个子女。</verse>
				<verse number="6">為到愛證明 你等係佢个子女，上帝就差派佢个孻仔个靈入𠊎等个心，呼喊：「阿爸！𠊎个爺！」</verse>
				<verse number="7">所以，從今以後，你就毋係奴僕了，係孻仔；既然係孻仔，上帝就俾你做繼承人。</verse>
				<verse number="8">以前你等毋識上帝个時，係被該兜毋係神个神明做奴才。</verse>
				<verse number="9">這下你等已經認識上帝 (事實上係被上帝認識)，樣又倒轉去尋該兜無能力㧯無路用个星宿个神靈 呢？樣愛重新去做佢等个奴才呢？</verse>
				<verse number="10">你等還將該兜日、月、節期，㧯年份个規定守到死死！</verse>
				<verse number="11">𠊎為你等實在憂愁，盡驚𠊎頭擺在你等中間所做个全部落空了。</verse>
				<verse number="12">兄弟姊妹啊，𠊎求你等，愛將心比心，像𠊎認同你等一樣。以前，你等毋識做過對毋起𠊎个事。</verse>
				<verse number="13">你等還記得嗎？𠊎頭一擺去傳福音給你等，係因為𠊎發病所造成个機會。</verse>
				<verse number="14">雖然𠊎个病使你等受盡大个考驗，總係你等無看輕𠊎，也無拒絕𠊎。顛倒，你等接待𠊎，像接待上帝个天使，像接待基督耶穌一樣。</verse>
				<verse number="15">該時你等恁歡喜！總係這下呢？𠊎敢講，該時，若係有法度，就係將自家个目珠挖給𠊎，你等乜願意。</verse>
				<verse number="16">這下𠊎㧯你等講真理，反轉卻成做你等个對敵係麼？</verse>
				<verse number="17">該兜人對你等恁熱心，毋係麼介好心術。佢等个目的係愛切斷你等㧯𠊎个關係，使你等正會熱心對待佢等。</verse>
				<verse number="18">在善事上熱心本來係好个，總係毋單淨𠊎同你等共下个時正恁樣。</verse>
				<verse number="19">𠊎親愛个子女啊，𠊎為你等再一擺像阿姆忍受生產个痛苦，直到基督在你等个生命中成形。</verse>
				<verse number="20">這下，𠊎若係同你等共下，毋知會有幾好噢！𠊎㧯你等講話个口氣就毋使像恁樣。為到你等，𠊎个心實在無葛無煞！</verse>
				<verse number="21">該兜想愛生活在法律之下个人，𠊎問你等一個問題：你等無聽過 摩西 个法律嗎？</verse>
				<verse number="22">法律書記載講， 亞伯拉罕 有兩個孻仔，一個係使女𫱔个，一個係自由个婦人家𫱔个。</verse>
				<verse number="23">使女𫱔个係照人个意思來𫱔个；自由个婦人家𫱔个係對上帝个應許來个。</verse>
				<verse number="24">這做得看做一個比喻：該兩個婦人家係代表兩種个契約。其中一個約係對 西奈 山來个，所𫱔个就愛做奴隸；這就係 夏甲 。</verse>
				<verse number="25">夏甲 係代表在 阿拉伯 个 西奈 山 ，可比今晡日个 耶路撒冷 ；姖㧯姖个子女所過个係奴隸个生活。</verse>
				<verse number="26">總係，在天頂个 耶路撒冷 係自由个；姖正係𠊎等个阿姆。</verse>
				<verse number="27">因為聖經記載講： 無懷胎、無𫱔子个𡜵娘人啊， 你愛歡喜！ 吂識經歷生產个痛苦个， 你愛大聲歡呼！ 因為受冷落个𡜵娘人 比該同老公共下生活个， 會有較多个子女！</verse>
				<verse number="28">兄弟姊妹啊，像 以撒 共樣，你等係對上帝个應許來成做上帝个子女。</verse>
				<verse number="29">當時，該照人个意思𫱔个，迫害聖靈所𫱔个；這下也係恁樣。</verse>
				<verse number="30">總係聖經樣般講呢？聖經講：「將使女㧯厥孻仔逐出去，因為使女个孻仔做毋得同自由个婦人家所𫱔个孻仔共下繼承產業。」</verse>
				<verse number="31">總講，兄弟姊妹啊，𠊎等毋係使女个子女；𠊎等係自由个婦人家所𫱔个。</verse>
			</chapter>
			<chapter number="5">
				<verse number="1">為到愛使𠊎等得到自由，基督已經釋放𠊎等了。所以，你等愛企在，毋好俾奴隸个軛再控制你等！</verse>
				<verse number="2">𠊎 — 保羅 正經㧯你等講，若係你等接受割禮，基督對你等就無麼介幫助。</verse>
				<verse number="3">𠊎再一擺警告逐個接受割禮个人，佢一定愛遵行全部个法律！</verse>
				<verse number="4">你等想愛靠遵行法律來同上帝有正確關係个人，就係切斷同基督个關係，失落上帝个恩典。</verse>
				<verse number="5">論到𠊎等，𠊎等靠聖靈个力量，通過𠊎等个信心，迫切盼望上帝會使𠊎等同佢有正確个關係。</verse>
				<verse number="6">因為，同基督耶穌結連个時節，有受割禮抑係無受割禮攏總無麼介關係；重要个只有一項，就係用愛心个行動表現出來个信心。</verse>
				<verse number="7">你等一旦走到盡好！麼人攔等你等，害你等毋順從真理呢？</verse>
				<verse number="8">這種勸話當然毋係對該呼召你等个上帝來个。</verse>
				<verse number="9">俗語講：「一些仔發酵就使歸團麵發起來。」</verse>
				<verse number="10">𠊎還係相信你等；因為𠊎等攏總係同主結連个人，𠊎確信你等个看法應當毋會同𠊎个有麼介爭差。總係，該擾亂你等个人，無論佢係麼人，定著會被上帝責罰！</verse>
				<verse number="11">兄弟姊妹啊，𠊎若係繼續傳割禮，做麼介還被人迫害呢？𠊎若正經傳割禮，𠊎所宣揚基督个十字架就毋會礙到佢等了！</verse>
				<verse number="12">𠊎真希望該兜攪亂你等个人自家去閹掉！</verse>
				<verse number="13">兄弟姊妹啊，上帝選召你等，係愛你等成做自由人。總係做毋得用這自由做放縱情慾个藉口，反轉愛用愛心互相服事。</verse>
				<verse number="14">因為全部法律攏總包含在「惜鄰舍像惜自家」這條命令底背。</verse>
				<verse number="15">愛細膩噢！你等若係像禽獸恁樣咬來咬去，你等大家一定會互相消滅！</verse>
				<verse number="16">𠊎愛強調：你等愛順從聖靈个帶領，就毋會滿足自家肉體个情慾。</verse>
				<verse number="17">因為肉體个情慾同聖靈彼此對立，互相攻擊，使你等無法度做你等想愛做个。</verse>
				<verse number="18">總係，若係你等被聖靈帶領，你等就毋使受法律个約束了。</verse>
				<verse number="19">情慾个事係盡明顯个，表現在淫亂、垃圾、下流、</verse>
				<verse number="20">拜偶像、行邪術、結冤仇、相爭、怨恨、發譴、自私、分派、結黨、</verse>
				<verse number="21">嫉妒、酒醉、癲狂宴樂，㧯其他這類个事。𠊎以前識警告你等，這下再警告你等：做這種事个人，一定毋會成做上帝國个子民！</verse>
				<verse number="22">總係聖靈所結个果子就係：仁愛、喜樂、和平、忍耐、恩慈、良善、信實、</verse>
				<verse number="23">溫柔，㧯節制。這兜事法律毋會禁止。</verse>
				<verse number="24">所有屬基督耶穌个人，已經將佢等个肉體，連肉體个一切邪情㧯私慾，攏總釘死在十字架頂了。</verse>
				<verse number="25">既然聖靈賜𠊎等新生命，𠊎等就應該順從佢个帶領來行事。</verse>
				<verse number="26">𠊎等毋好驕傲，毋好惹對方發譴，抑係互相嫉妒。</verse>
			</chapter>
			<chapter number="6">
				<verse number="1">兄弟姊妹啊，若係有人一時做毋著事，你等屬靈个人就愛用溫和个方法來挽回佢。你等自家也愛細膩，驚怕也受誘惑。</verse>
				<verse number="2">愛分擔重擔，恁樣就係遵行基督个命令。</verse>
				<verse number="3">自認有才調，事實上無半撇个人，佢係騙自家定定。</verse>
				<verse number="4">逐儕應該反省本身个行為；若係有好行為，佢做得為自家來感覺光榮，總係無需要同別人个成就比較。</verse>
				<verse number="5">因為逐儕愛㧡自家个擔頭。</verse>
				<verse number="6">在基督个真道上接受教導个人，應該愛供給教佢个先生，同佢分享一切个好東西。</verse>
				<verse number="7">你等毋好騙自家；無人能騙上帝。人種麼介，就會收麼介。</verse>
				<verse number="8">為到滿足自家个情慾來委種个，佢就會對情慾收成滅亡；為到愛得到聖靈个歡喜來委種个，佢就會對聖靈收成永遠个生命。</verse>
				<verse number="9">𠊎等行善，毋好失志；若無灰心，時間一到，就會有收成。</verse>
				<verse number="10">所以，無論麼介時節，一有機會就愛為眾人行善，對該兜在信仰上同屬一家个人還較愛恁樣。</verse>
				<verse number="11">你等看，這兜大隻个字係𠊎親筆為你等寫个！</verse>
				<verse number="12">該兜盡好用外表个事情來展㧯誇口，就係迫你等接受割禮个人。佢等恁樣做，惟一个原因就係驚為到基督个十字架受迫害。</verse>
				<verse number="13">事實上，該兜接受割禮个人，連佢等自家乜無遵守法律；佢等迫你等受割禮，勉強你等降服外表个儀式，目的係愛用恁樣來做佢等个誇口。</verse>
				<verse number="14">若係𠊎，𠊎一定無誇口別个，𠊎只有誇口𠊎等主耶穌基督个十字架；因為通過這十字架 ，對𠊎个觀點來看，世界已經釘死在十字架頂；對這世界來講，𠊎也已經釘死在十字架頂了。</verse>
				<verse number="15">受割禮抑係無受割禮攏總無麼介關係；重要个係𠊎等愛成做新創造个人。</verse>
				<verse number="16">願一切遵照這原則个人，㧯所有屬上帝个真 以色列 民，全部得到平安㧯憐憫！</verse>
				<verse number="17">從今以後，毋好再加添𠊎个麻煩；因為𠊎身上个傷跡已經證明𠊎係耶穌个奴僕。</verse>
				<verse number="18">兄弟姊妹啊，願𠊎等主耶穌基督个恩典常在你等心內！阿愐。</verse>
			</chapter>
		</book>
		<book number="49">
			<chapter number="1">
				<verse number="1">𠊎係 保羅 ；𠊎奉上帝个旨意做基督耶穌个使徒。𠊎寫信仔給 以弗所 地方 該兜在基督耶穌底背忠心个聖徒：</verse>
				<verse number="2">願𠊎等个阿爸上帝㧯主耶穌基督賜恩典、平安給你等！</verse>
				<verse number="3">頌讚歸給𠊎等主耶穌基督个阿爸上帝！因為佢通過基督將天頂各樣屬靈个福氣賜給𠊎等。</verse>
				<verse number="4">創造世界以前，佢已經通過基督揀選𠊎等，使𠊎等在佢面前成做聖潔、無好嫌个人。</verse>
				<verse number="5">因為上帝痛惜𠊎等，佢預定𠊎等通過耶穌基督來歸屬佢，做佢个子女；這係佢所歡喜个，係佢个旨意。</verse>
				<verse number="6">𠊎等來頌讚上帝這榮耀个恩典，因為佢將佢所惜个孻仔白白賜給𠊎等！</verse>
				<verse number="7">因為基督為𠊎等流血來死，𠊎等得到自由，罪得到赦免。上帝个恩典係樣般豐富啊！</verse>
				<verse number="8">佢係充充足足將這恩典賜給𠊎等！ 上帝用聰明智慧</verse>
				<verse number="9">完成佢个旨意，又使𠊎等知佢已經決定愛通過基督來完成个奧秘。</verse>
				<verse number="10">上帝在時機成熟个時，所愛完成這奧秘个計劃就係：使天頂㧯地上一切受造个攏總歸屬基督，基督做佢等个頭。</verse>
				<verse number="11">宇宙萬物全部係照上帝个計劃㧯決定來完成。上帝照佢早就決定个旨意，通過基督揀選𠊎等做佢个子民。</verse>
				<verse number="12">佢个旨意係愛俾𠊎這兜先仰望基督个人頌讚佢个榮耀！</verse>
				<verse number="13">共樣，你等也有成做上帝个子民。你等聽到真理个道，就係聽到該使你等得救个福音个時，你等相信基督，上帝就將佢所應許个聖靈賜給你等，做你等歸屬佢个印記。</verse>
				<verse number="14">聖靈保證𠊎等會承受上帝所應許个產業，直到上帝將完全个自由賜給屬佢个人。𠊎等應當頌讚佢个榮耀！</verse>
				<verse number="15">因為恁樣，自從𠊎聽到你等對主耶穌盡有信心，對眾聖徒盡有愛心，</verse>
				<verse number="16">𠊎就一直為你等感謝上帝。𠊎祈禱个時常常思念你等，</verse>
				<verse number="17">求𠊎等主耶穌基督个上帝，榮耀个阿爸，將聖靈賜給你等。聖靈會使你等有智慧，並啟示你等，使你等認識上帝。</verse>
				<verse number="18">𠊎也求上帝開你等个心眼，好使你等知：佢呼召你等來得个盼望係麼介；佢所應許愛給眾聖徒个產業係樣般豐富㧯榮光；</verse>
				<verse number="19">佢在𠊎等相信个人當中所顯出个能力係樣般偉大。這能力㧯佢使基督對死復活、使基督在天頂坐在自家正片个能力係共樣个。</verse>
				<verse number="20"></verse>
				<verse number="21">在該位，基督个統治超過一切天界个執政者、掌權者、統治者，㧯邪惡个勢力；佢超過現世㧯來世一切个名。</verse>
				<verse number="22">上帝又使宇宙萬物降服在基督个腳下，俾佢做教會个頭，統治一切。</verse>
				<verse number="23">教會係基督个身體，係充滿宇宙萬物个基督所充滿个 。</verse>
			</chapter>
			<chapter number="2">
				<verse number="1">頭擺，因為你等犯罪，悖逆上帝个命令，你等對靈性來講係死个。</verse>
				<verse number="2">該時，你等跈這世間邪惡个風俗，順從天界个掌權者，就係這下轄制該兜悖逆上帝命令个人个邪靈。</verse>
				<verse number="3">其實，頭擺𠊎等也同佢等共樣，放縱肉體个情慾，跈自家个私慾㧯意念去行。所以，𠊎等同別人共樣，註定愛受上帝个責罰。</verse>
				<verse number="4">總係上帝有豐盛个憐憫；佢對𠊎等个痛惜無窮無盡。</verse>
				<verse number="5">𠊎等个靈性在悖逆个罪惡中死掉个時，佢使𠊎等同基督共下生過來；你等个得救係倚靠上帝个恩典。</verse>
				<verse number="6">上帝又使𠊎等在基督耶穌个生命中同基督共下復活，同佢共下在天頂掌權。</verse>
				<verse number="7">上帝恁樣做係愛對世世代代表明佢極豐富个恩典，就係佢在基督耶穌底背對𠊎等顯現出來个慈愛。</verse>
				<verse number="8">你等个得救係靠上帝个恩典、憑信心來得到个；毋係因為你等个行為，係上帝賜給你等个。</verse>
				<verse number="9">既然毋係靠行為，你等就無麼介好誇口个。</verse>
				<verse number="10">𠊎等係上帝个作品，在基督耶穌底背造成个，目的係愛𠊎等行善；這係上帝早就計劃愛𠊎等去做个。</verse>
				<verse number="11">你等出世就係外邦人个，愛記得以前个情形：你等被自稱受過割禮个人 — 就係該兜用人个手在自家肉身行割禮个 猶太 人 — 稱做無受割禮个。</verse>
				<verse number="12">該時，你等同基督無關係，係外人，毋係上帝个選民。上帝對佢个子民所應許个契約，你等無份；你等在世間無希望，也無上帝。</verse>
				<verse number="13">你等頭擺係離開上帝遠遠个人，總係這下同基督耶穌結連共下，又因為基督流血來死，已經親近上帝了。</verse>
				<verse number="14">基督親自將和平賜給𠊎等 ；佢使 猶太 人㧯外邦人合一，用自家个身體拆掉該害佢等冤家分裂个牆。</verse>
				<verse number="15">佢廢除 猶太 法律个誡命㧯教條，目的係愛使這兩種人通過佢个生命成做一種新人，來成就和平。</verse>
				<verse number="16">通過在十字架頂个死，基督除掉冤仇；通過十字架，佢使兩片个人成做一體，㧯上帝和好。</verse>
				<verse number="17">恁樣，基督來傳和平个福音給所有个人，包含你這兜頭擺離開上帝遠遠个外邦人㧯親近上帝个 猶太 人。</verse>
				<verse number="18">因為𠊎等無論係 猶太 人抑係外邦人，攏總係通過基督，受共一位聖靈个感動，來到阿爸上帝个面前。</verse>
				<verse number="19">所以，你等外邦人無再係外人，也毋係生份人；你等係上帝子民个同胞，係上帝一家个人。</verse>
				<verse number="20">你等同 猶太 人共樣，也係起在使徒㧯先知个地基頂高，基督耶穌自家係屋棟連結个大樑 。</verse>
				<verse number="21">倚靠佢，歸座建築就互相結連，漸漸擴大，成做主个聖殿。</verse>
				<verse number="22">倚靠佢，你等大家也共下被佢建造，成做上帝通過聖靈住个所在。</verse>
			</chapter>
			<chapter number="3">
				<verse number="1">因為恁樣，𠊎 — 保羅 為到你等外邦人个緣故做基督耶穌个囚犯，為你等求上帝。</verse>
				<verse number="2">你等一定有聽過，為到你等个好處，上帝施恩將一項職務交託給𠊎。</verse>
				<verse number="3">佢啟示𠊎，使𠊎知佢个奧秘。 (𠊎已經將這奧秘簡略寫下來；</verse>
				<verse number="4">你等讀了就會了解，𠊎深知基督个奧秘。)</verse>
				<verse number="5">在以前个世代，上帝毋識俾麼人知這個奧秘；總係這下，佢已經通過聖靈啟示佢个聖使徒㧯先知了。</verse>
				<verse number="6">這奧秘个內容係恁樣：通過福音，外邦人愛同 猶太 人共下分享上帝个祝福，同屬一體，也同享上帝在基督耶穌底背所實現个應許。</verse>
				<verse number="7">上帝設立𠊎執行這傳福音个職務；這係照佢所運行个權能賜給𠊎个特別恩賜。</verse>
				<verse number="8">雖然𠊎係所有聖徒中最微細个，上帝還係賜𠊎特權，將福音，就係基督測毋透个豐盛，傳給外邦人，</verse>
				<verse number="9">使全人類知上帝樣般實行佢奧秘个計劃。在先前个世代，創造萬物个上帝將這奧秘囥等，</verse>
				<verse number="10">為到愛在這下个世代，通過教會，使天界个執政者㧯掌權者攏總會認識上帝無窮个智慧。</verse>
				<verse number="11">上帝恁樣做係照佢萬世不變个旨意；這旨意已經在𠊎等主基督耶穌个身上實現了。</verse>
				<verse number="12">通過信基督 ，𠊎等同佢結連，就做得好膽來到上帝个面前，全毋使驚。</verse>
				<verse number="13">所以，請你等毋好因為𠊎為你等受苦就灰心，反轉愛看做係你等个光榮。</verse>
				<verse number="14">因為恁樣，𠊎在阿爸面前跪下來祈禱。</verse>
				<verse number="15">天頂㧯地上所有个家族全部係佢安名个。</verse>
				<verse number="16">𠊎求上帝，照佢榮耀个豐盛，通過聖靈賜你等力量，使你等內在个生命勇健起來，</verse>
				<verse number="17">使基督通過你等个信心，住在你等个心中。𠊎也祈求上帝，使你等在佢个痛惜中有根也有基，</verse>
				<verse number="18">好使你等同眾聖徒共下體驗基督个痛惜係樣般个長、闊、高、深。</verse>
				<verse number="19">願你等正經體驗到基督該超過智識所能了解个痛惜，好使你等充滿上帝一切个豐盛。</verse>
				<verse number="20">上帝能用運行在𠊎等當中个能力成就一切，遠遠超過𠊎等所求所想个。</verse>
				<verse number="21">願佢在教會中並在基督耶穌底背得到榮耀，直到世世代代，永永遠遠！阿愐。</verse>
			</chapter>
			<chapter number="4">
				<verse number="1">所以，𠊎這因為事奉主成做囚犯个，勸話你等：行事為人應當愛合上帝呼召你等來得到个身份。</verse>
				<verse number="2">你等愛謙卑、溫柔、忍耐，用愛心互相寬容，</verse>
				<verse number="3">用和平彼此結連，盡力保持聖靈所賜合一个心。</verse>
				<verse number="4">只有一個身體，只有一位聖靈；像上帝呼召你等个時，你等只有一個盼望。</verse>
				<verse number="5">只有一位主，一個信仰，一個洗禮。</verse>
				<verse number="6">只有一位上帝，就係人類个阿爸；佢超越萬有，在萬有中間，也在萬有底背。</verse>
				<verse number="7">𠊎等逐個人攏總照基督所分配个，領受特別个恩賜。</verse>
				<verse number="8">像聖經所講： 佢升上去到高高个所在， 帶等盡多捉來个仇敵； 佢將各樣个恩賜賜給人。</verse>
				<verse number="9">(「佢升上去」這句話係麼介意思呢？這就係講：佢識先降下來，到地最深个所在。</verse>
				<verse number="10">該「降下來」又「升上去」到諸天頂高个係共一儕；佢恁樣做係愛充滿萬有。)</verse>
				<verse number="11">佢也係該「將各樣个恩賜賜給人」个；佢指定有兜人做使徒，有兜人做先知，有兜人做傳福音个，有兜人做牧師抑係教師；</verse>
				<verse number="12">目的係愛裝備眾聖徒做事奉个工作，來建立教會，就係基督个身體，</verse>
				<verse number="13">直到𠊎等眾人對上帝个孻仔有共樣个信仰㧯認識，長大成人，滿有基督成熟个樣式。</verse>
				<verse number="14">恁樣，𠊎等正毋會再像細人仔，陷落人所設奇巧个詭計，跈等各樣个學說走，像被風浪漂來打去。</verse>
				<verse number="15">顛倒，𠊎等愛用愛心講實話，在各方面一直長進到像基督。佢就係頭；</verse>
				<verse number="16">全身攏總倚靠佢，通過關節㧯筋骨來互相配合，彼此連結。恁樣，當各肢體个功效發揮个時，身體就會在相惜个當中漸漸長大，越來越勇健。</verse>
				<verse number="17">𠊎這下奉主个名勸你等：毋好再像外邦人過該種个生活。佢等所想个係無利益个事，</verse>
				<verse number="18">佢等个心肝烏暗，佢等已經同上帝所賜个生命隔斷了；因為佢等無頭腦又硬殼。</verse>
				<verse number="19">佢等毋知見笑，放縱情慾，隨心所愛去行各種敗德个事情。</verse>
				<verse number="20">總係，你等學習基督就毋係恁樣！</verse>
				<verse number="21">你等若係有影聽到佢个事，做佢个信徒，又學過在耶穌底背正有个真理，</verse>
				<verse number="22">恁樣，你等就愛脫掉該使你等生活在腐敗中个舊人；舊人係因為私慾个誘惑來腐敗掉个。</verse>
				<verse number="23">你等个心思意念愛換新，</verse>
				<verse number="24">愛將新人著起來；新人係照上帝个形像造个，通過真理个生活來表明正義㧯聖潔。</verse>
				<verse number="25">所以，你等毋好再講花撩！逐儕對鄰舍應當講實話，因為𠊎等攏總係基督身體个肢體。</verse>
				<verse number="26">你等若發譴，毋好因為恁樣來犯罪；也毋好閼到日頭落山；</verse>
				<verse number="27">毋好留機會給魔鬼來害你。</verse>
				<verse number="28">頭擺做賊个，毋好再偷拿；愛靠自家个雙手認真做事，正會有能力幫助窮苦人。</verse>
				<verse number="29">講話毋好傷人，愛講對人有幫助、造就人个話，使聽到个人得到利益。</verse>
				<verse number="30">毋好使上帝个聖靈憂愁；因為聖靈係你等屬上帝个印記，保證上帝釋放你等个日仔會到。</verse>
				<verse number="31">你等愛除掉一切个惡毒、怨恨，㧯憤怒。毋好再冤家抑係譭謗；做毋得再有麼介冤仇。</verse>
				<verse number="32">愛用慈悲㧯憐憫个心互相好款待，彼此赦免，像上帝通過基督赦免你等一樣。</verse>
			</chapter>
			<chapter number="5">
				<verse number="1">既然你等係上帝所惜个子女，你等就應該效法上帝。</verse>
				<verse number="2">你等个行事做人愛憑愛心，像基督惜𠊎等，為𠊎等犧牲生命，做香香个供物㧯祭物獻給上帝一樣。</verse>
				<verse number="3">該兜姦淫、屙糟、抑係貪心个事情，在你等中間連提起也毋好，因為你等係上帝个聖民。</verse>
				<verse number="4">你等也毋好講淫亂、憨蚩、抑係下流个話；顛倒，你等愛講感謝上帝个話。</verse>
				<verse number="5">因為你等確實知，犯姦淫、屙糟、抑係貪心个人 (貪心㧯拜偶像共樣) 絕對不能領受基督㧯上帝國底背个福份。</verse>
				<verse number="6">毋好被麼人用虛假个話騙走；因為這兜事，上帝會對該兜悖逆个人大發譴。</verse>
				<verse number="7">所以，毋好同這種人結交。</verse>
				<verse number="8">頭擺你等在烏暗中，總係自從成做主个信徒，你等就在光明中；恁樣，你等个生活應當愛像光明个子女。</verse>
				<verse number="9">光明所結豐盛个果子就係一切个良善、公義，㧯真理。</verse>
				<verse number="10">你等愛查考麼介係主所歡喜个事。</verse>
				<verse number="11">毋好做別人在暗中所做該兜無利益个事情，反轉愛將該兜事情掀出來。</verse>
				<verse number="12">(佢等在暗中所做个事，連講起也係盡見笑！)</verse>
				<verse number="13">一切事情在光明中一公開，真相就顯明出來；</verse>
				<verse number="14">因為使一切顯明出來个就係光。所以，詩人恁樣講： 睡目个人啊，好醒了！ 對死人中䟘起來！ 基督就愛光照你。</verse>
				<verse number="15">所以，你等个行為愛細膩。毋好像無智識个人，愛像有智慧个人。</verse>
				<verse number="16">愛把扼機會，因為這下个世代邪惡。</verse>
				<verse number="17">所以，你等毋好愕愕咄咄過日仔；愛明白主个旨意係麼介。</verse>
				<verse number="18">毋好食到酒醉，啉忒多酒會害你等放蕩；顛倒，你等愛被聖靈充滿。</verse>
				<verse number="19">你等愛用詩篇、聖詩，㧯靈歌來對唱，口唱心和來讚美主。</verse>
				<verse number="20">凡事愛奉𠊎等主耶穌基督个名，常常感謝阿爸上帝。</verse>
				<verse number="21">愛因為敬畏基督來彼此順服。</verse>
				<verse number="22">做𡜵娘个，你等愛順從自家个老公，像順服主一樣。</verse>
				<verse number="23">因為老公係𡜵娘个頭，就像基督係教會个頭，也係教會全體个救主。</verse>
				<verse number="24">像教會順服基督，做𡜵娘个也應當凡事順從老公。</verse>
				<verse number="25">做老公个，你等愛惜自家个𡜵娘，像基督惜教會，為教會犧牲生命一樣。</verse>
				<verse number="26">佢恁樣做係愛通過真道㧯水來潔淨教會，使它成做聖潔，</verse>
				<verse number="27">好獻給自家，做榮光个教會，全無缺點、無垃圾、無打摺，就係純潔完全个教會。</verse>
				<verse number="28">共樣，做老公个應當惜自家个𡜵娘，像惜自家个身體一樣；惜𡜵娘就係惜自家。</verse>
				<verse number="29">無人怨恨自家个身體，總係保養㧯照顧，像基督對待教會一樣；</verse>
				<verse number="30">因為𠊎等係佢身上个肢體。</verse>
				<verse number="31">聖經講：「因為恁樣，人愛離開爺𡟓，㧯𡜵娘結合，兩儕成做一體。」</verse>
				<verse number="32">這個經節啟示極大个奧秘。𠊎知它係指基督㧯教會个關係來講个，</verse>
				<verse number="33">總係也做得用在你等中間：做老公个應當惜𡜵娘，像惜自家；做𡜵娘个也應當敬重老公。</verse>
			</chapter>
			<chapter number="6">
				<verse number="1">做子女个，你等愛在主个底背聽從爺𡟓；這係理所當然个。</verse>
				<verse number="2">「愛孝敬爺𡟓，你就會事事順利，在世間享受長壽！」這係第一條帶應許个誡命。</verse>
				<verse number="3"></verse>
				<verse number="4">做阿爸个，毋好惹你等个子女發譴；愛用主个教訓㧯警戒來養育佢等。</verse>
				<verse number="5">做奴僕个，你等愛用敬畏个心，驚驚轆轆、誠誠實實來服從世間个主人，像事奉基督一樣；</verse>
				<verse number="6">毋好單淨在人看等你个時正恁樣做，像係愛俾人歡喜定定；你等愛像係做基督个僕人，誠心遵行上帝个旨意一樣。</verse>
				<verse number="7">你等愛甘心樂意盡做奴僕个本份，像係服事主，毋係服事人。</verse>
				<verse number="8">愛知，無論係奴僕抑係自由人，主愛照逐儕个好行為來報答佢。</verse>
				<verse number="9">做主人个，你等也愛好好對待奴僕，毋好威脅佢等。愛知，你等㧯你等个奴僕同屬一位在天頂个主；佢用共樣个標準對待每一個人。</verse>
				<verse number="10">最後，你等愛倚靠主㧯佢个大能大力做堅強个人。</verse>
				<verse number="11">你等愛著上帝所賜个全副軍裝，使你等企得住，來抵擋魔鬼个詭計。</verse>
				<verse number="12">因為𠊎等毋係同有血有肉个人對抗；係同天界个邪靈，就係這烏暗世代个執政者、掌權者，㧯宇宙間邪惡个勢力戰爭。</verse>
				<verse number="13">因為恁樣，你等愛用上帝所賜个全副軍裝來裝備自家，好在邪惡个日仔抵擋敵人个攻擊，拚到底，企在在。</verse>
				<verse number="14">所以，你等愛企穩。愛用真理做腰帶繫腰，用正義做護心鏡遮胸，</verse>
				<verse number="15">隨時準備宣揚和平个福音，像著等鞋一樣。</verse>
				<verse number="16">愛常常擎等信心个盾牌，來抵擋該邪惡者射過來一切个火箭。</verse>
				<verse number="17">愛用救恩做頭盔，用上帝个話做聖靈所賜个寶劍。</verse>
				<verse number="18">你等愛順從聖靈个帶領隨時祈禱，求上帝幫助你等；愛警醒祈禱，毋好停。你等愛常常為眾聖徒祈禱；</verse>
				<verse number="19">也愛為𠊎祈禱，求上帝賜𠊎真道，使𠊎好膽開嘴講明福音个奧秘。</verse>
				<verse number="20">為到做福音个大使，𠊎卻被人用鎖鍊紽等。你等愛求主賜𠊎勇氣，大膽講應當講个話。</verse>
				<verse number="21">𠊎等所親愛、忠心事奉主个兄弟 推基古 ，佢會將一切關係𠊎个事情㧯你等講，俾你等知𠊎个情形。</verse>
				<verse number="22">𠊎特別派佢去你等該位，係愛報你等知𠊎等這位个情形，使你等得到鼓勵。</verse>
				<verse number="23">願阿爸上帝㧯主耶穌基督賜平安、仁愛，㧯信心給你等各位兄弟姊妹！</verse>
				<verse number="24">願上帝个恩典永遠㧯所有敬愛𠊎等主耶穌基督个人同在！</verse>
			</chapter>
		</book>
		<book number="50">
			<chapter number="1">
				<verse number="1">基督耶穌个僕人 保羅 㧯 提摩太 寫信仔給住在 腓立比 个上帝个子民，就係屬基督耶穌个眾聖徒，並該兜監督㧯執事。</verse>
				<verse number="2">願𠊎等个阿爸上帝㧯主耶穌基督賜恩典、平安給你等！</verse>
				<verse number="3">逐擺想到你等，𠊎就感謝𠊎个上帝，</verse>
				<verse number="4">逐擺為你大家祈禱，𠊎就滿心歡喜；</verse>
				<verse number="5">因為對頭一日到這下，你等一直在傳福音个工作上幫助𠊎。</verse>
				<verse number="6">𠊎深信，在你等中間使這恁靚个工作開始个上帝，一定會使這個工作繼續下去，直到基督耶穌再來該日得到完成。</verse>
				<verse number="7">你等大家常常在𠊎个心肝底背！𠊎想念你等係當然个事；因為， 無論係這下𠊎在監獄肚，抑係頭擺𠊎自自由由為福音辯護㧯做證該時，你等攏總有份在上帝所賜給𠊎个恩典。</verse>
				<verse number="8">上帝做得為𠊎做證：像基督耶穌痛惜你等，𠊎深深想念你等大家个心情也係共樣！</verse>
				<verse number="9">𠊎所祈禱个就係你等个愛心會一直同真个智識㧯判斷个能力共下長進，</verse>
				<verse number="10">使你等有法度選到該最好个。恁樣，你等會做純潔無好嫌个人，直到基督再來該日。</verse>
				<verse number="11">你等个生活會充滿通過耶穌基督正可能結个仁義个果子，來榮光讚美上帝。</verse>
				<verse number="12">兄弟姊妹啊，𠊎愛你等知，𠊎所堵到个事反轉促成福音个擴展。</verse>
				<verse number="13">結果，王宮警衛隊全體，㧯在這位所有其他个人，攏總知𠊎係因為基督个緣故坐監个。</verse>
				<verse number="14">𠊎坐監，卻使大部份个兄弟姊妹對主更加有信心，越發勇敢傳揚上帝个真道，全無驚麼介。</verse>
				<verse number="15">當然，有兜人傳揚基督係出於嫉妒㧯好鬥个心理，總係也有兜係誠心誠意个。</verse>
				<verse number="16">這兜因為愛心傳福音个人攏總知，上帝交給𠊎个使命就係為福音辯護。</verse>
				<verse number="17">其他个人傳基督，動機無純正，係出於野心；佢等想愛在𠊎坐監个時增加𠊎个痛苦。</verse>
				<verse number="18">總係，這有麼介關係呢？無論佢等个動機著抑係毋著，基督還係被人傳開來。因為恁樣，𠊎就盡歡喜。 𠊎還愛繼續歡喜；</verse>
				<verse number="19">因為𠊎知，通過你等个祈禱㧯耶穌基督个靈个幫助，𠊎一定會得到釋放。</verse>
				<verse number="20">𠊎迫切渴慕㧯盼望个就係：𠊎毋會虧負𠊎个責任，反轉時時刻刻，特別係這下，會有罅額个勇氣，無論生死，用𠊎歸個人來榮光基督。</verse>
				<verse number="21">因為對𠊎來講，𠊎生係為到基督，死就有大福氣！</verse>
				<verse number="22">總係，若係𠊎生下去能加做兜有利益个工作，𠊎就毋知愛樣般決定。</verse>
				<verse number="23">𠊎在兩難个中間：𠊎盡愛離開這世間，去同基督共下，這係最好个事；</verse>
				<verse number="24">總係為到你等，𠊎生下去較要緊。</verse>
				<verse number="25">這係𠊎深信个，所以𠊎知𠊎會生下去。𠊎愛同你等大家共下，幫助你等在信仰上又長進又快樂，</verse>
				<verse number="26">恁樣，𠊎同你等再見面个時，你等在基督耶穌底背个歡喜就會越發增加 。</verse>
				<verse number="27">最重要个，你等个生活愛合基督个福音所要求个。恁樣，無論𠊎係親身去看你等，抑係對別人聽講你等个情形，𠊎會知你等有共同个目標，企到在在，同心協力為福音个信仰來打拚。</verse>
				<verse number="28">凡事都毋使驚敵人个恐嚇；愛勇敢，用恁樣來對佢等證明，佢等一定會滅亡，你等一定會得救 ，因為這係上帝所決裁个。</verse>
				<verse number="29">你等已經得到特別个恩典來事奉基督，毋單淨愛信佢，也愛為佢受苦。</verse>
				<verse number="30">這下，你等做得同𠊎共下作戰；這戰爭你等識看𠊎打過，也聽講𠊎還在這位繼續作戰。</verse>
			</chapter>
			<chapter number="2">
				<verse number="1">所以，既然你等在基督底背个生命使你等較堅強，佢个痛惜鼓勵你等，你等㧯聖靈有交通，你等也有慈悲㧯憐憫个心 ，</verse>
				<verse number="2">你等就愛有共同个心志，共樣个愛心，相同个情感，㧯一致个想法，好俾𠊎充滿歡喜。</verse>
				<verse number="3">毋好自私自利抑係自高自大，反轉愛彼此謙卑，看別人比自家較高明。</verse>
				<verse number="4">毋好單淨顧自家，也愛關心別人个事。</verse>
				<verse number="5">你等愛用基督耶穌个心做學習个模範：</verse>
				<verse number="6">佢本來就有上帝个本質， 總係毋識濫用 佢同上帝共樣个特權。</verse>
				<verse number="7">顛倒， 佢自願放掉一切， 取奴僕个本質。 佢成做人， 用人个形體出現。</verse>
				<verse number="8">佢自家甘願卑微， 順服到死， 又死在十字架頂。</verse>
				<verse number="9">所以， 上帝使佢高升到至高， 賜給佢該超過萬名个名；</verse>
				<verse number="10">使天頂、地上㧯地底下个眾生， 一聽到耶穌个名， 全部就跪落去，</verse>
				<verse number="11">眾口告白講： 「耶穌基督係主！」 歸榮光給阿爸上帝。</verse>
				<verse number="12">所以，親愛个朋友，𠊎同你等共下个時，你等常常聽從𠊎；這下𠊎無在你等該位，你等還較愛聽𠊎个話。你等愛驚驚轆轆，一直打拚來完成你等自家个得救；</verse>
				<verse number="13">因為係上帝常常在你等心肝肚運行，使你等又甘願又能實行佢美善个旨意。</verse>
				<verse number="14">你等無論做麼介，毋好埋怨抑係爭論，</verse>
				<verse number="15">好使你等成做純潔誠實个人，在這腐敗、罪惡个世代中，做上帝無缺點个子女。你等愛在世間人當中發光，像星仔照光天頂，</verse>
				<verse number="16">將生命个道傳給佢等。你等若係恁樣做，在基督再來該日，𠊎就有好誇口了，因為這會證明𠊎無走戇路，無做戇事。</verse>
				<verse number="17">可能𠊎愛用自家个血做祭酒，來淋在你等用信心獻給上帝个祭物頂。若係恁樣，𠊎也盡歡喜，同時，𠊎愛同你等大家分享𠊎个歡喜。</verse>
				<verse number="18">共樣，你等也愛歡歡喜喜，俾𠊎也分享你等个歡喜。</verse>
				<verse number="19">𠊎靠主耶穌，希望無幾久後，𠊎做得派 提摩太 去你等該位，將你等个消息帶轉來給𠊎，俾𠊎得到安慰。</verse>
				<verse number="20">佢係惟一㧯𠊎同心，又正經關心你等个人。</verse>
				<verse number="21">別人攏總為自家个事打算，無關心耶穌基督个事情。</verse>
				<verse number="22">總係你等清楚知 提摩太 个做人：佢同𠊎就像孻仔㧯阿爸，為到福音，共下辛苦工作。</verse>
				<verse number="23">等𠊎一知自家个結局會樣般个時，𠊎希望派去看你等个就係佢。</verse>
				<verse number="24">𠊎靠主自信在短時間內也會親身去看你等。</verse>
				<verse number="25">𠊎想，𠊎應該送𠊎等个兄弟 以巴弗提 轉你等該位去。你等選派佢來同𠊎𢯭手，共下工作，共下作戰。</verse>
				<verse number="26">佢當想念你等大家；心肝也盡毋過意，因為知你等聽到佢發病了。</verse>
				<verse number="27">佢有影識發病，險險死掉。總係上帝憐憫佢，毋單淨憐憫佢，也係憐憫𠊎，俾𠊎毋使堵到更多个憂傷。</verse>
				<verse number="28">所以，𠊎還較想愛趕緊送佢轉去，使你等歡歡喜喜同佢聚集；恁樣，𠊎个憂傷也會減少。</verse>
				<verse number="29">你等愛在主个底背歡歡喜喜接待佢。你等愛尊重像佢恁樣个人；</verse>
				<verse number="30">因為佢為到基督个工作冒生命个危險，險險死掉，為到愛補足你等無法度服事𠊎个所在。</verse>
			</chapter>
			<chapter number="3">
				<verse number="1">兄弟姊妹啊，總講：你等愛因為同主結連來歡喜！𠊎將這兜話再寫給你等，對𠊎係無麻煩，對你等也係妥當。</verse>
				<verse number="2">你等愛提防該兜作惡个人，該兜狐群狗黨，就係該兜堅持愛割自家身體个人。</verse>
				<verse number="3">其實，接受真割禮个，毋係佢等，係𠊎等；因為𠊎等係通過上帝个靈來敬拜、所誇口个係基督耶穌、毋係倚靠外表个禮儀。</verse>
				<verse number="4">其實，𠊎也做得靠外表个禮儀。若係有人恅到佢做得靠外表个禮儀，𠊎還較做得恁樣做。</verse>
				<verse number="5">𠊎出世第八日就受割禮。𠊎生來就係 以色列 人，屬 便雅憫 支族，係血統純正个 希伯來 人。對遵守 猶太 教教規這點來講，𠊎係屬法利賽派；</verse>
				<verse number="6">對熱心來講，𠊎識迫害教會；對遵守法律就算係義來講，𠊎無麼介好被人責備个。</verse>
				<verse number="7">總係，頭擺𠊎認為有利益个一切，這下為到基督个緣故，𠊎全部看做係損害。</verse>
				<verse number="8">毋單淨恁樣，𠊎更將萬事攏總看做損害，因為𠊎看認識𠊎个主基督耶穌做最寶貴个。所以，𠊎將一切準做垃圾㧒掉，為到愛得到基督，</verse>
				<verse number="9">完全同佢結連。𠊎所有个毋係自家對守法律來得到个義，係通過信基督 所領受个義；這個義係憑信心對上帝來領受个。</verse>
				<verse number="10">𠊎一切所盼望个就係認識基督，體驗佢復活个能力，分擔佢个苦難，效法佢个死，</verse>
				<verse number="11">希望對恁樣𠊎自家也會對死復活。</verse>
				<verse number="12">這毋係講𠊎已經成功，抑係已經完全了。𠊎繼續緊走，愛得到該獎賞；其實，為到愛使𠊎達成這個目標，基督耶穌已經先使𠊎歸屬佢。</verse>
				<verse number="13">兄弟姊妹啊，𠊎毋敢講𠊎已經得到該獎賞；𠊎只有專心一件事：就係毋記得後背，全力追求頭前个事。</verse>
				<verse number="14">𠊎向目標直直緊走，為到愛得到獎賞；這獎賞就係屬天个新生命，係上帝通過基督耶穌呼召𠊎去領受个。</verse>
				<verse number="15">所以，𠊎等中間所有靈性成熟个人，全部愛有這種个心志；若係你等有別樣个看法，上帝也會清清楚楚指示你等。</verse>
				<verse number="16">無論樣般，𠊎等愛照𠊎等一旦所遵守个規矩向前行。</verse>
				<verse number="17">兄弟姊妹啊，你等愛繼續效法𠊎。𠊎等已經為你等做榜樣；你等愛認真學該兜效法𠊎等个人。</verse>
				<verse number="18">𠊎已經勸你等好多擺，這下𠊎流目汁再一擺勸話你等：有兜人个行為使佢等成做基督十字架个仇敵。</verse>
				<verse number="19">佢等个結局係滅亡，因為佢等个神就係自家个肚笥。佢等拿自家見笑个事來誇口，所想个無一項毋係世間个事。</verse>
				<verse number="20">總係，𠊎等係天頂个公民；𠊎等一心等候𠊎等个救主，就係主耶穌基督對天頂降臨。</verse>
				<verse number="21">佢愛用使萬有歸服佢个能力，來改變𠊎等軟弱會死个身體，使𠊎等同佢共樣，有榮光个身體。</verse>
			</chapter>
			<chapter number="4">
				<verse number="1">𠊎所親愛、所想念个兄弟姊妹啊，你等係𠊎个歡喜，係𠊎个冕旒！𠊎所惜个啊，你等愛靠主企穩。</verse>
				<verse number="2">友阿蝶 㧯 循都基 啊，𠊎懇求你等愛同心，就像信主个姊妹。</verse>
				<verse number="3">𠊎忠實个同伴啊，𠊎也求你幫助姖兩儕；因為姖等在福音个工作上同𠊎、 革利免 ，㧯其他个同工識共下勞苦；這兜人个名全部已經記在上帝个生命冊。</verse>
				<verse number="4">你等愛因為同主結連來常常歡喜。𠊎再講，你等愛歡喜！</verse>
				<verse number="5">對所有个人，你等攏總愛顯出謙卑。主愛來了。</verse>
				<verse number="6">應當全無掛慮；凡事愛祈禱，將你等所需要个㧯上帝講，用感謝个心來祈求。</verse>
				<verse number="7">上帝所賜、該超過人所想像个平安，會通過基督耶穌保守你等个心懷意念。</verse>
				<verse number="8">兄弟姊妹啊，總講，你等愛時常留意該兜好德行㧯堪得稱讚个事。一切真實、高貴、公正、純潔、得人惜㧯光榮个事，你等全部愛看重。</verse>
				<verse number="9">你等對𠊎所學習，所領受，抑係所聽到，所看到个言行舉止，攏總愛實行出來。賜平安个上帝就會㧯你等同在。</verse>
				<verse number="10">𠊎在主个生命底背極歡喜！因為過恁久以後，這下你等又供給𠊎。其實，你等一直關心𠊎，總係無機會好表示定定。</verse>
				<verse number="11">𠊎恁樣講，毋係因為𠊎缺少麼介；𠊎已經學會滿足現況。</verse>
				<verse number="12">𠊎知樣般過窮苦个日仔，也知樣般過富足个生活。𠊎已經得到秘訣，隨時隨地，係飽係飢，豐富缺乏，𠊎攏總盡自在。</verse>
				<verse number="13">𠊎靠該賜給𠊎能力个，凡事都能做。</verse>
				<verse number="14">總係，𠊎在困難中，你等來幫助𠊎，實在係好事。</verse>
				<verse number="15">你等 腓立比 人知，在𠊎傳福音个初期，就係𠊎離開 馬其頓 个時節，在收支个事上，除了你等以外，並無別个教會㧯𠊎分擔。</verse>
				<verse number="16">連在 帖撒羅尼迦 个時，你等一再派人來供給𠊎个需要。</verse>
				<verse number="17">𠊎並無貪你等个禮物；𠊎所希望个就係你等賺加兜仔，好記在你等个帳項。</verse>
				<verse number="18">這就係你等送給𠊎一切禮物个收据；你等所送个超過𠊎所需要个。𠊎已經充足，因為𠊎對 以巴弗提 接受你等所送个禮物。它兜像清香个香味，係上帝所接納、所歡喜个祭物。</verse>
				<verse number="19">𠊎个上帝會照佢在基督耶穌底背偉大个豐盛，將你等所需要个一切賜給你等。</verse>
				<verse number="20">願榮耀歸給𠊎等个阿爸上帝，世世無窮！阿愐。</verse>
				<verse number="21">請代𠊎對各位屬基督耶穌个聖徒請安。同𠊎共下个眾兄弟姊妹也對你等請安。</verse>
				<verse number="22">所有个聖徒，特別係皇宮肚該兜人，全部對你等請安。</verse>
				<verse number="23">願主耶穌基督个恩典常在你等心內！</verse>
			</chapter>
		</book>
		<book number="51">
			<chapter number="1">
				<verse number="1">𠊎係 保羅 ；𠊎奉上帝个旨意做基督耶穌个使徒。𠊎㧯 提摩太 兄弟</verse>
				<verse number="2">寫信仔給你等在 歌羅西 个聖徒，就係在基督底背忠心个眾兄弟姊妹。 願𠊎等个阿爸上帝賜恩典、平安給你等！</verse>
				<verse number="3">為你等祈禱个時，𠊎等常常感謝上帝，就係𠊎等个主耶穌基督个阿爸；</verse>
				<verse number="4">因為𠊎等聽講你等對基督耶穌个信心，㧯對所有聖徒个愛心。</verse>
				<verse number="5">一開始，福音个真道傳到你等該位个時，你等就聽到這福音所帶來个盼望。恁樣，你等个信心㧯愛心係用為你等保存在天頂个盼望做根據个。</verse>
				<verse number="6">這福音毋單淨傳到你等該位，也傳遍全世界，一直長大並結果子，就像當日你等聽到也正經知上帝恩典个時，長大並結果子一樣。</verse>
				<verse number="7">你等係對𠊎等所親愛个同工 以巴弗 學到這福音；佢代𠊎等 做基督忠心个僕人。</verse>
				<verse number="8">有關聖靈賜給你等愛心个消息就係佢㧯𠊎等講个。</verse>
				<verse number="9">因為恁樣，自從聽到關係你等个消息，𠊎等就為你等祈禱，毋識停。𠊎等求上帝賜你等各樣屬靈个智慧㧯聰明，好俾你等充份了解佢个旨意。</verse>
				<verse number="10">恁樣，你等个生活就會合主个要求，凡事俾佢歡喜。同時，你等个生活會結各種美善个果子，你等對上帝个認識也會增加。</verse>
				<verse number="11">願你等對佢榮耀个權能得到力量，成做堅強个人，有耐心好忍受萬項事。你等也愛用歡喜个心</verse>
				<verse number="12">感謝天頂个阿爸，因為佢使你等 有資格同眾聖徒共下享受佢在光明个國所保留个福氣。</verse>
				<verse number="13">佢救𠊎等脫離烏暗个權勢，使𠊎等生活在佢所惜个孻仔个國底背。</verse>
				<verse number="14">通過佢所惜个孻仔，𠊎等得到救贖，罪得到赦免。</verse>
				<verse number="15">基督係該看毋到个上帝个形像，係超過萬有个長子。</verse>
				<verse number="16">通過佢，上帝創造天地萬物，無論係看得到个抑係看毋到个，包含靈界該兜在位者、統治者、執政者，㧯掌權者。通過佢，也為到佢，上帝創造全宇宙。</verse>
				<verse number="17">基督在萬有之先；萬有也係靠佢和諧來連結。</verse>
				<verse number="18">佢係教會个頭，就係厥身體个頭；佢係新生命个源頭。佢係長子，最先對死復活，好俾佢在萬有頂高坐大位。</verse>
				<verse number="19">上帝歡喜使佢一切个豐盛住在佢个孻仔底背。</verse>
				<verse number="20">通過孻仔，上帝決意使全宇宙㧯佢自家再和好。上帝通過佢个孻仔在十字架頂流血到死來成就和平，使天地萬物重新歸屬佢。</verse>
				<verse number="21">頭擺，因為言行思想个邪惡，你等遠離上帝，做佢个仇敵。</verse>
				<verse number="22">這下，通過佢个孻仔肉體个死，上帝使你等成做佢个朋友，愛使你等在佢面前做聖潔、無缺點、無好嫌个人。</verse>
				<verse number="23">你等所愛做个，就係堅持信仰，企在堅固个基礎頂高；毋好放掉當初領受福音个時所得到个盼望。這下，這福音已經傳遍全世界；𠊎 — 保羅 就係這福音个僕人。</verse>
				<verse number="24">𠊎這下感覺為你等受苦係盡快樂个事；因為𠊎肉體受苦，係愛補滿基督為自家个身體 — 就係為佢个教會，所忍受總係吂完成个苦難。</verse>
				<verse number="25">為到你等个利益，上帝將這個職務交給𠊎，喊𠊎做教會个僕人。這職務係愛𠊎將上帝个道理傳揚到盡圓滿；</verse>
				<verse number="26">這道理就係佢世世代代對人類隱藏个奧秘；這奧秘這下已經對佢个眾聖徒顯明出來。</verse>
				<verse number="27">上帝个計劃係愛佢等知，這豐盛又榮耀个奧秘係愛給全人類个。這奧秘就係：基督在你等个生命底背，這就係講，你等會享受上帝个榮耀 。</verse>
				<verse number="28">因為恁樣，𠊎等對所有个人傳揚基督，用各樣个智慧勸大家、教大家，為到愛使逐儕成做成熟个基督徒，帶佢等到上帝个面前。</verse>
				<verse number="29">為到達成這個目的，𠊎用基督賜給𠊎个大能力，無嫌勞苦，盡力工作。</verse>
			</chapter>
			<chapter number="2">
				<verse number="1">𠊎希望你等知，為到你等㧯 老底嘉 人，並盡多𠊎還吂見過面个人，𠊎盡心盡力工作。</verse>
				<verse number="2">𠊎个目的係愛大家得到鼓勵，用愛心來團結，滿有對真實个了解所帶來个信心，好認識上帝个奧秘；這奧秘就係基督本身。</verse>
				<verse number="3">一切智慧㧯智識个寶貝全部囥在佢底背。</verse>
				<verse number="4">𠊎講這兜話，免得有人用花言巧語來迷惑你等。</verse>
				<verse number="5">雖然𠊎个身體無在你等該位，總係𠊎个心同你等共下。𠊎非常歡喜看到你等凡事照秩序，對基督个信仰也盡堅定。</verse>
				<verse number="6">既然你等接受基督耶穌做主，你等愛同佢連結來行事，</verse>
				<verse number="7">在佢底背釘根，建造，堅固信心；這係你等所領受个教訓。還有，你等也愛滿心感謝！</verse>
				<verse number="8">你等愛細膩，毋好被麼人用虛空㧯欺騙个哲學所轄制。因為該種學理係照人个傳統；它个根源係宇宙間所謂星宿个神靈 ，毋係基督。</verse>
				<verse number="9">因為上帝神性个豐盛成做形體住在基督底背，</verse>
				<verse number="10">恁樣，你等同基督結連就得到豐盛个生命。佢係頭，超過一切靈界个執政者㧯掌權者。</verse>
				<verse number="11">你等在基督底背已經受割禮；這割禮毋係人个手所行个，係基督除掉你等肉體个情慾所完成个割禮。</verse>
				<verse number="12">因為，你等領洗禮个時，就係同基督共下埋葬；同時，因為上帝已經使基督對死復活，你等通過信上帝个大能也同佢共下復活了。</verse>
				<verse number="13">頭擺，你等屬靈个生命係死个，因為你等有罪，又因為你等係無 摩西 法律个外邦人。總係，上帝使你等同基督共下再生過來。佢赦免𠊎等一切个過犯，</verse>
				<verse number="14">取消該愛控告𠊎等、法律上䌈等𠊎等个犯罪記錄，將它釘在十字架頂廢掉。</verse>
				<verse number="15">在十字架頂，基督親身除掉 該兜靈界个執政者㧯掌權者个權勢，將佢等公開示眾，像被人捉來个敵人在勝利个遊行之中一樣。</verse>
				<verse number="16">所以，毋好俾人在飲食、節期、初一，抑係安息日這兜問題頂高用規則來䌈等你等。</verse>
				<verse number="17">這一切不過係未來事情个影定定；基督正係本體。</verse>
				<verse number="18">毋好俾該兜堅持表面謙卑㧯拜天使个人害到，使你等失掉得到獎賞个機會。佢等自誇有特別个異象，就照自家个妄想，無緣無故來自高自大，</verse>
				<verse number="19">切斷佢等同基督个關係。基督就係身體个頭；佢使全身得到滋養，關節㧯筋骨互相連絡，照上帝个旨意來長大。</verse>
				<verse number="20">既然你等同基督共下死，脫離該兜星宿个神靈，你等做麼介還同世俗个人共樣恁樣生活，繼續守該兜「毋好動，毋好嘗，毋好摸」个禁忌呢？</verse>
				<verse number="21"></verse>
				<verse number="22">該兜禁忌所講到个東西一使用就敗壞了；因為禁忌係對人个規則㧯教訓來个。</verse>
				<verse number="23">恁樣看起來，照自家个意思敬拜、表面謙卑、㧯肉身个苦修等等，當像盡有智慧；其實，對制伏肉體个情慾係無麼介效果个。</verse>
			</chapter>
			<chapter number="3">
				<verse number="1">你等已經同基督共下復活，你等就定著愛追求天頂个事；在該位，基督坐在上帝正片个寶座上。</verse>
				<verse number="2">你等愛專心天頂个事，毋係地上个事。</verse>
				<verse number="3">因為你等已經同基督共下死，你等个生命同佢共下囥在上帝个底背。</verse>
				<verse number="4">基督係你等个真生命；佢顯現个時，你等也愛同佢共下顯現，分享佢个榮耀。</verse>
				<verse number="5">所以，你等一定愛治死在你等身上作怪个該兜屬世个慾望，像淫亂、污穢、邪情、色慾，㧯貪心 (貪心係一種个拜偶像)。</verse>
				<verse number="6">因為這兜事，上帝个發譴會臨到該兜悖逆佢个人 。</verse>
				<verse number="7">你等頭擺也識順這兜慾望去生活，被它兜牽等走。</verse>
				<verse number="8">總係這下，你等愛棄絕這一切个事：毋好再有發閼、發譴，㧯怨恨；也做毋得講譭謗㧯垃圾个話。</verse>
				<verse number="9">毋好講花撩騙來騙去，因為你等已經脫掉舊人㧯舊人个習慣，</verse>
				<verse number="10">著上新人。這新人係被創造佢个上帝照自家个形像緊換新，來完全認識上帝。</verse>
				<verse number="11">因為恁樣， 希臘 人㧯 猶太 人就無分別；也無分麼介有受割禮个、無受割禮个，野蠻个、吂開化个，做奴隸个、抑係自由人等等。總講，基督就係一切，基督住在大家个底背。</verse>
				<verse number="12">上帝惜你等，揀選你等做佢聖潔个子民。所以，你等愛用憐憫、慈愛、謙卑、溫柔，㧯忍耐做衫來著。</verse>
				<verse number="13">有紛爭个時，愛彼此包容，互相原諒。主樣般赦免你等，你等也愛樣般赦免別人。</verse>
				<verse number="14">這一切德行以外，還愛著上愛心；因為使全部連結成做完全个就係愛心。</verse>
				<verse number="15">基督所賜个和平愛在你等个心內做主；為到使你等有這個和平，上帝揀選你等，使你等合做一體。還有，你等愛心存感謝。</verse>
				<verse number="16">你等愛俾基督个真道豐豐富富住在你等个心內。愛用各樣个智慧互相教導㧯勸話，用詩篇、聖詩、㧯屬靈个詩歌，對心底發出感謝个聲來頌讚上帝。</verse>
				<verse number="17">無論做麼介，講麼介，你等攏總愛奉主耶穌个名，通過佢感謝阿爸上帝。</verse>
				<verse number="18">做𡜵娘个，你等愛順服老公；因為這係基督徒个本份。</verse>
				<verse number="19">做老公个，你等愛惜𡜵娘，毋好苦毒姖等。</verse>
				<verse number="20">做子女个，你等愛凡事聽從爺𡟓；因為這係主所歡喜个。</verse>
				<verse number="21">做阿爸个，毋好刺傷你等个子女，免得佢等灰心失志。</verse>
				<verse number="22">做奴僕个，你等愛凡事聽從世間个主人。毋係愛做給主人看，來得到佢等个歡喜；愛因為你等係敬畏主个人，真心真意來做。</verse>
				<verse number="23">無論做麼介，你等愛專心去做，像係為主做，毋係為人做。</verse>
				<verse number="24">愛知，你等會得到主个獎賞，就係佢為佢个子民所保存个。你等服事个係主基督。</verse>
				<verse number="25">做壞事个，無論佢係麼人，一定會受報應，因為上帝係用共樣个標準來對待每一個人。</verse>
			</chapter>
			<chapter number="4">
				<verse number="1">做主人个，你等愛公平合理來對待奴僕；愛知，你等在天頂也有一位主。</verse>
				<verse number="2">你等愛迫切祈禱，祈禱个時愛警醒，也愛存感謝个心。</verse>
				<verse number="3">同時，也請為𠊎等祈禱，求上帝為𠊎等開傳福音个門，來講論基督个奧秘。這就係𠊎坐監个原因。</verse>
				<verse number="4">請為𠊎祈禱，使𠊎盡責任將這個奧秘講到清清楚楚。</verse>
				<verse number="5">同毋係基督徒个人往來个時，你等愛把扼機會，好好用你等个智慧。</verse>
				<verse number="6">講話愛常常和氣，像用鹽調味，愛知樣般回答每一個人所提出个問題。</verse>
				<verse number="7">𠊎在這位个一切情形，𠊎等親愛个兄弟 推基古 會詳細㧯你等講。佢係一個忠心个工人，同𠊎共下做主个僕人。</verse>
				<verse number="8">𠊎特別派佢去你等該位，報告𠊎等這位个情形，好俾你等得到鼓勵。</verse>
				<verse number="9">同佢共下去个有一個忠心又親愛个兄弟 阿尼西謀 ；佢係你等該位个人。佢兩儕會將這位一切个事㧯你等講。</verse>
				<verse number="10">同𠊎共下坐監个 亞里達古 對你等請安。 巴拿巴 个表老弟 馬可 也對你等請安。 (關係 馬可 ，𠊎識吩咐，佢若係去你等該位，愛接待佢。)</verse>
				<verse number="11">偏名 猶士都 个 耶數 也對你等請安。 猶太 人个信徒當中，只有佢三儕為上帝个國㧯𠊎同工，對𠊎有盡大个安慰。</verse>
				<verse number="12">對你等該位來个 以巴弗 向你等請安；佢也係基督耶穌个僕人。佢常常為你等迫切祈禱，求上帝使你等信心堅定，做成熟个基督徒，完全順服佢个旨意。</verse>
				<verse number="13">佢為你等，也為到 老底嘉 㧯 希拉坡里 个兄弟姊妹辛苦做工；這係𠊎做得證明个。</verse>
				<verse number="14">𠊎等所親愛个 路加 醫生㧯 底馬 兩儕也向你等請安。</verse>
				<verse number="15">請代𠊎等對 老底嘉 个兄弟姊妹，㧯 寧法 ，還有在姖屋下个教會請安。</verse>
				<verse number="16">你等宣讀這封信仔後，請轉交給 老底嘉 教會宣讀；同時，你等也愛讀對 老底嘉 教會轉給你等个信仔。</verse>
				<verse number="17">愛㧯 亞基布 講：「你所領受該服事主个職務一定愛盡力完成。」</verse>
				<verse number="18">𠊎 — 保羅 親筆對你等請安。你等愛記得𠊎係帶等鎖鍊个！ 願上帝賜恩典給你等！</verse>
			</chapter>
		</book>
		<book number="52">
			<chapter number="1">
				<verse number="1">𠊎係 保羅 ；𠊎同 西拉 㧯 提摩太 寫信仔給 帖撒羅尼迦 教會，就係屬阿爸上帝㧯主耶穌基督个眾信徒。 願你等大家得到恩典㧯平安！</verse>
				<verse number="2">𠊎等一直為到你等大家感謝上帝，在祈禱中常常提起你等，</verse>
				<verse number="3">在𠊎等阿爸上帝个面前，一直紀念你等樣般將所信个實行出來，樣般用愛心辛苦工作，又樣般堅持對𠊎等主耶穌基督个盼望。</verse>
				<verse number="4">兄弟姊妹啊，𠊎等知上帝痛惜你等，揀選了你等。</verse>
				<verse number="5">𠊎等將這福音傳給你等，毋係單靠話語，同時也係靠聖靈个能力㧯對福音个確信。你等知，在你等該位个時，𠊎等个生活係樣般；一切个所做攏總係為到你等个好處。</verse>
				<verse number="6">你等有效法𠊎等，也效法主；雖然你等堵到大苦難，還係用聖靈所賜个歡喜來領受真道。</verse>
				<verse number="7">因為恁樣，你等成做 馬其頓 㧯 亞該亞 所有信徒个模範。</verse>
				<verse number="8">主个真道毋單淨對你等該位傳到 馬其頓 㧯 亞該亞 ，你等對上帝有信心个消息也傳到遠近逐所在；毋使𠊎等加講麼介。</verse>
				<verse number="9">該兜人攏總恁樣傳講：在𠊎等訪問你等个時，你等樣般接待𠊎等；你等樣般棄絕偶像，歸向上帝，來事奉又生又真个上帝，</verse>
				<verse number="10">同時，等候佢个孻仔對天頂降臨。這個孻仔係上帝使佢對死復活个耶穌；佢救𠊎等脫離將來會臨到个上帝个大發譴。</verse>
			</chapter>
			<chapter number="2">
				<verse number="1">兄弟姊妹啊，你等自家知，𠊎等訪問你等並毋係無效个。</verse>
				<verse number="2">你等知，𠊎等去你等該位以前，在 腓立比 已經受迫害，被人侮辱。總係，𠊎等个上帝賜𠊎等勇敢，雖然在當多个阻擋中，還係將佢个福音傳給你等。</verse>
				<verse number="3">𠊎等个勸勉毋係對錯誤抑係無純正个動機來，也毋係想愛詐欺麼人。</verse>
				<verse number="4">顛倒，上帝考驗又揀選𠊎等，將傳福音个任務託給𠊎等。所以，上帝愛𠊎等講麼介，𠊎等就講麼介。𠊎等毋係愛使人歡喜，係愛使該察驗𠊎等內心个上帝歡喜。</verse>
				<verse number="5">你等知，𠊎等從來毋識講奉承你等个話，心也無存貪念；這係上帝做得為𠊎等做見證个。</verse>
				<verse number="6">𠊎等無求人个稱讚，無論係你等个，抑係別人个。</verse>
				<verse number="7">身為基督个使徒，本來𠊎等有權好要求你等个尊重；總係，在你等中間个時，𠊎等用溫柔款待你等，像阿姆養育子女一樣。</verse>
				<verse number="8">𠊎等既然恁樣惜你等，毋單淨歡喜同你等分享上帝个福音，連𠊎等个生命也甘願給你等，因為你等係𠊎等所痛惜个！</verse>
				<verse number="9">兄弟姊妹啊，你等應當記得，𠊎等係樣般煞猛勞碌來做事；𠊎等日夜工作，因為傳上帝个福音給你等个時節，無愛加添你等个負擔。</verse>
				<verse number="10">你等係見證人，上帝也做得做證：對你等信个人，𠊎等个做人係樣般純潔、公正、無好嫌。</verse>
				<verse number="11">你等知，𠊎等對你等每一個人，就像阿爸對自家个子女一樣：</verse>
				<verse number="12">𠊎等鼓勵你等，安慰你等；𠊎等也一直勸話你等，行事愛使上帝歡喜；佢就係呼召你等來分享佢个主權㧯榮光个上帝。</verse>
				<verse number="13">𠊎等也常常為這個事感謝上帝：聽到𠊎等所傳上帝个真道，你等就領受，並認為毋係人个話，係確確實實對上帝來个真道；這真道 也在你等信个人中間做工。</verse>
				<verse number="14">兄弟姊妹啊，你等所堵到个，同該兜在 猶太 地區，上帝个眾教會，就係屬基督耶穌个信徒所堵到个共樣。你等被自家个同胞迫害，就像佢等被 猶太 个同胞迫害共樣。</verse>
				<verse number="15">該兜 猶太 人害死主耶穌㧯眾先知，又將𠊎等逐出去。佢等个所做，上帝盡無歡喜。佢等又㧯眾人對敵。</verse>
				<verse number="16">連𠊎等對外邦人傳道理來使外邦人得救，佢等也愛反對。像恁樣，佢等个罪一直增加到滿滿；上帝个大發譴最尾臨到佢等了！</verse>
				<verse number="17">兄弟姊妹啊，𠊎等受迫害，同你等暫時分開，係身體分開定定，𠊎等个心並無離開你等。𠊎等非常想念你等，想盡辦法愛再看到你等！</verse>
				<verse number="18">𠊎等盡想愛再去你等該位！𠊎 — 保羅 一擺又一擺打算愛轉去看你等，總係撒但阻擋𠊎等。</verse>
				<verse number="19">𠊎等个主耶穌再來个時，在佢个面前，𠊎等个希望㧯歡喜，並所誇口个冕旒係麼介呢？敢毋係你等？</verse>
				<verse number="20">你等確實係𠊎等个光榮，𠊎等个歡喜！</verse>
			</chapter>
			<chapter number="3">
				<verse number="1">𠊎等既然忍毋住了，就決定自家留在 雅典 ，</verse>
				<verse number="2">派𠊎等个兄弟 提摩太 去你等該位；佢係𠊎等个同工，為上帝傳基督个福音。𠊎等派佢去个目的係愛堅固㧯幫助你等个信心，</verse>
				<verse number="3">使你等毋會有人因為受迫害來搖動。你等知，這迫害也係𠊎等定著愛經歷个。</verse>
				<verse number="4">同你等共下个時，𠊎等輒輒先㧯你等講，𠊎等會堵到迫害。這個事正經就發生；這係你等所知个。</verse>
				<verse number="5">因為恁樣，𠊎正派 提摩太 去；𠊎實在忍毋住了。𠊎派佢去，係愛知你等个信心到底樣般。𠊎驚怕你等已經被魔鬼迷惑，𠊎等个勞碌變無採工！</verse>
				<verse number="6">這下， 提摩太 已經對你等該位轉來了。佢帶轉關係你等个信心㧯愛心个好消息。佢講，你等常常思念𠊎等，迫切希望見到𠊎等，像𠊎等迫切希望看到你等一樣。</verse>
				<verse number="7">所以，兄弟姊妹啊，𠊎等在一切患難㧯困苦之中，因為你等个信心就得到鼓勵。</verse>
				<verse number="8">既然你等對主有堅定个信心，𠊎等就毋使愁到會死。</verse>
				<verse number="9">這下，𠊎等做得盡量為到你等感謝𠊎等个上帝。𠊎等感謝佢，因為你等使𠊎等在佢面前得到歡喜。</verse>
				<verse number="10">𠊎等日夜對佢迫切祈求，俾𠊎等會有好親身去看你等，來補滿你等信心个需要。</verse>
				<verse number="11">願上帝 — 𠊎等在天頂个阿爸㧯𠊎等个主耶穌親自開路，俾𠊎等會有好去到你等該位。</verse>
				<verse number="12">願主使你等有彼此相惜㧯惜眾人个心，日日增長，像𠊎等恁惜你等一樣。</verse>
				<verse number="13">恁樣，佢會堅定你等个心，在𠊎等个主耶穌㧯所有屬佢个人降臨个時，使你等在𠊎等个阿爸上帝面前成做聖潔，無好嫌。</verse>
			</chapter>
			<chapter number="4">
				<verse number="1">最後，兄弟姊妹啊，你等已經對𠊎等學到愛樣般在生活上俾上帝歡喜；事實上，你等也一直係恁樣行。這下，𠊎等奉主耶穌个名勸你等，求你等，愛更加打拚。</verse>
				<verse number="2">你等知，𠊎等通過主耶穌个權柄所教你等个係麼介。</verse>
				<verse number="3">上帝个旨意係愛你等聖潔，遠離淫亂个事；</verse>
				<verse number="4">每一個人愛知樣般用聖潔㧯尊貴个方式來保守自家个身體 ；</verse>
				<verse number="5">毋好放縱情慾，像該兜毋識上帝个異教徒恁樣。</verse>
				<verse number="6">在這種事上，毋好有對毋起抑係欺負兄弟姊妹个行為。𠊎等已經對你等講，也識警告你等：主定著會責罰該兜做這種事个人。</verse>
				<verse number="7">上帝呼召𠊎等，毋係愛𠊎等生活在淫亂中，係愛𠊎等聖潔。</verse>
				<verse number="8">所以，拒絕這種教訓个，毋係拒絕人，係拒絕賜聖靈給你等个上帝。</verse>
				<verse number="9">關係惜兄弟姊妹，𠊎毋使寫信仔同你等討論；上帝已經教你等愛樣般彼此相惜，</verse>
				<verse number="10">你等也係照這教訓對待全 馬其頓 个眾兄弟姊妹。總係，兄弟姊妹啊，𠊎等還係愛勸你等：更加打拚，</verse>
				<verse number="11">立志安份守己，親手做事來維持自家个生活，像𠊎等頭擺吩咐你等恁樣，</verse>
				<verse number="12">使你等得到該兜無信个人个尊敬，也毋使靠別人个供給。</verse>
				<verse number="13">兄弟姊妹啊，關係已經睡掉个人，𠊎等無愛你等毋知，免得你等憂愁，像該兜無盼望个人。</verse>
				<verse number="14">𠊎等相信耶穌已經死又復活，所以𠊎等相信，該兜信耶穌个人死後，上帝也會將佢等同佢共下帶轉去 。</verse>
				<verse number="15">𠊎等這下照主个教訓㧯你等講：𠊎這兜生等、存留到主再來个人，毋會比該兜已經睡个人先同主相會。</verse>
				<verse number="16">該時，會有發命令个聲，天使長个聲，㧯上帝个號筒聲，然後，主本身會對天頂降下來。相信基督，已經死掉个該兜人會先復活；</verse>
				<verse number="17">接等，𠊎這兜生等還存留个人攏總會同佢等共下受接到雲頂去，在空中同主相會。恁樣，𠊎等就永遠㧯主同在了。</verse>
				<verse number="18">所以，你等愛用這兜話彼此安慰。</verse>
			</chapter>
			<chapter number="5">
				<verse number="1">兄弟姊妹啊，關係這事發生个時間㧯日期，毋使人寫信仔㧯你等講；</verse>
				<verse number="2">因為你等自家清楚知，主再來个日仔就像賊仔在暗晡時忽然來到一樣。</verse>
				<verse number="3">大家講等「一切平安，無事！」个時，災難會忽然臨到佢等，像陣痛忽然臨到將愛𫱔个婦女一樣；佢等絕對走閃毋掉。</verse>
				<verse number="4">總係，兄弟姊妹啊，因為你等毋係生活在烏暗中，該日毋會像賊仔一樣忽然臨到你等。</verse>
				<verse number="5">你等全部係光明个人，係屬日時頭个。𠊎等毋係屬暗晡時，毋係生活在烏暗中个人。</verse>
				<verse number="6">所以，𠊎等無應該像別人恁樣睡到死死；𠊎等愛警醒、謹慎。</verse>
				<verse number="7">人睡目，係在暗晡時睡；酒徒也係在暗晡時醉酒。</verse>
				<verse number="8">既然𠊎等係屬日時頭个，就應該謹慎。𠊎等愛用信心㧯愛心做護心鏡著等，用得救个盼望做頭盔戴等。</verse>
				<verse number="9">上帝毋係揀選𠊎等來被佢責罰，係愛𠊎等通過𠊎等个主耶穌基督來得到拯救。</verse>
				<verse number="10">基督為𠊎等死，係愛使𠊎等，無論係已經睡掉抑係還生等，攏總會在佢再來个時同佢共下生等。</verse>
				<verse number="11">所以，你等愛互相鼓勵，彼此造就，像你等這下所做个一樣。</verse>
				<verse number="12">兄弟姊妹啊，𠊎等求你等，愛尊重該兜在你等中間辛苦工作个，就係主所揀選來指導勸勉你等个人。</verse>
				<verse number="13">因為佢等个工作，你等應該盡所能用尊敬㧯愛心來款待佢等。你等自家也愛彼此和睦。</verse>
				<verse number="14">兄弟姊妹啊，𠊎等勸你等，愛警告懶尸个人，鼓勵灰心个人，扶持軟弱个人，也愛用耐心對待每一個人。</verse>
				<verse number="15">愛細膩，無論麼人都做毋得用壞報壞；愛常常彼此關心，為到別人个好處來想。</verse>
				<verse number="16">愛常常喜樂，</verse>
				<verse number="17">祈禱無停，</verse>
				<verse number="18">凡事感謝；因為這係上帝為你這兜屬基督耶穌个人所定个旨意。</verse>
				<verse number="19">毋好消滅聖靈个感動 ；</verse>
				<verse number="20">毋好藐視先知个講論 。</verse>
				<verse number="21">逐樣事愛詳細察驗：美善个事愛持守，</verse>
				<verse number="22">一切邪惡个事愛棄絕。</verse>
				<verse number="23">願賜平安个上帝親自使你等完全聖潔！願你等个靈、魂、㧯身體得到保守，在𠊎等个主耶穌基督再來个時，完全無好嫌！</verse>
				<verse number="24">呼召你等个上帝係信實可靠个；佢一定會成就這個事。</verse>
				<verse number="25">兄弟姊妹啊，請為𠊎等祈禱。</verse>
				<verse number="26">你等愛聖潔相唚同眾兄弟姊妹請安。</verse>
				<verse number="27">𠊎奉主个名吩咐你等，這封信仔愛宣讀給所有个兄弟姊妹聽。</verse>
				<verse number="28">願𠊎等个主耶穌基督賜恩典給你等！</verse>
			</chapter>
		</book>
		<book number="53">
			<chapter number="1">
				<verse number="1">𠊎係 保羅 ；𠊎同 西拉 㧯 提摩太 寫信仔給 帖撒羅尼迦 教會，就係屬𠊎等个阿爸上帝㧯主耶穌基督个眾信徒。</verse>
				<verse number="2">願𠊎等个阿爸上帝㧯主耶穌基督賜恩典、平安給你等！</verse>
				<verse number="3">兄弟姊妹啊，𠊎等應該常常為你等感謝上帝。這係當然个；因為你等个信心非常進步，你等逐儕彼此相惜个心也大有增長。</verse>
				<verse number="4">因為恁樣，𠊎等在上帝个各教會中拿你等來誇口。𠊎等稱讚你等，因為你等在所受个一切迫害㧯患難中，還係相信，還係忍耐。</verse>
				<verse number="5">這就係上帝公義審判个證據，證明你等堪得享受上帝國个福氣。你等一直忍受苦難，就係為到這個國。</verse>
				<verse number="6">上帝愛施行公義：佢愛使該兜迫害你等个人堵到災難；</verse>
				<verse number="7">佢愛使你這兜受苦个人同𠊎等共下得到釋放。主耶穌㧯佢大能个眾天使對天頂在火焰中顯現个時，上帝就愛執行這件事。</verse>
				<verse number="8">佢愛責罰該兜拒絕佢，㧯該兜毋聽從𠊎等个主耶穌福音个人。</verse>
				<verse number="9">主再來該日，該兜人會受刑罰，永遠滅亡，對主个面前㧯佢大權能个榮光受隔絕。</verse>
				<verse number="10">在該日，佢愛對屬佢个眾聖徒得到榮光，接受所有信徒个稱頌。你等也愛在佢等个當中，因為你等已經相信𠊎等所傳个福音。</verse>
				<verse number="11">為到這個目的，𠊎等常常為你等祈禱，求𠊎等个上帝使你等堪得佢个呼召。願佢用佢个權能，幫助你等實現一切向善个心願，成就你等憑信心所做个工作。</verse>
				<verse number="12">恁樣，𠊎等主耶穌个名就會對你等得到榮光，你等也會對佢得到榮光；這係通過𠊎等个上帝㧯主耶穌基督个恩典來个。</verse>
			</chapter>
			<chapter number="2">
				<verse number="1">兄弟姊妹啊，關係𠊎等个主耶穌基督个再來，並佢愛聚集𠊎等同佢相會个事，𠊎等求你等，</verse>
				<verse number="2">毋好恁遽就被「主再來个日仔已經到了」這種講法來搖動，來操煩。可能有人講，這講法係𠊎等所傳、所講、抑係寫在信仔底背个。</verse>
				<verse number="3">無論麼人用麼介方法，你等毋好俾佢等騙到。因為，該日仔來到以前，定著會有大悖逆；該註定愛滅亡个不法者會出現。</verse>
				<verse number="4">該不法者會反對一切被人稱做神明抑係敬拜个對象，高升自家到一切个頂高；佢甚至會去坐在上帝个聖殿肚，自稱係上帝。</verse>
				<verse number="5">你等毋記得係麼？𠊎同你等共下个時，已經將這個事㧯你等講過了。</verse>
				<verse number="6">阻擋這件事，毋俾它這下就發生个係麼介，你等知。時機一到，該不法者就會出現。</verse>
				<verse number="7">該神秘不法个力量已經開始進行；總係，愛等到阻擋這件事个手徙開以後，這件事正會發生。</verse>
				<verse number="8">該時，不法者會出現；總係主耶穌再來个時愛用口中个氣來除滅佢，用自家降臨个榮光將佢消滅。</verse>
				<verse number="9">該不法者會靠撒但个權勢來到，行各種个奇事㧯神蹟，顯出假个兆頭，</verse>
				<verse number="10">佢也會用各種个詭計來對待該兜滅亡个人；佢等滅亡，因為佢等毋接受，也毋愛惜該會使佢等得救个真理。</verse>
				<verse number="11">因為恁樣，上帝就使佢等迷迷痴痴，俾佢等信從花撩。</verse>
				<verse number="12">結尾，一切毋信真理、歡喜不義个人，會受定罪。</verse>
				<verse number="13">主所惜个兄弟姊妹啊，𠊎等應該常常為你等感謝上帝；因為上帝揀選你等，通過聖靈神聖个工作㧯你等對真理个信仰，使你等先得救 。</verse>
				<verse number="14">通過𠊎等所傳給你等个福音，上帝呼召你等來分享𠊎等个主耶穌基督个榮光。</verse>
				<verse number="15">所以，兄弟姊妹啊，你等愛企在！對𠊎等所教个真理，無論係用講个抑係用信仔寫个，你等一定愛好好遵守。</verse>
				<verse number="16">上帝惜𠊎等，施恩將永存个安慰㧯美好个盼望賜給𠊎等。願這個阿爸上帝㧯𠊎等个主耶穌基督，</verse>
				<verse number="17">激勵你等，使你等有勇氣來傳講並實行一切美好个事。</verse>
			</chapter>
			<chapter number="3">
				<verse number="1">最後，兄弟姊妹啊，請為𠊎等祈禱，好俾主个真道遽遽傳開，也得到尊重，像傳到你等當中也受尊重一樣。</verse>
				<verse number="2">請你等也愛祈禱上帝，救𠊎等脫離該兜邪惡个人，因為毋係每一個人都相信真道。</verse>
				<verse number="3">總係，主係信實个；佢會使你等成做堅強，又保護你等脫離該邪惡者个陷害。</verse>
				<verse number="4">𠊎等靠主確信，你等當在該位實行𠊎等所吩咐个，也會一直實行下去。</verse>
				<verse number="5">願主帶領你等，使你等較深體驗上帝个痛惜，也有基督所賜个耐心。</verse>
				<verse number="6">兄弟姊妹啊，𠊎等奉主耶穌基督个名命令你等：愛遠遠離開所有懶尸毋盡本份、毋照𠊎等教訓去行个信徒。</verse>
				<verse number="7">你等自家清楚知，應該樣般效法𠊎等。𠊎等同你等共下个時，盡本份，毋識懶尸，</verse>
				<verse number="8">也無白食麼人个飯；反轉辛苦勞碌，日夜做事，免得你等中間有人受拖累。</verse>
				<verse number="9">𠊎等恁樣做，毋係𠊎等無權利要求生活个供給，係愛做榜樣給你等效法。</verse>
				<verse number="10">𠊎等在你等該位个時，識吩咐你等講：「毋做事个人做毋得食飯。」</verse>
				<verse number="11">𠊎等講這個話，係因為聽講你等當中有人懶尸毋盡本份，透日毋做事，反轉好管別人个閒事。</verse>
				<verse number="12">這種人，𠊎等奉主耶穌基督个名警告佢等，命令佢等，愛恬恬，親手做事來維持自家个生活。</verse>
				<verse number="13">總係，兄弟姊妹啊，你等愛繼續行善，毋好灰心。</verse>
				<verse number="14">若有人毋肯服從𠊎等在這封信仔底背所吩咐个話，你等愛提防這種人，莫同佢共下，使佢感覺見笑。</verse>
				<verse number="15">總係，毋好看佢做敵人；愛像對信徒恁樣來勸話佢。</verse>
				<verse number="16">願賜平安个主，隨時用各種个方法，親自將平安賜給你等！願主㧯你等大家同在！</verse>
				<verse number="17">𠊎 — 保羅 親筆對你等請安。𠊎逐封信仔攏總恁樣簽名；𠊎个筆跡就係恁樣。</verse>
				<verse number="18">願𠊎等个主耶穌基督賜恩典給你等大家！</verse>
			</chapter>
		</book>
		<book number="54">
			<chapter number="1">
				<verse number="1">𠊎係 保羅 ；𠊎奉𠊎等个救主上帝㧯𠊎等个盼望基督耶穌个命令，做基督耶穌个使徒。</verse>
				<verse number="2">𠊎寫信仔給你 — 提摩太 ，就係𠊎在信仰底背真个孻仔： 願阿爸上帝㧯𠊎等个主基督耶穌賜恩典、憐憫、平安給你！</verse>
				<verse number="3">𠊎愛去 馬其頓 个時，識喊你留在 以弗所 ；𠊎希望你繼續恁樣做。因為有兜人在該位傳假个教義，你定著愛命令佢等停下來。</verse>
				<verse number="4">你也愛命令佢等，愛放掉該兜無影無跡个傳說㧯無窮無盡个族譜；因為這兜東西會惹起辯論定定，對了解上帝个計劃全無幫助。上帝个計劃愛通過信心正會了解。</verse>
				<verse number="5">這命令个目的係愛激勵愛心；愛心係對純潔个心、清白个天良，㧯真實个信心所產生出來个。</verse>
				<verse number="6">有兜人偏離這兜，迷失在虛空个談論底背。</verse>
				<verse number="7">佢等想愛做上帝法律个指導者，總係，連自家所講个也無明白，連自家恁自信所主張个也無清楚。</verse>
				<verse number="8">𠊎等知，人若係照規矩來使用法律，法律本來係好个。</verse>
				<verse number="9">當然，𠊎等愛知：法律毋係為好人來制定个，係為該兜不法㧯毋受約束个、毋敬虔㧯犯罪个、藐視宗教㧯貪愛世俗个、㓾爺殺哀㧯謀殺个、</verse>
				<verse number="10">淫亂、男同性戀、販賣人口、講花撩、做假見證、違悖健全教訓等類个人。</verse>
				<verse number="11">這健全个教義係根據福音，就係榮光、堪得稱頌个上帝交託𠊎宣佈个。</verse>
				<verse number="12">𠊎感謝賜𠊎力量个 — 𠊎等个主基督耶穌！因為佢看𠊎做忠心，指派𠊎來事奉佢。</verse>
				<verse number="13">雖然𠊎頭擺譭謗佢，迫害佢，又侮辱佢，總係𠊎得到憐憫；因為該時𠊎毋信佢，毋明白自家所做个。</verse>
				<verse number="14">𠊎等个主賜𠊎豐盛个恩典，俾𠊎得到同基督耶穌結連个人正有个信心㧯愛心。</verse>
				<verse number="15">「基督耶穌降世个目的係愛拯救罪人」，這句話係真實个、堪得完全接受。𠊎係罪人中第一壞个；</verse>
				<verse number="16">總係，這就係上帝憐憫𠊎个原因，愛使基督耶穌對𠊎這罪人中最壞个，顯出佢完全个忍耐，來使該兜後來信佢、接受永生个人做榜樣。</verse>
				<verse number="17">願尊貴㧯榮光永遠歸給該萬世个君王，就係毋會朽爛、人看毋到、獨一無二个上帝！阿愐。</verse>
				<verse number="18">𠊎个孻仔 提摩太 啊，照頭擺所傳關係你个預言，𠊎將這個命令交託你。你愛用這兜話做武器，來打一場盡靚个戰爭。</verse>
				<verse number="19">愛堅持信仰㧯清白个天良。有兜人棄絕自家个天良，佢等个信仰就像船仔沈掉。</verse>
				<verse number="20">其中有 許米乃 㧯 亞歷山大 ；𠊎已經將佢等交在撒但个手中，愛俾佢等學會毋敢再譭謗上帝。</verse>
			</chapter>
			<chapter number="2">
				<verse number="1">最先，𠊎勸你，愛為萬民對上帝來懇求、祈禱、代禱、㧯感恩；</verse>
				<verse number="2">也愛為君王㧯一切有權勢个人祈禱，使𠊎等有恬靜㧯和平个日仔，來過敬虔㧯端正个生活。</verse>
				<verse number="3">這係好事，係𠊎等个救主上帝所歡喜个。</verse>
				<verse number="4">上帝愛每一個人得救，攏總認識真理。</verse>
				<verse number="5">因為只有一位上帝， 在上帝㧯人个中間只有一位中保， 就係成做人个基督耶穌；</verse>
				<verse number="6">佢犧牲自家來使人類得到自由 ； 這件事在時機成熟个時就證明出來。</verse>
				<verse number="7">為到恁樣，𠊎奉差派做傳道人、使徒、㧯外邦人个教師，來使佢等相信並認識真理。𠊎無講花撩；𠊎所講个全部係真實个！</verse>
				<verse number="8">在各所在个聚會，𠊎希望男人擎等聖潔个手來祈禱，全無發譴，也無辯論。</verse>
				<verse number="9">𠊎也希望婦女著衫愛端莊、大方㧯合適；莫辮奇奇怪怪个頭那毛；莫用金仔、珍珠、抑係盡貴个服裝來打扮。</verse>
				<verse number="10">愛用好行為來表明自家係敬畏上帝个婦女。</verse>
				<verse number="11">婦女愛恬恬來學習，凡事順服。</verse>
				<verse number="12">𠊎毋准婦女教訓人，抑係管轄男人；姖等愛安靜正好。</verse>
				<verse number="13">因為上帝先造 亞當 ，然後正係 夏娃 。</verse>
				<verse number="14">受引誘个毋係 亞當 ，係女人；姖受引誘，違悖上帝个禁令。</verse>
				<verse number="15">總係，婦女若安份守己，堅持信心、愛心、㧯聖潔，就會通過生養子女來得救 。</verse>
			</chapter>
			<chapter number="3">
				<verse number="1">有人講：「麼人想愛做監督 ，佢就係欣慕一件好个事工。」這句話係可靠个！</verse>
				<verse number="2">監督定著愛係一個無好嫌个人。佢只有做得討一個𡜵娘 ；做人愛嚴肅，會約束自家，生活有規律，樂意款待外鄉人。佢一定愛曉得教導人；</verse>
				<verse number="3">毋會酗酒，毋會打人，性情溫和，也無貪財。</verse>
				<verse number="4">佢一定愛好好治理自家个家庭，管教子女，喊佢等用適當个尊敬來順服佢。</verse>
				<verse number="5">一個人毋曉得處理自家个家庭，樣會看顧上帝个教會呢？</verse>
				<verse number="6">監督也毋應該係正入教會个人，免得佢自高自大，陷在魔鬼所受个審判中。</verse>
				<verse number="7">佢在教會外也愛有好名聲，免得佢受譭謗，陷落魔鬼个羅網底背。</verse>
				<verse number="8">執事 也的確愛有好德行。佢等講話愛誠實，做毋得酒醉㧯貪財；</verse>
				<verse number="9">愛用清白个天良堅持信仰个奧秘。</verse>
				<verse number="10">佢等應該先受考驗，無麼介好嫌正做得俾佢擔任職務。</verse>
				<verse number="11">女執事 也愛有好德行，毋會講閒話，穩重，凡事誠實可靠。</verse>
				<verse number="12">每一個執事只有做得討一個𡜵娘 ，佢也愛好好管教子女㧯治理家庭。</verse>
				<verse number="13">該兜在事奉个頂高有好表現个執事就得到好名聲，也會盡好膽講論佢等對基督耶穌个信仰。</verse>
				<verse number="14">𠊎一片寫這封信仔，一片希望遽遽來看你；</verse>
				<verse number="15">若係停跎，這封信仔係㧯你講，𠊎等在上帝个家庭中應該愛樣般行事。這個家庭就係永生上帝个教會，係真理个石柱㧯基礎。</verse>
				<verse number="16">大家公認，𠊎等信仰个奧秘係樣般高深： 佢用人个肉身顯現， 被聖靈證明為義， 被眾天使看見， 被人傳到萬邦， 被世間人相信， 受接入榮耀。</verse>
			</chapter>
			<chapter number="4">
				<verse number="1">聖靈明明講，在末後个時期，有兜人會放掉信仰，去跈欺騙个靈㧯邪靈个教訓。</verse>
				<verse number="2">這種教訓係對假冒為善个落仔來个；佢等个良心像被燒紅个鐵㸐死掉去。</verse>
				<verse number="3">佢等禁止嫁娶；有兜食物佢等也禁食，就係上帝所造、愛給該兜有信心又明白真理个人用感謝个心來領受个。</verse>
				<verse number="4">上帝所造个一切全部係好个，人應當用感謝个心來領受，毋好拒絕，</verse>
				<verse number="5">因為上帝个話㧯人个祈禱使這兜食物成做聖潔了。</verse>
				<verse number="6">你若係將這兜事指示兄弟姊妹，你就係基督耶穌个好僕人；同時，信仰个話㧯你一直所順從个正確道理，會幫助你自家在靈性上長進。</verse>
				<verse number="7">你愛棄絕該兜無搭無碓个言語㧯無影無跡个傳說；愛為到敬虔个生活操練自家。</verse>
				<verse number="8">身體个操練，利益有限；靈性个操練，凡事都有利益，因為會帶來今生㧯來生个盼望。</verse>
				<verse number="9">這句話係可靠个、堪得人完全接受。</verse>
				<verse number="10">𠊎等辛苦打拚 ，因為𠊎等所盼望个係永生个上帝；佢係人類个救主，特別係信徒个救主。</verse>
				<verse number="11">你愛將這兜事情指示佢等，教導佢等。</verse>
				<verse number="12">莫俾人看輕你後生；顛倒，無論講話、行事、愛心、信心、㧯純潔逐方面，你攏總愛做信徒个榜樣。</verse>
				<verse number="13">你愛用心在宣讀聖經、講道、㧯教導等工作上，直到𠊎來。</verse>
				<verse number="14">毋好忽略你屬靈个恩賜；這恩賜係通過先知个預言㧯眾長老个按手所賜給你个。</verse>
				<verse number="15">這兜事你愛專心認真去做，俾大家看到你个進步。</verse>
				<verse number="16">你愛謹慎自家㧯自家个教訓。這兜事情愛堅持去行；恁樣，你就會救你本身，又會救聽從你个人。</verse>
			</chapter>
			<chapter number="5">
				<verse number="1">毋好責備老人家；愛勸佢像勸若爸一樣。對待後生人愛像對兄弟恁樣；</verse>
				<verse number="2">對年長婦女愛像對阿姆恁樣；對後生个婦女愛用純潔个心，像對姊妹一樣。</verse>
				<verse number="3">愛尊重正經守寡个婦女。</verse>
				<verse number="4">寡婦若係有子女抑係孫仔孫女，姖个後輩就愛先學習樣般在屋下盡孝道，來報答爺𡟓抑係阿公阿婆，因為這係上帝所歡喜个。</verse>
				<verse number="5">正經守寡又無人好倚靠个婦女，所仰望个只有上帝，日夜祈禱所求个就係上帝个幫助。</verse>
				<verse number="6">單單追求享樂个寡婦，雖然生等，其實係已經死掉。</verse>
				<verse number="7">這兜事情，你一定愛教，免得姖等被人批評。</verse>
				<verse number="8">若係有人毋照顧親戚，特別係自家屋下个人，佢就係違悖信仰，比毋信个人還較壞。</verse>
				<verse number="9">寡婦登記个條件係恁樣：姖等愛有六十歲以上；只有結婚一擺 ；</verse>
				<verse number="10">還愛有好名聲，就像：盡會養育子女，接待旅客，洗聖徒个腳，救濟急難，盡力行各樣善事。</verse>
				<verse number="11">總係，後生个寡婦毋好登記；因為姖等情慾發動、離開基督个時，就想愛再嫁人，</verse>
				<verse number="12">違悖當初所許个願，因為恁樣受定罪。</verse>
				<verse number="13">同時，姖等還學到懶尸，好過家；還較慘个係，毋單淨懶尸，又好講長講短，插別人个閒事，講無應該講个話。</verse>
				<verse number="14">所以，𠊎希望後生个寡婦再嫁人，生養子女，照顧家庭，莫使對敵有攻擊个把柄。</verse>
				<verse number="15">因為，已經有兜寡婦改變心意，去跈撒但了。</verse>
				<verse number="16">信主个婦女若係屋下有寡婦，姖就愛照顧姖等，毋好將擔仔推給教會；恁樣，教會正會有能力照顧該兜無人好倚靠个寡婦。</verse>
				<verse number="17">盡會治理教會个長老，特別係認真講道㧯教導个，應該愛得到加倍个敬奉。</verse>
				<verse number="18">因為聖經講：「牛踏榖个時，毋好籠等牠个嘴」；又講：「工人得工錢係合理个。」</verse>
				<verse number="19">若係有人告長老，除非有兩個抑係三個證人，就毋使搭佢。</verse>
				<verse number="20">愛公開責備所有犯罪个人，來使其他个人得到警戒。</verse>
				<verse number="21">𠊎在上帝、基督耶穌、㧯受揀選个天使个面前慎重吩咐你，愛遵守這兜教訓，無論麼介事情毋好有成見抑係偏心。</verse>
				<verse number="22">毋好隨便為人行按手禮；毋好㧯別人个罪過有份；愛保守自家純潔。</verse>
				<verse number="23">因為你个身體常常有病，毋好單淨啉水，愛啉一些仔酒來幫助消化。</verse>
				<verse number="24">有兜人个罪係非常明顯个，盡遽就受定罪；總係，有兜人个罪後來正被人看出來。</verse>
				<verse number="25">共樣，好个行為也係明顯个；就算毋係恁明，也無法度囥起來。</verse>
			</chapter>
			<chapter number="6">
				<verse number="1">凡在軛下做奴僕个，應當盡尊重自家个主人，免得上帝个名㧯𠊎等个教訓被人譭謗。</verse>
				<verse number="2">奴僕若有信基督个主人，毋好因為佢等係主內个兄弟就看輕佢等；反轉愛更加煞猛服事，因為受服事來得到利益个人就係親愛个信徒。 你一定愛教導並勸話這兜事情。</verse>
				<verse number="3">若有人傳別樣个教訓，毋聽從𠊎等主耶穌基督健全个道理㧯𠊎等所傳敬虔个教訓，</verse>
				<verse number="4">就係自高自大，極無智識。這種人好辯論，又好摳字眼；結果就生出嫉妒、相爭、譭謗、㧯疑狐，</verse>
				<verse number="5">害該兜壞心術、喪失真理个人冤家無停。在佢等个心眼中，敬虔不過係發財个門路定定！</verse>
				<verse number="6">無毋著，人若知足，敬虔的確會使佢得到大利益。</verse>
				<verse number="7">𠊎等來這世間，雙手空空；𠊎等也帶毋走麼介！</verse>
				<verse number="8">𠊎等若有好食，有好著，就愛知足。</verse>
				<verse number="9">該兜想愛發財个人陷入誘惑个底背，被多多無知㧯會害人个慾望纏等，最後就沈淪滅亡掉去。</verse>
				<verse number="10">貪財係萬惡个根源。有兜人因為貪愛錢財就離開信仰个道路，自家受盡痛苦，傷害心靈。</verse>
				<verse number="11">論到你這屬上帝个人，你愛閃避這兜事。愛追求正義、敬虔、信心、愛心、忍耐、㧯溫柔。</verse>
				<verse number="12">在信仰个比賽頂高，你愛盡命仔走，為自家贏到永遠个生命；為到這個永生，你被上帝呼召，也在多多證人个面前，已經公開宣告這美好个信仰。</verse>
				<verse number="13">其實，基督耶穌在 龐修‧彼拉多 面前做證个時，識做美好个宣告。在賜生命給萬物个上帝㧯這位耶穌面前，𠊎吩咐你：</verse>
				<verse number="14">愛無缺點、無好嫌遵守你所接受个命令，直到𠊎等个主耶穌基督顯現該日。</verse>
				<verse number="15">時機成熟个時，上帝會喊佢顯現；上帝係堪得稱頌、獨一無二个主宰，萬王个王，萬主个主。</verse>
				<verse number="16">唯有佢係毋會死个。佢住在人無辦法接近个光底背；無人識見過佢，也無人看得到佢。願尊貴㧯永遠个權柄歸給佢！阿愐。</verse>
				<verse number="17">該兜在今生富足个人，你愛警戒佢等：毋好驕傲；毋好將希望放在無定著个錢財頂高；反轉愛倚靠將萬物豐豐富富賜給𠊎等享受个上帝。</verse>
				<verse number="18">愛吩咐佢等行善，在好事上富足，甘心救濟，樂意分享。</verse>
				<verse number="19">恁樣做，就係為自家積存財寶，為將來建立堅固个地基，來把扼真个生命。</verse>
				<verse number="20">提摩太 啊，你愛好好保守所託付你个。愛避免該兜無敬虔个空談，㧯所謂「智識」个爭論。</verse>
				<verse number="21">有兜人恅到自家已經有這智識，結果卻迷失信仰个方向。 願上帝賜恩典給你等！</verse>
			</chapter>
		</book>
		<book number="55">
			<chapter number="1">
				<verse number="1">𠊎係 保羅 ；𠊎奉上帝个旨意做基督耶穌个使徒，來宣佈上帝通過基督耶穌所應許个新生命。</verse>
				<verse number="2">𠊎寫信仔給你 — 𠊎所親愛个孻仔 提摩太 ： 願阿爸上帝㧯𠊎等个主基督耶穌賜恩典、憐憫、平安給你！</verse>
				<verse number="3">𠊎日夜祈禱个時，無一擺無想念你；想到你，𠊎就感謝上帝，就係𠊎同祖先共樣用清白个良心所敬拜个上帝。</verse>
				<verse number="4">一想到離別个時你所流个目汁，𠊎就迫切想愛見你；看到你，𠊎正會滿心歡喜。</verse>
				<verse number="5">𠊎記得你該種純真个信心；這信心先前在若姐婆 羅綺 㧯若姆 友妮基 个心肚；𠊎深信，這信心也在你个心肚。</verse>
				<verse number="6">所以，𠊎提醒你：𠊎為你按手个時，上帝賜給你个恩賜，你愛使它像火恁樣𤏸下去。</verse>
				<verse number="7">因為，上帝所賜給𠊎等个靈，毋係愛使𠊎等變無膽；顛倒，佢个靈會使𠊎等充滿力量、愛心、㧯節制。</verse>
				<verse number="8">因為恁樣，為𠊎等个主做證這件事，你毋好看做見笑，也毋好因為𠊎為主个緣故成做囚犯來感覺見笑。你愛照上帝所賜个力量，為福音相共來分擔苦難。</verse>
				<verse number="9">上帝拯救𠊎等，呼召𠊎等做佢聖潔个子民，並毋係𠊎等有麼介好行為，係因為佢个旨意㧯恩典。在萬世以前，佢已經通過基督耶穌將這恩典賜給𠊎等了；</verse>
				<verse number="10">這下，通過𠊎等个救主基督耶穌个降臨，這恩典就顯明出來。基督已經毀滅死个權勢，通過福音將毋會滅亡个生命表明出來。</verse>
				<verse number="11">為到這個福音，上帝指派𠊎做傳道人、使徒，㧯教師。</verse>
				<verse number="12">所以，𠊎正會受到這兜苦難。總係，𠊎毋會感覺見笑，因為𠊎認識𠊎所信靠个上帝 ，也深信佢會保守佢所交託𠊎个 ，直到主再來該日。</verse>
				<verse number="13">你愛堅持遵守對𠊎所學該健全个真道，看做規範，也愛堅持𠊎等同基督耶穌結連所得到个信心㧯愛心。</verse>
				<verse number="14">你愛倚靠住在𠊎等內心个聖靈，好好保守所交託你个真道。</verse>
				<verse number="15">你知，在 亞細亞 省个人全部離開𠊎，包含 腓吉路 㧯 黑摩其尼 。</verse>
				<verse number="16">願主憐憫 阿尼色弗 一家；因為佢好多擺鼓勵𠊎，使𠊎心神爽快。佢無因為𠊎成做囚犯來感覺見笑，</verse>
				<verse number="17">反轉，一到 羅馬 就熱心尋𠊎，直到尋到。</verse>
				<verse number="18">願主在自家再來該日施恩，使佢得到上主个憐憫！佢在 以弗所 為𠊎做盡多事情，這係你清楚知个。</verse>
			</chapter>
			<chapter number="2">
				<verse number="1">𠊎个孻仔啊，你愛通過基督耶穌所賜个恩典剛強起來。</verse>
				<verse number="2">你在盡多證人面前對𠊎領受个教訓，你也應該交託給該兜你所信用又能教別人个人。</verse>
				<verse number="3">身為基督耶穌个精兵，你愛相共來分擔苦難。</verse>
				<verse number="4">一個當兵个人愛爭取長官个稱讚，就毋好俾營外个事情纏身。</verse>
				<verse number="5">運動員比賽个時若無遵守規則，就毋使想愛得到獎賞。</verse>
				<verse number="6">煞猛耕種个農夫應當先享受所收成个。</verse>
				<verse number="7">你愛好好思想𠊎所講个話，因為主一定會使你明白一切事情。</verse>
				<verse number="8">你愛記得耶穌基督；佢係 大衛 个後代，佢已經對死人中復活了；這就係𠊎所傳个福音。</verse>
				<verse number="9">𠊎因為這福音受痛苦，甚至被人像囚犯恁樣䌈等；總係，上帝个話毋會被人䌈等。</verse>
				<verse number="10">所以，𠊎為上帝所揀選个子民忍受這一切，好使佢等也會得到對基督耶穌來个拯救㧯永遠个榮耀。</verse>
				<verse number="11">下背這站話係真實可信个： 𠊎等若同佢共下死， 就會同佢共下生。</verse>
				<verse number="12">𠊎等若係忍耐到底， 就會同佢共下掌權。 𠊎等若係毋認佢， 佢也會毋認𠊎等。</verse>
				<verse number="13">𠊎等若係無信用， 佢還係真實可信， 因為佢毋會違背自家。</verse>
				<verse number="14">你愛提醒大家，在上帝面前嚴嚴警戒佢等：毋好摳字眼；這係無利益个事，只會敗壞聽到个人。</verse>
				<verse number="15">愛盡力在上帝面前做一個堪得考驗、毋會見笑个工人，正確講解上帝个真道。</verse>
				<verse number="16">愛閃開無根無據个空談，因為這類个談論會害人離開上帝；</verse>
				<verse number="17">佢等所講个係像毒瘡，緊遰緊大𣽛。這兜人當中，有 許米乃 㧯 腓理徒 ；</verse>
				<verse number="18">佢等離開真理，主張復活个事已經過掉了，害別人信心搖動。</verse>
				<verse number="19">總係，上帝所立堅固个根基係毋會搖動个；在這地基頂高刻等：「主認識屬佢个人」，又刻等：「凡自認屬主个，一定愛棄絕邪惡。」</verse>
				<verse number="20">每一個大家庭攏總有盡多器皿，毋單淨有金器銀器，也有樹仔个、缶仔个；有兜係為到貴重个用途，有兜係為到卑賤个用途。</verse>
				<verse number="21">人若自潔，脫離一切卑賤个事，就會做貴重个器皿，成做聖潔，被主所用，來行各種个善事。</verse>
				<verse number="22">你毋好像後生人恁樣憑情慾行事；愛同該兜心純潔，求主幫助个人相共追求正義、信心、愛心、並和平。</verse>
				<verse number="23">愛棄絕該兜戇戇無知个辯論；你知，這種辯論常常會惹起冤家。</verse>
				<verse number="24">主个僕人做毋得冤家；佢應該和和氣氣來對待眾人，認真教導人，存心忍耐，</verse>
				<verse number="25">用溫柔勸話反對个人。或者上帝會給佢等悔改个機會，使佢等認識真理。</verse>
				<verse number="26">恁樣，雖然魔鬼將佢等捉去，強迫佢等順服，佢等也可能會醒過來，對佢个羅網底背走出來。</verse>
			</chapter>
			<chapter number="3">
				<verse number="1">你愛知，在世界个末期會有種種个苦難。</verse>
				<verse number="2">該時，人會單淨顧自家，貪財，自誇，驕傲，譭謗，悖逆爺𡟓，忘恩背義，無聖潔，</verse>
				<verse number="3">無親情，毋肯饒人，好講謠言，野蠻，粗暴，怨恨良善。</verse>
				<verse number="4">佢等會悖逆主人，出賣朋友，隨意亂行，自高自大，盡愛享樂贏過敬愛上帝。</verse>
				<verse number="5">佢等有敬虔个外表，總係拒絕真實个敬虔。這種人，你愛閃開。</verse>
				<verse number="6">佢等當中有兜人當會鑽，入到別人屋下，去迷惑該兜心志軟弱、被罪壓制、被各種慾望牽等走个婦女。</verse>
				<verse number="7">該兜婦女雖然常常學習，總係一直無法度認識真理。</verse>
				<verse number="8">就像古時代个 雅尼 㧯 洋布雷 反對 摩西 恁樣，這下這兜人也照樣反對真理。佢等係心思敗壞个人，在信仰上企毋住。</verse>
				<verse number="9">總係，佢等毋會有別个步數了；因為佢等个戇檔會在眾人面前顯明出來，像 雅尼 㧯 洋布雷 一樣。</verse>
				<verse number="10">論到你，你已經順從𠊎个教訓，學𠊎个做人、𠊎个志向、信心、大量、愛心、㧯忍耐，</verse>
				<verse number="11">又分擔𠊎所受个迫害㧯苦難。在 安提阿 、 以哥念 、㧯 路司得 這兜地方，𠊎所堵到个㧯所忍受个迫害，你全部知；總係，主救𠊎脫離這一切。</verse>
				<verse number="12">無毋著，凡立志跈基督耶穌來過敬虔生活个人，攏總會堵到迫害。</verse>
				<verse number="13">邪惡个人㧯該兜落仔，佢等个情況也會一日比一日較壞；佢等騙別人，也被人騙。</verse>
				<verse number="14">論到你，你愛堅持所學習㧯確信个真理。你知麼人係你个導師；</verse>
				<verse number="15">你也記得，你從細就明白聖經，就係能使你得到智慧、指示你通過信基督耶穌來得救个書。</verse>
				<verse number="16">全本聖經係受上帝个靈感來寫个 ，對教導真理，指責錯誤，糾正過失，指示人生个正路，攏總有利益，</verse>
				<verse number="17">愛使屬上帝个人得到充足个準備，能行各種个善事。</verse>
			</chapter>
			<chapter number="4">
				<verse number="1">在上帝㧯愛審判所有生人㧯死人个基督耶穌面前，𠊎憑佢个顯現㧯佢个主權，迫切勸話你：</verse>
				<verse number="2">愛傳福音，無論時機好壞總愛傳！愛用最大个耐心㧯各樣个教訓來責備，警戒，㧯勸勉。</verse>
				<verse number="3">時節會到，該時人會拒絕健全个教訓，順自家个慾望，逐所在去拜師，來滿足佢等當癢个耳公。</verse>
				<verse number="4">佢等會揞等耳公毋聽真理，反轉偏向無影無跡个傳說。</verse>
				<verse number="5">總係你，無論情況樣般，你一定愛謹慎，也愛忍受苦難，做傳道人應當做个工作，來盡上帝僕人个職務。</verse>
				<verse number="6">關係𠊎，𠊎犧牲自家 个時間到了；這下就係𠊎離開人間个時節。</verse>
				<verse number="7">堪得打拚个比賽，𠊎已經拚過了；應當走个路程，𠊎已經走透了；應當守个信仰，𠊎也已經遵守了。</verse>
				<verse number="8">這下，勝利个獎賞等等𠊎；照公義施行審判个主，在耶穌再來該日，愛將公義个冕旒賜給𠊎，毋單淨賜給𠊎，也愛賜給所有愛慕等候佢顯現个人。</verse>
				<verse number="9">你愛遽遽來𠊎這位。</verse>
				<verse number="10">因為 底馬 貪愛現世，就離開𠊎去 帖撒羅尼迦 了。 革勒士 去 加拉太 ， 提多 去 撻馬太 ；</verse>
				<verse number="11">只有 路加 同𠊎共下。你愛去尋 馬可 ，帶佢共下來，因為佢會㧯𠊎𢯭手。</verse>
				<verse number="12">𠊎已經派 推基古 去 以弗所 。</verse>
				<verse number="13">你來个時，愛將𠊎在 特羅亞 个時留在 加布 屋下該領大襖帶來；同時，愛將該兜書，特別係該幾本羊皮个書卷也共下帶來。</verse>
				<verse number="14">打銅師傅 亞歷山大 多方面害𠊎；主會照佢所做个報應佢。</verse>
				<verse number="15">你自家也愛提防佢，因為佢盡反對𠊎等所傳个道理。</verse>
				<verse number="16">𠊎第一擺為自家辯護个時，無半儕來幫助，大家全部離開𠊎。願上帝莫責罰佢等！</verse>
				<verse number="17">唯有主在𠊎身邊支持𠊎，給𠊎力量將真道傳給所有个外邦人，傳到盡完全；恁樣，𠊎就對獅仔个嘴肚得到拯救。</verse>
				<verse number="18">主一定會救𠊎脫離一切邪惡，接𠊎安安全全到佢个天國去。願榮光歸給佢，直到永永遠遠！阿愐。</verse>
				<verse number="19">請代𠊎對 百基拉 、 亞居拉 兩公婆，㧯 阿尼色弗 一家人請安。</verse>
				<verse number="20">以拉都 繼續住在 哥林多 了。 特羅非摩 發病，𠊎喊佢留在 米利都 。</verse>
				<verse number="21">你愛盡量在入冬以前趕來。 友布羅 、 布田 、 利努 、女信徒 克勞狄雅 ，㧯其他所有个兄弟姊妹全部對你請安。</verse>
				<verse number="22">願主常在你心內！願上帝賜恩典給你等！</verse>
			</chapter>
		</book>
		<book number="56">
			<chapter number="1">
				<verse number="1">𠊎係 保羅 ，上帝个僕人，耶穌基督个使徒。𠊎蒙召㧯奉差派來幫助上帝个選民建立信仰，帶領佢等認識𠊎等个信仰所教个真理；</verse>
				<verse number="2">這真理係用盼望永遠个生命做根據。上帝係毋會講花撩个！佢在萬世以前，已經應許愛將這永遠个生命賜給𠊎等，</verse>
				<verse number="3">時機成熟个時，佢就通過傳福音將佢个真道顯明出來。𠊎受交託，奉𠊎等个救主上帝个命令，揹起傳這真道个任務。</verse>
				<verse number="4">提多 ，𠊎這下寫信仔給你；你在𠊎等共同个信仰上係𠊎真个孻仔。 願阿爸上帝㧯𠊎等个救主基督耶穌賜恩典、平安給你！</verse>
				<verse number="5">𠊎留你在 克里特 ，目的係愛你處理還吂辦好个事務，也愛你在逐個城市設立長老。𠊎識吩咐：</verse>
				<verse number="6">做長老个一定愛係無好嫌个人。佢應當只有一個𡜵娘 ；佢个子女應該係信徒，無放蕩也無毋受管教个壞名聲。</verse>
				<verse number="7">既然做教會个領袖 擔負上帝个工作，佢就應該愛做無好嫌个人。佢莫固執，莫暴躁，莫酒醉，莫相打，莫貪財；</verse>
				<verse number="8">愛樂意款待外鄉人，歡喜做好事，穩重，正直，聖潔，節制。</verse>
				<verse number="9">愛堅守該可靠、符合真道个教訓；恁樣，正有辦法用健全个教訓來感化別人，並糾正該兜反對个人，指出佢等个毋著。</verse>
				<verse number="10">因為有盡多人違悖真道，用無根無據个話欺騙人，特別係該兜主張愛接受割禮个 猶太 基督徒。</verse>
				<verse number="11">你愛將該兜人个嘴塞等；佢等為到貪圖錢財，已經用毋應該傳講个學說破壞盡多人个家庭。</verse>
				<verse number="12">在 克里特 人中間，有本地一個先知識恁樣講：「 克里特 人常常講花撩，係兇惡个禽獸，豺食又懶尸。」</verse>
				<verse number="13">佢這個話無毋著。所以，你一定愛嚴嚴責備佢等，好俾佢等有健全个信仰，</verse>
				<verse number="14">毋愛再聽 猶太 人該兜無影無跡个傳說，㧯該兜拒絕真理个人所堅持个規矩。</verse>
				<verse number="15">對淨浰个人來講，一切攏總係淨浰个；總係對該兜垃圾㧯毋信个人來講，無一樣東西係淨浰个，因為佢等个心肝㧯天良全部垃圾到講毋得。</verse>
				<verse number="16">佢等堅持講佢等認識上帝；總係佢等个行為否認佢。佢等係得人惱个人，係悖逆个人，無可能做出麼介好事來！</verse>
			</chapter>
			<chapter number="2">
				<verse number="1">論到你，你个教導定著愛合健全个教訓。</verse>
				<verse number="2">你愛勸老人家，喊佢等做人愛穩重，有好德行，愛約束自家，愛追求健全个信心、愛心，㧯耐心。</verse>
				<verse number="3">共樣，你也愛勸年長婦女，喊姖等做人愛謹慎，莫論人是非，莫做酒奴才。姖等愛做好榜樣，</verse>
				<verse number="4">來教導後生个婦女，教姖等樣般惜老公㧯子女；</verse>
				<verse number="5">訓練姖等樣般約束自家，過貞潔个生活，料理家務，有慈悲心，順從老公，免得上帝个道受譭謗。</verse>
				<verse number="6">共樣，你也愛勸後生人，喊佢等愛約束自家。</verse>
				<verse number="7">當然，你自家無論在㖠方面都愛有好行為，做人个模範。教人个時愛誠懇、穩重，</verse>
				<verse number="8">所講个話愛妥當，毋好被人指責。恁樣，該兜好反對个人，因為尋毋到𠊎等个毋著，就無話好講，反轉自家感覺見笑。</verse>
				<verse number="9">你愛勸做奴僕个，喊佢等愛服從主人，凡事俾主人歡喜，莫堵撐佢等，</verse>
				<verse number="10">也做毋得偷拿佢等个東西；顛倒，愛在逐樣事上顯出忠心㧯有信用。恁樣，佢等所做个一切正會使𠊎等个救主上帝个教訓得到尊重。</verse>
				<verse number="11">因為上帝拯救全人類个恩典已經顯明出來了。</verse>
				<verse number="12">這恩典訓練𠊎等：愛棄絕無敬虔个生活㧯屬世个私慾；在今生愛用節制、正直，㧯敬虔來過日仔，</verse>
				<verse number="13">來等候𠊎等所盼望蒙恩个日仔來到。該時，至大个上帝 — 𠊎等救主 耶穌基督个榮耀愛顯現。</verse>
				<verse number="14">基督為𠊎等犧牲自家，係愛救贖𠊎等脫離一切个邪惡，使𠊎等成做佢純潔个子民來歸屬佢，熱心來行善。</verse>
				<verse number="15">你愛講論這兜事，好好運用你个權柄來勸勉人抑係責備人；毋好俾人看輕你。</verse>
			</chapter>
			<chapter number="3">
				<verse number="1">你愛提醒大家，喊佢等愛服從執政者㧯掌權者，聽從命令，隨時隨地去行各種个好事。</verse>
				<verse number="2">勸佢等莫講別人个壞話，莫相爭；做人愛和氣，用溫柔个態度來對待所有个人。</verse>
				<verse number="3">𠊎等頭擺也係無智識、悖逆，㧯受迷惑；𠊎等識做各種情慾㧯享樂个奴僕，生活在惡毒㧯嫉妒个當中，彼此怨恨。</verse>
				<verse number="4">總係，𠊎等个救主上帝已經顯出佢个慈愛，通過重生个洗禮㧯聖靈所賜个更新來拯救𠊎等；這毋係因為𠊎等自家有麼介好行為，係因為佢憐憫𠊎等。</verse>
				<verse number="5"></verse>
				<verse number="6">通過𠊎等个救主耶穌基督，上帝將聖靈豐豐富富倒在𠊎等个身上；</verse>
				<verse number="7">對佢个恩典，上帝使𠊎等同佢有正確个關係，來得到所盼望該永遠个生命。</verse>
				<verse number="8">這個話係確實有影个。 𠊎希望你特別強調這兜事情，好使該兜信上帝个人熱心行善；行善係盡靚又對人有利益个事。</verse>
				<verse number="9">愛避免戇檔个辯論，莫為族譜爭論，莫冤家抑係為法律个問題相爭；因為這兜全係無價值、無利益个。</verse>
				<verse number="10">對製造紛爭个人，警告佢一兩擺，佢還係毋聽，就毋好再同佢來往。</verse>
				<verse number="11">因為你知，這種人已經壞盡了，佢毋單淨犯罪，又定自家个罪。</verse>
				<verse number="12">𠊎派 亞提馬 抑係 推基古 去你該位个時，你愛想盡辦法來 尼哥坡里 見𠊎，因為𠊎已經決定愛在該位過冬。</verse>
				<verse number="13">愛盡量幫助 西納 律師㧯 亞波羅 出發去旅行，俾佢等無欠麼介。</verse>
				<verse number="14">屬𠊎等个人愛學習認真做正當个工作，來供給生活个需要，免得做閒亍亍無路用个人。</verse>
				<verse number="15">同𠊎共下个人攏總對你請安。請代𠊎等對該兜同信仰个好朋友請安。 願上帝賜恩典給你等大家！</verse>
			</chapter>
		</book>
		<book number="57">
			<chapter number="1">
				<verse number="1">𠊎係 保羅 ；𠊎為到基督耶穌个緣故成做囚犯。𠊎㧯 提摩太 兄弟寫信仔給你 — 𠊎等所親愛个同工 腓利門 ，</verse>
				<verse number="2">㧯在若屋下聚會个教會，並 亞腓亞 姊妹，還有同𠊎等共下為主做兵个 亞基布 。</verse>
				<verse number="3">願𠊎等个阿爸上帝㧯主耶穌基督賜恩典、平安給你等！</verse>
				<verse number="4">親愛个 腓利門 啊，𠊎逐擺祈禱个時就提到你，常常為你感謝𠊎个上帝；</verse>
				<verse number="5">因為𠊎聽講你對眾聖徒盡有愛心，對主耶穌盡有信心。</verse>
				<verse number="6">𠊎求上帝通過你對信仰所表現个團契，使𠊎等深知同基督結連个一切好處。</verse>
				<verse number="7">親愛个兄弟啊，你个愛心給𠊎極大个歡喜㧯安慰；因為眾聖徒个心已經對你得到爽快。</verse>
				<verse number="8">既然𠊎係你在基督底背个兄弟，𠊎本來做得大膽吩咐你行應該行个事；</verse>
				<verse number="9">總係，𠊎甘願用愛心來求你。雖然𠊎 — 保羅 係基督耶穌个大使，這下又因為佢个緣故成做囚犯 ，𠊎還係甘願恁樣行。</verse>
				<verse number="10">𠊎對你个請求係為到 阿尼西謀 。佢係𠊎在基督底背个孻仔；𠊎在監獄肚个時成做佢靈性个阿爸。</verse>
				<verse number="11">頭擺佢對你無麼介用，這下佢無論對你、對𠊎，攏總盡有用 。</verse>
				<verse number="12">𠊎這下送佢倒轉你該位去，像係送𠊎个心肝去一樣。</verse>
				<verse number="13">𠊎本來想愛留佢在𠊎身邊，喊佢在𠊎為福音坐監个時節代你服事𠊎；</verse>
				<verse number="14">總係，無你个同意，𠊎莫恁樣做較好，俾你所做个好事毋係勉強，係甘心樂意个。</verse>
				<verse number="15">阿尼西謀 暫時離開你，或者係愛俾你永遠得到佢。</verse>
				<verse number="16">這下，佢無再係一個奴隸，已經超過奴隸个身份，係在基督底背親愛个兄弟。對𠊎來講，佢確實係恁樣，對你還較係！因為佢係你个僕人，又係主內个兄弟！</verse>
				<verse number="17">所以，你若係看𠊎做親密个朋友，請你接納佢轉去，像係接納𠊎。</verse>
				<verse number="18">若係佢識做對毋起你个事，抑係虧欠你麼介，全部算𠊎个額。</verse>
				<verse number="19">𠊎在這位親筆寫下來：𠊎 — 保羅 負責還。𠊎無講，你乜知，你欠𠊎个係你个生命！</verse>
				<verse number="20">所以，兄弟啊，為到主个緣故，求你給𠊎這個人情！𠊎在基督底背个兄弟啊，求你使𠊎个心得到爽快！</verse>
				<verse number="21">𠊎寫這封信仔給你，因為𠊎深信你會聽從𠊎。其實，𠊎知你所行个會超過𠊎所要求个。</verse>
				<verse number="22">同時，請代𠊎準備一隻間房；𠊎希望上帝會聽你等个祈禱，俾𠊎轉到你等該位去。</verse>
				<verse number="23">為到基督耶穌同𠊎共下坐監个 以巴弗 對你請安。</verse>
				<verse number="24">𠊎个同工 馬可 、 亞里達古 、 底馬 、㧯 路加 也對你請安。</verse>
				<verse number="25">願主耶穌基督个恩典常在你等个心中！</verse>
			</chapter>
		</book>
		<book number="58">
			<chapter number="1">
				<verse number="1">在古時代，上帝盡多擺用各種方法，通過眾先知對𠊎等个祖先講話；</verse>
				<verse number="2">總係，在這末後个日仔，佢通過佢个孻仔對𠊎等講話。這個孻仔，上帝識通過佢創造宇宙，又設立佢來承受萬有。</verse>
				<verse number="3">佢係上帝个榮耀所發出个光，係上帝本質个真相；佢用佢大能个話托等萬有。佢洗淨人類个罪惡以後，就坐在天頂至大權能者个右片。</verse>
				<verse number="4">這孻仔个地位遠遠超過眾天使，像上帝所賜佢个名比天使个名較尊貴。</verse>
				<verse number="5">上帝從來毋識對任何一個天使講過： 你係𠊎个孻仔； 今晡日𠊎做你个阿爸。 佢也毋識對任何一個天使講： 𠊎愛做佢个阿爸； 佢愛做𠊎个孻仔。</verse>
				<verse number="6">上帝愛差派佢个長子來世間个時節，佢講： 上帝个眾天使攏總愛拜佢。</verse>
				<verse number="7">關係天使，佢講： 上帝使佢个使者成做風， 使佢个奴僕成做火焰。</verse>
				<verse number="8">總係，講到孻仔，佢就講： 上帝啊，你个寶座萬代長存！ 你用公平掌權。</verse>
				<verse number="9">你歡喜公義，怨恨罪惡； 所以上帝 — 你个上帝選立你， 使你充滿喜樂，贏過同伴。</verse>
				<verse number="10">佢又講： 主啊，起頭你定大地个根基； 諸天也係你親手創造个。</verse>
				<verse number="11">天地會消滅，總係你永遠長存； 天地會像衫褲爛掉恁樣消失。</verse>
				<verse number="12">你愛將天地捲起來，像捲外袍， 它兜會像衫褲漸漸歿掉； 總係你永遠毋會改變， 你个壽年無窮無盡。</verse>
				<verse number="13">上帝從來毋識對任何一個天使講過： 你坐在𠊎个右片， 等𠊎使你个仇敵伏在你个腳下。</verse>
				<verse number="14">恁樣，天使係麼介呢？佢等係事奉上帝个靈；上帝派佢等來幫助該兜愛承受救恩个人。</verse>
			</chapter>
			<chapter number="2">
				<verse number="1">因為恁樣，𠊎等一定愛堅守所聽个真理，免得被潮流打走。</verse>
				<verse number="2">天使所傳給𠊎等祖先个道理已經證明係確實个；所有毋順從抑係悖逆這道理个人已經受到應得个責罰。</verse>
				<verse number="3">既然係恁樣，若係𠊎等忽略恁大个拯救，樣般閃得走責罰呢？這拯救最先係主本身講个；該兜聽到个人已經對𠊎等證明過係事實个。</verse>
				<verse number="4">上帝自家也用神蹟、奇事，㧯各種个大能來加強佢等个見證；同時，佢又照自家个旨意，將聖靈个恩賜分給𠊎等。</verse>
				<verse number="5">𠊎等所講、該將來个世界，上帝並無交給天使管理。</verse>
				<verse number="6">顛倒，像聖經某所在講个： 上帝啊，人算麼介，你顧念佢！ 世間人算麼介，你看顧佢！</verse>
				<verse number="7">你使佢暫時比天使較細； 你用榮光尊貴做佢个冕旒；</verse>
				<verse number="8">你使佢管理萬物。 這位既然講，上帝使人「管理萬物」，當然係包含一切；事實上，𠊎等這下並無看到人管理萬物。</verse>
				<verse number="9">𠊎等只有看到耶穌，佢暫時成做比天使較細，通過上帝个恩典，代萬人來死；因為佢經歷死个痛苦，就得到榮光㧯尊貴个冕旒。</verse>
				<verse number="10">該創造㧯維持萬物个上帝，使耶穌經歷苦難，成做完全，為到愛使眾子女共下享受佢个榮耀；上帝恁樣做係當然个。因為耶穌做先鋒，親身帶領佢等進入拯救。</verse>
				<verse number="11">佢洗淨人个罪；佢㧯該兜得到淨浰个人就屬共一個阿爸。所以，耶穌認佢等做兄弟姊妹，也無看做見笑。</verse>
				<verse number="12">佢講： 上帝啊，𠊎愛對𠊎个兄弟姊妹傳揚你个名； 𠊎愛在全會眾个面前歌頌你。</verse>
				<verse number="13">佢也講： 𠊎愛信靠上帝； 又講： 看啊，𠊎㧯上帝所賜給𠊎个子女全部在這位。</verse>
				<verse number="14">既然這兜子女係有肉有血个人，耶穌本身也共樣成做肉體；恁樣，通過佢个死，佢能將揢等死个權勢个魔鬼廢掉，</verse>
				<verse number="15">又釋放該兜一生人被驚死个心捆綁个人。</verse>
				<verse number="16">盡明顯，佢毋係幫助天使；佢係幫助 亞伯拉罕 个子孫。</verse>
				<verse number="17">所以，佢一定愛在各方面㧯佢个眾兄弟姊妹共樣，好在上帝面前做佢等慈悲又信實个大祭司，來使人个罪得到赦免 。</verse>
				<verse number="18">因為佢識親身經歷試探㧯痛苦，所以佢這下能幫助該兜受試探个人。</verse>
			</chapter>
			<chapter number="3">
				<verse number="1">上帝所選召、所聖別个眾兄弟姊妹啊！你等愛好好愐想耶穌；佢係上帝所差派个，係𠊎等信仰所告白个大祭司。</verse>
				<verse number="2">佢對選召佢來工作个上帝盡忠心，像 摩西 在上帝个全家盡忠工作一樣。</verse>
				<verse number="3">總係，耶穌有資格比 摩西 承受更大个榮光；就像起屋个人所得个榮光超過佢所起个屋一樣。</verse>
				<verse number="4">逐間屋係人起造个，總係創造萬有个係上帝。</verse>
				<verse number="5">摩西 在上帝个全家做忠心个僕人，為到上帝後來所愛講个話做證；</verse>
				<verse number="6">總係，基督用孻仔个身份忠心治理上帝个家。𠊎等若因為所盼望个，勇敢到底，確信到底，𠊎等就係上帝个一家人了。</verse>
				<verse number="7">所以，像聖靈所講个： 今晡日，你等若聽到上帝个聲，</verse>
				<verse number="8">就毋好恁硬頸， 像頭擺恁樣悖逆上帝， 像當時在曠野試探佢。</verse>
				<verse number="9">上帝講：四十年个當中， 你等个祖先雖然看到𠊎所行个， 佢等還係在該位惹𠊎、試探𠊎。</verse>
				<verse number="10">所以，𠊎對該時代个人發譴，講： 「佢等一直恁毋忠心， 又毋服從𠊎个命令。」</verse>
				<verse number="11">𠊎在怒氣中發誓： 「佢等絕對做毋得入去該地方享受𠊎所賜个安息！」</verse>
				<verse number="12">𠊎个兄弟姊妹啊，你等愛細膩噢！驚怕你等當中有人心思敗壞，毋肯相信，離開永生个上帝。</verse>
				<verse number="13">最好，趕還有所謂「今晡日」个時節，你等愛日日彼此勸勉，免得你等中間有人被罪迷惑，變做硬頸。</verse>
				<verse number="14">因為，𠊎等若堅持當初个確信，始終不變，𠊎等就係基督个同工。</verse>
				<verse number="15">照聖經所講个： 今晡日，你等若聽到上帝个聲， 就毋好恁硬頸， 像頭擺恁樣悖逆上帝。</verse>
				<verse number="16">係麼人聽到上帝个聲又悖逆佢呢？敢毋係 摩西 對 埃及 帶領出來个人民嗎？</verse>
				<verse number="17">該四十年个當中，上帝係對麼人發譴啊？敢毋係該兜因為犯罪、身屍橫在曠野个人嗎？</verse>
				<verse number="18">上帝發誓講：「佢等絕對做毋得入去該地方享受𠊎所賜个安息！」這句話係對麼人講个啊？敢毋係對該兜悖逆个人嗎？</verse>
				<verse number="19">對恁樣來看，佢等無法度入去該地方享受安息係因為佢等毋信。</verse>
			</chapter>
			<chapter number="4">
				<verse number="1">既然上帝應許愛俾𠊎等享受佢所賜个安息，𠊎等就應該存敬畏个心，免得有人被上帝看做係失敗个，無法度享受安息。</verse>
				<verse number="2">𠊎等也有聽到福音，像佢等一樣；總係佢等聽了福音，並無得到利益，因為佢等無用信心來領受所聽到个。</verse>
				<verse number="3">𠊎等有好享受上帝个安息，因為𠊎等信；像上帝所講： 𠊎在怒氣中發誓： 「佢等絕對做毋得入去該地方享受𠊎所賜个安息！」 事實上，上帝創造个工作早就完成了，佢還恁樣講。</verse>
				<verse number="4">因為關係第七日，聖經有一節恁樣講：「在第七日，上帝就停佢一切个工作來安息。」</verse>
				<verse number="5">關係這件事，聖經又講：「佢等絕對做毋得入去該地方享受𠊎所賜个安息！」</verse>
				<verse number="6">先前該兜聽到福音个人無享受到安息，因為佢等毋信；這就係講，還有其他个人會有好享受佢个安息。</verse>
				<verse number="7">所以，上帝另外定一日，稱做「今晡日」。多多年後，佢通過 大衛 个話，照聖經所記載，講： 今晡日，你等若聽到上帝个聲， 就毋好恁硬頸。</verse>
				<verse number="8">若係 約書亞 已經帶領人民進入上帝所應許个安息，上帝後來就毋會再提這另外个一日。</verse>
				<verse number="9">對恁樣來看，還有另外一種个「安息日」為上帝子民个安息保留等。</verse>
				<verse number="10">因為，人若係領受上帝所應許个安息，就會對停下佢个工作來得到安息，像上帝停佢个工作來安息一樣。</verse>
				<verse number="11">所以，𠊎等應該盡力打拚來進入這種个安息，免得有人像該兜毋服從个人恁樣跌倒。</verse>
				<verse number="12">上帝个話係有生命、有效力个。它比兩邊利个劍還較利；連靈㧯魂，關節㧯骨髓，攏總刺得入。它能判斷人心中个思想㧯念頭。</verse>
				<verse number="13">受造个萬物無一樣有可能囥等毋給上帝知；在佢眼中，一切事情攏總係清清楚楚个。有一日，𠊎等愛對佢交帳。</verse>
				<verse number="14">恁樣，𠊎等應該堅持𠊎等所告白个信仰。因為𠊎等有一個偉大个大祭司，就係上帝个孻仔耶穌；佢已經升到上帝个面前。</verse>
				<verse number="15">𠊎等个大祭司毋係毋會同情𠊎等个軟弱；顛倒，𠊎等个大祭司經歷過𠊎等所堵到各方面个試探，總係佢無犯罪。</verse>
				<verse number="16">所以，𠊎等應該大膽來到上帝施恩个寶座前，好領受慈愛㧯恩典，做𠊎等及時个幫助。</verse>
			</chapter>
			<chapter number="5">
				<verse number="1">大祭司全部係對民間選出來个；佢个任務係代人民事奉上帝，為佢等个罪獻禮物㧯祭物。</verse>
				<verse number="2">大祭司自家也有各種个軟弱，所以佢會和和氣氣對待該兜無知來犯罪个人。</verse>
				<verse number="3">同時，因為佢自家个軟弱，佢毋單淨愛為人民个罪獻祭，也愛為自家个罪獻祭。</verse>
				<verse number="4">大祭司个尊榮地位，人做毋得自家去爭取；唯有上帝所選召个人正做得做大祭司，像 亞倫 一樣。</verse>
				<verse number="5">共樣，基督做大祭司个尊榮地位也毋係自家爭取來个；顛倒，係上帝對佢講： 你係𠊎个孻仔； 今晡日𠊎做你个阿爸。</verse>
				<verse number="6">佢又在另外一所在講： 你愛照 麥基洗德 个體制， 永遠做祭司。</verse>
				<verse number="7">耶穌在世間个時，識對該能救佢脫離死亡个上帝大聲祈禱，流目汁祈求。因為佢个謙卑㧯虔誠，上帝聽佢个祈求。</verse>
				<verse number="8">雖然佢係上帝个孻仔，還係愛對所受个苦難來學順服。</verse>
				<verse number="9">既然上帝使佢達到完全个地步，佢就成做一切順服佢个人永遠得救个根源；</verse>
				<verse number="10">上帝就宣佈佢照 麥基洗德 个體制做大祭司。</verse>
				<verse number="11">關係這個事，𠊎等還有好多愛講个，總係盡難對你等說明清楚，因為你等聽毋入耳。</verse>
				<verse number="12">你等早就應該做人个先生囉，總係你等還需要人用上帝真道个初步道理再教你等；你等還係需要食乳，無法度食飯。</verse>
				<verse number="13">只有食乳个還係孲𤘅仔，毋會分別是非。</verse>
				<verse number="14">長大成人个正有法度食飯；佢等已經有豐富个經驗，會分別好壞。</verse>
			</chapter>
			<chapter number="6">
				<verse number="1">恁樣，𠊎等應該將關係基督个初步道理放在後背，向較成熟个信仰來進前。𠊎等毋使再立根基，像係對腐敗个行為悔改、信靠上帝、</verse>
				<verse number="2">各樣个洗禮、按手禮、死人復活、永遠个審判等教訓。</verse>
				<verse number="3">𠊎等愛向前行！上帝若准，𠊎等一定愛恁樣做。</verse>
				<verse number="4">論到該兜離開正道个人，愛樣般使佢等重新悔改呢？佢等識得到上帝个光照，嘗過屬天恩賜个滋味，又㧯聖靈有份，</verse>
				<verse number="5">也識體驗到上帝个話係何等个美好，又感受到末世个大能。</verse>
				<verse number="6">你知無，後來佢等還係悖逆正道！這種个人無可能喊佢等回頭，重新悔改；因為佢等親手將上帝个孻仔再釘十字架，公然侮辱佢。</verse>
				<verse number="7">田地常常吸收雨水，生出青菜，俾耕種个人得到利益，就承受上帝个賜福。</verse>
				<verse number="8">總係，這田地若生出竻仔㧯蒺藜，還有麼介用呢？它就有受咒詛个危險，最尾被火燒掉。</verse>
				<verse number="9">親愛个朋友啊，雖然𠊎等恁樣講，總係𠊎等還係相信你等有較好个行為，接近得救。</verse>
				<verse number="10">上帝毋會恁無公當；佢毋會毋記得你等所做个工作㧯為到佢个名所表現个愛心，就係一直幫助其他个聖徒。</verse>
				<verse number="11">𠊎等最大个心願就係：你等每一個人會熱心到底，使你等所盼望个一切得到實現。</verse>
				<verse number="12">毋好懶尸，愛學該兜用信心㧯耐心來領受上帝應許个人。</verse>
				<verse number="13">上帝應許 亞伯拉罕 个時，佢有發過誓。因為無比佢較大个，佢就指自家个名來發誓。</verse>
				<verse number="14">佢講：「𠊎一定愛大大賜福給你；𠊎一定愛使你多子多孫。」</verse>
				<verse number="15">亞伯拉罕 耐心等候，到尾就得到上帝所應許个。</verse>
				<verse number="16">人發誓个時節，佢係指等比自家較大个來發誓；所以發誓成做一種个擔保，結束人㧯人中間个一切紛爭。</verse>
				<verse number="17">上帝為到愛對該兜承接佢應許个人，強調佢个計劃永遠毋會改變，就在應許頂高加上發誓。</verse>
				<verse number="18">上帝个應許㧯發誓攏總係毋會改變个，因為上帝毋會講花撩。所以，𠊎這兜拚等入到上帝保護之下个人得到當大个鼓勵，愛揪住放在𠊎等頭前个盼望。</verse>
				<verse number="19">𠊎等有這盼望，就像生命个錨，又安全又穩當。這盼望通過天頂聖殿个布簾，入到底背个聖所。</verse>
				<verse number="20">為到𠊎等，耶穌做先鋒，已經去該位；佢已經照 麥基洗德 个體制成做永遠个大祭司。</verse>
			</chapter>
			<chapter number="7">
				<verse number="1">這 麥基洗德 係 撒冷 王，也係至高上帝个祭司。 亞伯拉罕 㓾死眾王，對戰場轉來个時， 麥基洗德 去迎接佢，又為佢祝福。</verse>
				<verse number="2">亞伯拉罕 將自家所得到个拿十分之一給佢。基本上， 麥基洗德 照字翻譯意思係「公義个王」；又因為佢係 撒冷 王，佢个名有「和平 个王」个意思。</verse>
				<verse number="3">關係 麥基洗德 个爺𡟓、族譜、抑係佢个出世㧯過身，全部無記錄好查；佢係像上帝个孻仔，永遠做祭司。</verse>
				<verse number="4">你等想看仔，這個人有幾偉大！連族長 亞伯拉罕 也將所有戰利品个十分之一送給佢。</verse>
				<verse number="5">該兜 利未 个子孫做祭司，係照法律个規定對 以色列 人，就係佢等自家个同胞，收十分之一，雖然這兜人也係 亞伯拉罕 个子孫。</verse>
				<verse number="6">麥基洗德 毋係 利未 个子孫，總係佢對 亞伯拉罕 接受十分之一，還為得到上帝應許个 亞伯拉罕 祝福。</verse>
				<verse number="7">祝福人个比領受祝福个人較大，這係無麼介好拗个。</verse>
				<verse number="8">該兜收十分之一个祭司，係會死个人；總係，也收十分之一个 麥基洗德 ，照聖經个記載，佢係一直生下去个。</verse>
				<verse number="9">𠊎等做得講， 亞伯拉罕 納十分之一个時， 利未 也有納十分之一；雖然 利未 㧯佢个子孫係收十分之一个。</verse>
				<verse number="10">因為， 麥基洗德 迎接 亞伯拉罕 个時， 利未 還吂出世；𠊎等做得講，佢還在佢个祖先 亞伯拉罕 个身體底背。</verse>
				<verse number="11">以色列 人所領受个法律係用 利未 人个祭司制度做根基个。照恁樣來講，這制度个效果若係完全，樣般毋照 亞倫 个體制，反轉愛照 麥基洗德 个體制另外興起一個祭司呢？</verse>
				<verse number="12">既然祭司制度有改變，法律也需要改變。</verse>
				<verse number="13">𠊎等這下所講个，就係𠊎等个主；佢係屬另外一支族；這支族從來毋識有人做過祭司，在祭壇前事奉。</verse>
				<verse number="14">𠊎等个主係屬 猶大 支族，這係大家所知个； 摩西 講到祭司个時節，並無提起這個支族。</verse>
				<verse number="15">事情越來越明顯，因為另外一個像 麥基洗德 个祭司已經出現。</verse>
				<verse number="16">佢成做祭司，並毋係照人个法律規定，係因為佢有毋會消滅个生命个大能。</verse>
				<verse number="17">因為聖經講：「你愛照 麥基洗德 个體制永遠做祭司。」</verse>
				<verse number="18">恁樣，因為舊个規定無力又無用，就廢掉了。</verse>
				<verse number="19">摩西 个法律無法度使麼介變做完全；總係這下，𠊎等有一個較好个盼望，通過這個盼望，𠊎等就做得接近上帝。</verse>
				<verse number="20">另外，還有上帝个發誓。別个祭司封立个時，無這種个發誓；</verse>
				<verse number="21">總係，耶穌做祭司就有這種个發誓；上帝對佢講： 主已經發誓，絕對無反悔： 「你愛永遠做祭司。」</verse>
				<verse number="22">因為有恁大个分別，耶穌就成做較好个約个保證。</verse>
				<verse number="23">還有一個分別：先前該兜做祭司个盡多，因為佢等會死，無法度一直做下去；</verse>
				<verse number="24">總係，因為耶穌係永遠生个，毋使換人做祭司。</verse>
				<verse number="25">所以，佢能永遠拯救一切通過佢來親近上帝个人；因為佢永遠生等，為佢等代求。</verse>
				<verse number="26">恁樣，耶穌就係𠊎等所需要个大祭司。佢係聖潔、無過失、無罪个；佢係對罪人中分別出來个；佢个地位超越諸天。</verse>
				<verse number="27">佢㧯其他个大祭司無共樣，毋使逐日先為自家个罪獻祭，然後正為人民个罪獻祭。佢只有獻過一擺祭，將自家獻上，一擺就圓滿。</verse>
				<verse number="28">摩西 个法律設立人做大祭司，佢等做大祭司還有缺點；總係，在有法律以後，上帝用發誓來應許，設立佢个孻仔做大祭司，使佢完全，直到永遠。</verse>
			</chapter>
			<chapter number="8">
				<verse number="1">𠊎等所討論个重點係：𠊎等有像恁樣个大祭司；佢坐在天頂至大權能者个寶座右片。</verse>
				<verse number="2">佢在至聖所擔任大祭司；這聖所毋係人个手起个，係主所起真个聖帳篷。</verse>
				<verse number="3">每一個大祭司攏總係為到獻禮物㧯祭物來設立个；所以，𠊎等个大祭司也應該有所奉獻。</verse>
				<verse number="4">若係佢在地上，佢就無做祭司，因為已經有照 猶太 法律來獻禮物个祭司。</verse>
				<verse number="5">這兜祭司係照天頂聖所个樣式㧯影像來事奉。像 摩西 愛起聖帳篷个時，上帝警告佢，講：「愛謹慎，全部愛照𠊎在山頂指示你个樣式去造。」</verse>
				<verse number="6">總係，耶穌這下所擔任个祭司職務超越佢等个盡多，就像佢在上帝㧯人个中間做中保个約係較好个，因為這個約係照該較好个應許來立个。</verse>
				<verse number="7">第一個約若無缺點，就毋使有第二個約。</verse>
				<verse number="8">總係上帝責備佢个子民个時，講： 主講：日仔會到， 𠊎愛㧯 以色列 个人民 並 猶大 个人民另外立新个約。</verse>
				<verse number="9">這約毋像頭擺𠊎㧯佢等个祖先所立个約； 在該兜日仔𠊎牽等佢等个手， 帶領佢等出 埃及 。 總係佢等無遵守𠊎㧯佢等所立个約。 所以主講：𠊎也無愛搭佢等。</verse>
				<verse number="10">主又講： 在將來該兜日仔， 𠊎愛㧯 以色列 人民立這種个約： 𠊎愛將𠊎个法律放入佢等个頭腦， 寫在佢等个心上。 𠊎愛做佢等个上帝， 佢等愛做𠊎个子民。</verse>
				<verse number="11">佢等毋會再教同胞， 也毋使㧯自家个兄弟講： 「愛認識主」； 因為對最細个到最大个， 佢等攏總會認識𠊎。</verse>
				<verse number="12">𠊎愛赦免佢等个過犯， 無愛再記得佢等个罪惡。</verse>
				<verse number="13">既然上帝提到「新个約」，可見佢已經將頭一個約看做舊个。緊舊緊老个，就會盡遽消滅掉。</verse>
			</chapter>
			<chapter number="9">
				<verse number="1">頭一個約，有禮拜个例規㧯人造个禮拜場所。</verse>
				<verse number="2">所起个聖帳篷，頭一層安到聖所，底背有燈臺、桌仔，㧯敬神个餅。</verse>
				<verse number="3">第二領布簾後，有一層聖帳篷安到至聖所，</verse>
				<verse number="4">底背有燒香用个金香壇㧯包金个約櫃，櫃肚放等裝嗎哪个金罐仔，又有 亞倫 該支發過芽个柺棍仔㧯寫等十條誡个兩垤石版。</verse>
				<verse number="5">約櫃頂高有基路伯，表示上帝个臨在；基路伯个翼胛遮等赦罪个座位。關係這兜，這下無法度詳細說明。</verse>
				<verse number="6">這兜東西照恁樣安排好勢。該兜祭司就逐日入聖帳篷个外層去舉行禮拜个儀式；</verse>
				<verse number="7">總係內層該間，大祭司正做得入去，一年也只有一擺；為到自家㧯人民無意所犯个過失，佢逐擺愛帶等血入去獻給上帝。</verse>
				<verse number="8">聖靈通過這兜安排來指明，外層个聖帳篷若還在，透入至聖所个路就吂開。</verse>
				<verse number="9">外層聖帳篷係到這下為止个一種預表。這就係講，獻禮物㧯祭物給上帝毋會使敬拜个人內心成做完全；</verse>
				<verse number="10">這兜係有關飲食㧯各樣个潔淨儀式定定。這種外表个例規，到上帝改正一切个時就失效了。</verse>
				<verse number="11">這下，基督已經來到；佢做大祭司，已經實現 一切个好事。佢入去个聖帳篷還較大，還較完全，毋係人个手起个；這就係講，毋係屬這受造个世界。</verse>
				<verse number="12">基督進入至聖所，一擺就罅；該時，佢並無用山羊㧯細牛个血做祭物，反轉用佢自家个血，來俾𠊎等得到永遠个救贖。</verse>
				<verse number="13">在禮儀中，用山羊个血、牛牯个血、㧯牛乸个灰，拂在該兜無淨浰个人身上，若係能清掉佢等个垃圾，使佢等得到淨浰，</verse>
				<verse number="14">恁樣，基督个血所能成就个敢毋係還較多嗎？通過該永遠个靈，基督獻自家做無缺點个祭物給上帝。佢个血會潔淨𠊎等个良心，除掉𠊎等腐敗个行為，使𠊎等事奉永生个上帝。</verse>
				<verse number="15">因為恁樣，基督成做這新約个中保，用死來贖該兜在頭一個約之下所犯个罪過，使上帝所呼召个人有好領受佢所應許永遠个福氣。</verse>
				<verse number="16">遺言，一定愛證明立遺言个人已經死掉；</verse>
				<verse number="17">因為，立遺言个人還生，遺言就無效，佢一死，遺言就有效力。</verse>
				<verse number="18">所以，連頭一個約 也係愛用血來設立正有效。</verse>
				<verse number="19">當時， 摩西 照法律先將所有个誡命傳給人民，然後佢拿細牛㧯山羊个血，摻兜水，用深紅色个絨㧯牛膝草來蘸，拂在法律書㧯所有人民个身上。</verse>
				<verse number="20">佢講：「這係立約个血，係上帝㧯你等立約个記號。」</verse>
				<verse number="21">共樣， 摩西 也用血拂在聖帳篷，並禮拜㧯禮儀所用各樣个器皿頂高。</verse>
				<verse number="22">照法律个規定，差毋多所有个器皿全部係用血來潔淨个；無流血，就無赦罪。</verse>
				<verse number="23">既然這兜照天頂个樣式所造个器皿，一定愛用恁樣來潔淨；天頂个原物就還較愛用更好个祭物去潔淨。</verse>
				<verse number="24">基督並無入去人手所起个聖所；該不過係真聖所个影像定定。佢係進到天頂，就係真聖所，這下為到𠊎等个緣故企在上帝个面前。</verse>
				<verse number="25">猶太 人个大祭司愛逐年帶等頭牲个血入去至聖所；總係，基督毋使獻自家多多擺。</verse>
				<verse number="26">若毋係恁樣，對創造世界以來，佢就愛忍受苦難多多擺囉。總係這下，基督在末世顯現一擺，將自家獻做祭物，來除掉罪。</verse>
				<verse number="27">照所註定个，世間人攏總有一擺个死，死後還愛受上帝審判。</verse>
				<verse number="28">像恁樣，基督也犧牲一擺，來擔當眾人个罪。將來，佢還愛顯現一擺，毋係為到對付罪，係愛拯救該兜迫切等候佢个人。</verse>
			</chapter>
			<chapter number="10">
				<verse number="1">法律並毋係將來該兜美好事物个真相，係該兜事物个影像定定。共樣个祭物逐年一直獻上，法律又樣般做得通過這兜祭物使來到上帝面前个人成做完全呢？</verse>
				<verse number="2">若係有可能，一切个獻祭早就停止囉！因為該兜敬拜上帝个人，既然罪已經得到潔淨，就毋會再有罪个感覺了。</verse>
				<verse number="3">事實上，逐年个獻祭反轉使人想起自家个罪，</verse>
				<verse number="4">因為牛牯㧯山羊个血無法度除掉人个罪。</verse>
				<verse number="5">因為恁樣，基督來到世間个時，對上帝講： 你無愛祭物㧯供物； 你已經為𠊎準備身體。</verse>
				<verse number="6">你也無合意燒化祭㧯贖罪祭。</verse>
				<verse number="7">所以𠊎講： 看啊，𠊎來了！ 上帝啊，𠊎來係愛遵行你个旨意， 就像法律書所記載關係𠊎个事。</verse>
				<verse number="8">一開始，佢講：「你無愛，也無合意祭物㧯供物，燒化祭㧯贖罪祭。」雖然這兜祭物係照法律个規定所獻个，佢還恁樣講。</verse>
				<verse number="9">接等，佢又講：「看啊，𠊎來了，係愛遵行你个旨意。」可見，上帝取消先前一切个獻祭，愛用基督个犧牲來代換。</verse>
				<verse number="10">照上帝這個旨意，耶穌基督獻自家个身體，一擺就圓滿，使𠊎等聖化來歸主。</verse>
				<verse number="11">每一個 猶太 个祭司逐日企等事奉上帝，常常獻共樣个祭物；總係這兜祭物永遠無法度除掉人个罪。</verse>
				<verse number="12">總係，基督獻贖罪祭一擺，永遠就有效，然後坐在上帝个右片，</verse>
				<verse number="13">等候上帝使佢个敵人降服在佢个腳下。</verse>
				<verse number="14">因為佢獻祭一擺，該兜聖化歸主个人就永遠完全。</verse>
				<verse number="15">聖靈也對𠊎等做證；佢先講：</verse>
				<verse number="16">主恁樣講： 在將來該兜日仔， 𠊎愛㧯佢等立這種个約： 𠊎愛將𠊎个法律放入佢等个心， 寫在佢等个頭腦。</verse>
				<verse number="17">然後，佢講：「𠊎無愛再記得佢等个罪惡㧯過犯。」</verse>
				<verse number="18">既然這兜罪得到赦免，就無需要再有贖罪祭了。</verse>
				<verse number="19">所以，兄弟姊妹啊，通過耶穌流血到死，𠊎等就做得安心入去至聖所。</verse>
				<verse number="20">耶穌已經為𠊎等開一條又新又生个路；這條路透過布簾，就係通過佢个身體。</verse>
				<verse number="21">既然𠊎等有一個大祭司掌管上帝个家庭，</verse>
				<verse number="22">恁樣，𠊎等應該用誠實个心、堅定个信心，用已經潔淨、無邪惡个良心，㧯淨水洗過个身體，來親近上帝。</verse>
				<verse number="23">𠊎等愛堅定持守𠊎等所告白个盼望，因為應許𠊎等个上帝係信實个。</verse>
				<verse number="24">𠊎等愛彼此關心，激發愛心，勉勵行善。</verse>
				<verse number="25">有兜人放掉參加聚會个習慣；毋好學佢等，反轉愛互相勸勉。你等既然知主个日仔會到了，還較愛恁樣。</verse>
				<verse number="26">因為𠊎等認識真理以後，若係還故意犯罪，就毋會再有贖罪个祭物了；</verse>
				<verse number="27">只有驚驚轆轆等候審判㧯該愛燒滅對敵上帝个人个烈火！</verse>
				<verse number="28">違犯 摩西 法律个，有兩三個人做證，就一定愛處死刑，得毋到憐憫。</verse>
				<verse number="29">恁樣，踐踏上帝个孻仔，看輕上帝立約个血 — 就係潔淨佢个罪个血，又侮辱賜恩典个靈，這種人會樣般呢？想看仔，佢敢毋係會受到還較重个刑罰嗎？</verse>
				<verse number="30">𠊎等知係麼人講：「伸冤在𠊎，𠊎一定愛報應」；又講：「主愛審判佢个子民。」</verse>
				<verse number="31">落在永生上帝个手中係樣般得人驚啊！</verse>
				<verse number="32">愛記得往時个日仔。上帝光照你等以後，雖然堵到盡多痛苦，總係你等在奮鬥中並無失敗。</verse>
				<verse number="33">有時，你等識當眾被人侮辱㧯苦毒；有時，也識同該兜堵到這兜苦難个人企共下。</verse>
				<verse number="34">你等分擔坐監个人个苦難。財產被人搶走，你等也歡喜忍受；因為你等知，你等有還較好又長存个產業。</verse>
				<verse number="35">所以，你等个勇氣毋好無掉去；這勇氣會帶給你等極大个獎賞。</verse>
				<verse number="36">為到實行上帝个旨意並領受佢个應許，你等定著愛忍耐。</verse>
				<verse number="37">因為聖經講： 加一下仔， 該愛來个就會到， 毋會延纏。</verse>
				<verse number="38">屬𠊎个義人會因為信得到生命。 總係，佢若退後， 𠊎就毋歡喜佢。</verse>
				<verse number="39">好得𠊎等毋係退後致到滅亡个人；𠊎等係有信心來得救个人。</verse>
			</chapter>
			<chapter number="11">
				<verse number="1">信心就係對所盼望个事有把扼，對看毋到个事能確定。</verse>
				<verse number="2">古時代个人得到上帝个褒獎，就係因為佢等有信心。</verse>
				<verse number="3">因為信心，𠊎等知宇宙係通過上帝个話造成个；恁樣，看得到个係對看毋到个造出來个。</verse>
				<verse number="4">因為信心， 亞伯 獻比 該隱 較好个祭物給上帝。因為佢个信心，上帝褒獎佢，稱佢做義人，因為上帝歡喜接納佢个禮物。佢雖然死掉，還係通過這個信心講話。</verse>
				<verse number="5">因為信心， 以諾 毋使經歷死。佢受接到上帝該位去；無人尋得到佢，因為上帝將佢接走。聖經講，佢受接以前，已經得到上帝个歡喜。</verse>
				<verse number="6">人無信心，就毋會得到上帝个歡喜。到上帝面前來个人，一定愛信上帝个存在，還愛信佢會報賞尋求佢个人。</verse>
				<verse number="7">因為信心， 挪亞 在還吂看到个事情上，聽上帝个警告，存敬畏个心，造一隻大船，來救佢㧯佢全家。對恁樣，佢定該世代个罪，自家也對上帝領受因信所得个義。</verse>
				<verse number="8">因為信心， 亞伯拉罕 順服上帝个呼召，去上帝應許愛賜給佢个所在。佢離開本國个時，並毋知愛去㖠位。</verse>
				<verse number="9">通過信心，佢住在上帝所應許个所在，異鄉做旅客；佢㧯領受上帝共樣應許个 以撒 㧯 雅各 共下住在帳篷肚。</verse>
				<verse number="10">因為 亞伯拉罕 盼望該座根基永遠企在个城，就係上帝所設計、所建造个城。</verse>
				<verse number="11">因為信心，雖然 亞伯拉罕 已經老了， 莎拉 生育个年齡也已經過掉，佢還能做阿爸，因為佢 相信上帝會對佢个應許守信用。</verse>
				<verse number="12">雖然 亞伯拉罕 親像已經死掉，總係，對佢一個人還傳下像天頂个星仔恁多，像海滣个沙仔算毋盡个子孫來！</verse>
				<verse number="13">這兜人係到死還有信心个人。佢等並無領受到上帝所應許个；總係，佢等對遠遠看到，歡喜等候。佢等承認自家在世間係外鄉人㧯流浪个旅客。</verse>
				<verse number="14">講這種話个人，明明表示佢等係為自家尋一個家鄉。</verse>
				<verse number="15">佢等並無懷念所離開个地方，若毋係恁樣，佢等還有倒轉去个機會。</verse>
				<verse number="16">顛倒，佢等欣慕一個較靚个家鄉，就係在天頂个；所以，上帝無因為稱做佢等个上帝感覺見笑，因為佢已經為佢等準備一座城。</verse>
				<verse number="17">因為信心， 亞伯拉罕 在上帝考驗佢个時，將 以撒 獻做祭物。 亞伯拉罕 係領受應許个人，總係佢還係甘願將佢个單丁子獻做祭物。</verse>
				<verse number="18">上帝識對佢講：「你愛對 以撒 得到𠊎所應許个子孫。」</verse>
				<verse number="19">佢認為上帝能使人對死復活。事實上，也做得講， 亞伯拉罕 係將 以撒 對死接倒轉來。</verse>
				<verse number="20">因為信心， 以撒 為到將來个事情祝福 雅各 㧯 以掃 。</verse>
				<verse number="21">因為信心， 雅各 臨終个時，為 約瑟 兩個孻仔祝福；佢拄等柺棍仔敬拜上帝。</verse>
				<verse number="22">因為信心， 約瑟 臨終个時，提起 以色列 族將來愛出 埃及 个事，並吩咐愛樣般處理佢个遺體。</verse>
				<verse number="23">因為信心， 摩西 出世後，佢个爺𡟓看到孲𤘅仔盡靚，就將佢囥三個月，並毋驚王个命令。</verse>
				<verse number="24">因為信心， 摩西 成人以後，毋肯人稱佢做 埃及 公主个孻仔。</verse>
				<verse number="25">佢甘願同上帝个子民共下受苦，無愛在罪惡中暫時享樂。</verse>
				<verse number="26">在佢看來，為到受膏者 被人侮辱，比 埃及 所有个財寶還較寶貴，因為佢看重將來个獎賞。</verse>
				<verse number="27">因為信心， 摩西 離開 埃及 ，毋驚 埃及 王發譴；佢堅持到底，一直向前，就像看到目珠所看毋到个上帝。</verse>
				<verse number="28">因為信心，佢設立𨃟過節，並吩咐將血拂在門頂高，免得執行毀滅个天使殺害 以色列 人个長子。</verse>
				<verse number="29">因為信心， 以色列 人行過 紅海 ，像行燥地； 埃及 人也想愛跈等過，就被水浸死。</verse>
				<verse number="30">因為信心， 以色列 人𫟧等 耶利哥 城行七日，然後城牆就橫掉。</verse>
				<verse number="31">因為信心，妓女 喇合 毋使同該兜毋服從上帝个人共下滅亡，因為姖好款待該兜探仔。</verse>
				<verse number="32">𠊎敢還需要講下去？𠊎無恁多時間好講起 基甸 、 巴拉 、 參孫 、 耶弗他 、 大衛 、 撒母耳 ，㧯眾先知个事。</verse>
				<verse number="33">通過信心，佢等制伏列國，執行正義，領受上帝个應許；佢等塞等獅仔个嘴，</verse>
				<verse number="34">滅掉烈火个威力，閃開刀劍个殺害；佢等對軟弱變做剛強，在戰場中盡勇敢，打退敵人个軍隊。</verse>
				<verse number="35">有兜婦女將該兜對死復活个親人接倒轉來。 總係，有兜人拒絕被人釋放，甘願死在惡毒个刑罰之下，為到愛得到較靚復活个生命。</verse>
				<verse number="36">又有人忍受㩢耍㧯鞭打，甚至被人捆起來，關在監獄肚。</verse>
				<verse number="37">還有人被石頭㧹死，被鋸仔鋸斷，被刀劍㓾死。也有人披等綿羊抑係山羊个皮閃來閃去，忍受窮苦、迫害，㧯苦毒。</verse>
				<verse number="38">這世間堪毋得有這兜人！佢等像難民恁樣，在曠野㧯山嶺間流浪，住在山洞㧯地窿內肚。</verse>
				<verse number="39">這兜人，因為信心，攏總有得到上帝个褒獎；總係佢等並無領受到上帝所應許个。</verse>
				<verse number="40">因為上帝為到𠊎等有還較好个安排；佢个旨意就係：佢等愛同𠊎等共下正能達到完全。</verse>
			</chapter>
			<chapter number="12">
				<verse number="1">既然𠊎等有恁多見證人，像雲圍等𠊎等，就應該放掉各種个重擔㧯纏等𠊎等个罪，忍耐到底來走擺在𠊎等頭前个路程。</verse>
				<verse number="2">𠊎等愛注目看耶穌，因為佢係𠊎等信心个開創者㧯完成者。為到擺在佢頭前个喜樂，佢看輕侮辱，忍受十字架个痛苦；這下，佢坐在上帝寶座个右片。</verse>
				<verse number="3">你等愛好好想看仔，佢係樣般忍受罪人个怨恨；恁樣，你等正毋會冷心失志。</verse>
				<verse number="4">你等同罪惡戰鬥，還吂拚到生死个關頭。</verse>
				<verse number="5">上帝樣般勸勉你等，像勸子女一樣，敢講你等毋記得了係麼？佢講： 𠊎个孻仔啊，毋好看輕主个管教， 被佢責備个時節，毋好失志；</verse>
				<verse number="6">因為主管教佢所惜个人， 鞭打每一個佢所認个子女。</verse>
				<verse number="7">你等愛忍受苦難像係阿爸个管教，因為這係表示上帝對待你等像子女一樣。敢有毋使受厥爸管教个子女嗎？</verse>
				<verse number="8">你等若無像其他个子女恁樣受管教，你等就毋係子女，係私生子。</verse>
				<verse number="9">肉身个阿爸識管教𠊎等，𠊎等還係尊敬佢等。恁樣，對靈性个阿爸，𠊎等敢毋係還較愛順服佢，正會得到生命嗎？</verse>
				<verse number="10">肉身个阿爸照自家看做著个，暫時管教𠊎等；總係，上帝个管教係為到𠊎等个利益，愛使𠊎等有份佢个聖潔。</verse>
				<verse number="11">人受管教个時，一定會傷心，毋爽快；總係後來，該兜對管教來受操練个人就會結平安个果子，過正直个生活。</verse>
				<verse number="12">所以，你等手軟腳攋个，愛紮磳起來！</verse>
				<verse number="13">愛一直行在筆直个路上，使瘸掉个腳正毋會脫腕，反轉會得到醫治。</verse>
				<verse number="14">你等愛盡力㧯眾人和好，也愛追求聖潔；無聖潔，無一個人能見到主。</verse>
				<verse number="15">愛謹慎！免得有人失掉上帝个恩典；免得有人像有毒个根大起來，害到盡多人，使佢等變做污穢；</verse>
				<verse number="16">免得有人犯淫亂，抑係像 以掃 恁看重世俗，為到一碗食物連長子个名份也拿來賣掉。</verse>
				<verse number="17">你等知，後來佢想愛得到阿爸个祝福，總係受拒絕；佢雖然流目汁，迫切懇求，還係尋毋到挽回个辦法。</verse>
				<verse number="18">你等毋係像該兜 以色列 人恁樣，來到該摸得到个 西奈 山；在該位有火焰、烏雲、黑暗、暴風、</verse>
				<verse number="19">歕羊角个聲，㧯講話个聲。人民聽到這個話，就要求毋好再對佢等講話；</verse>
				<verse number="20">因為佢等當毋起該命令，講：「摸這山个，就算係頭牲也愛用石頭㧹死。」</verse>
				<verse number="21">所看到个非常得人驚，連 摩西 也講：「𠊎驚到愊愊掣！」</verse>
				<verse number="22">總係，你等係來到 錫安 山；這係永生上帝个城，係天頂个 耶路撒冷 ，有千千萬萬个天使。</verse>
				<verse number="23">你等係來到上帝眾長子歡喜聚會个場所；這兜長子个名已經記在天頂。你等係來到審判萬民个上帝面前，係來到成做完全个義人个靈魂該所在。</verse>
				<verse number="24">你等係來到新約个中保耶穌面前，係來到拂血个所在；這個血贏過 亞伯 个血所表現个。</verse>
				<verse number="25">所以，你等愛謹慎，毋好拒絕該向你等講話个。該兜拒絕該在地上將神聖个真道傳給佢等个一位，都無法度脫罪；若係𠊎等拒絕該對天頂向𠊎等講話个，𠊎等就還較無可能脫罪噢！</verse>
				<verse number="26">該時，佢个聲搖動地，總係這下，佢應許講：「還有一擺，𠊎毋單淨愛搖動地，連天也愛搖動。」</verse>
				<verse number="27">「還有一擺」這句話明顯表示受造之物會受搖動到徙走，俾該兜毋會搖動个留下來。</verse>
				<verse number="28">恁樣，既然𠊎等承受該毋會搖動个國，𠊎等就應該感恩。𠊎等愛照上帝所歡喜个，用虔誠敬畏个心來事奉佢，</verse>
				<verse number="29">因為𠊎等个上帝係烈火。</verse>
			</chapter>
			<chapter number="13">
				<verse number="1">你等愛一直像兄弟姊妹恁樣相惜。</verse>
				<verse number="2">毋好毋記得接待外鄉人去你等屋下。識有人恁樣行，無意中卻接待到天使。</verse>
				<verse number="3">愛關心該兜坐監个人，像係你等也同佢等共下坐監。愛關心該兜在患難中个人，就像你等也在患難中一樣。</verse>
				<verse number="4">每一個人攏總愛尊重婚姻；夫妻愛彼此忠實。上帝會審判該兜放蕩㧯淫亂个人。</verse>
				<verse number="5">你等个人生毋好總係想愛賺錢；愛滿足自家所有个。因為上帝識講：「𠊎絕對毋會離開你，永遠毋會㧒掉你。」</verse>
				<verse number="6">所以，𠊎等做得大膽講： 主係𠊎个幫助， 𠊎毋使驚； 人能對𠊎樣般哪？</verse>
				<verse number="7">你等愛紀念頭擺帶領你等、傳上帝个真道給你等个人。好好想看仔，佢等係樣般生活，樣般死；你等愛效法佢等个信心。</verse>
				<verse number="8">耶穌基督昨晡日、今晡日、直到永遠，也毋會改變。</verse>
				<verse number="9">毋好俾各樣奇怪个學說將你等帶走趲去。你等个心愛倚靠上帝个恩典來得到堅固，毋好倚靠食物个例規；照該兜例規去行个人並無得到麼介好處。</verse>
				<verse number="10">在聖帳篷底背事奉个 猶太 祭司，無權好食𠊎等祭壇頂个祭物。</verse>
				<verse number="11">猶太 个大祭司將頭牲个血帶入至聖所，獻做贖罪祭；總係該兜頭牲个身體係在營外燒。</verse>
				<verse number="12">所以，為到愛用自家个血來潔淨人个罪，耶穌就受苦，死在城外。</verse>
				<verse number="13">恁樣，𠊎等來去營外就近佢，分擔佢所受个侮辱。</verse>
				<verse number="14">因為在世間，𠊎等無永遠存在个城；𠊎等所追求个係將來个城。</verse>
				<verse number="15">所以，𠊎等應該通過耶穌，常常用頌讚做祭物來獻給上帝，就係用𠊎等个嘴告白佢个名。</verse>
				<verse number="16">總係，也毋好毋記得行善㧯彼此分享，因為這種个祭物係上帝所歡喜个。</verse>
				<verse number="17">愛服從你等个領袖，聽佢等个指導。佢等一直看顧你等个靈魂，因為佢等愛對上帝負責，像愛交帳一樣。你等聽從佢等，佢等就會做到盡歡喜；若無，佢等會冷心透大氣，這對你等有麼介利益呢？</verse>
				<verse number="18">請你等繼續代𠊎等祈禱。𠊎等自信良心清白，樂意隨時隨地行正路。</verse>
				<verse number="19">𠊎特別愛請你等代𠊎祈禱，使𠊎盡遽倒轉你等該位去。</verse>
				<verse number="20">上帝已經使𠊎等个主耶穌對死復活。佢通過耶穌所流个血印證了永遠个約，使佢成做眾羊群个大牧者。願賜平安个上帝成全你等，使你等行逐樣个好事，來遵行佢个旨意！願佢通過耶穌基督在𠊎等身上成就佢所歡喜个事！願榮耀歸給基督，直到永永遠遠！阿愐。</verse>
				<verse number="21"></verse>
				<verse number="22">兄弟姊妹啊，𠊎求你等耐心聽𠊎个勸勉；因為𠊎寫給你等个信仔，並毋係盡長。</verse>
				<verse number="23">𠊎報你等知，𠊎等个兄弟 提摩太 已經得到釋放了。佢若係較早來，𠊎會同佢共下去看你等。</verse>
				<verse number="24">請代𠊎等對你等所有个領袖㧯眾聖徒請安。對 意大利 來个人全部也對你等請安。</verse>
				<verse number="25">願上帝賜恩典給你等大家！</verse>
			</chapter>
		</book>
		<book number="59">
			<chapter number="1">
				<verse number="1">𠊎係 雅各 ，上帝㧯主耶穌基督个僕人；𠊎向分散在全世界上帝个子民 請安。</verse>
				<verse number="2">𠊎个兄弟姊妹啊，你等堵到各種个試煉，應該看做係歡喜个事，</verse>
				<verse number="3">因為知，你等个信心經過考驗就會生出忍耐。</verse>
				<verse number="4">你等愛忍耐到底，正能達到十全十美，無欠缺个地步。</verse>
				<verse number="5">你等中間若有人缺少智慧，佢就應當求上帝；佢會將智慧賜給佢，因為上帝樂意豐豐富富賜給每一個人。</verse>
				<verse number="6">總係，你等愛憑信心求，毋好有一些疑狐；因為疑狐个人像被風吹來吹去个海浪一樣。</verse>
				<verse number="7">恁樣个人三心兩意，在佢一切所行个事上無定無著；這種人毋使想愛對主該位得到麼介。</verse>
				<verse number="8"></verse>
				<verse number="9">窮苦个兄弟姊妹得到高升，應該歡喜；</verse>
				<verse number="10">有錢人受降卑也愛歡喜；因為佢會像野花一樣謝掉去。</verse>
				<verse number="11">日頭出來，熱風一吹，草就枯燥，花也謝掉，所有个靚就無掉去。有錢人在事業上無閒直掣，也會像恁樣謝掉去。</verse>
				<verse number="12">堵到試煉忍耐到底个人係有福氣个；因為通過考驗以後，佢會領受到上帝所應許給該兜敬愛佢个人生命个冕旒。</verse>
				<verse number="13">人受試探个時節，做毋得講：「𠊎係受上帝个試探！」因為上帝毋被邪惡試探，佢也毋會試探人。</verse>
				<verse number="14">每一個人受試探，係被佢自家个慾望牽等走，被它騙走去。</verse>
				<verse number="15">慾望懷胎以後，就𫱔出罪惡；罪惡一長成，就生出死亡。</verse>
				<verse number="16">𠊎親愛个兄弟姊妹啊，毋好被人騙走去！</verse>
				<verse number="17">一切美善㧯完全个恩賜全部係對頂高，對天頂个阿爸來个；佢係一切光个創造者，毋會改變，也無轉動个影。</verse>
				<verse number="18">佢照自家个旨意，通過真理个話賜生命給𠊎等，使𠊎等在佢所造个萬物中親像初熟个果子。</verse>
				<verse number="19">𠊎親愛个兄弟姊妹啊，你等愛知噢！每一個人愛遽遽聽，毋好恁遽開嘴，也毋好恁遽發譴；</verse>
				<verse number="20">因為人个發譴不能達成上帝公義个目的。</verse>
				<verse number="21">所以，你等愛除掉一切个壞習慣㧯邪惡个行為，用溫柔个心來接受上帝種在你等心中个真道，就係能拯救你等个真道。</verse>
				<verse number="22">總係，你等毋好騙自家，恅到聽道就罅；顛倒，你等一定愛行道。</verse>
				<verse number="23">若有人聽了道理無去行，就像一個人照鏡仔看自家个面貌，</verse>
				<verse number="24">看了就行開，黏時就毋記得自家个樣像。</verse>
				<verse number="25">總係，詳細查看該完全又使人得到自由个教示，並謹守个人，毋係聽了就毋記得，反轉實實在在去行，這種人在佢所行个事上一定會蒙福。</verse>
				<verse number="26">若有人自認係虔誠个人，總係無約束自家个舌乸，就係騙自家；佢个虔誠無半點價值。</verse>
				<verse number="27">在阿爸上帝看來，純潔無垃圾个虔誠就係：照顧在患難中个孤兒㧯寡婦；同時保守自家莫染到世界个污穢。</verse>
			</chapter>
			<chapter number="2">
				<verse number="1">𠊎个兄弟姊妹啊，你等既然係𠊎等榮光个主耶穌基督个信徒，就做毋得照人个外表用無共樣个態度來對待人。</verse>
				<verse number="2">假使有一個有錢人，戴金禁指，著靚衫，入去你等个會堂，同時有一個著爛衫个窮苦人也入去；</verse>
				<verse number="3">若係你等看重該著靚衫个人，對佢講：「請你坐上位」，總係對該窮苦人講：「企到該片去」，抑係講：「坐在𠊎个腳下」，</verse>
				<verse number="4">恁樣，你等敢毋係偏心，用壞意來品相人嗎？</verse>
				<verse number="5">𠊎親愛个兄弟姊妹啊，你等愛聽清楚噢！上帝敢毋係揀選世間个窮苦人，使佢等在信仰上富足，來承受佢所應許給該兜敬愛佢个人个國嗎？</verse>
				<verse number="6">總係，你等竟然侮辱窮苦人！事實上，欺壓你等，拉你等上官廳个，敢毋係該兜有錢人嗎？</verse>
				<verse number="7">譭謗你等所領受該尊貴个名，敢毋係佢等嗎？</verse>
				<verse number="8">你等若確實遵守聖經所記載，該至高無上 个教示：「惜別人像自家」，就著了！</verse>
				<verse number="9">總係，你等若照人个外表來對待人，就係犯罪；法律愛定你等做犯法个人。</verse>
				<verse number="10">無論麼人違背法律中个一條誡命，就係違背全部法律。</verse>
				<verse number="11">因為該命令講「做毋得犯姦淫」个，也講「做毋得㓾人」。你若係㓾人，雖然無犯姦淫，你還係違背法律。</verse>
				<verse number="12">既然你等愛照該使人得到自由个教示受審判，你等个言行就愛合它个標準。</verse>
				<verse number="13">因為，上帝審判个時，毋會憐憫該兜毋憐憫人个。憐憫會贏過審判。</verse>
				<verse number="14">𠊎个兄弟姊妹啊，假使有人講佢有信心，總係無用行為證明，有麼介用呢？該種信心會救佢麼？</verse>
				<verse number="15">假使有兄弟抑係姊妹，無好著又無好食，</verse>
				<verse number="16">你等中間有人對佢等講：「做你等平安轉去！願你等著得燒，食得飽！」總係無給佢等身體所需要个，有麼介用呢？</verse>
				<verse number="17">像恁樣，信心若無行為就係死个。</verse>
				<verse number="18">總係，有人會講：「你有信心；𠊎有行為。」總係，𠊎愛講：「給𠊎看你無行為个信心；𠊎就會用𠊎个行為給你看𠊎个信心。」</verse>
				<verse number="19">你信上帝只有一個，盡好！邪靈乜恁樣相信，總係佢等驚到愊愊掣。</verse>
				<verse number="20">戇仔啊！你想愛知無行為个信心係樣般無用嗎？</verse>
				<verse number="21">𠊎等个祖先 亞伯拉罕 係樣般被上帝稱做義人呢？敢毋係因為佢將厥孻仔 以撒 獻在祭壇頂這個行為嗎？</verse>
				<verse number="22">可見，佢个信心㧯行為係平平進行个；通過行為佢个信心正達到完全。</verse>
				<verse number="23">聖經講：「 亞伯拉罕 信上帝，因為佢个信，上帝就算佢做義人。」這個話實現了；所以，佢稱做上帝个朋友。</verse>
				<verse number="24">可見，人被上帝稱做義人係通過行為，毋係單單靠信心。</verse>
				<verse number="25">妓女 喇合 个情形也係恁樣。姖被上帝稱做義人係因為行為；姖接待 猶太 人个使者，又幫助佢等對另外一條路逃走。</verse>
				<verse number="26">所以，像身體無透氣係死个，信心無行為也係死个。</verse>
			</chapter>
			<chapter number="3">
				<verse number="1">𠊎个兄弟姊妹啊，你等毋好恁多人做教師，因為知𠊎等做教師个一定會比別人受較嚴个審判。</verse>
				<verse number="2">𠊎等大家都常常有過失；若有人在言語上無過失，佢就係一個完全个人，有法度控制佢个全身。</verse>
				<verse number="3">𠊎等將馬啣鐵放在馬嘴底背，喊馬順服，就能控制牠全身。</verse>
				<verse number="4">你看，船雖然恁大，又被大風吹等走，總係用一支細細个船舵就能控制它个方向，照舵公个意思行。</verse>
				<verse number="5">像恁樣，舌乸雖然盡細，總係會講大話。 看啊，細細个火能燒淨大大个森林！</verse>
				<verse number="6">舌乸像火一樣，在𠊎等个百體中，它係罪惡个世界，會害𠊎等歸身打垃圾；它會用對地獄來个火來焚燒𠊎等人生个路程。</verse>
				<verse number="7">人有辦法制伏各種个走獸、飛禽、昆蟲，㧯水族；事實上，各種个動物也已經被人制伏了。</verse>
				<verse number="8">總係，無人能制伏舌乸；它係無法制伏个惡物，充滿害死人个毒氣。</verse>
				<verse number="9">𠊎等用舌乸感謝主 — 𠊎等个天父，又用舌乸咒詛上帝照自家个形像所造出來个人。</verse>
				<verse number="10">感謝㧯咒詛全部對共張嘴出來！𠊎个兄弟姊妹啊，這係盡毋應該个！</verse>
				<verse number="11">共隻泉源能同時湧出甜水㧯苦水嗎？</verse>
				<verse number="12">𠊎个兄弟姊妹啊，無花果樹會打橄欖嗎？葡萄樹也會打無花果嗎？鹹个泉水毋會流出甜水來。</verse>
				<verse number="13">你等中間有聰明智慧个人麼？若有，佢就應該用謙卑㧯智慧个好行為，來表現佢當靚个生活。</verse>
				<verse number="14">你等心中若有惡毒个嫉妒㧯自私，你等就毋好再自誇㧯講花撩；這係悖逆真理个事。</verse>
				<verse number="15">這種个智慧毋係對天頂來个，係屬地个，屬情慾个，屬魔鬼个。</verse>
				<verse number="16">㖠位有嫉妒㧯自私，㖠位就會有混亂㧯各種邪惡个行為。</verse>
				<verse number="17">顛倒，對頂高來个智慧有幾樣特色：第一係純潔，然後係和平、溫和、好參詳，充滿慈悲，能結出豐富个善果，毋會偏心，也毋會虛假。</verse>
				<verse number="18">促進和平个人係用和平來委種，就收割公義个果子。</verse>
			</chapter>
			<chapter number="4">
				<verse number="1">你等中間个衝突㧯冤家係對㖠位來个呢？係對你等底背相爭个慾望來个！</verse>
				<verse number="2">你等貪圖，得毋到就想愛㓾人；你等嫉妒，得毋到就衝突㧯冤家。你等得毋到，因為你等無求上帝。</verse>
				<verse number="3">你等求也得毋到，因為你等个動機毋著；你等所求个係想愛浪費在宴樂中。</verse>
				<verse number="4">你這兜無忠心个人啊！敢講你等毋知同世界做朋友就係同上帝做對敵嗎？麼人想愛同世界做朋友，就係做上帝个敵人！</verse>
				<verse number="5">聖經講：「上帝放在𠊎等底背个靈有極強个慾望 。」你等恅到這句話無麼介意思嗎？</verse>
				<verse number="6">總係，上帝所賜个恩典還較強，像聖經所講： 上帝阻擋驕傲个人， 賜恩典給謙卑个人。</verse>
				<verse number="7">所以，你等愛順從上帝。愛抵抗魔鬼，魔鬼就會閃走。</verse>
				<verse number="8">你等親近上帝，上帝就會親近你等。有罪个人啊，愛潔淨你等个手！三心兩意个人啊，愛潔淨你等个心！</verse>
				<verse number="9">你等愛傷心，悲哀，流目汁；愛將笑聲變做哀噭，將歡喜變做悲傷！</verse>
				<verse number="10">愛在主个面前謙卑，佢就會高升你等。</verse>
				<verse number="11">兄弟姊妹啊，毋好互相批評。批評抑係論斷兄弟姊妹个，就係批評、論斷法律。你若係論斷法律，你就毋係行法律个人，係做審判者。</verse>
				<verse number="12">上帝係惟一个立法者㧯審判者；只有佢正能拯救，能毀滅。你係麼人，樣敢論斷別人啊！</verse>
				<verse number="13">愛細膩噢！你等有人講：「今晡日抑係天光日，𠊎等來去某某城，在該位住一年，做生理賺大錢。」</verse>
				<verse number="14">事實上，你等連天光日會樣般都毋知！你等个生命像麼介呢？係像濛煙一樣，出現一下仔就毋見掉。</verse>
				<verse number="15">你等應當恁樣講：「主若肯，𠊎等就能生下去，做這樣事，做該樣事。」</verse>
				<verse number="16">這下，你等竟然拿肨風个事來誇口；這種誇口係邪惡个。</verse>
				<verse number="17">所以，人若知善，毋去行，就係佢个罪。</verse>
			</chapter>
			<chapter number="5">
				<verse number="1">你等有錢人啊，愛細膩噢！你等愛流目汁大聲噭，因為有大災難會臨到你等了！</verse>
				<verse number="2">你等个財產放到歿掉，你等个衫褲被蟲仔蛀掉。</verse>
				<verse number="3">你等个金銀已經生鹵掉去；該兜鹵愛做告你等个證據，像火一樣燒滅你等个身體。在世界个末期，你等還在該位積存財產！</verse>
				<verse number="4">你等剝削在田項為你等割禾个工人，扣佢等个工錢。聽啊，該兜錢銀出怨聲囉；該兜收割个工人，佢等怨嘆个聲也入到主 — 萬軍个元帥个耳公囉！</verse>
				<verse number="5">你等在世間奢華宴樂，將自家畜到肥肥，等被人㓾个日仔 。</verse>
				<verse number="6">你等將義人定罪，害死佢等；佢等也無抵抗你等。</verse>
				<verse number="7">所以，兄弟姊妹啊，你等愛忍耐，等到主再來。看啊，耕田人恁有耐心等候田肚寶貴个出產，忍耐等候春霖秋雨。</verse>
				<verse number="8">你等也愛像恁樣忍耐。你等个心愛堅定，因為主再來个日仔會到了。</verse>
				<verse number="9">兄弟姊妹啊，毋好彼此埋怨，免得你等受審判；看啊，審判个主在門口了。</verse>
				<verse number="10">兄弟姊妹啊，往時該兜奉主个名講話个先知，你等愛拿佢等个受苦㧯忍耐來做榜樣。</verse>
				<verse number="11">愛知，在𠊎等看來，該兜忍耐到底个人係有福氣个。你等聽過 約伯 个忍耐，也知後來主樣般看顧佢。主係滿有慈悲㧯憐憫个。</verse>
				<verse number="12">𠊎个兄弟姊妹啊，最重要个係毋好發誓！毋好指天、指地、抑係指麼介東西發誓。係，就講「係」；毋係，就講「毋係」。恁樣，你等就毋會陷落上帝个審判。</verse>
				<verse number="13">你等中間有人受苦麼？佢應當愛祈禱。有人心情歡喜麼？佢應當愛歌頌上帝。</verse>
				<verse number="14">你等中間有人發病麼？佢應當請教會个長老來為佢祈禱，奉主个名為佢抹油。</verse>
				<verse number="15">有信心个祈禱會救到該病人；主會使病人好起來；若係佢犯了罪，主也會赦免佢。</verse>
				<verse number="16">所以，你等愛互相認罪，彼此代禱，使你等得到醫治。義人个祈禱係大有功效个。</verse>
				<verse number="17">以利亞 㧯𠊎等有共樣个人性；佢迫切祈禱，求上帝莫落雨，正經就有三年半無落雨。</verse>
				<verse number="18">佢再祈禱，天就落大雨，地正出產五榖。</verse>
				<verse number="19">𠊎个兄弟姊妹啊，你等中間若有人行毋著路，離開真理，有人將佢帶轉來，</verse>
				<verse number="20">你等愛知：麼人帶罪人回頭，離開毋著个路，會將罪人个靈魂對死搶救轉來，又使多多个罪得到赦免。</verse>
			</chapter>
		</book>
		<book number="60">
			<chapter number="1">
				<verse number="1">𠊎係 彼得 ，耶穌基督个使徒。𠊎寫信仔給上帝个選民，就係該兜分散在 本都 、 加拉太 、 加帕多家 、 亞細亞 、 庇推尼 各地方避難个人。</verse>
				<verse number="2">你等受揀選係照阿爸上帝所預定个旨意，通過聖靈成做聖潔，來順服耶穌基督，被佢个血潔淨。 願上帝豐豐富富賜恩典、平安給你等！</verse>
				<verse number="3">頌讚歸給𠊎等主耶穌基督个阿爸上帝！照佢个大慈悲，通過耶穌基督對死復活，佢將新个生命賜給𠊎等，使𠊎等有生个盼望，</verse>
				<verse number="4">來承受上帝為佢个子民所保留該豐富个福份。佢為你等保留在天頂个福份係毋會敗壞，毋會打垃圾，也毋會消失。</verse>
				<verse number="5">這個福份愛賜給你這兜因為信上帝蒙佢大能保守个人，使你等承受該已經準備好、在歷史个結尾愛實現个拯救。</verse>
				<verse number="6">所以，你等愛大歡喜，雖然因為種種个試煉，你等這下可能暫時會有憂愁。</verse>
				<verse number="7">這係愛證明你等確實有堅定个信心。會消滅个金仔，還用火來煉；你等个信心比金仔過較貴重，當然還較愛受考驗來堅定，使你等在耶穌基督顯現該日得到稱讚、光榮，㧯尊貴。</verse>
				<verse number="8">你等雖然無見過佢，總係敬愛佢；雖然這下看佢毋到，還係信靠佢。所以，你等就有無法度表達該種滿有榮光个歡喜，</verse>
				<verse number="9">因為你等這下領受信心个效果，就係你等靈魂个得救。</verse>
				<verse number="10">論到這拯救，眾先知早就詳細查考研究過了，佢等識預言上帝所愛賜給你等个恩典。</verse>
				<verse number="11">佢等查考，愛知基督个靈在佢等底背所指示个，就係「基督定著愛受苦，後來一定會得到榮光」這個預言，會在麼介時節，㖠種情形之下來實現 。</verse>
				<verse number="12">上帝啟示眾先知，俾佢等知，佢等个工作並毋係為自家，係為你等。佢等所講个這兜事，這下已經通過福音个使者，倚靠對天頂來个聖靈，傳給你等了；這兜事，連天使乜盡想愛查看！</verse>
				<verse number="13">所以，你等个心愛準備好勢；愛警醒，專心盼望耶穌基督顯現該時所愛賜給你等个恩典。</verse>
				<verse number="14">愛做聽從上帝个子女，毋好被私慾轄制，像你等頭擺戇檔無智識个時節恁樣。</verse>
				<verse number="15">呼召你等个上帝係聖潔个；你等也定著愛在一切所做个事上聖潔；</verse>
				<verse number="16">因為聖經講：「你等愛聖潔，因為𠊎係聖潔个。」</verse>
				<verse number="17">你等祈禱个時，喊該照人个行為、用共樣个標準來審判人个上帝做阿爸；恁樣，你等在世間做旅客个日仔就應該愛敬畏佢。</verse>
				<verse number="18">因為你等知，你等對祖先所傳个、會敗壞个生命中得到釋放，所付上个代價係麼介。並毋係像金銀這兜會敗壞个東西，</verse>
				<verse number="19">係基督寶貴个血；佢係像獻祭所用、無缺點無垃圾个羔羊一樣。</verse>
				<verse number="20">在世界創造以前，上帝已經先揀選基督，愛佢在這歷史个末期為你等來顯現。</verse>
				<verse number="21">通過佢，你等相信該使佢對死復活、又賜佢榮耀个上帝；因為恁樣，你等个信心㧯盼望係釘根在上帝个底背。</verse>
				<verse number="22">這下，因為聽從真理，你等已經使自家成做潔淨个人，又真實愛兄弟姊妹，就應當對心底彼此熱誠相惜。</verse>
				<verse number="23">因為你等得到重生，毋係對該會敗壞个種子生出來个，係對該毋會敗壞个種子，就係上帝有生命、長存个道理來个。</verse>
				<verse number="24">像聖經所講： 逐個人攏總像野草共樣， 佢等个榮華全部像野花； 草會枯燥，花會謝掉，</verse>
				<verse number="25">總係主个道永遠長存！ 這道就係該傳給你等个福音。</verse>
			</chapter>
			<chapter number="2">
				<verse number="1">所以，你等愛除掉一切个邪惡、詭詐、假冒為善、嫉妒，㧯一切譭謗人个話；</verse>
				<verse number="2">愛像正出世个孲𤘅仔，渴慕純淨个靈乳，使你等通過它來長大致到得救。</verse>
				<verse number="3">像聖經所講：「你等已經嘗過主慈愛个滋味。」</verse>
				<verse number="4">愛親近主，佢係生个石頭；雖然佢被人拒絕，總係上帝揀選佢，看佢做寶貝个。</verse>
				<verse number="5">你等也愛像生个石頭，受建造成做屬靈个聖殿，在該位做聖潔个祭司，通過耶穌基督來獻上帝所歡喜屬靈个祭物。</verse>
				<verse number="6">因為聖經講： 𠊎擇一垤貴重个石頭， 來做錫安房角个石頭； 信靠佢个，絕對毋會失望。</verse>
				<verse number="7">對你等信个人來講，這石頭係非常寶貴个；總係，對該兜毋信个人： 泥水師傅所㧒掉个這垤石頭， 已經成做地基中最重要个 ！</verse>
				<verse number="8">聖經另外又講： 這垤石頭會絆人个腳， 係會使人跌倒个大石頭！ 佢等絆倒了，因為佢等毋信真道；這也係上帝个旨意。</verse>
				<verse number="9">總係，你等係受揀選个一族，係王个祭司，聖潔个國，上帝个子民。上帝呼召你等離開烏暗，進入佢奇妙个光明，來宣揚佢奧妙个作為。</verse>
				<verse number="10">你等以前毋係上帝个子民， 總係這下係佢个子民； 以前無得到上帝个憐憫， 這下已經得到佢个憐憫。</verse>
				<verse number="11">親愛个朋友啊，你等在世間係旅客，係避難个人！𠊎勸你等，毋好放縱肉體个情慾；情慾從來就係攻擊靈魂个。</verse>
				<verse number="12">在外邦人當中，你等應當有端正个品行，使該兜講你等壞話，責備你等做壞事个人，因為看到你等个好行為，在主再來該日，會歸榮光給上帝。</verse>
				<verse number="13">為到主个緣故，你等愛順從世間所有个掌權者，就係在上个君王，</verse>
				<verse number="14">並佢所派來責罰作惡、獎勵行善个官長。</verse>
				<verse number="15">因為上帝个旨意係愛你等用好行為來塞死該班糊塗人無知个嘴。</verse>
				<verse number="16">你等愛做自由人！總係毋好用自由做邪惡个藉口；顛倒，你等愛做上帝个奴僕。</verse>
				<verse number="17">你等愛尊重每一個人；惜信主个兄弟姊妹；敬畏上帝；尊重君王。</verse>
				<verse number="18">做奴僕个，你等愛順從主人，也愛對佢等表現十分个恭敬；毋單淨對好心溫柔个主人愛恁樣，對粗暴个主人也愛恁樣。</verse>
				<verse number="19">若係你等看這係上帝个旨意，甘願忍受毋應該食个苦，上帝一定會賜福給你等。</verse>
				<verse number="20">若係你等因為犯罪來忍受責打，有麼介光榮呢？唯有因為行善來忍受苦難个人正會得到上帝个賜福。</verse>
				<verse number="21">上帝呼召你等个目的就係在這位；因為基督為你等受苦，留下榜樣給你等，愛使你等跈佢个腳步行。</verse>
				<verse number="22">佢無犯過罪； 無人聽過佢講花撩。</verse>
				<verse number="23">佢被人辱罵無應嘴，被人虐待也無講恐嚇个話，只有仰望該照公義審判人个主。</verse>
				<verse number="24">基督在十字架頂親身擔當𠊎等个罪，使𠊎等既然在罪惡上死，就為到公義來生。因為佢所受个鞭傷，你等就得到醫治。</verse>
				<verse number="25">以前你等像迷路个羊，總係這下已經回頭，跈等你等靈魂个牧者㧯監護人了。</verse>
			</chapter>
			<chapter number="3">
				<verse number="1">共樣，做𡜵娘个，你等也應該順從自家个老公，使無信從真道个老公因為你等个好品行來受感化。你等个話毋使講恁多，</verse>
				<verse number="2">因為佢等會看到你等純潔㧯端莊个品行。</verse>
				<verse number="3">你等毋好講究外在个打扮，像愛樣般辮頭那毛，戴金鍊，著靚衫等。</verse>
				<verse number="4">應當有內在个靚，用毋會褪色个溫柔㧯恬靜來打扮；照上帝看，這係最有價值个。</verse>
				<verse number="5">因為，頭擺該兜聖潔个婦女，姖等仰望上帝，攏總用順從老公來打扮自家。</verse>
				<verse number="6">莎拉 就係恁樣；姖順從 亞伯拉罕 ，稱佢做「頭家」。你等若行善，無驚東驚西，就係 莎拉 个妹仔了。</verse>
				<verse number="7">共樣，做老公个，你等同𡜵娘共下生活，愛體貼姖等係較軟弱个同伴。愛尊重姖等，因為姖等係同你等共下承接上帝所賜个新生命。恁樣，你等个祈禱就毋會受阻礙。</verse>
				<verse number="8">總講，你等大家愛有共樣个心志㧯心情，像兄弟姊妹恁樣相惜，用慈愛㧯謙卑互相款待。</verse>
				<verse number="9">毋好用壞報壞，用辱罵還辱罵；顛倒，愛祝福，因為上帝呼召你等个目的係愛給你等承受祝福。</verse>
				<verse number="10">像聖經所講： 麼人想愛享受人生， 希望過安樂个日仔， 舌乸就毋好講壞話， 嘴唇也毋好講花撩。</verse>
				<verse number="11">愛棄絕邪惡，盡力行善； 愛追求和平，煞猛去行。</verse>
				<verse number="12">因為主看顧義人， 留心聽佢等个祈禱； 總係該兜作惡个人， 主就對佢等變面。</verse>
				<verse number="13">你等若係熱心行善，麼人會害你等呢？</verse>
				<verse number="14">你等就係為義受苦，也係盡有福氣啊！毋使驚人个威脅，也毋使憂愁。</verse>
				<verse number="15">你等个心愛敬畏基督，尊佢做主。愛常常準備好勢，來回答別人个問題，就係關係你等心中个盼望；</verse>
				<verse number="16">總係愛用溫柔㧯謹慎个態度來回答。愛有清白个良心；恁樣，在你等受侮辱个時節，該兜譭謗你等个人，會因為你等做基督徒所表現个好行為，自家感覺見笑。</verse>
				<verse number="17">上帝个意思，若係愛你等因為行善來受苦，較贏因為作惡來受苦。</verse>
				<verse number="18">因為基督識為罪來死 ，一擺就完成，係義个代不義个，愛帶你等到上帝个面前去。佢个肉體被人處死刑，總係佢个靈還係生生 。</verse>
				<verse number="19">佢通過這個靈識去對監獄肚該兜靈傳道。</verse>
				<verse number="20">該兜靈係硬頸个靈，就係在 挪亞 造大船个時，上帝忍耐等待个靈。當時，入大船通過水得到拯救个人毋多，只有八儕。</verse>
				<verse number="21">這個水所預表个洗禮，這下已經救到你等。洗禮毋係洗淨你等身體个垃圾，係表示你等用淨浰个良心對上帝許願；這洗禮通過耶穌基督个復活拯救你等。</verse>
				<verse number="22">耶穌基督已經上天頂去，這下坐在上帝个右片；所有个天使並天界个掌權者㧯統治者攏總服從佢。</verse>
			</chapter>
			<chapter number="4">
				<verse number="1">基督既然在肉體受苦，你等就應該用這種个心志裝備自家，因為在肉體上受過苦个人，佢同罪惡个關係已經切斷；</verse>
				<verse number="2">從今以後，你等在世間个日仔愛順從上帝个旨意，毋好再被人个慾望轄制。</verse>
				<verse number="3">往時你等浪費光陰，行無信个人歡喜做个各種事，像淫亂、私慾、好酒、宴樂、酒醉，㧯上帝法律所禁止个拜偶像。</verse>
				<verse number="4">這下你等無再㧯佢等共樣過該種放蕩、無節制个生活，佢等感覺盡奇怪，就侮辱你等。</verse>
				<verse number="5">總係，佢等一定愛對該審判生人㧯死人个上帝交帳。</verse>
				<verse number="6">就係因為恁樣，福音也識傳給死人，給佢等雖然肉體同其他个人共樣受審判，總係靈魂有好像上帝恁樣生等。</verse>
				<verse number="7">萬事个結局近了。你等愛謹慎節制，警醒祈禱。</verse>
				<verse number="8">最重要个係愛彼此熱誠相惜，因為愛惜正能遮蓋多多个罪。</verse>
				<verse number="9">大家愛彼此接待，毋好埋怨。</verse>
				<verse number="10">既然逐儕係上帝各樣恩賜个好管家，就愛照所領受个種種恩賜，彼此服務。</verse>
				<verse number="11">講道个，愛照上帝个話來講；服務个，愛用上帝所賜个力量來服務，使萬項事攏總通過耶穌基督歸榮光給上帝。願榮光㧯權能全部歸給佢，直到永永遠遠！阿愐。</verse>
				<verse number="12">親愛个朋友啊，你等堵到像火恁樣个考驗，毋使奇怪，像係堵到麼介希奇个事。</verse>
				<verse number="13">顛倒，你等應該將分擔基督个苦難看做快樂个事，好使你等在佢个榮光顯現个時來歡喜快樂。</verse>
				<verse number="14">你等若因為跈基督受侮辱，就有福氣了！這表示榮光个聖靈，就係上帝个靈，在你等个身上。</verse>
				<verse number="15">總係，你等當中若有人受苦，毋好係因為兇殺、做賊、犯刑事案件、抑係好插閒事。</verse>
				<verse number="16">受苦若係因為做基督徒，毋好看做見笑，反轉愛因為有這個名稱來榮光上帝。</verse>
				<verse number="17">審判个時節到了，上帝家內个子女愛先受審判。既然審判愛對𠊎等開始，恁樣，毋信從上帝福音个人結局會樣般呢？</verse>
				<verse number="18">像聖經所講： 連義人得救也恁無簡單， 毋敬虔个罪人會樣般呢？</verse>
				<verse number="19">所以，該兜因為上帝个旨意受苦个人，愛一心行善，將自家交託該信實个創造主。</verse>
			</chapter>
			<chapter number="5">
				<verse number="1">𠊎這做長老、做基督受苦个見證人、有份將來所愛顯現个榮光，這下勸你等中間共下做長老个。</verse>
				<verse number="2">你等愛牧養上帝託付你等个羊群，樂意照上帝个旨意照顧佢等，毋係出於勉強；毋係因為貪財，係出於甘心來事奉。</verse>
				<verse number="3">毋好轄制所託付你等个羊群，反轉愛做佢等个榜樣。</verse>
				<verse number="4">恁樣，大牧者出現个時節，你等就會領受該永遠毋會失去榮光个冕旒。</verse>
				<verse number="5">共樣，你等後生个人應該順從長輩。大家愛用謙卑做圍身裙繫等來互相服事；因為聖經講： 上帝阻擋驕傲个人， 賜恩典給謙卑个人。</verse>
				<verse number="6">所以，你等愛謙卑，降服在上帝大能个手下，恁樣，佢會在適當个時機高升你等。</verse>
				<verse number="7">愛將一切个掛慮交給佢，因為佢關心你等。</verse>
				<verse number="8">愛節制警醒！你等个對敵 — 魔鬼像吼吼滾个獅仔恁樣行來行去，尋佢吞得落去个人。</verse>
				<verse number="9">你等愛信心堅定來抵抗佢，因為知，你等在全世界个眾兄弟姊妹也經歷共樣个苦難。</verse>
				<verse number="10">總係，在你等暫時受苦以後，該賜一切恩典个上帝，就係呼召你等通過同基督耶穌結連來分享佢永遠个榮光个上帝，定著會親自成全你等，堅定你等，賜力量㧯堅固个地基給你等。</verse>
				<verse number="11">願權能歸給佢，直到永永遠遠！阿愐。</verse>
				<verse number="12">在忠心个兄弟 西拉 个幫助之下，𠊎寫這封短短个信仔給你等，來勸勉你等，對你等做見證：這係上帝真實个恩典；你等愛在這個恩典頂高企穩。</verse>
				<verse number="13">同你等共下得到揀選个 巴比倫 教會對你等請安；吾孻仔 馬可 也對你等請安。</verse>
				<verse number="14">你等愛用愛心相唚彼此請安。 願你等所有屬基督个人攏總得到平安！</verse>
			</chapter>
		</book>
		<book number="61">
			<chapter number="1">
				<verse number="1">𠊎係 西門‧彼得 ，耶穌基督个僕人㧯使徒。𠊎寫信仔給該兜通過𠊎等个上帝㧯救主耶穌基督个義，同𠊎等得到共樣寶貴信仰个人：</verse>
				<verse number="2">願你等通過認識上帝㧯𠊎等个主耶穌得到豐豐富富个恩典㧯平安！</verse>
				<verse number="3">上帝已經用佢神聖个能力，將𠊎等過敬虔生活所需要个一切賜給𠊎等了；這個恩賜係通過認識該呼召𠊎等來分享佢自家个榮光㧯良善个主來个。</verse>
				<verse number="4">恁樣，佢將佢所應許最大㧯最寶貴个恩賜賜給𠊎等；通過這兜恩賜，你等就做得脫離世間毀滅性个慾望，來分享上帝个神性。</verse>
				<verse number="5">為到這個緣故，你等愛盡力使你等在信心上加上美德，美德加上智識，</verse>
				<verse number="6">智識加上節制，節制加上忍耐，忍耐加上敬虔，</verse>
				<verse number="7">敬虔加上愛兄弟姊妹个情，愛兄弟姊妹个情又加上惜眾人个心。</verse>
				<verse number="8">這兜係你等應該培養个德行，又日見日多；恁樣，你等就會還較有效、更加深刻認識𠊎等个主耶穌基督。</verse>
				<verse number="9">總係，無這兜德行个人就係近視，甚至瞙目，毋記得自家往日个罪已經得到洗淨了。</verse>
				<verse number="10">所以，兄弟姊妹啊，你等愛更加努力，使上帝个呼召㧯揀選成做你等永久个經驗；有這兜經驗，你等就毋會跌倒。</verse>
				<verse number="11">恁樣，你等會領受充分个權利，有好進入𠊎等个主 — 救主耶穌基督永遠个國。</verse>
				<verse number="12">所以，雖然你等已經知這兜事，也在所領受个真理上企到在在，𠊎還係愛一直提醒你等。</verse>
				<verse number="13">𠊎想，𠊎還在世間一日，𠊎應當常常幫助你等記得這兜事。</verse>
				<verse number="14">𠊎知，過無幾久，𠊎會脫離這會腐爛个身體；這係𠊎等个主耶穌基督指示𠊎个。</verse>
				<verse number="15">𠊎愛想盡辦法使你等在𠊎離開世間以後還會常常記得這兜事。</verse>
				<verse number="16">𠊎等以前將有關𠊎等个主耶穌基督个大能㧯再臨个事㧯你等講，並毋係根據該兜捏造出來無影無跡个傳說。𠊎等有親眼看過佢个偉大。</verse>
				<verse number="17">佢對阿爸上帝接受尊貴㧯榮光个時，𠊎等也攏總在場。該時，至高榮光个上帝對佢講：「這係𠊎所惜个孻仔，𠊎所歡喜个。」</verse>
				<verse number="18">𠊎等同佢共下在聖山頂高，親耳聽到這對天頂來个聲音。</verse>
				<verse number="19">恁樣，𠊎等對眾先知所宣佈个話更加確信。你等愛好好留意這個話；因為它係像一盞明燈光照烏暗个所在，直到天光，到朝晨頭个星仔在你等心中發出光該日。</verse>
				<verse number="20">最重要个一點，你等愛記得：聖經底背个預言，無一個係照自家 个意思來解釋个；</verse>
				<verse number="21">因為，從來無一個預言係對人个意思來个，其實係人受聖靈个感動將上帝个話傳出來个。</verse>
			</chapter>
			<chapter number="2">
				<verse number="1">頭擺有假先知在 以色列 民間出現；共樣，也會有假教師在你等中間出現。佢等會暗中帶入毀滅性个異端，甚至毋承認救贖佢等个主宰，盡遽就自取滅亡。</verse>
				<verse number="2">雖然恁樣，還係有盡多人會跈佢等去行淫亂个事，致到真道因為佢等个行為受到譭謗。</verse>
				<verse number="3">這兜假教師為到愛滿足自家个貪心，會用捏造个故事來騙你等个財物。自古以來，佢等个刑罰一直無延纏；佢等个滅亡必定遽遽來到！</verse>
				<verse number="4">上帝並無饒該兜犯罪个天使，反轉將佢等㧒落地獄，關在烏暗中，等候審判。</verse>
				<verse number="5">上帝也無饒上古个世代，反轉用大水浸死該兜心中無上帝个人，只有拯救傳揚正義个 挪亞 㧯其他七個人。</verse>
				<verse number="6">上帝責罰 所多瑪 㧯 蛾摩拉 兩座城，降火將它兜燒掉，做毋敬虔个人个鑑戒。</verse>
				<verse number="7">佢搶救好人 羅得 ； 羅得 為到壞人个淫亂行為大大憂愁。</verse>
				<verse number="8">該好人住在壞人中間，逐日看到又聽到該兜邪惡个事，心肝非常痛苦。</verse>
				<verse number="9">主知愛樣般拯救敬虔个人脫離試煉，也知愛樣般將壞人拘留起來，特別係該兜放縱肉體个情慾、藐視上帝主權个人，好在審判該日刑罰佢等。 這班假教師大膽、自傲，毋單淨毋尊敬該兜在天頂有榮光个，反轉侮辱佢等；</verse>
				<verse number="10"></verse>
				<verse number="11">連該兜力量㧯權能強過這班假教師个天使也無用侮辱个話在主个面前告佢等。</verse>
				<verse number="12">總係，這班人像無靈性个禽獸，天生就係愛被人捉被人㓾个；佢等照本能去行，譭謗自家無了解个事。佢等會像禽獸共樣堵到毀滅。</verse>
				<verse number="13">佢等多行不義，最後會食到不義个報應。對佢等來講，所謂快樂就係在光天白日之下滿足肉體个情慾。佢等非常屙糟㧯污穢！佢等同你等共桌食飯 个時，就拿詭詐來準做快樂！</verse>
				<verse number="14">佢等好色个目珠專看淫婦，犯罪个慾望一直無滿足。佢等誘惑軟弱个人；佢等習慣貪心；佢等係上帝所咒詛个人！</verse>
				<verse number="15">佢等離開正路，行歪路，同 比珥 个孻仔 巴蘭 行共條路。 巴蘭 貪愛不義个錢財；</verse>
				<verse number="16">因為自家所犯个罪受到責罰。毋會講話个驢仔竟然發出人个聲音來攔阻先知个戇檔。</verse>
				<verse number="17">這兜人像燥掉个泉源，像暴風吹散个水氣；上帝為到佢等保留个地方係在烏暗个深淵底背。</verse>
				<verse number="18">佢等講肨風个空話，用肉體个情慾誘惑該兜正對糜爛个生活中脫出來个人。</verse>
				<verse number="19">佢等答應愛給人自由，自家反轉做腐敗生活个奴才；因為人被麼介制伏，就係麼介个奴才。</verse>
				<verse number="20">若係人通過認識𠊎等个主 — 救主耶穌基督，脫離這世界腐敗个各種勢力，以後又被它兜捉去，被它兜制伏，這種人个結局就比先前還較慘。</verse>
				<verse number="21">佢等知有正義个道路，還敢對佢等所承受該神聖个命令離開；這種人莫知有正義个道路還較贏。</verse>
				<verse number="22">俗語講盡著：「狗仔回頭食牠所嘔出來个」；抑係「豬仔洗淨，又搵湳泥」。佢等个情形就像恁樣。</verse>
			</chapter>
			<chapter number="3">
				<verse number="1">親愛个朋友啊，𠊎這下寫給你等个係第二封信仔。在兩封信仔底背，𠊎攏總提醒你等這兜事情來激發你等純潔个思想。</verse>
				<verse number="2">𠊎愛你等記得古早時該兜聖先知所講个話，還有𠊎等个主 — 救主通過眾使徒傳給你等个命令。</verse>
				<verse number="3">最重要个係，你等一定愛知，在這末後个日期，有兜人受私慾个轄制，會出來㩢耍你等，</verse>
				<verse number="4">講：「佢毋係應許愛再來嗎？佢在㖠位呢？𠊎等个祖先攏總過身了，總係萬有敢毋係還㧯太初創造个時共樣嗎？」</verse>
				<verse number="5">佢等佻佻毋記得上帝在太初用佢个話創造天地這個事實。地係對水、通過水來成形个；</verse>
				<verse number="6">舊个世界也係對水，就係大水來消滅个。</verse>
				<verse number="7">這下个天㧯地也共樣係憑上帝个話保留下來个，等到毋信个人受審判、愛消滅該日，就愛用火燒掉。</verse>
				<verse number="8">總係，親愛个朋友啊，有一件事你等毋好毋記得：在主看來，一日像千年，千年像一日。</verse>
				<verse number="9">主毋係像一般人所想个，延延纏纏毋實現佢个應許。其實，佢係寬容你等；因為佢毋願意有一個人沈淪，係願意人人都來悔改。</verse>
				<verse number="10">總係，主再來該日就像賊仔忽然來到一樣。在該日，諸天會在大聲中消失，星辰會在烈火中燒掉，大地㧯萬物攏總會消滅掉去 。</verse>
				<verse number="11">既然這一切愛恁樣毀滅掉，你等行事做人愛樣般呢？你等應當愛過聖潔㧯虔誠个生活，</verse>
				<verse number="12">來等候上帝个日仔，催迫它趕緊來 。在該日，諸天會被火燒滅掉，星辰會在烈火中鎔掉。</verse>
				<verse number="13">總係，𠊎等所等个係上帝所應許个新天新地；在該位，正義永遠常存。</verse>
				<verse number="14">所以，親愛个朋友啊，既然你等等候該日，就應該在上帝面前盡力追求聖潔，過無好嫌个生活，同佢和好。</verse>
				<verse number="15">愛用𠊎等个主个寬容做你等得救个機會，像𠊎等親愛个兄弟 保羅 用上帝所賜个智慧寫信仔給你等一樣。</verse>
				<verse number="16">佢在所有个書信底背全部有講起這個事情。佢个信仔底背有兜所在盡難了解，該兜無知㧯反覆無常个人就隨便曲解，像佢等曲解其他个經文一樣，結果就係自取滅亡。</verse>
				<verse number="17">總講，親愛个朋友啊，既然你等知這兜事情，就應該提防，免得被該兜壞人錯誤个言論拐走，害你等離開堅固个立場。</verse>
				<verse number="18">你等愛在𠊎等个主 — 救主耶穌基督个恩典中，並對佢个認識上，繼續長進。願榮光歸給佢，對這下一直到永遠！阿愐。</verse>
			</chapter>
		</book>
		<book number="62">
			<chapter number="1">
				<verse number="1">𠊎等寫這封信仔來對你等講論該對太初就存在个生命之道。這生命之道，𠊎等識聽過，也親眼看過；毋單淨看過，也親手摸過。</verse>
				<verse number="2">這生命出現个時，𠊎等有看到；所以，𠊎等對你等做見證，並傳揚該永遠个生命，就係原來同天頂个阿爸共下、也識對𠊎等顯現个。</verse>
				<verse number="3">𠊎等將所看到、所聽到个這下也傳給你等，好使你等分享𠊎等个團契；這團契就係𠊎等同天頂个阿爸㧯佢个孻仔耶穌基督共有个。</verse>
				<verse number="4">𠊎等寫這兜係愛俾𠊎等 大家个歡喜得到圓滿。</verse>
				<verse number="5">這下𠊎等愛將對上帝个孻仔所聽到个道理傳給你等：上帝係光，佢完全無烏暗。</verse>
				<verse number="6">恁樣，若係𠊎等講𠊎等同佢有團契个關係，總係還生活在烏暗中，𠊎等就係講花撩，無實行真理。</verse>
				<verse number="7">顛倒，若係𠊎等生活在光明中，像上帝在光明中，𠊎等就彼此有團契个關係，佢个孻仔耶穌个血也洗淨𠊎等一切个罪。</verse>
				<verse number="8">若係𠊎等講自家無罪，就係欺騙自家，真理無在𠊎等个底背。</verse>
				<verse number="9">若係𠊎等對上帝認罪，佢係信實又公義个，佢會赦免𠊎等个罪，洗淨𠊎等一切个不義。</verse>
				<verse number="10">若係𠊎等講自家無犯過罪，𠊎等就係看上帝做講花撩个，佢个道就無在𠊎等个底背了。</verse>
			</chapter>
			<chapter number="2">
				<verse number="1">𠊎親愛个子女啊，𠊎寫這兜係愛喊你等莫犯罪；若有人犯罪，𠊎等有一個中保，代𠊎等對天頂个阿爸求情，就係公義个耶穌基督。</verse>
				<verse number="2">基督犧牲自家，贖𠊎等个罪；這毋單淨係為𠊎等个罪，也係為全人類个罪。</verse>
				<verse number="3">若係𠊎等遵守上帝个命令，𠊎等就知𠊎等認識佢。</verse>
				<verse number="4">若有人講「𠊎認識佢」，總係毋遵守佢个命令，這樣个人係講花撩个，真理無在佢底背。</verse>
				<verse number="5">顛倒，該遵守上帝道理个人，佢對上帝个敬愛就正經得到完全了。自稱在上帝生命底背个人，應該照耶穌基督个言行來生活；恁樣，𠊎等正會有把扼講，𠊎等在佢个生命底背。</verse>
				<verse number="6"></verse>
				<verse number="7">親愛个朋友啊，𠊎寫給你等个，毋係新个命令，係舊个命令，係你等一開始就領受个。這舊个命令就係你等當時所聽到个道理。</verse>
				<verse number="8">總係，𠊎寫給你等个，也算係新个命令；這命令个真理在基督身上，也在你等當中顯明出來。因為烏暗漸漸仔消失，真光已經開始顯明了。</verse>
				<verse number="9">若有人講佢生活在光明中，總係怨恨自家个兄弟姊妹，佢還係在烏暗中。</verse>
				<verse number="10">惜兄弟姊妹个，就係生活在光明中，佢毋會害自家 跌倒犯罪。</verse>
				<verse number="11">總係，怨恨兄弟姊妹个，就係在烏暗中；佢在烏暗中行，毋知自家愛去㖠位，因為烏暗害佢个目珠青盲了。</verse>
				<verse number="12">親愛个子女啊，𠊎寫信仔給你等， 因為你等个罪已經通過基督个名得到赦免。</verse>
				<verse number="13">父老啊，𠊎寫信仔給你等， 因為你等認識該對太初就已經存在个。 青年人啊，𠊎寫信仔給你等， 因為你等已經贏過該隻邪惡者。</verse>
				<verse number="14">親愛个子女啊，𠊎寫信仔給你等， 因為你等認識天頂个阿爸。 父老啊，𠊎寫信仔給你等， 因為你等認識該對太初就已經存在个。 青年人啊，𠊎寫信仔給你等， 因為你等勇健； 上帝个道理在你等个生命中， 你等也已經贏過該隻邪惡者。</verse>
				<verse number="15">莫愛世界，抑係愛屬這世界个東西。人若愛世界，就毋會有敬愛天頂阿爸个心了。</verse>
				<verse number="16">一切屬世界个事物，可比肉體个情慾、目珠个情慾，㧯今生一切个驕傲，攏總毋係對天頂个阿爸來个，係對世界來个。</verse>
				<verse number="17">這世界㧯一切屬世界个情慾全部漸漸消失；總係，實行上帝旨意个人會永遠長存。</verse>
				<verse number="18">親愛个子女啊，世界个末期到了！你等識聽講，敵基督該儕愛來；這下，敵基督个盡多已經出現了，所以𠊎等知末期已經到了。</verse>
				<verse number="19">這兜人並毋係正經屬𠊎等个，所以離開𠊎等；佢等若係屬𠊎等，就會同𠊎等共下。總係，佢等離開了，可見佢等攏總毋係正經屬𠊎等个。</verse>
				<verse number="20">你等已經對基督領受聖靈 ，所以你等攏總認識真理 。</verse>
				<verse number="21">𠊎寫信仔給你等，毋係因為你等毋識真理，係因為你等已經認識了，也知一切个虛假全部毋係對真理來个。</verse>
				<verse number="22">恁樣，麼人係講花撩个呢？就係否認耶穌係基督該儕人！這種人就係敵基督个；佢拒絕天頂个阿爸，也拒絕佢个孻仔。</verse>
				<verse number="23">凡拒絕孻仔个，就無阿爸；凡公開承認孻仔个，連阿爸也有了。</verse>
				<verse number="24">恁樣，你等一定愛謹守當初所聽个道理。你等若謹守當初所聽个道理，你等就會常常生在孻仔㧯阿爸个生命底背。</verse>
				<verse number="25">這就係基督親自應許給𠊎等个永遠个生命。</verse>
				<verse number="26">𠊎寫這兜事，係指等該兜想愛欺騙你等个人講个。</verse>
				<verse number="27">你等呢，基督已經將佢个靈 賜給你等。佢个靈若㧯你等同在，就無需要麼人來教你等；因為佢个靈會將一切教你等。佢个靈係真實个，毋係虛假个。所以，你等愛順從聖靈个教示，一直生在基督个生命底背。</verse>
				<verse number="28">親愛个子女啊，無毋著，你等愛生在佢个生命底背；恁樣，在佢顯現、再來該日，𠊎等就做得大膽無見笑，毋使囥起來。</verse>
				<verse number="29">你等知基督係公義个；所以，你等應該知，照公義行个人就係上帝所𫱔个。</verse>
			</chapter>
			<chapter number="3">
				<verse number="1">你等看，天頂个阿爸樣般惜𠊎等！甚至稱𠊎等做上帝个子女；事實上，𠊎等就係佢个子女！世間人所以毋識𠊎等，係因為佢等毋識上帝。</verse>
				<verse number="2">親愛个朋友啊，這下𠊎等係上帝个子女，將來會變做樣般，還吂顯明。總係，𠊎等知，基督顯現个時，𠊎等全部會像佢，因為𠊎等會看到佢个真相。</verse>
				<verse number="3">每一個盼望基督顯現个人就保持自家个純潔，像基督係純潔个一樣。</verse>
				<verse number="4">所有犯罪个人，就係違背上帝个法律；因為罪就係違背法律。</verse>
				<verse number="5">你等知，基督顯現个目的係愛除掉人个罪；佢自家並無罪。</verse>
				<verse number="6">所以，一切生在基督生命底背个人就毋繼續犯罪；繼續犯罪个人無見過基督，也毋識認識佢。</verse>
				<verse number="7">親愛个子女啊，莫被人騙走去。遵行公義个，正係義人，就像基督係公義个。</verse>
				<verse number="8">繼續犯罪个，係屬魔鬼，因為魔鬼對起初就犯罪。為到這個緣故，上帝个孻仔顯現，目的就係愛毀滅魔鬼个工作。</verse>
				<verse number="9">凡上帝所𫱔个就毋繼續犯罪，因為上帝个生命 在佢等底背。既然上帝係佢等个阿爸，佢等就毋會繼續犯罪。</verse>
				<verse number="10">上帝个子女㧯魔鬼个子女有盡明顯个分別：該毋遵行公義，毋惜兄弟姊妹个，就毋係上帝个子女。</verse>
				<verse number="11">你等對一開始所聽到个道理就係：𠊎等愛彼此相惜。</verse>
				<verse number="12">你等莫像 該隱 。佢係屬該隻邪惡者，又㓾死自家个老弟。佢做麼介愛㓾死老弟呢？因為佢个行為邪惡，厥老弟个行為正直。</verse>
				<verse number="13">所以，兄弟姊妹啊，若係這世間个人怨恨你等，你等毋使看做希奇。</verse>
				<verse number="14">𠊎等知，𠊎等已經出死入生了；𠊎等所以知，係因為𠊎等惜兄弟姊妹。無愛心个人，還係住在死个權勢之下。</verse>
				<verse number="15">凡怨恨兄弟姊妹个，就係㓾人个；你等也知，凡㓾人个，就無永遠个生命。</verse>
				<verse number="16">基督為到𠊎等犧牲生命，對這點，𠊎等就知麼介安到愛心。恁樣，𠊎等也應該為到兄弟姊妹犧牲生命！</verse>
				<verse number="17">該有世上財寶个人，看到自家个兄弟姊妹有欠缺，竟然硬心毋搭佢，愛樣般講佢敬愛上帝呢？</verse>
				<verse number="18">親愛个子女啊，𠊎等相惜，莫單淨用嘴講，應該用真實个愛心㧯行動來證明！</verse>
				<verse number="19">恁樣，對這點𠊎等就知，𠊎等係屬真理个；𠊎等在上帝个面前也做得心安理得。</verse>
				<verse number="20">就算良心自責，𠊎等還係知，上帝比𠊎等个心較大；萬事佢全部清楚。</verse>
				<verse number="21">所以，親愛个朋友啊，𠊎等个良心若無自責，𠊎等在上帝面前就做得好膽無驚。</verse>
				<verse number="22">𠊎等無論對佢求麼介，佢一定會賜給𠊎等；因為𠊎等遵守佢个命令，做佢所歡喜个事。</verse>
				<verse number="23">佢个命令就係：𠊎等一定愛信佢个孻仔耶穌基督个名，也照基督所賜給𠊎等个命令彼此相惜。</verse>
				<verse number="24">遵守上帝命令个人，就在上帝个生命底背，上帝也在佢等个生命底背。𠊎等所以知上帝在𠊎等个生命底背，係因為佢所賜給𠊎等个聖靈。</verse>
			</chapter>
			<chapter number="4">
				<verse number="1">親愛个朋友啊，一切个靈，你等毋好全部相信，一定愛察驗該兜靈係毋係對上帝來个，因為已經有盡多个假先知逐所在出現。</verse>
				<verse number="2">你等愛樣般認出係上帝个靈呢？麼人公開承認耶穌基督係成做肉身來个，麼人就有對上帝來个靈。</verse>
				<verse number="3">麼人毋公開承認耶穌，佢就無對上帝來个靈；佢所有个係該隻敵基督个靈。你等有聽過這個靈愛來，這下已經在世間了。</verse>
				<verse number="4">親愛个子女啊，你等係屬上帝个，也已經贏過假先知了，因為在你等底背个靈比屬世界个人底背个靈較有力量。</verse>
				<verse number="5">該兜假先知講論世間个事，世間人聽從佢等，因為佢等係屬世界个。</verse>
				<verse number="6">總係，𠊎等係屬上帝个。認識上帝个人就聽從𠊎等；毋屬上帝个人就毋聽從𠊎等。照這點，𠊎等知愛樣般認出真理个靈㧯錯誤个靈。</verse>
				<verse number="7">親愛个朋友啊，𠊎等愛彼此相惜，因為愛心係對上帝來个。該有愛心个，係上帝所𫱔个，也認識上帝。</verse>
				<verse number="8">該無愛心个，毋識上帝，因為上帝就係愛。</verse>
				<verse number="9">上帝差派佢獨一个孻仔 到世間來，使𠊎等通過佢得到生命；上帝用恁樣來顯明佢惜𠊎等。</verse>
				<verse number="10">這就係愛：毋係𠊎等敬愛上帝，係上帝惜𠊎等，差派佢个孻仔，為到𠊎等犧牲，贖𠊎等个罪。</verse>
				<verse number="11">親愛个朋友啊，既然上帝恁惜𠊎等，𠊎等也應該彼此相惜。</verse>
				<verse number="12">無人見過上帝，總係𠊎等若彼此相惜，上帝就在𠊎等个生命底背，佢个痛惜在𠊎等个當中就完全實現了。</verse>
				<verse number="13">上帝將佢个靈賜給𠊎等，因為恁樣，𠊎等知𠊎等在佢个生命底背，佢也在𠊎等个生命底背。</verse>
				<verse number="14">天頂个阿爸差派佢个孻仔來做世界个救主；這係𠊎等所看到、所見證个。</verse>
				<verse number="15">麼人公開承認耶穌係上帝个孻仔，上帝就在佢个生命底背，佢也在上帝个生命底背。</verse>
				<verse number="16">所以，𠊎等知，也相信，上帝惜𠊎等。 上帝就係愛；生命肚有愛心个人就在上帝个生命底背，上帝也在佢个生命底背。</verse>
				<verse number="17">恁樣，愛就在𠊎等个當中完全實現，使𠊎等在審判該日好膽無驚；因為𠊎等在世間有同基督共樣个生命。</verse>
				<verse number="18">在愛底背無驚；完全个愛心能逐走一切个驚。所以，會驚个人就係無完全个愛心，因為驚㧯刑罰係連做一下个。</verse>
				<verse number="19">𠊎等愛，因為上帝先惜𠊎等。</verse>
				<verse number="20">若有人講「𠊎敬愛上帝」，還怨恨自家个兄弟姊妹，佢就係講花撩个人；佢既然毋惜該看得到个兄弟姊妹，就無法度敬愛該看毋到个上帝。</verse>
				<verse number="21">這係𠊎等對基督所領受个命令：敬愛上帝个，也應當惜兄弟姊妹。</verse>
			</chapter>
			<chapter number="5">
				<verse number="1">凡信耶穌係基督个，全部係上帝所𫱔个。人若敬愛該做阿爸个，就一定會惜佢个子女。</verse>
				<verse number="2">𠊎等若敬愛上帝，又遵守佢个命令，恁樣就知𠊎等惜佢个子女。</verse>
				<verse number="3">𠊎等遵守上帝个命令，這就係敬愛上帝；佢个命令並毋係恁難遵守，</verse>
				<verse number="4">因為凡上帝所𫱔个就贏過世界。使𠊎等贏過世界个，係𠊎等个信心。</verse>
				<verse number="5">麼人能贏過世界呢？唯有信耶穌係上帝个孻仔个人！</verse>
				<verse number="6">耶穌基督降世係通過洗禮个水㧯犧牲个血；毋單淨係通過水，係通過水㧯血。聖靈也親自見證這係真實个，因為聖靈就係真理。</verse>
				<verse number="7">聖靈、水㧯血，這三樣攏總做見證，三樣都同意。</verse>
				<verse number="8"></verse>
				<verse number="9">既然𠊎等接受人个見證，上帝个見證還較有力；因為這見證係上帝為佢个孻仔做个。</verse>
				<verse number="10">所以，麼人信上帝个孻仔，麼人心中就有這個見證；麼人毋信上帝，就係看上帝做講花撩个，因為佢毋信上帝為佢个孻仔所做个見證。</verse>
				<verse number="11">這見證就係：上帝賜𠊎等永遠个生命，這生命个源頭就係佢个孻仔。</verse>
				<verse number="12">人有上帝个孻仔就有這生命；人無上帝个孻仔就無這生命。</verse>
				<verse number="13">𠊎寫這兜給你等，係愛你等知，你等信上帝个孻仔个人有永遠个生命。</verse>
				<verse number="14">𠊎等在上帝面前好膽無驚；因為𠊎等確實知，𠊎等若照佢个旨意求，佢就會聽𠊎等。</verse>
				<verse number="15">既然𠊎等知佢會聽𠊎等一切个祈求，𠊎等就知𠊎等對佢所求个，已經得到。</verse>
				<verse number="16">若有人看到兄弟姊妹犯了毋會致到死个罪，佢應當求上帝，上帝會賜生命給佢个兄弟姊妹。這係指該兜犯了毋會致到死个罪个人講个。總係，有會致到死个罪；𠊎毋係講愛為這個罪祈禱。</verse>
				<verse number="17">一切不義个行為攏總係罪，總係也有毋會致到死个罪。</verse>
				<verse number="18">𠊎等知，凡上帝所𫱔个就毋會繼續犯罪；上帝个孻仔保守佢，該隻邪惡者也害佢毋到。</verse>
				<verse number="19">𠊎等知，雖然全世界攏總住在該隻邪惡者个轄制之下，𠊎等還係屬上帝。</verse>
				<verse number="20">𠊎等知，上帝个孻仔已經來了，佢賜𠊎等理解力，使𠊎等認識真神。𠊎等在真神个生命底背，就係在佢个孻仔耶穌基督个生命底背。佢就係真神，就係永遠个生命。</verse>
				<verse number="21">親愛个子女啊，你等愛遠遠離開偶像！</verse>
			</chapter>
		</book>
		<book number="63">
			<chapter number="1">
				<verse number="1">𠊎係長老；𠊎寫信仔給你 — 蒙揀選个夫人，也給你个子女： 你等係𠊎誠心所惜个；毋單淨𠊎惜你等，所有認識真理个人也惜你等；</verse>
				<verse number="2">因為真理在𠊎等心內，也愛永遠㧯𠊎等同在。</verse>
				<verse number="3">阿爸上帝㧯佢个孻仔耶穌基督一定會賜恩典、憐憫、㧯平安給𠊎等，使𠊎等一直生活在真理㧯相惜个底背。</verse>
				<verse number="4">𠊎盡歡喜，因為𠊎知在你个子女當中有遵從天頂阿爸个命令、生活在真理底背个人。</verse>
				<verse number="5">所以，親愛个夫人，𠊎求你，𠊎等大家愛彼此相惜。𠊎寫給你个，並毋係一條新个命令，還係𠊎等對一開始就領受个。</verse>
				<verse number="6">這就係愛：𠊎等應當遵行上帝所有个命令。你等對一開始所聽到个命令就係：你等應當用愛行事做人。</verse>
				<verse number="7">有盡多迷惑人个已經在世界出現；佢等公開否認耶穌基督係成做肉身來个。這種人就係迷惑人个，係敵基督个。</verse>
				<verse number="8">你等愛細膩，正毋會失掉𠊎等 所成就个，反轉會得到豐富个報賞。</verse>
				<verse number="9">所有毋遵守基督个教訓，又偏走去个，就無屬上帝；遵守教訓个，就屬天頂个阿爸，又屬孻仔。</verse>
				<verse number="10">若有人到你等該位去，毋傳這個教訓，就毋好接待佢到你等个屋下去，也毋好對佢請安；</verse>
				<verse number="11">因為對佢請安个，就㧯佢所做該兜邪惡个事有份。</verse>
				<verse number="12">𠊎還有盡多話愛㧯你等講，總係𠊎想，無愛用筆墨來傳達。𠊎希望親身去探訪你等，當面㧯你等談論，使𠊎等个歡喜得到滿足。</verse>
				<verse number="13">你該蒙揀選个姊妹个子女 對你等請安！</verse>
			</chapter>
		</book>
		<book number="64">
			<chapter number="1">
				<verse number="1">𠊎係長老；𠊎寫信仔給親愛个 該猶 — 𠊎誠心所惜个朋友：</verse>
				<verse number="2">親愛个朋友，𠊎祝福你事事順利，身體勇健，像你个靈性共樣恁勇健。</verse>
				<verse number="3">𠊎盡歡喜，因為有兜兄弟來到這位，㧯𠊎講，你對真理盡忠心，凡事遵照真理來行。</verse>
				<verse number="4">𠊎最大个歡喜就係：聽到𠊎个眾子女生活在真理个底背。</verse>
				<verse number="5">親愛个朋友，你恁忠心為到眾兄弟姊妹做事，甚至對外來个兄弟姊妹也係恁樣。</verse>
				<verse number="6">佢等識對這所在个教會講起你个愛心。請你照上帝所歡喜个，幫助佢等繼續佢等个旅程。</verse>
				<verse number="7">佢等為到基督个緣故出外工作，並無接受吂信个人个幫助。</verse>
				<verse number="8">所以，𠊎等基督徒應該愛接待這種人，同佢等共下來為到真理工作。</verse>
				<verse number="9">𠊎識寫一封信仔給教會；總係，想愛做教會領袖个 丟特腓 毋搭𠊎所講个話。</verse>
				<verse number="10">𠊎去个時節，一定愛講起佢所做个事。佢用壞話攻擊𠊎等，譭謗𠊎等！毋單淨恁樣，佢自家毋接待外來个兄弟姊妹，又禁止該兜願意接待个人，甚至愛逐佢等出教會！</verse>
				<verse number="11">親愛个朋友，毋好學壞，愛學好。行善个人就屬上帝；作惡个人就無見過上帝。</verse>
				<verse number="12">大家褒獎 底米特 。真理為佢做證；𠊎等也為佢做證。你知𠊎等个見證係真實个。</verse>
				<verse number="13">𠊎還有盡多話愛㧯你講，總係𠊎想，無愛用筆墨來寫。</verse>
				<verse number="14">𠊎希望無幾久會見到你，當面㧯你談論。</verse>
				<verse number="15">願你平安！ 你个朋友全部對你請安。請代𠊎對各位朋友一儕一儕請安。</verse>
			</chapter>
		</book>
		<book number="65">
			<chapter number="1">
				<verse number="1">𠊎係耶穌基督个僕人， 雅各 个兄弟 猶大 。𠊎寫信仔給蒙上帝選召、生活在阿爸上帝个痛惜中、又蒙耶穌基督保守个人。</verse>
				<verse number="2">願上帝豐豐富富賜你等憐憫、平安，㧯慈愛。</verse>
				<verse number="3">親愛个朋友，𠊎盡早就想愛寫信仔㧯你等談論同𠊎等大家攏總有關係个救恩問題；總係，𠊎感覺有需要即時寫信仔勸勉你等，愛繼續為上帝一擺就完全傳給聖徒个信仰盡力打拚。</verse>
				<verse number="4">因為，有兜無敬虔个人偷偷入來𠊎等个中間，曲解上帝恩典个道理來遮蓋自家腐敗个行為。佢等拒絕惟一个主宰 — 𠊎等个主耶穌基督。盡早以前，聖經已經預言佢等一定愛受刑罰。</verse>
				<verse number="5">這一切，雖然你等全部清楚，𠊎還係愛提醒你等：主 樣般拯救 以色列 人脫離 埃及 ，然後消滅該兜毋信个人。</verse>
				<verse number="6">毋好毋記得該兜毋守本份、離開本位个天使，佢等被永遠解毋開个鎖鍊鎖在烏暗个深淵肚；上帝將佢等關在該位，等候審判个大日仔。</verse>
				<verse number="7">還有住在 所多瑪 、 蛾摩拉 、㧯附近城市个人民，像該兜天使共樣，佢等行淫亂，放縱違反自然个性慾，所以落在該永遠不滅个火底背受刑罰。這個事可以做大家个鑑戒。</verse>
				<verse number="8">這兜無敬虔个人也共樣。佢等屙糟个妄想害佢等犯罪，打垃圾自家个身體；佢等藐視上帝个權柄，褻瀆天頂該兜有尊榮个。</verse>
				<verse number="9">就係天使長 米迦勒 ，為到 摩西 个身屍同魔鬼辯論个時，也毋敢用譭謗个話來責備，只有講：「主責備你！」</verse>
				<verse number="10">總係，這兜人竟然譭謗一切佢等毋了解个事；像禽獸恁樣，佢等順本性个唆慫去做該兜敗壞自家个事。</verse>
				<verse number="11">這兜人慘了！佢等同 該隱 行共條路。為到錢財，佢等陷入 巴蘭 所犯个錯誤中。佢等像 可拉 恁樣悖逆，也像恁樣滅亡。</verse>
				<verse number="12">這兜人同你等共下食愛个筵席，毋知見笑，只顧自家盡啉，成做筵席个污點。佢等像毋會落雨个雲，被風吹來吹去；又像秋天毋會結果子个樹，連根被人挷出來，完全死掉 。</verse>
				<verse number="13">佢等个行為毋知見笑，像海肚个大浪，激出屙糟个水泡。佢等像星仔遊蕩，跌落上帝永遠為佢等保留該烏暗个深淵。</verse>
				<verse number="14">亞當 个第七代孫仔 以諾 對這兜人早就預言；佢講：「看啊，主帶等千萬个聖天使共下來。</verse>
				<verse number="15">佢愛審判所有个人，刑罰所有無敬虔个罪人；因為佢等个行為無敬虔，又用無敬虔个話冒犯上帝！」</verse>
				<verse number="16">這兜人常常埋怨別人，怪怨別人；佢等順自家邪惡个情慾，講肨風个話，為到自家个利益巴結別人。</verse>
				<verse number="17">總講，親愛个朋友啊，毋好毋記得𠊎等主耶穌基督个使徒講過个話。</verse>
				<verse number="18">佢等對你等講：「在歷史个末期有人會出來，照自家邪惡㧯無敬虔个慾念㩢耍你等。」</verse>
				<verse number="19">這兜人無聖靈；佢等順從本性个教唆，製造紛爭。</verse>
				<verse number="20">總係你等呢，親愛个朋友啊，你等應當一直在至聖个信仰上造就自家，在聖靈个底背祈禱，</verse>
				<verse number="21">常常生活在上帝个痛惜底背，仰望𠊎等个主耶穌基督憐憫你等，賜你等永遠个生命。</verse>
				<verse number="22">對該兜疑狐無辦法決裁个人，你等愛憐憫佢等。</verse>
				<verse number="23">有兜人，你等愛對火个當中搶救佢等。另外有兜人，你等愛憐憫佢等，總係愛細膩；連佢等膏到情慾个衫褲也毋好摸到。</verse>
				<verse number="24">願該能保守你等毋會跌倒，使你等無缺點、有好歡歡喜喜來到佢榮光个面前个，</verse>
				<verse number="25">𠊎等个救主，獨一無二个上帝，通過𠊎等个主耶穌基督，得到榮光、威嚴、能力、㧯權柄，對萬世以前，到這下，直到永永遠遠！阿愐。</verse>
			</chapter>
		</book>
		<book number="66">
			<chapter number="1">
				<verse number="1">本書係記載耶穌基督个啟示。上帝交給佢這個啟示，愛佢將短期內一定會發生个事指示上帝个眾僕人。基督差派天使對佢个僕人 約翰 顯明這兜事，</verse>
				<verse number="2">約翰 就將所看到个㧯大家講，為上帝个真道㧯耶穌基督所啟示个真理做見證。</verse>
				<verse number="3">宣讀這本書个人樣般有福氣！該兜聽這個預言又照其中个記載去行个人實在有福氣噢！因為這一切事情實現个時機會到了。</verse>
				<verse number="4">𠊎 — 約翰 寫信仔給 亞細亞 省个七間教會： 願古早存在、這下存在、將來也永遠存在个上帝，並佢寶座前七個靈，㧯該忠心个見證者，就係最先對死復活、統治地上萬王个耶穌基督，賜恩典、平安給你等！ 佢惜𠊎等，又通過流血到死來釋放𠊎等脫離𠊎等个罪，</verse>
				<verse number="5"></verse>
				<verse number="6">使𠊎等成做一個國，做祭司來服事佢个阿爸上帝。願榮光㧯權能歸給耶穌基督，世世無窮！阿愐。</verse>
				<verse number="7">看啊！佢坐雲來囉； 每一個人會看到佢， 連該兜用槍刺佢个人也會看到佢。 佢來个時，地上个萬民攏總會因為佢捶心肝大噭。 這個事一定會發生！阿愐。</verse>
				<verse number="8">古早存在、這下存在、將來也永遠存在个主 — 全能个上帝講：「𠊎係阿爾法 — 就係開始，係亞米茄 — 就係結束！」</verse>
				<verse number="9">𠊎 — 約翰 就係你等个兄弟。𠊎同你等共下有份耶穌个患難、佢个國、㧯忍耐。為到傳揚上帝个真道㧯耶穌所啟示个真理，𠊎識被人關在該名安到 拔摩 个海島。</verse>
				<verse number="10">有一個主日，𠊎受聖靈个感動，聽到有大聲音，像係號筒个聲，在𠊎後背對𠊎講：</verse>
				<verse number="11">「愛將你所看到个寫下來，然後將這書卷寄給 以弗所 、 士每拿 、 別迦摩 、 推雅推喇 、 撒狄 、 非拉鐵非 、㧯 老底嘉 七個教會。」</verse>
				<verse number="12">𠊎轉身愛看係麼人對𠊎講話，𠊎就看到七盞金燈臺。</verse>
				<verse number="13">燈臺中間有一個像人子个，企在該位，著等縋到腳盤个長袍，胸前繫等金帶。</verse>
				<verse number="14">佢个頭那毛像羊毛也像雪恁白；佢个目珠像火焰恁金；</verse>
				<verse number="15">佢个腳像火爐中煉過又拭金金个銅；佢个聲像係大水个聲。</verse>
				<verse number="16">佢右手拿等七粒星仔，嘴呸出一支兩邊利个劍。佢个面像當晝个日頭。</verse>
				<verse number="17">𠊎一看到佢，就仆在佢个腳前，像死掉一樣。佢用右手捍等𠊎，講：「毋使驚！𠊎係開始，也係結束。</verse>
				<verse number="18">𠊎係該永遠存在个！𠊎識死過，這下生生，也愛生到永遠。𠊎掌管死㧯陰間个鎖匙。</verse>
				<verse number="19">你愛將所看到个，無論係這下抑係將來愛發生个，全部寫下來。</verse>
				<verse number="20">你所看到、在𠊎右手个七粒星仔㧯七盞金燈臺个奧秘係恁樣：七粒星仔係七個教會个使者；七盞燈臺就係七個教會。」</verse>
			</chapter>
			<chapter number="2">
				<verse number="1">「你愛寫信仔給 以弗所 教會个使者，講： 『該右手拿等七粒星仔、在七盞金燈臺中間行个，恁樣講：</verse>
				<verse number="2">𠊎知你所做个：你樣般辛苦工作，樣般忍耐；𠊎也知你無縱壞人，識考驗該兜自稱使徒其實毋係使徒个人，認出佢等係假冒个。</verse>
				<verse number="3">你盡有忍耐，識為𠊎个緣故經歷苦難，從來毋識忍毋住。</verse>
				<verse number="4">總係，有一件事𠊎愛責備你：你已經失掉先前對𠊎个愛心。</verse>
				<verse number="5">你想看仔，你已經墜落到麼介程度！你愛悔改，回復你先前有愛心个行為。你若毋悔改，𠊎愛來，將你个燈臺對原位徙走。</verse>
				<verse number="6">總係，你有一個優點：你同𠊎共樣恁惱 尼哥拉 黨个作為。</verse>
				<verse number="7">『聖靈對各教會所講个話，有耳公好聽个，就愛聽！ 『得勝个人，𠊎愛給佢有權好食上帝樂園中生命樹个果子。』」</verse>
				<verse number="8">「你愛寫信仔給 士每拿 教會个使者，講： 『該開始㧯結束、死又復活个，恁樣講：</verse>
				<verse number="9">𠊎知你个患難㧯窮苦；事實上你係富足个！𠊎知你被該兜自稱 猶太 人个譭謗；其實佢等並毋係 猶太 人，佢等係撒但一黨个人。</verse>
				<verse number="10">毋使驚你所會堵到个苦難。看啊，魔鬼愛考驗你等；你等中間有兜人會被佢㧒落監獄；你等愛受十日个苦難。你愛忠心到死，𠊎就賜你生命个冕旒。</verse>
				<verse number="11">『聖靈對各教會所講个話，有耳公好聽个，就愛聽！ 『得勝个人絕對毋會受第二擺死个傷害。』」</verse>
				<verse number="12">「你愛寫信仔給 別迦摩 教會个使者，講： 『該有兩邊利个劍个，恁樣講：</verse>
				<verse number="13">𠊎知你住个地方就係撒但做王个所在。你對𠊎忠誠；就係𠊎忠心个見證人 安提帕 在撒但个地盤受害个時，你也無放掉對𠊎个信心。</verse>
				<verse number="14">總係，有兜事𠊎愛責備你：你等中間有人照 巴蘭 个教訓去行；這個 巴蘭 誘惑 巴勒 ，教唆 以色列 人犯罪，去食拜過偶像个祭物，又行淫亂个事情。</verse>
				<verse number="15">共樣，你等中間也有人照 尼哥拉 黨个教訓去行。</verse>
				<verse number="16">所以，你愛悔改，若無，𠊎會黏時到，用𠊎口中个劍攻擊這兜人。</verse>
				<verse number="17">『聖靈對各教會所講个話，有耳公好聽个，就愛聽！ 『得勝个人，𠊎愛賜給佢該囥等个嗎哪。𠊎也愛給佢一垤白石頭，頂高寫等新个名；這個名，除了接受个人，無人認得識。』」</verse>
				<verse number="18">「你愛寫信仔給 推雅推喇 教會个使者，講： 『上帝个孻仔，目珠像火焰恁金，腳像拭金金个銅，佢恁樣講：</verse>
				<verse number="19">𠊎知你所做个；𠊎知你个愛心、信心、事奉、㧯耐心。𠊎知你這下所做个比先前還較多。</verse>
				<verse number="20">總係，有一件事𠊎愛責備你：你忍受該自稱女先知个 耶洗碧 。姖教唆引誘𠊎所有个僕人去行淫亂个事，食拜過偶像个祭物。</verse>
				<verse number="21">𠊎有給姖悔改个時間，總係姖毋肯離開姖个淫亂。</verse>
				<verse number="22">看啊，𠊎愛使姖發病橫在眠床頂；該兜同姖行淫亂个人，除非佢等悔改，無再同姖行淫亂，𠊎就愛使佢等同姖共下受大苦難。</verse>
				<verse number="23">𠊎也愛攻擊跈姖个人，治死佢等；各教會就會知，𠊎係該看透人个思想㧯意念个。𠊎愛照你等逐儕所做个，給每一個人得到自家个報應。</verse>
				<verse number="24">『論到在 推雅推喇 其他个人，你等無跈該邪說，無學習所謂撒但个奧秘。𠊎㧯你等講，𠊎毋會再將別个重擔加給你等。</verse>
				<verse number="25">總係，你等愛持守你等已經有个，直到𠊎來。</verse>
				<verse number="26">得勝个、能繼續遵行𠊎命令到最後个人，𠊎愛賜佢權柄，同吾爸給𠊎个共樣； 𠊎愛賜佢權柄來統治萬國， 用鐵杖治理佢等， 像打爛缶仔恁樣粉碎佢等。 𠊎也愛將天光星賜給得勝个人。</verse>
				<verse number="27"></verse>
				<verse number="28"></verse>
				<verse number="29">『聖靈對各教會所講个話，有耳公好聽个，就愛聽！』」</verse>
			</chapter>
			<chapter number="3">
				<verse number="1">「你愛寫信仔給 撒狄 教會个使者，講： 『該有上帝七個靈㧯七粒星仔个，恁樣講：𠊎知你所做个；𠊎知有人恅到你係生个，實際上你係死个！</verse>
				<verse number="2">所以，好醒了！愛堅固你所賸一些仔吂死掉个；因為𠊎看出你所做个，在𠊎个上帝面前還吂完全。</verse>
				<verse number="3">所以，你愛記得所聽、所接受个教訓，確實去遵行，離開你个罪惡。你若還毋醒，𠊎愛像賊仔恁樣忽然來到；你絕對毋會知𠊎愛來到个時間。</verse>
				<verse number="4">總係，在 撒狄 ，你等還有兜人衫褲保持到盡淨浰；這兜人堪得著白色个長袍，同𠊎共下行。</verse>
				<verse number="5">得勝个人共樣也愛著白色个長袍。𠊎絕對毋會對生命冊將佢个名拭掉；在吾爸㧯佢个天使面前，𠊎愛公開承認佢係屬𠊎个。</verse>
				<verse number="6">『聖靈對各教會所講个話，有耳公好聽个，就愛聽！』」</verse>
				<verse number="7">「你愛寫信仔給 非拉鐵非 教會个使者，講： 『該神聖又信實、 掌管 大衛 个鎖匙、 打開門就無人能關、 關門就無人能開个， 佢恁樣講：</verse>
				<verse number="8">𠊎知你所做个；𠊎知你只有一些个能力，總係你遵守𠊎个教訓，無否認𠊎个名。𠊎已經在你面前開一扇門，係無人能關个。</verse>
				<verse number="9">看啊，該兜撒但一黨个人，自稱 猶太 人其實毋係 猶太 人，佢等係騙仔；𠊎愛喊佢等來，在你腳前跪拜，俾佢等知𠊎惜你。</verse>
				<verse number="10">因為你遵守𠊎个命令，忍耐到底，所以在患難臨到全世界、全人類受試煉个時，𠊎愛保守你。</verse>
				<verse number="11">𠊎就會到了。你愛持守你所有个，你得勝个冕旒毋好被人搶走。</verse>
				<verse number="12">得勝个人，𠊎愛使佢做𠊎上帝个聖殿底背个柱仔；佢永遠毋會離開該位。𠊎愛在佢身上寫𠊎上帝个名，還有𠊎上帝个城个名，就係對天頂、對𠊎上帝該位降下來个新 耶路撒冷 ；𠊎也愛將𠊎个新名寫在佢身上。</verse>
				<verse number="13">『聖靈對各教會所講个話，有耳公好聽个，就愛聽！』」</verse>
				<verse number="14">「你愛寫信仔給 老底嘉 教會个使者，講： 『該名安到阿愐个，係信實可靠个見證者，係上帝創造个根源，佢恁樣講：</verse>
				<verse number="15">𠊎知你所做个；𠊎知你無冷也無熱；𠊎盡希望你係冷个抑係熱个！</verse>
				<verse number="16">因為你像溫水恁樣，無冷也無燒，𠊎愛將你對𠊎个嘴呸出去！</verse>
				<verse number="17">你講：𠊎係富足个，𠊎盡發，麼介都無欠。總係，你毋知自家係樣般衰過，樣般可憐！你窮苦、青盲、又赤身露體。</verse>
				<verse number="18">所以，𠊎勸你對𠊎買用火煉過个金仔，使你成做富足；買白色个長袍來著，將你見笑个身體遮起來；買目藥來膏你个目珠，使你看得到。</verse>
				<verse number="19">𠊎所惜个人，𠊎就責備管教。所以，你愛熱心起來，也愛悔改。</verse>
				<verse number="20">聽啊，𠊎企在門外掽門；若有人聽到𠊎个聲來開門，𠊎愛入去佢該位；𠊎同佢，佢同𠊎共桌食飯。</verse>
				<verse number="21">得勝个人，𠊎愛賜佢權利，在𠊎个寶座上同𠊎共下坐，就像𠊎已經得勝，這下在吾爸个寶座上同佢共下坐一樣。</verse>
				<verse number="22">『聖靈對各教會所講个話，有耳公好聽个，就愛聽！』」</verse>
			</chapter>
			<chapter number="4">
				<verse number="1">接等，𠊎得到另外一個異象，看到天頂有一扇開等个門。 𠊎先前所聽到、像號筒个聲，又對𠊎講：「你上這位來，𠊎愛指示你以後必定愛發生个事。」</verse>
				<verse number="2">即時，聖靈就感動𠊎。𠊎看到天頂有一個寶座；有一位坐在寶座上。</verse>
				<verse number="3">佢个面貌像碧玉㧯紅寶石恁樣皓光。寶座个周圍有虹圍等，色像綠寶石。</verse>
				<verse number="4">寶座周圍有二十四個座位，頂高坐等二十四個長老，著等白色个長袍，頭那戴等金个冕旒。</verse>
				<verse number="5">有𥍉爧、𠾐𠾐滾个聲，㧯響雷公个聲對寶座發出。寶座前𤏸等七支火把；該就係上帝个七個靈。</verse>
				<verse number="6">寶座前還有像水晶恁樣个玻璃海。 寶座个四面有四個生物，前後全部有目珠。</verse>
				<verse number="7">第一個生物像係獅仔；第二個像係牛牯；第三個有人个面；第四個像係飛等个鷹鳥。</verse>
				<verse number="8">該四個生物，逐個有六隻翼胛，無論內外全部有目珠。佢等日夜緊唱： 聖哉！聖哉！聖哉！ 主 — 全能个上帝， 古早存在、這下存在、 將來也永遠存在个！</verse>
				<verse number="9">逐擺，四個生物唱榮光、尊貴、感謝个詩歌，獻給該坐在寶座上、永遠生生个，</verse>
				<verse number="10">該時，二十四個長老就伏落去敬拜該永遠生生、坐在寶座上个。佢等將自家个冕旒放在寶座前，講：</verse>
				<verse number="11">𠊎等个主，𠊎等个上帝！ 你堪得接受榮光、尊貴、㧯權能。 因為你創造了萬有； 萬有个受造㧯生存， 完全係照你个旨意。</verse>
			</chapter>
			<chapter number="5">
				<verse number="1">𠊎看到該坐在寶座上个，右手拿等一卷書；這卷書兩面寫到滿滿个字，係用七隻印仔封等。</verse>
				<verse number="2">𠊎又看到一個盡勇壯个天使，大聲宣佈講：「麼人有資格掀開這兜印仔，打開這卷書呢？」</verse>
				<verse number="3">總係，無論在天頂、地上、抑係地底下，攏總無人能打開抑係看該卷書。</verse>
				<verse number="4">𠊎就大聲噭，因為無人有資格打開抑係看該卷書。</verse>
				<verse number="5">長老中有一個對𠊎講：「毋使噭！你看，該對 猶大 支族出來个獅仔 — 大衛 个後代已經得勝了；佢能掀開該七隻印仔，打開該卷書。」</verse>
				<verse number="6">接等，𠊎看到在寶座㧯四個生物个中央，就係眾長老圍等个中央，有羔羊企等。該羔羊像係被人㓾過个，有七支角，七隻目珠，就係上帝个七個靈，係奉差派到世間逐所在去个。</verse>
				<verse number="7">該羔羊進前來，對坐在寶座上个右手將該卷書接過來。</verse>
				<verse number="8">佢接過該卷書个時，四個生物㧯二十四個長老就跪在羔羊个面前。逐個長老拿等弦琴㧯裝滿香个金爐；這香係眾聖徒个祈禱。</verse>
				<verse number="9">佢等唱一首新个詩歌，講： 唯有你有資格接受該卷書， 掀開該兜頂高个印仔； 因為你識被人㓾死！ 你通過流血到死， 對各種族、各語言、 各民族、㧯逐個國家， 將人贖轉來，歸給上帝。</verse>
				<verse number="10">你使佢等成做一個國， 做祭司來服事𠊎等个上帝； 佢等會統治世界。</verse>
				<verse number="11">繼續看下去，𠊎聽到有千千萬萬天使个聲音。佢等圍等企在寶座、㧯四個生物、並眾長老个周圍，</verse>
				<verse number="12">大聲唱詩講： 被人㓾死个羔羊， 有資格接受權能、 豐盛、智慧、力量、 尊貴、榮光、㧯頌讚！</verse>
				<verse number="13">𠊎又聽到天頂、地上、地底下、㧯海肚一切受造个，就係宇宙間个萬物，攏總唱詩，講： 願頌讚、尊貴、榮光、㧯權柄， 全部歸給該坐寶座个㧯羔羊， 直到永永遠遠！</verse>
				<verse number="14">四個生物應講：「阿愐！」眾長老就伏落去拜佢。</verse>
			</chapter>
			<chapter number="6">
				<verse number="1">𠊎看到羔羊掀開該七隻印仔个頭一隻。該時，𠊎聽到四個生物中个一個發出像響雷公个聲，講：「來！」</verse>
				<verse number="2">𠊎一看，看到一匹白馬；該騎馬个拿等弓，領受賜給佢个冕旒，然後就出去戰爭，得勝又愛得勝。</verse>
				<verse number="3">羔羊掀開第二隻印仔个時，𠊎聽到第二個生物講：「來！」</verse>
				<verse number="4">另外一匹馬就出來，係紅色个。該騎馬个領受了交給佢个權，可以將地上个和平搶走，使人類互相殘殺；佢所領受个係一支大劍。</verse>
				<verse number="5">羔羊掀開第三隻印仔个時，𠊎聽到第三個生物講：「來！」𠊎一看，看到一匹烏馬；該騎馬个手中拿等天平。</verse>
				<verse number="6">𠊎聽到有聲，像係對四個生物中發出个，講：「一日个工錢正買一公升小麥，一日个工錢正買三公升大麥。橄欖油㧯酒毋好蹧踏！」</verse>
				<verse number="7">羔羊掀開第四隻印仔个時，𠊎聽到第四個生物講：「來！」</verse>
				<verse number="8">𠊎一看，看到一匹灰色个馬；該騎馬个名安到「死」，「陰間」跈在佢後背。佢等得到權柄，管轄世界个四分之一，用戰爭、飢荒、發瘟，㧯地上个禽獸去㓾人。</verse>
				<verse number="9">羔羊掀開第五隻印仔个時，𠊎看到該兜因為傳上帝个真道、忠心做見證，被人㓾死个靈魂在祭壇下。</verse>
				<verse number="10">佢等大聲喊講：「神聖又真實个主宰啊！你幾時正愛審判地上个人，為𠊎等所流个血伸冤啊？」</verse>
				<verse number="11">佢等逐儕接受一領白色个長袍，又聽到有話吩咐佢等，喊佢等歇睏加一下仔，等到同佢等相共事奉主个人㧯兄弟姊妹也像佢等共樣被人㓾死，數目滿个時。</verse>
				<verse number="12">𠊎又看到羔羊掀開第六隻印仔。該時，大地盡顫；日頭變烏，像一垤烏毛个布仔；月光歸隻變紅，像血一樣；</verse>
				<verse number="13">天頂个星仔落在地上，像還吂熟个無花果被暴風對樹頂吹下來一樣。</verse>
				<verse number="14">天毋見掉，像書捲起來收走一樣；山嶺㧯海島也一一對原位徙走。</verse>
				<verse number="15">地上个君王、統治者、將軍、有錢有勢个，並一切奴隸㧯自由人，全部囥在山孔㧯巖石縫肚。</verse>
				<verse number="16">佢等對山㧯巖石喊講：「橫在𠊎等身上！將𠊎等囥起來，使𠊎等閃避坐在寶座上个面㧯羔羊个大發譴！</verse>
				<verse number="17">因為佢等發譴个大日仔到了；麼人企得住呢？」</verse>
			</chapter>
			<chapter number="7">
				<verse number="1">後來，𠊎看到四個天使企在地个四隻角頭，擋等地上四面个風，毋俾風吹在地上、海上，抑係樹仔个頂高。</verse>
				<verse number="2">𠊎又看到另外一個天使，捧等永生上帝个印仔，對東方上來。佢大聲對該領受上帝所賜个權柄、能破壞地㧯海个四個天使喊講：</verse>
				<verse number="3">「毋好傷害地、海，抑係樹仔，等𠊎等在上帝个眾僕人額頭頂揝印仔。」</verse>
				<verse number="4">𠊎聽講，在 以色列 个各支族中受揝印仔个，總數有十四萬四千人：</verse>
				<verse number="5">猶大 支族中接受揝印仔个，有一萬兩千人； 呂便 支族，一萬兩千人； 迦得 支族，一萬兩千人；</verse>
				<verse number="6">亞設 支族，一萬兩千人； 拿弗他利 支族，一萬兩千人； 瑪拿西 支族，一萬兩千人；</verse>
				<verse number="7">西緬 支族，一萬兩千人； 利未 支族，一萬兩千人； 以薩迦 支族，一萬兩千人；</verse>
				<verse number="8">西布倫 支族，一萬兩千人； 約瑟 支族，一萬兩千人； 便雅憫 支族，一萬兩千人。</verse>
				<verse number="9">後來，𠊎一看，又看到一大群个人，數目盡難計算。佢等係對世界各國家、各民族、各種人、㧯各種語言來个，全部企在寶座㧯羔羊个面前，著等白色个長袍，手拿等棕樹枝。</verse>
				<verse number="10">佢等大聲喊講： 救恩係對坐在寶座上𠊎等个上帝， 㧯羔羊來个！</verse>
				<verse number="11">所有个天使攏總企在寶座、長老，㧯四個生物个周圍。佢等在寶座个面前伏下來敬拜上帝，</verse>
				<verse number="12">講： 阿愐！ 願頌讚、榮光、智慧、 感謝、尊貴、權能、力量， 全部歸給𠊎等个上帝， 直到永永遠遠！ 阿愐。</verse>
				<verse number="13">有一個長老問𠊎，講：「這兜著白長袍个係麼人？佢等係對㖠位來个？」</verse>
				<verse number="14">𠊎應講：「先生，你正知。」 佢㧯𠊎講：「這兜人係經歷過大迫害个。佢等識用羔羊个血將自家个長袍洗到白白。</verse>
				<verse number="15">因為恁樣，佢等在上帝个寶座前，日夜在佢个聖殿中事奉佢。該坐在寶座上个上帝愛親自庇佑佢等。</verse>
				<verse number="16">佢等毋會再肚飢，也毋會再嘴燥；日頭抑係任何熱氣攏總㸐佢等毋到。</verse>
				<verse number="17">因為寶座中个羔羊愛牧養佢等，帶佢等到生命水个源頭；上帝也愛拭掉佢等一切个目汁。」</verse>
			</chapter>
			<chapter number="8">
				<verse number="1">羔羊掀開第七隻印仔个時，天頂恬恬無聲，差毋多半點鐘。</verse>
				<verse number="2">然後，𠊎看到企在上帝面前个七個天使；有七支號筒交給佢等。</verse>
				<verse number="3">另外有一個天使出來，拿等金香爐，企在祭壇前。有盡多香交給佢，俾佢同眾聖徒个祈禱共下獻在寶座前个金壇頂。</verse>
				<verse number="4">該兜香所發出个煙㧯眾聖徒个祈禱就對天使个手中升到上帝个面前。</verse>
				<verse number="5">接等，天使拿等香爐，將香爐裝滿壇頂个火，㧒到地上去。跈等，就響雷公，有𠾐𠾐滾个聲，𥍉爧，㧯地動。</verse>
				<verse number="6">然後，該七個拿等七支號筒个天使就準備愛歕號筒。</verse>
				<verse number="7">第一個天使一歕號筒，就有冰雹㧯火，摻等血，倒在地上。地个三分之一就燒掉，樹仔燒掉三分之一，所有个青草全部燒掉。</verse>
				<verse number="8">第二個天使一歕號筒，就有一座像𤏸等火个大山㧒落海肚。海个三分之一變做血，</verse>
				<verse number="9">海肚个生物死掉三分之一，船也壞掉三分之一。</verse>
				<verse number="10">第三個天使一歕號筒，就有一粒大星仔，像𤏸等个火把，對天頂跌下來，落在三分之一个河壩㧯一切个水源頂高。</verse>
				<verse number="11">(這粒星仔名安到「苦篤」。) 水个三分之一就變苦。因為水變苦，盡多人啉這個水就死掉。</verse>
				<verse number="12">第四個天使一歕號筒，日頭个三分之一，月光个三分之一，㧯星仔个三分之一全部受到攻擊。恁樣，日頭、月光、㧯星仔就失掉三分之一个光；日時頭个三分之一無光，暗晡時也係恁樣。</verse>
				<verse number="13">𠊎又看，又聽到一隻在空中飛盡高个鷹鳥大聲講：「慘了！慘了！住在地上个人慘了！因為另外三個天使就愛歕號筒了！」</verse>
			</chapter>
			<chapter number="9">
				<verse number="1">第五個天使一歕號筒，𠊎就看到有一粒星仔對天頂跌下來，落在地上。無底坑个鎖匙就交給佢。</verse>
				<verse number="2">佢打開無底坑，有煙對底背衝出來，像煙對大火爐衝出來一樣；日頭㧯天空全部因為無底坑衝出來个煙變做烏烏。</verse>
				<verse number="3">有草蜢對煙底背出來，落在地上；有能力賜給牠兜，像地上个蠍仔所有个能力一樣。</verse>
				<verse number="4">牠兜受吩咐毋好傷害地上个草、樹仔、抑係其他个植物，只有做得傷害該兜額頭無揝上帝个印仔个人。</verse>
				<verse number="5">草蜢無權害死這兜人，只有害佢等受苦五個月。這種痛苦就像人被蠍仔叮到一樣。</verse>
				<verse number="6">在這五個月中，人會求死不得，想死不能。</verse>
				<verse number="7">草蜢个樣式像準備愛上戰場个馬一樣。牠兜个頭那戴等像係金仔做个冕旒；牠兜个面像人个面。</verse>
				<verse number="8">牠兜个頭那生毛，像婦人家个頭那毛；牠兜个牙齒像獅仔个牙齒。</verse>
				<verse number="9">牠兜个胸脯所掛等个，像係鐵做个護心鏡；牠兜个翼胛發出个聲，像一大陣戰車上戰場發出个聲。</verse>
				<verse number="10">牠兜像蠍仔一樣，有尾也有竻；有能力害人受五個月个痛苦个就係這個尾。</verse>
				<verse number="11">有一個王管理牠兜，就係管無底坑个天使。佢个名 希伯來 話安到 亞巴頓 ， 希臘 話安到 亞玻倫 (意思係毀滅者)。</verse>
				<verse number="12">頭一種个災難已經過掉；看啊，跈等還有兩種个災難愛來。</verse>
				<verse number="13">第六個天使一歕號筒，𠊎就聽到有聲音對上帝面前該座金壇个四隻角頭發出來。</verse>
				<verse number="14">這聲音對歕號筒个第六個天使講：「將關在 幼發拉底 大河个四個天使放出來！」</verse>
				<verse number="15">該四個天使就得到透放。佢等係早就受安排好，愛在這年、這月、這日、這時，㓾掉人類个三分之一。</verse>
				<verse number="16">騎兵隊个數目有兩億；佢等个數目𠊎有聽到。</verse>
				<verse number="17">在異象中，𠊎看到該兜馬㧯騎兵。騎兵著等紅像火、藍像藍寶石、㧯硫磺色个護心鏡。馬个頭像獅仔頭，牠兜个嘴有火、煙、㧯硫磺噴出來。</verse>
				<verse number="18">人類个三分之一被馬嘴所噴出个火、煙、㧯硫磺這三樣災難害死。</verse>
				<verse number="19">馬个能力在牠兜个嘴㧯牠兜个尾。牠兜个尾像蛇，也有頭；牠兜就係用這兜頭來傷害人。</verse>
				<verse number="20">其他个人，無被這兜災難害死个，還係毋悔改，毋肯㧒掉佢等親手所造个偶像。佢等還係照常拜魔鬼㧯偶像；該兜偶像係用金、銀、銅、石頭、樹仔做个，毋會看、毋會聽、也毋會行。</verse>
				<verse number="21">佢等繼續犯兇殺、邪術、淫亂、偷拿這兜罪，完全無悔改。</verse>
			</chapter>
			<chapter number="10">
				<verse number="1">𠊎又看到一個盡有力个天使對天降下來。佢披等雲，頭那頂有虹圍等；佢个面像日頭，雙腳像𤏸火个柱仔。</verse>
				<verse number="2">佢个手拿等一卷打開个細書；右腳踏在海面，左腳踏在地上。</verse>
				<verse number="3">佢大聲喊，像獅仔个吼聲；佢一喊，就有七隻雷公應聲。</verse>
				<verse number="4">𠊎堵堵想愛將七隻雷公所講个話寫下來，有聲對天頂出來，講：「七隻雷公所講个話，你愛嚴守祕密，毋好寫下來！」</verse>
				<verse number="5">這個事以後，𠊎所看到，該企在海面㧯地上个天使向天擎起佢个右手，</verse>
				<verse number="6">指等該創造天、地、海，㧯其中萬物个永生上帝發誓講：「毋會再延纏了！</verse>
				<verse number="7">第七個天使歕號筒个時，上帝个奧秘就愛實現，像佢對自家个僕人 — 就係眾先知所宣告个。」</verse>
				<verse number="8">後來，𠊎聽到該先前對天頂出來个聲又對𠊎講：「你去，將企在海面㧯地上个天使手中該卷打開个書拿來。」</verse>
				<verse number="9">𠊎行過去，請該天使將該卷細書交給𠊎。佢對𠊎講：「拿去，食落去！你个肚笥會感覺苦苦，總係嘴會像蜂糖恁甜。」</verse>
				<verse number="10">𠊎對天使手中將該卷細書接過來，食落去，嘴肚正經像蜂糖恁甜，總係𠊎吞落去以後，肚笥就感覺苦苦。</verse>
				<verse number="11">天使又對𠊎講：「上帝對逐個民族、逐個國家、各種語言个人、㧯該兜君王所講个預言，你一定愛再宣佈一擺。」</verse>
			</chapter>
			<chapter number="11">
				<verse number="1">有一支像棍仔个尺交給𠊎，有聲對𠊎講：「䟘起來，去量上帝个聖殿㧯祭壇，同時算看在聖殿肚敬拜个人。</verse>
				<verse number="2">總係，毋使量聖殿个外院，因為這外院已經留給外邦人；佢等會踐踏聖城四十二個月。</verse>
				<verse number="3">𠊎愛差派兩個著麻衫个見證人；佢等愛傳講上帝个話一千兩百六十日。」</verse>
				<verse number="4">該兩個見證人就係企在世界个主面前，該兩頭橄欖樹㧯兩支燈臺。</verse>
				<verse number="5">若有人想愛傷害佢等，佢等會對嘴肚噴出火焰來燒死敵人。所以，麼人想愛傷害佢等，就會恁樣被佢等㓾死。</verse>
				<verse number="6">佢等有權將天關起來，在佢等宣佈上帝个話該兜日仔，喊天莫落雨。佢等也有權掌管所有个水源，喊水變做血，也有權隨時隨意用各種災難攻擊大地。</verse>
				<verse number="7">佢等做完見證以後，該對無底坑出來个惡獸愛同佢等相㓾，打贏佢等，將佢等㓾死。</verse>
				<verse number="8">佢等个身屍會橫在大城个街項，就係佢等个主被人釘十字架个所在。這城象徵个名可比 所多瑪 抑係 埃及 。</verse>
				<verse number="9">對各種人、各民族、各語言、㧯逐個國家，會有人來看佢等个身屍三日半，不准人安葬佢等。</verse>
				<verse number="10">地上个人會因為佢等个死歡喜快樂。大家慶祝，交換禮物，因為這兩個先知識使地上个人受大苦難。</verse>
				<verse number="11">三日半過掉，有生命个靈氣對上帝該位降臨，進入佢等个底背，佢等就企起來；看到佢等个人就非常著驚。</verse>
				<verse number="12">這兩個先知聽到對天頂有大聲音對佢等講：「上這位來！」佢等就在敵人个注目之下坐雲升天。</verse>
				<verse number="13">就在該時，大地動發生，該座城橫掉十分之一。因為地動，死掉个人有七千儕；賸个人非常著驚，就歸榮光給天頂个上帝。</verse>
				<verse number="14">第二種个災難已經過掉；看啊，第三種災難會到了。</verse>
				<verse number="15">第七個天使一歕號筒，天頂就有大聲音講： 「統治宇宙个權能已經歸𠊎等个主㧯佢所立个基督了； 佢愛掌權，直到永永遠遠！」</verse>
				<verse number="16">在上帝面前、坐在自家个座位頂高个二十四個長老就伏在地上，敬拜上帝，</verse>
				<verse number="17">講： 古早存在、這下存在个主 — 全能个上帝啊， 𠊎等感謝你； 因為你已經掌管大權， 已經實行統治了！</verse>
				<verse number="18">列國發譴， 總係，你个大發譴也臨到了。 時機已經成熟， 死人愛受審判； 你个僕人，就係眾先知、 眾聖徒、㧯所有敬畏你个人， 無論尊貴抑係卑微， 全部愛得到獎賞。 該兜敗壞大地个人愛堵到毀滅！</verse>
				<verse number="19">這時，上帝在天頂个聖殿打開來；佢个約櫃在聖殿肚顯明出來。接等，就𥍉爧、響雷公、有𠾐𠾐滾个聲、地動、㧯大冰雹。</verse>
			</chapter>
			<chapter number="12">
				<verse number="1">這時，天頂出現一個盡大又盡神秘个奇事。有一個婦人家身著日頭，腳踏月光，頭那戴等一頂有十二粒星仔个冕旒。</verse>
				<verse number="2">姖會𫱔了，𫱔子个陣痛害姖大聲盡喊。</verse>
				<verse number="3">天頂又出現另外一個神秘个奇事。有一條紅色个大惡龍，有七隻頭那，十支角；逐隻頭那攏總戴等冕旒。</verse>
				<verse number="4">牠用尾將天頂三分之一个星仔捲起來，抨在地上。牠企在該差毋多會𫱔个婦人家面前，等孲𤘅仔一出世，就愛將佢吞落去。</verse>
				<verse number="5">該婦人家𫱔一個孻仔；這孲𤘅仔將來愛用鐵杖統治萬國。姖个孻仔受接到上帝个寶座該位去。</verse>
				<verse number="6">該婦人家逃走去曠野，到上帝為姖準備个所在。在該位，姖愛得到照顧一千兩百六十日。</verse>
				<verse number="7">後來，天頂發生戰爭。 米迦勒 㧯佢該兜天使去同惡龍相㓾，惡龍也帶牠該兜使者去交戰。</verse>
				<verse number="8">總係，惡龍戰敗了；牠㧯牠該兜使者無法度再留在天頂。</verse>
				<verse number="9">所以，該條大惡龍被天使抨下來；牠就係該老蛇，名安到魔鬼抑係撒但，係迷惑全人類个。牠被天使抨在地上；牠該兜使者也跈等抨下來。</verse>
				<verse number="10">𠊎又聽到天頂有大聲音講： 這下就係𠊎等上帝拯救个時節！ 上帝已經彰顯佢个權能㧯統治！ 佢所立个基督也顯出佢个權柄！ 該日夜在𠊎等个上帝面前 告𠊎等兄弟姊妹个， 已經對天頂抨下來了。</verse>
				<verse number="11">𠊎等个兄弟姊妹已經通過羔羊个血 㧯佢等所宣佈个真道贏過惡龍了； 就係犧牲自家个生命， 佢等也甘願。</verse>
				<verse number="12">所以，諸天㧯住在其中个， 你等應當歡喜快樂！ 總係，地㧯海慘了； 因為魔鬼知佢个時間毋多， 滿肚笥火氣下到你等該位去了。</verse>
				<verse number="13">該條惡龍發現自家抨落地上，就去迫害該𫱔孻仔个婦人家。</verse>
				<verse number="14">有大鷹鳥个兩支翼胛賜給該婦人家，俾姖飛入曠野，去到自家个地方。在該位，姖愛得到照顧三年半，無受該尾蛇个攻擊。</verse>
				<verse number="15">該尾蛇在婦人家後背，用嘴噴出水來，像河壩水恁大，愛將姖打走。</verse>
				<verse number="16">總係，地幫助該婦人家，打開嘴將該條惡龍噴出來个水吞落去。</verse>
				<verse number="17">惡龍對該婦人家盡譴，就去同婦人家其他个子孫相㓾，就係同所有服從上帝命令、為耶穌所啟示个真理做見證个人相㓾。</verse>
				<verse number="18">該條惡龍企 在海滣个沙灘頂。</verse>
			</chapter>
			<chapter number="13">
				<verse number="1">接等，𠊎看到一隻惡獸對海肚上來。牠有十支角㧯七隻頭那；逐支角戴等冕旒，逐隻頭那寫等侮辱上帝个名號。</verse>
				<verse number="2">𠊎看到該惡獸像一條豹仔；牠个腳像熊个腳，嘴像獅仔个嘴。惡龍將自家个能力、座位，㧯大權柄全部交給該隻惡獸。</verse>
				<verse number="3">惡獸个一隻頭那像係有受到致命个重傷，總係傷已經好了。全世界攏總盡希奇，跈在該隻惡獸个後背。</verse>
				<verse number="4">大家拜該條惡龍，因為惡龍將牠个權柄交給該隻惡獸。佢等也拜該隻惡獸，講：「麼人同這惡獸比抑得呢？麼人有能力同牠交戰啊？」</verse>
				<verse number="5">該隻惡獸得到一張誇口㧯褻瀆个嘴，又得到權柄，做得隨意行事四十二個月。</verse>
				<verse number="6">該隻惡獸就開嘴侮辱上帝，褻瀆佢个名㧯佢住个所在，並所有住在天頂个。</verse>
				<verse number="7">牠又得到權柄㧯聖徒作戰，贏過佢等；也得到權柄轄制各民族、各種人、逐個國家、㧯各種語言个人。</verse>
				<verse number="8">所有住在地面上个人、佢等个名在創造世界以前無記在該被人㓾死个羔羊个生命冊底背个，攏總愛拜牠。</verse>
				<verse number="9">有耳公好聽个，就愛聽！</verse>
				<verse number="10">該當捉去个， 一定會被人捉去； 該當死在刀下个 ， 一定會死在刀下。 所以，聖徒愛有耐心㧯信心。</verse>
				<verse number="11">𠊎又看到有另外一隻惡獸對地底下出來。牠有兩支角，像羊个角，總係講話像惡龍。</verse>
				<verse number="12">牠在頭一隻惡獸个面前，行頭一隻惡獸一切个權柄。牠強迫大地㧯所有住在地面上个，去拜該隻有受到致命个重傷又好起來个頭一隻惡獸。</verse>
				<verse number="13">第二隻惡獸也行大奇事，甚至在人面前喊火對天頂降在地上。</verse>
				<verse number="14">牠得到權柄，在頭一隻惡獸个面前行奇事，因為恁樣，就迷惑所有住在地面上个人。牠吩咐世間个人為到該隻有受到刀傷還生生个惡獸作像。</verse>
				<verse number="15">第二隻惡獸又得到權柄，將生氣歕入頭一隻惡獸个像，使該座像會講話，也能殺害所有毋拜該座獸像个人。</verse>
				<verse number="16">這隻惡獸又強迫所有个人，無論大細、貧賤富貴、奴隸抑係自由人，在佢等个右手抑係額頭揝印仔做記號。</verse>
				<verse number="17">這記號就係該隻惡獸个名抑係代表名个數目；無這種記號个，就做毋得做買賣。</verse>
				<verse number="18">對這個事愛有智慧。願聰明人算出該隻惡獸个數目，因為這數目代表一個人。這個數目係六百六十六。</verse>
			</chapter>
			<chapter number="14">
				<verse number="1">𠊎再看，看到羔羊企在 錫安 山，同佢共下个有十四萬四千人；佢等个額頭寫等羔羊㧯厥爸个名。</verse>
				<verse number="2">𠊎聽到有聲音對天頂來，像大水个吼聲，也像雷公个大聲。𠊎所聽到个聲又像琴師彈弦琴个聲。</verse>
				<verse number="3">佢等企在寶座㧯四個生物並眾長老个面前，唱一首新歌；這首詩歌只有對地上救贖出來个十四萬四千人會唱。</verse>
				<verse number="4">這兜人全部係毋識親近婦女个童男。羔羊行到㖠位，佢等就跈到㖠位。佢等係對人類中救贖出來，最先獻給上帝㧯羔羊个。</verse>
				<verse number="5">佢等從來毋識講花撩，係無缺點个。</verse>
				<verse number="6">𠊎又看到另外一個天使在空中飛；佢有永遠个福音愛向世間逐個國家、各民族、逐種語言、㧯各種个人宣佈。</verse>
				<verse number="7">佢大聲講：「愛敬畏上帝，將榮光歸給佢！因為佢審判人類个時節到了。愛敬拜該創造天、地、海，㧯一切泉源个主！」</verse>
				<verse number="8">第二個天使跈等講：「橫掉了！大 巴比倫 橫掉了！因為姖識拿淫亂个烈酒給萬民啉。」</verse>
				<verse number="9">第三個天使跈等佢等大聲講：「麼人拜該隻惡獸㧯牠个像，額頭抑係手骨頂高有揝牠个印仔个，</verse>
				<verse number="10">就愛啉上帝个烈酒；這個酒係無透淡、斟在佢發譴个杯仔底背个！佢等愛在眾聖天使㧯羔羊面前受烈火㧯硫磺燒个痛苦。</verse>
				<verse number="11">刑罰佢等个火煙緊衝等上，永遠毋會停。拜該隻惡獸㧯牠个像个該兜人，受到牠个名號揝印仔个，日夜不得安息。」</verse>
				<verse number="12">因為恁樣，該兜服從上帝命令、對耶穌忠心个聖徒愛有耐心。</verse>
				<verse number="13">𠊎又聽到對天頂有聲音講：「你愛寫下來：從今以後，在主底背來死个人有福氣 ！」 聖靈應講：「著！佢等會結束勞苦，享受安息，因為佢等工作个成果會跈等佢等。」</verse>
				<verse number="14">𠊎一看，看到一團白雲，雲頂坐等一個像係人子个，頭那戴等金冕旒，手拿盡利个禾鐮。</verse>
				<verse number="15">另外有一個天使對聖殿出來，對坐在雲頂个大聲講：「時間到了，地面上个五榖熟了！請伸出你个禾鐮去收割！」</verse>
				<verse number="16">該坐在雲頂个就用佢个禾鐮向地面𠚼下去，地面上个五榖就收割了。</verse>
				<verse number="17">𠊎又看到另外一個天使對天頂个聖殿出來；佢也有一支盡利个禾鐮。</verse>
				<verse number="18">接等，又有一個管理火个天使對祭壇該位出來，對手拿盡利禾鐮个天使大聲喊講：「伸出你个禾鐮去收地面上个葡萄，因為葡萄已經熟了！」</verse>
				<verse number="19">該天使就用佢个禾鐮向地面𠚼下去，收割地面上个葡萄，將它兜㧒在上帝發譴个大醡酒池底背。</verse>
				<verse number="20">用腳蹬城外這隻醡酒池底背个葡萄，有血對醡酒池流出來，淹到三百公里遠，約有兩公尺深。</verse>
			</chapter>
			<chapter number="15">
				<verse number="1">𠊎又看到在天頂有另外一個神秘个奇事，又大又奇。有七個天使掌管最後七種災難，因為上帝个大怒氣愛在這兜災難中發盡。</verse>
				<verse number="2">𠊎又看到一個像玻璃个海，摻等火。𠊎也看到一兜人；佢等已經贏過該隻惡獸、牠个像，㧯該代表牠个名个數目。佢等企在玻璃海个滣頭，拿等上帝給佢等个弦琴，</verse>
				<verse number="3">唱等上帝个僕人 摩西 个詩歌㧯羔羊个詩歌，講： 主 — 全能个上帝啊， 你个所做偉大又奇妙！ 萬國 个王啊， 你个道路公義又真實！</verse>
				<verse number="4">主啊，麼人敢毋敬畏你呢？ 麼人敢毋榮光你个名呢？ 因為唯有你係神聖个！ 萬國全部愛來， 在你面前敬拜， 因為你公義个所做已經彰顯出來了。</verse>
				<verse number="5">這兜事情以後，𠊎看到天頂个聖殿打開來，底背有上帝臨在个聖帳篷。</verse>
				<verse number="6">該掌管七種災難个七個天使對聖殿出來，著等麻紗个衫，白淨皓光，胸前繫等金帶。</verse>
				<verse number="7">四個生物其中个一個將七隻金碗交給該七個天使；金碗底背裝滿永生上帝个怒氣。</verse>
				<verse number="8">因為上帝个榮耀㧯權能，聖殿底背滿滿係煙；該七個天使降七種災難完成以前，無人能入去聖殿。</verse>
			</chapter>
			<chapter number="16">
				<verse number="1">𠊎聽到對聖殿肚有大聲音向該七個天使講：「你等去，將該七碗上帝个怒氣倒在地上！」</verse>
				<verse number="2">第一個天使就去，將佢个碗倒在地上；該兜有惡獸个記號㧯拜過牠个像个人，身上就發盡臭又盡毒个瘡仔。</verse>
				<verse number="3">第二個天使將佢个碗倒在海中；海水就變做像死人个血一樣，海肚个生物就死淨淨。</verse>
				<verse number="4">第三個天使將佢个碗倒在該兜河壩㧯水源頭，水就變做血。</verse>
				<verse number="5">𠊎聽到該管理水个天使講： 「古早存在、這下存在个至聖者啊， 你係公義个審判者。</verse>
				<verse number="6">佢等識流聖徒㧯先知个血， 這下你用血給佢等啉； 這係佢等應該得到个！」</verse>
				<verse number="7">𠊎又聽到有聲音對祭壇發出講： 「主 — 全能个上帝啊， 你个審判係真實又公義个！」</verse>
				<verse number="8">第四個天使將佢个碗倒在日頭頂高，使日頭可以用烈火來㸐人。</verse>
				<verse number="9">人被盡燒个熱氣㸐到，就褻瀆該有權支配這兜災難个上帝。佢等還係毋悔改，毋將榮光歸給上帝。</verse>
				<verse number="10">第五個天使將佢个碗倒在該隻惡獸个座位頂。惡獸个國就變做烏暗，人因為盡痛苦，就咬自家个舌乸。</verse>
				<verse number="11">佢等因為所受个痛苦㧯身上所發个瘡仔就褻瀆天頂个上帝，還係毋悔改來離開佢等邪惡个行為。</verse>
				<verse number="12">第六個天使將佢个碗倒在 幼發拉底 大河个頂高，河壩水就燥掉，來為該兜對東方來个王預備一條道路。</verse>
				<verse number="13">接等𠊎看到有三個像蝦蟆个邪靈，對惡龍个嘴、惡獸个嘴，㧯假先知个嘴出來；</verse>
				<verse number="14">佢等係該兜會行奇事个鬼个靈。佢等出去召集全世界所有个王，準備佢等在全能上帝偉大个日仔來相㓾。</verse>
				<verse number="15">主講：「愛細膩噢！𠊎會像賊仔一樣忽然臨到！隨時警醒、一直著等衫褲个人有福氣了！因為佢毋會赤身露體行路，被人看到見笑。」</verse>
				<verse number="16">該三個邪靈就將列王聚集在一個所在， 希伯來 話安到 哈米吉多頓 。</verse>
				<verse number="17">第七個天使將佢个碗倒在空中。有大聲音對聖殿肚个寶座該位發出，講：「完成了！」</verse>
				<verse number="18">跈等就𥍉爧、有𠾐𠾐滾个聲、響雷公个聲、㧯大地動；自從地球有人類以來，吂識有恁厲害个地動！</verse>
				<verse number="19">巴比倫 大城裂做三析，列國个城市也橫淨淨；因為上帝記得 巴比倫 大城个罪惡，罰它啉該杯上帝大發譴个烈酒。</verse>
				<verse number="20">所有个海島全部毋見掉；所有个山也無掉去。</verse>
				<verse number="21">大冰雹對天頂落在人个身上，一垤約有五十公斤恁重；因為這冰雹个災難極悲慘，人就褻瀆上帝。</verse>
			</chapter>
			<chapter number="17">
				<verse number="1">拿等七隻碗个七個天使當中，有一個進前來對𠊎講：「你來，𠊎愛俾你看大淫婦所愛受个刑罰；姖就係該起在幾條河壩滣个大城。</verse>
				<verse number="2">地上該兜王全部識同這大淫婦行姦淫；世間个人也因為啉姖淫亂个酒，食到醉醉。」</verse>
				<verse number="3">𠊎被聖靈感動；天使就帶𠊎去到曠野。𠊎看到一個婦人家騎一隻大紅色个惡獸；該隻惡獸滿身寫等褻瀆个名號，有七隻頭那㧯十支角。</verse>
				<verse number="4">該婦人家著等紫色㧯大紅色个衫，歸身掛等金仔、寶石，㧯珍珠。姖个手㨮等金杯，杯肚裝滿可惡之物，就係姖淫亂个屙糟東西。</verse>
				<verse number="5">姖个額頭寫等一個奧秘个名號： 「大 巴比倫 ， 世間个淫婦㧯一切可惡个東西个阿姆！」</verse>
				<verse number="6">𠊎又看到該婦人家啉眾聖徒个血，還有該兜為到耶穌做見證來殉道个人个血，食到醉醉。 看到姖个時，𠊎感覺非常希奇。</verse>
				<verse number="7">天使問𠊎講：「你做麼介感覺希奇？𠊎愛㧯你講這婦人家並姖所騎有七隻頭那㧯十支角个惡獸个奧秘。</verse>
				<verse number="8">頭下你所看到該隻惡獸，牠早有，這下無；無幾久後，牠會對無底坑上來，向滅亡行等去。地上个人，佢等个名在創造世界以前無記在生命冊个，一看到該隻早有、這下無、將來又愛出現个惡獸，全部會盡希奇。</verse>
				<verse number="9">「這個事愛用智慧來了解。七隻頭那，就係該婦人家所坐个七座山，也係代表七個王。</verse>
				<verse number="10">其中五個已經橫掉，一個還在；另外一個還吂來，來个時節也只會停留一下仔定定。</verse>
				<verse number="11">該早有、這下無該隻惡獸，就係第八個王；佢也係七個王其中个一個，係向滅亡行等去。</verse>
				<verse number="12">「你所看到个十支角係代表十個還吂開始統治个王；總係佢等會承受王權，同該隻惡獸共樣統治一點鐘久。</verse>
				<verse number="13">這十個王同心合意，愛將佢等个能力㧯權柄交給該隻惡獸。</verse>
				<verse number="14">佢等會同羔羊相㓾；總係羔羊一定會打贏佢等，因為佢係萬主个主、萬王个王。佢所選召、忠心跈佢个人，也一定會得勝。」</verse>
				<verse number="15">天使又對𠊎講：「你所看到个大淫婦，姖坐等个幾條河壩就係代表各民族、各種族、逐個國家、㧯各種語言个人。</verse>
				<verse number="16">你所看到个十支角㧯該隻惡獸會怨恨該淫婦，將姖所有个一切搶走，使姖歸身光光；牠兜會食姖个肉，放火燒姖。</verse>
				<verse number="17">因為上帝將執行佢旨意个意念放在該十個王个心內，使佢等同心，將佢等个統治權交給該隻惡獸，直到上帝个話實現。</verse>
				<verse number="18">「你所看到个婦人家，就係管轄地上眾王个大城。」</verse>
			</chapter>
			<chapter number="18">
				<verse number="1">這兜事情以後，𠊎看到另外一個天使對天頂下來。佢有盡大个權柄；佢个榮耀普照大地。</verse>
				<verse number="2">佢大聲喊講： 橫掉了！ 大 巴比倫 橫掉了， 成做鬼住个所在， 並各樣邪靈㧯各種屙糟又可惡个鳥仔个藪。</verse>
				<verse number="3">因為列國全部啉過這大淫婦淫亂个烈酒， 地上該兜王識同姖行姦淫， 世間个生理人識通過姖个奢華宴樂賺大錢。</verse>
				<verse number="4">跈等，𠊎又聽到另外一個聲音對天頂下來，講： 𠊎个子民啊，出來！ 對該座城出來！ 你等正毋會遰到姖个罪， 也毋使同姖共下受災難。</verse>
				<verse number="5">因為姖个罪惡堵天， 上帝記得姖个不義。</verse>
				<verse number="6">照姖對你等所做个對付姖； 照姖个行為加倍來報應姖。 姖樣般調酒交給你等， 就用加倍嚴个酒斟滿姖个杯！</verse>
				<verse number="7">姖樣般榮光自家，又奢華宴樂， 就樣般苦毒姖，俾姖受盡痛苦。 因為姖一直對自家講： 『𠊎係坐在寶座上个女王， 𠊎毋係寡婦，絕對毋會有悲傷。』</verse>
				<verse number="8">就係因為恁樣， 悲傷、飢荒、㧯死个災禍， 會在一日之中臨到姖！ 姖會被火燒滅， 因為審判姖个主上帝大有能力！</verse>
				<verse number="9">地面上該兜同姖奢華宴樂行姦淫个王一看到該燒姖个火煙就為姖捶心肝大噭。</verse>
				<verse number="10">佢等因為盡驚姖所受个痛苦，就遠遠企等，講： 慘了！這座大城慘了！ 勇壯个 巴比倫 城啊， 還無一點鐘久， 你就堵到責罰了！</verse>
				<verse number="11">世間个生理人也為姖傷心大噭，因為無人再來買佢等个貨了。</verse>
				<verse number="12">無人買佢等个金、銀、寶石、珍珠；也無人買佢等个麻紗、綢布、高貴个紫色㧯大紅色个布料、各種香木、各樣象牙个製品、貴重个木器、銅器、鐵器、㧯大理石个製品；</verse>
				<verse number="13">也無人買肉桂、香料、香、香水、乳香、酒、油、麵粉、麥仔、牛、羊、馬、馬車、奴隸、㧯人口等。</verse>
				<verse number="14">這兜生理人對姖講： 你所貪愛个各種果子已經離開你了； 一切个榮華富貴也無掉去， 無可能尋倒轉來了！</verse>
				<verse number="15">賣這兜貨、在該座城肚發大財个生理人，因為盡驚姖所受个痛苦，就遠遠企等。佢等傷心大噭，</verse>
				<verse number="16">講： 慘了！這座大城慘了！ 姖一直著等麻紗、 紫色㧯大紅色个衫， 歸身掛等金仔、寶石、㧯珍珠。</verse>
				<verse number="17">還無一點鐘久， 這一切个財產就失掉了！ 所有个船長、旅客、船員，㧯所有靠海謀生个人全部遠遠企等。</verse>
				<verse number="18">佢等看到該燒姖个火煙，就喊講：「㖠座城能同這座大城比呢！」</verse>
				<verse number="19">佢等拿泥粉委在自家个頭那頂，傷心大噭，講： 「慘了！這座大城慘了！ 海面所有个船，它兜个船主全部係靠姖發財个！ 還無一點鐘久， 姖就荒廢掉了！」</verse>
				<verse number="20">天啊，愛歡喜起來！ 因為姖毀滅了！ 眾聖徒、各位使徒、㧯眾先知啊， 愛歡喜起來！ 因為上帝已經代你等伸冤，責罰姖了！</verse>
				<verse number="21">接等，有一個盡有力个天使擎起一隻像大磨石恁大个石頭，㧒落海肚去，講： 巴比倫 大城也愛像恁樣重重抨掉， 永遠毋會再有人看到姖了！</verse>
				<verse number="22">在你城肚，毋會再有人聽到有琴師㧯樂師个音樂， 抑係歕笛仔㧯號筒个聲。 各種手藝个師傅再尋毋到； 磨粄个聲再聽毋到了！</verse>
				<verse number="23">油燈个火毋會再被人點𤏸起來； 也毋會再有人聽到新郎㧯新娘个聲了。 你个生理人一直係世間最有勢力个人； 萬國也攏總被你个邪術迷惑去。</verse>
				<verse number="24">在這城肚有發現眾先知㧯聖徒， 並所有在世間被人㓾死个人个血。</verse>
			</chapter>
			<chapter number="19">
				<verse number="1">這兜事情以後，𠊎聽到有大聲音，像係天頂有一大群人，喊講： 哈利路亞，讚美上主！ 救恩、榮耀、權能全部屬𠊎等个上帝！</verse>
				<verse number="2">佢个審判係真實又公義个！ 因為佢審判該用淫亂敗壞世界个大淫婦， 刑罰姖殺害上帝僕人个罪。</verse>
				<verse number="3">佢等第二擺又喊講： 哈利路亞，讚美上主！ 燒該座大城个火煙一直衝等上， 永遠無停！</verse>
				<verse number="4">二十四個長老㧯四個生物就伏下去敬拜該坐在寶座上个上帝，講： 阿愐！哈利路亞！</verse>
				<verse number="5">接等，有聲音對寶座發出，講： 所有上帝个僕人， 凡係敬畏佢个， 無論尊貴抑係卑微个， 攏總愛讚美𠊎等个上帝！</verse>
				<verse number="6">𠊎又聽到像有一大群人个聲，像係大水㧯響雷公个大聲，講： 哈利路亞，讚美上主！ 因為𠊎等个主 — 全能个上帝做王了！</verse>
				<verse number="7">𠊎等愛歡喜快樂， 將榮光歸給佢！ 因為羔羊結婚个時間到了； 佢个新娘準備好勢了。</verse>
				<verse number="8">上帝已經賜新娘 皓光白淨个麻紗个衫。 (麻紗个衫就係代表眾聖徒所行个義。)</verse>
				<verse number="9">然後，天使對𠊎講：「你愛寫下來：受邀請參加羔羊婚姻筵席个人有福氣了！」佢又對𠊎講：「這兜係上帝真實个話。」</verse>
				<verse number="10">𠊎伏在佢腳前，愛拜佢，總係佢對𠊎講：「千萬做毋得！𠊎㧯你，並你个眾兄弟姊妹，就係所有持守耶穌所啟示个真理个，全部共樣係僕人。你應當敬拜上帝！」因為，耶穌所啟示个真理就係預言个精義 。</verse>
				<verse number="11">後來，𠊎看到天開了。有一匹白馬，該騎馬个稱做「誠信」㧯「真實」；佢憑公義來審判㧯交戰。</verse>
				<verse number="12">佢个目珠像火焰，頭那戴等盡多冕旒。佢身上寫等一個名，除了佢自家，無人知係麼介意思。</verse>
				<verse number="13">佢所著个長袍歸領染到血。佢个名稱做「上帝个道」。</verse>
				<verse number="14">天頂个軍隊跈等佢；佢等騎等白馬，著等白淨个麻紗个衫。</verse>
				<verse number="15">有一支當利个劍對佢个嘴歕出來；佢愛用這支劍來打贏列國。佢愛用鐵杖治理佢等；佢也愛在全能个上帝大怒氣个醡酒池底背榨出酒來。</verse>
				<verse number="16">佢个長袍㧯腳髀頂高寫等一個名號，就係： 「萬王个王， 萬主个主。」</verse>
				<verse number="17">𠊎又看到有一個天使企在日頭中央。佢大聲對空中所有个飛鳥喊講：「來啊，相共來參加上帝个大筵席！</verse>
				<verse number="18">來食君王、將軍、㧯士兵个肉；來食馬㧯騎士个肉；來食奴隸、自由人、尊貴个、卑微个、各種人个肉！」</verse>
				<verse number="19">𠊎又看到該隻惡獸㧯地上个列王，並佢等个軍隊聚集共下，來同該白馬騎士㧯佢个軍隊相㓾。</verse>
				<verse number="20">該隻惡獸被天軍捉去；識在佢面前行奇事个假先知也共下被天軍捉去。 (這個假先知識通過奇事迷惑該兜有該隻惡獸个印記㧯拜獸像个人。) 該隻惡獸㧯假先知被該白馬騎士生生㧒落該燒等硫磺个火湖底背。</verse>
				<verse number="21">佢等个軍隊全部被該白馬騎士口中歕出个劍㓾死；所有个鳥仔全部飛來食佢等个肉，食到飽𩜰𩜰。</verse>
			</chapter>
			<chapter number="20">
				<verse number="1">然後，𠊎看到有一個天使對天頂下來，手拿等無底坑个鎖匙㧯一條大鍊仔。</verse>
				<verse number="2">佢將該條惡龍，就係該尾老蛇，名安到魔鬼抑係撒但个，捉起來，將牠捆綁一千年。</verse>
				<verse number="3">天使將牠㧒落無底坑，關起來，揝等封印，毋俾牠再去迷惑列國，直到這一千年滿。期限過掉，牠一定會暫時得到透放。</verse>
				<verse number="4">𠊎又看到一兜寶座；該兜坐在頂高个人全部得到審判个權柄。𠊎也看到該兜因為宣揚耶穌所啟示个真理、又為到上帝个真道被人斬頭个人个靈魂。佢等毋識拜該隻惡獸抑係牠个像，額頭抑係手骨也無該隻惡獸个名號。佢等全部復活了，同基督共下做王一千年。</verse>
				<verse number="5">(其他个死人愛等這一千年滿正復活。) 這係頭一擺个復活。</verse>
				<verse number="6">有份在頭一擺復活个係聖潔有福氣个人。第二擺个死無權轄制佢等；反轉佢等愛做上帝㧯基督个祭司，愛同基督共下做王一千年。</verse>
				<verse number="7">這一千年以後，撒但會對監牢得到透放，</verse>
				<verse number="8">會去迷惑地上四方个列國，就係 歌革 㧯 瑪各 。撒但會將佢等聚集起來，出去相㓾；佢等个數目像海滣个沙仔恁多。</verse>
				<verse number="9">佢等遍滿全地，圍困聖徒个營房 — 上帝所惜个城。總係有火對天頂降下來，燒滅佢等。</verse>
				<verse number="10">該迷惑佢等个魔鬼被天使㧒落硫磺火湖底背；該隻惡獸㧯假先知早就在該位。在該位，佢等會日夜受苦，直到永永遠遠。</verse>
				<verse number="11">接等，𠊎看到一張白色个大寶座㧯該坐在寶座上个。天㧯地攏總對佢个面前逃走，無蹤無跡。</verse>
				<verse number="12">𠊎又看到該兜死掉个人，無論尊貴抑係卑微个，全部企在寶座前。該兜書卷已經打開來了；另外有一本生命冊也打開來。死掉个人全部係照佢等个行為，根據這兜書卷所記載个，接受審判。</verse>
				<verse number="13">然後，海就將其中个死人交出來；死㧯陰間也將其中所關个死人交出來。這兜人全部照佢等个行為接受審判。</verse>
				<verse number="14">死㧯陰間也被該坐在寶座上个 㧒落火湖底背。 (這火湖就係第二擺个死。)</verse>
				<verse number="15">麼人个名無記在生命冊，佢就被該坐在寶座上个㧒落火湖底背。</verse>
			</chapter>
			<chapter number="21">
				<verse number="1">接等，𠊎看到一個新天新地；因為先前个天㧯地已經過去，海也無掉了。</verse>
				<verse number="2">𠊎又看到聖城，就係新个 耶路撒冷 ，對天頂上帝該位降下來，像新娘打扮好勢來迎接姖个老公。</verse>
				<verse number="3">𠊎聽到有大聲對寶座出來，講： 上帝个家在人間囉！ 佢愛同人類共下住， 佢等愛做佢个子民。 上帝愛親自㧯佢等同在， 佢愛做佢等个上帝。</verse>
				<verse number="4">佢愛拭掉佢等所有个目汁； 毋會再有死，也毋會再有傷心、大噭、㧯痛苦， 因為先前个事全部過掉了。</verse>
				<verse number="5">這時，坐在寶座上个講：「看啊，𠊎換新萬物！」佢又講：「寫下來，因為這兜話係真實可靠个。」</verse>
				<verse number="6">佢又對𠊎講：「完成了！𠊎係阿爾法㧯亞米茄，係開始㧯結束。𠊎愛將生命个泉水白白賜給嘴燥个人啉。</verse>
				<verse number="7">得勝个人就做得承接這兜福氣：𠊎愛做佢个上帝，佢愛做𠊎个孻仔。</verse>
				<verse number="8">總係該兜驚死、毋信、腐敗、㓾人、淫亂、行邪術、拜偶像、㧯講花撩个人，有該燒等硫磺个火湖等等佢等；這就係第二擺个死。」</verse>
				<verse number="9">該拿等七隻碗、裝滿背尾七種災難个七個天使，當中有一個來對𠊎講：「你來，𠊎愛帶你去看新娘，就係羔羊个𡜵娘。」</verse>
				<verse number="10">聖靈感動𠊎；天使就帶𠊎到高山頂去，俾𠊎看到對天頂上帝該位降下來个聖城 耶路撒冷 。</verse>
				<verse number="11">該座城充滿上帝个榮光，像碧玉㧯寶石恁樣皓光，像水晶恁明亮。</verse>
				<verse number="12">城牆盡高大，有十二扇門，有十二個天使掌等；門个頂高寫等 以色列 十二支族个名。</verse>
				<verse number="13">東片有三扇門，北片有三扇門，南片有三扇門，西片有三扇門。</verse>
				<verse number="14">城牆有十二座地基，地基寫等羔羊十二使徒个名。</verse>
				<verse number="15">該對𠊎講話个天使拿一節金仔做个尺去量該座城、城門，㧯城牆。</verse>
				<verse number="16">城係四方个，長㧯闊共樣；天使用尺量該座城：長、闊、高全部共樣，有一萬兩千里。</verse>
				<verse number="17">天使又量城牆，照人个尺寸來講，有一百四十四尺賁 。</verse>
				<verse number="18">城牆係用碧玉起个，城本身係用純金做个，像淨浰个玻璃恁光。</verse>
				<verse number="19">城牆个地基用各種个寶石來裝飾：第一座地基係碧玉，第二座係藍寶石，第三座係綠瑪瑙，第四座係綠寶石，</verse>
				<verse number="20">第五座係紅瑪瑙，第六座係紅寶石，第七座係黃璧玉，第八座係水蒼玉，第九座係紅璧玉，第十座係翡翠，第十一座係紫玉，第十二座係紫晶。</verse>
				<verse number="21">十二扇門係十二粒珍珠，逐扇門係用一粒珍珠做个。城內个街路係純金个，像係光光个玻璃。</verse>
				<verse number="22">𠊎無看到城內有聖殿，因為全能个主上帝㧯羔羊就係這座城个聖殿。</verse>
				<verse number="23">這座城毋使靠日頭抑係月光个照明；因為有上帝个榮光照等，又有羔羊做這城个燈。</verse>
				<verse number="24">萬國全部愛通過這光來行；地上个王愛將佢等个榮華帶入這座城。</verse>
				<verse number="25">城門歸日開開，永遠毋使關，因為在該位無暗晡頭。</verse>
				<verse number="26">萬國會將佢等个榮光㧯尊貴帶入這座城。</verse>
				<verse number="27">總係，一切無淨浰个，行為可惡抑係講花撩个，全部做毋得入去；只有該兜名寫在羔羊个生命冊底背个，正做得入去。</verse>
			</chapter>
			<chapter number="22">
				<verse number="1">天使又俾𠊎看生命水个河壩，像水晶恁明亮，對上帝㧯羔羊个寶座流出來，</verse>
				<verse number="2">通過城中央个街路。河壩兩片有生命樹，逐年結果子十二擺 ，逐隻月一擺；樹葉係為到醫治萬民。</verse>
				<verse number="3">城內毋會再有上帝所咒詛个事情。 上帝㧯羔羊个寶座愛在這座城底背；佢个僕人全部愛敬拜佢。</verse>
				<verse number="4">佢等會見到上帝个面，佢个名愛寫在佢等个額頭。</verse>
				<verse number="5">在該位毋會再有暗晡頭；佢等無需要燈抑係日頭个光，因為主上帝會照明佢等。佢等愛做王，直到永永遠遠。</verse>
				<verse number="6">天使又對𠊎講：「這兜話係真實可靠个。主，就係使眾先知得到靈感个上帝，已經差派佢个使者，將即時就愛發生个事情指示佢个眾僕人。」</verse>
				<verse number="7">耶穌講：「看啊，𠊎盡遽就會到了！遵守這本書底背所預言个有福氣了！」</verse>
				<verse number="8">𠊎 — 約翰 聽到又看到這一切事情。𠊎聽到又看到以後，就伏在指示𠊎這兜事情个天使腳前愛拜佢。</verse>
				<verse number="9">總係佢對𠊎講：「千萬做毋得！𠊎㧯你、你該兜做先知个兄弟、並所有遵行這本書个話个，全部共樣係僕人。你應當敬拜上帝！」</verse>
				<verse number="10">佢又對𠊎講：「莫將這本書底背所預言个話封起來，因為這一切事情實現个時機會到了。</verse>
				<verse number="11">作惡个由在佢繼續作惡；屙糟个由在佢屙糟。行善个由在佢繼續行善；聖潔个由在佢聖潔。」</verse>
				<verse number="12">耶穌講：「看啊，𠊎盡遽就會到了！賞罰在𠊎，𠊎愛照逐儕个行為報應佢。</verse>
				<verse number="13">𠊎係阿爾法㧯亞米茄，係最先㧯最後个，係開始㧯結束。」</verse>
				<verse number="14">洗淨自家衫褲个人實在有福氣；佢等會有權到生命樹該位，又做得對門入城。</verse>
				<verse number="15">總係該兜畜牲、行邪術个、淫亂个、㓾人个、拜偶像个、並一切歡喜行虛假个人，全部愛留在城外。</verse>
				<verse number="16">「𠊎 — 耶穌差遣𠊎个天使，去各教會對你等證明這兜事。𠊎係 大衛 家族个後代；𠊎係光明个天光星。」</verse>
				<verse number="17">聖靈㧯新娘對耶穌講：「來！」 所有聽到个人也應該講：「來！」 來啊，嘴燥个人全部愛來； 想愛个人全部做得白白得到生命个水。</verse>
				<verse number="18">𠊎 — 約翰 嚴嚴警告每一個聽到這本書所預言个人：若有人在這兜話以外又加添麼介，上帝會將這本書底背所寫个災難加給佢；</verse>
				<verse number="19">若有人對這本書底背个預言除掉一點，上帝會將佢除名，使佢無資格好享受這本書所記載个生命樹㧯聖城个福氣。</verse>
				<verse number="20">為這一切做見證个，佢講：「著！𠊎就會到了！」 阿愐！主耶穌啊，請你來！</verse>
				<verse number="21">願主耶穌个恩典㧯每一個人 同在。阿愐！</verse>
			</chapter>
		</book>
	</testament>
</bible>