﻿<?xml version="1.0" encoding="UTF-8"?>
<bible translation="Garhwali GBM (Garhwali)" link="https://www.bible.com/bible/4037/MAT.1.GBM" status="© (Active) Wycliffe Bible Translators, Inc">
	<testament name="New">
		<book number="40">
			<chapter number="1">
				<verse number="1">प्रभु यीशु मसीह का पितरों का नौ की सूची इन च, कि यीशु जु की राजा दाऊद का वंश मदि, अर राजा दाऊद अब्राहम का वंश मदि छौ। अर पितर अब्राहम बटि यीशु मसीह तक जनम्यां लोगु का नौ कुछ इन छिन।</verse>
				<verse number="2">पितर अब्राहम बटि इसहाक को जनम ह्‍वे, अर इसहाक बटि याकूब को जनम ह्‍वे, अर याकूब बटि यहूदा को जनम ह्‍वे, अर याकूब की और भि औलाद छै।</verse>
				<verse number="3">यहूदा बटि पेरेस अर जोरह को जनम ह्‍वे, अर ऊंकी माँ को नौ तामार छौ, अर फिरिस बटि हिस्रोन को जनम ह्‍वे, अर हिस्रोन बटि एराम को जनम ह्‍वे।</verse>
				<verse number="4">अर एराम बटि अम्मीनादाब को जनम ह्‍वे, अर अम्मीनादाब बटि नहशोन को जनम ह्‍वे, अर नहशोन बटि सलमोन को जनम ह्‍वे।</verse>
				<verse number="5">अर सलमोन बटि बोअज को जनम ह्‍वे, अर बोअज की माँ को नौ राहाब छौ, अर बोअज न रूत बटि ब्यौ कैरी, अर ऊंका नौना को नौ ओबेद छौ, अर ओबेद बटि यिशै को जनम ह्‍वे।</verse>
				<verse number="6">अर यिशै बटि राजा दाऊद को जनम ह्‍वे, अर दाऊद बटि सुलैमान राजा को जनम ह्‍वे। (अर यू वीं जनानि बटि पैदा ह्‍वे जु पैलि ऊरिय्याह कि घरवळी छै)।</verse>
				<verse number="7">अर सुलैमान बटि रहबाम को जनम ह्‍वे, अर रहबाम बटि अबिय्याह को जनम ह्‍वे, अर अबिय्याह बटि आसा को जनम ह्‍वे।</verse>
				<verse number="8">अर आसा बटि यहोशाफात को जनम ह्‍वे, अर यहोशाफात बटि योराम को जनम ह्‍वे, अर योराम बटि उज्‍जियाह को जनम ह्‍वे।</verse>
				<verse number="9">अर उज्‍जियाह बटि योताम को जनम ह्‍वे, अर योताम बटि आहाज को जनम ह्‍वे, अर आहाज बटि हिजिकिय्याह को जनम ह्‍वे।</verse>
				<verse number="10">अर हिजिकिय्याह बटि मनश्शिह को जनम ह्‍वे, मनश्शिह बटि आमोन को जनम ह्‍वे, अर आमोन बटि योशिय्याह को जनम ह्‍वे।</verse>
				<verse number="11">अर एक बगत इन ऐ, कि बेबीलोन देस का राजा न यहूदियों तैं युद्ध मा हरै दिनी, तब वु ऊंतैं अपणा देस बेबीलोन कू लि गै। अर वे बगत पर योशिय्याह को नौनु यकुन्याह को जनम ह्‍वे। अर वेका बाद यकुन्याह का और भि भैयों न जनम लिनी।</verse>
				<verse number="12">अर जब ऊ बेबीलोन देस मा रौण लगि गैनी, त वे बगत यकुन्याह बटि शालतिएल को जनम ह्‍वे। अर शालतिएल बटि जरुब्बाबिल को जनम ह्‍वे।</verse>
				<verse number="13">अर जरुब्बाबिल बटि अबीहूद को जनम ह्‍वे, अर अबीहूद बटि इल्याकीम को जनम ह्‍वे, अर इल्याकीम बटि अजोर को जनम ह्‍वे।</verse>
				<verse number="14">अर अजोर बटि सदोक को जनम ह्‍वे, अर सदोक बटि अखीम को जनम ह्‍वे, अर अखीम बटि इलीहूद को जनम ह्‍वे।</verse>
				<verse number="15">अर इलीहूद बटि इलियाजार को जनम ह्‍वे, अर इलियाजार बटि मत्तान को जनम ह्‍वे, अर मत्तान बटि याकूब को जनम ह्‍वे।</verse>
				<verse number="16">अर याकूब बटि यूसुफ को जनम ह्‍वे। अर यूसुफ न मरियम बटि ब्यौ कैरी, अर मरियम बटि यीशु को जनम ह्‍वे। अर वे ही यीशु कू मसीह बुले जान्दु।</verse>
				<verse number="17">त इनकै पितर अब्राहम बटि राजा दाऊद तक चौदह पीढ़ी ह्‍वेनि। अर राजा दाऊद बटि लेके यहूदियों का बेबीलोन देस मा बन्धी बणै के लि जाण तक चौदह पीढ़ी ह्‍वेनि। अर बेबीलोन मा रौण का बगत बटि लेके यीशु मसीह तक चौदह पीढ़ी ह्‍वेनि।</verse>
				<verse number="18">जब मरियम की मांगण यूसुफ का दगड़ा मा ह्‍वे गै छै, त ऊंका ब्यौ होण से पैलि ही इन पता चलि गै, कि वा परमेस्वर की पवित्र आत्मा की ताकत से गरवति च।</verse>
				<verse number="19">अर यूसुफ जु की परमेस्वर की नजर मा एक धरमी मनखि छौ। जब वेतैं इन पता चलि कि वा गरवति च, त वेन अपणा मन मा इन ठाणि दिनी, कि चुपचाप वीं से मांगण तोड़ि द्‍यो। किलैकि उ वींतैं बदनाम नि करण चाणु छौ।</verse>
				<verse number="20">अर जब उ यों सब बातों का बारा मा सुचणु ही छौ, कि एक दिन वेतैं सुपन्या मा प्रभु को एक दूत दिखै। अर वेन वेकू बोलि कि, “हे यूसुफ, तू जु दाऊद का वंश मदि छैई तू मरियम का दगड़ा मा ब्यौ करण से नि डौऽर, किलैकि जु बच्‍चा वींका कोख मा च, उ परमेस्वर की पवित्र आत्मा की ताकत से च। अर मि त्वेतै बतै देन्दु कि,</verse>
				<verse number="21">‘वा एक नौना तैं जनम द्‍याली। अर तू वेको नौ यीशु रखी किलैकि उ अपणा लोगु तैं ऊंका पापों बटि छुटकारा द्‍यालु।’”</verse>
				<verse number="22">अर यू सब इलै ह्‍वे, ताकि जु वचन प्रभु न अपणा रैबर्यों का द्‍वारा बुलवै छौ, उ पूरु ह्‍वे जौ।</verse>
				<verse number="23">अर उ वचन इन च कि, “सुणा, एक कुंवारी नौनि गरवति होलि अर एक नौना तैं जनम द्‍याली, अर वेको नौ इम्मानुएल रखै जालु,” जैको मतलब च कि “परमेस्वर हमरा दगड़ा मा च।”</verse>
				<verse number="24">अर इथगा मा यूसुफ की निन्द खुलि गै। अर जन प्रभु का दूत न वेकू बोलि छौ वेन ठिक उन्‍नि कैरी, अर मरियम का दगड़ा मा ब्यौ कैरिके वींतैं अपणा इख लेके ऐ गै।</verse>
				<verse number="25">अर जबरि तक वींन नौना तैं जनम नि देई, तबरि तक यूसुफ मरियम का दगड़ा मा नि सै। अर जब नौनो को जनम ह्‍वे, त यूसुफ न वेकू नौ यीशु रखी। अर इनकै यीशु को जनम ह्‍वे।</verse>
			</chapter>
			<chapter number="2">
				<verse number="1">यहूदिया मुलक को राजा हेरोदेस अन्तिपास छौ। अर ऊं दिनों मा ही यीशु को जनम यहूदिया मुलक का बैतलहम गौं मा ह्‍वे, तब पूरब दिसा का देसों बटि कुछ जोतिस यरूशलेम नगर मा ऐनी।</verse>
				<verse number="2">अर पूछण लगि गैनी कि, “यहूदियों को राजा जैको जनम ह्‍वे, उ कख च? किलैकि हमुन वेको गैंणु देखि। अर हम वेकी भक्‍ति करणु कू अयां छां।”</verse>
				<verse number="3">अर यू सुणी के राजा हेरोदेस अर यरूशलेम नगर का सब लोग घबरै गैनी।</verse>
				<verse number="4">तब राजा हेरोदेस अन्तिपास न लोगु का सब मुख्य पुरोहितों अर शास्‍त्रियों तैं बुलै के इकट्‍ठा कैरिके बोलि कि, “मसीह को जनम कख होण चयेणु?”</verse>
				<verse number="5">तब ऊंन वेकू बोलि, “यहूदिया मुलक का बैतलहम गौं मा, किलैकि परमेस्वर का रैबर्यों का द्‍वारा इन्‍नि लिख्यूं च कि,</verse>
				<verse number="6">“ हे यहूदिया मुलक का बैतलहम गौं, तू जु सबसे छुटो छैई, पर सुण, यहूदिया मुलक का सब नगरों मा बटि तू सबसे खास छैई। किलैकि त्वेमा बटि एक बड़ु सासक निकळळु, जु की मेरी परजा इस्राएल का लोगु की देख-रेख करलु।”</verse>
				<verse number="7">तब हेरोदेस अन्तिपास न जोतिसों तैं चुपचाप से बुलै, अर ऊं बटि पूछी कि तुमतै गैंणु ठिक कै बगत मा दिखै छौ।</verse>
				<verse number="8">तब वेन जोतिसों तैं इन बोलि के बैतलहम गौं मा भेजि कि, “जा, अर वे नौना का बारा मा अच्छी तरौं से पता लगावा। अर जब उ तुमतै मिली जालु, त ऐके मितैं खबर दे दियां, ताकि मि भि ऐके वेकी भक्‍ति कैरी सैकु।”</verse>
				<verse number="9">अर राजा की या बात सुणी के ऊ चलि गैनी, अर जु गैंणु ऊंन पूरब दिसा मा देखि छौ, उ ऊंका अगनै-अगनै चलि, अर वीं जगा का मथि पौंछी के रुकी गै जख उ बच्‍चा छौ।</verse>
				<verse number="10">अर जब ऊंन वे गैंणा तैं उख रुकद देखि, त ऊंकी खुशी को कुई ठिकाणु नि रै।</verse>
				<verse number="11">अर जब ऊ वे घौर मा गैनी, त ऊंन बच्‍चा तैं वेकी माँ मरियम का दगड़ा मा देखि। अर अपणा-अपणा थैलों तैं खोली के सोना, लोबान, अर गंधरस उपहार का रुप मा देके बच्‍चा को आदर-सम्मान कैरी।</verse>
				<verse number="12">तब परमेस्वर न जोतिसों तैं सुपन्या मा चितै के बोलि कि, “सुणा, हेरोदेस का पास फिर नि जयां।” इलै ऊ दुसरा ही बाटा बटि अपणा देस कू चलि गैनी।</verse>
				<verse number="13">अर जब जोतिस लोग उख बटि चलि गैनी, त प्रभु को एक दूत यूसुफ तैं सुपन्या मा दिखै अर वेन वेकू बोलि, “यूसुफ उठ, बच्‍चा अर वेकी माँ तैं लेके मिस्र देस कू चलि जा। अर जबरि तक मि त्वेकू नि बोललु तबरि तक उखि रै, किलैकि हेरोदेस ये बच्‍चा तैं खुजवौणु च, ताकि उ येतैं मरवै द्‍यो।”</verse>
				<verse number="14">इलै यूसुफ उठी, अर वीं ही रात बच्‍चा अर वेकी माँ तैं लेके मिस्र देस कू चलि गै।</verse>
				<verse number="15">अर उ हेरोदेस का मुरण तक उखि रै। अर यू सब इलै ह्‍वे ताकि परमेस्वर को उ वचन पूरु ह्‍वे जौ, जु वेन अपणा रैबर्या का द्‍वारा बोलि छौ। अर उ वचन इन च कि, “मिन अपणा पुत्र तैं मिस्र देस बटि बुलै।”</verse>
				<verse number="16">अर जब राजा हेरोदेस तैं इन पता चलि कि जोतिसों न मितैं धोखा दियाली, त उ खौं को बाग बणि गै। अर जै बगत का बारा मा जोतिसों न बोलि छौ, वेका मुताबिक वेन पता करवै के अपणा सिपयों तैं बैतलहम गौं मा अर आस-पास का ग्‍वोंऽ मा भेजि। अर आज्ञा देई कि दुई साल का या वेसे कम साल का जथगा भि नौना छिन ऊं सभ्यों तैं मारी द्‍या।</verse>
				<verse number="17">अर जब इन ह्‍वे, तब परमेस्वर को वु वचन पूरु ह्‍वे जु वेन यिर्मयाह रैबर्या का द्‍वारा बोलि छौ। अर उ इन च कि,</verse>
				<verse number="18">“रामाह मा रुंण अर मातम की भौत आवाज औणी च, अर राहेल अपणा नौनो का खातिर रुंणी च, अर वींतैं दिलासा नि चयेणी, किलैकि वींका नौना अब नि रयां।”</verse>
				<verse number="19">अर राजा हेरोदेस की मौत का बाद, प्रभु को एक दूत यूसुफ तैं सुपन्या मा दिखै, अर तब यूसुफ मिस्र देस मा ही छौ।</verse>
				<verse number="20">अर वेन वेकू बोलि, “यूसुफ उठ, बच्‍चा अर वेकी माँ तैं इख बटि लेके इस्राएल देस कू चलि जा, किलैकि जु बच्‍चा तैं जान से मरण चाणा छा ऊ मोरि गैनी।”</verse>
				<verse number="21">इलै यूसुफ उठी, अर बच्‍चा अर वेकी माँ तैं लेके इस्राएल देस मा ऐ गै।</verse>
				<verse number="22">अर जब उ इख ऐ, त वेन सुणी कि हेरोदेस अन्तिपास की जगा मा अब वेको नौनु अरखिलाउस यहूदिया मुलक पर राज कनु च, त उ उख जाण से डौऽरी गै। पर परमेस्वर न वेतैं सुपन्या मा चितै, इलै उ गलील मुलक कू चलि गै।</verse>
				<verse number="23">अर उख जैके गलील मुलक का नासरत गौं मा बसी गै, ताकि परमेस्वर का रैबर्यों द्‍वारा बुलयूं उ वचन पूरु ह्‍वे जौ जु कि इन च कि, “वे मनखि कू नासरत गौं को बुले जालु।”</verse>
			</chapter>
			<chapter number="3">
				<verse number="1">अर या ऊं दिनों की बात च, जब यूहन्‍ना नौ को एक मनखि जु की बपतिस्मा देन्दु छौ। उ यहूदिया मुलक का निर्जन जगा मा इन परचार करण लगि गै कि,</verse>
				<verse number="2">“अपणा-अपणा पापों से पस्ताप कैरा, किलैकि परमेस्वर राज करण वळु च अर उ नजदीक ही च।”</verse>
				<verse number="3">अर यू यूहन्‍ना उई च जैका बारा मा परमेस्वर का रैबर्या यशायाह न बोलि छौ कि, “निर्जन जगा मा एक पुकरण वळे की आवाज औणी च, प्रभु खुणि बाटु तयार कैरा वे खुणि बाटु सैणु कैरा।”</verse>
				<verse number="4">अर यूहन्‍ना ऊंट का बाळो से बणयूं कपड़ा पैरदु छौ, अर अपणी कमर पर चमड़ा का पठुगा तैं बान्धि के रखदु छौ। अर खाण मा वेकू खाणुक टिड़ियां अर जंगळि शहद छौ।</verse>
				<verse number="5">तब लोग निकळि-निकळि के यूहन्‍ना का पास यरूशलेम नगर बटि अर पूरा यहूदिया मुलक बटि, इख तक की यरदन गाड का आस-पास का पूरा मुलक बटि वेका पास ऐनी।</verse>
				<verse number="6">अर ऊं लोगु न अपणा-अपणा पापों तैं कबूल कैरिके यरदन गाड मा यूहन्‍ना बटि बपतिस्मा ले।</verse>
				<verse number="7">अर जब यूहन्‍ना न भौत सरा फरीसी दल का लोगु तैं अर सदूकियों तैं बपतिस्मा लेण कू अपणा पास औन्द देखि, त वेन ऊंकू बोलि, “हे गुरौ का बच्‍चों, तुमतै कैन चितै की परमेस्वर का औण वळा परकोप से दूर भागा?</verse>
				<verse number="8">इलै इन्द्रया काम कैरा, ज्यां से इन पता चलु कि तुमुन मन से पस्तावा कैरियाली।</verse>
				<verse number="9">अर अपणा-अपणा मनों मा इन नि समझा कि, ‘हम अब्राहम का वंश मदि छां, इलै हमतै परमेस्वर दण्ड नि द्‍यालु।’ पर सुणा, मि तुमतै बतै देन्दु कि परमेस्वर यों ढुंगो मा बटि भि अब्राहम खुणि औलाद पैदा कैरी सकदु च।</verse>
				<verse number="10">अर अब कुल्हाडु डाळों की जड़ पर रख्युं च, इलै जै डाळा पर अच्छा फल नि लगदिन, वेतैं काटी के आग मा ढुळै जान्दु।</verse>
				<verse number="11">“अर मि त तुमतै पापों से माफी पौणु खुणि पाणिळ बपतिस्मा देणु छौं। पर उ मनखि औण वळु च, जु मिसे भि जादा ताकतबर च, अर मि ये लैख भि नि छौं कि वेको नौकर बणि के वेका जुता उठे सैकु अर उ तुमतै पवित्र आत्मा अर आग बटि बपतिस्मा द्‍यालु।</verse>
				<verse number="12">अर वेको सुप्पु वेका हाथों मा च, अर उ अपणा खल्याण तैं ढंगल साफ करलु, ग्यूँ तैं अपणा कुठार मा इकट्‍ठा करलु, पर बूखा तैं वीं आग मा ढोळि द्‍यालु ज्वा कभि बुझि नि सकदी।”</verse>
				<verse number="13">अर ऊं दिनों मा यीशु गलील मुलक बटि ह्‍वेके यरदन गाड का छाला पर यूहन्‍ना का पास बपतिस्मा लेणु कू ऐ।</verse>
				<verse number="14">पर यूहन्‍ना इन बोलि के वेतैं रुकण लगि गै कि, “मितैं तुम बटि बपतिस्मा लेण की जरुरत च, अर तुम मेरा पास अयां छाँ?”</verse>
				<verse number="15">तब यीशु न वेतैं जबाब दिनी, “अबरि जन होणु च तू वेतैं होण दे, किलैकि हम खुणि यू जरुरी च, कि जन परमेस्वर की मनसा च हम वींतैं उन्‍नि पूरु कैरा।” तब यूहन्‍ना न वेकी बात माणी दिनी।</verse>
				<verse number="16">अर यीशु न बपतिस्मा ले अर जन्‍नि उ पाणि बटि भैर निकळि ठिक उन्‍नि स्वर्ग खुलि गै, अर वेन परमेस्वर का आत्मा तैं कबूतर का रुप मा उतरद देखि अर अपणा मथि औन्द देखि।</verse>
				<verse number="17">अर सुणा, स्वर्ग बटि इन आवाज ऐ कि, “यू मेरु लाडलु पुत्र च, अर मि येसे भौत खुश छौं।”</verse>
			</chapter>
			<chapter number="4">
				<verse number="1">यीशु का बपतिस्मा लेण का कुछ देर बाद, पवित्र आत्मा यीशु तैं निर्जन जगा कू लि गै, ताकि उख शैतान वेतैं भकलौ।</verse>
				<verse number="2">अर वेन चालीस दिनों तक उपवास रख्युं छौ अर वेन कुछ भि नि खै, तब वेतैं भूक लगि।</verse>
				<verse number="3">तब शैतान जु कि भकलौण वळु च वेका पास ऐ, अर वेन यीशु कू बोलि, “अगर जु तू परमेस्वर को पुत्र छैई, त यों ढुंगो कू बोल कि रुट्‍टी बण जा।”</verse>
				<verse number="4">मगर यीशु न वेकी बात तैं नकारी के बोलि कि, “पवित्रशास्‍त्र मा लिख्यूं च कि, ‘मनखि केवल रुट्‍टी बटि ही ज्यून्दु नि रालु, बल्किन मा परमेस्वर का मुख बटि निकळ्यां हरेक वचन बटि ज्यून्द रालु।’”</verse>
				<verse number="5">तब शैतान वेतैं पवित्र नगर यरूशलेम मा लि गै, अर वेतैं मन्दिर की सबसे ऊँची जगा पर खड़ु कैरिके बोलि,</verse>
				<verse number="6">“अगर तू परमेस्वर को पुत्र छैई, त इख बटि मूड़ी फाल मारी दे, किलैकि पवित्रशास्‍त्र मा लिख्यूं च कि, ‘तेरी हिफाजत करणु खुणि उ अपणा स्वर्गदूतों तैं आज्ञा द्‍यालु, अर ऊ त्वेतै तुरन्त अपणा हाथों मा उठे द्‍याला, ताकि कखि इन नि हो कि तेरा खुटों मा ढुंगे की चोट लगि जौ।’”</verse>
				<verse number="7">तब यीशु न वेकी बात तैं नकारी के बोलि कि, “पवित्रशास्‍त्र मा इन भि लिख्यूं च कि, ‘तू अपणा प्रभु परमेस्वर तैं नि भकलौ।’”</verse>
				<verse number="8">तब शैतान वेतैं एक ऊँचा पाड़ पर लि गै, अर झट वेतैं दुनियां का सब राज्य, अर दुनियां की सब धन-दौलत दिखै के बोलि,</verse>
				<verse number="9">“अगर जु तू झुकि के मेरी पूजा करली, त मि यू सब त्वेतै दे द्‍यूलु।”</verse>
				<verse number="10">तब यीशु न वेकी बात तैं नकारी के बोलि, “शैतान मेरा पास बटि दूर ह्‍वे जा, किलैकि पवित्रशास्‍त्र मा लिख्यूं च कि, ‘तू केवल अपणा प्रभु परमेस्वर की ही पूजा कैर, अर बस वेकी ही सेवा कैर।’”</verse>
				<verse number="11">अर तब शैतान यीशु तैं छोड़ि के चलि गै, अर स्वर्गदूत ऐके यीशु की सेवा करण लगि गैनी।</verse>
				<verse number="12">अर जब वेन सुणी की यूहन्‍ना तैं बन्धी बणयै गै, तब यीशु वापस गलील मुलक कू चलि गै।</verse>
				<verse number="13">अर नासरत नगर तैं छुड़ण का बाद उ कफरनहूम नगर मा रौण लगि गै। अर कफरनहूम नगर झील का छाला पर बस्यूं च, अर जबूलून और नप्‍ताली का गोत्र का लोग ये मुलक मा रौन्दा छा।</verse>
				<verse number="14">अर यू इलै ह्‍वे, ताकि यशायाह रैबर्या का द्‍वारा बुलयूं वु वचन पूरु ह्‍वे जौ। अर वु इन च कि,</verse>
				<verse number="15">“जु लोग गलील झील का किनरा जबूलून अर नप्‍ताली का मुलकों मा रौनदिन, इख तक कि जु लोग गलील इलाका मा रौण वळा लोगु का बीच मा रौनदिन, जु कि यहूदी जाति का नि छिन। ऊंकू मि इन बुल्दु कि,</verse>
				<verse number="16">जु लोग अन्धेरा मा अपणा जीवन को गुजर-बसर कना छिन, ऊ एक बड़ा उज्याळा तैं दिखला, अर जु लोग आत्मिक मौत का बाटा मा छिन, ऊं पर एक उज्याळु चमकी।”</verse>
				<verse number="17">अर ये बगत बटि ही यीशु परचार करण लगि गै। अर वेन बोलि कि, “अपणा-अपणा पापों से पस्ताप कैरा, किलैकि परमेस्वर को राज नजदीक ही च अर उ राज करण वळु च।”</verse>
				<verse number="18">अर जब यीशु गलील की झील का छाला बटि जाणु छौ, त वेन दुई भैयों तैं देखि, शमौन जैकू पतरस भि बुल्दिन, अर वेका भै अन्द्रियास तैं। अर यू दुई मछैर छा अर झील मा जाल डलणा छा।</verse>
				<verse number="19">तब यीशु न ऊंकू बोलि, “मेरा पिछनै आ, अर मि तुमतै मनखियों तैं पकड़ण वळु बणौलु।”</verse>
				<verse number="20">अर ऊ अपणा जालों तैं तुरन्त उखि छोड़ि के यीशु का पिछनै ह्‍वे गैनी।</verse>
				<verse number="21">अर जब यीशु उख बटि अगनै गै, त वेन याकूब अर यूहन्‍ना तैं देखि जु कि जबदी का नौना छा, अर यू दुई भै नाव मा बैठि के अपणा बुबा का दगड़ा मा जाल ठिक कना छा। तब यीशु न ऊंतैं भि अपणा दगड़ा मा बुलै।</verse>
				<verse number="22">तब ऊंन भि तुरन्त अपणा बुबा अर नाव तैं छोड़ि दिनी, अर यीशु का पिछनै ह्‍वे गैनी।</verse>
				<verse number="23">अर यीशु पूरा गलील मुलक मा घूमणु रै। अर यहूदी लोगु का प्रार्थना भवनों मा जैके उपदेस देणु रै, अर परमेस्वर का राज को शुभ समाचार परचार कनु रै। अर उखा लोगु की हरेक किसम की बिमारियों तैं अर कमजोरियों तैं दूर कनु रै।</verse>
				<verse number="24">अर पूरा सीरिया मुलक मा वेकी चर्चा फैली गै। अर लोग वेका पास बन्‍नि-बन्‍नि किसम का दुख-बिमारियों मा पोडयां लोगु तैं, अर खबेस लग्यां लोगु तैं लेके ऐनी। अर जौं लोगु पर मिर्गी औन्दी छै, अर जु लोग लकवा मा पोड़यां छा ऊंतैं भि यीशु का पास लये गै अर वेन ऊं सब लोगु तैं खूब कैरी।</verse>
				<verse number="25">इलै गलील, दिकापुलिस, अर यहूदिया मुलकों बटि, अर यरूशलेम नगर अर यरदन गाड का दुसरा छाला बटि, भीड़ की भीड़ यीशु का पिछनै चलण लगि गै।</verse>
			</chapter>
			<chapter number="5">
				<verse number="1">अर ईं बड़ी भीड़ तैं देखि के यीशु पाड़ पर चैड़ि अर उख जैके बैठि गै, अर वेका चेला वेका पास ऐनी।</verse>
				<verse number="2">तब उ ऊंतैं उपदेस देके बोन्‍न लगि गै कि:</verse>
				<verse number="3">“धन्य छिन ऊ, जु मन का दीन छिन, किलैकि परमेस्वर को राज ऊंको ही च।</verse>
				<verse number="4">“धन्य छिन ऊ, जु शोक मा छिन, किलैकि ऊंतैं शान्ति दिये जालि।</verse>
				<verse number="5">“धन्य छिन ऊ, जु नमर सभौ का छिन, किलैकि ऊ ईं धरती का अधिकारी होला।</verse>
				<verse number="6">“धन्य छिन ऊ, जु धरमी जीवन जीणु खुणि भूका अर प्यासा छिन, किलैकि ऊंकी तड़प पूरि किये जालि।</verse>
				<verse number="7">“धन्य छिन ऊ, जु दयालु छिन, किलैकि ऊं पर भि दया किये जालि।</verse>
				<verse number="8">“धन्य छिन ऊ, जु साफ दिल का छिन, किलैकि ऊ परमेस्वर तैं दिखला।</verse>
				<verse number="9">“धन्य छिन ऊ, जु मेल-जोल करौंदिन, किलैकि ऊंकू परमेस्वर की औलाद बुले जालु।</verse>
				<verse number="10">“धन्य छिन ऊ, जौं तैं धरमी जीवन जीण का खातिर सतयै जान्दु, किलैकि परमेस्वर को राज ऊंको ही च।</verse>
				<verse number="11">“अर धन्य छाँ तुम, किलैकि जब लोग मेरी वजै से तुमतै बदनाम करला, अर तुमतै सताला अर झूठ्‍ठ बोलि-बोलि के तुमरा खिलाप मा बन्‍नि-बन्‍नि किसम की बात बुलला,</verse>
				<verse number="12">तब तुम आनन्द मणया अर मगन ह्‍वे जयां, किलैकि तुम खुणि स्वर्ग मा बड़ु इनाम रख्युं च। अर जन वु तुमतै सतौणा छिन, ठिक इन्‍नि ऊंन तुम से पैलि परमेस्वर का भौत सा रैबर्यों तैं भि सतै।”</verse>
				<verse number="13">तब यीशु न भीड़ का लोगु कू इन बोलि कि, “तुम ईं दुनियां मा लूण का जन छाँ। अर अगर जु लूण को स्वाद बिगाड़ि जौ, त फिर वेतैं कनकै नमकीन किये जै सकदु? फिर उ कै काम को नि रौन्दु। तब लोग वेतैं भैर ढोळि देन्दिन, अर उ मनखियों का खुटों तौळ पितड़े जान्दु।</verse>
				<verse number="14">अर ठिक उन्‍नि तुम ईं दुनियां का उज्याळा छाँ। अर जु नगर पाड़ पर बस्यूं हो, उ कभि छिपी नि सकदु।</verse>
				<verse number="15">अर लोग द्‍यू बाळि के कटोरा का तौळ ढकै के नि रखदिन, बल्किन मा एक ऊँची जगा पर रखदिन, ताकि उ घौर का सब लोगु तैं उज्याळु दे सैको।</verse>
				<verse number="16">ठिक इन्‍नि तुमरो उज्याळु भि लोगु का समणि चमकण चयेणु, ताकि लोग तुमरा भला कामों तैं देखि के तुमरा पिता परमेस्वर की बडै कैरा, जु की स्वर्ग मा च।”</verse>
				<verse number="17">“अर यीशु न ऊंकू इन भि बोलि कि, ‘इन नि सोचा, कि मि मूसा का दियां नियम-कानूनों तैं या रैबर्यों का द्‍वारा लिखीं बातों तैं रद्‍द करणु खुणि अयूं छौं। अरे, मि ऊंतैं रद्‍द करणु खुणि ना, पर पूरु करणु खुणि अयूं छौं।</verse>
				<verse number="18">अर मि तुम बटि सच्‍चि बोन्‍नु छौं कि जब तक या धरती अर आसमान च, तब तक परमेस्वर का नियम-कानूनों न खतम नि होण, अर वेमा लिखीं हरेक छुटी से छुटी बात भि पक्‍की तरौं से पूरि होलि।</verse>
				<verse number="19">इलै जु कुई भि यों बातों मा बटि एक छुटी से छुटी आज्ञा को पालन भि नि करलु, अर उन्‍नि दुसरो तैं करणु कू सिखौलु, त वेतैं परमेस्वर का राज मा सबसे छुटो बुले जालु, मगर जु कुई भि यों आज्ञाओं को पालन करलु, अर ठिक उन्‍नि दुसरो तैं भि करणु कू सिखौलु, त वेतैं परमेस्वर का राज मा सबसे बड़ु बुले जालु।</verse>
				<verse number="20">अर मि तुमतै बतै देन्दु, कि अगर जु तुम परमेस्वर की नजर मा धरमी जीवन जीण को काम, शास्‍त्री अर फरीसी दल का लोगु से जादा नि करिल्या, त तुम परमेस्वर का राज मा नि जै सकद्‍यां।’”</verse>
				<verse number="21">“अर यीशु न ऊंकू बोलि कि, ‘तुमुन या बात पैलि भि सुण्यालि की तुमरा पितरों कू बुले गै छौ कि, हत्या नि कर्यां, अर अगर जु कुई हत्या करलु, त वेको न्याय कचैरी मा किये जालु।’</verse>
				<verse number="22">पर मि तुमतै बतै देन्दु कि, जु कुई भि कै मनखि से नाराज हो, अर वेको अपमान कैरो अर बोलो ‘अरे बेकूप’ त वेतैं कचैरी मा दोषी ठैरै के दण्ड मिललु। अर अगर जु कुई अपणा भै-बैंण कू बोललु ‘अरे मूरख’ त उ नरकलोक की आग मा डळै जालु।</verse>
				<verse number="23">अर जब तू मन्दिर मा वेदी का पास अपणी भेंट लेके ऐलि, अर उख त्वे याद अऽ, कि तेरा मन मा कै का खिलाप मा कुछ च, त अपणी भेंट तैं नि चड़ौ,</verse>
				<verse number="24">बल्किन मा अपणी भेंट तैं मन्दिर मा ही छोड़ि दे, अर पैलि जैके वेका दगड़ा मा मेल-जोल कैर, अर तब ऐके अपणी भेंट तैं चड़ै।</verse>
				<verse number="25">अर जब तेरु दुसमन त्वेतै पंचैत मा लि जाणु हो, त तू अधा बाटा मा ही वेका दगड़ा मा सला कैरी ले, कखि इन नि हो कि उ त्वेतै पंचैत का हवाला कैरी द्‍यो, अर पंचैत पटवरी का, अर तब पटवरी त्वेतै जेलखाना मा डलवै द्‍यालु।</verse>
				<verse number="26">मि तुम बटि सच्‍चि बोन्‍नु छौं, जब तक तू एक-एक रुपया नि चुकै दिली, तब तक तू उख बटि कनकै भि छुटी नि सकदी।”</verse>
				<verse number="27">“अर यीशु न ऊंकू इन भि बोलि कि, ‘तुमुन पैलि भि सुण्यालि की बुले गै छौ कि, गळत सम्बन्ध नि रख्यां।’</verse>
				<verse number="28">पर मि तुमतै बतै देन्दु कि, हरेक उ मनखि जु कै दुसरि जनानि तैं गळत नजर से दिखदु, त वेन अपणा मन मा वींका दगड़ा गळत सम्बन्ध बणैनी।</verse>
				<verse number="29">अर अगर तेरी दैंणी आंख त्वे बटि पाप करौणी च, त वींतैं निकाळि के ढोळि दे, किलैकि पूरा सरील को नरकलोक मा नास होण से त जादा खूब यू च, कि तेरा सरील को एक अंग ही नास ह्‍वे जौ।</verse>
				<verse number="30">अर अगर तेरु दैंणु हाथ त्वे बटि पाप करौणु च त वेतैं काटी के ढोळि दे, किलैकि पूरा सरील को नरकलोक मा नास होण से त जादा खूब यू च, कि तेरा सरील को एक अंग ही नास ह्‍वे जौ।”</verse>
				<verse number="31">अर यीशु न ऊंकू बोलि कि, “तुमकु इन भि बुले गै छौ कि, ‘जु कुई अपणी घरवळी तैं तलाक द्‍यालु, त उ एक तलाकनामा लिखी के द्‍यो।’</verse>
				<verse number="32">पर मि तुमतै बतै देन्दु, कि हरेक उ मनखि जु गळत सम्बन्ध रखण का अलावा कै दुसरा कारण से अपणी घरवळी तैं तलाक देन्दु, त इन्द्रयो मनखि वीं जनानि बटि सरील का सम्बन्ध बणवाणु च। अर जु कुई इन्दरि जनानि बटि ब्यौ करदु, त उ मनखि भि सरील का सम्बन्ध बणौणु च जु कि गळत च।”</verse>
				<verse number="33">तब यीशु न ऊंकू इन भि बोलि कि, “तुमरो सुणयूं च की तुमरा पितरों कू बुले गै छौ कि, ‘झूठ्‍ठी कसम नि खयां, पर प्रभु का समणि ज्वा कसम तुमुन खाई वींतैं वे खुणि पूरु कैरा।’</verse>
				<verse number="34">पर मि तुमतै बतै देन्दु, कि तुम कभि कसम नि खयां, नऽ त स्वर्ग की किलैकि उ परमेस्वर की राजगद्‍दी च,</verse>
				<verse number="35">अर ना ही ईं धरती की कसम खयां, किलैकि या वेका खुटा रखण की जगा च। अर नऽ त यरूशलेम नगर की कसम खयां, किलैकि उ सबसे महान राजा परमेस्वर को नगर च।</verse>
				<verse number="36">अर तुम खुद की कसम भि नि खयां, किलैकि तुम अपणा एक बाल तैं भि सफेद या काळु नि कैरी सकद्‍यां।</verse>
				<verse number="37">पर जख मा तुमतै ‘हाँ’ बोन्‍न होलु उख मा ‘हाँ’ बोला, अर जख मा ‘ना’ बोन्‍न होलु त उख मा ‘ना’ बोला, किलैकि अगर जु तुम येसे जादा बुल्द्‍यां, त ईं बात तैं जाणि ल्या कि वा बात दुष्‍ट शैतान की तरफा बटि औणी च।”</verse>
				<verse number="38">अर वेन ऊं लोगु कू बोलि कि, “तुमुन सुणी होलु कि, ‘अगर कुई कै की आंख तैं फोड़ि द्‍यो, त तुम भि वेकी आंख फोड़ि द्‍या, अर अगर कुई कै को दांत तोड़ि द्‍यो, त तुम भि वेको दांत तोड़ि द्‍या।’</verse>
				<verse number="39">पर मि तुमतै बतै देन्दु, कि जु बुरु च वेको मुकाबला नि कैरा, पर अगर कुई तेरा दैंणा गलोड़ा पर थप्पड मारो, त वेकी तरफा दुसरो गलोडु भि कैर दे।</verse>
				<verse number="40">अर अगर कुई त्वे पर मुकदमा चलै के तेरु कुरता लेण चालु, त वेतैं अपणु कोट भि लेण दे।</verse>
				<verse number="41">अर अगर कुई त्वेतै अफ दगड़ा जबरदस्ती एक मील लेके जौ, त तू वेका दगड़ा मा दुई मील चलि जा।</verse>
				<verse number="42">अर जु कुई त्वे बटि मांगु, त वेतैं दे अर जु त्वे बटि करज लेण चौ, त वे खुणि मना नि कैर।”</verse>
				<verse number="43">अर यीशु न बोलि कि, “तुमुन इन भि सुणी की बुले गै छौ कि, ‘अपणा पड़ोसी बटि प्यार कैरा, अर दुसमनों बटि नफरत।’</verse>
				<verse number="44">पर मि तुमतै बतै देन्दु, कि अपणा दुसमनों बटि भि प्यार कैरा, अर जु लोग तुमतै सतौणा छिन ऊं खुणि प्रार्थना कैरा।</verse>
				<verse number="45">अर इन कैरिके तुम स्वर्ग मा रौण वळा अपणा पिता परमेस्वर की औलाद ह्‍वेल्या, किलैकि उ अच्छा अर बुरा, दुई किसम का लोगु पर सूरज को उज्याळु चमकान्दु, अर धरमी और अधरमी लोगु खुणि बरखा भि करदु।</verse>
				<verse number="46">किलैकि अगर जु तुम बस ऊं बटि ही प्यार करद्‍यां जु तुम बटि करदिन, त कौन सा तुमुन भौत बड़ु काम कैरियाली। अरे, चुंगी लेण वळा पापि लोग भि त इन्‍नि करदिन,</verse>
				<verse number="47">अर अगर जु तुम बस अपणा ही भै-बन्दों तैं नमस्कार करद्‍यां, त कौन सा तुमुन भौत बड़ु काम कैरियाली। अरे, जु लोग यहूदी जाति का नि छिन ऊ भि त इन्‍नि करदिन।</verse>
				<verse number="48">इलै तुम खरु मनखि बणा, जन स्वर्ग मा रौण वळु तुमरो पिता परमेस्वर खरु च।”</verse>
			</chapter>
			<chapter number="6">
				<verse number="1">तब यीशु न लोगु कू बोलि कि, “चौकस रा, तुम लोगु तैं दिखौणु खुणि धरमी बणणो को काम नि कैरा, निथर तुमतै स्वर्ग मा रौण वळा अपणा पिता परमेस्वर बटि कुई इनाम नि मिलण।</verse>
				<verse number="2">इलै जब तू कै गरीब तैं दान-दकछिणा दिली, त यां को ढिनडोरु नि मचै जन कि प्रार्थना भवन अर बाटों मा ढोंगि लोग अपणु ढिनडोरु मचौन्दिन, ताकि दुसरा लोगु बटि ऊंतैं पूरु आदर-सम्मान मिलु। पर मि तुमतै बतै देन्दु, कि सच्‍चि बात या च कि इन्द्रया लोगु तैं दुसरा लोगु बटि पूरु आदर-सम्मान त मिली गै, मगर परमेस्वर बटि ऊंतैं कुछ इनाम नि मिलण।</verse>
				<verse number="3">पर जब तू दान-दकछिणा दिली, त तेरा दैंणा हाथ तैं पता नि चलु कि तेरु बैं हाथ क्या कनु च,</verse>
				<verse number="4">अर इन कैरिके तेरु दियूं दान गुप्‍त रालु, अर स्वर्ग मा रौण वळु तेरु पिता परमेस्वर जु कि तेरा गुप्‍त का काम भि दिखदु, उ वांका बदला मा त्वेतै जरुर इनाम दयालु।</verse>
				<verse number="5">“अर जब तुम प्रार्थना करद्‍यां, त ढोंगि लोगु की तरौं नि कर्यां, किलैकि यू लोग दुसरा लोगु तैं दिखाण का बाना प्रार्थना भवनों मा, अर बजारों का कुणों-काणों पर खड़ु ह्‍वेके प्रार्थना करदिन, अर इन करण ऊंतैं अच्छु लगदु। पर मि तुम बटि सच्‍चि बोन्‍नु छौं, कि ऊंतैं यां को इनाम मिली गै।</verse>
				<verse number="6">पर जब तू प्रार्थना करली, त अपणी कुठड़ी मा जैके द्‍वार बन्द कैर अर अपणा पिता परमेस्वर बटि प्रार्थना कैर, जु की दिखेन्दु नि च। तब स्वर्ग मा रौण वळु तेरु पिता जु कि तेरी छिपी बातों तैं भि जणदु च, उ यां को इनाम त्वेतै जरुर दयालु।</verse>
				<verse number="7">अर प्रार्थना कन बगत तुम ऊं लोगु की तरौं जादा बक-बक नि कैरा जु पिता परमेस्वर तैं नि मणदिन, किलैकि ऊ सोचदिन की जादा बोन्‍न से ऊंकी प्रार्थना जल्दी सुणै जालि।</verse>
				<verse number="8">इलै तुम ऊंका जन नि बणा, किलैकि तुमरो पिता परमेस्वर तुमरो मंगण से पैलि ही जणदु च कि तुमतै कैं चीज की जरुरत च।</verse>
				<verse number="9">“इलै तुम प्रार्थना इनकै कर्यां कि, “हे हमरा पिता, तुम जु स्वर्ग मा छाँ, तुमरो नौ पवित्र मणै जौ।</verse>
				<verse number="10">तुमरो राज अऽ। अर जन तुमरि मनसा स्वर्ग मा पूरि होन्दी ठिक उन्‍नि ईं धरती पर भि पूरि हो।</verse>
				<verse number="11">हमरा दिन-भर की रुट्‍टी हमतै रोज द्‍या।</verse>
				<verse number="12">अर जन हम ऊंतैं माफ करद्‍यां, जु की हमरा खिलाप बुरै करदिन, ठिक उन्‍नि तुम भि हमरा पापों तैं माफ कैरा।</verse>
				<verse number="13">अर शैतान की बातों का द्‍वारा हम भकलै नि जा, बल्किन मा हमतै बुरै से बचै के रखा। [किलैकि तुमरो राज अर तुमरि ताकत, अर तुमरो आदर-सम्मान सदनि तक होन्दी रौ। आमीन।]</verse>
				<verse number="14">“इलै अगर जु तुम लोगु का अपराधों तैं माफ करिल्या, त स्वर्ग मा रौण वळु तुमरो पिता भि तुमतै माफ करलु।</verse>
				<verse number="15">अर अगर जु तुम लोगु का अपराधों तैं माफ नि करिल्या, त स्वर्ग मा रौण वळु तुमरो पिता भि तुमरा अपराधों तैं माफ नि करलु।”</verse>
				<verse number="16">अर यीशु न भीड़ का लोगु कू इन भि बोलि कि, “जब तुम उपवास रखिल्या, त ढोंगि लोगु की तरौं तुमरा मुख पर उदासी नि हो, किलैकि ऊ अपणु मुख इन्द्रयो इलै बणै के रखदिन, ताकि लोग समझि जा कि ऊंको उपवास रख्युं च। पर मि तुम बटि सच्‍चि बोन्‍नु छौ, कि लोगु बटि त ऊंतैं आदर-सम्मान मिली गै, मगर पिता परमेस्वर बटि ऊंतैं कुछ इनाम नि मिलण।</verse>
				<verse number="17">मगर जब तू उपवास रखलि, त अपणा मुख तैं ध्वे अर मुण्ड़ पर तेल लगै,</verse>
				<verse number="18">अर इन कैरिके तू पिता परमेस्वर की नजर मा उपवास रखण वळु ठैरीलि, ना कि मनखियों की नजर मा। किलैकि परमेस्वर जु कि दिखेन्दु त नि च, मगर छिप्यां कामों तैं भि देखि सकदु च, त्वेतै यां को इनाम जरुर द्‍यालु।”</verse>
				<verse number="19">“अर मि तुमतै इन भि बतै देन्दु कि, अफु खुणि ईं धरती पर धन जमा नि कैरा, किलैकि इख कीड़ा वेतैं खै द्‍याला, या जंक बरबाद कैरी द्‍यालु, या त चोर आलु अर तोड़ि के सब लि जालु।</verse>
				<verse number="20">पर अफु खुणि स्वर्ग मा धन जमा कैरा उख नऽ त वेतैं कीड़ु खालु, अर ना ही वेतैं जंक बरबाद करलु, उख त चोर भि नि ऐ सकदु अर ना ही तोड़ि के कुछ लि जै सकदु।</verse>
				<verse number="21">अर या बात मि तुमतै इलै बतौणु छौं, किलैकि जख तेरु धन रालु उखि तेरु मन लग्यूं रालु।”</verse>
				<verse number="22">यीशु न ऊंकू बोलि कि, “मनखि का सरील खुणि वेका आंखा द्‍यू का जन काम करदिन, अर अगर जु ऊ ठिक होला, त वेको पूरु सरील मा उज्याळु होलु।</verse>
				<verse number="23">पर अगर जु खराब होला, त तेरु पूरु सरील भि अन्धेरा मा ही रालु, अर अगर जु त्वेमा उज्याळु च अर उ अन्धेरु ह्‍वे जौ, त उ अन्धेरु कथगा जादा खतरनाक होलु।”</verse>
				<verse number="24">तब यीशु न भीड़ का लोगु कू इन भि बोलि, “कुई भि मनखि दुई मालिकों की सेवा नि कैरी सकदु, किलैकि अगर वु करलु त एक बटि प्यार करलु अर दुसरा बटि नफरत, य त उ एक का दगड़ा मा वफादार रालु अर दुसरो को तिरिस्कार करलु। ठिक उन्‍नि तुम लोग भि परमेस्वर अर धन दुईयों की सेवा नि कैरी सकद्‍यां।</verse>
				<verse number="25">इलै मि तुम बटि बोन्‍नु छौं, कि अपणा पराण खुणि चिन्ता नि कर्यां कि क्या खौला अर क्या प्यूला, अर ना ही अपणा सरील खुणि की क्या जि पैरुला, किलैकि पराण की कीमत खाणुक से जादा च, अर ठिक उन्‍नि सरील की कीमत कपड़ों से जादा च।</verse>
				<verse number="26">अर पंछियों तैं ध्यान से देखा, ऊ नऽ त बुतदा छिन, ना लवै करदिन, अर ना ही वु अपणा घोलो मा बटोळि के रखदिन, अर फिर भि स्वर्ग मा रौण वळु तुमरो पिता ऊंतैं खिलान्दु च, त उ तुमतै किलै नि खिलालु?</verse>
				<verse number="27">“अर तुम मा बटि इन्द्रयो मनखि कु च, जु चिन्ता-फिकर कैरिके अपणी उमर मा एक घड़ी भि बढै सैको?</verse>
				<verse number="28">त तुम अपणा कपड़ों खुणि किलै चिन्ता कना छाँ? अरे जंगळि फूलों तैं जरा ध्यान से त देखा कि ऊ कनकै खिल्दिन, नऽ त ऊ मेनत करदिन अर ना ही ऊ अफ खुणि कपड़ा बणौन्दिन।</verse>
				<verse number="29">पर फिर भि मि तुम बटि बोन्‍नु छौं कि सुलैमान राजा न भि अपणा बगत मा यों सुन्दर फूलों मा बटि कै एक फूल का रंग का जन भि कपड़ा नि पैरि सकिनी, जब कि वे बगत मा उ सबसे जादा सेठ छौ।</verse>
				<verse number="30">ठिक उन्‍नि जब परमेस्वर तपड़ की घास तैं ज्वा आज च अर भोळ वींन आग मा फुकै जाण, इथगा अच्छे से सजान्दु, त हे कम बिस्वास रखण वळा लोगु, त उ तुमतै नि पैरालु?</verse>
				<verse number="31">“अर ठिक उन्‍नि चिन्ता कैरिके इन नि बुलयां कि हम क्या जि खौला-प्यूला, अर क्या जि पैरुला।</verse>
				<verse number="32">किलैकि यों सब चीजों का पिछनै दिन-रात ऊ लोग अटगंणा छिन, जु परमेस्वर तैं नि मणदिन। मगर स्वर्ग मा रौण वळु तुमरो पिता जणदु च, कि तुमतै यों सब चीजों की जरुरत च।</verse>
				<verse number="33">इलै पैलि तुम परमेस्वर का राज की खोज कैरा, अर धरमी जीवन जीणु खुणि पूरि कोसिस कैरा, त यू सब चीज तुमतै मिली जालि।</verse>
				<verse number="34">इलै भोळ की चिन्ता भोळ खुणि ही छोड़ि द्‍या, किलैकि भोळ को दिन अपणी चिन्ता अफि कैरी ल्यालु, आज की जरुरतों खुणि तुमरि चिन्ता करण काफी च।”</verse>
			</chapter>
			<chapter number="7">
				<verse number="1">अर यीशु न भीड़ का लोगु कू इन भि बोलि कि, “एक-दुसरा पर इळजाम लगौण बन्द कैरा, ताकि तुम पर भि इळजाम नि लगये जौ।</verse>
				<verse number="2">किलैकि जन तुम इळजाम लगौन्द्‍यां, उन्‍नि तुम पर भि इळजाम लगये जालु, अर जै नापळ तुम दुसरा लोगु खुणि नपद्‍यां, उन्‍नि तुमकु भि नपै जालु।</verse>
				<verse number="3">“तू अपणा भै का आंखा मा पोड़्यूं तिण तैं किलै दिखणी, जब कि खुद तेरी आंख मा जांठु च।</verse>
				<verse number="4">अरे, जब तेरा ही आंख मा जांठु च, त तू कनकै अपणा भै कू बोलि सकदी कि, ‘भैजी, ला मि तुमरि आंखा बटि तिण निकाळि द्‍यूं?’</verse>
				<verse number="5">अरे ढोंगि, पैलि अपणा आंख बटि वे जांठा तैं त निकाळ, तब जैके तू अपणा भै की आंख को तिण अच्छी तरौं देखि के निकाळि सकलि।</verse>
				<verse number="6">“अर जु चीज पवित्र छिन, ऊंतैं कुकरों तैं नि द्‍या, अर ना ही अपणा मोति सुंगरों का अगनै डाला, कखि इन नि हो की वु ऊंतैं अपणा खुटों का तौळ दबै द्‍या, अर पिछनै मुड़ि के तुमतै फाड़ी द्‍या अर टुकड़ा-टुकड़ा कैरी द्‍या।”</verse>
				<verse number="7">अर यीशु न इन भि बोलि कि, “मांगा, त तुमतै दिये जालु, खुजैल्या त तुमतै जरुर मिललु, खखटैल्या त तुम खुणि खुलै जालु।</verse>
				<verse number="8">किलैकि जु कुई मंगदु च वेतैं मिलदु च, अर खुज्यान्दु च उ पौन्दु च, अर जु खखटान्दु च वे खुणि खुलै जान्दु।</verse>
				<verse number="9">“अर तुम मा बटि इन्द्रयो मनखि कु च, जब वेको नौनु वेसे रुट्‍टी मांगु, त उ वेतैं ढुंगो द्‍यो?</verse>
				<verse number="10">या जब वेको नौनु माछु मांगु, त उ वेतैं गुरौ द्‍यो?</verse>
				<verse number="11">अरे जब तुम बुरा ह्‍वेके भि अपणा बाल-बच्‍चों तैं अच्छी चीज देण जणद्‍यां, त स्वर्ग मा रौण वळु तुमरो पिता तुमरा मंगण पर तुमतै अच्छी चीज किलै नि द्‍यालु?</verse>
				<verse number="12">इलै ध्यान रखा, जन तुम चन्द्‍यां कि लोग तुमरा दगड़ा मा अच्छु बरतौ कैरा, ठिक उन्‍नि तुम भि लोगु का दगड़ा मा अच्छु बरतौ कैरा। अर इन तुम इलै कैरा, किलैकि नियम-कानूनों अर रैबर्यों की शिक्षा या ही च।”</verse>
				<verse number="13">अर यीशु न भीड़ का लोगु तैं एक उदारण देके इन बोलि, “संगड़ा द्‍वार बटि जाणे की पूरि कोसिस कैरा, किलैकि विणास की तरफा लि जाण वळु बाटु भौत चौड़ु च, अर वेको द्‍वार भि भौत बड़ु च अर भौत सा लोग छिन जु की ये बाटा बटि भितर जाणा छिन।</verse>
				<verse number="14">पर सदनि का जीवन की तरफा लि जाण वळु बाटु भौत संगडु च, अर वेकू द्‍वार भि भौत छुटो च अर भौत कम लोग छिन जौं तैं यू बाटु मिलदु।”</verse>
				<verse number="15">अर यीशु न बोलि, “झूठ्‍ठा रैबर्यों बटि बचि के रा, किलैकि उ भेड़ों की तरौं सीदु बणि के तुमरा पास औन्दिन, पर असल मा ऊ भितर बटि एक खतरनाक भेड़िया का जन छिन।</verse>
				<verse number="16">अर तुम ऊंतैं ऊंका कामों से पछ्याण दिल्या, किलैकि झिबलांण बटि कुई भि तिमला नि तोड़दु, अर ना ही कुई कांडों का झिबलांणो बटि अंगूर तोडदु।</verse>
				<verse number="17">अर ठिक उन्‍नि हरेक अच्छा डाळा पर अच्छा फल लगदिन, अर बुरा डाळा पर बुरा फल लगदिन।</verse>
				<verse number="18">अर ठिक इन्‍नि अच्छु डाळु कभि बुरा फल नि लै सकदु, अर ना ही बुरु डाळु अच्छा फल लै सकदु।</verse>
				<verse number="19">पर मि तुमतै बतै देन्दु, कि जै-जै डाळा पर अच्छा फल नि लगदिन, वेतैं काटी के आग मा डळै जान्दु।</verse>
				<verse number="20">अर ठिक उन्‍नि तुम भि ऊं झूठ्‍ठा रैबर्यों तैं ऊंका कामों से पछ्याणी दिल्या।</verse>
				<verse number="21">“अर जु लोग मिकू, ‘हे प्रभु, हे प्रभु’ बोन्‍ना रौनदिन, ऊंमा बटि हरेक मनखि परमेस्वर का राज मा नि जै सकदु, बस उई जै सकदु जु स्वर्ग मा रौण वळा मेरा पिता परमेस्वर की मनसा पर चलदु।</verse>
				<verse number="22">अर न्याय का दिन पर भौत सा लोग मिकू बुलला, ‘प्रभु, हे प्रभु, हमुन त तुमरा नौ से भविष्यबाणी कैरी छै, खबेसों तैं निकाळि छौ, अर तुमरा नौ से भौत सा चमत्कार भि करिनी, त क्या प्रभु तुमुन हमतै नि पछ्याणी।’</verse>
				<verse number="23">तब मिन ऊं लोगु कू साफ-साफ बोलि देण, ‘हे कुकर्मी लोगु, मिन तुमतै कभि नि जाणि मेरा समणि बटि निकळि जा।’</verse>
				<verse number="24">“इलै जु कुई मेरा यों वचनों तैं सुणी के वेका मुताबिक चलदु, उ वे अकलमन्द मनखि का जन च जैन अपणु घौर पौड़ पर बणै।</verse>
				<verse number="25">अर बाद मा भौत खतरनाक बरखा ह्‍वे अर तूफान भि ऐ, इख तक की गाड-गदिना ऐ गैनी, अर यू सब वे घौर पर टक्‍करैनी पर वु घौर फिर भि नि टूटी किलैकि वेकी बुनियाद पौड़ पर रखी छै।</verse>
				<verse number="26">पर अगर जु कुई मेरा यों वचनों तैं सुणी के वेका मुताबिक नि चलदु, त उ वे मूरख मनखि का जन च जैन अपणु घौर बळा का मथि बणै।</verse>
				<verse number="27">अर बाद मा भौत खतरनाक बरखा ह्‍वे अर तूफान भि ऐ, इख तक कि गाड-गदिना ऐ गैनी, अर यू सब वे घौर पर टक्‍करैनी अर उ तुरन्त टूटी गै अर वेको छत्यनास ह्‍वे गै।”</verse>
				<verse number="28">अर जब यीशु न यू बात बोलि दिनी, त वेका सिखौण का तरीका तैं देखि के लोग दंग रै गैनी,</verse>
				<verse number="29">किलैकि उ ऊंतैं शास्‍त्रियों की तरौं ना, बल्किन मा एक अधिकार पयां मनखि का जन उपदेस देणु छौ।</verse>
			</chapter>
			<chapter number="8">
				<verse number="1">अर उपदेस देण का बाद यीशु वे पाड़ बटि मूड़ी उतरि गै, अर बड़ी भीड़ वेका पिछनै चलण लगि गै।</verse>
				<verse number="2">अर इन ह्‍वे कि, एक कोड़ी मनखि वेका पास ऐ अर वेन यीशु तैं परणाम कैरिके बोलि, “प्रभु, अगर तुम चा त मितैं शुद्ध कैरी सकद्‍यां।”</verse>
				<verse number="3">तब वेन अपणु हाथ लगै के वेकू बोलि, “हाँ, मि चान्दु छौं कि तू शुद्ध ह्‍वे जा।” तब वेको कोड़ चलि गै अर उ शुद्ध ह्‍वे गै।</verse>
				<verse number="4">अर यीशु न वेकू बोलि, “पर सुण, येका बारा मा कै मा कुछ भि नि बोलि, मगर जा, अर अफ तैं पुरोहित मा दिखौ। अर अपणा शुद्ध होण का खातिर लोगु का समणि मूसा का दिया नियम-कानूनों का मुताबिक भेंट चड़ौ, ताकि वु लोग खुद ईं बात का गवा ह्‍वे जा, कि तू शुद्ध ह्‍वे गै।”</verse>
				<verse number="5">एक दिन यीशु कफरनहूम नगर मा ऐ। अर एक रोमी सुबेदार वेका पास ऐके वे बटि बिन्ती कैरिके बोन्‍न लगि गै कि,</verse>
				<verse number="6">“प्रभु, मेरु नौकर घौर मा लकवा रोग मा पोड़्यूं च, अर उ भौत दुखी च।”</verse>
				<verse number="7">यीशु न वेकू बोलि, “मि ऐके वेतैं खूब कैर द्‍यूलु।”</verse>
				<verse number="8">अर सुबेदार न बोलि, “प्रभु, मि इथगा लैख भि नि छौं, कि तुम मेरा घौर मा ऐ सैका, बस तुम एक शब्द ही बोलि द्‍या, त मेरु नौकर खूब ह्‍वे जालु।</verse>
				<verse number="9">किलैकि मि भि अधिकारीयों का मूड़ी काम करण वळु मनखि छौं, अर मेरा मूड़ी भि सिपै छिन। अर जब मि एक कू जाणु कू बुल्दु, त उ जान्दु च अर जब दुसरा कू औणु कू बुल्दु, त उ औन्दु च। अर जब मि अपणा नौकर तैं कुछ करणु कू बुल्दु छौं, त उ वेतैं करदु च।”</verse>
				<verse number="10">अर यों बातों तैं सुणी के यीशु हकदक रै गै। अर मुड़ि के अपणा पिछनै औण वळी भीड़ कू बोलि, “मि तुम बटि सच्‍चि बोन्‍नु छौं, कि इन्द्रयो बिस्वास मिन इस्राएल का लोगु मा भि नि देखि।”</verse>
				<verse number="11">अर मि तुमतै या बात भि बतै देन्दु, कि एक दिन भौत सरा लोग पूरब अर पच्छिम दिसा बटि आला, अर स्वर्ग का राज मा अब्राहम, इसहाक अर याकूब का दगड़ा दावत मा बैठला।</verse>
				<verse number="12">मगर जु लोग राज का असली हकदार छा ऊंतैं भैर अन्धेरा मा डळै जालु। अर उख त सिरफ रुंण अर दांतों तैं कड़गिटाण होलु।</verse>
				<verse number="13">तब यीशु न वे सुबेदार कू बोलि, “जा, अर जन तेरु बिस्वास च, त्वेकू उन्‍नि हो।” अर वेकू नौकर वे बगत ही खूब ह्‍वे गै।</verse>
				<verse number="14">अर जब यीशु पतरस का घौर मा ऐ, त वेन वेकी सासु तैं जौर मा पोड़्यूं देखि।</verse>
				<verse number="15">तब वेन वींको हाथ छ्वी अर वींको जौर उतरि गै, अर वा बिस्तर बटि उठी के ऊंकी सेवा-भगत करण लगि गै।</verse>
				<verse number="16">अर जब रुमुक ह्‍वे, त लोग अफ दगड़ा मा भौत सा इन्द्रया लोगु तैं यीशु का पास लेके ऐनी, जौं पर खबेस लग्यां छा, अर वेन ऊं खबेसों तैं अपणा वचन का द्‍वारा निकाळि दिनी, अर सब बिमार लोगु तैं खूब कैरी दिनी।</verse>
				<verse number="17">अर इन इलै ह्‍वे, ताकि उ वचन पूरु ह्‍वे जौ जु कि यशायाह रैबर्या न बोलि छौ। अर उ वचन इन च कि, “वेन हमरि कमजोरियों तैं ले लिनी, अर इख तक कि हमरि बिमारियों तैं भि अफ पर ले लिनी।”</verse>
				<verse number="18">एक दिन इन ह्‍वे कि यीशु न अपणा चौतरफि एक बड़ी भीड़ देखि, त वेन चेलों तैं आज्ञा दिनी, “चला, झील का पल्या छाला चलद्‍यां।”</verse>
				<verse number="19">तब एक शास्‍त्री न यीशु का पास ऐके बोलि, “गुरुजी, जख-जख तुम जैल्या उख-उख मि तुमरा पिछनै-पिछनै औलु।”</verse>
				<verse number="20">यीशु न वेकू बोलि, “स्याळों का उड़्यार अर पंछियों का घोल होनदिन, पर मनखि का पुत्र का पास इन्दरि कुई जगा नि च जख उ रुकी के आराम कैरो।”</verse>
				<verse number="21">तब बिस्वास करण वळा लोगु मा बटि एक मनखि न यीशु कू बोलि, “प्रभु पैलि मितैं इन इजाजत द्‍या, ताकि मि अपणा घौर जैके पैलि अपणा बुबा की सेवा कैरुं अर जब उ मोरि जाला, तब मि ऐके तुमरो चेला बणि जौलु।”</verse>
				<verse number="22">पर यीशु न वे मनखि कू बोलि, “जु आत्मिक रुप से मुरयां छिन, ऊंतैं अपणा मुरदो तैं दफनौण दे, पर तू मेरा पिछनै अऽ।”</verse>
				<verse number="23">अर यीशु एक नाव मा बैठि गै अर वेका चेला भि वेका दगड़ा मा छा, तब वु उख बटि अगनै गैनी।</verse>
				<verse number="24">अर वे ही बगत झील मा एक इथगा बड़ु तूफान ऐ, कि नाव झील की लैर की वजै से डुबण लगि गै, पर यीशु सिणु छौ।</verse>
				<verse number="25">तब चेला वेका पास ऐनी अर वेतैं झकोली के बोलि, “हे प्रभु, हमतै बचौ किलैकि हम मुरण वळा छां।”</verse>
				<verse number="26">तब यीशु न बोलि, “हे कम बिस्वास करण वळो, तुम डऽरणा किलै छाँ?” तब वेन उठी के तूफान अर लैरों तैं झिड़की, अर सब कुछ शान्त ह्‍वे गै।</verse>
				<verse number="27">अर वु हकदक ह्‍वेके बोन्‍न लगि गैनी कि “यू कन्द्रयो मनखि च जु कि तूफान अर झील भि येकी बातों तैं मणदिन?”</verse>
				<verse number="28">गदरेनियों मुलक मा दुई मनखि छा जौं पर खबेस लग्यां छा, अर यू कबरिस्तान मा रौन्दा छा। अर यू इथगा खतरनाक छा कि कुई भि वे बाटा बटि जै ही नि सकदु छौ। अर इन ह्‍वे, कि जब यीशु अर वेका चेला ये मुलक मा पौंछिनी, त यू दुईया का दुई कबरिस्तान बटि निकळि के वेका पास ऐनी।</verse>
				<verse number="29">तब ऊंन चिल्‍लै के बोलि, “हे परमेस्वर का पुत्र, तुम हम बटि क्या चाणा छाँ? क्या तुम चुण्यां बगत से पैलि ही हमतै दुख देण कू ऐ ग्यां?”</verse>
				<verse number="30">अर उख कुछ दूर सुंगरों को एक झुण्ड चरणु छौ।</verse>
				<verse number="31">अर खबेसों न यीशु बटि बिन्ती कैरी, “अगर जु तुम हमतै भैर निकळणा ही छाँ, त हमतै सुंगरों का झुण्ड मा भेजि द्‍या।”</verse>
				<verse number="32">अर वेन ऊंकू बोलि, “जा,” अर वु खबेस निकळि के सुंगरों मा बैठि गैनी। अर सुंगरों को वु झुण्ड तुरन्त भ्योळ जनै भागी अर उखुन्द लमडी के झील मा पोड़ीनी अर सब सुंगर डुबी के मोरि गैनी।</verse>
				<verse number="33">अर यू सब देखि के सुंगरों तैं चराण वळा उख बटि भगिनी, अर ऊंन नगरों मा जैके सब बातों का बारा मा, अर खबेस लग्यूं ऊं दुई लोगु का बारा मा नगर का लोगु तैं सब बात बतै दिनी।</verse>
				<verse number="34">तब नगर का सब लोग जु कुछ ह्‍वे छौ वेतैं दिखण का बाना नगर बटि निकळि के यीशु तैं मिलणु खुणि ऐनी। अर वेतैं देखि के वेसे बिन्ती कैरी, कि हमरि सीमा से भैर चलि जा।</verse>
			</chapter>
			<chapter number="9">
				<verse number="1">अर यू सब होण का बाद यीशु नाव मा चैड़ि के झील का पार अपणा नगर कफरनहूम मा ऐ गै।</verse>
				<verse number="2">अर सुणा, कुछ लोग एक लकवा का रोगी तैं बिस्तर का फंचा पर रखी के यीशु का पास लैनि। अर ऊं लोगु को बिस्वास देखि के यीशु न वेकू बोलि, “हिम्मत रख बेटा, तेरा पाप माफ ह्‍वे गैनी।”</verse>
				<verse number="3">तब कुछ शास्‍त्री लोगु न अपणा मन मा सोची, “अरे, यू त परमेस्वर की बेजती कनु च।”</verse>
				<verse number="4">पर यीशु ऊंका विचारों तैं जाणि गै अर वेन ऊंकू बोलि, “तुम लोग अपणा-अपणा मनों मा बुरी बातों तैं किलै सुचणा छाँ?</verse>
				<verse number="5">अर इन बता क्या बोन्‍नु जादा सौंगु च? इन बुलण कि, ‘तेरा पाप माफ ह्‍वे गैनी,’ या इन बोन्‍न, ‘कि उठ अर हिटण लगि जा।’</verse>
				<verse number="6">मगर मि यू इलै बोन्‍नु छौं, ताकि तुम लोग या बात जाणि जा कि मनखि का पुत्र का पास धरती पर पाप माफ करणु को अधिकार च।” तब यीशु न लकवा पोड़यां रोगी कू बोलि, “उठ, अर अपणा बिस्तर का फंचा तैं उठौ, अर अपणा घौर चलि जा।”</verse>
				<verse number="7">अर उ उठी के अपणा घौर चलि गै।</verse>
				<verse number="8">अर यू होन्द देखि के लोग डौऽरी गैनी अर परमेस्वर की बडै करण लगि गैनी, कि परमेस्वर न मनखियों तैं इन्द्रयो अधिकार दियूं च।</verse>
				<verse number="9">अर जब यीशु उख बटि अगनै जाणु छौ, त वेन मत्ती नौ का एक मनखि तैं चुंगी लेण वळो की चौकी मा बैठयूं देखि। तब यीशु न वेकू बोलि, “मेरा दगड़ा मा चल अर मेरु चेला बणि जा।” अर उ उठी के वेका पिछनै चलि गै।</verse>
				<verse number="10">अर इन ह्‍वे कि यीशु मत्ती का घौर मा खाणुक खाणु कू बैठयूं छौ, अर भौत सा चुंगी लेण वळा अर ऊंका ही जन कुछ और भि पापि लोग ऐके यीशु अर वेका चेलों का दगड़ा मा खाणुक खाणु कू बैठिनी।</verse>
				<verse number="11">अर यू देखि के फरीसी दल का लोगु न यीशु का चेलों कू बोलि, “तुमरो गुरु चुंगी लेण वळो कि, अर ऊंका ही जन दुसरा पापि लोगु का दगड़ा मा खाणुक किलै खान्दु?”</verse>
				<verse number="12">अर या बात सुणी के यीशु न ऊंकू बोलि, “जु ठिक-ठाक छिन, ऊंतैं बैद की जरुरत नि होन्दी, मगर बिमारों तैं होन्दी च।</verse>
				<verse number="13">इलै तुम पैलि जैके पवित्रशास्‍त्र की ईं बात को मतलब सीखा जन कि लिख्यूं च, ‘मि बलिदान ना, बल्किन मा दया चान्दु।’ अर जु लोग खुद तैं धरमी समझदिन मि ऊं खुणि ना, बल्किन मा पापि लोगु तैं बुलाणु खुणि अयूं छौं।”</verse>
				<verse number="14">अर एक दिन यूहन्‍ना बपतिस्मा देण वळा का चेला यीशु का पास ऐनी अर पूछी, “गुरुजी, क्या बात च कि हम अर फरीसी दल का लोग इथगा उपवास रखद्‍यां, पर तुमरा चेला बिल्कुल भि उपवास नि रखदिन?”</verse>
				<verse number="15">तब यीशु न ऊंतैं जबाब देई, “जबरि तक ब्यौला बरातियों का दगड़ा मा च, क्या बराति शोक कैरी सकदिन? मगर इन्द्रया दिन औण वळा छिन, जब ब्यौला तैं ऊंका दगड़ा बटि अलग किये जालु, तब ऊं दिनों मा ऊ उपवास रखला।”</verse>
				<verse number="16">तब यीशु न ऊंतैं एक और उदारण देके बोलि, “कुई भि मनखि नया कपड़ा मा बटि फाड़ी के पुरणा कपड़ा पर टल्‍ला नि लगौन्दु। अर अगर लगालु, त नयू फटी जालु अर उ टल्‍ला पुरणा कपड़ा मा बटि और फाड़ी देन्दु, तब पुरणु कपड़ा और भि जादा फटी जान्दु।</verse>
				<verse number="17">अर ठिक उन्‍नि कुई भि नयू अंगूरों को रस पुरणा चमड़ा का थैला मा नि भोरदु। अर अगर भोरलु, त नयू अंगूरों को रस पुरणा चमड़ा का थैला तैं फाड़ी देन्दु। अर चमड़ा को थैला भि खराब ह्‍वे जान्दु अर रस भि बोगि जान्दु। इलै नयू अंगूरों को रस नया चमड़ा का थैलों मा भोरण चयेणु, ताकि थैला अर रस दुईया का दुई बच्यां रा।”</verse>
				<verse number="18">अर जब यीशु ऊंतैं यू बात बतौणु ही छौ कि देखा, प्रार्थना भवन को एक अधिकारी वेका पास ऐ, अर वेतैं परणाम कैरिके बोलि, “गुरुजी, मेरी नौनि अभि-अभि मोरि गै, पर फिर भि तुम चलि के अपणु हाथ वीं पर रख द्‍या, ताकि वा ज्यून्द ह्‍वे जौ।”</verse>
				<verse number="19">तब यीशु उठी अर वे अधिकारी का दगड़ा मा चलण लगि गै, अर वेका चेला भि वेका दगड़ा मा छा।</verse>
				<verse number="20">अर जब ऊ जाणा ही छा, कि सुणा, एक जनानि जींतैं बारह सालों बटि ल्वे बुगणो को रोग छौ, वींन पिछनै बटि ऐके यीशु का कपड़ा पर लग्यां झालरों तैं छ्वी।</verse>
				<verse number="21">अर इन वींन इलै कैरी किलैकि वा अपणा मन मा सोचदी छै कि, “बस, अगर जु मि यीशु का कपड़ों पर लग्यां झालरों तैं छ्वी द्‍यूलु, त ठिक ह्‍वे जौलु।”</verse>
				<verse number="22">अर यीशु न पिछनै मुड़ि के वींतैं देखि अर बोलि, “हे बेटी, हिम्मत रख, किलैकि तिन बिस्वास कैरी, इलै तू खूब ह्‍वे गै।” अर सुणा, वा जनानि वे ही बगत खूब ह्‍वे गै।</verse>
				<verse number="23">अर जब यीशु वे अधिकारी का घौर मा पौंछी, त वेन उख लोगु को रुंण-धुण अर मातम को गीत गाण सुणी, अर यू लोग नौनि का खातिर भौत जादा दुख जतौणा छा।</verse>
				<verse number="24">तब वेन ऊं लोगु कू बोलि, “सब लोग इख बटि भैर चलि जा, किलैकि नौनि मोरि नि च बल्किन मा सिंणी च।” अर या बात सुणी के लोग यीशु पर हसण लगि गैनी।</verse>
				<verse number="25">पर जब भीड़ तैं भैर निकळे गै, तब यीशु भितर गै। अर वेन नौनि को हाथ पकड़ी, अर नौनि ज्यून्द ह्‍वेके उठी गै।</verse>
				<verse number="26">अर ईं बात की चर्चा वे पूरा मुलक मा फैली गै।</verse>
				<verse number="27">अर जब यीशु उख बटि अगनै जाणु छौ, त दुई अन्धा मनखि इन चिलौन्द-चिलौन्द वेका पिछनै ऐनी कि, “हे दाऊद का वंशज, हम पर दया कैर।”</verse>
				<verse number="28">अर जब यीशु घौर मा पौंछी, त वु दुई अन्धा भि वेका पास उखि ऐ गैनी। अर यीशु न ऊं बटि पूछी, “क्या तुमतै बिस्वास च कि मि तुमतै खूब कैरी सकदु छौं?” तब ऊंन यीशु तैं जबाब दिनी, “हाँ, प्रभु हम बिस्वास करद्‍यां।”</verse>
				<verse number="29">तब वेन ऊंका आंख्यों तैं छ्वी के बोलि, “तुमरा बिस्वास का मुताबिक तुम खुणि हो।”</verse>
				<verse number="30">अर ऊंका आंखा खुलि गैनी। तब यीशु न ऊंतैं चितै के बोलि, “ईं बात का बारा मा कैतैं पता नि चलण चयेणु।”</verse>
				<verse number="31">पर ऊंन उख बटि निकळि के पूरा मुलक मा वेकी चर्चा फैलै दिनी।</verse>
				<verse number="32">अर जब यीशु अर वेका चेला वे घौर बटि निकळणा ही छा, कि कुछ लोग एक गूंगा मनखि तैं यीशु का पास लेके ऐनी, जै पर खबेस लग्यूं छौ। अर वे खबेस न वे मनखि तैं गूंगु बणै के रख्युं छौ।</verse>
				<verse number="33">अर जब यीशु न वे खबेस तैं निकळि दिनी, त गूंगु मनखि बुलण लगि गै। अर यू देखि के भीड़ का लोग हकदक ह्‍वेके बोन्‍न लगि गैनी, “हम इस्राएली लोगु मा इन्द्रयो काम अभि तक कैन नि देखि”</verse>
				<verse number="34">मगर फरीसी दल का लोग बुलण लगि गैनी कि, “यू मनखि त खबेसों का अधिकारी की मदद से खबेसों तैं निकळदु।”</verse>
				<verse number="35">अर यीशु वे मुलक का नगरों अर ग्‍वोंऽ मा घूमणु रै, अर उखा प्रार्थना भवनों मा जैके उपदेस देन्दु अर परमेस्वर का राज को शुभ समाचार परचार करदु छौ। अर उखा लोगु की बिमारियों तैं अर सब किसमे कमजोरियों तैं दूर करदु छौ।</verse>
				<verse number="36">जब यीशु न भीड़ तैं देखि त वेतैं लोगु पर बड़ु तरस ऐ, किलैकि ऊ लोग मुसीबत मा छा अर ऊंकी मदद करण वळु कुई नि छौ। अर वु त ऊं भेड़ों का जन छा जौं को कुई सैं गुसैं नि होन्दु।</verse>
				<verse number="37">तब वेन अपणा चेलों कू बोलि, “पक्यां पुंगड़ा त भौत छिन, पर मजदूरों की कमी च।</verse>
				<verse number="38">इलै पुंगड़ा का मालिक बटि बिन्ती कैरा कि उ अपणा पुंगड़ों की लवै करणु खुणि मजदूरों तैं भेजि द्‍यो।”</verse>
			</chapter>
			<chapter number="10">
				<verse number="1">अर यीशु न अपणा बारह चेलों तैं अपणा पास बुलै अर ऊंतैं मनखियों मा बटि खबेसों तैं निकळण को, अर सब किसमे बिमारियों तैं अर हरेक कमजोरियों तैं दूर करण को अधिकार दिनी।</verse>
				<verse number="2">अर यीशु का खास चेलों का नौ इन छिन, शमौन, जैकू पतरस भि बुले जान्दु, अर वेकू भै अन्द्रियास, जबदी का दुई नौना याकूब अर वेको भै यूहन्‍ना,</verse>
				<verse number="3">फिलिप्पुस, बरतुल्मै, थोमा, चुंगी लेण वळु मत्ती हलफई को नौनु याकूब अर तद्‍दै,</verse>
				<verse number="4">शमौन कनानी अर यहूदा इस्करियोती जैन बाद मा यीशु तैं धोखा देके पकड़वै दिनी।</verse>
				<verse number="5">अर यीशु न यों बारह चेलों तैं इन आज्ञा देके भेजि कि, “ऊं लोगु का बीच मा नि जयां जु यहूदी जाति का नि छिन, अर ना ही सामरी लोगु का नगर मा जयां।</verse>
				<verse number="6">पर इस्राएली कुटुम्ब का लोगु का पास ही जयां जु कि हरचि भेड़ों का जन छिन।</verse>
				<verse number="7">अर जब तुम ये सफर तैं करिल्या त इन परचार कर्यां कि, ‘परमेस्वर राज करण वळु च अर उ नजदीक ही च।’</verse>
				<verse number="8">अर बिमारों तैं खूब कैरा, मुरयां लोगु तैं ज्यून्द कैरा, अर कोड़ियों तैं शुद्ध कैरा, अर खबेसों तैं मनखियों मा बटि निकाळा। अर जन यू अधिकार तुमतै मुफत मा मिली, ठिक उन्‍नि तुम भि लोगु तैं यू मुफत मा द्‍या।</verse>
				<verse number="9">“अर अपणा बटुवा मा नऽ त सोना लियां अर ना चान्दी, अर ना ही तांबा रख्यां।</verse>
				<verse number="10">अर यात्रा खुणि नऽ त झोळा रख्यां अर ना ही दुई कुरता, नऽ त जुता अर ना लाठु रख्यां, किलैकि इन बुले जान्दु कि काम करण वळो तैं ऊंकी ध्याड़ि जरुर मिलण चयेणी।</verse>
				<verse number="11">“अर जै भि नगर या गौं मा तुम जैल्या, त पता लग्यां कि उख काबिल मनखि कु च अर जब तक वे नगर या गौं बटि नि निकळिल्या, तब तक वेका इख ही रयां।</verse>
				<verse number="12">अर जै घौर मा तुम जैल्या त सबसे पैलि ऊं लोगु कू बुलयां, ‘तुम लोगु तैं शान्ति मिलु।’</verse>
				<verse number="13">अर अगर उख कुई ये लैख होलु त शान्ति को जु आसिरबाद तुमुन ऊंतैं देई वु ऊं पर ठैरि जालु, अर अगर वु काबिल नि होलु त शान्ति को वु आसिरबाद तुमरा पास वापस ऐ जालु।</verse>
				<verse number="14">अर अगर कुई तुमतै स्वीकार नि करलु, अर ना ही तुमरि बातों तैं सुणलु, त वे घौर या वे नगर बटि निकळद दौं अपणा खुटों पर लगीं धूळ तैं झाड़ि द्‍या।</verse>
				<verse number="15">अर मि तुमतै सच्‍चि मा बतै देन्दु, कि जन हालत सदोम अर अमोरा की खराब ह्‍वे छै, वे नगर की हालत वेसे भि खतरनाक खराब होलि।”</verse>
				<verse number="16">अर यीशु न खास चेलों कू इन भि बोलि, “सुणा, जन भेड़ खतरनाक भेड़ियों का बीच मा जान्दी, ठिक उन्‍नि मि भि तुमतै बुरा लोगु का बीच मा भेजणु छौं। इलै गुरौ की तरौं चालाक अर कबूतर की तरौं सीदा बणा।</verse>
				<verse number="17">अर लोगु से चौकस रा, किलैकि उ तुमतै न्याय खुणि पंचैत का हवाला कैरी द्‍याला, अर अपणा प्रार्थना भवनों मा तुम पर कोड़ा मरवाला।</verse>
				<verse number="18">अर मेरी वजै से वु तुमतै सासन करण वळो अर राजाओं का समणि लि जाला, अर यू वु अवसर होलु जब तुम यों का अर ऊं लोगु का समणि मेरा गवा ह्‍वा जु यहूदी जाति का नि छिन।</verse>
				<verse number="19">अर जब ऊ तुमतै पकड़वाला, त तुम इन चिन्ता नि कर्यां कि क्या बुलण अर कनकै बुलण, किलैकि जु कुछ भि तुमतै बोन्‍न होलु वु उबरि तुमतै बतये जालु।</verse>
				<verse number="20">अर याद रखा कि बोन्‍न वळा तुम नि छाँ, बल्किन मा तुमरा भितर पिता परमेस्वर को पवित्र आत्मा च जु कि तुमरा द्‍वारा बोललु।</verse>
				<verse number="21">“अर भै अपणा ही भै तैं जान से मरवौणु खुणि सौंपी द्‍यालु, अर ठिक उन्‍नि बुबा अपणा नौना तैं मरवौणु खुणि सौंपी द्‍यालु, इख तक की बाल-बच्‍चा अपणा ही ब्वे-बबों का खिलाप मा होला अर ऊंतैं मरवौणु खुणि सौंपी द्‍याला।</verse>
				<verse number="22">अर वु तुम से इलै नफरत करला, किलैकि तुम मेरा नौ पर बिस्वास करद्‍यां, पर जु मनखि आखिरी तक सबर रखलु वेतैं ही बचयै जालु।</verse>
				<verse number="23">अर जब वु लोग तुमतै ये नगर मा सताला तब तुम दुसरा नगर मा भागी जयां। अर मि तुम बटि सच्‍च बोन्‍नु छौं कि तुम इस्राएल देस का सब नगरों मा परचार पूरु भि नि कैरी सकिल्या कि तबरि तक मनखि को पुत्र ऐ जालु।</verse>
				<verse number="24">“अर एक चेला अपणा गुरु से बड़ु नि होन्दु, अर ना ही एक नौकर अपणा मालिक से बड़ु होन्दु।</verse>
				<verse number="25">अगर एक चेला अपणा गुरु का जन अर एक नौकर अपणा मालिक का जन ह्‍वे जौ, त वे खुणि इथगा भि काफी च। अर जब ऊं लोग न घौर का मालिक खुणि ही बालजबूल बोलियालि, त वेका घौर का लोगु खुणि क्या कुछ नि बुलला?”</verse>
				<verse number="26">“इलै मि तुमतै बतै देन्दु कि, लोगु बटि नि डऽरयां किलैकि इन्दरि कुई भि बात नि च ज्वा की छिपी हो, अर वेको खुलासा नि किये जौ, अर ना ही कुई इन्द्रयो गुप्‍त राज छिप्यूं च जैको पता नि चलो।</verse>
				<verse number="27">अर राज कि जु बात मि राति तुमतै बतौन्दु, तुम दिन का उज्याळा मा वु लोगु तैं बता, अर जु कुछ भि मिन तुमरा कन्दूड़ मा बोलि, तुम खुलाआम जैके लोगु मा वेको परचार कैरा।</verse>
				<verse number="28">अर ऊं लोगु बटि नि डौऽरा जु तुमरि जान त ले सकदिन, मगर तुमरि आत्मा को नास नि कैरी सकदिन। पर मि तुमतै चितै देन्दु कि तुमतै परमेस्वर पर अपणी पूरि सरदा रखण चयेणी, अर वेसे डऽरण भि चयेणु, किलैकि उ तुमरा सरील अर आत्मा दुईयों तैं नरकलोक मा डालि के नास करण की ताकत रखदु।</verse>
				<verse number="29">“अरे सुणा, क्या दुई घिंडुडि भौत कम कीमत मा नि बिकदिन? फिर भि तुमरा पिता परमेस्वर की इच्छा का बगैर ऊंमा बटि एक भि भ्वीं मा नि पोड़दिन।</verse>
				<verse number="30">तुमरा मुण्ड़ का सब बाळ भि गिणयां छिन।</verse>
				<verse number="31">इलै डौऽरा ना, किलैकि तुमरि कीमत भौत घिंडुडियों से भि जादा च।”</verse>
				<verse number="32">अर यीशु न अपणा खास चेलों कू इन भि बोलि, “जु मनखि लोगु का समणि मितैं स्वीकार करलु, मि भि वे मनखि तैं स्वर्ग मा रौण वळा पिता का समणि स्वीकार करलु।</verse>
				<verse number="33">पर जु मनखि लोगु का समणि मितैं नकारी दयालु, त मि भि वेतैं स्वर्ग मा रौण वळा पिता का समणि नकारी द्‍यूलु।”</verse>
				<verse number="34">“अर इन नि समझा कि मेरी वजै से लोगु का बीच मा शान्ति राली, मगर मि तुमतै बतै देन्दु कि मेरी वजै से त लोगु का बीच मा फूट पोड़ि जालि।</verse>
				<verse number="35">“‘अर मेरी वजै से एक नौनु अपणा बुबा का खिलाप मा ह्‍वे जालु, अर एक नौनि अपणा ब्वे का खिलाप मा, अर ठिक इन्‍नि एक ब्वारि अपणा सासु का खिलाप मा ह्‍वे जालि।</verse>
				<verse number="36">अर मनखि का दुसमन वेका घौर का लोग ही होला।’</verse>
				<verse number="37">“अगर कुई मनखि अपणा ब्वे-बाब तैं मिसे जादा प्यार करदु, त वु मेरु चेला होण का लैख नि च। अर ठिक उन्‍नि अगर कुई अपणा नौना या नौनि तैं मिसे जादा प्यार करदु, त उ भि मेरु चेला होण का लैख नि च।</verse>
				<verse number="38">अर जु कुई अपणी क्रूस तैं लेके मेरा पिछनै नि चलदु उ भि मेरु चेला होण का लैख नि ह्‍वे सकदु।</verse>
				<verse number="39">किलैकि जु कुई अपणा पराण तैं बचौण चालु, उ वेतैं ख्वे द्‍यालु। मगर जु कुई मेरा खातिर अपणा पराण तैं ख्वे द्‍यालु, उई मनखि सदनि को जीवन पालु।”</verse>
				<verse number="40">अर यीशु न ऊंकू इन भि बोलि, “जु तुमतै स्वीकार करदु उ मितैं स्वीकार करदु। अर जु मितैं स्वीकार करदु उ वेतैं स्वीकार करदु जै पिता परमेस्वर न मितैं भेजि च।</verse>
				<verse number="41">अर अगर कुई परमेस्वर का रैबर्या तैं रैबर्या समझि के स्वीकार करदु, त वे मनखि तैं उई इनाम मिललु जु की एक रैबर्या तैं मिलदु। अर अगर कुई एक धरमी मनखि तैं धरमी समझि के स्वीकार करदु, त वे मनखि तैं उई इनाम मिललु जु की एक धरमी तैं मिलदु।</verse>
				<verse number="42">मि तुम बटि सच्‍च बोन्‍नु छौं कि, अगर कुई भि मनखि यों दीन चेलों मा बटि कै एक तैं भि मेरु चेला समझि के एक गिलास ठण्डु पाणि पिलालु, त वेतैं जरुर इनाम मिललु।”</verse>
			</chapter>
			<chapter number="11">
				<verse number="1">अर जब यीशु न अपणा बारह चेलों तैं आज्ञा दे दिनी, त उ उख बटि चलि गै। अर ऊंका गलील मुलक का नगरों मा जैके उपदेस अर परचार करण लगि गै।</verse>
				<verse number="2">मगर जब यूहन्‍ना बपतिस्मा देण वळा न जेलखाना मा यीशु मसीह का कामों का बारा मा सुणी, तब वेन अपणा चेलों तैं वेका पास या बात पूछण कू भेजि कि,</verse>
				<verse number="3">“क्या तुम उई मसीह छाँ जु औण वळु छौ, या हम कै दुसरो को इंतजार कैरा?”</verse>
				<verse number="4">तब यीशु न ऊंतैं जबाब दिनी, “जा, अर जु कुछ तुम दिखणा अर सुनणा छाँ, वेका बारा मा यूहन्‍ना तैं बतै दियां कि,</verse>
				<verse number="5">‘अन्धा दिखणा छिन, अर लूला-लंगड़ा चलणा-फिरणा छिन, अर कोड़ियों तैं शुद्ध किये जाणु च, बैरा सुनणा छिन अर मुरदो तैं ज्यून्द किये जाणु च, अर गरीबों तैं शुभ समाचार सुणये जाणु च।</verse>
				<verse number="6">अर धन्य च उ, जु मि पर सक नि करदु बल्किन मा बिस्वास करदु।’”</verse>
				<verse number="7">अर जब यूहन्‍ना का भेज्यां चेला वापिस चलि गैनी, तब यीशु न यूहन्‍ना का बारा मा लोगु तैं बतै, “तुम निर्जन जगा मा क्या दिखणु कू ग्यां छा? बथौं बटि हिलण वळा निगुंला तैं क्या?</verse>
				<verse number="8">फिर तुम क्या दिखणु कू ग्यां छा? क्या मखमल का कपड़ा पैरयां एक मनखि तैं? सुणा, जु सानदार कपड़ा पैरदिन, ऊ त राज महलों मा रौनदिन।</verse>
				<verse number="9">फिर तुम क्या दिखणु कू गै छा? क्या परमेस्वर का एक रैबर्या तैं दिखण कू? हाँ मि तुमतै बतै देन्दु, कि रैबर्या से भि कै बड़ा तैं दिखणु कू ग्यां।</verse>
				<verse number="10">अर यू उई च, जैका बारा मा पवित्रशास्‍त्र मा लिख्यूं कि, “‘देख, मि अपणा रैबार देण वळा तैं त्वेसे पैलि भेजणु छौं। अर उ त्वेसे पैलि जैके त्वे खुणि बाटु तयार करलु।’</verse>
				<verse number="11">“अर मि तुम बटि सच्‍च बोन्‍नु छौं, कि जथगा भि लोगु न जनानियों बटि जनम लियूं च, ऊंमा बटि यूहन्‍ना से महान कुई नि च। पर जु परमेस्वर का राज मा सबसे छुटो च, उ यूहन्‍ना से भि महान च।”</verse>
				<verse number="12">अर जब यूहन्‍ना बपतिस्मा देण वळन परचार करण शुरु कैरी, तब बटि अभि तक बुरा लोग परमेस्वर का राज की शिक्षा को अपणी पूरि ताकतळ विरोध कना छिन, अर वेतैं नास करण की पूरि कोसिस भि कना छिन।</verse>
				<verse number="13">किलैकि यूहन्‍ना बपतिस्मा देण वळा का बगत तक परमेस्वर का नियम-कानूनों मा बटि और सब रैबर्यों की भविष्यबाणियों मा बटि लोग तैं सिखये गै।</verse>
				<verse number="14">अर अगर तुम मेरी मनण चा, त एलिय्याह जु कि औण वळु छौ उ यूहन्‍ना ही च।</verse>
				<verse number="15">जैका पास कन्दूड़ छिन, उ सुणी ल्यो।</verse>
				<verse number="16">“अर मि ये जमना का लोगु कि तुलना कै बटि कैरुं? यू त ऊं नौनो का जन छिन जु कि बजारों मा बैठदिन, अर अपणा खेल मा एक-दुसरा कू चिल्‍लै-चिल्‍लै के बुल्दिन कि,</verse>
				<verse number="17">‘हमुन तुम खुणि बांसुळि बजै मगर तुम नि नच्यां, अर हमुन दुख देण वळु गीत गै मगर तुम नि रुंयां।’</verse>
				<verse number="18">यूहन्‍ना बपतिस्मा देण वळु ऐ, जु नऽ त खाणुक खान्दु छौ, अर ना ही खाण-पीण करदु छौ, अर फिर भि लोग बुल्दिन कि, ‘वे पर खबेस लग्यूं च।’</verse>
				<verse number="19">जब की मनखि को पुत्र ऐ, अर खान्दु-पीन्दु च त लोग बुल्दिन कि, ‘देखा, यू त पेटू अर जादा खाण-पीण वळु मनखि च, अर चुंगी लेण वळो को अर इन्द्रया ही दुसरा पापि लोगु को दगड़्या च।’ पर फिर भि परमेस्वर का ज्ञान का द्‍वारा जु कुछ भि काम निकळि के औन्दिन, वु इन साबित कैरी देन्दिन कि उ ज्ञान सच्‍चु च।”</verse>
				<verse number="20">फिर यीशु न ऊं नगरों तैं भौत झिड़की जौं नगरों मा वेन चमत्कार का भौत काम कैरी छा। अर इन वेन इलै कैरी, किलैकि उखा लोगु न अपणा पापों को पस्ताप नि कैरी।</verse>
				<verse number="21">यीशु न बोलि, “हे खुराजीन अर बैतसैदा नगर का लोगु तुम पर हाय च, किलैकि जु चमत्कारिक काम तुमरा इख किये गैनी, अगर ऊ काम सूर अर सैदा नगर मा किये जान्दा, त उखा लोगु न कभि टाट ओड़ि के अर छारा मा बैठि के पस्ताप कैरी देण छौ।</verse>
				<verse number="22">पर मि तुमतै बतै देन्दु, कि न्याय का दिन सूर अर सैदा नगर का लोगु की दसा से भि जादा खतरनाक तुमरि होलि।</verse>
				<verse number="23">हे कफरनहूम नगर का लोगु, तुम क्या सोचद्‍यां कि तुमतै स्वर्ग तक ऊँचो किये जालु, ‘नऽ रे ना’ तुमतै त अधलोक मा डळै जालु, किलैकि सामर्थ का जु काम तुम लोगु का बीच मा किये गैनी, अगर वु सदोम नगर मा किये जान्दा, त वु नगर आज तक बणयूं रौन्दु।</verse>
				<verse number="24">पर मि तुमतै बतै देन्दु, कि न्याय का दिन सदोम नगर का लोग की दसा से भि जादा खतरनाक तुमरि होलि।”</verse>
				<verse number="25">अर वे ही बगत यीशु न पिता परमेस्वर बटि प्रार्थना कैरिके बोलि, “हे मेरा पिता, स्वर्ग अर धरती का प्रभु, मि तुमरो धन्यवाद करदु, कि यू सब बात तुमुन समझदारों अर अकलमन्दो बटि छिपै, अर ऊं लोगु पर परगट कैरी जु बच्‍चों का जन छिन।</verse>
				<verse number="26">हाँ पिता किलैकि तुमतै यू ही अच्छु लगि।”</verse>
				<verse number="27">तब यीशु न लोगु कू इन भि बोलि, “पिता परमेस्वर न सब कुछ मि मा सौंप्याली, अर पिता का अलावा कुई नि जणदु कि पुत्र कु च, अर ना ही पुत्र का अलावा कुई जणदु की पिता कु च, पर केवल पुत्र ही च जै पर उ चान्दु, वे पर वेतैं परगट करदु।”</verse>
				<verse number="28">“हे सब मेहनत कैरी-कैरिके थक्यां अर बोझ से दबयां लोगु, मि मू आ, मि तुमतै आराम द्‍यूलु।</verse>
				<verse number="29">मेरा जुवा तैं अपणा मथि ले ल्या अर मि बटि सीखा, किलैकि मेरु सभौ नमर अर मन से मि दीन छौं अर तुमरा मन तैं चैन मिललु।</verse>
				<verse number="30">किलैकि मेरा अधीन मा औण सरल च, अर जु मि सिखौन्दु ऊ कठिन नि च।”</verse>
			</chapter>
			<chapter number="12">
				<verse number="1">अर सब्त का दिन यीशु अपणा चेलों का दगड़ा मा पुंगड़ों बटि जाणु छौ, अर वेका चेलों तैं भूक लगि अर वु अन्‍न का बलडो तैं तोड़ि के खाण लगि गैनी।</verse>
				<verse number="2">अर यू देखि के फरीसी दल का लोगु न यीशु कू बोलि, “अरे सुण, तेरा चेला वु काम कना छिन, जु कि सब्त का दिन पर करण ठिक नि च।”</verse>
				<verse number="3">तब यीशु न ऊंतैं जबाब दिनी, “क्या तुमुन यू नि पैड़ी, कि जब राजा दाऊद अर वेका दगड़्या भूका छा, त वेन क्या कैरी?</verse>
				<verse number="4">उ परमेस्वर का मन्दिर मा गै, अर अरपण मा चड़ईं रुट्‍टी तैं वेन अर वेका दगड़्यों न खै। जब कि ऊं रुट्‍टीयों तैं खाण वे खुणि अर वेका दगड़्यों खुणि ठिक नि छौ, मगर ऊं रुट्‍टीयों तैं केवल पुरोहित लोग ही खै सकदा छा।</verse>
				<verse number="5">अर क्या तुमुन नियम-कानूनों मा इन नि पैड़ी, कि पुरोहित लोग भि सब्त का दिन मन्दिर मा काम करण का बगत पर कई बार सब्त का नियम तोड़ि देन्दिन, मगर फिर भि ऊंतैं निरदोष मणै जान्दु?</verse>
				<verse number="6">मगर मि तुमतै बतै देन्दु कि इख उ च, जु की मन्दिर से भि बड़ु च।</verse>
				<verse number="7">अर जन कि लिख्यूं भि च कि, ‘मि बलिदान ना, बल्किन मा दया चान्दु।’ कास तुम ईं बात को मतलब जाणि जान्दा त तुम निरदोष लोगु पर दोष लगौण वळा नि ठैरदा।</verse>
				<verse number="8">किलैकि मनखि को पुत्र त सब्त का दिन को भि प्रभु च।”</verse>
				<verse number="9">अर येका बाद यीशु उख बटि निकळि के यहूदी लोगु का प्रार्थना भवन मा ऐ।</verse>
				<verse number="10">अर उख एक आदिम छौ, जैको एक हाथ सुक्यूं छौ। अर उख कुछ लोगु न यीशु पर दोष लगौणु का खातिर वेसे पूछी, “गुरुजी, सब्त का दिन पर कै मनखि तैं हमरा नियम-कानूनों का मुताबिक खूब करण ठिक च या नि च?”</verse>
				<verse number="11">तब यीशु न ऊंतैं जबाब दिनी, “मानल्या, तुम मा बटि कै का पास एक ही भेड़ हो, अर अगर वा सब्त का दिन खडोळुन्द लमडी जौ, त अब इन बतावा कि तुम मा बटि इन्द्रयो कु जि मनखि होलु जु कि वींतैं पकड़ी के भैर नि निकळळु?</verse>
				<verse number="12">मनखि की कीमत त फिर भि वीं भेड़ से कई जादा च। इलै सब्त का दिन पर भलै करण ठिक बात च, अर यां की इजाजत नियम-कानून भि देन्दिन।”</verse>
				<verse number="13">तब यीशु न सुख्यां हाथ वळा मनखि कू बोलि, “अपणु हाथ अगनै बढ़ो” अर वेन बढै, तब वेको वु हाथ भि दुसरा हाथ का जन ठिक ह्‍वे गै।</verse>
				<verse number="14">तब फरीसी दल का लोग उख बटि भैर चलि गैनी, अर यीशु तैं जान से मरणु खुणि सला बणौण लगि गैनी।</verse>
				<verse number="15">अर यीशु यू जाणि गै, अर उख बटि चलि गै। अर भौत सा लोग वेका पिछनै चलण लगि गैनी, अर वेन सब बिमार लोगु तैं खूब कैरी,</verse>
				<verse number="16">अर ऊं लोगु तैं वेन इन भि आदेस देके बोलि कि, “मेरा बारा मा कैतैं नि बतयां।”</verse>
				<verse number="17">अर या बात यीशु न इलै बोलि, ताकि वु वचन पूरु ह्‍वे जौ, जु कि यशायाह रैबर्या का द्‍वारा बुले गै छौ। अर वु वचन इन च कि,</verse>
				<verse number="18">“देखा, यू मेरु सेवक च जैतैं मिन चुणी, यू मेरु लाडलु च अर येसे मेरु मन भौत खुश च, अर मि येतैं अपणा पवित्र आत्मा का द्‍वारा ताकत द्‍यूलु, अर मि कनकै सब देसों का लोगु तैं धरमी बणौलु, वांको परचार वु लोगु का बीच मा करलु।</verse>
				<verse number="19">अर वु न त कै का दगड़ा मा झगड़ा करलु, अर वु कै खुणि भि चिल्‍लै के नि बुललु, अर ना ही वेकी आवाज सड़कों मा सुण्यालि।</verse>
				<verse number="20">अर जु लोग निगुंला का कुंगळा हिस्सा का जन छिन, ऊंतैं वु तोड़ि के नास नि करलु, अर जु लोग बुझण वळा द्‍यू का जन छिन ऊंतैं वु नि बुझालु। अर जबरि तक परमेस्वर का सच्‍चा न्याय तैं जीत नि मिली जौ, तबरि तक उ इन्‍नि कनु रालु।</verse>
				<verse number="21">देखा अर सुणा, देस-देस का लोग वेका नौ पर अपणी आस बणै के रखला।”</verse>
				<verse number="22">तब लोग यीशु का पास एक इन्द्रया मनखि तैं लेके ऐनी जै पर खबेस लग्यूं छौ, अर वे खबेस की वजै से उ अन्धु अर गूंगु ह्‍वे गै छौ। अर यीशु न वेतैं खूब कैर दिनी, अर वु दिखण अर बुलण लगि गै।</verse>
				<verse number="23">अर ईं बात पर सब लोग हकदक ह्‍वेके बोन्‍न लगि गैनी, “अरे, कखि यू उई मसीह त नि च, जु कि राजा दाऊद का वंश मदि औण वळु छौ।”</verse>
				<verse number="24">पर फरीसी दल का लोगु न यू सुणी के बोलि, “यू खबेसों का अधिकारी बालजबूल याने की शैतान की मदद से खबेसों तैं निकळदु।”</verse>
				<verse number="25">पर यीशु ऊंका मनों की बात जाणि गै अर वेन ऊंकू बोलि, “अगर कै राज्य मा फूट पोड़ि जौ, त उ राज्य बरबाद ह्‍वे जान्दु। अर ठिक उन्‍नि अगर कै नगर या परिवार मा फूट पोड़ि जौ, त उ भि बरबाद ह्‍वे जान्दु,</verse>
				<verse number="26">अर अगर शैतान ही शैतान तैं निकळण लगि जालु, त इन कैरिके वु खुद ही अपणा खिलाप ह्‍वे जालु, अर फिर वेको राज कनकै बणयूं रालु?</verse>
				<verse number="27">अगर जु मि बालजबूल की मददळ खबेसों तैं निकळदु, त तुमरि शिक्षा का मुताबिक चलण वळा लोग खबेसों तैं कै की मददळ निकळदिन? इलै वु लोग ही तुमतै गळत साबित करला।</verse>
				<verse number="28">पर अगर जु मि परमेस्वर की आत्मा की मददळ खबेसों तैं निकळदु, त ईं बात तैं सुणिल्या कि परमेस्वर को राज तुमरा नजदीक ऐ गै।</verse>
				<verse number="29">“अर अगर कुई मनखि कै ताकतबर मनखि का घौर मा घुसी के वेको समान चुरण चान्दु हो, त पैलि वेतैं ताकतबर मनखि तैं बन्धण पोड़लु। तब उ मनखि वेका घौर का समान तैं आराम से चुरै सकदु च।</verse>
				<verse number="30">जु मेरा दगड़ा मा नि च उ मेरा खिलाप च, अर जु मेरा दगड़ा मा लोगु तैं इकट्‍ठा नि करलु उ ऊंतैं परमेस्वर बटि दूर लि जान्दु।</verse>
				<verse number="31">इलै मि तुमतै बतै देन्दु कि मनखियों को हरेक पाप अर ऊंकी बुरी बातों तैं माफ किये जालु, पर अगर कुई मनखि पवित्र आत्मा का खिलाप मा बुललु, त वेको वु पाप माफ नि किये जालु।</verse>
				<verse number="32">अर ठिक उन्‍नि अगर कुई मनखि का पुत्र का खिलाप मा कुछ बोललु, त वेतैं माफी दिये जालि, पर अगर कुई पवित्र आत्मा का खिलाप मा कुछ बोललु, त वेको यू अपराध ना त ये युग मा अर ना ही औण वळा युग मा माफ किये जालु।”</verse>
				<verse number="33">फिर यीशु न इन भि बोलि, “अगर तुम कै डाळा कू अच्छु बुल्द्‍यां, त वेका फल कू भि अच्छु बोला, अगर तुम कै डाळा कू बेकार बुल्द्‍यां त वेका फल कू भि बेकार बोला, किलैकि डाळु अपणा फलों बटि ही पछ्याणे जान्दु।</verse>
				<verse number="34">हे गुरौ का बच्‍चों, तुम त बुरा छाँ, त फिर तुम अच्छी बात कनकै बोलि सकद्‍यां? किलैकि जु कुछ मन मा भोरयूं होन्दु, मनखि का गिच्‍चा बटि उई निकळदु।</verse>
				<verse number="35">एक अच्छा मनखि का मन मा अच्छी बात होनदिन, इलै उ अपणा मन से अच्छी बात ही बुल्दु। अर एक बुरा मनखि का मन मा बुरी बात होनदिन, इलै उ अपणा मन से बुरी बात ही बुल्दु।</verse>
				<verse number="36">मि तुम बटि बोन्‍नु छौं कि न्याय का दिन पर हरेक मनखि तैं वेकी बुलिं बेकार बातों को हिसाब-किताब देण पोड़लु।</verse>
				<verse number="37">किलैकि तू अपणी ही बातों की वजै से निरदोष ठैरैये जैली, अर अपणी ही बातों की वजै से तू दोषी ठैरीलि।”</verse>
				<verse number="38">तब कुछ शास्‍त्रियों अर फरीसी दल का लोगु न यीशु कू बोलि, “गुरुजी, हम चन्द्‍यां कि तुम हमतै एक चमत्कारिक चिन्‍न दिखा।”</verse>
				<verse number="39">वेन ऊंतैं जबाब दिनी कि, “ईं पीढ़ी का बुरा अर बिस्वासघात करण वळा लोग ही चमत्कारिक चिन्‍न खुज्यौदिन, पर परमेस्वर का रैबर्या योना का दगड़ा मा जु कुछ भि ह्‍वे, वे चिन्‍न का अलावा ऊंतैं कुई चमत्कारिक चिन्‍न नि दिखये जालु।</verse>
				<verse number="40">अर जन योना एक बड़ा माछा का पुटगुन्द तीन दिन अर तीन रात तक रै, ठिक उन्‍नि मनखि को पुत्र भि धरती का तौळ तीन दिन अर तीन रात तक रालु।</verse>
				<verse number="41">अर नीनवे नगर का लोग भि न्याय का दिन पर ये जमना का लोगु का दगड़ा मा खड़ा होला अर तुमतै दोषी ठैराला, किलैकि ऊंन योना रैबर्या का द्‍वारा कियां परचार तैं सुणी के पस्ताप कैरी। पर सुणा, इख त उ च जु की योना रैबर्या से भि महान च, पर तुम वे पर बिस्वास नि करद्‍यां।</verse>
				<verse number="42">“अर दक्छिण की महाराणी न्याय का दिन पर ये जमना का लोगु का दगड़ा मा खड़ि होलि अर तुमतै दोषी ठैराली, किलैकि जब वींन राजा सुलैमान का ज्ञान का बारा मा सुणी, तब वा धरती का छोर बटि ऐ। पर सुणा, इख त उ च जु की राजा सुलैमान से भि महान च, पर तुम वे पर बिस्वास नि करद्‍यां।”</verse>
				<verse number="43">“अर जब कुई खबेस कै मनखि बटि भैर निकळदु, त उ खबेस सूखि जगों मा आराम करण की जगा खुज्यान्दु, अर जब वेतैं आराम की जगा नि मिलदी तब उ बुल्दु कि,</verse>
				<verse number="44">‘मि वापिस वे ही मनखि का भितर चलि जौलु, जख बटि ऐ छौ।’ तब उ खबेस वापिस ऐके वे मनखि तैं एक घौर का जन खालि साफ-सुत्रो अर सज्युं-धज्युं पौन्दु।</verse>
				<verse number="45">तब उ खबेस वापिस जैके अपणा दगड़ा मा सात और भि बुरा खबेसों तैं लेके औन्दु, अर ऊ वे मनखि मा रौण लगि जनदिन, अर तब वे मनखि की दसा पैलि से भि और बुरी ह्‍वे जान्दी। ईं पीढ़ी का बुरा लोगु की हालत भि इन्‍नि ह्‍वेलि।”</verse>
				<verse number="46">अर जब यीशु भीड़ का लोगु बटि बात कनु छौ, कि देखा, वेकी माँ अर वेका भै भैर खड़ा होयां छा, अर ऊ यीशु बटि मिलण चाणा छा।</verse>
				<verse number="47">तब कैन ऐके वेकू बोलि, “गुरुजी सुणा, तुमरि माँ अर तुमरा भै भैर खड़ा होयां छिन, अर तुम बटि मिलण चाणा छिन।”</verse>
				<verse number="48">अर यू सुणी के वेन बोन्‍न वळा कू इन बोलि, “आखिर मा क्‍वा च मेरी माँ, अर कु छिन मेरा भै मि तुमतै बतै देन्दु,”</verse>
				<verse number="49">तब वेन अपणु हाथ अपणा चेलों की तरफा बढै के बोलि, “देखा, यू ही मेरी माँ अर यू ही मेरा भै छिन।</verse>
				<verse number="50">किलैकि जु कुई स्वर्ग मा रौण वळा मेरा पिता परमेस्वर की मनसा का मुताबिक चलदु, वा ही मेरी माँ अर ऊ ही मेरा भै-बैंणा छिन।”</verse>
			</chapter>
			<chapter number="13">
				<verse number="1">अर वे ही दिन यीशु वे घौर बटि निकळि के गलील झील का छाला पर बैठि गै।</verse>
				<verse number="2">अर इन ह्‍वे, कि एक बड़ी भीड़ इकट्‍ठा होण लगि गै, इलै उ नाव मा चैड़ि गै, अर भीड़ का सब लोग छाला पर छा।</verse>
				<verse number="3">अर वेन ऊं लोगु तैं भौत सा उदारण देके अपणी भौत सि बात बतैनि। अर वेन ऊंकू इन भि बोलि कि, “एक बार एक किसान बीज बुतण कू गै।</verse>
				<verse number="4">अर जब उ बीज बुतणु छौ, त कुछ बीज बाटा का किनरा पोड़ीनी, अर पंछियों न ऐके ऊंतैं चुगि दिनी।</verse>
				<verse number="5">अर कुछ ढुंग्याण जमीन पर पोड़ीनी, अर उख ऊंतैं जादा माटु नि मिली अर माटु नि मिलण की वजै से बीज जल्दी उपजी गैनी।</verse>
				<verse number="6">पर जब घाम ऐ त ऊ पौधा झुलसि गैनी, अर जलुड़ा गैरा नि होण की वजै से वु सूखि भि गैनी।</verse>
				<verse number="7">अर कुछ बीज झिबलांणो मा पोड़ीनी, अर झिबलांण भि ऊंका दगड़ा मा बढिनि अर ऊंतैं दबै दिनी।</verse>
				<verse number="8">मगर कुछ बीज अच्छी जमीन मा पोड़ीनी, अर ऊं पर फल लगिनी कै पर सौ गुणा, कै पर साठ गुणा, अर कै पर तीस गुणा।</verse>
				<verse number="9">जैका पास कन्दूड़ छिन, उ सुणी ल्यो।”</verse>
				<verse number="10">फिर यीशु का चेलों न वेका पास ऐके वेसे पूछी, “गुरुजी, तुम लोगु का दगड़ा उदारणों मा किलै बात करद्‍यां?”</verse>
				<verse number="11">अर वेन ऊंतैं जबाब दिनी, “तुमतै त परमेस्वर का राज का भेदों तैं बिंगण को ज्ञान दियूं च, मगर ऊं लोगु तैं ना।</verse>
				<verse number="12">किलैकि जु कुई भि परमेस्वर का राज तैं बिंगणे की इच्छा रखदु, वेतैं वेका बारा मा बिंगण को और भि जादा ज्ञान दिये जालु। मगर जु मनखि इन सोचदु, कि मितैं भौत ज्ञान च, त वे बटि वु ज्ञान भि छिनै जालु।</verse>
				<verse number="13">इलै मि ऊं लोगु से उदारणों मा बात करदु, किलैकि ऊ देखि के भि नि दिखदिन अर सुणी के भि नि सुणदिन, अर ना ही वु ऊं बातों तैं बिंगदिन।</verse>
				<verse number="14">अर ज्वा बात यशायाह रैबर्या का द्‍वारा बुले गै छै वा पूरि होन्दी। अर वा बात इन च कि, ‘तुम सुणिल्या त सही मगर तुमरा बिंगण मा कुछ नि औण, अर तुम दिखल्या त सही मगर तुमतै वीं बात को मतलब पता नि चलण।</verse>
				<verse number="15">किलैकि यों लोगु को मन निठुर ह्‍वे गैनी, अर ऊ कन्दूड़ कम सुणदिन, अर ऊंन अपणा आंख्यों तैं बन्द कैरियाली, ताकि इन नि हो कि वु अपणा आंख्यों न देखा अर कन्दूड़ो न सुणा, अर अपणा मन मा बिंगा, अर अपणा-अपणा पापों बटि पस्ताप कैरा, अर मि ऊंतैं माफ कैरी द्‍यो।’”</verse>
				<verse number="16">तब यीशु न अपणा चेलों कू बोलि, “पर धन्य छिन तुमरा आंखा अर कन्दूड़, जु कि यों बातों तैं दिखणा अर सुनणा छिन।</verse>
				<verse number="17">मि तुम बटि सच्‍च बोन्‍नु छौं, किलैकि परमेस्वर का भौत सा रैबर्या अर धरमी लोग यों सब कामों तैं दिखण चान्दा छा जौं तुम आज दिखणा छाँ, मगर ऊंन नि देखि सैकी। अर जौं बातों तैं तुम सुनणा छाँ ऊं बातों तैं वु सुनण चान्दा छा, मगर ऊंन नि सुणी सैकी।</verse>
				<verse number="18">“तब यीशु न चेलों कू बोलि, ‘अब तुम बीज बुतण वळा उदारण को मतलब सुणा,</verse>
				<verse number="19">बाटा का किनरा पोड़यां बीज का दगड़ा मा जु कुछ भि ह्‍वे, उ इन च कि कुछ लोग परमेस्वर का राज का बारा मा वचन तैं सुणदा त छिन, मगर वेको मतलब नि समझि सकदिन, अर शैतान ऐके ऊंका मनों बटि वचन तैं छिनी के लि जान्दु, जु कि वेका मन मा बुतै गै छौ।</verse>
				<verse number="20">अर ढुंग्याण जमीन पर पोड़्यूं बीज का दगड़ा मा जु कुछ भि ह्‍वे, उ इन च कि कुछ लोग परमेस्वर का वचन तैं सुणी के बड़ी खुशी से स्वीकार त करदिन,</verse>
				<verse number="21">मगर ऊ अपणा भितर वचन की जड़ तैं जमण नि देन्दिन, अर वु वचन भि वेमा कुछ बगत तक ही रौन्दु। इलै वचन की वजै से जब कुई भि दुख-तकलीफ या सतौ ऊंका जीवन मा औन्दिन, तब वु लोग तुरन्त बिस्वास करण छोड़ि देन्दिन।</verse>
				<verse number="22">अर झिबलांणो मा पोड़यां बीज का दगड़ा मा जु कुछ भि ह्‍वे, उ इन च कि कुछ लोग परमेस्वर का वचन तैं सुणदा त छिन, मगर ईं दुनियां मा जीवन की चिन्ता-फिकर, अर धन-दौलत को लालच वे वचन तैं दबै देन्दिन, इलै वे पर फल नि लगदिन।</verse>
				<verse number="23">अर अच्छी जमीन मा पोड़्यूं बीज का दगड़ा मा जु कुछ भि ह्‍वे, उ इन च कि कुछ लोग परमेस्वर का वचन तैं सुणी के वेतैं अच्छे से बिंगदिन, अर फल लेके औन्दिन, कुई सौ गुणा कुई साठ गुणा, अर कुई तीस गुणा।’”</verse>
				<verse number="24">तब यीशु न ऊंतैं एक और उदारण देके बोलि, “परमेस्वर को राज वे मनखि जन च जैन अपणा पुंगड़ा मा ग्यूँ को अच्छु बीज बूति।</verse>
				<verse number="25">पर जब सब लोग सिणा छा, त वेका दुसमन न ऐके ग्यूँ का दगड़ा मा जंगळि ग्यूँ को बीज भि बूति दिनी।</verse>
				<verse number="26">अर जब अंकुर निकळि अर बलडा लगनी, त ऊंका दगड़ा मा जंगळि ग्यूँ भि दिखैण लगि गैनी।</verse>
				<verse number="27">तब वेका नौकरों न ऐके अपणा मालिक बटि पूछी, ‘साब, क्या तुमुन अपणा पुंगड़ा मा अच्छु बीज नि बूति छौ? त फिर जंगळि ग्यूँ कख बटि ऐ गैनी?’</verse>
				<verse number="28">अर वेन ऊंकू बोलि, ‘यू कै दुसमन को काम च।’ तब नौकरों न वे बटि पूछी, ‘त तुमरि इच्छा क्या च कि हम जैके जंगळि ग्यूँ तैं उखाड़ द्‍या?’</verse>
				<verse number="29">वेन बोलि, ‘नऽ ना इन नि कर्यां कखि इन नि हो, कि जंगळि पौधों तैं उखड़्न दौं तुम ग्यूँ भि उखाड़ द्‍या।</verse>
				<verse number="30">इलै सुणा, लवै का बगत तक दुईयों तैं बढण द्‍या, अर जब लवै का बगत ऐ जालु त मि लवै करण वळु कू बोललु, कि पैलि जंगळि ग्यूँ का पौधों तैं पूळा बणै के आग मा डलणु खुणि जमा कैरा, अर ग्यूँ तैं मेरा कुठार मा इकट्‍ठा कैरा।’”</verse>
				<verse number="31">अर यीशु न ऊंतैं एक और उदारण देके बोलि, “परमेस्वर को राज लय्या का बीज की तरौं च, जैतैं एक आदिम न अपणा पुंगड़ा मा बूति।</verse>
				<verse number="32">अर यू सब बीजों मा सबसे छुटो होन्दु, मगर जब यू बढदु त पुंगड़ा का पौधों मा इथगा बड़ु ह्‍वे जान्दु कि एक डाळु बणि जान्दु, अर पंछि वेका फौंक्यों मा ऐके अपणु घोल बणौन्दिन।”</verse>
				<verse number="33">अर यीशु न ऊंतैं एक और उदारण देके बोलि, “परमेस्वर को राज खमीर का जन च जैतैं एक जनानि न तीन पाथा आटा मा खमीर मिलै, अर उ पूरु आटु खमीर बणि गै।”</verse>
				<verse number="34">अर यू सब बात यीशु न उदारण दे देके लोगु तैं बतैनि, अर बगैर उदारण दियां वु लोगु बटि कुछ भि बात नि करदु छौ।</verse>
				<verse number="35">अर इन वु इलै करदु छौ, ताकि वा बात पूरि ह्‍वे जौ जु की परमेस्वर का रैबर्या का द्‍वारा बुले गै छै। अर वा बात इन च कि, “मि उदारण देके बात करलु, अर जब बटि दुनियां बणि तब बटि जु बात छिपी छै, ऊं बातों तैं परगट करलु।”</verse>
				<verse number="36">यीशु वीं भीड़ तैं छोड़ि के घौर चलि गै, अर वेका चेलों न वेका पास ऐके बोलि, “गुरुजी, हमतै पुंगड़ा मा होयां जंगळि ग्यूँ को मतलब समझै द्‍या।”</verse>
				<verse number="37">अर वेन ऊंतैं जबाब देई, “अच्छा बीज तैं बुतण वळु, मनखि को पुत्र च।</verse>
				<verse number="38">पुंगड़ा को मतलब या दुनियां च, अर अच्छा बीज को मतलब ऊं लोगु से च जौं का जीवन मा परमेस्वर राज करदु। अर जंगळि बीजों को मतलब ऊं लोगु से च जौं का जीवन मा शैतान राज करदु।</verse>
				<verse number="39">अर जै दुसमन न वु बीज बूति उ शैतान च। अर लवै का बगत को मतलब दुनियां को अन्त होण से च, अर ईं लवै तैं करण वळा स्वर्गदूत छिन।</verse>
				<verse number="40">अर जन जंगळि ग्यूँ का पौधा तैं इकट्‍ठा कैरिके आग मा ढोळि देन्दिन, ठिक उन्‍नि दुनियां का अन्त मा होलु।</verse>
				<verse number="41">अर वे बगत मनखि को पुत्र अपणा स्वर्गदूतों तैं भेजलु, अर वु वेका राज मा आला अर जु लोग दुसरा लोगु खुणि पाप करण की वजा बणदिन, अर ऊ सब लोग भि जु कि बुरा काम करदिन, स्वर्गदूत ऊं सब लोगु तैं इकट्‍ठा करला,</verse>
				<verse number="42">तब वु ऊंतैं आग का भटा मा डालि द्‍याला, उख रुंण अर दांतों तैं कड़गिटाण ही होलु।</verse>
				<verse number="43">अर धरमी लोग अपणा पिता परमेस्वर का राज मा सूरज का जन चमकला। जैका पास कन्दूड़ छिन, उ सुणी ल्यो।”</verse>
				<verse number="44">अर यीशु न ऊंकू इन भि बोलि, “परमेस्वर को राज कै पुंगड़ा मा छिप्यां एक खजाना का जन च, जु कि कै मनखि तैं मिली अर वेन वेतैं फिर उखि छिपै दिनी। तब वेतैं इथगा बड़ी खुशी ह्‍वे कि वेन अपणु सब कुछ बेचि दिनी, अर वे पुंगड़ा तैं खरीदी दिनी।”</verse>
				<verse number="45">अर येका बाद यीशु न ऊंतैं एक और उदारण मा बोलि, “परमेस्वर को राज एक इन व्यापारी मनखि का जन च, जु अच्छा मोतियों की खोज मा हो।</verse>
				<verse number="46">अर जब वेतैं एक कीमती मोति मिली, त वेन जैके अपणु सब कुछ बेचि के वेतैं खरीद दिनी।”</verse>
				<verse number="47">तब यीशु न एक और उदारण देके बोलि, “स्वर्ग को राज्य एक बड़ा जाल का जन च जु झील मा डळै गै, अर वेमा बन्‍नि-बन्‍नि किसम का माछा फंसी गैनी।</verse>
				<verse number="48">अर जब जाल पूरु भुरे गै, त मछैर वेतैं छाला पर खैंची के लैनि अर बैठि के अच्छा-अच्छा माछा थैलुन्द रखिनी, अर बेकार माछा ढोळि दिनी।</verse>
				<verse number="49">अर दुनियां का अन्त मा भि इन्‍नि होलु, स्वर्गदूत आला अर धरमी लोगु का बीच मा बटि दुष्‍ट मनखियों तैं अलग करला।</verse>
				<verse number="50">अर ऊंतैं आग का भटा मा डालि द्‍याला, अर उख रुंण अर दांतों तैं कड़गिटाण ही होलु।”</verse>
				<verse number="51">यीशु न अपणा चेलों बटि पूछी, “क्या तुम यों बातों तैं समझि ग्यां?” त ऊंन बोलि, “हाँ गुरुजी।”</verse>
				<verse number="52">तब वेन ऊंतैं बतै कि, “हरेक शास्‍त्री तैं परमेस्वर का राज की शिक्षा मिली च, अर ऊ घौर का मालिक का जन छिन, जु कि अपणा कुठार बटि नई अर पुरणि चीजों तैं निकळदिन।”</verse>
				<verse number="53">अर जब यीशु न यू सब उदारण सुणै दिनी, त उ उख बटि चलि गै।</verse>
				<verse number="54">अर जब उ अपणा नगर मा ऐ जख उ बड़ु ह्‍वे छौ, तब उ उखा प्रार्थना भवन मा जैके लोगु तैं उपदेस देके सिखौण लगि गै। पर ऊ लोग हकदक ह्‍वेके बोन्‍न लगि गैनी, “अरे, येतैं यू ज्ञान कख बटि मिली गै, अर येतैं चमत्कार करण की ताकत कख बटि मिली होलि?</verse>
				<verse number="55">अरे, यू त बड़ई को नौनु च, येकी माँ को नौ मरियम च, अर येका भै त याकूब, शमौन, यूसुफ अर यहूदा छिन।</verse>
				<verse number="56">अर येकी सब बैंण हमरा बीच मा रौनदिन, त फिर यू सब कुछ येतैं कख बटि मिली गै?”</verse>
				<verse number="57">इलै ऊंन यीशु की बातों तैं स्वीकार नि कैरी। अर यीशु न ऊंकू बोलि, “एक रैबर्या तैं अपणा घौर अर मुलक का अलावा हरेक जगा आदर-सम्मान मिलदु।”</verse>
				<verse number="58">इलै ऊं लोगु को बिस्वास नि करण की वजै से वेन उख जादा चमत्कारिक काम नि करिनी।</verse>
			</chapter>
			<chapter number="14">
				<verse number="1">अर वे बगत गलील मुलक पर सासन करण वळा हेरोदेस अन्तिपास न यीशु की चर्चा सुणी।</verse>
				<verse number="2">तब वेन अपणा नौकरों कू बोलि, “अरे यू त बपतिस्मा देण वळु यूहन्‍ना च, जु कि मुरदो मा बटि ज्यून्दु ह्‍वे गै, इलै वेका द्‍वारा चमत्कारिक काम होणा छिन।”</verse>
				<verse number="3">अर यू उई हेरोदेस च, जैन अपणा भै फिलिप्पुस की घरवळी हेरोदियास का दगड़ा मा ब्यौ कैरियाली छौ। अर यूहन्‍ना न वेतैं कई दौं चितै के बोलि छौ कि तू अपणी भै कि घरवळी तैं रखणी छैई, जु कि नियम-कानून का खिलाप मा च, अर या बात त्वे खुणि ठिक नि च। इलै हेरोदियास का बोन्‍न पर राजा हेरोदेस न यूहन्‍ना तैं संगुळों मा बन्धी बणै के जेलखाना मा डलवै दिनी।</verse>
				<verse number="4"></verse>
				<verse number="5">अर हेरोदेस यूहन्‍ना तैं जान से मरण चान्दु छौ, पर वु लोगु से डऽरदु छौ, किलैकि लोग यूहन्‍ना तैं परमेस्वर को रैबर्या मणदा छा।</verse>
				<verse number="6">पर जब हेरोदेस अन्तिपास को जनम दिन ऐ, त हेरोदियास कि नौनि न दावत मा नाची के हेरोदेस तैं खुश कैरी दिनी।</verse>
				<verse number="7">तब वेन खुश ह्‍वेके कसम खै के वींतैं वचन देई, “जु कुछ भि तू मंगली मि त्वेतै द्‍यूलु।”</verse>
				<verse number="8">अर वा अपणी माँ का पास गै, अर माँ का भगलौण पर वींन राजा कू बोलि, “अभि मि खुणि एक थाळ मा यूहन्‍ना बपतिस्मा देण वळा को मुण्ड़ मंगवै द्‍या।”</verse>
				<verse number="9">अर यू सुणी के राजा दुखी ह्‍वे गै, मगर वीं कसम की वजै से ज्वा वेन वींका दगड़ा मा खईं छै, अर उख बैठयां लोगु की वजै से भि वेन आज्ञा दिनी कि यूहन्‍ना को मुण्ड़ ईं तैं दिये जौ।</verse>
				<verse number="10">अर वेन जेलखाना मा लोगु तैं भेजि के यूहन्‍ना को मुण्ड़ कटवै दिनी।</verse>
				<verse number="11">तब यूहन्‍ना को मुण्ड़ एक थाळ मा रखी के लये गै, अर वीं नौनि तैं दिये गै। अर वा वीं थाळ तैं लेके अपणी माँ मा चलि गै।</verse>
				<verse number="12">तब यूहन्‍ना का चेला ऐनी, अर वेकी लांश तैं लि जैके दफनै दिनी। अर ईं खबर का बारा मा जैके यीशु तैं बतै।</verse>
				<verse number="13">अर जब यीशु न या खबर सुणी, त वेका बाद उ नाव पर बैठि के उख बटि निकळि के एक शान्त जगा कू चलि गै। अर जब लोगु तैं ईं बात को पता चलि गै, त लोग नगरों बटि पैदल ही वेका पिछनै चलण लगि गैनी।</verse>
				<verse number="14">अर जब यीशु छाला पर पौंछी त वेन एक बड़ी भीड़ देखि अर वेतैं ऊं पर बड़ु तरस ऐ, तब वेन ऊं लोगु का बीच मा जु बिमार छा ऊंतैं खूब कैरी।</verse>
				<verse number="15">अर जब रुमुक ह्‍वे गै, त यीशु का चेलों न वेका पास ऐके बोलि, “गुरुजी, या निर्जन जगा च अर देर भि होणी च, इलै तुम यों लोगु तैं विदा कैरा, ताकि यू लोग आस-पास का ग्‍वोंऽ अर बस्तियों मा जैके अफ खुणि खाणुक को इंतजाम कैरी सैका।”</verse>
				<verse number="16">तब यीशु न चेलों कू बोलि, “ऊंतैं कखि जाणे जरुरत नि च, तुम ही यों तैं खाणु कू द्‍या।”</verse>
				<verse number="17">अर ऊंन बोलि, “हम मा त पांच रुट्‍टी अर दुई माछों का अलावा और कुछ भि नि च।”</verse>
				<verse number="18">वेन बोलि, “ऊंतैं मेरा पास ला।”</verse>
				<verse number="19">अर यीशु न लोगु तैं घास पर बैठणु कू बोलि। तब वेन पांच रुट्‍टी अर दुई माछों तैं लेई, अर स्वर्ग जनै देखि के परमेस्वर को धन्यवाद देई, अर रुट्‍टी तोड़ि-तोड़ि के चेलों तैं दिनी अर ऊंन लोगु मा बांटि दिनी।</verse>
				<verse number="20">अर सब लोग खै के छक ह्‍वे गैनी, अर जु टुकड़ा बचि गै छा ऊंतैं चेलों न बटोळि अर बारह कण्डो तैं भोरी के उठे।</verse>
				<verse number="21">अर खाण वळो मा करीब पांच हजार त बैख ही छा, अर ऊंका अलावा बच्‍चा अर जनानियां भि छै जौं तैं नि गिणै गै छौ।</verse>
				<verse number="22">अर येका तुरन्त बाद यीशु न अपणा चेलों कू बोलि, “जबरि तक मि लोगु तैं विदा करदु तबरि तक तुम लोग नाव मा चैड़ि के मिसे पैलि झील का पल्या छाला चलि जा।”</verse>
				<verse number="23">अर लोगु तैं विदा करण का बाद, उ खुद प्रार्थना करणु कू पाड़ पर चलि गै। अर यू रात होण को बगत छौ, अर उख उ इखुली छौ।</verse>
				<verse number="24">मगर दुसरि तरफा ये ही बगत चेला छाला बटि भौत दूर चलि गै छा, अर ऊंकी नाव पाणि की उथल-पुथल मा डगमगौणि छै, किलैकि हवा नाव का खिलाप मा चलणी छै।</verse>
				<verse number="25">अर यीशु सुबेर तीन से छह बजी का करीब झील का पाणि पर चलद-चलद चेलों का पास ऐ।</verse>
				<verse number="26">अर चेला यीशु तैं झील पर चलद देखि के भौत डौऽरी गैनी अर ऊंन बोलि, “अरे उ देखा बाण।” अर वु डौऽर का बानो जोर-जोर से चिलाण लगि गैनी।</verse>
				<verse number="27">पर यीशु न तुरन्त बात कैरिके ऊं से बोलि, “हिम्मत रखा, डौऽरा ना, मि छौं।”</verse>
				<verse number="28">तब पतरस न वेतैं जबाब दिनी, “प्रभु, अगर जु यू तुम छाँ, त मितैं आज्ञा द्‍या, कि मि पाणि मा चलि के तुमरा पास औंऽऽ।”</verse>
				<verse number="29">अर यीशु न बोलि, “पतरस ऐ जा।” तब पतरस नाव बटि उतरि के वेका पास जाण लगि गै।</verse>
				<verse number="30">अर तेज हवा तैं देखि के वु डौऽरी गै अर जब डुबण लगि गै, तब वेन चिल्‍लै के बोलि, “हे प्रभु मितैं बचौ।”</verse>
				<verse number="31">अर यीशु न तुरन्त अपणु हाथ बढै के वेतैं थामि दिनी अर वेकू बोलि, “हे कम बिस्वास करण वळा, तिन सक किलै कैरी?”</verse>
				<verse number="32">अर जब ऊ दुई नाव मा चैड़ि गैनी, त हवा रुकी गै।</verse>
				<verse number="33">अर नाव मा बैठयां चेला यीशु का खुटों मा पोड़ि के बोन्‍न लगि गैनी, “सच्‍चि मा, तुम ही परमेस्वर का पुत्र छाँ।”</verse>
				<verse number="34">तब यीशु अर वेका चेला झील तैं पार कैरिके गन्‍नेसरत का छाला पर पौंछिनी।</verse>
				<verse number="35">अर उखा लोगु न वेतैं पछ्याण दिनी, अर आस-पास का सब मुलकों मा इन खबर भेजि कि यीशु इख अयूं च। तब लोग सब बिमारों तैं वेका पास लेके ऐनी।</verse>
				<verse number="36">अर ऊ लोग यीशु से बिन्ती करण लगि गैनी कि, “गुरुजी, कम से कम हमतै अपणा कपड़ा का झालरों तैं ही छूण द्‍या।” अर जथगा भि लोग वेतैं छून्दा छा, ऊ सभ्या का सभि खूब ह्‍वे जान्दा छा।</verse>
			</chapter>
			<chapter number="15">
				<verse number="1">तब यरूशलेम नगर बटि कुछ फरीसी दल का लोग अर शास्‍त्री यीशु का पास ऐनी अर बोन्‍न लगि गैनी,</verse>
				<verse number="2">“गुरुजी, तुमरा चेला पितरों की रीति-रिवाजों का खिलाप मा जैके बगैर हाथ धुयां खाणुक किलै खनदिन?”</verse>
				<verse number="3">वेन ऊंतैं जबाब दिनी, “अरे, तुम भि त अपणी रीति-रिवाजों को पालन करण का चक्‍कर मा, परमेस्वर की आज्ञाओं को पालन नि करद्‍यां।</verse>
				<verse number="4">किलैकि परमेस्वर न बोलि छौ कि, ‘अपणा ब्वे-बबा को आदर कर्यां।’ अर ‘जु कुई अपणा ब्वे-बबा कू गळत बात बोललु, वेतैं जान से मार दिये जालु।’</verse>
				<verse number="5">पर तुम लोगु तैं इन सिखौन्द्‍यां कि, ‘एक मनखि अपणा ब्वे-बाब खुणि इन बोलि सकदु च कि, तुमरो पालन-पोसण करणु खुणि मि मा कुछ छैं त च मगर मि यू तुमतै नि दे सकदु, किलैकि मिन यू पिता परमेस्वर तैं अरपण कैरियाली।’</verse>
				<verse number="6">अर तुम इन भि सिखौन्द्‍यां कि, ‘अगर तुम अपणा ब्वे-बाब तैं नि देखि सकद्‍यां, त कुई बात नि च,’ अर इन कैरिके तुम अपणा रीति-रिवाजों को पालन करौण का खातिर परमेस्वर की आज्ञा तैं ही टाळि देन्द्‍यां।</verse>
				<verse number="7">हे ढोंगि लोगु, तुमरा बारा मा यशायाह रैबर्या न एकदम ठिक भविष्यबाणी कैरी छै। अर वेन बोलि छौ कि,</verse>
				<verse number="8">“‘केवल गिच्‍चळ ही यू लोग मेरु आदर-समान करदिन, मगर यों को मन मिसे भौत दूर च।</verse>
				<verse number="9">अर यू लोग बेकार मा ही मेरी भक्‍ति करदिन, किलैकि यू लोग अपणा ही द्‍वारा बणईं आज्ञाओं तैं परमेस्वर की शिक्षा बतै के सिखौन्दिन।’”</verse>
				<verse number="10">तब यीशु न लोगु तैं अपणा पास बुलै अर ऊंकू बोलि, “सुणा, अर ईं बात तैं बिंगण की कोसिस कैरा।</verse>
				<verse number="11">मनखि का गिच्‍चा बटि जु कुछ भि भितर जान्दु वु वेतैं अशुद्ध नि करदु, मगर जु कुछ भि वेका गिच्‍चा बटि भैर निकळदु उई वेतैं अशुद्ध करदु।”</verse>
				<verse number="12">तब यीशु का चेला न वेका पास ऐके बोलि, “गुरुजी, क्या तुमतै पता च कि तुमरा ये वचन की वजै से फरीसी दल का लोग खिरसयां छिन?”</verse>
				<verse number="13">वेन जबाब दिनी, “हरेक उ पौधा जु स्वर्ग मा रौण वळा मेरा पिता न नि लगै, वेतैं उखाड़ दिये जालु।</verse>
				<verse number="14">अरे, ऊंतैं जाण द्‍या। ऊ खुद त अन्धा छिन, अर दुसरो तैं बाटु बतौन्दिन। अगर एक अन्धु दुसरा अन्धा तैं बाटु दिखालु, त दुईया का दुई खडोळुन्द पोड़ि जाला।”</verse>
				<verse number="15">अर या बात सुणी के पतरस न वेकू बोलि, “गुरुजी, मनखि तैं अशुद्ध करण वळी बात को मतलब हमतै समझै द्‍या।”</verse>
				<verse number="16">वेन बोलि, “क्या तुम अभि तक नासमझ छाँ?</verse>
				<verse number="17">अर क्या तुमरि बिंगण मा नि औन्दु, कि जु कुछ भि गिच्‍चा भितर जान्दु उ पुटगुन्द ही जान्दु, अर सुबेर मल का रुप मा भैर निकळि जान्दु?</verse>
				<verse number="18">पर सुणा, जु कुछ भि गिच्‍चा बटि निकळदु, उ मनखि का मन बटि निकळदु अर उई मनखि तैं अशुद्ध भि करदु।</verse>
				<verse number="19">किलैकि बुरा ख्याल, हत्या करण, दुसरि जनानियों पर गळत नजर रखण, अर दुसरि जनानियों का दगड़ा मा गळत सम्बन्ध रखण, चोरी करण, झूठ्‍ठी गवै देण, दुसरो की बुरै करण, इन्दरि किसमे सब बात मनखि का मन बटि ही निकळदिन।</verse>
				<verse number="20">अर यू सब बात ही मनखि तैं अशुद्ध करदिन, पर अगर कुई मनखि बगैर हाथ धुयां खाणुक खान्दु त वु खाणुक वेतैं अशुद्ध नि करदु।”</verse>
				<verse number="21">तब यीशु उख बटि निकळि के, सूर अर सैदा नगरों का मुलक मा चलि गै।</verse>
				<verse number="22">अर देखा, वे ही बगत वे मुलक बटि एक जनानि ऐ, ज्वा की कनानी जाति की छै। अर वा चिल्‍लै-चिल्‍लै के बोन्‍न लगि गै, “मेरा प्रभु, राजा दाऊद का वंशज, मि पर दया कैरा, किलैकि मेरी नौनि तैं खबेस न बुरी तरौं से अपणा बस मा कर्युं च, अर उ वींतैं भौत सतौन्दु।”</verse>
				<verse number="23">पर यीशु न वींतैं कुछ जबाब नि दिनी। तब वेका चेलों न पास ऐके बोलि, “गुरुजी, ईं तैं इख बटि विदा कैर द्‍या, किलैकि या हमरा पिछनै चिल्‍लै-चिल्‍लै के औणी च।”</verse>
				<verse number="24">तब यीशु न जबाब देई, “मितैं सिरफ इस्राएली लोगु की मदद करणु खुणि ही भिजे गै, जु कि हरचि भेड़ों का जन छिन।”</verse>
				<verse number="25">पर वा जनानि वेका पास ऐ, अर वेका खुटों मा हाथ जोड़ी के पोड़ि गै अर बोलि, “मेरा प्रभु, मेरी मदद कैरा।”</verse>
				<verse number="26">अर वेन उदारण देके वींकू बोलि, “या बात ठिक नि च कि बच्‍चों की रुट्‍टी लेके कुकरों का अगनै डळै जौ।”</verse>
				<verse number="27">वींन बोलि, “हाँ प्रभु, तुम ठिक बोन्‍ना छाँ, पर कुकर भि त मालिक का द्‍वारा छुटयां चूर-बूर तैं खनदिन।”</verse>
				<verse number="28">तब यीशु न वींकू बोलि, “हे बेटी, त्वेतै भौत जादा बिस्वास च। इलै जन तू चान्दी त्वे खुणि उन्‍नि हो।” अर सुणा, वे बगत बटि ही वीं जनानि की नौनि खूब ह्‍वे गै।</verse>
				<verse number="29">तब यीशु उख बटि निकळि के गलील झील का छाला पर ऐ, अर उख एक पाड़ पर चैड़ि के बैठि गै।</verse>
				<verse number="30">अर तब एक बड़ी भीड़ वेका पास ऐ। अर यू लोग अपणा दगड़ा मा लूला-लंगड़ो, अन्धों, अर गूंगों तैं अर इन्‍नि भौत बिमार लोगु तैं भि लेके ऐनी। अर भीड़ का लोगु न यों तैं यीशु का खुटों का समणि रखी दिनी, अर यीशु न ऊंतैं खूब कैरी।</verse>
				<verse number="31">अर जब लोगु न देखि कि गूंगा बुलणा छिन, अर लूला-लंगड़ा खूब ह्‍वेके हिटणा छिन, अर अन्धा दिखणा छिन, त भीड़ का लोग दंग ह्‍वेके इस्राएल का परमेस्वर की बडै करण लगि गैनी।</verse>
				<verse number="32">तब यीशु न अपणा चेलों तैं अपणा पास बुलै अर ऊंकू बोलि, “ईं भीड़ पर मितैं बड़ु तरस औणु च, किलैकि तीन दिन बटि यू मेरा दगड़ा मा ही छिन। अर खाणु खुणि ऊंका पास कुछ नि च, अर मि ऊंतैं भूकि वापस नि भेजण चान्दु, कखि इन नि हो कि जान्द दौं वु बाटा मा गस खै द्‍या।”</verse>
				<verse number="33">मगर वेका चेलों न वेकू बोलि, “गुरुजी, ईं निर्जन जगा मा हमुन इथगा माप रुट्‍टी कख बटि लौणिन, कि हम ईं भीड़ तैं खिलै सैका?”</verse>
				<verse number="34">अर यीशु न ऊं बटि पूछी, “एक बात बता तुम मा कथगा रुट्‍टी छिन?” ऊंन बोलि, “बस सात रुट्‍टी अर कुछ छुटा माछा छिन।”</verse>
				<verse number="35">तब यीशु न लोगु तैं भ्वीं मा बैठणे की आज्ञा दिनी।</verse>
				<verse number="36">तब वेन सात रुट्‍टी अर माछों तैं ले, अर परमेस्वर को धन्यवाद देके ऊंतैं तोड़ि, अर अपणा चेलों तैं देणु रै अर वु भीड़ का लोगु मा बंटणा रैनी।</verse>
				<verse number="37">अर सब लोग खै के छक ह्‍वे गैनी, त वेका चेलों न बच्यां टुकड़ों का सात ठुफरा उठैनि।</verse>
				<verse number="38">अर खाण वळो मा करीब चार हजार त बैख ही छा, अर ऊंका अलावा बच्‍चा अर जनानियां भि छै, जौं तैं नि गिणै गै छौ।</verse>
				<verse number="39">तब यीशु भीड़ तैं विदा कैरिके नाव मा चैड़ि, अर मगदन नगर का क्षेत्र की सीमाओं जनै चलि गै।</verse>
			</chapter>
			<chapter number="16">
				<verse number="1">एक दिन फरीसी अर सदूकी दल का लोगु न यीशु का पास ऐके वेकी अजमैस करण का खातिर वेकू बोलि, “हमतै स्वर्ग मा बटि कुई चमत्कारिक चिन्‍न दिखौ।”</verse>
				<verse number="2">वेन ऊंतैं जबाब दिनी, “रुमुक होण पर तुम बुल्द्‍यां, ‘मौसम ठिक रालु किलैकि आसमान लाल च।’</verse>
				<verse number="3">अर सुबेर का बगत बुल्द्‍यां, ‘आज जरुर तूफान आलु, किलैकि आसमान लाल अर धुंधळु होयुं च।’ अरे जब तुम आसमान का लक्षण देखि के वेको हाल बतै सकद्‍यां, त क्या तुमतै इथगा पता नि चलणु च कि आज ब्याळि क्या-क्या काम होणा छिन।</verse>
				<verse number="4">ईं पीढ़ी का बुरा अर बिस्वासघात करण वळा लोग ही चमत्कारिक चिन्‍न खुज्यौदिन, पर परमेस्वर का रैबर्या योना का चिन्‍न का अलावा ऊंतैं कुई चमत्कारिक चिन्‍न नि दिखये जालु।” अर इन बोलि के यीशु ऊंतैं उखि छोड़ि के चलि गै।</verse>
				<verse number="5">अर येका बाद जब यीशु अर वेका चेला झील का पल्या छाला पौंछिनी, त ऊ अफ दगड़ा मा रुट्‍टी लाण बिसरी गै छा।</verse>
				<verse number="6">तब यीशु न ऊंतैं चितै के बोलि, “सुणा, फरीसी अर सदूकी दल का लोगु का खमीर से बचि के रा।”</verse>
				<verse number="7">अर या बात सुणी के वु आपस मा विचार कैरिके बोन्‍न लगि गैनी ऊंन बोलि, “हम रुट्‍टी नि लयां क्या पता उ इलै ही हम कू इन बोन्‍नु च।”</verse>
				<verse number="8">अर यीशु न ऊंका विचारों तैं जाणि के बोलि, “हे कम बिस्वास करण वळो, तुम आपस मा इन विचार किलै कना छाँ कि हमरा पास रुट्‍टी नि च?</verse>
				<verse number="9">क्या तुमुन मितैं अभि तक नि पछ्याणी? अर क्या तुमतै याद नि च जब मिन पांच रुट्‍टीयों का द्‍वारा पांच हजारों तैं खिलै छौ? अर क्या तुमतै यू भि याद नि च कि तुमुन कथगा ठुफरा उठैनि?</verse>
				<verse number="10">अर ठिक उन्‍नि क्या तुमतै यू भि याद नि च, कि जब मिन सात रुट्‍टीयों का द्‍वारा चार हजारों तैं खिलै छौ? अर क्या तुमतै यू भि याद नि च, कि तुमुन उख भि कथगा ठुफरा उठैनि?</verse>
				<verse number="11">अरे, तुमरि समझ मा किलै नि च औणु, मि तुमतै रुट्‍टीयों का बारा मा ना, बल्किन मा फरीसी अर सदूकी दल का लोगु की वीं शिक्षा से बचण का खातिर बोन्‍नु छौं, ज्वा कि खमीर का जन च।”</verse>
				<verse number="12">तब जैके ऊंकी समझ मा ऐ कि यीशु रुट्‍टीयों का खमीर का बारा मा ना, बल्किन मा फरीसी अर सदूकी दल का लोगु की शिक्षा से बचि के रौणु कू बोन्‍नु छौं।</verse>
				<verse number="13">अर जब यीशु कैसरिया अर फिलिप्पी का मुलक मा ऐ, त वेन अपणा चेलों बटि पूछी कि, “मनखि का पुत्र का बारा मा लोग क्या बुल्दिन?”</verse>
				<verse number="14">तब चेलों न वेतैं जबाब दिनी, “गुरुजी, कुछ लोग तुम खुणि यूहन्‍ना बपतिस्मा देण वळु बुल्दिन, अर कुछ बुल्दिन कि तुम परमेस्वर का रैबर्या एलिय्याह छाँ, अर कुछ त इन भि बुल्दिन कि तुम यिर्मयाह या पुरणा रैबर्यों मा बटि कुई एक छाँ।”</verse>
				<verse number="15">वेन ऊं बटि पूछी, “पर तुम मिकू क्या बुल्द्‍यां?”</verse>
				<verse number="16">तब शमौन पतरस न जबाब देई, “गुरुजी, ज्यून्दा परमेस्वर का पुत्र मसीह तुम ही छाँ।”</verse>
				<verse number="17">तब यीशु न वेतैं जबाब देई, “हे योना का नौना शमौन, तू धन्य छैई, किलैकि त्वे पर या बात कै मनखि न ना, बल्किन मा स्वर्ग मा रौण वळा मेरा पिता परमेस्वर न परगट कैरी।</verse>
				<verse number="18">अर मि त्वेसे बुल्दु, तू पतरस छैई, जैको मतलब चटान च। अर ईं चटान पर मिन अपणु समुदाय खड़ु करण। अर मौत की ताकत वे पर अपणु राज नि कैरी सकलि।</verse>
				<verse number="19">अर मि स्वर्ग राज की चाबी त्वेतै द्‍यूलु अर जु कुछ तू ईं धरती पर बन्द करली, उ स्वर्ग मा बन्द किये जालु, अर जु कुछ तू धरती पर खुलिली, उ स्वर्ग मा खुलै जालु।”</verse>
				<verse number="20">तब यीशु न चेलों तैं चितै के बोलि कि, “या बात कै मा नि बुलयां कि मि मसीह छौं।”</verse>
				<verse number="21">अर वे बगत बटि यीशु अपणा चेलों तैं बतौण लगि गै कि, “मेरु यरूशलेम नगर कू जाण जरुरी च, अर उख मि अध्यक्षों, मुख्य पुरोहितों अर शास्‍त्री लोगु का द्‍वारा भौत दुख उठौलु अर ऊ मितैं मरवै द्‍याला, अर मि तिसरा दिन मुरदो मा बटि ज्यून्दु ह्‍वे जौलु।”</verse>
				<verse number="22">ईं बात पर पतरस वेतैं अलग मा लि गै अर इन बोलि के झिड़कण लगि गै, “प्रभु, कभि इन नि हो कि परमेस्वर तुमरा दगड़ा मा इन कैरुं।”</verse>
				<verse number="23">पर यीशु न पतरस जनै मुड़ि के बोलि, “हे शैतान, मेरा समणि बटि दूर ह्‍वे जा। पतरस मि खुणि उतेडु़ किलै बणणी छैई, तू परमेस्वर की बातों पर मन नि लगौन्दिन, बल्किन मा तेरु मन मनखियों की बातों पर लग्यूं रौन्दु।”</verse>
				<verse number="24">तब यीशु न अपणा चेलों कू बोलि, “अगर कुई मेरा पिछनै औण चान्दु, त उ अफ तैं नकारी द्‍यो अर दुख अर मौत तैं झिलणु खुणि हमेसा तयार ह्‍वेके मेरा पिछनै चलु।</verse>
				<verse number="25">किलैकि जु कुई अपणा पराण तैं बचौण चालु, उ वेतैं ख्वे द्‍यालु। मगर जु कुई मेरा खातिर अपणा पराण तैं ख्वे द्‍यालु, उई सदनि को जीवन पालु।</verse>
				<verse number="26">अर अगर कुई मनखि दुनियां की हरेक चीजों तैं हासिल कैरी द्‍यो, मगर उ सदनि का जीवन तैं ख्वे द्‍यो त वेतैं फिर क्या फैदा ह्‍वे? अर कुई भि मनखि सदनि का जीवन तैं पौणु खुणि क्या दे सकदु?</verse>
				<verse number="27">किलैकि मनखि को पुत्र अपणा स्वर्गदूतों का दगड़ा अर अपणा पिता की सामर्थ मा वापस औण वळु च, अर वे बगत ‘उ हरेक मनखि तैं वेका कामों का मुताबिक बदला मा ऊंतैं द्‍यालु।’</verse>
				<verse number="28">मि तुम बटि सच्‍च बोन्‍नु छौं कि जथगा लोग इख खड़ा छिन, ऊंमा बटि कुछ इन्द्रया भि छिन, जु कि तब तक नि मुरला जब तक की वु मनखि का पुत्र तैं वेका राज का दगड़ा मा औन्द देखि नि द्‍याला।”</verse>
			</chapter>
			<chapter number="17">
				<verse number="1">अर यों सब बातों का छह दिन का बाद यीशु, पतरस, याकूब अर वेका भै यूहन्‍ना तैं दुसरा चेलों से अलग कैरिके अपणा दगड़ा मा एक ऊँचा ढौंडा मा लि गै।</verse>
				<verse number="2">अर ऊंका समणि वेको रुप बदलि गै, अर वेको मुख सूरज की तरौं चमकण लगि गै, अर वेका कपड़ा उज्याळा ह्‍वेके चमकण लगि गैनी।</verse>
				<verse number="3">अर परमेस्वर का रैबर्या मूसा अर एलिय्याह वेका दगड़ा मा बात करद दिखैनि।</verse>
				<verse number="4">अर यू देखि के पतरस न यीशु कू बोलि, “प्रभु, हमरु इख रौण ठिक च। अर अगर जु तुमरि मनसा हो त मि इख तीन तम्बू बणौ, एक तुम खुणि, एक मूसा खुणि अर एक एलिय्याह खुणि।”</verse>
				<verse number="5">जब उ इन बोन्‍नु ही छौ, कि तबरि एक चमकदार बादळ न ऐके ऊंतैं घेरि दिनी। तब वे बादळ मा बटि एक आवाज ऐ, “यू मेरु लाडलु पुत्र च, अर येसे मि खुश छौं, येकी सुणा।”</verse>
				<verse number="6">अर जब चेलों न या बात सुणी त वु डौऽरी गैनी अर मुख भ्वीं मा कैरिके पोड़ि गैनी।</verse>
				<verse number="7">तब यीशु ऊंका पास ऐ अर ऊंतैं छ्वी के बोलि, “उठा, डौऽरा ना।”</verse>
				<verse number="8">तब ऊंन मथि देखि पर यीशु का अलावा ऊंतैं और कुई नि दिखै।</verse>
				<verse number="9">यीशु अर वेका तीन चेला ये ढौंडा बटि मूड़ी औणा छा, त वेन ऊंतैं या आज्ञा देई, “जब तक मनखि को पुत्र मुरदो मा बटि ज्यून्दु नि ह्‍वे जौ, तब तक जु कुछ भि तुमुन देखि वेका बारा मा कै मा नि बुलयां।”</verse>
				<verse number="10">ईं बात तैं सुणी के वेका चेलों न वेसे पूछी, “गुरुजी, त फिर शास्‍त्री लोग इन किलै बुल्दिन कि पैलि एलिय्याह रैबर्या को औण जरुरी च?”</verse>
				<verse number="11">वेन ऊंतैं जबाब दिनी, “एलिय्याह जरुर आलु, अर सब कुछ उन्‍नि कैरी द्‍यालु जन कि होण चयेणु।</verse>
				<verse number="12">मगर मि तुमतै बतै देन्दु कि एलिय्याह मिसे पैलि ऐ गै, पर लोगु न वेतैं नि पछ्याणी, अर जन ऊ चान्दा छा ऊंन ठिक उन्‍नि वेका दगड़ा मा कैरी। अर ठिक उन्‍नि मनखि को पुत्र भि ऊं लोगु का द्‍वारा बड़ु दुख उठालु।”</verse>
				<verse number="13">तब चेला समझि गैनी कि यीशु हम बटि यूहन्‍ना बपतिस्मा देण वळा का बारा मा बात कनु च।</verse>
				<verse number="14">अर जब यीशु अर वेका चेला भीड़ का पास पौंछिनी, त एक मनखि वेका पास ऐ, अर वेका समणि घुंडा टेकी के बोलि कि,</verse>
				<verse number="15">“प्रभु, मेरा नौना पर दया कैरा, किलैकि वे पर एक खबेस लग्यूं च इलै वेतैं मिर्गी का दौरा पोड़दिन। अर जब वेतैं मिर्गी औन्दी, त उ बड़ु दुख झिलदु फिर वु कई बार पाणि मा अर कई बार आग मा पोड़ि जान्दु।</verse>
				<verse number="16">मि वेतैं तुमरा चेलों का पास लेके ऐ छौ, मगर ऊ वेतैं खूब नि कैरी सकिनी।”</verse>
				<verse number="17">तब यीशु न जबाब देई, “हे बिस्वास नि करण वळो अर भ्रष्‍ट पीढ़ी का लोगु, आखिर मा मि कब तक तुमरा दगड़ा मा रौलु, अर कब तक तुमरि सौलु? जा, अपणा नौना तैं इनै लेके अऽ।”</verse>
				<verse number="18">तब यीशु न वे नौना मा लग्यां खबेस तैं झिड़की, अर वु खबेस वेमा बटि निकळि गै। अर देखा, वु नौनु उबरि ठिक ह्‍वे गै।</verse>
				<verse number="19">तब चेलों न अकेला मा यीशु का पास ऐके पूछी, “गुरुजी, हमुन वे खबेस तैं किलै नि निकळि सैकी।”</verse>
				<verse number="20">वेन ऊंतैं जबाब दिनी, “किलैकि तुम मा बिस्वास की कमी च, अर मि तुम लोगु से सच्‍च बोन्‍नु छौं कि अगर जु तुमरो बिस्वास लय्या का बीज बराबर भि होलु, अर तुम ये पाड़ कू भि बोलिल्या कि ‘इख बटि हटि के उख चलि जा,’ त उ भि हटि जालु। अर अगर तुम बिस्वास करिल्या, त हरेक बात तुम खुणि पूरि ह्‍वेलि।”</verse>
				<verse number="21">[पर खबेस तैं निकळणु खुणि प्रार्थना अर उपवास कि जरुरत होन्दी।]</verse>
				<verse number="22">जब यीशु अर वेका चेला गलील मुलक मा इकट्‍ठा ह्‍वेनि, त यीशु न ऊंकू बोलि, “मनखि को पुत्र लोगु का हाथों मा पकड़वै जालु।</verse>
				<verse number="23">अर ऊ वेतैं जान से मारी द्‍याला, पर उ तिसरा दिन मुरदो मा बटि ज्यून्दु ह्‍वे जालु।” अर यू सुणी के चेला भौत दुखी ह्‍वेनि।</verse>
				<verse number="24">जब यीशु अर वेका चेला कफरनहूम नगर मा ऐनी, त मन्दिर मा कर लेण वळो न पतरस का पास ऐके पूछी, “क्या तुमरो गुरु मन्दिर को कर भि देन्दु?”</verse>
				<verse number="25">तब वेन बोलि, “हाँ, गुरुजी देन्दा छिन।” अर जब पतरस घौर मा ऐ, त वेका बोन्‍न से पैलि ही यीशु न वेसे पूछी, “शमौन, तू क्या सोचदी? कि दुनियां का राजा कै बटि चुंगी अर कर लेन्दिन, अपणा नौना बटि या दुसरा लोगु बटि?”</verse>
				<verse number="26">पतरस न वेकू बोलि, “गुरुजी, कर त दुसरा लोगु बटि लिये जान्दु।” यीशु न वेकू बोलि, “ईं बात को मतलब इन च कि वेका नौना कर देण से बचि गैनी।</verse>
				<verse number="27">पतरस सुण, कखि उ हमतै देखि के खिरसे नि जा, इलै तू जा अर झील का छाला पर बळस डाल, अर जु माछु पैलि लगलु, वेतैं ले अर वेका गिच्‍चा तैं खुलण पर त्वेतै एक चांदी को सिक्‍का मिललु, जु हम दुईयों को कर चुकता कैरी द्‍यालु।”</verse>
			</chapter>
			<chapter number="18">
				<verse number="1">अर वे ही बगत चेला यीशु का पास ऐके पूछण लगि गैनी, “गुरुजी, परमेस्वर का राज मा सबसे खास कु च?”</verse>
				<verse number="2">तब वेन एक बच्‍चा तैं अपणा पास बुलै के ऊंका बीच मा खड़ु कैरी। अर बोलि,</verse>
				<verse number="3">“मि तुम बटि सच्‍चि बोन्‍नु छौं कि जबरि तक तुम खुद तैं बदलि के एक बच्‍चा का सभौ का जन नि बणि जैल्या, तबरि तक तुम स्वर्ग का राज मा नि जै सकद्‍यां।</verse>
				<verse number="4">अर जु कुई अफ तैं ये बच्‍चा का जन नमर सभौ को बणालु, वु परमेस्वर का राज मा सबसे खास होलु।</verse>
				<verse number="5">अर जु कुई मेरा नौ से इन्द्रया एक बच्‍चा तैं स्वीकार करदु उ मितैं स्वीकार करदु।”</verse>
				<verse number="6">फिर यीशु न अपणा चेलों कू इन भि बोलि, “अगर तुम मा बटि कुई भि यों छुटो तैं जु कि मि पर बिस्वास करदिन, अगर कै एक तैं भि पाप का बाटा पर लि जान्दु, त वे मनखि खुणि यू जादा ठिक च, कि वेका गौळा मा जंदरु डालि के वेतैं समुन्दर मा ढुळै जौ। मगर या सजा भि वे मनखि खुणि कम च, किलैकि इन्द्रया मनखि तैं येसे भि जादा खतरनाक सजा मिलण।</verse>
				<verse number="7">अर हाय च दुनियां का लोगु खुणि जु कि एक-दुसरा तैं पाप का बाटा पर लि जनदिन। अर या बात भि सच्‍च च कि लोगु तैं पाप मा लि जाण को काम त होलु, मगर जै मनखि का द्‍वारा यू काम होलु वे पर हाय च।</verse>
				<verse number="8">अर अगर तेरु हाथ या खुटु त्वेसे पाप करौणु च त तू वेतैं काटी के ढोळि दे, किलैकि त्वे खुणि यू जादा खूब च कि तू लूलु-लंगड़ु ह्‍वेके सदनि का जीवन तैं पै। अर अगर जु तू अपणा दुई हाथ या खुटों समेत नरकलोक मा डळै जाणि छैई, त फिर त्वेतै क्या फैदा ह्‍वे।</verse>
				<verse number="9">अर अगर तेरी आंख त्वेसे पाप करौणि च त वींतैं निकळि के ढोळि दे, किलैकि त्वे खुणि यू जादा खूब च कि तू कांणु ह्‍वेके सदनि का जीवन तैं पै। अर अगर जु तेरा दुई आंख्यों समेत तू सदनि की आग मा डळै जाणि छैई, त फिर त्वेतै क्या फैदा ह्‍वे।”</verse>
				<verse number="10">यीशु न ऊंकू इन भि बोलि, “सुणा, तुम मेरा पिछनै चलण वळा यों छुटो तैं सुद्‍दी नि समझा, अर मि तुमतै चितै देन्दु किलैकि स्वर्ग मा रौण वळा स्वर्गदूत जु की ऊंकी देख-रेख करदिन, वु सदनि मेरा पिता का समणि हाजिर रौनदिन।</verse>
				<verse number="11">[अर मनखि को पुत्र हरच्यां लोगु तैं बचौणु खुणि अयूं च।”]</verse>
				<verse number="12">तब यीशु न ऊंकू इन भि बोलि, “तुम क्या सोचद्‍यां? अगर तुम मा बटि कै मनखि का पास सौ भेड़ हो अर ऊंमा बटि एक हरचि जौ, त तुम मा बटि इन्द्रयो कु च, जु ऊं निन्याणबे भेड़ों तैं छोड़ि द्‍यो, अर वीं एक हरचि भेड़ तैं खुज्याण का बानो पाड़ो पर चलि जौ?</verse>
				<verse number="13">अर अगर वा भेड़ वेतैं मिली जौ, त मि तुम बटि सच्‍च बोन्‍नु छौं कि उ मनखि ऊं निन्याणबे भेड़ों का खातिर जु हरचि नि छै इथगा खुशी नि मणालु, जथगा कि वु वीं हरचि भेड़ का बानो मणालु।</verse>
				<verse number="14">अर ठिक इन्‍नि तुमरा स्वर्ग मा रौण वळा पिता की मनसा च, कि यों छुटो मा बटि कै एक को भि नास नि हो।”</verse>
				<verse number="15">अर यीशु न ऊंकू इन भि बोलि, “अगर जु तेरु भै या बैंण तेरा खिलाप मा कुछ अपराध करदु, त वेतैं अकेला मा लि जैके वेका अपराध तैं बतौ जु कि ऊंन कैरी। अर अगर उ तेरी बात तैं मणदु, त इन समझि जा कि तिन वेतैं फिर से वापस पयेलि।</verse>
				<verse number="16">अर अगर वु तेरी बात नि माणो, त एक या दुई आदमियों तैं अफ दगड़ा मा लि जा, ताकि परमेस्वर को यू वचन पूरु ह्‍वे जौ। अर वु इन च कि, “‘दुई या तीन लोगु का द्‍वारा या बात साबित की जौ।’</verse>
				<verse number="17">अगर जु वु मनखि ऊं गवाओ की भि नि माणो, त बिस्वासी समुदाय का लोगु कू बोलि दे, अर अगर वु समुदाय का लोगु की भि नि माणो, त फिर तू वेतैं चुंगी लेण वळो अर ऊं लोगु का जन माण जु परमेस्वर तैं नि मणदिन।</verse>
				<verse number="18">“मि तुम बटि सच्‍च बोन्‍नु छौं, कि जु कुछ तुम ईं धरती पर बन्द करिल्या, उ स्वर्ग मा बन्द किये जालु, अर जु कुछ तुम धरती पर खुलिल्या, उ स्वर्ग मा खुलै जालु।</verse>
				<verse number="19">मि तुम बटि फिर से सच्‍च बोन्‍नु छौं, अगर तुम मा बटि दुई लोग ईं धरती पर कैं चीज खुणि एक मन ह्‍वेके मंगला, त स्वर्ग मा मेरा पिता की तरफा बटि तुम खुणि उन्‍नि किये जालु।</verse>
				<verse number="20">किलैकि जख दुई या तीन लोग मेरा नौ से इकट्‍ठा होनदिन, उख मि ऊंका बीच मा होन्दु।”</verse>
				<verse number="21">तब पतरस न यीशु का पास ऐके बोलि, “प्रभु, अगर कुई भि मनखि मेरा खिलाप मा अपराध कनु रौ, त मि वेतैं कथगा बार माफ कैरुं? क्या सात बार तक?”</verse>
				<verse number="22">यीशु न वेकू बोलि, “मि त्वे बटि बोन्‍नु छौं कि सात बार तक ही ना, बल्किन मा सात का सत्तर गुणा तक माफ कनु रौ।</verse>
				<verse number="23">“इलै मेरा ये उदारण तैं सुणा, परमेस्वर को राज वे राजा का जन च, जैन अपणा नौकरों का दगड़ा मा हिसाब-किताब करण चै।</verse>
				<verse number="24">अर जब उ हिसाब-किताब कनु छौ, त एक नौकर वेका पास लये गै, जै पर करोड़ो रुपयों को करज होयुं छौ।</verse>
				<verse number="25">अर करज चुकता करणु खुणि ये नौकर मा कुछ नि छौ। तब वे नौकर खुणि राजा न बोलि, ‘येतैं अर येकी घरवळी, अर येका बाल-बच्‍चों तैं, अर जु कुछ भि ये मा च वु सब कुछ बेचि के करज की भरपूरी किये जौ।’</verse>
				<verse number="26">अर ईं बात पर उ नौकर वेका खुटों मा पोड़ि गै अर गिड़गिड़ै के बुलण लगि गै, ‘साब, जरा कुछ दिन और रुकी जा, मि तुमरो सब कुछ चुकता कैरी द्‍यूलु।’</verse>
				<verse number="27">अर यू देखि के राजा का मन मा बड़ु तरस ऐ अर वेन नौकर तैं जाणि दिनी, अर वेको करज भि माफ कैरी दिनी।</verse>
				<verse number="28">“पर जब यू नौकर राजा का पास बटि निकळि गै, त उ अफ दगड़ा का नौकरों मा बटि वे नौकर से मिली, जैन वेका हजार रुपया देण छा। अर येन वेको गौळो दबै के बोलि, ‘जु करज तेरु मि बटि लियूं च वेतैं अभि वापिस दे।’</verse>
				<verse number="29">अर ईं बात पर वेको दगड़्या नौकर वेका खुटों मा पोड़ि अर गिड़गिड़ै के बुलण लगि गै, ‘भैजी, जरा कुछ दिन और रुकी जा, मि तुमरो सब कुछ चुकता कैरी द्‍यूलु।’</verse>
				<verse number="30">पर ये नौकर न अपणा दगड़्या नौकर की बात नि माणी, बल्किन मा वेतैं जेलखाना मा डलवै दिनी, ताकि जबरि तक उ करज चुकता नि कैरी द्‍यो तबरि तक उखि रौ।</verse>
				<verse number="31">अर जब वेका दगड़ा का दुसरा नौकरों न यू सब होन्द देखि, त भौत उदास ह्‍वे गैनी। अर ऊंन जैके राजा तैं सब कुछ बतै दिनी।</verse>
				<verse number="32">तब वे राजा न वे नौकर तैं बुलै के बोलि, ‘हे दुष्‍ट नौकर, मिन तेरु पूरु करज माफ कैर दिनी, किलैकि तिन मि बटि दया कि भीक मांगि छै।</verse>
				<verse number="33">अर जन मिन त्वे पर दया कैरी, क्या तेरु भि इन फरज नि बणदु छौ कि तू भि अपणा दगड़ा नौकर पर दया कैर?’</verse>
				<verse number="34">तब राजा तैं भौत गुस्सा ऐ, अर वेन वे नौकर तैं दण्ड देण वळो का हाथ मा सौंप दिनी, ताकि जबरि तक यू करज चुकता नि कैरी द्‍यो, तबरि तक यू ऊंका हवाला मा रौ।</verse>
				<verse number="35">“इलै अगर जु तुम मा बटि हरेक उ मनखि, जु अपणा भै तैं मन से माफ नि करलु, त स्वर्ग मा रौण वळु मेरु पिता भि तुमरा दगड़ा मा ठिक इन्‍नि करलु।”</verse>
			</chapter>
			<chapter number="19">
				<verse number="1">अर यू सब कुछ बोन्‍न का बाद यीशु गलील मुलक बटि निकळि गै, अर यरदन गाड का दुसरा छाला यहूदिया मुलक मा ऐ गै।</verse>
				<verse number="2">अर सुणा, एक भौत बड़ी भीड़ वेका पिछनै चलण लगि गै, अर वेन उख लोगु तैं खूब कैरी।</verse>
				<verse number="3">तब फरीसी दल का लोग यीशु की अजमैस करणु खुणि वेका पास ऐनी अर ऊंन वेकू बोलि, “क्या या बात ठिक च, कि कुई भि मनखि अपणी जनानि तैं कैं भि वजै से तलाक दे सकदु?”</verse>
				<verse number="4">वेन ऊंतैं जबाब दिनी, “क्या तुम लोगु न पवित्रशास्‍त्र मा नि पैढी कि जैन सब कुछ बणै वे परमेस्वर न ऊंतैं नर अर नारी का रुप मा बणै।</verse>
				<verse number="5">अर वेन इन भि बोलि छौ कि, ‘आदिम अपणा ब्वे-बाब तैं छोड़ि के अपणी घरवळी का दगड़ा मा रालु, अर ऊ दुईया का दुई एक सरील होला?’</verse>
				<verse number="6">“इलै अब से वु दुई नि होला, बल्किन मा ऊ दुईया का दुई एक सरील होला। इलै जैतैं परमेस्वर न एक ब्यौ का बन्धन मा जुड़यूं च, वेतैं कुई भि मनखि अलग नि कैरो।”</verse>
				<verse number="7">तब फरीसी दल का लोगु न बोलि, “त फिर परमेस्वर का रैबर्या मूसा न इन आज्ञा किलै दे, कि तलाकनामा लिखी के वींतैं छोड़ द्‍या?”</verse>
				<verse number="8">तब यीशु न ऊंकू बोलि, “वु त मूसा रैबर्या न तुमरा मन का निठुर होण की वजै से इन आज्ञा दिनी कि तुम अपणी-अपणी घरवळी तैं तलाक दे सकद्‍यां, मगर शुरुवात मा जब परमेस्वर न मनखि तैं बणै, त वे बगत मा इन नि छौ।</verse>
				<verse number="9">अर मि तुमतै बतै देन्दु, कि जु मनखि ब्यौ का बाद गळत सम्बन्ध रखण का अलावा कै दुसरि वजै से अपणी घरवळी तैं तलाक देन्दु, अर फिर दुसरि जनानि का दगड़ा मा ब्यौ करदु, त इन्द्रयो मनखि गळत सम्बन्ध रखण वळु च। अर जु मनखि इन्दरि छोड़ि जनानि का दगड़ा मा ब्यौ करदु, त उ मनखि भि ठिक उन्‍नि गळत सम्बन्ध रखण वळु च।”</verse>
				<verse number="10">तब चेलों न यीशु कू बोलि, “गुरुजी, अगर कै पति अर पत्‍नी का बीच मा इन्द्रया हालत हो, फिर त ब्यौ ही नि करण चयेणु।”</verse>
				<verse number="11">यीशु न ऊंकू बोलि, “सब लोग ईं शिक्षा तैं स्वीकार नि कैरी सकदिन, पर जौं लोगु तैं परमेस्वर न अणविवाक होण को दान दियूं होलु, वु ही स्वीकार कैरी सकदिन।</verse>
				<verse number="12">किलैकि कुछ लोग अपणी माँ की कोख बटि ही नपुंसक जनम्यां छिन, अर कुछ लोगु तैं मनखि नपुंसक बणौन्दिन, पर कुछ लोग चनदिन कि ऊ परमेस्वर का राज की सेवा अच्छी तरौं कैरा इलै ईं बात का खातिर ऊ ब्यौ नि करदिन। अर जु कुई ईं शिक्षा तैं स्वीकार कैरी सकदु उ कैरी ल्यो।”</verse>
				<verse number="13">अर फिर लोग अपणा बाल-बच्‍चों तैं यीशु का पास लैनि, कि उ ऊं पर अपणु हाथ रखी के प्रार्थना कैरो, मगर वेका चेलों न ऊंतैं झिड़की।</verse>
				<verse number="14">पर यीशु न बोलि, “बच्‍चों तैं मि मू औण द्‍या, ऊंतैं रोका ना, किलैकि परमेस्वर को राज ऊं लोगु को ही च जौं को जीवन यों बच्‍चों की तरौं च।”</verse>
				<verse number="15">फिर यीशु न ऊं बच्‍चों पर अपणु हाथ रखी के ऊंतैं आसिरबाद दिनी, तब उ उख बटि चलि गै।</verse>
				<verse number="16">सुणा, एक ज्वान मनखि यीशु का पास ऐके बोन्‍न लगि गै, “गुरुजी, सदनि को जीवन पौणु खुणि मि कु जि भलु काम कैरुं?”</verse>
				<verse number="17">तब वेन वेकू बोलि, “तू मि बटि भलै का बारा मा किलै पूछणी छैई? परमेस्वर का अलावा कुई भलु नि च। अर अगर तू सदनि का जीवन मा जाण चान्दी छैई, त परमेस्वर की आज्ञाओं तैं माण।”</verse>
				<verse number="18">अर वे मनखि न बोलि, “कु जि आज्ञा गुरुजी?” यीशु न बोलि, “हत्या नि कैरी, दुसरि जनानियों का दगड़ा मा गळत सम्बन्ध नि रखी, अर चोरी नि कैरी, झूठ्‍ठी गवै नि देई,</verse>
				<verse number="19">अर अपणा ब्वे-बुबों को आदर-सम्मान कैरी, अर अपणा पड़ोसी बटि ठिक उन्‍नि प्यार कैरी जन तू खुद बटि करदी।”</verse>
				<verse number="20">वे ज्वान मनखि न वेकू बोलि, “गुरुजी, यों सब बातों तैं त मि मणदी ही औणु छौं, त अब मि मा कैं बात की कमी च।”</verse>
				<verse number="21">यीशु न वेकू बोलि, “अगर जु तू हरेक बात मा सिद्ध होण चान्दी त जा, अपणी जैजाद बेचि दे अर वे बटि जु कुछ भि मिललु वु सब गरीबों मा बांटि दे, अर मेरु चेला बणि जा। अर सुण, त्वेतै स्वर्ग मा खजाना मिललु।”</verse>
				<verse number="22">पर ईं बात तैं सुणी के वु ज्वान मनखि भौत उदास ह्‍वेके उख बटि चलि गै, किलैकि उ भौत बड़ु सेठ छौ।</verse>
				<verse number="23">तब यीशु न अपणा चेलों कू बोलि, “मि तुम बटि सच्‍च बोन्‍नु छौं, कि एक सेठ मनखि को परमेस्वर का राज मा दाखिल होण भौत कठिन च।</verse>
				<verse number="24">मि तुम बटि फिर से बोन्‍नु छौं, कि एक ऊंट को स्यूण का छेद बटि निकळण सरल च, मगर सेठ मनखि को परमेस्वर का राज मा दाखिल होण बड़ु कठिन च।”</verse>
				<verse number="25">अर ईं बात तैं सुणी के चेला दंग ह्‍वेके पूछण लगि गैनी, “गुरुजी, त फिर कैतैं बचयै जालु?”</verse>
				<verse number="26">तब यीशु न ऊंकी तरफा देखि के बोलि, “मनखियों बटि त यू नि ह्‍वे सकदु, पर परमेस्वर बटि सब कुछ ह्‍वे सकदु च।”</verse>
				<verse number="27">तब ईं बात पर पतरस न यीशु कू बोलि, “गुरुजी देखा, हम त सब कुछ छोड़ि के तुमरा पिछनै ह्‍वे ग्यां, त हमतै क्या जि मिललु?”</verse>
				<verse number="28">यीशु न ऊंकू बोलि, “मि तुम बटि सच्‍चि बोन्‍नु छौं, कि जब परमेस्वर नयू राज्य बणालु, वे बगत मनखि को पुत्र जु कि अपणा आदर-सम्मान की राजगद्‍दी पर बैठलु, अर तुम जु मेरा पिछनै चलणा छाँ, वे बगत पर तुम बारह राजगद्‍दियों पर बैठि के इस्राएल का बारह गोत्रों को न्याय करिल्या।</verse>
				<verse number="29">अर वु सभि लोग जौन मेरा खातिर अपणा घौर-बार, अर अपणा भै-बैंणो, अर अपणा ब्वे-बबों या अपणा बाल-बच्‍चों या अपणा पुंगड़ा-पटलों तैं छोड़याली, ऊंतैं सब कुछ मिललु, तब ऊ सदनि का जीवन का वारिस होला।</verse>
				<verse number="30">पर भौत सा लोग जु पैलि छिन, वु आखिरी ह्‍वे जाला, अर जु आखिरी छिन वु पैलि ह्‍वे जाला।”</verse>
			</chapter>
			<chapter number="20">
				<verse number="1">अर यीशु न अपणा चेलों कू इन भि बोलि कि, “परमेस्वर को राज इन च कि एक घौर को मालिक सुबेर लेके अपणा घौर बटि इलै निकळि, ताकि अपणा अंगूरों का बगिचा मा काम करणु खुणि मजदूरों तैं लगौ।</verse>
				<verse number="2">अर वेन मजदूरों तैं एक दिन की पूरि ध्याड़ि देण को करार कैरी, अर फिर वेन ऊंतैं अपणा अंगूर का बगिचा मा भेजि दिनी।</verse>
				<verse number="3">अर सुबेर नौ बजी का लगभग वु मालिक फिर से घौर बटि निकळि, अर वेन देखि की कुछ मजदूर लोग बजार मा सुद्‍दी खड़ा होयां छिन,</verse>
				<verse number="4">अर वेन ऊंकू बोलि, ‘तुम लोग भि मेरा अंगूरों का बगिचा मा जा, अर मि तुमतै ठिक-ठाक ध्याड़ि द्‍यूलु।’ तब वु लोग भि वेका बगिचा मा गैनी।</verse>
				<verse number="5">अर फिर उ मालिक बारह अर तीन बजी का करीब अपणा घौर बटि भैर निकळि, अर वेन फिर से ठिक उन्‍नि कैरी।</verse>
				<verse number="6">अर रुमुक का बगत करीब पांच बजी उ फिर घौर बटि भैर निकळि, अर वेन कुछ और लोगु तैं खड़ु होयुं देखि। अर वेन ऊंकू बोलि, ‘तुम लोग पूरा दिन-भर इख बेकार किलै खड़ा रयां?’</verse>
				<verse number="7">ऊंन वेकू बोलि, ‘किलैकि साब, हमतै कैन भि ध्याड़ि पर नि रखी।’ वे मालिक न ऊंकू बोलि, ‘जा, मेरा अंगूर का बगिचा मा जैके ध्याड़ि को काम कैरा।’</verse>
				<verse number="8">अर जब रुमुक ह्‍वे गै, त बगिचा का मालिक न अपणा कर्ता-धर्ता कू बोलि, ‘सब मजदूरों तैं बुलौ, अर जु लोग आखिरी मा ऐ छा ऊं बटि लेके शुरु तक सभ्यों तैं ध्याड़ि दे।’</verse>
				<verse number="9">अर जब वु मजदूर ऐनी जु कि पांच बजी का लगभग ऐ छा, त ऊंतैं एक दिन की पूरि ध्याड़ि मिली।</verse>
				<verse number="10">इलै जु पैलि ऐ छा ऊंन सोची की हमतै जादा मिललु, मगर ऊंतैं भि एक दिन की ध्याड़ि ही मिली।</verse>
				<verse number="11">अर जब ऊंतैं ध्याड़ि मिली गै, त वु मालिक पर कुड़कुड़ौण लगि गैनी।</verse>
				<verse number="12">अर बोलि, ‘साब, यू जु आखिरी मा ऐनी यों न त सिरफ एक घन्टा ही काम कैरी, अर तुमुन ऊंतैं भि हमरा बराबर ही कैरियाली, अर हमुन त पूरा दिन-भर इथगा मेनत कैरी अर तेज घाम मा भि लग्यां रयां?’</verse>
				<verse number="13">अर मालिक न ऊंमा बटि कै एक तैं जबाब दिनी, ‘हे दगड़्या, मिन तेरा दगड़ा मा कुछ अन्यो नि कैरी, किलैकि मिन त्वेतै पैलि ही बतैयालि छौ, कि मिन त्वेतै एक दिन कि ही ध्याड़ि देण।</verse>
				<verse number="14">इलै जु तेरु हिसाब-किताब च वेतैं उठौ अर चलि जा, किलैकि मेरी मनसा इन च कि जथगा मिन त्वेतै दे, ठिक उथगा ही मि आखिरी मा अयां लोगु तैं भि द्‍यूं।</verse>
				<verse number="15">क्या मि अपणा धन-दौलत तैं अपणी मरजी से खर्च नि कैरी सकदु? या तू जळत्यौणि छै, किलैकि मि खुला दिल से देन्दु।’</verse>
				<verse number="16">अर ठिक उन्‍नि भौत सा लोग जु पैलि छिन, वु आखिरी ह्‍वे जाला, अर जु आखिरी छिन वु पैलि ह्‍वे जाला।”</verse>
				<verse number="17">अर यीशु अपणा बारह चेलों का दगड़ा मा यरूशलेम नगर जाणु छौ, त वेन बाटा मा चलद-चलद अपणा बारह चेलों तैं भीड़ मा बटि अलग कैरिके ऊंकू बोलि कि,</verse>
				<verse number="18">“सुणा, हम लोग यरूशलेम नगर कू जाणा छां, अर उख मनखि का पुत्र तैं मुख्य पुरोहितों अर शास्‍त्री लोगु का हवाला किये जालु, अर वु वे पर इळजाम लगाला कि वेतैं जान से मार दिये जौ।</verse>
				<verse number="19">अर वु लोग मनखि का पुत्र तैं ऊं लोगु का हवाला कैरी द्‍याला जु कि यहूदी जाति का नि छिन, ताकि वु लोग वेको मजाक उड़ा, अर कोड़ा मारा, अर क्रूस पर चड़ै द्‍या, पर सुणा, उ तिसरा दिन ज्यून्दु ह्‍वे जालु।”</verse>
				<verse number="20">येका बाद जबदी की घरवळी अपणा दुई नौनो का दगड़ा यीशु का पास ऐ। अर वींन वेका खुटों मा पोड़ि के वेसे बिन्ती कैरिके कुछ मांगि।</verse>
				<verse number="21">तब यीशु न वींकू बोलि, “हे बेटी, तू क्या चान्दी?” वींन बोलि, “गुरुजी, जब तुमरो राज आलु त मेरा दुई नौनो तैं एक तैं अपणी दैंणी तरफा, अर दुसरा तैं अपणी बैं तरफा बैठण को अधिकार दे द्‍या।”</verse>
				<verse number="22">ईं बात तैं सुणी के यीशु न बोलि, “तुम नि जणद्‍यां कि तुम मंगणा क्या छाँ। क्या तुम वे दुख तैं झेली सकद्‍यां, जु मि झिलण वळु छौं?” तब ऊं दुईयों न वेकू बोलि, “हाँ गुरुजी, हम झेली सकद्‍यां।”</verse>
				<verse number="23">वेन ऊंकू बोलि, “तुम वे दुख तैं जरुर झिलिल्या, पर मेरा दैं अर बैं तरफा बैठाण को हक मि मा नि च। या जगा त ऊं लोगु खुणि च जौं खुणि मेरा पिता परमेस्वर न तयार कैरिके रखी च।”</verse>
				<verse number="24">अर ऊं दुई भैयों की ईं बात तैं सुणी के दस चेला ऊं दुई भैयों पर गुस्सा ह्‍वेनि।</verse>
				<verse number="25">अर यीशु न चेलों तैं अपणा पास बुलै के बोलि, “तुम जणदा ही छाँ कि जु लोग यहूदी जाति का नि छिन, ऊंका राजा ऊं पर सासन करदिन अर ऊंका बड़ा अधिकारी लोग अपणा-अपणा राज्य का लोगु पर अपणु हक जमौन्दिन।</verse>
				<verse number="26">पर तुम लोगु का बीच मा अधिकार जतौण वळी बात नि होण चयेणी, अर अगर तुम मा बटि कुई बड़ु होण चान्दु, त उ तुमरो सेवक बणु,</verse>
				<verse number="27">अर अगर कुई तुम मा बटि पैलु होण चान्दु, उ तुमरो सेवक बणु।</verse>
				<verse number="28">तुमतै मनखि का पुत्र जन होण चयेणु, किलैकि उ अपणी खातिरदारि करौणु खुणि नि ऐ, बल्किन मा इलै ऐ कि खुद दुसरा लोगु की सेवा कैरो, अर भौत सा लोगु तैं ऊंका पापों से आजादी दिलौणु खुणि अपणी जान दे द्‍यो।”</verse>
				<verse number="29">जब यीशु अर वेका चेला यरीहो नगर बटि निकळि के जाणा छा, त एक बड़ी भीड़ वेका पिछनै चलण लगि गै।</verse>
				<verse number="30">अर सुणा, दुई अन्धा सड़क का किनरा बैठयां छा, अर जब ऊंन यू सुणी कि यीशु इख बटि जाणु च त ऊ चिल्‍लै-चिल्‍लै के बुलण लगि गैनी, “हे प्रभु, राजा दाऊद का वंशज, हम पर दया कैर।”</verse>
				<verse number="31">तब लोगु न ऊंतैं झिड़की के बोलि, “चुप ह्‍वे जा।” पर उ और भि जादा जोर से चिल्‍लै के बोन्‍न लगि गैनी, “प्रभु हे प्रभु, राजा दाऊद का वंशज, हम पर दया कैर।”</verse>
				<verse number="32">तब यीशु रुकी गै अर वेन ऊंतैं बुलै अर पूछी, “तुम क्या चन्द्‍यां, कि मि तुम खुणि कैरुं?”</verse>
				<verse number="33">अर ऊंन वेकू बोलि, “प्रभु, हमरा आंख्यों तैं खूब कैरी द्‍या।”</verse>
				<verse number="34">अर यू सुणी के यीशु तैं ऊं पर तरस ऐ, अर वेन ऊंका आंख्यों तैं छ्वी, अर वु तुरन्त दिखण लगि गैनी। अर तब वु दुईया का दुई भि यीशु का पिछनै ह्‍वे गैनी।</verse>
			</chapter>
			<chapter number="21">
				<verse number="1">अर जब यीशु अर वेका चेला यरूशलेम नगर का नजदीक पौंछिनी, त वु जैतून नौ का पाड़ पर बस्यां बैतफगे गौं मा ऐनी, त वेन अपणा दुई चेलों तैं इन बोलि के भेजि कि,</verse>
				<verse number="2">“समणि का गौं मा जा। अर उख पौंछदि तुमतै एक गधी मिलेली ज्वा कि बन्धी होलि, अर वेका दगड़ा मा वेको बच्‍चा भि मिललु तुम ऊंतैं खोली के मेरा पास ला।</verse>
				<verse number="3">अर अगर कुई तुम बटि पूछलु, किलै खुलणा छाँ रे येतैं? त इन बुलयां कि, ‘प्रभु तैं यों की जरुरत च,’ तब वु तुरन्त तुमतै लि जाण द्‍याला।”</verse>
				<verse number="4">अर इन इलै ह्‍वे ताकि परमेस्वर का रैबर्या का द्‍वारा बुलयूं वु वचन पूरु ह्‍वे जौ। जु इन च कि,</verse>
				<verse number="5">“सिय्योन की नौनि कू बोला, ‘देख तेरु राजा तेरा पास औणु च, अर वु दीन च, अर गधा पर, बल्किन मा गधी का बच्‍चा पर बैठयूं च।’”</verse>
				<verse number="6">अर चेलों न जैके ठिक उन्‍नि कैरी, जन यीशु न ऊंकू बोलि छौ।</verse>
				<verse number="7">अर ऊ गधी अर वेका बच्‍चा तैं लेके ऐ गैनी, अर लोगु न ऊं पर अपणा कपड़ा डाल दिनी, अर यीशु ऊंमा बैठि गै।</verse>
				<verse number="8">तब भीड़ मा बटि भौत सा लोगु न यीशु का आदर-सम्मान का खातिर अपणा कपड़ा बाटा मा बिछैंनी, अर ठिक उन्‍नि कुछ लोगु न वेका स्वागत का खातिर डाळों का फौंकों तैं काटी के बाटा मा बिछै।</verse>
				<verse number="9">अर भीड़ का जु लोग वेका अगनै-पिछनै औणा छा, ऊ सब चिल्‍लै-चिल्‍लै के बोन्‍ना छा कि, “दाऊद का वंशजे की होसन्‍ना, धन्य च उ जु प्रभु का नौ से औन्दु, स्वर्ग मा होसन्‍ना।”</verse>
				<verse number="10">अर जब यीशु यरूशलेम नगर मा ऐ, त पूरा नगर मा हलचल मची गै। अर नगर का लोग पूछण लगि गैनी, “अरे कु च यू?”</verse>
				<verse number="11">अर भीड़ का लोगु न बोलि, “अरे यू गलील मुलक का नासरत गौं को रैबर्या यीशु च।”</verse>
				<verse number="12">अर यीशु यरूशलेम मन्दिर मा जैके ऊं सभ्यों तैं भैर निकळण लगि गै, जु कि मन्दिर मा चीजों तैं बिकौण अर खरीदण वळा छा। अर पैसौं को अदलण-बदलण करण वळो की मेजों तैं उल्ट-पुल्ट कैर दिनी, अर कबूतर बिकौण वळो की चौकलों तैं फरके दिनी।</verse>
				<verse number="13">तब वेन बोलि, “इन लिख्यूं च कि, “‘मेरु घौर प्रार्थना को घौर होलु,’ पर तुमुन येतैं डकैतों को उड़्यार बणैयालि।”</verse>
				<verse number="14">अर उख मन्दिर मा अन्धा अर लंगड़ा यीशु का पास ऐनी, अर वेन ऊंतैं खूब कैरी।</verse>
				<verse number="15">अर जब मुख्य पुरोहितों अर शास्‍त्रियों न वेका द्‍वारा अदभुत कामों तैं देखि, अर नौनो का द्‍वारा इन नारा लगौण सुणी कि, “दाऊद का वंशजे की होसन्‍ना” त यू सुणी के ऊंतैं भौत गुस्सा ऐ।</verse>
				<verse number="16">तब ऊंन यीशु कू बोलि, “क्या तू सुनणी नि छैई कि यू क्या बोन्‍ना छिन?” अर वेन ऊंकू बोलि, “हाँ सुनणु छौं। क्या तुमुन पवित्रशास्‍त्र मा यू कभि नि पैढी कि, ‘तिन बच्‍चों अर दूद पीण वळा छुटा बच्‍चों से अपणी तारीफ करवै?’”</verse>
				<verse number="17">तब यीशु ऊंतैं छोड़ि के यरूशलेम नगर का भैर बैतनिय्याह गौं कू चलि गै, अर वीं राति उ उखि रै।</verse>
				<verse number="18">अर दुसरा दिन जब सुबेर ह्‍वे, त यीशु अर वेका चेला बैतनिय्याह गौं बटि वापिस यरूशलेम नगर कू औणा छा, त वेतैं भूक लगि।</verse>
				<verse number="19">अर वेकी नजर बाटा का किनरा एक तिमला का डाळा पर पोड़ि अर उ वेका नजदीक गै, मगर वेतैं पत्तों का अलावा वे पर एक भि तिमलु नि मिली। तब यीशु न वे डाळा कू बोलि, “आज का बाद त्वे पर कभि फल नि लगा।” अर देखा, वु डाळु तुरन्त सूखि गै।</verse>
				<verse number="20">अर यू देखि के चेला हकदक ह्‍वेके पूछण लगि गैनी, “यू तिमला को डाळु एकदम से कनकै सुख गै, गुरुजी?”</verse>
				<verse number="21">वेन ऊंतैं जबाब दिनी, “मि तुम बटि सच्‍च बोन्‍नु छौं, अगर जु तुम बिस्वास रखिल्या, अर सक नि करिल्या, त तुम भि यू कैरी सकद्‍यां जन मिन ये डाळा का दगड़ा मा कैरी, बल्किन मा अगर जु तुम ये पाड़ कू भि बोलिल्या कि ‘इख बटि उखड़ी जा, अर समुन्दर मा पोड़ि जा,’ त तुम खुणि उन्‍नि ह्‍वे जालु।</verse>
				<verse number="22">अर प्रार्थना मा जु कुछ भि तुम बिस्वास से मंगिल्या, उ सब तुमतै मिली जालु।”</verse>
				<verse number="23">अर एक बार इन ह्‍वे कि यीशु मन्दिर मा जैके उपदेस देणु छौ। तबरि तक उख कुछ मुख्य पुरोहित, अर लोगु का कुछ यहूदी अध्यक्षों न वेका पास ऐके पूछी, “गुरुजी, हमतै इन बता कि तुम कै का दियां अधिकार से यू काम करद्‍यां? अर कु च उ जैन तुमतै यू अधिकार देई?”</verse>
				<verse number="24">तब वेन ऊंतैं जबाब दिनी, “चला मि भि तुम बटि एक सवाल पूछदु, अर अगर तुम मितैं बतै दिल्या, त मि भि तुमतै बतै द्‍यूलु कि मि यू काम कै अधिकार से करदु।</verse>
				<verse number="25">चला इन बता कि यूहन्‍ना तैं बपतिस्मा देण को अधिकार परमेस्वर न दे छौ, या यू अधिकार वेतैं लोगु न दे छौ?” तब ऊ आपस मा बात-चित कैरिके बोन्‍न लगि गैनी, “अगर जु हम इन बुलला कि, ‘वेतैं यू अधिकार परमेस्वर की तरफा बटि मिल्यूं च,’ तब वेन हम कू बोन्‍न कि, ‘त फिर तुमुन वेका वचनों पर बिस्वास किलै नि कैरी?’</verse>
				<verse number="26">अर अगर जु हम इन बुल्द्‍यां, ‘मनखियों की तरफा बटि,’ त हम कू भीड़ की डौऽर च, किलैकि यू सब यूहन्‍ना तैं परमेस्वर को एक रैबर्या मणदिन।”</verse>
				<verse number="27">इलै ऊंन यीशु तैं जबाब देई, “हम नि जणद्‍यां की यू अधिकार वेतैं कख बटि मिली।” तब वेन ऊंकू बोलि, “त ठिक च मिन भि तुमतै नि बतौण की मि यू काम कै का दियां अधिकार से करदु।”</verse>
				<verse number="28">अर यीशु न ऊं से पूछी, “चला, इन बता तुम ईं बात का बारा मा क्या सोचद्‍यां? सुणा, एक मनखि का दुई नौना छा। अर एक दिन वेन बड़ा नौना का पास जैके बोलि, ‘बेटा, आज अंगूरों का बगिचा मा जैके काम कैर।’</verse>
				<verse number="29">अर वे नौन न जबाब दिनी, ‘मि नि जाणु पापा,’ पर बाद मा वेको मन बदलि गै अर चलि गै।</verse>
				<verse number="30">तब बुबा न छुटा नौना का पास जैके भि इन्‍नि बोलि, अर ये दुसरा नौन न जबाब दिनी, ‘ठिक च पापा जाणु छौं,’ पर उ नि गै।</verse>
				<verse number="31">यों दुईयों मा बटि कैन अपणा बुबा की इच्छा तैं पूरि कैरी?” ऊं लोगु न बोलि, “गुरुजी, बड़ा नौन न।” यीशु न ऊंकू बोलि, “मि तुम बटि सच्‍च बोन्‍नु छौं, कि चुंगी लेण वळा लोग अर वेश्याओं का जन दुसरा पापि लोग तुम से पैलि परमेस्वर का राज मा जाणा छिन।</verse>
				<verse number="32">अर यू मि इलै बोन्‍नु छौं किलैकि यूहन्‍ना बपतिस्मा देण वळु यू बतौणु खुणि ऐ कि मनखि तैं कनकै धरमी जीवन जीण चयेणु, अर तुम लोगु न वेकी बातों पर बिस्वास नि कैरी, पर चुंगी लेण वळो न अर वेश्याओं का जन दुसरा पापि लोगु न वेकी बातों पर बिस्वास कैरी। अर यू दिखण का बाद भि तुम लोगु न मन से पस्ताप नि कैरी, अर ना ही वेकी बातों पर बिस्वास कैरी।”</verse>
				<verse number="33">यीशु न ऊंकू बोलि एक और उदारण सुणा, “एक घौर का मालिक न अंगूरों को एक बगिचा बणै, अर वेका चौतरफि बाड़ कैरी, अर रस निकळणु खुणि कोलु लगै अर रस जमा करणु खुणि खडलु भि बणै, अर बगिचे की देख-रेख करण वळा खुणि एक झोपड़ी भि बणै। अर बगिचा को ठेक्‍का किसानों तैं देके खुद वु देस चलि गै।</verse>
				<verse number="34">अर जब अंगूरों तैं गड़णो को बगत ऐ, त वे मनखि न अपणा नौकरों तैं ऊं किसानों का पास भेजि, ताकि ऊ लोग अंगूरों को हिस्सा लेके वेका पास आ।</verse>
				<verse number="35">पर किसानों न वेका नौकरों तैं पकड़ी के मारी-पीटि, अर कै पर ढुंग्यो लगै, अर कैतैं त जान से ही मारी दिनी।</verse>
				<verse number="36">“तब वे मालिक न दुसरि दौं पैलि से भि जादा नौकरों तैं भेजि, अर ऊं किसानों न ऊंका दगड़ा मा भि उन्‍नि कैरी।</verse>
				<verse number="37">अर आखिर मा वेन अपणा नौना तैं इन सोची के ऊंका पास भेजि कि, ‘ऊ मेरा नौना की जरुर इज्‍जत करला।’</verse>
				<verse number="38">अर जब ऊं किसानों न मालिक का नौना तैं देखि त आपस मा बुलण लगि गैनी, ‘अरे, यू त वारिस च। ऐ जा, हम येतैं मारी देन्द्‍यां, अर यू सब कुछ हम ले लिन्द्‍यां।’</verse>
				<verse number="39">इलै ऊंन वेतैं पकड़ी अर अंगूरों का बगिचा बटि भैर निकाळि, अर वेतैं जान से मारी दिनी।</verse>
				<verse number="40">“इलै अब इन बता, जब बगिचा को मालिक आलु, त ऊं किसानों का दगड़ा मा क्या जि करलु?”</verse>
				<verse number="41">तब ऊंन यीशु कू बोलि, “गुरुजी, वु मालिक ऊं बुरा किसानों तैं बुरी तरौं से नास करलु, अर अंगूरों का बगिचा को ठेक्‍का दुसरा किसानों तैं दे द्‍यालु, जु बगत-बगत पर अंगूरों को हिस्सा वेतैं दिणा राला।”</verse>
				<verse number="42">तब यीशु न ऊंकू बोलि, “क्या तुमुन पवित्रशास्‍त्र मा कभि इन नि पैढी कि, “‘जै ढुंगा तैं मिस्‍त्रियों न फुंन ढोळि छौ, उई कुणों को खास ढुंगो बणि गै? अर यू प्रभु की तरफा बटि ह्‍वे, अर हमरा दिखण मा यू अदभुत च।’</verse>
				<verse number="43">“इलै मि तुमतै बतै देन्दु, कि परमेस्वर को राज तुम बटि लुछे जालु, अर इन्द्रया लोगु तैं दिये जालु, जु कि वेका मुताबिक आज्ञा को पालन करला।</verse>
				<verse number="44">अर जु कुई भि वे ढुंगा पर लमड़लु वेका टुकड़ा-टुकड़ा ह्‍वे जाला, अर जै पर उ पोड़लु वेतैं त उ पीसी द्‍यालु।”</verse>
				<verse number="45">अर यीशु का यों उदारण तैं सुणी के मुख्य पुरोहित अर फरीसी दल का लोग समझि गैनी कि उ हमरा बारा मा बोन्‍नु च।</verse>
				<verse number="46">अर वु वेतैं पकड़ण चाणा छा, मगर ऊंतैं भीड़ का लोगु से डौऽर लगि, किलैकि लोग वेतैं परमेस्वर को एक रैबर्या मणदा छा।</verse>
			</chapter>
			<chapter number="22">
				<verse number="1">अर यीशु ऊं लोगु तैं फिर से अलग-अलग उदारण देण लगि गै।</verse>
				<verse number="2">वेन बोलि कि, “परमेस्वर को राज एक राजा का जन च, जैन अपणा नौना का ब्यौ की दावत देई।</verse>
				<verse number="3">अर वेन न्यूत्यां लोगु तैं ब्यौ की दावत मा बुलाणु खुणि अपणा नौकरों तैं भेजि, मगर न्यूतेर लोग औण नि चाणा छा।</verse>
				<verse number="4">अर वेन दुसरि दौं भि अपणा और नौकरों तैं इन बोलि के भेजि कि, ‘सुणा, न्यूत्यां लोगु कू बोला कि मिन दावत को खाणुक तयार कैरियाली, अर मेरा पळ्यां हटा-कटा जानबर मरयां छिन। अर देखा, सब कुछ तयार च, इलै तुम ब्यौ की दावत मा ऐ जा।’</verse>
				<verse number="5">पर न्यूत्यां लोगु न ईं बात पर कुई ध्यान नि देई, अर वु अपणा-अपणा कामों पर चलि गैनी, कुई अपणा पुंगड़ा मा, अर कुई अपणा व्यापार खुणि चलि गै।</verse>
				<verse number="6">अर कुछ लोगु न राजा का नौकरों तैं पकड़ी अर ऊंका दगड़ा गळत बरतौ कैरी, अर ऊंतैं मारी भि दिनी।</verse>
				<verse number="7">तब वे राजा तैं भौत गुस्सा ऐ, अर वेन अपणी सेना तैं भेजि के ऊं हत्यारों को नास कैरी दिनी, अर ऊंका नगर तैं फूकी दिनी।</verse>
				<verse number="8">“तब वेन अपणा नौकरों कू बोलि, ‘ब्यौ को खाणु तयार च, मगर जौं लोगु तैं बुलये गै छौ ऊ लोग ही लैख नि छा।</verse>
				<verse number="9">इलै सुणा, तुम लोग चौबटो पर जा, अर जथगा भि लोग तुमतै मिलला, ऊं सभ्यों तैं ब्यौ की दावत मा बुलै के ला।’</verse>
				<verse number="10">तब वु नौकर सड़कों मा चलि गैनी, अर ऊंतैं जथगा भि लोग मिलिनी, अब चै वु भला हो या बुरा जथगा भि लोग मिलिनी ऊं नौकरों न ऊं सब लोगु तैं इकट्‍ठा कैरी। अर जै घौर मा ब्यौ होणु छौ उ घौर मैमानोंळ भोरी गै।</verse>
				<verse number="11">“अर जब राजा मैमानों तैं मिलणु कू भितर ऐ, त वेकी नजर एक आदिम पर पोड़ि, जैका ब्यौ का कपड़ा नि पैरयां छा।</verse>
				<verse number="12">वेन वेकू बोलि, ‘दगड़्या, तू बगैर ब्यौ का कपड़ा पैरयां इख किलै ऐ?’ अर उ आदिम सन्ट रै गै।</verse>
				<verse number="13">तब राजा न नौकरों कू बोलि, ‘ये मनखि का हाथ-खुटा बान्धि के भैर अन्धेरा मा डाल द्‍या, जख रुंण अर दांतों को कड़गिटाण ही होलु।’”</verse>
				<verse number="14">तब सुनण वळा लोगु खुणि यीशु न इन भि बोलि, “बुलयां त भौत छिन, पर चुण्यां कम ही छिन।”</verse>
				<verse number="15">तब फरीसी दल का लोग उख बटि चलि गैनी। अर अपणा आपस मा मिली के ऊंन एक सला बणै, कि यीशु तैं वेकी ही बात मा कनकै फसांण।</verse>
				<verse number="16">तब ऊंन अपणा चेला-चआँटों तैं राजा हेरोदेस का कुछ खास लोगु का दगड़ा यीशु का पास इन बुलणु कू भेजि, कि वेकू बुलयां, “गुरुजी, हम जणदा छां कि तुम सच्‍चा छाँ, अर सच्‍चै से परमेस्वर का बाटा का बारा मा सिखौन्द्‍यां। अर तुम कै से भि नि डऽरद्‍यां, अर ना ही तुम कै का दगड़ा मा पक्षपात कैरिके बात करद्‍यां।</verse>
				<verse number="17">इलै हमतै बता, कि तुम क्या सोचद्‍यां? हमतै रोमी महाराजा तैं कर देण चयेणु, या नि देण चयेणु?”</verse>
				<verse number="18">पर यीशु न ऊंका मन का कपट तैं जाण्यालि छौ इलै वेन ऊंकू बोलि, “हे ढोंगियों, तुम मितैं किलै अजमौणा छाँ?</verse>
				<verse number="19">जौं सिक्‍कोंळ तुम कर देन्द्‍यां वु मितैं दिखा।” तब वु लोग वेका पास एक सिक्‍का लेके ऐनी।</verse>
				<verse number="20">यीशु न ऊंतैं पूछी, “यां पर कै की छाप अर कै को नौ लिख्यूं च?”</verse>
				<verse number="21">अर ऊंन वेकू बोलि “रोमी महाराज को।” तब वेन बोलि, “जु रोमी महाराज को च उ महाराज तैं द्‍या, अर जु परमेस्वर को च उ परमेस्वर तैं द्‍या।”</verse>
				<verse number="22">अर या बात सुणी के वु हकदक ह्‍वे गैनी, अर यीशु तैं छोड़ि के उख बटि चलि गैनी।</verse>
				<verse number="23">अर वे ही दिन सदूकी दल का लोग यीशु का पास ऐनी अर यू इन मणदिन कि मुरयां लोग फिर से ज्यून्दा नि ह्‍वे सकदिन इलै ऊंन वेसे पूछी,</verse>
				<verse number="24">“गुरुजी, मूसा रैबर्या का दियां नियम-कानूनों मा लिख्यूं च कि, अगर कै को भै मोरि जौ अर ऊंकी कुई औलाद नि हो, त वेकू भै अपणी भाभी का दगड़ा ब्यौ कैरिके अपणा भै को वंश अगनै बढ़ो।</verse>
				<verse number="25">त गुरुजी, बात इन च कि, हमरा इख सात भै छा अर जब पैला भै को ब्यौ ह्‍वे, त बिना औलाद को सुख दिख्यां ही उ मोरि गै। अर वेकी औलाद नि छै, इलै वेका दुसरा भै न भाभी तैं अपणु बणै दिनी, मगर उ भि बिना औलाद को सुख दिख्यां मोरि गै।</verse>
				<verse number="26">अर फिर तिसरा न भि वीं भाभी का दगड़ा मा ब्यौ कैरी, अर उ भि बिना औलाद को सुख दिख्यां ही मोरि गै। अर ऊं सातों का दगड़ा इन्‍नि ह्‍वे।</verse>
				<verse number="27">अर ऊं सभ्यों का बाद वा जनानि भि मोरि गै।</verse>
				<verse number="28">त अब हमतै इन बता कि मुरयां लोगु का ज्यून्द होण का दिन पर वा कै की घरवळी होलि? किलैकि वा सातों की घरवळी ह्‍वे गै छै।”</verse>
				<verse number="29">तब यीशु न ऊंतैं जबाब दिनी, “तुम बड़ा भरम मा छाँ, किलैकि तुम नऽ त पवित्रशास्‍त्र तैं जणद्‍यां, अर ना ही परमेस्वर की ताकत तैं।</verse>
				<verse number="30">किलैकि ज्यून्दा होण पर वु लोग नऽ त ब्यौ करला, अर ना ही ऊंकी नौनि ब्यौ खुणि दिये जालि, पर स्वर्ग मा वु परमेस्वर का स्वर्गदूतों का जन ह्‍वे जाला।</verse>
				<verse number="31">पर मुरयां लोगु का ज्यून्द होण का बारा मा जु वचन परमेस्वर न बोलि छौ, तुमुन वु नि पैढी क्या?</verse>
				<verse number="32">“परमेस्वर इन बुल्दु कि, ‘मि अब्राहम को परमेस्वर, इसहाक को परमेस्वर अर याकूब को परमेस्वर छौं?’ अर परमेस्वर मुरदो को ना, पर ज्यून्दो को परमेस्वर च।”</verse>
				<verse number="33">अर जब लोगु न या बात सुणी, त वेका उपदेस तैं सुणी के दंग रै गैनी।</verse>
				<verse number="34">अर जब फरीसी दल का लोगु न या बात सुणी की यीशु न सदूकियों की बोलती बन्द कैरियाली, त ऊ सब इकट्‍ठा ह्‍वेनि।</verse>
				<verse number="35">तब ऊंमा बटि एक मनखि जैतैं यहूदी नियम-कानूनों को भौत अच्छु ज्ञान छौ वेन यीशु तैं अजमौणु खुणि वेसे पूछी,</verse>
				<verse number="36">“गुरुजी, नियम-कानून मा सबसे बड़ी आज्ञा क्‍वा च?”</verse>
				<verse number="37">तब यीशु न जबाब देई, “‘तू अपणा प्रभु परमेस्वर तैं अपणा पूरा मनळ, अर अपणी पूरि अकलळ, अर ठिक उन्‍नि अपणा पूरा जीवन से प्यार कैर।’</verse>
				<verse number="38">सबसे बड़ी अर खास आज्ञा त या ही च।</verse>
				<verse number="39">अर ठिक उन्‍नि दुसरि आज्ञा या च कि, ‘जन प्यार तू खुद से करदी, ठिक उन्‍नि प्यार तू सब लोगु से भि कैर।’</verse>
				<verse number="40">“अर यों दुई आज्ञाओं पर ही मूसा का दियां सब नियम-कानून अर परमेस्वर का रैबर्यों की सब शिक्षा टिकी छिन।”</verse>
				<verse number="41">अर उख जमा होयां फरीसी दल का लोगु बटि यीशु न इन पूछी,</verse>
				<verse number="42">“मसीह का बारा मा तुम क्या सोचद्‍यां? उ कै की पीढ़ी बटि होलु?” ऊंन वेकू बोलि, “राजा दाऊद की पीढ़ी को।”</verse>
				<verse number="43">यीशु न ऊंकू बोलि, “त फिर दाऊद पवित्र आत्मा मा ह्‍वेके वे खुणि प्रभु किलै बुल्दु?</verse>
				<verse number="44">अर उ इन बुल्दु कि, “‘परमेस्वर न मेरा प्रभु बटि बोलि, मेरी दैंणी तरफा बैठ, जबरि तक कि मि तेरा दुसमनों तैं हरै के तेरा अधीन नि कैरी द्‍यूं।’</verse>
				<verse number="45">“अर जब राजा दाऊद ही मसीह खुणि ‘प्रभु’ बुल्दु, त फिर उ वेको नौनु कनकै ह्‍वे सकदु?”</verse>
				<verse number="46">अर ईं बात तैं सुणी के फरीसी दल का लोग यीशु तैं जबाब नि दे सकिनी, अर ये दिन बटि कै की हिम्मत नि ह्‍वे कि कुई भि वेतैं अजमौणु खुणि फिर वे बटि सवाल पूछो।</verse>
			</chapter>
			<chapter number="23">
				<verse number="1">अर जब सब लोग यू सुनणा छा, त यीशु न अपणा चेलों अर भीड़ का लोगु कू बोलि,</verse>
				<verse number="2">शास्‍त्री अर फरीसी दल का लोगु का पास मूसा का दियां नियम-कानून तैं सिखौण को अधिकार च।</verse>
				<verse number="3">इलै ऊ जु कुछ भि तुम बटि बुलला तुम ऊंकी माणा अर उन्‍नि कैरा, पर ऊंका जन काम नि कर्यां, किलैकि जु कुछ भि ऊ बुल्दिन, वेका मुताबिक वु खुद नि करदिन।</verse>
				<verse number="4">अर वु नियम-कानूनों का गरा बोझ तैं बणै के लोगु का कन्धों पर लादि देन्दिन जैतैं उठौण बड़ु कठिन च, पर नियम-कानून को पालन कनकै करण चयेणु ईं बात खुणि वु दुसरा लोगु की मदद नि करदिन।</verse>
				<verse number="5">अर वु पवित्रशास्‍त्र का वचनों तैं चमड़े की चौड़ी पट्‍टियों पर लिखी के अपणा सरील पर बन्धदिन, अर अपणा चोळों का झालरों तैं बड़ु लम्बो करदिन, अर अपणु हरेक काम वु मनखियों तैं दिखाणु खुणि करदिन।</verse>
				<verse number="6">अर दावत का बगत मा आदर-सम्मान वळी जगा, अर उन्‍नि ऊंतैं प्रार्थना भवनों मा मुख्य-मुख्य जगा चयेन्दी।</verse>
				<verse number="7">अर ऊ चनदिन कि लोग ऊंतैं बजारों मा नमस्कार कैरा, अर गुरु बोलि के ऊंतैं आदर-सम्मान द्‍या।</verse>
				<verse number="8">मगर तुम दुसरा लोगु बटि खुद तैं गुरु नि बुलवयां, किलैकि तुमरो एक ही गुरु च, अर तुम सब आपस मा भै छाँ।</verse>
				<verse number="9">अर ना ही ईं धरती पर कै कू आत्मिक पिता बुलयां, किलैकि तुमरो एक ही पिता च जु की स्वर्ग मा च।</verse>
				<verse number="10">अर ना ही तुम खुद कू मालिक बुलवयां, किलैकि तुमरो एक ही मालिक च याने कि मसीह जु कि मि छौं।</verse>
				<verse number="11">इलै जु कुई तुम मा बड़ु होण चान्दु, उ तुमरि सेवा कैरुं।</verse>
				<verse number="12">किलैकि जु कुई अफ तैं बड़ु बणालु उ छुटो किये जालु, अर जु अफु तैं दीन कैरिके छुटो बणालु वु बड़ु किये जालु।</verse>
				<verse number="13">तब यीशु न ऊंकू बोलि, “हे शास्‍त्री अर फरीसी दल का लोगु, तुम बड़ा ढोंगि छाँ अर तुम पर हाय च, किलैकि तुम दुसरा लोगु खुणि परमेस्वर का राज को द्‍वार बन्द कना छाँ, अर नऽ त तुम खुद वेमा जाणा छाँ, अर ना ही ऊंतैं जाण देणा छाँ जु कि वेमा जाण का हकदार छिन।</verse>
				<verse number="14">[हे शास्‍त्री अर फरीसी दल का लोगु, तुम बड़ा ढोंगि छाँ अर तुम पर हाय च, तुम लोगु तैं दिखौणु खुणि लम्बी-लम्बी प्रार्थना करद्‍यां, अर विधवा जनानियों तैं धोखा देके ऊंका घौरों तैं लूटी देन्दयां, इलै सुणा, तुमतै भौत बड़ु दण्ड मिललु।]</verse>
				<verse number="15">“हे शास्‍त्री अर फरीसी दल का लोगु, तुम पर हाय च, अर तुम बड़ा ढोंगि छाँ, किलैकि तुम एक मनखि तैं यहूदी बणौणु खुणि दिन-रात एक कैरी देन्द्‍यां। अर जब तुम वे मनखि तैं यहूदी बणै देन्द्‍यां त इन कैरिके तुम वेतैं अफ से भि जादा नरकलोक का लैख बणै देन्द्‍यां।</verse>
				<verse number="16">“हे सच्‍चै का बाटा तैं दिखौण वळा अन्धा लोगु, तुम पर हाय च, किलैकि तुम लोगु तैं इन सिखौन्द्‍यां, कि अगर कुई मनखि मन्दिर की कसम खालु, त कुई बड़ी बात नि च, पर अगर जु तुम परमेस्वर का मन्दिर का सोने की कसम खन्द्‍यां, त तुमतै वा कसम पूरि भि करण पोड़लि।</verse>
				<verse number="17">अरे अन्धा मूरख लोगु, बड़ी बात क्या च, मन्दिर को सोना या वु मन्दिर जैन वे सोना तैं पवित्र बणै?</verse>
				<verse number="18">अर फिर तुम जु इन भि सिखौन्द्‍यां, कि अगर कुई मनखि मन्दिर मा रखी वेदी की कसम खालु, त कुई बड़ी बात नि च, पर अगर जु तुम वेदी मा रखी भेंट की कसम खन्द्‍यां, त तुमतै वा कसम पूरि भि करण पोड़लि।</verse>
				<verse number="19">हे अन्धा लोगु, बड़ी बात क्या च, भेंट या वा वेदी जैन वीं भेंट तैं पवित्र बणै।</verse>
				<verse number="20">इलै जु कुई वेदी की कसम खान्दु, त वु वेदी की अर वेमा रखी चीजों की कसम भि खान्दु।</verse>
				<verse number="21">अर जु परमेस्वर का मन्दिर की कसम खान्दु, त उ वेकी अर वेमा रौण वळी चीजों की भि कसम खान्दु।</verse>
				<verse number="22">अर जु स्वर्ग की कसम खान्दु, त उ परमेस्वर की राजगद्‍दी की अर वेमा बैठयां परमेस्वर की भि कसम खान्दु।</verse>
				<verse number="23">“हे शास्‍त्री अर फरीसी दल का लोगु, तुम पर हाय च अर तुम भौत बड़ा ढोंगि छाँ, किलैकि तुम पुदीना, सौंफ अर जीरा की तरौं छुटी-छुटी चीजों को भि दसुं हिस्सा देन्द्‍यां, पर परमेस्वर का नियम-कानूनों मा जु खास-खास बात छिन ऊंतैं तुम छोड़ि देन्द्‍यां, जु कि जादा जरुरी छौ, जन कि न्याय करण, खरु मनखि बणण, दुसरा लोगु पर दया करण, अर भरोसा का लैख बणण। अर हरेक चीज को दसुं हिस्सा देण अच्छी बात च, मगर येका दगड़ा-दगड़ि तुमतै परमेस्वर का नियम-कानूनों की खास बातों पर भि ध्यान देण चयेणु छौ।</verse>
				<verse number="24">हे सच्‍चै का बाटा तैं दिखौण वळा अन्धा लोगु, तुम पाणि मा पोड़यां माखा तैं त छाणी के निकाळि देन्द्‍यां, मगर ऊंट तैं घोली के पी जन्द्‍यां।</verse>
				<verse number="25">“हे शास्‍त्री अर फरीसी दल का लोगु, तुम पर हाय च तुम भौत बड़ा ढोंगि छाँ। तुम लोग कटोरा अर थकुला तैं भैरि-भैर मजौन्द्‍यां, मगर तुमरा भितर लालच अर बुरै ही भुरीं छिन।</verse>
				<verse number="26">इलै हे अन्धा फरीसियों, पैलि कटोरा अर थकुला तैं भितर बटि मांजा, तब उ भैर बटि भि साफ ह्‍वे जालु।</verse>
				<verse number="27">“हे शास्‍त्री अर फरीसी दल का लोगु, तुम पर हाय च अर तुम भौत बड़ा ढोंगि छाँ। तुम त चुना पूथिं कबरों का जन छाँ, जु भैर बटि त भौत सुन्दर दिख्योंदिन, पर ऊंका भितर मुरदो का हड़गा अर बन्‍नि-बन्‍नि किसम कि गन्दगी ही भुरीं रौन्दी।</verse>
				<verse number="28">अर इन्‍नि तुम भि दुसरा लोगु का समणि खुद तैं धरमी होण को बड़ु दिखावा करद्‍यां, पर भितर बटि तुम बड़ा ढोंगि अर बुरै से भोर्यां छाँ।</verse>
				<verse number="29">“हे शास्‍त्री अर फरीसी दल का लोगु, तुम पर हाय च अर तुम भौत बड़ा ढोंगि छाँ, किलैकि तुम परमेस्वर का रैबर्यों की कबरों तैं सजौन्द्‍या अर धरमी लोगु की कबरों तैं भि बणौन्द्‍यां,</verse>
				<verse number="30">अर तुम बुल्द्‍यां, ‘अगर जु हम अपणा पितरों का जमना मा होन्दा, त रैबर्यों की हत्या मा हम अपणा पितरों का साझी नि होन्दा।’</verse>
				<verse number="31">अर इन बोलि के तुम खुद ही ईं बात की गवै देन्द्‍यां, कि तुम ऊंकी औलाद छाँ, जौन रैबर्यों की हत्या कैरी।</verse>
				<verse number="32">इलै जै पाप की शुरुवात तुमरा पितरों न कैरी वेतैं तुम पूरु कैरा।</verse>
				<verse number="33">हे खतरनाक बिस से भोर्यां गुरौ अर ऊंका बच्‍चों, तुम लोग नरकलोक का दण्ड पौड़ से कनकै बचि सकिल्या?</verse>
				<verse number="34">“इलै सुणा, मि तुमरा पास रैबर्यों तैं, अर अकलमन्दो तैं, शास्‍त्री लोगु तैं भेजणु छौं, अर तुम ऊंमा बटि कुछो तैं मारी दिल्या, अर क्रूस पर चड़ै दिल्या। अर कुछो तैं अपणा प्रार्थना भवनों मा कोड़ा मरवैल्या, इख तक कि तुम नगर-नगर मा जैके ऊंतैं सतैल्या।</verse>
				<verse number="35">अर शुरुवात बटि अभि तक जथगा भि धरमी लोगु को ल्वे ईं धरती पर बुगये गै, ऊं सभ्यों की हत्या को दोषी तुम लोगु तैं ठैरैये जालु, याने कि धरमी हाबिल की हत्या से लेके बिरिक्याह का नौना जकरयाह रैबर्या की हत्या तक, जैको ल्वे तुमरा पितरों न मन्दिर की वेदी का समणि कैरी छौ।</verse>
				<verse number="36">अर मि तुम बटि सच्‍च बोन्‍नु छौं, कि यों सब बातों को हिसाब ईं पीढ़ी का लोगु बटि लिये जालु।”</verse>
				<verse number="37">अर यीशु न फिर से बोलि, “हे यरूशलेम का लोगु, तुम परमेस्वर का रैबर्यों तैं मारी देन्द्‍यां, अर जौं लोगु तैं परमेस्वर न तुमरा बीच मा भेजि ऊंतैं तुम ढुंग्यौन्दा छाँ। अर मिन भौत बार इन चै कि जन कुखडि अपणा बच्‍चों तैं अपणा फाँकुड़ो का तौळ इकट्‍ठा कैरिके रखदी, उन्‍नि मि भि तुमतै इकट्‍ठा कैरुं, पर तुम लोगु न इन नि चै।</verse>
				<verse number="38">इलै सुणा, तुमरो घौर खण्डर होणु खुणि छुड़ै जान्दु।</verse>
				<verse number="39">अर मि तुमतै बतै देन्दु कि अब बटि तुम मितैं तब तक नि देखि सकद्‍यां, जब तक तुम नि बोलिल्या कि, ‘धन्य च उ जु प्रभु का नौ से औन्दु।’”</verse>
			</chapter>
			<chapter number="24">
				<verse number="1">अर जब यीशु मन्दिर बटि भैर जाणु छौ, त वेका चेला वेका पास ऐनी, अर ऊंन मन्दिर जनै इसारा कैरी की उ कै तरीके से बणयूं च।</verse>
				<verse number="2">तब यीशु न ऊंकू बोलि, “जौं चीजों तैं तुम आज इख दिखणा छाँ मि तुम बटि सच्‍च बोन्‍नु छौं एक दिन आलु, जब ये मन्दिर को एक ढुंगो भि अपणी जगा पर नि रालु, किलैकि वु सब ढुळै जाला।”</verse>
				<verse number="3">अर यू सब होण का बाद जब यीशु जैतून नौ का पाड़ पर बैठयूं छौ, तब चेलों न चुपके से वे बटि पूछी, “गुरुजी, जु बात तुमुन बतैनि वु कब पूरि होलि? अर हमतै इन भि बता कि तुमरा वापस औण को अर ईं दुनियां का विणास को क्या जि चिन्‍न होलु?”</verse>
				<verse number="4">तब वेन ऊंतैं जबाब दिनी, “चेतन रा, कुई भि तुमतै भरमै नि सैको।</verse>
				<verse number="5">किलैकि भौत सरा लोग मेरा नौ से आला अर बुलला कि, ‘मि मसीह छौं,’ अर भौतों तैं भरमै द्‍याला।</verse>
				<verse number="6">अर जब तुम लड़ै अर लड़ै की अफवा का बारा मा सुणिल्या, त घबरै नि जयां, किलैकि यों सब बातों को होण जरुरी च, पर वे बगत अन्त नि आलु,</verse>
				<verse number="7">किलैकि यू होण से पैलि एक देस दुसरा देस पर अर एक राज्य दुसरा राज्य का खिलाप मा खड़ा होला, अर भौत सि जगों पर अकाळ पोड़ला, अर भ्वींचळा भि आला।</verse>
				<verse number="8">अर जन पीड़ा एक जनानि तैं बच्‍चा पैदा करण का बगत मा होन्दी, ठिक उन्‍नि यों सब बातों की शुरुवात होलि।</verse>
				<verse number="9">अर वे बगत लोग तुमतै दुख देणु खुणि पकड़वै द्‍याला, अर तुम मि पर बिस्वास करद्‍यां इलै सब जाति का लोग तुम बटि नफरत करला, इख तक की मरवै भि द्‍याला।</verse>
				<verse number="10">अर यू उ बगत होलु, जब भौत सा बिस्वासी लोग बिस्वास से दूर ह्‍वे जाला, अर एक-दुसरा तैं पकड़वै द्‍याला, अर एक-दुसरा बटि नफरत भि करला।</verse>
				<verse number="11">अर भौत सा झूठ्‍ठा रैबर्या आला, अर भौतों तैं भरमै द्‍याला।</verse>
				<verse number="12">अर दुनियां मा बुरै इथगा जादा ह्‍वे जालि, कि भौत सा लोगु को प्यार एक-दुसरा खुणि ठण्डु पोड़ि जालु।</verse>
				<verse number="13">पर जु कुई आखिरी तक बिस्वास मा टिक्यूं रालु, वेतैं ही बचयै जालु।</verse>
				<verse number="14">अर परमेस्वर का राज का ये शुभ समाचार को परचार पूरि दुनियां मा किये जालु, ताकि सब जातियों पर गवै हो, अर येका बाद अन्त ऐ जालु।”</verse>
				<verse number="15">अर यीशु न ऊंकू इन भि बोलि, “परमेस्वर का रैबर्या दानिय्येलळ न अपणी किताब मा एक खण्डर करण वळी खतरनाक अर भौत बुरी चीज का बारा मा लिख्यूं च। अर एक दिन तुम दिखल्या कि वा बुरी चीज परमेस्वर की पवित्र जगा तैं अशुद्ध करली (जु पढणु च उ ईं बात तैं समझि ल्यो)।</verse>
				<verse number="16">तब जु यहूदिया मुलक मा हो उ पाड़ो जनै भागी जौ।</verse>
				<verse number="17">अर जु कुई छत मा हो, उ अपणा घौर बटि समान लेणु कू मूड़ी नि उतरो।</verse>
				<verse number="18">अर जु पुंगड़ा मा हो, उ अपणु कपड़ा लेणु कू पिछनै नि जौ।</verse>
				<verse number="19">“अर ऊं दिनों मा जु गरवति होलि, या अपणा बच्‍चों तैं दूद पिलाणि होलि, ऊं खुणि यू दिन भौत खतरनाक होला।</verse>
				<verse number="20">अर इन प्रार्थना कैरा कि तुमतै ह्‍यूँद का दिनों मा या सब्त का दिन पर भगण नि पोड़ो।</verse>
				<verse number="21">किलैकि वे बगत इथगा बड़ु संकट आलु, जु कि नऽ त दुनियां की शुरुवात बटि अभि तक ऐ, अर ना ही कभि आलु।</verse>
				<verse number="22">अर अगर पिता परमेस्वर ऊं दिनों की गिनती कम नि करदु, त कुई भि मनखि नि बचदु, मगर चुण्यां लोगु का खातिर ही ऊं दिनों की गिनती कम किये गै।</verse>
				<verse number="23">अगर वे बगत लोग तुमकु बुलला कि, ‘देखा मसीह इख च’ या ‘देखा मसीह उख च,’ त तुम यकीन नि कर्यां।</verse>
				<verse number="24">“किलैकि झूठ्‍ठा मसीह अर झूठ्‍ठा रैबर्या ऐ जाला, अर बड़ा-बड़ा चिन्‍न अर चमत्कार का काम कैरिके दिखाला, इख तक कि जु लोग चुण्यां छिन ऊंतैं भि भरमै द्‍याला।</verse>
				<verse number="25">अर सुणा, यू सब कुछ मिन तुमतै पैलि ही बतैयालि।</verse>
				<verse number="26">इलै सुणा, अगर कुई तुमकु बोललु कि, ‘देखा, मसीह निर्जन जगा मा च,’ त भैर नि जयां, या ‘देखा, मसीह भितर कमरों मा च,’ त तुम ऊं पर बिस्वास नि कर्यां।</verse>
				<verse number="27">“किलैकि जन बिजली आसमान मा पूरब बटि निकळि के पच्छिम तक चमकदी, ठिक उन्‍नि मनखि का पुत्र को भि औण होलु।</verse>
				<verse number="28">अर जख लांश होन्दी, गरुड़ भि उखि जमा होनदिन, तब सब लोगु तैं पता चलि जान्दु कि उख कुछ मुरयूं च।”</verse>
				<verse number="29">अर यीशु न चेलों कू इन भि बोलि, “यों सब मुसीबतों का तुरन्त बाद सूरज अन्धेरु ह्‍वे जालु, अर चाँद भि अपणु उज्याळु देण बन्द कैरी दयालु, अर गैंणा आसमान बटि धरती मा पोड़ि जाला, अर आसमान की सब शक्‍तियाँ इनै-उनै ह्‍वे जालि।</verse>
				<verse number="30">अर मनखि का पुत्र को औण को चिन्‍न आसमान मा दिख्यालु, तब धरती का सब जाति का लोग भौत दुखी ह्‍वेके रुंण लगि जाला। अर लोग मनखि का पुत्र तैं बादळों मा अपणी बड़ी ताकत अर बड़ा आदर-सम्मान का साथ मा औन्द दिखला।</verse>
				<verse number="31">अर बिगुले की बड़ी आवाज का दगड़ा मा मनखि को पुत्र अपणा स्वर्गदूतों तैं भेजलु, अर स्वर्गदूत वेका चुण्यां लोगु तैं पूरि दुनियां का हरेक दिसा से इकट्‍ठा करला।”</verse>
				<verse number="32">तब यीशु न लोगु तैं एक उदारण सुणै। अर वेन बोलि, “तिमला का डाळा बटि सबक सीखा, जब वे पर फौंका लगदिन, अर कुंगळा पत्ता निकळण शुरु ह्‍वे जनदिन, त तुमतै पता लगि जान्दु कि रुड़्यूं का दिन नजदीक ऐ गैनी।</verse>
				<verse number="33">अर ठिक इन्‍नि जब तुम संकट की यों बातों तैं होन्द दिखल्या, त समझि जयां कि मनखि का पुत्र को वापस औण नजदीक ही च, बल्किन मा समणि ही ऐ गै।</verse>
				<verse number="34">अर मि तुम बटि सच्‍च बोन्‍नु छौं कि जब तक यू सब बात पूरि नि ह्‍वे जालि तब तक ईं पीढ़ी को अन्त नि होलु।</verse>
				<verse number="35">आसमान अर धरती को नास ह्‍वे जालु, मगर मेरी बुलिं बात कभि नि टळळि।”</verse>
				<verse number="36">तब यीशु न ऊंकू इन भि बोलि, “वे दिन अर वे बगत का बारा मा कुई भि नि जणदु, नऽ त स्वर्गदूत अर ना ही मनखि को पुत्र, पर केवल पिता परमेस्वर ही जणदु।</verse>
				<verse number="37">अर जन नूह का दिनों मा ह्‍वे छौ, ठिक उन्‍नि मनखि का पुत्र का वापस औण का दिनों मा भि होलु।</verse>
				<verse number="38">अर नूह का दिनों मा जब तक जल परलय नि ह्‍वे गै छौ, अर जबरि तक नूह जाज मा नि चैड़ि छौ, वे दिन तक लोग खाणा-पीणा छा, अर अपणा आपस मा ब्यौ खुणि दिये जाणा छा।</verse>
				<verse number="39">अर ऊंतैं तबरि तक कुछ पता नि चलि, जबरि तक जल परलय ऊं सभ्यों तैं बुगै के नि लि गै। अर ठिक उन्‍नि मनखि का पुत्र को वापस औण भि अचानक होलु।</verse>
				<verse number="40">अर वे बगत दुई मनखि पुंगड़ा मा काम कना होला ऊंमा बटि एक तैं लिये जालु, अर दुसरा तैं छोड़ दिये जालु।</verse>
				<verse number="41">अर दुई जनानियां जन्दरुन्द पिसणी राली, ऊंमा बटि एक लिये जालि, त दुसरि छोड़ दिये जालि।</verse>
				<verse number="42">“इलै चौकस रा, किलैकि तुम नि जणद्‍यां कि तुमरो प्रभु कै दिन ऐ जालु।</verse>
				<verse number="43">अर ईं बात तैं अच्छे से समझि ल्या, अगर घौर का मालिक तैं इन पता हो कि राति चोरळ कब औण, त उ उठयूं रालु अर अपणा घौर मा चोरी नि होण द्‍यालु।</verse>
				<verse number="44">इलै तुम लोग भि तयार रा, किलैकि जै बगत का बारा मा तुमुन सोची भि नि होलु, वे बगत मनखि को पुत्र ऐ जालु।”</verse>
				<verse number="45">अर यीशु न उदारण मा ऊंकू बोलि, “उ वफादार अर अकलमन्द नौकर कु च, जैको मालिक वेतैं सब नौकरों को मुखिया बणौ, ताकि उ ऊंतैं बगत-बगत खाणुक को समान द्‍यो।</verse>
				<verse number="46">अर धन्य च उ नौकर जब वेको मालिक वापिस अऽ, त उ वेतैं इन्‍नि काम करदी देखो।</verse>
				<verse number="47">अर मि तुम बटि सच्‍चि बोन्‍नु छौं कि, मालिक वेतैं अपणा पूरि धन-दौलत की देख-रेख करण वळु बणै द्‍यालु।</verse>
				<verse number="48">पर अगर कुई दुष्‍ट नौकर अपणा मन मा सुचण लगि जौ कि मेरा मालिक न वापस देर से लौटण,</verse>
				<verse number="49">अर तब उ अपणा दगड़ा का दुसरा नौकरों तैं मरण-पिटण लगि जौ, अर दरोळयों का दगड़ा खाण-पीण लगि जौ,</verse>
				<verse number="50">तब वे नौकर को मालिक एक इन्द्रया दिन पर आलु जै दिन कि वेतैं आस भि नि होलि, बल्किन मा इन्द्रया बगत पर आलु जैका बारा मा उ जणदु भि नि होलु।</verse>
				<verse number="51">तब वेको मालिक वेतैं कड़क से कड़क सजा दयालु, अर ज्वा जगा ढोंगि लोगु खुणि ठैरैईं च वेतैं भि उखि रखै जालु। अर उख सिरफ रुंण, अर दांतों तैं कड़गिटाण ही होलु।”</verse>
			</chapter>
			<chapter number="25">
				<verse number="1">तब यीशु न लोगु तैं एक और उदारण सुणै के बोलि, “परमेस्वर को राज ऊं दस कुंवारियों का जन होलु, जु अपणी चिमनियों तैं लेके ब्यौला तैं मिलणु कू गैनी।</verse>
				<verse number="2">अर ऊंमा बटि पांच त मूरख, अर पांच समझदार छै।</verse>
				<verse number="3">अर मूरख कुंवारियों न अपणी चिमनियों तैं लिनी, पर ऊंमा डलणु खुणि तेल नि लिनी।</verse>
				<verse number="4">पर समझदार कुंवारियों न अपणी चिमनियों का दगड़ा मा वामा डलणु खुणि एक डब्बा मा तेल भि रखी दिनी।</verse>
				<verse number="5">अर जब ब्यौला का औण मा देर ह्‍वे गै, त ऊ सभ्यों तैं निन्दया टोळा औण लगि गैनी अर वु सै गैनी।</verse>
				<verse number="6">“अर ठिक अधि राति मा एक आवाज ऐ, ‘सुणा, ब्यौला औणु च, वेतैं मिलणु कू चला रे।’</verse>
				<verse number="7">तब ऊ सब कुंवारियाँ उठनि, अर अपणी-अपणी चिमनियों तैं ठिक करण लगि गैनी।</verse>
				<verse number="8">तब मूरख कुंवारियों न समझदारों कू बोलि, ‘जरा अपणा तेल मा बटि कुछ हमतै भि दे द्‍या, किलैकि हमरि चिमनी बुझण वळी छिन।’</verse>
				<verse number="9">पर समझदार कुंवारियों न ऊंकू बोलि, ‘अगर जु हम तुमतै यू तेल दे द्‍यूला, तब नऽ त ये तेल न हम कू पूरु होण अर ना ही तुमकु, इलै तुम तेल बिकौण वळो मा जा अर खरीदी के ले ल्या।’</verse>
				<verse number="10">अर जब वु तेल लेणु कू जाणा ही छा, कि तबरि ब्यौला ऐ गै। अर सुणा, जु कुंवारियाँ तयार छै, ऊ ब्यौला का दगड़ा ब्यौ मा चलि गैनी, अर द्‍वार बन्द किये गै।</verse>
				<verse number="11">अर कुछ देर बाद ऊ मूरख कुंवारियाँ भि ऐके बोन्‍न लगि गैनी, ‘प्रभु, हे प्रभु, हम खुणि भि द्‍वार खोली द्‍या।’</verse>
				<verse number="12">तब ब्यौला न जबाब दिनी कि, ‘मि तुम बटि सच्‍च बोन्‍नु छौं, मि तुमतै नि जणदु।’”</verse>
				<verse number="13">तब यीशु न ऊंकू बोलि, “इलै तुम भि तयार रा, किलैकि तुम नऽ त वे दिन का बारा मा, अर ना ही वे बगत का बारा मा जणद्‍यां, कि कब मनखि को पुत्र वापस ऐ जालु।”</verse>
				<verse number="14">यीशु न ऊंतैं एक और उदारण देके बोलि, “परमेस्वर को राज एक इन्द्रया मनखि का जन च जैन परदेस जाण बगत अपणा नौकरों तैं बुलै, अर चांदी का कुछ सिक्‍का ऊंका हाथों मा सौंप दिनी।</verse>
				<verse number="15">अर जु जथगा का लैख छौ वेन ऊंतैं उथगा ही चांदी का सिक्‍का दिनी, एक तैं पांच हजार सिक्‍का, दुसरा तैं दुई हजार सिक्‍का, अर तिसरा तैं एक हजार सिक्‍का दिनी। अर वेका बाद उ खुद परदेस चलि गै।</verse>
				<verse number="16">“अर जै नौकर तैं पांच हजार सिक्‍का मिली छा, वेन तुरन्त जैके ऊं सिक्‍कों से लेण-देण कैरी, अर पांच हजार सिक्‍का और कमै दिनी।</verse>
				<verse number="17">अर ठिक इन्‍नि जैतैं दुई हजार सिक्‍का मिल्यां छा, वेन भि दुई हजार सिक्‍का और कमै दिनी।</verse>
				<verse number="18">पर जैतैं एक हजार सिक्‍का मिल्यां छा, वेन जैके माटु खोदी अर अपणा मालिक का दियां सिक्‍कों तैं लुकै दिनी।</verse>
				<verse number="19">“अर भौत दिनों का बाद ऊं नौकरों को मालिक वापिस ऐ, अर ऊं बटि हिसाब-किताब लेण लगि गै।</verse>
				<verse number="20">अर जै नौकर तैं पांच हजार सिक्‍का मिल्यां छा, वेन और पांच हजार सिक्‍का लेके अपणा मालिक कू बोलि, ‘साब, तुमुन मितैं पांच हजार सिक्‍का दे छा। अर इख देखा, मिन पांच हजार सिक्‍का और कमैनि।’</verse>
				<verse number="21">मालिक न वेकू बोलि, ‘सबास, मेरा अच्छा अर भरोसा लैख नौकर, तू कम मा भि इमानदार रै, इलै मि त्वेतै भौत सि चीजों को अधिकारी बणौलु। आ जा, अपणा मालिक की खुशी मा सामिल हो।’</verse>
				<verse number="22">“अर जै नौकर तैं दुई हजार सिक्‍का मिल्यां छा, वेन भि मालिक का पास ऐके बोलि, ‘साब, तुमुन मितैं दुई हजार सिक्‍का दे छा। अर इख देखा, मिन दुई हजार सिक्‍का और कमैनि।’</verse>
				<verse number="23">मालिक न वेकू बोलि, ‘सबास, मेरा अच्छा अर भरोसा लैख नौकर, तू कम मा भि इमानदार रै, इलै मि त्वेतै भौत सि चीजों को अधिकारी बणौलु। आ जा, अपणा मालिक की खुशी मा सामिल हो।’</verse>
				<verse number="24">“तब जैतैं एक हजार सिक्‍का मिल्यां छा, वेन भि मालिक का पास ऐके बोलि, ‘साब, मि जणदु छौ कि तुम सक्‍त मनखि छाँ, किलैकि तुम उख बटि लवै करद्‍यां जख तुमुन बूति नि च, अर जख तुमुन बीज नि छिलारी उख बटि तुम बटोल्दा छाँ।</verse>
				<verse number="25">इलै मि डौऽरी ग्यों, अर मिन जैके तुमरा दियां सिक्‍कों तैं माटा मा लुकै दिनी। अर देखा, यू छिन वु सिक्‍का जु कि तुमुन दे छा।’</verse>
				<verse number="26">तब वे मालिक न वेतैं जबाब दिनी, ‘हे दुष्‍ट अर अळकसि नौकर, जब त्वेतै पता छौ, कि मि उख लवै करदु जख मिन बूति नि च, अर जख मिन बीज नि छिलारी उख बटि बटोल्दु छौं,</verse>
				<verse number="27">त त्वेतै मेरा यू सिक्‍का सौकार का पास जमा कैर देण चयेणा छा, ताकि जब मि औन्दु त वेका दगड़ा-दगड़ि ब्याज भि पौन्दु।</verse>
				<verse number="28">इलै ऊं सिक्‍कों तैं वे बटि ले ल्या, अर वेतैं दे द्‍या जैमा दस हजार सिक्‍का छिन।</verse>
				<verse number="29">अर ये निकमा नौकर तैं भैर अन्धेरा मा ढोळि द्‍या, जख रुंण अर दांतों तैं कड़गिटाण ही होलु, किलैकि जु कुई भि परमेस्वर का राज तैं बिंगणे की इच्छा रखदु, वेतैं वेका बारा मा बिंगण को और भि जादा ज्ञान दिये जालु। मगर जु मनखि इन सोचदु, कि मितैं भौत ज्ञान च, त वे बटि वु ज्ञान भि छिनै जालु।’”</verse>
				<verse number="30"></verse>
				<verse number="31">अर यीशु न ऊंकू बोलि, “जब मनखि को पुत्र अपणी पूरि सामर्थ का दगड़ा मा आलु अर सब स्वर्गदूत वेका दगड़ा होला। तब उ बड़ा आदर-सम्मान की राजगद्‍दी पर बैठलु,</verse>
				<verse number="32">अर देस-देस का सब लोग न्याय खुणि वेका समणि इकट्‍ठा किये जाला, अर वु ऊंतैं एक-दुसरा बटि अलग करलु, जन एक चरवाह भेड़ों तैं बखरों बटि अलग-अलग करदु, ठिक उन्‍नि उ भि करलु।</verse>
				<verse number="33">अर जन भेड़ अर बखरों को सभौ होन्दु, ठिक उन्‍नि जु लोग परमेस्वर की नजर मा धरमी लोग छिन ऊंतैं उ अपणी दैंणी तरफा खड़ु करलु, अर जु लोग वेकी नजर मा धरमी नि छिन ऊंतैं उ अपणी बैं तरफा खड़ु करलु।</verse>
				<verse number="34">तब राजा अपणा दैंणी तरफा वळो कू बोललु, ‘मेरा पिता बटि आसीस पौण वळो, आ, अर वे राज्य का अधिकारी ह्‍वे जा, जु दुनियां की शुरुवात बटि तुम खुणि तयार कैरिके रख्युं च।</verse>
				<verse number="35">किलैकि जब मि भूकि छौ त तुमुन मितैं खाणु खिलै, अर जब मि तिसलु छौ, त तुमुन मेरी तीस बुझै, अर मि तुम खुणि अणजाण छौ, पर फिर भि तुमुन मितैं अपणा घौर मा जगा दिनी।</verse>
				<verse number="36">अर जब मि बिन कपड़ों को छौ, त तुमुन मितैं कपड़ा दिनी, अर जब मि बिमार छौ, त तुमुन मेरी देख-रेख कैरी, अर जब मि जेलखाना मा छौ, तब तुम मितैं मिलण कू अयां।’</verse>
				<verse number="37">“तब धरमी लोग वे बटि पूछला, ‘प्रभु, हमुन तुमतै कब भूकि देखि अर तुमतै खाणुक खिलै, या कब हमुन तुमतै तिसळु देखि अर तुमरि तीस बुझै?</verse>
				<verse number="38">अर प्रभु कब तुम एक अणजाण का रुप मा हमरा घौर मा अयां अर हमुन तुमतै रौणु खुणि जगा दिनी, या कब हमुन तुमतै बिन कपड़ों को देखि, अर तुमतै कपड़ा दिनी?</verse>
				<verse number="39">अर कब हमुन तुमतै बिमार या जेलखाना मा देखि, अर कब तुमतै मिलणु कू अयां?’</verse>
				<verse number="40">तब राजा ऊंतैं जबाब द्‍यालु, ‘मि तुम बटि सच्‍च बोन्‍नु छौं, कि जु भलै तुमुन मि पर बिस्वास करण वळा लोगु का दगड़ा मा करिनी जौं तैं लोग कुछ नि समझदिन, वु सब भलै तुमुन मेरा दगड़ा मा ही करिनी।’</verse>
				<verse number="41">“तब राजा अपणा बैं तरफा वळो कू बोललु, ‘हे असगार लग्यां लोगु, मेरा समणि बटि दूर ह्‍वे जा, अर सदनि की वीं आग मा नास होणु कू चलि जा, ज्वा शैतान अर वेका दूतों खुणि तयार कैरिके रखी च।</verse>
				<verse number="42">किलैकि जब मि भूकि छौ त तुमुन मितैं खाणु नि खिलै, अर जब मि तिसलु छौ, त तुमुन मेरी तीस नि बुझै,</verse>
				<verse number="43">अर जब मि तुम खुणि अणजाण छौ, त तुमुन मितैं अपणा घौर मा जगा नि दिनी। अर जब मि बिन कपड़ों को छौ, त तुमुन मितैं कपड़ा नि दिनी, अर जब मि बिमार छौ, अर जेलखाना मा छौ तब तुम मितैं मिलण कू नि अयां।’</verse>
				<verse number="44">“तब दैंणी तरफा वळा वे बटि पूछला, ‘प्रभु, हमुन कब तुमतै भूकि या कब तुमतै तिसळु, अर कब अणजाण या बिना कपड़ों को देखि, अर कब हमुन तुमतै बिमार अर जेलखाना मा पोड़्यूं देखि, अगर जु हम दिखदा, त जरुर तुमरि मदद करदा।’</verse>
				<verse number="45">तब राजा ऊंतैं जबाब द्‍यालु, ‘मि तुम बटि सच्‍च बोन्‍नु छौं, कि जु लोग मि पर बिस्वास करदिन ऊंमा बटि कै एक का दगड़ा मा भलै का काम तुमुन नि करिनी। हाँ, ऊंका दगड़ा मा ही जौं तैं लोग कुछ नि समझदिन, इलै सुणा, भलै का वु काम तुमुन मेरा दगड़ा मा भि नि करिनी।’</verse>
				<verse number="46">तब अधरमी लोगु तैं सदनि को दण्ड मिललु, मगर धरमी लोग सदनि का जीवन मा जाला।”</verse>
			</chapter>
			<chapter number="26">
				<verse number="1">अर जब यीशु न यू सब बात बोलि दिनी, तब वेन अपणा चेलों कू बोलि,</verse>
				<verse number="2">“तुम लोग जणदा ही छाँ कि परस्यों फसह को त्योवार च, अर वे दिन मनखि को पुत्र क्रूस पर चड़ये जाण खुणि दुसमनों का हाथों मा पकड़वै जालु।”</verse>
				<verse number="3">तब कुछ मुख्य पुरोहित अर यहूदियों का अध्यक्ष लोग, काइफा नौ का महा पुरोहित का चौक मा इकट्‍ठा ह्‍वेनि,</verse>
				<verse number="4">अर अपणा आपस मा मिली के यीशु का दगड़ा छल कैरिके वेतैं पकड़ण अर जान से मरण की जाळसाजि बणौण लगि गैनी।</verse>
				<verse number="5">पर ऊंन इन भि बोलि, “त्योवार का बगत मा हम लोगु तैं इन नि करण चयेणु, कखि इन नि हो कि लोगु मा हल्‍ला मची जौ।”</verse>
				<verse number="6">बैतनिय्याह गौं मा शमौन नौ को एक मनखि छौ, जु कि पैलि कोड़ी छौ। अर एक दिन यीशु वेका घौर मा छौ।</verse>
				<verse number="7">तब एक जनानि संगमरमर की बोतल मा भौत कीमती इतर लेके यीशु का पास ऐ, अर जब उ खाणुक खाणु कू बैठयूं छौ, त वींन यीशु को आदर-सम्मान करणु खुणि वेका मुण्ड़ मा इतर अखणै दिनी।</verse>
				<verse number="8">अर यू देखि के वेका चेला खिरसे के बोन्‍न लगि गैनी, “ईं न यू इतर किलै बरबाद कैरी होलु?</verse>
				<verse number="9">अरे यू त भौत मैंगु बिकी सकदु छौ, अर वां से गरीबों की मदद भि किये जै सकदी छै।”</verse>
				<verse number="10">अर यीशु ईं बात तैं जाणि गै अर वेन चेलों कू बोलि, “तुम ईं जनानि तैं किलै सतौणा छाँ? वींन त मेरा दगड़ा मा भलै ही कैरी।</verse>
				<verse number="11">अर गरीब त हमेसा तुमरा दगड़ा मा रौनदिन, मगर मिन तुमरा दगड़ा हमेसा नि रौण।</verse>
				<verse number="12">वींन मेरा सरील तैं कबरुन्द रखण की तयारी मा यू इतर मेरा सरील मा अखणै।</verse>
				<verse number="13">अर मि तुम बटि सच्‍च बोन्‍नु छौं, कि पूरि दुनियां मा जख-जख ये शुभ समाचार को परचार किये जालु, उख-उख ईं जनानि तैं याद करणु खुणि ईं का ये काम का बारा मा बतये जालु, जु आज ईं न कैरी।”</verse>
				<verse number="14">अर यीशु का बारह चेलों मा बटि यहूदा इस्करियोती न मुख्य पुरोहितों का पास जैके बोलि,</verse>
				<verse number="15">“सुणा, अगर मि यीशु तैं तुमरा हाथों मा पकड़वै द्‍यूलु त तुम मितैं क्या दिल्या?” तब ऊंन वेतैं चांदी का तीस सिक्‍का दे दिनी।</verse>
				<verse number="16">अर उबरि बटि ही यहूदा यीशु तैं पकड़वाणु खुणि मौका खुज्याण लगि गै।</verse>
				<verse number="17">अर अखमीरी रुट्‍टी का त्योवार का पैला दिन चेलों न यीशु का पास ऐके पूछी, “गुरुजी, तुम कख चन्द्‍यां कि हम तुम खुणि फसह को खाणुक खाण की तयारी कैरा?”</verse>
				<verse number="18">वेन ऊंकू बोलि, “नगर मा फलणा मनखि का पास जा, अर वेकू बोला, गुरुजी बोन्‍ना छिन, कि ‘मेरु बगत नजदीक ऐ गै। अर मि अपणा चेलों का दगड़ा तेरा घौर मा फसह को त्योवार मणौलु।’”</verse>
				<verse number="19">अर चेलों न ठिक उन्‍नि कैरी जन यीशु न बोलि छौ, अर फसह का त्योवार की तयारी कैरी।</verse>
				<verse number="20">अर जब रुमुक ह्‍वे, त यीशु अपणा बारह चेलों का दगड़ा मा खाणुक खाणु कू बैठि।</verse>
				<verse number="21">अर जब ऊ खाणु खाणा छा त यीशु न अपणा चेलों कू बोलि, “मि तुम बटि सच्‍च बोन्‍नु छौं कि तुम मा बटि एक न मितैं धोखा से पकड़वाण।”</verse>
				<verse number="22">अर ईं बात तैं सुणी के ऊ भौत दुखी ह्‍वेनि, हरेक चेला वे बटि पूछण लगि गै कि, “प्रभु, कखि वु मि त नि छौं?”</verse>
				<verse number="23">तब वेन ऊंतैं जबाब दिनी, “जु मेरा दगड़ा कटोरा मा अपणु हाथ डलणु च, उई च जु मितैं पकड़वालु।</verse>
				<verse number="24">अर जन कि पवित्रशास्‍त्र मा मनखि का पुत्र का बारा मा लिख्यूं च, वेका मुताबिक वेकी मौत को होण जरुरी च। मगर हाय च वे मनखि पर जैका द्‍वारा मनखि को पुत्र पकड़वै जान्दु, वे मनखि खुणि त भलु यू ही छौ कि वेको जनम ही नि होन्दु।”</verse>
				<verse number="25">तब यहूदा न जु कि यीशु तैं पकड़ौण वळु छौ वेन बोलि, “गुरुजी, कखि उ मि त नि छौं?” अर यीशु न बोलि, “तिन अफि बोलियालि।”</verse>
				<verse number="26">अर जब ऊ सब खाणु खाणा छा, त यीशु न रुट्‍टी ले अर धन्यवाद देके तोड़ि अर चेलों तैं देके बोलि, “ल्या, येतैं खा यू मेरु बदन च।”</verse>
				<verse number="27">तब वेन ठिक उन्‍नि अंगूरों को रस को कटोरा उठे, अर परमेस्वर तैं धन्यवाद देके ऊंतैं दे अर बोलि, “तुम सब ये मा बटि प्या।</verse>
				<verse number="28">अर यू अंगूरों को रस मेरु ल्वे च, जैका द्‍वारा पिता परमेस्वर लोगु का बीच मा एक नयू करार बणौन्दु। अर भौत सा लोगु का पापों तैं माफ करणु खुणि मेरु ल्वे बुगये जान्दु।</verse>
				<verse number="29">मि तुम बटि बोन्‍नु छौं, अब बटि मि अंगूरों को यू रस वे दिन तक नि प्यूलु, जब तक मि अपणा पिता का राज मा तुमरा दगड़ा नयू रस नि प्यों।”</verse>
				<verse number="30">अर खाणुक खाण का बाद ऊंन पिता परमेस्वर की भक्‍ति कैरी। अर वेका बाद ऊ जैतून नौ का पाड़ पर चलि गैनी।</verse>
				<verse number="31">तब यीशु न अपणा चेलों कू बोलि, “आज राति तुम मितैं छोड़ि के चलि जैल्या, किलैकि पवित्रशास्‍त्र मा लिख्यूं च कि, “‘मि चरवाह तैं मरलु, अर झुण्ड की भेड़ तितर-बितर ह्‍वे जालि।’</verse>
				<verse number="32">पर मि मुरदो मा बटि ज्यून्द होण का बाद तुम से पैलि गलील मुलक कू जौलु।”</verse>
				<verse number="33">यू सुणी के पतरस न वेकू बोलि, “गुरुजी, सब तुमतै छोड़ि के जै सकदिन, मगर मिन तुमतै छोड़ि के नि जाण।”</verse>
				<verse number="34">अर यीशु न वेकू बोलि, “पतरस, मि त्वे बटि सच्‍चि बोन्‍नु छौं, कि आज रात मैर बसण से पैलि तिन मितैं तीन दौं नकारी देण।”</verse>
				<verse number="35">मगर पतरस न वेकू बोलि, “गुरुजी, अगर मितैं तुमरा दगड़ा मा मुरण भि पोड़लु, तभि भि मि तुमतै नि नकरुलु।” अर ठिक इन्‍नि सब चेलों न भि बोलि।</verse>
				<verse number="36">तब यीशु अपणा चेलों का दगड़ा मा गतसमनी नौ की एक जगा मा ऐ अर वेन चेलों कू बोलि, “तुम इख बैठयां रा, तब तक मि उख जैके प्रार्थना कैरिके औन्दु।”</verse>
				<verse number="37">तब यीशु अपणा दगड़ा मा पतरस अर जबदी का दुई नौना याने कि याकूब अर यूहन्‍ना तैं लेके गै। तब उ भौत उदास अर परेसान होण लगि गै।</verse>
				<verse number="38">अर यीशु न ऊंकू बोलि, “मेरु ज्यू भौत दुखी च, इन लगणु च कि मेरु पराण निकळण वळु होलु, तुम इख रुका अर मेरा दगड़ा मा बिज्यां रा।”</verse>
				<verse number="39">तब यीशु कुछ दूर गै अर भ्वीं मा पोड़ि के प्रार्थना कैरिके बोलि, “मेरा पिता, अगर जु तुमरि मरजी हो, त दुख का ये बगत तैं मेरा समणि बटि हटै द्‍या, पर फिर भि मेरी इच्छा ना, बल्किन मा तुमरि मनसा पूरि हो।”</verse>
				<verse number="40">फिर यीशु ऊं तीनों का पास ऐ अर ऊंतैं सियूं देखि। तब वेन पतरस कू बोलि, “क्या तुम लोग एक घन्टा भि मेरा दगड़ा मा बिज्यां नि रै सक्यां?</verse>
				<verse number="41">इलै बिज्यां रा, अर प्रार्थना कना रा, ताकि शैतान तुमतै नि भकलौ, तुमरो मन त छैई च कि बिज्यां रा, मगर तुमरो सरील साथ नि देणु।”</verse>
				<verse number="42">तब वेन दुसरि बार जैके इन प्रार्थना कैरी, “हे मेरा पिता, अगर तुमरि मनसा या च कि दुख का ये बगत तैं मिन सौण ही च, त तुमरि या मनसा पूरि हो।”</verse>
				<verse number="43">तब यीशु दुबरा ऊं तीनों का पास ऐ, अर ऊंतैं फिर से सियूं देखि, किलैकि यू तीनों का आंख्यों मा निन्द बौळीं छै।</verse>
				<verse number="44">तब उ ऊंतैं छोड़ि के चलि गै, अर फिर से तिसरी दौं भि ठिक उन्‍नि प्रार्थना कैरी।</verse>
				<verse number="45">तब यीशु अपणा चेलों का पास ऐ अर वेन ऊंकू बोलि, “अरे, तुम अभि तक सिणा छाँ अर आराम करण पर लग्यां छाँ। सुणा, अब उ बगत ऐ गै कि मनखि को पुत्र पापि लोगु का हाथ मा पकड़वै जाणु च।</verse>
				<verse number="46">अब उठा, अर इख बटि चला। देखा, मितैं पकड़वौण वळु नजदीक ऐ गै।”</verse>
				<verse number="47">अर जब यीशु या बात बोन्‍नु ही छौ, कि तबरि यहूदा इस्करियोती उख ऐ गै जु की बारह चेलों मदि एक छौ। अर वेका दगड़ा मा एक बड़ी भीड़ छै, जौं का हाथों मा तलवार अर लाठा छा। अर यू लोग मुख्य पुरोहितों अर यहूदी अध्यक्षों का द्‍वारा भिजे गै छा।</verse>
				<verse number="48">अर धोखा से पकड़वौण वळा यहूदा का दगड़ा मा जु लोग अयां छा, ऊंतैं यहूदा न एक चिन्‍न बतयूं छौ, कि जैकी भूकि मि प्यूलु, तुम वेतैं पकड़यां, किलैकि उई यीशु होलु।</verse>
				<verse number="49">अर वेन यीशु का पास ऐके वेकू बोलि, “नमस्कार गुरुजी,” अर वेन यीशु की भूकि पे।</verse>
				<verse number="50">यीशु न वेकू बोलि, “मेरा दगड़्या, जै काम से तू इख अईं छैई, वेतैं पूरु कैर।” तब ऊं लोगु न नजदीक ऐके यीशु तैं पकड़ी के अपणी हिरासत मा ले दिनी।</verse>
				<verse number="51">मगर तबरि यीशु का चेलों मा बटि कै एक न अपणी तलवार निकाळि के महा पुरोहित का नौकर पर चलै अर वेको कन्दूड़ उड़ै दिनी।</verse>
				<verse number="52">तब यीशु न वे चेला कू बोलि, “अपणी तलवार तैं म्यान मा रखी दे, किलैकि जु तलवार चलौन्दिन वु सब तलवार से ही मरे जाला।</verse>
				<verse number="53">तू क्या सोचदी, क्या मि अपणा पिता बटि बिन्ती नि कैरी सकदु, कि मेरी हिफाजत का खातिर अपणा स्वर्गदूतों की बारह पलटणो से भि जादा मेरा पास भेजि द्‍यो?</verse>
				<verse number="54">मि इन कैरी सकदु छौं, मगर इन कैरिके पवित्रशास्‍त्र की वा बात पूरि होलि, कि इन होण जरुरी च।”</verse>
				<verse number="55">अर जु लोग वेतैं पकड़णु खुणि अयां छा, यीशु न वे ही बगत ऊं लोगु कू बोलि, “क्या तुम मितैं डाकु समझद्‍यां, कि जु तुम तलवार अर लाठा लेके अयां छाँ? अरे जब मि हरेक दिन मन्दिर मा बैठि के तुमतै सिखौन्दु छौ, तब त तुमुन मितैं पकड़ी के गिरफ्तार नि कैरी।</verse>
				<verse number="56">अर यू सब त इलै ह्‍वे, ताकि रैबर्यों का द्‍वारा लिख्यां वचन पूरा ह्‍वे जा।” फिर यीशु का सब चेला वेतैं छोड़ि के भागी गैनी।</verse>
				<verse number="57">तब जौं लोगु न यीशु तैं पकड़ी छौ, ऊ वेतैं महा पुरोहित काइफा का पास लेके गैनी, अर उख शास्‍त्री अर अध्यक्ष लोग इकट्‍ठा होयां छा।</verse>
				<verse number="58">पर पतरस काफी दूर ह्‍वेके यीशु का पिछनै-पिछनै महा पुरोहित का चौक तक पौंछी गै। अर भितर जैके पैरादारों का दगड़ा मा बैठि गै, ताकि देखो कि अगनै क्या जि होलु।</verse>
				<verse number="59">तब मुख्य पुरोहित अर यहूदी लोगु को न्याय करण वळा सब लोग यीशु का खिलाप मा झूठ्‍ठी गवै की तलास मा छा, ताकि वेतैं ऊ मरवै द्‍या।</verse>
				<verse number="60">मगर भौत से झूठ्‍ठा गवाओ का औण पर भि ऊंतैं एक भि ठिक गवै नि मिली। तब आखिरी मा दुई लोग ऐनी अर ऊंन बोलि,</verse>
				<verse number="61">“ये मनखि न बोलि मि परमेस्वर का मन्दिर तैं ढोळि सकदु छौं अर तीन दिन मा वेतैं बणै भि सकदु छौं।”</verse>
				<verse number="62">तब महा पुरोहित न खड़ु ह्‍वेके यीशु कू बोलि, “अरे, यू क्या बात छिन जु कि लोग तेरा खिलाप मा इथगा गवै देणा छिन, तू कुई जबाब किलै नि देणी?”</verse>
				<verse number="63">पर यीशु चुप रै। तब महा पुरोहित न वेकू बोलि, “मि त्वेतै ज्यून्दा परमेस्वर की कसम देन्दु, हमतै बतौ कि क्या तू परमेस्वर को पुत्र मसीह छैई।”</verse>
				<verse number="64">अर यीशु न बोलि, “तुमुन अफि बोलियालि। फिर भि मि तुम लोगु बटि बोन्‍नु छौं, अब बटि तुम मनखि का पुत्र तैं सबसे महान परमेस्वर की दैंणी तरफा बैठयूं, अर आसमान मा बादळों पर औन्द दिखल्या।”</verse>
				<verse number="65">अर ईं बात तैं सुणी के महा पुरोहित न अपणा कपड़ा फाड़ी के बोलि, “येन परमेस्वर की बेजती कैरी, अर तुम सभ्यों न भि ईं बात तैं सुण्यालि, अब हमतै गवाओ की कुई जरुरत नि च,</verse>
				<verse number="66">अर मितैं बता कि तुम क्या सोचद्‍यां?” तब लोगु न जबाब दिनी, “यू त मौत की सजा का लैख च।”</verse>
				<verse number="67">तब ऊं लोगु न यीशु का मुख पर थूकि अर वे पर मुक्‍का मरनि, अर कुछ लोगु न थप्पड मारी के बोलि,</verse>
				<verse number="68">“अरे मसीह, अब पछ्याण अर हमतै बतौ कि कैन त्वेतै मारी?”</verse>
				<verse number="69">अर पतरस भैर चौक मा बैठयूं छौ। अर एक नौकराणि न वेका पास ऐके पूछी, “अरे, तू भि त गलील का यीशु का दगड़ा मा छे।”</verse>
				<verse number="70">मगर वेन सभ्यों का समणि इन बोलि के नकारी दिनी कि, “मि नि जणदु कि तू क्या छैई बोन्‍नि।”</verse>
				<verse number="71">तब पतरस उख बटि उठी के भैर द्‍वार का पास गै, अर उख एक दुसरि नौकराणि न वेतैं देखि, तब वींन उख जमा होयां लोगु कू बोलि, “अरे यू मनखि भि त नासरत गौं का यीशु का दगड़ा मा छौ।”</verse>
				<verse number="72">मगर वेन नकारी दिनी, अर कसम खै के बोलि, “अरे, मि वे मनखि तैं नि जणदु।”</verse>
				<verse number="73">अर कुछ देर बाद आस-पास खड़ा होयां लोगु न पतरस का पास ऐके बोलि, “सच्‍चि मा तेरा बोन्‍न का तरीका से साफ पता चलणु च, कि तू भि गलील मुलक को छैई, अर ऊं मदि एक छैई।”</verse>
				<verse number="74">तब पतरस न बोलि, “अगर जु मि झूठ्‍ठ बोन्‍नु होलु, त मि पर असगार लगु, मि वेतैं नि जणदु।” अर तबरि मैर बासी गै।</verse>
				<verse number="75">अर झट पतरस तैं यीशु की बुलिं बात याद ऐ कि, “मैर का बसण से पैलि तू तीन दौं मितैं नकारी दिली।” तब उ भैर जैके भकोरि-भकोरि के रुंण लगि गै।</verse>
			</chapter>
			<chapter number="27">
				<verse number="1">अर सुबेर होन्दी यहूदियों का सब मुख्य पुरोहित अर अध्यक्ष लोग मिली के यीशु तैं मरवौण की सला बणौण लगि गैनी।</verse>
				<verse number="2">तब ऊ वेतैं बान्धि के लि गैनी, अर रोमी गवर्नर पिलातुस का हाथ मा सौंप दिनी।</verse>
				<verse number="3">अर यीशु तैं धोखा से पकड़वौण वळा यहूदा इस्करियोती न जब इन सुणी, कि न्याय करण वळो न वेतैं मौत की सजा सुणैयालि, त उ भौत पछतै, इलै उ मुख्य पुरोहितों अर अध्यक्ष लोगु का पास चांदी का ऊं तीस सिक्‍कों तैं लेके गै।</verse>
				<verse number="4">अर वेन ऊंकू बोलि, “मिन एक निरदोष मनखि की मौत खुणि वेका दगड़ा मा बिस्वासघात कैरिके पाप कैरियाली,” पर ऊंन वेकू बोलि, “हमतै ईं बात से कुई भि मतलब नि च, तू खुद ही निस्तारि ले।”</verse>
				<verse number="5">तब यहूदा न चांदी का सिक्‍कों तैं मन्दिर मा ढोळि दिनी अर उख बटि चलि गै, अर जैके फांस खै दिनी।</verse>
				<verse number="6">तब मुख्य पुरोहितों न चांदी का ऊं सिक्‍कों तैं उठे अर बोलि, “यों सिक्‍कों तैं मन्दिर की दान-पेटि मा रखण ठिक नि च, किलैकि कै की मौत खुणि येको इस्तेमाल किये गै।”</verse>
				<verse number="7">इलै ऊं लोगु न मिली के ऊं सिक्‍कों से माटा का भाँडा तैं बणौण वळा का पुंगड़ा तैं खरीदी, ताकि परदेसी लोगु का मुरण का बाद ऊंतैं उख दफनये जै सैको।</verse>
				<verse number="8">इलै वे पुंगड़ों तैं आज का दिन तक “ल्वे को पुंगड़ा” बुले जान्दु।</verse>
				<verse number="9">अर इन त इलै ह्‍वे, ताकि उ वचन पूरु ह्‍वे जौ जु कि परमेस्वर का रैबर्या यिर्मयाह न बोलि छौ, अर उ इन च कि, “ऊंन चांदी का तीस सिक्‍का लिनी, इस्राएली लोगु न वेकी जान की कीमत या ही ठैरै।</verse>
				<verse number="10">अर ऊंन यू सिक्‍का माटा का भाँडा बणौण वळा तैं पुंगड़े की कीमत मा दे दिनी, ठिक जन प्रभु न मितैं आज्ञा दे छै।”</verse>
				<verse number="11">अर जब यीशु तैं रोमी गवर्नर पिलातुस का समणि लये गै, त वेन वेसे पूछी, “क्या तू यहूदियों को राजा छैई?” यीशु न वेतैं जबाब दिनी, “तुम अफि बोन्‍ना छाँ।”</verse>
				<verse number="12">मगर जब मुख्य पुरोहित अर ऊंका अध्यक्ष लोग वे पर इळजाम लगौणा छा, त वेन कुई जबाब नि दिनी।</verse>
				<verse number="13">तब रोमी गवर्नर न वेकू बोलि, “क्या त्वेतै सुन्यौणु नि च कि यू लोग तेरा खिलाप इथगा माप इळजाम लगौणा छिन?”</verse>
				<verse number="14">पर यीशु न वेतैं कै भि बात को जबाब नि दिनी, अर यू देखि के रोमी गवर्नर तैं बड़ु ताजुब ह्‍वे।</verse>
				<verse number="15">अर फसह का त्योवार पर हर साल इन रिवाज छौ, कि जै कैदी तैं लोग गवर्नर बटि मंगदा छा, वु ऊं लोगु खुणि वे कैदी तैं छोड़ि देन्दु छौ।</verse>
				<verse number="16">अर ऊं दिनों मा बरअब्बा नौ को एक भौत बदनाम मनखि ऊंका इख कैदी छौ।</verse>
				<verse number="17">अर जब भीड़ इकट्‍ठा ह्‍वे गै, त पिलातुस न ऊं बटि पूछी, “तुम क्या चन्द्‍यां, कि मि तुम खुणि कैतैं छोड़ द्‍यूं, बरअब्बा तैं या यीशु तैं जैकू मसीह बुले जान्दु?”</verse>
				<verse number="18">किलैकि पिलातुस जणदु छौ कि यों लोगु न यीशु तैं जलन रखण की वजै से पकड़वै।</verse>
				<verse number="19">अर जब पिलातुस न्याय आसन पर बैठयूं छौ, त वेकी घरवळी न वेका पास इन रैबार भेजि कि, “तुम वे धरमी मनखि का मामला मा हाथ नि डलयां, किलैकि ब्याळि राति मिन वेका बारा मा सुपन्या देखि, अर वेकी वजै से आज मि भौत दुख झेली।”</verse>
				<verse number="20">अर मुख्य पुरोहितों न अर यहूदी अध्यक्ष लोगु न भीड़ का लोगु तैं उकसै, कि ऊ बरअब्बा तैं आजाद करण की, अर यीशु तैं जान से मरण की मांग कैरा।</verse>
				<verse number="21">तब रोमी गवर्नर पिलातुस न लोगु बटि पूछी, “तुम क्या चन्द्‍यां, कि यों दुईयों मा बटि मि तुम खुणि कैतैं आजाद कैरुं?” अर ऊंन बोलि, “बरअब्बा तैं छोड़ि द्‍या।”</verse>
				<verse number="22">अर वेन ऊंकू बोलि, “त फिर मि यीशु का दगड़ा क्या कैरुं, जैकू मसीह बुले जान्दु?” तब ऊं सभ्यों न बोलि, “वेतैं क्रूस पर चड़ै द्‍या, वेतैं क्रूस पर चड़ै द्‍या।”</verse>
				<verse number="23">वेन ऊंकू बोलि, “किलै, वेन क्या अपराध कैरी?” पर लोग और भि चिल्‍लै-चिल्‍लै के बोन्‍न लगि गैनी, “वेतैं क्रूस पर चड़ै द्‍या, वेतैं क्रूस पर चड़ै द्‍या।”</verse>
				<verse number="24">जब पिलातुस न देखि कि कुई फैदा नि होणु, बल्किन मा हल्‍ला और भि जादा होणु च, त वेन पाणि ले अर भीड़ का समणि अपणा हाथ ध्वेके बोलि, “ये निरदोष मनखि का ल्वे मा मेरु कुई हाथ नि च येका बारा मा तुम ही जाणा।”</verse>
				<verse number="25">तब लोगु न वेकू बोलि, “येका ल्वे को हिसाब-किताब हमरा अर हमरि औलादों बटि लिये जौ।”</verse>
				<verse number="26">तब पिलातुस न ऊंकी मांग का मुताबिक बरअब्बा तैं छोड़ दिनी, अर यीशु तैं कोड़ा लगवैनि अर क्रूस पर चड़ौणु खुणि ऊंका हाथों मा सौंप दिनी।</verse>
				<verse number="27">अर येका बाद रोमी गवर्नर पिलातुस का सिपै यीशु तैं राजमहल मा लि गैनी, अर उख सिपयों की पूरि पलटण वेका चौतरफि इकट्‍ठा ह्‍वे गै।</verse>
				<verse number="28">अर उख ऊंन वेका कपड़ा उतारि के वेतैं बैंगनि रंग को चोळा पैरै,</verse>
				<verse number="29">अर कांडों को एक मुकुट बूणी के वेका मुण्ड़ मा पेनै, अर वेका दैंणा हाथ मा निगुंलो को एक जांठु दिनी। अर वेका अगनै घुंडा टेकी के वेको मजाक उड़ै के बोलि, “हे यहूदियों का राजा तेरी जै हो।”</verse>
				<verse number="30">अर ऊंन वे पर थूकि, अर निगुंला का वे जांठा तैं लेके वेका मुण्ड़ पर मरण लगि गैनी।</verse>
				<verse number="31">अर जब ऊंन यीशु को खूब मजाक बणै दिनी, तब ऊंन वे चोळा तैं उतारि के फिर से वेका कपड़ा वेतैं पेनै दिनी। अर वेतैं क्रूस पर चड़ौणु कू लि गैनी।</verse>
				<verse number="32">जब रोमी सिपै यीशु तैं लि जाणा छा। तब सिपयों न कुरेन नगर का रौण वळा शमौन तैं पकड़ी, अर वेतैं मजबूर कैरी कि उ यीशु की क्रूस तैं उठे के लि जौ।</verse>
				<verse number="33">अर जब ऊ गुलगुता नौ की एक जगा पर पौंछिनी, अर ईं जगा कू खोपड़ि की जगा भि बुल्दिन।</verse>
				<verse number="34">तब ऊंन यीशु तैं तीत मिल्यूं अंगूरों को रस पीणु खुणि दे, मगर वेन उ चखी के पीण नि चै।</verse>
				<verse number="35">तब ऊंन वेतैं क्रूस पर चड़ै दिनी, अर पांसा डालि के वेका कपड़ा आपस मा बांट दिनी।</verse>
				<verse number="36">अर उख बैठि के वेकी पैरेदारी करण लगि गैनी।</verse>
				<verse number="37">अर वे पर लग्यां इळजाम तैं एक पाटि मा लिख्वे के क्रूस पर लगवै दिनी, अर वीं पाटि मा इन लिख्यूं छौ कि, “यू यहूदियों को राजा यीशु च।”</verse>
				<verse number="38">अर यीशु का दगड़ा-दगड़ि दुई और डाकुओं तैं भि क्रूस पर चड़ये गै, एक तैं वेकी दैंणी तरफा अर दुसरा तैं वेकी बैं तरफा।</verse>
				<verse number="39">अर जु लोग उख बटि औणा-जाणा छा वु वेकी बेजती कना छा, अर अपणु मुण्ड़ हिलै-हिलै के इन बोन्‍ना छा कि,</verse>
				<verse number="40">“हे मन्दिर का नास करण वळा, अर तीन दिन मा वेतैं बणौण वळा, अरे अब खुद तैं बचौ, अर अगर जु तू परमेस्वर को पुत्र छैई, त क्रूस बटि मूड़ी उतर।”</verse>
				<verse number="41">अर ठिक इन्‍नि मुख्य पुरोहित, शास्‍त्री अर यहूदी अध्यक्ष लोग भि मजाक उड़ै के बोन्‍ना छा कि,</verse>
				<verse number="42">“अरे येन दुसरो तैं बचै पर अब खुद तैं नि बचै सकणु रे, अर यू च ‘इस्राएल को राजा,’ अर अगर यू क्रूस बटि उतरि जौ त हम भि ये पर बिस्वास करुला।</verse>
				<verse number="43">अरे, अगर यू परमेस्वर पर भरोसा रखदु, अर अगर जु पिता परमेस्वर भि चान्दु त अब उ येतैं बचौ, किलैकि यू त बुल्दु छौ कि ‘मि परमेस्वर को पुत्र छौं।’”</verse>
				<verse number="44">अर ठिक इन्‍नि जु डाकु वेका दगड़ा क्रूस पर चड़ये गै छा, ऊंन भि वेको मजाक उड़ै।</verse>
				<verse number="45">अर दुफरे की बारह बजी बटि लेके तीन बजी तक पूरा देस मा अन्धेरु होयुं रै।</verse>
				<verse number="46">अर तीन बजी का करीब यीशु न ऊँची आवाज मा चिल्‍लै के बोलि, “एली, एली, लमा शबक्‍तनी?” ज्यां को मतलब इन च कि, “हे मेरा परमेस्वर, हे मेरा परमेस्वर, तुमुन मितैं किलै छोड़याली?”</verse>
				<verse number="47">अर जु लोग उख खड़ा छा, ऊंन ईं बात तैं सुणी के बोलि कि, “यू त एलिय्याह तैं बुलाणु च।”</verse>
				<verse number="48">तब तुरन्त सिपयों मा बटि एक भागी के गै अर वेन एक स्पंच तैं सिरका मा भिजे, अर निगुंला का जांठा पर रखी के वेका गिच्‍चा पर लगै।</verse>
				<verse number="49">तब दुसरा लोगु न बोलि, “रुकी जा, दिखद्‍यां कि एलिय्याह येतैं बचौणु खुणि औन्दु च, कि ना।”</verse>
				<verse number="50">अर यीशु एक बार फिर ऊँची आवाज मा चिल्‍लै, अर वेन अपणा पराण छोड़ि दिनी।</verse>
				<verse number="51">अर वे ही बगत मन्दिर को परदा मथि बटि मूड़ी तक दुई हिस्सों मा फटी गै, अर एक बड़ु भ्वींचळु औण से धरती हिली गै, अर पौड़-पखाडो पर तिड़कवाल पोड़ि गै,</verse>
				<verse number="52">अर इख तक की कबर खुलि गैनी, अर भौत सा परमेस्वर का पवित्र लोग जु मोरि गै छा, ऊ अपणा-अपणा सरील मा ज्यून्दा ह्‍वे गैनी।</verse>
				<verse number="53">अर यीशु का मौत मा बटि ज्यून्द होण का बाद, यू लोग भि कबर बटि भैर निकळि गैनी, अर पवित्र नगर यरूशलेम मा जैके भौत सा लोगु तैं दिखैनि।</verse>
				<verse number="54">अर जु रोमी सुबेदार अर दुसरा सिपै यीशु की पैरेदारी कना छा, ये भ्वींचळा का औण से अर जु कुछ भि ह्‍वे वां से ऊ भौत डौऽरी गैनी। तब ऊंन बोलि, “सच्‍चि मा यू परमेस्वर को पुत्र छौ।”</verse>
				<verse number="55">अर भौत सि जनानियां गलील बटि इख अईं छै, जु की यीशु की सेवा करदी छै, अर वेका पिछनै-पिछनै चलदि छै, अर यों सब बातों तैं यू दूर से दिखणी छै।</verse>
				<verse number="56">अर ऊं जनानियों मा बटि एक मगदला गौं की मरियम, याकूब अर यूसुफ की माँ मरियम, अर जबदी की घरवळी भि छै।</verse>
				<verse number="57">यूसुफ नौ को एक मनखि छौ, जु कि अरिमतिया नगर मा रौन्दु छौ। अर यू एक सेठ मनखि छौ, अर यू यीशु पर बिस्वास करदु छौ। अर जब रुमुक ह्‍वे, त यू रोमी गवर्नर पिलातुस का पास गै।</verse>
				<verse number="58">अर जब उ पिलातुस का पास पौंछी, त वेन यीशु की लांश तैं गुलगुता नौ की जगा बटि लि जाण की मांग कैरी, तब पिलातुस न वेतैं लि जाण की आज्ञा दे दिनी।</verse>
				<verse number="59">तब यूसुफ न यीशु की लांश तैं लेई, अर वेकी लांश तैं मखमल का एक साफ चदरा मा लपेटि दिनी।</verse>
				<verse number="60">अर वेन यीशु की लांश तैं कबर मा रखी दिनी, अर ईं कबर का मुख पर वेन एक बड़ु डांग लगै दिनी। अर या एक नई कबर छै ज्वा कि वेन पाड़ पर खुदवै के अफ खुणि बणवईं छै।</verse>
				<verse number="61">अर मगदला गौं की मरियम अर दुसरि मरियम कबर का समणि उखि बैठि छै।</verse>
				<verse number="62">अर दुसरा दिन, जु कि सब्त को दिन छौ, मुख्य पुरोहित अर फरीसी दल का लोग, रोमी गवर्नर पिलातुस का पास इकट्‍ठा ह्‍वेनि।</verse>
				<verse number="63">अर ऊंन बोलि, “श्रीमान, हमतै याद च, कि ये झूठ्‍ठा मनखि न जब उ ज्यून्दु छौ, त वेन बोलि छौ, ‘मि तीन दिन बाद ज्यून्दु ह्‍वे जौलु।’</verse>
				<verse number="64">इलै तुम तीन दिन तक वेकी कबर पर पैरा देणु खुणि आज्ञा दे द्‍या, कखि इन नि हो कि वेका चेला ऐके वेकी लांश तैं चुरै के लि जा, अर लोगु मा जैके बोला कि, ‘यीशु मुरदो मा बटि ज्यून्दु ह्‍वे गै।’ श्रीमान, अगर जु इन ह्‍वे जालु, त या झूठ्‍ठी बात पैले की झूठ्‍ठी बातों से और भि जादा फैली जालि, अर हालत जादा खराब ह्‍वे जाला।”</verse>
				<verse number="65">तब पिलातुस न ऊंकू बोलि, “तुमरा पास त पैरेदार छैई छिन ऊंतैं ही लि जा, अर कबर की रखवळी करणु खुणि जन ठिक लगणु तुम उन्‍नि कैरा।”</verse>
				<verse number="66">तब वु उख बटि गैनी, अर कबर पर मोर लगै के पैरादारों तैं पैरा देणु खुणि उख बैठे दिनी।</verse>
			</chapter>
			<chapter number="28">
				<verse number="1">अर जब सब्त को दिन बीती गै, त हप्‍ता का पैला दिन याने कि इतवार रात खुलण से पैलि ही मगदला गौं की मरियम अर दुसरि मरियम कबर पर दिखणु कू ऐनी।</verse>
				<verse number="2">अर सुणा, अचानक एक बड़ु भ्वींचळु ऐ, किलैकि प्रभु को एक दूत स्वर्ग बटि ऐ, अर वेन ऐके कबर का मुख पर रख्यां बड़ा डांग तैं हटै दिनी, अर वेमा पर बैठि गै।</verse>
				<verse number="3">अर वेको रुप आसमान मा चमकण वळी बिजली का जन, अर वेका कपड़ा बरफ की तरौं सफेद छा।</verse>
				<verse number="4">अर जु पैरेदार यीशु की कबर पर पैरा देणा छा, वेतैं देखि के वु लोग डौऽरळ कौंपण लगि गैनी, अर इन ह्‍वे गैनी जन की मुरयां हो।</verse>
				<verse number="5">तब स्वर्गदूत न ऊं जनानियों कू बोलि, “डौऽरा ना, मि जणदु छौं कि तुम यीशु तैं खुज्याणा छाँ, जैतैं क्रूस पर चड़ये गै छौ।</verse>
				<verse number="6">उ इख नि च, किलैकि उ अपणा बुलयां वचन का मुताबिक मुरदो मा बटि ज्यून्दु ह्‍वे गै। आ, अर ईं जगा तैं देखा, जख वेतैं रख्युं छौ।</verse>
				<verse number="7">अर तुरन्त इख बटि जा, अर वेका चेलों तैं बता कि उ मुरदो मा बटि ज्यून्दु ह्‍वे गै। अर उ तुम से पैलि गलील मुलक कू जाणु च, अर तुम लोग वेतैं उखि दिखल्या। अर सुणा, मिन या बात तुमतै बतैयालि।”</verse>
				<verse number="8">अर यू सुणी के वु भौत डौऽरी गै छा, मगर येका दगड़ा-दगड़ि वु खुश छा। तब वु तुरन्त चेलों तैं या खबर देणु खुणि कबर बटि भागी के गैनी।</verse>
				<verse number="9">अर जब वु जाणा छा कि सुणा, अचानक यीशु ऊंतैं दिखै अर वेन ऊंकू बोलि, “सलाम।” अर ऊ वेका पास ऐनी, अर वेका खुटों तैं पकड़ी के वेकी भक्‍ति करण लगि गैनी।</verse>
				<verse number="10">तब यीशु न ऊंकू बोलि, “डौऽरा ना, अर जैके मेरा भैयों मा बोला कि गलील मुलक मा चलि जा, अर मि ऊंतैं उखि मिललु।”</verse>
				<verse number="11">अर जब यू जनानियां जाणि ही छै कि इथगा मा जु पैरेदार कबर पर पैरा देणा छा ऊंमा मा बटि कुछ न नगर मा जैके पूरु हाल समाचार मुख्य पुरोहितों तैं बतै दिनी।</verse>
				<verse number="12">तब मुख्य पुरोहितों न, अध्यक्ष लोगु का दगड़ा मा मिली के सला कैरी। अर सिपयों तैं भौत रुपया देके बोलि कि,</verse>
				<verse number="13">“सुणा, तुम लोग इन बुलयां कि, ‘राति जब हम सियां छा, तब वेका चेला ऐनी अर वेकी लांश तैं चुरै के लि गैनी।’</verse>
				<verse number="14">अर अगर जु या बात गवर्नर तक पौंछी जालि, त हम ऊंतैं समझै द्‍यूला अर तुमतै मुसीबत से भि बचै द्‍यूला।”</verse>
				<verse number="15">तब पैरादारों न रुपया लेके उन्‍नि कैरी जन ऊंतैं सिखै गै छौ। अर यहूदी लोगु मा आज का दिन तक या बात इन्‍नि फैली च कि यीशु कि लांश चुरयै गै।</verse>
				<verse number="16">अर येका बाद ग्यारा चेला गलील मुलक का वे पाड़ पर गैनी, जैका बारा मा यीशु न ऊंतैं बतै छौ।</verse>
				<verse number="17">अर इख ऊंन यीशु तैं देखि अर वेकी भक्‍ति कैरी, मगर फिर भि कै कैतैं यकीन नि ह्‍वे कि यू यीशु ही च।</verse>
				<verse number="18">तब यीशु न ऊंका पास ऐके बोलि, “स्वर्ग अर ईं धरती को पूरु अधिकार मितैं दियूं च।</verse>
				<verse number="19">इलै तुम जा, अर सब जाति का लोगु तैं चेला बणा, अर ऊंतैं पिता, पुत्र अर पवित्र आत्मा का नौ से बपतिस्मा द्‍या,</verse>
				<verse number="20">अर जु आज्ञा मिन तुमतै दिनी, ऊं सब बातों को पालन करण लोगु तैं सीखा, अर याद रखा मि ईं दुनियां का अन्त तक सदनि तुमरा दगड़ा मा छौं।”</verse>
			</chapter>
		</book>
		<book number="41">
			<chapter number="1">
				<verse number="1">परमेस्वर का पुत्र प्रभु यीशु मसीह का शुभ समाचार की शुरुवात कुछ इनकै ह्‍वे,</verse>
				<verse number="2">जन की परमेस्वर का रैबर्या यशायाह की किताब मा लिख्यूं च, ठिक उन्‍नि ह्‍वे। “देख, मि अपणा रैबार देण वळा तैं त्वेसे पैलि भेजणु छौं। जु की त्वे खुणि बाटु तयार करलु।</verse>
				<verse number="3">निर्जन जगा मा जोर-जोर से धै लगै के बुलण वळे की आवाज औणी च कि, ‘प्रभु को बाटु तयार कैरा, वे खुणि बाटु सीदु कैरा।’”</verse>
				<verse number="4">अर यूहन्‍ना नौ को एक मनखि जु की बपतिस्मा देन्दु छौ उ निर्जन जगा मा ऐ, अर उ पापों बटि माफी पौणु खुणि मन से पस्ताप कैरिके बपतिस्मा लेण को परचार कनु छौ।</verse>
				<verse number="5">तब पूरा यहूदिया मुलक अर यरूशलेम नगर का सब रौण वळा लोग वेका पास ऐनी, अर ऊं लोगु न अपणा-अपणा पापों तैं कबूल कैरिके यरदन गाड मा यूहन्‍ना बटि बपतिस्मा लिनी।</verse>
				<verse number="6">अर उ ऊंट का बाळो से बणयूं कपड़ा पैरदु छौ, अर अपणी कमर पर चमड़ा का पठुगा तैं बान्धि के रखदु छौ। अर खाण मा वेकू खाणुक टिड़ियां अर जंगळि शहद छौ।</verse>
				<verse number="7">अर उ इन परचार करदु छौ कि, “मेरा बाद एक इन मनखि औण वळु च, जु मिसे भि जादा ताकतबर च अर मि ये लैख भि नि छौं, कि झुकि के वेका जुतों का तसमा भि खोली सैकु।</verse>
				<verse number="8">अर मि त तुमतै पाणिळ बपतिस्मा देन्दु छौं, मगर उ तुमतै पवित्र आत्मळ बपतिस्मा द्‍यालु।”</verse>
				<verse number="9">अर ऊं दिनों मा यीशु गलील मुलक का नासरत नगर बटि ऐ, अर यरदन गाड मा ऐके यूहन्‍ना बटि बपतिस्मा लिनी।</verse>
				<verse number="10">अर जब यीशु पाणि बटि निकळि, त तुरन्त वेन स्वर्ग तैं खुल्यूं अर पवित्र आत्मा तैं कबूतर का रुप मा अपणा मथि उतरद देखि।</verse>
				<verse number="11">तब स्वर्ग बटि इन आवाज ऐ कि, “तू मेरु लाडलु पुत्र छैई, अर मि त्वे बटि भौत खुश छौं।”</verse>
				<verse number="12">अर येका बाद, परमेस्वर का आत्मा न अपणी ताकत से यीशु तैं तुरन्त निर्जन जगा कू भेजि।</verse>
				<verse number="13">अर निर्जन जगा मा चालीस दिनों तक शैतान न वेतैं अपणी बातों मा भकलौण की कोसिस कैरी। अर उख यीशु जंगळि जानबरों का दगड़ा मा रौन्दु छौ, अर स्वर्गदूत ऐके यीशु की सेवा करदा छा।</verse>
				<verse number="14">अर जब यूहन्‍ना बपतिस्मा देण वळा तैं पकड़ी के जेलखाना मा डळै गै छौ, त यीशु गलील मुलक मा परमेस्वर का राज को शुभ समाचार सुणौन्द-सुणौन्द ऐ।</verse>
				<verse number="15">अर वेन बोलि कि, “सुणा, बगत पूरु ह्‍वे गै अर परमेस्वर को राज नजदीक ऐ गै, इलै अपणा-अपणा पापों से पस्ताप कैरा अर ये शुभ समाचार पर बिस्वास कैरा।”</verse>
				<verse number="16">अर एक दिन यीशु गलील की झील का छाला बटि ह्‍वेके जाणु छौ, त वेन दुई मछैर भैयों तैं झील मा जाल डलण देखि। तब यीशु न ऊंकू बोलि, “मेरा पिछनै आ, अर मि तुमतै मनखियों तैं पकड़ण वळु बणौलु।” अर यू शमौन अर वेको भै अन्द्रियास छौ।</verse>
				<verse number="17"></verse>
				<verse number="18">अर ऊ अपणा जालों तैं तुरन्त उखि छोड़ि के यीशु का पिछनै ह्‍वे गैनी।</verse>
				<verse number="19">अर जब यीशु उख बटि कुछ अगनै गै, त वेन जबदी का दुई नौना याकूब अर यूहन्‍ना तैं देखि, अर यू दुई भै नाव मा बैठि के जाल ठिक कना छा।</verse>
				<verse number="20">तब यीशु न तुरन्त ऊंतैं बुलै, अर ऊंन अपणा बुबा तैं वीं नाव मा ही मजदूरों का दगड़ा छोड़ि दिनी, अर यीशु का पिछनै ह्‍वे गैनी।</verse>
				<verse number="21">फिर यीशु अर वेका चेला गलील मुलक का कफरनहूम नगर मा ऐनी, अर जब सब्त को दिन ऐ त यीशु तुरन्त प्रार्थना भवन मा गै, अर लोगु तैं उपदेस देण लगि गै।</verse>
				<verse number="22">अर वेको उपदेस सुणी के लोग दंग रै गैनी, किलैकि उ लोगु तैं शास्‍त्रियों की तरौं ना, बल्किन मा एक अधिकार पयां मनखि का जन उपदेस देणु छौ।</verse>
				<verse number="23">अर वे बगत वे प्रार्थना भवन मा एक आदिम छौ, जै पर खबेस लग्यूं छौ।</verse>
				<verse number="24">अर वेन जोर से चिल्‍लै के बोलि, “हे नासरत गौं का यीशु, हमतै त्वेसे क्या मतलब? क्या तू हमतै नास करणु कू अईं छैई? मि जणदु छौं कि तू कु छैई, तू परमेस्वर को पवित्र जन छैई।”</verse>
				<verse number="25">तब यीशु न वेतैं झिड़की के बोलि, “चुप रौ, अर वेमा बटि निकळि जा।”</verse>
				<verse number="26">तब वे खबेस न वेतैं मरोड़ि, अर चिल्‍लै-चिल्‍लै के वेमा बटि भैर निकळि गै।</verse>
				<verse number="27">अर यू देखि के सब लोग दंग रै गैनी। अर ऊ एक-दुसरा बटि बुलण लगि गैनी कि, “अरे यू सब क्या होणु च? यू त कुई नयू उपदेस च। अर यू अधिकार पयां मनखि का जन खबेसों तैं भि आज्ञा देन्दु, अर वु वेकी आज्ञा मणदिन।”</verse>
				<verse number="28">अर यीशु की चर्चा तुरन्त पूरा गलील मुलक मा फैली गै।</verse>
				<verse number="29">अर येका बाद यीशु तुरन्त प्रार्थना भवन बटि निकळि, अर याकूब अर यूहन्‍ना का दगड़ा मा शमौन अर अन्द्रियास का घौर गै।</verse>
				<verse number="30">अर उख शमौन की सासु तैं तेज जौर औणु छौ, अर ऊंन तुरन्त यीशु तैं वींका बारा मा बतै।</verse>
				<verse number="31">अर यीशु न वींका पास ऐके वींको हाथ पकड़ी के उठे, अर वींको जौर उतरि गै, तब वा ऊंकी सेवा-भगत करण लगि गै।</verse>
				<verse number="32">अर रुमुक होण का बाद, लोग अफ दगड़ा मा भौत सा बिमारों तैं अर इन्द्रया लोगु तैं भि जौं पर खबेस लग्यां छा यीशु का पास लेके ऐनी।</verse>
				<verse number="33">अर पूरा नगर का लोग ऊंका द्‍वार पर इकट्‍ठा ह्‍वे गैनी।</verse>
				<verse number="34">अर यीशु न भौत सा लोगु तैं जु की बन्‍नि-बन्‍नि किसम की बिमारियों से दुखी छा ऊंतैं खूब कैरी, अर भौत सा खबेसों तैं लोगु मा बटि भैर निकाळि। अर खबेसों तैं यीशु बोन्‍न नि देन्दु छौ, किलैकि ऊ जणदा छा कि उ कु च।</verse>
				<verse number="35">अर दुसरा दिन सुबेर होण से पैलि, यीशु उठी अर एक निर्जन जगा कू चलि गै अर उ उख जैके प्रार्थना करण लगि गै।</verse>
				<verse number="36">तब शमौन अर वेका दगड़्या यीशु तैं खुज्याणु कू गैनी।</verse>
				<verse number="37">अर जब यीशु ऊंतैं मिली त ऊंन वेकू बोलि, “गुरुजी, सब लोग तुमतै खुज्याणा छिन।”</verse>
				<verse number="38">मगर यीशु न ऊंकू बोलि, “चला, समणि का ग्‍वोंऽ मा भि चलद्‍यां, ताकि उखा लोगु तैं भि शुभ समाचार सुणये जौ, किलैकि मि यां खुणि ही अयूं छौं।”</verse>
				<verse number="39">इलै यीशु न गलील मुलक मा यहूदी लोगु का प्रार्थना भवनों मा जै-जैके उपदेस देणु रै, अर लोगु मा बटि खबेसों तैं भि निकाळि।</verse>
				<verse number="40">अर यीशु का पास एक दिन एक कोड़ी मनखि ऐ, अर वेन वेका समणि घुंडा टिकनी अर बिन्ती कैरिके बोलि, “गुरुजी, अगर तुम चा त मितैं ये कोड़ से शुद्ध कैरी सकद्‍यां।”</verse>
				<verse number="41">अर यीशु तैं वे पर बड़ु तरस ऐ अर वेन अपणा हाथ तैं अगनै बढै के वेतैं छ्वी अर बोलि, “हाँ, मि चान्दु छौं कि तू शुद्ध ह्‍वे जा।”</verse>
				<verse number="42">अर तुरन्त वेतैं वे कोड़ से छुटकारु मिली अर उ मनखि शुद्ध ह्‍वे गै।</verse>
				<verse number="43">अर यीशु न वेतैं चितै के बोलि कि,</verse>
				<verse number="44">“सुण, येका बारा मा कै मा कुछ भि नि बोलि, पर जा, अर अफ तैं पुरोहित तैं दिखौ। अर अपणा शुद्ध होण का बारा मा मूसा का दिया नियम-कानूनों का मुताबिक भेंट चड़ौ, ताकि लोग समझि सैका कि तू शुद्ध ह्‍वे गै।” तब यीशु न वेतैं उख बटि तुरन्त भेज दिनी।</verse>
				<verse number="45">पर उख बटि निकळदि ही वे मनखि न ईं बात को परचार करण शुरु कैर दिनी। अर वेन या बात इथगा फैलै दिनी, कि यीशु को नगर मा खुलाआम जाण मुस्किल ह्‍वे गै, इलै यीशु नगर का भैर निर्जन जगों मा रै, मगर फिर भि लोग अलग-अलग जगों बटि वेका पास औणा छा।</verse>
			</chapter>
			<chapter number="2">
				<verse number="1">अर कुछ दिन का बाद यीशु फिर से कफरनहूम नगर मा ऐ, अर या खबर फैली गै कि यीशु घौर अयूं च।</verse>
				<verse number="2">तब उख इथगा लोग इकट्‍ठा ह्‍वे गैनी, कि द्‍वार पर भि जगा नि रै।</verse>
				<verse number="3">अर जब यीशु ऊंतैं वचन सुनौणु छौ कि सुणा, कुछ लोग एक मनखि तैं वेका पास लेके ऐनी। अर यू मनखि लकवा को रोगी छौ, जैतैं चार लोग उठे के लाणा छा।</verse>
				<verse number="4">अर भौत भीड़ होण की वजै से वु लकवा पोड़यां मनखि तैं यीशु का समणि नि लि जै सकिनी, इलै ऊंन जख यीशु बैठयूं छौ वे घौर का पठौलो तैं हटै, अर लकवा पोड़यां मनखि तैं वेका बिस्तर का फंचा समेत मूड़ी उतारि दिनी।</verse>
				<verse number="5">ऊं लोगु को बिस्वास देखि के यीशु न वे मनखि कू बोलि, “बेटा, तेरा पाप माफ ह्‍वे गैनी।”</verse>
				<verse number="6">अर कुछ शास्‍त्री लोग जु कि उख बैठयां छा, वु अपणा-अपणा मनों मा सुचण लगि गैनी,</verse>
				<verse number="7">“यू मनखि इन कनकै बोलि सकदु? यू त इन बोलि के सरा-सर परमेस्वर की बेजती कनु च, अरे परमेस्वर का अलावा पापों से माफी कु दे सकदु?”</verse>
				<verse number="8">पर यीशु तुरन्त अपणी आत्मा मा जाणि गै, कि वु अपणा मनों मा क्या सुचणा छिन। तब वेन ऊंकू बोलि, “तुम अपणा मनों मा इन किलै सुचणा छाँ?</verse>
				<verse number="9">अर क्या बोन्‍नु जादा सौंगु च? इन बुलण कि, ‘तेरा पाप माफ ह्‍वे गैनी, या इन बोन्‍न कि, उठ, अर अपणा बिस्तर तैं उठौ अर हिटण लगि जा।’</verse>
				<verse number="10">मगर ईं बात को मि तुमतै सबूत देन्दु, ताकि तुम लोग या बात जाणि जा कि मनखि का पुत्र का पास धरती पर पाप माफ करणु को अधिकार च।” तब यीशु न लकवा पोड़यां रोगी कू बोलि,</verse>
				<verse number="11">“मि त्वेकू बोन्‍नु छौं, उठ, अर अपणु बिस्तर उठौ अर अपणा घौर चलि जा।”</verse>
				<verse number="12">तब उ उठी अर तुरन्त अपणा बिस्तर तैं उठे के ऊं लोगु का समणि बटि निकळि के चलि गै। अर यू देखि के सब लोग हकदक ह्‍वे गैनी, अर परमेस्वर की बडै कैरिके बोन्‍न लगि गैनी कि, “हम लोगु न इन पैलि कभि नि देखि।”</verse>
				<verse number="13">अर उख बटि निकळि के यीशु झील का छाला पर चलि गै, अर एक बड़ी भीड़ वेका पास ऐ, अर उ ऊंतैं सिखौण लगि गै।</verse>
				<verse number="14">अर जब यीशु उख बटि जाणु छौ, त वेन चुंगी लेण वळो की चौकी मा एक मनखि तैं बैठयूं देखि, वेको नौ लेवी छौ अर उ हलफई को नौनु छौ। तब यीशु न वेकू बोलि, “मेरा दगड़ा मा चल अर मेरु चेला बणि जा।” अर उ उठी के वेका पिछनै चलि गै।</verse>
				<verse number="15">अर एक दिन लेवी न अपणा घौर मा यीशु की बड़ी दावत कैरी, तब उख चुंगी लेण वळो कि, अर ऊंका ही जन दुसरा पापि लोगु की भीड़ यीशु अर वेका चेलों का दगड़ा मा खाणुक खाणु खुणि बैठि छै। अर यों लोगु की गिनती भौत जादा छै, अर यू सब यीशु का पिछनै ह्‍वे गै छा।</verse>
				<verse number="16">अर शास्‍त्री अर फरीसी दल का लोगु न देखि कि यू त चुंगी लेण वळो अर इन्‍नि दुसरा पापियों का दगड़ा मा खाणुक खाणु च, त ऊंन यीशु का चेलों कू बोलि, “तुमरो गुरु चुंगी लेण वळो अर ऊंका ही जन दुसरा पापि लोगु का दगड़ा मा खाणुक किलै खान्दु?”</verse>
				<verse number="17">अर या बात सुणी के यीशु न ऊंकू बोलि, “जु ठिक-ठाक छिन, ऊंतैं बैद की जरुरत नि होन्दी, मगर बिमारों तैं होन्दी च, अर जु लोग खुद तैं धरमी समझदिन मि ऊं लोगु खुणि ना, बल्किन मा पापि लोगु तैं बुलाणु खुणि अयूं छौं।”</verse>
				<verse number="18">यूहन्‍ना बपतिस्मा देण वळा का चेलों को अर फरीसी दल का लोगु को उपवास रख्युं छौ। तब कुछ लोगु न यीशु का पास ऐके बोलि, “गुरुजी, क्या बात च कि यूहन्‍ना का चेला अर फरीसी दल का लोग इथगा उपवास रखदिन, पर तुमरा चेला किलै नि रखदिन?”</verse>
				<verse number="19">तब यीशु न ऊंतैं जबाब दिनी, “जबरि तक ब्यौला बरातियों का दगड़ा मा च, क्या बराति लोग उपवास रखदिन? इलै जब तक ब्यौला ऊंका दगड़ा मा च, तब तक वु लोग उपवास नि रखी सकदिन।</verse>
				<verse number="20">मगर वु दिन आला, जब कि ब्यौला ऊंका बीच मा बटि अलग किये जालु, वे बगत ऊ उपवास रखला।</verse>
				<verse number="21">“कुई भि मनखि नया कपड़ा मा बटि फाड़ी के पुरणा कपड़ा मा टल्‍ला नि लगौन्द, अर अगर लगालु, त नया कपड़ा को टल्‍ला सिकुड़ी जालु अर वे पुरणा कपड़ा पर पैलि से और भि जादा बड़ु छेद ह्‍वे जालु।</verse>
				<verse number="22">अर ठिक उन्‍नि कुई भि नयू अंगूरों को रस पुरणा चमड़ा का थैला मा नि भोरदु। अर अगर भोरलु, त नयू अंगूरों को रस पुरणा चमड़ा का थैला तैं फाड़ी द्‍यालु। तब चमड़ा को थैला अर रस दुई बरबाद ह्‍वे जाला, इलै नया अंगूरों का रस तैं नया चमड़ा का थैलों मा भुरे जान्दु।”</verse>
				<verse number="23">एक बार यीशु सब्त का दिन पर अपणा चेलों का दगड़ा मा पुंगड़ों बटि जाणु छौ, अर वेका चेला अन्‍न का बलडो तैं तोड़ण लगि गैनी।</verse>
				<verse number="24">अर यू देखि के फरीसी दल का लोगु न यीशु कू बोलि, “अरे सुण, तेरा चेला वु काम किलै कना छिन, जु कि सब्त का दिन पर करण ठिक नि च?”</verse>
				<verse number="25">तब वेन ऊंतैं जबाब दिनी, “क्या तुमुन यू नि पैड़ी, कि जब राजा दाऊद अर वेका दगड़्या भूका छा, त वेन क्या कैरी?</verse>
				<verse number="26">अबियातार महा पुरोहित का बगत मा दाऊद परमेस्वर का मन्दिर मा गै अर परमेस्वर तैं अरपण मा चड़ईं रुट्‍टी तैं खै, जौं तैं खाण पुरोहितों का अलावा और कै दुसरा खुणि ठिक नि छौ, अर वेन वा रुट्‍टी अपणा दगड़्यों तैं भि दिनी।”</verse>
				<verse number="27">तब यीशु न ऊंकू इन भि बोलि, “सब्त को दिन मनखि खुणि बणयै गै, ना कि मनखि सब्त का दिन खुणि।</verse>
				<verse number="28">इलै मनखि को पुत्र सब्त का दिन को भि प्रभु च।”</verse>
			</chapter>
			<chapter number="3">
				<verse number="1">अर येका बाद यीशु फिर से यहूदी लोगु का प्रार्थना भवन मा ऐ, अर उख एक आदिम छौ जैको हाथ सुक्यूं छौ।</verse>
				<verse number="2">अर कुछ लोग यीशु की ताक मा छा, कि उ सब्त का दिन पर वे मनखि तैं खूब करदु च कि ना, ताकि वु वे पर इळजाम लगै सैका।</verse>
				<verse number="3">तब यीशु न वे सुख्यां हाथ वळा आदिम कू बोलि, “उठ, अर इख बीच मा खड़ु ह्‍वे जा।”</verse>
				<verse number="4">तब यीशु न ऊंकू बोलि, “सब्त का दिन क्या करण ठिक च भलु करण या बुरु करण? पराण तैं बचौण या नास करण?” मगर वु सन्ट रैनी।</verse>
				<verse number="5">अर ऊंका निठुर पराण तैं देखि के यीशु तैं बड़ु दुख ह्‍वे, अर गुस्सा मा चौतरफि देखि के वेन सुख्यां हाथ वळा मनखि कू बोलि, “अपणु हाथ अगनै बढ़ो।” अर जब वेन अपणु हाथ अगनै बढै, तब वेकू हाथ खूब ह्‍वे गै।</verse>
				<verse number="6">अर यू देखि के फरीसी दल का लोग तुरन्त उख बटि भैर निकळि गैनी। अर राजा हेरोदेस का कुछ खास लोगु का दगड़ा मा मिली के यीशु का खिलाप मा जाळसाजि करण लगि गैनी, कि वेतैं कनकै खतम किये जौ।</verse>
				<verse number="7">अर यीशु अपणा चेलों का दगड़ा झील का छाला पर चलि गै, अर गलील मुलक बटि एक बड़ी भीड़ वेका पिछनै चलण लगि गै।</verse>
				<verse number="8">अर यीशु का बड़ा-बड़ा कामों का बारा मा सुणी के यहूदिया मुलक बटि, अर यरूशलेम नगर बटि, अर इदूमिया मुलक अर यरदन गाड का दुसरा छाला बटि, अर सूर अर सैदा नगरों का आस-पास का मुलक बटि भि एक बड़ी भीड़ वेका पास ऐ।</verse>
				<verse number="9">तब भीड़ की वजै से यीशु न अपणा चेलों कू बोलि, “मि खुणि एक छुटी नाव तयार रखा, ताकि भीड़ की वजै से कखि मि दबी नि जौं।”</verse>
				<verse number="10">किलैकि वेन भौत सा लोगु तैं खूब कैरी छौ, इलै रोगी लोग वेतैं छूण चाणा छा, अर रोगियों की संख्या भौत छै, अर बड़ी धक्‍का-मुक्‍की चलणी छै।</verse>
				<verse number="11">अर जौं लोगु पर खबेस लग्यां रौन्दा छा, जब वु यीशु तैं दिखदा छा, त खबेस वेका खुटों मा पोड़ि के चिल्‍लै-चिल्‍लै के बुल्दा छा कि, “तू परमेस्वर को पुत्र छैई।”</verse>
				<verse number="12">मगर यीशु ऊंतैं आदेस देके बुल्दु छौ कि, “मेरा बारा मा इन परगट नि कैरा कि मि कु छौं।”</verse>
				<verse number="13">अर वेका बाद यीशु एक पाड़ पर चैड़ि गै, अर वेन ऊं लोगु तैं अपणा पास बुलै जौं तैं अपणा पास रखण की वेकी इच्छा छै, तब वु लोग वेका पास गैनी।</verse>
				<verse number="14">अर वेन ऊंमा बटि बारह लोगु तैं चुणी अर ऊंकू खास चेला बोलि, ताकि ऊ यीशु का दगड़ा मा रा अर वु ऊंतैं परचार करणु कू भेजूँ,</verse>
				<verse number="15">अर ऊंमा खबेसों तैं निकळण को अधिकार हो।</verse>
				<verse number="16">अर ऊं बारह चेलों का नौ इन छिन, शमौन, जैको नौ वेन पतरस रखी,</verse>
				<verse number="17">अर जबदी का दुई नौना याकूब अर वेको भै यूहन्‍ना, जौं तैं यीशु न बुअनरगिस नौ दिनी, जैको मतलब इन च कि गगड़ट को नौनु,</verse>
				<verse number="18">अन्द्रियास अर फिलिप्पुस, बरतुल्मै, मत्ती, थोमा, हलफई को नौनु याकूब, तद्‍दै, शमौन कनानी</verse>
				<verse number="19">अर यहूदा इस्करियोती जैन बाद मा यीशु तैं धोखा देके पकड़वै दिनी।</verse>
				<verse number="20">अर जब यीशु अर वेका चेला एक घौर मा ऐनी, त उख एक भौत बड़ी भीड़ इकट्‍ठा ह्‍वे गै, इख तक कि वु रुट्‍टी भि नि खै सकिनी।</verse>
				<verse number="21">अर जब यीशु का परिवार का लोगु न यू सुणी, त वु यीशु तैं पकड़णु कू गैनी, किलैकि वु इन बुल्दा छा कि, “वेकू दिमाग ठिकणा पर नि च।”</verse>
				<verse number="22">अर जु शास्‍त्री लोग यरूशलेम नगर बटि अयां छा, वु भि इन बुल्दा छा कि, “त्वेमा त बालजबूल च,” अर “उ खबेसों का अधिकारी बालजबूल याने कि शैतान की मदद से लोगु मा लग्यां खबेसों तैं निकळदु।”</verse>
				<verse number="23">अर यीशु न ऊंतैं अपणा पास बुलै के बोलि, “शैतान खुद ही शैतान तैं कनकै निकाळि सकदु।”</verse>
				<verse number="24">तब वेन ऊंतैं एक उदारण देके समझै, “सुणा, अगर कै राज्य का दुई हिस्सा ह्‍वे जा, त उ राज्य बरबाद ह्‍वे जान्दु।</verse>
				<verse number="25">अर अगर कै परिवार मा दुई हिस्सा ह्‍वे जा, त उ भि बरबाद ह्‍वे जान्दु।</verse>
				<verse number="26">ठिक उन्‍नि अगर जु शैतान ही शैतान तैं निकळण लगि जालु, त इन कैरिके वु खुद ही अपणा खिलाप ह्‍वे जालु, त फिर इन बता कि वेको राज कनकै बणयूं रालु? अरे इन कैरिके त वेको अन्त ही ह्‍वे जालु।</verse>
				<verse number="27">अर अगर कुई मनखि कै ताकतबर मनखि का घौर मा घुसी के वेको समान चुरण चान्दु हो, त वेतैं पैलि वे ताकतबर मनखि तैं बन्धण पोड़लु। तब उ मनखि वेका घौर का समान तैं आराम से चुरै सकदु।</verse>
				<verse number="28">अर मि तुमतै सच्‍चि मा बतै देन्दु कि मनखियों द्‍वारा किये जाण वळु हरेक पाप अर परमेस्वर की बेजती माफ किये जालि,</verse>
				<verse number="29">पर अगर कुई पवित्र आत्मा की बेजती करलु, त वेको यू अपराध माफ नि किये जालु, बल्किन मा वु त पाप खुणि सदनि खुणि दोषी ठैरलु।”</verse>
				<verse number="30">अर यीशु न या बात इलै बोलि किलैकि वु लोग इन बोन्‍ना छा कि, “वेमा त एक खबेस रौन्दु।”</verse>
				<verse number="31">तब यीशु की माँ अर वेका भै वे बटि मिलणु कू ऐनी, तब ऊंन कै मा यीशु तैं भैर बुलाणु खुणि रैबार भेजि।</verse>
				<verse number="32">अर भीड़ का लोग यीशु तैं घेरि के बैठयां छा अर ऊंन वेकू बोलि, “गुरुजी सुणा, तुमरि माँ अर तुमरा भै अर बैंण भैर खड़ा होयां छिन अर ऊ तुम बटि मिलण चाणा छिन।”</verse>
				<verse number="33">यीशु न ऊंकू बोलि, “सच्‍चि मा मेरी माँ अर मेरा भै कु छिन?”</verse>
				<verse number="34">फिर यीशु न अपणा आस-पास बैठयां लोगु जनै देखि के बोलि, “देखा, मेरी माँ अर मेरा भै यू ही छिन।</verse>
				<verse number="35">किलैकि जु लोग परमेस्वर का वचन तैं सुणदिन अर वेका मुताबिक चलदिन, वा ही मेरी माँ अर ऊ ही मेरा भै-बैंणा छिन।”</verse>
			</chapter>
			<chapter number="4">
				<verse number="1">एक बार फिर यीशु झील का छाला पर कुछ लोगु तैं सिखौणु छौ, अर वेका पास इथगा भीड़ जमा ह्‍वे गै, कि वु एक नाव मा चैड़ि के बैठि गै, पर भीड़ का लोग झील का छाला पर ही खड़ा छा।</verse>
				<verse number="2">अर वेन ऊं लोगु तैं भौत उदारण देके ऊंतैं भौत सि बात सिखैनी।</verse>
				<verse number="3">अर अपणा उपदेस मा वेन बोलि कि, “ध्यान से सुणा, एक बार एक किसान बीज बुतण कू गै।</verse>
				<verse number="4">अर जब उ बीज बुतणु छौ, त कुछ बीज बाटा का किनरा पोड़ीनी, अर पंछियों न ऐके ऊंतैं चुगि दिनी।</verse>
				<verse number="5">“अर ऊं बीजों मा बटि कुछ बीज ढुंग्याण जमीन पर पोड़ीनी, अर उख जादा माटु नि छौ अर जादा माटु नि मिलण की वजै से बीज जल्दी उपजी गैनी,</verse>
				<verse number="6">पर जब घाम ऐ त ऊ पौधा झुलसि गैनी, अर जलुड़ा मजबूत नि छा इलै वु सूखि भि गैनी।</verse>
				<verse number="7">“अर ऊं बीजों मा बटि कुछ बीज झिबलांणो मा पोड़ीनी, अर झिबलांण भि वेका दगड़ा मा बढिनि, अर ऊंन ऊंतैं दबै दिनी अर ऊं पर फल नि लगिनी।</verse>
				<verse number="8">“मगर कुछ बीज अच्छी जमीन मा पोड़ीनी, अर वु उपजण लगि गैनी अर ऊं पर खूब अच्छा फल लगिनी, कै पर तीस गुणा, कै पर साठ गुणा, अर कै पर सौ गुणा।”</verse>
				<verse number="9">तब यीशु न ऊंकू बोलि, “जैका पास सुनणु खुणि कन्दूड़ छिन, उ सुणी ल्यो।”</verse>
				<verse number="10">अर जब यीशु इखुली छौ, त जौं लोगु न वे उदारण का बारा मा सुणी छौ ऊं मदि वेका बारह चेला न, अर कुछ और लोगु न वे उदारण को मतलब वेसे पूछी।</verse>
				<verse number="11">अर वेन ऊंतैं जबाब दिनी, “तुमतै त परमेस्वर का राज का भेदों तैं समझण को दान दियूं च, पर दुसरा लोगु तैं मितैं उदारण मा बतौण पोड़दु,</verse>
				<verse number="12">ताकि पवित्रशास्‍त्र की वा बात पूरि हो ज्वा की इन च कि, “वु लोग देखि के भि देखि नि सैका, अर सुणी के भि समझि नि सैका, कखि इन नि हो कि वु अपणा पापों बटि पस्ताप कैरा, अर ऊंतैं माफी दिये जौ।”</verse>
				<verse number="13">तब यीशु न अपणा चेलों कू बोलि, “क्या तुम ये उदारण को मतलब नि समझयां? अर अगर जु तुम यू नि समझद्‍यां, त फिर दुसरा उदारणों को मतलब कनकै समझि ल्या?</verse>
				<verse number="14">बीज बुतण वळु इन च जन की कुई परमेस्वर का वचन तैं बुल्दु।</verse>
				<verse number="15">“अर बाटा का किनरा पोडयां बीज का दगड़ा मा जु कुछ भि ह्‍वे, उ इन च कि कुछ लोग परमेस्वर का राज का बारा मा वचन तैं सुणदा त छिन, मगर वेको मतलब ऊंका बिंगण मा नि औन्दु, अर शैतान ऐके वे वचन तैं छिनी के लि जान्दु, जु कि वेका मन मा बुतै गै छौ।</verse>
				<verse number="16">“अर ठिक उन्‍नि ढुंग्याण जमीन पर पोडयां बीज का दगड़ा मा जु कुछ भि ह्‍वे, उ इन च कि कुछ लोग परमेस्वर का वचन तैं सुणी के बड़ी खुशी से स्वीकार त करदिन,</verse>
				<verse number="17">मगर बिस्वास मा जड़ नि होण की वजै से वु कुछ बगत तक ही बिस्वास मा बणयां रौनदिन। इलै वचन की वजै से जब कुई दुख-तकलीफ या कुई सतौ ऊंका जीवन मा औन्दिन, त वु लोग बिस्वास करण छोड़ि देन्दिन।</verse>
				<verse number="18">“अर झिबलांणो मा पोड़यां बीज का दगड़ा मा जु कुछ भि ह्‍वे, उ इन च कि कुछ लोग परमेस्वर का वचन तैं सुणदा त छिन,</verse>
				<verse number="19">मगर ईं दुनियां मा अगनै चलि के जीवन की चिन्ता-फिकर, अर धन-दौलत को धोखा, अर इन्‍नि दुसरि चीजों को लालच भि ऊंमा ऐ जान्दु। अर ऊ वे वचन तैं दबै देन्दिन, इलै ही वे पर फल नि लगदिन।</verse>
				<verse number="20">अर अच्छी जमीन मा पोड़यां बीज का दगड़ा मा जु कुछ भि ह्‍वे, उ इन च कि कुछ लोग परमेस्वर का वचन तैं सुणी के वेतैं स्वीकार करदिन, अर फल लेके औन्दिन, कै पर तीस गुणा, कै पर साठ गुणा, अर कै पर सौ गुणा।”</verse>
				<verse number="21">अर यीशु न ऊंकू इन भि बोलि, “कुई भि द्‍यू बाळि के कटोरा का तौळ ढकै के नि रखदु, अर ना ही खाट का तौळ रखदु, पर एक ऊँची जगा पर रखदु।</verse>
				<verse number="22">अर इन्दरि कुई भि बात नि च ज्वा की परमेस्वर बटि छिपी हो, अर ना ही कुई इन्द्रयो गुप्‍त भेद लुक्युं ज्यां को वेतैं पता नि हो, अर उ वेको खुलासा उज्याळा मा करलु।</verse>
				<verse number="23">अगर कै मा सुनणु खुणि कन्दूड़ छिन, त वु सुणी ल्यो।”</verse>
				<verse number="24">फिर यीशु न ऊंकू बोलि, “इलै ध्यान द्‍या की तुम क्या सुनणा छाँ, अर जै नापळ तुम नपद्‍यां, ठिक उन्‍नि तुम खुणि भि नपै जालु, अर तुमतै और जादा दिये जालु।</verse>
				<verse number="25">किलैकि जु कुई भि परमेस्वर का राज तैं बिंगणे की इच्छा रखदु, वेतैं वेका बारा मा बिंगण को और भि जादा ज्ञान दिये जालु। मगर जु मनखि इन सोचदु, कि मितैं भौत ज्ञान च, त वे बटि वु ज्ञान भि छिनै जालु।”</verse>
				<verse number="26">येका बाद यीशु न इन भि बोलि कि, “परमेस्वर को राज इन च, जन की कुई मनखि पुंगड़ा मा बीज बुतदु।</verse>
				<verse number="27">अर राति वु आदिम सै जान्दु अर दिन-भर उठयूं रौन्दु, पर वु यू नि जणदु कि वु बीज कनकै उपजणु अर कनकै बढणु च।</verse>
				<verse number="28">जमीन अफि उपज का फल तैं पैदा करदी, पैलि अंकुर, तब बलडा अर वेका बाद पूरा बीज ही बीज।</verse>
				<verse number="29">अर जब फसल पक्‍की जान्दी, तब उ तुरन्त दथड़ु लेके पुंगड़ा मा पौंछी जान्दु अर कटण शुरु कैरी देन्दु, किलैकि लवै करण को बगत ऐ गै।”</verse>
				<verse number="30">अर येका बाद यीशु न ऊंकू इन भि बोलि, “हम परमेस्वर का राज की तुलना कै का दगड़ा मा कैरा? अर वेको बखान क्या जि उदारण देके बता?</verse>
				<verse number="31">अरे, परमेस्वर को राज त लय्या का बीज की तरौं च, जब वु बुतै जान्दु त जमीन का सब बीजों मा सबसे छुटो होन्दु,</verse>
				<verse number="32">मगर जब बुतै जान्दु, त उपजी के सब पौधों मा बटि सबसे बड़ु ह्‍वे जान्दु, अर वेका फौंका इथगा बड़ा ह्‍वे जनदिन कि पंछि वेका फौंक्यों मा ऐके अपणु घोल बणौन्दिन।”</verse>
				<verse number="33">अर यीशु न लोगु तैं सिखौणु खुणि इन्‍नि भौत सा उदारणों को इस्तेमाल कैरी, अर ऊंतैं उथगा ही बतै जथगा वु समझि सकदा छा।</verse>
				<verse number="34">अर यीशु बगैर उदारण दियां लोगु बटि कुछ भि नि बुल्दु छौ, मगर जब यीशु अपणा चेलों का दगड़ा मा होन्दु छौ, त हरेक बात को मतलब ऊंतैं समझै देन्दु छौ।</verse>
				<verse number="35">अर वे ही दिन जब रुमुक होण लगि गै, त यीशु न चेलों कू बोलि, “चला, हम झील का पल्या छाला चलद्‍यां।”</verse>
				<verse number="36">इलै ऊ वीं भीड़ तैं उखि छोड़ि के यीशु तैं ठिक उन्‍नि अफ दगड़ि लि गैनी, जन वु नाव मा छौ। अर वीं नाव का दगड़ा मा उख दुसरि नावें भि छै।</verse>
				<verse number="37">अर जब वु झील मा जाणा छा, त एक बड़ी आंधी ऐ। अर पाणि की लैर नाव से इथगा जोर से लगिनी, कि नाव पाणिळ भुरेण लगि गै।</verse>
				<verse number="38">मगर यीशु नाव का पिछनै का हिस्सा मा मुण्ड़ तौळ तकिया रखी के सिणु छौ। अर चेलों न वेतैं बिंजाळी के बोलि, “गुरुजी हे गुरुजी, तुमतै त हमरि कुई भि चिन्ता-फिकर नि च, कि हम मुरण वळा छां।”</verse>
				<verse number="39">तब वेन उठी के आंधी तैं झिड़की, अर पाणि की बौछारों कू बोलि, शान्त ह्‍वे जा अर रुकी जा, अर ऊ रुक गैनी अर सब कुछ शान्त ह्‍वे गै।</verse>
				<verse number="40">अर यीशु न चेलों कू बोलि, “तुम किलै डऽरणा छाँ? क्या तुमतै अभि तक बिस्वास नि च?”</verse>
				<verse number="41">तब यू देखि के चेला भौत डौऽरी गैनी अर आपस मा बोन्‍न लगि गैनी, “अरे, आखिर मा यू छैई कु च? जु कि आंधी अर पाणि तैं आज्ञा देन्दु, अर ऊ वेकी मणदिन।”</verse>
			</chapter>
			<chapter number="5">
				<verse number="1">गिरासेनियों का मुलक मा एक मनखि छौ, जै पर खबेस लग्यूं छौ, अर यू मनखि कबरिस्तान मा रौन्दु छौ। अर कुई भि मनखि वेतैं संगुळोन बन्धी के भि नि रखी सकदु छौ, किलैकि कई बार उ बेड़ियों अर संगुळोन बन्धे त गै, मगर वेन ऊं संगुळों तैं तोड़ि दिनी अर बेड़ियों का टुकड़ा-टुकड़ा कैरी दिनी। अर कुई भि मनखि वेतैं वश मा नि रखी सकदु छौ। उ दिन-रात कबरिस्तान मा अर पाड़ो मा लगातार चिल्‍लाणु रौन्दु छौ, अर ढुंगा मारी-मारी के अफ तैं नुकसान पौंछान्दु छौ। अर जब यीशु अर वेका चेला झील का दुसरा छाला गिरासेनियों का मुलक मा पौंछिनी, अर जन्‍नि यीशु नाव बटि उतरि, कि देखा, तुरन्त यू मनखि जैमा खबेस लग्यूं छौ, कबरिस्तान बटि निकळि अर यीशु तैं दूर से देखि के भागी के वेसे मिली अर वेतैं परणाम कैरी।</verse>
				<verse number="2"></verse>
				<verse number="3"></verse>
				<verse number="4"></verse>
				<verse number="5"></verse>
				<verse number="6"></verse>
				<verse number="7">अर ऊँची आवाज मा चिल्‍लै के बोलि, “हे सबसे महान परमेस्वर का पुत्र यीशु, तुम मि बटि क्या चाणा छाँ? मि तुमतै परमेस्वर की कसम देन्दु, कि मितैं दुख नि द्‍या।”</verse>
				<verse number="8">अर वेन यू इलै बोलि किलैकि यीशु न वेकू बोलि छौ कि, “हे खबेस तू ये मनखि मा बटि भैर निकळि जा।”</verse>
				<verse number="9">तब यीशु न वे खबेस तैं पूछी, “तेरु नौ क्या च?” वेन वेकू बोलि, “मेरु नौ पलटण च किलैकि हम भौत जादा छां।”</verse>
				<verse number="10">अर वेन यीशु बटि भौत बिन्ती कैरी कि, “हमतै ये मुलक से भैर नि भेज।”</verse>
				<verse number="11">अर उख पाड़ पर सुंगरों को एक बड़ु झुण्ड चरणु छौ।</verse>
				<verse number="12">इलै खबेसों न यीशु बटि बिन्ती कैरी कि, “हमतै ऊं सुंगरों मा भेज दे, ताकि हम ऊंका भितर चलि जां।”</verse>
				<verse number="13">अर वेन ऊंतैं इजाजत दे दिनी। तब खबेसों की पलटण वे मनखि मा बटि निकळि के सुंगरों मा बैठि गैनी, अर सुंगरों को वु पूरु झुण्ड भौत तेजी से भ्योळ जनै भागी, अर वु सभ्या का सभि मूड़ी झील मा लमडी गैनी अर डुबी के मोरि गैनी। अर ये झुण्ड की संख्या दुई हजार का लगभग छै।</verse>
				<verse number="14">अर यू सब देखि के सुंगरों तैं चराण वळा उख बटि भगिनी, अर नगरों अर ग्‍वोंऽ मा जैके ऊंन या पूरि बात लोगु तैं बतै दिनी, तब जु कुछ ह्‍वे छौ वेतैं दिखण खुणि लोग ऐनी।</verse>
				<verse number="15">अर ऊंन यीशु का पास ऐके वे मनखि तैं जैमा खबेसों की पलटण बैठि छै कपड़ा पैरि के अर चेतन बैठयूं देखि, अर यू देखि के ऊ लोग डौऽरी गैनी।</verse>
				<verse number="16">अर जौं लोगु न यू सब होण देखि ऊंन नगर बटि अयां लोगु तैं बतै, कि खबेसों का द्‍वारा सतयुं यू मनखि कनकै खूब ह्‍वे, अर सुंगरों का दगड़ा मा क्या ह्‍वे।</verse>
				<verse number="17">तब गिरासेनियों मुलक का लोगु न यीशु बटि बिन्ती कैरी, कि हमरा मुलक बटि चलि जा।</verse>
				<verse number="18">अर जब यीशु नाव पर बैठण लगि गै, त वु मनखि जै पर पैलि खबेस लग्यां छा, वेन यीशु बटि बिन्ती कैरी कि, “मितैं अपणा दगड़ा मा रौण द्‍या।”</verse>
				<verse number="19">मगर वेन वेतैं विदा कैरिके इन आज्ञा दिनी कि, “जा, अपणा घौर चलि जा, अर परमेस्वर न त्वे पर कथगा बड़ी दया कैरी, वे काम का बारा मा सब कुछ अपणा लोगु तैं बतौ।”</verse>
				<verse number="20">तब उ आदिम उख बटि चलि गै अर दिकापुलिस का मुलक मा ईं बात को परचार करण लगि गै, कि यीशु न मि खुणि भौत बड़ु काम कैरी। अर वे आदिम कि ऊं सब बातों तैं सुणी के लोग ताजुब मा पोड़ि गैनी।</verse>
				<verse number="21">फिर यीशु नाव से गिरासेनियों का मुलक बटि निकळि के वापस दुसरा छाला पर चलि गै, अर जब उ छाला पर ही छौ, कि देखा, एक बड़ी भीड़ वेका पास जमा ह्‍वे गै।</verse>
				<verse number="22">अर इथगा मा याईर नौ को एक मनखि वेका पास ऐ अर यू यहूदियों का प्रार्थना भवन का मुखियों मा मदि एक छौ। अर उ यीशु का खुटों मा पोड़ि के वे बटि बिन्ती करण लगि गै।</verse>
				<verse number="23">वेन इन बोलि कि, “गुरुजी, मेरी छुटी नौनि मुरण वळी च, तुम चलि के अपणु हाथ वीं पर रख द्‍या, ताकि वा ठिक ह्‍वे जौ अर ज्यून्द रौ।”</verse>
				<verse number="24">अर तब यीशु वेका दगड़ा मा चलि गै, त बड़ी भीड़ वेका पिछनै-पिछनै जाण लगि, अर लोग जादा होण की वजै से यीशु का दगड़ा मा धक्‍का-मुक्‍की होण लगि गै।</verse>
				<verse number="25">अर उख भीड़ मा एक जनानि छै, जींतैं बारह सालों बटि ल्वे बुगणो को रोग छौ।</verse>
				<verse number="26">अर वींन भौत सा बैदों बटि अपणु इलाज करवै-करवै के भौत दुख उठे, अर जु कुछ भि वींका पास छौ वु सब कुछ खर्च करण का बाद भि वींतैं कुई फैदा नि ह्‍वे, बल्किन मा वीं की हालत और भि जादा खराब ह्‍वे गै छै।</verse>
				<verse number="27">अर जब वींन यीशु का बारा मा सुणी, त वा भीड़ मा पिछनै बटि ऐ अर वींन यीशु का कपड़ा पर लग्यां झालरों तैं छ्वी दिनी।</verse>
				<verse number="28">किलैकि मन मा सोचदी छै कि, “अगर जु मि यीशु का कपड़ा तैं ही छ्वी द्‍यूलु, त ठिक ह्‍वे जौलु।”</verse>
				<verse number="29">अर जन्‍नि वींन छ्वी तन्‍नि वींको ल्वे बुगण रुकी गै, अर वा अपणा सरील मा जाणि गै कि मि ठिक ह्‍वे ग्यों।</verse>
				<verse number="30">अर यीशु तुरन्त जाणि गै कि मि मा बटि ठिक करणु खुणि सामर्थ निकळि, इलै वेन पिछनै मुड़ि के भीड़ का लोगु कू बोलि, “मेरा कपड़ा तैं कैन छ्वी?”</verse>
				<verse number="31">तब वेका चेलों न यीशु बटि बोलि, “गुरुजी, तुम दिखणा नि छाँ कि भीड़ त्वेतै दबौंणि च? अर फिर भि तुम बोन्‍ना छाँ कि मितैं कैन छ्वी?”</verse>
				<verse number="32">मगर यीशु चौतरफि दिखण पर लग्यूं रै कि आखिर मा यू काम कैन कैरी।</verse>
				<verse number="33">अर वा जनानि जाणि गै कि मेरा दगड़ा मा क्या अदभुत काम ह्‍वे, तब वा डौऽरा बानो कौंपदी-कौंपदी यीशु का पास ऐ अर वेका खुटों मा पोड़ि के वेतैं सब कुछ सच्‍च बतै दिनी।</verse>
				<verse number="34">तब वेन वींकू बोलि, “बेटी, तिन बिस्वास कैरी इलै तू खूब ह्‍वे गै, अब तू शान्ति से चलि जा, अर अपणी ईं बिमारि से बचि रौ।”</verse>
				<verse number="35">अर जब यीशु इन बोन्‍नु ही छौ, कि तबरि प्रार्थना भवन का वे मुखिया का घौर बटि कुछ लोगु न ऐके बोलि, “मुखिया जी, तुमरि नौनि मोरि गै, अब गुरुजी तैं परेसान नि कैरा।”</verse>
				<verse number="36">अर जु बात ऊ बोन्‍ना छा यीशु न ऊं बातों पर ध्यान नि दिनी, अर वे मुखिया कू बोलि, “डौऽर ना, बस बिस्वास रख।”</verse>
				<verse number="37">अर यीशु न पतरस, याकूब अर वेका भै यूहन्‍ना का अलावा और कैतैं भि अपणा दगड़ा मा औण नि दिनी।</verse>
				<verse number="38">अर जब यीशु वे मुखिया का घौर मा पौंछी, त वेन देखि कि लोग भौत रुंणा अर बड़ु मातम मनौणा छिन।</verse>
				<verse number="39">तब वेन घौर का भितर जैके लोगु कू बोलि, “तुम हल्‍ला किलै मचौणा? अर किलै रुंणा छाँ? वा मोरि नि च बल्किन मा सिंणी च।”</verse>
				<verse number="40">ईं बात तैं सुणी के ऊ सब लोग वे पर हसण लगि गैनी, मगर यीशु न ऊं सब लोगु तैं उख बटि भैर निकाळि, अर नौनि का ब्वे-बाब अर ऊं तीन चेलों तैं अफ दगड़ि भितर लि गै जख नौनि रखी छै।</verse>
				<verse number="41">अर यीशु न वीं नौनि को हाथ पकड़ी के बोलि, “तलीता, कूमी” ज्यां को मतलब च कि “हे छुटी नौनि, मि त्वेकू बोन्‍नु छौं, उठ।”</verse>
				<verse number="42">अर बारा साल की वा नौनि तुरन्त उठी के चलण-फिरण लगि गै, अर यू देखि के वेका दगड़ा का लोग ताजुब मा पोड़ि गैनी।</verse>
				<verse number="43">फिर वेन ऊंतैं चितै के आज्ञा दिनी, कि या बात कैतैं भि पता नि चलु। अर वींका ब्वे-बाब कू वेन बोलि, “वींतैं खाणु कू कुछ द्‍या।”</verse>
			</chapter>
			<chapter number="6">
				<verse number="1">अर वेका बाद यीशु कफरनहूम नगर बटि निकळि के अपणा नगर नासरत मा ऐ, अर वेका चेला भि वेका दगड़ा मा ऐनी।</verse>
				<verse number="2">अर जब सब्त को दिन ऐ, त यीशु प्रार्थना भवन मा सिखौण लगि गै, अर वेकी बातों तैं सुणी के भौत सा लोग हैरान ह्‍वेके इन बोन्‍न लगि गैनी कि, “येतैं यू सब बात कख बटि मिलिनी? अर कन्दरि अकल च वा ज्वा कि येतैं दिये गै? अर सामर्थ का काम येका हाथोंळ कनकै होनदिन?</verse>
				<verse number="3">अरे, यू त बड़ई च, अर मरियम को नौनु च, अर, यू त उई च जैका भै याकूब, योसेस, यहूदा अर शमौन छिन। अर येकी बैंण त इख हमरा बीच मा रौनदिन?” इलै ऊंन यीशु तैं स्वीकार नि कैरी।</verse>
				<verse number="4">अर यीशु न ऊंकू बोलि, “एक रैबर्या तैं अपणा घौर अर रिश्तेदार, अर अपणा मुलक का अलावा हरेक जगा आदर-सम्मान मिलदु।”</verse>
				<verse number="5">अर ऊंन वेतैं स्वीकार नि कैरी, इलै यीशु न उखा कुछ बिमारों पर हाथ रखी के ऊंतैं खूब कैरी, अर येका अलावा वु कुछ भि अदभुत काम नि कैर पै।</verse>
				<verse number="6">अर बिस्वास नि करण की बात तैं देखि के यीशु तैं ऊं पर बड़ु ताजुब ह्‍वे। फिर उ गौं-गौं मा जैके के उपदेस देण लगि गै।</verse>
				<verse number="7">तब यीशु न बारह चेलों तैं अपणा पास बुलै, अर ऊंतैं दुई-दे कैरिके भेजि। अर वेन ऊंतैं खबेसों तैं निकळणु को अधिकार दिनी।</verse>
				<verse number="8">अर वेन ऊंतैं इन आज्ञा दिनी कि, “यात्रा करण का बगत लाठा का अलावा कुछ नि लियां, नऽ त रुट्‍टी, नऽ झोळा, अर ना ही बटुवा मा रुपया लियां,</verse>
				<verse number="9">तुम जुता पैरि के जा मगर दुई कुरता नि रखा।”</verse>
				<verse number="10">अर वेन ऊंकू इन भि बोलि, “जै भि घौर मा तुम लोग रुकिल्या, वे घौर मा तब तक रयां जब तक की तुम वे नगर बटि विदै नि ले लिन्द्‍यां।</verse>
				<verse number="11">अर अगर वीं जगा का लोग तुमरि बातों तैं स्वीकार नि करला अर तुमरि नि सुणला, त उख बटि निकळण दौं अपणा खुटों पर लगीं धूळ तैं उखि झाड़ि द्‍या, ताकि इन कैरिके ऊंका खिलाप मा गवै हो।”</verse>
				<verse number="12">तब बारह चेलों न जैके परचार कैरी कि, “अपणा-अपणा पाप का कामों से पस्ताप कैरा, अर परमेस्वर का पास वापस ऐ जा।”</verse>
				<verse number="13">तब ऊंन भौत सा लोगु मा बटि खबेसों तैं निकाळि, अर भौत सा बिमारों पर तेल मळि के ऊंतैं खूब कैरी।</verse>
				<verse number="14">राजा हेरोदेस अन्तिपास तक या चर्चा पौंछी गै, कि यीशु को नौ भौत जादा फैली गै। अर लोग बोन्‍ना छिन कि, “यूहन्‍ना बपतिस्मा देण वळु मुरदो मा बटि ज्यून्दु ह्‍वे गै, इलै वेका द्‍वारा अब यू सामर्थ का काम किये जाणा छिन।”</verse>
				<verse number="15">अर कुछ लोग बोन्‍ना छा कि, “यू एलिय्याह रैबर्या च।” मगर कुछ लोग इन भि बोन्‍ना छा कि, “यू त रैबर्यों मा बटि कै एक रैबर्या का जन च।”</verse>
				<verse number="16">अर यों बातों तैं सुणी के राजा हेरोदेस अन्तिपास न बोलि, “जै यूहन्‍ना को मुण्ड़ मिन कटवैयली छौ, उ त ज्यून्द ह्‍वे गै।”</verse>
				<verse number="17">अर हेरोदेस अन्तिपास न अपणा भै फिलिप्पुस की घरवळी का दगड़ा मा ब्यौ कैरियाली छौ, जिं को नौ हेरोदियास छौ। अर यूहन्‍ना वेकू इन बुल्दु छौ कि, “हेरोदेस अपणा भै कि घरवळी तैं रखण त्वे खुणि खूब नि च।” इलै हेरोदेस अन्तिपास न लोगु तैं यूहन्‍ना का पास भेजि के वेतैं जेलखाना मा डलवै दिनी। अर यू सब वेन हेरोदियास का बुलयां पर कैरी छौ।</verse>
				<verse number="18"></verse>
				<verse number="19">हेरोदियास त यूहन्‍ना से भौत खार खान्दी छै, अर वा चान्दी छै कि वा यूहन्‍ना तैं जान से मरवै द्‍यो, मगर वींन इन नि कैरी सैकी।</verse>
				<verse number="20">अर हेरोदेस अन्तिपास यूहन्‍ना बटि डऽरदु छौ किलैकि उ जणदु छौ, कि वु एक धरमी अर पवित्र मनखि च, इलै वु यूहन्‍ना की हिफाजत भि करदु छौ, अर वेकी बातों तैं सुणी के भौत उळझण मा पोड़ि जान्दु छौ, मगर फिर भि राजा वेकी बातों तैं खुशी से सुणदु छौ।</verse>
				<verse number="21">अर आखिरकार हेरोदियास तैं वु मौका राजा हेरोदेस अन्तिपास का जनम दिन पर मिली गै। अर अपणा जनम दिन पर राजा न मुख्य परधानों तैं, अर सैनिको का मुख्यों तैं, अर गलील मुलक का कुछ खास-खास लोगु तैं दावत पर बुलयूं छौ।</verse>
				<verse number="22">अर हेरोदियास की नौनि भितर ऐ, अर दावत मा इन नाची कि हेरोदेस अन्तिपास अर वेका दगड़ा उख बैठयां लोग भौत खुश ह्‍वे गैनी। तब राजा न वीं नौनि कू बोलि, “जु कुछ भि तू मंगली मि त्वेतै द्‍यूलु।”</verse>
				<verse number="23">अर वेन कसम खै के वींकू बोलि, “मांग, जु कुछ भि त्वेतै चयेणु च, अब चै वु मेरु अधा राज्य ही किलै नि हो।”</verse>
				<verse number="24">तब नौनि न भैर जैके अपणी माँ बटि पूछी कि, “माँ, मि क्या मांगु?” अर हेरोदियास न बोलि, “यूहन्‍ना बपतिस्मा देण वळा को मुण्ड़ मांग।”</verse>
				<verse number="25">अर वा तुरन्त भागी के भितर राजा का पास ऐ, अर वेसे बिन्ती कैरिके बोलि, “महाराज, मि चान्दु, कि तुम यूहन्‍ना बपतिस्मा देण वळा को मुण्ड़ मितैं थाळ मा अभि लेके दे द्‍या।”</verse>
				<verse number="26">अर यू सुणी के राजा दुखी ह्‍वे गै, मगर वीं कसम की वजै से ज्वा वेन वींका दगड़ा मा खईं छै, अर उख बैठयां लोगु की वजै वेन वीं की मांग तैं नि टाळि।</verse>
				<verse number="27">इलै राजा न तुरन्त एक जल्‍लाद तैं इन आज्ञा देके जेलखाना मा भेजि कि, “जा, अर वेको मुण्ड़ काटी के इख लेके अऽ।”</verse>
				<verse number="28">अर वेन जैके यूहन्‍ना को मुण्ड़ काटी दिनी, अर एक थाळ मा रखी के लै अर वीं नौनि तैं दे दिनी, अर नौनि न वु मुण्ड़ अपणी माँ तैं दिनी।</verse>
				<verse number="29">अर ईं बात तैं सुणी के यूहन्‍ना का चेला उख ऐनी, अर वेकी लांश तैं लि जैके कबर मा रखी दिनी।</verse>
				<verse number="30">अर जौं बारह खास चेलों तैं यीशु न भेजि छौ, वु वापिस ऐके यीशु का पास इकट्‍ठा ह्‍वेनि, अर जु कुछ ऊंन कैरी अर सिखै, वेका बारा मा यीशु तैं बतै।</verse>
				<verse number="31">तब यीशु न ऊंकू बोलि, “मेरा दगड़ा मा एक शान्त जगा कू चला, अर थुड़ी देर आराम करिल्या।” अर यीशु न इन इलै बोलि, किलैकि भौत सा लोग ऊंका पास औणा-जाणा छा, अर ऊंतैं खाणु-खाण को भि बगत नि मिलणु छौ।</verse>
				<verse number="32">इलै वु नाव मा चैड़ि के, एक शान्त जगा कू चलि गैनी।</verse>
				<verse number="33">अर भौत सा लोगु न ऊंतैं नाव मा जान्द देखि, अर पछ्याण दिनी कि वु कु छिन। तब सब नगरों का लोग पैदल ही पैदल भागी के ऊं से पैलि वीं जगा मा पौंछी गैनी।</verse>
				<verse number="34">अर जब यीशु छाला पर पौंछी त वेन एक बड़ी भीड़ देखि, अर वेतैं ऊं पर बड़ु तरस ऐ, अर वु त ऊं भेड़ों का जन छा जौं को कुई सैं गुसैं नि होन्दु। अर तब यीशु ऊंतैं भौत सि बात सिखौण लगि गै।</verse>
				<verse number="35">अर जब रुमुक होण लगि गै, त वेका चेला वेका पास ऐनी अर वे बटि बोलि, “गुरुजी, या निर्जन जगा च, अर देर होणी च,</verse>
				<verse number="36">इलै फटाफट के यों तैं भेजा, ताकि यू आस-पास का ग्‍वोंऽ अर बस्तियों मा जैके, अफ खुणि कुछ खाणु खरीद सैका।”</verse>
				<verse number="37">तब वेन चेलों कू बोलि, “तुम ही यों तैं खाणु कू द्‍या।” ऊंन वेकू बोलि, “गुरुजी, क्या हम यों लोगु खुणि दुई सौ दीनार की रुट्‍टी खरीद के ला, अर ऊंतैं खिला?”</verse>
				<verse number="38">अर वेन ऊंकू बोलि, “जैके, देखा तुमरा पास कथगा रुट्‍टी छिन?” अर इन पता करण का बाद ऊंन यीशु कू बोलि, “गुरुजी, पांच रुट्‍टी अर दुई ही माछा छिन।”</verse>
				<verse number="39">तब यीशु न ऊंतैं आज्ञा दिनी, कि सभ्यों तैं हरीं घास मा अलग-अलग कतार मा बैठे द्‍या।</verse>
				<verse number="40">तब भीड़ का लोग सौ-सौ अर पचास-पचास की कतार मा बैठि गैनी।</verse>
				<verse number="41">तब यीशु न पांच रुट्‍टी अर दुई माछों तैं लेई, अर स्वर्ग जनै देखि के परमेस्वर को धन्यवाद देई, अर रुट्‍टी तोड़ि-तोड़ि के चेलों तैं दिनी, ताकि वु लोग कू परोसा। अर ठिक उन्‍नि वेन दुई माछा भि ऊं सभ्यों मा बांटि दिनी।</verse>
				<verse number="42">अर सब लोग खै के छक ह्‍वे गैनी।</verse>
				<verse number="43">रुट्‍टी अर माछों का जु टुकड़ा बचि गै छा, ऊंतैं चेलों न बटोळि, अर बारह कण्डो तैं भोरी के उठे।</verse>
				<verse number="44">अर जौं लोगु न रुट्‍टी अर माछा खै छा, ऊंमा बटि केवल बैखों की संख्या ही पांच हजार का करीब छै।</verse>
				<verse number="45">तब यीशु न तुरन्त अपणा चेलों तैं नाव पर चड़ण की आज्ञा दिनी वेन बोलि कि, “जबरि तक मि लोगु तैं विदा करदु, तबरि तक तुम लोग मिसे पैलि पल्या छाला बैतसैदा नगर कू चलि जा।”</verse>
				<verse number="46">अर जब वेन लोगु तैं विदा कैरी दिनी, त वु प्रार्थना करणु खुणि पाड़ पर चलि गै।</verse>
				<verse number="47">अर जब रुमुक ह्‍वे गै, त चेला झील का बीच नाव मा छा। अर यीशु वीं जगा पर इखुली ही रै गै छौ।</verse>
				<verse number="48">अर यीशु न देखि कि चेला नाव तैं बड़ी मुस्किलन चलौणा छिन, किलैकि हवा नाव का खिलाप मा चलणी छै। अर रात तीन बजी का करीब यीशु झील का पाणि पर चलि के ऊंका पास ऐ, अर ऊं से अगनै जाण चाणु छौ।</verse>
				<verse number="49">मगर वेका चेलों न वेतैं झील पर चलद देखि के समझि कि वु बाण च, अर चिल्‍लाण लगि गैनी।</verse>
				<verse number="50">किलैकि यीशु तैं देखि के वु हकबकै गै छा, पर यीशु न तुरन्त ऊंका दगड़ा मा बात कैरिके बोलि, “हिम्मत रखा, डौऽरा ना, मि छौं।”</verse>
				<verse number="51">तब वु वीं नाव मा चैड़ि, त हवा रुकी गै, अर वु सब भौत दंग रै गैनी।</verse>
				<verse number="52">किलैकि चेला अभि भि यीशु का द्‍वारा कियां रुट्‍टी का वे बड़ा चमत्कार तैं समझि नि छा, अर ऊंका मन अभि तक भि निठुर छा।</verse>
				<verse number="53">तब यीशु अर वेका चेला झील तैं पार कैरिके गन्‍नेसरत का छाला पर पौंछिनी, अर ऊंन नाव तैं छाला पर लगै।</verse>
				<verse number="54">अर जब यीशु नाव मा बटि उतरि, त उखा लोगु न वेतैं पछ्याण दिनी।</verse>
				<verse number="55">अर लोग तुरन्त पूरा मुलक मा इनै-उनै भगिनी, अर बिमारों तैं बिस्तर मा लिटै दिनी, अर जख कखि भि ऊंन सुणी कि यीशु उख च, त लोग उखि यों लोगु तैं लेके गैनी।</verse>
				<verse number="56">अर जौं-जौं नगरों, अर ग्‍वोंऽ या बस्तियों मा यीशु जान्दु छौ, उख-उख लोग बिमारों तैं खुलि जगों मा रखी देन्दा छा, अर वेसे बिन्ती करदा छा कि यीशु ऊंतैं अपणा कपड़ा का झालरों तैं ही छूण द्‍यो। अर जथगा भि लोग वेतैं छून्दा छा, ऊ सभ्या का सभि खूब ह्‍वे जान्दा छा।</verse>
			</chapter>
			<chapter number="7">
				<verse number="1">तब यरूशलेम नगर बटि कुछ फरीसी दल का लोग अर शास्‍त्री, मिली के यीशु का पास ऐनी।</verse>
				<verse number="2">अर ऊंन देखि कि यीशु का कुछ चेला बगैर हाथ धुयां याने कि अशुद्ध हाथोंळ खाणुक खाणा छिन, अर या बात ऊंका रीति-रिवाज का खिलाप मा च।</verse>
				<verse number="3">(अर ईं बात पर ऊंन इलै ध्यान देई, किलैकि फरीसी अर सब यहूदी लोग अपणा पितरों की बणईं रीति-रिवाजों का मुताबिक जबरि तक अपणा हाथ अच्छे से नि ध्वे देन्दिन, तबरि तक खाणुक नि खनदिन।</verse>
				<verse number="4">जन कि, जबरि तक वु बजार बटि वापिस ऐके रीति-रिवाज का मुताबिक नहे नि जनदिन, तबरि तक वु खाणुक नि खै सकदिन, अर इन्‍नि और भि भौत सि बात छिन, जौं को पालन वु करदा छिन जन कि, कटोरों अर मगो तैं अर तांबो का भाँडो तैं धोण अर ऊंतैं मंजौण)।</verse>
				<verse number="5">इलै फरीसी दल का लोगु न अर शास्‍त्रियों न यीशु बटि पूछी, “तेरा चेला पितरों का रीति-रिवाजों तैं किलै नि मणदिन? अर बगैर हाथ धुयां खाणुक किलै खनदिन?”</verse>
				<verse number="6">अर वेन ऊंकू बोलि, “ यशायाह रैबर्या न तुम ढोंगि लोगु का बारा मा बिल्कुल ठिक ही भविष्यबाणी कैरी छै वेन बोलि छौ कि, “‘केवल गिच्‍चळ ही यू लोग मेरु आदर-समान करदिन, मगर यों का मन मिसे भौत दूर छिन।</verse>
				<verse number="7">अर यू लोग बेकार मा ही मेरी भक्‍ति करदिन, किलैकि यू लोग अपणा ही द्‍वारा बणईं आज्ञाओं तैं परमेस्वर की शिक्षा बतै के सिखौन्दिन।’</verse>
				<verse number="8">अरे तुम लोग मनखियों कि रीति-रिवाजों पर ही चलणा छाँ, अर तुमुन परमेस्वर की आज्ञाओं तैं छोड़याली।”</verse>
				<verse number="9">अर यीशु न ऊंकू इन भि बोलि, “वाह, तुम अपणी रीति-रिवाजों को पालन करण खुणि परमेस्वर की आज्ञा तैं कथगा अच्छे से टाळि देन्दयां।</verse>
				<verse number="10">अर जन की मूसा रैबर्या न बोलि छौ कि, ‘अपणा ब्वे-बाब को आदर-सम्मान कैरा।’ अर ‘जु कुई भि अपणा ब्वे-बबा खुणि गळत बात बुल्दु, त वेतैं जान से मार दिये जौ।’</verse>
				<verse number="11">“पर तुम लोगु तैं इन सिखौन्द्‍यां कि, एक मनखि अपणा ब्वे-बाब खुणि इन बोलि सकदु च कि, ‘तुमरो पालन-पोसण करणु खुणि मि मा कुछ छैं त च मगर मि यू तुमतै नि दे सकदु, किलैकि मिन यू पिता परमेस्वर तैं अरपण कैरियाली।’</verse>
				<verse number="12">अर इन सिखै के तुम वे मनखि तैं वेका ब्वे-बाब खुणि कुछ भि सेवा नि करण देन्द्‍यां।</verse>
				<verse number="13">अर इनकै तुम अपणी बणईं रीति-रिवाजों की वजै से परमेस्वर का वचन तैं रद्‍द कैरी देन्द्‍यां। अर इन्‍नि और भि भौत सि बात छिन, जौं तैं तुम करद्‍यां।”</verse>
				<verse number="14">तब यीशु न भीड़ का लोगु तैं फिर से अपणा पास बुलै अर ऊंकू बोलि, “तुम सब मेरी बात तैं सुणा अर वींतैं बिंगण की कोसिस कैरा।</verse>
				<verse number="15">इन्दरि कुई भि चीज नि च ज्वा कि भैर बटि मनखि का भितर जौ अर वेतैं अशुद्ध कैरी द्‍यो, मगर जु चीज मनखि का भितर बटि निकळदिन उई वेतैं अशुद्ध करदिन।</verse>
				<verse number="16">[अगर कै का कन्दूड़ छिन, त वु सुणी ल्यो।”]</verse>
				<verse number="17">जब यीशु भीड़ मा बटि निकळि के एक घौर मा गै, त वेका चेलों न वेसे ये उदारण का बारा मा पूछी।</verse>
				<verse number="18">वेन ऊंकू बोलि, “क्या तुम अभि तक नासमझ छाँ? अर क्या तुमरि बिंगण मा नि औन्दु, कि ज्वा चीज भैर बटि मनखि का भितर जान्दी, वा चीज वेतैं अशुद्ध नि करदी?</verse>
				<verse number="19">किलैकि वा चीज वेका मन मा ना, बल्किन मा पुटगुन्द जान्दी, अर मल का रुप मा भैर निकळि जान्दी। अर इन बोलि के यीशु न खाण की सब चीजों तैं शुद्ध ठैरै।</verse>
				<verse number="20">पर जु कुछ मनखि का भितर बटि भैर निकळदु, वु ही मनखि तैं अशुद्ध करदु।</verse>
				<verse number="21">किलैकि मनखि का मन से याने कि वेका भितर बटि ही बुरा विचार अर दुसरि जनानियों तैं गळत नजर से दिखण, चोरी करण इख तक की हत्या करण, दुसरि जनानियों का दगड़ा मा गळत सम्बन्ध रखण,</verse>
				<verse number="22">लालच करण, अर दुसरो की बुरै करण, छल-कपट, हवस, बुरी नजर से दुसरो तैं दिखण, दुसरा लोगु की बेजती करण, अर अपणा ही मिजाज मा रौण, अर मूरख होण।</verse>
				<verse number="23">अरे, यू सब बुरी बात मनखि का भितर बटि ही निकळदिन, अर यू ही बात मनखि तैं अशुद्ध करदिन।”</verse>
				<verse number="24">तब यीशु उख बटि निकळि के, सूर अर सैदा नौ का नगरों का इलाकों मा ऐ, अर वु एक घौर मा गै। अर वु इन चान्दु छौ, कि कैतैं पता नि चलु कि मि इख छौं, मगर फिर भि लोगु तैं ईं बात का बारा मा पता चलि गै।</verse>
				<verse number="25">अर यीशु की चर्चा सुणी के तुरन्त एक जनानि वेका पास ऐ, अर वीं की छुटी नौनि पर खबेस लग्यूं छौ। अर या जनानि वेका खुटों मा पोड़ि गै,</verse>
				<verse number="26">अर वीं जनानि न वेसे बिन्ती कैरी कि, “प्रभु, मेरी नौनि मा बटि खबेस तैं निकाळि द्‍या।” अर या जनानि यहूदी जाति की नि छै, या सीरिया राज्य का सुरूफिनिकी इलाका की छै।</verse>
				<verse number="27">वेन वींकू बोलि, “पैलि बच्‍चों तैं पुटगी भोरी के खाण दे, किलैकि नौनो की रुट्‍टी लेके कुकरों का अगनै डलण ठिक नि च।”</verse>
				<verse number="28">मगर जनानि न वेतैं जबाब दिनी, “हाँ प्रभु, तुम ठिक बोन्‍ना छाँ, पर कुकर भि त मेज का मूड़ी छुटयां बच्‍चों का चूर-बूर तैं खनदिन।”</verse>
				<verse number="29">तब यीशु न वींकू बोलि, “ज्वा बात तिन बोलि वीं बात की वजै से मि तेरी मदद कनु छौं, इलै घौर जा, तेरी नौनि मा बटि वु खबेस निकळि गै।”</verse>
				<verse number="30">अर वींन अपणा घौर मा ऐके देखि कि नौनि बिस्तर मा पोड़ि च, अर खबेस वींमा बटि निकळि गै।</verse>
				<verse number="31">अर फिर यीशु सूर नगर का मुलक बटि निकळि गै। अर सैदा नगर का मुलक बटि अर दिकापुलिस का मुलक बटि ह्‍वेके गलील झील का पास पौंछी।</verse>
				<verse number="32">अर लोग एक बैरा मनखि तैं वेका पास लेके ऐनी, जु कि हकलान्दु भि छौ। अर लोगु न वेसे बटि बिन्ती कैरी कि अपणु हाथ वे पर रखा।</verse>
				<verse number="33">तब यीशु वे मनखि तैं भीड़ मा बटि अलग लि गै, अर अपणा अंगुळा वेका कन्दूड़ मा डलिनी, अर वेन थूकि अर वेकी जीब तैं छ्वी।</verse>
				<verse number="34">तब वेन स्वर्ग जनै देखि अर लम्बी सांस लेके वेकू बोलि, “इफ्फत्तह” जैको मतलब च “खुलि जा।”</verse>
				<verse number="35">अर तुरन्त वेका कन्दूड़ खुलि गैनी, अर वेकी जीब की गाँठ भि खुलि गै, अर वु साफ-साफ बुलण लगि गै।</verse>
				<verse number="36">तब यीशु न ऊं लोगु तैं चितै के बोलि कि ईं बात का बारा मा कै मा नि बुलयां, मगर यीशु जथगा ऊंतैं रुकदु छौ, लोग उथगा ही वेका बारा मा बखान करण लगि गैनी।</verse>
				<verse number="37">अर जथगा भि लोगु न यीशु का बारा मा सुणी वु सब हैरान ह्‍वेके बुलण लगि गैनी कि, “वेन जु कुछ भि कैरी वु सब ठिक कैरी, अरे वु त बैरो तैं सुनणे की अर गूंगों तैं बुलणै की ताकत देन्दु।”</verse>
			</chapter>
			<chapter number="8">
				<verse number="1">अर ऊं ही दिनों की बात च जब एक बड़ी भीड़ यीशु का पास इकट्‍ठा ह्‍वे, अर ऊंका पास खाणु खुणि कुछ नि छौ। तब यीशु न अपणा चेलों तैं बुलै अर ऊंकू बोलि कि,</verse>
				<verse number="2">“मितैं ईं भीड़ पर बड़ु तरस औणु च, किलैकि यू तीन दिन बटि मेरा दगड़ा मा ही छिन। अर खाणु खुणि भि ऊंका पास कुछ नि च।</verse>
				<verse number="3">अर अगर जु मि ऊंतैं भूकि घौर भेजि द्‍यूलु, त कखि इन नि हो कि जान्द दौं वु बाटा मा गस खै जा, किलैकि कुछ लोग त इन छिन जु कि भौत दूर बटि अयां छिन।”</verse>
				<verse number="4">मगर वेका चेलों न वेकू बोलि, “गुरुजी, ईं निर्जन जगा मा हमुन इथगा माप रुट्‍टी कख बटि लौणिन, ताकि यू पुटगा भोरी के खै सैका?”</verse>
				<verse number="5">अर यीशु न ऊं बटि पूछी, “एक बात बता तुम मा कथगा रुट्‍टी छिन?” ऊंन बोलि, “बस सात रुट्‍टी छिन गुरुजी।”</verse>
				<verse number="6">तब यीशु न ऊंतैं भ्वीं मा बैठणे की आज्ञा दिनी, अर वेन ऊं सात रुट्‍टीयों तैं लेई अर परमेस्वर को धन्यवाद देके ऊंतैं तोड़ि, अर लोगु मा बंटणु खुणि अपणा चेलों तैं दिनी, अर वु लोगु मा बंटण रैनी।</verse>
				<verse number="7">अर ऊंका पास कुछ छुटा माछा भि छा, वेन परमेस्वर को धन्यवाद देके ऊं माछों तैं भि लोगु मा बंटणु कू बोलि।</verse>
				<verse number="8">अर सब लोग खै के छक ह्‍वे गैनी, तब वेका चेलों न बच्यां टुकड़ों का सात ठुफरा भोरी के उठैनि।</verse>
				<verse number="9">अर खाण वळो मा करीब चार हजार लोग छा। तब यीशु न भीड़ का लोगु तैं विदा कैरी।</verse>
				<verse number="10">अर वेका बाद यीशु तुरन्त अपणा चेलों का दगड़ा नाव मा चैड़ि के दलमनूता मुलक कू चलि गै।</verse>
				<verse number="11">अर फरीसी दल का कुछ लोग यीशु का पास ऐके वाद-विवाद करण लगि गैनी, अर वेकी अजमैस करणु खुणि स्वर्ग बटि कै चमत्कारिक चिन्‍न तैं दिखौण की मांग कैरी।</verse>
				<verse number="12">अर वेन गैरी सांस लेके बोलि, “ईं पीढ़ी का लोग चिन्‍न किलै खुज्यौदिन? मि तुम बटि सच्‍च बोन्‍नु छौं, कि ईं पीढ़ी का लोगु तैं कुई चिन्‍न नि दिये जालु।”</verse>
				<verse number="13">तब यीशु ऊंतैं छोड़ि के फिर से नाव मा चैड़ि गै, अर झील का पल्या छाला पर चलि गै।</verse>
				<verse number="14">यीशु का चेला अफ दगड़ा मा रुट्‍टी लाण बिसरी गै छा, अर नाव मा एक रुट्‍टी का अलावा ऊंका पास और कुछ नि छौ।</verse>
				<verse number="15">वेन ऊंतैं चितै के बोलि, “सुणा, फरीसी दल का लोगु अर हेरोदेस अन्तिपास का खमीर से बचि के रा।”</verse>
				<verse number="16">अर वु अपणा आपस मा विचार कैरिके बोन्‍न लगि गैनी कि, “हम मा रुट्‍टी नि च, क्या पता इलै ही गुरुजी इन बोन्‍ना छिन?”</verse>
				<verse number="17">अर ऊंकी बातों तैं जाणि के वेन ऊंकू बोलि, “तुम मा रुट्‍टी नि च यां का खातिर तुम किलै इथगा विचार कना छाँ? क्या तुमुन मितैं अभि तक नि पछ्याणी, क्या तुम मेरा बारा मा अभि तक नि समझयां? क्या तुमरा मन निठुर ह्‍वे गैनी?</verse>
				<verse number="18">क्या छौन्द आंखा अर कन्दूड़ होण का बाद भि तुमतै दिख्यौणु अर सुन्यौणु नि च? अर क्या तुमतै याद नि च कि,</verse>
				<verse number="19">जब मिन पांच हजारों खुणि पांच रुट्‍टी तोड़ि के तुम मा बंटणु खुणि दिनी, त तुमुन बच्यां टुकड़ों का कथगा ठुफरा भोरी के उठैनि?” तब ऊंन बोलि, “बारह ठुफरा, गुरुजी।”</verse>
				<verse number="20">“अर ठिक उन्‍नि जब मिन चार हजार खुणि सात रुट्‍टी तोड़ि के तुम मा बंटणु खुणि दिनी, त तुमुन बच्यां टुकड़ों से कथगा ठुफरा भोरी के उठैनि?” तब ऊंन बोलि, “सात ठुफरा, गुरुजी।”</verse>
				<verse number="21">वेन ऊंकू बोलि, “त क्या अभि तक तुमरि समझ मा नि ऐ?”</verse>
				<verse number="22">अर जब यीशु अर वेका चेला बैतसैदा नगर मा ऐनी, त कुछ लोग एक अन्धा मनखि तैं वेका पास लेके ऐनी अर वेसे बिन्ती कैरी कि वेतैं छ्वी द्‍या।</verse>
				<verse number="23">अर यीशु वे अन्धा मनखि को हाथ पकड़ी के नगर बटि भैर लि गै, अर वेकी आंख्यों मा थूकि के वे पर हाथ रखी, अर वे बटि पूछी, “क्या त्वेतै कुछ दिखणु च?”</verse>
				<verse number="24">वेन मथि देखि के बोलि, “मितैं लोग दिख्यौणा छिन जु कि चलणा-फिरणा छिन, मगर वु डाळों का जन छिन।”</verse>
				<verse number="25">तब यीशु न फिर से वेकी आंख्यों पर हाथ रखी, अर वे मनखि का आंखा खूब ह्‍वे गैनी, अर वु फिर से सब कुछ साफ-साफ दिखण लगि गै।</verse>
				<verse number="26">अर यीशु न वेतैं इन बोलि के भेजि कि, “अपणा घौर चलि जा, पर ये गौं मा नि जै।”</verse>
				<verse number="27">यीशु अर वेका चेला कैसरिया अर फिलिप्पी मुलक का आस-पास का गौं मा चलि गैनी। अर बाटा मा वेन अपणा चेलों बटि पूछी, “मि कु छौं, अर लोग मेरा बारा मा क्या बुल्दिन?”</verse>
				<verse number="28">अर ऊंन वेतैं जबाब दिनी, “गुरुजी, कुछ लोग तुम खुणि यूहन्‍ना बपतिस्मा देण वळु बुल्दिन, पर कुई-कुई बुल्दु कि तुम परमेस्वर का रैबर्या एलिय्याह छाँ, अर कुछ त इन भि बुल्दिन कि तुम रैबर्यों मा बटि कुई एक छाँ।”</verse>
				<verse number="29">वेन ऊं बटि पूछी, “पर तुम मिकू क्या बुल्द्‍यां?” तब पतरस न जबाब देई, “गुरुजी, तुम मसीह छाँ।”</verse>
				<verse number="30">तब यीशु न चेलों तैं चितै के बोलि कि, “मेरा बारा मा कैतैं नि बतयां।”</verse>
				<verse number="31">तब यीशु चेलों तैं सिखौण लगि गै कि यू जरुरी च कि मनखि को पुत्र भौत खैरि खौऽ, अर अध्यक्ष, मुख्य पुरोहित अर शास्‍त्री लोग वेतैं नकारी के मरवै द्‍या, मगर उ तिसरा दिन मुरदो मा बटि ज्यून्दु ह्‍वे जालु।</verse>
				<verse number="32">अर वेन ऊंतैं या बात साफ-साफ बतै दिनी। अर ईं बात तैं सुणी के पतरस वेतैं अलग मा लि गै, अर वेतैं झिड़कण लगि गै।</verse>
				<verse number="33">अर यीशु न मुड़ि के अपणा चेलों जनै देखि, अर पतरस कू झिड़की के बोलि, “हे शैतान, मेरा समणि बटि दूर ह्‍वे जा, किलैकि तेरी सोच परमेस्वर की बातों की तरौं नि च, बल्किन मा तेरु मन मनखियों की बातों पर लग्यूं रौन्दु।”</verse>
				<verse number="34">तब यीशु न भीड़ तैं अपणा चेलों समेत पास बुलै के बोलि, “अगर कुई मेरा पिछनै औण चान्दु, त उ अफ तैं नकारी द्‍यो, अर दुख अर मौत तैं झिलणु खुणि हमेसा तयार ह्‍वेके मेरा पिछनै चलु।</verse>
				<verse number="35">किलैकि जु कुई अपणा पराण तैं बचौण चालु, उ वेतैं ख्वे द्‍यालु, मगर जु कुई मेरा अर शुभ समाचार का खातिर अपणा पराण तैं ख्वे द्‍यालु, उई सदनि को जीवन पालु।</verse>
				<verse number="36">अर अगर कुई मनखि पूरा संसार की हर चीजों तैं हासिल कैरी द्‍यो, मगर उ सदनि का जीवन तैं ख्वे द्‍यो त वेतैं फिर क्या फैदा होलु?</verse>
				<verse number="37">किलैकि अगर कुई मनखि सदनि का जीवन तैं ख्वे द्‍यो, त उ वेतैं वापिस नि मिली सकदु?</verse>
				<verse number="38">अर कुई मनखि परमेस्वर तैं छोड़ के चलि जान्दु अर ईं पापि पीढ़ी का लोगु का समणि मि बटि अर मेरा वचनों बटि सरमान्दु, त जब मनखि को पुत्र भि अपणा पवित्र स्वर्गदूतों का दगड़ा, अर अपणा पिता की सामर्थ का दगड़ा मा वापस आलु, त उ भि वे मनखि से सरमालु।”</verse>
			</chapter>
			<chapter number="9">
				<verse number="1">अर यीशु न ऊंकू इन भि बोलि कि, “मि तुम से सच्‍च बोन्‍नु छौं कि जु इख खड़ा होयां छिन, ऊंमा बटि कुछ इन्द्रया भि छिन, जु की तब तक नि मुरला, जब तक की वु परमेस्वर तैं सामर्थ का दगड़ा मा राज करद देखि नि द्‍याला।”</verse>
				<verse number="2">अर यों सब बातों का छह दिन का बाद यीशु अपणा चेलों मा बटि पतरस, याकूब अर यूहन्‍ना तैं अफ दगड़ि एक ऊँचा ढौंडा पर इखुली लि गै। अर उख ऊंका समणि वेको रुप बदलि गै,</verse>
				<verse number="3">अर वेका कपड़ा भौत सफेद ह्‍वेके चमकण लगि गैनी, इथगा सफेद कि दुनियां को कुई भि धोबि ध्वेके उथगा सफेद नि कैरी सकदु।</verse>
				<verse number="4">अर उख ऊंन परमेस्वर का रैबर्या एलिय्याह अर मूसा तैं परगट होण देखि, जु कि यीशु का दगड़ा मा बात कना छा।</verse>
				<verse number="5">अर यू देखि के पतरस न यीशु कू बोलि, “गुरुजी, हम सभ्यों को इख रौण ठिक च, इलै हम इख तीन तम्बू बणौला, एक तुम खुणि, एक मूसा खुणि अर एक एलिय्याह खुणि।”</verse>
				<verse number="6">अर या बात वेन इलै बोलि, किलैकि वे बगत पतरस तैं पता नि छौ कि क्या बुलण, अर उ भौत जादा डऽरयुं छौ।</verse>
				<verse number="7">कि, तबरि एक बादळ न ऐके यीशु, मूसा अर एलिय्याह तैं घेरि दिनी, अर वे बादळ मा बटि एक आवाज ऐ, “यू मेरु लाडलु पुत्र च, येकी सुणा।”</verse>
				<verse number="8">अर अचानक, ऊंन अपणा चौतरफि देखि, त यीशु का अलावा ऊंतैं और कुई नि दिखै।</verse>
				<verse number="9">अर यीशु अर वेका तीन चेला ये ढौंडा बटि मूड़ी औणा छा, त वेन ऊंतैं या आज्ञा देई कि जबरि तक मनखि को पुत्र मुरदो मा बटि ज्यून्दु नि ह्‍वे जौ, तबरि तक जु तुमुन देखि वेका बारा मा कै मा नि बुलयां।</verse>
				<verse number="10">इलै वेकी ईं बात तैं ऊंन अपणा मन मा रखी। अर आपस मा बात-चित करण लगि गैनी कि, “मुरदो मा बटि ज्यून्द होण को मतलब क्या ह्‍वे सकदु च?”</verse>
				<verse number="11">तब ऊंन यीशु बटि एक सवाल पूछी, “गुरुजी, शास्‍त्री लोग इन किलै बुल्दिन कि पैलि एलिय्याह रैबर्या को औण जरुरी च?”</verse>
				<verse number="12">वेन ऊंतैं जबाब दिनी, “एलिय्याह सच्‍चि मा पैलि ऐके सब कुछ फिर से ठिक करलु, मगर मनखि का पुत्र का बारा मा इन किलै लिख्यूं च कि, वेतैं भौत दुख झिलण पोड़लु, अर वेको तिरिस्कार किये जालु?</verse>
				<verse number="13">मगर मि तुमतै बतै देन्दु, कि एलिय्याह त ऐ गै, अर जन वेका बारा मा लिख्यूं च, लोगु न वेका दगड़ा मा ठिक उन्‍नि कैरी, जन ऊ चान्दा छा।”</verse>
				<verse number="14">अर जब यीशु पतरस, याकूब अर यूहन्‍ना का दगड़ा अपणा दुसरा चेलों का पास पौंछी, त ऊंन देखि कि एक बड़ी भीड़ ऊंका चौतरफि इकट्‍ठा होईं च, अर शास्‍त्री लोग चेलों का दगड़ा मा बहसबाजी कना छिन।</verse>
				<verse number="15">अर जब भीड़ का लोगु न यीशु तैं देखि त ऊ सब हकदक ह्‍वे गैनी, अर सलाम बोन्‍नु खुणि वेका पास भागी के गैनी।</verse>
				<verse number="16">अर वेन ऊं से पूछी, “तुम लोग ऊंका दगड़ा मा कैं बात का खातिर बहस कना छाँ?”</verse>
				<verse number="17">तब भीड़ मा बटि कै एक न वेतैं जबाब देई, “गुरुजी, मि अपणा नौना तैं तुमरा पास लेके ऐ छौ, किलैकि वे पर गूंगु करण वळु खबेस लग्यूं च।</verse>
				<verse number="18">अर जब उ खबेस वेतैं अपणा वश मा करदु, त वेतैं उखि पटकी देन्दु, अर मेरा नौना का गिच्‍चा बटि गाज निकळण लगि जान्दु, अर उ अपणा दांत कड़गिटाण लगि जान्दु, अर अकडै़ भि जान्दु। अर गुरुजी, मिन तुमरा चेलों कू बोलि, कि ऊ वे खबेस तैं वेमा बटि निकाळि द्‍या, मगर ऊ वेतैं निकाळि नि सकिनी।”</verse>
				<verse number="19">अर ईं बात तैं सुणी के यीशु न ऊंकू बोलि, “हे बिस्वास नि करण वळा पीढ़ी का लोगु, आखिर मि कब तक तुमरा दगड़ा मा रौलु? अर कब तक तुमरि सौलु? तुम वे नौना तैं इनै लेके आ।”</verse>
				<verse number="20">तब ऊ वे नौना तैं वेका पास लेके ऐनी, अर जब वे खबेस न यीशु तैं देखि, त खबेस न तुरन्त वे नौना तैं मरोड़ि, अर उ नौनु भ्वीं मा पोड़ि गै, अर वेका गिच्‍चा बटि गाज निकळण लगि गै, अर वु भैंकर लफड़ाण लगि गै।</verse>
				<verse number="21">यीशु न वे नौना का बुबा बटि पूछी, “येकी इन्दरि हालत कब बटि च?” वेन बोलि, “बचपन बटि, गुरुजी।</verse>
				<verse number="22">अर यू खबेस मेरा नौना तैं मरण खुणि कभि वेतैं आग मा डालि देन्दु, अर कभि पाणि मा ढोळि देन्दु, अर अगर तुम कुछ कैरी सकद्‍यां, त गुरुजी हम पर दया कैरा अर हमरि मदद कैरा।”</verse>
				<verse number="23">यीशु न वेकू बोलि, “तू क्या बात बोन्‍नि छैई, कि गुरुजी, तुम कुछ कैरी सकद्‍यां? अरे, बिस्वास करण वळा मनखि खुणि सब कुछ ह्‍वे सकदु।”</verse>
				<verse number="24">अर नौना का बुबा न तुरन्त ऊँची आवाज मा बोलि, “गुरुजी, मि बिस्वास करदु, अर मेरु बिस्वास और जादा मजबूत हो या खुणि मेरी मदद कैरा।”</verse>
				<verse number="25">अर जब यीशु न देखि की लोग दौड़ी के भीड़ लगौण लगि गैनी, त वेन वे नौना मा लग्यां खबेस तैं झिड़की के बोलि, “हे गूंगा अर बैरा खबेस, मि त्वेतै आज्ञा देन्दु, वेमा बटि निकळि जा, अर फिर येका भितर कभि नि ऐ।”</verse>
				<verse number="26">तब उ चिल्‍लै के अर वे नौना तैं भौत जादा मरोड़ि के वेमा बटि निकळि गै, अर वु नौनु इन ह्‍वे गै जन कि वेका पराण वेमा बटि निकळि गै हो। अर यू देखि के भौत सा लोग इन बोन्‍न लगि गैनी कि, “अरे, यू त मोरि गै।”</verse>
				<verse number="27">पर यीशु न वेकू हाथ पकड़ी के वेतैं उठे, अर उ खड़ु ह्‍वे गै।</verse>
				<verse number="28">अर जब यीशु अर वेका चेला एक घौर मा पौंछिनी, त ऊंन अकेला मा वेसे पूछी, “गुरुजी, हमुन वे खबेस तैं किलै नि निकळि सैकी।”</verse>
				<verse number="29">वेन ऊंकू बोलि, “इन्द्रया खबेसों तैं निकळणु खुणि उपवास अर [प्रार्थना की जरुरत होन्दी] अर बिना येका यू नि निकळि सकदिन।”</verse>
				<verse number="30">अर येका बाद यीशु अर वेका चेला, वे मुलक बटि निकळि के गलील मुलक बटि ह्‍वेके जाणा छा, अर यीशु नि चान्दु छौ कि कैतैं भि वेका बारा मा पता चलु, किलैकि उ अपणा चेलों तैं सिखौणु छौ।</verse>
				<verse number="31">अर ऊंतैं सिखौण दौं वेन ऊंकू बोलि कि, “मनखि को पुत्र लोगु का हाथों मा पकड़वै जालु, अर ऊ वेतैं जान से मारी द्‍याला, पर मुरण का बाद तिसरा दिन वु मुरदो मा बटि ज्यून्दु ह्‍वे जालु।”</verse>
				<verse number="32">मगर यीशु का चेला ईं बात तैं नि समझिनी, अर ऊ वे बटि ईं बात को मतलब पूछण से भि डऽरदा छा।</verse>
				<verse number="33">तब यीशु अर वेका चेला कफरनहूम नगर मा ऐनी। अर जब ऊ घौर मा छा त वेन ऊं से पूछी, “तुम बाटा मा कैं बात का बारा मा बात-चित कना छा?”</verse>
				<verse number="34">पर ऊ संट रैनी, किलैकि बाटा मा ऊंन इन बात-चित कैरी छै कि, “हम मा बटि सबसे खास कु च।”</verse>
				<verse number="35">तब वेन बैठि के बारह चेलों तैं बुलै अर ऊंकू बोलि, “अगर तुम मा बटि कुई बड़ु होण चाणु हो, त उ सबसे छुटो बणु अर सभ्यों को सेवक भि।”</verse>
				<verse number="36">तब यीशु न एक बच्‍चा तैं बुलै अर ऊंका बीच मा खड़ु कैरी, अर वेतैं गोद मा लेके ऊंकू बोलि,</verse>
				<verse number="37">“जु कुई मेरा नौ से इन्द्रया बच्‍चों मा बटि कै एक तैं स्वीकार करदु उ मितैं स्वीकार करदु, अर जु कुई मितैं स्वीकार करदु उ केवल मितैं ही ना, बल्किन मा वेतैं भि स्वीकार करदु जैन मितैं भेजि च।”</verse>
				<verse number="38">तब यूहन्‍ना न यीशु कू बोलि, “गुरुजी, हमुन एक आदिम तैं तुमरा नौ से खबेसों तैं निकळद देखि, अर हमुन वेकू मना कैरी, किलैकि उ हमरा दल को नि च।”</verse>
				<verse number="39">मगर वेन वेकू बोलि, “वेतैं नि रोका, किलैकि जु कुई मेरा नौ से सामर्थ का काम करदु, वु इथगा जल्दी मेरा खिलाप मा बुरी बात नि बोलि सकदु।</verse>
				<verse number="40">किलैकि जु हमरा खिलाप मा नि च, उ हमरा पक्ष मा च।</verse>
				<verse number="41">अर अगर कुई तुमतै एक गिलास पाणि भि इलै पिलालु, किलैकि तुम मसीह का लोग छाँ त मि तुम बटि सच्‍च बोन्‍नु छौं, कि वेतैं जरुर इनाम मिललु।”</verse>
				<verse number="42">अर यीशु न अपणा चेलों कू इन भि बोलि, “अगर तुम मा बटि कुई भि यों छुटो तैं जु कि मि पर बिस्वास करदिन, अगर कै एक खुणि भि पाप करण की वजा बणदु, त या सजा भि वे खुणि कम च कि वेका गौळा मा जंदरु डालि के वेतैं समुन्दर मा ढुळै जौ।</verse>
				<verse number="43">“अर अगर जु तेरु हाथ त्वेसे पाप करौणु च त तू वेतैं काटी दे, किलैकि त्वे खुणि यू जादा खूब च कि तू अपंग ह्‍वेके सदनि का जीवन मा जा। अर अगर जु तू अपणा दुई हाथों समेत नरकलोक मा डळै जाणि छैई, त फिर त्वेतै क्या फैदा ह्‍वे। [</verse>
				<verse number="44">अर वे नरकलोक को कीड़ु कभि नि मुरदो, अर उखे आग कभि नि बुझदी।]</verse>
				<verse number="45">अर अगर जु तेरु खुटु त्वेसे पाप करौणु च त तू वेतैं काटी दे, किलैकि त्वे खुणि यू जादा खूब च कि तू लंगड़ु ह्‍वेके सदनि का जीवन मा जा। अर अगर जु तू अपणा दुई खुटों समेत नरकलोक मा डळै जाणि छैई, त फिर त्वेतै क्या फैदा ह्‍वे। [</verse>
				<verse number="46">अर वे नरकलोक को कीड़ु कभि नि मुरदो, अर उखे आग कभि नि बुझदी।]</verse>
				<verse number="47">अर अगर जु तेरी आंख त्वेसे पाप करौणी च त तू वींतैं निकाळि दे, किलैकि त्वे खुणि यू जादा खूब च कि तू कांणु ह्‍वेके परमेस्वर का राज मा जा। अर अगर जु तू अपणा दुई आंख्यों समेत नरकलोक मा डळै जाणि छैई, त फिर त्वेतै क्या फैदा ह्‍वे।</verse>
				<verse number="48">अर वे नरकलोक को कीड़ु कभि नि मुरदो, अर उखे आग कभि नि बुझदी।</verse>
				<verse number="49">किलैकि हरेक मनखि तैं आग का द्‍वारा शुद्ध किये जालु [अर हरेक बलिदान तैं लूण से नमकीन किये जालु।]</verse>
				<verse number="50">“लूण त अच्छु च, पर अगर जु लूण को स्वाद ही खतम ह्‍वे जौ, त फिर वेतैं कनकै लूणयां किये जै सकदु? इलै अपणा जीवनों तैं लूण जन शुद्ध रखा, अर एक-दुसरा का दगड़ा मा शान्ति से रा।”</verse>
			</chapter>
			<chapter number="10">
				<verse number="1">तब यीशु कफरनहूम नगर बटि निकळि के यरदन गाड का दुसरा छाला यहूदिया मुलक मा ऐ। अर सुणा, एक भीड़ फिर से वेका पास इकट्‍ठा ह्‍वे गै, अर उ लोगु तैं हमेसा की तरौं फिर से सिखौण लगि गै।</verse>
				<verse number="2">तब कुछ फरीसी दल का लोग यीशु का पास ऐनी, अर ऊंन वेतैं अपणी बात मा फसौणु खुणि वेसे पूछी, “क्या या बात नियम का मुताबिक ठिक च, कि कुई भि मनखि अपणी जनानि तैं तलाक दे सकदु?”</verse>
				<verse number="3">वेन ऊंतैं जबाब दिनी, “मूसा न तुमतै क्या इजाजत दिईं च?”</verse>
				<verse number="4">ऊंन बोलि, “परमेस्वर का रैबर्या मूसा न तलाकनामा लिखी के घरवळी तैं छुड़ण की आज्ञा दिईं च।”</verse>
				<verse number="5">मगर यीशु न ऊंकू बोलि, “तुमरा मन का निठुर होण की वजै से वेन तुमतै या आज्ञा लिखी के दिनी।</verse>
				<verse number="6">पर शुरु बटि ही परमेस्वर न ऊंतैं नर अर नारी का रुप मा बणै।</verse>
				<verse number="7">इलै आदिम अपणा ब्वे-बाब तैं छोड़ि के अपणी घरवळी का दगड़ा मा एक ह्‍वेके रालु, अर वु दुईया का दुई एक बदन होला।</verse>
				<verse number="8">अर दुई होण की वजै से वु अलग नि होला, बल्किन मा ऊ एक सरील छिन।</verse>
				<verse number="9">इलै जैतैं परमेस्वर न जोड़ी, वेतैं कुई भि मनखि अलग नि कैरो।”</verse>
				<verse number="10">तब वेका चेलों न घौर मा जैके तलाक का बारा मा यीशु से फिर से पूछी।</verse>
				<verse number="11">वेन ऊंकू बोलि, जु कुई अपणी घरवळी तैं तलाक देके कै दुसरि जनानि का दगड़ा ब्यौ करदु, त वु पैलि जनानि का खिलाप मा पाप करदु।</verse>
				<verse number="12">अर ठिक उन्‍नि अगर कुई जनानि अपणा पति तैं छोड़ि के कै दुसरा का दगड़ा मा ब्यौ करदी, त वा जनानि गळत सम्बन्ध बणौणी च।</verse>
				<verse number="13">अर फिर लोग अपणा बाल-बच्‍चों तैं यीशु का पास लेके ऐनी, ताकि उ ऊं पर अपणु हाथ रखो, मगर वेका चेलों न ऊंतैं झिड़की।</verse>
				<verse number="14">अर यू देखि के यीशु नाराज ह्‍वे अर वेन अपणा चेलों कू बोलि, “बच्‍चों तैं मि मू औण द्‍या, ऊंतैं रोका ना, किलैकि परमेस्वर को राज ऊंको ही च जौं को जीवन यों बच्‍चों की तरौं च।</verse>
				<verse number="15">अर मि तुम बटि सच्‍चि बोन्‍नु छौं, कि परमेस्वर का राज मा वे ही मनखि न जै सकण, जु परमेस्वर का राज तैं एक छुटा बच्‍चा की तरौं स्वीकार करलु।”</verse>
				<verse number="16">अर वेन ऊं बच्‍चों तैं अपणा गोद मा उठे, अर ऊं पर अपणु हाथ रखी के ऊंतैं आसीस दिनी।</verse>
				<verse number="17">अर जब यीशु वे मुलक बटि निकळि के यरूशलेम नगर कू जाणु छौ, त एक मनखि भागी के वेका पास ऐ, अर वेका अगनै घुंडा टेकी के वेसे पूछी, “गुरुजी, तुम अच्छा गुरु छाँ, सदनि का जीवन को हकदार होण खुणि मि क्या जि कैरुं?”</verse>
				<verse number="18">वेन वे मनखि कू बोलि, “तू मिकू अच्छु किलै बोन्‍नि छैई, परमेस्वर का अलावा कुई भि अच्छु नि च।</verse>
				<verse number="19">तू आज्ञाओं तैं त जणदी ही छैई, ‘हत्या नि कैरी, कै का दगड़ा मा गळत सम्बन्ध नि रखी, अर चोरी नि कैरी, झूठ्‍ठी गवै नि देई, छल-कपट नि कैरी, अपणा ब्वे-बुबों को आदर-सम्मान कैरी।’”</verse>
				<verse number="20">वे मनखि न बोलि, “गुरुजी, यों सब बातों तैं त मि बाळ्‍पन बटि ही मणदी औणु छौं।”</verse>
				<verse number="21">अर यीशु न वे जनै देखि अर वेका मन मा वे मनखि खुणि भौत प्यार ऐ। अर वेन वेकू बोलि, “त्वेमा अभि भि एक बात की कमी च, इन कैर कि जु कुछ भि त्वेमा च, ऊ सब कुछ बेचि दे अर वे बटि जु कुछ भि मिललु वु सब गरीबों मा बांटि दे। अर मेरु चेला बणि जा, तब त्वेतै स्वर्ग मा खजानु मिललु।”</verse>
				<verse number="22">पर ईं बात तैं सुणी के वु मनखि भौत उदास ह्‍वे। अर बड़ु दुखी ह्‍वेके उख बटि चलि गै, किलैकि वेका पास भौत जादा जैजाद छै।</verse>
				<verse number="23">अर यीशु न चौतरफि देखि के अपणा चेलों कू बोलि, “सेठ लोगु को परमेस्वर का राज मा दाखिल होण भौत कठिन च।”</verse>
				<verse number="24">वेका चेला या बात सुणी के दंग ह्‍वे गैनी। पर यीशु न ऊंकू फिर से बोलि, “बच्‍चों सुणा, जु लोग अपणी जमीन-जैजाद पर भरोसा रखदिन, ऊ खुणि परमेस्वर का राज मा दाखिल होण बड़ु कठिन च।</verse>
				<verse number="25">एक ऊंट को स्यूण का छेद बटि निकळण सरल च, मगर एक सेठ मनखि को परमेस्वर का राज मा दाखिल होण बड़ु कठिन च।”</verse>
				<verse number="26">अर ईं बात तैं सुणी के चेला और भि जादा दंग ह्‍वे गैनी, अर अपणा आपस मा पूछण लगि गैनी, “त फिर इनकै कैतैं बचयै जालु?”</verse>
				<verse number="27">तब यीशु न ऊंकी तरफा देखि के बोलि, “मनखियों बटि त यू नि ह्‍वे सकदु, पर परमेस्वर बटि ह्‍वे सकदु च, किलैकि परमेस्वर सब कुछ कैरी सकदु च।”</verse>
				<verse number="28">ईं बात तैं सुणी के पतरस यीशु कू बोन्‍न लगि गै कि, “गुरुजी देखा, हम त सब कुछ छोड़ि के तुमरा पिछनै ह्‍वे ग्यां।”</verse>
				<verse number="29">यीशु न ऊंकू बोलि, “मि तुम बटि सच्‍चि बोन्‍नु छौं, कि वु सब लोग जु मेरा अर शुभ समाचार का बानो, अपणा घौर-बार तैं, अपणा भै-बैंणो, अर अपणा ब्वे-बबों या अपणा बाल-बच्‍चों तैं या पुंगड़ा-पटलों तैं छोड़ि देन्दिन,</verse>
				<verse number="30">ऊं लोगु तैं धरती पर सतयै जालु, मगर फिर भि ईं दुनियां मा ऊंतैं अपणु घौर-बार, भै-बैंणो, अर अपणा ब्वे-बबा, अपणा पुंगड़ा-पटलों बटि सौ गुणा मिललु, अर औण वळा युग मा ऊ सदनि का जीवन तैं भि पाला।</verse>
				<verse number="31">पर वे औण वळा युग मा भौत सा लोग जु आज पैलि छिन, वु आखिरी ह्‍वे जाला, अर जु आज आखिरी छिन वु पैलि ह्‍वे जाला।”</verse>
				<verse number="32">अर यीशु अर वेका चेला यरूशलेम नगर कू जाणा छा, अर वे बाटा मा वु चेलों का अगनै-अगनै छौ। अर चेला बड़ा ताजुब मा छा, अर भीड़ का जु लोग वेका पिछनै-पिछनै औणा छा वु भि डऽरयां छा। तब यीशु अपणा बारह चेलों तैं अलग लि गै, अर अफ पर होण वळी बातों का बारा मा बतौण लगि गै।</verse>
				<verse number="33">वेन बोलि, “सुणा, हम लोग यरूशलेम नगर कू जाणा छां, अर उख मनखि का पुत्र तैं मुख्य पुरोहितों अर शास्‍त्री लोगु का हवाला किये जालु, अर वु वे पर इळजाम लगाला कि वेतैं जान से मार दिये जौ, अर वेतैं ऊं लोगु का हवाला करला जु कि यहूदी जाति का नि छिन।</verse>
				<verse number="34">अर यू लोग जु यहूदी जाति का नि छिन, यू वेको मजाक उड़ाला, वे पर थुकला वे पर कोड़ा मरला, इख तक की जान से मार द्‍याला, पर उ तिसरा दिन मुरदो मा बटि ज्यून्दु ह्‍वे जालु।”</verse>
				<verse number="35">तब जबदी का दुई नौना याकूब अर यूहन्‍ना यीशु का पास ऐनी अर वेकू बोलि, “गुरुजी, हम चन्द्‍यां कि जु कुछ भि हम तुम बटि मांगा, वु तुम हमतै द्‍या।”</verse>
				<verse number="36">तब यीशु न ऊंकू बोलि, “तुम क्या चन्द्‍यां, कि मि तुम खुणि कैरुं?”</verse>
				<verse number="37">अर ऊंन बोलि, “गुरुजी, हमतै इन इजाजत दे द्‍या, कि जब तुम आदर-सम्मान का दगड़ा मा राज करिल्या, तब हम दुईया का दुई एक तुमरि दैंणी तरफा अर दुसरो बैं तरफा बैठि सैका।”</verse>
				<verse number="38">यीशु न ऊंकू बोलि, “तुम नि जणद्‍यां कि तुम मंगणा क्या छाँ? क्या तुम वे दुख तैं झेली सकद्‍यां, जु मि झिलण वळु छौं? अर जै तरीके से मेरी मौत होण वळी च क्या वे तरीके से तुम मोरि सकद्‍यां?”</verse>
				<verse number="39">ऊंन वेकू बोलि, “हाँ गुरुजी, हम झेली सकद्‍यां।” वेन ऊंकू बोलि, “जु दुख मि झिलण वळु छौं, वेतैं तुम जरुर झिलिल्या, अर ज्वा मौत मि झिलण वळु छौं वींतैं तुम भि जरुर झिलिल्या।</verse>
				<verse number="40">पर मेरा दैं अर बैं तरफा बैठाण को काम मेरु नि च, पर या जगा ऊं खुणि च जौं खुणि तयार किये गै।”</verse>
				<verse number="41">याकूब अर यूहन्‍ना की यों बातों तैं सुणी के दस का दस चेला ऊं दुईयों पर बड़ा गुस्सा ह्‍वेनि।</verse>
				<verse number="42">अर यीशु न चेलों तैं अपणा पास बुलै के बोलि, “तुम जणदा छाँ कि ईं दुनियां का लोगु पर राज करण वळा ऊं पर जुलम करदिन, अर बड़ा अधिकारी लोग अपणा-अपणा राज्य का लोगु पर अपणु हक जमौन्दिन।</verse>
				<verse number="43">पर तुम लोगु का बीच मा इन नि होण चयेणु, अगर तुम मा बटि कुई बड़ु होण चान्दु, त उ पैलि तुमरो सेवक बणु,</verse>
				<verse number="44">अर जु कुई तुम मा बटि परधान होण चान्दु, त उ सभ्यों की सेवा करण वळु हो।</verse>
				<verse number="45">किलैकि मनखि को पुत्र अपणी खातिरदारि करौणु खुणि नि ऐ, बल्किन मा इलै ऐ, कि खुद सेवा कैरो अर भौत सा लोगु तैं ऊंका पापों की सजा से आजादी दिलौणु खुणि अपणी जान दे द्‍यो।”</verse>
				<verse number="46">अर येका बाद यीशु अर वेका चेला यरीहो नगर मा ऐनी। अर जब वु यरीहो नगर बटि निकळण लगि गैनी, त एक बड़ी भीड़ वेका पिछनै चलण लगि गै। अर सुणा, बाटा का किनरा एक अन्धु भिकारी बैठयूं छौ, जैको नौ बरतिमाई छौ, अर येका बुबा को नौ तिमाई छौ।</verse>
				<verse number="47">अर वे अन्धा न सुणी कि नासरत गौं को यीशु इख च, त वु चिल्‍लै-चिल्‍लै के बुलण लगि गै, “हे राजा दाऊद का वंशज यीशु, मि पर दया कैर।”</verse>
				<verse number="48">तब भौत सा लोगु न वेतैं झिड़की की चुप ह्‍वे जा, पर उ और भि जादा जोर से चिल्‍लै के बोन्‍न लगि गै, “हे राजा दाऊद का वंशज, मि पर दया कैर।”</verse>
				<verse number="49">तब यीशु रुकी गै अर वेन बोलि, “वेतैं इख बुला।” अर लोगु न वेतैं जैके बुलै अर वे अन्धा मनखि कू बोलि, “हिम्मत रख, अर खड़ु हो किलैकि यीशु त्वेतै बुलाणु च।”</verse>
				<verse number="50">अर जु कपड़ा वेन उड़युं छौ वेन वेतैं एक तरफा ढोळि, अर चड़म उठी के यीशु का पास ऐ।</verse>
				<verse number="51">यीशु न वेतैं पूछी, “तू क्या चान्दी, कि मि त्वे खुणि कैरुं?” अर वेन बोलि, “गुरुजी, मि इन चान्दु कि मि फिर से दिखण लगि जौं।”</verse>
				<verse number="52">यीशु न वेकू बोलि, “जा, तू खूब ह्‍वे गै, किलैकि तिन मि पर बिस्वास कैरी।” अर उ तुरन्त दिखण लगि गै, अर वे ही बाटा मा यीशु का पिछनै चलण लगि गै।</verse>
			</chapter>
			<chapter number="11">
				<verse number="1">अर जब यीशु अर वेका चेला यरूशलेम नगर का नजदीक पौंछिनी, त वु जैतून नौ का पाड़ पर बैतनिय्याह अर बैतफगे गौं का पास ऐनी। तब वेन अपणा दुई चेलों तैं इन बोलि के भेजि कि,</verse>
				<verse number="2">“समणि का गौं मा जा, अर उख पौंछदि तुमतै एक गधी को बच्‍चा बन्धयूं मिललु, जै पर अभि तक कुई नि बैठि, तुम वेतैं खोली के इख ला।</verse>
				<verse number="3">अर अगर कुई तुम बटि पूछलु, किलै खुलणा छाँ रे येतैं? त इन बुलयां कि, ‘प्रभु, तैं येकी जरुरत च, अर उ तुरन्त गधी का ये बच्‍चा तैं वापिस कैरी द्‍यालु।’”</verse>
				<verse number="4">तब वु दुई चेला उख बटि चलि गैनी। अर यीशु का बुलयां मुताबिक वे गौं का बाटा मा ऊंतैं एक गधी को बच्‍चा द्‍वार का पास बन्धयूं मिली, अर ऊ वेतैं खुलण लगि गैनी।</verse>
				<verse number="5">अर जु लोग उख खड़ा होयां छा, ऊंमा बटि कुछ लोगु न ऊं दुईयों कू बोलि, “अरे, किलै खुलणा छाँ बच्‍चा तैं?”</verse>
				<verse number="6">अर जन यीशु न ऊंकू बोलि छौ ऊं दुईयों न ठिक उन्‍नि बोलि, तब ऊं लोगु न वे बच्‍चा तैं लि जाण दिनी।</verse>
				<verse number="7">अर ऊ गधी का बच्‍चा तैं यीशु का पास लैनि, अर ऊंन वे पर अपणा कपड़ा डलिनी, अर यीशु वेमा बैठि गै।</verse>
				<verse number="8">तब भौत सा लोगु न यीशु का आदर-सम्मान का खातिर अपणा कपड़ा तैं बाटा मा बिछैंनी, अर दुसरा लोगु न वेका स्वागत का खातिर पुंगड़ों बटि फौंक्यों तैं काटी के बाटा मा बिछैंनी।</verse>
				<verse number="9">अर भीड़ का जु लोग वेका अगनै-पिछनै औणा छा, ऊ सब चिल्‍लै-चिल्‍लै के बोन्‍ना छा कि, “ होसन्‍ना, धन्य च उ जु प्रभु का नौ से औन्दु।</verse>
				<verse number="10">हमरा पितर दाऊद को राज धन्य च जु की औणु च, स्वर्ग मा परमेस्वर की होसन्‍ना।”</verse>
				<verse number="11">अर जब यीशु यरूशलेम नगर मा ऐ, त उ मन्दिर मा गै। अर वेन मन्दिर मा चौतरफि सब चीजों तैं देखि, अर वेका बाद वु अपणा बारह चेला का दगड़ा मा बैतनिय्याह गौं कू चलि गै किलैकि रुमुक ह्‍वे गै छै।</verse>
				<verse number="12">अर दुसरा दिन जब यीशु अर वेका चेला बैतनिय्याह गौं बटि निकळिनी, त वेतैं भूक लगि।</verse>
				<verse number="13">अर वेकी नजर दूर एक हरयां तिमला डाळा पर पोड़ि तब यीशु वेतैं दिखणु खुणि वेका पास गै, कि क्या पता वे पर कुछ तिमला मिली जा, मगर वेतैं पत्तों का अलावा वे पर एक भि तिमलु नि मिली, किलैकि वु समौ फलों को नि छौ।</verse>
				<verse number="14">तब वेन वे डाळा कू बोलि, “आज का बाद तेरा फल कुई नि खै सकलु।” अर वेका चेला या बात सुनणा छा।</verse>
				<verse number="15">फिर यीशु अर वेका चेला यरूशलेम नगर मा ऐनी, अर जब ऊ मन्दिर मा गैनी, तब यीशु चीजों तैं बिकौण अर खरीदण वळा लोगु तैं उख बटि भैर निकळण लगि गै, अर वेन पैसौं को अदलण-बदलण करण वळो की मेजों तैं, अर कबूतर बिकौण वळो की चौकलों तैं उल्ट-पुल्ट कैरी दिनी।</verse>
				<verse number="16">अर वेन मन्दिर मा बटि ह्‍वेके कैतैं भि समान लौण अर लि जाण की इजाजत नि दिनी।</verse>
				<verse number="17">अर वेन उपदेस देके ऊंकू बोलि, “क्या पवित्रशास्‍त्र मा इन नि लिख्यूं कि परमेस्वर बुल्दु कि, “‘सब जाति का लोगु खुणि मेरु घौर प्रार्थना को घौर बुले जालु?’ पर तुमुन येतैं डकैतों को उड़्यार बणैयालि।”</verse>
				<verse number="18">अर ईं बात तैं सुणी के मुख्य पुरोहित अर शास्‍त्री लोग वेतैं जान से मरणे की फिराक मा लगि गैनी, मगर यू लोग यीशु से डऽरदा छा, किलैकि लोग वेका उपदेस तैं सुणी के दंग रै जान्दा छा।</verse>
				<verse number="19">अर जब रुमुक ह्‍वे गै, त ऊ वे नगर से भैर चलि गैनी।</verse>
				<verse number="20">मगर दुसरा दिन जब ऊ सुबेर लेके वे ही बाटा बटि वापिस जाणा छा, त चेलों न वे तिमला का डाळा तैं देखि, कि उ जलुड़ो समेत सूखि गै।</verse>
				<verse number="21">अर पतरस तैं वा बात याद ऐ तब वेन यीशु कू बोलि, “गुरुजी, ये डाळा कू तुमुन बोलि छौ कि त्वे पर लग्यां फल फिर कभि कुई नि खौऽ, इख देखा, तिमला को यू डाळु सूखि गै।”</verse>
				<verse number="22">अर यीशु न ऊंतैं जबाब देई, “परमेस्वर पर बिस्वास रखा।</verse>
				<verse number="23">मि तुम बटि सच्‍च बोन्‍नु छौं, अगर कुई ये पाड़ कू बोललु कि, ‘इख बटि उखड़ी के समुन्दर मा पोड़ि जा,’ अर अपणा मन मा सक नि कैरो, बल्किन मा बिस्वास कैरो जु कुछ बुलणु च उ सब कुछ वे खुणि उन्‍नि ह्‍वे जालु।</verse>
				<verse number="24">इलै मि तुम बटि बोन्‍नु छौ कि जु कुछ भि तुम प्रार्थना मा मंगिल्या, त इन बिस्वास कैरा कि वु तुमतै मिली गै, अर सुणा, वु तुमतै मिली जालु।</verse>
				<verse number="25">अर जब तुम प्रार्थना करणु कू खड़ा छाँ, अर तुमरा मन मा कै का खिलाप कुई बात हो, त वेतैं माफ कैरा, ताकि तुमरो पिता परमेस्वर भि जु की स्वर्ग मा च, तुमरा पापों तैं माफ कैरो। [</verse>
				<verse number="26">अर अगर तुम माफ नि करिल्या, त तुमरो पिता परमेस्वर भि जु की स्वर्ग मा च, तुमरा पापों तैं माफ नि करलु।”]</verse>
				<verse number="27">फिर यीशु अर वेका चेला यरूशलेम नगर मा ऐनी। अर जब यीशु मन्दिर मा घूमणु छौ, त मुख्य पुरोहित अर शास्‍त्री अर अध्यक्ष लोग वेका पास ऐनी।</verse>
				<verse number="28">अर ऊंन वे बटि पूछी कि, “हमतै इन बता कि तुम कै का दियां अधिकार से यों सब कामों तैं करद्‍यां? अर कु च उ जैन तुमतै यू हक देई कि तुम यू सब काम कैरा?”</verse>
				<verse number="29">तब वेन ऊंकू बोलि, “चला मि भि तुम बटि एक बात पूछदु, अर अगर तुम मितैं बतै दिल्या, त मि भि तुमतै बतै द्‍यूलु कि मि यू सब काम कै अधिकार से करदु।</verse>
				<verse number="30">चला बता, कि यूहन्‍ना तैं बपतिस्मा देण को अधिकार परमेस्वर न दे छौ, या यू अधिकार वेतैं लोगु न दे छौ?”</verse>
				<verse number="31">तब ऊ आपस मा बुलण लगि गैनी, “अगर जु हम बुल्द्‍यां कि, ‘वेतैं यू अधिकार परमेस्वर बटि मिल्यूं छौ,’ त फिर येन बोन्‍न कि ‘तुमुन वे पर बिस्वास किलै नि कैरी?’</verse>
				<verse number="32">अर अगर जु हम इन बुलला कि, ‘वेतैं यू अधिकार मनखियों की तरफा बटि मिल्यूं छौ, त भीड़ का लोगु न हम पर गुस्सा करण।’ असल, मा यू सब भीड़ का लोगु से डऽरणा छा, किलैकि सब लोग जणदा छा कि यूहन्‍ना बपतिस्मा देण वळु सच्‍चि मा एक रैबर्या च।”</verse>
				<verse number="33">इलै ऊंन जबाब देई, “हम नि जणद्‍यां की यू अधिकार वेतैं कख बटि मिली।” तब यीशु न ऊंकू बोलि, “त मिन भि तुमतै नि बतौण की मि यू सब काम कै का दियां अधिकार से करदु।”</verse>
			</chapter>
			<chapter number="12">
				<verse number="1">फिर यीशु यहूदियों का मुख्य लोगु का दगड़ा मा उदारण देके बात करण लगि गै। अर वेन बोलि कि, “एक मनखि न अंगूरों को एक बगिचा बणै, अर वेका चौतरफि बाड़ कैरी, अर रस जमा करणु खुणि खडलु बणै, अर बगिचे मा पैरा देणु खुणि एक जगा भि तयार कैरी। अर बगिचा को ठेक्‍का किसानों तैं देके खुद वु मनखि कै दुसरा देस कू चलि गै।</verse>
				<verse number="2">“अर जब अंगूरों तैं गड़णो को बगत ऐ, त वे मनखि न अपणा एक नौकर तैं ऊं किसानों का पास भेजि, ताकि उ किसानों बटि अंगूरों को हिस्सा ल्यो।</verse>
				<verse number="3">पर किसानों न वेका नौकर तैं पकड़ी के मारी-पीटि, अर खालि हाथ वापिस भेज दिनी।</verse>
				<verse number="4">तब वे मनखि न एक और नौकर तैं भेजि, मगर ऊंन वेको कपाळ फोड़ि दिनी अर वेकी बेजती कैरिके वापस भेजि दिनी।</verse>
				<verse number="5">फिर वेन एक और नौकर तैं भेजि, अर ऊंन वेतैं जान से मारी दिनी। तब वेन और भि जादा नौकरों तैं भेजि, मगर ऊं किसानों न नौकरों तैं पकड़ी के मारी-पीटि, अर कुछ नौकरों तैं त जान से ही मारी दिनी।</verse>
				<verse number="6">“अर अब वे मनखि का पास एक ही रै गै छौ जु कि वेको लाडलु नौनु छौ, अर आखिरी मा वेन अपणा नौना तैं इन सोची के ऊंका पास भेजि की ऊ लोग मेरा नौने की जरुर इज्‍जत करला, अर अंगूरों को हिस्सा द्‍याला।</verse>
				<verse number="7">मगर वे नौना तैं देखि के ऊं किसानों न अपणा आपस मा बोलि, ‘अरे, यू त वारिस च, ऐ जा, हम येतैं मारी देन्द्‍यां, ताकि यू सब कुछ हमरु ह्‍वे जौ।’</verse>
				<verse number="8">अर ऊंन वेतैं पकड़ी के जान से मारी दिनी, अर अंगूरों का बगिचा का भैर ढोळि दिनी।</verse>
				<verse number="9">“इलै अब इन बता, जब बगिचा को मालिक आलु, त ऊं किसानों का दगड़ा मा क्या जि करलु? वु ऊं किसानों को नास करलु, अर अंगूरों को बगिचा दुसरा किसानों तैं दे द्‍यालु।</verse>
				<verse number="10">तब यीशु न ऊंकू बोलि, ‘क्या तुम लोगु न पवित्रशास्‍त्र मा इन नि पैढी,’ “‘जै ढुंगा तैं मिस्‍त्रियों न फुंन ढोळि छौ, उई कुणों को खास ढुंगो बणि गै?</verse>
				<verse number="11">अर यू प्रभु की तरफा बटि ह्‍वे, अर हमरा दिखण मा यू अदभुत च।’”</verse>
				<verse number="12">अर ईं बात तैं सुणी के यहूदियों का मुख्य लोग समझि गैनी, कि यीशु न यू उदारण हमतै सुनौण खुणि बोलि, इलै ऊ यीशु तैं पकड़ण की कोसिस करण लगि गैनी। मगर ऊंतैं लोगु की डौऽर लगि, अर ऊ यीशु तैं छोड़ि के चलि गैनी।</verse>
				<verse number="13">तब यहूदियों का मुख्य लोगु न यीशु तैं वेकी ही बातों मा फसौंणु खुणि अपणा कुछ फरीसी दल का लोगु तैं, अर राजा हेरोदेस का कुछ लोगु तैं वेका पास भेजि।</verse>
				<verse number="14">अर ऊंन यीशु का पास ऐके बोलि, “गुरुजी, हम जणदा छां कि तुम सच्‍चा छाँ, अर कै की परवा नि करद्‍यां, किलैकि तुम कै का दगड़ा मा पक्षपात नि करद्‍यां, पर सच्‍चै से परमेस्वर का बाटा का बारा मा सिखौन्द्‍यां। इलै हमतै बता, कि तुम क्या सोचद्‍यां कि हमतै नियम का मुताबिक रोमी महाराजा तैं कर देण चयेणु, या नि देण चयेणु?”</verse>
				<verse number="15">पर यीशु ऊंका मन का कपट तैं जाणि गै इलै वेन ऊंकू बोलि, “तुम मितैं किलै अजमौणा छाँ? मेरा पास चांदी को एक सिक्‍का ला, अर मितैं दिखा।”</verse>
				<verse number="16">तब वु लोग वेका पास चांदी को एक सिक्‍का लेके ऐनी। अर यीशु न ऊंतैं पूछी, “यां पर कै की छाप अर कै को नौ लिख्यूं च?” अर ऊंन बोलि, “रोमी महाराज को।”</verse>
				<verse number="17">तब वेन ऊंकू बोलि, “जु रोमी महाराज को च उ महाराज तैं द्‍या, अर जु परमेस्वर को च उ परमेस्वर तैं द्‍या।” अर या बात सुणी के वु भौत ताजुब मा पोड़ि गैनी।</verse>
				<verse number="18">अर तब सदूकी लोग जौं को मनण इन च कि, मुरयां लोग फिर से ज्यून्दा नि ह्‍वे सकदिन, वु यीशु का पास ऐनी, अर ऊंन यीशु बटि पूछी कि,</verse>
				<verse number="19">“गुरुजी, मूसा रैबर्या न हम खुणि लिख्यूं च कि, अगर कै को भै मोरि जौ अर ऊंकी कुई औलाद नि हो, अर वेकी घरवळी ज्यून्द हो, त वेकू भै वीं जनानि का दगड़ा मा ब्यौ कैरिके अपणा भै खुणि वंश अगनै बढ़ो।</verse>
				<verse number="20">त गुरुजी, अब बात इन च कि सात भै छा, अर जब पैला भै को ब्यौ ह्‍वे त बिना औलाद को सुख दिख्यां ही उ मोरि गै,</verse>
				<verse number="21">तब दुसरा भै न वीं जनानि तैं अपणु बणै दिनी, त उ भि बिना औलाद को मोरि गै। अर फिर तिसरा न वींका दगड़ा मा ब्यौ कैरी त वेका दगड़ा मा भि ठिक उन्‍नि ह्‍वे।</verse>
				<verse number="22">अर ऊं सातों भै का दगड़ा मा उन्‍नि ह्‍वे ऊ सब बिना औलाद को सुख दिख्यां ही मोरि गैनी, अर आखिरी मा वा जनानि भि मोरि गै।</verse>
				<verse number="23">त गुरुजी, अब हमतै इन बता कि मुरयां लोगु का ज्यून्द होण का दिन पर वा कै की घरवळी होलि? किलैकि वा सातों की घरवळी ह्‍वे गै छै।”</verse>
				<verse number="24">तब यीशु न ऊंतैं जबाब दिनी, “तुम बड़ा भरम मा छाँ, किलैकि तुम नऽ त पवित्रशास्‍त्र तैं जणद्‍यां, अर ना ही परमेस्वर की ताकत तैं।</verse>
				<verse number="25">किलैकि जब ऊ मुरदो मा बटि ज्यून्दा होला त वु नऽ त ब्यौ करला, अर ना ही अपणा बाल-बच्‍चों तैं ब्यौ करणु खुणि द्‍याला, पर स्वर्ग मा त ऊ परमेस्वर का स्वर्गदूतों का जन ह्‍वे जाला।</verse>
				<verse number="26">अर अब मि तुमतै मुरदो मा ज्यून्द होण का बारा बतौन्दु, तुमुन मूसा रैबर्या की किताब मा जगदी झाड़ि का दगड़ा मा जु कुछ ह्‍वे, क्या तुमुन वे हिस्सा तैं नि पैढी? जख मा परमेस्वर वेकू बुल्दु कि, “‘मि अब्राहम को परमेस्वर, इसहाक को परमेस्वर अर याकूब को परमेस्वर छौं।’</verse>
				<verse number="27">अर परमेस्वर मुरदो को ना, पर ज्यून्दो को परमेस्वर च, मगर तुम लोग अभि भि मुरदो मा बटि ज्यून्द होण का बारा मा बड़ा भरम मा छाँ।”</verse>
				<verse number="28">अर एक शास्‍त्री न ऐके यीशु अर सदूकी लोगु तैं आपस मा वाद-विवाद करद सुणी। तब वे मनखि न वेसे सवाल पूछी, “गुरुजी, सबसे बड़ी आज्ञा क्‍वा च?”</verse>
				<verse number="29">तब वेन जबाब देई, “आज्ञाओं मा बटि सबसे खास आज्ञा या च कि, “‘हे इस्राएल का लोगु सुणा, प्रभु जु कि हमरु परमेस्वर च, उई हमरु प्रभु च।</verse>
				<verse number="30">अर तू अपणा प्रभु परमेस्वर तैं अपणा पूरा मनळ, अपणा पूरा पराणळ, अर अपणी पूरि अकलळ, अर अपणी पूरि ताकतळ प्यार कैर।’</verse>
				<verse number="31">अर दुसरि आज्ञा या च कि, ‘जन प्यार तू खुद से करदी, उन्‍नि प्यार तू सब लोगु से कैर।’ यों से बड़ी कुई और आज्ञा नि छिन।”</verse>
				<verse number="32">तब शास्‍त्री न वेकू बोलि, “गुरुजी, तुमुन भौत अच्छु बोलि, अर तुमुन सच्‍च ही बोलि कि वु एक ही च अर वेतैं छोड़ और कुई दुसरो छैई नि च।</verse>
				<verse number="33">अर वेसे अपणा पूरा मनळ, अपणी पूरि अकलळ, अर अपणी पूरि ताकतळ प्यार करण चयेणु। अर जन प्यार हम खुद बटि करद्‍यां, ठिक उन्‍नि हम सब लोग से कैरा, किलैकि इन करण भेंट अर बलिदान चड़ौण से भौत जादा अच्छु च।”</verse>
				<verse number="34">यीशु न यू देखि कि शास्‍त्री न बड़ी समझदारी से जबाब दिनी, इलै वेन वेकू बोलि, “तू परमेस्वर का राज बटि दूर नि छैई।” तब येका बाद कै की भि हिम्मत नि ह्‍वे कि कुई भि मनखि यीशु से कुछ भि सवाल पूछो।</verse>
				<verse number="35">तब यीशु न मन्दिर मा उपदेस देण दौं इन बोलि, “शास्‍त्री लोग इन किलै बुल्दिन कि मसीह राजा दाऊद को वंशज च?</verse>
				<verse number="36">जब की राजा दाऊद न खुद पवित्र आत्मा मा ह्‍वेके बोलि कि, “‘परमेस्वर न मेरा प्रभु बटि बोलि, मेरी दैंणी तरफा बैठ, जबरि तक की मि तेरा दुसमनों तैं हरै के तेरा अधीन मा नि कैरी द्‍यूं।’</verse>
				<verse number="37">“जब की राजा दाऊद ही मसीह खुणि ‘प्रभु’ बुल्दु, त फिर उ वेकू वंशज कनकै ह्‍वे सकदु? अर भीड़ का लोग यीशु की बातों तैं बड़ी खुशी से सुनणा छा।”</verse>
				<verse number="38">अर अपणा उपदेस मा यीशु न इन भि बोलि, “शास्‍त्रियों बटि बचि के रा, किलैकि ऊंतैं लम्बा-लम्बा चोळा पैरि के घूमण अच्छु लगदु, अर ऊ चनदिन, कि बजारों मा लोग ऊंकू नमस्कार बोला।</verse>
				<verse number="39">अर उन्‍नि ऊंतैं प्रार्थना भवनों मा मुख्य जगा अर दावत का बगत मा आदर-सम्मान वळी जगा चयेन्दी।</verse>
				<verse number="40">अर यू विधवाओं का घौर पर कब्जा कैरी देन्दिन, अर लोगु तैं दिखाणु खुणि भौत देर तक प्रार्थना कना रौनदिन, पर ऊंतैं भौत कड़क सजा मिलण।”</verse>
				<verse number="41">अर यीशु मन्दिर मा दान-पेटि का समणि बैठि के दिखणु छौ, कि लोग दान-पेटि मा दान कनकै डलणा छिन। अर भौत सा सेठ लोगु न भौत कुछ डालि।</verse>
				<verse number="42">कि तबरि एक गरीब विधवा न ऐके तांबा का दुई सिक्‍का डलिनी, जौं कि कीमत एक पैसा का बराबर छै।</verse>
				<verse number="43">तब यीशु न अपणा चेलों तैं अपणा पास बुलै के बोलि, “मि तुम बटि सच्‍चि बोन्‍नु छौं कि जु दान लोग दान-पेटि मा डलणा छिन, ऊंमा बटि सबसे जादा डलण वळी या विधवा च।</verse>
				<verse number="44">किलैकि सभ्यों न त अपणी भरपूरी मा बटि डालि, मगर अपणु गुजर-बसर करणु खुणि जु कुछ भि ईं विधवा का पास छौ, वींन अपणी गरीबी मा बटि वु सब कुछ डालियेली।”</verse>
			</chapter>
			<chapter number="13">
				<verse number="1">अर जब यीशु मन्दिर बटि भैर जाणु छौ, त वेका चेलों मा बटि एक न वेकू बोलि, “देखा गुरुजी, कथगा बड़ा ढुंगो से कथगा सुन्दर भवन बणयां छिन।”</verse>
				<verse number="2">तब यीशु न ऊंकू बोलि, “तुम यों बड़ी-बड़ी दिवालों तैं दिखणा छाँ, इख एक ढुंगो दुसरा ढुंगा का मथि नि रालु, किलैकि वु सब ढुळै जाला।”</verse>
				<verse number="3">अर यीशु जैतून नौ का पाड़ पर बैठयूं छौ, अर मन्दिर वेका समणि दिखैणु छौ। तब पतरस, याकूब अर यूहन्‍ना अर अन्द्रियास न अलग मा जैके यीशु बटि पूछी कि,</verse>
				<verse number="4">“गुरुजी, हमतै इन बता कि जु बात तुमुन बुलिनी वु सब कब पूरि होलि? अर जब वु पूरि होण लगि जालि त वेको चिन्‍न क्या जि होलु?”</verse>
				<verse number="5">वेन ऊंकू बोलि, “चेतन रा, कुई भि तुमतै भरमै नि सैको।</verse>
				<verse number="6">अर भौत सरा लोग मेरा नौ से आला अर बुलला कि, ‘मि उई छौं,’ अर भौत सा लोगु तैं भरमै द्‍याला।</verse>
				<verse number="7">अर जब तुम लड़ै अर लड़ै की अफवा का बारा मा सुणिल्या, त घबरै नि जयां, किलैकि यों सब बातों को होण जरुरी च, पर वे बगत भि अन्त नि होलु।</verse>
				<verse number="8">किलैकि एक देस दुसरा देस पर, अर एक राज्य दुसरा राज्य का खिलाप मा खड़ा होला। अर भौत सि जगों पर भ्वींचळा आला, अर अकाळ पोड़लु। अर यों सब बातों से त बस दुख की शुरुवात होलि।</verse>
				<verse number="9">“पर तुम अपणा बारा मा चौकस रा, किलैकि लोग तुमतै न्याय समितियों का हवाला करला अर तुमतै प्रार्थना भवनों मा पिटला, अर मेरा खातिर लोग तुमतै अधिकारीयों अर राजाओं का समणि खड़ा करला, अर यू वु अवसर होलु, जब तुम मेरा बारा मा बता।</verse>
				<verse number="10">पर जरुरी यू च, कि पैलि शुभ समाचार को परचार सब जातियों मा किये जौ।</verse>
				<verse number="11">जब लोग तुमतै लि जैके ऊं लोगु का हवाला करला, त तुम पैलि बटि इन चिन्ता नि कर्यां कि हमुन क्या जि बोन्‍न, किलैकि पवित्र आत्मा वे ही बगत तुमतै सिखालु कि बोन्‍न क्या च। अर तुम उई बुलयां, किलैकि बुलण वळा तुम नि छाँ बल्किन मा पवित्र आत्मा च।</verse>
				<verse number="12">अर भै अपणा ही भै तैं मरणु खुणि पकड़वै द्‍याला, अर ठिक उन्‍नि बुबा भि अपणा नौना तैं मरणु खुणि पकड़वै द्‍याला, अर बच्‍चा अपणा ब्वे-बाब का खिलाप मा ह्‍वेके ऊंतैं मरवै द्‍याला।</verse>
				<verse number="13">अर मेरा नौ का खातिर सब लोग तुम बटि नफरत करला, पर जु आखिरी तक सबर रखलु वेतैं ही बचयै जालु।</verse>
				<verse number="14">“अर यीशु न इन भि बोलि, ‘अर जब तुम खण्डर करण वळी वीं अशुद्ध चीज तैं ज्वा की वीं जगा पर खड़ि किये जाणि हो, इन होन्द दिखल्या, जख कि वींतैं नि होण चयेणु (जु पढणु च उ ईं बात तैं समझि ल्यो) तब जु यहूदिया मुलक मा हो उ पाड़ो जनै भागी जौ।</verse>
				<verse number="15">अर जु कुई छत मा हो उ मूड़ी नि उतरो, अर ना ही उ घौर बटि कुछ लेणु खुणि भितर जौ।</verse>
				<verse number="16">अर जु पुंगड़ा मा हो, उ अपणु कपड़ा लेणु कू पिछनै नि जौ।</verse>
				<verse number="17">अर ऊं दिनों मा जु गरवति होलि, या अपणा बच्‍चों तैं दूद पिलाणि होलि, ऊं खुणि यू दिन भौत पीड़ा देण वळा होला।</verse>
				<verse number="18">अर इन प्रार्थना कैरा कि तुमतै ह्‍यूँद का दिनों मा नि भगण पोड़ो,</verse>
				<verse number="19">किलैकि तब संकट का इन्द्रया दिन आला, याने कि इन्द्रयो संकट जु की परमेस्वर की बणईं ईं दुनियां की शुरुवात बटि नऽ त अभि तक ऐनी, अर ना ही फिर कभि आला।</verse>
				<verse number="20">अर अगर जु प्रभु ऊं दिनों की गिनती कम नि करदु, त कुई भि मनखि नि बचदु, मगर जौं लोगु तैं परमेस्वर न चुण्यालि, ऊं लोगु का खातिर ही वेन ऊं दिनों की गिनती कम कैरी।’</verse>
				<verse number="21">अगर वे बगत मा लोग तुमकु बुलला कि, ‘देखा मसीह इख च’ या ‘देखा मसीह उख च,’ त तुम यकीन नि कर्यां।”</verse>
				<verse number="22">किलैकि झूठ्‍ठा मसीह अर झूठ्‍ठा रैबर्या ऐ जाला, अर इन ह्‍वे सकदु कि चुण्यां लोगु तैं भरमौण खुणि ऊ बड़ा-बड़ा चिन्‍न अर चमत्कार का काम कैरिके दिखाला।</verse>
				<verse number="23">पर तुम लोग चौकस रा, सुणा, यू सब कुछ मिन तुमतै पैलि ही बतैयालि।</verse>
				<verse number="24">अर यीशु न चेलों कू इन भि बोलि, “ऊं दिनों मा ये संकट का तुरन्त बाद सूरज अन्धेरु ह्‍वे जालु, अर चाँद भि अपणु उज्याळु देण बन्द कैरी दयालु,</verse>
				<verse number="25">अर आसमान का गैंणा मूड़ी पोड़ि जाला, अर जु कुछ भि आसमान मा च वु सब कुछ इनै-उनै ह्‍वे जालु।</verse>
				<verse number="26">तब लोग मनखि का पुत्र तैं बादळों मा बड़ी ताकत अर बड़ा आदर-सम्मान का साथ मा वापस औन्द दिखला।</verse>
				<verse number="27">अर वे बगत मनखि को पुत्र अपणा स्वर्गदूतों तैं भेजलु, ताकि वु वेका चुण्यां लोगु तैं पूरि दुनियां का हरेक दिसा से इकट्‍ठा कैरा।”</verse>
				<verse number="28">तब यीशु न ऊंकू बोलि, “तिमला का डाळा बटि इन सबक सीखा। जब वे पर फौंका लगदिन, अर कुंगळा पत्ता निकळण शुरु ह्‍वे जनदिन, त तुमतै पता लगि जान्दु कि रुड़्यूं का दिन नजदीक ऐ गैनी।</verse>
				<verse number="29">ठिक उन्‍नि जब तुम ऊं बातों तैं होन्द दिखल्या, त समझि ज्यां कि मनखि का पुत्र को वापस औण नजदीक ही च, बल्किन मा समणि ही च।</verse>
				<verse number="30">अर मि तुम बटि सच्‍च बोन्‍नु छौं कि जब तक यू सब बात पूरि नि ह्‍वे जालि, तब तक ईं पीढ़ी को अन्त नि होलु।</verse>
				<verse number="31">आसमान अर धरती को नास ह्‍वे जालु, मगर मेरी बुलिं बात कभि नि टळळि।”</verse>
				<verse number="32">अर यीशु न चेलों कू इन भि बोलि, “वे दिन अर वे बगत का बारा मा कुई भि नि जणदु, नऽ त स्वर्गदूत अर ना ही पुत्र, पर केवल पिता परमेस्वर ही जणदु।</verse>
				<verse number="33">इलै चौकस रा अर बिज्यां रा, किलैकि तुम नि जणद्‍यां कि उ बगत कब ऐ जालु।</verse>
				<verse number="34">“अब मि तुमतै वे दिन अर वे बगत का बारा मा एक उदारण बतौन्दु, एक दिन एक मनखि जैन परदेस जाण का बगत अपणा घौर की जबाबदारी अपणा नौकरों का हाथों मा सौंप दिनी, अर हरेक तैं वेको काम बतै, अर पैरेदार तैं आज्ञा दिनी की चौकस रै।</verse>
				<verse number="35">ठिक उन्‍नि तुम भि चौकस रा, किलैकि तुम नि जणद्‍यां कि घौर को मालिक कब ऐ जालु, ह्‍वे सकदु रुमुक होण पर या अधि रात मा, या फिर रात खुलण का बगत मा, या सुबेर लेके,</verse>
				<verse number="36">कखि इन ना हो कि वु अचानक ऐ जौ, अर तुमतै सियूं देखो।</verse>
				<verse number="37">अर जु कुछ मि तुम बटि बोन्‍नु छौं उई मि सभ्यों कू बुल्दु कि, चौकस रा।”</verse>
			</chapter>
			<chapter number="14">
				<verse number="1">अर दुई दिन का बाद फसह को त्योवार अर अखमीरी रुट्‍टी को त्योवार औण वळु छौ। अर मुख्य पुरोहित अर शास्‍त्री लोग, ईं बात की फिराक मा छा कि कनकै यीशु का दगड़ा मा छल कैरिके वेतैं पकड़ै जौ अर जान से मरे जौ।</verse>
				<verse number="2">पर ऊ इन बुलणा छा कि, “त्योवार का यों दिनों मा इन नि करद्‍यां, कखि लोगु मा घपरोळ नि मची जौ।”</verse>
				<verse number="3">अर ऊं ही दिनों मा यीशु बैतनिय्याह गौं मा शमौन नौ का एक मनखि का घौर खाणुक खाणु कू बैठयूं छौ, जु कि पैलि कोड़ी छौ। अर वे ही बगत एक जनानि संगमरमर की बोतल मा शुद्ध इतर लेके ऐ, जु कि बड़ु कीमती अर खुशबुदार छौ, अर जटामांसी पौद को बणयूं छौ। अर वींन बोतल का मुख तैं तोड़ि, अर यीशु का मुण्ड़ मा अखणै दिनी।</verse>
				<verse number="4">अर यू देखि के उख बैठयां कुछ लोग खिरसे के बोन्‍न लगि गैनी, “ईं न यू इतर किलै बरबाद कैरी?</verse>
				<verse number="5">किलैकि यू इतर त तीन सौ दीनार से भि जादा मा बिकी सकदु छौ, अर गरीबों तैं दिये जै सकदु छौ।” अर इन बोलि के वु वींतैं झिड़कण लगि गैनी।</verse>
				<verse number="6">अर यीशु न बोलि, “तुम ईं जनानि तैं किलै सतौणा छाँ, वींकू कुछ नि बोला? किलैकि वींन त मि खुणि एक भलु काम ही कैरी।</verse>
				<verse number="7">अर गरीब त हमेसा तुमरा दगड़ा मा राला, अर जब तुम चा तब ऊंका दगड़ा मा भलै कैरी सकद्‍यां, मगर मिन तुमरा दगड़ा हमेसा नि रौण।</verse>
				<verse number="8">अर जु कुछ वीं से ह्‍वे सकदु छौ वींन वु काम कैरी, अर मेरा सरील तैं कबरुन्द रखण की तयारी मा वींन यू खुशबुदार इतर लगै।</verse>
				<verse number="9">अर मि तुम बटि सच्‍च बोन्‍नु छौं, कि पूरि दुनियां मा जख-जख ये शुभ समाचार को परचार किये जालु, उख-उख ईं जनानि तैं याद करणु खुणि ईं का ये काम का बारा मा बतये जालु।”</verse>
				<verse number="10">तब यीशु का बारह चेलों मा बटि यहूदा इस्करियोती मुख्य पुरोहितों का पास गै, ताकि उ वेतैं धोखा से पकड़वै द्‍यो।</verse>
				<verse number="11">अर वेकी बात तैं सुणी के वु लोग भौत खुश ह्‍वेनि, अर वेतैं रुपया देण को करार कैरी। अर तब बटि यहूदा इस्करियोती यीशु तैं पकड़वौण को मौका खुज्याण लगि गै।</verse>
				<verse number="12">अर तब अखमीरी रुट्‍टी का त्योवार को पैलु दिन ऐ, अर ये दिन पर लोग फसह का त्योवार खुणि मेम्‍ना को बलिदान करदिन। तब चेलों न यीशु बटि पूछी, “गुरुजी, तुम कख चन्द्‍यां, कि हम तुम खुणि फसह खाण की तयारी कैरा?”</verse>
				<verse number="13">अर वेन अपणा चेला मा बटि दुई चेलों तैं इन बोलि के भेजि कि, “यरूशलेम नगर मा जा, उख तुमतै एक मनखि पाणि भाँडु लि जान्द दिख्यालु, तुम वेका पिछनै-पिछनै जयां,</verse>
				<verse number="14">अर जै घौर मा उ जालु, तुम वे घौर का मालिक कू इन बुलयां कि, ‘गुरुजी को बुलयूं च कि मैमानों को उ कमरा कख च, जख मिन अपणा चेलों का दगड़ा मा फसह को खाणुक खाण?’</verse>
				<verse number="15">तब उ मनखि तुमतै मंज्यूळ मा तयार कर्युं एक बड़ु कमरा दिखालु, अर तुम उखि खाण की तयारी कैरा।”</verse>
				<verse number="16">तब ऊ दुईया का दुई नगर मा ऐनी, अर जन यीशु न ऊंतैं बतै छौ ऊंन उन्‍नि पै, अर फसह की तयारी कैरी।</verse>
				<verse number="17">अर जब रुमुक ह्‍वे, त यीशु अपणा बारह चेलों का दगड़ा मा उख ऐ।</verse>
				<verse number="18">अर जब ऊ बैठि के खाणु खाणा छा, त यीशु न ऊंकू बोलि, “मि तुम से सच्‍चि बोन्‍नु छौं, कि तुम मा बटि एक जु मेरा दगड़ा खाणुक खाणु च उ मितैं धोखा से पकड़वै द्‍यालु।”</verse>
				<verse number="19">अर या बात सुणी के ऊ उदास ह्‍वे गैनी, अर एक-एक कैरिके वेसे पूछण लगि गैनी कि, “गुरुजी, कखि उ मि त नि छौं?”</verse>
				<verse number="20">अर वेन ऊंकू बोलि, “वु तुम बारहों मदि च, जु कि मेरा दगड़ा कटोरा मा रुट्‍टी डुबै के खाणु च।</verse>
				<verse number="21">किलैकि मनखि का पुत्र खुणि जन लिख्यूं च वेका दगड़ा मा उन्‍नि होलु, मगर हाय च वे मनखि पर जैका द्‍वारा मनखि को पुत्र पकड़वै जान्दु, वे मनखि खुणि त भलु यू ही छौ कि वेको जनम ही नि होन्दु।”</verse>
				<verse number="22">अर जब ऊ सब खाणु खाणा छा, त यीशु न रुट्‍टी ले अर परमेस्वर को धन्यवाद देके तोड़ि, अर चेलों तैं देके बोलि, “ल्या, येतैं खा यू मेरु बदन च।”</verse>
				<verse number="23">तब वेन अंगूरों को रस को कटोरा उठे अर परमेस्वर को धन्यवाद कैरिके ऊंतैं दे, अर ऊं सभ्यों न वामा बटि पेई।</verse>
				<verse number="24">अर वेन ऊंकू बोलि, “यू अंगूरों को रस मेरु ल्वे च जु भौत सा लोगु खुणि बुगये जान्दु। अर येका द्‍वारा पिता परमेस्वर लोगु का बीच मा एक नयू करार बणौन्दु।</verse>
				<verse number="25">मि तुम बटि सच्‍च बोन्‍नु छौं, कि मि अंगूरों को यू रस वे दिन तक नि प्यूलु, जब तक की परमेस्वर का राज मा नयू रस नि प्यों।”</verse>
				<verse number="26">अर परमेस्वर की भक्‍ति का गीत गाण का बाद ऊ जैतून नौ का पाड़ पर चलि गैनी।</verse>
				<verse number="27">तब यीशु न अपणा चेलों कू बोलि, “तुम सब मितैं छोड़ि के चलि जैल्या, किलैकि पवित्रशास्‍त्र मा लिख्यूं च कि, “‘मि चरवाह तैं मरलु, अर झुण्ड की भेड़ तितर-बितर ह्‍वे जालि।’</verse>
				<verse number="28">पर मि मुरदो मा बटि ज्यून्द होण का बाद तुम से पैलि गलील मुलक कू जौलु।”</verse>
				<verse number="29">अर यू सुणी के पतरस न वेकू बोलि, “गुरुजी, सब तुमतै छोड़ि के जै सकदिन, मगर मिन तुमतै छोड़ि के कभि नि जाण।”</verse>
				<verse number="30">अर यीशु न वेकू बोलि, “पतरस, मि त्वे बटि सच्‍चि बोन्‍नु छौं, कि आज रात ही मैर का दुई बार बसण से पैलि तिन मितैं तीन दौं नकारी देण।”</verse>
				<verse number="31">मगर पतरस न अपणी ही बात पर जोर रखी के बोलि, “गुरुजी, अगर मितैं तुमरा दगड़ा मा मुरण भि पोड़लु, तभि भि मि तुमतै नि नकरुलु।” अर ठिक इन्‍नि सब चेलों न भि बोलि।</verse>
				<verse number="32">तब यीशु अपणा चेलों का दगड़ा मा गतसमनी नौ की एक जगा मा ऐ अर वेन चेलों कू बोलि, “जब तक मि प्रार्थना करदु, तब तक तुम इखि बैठयां रा।”</verse>
				<verse number="33">तब यीशु अपणा दगड़ा मा पतरस, याकूब अर यूहन्‍ना तैं लेके गै, अर उ भौत उदास ह्‍वे गै अर हकबकौण लगि गै।</verse>
				<verse number="34">अर यीशु न ऊंकू बोलि, “मेरु ज्यू भौत दुखी च, इन लगणु च कि मेरु पराण निकळण वळु होलु। तुम इख रुका अर मेरा दगड़ा मा बिज्यां रा।”</verse>
				<verse number="35">तब यीशु कुछ दूर गै अर भ्वीं मा पोड़ि के प्रार्थना करण लगि गै कि, “हे पिता, अगर इन ह्‍वे सकदु च, त यू जु बगत च उ मेरा समणि बटि हटि जौ।”</verse>
				<verse number="36">अर वेन इन भि बोलि, “अब्बा, मेरा पिता, तुम बटि त सब कुछ ह्‍वे सकदु, इलै दुख का ये बगत तैं मेरा समणि बटि हटै द्‍या, तभि भि जन मि चान्दु उन ना, पर जन तुमरि मनसा च ठिक उन्‍नि हो।”</verse>
				<verse number="37">फिर यीशु ऊं तीनों का पास ऐ अर ऊंतैं सियूं देखि के वेन शमौन पतरस कू बोलि, “शमौन तू सिंणी छैई, क्या तू मि खुणि एक घन्टा भि बिज्युं नि रै सैकी?</verse>
				<verse number="38">अरे, बिज्यां रा, अर प्रार्थना कना रा, ताकि शैतान तुमतै नि भकलौ, तुमरो मन त छैई च कि बिज्यां रा, मगर तुमरो सरील साथ नि देणु।”</verse>
				<verse number="39">तब यीशु फिर से चलि गै, अर जैके उन्‍नि प्रार्थना कैरी जन वेन पैलि कैरी छै।</verse>
				<verse number="40">अर कुछ देर बाद उ दुबरा ऊं तीनों का पास ऐ अर ऊंतैं फिर से सियूं देखि, किलैकि ऊंका आंख्यों मा निन्द बौळीं छै, अर चेला नि जणदा छा कि वेतैं क्या जबाब देण।</verse>
				<verse number="41">तब तिसरी दौं उ फिर से वापस ऐ, अर वेन ऊंकू बोलि, “अरे, तुम अभि तक सिणा छाँ अर आराम करण पर लग्यां छाँ, सुणा, अब उ बगत ऐ गै कि मनखि को पुत्र पापि लोगु का हाथ मा पकड़वै जाणु च।</verse>
				<verse number="42">अब उठा अर इख बटि चला। देखा, मितैं पकड़वौण वळु नजदीक ऐ गै।”</verse>
				<verse number="43">अर जब यीशु या बात बोन्‍नु ही छौ कि तबरि यहूदा इस्करियोती उख ऐ गै जु की बारह चेलों मदि एक छौ। अर वेका दगड़ा मा एक बड़ी भीड़ छै, जौं का हाथों मा तलवार अर लाठा छा। अर यों लोगु तैं मुख्य पुरोहित, शास्‍त्री अर यहूदी अध्यक्षों का द्‍वारा भिजे गै छौ।</verse>
				<verse number="44">अर धोखा से पकड़वौण वळा यहूदा न ऊंतैं एक चिन्‍न बतयूं छौ, कि जैकी भूकि मि प्यूलु, तुम वेतैं पकड़यां अर अंक्‍वे लि जयां।</verse>
				<verse number="45">अर वेन यीशु का पास ऐके वेकू बोलि, “गुरुजी।” अर वेन यीशु की भूकि पे।</verse>
				<verse number="46">तब ऊं लोगु न यीशु तैं पकड़ी के अपणी हिरासत मा ले दिनी।</verse>
				<verse number="47">मगर जु लोग यीशु का पास खड़ा होयां छा, ऊंमा बटि कै एक न तलवार निकाळि के महा पुरोहित का नौकर पर चलै अर वेको कन्दूड़ उड़ै दिनी।</verse>
				<verse number="48">तब यीशु न ऊंकू बोलि, “क्या तुम मितैं डाकु समझद्‍यां, कि जु तुम मितैं पकड़णु खुणि तलवार अर लाठा लेके अयां?</verse>
				<verse number="49">मि त हरेक दिन मन्दिर मा तुमरा समणि रै के ही लोगु तैं सिखौन्दु छौ, तब त तुमुन मितैं नि पकड़ी, पर यू सब त इलै होणु च ताकि पवित्रशास्‍त्र की बात पूरि हो, जु कि मेरा बारा मा लिखी छिन।”</verse>
				<verse number="50">अर यू होण पर यीशु का सब चेला वेतैं छोड़ि के भागी गैनी।</verse>
				<verse number="51">पर एक ज्वान मनखि यीशु का पिछनै-पिछनै ऐ, अर ये मनखि न अपणा बदन पर मखमल को चदरो उड़युं छौ। अर ऊं लोगु न वेतैं पकड़ी,</verse>
				<verse number="52">मगर उ अपणा चदरा तैं छोड़ि के उख बटि नंग्यों-नंगि भागी गै।</verse>
				<verse number="53">तब जौं लोगु न यीशु तैं पकड़ी छौ, ऊ वेतैं महा पुरोहित का पास लेके गैनी, अर उख सब मुख्य पुरोहित, शास्‍त्री अर अध्यक्ष लोग इकट्‍ठा होयां छा।</verse>
				<verse number="54">पर पतरस काफी दूर ह्‍वेके यीशु का पिछनै-पिछनै महा पुरोहित का चौक तक पौंछी गै। अर भितर जैके पैरादारों का दगड़ा मा बैठि के आग तपण लगि गै।</verse>
				<verse number="55">तब मुख्य पुरोहित अर न्याय समिति का सब लोग यीशु का खिलाप मा झूठ्‍ठी गवै की तलास मा छा, ताकि वेतैं ऊ मरवै द्‍या, मगर ऊंतैं ठिक गवै नि मिली।</verse>
				<verse number="56">किलैकि भौत सा लोग वेका खिलाप झूठ्‍ठी गवै देणा छा, मगर ऊं सब लोगु की गवै अलग-अलग किसमे छै।</verse>
				<verse number="57">तब कुछ लोगु न उठी के यीशु का खिलाप मा इन झूठ्‍ठी गवै दिनी कि,</verse>
				<verse number="58">“हम लोगु न येतैं इन बुल्द सुणी कि, ‘मि हाथ का बणयां ये मन्दिर तैं ढोळि द्‍यूलु, अर तीन दिन मा दुसरो बणै द्‍यूलु, जु कि हाथों को बणयूं नि होलु।’”</verse>
				<verse number="59">मगर या गवै भि ऊंकी अलग-अलग किसमे छै।</verse>
				<verse number="60">तब न्याय समिति का बीच मा महा पुरोहित न खड़ु ह्‍वेके यीशु कू बोलि, “तू कुई जबाब किलै नि देणी? अर यू क्या बात छिन, जु कि लोग तेरा खिलाप मा इथगा किसमे गवै देणा छिन।”</verse>
				<verse number="61">पर यीशु चुप रै, अर वेन वेतैं कुई जबाब नि दिनी। तब महा पुरोहित न फिर से पूछी, “एक ही परमेस्वर च जु की भक्‍ति का लैख च अर क्या तू वेको पुत्र मसीह छैई?”</verse>
				<verse number="62">तब यीशु न बोलि, “मि छौं, तुम लोग मनखि का पुत्र तैं बड़ा आदर का साथ ताकतबर परमेस्वर की दैंणी तरफा बैठयूं, अर आसमान मा बादळों पर औन्द दिखल्या।”</verse>
				<verse number="63">अर ईं बात तैं सुणी के महा पुरोहित न अपणा कपड़ा फाड़ी के बोलि, “अब हमतै गवाओ की कुई जरुरत नि च,</verse>
				<verse number="64">येन परमेस्वर की बेजती कैरी क्या तुमुन नि सुणी? अब मितैं इन बता की तुमरो क्या विचार च।” तब ऊं सब लोगु न वेतैं जबाब दिनी, “यू त मौत की सजा का लैख च।”</verse>
				<verse number="65">तब कुछ लोगु न यीशु का मुख पर थूकि, अर कुछ न वेका मुख पर कपड़ा लपेटि के मुक्‍का मरनि, अर वेकू बोलि, “चल अब हमतै इन बतौ कि कैन त्वेतै मारी।” अर पैरादारों न वेतैं पकड़ी के थप्पड़ै।</verse>
				<verse number="66">अर जब पतरस मूड़ी चौक मा बैठयूं छौ, त महा पुरोहित की नौकराणियों मा बटि एक उख ऐ,</verse>
				<verse number="67">त वींन पतरस तैं आग तपण दौं एक-टक ह्‍वेके देखि। अर वेकू बोलि, “अरे, तू भि त नासरत गौं का यीशु का दगड़ा मा छे।”</verse>
				<verse number="68">अर वेन नकारी के बोलि, “मि नि जणदु, अर ना ही समझदु कि तू क्या बोन्‍नि छैई।” तब उ उख बटि भैर गेट का पास चलि गै, अर मैर बासी गै।</verse>
				<verse number="69">अर वीं नौकराणि न पतरस तैं फिर से देखि, अर उख खड़ा होयां लोगु कू बोलि, “यू मनखि भि ऊं मदि एक च।”</verse>
				<verse number="70">मगर वेन फिर से नकारी दिनी। अर कुछ देर बाद जु लोग पतरस का आस-पास खड़ा होयां छा ऊंन वेकू बोलि, “सच्‍चि मा तू भि ऊं मदि एक छैई, किलैकि तू भि गलील मुलक को छैई।”</verse>
				<verse number="71">तब पतरस न कसम खै के बोलि, “जै मनखि का बारा मा तुम बात कना छाँ मि वेतैं नि जणदु, अगर जणदु त मि पर असगार लगु।”</verse>
				<verse number="72">अर जन्‍नि वेन इन बोलि तन्‍नि मैर दुसरि दौं बासी गै। अर पतरस तैं यीशु की बुलिं वा बात याद ऐ कि, “मैर का दुई दौं बसण से पैलि, तू तीन दौं मितैं नकारी दिली।” तब उ ईं बात तैं सोची के भकोरि-भकोरि के रुंण लगि गै।</verse>
			</chapter>
			<chapter number="15">
				<verse number="1">अर सुबेर होन्दी सब मुख्य पुरोहित, अध्यक्ष लोग अर शास्‍त्री अर पूरि न्याय समिति का लोगु न सला कैरिके यीशु तैं बन्धवै अर वेतैं लि गैनी, अर गवर्नर पिलातुस का सुपुर्द कैर दिनी।</verse>
				<verse number="2">तब पिलातुस न यीशु बटि पूछी, “क्या तू यहूदियों को राजा छैई?” वेन वेकू बोलि, “तुम अफि बोन्‍ना छाँ”</verse>
				<verse number="3">अर मुख्य पुरोहित भौत सि बातों को इळजाम यीशु पर लगौणा छा।</verse>
				<verse number="4">इलै पिलातुस न एक बार फिर वेसे पूछी, “अरे देख, यू लोग तेरा खिलाप मा कथगा इळजाम लगौणा छिन, तू यों बातों को जबाब किलै नि देणी?”</verse>
				<verse number="5">पर यीशु न वेतैं कै भि बात को जबाब नि दिनी, अर यू देखि के गवर्नर तैं बड़ु ताजुब ह्‍वे।</verse>
				<verse number="6">अर फसह का त्योवार पर हर साल इन रिवाज छौ, कि जै कैदी तैं लोग गवर्नर बटि मंगदा छा, वु ऊं लोगु खुणि वे कैदी तैं छोड़ि देन्दु छौ।</verse>
				<verse number="7">अर ये बगत मा बरअब्बा नौ को एक मनखि छौ, जु कि रोमी राज्य का खिलाप मा विरोध करण वळु छौ। अर यू विरोध अर लोगु की हत्या करण की वजै से जेलखाने मा बन्द छौ।</verse>
				<verse number="8">तब भीड़ का लोग मथि पिलातुस का पास जैके वेसे बिन्ती करण लगि गैनी कि, “साब, जन तुम हम खुणि अभि तक करदी औणा छाँ उन्‍नि अबरि दौं भि कैरा।”</verse>
				<verse number="9">तब वेन ऊंतैं जबाब दिनी, “तुम क्या चन्द्‍यां? क्या मि तुम खुणि यहूदियों का राजा तैं छोड़ि द्‍यू?”</verse>
				<verse number="10">अर पिलातुस न या बात इलै बोलि, किलैकि उ जणदु छौ कि मुख्य पुरोहितों न यीशु तैं जलन रखण की वजै से पकड़वयुं च।</verse>
				<verse number="11">पर मुख्य पुरोहितों न भीड़ का लोगु तैं उकसै, कि ऊ बरअब्बा तैं आजाद करण की मांग कैरा।</verse>
				<verse number="12">अर या बात सुणी के गवर्नर पिलातुस न ऊं लोगु बटि फिर पूछी, “त जैकू तुम यहूदियों को राजा बुल्द्‍यां, वेका दगड़ा मा मि क्या कैरुं?”</verse>
				<verse number="13">फिर ऊंन चिल्‍लै के बोलि, “वेतैं क्रूस पर चड़ै द्‍या, वेतैं क्रूस पर चड़ै द्‍या।”</verse>
				<verse number="14">वेन ऊंकू बोलि, “किलै, वेन क्या अपराध कैरी?” पर लोग और भि चिल्‍लै-चिल्‍लै के बोन्‍न लगि गैनी, “वेतैं क्रूस पर चड़ै द्‍या, वेतैं क्रूस पर चड़ै द्‍या।”</verse>
				<verse number="15">तब पिलातुस न भीड़ तैं खुश करण की इच्छा से बरअब्बा तैं ऊं लोगु खुणि छोड़ दिनी, अर यीशु तैं कोड़ा मरवै के रोमी सिपयों का हवाला करवै दिनी, ताकि वु यीशु तैं क्रूस पर चड़ै द्‍या।</verse>
				<verse number="16">अर येका बाद सिपै यीशु तैं गवर्नर पिलातुस का राजमहल का चौक मा लि गैनी, जैकू प्रीटोरियुम बुले जान्दु। अर उख सिपयों की पूरि पलटण तैं एक साथ बुलै।</verse>
				<verse number="17">अर ऊंन वेतैं बैंगनि रंग को कपड़ा पेनै, अर कांडों को एक मुकुट बूणी के वेका मुण्ड़ मा रखी,</verse>
				<verse number="18">अर मजाक मा वेतैं नमस्कार कैरिके बोलि, “हे यहूदियों का राजा तेरी जै हो।”</verse>
				<verse number="19">अर ऊंन वेका मुण्ड़ पर निगुंला का जांठा से मारी, अर वे पर थूकि, अर वेका अगनै घुंडा टेकी के वेकी बेजती करणु खुणि वेतैं नमस्कार कैरी।</verse>
				<verse number="20">अर जब ऊंन यीशु को खूब मजाक उड़ै दिनी, तब ऊंन उ बैंगनि कपड़ा उतारि अर फिर वेका कपड़ा वेतैं पेनै दिनी। तब वु यीशु तैं क्रूस पर चड़ौणु खुणि उख बटि भैर लि गैनी।</verse>
				<verse number="21">अर वे ही बाटा पर शमौन नौ को एक मनखि कै गौं बटि औणु छौ। अर उ कुरेन नगर को रौण वळु छौ, अर सिकन्दर अर रूफुस येका ही नौना छा। तब सिपयों न वेतैं मजबूर कैरी, कि उ यीशु की क्रूस तैं उठे के लि जौ।</verse>
				<verse number="22">अर वु लोग यीशु तैं गुलगुता नौ की जगा पर लि गैनी, (गुलगुता को मतलब च खोपड़ि की जगा)।</verse>
				<verse number="23">अर उख ऊंन यीशु तैं गंधरस मिल्यूं अंगूरों को रस पीणु कू दे, पर वेन नि पे।</verse>
				<verse number="24">तब ऊंन वेतैं क्रूस पर चड़ै, अर वेका कपड़ों खुणि पांसा डलिनी कि वु कैतैं जि मिलला, अर इन कैरिके ऊंन कपड़ा आपस मा बांट दिनी।</verse>
				<verse number="25">अर सुबेर नौ बजी का करीब ऊंन वेतैं क्रूस पर चड़ै।</verse>
				<verse number="26">अर वे पर लग्यां इळजाम तैं एक पाटि मा लिख्वे के क्रूस पर लगवै दिनी, अर वीं पाटि मा इन लिख्यूं छौ कि, “यहूदियों को राजा।”</verse>
				<verse number="27">अर यीशु का दगड़ा-दगड़ि दुई और डाकुओं तैं भि क्रूस पर चड़ये गै, एक तैं वेकी दैंणी तरफा अर दुसरा तैं वेकी बैं तरफा। [</verse>
				<verse number="28">अर तब पवित्रशास्‍त्र को वु वचन पूरु ह्‍वे जु कि इन च कि, “उ अपराधियों का दगड़ा मा गिणै गै।”]</verse>
				<verse number="29">अर जु लोग उख बटि औणा-जाणा छा वु अपणु मुण्ड़ हिलै-हिलै के इन बोलि के वेकी बेजती कना छा कि, “हे मन्दिर का नास करण वळा, अर तीन दिन मा वेतैं बणौण वळा,</verse>
				<verse number="30">अरे क्रूस बटि मूड़ी उतर, अर खुद तैं बचौ।”</verse>
				<verse number="31">अर ठिक इन्‍नि मुख्य पुरोहित, शास्‍त्री यीशु को मजाक उड़ै के अपणा आपस मा बोन्‍ना छा कि, “अरे येन दुसरो तैं बचै, पर अब खुद तैं नि बचै सकणु।</verse>
				<verse number="32">इस्राएल को राजा मसीह, अगर यू क्रूस बटि उतरि के ऐ जालु, त हम भि देखि के बिस्वास करुला।” अर जु दुई डाकु यीशु का दगड़ा क्रूस पर चड़ये गै छा, वु भि यीशु कू ज्या कुछ बोलि के वेकी बेजती कना छा।</verse>
				<verse number="33">दुफरा का बारह बजी बटि लेके तीन बजी तक पूरा देस मा अन्धेरु होयुं रै।</verse>
				<verse number="34">अर तीन बजी यीशु न ऊँची आवाज मा चिल्‍लै के बोलि, “इलोई, इलोई, लमा शबक्‍तनी?” ज्यां को मतलब इन च कि, “हे मेरा परमेस्वर, हे मेरा परमेस्वर, तुमुन मितैं किलै छोड़याली?”</verse>
				<verse number="35">अर जु लोग यीशु का पास खड़ा होयां छा, ऊंमा बटि कुछ लोगु न ईं बात तैं सुणी के बोलि कि, “अरे सुणा, यू त एलिय्याह तैं बुलाणु च।”</verse>
				<verse number="36">तब तुरन्त एक मनखि भागी के गै अर वेन एक स्पंच तैं सिरका मा भिजे, अर निगुंला पर स्पंच रखी के वेतैं पीणु कू दिनी अर बोलि, “रुकी जा, चला दिखद्‍यां कि एलिय्याह येतैं मूड़ी उतरणु खुणि मूड़ी औन्दु च, कि ना।”</verse>
				<verse number="37">पर यीशु ऊँची आवाज मा चिल्‍लै, अर वेन अपणा पराण छोड़ि दिनी।</verse>
				<verse number="38">अर वे ही बगत मन्दिर को परदा मथि बटि मूड़ी तक दुई हिस्सों मा फटी गै।</verse>
				<verse number="39">अर जु रोमी सुबेदार यीशु का पास खड़ु छौ, जब वेन यू देखि कि कनकै यीशु न अपणा पराण तैं छोड़ि त वेन बोलि, “सच्‍चि मा यू परमेस्वर को पुत्र छौ।”</verse>
				<verse number="40">अर कुछ जनानियां भि दूर बटि यू सब होन्द दिखणी छै, ऊं जनानियों मा बटि एक मगदला गौं की मरियम, अर छुटो याकूब अर योसेस की माँ मरियम, अर सलोमी छै।</verse>
				<verse number="41">अर जब यीशु गलील मुलक मा छौ, त यू जनानियां भि वेका पिछनै-पिछनै ह्‍वे गै छै, अर वेकी सेवा करदी छै। अर उख और भि जनानियां छै जु कि यीशु का दगड़ा यरूशलेम नगर बटि अईं छै।</verse>
				<verse number="42">अर रुमुक ह्‍वे छै, अर सब्त का दिन की तयारी भि करण छै किलैकि दुसरो दिन सब्त को दिन छौ।</verse>
				<verse number="43">अर वे बगत मा अरिमतिया नगर मा रौण वळु यूसुफ नौ को एक मनखि जु कि न्याय समिति को एक इज्‍जतदार सदस्य छौ, अर उ खुद परमेस्वर का राज को इंतजार कनु छौ, उ बड़ी हिम्मत कैरिके गवर्नर पिलातुस का पास गै। अर वेन वेसे यीशु की लांश लि जाण की मांग कैरी।</verse>
				<verse number="44">अर जब गवर्नर पिलातुस न या बात सुणी कि यीशु इथगा जल्दी मोरि गै त वेतैं बड़ु ताजुब ह्‍वे। तब वेन रोमी सुबेदार तैं बुलै के पूछी, “क्या यीशु मोरि गै?”</verse>
				<verse number="45">अर जब सुबेदार का द्‍वारा वेतैं यीशु का बारा मा पता चलि, तब पिलातुस न यीशु की लांश तैं लि जाण की आज्ञा दे दिनी।</verse>
				<verse number="46">तब यूसुफ न मखमल को एक चदरो खरीदी, अर यीशु की लांश तैं क्रूस बटि उतरवै के चदरा मा लपेटि। अर उख चटान तैं खोदी के एक कबर बणईं छै, तब वेन लांश तैं उख रख दिनी, अर कबर का मुख पर एक बड़ु डांग रड़के के लगै।</verse>
				<verse number="47">अर यीशु की लांश कख रखै जाणि च, इन होन्द मगदला गौं की मरियम अर योसेस की माँ मरियम न देखि।</verse>
			</chapter>
			<chapter number="16">
				<verse number="1">अर जब सब्त को दिन खतम ह्‍वे गै, त मगदला गौं की मरियम अर याकूब की माँ मरियम, अर सलोमी न खुशबुदार चीजों तैं खरीदी, ताकि जैके यीशु की लांश पर लगौ।</verse>
				<verse number="2">अर हप्‍ता का पैला दिन याने कि इतवार की सुबेर जब घाम औणु ही छौ, त ऊ कबर जनै गैनी।</verse>
				<verse number="3">अर वु अपणा आपस मा इन बोन्‍नि छै कि, “हम खुणि वे डांग तैं कु जि हटालु जु कि कबर का मुख पर लग्यूं च?”</verse>
				<verse number="4">मगर जब ऊंन कबर जनै देखि, त ऊंन देखि की डांग त पैलि बटि हटयुं च। अर उ डांग भौत ही बड़ु छौ।</verse>
				<verse number="5">अर जब वु कबर का भितर गैनी, त ऊंन देखि कि एक ज्वान सफेद कपड़ा पैरयूं दैंणी तरफा बैठयूं च, अर वेतैं देखि के वु भौचक ह्‍वे गैनी।</verse>
				<verse number="6">पर वेन ऊंकू बोलि, “सुणा, ताजुब नि कैरा, नासरत गौं का जै यीशु तैं क्रूस पर चड़ये गै छौ, जैतैं तुम खुज्याणा छाँ, उ मुरदो मा बटि ज्यून्दु ह्‍वे गै। अर देखा, या वा ही जगा च जख ऊंन वेतैं रखी छौ, मगर अब उ इख नि च।</verse>
				<verse number="7">पर तुम जा, अर वेका चेलों अर पतरस कू बोला कि उ तुम से पैलि गलील मुलक कू जाणु च। अर जन वेन तुम कू बोलि छौ वेका मुताबिक तुम लोग वेतैं उखि दिखल्या।”</verse>
				<verse number="8">तब वु जनानियां कबर बटि भैर ऐनी अर उख भागी के चलि गैनी, ऊ भौत हकदक अर कौंपणी छै, अर ऊंन या बात कैतैं नि बतै, किलैकि ऊ भौत डऽरयां छा। [</verse>
				<verse number="9">हप्‍ता का पैला दिन सुबेर होन्दी यीशु मुरदो मा बटि ज्यून्द होण पर सबसे पैलि मगदला गौं की मरियम तैं दिखै, अर या वा ही जनानि च जिं मा बटि यीशु न सात खबेसों तैं निकाळि छौ।</verse>
				<verse number="10">अर जु लोग यीशु का पिछनै चलण वळा छा, ऊ बड़ु शोक कना अर रुंणा छा। अर वींन ऐके ऊंतैं या खबर सुणै।</verse>
				<verse number="11">मगर जब ऊंन सुणी कि उ ज्यून्दु ह्‍वे गै अर वींन यीशु तैं देखि, त ऊंन वीं की बातों पर बिस्वास नि कैरी।</verse>
				<verse number="12">अर येका बाद यीशु का दुई चेला कै गौं कू जाणा छा, तब यीशु ऊं दुईयों तैं कै अलग ही रुप मा दिखै।</verse>
				<verse number="13">तब ऊंन जैके दुसरा लोगु तैं ईं बात कि खबर दिनी, मगर ऊं लोगु न फिर भि यों की ईं बात पर यकीन नि कैरी।</verse>
				<verse number="14">अर येका बाद जब यीशु का ग्यारा चेला खाणुक खाणु खुणि बैठयां छा, त वे बगत उ ऊंतैं दिखै। तब यीशु न ऊंका निठुर मन अर बिस्वास की कमी की वजै से ऊंतैं झिड़की, किलैकि ज्यून्द होण का बाद जौं लोगु न वेतैं देखि छौ, ऊंकी बातों पर भि यों न यकीन नि कैरी।</verse>
				<verse number="15">अर वेन ऊंकू बोलि, “तुम पूरि दुनियां मा जैके शुभ समाचार को परचार दुनियां का सब लोगु तैं सुणा।</verse>
				<verse number="16">अर जु मनखि बिस्वास करलु, अर बपतिस्मा ल्यालु, वेतैं ही बचयै जालु, पर जु मनखि बिस्वास नि करलु, वु दोषी ठैरैये जालु।</verse>
				<verse number="17">अर बिस्वास करण वळा लोगु मा यू चिन्‍न होला, वु मेरा नौ से खबेसों तैं निकळळा, अर नई-नई भाषा बुलला,</verse>
				<verse number="18">वु गुरौऔं तैं भि उठे द्‍याला, इख तक की अगर वु बिस भि पे द्‍याला, तभि भि ऊंतैं कुछ नुकसान नि होलु, वु बिमार लोगु पर अपणु हाथ रखला अर ऊ खूब ह्‍वे जाला।”</verse>
				<verse number="19">अर जब प्रभु यीशु ऊंका दगड़ा बात कैरी दिनी वेका बाद उ स्वर्ग मा उठये गै, अर परमेस्वर की दैंणी तरफा आदर-सम्मान वळी जगा मा बैठि गै।</verse>
				<verse number="20">अर चेलों न उख बटि निकळि के हरेक जगा जैके परचार कैरी। अर प्रभु भि ऊंका दगड़ा-दगड़ि काम कनु रै। अर ऊंका द्‍वारा जु चिन्‍न-चमत्कार का काम होणा छा, वेका द्‍वारा वेन इन साबित कैरी, कि जै वचन को परचार ऊ कना छिन उ वचन सच्‍चु च।]</verse>
			</chapter>
		</book>
		<book number="42">
			<chapter number="1">
				<verse number="1">प्रिय थियुफिलुस, जु बात हम सभ्यों का बीच मा ह्‍वेनि, ऊं बातों तैं शुरु बटि लेके एक-एक कैरिके लिखणु खुणि भौत लोगु न कोसिस कैरी।</verse>
				<verse number="2">अर ऊं लोगु न, जौन खुद पैलि बटि यों बातों तैं देखि अर वचन को परचार करण की सेवा कैरी, ऊंन ही यू वचन हम मा पौंछे।</verse>
				<verse number="3">श्रीमान थियुफिलुस, यों सब बातों की मिन शुरु बटि पूरि अच्छी तरौं से जाँच-पड़ताल कैरी। इलै मितैं भि यू ठिक लगि कि ऊं सब बातों तैं मि शुरु बटि लेके आखिरी तक तुम खुणि लिखु।</verse>
				<verse number="4">ताकि तुम यू जाणि जा, कि जौं बातों की शिक्षा तुमुन पै, ऊ अटल छिन।</verse>
				<verse number="5">जब हेरोदेस राजा यहूदिया का मुलक पर राज कनु छौ, तब ऊं दिनों मा जकरयाह नौ को एक पुरोहित छौ। अर उ अबिय्याह नौ का पुरोहित दल को एक सदस्य छौ। अर वेकी घरवळी को नौ इलीशिबा छौ, अर वा हारुन का वंश मदि छै।</verse>
				<verse number="6">अर यू दुईया का दुई परमेस्वर की नजर मा धरमी छा, अर यू प्रभु की सब आज्ञाओं अर विधिओं को बिन गळती कर्यां पालन करदा छा।</verse>
				<verse number="7">पर ऊंकी कुई भि औलाद नि छै, किलैकि इलीशिबा बाँझ छै। अर ऊ दुईया का दुई बुडै गै छा।</verse>
				<verse number="8">एक बार इन ह्‍वे कि, मन्दिर मा सेवा करण की बारी जकरयाह का दल की ऐ। तब पुरोहितों की रीति का मुताबिक मन्दिर मा परमेस्वर का समणि धुप जलौण खुणि परची डळै गै, अर परमेस्वर न जकरयाह तैं चुणी। इलै उ मन्दिर मा वेका समणि पुरोहित का रुप मा सेवा करण लगि गै।</verse>
				<verse number="9"></verse>
				<verse number="10">जब उ धूबत्ती जलौणु छौ, तब सब लोग भैर एकजुट ह्‍वेके वे बगत प्रार्थना कना छा।</verse>
				<verse number="11">अर वे बगत वेतैं प्रभु को एक स्वर्गदूत दिखै, जु कि धूबत्ती जलौण वळी वेदी की दैंणी तरफा खड़ु होयुं छौ।</verse>
				<verse number="12">अर वेतैं देखि के जकरयाह चौंकी गै अर भौत डौऽरी गै।</verse>
				<verse number="13">पर स्वर्गदूत न वेकू बोलि, “हे जकरयाह, डौऽर ना, किलैकि तेरी प्रार्थना तैं परमेस्वर न सुण्यालि। अर अब तेरी घरवळी इलीशिबा एक नौना तैं जनम द्‍याली, अर तू वेकू नौ यूहन्‍ना रखी।</verse>
				<verse number="14">अर वेका बानो त्वेतै आनन्द अर खुशी होलि, अर वेका पैदा होण से भौत सरा लोग आनन्द मणाला।</verse>
				<verse number="15">किलैकि उ प्रभु का दिखण मा महान होलु, अर उ अंगूरों को रस या कन्दरि भि दारु नि प्यालु। अर अपणी माँ का कोख बटि ही उ पवित्र आत्मा से भरपूर होलु।</verse>
				<verse number="16">अर उ इस्राएली लोगु मा बटि जु लोग प्रभु परमेस्वर बटि दूर ह्‍वे गैनी, ऊंतैं परमेस्वर की तरफा लेके आलु।</verse>
				<verse number="17">अर उ परमेस्वर का रैबर्या एलिय्याह की आत्मा अर सामर्थ पैके खुद प्रभु का अगनै आलु। ताकि बाल-बच्‍चों जनै ध्यान देणु खुणि उ बुबों का मनों तैं ऊंकी तरफा कैरी द्‍यो, अर आज्ञा नि मनण वळो तैं धरमी बणणो को ज्ञान द्‍यो, अर प्रभु खुणि एक लैख परजा तयार कैरो।”</verse>
				<verse number="18">तब जकरयाह न स्वर्गदूत बटि पूछी, “मितैं कनकै पता चललु कि यू सब होण? किलैकि मि त बुढ्या ह्‍वे ग्यों, अर मेरी घरवळी भि बुड्ड़ी ह्‍वे गै।”</verse>
				<verse number="19">तब स्वर्गदूत न वेतैं जबाब देई कि, “मि जिब्राईल छौं, अर मि परमेस्वर का समणि खड़ु रौन्दु, अर मितैं त्वे बटि बात करणु कू अर त्वेतै यू शुभ समाचार सुनाणु कू भेज्यूं च।</verse>
				<verse number="20">अर देख, जै दिन तक यू सब बात पूरि नि ह्‍वे जनदिन, वे दिन तक तू गूंगु ह्‍वे जैली अर कुछ भि नि बोलि सकलि। किलैकि तिन मेरी यों बातों पर बिस्वास नि कैरी, जु की अपणा बगत पर पूरि होलि।”</verse>
				<verse number="21">अर लोग जकरयाह को इंतजार कना छा, अर वु ताजुब मा पोड़ि गैनी कि वेतैं मन्दिर मा इथगा देर किलै लगणि च।</verse>
				<verse number="22">अर जब जकरयाह भैर ऐ त उ गूंगु ह्‍वे गै छौ, अर एकजुट होयां लोगु का दगड़ा मा बोलि नि सैकी, पर केवल इसारा मा ही ऊंतैं बतै। तब ऊ जाणि गैनी, कि वेन मन्दिर मा कुई दरसन पै।</verse>
				<verse number="23">अर जब मन्दिर मा सेवा करण का दिन पूरा ह्‍वे गैनी, तब जकरयाह अपणा घौर चलि गै।</verse>
				<verse number="24">अर कुछ दिनों का बाद वेकी घरवळी इलीशिबा गरवति ह्‍वे। तब वा पांच मैना तक चुपचाप अपणा घौर मा ही रै।</verse>
				<verse number="25">अर वींन इन बोलि कि, “प्रभु न यों दिनों मा मि पर अपणी बड़ी किरपा कैरी, अर यू सब वेन मि खुणि ही कैरी, ताकि बच्‍चा नि होण की वजै से मेरु जु अपमान मनखियों का बीच मा होयुं छौ, उ दूर ह्‍वे जौ।”</verse>
				<verse number="26">इलीशिबा का गरवति होण का छटुं मैना मा परमेस्वर न जिब्राईल स्वर्गदूत तैं गलील मुलक का नासरत नगर मा एक कुंवारी का पास भेजि।</verse>
				<verse number="27">अर वीं कुंवारी को नौ मरियम छौ, जिं की मांगण राजा दाऊद का वंश मा बटि यूसुफ नौ का एक मनखि का दगड़ा मा होईं छै।</verse>
				<verse number="28">तब स्वर्गदूत न वींका पास ऐके बोलि, “सलाम, प्रभु की किरपा त्वे पर ह्‍वेई च अर प्रभु तेरा दगड़ा मा च।”</verse>
				<verse number="29">पर ये वचन तैं सुणी के मरियम भौत जादा घबरै गै, अर सुचण लगि गै, कि ये रैबार को क्या मतलब ह्‍वे सकदु च?</verse>
				<verse number="30">तब स्वर्गदूत न वींकू बोलि, “मरियम, डौऽर ना, किलैकि परमेस्वर की किरपा त्वे पर होईं च।</verse>
				<verse number="31">अर देख, तू गरवति होलि, अर एक बच्‍चा तैं जनम दिली। अर तू वेकू नौ यीशु रखी।</verse>
				<verse number="32">उ महान होलु, अर वे खुणि सबसे महान परमेस्वर को पुत्र बुले जालु। अर प्रभु परमेस्वर वेका पितर राजा दाऊद की राजगद्‍दी वेतैं द्‍यालु।</verse>
				<verse number="33">अर उ इस्राएली लोगु पर सदनि तक राज करलु। अर वेका राज को कभि अन्त नि होलु।”</verse>
				<verse number="34">तब मरियम न स्वर्गदूत कू बोलि, “इन कनकै ह्‍वे सकदु? किलैकि अभि तक त मि कुंवारी छौं।”</verse>
				<verse number="35">तब स्वर्गदूत न वींतैं जबाब देई कि, “पवित्र आत्मा त्वे पर उतरलु, अर सबसे महान परमेस्वर की शक्‍ति त्वेतै चौतरफि बटि घेरि के रखलि। इलै जु बच्‍चा पैदा होण वळु च, उ पवित्र होलु अर वेकू परमेस्वर को पुत्र बुले जालु।</verse>
				<verse number="36">अर सुण, तेरी रिश्तेदार इलीशिबा को भि बुडैन दौं मा एक नौनु होण वळु च। अर जिं कू सब लोग बाँझ बुल्दिन, वींको अब यू छटुं मैना च।</verse>
				<verse number="37">किलैकि परमेस्वर कुछ भि कैरी सकदु च।”</verse>
				<verse number="38">तब मरियम न बोलि, “देख, मि प्रभु की सेविका छौं, अर जु कुछ तुमुन मिकू बोलि मेरा दगड़ा मा ठिक उन्‍नि हो।” तब स्वर्गदूत वींका पास बटि चलि गै।</verse>
				<verse number="39">तब ऊं दिनों मा मरियम तुरन्त तयारी कैरिके यहूदिया मुलक का बड़ा ढौंडा पर बस्यां एक नगर मा चलि गै।</verse>
				<verse number="40">अर जकरयाह का घौर मा जैके वींन इलीशिबा कू सलाम बोलि।</verse>
				<verse number="41">अर जन्‍नि इलीशिबा न मरियम को सलाम सुणी, तन्‍नि वींका पुटगुन्द बच्‍चा उछलि। अर तब इलीशिबा पवित्र आत्मा बटि भरपूर ह्‍वे गै।</verse>
				<verse number="42">तब वींन बड़ी जोर से बोलि, “मरियम, तू जनानियों मा धन्य छैई, अर जै बच्‍चा तैं तू जनम देण वळी छैई, उ भि धन्य च।</verse>
				<verse number="43">मेरा प्रभु की माँ मितैं मिलणु ऐ, यू मि खुणि कथगा सम्मान की बात च।</verse>
				<verse number="44">अर सुण जन्‍नि तेरु सलाम को शब्द मेरा कन्दूड़ो तैं सुणे, तन्‍नि मेरी कोख मा बच्‍चा खुशी से उछलि गै।</verse>
				<verse number="45">अर तू धन्य छैई, किलैकि तिन बिस्वास कैरी कि जु बात प्रभु की तरफा बटि त्वेमा बुले गैनी, ऊंन पूरि होण।”</verse>
				<verse number="46">तब मरियम न बोलि, “मेरु पराण प्रभु की बडै कनु च।</verse>
				<verse number="47">अर मेरु मन मेरा छुटकारा देण वळा परमेस्वर की वजै से बड़ु आनन्दित च।</verse>
				<verse number="48">किलैकि मि ऊंकी दीन सेविका छौं, अर यू देखि के वेन मि पर अपणी बड़ी किरपा कैरी। इलै देखा, अब बटि सब पीढ़ी का लोग मितैं धन्य बुलला।</verse>
				<verse number="49">किलैकि वे ताकतबर परमेस्वर न मि खुणि बड़ा-बड़ा काम करिनी। अर वेको नौ पवित्र च।</verse>
				<verse number="50">अर जु लोग परमेस्वर पर अपणी पूरि सरदा रखदिन, ऊं पर अर होण वळी पीढ़ी का लोगु पर वेकी दया बणि रौन्दी।</verse>
				<verse number="51">अर वेन अपणी ताकत से बड़ा-बड़ा काम कैरिके दिखैनि। अर जु अफ तैं बड़ु समझदा छा ऊंतैं तितर-बितर कैरी देई।</verse>
				<verse number="52">अर वेन अधिकार रखण वळो तैं ऊंकी राजगद्‍दियों बटि हटैयली, अर दीन लोगु तैं ऊँचो कैरी।</verse>
				<verse number="53">वेन भूकों तैं अच्छी-अच्छी चीजों बटि भरपूर कैरी, अर सेठ लोगु तैं खालि हाथ लौटे दिनी।</verse>
				<verse number="54">अर वेन हमरा पितरों का दगड़ा मा करार कर्युं छौ कि, उ अब्राहम अर वेका वंश पर सदनि दया करलु। अर वेन अपणा ये करार तैं याद कैरिके अपणी सेवा करण वळा इस्राएली लोगु की मदद कैरी।”</verse>
				<verse number="55"></verse>
				<verse number="56">येका बाद मरियम लगभग तीन मैना तक इलीशिबा का दगड़ा मा रै, फिर अपणा घौर वापिस चलि गै।</verse>
				<verse number="57">अर जब इलीशिबा को परसव को बगत पूरु ह्‍वे, तब वींन एक नौना तैं जनम देई।</verse>
				<verse number="58">अर जब वींका पड़ोसीयों न अर रिश्तेदारों न यू सुणी, कि प्रभु न वीं पर बड़ी दया कैरी, तब ऊं सभ्यों न भि वींका दगड़ा मा आनन्द मणै।</verse>
				<verse number="59">अर इन ह्‍वे कि, बच्‍चा पैदा होण का आठवां दिन मा लोग वे नौना का घौर मा ऐनी, ताकि खतना का रिवाज तैं पूरु कैरा। अर वेकू नौ वेका बुबा का नौ पर जकरयाह रखण वळा छा।</verse>
				<verse number="60">पर वेकी माँ न बोलि, “नऽ, वेकू नौ यूहन्‍ना रखण।”</verse>
				<verse number="61">तब ऊं लोगु न वींकू बोलि, “पर तेरा रिश्तेदारों मा कै को भि इन्द्रयो नौ नि च।”</verse>
				<verse number="62">तब ऊंन बच्‍चा का बुबा जकरयाह की जनै इसारा कैरिके पूछी कि, “तुम वेकू नौ क्या रखण चाणा छाँ?”</verse>
				<verse number="63">तब वेन लिखणु खुणि एक पाटि मांगि, अर लिखी, “वेकू नौ यूहन्‍ना च।” अर यू देखि के ऊ सब लोग हकदक ह्‍वे गैनी।</verse>
				<verse number="64">अर तबरि जकरयाह को गिच्‍चु अर जीब खुलि गै। अर उ बोन्‍न लगि गै, अर परमेस्वर की बडै करण लगि गै।</verse>
				<verse number="65">तब ऊंका आस-पास का सब रौण वळा डौऽरी गैनी। अर यों सभि बातों की खबर यहूदिया मुलक का पूरा पाड़ मुलक मा फैली गै।</verse>
				<verse number="66">अर जथगा लोगु न ये बारा मा सुणी, ऊं सभ्यों न ईं बात तैं अपणा-अपणा मनों मा ही रखी अर बोलि, “यू नौनु बड़ु ह्‍वेके कन्द्रयो होलु?” किलैकि प्रभु को हाथ वे बच्‍चा का दगड़ा मा छौ।</verse>
				<verse number="67">तब बच्‍चा को बुबा जकरयाह पवित्र आत्मा से भरपूर ह्‍वे गै, अर भविष्यबाणी करण लगि गै।</verse>
				<verse number="68">अर बुलण लगि गै कि, “प्रभु जु की इस्राएली लोगु को परमेस्वर च, उ धन्य च। किलैकि उ अपणा लोगु की मदद करणु कू अयूं च, अर वेन ऊंतैं छुटकारा भि दियाली।</verse>
				<verse number="69">अर पुरणा जमना मा परमेस्वर न अपणा पवित्र रैबर्यों का द्‍वारा बोलि छौ कि, हमरा सब दुसमनों बटि अर सब बैरियों बटि हमतै छुटकारा द्‍यालु। इलै वेन अपणा सेवक राजा दाऊद की पीढ़ी मा बटि, हमतै एक बचौण वळु देई जु कि ताकतबर च।</verse>
				<verse number="70"></verse>
				<verse number="71"></verse>
				<verse number="72">अर हमरा पितरों पर दया करणु खुणि, परमेस्वर का द्‍वारा कियां पवित्र करार, याने की ज्वा कसम वेन हमरा पितर अब्राहम का दगड़ा मा कैरी छौ, वे करार तैं याद करणु खुणि वेन यू कैरी।</verse>
				<verse number="73"></verse>
				<verse number="74">अर उ करार इन च कि, ‘मि परमेस्वर तुमरा दगड़ा मा इन करलु कि, तुम अपणा दुसमनों बटि छुटी के, मेरा समणि पवित्र अर धरमी बणि के बिन डऽरयां जीवन भर मेरी सेवा करिल्या।’”</verse>
				<verse number="75"></verse>
				<verse number="76">तब जकरयाह न अपणा नौना खुणि बोलि कि, “हे मेरा नौना, त्वे खुणि सबसे महान परमेस्वर को रैबर्या बुले जालु। किलैकि तू प्रभु का औण से पैलि वे खुणि बाटु तयार करली।</verse>
				<verse number="77">अर वेका लोगु तैं तू बचयै जाण को इन ज्ञान दिली, ताकि ऊ अपणा-अपणा पापों से माफी पैके बचि जा।</verse>
				<verse number="78">अर यू सब हमरा परमेस्वर की बड़ी दया से होलु। अर ईं दया का बाना मथि बटि हम पर सुबेर को उज्याळु चमकलु।</verse>
				<verse number="79">ताकि जु कुई अन्धेरा अर मौत का छैल मा जीणा छिन, ऊंतैं उ उज्याळु द्‍यो, अर हमतै शान्ति का बाटा पर चललु।”</verse>
				<verse number="80">अर उ नौनु बड़ु होणु रै, अर आत्मा मा मजबूत होणु रै, अर इस्राएली लोगु का बीच मा सेवकाई को काम शुरु करण से पैलि उ निर्जन जगों मा रै।</verse>
			</chapter>
			<chapter number="2">
				<verse number="1">अर ऊं दिनों मा रोमी महाराजा औगुस्तुस की तरफा बटि आज्ञा निकळि, कि रोम सरकार का राज मा रौण वळा लोगु की जनगणना किये जौ।</verse>
				<verse number="2">जब रोमी सरकार का द्‍वारा या पैलि जनगणना ह्‍वे, त वे बगत पर क्‍विरिनियुस सीरिया मुलक को गवर्नर छौ।</verse>
				<verse number="3">तब सब लोग अपणु-अपणु नौ लिखौणु खुणि अपणा-अपणा गौं गैनी।</verse>
				<verse number="4">तब यूसुफ भि नौ लिखौणु खुणि गलील मुलक का नासरत नगर बटि निकळि के यहूदिया मुलक का बैतलहम गौं कू गै, जु की राजा दाऊद को नगर छौ। अर यूसुफ नौ लिखौणु खुणि इलै गै, किलैकि वु राजा दाऊद का कुटुम्ब अर वेका वंश मदि छौ।</verse>
				<verse number="5">अर उ अपणी मंगेतर मरियम तैं भि अपणा दगड़ा मा नौ लिखौणु खुणि लि गै, ज्वा की गरवति छै।</verse>
				<verse number="6">अर जब ऊ बैतलहम गौं मा ही छा, तब वींका परसव का दिन पूरा ह्‍वे गैनी।</verse>
				<verse number="7">तब वींन अपणा पैला नौना तैं जनम देई, अर वेतैं कपड़ा मा लपेटि के छन्‍नि की चौंर मा रखी। किलैकि ऊं खुणि धर्मशाळा मा जगा नि छै।</verse>
				<verse number="8">अर वे मुलक मा कुछ चरवाह छा, जु की राति का बगत पुंगड़ों मा रै के अपणी भेड़ों की देखभाल करणा छा।</verse>
				<verse number="9">तबरि प्रभु को एक स्वर्गदूत ऊंतैं दिखै, अर प्रभु को तेज ऊंका चौतरफि चमकण लगि गै। तब ऊ भौत जादा डौऽरी गैनी।</verse>
				<verse number="10">तब स्वर्गदूत न ऊंकू बोलि, “डौऽरा ना, किलैकि सुणा, मि तुमतै एक शुभ समाचार सुणान्दु, जु सब लोगु तैं बड़ी खुशी द्‍यालु।</verse>
				<verse number="11">अर वु इन च कि आज राजा दाऊद का नगर मा तुम खुणि छुटकारा देण वळा को जनम होयुं च, अर उई मसीह प्रभु च।</verse>
				<verse number="12">अर ईं बात को तुम खुणि यू चिन्‍न होलु कि तुम एक बच्‍चा तैं कपड़ा मा लपेटयुं अर छन्‍नि की चौंर मा रख्युं दिखल्या।”</verse>
				<verse number="13">तबरि अचानक वे स्वर्गदूत का दगड़ा मा स्वर्गदूतों को एक दल ऐ, अर परमेस्वर की बडै करण लगि गै, अर ऊंन बोलि कि,</verse>
				<verse number="14">“स्वर्ग मा परमेस्वर की बडै हो, अर धरती पर जौं बटि परमेस्वर खुश च, ऊं लोगु तैं शान्ति मिलु।”</verse>
				<verse number="15">अर जब स्वर्गदूत चरवाहों का समणि बटि स्वर्ग चलि गैनी, तब वु चरवाह आपस मा बुलण लगि गैनी, “चला, जनम की या बात ज्वा कि हमरा बीच ह्‍वे च, ईं तैं दिखणु हम बैतलहम गौं कू चलद्‍यां, अर ज्वा बात प्रभु न हमतै बतै वींतैं उख जैके दिखुला।”</verse>
				<verse number="16">तब ऊ फटाफट के गैनी। अर जब ऊ उख पौंछिनी, त ऊंन मरियम अर यूसुफ तैं अर छन्‍नि की चौंर मा वे बच्‍चा तैं रख्युं देखि।</verse>
				<verse number="17">अर ऊंतैं देखि के चरवाहों न वु सब बात, जु ये बच्‍चा का बारा मा स्वर्गदूत न बोलि छै, वु सब लोगु तैं बतैनि।</verse>
				<verse number="18">अर चरवाहों की यों बातों तैं सुणी के सब सुनण वळा हकदक रै गैनी।</verse>
				<verse number="19">पर मरियम न यों सब बातों तैं अपणा मन मा ही रखी, अर यों बातों का बारा मा सुचण लगि गै।</verse>
				<verse number="20">तब चरवाहों कू जन बुले गै छौ, ऊंन ठिक उन्‍नि देखि अर सुणी, अर ऊं सब बातों का खातिर परमेस्वर की बडै कैरी, अर वेतैं बड़ु आदर-सम्मान देके वापिस चलि गैनी।</verse>
				<verse number="21">अर बच्‍चा पैदा होण का आठवां दिन मा, जब खतना का रिवाज तैं पूरु करण को दिन ऐ, त वेकू नौ यीशु रखै गै। अर यू उई नौ छौ, जु स्वर्गदूत न मरियम का गरवति होण से पैलि वे बच्‍चा तैं देई छौ।</verse>
				<verse number="22">अर मूसा का दियां नियम-कानूनों का मुताबिक जब शुद्ध होण को दिन ऐ, तब मरियम अर यूसुफ, अपणा बच्‍चा यीशु तैं प्रभु का समणि अरपण करणु खुणि यरूशलेम नगर मा लि गैनी।</verse>
				<verse number="23">(किलैकि प्रभु का नियम-कानूनों मा लिख्यूं च कि, “ हरेक पैला जनम्यां बच्‍चों तैं प्रभु खुणि पवित्र किये जौ।”)</verse>
				<verse number="24">अर प्रभु का नियम-कानूनों का मुताबिक जु लोग शुद्धिकरण करणु खुणि जान्दा छिन, “ ऊंतैं घुघतियों को एक जोड़ा, या कबूतरों का दुई बच्‍चा लेके बलिदान करण चयेणु।” इलै ऊ भि बलिदान चड़ौणु खुणि यरूशलेम गैनी।</verse>
				<verse number="25">अर यरूशलेम नगर मा शमौन नौ को एक मनखि छौ, जु की धरमी अर भक्‍त छौ। अर उ इस्राएली लोगु का छुटकारा खुणि मसीह को इंतजार कनु छौ, अर पवित्र आत्मा वे पर छौ।</verse>
				<verse number="26">अर पवित्र आत्मा न वेतैं बतयूं छौ कि, “जब तक तू प्रभु का भेज्यां मसीह तैं नि देखि दिली, तब तक तेरी मौत नि होण।”</verse>
				<verse number="27">अर जब मरियम अर यूसुफ नियम-कानूनों का मुताबिक रीति-रिवाजों तैं पूरा करणु खुणि अपणा बच्‍चा यीशु तैं मन्दिर मा लि गैनी, तब पवित्र आत्मा का बुलयां पर शमौन भि मन्दिर मा अयूं छौ।</verse>
				<verse number="28">तब शमौन न बच्‍चा तैं अपणा हाथों मा लेई, अर परमेस्वर को धन्यवाद कैरिके बोलि,</verse>
				<verse number="29">“हे मालिक, अब तुम अपणा सेवक तैं अपणा वचन का मुताबिक शान्ति से ईं दुनियां बटि बिदा कैरा।</verse>
				<verse number="30">किलैकि मेरी आंख्यों न तुमरा भेज्यां छुटकारा तैं देखियाली,</verse>
				<verse number="31">अर तुमुन येका द्‍वारा पूरि दुनियां तैं छुटकारा देण की योजना बणै अर यू सब लोग दिखला।</verse>
				<verse number="32">अर जु लोग यहूदी नि छिन ऊं लोगु पर तुमरा बारा मा सच्‍चै परगट करणु खुणि यू एक उज्याळु च। अर वेका द्‍वारा तेरा इस्राएली लोगु तैं बड़ु आदर-सम्मान मिललु।”</verse>
				<verse number="33">अर जु कुछ भि शमौन न बच्‍चा का बारा मा बोलि, उ सब सुणी के यीशु ब्वे-बाब हकदक रै गैनी।</verse>
				<verse number="34">तब शमौन न ऊंतैं आसीस देके वेकी माँ मरियम कू बोलि, “सुण, यू बच्‍चा इस्राएली लोगु मदि भौत सरा लोगु खुणि दण्ड मिलण को, अर भौत सरा लोगु तैं बचयै जाण की वजा बणलु। अर यों बातों खुणि यू बच्‍चा एक चिन्‍न च, पर लोग येका खिलाप मा बुलला,</verse>
				<verse number="35">अर येका द्‍वारा भौत सरा लोगु का मनों का विचार परगट ह्‍वे जाला। अर मरियम सुण, एक तलवार तेरी जिकुड़ी का आर-पार छेद कैरी द्‍याली।”</verse>
				<verse number="36">अर मन्दिर मा हन्‍नाह नौ की एक रैबर्या छै, ज्वा कि आशेर का गोत्र मा बटि छै, अर वा फनूएल की नौनि छै अर वा भौत बुड्ड़ी छै, अर ब्यौ होण का बाद सात साल तक ही अपणा पति का दगड़ा मा रै सैकी, किलैकि वींको पति मोरि गै छौ।</verse>
				<verse number="37">अर वा चौरासि साल की विधवा छै। अर मन्दिर मा ही रौन्दी छै, अर उपवास अर प्रार्थना कैरी-कैरिके दिन-रात परमेस्वर की सेवा मा लगि रौन्दी छै।</verse>
				<verse number="38">अर तबरि वा मरियम अर यूसुफ का पास ऐके परमेस्वर को धन्यवाद करण लगि गै। अर जु लोग यरूशलेम नगर तैं छुटकारा मिलण को इंतजार कना छा, ऊं सभ्यों तैं हन्‍नाह रैबर्या ये बच्‍चा का बारा मा बतौण लगि गै।</verse>
				<verse number="39">अर जब मरियम अर यूसुफ न प्रभु का नियम-कानूनों का मुताबिक सब रीति-रिवाजों तैं पूरु कैरी दिनी, तब ऊ फिर से अपणा गौं नासरत कू ऐ गैनी जु कि गलील मुलक मा च।</verse>
				<verse number="40">अर उ बच्‍चा बड़ु होणु रै, अर मजबूत होणु रै, अर अकल से भि भरपूर होणु रै। अर परमेस्वर की किरपा वे पर छै।</verse>
				<verse number="41">हर साल यीशु का ब्वे-बाब फसह का त्योवार तैं मनौणु खुणि यरूशलेम नगर मा जान्दा छा।</verse>
				<verse number="42">अर जब यीशु बारह साल को ह्‍वे, तब वेका ब्वे-बाब अपणी रीति का मुताबिक त्योवार मनौणु खुणि यरूशलेम नगर गैनी, अर यीशु तैं भि अपणा दगड़ा मा लि गैनी।</verse>
				<verse number="43">अर जब त्योवार का दिन पूरा ह्‍वे गैनी, त ऊ उख बटि वापिस लौटण लगि गैनी, पर बालक यीशु यरूशलेम नगर मा ही रै गै। अर ईं बात का बारा मा वेका ब्वे-बाब नि जणदा छा,</verse>
				<verse number="44">किलैकि ऊंतैं यू लगणु छौ कि यीशु हम दगड़ा का दुसरा मुसाफिरों का साथ मा होलु। अर इन सोची के ऊंन एक दिन को बाटु पूरु कैरी दिनी, पर यीशु ऊंतैं तब भि नि दिखै, तब ऊ वेतैं अपणा रिश्तेदारों अर जाण-पछ्याण का लोगु मा खुज्याण लगि गैनी।</verse>
				<verse number="45">पर यीशु ऊंतैं नि मिली। तब ऊ वेतैं खुज्यान्द-खुज्यान्द यरूशलेम कू फिर वापिस लौटी गैनी।</verse>
				<verse number="46">अर तीन दिन का बाद उ ऊंतैं मन्दिर मा मिली। अर उख यीशु गुरु लोगु का दगड़ा मा बैठि के ऊंकी बातों तैं सुनणु छौ अर ऊं बटि सवाल कनु छौ।</verse>
				<verse number="47">अर जथगा भि वेकी बातों तैं सुनणा छा, ऊ सब वेकी समझ अर वेका जबाबों तैं सुणी के हकदक रै गैनी।</verse>
				<verse number="48">तब वेतैं देखि के वेका ब्वे-बाब भि हकदक रै गैनी। अर वेकी माँ न वेकू बोलि, “बेटा, तिन हमरा दगड़ा मा इन किलै कैरी? देख, तेरु बुबा अर मि त्वेतै खुज्यान्द-खुज्यान्द परेसान ह्‍वे गै छा।”</verse>
				<verse number="49">तब यीशु न ऊंकू बोलि, “तुम मितैं किलै खुज्याणा छाँ? क्या तुम नि जणद्‍यां कि मितैं अपणा पिता का घौर मा रौण जरुरी च?”</verse>
				<verse number="50">पर जु बात यीशु न ऊंकू बोलि, वा ऊंका समझ मा नि ऐ।</verse>
				<verse number="51">तब उ ऊंका दगड़ा मा नासरत नगर कू वापिस ऐ। अर ऊंकी आज्ञाओं का अधीन मा रै, अर वेकी माँ न यों सब बातों तैं अपणा मन मा रखी।</verse>
				<verse number="52">अर यीशु अकल मा, अर अपणा सरील मा, अर परमेस्वर अर मनखियों की किरपा मा बढणु रै।</verse>
			</chapter>
			<chapter number="3">
				<verse number="1">जौं दिनों मा महाराजा तिबिरियुस रोम को महाराजा छौ, वेका राज का पन्द्रवां साल मा यहूदिया मुलक को गवर्नर पुन्तियुस पिलातुस छौ, अर गलील मुलक पर सासन करण वळु हेरोदेस अन्तिपास छौ। अर वेकू भै फिलिप्पुस को सासन इतूरैया मुलक पर अर त्रखोनीतिस मुलक पर छौ। अर अबिलेने मुलक पर लिसानियास सासन करण वळु छौ।</verse>
				<verse number="2">अर जब यू लोग राज कना छा, त ये बगत मा हन्‍ना अर काइफा महा पुरोहित छा। ऊं दिनों मा जकरयाह का नौना यूहन्‍ना का दगड़ा मा परमेस्वर न निर्जन जगा मा अपणु वचन देके बात-चित कैरी।</verse>
				<verse number="3">अर उ यरदन गाड का आस-पास का मुलक मा जैके पापों बटि माफी पौण खुणि मन से पस्ताप कैरिके बपतिस्मा लेण को परचार कनु छौ।</verse>
				<verse number="4">अर जन की भौत साल पैलि परमेस्वर का रैबर्या यशायाह का द्‍वारा बुलयां वचनों की किताब मा लिख्यूं च, वेका मुताबिक ही यू ह्‍वे। वेन इन बोलि छौ कि, “निर्जन जगा मा जोर-जोर से धै लगै के बुलण वळे की आवाज औणी च कि, ‘प्रभु को बाटु तयार कैरा, वे खुणि बाटु सीदु कैरा।</verse>
				<verse number="5">अर हरेक गदेरु भुरे जालु, अर हरेक ढौंडा अर पाड़ समतल किये जाला। अर जु टेड़ा-मेड़ा बाटा छिन, ऊंतैं सीदु किये जालु, अर जु उबड-खाबड़ बाटा छिन, ऊंतैं समतल किये जालु।</verse>
				<verse number="6">अर हरेक मनखि परमेस्वर का द्‍वारा दियां छुटकारा तैं दिखलु।’”</verse>
				<verse number="7">अर भौत जादा भीड़ ज्वा वेका पास बपतिस्मा लेणु खुणि औणी छै, वेन ऊंकू बोलि, “हे गुरौ का बच्‍चों, तुमतै कैन चितै की परमेस्वर का औण वळा परकोप से दूर भागा?</verse>
				<verse number="8">पर तुम इन्द्रया काम कैरा, ज्यां से इन पता चलु कि तुमुन मन से पस्तावा कैरियाली। अर अपणा-अपणा मनों मा यू नि सोचा कि, ‘हम अब्राहम का वंश मदि छां, इलै हमतै परमेस्वर दण्ड नि द्‍यालु।’ पर मि तुमतै बतै देन्दु कि, परमेस्वर यू ढुंगो मा बटि भि अब्राहम खुणि औलाद पैदा कैरी सकदु च।</verse>
				<verse number="9">अर अब कुल्हाडु डाळों की जड़ पर रख्युं च, इलै जै डाळा पर अच्छा फल नि लगदिन, वेतैं काटी के आग मा ढुळै जान्दु।”</verse>
				<verse number="10">तब भीड़ का लोगु न यूहन्‍ना बटि पूछी, “त हमतै क्या करण चयेणु?”</verse>
				<verse number="11">तब वेन ऊंतैं जबाब देई, “अगर कै मनखि का पास दुई कुरता हो, त उ एक वेतैं दे द्‍यो जैमा नि च। अर ठिक उन्‍नि जैमा खाणु च, उ भि इन्‍नि कैरो।”</verse>
				<verse number="12">अर तब चुंगी लेण वळा भि वेका पास बपतिस्मा लेणु कू ऐनी, अर वे बटि पूछी, “गुरुजी, हमतै क्या करण चयेणु?”</verse>
				<verse number="13">अर वेन ऊंकू बोलि, “जथगा चुंगी लेण ठैर्युं च उथगा ही ल्या, ना कि वेसे जादा।”</verse>
				<verse number="14">तब सिपयों न भि वे बटि पूछी कि, “हमतै क्या करण चयेणु?” वेन ऊंकू बोलि, “कै बटि भि जबरदस्ती कैरिके पैसा नि ल्या, अर ना ही झूठ्‍ठों इळजाम लगा। पर अपणी ही कमै पर संतुष्‍ट रा।”</verse>
				<verse number="15">अर वे बगत पर लोग मसीह की आस मा लग्यां छा, अर ऊ सब अपणा-अपणा मनों मा यूहन्‍ना का बारा मा विचार करण लगि गैनी कि, “कखि यूई मसीह त नि च।”</verse>
				<verse number="16">तब यूहन्‍ना न ऊं सभ्यों कू बोलि, “मि त तुमतै पाणिळ बपतिस्मा देणु छौं, पर उ औण वळु च, जु मिसे भि जादा ताकतबर च। अर मि ये लैख भि नि छौं कि वेका जुतों का तसमा भि खोली सैकु। अर उ तुमतै पवित्र आत्मा अर आग बटि बपतिस्मा द्‍यालु।</verse>
				<verse number="17">अर वेको सुप्पु वेका हाथों मा च। अर उ अपणा खल्याण तैं अच्छा ढंगल साफ करलु, अर ग्यूँ तैं अपणा कुठार मा इकट्‍ठा करलु, पर बूखा तैं वीं आग मा ढोळि द्‍यालु ज्वा कभि बुझि नि सकदी।”</verse>
				<verse number="18">इन्‍नि और भि भौत सरी शिक्षा देके यूहन्‍ना न लोगु तैं शुभ समाचार सुणै।</verse>
				<verse number="19">तब गलील मुलक पर सासन करण वळु हेरोदेस अन्तिपास तैं यूहन्‍ना वेका सब बुरा कामों का बारा मा झिड़कुदु छौ, अर इलै भि झिड़कुदु छौ किलैकि वेन अपणा भै फिलिप्पुस की घरवळी हेरोदियास तैं अपणु बणैयालि छौ।</verse>
				<verse number="20">तब हेरोदेस न यूहन्‍ना तैं जेलखाना मा डालि दिनी। अर यू काम कैरिके हेरोदेस न अपणा जीवन को सबसे बड़ु बुरु काम कैरी।</verse>
				<verse number="21">यूहन्‍ना का जेलखाना मा डळै जाण से पैलि, जब सब लोग बपतिस्मा लिणा छा, तब यीशु न भि बपतिस्मा लेई, अर जब उ प्रार्थना कनु छौ तब आसमान खुलि गै।</verse>
				<verse number="22">अर पवित्र आत्मा तैं कबूतर का रुप मा यीशु पर उतरद देखि। अर आसमान बटि या आवाज ऐ कि, “तू मेरु लाडलु पुत्र छैई, अर मि त्वे बटि भौत खुश छौं।”</verse>
				<verse number="23">अर जब यीशु न अपणी सेवा शुरु कैरी, त उ तकरीबन तीस साल को छौ। अर लोग इन समझदा छा कि यीशु यूसुफ को नौनु छौ, अर यूसुफ पितर एली को नौनु छौ।</verse>
				<verse number="24">अर एली मतात को नौनु छौ, अर मतात लेवी को नौनु छौ, अर लेवी मलकी को नौनु छौ, अर मलकी यन्‍ना को नौनु छौ, अर यन्‍ना यूसुफ को नौनु छौ।</verse>
				<verse number="25">अर यूसुफ मत्तित्याह को नौनु छौ, अर मत्तित्याह आमोस को नौनु छौ, अर आमोस नहूम को नौनु छौ, अर नहूम असल्याह को नौनु छौ, अर असल्याह नोगह को नौनु छौ।</verse>
				<verse number="26">अर नोगह मात को नौनु छौ, अर मात मत्तित्याह को नौनु छौ, अर मत्तित्याह शिमी को नौनु छौ, अर शिमी योसेख को नौनु छौ, अर योसेख योदाह को नौनु छौ।</verse>
				<verse number="27">अर योदाह यूहन्‍ना को नौनु छौ, अर यूहन्‍ना रेसा को नौनु छौ, अर रेसा जरुब्बाबिल को नौनु छौ, अर जरुब्बाबिल शालतिएल को नौनु छौ, अर शालतिएल नेरी को नौनु छौ।</verse>
				<verse number="28">अर नेरी मलकी को नौनु छौ, अर मलकी अद्‍दी को नौनु छौ, अर अद्‍दी कोसाम को नौनु छौ, अर कोसाम इलमोदाम को नौनु छौ, अर इलमोदाम एर को नौनु छौ।</verse>
				<verse number="29">अर एर यहोशुआ को नौनु छौ, अर यहोशुआ इलाजार को नौनु छौ, अर इलाजार योरीम को नौनु छौ, अर योरीम मतात को नौनु छौ, अर मतात लेवी को नौनु छौ।</verse>
				<verse number="30">अर लेवी शमौन को नौनु छौ, अर शमौन यहूदाह को नौनु छौ, अर यहूदाह यूसुफ को नौनु छौ, अर यूसुफ योनान को नौनु छौ, अर योनान इलयाकीम को नौनु छौ।</verse>
				<verse number="31">अर इलयाकीम मलेआह को नौनु छौ, अर मलेआह मिन्‍नाह को नौनु छौ, अर मिन्‍नाह मत्तता को नौनु छौ, अर मत्तता नातान को नौनु छौ, अर नातान राजा दाऊद को नौनु छौ।</verse>
				<verse number="32">अर दाऊद यिशै को नौनु छौ, अर यिशै ओबेद को नौनु छौ, अर ओबेद बोअज को नौनु छौ, अर बोअज सलमोन को नौनु छौ, अर सलमोन नहशोन को नौनु छौ।</verse>
				<verse number="33">अर नहशोन अम्मीनादाब को नौनु छौ, अर अम्मीनादाब अदमीन को नौनु छौ, अर अदमीन अरनी को नौनु छौ, अर अरनी हिस्रोन को नौनु छौ, अर हिस्रोन फिरिस को नौनु छौ, अर फिरिस यहूदाह को नौनु छौ।</verse>
				<verse number="34">अर यहूदाह याकूब को नौनु छौ, अर याकूब इसहाक को नौनु छौ, अर इसहाक अब्राहम को नौनु छौ, अर अब्राहम तिरह को नौनु छौ, अर तिरह नाहोर को नौनु छौ।</verse>
				<verse number="35">अर नाहोर सरूग को नौनु छौ, अर सरूग रऊ को नौनु छौ, अर रऊ फिलिग को नौनु छौ, अर फिलिग एबिर को नौनु छौ, अर एबिर शिलह को नौनु छौ।</verse>
				<verse number="36">अर शिलह केनान को नौनु छौ, अर केनान अरपक्षद को नौनु छौ, अर अरपक्षद शेम को नौनु छौ, अर शेम नूह को नौनु छौ, अर नूह लिमिक को नौनु छौ।</verse>
				<verse number="37">अर लिमिक मथूशिलह को नौनु छौ, अर मथूशिलह हनोक को नौनु छौ, अर हनोक यिरिद को नौनु छौ, अर यिरिद महललेल को नौनु छौ, अर महललेल केनान को नौनु छौ।</verse>
				<verse number="38">अर केनान एनोश को नौनु छौ, अर एनोश शेत को नौनु छौ, अर शेत आदम को नौनु छौ, अर आदम परमेस्वर को नौनु छौ।</verse>
			</chapter>
			<chapter number="4">
				<verse number="1">फिर यीशु पवित्र आत्मा बटि भरपूर ह्‍वेके यरदन गाड बटि वापिस ऐ गै, अर पवित्र आत्मा वेतैं चालीस दिनों तक निर्जन जगा कू लि गै।</verse>
				<verse number="2">अर उख शैतान चालीस दिनों तक वेतैं भकलौणु रै, अर ऊं दिनों मा यीशु न कुछ भि नि खै। अर जब ऊ दिन पूरा ह्‍वे गैनी, तब वेतैं भूक लगि।</verse>
				<verse number="3">तब शैतान न वेकू बोलि, “अगर जु तू परमेस्वर को पुत्र छैई, त ये ढुंगा कू बोल कि, रुट्‍टी बण जा।”</verse>
				<verse number="4">मगर यीशु न वेकी बात तैं नकारी के जबाब दिनी, “पवित्रशास्‍त्र मा लिख्यूं च कि, ‘मनखि केवल रुट्‍टी बटि ही ज्यून्दु नि रालु।’”</verse>
				<verse number="5">तब शैतान वेतैं एक ऊँची जगा पर लि गै, अर झट वेतैं दुनियां का सब राज्य दिखैनि।</verse>
				<verse number="6">अर वेन यीशु कू बोलि, “मि यों सब राज्यों पर अधिकार अर येकी सब धन-दौलत त्वेतै द्‍यूलु। किलैकि यू सब मि मा सौप्युं च, अर मि जैतैं चान्दु वेतैं दे सकदु छौं।</verse>
				<verse number="7">अगर जु तू मेरी पूजा करली, त यू सब कुछ तेरु ह्‍वे जालु।”</verse>
				<verse number="8">तब यीशु न वेकी बात तैं नकारी के जबाब देई, “पवित्रशास्‍त्र मा लिख्यूं च कि, ‘तू केवल अपणा प्रभु परमेस्वर की ही पूजा कैर, अर बस वेकी ही सेवा कैर।’”</verse>
				<verse number="9">फिर शैतान वेतैं यरूशलेम नगर मा लि गै, अर मन्दिर की सबसे ऊँची जगा पर खड़ु कैरी। अर वेन यीशु कू बोलि, “अगर तू परमेस्वर को पुत्र छैई, त इख बटि मूड़ी फाल मारी दे।</verse>
				<verse number="10">किलैकि पवित्रशास्‍त्र मा लिख्यूं च कि, ‘तेरी हिफाजत करणु खुणि उ अपणा स्वर्गदूतों तैं आज्ञा द्‍यालु।</verse>
				<verse number="11">अर वु त्वेतै तुरन्त अपणा हाथों मा उठे द्‍याला, ताकि कखि इन नि हो कि तेरा खुटों मा ढुंगे की चोट लगि जौ।’”</verse>
				<verse number="12">तब यीशु न वेकी बात तैं नकारी के जबाब देई, “पवित्रशास्‍त्र मा इन भि लिख्यूं च कि, ‘तू अपणा प्रभु परमेस्वर तैं नि भकलौ।’”</verse>
				<verse number="13">अर जब शैतान न यीशु तैं हरेक किसम से भकलै दिनी, तब दुसरो मौका मिलण तक उ वेका पास बटि चलि गै।</verse>
				<verse number="14">येका बाद यीशु पवित्र आत्मा की शक्‍ति का द्‍वारा गलील मुलक कू लौटी गै। अर वेकी चर्चा आस-पास का ग्‍वोंऽ मा फैली गै।</verse>
				<verse number="15">अर उ ऊंका प्रार्थना भवनों मा उपदेस देण लगि गै, अर सब लोग वेकी बडै करदा छा।</verse>
				<verse number="16">फिर यीशु नासरत नगर मा ऐ, जख उ पाली-पोसि के बड़ु ह्‍वे छौ। अर हमेसा की तरौं उ सब्त का दिन प्रार्थना भवन मा गै अर पवित्रशास्‍त्र पढणु खुणि खड़ु ह्‍वे गै।</verse>
				<verse number="17">तब परमेस्वर का रैबर्या यशायाह की किताब वेतैं दिये गै। अर वेन किताब खोली के वा जगा निकाळि जख मा इन लिख्यूं छौ कि,</verse>
				<verse number="18">“प्रभु की आत्मा मि मा च, किलैकि वेन गरीबों तैं शुभ समाचार सुनाणु कू मितैं चुण्यूं च। अर बन्धियों तैं छुटकारा का बारा मा, अर अन्धों तैं फिर से दिखण का बारा मा परचार करणु खुणि, अर सतयां लोगु तैं छुटकारा देणु खुणि वेन मितैं भेजि च।</verse>
				<verse number="19">अर यूई प्रभु को खुश होणो कू साल च, इन परचार करणु खुणि भि वेन मितैं भेजि।”</verse>
				<verse number="20">तब यीशु न किताब बन्द कैरिके प्रार्थना भवन का सेवक तैं वापिस दे दिनी अर फिर बैठि गै। अर प्रार्थना भवन का सब लोगु की नजर वे पर ही लगि रै।</verse>
				<verse number="21">तब यीशु न ऊंकू बोलि, “आज पवित्रशास्‍त्र की या बात ज्वा तुमुन सुणी वा उबरि पूरि ह्‍वे गै।”</verse>
				<verse number="22">अर सभ्यों न वेकी तारीफ कैरी, अर जु भलै की बात वेन बुलिनी, ऊंतैं सुणी के सब लोग हकदक ह्‍वे गैनी। अर ऊ बुलण लगि गैनी, “अरे यू त यूसुफ को नौनु च?”</verse>
				<verse number="23">तब यीशु न ऊंकू बोलि, “तुम जरुर मि खुणि या औखाण बोलिल्या कि, ‘हे बैद, पैलि खुद तैं खूब कैर।’ अर तुम इन भि बोलिल्या कि, ‘जौं चमत्कारिक कामों का बारा मा हमुन सुणी, कि तुमुन कफरनहूम नगर मा कैरी, ऊंतैं इख अपणा नगर मा भि कैर।’</verse>
				<verse number="24">पर मि तुम बटि सच्‍चि बोन्‍नु छौं, कि कै भि रैबर्या तैं वेका अपणा घौर का लोग स्वीकार नि करदिन।</verse>
				<verse number="25">“अर मि तुम बटि सच्‍च बोन्‍नु छौं कि, एलिय्याह रैबर्या का दिनों मा जब सढ़े तीन साल तक सरग नि बरखी, अर पूरा देस मा अकाळ पोड़ि छौ, त उबरि इस्राएल मा भौत सरी विधवा छै।</verse>
				<verse number="26">पर ऊंमा बटि कै का पास भि परमेस्वर न एलिय्याह तैं नि भेजि, पर केवल सैदा मुलक का सारपत नगर की एक विधवा का पास ही भेजि, ज्वा कि इस्राएली नि छै।</verse>
				<verse number="27">“अर ठिक इन्‍नि एलीशा रैबर्या का बगत मा भि इस्राएल देस मा भौत जादा कोड़ी छा। पर ऊंमा बटि कुई भि शुद्ध नि किये गै। पर केवल सीरिया देस का नामान नौ का मनखि तैं ही वेका कोड़ बटि शुद्ध करै गै।”</verse>
				<verse number="28">“अर यों बातों तैं सुणदी ही प्रार्थना भवन का सब लोगु तैं भौत गुस्सा ऐ गै।</verse>
				<verse number="29">अर ऊंन उठी के यीशु तैं नगर बटि भैर खदेड़ दिनी, अर जै पाड़ पर ऊंको नगर बस्यूं छौ वेका ढौंडा मा लि गैनी, ताकि वेतैं मूड़ी भ्योंलुन्द ढोळि द्‍या।</verse>
				<verse number="30">मगर उ ऊंका बीच मा बटि निकळि के चलि गै।”</verse>
				<verse number="31">फिर यीशु गलील मुलक का कफरनहूम नगर कू गै, अर जब सब्त को दिन ऐ त उ लोगु तैं उपदेस देणु छौ।</verse>
				<verse number="32">अर वेको उपदेस सुणी के लोग दंग रै गैनी, किलैकि उ एक अधिकार पयां मनखि का जन बोन्‍नु छौ।</verse>
				<verse number="33">अर उख प्रार्थना भवन मा एक आदिम छौ, जै पर खबेस लग्यूं छौ। अर उ जोर-जोर से चिल्‍लै के बोन्‍न लगि गै कि,</verse>
				<verse number="34">“हे नासरत गौं का यीशु, हमतै त्वेसे क्या मतलब? क्या तू हमतै नास करणु कू अईं छैई? मि जणदु छौं कि तू कु छैई, तू परमेस्वर को पवित्र जन छैई।”</verse>
				<verse number="35">तब यीशु न वेतैं झिड़की के बोलि, “चुप रौ, अर वेमा बटि निकळि जा।” तब वे खबेस न वेतैं लोगु का बीच मा पटकी, अर बगैर कुई नुकसान पौंछयां उ वे मनखि मा बटि निकळि गै।</verse>
				<verse number="36">अर यू देखि के सब लोग दंग रै गैनी। अर ऊ एक-दुसरा बटि बुलण लगि गैनी कि, “येका शब्दों मा कन्दरि ताकत च? किलैकि यू खबेसों तैं भि अधिकार अर शक्‍ति से आज्ञा देन्दु, अर ऊ निकळि जनदिन।”</verse>
				<verse number="37">फिर चारो तरफा हर जगा यीशु की चर्चा होण लगि गै।</verse>
				<verse number="38">तब यीशु प्रार्थना भवन मा बटि उठी के शमौन का घौर मा गै। अर शमौन की सासु तैं भौत जौर चड़यूं छौ। तब ऊंन यीशु बटि बिन्ती कैरी कि उ वींतैं खूब कैरी द्‍यो।</verse>
				<verse number="39">अर यीशु वींका पास खड़ु ह्‍वे, अर जौर तैं झिड़की। अर वींको जौर उतरि गै, अर वा तुरन्त उठी के ऊंकी सेवा-भगत करण लगि गै।</verse>
				<verse number="40">अर रुमुक का बगत जौं-जौं का इख बन्‍नि-बन्‍नि किसमे की बिमारि मा लोग पोड़यां छा, ऊ सब ऊं लोगु तैं यीशु का पास लैनि। अर वेन एक-एक पर हाथ रखी के ऊंतैं खूब कैरी देई।</verse>
				<verse number="41">अर खबेस भि चिल्‍लै-चिल्‍लै के बुल्दा छा कि, “तू परमेस्वर को पुत्र छैई,” अर इन बोलि के खबेस लोगु मा बटि निकळि जान्दा छा। पर यीशु खबेसों तैं झिड़कुदु छौ, अर ऊंतैं बोन्‍न नि देन्दु छौ, किलैकि ऊ जणदा छा कि वु मसीह च।</verse>
				<verse number="42">अर जब सुबेर ह्‍वे, तब यीशु निकळि के एक निर्जन जगा मा गै। अर भीड़ की भीड़ वेतैं खुज्यान्द-खुज्यान्द वेका पास ऐ गै। अर ऊ वेतैं रुकण लगि गैनी, कि उ ऊंका पास बटि नि जौ।</verse>
				<verse number="43">पर यीशु न ऊंकू बोलि, “मितैं परमेस्वर का राज को शुभ समाचार दुसरा नगरों मा भि जैके सुनौण जरुरी च, किलैकि मितैं ये ही मकसद खुणि भेज्यूं च।”</verse>
				<verse number="44">फिर उ यहूदिया मुलक का प्रार्थना भवनों मा उपदेस देण लगि गै।</verse>
			</chapter>
			<chapter number="5">
				<verse number="1">एक बार भौत बड़ी भीड़ यीशु का पास इकट्‍ठा ह्‍वेके परमेस्वर का वचन तैं सुनणी छै। तब उ गन्‍नेसरत की झील का किनरा पर खड़ु छौ, अर जादा लोग होण की वजै से धक्‍का-मुक्‍की होण लगि गै अर वु यीशु पर गिरण लगि गैनी।</verse>
				<verse number="2">तब वेन झील का छाला पर दुई नाव लगि दिखिनी, अर मछैर ऊंमा बटि उतरि के अपणा जाल धोणा छा।</verse>
				<verse number="3">अर ऊंमा बटि एक शमौन की नाव छै। अर यीशु वींमा चैड़ि गै अर वेकू बोलि, “नाव तैं किनरा बटि हटै के जरा सि अगनै लि जा।” तब यीशु नाव पर बैठि के लोगु तैं उपदेस देण लगि गै।</verse>
				<verse number="4">अर जब यीशु को उपदेस खतम ह्‍वे गै, तब वेन शमौन कू बोलि, “नाव तैं गैरा पाणि मा ले चल, अर माछा मरणु कू अपणु जाल डाल।”</verse>
				<verse number="5">तब शमौन न वेतैं जबाब देई, “गुरुजी, हमुन पूरि रात भर मेनत कैरी, मगर हमुन कुछ भि नि पकड़ी। फिर भि तुमरा बुलण पर मि जाल डालि देन्दु।”</verse>
				<verse number="6">अर जब वेन जाल डालि त बिजांम माछा पकड़िनी। अर ऊंका जाल फटण लगि गैनी।</verse>
				<verse number="7">तब ऊंन अपणा दगड़्यों तैं जु कि दुसरि नाव पर छा इसारा कैरिके बोलि, “इख ऐके हमरि मदद कैरा।” तब ऊ ऐनी, अर दुई नावों मा इथगा माछा भोरी दिनी की ऊ डुबण लगि गैनी।</verse>
				<verse number="8">अर यू देखि के शमौन पतरस यीशु का खुटों मा पोड़ि गै, अर बोलि, “हे प्रभु, मि एक पापि मनखि छौं, इलै तुम मेरा समणि बटि चलि जा।”</verse>
				<verse number="9">अर यू वेन इलै बोलि, किलैकि इथगा माप माछा पकड़ण की वजै से उ अर वेका दगड़्या भौत हकदक ह्‍वे गै छा।</verse>
				<verse number="10">अर ठिक उन्‍नि शमौन का दगड़्या याकूब अर यूहन्‍ना भि हकदक रै गैनी अर याकूब अर यूहन्‍ना जबदी का नौना छा। तब यीशु न शमौन कू बोलि, “डौऽर ना, मि त्वेतै मनखियों तैं पकड़ण वळु बणौलु।”</verse>
				<verse number="11">फिर ऊ अपणी-अपणी नावों तैं छाला पर लैनि, अर अपणु सब कुछ छोड़ि के यीशु का पिछनै ह्‍वे गैनी।</verse>
				<verse number="12">अर एक दिन यीशु एक नगर मा छौ। अर उख एक मनखि छौ जैका पूरा सरील पर कोड़ छौ। अर उ यीशु तैं देखि के वेका खुटों मा पोड़ि गै, अर गिड़गिड़ै के वेकू बोन्‍न लगि गै, “हे प्रभु, अगर तुम चा त मितैं शुद्ध कैरी सकद्‍यां।”</verse>
				<verse number="13">तब यीशु न अपणा हाथ तैं अगनै बढै के वेतैं छ्वी अर बोलि, “हाँ, मि चान्दु छौं, कि तू शुद्ध ह्‍वे जा।” अर उबरि वेको कोड़ ठिक ह्‍वे गै।</verse>
				<verse number="14">तब यीशु न वेतैं चितै अर बोलि, “येका बारा मा कै मा कुछ भि नि बोलि, पर जा अर खुद तैं पुरोहित मा दिखौ। अर अपणा शुद्ध होण का बारा मा मूसा का दिया नियम-कानूनों का मुताबिक भेंट चड़ौ, ताकि लोग समझि सैका कि तू शुद्ध ह्‍वे गै।”</verse>
				<verse number="15">पर यीशु की चर्चा त और भि जादा फैलण लगि गै। अर भीड़ की भीड़ वेका वचनों तैं सुनणु कू अर अपणी बिमारियों मा बटि खूब होणु खुणि वेका पास औन्दी छै।</verse>
				<verse number="16">पर अकसर यीशु ऊं बटि अलग ह्‍वेके निर्जन जगा मा जैके प्रार्थना करणु कू चलि जान्दु छौ।</verse>
				<verse number="17">अर एक दिन इन ह्‍वे कि यीशु लोगु तैं उपदेस देणु छौ। अर उख फरीसी दल का कुछ लोग अर नियम-कानूनों तैं सिखौण वळा कुछ लोग बैठयां छा। ऊ गलील अर यहूदिया मुलकों का हरेक गौं बटि, अर यरूशलेम नगर बटि अयां छा। अर लोगु तैं खूब करणु खुणि प्रभु की शक्‍ति यीशु का दगड़ा मा छै।</verse>
				<verse number="18">तब कुछ लोग लकवा पोड़्यां एक मनखि तैं बिस्तर का फंचा मा लिटै के लैनि। अर ऊ वेतैं यीशु का समणि भितर लि जाणे की कोसिस कना छा।</verse>
				<verse number="19">पर भौत भीड़ होण की वजै से ऊ वेतैं भितर नि लि जै सकिनी। इलै ऊ घौर का छत पर चैड़ि गैनी, अर पठौलो तैं हटै के वेतैं बिस्तर का फंचा समेत बीच मा यीशु का समणि उतारि दिनी।</verse>
				<verse number="20">तब यीशु न ऊं लोगु को बिस्वास देखि के वे मनखि कू बोलि, “बेटा, तेरा पाप माफ ह्‍वे गैनी।”</verse>
				<verse number="21">तब शास्‍त्री अर फरीसी दल का लोग मन मा सुचण लगि गैनी, “यू कु च, जु अपणी बातों बटि परमेस्वर की बेजती कनु च? किलैकि परमेस्वर का अलावा और कु च जु पापों तैं माफ कैरी सकदु?”</verse>
				<verse number="22">पर यीशु न ऊंका मनों की बात तैं जाणि के बोलि, “तुम अपणा मनों मा इन किलै सुचणा छाँ?</verse>
				<verse number="23">यों दुई बातों मा बटि क्या बोन्‍न सरल च? क्या इन बोन्‍न, ‘तेरा पाप माफ ह्‍वे गैनी,’ या इन बोन्‍न कि ‘उठ, अर हिटण लगि जा?’</verse>
				<verse number="24">अर अब तुम जाणि जा, कि मनखि का पुत्र तैं धरती पर पाप माफ करण को अधिकार दियूं च।” तब यीशु न वे लकवा पोड़्यां मनखि कू बोलि, “मि त्वे बटि बोन्‍नु छौं, उठ, अर अपणा बिस्तर तैं उठे के अपणा घौर चलि जा।”</verse>
				<verse number="25">अर उ तुरन्त ऊं सभ्यों का समणि उठी, अर जै बिस्तर मा उ पोड़्यों छौ वेतैं उठे के परमेस्वर की बडै करद-करद अपणा घौर चलि गै।</verse>
				<verse number="26">अर यू देखि के सब लोग हैरान ह्‍वे गैनी अर परमेस्वर की बडै करण लगि गैनी। अर वु भौत डौऽरी के बोन्‍न लगि गैनी कि, “आज हमुन अदभुत काम होन्द देखि।”</verse>
				<verse number="27">अर येका बाद यीशु भैर गै, अर वेन चुंगी लेण वळो की चौकी पर एक मनखि तैं बैठयूं देखि, जैको नौ लेवी छौ। अर यीशु न वेकू बोलि, “मेरा दगड़ा मा चल, अर मेरु चेला बणि जा।”</verse>
				<verse number="28">तब उ उठी अर अपणु सब कुछ छोड़ि के वेका पिछनै चलि गै।</verse>
				<verse number="29">तब लेवी न अपणा घौर मा यीशु की बड़ी दावत कैरी। अर उख चुंगी लेण वळो कि, अर उन्‍नि दुसरा लोगु की भीड़ भि यीशु का दगड़ा मा खाणुक खाणु कू बैठि छै।</verse>
				<verse number="30">तब फरीसी दल का लोग अर शास्‍त्री लोग कुड़कुड़ै के यीशु का चेलों कू बोन्‍न लगि गैनी, “तुम चुंगी लेण वळो अर ऊंका ही जन दुसरा पापि लोगु का दगड़ा मा खान्दा-पीन्दा किलै छाँ?”</verse>
				<verse number="31">तब यीशु न ऊंतैं जबाब दिनी, “जु ठिक-ठाक छिन, ऊंतैं बैद की जरुरत नि होन्दी, मगर बिमारों तैं होन्दी च।</verse>
				<verse number="32">ठिक उन्‍नि जु लोग खुद तैं धरमी समझदिन, मि ऊंतैं बुलाणु खुणि नि अयूं, पर पापि लोगु खुणि अयूं छौं ताकि ऊ पस्ताप कैरा।”</verse>
				<verse number="33">तब ऊंन यीशु कू बोलि, “यूहन्‍ना का चेला त अपणी रीति का मुताबिक उपवास रखदिन अर प्रार्थना भि करदिन। अर फरीसी दल का लोग भि इन्‍नि करदिन। मगर तेरा चेला त खाणा-पीणा रौनदिन।”</verse>
				<verse number="34">तब यीशु न ऊंतैं जबाब दिनी, “जबरि तक ब्यौला बरातियों का दगड़ा मा च, त क्या तुम ऊं बटि उपवास करै सकद्‍यां?</verse>
				<verse number="35">मगर इन्द्रया दिन औण वळा छिन, जब ब्यौला तैं ऊंका दगड़ा बटि अलग किये जालु, तब ऊं दिनों मा ऊ उपवास रखला।”</verse>
				<verse number="36">तब यीशु न ऊंतैं एक और उदारण सुणै कि, “कुई भि नया कपड़ा मा बटि फाड़ी के पुरणा कपड़ा मा टल्‍ला नि लगौन्दु। अर अगर लगालु, त नयू फटी जालु अर उ टल्‍ला भि पुरणा का दगड़ा मा मेल नि खान्दु।</verse>
				<verse number="37">अर उन्‍नि कुई भि नयू अंगूरों को रस पुरणा चमड़ा का थैला मा नि भोरदु। अर अगर भोरलु, त नयू अंगूरों को रस पुरणा चमड़ा का थैला तैं फाड़ी देन्दु। तब चमड़ा को थैला भि खराब ह्‍वे जान्दु अर रस भि बोगि जान्दु।</verse>
				<verse number="38">इलै नयू अंगूरों को रस नया चमड़ा का थैलों मा भोरण चयेणु।</verse>
				<verse number="39">अर कुई भि मनखि पुरणा अंगूरों का रस तैं पीणा का बाद नया रस तैं पीण पसन्द नि करदु। किलैकि उ बुल्दु च कि, ‘पुरणु ही अच्छु च।’”</verse>
			</chapter>
			<chapter number="6">
				<verse number="1">एक बार यीशु सब्त का दिन पर अपणा चेलों का दगड़ा मा पुंगड़ों बटि जाणु छौ। तब वेका चेला अन्‍न का बलडो तैं तोड़ि के अर हाथों मा मींड़ी के खान्दी जाणा छा।</verse>
				<verse number="2">तब फरीसी दल का कुछ लोग बुलण लगि गैनी, “तुम इन काम किलै कना छाँ, जु सब्त का दिन पर करण ठिक नि च?”</verse>
				<verse number="3">तब यीशु न ऊंतैं जबाब दिनी, “क्या तुमुन यू नि पैड़ी, कि जब राजा दाऊद अर वेका दगड़्या भूका छा, तब वेन क्या कैरी?</verse>
				<verse number="4">तब उ परमेस्वर का मन्दिर मा गै अर अरपण की रुट्‍टी जौं तैं पुरोहितों का अलावा और कै दुसरा तैं खाण ठिक नि छौ, ऊंतैं खै अर जु वेका दगड़ा मा छा ऊंतैं भि दिनी।”</verse>
				<verse number="5">अर यीशु न फिर ऊंकू बोलि, “मनखि को पुत्र त सब्त का दिन को भि प्रभु च।”</verse>
				<verse number="6">अर एक सब्त का दिन पर यीशु प्रार्थना भवन मा जैके उपदेस देण लगि गै। अर उख एक आदिम छौ, जैको दैंणु हाथ सुक्यूं छौ।</verse>
				<verse number="7">तब शास्‍त्री अर फरीसी दल का लोग यीशु पर दोष लगौणु खुणि कुछ सबूत मिली जौ, ईं बात का इंतजार मा छा। इलै सब्त का दिन पर उ वेतैं खूब करदु च कि ना, यू दिखणु खुणि ऊंकी यीशु पर टक लगईं छै।</verse>
				<verse number="8">पर यीशु ऊंका मनों का विचार जाणि गै, इलै वेन सुख्यां हाथ वळा आदिम कू बोलि, “उठ, अर बीच मा खड़ु ह्‍वे जा।” तब उ मनखि उठी अर खड़ु ह्‍वे गै।</verse>
				<verse number="9">तब यीशु न ऊंकू बोलि, “मि तुम बटि पूछदु, कि सब्त का दिन क्या करण ठिक च। भलु करण या बुरु करण? पराण तैं बचौण या नास करण?”</verse>
				<verse number="10">अर वेन चारो तरफा ऊं सभ्यों तैं देखि, अर वे मनखि कू बोलि, “अपणु हाथ अगनै बढ़ो।” तब वेन उन्‍नि कैरी अर वेकू हाथ ठिक ह्‍वे गै।</verse>
				<verse number="11">पर यू देखि के ऊंकी जिकुड़ी मा आग लगि गै। तब वु अपणा आपस मा बोन्‍न लगि गैनी कि, “अब हम ये यीशु का दगड़ा मा क्या कैरा?”</verse>
				<verse number="12">अर ऊं ही दिनों मा यीशु प्रार्थना करणु कू पाड़ पर गै, अर पूरि रात परमेस्वर बटि प्रार्थना कैरी।</verse>
				<verse number="13">अर जब सुबेर ह्‍वे, त वेन अपणा चेलों तैं बुलै। अर ऊंमा बटि बारह लोगु तैं चुणी, अर ऊंकू खास चेला बोलि।</verse>
				<verse number="14">अर ऊ बारह चेला यू छिन, शमौन जैतैं वेन पतरस नौ भि देई, वेकू भै अन्द्रियास, याकूब अर यूहन्‍ना, फिलिप्पुस अर बरतुल्मै,</verse>
				<verse number="15">मत्ती, थोमा, हलफई को नौनु याकूब, शमौन जैकू जेलोतेस बुले जान्दु,</verse>
				<verse number="16">याकूब को नौनु यहूदा, अर यहूदा इस्करियोती जु बाद मा यीशु तैं धोखा देके पकड़वै देन्दु।</verse>
				<verse number="17">तब यीशु ऊं चेलों का दगड़ा मा पाड़ बटि उतरि के एक सैंणि जगा मा खड़ु ह्‍वे। अर वेका पिछनै चलण वळो की एक बड़ी भीड़ उख जमा होईं छै। अर सरा यहूदिया मुलक, यरूशलेम नगर, अर समुन्दर का छाला पर रौण वळा सूर अर सैदा नगरों का भौत सा लोग भि उख जमा होयां छा। अर वु वेका वचनों तैं सुनणु कू अर अपणी बिमारियों मा बटि खूब होणु कू वेका पास अयां छा।</verse>
				<verse number="18">तब खबेस लग्यां सब मनखियों तैं भि खूब किये जान्दु छौ।</verse>
				<verse number="19">अर भीड़ का सब लोग यीशु तैं छूण चाणा छा, किलैकि वेमा बटि शक्‍ति निकळि के सभ्यों तैं खूब कनि छै।</verse>
				<verse number="20">तब वेन अपणा पिछनै चलण वळो का जनै देखि के बोलि, “धन्य छाँ तुम जु दीन छाँ, किलैकि परमेस्वर को राज तुमरो ही च।”</verse>
				<verse number="21">धन्य छाँ तुम जु की अभि भूका छाँ, किलैकि तुमरि तड़प पूरि किये जालि। धन्य छाँ तुम जु की अभि रुंणा छाँ, किलैकि तुम हैंसिल्या।</verse>
				<verse number="22">धन्य छाँ तुम किलैकि जब मनखि का पुत्र का बाना लोग तुम बटि नफरत करला, अर अपणा बीच मा बटि तुमरो तिरिस्कार करला। इख तक की ऊ तुमतै बदनाम करला, अर तुमरो नौ खराब कैरिके तुमतै दूर करला।</verse>
				<verse number="23">“तब वे दिन पर तुम आनन्द मणया अर खुशी का बाना उछल्यां, किलैकि सुणा, स्वर्ग मा तुम खुणि बड़ु इनाम रख्युं च। अर ऊंका पितरों न परमेस्वर का रैबर्यों का दगड़ा मा इन्‍नि त कैरी छौ।</verse>
				<verse number="24">“हाय च तुम पर, जु कि तुम सेठ छाँ। किलैकि तुमुन अपणा सुख-चैन तैं पयेलि।</verse>
				<verse number="25">हाय च तुम पर, जु कि तुम अभि पुटगु भोरी के खान्दा-पीन्दा छाँ, किलैकि तुमतै भूक सतालि। हाय च तुम पर, जु कि तुम अभि हैंसणा छाँ, किलैकि तुम शोक मणैल्या अर रुविल्या।</verse>
				<verse number="26">हाय च तुम पर, जब सब लोग तुमरि तारीफ करदिन। किलैकि ऊंका पितरों न भि झूठ्‍ठा रैबर्यों की ठिक इन्‍नि तारीफ कैरी छै।”</verse>
				<verse number="27">अर यीशु न इन भि बोलि, “हे सुनण वळो, मि तुमतै बतै देन्दु, कि तुम अपणा दुसमनों बटि प्यार कैरा, अर जु तुम बटि नफरत करदिन ऊंका दगड़ा मा भलै कैरा।</verse>
				<verse number="28">अर जु तुमतै असगार देन्दिन तुम ऊं खुणि परमेस्वर बटि आसीस मांगा। अर जु तुमरा दगड़ा मा अच्छु बरतौ नि करदिन, ऊं खुणि प्रार्थना कैरा।</verse>
				<verse number="29">“अर कुई तुमरा एक गलोड़ा पर थप्पड मारो, त वेकी तरफा दुसरो गलोड़ा भि कैरी दे। अर कुई तुमरो कोट ले ल्यो, त वेतैं अपणु कुरता भि लेण दे।</verse>
				<verse number="30">अगर कुई त्वे बटि मांगु, त वेतैं दे। अर कुई त्वे बटि तेरी चीजों तैं छिनी के लि जौ, त वे बटि वापिस नि मांग।</verse>
				<verse number="31">अर जन तुम चन्द्‍यां कि लोग तुमरा दगड़ा मा अच्छु बरतौ कैरा, तुम भि ऊंका दगड़ा मा उन्‍नि बरतौ कैरा।</verse>
				<verse number="32">“अगर तुम ऊं ही लोगु बटि ही प्यार करद्‍यां? जु तुम बटि प्यार करदिन, त कौन सा तुमुन भौत बड़ु काम कैरियाली? किलैकि पापि मनखि भि त इन्‍नि करदिन।</verse>
				<verse number="33">अर उन्‍नि जु तुमरा दगड़ा मा भलै करदिन, अगर तुम बस ऊंको ही भलु करद्‍यां, त कौन सा तुमुन भौत बड़ु काम कैरियाली? किलैकि पापि मनखि भि त इन्‍नि करदिन।</verse>
				<verse number="34">अर तुम ऊंतैं ही करज देन्दयां, जौं बटि फिर वापिस मिली जालु, त इन कैरिके कौन सा तुमुन भौत बड़ु काम कैरियाली? किलैकि पापि मनखि भि दुसरा पापियों तैं करज देन्दिन, कि उथगा ही वापिस मिली जौ।</verse>
				<verse number="35">“पर मि तुम बटि बोन्‍नु छौं, कि अपणा दुसमनों बटि प्यार कैरा, अर ऊंका दगड़ा मा भलै कैरा। अर फिर वापिस मिलणे की आस नि रखी के करज द्‍या। तब तुमतै बड़ु इनाम मिललु, अर तुम सबसे महान परमेस्वर की औलाद बणि जैल्या। किलैकि उ ऐसान नि मनण वळो अर बुरा लोगु पर भि अपणी किरपा करदु।</verse>
				<verse number="36">अर जन तुमरो पिता परमेस्वर दयालु च, ठिक उन्‍नि तुम भि दयालु बणा।”</verse>
				<verse number="37">तब यीशु न ऊंकू इन भि बोलि, “एक-दुसरा पर इळजाम नि लगा, त तुम पर भि इळजाम नि लगये जालु। अर कैतैं भि दोषी नि ठैरा, त तुमतै भि दोषी नि ठैरैये जालु, एक-दुसरा तैं माफ कैरा त तुमतै भि माफ किये जालु।</verse>
				<verse number="38">अर द्‍या, त तुमतै भि दिये जालु। अर पूरा नापळ दबै-दबै के अर हिल्‍लै-हिल्‍लै के भरपूरी से तुमरा थैलुन्द भि डळै जालु, किलैकि जै नापळ तुम नापी के दिल्या, वे ही नापळ तुमतै भि नापी के दिये जालु।”</verse>
				<verse number="39">फिर यीशु न ऊंतैं एक उदारण देके बतै कि, “क्या एक अन्धु, दुसरा अन्धा तैं बाटु दिखै सकदु च? अगर इन ह्‍वे गै त दुईया का दुईयों न खडोळुन्द पोड़ि जाण।</verse>
				<verse number="40">अर कुई भि चेला अपणा गुरु से बड़ु नि च, पर जब उ अपणी शिक्षा तैं पूरि कैरी देन्दु, त उ अपणा गुरु का बराबर ह्‍वे जान्दु।</verse>
				<verse number="41">“तू अपणा भै का आंखा मा पोड़्यूं तिण तैं किलै दिखणी, जब कि तेरी आंख मा ही जांठु च?</verse>
				<verse number="42">अरे, जब तेरा ही आंख मा जांठु च, त तू कनकै अपणा भै कू बोलि सकदी कि, ‘भैजी, ला मि तुमरि आंखा बटि तिण निकाळि द्‍यूं?’ हे ढोंगि, पैलि अपणा आंखा बटि वे जांठा तैं त निकाळ। तब जैके तू अपणा भै की आंख को तिण अच्छी तरौं देखि के निकाळि सकलि।”</verse>
				<verse number="43">“अर कै भि अच्छा डाळा पर बेकार फल नि लगदिन, अर ना ही बेकार डाळा पर अच्छा फल लगि सकदिन।</verse>
				<verse number="44">अर हरेक डाळु अपणा फलों बटि ही पछ्याणे जान्दु। अर झाड़ि बटि कुई भि तिमला नि तोड़दिन, अर ना ही कांडों का झिबलांण बटि कुई भि अंगूर तोड़दिन।</verse>
				<verse number="45">अर उन्‍नि अच्छा मनखि का मन मा अच्छी बात होनदिन, इलै उ अपणा मन से अच्छी बात ही बुल्दु, अर एक बुरु मनखि वेका मन मा जु बुरी बात होनदिन, इलै उ ऊंतैं ही निकळदु। किलैकि जै मनखि का मन मा जन बात भोरी होलि, उई बात वेका गिच्‍चा बटि औन्दिन।”</verse>
				<verse number="46">तब यीशु न इन भि बोलि कि, “तुम मिकू ‘हे प्रभु, हे प्रभु,’ बुल्द्‍यां, पर जु मि बुल्दु, तुम वेतैं किलै नि मणद्‍यां?</verse>
				<verse number="47">अर जु कुई मेरा पास औन्दु अर मेरी बातों तैं सुणी के वेका मुताबिक चलदु, उ कै का जन च, मि तुमतै बतै देन्दु।</verse>
				<verse number="48">उ वे मनखि का जन च, जैन घौर बणौण का बगत जमीन गैरी खैंडि के वेकी बुनियाद पौड़ पर रखी। अर जब गाड-गदिना ऐ गैनी अर वे घौर पर टक्‍करैनी, तभि भि ऊ वेतैं हिल्‍लै नि सकिनी, किलैकि उ घौर पक्‍कु बणयूं छौ।</verse>
				<verse number="49">पर जु कुई मेरा वचनों तैं सुणी के ऊंतैं नि मणदु, उ वे मनखि का जन च जैन जमीन पर बिना बुनियाद को घौर बणै। अर जब गदेरु को पाणि ऐ, अर वे घौर पर टकरै, तब उ तुरन्त पोड़ि गै अर वेको छत्यनास ह्‍वे गै।”</verse>
			</chapter>
			<chapter number="7">
				<verse number="1">जब यीशु न लोगु तैं अपणु वचन सुणै दिनी, तब उ कफरनहूम नगर मा गै।</verse>
				<verse number="2">अर उख नगर मा एक रोमी सैनिको को सुबेदार छौ। अर ये सुबेदार को एक नौकर छौ, जै बटि उ भौत प्यार करदु छौ। अर उ नौकर भौत बिमार होयुं छौ अर मुरण वळु छौ।</verse>
				<verse number="3">जब वे सुबेदार न यीशु का बारा मा सुणी, तब यहूदियों का कुछ मुख्यों तैं यीशु का पास भेजि के इन बिन्ती कैरी कि तुम ऐके मेरा नौकर तैं खूब कैरी द्‍या।</verse>
				<verse number="4">अर ऊंन यीशु का पास पौंछी के वे बटि बिन्ती कैरी कि, “गुरुजी, तुम ऐके सुबेदार की मदद कैरी द्‍या, किलैकि उ ईं मदद का लैख च।</verse>
				<verse number="5">अर उ हम यहूदी लोगु बटि प्यार करदु, अर वेन हम खुणि प्रार्थना भवन बणवै।”</verse>
				<verse number="6">तब यीशु ऊंका दगड़ा मा गै। अर जब यीशु सुबेदार का घौर का पास ही पौंछी छौ, तब सुबेदार न अपणा दगड़्यों मा बटि कुछ लोगु तैं यीशु का पास यू रैबार भेजि कि, “प्रभु, तुम कष्‍ट नि कैरा, किलैकि मि ये लैख नि छौं, कि तुम मेरा घौर मा भि ऐ सैका।</verse>
				<verse number="7">इलै मिन खुद तैं इथगा लैख भि नि समझि, कि मि खुद तुमरा पास औंऽऽ। पर बस तुम उख बटि ही बोलि द्‍या, तब मेरु नौकर खूब ह्‍वे जालु।</verse>
				<verse number="8">किलैकि मि भि अधिकारीयों का मूड़ी काम करण वळु मनखि छौं, अर मेरा मूड़ी भि सिपै छिन। अर जब मि एक कू जाणु कू बुल्दु, त उ जान्दु च, अर जब दुसरा कू औणु कू बुल्दु, त उ औन्दु च। अर जब मि अपणा नौकर तैं कुछ करणु कू बुल्दु छौं, त उ वेतैं करदु च।”</verse>
				<verse number="9">अर यों बातों तैं सुणी के यीशु हकदक रै गै। अर मुड़ि के अपणा पिछनै औण वळी भीड़ कू बोलि, “मि तुमतै बतै देन्दु, कि इन्द्रयो बिस्वास मिन इस्राएल का लोगु मा भि नि देखि।”</verse>
				<verse number="10">अर जौं लोगु तैं सुबेदार न भेजि छौ, ऊंन वापिस घौर ऐके देखि की उ नौकर खूब ह्‍वे गै।</verse>
				<verse number="11">अर येका बाद यीशु नाईन नौ का नगर कू गै। अर वेका चेला, अर बड़ी भीड़ वेका दगड़ा मा जाणि छै।</verse>
				<verse number="12">जब उ वे नगर का गेट का पास पौंछी। तब लोग एक मुरदा तैं भैर लि जाणा छा। अर उ मुरदा अपणी विधवा माँ को इकलौतु नौनु छौ। अर नगर का भौत सा लोग वींका दगड़ा मा छा।</verse>
				<verse number="13">अर वींतैं देखि के प्रभु तैं तरस ऐ। अर वेन वींकू बोलि, “नि रो।”</verse>
				<verse number="14">अर वेन समणि जैके, डांडी तैं छ्वी। तब डांडी तैं लि जाण वळा रुकी गैनी। अर वेन बोलि “हे ज्वान, मि त्वेकू बोन्‍नु छौं कि, ‘उठी जा।’”</verse>
				<verse number="15">तब जु मोरि गै छौ उ उठी के बैठि गै, अर बात करण लगि गै। अर यीशु न वेतैं वेकी माँ का सुपुर्द कैरी दिनी।</verse>
				<verse number="16">अर यू देखि के सब लोग डौऽरी गैनी, अर परमेस्वर की बडै कैरिके बोन्‍न लगि गैनी कि, “हमरा बीच मा परमेस्वर को एक बड़ु रैबर्या ऐ गै, अर परमेस्वर अपणा लोगु की मदद करण खुणि ऐ गै।”</verse>
				<verse number="17">अर यीशु का बारा मा या खबर पूरा यहूदिया मुलक मा अर आस-पास की सब जगों मा फैली गै।</verse>
				<verse number="18">तब यूहन्‍ना बपतिस्मा देण वळा का चेलों न जेलखाना मा जैके यों सभि बातों की खबर वेतैं सुणै।</verse>
				<verse number="19">तब यूहन्‍ना न अपणा चेलों मा बटि दुई चेलों तैं बुलै के प्रभु बटि इन पूछणु कू भेजि कि, “क्या तुम उई मसीह छाँ, जु औण वळु छौ, या हम कै दुसरो को इंतजार कैरा?”</verse>
				<verse number="20">तब ऊं दुईयों न यीशु का पास ऐके बोलि, “हमरा गुरु यूहन्‍ना न हमतै तुमरा पास यू पूछणु कू भेजि कि, ‘क्या तुम उई छाँ, जु औण वळु छौ, या हम कै दुसरो को इंतजार कैरा?’”</verse>
				<verse number="21">अर वे ही बगत यीशु न भौत लोगु तैं ऊंकी बिमारियों मा बटि, अर पीड़ाओं बटि खूब कैरी, अर खबेस लग्यां मनखियों तैं छुटकारु देई, अर भौत सा अन्धों का आंखा भि खूब करिनी।</verse>
				<verse number="22">अर वेन यूहन्‍ना का चेलों तैं जबाब दिनी, “जु कुछ तुमुन देखि, अर सुणी, वेका बारा मा जैके यूहन्‍ना तैं बता। वेमा बुलयां कि, ‘अन्धा दिखणा छिन, लूला-लंगड़ा चलणा-फिरणा छिन, अर कोड़ियों तैं शुद्ध किये जाणु च, बैरा सुनणा छिन अर मुरदो तैं ज्यून्द किये जाणु च, अर गरीबों तैं शुभ समाचार सुणये जाणु च।</verse>
				<verse number="23">अर धन्य च उ, जु मि पर सक नि करदु बल्किन मा बिस्वास करदु।’”</verse>
				<verse number="24">जब यूहन्‍ना का भेज्यां चेला वापिस चलि गैनी, तब यीशु न वेका बारा मा लोगु तैं बतै, “तुम निर्जन जगा मा क्या दिखणु कू ग्यां छा? बथौं बटि हिलण वळा निगुंला तैं क्या?</verse>
				<verse number="25">फिर तुम क्या दिखणु कू ग्यां छा? क्या मखमल का कपड़ा पैरयां एक मनखि तैं? देखा जु सानदार कपड़ा पैरदिन, अर भोग-बिलास मा रौनदिन, ऊ त राज महलों मा रौनदिन।</verse>
				<verse number="26">त फिर तुम क्या दिखणु कू गै छा? क्या परमेस्वर का एक रैबर्या तैं दिखण कू? हाँ, मि तुमतै बतै देन्दु, कि तुमुन एक रैबर्या से भि बड़ा मनखि तैं देखि।</verse>
				<verse number="27">अर यू उई च, जैका बारा मा पवित्रशास्‍त्र मा लिख्यूं कि, “‘परमेस्वर बुल्दु कि, देख, मि अपणा रैबार देण वळा तैं त्वेसे पैलि भेजणु छौं। अर उ त्वेसे पैलि जैके त्वे खुणि बाटु तयार करलु।’</verse>
				<verse number="28">“अर मि तुम बटि बोन्‍नु छौं, कि जथगा भि लोगु न जनानियों बटि जनम लियूं च, ऊंमा बटि यूहन्‍ना से महान कुई नि च। पर जु परमेस्वर का राज मा सबसे छुटो च, उ यूहन्‍ना से भि महान च।”</verse>
				<verse number="29">अर यू सुणी के सब लोगु न अर इख तक कि चुंगी लेण वळु न भि यूहन्‍ना की बात सुणी के वे बटि बपतिस्मा लेई, अर यू माणी दिनी की परमेस्वर धरमी च।</verse>
				<verse number="30">पर फरीसी दल का लोगु न अर नियम-कानूनों तैं सिखौण वळो न वे बटि बपतिस्मा नि लेई। अर इन कैरिके ऊं खुणि परमेस्वर को जु मकसद छौ, वेतैं ऊंन नकारी दिनी।</verse>
				<verse number="31">तब यीशु न फिर से बोलि, “मि ये जमना का लोगु कि तुलना कै बटि कैरुं कि यू कै का जन छिन?</verse>
				<verse number="32">यू त ऊं नौनो का जन छिन जु की बजार मा बैठि के एक-दुसरा मा चिल्‍लै-चिल्‍लै के बुल्दिन, ‘हमुन तुम खुणि बांसुळि बजै, मगर तुम नि नच्यां, अर हमुन दुख देण वळु गीत गै, मगर तुम नि रुंयां।’</verse>
				<verse number="33">यूहन्‍ना बपतिस्मा देण वळु ऐ, जु ना त रुट्‍टी खान्दु छौ, अर ना ही अंगूरों को रस पीन्दु छौ, अर तुम बुल्द्‍यां कि, ‘वे पर खबेस लग्यूं च।’</verse>
				<verse number="34">जब की मनखि को पुत्र ऐ, अर खान्दु-पीन्दु च, अर तुम बुल्द्‍यां कि, ‘देखा, यू त पेटू अर जादा खाण-पीण वळु मनखि च, अर चुंगी लेण वळो को अर इन्द्रया ही दुसरा पापि लोगु को दगड़्या च।’</verse>
				<verse number="35">पर फिर भि परमेस्वर का ज्ञान का द्‍वारा जु कुछ भि काम निकळि के औन्दिन, वु सब इन साबित कैरी देन्दिन, कि यू ज्ञान सच्‍चु च।”</verse>
				<verse number="36">फरीसी दल का लोगु मदि शमौन नौ को एक मनखि छौ। अर एक दिन वेन यीशु से बिन्ती कैरिके वेतैं खाणु पर बुलै। तब उ वे फरीसी का घौर मा गै, अर खाणुक खाणु कू बैठि गै।</verse>
				<verse number="37">अर उखि नगर मा एक पापि जनानि छै। अर जब वींतैं इन पता चलि, कि यीशु फरीसी का घौर मा खाणुक खाणु कू बैठयूं च, तब वा संगमरमर की बोतल मा खुशबुदार इतर लेके ऐ।</verse>
				<verse number="38">अर वा यीशु का खुटों का समणि खड़ि ह्‍वेके रुंण लगि गै, अर अपणा आंसुवोंन वेका खुटों तैं भिगौण लगि गै। अर अपणा बाळो से फुंजणि, अर बार-बार वेका खुटों की भूकि पीणी छै, अर वेका खुटों पर खुशबुदार इतर मळणी छै।</verse>
				<verse number="39">अर यू देखि के उ फरीसी, जैन यीशु तैं अपणा घौर मा बुलै छौ, उ अपणा मन मा सुचण लगि गै कि, “अगर जु यू परमेस्वर को रैबर्या होन्दु, त यू जाणि जान्दु, की या जनानि क्‍वा च, अर कन्दरि च, ज्वा वेतैं छूणि च। अर उ इन भि जाणि जान्दु, कि वा एक पापि च।”</verse>
				<verse number="40">तब यीशु न वेकू बोलि, “शमौन, मि त्वे बटि कुछ बुलण चाणु छौं।” तब वेन बोलि, “हाँ गुरुजी, बोला।”</verse>
				<verse number="41">तब यीशु न बोलि, “एक सेठ न दुई लोगु तैं करज दियूं छौ। वेन एक तैं पांच सौ दीनार, अर दुसरा तैं पचास दीनार को करज दियूं छौ।</verse>
				<verse number="42">अर जब अपणु करज वापिस देणु खुणि ऊंमा कुछ नि छौ, तब वे सेठ न ऊं दुईयों को करज माफ कैरी दिनी। अब यू बतौ, कि ऊं दुईयों मा बटि कु जि वे सेठ बटि जादा प्यार करलु?”</verse>
				<verse number="43">तब शमौन न जबाब देई, “मेरा ख्याल से उ, जै पर जादा करज होयुं छौ।” तब वेन वेकू बोलि, “तिन ठिक जबाब देई।”</verse>
				<verse number="44">तब यीशु न वीं जनानि की तरफा मुड़ि के शमौन कू बोलि, “तू ईं जनानि तैं देख, मि तेरा घौर मा औंऽऽ, पर तिन मेरा खुटों तैं धोणु कू पाणि तक भि नि देई। पर ईं जनानि न अपणा आंसुवोंन मेरा खुटों तैं भिगै, अर अपणा बाळुन फुंजी।</verse>
				<verse number="45">अर तिन मेरी भूकि नि पेई, पर जबरि बटि मि इख औंऽऽ, तबरि बटि ईं न मेरा खुटों तैं चुमण नि छोड़ि।</verse>
				<verse number="46">अर तिन मेरा मुण्ड़ पर तेल नि लगै, पर ईं न मेरा खुटों पर खुशबुदार इतर मळि।</verse>
				<verse number="47">इलै मि त्वे बटि बोन्‍नु छौं, कि ईं जनानि न जु भौत सरा पाप कर्यां छा, उ सब पाप माफ ह्‍वे गैनी। किलैकि ईं न मि बटि भौत प्यार कैरी, पर जैको कम माफ किये गै, उ प्यार भि कम करदु।”</verse>
				<verse number="48">तब यीशु न वीं जनानि कू बोलि, “तेरा पाप माफ ह्‍वे गैनी।”</verse>
				<verse number="49">अर यू सुणी के जु लोग वेका दगड़ा मा खाणुक खाणु कू बैठयां छा, ऊ आपस मा बुलण लगि गैनी कि, “यू कु होन्दु, जु कि पापों तैं भि माफ कनु च?”</verse>
				<verse number="50">पर यीशु न वीं जनानि कू बोलि, “तेरा बिस्वास न त्वेतै बचैयालि, अब तू शान्ति से चलि जा।”</verse>
			</chapter>
			<chapter number="8">
				<verse number="1">अर येका बाद यीशु परमेस्वर का राज को शुभ समाचार लोगु तैं सुणौन्द-सुणौन्द, नगर-नगर अर गौं-गौं मा घूमणु रै। अर वेका बारह चेला भि वेका दगड़ा मा छा।</verse>
				<verse number="2">अर कुछ जनानि भि वेका दगड़ा मा छै। जु खबेसों बटि छुड़ईं छै, अर बिमारियों मा बटि भि ऊंतैं छुटकारु मिल्यूं छौ। ऊंमा बटि एक मगदला गौं की मरियम छै, जिं मा बटि सात खबेस निकळि छा।</verse>
				<verse number="3">अर ऊं मदि योअन्‍ना, ज्वा कि हेरोदेस अन्तिपास का घौर का कर्ता-धर्ता खुजा की घरवळी छै, अर वींका दगड़ा मा सूसन्‍नाह अर भौत सि जनानियां भि छै। अर यू सब अपणी धन-दौलत बटि यीशु अर वेका चेलों की मदद करदी छै।</verse>
				<verse number="4">अर एक दिन इन ह्‍वे, कि एक बड़ी भीड़ इकट्‍ठा होण लगि गै, अर हरेक नगर बटि भि लोग वेका पास औणा छा, तब यीशु न ऊंतैं एक उदारण देके बोलि,</verse>
				<verse number="5">“एक बार एक किसान बीज बुतण कू गै। अर जब उ बीज बुतणु छौ, तब कुछ बीज बाटा का किनरा पोड़ीनी अर खुटों का तौळ पितड़े गैनी, अर पंछियों न ऐके ऊंतैं चुगि दिनी।</verse>
				<verse number="6">“अर कुछ ढुंग्याण जमीन पर पोड़ीनी अर उपजी गैनी, पर ऊंतैं नमी नि मिली इलै वु सूखि गैनी।</verse>
				<verse number="7">अर कुछ बीज झिबलांणो मा पोड़ीनी, अर झिबलांण भि ऊंका दगड़ा मा बढिनि अर ऊंतैं दबै दिनी।</verse>
				<verse number="8">मगर कुछ बीज अच्छी जमीन मा पोड़ीनी, अर उगि के सौ गुणा फल लैनि। अर यू बुलण का बाद यीशु न जोर से बोलि, ‘जैका पास कन्दूड़ छिन, उ सुणी ल्यो।’”</verse>
				<verse number="9">तब यीशु का चेलों न वे बटि पूछी, “गुरुजी, ये उदारण को मतलब क्या च?”</verse>
				<verse number="10">अर वेन ऊंतैं जबाब दिनी, “तुमतै त परमेस्वर का राज का भेदों तैं बिंगण की इजाजत दिईं च, पर दुसरा लोगु तैं मितैं उदारण मा बोन्‍न पोड़दु ताकि, “‘वु लोग देखि के भि देखि नि सैका, अर सुणी के भि समझि नि सैका।’”</verse>
				<verse number="11">अर यीशु न ऊंकू बोलि, “ये उदारण को मतलब च, कि बीज त परमेस्वर को वचन च।</verse>
				<verse number="12">अर जु बीज बाटा का किनरा पोड़ीनी, ऊ वु लोग छिन जु वचनों तैं सुणदा त छिन, मगर शैतान ऐके ऊंका मनों मा बटि वचन तैं निकाळि देन्दु, ताकि कखि इन नि हो कि ऊ बिस्वास कैरिके बचि जा।</verse>
				<verse number="13">अर जु बीज ढुंग्याण जमीन पर पोड़ीनी, ऊ वु लोग छिन जु वचन तैं सुणी के खुशी से स्वीकार करदिन, अर कुछ बगत तक ऊ बिस्वास त करदिन, पर बिस्वास मा जड़ नि पकड़ण की वजै से जब अजमैस ऊंका जीवन मा औन्दिन, त ऊ बिस्वास करण छोड़ि देन्दिन।</verse>
				<verse number="14">अर जु बीज झिबलांणो मा पोड़ीनी, ऊ वु लोग छिन जौन वचनों तैं सुणी, मगर अगनै चलि के जीवन की चिन्ता-फिकर मा, अर धन-दौलत मा, अर मौज-मस्ती मा फंसी जनदिन, अर ऊ बिस्वास मा मजबूत नि होनदिन।</verse>
				<verse number="15">अर अच्छी जमीन मा पोड़यां बीज वु लोग छिन जु परमेस्वर का वचन तैं सुणी के वेतैं अपणा अच्छा अर आज्ञा मनण वळा मन मा समाळि के रखदिन, अर सबर रखी के अच्छा फल लेके औन्दिन।”</verse>
				<verse number="16">अर यीशु न इन भि बोलि, “कुई भि द्‍यू बाळि के कटोरा का तौळ ढकै के नि रखदु अर ना ही खाट का तौळ रखदु, पर एक ऊँची जगा पर रखदु ताकि भितर औण-जाण वळो तैं उज्याळु मिली सैको।</verse>
				<verse number="17">अर इन्दरि कुई भि बात नि च ज्वा परमेस्वर बटि छिपी हो, अर ना ही कुई इन्द्रयो गुप्‍त भेद लुक्युं ज्यां को वेतैं पता नि हो, अर उ वेको खुलासा उज्याळा मा करलु।</verse>
				<verse number="18">इलै ध्यान द्‍या, कि तुम क्या सुनणा छाँ। किलैकि जु कुई भि परमेस्वर का राज तैं बिंगणे की इच्छा रखदु, वेतैं वेका बारा मा बिंगण को और भि जादा ज्ञान दिये जालु। मगर जु मनखि इन सोचदु, कि मितैं भौत ज्ञान च, त वे बटि वु ज्ञान भि छिनै जालु।”</verse>
				<verse number="19">तब यीशु की माँ अर वेका भै वे बटि मिलणु कू ऐनी, पर भीड़ जादा होण की वजै से ऊ वे बटि नि मिली सकिनी।</verse>
				<verse number="20">तब कैन ऐके वेकू बोलि, “गुरुजी सुणा, तुमरि माँ अर तुमरा भै भैर खड़ा होयां छिन, अर ऊ तुम बटि मिलण चाणा छिन।”</verse>
				<verse number="21">अर वेन ऊं लोगु कू बोलि, “मेरी माँ अर मेरा भै ऊ छिन, जु परमेस्वर का वचन तैं सुणदिन अर वेका मुताबिक चलदिन।”</verse>
				<verse number="22">अर एक दिन यीशु अपणा चेलों का दगड़ा मा नाव पर चैड़ि गै, अर वेन ऊंकू बोलि, “चला, हम झील का पल्या छाला चलद्‍यां।” तब ऊ चलि गैनी।</verse>
				<verse number="23">अर जब ऊ नाव चलाणा छा त यीशु से गै। तब झील मा एक आंधी ऐ गै, अर नाव पाणिळ भुरेण लगि गै अर ऊं पर बड़ु संकट ऐ गै।</verse>
				<verse number="24">तब ऊ यीशु का पास ऐनी अर वेतैं झकोली के बोलि, “गुरुजी हे गुरुजी, हम मुरण वळा छां।” तब वेन उठी के आंधी अर पाणि की बौछारों तैं झिड़की, अर ऊ रुक गैनी अर सब कुछ शान्त ह्‍वे गै।</verse>
				<verse number="25">तब वेन चेलों कू बोलि, “तुमरो बिस्वास कख छौ?” अर यू देखि के ऊ डौऽरी गैनी अर हैरान ह्‍वेके आपस मा बोन्‍न लगि गैनी कि, “आखिर मा यू छैई कु च? जु आंधी अर पाणि तैं आज्ञा देन्दु, अर ऊ वेकी मणदिन।”</verse>
				<verse number="26">गलील झील का पल्या छाला पर गिरासेनियों मुलक च। अर गिरासेनियों का ये मुलक मा एक मनखि छौ, जै पर खबेस लग्यां छा। अर यू खबेस मनखि तैं बार-बार अपणा कब्जा मा कैरी देन्दु छौ। अर लोग वेतैं बेड़ियों अर संगुळोन बान्धि के रखदा छा, मगर यू सब खबेस यों बेड़ियों तैं तोड़ि के वे मनखि तैं निर्जन जगों कू लि जान्दा छा। अर खबेस लगण की वजै से यू मनखि घौर मा नि रौन्दु छौ, अर ना ही यू कपड़ा पैरदु छौ, बल्किन यू त कबरिस्तान मा रौन्दु छौ। अर जब यीशु अर वेका चेला गिरासेनियों मुलक मा पौंछिनी, त जन्‍नि उ नाव बटि उतरि, कि देखा, तुरन्त यू मनखि जै पर खबेस लग्यां छा, वेन यीशु तैं देखि अर जोर-जोर से चिल्‍लै, अर वेका खुटों मा पोड़ि गै अर वेन ऊँची आवाज मा बोलि, “हे सबसे महान परमेस्वर का पुत्र यीशु, हम दुईयों को एक-दुसरा बटि कुई लेण-देण नि च तुम मि बटि क्या चाणा छाँ? मि तुम बटि बिन्ती करदु कि मितैं दुख नि द्‍या।” अर इन वेन इलै बोलि, किलैकि यीशु वे खबेस तैं वे मनखि मा बटि भैर निकळण की आज्ञा देणु छौ।</verse>
				<verse number="27"></verse>
				<verse number="28"></verse>
				<verse number="29"></verse>
				<verse number="30">तब यीशु न वे बटि पूछी, “तेरु नौ क्या च?” वेन बोलि, “पलटण च,” किलैकि भौत खबेस वे पर लग्यां छा।</verse>
				<verse number="31">अर ऊंन यीशु बटि बिन्ती कैरी, कि हमतै अधलोक मा जाणे आज्ञा नि द्‍या।</verse>
				<verse number="32">अर उख पाड़ पर सुंगरों को एक बड़ु झुण्ड चरणु छौ, इलै खबेसों न यीशु बटि बिन्ती कैरी कि, “हमतै ऊंमा बैठणे की आज्ञा दे द्‍या, अर वेन ऊंतैं जाण दिनी।”</verse>
				<verse number="33">तब खबेसों की पलटण वे मनखि मा बटि निकळि के सुंगरों मा बैठि गै, अर वेन ऊंकू बोलि, “जा।” अर ऊ खबेस निकळि के सुंगरों मा बैठ गैनी। अर सुंगरों को वु झुण्ड तुरन्त भ्योळ जनै भागी अर उखुन्द लमडी के झील मा पोड़ीनी अर सब डुबी के मोरि गैनी।</verse>
				<verse number="34">अर यू सब देखि के सुंगरों तैं चराण वळा उख बटि भगिनी, अर नगरों अर ग्‍वोंऽ मा जैके ऊंन या पूरि बात लोगु तैं बतै दिनी।</verse>
				<verse number="35">तब लोग जु कुछ ह्‍वे छौ वेतैं दिखण का बाना नगर बटि निकळि के यीशु का पास ऐनी। अर उख ऐके ऊंन वे मनखि तैं यीशु का खुटों का पास कपड़ा पैरि के अर चेतन बैठयूं देखि जै पर खबेस लग्यां छा, अर यू देखि के ऊ डौऽरी गैनी</verse>
				<verse number="36">अर जौं लोगु न यू सब होण देखि ऊंन नगर बटि अयां लोगु तैं बतै, कि खबेसों का द्‍वारा सतयुं यू मनखि कनकै खूब ह्‍वे।</verse>
				<verse number="37">तब गिरासेनियों मुलक का आस-पास का नगर बटि अयां लोगु न यीशु बटि बिन्ती कैरी, कि हमरा मुलक बटि चलि जा, किलैकि ऊ भौत डौऽरी गै छा। इलै यीशु उख बटि वापिस जाणु खुणि नाव मा बैठि गै।</verse>
				<verse number="38">पर जै मनखि मा बटि खबेस निकळ्यां छा वेन यीशु बटि बिन्ती कैरी, कि मितैं अपणा दगड़ा मा रौण द्‍या। मगर यीशु न वेतैं विदा कैरिके बोलि,</verse>
				<verse number="39">“जा, अपणा घौर चलि जा, अर परमेस्वर न त्वे खुणि जु काम कैरी, वेका बारा मा लोगु तैं बतौ।” अर उ गै अर जैके पूरा नगर मा परचार करण लगि गै, कि यीशु न मि खुणि एक भौत बड़ु काम कैरी।</verse>
				<verse number="40">जब यीशु अर वेका चेला गिरासेनियों का मुलक बटि वापिस ऐनी, त भीड़ का लोग न वेको स्वागत कैरी, किलैकि सब वेको इंतजार कना छा।</verse>
				<verse number="41">अर इथगा मा याईर नौ को एक मनखि वेका पास ऐ, अर यू यहूदियों का प्रार्थना भवन को मुखिया छौ। अर उ वेका खुटों मा पोड़ि के वे बटि बिन्ती करण लगि गै कि, गुरुजी, मेरा घौर चला।</verse>
				<verse number="42">किलैकि वेकी बारह साल की इकलौती नौनि छै, अर वा मुरण वळी छै। अर जब यीशु उख जाण लगि, त भीड़ जादा होण कि वजै से बड़ी धक्‍का-मुक्‍की होण लगि, अर लोग यीशु का मथि फरक्योंणा लगि गैनी।</verse>
				<verse number="43">अर उख भीड़ मा एक जनानि छै, जींतैं बारह सालों बटि ल्वे बुगणो को रोग छौ। अर ये इलाज का बाना वींन अपणा जीवन की पूरि कमै बैदों पर खर्च कैरी दिनी, पर कैन भि वींतैं खूब नि कैरी सैकी।</verse>
				<verse number="44">अर वींन पिछनै बटि ऐके यीशु का कपड़ा पर लग्यां झालरों तैं छ्वी, अर तुरन्त वींको ल्वे बुगण रुकी गै।</verse>
				<verse number="45">तब यीशु न बोलि, “मितैं कैन छ्वी?” जब सब लोग इनकार करण लगि गैनी, तब पतरस न बोलि, “गुरुजी, तुमतै त भीड़ न चारो तरफा बटि घेरयुं च अर वा ही तुमतै दबौंणि च।”</verse>
				<verse number="46">पर वेन बोलि, “ना-ना, मितैं कैन छ्वी च, किलैकि मितैं पता चलि गै, कि मि मा बटि सामर्थ निकळि।”</verse>
				<verse number="47">अर वा जनानि समझि गै कि अब मि छिपी के नि रै सकदु, त वा डौऽरा बाना कौंपदी-कौंपदी यीशु का पास मा ऐ अर वेका खुटों मा पोड़ि गै। तब वींन सब लोगु तैं बतै दिनी, कि मिन किलै यीशु तैं छ्वी अर कनकै एकदम से खूब ह्‍वे ग्यों।</verse>
				<verse number="48">तब वेन वींकू बोलि, “बेटी, तिन बिस्वास कैरी इलै तू खूब ह्‍वे गै, अब तू शान्ति से चलि जा।”</verse>
				<verse number="49">अर जब यीशु इन बोन्‍नु ही छौ, तबरि याईर जु की प्रार्थना भवन को मुखिया छौ, वेका घौर बटि कुई आदिम ऐ। अर वेन वेकू बोलि, “मुखिया जी, तुमरि नौनि मोरि गै, अब गुरुजी तैं परेसान नि कैरा।”</verse>
				<verse number="50">पर यू सुणी के यीशु न याईर तैं जबाब देई, “डौऽर ना, पर बिस्वास कैर तब वा खूब ह्‍वे जालि।”</verse>
				<verse number="51">अर जब यीशु वेका घौर मा पौंछी, तब वेन पतरस, यूहन्‍ना अर याकूब अर वीं नौनि का ब्वे-बबों का अलावा और कैतैं भि अपणा दगड़ा भितर नि औण दिनी।</verse>
				<verse number="52">अर उख सब लोग वीं नौनि खुणि रुंणा छा, मगर वेन ऊंकू बोलि, “नि रुवा, वा मोरि नि च बल्किन मा सिंणी च।”</verse>
				<verse number="53">पर सब लोग वेकी बात पर हसण लगि गैनी, किलैकि ऊ जणदा छा कि वा मोरि गै।</verse>
				<verse number="54">पर यीशु न वीं नौनि को हाथ पकड़ी के बोलि, “बेटी, उठ जा,”</verse>
				<verse number="55">अर वींको पराण फिर से वापिस ऐ गै, अर वा तुरन्त उठी गै। तब वेन बोलि, ईं तैं खाणु कू कुछ द्‍या।</verse>
				<verse number="56">अर वींका ब्वे-बाब यू देखि के हकदक ह्‍वे गैनी, पर यीशु न ऊंतैं चितै कि इख जु कुछ भि ह्‍वे, वेका बारा मा कै बटि कुछ नि बुलयां।</verse>
			</chapter>
			<chapter number="9">
				<verse number="1">तब यीशु न बारह चेलों तैं एक साथ बुलै, अर ऊंतैं सब खबेसों तैं निकळणु को अर बिमारियों तैं खूब करण की सामर्थ अर अधिकार दिनी।</verse>
				<verse number="2">अर वेन ऊंतैं परमेस्वर का राज को परचार करणु कू अर बिमारों तैं खूब करणु कू भेजि।</verse>
				<verse number="3">अर वेन ऊंकू बोलि, “यात्रा करण का बगत कुछ नि लि जयां, ना त लाठु, अर ना ही झोळा, ना त रुट्‍टी, ना रुपया अर ना ही दुई कुरता।</verse>
				<verse number="4">अर जै घौर मा तुम जैल्या, उखि रयां अर वे घौर बटि ही विदा होयां।</verse>
				<verse number="5">अर अगर वे नगर का लोग तुमरि बातों तैं स्वीकार नि करला त उख बटि निकळण दौं अपणा खुटों पर लगीं धूळ उखि झाड़ि द्‍या, ताकि इन कैरिके ऊंका खिलाप गवै हो।”</verse>
				<verse number="6">तब चेला चलि गैनी अर गौं-गौं मा शुभ समाचार सुनौण लगि गैनी, अर लोगु तैं खूब कना रैनी अर जग-जगा घूमणा रैनी।</verse>
				<verse number="7">अर हेरोदेस अन्तिपास जु गलील मुलक पर सासन करण वळु छौ। जब वेन यीशु का बारा मा लोगु की यों सब बातों तैं सुणी, कि यूहन्‍ना बपतिस्मा देण वळु मुरदो मा बटि ज्यून्दु ह्‍वे गै, त उ भौत जादा घबरै गै।</verse>
				<verse number="8">अर कुछ लोग बोन्‍ना छा, कि एलिय्याह रैबर्या परगट ह्‍वे गै, अर कुछ लोग त इन भि बोन्‍ना छा, कि पुरणा रैबर्यों मा बटि कुई ज्यून्दु ह्‍वे गै।</verse>
				<verse number="9">पर हेरोदेस अन्तिपास न बोलि कि, “यूहन्‍ना को त मिन मुण्ड़ कटवैयली छौ त अब यू मनखि कु च, जैका बारा मा मि यों बातों तैं सुनणु छौं?” इलै वेन यीशु तैं दिखणे की इच्छा कैरी।</verse>
				<verse number="10">अर जब यीशु का खास चेला शुभ समाचार को परचार कैरिके वापिस लौटिनी, अर जु कुछ ऊंन कैरी छौ, वेका बारा मा ऊंन यीशु तैं बतै। तब वेन चुपचाप से ऊंतैं अलग कैरी अर अफ दगड़ा बैतसैदा नगर मा लि गै।</verse>
				<verse number="11">पर लोगु तैं पता चलि गै, इलै ऊ वेका पिछनै जाण लगि गैनी। अर यीशु न भि ऊंको स्वागत कैरी, अर ऊं बटि परमेस्वर का राज की बात करण लगि गै, अर जु खूब होण चाणा छा ऊंतैं खूब कैरी।</verse>
				<verse number="12">अर जब रुमुक ह्‍वे गै। तब बारह चेलों न यीशु का पास ऐके बोलि, “गुरुजी, भीड़ तैं भेजि द्‍या ताकि लोग आस-पास का ग्‍वोंऽ अर बस्तियों मा जैके अपणा रौण को ठिकाणु अर खाणु को इंतजाम कैरी सैका, किलैकि हम एक निर्जन जगा मा छां।”</verse>
				<verse number="13">तब वेन चेलों कू बोलि, “तुम ही यों लोगु तैं खाणुक कू द्‍या।” अर ऊंन बोलि, “हम मा त पांच रुट्‍टी अर दुई माछों का अलावा और कुछ भि नि च, पर अगर जु हम जैके यों सभ्यों खुणि खाणुक खरीदी के ला, तब त ह्‍वे सकदु च।”</verse>
				<verse number="14">तब यीशु न चेलों कू बोलि, “ऊंतैं पचास-पचास की पांत मा खाणु खुणि बैठे द्‍या।” अर ऊं लोगु मा केवल बैख ही लगभग पांच हजार छा।</verse>
				<verse number="15">अर चेलों न इन्‍नि कैरी, अर सभ्यों तैं बैठे दिनी।</verse>
				<verse number="16">तब यीशु न पांच रुट्‍टी अर दुई माछों तैं लेई, अर स्वर्ग जनै देखि के परमेस्वर को धन्यवाद देई, अर तोड़ि-तोड़ि के चेलों तैं दिनी ताकि ऊ लोगु तैं द्‍या।</verse>
				<verse number="17">अर जब सब लोग खै के छक ह्‍वे गैनी, अर जु टुकड़ा बचि गै छा, ऊंतैं चेलों न बटोळि अर बारह कण्डो तैं भोरी के उठे।</verse>
				<verse number="18">एक बार यीशु अकेला मा प्रार्थना कनु छौ, अर वेका चेला वेका पास ऐनी, तब वेन ऊं बटि पूछी कि, “मि कु छौं अर लोग मेरा बारा मा क्या बुल्दिन?”</verse>
				<verse number="19">तब चेलों न वेतैं जबाब दिनी, “गुरुजी, लोग त तुम खुणि यूहन्‍ना बपतिस्मा देण वळु बुल्दिन, अर कुछ बुल्दिन, कि तुम एलिय्याह रैबर्या छाँ, अर कुछ त इन भि बुल्दिन कि पुरणा रैबर्यों मा बटि कुई ज्यून्दु ह्‍वे गै।”</verse>
				<verse number="20">तब वेन ऊं बटि पूछी, “तुमतै क्या लगदु की मि कु छौं?” अर पतरस न जबाब दिनी, “गुरुजी, तुम त परमेस्वर का भेज्यां मसीह छाँ।”</verse>
				<verse number="21">तब यीशु न चेलों तैं चितै के बोलि कि, “या बात कै मा नि बुलयां।”</verse>
				<verse number="22">तब यीशु न चेलों तैं बतै, “यू जरुरी च कि मनखि को पुत्र भौत खैरि खौऽ, अर अध्यक्षों, मुख्य पुरोहितों अर शास्‍त्री लोग वेतैं नकारी के मरवै द्‍या, मगर उ तिसरा दिन मुरदो मा बटि ज्यून्दु ह्‍वे जालु।”</verse>
				<verse number="23">तब यीशु न ऊं सभ्यों कू बोलि, “अगर कुई मेरा पिछनै औण चान्दु, त उ अफ तैं नकारी द्‍यो, अर दुख अर मौत तैं झिलणु खुणि हर रोज तयार ह्‍वेके मेरा पिछनै चलु।</verse>
				<verse number="24">किलैकि जु कुई अपणा पराण तैं बचौण चालु, उ वेतैं ख्वे द्‍यालु। मगर जु कुई मेरा खातिर अपणा पराण तैं ख्वे द्‍यालु, उई सदनि का जीवन तैं पालु।</verse>
				<verse number="25">अर अगर कुई मनखि सरा संसार की हर चीजों तैं हासिल कैरी द्‍यो, मगर उ अपणा पराण तैं ख्वे द्‍यो याने कि वे बटि वेको पराण ले लिये जौ, त वेतैं फिर क्या फैदा ह्‍वे?</verse>
				<verse number="26">अर जु कुई मि बटि अर मेरा वचनों बटि सरमान्दु, त जब मनखि को पुत्र अपणी अर अपणा पिता अर पवित्र स्वर्गदूतों की सामर्थ का दगड़ा मा वापस आलु, त उ भि वे मनखि से सरमालु।</verse>
				<verse number="27">“पर मि तुम बटि सच्‍च बोन्‍नु छौं, कि इख कुछ इन्द्रया भि खड़ा छिन, जु तब तक नि मुरला, जब तक की वु परमेस्वर का राज तैं देखि नि द्‍याला।”</verse>
				<verse number="28">अर यों सब बातों का करीब आठ दिन बाद यीशु पतरस, याकूब अर यूहन्‍ना तैं अपणा दगड़ा मा प्रार्थना करणु कू एक ऊँचा ढौंडा मा लि गै।</verse>
				<verse number="29">अर जब यीशु प्रार्थना कनु छौ, त वेको मुख को रुप-रंग ही बदलि गै, अर वेका कपड़ा सफेद ह्‍वेके चमकण लगि गैनी।</verse>
				<verse number="30">अर देखा, दुई मनखि वेका दगड़ा मा बात करणा छा, जु की मूसा अर एलिय्याह छा।</verse>
				<verse number="31">अर यू सब स्वर्गीय तेज मा दिखै दिनी, अर वु यीशु की मौत की बात कना छा, जु कि यरूशलेम नगर मा पूरि होण वळी छै।</verse>
				<verse number="32">पर पतरस अर वेका दगड़्यों पर निन्द बौलईं छै, अर जब ऊ ढंगल चेत मा ऐनी, त ऊंन यीशु की महानता तैं देखि। अर वेका दगड़ा मा ऊं दुई मनखियों तैं भि देखि, जु वेका दगड़ा मा खड़ा होयां छा।</verse>
				<verse number="33">जब ऊ दुई वेका पास बटि जाण लगि गैनी, त पतरस न यीशु कू बोलि कि, “गुरुजी, हमरु इख रौण ठिक च, इलै हम इख तीन तम्बू बणौला, एक तुम खुणि, एक मूसा खुणि अर एक एलिय्याह खुणि।” पर उ ईं बात तैं नि जणदु छौ कि उ बोन्‍नु क्या च।</verse>
				<verse number="34">अर जब पतरस इन बोन्‍नु ही छौ, कि तबरि एक बादळ न ऐके ऊंतैं घेरि दिनी, अर वे बादळ मा घिरेण की वजै से ऊ भौत डौऽरी गैनी।</verse>
				<verse number="35">अर तब वे बादळ मा बटि एक आवाज ऐ, “ यू मेरु पुत्र च, अर येतैं मिन चुणी येकी सुणा।”</verse>
				<verse number="36">अर जब आवाज बन्द ह्‍वे गै, त यीशु इखुली दिखै। अर जु कुछ ऊंन देखि छौ, वे बगत का बारा ऊंन कै बटि कुछ नि बोलि, बल्किन मा ऊ चुपचाप रैनी।</verse>
				<verse number="37">अर दुसरा दिन जब यीशु अर वेका चेला पाड़ बटि उतरिनी, त एक बड़ी भीड़ ऊंतैं मिली।</verse>
				<verse number="38">अर तब भीड़ मा बटि एक आदिम न चिल्‍लै के बोलि “गुरुजी, मि तुम बटि बिन्ती करदु, कि मेरा नौना पर दया कैरा किलैकि उ मेरु इकलौतु नौनु च।</verse>
				<verse number="39">अर देखा, एक खबेस मेरा नौना तैं अपणा कब्जा मा कैरी देन्दु अर उ अचानक जोर-जोर से चिलाण लगि जान्दु। अर उ खबेस वेतैं इन मरोड़दु कि वेका गिच्‍चा बटि गाज निकळण लगि जान्दु, अर उ मेरा नौना तैं बड़ी मुस्किल से छुड़दु, अर उ खबेस वेको नास करण चाणु च।</verse>
				<verse number="40">अर मिन तुमरा चेलों बटि बिन्ती कैरी कि, ऊ वे खबेस तैं वेमा बटि निकाळि द्‍या, मगर ऊ वेतैं निकाळि नि सकिनी।”</verse>
				<verse number="41">तब यीशु न जबाब देई, “हे बिस्वास नि करण वळो अर भ्रष्‍ट पीढ़ी का लोगु, आखिर मा मि कब तक तुमरा दगड़ा मा रौलु, अर कब तक तुमरि सौलु? जा, अपणा नौना तैं इनै लेके अऽ।”</verse>
				<verse number="42">अर जब नौनु यीशु का पास औणु ही छौ, तब खबेस न वेतैं पटकी के मरोड़ि दिनी। पर यीशु न वे खबेस तैं झिड़की, अर वे नौना तैं खूब कैरिके वेका बुबा का सुपुर्द कैरी दिनी।</verse>
				<verse number="43">अर तब सब लोग परमेस्वर की महानता तैं देखि के दंग रै गैनी। अर लोग यीशु का सब काम तैं देखि के ताजुब मा पोड़ि जान्दा छा।</verse>
				<verse number="44">तब यीशु न अपणा चेलों कू बोलि कि, “तुम मेरी ईं बात तैं कन्दूड़ खोली के सुणी ल्या, कि मनखि को पुत्र लोगु का हाथों मा पकड़वै जाण वळु च।”</verse>
				<verse number="45">मगर चेला वेकी ईं बात तैं नि समझिनी, किलैकि ऊं बटि ईं बात को मतलब छिपयै गै। इलै ऊ यीशु की ईं बात तैं नि समझिनी, अर ऊ वे बटि ईं बात को मतलब पूछण से भि डऽरदा छा।</verse>
				<verse number="46">एक बार चेलों का बीच वाद-विवाद होण लगि गै कि हम मा बटि सबसे खास कु च?</verse>
				<verse number="47">पर यीशु ऊंका मन की ईं बात तैं जाणि गै कि ऊंका मन मा क्या विचार छिन। तब वेन एक बच्‍चा तैं अपणा पास खड़ु कैरी। अर बोलि कि,</verse>
				<verse number="48">“जु कुई मेरा नौ से ये बच्‍चा तैं स्वीकार करदु उ मितैं स्वीकार करदु, अर जु कुई मितैं स्वीकार करदु उ वेतैं स्वीकार करदु जैन मितैं भेजि च। किलैकि तुम मा बटि जु कुई भि दीन बणि के चललु, उई सबसे खास होलु।”</verse>
				<verse number="49">तब यूहन्‍ना न बोलि, “गुरुजी, हमुन एक आदिम तैं तुमरा नौ से खबेसों तैं निकळद देखि, अर हमुन वेकू मना कैरी, कि यू काम नि कैर। अर इन हमुन इलै कैरी, किलैकि उ हमरा दगड़ा मा नि रौन्दु।”</verse>
				<verse number="50">पर यीशु न वेकू बोलि, “वेतैं नि रोका, किलैकि जु तुमरा खिलाप मा नि च, उ तुमरा पक्ष मा च।”</verse>
				<verse number="51">अर जब उ बगत नजदीक औण लगि गै, कि यीशु स्वर्ग मा उठये जौ। तब वेन यरूशलेम नगर मा जाण को पक्‍कु विचार बणै, अर उखा कू निकळि गै।</verse>
				<verse number="52">अर यीशु न अपणा जाण से पैलि कुछ सेवकों तैं सामरिया मुलक का एक गौं मा भेजि, ताकि ऊ वेका उख पौंछण से पैलि तयारी कैरी सैका।</verse>
				<verse number="53">मगर उखा लोगु न वेको स्वागत नि कैरी, किलैकि यीशु यरूशलेम नगर जाणु छौ।</verse>
				<verse number="54">अर लोगु को इन सभौ देखि के याकूब अर यूहन्‍ना न बोलि, “प्रभु, अगर तुमरि इच्छा हो, त हमतै आज्ञा द्‍या, कि स्वर्ग बटि आग अऽ अर यों लोगु तैं भसम कैरी द्‍यो?”</verse>
				<verse number="55">पर यीशु न पिछनै मुड़ि के ऊं दुईयों तैं झिड़की।</verse>
				<verse number="56">तब ऊ सब कै दुसरा गौं कू चलि गैनी।</verse>
				<verse number="57">जब यीशु अर वेका चेला बाटा मा जाणा छा, तब एक मनखि न यीशु कू बोलि, “गुरुजी, जख-जख तुम जैल्या उख-उख मि तुमरा पिछनै औलु।”</verse>
				<verse number="58">तब यीशु न वेकू बोलि, “स्याळों का उड़्यार अर पंछियों का घोल होनदिन, पर मनखि का पुत्र का पास इन्दरि कुई जगा नि च, जख उ रुकी के आराम कैरो।”</verse>
				<verse number="59">अर यीशु न ऊं मदि एक मनखि कू बोलि, “मेरा पिछनै अऽ,” पर वेन जबाब दिनी, “प्रभु पैलि मितैं इन इजाजत दे द्‍या, ताकि मि अपणा घौर जैके पैलि अपणा बुबा की सेवा कैरुं अर जब उ मोरि जाला, तब मि ऐके तुमरो चेला बणि जौलु।”</verse>
				<verse number="60">पर वेन वे मनखि कू बोलि, “जु आत्मिक रुप से मुरयां छिन, ऊंतैं अपणा मुरदो तैं दफनौण दे, पर तू जैके परमेस्वर का राज को परचार कैर।”</verse>
				<verse number="61">तब एक और मनखि न यीशु कू बोलि, “प्रभु मि तुमरा पिछनै औलु, पर पैलि मितैं इजाजत द्‍या, ताकि मि पैलि अपणा घौर वळो बटि विदै ले ल्यूं।”</verse>
				<verse number="62">तब यीशु न वेकू बोलि कि, “हौळ लगौण का बगत जु कुई भि पिछनै मुड़ि के दिखदु, इन्द्रयो मनखि परमेस्वर का राज का लैख नि च।”</verse>
			</chapter>
			<chapter number="10">
				<verse number="1">अर यों सब बातों का बाद प्रभु यीशु न और सत्तर लोगु तैं चुणी, अर ऊंतैं दुई-दे कैरिके अपणा अगनै हर वे नगर अर वीं जगा भेजि, जख यीशु जाण चान्दु छौ।</verse>
				<verse number="2">अर यीशु न ऊंकू बोलि, “फसल त लवै कू तयार च पर मजदूरों की कमी च, इलै पुंगड़ा का मालिक बटि बिन्ती कैरा, कि उ अपणा पुंगड़ों की लवै करणु खुणि मजदूरों तैं भेजि द्‍यो।”</verse>
				<verse number="3">तब यीशु न ऊंकू बोलि, “जा, मि तुमतै खतरनाक भेड़ियों का बीच मा मेम्‍ना का जन भेजणु छौं।</verse>
				<verse number="4">अर जाण दौं अपणा दगड़ा मा नऽ त बटुवा, अर ना झोळा, ना ही जुता लि जयां। अर ना ही बाटा मा कै को हाल-चाल पूछी के अपणु बगत बरबाद कर्यां।</verse>
				<verse number="5">अर जै घौर मा तुम जैल्या, त सबसे पैलि बुलयां, ‘ये घौर का लोगु तैं शान्ति मिलु।’</verse>
				<verse number="6">अर अगर उख कुई मनखि शान्ति को जीवन जीण वळु होलु, त शान्ति को उ वचन वे पर ठैरि जालु, निथर तुम मा वापिस ऐ जालु।</verse>
				<verse number="7">अर घौर-घौर नि जयां। पर वे ही घौर मा रयां, अर जु कुछ भि वु तुमतै खाण-पीणु कू द्‍याला तुम खयां, किलैकि काम करण वळा तैं वेकी ध्याड़ि मिलण चयेणी।</verse>
				<verse number="8">अर जै नगर मा तुम जैल्या, अर अगर उखा लोग तुमरो सम्मान करदिन, त जु कुछ भि वु तुमरा अगनै रखला तुम वेतैं खयां।</verse>
				<verse number="9">अर जु लोग उख बिमार छिन ऊंतैं खूब कैरा अर ऊंतैं बतै द्‍या कि, ‘परमेस्वर को राज तुमरा नजदीक ऐ गै।’</verse>
				<verse number="10">पर जै नगर मा तुम जैल्या, अर अगर उखा लोग तुमरो सम्मान नि कैरा, त वे नगर का बजारों मा जैके बुलयां कि,</verse>
				<verse number="11">‘तुमरा ये नगर की धूळ भि ज्वा हमरा खुटों मा लगीं च, वींतैं हम तुमरा समणि झाड़ि देन्द्‍यां, पर जाणि जा कि परमेस्वर को राज तुमरा नजदीक ऐ गै।’</verse>
				<verse number="12">पर मि तुमतै बतै देन्दु, कि न्याय का दिन ये नगर का लोगु की हालत सदोम नगर का लोगु की हालत से भि जादा खराब होलि।”</verse>
				<verse number="13">तब यीशु न इन बोलि, “हे खुराजीन अर बैतसैदा नगर का लोगु तुम पर हाय च, किलैकि जु चमत्कारिक काम तुमरा इख किये गैनी, अगर ऊ काम सूर अर सैदा नगर मा किये जान्दा, त उखा लोग न कभि टाट ओड़ि के अर छारा मा बैठि के पस्ताप कैरी देण छौ।</verse>
				<verse number="14">पर मि तुमतै बतै देन्दु, कि न्याय का दिन सूर अर सैदा नगर का लोगु की दसा तुम लोगु से जादा खूब होलि।</verse>
				<verse number="15">हे कफरनहूम नगर का लोगु तुम क्या सोचद्‍यां, कि तुमतै स्वर्ग तक ऊँचो किये जालु ‘नऽ रे ना’ तुमतै त अधलोक मा डळै जालु।”</verse>
				<verse number="16">तब वेन अपणा चेलों कू बोलि, “जु तुमरि शिक्षा तैं सुणदु उ मेरी शिक्षा तैं सुणदु। अर जु तुमतै स्वीकार नि करदु, उ मितैं भि स्वीकार नि करदु। अर जु मितैं स्वीकार नि करदु, उ वेतैं स्वीकार नि करदु जैन मितैं भेजि च।”</verse>
				<verse number="17">अर फिर यीशु का द्‍वारा चुण्यां सत्तर लोग खुश ह्‍वेके वापस ऐनी अर बोन्‍न लगि गैनी, “प्रभु, तुमरा नौ से त खबेस भि हमरा समणि हार माणी जनदिन।”</verse>
				<verse number="18">तब यीशु न ऊंकू बोलि, “मिन शैतान तैं स्वर्ग बटि बिजली जन मूड़ी पोड़द देखि।</verse>
				<verse number="19">अर सुणा, जन लोग गुरौ अर बिच्छीयों तैं खुटों तौळ पितेड़ देन्दी, ठिक उन्‍नि मि भि तुमतै दुसमन की पूरि ताकत पर अधिकार देन्दु। अर कै भि चीज से तुमतै नुकसान नि होलु।</verse>
				<verse number="20">पर फिर भि ईं बात से आनन्द नि मणा, कि खबेस भि तुमरा समणि हार माणी जनदिन। मगर ईं बात को आनन्द मणा, कि तुमरा नौ स्वर्ग मा लिख्यां छिन।”</verse>
				<verse number="21">अर उबरि यीशु पवित्र आत्मा बटि खुश ह्‍वेके बोन्‍न लगि गै, “हे मेरा पिता, स्वर्ग अर धरती का प्रभु, मि तुमरो धन्यवाद करदु, हाँ पिता किलैकि तुमतै यू ही अच्छु लगि, कि यू सब बात समझदारों अर अकलमन्दो बटि छिपै जौ, अर ऊं लोगु पर परगट किये जौ जु बच्‍चों का जन छिन।</verse>
				<verse number="22">अर मेरा पिता न मि मा सब कुछ सौंप्याली, अर पुत्र का अलावा कुई नि जणदु कि पिता कु च, अर ना ही पिता का अलावा कुई जणदु की पुत्र कु च, पर केवल पुत्र ही च जै पर उ चान्दु, वे पर वेतैं परगट करदु।”</verse>
				<verse number="23">तब यीशु न अपणा चेलों कि तरफा मुड़ि के चुपके से बोलि, “धन्य छिन तुमरा आंखा, जु कि यू सब कुछ होन्द दिखणा छिन।</verse>
				<verse number="24">मि तुमतै बतै देन्दु, कि परमेस्वर का भौत सा रैबर्या अर राजाओं न चै कि ऊ यू सब देखा, जौं तैं तुम दिखणा छाँ मगर वु देख नि सकिनी। अर जौं बातों तैं तुम सुनणा छाँ, ऊं बातों तैं वु सुनण चान्दा छा, मगर ऊंन नि सुणी सैकी।”</verse>
				<verse number="25">अर एक बार एक मनखि जु की शास्‍त्री छौ, वेन यीशु तैं परखण का खातिर खड़ु ह्‍वेके बोलि, “गुरुजी, सदनि का जीवन को वारिस होणु खुणि मि क्या जि कैरुं?”</verse>
				<verse number="26">तब यीशु वेकू बोलि, “नियम-कानूनों मा क्या लिख्यूं च? तू वेतैं कनकै पढदी?”</verse>
				<verse number="27">तब शास्‍त्री न वेतैं जबाब देई, “तू अपणा प्रभु परमेस्वर तैं पूरा मनळ, अपणा पूरा पराणळ, अर अपणी पूरि ताकतळ अर पूरि अकलळ प्यार कैर। अर जन प्यार तू खुद बटि करदी, ठिक उन्‍नि प्यार तू सब लोगु से भि कैर।”</verse>
				<verse number="28">तब यीशु न वेकू बोलि, “तिन ठिक जबाब देई, तू इन्‍नि कनु रौ तब त्वेतै सदनि को जीवन मिललु।”</verse>
				<verse number="29">पर शास्‍त्री न अफु तैं धरमी बतौण कि मनसा से यीशु बटि पूछी, “त गुरुजी, इन बता कि मेरु पड़ोसी कु च?”</verse>
				<verse number="30">तब यीशु न बोलि, “एक बार एक मनखि यरूशलेम नगर बटि निकळि के मूड़ी यरीहो नगर कू औणु छौ। अर तब डाकुओं न वेतैं अधा बाटा मा घेर दिनी, अर वेका कपड़ों तैं गाडी दिनी, अर वेतैं मारी-पीटि के अधमरो छोड़ि दिनी, अर उख बटि चलि गैनी।</verse>
				<verse number="31">“अर इतफाकन, एक पुरोहित वे ही बाटा बटि औणु छौ, अर वेन वेतैं देखि त दुसरि तरफा बटि निकळि के चलि गै।</verse>
				<verse number="32">“अर ठिक उन्‍नि एक लेवी मनखि भि वे बाटा बटि औणु छौ, अर वेन भि वेतैं देखि पर दुसरि तरफा बटि निकळि के चलि गै।</verse>
				<verse number="33">“अर एक सामरी मनखि भि वे बाटा बटि ऐ, अर जब वेन ये मनखि तैं देखि त वेका मन मा बड़ु तरस ऐ।</verse>
				<verse number="34">अर उ वेका पास ऐ, वेका घौ पर तेल अर दारु-दवै कैरिके वे पर पट्‍टी बान्धि, अर वे घायल मनखि तैं अपणा जानबर मा रखी के धर्मशाळा मा लि गै, अर वेकी देख-रेख कैरी।</verse>
				<verse number="35">अर दुसरा दिन वे मनखि न धर्मशाळा का मालिक तैं दुई दीनार निकाळि के दिनी अर बोलि, ‘येकी देख-रेख कैरी, अर येका अलावा जु कुछ भि तेरु खर्चा लगलु, वेतैं मि वापिस औण का बाद त्वेतै दे द्‍यूलु।’”</verse>
				<verse number="36">तब यीशु न वे शास्‍त्री बटि पूछी, “अब इन बतौ त्वेतै क्या लगदु, कि यों तिन्युं मा बटि कु जि वेकू सच्‍चु पड़ोसी होलु जैतैं डाकुओं न घेरियली छौ?”</verse>
				<verse number="37">तब वेन बोलि, “गुरुजी, उ सामरी जैन वे पर दया कैरी।” तब यीशु न वेकू बोलि, “जा, तू भि इन्‍नि कैर।”</verse>
				<verse number="38">एक बार यीशु अर वेका चेला जाणा छा, त वु एक गौं मा गैनी, तब मारथा नौ की एक जनानि न अपणा घौर मा ऊंको स्वागत कैरी।</verse>
				<verse number="39">अर वीं की एक बैंण छै, अर वींको नौ मरियम छौ। अर मरियम प्रभु यीशु का खुटों का पास बैठि के वेका वचनों तैं सुनणी छै।</verse>
				<verse number="40">मगर मारथा काम-काज करद-करद भौत परेसान ह्‍वे गै। तब वा यीशु का पास ऐके बोन्‍न लगि गै, “प्रभु, क्या तुमतै कुछ भि चिन्ता नि च, कि मेरी बैंण न मैमानों की सेवा करणु खुणि मितैं अकेला छोड़याली? इलै वींकू बोला कि मेरा दगड़ा मा मदद कैर।”</verse>
				<verse number="41">तब प्रभु न वींतैं जबाब देई, “हे मारथा, तू भौत सरी बातों की चिन्ता-फिकर करदी अर घबरान्दी छैई।</verse>
				<verse number="42">देख, मरियम न वु अच्छु हिस्सा चुण्यालि जु वीं बटि कभि भि लिये नि जालु, अर देख सबसे पैलि येकी ही जरुरत च।”</verse>
			</chapter>
			<chapter number="11">
				<verse number="1">एक बार यीशु कै जगा मा प्रार्थना कनु छौ। अर जब वेन प्रार्थना कैरियाली छै, तब वेका एक चेला न वेकू बोलि, “प्रभु, जन यूहन्‍ना बपतिस्मा देण वळन अपणा चेलों तैं प्रार्थना करण सिखै ठिक उन्‍नि तुम हमतै भि सिखै द्‍या।”</verse>
				<verse number="2">तब वेन ऊंकू बोलि, “जब तुम प्रार्थना करिल्या त इन बुलयां कि, “‘हे हमरा पिता, तुमरो नौ पवित्र मणै जौ, तुमरो राज अऽ।</verse>
				<verse number="3">अर हमरि रोज की रुट्‍टी हमतै रोज द्‍या।</verse>
				<verse number="4">अर हमरा पापों तैं माफ कैरा, जन हम ऊंतैं माफ करद्‍यां, जु की हमरा खिलाप मा पाप करदिन, अर शैतान की बातों का द्‍वारा हम भकलै नि जा।’”</verse>
				<verse number="5">तब यीशु न ऊंकू बोलि, “माणी ल्या तुम मा बटि कै को एक दगड़्या च, अर वु अधि रात मा तुमरा पास ऐके बोलो कि, ‘दगड़्या जरा तीन रुट्‍टी दे दे।</verse>
				<verse number="6">किलैकि मेरु एक दगड़्या सफर कैरिके अभि हमरा इख ऐ, अर वेतैं खिलाणु कू मि मा कुछ भि नि च।’</verse>
				<verse number="7">तब उ भितर बटि जबाब द्‍यो कि, ‘मितैं परेसान नि कैर, अब मिन द्‍वार बन्द कैरियाली, अर मेरा बाल-बच्‍चा मि दगड़ि बिस्तर मा छिन, इलै मि उठी के त्वेतै नि दे सकदु।’</verse>
				<verse number="8">“मि तुमतै बतै देन्दु कि, दगड़्या होण का नाता अगर उ उठी के वेतैं नि द्‍यो, पर जब वेकू वु दगड़्या वे बटि बिन झिझकयां रुट्‍टी मंगणु रालु, तब रुट्‍टी मंगण की वजै से वु उठी के वेकी जरुरत का मुताबिक वेतैं दे दयालु।”</verse>
				<verse number="9">अर मि तुमतै बतै देन्दु, “मांगा, त तुमतै दिये जालु, खुजैल्या त तुम पैल्या, खखटैल्या त तुम खुणि खुलै जालु।</verse>
				<verse number="10">किलैकि जु कुई मंगदु च वेतैं मिलदु च, अर जु खुज्यान्दु च उ पौन्दु च, अर जु खखटान्दु च वे खुणि खुलै जान्दु।</verse>
				<verse number="11">अर तुम मा बटि इन्द्रयो बुबा कु च कि जब वेकू नौनु वे बटि रुट्‍टी मांगु त उ वेतैं ढुंगो द्‍यो, या माछु मांगु त माछा का बदला मा उ वेतैं गुरौ द्‍यो?</verse>
				<verse number="12">या अगर अण्ड़ा मांगु त वेतैं बिच्छी द्‍यो?</verse>
				<verse number="13">इलै जब तुम बुरा ह्‍वेके भि अपणा बाल-बच्‍चों तैं अच्छी चीज देण जणद्‍यां, त जु लोग स्वर्ग मा रौण वळा पिता बटि मंगदा छिन ऊंतैं वु पवित्र आत्मा किलै नि द्‍यालु।”</verse>
				<verse number="14">अर यीशु एक मनखि मा बटि गूंगु बणै देण वळा खबेस तैं निकळणु छौ, जब उ निकळि गै त गूंगु बुलण लगि गै, अर यू देखि के लोग हैरान ह्‍वे गैनी।</verse>
				<verse number="15">पर भीड़ का लोगु मा बटि कुछ न बोलि कि, “यू खबेसों का अधिकारी बालजबूल की मदद से खबेसों तैं निकळदु।”</verse>
				<verse number="16">तब कुछ लोगु न वेकी अजमैस करण खुणि वे बटि एक स्वर्गीय चिन्‍न की मांग कैरी।</verse>
				<verse number="17">पर यीशु ऊंका मनों की बात जाणि गै अर वेन ऊंकू बोलि, “अगर कै राज्य का दुई हिस्सा ह्‍वे जनदिन, त उ राज्य बरबाद ह्‍वे जान्दु। अर उन्‍नि कै घौर का भि अगर दुई हिस्सा ह्‍वे जनदिन, त उ भि बरबाद ह्‍वे जान्दु,</verse>
				<verse number="18">त अब तुम मितैं इन बता, ‘अगर शैतान खुद ही अपणा खिलाप ह्‍वे जालु, त वेको राज कनकै बणयूं रालु?’ अर यू मि तुम बटि इलै पूछणु छौं, किलैकि तुम मेरा बारा मा बुल्द्‍यां कि मि बालजबूल याने की शैतान की मदद से खबेसों तैं निकळदु छौं।</verse>
				<verse number="19">अगर जु मि बालजबूल की मदद से खबेसों तैं निकळदु छौं, त तुमरि शिक्षा का मुताबिक चलण वळा खबेसों तैं कै की मददळ निकळदिन? इलै वु लोग ही तुमतै गळत साबित करला।</verse>
				<verse number="20">पर अगर जु मि परमेस्वर की सामर्थळ खबेसों तैं निकळदु, त ईं बात तैं सुणिल्या कि परमेस्वर को राज तुमरा नजदीक ऐ गै।</verse>
				<verse number="21">“अर जब एक ताकतबर मनखि अपणा घौर अर जैजाद की रखवळी करदु, अर वेकी रखवळी खुणि अपणा पास हथियार भि रखदु, ताकि वेकी जैजाद बचि रौ। मगर मि तुमतै बतै देन्दु, कि जब वेसे भि जादा ताकतबर मनखि वे पर हम्‍ला करदु अर जीती जान्दु, त वेकी ईं जैजाद तैं वु अपणा लोगु मा बांटि देन्दु। तब यू ताकतबर मनखि वेका हथियार तैं लूछि लेन्दु जौं पर वे मनखि को भरोसा छौ।</verse>
				<verse number="22"></verse>
				<verse number="23">जु मेरा दगड़ा मा नि च उ मेरा खिलाप च, अर जु मेरा दगड़ा मा लोगु तैं इकट्‍ठा नि करलु उ ऊंतैं परमेस्वर बटि दूर लि जान्दु।”</verse>
				<verse number="24">“अर जब कुई खबेस कै मनखि बटि भैर निकळदु, त उ खबेस सूखि जगों मा आराम करण की जगा खुज्यान्दु, अर जब वेतैं आराम करण की जगा नि मिलदी तब उ बुल्दु कि, ‘मि वापिस अपणा वे ही घौर मा चलि जौलु जख बटि निकळि छौं।’</verse>
				<verse number="25">तब उ वापिस ऐके वे घौर तैं साफ-सुत्रो अर सज्युं-धज्युं पौन्दु।</verse>
				<verse number="26">फिर उ खबेस वापिस जैके अपणा दगड़ा मा सात और भि बुरा खबेसों तैं लेके औन्दु, अर ऊ वे मनखि मा रौण लगि जनदिन, अर तब वे मनखि की दसा पैलि से भि और बुरी ह्‍वे जान्दी।”</verse>
				<verse number="27">अर जब यीशु यों बातों तैं बुलणु ही छौ, कि भीड़ मा बटि एक जनानि न ऊँची आवाज मा बोलि, “धन्य च वा कोख जैमा तू रै, धन्य च वा माँ जिं को तिन दूद पेई।”</verse>
				<verse number="28">पर वेन बोलि, “धन्य त ऊ छिन जु परमेस्वर का वचन तैं सुणदिन अर वेका मुताबिक चलदा भि छिन।”</verse>
				<verse number="29">अर जब लोग जादा होण लगि गैनी तब यीशु न बोलि, “यू लोग चिन्‍न खुज्यौदिन, मगर यों तैं परमेस्वर का रैबर्या योना का चिन्‍न का अलावा कुई चिन्‍न नि दिखये जालु, किलैकि ये जमना का लोग दुष्‍ट छिन।</verse>
				<verse number="30">अर जन योना रैबर्या नीनवे नगर का लोगु खुणि एक चिन्‍न ठैरि, उन्‍नि मनखि को पुत्र भि ये जमना का लोगु खुणि एक चिन्‍न ठैरलु।</verse>
				<verse number="31">“अर दक्छिण की महाराणी न्याय का दिन पर ये जमना का लोगु का दगड़ा मा खड़ि होलि अर तुमतै दोषी ठैराली, किलैकि जब वींन राजा सुलैमान का ज्ञान का बारा मा सुणी, तब वा धरती का छोर बटि ऐ। पर सुणा, इख त उ च जु की राजा सुलैमान से भि महान च, पर तुम वे पर बिस्वास नि करद्‍यां।</verse>
				<verse number="32">“अर नीनवे नगर का लोग भि न्याय का दिन पर ये जमना का लोगु का दगड़ा मा खड़ा होला अर तुमतै दोषी ठैराला, किलैकि ऊंन योना रैबर्या का द्‍वारा कियां परचार तैं सुणी के पस्ताप कैरी। पर सुणा, इख त उ च जु की योना रैबर्या से भि महान च, पर तुम वे पर बिस्वास नि करद्‍यां।”</verse>
				<verse number="33">तब यीशु न ऊंतैं उदारण देके बोलि, “कुई मनखि द्‍यू बाळि के छिपै के नि रखदु, अर ना ही वेतैं कै कटोरा का तौळ ढकै के रखदु, बल्किन मा एक ऊँची जगा पर रखदु, ताकि भितर औण वळा लोगु तैं उज्याळु मिलु।</verse>
				<verse number="34">अर तुमरा आंखा तुमरा सरील खुणि एक द्‍यू का जन काम करदिन, इलै अगर जु तुमरा आंखा शुद्ध राला त तुमरा पूरा सरील मा उज्याळु होलु, पर अगर जु तुमरा आंखा अशुद्ध राला त तुमरा पूरा सरील मा भि अन्धेरु रालु।</verse>
				<verse number="35">इलै ध्यान रखा, कि कखि तुमरो उज्याळु अन्धेरा मा नि बदलि जौ।</verse>
				<verse number="36">इलै अगर जु तेरु पूरु सरील उज्याळा मा च अर वेको कुई भि अंग अन्धेरा मा नि हो, त तू यू जाणि ले कि यू सभि अंग इन चमकला जन वे बगत होन्दु, जब द्‍यू अपणी चमक का द्‍वारा त्वेतै उज्याळु देन्दु।”</verse>
				<verse number="37">अर जब यीशु इन बोन्‍नु ही छौ, कि फरीसी दल मदि एक मनखि वेसे बिन्ती कैरिके वेतैं अपणा इख खाणुक पर बुलै। अर उ वेका इख भितर जैके खाणुक खाणु कू बैठि गै।</verse>
				<verse number="38">तब फरीसी दल का मनखि न यू देखि अर हैरान ह्‍वे गैनी कि, वेन खाणुक खाण से पैलि अपणा हाथों तैं नि ध्वे।</verse>
				<verse number="39">प्रभु न वेकू बोलि, “तुम फरीसी लोग कटोरा अर थकुला तैं भैरि-भैर मजौन्द्‍यां, मगर तुमरा भितर लालच अर बुरै भुरीं छिन।</verse>
				<verse number="40">अरे लाटों, जैन भैर को हिस्सा बणै, क्या वेन भितर को हिस्सा नि बणै?</verse>
				<verse number="41">अगर जु तुम पवित्र मन से दान दिल्या त सुणा, तब तुम खुणि सब कुछ शुद्ध ह्‍वे जालु।</verse>
				<verse number="42">“हे फरीसी दल का लोगु, तुम पर हाय च, किलैकि तुम पुदीना अर सुदाब नौ का पौधा को अर इन्‍नि बन्‍नि-बन्‍नि किसम का साग-पातो को भि दसुं हिस्सा देन्दयां। पर न्याय अर परमेस्वर का प्यार तैं टाळि देन्दयां, जब की तुमरो यू फरज छौ कि अपणा मन तैं शुद्ध बणै के परमेस्वर का प्यार तैं अर वेकी आज्ञा को पालन तुम खुद भि कना रौन्दा, अर यू ही तरीका लोगु तैं भि सिखौन्दा।</verse>
				<verse number="43">फरीसी दल का लोगु तुम पर हाय च, किलैकि तुम प्रार्थना भवनों मा आदर-सम्मान मिलण वळी जगा पर बैठण पसन्द करद्‍यां, अर तुम चन्द्‍यां, कि बजारों मा लोग तुमतै नमस्कार कैरा।</verse>
				<verse number="44">अर हाय च तुम पर, किलैकि तुम त ऊं कबरों का जन छाँ जौं को कुई अता-पता नि च, अर लोग बिन जणयां ऊंका मथि चलदिन।”</verse>
				<verse number="45">तब एक शास्‍त्री न यीशु तैं जबाब दिनी, “गुरुजी, इन बोलि के त तुम हमरि बेजती कना छाँ।”</verse>
				<verse number="46">यीशु न बोलि, “हे शास्‍त्रियों तुम पर भि हाय च, किलैकि तुम नियम-कानूनों का बोझ तैं मनखियों पर लादि देन्द्‍यां जौं तैं उठौण कठिन च, पर तुम खुद ऊं नियम-कानूनों को पालन करण कि कोसिस नि करद्‍यां।</verse>
				<verse number="47">अर हाय च तुम पर, किलैकि परमेस्वर का जौं रैबर्यों तैं तुमरा ही पितरों न मारी छौ, तुम ऊंकी कबरों तैं याद रखणु खुणि एक चिन्‍न बणौन्द्‍यां।</verse>
				<verse number="48">हाँ, तुम ऊंकी ही कबरों तैं बणौन्द्‍यां, जौं तैं तुमरा पितरों न मरवेयलि छौ, इलै तुम अपणा पितरों की यों करतूतों का गवा छाँ, अर ऊंका ऊं कामों से सैमत भि छाँ।</verse>
				<verse number="49">इलै परमेस्वर की अकल न बोलियालि छौ कि, ‘मि ऊंका पास रैबर्यों अर खास चेलों तैं भेजलु। अर वु लोग यों भेज्यां लोगु मा बटि कुछ लोगु तैं सताला अर कुछो तैं त मारी भि द्‍याला।’</verse>
				<verse number="50">“अर दुनियां की शुरुवात से लेके अभि तक जथगा भि रैबर्यों को खून किये गै, ऊं सभ्यों की मौत को हिसाब ये जमना का लोगु बटि लिये जालु।</verse>
				<verse number="51">हाबिल की हत्या से लेके जकरयाह रैबर्या की हत्या तक जैको ल्वे परमेस्वर का मन्दिर अर वेदी का समणि ह्‍वे छौ। अर मि तुमतै बतै देन्दु कि, ऊं सभ्यों की हत्या को हिसाब ईं पीढ़ी का लोगु बटि लिये जालु।</verse>
				<verse number="52">अर हाय च तुम शास्‍त्रियों पर, किलैकि तुमुन परमेस्वर का ज्ञान की चाबी ले त दिनी, मगर तुमुन खुद ही नि सिखी अर ना दुसरो तैं सिखण देई अर ना ही ऊंतैं वेमा जाण देई।”</verse>
				<verse number="53">अर जब यीशु वे शास्‍त्री का इख बटि निकळि गै, त शास्‍त्री अर फरीसी दल का लोग वे बटि खार खाण लगि गैनी, अर वेका पिछनै पोड़ि गैनी। अर भौत सि बातों का बारा मा ऊ यीशु बटि सवाल-जबाब करण लगि गैनी।</verse>
				<verse number="54">अर ऊ ईं ताक मा छा कि वेका गिच्‍चा बटि कुई इन्दरि बात निकळि जौ, जैका बाना ऊ वेतैं पकड़ी सैका।</verse>
			</chapter>
			<chapter number="12">
				<verse number="1">अर जब यीशु शास्‍त्री का इख बटि ऐ गै, त यीशु तैं मिलणु खुणि बिजांम लोगु की भीड़ इकट्‍ठा ह्‍वे गै, अर लोगु की संख्या इथगा छै, कि वु एक-दुसरा पर फरक्योंणा छा। तब यीशु न सबसे पैलि अपणा चेलों कू बोलि कि, “सुणा, फरीसी लोगु का ढोंग रुपी खमीर से चौकस रा।</verse>
				<verse number="2">अर इन्दरि कुई भि बात नि च ज्वा परमेस्वर बटि छिपी हो, अर ना ही कुई इन्द्रयो गुप्‍त भेद लुक्युं ज्यां को वेतैं पता नि हो, अर उ वेको खुलासा उज्याळा मा करलु।</verse>
				<verse number="3">इलै हरेक वु बात जु तुमुन अन्धेरा मा बोलि, वा उज्याळा मा सुणये जालि, अर जु बात तुमुन कमरों मा जैके लोगु का कन्दूड़ो मा खुसुर-पुसुर कैरिके बोलि, ऊंको परचार घौरों की छतों मा बटि किये जालु।”</verse>
				<verse number="4">अर यीशु न बोलि, “हे मेरा दगड़्यों, मि तुमतै बतै देन्दु कि तुम ऊं बटि नि डौऽरा जु तुमरि जान त ले सकदिन, मगर वेका बाद वु तुम बटि और कुछ नि ले सकदिन।</verse>
				<verse number="5">पर मि तुमतै चितै देन्दु कि तुमतै कै बटि डऽरण चयेणु, तुम वे बटि डौऽरा जैका पास मौत का बाद भि नरकलोक मा डलण को अधिकार च, वे बटि ही डौऽरा, हाँ मि तुमतै चितै देन्दु वे बटि ही डौऽरा।</verse>
				<verse number="6">“अरे सुणा, क्या दुई घिंडुडि भौत कम कीमत मा नि बिकदिन? फिर भि पिता परमेस्वर ऊंमा बटि एक तैं भि नि बिसरदु।</verse>
				<verse number="7">अर या बात सच्‍च च, कि तुमरा मुण्ड़ का सब बाळ भि गिणयां छिन, इलै डौऽरा ना, किलैकि तुमरि कीमत भौत घिंडुडियों से भि जादा च।”</verse>
				<verse number="8">अर यीशु न बोलि मि तुमतै बतै देन्दु कि, “जु मनखि लोगु का समणि मितैं स्वीकार करलु, वेतैं मनखि को पुत्र भि परमेस्वर का स्वर्गदूतों का समणि स्वीकार करलु।</verse>
				<verse number="9">पर जु मनखि लोगु का समणि मितैं नकारी दयालु, त वेतैं मनखि को पुत्र भि परमेस्वर का स्वर्गदूतों का समणि नकारी द्‍यालु।</verse>
				<verse number="10">“अर जु कुई मनखि का पुत्र का खिलाप मा कुछ बोललु त वेतैं माफी दिये जालि, पर अगर कुई मनखि पवित्र आत्मा का खिलाप मा कुछ बोललु त वेतैं माफी नि दिये जालि।</verse>
				<verse number="11">अर जब वु लोग तुमतै प्रार्थना भवनों मा, सासन करण वळो अर अधिकारीयों का पास लि जाला, त अपणा बचाव की चिन्ता नि कर्यां कि हम क्या जि बोलुला।</verse>
				<verse number="12">किलैकि पवित्र आत्मा उबरि तुमतै सिखै दयालु, कि क्या-क्या बोन्‍न।”</verse>
				<verse number="13">तब भीड़ मा बटि एक मनखि न यीशु कू बोलि, “गुरुजी, मेरा भै कू बोला कि मेरा पितरों की जैजाद को बटवारु कैर।”</verse>
				<verse number="14">पर वेन वेकू बोलि, “हे भुला, कैन मितैं तुमरो न्यायी अर बटवारु करण वळु बणै?”</verse>
				<verse number="15">अर वेन यू भि बोलि, “ध्यान रखा, हरेक किसम का लालच बटि खुद तैं बचै के रखा, किलैकि मनखि का जीवन की कीमत वेका जैजाद बटि नि नपै जै सकदी।”</verse>
				<verse number="16">तब यीशु न ऊंतैं एक उदारण सुणै, “एक बार एक सेठ मनखि का पुंगड़ों मा खूब अच्छी फसल ह्‍वे।</verse>
				<verse number="17">तब उ सेठ सुचण लगि गै कि, ‘अब मि क्या कैरुं, किलैकि मेरा इख त इथगा जगा ही नि च जख मि फसल रखी सैकु।’</verse>
				<verse number="18">इलै वेन सोची, ‘अब मि इन करदु कि अपणा कुठारों तैं तोड़ि के ऊंतैं और भि बड़ु बणौलु, अर उख अपणी रासन-पाणि अर सब अच्छी चीजों तैं जमा कैरिके रखलु,</verse>
				<verse number="19">हाँ, तब मि अफु कू बोलि सकदु छौं कि भौत सालों खुणि मि मा भौत सि अच्छी चीज जमा छिन, इलै आराम से रौलु, खौलु-पीलु अर मजा मा रौलु।’</verse>
				<verse number="20">पर परमेस्वर न वेकू बोलि, ‘अरे मूरख, अगर आज राति ही तेरु पराण त्वे बटि ले लिये जौ, त इन बतौ जु कुछ भि तेरु इकट्‍ठा कर्युं च, उ सब कै को होलु?’”</verse>
				<verse number="21">तब यीशु न ऊंतैं बतै कि, “इन्‍नि वु मनखि भि च जु अफु खुणि इकट्‍ठा करदु, पर वु मनखि परमेस्वर की नजर मा सेठ नि च।”</verse>
				<verse number="22">तब यीशु न अपणा चेलों कू बोलि, “इलै मि तुम खुणि बोन्‍नु छौं कि अपणा जीवन की चिन्ता-फिकर नि कैरा कि हम क्या जि खौला, अर ठिक उन्‍नि अपणा सरील की चिन्ता नि कैरा कि क्या जि पैरुला।</verse>
				<verse number="23">किलैकि पराण की कीमत खाणुक से जादा च, अर ठिक उन्‍नि सरील की कीमत कपड़ों से जादा च।</verse>
				<verse number="24">अर कवौं तैं ध्यान से देखा अर सोचा, किलैकि वु नऽ त बुतदा छिन अर ना ही लवै करदिन, अर नऽ त ऊंका गुदाम होनदिन अर ना ही ऊंका कुठार होनदिन, फिर भि परमेस्वर ऊंतैं खिलान्दु च, पर तुमरि कीमत त ऊं पंछियों से भि जादा च।</verse>
				<verse number="25">अर तुम मा बटि इन्द्रयो मनखि कु च, जु चिन्ता-फिकर कैरिके अपणी उमर मा एक घड़ी भि बढै सैको।</verse>
				<verse number="26">इलै अगर जु तुम यू छुटो काम भि नि कैरी सकद्‍यां, त और बातों की चिन्ता-फिकर किलै कना छाँ?</verse>
				<verse number="27">अर लिली का फूलों तैं ध्यान से देखा अर सोचा, कि वु कनकै खिलदीन वु नऽ त मेनत करदिन अर ना ही ऊंकी छंटै किये जान्दी, पर मि तुमतै बतै देन्दु कि यों सुन्दर फूलों का जन सुलैमान राजा न भि अपणा बगत मा यों फूलों मा बटि कै एक फूल का रंग का जन भि कपड़ा नि पैरि सकिनी,</verse>
				<verse number="28">इलै जब परमेस्वर एक तपड़ की घास तैं ज्वा कि आज च अर भोळ वींन आग मा फुकै जाण, जब परमेस्वर ऊंतैं इन सजै सकदु च, त हे कम बिस्वास रखण वळा लोगु, उ तुमतै येसे जादा किलै नि पैरालु।</verse>
				<verse number="29">इलै तुम यों बातों की खोज मा नि रा अर ना ही चिन्ता कैरा, कि क्या जि खौला अर क्या जि प्यूला।</verse>
				<verse number="30">किलैकि ईं दुनियां का लोग यों सब चीजों की तलास मा रौनदिन, अर तुमरो पिता जणदु च कि तुमतै यों चीजों की जरुरत च।</verse>
				<verse number="31">पर पैलि परमेस्वर का राज की खोज कैरा, तब यू सब चीज भि तुमतै मिली जालि।”</verse>
				<verse number="32">अर यीशु न ऊंकू बोलि, “हे मेरा छुटा दल, नि डौऽर किलैकि तुमरा पिता तैं यू ही अच्छु लगि कि वु तुमतै स्वर्ग को राज द्‍यो।</verse>
				<verse number="33">अर जु कुछ तुमरा पास च वेतैं बेचि के जरुरतमन्द लोगु तैं दे द्‍या। अर स्वर्ग मा अफु खुणि इन्द्रया बटुवा बणावा जु कभि पुरणा नि होनदिन, अर वामा अफु खुणि इन्द्रयो धन इकट्‍ठा कैरा, जु कभि खतम नि होन्दु अर जैका नजदीक चोर नि ऐ सकदु अर ना ही वे पर कभि कीड़ु लगदु।</verse>
				<verse number="34">किलैकि जख तेरु धन रालु, उखि तेरु मन लग्यूं रालु।”</verse>
				<verse number="35">तब यीशु न ऊंकू इन भि बोलि, “तुम ऊं नौकरों का जन बणा, जु अपणा मालिक को इंतजार करदिन, ताकि जब उ मालिक ब्यौ बटि वापिस अऽ, अर द्‍वार तैं खटखटऽ, त वु नौकर वे खुणि द्‍वार तैं तुरन्त खोली द्‍यो। इलै तुम भि सेवा करणु खुणि तयार रा, अर तुमरा द्‍यू जगणा रा।</verse>
				<verse number="36"></verse>
				<verse number="37">अर धन्य छिन ऊ नौकर जौं तैं ऊंको मालिक औन्द का बगत बिज्युं देखो, अर मि तुम बटि सच्‍च बोन्‍नु छौं, कि मालिक अपणी कमर कसी के ऊंकी सेवा करलु अर खाणुक खाणु कू बैठालु, अर ऊं खुणि खाणुक परोसलु।</verse>
				<verse number="38">अगर वु मालिक राति बारा बजी या तीन बजी तक ऊंतैं बिज्युं देखो, त वु नौकर धन्य छिन।”</verse>
				<verse number="39">तब यीशु न ऊंतैं एक और उदारण देके बोलि, “ईं बात तैं अच्छे से समझि ल्या, अगर घौर का मालिक तैं इन पता हो कि राति चोरळ कब औण, त उ उठयूं रालु अर अपणा घौर मा चोरी नि होण द्‍यालु,</verse>
				<verse number="40">ठिक उन्‍नि तुम भि तयार रा, किलैकि जै बगत का बारा मा तुमुन सोची भि नि होलु, वे बगत मनखि को पुत्र ऐ जालु।”</verse>
				<verse number="41">अर पतरस न यीशु बटि पूछी, “प्रभु, क्या यू उदारण हम चेलों खुणि ही च, या सब लोगु खुणि च?”</verse>
				<verse number="42">तब यीशु न एक और उदारण देके बोलि, “उ वफादार अर अकलमन्द कर्ता-धर्ता कु च? जैको मालिक वेतैं सब नौकरों का मथि एक मुखिया बणौन्दु, ताकि उ ऊंतैं बगत-बगत खाणुक को समान द्‍यो।</verse>
				<verse number="43">अर धन्य च उ नौकर जब वेको मालिक वापिस अऽ, त उ वेतैं इन्‍नि काम करदी देखो।</verse>
				<verse number="44">अर मि तुम बटि सच्‍चि बोन्‍नु छौं कि, मालिक वेतैं अपणा पूरि धन-दौलत की देख-रेख करण वळु बणै द्‍यालु।</verse>
				<verse number="45">पर अगर उ नौकर अपणा मन मा सुचण लगि जौ कि मेरा मालिक न वापस देर से लौटण, अर तब उ दुसरा नौकरों तैं मरण-पिटण लगि जौ अर खाण-पीण वळु अर दरोळया ह्‍वे जौ।</verse>
				<verse number="46">तब वे नौकर को मालिक एक इन्द्रया दिन पर आलु जै दिन कि वेतैं आस भि नि होलि, बल्किन मा इन्द्रया बगत पर आलु जैका बारा मा उ जणदु भि नि होलु। तब वेको मालिक वेतैं कड़क से कड़क सजा दयालु, अर वेतैं ऊंका दगड़ा मा भेजि द्‍यालु जु आज्ञा नि मणदिन।</verse>
				<verse number="47">अर उ नौकर जु अपणा मालिक की मनसा तैं जणदु हो पर तयार नि रौ, अर ना ही वेन वेकी मनसा का मुताबिक काम कैरी हो, त उ नौकर भौत मार खालु।</verse>
				<verse number="48">पर जै नौकर तैं अपणा मालिक की मनसा का बारा मा पता नि हो अर वेन मार खाण वळा काम कियां हो, त उ कम मार खालु। इलै जैतैं जादा दिये गै वे बटि जादा मांगे जालु, अर जैमा जादा सौंपे गै वे बटि जादा लिये जालु।”</verse>
				<verse number="49">तब यीशु न ऊंकू बोलि, “मि धरती मा आग लगाणु कू अयूं छौं, अर मेरी इच्छा च की या अभि सुलगी जौ।</verse>
				<verse number="50">अर मिन एक बपतिस्मा लेण, अर जबरि तक यू बपतिस्मा नि ले ल्यूं तबरि तक मिन इन्‍नि बेचैनी मा ही रौण?</verse>
				<verse number="51">अर तुम क्या समझद्‍यां कि मि धरती मा शान्ति देणु कू अयूं छौं? मि तुमतै बतै देन्दु, यां खुणि ना, बल्किन मा मि त अलग करणु कू अयूं छौं।</verse>
				<verse number="52">किलैकि अब बटि एक परिवार का पांच सदस्य एक-दुसरा का खिलाप ह्‍वे जाला, तीन दुई का खिलाप मा अर यू दुई तीन का खिलाप ह्‍वे जाला,</verse>
				<verse number="53">बुबा नौना का खिलाप अर नौनु बुबा का खिलाप मा होलु, माँ बेटी का खिलाप अर बेटी माँ का खिलाप मा होलि। अर उन्‍नि सासु ब्वारि का खिलाप अर ब्वारि सासु का खिलाप मा होलि।”</verse>
				<verse number="54">तब यीशु न भीड़ का लोगु कू इन भि बोलि, “जब तुम पच्छिम दिसा मा बादळों तैं दिखद्‍यां, त तुरन्त बुल्द्‍यां ‘बरखा होण वळी च’ अर ठिक उन्‍नि होन्दु।</verse>
				<verse number="55">अर जब दक्छिण दिसा मा हवा चलदि त तुम बुल्द्‍यां कि ‘गरम होलु,’ अर ठिक उन्‍नि होन्दु।</verse>
				<verse number="56">हे ढोंगि लोगु, तुम धरती अर आसमान तैं देखि के मौसम का बारा मा समझि जन्द्‍यां, मगर ये बगत मा जु काम होणा छिन, तुम ऊंका बारा मा किलै नि जाणि सकणा?”</verse>
				<verse number="57">“अर तुम खुद यू फैसला नि कैरी सकद्‍यां कि ठिक क्या च?</verse>
				<verse number="58">जब तू अपणा दुसमन का दगड़ा मा कै अधिकारी का पास जाणि रैलि, त अधा बाटा मा ही वेका दगड़ा सला कैरी दे, कखि इन नि हो कि उ त्वेतै न्याय करण वळा मा खैंची के लि जौ, अर न्याय करण वळु त्वेतै सिपयों का हवाला कैरी द्‍यो। तब सिपै त्वेतै जेलखाना मा डालि द्‍याला।</verse>
				<verse number="59">अर मि तुमतै बतै देन्दु कि, जब तक तू एक-एक रुपया को हिसाब नि चुकै दिली, तब तक तू उख बटि छुटी नि सकदी।”</verse>
			</chapter>
			<chapter number="13">
				<verse number="1">अर जब यीशु न यू सब बात बोलि दिनी कि उबरि उख कुछ लोग ऐनी, अर यीशु तैं ऊं गलीली लोगु का बारा मा बतौण लगि गैनी जौं तैं रोमी गवर्नर पिलातुस न मन्दिर मा बलिदान चड़ौण का बगत पर मरवेयलि छौ।</verse>
				<verse number="2">तब वेन जबाब दिनी, “तुम क्या सोचद्‍यां, कि यू गलीली लोग दुसरा गलीली लोगु से जादा पापि छा क्या, जु कि ऊंतैं इन्द्रयो दुख भोगण पोड़ि?</verse>
				<verse number="3">नऽ रे ना, पर मि तुमतै बतै देन्दु, कि अगर जु तुम पस्ताप नि करिल्या, त तुम सभ्यों को भि नास इन्‍नि के ह्‍वे जाण।</verse>
				<verse number="4">अर तुम क्या सोचद्‍यां, कि ऊ अठारा लोग, जौं पर शीलोह को बड़ु खम्बा पोड़ि छौ, अर ऊ वेका तौळ दबी के मोरि गैनी, त क्या ऊ लोग यरूशलेम नगर मा रौण वळा ऊं दुसरा लोगु से जादा पापि छा?</verse>
				<verse number="5">नऽ रे ना, पर मि तुमतै बतै देन्दु, कि अगर जु तुम पस्ताप नि करिल्या, त तुम सभ्यों को भि नास इन्‍नि के ह्‍वे जाण।”</verse>
				<verse number="6">तब यीशु न ऊंतैं एक उदारण सुणै, “एक बार एक मनखि न अपणा अंगूर का बगिचा मा एक तिमला को डाळु लगयूं छौ। अर उ वे डाळा पर फल खुज्याणु कू ऐ, पर वेतैं कुछ नि मिली।</verse>
				<verse number="7">तब वेन बगिचा का माली कू बोलि, ‘मि तीन साल बटि ये तिमला का डाळा पर फल खुज्याणु खुणि औणु छौं, पर अभि तक मितैं कुछ नि मिली। पर सुण, अब इन कैर कि ये डाळा तैं काटी दे, किलैकि यू फालतु मा हमरि जमीन घेरणु च।’</verse>
				<verse number="8">तब वे माली न वेतैं जबाब दे, ‘साब, ये साल येतैं नि कटवा, मि येका चौतरफि खैणी कै मोळ डललु।</verse>
				<verse number="9">अगर ये पर तभि भि फल नि लगला, त येतैं कटवै दियां।’”</verse>
				<verse number="10">अर यीशु सब्त का दिन पर एक प्रार्थना भवन मा उपदेस देणु छौ।</verse>
				<verse number="11">अर उख एक जनानि छै जिं मा अठारा सालों बटि एक खबेस लग्यूं छौ, अर येन ईं जनानि तैं पूरि तरौं से कुबडी बणैयालि छौ। अर ईं वजै से वा सीदी नि ह्‍वे सकदी छै।</verse>
				<verse number="12">अर यीशु न वींतैं देखि अर वींकू बोलि, “बेटी, त्वेतै ये रोग से आजाद किये जान्दु।”</verse>
				<verse number="13">तब वेन अपणु हाथ वीं जनानि पर रखी, अर तुरन्त वीं की कमर सीदी ह्‍वे गै, अर वा परमेस्वर कि बडै करण लगि गै।</verse>
				<verse number="14">अर प्रार्थना भवन का मुखिया न यू देखि कि यीशु न सब्त का दिन पर वींतैं खूब कैरियाली। इलै उ गुस्सा ह्‍वेके लोगु मा बुलण लगि गै कि, “हप्‍ता का छह दिनों मा ही काम करण चयेणु इलै ऊं दिनों मा ही ऐके खूब ह्‍वा, मगर सब्त का दिन पर इन्द्रयो काम नि कैरा।”</verse>
				<verse number="15">अर यू सुणी के प्रभु न वेतैं जबाब दिनी, “हे ढोंगि लोगु, जब तुम मा बटि हरेक मनखि सब्त का दिन पर अपणा बल्द या गधा तैं कीला बटि खोली के पाणि पिलाणु कू लि जै सकदु,</verse>
				<verse number="16">त क्या यू काम ठिक नि छौ कि, या नौनि ज्वा कि अब्राहम का वंश मदि च जींतैं शैतान न अठारा साल बटि अपणा कब्जा मा कर्युं छौ, ईं तैं वे बटि आजाद करै जौ।</verse>
				<verse number="17">जब वेन या बात बोलि त जु लोग वेका खिलाप मा छा ऊं सभ्यों की बेजती ह्‍वे गै, पर भीड़ का सब लोग वेका यों चमत्कारिक कामों से जु वेन करिनी आनन्द मनौणा छा।”</verse>
				<verse number="18">यीशु न बोलि, “परमेस्वर को राज्य कै की तरौं च? अब मि वेकी तुलना कै का दगड़ा मा कैरुं?</verse>
				<verse number="19">यू त लय्या का बीज की तरौं च, जैतैं एक आदिम न अपणा बगिचा मा बूति, अर जब उ बड़ु डाळु बणि गै, तब पंछि ऐनी अर वेका फौंक्यों मा ऐके अपणु घोल बणै।”</verse>
				<verse number="20">अर वेन इन भि बोलि, “मि परमेस्वर का राज की तुलना कै का दगड़ा मा कैरुं?</verse>
				<verse number="21">यू त खमीर का जन च जैतैं एक जनानि न तीन पाथा आटा मा खमीर मिलै, अर इन करद-करद उ पूरु आटु खमीर बणि गै।”</verse>
				<verse number="22">जब यीशु यरूशलेम नगर मा जाणु छौ, त बाटा मा औण वळा नगर अर गौं मा वेन उपदेस देई</verse>
				<verse number="23">तब कै मनखि न वे बटि पूछी, “प्रभु, क्या कुछ ही लोगु तैं बचयै जालु?”</verse>
				<verse number="24">यीशु न बोलि, “संगड़ा द्‍वार बटि जाणे की पूरि कोसिस कैरा, किलैकि मि तुमतै बतै देन्दु कि भौत सरा लोग भितर जाण चाला पर नि जै सकला।</verse>
				<verse number="25">अर जब घौर को मालिक उठी के द्‍वार बन्द कैरी द्‍यालु, तब तुम द्‍वार का भैर खड़ा ह्‍वेके खखटै के बोलिल्या, ‘प्रभु, हम खुणि द्‍वार खोली द्‍या।’ तब उ तुमतै जबाब द्‍यालु कि, ‘मि तुमतै नि जणदु कि तुम कखा छाँ?’</verse>
				<verse number="26">तब तुम लोग बोलिल्या कि, ‘प्रभु, तुमुन हमरा बजारों मा उपदेस देई, अर हमुन तुमरा दगड़ा खै-पे छौ।’</verse>
				<verse number="27">पर उ तुमकु बोललु कि, ‘मि तुमतै नि जणदु कि तुम कखा छाँ, इलै हे अधरमी लोगु, मेरा समणि बटि दूर ह्‍वे जा।’</verse>
				<verse number="28">अर उख तुम अब्राहम, इसहाक, याकूब अर सब रैबर्यों तैं परमेस्वर का राज मा दिखल्या, पर तुमतै भैर निकळे जालु। अर उख त सिरफ रुंण अर दांतों तैं कड़गिटाण होलु।</verse>
				<verse number="29">“अर तब हर दिसा बटि याने कि पूरब अर पच्छिम, उत्तर अर दक्छिण बटि लोग ऐके, परमेस्वर का राज की बड़ी दावत मा सामिल होला।</verse>
				<verse number="30">अर सुणा, जु पिछनै छिन वु अगनै जाला, अर जु अगनै छिन वु पिछनै जाला।”</verse>
				<verse number="31">अर उबरि फरीसी दल का कुछ लोगु न यीशु का पास ऐके बोलि, “गुरुजी, इख बटि चलि जा, किलैकि हेरोदेस अन्तिपास तुमतै मरण चाणु च।”</verse>
				<verse number="32">तब वेन ऊंकू बोलि, “तुम जैके वे स्याळ कू बोलि द्‍या कि, देख, मिन आज अर भोळ खबेसों तैं निकळण अर बिमारों तैं खूब करण, अर परस्यों खुणि मिन अपणु काम पूरु कैरी देण।</verse>
				<verse number="33">अब चै कुछ भि ह्‍वे जौ, आज भोळ अर परस्यों तक मिन अपणी यात्रा पूरि करण, किलैकि इन नि ह्‍वे सकदु कि कुई रैबर्या यरूशलेम नगर का भैर मरे जौ।”</verse>
				<verse number="34">तब वेन इन बोलि, “हे यरूशलेम का लोगु, तुम जु रैबर्यों तैं मारी देन्द्‍यां, अर जौं लोगु तैं परमेस्वर न तुमरा बीच मा भेजि ऊंतैं तुम ढुंग्यौन्दा छाँ। अर मिन कथगा ही दौं इन चै कि जन कुखडि अपणा बच्‍चों तैं अपणा फाँकुड़ो का तौळ इकट्‍ठा कैरिके रखदी, ठिक उन्‍नि मि भि तुमतै इकट्‍ठा कैरुं, पर तुम लोगु न इन नि चै।</verse>
				<verse number="35">अर सुणा मि तुमतै बतै देन्दु कि, “ तुमरा घौर तैं परमेस्वर न छोड़याली, अर तुमुन मितैं तब तक नि दिखण जब तक तुम इन नि बोलिल्या कि, ‘धन्य च उ जु प्रभु का नौ से औन्दु।’”</verse>
			</chapter>
			<chapter number="14">
				<verse number="1">एक दिन इन ह्‍वे कि, यीशु सब्त का दिन पर फरीसी दल का मुख्यों मा बटि कै एक मुखिया का घौर मा रुट्‍टी खाणु कू गयूं छौ, अर वु वेतैं बड़ी ध्यान से दिखणा छा।</verse>
				<verse number="2">अर उख एक मनखि यीशु का समणि छौ, जु कि बिमार छौ अर वेको पूरु सरील फूली गै छौ। अर ईं बिमारि को नौ जलशोथ च।</verse>
				<verse number="3">तब यीशु न नियम-कानूनों तैं जनण वळो अर फरीसी दल का लोगु कू बोलि, “क्या सब्त का दिन पर कै मनखि तैं खूब करण ठिक च या नि च?”</verse>
				<verse number="4">पर वु सब संट होयां रैनी। तब वेन वे मनखि तैं छ्वी के खूब कैरी दिनी अर वेतैं जाणि दिनी।</verse>
				<verse number="5">अर वेन इन भि बोलि, “अगर तुम मा बटि कै को नौनु या बल्द सब्त का दिन पर कुआँ मा लमडी जौ, त क्या तुम वेतैं तुरन्त भैर नि निकळद्‍यां?”</verse>
				<verse number="6">अर ऊंका पास ईं बात को कुई जबाब नि छौ।</verse>
				<verse number="7">अर जब यीशु न देखि कि न्यूत्यां लोग अफु खुणि कनकै खास जगों तैं चुणी देन्दिन, तब वेन उदारण देके बोलि कि,</verse>
				<verse number="8">“जब कुई मनखि तुमतै ब्यौ मा बुलान्दु त तुम आदर-सम्मान वळी जगा मा जैके नि बैठयां, कखि इन नि हो कि वेको कै दुसरा तैं भि न्यूत्युं हो अर वु तुम से बड़ु हो।</verse>
				<verse number="9">अर जै मनखि न त्वेतै अर वे बड़ा आदिम तैं न्यूत्युं हो अर उ तुमरा पास ऐके बोलो कि, ‘यों तैं इख मा बैठण दे।’ अर यू देखि के तुमरि बेजती होलि अर तब तुमतै उठी के सबसे पिछनै की जगा मा बैठण पोड़लु।</verse>
				<verse number="10">पर जब त्वेतै कै को न्यूत्युं हो त सबसे पिछनै बैठि, ताकि जब उ अऽ जैको त्वेतै बुलयूं च, तब उ त्वेतै देखि के बोललु, ‘अरे दगड़्या, अगनै बैठ।’ तब तेरा दगड़ा मा बैठयां लोगु का समणि तेरु बड़ु आदर-सम्मान होलु।</verse>
				<verse number="11">किलैकि जु कुई अफु तैं बड़ु बणालु उ छुटो किये जालु, अर जु कुई अफु तैं छुटो बणालु उ बड़ु किये जालु।”</verse>
				<verse number="12">तब यीशु न फरीसी मुखिया कू बोलि जैको यीशु तैं न्यूत्युं छौ, “जब तू दिन या राति को खाणुक करली, त अपणा दगड़्यों या भैयों तैं नि बुलै अर ना ही अपणा रिश्तेदारों अर सेठ पड़ोसीयों तैं बुलै। कखि इन नि हो कि ऊ भि बदला मा त्वेतै बुलै के खाणुक खिला अर इन कैरिके तब बात बराबर ह्‍वे जौ।</verse>
				<verse number="13">पर जब तू दावत दिली, त गरीबों, लूला-लंगड़ो अर अन्धों तैं बुलै।</verse>
				<verse number="14">तब त्वेतै परमेस्वर की तरफा बटि आसीस मिलेली, किलैकि ऊंका पास त्वेतै वापिस लौटाणु कू कुछ भि नि च। मगर मुरदो मा बटि ज्यून्द होण का दिन पर जब धरमी लोग ज्यून्दा होला, तब त्वेतै वेको फल मिली जालु।”</verse>
				<verse number="15">अर यों बातों तैं सुणी के खाणु-खाण वळा लोगु मा बटि एक मनखि न बोलि, “धन्य च उ जु परमेस्वर का राज मा रुट्‍टी खालु।”</verse>
				<verse number="16">तब यीशु न वे मनखि कू बोलि, “एक बार एक मनखि न भौत बड़ी दावत कैरी, अर वेन भौत सरा लोगु तैं बुलै।</verse>
				<verse number="17">अर जब खाणुक तयार ह्‍वे गै त वेन न्यूत्यां लोगु तैं दावत मा बुलाणु खुणि अपणा नौकर कू बोलि, ‘जा, अर न्यूत्यां लोगु कू बोल कि, आ, किलैकि दावत को खाणु तयार च।’</verse>
				<verse number="18">“पर ऊ सभि बाना बणौण लगि गैनी। अर पैला मनखि न बोलि, ‘मि तुम बटि बिन्ती करदु कि मि नि ऐ सकदु मितैं माफ कैरी द्‍या, किलैकि मेरु एक पुंगड़ु खरीद्‍युं च अर वेतैं दिखणु कू मेरु जाण जरुरी च।’</verse>
				<verse number="19">अर दुसरा न बोलि, ‘मि तुम बटि बिन्ती करदु कि मि नि ऐ सकदु मितैं माफ कैरी द्‍या, किलैकि मेरा पांच जोड़ी बल्द खरीद्‍यां छिन अर मि ऊंतैं परखणु कू जाणु छौं।’</verse>
				<verse number="20">अर उन्‍नि हैंका न भि बोलि, ‘मेरु अभि-अभि नयू ब्यौ होयुं च, मिन नि ऐ सकण।’</verse>
				<verse number="21">अर यू सब बात नौकर न अपणा मालिक मा जैके बुलिनी। तब घौर का मालिक तैं भौत गुस्सा ऐ, अर वेन नौकर कू बोलि, ‘तू तुरन्त नगर का बजारों मा अर बाटों मा जा, अर उख बटि गरीबों, लूला-लंगड़ो अर अन्धों तैं लेके इख अऽ।’</verse>
				<verse number="22">तब नौकर न वेकू बोलि, ‘साब, जन तुमुन बोलि छौ ठिक उन्‍नि किये गै, पर इख त अभि भि जगा खालि च।’</verse>
				<verse number="23">तब मालिक न नौकर कू बोलि, ‘सड़कों मा जा अर नगरों का बाटों मा जा अर लोगु तैं इख औणु खुणि मजबूर कैर, ताकि मेरु घौर भुरे जौ।</verse>
				<verse number="24">किलैकि मि तुमतै बतै देन्दु कि, ऊं न्यूत्यां लोगु मा बटि कैन भि मेरी दावत को खाणु नि चखण।’”</verse>
				<verse number="25">अर जब एक बड़ी भीड़ यीशु का दगड़ा मा जाणि छै, त वेन पिछनै मुड़ि के ऊंकू बोलि कि,</verse>
				<verse number="26">“अगर कुई मनखि मेरु चेला बणण चान्दु हो, मगर उ मनखि अपणा ब्वे-बाब, घरवळी अर अपणा बाल-बच्‍चों तैं अर अपणा भै-बैंणो तैं इख तक की अपणा पराण तैं मिसे भि जादा प्यार करदु हो, त इन्द्रयो मनखि मेरु चेला नि ह्‍वे सकदु।</verse>
				<verse number="27">अर जु कुई अपणी क्रूस तैं बिन बिज्यां मेरा पिछनै चलदु उ भि मेरु चेला नि ह्‍वे सकदु।</verse>
				<verse number="28">“अर तुम मा बटि इन्द्रयो मनखि कु च जु एक गढ़ बणौण चान्दु हो, अर पैलि बैठि के खर्चा का बारा मा हिसाब-किताब नि कैरो, कि गढ़ बणाणु खुणि मेरी हैसियत छै भि च कि नि च?</verse>
				<verse number="29">अर जब उ मनखि बिन सोच्यां बुनियाद तैं रखी द्‍यो पर पूरु बणै नि सैको, त मि तुमतै बतै देन्दु कि, तब सब दिखण वळा लोग वेकू मजाक उड़ौण लगि जाला।</verse>
				<verse number="30">अर बोलला कि, ‘देखा यू मनखि गढ़ बणाण चान्दु छौ, मगर येन पूरु नि बणै सैकी।’</verse>
				<verse number="31">“अर फिर इन्द्रयो कु राजा होलु, जु दुसरा राजा का दगड़ा मा लड़ै करण कू जाणु हो, अर पैलि इन नि सोचो कि जु बीस हजार की फौज लेके मि बटि लड़णु खुणि औणु च, क्या मेरा दस हजार सिपै ऊंको मुकाबला कैर सकला या नि कैरी सकला?</verse>
				<verse number="32">अगर वेको बसो नि होलु, त यू राजा अपणा कुछ खास लोगु तैं वे दुसरा राजा का पास भेजि के वेका दगड़ा मा शान्ति की सला करण चालु।</verse>
				<verse number="33">अर इन्‍नि तुम मा बटि जु कुई मेरा खातिर अपणी जैजाद तैं छुड़णु खुणि तयार नि हो, उ भि मेरु चेला नि ह्‍वे सकदु।”</verse>
				<verse number="34">“लूण त अच्छु च, पर अगर जु लूण को स्वाद ही खतम ह्‍वे जौ, त फिर वेतैं कनकै लूणयां किये जै सकदु?</verse>
				<verse number="35">फिर उ नऽ त जमीन खुणि अच्छु च अर ना ही खाणुक मा मिलाण का लैख, वेतैं त लोग भैर ढोळि देन्दिन। अर जैका पास सुनणु खुणि कन्दूड़ छिन उ सुणी ल्यो।”</verse>
			</chapter>
			<chapter number="15">
				<verse number="1">अर सब चुंगी लेण वळा अर इन्‍नि और पापि लोग भि यीशु का पास वेको उपदेस तैं सुनणु कू औन्दा छा।</verse>
				<verse number="2">तब फरीसी दल का लोग अर शास्‍त्री लोग कुड़कुड़ै के बोन्‍न लगि गैनी, “यू त पापि मनखियों का दगड़ा मा मेल-जोल रखदु, अर ऊंका दगड़ा मा खान्दु-पीन्दु च।”</verse>
				<verse number="3">तब यीशु न ऊंतैं एक उदारण देके बोलि कि,</verse>
				<verse number="4">“अगर तुम मा बटि कै मनखि का मा सौ भेड़ हो अर ऊंमा बटि एक हरचि जौ, त तुम मा बटि इन्द्रयो कु च जु वीं हरचि भेड़ तैं खुज्याण का खातिर ऊं निन्याणबो तैं निर्जन जगा मा छोड़ि द्‍यो, अर वीं एक हरचि भेड़ तैं तब तक खुज्याणु रौ, जब तक वा मिली नि जौ?</verse>
				<verse number="5">अर जब वा मिली जान्दी, तब उ मनखि बड़ु खुश होन्दु अर वींतैं अपणा कन्धों मा उठे के लि जान्दु।</verse>
				<verse number="6">अर घौर मा पौंछी के उ अपणा दगड़्यों अर पड़ोसीयों तैं इकट्‍ठा कैरिके बुल्दु कि, ‘मेरा दगड़ा मा आनन्द मणा, किलैकि मितैं मेरी हरचि भेड़ मिली गै।’</verse>
				<verse number="7">अर मि या बात तुमतै बतै देन्दु, कि जु आनन्द ऊं निन्याणबे लोग का खातिर मणये जान्दु, वेसे भि जादा आनन्द एक पापि मनखि का पापों बटि पस्ताप करण का बगत मा स्वर्गलोक मा मणये जान्दु, हाँ ऊं निन्याणबे लोगु से जादा जौं तैं पस्ताप करण की कुई जरुरत नि च।”</verse>
				<verse number="8">अर वेन ऊंकू बोलि, “तुम मा बटि इन्दरि क्‍वा जि जनानि होलि, जिं का पास चांदी का दस सिक्‍का हो अर ऊं सिक्‍कों मा बटि एक हरचि जौ। तब वा जनानि वे सिक्‍का तैं मन लगै के खुज्याण मा लगि जौ, इख तक की द्‍यू बाळि के घौर का कुणों-काणों मा भि सुरदी रौ।</verse>
				<verse number="9">अर जब उ सिक्‍का मिली जान्दु, तब वा जनानि अपणा दगड़्यों अर अपणा अर पड़ोसीयों तैं इकट्‍ठा कैरिके बुल्दी कि, ‘मेरा दगड़ा मा आनन्द मणा, किलैकि मितैं मेरु हरच्यूं सिक्‍का मिली गै।’</verse>
				<verse number="10">अर मि तुमतै बतै देन्दु, कि ठिक इन्‍नि आनन्द परमेस्वर का स्वर्गदूतों का समणि तब मणये जान्दु, जब एक पापि मनखि अपणा पापों बटि पस्ताप करदु।”</verse>
				<verse number="11">तब यीशु न इन भि बोलि, “एक मनखि का दुई नौना छा।</verse>
				<verse number="12">अर ऊंमा बटि छुटा नौन न बुबा कू बोलि, ‘पापा, जैजाद मा बटि जु हिस्सा मेरु च, उ तुम मितैं दे द्‍या।’ अर पिता न जैजाद बांटि दिनी।</verse>
				<verse number="13">“अर अभि कुछ दिन ही ह्‍वे छा कि, छुटो नौनु अपणु सब कुछ इकट्‍ठा कैरिके एक दूर मुलक मा चलि गै, अर उख वेन अपणी मौज-मस्ती मा पूरि धन-दौलत तैं उड़ै दिनी।</verse>
				<verse number="14">अर जब वेन अपणी पूरि धन-दौलत खर्च कैरी दिनी, त कंगाल ह्‍वे गै। अर ऊं दिनों मा ही वे मुलक मा खतरनाक अकाळ पोड़ि गै।</verse>
				<verse number="15">इलै उ वे मुलक मा एक नागरिक का इख जैके काम करण लगि गै, अर वे मनखि न वेतैं अपणा पुंगड़ों मा सुंगर चराणु कू भेजि।</verse>
				<verse number="16">अर कुई भि वेतैं खाणु कू कुछ नि देन्दु छौ, इलै वेकी इच्छा होन्दी छै कि उ भि ऊं फलियों तैं खौऽ, जौं तैं सुंगर खनदिन।</verse>
				<verse number="17">पर जब वेकी अकल ठिकणा पर ऐ, तब उ सुचण लगि गै, ‘मेरा बुबा का सब नौकरों तैं पुटगु भोरी के खाणु मिलदु, अर मि इख भूकि मुरणु छौं।</verse>
				<verse number="18">अब मि इख बटि वापिस अपणा बुबा का पास जौलु अर बोललु, पापा, मि तुमरा खिलाप ग्यों अर इन्‍नि कैरिके मिसे गळती ह्‍वे गै, अर इन कैरिके मिन परमेस्वर का खिलाप मा भि पाप कैरियाली।’</verse>
				<verse number="19">अर जैके इन बोललु कि, ‘पापा, अब मि तुमरो नौनु होण का लैख भि नि छौं, इलै मितैं अपणा इख एक नौकर की तरौं रखी द्‍या।’</verse>
				<verse number="20">तब उ उठी अर अपणा बुबा का इख चलि गै। “अर जब उ घौर का पास भि नि पौंछी छौ, कि सुणा, वेका बुबा न वेतैं देखि दिनी, अर अपणा नौना तैं देखि के वेका मन मा बड़ु तरस ऐ, तब उ दौड़ी के गै अर वेन अपणा नौना तैं गौळा लगै अर वेकी भूकि पीण लगि गै।</verse>
				<verse number="21">अर वे नौन न बोलि, ‘पापा, मि तुमरा खिलाप ग्यों अर इन्‍नि कैरिके मिसे गळती ह्‍वे गै, अर इन कैरिके मिन परमेस्वर का खिलाप मा भि पाप कैरियाली, अर मि तुमरो नौनु होण का लैख भि नि छौं।’</verse>
				<verse number="22">पर वेका बुबा न अपणा नौकरों कू बोलि, ‘सुणा, फटाफट अच्छा कपड़ा निकाळा अर येतैं पैरा, अर येका हाथ मा अंगुठी अर खुटों पर जुता पैरा।</verse>
				<verse number="23">अर पळ्यां बखरों मा बटि बड़िया बखरा तैं लेके काटा, ताकि हम खा अर खुशी मणा।</verse>
				<verse number="24">किलैकि मेरु यू नौनु मोरि गै छौ पर अब यू ज्यून्दु ह्‍वे गै।’ अर यू हरचि गै छौ पर अब मिली गै। तब ऊ सब मिली के खुशी मनौण लगि गैनी।</verse>
				<verse number="25">“मगर वे बगत वेकू बड़ु नौनु पुंगड़ा मा छौ। अर जब उ पुंगड़ा बटि वापस ऐ अर अभि उ घौर का नजदीक ही छौ, कि वेतैं नचण अर गाजा-बाजों की आवाज सुणै।</verse>
				<verse number="26">इलै वेन एक नौकर तैं बुलै अर वे बटि पूछी कि, ‘आज घौर मा होणु क्या च?’</verse>
				<verse number="27">अर वे नौकर न वेकू बोलि, ‘साब, तुमरो भुला अयूं च अर मालिक साब न वेतैं सुख-सन्ति पै, इलै ऊंन ढबडूबो बखरु कटवै।’</verse>
				<verse number="28">अर यू सुणी के वेतैं भौत गुस्सा ऐ गै अर उ भितर भि नि जाण चाणु छौ। इलै वेको बुबा भैर ऐ अर वेतैं मनौण लगि गै।</verse>
				<verse number="29">पर वेन अपणा बुबा कू बोलि, ‘सुणा, मि इथगा सालों बटि तुमरि सेवा कनु छौं। अर मिन कभि भि तुमरि बात तैं नि टाळि, मगर अभि तक तुमुन मितैं एक चिनखु भि नि देई, कि मि जैके अपणा दगड़्यों का दगड़ा मा खुशी मणै सैकु।</verse>
				<verse number="30">पर जन्‍नि तुमरो यू नौनु ऐ, त तुमुन वे खुणि बड़िया बखरु कटवै, जैन तुमरि जैजाद तैं वेश्याओं का पिछनै उड़ै दिनी।’</verse>
				<verse number="31">अर बुबा न वेकू बोलि, ‘बेटा, तू त हमेसा मेरा दगड़ा मा छे अर जु कुछ मेरु च उ सब तेरु ही त च।</verse>
				<verse number="32">पर चल, अब हमतै आनन्द अर खुशी मनौण चयेणी, किलैकि तेरु भुला जु मोरि गै छौ पर अब उ ज्यून्दु ह्‍वे गै, जु हरचि गै छौ अब उ वापिस मिली गै।’”</verse>
			</chapter>
			<chapter number="16">
				<verse number="1">यीशु न अपणा चेलों कू बोलि, “एक सेठ मनखि का इख एक कर्ता-धर्ता छौ। तब सेठ मनखि का पास वे कर्ता-धर्ता का खिलाप सिकैत किये गै, कि उ तुमरि जैजाद सुद्‍दी उड़ौणु च।</verse>
				<verse number="2">तब सेठ न वे कर्ता-धर्ता तैं बुलै अर वेकू बोलि, ‘तेरा बारा मा मि यू क्या सुनणु छौं? अपणा काम को हिसाब-किताब बतौ, किलैकि अब तिन कर्ता-धर्ता नि रौण।’</verse>
				<verse number="3">तब कर्ता-धर्ता सुचण लगि गै, ‘अब मि क्या कैरुं? किलैकि मेरु मालिक मितैं कर्ता-धर्ता का काम बटि हटाणु च। अर माटु त मिन खैणी नि सकण, अर भीक मंगण मा सरम आली।</verse>
				<verse number="4">अब मितैं क्या करण चयेणु, कि जब कर्ता-धर्ता का काम बटि हटयै जौ, त लोग मितैं अपणा घौर मा औण द्‍या। हाँ, मि समझि ग्यों कि मितैं क्या करण चयेणु।’</verse>
				<verse number="5">“तब कर्ता-धर्ता न अपणा मालिक का करजदारों तैं एक-एक कैरिके बुलै। अर वेन पैला बटि पूछी, ‘तिन मेरा मालिक को कथगा करज देण?’</verse>
				<verse number="6">तब वेन बोलि, ‘साब, आठ सौ गैलन तेल।’ तब कर्ता-धर्ता न बोलि, ‘ये ले अपणु खाता पकड़ अर बैठि जा अर तुरन्त वेमा चार सौ गैलन लिखी दे।’</verse>
				<verse number="7">तब कर्ता-धर्ता न दुसरा बटि पूछी, ‘त्वे पर कथगा करज च?’ वेन बोलि, ‘सौ बोरी ग्यूँ।’ तब कर्ता-धर्ता न बोलि, ‘ये ले अपणु खाता पकड़ अर तुरन्त वेमा अस्सि लिखी दे।’</verse>
				<verse number="8">तब सेठ मनखि न वे अधरमी कर्ता-धर्ता की पुलबै कैरी, किलैकि वेन बड़ी चकड़ैति से काम कर्युं छौ।” अर यीशु न बोलि, “ईं दुनियां का लोग अफ दगड़ा का लोगु से लेण-देण का मामला मा आत्मिक लोगु से जादा चकडै़त होनदिन।</verse>
				<verse number="9">अर मि तुम बटि बोन्‍नु छौं कि, ‘दुनियां की दौलत का छौन्द तुम अफु खुणि दगड़्या बणैल्या, ताकि जब वा दौलत खतम ह्‍वे जौ, त ऊ तुमरो स्वागत सदनि का घौर मा करला।’</verse>
				<verse number="10">अर जु मनखि छुटी-छुटी बातों मा इमानदार होन्दु, वु बड़ी-बड़ी बातों मा भि इमानदार होन्दु। अर जु छुटी-छुटी बातों मा बेमान होलु, वु बड़ी-बड़ी बातों मा भि बेमान होलु।</verse>
				<verse number="11">इलै जब तुम लोग संसार की दौलत मा भरोसा का लैख नि रयां, त सच्‍चु धन तुम मा कैन सौंपण?</verse>
				<verse number="12">अर जब तुम दुसरे की दौलत मा ही बिस्वासयोग्य नि ठैरयां, त जु तुमरो च, उ तुमतै कैन देण?</verse>
				<verse number="13">“अर कुई भि नौकर दुई मालिकों की सेवा नि कैरी सकदु, किलैकि अगर वु करलु त एक बटि नफरत करलु अर दुसरा बटि प्यार, य त फिर उ एक का दगड़ा मा वफादार रालु अर दुसरो को तिरिस्कार करलु। ठिक उन्‍नि तुम लोग भि परमेस्वर अर धन दुईयों की सेवा नि कैरी सकद्‍यां।”</verse>
				<verse number="14">अर जब फरीसी दल का लोगु न यीशु की यों बातों तैं सुणी, त वेको मजाक उड़ौण लगि गैनी। किलैकि उ दौलत का लालची छा।</verse>
				<verse number="15">अर वेन ऊंकू बोलि कि, “तुम त लोगु का समणि अफ तैं धरमी ठैरौन्द्‍यां, पर परमेस्वर तुमरा मनों तैं जणदु च, किलैकि ज्वा चीज मनखियों की नजर मा सबसे महान होन्दी, वीं ही चीज से परमेस्वर नफरत करदु।</verse>
				<verse number="16">“यूहन्‍ना बपतिस्मा देण वळा का बगत तक मूसा का दियां नियम-कानून अर परमेस्वर का रैबर्यों का बारा मा परचार ह्‍वे। मगर यूहन्‍ना का बाद परमेस्वर का राज का शुभ समाचार का बारा मा परचार किये जाणु च, अर हरेक मनखि वेकी तरफा जल्दी से खिच्येणु च।</verse>
				<verse number="17">धरती अर आसमान को नास होण आसान च, मगर नियम-कानूनों मा लिखीं छुटी से छुटी बात भि बदलै नि जै सकदी।</verse>
				<verse number="18">उदारण खुणि, अगर कुई मनखि अपणी घरवळी तैं तलाक देके कै दुसरि जनानि का दगड़ा मा ब्यौ करदु, त उ वीं जनानि का दगड़ा मा गळत सम्बन्ध बणौणु च। अर ठिक उन्‍नि अगर कुई मनखि वीं तलाक दिईं जनानि का दगड़ा मा ब्यौ करदु, त वु मनखि भि वींका दगड़ा मा गळत सम्बन्ध बणौणु च, जु कि गळत च।”</verse>
				<verse number="19">अर यीशु न बोलि, “एक सेठ मनखि छौ। जु मखमल का बैंगनि कपड़ा पैरदु छौ, अर हर रोज ऐस-आराम अर बड़ा ठाठ-बाट से रौन्दु छौ।</verse>
				<verse number="20">अर लाजर नौ का एक गरीब मनखि तैं वेका द्‍वार का समणि छोड़ दिये जान्दु छौ, जैका पूरु सरील पर फोड़ो का घौ होयां छा।</verse>
				<verse number="21">इख तक की कुकर भि ऐके वेका घौ तैं चटदा छा, अर उ चान्दु छौ कि सेठ का बच्यां खाणु मा बटि उ अपणु पुटगु भोरी सैको।</verse>
				<verse number="22">“अर इन ह्‍वे, कि एक दिन लाजर मोरि गै, अर स्वर्गदूतों न ऐके वेतैं अब्राहम का पास पौंछे दिनी। अर ठिक उन्‍नि कुछ दिनों बाद सेठ मनखि भि मोरि गै, अर ऊंतैं दफनये गै।</verse>
				<verse number="23">पर जब अधलोक का दुख मा बटि, सेठ मनखि न मथि देखि त वेन दूर अब्राहम का पास लाजर तैं बैठयूं देखि,</verse>
				<verse number="24">तब वेन धै लगै के अब्राहम कू बोलि, ‘हे पिता, मि पर दया कैरा अर लाजर तैं मेरा पास भेजि द्‍या, ताकि उ अपणा अंगुळा तैं पाणि मा भिगै के मेरी जीब पर लगौ अर वा ठण्डी ह्‍वे जौ, किलैकि मि नरकलोक की आग मा तड़पणु छौं।’</verse>
				<verse number="25">पर अब्राहम न बोलि, ‘बेटा, याद कैर तिन अपणा जीवन मा वु सब कुछ पै ज्यां की त्वेतै जरुरत छै, जब की लाजर न खैरि खै मगर अब वेतैं इख सुख-शान्ति मिलणी च, अर त्वेतै उख खैरि।</verse>
				<verse number="26">अर यों बातों का अलावा हमरा अर तुमरा बीच मा एक भौत बड़ी खाई च, ताकि अगर कुई इख बटि तुमरा पास जाण चौ त उ नि जै सैको, अर ना ही कुई उख बटि इख हमरा पास ऐ सकदु।’</verse>
				<verse number="27">“तब सेठ मनखि न बोलि, ‘हे पिता, अगर इन बात च त मि तुम बटि बिन्ती करदु, कि तुम लाजर तैं मेरा घौर भेजा द्‍या,</verse>
				<verse number="28">किलैकि मेरा पांच भै और भि छिन अर कखि इन नि हो कि वु भि ईं जगा मा ऐके खैरि खा, इलै लाजर तैं ऊंका पास भेजा ताकि वु यों बातों तैं बतै सैको।’</verse>
				<verse number="29">तब अब्राहम न वेकू बोलि, ‘ऊंका पास मूसा अर रैबर्यों कि किताब छिन, इलै वु ऊंकी सुणा।’</verse>
				<verse number="30">अर वेन अब्राहम कू बोलि, ‘नऽ ना पिता, अगर कुई मुरयां लोगु मा बटि ऊंका पास जालु, त वु जरुर पस्ताप करला।’</verse>
				<verse number="31">मगर अब्राहम न वेकू बोलि, ‘जब वु मूसा अर रैबर्यों की बातों तैं नि मणदिन, त अगर कुई मुरयां लोगु मा बटि ज्यून्दु ह्‍वेके जालु त वु वेकी भि नि मणला।’”</verse>
			</chapter>
			<chapter number="17">
				<verse number="1">फिर यीशु न अपणा चेलों कू बोलि, “अगर तुम मा बटि कुई यों छुटो तैं पाप करणु खुणि उकसौन्दु, त वे मनखि खुणि यू जादा ठिक होन्दु कि, वेका गौळा मा जंदरु डालि के बन्धे जान्दु, अर वेतैं समुन्दर मा ढुळै जान्दु। अर इन ह्‍वे नि सकदु कि मनखि पाप नि कैरो, पर हाय च वे मनखि खुणि जैकी वजै से यू पापों मा फंसदिन।</verse>
				<verse number="2"></verse>
				<verse number="3">इलै चौकस रा, अगर जु तेरु भै पाप कैरो त वेतैं समझौ, अर अगर उ पस्ताप करदु त वेतैं माफ कैर।</verse>
				<verse number="4">अर अगर जु उ तेरा खिलाप मा एक दिन मा सात बार पाप कैरो। अर उथगि दौं ऐके बोलो, ‘मि बटि गळती ह्‍वे गै अर अब मि पछताणु छौं,’ त तू वेतैं माफ कैर दे।”</verse>
				<verse number="5">तब खास चेलों न प्रभु कू बोलि, “गुरुजी, हमरु बिस्वास कनकै बढी सकदु?”</verse>
				<verse number="6">अर प्रभु न बोलि, “अगर जु तुमरो बिस्वास लय्या का बीज बराबर भि च, त तुम ये सैतूत का डाळा कू बुल्दा कि, ‘जलुड़ो समेत उखड़ी के समुन्दर मा लगि जा, त उ तुमरि बात तैं मणलु।’”</verse>
				<verse number="7">यीशु इन भि बोलि, “तुम मा बटि इन्द्रयो कु च, जैको नौकर पुंगड़ा मा हौळ लगौणु हो या भेड़ चराणु हो, अर जब उ पुंगड़ा बटि वापिस अऽ, त नौकर कू बोल, ‘तुरन्त इख अऽ अर खाणुक खाणु कू बैठ?’ ना, इन नि होन्दु।</verse>
				<verse number="8">पर इन बोललु, ‘मि खुणि खाणु बणौ, अर जबरि तक मि खै-पी नि ल्यूं, तबरि तक अपणी कमर बान्धि के मेरी सेवा कैर अर वेका बाद तू भि खै-पी ले?</verse>
				<verse number="9">त अब इन बता कि, क्या मालिक वे नौकर को ऐसान मणलु, कि वेन उई काम करिनी जौं कि आज्ञा दिये गै छै।’</verse>
				<verse number="10">अर ठिक इन्‍नि तुम भि जब वु सब काम कैरी दिल्या त बुलयां, ‘हम त कै भि काम का लैख नि छां, किलैकि जु काम हम कू करणु खुणि बुलै गै छा हम नौकरों न सिरफ उई कैरी।’”</verse>
				<verse number="11">एक बार इन ह्‍वे कि यीशु सामरिया अर गलील मुलक का ग्‍वोंऽ का बीच मा बटि ह्‍वेके यरूशलेम नगर कू जाणु छौ,</verse>
				<verse number="12">अर जब उ कै गौं मा जाणु छौ, त वेतैं दस कोड़ी मिलिनी।</verse>
				<verse number="13">अर वु दूर खड़ा छा अर ऊंन धै लगै के बोलि, “यीशु गुरुजी, हम पर दया कैरा।”</verse>
				<verse number="14">अर वेन ऊंतैं देखि के बोलि, “जा, अर अपणी जाँच-पड़ताल पुरोहितों बटि करावा।” अर बाटा मा जान्दी दौं वु लोग शुद्ध ह्‍वे गैनी।</verse>
				<verse number="15">तब ऊंमा बटि एक न देखि कि मि शुद्ध ह्‍वे ग्यों, त उ जोर-जोर से परमेस्वर की बडै करदी वापिस ऐ गै।</verse>
				<verse number="16">अर यीशु का खुटों मा हाथ जोड़ी के पोड़ि गै, अर वेको धन्यवाद करण लगि गै। अर उ एक सामरी जाति को आदिम छौ।</verse>
				<verse number="17">तब यीशु न वेकू बोलि, “क्या दस का दस शुद्ध नि ह्‍वेनि? त फिर ऊ नौ कख छिन?</verse>
				<verse number="18">क्या ये दुसरि जाति का मनखि का अलावा कुई और नि छौ, जु की वापिस ऐके परमेस्वर की बडै करदु?”</verse>
				<verse number="19">तब वेन वेकू बोलि, “खड़ु हो अर जा, तेरा बिस्वास न त्वेतै खूब कैरियाली।”</verse>
				<verse number="20">अर फरीसी दल का लोगु न यीशु बटि पूछी कि, “परमेस्वर को राज कब आलु।” तब वेन ऊंकू बोलि, “परमेस्वर को राज परगट रुप से नि दिखेन्दु की लोग वेतैं देखा।</verse>
				<verse number="21">अर लोग इन नि बुलला कि, ‘देख इख च’ या ‘उख च।’ पर सुणा, परमेस्वर को राज त तुमरा ही बीच मा च।”</verse>
				<verse number="22">तब वेन चेलों कू बोलि कि, “वु बगत आलु, जब तुम मनखि का पुत्र का दिनों मा बटि एक दिन तैं दिखणु कू तरसिल्या पर देखि नि सकिल्या।</verse>
				<verse number="23">अर लोग तुम बटि बुलला, ‘देखा, परमेस्वर को राज इख च’ या ‘देखा उख च।’ पर तुम नि जयां अर ना ही ऊंकी बातों का मुताबिक चलयां।”</verse>
				<verse number="24">“अर मनखि का पुत्र को दुबरा औण आसमान मा बिजली चमकण जन होलु, जन बिजली आसमान मा एक जगा बटि दुसरि जगा तक चमकदी,</verse>
				<verse number="25">पर यू सब होण से पैलि यू जरुरी च कि उ भौत दुख-तकलीफ उठौ, अर ईं पीढ़ी का लोग वेतैं स्वीकार नि कैरा।</verse>
				<verse number="26">अर ठिक जन नूह का दिनों मा ह्‍वे छौ, उन्‍नि मनखि का पुत्र का दिनों मा भि होलु।</verse>
				<verse number="27">अर जबरि तक नूह जाज मा नि चैड़ि छौ, तबरि तक लोग खूब खाणा-पीणा छा अर ऊंमा ब्यौ-पग्‍नी होणा छौ। तब जल परलय न ऐके ऊं सभ्यों तैं नास कैरी दिनी।</verse>
				<verse number="28">अर जन लूत का दिनों मा ह्‍वे, जब लोग खाणा-पीणा छा, अर लेण-देण कना छा, अर खेति कना अर घौर बणौणा छा।</verse>
				<verse number="29">पर जै दिन लूत सदोम नगर तैं छोड़ि के निकळि गै, वे दिन आसमान बटि आग अर गंधक कि बरखा ह्‍वे अर सब कुछ नास ह्‍वे गै।</verse>
				<verse number="30">अर ठिक इन्‍नि वे दिन भि होलु, जब मनखि को पुत्र आलु।</verse>
				<verse number="31">अर वे दिन अगर कुई मनखि छत मा हो अर वेको समान घौर मा हो, त उ वेतैं लेणु खुणि मूड़ी नि जौ। अर ठिक उन्‍नि अगर कुई मनखि पुंगड़ा मा हो त उ भि पिछनै छुड़ी चीजों तैं लेणु कू नि जौ।</verse>
				<verse number="32">अर लूत कि घरवळी तैं याद कैरा, कि वींका दगड़ा मा क्या ह्‍वे।</verse>
				<verse number="33">अर जु कुई अपणा पराण तैं बचौण चालु उ वेतैं नि बचै सकलु, मगर जु कुई अपणा पराण को नुकसान उठालु उ वेतैं बचालु।</verse>
				<verse number="34">“अर मि तुमतै बतै देन्दु कि, वीं रात एक खाट मा दुई लोग सियां होला, अर ऊंमा बटि एक उठे दिये जालु अर दुसरा तैं छोड़ दिये जालु।</verse>
				<verse number="35">अर उन्‍नि दुई जनानियां मिली के जन्दरुन्द पिसणी ह्‍वेलि, अर ऊंमा बटि एक उठये जालि अर दुसरि छोड़ दिये जालि।</verse>
				<verse number="36">[दुई मनखि पुंगड़ा मा होला, अर ऊंमा बटि एक उठे दिये जालु अर दुसरा तैं छोड़ दिये जालु।”]</verse>
				<verse number="37">तब ऊंन वे बटि पूछी, “प्रभु यू कख होलु?” तब यीशु न ऊंकू बोलि, “जख लांश होन्दी गरुड़ भि उखि जमा होनदिन।”</verse>
			</chapter>
			<chapter number="18">
				<verse number="1">अर यीशु न अपणा चेलों तैं हमेसा प्रार्थना करण का बारा मा अर हिम्मत नि छुड़ण का बारा मा बतौणु खुणि ऊंतैं एक उदारण सुणै। वेन ऊंकू बोलि कि,</verse>
				<verse number="2">“एक नगर मा एक न्याय करण वळु रौन्दु छौ, जु कि परमेस्वर पर सरदा नि रखदु छौ। अर ना ही कै मनखि की इज्‍जत करदु छौ।</verse>
				<verse number="3">अर वे नगर मा एक विधवा जनानि भि रौन्दी छै। अर वा वेमा बार-बार ऐके बुल्दी छै कि, ‘साब, मेरा बैरी बटि मेरु न्याय कैरिके मितैं बचावा।’</verse>
				<verse number="4">अर भौत दिनों तक उ वीं की बात टलणु रै, पर बाद मा वेन अपणा मन मा सोची कि, ‘नऽ त मि परमेस्वर पर सरदा रखदु अर ना ही कै मनखि की इज्‍जत करदु,</verse>
				<verse number="5">मगर ईं विधवा को मितैं परेसान कैरिके रख्युं च, इलै मिन ईं को न्याय जरुर करण कखि इन नि हो की या विधवा बार-बार ऐके मेरा नाक मा दम कैरी द्‍यो, अर मेरु जीण हराम ह्‍वे जौ।’”</verse>
				<verse number="6">तब प्रभु यीशु न चेलों कू बोलि, “अब ध्यान से सुणा, अर ये अधरमी न्याय करण वळा की ईं बात बटि सीखा?</verse>
				<verse number="7">अर जब एक अधरमी न्याय करणु वळु इन कैरी सकदु, त क्या परमेस्वर अपणा चुण्यां लोगु को न्याय नि करलु? जु दिन-रात वेसे प्रार्थना करणा रौनदिन, क्या उ अपणा लोगु का खातिर देर करलु?</verse>
				<verse number="8">नऽ रे ना, मि तुमतै बतै देन्दु कि परमेस्वर तुरन्त ऊंको न्याय जरुर करलु। “पर अब बात या च कि जब मनखि को पुत्र आलु, त क्या उ धरती का लोगु मा बिस्वास पालु?”</verse>
				<verse number="9">तब यीशु न ऊं लोगु खुणि जु खुद पर इन भरोसा रखदिन कि हम भौत धरमी छां, मगर दुसरा लोगु को तिरिस्कार करदिन। अर इन्द्रया लोगु खुणि ही यीशु न एक उदारण देके बोलि कि,</verse>
				<verse number="10">“एक बार दुई मनखि मन्दिर मा प्रार्थना करणु कू गैनी, ऊंमा बटि एक फरीसी दल को मनखि अर दुसरो चुंगी लेण वळु छौ।</verse>
				<verse number="11">अर फरीसी खड़ु ह्‍वेके अपणा मन मा इन प्रार्थना करण लगि गै कि, ‘परमेस्वर, मि तुमरो धन्यवाद करदु कि मि दुसरा लोगु का जन ठग, अधरमी, अर ना ही गळत सम्बन्ध रखण वळा का जन छौं, अर ना ही ये चुंगी लेण वळा का जन छौं।</verse>
				<verse number="12">मि हप्‍ता मा दुई बार उपवास रखदु अर जु कुछ मितैं मिलदु, वांको दसुं हिस्सा चड़ौन्दु छौं।’</verse>
				<verse number="13">पर वे चुंगी लेण वळा न स्वर्ग जनै भि नि देखि, बल्किन दूर खड़ु ह्‍वेके अपणी छति भटगै-भटगै के बोलि, ‘परमेस्वर, मि एक पापि मनखि छौं मि पर दया कैरा।’”</verse>
				<verse number="14">यीशु न ऊंकू बोलि, “मि तुमतै बतै देन्दु, कि यू फरीसी मनखि ना पर चुंगी लेण वळु मनखि धरमी ठैरैये गै अर घौर चलि गै। किलैकि जु कुई अफ तैं बड़ु बणालु उ छुटो किये जालु, अर जु अफु तैं दीन कैरिके छुटो बणालु वु बड़ु किये जालु।”</verse>
				<verse number="15">अर फिर लोग अपणा बाल-बच्‍चों तैं यीशु का पास लैनि, कि उ ऊं पर अपणु हाथ रखी के आसीस द्‍यो। मगर यू देखि के चेला ऊंतैं झिड़कण लगि गैनी।</verse>
				<verse number="16">पर वेन ऊं बच्‍चों तैं अफ जनै बुलै के बोलि, “बच्‍चों तैं मि मू औण द्‍या ऊंतैं रोका ना, किलैकि परमेस्वर को राज ऊंको ही च, जु यों बच्‍चों का जन छिन।”</verse>
				<verse number="17">अर मि तुम बटि सच्‍चि बोन्‍नु छौं, जु कुई भि परमेस्वर का राज तैं एक छुटा बच्‍चा का जन स्वीकार नि करलु, वेन वे राज्य मा कभि भि नि जै सकण।</verse>
				<verse number="18">तब कै मुखिया न यीशु तैं पूछी, “गुरुजी, तुम अच्छा गुरु छाँ, मि इन्द्रयो कु जि काम कैरुं कि सदनि का जीवन को हकदार ह्‍वे जौ?”</verse>
				<verse number="19">अर यीशु न वेकू बोलि, “तू मिकू अच्छु किलै बोन्‍नि छैई? परमेस्वर का अलावा कुई भि अच्छु नि च।</verse>
				<verse number="20">तू आज्ञाओं तैं त जणदी ही छैई, ‘दुसरि जनानियों का दगड़ा मा गळत सम्बन्ध नि रखी, हत्या नि कैरी, अर चोरी नि कैरी, झूठ्‍ठी गवै नि देई, अपणा ब्वे-बुबों को आदर-सम्मान कैरी।’”</verse>
				<verse number="21">वेन बोलि, “गुरुजी, यों सब बातों तैं त मि बाळ्‍पन बटि मणदी औणु छौं।”</verse>
				<verse number="22">अर यू सुणी के यीशु न वेकू बोलि, “त्वेमा अभि भि एक बात की कमी च। इन कैर कि जु कुछ भि त्वेमा च, ऊ सब कुछ बेचि दे अर वे बटि जु कुछ भि मिललु वु सब गरीबों मा बांटि दे, अर ऐके मेरु चेला बणि जा तब त्वेतै स्वर्ग मा खजानु मिललु।”</verse>
				<verse number="23">जब वेन यू सुणी त उ भौत उदास ह्‍वे गै, किलैकि उ भौत बड़ु सेठ छौ।</verse>
				<verse number="24">अर यीशु न देखि की मेरी बात तैं सुणी के यू उदास ह्‍वे गै तब यीशु न बोलि कि, “सेठ लोगु को परमेस्वर का राज मा दाखिल होण बड़ु कठिन च।</verse>
				<verse number="25">मि तुम बटि बोन्‍नु छौं, कि एक ऊंट को स्यूण का छेद बटि निकळण सरल च, मगर सेठ मनखि को परमेस्वर का राज मा जाण बड़ु कठिन च।”</verse>
				<verse number="26">अर जु लोग यीशु की बातों तैं सुनणा छा, ऊंन वेतैं पूछी, “गुरुजी, त फिर इन कैरिके कु बचि सकदु?”</verse>
				<verse number="27">अर वेन बोलि, “जु मनखियों बटि नि ह्‍वे सकदु उ परमेस्वर बटि ह्‍वे सकदु च।”</verse>
				<verse number="28">तब चेलों मा बटि पतरस न बोलि, “गुरुजी देखा, हम त अपणु सब कुछ छोड़ि के तुमरा पिछनै ह्‍वे ग्यां।”</verse>
				<verse number="29">अर यीशु न ऊंकू बोलि, “मि तुम बटि सच्‍चि बोन्‍नु छौं कि, वु सभि लोग जौन परमेस्वर का राज का बानो अपणु घौर, अपणी घरवळी या अपणा भै-बैंणो या अपणा ब्वे-बबों या अपणा बाल-बच्‍चों तैं छुड़यूं च,</verse>
				<verse number="30">वु ये जमना मा भौत जादा पाला, अर औण वळा युग मा ऊ सभि सदनि का जीवन तैं भि पाला।”</verse>
				<verse number="31">फिर यीशु न अपणा बारह चेलों तैं अलग मा लि जैके बोलि, “सुणा, हम लोग यरूशलेम नगर जाणा छां, अर जु-जु बात मनखि का पुत्र का बारा मा परमेस्वर का रैबर्यों की लिखीं छिन, वु सब पूरि होलि।</verse>
				<verse number="32">किलैकि ऊ वेतैं ऊं लोगु का हवाला करला जु कि यहूदी जाति का नि छिन, ताकि वु वेको मजाक उड़ा अर वेका दगड़ा मा गळत बरतौ कैरा, अर वे पर थुकला,</verse>
				<verse number="33">अर ऊ वे पर कोड़ा मरला, इख तक की जान से मार द्‍याला, पर उ तिसरा दिन ज्यून्दु ह्‍वे जालु।”</verse>
				<verse number="34">अर जौं बातों तैं यीशु बोन्‍नु छौ, ऊ बात वु नि समझ सकिनी। अर यों बातों को मतलब ऊं बटि छिप्यूं रै, इलै या बात चेलों का समझ मा नि ऐ।</verse>
				<verse number="35">जब यीशु अर वेका चेला यरीहो नगर का नजदीक पौंछिनी, त उख एक अन्धु मनखि सड़क का किनरा बैठि के भीक मंगणु छौ।</verse>
				<verse number="36">जब वे अन्धा मनखि न भीड़ की आवाज सुणी, त उ पूछण लगि गै, “अरे, इख क्या होणु च?”</verse>
				<verse number="37">लोगु न वेकू बोलि, “नासरत गौं को यीशु जाणु च।”</verse>
				<verse number="38">अर यू सुणी के वेन जोर से बोलि कि, “हे राजा दाऊद का वंशज यीशु, मि पर दया कैर।”</verse>
				<verse number="39">अर जु अगनै-अगनै जाणा छा ऊं लोगु न झिड़की के बोलि, चुप रौ। मगर उ और भि जादा चिल्‍लै के बोन्‍न लगि गै, “हे दाऊद का वंशज, मि पर दया कैर।”</verse>
				<verse number="40">तब यीशु रुकी गै अर वेन आज्ञा दिनी, कि वेतैं मेरा पास लेके आ। अर जब उ मनखि नजदीक ऐ त यीशु न वेतैं पूछी,</verse>
				<verse number="41">“तू क्या चान्दी, कि मि त्वे खुणि कैरुं?” अर वेन बोलि, “प्रभु, मि चान्दु, कि मि फिर से दिखण लगि जौ।”</verse>
				<verse number="42">अर यीशु न वेकू बोलि, “दिखण लगि जा, तेरा बिस्वास न त्वेतै खूब कैरियाली।”</verse>
				<verse number="43">अर उ तुरन्त दिखण लगि गै, अर परमेस्वर की बडै करद-करद यीशु का पिछनै चलण लगि गै। अर यू काम देखि के सब लोग परमेस्वर को गुणगान करण लगि गैनी।</verse>
			</chapter>
			<chapter number="19">
				<verse number="1">यीशु यरीहो नगर का बाटा बटि ह्‍वेके जाणु छौ।</verse>
				<verse number="2">अर उख जक्‍कई नौ को एक मनखि छौ। जु की चुंगी लेण वळो को अधिकारी छौ अर यू भौत सेठ छौ।</verse>
				<verse number="3">अर उ यीशु तैं दिखण चाणु छौ कि आखिर मा उ छैई कु च, पर भीड़ जादा होण की वजै से उ वेतैं देखि नि सकणु छौ, किलैकि उ नाटु छौ।</verse>
				<verse number="4">इलै उ यीशु तैं दिखणु का बाना भागी के अगनै गै अर एक गूलर का डाळा पर चैड़ि गै, किलैकि यीशु वे ही बाटा बटि औण वळु छौ।</verse>
				<verse number="5">जब यीशु वीं जगा पर पौंछी, त वेन मथि देखि के वेकू बोलि, “जक्‍कई, झट मूड़ी उतर, किलैकि यू जरुरी च कि मि आज तेरा घौर मा रौ रौंऽऽ।”</verse>
				<verse number="6">अर उ झट मूड़ी उतरि गै अर बड़ी खुशी से यीशु तैं अपणा घौर लि जाणु खुणि वेको स्वागत कैरी, तब ऊ चलि गैनी।</verse>
				<verse number="7">अर यू देखि के भीड़ का लोग न बबड़णान्द-बबड़णान्द बोलि, “अरे, यू त एक पापि मनखि का घौर मा रुकणु कू जाणु।”</verse>
				<verse number="8">अर जक्‍कई न खड़ु ह्‍वेके यीशु कू बोलि, “प्रभु मि अपणी अधि धन-दौलत गरीबों तैं द्‍यूलु अर जौं बटि मिन अन्यो कैरिके लेई ऊंतैं मि चार गुणा वापिस द्‍यूलु।”</verse>
				<verse number="9">तब यीशु न वेकू बोलि, “आज ये घौर का लोगु तैं छुटकारु मिली गै, किलैकि यू भि अब्राहम की पीढ़ी मदि एक च।</verse>
				<verse number="10">किलैकि मनखि को पुत्र हरच्यां लोगु तैं खुजै के बचौणु खुणि ही अयूं च।”</verse>
				<verse number="11">यीशु अर वेका चेला यरूशलेम नगर का नजदीक छा, अर एक बड़ी भीड़ वेका पिछनै चलणी छै। अर सब लोग यीशु की बातों तैं सुनणा छा, अर इन समझणा छा कि अब परमेस्वर को राज तुरन्त दिखैण वळु च। इलै यीशु न ऊंतैं एक और उदारण देके बोलि,</verse>
				<verse number="12">“एक बार एक राज वंश को मनखि राज्य पर अधिकार पौण का बाना दूर देस कू चलि गै, ताकि वे अधिकार तैं पैके वापिस ऐ जौ।</verse>
				<verse number="13">अर वेन जाण से पैलि नौकरों मा बटि दस नौकरों तैं अपणा पास बुलै अर ऊंतैं दस सोना का सिक्‍का दिनी, अर बोलि, ‘जब तक मि वापिस नि ऐ जौ, तब तक यों से व्यापार कर्यां।’</verse>
				<verse number="14">पर वे नगर का लोग ये मनखि बटि नफरत करदा छा, इलै वेका पीठ पिछनै लोगु न वे खुणि यू रैबार भेजि कि, ‘हम नि चन्द्‍यां कि यू हम पर राज कैरो।’</verse>
				<verse number="15">“पर फिर भि जब वु राज को अधिकार पैके वापिस लौटी। अर जब ऐ गै, त वेन ऊं दस नौकरों तैं बुलै जौं तैं वेन सोना का सिक्‍का दियां छा, ताकि इन पता चलु कि ऊंन ऊं सिक्‍कों बटि कथगा कमै कैरी।</verse>
				<verse number="16">तब पैलु नौकर ऐ अर वेन बोलि, ‘साब, तुमुन जु सिक्‍का मितैं दियां छा वामा बटि मिन दस सिक्‍का और कमैनि।’</verse>
				<verse number="17">अर वेन वेकू बोलि, ‘सबास मेरा नौकर, भौत अच्छु तू भौत कम मा भि भरोसा लैख बणि रै, इलै मि त्वेतै दस नगरों पर अधिकार देन्दु।’</verse>
				<verse number="18">तब दुसरा न ऐके बोलि, ‘साब, तुमुन जु सिक्‍का मितैं दियां छा वामा बटि मिन पांच सिक्‍का और कमैनि।’</verse>
				<verse number="19">अर वेन वेकू बोलि, ‘तू भि पांच नगरों को अधिकारी ह्‍वे जा।’</verse>
				<verse number="20">तब एक और मनखि न ऐके बोलि, ‘साब, जु सिक्‍का तुमुन मितैं दे छौ वु यू च, अर मिन येतैं अंगोछा मा गेड़ मारी के रखियालि छौ।</verse>
				<verse number="21">अर मि तुम बटि डऽरदु छौ अर मि जणदु छौ कि तुम सक्‍त मनखि छाँ, किलैकि जख तुम नि रखद्‍यां उख बटि तुम उठौन्दा छाँ, अर जख तुमुन बुतयूं नि च उख तुम लवै करद्‍यां।’</verse>
				<verse number="22">तब वे मालिक न वेकू बोलि, ‘हे निकमा नौकर, मि तेरा बुलयां का मुताबिक तेरु न्याय करलु, जब त्वेतै पता छौ कि मि सक्‍त मनखि छौं, अर जख मि रखदु नि छौं उख बटि उठौन्दु अर जख मेरु बुतयूं नि उखे मि लवै करदु,</verse>
				<verse number="23">त फिर तिन मेरा यू धन सौकार का पास जमा किलै नि कैरी? ताकि जब मि औन्दु त वेका दगड़ा-दगड़ि ब्याज भि पौन्दु।’</verse>
				<verse number="24">अर जु वे मालिक का पास खड़ा होयां छा वेन ऊंकू बोलि, ‘वे सोना का सिक्‍का तैं वे बटि ले ल्या, अर वेतैं दे द्‍या जैमा दस सिक्‍का छिन।’</verse>
				<verse number="25">अर ऊं लोगु न मालिक कू बोलि, ‘साब, वेमा त पैलि सोना का दस सिक्‍का छिन।’</verse>
				<verse number="26">अर मालिक न बोलि, ‘मि तुम बटि बोन्‍नु छौं कि, जु कुई परमेस्वर का राज तैं बिंगणे की इच्छा रखदु, वेतैं वेका बारा मा बिंगण को और भि जादा ज्ञान दिये जालु। मगर जु मनखि इन सोचदु, कि मितैं भौत ज्ञान च त वे बटि वु ज्ञान भि छिनै जालु।</verse>
				<verse number="27">पर अब मेरा वु दुसमन जु नि चाणा छा कि मि ऊं पर राज कैरुं, ऊंतैं इख ला अर मेरा समणि मारी द्‍या।’”</verse>
				<verse number="28">अर यों बातों तैं बुलण का बाद यीशु ऊंका अगनै-अगनै यरूशलेम नगर की ऊकाळ चड़ण लगि गै।</verse>
				<verse number="29">अर जब उ जैतून नौ का पाड़ पर बैतफगे अर बैतनिय्याह गौं का पास पौंछी, त वेन अपणा दुई चेलों तैं इन बोलि के भेजि कि,</verse>
				<verse number="30">“समणि का गौं मा जा, अर उख पौंछदि तुमतै एक गधा को बच्‍चा बन्धयूं मिललु, जै पर अभि तक कुई नि बैठि वेतैं खोली के इख ला।</verse>
				<verse number="31">अर अगर कुई तुम बटि पूछलु, किलै खुलणा छाँ रे येतैं? त इन बुलयां कि, ‘प्रभु तैं येकी जरुरत च।’”</verse>
				<verse number="32">तब वु चेला चलि गैनी, अर जौं चेलों तैं यीशु न भेजि अर जन वेन ऊंकू बोलि छौ, ऊंन जैके ठिक उन्‍नि पै।</verse>
				<verse number="33">अर जब वु गधा का बच्‍चा तैं खुलणा छा त वेका मालिकों न ऊंतैं पूछी, “किलै खुलणा छाँ रे ये बच्‍चा तैं?”</verse>
				<verse number="34">अर ऊंन बोलि, “प्रभु तैं येकी जरुरत च।”</verse>
				<verse number="35">अर तब ऊ वेतैं यीशु का पास लेके ऐनी, अर ऊंन गधा का बच्‍चा पर अपणा कपड़ा डालि के यीशु तैं वेमा बैठे दिनी।</verse>
				<verse number="36">अर जब उ बच्‍चा पर बैठि के जाणु छौ, तब भीड़ का लोग न वेका आदर-सम्मान का खातिर अपणा कपड़ों तैं बाटा मा बिछै।</verse>
				<verse number="37">अर जब उ जैतून नौ का पाड़ की उन्दार मा पौंछी, त वेका चेलों न अर वेका पिछनै चलण वळा लोगु की भीड़ न आनन्दित ह्‍वेके ऊँची आवाज मा परमेस्वर को गुणगान कैरी। किलैकि ऊंन भौत सा चमत्कारिक कामों तैं देखि छौ। तब ऊंन बोलि,</verse>
				<verse number="38">“ धन्य च उ राजा जु प्रभु का नौ से औन्दु, अर स्वर्ग मा शान्ति, अर सबसे महान परमेस्वर की बडै हो।”</verse>
				<verse number="39">तब भीड़ मा बटि कुछ फरीसी दल का लोगु न वेकू बोलि, “गुरुजी, अपणा चेलों तैं झिड़क।”</verse>
				<verse number="40">अर यीशु न ऊंतैं जबाब देई, “मि तुमतै बतै देन्दु कि अगर जु यू चुप ह्‍वे जाला, त ढुंगा चिलाण लगि जाला।”</verse>
				<verse number="41">अर जब यीशु यरूशलेम नगर का नजदीक पौंछी, त वे नगर तैं देखि के उ रुंण लगि गै।</verse>
				<verse number="42">अर वेन बोलि, “कास, आज का दिन पर अगर तू यू समझि जान्दी कि त्वेतै शान्ति कै बटि मिलण, मगर देख अब त यू सब बात तेरी आंख्यों बटि छिपी छिन।</verse>
				<verse number="43">किलैकि वु दिन औण वळा छिन, जब तेरा दुसमन नगर का चौतरफि नाकाबन्दी कैरी द्‍याला, तब तुमरो नगर बटि बैर-भितर औण-जाण बन्द ह्‍वे जालु।</verse>
				<verse number="44">अर वु तुमरा द्‍वारा करीं चिणैं तैं ढोळि द्‍याला, इख तक की वु त्वेतै अर त्वेमा रौण वळा बाल-बच्‍चों को भि नास कैरी द्‍याला, अर तुमरो छत्यनास ह्‍वे जालु। किलैकि तिन वे मौका तैं नि पछ्याणी जब त्वे पर किरपा करै गै।”</verse>
				<verse number="45">तब यीशु यरूशलेम मन्दिर मा जैके व्यापार करण वळो तैं इन बोलि के भैर निकळण लगि गै कि, “पवित्रशास्‍त्र मा इन लिख्यूं च कि, परमेस्वर बुल्दु,</verse>
				<verse number="46">“‘मेरु घौर प्रार्थना को घौर होलु, पर तुमुन येतैं डकैतों को उड़्यार बणैयालि।’”</verse>
				<verse number="47">अर यीशु हर दिन मन्दिर मा उपदेस देणु रै, पर मुख्य पुरोहित, शास्‍त्री अर कुछ खास लोग वेतैं जान से मरणे की फिराक मा लग्यां छा।</verse>
				<verse number="48">मगर ऊंकी समझ मा नि ऐ कि यू काम कनकै करै जौ, किलैकि सब लोग यीशु की बातों तैं ध्यान से सुणदा छा।</verse>
			</chapter>
			<chapter number="20">
				<verse number="1">अर एक बार इन ह्‍वे कि यीशु लोगु तैं मन्दिर मा उपदेस देण का दगड़ा-दगड़ि शुभ समाचार भि सुनाणु छौ। तबरि तक उख कुछ मुख्य पुरोहित, शास्‍त्री अर कुछ यहूदी अध्यक्ष लोग ऐ गैनी। अर ऊंन बोलि कि,</verse>
				<verse number="2">“हमतै इन बता कि तुम कै का दियां अधिकार से यू काम करद्‍यां? अर कु च उ जैन तुमतै यू अधिकार देई?”</verse>
				<verse number="3">तब वेन ऊंतैं जबाब दिनी, “चला, मि भि तुम बटि एक बात पूछदु मितैं इन बतावा कि,</verse>
				<verse number="4">यूहन्‍ना तैं बपतिस्मा देण को अधिकार परमेस्वर न दे छौ, या यू अधिकार वेतैं लोगु न दे छौ?”</verse>
				<verse number="5">तब ऊ आपस मा बुलण लगि गैनी, “अगर जु हम बुल्द्‍यां कि, ‘वेतैं यू अधिकार परमेस्वर बटि मिल्यूं छौ,’ त फिर येन बोन्‍न कि ‘तुमुन वे पर बिस्वास किलै नि कैरी?’</verse>
				<verse number="6">अर अगर जु हम इन बुलला कि, ‘वेतैं यू अधिकार मनखियों की तरफा बटि मिल्यूं छौ,’ त सब लोगु न हमतै ढुंग्योण च। किलैकि लोगु तैं यकीन छौ कि यूहन्‍ना बपतिस्मा देण वळु एक रैबर्या च।”</verse>
				<verse number="7">इलै ऊंन जबाब देई, “हम नि जणद्‍यां की यू अधिकार वेतैं कख बटि मिली।”</verse>
				<verse number="8">तब यीशु न ऊंकू बोलि, “त मिन भि तुमतै नि बतौण की मि यू सब काम कै का दियां अधिकार से करदु।”</verse>
				<verse number="9">तब यीशु न लोगु तैं एक उदारण सुणै अर बोलि कि, “एक बार एक मनखि न अंगूरों को बगिचा बणै, अर भौत दिनों खुणि परदेस मा जाण से पैलि वेन ये बगिचो को ठेक्‍का किसानों तैं दे दिनी।</verse>
				<verse number="10">अर जब अंगूरों तैं गड़णो को बगत ऐ, त वे मनखि न अपणा एक नौकर तैं ऊं किसानों का पास भेजि, ताकि ऊ लोग अंगूरों को कुछ हिस्सा वेतैं दे द्‍या। मगर किसानों न वे नौकर तैं मारी-पीटि के खालि हाथ वापिस भेजि दिनी।</verse>
				<verse number="11">तब वे मनखि न एक और नौकर तैं भेजि, अर ऊंन येतैं मारी-पीटि अर येकी बेजती कैरी अर येतैं भि खालि हाथ वापिस भेजि दिनी।</verse>
				<verse number="12">तब वेन तिसरा तैं भेजि, अर ऊंन येतैं भि अधमरो कैरिके भैर ढोळि दिनी।</verse>
				<verse number="13">तब वे बगिचा का मालिक न बोलि, ‘मि क्या जि कैरुं? अब मिन अपणु लाडलु नौनु भेजण, क्या पता वु वेको आदर-सम्मान कैरा।’</verse>
				<verse number="14">अर जब ऊं किसानों न मालिक का नौना तैं देखि त आपस मा बुलण लगि गैनी, ‘अरे, यू त वारिस च। ऐ जा, हम येतैं मारी देन्द्‍यां ताकि यू सब कुछ हमरु ह्‍वे जौ।’</verse>
				<verse number="15">इलै ऊंन वेतैं अंगूरों का बगिचा बटि भैर निकाळि अर वेतैं जान से मारी दिनी। त अब इन बता कि जब बगिचा को मालिक आलु, त ऊंका दगड़ा क्या जि करलु?</verse>
				<verse number="16">मि तुमतै बतै देन्दु कि, उ ऐके ऊं किसानों को नास कैरी द्‍यालु, अर अंगूरों को बगिचा दुसरो मा सौंपी द्‍यालु।” अर यू सुणी के ऊंन बोलि, “परमेस्वर नि कैरो कि इन हो”</verse>
				<verse number="17">तब यीशु न ऊंकी तरफा देखि के बोलि, “त फिर बता कि पवित्रशास्‍त्र मा इन किलै लिख्यूं कि, “‘जै ढुंगा तैं मिस्‍त्रियों न फुंन ढोळि छौ, उई कुणों को खास ढुंगो बणि गै।’</verse>
				<verse number="18">“अर जु कुई भि वे ढुंगा पर लमड़लु वेका टुकड़ा-टुकड़ा ह्‍वे जाला, अर जै पर उ पोड़लु वेतैं त उ पीसी द्‍यालु।”</verse>
				<verse number="19">अर शास्‍त्री अर मुख्य पुरोहित समझि गैनी, कि वेन यू उदारण हम खुणि बोलि, इलै वु यीशु तैं वे बगत ही पकड़ण चाणा छा, मगर ऊंतैं लोगु की डौऽर लगि।</verse>
				<verse number="20">इलै वु वेकी ताक मा लग्यां रैनी, इख तक की ऊंन जासूसों तैं भि भेजि कि वु धरमी मनखियों का जन बणि के वेकी कै बात तैं पकड़ा, ताकि तब वु वेकी वीं बात पर दोष लगै के वेतैं रोमी गवर्नर मा सौंपी सैका।</verse>
				<verse number="21">तब जासूसों न यीशु कू बोलि, “गुरुजी, हम जणदा छां कि तुम बिल्कुल सही बुल्द्‍यां अर सिखौन्द्‍यां। अर ना ही कै का दगड़ा मा पक्षपात करद्‍यां, पर सच्‍चै से परमेस्वर का बाटा का बारा मा सिखौन्द्‍यां। पर हमतै एक बात बता कि,</verse>
				<verse number="22">क्या हमतै महाराजा तैं कर देण चयेणु, या नि देण चयेणु?”</verse>
				<verse number="23">पर यीशु ऊंकी चकड़ैति तैं समझि गै अर ऊंकू बोलि,</verse>
				<verse number="24">“लाऽऽ मितैं एक दीनार दिखा, अर इन बता कि ये पर कै की छाप अर कै को नौ लिख्यूं च?” अर ऊंन बोलि “रोमी महाराज को।”</verse>
				<verse number="25">तब यीशु न ऊंकू बोलि, “त जु महाराजा को च उ महाराजा तैं द्‍या, अर जु परमेस्वर को च उ परमेस्वर तैं द्‍या।”</verse>
				<verse number="26">इलै वु ईं बात पर लोगु का समणि वेतैं पकड़ी नि सकिनी, बल्किन मा वेका जबाब तैं सुणी के हकदक रै गैनी।</verse>
				<verse number="27">अर येका बाद सदूकी लोग जु कि इन मणदिन कि मुरयां लोग फिर से ज्यून्दा नि ह्‍वे सकदिन, अर कुछ लोग यीशु का पास ऐनी अर वेकू बोलि कि,</verse>
				<verse number="28">“गुरुजी, मूसा रैबर्या का दियां नियम-कानूनों मा लिख्यूं च कि, ‘अगर कै मनखि को भै मोरि जौ अर ऊंकी कुई औलाद नि हो, त वेकू भै अपणा भै कि घरवळी का दगड़ा मा ब्यौ कैरिके अपणा भै को वंश अगनै बढ़ो।’</verse>
				<verse number="29">त सुणा गुरुजी, एक बार सात भै छा अर जब पैला भै को ब्यौ ह्‍वे त बिना औलाद को सुख दिख्यां ही उ मोरि गै।</verse>
				<verse number="30">तब दुसरा न अपणा भै कि घरवळी का दगड़ा मा ब्यौ कैरी मगर उ भि बिना औलाद को सुख दिख्यां ही मोरि गै,</verse>
				<verse number="31">अर फिर तिसर न भि वीं जनानि का दगड़ा मा ब्यौ कैरी, अर उ भि बिना औलाद को सुख दिख्यां ही मोरि गै। अर सातों का दगड़ा इन्‍नि ह्‍वे।</verse>
				<verse number="32">अर आखिरी मा वा जनानि भि मोरि गै,</verse>
				<verse number="33">त अब हमतै इन बतौ कि जै दिन लोगु तैं मुरदो मा बटि ज्यून्द किये जालु वे दिन पर वा कै की घरवळी होलि? किलैकि वा सातों की घरवळी ह्‍वे गै छै।”</verse>
				<verse number="34">अर यीशु न ऊंकू बोलि, “ईं दुनियां का लोग ब्यौ करदिन, अर ब्यौ करणु कू एक-दुसरा खुणि दिये जनदिन।</verse>
				<verse number="35">पर जु लोग परमेस्वर की औलाद छिन, वु लोग वे जमना खुणि मौत मा बटि ज्यून्द होण का लैख अर जीवन तैं पौण का लैख छिन। अर फिर वु कभि नि मुरला, किलैकि उख वु स्वर्गदूतों की तरौं होला, वु ना त उख ब्यौ करला अर ना ही वु ब्यौ करणु खुणि दिये जाला। अर फिर वु परमेस्वर की औलाद होला, किलैकि वु मौत मा बटि ज्यून्दा ह्‍वे जाला।</verse>
				<verse number="36"></verse>
				<verse number="37">इख तक कि मूसा न भि साफ-साफ बतै दिनी, कि मुरदो तैं भि ज्यून्दु किये जान्दु। अर वेन जगदी झाड़ि का बारा मा लिखी कि, “प्रभु भि इन बुल्दु कि, ‘मि अब्राहम को परमेस्वर, इसहाक को परमेस्वर अर याकूब को परमेस्वर छौं।’</verse>
				<verse number="38">अर परमेस्वर मुरदो को ना, पर ज्यून्दो को परमेस्वर च, किलैकि जु वेका छिन ऊ सब लोग वे खुणि ज्यून्दा छिन।”</verse>
				<verse number="39">अर यू सुणी के शास्‍त्रियों मा बटि कुछ लोगु न बोलि, “गुरुजी, तुमुन ठिक बोलि।”</verse>
				<verse number="40">अर येका बाद ऊं लोगु की हिम्मत नि ह्‍वे कि वे बटि कुछ भि पूछा।</verse>
				<verse number="41">तब यीशु न ऊं लोगु कू बोलि कि, “लोग बुल्दिन कि मसीह राजा दाऊद को नौनु च अब इन बता कि इन कनकै ह्‍वे सकदु?</verse>
				<verse number="42">जब की दाऊद अफि भजन संहिता की किताब मा बुल्दु कि, “परमेस्वर न मेरा प्रभु बटि बोलि,</verse>
				<verse number="43">‘मेरी दैंणी तरफा बैठ, जबरि तक कि मि तेरा दुसमनों तैं, हरै के तेरा अधीन नि कैरी द्‍यूं।’”</verse>
				<verse number="44">“अर जब राजा दाऊद ही मसीह कू ‘प्रभु’ बुल्दु, त फिर उ वेको नौनु कनकै ह्‍वे सकदु?”</verse>
				<verse number="45">अर जब सब लोग यू सुनणा छा, त वेन अपणा चेलों कू बोलि,</verse>
				<verse number="46">“शास्‍त्रियों बटि बचि के रयां, किलैकि यों तैं लम्बा-लम्बा चोळा पैरि के घूमण अच्छु लगदु, अर बजारों मा लोगु द्‍वारा नमस्कार सुनण भि यों तैं अच्छु लगदु। अर उन्‍नि यों तैं प्रार्थना भवनों मा मुख्य जगा अर दावत का बगत मा आदर-सम्मान वळी जगा चयेन्दी।</verse>
				<verse number="47">मगर मि तुमतै बतै देन्दु, कि यू विधवाओं का घौर पर कब्जा कैरी देन्दिन, अर लोगु तैं दिखाणु खुणि भौत देर तक प्रार्थना कना रौनदिन। पर यों तैं भौत कड़क सजा मिलण।”</verse>
			</chapter>
			<chapter number="21">
				<verse number="1">अर जब यीशु मन्दिर मा छौ, त वेन सेठ लोगु तैं दान-पेटि मा अपणी-अपणी तरफा बटि दान डलण देखि।</verse>
				<verse number="2">अर वेन एक गरीब विधवा तैं भि दान-पेटि मा दुई सिक्‍का डलण देखि, जौं की कीमत भौत कम छै।</verse>
				<verse number="3">अर यू देखि यीशु न बोलि, “मि तुम बटि सच्‍चि बोन्‍नु छौं, कि सब लोगु मा बटि सबसे जादा डलण वळी या विधवा ही च।</verse>
				<verse number="4">किलैकि यों सभ्यों न त अपणी भरपूरी मा बटि ही दान डालि, मगर अपणी गरीबी की हालत मा जु कुछ भि ईं मा छौ ईं न वु सब कुछ डालियेली।”</verse>
				<verse number="5">अर उख कुछ लोग मन्दिर का बारा मा बात कना छा, कि उ कन सुन्दर ढुंगोळ अर दान की चीजों से सज्युं च।</verse>
				<verse number="6">तब यीशु न बोलि, “जौं चीजों तैं तुम आज दिखणा छाँ एक दिन आलु, जब ये मन्दिर को एक ढुंगो भि अपणी जगा पर नि रालु, किलैकि वु सब ढुळै जाला।”</verse>
				<verse number="7">अर लोगु न वे बटि पूछी, “गुरुजी, यू सब कब होलु? अर जब यू सब होलु, त वे बगत का क्या जि चिन्‍न होला?”</verse>
				<verse number="8">तब यीशु न ऊंकू बोलि, “जब तुम लड़ै अर दंगों का बारा मा सुणिल्या, त घबरै नि जयां, किलैकि यों सब बातों को पैलि होण जरुरी च। पर वे बगत भि अन्त तुरन्त नि आलु, अर भौत सरा लोग मेरा नौ से आला अर बुलला कि, ‘मि उई छौं,’ अर इन भि बुलला कि उ ‘बगत नजदीक ऐ गै।’ पर मि तुमतै बतै देन्दु कि, तुम कै का पिछनै नि जयां, इलै चौकस रा कखि कुई तुमतै भरमै नि द्‍यो।”</verse>
				<verse number="9"></verse>
				<verse number="10">अर वेन ऊंकू इन भि बोलि, “एक देस दुसरा देस पर अर एक राज्य दुसरा राज्य पर हम्‍ला करलु।</verse>
				<verse number="11">तब बड़ा-बड़ा भ्वींचळा होला, अर जग-जगा बन्‍नि-बन्‍नि किसमे की बिमारि आली अर अकाळ भि पोड़ला। अर इख तक की आसमान मा भि बड़ा-बड़ा अर खतरनाक चिन्‍न दिख्याला।</verse>
				<verse number="12">अर यू सब होण से पैलि लोग तुमतै सताला अर पकड़वै द्‍याला, अर तुमतै प्रार्थना भवन का लोगु का सुपुर्द कैरी द्‍याला। इख तक की वु तुमतै राजाओं अर सासन करण वळो का समणि लि जाला, अर जेलखाना मा भि डलवै द्‍याला। अर यू सब वु मेरा नौ की वजै से तुमरा दगड़ा मा करला।</verse>
				<verse number="13">पर मि तुमतै बतै देन्दु कि, यू वु अवसर होलु जब तुम मेरा बारा मा गवै दिल्या।</verse>
				<verse number="14">इलै अपणा-अपणा मन मा इन ठाणि द्‍या, कि हमुन पैलि बटि कुई चिन्ता नि करण कि क्या जि बोन्‍न,</verse>
				<verse number="15">किलैकि मि तुमतै इन्दरि अकल अर बुलणु खुणि इन शब्द द्‍यूलु, कि तुमरा सब बैरी तुमरि बातों को मुकाबला नि कैरी सकला, अर ना ही तुमरि बात को विरोध कैरी सकला।</verse>
				<verse number="16">अर तुमरा ब्वे-बाब अर भै-बन्द, अर तुमरा रिश्तेदार अर दगड़्या ही तुमतै पकड़वाला, इख तक की वु तुम मा बटि कुछ लोगु तैं जान से मरवै द्‍याला।</verse>
				<verse number="17">अर सब लोग तुम बटि नफरत करला, किलैकि तुम मेरा छाँ।</verse>
				<verse number="18">पर कुई भि तुमरो कुछ नि बिगाड़ि सकलु।</verse>
				<verse number="19">अर तुमरो सबर रखण की ताकत ही तुमरा जीवन तैं बचालि।</verse>
				<verse number="20">“जब तुम यरूशलेम नगर तैं फौजीयों बटि घेरयुं दिखल्या, त इन समझि जयां कि यरूशलेम नगर को खण्डर होण को बगत ऐ गै।</verse>
				<verse number="21">तब जु यहूदिया मुलक मा हो वु पाड़ो जनै भागी जौ, अर जु कुई यरूशलेम नगर मा हो, त उ नगर बटि भैर निकळि जौ, अर जु कुई गौं मा हो, त उ नगर मा नि जौ।</verse>
				<verse number="22">किलैकि उ बदला लेण का दिन होला, ताकि जु बात पवित्रशास्‍त्र मा लिखीं छिन वु पूरि ह्‍वे जौ।</verse>
				<verse number="23">अर ऊं दिनों मा जु गरवति होलि या जु दूद पिलाणि होलि, ऊं जनानियों खुणि बड़ु दुख च, किलैकि देस कि हालत भौत बेकार होलि। अर ऊं दिनों मा परमेस्वर को बड़ु परकोप लोगु पर पोड़लु।</verse>
				<verse number="24">अर वु लोग तलवार से मरे जाला, अर कैदी बणै के सब देसों मा भेजि जाला। अर जबरि तक ऊंको बगत पूरि नि ह्‍वे जौ जु कि यहूदी जाति का नि छिन, तबरि तक यरूशलेम नगर इन्द्रया लोगु का द्‍वारा बुरी तरौं से सतयै जाला।</verse>
				<verse number="25">“अर तुमतै सूरज, चाँद अर गैंणो मा चिन्‍न दिख्याला, अर धरती पर देस-देस का लोगु पर संकट आलु, इख तक की वु समुन्दर की लैरों की आवाजळ भि घबरै जाला।</verse>
				<verse number="26">अर आसमान की सब शक्‍तियाँ इनै-उनै ह्‍वे जालि, अर लोग डौऽर अर दुनियां मा औण वळा संकट का बानो जैकी कैन भि उम्मीद नि कैरी होलि उ ऐ जालु, तब लोगु का ज्यू मा ज्यू नि रालु।</verse>
				<verse number="27">तब वु लोग मनखि का पुत्र तैं बादळु मा अपणी बड़ी ताकत अर बड़ा आदर-सम्मान का साथ मा औन्द दिखला।</verse>
				<verse number="28">अर जब इन होण लगि जालु, त तुम गर्व से खड़ा ह्‍वे जयां, किलैकि तुमरो छुटकारु को बगत नजदीक ऐ गै।”</verse>
				<verse number="29">तब यीशु न ऊं लोगु तैं एक उदारण सुणै, “तिमला का डाळा तैं अर ठिक उन्‍नि दुसरा डाळों तैं भि देखा।</verse>
				<verse number="30">अर जब ऊं पर कुंगळा पत्ता निकळण शुरु ह्‍वे जनदिन, त तुमतै पता लगि जान्दु कि रुड़्यूं का दिन नजदीक ऐ गैनी।</verse>
				<verse number="31">अर ठिक इन्‍नि जब तुम यों बातों तैं होन्द दिखल्या त समझि जयां कि परमेस्वर को राज नजदीक ऐ गै।</verse>
				<verse number="32">अर मि तुम बटि सच्‍च बोन्‍नु छौं कि जब तक यू सब बात पूरि नि ह्‍वे जालि तब तक ईं पीढ़ी को अन्त नि होलु।</verse>
				<verse number="33">“आसमान अर धरती को नास ह्‍वे जालु, मगर मेरी बुलिं बात कभि नि टळळि।</verse>
				<verse number="34">इलै चौकस रा, कखि तुम भि दुनियां का भोग-बिलास मा, दरोळया होण मा, अर जीवन की चिन्ता-फिकर कैरिके अपणा मन तैं यों बातों का भार से दबै नि द्‍या। अर वु दिन एक जाल की तरौं तुम पर अचानक से ऐ जालु।</verse>
				<verse number="35">किलैकि पूरि दुनियां मा रौण वळो पर वु दिन इन्‍नि आलु।</verse>
				<verse number="36">इलै हर बगत चौकस रा अर प्रार्थना कना रा, ताकि जु बात होण वळी छिन तुम ऊं सब बातों से बचि सैका। अर मनखि का पुत्र का समणि खड़ु होण का लैख बणि सैका।”</verse>
				<verse number="37">अर यीशु दिन का बगत पर मन्दिर मा उपदेस देन्दु छौ, अर राति का बगत उ नगर का भैर जैतून नौ का पाड़ पर चलि जान्दु छौ।</verse>
				<verse number="38">अर सुबेर होन्दी सब लोग यीशु का उपदेस तैं सुनणु खुणि मन्दिर मा ऐ जान्दा छा।</verse>
			</chapter>
			<chapter number="22">
				<verse number="1">अर अखमीरी रुट्‍टी को त्योवार जैकू फसह को त्योवार भि बुल्दिन, उ औण वळु छौ।</verse>
				<verse number="2">अर मुख्य पुरोहित अर शास्‍त्री, यीशु तैं अपणा बाटा बटि साफ करण चाणा छा, मगर ऊ लोगु बटि डऽरदा छा।</verse>
				<verse number="3">अर यीशु का बारह चेलों मा बटि यहूदा एक छौ, जैकू इस्करियोती भि बुल्दिन। अर तब शैतान यहूदा इस्करियोती मा समै गै।</verse>
				<verse number="4">अर यहूदा मुख्य पुरोहितों अर मन्दिर का अधिकारीयों का पास इन बात-चित करणु कू गै, कि उ यीशु तैं कनकै ऊंका हवाला करालु।</verse>
				<verse number="5">अर या बात सुणी के वु लोग भौत आनन्दित ह्‍वेनि, अर वु वेतैं रुपया देणु खुणि राजी ह्‍वे गैनी।</verse>
				<verse number="6">तब उ भि राजी ह्‍वे गै। अर वे ही बगत बटि उ इन मौका खुज्याण लगि गै, कि जब यीशु का दगड़ा मा भीड़ नि होलि, त वेन वेतैं पकड़वाण।</verse>
				<verse number="7">अर जब अखमीरी रुट्‍टी को त्योवार को दिन ऐ, अर वे बगत पर फसह का मेम्‍ना तैं बलि किये जाण जरुरी छौ।</verse>
				<verse number="8">तब यीशु न पतरस अर यूहन्‍ना तैं इन बोलि के भेजि, “जा, अर हम खुणि फसह को खाणु तयार कैरा।”</verse>
				<verse number="9">अर ऊंन वे बटि पूछी, “गुरुजी, तुम कख चन्द्‍यां, कि हम त्योवार का खाण की तयारी कैरा।”</verse>
				<verse number="10">अर वेन ऊंकू बोलि, “सुणा, जब तुम नगर मा जैल्या त तुमतै एक मनखि पाणि भाँडु लि जान्द दिख्यालु त तुम वेका पिछनै-पिछनै जयां, अर जै घौर मा उ जालु वे घौर मा तुम भि जयां,</verse>
				<verse number="11">अर वे घौर का मालिक कू इन बुलयां कि, ‘गुरुजी को बुलयूं च कि मैमानों को वु कमरा कख च, जख मि अर मेरा चेला मेरा दगड़ा मा खाणु खाला?’</verse>
				<verse number="12">तब उ मनखि तुमतै मंज्यूळ लि जालु, अर तयार कर्युं एक बड़ु कमरा दिखालु। अर तुम खाण की तयारी उखि कर्यां।”</verse>
				<verse number="13">अर ऊ दुईया का दुई गैनी, अर जन यीशु न ऊंतैं बतै छौ ऊंन उन्‍नि पै, तब ऊं दुईयों न फसह की तयारी कैरी।</verse>
				<verse number="14">अर जब फसह का खाणुक तैं खाण को बगत ऐ, त यीशु अपणा खास चेलों का दगड़ा मा खाणुक खाणु कू बैठि।</verse>
				<verse number="15">अर यीशु न ऊंकू बोलि, मेरी बड़ी इच्छा छै कि दुख भोगण से पैलि तुमरा दगड़ा मा फसह को खाणु खौऽ।</verse>
				<verse number="16">मि तुम बटि बोन्‍नु छौं, जबरि तक परमेस्वर का राज मा ये खाणुक को मतलब पूरु नि ह्‍वे जौ, तबरि तक मि येतैं नि खौलु।</verse>
				<verse number="17">अर तब वेन एक कटोरा उठे अर परमेस्वर को धन्यवाद देई अर ऊंकू बोलि, “ल्या अर येतैं आपस मा बांटि के प्या।</verse>
				<verse number="18">किलैकि मि तुम बटि बोन्‍नु छौं, आज बटि लेके वे बगत तक जब तक की परमेस्वर को राज ऐ नि जौ, तब तक मिन यू अंगूरों को रस नि पीण।”</verse>
				<verse number="19">अर फिर वेन रुट्‍टी उठे अर परमेस्वर को धन्यवाद कैरी। अर रुट्‍टी का टुकड़ा कैरिके ऊंतैं देई अर बोलि, “यू मेरु बदन च, जु मि तुमरा बानो देन्दु छौं मितैं याद करणु खुणि इन्‍नि कना रयां।”</verse>
				<verse number="20">अर जब ऊंन खै दिनी। तब वेन उन्‍नि कटोरा उठे अर बोलि, “यू कटोरा मेरा ल्वे द्‍वारा बणयूं नयू करार च, जु तुम लोगु खुणि बुगये जान्दु।</verse>
				<verse number="21">पर सुणा, जैन मितैं पकड़वाण उ भि हमरा दगड़ा ये कटोरा मा सामिल च।</verse>
				<verse number="22">किलैकि मनखि का पुत्र खुणि जन ठैर्युं च, उन्‍नि वेका दगड़ा मा होलु, मगर हाय च वे मनखि पर जैन वेतैं पकड़वाण।”</verse>
				<verse number="23">तब वु सब आपस मा पूछताछ करण लगि गैनी हम मा बटि कु ह्‍वे सकदु, जु इन काम करलु।</verse>
				<verse number="24">अर चेला ईं बात पर बहस करण लगि गैनी, कि हम मा बटि सबसे खास कु च।</verse>
				<verse number="25">पर यीशु न ऊंकू बोलि, “दुनियां का राजा अपणा-अपणा राज्यों पर राज करदिन अर अधिकार रखदिन, अर वु चनदिन की लोग ऊं खुणि भलै करण वळा बोला।</verse>
				<verse number="26">पर तुम इन नि होयां, बल्किन मा तुम मा बटि जु सबसे बड़ु च उ सबसे छुटो बणौ, अर जु मुखिया च उ नौकर की तरौं बणौ।</verse>
				<verse number="27">अब इन बता कि, बड़ु कु च, क्या उ जु खाणु कू बैठयूं च या उ जु बंटदु च? हाँ, खाणुक खाण वळु बड़ु च। पर मि त तुमरा बीच मा एक सेवक की तरौं छौं।</verse>
				<verse number="28">“अर तुम ही छा जु मेरी अजमैसों का बगत मा मेरा दगड़ा रयां।</verse>
				<verse number="29">अर जन मेरा पिता न मितैं एक राज्य दियूं, तन्‍नि मि भि तुमतै एक राज्य देन्दु छौं,</verse>
				<verse number="30">ताकि तुम मेरा राज्य मा मेरा भोज तैं खा-प्या, अर राजगद्‍दियों पर बैठि के इस्राएल का बारह गोत्रों को न्याय कैरा।”</verse>
				<verse number="31">तब यीशु न शमौन पतरस कू बोलि, “शमौन, देख, शैतान न तुम लोगु तैं ग्यूँ की तरौं फटकूंणु खुणि मांगियालि।</verse>
				<verse number="32">पर मिन त्वे खुणि बिन्ती कैरियाली कि तेरु बिस्वास खतम नि हो, अर जब त्वेतै चेत आली, तब तू अपणा भैयों का बिस्वास तैं मजबूत करली।”</verse>
				<verse number="33">तब पतरस न वेकू बोलि, “प्रभु, मि त तुमरा दगड़ा जेलखाना जाणु खुणि, इख तक की मुरणु खुणि भि तयार छौं।”</verse>
				<verse number="34">यीशु न वेकू बोलि, “पतरस, मि त्वेतै बतै देन्दु, कि मैर का बसण से पैलि तिन मितैं तीन दौं नकारी देण, कि मि वेतैं नि जणदु।”</verse>
				<verse number="35">फिर यीशु न चेलों कू बोलि, “जब मिन तुमतै परचार करणु खुणि बिन बटुवा, बिन झोळा अर बिन दुई जोड़ी जुता का बगैर भेजि छौ, त क्या तुमतै कैं भि चीज की कमी ह्‍वे?” तब ऊंन बोलि, “गुरुजी ना।”</verse>
				<verse number="36">तब वेन ऊंकू बोलि, “पर अब जैमा बटुवा च उ वेतैं ले ल्यो अर उन्‍नि झोळा भि रखा, अर जैमा तलवार नि हो त उ अपणा कपड़ा बेचि के एक ले ल्यो।</verse>
				<verse number="37">अर यू मि तुम मा इलै बोन्‍नु छौं, किलैकि यू जरुरी च कि पवित्रशास्‍त्र की वा बात पूरि हो, ज्वा की मेरा बारा मा लिखीं च, “‘उ अपराधियों का दगड़ा मा गिणै जालु।’ “हाँ, मेरा बारा मा लिखीं या बात पूरि होण वळी च।”</verse>
				<verse number="38">अर ऊंन वेकू बोलि, “हे प्रभु देखा, इख दुई तलवार छिन,” वेन ऊंकू बोलि, “अरे भौत छिन।”</verse>
				<verse number="39">अर यीशु भैर निकळि अर हमेसा की तरौं जैतून नौ का पाड़ पर चलि गै। अर वेका चेला भि वेका पिछनै-पिछनै गैनी।</verse>
				<verse number="40">अर जब उ वीं जगा पौंछी गैनी, तब यीशु न बोलि “प्रार्थना कैरा ताकि शैतान तुमतै नि भकलौ।”</verse>
				<verse number="41">तब यीशु कुछ दूर गै अर घुंडा टेकी के प्रार्थना करण लगि गै,</verse>
				<verse number="42">“हे पिता, अगर जु तुमरि मरजी हो, त दुख का ये बगत तैं मेरा समणि बटि हटै द्‍या, पर फिर भि मेरी इच्छा ना, बल्किन मा तुमरि मरजी पूरि हो।”</verse>
				<verse number="43">तब स्वर्ग बटि एक स्वर्गदूत वेका पास ऐ जैन वेकी हिम्मत बढै।</verse>
				<verse number="44">अर उ और भि जादा बेचेन अर उचाट ह्‍वेके और भि जादा प्रार्थना करण लगि गै। अर वेकू पसीना ल्वे की बड़ी-बड़ी बुन्दौं की तरौं भ्वीं मा पोड़णु रै।</verse>
				<verse number="45">तब उ प्रार्थना कैरिके उठी अर अपणा चेलों का पास गै, अर वेन ऊंतैं सियूं देखि। किलैकि चेला दुख की वजै से पस्त ह्‍वे गै छा।</verse>
				<verse number="46">अर वेन ऊंकू बोलि, “अरे तुम सिणा किलै छाँ? उठा अर प्रार्थना कैरा, ताकि शैतान तुमतै नि भकलौ।”</verse>
				<verse number="47">अर जब यीशु या बात बोन्‍नु ही छौ तबरि एक भीड़ उख ऐ गै। अर तब यहूदा जु की बारह चेलों मदि एक छौ उ भीड़ का अगनै-अगनै औणु छौ अर उ यीशु का समणि ऐ, ताकि उ वेकी भूकि प्यों।</verse>
				<verse number="48">पर यीशु न वेकू बोलि, “हे यहूदा, क्या तू मनखि का पुत्र तैं भूकि पे के पकड़वौणी छैई?”</verse>
				<verse number="49">अर जब वु जाणि गैनी कि क्या बात होण वळी च, त यीशु का चेलों न बोलि, “हे प्रभु क्या हम तलवार चला?”</verse>
				<verse number="50">तबरि तक ऊंमा बटि एक चेला न महा पुरोहित का नौकर पर तलवार चलै के वेकू दैंणु कन्दूड़ उड़ै दिनी।</verse>
				<verse number="51">पर यीशु न बोलि, “हे इन नि कैर,” अर वेन नौकर का कन्दूड़ पर हाथ लगै के खूब कैरी दिनी।</verse>
				<verse number="52">तब यीशु न मुख्य पुरोहितों अर मन्दिर का पैरादारों अर अध्यक्षों कू बोलि, “क्या तुम मितैं डाकु समझद्‍यां, कि जु तुम तलवार अर लाठा लेके अयां छाँ?</verse>
				<verse number="53">जब मि मन्दिर मा हरेक दिन तुमरा दगड़ा छौ, तब तुमुन मितैं नि पकड़ी पर यू बगत तुमरो अर अन्धेरा का अधिकारी शैतान को च।”</verse>
				<verse number="54">अर ऊ लोग यीशु तैं पकड़ी के महा पुरोहित का घौर लि गैनी। अर पतरस काफी दूर रै के ऊंका पिछनै-पिछनै जाणु छौ,</verse>
				<verse number="55">अर लोग बीच चौक मा आग जलै के इकट्‍ठा बैठयां छा, अर तब पतरस भि ऊंका बीच मा ऐके बैठि गै।</verse>
				<verse number="56">अर एक नौकराणि न वेतैं आग का उज्याळा मा एक-टक ह्‍वेके देखि अर बोलि, “अरे यू मनखि भि त वेका दगड़ा मा छौ।”</verse>
				<verse number="57">पर वेन इन बोलि के नकारी दिनी कि, “भुलि, मि वे मनखि तैं नि जणदु।”</verse>
				<verse number="58">अर कुछ देर बाद एक हैंका मनखि न भि वेतैं देखि के बोलि, “तू भि त ऊंमा बटि ही एक छैई।” पर पतरस न बोलि, “ना, ना भैजी, मि नि छौं।”</verse>
				<verse number="59">फिर लगभग एक घन्टा का बाद एक और मनखि पक्‍की तरौं से बोन्‍न लगि गै, “पक्‍की बात च यू मनखि भि ऊंका दगड़ा मा छौ। किलैकि यू भि गलील मुलक को च।”</verse>
				<verse number="60">तब पतरस न बोलि, “अरे भैजी, क्या बोन्‍ना छाँ तुम इन्द्रयो को, मि त वेतैं जणदु ही नि छौं।” अर जब उ इन बोन्‍नु ही छौ, कि तबरि मैर बासी गै।</verse>
				<verse number="61">अर प्रभु न मुड़ि के पतरस जनै देखि। अर उबरि वेतैं प्रभु को वु वचन याद ऐ जु यीशु न वे बटि बोलि छौ, “आज मैर का बसण से पैलि तू तीन दौं मितैं नकारी दिली, कि मि वेतैं नि जणदु।”</verse>
				<verse number="62">अर तब उ उख बटि भैर ऐ, अर भकोरि-भकोरि के रुंण लगि गै।</verse>
				<verse number="63">अर वे बगत यीशु तैं जौं लोगु की निगराणी मा रख्युं छौ, वु लोग वेतैं मरण लगि गैनी। अर ऊंन वेको मजाक भि उड़ै,</verse>
				<verse number="64">इख तक की वु वेका आंख्यों तैं बुजी कैरिके पूछण लगि गैनी कि, “अब पछ्याण अर हमतै इन बतौ की त्वेतै कैन मारी?”</verse>
				<verse number="65">अर ऊंन ज्या कुछ बोलि के यीशु को अपमान कैरी।</verse>
				<verse number="66">अर जब सुबेर ह्‍वे, त यहूदी अध्यक्ष लोगु की सभा बुलये गै, ज्यां मा मुख्य पुरोहित अर शास्‍त्री लोग भि अयां छा। तब यीशु की निगराणी करण वळा वेतैं न्याय समिति मा लेके गैनी अर समिति का लोगु न वे बटि पूछी,</verse>
				<verse number="67">“अगर जु तू उई मसीह छैई, जु कि औण वळु छौ त हमतै बतै दे।” मगर यीशु न ऊंकू बोलि, “अगर जु मि तुमतै बतै द्‍यूलु, त फिर भि तुमुन मि पर यकीन नि करण।</verse>
				<verse number="68">अर अगर जु मि तुम बटि कुछ पूछलु, त तुमुन मितैं जबाब नि देण।</verse>
				<verse number="69">पर सुणा, अब बटि मनखि को पुत्र ताकतबर परमेस्वर का दैंणी तरफा बैठयूं होलु।”</verse>
				<verse number="70">अर या बात सुणी के ऊं सभ्यों न बोलि, “त क्या तू परमेस्वर को पुत्र छैई?” यीशु न ऊंकू बोलि, “तुम खुद ही बोन्‍ना छाँ कि, मि छौं।”</verse>
				<verse number="71">तब ऊंन बोलि, “अब हमतै गवै की कुई भि जरुरत नि च? किलैकि हमुन खुद ही वेका गिच्‍चा बटि सुण्यालि।”</verse>
			</chapter>
			<chapter number="23">
				<verse number="1">तब सभा का सब लोग उठनि, अर यीशु तैं गवर्नर पिलातुस का पास लि गैनी।</verse>
				<verse number="2">अर उख पौंछी के वु लोग यीशु पर इळजाम लगै के बोन्‍न लगि गैनी कि, “यू आदिम हमरा लोगु तैं भरमौन्दु, अर इन भि बुल्दु कि महाराज तैं कर नि देण चयेणु। अर इन भि बुल्दु कि, ‘मि मसीह छौं अर मि एक राजा भि छौं।’”</verse>
				<verse number="3">तब पिलातुस न यीशु बटि पूछी, “क्या तू यहूदियों को राजा छैई?” वेन वेकू बोलि, “तुम अफि बोन्‍ना छाँ”</verse>
				<verse number="4">अर पिलातुस न मुख्य पुरोहितों अर ऊं लोगु कू बोलि, “मितैं नि लगदु कि यू मनखि दोषी च।”</verse>
				<verse number="5">पर वु और जादा जिद्‍द कैरिके बोन्‍न लगि गैनी कि, “अरे यू पूरा यहूदिया मुलक का लोगु तैं अपणा उपदेस का द्‍वारा भड़काणु च। अर येन यू काम गलील मुलक बटि शुरु कैरी छौ, अर अब यू यरूशलेम तक पौंछी गै।”</verse>
				<verse number="6">अर जब पिलातुस न या बात सुणी त पूछी, “क्या यू मनखि एक गलीली च?”</verse>
				<verse number="7">अर ऊं दिनों मा हेरोदेस अन्तिपास यरूशलेम नगर मा अयूं छौ, अर यू गलील मुलक पर सासन करण वळु छौ। अर जब पिलातुस तैं इन पता चलि गै, कि यीशु गलील मुलक को च त पिलातुस न यीशु तैं वेका पास भेजि दिनी।</verse>
				<verse number="8">अर हेरोदेस अन्तिपास यीशु तैं देखि के भौत खुश ह्‍वे गै, किलैकि वेको यीशु का बारा मा भौत कुछ सुणयूं छौ, इलै उ भौत दिनों बटि वेतैं दिखण चाणु छौ। अर उ इन उम्मीद रखदु छौ, कि यीशु वेतैं कुई चमत्कार दिखालु।</verse>
				<verse number="9">अर हेरोदेस अन्तिपास वे बटि भौत सरी बात पूछण लगि गै, पर वेन कुई जबाब नि देई।</verse>
				<verse number="10">अर मुख्य पुरोहितों न अर शास्‍त्रियों न उखि खड़ु रै के अपणु पूरु जोर लगै दिनी, ताकि वु वेतैं दोषी ठैरै सैका।</verse>
				<verse number="11">तब हेरोदेस अन्तिपास न भि अपणा सिपयों का दगड़ा मा यीशु को अपमान कैरिके वेको मजाक उड़ै, अर चटकिलु कपड़ा पैरै के वेतैं पिलातुस का पास वापिस भेजि दिनी।</verse>
				<verse number="12">वे दिन बटि ही पिलातुस अर हेरोदेस अन्तिपास दगड़्या बणि गैनी, किलैकि यां से पैलि ऊ एक-दुसरा का दुसमन छा।</verse>
				<verse number="13">तब पिलातुस न मुख्य पुरोहितों अर अधिकारीयों अर लोगु तैं बुलै अर बोलि कि,</verse>
				<verse number="14">“तुम लोग ये मनखि तैं मेरा पास इन बोलि के लयां कि यू लोगु तैं भरमौणु च। पर सुणा, मिन तुमरा समणि ये मनखि की जाँच-पड़ताल कैरी, अर जै अपराध को तुमुन ये पर दोष लगै छौ, उन्दरि कुई बात मितैं ये मा नि दिखै,</verse>
				<verse number="15">अर ना ही हेरोदेस अन्तिपास तैं कुई वजा मिली, इलै वेन भि येतैं हमरा पास वापिस भेजि दिनी। अर सुणा, येन इन कुई काम नि कैरी जु की येतैं मौत की सजा दिये जौ।</verse>
				<verse number="16">इलै मि येतैं पिटवै के छोड़ि देन्दु।”</verse>
				<verse number="17">[अर फसह का त्योवार की रीति का मुताबिक पिलातुस तैं एक मनखि तैं आजाद करण की वेकी मजबूरी छै।]</verse>
				<verse number="18">पर वु सब लोग चिल्‍लै के बुलण लगि गैनी, “ना येतैं जान से मारी द्‍या, अर हम खुणि बरअब्बा तैं छोड़ि द्‍या।”</verse>
				<verse number="19">अर बरअब्बा नौ को यू मनखि नगर मा हुड़दंग अर लोगु की हत्या करण की वजै से जेलखाना मा डळै गै छौ।</verse>
				<verse number="20">पर पिलातुस यीशु तैं छुड़ण चान्दु छौ, इलै वेन लोगु तैं फिर एक बार और समझै।</verse>
				<verse number="21">पर ऊ चिल्‍लै-चिल्‍लै के बोन्‍न लगि गैनी कि, “येतैं क्रूस पर चड़ै द्‍या, येतैं क्रूस पर चड़ै द्‍या।”</verse>
				<verse number="22">अर वेन तिसरी दौं ऊंकू बोलि, “किलै, येन इन्द्रयो क्या बुरु काम कैरी? अर मितैं येका कियां अपराध का खिलाप कुई भि सबूत नि मिली, जु कि मि येतैं मौत की सजा द्‍यूं। इलै मिन येतैं पिटवै के छोड़ि देण।”</verse>
				<verse number="23">पर लोग पिलातुस का समणि जोर-जोर से नारा लगै के इन मांग कना छा कि, “वेतैं क्रूस पर चड़ै द्‍या, वेतैं क्रूस पर चड़ै द्‍या।” अर लोगु को चिल्‍लाण इथगा जादा ह्‍वे कि,</verse>
				<verse number="24">पिलातुस न हुकम दिनी, “ऊंकी मांग पूरि कैरा।”</verse>
				<verse number="25">अर लोगु की मांग का मुताबिक पिलातुस न बरअब्बा तैं छोड़ि दिनी, अर यीशु तैं लोगु का हवाला कैरी दिनी। अर ये बरअब्बा तैं त हुड़दंग अर लोगु तैं जान से मरण की वजै से जेलखाना डळै गै छौ।</verse>
				<verse number="26">जब रोमी सिपै यीशु तैं लि जाणा छा। तब सिपयों न कुरेन का रौण वळा शमौन तैं जु की गौं बटि नगर कू औणु छौ पकड़ी, अर ऊंन वा क्रूस वेमा लादि दिनी, ताकि उ वेतैं यीशु का पिछनै-पिछनै लि जौ।</verse>
				<verse number="27">अर लोगु की एक बड़ी भीड़ यीशु का पिछनै-पिछनै जाणि छै, अर या मा कुछ जनानियां भि छै, जु कि यीशु का बाना छति भटगै-भटगै के रुंणी अर मातम मनौणि छै।</verse>
				<verse number="28">अर यीशु न ऊंकी जनै मुड़ि के बोलि, “यरूशलेम कि नौन्यों, मि खुणि नि रुवा, पर अफु खुणि अर अपणा बाल-बच्‍चों खुणि रुवा।</verse>
				<verse number="29">किलैकि सुणा, अब ऊ दिन औण वळा छिन जब लोग बुलला, ‘धन्य छिन वु जनानियां जु की बाँझ छिन, अर वु जनानियां जौन बच्‍चों तैं जनम नि देई, ऊ दूदि जौन दूद नि पिलै।’</verse>
				<verse number="30">अर वे बगत लोग पाड़ो कू बुलला कि, ‘हे पाड़ो हमतै अपणा मूड़ी दबै द्‍या,’ इख तक की वु ढौंडो कू बुलला कि, ‘हमतै अपणा मूड़ी दफनै द्‍या।’</verse>
				<verse number="31">“किलैकि जब लोग हरयां डाळा का दगड़ा मा इन कैरी सकदिन, त सुख्यां डाळा का दगड़ा मा क्या कुछ नि करला।”</verse>
				<verse number="32">अर यीशु का दगड़ा जान से मरणु खुणि दुई और अपराधियों तैं लेके गैनी।</verse>
				<verse number="33">अर जब ऊ सब खोपड़ि नौ की जगा पर पौंछिनी, त उख ऊंन यीशु अर ऊं दुई अपराधियों तैं क्रूस पर चड़ै, एक तैं यीशु का बैं तरफा अर दुसरा तैं दैंणी तरफा।</verse>
				<verse number="34">तब यीशु न बोलि, “मेरा पिता, यों तैं माफ कैरी द्‍या, किलैकि यों तैं पता नि च कि यू क्या कना छिन।” अर ऊं सिपयों न पांसा डालि के वेका कपड़ा आपस मा बांट दिनी।</verse>
				<verse number="35">अर लोग उखि खड़ा ह्‍वेके यू सब दिखणा छा। अर अधिकारी लोगु न भि वेको मजाक उड़ै के बोलि, “अरे, येन दुसरा लोगु तैं बचै, अगर जु यू परमेस्वर को चुण्यूं मसीह च त अब यू खुद तैं बचौ।”</verse>
				<verse number="36">अर सिपयों न भि वेको मजाक उड़ै। अर ऊंन यीशु का पास ऐके वेतैं अंगूरों को खट्‍टु रस देके बोलि,</verse>
				<verse number="37">“अगर जु तू यहूदियों को राजा छैई, त खुद तैं बचौ।”</verse>
				<verse number="38">अर यीशु की क्रूस का मथि एक पाटि पर वेका कियां अपराध तैं लिख्यूं छौ कि, “यू यहूदियों को राजा च।”</verse>
				<verse number="39">अर उख जु दुई अपराधि यीशु का दगड़ा क्रूस पर चड़ये गै छा, ऊंमा बटि एक न वेकी बेजती कैरिके बोलि, “अरे तू त मसीह छैई, त फिर अफ तैं अर हमतै बचौ।”</verse>
				<verse number="40">पर दुसरा अपराधि न वेतैं झिड़की के बोलि, “हे क्या तू परमेस्वर बटि भि नि डऽरदी? किलैकि त्वेतै भि उई दण्ड मिल्यूं च जु वेतैं मिल्यूं च।</verse>
				<verse number="41">अर हमुन जु काम करिनी वेका मुताबिक ठिक दण्ड पैके अब हम न्याय का मुताबिक ईं सजा तैं भुगतणा छां। पर येन त इन्द्रयो कुई भि बुरु काम नि कैरी छौ।”</verse>
				<verse number="42">तब वेन बोलि, “यीशु, जब तुम अपणा राज्य मा ऐल्या, त मितैं याद रख्यां।”</verse>
				<verse number="43">अर यीशु न वेकू बोलि, “मि त्वे बटि सच्‍च बोन्‍नु छौं, कि आज ही तू मेरा दगड़ा स्वर्ग मा होलि।”</verse>
				<verse number="44">अर वे बगत दुफरे की बारह बजणी छै, अर तब बटि लेके तीन बजी तक पूरा देस मा अन्धेरु होयुं रै।</verse>
				<verse number="45">अर सूरज को उज्याळु भि कम ह्‍वे गै, अर मन्दिर को परदा दुई हिस्सों मा फटी गै।</verse>
				<verse number="46">अर यीशु न ऊँची आवाज मा बोलि, “मेरा पिता, मि अपणी आत्मा तुमरा हाथ मा सौंपणु छौं।” अर इन बोलि के यीशु न पराण छोड़ दिनी।</verse>
				<verse number="47">अर यू सब देखि के रोमी सुबेदार न परमेस्वर की बडै कैरिके बोलि, “सच्‍चि मा यू धरमी मनखि छौ।”</verse>
				<verse number="48">अर उख जमा होईं भीड़ न जब यू सब होण देखि, त छति भटगै-भटगै के वापिस चलि गैनी।</verse>
				<verse number="49">अर यीशु की जाण-पछ्याण वळा अर जु जनानियां गलील मुलक बटि वेका पिछनै ऐ छै, यू सब दूर खड़ि ह्‍वेके दिखणी छै।</verse>
				<verse number="50">यूसुफ नौ को एक आदिम छौ, जु की यहूदिया मुलक का अरिमतिया नगर मा रौन्दु छौ। यू एक भलु अर धरमी मनखि छौ, अर परमेस्वर का राज को इंतजार कनु छौ, अर यू समिति को एक सदस्य भि छौ। अर उ यहूदी समिति का द्‍वारा यीशु का खिलाप बणईं जाळसाजि अर ऊंका यों कामों से यूसुफ खुश नि छौ।</verse>
				<verse number="51"></verse>
				<verse number="52">तब यूसुफ पिलातुस का पास गै, अर वे बटि यीशु की लांश मांगि।</verse>
				<verse number="53">तब वेन यीशु की लांश तैं क्रूस बटि उतरवै, अर मखमल का चदरा मा लपेटि के कबर मा रखी दिनी। अर या कबर एक चटान पर खुदवै के बणयीं छै, जैमा कैतैं अभि तक नि रखै गै छौ।</verse>
				<verse number="54">अर सब्त को बगत शुरु होण वळु छौ, अर यू बगत सब्त की तयारी को छौ।</verse>
				<verse number="55">अर जु जनानियां यीशु का दगड़ा गलील मुलक बटि अईं छै, वु भि यूसुफ का पिछनै-पिछनै गैनी। अर ऊंन वीं कबर तैं देखि अर इन भि देखि कि, यीशु की लांश कनकै रखी।</verse>
				<verse number="56">किलैकि ऊंतैं तयारी करण छै, इलै ऊंन वापिस लौटी के खुशबुदार चीजों अर खुशबुदार इतर तैं तयार कैरी। अर मूसा का दियां नियम-कानूनों की आज्ञा का मुताबिक ऊंन सब्त का दिन पर आराम कैरी।</verse>
			</chapter>
			<chapter number="24">
				<verse number="1">पर हप्‍ता का पैला दिन याने कि रात खुलण से पैलि वु जनानियां खुशबुदार चीजों तैं अपणा दगड़ा मा कबर पर लेके ऐनी, जौं की तयारी ऊंन पैलि बटि कैरिके रखी छै। अर यू वु जनानियां छै, जु यीशु की मौत का बगत उख छै।</verse>
				<verse number="2">अर जब यू सब उख पौंछिनी त ऊंन कबर का मुख पर रख्यां डांग तैं हटयुं देखि।</verse>
				<verse number="3">अर जब वु भितर गैनी, त ऊंतैं प्रभु यीशु की लांश नि मिली।</verse>
				<verse number="4">अर यू देखि के वु बड़ी उळझण मा पोड़ि गैनी, कि तबरि दुई मनखि ऊंका समणि ऐके खड़ा ह्‍वे गैनी, अर ऊंका चमकिला कपड़ा पैरयां छा।</verse>
				<verse number="5">अर ऊंतैं देखि के जनानियों न अपणु मुख मूड़ी झुकै दिनी, किलैकि वु डौऽरी गै छा। तब ऊं दुई मनखियों न ऊंकू बोलि, “तुम लोग ज्यून्दा मनखि तैं मुरयां लोगु मा किलै खुज्याणा छाँ?</verse>
				<verse number="6">उ इख नि च पर मुरदो मा बटि ज्यून्दु ह्‍वे गै। अर जब उ गलील मुलक मा छौ, त वेन तुमतै बतै छौ, क्या उ तुमतै याद नि च?</verse>
				<verse number="7">ऊंन बोलि छौ कि, ‘यू जरुरी च कि मनखि को पुत्र पापि लोगु का हाथ मा पकड़वै जौ, ताकि ऊ वेतैं क्रूस पर चड़ै द्‍या। अर फिर उ तिसरा दिन मुरदो मा बटि ज्यून्दु ह्‍वे जौ।’”</verse>
				<verse number="8">तब ऊं जनानियों तैं यीशु की वा बात याद ऐ।</verse>
				<verse number="9">तब ऊ जनानियां कबर बटि लौटी के वापिस ऐ गैनी, यों सब बातों की खबर ग्यारा चेलों तैं अर ऊंका दगड़ा मा इकट्‍ठा लोगु तैं बतै दिनी।</verse>
				<verse number="10">अर जौं जनानियों न खास चेलों तैं यू बात बतैनि ऊंको नौ च, मगदला गौं की मरियम, योअन्‍ना अर याकूब की माँ जिं को नौ मरियम छौ, अर ऊंका दगड़ा-दगड़ि और भि जनानियां छै।</verse>
				<verse number="11">पर खास चेलों न यों जनानियों की बातों तैं सुद्‍दी समझि, अर ऊंन ऊंकी बात पर बिस्वास नि कैरी।</verse>
				<verse number="12">तब पतरस उठी अर कबर जनै दौड़ी के गै, अर जब वेन निसो ह्‍वेके भितर देखि, त वेतैं केवल कफन को कपड़ा उख पोड़्यूं दिखै। अर यू सब देखि के उ हकदक रै गै अर फिर वापिस चलि गै।</verse>
				<verse number="13">अर वे ही दिन पर यीशु का पिछनै चलण वळो मा बटि क्लियुपास अर वेका दगड़्या मा एक और मनखि इम्माऊस नौ का गौं कू जाणा छा। अर यू गौं यरूशलेम नगर बटि लगभग ग्यारा किलोमीटर दूर छौ।</verse>
				<verse number="14">अर यू दुई यरूशलेम नगर मा होईं घटना का बारा मा बात-चित करदी-करदी जाणा छा।</verse>
				<verse number="15">अर अपणी ईं बात का दौरान उ होईं घटना का बारा मा चर्चा कना छा, कि तबरि यीशु खुद ही ऊंका पास ऐ गै अर ऊंका दगड़ा मा चलण लगि गै।</verse>
				<verse number="16">पर ऊंन वेतैं नि पछ्याणी की यू कु च, किलैकि उबरि परमेस्वर न परगट नि कैरी छौ।</verse>
				<verse number="17">तब यीशु न ऊंतैं पूछी, “तुम लोग चलदि-चलदि कै बात का बारा मा बात-चित कना छां?” अर ऊ उदास ह्‍वेके रुकी गैनी।</verse>
				<verse number="18">अर यू सुणी के ऊं मदि क्लियुपास न यीशु कू बोलि, “तुम यरूशलेम मा अकेला एक इन्द्रया परदेसी छाँ, जैतैं यू पता नि च, कि यों दिनों यरूशलेम मा क्या-क्या ह्‍वे।”</verse>
				<verse number="19">तब वेन ऊं बटि पूछी, “अरे क्या-क्या बात ह्‍वे?” ऊंन वेकू बोलि, “अरे या बात नासरत गौं का यीशु की च अर वु परमेस्वर को एक रैबर्या छौ। जु की परमेस्वर अर सब लोगु का समणि वचन देण मा, अर हरेक किसम का कामों तैं करण मा ताकतबर छौ।</verse>
				<verse number="20">पर हमरा मुख्य पुरोहितों न अर अधिकारीयों न वेतैं मौत की सजा देण खुणि सौंप दिनी, ताकि वेतैं क्रूस पर चड़ये जौ।</verse>
				<verse number="21">अर हमतै उम्मीद छै कि यू ही मनखि इस्राएल राज्य तैं छुटकारु देणु खुणि चुण्यूं च। अर यू सब बात दुई दिन पैलि ह्‍वेनि, अर आज तिसरु दिन च।</verse>
				<verse number="22">“अर हमरा बीच मा कुछ जनानियां छिन ऊंन हमतै घंघतोळ मा डालियेली, किलैकि आज सुबेर होन्दी वु कबर पर गै छै,</verse>
				<verse number="23">अर जब कबर मा वेकी लांश नि पै, तब ऊंन ऐके हम मा इन बोलि कि हमुन स्वर्गदूतों को दरसन पै, अर ऊंन हम कू बोलि कि उ ज्यून्दु च।</verse>
				<verse number="24">तब हमरा दगड़्यों मा बटि कुछ वीं कबर पर गैनी। अर जन जनानियों न बोलि छौ, ठिक उन्‍नि पै अर यीशु की लांश उख नि छै।”</verse>
				<verse number="25">तब वेन ऊंकू बोलि, “अरे लाटों, अर परमेस्वर का रैबर्यों का द्‍वारा बोलि बातों पर देर से बिस्वास करण वळो,</verse>
				<verse number="26">क्या यू जरुरी नि छौ कि मसीह ये दुख तैं उठौ अर अपणा आदर-सम्मान तैं पौ?”</verse>
				<verse number="27">तब यीशु न मूसा का द्‍वारा बुलिं बातों बटि शुरु कैरी, अर सब रैबर्यों का द्‍वारा किताबों मा लिखीं भविष्यबाणियों का बारा मा ऊं दुईयों तैं समझौण लगि गै, जु कि वेका बारा मा लिखीं छै।</verse>
				<verse number="28">अर इथगा मा ऊ वे गौं का नजदीक पौंछी गैनी जख चेला जाणा छा। अर यीशु बरतौ से इन लगणु छौ, जन कि वु अगनै जाण चाणु होलु।</verse>
				<verse number="29">पर ऊंन वेतैं रोकी के बोलि कि, “रुमुक को बगत च अर रात होण वळी च, इलै तू हमरा दगड़ा मा इखि रुकी जा।” तब यीशु ऊंका दगड़ा मा रौणु कू वे गौं मा चलि गै।</verse>
				<verse number="30">अर जब उ ऊंका दगड़ा खाणुक खाणु कू बैठि, त वेन रुट्‍टी उठे के परमेस्वर को धन्यवाद कैरी अर रुट्‍टी का टुकड़ा कैरिके वेन ऊंतैं दे।</verse>
				<verse number="31">तब ऊ समझि गैनी अर ऊंन वेतैं पछ्याण दिनी, मगर यीशु ऊंकी समणि बटि झट गैब ह्‍वे गै।</verse>
				<verse number="32">तब ऊंन आपस मा बोलि, “पूरा बाटा फुंड जब उ हमरा दगड़ा मा बात-चित कनु छौ, अर पवित्रशास्‍त्र मा लिखीं बातों को मतलब हमतै समझौण छौ, त सच्‍चि मा हमरा मन मा या इच्छा होणी छै कि हम येकी और जादा सुणा।”</verse>
				<verse number="33">तब ऊ वे ही बगत उख बटि उठनि अर यरूशलेम नगर कू लौटी गैनी। अर उख पौंछी के दुईयों न ऊं ग्यारों तैं अर ऊंका दगड़्यों तैं इकट्‍ठा होयुं देखि,</verse>
				<verse number="34">अर ऊ लोग अपणा आपस मा इन बोन्‍न छा कि, “सच्‍चि मा प्रभु ज्यून्द ह्‍वे गै, अर शमौन न वेतैं देखि।”</verse>
				<verse number="35">तब क्लियुपास अर वेका दगड़ा का मनखि न बाटा की सब बात जु ऊंका दगड़ा मा ह्‍वे छै ऊंतैं बतै। अर ऊं दुईयों न ऊंतैं इन भि बतै की रुट्‍टी खाण का बगत ऊंन यीशु तैं कनकै पछ्याणी।</verse>
				<verse number="36">अर जब ऊ दुईया का दुई यों बातों तैं बतौणा ही छा, कि तबरि यीशु ऊंका बीच मा ऐके खड़ु ह्‍वे गै। अर वेन ऊंकू बोलि, “तुमतै शान्ति मिलु।”</verse>
				<verse number="37">पर वु घबरै अर डौऽरी गैनी, अर ऊंन समझि की कखि यू बाण त नि च।</verse>
				<verse number="38">अर यीशु न ऊंकू बोलि, “अरे, तुम घबराणा किलै छाँ? ‘मि ही छौं,’ जरा मेरा हाथ, खुटों तैं त देखा, निथर मितैं छ्वी के देखा। अर तुमरा मनों मा सक पैदा किलै होणु च? किलैकि बाण पर हड़गा अर मांस नि होन्दु पर मि पर छैं छिन।”</verse>
				<verse number="39"></verse>
				<verse number="40">अर इन बोलि के वेन ऊंतैं अपणा हाथ अर खुटा दिखैनि।</verse>
				<verse number="41">अर वु भौत खुश ह्‍वे गैनी, मगर फिर भि वु घंघतोळ मा छा अर अभि भि ऊंतैं ईं बात पर बिस्वास नि होणु छौ। इलै यीशु न ऊंतैं पूछी, “क्या इख तुम मा कुछ खाणु कू भि च?”</verse>
				<verse number="42">तब ऊंन वेतैं भुड़यां माछु को एक कतर दिनी।</verse>
				<verse number="43">अर वेन ऊं बटि ले अर ऊंका समणि खै।</verse>
				<verse number="44">तब यीशु न ऊंकू बोलि, “यू मेरी वु बात छिन जब मि तुमरा दगड़ा छौ, तब मिन तुमकु बोलि छौ कि यू जरुरी च कि जथगा भि बात मूसा का द्‍वारा लिख्यां नियम-कानूनों मा, अर रैबर्यों की किताबों मा लिखीं छिन, इख तक की जु बात भजनों की किताबों मा भि मेरा बारा मा लिख्यूं छिन, ऊ सभ्यों को पूरु होण जरुरी च।”</verse>
				<verse number="45">तब यीशु न पवित्रशास्‍त्र मा लिखीं बातों तैं समझणु खुणि ऊंकी समझ खोली दिनी।</verse>
				<verse number="46">अर वेन ऊंकू बोलि, “इन लिख्यूं च कि मसीह दुख उठालु अर तिसरा दिन मुरयां लोगु मा बटि ज्यून्दु ह्‍वे जालु।</verse>
				<verse number="47">अर वेका नौ से पापों की माफी पौणु खुणि अर मन से पस्ताप करण को परचार यरूशलेम नगर बटि दुनियां का सब देसों मा किये जालु,</verse>
				<verse number="48">अर तुम सब यों बातों का गवा छाँ।</verse>
				<verse number="49">अर सुणा, पिता का वे करार का मुताबिक मि वेतैं तुम पास भेजलु, अर जबरि तक वा ताकत तुमतै स्वर्ग बटि नि मिली जौ, तबरि तक तुम यरूशलेम नगर मा ही रयां।”</verse>
				<verse number="50">तब यीशु अपणा चेलों अर ऊंका दगड़ा मा जमा होयां लोगु तैं अफ दगड़ा बैतनिय्याह गौं से भैर लेके ऐ, अर अपणा हाथों तैं उठे के वेन ऊंतैं आसीस दिनी।</verse>
				<verse number="51">अर उ ऊंतैं आसीस देणु ही छौ, कि यीशु ऊं से अलग ह्‍वे गै अर स्वर्ग मा उठये गै।</verse>
				<verse number="52">तब ऊंन झुकि के वेतैं परणाम कैरी, अर बड़ी खुशी से यरूशलेम नगर कू लौटी गैनी।</verse>
				<verse number="53">अर ऊ लगातार मन्दिर मा जैके परमेस्वर की बडै करदा छा।</verse>
			</chapter>
		</book>
		<book number="43">
			<chapter number="1">
				<verse number="1">शुरुवात मा वचन छौ। अर उई वचन परमेस्वर का दगड़ा मा छौ। अर उई वचन परमेस्वर छौ।</verse>
				<verse number="2">यू ही शुरुवात मा परमेस्वर का दगड़ा मा छौ।</verse>
				<verse number="3">अर सब कुछ वेसे बणयै गै अर जु कुछ भि बणयै गै, उ सब कुछ वेका ही द्‍वारा बणयै गै।</verse>
				<verse number="4">यू वचन जीवन देण वळु छौ अर यू जीवन ही मनखियों खुणि उज्याळु लेके ऐ।</verse>
				<verse number="5">अर यू उज्याळु अन्धेरा मा चमकदु च, पर अन्धेर न वेतैं स्वीकार नि कैरी।</verse>
				<verse number="6">तब परमेस्वर की तरफा बटि भेज्यूं एक मनखि ऐ, वेको नौ यूहन्‍ना छौ।</verse>
				<verse number="7">उ गवै देणु खुणि ऐ, ताकि उ उज्याळा का बारा मा गवै दे सैको अर वेका द्‍वारा सभि मनखि बिस्वास करण लगि जां।</verse>
				<verse number="8">उ खुद त उज्याळु नि छौ, पर वे उज्याळा का बारा मा गवै देणु खुणि अयूं छौ।</verse>
				<verse number="9">अर सच्‍चु उज्याळु जु हरेक मनखि तैं उज्याळु देन्दु, उ दुनियां मा औण वळु छौ।</verse>
				<verse number="10">अर उ दुनियां मा छौ अर दुनियां वेका द्‍वारा ही बणयै गै, पर दुनियां का लोगु न वेतैं नि पछ्याणी।</verse>
				<verse number="11">उ अपणा निज लोगु का बीच मा ऐ, पर वेका अपणा लोगु न वेतैं स्वीकार नि कैरी।</verse>
				<verse number="12">पर जथगा लोगु न वेतैं स्वीकार कैरी, याने कि जथगा वे पर बिस्वास करदिन, वेन ऊंतैं परमेस्वर की औलाद होण को अधिकार दियूं च।</verse>
				<verse number="13">अर ऊ नऽ त ल्वे बटि, नऽ त सरील की इच्छा बटि, अर ना ही मनखियों की योजना बटि पैदा ह्‍वेनि, बल्किन मा ऊ त परमेस्वर की औलाद छिन अर ऊं खुणि वेकी इच्छा या ही छै।</verse>
				<verse number="14">अर उ वचन सरील का रुप मा मनखियों का बीच मा ऐ। अर हम पर भरपूर किरपा कैरिके अर परमेस्वर की पूरि सच्‍चै हमतै बतै के हमरा बीच मा रै। अर वेकी महानता तैं हमुन देखि। अर पिता परमेस्वर न वेतैं बिजांम महान बणै, किलैकि उ वेको इकलौतु पुत्र च।</verse>
				<verse number="15">तब यूहन्‍ना बपतिस्मा देण वळन वेका बारा मा गवै दे, अर चिल्‍लै-चिल्‍लै के इन बोलि कि, “यू मनखि उई च, जैका बारा मा मिन बोलि छौ, उ जु मेरा बाद औण वळु च, उ मिसे भि महान च किलैकि उ मिसे भि पैलि बटि छौ।</verse>
				<verse number="16">अर वेकी भरपूर किरपा बटि हम सभ्यों तैं आसीस पर आसीस मिली।”</verse>
				<verse number="17">भौत पैलि मूसा का द्‍वारा त नियम-कानून दिये गैनी, पर यीशु मसीह का द्‍वारा ही हमतै किरपा मिली अर परमेस्वर की सच्‍चै परगट ह्‍वे।</verse>
				<verse number="18">अर परमेस्वर तैं कैन कभि नि देखि, पर वेकू इकलौतु पुत्र, जु पिता की गोद मा बैठदु च, वेन ही वेतैं परगट कैरी।</verse>
				<verse number="19">जब यहूदियों का मुख्यों न यरूशलेम नगर बटि पुरोहितों अर लेवियों तैं यूहन्‍ना का पास वे बटि यू पूछणु कू भेजि, “तुम कु छाँ?” तब वेकी गवै या च।</verse>
				<verse number="20">अर वेन ऊंका समणि कुछ भि नि छिपै, पर साफ-साफ बोलि कि, “मि मसीह नि छौं।”</verse>
				<verse number="21">तब ऊं लोगु न वे बटि पूछी, “त क्या तुम एलिय्याह छाँ?” वेन बोलि, “ना।” “त क्या तुम उ रैबर्या छाँ? जु औण वळु च,” तब वेन बोलि, “मि नि छौं।”</verse>
				<verse number="22">अर ऊं लोगु न वे बटि पूछी, “त तुम कु छाँ? अर हमतै बतौ कि तुम अपणा बारा मा क्या बुल्द्‍यां, ताकि हम जैके अपणा भेजण वळो तैं जबाब दे सैका।”</verse>
				<verse number="23">तब यूहन्‍ना न बोलि, “जन परमेस्वर का रैबर्या यशायाह न बोलि छौ कि, “‘मि निर्जन जगा मा पुकरण वळे की एक धै छौं। वेन बोलि छौ, कि प्रभु को बाटु सैणु कैरा।’”</verse>
				<verse number="24">तब जौं लोगु तैं फरीसी दल का लोगु न भेजि छौ,</verse>
				<verse number="25">ऊं लोगु न यूहन्‍ना तैं पूछी, “जब नऽ त तुम मसीह छाँ, नऽ त एलिय्याह, अर ना ही परमेस्वर को उ रैबर्या, त फिर बपतिस्मा किलै देणा छाँ?”</verse>
				<verse number="26">तब यूहन्‍ना न ऊंकू बोलि, “मि त पाणिळ बपतिस्मा देन्दु छौं, पर तुमरा बीच मा एक मनखि खड़ु होयुं च, जैतैं तुम नि जणद्‍यां की उ कु च।</verse>
				<verse number="27">यू उई च, जु मेरा बाद औण वळु छौ। मि इथगा लैख भि नि छौं कि वेका जुतों का तसमा भि खोली सैकु।”</verse>
				<verse number="28">यू सब कुछ त यरदन गाड का पल्या छाला, याने की पूरब दिसा का बैतनिय्याह गौं मा ह्‍वेनि, जख यूहन्‍ना बपतिस्मा देन्दु छौ।</verse>
				<verse number="29">अर दुसरा दिन यूहन्‍ना न यीशु तैं अपणी तरफा औन्द देखि अर बोलि, “अफार देखा, परमेस्वर को भेज्यूं मेम्‍ना, जु कि अपणु बलिदान देके दुनियां का लोगु का पापों तैं उठे के लि जान्दु।</verse>
				<verse number="30">अर यू उई च जैका बारा मा मिन बोलि छौ कि, ‘उ जु मेरा बाद औण वळु च, उ मिसे भि महान च किलैकि उ मिसे भि पैलि बटि छौ।’</verse>
				<verse number="31">अर मि यू नि जणदु छौ कि यू उई च, पर मि पाणि बटि बपतिस्मा देन्दु छौं, ताकि उ इस्राएली लोगु मा पछ्याणे जौ।”</verse>
				<verse number="32">अर फिर यूहन्‍ना न या भि गवै दे, “मिन स्वर्ग बटि पवित्र आत्मा तैं एक कबूतर का रुप मा उतरद देखि अर उ यीशु पर ठैरि गै।</verse>
				<verse number="33">अर मि त वे मनखि तैं नि पछ्याणदु छौ, पर जै परमेस्वर न मितैं पाणि बटि बपतिस्मा देणु कू भेजि, वेन मिकू बोलि, कि ‘जै पर तू पवित्र आत्मा तैं उतरद अर ठैरिद दिखली, उई पवित्र आत्मा बटि बपतिस्मा देण वळु च।’</verse>
				<verse number="34">अर मिन यू खुद देखि च अर इन गवै देन्दु छौं, कि यू ही परमेस्वर को पुत्र च।”</verse>
				<verse number="35">अर दुसरा दिन फिर यूहन्‍ना अपणा दुई चेलों का दगड़ा मा उखि खड़ु होयुं छौ।</verse>
				<verse number="36">अर वेन यीशु तैं जान्द देखि के बोलि, “अफार देखा, यू परमेस्वर को भेज्यूं मेम्‍ना च।”</verse>
				<verse number="37">जब ऊं दुई चेलों न वेतैं यू बुल्द सुणी, तब वु यीशु का पिछनै चलि गैनी।</verse>
				<verse number="38">अर यीशु न मूड़ी के ऊंतैं अपणा पिछनै औन्द देखि अर ऊंतैं पूछी, “तुम कैतैं खुज्याणा छाँ?” ऊंन वेकू बोलि, “रब्बी तुम कख रौन्द्‍यां?” (रब्बी जैको मतलब गुरुजी च)।</verse>
				<verse number="39">तब वेन ऊंकू बोलि, “आ, अर देखि ल्यावा।” अर वु गैनी अर जख उ रौन्दु छौ वा जगा देखि। वे बगत दिन की करीब चार बजणी छै। इलै वे दिन वु यीशु का दगड़ा मा ही रैनी।</verse>
				<verse number="40">अर यूहन्‍ना की बात सुणी के जु दुई चेला यीशु का पिछनै ह्‍वे गै छा, ऊं मदि एक शमौन पतरस को भै अन्द्रियास छौ।</verse>
				<verse number="41">वेन पैलि अपणा सगा भै शमौन बटि मिली के वेकू बोलि, “हमतै ख्रीष्‍ट, याने कि ‘मसीह’ मिली गै।”</verse>
				<verse number="42">अर उ वेतैं यीशु का समणि लेके ऐ। तब यीशु न वेतैं देखि के बोलि कि, “तू यूहन्‍ना को नौनु शमौन छैई, त्वेकू आज बटि कैफा मतलब पतरस बुले जालु।”</verse>
				<verse number="43">दुसरा दिन यीशु न गलील का मुलक मा जाणु को पक्‍कु इरादा कैरी। तब उ फिलिप्पुस बटि मिली अर वेकू बोलि, “मेरा पिछनै औंऽऽ।”</verse>
				<verse number="44">फिलिप्पुस त बैतसैदा नगर को रौण वळु छौ, जख अन्द्रियास अर पतरस भि रौन्दा छा।</verse>
				<verse number="45">तब फिलिप्पुस नतनएल बटि मिली अर वेन वेकू बोलि, “जैका बारा मा मूसा न अपणा नियम-कानून मा अर परमेस्वर का रैबर्यों न अपणी किताबों मा लिख्यूं च, उ हमतै मिली गै। अर उ यूसुफ को नौनु नासरत गौं को यीशु च।”</verse>
				<verse number="46">तब नतनएल न वे बटि बोलि, “कभि, नासरत बटि भि कुछ भलु निकळि सकदु च?” अर फिलिप्पुस न वेकू बोलि, “चल, अर खुद देखि ले।”</verse>
				<verse number="47">यीशु न नतनएल तैं अपणी तरफा औन्द देखि के वेका बारा मा बोलि, “देखा, यू सच्‍चु इस्राएली च जैमा कुई कपट नि च।”</verse>
				<verse number="48">तब नतनएल न वे बटि पूछी, “तुम मितैं कनकै जणद्‍यां?” फिर यीशु न वेकू बोलि, “फिलिप्पुस न जब त्वेतै बुलै, वेसे पैलि मिन त्वेतै तिमला का डाळा तौळ देखियाली छौ।”</verse>
				<verse number="49">अर नतनएल न वेकू बोलि, “गुरुजी, तुम परमेस्वर का नौना छाँ अर तुम ही इस्राएल का राजा छाँ”</verse>
				<verse number="50">फिर यीशु न वेतैं जबाब देई, “मिन जु त्वेकू बोलि कि, ‘मिन त्वेतै तिमला डाळा का तौळ देखि,’ क्या इलै ही तू मि पर बिस्वास करदी? मि तुमतै बतै देन्दु, कि तुम येसे भि बड़ा-बड़ा कामों तैं दिखल्या।”</verse>
				<verse number="51">अर यीशु न वेकू यू भि बोलि, “मि तुम लोगु बटि सच्‍चि ही बोन्‍नु छौं, कि तुम स्वर्ग तैं खुल्यूं अर परमेस्वर का स्वर्गदूतों तैं उब जान्द अर जख मनखि को पुत्र, याने मि छौं, उख उतरद दिखल्या।”</verse>
			</chapter>
			<chapter number="2">
				<verse number="1">फिर तिसरा दिन गलील मुलक का काना गौं मा एक ब्यौ छौ। अर उख यीशु की माँ भि छै।</verse>
				<verse number="2">यीशु अर वेका चेला भि वे ब्यौ मा न्यूत्यां छा।</verse>
				<verse number="3">अर जब अंगूरों को रस कम ह्‍वे गै, त यीशु की माँ न वेकू बोलि कि, “ऊंका पास अंगूरों को रस खतम ह्‍वे गै।”</verse>
				<verse number="4">तब यीशु न वींकू बोलि, “हे माँ, मिकू अभि नि बोला की मिन क्या करण, किलैकि अभि मेरु बगत नि ऐ।”</verse>
				<verse number="5">पर वेकी माँ न नौकरों कू बोलि, “जु कुछ भि उ तुमकु बोललु, उन्‍नि कर्यां।”</verse>
				<verse number="6">उख त ढुंगो का बणयां छह बड़ा-बड़ा भाँडा धरयां छा, जैमा चार-छह गागर पाणि ऐ जान्दी छै। यू त यहूदियों की रीति का मुताबिक शुद्धिकरण खुणि धरयां छा।</verse>
				<verse number="7">अर यीशु न ऊं नौकरों कू बोलि, “यों भाँडो तैं पाणिळ भोरी द्‍या।” तब ऊंन भाँडो तैं मुख तक पाणिळ भोरी दिनी।</verse>
				<verse number="8">फिर वेन ऊंकू बोलि, “अब उखुन्द बटि गाडी के दावत का कर्ता-धर्ता का पास लि जा।” अर वु लि गैनी।</verse>
				<verse number="9">तब दावत का कर्ता-धर्ता न उ पाणि चखी जु अंगूरों को रस बणि गै छौ। अर उ नि जणदु छौ कि यू कख बटि ऐ। (पर जौं नौकरों न पाणि निकाळि छौ, ऊ जणदा छा)। तब दावत का कर्ता-धर्ता न ब्यौला तैं बुलै अर वे बटि बोलि,</verse>
				<verse number="10">“हरेक मनखि त पैलि अच्छु अंगूरों को रस देन्दु च अर जब लोग पी के छक ह्‍वे जनदिन, तब हलकु वळु देन्दु च। पर तुमुन त अभि तक अंगूरों को अच्छु रस रख्युं च।”</verse>
				<verse number="11">अर यीशु न गलील का काना गौं मा अपणु पैलु चमत्कार कैरिके अपणी महानता दिखै। अर वेका चेलों न वे पर बिस्वास कैरी।</verse>
				<verse number="12">येका बाद यीशु अपणी माँ, भैयों अर चेलों का दगड़ा मा कफरनहूम नगर गै। अर उख ऊ कुछ ही दिन रैनी।</verse>
				<verse number="13">अर जब यहूदियों को फसह को त्योवार नजदीक छौ, तब यीशु यरूशलेम नगर कू गै।</verse>
				<verse number="14">अर वेन मन्दिर मा बल्दों, भेड़ों, अर कबूतरों तैं बिकौण वळो अर पैसौं को अदलण-बदलण करण वळो तैं बैठयूं देखि।</verse>
				<verse number="15">तब वेन ज्यूडों को एक कोड़ा बणै के सभि भेड़ों अर बल्दों तैं मन्दिर बटि भैर निकाळि दिनी, अर पैसौं को अदलण-बदलण करण वळो का पैसा छिलारी दिनी, अर ऊंकी मेजों तैं उल्ट-पुल्ट कैरी दिनी।</verse>
				<verse number="16">अर कबूतर बिकौण वळो बटि बोलि, “यू सब इख बटि लि जा। तुम मेरा पिता का घौर तैं व्यापार को घौर नि बणावा।”</verse>
				<verse number="17">तब पवित्रशास्‍त्र मा जु लिख्यूं च उ वेका चेलों तैं याद ऐ, कि “तेरा घौर की धुन का कारण मेरु नास किये जालु।”</verse>
				<verse number="18">अर यहूदियों का मुखिया लोगु न यीशु तैं पूछी, “यू सब करणु को त्वेतै अधिकार च, यू साबित करणु कू तू हमतै कु चिन्‍न दिखै सकदी?”</verse>
				<verse number="19">तब यीशु न ऊंतैं जबाब देई, “ये मन्दिर तैं ढोळि द्‍या अर मि येतैं तीन दिन मा बणै द्‍यूलु।”</verse>
				<verse number="20">तब ऊंन बोलि, “ये मन्दिर तैं बणौण मा छियालिस साल लगि गैनी अर क्या तू येतैं तीन दिनों मा बणै दिली?”</verse>
				<verse number="21">पर उ त अपणा सरील रुपी मन्दिर का बारा मा ऊंतैं बतौणु छौ।</verse>
				<verse number="22">इलै जब यीशु मुरदो मा बटि ज्यून्द ह्‍वे तब वेका चेलों तैं यू सब याद ऐ। अर ऊंन पवित्रशास्‍त्र अर यीशु मसीह का द्‍वारा बुलयां वचन पर बिस्वास कैरी।</verse>
				<verse number="23">अर फसह का त्योवार का बगत पर यीशु यरूशलेम नगर मा छौ, अर वेका द्‍वारा जु चमत्कारिक काम किये जाणा छा, ऊंतैं देखि के भौत सरा लोगु न वे पर बिस्वास कैरी।</verse>
				<verse number="24">पर यीशु न ऊं पर भरोसा नि कैरी, किलैकि उ सब लोगु तैं अच्छी तरौं से जणदु छौ।</verse>
				<verse number="25">अर वेतैं कुई जरुरत नि छै, कि कुई भि वेतैं मनखियों का बारा मा बतौ। किलैकि उ खुद ही जणदु छौ, कि मनखियों का मनों मा क्या च।</verse>
			</chapter>
			<chapter number="3">
				<verse number="1">फरीसी दल का लोगु मदि नीकोदिमुस नौ को एक मनखि छौ, जु कि यहूदियों को एक मुखिया छौ।</verse>
				<verse number="2">उ एक रात यीशु का पास ऐ अर बोलि, “गुरुजी, हम जणदा छां, कि तुम परमेस्वर की तरफा बटि गुरु ह्‍वेके अयां छाँ, किलैकि जौं चमत्कारिक कामों तैं तुम करद्‍यां, यू सिरफ उई कैरी सकदु जैका दगड़ा मा परमेस्वर हो।”</verse>
				<verse number="3">तब यीशु न वेतैं जबाब देई, “मि तुम से सच्‍चि बोन्‍नु छौं, जबरि तक कुई नई रीति बटि जनम नि ल्यालु, तबरि तक कुई भि परमेस्वर का राज तैं देखि नि सकदु।”</verse>
				<verse number="4">तब नीकोदिमुस न वेकू बोलि, “मनखि जब बुढ्या ह्‍वे जान्दु, त उ फिर कनकै जनम ले सकदु? क्या उ दुबरा अपणी माँ की कोख मा वापिस जैके दुसरि दौं जनम ले सकदु च?”</verse>
				<verse number="5">अर यीशु न बोलि, “मि तुम से सच्‍चि बोन्‍नु छौं, कि जबरि तक कुई मनखि पाणि अर पवित्र आत्मा से जनम नि ल्यालु, तबरि तक उ परमेस्वर का राज मा दाखिल नि ह्‍वे सकदु।</verse>
				<verse number="6">जु मनखि सरील बटि जनम लेन्दु, उ त सरील च, पर जु पवित्र आत्मा बटि जनम लेन्दु, उ आत्मा च।</verse>
				<verse number="7">अर तुम ईं बात पर ताजुब नि कैरा, कि मिन तुमकु इन बोलि कि, ‘तुमतै नई रीति बटि जनम लेण जरुरी च।’</verse>
				<verse number="8">किलैकि हवा जनै चान्दी उनै जान्दी अर तुम बस वीं की आवाज सुणद्‍यां, पर नि जणद्‍यां कि वा कनै बटि औणी अर कख कू जाणि च। ठिक उन्‍नि हरेक मनखि जु पवित्र आत्मा बटि जनम ल्युन्दु उ भि इन्द्रयो ही च।”</verse>
				<verse number="9">तब नीकोदिमुस न वे बटि बोलि, “गुरुजी, इन कनकै ह्‍वे सकदु?”</verse>
				<verse number="10">अर यीशु न वेकू बोलि, “तुम त इस्राएली लोगु का गुरु छाँ, फिर भि यों बातों तैं नि समझद्‍यां?</verse>
				<verse number="11">अर मि तुम सच्‍चि ही बोन्‍नु छौं, कि हम जु जणदा छां, उई बुल्द्‍यां, अर जु हमुन देखि च, वेकी गवै देन्दा छां, पर तुम हमरि गवै तैं स्वीकार नि करद्‍यां।</verse>
				<verse number="12">अर जब मिन तुमतै ईं दुनियां की बात बतैनि त तुम बिस्वास नि कैरी, अगर मि तुमतै स्वर्ग की बात बतौलु त फिर कनकै बिस्वास करिल्या।</verse>
				<verse number="13">अर कुई भि स्वर्ग मा नि गै पर केवल उई स्वर्ग मा गै जु कि स्वर्ग बटि ऐ, याने कि मनखि को पुत्र।</verse>
				<verse number="14">अर जै ढंग से मूसा न निर्जन जगा मा पितळा का गुरौ तैं ऊँचा पर चड़ै छौ, ठिक उन्‍नि जरुरी च कि मनखि का पुत्र तैं भि ऊँचा पर चड़ै जौ।</verse>
				<verse number="15">ताकि जु कुई भि वे पर बिस्वास करलु, वेतैं सदनि को जीवन दिये जौ।</verse>
				<verse number="16">किलैकि परमेस्वर न दुनियां बटि इथगा प्यार कैरी, कि वेन अपणु इकलौतु पुत्र दे दिनी ताकि जु कुई वे पर बिस्वास कैरो, उ नास ना हो बल्किन मा सदनि को जीवन पौ।</verse>
				<verse number="17">परमेस्वर न अपणा पुत्र तैं इलै नि भेजि कि उ दुनियां का लोगु को न्याय कैरो, बल्किन मा वेन अपणा पुत्र तैं दुनियां का लोगु तैं बचौणु खुणि भेजि।</verse>
				<verse number="18">“अर जु कुई भि वे पुत्र पर बिस्वास करदु, उ दोषी नि ठैरैये जालु, पर जु बिस्वास नि करदु, उ दोषी ठैरैये गै। किलैकि वेन परमेस्वर का इकलौता पुत्र पर बिस्वास नि कैरी।</verse>
				<verse number="19">अर दोष लगौण को कारण यू च, कि उज्याळु ईं दुनियां मा ऐ, पर मनखियों न उज्याळा बटि ना बल्किन मा अन्धेरा तैं खूब माणी, किलैकि ऊंका काम बुरा छा।</verse>
				<verse number="20">किलैकि जु कुई बुरा काम करदु, उ उज्याळा बटि खार खान्दु अर उज्याळा का नजदीक नि औन्दु, अर इन वु इलै करदु ताकि वेका बुरा काम लोगु का समणि परगट नि ह्‍वे जा।</verse>
				<verse number="21">पर जु सच्‍चै का बाटा पर चलदु, उ उज्याळा का समणि औन्दु, ताकि इन परगट ह्‍वे जौ कि वेका काम परमेस्वर की मनसा से होनदिन।”</verse>
				<verse number="22">येका बाद यीशु अर वेका चेला यहूदिया का मुलक मा ऐनी। अर उ उख ऊंका दगड़ा मा रै के बपतिस्मा देण लगि गै।</verse>
				<verse number="23">अर यूहन्‍ना भि शालेम नगर का नजदीक ऐनोन नौ की जगा मा बपतिस्मा देन्दु छौ। किलैकि उख बिजांम पाणि छौ, अर लोग ऐके बपतिस्मा लेन्दा छा।</verse>
				<verse number="24">(अर तब तक त यूहन्‍ना तैं जेलखाना मा नि डळै गै छौ)।</verse>
				<verse number="25">फिर एक दिन एक यहूदी मनखि को यूहन्‍ना का चेलों का दगड़ा मा शुद्धिकरण का खातिर बहसबाजी ह्‍वे।</verse>
				<verse number="26">अर ऊंन यूहन्‍ना का पास ऐके वेकू बोलि, “गुरुजी, जु मनखि यरदन गाड का वे छाला तुमरा दगड़ि छौ, अर जैका बारा मा तुमुन गवै दे छै, उ बपतिस्मा देणु च, अर सब मनखि वेका पास जनदिन।”</verse>
				<verse number="27">तब यूहन्‍ना न बोलि, “जबरि तक मनखि तैं परमेस्वर की तरफा बटि नि दिये जौ, तबरि तक उ कुछ नि पै सकदु।</verse>
				<verse number="28">मिन बोलि छौ कि, ‘मि मसीह नि छौं पर वेसे पैलि भेज्यूं ग्यों।’ अर ईं बात मा तुम खुद ही मेरा गवा छाँ।</verse>
				<verse number="29">अर ब्यौला उ च जैतैं ब्यौलि मिलदी च, पर ब्यौला को खास दगड़्या जु कि वेका समणि खड़ु ह्‍वेके वेकी सुणदु। अर उ ब्यौला की आवाज सुणी के बिजांम खुश होन्दु, ठिक उन्‍नि मेरी खुशी को भि कुई ठिकाणु नि च।</verse>
				<verse number="30">अर यू जरुरी च, कि यीशु बढ़ो अर मि घटु।</verse>
				<verse number="31">“अर जु स्वर्ग बटि औन्दु उ सभ्यों मदि महान च। अर जु दुनियां बटि औन्दु उ दुनियां को ही च, अर दुनियां की ही बात तैं बुल्दु, पर जु स्वर्ग बटि औन्दु उ सभ्यों मदि महान च।</verse>
				<verse number="32">अर जु कुछ भि वेन देखि अर सुणी च, वेका बारा मा उ गवै देन्दु, पर कुई भि वेकी गवै तैं स्वीकार नि करदु।</verse>
				<verse number="33">अर जैन भि वेकी गवै तैं स्वीकार कैरी, वेन छाप लगै के इन परमाण दियाली की परमेस्वर सच्‍चु च।</verse>
				<verse number="34">किलैकि जैतैं परमेस्वर न भेजि, उ त केवल परमेस्वर की ही छुईं करदु। अर इन वु इलै करदु किलैकि परमेस्वर वेतैं पवित्र आत्मा भरपूरी से देन्दु।</verse>
				<verse number="35">अर पिता अपणा पुत्र से प्यार करदु, अर वेन सब कुछ वेका हाथों मा सौंप्याली।</verse>
				<verse number="36">अर जु कुई वे पुत्र पर बिस्वास करदु, वेतैं ही सदनि को जीवन मिलदु। अर जु कुई पुत्र पर बिस्वास नि करदु, वेतैं जीवन नि मिललु, बल्किन मा परमेस्वर को परकोप वे पर पोड़दु।”</verse>
			</chapter>
			<chapter number="4">
				<verse number="1">फिर फरीसी दल का लोगु न सुणी, कि यीशु यूहन्‍ना से भि जादा चेला बणादु, अर ऊंतैं बपतिस्मा देन्दु च। अर या बात यीशु तैं पता चलि गै।</verse>
				<verse number="2">(जब कि यीशु खुद त बपतिस्मा नि देणु छौ, बल्किन वेका चेला देन्दा छा)।</verse>
				<verse number="3">तब उ यहूदिया का मुलक तैं छोड़ि के गलील का मुलक मा चलि गै।</verse>
				<verse number="4">तब यीशु तैं सामरिया का मुलक बटि ही जाण पोड़ि।</verse>
				<verse number="5">अर उ सामरिया मुलक का सुखार नौ का एक नगर मा ऐ। अर उ नगर वीं जमीन का नजदीक छौ, ज्वा याकूब न अपणा नौना यूसुफ तैं दे छै।</verse>
				<verse number="6">अर याकूब को कुआँ भि उखि छौ। वे बगत दिन-दुफरि की करीब बारह बजणी छै। इलै यीशु सफर मा हिटण की वजै से थक्यूं छौ, अर उ वे कुआँ का समणि बैठि गै।</verse>
				<verse number="7">तबरि इथगा मा सामरी जाति की एक जनानि पाणि भोनु कू ऐ। अर यीशु न वींकू बोलि, “जरा मितैं पाणि पिलै द्‍या।”</verse>
				<verse number="8">अर यीशु का चेला नगर मा खाणु को समान मोल लेणु कू ग्यां छा।</verse>
				<verse number="9">तब वीं सामरी जाति की जनानि न यीशु कू बोलि, “तुम त यहूदी छाँ अर मि सामरी जनानि छौं, त तुम मि बटि पाणि कनकै मांगि सकद्‍यां?” (किलैकि यहूदी लोग, सामरियों का दगड़ा मा कै भि तरीके को ब्यौहार नि रखदिन)।</verse>
				<verse number="10">अर यीशु न वींकू बोलि, “अगर तुम परमेस्वर का बरदान तैं जणदा, अर यू भि जणदा की उ कु च, जु तुम बटि बोन्‍नु च, ‘मितैं पाणि पिलै द्‍या।’ त तुम वे बटि मंगदा, अर उ तुमतै जीवन देण वळु पाणि देन्दु।”</verse>
				<verse number="11">तब जनानि न वेकू बोलि कि, “श्रीमान, तुमरा पास त पाणि निकळणु खुणि कुई भाँडु भि नि च, अर कुआँ गैरु च, त फिर जीवन देण वळु वु पाणि तुमरा पास कख बटि ऐ?</verse>
				<verse number="12">क्या तुम हमरा पितर याकूब से भि बड़ा छाँ? किलैकि ऊंन हमतै यू कुआँ दियूं च, अर ऊंन खुद भि अर ऊंका नौनो न अर ऊंका गोर-बछरों न भि यां मा बटि पाणि पेई।”</verse>
				<verse number="13">तब यीशु न वींकू बोलि, “जु कुई ये पाणि मा बटि प्यालु वेतैं फिर से तिस लगली।</verse>
				<verse number="14">पर जु कुई भि मेरा दियां पाणि मा बटि प्यालु, वेतैं फिर सदनि तक तिस नि लगली, किलैकि जु पाणि मि वेतैं द्‍यूलु, उ वेमा बटि सदनि तक उछ्लण-कुदण वळु जीवन को एक छोया जन बणि जालु।”</verse>
				<verse number="15">तब जनानि न वे बटि बोलि, “श्रीमान, वु पाणि मितैं भि दे, ताकि मि तिसळि नि रौ, अर ना ही पाणि भोनु कू इथगा दूर औंऽऽ।”</verse>
				<verse number="16">अर यीशु न वींकू बोलि, “जा, अपणा पति तैं इख बुलै के लौ।”</verse>
				<verse number="17">जनानि न वेतैं जबाब दिनी, “मेरु पति नि च।” यीशु न वींकू बोलि, “तू ठिक बोन्‍नि छै, कि मि बिना पति की छौं।</verse>
				<verse number="18">किलैकि तेरा पैलि पांच पति छा, अर जैमा तू अभि छैई उ भि तेरु पति नि च, इलै तिन जु बोलि उ ठिक ही बोलि।”</verse>
				<verse number="19">तब जनानि न वे बटि बोलि, “श्रीमान, मितैं लगदु की तुम एक रैबर्या छाँ।</verse>
				<verse number="20">अर हमरा पितरों न ये ढौंडा पर परमेस्वर की भक्‍ति कैरी, अर तुम लोग बुल्द्‍यां कि यरूशलेम नगर ही इन जगा च, जख परमेस्वर की भक्‍ति करण चयेणी।”</verse>
				<verse number="21">तब यीशु न वींकू बोलि, “भुलि, तू मेरी ईं बात पर बिस्वास कैर, कि अब उ बगत औण वळु च जब कि तुम सामरी लोग पिता परमेस्वर की भक्‍ति तैं नऽ त ये ढौंडा पर करिल्या अर ना ही यरूशलेम नगर मा।</verse>
				<verse number="22">अर तुम जैतैं जणदा नि छाँ वेकी भक्‍ति करद्‍यां, पर हम जैतैं जणदा छां वेकी भक्‍ति करद्‍यां, किलैकि बचौण वळु यहूदियों मदि ही च।</verse>
				<verse number="23">पर अब उ बगत औण वळु च बल्किन अभि भि च, जब सच्‍चा भक्‍त पिता परमेस्वर की भक्‍ति तैं आत्मा अर सच्‍चै से करला, किलैकि पिता परमेस्वर अफु खुणि इन्‍नि भक्‍ति करण वळो तैं खुज्यान्दु च।</verse>
				<verse number="24">परमेस्वर आत्मा च, अर यू जरुरी च, कि वेकी भक्‍ति करण वळा आत्मा अर सच्‍चै से वेकी भक्‍ति कैरा।”</verse>
				<verse number="25">तब जनानि न वेकू बोलि, “श्रीमान, मि जणदी छौं कि मसीह, जैकू ख्रीष्‍ट बुल्दिन, औण वळु च। जब उ आलु त हमतै सब कुछ बतै द्‍यालु।”</verse>
				<verse number="26">अर यीशु न वींकू बोलि, “मि जु तेरा दगड़ा मा बच्यांणु छौं उई छौं।”</verse>
				<verse number="27">तबरि तक यीशु का चेला ऐ गैनी, अर वेतैं एक जनानि का दगड़ा मा बात करद देखि के ताजुब मा पोड़ि गैनी। पर ऊंमा बटि कैन भि वेतैं पूछी नि कि, “गुरुजी, तुम क्या चाणा छाँ? अर किलै वींका दगड़ा मा बात करणा छाँ?”</verse>
				<verse number="28">तब वा जनानि अपणा भाँडा तैं उखि छोड़ि के नगर मा चलि गै, अर लोगु मा बोन्‍न लगि गै,</verse>
				<verse number="29">“आ, अर एक मनखि तैं देखा, कखि यूई त मसीह नि च? किलैकि जु कुछ भि मिन कैरी छौ, वेन उ सब कुछ मेरा बारा मा बतै दिनी।”</verse>
				<verse number="30">तब लोग नगर बटि निकळि-निकळि के यीशु तैं दिखणु कू ऐनी।</verse>
				<verse number="31">अर इथगा मा चेलों न यीशु बटि बिन्ती कैरी, “गुरुजी, कुछ खै ल्यावा।”</verse>
				<verse number="32">पर वेन ऊं बटि बोलि, “मि मा इन्द्रयो खाणुक च जैका बारा मा तुम नि जणद्‍यां।”</verse>
				<verse number="33">अर चेला आपस मा पूछण लगि गैनी, “अरे, क्या कुई गुरुजी खुणि कुछ खाणु भि लेके ऐ?”</verse>
				<verse number="34">तब यीशु न ऊं बटि बोलि, “मेरु खाणुक यू च कि अपणा भेजण वळे की मनसा का मुताबिक चलु, अर वेका काम तैं पूरु कैरुं।</verse>
				<verse number="35">क्या तुम खुद नि बुल्द्‍यां कि, ‘लवै करण को बगत अभि तक नि ऐ, किलैकि चार मैना पोड़यां छिन?’ पर सुणा, मि तुम बटि बोन्‍नु छौं, अरे जरा ढंगल देखा त सही, कि यू पुंगड़ा लवै खुणि पक्‍की गैनी।</verse>
				<verse number="36">अर लवै करण वळो तैं ध्याड़ि मिलणी च। अर लोगु तैं सदनि को जीवन मिलु, वां खुणि ऊ फसल बटोळ्दीन, ताकि बुतण वळा अर लवै करण वळा दुई मिली के खुशी मणै सैका।</verse>
				<verse number="37">अर इख मा या औखाण ठिक बैठणी च, कि “‘एक बुतदु च, अर दुसरो कटदु च।’</verse>
				<verse number="38">“अर मिन त तुमतै वा लवै करणु कू भेजि, ज्यां मा तुमुन कुई मेनत नि कैरी, पर दुसरो न मेनत कैरी अर तुम भि ऊंकी मेनत का फल मा साझी ह्‍वे ग्यां।”</verse>
				<verse number="39">अर वे सामरी नगर का भौत सरा लोगु न यीशु पर बिस्वास कैरी, किलैकि वीं जनानि न इन गवै दे छै कि “जु कुछ भि मिन कैरी छौ वेन उ सब कुछ मेरा बारा मा बतै दिनी।”</verse>
				<verse number="40">फिर सामरी लोग यीशु का समणि ऐनी, अर वेसे बिन्ती करण लगि गैनी कि, “गुरुजी, हमरा इख ही रुक जा।” तब उ दुई दिन तक उखि बासा रै।</verse>
				<verse number="41">अर वेका वचनों तैं सुणी के भौत सरा लोगु न बिस्वास कैरी।</verse>
				<verse number="42">तब ऊ लोग वीं जनानि बटि बुलण लगि गैनी, “अब हम तेरा बुलयां पर ही बिस्वास नि करद्‍यां, किलैकि हमुन अफि सुण्यालि, अर यू भि जाण्यालि कि सच्‍चि मा यूई मनखि दुनियां तैं छुटकारा देण वळु च।”</verse>
				<verse number="43">फिर यीशु दुई दिनों का बाद उख बटि निकळि के गलील का मुलक मा चलि गै।</verse>
				<verse number="44">यीशु न पैलि ही इन गवै दियाली छै कि, “एक रैबर्या अपणा घौर का लोगु का बीच मा कभि भि आदर-सम्मान नि पौन्दु।”</verse>
				<verse number="45">पर फिर भि जब उ गलील का मुलक मा ऐ, त गलील का लोगु न वेको पूरु आदर-सम्मान कैरी। किलैकि ऊ भि फसह का त्योवार का बगत यरूशलेम मा छा, अर जथगा भि चमत्कार यीशु न उख करिनी ऊं सभि चमत्कारों तैं ऊंन अपणी आंख्यों न देखि छौ।</verse>
				<verse number="46">तब यीशु फिर से गलील का काना गौं मा ऐ, जख वेन पाणि बटि अंगूरों को रस बणै छौ। अर कफरनहूम नगर मा एक राजा को अधिकारी छौ, जैको नौनु बिमार छौ।</verse>
				<verse number="47">जब वे अधिकारी न या बात सुणी, कि यीशु यहूदिया का मुलक बटि गलील का मुलक मा ऐ गैनी, तब उ वेका पास गै, अर वेसे बिन्ती कैरी कि, “गुरुजी, चलि के मेरा नौना तैं ठिक कैरी द्‍या, किलैकि उ मुरण वळु च।”</verse>
				<verse number="48">तब यीशु न वेकू बोलि, “जबरि तक तुम लोग चिन्‍न अर चमत्कार का कामों तैं नि दिखल्या, तबरि तक तुम बिस्वास नि करिल्या।”</verse>
				<verse number="49">अर फिर राजा का अधिकारी न वेसे बोलि, “श्रीमान, मेरा नौना का मुरण से पैलि चला।”</verse>
				<verse number="50">अर यीशु न वेकू बोलि, “जा, तेरु नौनु ज्यून्दु च।” तब वु मनखि यीशु की बात पर बिस्वास कैरिके उख बटि चलि गै।</verse>
				<verse number="51">फिर जब उ अपणा घौर जाण वळा बाटा मा छौ, त वेका नौकर वेतैं ऐके मिलिनी अर बोन्‍न लगि गैनी कि, “तेरु नौनु खूब ह्‍वे गै।”</verse>
				<verse number="52">तब वेन ऊं से पूछी, कि “उ कै बगत बटि ठिक होण लगि गै?” अर ऊंन वेकू बोलि, “ब्याळि दुफरि का एक बजी वेको जौर उतरि गै छौ।”</verse>
				<verse number="53">तब नौना का बुबा तैं या बात याद ऐ गै, कि यू उई बगत छौ, जब यीशु न वेकू बोलि छौ, “तेरु नौनु ज्यून्दु च।” फिर वेन अर वेका घौर का सब लोगु न यीशु पर बिस्वास कैरी।</verse>
				<verse number="54">अर यू दुसरो चमत्कार छौ, जु यीशु न यहूदिया का मुलक बटि ऐके गलील का मुलक मा कैरी।</verse>
			</chapter>
			<chapter number="5">
				<verse number="1">येका बाद यहूदियों को एक त्योवार छौ, इलै यीशु यरूशलेम नगर कू गै।</verse>
				<verse number="2">अर यरूशलेम मा भेड़ नौ का गेट का नजदीक पाणि को एक कुण्ड च, जैतैं इब्रानी भाषा मा बैतहसदा बुल्दिन। अर कुण्ड का चौतरफि पांच बरण्डा छिन।</verse>
				<verse number="3">अर यां मा बिजांम बिमार मनखि जु की, अन्धा, लूला-लंगड़ा छा, ऊ उख पोड़यां रौन्दा छा। [अर ऊ पाणि हिलण का इंतजार मा रौन्दा छा।</verse>
				<verse number="4">किलैकि परमेस्वर को स्वर्गदूत कभि-कभि ही कुण्ड मा उतरि के वे पाणि तैं हिलांदु छौ। अर पाणि हिलण का बाद जु मनखि उखुन्द पैलि जान्दु छौ, उ कन्दरि भि बिमारि मा किलै ना हो, उ खूब ह्‍वे जान्दु छौ।]</verse>
				<verse number="5">अर उख एक मनखि छौ, जु कि अड़तीस सालो बटि बिमार पोड़्यूं छौ।</verse>
				<verse number="6">तब यीशु न वेतैं उख पोड़्यूं देखि अर वेतैं पता चलि, कि यू ईं दसा मा इख भौत दिनों बटि पोड़्यूं च। इलै वेन वे बटि पूछी, “क्या तू खूब होण चान्दी?”</verse>
				<verse number="7">तब वे बिमार मनखि न यीशु तैं जबाब देई, “श्रीमान, मेरा दगड़ा मा इन कुई भि मनखि नि च, कि जब पाणि हिल्ये जौ, त मितैं कुण्ड मा उतारि सैको। अर जबरि तक मि उख पौंछदु तबरि तक दुसरो मिसे पैलि उखुन्द उतरि जान्दु।”</verse>
				<verse number="8">तब यीशु न वेकू बोलि, “उठ, अपणा बिस्तर तैं उठौ, अर चलण-फिरण लगि जा।”</verse>
				<verse number="9">तब उ मनखि एकदम खूब ह्‍वे गै, अर अपणा बिस्तर तैं उठे के चलण-फिरण लगि गै।</verse>
				<verse number="10">अर उ दिन सब्त को दिन छौ, अर ये दिन यहूदी लोग कुछ काम नि करदिन। इलै ऊंन वेकू जु खूब ह्‍वे गै छौ बोलि, “आज त सब्त को दिन च, इलै त्वेकू यू ठिक नि च, कि तू अपणा बिस्तर तैं उठौ।”</verse>
				<verse number="11">पर वे मनखि न ऊंकू बोलि, “जैन मितैं खूब कैरी, वेन ही मिकू बोलि कि ‘अपणा बिस्तर तैं उठौ अर चलण-फिरण लगि जा।’”</verse>
				<verse number="12">ऊं लोगु न वेकू बोलि, “उ मनखि कु च जैन त्वेकू इन बोलि कि ‘अपणा बिस्तर तैं उठौ अर चलण-फिरण लगि जा?’”</verse>
				<verse number="13">पर जु मनखि खूब ह्‍वे गै छौ उ नि जणदु छौ, कि उ कु च। किलैकि वीं जगा पर बिजांम भीड़ छै, इलै यीशु उख बटि चलि गै छौ।</verse>
				<verse number="14">फिर येका बाद यीशु वे मनखि तैं मन्दिर मा मिली अर वेकू बोलि, “देख, तू खूब ह्‍वे गै। अब येका बाद पाप नि कैरी, कखि इन ना हो कि त्वे पर येसे भि जादा विपदा ऐ जौ।”</verse>
				<verse number="15">तब वे मनखि न उख बटि जैके यहूदियों तैं बतै दिनी कि, “जैन मितैं खूब कैरी उ यीशु च।”</verse>
				<verse number="16">अर इलै यहूदी लोग यीशु तैं सतौण लगि गैनी, किलैकि उ यों सब कामों तैं सब्त का दिन पर करदु छौ।</verse>
				<verse number="17">पर यीशु न ऊंकू बोलि, “मेरु पिता अभि तक काम करदु, इलै मि भि काम करदु छौं।”</verse>
				<verse number="18">इलै यहूदी वेतैं और भि जादा जान से मरणे की फिराक मा लगि गैनी। किलैकि उ नऽ त केवल सब्त का दिन की विधि तैं तोड़दु छौ, बल्किन परमेस्वर तैं पिता बोलि के अफु तैं वेका बराबर ठैरै देन्दु छौ।</verse>
				<verse number="19">फिर यीशु न ऊं खुणि बोलि, “मि तुम बटि सच्‍चि ही बोन्‍नु छौं, कि पुत्र अपणी तरफा बटि कुछ नि कैरी सकदु, पर उ पिता तैं जन काम करद दिखदु, ठिक उन्‍नि कामों तैं वु भि करदु, किलैकि जु कुछ भि पिता करदु, उ पुत्र भि करदु।</verse>
				<verse number="20">अर पिता अपणा पुत्र बटि प्यार करदु अर जथगा भि कामों तैं उ खुद करदु, ऊं सभि कामों तैं वु वेतैं दिखान्दु च। अर पिता येसे भि बड़ा-बड़ा कामों तैं कैरिके वेतैं दिखालु, जै से कि तुम हकदक रै जा।</verse>
				<verse number="21">जन कि पिता मुरदो तैं उठौन्दु अर ऊंतैं जीवन देन्दु च, ठिक उन्‍नि पुत्र भि जैतैं चान्दु ऊंतैं जीवन देन्दु।</verse>
				<verse number="22">अर पिता कै को न्याय नि करदु, पर वेन न्याय करण को पूरु अधिकार पुत्र तैं सौंप्याली।</verse>
				<verse number="23">किलैकि जन लोग पिता को आदर करदिन, ठिक उन्‍नि ऊ पुत्र को भि आदर कैरा। जु पुत्र को आदर नि करदु, उ पिता को भि आदर नि करदु, जैन वेतैं भेजि च।”</verse>
				<verse number="24">“अर मि तुम बटि सच्‍चि ही बोन्‍नु छौं, कि जु कुई मेरा वचनों तैं सुणी के मेरु भेजण वळा पर बिस्वास करदु, त जाणि ल्या की सदनि को जीवन वेकू ही च। अब वे पर दण्ड की आज्ञा नि ह्‍वेलि, किलैकि वेन मौत तैं भि पार कैरियाली अर वेतैं सदनि को जीवन मिली गै।</verse>
				<verse number="25">मि तुम बटि सच्‍चि ही बोन्‍नु छौं, कि अब उ बगत औण वळु च बल्किन मा ऐ गै, अर जु लोग आत्मिक जीवन मा मोरि गैनी, ऊ भि परमेस्वर का पुत्र की आवाज तैं सुणला। अर जु कुई वेकी आवाज तैं सुणला ऊ सदनि को जीवन पाला।</verse>
				<verse number="26">किलैकि जन पिता खुद जीवन देण वळु च, ठिक उन्‍नि वेन पुत्र तैं भि यू अधिकार दियूं च, कि उ भि जीवन दे सैको।</verse>
				<verse number="27">अर इख तक की वेन वेतैं न्याय करण को भि अधिकार दियूं च, किलैकि उई मनखि को पुत्र च।</verse>
				<verse number="28">“ईं बात पर ताजुब नि कैरा, किलैकि अब उ बगत औण वळु च, कि जथगा भि लोग मोरि गैनी, ऊ सब वेकी आवाज तैं सुणी के मौत मा बटि ज्यून्दा ह्‍वे जाला।</verse>
				<verse number="29">अर जथगा भि लोगु न भलै का काम करिनी, वु सब सदनि को जीवन जीणु खुणि ज्यून्दा होला। अर जथगा भि लोगु न बुरै का काम करिनी, वु सब दण्ड भुगणु खुणि ज्यून्दा होला।</verse>
				<verse number="30">मि अपणी तरफा बटि कुछ नि कैरी सकदु, पर जन पिता बटि सुणदु छौं, ठिक उन्‍नि न्याय करदु अर मेरु न्याय सच्‍चु च। किलैकि मि अपणी इच्छा तैं ना, बल्किन मा अपणा भेजण वळे की मनसा तैं पूरु करण चान्दु।”</verse>
				<verse number="31">फिर यीशु न इन भि बोलि, “अगर अपणा बारा मा मि खुद ही गवै देण लगि जौलु, त मेरी बात तैं कैन नि मनण।</verse>
				<verse number="32">पर मेरा बारा मा गवै देणु खुणि एक और च। अर मि जणदु छौं, कि वेकी गवै मेरा बारा मा सच्‍चि च।</verse>
				<verse number="33">अर तुमुन मेरा बारा मा पूछणु कू अपणा लोगु तैं यूहन्‍ना बपतिस्मा देण वळा मा भेजि, अर वेन सच्‍चै की गवै देई।</verse>
				<verse number="34">पर मितैं अपणा बारा मा मनखियों की तरफा बटि गवै की कुई जरुरत नि च। फिर भि मि या बात इलै बतौणु छौं, ताकि तुमतै बचयै जौ।</verse>
				<verse number="35">अर यूहन्‍ना त तुम लोगु का बीच मा जळदु अर चमकदु द्‍यू जन छौ, अर वेका उज्याळा मा कुछ बगत तक तुमतै मगन होण अच्छु लगि।</verse>
				<verse number="36">पर ज्वा मेरी गवै च, या यूहन्‍ना की गवै से भि बड़ी च, किलैकि जु-जु काम मि मा पिता का द्‍वारा सौंप्यां छिन, याने कि जु-जु काम मि करदु वु मेरा गवा छिन, अर वु इन साबित करदिन कि पिता न मितैं भेज्यूं च।</verse>
				<verse number="37">अर पिता जैन मितैं भेज्यूं च, वेन खुद ही मेरी गवै देई च, पर तुमुन नऽ त कभि वेकी आवाज सुणी, अर ना ही वेको रुप देखि च।</verse>
				<verse number="38">अर वेका वचनों मा तुम टिक्यूं नि रौन्द्‍यां, किलैकि जैतैं वेन भेज्यूं च तुम वे पर बिस्वास नि करद्‍यां।</verse>
				<verse number="39">“तुम पवित्रशास्‍त्र को मनन करद्‍यां, किलैकि तुम लोग समझद्‍यां, कि ये मा तुमतै सदनि को जीवन मिलदु, पर यू ही शास्‍त्र मेरी गवै देन्दिन।</verse>
				<verse number="40">फिर भि तुम सदनि को जीवन पौण कू मि मू नि औण चन्द्‍यां।</verse>
				<verse number="41">“मि मनखियों बटि आदर-सम्मान नि चान्दु।</verse>
				<verse number="42">पर मि तुमरा बारा मा जणदु छौं, कि तुमरा मनों मा पिता परमेस्वर खुणि प्यार नि च।</verse>
				<verse number="43">मि त अपणा पिता का नौ से अयूं छौं, पर तुम मितैं स्वीकार नि करद्‍यां। अगर कुई दुसरो तुमरा बीच मा अपणा नौ से आलु त तुम वेतैं स्वीकार करिल्या।</verse>
				<verse number="44">तुम जु एक-दुसरा बटि आदर-सम्मान पौण चन्द्‍यां, पर उ आदर-सम्मान जु केवल परमेस्वर की तरफा बटि मिलदु च वेतैं नि चन्द्‍यां, त फिर तुम कनकै मि पर बिस्वास कैरी सकदा छाँ।</verse>
				<verse number="45">तुम इन नि समझा, कि मि पिता का समणि तुम पर दोष लगौलु। किलैकि तुम पर दोष लगौण वळु त मूसा च, अर वेका दियां नियम-कानूनों पर तुमुन बेकार मा अपणी आस लगईं च।</verse>
				<verse number="46">अगर तुम सच्‍चि मा मूसा पर बिस्वास करद्‍यां, त मि पर भि बिस्वास करदा। किलैकि वेन मेरा बारा मा अपणी किताबों मा लिख्यूं च।</verse>
				<verse number="47">पर जब तुम वेकी लिखीं ही बातों पर बिस्वास नि करद्‍यां, त फिर मेरी बातों पर कनकै बिस्वास करिल्या?”</verse>
			</chapter>
			<chapter number="6">
				<verse number="1">फिर येका बाद यीशु अपणा चेलों का दगड़ा तिबिरियास की झील याने कि गलील झील का पल्या छाला नाव मा बैठि के चलि गै।</verse>
				<verse number="2">तब भौत बड़ी भीड़ वेका पिछनै चलण लगि गै, किलैकि जै चमत्कारिक रुप बटि उ बिमारों तैं खूब करदु छौ, ऊंन ऊ देखि छा।</verse>
				<verse number="3">फिर यीशु एक ऊँचा ढौंडा मा चैड़ि अर अपणा चेलों का दगड़ा मा उख बैठि गै।</verse>
				<verse number="4">अर यहूदियों को फसह को त्योवार नजदीक छौ।</verse>
				<verse number="5">जब यीशु न देखि, की एक बड़ी भीड़ वेकी तरफा औणी च, तब वेन अपणा चेला फिलिप्पुस कू बोलि, “यों खुणि खाणु खुणि रुट्‍टी हम कख बटि मोल लाँ?”</verse>
				<verse number="6">पर यू त वेन वेतैं अजमौणु कू बोलि छौ, किलैकि उ खुद ही जणदु छौ कि मिन कन क्या च।</verse>
				<verse number="7">तब फिलिप्पुस न वेतैं जबाब देई, “दुई सौ दीनार की रुट्‍टी भि यों खुणि पूरि नि होलि जु की हरेक तैं जरा-जरा भि मिली जौ।”</verse>
				<verse number="8">तबरि शमौन पतरस को भै अन्द्रियास जु कि चेलों मदि एक छौ, वेन यीशु कू बोलि,</verse>
				<verse number="9">“गुरुजी, इख एक नौनु च, जैमा जौ की पांच रुट्‍टी अर दुई माछा छिन, पर इथगा मा यों लोगु खुणि क्या होण?”</verse>
				<verse number="10">तब यीशु न बोलि, “यों सभि लोगु तैं भ्वीं मा बैठे द्‍या।” अर उख भौत घास छै, इलै ऊ सभि लोग वीं जगा बैठि गैनी। अर ऊं लोगु मा केवल बैख ही लगभग पांच हजार छा।</verse>
				<verse number="11">तब यीशु न रुट्‍टी लेके पिता परमेस्वर को धन्यवाद देई, अर उख बैठयां लोगु मा बांटि दिनी। फिर ठिक उन्‍नि वेन माछों तैं भि लेई अर उन्‍नि कैरी, अर जथगा ऊ चान्दा छा, उथगा ऊंतैं देई।</verse>
				<verse number="12">जब ऊ खै के छक ह्‍वे गैनी, तब यीशु न अपणा चेलों कू बोलि, “बच्यां टुकड़ों तैं बटोळि ल्या कि कुछ भि बेकार नि जौ।”</verse>
				<verse number="13">इलै सब लोगु का खाण का बाद जौ की पांच रुट्‍टीयों मा बटि जु बचि गै छौ, ऊंतैं चेलों न बटोळि अर बारह कण्डो तैं भोरी।</verse>
				<verse number="14">तब यीशु का ये चमत्कार तैं देखि के ऊ लोग बुलण लगि गैनी, “सच्‍चि मा यू त परमेस्वर को उई रैबर्या च, जु कि ईं दुनियां मा औण वळु छौ।”</verse>
				<verse number="15">तब यीशु न यू जाण्यालि कि, “यू लोग मितैं पकड़ी के जबरदस्ती अपणु राजा बणौण चाणा छिन।” इलै उ फिर से इखुली ही ढौंडा मा चलि गै।</verse>
				<verse number="16">जब रुमुक पोड़ि गै, त यीशु का चेला झील का छाला पर गैनी।</verse>
				<verse number="17">अर एक नाव पर चैड़ि के झील का पल्या छाला कफरनहूम नगर जाण लगि गैनी अर अन्धेरु ह्‍वे गै छौ, मगर यीशु तबरि तक भि उख नि पौंछी छौ।</verse>
				<verse number="18">अर फिर भौत तेज बथौं चलण लगि गै, ज्यां से झील का पाणि मा उथल-पुथल मची गै।</verse>
				<verse number="19">जब ऊ नाव चलौन्द-चलौन्द लगभग पांच-छह किलोमीटर चलि गैनी, त ऊंन यीशु तैं झील का पाणि पर चलण अर नाव जनै औन्द देखि। अर ऊ भौत डौऽरी गैनी।</verse>
				<verse number="20">पर यीशु न ऊंकू बोलि, “डौऽरा ना, मि छौं।”</verse>
				<verse number="21">तब चेला वेतैं नाव मा लेणु कू तयार ह्‍वे गैनी, अर वा नाव एकदम से वीं जगा पर पौंछी गै जख ऊंतैं जाण छौ।</verse>
				<verse number="22">अर दुसरा दिन भीड़ ज्वा कि झील का वे छाला मा रै गै छै, ऊंन देखि कि इख त एक ही नाव तैं छोड़ अर कुई दुसरि नि छै। अर ऊ जणदा छा, कि यीशु वीं नाव मा अपणा चेलों का दगड़ा नि गै, बल्किन मा वेका चेला ही गैनी।</verse>
				<verse number="23">(तब तिबिरियास नगर बटि कुछ दुसरि नाव वीं जगा का नजदीक ऐनी, जख ऊंतैं प्रभु यीशु न पिता परमेस्वर को धन्यवाद देण का बाद रुट्‍टी खिलै छै)।</verse>
				<verse number="24">इलै जब भीड़ न देखि, कि इख नऽ त यीशु च अर ना ही वेका चेला, त ऊ भि नावों पर चैड़ि के यीशु तैं खुज्यान्द-खुज्यान्द कफरनहूम नगर मा पौंछी गैनी।</verse>
				<verse number="25">जब ऊं लोगु तैं यीशु झील का पल्या छाला मिली त ऊंन वेतैं पूछी, “गुरुजी, तुम इख कब अयां?”</verse>
				<verse number="26">तब यीशु न ऊंतैं जबाब देई, “मि तुम बटि सच्‍चि ही बोन्‍नु छौं, तुम मितैं इलै नि खुज्याणा छाँ कि तुमुन चमत्कार का काम दिखिनी, पर इलै किलैकि तुमुन रुट्‍टी खै के अपणी भूक मिटै।</verse>
				<verse number="27">तुम नास होण वळा खाणु खुणि ना, बल्किन मा वे खाणुक खुणि मेनत कैरा जु कि सदनि का जीवन तक रौन्दु। अर उ खाणुक मनखि को पुत्र ही तुमतै द्‍यालु, किलैकि यू देणु खुणि पिता परमेस्वर न वेतैं यू अधिकार दियूं च।”</verse>
				<verse number="28">तब ऊंन वे बटि पूछी, “परमेस्वर को काम करणु खुणि हमतै क्या करण चयेणु?”</verse>
				<verse number="29">तब यीशु न ऊंतैं जबाब देई, “परमेस्वर को काम यू च, कि जैतैं वेन भेजि च तुम वे पर बिस्वास कैरा।”</verse>
				<verse number="30">तब ऊंन वेकू बोलि, “तुम हमतै कु जि अदभुत चिन्‍न दिखैल्या, कि हम वेतैं देखि के तुम पर बिस्वास कैरा?</verse>
				<verse number="31">हमरा पितरों न निर्जन जगा मा मन्‍ना खै, जन कि पवित्रशास्‍त्र मा भि लिख्यूं च, “‘वेन ऊंतैं खाणु खुणि स्वर्ग बटि रुट्‍टी देई।’”</verse>
				<verse number="32">तब यीशु न ऊंकू बोलि, “मि तुम बटि सच्‍चि ही बोन्‍नु छौं, कि वा रुट्‍टी स्वर्ग बटि तुमतै मूसा न नि देई, बल्किन मा मेरु पिता ही तुमतै स्वर्ग बटि सच्‍चि रुट्‍टी देन्दु च।</verse>
				<verse number="33">किलैकि परमेस्वर का द्‍वारा दिईं रुट्‍टी वा च, जु स्वर्ग बटि उतरि के दुनियां का लोगु तैं जीवन देन्दी।”</verse>
				<verse number="34">तब ऊंन वेकू बोलि, “गुरुजी, इन्दरि रुट्‍टी हमतै रोज दिया कैरा।”</verse>
				<verse number="35">तब यीशु न ऊंकू बोलि, “जीवन देण वळी रुट्‍टी मि छौं। जु मि मा आलु, उ कभि भूकों नि रालु, अर जु मि पर बिस्वास करलु, उ फिर कभि नि तिसालु।</verse>
				<verse number="36">तुमुन मितैं देखि, पर बिस्वास नि कैरी। अर या बात मिन तुमतै पैलि ही बतैयालि छै।</verse>
				<verse number="37">अर पिता न जु लोग मि मा सौंप्यां छिन, उ सभि मि मा आला। अर जु कुई भि मि मा आला, ऊंतैं मि कभि नि निकळळु।</verse>
				<verse number="38">किलैकि मि अपणी इच्छा तैं ना, बल्किन अपणा भेजण वळे की मनसा तैं पूरि करणु खुणि स्वर्ग बटि उतरयुं छौं।</verse>
				<verse number="39">अर मेरा भेजण वळे की मनसा या च, कि जु कुछ भि वेन मितैं सौंपी, मि वामा बटि कुछ भि नि हरचौं, बल्किन वेतैं आखिरी का दिन मा ज्यून्दु कैरी द्‍यूं।</verse>
				<verse number="40">किलैकि मेरा पिता की मनसा या च, कि जु पुत्र तैं दिखदु अर वे पर बिस्वास करदु, उ सदनि को जीवन पौ अर मि वेतैं आखिरी का दिन मा ज्यून्दु कैरी द्‍यूं।”</verse>
				<verse number="41">तब यहूदी लोग यीशु पर कुड़कुड़ौण लगि गैनी, किलैकि वेन इन बोलि, “ज्वा रुट्‍टी स्वर्ग बटि उतरि, वा मि छौं।”</verse>
				<verse number="42">अर ऊंन बोलि, “क्या यू यूसुफ को नौनु यीशु नि च? अरे, हम त येका ब्वे-बबों तैं भि जणदा छां। फिर यू कनकै बोन्‍नु च कि मि स्वर्ग बटि अयूं छौं?”</verse>
				<verse number="43">तब यीशु न ऊंकू बोलि, “तुम आपस मा नि कुड़कुड़ावा।</verse>
				<verse number="44">मेरा पिता न मितैं भेज्यूं च अर उई लोगु तैं मि मा लेके औन्दु। जबरि तक उ लेके नि अऽ, तबरि तक कुई मि मा नि ऐ सकदु। अर जौं लोगु तैं उ मि मा लेके औन्दु, ऊंतैं मि आखिरी का दिन मा फिर से ज्यून्दु कैरी द्‍यूलु।</verse>
				<verse number="45">अर परमेस्वर का रैबर्यों न लिख्यूं च कि, “‘ऊ सभ्या का सभि परमेस्वर की तरफा बटि सिखये जाला।’ इलै हरेक जु पिता की बात तैं सुणी के सिखदिन, ऊ सभि मि मा औन्दिन।</verse>
				<verse number="46">अर कैन भि पिता तैं नि देखि, पर जु परमेस्वर की तरफा बटि अयूं च, बस वेन ही वेतैं देखि च।</verse>
				<verse number="47">मि तुम बटि सच्‍चि ही बोन्‍नु छौं, कि जु कुई मि पर बिस्वास करदु, सदनि को जीवन वेकू च।</verse>
				<verse number="48">किलैकि जीवन देण वळी रुट्‍टी मि छौं।</verse>
				<verse number="49">अर तुमरा पितरों न निर्जन जगा मा मन्‍ना खै, फिर भि मोरि गैनी।</verse>
				<verse number="50">पर या वा रुट्‍टी च ज्वा स्वर्ग बटि अईं च, ताकि जु कुई वामा बटि खौऽ, उ कभि नि मुरलु।</verse>
				<verse number="51">अर जीवन की रुट्‍टी ज्वा स्वर्ग बटि अईं च, वा मि छौं। अर जु कुई ईं रुट्‍टी मा बटि खालु, उ सदनि खुणि ज्यून्दु रालु। अर ज्वा रुट्‍टी मि दुनियां का लोगु तैं जीवन देणु खुणि देन्दु छौं, उ मेरु बदन च।”</verse>
				<verse number="52">तब ईं बात पर यहूदी आपस मा घपरोळ करण लगि गैनी कि, “यू मनखि कनकै हमतै अपणु बदन खाणु कू दे सकदु च?”</verse>
				<verse number="53">फिर यीशु न ऊंकू बोलि, “मि तुम बटि सच्‍चि ही बोन्‍नु छौं, कि जब तक तुम मनखि का पुत्र का बदन तैं नि खैल्या, अर वेका ल्वे तैं नि पील्या, तब तक तुम मा सदनि को जीवन नि होलु।</verse>
				<verse number="54">इलै जु कुई मेरु बदन तैं खालु अर मेरु ल्वे तैं प्यालु, त सदनि को जीवन वेकू च, अर मि वेतैं आखिरी का दिन मा फिर से ज्यून्दु कैरी द्‍यूलु।</verse>
				<verse number="55">किलैकि मेरु बदन त सच्‍चु खाणु च अर मेरु ल्वे सच्‍चि मा पीणे की चीज च।</verse>
				<verse number="56">इलै जु कुई मेरु बदन तैं खान्दु अर मेरु ल्वे तैं पीन्दु च, उ मि मा अर मि वेमा बसदु छौं।</verse>
				<verse number="57">अर जीवन देण वळा पिता न मितैं भेजि, अर वेकी वजै से मि ज्यून्दु छौं ठिक उन्‍नि उ भि जु मितैं खालु, मेरी वजै से ज्यून्दु रालु।</verse>
				<verse number="58">अर या वा रुट्‍टी च, ज्वा स्वर्ग बटि अईं च। अर या वीं रुट्‍टी का जन नि च, जींतैं तुमरा पितरों न खै फिर भि मोरि गैनी, पर जु कुई स्वर्ग बटि अईं ईं रुट्‍टी तैं खालु उ सदनि ज्यून्दु रालु।”</verse>
				<verse number="59">अर जब यीशु कफरनहूम नगर का एक प्रार्थना भवन मा छौ, तब वेन अपणा उपदेस मा यू सभि बात बुलिनी।</verse>
				<verse number="60">अर यीशु की बातों तैं सुणी के वेका पिछनै चलण वळा भौत सरा लोगु न बोलि, “यों बातों पर चलण त बड़ु कठिन च, यों तैं कु स्वीकार कैरी सकदु?”</verse>
				<verse number="61">पर वेन अपणा मन मा यू जाण्यालि, कि वेका पिछनै चलण वळा लोग आपस मा कुड़कुड़ौण लगि गैनी। इलै वेन बोलि, “क्या तुम यों बातों तैं सुणी के बिस्वास मा डगमगै ग्यां?</verse>
				<verse number="62">अगर जु तुम मनखि का पुत्र तैं स्वर्ग जान्द दिखल्या, जख उ पैलि छौ त फिर तुमरो क्या जि होलु?</verse>
				<verse number="63">अर जीवन देण वळु त परमेस्वर को आत्मा च, पर सरील बटि कुई फैदा नि होन्दु। अर जु बात मिन तुम मा बुलिनी, वु सब परमेस्वर की आत्मा बटि अईं छिन, अर जीवन देण वळी भि छिन।</verse>
				<verse number="64">फिर भि तुम मा इन्द्रया भि छिन, जु मेरी बातों पर बिस्वास नि करदिन।” (यीशु न यू इलै बोलि, किलैकि उ पैलि बटि जणदु छौ, कि ऊ कु छिन जु बिस्वास नि करदिन, अर उ कु च जु वेतैं पकड़ौण वळु च)।</verse>
				<verse number="65">फिर यीशु न बोलि, “इलै मिन तुमतै पैलि बतैयालि छौ, कि जबरि तक पिता की रजामंदी नि हो तबरि तक कुई भि मि मा नि ऐ सकदु।”</verse>
				<verse number="66">अर ईं बात का बाना वेका पिछनै चलण वळो मा बटि भौत सरा वापिस लौटी गैनी, अर वेका बाद ऊ फिर कभि वेका पिछनै नि गैनी।</verse>
				<verse number="67">तब यीशु न अपणा बारह चेलों बटि पूछी, “क्या तुम भि वापस जाण चन्द्‍यां?”</verse>
				<verse number="68">फिर शमौन पतरस न वेतैं जबाब देई, “हे प्रभु, हमुन कै मा जाण? किलैकि सदनि को जीवन देण वळी बात त तुम मा ही छिन।</verse>
				<verse number="69">अर हम बिस्वास करद्‍यां अर जाण भि ग्यां कि, परमेस्वर का पवित्र जन तुम ही छाँ।”</verse>
				<verse number="70">तब यीशु न ऊंतैं जबाब देई, “क्या मिन तुम बारह तैं नि चुणी? तभि भि तुम मा बटि एक मनखि शैतान च।”</verse>
				<verse number="71">यू वेन शमौन इस्करियोती का नौना यहूदा का बारा मा बोलि। किलैकि उई ऊं बारहों मदि एक छौ, जु की यीशु तैं पकड़ौण वळु छौ।</verse>
			</chapter>
			<chapter number="7">
				<verse number="1">येका बाद यीशु गलील का मुलक मा घूमणु रै। अर उ यहूदिया का मुलक मा जाण नि चान्दु छौ, किलैकि यहूदी लोगु का मुखिया वेतैं मरणे की फिराक मा छा।</verse>
				<verse number="2">तब यहूदियों को तम्बू मा रौण को त्योवार नजदीक छौ।</verse>
				<verse number="3">इलै यीशु का भैयों न वेकू बोलि, “तू इख बटि निकळि के यहूदिया का मुलक मा चलि जा। किलैकि जु चमत्कारिक कामों तैं तू करदी, ऊंतैं तेरा पिछनै चलण वळा भि देखि सैका।</verse>
				<verse number="4">किलैकि अगर कुई नौ कमाण चान्दु त अपणा कामों तैं लुकि-छिपी के नि करदु। ठिक उन्‍नि अगर तू भि यों कामों तैं करदी, त अफ तैं दुनियां का लोगु का समणि परगट कैर।”</verse>
				<verse number="5">यीशु का भै भि वे पर बिस्वास नि करदा छा, इलै ऊंन इन्दरि बात बोलि।</verse>
				<verse number="6">तब यीशु न ऊंकू बोलि, “मेरु बगत त अभि तक नि ऐ, पर त्योवार मा जाणु खुणि तुम खुणि हरेक बगत ठिक च।</verse>
				<verse number="7">अर दुनियां का मनखि तुम बटि बैर नि रखी सकदिन, पर ऊ मि बटि बैर करदिन। किलैकि मि ऊंका बारा मा गवै देन्दु कि ऊंका काम बुरा छिन।</verse>
				<verse number="8">पर तुम ही त्योवार मा जा, मि नि जाणु। किलैकि अभि तक मेरु बगत नि ऐ।”</verse>
				<verse number="9">अर ऊंकू इन बोलि के यीशु गलील का मुलक मा ही रुकी गै।</verse>
				<verse number="10">पर जब यीशु का भै त्योवार मा चलि गैनी, तब उ खुद भि खुलाआम त ना, पर लुकि के उख चलि गै।</verse>
				<verse number="11">अर यहूदियों का मुखिया वेतैं त्योवार मा खुज्याण लगि गैनी अर इन भि पूछी, कि “यीशु कख च?”</verse>
				<verse number="12">तब उख लोगु का बीच मा यीशु का बारा मा खुसुर-पुसुर होण लगि गै। कुछ बोन्‍ना छा, “उ अच्छु मनखि च।” अर कुछ न बोलि, “ना, उ लोगु तैं भरमौन्दु च।”</verse>
				<verse number="13">पर यहूदी मुख्यों का डौऽरा बाना कुई भि वेका बारा मा खुलि के नि बोन्‍नु छौ।</verse>
				<verse number="14">जब त्योवार का अधा दिन बीती गैनी, तब यीशु मन्दिर मा जैके उपदेस देण लगि गै।</verse>
				<verse number="15">तब यहूदी हैरान ह्‍वेके बुलण लगि गैनी, “यू त कभि शास्‍त्र की पाठसाला मा नि गै, त फिर येतैं इथगा शिक्षा कख बटि मिली?”</verse>
				<verse number="16">तब यीशु न ऊंतैं जबाब देई, “मेरु उपदेस मेरु अपणु नि च, पर मेरा भेजण वळा को च।</verse>
				<verse number="17">अर अगर कुई परमेस्वर की मनसा पर चलण चान्दु, त उ यू जाणि जालु, कि यू उपदेस परमेस्वर की तरफा बटि च, या फिर मि अपणी तरफा बटि बोन्‍नु छौं।</verse>
				<verse number="18">अर जु कुई अपणी तरफा बटि बुल्दु, उ त केवल अपणु ही आदर-सम्मान चान्दु, पर जु अपणा भेजण वळा को आदर-सम्मान चान्दु, त वेमा कुई कपट नि च।</verse>
				<verse number="19">क्या मूसा न तुमतै नियम-कानून नि दिनी? फिर भि तुम मा बटि कुई भि ऊं नियम-कानूनों पर नि चलदु। त फिर तुम मितैं किलै मरण चाणा छाँ?”</verse>
				<verse number="20">तब लोगु न वेकू बोलि, “त्वे पर खबेस लग्यूं च। अर कु च जु त्वेतै मरण चाणु च?”</verse>
				<verse number="21">यीशु न ऊंतैं जबाब देई, “मिन सब्त का दिन मा एक चमत्कारिक काम कैरी, अर वेतैं देखि के तुम सब हकदक रै ग्यां।</verse>
				<verse number="22">मूसा न त तुमतै बच्‍चा पैदा होण का दिन बटि लेके आठवां दिन मा ऊंका खतना का रिवाज तैं पूरु करणु को नियम-कानून देई। इलै तुम अगर उ आठु दिन चै सब्त को दिन भि किलै नि हो, तुम ऊं खुणि खतना का रिवाज तैं पूरु करद्‍यां। [सच्‍च त यू च, कि खतना करण मूसा की तरफा बटि नि च, बल्किन मा रिवाज त पितरों बटि चलदि औणी च।]</verse>
				<verse number="23">अर मूसा को दियूं नियम-कानून नि टळै जौ, इलै तुम सब्त का दिन भि अपणा नौनु को खतना करद्‍यां। जब कि मिन सब्त का दिन मा एक मनखि तैं पूरि तरौं से खूब कैरियाली, त फिर तुम मि पर किलै गुस्सा कना छाँ?</verse>
				<verse number="24">अर तुम कै को मुख देखि के वेको न्याय नि कैरा, बल्किन सच्‍चु न्याय कैरा।”</verse>
				<verse number="25">तब कुछ लोग जु यरूशलेम नगर का छा, ऊ बोन्‍न लगि गैनी, कि “क्या यू उई मनखि नि च, जैतैं ऊ मरणे की फिराक मा छिन?</verse>
				<verse number="26">पर देखा, उ त खुलाआम बात कनु च अर कुई वे बटि कुछ नि बुल्दु, क्या अधिकारीयों तैं सच्‍चि मा पता चलि गै कि यू ही मसीह च?</verse>
				<verse number="27">जब मसीह आलु त, कैतैं भि पता नि चलण की उ कखो च। पर ये यीशु तैं त हम अच्छी तरौं से जणद्‍यां, कि यू कखो च।”</verse>
				<verse number="28">तब यीशु न मन्दिर मा उपदेस देण का बगत ऊँची आवाज मा बोलि, “तुम जणदा छाँ, कि मि कु छौं अर कख बटि अयूं छौं। पर मि अपणी मरजी से नि अयूं, पर मेरु भेजण वळु सच्‍चु च अर वेतैं तुम नि जणद्‍यां।</verse>
				<verse number="29">पर मि वेतैं जणदु छौं, किलैकि मि वेकी तरफा बटि अयूं छौं अर वेन ही मितैं भेजि च।”</verse>
				<verse number="30">यू सुणी के ऊ लोग यीशु तैं पकड़णे की कोसिस करण लगि गैनी, पर कुई भि वेतैं पकड़ी नि पै। किलैकि वेको बगत अभि तक नि ऐ छौ।</verse>
				<verse number="31">फिर भि भीड़ मा बटि भौत सरा लोगु न वे पर बिस्वास कैरी, अर ऊंन बोलि कि, “जब मसीह आलु, त क्या उ येसे भि जादा चमत्कारिक कामों तैं करलु?”</verse>
				<verse number="32">अर जब फरीसी दल का लोगु न भीड़ का लोगु तैं यीशु का बारा मा खुसुर-पुसुर करद सुणी, तब मुख्य पुरोहितों न अर फरीसियों न यीशु तैं पकड़णु खुणि मन्दिर का सिपै भेजिनि।</verse>
				<verse number="33">तब यीशु न लोगु कू बोलि, “मि कुछ बगत तक ही तुमरा दगड़ा मा छौं, अर फिर अपणा भेजण वळा का पास चलि जौलु।</verse>
				<verse number="34">तब तुम मितैं खुजैल्या, पर मि तुमतै नि मिललु। अर जख मि रौलु उख तुम नि ऐ सकद्‍यां।”</verse>
				<verse number="35">तब यहूदी आपस मा बुलण लगि गैनी कि, “यू मनखि कख जाण वळु च, कि यू हमतै नि मिललु? क्या यू ऊं यहूदी लोगु का बीच मा जालु जु तितर-बितर ह्‍वेके रौणा छिन, अर ऊंका बीच मा जैके ऊं लोगु तैं उपदेस द्‍यालु जु यहूदी जाति का नि छिन?</verse>
				<verse number="36">अर या क्या बात च कि ज्वा वेन बोलि, कि ‘तुम मितैं खुजैल्या, पर मि तुमतै नि मिललु’ अर ‘जख मि रौलु उख तुम नि ऐ सकद्‍यां?’”</verse>
				<verse number="37">तब त्योवार को आखिरी दिन ऐ, जु की खास दिन छौ। फिर यीशु खड़ु ह्‍वे अर ऊँची आवाज मा बुलण लगि गै, “जु कुई तिसळु च, उ मेरा पास अऽ अर पेई ल्यो।</verse>
				<verse number="38">अर जु मि पर बिस्वास करदिन, जन कि पवित्रशास्‍त्र मा लिख्यूं च, उन्‍नि ऊंका मनों बटि भि जीवन देण वळा पाणि का गाड-गदिना बुगण लगि जाला।”</verse>
				<verse number="39">यीशु न यों बातों तैं पवित्र आत्मा का बारा मा बोलि, जु की वे पर बिस्वास करण वळो तैं बाद मा मिलण वळु छौ। अर अभि तक वे पवित्र आत्मा तैं नि दिये गै छौ, किलैकि यीशु तैं अभि तक पूरु आदर-सम्मान नि मिली छौ।</verse>
				<verse number="40">तब यों बातों तैं सुणी के भीड़ मदि कुछ लोग बुलण लगि गैनी कि, “सच्‍चि मा यू ही परमेस्वर को उ रैबर्या च।”</verse>
				<verse number="41">तब और लोगु न बोलि कि, “यू ही मसीह च।” पर कुछ लोगु न बोलि, “क्या मसीह गलील बटि आलु?</verse>
				<verse number="42">क्या पवित्रशास्‍त्र मा इन नि लिख्यूं च कि, ‘मसीह राजा दाऊद का वंश मदि अर बैतलहम गौं मा पैदा होलु, जख राजा दाऊद रौन्दु छौ?’”</verse>
				<verse number="43">इलै यीशु का बाना लोगु का बीच मा फूट पोड़ि गै।</verse>
				<verse number="44">तब ऊं लोगु मा बटि कुछ वेतैं पकड़ण चान्दा छा, पर कुई भि वेतैं पकड़ी नि पै।</verse>
				<verse number="45">फिर मन्दिर का सिपै लौटी के मुख्य पुरोहितों अर फरीसी दल का लोगु का पास ऐ गैनी। तब ऊंन मन्दिर का सिपयों बटि पूछी, “तुम वेतैं लेके किलै नि अयां?”</verse>
				<verse number="46">अर मन्दिर का सिपयों न जबाब देई कि, “जन बातों तैं उ मनखि बोन्‍नु छौ, उन्दरि बात त कैन कभि भि नि बुलिनी।”</verse>
				<verse number="47">ये पर फरीसी दल का लोगु न ऊंकू बोलि, “क्या वेन तुमतै भि भरमैयेली?</verse>
				<verse number="48">अर क्या हमरा मुख्यों या फरीसियों मा बटि कैन भि वे पर बिस्वास कैरी?</verse>
				<verse number="49">पर ईं भीड़ का लोग पर असगार लग्यूं च, किलैकि ऊ नियम-कानून तैं नि जणदिन।”</verse>
				<verse number="50">तब नीकोदिमुस न जु कि मुख्यों मदि एक छौ, अर पैलि भि यीशु तैं मिलणु कू ऐ छौ, वेन ऊंकू बोलि,</verse>
				<verse number="51">“क्या हमरा नियम-कानून कै भि मनखि तैं बिना वेकी पूरि बात सुणयां अर बिना इन जणयां, कि उ करदु क्या च, क्या वेतैं पैलि ही दोषी ठैरै देन्दी?”</verse>
				<verse number="52">तब ऊंन नीकोदिमुस तैं जबाब देई कि, “क्या तू भि गलील का मुलक को रौण वळु छैई? पवित्रशास्‍त्र मा खुजै के देख ले, कि गलील का मुलक बटि कुई भि परमेस्वर को रैबर्या परगट नि ह्‍वे सकदु।”</verse>
				<verse number="53">[तब सभि अपणा-अपणा घौर वापिस चलि गैनी।</verse>
			</chapter>
			<chapter number="8">
				<verse number="1">अर यीशु जैतून नौ का पाड़ पर चलि गै।</verse>
				<verse number="2">रात खुलदि यीशु मन्दिर मा ऐ। तब सभि लोग वेका पास ऐनी अर उ बैठि के ऊंतैं उपदेस देण लगि गै।</verse>
				<verse number="3">तब शास्‍त्री अर फरीसी दल का लोग एक जनानि तैं लेके ऐनी, ज्वा कि गळत सम्बन्ध रखण दौं पकड़ै गै। अर वीं जनानि तैं लोगु का बीच मा खड़ु कैरिके यीशु कू बोलि,</verse>
				<verse number="4">“गुरुजी, या जनानि गळत सम्बन्ध रखण बगत पकड़ै गै।</verse>
				<verse number="5">अर नियम-कानून मा मूसा न हमतै आज्ञा देई च, कि ‘इन्दरि जनानि पर ढुंग्यो लगै के जान से मार दिये जौ।’ पर तुम ईं जनानि का बारा मा क्या बुल्द्‍यां?”</verse>
				<verse number="6">ऊंन वेतैं अजमौणु कू या बात बोलि, ताकि यीशु पर इळजाम लगै सैका। पर यीशु मूड़ी-झुकि के अपणा अंगुळळ भ्वीं मा कुछ लिखण लगि गै।</verse>
				<verse number="7">जब ऊ वेतैं बार-बार पूछणा रैनी, तब यीशु न खड़ु ह्‍वेके ऊंकू बोलि, “अगर तुम मदि कुई इन्द्रयो च जैन कुई पाप नि कैरी हो, त उई पैलि वीं पर ढुंगे मारो।”</verse>
				<verse number="8">अर उ फिर से झुकि के भ्वीं मा लिखण लगि गै।</verse>
				<verse number="9">जब ऊं लोगु न या बात सुणी त बड़ा लोगु से लेके छुटा तक एक-एक कैरिके उख बटि चलि गैनी, अर यीशु इखुली रै गै। अर वा जनानि भि वेका समणि उखि खड़ि रै</verse>
				<verse number="10">तब यीशु न खड़ु ह्‍वेके वींकू बोलि, “हे भुलि, ऊ सभि कख गैनी? क्या कैन भि तुमतै दोषी नि ठैरै?”</verse>
				<verse number="11">अर वीं जनानि न बोलि, “श्रीमान, कैन भि ना।” तब यीशु न बोलि, “मि भि तुमतै दोषी नि ठैरान्दु, जा अर फिर से पाप नि कैरी।”]</verse>
				<verse number="12">फिर यीशु न लोगु कू बोलि, “दुनियां को उज्याळु मि छौं। अर जु कुई भि मेरा पिछनै चललु, उ अन्धेरा मा नि रालु, बल्किन मा उ जीवन का उज्याळा तैं पालु।”</verse>
				<verse number="13">तब फरीसी दल का लोगु न वेकू बोलि, “तू अपणी गवै अफि देन्दी, इलै तेरी गवै सच्‍चि नि च।”</verse>
				<verse number="14">फिर यीशु न ऊंतैं जबाब देई, “हालांकि मि अपणी गवै अफि देन्दु छौं, फिर भि मेरी गवै सच्‍चि च, किलैकि मि जणदु छौं, कि मि कख बटि अयूं अर कख कू जाणु छौं। पर तुम नि जणद्‍यां की मि कख बटि अयूं अर कख कू जाणु छौं।</verse>
				<verse number="15">अर तुम दुनियां की रीति का मुताबिक न्याय करद्‍यां, पर मि कै को न्याय नि करदु।</verse>
				<verse number="16">अगर मि न्याय करलु, त मेरु न्याय सच्‍चु च। किलैकि मि इखुली न्याय नि करदु, बल्किन मा मि अर मेरु पिता, जैन मितैं भेजि उ भि मेरा दगड़ा मा च।</verse>
				<verse number="17">अर तुमरा नियम-कानून मा भि लिख्यूं च कि, ‘अगर दुई जन कै बात का बारा मा गवै देन्दिन, त वा बात सच्‍चि होन्दी।’</verse>
				<verse number="18">अर मि अपणी गवै अफि देन्दु छौं, अर जै पिता न मितैं भेजि च, उ भि मेरा बारा मा गवै देन्दु।”</verse>
				<verse number="19">अर ऊंन यीशु तैं पूछी, “तेरु पिता कख च?” तब यीशु न जबाब देई, “नऽ त तुम मितैं जणद्‍यां अर ना ही मेरा पिता तैं। अगर जु तुम मितैं जणदा, त मेरा पिता तैं भि जणदा।”</verse>
				<verse number="20">अर यीशु न यों सब बातों तैं अपणा उपदेस मा बोलि अर वे बगत उ वीं जगा मा छौ जख मा दान-पेटि रखी रौनदिन, पर तभि भि कैन यीशु तैं नि पकड़ी, किलैकि वेको बगत अभि तक नि ऐ छौ।</verse>
				<verse number="21">तब यीशु न फिर ऊंकू बोलि, “मि त जाणु छौं। अर तुम मितैं खुजैल्या अर अपणा पापों की बिना माफी पयां मोरि जैल्या। अर जख मि जाणु छौं, उख तुम नि ऐ सकद्‍यां।”</verse>
				<verse number="22">ईं बात पर यहूदियों न आपस मा बोलि, “क्या उ कखि अपणी हत्या त नि करण वळु च? किलैकि वेन बोलि, ‘जख मि जाणु छौं, उख तुम नि ऐ सकद्‍यां।’”</verse>
				<verse number="23">तब यीशु न ऊंकू बोलि, “तुम मूड़ी का रौण वळा छाँ, पर मि मथि को छौं। अर तुम ईं दुनियां का छाँ, पर मि ईं दुनियां को नि छौं।</verse>
				<verse number="24">इलै मिन तुमकु बोलि, कि तुम अपणा पापों की बिना माफी पयां मोरि जैल्या। किलैकि अगर तुम बिस्वास नि करद्‍यां, की मि उई छौं, त फिर तुम अपणा पापों मा मोरि जैल्या।”</verse>
				<verse number="25">अर ऊंन वेतैं पूछी, “तू कु छैई?” तब यीशु न ऊंकू बोलि, “मि पैलि बटि जैका बारा मा तुम मा बुल्दी औणु छौं, मि उई छौं।</verse>
				<verse number="26">अर उन त मि मा तुमरा बारा मा बुलणु खुणि अर तुम पर दोष लगाणु खुणि भौत कुछ च। पर मेरु भेजण वळु सच्‍चु च, अर जु बात मिन वे बटि सुणी छिन, ऊं ही बातों तैं मि दुनियां का लोगु तैं बतौन्दु।”</verse>
				<verse number="27">पर ऊ नि समझिनी, कि यीशु ऊंतैं पिता परमेस्वर का बारा मा बतौणु च।</verse>
				<verse number="28">इलै वेन ऊंकू बोलि, “जब तुम मनखि का पुत्र तैं ऊँचा पर चड़ैल्या, तब तुमतै पता चललु, कि मि उई छौं अर मि अपणा अधिकार बटि कुछ नि करदु, पर जन मेरा पिता परमेस्वर न मितैं सिखै, ठिक उन्‍नि मि बुल्दु छौं।</verse>
				<verse number="29">अर मेरु भेजण वळु मेरा दगड़ा मा च। अर वेन मितैं इखुली नि छोड़ि, किलैकि मि हमेसा ऊं कामों तैं करदु छौं, जौं से पिता खुश होन्दु।”</verse>
				<verse number="30">अर जब यीशु यों बातों तैं बुलणु छौ, तब भौत सरा लोगु न वे पर बिस्वास कैरी।</verse>
				<verse number="31">तब यीशु न ऊं यहूदियों बटि जौन वे पर बिस्वास कैरी, ऊंकू बोलि, “अगर तुम मेरा वचनों का मुताबिक जीवन बितैल्या, त सच्‍चि मा मेरा चेला ह्‍वेल्या।</verse>
				<verse number="32">तब तुम सच्‍चै तैं जणिल्या, अर वा सच्‍चै तुमतै आजाद करली।”</verse>
				<verse number="33">पर ऊंन वेतैं जबाब देई, कि “हम त अब्राहम का वंश मदि छां, अर कभि भि कै का गुलाम नि रयां। त फिर तू कनकै बोन्‍नि, कि ‘तुम आजाद ह्‍वे जैल्या?’”</verse>
				<verse number="34">यीशु न ऊंतैं जबाब देई, “मि तुम बटि सच्‍चि ही बोन्‍नु छौं, कि जु कुई पाप करदु, उ पाप को ही गुलाम च।</verse>
				<verse number="35">अर गुलाम त सदनि अपणा मालिक का घौर मा नि रौन्दु, पर नौनु सदनि दगड़ा मा रौन्दु च।</verse>
				<verse number="36">इलै पुत्र अगर जु तुमतै आजाद करलु, त सच्‍चि मा तुम आजाद ह्‍वे जैल्या।</verse>
				<verse number="37">अर मि जणदु छौं, कि तुम अब्राहम का वंश मदि छाँ। फिर भि तुम मितैं मरण चाणा छाँ, किलैकि मेरा वचन तैं तुम अपणा मनों मा स्वीकार नि करद्‍यां।</verse>
				<verse number="38">अर मि त ऊं बातों तैं बोन्‍नु छौं, जु मिन अपणा पिता परमेस्वर का इख दिखिनी। पर तुम त ऊं कामों तैं करद्‍यां, जु तुमुन अपणा बुबा बटि सुणिनी।”</verse>
				<verse number="39">तब ऊंन यीशु कू बोलि, “हमरु बुबा त अब्राहम च।” पर यीशु न ऊंकू बोलि, “अगर जु तुम अब्राहम का नौना होन्दा, त वेका जन काम भि करदा।</verse>
				<verse number="40">पर जै मनखि न परमेस्वर की तरफा बटि सुणी के तुमतै सच्‍चै बतै, वेतैं याने कि मितैं, तुम मरण चाणा छाँ। पर अब्राहम न त इन कभि नि कैरी।</verse>
				<verse number="41">पर तुम त अपणा बुबा का जन काम करदा छाँ।” तब ऊं लोगु न वेकू बोलि, “हम गळत सम्बन्ध रखी के नि जनम्यां, पर हमरु त एक ही बुबा च, अर उ परमेस्वर च।”</verse>
				<verse number="42">तब यीशु न ऊंकू बोलि कि, “अगर परमेस्वर तुमरो पिता होन्दु, त तुम मि बटि प्यार करदा, किलैकि मि परमेस्वर मा बटि ही निकळि के इख अयूं छौं। अर मि अपणी तरफा बटि नि अयूं, पर वेन ही मितैं भेजि च।</verse>
				<verse number="43">जु मि बोन्‍नु छौं, तुम यों बातों तैं किलै नि समझणा? इन इलै च, किलैकि तुम मेरा वचनों तैं सुणी नि सकद्‍यां।</verse>
				<verse number="44">अर तुम अपणा बुबा शैतान की तरफा बटि छाँ अर वेकी मनसा तैं पूरि करण चान्दा छाँ। उ त पैलि बटि हत्यारू च अर सच्‍चै पर नि टिक्यूं रौन्दु, किलैकि सच्‍चै वेमा छैई नि च। अर जब उ झूठ्‍ठ बुल्दु, त अपणा ही सभौ बटि बुल्दु। किलैकि उ त झूठ्‍ठु च, बल्किन मा झूठ्‍ठों को बुबा च।</verse>
				<verse number="45">पर मि जु तुम बटि सच्‍च बोन्‍नु छौं, इलै तुम मि पर बिस्वास नि करद्‍यां।</verse>
				<verse number="46">तुम मा बटि इन कु च जु मितैं पापि ठैरै सकदु? मि जु सच्‍च बोन्‍नु छौं, त तुम मेरु बिस्वास किलै नि करद्‍यां?</verse>
				<verse number="47">जु परमेस्वर का छिन, ऊ परमेस्वर का वचनों तैं सुणदिन, पर तुम परमेस्वर का नि छाँ इलै तुम नि सुणद्‍यां।”</verse>
				<verse number="48">तब यों बातों तैं सुणी के यहूदियों न यीशु कू बोलि, “क्या हम ठिक नि बुल्द्‍यां कि तू सामरी छैई, अर त्वे पर खबेस लग्यूं च?”</verse>
				<verse number="49">पर यीशु न जबाब देई, “मि पर खबेस नि लग्यूं। अर मि त अपणा पिता को आदर-सम्मान करदु छौं, पर तुम त मितैं कुछ भि नि समझद्‍यां।</verse>
				<verse number="50">अर मि अपणु आदर-सम्मान नि चान्दु, पर एक च जु मेरु आदर-सम्मान चान्दु अर उई न्याय भि करदु च।</verse>
				<verse number="51">मि तुम बटि सच्‍चि ही बोन्‍नु छौं, कि अगर कुई मेरा वचनों का मुताबिक चलदु, त उ कभि नि मुरलु।”</verse>
				<verse number="52">तब यहूदियों न यीशु कू बोलि, “अब हमतै पूरु पता चलि गै, कि त्वे पर खबेस ही लग्यूं च। किलैकि अब्राहम त मोरि गै अर परमेस्वर का रैबर्या भि मोरि गैनी। पर तू बुल्दी कि, ‘अगर कुई मेरा वचनों का मुताबिक चलदु, त उ कभि नि मुरलु।’</verse>
				<verse number="53">हमरु बुबा अब्राहम त मोरि गै। क्या तू वेसे भि महान छैई? अर उन्‍नि परमेस्वर का रैबर्या भि मोरि गैनी। त तू खुद तैं क्या समझदी?”</verse>
				<verse number="54">तब यीशु न जबाब देई, “अगर मि अपणी बडै अफि कैरुं, त मेरी बडै को कुई मतलब नि च। पर मेरी बडै करण वळु त मेरु पिता च, जैतैं तुम अपणु परमेस्वर मणद्‍यां।</verse>
				<verse number="55">फिर भि तुम त वेतैं नि जणद्‍यां, पर मि वेतैं जणदु छौं। अगर जु मि बुल्दु, कि मि वेतैं नि जणदु, त मि भि तुमरि तरौं झूठ्‍ठु ठैरलु। पर मि वेतैं जणदु छौं अर वेका ही वचनों का मुताबिक चलदु छौं।</verse>
				<verse number="56">तुमरो बुबा अब्राहम मेरु दिन दिखणे की आस मा भौत खुश छौ। अर वेन देखि अर खुशी मणै।”</verse>
				<verse number="57">तब यहूदियों न यीशु कू बोलि, “अभि तक तू पचास साल को भि नि ह्‍वे, त फिर तिन कनकै अब्राहम तैं देखि?”</verse>
				<verse number="58">अर यीशु न ऊंकू बोलि, “मि तुम बटि सच्‍चि बोन्‍नु छौं, कि जब अब्राहम पैदा भि नि ह्‍वे छौ, वेसे पैलि बटि मि छौं।”</verse>
				<verse number="59">तब ऊंन यीशु पर मरणु कू ढुंगा उठैनि, पर यीशु न खुद तैं छिपै अर मन्दिर बटि निकळि गै।</verse>
			</chapter>
			<chapter number="9">
				<verse number="1">अर जब यीशु अर वेका चेला जाणा छा, तब वेन एक मनखि तैं देखि, जु कि जनम बटि ही अन्धु छौ।</verse>
				<verse number="2">तब वेका चेलों न वे बटि पूछी, “गुरुजी, कैन पाप कैरी छौ कि यू अन्धु जनमी? येन या येका ब्वे-बबों न?”</verse>
				<verse number="3">वेन जबाब देई, “नऽ त येन अर ना ही येका ब्वे-बबों का पापों का कारण, पर यू त अन्धु इलै जनमी, ताकि ये मनखि मा परमेस्वर को काम परगट किये जौ।</verse>
				<verse number="4">अर जबरि तक दिन च तबरि तक यू जरुरी च कि हम वेका कामों तैं पूरु कैरी द्‍या जैन मितैं भेजि च, किलैकि देखा, रात होण वळी च तब कुई भि काम नि कैरी सकदु।</verse>
				<verse number="5">अर जब तक मि दुनियां मा छौं, तबरि तक मि दुनियां को उज्याळु छौं।”</verse>
				<verse number="6">अर इन बोलि के यीशु न भूयां मा थूकि अर वे थूक तैं माटा का दगड़ा मा भिजे। अर वे माटा तैं वेन वेका आंख्यों पर लगै।</verse>
				<verse number="7">फिर वेन वे खुणि बोलि, “जा, अर शीलोह नौ का कुण्ड मा जैके ध्वे ले।” (शीलोह जैको मतलब च “भेज्यूं”)। अर वेन जैके ध्वेइ। अर जब उ लौटणु छौ, त वेतैं सब कुछ दिखैणु छौ।</verse>
				<verse number="8">तब वेका पड़ोसीयों न अर जौं लोगु न वेतैं पैलि भीक मंगण देखि छौ, ऊ बोन्‍न लगि गैनी, “क्या यू उई नि च, जु बैठि के भीक मंगदु छौ?”</verse>
				<verse number="9">तब कुछ लोगु न बोलि, “यू उई च।” पर कुछ औरु न बोलि, “ना, यू कुई दुसरो च, जु की वेका जन ही दिखेन्दु।” पर वे मनखि न बोलि, “मि उई छौं।”</verse>
				<verse number="10">तब ऊंन वेकू बोलि, “तू कनकै दिखण लगि गै?”</verse>
				<verse number="11">वेन जबाब देई, “यीशु नौ का एक मनखि न माटा तैं भिजे के मेरा आंख्यों मा लगै अर मिकू बोलि, ‘शीलोह कुण्ड मा जैके ध्वे ले।’ इलै मिन जैके ध्वेइ अर दिखण लगि ग्यों।”</verse>
				<verse number="12">तब ऊंन वे बटि पूछी, “उ मनखि कख च?” वेन बोलि, “मि नि पता।”</verse>
				<verse number="13">तब लोग वे मनखि तैं जु पैलि अन्धु छौ, वेतैं फरीसी दल का लोगु का पास लि गैनी।</verse>
				<verse number="14">किलैकि जै दिन यीशु न माटा तैं भिजे के अन्धा का आंख्यों तैं खूब कैरी छौ, वु सब्त को दिन छौ।</verse>
				<verse number="15">फिर फरीसी दल का लोगु न भि वेतैं पूछी, “तू कनकै दिखण लगि गै?” तब वेन ऊंतैं जबाब देई, “वेन माटा तैं भिजे अर मेरा आंख्यों पर लगै, फिर मिन ध्वेइ अर दिखण लगि ग्यों।”</verse>
				<verse number="16">ईं बात का बाना कुछ फरीसी बुलण लगि गैनी कि, “यू मनखि परमेस्वर की तरफा बटि नि अयूं, किलैकि यू सब्त का दिन तैं मणदु ही नि च।” पर दुसरा लोगु न बोलि, “कुई पापि मनखि इन चिन्‍न-चमत्कार कनकै कैरी सकदु?” इलै ऊं लोगु का बीच मा फूट पोड़ि गै।</verse>
				<verse number="17">तब जु अन्धु छौ, वेकू फरीसी दल का लोगु न बोलि, “जैन तेरी आंख्यों तैं खूब कैरी, वेका बारा मा तू क्या बुल्दी?” वेन बोलि, “उ त परमेस्वर को एक रैबर्या च।”</verse>
				<verse number="18">पर यहूदियों का मुख्यों तैं फिर भि बिस्वास नि ह्‍वे, कि उ अन्धु छौ अर अब दिखण लगि गै। इलै ऊंन वेका ब्वे-बबों तैं बुलै।</verse>
				<verse number="19">अर ऊंतैं पूछी, “क्या यू तुमरो ही नौनु च, जैका बारा मा तुम इन बुल्दा छाँ, की उ त जनम बटि ही अन्धु छौ? फिर अब उ कनकै दिखण लगि गै?”</verse>
				<verse number="20">तब वेका ब्वे-बबों न जबाब देई, “हम त जणदा छां कि यू हमरु नौनु च अर अन्धु ही जनमी छौ।</verse>
				<verse number="21">पर हम यू नि जणद्‍यां, कि उ कनकै दिखण लगि गै अर यू भि नि जणद्‍यां, कि कैन वेतैं खूब कैरी। पर तुम वेतैं ही पूछील्या, किलैकि अब उ बड़ु ह्‍वे गै अर उ अपणा बारा मा अफि बोलि सकदु च।”</verse>
				<verse number="22">वेका ब्वे-बाब यहूदियों का मुख्यों बटि डौऽरदा छा, इलै ऊंन इन बोलि। किलैकि यहूदियों का मुख्यों न एक सला बणैयालि छै, कि जु कुई भि इन कबूल कैरी द्‍यालु कि यीशु ही मसीह च, वेतैं हमेसा खुणि प्रार्थना भवन बटि भैर कैरी दिये जालु।</verse>
				<verse number="23">इलै वेका ब्वे-बबों न बोलि, “उ बड़ु ह्‍वे गै, तुम वेतैं ही पूछील्या।”</verse>
				<verse number="24">तब ऊंन वे मनखि तैं, जु की पैलि अन्धु छौ, दुसरि दौं बुलै अर वेकू बोलि, “परमेस्वर की कसम खै के सच्‍च बोल। अर हम त जणदा छां, कि उ एक पापि मनखि च।”</verse>
				<verse number="25">तब वेन जबाब देई, “मि नि जणदु, कि उ मनखि पापि च या नि च। पर मि त केवल इथगा जणदु, कि मि अन्धु छौ अर अब दिखण लगि ग्यों।”</verse>
				<verse number="26">तब ऊंन वेतैं पूछी, “वेन तेरा दगड़ा मा क्या-क्या कैरी? अर कनकै वेन तेरी आंख्यों तैं खूब कैरी?”</verse>
				<verse number="27">अर वेन ऊंकू बोलि, “मिन तुम मा यू पैलि भि बोलियालि छौ, पर तुमुन नि सुणी। अब दुसरि दौं किलै सुनण चाणा छाँ? क्या तुम भि वेका चेला होण चन्द्‍यां?”</verse>
				<verse number="28">फिर ऊ वेकू ज्या कुछ बुलण लगि गैनी अर बोलि, “हम त मूसा का चेला छां, पर तू ही वेको चेला छैई।</verse>
				<verse number="29">अर हम जणदा छां कि, परमेस्वर न मूसा का दगड़ा मा बात कैरी, पर हम ये मनखि तैं नि जणद्‍यां, कि यू कख बटि अयूं च।”</verse>
				<verse number="30">तब वे मनखि न जबाब देई, “या त बड़ी ताजुब की बात च, कि तुम नि जणद्‍यां कि उ कखो च, पर फिर भि वेन मेरा आंख्यों तैं खूब कैरी दिनी।</verse>
				<verse number="31">हमतै यू पता च, कि परमेस्वर पापि मनखियों की नि सुणदु, पर वेकी सुणदु जु कि वेको भक्‍त च अर वेकी मनसा पर चलदु च।</verse>
				<verse number="32">अर दुनियां की शुरुवात बटि कभि भि इन सुनण मा नि ऐ, कि कैन भि जनम का अन्धा का आंख्यों तैं खूब कैरी हो।</verse>
				<verse number="33">इलै अगर यू मनखि परमेस्वर की तरफा बटि नि होन्दु, त यू कुछ भि नि कैरी सकदु।”</verse>
				<verse number="34">फिर ऊंन वेकू झिड़की के बोलि, “तू त बिल्कुल पापों मा पैदा होयुं छैई, अर तू हमतै क्या सिखौणि छैई?” तब ऊंन वेतैं प्रार्थना भवन बटि बेदखल कैरी दिनी।</verse>
				<verse number="35">फिर यीशु न सुणी, कि यहूदियों का मुख्यों न वे जनम का अन्धा तैं भैर निकाळयालि। तब यीशु जैके वे बटि मिली अर वेकू बोलि, “क्या तू मनखि का पुत्र पर बिस्वास करदी?”</verse>
				<verse number="36">तब वेन जबाब देई, “श्रीमान, उ कु च, कि मि वे पर बिस्वास कैरुं?”</verse>
				<verse number="37">यीशु न वेकू बोलि, “तिन वेतैं देखि च, अर जु तेरा दगड़ा मा बात कनु च, उ उई च।”</verse>
				<verse number="38">तब वेन बोलि, “प्रभु, मि बिस्वास करदु छौं।” अर वेका खुटों मा हाथ जोड़ी के पोड़ि गै।</verse>
				<verse number="39">तब यीशु न बोलि, “मि इलै अयूं, कि ईं दुनियां को न्याय मेरा द्‍वारा किये जौ, किलैकि जु नि देख सकदिन ऊ दिखण लगि जा, अर जु देखि सकदिन ऊ अन्धा ह्‍वे जा।”</verse>
				<verse number="40">अर फरीसियों मा बटि जु वेका दगड़ा मा छा अर वेकी बातों तैं सुनणा छा, ऊंन वेकू बोलि, “क्या हम भि अन्धा छां?”</verse>
				<verse number="41">तब यीशु न ऊंकू बोलि, “अगर जु तुम अन्धा होन्दा, त तुम पर पापों को दोष नि लगये जान्दु। पर तुम बुल्द्‍यां कि, ‘हमतै दिखेन्दु च।’ इलै तुम पर पापों को दोष लगदु।”</verse>
			</chapter>
			<chapter number="10">
				<verse number="1">तब यीशु न फिर से बोलि, “मि तुम बटि सच्‍चि ही बोन्‍नु छौं, कि जु भेड़ों का गुठ्‍यार का भितर द्‍वारा बटि नि जान्दु, बल्किन मा कै हैंकी तरफा बटि जान्दु, उ त चोर-डाकु च।</verse>
				<verse number="2">पर जु कुई द्‍वार बटि भितर जान्दु, उ भेड़ को चरवाह च।</verse>
				<verse number="3">अर पैरेदार वे खुणि द्‍वार तैं खोली देन्दु च, अर भेड़ वे चरवाह आवाज तैं पछ्याणदिन। अर उ अपणी भेड़ों को नौ ले लेके बुलान्दु अर ऊंतैं भैर लि जान्दु।</verse>
				<verse number="4">जब उ अपणी सभि भेड़ों तैं भैर ले औन्दु, तब चरवाह ऊंका अगनै-अगनै चलदु च, अर भेड़ वेका पिछनै-पिछनै। किलैकि भेड़ वेकी आवाज तैं पछ्याणदिन।</verse>
				<verse number="5">पर ऊ दुसरो का पिछनै नि जालि, बल्किन वेकी आवाज तैं सुणी के दूर भगेली। किलैकि ऊ वेकी आवाज तैं नि पछ्याणदिन।”</verse>
				<verse number="6">यीशु न यू उदारण ऊं लोगु तैं सुणै पर जु कुछ वेन ऊं लोगु कू बोलि, वु ऊंका समझ मा नि ऐ, कि यीशु ऊंकू बोन्‍नु क्या च।</verse>
				<verse number="7">इलै यीशु न ऊंकू फिर से बोलि, “मि तुम बटि सच्‍चि ही बोन्‍नु छौं, कि भेड़ों खुणि द्‍वार मि ही छौं।</verse>
				<verse number="8">अर जथगा भि मिसे पैलि ऐनी, ऊ सभ्या का सभि चोर अर डाकु छिन, पर भेड़ों न ऊंकी आवाज नि सुणी।</verse>
				<verse number="9">द्‍वार मि ही छौं अर जु कुई मेरा द्‍वारा भितर परवेस करदु, उ बचयै जालु। अर उ भैर-भितर औणु-जाणु रालु अर वेतैं चारो मिललु।</verse>
				<verse number="10">अर चोर त केवल चोरी करणु खुणि, जान से मरणु खुणि अर नास करणु खुणि ही औन्दु। पर मि त इलै अयूं छौं, कि तुमतै जीवन मिलु, अर भरपूरी से मिलु।</verse>
				<verse number="11">“अच्छु चरवाह मि छौं। अर अच्छु चरवाह अपणा भेड़ों का बानो अपणी जान भि दे देन्दु।</verse>
				<verse number="12">पर मजदूर जु नऽ त चरवाह च, अर ना ही भेड़ों को मालिक, उ भेड़िया तैं औन्द देखि के भेड़ों तैं छोड़ि के भागी जान्दु। अर भेड़िया झपटी के ऊंतैं पकड़दु अर तितर-बितर कैरी देन्दु।</verse>
				<verse number="13">अर उ त इलै भागी जान्दु, किलैकि उ मजदूर ही च अर वेतैं भेड़ों की कुई चिन्ता नि होन्दी।</verse>
				<verse number="14">“अच्छु चरवाह मि छौं। अर जन पिता मितैं जणदु, अर मि पिता तैं जणदु, ठिक उन्‍नि मि भि अपणी भेड़ों तैं जणदु छौ, अर मेरी भेड़ भि मितैं जणदी छिन।</verse>
				<verse number="15">अर भेड़ों का बानो मि अपणी जान दे देन्दु।</verse>
				<verse number="16">“मेरी और भि भेड़ छिन, जु कि ये गुठ्‍यार की नि छिन। अर यू जरुरी च, कि मि ऊंतैं भि अपणा गुठ्‍यार मा लेके औंऽऽ। तब ऊ भि मेरी आवाज तैं सुणला, अर तब एक ही झुण्ड अर एक ही चरवाह होलु।</verse>
				<verse number="17">“पिता मि बटि इलै प्यार करदु, किलैकि मि अपणी जान देन्दु छौं, ताकि मि वेतैं फिर से पै द्‍यूं।</verse>
				<verse number="18">अर कुई भि मि बटि मेरी जान तैं निकाळि नि सकदु, पर मि वेतैं अफि देन्दु छौं। अर मितैं वे देणु को अधिकार च, अर वेतैं फिर पौण को भि अधिकार च। अर इन करण की आज्ञा मेरा पिता न मितैं देई च।”</verse>
				<verse number="19">अर यों बातों का बाना यहूदियों मा फिर से फूट पोड़ि गै।</verse>
				<verse number="20">अर ऊं मदि भौत सरा मनखि बुलण लगि गैनी कि, “वे पर त खबेस लग्यूं च, अर उ त बौल्या च, तुम वेकी छुईंयों तैं किलै सुणद्‍यां?”</verse>
				<verse number="21">पर दुसरा लोगु न बोलि, “जै मनखि पर खबेस लग्यूं हो, उ इन्दरि बात नि बोलि सकदु। क्या कभि खबेस अन्धा का आंखा खूब कैरी सकदु च?”</verse>
				<verse number="22">अर यरूशलेम मा मन्दिर स्थापना को त्योवार मणै जाणु छौ। अर उ ह्‍यूँद को मैना छौ।</verse>
				<verse number="23">तब यीशु मन्दिर मा सुलैमान नौ का बरण्डा मा घूमणु छौ।</verse>
				<verse number="24">तब यहूदी यीशु का चौतरफि ऐके जमा ह्‍वे गैनी अर वे बटि पूछी, “तू हमतै कब तक दुविधा मा रखलि? अगर तू मसीह छैई, त हमतै साफ-साफ बतै दे।”</verse>
				<verse number="25">यीशु न ऊंकू बोलि, “मिन तुम मा बोलियालि छौ, पर तुम बिस्वास नि करद्‍यां। अर जौं कामों तैं मि अपणा पिता का दियां अधिकार से करदु छौं, उई मेरा गवा छिन।</verse>
				<verse number="26">पर तुम बिस्वास नि करद्‍यां, किलैकि तुम मेरी भेड़ों मदि नि छाँ।</verse>
				<verse number="27">मेरी भेड़ मेरी आवाज तैं पछ्याणदिन, मि ऊंतैं जणदु छौं। अर ऊ मेरा पिछनै-पिछनै चलदिन।</verse>
				<verse number="28">अर मि ऊंतैं सदनि को जीवन देन्दु छौं। अर फिर ऊ कभि नास नि होलि अर कुई भि ऊंतैं मि मा बटि छिनी नि सकदु।</verse>
				<verse number="29">अर मेरु पिता जैन ऊंतैं मि मा सौप्युं च, उई सबसे महान च। अर कुई भि ऊंतैं पिता बटि छिनी नि सकदु।</verse>
				<verse number="30">मि अर पिता एक ही छां।”</verse>
				<verse number="31">तब यहूदियों न फिर से वे पर मरणु कू ढुंगा उठैनि।</verse>
				<verse number="32">पर यीशु न ऊंकू बोलि, “मिन त अपणा पिता की तरफा बटि भौत सरा भला काम कैरिके दिखैनि। अर ऊं मदि कौं कामों का बानो तुम मि पर ढुंगे मरण चन्द्‍यां?”</verse>
				<verse number="33">तब यहूदियों न वेतैं जबाब देई, “कै भला काम का बाना ना पर तू परमेस्वर की बुरै करदी, अर तू मनखि ह्‍वेके अफ तैं परमेस्वर बतौन्दी, इलै हम त्वे पर ढुंगे मरण चन्द्‍यां।”</verse>
				<verse number="34">तब यीशु न ऊंकू बोलि, “तुमरा ही पवित्रशास्‍त्र मा इन लिख्यूं च कि, “‘मिन बोलि, तुम ईश्‍वर छाँ?’</verse>
				<verse number="35">“अर जौं मा परमेस्वर को वचन पौंछी, ऊं खुणि वेन ईश्‍वर बोलि। (अर पवित्रशास्‍त्र की बात झूठ्‍ठी नि ह्‍वे सकदी)।</verse>
				<verse number="36">अर मितैं पिता न पवित्र ठैरै के दुनियां मा भेजि च। इलै मिन बोलि कि ‘मि परमेस्वर को पुत्र छौं,’ क्या इलै ही तुम बुल्द्‍यां कि, ‘तू परमेस्वर की बुरै कनि छैई?’</verse>
				<verse number="37">अगर जु मि अपणा पिता का कामों तैं नि करदु, त तुम मेरु बिस्वास नि कैरा।</verse>
				<verse number="38">अर अगर मि करदु छौं, त चै तुम मेरु बिस्वास कैरा या नि कैरा, पर ऊं कामों पर त बिस्वास कैरा, ताकि तुम जाणि अर समझि सैका, कि पिता मि मा, अर मि पिता मा बसदु छौं।”</verse>
				<verse number="39">तब ऊंन यीशु तैं फिर से पकड़णे की कोसिस कैरी, पर उ ऊंका हाथ बटि बचि के निकळि गै।</verse>
				<verse number="40">अर उ यरदन गाड का पल्या छाला फिर से चलि गै, जख यूहन्‍ना पैलि बपतिस्मा देन्दु छौ, अर उखि रौण लगि गै।</verse>
				<verse number="41">तब भौत सरा लोग वेका पास ऐनी, अर बोन्‍न लगि गैनी, “यूहन्‍ना न त कुई भि चमत्कार नि कैरी, फिर भि वेन जु कुछ भि ये मनखि का बारा मा बोलि छौ, उ सब सच्‍च छौ।”</verse>
				<verse number="42">अर उख भौत सरा मनखियों न यीशु पर बिस्वास कैरी।</verse>
			</chapter>
			<chapter number="11">
				<verse number="1">यहूदिया मुलक का बैतनिय्याह गौं मा लाजर नौ को एक मनखि छौ अर उ बिमार पोड़्यूं छौ। वेकी दुई बैंण मरियम अर मारथा छै। (या वा ही मरियम च, ज्वा बाद मा प्रभु यीशु का खुटों मा खुशबुदार तेल डालि के अपणा बाळो से फुंजन्दी च)।</verse>
				<verse number="2"></verse>
				<verse number="3">जब लाजर बिमार ह्‍वे गै, तब वेकी बैंणो न यीशु कू रैबार भेजि कि, “हे प्रभु देखा, जै से तुम प्यार करद्‍यां उ बिमार होयुं च।”</verse>
				<verse number="4">जब यीशु न इन सुणी, तब वेन बोलि, “ईं बिमारि बटि वेकी मौत नि ह्‍वेलि, पर यू त इलै च कि परमेस्वर की बडै हो, अर वेका द्‍वारा परमेस्वर का पुत्र की भि बडै हो।”</verse>
				<verse number="5">अर यीशु, मारथा अर वीं की बैंण अर ऊंका भै लाजर बटि प्यार करदु छौ।</verse>
				<verse number="6">जब वेन या बात सुण्यालि छै, कि लाजर बिमार च, फिर भि जख उ छौ, उखि दुई दिन और रुकी गै।</verse>
				<verse number="7">अर दुई दिन बाद वेन अपणा चेलों खुणि बोलि, “चला, हम यहूदिया मुलक कू लौटद्‍यां।”</verse>
				<verse number="8">तब चेलों न वेकू बोलि, “गुरुजी, अभि कुछ दिन पैलि त यहूदी लोग तुमतै ढुंग्योण चान्दा छा, अर क्या तुम फिर से उखि जाण चन्द्‍यां?”</verse>
				<verse number="9">अर यीशु न बोलि, “क्या दिन मा बारह घन्टा नि होनदिन? अर अगर कुई दिन मा चलदु त वेतैं उतेडु़ नि लगदु, किलैकि उ दुनियां का उज्याळा मा दिखदु च।</verse>
				<verse number="10">पर अगर कुई राति चलदु त वेतैं उतेडु़ लगदु, किलैकि राति मा उज्याळु नि होन्दु।”</verse>
				<verse number="11">इन बुलण का बाद यीशु न ऊंकू फिर से बोलि कि, “हमरु दगड़्या लाजर सै गै, इलै मि वेतैं उठौणु कू जाणु छौं।”</verse>
				<verse number="12">तब चेलों न वेकू बोलि, “गुरुजी, अगर उसै गै त खूब ह्‍वे जालु।”</verse>
				<verse number="13">यीशु न त वेकी मौत का बारा मा बोलि छौ, पर ऊंन सोची कि उ वेतैं निन्द बटि उठौण का बारा मा बोन्‍नु च।</verse>
				<verse number="14">तब यीशु न ऊंतैं सीदा बतै दिनी कि, “लाजर मोरि गै।</verse>
				<verse number="15">पर मि त तुमरा खातिर बड़ु ही आनन्दित छौं, कि मि उबरि उख नि छौ। अर या बात तुमरा फैदा की च, ताकि तुम बिस्वास कैरी सैका। चला, अब हम वेका पास चलद्‍यां।”</verse>
				<verse number="16">तब थोमा न जैकू जौंळ्या भि बुले जान्दु, वेन अफ दगड़ा का चेलों कू बोलि, “चला, हम भि वेका दगड़ा मा मुरणु कू चलद्‍यां।”</verse>
				<verse number="17">अर जब यीशु उख पौंछी, त वेतैं पता चलि, कि लाजर तैं कबरुन्द रख्यां चार दिन ह्‍वे गैनी।</verse>
				<verse number="18">अर बैतनिय्याह गौं यरूशलेम नगर बटि लगभग तीन किलोमीटर की दूरी पर छौ।</verse>
				<verse number="19">तब मारथा अर मरियम का घौर ऊंका भै की मौत पर पस्तौ करणु कू भौत सरा यहूदी लोग अयां छा।</verse>
				<verse number="20">जब मारथा न सुणी, कि यीशु औणु च तब वा वेतैं मिलणु कू गै। पर मरियम त घौर मा ही बैठि रै।</verse>
				<verse number="21">अर मारथा न यीशु कू बोलि, “हे प्रभु, अगर जु तुम इख होन्दा त मेरु भै नि मुरदो।</verse>
				<verse number="22">फिर भि मि जणदी छौं, कि जु कुछ भि तुम परमेस्वर बटि मंगिल्या, उ परमेस्वर तुमतै द्‍यालु।”</verse>
				<verse number="23">तब यीशु न वींकू बोलि, “तेरु भै फिर ज्यून्दु ह्‍वे जालु।”</verse>
				<verse number="24">मारथा न वेकू बोलि, “हाँ, मि जणदी छौं, कि उ आखिरी का दिन मा जब मुरदा ज्यून्दा किये जाला, तब उ भि ज्यून्दु ह्‍वे जालु।”</verse>
				<verse number="25">तब यीशु न वींकू बोलि, “मुरदो मा बटि ज्यून्दु कन वळु, अर मनखियों तैं जीवन देण वळु मि ही छौं। अर जु कुई मि पर बिस्वास करदु, अगर उ मोरि भि जालु, फिर भि ज्यून्दु होलु।</verse>
				<verse number="26">अर जु कुई ज्यून्दा छिन अर मि पर बिस्वास करदिन, ऊ कभि नि मुरला। क्या तू ईं बात पर बिस्वास करदी?”</verse>
				<verse number="27">तब वींन वेकू बोलि, “हाँ प्रभु, मि बिस्वास करदी छौं, कि परमेस्वर को पुत्र मसीह जु की ईं दुनियां मा औण वळु छौ, उ तुम ही छाँ।”</verse>
				<verse number="28">तब इन बोलि के मारथा उख बटि चलि गै अर अपणी बैंण मरियम तैं चुपचाप बुलै के वींकू बोलि, “गुरुजी, इख अयां छिन, अर त्वेतै बुलाणा छिन।”</verse>
				<verse number="29">अर जन्‍नि मरियम न इन सुणी, उन्‍नि वा झटपट उठी अर यीशु तैं मिलणु कू चलि गै।</verse>
				<verse number="30">अर तबरि तक यीशु गौं मा नि पौंछी छौ, पर वीं जगा मा ही छौ, जख मारथा वेसे मिली छै।</verse>
				<verse number="31">तब जु यहूदी लोग मरियम का घौर मा वींतैं दिलासा देणा छा, ऊंन देखि, कि मरियम झटपट उठी के भैर चलि गै। तब ऊंन समझि, कि वा रुंणु खुणि कबर पर जाणि च। इलै ऊ भि वींका पिछनै गैनी।</verse>
				<verse number="32">जब मरियम उख पौंछी जख यीशु छौ, तब वेतैं दिखदी ही वेका खुटों मा पोड़ि गै अर बोलि, “हे प्रभु, अगर जु तुम इख होन्दा, त मेरु भै नि मुरदो।”</verse>
				<verse number="33">अर यीशु न देखि की मरियम रुंणी च, अर जु यहूदी लोग वींका दगड़ा मा अयां छा, ऊ भि रुंणा छिन। तब उ आत्मा मा भौत उदास ह्‍वे गै अर हकबकै गै।</verse>
				<verse number="34">अर वेन पूछी, “तुमुन वेतैं कख रखी?” ऊंन वेकू बोलि, “प्रभु, तुम ऐके देखिल्या।”</verse>
				<verse number="35">अर यीशु रुंण लगि गै।</verse>
				<verse number="36">तब यहूदियों न बोलि, “देखा, उ वेसे कथगा प्यार करदु छौ।”</verse>
				<verse number="37">पर ऊंमा बटि औरु न बोलि, “जै मनखि न अन्धा का आंख खूब करिनी, क्या उ ये मनखि तैं मुरण से नि बचै सकदु छौ?”</verse>
				<verse number="38">तब यीशु फिर से मन मा भौत उदास ह्‍वे अर कबर पर गै। अर वा कबर एक उड़्यार छै, अर वेका मुखा समणि एक डांग लग्यूं छौ।</verse>
				<verse number="39">तब यीशु न बोलि “ये डांग तैं उनै फरके द्‍या।” तबरि मुरयां मनखि की बैंण मारथा न बोलि, “प्रभु, अब त वे पर सड़्याण औण लगि गै ह्‍वेलि, किलैकि वेतैं मुरयां चार दिन ह्‍वे गैनी।”</verse>
				<verse number="40">तब यीशु न वींकू बोलि, “क्या मिन त्वेकू इन नि बोलि छौ, कि अगर तू बिस्वास करली, त तू दिखली कि परमेस्वर कथगा महान च?”</verse>
				<verse number="41">फिर ऊंन वे डांग तैं एक तरफा फरके दिनी। तब यीशु न नजर उठे के स्वर्ग जनै देखि अर बोलि, “हे पिता, मि तुमरो धन्यवाद करदु छौं, कि तुमुन मेरी सुण्यालि।</verse>
				<verse number="42">अर मि जणदु छौं, कि तुम सदनि मेरी सुणद्‍यां। फिर भि जु लोग इख चौतरफि खड़ा छिन, ऊंका बानो मिन इन बोलि। ताकि यू बिस्वास कैरा, कि तुमुन ही मितैं भेजि च।”</verse>
				<verse number="43">अर इन बोन्‍ना का बाद यीशु न धै लगै के बोलि, “हे लाजर, भैर अऽ।”</verse>
				<verse number="44">अर लाजर जु की मोरि गै छौ, उ भैर ऐ गै। अर वेका हाथ-खुटा कफनळ लपेट्यां छा, अर वेका मुख पर एक रूमाल लपेटयुं छौ। तब यीशु न ऊंकू बोलि, “येतैं खोली द्‍या अर जाण द्‍या।”</verse>
				<verse number="45">तब जु यहूदी लोग मरियम का दगड़ा मा अयां छा, ऊंमा बटि भौत सरा लोगु न यीशु का ये काम तैं देखि के वे पर बिस्वास कैरी।</verse>
				<verse number="46">पर ऊं मदि कुछ लोगु न फरीसी दल का लोगु का पास जैके जु कुछ भि यीशु न कैरी छौ वेकी सब छुईं ऊंतैं बतै दिनी।</verse>
				<verse number="47">तब मुख्य पुरोहितों न अर फरीसी दल का लोगु न मुख्य लोगु की सभा बुलै अर बोन्‍न लगि गैनी कि, “यू आदिम त भौत सरा चमत्कारिक कामों तैं कनु च। पर हम क्या कना छां?</verse>
				<verse number="48">अगर जु हम वेतैं इन्‍नि छोड़ि द्‍यूला, त सभ्यों न वे पर बिस्वास करण लगि जाण। अर रोमी लोगु न ऐके हमरा मन्दिर अर हमरि परजा दुईयों तैं नास कैरी देण।”</verse>
				<verse number="49">तब ऊं मदि काइफा नौ का एक मनखि न, जु की वे साल को महा पुरोहित छौ। अर वेन ऊंकू बोलि, “तुम कुछ भि नि जणद्‍यां,</verse>
				<verse number="50">अर ना ही कुछ समझद्‍यां, कि हमरा सभि लोगु का नास होण से अच्छु त यू ही च, कि एक ही मनखि हमरा लोगु का बदला मा मोरो।”</verse>
				<verse number="51">अर वेन यू अपणी तरफा बटि नि बोलि, पर वे साल का महा पुरोहित होण का नाता वेन भविष्यबाणी कैरी, कि यीशु सभि यहूदी लोगु खुणि मुरलु।</verse>
				<verse number="52">अर सिरफ यहूदी लोगु खुणि ही ना, बल्किन परमेस्वर की औलाद जु कि तितर-बितर होईं छिन, ऊं सभ्यों तैं भि एकजुट करणु खुणि मुरलु।</verse>
				<verse number="53">अर वे ही दिन बटि वु लोग यीशु तैं मरणे की जाळसाजि बणौण लगि गैनी।</verse>
				<verse number="54">इलै वे दिन बटि यीशु न यहूदी लोगु का बीच मा खुलाआम घूमण बन्द कैरी दिनी। पर उ उख बटि निकळि के इफ्राइम नौ का एक नगर मा चलि गै, जु कि निर्जन जगा का नजदीक का मुलक मा छौ। अर अपणा चेलों का दगड़ा मा उ उख रौण लगि गै।</verse>
				<verse number="55">अर यहूदियों को फसह को त्योवार औण वळु छौ। अर फसह का त्योवार से पैलि भौत सरा लोग अफ तैं शुद्ध करणु कू ग्‍वोंऽ बटि निकळि के यरूशलेम नगर कू गैनी।</verse>
				<verse number="56">अर ऊ लोग यीशु तैं खुज्याणा छा, अर मन्दिर मा खड़ा ह्‍वेके आपस मा पूछण लगि गैनी, “तुम क्या सुचणा? क्या उ त्योवार मा आलु?”</verse>
				<verse number="57">अर मुख्य पुरोहितों को अर फरीसी दल का लोगु को इन हुकम निकळ्यों छौ कि, “जैतैं भि इन पता चललु कि यीशु कख च, त उ ऐके हमतै बतै द्‍यो ताकि हम वेतैं पकड़ी सैका।”</verse>
			</chapter>
			<chapter number="12">
				<verse number="1">अर यीशु फसह का त्योवार से छह दिन पैलि बैतनिय्याह गौं मा ऐ। अर जै लाजर तैं यीशु न ज्यून्दु कैरी छौ उ इखि रौन्दु छौ।</verse>
				<verse number="2">तब उख ऊंन यीशु खुणि खाणु बणै अर मारथा खातिरदारि मा लगि रै, अर लाजर भि ऊंका दगड़ा मा खाणुक खाणु कू बैठयूं छौ।</verse>
				<verse number="3">तब मरियम करीब अधा माणि असली खुशबुदार तेल तैं लेके ऐ, जु कि जटामांसी पौद को बणयूं छौ अर बड़ु कीमती छौ। अर वींन वे तेल तैं यीशु का खुटों मा डालि अर अपणा बाळो से वेका खुटों तैं फुंजण लगि गै। तब वे खुशबुदार तेल की खुशबु से घौर मैहकंण लगि गै।</verse>
				<verse number="4">तब यीशु का चेलों मा बटि यहूदा इस्करियोती, जु की वेतैं धोखा से पकड़ौण वळु छौ वेन बोलि,</verse>
				<verse number="5">“यू खुशबुदार तेल तीन सौ दीनार मा बिकी सकदु छौ, अर उ पैसा गरीबों तैं दिये जै सकदा छा।”</verse>
				<verse number="6">अर वेन या बात इलै नि बोलि, कि वेतैं गरीब लोगु की चिन्ता-फिकर छै। पर उ त चोर छौ, अर रुपयों की थैली भि वेमा ही रौन्दी छै। अर जु कुछ भि उखुन्द डळै जान्दु छौ, उ वामा बटि निकाळि देन्दु छौ।</verse>
				<verse number="7">तब यीशु न बोलि कि, “वींकू कुछ नि बोला, किलैकि वींन मेरा बदन तैं कबरुन्द रखण से पैलि खुशबुदार तेल लगै के तयारी कैरियाली।</verse>
				<verse number="8">किलैकि गरीब लोग त हमेसा तुमरा दगड़ा मा छिन, पर मिन हमेसा तुमरा दगड़ा मा नि रौण।”</verse>
				<verse number="9">जब भौत सरा यहूदी लोगु तैं पता चलि की यीशु उख च, त ऊ यीशु तैं दिखणु कू ऐनी। अर केवल वेतैं ही ना, बल्किन मा वे लाजर तैं भि दिखणु खुणि ऐनी, जैतैं वेन मुरदो मा बटि ज्यून्दु कैरी छौ।</verse>
				<verse number="10">तब मुख्य पुरोहितों न लाजर तैं भि जान से मरणे की जाळसाजि बणै।</verse>
				<verse number="11">किलैकि वेकी वजै से भौत सरा यहूदी लोग ऊंतैं छोड़ि के यीशु पर बिस्वास करण लगि गै छा।</verse>
				<verse number="12">अर दुसरा दिन फसह का त्योवार मा अयां भौत सरा लोगु न सुणी, कि यीशु यरूशलेम नगर मा औणु च।</verse>
				<verse number="13">तब ऊ लोग स्वागत करणु कू खजूर की फौंक्यों तैं हाथ मा लेके वेतैं मिलणु कू गैनी। अर ऊ जोर-जोर से बोन्‍न लगि गैनी, “ होसन्‍ना, धन्य च उ जु प्रभु का नौ से औन्दु, उई इस्राएल को राजा च।”</verse>
				<verse number="14">तब यीशु तैं गधा को एक बच्‍चा मिली, अर उ वे पर बैठि गै। अर यू इलै ह्‍वे कि पवित्रशास्‍त्र की बात पूरि हो, जन कि लिख्यूं च,</verse>
				<verse number="15">“हे सिय्योन की नौनि, नि डौऽर। देख तेरु राजा गधा का बच्‍चा पर बैठि के औणु च।”</verse>
				<verse number="16">अर वेका चेला पैलि त यों बातों तैं नि समझिनी, पर जब ऊंन यीशु को बड़ु आदर-सम्मान होण देखि, तब ऊंतैं याद ऐ कि यू बात वेका बारा मा ही लिखीं छै, अर लोगु न भि वेका दगड़ा मा उन्‍नि कैरी।</verse>
				<verse number="17">जब यीशु न लाजर तैं कबर बटि बुलै के ज्यून्दु कैरी छौ, तब वे बगत जु लोग यीशु का दगड़ा मा छा, ऊंन भि ये काम की गवै देई।</verse>
				<verse number="18">इलै भौत सरा लोग वेतैं मिलणु खुणि ऐनी, किलैकि ऊंन सुणी छौ की यू उई च जैन वु अदभुत काम कैरी।</verse>
				<verse number="19">तब फरीसी दल का लोग आपस मा बुलण लगि गैनी, “हम लोगु बटि कुछ भि नि ह्‍वे सकणु च, देखा, सरी दुनियां का लोग वेका पिछनै चलण लगि गैनी।”</verse>
				<verse number="20">अर जु लोग उख त्योवार मा भक्‍ति करणु कू यरूशलेम नगर मा अयां छा, ऊंमा बटि कुछ लोग यहूदी जाति का नि छा।</verse>
				<verse number="21">अर यू लोग गलील मुलक का बैतसैदा नगर का रौण वळा फिलिप्पुस का पास गैनी, अर वे बटि बिन्ती कैरी कि, “श्रीमान, हम तुमरा गुरु यीशु बटि मिलण चन्द्‍यां।”</verse>
				<verse number="22">तब वेन जैके अन्द्रियास मा बतै, फिर ऊं दुईयों न जैके यीशु मा बोलि।</verse>
				<verse number="23">तब यीशु न ऊंकू बोलि, “देखा, अब मनखि का पुत्र को बड़ु आदर-सम्मान करण को बगत ऐ गै।</verse>
				<verse number="24">अर मि तुम बटि सच्‍चि ही बोन्‍नु, जबरि तक ग्यूँ को बीज माटा मा पोड़ि के मोरि नि जान्दु, तबरि तक उ इखुली ही रौन्दु पर जब उ मोरि जान्दु त भौत सरा फल लान्दु च।</verse>
				<verse number="25">अर जु कुई अपणा पराण बटि प्यार करदु, उ वेतैं ख्वे देन्दु। पर जु कुई ईं दुनियां मा अपणा पराण बटि प्यार नि करदु, उ वेतैं सदनि का जीवन खुणि बचै के रखदु।</verse>
				<verse number="26">अगर कुई मेरी सेवा करदु, त उ मेरा पिछनै चलो। अर जख मि रौलु उख मेरु सेवक भि होलु। अर जु कुई मेरी सेवा करदु, वेतैं मेरु पिता आदर-सम्मान द्‍यालु।</verse>
				<verse number="27">“मेरु ज्यू घबराणु च। अब मिन क्या बोन्‍न? ‘हे पिता दुख का ये बगत से मितैं बचै द्‍या,’ इन बुलण क्या? ना, इन नि बोन्‍न। किलैकि येका बानो ही मि अयूं छौं।</verse>
				<verse number="28">हे पिता, तुम कथगा महान छाँ, यू लोगु तैं दिखै द्‍या।” तब सरग बटि इन्दरि आवाज ह्‍वे, “मिन त पैलि भि यू देखैलि, अर अगनै भि दिखौण।”</verse>
				<verse number="29">तब उख जु लोग खड़ा होयां छा यू सुणी के ऊंन इन बोलि कि, “सरग गगड़ाणु च।” अर औरु न बोलि, “कै स्वर्गदूत न वेसे बात कैरी।”</verse>
				<verse number="30">तब यीशु न बोलि, “या आवाज मि खुणि ना, बल्किन तुमरा फैदा खुणि ह्‍वे।</verse>
				<verse number="31">अब ईं दुनियां को न्याय होणो को बगत ऐ गै। अर जु ईं दुनियां पर राज कनु च, वेतैं भैर निकळे जालु।</verse>
				<verse number="32">अर जब मि ईं धरती मा बटि ऊँचा पर चड़ये जौलु, तब मि सभि लोगु तैं अफ जनै खैंचुलु।”</verse>
				<verse number="33">इन बोलि के यीशु न यू बतै दिनी, कि वेकी मौत कनकै होण।</verse>
				<verse number="34">तब लोगु न वेकू बोलि, “हमुन पवित्रशास्‍त्र मा बटि यू सुणी, कि मसीह त हमेसा रालु। पर तुम इन किलै बुलणा कि, ‘मनखि का पुत्र तैं ऊँचा पर चड़ये जालु?’ त फिर यू मनखि को पुत्र कु च?”</verse>
				<verse number="35">तब यीशु न ऊंकू बोलि, “अब उज्याळु कुछ ही देर तक तुमरा बीच मा च। अर जबरि तक उज्याळु तुमरा दगड़ा मा च तबरि तक तुम उज्याळा मा हिटणा रा, कखि इन ना हो की अन्धेरु ऐके तुमतै घेरि द्‍यो किलैकि जु कुई अन्धेरा मा हिटदु, उ नि जणदु कि उ कख जाणु च।</verse>
				<verse number="36">अर जब तक उज्याळु तुमरा दगड़ा मा च, तुम उज्याळा पर बिस्वास कैरा। ताकि तुम उज्याळे की औलाद बणि जा।” अर यों बातों तैं बोन्‍ना का बाद यीशु उख बटि चलि गै, अर ऊं बटि छिप्यूं रै।</verse>
				<verse number="37">अर यीशु न ऊं लोगु का समणि भौत सरा चिन्‍न-चमत्कार करिनी, पर फिर भि ऊंन वे पर बिस्वास नि कैरी।</verse>
				<verse number="38">इन इलै ह्‍वे, किलैकि ज्वा बात परमेस्वर का रैबर्या यशायाह न बोलि छै, उ सब सच्‍च ह्‍वे जौ। अर वा बात इन च, की “हे प्रभु कैन हमरा वचनों पर बिस्वास कैरी? अर कै पर प्रभु की शक्‍ति परगट ह्‍वेई?”</verse>
				<verse number="39">अर वु इलै बिस्वास नि कैरी सकिनी, किलैकि यशायाह न इन भि बोलि छौ कि,</verse>
				<verse number="40">“वेन ऊंका आंख्यों तैं अन्धु अर मन तैं निठुर कैरियाली, ताकि वु आंख्यों बटि ना देखा अर ना ही मन बटि समझा। अगर ऊंन देखियाली अर समझियालि अर अपणा मन से पस्ताप कैरियाली, त कखि इन ना हो कि मि ऊंतैं खूब कैरी द्‍यूं।”</verse>
				<verse number="41">अर यशायाह न यों बातों तैं इलै बोलि, किलैकि वेन वेकी महानता तैं देखियाली छौ, अर वेका बारा मा बोलि भि छौ।</verse>
				<verse number="42">फिर भि भौत सरा यहूदी मुख्यों न यीशु पर बिस्वास कैरी, पर फरीसी दल का लोगु की डौऽरा का बानो उ खुलाआम नि बुलणा छा। किलैकि ऊंतैं या डौऽर लगदी छै, कि कखि हमतै प्रार्थना भवन बटि भैर नि किये जौ।</verse>
				<verse number="43">किलैकि ऊंतैं परमेस्वर की तरफा बटि मिलण वळु आदर-सम्मान से भि जादा मनखियों की तरफा बटि मिलण वळु आदर-सम्मान जादा खूब लगदु छौ।</verse>
				<verse number="44">तब यीशु न ऊँची आवाज मा बोलि, “जु कुई मि पर बिस्वास करदु, उ मि पर ना, बल्किन जैन मितैं भेजि च वे पर बिस्वास करदु।</verse>
				<verse number="45">अर जु मितैं दिखदु, वेन वे परमेस्वर तैं भि देखियाली जैन मितैं भेजि च।</verse>
				<verse number="46">अर मि ईं दुनियां मा उज्याळु बणि के अयूं छौं। ताकि जु कुई भि मि पर बिस्वास कैरो, उ अन्धेरा मा नि रौ।</verse>
				<verse number="47">अर जु कुई मेरी बातों तैं सुणी के वेका मुताबिक नि चलदु वे पर मि दोष नि लगौन्दु, किलैकि मि दुनियां का लोगु तैं दोषी ठैराणु खुणि ना, बल्किन दुनियां का लोगु तैं बचौणु खुणि अयूं छौं।</verse>
				<verse number="48">अर जु कुई मितैं सुद्‍दी समझदु अर मेरी बातों तैं नि मणदु, वे पर दोष लगौण वळु त एक च। मतलब जौं बातों तैं मिन बोलि, उई आखिरी का दिन मा वेतैं दोषी ठैराली।</verse>
				<verse number="49">किलैकि मिन अपणी तरफा बटि कुछ भि नि बोलि, पर पिता जैन मितैं भेजि च, वेन मितैं या आज्ञा देई, कि मिन क्या-क्या बोन्‍न, अर क्या-क्या बतौण।</verse>
				<verse number="50">अर मि जणदु छौं, कि वेकी आज्ञा सभ्यों तैं सदनि का जीवन की तरफा लेके जान्दी। इलै जु कुछ भि मि बोन्‍नु छौं, जन मेरा पिता न मितैं सिखै, उन्‍नि मि बोन्‍नु छौं।”</verse>
			</chapter>
			<chapter number="13">
				<verse number="1">अर फसह का त्योवार से पैलि यीशु जाणि गै, कि दुनियां तैं छोड़ि के पिता का पास चलि जाणु को बगत नजदीक ऐ गै। तब वेन जु वेका दगड़ा मा रौन्दा छा, ऊंतैं जन प्यार उ पैलि करदु छौ, उन्‍नि प्यार उ आखिरी का दिन तक कनु रै।</verse>
				<verse number="2">अर जब ऊ राति खाणु खाणा छा, तब शैतान न शमौन का नौना यहूदा इस्करियोती का मन मा पैलि ही यू विचार डालियेली छौ, कि उ यीशु तैं पकड़वै द्‍यो।</verse>
				<verse number="3">अर यीशु न यू जाण्यालि छौ, कि पिता न सब कुछ मेरा हाथ मा सौंप्याली, अर मि परमेस्वर की तरफा बटि अयूं छौं, अर अब फिर से परमेस्वर का पास जाण वळु छौं।</verse>
				<verse number="4">तब उ खाणुक खाण दौं उठी। अर वेन अपणा भैरा कपड़ों तैं उतारि के अलग मा रखी दिनी, अर अंगोछु लेके अपणी कमर तैं बान्धि दिनी।</verse>
				<verse number="5">येका बाद वेन परात मा पाणि भोरी अर चेलों का खुटा धोण लगि गै, अर अपणी कमर पर बन्धयां अंगोछन फुंजण लगि गै।</verse>
				<verse number="6">अर जब उ शमौन पतरस का समणि ऐ, तब वेन यीशु कू बोलि, “प्रभु, क्या तुमुन मेरा खुटा धोणिन?”</verse>
				<verse number="7">तब यीशु न वेतैं जबाब देई, “जु मि कनु छौं, वांका बारा मा तू अभि कुछ नि जणदी, पर बाद मा तू समझि जैली।”</verse>
				<verse number="8">पर पतरस न वेकू बोलि, “मि तुमतै अपणा खुटा कभि भि धोणु कू नि द्‍यूलु।” यू सुणी के यीशु न वेकू बोलि, “अगर जु मि तेरा खुटा नि धूलु, त तू मेरा दगड़ा मा साझी नि ह्‍वे सकदी।”</verse>
				<verse number="9">तब शमौन पतरस न वेकू बोलि, “प्रभु, त फिर तुम इन कैरा, की मेरा खुटा ही ना, पर मेरा हाथ अर मुण्ड़ भि ध्वे द्‍या।”</verse>
				<verse number="10">फिर यीशु न वेकू बोलि, “जु नहे गै वेतैं खुटों का अलावा और कुछ भि धोणे की जरुरत नि च। किलैकि उ त पूरि तरौं से शुद्ध च। अर तुम शुद्ध छाँ, पर सभ्या का सभि ना।”</verse>
				<verse number="11">अर यीशु अपणा पकड़ौण वळा तैं जणदु छौ, इलै ही वेन बोलि, कि “तुम मा बटि सभ्या का सभि शुद्ध नि छिन।”</verse>
				<verse number="12">जब वेन ऊंका खुटा ध्वे दिनी, तब उ अपणा कपड़ा पैरि के फिर से बैठि गै। अर वेन ऊंकू बोलि, “क्या तुम समझि ग्यां, कि मिन तुमरा दगड़ा मा क्या कैरी?</verse>
				<verse number="13">अर तुम मिकू गुरु अर प्रभु बुल्द्‍यां, अर तुम ठिक ही बुल्द्‍यां, किलैकि मि उई छौं।</verse>
				<verse number="14">अर जब मिन प्रभु अर गुरु ह्‍वेके तुमरा खुटा ध्वेनि, त तुमतै भि एक-दुसरा का खुटों तैं धोण जन सेवा करण चयेणी।</verse>
				<verse number="15">किलैकि मिन तुमरा समणि एक उदारण कैरिके देखैलि, कि जन मिन तुमरा दगड़ा मा कैरी, उन्‍नि तुम भि कैरा।</verse>
				<verse number="16">अर मि तुम बटि सच्‍चि बोन्‍नु छौं, कि नौकर अपणा मालिक से बड़ु नि होन्दु, अर जैतैं भेज्यूं च उ अपणा भेजण वळा से बड़ु नि होन्दु।</verse>
				<verse number="17">अगर तुम यों बातों तैं जाणि के ऊंका मुताबिक चलिल्या त तुम धन्य छाँ।”</verse>
				<verse number="18">तब यीशु न फिर से बोलि, “मि तुम सभ्यों का बारा मा नि बोन्‍नु छौं, किलैकि जौं तैं मिन चुण्यालि, ऊ कन्द्रया छिन मि जणदु छौं। फिर भि यू इलै होणु च ताकि पवित्रशास्‍त्र को वु वचन पूरु हो जु कि इन च कि, “‘जैन मेरी रुट्‍टी खै, वेन ही मि पर लथि उठे।’</verse>
				<verse number="19">अर यू होण से पैलि ही मि तुमतै येका बारा मा बतै देन्दु, ताकि जब यू पूरु ह्‍वे जौ, त तुम बिस्वास कैरा कि मि उई छौं।</verse>
				<verse number="20">अर मि तुम बटि सच्‍चि ही बोन्‍नु छौं, कि जु कुई मेरा भेज्यां मनखियों तैं स्वीकार करदु, उ मितैं स्वीकार करदु। अर जु मितैं स्वीकार करदु, उ वेतैं स्वीकार करदु जैन मितैं भेजि च।”</verse>
				<verse number="21">अर इन बोन्‍ना का बाद यीशु हकबकौण लगि गै। अर वेन बोलि, “मि तुम बटि सच्‍चि ही बोन्‍नु छौं, कि तुम मा बटि एक न मितैं पकड़ौण च।”</verse>
				<verse number="22">तब चेला सक कैरिके एक-दुसरा तैं दिखण लगि गैनी, कि उ कै का बारा मा या बात बोन्‍नु च।</verse>
				<verse number="23">अर चेलों मा बटि यीशु जैतैं भौत जादा प्यार करदु छौ, उ यीशु की काखे तरफा झुकि के बैठयूं छौ।</verse>
				<verse number="24">इलै शमौन पतरस न वे चेला जनै इसारा कैरी कि, “जरा वे बटि पूछ, कि उ कै का बारा मा बोन्‍नु च?”</verse>
				<verse number="25">अर वे चेला न उन्‍नि यीशु की काखे तरफा झुकि के वेतैं पूछी, “प्रभु, कु च उ?”</verse>
				<verse number="26">तब यीशु न जबाब देई, “जैतैं मि यू रुट्‍टी को टुकड़ा कटोरा मा डुबै के द्‍यूलु, उई च।” अर वेन रुट्‍टी का टुकड़ा तैं कटोरा मा डुबै के शमौन इस्करियोती का नौना यहूदा इस्करियोती तैं देई। अर वेन उ रुट्‍टी को टुकड़ा लेई।</verse>
				<verse number="27">अर शैतान यहूदा मा समै गै। तब यीशु न यहूदा कू बोलि, “जु तिन करण च, उ तू जल्दी कैर।”</verse>
				<verse number="28">पर जु उख खाणुक खाणु कू बैठयां छा, ऊंमा बटि कुई भि इन नि समझ सैकी, कि यीशु न वेकू इन्द्रयो किलै बोलि।</verse>
				<verse number="29">अर ऊंमा बटि कुछ न सोची, कि त्योवार मा जु-जु चीज जरुरी छिन, ऊंतैं मोल लिणा का बानो, या त गरीबों मा दान बंटणा का खातिर वेन इन बोलि होलु। किलैकि यहूदा मा पैसौं की थैली रौन्दी छै।</verse>
				<verse number="30">जब यहूदा न रुट्‍टी को टुकड़ा लेई, तब उ तुरन्त भैर चलि गै। अर यू राति को बगत छौ।</verse>
				<verse number="31">जब यहूदा भैर चलि गै तब यीशु न बोलि, “मनखि को पुत्र कथगा महान च, यू लोगु तैं पता चललु। अर वेका द्‍वारा परमेस्वर कथगा महान च, यू भि ऊंतैं पता चललु।</verse>
				<verse number="32">अर इन होण से परमेस्वर की बडै ह्‍वेलि, तब परमेस्वर भि इन दिखै द्‍यालु, कि पुत्र कथगा महान च। अर इन उ जल्दी ही करलु।</verse>
				<verse number="33">“मेरा बच्‍चों, अब मि तुमरा दगड़ा मा कुछ ही देर तक छौं। फिर तुम मितैं खुजैल्या, अर जन मिन यहूदियों कू बोलि, उन्‍नि मि अब तुमकु भि बोन्‍नु छौं, कि जख मि जाणु छौं, उख तुम नि ऐ सकद्‍यां।</verse>
				<verse number="34">इलै अब मि तुमतै एक नई आज्ञा देन्दु छौं, कि तुम एक-दुसरा बटि प्यार कैरा। अर जन मिन तुम बटि प्यार कैरी, उन्‍नि तुम भि एक-दुसरा बटि प्यार कैरा।</verse>
				<verse number="35">अर अगर जु तुम आपस मा प्यार करिल्या, त यू देखि के सभि लोग जाणि जाला कि तुम मेरा चेला छाँ।”</verse>
				<verse number="36">तब शमौन पतरस न यीशु तैं पूछी, “प्रभु तुम कख जाणा छाँ?” यीशु न वेतैं जबाब देई, “जख मि जाणु छौं, उख तू अभि मेरा पिछनै नि ऐ सकदी, पर बाद मा ऐलि।”</verse>
				<verse number="37">अर पतरस न वेकू बोलि, “प्रभु मि अभि तुमरा पिछनै किलै नि ऐ सकदु? मि त तुमरा खातिर अपणी जान भि दे द्‍यूलु।”</verse>
				<verse number="38">तब यीशु न वेतैं जबाब देई, “क्या तू मेरा खातिर अपणी जान दे दिली? मि त्वे बटि सच्‍चि ही बोन्‍नु छौं, कि मैर का बसण से पैलि तिन मितैं तीन दौं नकारी देण कि, मि वेतैं नि जणदु।”</verse>
			</chapter>
			<chapter number="14">
				<verse number="1">अर यीशु न अपणा चेलों कू फिर से बोलि, “तुम अपणा मन मा नि घबरा, पर परमेस्वर पर बिस्वास कैरा अर मि पर भि बिस्वास कैरा।</verse>
				<verse number="2">अर मेरा पिता का घौर मा भौत सरी जगा च। अगर जु नि होन्दी त मि तुमतै बतै देन्दु। किलैकि मि तुम खुणि जगा तयार करणु कू जाणु छौं।</verse>
				<verse number="3">अर जब मि जैके तुम खुणि जगा तयार कैरी द्‍यूलु, त फिर ऐके तुमतै भि अपणा इख लि जौलु ताकि जख मि रौ उख तुम भि रा।</verse>
				<verse number="4">अर जख मि जाणु छौं, उखो बाटु तुम जणदा छाँ।”</verse>
				<verse number="5">तब थोमा न वेकू बोलि, “प्रभु हम नि जणद्‍यां कि तुम कख जाणा छाँ, त फिर हमुन बाटु कनकै जनण?”</verse>
				<verse number="6">तब यीशु न वेकू बोलि, “मि ही बाटु, सच्‍चै अर जीवन छौं। अर मेरा बगैर कुई भि पिता का पास नि पौंछी सकदु।</verse>
				<verse number="7">अगर तुम मितैं पछ्याण जान्दा, त मेरा पिता तैं भि पछ्याण्दा, पर अब तुम वेतैं पछ्याण्दा छाँ अर तुमुन भि वेतैं देखियाली।”</verse>
				<verse number="8">तब फिलिप्पुस न वेकू बोलि, “प्रभु हमतै पिता का दरसन करै द्‍या, हम खुणि त इथगा ही काफी च।”</verse>
				<verse number="9">तब यीशु न वेकू बोलि, “फिलिप्पुस, मि इथगा दिनों बटि तुमरा दगड़ा मा छौं, क्या फिर भि तिन मितैं अभि तक नि पछ्याणी? अर जैन मितैं देखियाली, वेन पिता तैं भि देखियाली। त फिर तू कनकै बुलणि कि, ‘हमतै पिता का दरसन करै द्‍या?’</verse>
				<verse number="10">क्या त्वेतै बिस्वास नि च, कि मि पिता मा अर पिता मि मा च? अर जु बात मि तुम मा बुल्दु छौं, ऊ अपणी तरफा बटि नि बुल्दु, पर पिता मि मा रै के अपणा कामों तैं करदु च।</verse>
				<verse number="11">अर मेरु बिस्वास कैरा, कि मि पिता मा छौं अर पिता मि मा च। निथर जौं कामों तैं मिन कैरी, ऊं कामों की वजै से त बिस्वास कैरा।</verse>
				<verse number="12">अर मि पिता का पास जाणु छौं, इलै मि तुम बटि सच्‍चि ही बोन्‍नु छौं, कि जु कुई मि पर बिस्वास करदु, उ यों कामों तैं भि करलु, जौं तैं मि करदु छौं। बल्किन येसे भि बड़ा-बड़ा काम उ करलु।</verse>
				<verse number="13">अर जु कुछ भि तुम मेरा नौ से मंगिल्या, उई मि करलु। ताकि पुत्र का द्‍वारा पिता की बडै हो।</verse>
				<verse number="14">अगर तुम मेरा नौ से जु कुछ भि मि बटि मंगिल्या, त वु मि करलु।”</verse>
				<verse number="15">फिर यीशु न चेलों खुणि इन भि बोलि, “अगर जु तुम मि बटि प्यार करद्‍यां, त मेरी आज्ञाओं तैं भि मणिल्या।</verse>
				<verse number="16">अर मि पिता बटि बिन्ती करलु, अर उ तुमतै एक और मददगार द्‍यालु, याने कि सच्‍चै को आत्मा। अर उ सदनि तुमरा दगड़ा मा रालु।</verse>
				<verse number="17">अर दुनियां का लोग वेतैं स्वीकार नि कैरी सकदिन, किलैकि ऊ नऽ त वेतैं दिखदिन अर ना ही जणदिन। पर तुम वेतैं जणदा छाँ, किलैकि उ तुमरा दगड़ा मा रौन्दु च अर उ तुम मा होलु।</verse>
				<verse number="18">“अर मि तुमतै अनाथ की तरौं नि छुड़लु, पर मि तुमरा पास फिर से औलु।</verse>
				<verse number="19">अब कुछ देर बाद दुनियां का लोग मितैं नि दिखला पर तुम मितैं दिखल्या, किलैकि मि ज्यून्दु छौं अर तुम भि ज्यून्दा रैल्या।</verse>
				<verse number="20">फिर वे दिन तुम जणिल्या, कि मि अपणा पिता मा छौं, अर तुम मि मा, अर मि तुम मा छौं।</verse>
				<verse number="21">अर जु कुई मेरी आज्ञाओं तैं स्वीकार कैरिके वेका मुताबिक चलदु च, उई मि बटि प्यार करदु। अर जु मि बटि प्यार करदु, वे बटि मेरु पिता भि प्यार करदु। अर मि भि वे बटि प्यार करलु, अर अपणु दरसन वेतैं दिखौलु।”</verse>
				<verse number="22">तब यहूदा न (जु इस्करियोती नि छौ) यीशु कू बोलि, “प्रभु, तुम केवल हमतै ही दरसन किलै दिखाण चाणा छाँ? पर दुनियां का लोगु तैं किलै ना?”</verse>
				<verse number="23">तब यीशु न वेतैं जबाब देई, “अगर कुई मि बटि प्यार करदु, त उ मेरी आज्ञाओं का मुताबिक चललु। अर मेरु पिता भि वे बटि प्यार करलु। अर हम वेका पास औला अर वेका दगड़ा मा रौला।</verse>
				<verse number="24">पर जु कुई मि बटि प्यार नि करदु, उ मेरा वचन तैं भि नि मणदु। अर जु वचन तुम सुणद्‍यां, उ मेरु ना बल्किन मा जै पिता न मितैं भेजि च वेको च।</verse>
				<verse number="25">“अर यों सब बातों तैं मिन तुमतै वे बगत बतैयालि छौ, जब मि तुमरा दगड़ा मा छौ।</verse>
				<verse number="26">फिर भि वे मददगार तैं, याने कि पवित्र आत्मा, जैतैं पिता मेरा नौ से भेजलु, उ तुमतै सब कुछ सिखौलु। अर जु कुछ मिन तुमतै बतै, वु सब कुछ उ तुमतै याद करालु।</verse>
				<verse number="27">“अर मि तुमतै शान्ति दिये जान्दु, अपणी शान्ति मि तुमतै देणु छौं। अर जन दुनियां तुमतै देन्दी, उन्दरि शान्ति मि तुमतै नि देन्दु। इलै तुम नि डौऽरा अर ना ही घबरा।</verse>
				<verse number="28">तुमुन मितैं इन बुल्द सुणी कि, ‘मि जाणु छौं, अर फिर से मि तुमरा पास औलु।’ अगर जु तुम मि बटि प्यार करदा, त ईं बात से खुश होन्दा, कि मि पिता का पास जाणु छौं। किलैकि पिता मिसे भि महान च।</verse>
				<verse number="29">“अर यू सब होण से पैलि ही मिन तुमतै बतैयालि, ताकि जब यू सब ह्‍वे जौ तब तुम बिस्वास कैरी सैका।</verse>
				<verse number="30">अर अब मिन तुमरा दगड़ा मा जादा बात नि करण, किलैकि ईं दुनियां पर राज करण वळु औण वळु च। फिर भि वेको मि पर कुई भि अधिकार नि च।</verse>
				<verse number="31">पर यू त इलै होणु च, कि दुनियां का लोग जाणि जा, कि मि पिता से प्यार करदु अर जन पिता न मितैं आज्ञा देई, मि उन्‍नि करदु छौं। “अब उठा, इख बटि चलद्‍यां।”</verse>
			</chapter>
			<chapter number="15">
				<verse number="1">तब यीशु न चेलों खुणि एक उदारण देके बोलि, “अंगूरों की सच्‍चि बेल मि ही छौं, अर मेरु पिता माली च।</verse>
				<verse number="2">अर ज्वा फौंकि मि मा च अर अगर वीं पर फल नि लगदिन त वींतैं उ काटी देन्दु, अर ज्वा फळदि च वींतैं उ छाँटदु च, ताकि वे पर और भि जादा फल लगा।</verse>
				<verse number="3">अर जु-जु वचन मिन तुम मा बुलिनी, ऊंकी वजै से तुम शुद्ध ह्‍वे ग्यां।</verse>
				<verse number="4">तुम मि मा बणयां रा अर मि तुम मा रौलु। अर जन फौंकि बेल पर नि राली, त वा खुद से फल नि ला सकदी, ठिक उन्‍नि तुम भि मि मा नि बणयां रैल्या त फल नि लै सकद्‍यां।</verse>
				<verse number="5">“मि अंगूरों की बेल छौं, अर तुम फौंकि छाँ। अर जु मि मा बणयां रौनदिन अर जौं मा मि बणयूं रौन्दु उई जादा फल लनदिन, किलैकि मि बटि अलग ह्‍वेके तुम कुछ भि नि कैरी सकद्‍यां।</verse>
				<verse number="6">अर जु कुई मि मा बणयूं नि रालु, त वेतैं फौंकि की तरौं काटी के फुंन ढुळै जालु। तब उ सूखि जान्दु, अर लोग वेतैं बटोळि के आग मा डालि देन्दिन अर ऊ फुके जनदिन।</verse>
				<verse number="7">अगर जु तुम मि मा बणयां रैल्या, अर मेरु वचन तुम मा बणयूं रालु, तब जु कुछ भि तुमतै चयेणु होलु, वेतैं मांगा अर वु सब कुछ तुमतै मिली जालु।</verse>
				<verse number="8">अर अगर जु तुम मा बिजांम फल लगदिन, त यां से मेरा पिता को भौत आदर-सम्मान होलु। तब तुम साबित कैरी दिल्या की तुम मेरा चेला छाँ।</verse>
				<verse number="9">“अर जन पिता मि बटि प्यार करदु, उन्‍नि मिन तुम बटि प्यार कैरी। अर तुम मेरा प्यार मा बणयां रा।</verse>
				<verse number="10">अर जन मि अपणा पिता की आज्ञाओं को पालन कैरिके वेका प्यार मा बणयूं रौन्दु, ठिक उन्‍नि तुम भि अगर मेरी आज्ञाओं को पालन करिल्या, त मेरा प्यार मा बणयां रैल्या।</verse>
				<verse number="11">अर यू बात मिन तुमकु इलै बुलिनी, कि मेरु आनन्द तुम मा बणयूं रौ अर तुम वे आनन्द मा भरपूर ह्‍वे जा।</verse>
				<verse number="12">अर मेरी आज्ञा या च, कि जन मिन तुम बटि प्यार कैरी, ठिक उन्‍नि तुम भि एक-दुसरा बटि प्यार कैरा।</verse>
				<verse number="13">अर कुई अपणा दगड़्यों का खातिर अपणी जान दे द्‍यो, येसे महान प्यार कुई नि कैरी सकदु।</verse>
				<verse number="14">“अर अगर जु तुम मेरी आज्ञाओं का मुताबिक चलिल्या, त तुम मेरा दगड़्या छाँ।</verse>
				<verse number="15">अर अब से मि तुमकु नौकर नि बोललु किलैकि नौकर नि जणदु कि वेको मालिक क्या-क्या करदु, पर मिन त तुमकु दगड़्या बोलि किलैकि जु कुछ मिन अपणा पिता बटि सुणी, उ सब कुछ मिन तुमतै बतैयालि।</verse>
				<verse number="16">अर तुम न मितैं नि चुणी, बल्किन मिन तुमतै चुणी के ठैरैयालि ताकि तुम जा अर सफल ह्‍वे जा, अर तुमरो सफल होण बणयूं रौ अर जु कुछ भि तुम मेरा नौ से पिता बटि मंगिल्या, उ सब पिता तुमतै द्‍यालु।</verse>
				<verse number="17">अर यू सब आज्ञा मि तुमतै इलै देणु छौं, कि तुम एक-दुसरा से प्यार कैरा।”</verse>
				<verse number="18">यीशु न फिर से चेलों कू बोलि, “अगर दुनियां का लोग तुम से नफरत करदिन, त तुम ईं बात तैं याद कर्यां कि ऊं लोगु न तुम से पैलि मिसे भि नफरत कैरी।</verse>
				<verse number="19">अर अगर जु तुम दुनियां का लोगु का जन होन्दा, त दुनियां का लोग तुमतै अपणु जाणि के तुम से प्यार करदा, पर तुम त दुनियां का लोगु का जन नि छाँ। किलैकि मिन तुमतै दुनियां मा बटि चुण्यालि, इलै दुनियां का लोग तुम से नफरत करदिन।</verse>
				<verse number="20">“इलै मिन जु तुम बटि बोलि, वेतैं याद रखा कि, ‘नौकर अपणा मालिक से बड़ु नि होन्दु।’ इलै जब ऊंन मितैं सतै त उ तुमतै भि सताला, ठिक उन्‍नि अगर ऊंन मेरी बात माणी त वु तुमरि बात भि मणला।</verse>
				<verse number="21">अर यू सब वु मेरा बानो तुमरा दगड़ा मा करला, किलैकि जै परमेस्वर न मितैं भेजि च, वेतैं वु लोग नि जणदिन।</verse>
				<verse number="22">“अर अगर जु मि नि औन्दु अर परमेस्वर की बातों तैं ऊंतैं नि बतौन्दु त वु दोषी नि ठैरदा, पर अब जब ऊंन सुण्यालि त दोषी ठैरणो को ऊंमा कुई बहाना नि च।</verse>
				<verse number="23">अर जु कुई मि बटि नफरत करदु, उ मेरा पिता बटि भि नफरत करदु।</verse>
				<verse number="24">“अगर जु मि ऊंका बीच मा ऊं कामों तैं नि करदु, जु मिसे पैलि कैन भि नि करिनी त वु दोषी नि ठैरदा, पर अब त ऊंन मितैं अर मेरा पिता तैं देखियाली अर हम दुईयों से नफरत कैरी।</verse>
				<verse number="25">पर यू त इलै ह्‍वे, ताकि पवित्रशास्‍त्र मा जन लिख्यूं च उ पूरु ह्‍वे जौ। अर बात इन च कि, “‘ऊंन बेकार मा मिसे नफरत कैरी।’</verse>
				<verse number="26">पर उ मददगार पिता मा बटि निकळदु अर वु सच्‍चै को आत्मा च, अर जैतैं मि पिता की तरफा बटि तुमरा पास भेजलु, जब उ आलु त उ मेरी गवै द्‍यालु।</verse>
				<verse number="27">अर तुम भि मेरी गवै दिल्या, किलैकि तुम शुरु बटि ही मेरा दगड़ा मा छाँ।”</verse>
			</chapter>
			<chapter number="16">
				<verse number="1">फिर से यीशु न ऊंकू बोलि, “यू बात मिन तुमतै इलै बतैनि, कि तुम बिस्वास मा नि डगमगा।</verse>
				<verse number="2">किलैकि लोग तुमतै प्रार्थना भवन बटि निकाळि द्‍याला। इथगा ही ना, बल्किन इन बगत औणु वळु च, कि जु कुई भि तुमतै जान से मरलु उ इन समझालु, कि इन कैरिके उ परमेस्वर की ही सेवा कनु च।</verse>
				<verse number="3">अर इन ऊ लोग इलै करला, किलैकि ऊंन नऽ त पिता तैं पछ्याणी अर ना ही मितैं।</verse>
				<verse number="4">अर यू बात मिन तुमतै इलै बतैनि, ताकि जब उ बगत आलु त तुमतै याद ऐ जौ, कि मिन यू सब पैलि ही तुमतै बतैयालि छौ। अर मिन यू बात शुरु बटि इलै नि बतैनि, किलैकि मि तुमरा दगड़ा मा छौ।”</verse>
				<verse number="5">अर यीशु न इन भि बोलि, “पर अब मि अपणा भेजण वळा मा जाणु छौं। अर तुम मा बटि कुई भि मितैं इन नि पूछणु च कि, ‘तुम कख जाणा छाँ?’</verse>
				<verse number="6">अर मिन यू सब बात जु तुम मा बुलिनी, इलै तुमरो मन बड़ु दुखी ह्‍वे गै।</verse>
				<verse number="7">फिर भि मि तुम मा सच्‍चि बोन्‍नु छौं, कि मेरु जाण तुम खुणि फैदे की ही बात च। किलैकि अगर जु मि नि जौलु, त वे मददगार न तुम मा नि औण, पर जब मि जौलु, त वेतैं तुम मा भेजलु।</verse>
				<verse number="8">अर उ ऐके ईं दुनियां का लोगु तैं ऊंका पाप, ऊंको धरमी बणण अर परमेस्वर का न्याय का बारा मा ऊंकी सोच तैं गळत साबित करलु।</verse>
				<verse number="9">अर पाप का बारा मा इलै, किलैकि ऊ मि पर बिस्वास नि करदिन।</verse>
				<verse number="10">अर धरमी बणण का बारा मा इलै, किलैकि मि पिता मा जाणु छौं, अर तुम मितैं फिर नि दिखल्या।</verse>
				<verse number="11">अर परमेस्वर का न्याय का बारा मा इलै, किलैकि दुनियां पर राज करण वळा को न्याय कैरिके वेतैं दोषी ठैरै गै।</verse>
				<verse number="12">“उन त मि मा तुम खुणि बोन्‍नु खुणि भौत सरी बात छिन। पर अभि तुम ऊं बातों तैं सै नि सकद्‍यां।</verse>
				<verse number="13">पर जब उ सच्‍चै को आत्मा आलु, त उ तुमतै पूरु सच्‍चै को बाटु बतालु। अर उ अपणी तरफा बटि कुछ भि नि बोललु, पर जु कुछ भि उ सुणलु उन्‍नि बतालु। अर होण वळी बातों तैं उ तुम पर परगट करलु।</verse>
				<verse number="14">अर उ बतै द्‍यालु की मि कथगा महान छौं, किलैकि जु कुछ भि मिन वेतैं बतै वु तुमतै उन्‍नि बतालु।</verse>
				<verse number="15">अर जु कुछ भि पिता को च उ सब मेरु च, इलै मिन बोलि कि, ‘जु कुछ भि मिन वेतैं बतै वु तुमतै उन्‍नि बतालु।’”</verse>
				<verse number="16">यीशु न चेलों खुणि फिर से बोलि, “थुड़ी देर बाद तुम मितैं नि दिखल्या, पर और थुड़ी देर बाद तुम मितैं फिर से दिखल्या।”</verse>
				<verse number="17">तब वेका कुछ चेलों न आपस मा बोलि, “यू हम बटि बोन्‍नु च कि, ‘थुड़ी देर बाद तुम मितैं नि दिखल्या, पर और थुड़ी देर बाद तुम मितैं फिर से दिखल्या।’ त यां को मतलब क्या च?”</verse>
				<verse number="18">“यू जु ‘थुड़ी देर’ बोन्‍नु च, या क्या बात ह्‍वे सकदी च? हमरि समझ मा नि च औणु, कि यू बोन्‍नु क्या च।”</verse>
				<verse number="19">तब यीशु तैं मालूम ह्‍वे गै, कि ऊ मि बटि कुछ पूछण चाणा छिन। इलै वेन ऊंकू बोलि, “मिन तुमकु बोलि कि, ‘थुड़ी देर बाद तुम मितैं नि दिखल्या, पर और थुड़ी देर बाद तुम मितैं फिर से दिखल्या।’ क्या येका बारा मा तुम आपस मा पूछताछ करणा छाँ, कि येको मतलब क्या च?</verse>
				<verse number="20">अर मि तुम बटि सच्‍चि ही बोन्‍नु छौं, कि तुम रुविल्या अर विलाप करिल्या, पर दुनियां का लोग खुशी मणाला। अर तुम दुखी ह्‍वेल्या, पर तुमरो दुख खुशी मा बदलि जालु।</verse>
				<verse number="21">अर जब कै जनानि तैं परसव की पीड़ा होन्दी त वींतैं बड़ु दुख होन्दु, किलैकि वींको बच्‍चा पैदा करण को बगत ऐ गै। पर जब वा बच्‍चा तैं जनम दे देन्दी, तब वा अपणी वीं पीड़ा तैं बिसरी जान्दी, किलैकि वींतैं ईं बात की खुशी होन्दी, कि दुनियां मा एक बच्‍चा पैदा ह्‍वे गै।</verse>
				<verse number="22">इन्‍नि तुम भि अभि दुख मा छाँ, पर मि तुमतै फिर से मिललु, तब तुमरा मन मा खुशी को कुई ठिकाणु नि रालु। अर तुमरि ईं खुशी तैं कुई भि तुम बटि छिनी नि सकदु।</verse>
				<verse number="23">अर वे दिन तुम मि बटि कुछ भि नि पूछील्या, पर जु कुछ भि तुम पिता बटि मंगिल्या उ सब पिता मेरा नौ से तुमतै द्‍यालु। अर यू मि तुम बटि सच्‍चि ही बोन्‍नु छौं।</verse>
				<verse number="24">अर अभि तक तुमुन मेरु नौ से कुछ भि नि मांगि। इलै मांगा, त तुमतै दिये जालु, ताकि तुम भरपूर आनन्द कैरी सैका।</verse>
				<verse number="25">“अर अभि तक मिन यू बात तुमतै उदारण देके बतैनि, पर इन्द्रयो बगत औण वळु च, कि तब मि तुम बटि उदारणों मा नि बोललु, पर पिता का बारा मा तुमतै साफ-साफ बतै द्‍यूलु।</verse>
				<verse number="26">अर मि तुम मा इन नि बोन्‍नु छौं, कि वे दिन मि पिता बटि तुम खुणि मंगलु, पर तुम त खुद ही मेरा नौ से मंगिल्या।</verse>
				<verse number="27">किलैकि पिता खुद ही तुम बटि प्यार करदु अर इन उ इलै करदु, किलैकि तुमुन मिसे प्यार कैरी, अर ईं बात पर भि बिस्वास कैरी, कि मि पिता परमेस्वर की तरफा बटि अयूं छौं।</verse>
				<verse number="28">हाँ, मि पिता परमेस्वर की तरफा बटि इख अयूं छौं, अर अब ईं दुनियां तैं छोड़ि के पिता मा जाणु छौं।”</verse>
				<verse number="29">तब यीशु का चेलों न वेकू बोलि, “गुरुजी, सच्‍चि ही मा अब तुम उदारण मा ना, बल्किन साफ-साफ बोन्‍ना छाँ।</verse>
				<verse number="30">अर अब हम समझि ग्यां, कि तुम सब कुछ जणदा छाँ। अर अब हमतै जरुरत नि च, कि तुम बटि कुछ भि सवाल पूछा। अर यां से हम बिस्वास करद्‍यां, कि तुम परमेस्वर की तरफा बटि अयां छाँ।”</verse>
				<verse number="31">तब यीशु न ऊंकू बोलि, “क्या तुम अब बिस्वास कना छाँ?</verse>
				<verse number="32">देखा, अब उ बगत औणु च, बल्किन मा ऐ भि गै। जब तुम सभि मितैं इखुली छोड़ि के तितर-बितर ह्‍वे जैल्या, अर अपणा-अपणा बाटों पर चलि जैल्या। तभि भि मि इखुली नि छौं, किलैकि मेरु पिता मेरा दगड़ा मा च।</verse>
				<verse number="33">अर यों बातों तैं मिन तुम मा इलै बोलि, ताकि मि मा बणयूं रै के तुमतै शान्ति मिलु। ईं दुनियां मा त तुम पर मुसीबतों न औण, पर तुम हिम्मत रखा किलैकि ईं दुनियां तैं मिन जीतयाली।”</verse>
			</chapter>
			<chapter number="17">
				<verse number="1">अर यू सब बोन्‍ना का बाद यीशु न स्वर्ग जनै देखि के प्रार्थना कैरी, “हे पिता, अब वा घड़ी ऐ गै। तुमरो पुत्र कथगा महान च, यू दिखै द्‍या, ताकि पुत्र का द्‍वारा भि यू दिखै जौ, कि तुम कथगा महान छाँ।</verse>
				<verse number="2">किलैकि तुमुन मितैं सभि मनखियों पर अधिकार दियूं च, ताकि जु लोग तुमुन मि मा सौंप्यां छिन, ऊं लोगु तैं मि सदनि को जीवन दे सैकु।</verse>
				<verse number="3">अर वु सदनि को जीवन यू च, कि तुम ही एकमात्र सच्‍चा परमेस्वर छाँ, अर तुमतै ऊ सभि पछ्याणी जा अर इन भि जाणि जा, कि मि यीशु मसीह तैं तुमुन ही भेजि।</verse>
				<verse number="4">अर जु काम करणु कू तुमुन मितैं दे छा, ऊंतैं पूरु कैरिके मिन दिखैयालि, कि तुम कथगा महान छाँ।</verse>
				<verse number="5">“हे पिता, दुनियां की शुरुवात से पैलि जब मि तुमरा दगड़ा मा छौ, तब मितैं बड़ु आदर-सम्मान मिलदु छौ, अर अब जब तुमरा दगड़ा मा रौलु त उई आदर-सम्मान मितैं मिलु।”</verse>
				<verse number="6">अर यीशु न इन भि प्रार्थना कैरी, “हे पिता, तुमुन ईं दुनियां मा बटि जु लोग मितैं दियां छिन, ऊंतैं मिन तुमरा बारा मा बतैयालि। अर ऊ लोग तुमरा ही छा, अर तुमुन ही ऊंतैं मि मा सौंपी। अर ऊंन तुमरा वचन तैं माणियालि।</verse>
				<verse number="7">अर अब ऊ इन जाणि गैनी, कि जु कुछ तुमुन मि मा सौंप्याली, उ सब तुमरि ही तरफा बटि मिल्यूं च।</verse>
				<verse number="8">किलैकि जु वचन तुमुन मितैं देई वु मिन ऊंतैं बतैयालि, अर ऊंन वेतैं स्वीकार कैरी। अर ऊ सच्‍चि मा ईं बात तैं जाणि गैनी, कि मि तुमरि तरफा बटि अयूं छौं, अर ऊ बिस्वास भि करदिन कि मितैं तुमुन ही भेजि।</verse>
				<verse number="9">“अर अभि मि दुनियां का लोगु कू ना, पर ऊं चेलों खुणि ही जु तुमुन मि मा सौंप्यां छिन, ऊं खुणि ही प्रार्थना कनु छौं। किलैकि वु तुमरा ही छिन।</verse>
				<verse number="10">अर जु कुछ भि मेरु च, उ सब तुमरो ही च। अर जु तुमरो च, उ मेरु भि च। अर ऊं ही चेलों द्‍वारा मेरी महानता का बारा मा पता चलदु।</verse>
				<verse number="11">अर अब मिन ईं दुनियां मा नि रौण, किलैकि मि तुमरा पास औणु छौं, पर ऊंन त ईं दुनियां मा ही रौण। हे मेरा पवित्र पिता, अपणु नौ, जु तुमुन मितैं दियूं च वे ही नौ की शक्‍ति से यों की हिफाजत कैरा, ताकि जन हम दुईया का दुई एक छां, ठिक उन्‍नि ऊ भि एक ह्‍वे जा।</verse>
				<verse number="12">जबरि तक मि ऊंका दगड़ा मा छौ, तबरि तक मिन तुमरा वे नौ की शक्‍ति से, जु नौ तुमुन मितैं देई ऊंकी देख-रेख अर हिफाजत कैरी। इलै ऊं मदि कै को भि नास नि ह्‍वे, पर बस वे एक ही मनखि विणास ह्‍वे, जैन विणास को बाटु चुणी ताकि पवित्रशास्‍त्र मा जु लिख्यूं छौ उ पूरु ह्‍वे जौ।</verse>
				<verse number="13">“हे मेरा पिता, अब मि तेरा पास औणु छौं अर दुनियां मा रौन्द ही मि यों बातों तैं बोन्‍नु छौं। ताकि जन खुशी मितैं होणी च, उन्‍नि ऊंतैं भि भौत खुशी हो।</verse>
				<verse number="14">अर मिन तुमरो वचन ऊंतैं सुण्यालि, इलै दुनियां का लोगु न ऊं बटि बैर कैरी, किलैकि जन मि दुनियां को नि छौं, ठिक उन्‍नि ऊ भि दुनियां का नि छिन।</verse>
				<verse number="15">अर मि इन प्रार्थना नि कनु छौं, कि तुम ऊंतैं दुनियां मा बटि उठे द्‍या, पर इन प्रार्थना कनु छौं, कि तुम ऊंतैं दुष्‍ट शैतान बटि बचै के रखा।</verse>
				<verse number="16">अर जन मि ईं दुनियां को नि छौं, ठिक उन्‍नि ऊ भि ईं दुनियां का नि छिन।</verse>
				<verse number="17">तुमरो वचन सच्‍चु च, इलै अपणा वे सच्‍चा वचन का द्‍वारा तुम ही ऊंतैं पवित्र कैरा।</verse>
				<verse number="18">अर जन तुमुन मितैं ईं दुनियां मा भेजि, ठिक उन्‍नि मिन भि ऊंतैं ईं दुनियां मा भेजदु छौं।</verse>
				<verse number="19">अर ऊंका खातिर मि अफ तैं दे देन्दु, ताकि ऊ भि सच्‍चै का द्‍वारा अफ तैं तुम खुणि दे द्‍या।”</verse>
				<verse number="20">अर यीशु न इन भि प्रार्थना कैरी कि, “हे पिता, मि सिरफ यों खुणि ही ना, बल्किन ऊं खुणि भि प्रार्थना कनु छौं, जु कि ऊंका वचनों तैं सुणी के मि पर बिस्वास करदिन।</verse>
				<verse number="21">ताकि ऊ सभ्या का सभि एक ह्‍वे जा। हे मेरा पिता, जन तुम मि मा छाँ अर मि तुम मा छौं, ठिक उन्‍नि ऊ भि हम मा बणयां रा ताकि दुनियां का लोग बिस्वास कैरा, कि तुमुन ही मितैं भेजि च।</verse>
				<verse number="22">अर जन आदर-सम्मान तुमुन मितैं देई, उई मिन ऊंतैं दियाली ताकि जन हम दुई एक छां, ठिक उन्‍नि ऊ भि एक ह्‍वे जा।</verse>
				<verse number="23">अर तुम मि मा छाँ अर मि ऊंमा छौं, ताकि वु पूरि तरौं से एक ह्‍वे जा। अर यू देखि के दुनियां का लोग जाणि जाला, कि तुमुन ही मितैं भेजि च, अर जन तुमुन मि बटि प्यार कैरी, ठिक उन्‍नि प्यार ऊं बटि कैरी।</verse>
				<verse number="24">“हे मेरा पिता, मि चान्दु छौं, कि जु लोग तुमुन मि मा सौंप्यां छिन, ऊ भि मेरा दगड़ा मा उख रा, जख मि रौलु। ताकि दुनियां की शुरुवात से पैलि तुमुन मि बटि प्यार कैरिके जु आदर-सम्मान मितैं देई, वेतैं वु देखि सैका।</verse>
				<verse number="25">“हे मेरा धरमी पिता, दुनियां का लोगु न तुमतै नि पछ्याणी, पर मि तुमतै पछ्याणदु छौं। अर यों लोगु न भि जाण्यालि, कि तुमुन ही मितैं भेजि।</verse>
				<verse number="26">अर मिन तुमरा बारा मा ऊंतैं बतै, अर अगनै भि ऊंतैं बतौणु रौलु। किलैकि जु प्यार तुमुन मि बटि कैरी, उई प्यार ऊंमा बणयूं रौ अर मि भि ऊंमा बणयूं रौ।”</verse>
			</chapter>
			<chapter number="18">
				<verse number="1">अर इन प्रार्थना करण का बाद यीशु अपणा चेलों का दगड़ा मा किद्रोन नौ का एक गदेरा तैं पार कैरिके दुसरि तरफा गै। उख एक बगिचा छौ अर यीशु अर वेका चेला वे बगिचा मा गैनी।</verse>
				<verse number="2">अर वेतैं पकड़ौण वळा यहूदा तैं भि ईं जगा का बारा मा पता छौ। किलैकि यीशु जादातर अपणा चेलों का दगड़ा मा उखि जान्दु छौ।</verse>
				<verse number="3">तब यहूदा, रोमी सिपयों को एक दल तैं, अर मुख्य पुरोहितों अर फरीसी दल का लोगु की तरफा बटि भेज्यां मन्दिर का पैरादारों तैं लेके ऐ। अर ऊंका हाथों मा लालटेन, मसाल अर हथियार भि छा।</verse>
				<verse number="4">तब यीशु ऊं सब बातों तैं जाणि गै, कि वेका दगड़ा मा क्या-क्या होण वळु च। इलै उ अगनै ऐ अर ऊंकू बोलि, “तुम कैतैं खुज्याणा छाँ?”</verse>
				<verse number="5">तब ऊंन वेकू बोलि, “नासरत गौं का यीशु तैं।” यीशु न ऊंकू बोलि, “उ मि ही छौं।” तब यीशु तैं पकड़ौण वळु यहूदा भि ऊंका दगड़ा मा उखि खड़ु छौ।</verse>
				<verse number="6">जब यीशु न इन बोलि, कि “उ मि ही छौं,” तब ऊ पिछनै हटि गैनी अर भूयां मा फरके गैनी।</verse>
				<verse number="7">तब यीशु न ऊंतैं फिर से पूछी, “तुम कैतैं खुज्याणा छाँ।” ऊंन बोलि, “नासरत गौं का यीशु तैं।”</verse>
				<verse number="8">यीशु न ऊंतैं जबाब देई, “मिन त तुमतै बतैयालि, कि मि उई छौं। अगर जु तुम मितैं ही खुज्याणा छाँ, त यों तैं जाण द्‍या।”</verse>
				<verse number="9">अर यू सब इलै ह्‍वे ताकि उ वचन पूरु हो, जु यीशु न एक बार बोलि छौ। अर वु इन च कि, “जु लोग तुमुन मि मा सौंप्यां छिन, ऊंमा बटि मिन एक तैं भि नि हरचै।”</verse>
				<verse number="10">तब शमौन पतरस मा एक तलवार छै। अर वेन वींतैं निकाळि के महा पुरोहित का नौकर पर चलै के वेको देणु कन्दूड़ उड़ै दिनी। अर वे नौकर को नौ मलखुस छौ।</verse>
				<verse number="11">तब यीशु न पतरस कू बोलि, “अपणी तलवार तैं म्यान मा रखी दे। किलैकि जु कटोरा पिता न मितैं दियूं च, क्या मि वेतैं नि प्यों?”</verse>
				<verse number="12">तब सैनिको न अर ऊंका सुबेदार न अर यहूदियों का मन्दिर का पैरादारों न यीशु तैं पकड़ी के बान्धि दिनी।</verse>
				<verse number="13">फिर ऊ पैलि वेतैं पुरणा महा पुरोहित हन्‍ना मा लेके गैनी, किलैकि उ वे बगत का महा पुरोहित याने कि काइफा को ससुर छौ।</verse>
				<verse number="14">अर यू उई काइफा छौ, जैन यहूदियों का मुख्यों तैं इन सला देई छै कि, “हमरा सभि लोगु खुणि एक ही मनखि को मुरण अच्छु च।”</verse>
				<verse number="15">अर जब वु यीशु तैं पकड़ी के लि जाणा छा, तब शमौन पतरस अर एक और चेला भि यीशु का पिछनै-पिछनै गैनी। अर यू चेला महा पुरोहित को जाण-पछ्याण को छौ। इलै उ भि यीशु का दगड़ा मा महा पुरोहित का चौक तक पौंछी सैकी।</verse>
				<verse number="16">पर पतरस भैर द्‍वार का ही समणि खड़ु रै। तब उ दुसरो चेला, जु महा पुरोहित की जाण-पछ्याण को छौ भैर ऐ, अर द्‍वार पर पैरा देण वळी जनानि का दगड़ा मा बात कैरिके पतरस तैं अफ दगड़ा भितर लि गै।</verse>
				<verse number="17">तब पैरा देण वळी जनानि न पतरस कू बोलि, “कखि तू भि वे मनखि का चेलों मा बटि त नि छैई?” वेन बोलि, “ना, मि नि छौं।”</verse>
				<verse number="18">अर उबरि ठण्ड भौत होणी छै, इलै नौकरों न अर मन्दिर का पैरादारों न क्‍वेला धदगै के ऊ सब आग तपणा छा। अर पतरस भि खड़ु ह्‍वेके ऊंका दगड़ा मा आग तपणु छौ।</verse>
				<verse number="19">तब महा पुरोहित हन्‍ना न यीशु बटि वेका चेलों का बारा मा अर वेका दियां उपदेस का बारा मा पूछताछ कैरी।</verse>
				<verse number="20">तब यीशु न वेतैं जबाब देई, “मिन सब लोगु का समणि खुलाआम बात करिनी। अर जख सब यहूदी लोग जमा होनदिन, जन कि प्रार्थना भवनों अर मन्दिर मा भि उपदेस देई। अर मिन लुकि-छिपी के कुछ भि नि बोलि।</verse>
				<verse number="21">फिर तुम मि बटि किलै पूछणा छाँ? ऊंतैं पूछा जौन मेरु उपदेसों तैं सुणी, कि मिन ऊंमा क्या-क्या बोलि। किलैकि वु जणदा छिन, कि मिन क्या-क्या बोलि।”</verse>
				<verse number="22">जब यीशु न इन बोलि, तब मन्दिर का एक पैरेदार न जु कि उखम खड़ु होयुं छौ, वेन वे पर थप्पड मारी अर बोलि, “तू महा पुरोहित तैं इन्द्रयो जबाब किलै देणी?”</verse>
				<verse number="23">तब यीशु न वेकू बोलि, “अगर मिन कुछ गळत बात बोलि त मेरी गळती भि बतै दे, पर अगर जु मिन ठिक बोलि त तू मितैं किलै मरणी छैई?”</verse>
				<verse number="24">तब हन्‍ना न यीशु तैं उन्‍नि बन्धयां महा पुरोहित काइफा का पास भेज दिनी।</verse>
				<verse number="25">अर जब शमौन पतरस खड़ु ह्‍वेके आग तपणु छौ, तब ऊं लोगु न वेतैं पूछी, “कखि तू भि वेका चेलों मा बटि त नि छैई?” तब वेन इनकार कैरिके बोलि, “ना, मि नि छौं।”</verse>
				<verse number="26">अर महा पुरोहितों का नौकरों मा बटि एक उख छौ, अर यू वे नौकर को रिश्तेदार छौ, जैको कन्दूड़ पतरस न उड़ेयेलि छौ। तब ये नौकर न पतरस कू बोलि, “क्या मिन त्वेतै वेका दगड़ा बगिचा मा नि देखि छौ?”</verse>
				<verse number="27">अर पतरस न अबरि दौं भि इनकार कैरी दिनी। अर तबरि मैर बासी गै।</verse>
				<verse number="28">तब रात खुलण का बगत ऊ लोग यीशु तैं काइफा का इख बटि रोमी गवर्नर पिलातुस का राजमहल मा लि गैनी। अर ऊ यहूदी लोग खुद राजमहल का भितर नि गैनी, किलैकि कखि ऊ अशुद्ध नि ह्‍वे जा, अर फसह को त्योवार को खाणु नि खै सैका।</verse>
				<verse number="29">इलै पिलातुस न भैर ऐके ऊंतैं पूछी कि, “तुम ये मनखि पर कै बात को दोष लगौणा छाँ?”</verse>
				<verse number="30">तब ऊंन वेतैं जबाब देई, “अगर यू मनखि अपराधि नि होन्दु, त हम येतैं तुमरा सुपुर्द नि करदा।”</verse>
				<verse number="31">तब पिलातुस न ऊंकू बोलि, “तुम येतैं लि जा, अर अपणा नियम-कानूनों का मुताबिक येको न्याय कैरा।” यां पर यहूदी मुख्यों न वेकू बोलि, “हम मा यू अधिकार नि च कि कैतैं भि मौत की सजा दे सैका।”</verse>
				<verse number="32">अर यू इलै ह्‍वे, किलैकि यीशु न जु वचन अपणा चेलों मा बोलि छौ, उ पूरु ह्‍वे जौ कि वेकी मौत कनकै होण। अर इन बोलि के वेन अपणा चेलों तैं पैलि ही संकेत दियाली छौ।</verse>
				<verse number="33">तब पिलातुस फिर से राजमहल का भितर गै, अर यीशु तैं बुलै के वेतैं पूछी, “क्या तू यहूदियों को राजा छैई?”</verse>
				<verse number="34">तब यीशु न बोलि, “क्या तुम ईं बात तैं अपणी तरफा बटि बुलणा छाँ, या मेरा बारा मा तुमतै औरु न बतै?”</verse>
				<verse number="35">तब पिलातुस न जबाब देई, “मि यहूदी थुड़ी नि छौं? तेरा ही लोगु न अर मुख्य पुरोहितों न त्वेतै मेरा सुपुर्द कैरी, पर तू मितैं इन बतौ कि तिन इन्द्रयो क्या कैरी?”</verse>
				<verse number="36">तब यीशु न जबाब देई, “मेरु राज ईं दुनियां को नि च। अर अगर जु मेरु राज ईं दुनियां को होन्दु, त मेरा सेवक लड़ै करदा, कि मि यहूदियों का हाथों मा पकड़वै नि जान्दु पर मेरु राज ईं दुनियां को नि च।”</verse>
				<verse number="37">तब पिलातुस न यीशु तैं पूछी, “त क्या फिर तू राजा छैई?” वेन जबाब देई, “तुम ठिक ही बोन्‍ना छाँ, कि मि राजा छौं, अर मि त इलै ही जनमियूं अर ईं दुनियां मा मि इलै अयूं, कि सच्‍चै का बारा मा लोगु तैं बतौ। अर हरेक जु सच्‍चै का छिन, ऊ मेरी आवाज तैं सुणदिन।”</verse>
				<verse number="38">तब पिलातुस न वे बटि पूछी, “वा सच्‍चै क्या च?” अर इन बोन्‍न का बाद पिलातुस फिर से यहूदियों का मुख्यों का पास भैर ऐ, अर ऊंकू बोलि, “मिन त वे मनखि मा कुई भि खोट नि पै।</verse>
				<verse number="39">पर तुमरो त इन रिवाज च, कि फसह का त्योवार पर मि तुम खुणि एक कैदी तैं छोड़ि द्‍यूं। त क्या तुम इन चन्द्‍यां, कि मि तुम खुणि यहूदियों का राजा तैं छोड़ि द्‍यूं?”</verse>
				<verse number="40">तब ऊंन फिर से चिल्‍लै-चिल्‍लै के बोलि, “ये मनखि तैं ना, पर हम खुणि बरअब्बा तैं छोड़ि दे।” पर वु बरअब्बा त एक डाकु छौ।</verse>
			</chapter>
			<chapter number="19">
				<verse number="1">येका बाद पिलातुस न यीशु तैं लि जैके कोड़ा मरवैनी।</verse>
				<verse number="2">अर सिपयों न वेको मजाक उड़ौणु खुणि वेतैं राजा की तरौं कांडों को एक मुकुट बूणी के वेका मुण्ड़ मा पेनै, अर वेतैं बैंगनि कपड़ा भि पेनै।</verse>
				<verse number="3">अर ऊ बार-बार वेका समणि ऐके बोन्‍न लगि गैनी, “हे यहूदियों का राजा तेरी जै हो।” अर वेतैं थपड़यौण लगि गैनी।</verse>
				<verse number="4">तब पिलातुस फिर से भैर ऐ अर ऊंकू बोलि, “देखा, मि वेतैं तुमरा समणि भैर लेके औणु छौं ताकि तुमतै मालूम ह्‍वे जौ, कि मिन वेमा कुई भि दोष नि पै।”</verse>
				<verse number="5">तब यीशु उन्‍नि बैंगनि कपड़ा अर मुण्ड़ मा कांडों को मुकुट पैरि के भैर ऐ। तब पिलातुस न ऊंकू बोलि, “ये मनखि तैं देखा।”</verse>
				<verse number="6">अर जन्‍नि मुख्य पुरोहितों न अर मन्दिर का पैरादारों न यीशु तैं देखि, ऊ चिल्‍लै-चिल्‍लै के बुलण लगि गैनी, “वेतैं क्रूस पर चड़ै द्‍या, वेतैं क्रूस पर चड़ै द्‍या।” पर पिलातुस न ऊंकू बोलि, “तुम ही येतैं लि जा, अर क्रूस पर चड़ा किलैकि मितैं वेमा कुई दोष नि दिखेन्दु।”</verse>
				<verse number="7">तब यहूदियों न वेतैं जबाब देई, “हमरु भि नियम-कानून च अर वे नियम-कानून का मुताबिक उ मरे जाण लैख च, किलैकि येन अफ तैं परमेस्वर को पुत्र ठैरै।”</verse>
				<verse number="8">अर जब पिलातुस न या बात सुणी त उ और भि जादा डौऽरी गै।</verse>
				<verse number="9">अर उ फिर से राजमहल का भितर गै अर यीशु तैं पूछी, “तू कख बटि अईं?” पर यीशु न वेतैं कुई जबाब नि देई।</verse>
				<verse number="10">तब पिलातुस न वेकू बोलि, “तू मि बटि बात किलै नि कनि? क्या तू नि जणदी, कि त्वेतै छुड़ण को अधिकार मि मा च, अर त्वेतै क्रूस पर चड़ौणु को भि अधिकार मि मा च?”</verse>
				<verse number="11">तब यीशु न जबाब देई, “अगर तुमतै परमेस्वर की तरफा बटि यू अधिकार नि दिये जान्दु, त तुमरो मि पर कुई भि अधिकार नि होन्दु। इलै जैन मितैं तुमरा सुपुर्द कैरी, वेको पाप और भि जादा बड़ु च।”</verse>
				<verse number="12">जब पिलातुस न यू सुणी, त यीशु तैं छुड़णे की कोसिस कैरी पर यहूदियों न चिल्‍लै-चिल्‍लै के बोलि, “अगर जु तुम ये मनखि तैं छोड़ि दिल्या, त फिर तुम महाराजा को विरोध करण वळा छाँ, किलैकि जु कुई भि अफ तैं राजा बणादु उ महाराजा को विरोध करदु।”</verse>
				<verse number="13">अर यू सब बातों तैं सुणी के पिलातुस यीशु तैं भैर लेके ऐ, अर न्याय आसन पर बैठि गै। यू न्याय आसन ढुंगो को एक चबूतरा पर छौ, अर वे चबूतरो को नौ इब्रानी भाषा मा “गब्बता” छौ।</verse>
				<verse number="14">अर यू दिन फसह का त्योवार की तयारी को दिन छौ। अर उबरि दिन की करीब बारह बजणी छै। तब पिलातुस न यहूदियों खुणि बोलि, “देखा तुमरो राजा।”</verse>
				<verse number="15">पर ऊ चिलाण लगि गैनी, “वेतैं लि जा, वेतैं लि जा, वेतैं क्रूस पर चड़ै द्‍या।” पिलातुस न ऊंकू बोलि, “त क्या मि तुमरा राजा तैं क्रूस पर चड़ै द्‍यूं?” तब मुख्य पुरोहितों न जबाब देई, “महाराजा का अलावा हमरु कुई दुसरो राजा नि च।”</verse>
				<verse number="16">अर आखिरी मा पिलातुस न यीशु तैं क्रूस पर चड़ौणु खुणि वेतैं रोमी सिपयों का सुपुर्द कैरी दिनी।</verse>
				<verse number="17">तब ऊ यीशु तैं लेके चलि गैनी। अर यीशु खुद अपणी क्रूस तैं उठे के एक जगा मा गै। अर वीं जगा को नौ “खोपड़ि की जगा” छौ, जैकू इब्रानी भाषा मा गुलगुता बुल्दिन।</verse>
				<verse number="18">अर उख ऊंन यीशु तैं क्रूस पर चड़ै। अर वेका दगड़ा दुई और मनखियों तैं भि क्रूस पर चड़ै, एक तैं इनै अर दुसरा तैं उनै अर यीशु तैं बीच मा।</verse>
				<verse number="19">अर पिलातुस न एक पाटि मा यीशु का कियां अपराध तैं लिख्वे के क्रूस का मथि लगवै दिनी। अर वे पर इन लिख्यूं छौ, “नासरत को यीशु, यहूदियों को राजा।”</verse>
				<verse number="20">अर जु लिख्यूं छौ, वेतैं भौत सरा यहूदी लोगु न पैड़ी। किलैकि जिं जगा पर यीशु तैं क्रूस पर चड़ये गै छौ, वा जगा यरूशलेम नगर का नजदीक ही छै, अर यू इब्रानी, लतीनी अर यूनानी भाषा मा लिख्यूं छौ।</verse>
				<verse number="21">तब यहूदियों का मुख्य पुरोहितों न पिलातुस कू बोलि, “यहूदियों को राजा इन नि लिखा, पर इन लिखा कि, ‘येन बोलि की मि यहूदियों को राजा छौं।’”</verse>
				<verse number="22">तब पिलातुस न बोलि, “एक बार जु मिन लिख्यालि, उ लिख्यालि।”</verse>
				<verse number="23">जब सिपयों न यीशु तैं क्रूस पर चड़ै दिनी, तब ऊंन वेका कपड़ों तैं ले अर चार भागों मा बांटि दिनी, ताकि हरेक सिपै खुणि एक-एक ह्‍वे जौ। अर उन्‍नि ऊंन कुरता भि लेई पर यू कुरता त सिल्युं नि छौ, बल्किन मथि बटि मूड़ी तक पूरु बणयूं छौ।</verse>
				<verse number="24">इलै ऊंन आपस मा बोलि, “हम येतैं नि चिरद्‍या पर पांसा डालि के दिखद्‍यां, कि यू कै को जि होन्दु।” अर सिपयों न उन्‍नि कैरी। अर यू त इलै ह्‍वे, ताकि पवित्रशास्‍त्र की लिखीं बात पूरि ह्‍वे जौ। अर वा इन च, कि “ऊंन मेरा कपड़ा आपस मा बांटि दिनी, अर मेरा कुरता खुणि पांसा डालि।”</verse>
				<verse number="25">अर वे बगत यीशु का क्रूस का नजदीक वेकी माँ, वेकी मौसि, अर क्लोपास की घरवळी मरियम अर मगदला गौं की मरियम खड़ि होईं छै।</verse>
				<verse number="26">जब यीशु न अपणी माँ अर अपणा प्रिय चेला तैं उख खड़ु होयुं देखि, तब वेन अपणी माँ खुणि बोलि, “माँ, देख आज बटि यू तेरु नौनु च।”</verse>
				<verse number="27">अर वेन वे चेला खुणि भि बोलि, “देख, आज बटि या तेरी माँ च।” अर वे दिन बटि ही उ चेला वींतैं अपणा घौर लि गै।</verse>
				<verse number="28">येका बाद यीशु यू जाणि गै, कि वेको काम पूरु ह्‍वे गै। अर जन पवित्रशास्‍त्र मा लिख्यूं च, उ भि पूरु ह्‍वे जौ इलै वेन बोलि, “मितैं तिस लगि।”</verse>
				<verse number="29">अर उख सिरका को भोरयूं एक भाँडु रख्युं छौ। इलै ऊंन एक स्पंच तैं सिरका मा भिजे अर जुफा की फौंकि मा रखी के वेका गिच्‍चा पर लगै।</verse>
				<verse number="30">तब यीशु न वे सिरका तैं चुसी के बोलि, “पूरु ह्‍वे गै।” अर मुण्ड़ झुकै के वेन अपणा पराण छोड़ि दिनी।</verse>
				<verse number="31">अर उ यहूदियों को सब्त की तयारी को दिन छौ। अर सब्त का दिन लांश क्रूस पर नि रौ, इलै यहूदी लोगु न पिलातुस बटि बिन्ती कैरी कि, “ऊंका टंगड़ा तोड़ि द्‍या, अर जब ऊ मोरि जा, तब ऊंतैं उतारि द्‍या।” किलैकि उ सब्त को दिन एक खास सब्त को दिन छौ।</verse>
				<verse number="32">इलै सिपयों न जैके जु यीशु का दगड़ा क्रूस पर चड़ये गै छा, ऊं दुईयों का टंगड़ा तोड़ि दिनी।</verse>
				<verse number="33">पर जब ऊ लोग यीशु का समणि ऐनी, त ऊंन देखि कि उ त पैलि ही मोरि गै। इलै ऊंन वेका टंगड़ा नि तोड़िनि।</verse>
				<verse number="34">तब एक सिपै न वेकी पंणकोखि पर भाले की मारी, अर तुरन्त उख बटि ल्वे अर पाणि निकळण लगि गै।</verse>
				<verse number="35">अर इन इलै ह्‍वे, ताकि पवित्रशास्‍त्र मा लिख्यूं वचन पूरु ह्‍वे जौ। अर वु वचन इन च कि, “वेकी कुई भि हड्‍डी तुड़ै नि जालि।” अर पवित्रशास्‍त्र का एक हैंकी जगा मा इन भि लिख्यूं च कि, “जैतैं ऊंन भालळ मारी, वु लोग वेतैं दिखला।” अर जैन यू सब होन्दु देखि, वेन ही या गवै देई अर वेकी गवै सच्‍चि च। अर उ खुद ही जणदु च, कि उ सच्‍च ही बोन्‍नु च। अर वेन या गवै इलै देई, ताकि तुम भि बिस्वास कैरा।</verse>
				<verse number="36"></verse>
				<verse number="37"></verse>
				<verse number="38">अर अरिमतिया नगर मा यूसुफ नौ को एक मनखि छौ, जु की यीशु पर बिस्वास करण वळु छौ। पर यहूदियों की डौऽर की वजै से ईं बात तैं छिपै के रखदु छौ। तब उ पिलातुस का पास जैके बिन्ती करण लगि गै, कि उ यीशु की लांश तैं लि जौ। अर पिलातुस बटि इजाजत मिलण का बाद उ ऐके यीशु की लांश तैं लि गै।</verse>
				<verse number="39">अर नीकोदिमुस जु कि राति का बगत पैलि यीशु तैं मिलणु कू गै छौ, उ भि वेका दगड़ा मा छौ अर उ लगभग तैंतिस किलो गंधरस अर एलवा नौ की खुशबुदार चीजों को एक घोळ तैं मिलै के अपणा दगड़ा मा लेके ऐ।</verse>
				<verse number="40">तब ऊंन यीशु की लांश तैं उठे, अर यहूदी लोगु की दफनौण की रीति का मुताबिक वे पर खुशबुदार चीजों तैं लगै के कफन मा लपेटि दिनी।</verse>
				<verse number="41">अर जख यीशु तैं क्रूस पर चड़ये गै छौ, वीं जगा का नजदीक ही एक बगिचा छौ। वे बगिचा मा एक नई उड़्यार की बणि कबर छै, जैमा कभि भि कैतैं नि रखै गै छौ।</verse>
				<verse number="42">अर उ यहूदियों को सब्त की तयारी को दिन छौ, अर वा कबर समणि पर ही छै, इलै ऊंन यीशु का सरील तैं वीं कबर मा ही रखी दिनी।</verse>
			</chapter>
			<chapter number="20">
				<verse number="1">तब हप्‍ता का पैला दिन याने कि इतवार रात खुलण से पैलि ही मगदला गौं की मरियम यीशु की कबर पर ऐ। अर वींन देखि की कबर का मुख पर जु डांग छौ, उ हटयुं च।</verse>
				<verse number="2">इलै वा भागी के शमौन पतरस अर यीशु का दुसरा चेला जै बटि यीशु जादा प्यार करदु छौ, ऊंका पास गै अर ऊंकू बोलि, “ऊ लोग प्रभु तैं कबर बटि निकाळि के लि गैनी। अर हमतै यू मालूम नि च, कि ऊंन वेतैं कख रखी।”</verse>
				<verse number="3">तब पतरस अर उ दुसरो चेला भागी के कबर जनै गैनी।</verse>
				<verse number="4">अर ऊ दुई दगड़ा-दगड़ि अटगंणा छा, पर उ दुसरो चेला पतरस से अगनै दौड़ी के कबर पर पैलि पौंछी गै।</verse>
				<verse number="5">अर वेन निसो ह्‍वेके भितर देखि, पर उ भितर नि गै। अर वेतैं कफन को कपड़ा उख पोड़्यूं दिखै।</verse>
				<verse number="6">जब शमौन पतरस भि वेका पिछनै-पिछनै उख पौंछी गै, त उ सीदा कबर का भितर चलि गै। अर उख वेन भि उ कफन पोड़्यूं देखि।</verse>
				<verse number="7">अर वेन यू भि देखि, कि जै अंगोछन यीशु को मुण्ड़ लपेटयुं छौ, उ कफन का कपड़ों का दगड़ा मा ना, पर एक अलग जगा मा तह कैरिके रख्युं छौ।</verse>
				<verse number="8">तब उ दुसरो चेला जु की पैलि कबर पर पौंछी छौ उ भि भितर गै, अर वेन भि देखि अर बिस्वास कैरी।</verse>
				<verse number="9">किलैकि पवित्रशास्‍त्र कि ईं बात तैं ऊ तभि तक भि नि समझि छा। अर वा बात इन च कि यीशु को मुरदो मा बटि ज्यून्दु होण जरुरी च।</verse>
				<verse number="10">तब चेला जख रुक्यां छा, वु वापस उखि चलि गैनी।</verse>
				<verse number="11">पर मगदला गौं की मरियम त कबर का भैर ही खड़ि ह्‍वेके रुंणी छै। अर रुंन्द-रुंन्द वींन निसो ह्‍वेके कबर का भितर देखि।</verse>
				<verse number="12">तब वींतैं दुई स्वर्गदूत चमकदार कपड़ा पैरयां दिखैनि। अर ऊंमा बटि एक सिराणा की तरफा अर दुसरो पैथाणा की तरफा बैठयूं छौ, जख यीशु तैं रख्युं छौ।</verse>
				<verse number="13">तब ऊंन वींकू बोलि, “बेटी, तू रुंणी किलै छैई?” तब वींन ऊंकू बोलि, “ऊ लोग मेरा प्रभु तैं उठे के लि गैनी, अर मि नि जणदु कि ऊंन वेतैं कख रख्युं च।”</verse>
				<verse number="14">इन बोलि के वा पिछनै मुड़ि, अर यीशु तैं उखम खड़ु होयुं देखि, पर नि पछ्याणी कि उ यीशु ही च।</verse>
				<verse number="15">तब यीशु न वींकू बोलि, “हे भुलि, तू रुंणी किलै छैई? अर कैतैं खुज्याणी छैई?” अर वींन इन समझि कि यू बगिचा को माली च। इलै वींन वेकू बोलि, “श्रीमान, अगर जु तुमुन वेतैं इख बटि उठे, त मितैं बतै द्‍या, कि तुमुन वेतैं कख रखी कि मि वेतैं लि जौ।”</verse>
				<verse number="16">तब यीशु न वींकू बोलि, “मरियम।” वींन पिछनै मुड़ि के इब्रानी भाषा मा बोलि, “रब्बूनी” (जैको मतलब च, गुरुजी)।</verse>
				<verse number="17">तब यीशु न वींकू बोलि, “मितैं पकड़ी के ही नि रख। किलैकि मि अभि तक मेरा पिता का पास मथि नि ग्यों। पर तू मेरा भैयों का पास जा अर ऊंतैं बतै दे, कि मि मेरा पिता अर तुमरा पिता, अर मेरा परमेस्वर अर तुमरा परमेस्वर का पास मथि जाणु छौं।”</verse>
				<verse number="18">तब मगदला गौं की मरियम न जैके चेलों तैं बतै कि, “मिन प्रभु तैं देखि।” अर प्रभु न वींतैं जु बतै छौ, वु सब कुछ वींन ऊंतैं बतै।</verse>
				<verse number="19">अर वे ही दिन याने कि इतवार की श्याम बगत यीशु का चेला एक कमरा मा छा। अर यहूदियों की डौऽर का बाना ऊंन द्‍वार बन्द कैरियाली छा, कि तबरि यीशु ऊंका बीच मा ऐके खड़ु ह्‍वे गै, अर ऊंकू बोलि, “तुमतै शान्ति मिलु।”</verse>
				<verse number="20">अर इन बोन्‍न का बाद वेन ऊंतैं अपणा हाथ अर पंणकोखि दिखै। तब चेला प्रभु तैं पछ्याणी के भौत खुश ह्‍वे गैनी।</verse>
				<verse number="21">अर यीशु न ऊंकू फिर से बोलि, “तुमतै शान्ति मिलु। अर जन पिता न मितैं भेजि, उन्‍नि मि भि तुमतै भेजदु छौं।”</verse>
				<verse number="22">इन बोलि के वेन ऊं पर सांस फूकी अर ऊंकू बोलि, “पवित्र आत्मा तैं स्वीकार कैरा।</verse>
				<verse number="23">अर जौं का पाप तुम माफ करिल्या, ऊंतैं माफी दिये जालि। अर जौं का पाप तुम माफ नि करिल्या, ऊंका पाप माफ नि किये जाला।”</verse>
				<verse number="24">अर जबरि यीशु उख ऐ छौ, त वे बगत यीशु का बारह चेलों मा बटि थोमा, जैकू जौंळ्या भि बुल्दिन, उ ऊंका दगड़ा मा नि छौ।</verse>
				<verse number="25">इलै दुसरा चेलों न वे बटि बोलि, “हमुन प्रभु तैं देखि।” पर थोमा न ऊं खुणि बोलि, “जबरि तक मि वेका हाथों पर किल्यों का निसान नि देखि द्‍यूं, अर किल्यों का ऊं छेदों का भितर अपणी अंगुळि नि डालि द्‍यूं, अर वेकी पंणकोखि पर अपणु हाथ नि डालि द्‍यूं, तबरि तक मि बिस्वास नि कैरी सकदु।”</verse>
				<verse number="26">एक हप्‍ता का बाद यीशु का चेला फिर से घौर का भितर छा। अर अबरि दौं थोमा भि ऊंका दगड़ा मा छौ। अर घौर का द्‍वार बन्द छा, तभि भि यीशु भितर ऐ गै। अर ऊंका बीच मा खड़ु ह्‍वेके बोलि, “तुमतै शान्ति मिलु।”</verse>
				<verse number="27">तब वेन वेकू बोलि, “थोमा, अपणा अंगुळा तैं इनै लौ मेरा हाथों मा डालि के देख। अर अपणा हाथों तैं बढै के मेरी पंणकोखि मा डाल, अर सकी ना पर बिस्वासी बण।”</verse>
				<verse number="28">तब थोमा न वेकू बोलि, “मेरा प्रभु, मेरा परमेस्वर।”</verse>
				<verse number="29">यीशु न वेकू बोलि, “क्या तू इलै बिस्वास कनि, किलैकि तिन मितैं देखियाली? पर धन्य छिन ऊ लोग, जु बिन दिख्यां बिस्वास करदिन।”</verse>
				<verse number="30">अर यीशु न त और भि भौत सा चमत्कारिक काम अपणा चेलों का समणि करिनी। पर ऊ सब ईं किताब मा नि लिख्यां छिन।</verse>
				<verse number="31">पर जु कुछ भि यां मा लिख्यूं च उ इलै लिख्यूं च, ताकि तुम बिस्वास कैरी सैका, कि यीशु ही परमेस्वर को पुत्र मसीह च। अर ईं बात पर बिस्वास कैरिके तुम वेका नौ से सदनि को जीवन पै सैका।</verse>
			</chapter>
			<chapter number="21">
				<verse number="1">अर येका बाद यीशु अपणा चेलों तैं गलील झील का छाला पर फिर से दिखै। अर वे दिन इन ह्‍वे कि:</verse>
				<verse number="2">एक दिन शमौन पतरस, अर थोमा जैकू जौंळ्या भि बुल्दिन, अर गलील मुलक का काना गौं को नतनएल, अर जबदी का दुई नौना अर यीशु का दुई और चेला भि जमा होयां छा।</verse>
				<verse number="3">तब शमौन पतरस न ऊंकू बोलि, “मि त माछा मरणु कू जाणु छौं।” अर दुसरा चेलों न वेकू बोलि, “हम भि तेरा दगड़ा मा औणा छां।” तब ऊ सब जैके नाव मा बैठि गैनी, पर वीं राति ऊंन कुछ भि नि पकड़ी।</verse>
				<verse number="4">जब सुबेर होण लगि गै त यीशु छाला पर खड़ु होयुं छौ, पर चेलों न वेतैं नि पछ्याणी की उ यीशु ही च।</verse>
				<verse number="5">तब यीशु न ऊंतैं पूछी, “हे दगड़्यों, क्या तुमतै कुछ माछा भि मिलिनी?” तब ऊंन वेतैं जबाब देई, “नऽ रे ना।”</verse>
				<verse number="6">तब वेन ऊंकू बोलि, “नाव की दैंणी तरफा जाल डाला, त तुमतै माछा मिलला।” तब ऊंन जाल डालि, अर जाल मा इथगा माप माछा फंसी गैनी, कि ऊं लोगु न जाल भि नि खैंची सैकी।</verse>
				<verse number="7">अर जै चेला बटि यीशु जादा प्यार करदु छौ, वेन पतरस कू बोलि, “अरे, यू त प्रभु छिन,” अर जन्‍नि शमौन पतरस न या बात सुणी कि, “यू त प्रभु छिन,” उन्‍नि वेन यीशु तैं मिलणु कू अपणा कपड़ा पैरिनी (किलैकि वेका पूरा कपड़ा नि पैरयां छा), अर झील मा फाल मारी दिनी।</verse>
				<verse number="8">पर वेका दगड़ा मा जु दुसरा चेला छा, ऊ वीं नाव मा बैठि के अर माछों का भोर्यां वे जाल तैं उन्‍नि के खैंचदी-खैंचदी छाला मा लेके ऐनी। किलैकि उ छाला बटि जादा दूर नि छा, पर लगभग सौ मीटर की दूरी पर छा।</verse>
				<verse number="9">फिर जब ऊ छाला पर उतरिनी त ऊंन देखि, कि अंगार सुलग्यां अर वेमा माछा रख्यां छिन, अर वेका नजदीक ही रुट्‍टी भि च।</verse>
				<verse number="10">तब यीशु न ऊंकू बोलि, “जु माछा तुमुन अभि पकड़िनी, ऊंमा बटि कुछ लेके आ।”</verse>
				<verse number="11">तब शमौन पतरस नाव मा चैड़ि, अर माछों का भोर्यां जाल तैं खैंची के छाला पर लेके ऐ। अर वे जाल मा एक सौ तिरप्पन बड़ा-बड़ा माछा छा। अर इथगा माप माछा होण का बाद भि जाल नि फटी।</verse>
				<verse number="12">तब यीशु न ऊंकू बोलि, “आ, अर कल्यार खा।” अर चेलों मा बटि कैतैं भि इन पूछणे की हिम्मत नि ह्‍वे, कि “तुम कु छाँ,” किलैकि ऊ जणदा छा कि यू प्रभु ही च।</verse>
				<verse number="13">तब यीशु न ऐके रुट्‍टी लेई अर ऊंतैं देई, अर वेका बाद उन्‍नि ऊंतैं माछा भि दिनी।</verse>
				<verse number="14">अर यीशु को मुरदो मा बटि ज्यून्दु होण का बाद यू तिसरी दौं छौ, कि वेन अपणु दरसन चेलों तैं देई।</verse>
				<verse number="15">जब ऊंन कल्यार खयेलि छौ, तब यीशु न शमौन पतरस बटि पूछी, “हे यूहन्‍ना का नौना शमौन, क्या तू यों सभ्यों मा बटि मिसे जादा प्यार करदी?” अर वेन वेकू बोलि, “हाँ प्रभु, तुम त जणदा ही छाँ, कि मि तुम बटि प्यार करदु छौं।” तब यीशु न वेकू बोलि, “मेरा मेम्‍नों तैं चरो।”</verse>
				<verse number="16">तब यीशु न दुसरि दौं वेकू बोलि, “हे यूहन्‍ना का नौना शमौन, क्या तू मि बटि प्यार करदी?” वेन वेकू बोलि, “हाँ प्रभु, तुम त जणदा ही छाँ, कि मि तुम बटि प्यार करदु छौं।” तब यीशु न वेकू बोलि, “मेरी भेड़ों की देख-रेख कैर।”</verse>
				<verse number="17">अर यीशु न तिसरी दौं वेकू बोलि, “हे यूहन्‍ना का नौना शमौन, क्या तू मि बटि प्यार करदी?” तब पतरस तैं दुख ह्‍वे, किलैकि यीशु न तिसरी दौं वे बटि पूछी छौ कि, “क्या तू मि बटि प्यार करदी?” इलै वेन वेकू बोलि, “हे प्रभु, तुम त सब कुछ जणद्‍यां। अर यू भि जणद्‍यां, कि मि तुम बटि प्यार करदु छौं।” तब यीशु न वेकू बोलि, “मेरी भेड़ों तैं चरो।</verse>
				<verse number="18">अर मि त्वे बटि सच्‍चि ही बोन्‍नु छौं, जब तू ज्वान छे, त तू खुद तयार ह्‍वेके जख चान्दी छे, उख जान्दी छे। पर जब तू बुढ्या ह्‍वे जैली त तू अपणा हाथ फैलैली, अर कुई दुसरो त्वेतै तयार करलु अर जख तू नि जाण चैलि, उख उ त्वेतै लि जालु।”</verse>
				<verse number="19">अर पतरस कनकै मुरलु अर लोगु तैं दिखै द्‍यालु की परमेस्वर कथगा महान च, इन बिंगाणु खुणि यीशु न वेकू इन बोलि छौ। अर इन बोन्‍ना का बाद यीशु न पतरस कू बोलि, “मेरा पिछनै अऽ।”</verse>
				<verse number="20">तब पतरस न पिछनै मुड़ि के वे चेला तैं औन्द देखि, जैतैं यीशु जादा प्यार करदु छौ, अर जैन खाणु खाणा दौं यीशु की काखे तरफा झुकि के वेतैं पूछी छौ, “प्रभु तुमतै धोखा से पकड़ौण वळु कु च?”</verse>
				<verse number="21">तब वेतैं देखि के पतरस न यीशु कू बोलि, “प्रभु, ये मनखि को क्या जि होलु?”</verse>
				<verse number="22">फिर यीशु न वेकू बोलि, “अगर जु मेरी इच्छा होलि, कि उ मेरा औण तक ठैर्युं रौ, त त्वेतै ईं बात से क्या मतलब? पर तू मेरा पिछनै अऽ।”</verse>
				<verse number="23">इलै बिस्वासी लोगु मा या बात फैली गै, कि यू चेला कभि नि मुरलु, पर यीशु न वे खुणि इन नि बोलि छौ कि, “वेन कभि नि मुरण” बल्किन इन बोलि छौ कि, “अगर जु मेरी इच्छा होलि, कि उ मेरा औण तक ठैर्युं रौ, त त्वेतै ईं बात से क्या मतलब?”</verse>
				<verse number="24">अर यू उई चेला च, जु की यों बातों की गवै देन्दु, अर जैन यू सब बात भि लिखिनी। अर हम जणदा छां, कि वेकी गवै सच्‍चि च।</verse>
				<verse number="25">अर यीशु न त और भि भौत सरा काम करिनी। अगर वु सब काम एक-एक कैरिके लिखे जान्दा, त मेरा ख्याल से इथगा किताब लिखे जान्दी, कि ऊंतैं रखणु खुणि ईं दुनियां मा भि जगा नि होन्दी।</verse>
			</chapter>
		</book>
		<book number="44">
			<chapter number="1">
				<verse number="1">प्रिय थियुफिलुस, मिन अपणी पैलि किताब मा यीशु मसीह का ऊं सब कामों का बारा मा लिखी, जु कुछ भि वेन करण की अर सिखौण की शुरुवात कैरी,</verse>
				<verse number="2">अर वेन अपणा चुण्यां खास चेलों तैं पवित्र आत्मा का द्‍वारा आज्ञा भि दिनी, अर येका बाद वेतैं स्वर्ग मा उठये गै।</verse>
				<verse number="3">अर क्रूस को दुख झिलण का बाद भि यीशु न अपणा ज्यून्द होण का भौत सरा पक्‍का परमाण दिनी। अर उ चालीस दिनों तक अपणा खास चेलों तैं दिखै, अर वेन ऊं बटि परमेस्वर का राज का बारा मा बात भि कैरी।</verse>
				<verse number="4">अर थियुफिलुस, एक दिन इन ह्‍वे जब यीशु अपणा चेलों का दगड़ा मा मिली के खाणुक खाणु छौ, त वेन ऊंतैं आज्ञा दिनी कि, “यरूशलेम नगर तैं छोड़ि के नि जयां, मगर इखि रयां अर पिता का वे करार तैं पूरु होण को इंतजार कर्यां, जैका बारा मा मिन तुमुन पैलि बतै छौ।</verse>
				<verse number="5">किलैकि यूहन्‍ना न त पाणिळ बपतिस्मा दिनी, मगर अब से कुछ दिनों का बाद तुम पवित्र आत्मा का द्‍वारा बपतिस्मा पैल्या।”</verse>
				<verse number="6">अर जब यीशु का खास चेला वेका दगड़ा मा छा, त ऊंन वे बटि पूछी कि, “प्रभु, क्या तुम इस्राएल राज्य तैं अभि छुड़ै के फिर से जनौ-तन कैरी दिल्या?”</verse>
				<verse number="7">तब वेन ऊंकू बोलि, “वे बगत अर वे समौ का बारा मा जनण तुमरो काम नि च, किलैकि वु सब कुछ पिता न अपणा अधिकार मा रख्युं च।</verse>
				<verse number="8">अर जब तुम पवित्र आत्मा तैं पैल्या, त तुमतै सामर्थ मिलेली तब तुम यरूशलेम नगर मा अर पूरा यहूदिया अर सामरिया का मुलकों मा, इख तक की पूरि दुनियां मा तुम मेरा गवा बणि जैल्या।”</verse>
				<verse number="9">अर जब यीशु न या बात बोलि दिनी, त उ खास चेलों का दिखदी-दिखदी मथि स्वर्ग मा उठये गै, अर जब उ जाणु छौ, त एक बादळ न वेतैं ऊंका आंख्यों बटि लुके दिनी, वेका चेला वेतैं टक लगै के दिखणा छा। अर देखा, उबरि सफेद कपड़ा पैरयां दुई आदिम चेलों का समणि ऐके खड़ा ह्‍वेनि।</verse>
				<verse number="10"></verse>
				<verse number="11">अर यों न चेलों कू बोलि, “हे गलीली लोगु, तुम किलै खड़ु ह्‍वेके आसमान जनै टक लगै के दिखणा छाँ? यू ही यीशु जु तुमरा पास बटि स्वर्ग मा उठये गै, ठिक इन्‍नि वेन औण भि च जन तुम वेतैं स्वर्ग मा जान्द दिखणा छाँ।”</verse>
				<verse number="12">तब यीशु का खास चेला जैतून नौ का ढौंडा बटि यरूशलेम नगर कू वापिस ऐनी। अर यू ढौंडो यरूशलेम नगर बटि लगभग एक किलोमीटर की दूरी पर च।</verse>
				<verse number="13">अर जब यू लोग यरूशलेम नगर मा ऐनी, त वे घौर का मंज्यूळ मा गैनी जख यू सब रुक्यां छा। अर यों लोगु का नौ इन छिन, पतरस, यूहन्‍ना, याकूब, अन्द्रियास, फिलिप्पुस, थोमा, बरतुल्मै, मत्ती, हलफई को नौनु याकूब, शमौन जेलोतेस, अर याकूब को नौनु यहूदा।</verse>
				<verse number="14">अर यू सभ्या का सभि हमेसा एक जगा मा मिलदा छा अर एक मन ह्‍वेके प्रार्थना करदा छा, अर ऊंका दगड़ा मा यीशु की माँ मरियम अर वेका भै अर कुछ और जनानियां भि छै।</verse>
				<verse number="15">अर कुछ दिनों का बाद इन ह्‍वे कि, पतरस लगभग एक सौ बीस बिस्वासी लोगु का बीच मा खड़ु ह्‍वेके बोन्‍न लगि गै, “हे मेरा भै-बैंणो, या बात यहूदा इस्करियोती का बारा मा च, जु की यीशु तैं पकड़वौण वळो तैं बाटु दिखौण वळु बणि के ऐ छौ। हाँ, वेकी गिनती हमरा दगड़ा मा किये जान्दी छै, अर उ भि हमरि तरौं सेवा मा सामिल ह्‍वे गै छौ। मगर पवित्र आत्मा न येका बारा मा पैलि ही राजा दाऊद का द्‍वारा भविष्यबाणी करवै छै, अर यू जरुरी छौ कि पवित्रशास्‍त्र की या बात पूरि हो।</verse>
				<verse number="16"></verse>
				<verse number="17"></verse>
				<verse number="18">अर वेकी नीच कमै का द्‍वारा एक पुंगड़ु खरीदे गै, अर उ कपाळ का बल पोड़ि, पुटगु फटी, अर वेका सब अन्दड़ा भैर निकळि गैनी।</verse>
				<verse number="19">अर या बात यरूशलेम नगर का सब लोगु तैं पता चलि गै, इलै वीं जगा को नौ ऊंकी भाषा का मुताबिक ‘हकलदमा’ रखै गै जैको मतलब च ‘ल्वे को पुंगड़ु।’</verse>
				<verse number="20">अर जन की भजन संहिता की किताब मा भि लिख्यूं च कि, “‘वेको घौर बांजा पोड़ि जौ, अर वेमा मा कुई भि नि रै सैको’ अर ‘वेको पद कुई दुसरो ले ल्यो।’</verse>
				<verse number="21">“इलै यूहन्‍ना बपतिस्मा देण वळा का दिन बटि लेके जबरि तक प्रभु यीशु स्वर्ग मा नि उठये गै,</verse>
				<verse number="22">याने कि जब हमरु प्रभु यीशु हमरा दगड़ा मा छौ वे बगत बटि लेके अब तक जु लोग हमरा दगड़ा मा छिन, ऊंमा बटि एक मनखि तैं चुणै जौ। ताकि उ मनखि भि ईं बात को गवा ह्‍वे कि यीशु तैं मुरदो मा बटि ज्यून्द किये गै।”</verse>
				<verse number="23">तब ऊंन दुई मनखियों तैं चुणी के खड़ु कैरी पैलु यूसुफ, अर यूसुफ कू बरसब्बा भि बुले जान्दु छौ, अर कुछ लोग येतैं यूसतुस नौ से भि जणदा छा, अर दुसरो मत्तियाह।</verse>
				<verse number="24">अर लोगु न इन प्रार्थना कैरी, “हे प्रभु, तुम त सब लोगु का मन की बात तैं जणद्‍यां, इलै हमतै बता कि यों दुईयों मा बटि तुमुन कैतैं चुण्यूं च,</verse>
				<verse number="25">ताकि वेतैं सेवा की जिमेदारी अर खास चेला होण को पद दिये जौ, किलैकि यहूदा न ये पद तैं नकारी दिनी, अर ज्वा जगा वे खुणि चुणै गै छै वु उख चलि गै।”</verse>
				<verse number="26">अर ऊं लोगु न यों का नौ पर पांसा डलिनी, अर पांसा मत्तियाह का नौ पर निकळिनी। तब मत्तियाह भि ऊं ग्यारा खास चेलों का दगड़ा मा गिणै गै।</verse>
			</chapter>
			<chapter number="2">
				<verse number="1">अर जब पिन्तेकुस्त का त्योवार को दिन ऐ, त वु सब बिस्वासी लोग एक जगा इकट्‍ठा होयां छा।</verse>
				<verse number="2">अर अचानक आसमान बटि हवा की बड़ी सुंस्याट जन आवाज ऐ, अर जख ऊ बैठयां छा उ पूरु घौर वीं आवाजळ भरी गै।</verse>
				<verse number="3">तब ऊंतैं आग की तरौं भौत सरी जीब दिखैनि, जु की अलग-अलग ह्‍वेके हरेक मनखि मा ऐके बैठि गैनी।</verse>
				<verse number="4">अर ऊ सभ्या का सभि पवित्र आत्मा से भरपूर ह्‍वे गैनी। अर पवित्र आत्मा न अपणा मुताबिक ऊंतैं बोन्‍न की ताकत दिनी, अर वु बन्‍नि-बन्‍नि किसम की भाषा बोन्‍न लगि गैनी।</verse>
				<verse number="5">अर वे बगत पर पूरि दुनियां का हरेक देस बटि यहूदी भक्‍त लोग यरूशलेम नगर मा रौणा छा।</verse>
				<verse number="6">अर जब लोगु न हल्‍ला सुणी, त भीड़ की भीड़ इकट्‍ठा ह्‍वे गै। अर सब लोग हैरान ह्‍वे गैनी, किलैकि जब यू लोग बात करणा छा, त भीड़ का लोगु तैं अपणी-अपणी भाषा सुन्यौणी छै।</verse>
				<verse number="7">अर लोग बड़ा हकदक अर ताजुब मा पोड़ि के बोन्‍न लगि गैनी, “अरे जरा यों लोगु तैं त देखा, यू लोग हमरि भाषा मा कनकै बोलि सकदिन? यू कनकै ह्‍वे सकदु? किलैकि यू सब लोग त गलील मुलक का छिन। जब की हम सब लोग अलग-अलग जगा का छां, फिर भि हमतै हमरि मात्रभाषा सुन्यौणी च।</verse>
				<verse number="8"></verse>
				<verse number="9">जब की हम मा बटि कुछ लोग त पारथी अर मादी मुलक का छिन, अर कुछ त मेसोपोटामिया मुलक बटि अयां छिन, अर कुछ लोग एलामी निवासी छिन। इख तक की हमरा बीच मा यहूदिया, कप्पदूकिया, पुन्तुस, अर आसिया मुलकों का रौण वळा लोग भि इख अयां छिन।</verse>
				<verse number="10">अर कुछ लोग त फ्रूगिया अर पंफूलिया मुलक का छिन, अर कुछ त मिस्र मुलक बटि अयां। अर कुरेने नगर का आस-पास का लीबिया मुलक बटि भि, इख तक कि रोम नगर बटि भि अयां मुसाफिरों तैं भि अपणी-अपणी भाषा सुन्यौणी च, अर जु लोग पैलि बटि यहूदी छिन अर वु जौन यहूदी धरम तैं स्वीकार कैरियाली हम सभ्यों तैं भि अपणी-अपणी भाषा सुन्यौणी च।</verse>
				<verse number="11">अर क्रेते टापू अर अरब देस बटि अयां निवासीयों तैं भि, हम सभ्यों तैं अपणी-अपणी भाषा सुन्यौणी च, कि यू सब लोग परमेस्वर का बड़ा-बड़ा कामों की बडै कना छिन। यू सब कनकै ह्‍वे सकदु?”</verse>
				<verse number="12">अर यू देखि के सब लोग हकदक छा अर बड़ी उळझण मा पोड़यां छा तब ऊ एक-दुसरा बटि पूछण लगि गैनी, “आखिर मा यू सब होणु क्या च?”</verse>
				<verse number="13">पर दुसरा लोगु न बिस्वासी लोगु को मजाक बणै के बोलि, “अरे यू त नयी दारु पी के टूंन होयां छिन।”</verse>
				<verse number="14">तब पतरस ऊं ग्यारा चेलों का दगड़ा मा खड़ु ह्‍वे अर ऊँची आवाज मा ऊं लोगु कू बोन्‍न लगि गै कि, “हे यहूदियों अर यरूशलेम मा रौण वळा सब लोगु, कन्दूड़ खोली के मेरी बात तैं सुणा अर तुम यू जाणि ल्या कि,</verse>
				<verse number="15">यों लोगु न दारु नि पेई, जन तुम लोग समझणा छाँ, किलैकि अभि त सुबेरे नौ ही बजणी च।</verse>
				<verse number="16">पर या त वा बात च जैका बारा मा परमेस्वर का रैबर्या योएल न बोलि छौ। अर वा बात इन च कि,</verse>
				<verse number="17">परमेस्वर इन बुल्दु कि, ‘आखिरी का दिनों मा इन होलु कि, मि अपणी पवित्र आत्मा सब मनखियों तैं भरपूरी से दूयुलु, अर तुमरा नौना अर नौनि भविष्यबाणी करला। अर तुमरा ज्वान लोग दरसन दिखला, अर तुमरा दाना-स्यांणा सुपन्या दिखला।</verse>
				<verse number="18">अर ऊं दिनों मा मि अपणा सेवकों अर सेविकाओं तैं भि पवित्र आत्मा भरपूरी से देण, अर ऊ भविष्यबाणी करला।</verse>
				<verse number="19">अर मिन मूड़ी धरती पर ल्वे, अर आसमान मा आग अर धुंवा का बादळों का चमत्कारिक चिन्‍न दिखौणिन।</verse>
				<verse number="20">अर प्रभु का वे महान अर अदभुत दिन का औण से पैलि, सूरज काळु अर चाँद ल्वे जन लाल ह्‍वे जालु,</verse>
				<verse number="21">पर जु कुई प्रभु को नौ ल्यालु, वेतैं बचयै जालु।’</verse>
				<verse number="22">“हे इस्राएल का लोगु, इथगा ही ना बल्किन मा मेरी यों बातों तैं भि सुणा, परमेस्वर न नासरत गौं का यीशु का द्‍वारा तुमरा बीच मा बड़ा-बड़ा चमत्कार का चिन्‍न अर भौत सरा अदभुत काम कैरिके दिखैनि। अर यों कामों से इन परमाण दिनी कि उ परमेस्वर को भेज्यूं एक मनखि च, अर वेका बारा मा तुम सब जणदा ही छाँ।</verse>
				<verse number="23">अर पिता परमेस्वर न पैलि बटि बणईं योजना का मुताबिक वे यीशु तैं तुमरा हाथों मा सौंप दिनी, अर वेका बारा मा उ पैलि बटि जणदु छौ, अर ये ही यीशु तैं तुम लोगु न अधरमी लोगु का हवाला कैरिके वेतैं क्रूस पर चड़वै दिनी।</verse>
				<verse number="24">पर यीशु तैं परमेस्वर न मौत का बन्धनों मा बटि छुड़ै के ज्यून्दु कैरी, किलैकि या बात ह्‍वे ही नि सकदी छै कि मौत वेतैं अपणा वश मा रखो।</verse>
				<verse number="25">अर राजा दाऊद न भि वेका बारा मा इन बोलि कि, “‘मि प्रभु तैं हमेसा अपणा समणि दिखदु, किलैकि उ मेरी दैंणी तरफा च ताकि मि नि डगमगौ।</verse>
				<verse number="26">इलै मेरु मन खुश च अर मि परमेस्वर का गीत गान्दु, अर मितैं आस च की तुम मेरा सरील तैं बचै के रखिल्या।</verse>
				<verse number="27">किलैकि तुम मेरा पराण तैं अधलोक मा नि छुड़ील्या, अर ना ही अपणा पवित्र मनखि तैं कबरुन्द सड़ण दिल्या।</verse>
				<verse number="28">अर तुमुन ही मितैं जीवन को बाटु दिखै, अर तुमरो मेरा दगड़ा मा होण से मितैं बड़ी खुशी होलि।’”</verse>
				<verse number="29">तब पतरस न ऊंकू इन भि बोलि कि, “हे मेरा भै-बैंणो, मि तुमतै पितर राजा दाऊद का बारा मा हिम्मत से बतै सकदु, कि पितर दाऊद त मोरि गैनी अर ऊंतैं दफनये भि गै अर ऊंकी कबर आज भि हमरा इख च।</verse>
				<verse number="30">अर उ एक रैबर्या छौ, अर उ जणदु छौ कि परमेस्वर की एक कसम खईं च कि उ वेका वंश मदि कै एक तैं वेकी राजगद्‍दी पर बैठालु।</verse>
				<verse number="31">अर यीशु मसीह को मुरदो मा बटि ज्यून्द होण का बारा मा, होण वळी यों बातों तैं राजा दाऊद न पैलि ही देखि के बतैयालि छौ, कि पिता परमेस्वर न नऽ त वेका पराण तैं अधलोक मा छोड़ि, अर ना ही वेतैं कबरुन्द सड़ण देई।</verse>
				<verse number="32">अर ये ही यीशु तैं परमेस्वर न मौत मा बटि ज्यून्दु कैरी, अर ईं बात का गवा हम सभि छां।</verse>
				<verse number="33">अर इन कैरिके यीशु न पिता परमेस्वर की दैंणी तरफा सबसे ऊँचो पद पै, अर पिता का कियां करार का मुताबिक पिता बटि पवित्र आत्मा तैं पैके वे करार तैं पूरु कैरी। अर आज वे ही करार का मुताबिक पवित्र आत्मा तैं वेन हम पर भि भरपूरी से दियाली। अर जु कुछ भि तुम दिखणा अर सुनणा छाँ, यू सब कुछ पवित्र आत्मा को काम च।</verse>
				<verse number="34">अर राजा दाऊद त स्वर्ग मा नि गै, पर फिर भि उ यीशु का बारा मा इन बुल्दु कि, “परमेस्वर न मेरा प्रभु बटि बोलि, ‘मेरी दैंणी तरफा बैठ,</verse>
				<verse number="35">जबरि तक कि मि तेरा दुसमनों तैं हरै के तेरा अधीन नि कैरी द्‍यूं।’”</verse>
				<verse number="36">“इलै हे इस्राएल का सब लोगु, तुम हर हाल मा ईं बात तैं जाणि ल्या, कि जै यीशु तैं तुमुन क्रूस पर चड़ै, परमेस्वर न वेतैं ही प्रभु अर मसीह ठैरै।”</verse>
				<verse number="37">अर जब ऊं लोगु न यों बातों तैं सुणी, त या बात ऊंका दिलों मा लगि गै। तब ऊंन पतरस अर दुसरा खास चेलों से पूछी, “हे भैयों अब हमतै इन बता कि हम क्या जि कैरा?”</verse>
				<verse number="38">तब पतरस न ऊंकू बोलि, “अपणा-अपणा पापों बटि पस्ताप कैरा अर पापों बटि माफी पौणु खुणि तुम मा बटि हरेक मनखि यीशु मसीह का नौ से बपतिस्मा ल्यो, अर तब तुमतै पवित्र आत्मा को दान मिललु।</verse>
				<verse number="39">किलैकि पवित्र आत्मा देण को यू करार तुम खुणि, अर तुमरि औलादों खुणि अर ऊं सभ्यों खुणि च जु दूर-दूर रौणा छिन। अर यू करार ऊं लोगु खुणि भि च, जौं तैं हमरु प्रभु परमेस्वर अपणा पास बुलान्दु।”</verse>
				<verse number="40">अर पतरस न भौत सरी बातों की गवै देके लोगु तैं समझै, अर ऊंतैं चितै के बोलि, “ईं दुष्‍ट पीढ़ी का लोगु बटि बचि के रा।”</verse>
				<verse number="41">इलै जौं लोगु न वेका ये उपदेस तैं स्वीकार कैरी, ऊंन बपतिस्मा लिनी, अर वे ही दिन करीब तीन हजार लोग बिस्वासी समुदाय का दगड़ा मा मिली गैनी।</verse>
				<verse number="42">अर सब बिस्वासी लोग यीशु का खास चेलों बटि लगातार वचन की शिक्षा पौणा रैनी। अर एक साथ संगत करण मा, प्रभु-भोज करण मा, अर प्रार्थना करण मा भि एक मन ह्‍वेके रौण लगि गैनी।</verse>
				<verse number="43">अर लोगु का दिलों मा प्रभु खुणि और भि जादा आदर-सम्मान औण लगि गै, अर प्रभु खास चेलों का द्‍वारा भौत सरा अदभुत काम अर चमत्कारिक कामों तैं कनु छौ।</verse>
				<verse number="44">अर सब बिस्वासी लोग मिली-जुली के रौन्दा छा, अर जु कुछ भि ऊंमा छौ वेतैं ऊ आपस मा बांटि देन्दा छा।</verse>
				<verse number="45">अर ऊ अपणी जैजाद अर चीजों तैं बेचि के मिलण वळा रुपयों तैं ऊं लोगु मा बांटि देन्दा छा, जौं लोगु तैं जरुरत होन्दी छै।</verse>
				<verse number="46">अर ऊ एक मन ह्‍वेके हरेक दिन मन्दिर मा इकट्‍ठा होन्दा छा, अर प्रभु-भोज खुणि एक-दुसरा का घौर मा मिलदा छा, अर सब दिल खोली के खुशी से एक-दुसरा का दगड़ा मा खाणु खान्दा छा।</verse>
				<verse number="47">अर ऊ परमेस्वर की बडै करदा छा अर सब लोग ऊं बटि खुश छा। अर जु लोग बचण चान्दा छा, प्रभु ऊंतैं हरेक दिन बिस्वासी लोगु का दगड़ा मा मिलै देन्दु छौ।</verse>
			</chapter>
			<chapter number="3">
				<verse number="1">एक दिन पतरस अर यूहन्‍ना दुफरे तीन बजी का करीब प्रार्थना का बगत मन्दिर कू जाणा छा।</verse>
				<verse number="2">अर ये मन्दिर का गेट पर जैकू सुन्दर गेट बुले जान्दु, लोग जनम का एक लंगड़ा मनखि तैं हर दिन ये गेट का पास बैठे देन्दा छा, ताकि यू भैर-भितर जाण वळा लोगु बटि भीक मांगु, अर इन्‍नि ये दिन भि ह्‍वे।</verse>
				<verse number="3">जब ये मनखि न पतरस अर यूहन्‍ना तैं मन्दिर मा औन्द देखि, त कुछ पौण की उम्मीद से वेन ऊं बटि भीक मांगि।</verse>
				<verse number="4">पतरस अर यूहन्‍ना न वेकी तरफा ध्यान से देखि अर बोलि, “हम जनै देख।”</verse>
				<verse number="5">तब वेन ऊं बटि कुछ पौणे की इच्छा से ऊं जनै देखि।</verse>
				<verse number="6">अर पतरस न बोलि, “सोना अर चांदी त मि मा नि च, मगर जु मेरा पास च वु मि त्वेतै देन्दु, नासरत गौं का यीशु मसीह का नौ से उठ अर चलण-फिरण लगि जा।”</verse>
				<verse number="7">तब पतरस न वेकू दैंणु हाथ पकड़ी अर वेतैं उठे, अर तुरन्त वेका खुटों अर घुंडो मा ताकत ऐ गै।</verse>
				<verse number="8">तब उ उचड़फळि मारी के खड़ु ह्‍वे अर चलण-फिरण लगि, अर ईं खुशी का बाना उ नचण लगि गै, अर उछलि-कूदी के परमेस्वर की तारीफ करद-करद ऊंका दगड़ा मन्दिर मा चलि गै।</verse>
				<verse number="9">अर सब लोगु न वेतैं हिटण अर परमेस्वर की तारीफ करद देखि,</verse>
				<verse number="10">अर पछ्याणी गैनी, कि यू त उई मनखि च जु कि मन्दिर का सुन्दर गेट पर बैठि के भीक मंगदु छौ। अर यू देखि के की अब यू चलण-फिरण लगि गै लोग हकदक अर ताजुब मा पोड़ि गैनी।</verse>
				<verse number="11">पतरस अर यूहन्‍ना मन्दिर का वे बरण्डा का पास छा जैकू सुलैमान को बरण्डा बुले जान्दु, अर अपणी खुशी का बानो ये भिकारी मनखि न ऊंतैं पकड़ी के रख्युं छौ। अर ये मनखि तैं देखि के हकदक होईं भीड़ भागी के ऊंका पास ऐ।</verse>
				<verse number="12">अर यू देखि के पतरस न ऊं लोगु कू बोलि, “हे इस्राएल का लोगु, तुम ये काम तैं देखि के किलै ताजुब कना छाँ? अर टक लगै के हमतै इन किलै दिखणा छाँ? तुम त इन दिखणा छाँ जन कि हम लोगु न ये मनखि तैं खुद की ताकत अर भक्‍ति की वजै से खूब कैरी हो।</verse>
				<verse number="13">अरे, यू सब आदर-सम्मान त हमरा पितरों का परमेस्वर याने कि अब्राहम का परमेस्वर, इसहाक का परमेस्वर अर याकूब का परमेस्वर न अपणा सेवक हमरा प्रभु यीशु तैं देई, हाँ, वे ही यीशु तैं जैतैं तुमुन पकड़वै दिनी। अर गवर्नर पिलातुस न वेतैं छुड़ण को विचार कैरी, पर तुमुन वेका समणि यीशु तैं नकारी दिनी।</verse>
				<verse number="14">हाँ, तुम लोगु न वे पवित्र अर धरमी मनखि तैं नकारी दिनी, अर पिलातुस बटि वे हत्यारा मनखि बरअब्बा खुणि बिन्ती कैरी, कि तुम लोगु खुणि वेतैं छुड़ै जौ।</verse>
				<verse number="15">अर तुमुन जीवन का दाता तैं मारी दिनी, मगर परमेस्वर न वेतैं मुरदो मा बटि ज्यून्दु कैरी, अर ईं बात का गवा हम छां,</verse>
				<verse number="16">अर यीशु पर बिस्वास करण से, अर वेकी ताकत से, ये मनखि तैं खड़ु होण की ताकत मिली, अर तुम येतैं दिखणा अर जणदा भि छाँ। अर सच्‍च त यू च कि यीशु पर बिस्वास करण से ही यू मनखि तुम सभ्यों का समणि पूरि तरौं से तन्दुरुस्त ह्‍वे गै।</verse>
				<verse number="17">“हे मेरा भै-बैंणो, मि जणदु छौं कि तुमुन अर तुमरा अधिकारीयों न यीशु का दगड़ा मा जु कुछ भि कैरी, तुम वीं बात का बारा मा नि जाणि सक्यां कि तुमुन इन किलै कैरी।</verse>
				<verse number="18">अरे, परमेस्वर न पैलि ही अपणा सब रैबर्यों का द्‍वारा इन बुलवै छौ कि जै मसीह तैं मि भेजलु वेतैं यू दुख सौण पोड़लु, अर वेन यीशु मसीह का द्‍वारा वीं भविष्यबाणी तैं इनकै पूरु कैरी दिनी।</verse>
				<verse number="19">इलै अपणा पापों से पस्ताप कैरा, अर परमेस्वर का पास वापिस ऐ जा, ताकि तुमरा पाप पूरि तरौं से माफ ह्‍वे जा,</verse>
				<verse number="20">तब प्रभु बटि तुमतै नयी ताकत मिलण को बगत आलु, अर उ यीशु तैं तुमरा पास फिर से भेजलु, जैतैं वेन पैलि बटि तुम खुणि मसीह कैरिके ठैर्युं च।</verse>
				<verse number="21">अर या बात जरुरी च कि यीशु स्वर्ग मा तब तक रौ जबरि तक की परमेस्वर सब चीजों तैं फिर से नयू नि कैरी द्‍यो, जौं बातों का बारा मा परमेस्वर न अपणा पवित्र रैबर्यों का द्‍वारा भौत साल पैलि ही बुलवैयालि छौ।</verse>
				<verse number="22">हाँ, जन की मूसा रैबर्या न बोलि छौ कि, ‘प्रभु परमेस्वर तुमरा बीच मा बटि मि जन एक रैबर्या तैं चुणी के तुम खुणि खड़ु करलु, अर जु कुछ भि उ तुम मा बोललु तुम वे बटि सुणी के वेका मुताबिक ही कर्यां।</verse>
				<verse number="23">अर हरेक मनखि जु वे रैबर्या की बात तैं नि सुणलु, उ मनखि लोगु का बीच मा बटि नास किये जालु।’</verse>
				<verse number="24">अर परमेस्वर का रैबर्या शमूएल न अर वेका बाद औण वळा जथगा भि रैबर्यों न भविष्यबाणी कैरिके बोलि, ऊं सभ्यों न यों दिनों मा होण वळी बातों का बारा मा ही त बतै छौ।</verse>
				<verse number="25">अर परमेस्वर न रैबर्यों का द्‍वारा जु करार कैरी, वु तुम खुणि भि च। अर तुम ये समझौता का हकदार छाँ जु कि तुमरा पितरों का दगड़ा मा किये गै। अर वेन पितर अब्राहम कू बोलि छौ कि, ‘तेरा वंश का द्‍वारा धरती का सब कुटुम्ब आसीस पाला।’</verse>
				<verse number="26">अर परमेस्वर न ही हम लोगु का बीच मा बटि यीशु मसीह तैं चुणी के ठैरै, अर सबसे पैलि तुमरा ही बीच मा भेजि, ताकि तुम सब अपणी-अपणी बुरै तैं छोड़ि द्‍या, अर वेसे आसीस पा।”</verse>
			</chapter>
			<chapter number="4">
				<verse number="1">जब पतरस अर यूहन्‍ना लोगु मा या बात बोन्‍ना ही छा, कि तबरि पुरोहित अर मन्दिर का सिपयों का अधिकारी अर सदूकी लोग ऊंका पास ऐ गैनी।</verse>
				<verse number="2">अर वु लोग भौत गुस्सा मा छा किलैकि पतरस अर यूहन्‍ना यीशु को उदारण देके लोगु तैं सिखौणा छाँ, अर इन परचार कैरिके बतौणा छा कि उ मुरदो मा बटि ज्यून्द ह्‍वे गै।</verse>
				<verse number="3">तब ऊं लोगु न यों दुईयों तैं पकड़ी दिनी अर दुसरा दिन तक जेलखाना मा रखी, किलैकि रुमुक ह्‍वे गै छै।</verse>
				<verse number="4">पर जथगा लोगु न वचन तैं सुणी ऊंमा बटि भौत सरा लोगु न बिस्वास कैरी, अर ऊं लोगु मा बैखों की संख्या ही लगभग पांच हजार छै।</verse>
				<verse number="5">अर दुसरा दिन इन ह्‍वे कि यरूशलेम नगर मा यहूदी लोगु का अधिकारी, अध्यक्ष अर शास्‍त्री लोग इकट्‍ठा ह्‍वेनि।</verse>
				<verse number="6">अर ऊंका दगड़ा मा महा पुरोहित हन्‍ना, काइफा अर महा पुरोहित का कुटुम्ब बटि यूहन्‍ना, सिकन्दर अर ऊंका कुटुम्ब का कुछ लोग और भि छा।</verse>
				<verse number="7">अर ऊं लोगु न पतरस अर यूहन्‍ना तैं बीच मा खड़ु कैरिके ऊं बटि पूछी, तुमुन वे लंगड़ा भिकारी तैं कै का नौ से अर कै की दिईं ताकतळ खूब कैरी?</verse>
				<verse number="8">तब पतरस तैं पवित्र आत्मा की पूरि ताकत मिली अर वेन ऊंकू बोलि कि,</verse>
				<verse number="9">“मेरा अधिकारी अर अध्यक्ष लोगु, आज तुम लोग ये अपंग मनखि का दगड़ा मा करीं भलै का बारा मा हम बटि जाँच-पड़ताल कना छाँ, कि उ कनकै खूब ह्‍वे गै,</verse>
				<verse number="10">त मि तुमतै अर सब इस्राएली लोगु तैं बतै देन्दु, कि नासरत गौं का यीशु मसीह का नौ से यू मनखि तुमरा समणि तन्दुरुस्त खड़ु च। अर ये ही यीशु तैं तुमुन क्रूस पर चड़ै दिनी, पर परमेस्वर न वेतैं मुरदो मा बटि ज्यून्द कैरी।</verse>
				<verse number="11">अर वे ही यीशु का बारा मा इन लिख्यूं च कि, “‘यू उई ढुंगो च जैतैं तुम मिस्‍त्रियों न फुंन ढुळ्यु समझि पर उई कुणों को खास ढुंगो बणि गै।’</verse>
				<verse number="12">“अर यीशु का अलावा कुई दुसरो बचै नि सकदु, किलैकि आसमान का मूड़ी अर लोगु का बीच मा कुई भि दुसरो नौ नि दिये गै, जैका द्‍वारा हमतै बचयै जौ।”</verse>
				<verse number="13">अर यों लोगु न पतरस अर यूहन्‍ना तैं बड़ी हिम्मत से बुलण देखि, अर जब यों तैं पता चलि की यू अनपढ़ अर साधारण मनखि छिन, त यू लोग ताजुब मा पोड़ि गैनी। तब वु लोग यों तैं पछ्याण गैनी कि यू उई छिन जु कि यीशु का दगड़ा मा रौन्दा छा।</verse>
				<verse number="14">अर ऊंन वे अपंग मनखि तैं जु खूब ह्‍वे छौ, ऊंका दगड़ा मा खड़ु होयुं देखि, त वु लोग यों दुईयों का खिलाप मा कुछ नि बोलि सकिनी।</verse>
				<verse number="15">इलै ऊंन पतरस अर यूहन्‍ना तैं अपणी न्याय समिति मा बटि भैर जाण को हुकम देई, अर फिर ऊ आपस मा बात-चित करण लगि गैनी।</verse>
				<verse number="16">अर ऊंन आपस मा बोलि कि, “हम यों दुईयों का दगड़ा मा क्या जि कैरा? किलैकि यों का द्‍वारा सच्‍चि मा अदभुत चमत्कार दिखये गै, अर ईं बात का बारा मा यरूशलेम नगर का सब निवासी लोगु तैं पता चलि गै अर हम ईं बात तैं नकारी नि सकद्‍यां।</verse>
				<verse number="17">अर कखि इन नि हो की खूब होण की या बात लोगु का बीच मा और भि जादा फैली जौ, इलै आ इन करद्‍यां कि हम ऊंतैं हड़कौन्द्‍यां, ताकि फिर ऊ कभि यीशु नौ की चर्चा कै का दगड़ा मा नि कैरा।”</verse>
				<verse number="18">तब ऊंन पतरस अर यूहन्‍ना तैं बुलै अर ऊंतैं हड़कै के बोलि, “कन्दूड़ खोली के सुणा, यीशु नौ की चर्चा फिर नि कर्यां अर ना ही कुछ सिखयां।”</verse>
				<verse number="19">अर ऊंन ऊंतैं जबाब दिनी, “चला, अब तुम ही बता, कि परमेस्वर की नजर मा क्या ठिक च। क्या परमेस्वर का छौन्द, हम वेकी बात तैं माणा या तुमरि?</verse>
				<verse number="20">देखा अब इन त ह्‍वे नि सकदु, कि हमुन जु देखि अर सुणी च वेका बारा मा हम कुछ नि बोला।”</verse>
				<verse number="21">तब ऊं लोगु न ऊंतैं फिर से धमकै के छोड़ि दिनी, किलैकि वु लोगु से डऽरदा छा अर यों लोगु तैं दण्ड देणु खुणि कुई दुसरो बाना नि मिली। अर यू सब त इलै ह्‍वे किलैकि अपंग मनखि का दगड़ा मा जु कुछ भि ह्‍वे छौ, वेतैं लेके सब लोग परमेस्वर की बडै कना छा।</verse>
				<verse number="22">अर लोग परमेस्वर की बडै इलै करणा छा, किलैकि यू मनखि जु पतरस अर यूहन्‍ना का द्‍वारा चमत्कार कैरिके खूब ह्‍वे छौ, उ चालीस साल से मथि छौ अर पैदा होण का बगत बटि ही लंगड़ा छौ।</verse>
				<verse number="23">तब यू दुई उख बटि छुटी के बिस्वासी लोगु का पास ऐ गैनी। अर जब पतरस अर यूहन्‍ना अपणा बिस्वासी लोगु का पास पौंछिनी, त यों न ऊंतैं वु सब बात बतैनि, जु कुछ मुख्य पुरोहितों अर अध्यक्षों न ऊंकू बोलि छै।</verse>
				<verse number="24">अर जब ऊंन सुणी, त एक मन ह्‍वेके ऊँची आवाज मा परमेस्वर बटि प्रार्थना कैरिके बोलि, “हे हमरा प्रभु, तुमुन ही आसमान, या धरती अर समुन्दर बणै। अर जु कुछ भि यों मा च उ सब कुछ भि तुमुन ही बणै।</verse>
				<verse number="25">अर प्रभु, तुमुन ही पवित्र आत्मा से अपणा सेवक हमरा पितर दाऊद का द्‍वारा इन बुलवै छौ कि, “‘जु यहूदी जाति का नि छिन ऊंन किलै वेका खिलाप मा घपरोळ मचै? अर बेकार की बात बणै के वेका खिलाप मा किलै योजना बणै?</verse>
				<verse number="26">प्रभु अर वेका द्‍वारा चुण्यां मसीह का खिलाप मा धरती का राजा खड़ा होला, अर अधिकारी लोग इकट्‍ठा ह्‍वेके वेका खिलाप मा बुलला।’</verse>
				<verse number="27">“अर सच्‍चि मा इन्‍नि ह्‍वे कि राजा हेरोदेस अन्तिपास अर गवर्नर पुन्तियुस पिलातुस न भि इस्राएली लोगु अर ऊं लोगु का दगड़ा मा मिली के जु यहूदी जाति का नि छां, तुमरा पवित्र सेवक यीशु मसीह का खिलाप ये नगर मा इकट्‍ठा ह्‍वेनि, जैतैं तुमुन चुण्यूं छौ।</verse>
				<verse number="28">अर इन त इलै ह्‍वे, किलैकि तुमुन यू सब पैलि बटि ही अपणी इच्छा अर सामर्थ से ठैर्युं छौ, ताकि इन्‍नि हो।</verse>
				<verse number="29">अर प्रभु हम तुम बटि बिन्ती करद्‍यां कि, तुम ही ऊंकी यों धमकियों तैं सुणा, अर अपणा सेवकों की मदद कैरा, ताकि यू हिम्मतळ तुमरो वचन तैं सुणै सैका।</verse>
				<verse number="30">अर अपणा हाथ बढै के ऊंतैं ताकत द्‍या, ताकि ऊ तुमरा पवित्र सेवक यीशु मसीह का नौ से लोगु तैं खूब कैरी सैका, अर बड़ा-बड़ा चमत्कारिक कामों तैं अदभुत तरीके से कैरी सैका।”</verse>
				<verse number="31">अर जब ऊंन इन प्रार्थना कैरी दिनी, त जख ऊ सब लोग इकट्‍ठा होयुं छा वा जगा हिली गै, अर वु सब पवित्र आत्मा से भरपूर ह्‍वे गैनी। अर येका बाद वु सब लोग फिर से परमेस्वर का वचन तैं बड़ी हिम्मतळ सुनौण लगि गैनी।</verse>
				<verse number="32">अर बिस्वास करण वळा सब लोग एक दिल अर एक मन ह्‍वेके रौन्दा छा। इख तक कि ऊंमा बटि कुई भि अपणी जैजाद तैं अपणु नि बुल्दु छौ, अर वु अपणी सब चीजों को आर-सार एक-दुसरा का दगड़ा मा करदा छा।</verse>
				<verse number="33">अर खास चेला प्रभु यीशु का मुरदो मा बटि ज्यून्द होण की गवै का बारा मा बड़ी सामर्थळ बतौन्दा छा। अर ऊं सभ्यों पर परमेस्वर की बड़ी किरपा छै।</verse>
				<verse number="34">अर ऊं लोगु मा कैतैं भि कैं बात की कमी नि छै, किलैकि जौं लोगु का पास जमीन या घौर होन्दा छा वु वेतैं बेचि के मिली रकम, खास चेलों का हाथों मा दे देन्दा छा।</verse>
				<verse number="35">अर खास चेला वीं रकम तैं जरुरतमन्द लोगु तैं ऊंकी जरुरत का मुताबिक ऊंमा बांटि देन्दा छा।</verse>
				<verse number="36">अर साइप्रस टापू को एक बिस्वासी मनखि जैको नौ यूसुफ छौ, यू लेवी गोत्र को छौ, अर खास चेलों न वेको नौ बरनबास रखी (जैको मतलब च दिलासा देण वळु)।</verse>
				<verse number="37">अर वेका पास एक पुंगड़ु छौ, जैतैं वेन बेचि अर ज्वा रकम वेतैं मिली वा वेन खास चेलों का हाथों मा दे दिनी।</verse>
			</chapter>
			<chapter number="5">
				<verse number="1">अर ऊं दिनों मा ही हनन्याह नौ को एक बिस्वासी मनखि छौ, अर वेकी घरवळी को नौ सफीरा छौ अर ऊंन अपणु एक पुंगड़ु बेचि।</verse>
				<verse number="2">अर वीं रकम मा बटि कुछ हिस्सा वेन अपणा ही पास छिपै के रखी दिनी, अर कुछ हिस्सा लेके खास चेलों का हाथों मा रखण लगि गै, अर ईं बात का बारा मा वेकी घरवळी भि जणदी छै।</verse>
				<verse number="3">तब पतरस न हनन्याह कू बोलि, “हनन्याह, तिन शैतान तैं अपणा मन मा इन बात किलै डलण दिनी, कि तू पवित्र आत्मा बटि झूठ्‍ठ बोल, अर पुंगड़े रकम मा बटि गबन कैरिके अपणा पास रख दे,</verse>
				<verse number="4">तेरा मन मा इन्द्रयो ख्याल किलै ऐ? वे हिस्सा का बिकण से पैलि उ तेरु ही छौ अर जब तिन वु बेचि छौ, त मिल्यां रुपयों पर भि तेरु ही अधिकार छौ। हनन्याह, तिन मनखियों बटि ना, बल्किन मा परमेस्वर बटि झूठ्‍ठ बोलि।”</verse>
				<verse number="5">अर ईं बात तैं सुणदी ही हनन्याह भ्वीं मा फरके गै अर वेन अपणु दम तोड़ि दिनी, अर सब सुनण वळो पर बड़ु खौफ ऐ गै।</verse>
				<verse number="6">तब ज्वान लोग न उठी के वेतैं कफन मा लपेटि अर दफनौणु खुणि नगर से भैर लि गैनी।</verse>
				<verse number="7">अर करीब तीन घन्टा बाद वेकी घरवळी सफीरा भितर ऐ, अर वींतैं ईं बात का बारा मा कुछ पता नि छौ।</verse>
				<verse number="8">तब पतरस न वीं बटि पूछी, “सफीरा इन बतौ क्या तुमुन वु पुंगड़ु इथगा मा ही बेचि छौ?” अर वींन बोलि, “हाँ, इथगा ही मा बेचि छौ।”</verse>
				<verse number="9">पतरस न वींकू बोलि, “या क्या बात च, कि तुम दुईया का दुई परमेस्वर की आत्मा तैं परखणु खुणि एक मन ह्‍वे ग्यां? देख, तेरा पति तैं दफनौण वळा द्‍वार पर ऐ गैनी, अर सुण, अब वु त्वेतै भि उठे के भैर लि जाला।”</verse>
				<verse number="10">अर वा तुरन्त वेका खुटों का पास फरके गै अर वींन अपणु दम तोड़ि दिनी। अर ज्वान मनखियों न भितर ऐके वींतैं मुरयूं पै, तब वु सफीरा तैं नगर का भैर लि गैनी अर वींतैं वींका पति का पास दफनै दिनी।</verse>
				<verse number="11">अर यू देखि के बिस्वासी समुदाय का लोगु पर, अर जथगा भि लोगु न ईं घटना का बारा मा सुणी ऊ सब भौत डौऽरी गैनी।</verse>
				<verse number="12">अर यीशु का खास चेलों का द्‍वारा भौत सरा अदभुत अर बड़ा-बड़ा चमत्कारिक काम लोगु का बीच मा किये जाणा छा, अर सब एक मन ह्‍वेके मन्दिर की वीं जगा मा इकट्‍ठा होन्दा छा, जै खुणि सुलैमान को बरण्डु बुले जान्दु।</verse>
				<verse number="13">फिर भि भौत सा लोग इन छा जु की यों को आदर-सम्मान करदा त छा, पर ऊंकी हिम्मत नि होन्दी छै की वु ऊंका दगड़ा मा मिली जा।</verse>
				<verse number="14">अर भौत सा बैख अर जनानियों न जौन प्रभु पर बिस्वास कैरी वु बिस्वासी समुदाय का यों लोगु का दगड़ा मा सामिल ह्‍वे गैनी, अर यों की गिनती और भि जादा ह्‍वे गै।</verse>
				<verse number="15">इख तक की लोग बिमारों तैं सड़कों मा लि जान्दा छा, अर ऊंतैं खाटों अर बिस्तरों पर लिटै देन्दा छा, ताकि जब पतरस उख बटि अऽ, त कम से कम वेको छैल ही ऊंमा मदि कै पर भि पोड़ि जौ अर वु खूब ह्‍वे जौ।</verse>
				<verse number="16">अर यरूशलेम नगर का आस-पास का ग्‍वोंऽ बटि भि लोग भौत सा बिमारों तैं अर जौं पर खबेस लग्यां छा ऊं सब लोगु तैं लेके ऐनी। अर परमेस्वर का द्‍वारा सब लोग खूब किये जान्दा छा।</verse>
				<verse number="17">अर यू सब देखि के महा पुरोहित अर वेका दगड़ा का सदूकी दल का लोग यीशु का खास चेलों तैं देखि के भौत खार खाण लगि गैनी।</verse>
				<verse number="18">अर ऊंन खास चेलों तैं पकड़ी के जेलखाना मा बन्द कैरी दिनी।</verse>
				<verse number="19">पर राति का बगत प्रभु का एक स्वर्गदूत न जेलखाना का द्‍वार खोली के ऊंतैं भैर लि गै। अर ऊंकू बोलि कि,</verse>
				<verse number="20">“जा, अर मन्दिर मा खड़ा ह्‍वेके ये नया जीवन का बारा मा लोगु तैं बिन डऽरयां बता।”</verse>
				<verse number="21">अर यू सुनण का बाद वु सुबेर होन्दी मन्दिर मा जैके उपदेस देण लगि गैनी। तब महा पुरोहित अर वेका सब दगड़्या ऐनी, अर ऊंन न्याय समिति का सब लोगु तैं अर इस्राएली लोगु का सब अध्यक्षों तैं इकट्‍ठा कैरी, अर सिपयों तैं आदेस दिनी कि, “जेलखाना बटि ऊं लोगु तैं इख लेके आ।”</verse>
				<verse number="22">पर जब मन्दिर का सिपै उख पौंछिनी, त जेलखाना मा ऊंतैं खास चेला नि दिखैनि, अर वापस लौटी के सिपयों न इन खबर दिनी कि,</verse>
				<verse number="23">“साब, जब हम उख पौंछयां, त हमुन देखि कि जेलखाना का द्‍वार पर पैरेदार खड़ा होयां छिन अर द्‍वार पर तालु भि लग्यूं च मगर जब हमुन द्‍वार खोली त भितर कुई भि नि छौ।”</verse>
				<verse number="24">अर जब मन्दिर का सिपयों का अधिकारी न, अर मुख्य पुरोहितों न सुणी त यों बातों तैं सुणी के घबरै गैनी, कि अब क्या जि होलु।</verse>
				<verse number="25">अर इथगा मा कैन ऐके ऊंतैं बतै, “अरे सुणा, जौं लोगु तैं तुमुन जेलखाना मा बन्द कैरी छौ, वु मन्दिर मा खड़ा ह्‍वेके लोगु तैं उपदेस देणा छिन।”</verse>
				<verse number="26">तब मन्दिर का सिपयों को अधिकारी ऊंतैं अपणा दगड़ा मा लि गै, अर ऊंन खास चेलों का दगड़ा मा कुई जोर-जबरदस्ती नि कैरी, पर चुपचाप से ऊंतैं वु अफ दगड़ा मा लेके ऐनी, किलैकि ऊंतैं डौऽर छै कि कखि लोग ऊं पर ढुंग्यो नि लगै द्‍या।</verse>
				<verse number="27">अर जब सिपयों न खास चेलों तैं न्याय समिति का समणि खड़ु कैरी, त महा पुरोहित न खास चेलों तैं पूछी कि,</verse>
				<verse number="28">“जब हमुन तुमतै चितै के आज्ञा दे छै कि तुम यीशु का नौ से उपदेस नि दियां, पर सुणा, तुमुन त पूरा यरूशलेम नगर मा अपणी ही शिक्षा फैलैयालि अर वे मनखि की मौत को दोष हम पर डलणा छाँ।”</verse>
				<verse number="29">तब पतरस अर दुसरा खास चेलों न जबाब दिनी, “मनखियों की आज्ञा से जादा बढी के परमेस्वर की आज्ञा को पालन करण हमरु फरज च।</verse>
				<verse number="30">अर तुम लोगु न यीशु तैं क्रूस पर चड़वै के मार दिनी, पर हमरा पितरों का परमेस्वर न वे ही यीशु तैं मुरदो मा बटि ज्यून्दु कैरी।</verse>
				<verse number="31">अर वेतैं ही परमेस्वर न प्रभु अर छुटकारु देण वळु ठैरै, अर अपणा दैंणा हाथ की तरफा बैठे के सबसे ऊँची जगा दिनी, ताकि वेका द्‍वारा इस्राएली अर सब लोगु तैं अपणा-अपणा जीवनों तैं बदळणों को, अर पापों से माफी पौण को अवसर मिली सैको।</verse>
				<verse number="32">अर यों बातों का गवा हम छां अर पवित्र आत्मा भि च, अर यू पवित्र आत्मा परमेस्वर न ऊंतैं दियूं च जु की वेकी आज्ञा को पालन करदिन।”</verse>
				<verse number="33">अर या बात सुणी के ऊंका जिकुड़ियों मा आग लगि गै, अर ऊंन खास चेलों तैं जान से मरण चै।</verse>
				<verse number="34">मगर न्याय समिति मा गमलीएल नौ को एक मनखि खड़ु ह्‍वे, अर वेन खास चेलों तैं उख बटि भैर जाणु कू बोलि कि, “थुड़ी देर भैर मा रा” अर वु चलि गैनी। अर यू गमलीएल त एक फरीसी मनखि छौ, जु की मूसा का दियां नियम-कानूनों तैं भौत अच्छा से जणदु छौ, अर लोगु मा वेकी बड़ी इज्‍जत छै।</verse>
				<verse number="35">अर येन न्याय समिति का लोगु कू बोलि कि, “हे इस्राएली लोगु, अगर तुम यों लोगु का दगड़ा मा कुछ कना छाँ, त जरा सोची समझि के कर्यां।</verse>
				<verse number="36">किलैकि कुछ दिन पैलि थियुदास नौ को मनखि मुखिया बणि के ऐ छौ, अर बुल्दु छौ की मि भि कुछ छौं, अर करीब चार सौ लोग वेका दल मा सामिल ह्‍वे गै छा। पर जब वेतैं मरवयै गै, त जथगा भि लोग वेकी शिक्षा तैं मनण वळा छा, वु सब तितर-बितर ह्‍वे गैनी, अर अब ऊंका दल को कुई अता-पता ही नि च।</verse>
				<verse number="37">अर वेका बाद जनगणना का दिनों मा गलील मुलक को रौण वळु यहूदा नौ एक और मनखि मुखिया बणि के ऐ, अर वेन कुछ लोगु तैं अपणु चेला बणै दिनी। पर जब वु मोरि गै, त जथगा भि लोग वेकी मणदा छा वु सब भि तितर-बितर ह्‍वे गैनी।</verse>
				<verse number="38">इलै जु कुछ भि होणु च ऊं सब बातों का बारा मा मि तुमतै बतै देन्दु कि यों मनखियों तैं यों का हाल पर छोड़ द्‍या अर ऊं बटि दूर रा, अगर जु यू काम अर या योजना मनखियों की तरफा बटि होलि, त अफि खतम ह्‍वे जालि।</verse>
				<verse number="39">पर अगर जु यू काम अर या योजना परमेस्वर की तरफा बटि होलि त तुम ऊं लोगु तैं रोकी नि सकिल्या, अर कखि इन नि हो कि तुम लोग ये चक्‍कर मा परमेस्वर का दगड़ा मा भि लड़ै करण वळा बणि जा।” अर ऊं लोगु गमलीएल बात माणी दिनी।</verse>
				<verse number="40">तब न्याय समिति का लोगु न खास चेलों तैं बुलै अर ऊंतैं पिटवै। अर ऊंतैं इन आज्ञा देके छोड़ि दिनी, कि यीशु नौ की चर्चा फिर नि कर्यां।</verse>
				<verse number="41">अर यीशु मसीह का खातिर दुख सौणु का लैख परमेस्वर न ऊंतैं समझि, इलै खास चेला न्याय समिति का लोगु का समणि बटि आनन्द मणौन्द-मणौन्द चलि गैनी।</verse>
				<verse number="42">अर खास चेला हरेक दिन मन्दिर अर घौर-घौर जैके लोगु तैं सिखौन्दा छा, अर ईं बात को शुभ समाचार देन्दा छा कि यीशु ही मसीह च।</verse>
			</chapter>
			<chapter number="6">
				<verse number="1">ऊं दिनों मा जब बिस्वासी लोगु की संख्या भौत बढणी छै, त यूनानी भाषा बुलण वळा बिस्वासी लोग, इब्रानी भाषा बुलण वळा बिस्वासी लोगु की सिकैत करण लगि गैनी, कि हर रोज मिलण वळा खाण-पीण का समान मा हमरि विधवा जनानियों का दगड़ा मा भेदभाव किये जाणु च।</verse>
				<verse number="2">तब बारह चेलों न बिस्वासी समुदाय का लोगु तैं बुलै के बोलि, “यू ठिक नि च कि हम परमेस्वर का वचन को परचार तैं छोड़ि के खिलाण-पिलाण की सेवा मा लग्यां रा।</verse>
				<verse number="3">इलै हे मेरा भै-बैंणो, अपणा बीच मा बटि सात खास लोगु तैं चुणा जौं तैं लोग अच्छु मणदा हो, बल्किन मा वु पवित्र आत्मा अर अकल मा भि भरपूर हो, ताकि हम ऊंतैं ये काम की जिमेदारी द्‍या।</verse>
				<verse number="4">मगर हम लोग प्रार्थना करण मा, अर वचन की सेवा का काम तैं पूरु करण मा हरेक बगत लग्यां रौला।”</verse>
				<verse number="5">अर या बात बिस्वासी समुदाय का सब लोगु तैं ठिक लगि, अर ऊंन स्तिफनुस तैं चुणी, अर यू अच्छु बिस्वासी अर पवित्र आत्मा से भरपूर छौ। अर येका दगड़ा-दगड़ि ऊंन फिलिप्पुस, प्रुखुरुस, अर नीकनोर अर तीमोन तैं, अर परमिनास, अर अन्ताकिया नगर का नीकुलाउस तैं चुणी जु कि यहूदी बणि गै छौ।</verse>
				<verse number="6">अर यों तैं यीशु का खास चेलों का समणि खड़ु किये गै। अर ऊंन यों सातों पर हाथ रखी के प्रार्थना कैरी।</verse>
				<verse number="7">अर इनकै परमेस्वर को वचन और भि जादा फैलदी गै, अर यरूशलेम नगर मा बिस्वासी लोगु की गिनती और भि जादा ह्‍वे गै। अर भौत सा पुरोहितों न बिस्वास कैरी अर यू भि ऊंका दगड़ा मा मिली गैनी।</verse>
				<verse number="8">अर स्तिफनुस पर परमेस्वर की बड़ी किरपा अर सामर्थ छै, इलै उ अदभुत काम अर चमत्कारिक चिन्‍न कैरिके दिखान्दु छौ।</verse>
				<verse number="9">मगर उख एक प्रार्थना भवन छौ जैमा वु लोग औन्दा छा जु की गुलामी से आजाद होयां छा। तब यों लोगु का बीच मा बटि कुरेनी, सिकन्दरिया अर किलिकिया अर आसिया मुलकों का कुछ लोग स्तिफनुस का दगड़ा मा वाद-विवाद करणु खुणि खड़ा ह्‍वेनि। अर वाद-विवाद करण लगि गैनी,</verse>
				<verse number="10">पर यू लोग वेका ज्ञान की बातों को जबाब नि दे सकिनी, किलैकि स्तिफनुस पवित्र आत्मा की सामर्थ मा ह्‍वेके बोन्‍नु छौ।</verse>
				<verse number="11">तब ऊंन चुपके से कुछ लोगु तैं उकसै कि ऊ इन बोला कि, “हमुन येतैं परमेस्वर का खिलाप मा अर नियम-कानून देण वळा मूसा का खिलाप मा बुरै का शब्द बुल्द सुणी।”</verse>
				<verse number="12">तब ऊ अध्यक्ष अर शास्‍त्रियों तैं भड़कौण लगि गैनी, अर ऊंन स्तिफनुस तैं पकड़ी अर न्याय समिति का समणि लेके गैनी।</verse>
				<verse number="13">तब ऊंन झूठ्‍ठा गवा खड़ा करिनी। अर झूठ्‍ठी गवै देण वळा ऊं लोगु बोलि कि, “यू मनखि त हमरा पवित्र मन्दिर अर नियम-कानूनों का विरोध मा ही बोन्‍नु रौन्दु।</verse>
				<verse number="14">अर हमुन येतैं इन भि बुल्द सुणी कि, नासरत गौं को यीशु हमरा मन्दिर तैं बरबाद कैर दयालु, अर ऊं रीति-रिवाजों तैं भि बदल दयालु जु हमतै मूसा न दिनी।”</verse>
				<verse number="15">तब न्याय समिति का सब लोगु न स्तिफनुस का मुख जनै एक-टक ह्‍वेके देखि, त ऊंतैं वेकी मुखडी स्वर्गदूत का जन दिखै।</verse>
			</chapter>
			<chapter number="7">
				<verse number="1">तब महा पुरोहित न स्तिफनुस बटि पूछी, “तेरा बारा मा बुलिं यू सब बात सच्‍च छिन क्या?”</verse>
				<verse number="2">अर स्तिफनुस न जबाब दिनी, “हे मेरा भैयों अर दाना-स्यांणा लोगु, मेरी बातों तैं ध्यान से सुणा, जब हमरु पितर अब्राहम हारान नगर मा रौणु कू गै छौ, वेसे पैलि उ मेसोपोटामिया का मुलक मा छौ। अर उख हमरा महान परमेस्वर न वेतैं अपणु दरसन दिनी।</verse>
				<verse number="3">अर वेकू बोलि कि, “‘अब्राहम तू अपणा रिश्तेदारों अर अपणा देस तैं छोड़ि के वे देस मा चलि जा, जु मि त्वेतै दिखौलु।’</verse>
				<verse number="4">“तब अब्राहम अपणा पिता का दगड़ा मा कसदियों का मुलक बटि निकळि के हारान नगर मा रौण लगि गै, अर वेका बुबा की मौत का बाद परमेस्वर न वेतैं उख बटि निकळणे की आज्ञा दिनी। अर उ उख बटि निकळि के ये देस मा रौणु कू ऐ गै जख अब तुम रौणा छाँ।</verse>
				<verse number="5">मगर परमेस्वर न वेतैं ये मुलक मा कुछ भि हिस्सा नि दिनी, इख तक कि थुड़ी सि जमीन भि ना। पर परमेस्वर न वे बटि करार कैरी, कि मि यू देस त्वेतै अर तेरी औण वळी पीढ़ी का लोगु तैं दे द्‍यूलु, अर वे बगत वेकी कुई भि आस-औलाद नि छै।</verse>
				<verse number="6">अर परमेस्वर न वेकू बोलि कि, ‘तेरु वंश कै दुसरा देस मा परदेसी ह्‍वेके रालु, अर वे देस का लोग तेरा वंश का लोगु तैं चार सौ साल तक गुलाम बणै के रखला, अर ऊंतैं भौत सताला।’</verse>
				<verse number="7">पर परमेस्वर न इन भि बोलि छौ कि, ‘जु लोग ऊंतैं गुलाम बणाला, ऊंतैं मि दण्ड द्‍यूलु वु लोग वे देस बटि निकळि के ऐ जाला अर ईं जगा मा ऐके मेरी सेवा करला।’</verse>
				<verse number="8">अर परमेस्वर न अब्राहम का दगड़ा मा समझौता कैरी अर खतना करण वेकू एक चिन्‍न छौ। इलै जब इसहाक को जनम ह्‍वे, त अब्राहम न आठवां दिन मा इसहाक को खतना करवै। अर फिर इसहाक को नौनु याकूब ह्‍वे अर याकूब का बारह बच्‍चा ह्‍वेनि, अर ऊंन भि इन्‍नि करवै। अर यों बच्‍चों का द्‍वारा ही बारह गोत्र ह्‍वेनि, अर ऊ सब हमरा पितर छा अर ऊं मदि यूसुफ एक छौ।</verse>
				<verse number="9">“अर हमरा पितर यूसुफ का ग्यारा भै वे बटि खिरस्योन्दा छा, इलै ऊंन वेतैं मिस्र देस का लोगु तैं गुलाम होणु खुणि बेचि दिनी। मगर परमेस्वर वेका दगड़ा मा छौ,</verse>
				<verse number="10">अर वेन पितर यूसुफ तैं वेकी सब मुसीबतों से बचै। अर परमेस्वर न मिस्र का राजा फिरौन की नजर मा यूसुफ तैं होसियार ठैरै, अर राजा तैं यूसुफ की अकल की बात पसन्द ऐनी। तब राजा फिरौन न वेतैं अपणा पूरा रजवाड़ा को मुखिया अर मिस्र देस को अधिकारी ठैरै दिनी।</verse>
				<verse number="11">“अर जौं दिनों मा मिस्र अर कनान का पूरा देसों मा अकाळ पोड़ि गै अर सब पर बड़ी विपदा ऐ गै, अर हमरा पितरों तैं खाणु नि मिली।</verse>
				<verse number="12">अर जब याकूब न यू सुणी की मिस्र मा अनाज च, त वेन अपणा नौनो तैं उख भेजि अर इन कैरिके हमरा पितर पैलि बार मिस्र देस मा गैनी।</verse>
				<verse number="13">अर कुछ दिनों का बाद जब ऊ दुबरा मिस्र मा गैनी, त यूसुफ न अपणा बारा मा सब कुछ अपणा भैयों तैं बतै दिनी। तब यूसुफ का परिवार का बारा मा फिरौन तैं भि पता चलि गै।</verse>
				<verse number="14">तब यूसुफ न अपणा बुबा याकूब तैं अर अपणा पूरा कुटुम्ब तैं मिस्र देस मा कैतैं भेजि के अपणा इख बुलै दिनी, अर ऊ लोग की गिनती पिचत्तर छै।</verse>
				<verse number="15">तब याकूब मिस्र देस मा रौण लगि गै अर वे ही देस मा मोरि गै, अर हमरा और पितर भि उखि मुरिनी।</verse>
				<verse number="16">अर हमरा पितरों की लांशों तैं मिस्र बटि कनान देस का शकेम नगर मा लेके ऐनी, अर हमरा पितरों तैं इख दफनये गै। अर या कबर हमरा पितर अब्राहम न हमोर का नौनो बटि चांदी का सिक्‍का देके खरीदी छै।</verse>
				<verse number="17">“अर जु करार परमेस्वर न अब्राहम का दगड़ा मा कैरी छौ, जब वेको पूरु होण को बगत नजदीक औण लगि गै, तब तक मिस्र देस मा हमरा पितरों की संख्या भौत जादा ह्‍वे गै छै।</verse>
				<verse number="18">अर भौत सालों बाद मिस्र देस मा एक-दुसरो राजा बणि, जु कि यूसुफ तैं जणदु नि छौ।</verse>
				<verse number="19">अर ये नया राजा न हमरा पितरों का दगड़ा मा बिस्वासघात कैरी अर ऊंका दगड़ा मा भौत गळत ब्यौहार कैरी, वेन ऊंतैं इथगा मजबूर कैरी कि ऊंन अपणा नवजात बच्‍चों तैं मुरणु खुणि भैर छोड़ दिनी ताकि वु मोरि जा।</verse>
				<verse number="20">“अर जब यू सब होणु छौ, त ऊं दिनों मा ही परमेस्वर का रैबर्या मूसा को जनम ह्‍वे। अर मूसा परमेस्वर की नजर मा सुन्दर छौ, अर तीन मैना तक वेका घौर वळो न वेकी देखभाल कैरी।</verse>
				<verse number="21">पर जब वेका घौर वळो न वेतैं छोड़ दिनी, त फिरौन राजा की नौनि तैं उ मिली अर वींन वेतैं उठे अर अपणु नौनु समझि के वेको पालन-पोसण कैरी।</verse>
				<verse number="22">अर मूसा तैं मिस्र देस की हरेक विद्‍या को ज्ञान दिये गै, अर वु बुलण मा अर हरेक करम तैं करण मा भि जबरदस्त छौ।</verse>
				<verse number="23">अर जब मूसा चालीस साल को ह्‍वे, त वेका मन मा यू विचार ऐ कि मि अपणा इस्राएली भै-बन्दों बटि मिली के औन्दु।</verse>
				<verse number="24">“एक दिन मूसा न देखि, कि एक मिस्री मनखि एक इस्राएली भै का दगड़ा मा बुरु ब्यौहार कनु च, त वेन वेतैं बचै अर वे मिस्री तैं जान से मारी दिनी, अर इन के वेन वे इस्राएली भै का दगड़ा मा होयां जुलम को बदला लेई।</verse>
				<verse number="25">अर मूसा न सोची, कि वेकी जाति का लोग समझि जाला कि परमेस्वर वेका द्‍वारा इस्राएली लोगु तैं मिस्री लोगु का हाथों से आजाद करौण चान्दु, मगर वु लोग नि समझिनी।</verse>
				<verse number="26">“अर कैं हैंका दिन मूसा न देखि कि दुई इस्राएली लोग आपस मा झगड़ा कना छिन, त उ ऊंका पास गै। अर ऊं लोगु का बीच मा मेल-जोल करण की कोसिस कैरी अर बोलि, ‘तुम त भै-भै छाँ त अपणा आपस मा झगड़ा किलै कना छाँ?’</verse>
				<verse number="27">पर जु मनखि दुसरा का दगड़ा मा मार करणु कू जाणु छौ वेन मूसा तैं धक्‍का देके बोलि, ‘त्वेतै कैन हमरु अधिकारी अर न्याय करण वळु बणै?</verse>
				<verse number="28">जन तिन ब्याळि वे मिस्री तैं मार दिनी, क्या तू उन्‍नि मितैं भि मरण चाणि छैई?’</verse>
				<verse number="29">अर या बात सुणी के मूसा मिस्र देस बटि गौळ ह्‍वे गै, अर मिधान देस मा परदेसीयों की तरौं रौण लगि गै। अर उख वेका दुई नौना ह्‍वेनि।</verse>
				<verse number="30">“अर जब मूसा तैं मिधान देस मा चालीस साल ह्‍वे गैनी, त एक दिन सीनै पाड़ की एक निर्जन जगा पर एक स्वर्गदूत न मूसा तैं जगदी झाड़ि की लपटो मा दरसन दिनी।</verse>
				<verse number="31">अर यू सब देखि के वु ताजुब करण लगि गै अर करीब से दिखणु खुणि वेका और नजदीक गै, कि तबरि प्रभु की आवाज ऐ,</verse>
				<verse number="32">‘मूसा, मि तुमरा पितर अब्राहम को परमेस्वर, इसहाक को परमेस्वर, अर याकूब को परमेस्वर छौं।’ तब मूसा परमेस्वर की डौऽर से कौंपण लगि गै, अर वेकी हिम्मत नि ह्‍वे कि वु वेतैं देखि सैको।</verse>
				<verse number="33">अर प्रभु न वेकू बोलि, ‘या जगा पवित्र जगा च जख तू खड़ु होईं छैई, इलै अपणा जुतों तैं उतारि दे।</verse>
				<verse number="34">अर आज मि इख अपणा लोगु तैं छुड़ाणु खुणि उतरयुं छौं, किलैकि मिन मिस्र मा अपणा लोगु तैं कुदसा मा पोड़्यूं देखि, अर ऊंको कणाट भि मिन सुण्यालि। इलै अब चल मि त्वेतै मिस्र भेजणु छौ।’</verse>
				<verse number="35">“अर यू उई मूसा च जैतैं इस्राएली लोगु न इन बोलि के नकारी छौ कि, ‘त्वेतै कैन हमरु अधिकारी अर न्याय करण वळु बणै?’ मगर परमेस्वर न वे ही मूसा तैं इस्राएली लोगु को अधिकारी अर छुड़ौण वळु ठैरै, अर जगदी झाड़ि मा वे स्वर्गदूत का द्‍वारा बात कैरिके मूसा तैं मिस्र देस मा भेजि दिनी।</verse>
				<verse number="36">अर यू उई मूसा च जैन हमरा पितरों तैं मिस्र देस बटि भैर निकाळि। अर मूसा न चालीस साल तक मिस्र देस मा, लाल समुन्दर, अर निर्जन जगों मा चिन्‍न अर चमत्कारिक काम कैरिके दिखै छा।</verse>
				<verse number="37">अर यू उई च जैन इस्राएल का लोगु कू बोलि छौ कि, ‘परमेस्वर तुम लोगु का बीच मा बटि मि जन एक रैबर्या तैं चुणी के तुम खुणि खड़ु करलु।’</verse>
				<verse number="38">अर यू उई मूसा छौ जु की निर्जन जगा मा इस्राएली लोगु का दगड़ा मा छौ, अर जैन बिचलु को काम कैरी छौ। अर सीनै पाड़ पर उ वे स्वर्गदूत का दगड़ा मा छौ जैन वेका दगड़ा मा बात कैरी छै, अर उ हमरा पितरों का दगड़ा मा छौ। अर वेन ही यू वचन हमतै देणु खुणि ज्यून्दा पिता परमेस्वर बटि पै।</verse>
				<verse number="39">अर वु लोग मूसा की बातों तैं नि मनण चाणा छा, बल्किन मा ऊ वेतैं नकरण लगि गैनी, तब ऊंन अपणु-अपणु मन मिस्र जनै लगौण शुरु कैरी दिनी।</verse>
				<verse number="40">अर हारुन कू बोलि, ‘हम खुणि द्‍यबतों तैं बणौ, जु हमरा अगनै-अगनै चला, किलैकि मूसा जु कि हमतै मिस्र देस बटि निकाळि के लै, हम नि जणद्‍यां कि वेको क्या ह्‍वे।’</verse>
				<verse number="41">तब ऊं दिनों मा ऊंन एक बछड़ा की मूरत बणवै, अर वीं मूरत का अगनै एक बलि चड़ै, अर जु कुछ भि ऊंन बणै वेका खातिर ऊ बड़ु आनन्द मनौण लगि गैनी।</verse>
				<verse number="42">इलै परमेस्वर ऊं बटि दूर ह्‍वे गै, अर सूरज, चाँद अर गैंणो की पूजा करणु खुणि छोड़ि दिनी। अर जन रैबर्यों की किताबों मा लिख्यूं च कि, “‘हे इस्राएल का कुटुम्ब, निर्जन जगा मा चालीस सालों तक जु दान-बलिदान तुमुन चडैनी, क्या वु तुमुन मि खुणि ही चडैनी?</verse>
				<verse number="43">ना, वु मि खुणि नि छौ यू त तुमुन मोलेक द्‍यबता का तम्बू खुणि, अर ज्वा मूरत रिफान नौ का गैंणा द्‍यबता की लेके तुम घूमदा छा तुमुन यू सब ऊं खुणि ही कैरी। अर यों सब मूरतों तैं तुमुन इलै बणै ताकि तुम ऊंकी पूजा कैरी सैका। इलै मि भि तुमतै तुमरा देस बटि निकाळि के बेबीलोन नगर से भि भौत दूर लि जैके बसौलु।’</verse>
				<verse number="44">“अर साक्षी को तम्बू जु कि निर्जन जगा मा हमरा पितरों का पास छौ, अर जैतैं बणौण की आज्ञा परमेस्वर न मूसा तैं देई छै अर इन बोलि छौ कि, ‘तम्बू को जु नमूना त्वेतै दिखये गै, वेका मुताबिक वेतैं बणौ।’</verse>
				<verse number="45">अर तब हमरु यू देस पैलि ऊं लोगु को छौ जु की हमरि जाति-बिरादरी का नि छा। अर वे बगत मा हमरा परमेस्वर न ऊं सब लोगु तैं इख बटि भैर निकाळि के यू देस हमरा पितरों का अधिकार मा दे दिनी। अर वे बगत मा हमरा पितर साक्षी का तम्बू तैं पितर यहोशू का दगड़ा मा लेके ये देस मा ऐनी, अर वु तम्बू राजा दाऊद का दिनों तक इख रै।</verse>
				<verse number="46">अर परमेस्वर की किरपा राजा दाऊद पर छै, अर दाऊद न वेसे बिन्ती कैरी कि मि पितर याकूब का परमेस्वर खुणि रौणे की एक जगा बणौ।</verse>
				<verse number="47">मगर रौण की वा जगा पितर दाऊद का नौना सुलैमान राजा न बणवै।</verse>
				<verse number="48">पर क्या इन ह्‍वे सकदु च कि सबसे महान परमेस्वर मनखि द्‍वारा बणईं जगा मा रौ, ना, इन नि ह्‍वे सकदु किलैकि परमेस्वर न अपणा रैबर्या का द्‍वारा बोलि छौ कि,</verse>
				<verse number="49">“‘प्रभु बुल्दु कि, स्वर्ग मेरी राजगद्‍दी अर धरती मेरा खुटा रखण की जगा च, अब बता तुम मि खुणि कन्द्रयो घौर बणैल्या? अर इन्दरि जगा कख च जख मि आराम कैर सैकु?</verse>
				<verse number="50">अर क्या यों सब चीजों तैं मिन नि बणै?’</verse>
				<verse number="51">“अर स्तिफनुस न ऊंकू इन भि बोलि कि, ‘हे जिद्‍दमार लोगु, तुम ऊं लोगु का जन किलै होणा छाँ जु परमेस्वर की बातों तैं सुनण अर मनण नि चनदिन, अर तुम हमेसा किलै पवित्र आत्मा को विरोध करद्‍यां? जन तुमरा पितरों न कैरी ठिक उन्‍नि तुम भि करद्‍यां।</verse>
				<verse number="52">अर तुमरा पितरों न परमेस्वर का कै रैबर्यों तैं नि सतै? अर जौं रैबर्यों न वे धरमी मनखि का औण का बारा मा पैलि ही बतैयालि छौ ऊंतैं भि ऊं लोगु न जान से मारी दिनी। अर ऊंका मुताबिक तुमुन वे धरमी मनखि तैं बिस्वासघात कैरिके पकड़वै अर वेतैं जान से मरवै के तुम वेका हत्यारा ह्‍वे ग्यां।</verse>
				<verse number="53">तुम त उई छाँ, जौन नियम-कानूनों तैं परमेस्वर का स्वर्गदूतों का द्‍वारा पै, मगर फिर भि तुमुन ऊंको पालन नि कैरी।’”</verse>
				<verse number="54">अर स्तिफनुस की यों बातों तैं सुणी के न्याय समिति का लोग भौत गुस्सा ह्‍वेनि। अर ऊंतैं इथगा गुस्सा ऐ, कि ऊ गुस्सा से तमतमै गैनी।</verse>
				<verse number="55">मगर स्तिफनुस न पवित्र आत्मा से भरपूर ह्‍वेके स्वर्ग जनै देखि, अर वेन परमेस्वर की दिब्य चमक देखि अर यीशु मसीह तैं परमेस्वर का दैंणी तरफा खड़ु होयुं देखि अर बोलि कि,</verse>
				<verse number="56">“सुणा, मि स्वर्ग तैं खुल्यूं अर मनखि का पुत्र तैं परमेस्वर की दैंणी तरफा खड़ु होयुं दिखणु छौं।”</verse>
				<verse number="57">अर या बात सुणी के ऊंन अपणा कन्दूड़ बन्द कैरी दिनी अर जोर से चिल्‍लैनि, अर वेतैं जान से मरणु खुणि वे जनै झट गैनी।</verse>
				<verse number="58">अर वेतैं ढुंग्योण खुणि ऊ लोग वेतैं नगर बटि भैर खिखोड़ी के लि गैनी। अर जथगा गवा स्तिफनुस का खिलाप मा छा ऊंन अपणा-अपणा कपड़ों तैं शाऊल नौ का एक ज्वान मनखि का समणि जमा करिनी।</verse>
				<verse number="59">जब ऊ लोग स्तिफनुस तैं ढुंग्योणा छा, त वेन प्रभु से प्रार्थना कैरी, “मेरा प्रभु यीशु, मेरी आत्मा तैं स्वीकार कैरा।”</verse>
				<verse number="60">फिर वेन घुंडा टिकनी अर चिल्‍लै के बोलि, “मेरा प्रभु, ये पाप को दोष यों पर नि लग्यां” अर इन बोलि के वेन ईं दुनियां तैं छोड़ि दिनी।</verse>
			</chapter>
			<chapter number="8">
				<verse number="1">अर यू ज्वान शाऊल भि स्तिफनुस की हत्या मा राजी छौ। तब कुछ भक्‍त लोगु न ऐके स्तिफनुस तैं कबर मा दफनै दिनी, अर वेका बानो बड़ु मातम कैरी। अर वे दिन बटि ही यरूशलेम नगर का बिस्वासी समुदाय पर बड़ु सतौ औण लगि गै, अर खास चेलों का अलावा सब बिस्वासी लोग यहूदिया अर सामरिया का मुलक मा तितर-बितर ह्‍वे गैनी।</verse>
				<verse number="2"></verse>
				<verse number="3">अर शाऊल न बिस्वासी समुदाय तैं बरबाद करण शुरु कैर दिनी, अर वु घौरों-घौरों मा घुसी के जनानियों अर बैखों तैं खिखोड़ी-खिखोड़ी के निकळदु छौ अर ऊंतैं जेलखाना मा डालि देन्दु छौ।</verse>
				<verse number="4">मगर जु बिस्वासी लोग तितर-बितर ह्‍वे गै छा, वु जख भि गैनी ऊंन उख-उख शुभ समाचार को परचार कैरी।</verse>
				<verse number="5">अर बिस्वासी लोगु मा बटि फिलिप्पुस सामरिया मुलक का एक नगर मा चलि गै, अर लोगु का बीच मा मसीह को परचार करण लगि गै।</verse>
				<verse number="6">अर भौत सा लोगु न फिलिप्पुस की बातों तैं ध्यान से सुणी, अर वेका द्‍वारा किये जाण वळा चमत्कारों तैं देखि, अर वेकी बातों पर अपणु-अपणु ध्यान लगै।</verse>
				<verse number="7">किलैकि भौत सा लोगु पर खबेस लग्यां छा, वु खबेस चिल्‍लै-चिल्‍लै के ऊंमा बटि निकळि जान्दा छा। अर भौत सा लोग जौं तैं लकवा पोड़्यूं छौ, अर जु लंगड़ा छा यों सब लोगु तैं खूब किये जान्दु छौ।</verse>
				<verse number="8">अर वे पूरा नगर मा सब लोग खुशी मनौण लगि गैनी।</verse>
				<verse number="9">अर वे नगर मा फिलिप्पुस से पैलि शमौन नौ को एक जादूगर छौ, अर ये जादूगर न अपणा जादु-टोंणा का द्‍वारा उखा सब लोगु तैं घंघतोळ मा डालि के रख्युं छौ। अर यू जादूगर इन दावा करदु छौ, कि मि भि एक महान मनखि छौं।</verse>
				<verse number="10">इलै छुटो हो या बड़ु सब लोग वेकी बात को मान करदा छा अर बुल्दा छा कि, “यू मनखि ही परमेस्वर की महान ताकत च।”</verse>
				<verse number="11">अर येन भौत दिनों बटि लोगु तैं अपणा जादु-टोंणा का द्‍वारा ताजुब मा डलयुं छौ, इलै सब लोग वेतैं भौत मणदा छा।</verse>
				<verse number="12">पर जब फिलिप्पुस ये नगर मा ऐ, त वेन इख ऐके परमेस्वर का राज अर यीशु मसीह का नौ को शुभ समाचार परचार कैरी। अर वेकी यों बातों तैं सुणी के भौत सा बैखों अर जनानियों न बिस्वास कैरी, अर बपतिस्मा भि लेई।</verse>
				<verse number="13">इख तक की जादूगर शमौन न भि खुद बिस्वास कैरी अर बपतिस्मा ले, अर वेका बाद उ फिलिप्पुस का दगड़ा मा लगातार रौण लगि गै। अर फिलिप्पुस का द्‍वारा जु अदभुत काम अर चमत्कारिक चिन्‍न किये जान्दा छा, ऊंतैं देखि के उ हकदक ह्‍वे जान्दु छौ।</verse>
				<verse number="14">अर जु खास चेला यरूशलेम नगर मा रौणा छा, जब ऊंतैं ईं बात का बारा मा पता चलि कि सामरिया मुलक का लोगु न भि परमेस्वर का वचन तैं स्वीकार कैरियाली, तब ऊंन पतरस अर यूहन्‍ना तैं ऊंका पास भेजि।</verse>
				<verse number="15">तब यू दुईया का दुईया उख गैनी। अर जब पतरस अर यूहन्‍ना सामरिया मुलक मा पौंछिनी, त उख पौंछण का बाद ऊंन लोगु खुणि प्रार्थना कैरी, ताकि ऊ लोग भि पवित्र आत्मा पा।</verse>
				<verse number="16">किलैकि पवित्र आत्मा अब तक उखा लोगु तैं नि मिली छौ, ऊंतैं बस प्रभु यीशु मसीह का नौ का द्‍वारा ही बपतिस्मा दिये गै छौ।</verse>
				<verse number="17">तब पतरस अर यूहन्‍ना न ऊंन लोगु पर हाथ रखी, अर ऊंन पवित्र आत्मा तैं पै।</verse>
				<verse number="18">अर जब शमौन जादूगर न देखि, कि खास चेलों का हाथ रखण से पवित्र आत्मा मिलणु च, त वेन ऊंका समणि रुपया रखिनी। अर बोलि कि,</verse>
				<verse number="19">“भैयों, या ताकत मितैं भि द्‍या ताकि जब मि कै मनखि पर हाथ रखूं त वु मनखि पवित्र आत्मा तैं पौ।”</verse>
				<verse number="20">मगर पतरस न वेकू बोलि, “तेरु अर तेरा दगड़ा मा तेरा रुपयों को भि विणास ह्‍वे जौ, किलैकि तिन इन सोची कि परमेस्वर का दान तैं रुपयोंळ खरीद द्‍यूं,</verse>
				<verse number="21">अरे, ईं सेवा मा नऽ त तेरु कुई सम्बन्ध अर ना ही तेरु कुई हिस्सा, किलैकि परमेस्वर की नजर मा तेरु मन खरु नि च।</verse>
				<verse number="22">इलै अपणी ईं बुरै का बाना पस्ताप कैर अर प्रभु से प्रार्थना कैर। अर क्या पता परमेस्वर तेरा ये ख्याल तैं माफ कैर द्‍यो।</verse>
				<verse number="23">किलैकि मितैं दिखौणु च कि तू तीत जन भौत कड़ु, अर पापों का बन्धनों मा फस्युं छैई।”</verse>
				<verse number="24">तब शमौन न बोलि, “भैयों जु कुछ तुमुन बोलि वेका मुताबिक मेरा दगड़ा मा कुछ भि नि हो, इलै तुम मि खुणि प्रभु बटि प्रार्थना कैरा।”</verse>
				<verse number="25">अर जब पतरस अर यूहन्‍ना न सामरिया मुलक का ये क्षेत्र मा गवै सुनौण को अर परचार करण को काम पूरु कैरी दिनी, तब ऊ उख बटि यरूशलेम नगर कू वापिस जाण लगि गैनी। अर सफर मा वापिस जान्द दौं सामरिया मुलक का जथगा भि और गौं ऐनी, उख-उख ऊंन प्रभु को शुभ समाचार सुणै।</verse>
				<verse number="26">अर एक दिन इन ह्‍वे, कि प्रभु का एक स्वर्गदूत न फिलिप्पुस कू बोलि कि, “फिलिप्पुस चल, वु निर्जन बाटु जु दक्छिण दिसा की तरफा च अर यरूशलेम नगर बटि गाजा नगर कू जान्दु तू उख जा।”</verse>
				<verse number="27">अर फिलिप्पुस न तयारी कैरी अर वे बाटा पर चलि गै। अर सुणा, वेकी मुलाकात एक मनखि का दगड़ा मा ह्‍वे जु की इथियोपिया नगर को छौ, अर यू मनखि इथियोपिया नगर की महाराणी कन्दाके का खजाना को अधिकारी छौ, अर वु नपुंसक छौ। अर यू यरूशलेम नगर मा परमेस्वर की भक्‍ति करणु खुणि अयूं छौ।</verse>
				<verse number="28">अर यरूशलेम नगर बटि वापिस जान्द दौं उ अपणा रथ मा बैठि के परमेस्वर का रैबर्या यशायाह की किताब तैं पढणु छौ।</verse>
				<verse number="29">तब पवित्र आत्मा न फिलिप्पुस कू बोलि, “नजदीक जैके रथ का दगड़ा-दगड़ि मा चल।”</verse>
				<verse number="30">फिर उ वे रथ का जनै भागी के गै, अर फिलिप्पुस न वे अधिकारी तैं यशायाह रैबर्या की किताब पढद सुणी। तब वेन वे बटि पूछी, “साब, तुम जु पढणा छाँ, क्या वु तुमरा बिंगण मा भि औणु च?”</verse>
				<verse number="31">वेन बोलि, “जबरि तक कुई मितैं नि बिंगालु तबरि तक मिन कनकै बिंगण?” तब वेन फिलिप्पुस तैं अपणा रथ मा बैठणु खुणि बोलि।</verse>
				<verse number="32">अर पवित्रशास्‍त्र का जै हिस्सा मा बटि उ पढणु छौ उख मा इन लिख्यूं छौ कि, “उ त भेड़ की तरौं बलि होण खुणि लये गै, अर जन भेड़ को बच्‍चा ऊंन माठण दौं शान्त रौन्दु ठिक उन्‍नि वेन भि अपणु गिच्‍चु नि खोली।</verse>
				<verse number="33">अर जब वेको अपमान किये जाणु छौ, त वेको न्याय सच्‍चै से नि किये गै। अर वेकी पीढ़ी का बारा मा कुई नि बतौ सकदु, किलैकि धरती मा बटि त वेको जीवन ले लिये गै छौ।”</verse>
				<verse number="34">तब वे अधिकारी न फिलिप्पुस तैं पूछी, “मितैं इन बतौ कि इख मा परमेस्वर को रैबर्या कै का बारा मा बतौणु च? अपणा बारा मा या कै दुसरा का बारा मा?”</verse>
				<verse number="35">तब फिलिप्पुस न बतौण शुरु कैरी, अर पवित्रशास्‍त्र का ये वचन बटि शुरु कैरिके यीशु का शुभ समाचार तक वेतैं सुणै दिनी।</verse>
				<verse number="36">अर बाटा मा चलद-चलद वु एक जगा मा पौंछिनी जख पाणि छौ। तब वे अधिकारी न बोलि, “देखा, इख मा पाणि च, मि बपतिस्मा ले सकदु क्या?”</verse>
				<verse number="37">[अर फिलिप्पुस न वेतैं पूछी, “अगर तुम पूरा मनळ बिस्वास करद्‍यां, त तुम बपतिस्मा ले सकद्‍यां।” अर वेन जबाब दिनी, “हाँ, मि बिस्वास करदु छौं, कि यीशु मसीह ही परमेस्वर को पुत्र च।”]</verse>
				<verse number="38">तब वे अधिकारी न रथ तैं रुकण को आदेस देई, तब फिलिप्पुस अर वु अधिकारी पाणि मा उतरिनी, अर वेन वेतैं बपतिस्मा देई।</verse>
				<verse number="39">अर जब ऊ पाणि बटि भैर ऐनी, त प्रभु की पवित्र आत्मा न फिलिप्पुस तैं उख बटि गैब कैर दिनी, अर वे अधिकारी उ नि देखि। अर वु अधिकारी बड़ु आनन्द मणौन्द-मणौन्द अपणा बाटा पर चलि गै।</verse>
				<verse number="40">मगर फिलिप्पुस न अफ तैं अशदोद नगर मा देखि। तब उ कैसरिया नगर कू जाण लगि गै, अर कैसरिया नगर मा पौंछण से पैलि वेन बाटा मा औण वळा सब नगरों मा शुभ समाचार सुणै।</verse>
			</chapter>
			<chapter number="9">
				<verse number="1">अर यरूशलेम नगर मा शाऊल नौ को उ ज्वान मनखि अभि तक यीशु पर बिस्वास करण वळो तैं धमकौणु ही छौ, अर ऊंतैं जान से मरणे की एक धुन वेमा ऐ गै छै।</verse>
				<verse number="2">तब उ महा पुरोहित का पास गै, अर वेन वे बटि दमिश्क नगर का प्रार्थना भवनों का मुखिया लोगु खुणि चिठ्‍ठी मांगि, कि प्रभु यीशु पर बिस्वास करण वळु जु भि मिललु ऊंतैं बन्धी बणै के यरूशलेम नगर मा लये जौ, अब चै उ जनानि हो या बैख।</verse>
				<verse number="3">अर जब शाऊल ये सफर तैं करद-करद दमिश्क नगर का नजदीक पौंछी, त अचानक आसमान बटि एक उज्याळु वेका चौतरफि चमकण लगि गै।</verse>
				<verse number="4">अर उ भ्वीं फरके गै अर वेतैं एक आवाज सुणै, “हे शाऊल, तू मितैं किलै सतौणी छैई?”</verse>
				<verse number="5">वेन पूछी, “हे प्रभु तुम कु छाँ?” अर इन आवाज ऐ, “मि यीशु छौं, जैतैं तू सतौणी छैई।</verse>
				<verse number="6">पर अब तू खड़ु उठ, अर नगर मा जा अर जु कुछ त्वेतै करण होलु वु सब त्वेतै उखि बतये जालु।”</verse>
				<verse number="7">अर जु लोग वेका दगड़ा मा यात्रा कना छा वु सब सन्ट खड़ा ह्‍वे गैनी, किलैकि ऊंतैं आवाज त सुन्यौणी छै मगर ऊंतैं कुई भि नि दिख्यौणु छौ।</verse>
				<verse number="8">तब शाऊल भ्वीं मा बटि उठी, पर जब वेन अपणा आंखा तैं खुलि त वेतैं कुछ नि दिखैणु छौ, तब वेका दगड़्या वेको हाथ पकड़ी के दमिश्क नगर कू लि गैनी।</verse>
				<verse number="9">अर तीन दिनों तक ना त वु कुछ देखि सैकी, अर ना ही कुछ खै-पे।</verse>
				<verse number="10">अर दमिश्क नगर मा हनन्याह नौ को एक बिस्वासी रौन्दु छौ। प्रभु न वेतैं एक दरसन देके बोलि, “हे हनन्याह,” अर वेन बोलि, “हाँ प्रभु।”</verse>
				<verse number="11">तब प्रभु न वेकू बोलि, “उठ, अर यहूदा नौ का मनखि का घौर जा, अर सुण, वेकू घौर वे बाटा पर च जैकू सीदु बुले जान्दु, अर उख पौंछी के पूछ कि तरसुस नगर को शाऊल कख च।</verse>
				<verse number="12">अर इन इलै कैर, किलैकि शाऊल मिसे प्रार्थना कनु च, अर वेन एक दरसन देखि कि हनन्याह नौ को एक मनखि भितर औणु च, जैन वे पर हाथ रखी ताकि उ फिर से दिखण लगि जौ।”</verse>
				<verse number="13">पर हनन्याह न प्रभु तैं इन जबाब दिनी, “प्रभु, मिन ये मनखि का बारा मा भौत कुछ सुणयूं च, कि येन यरूशलेम नगर मा तुमरा बिस्वासी लोगु का दगड़ा मा भौत बुरु बरतौ कैरी।</verse>
				<verse number="14">इख तक कि अब मुख्य पुरोहितों न भि वेतैं इन अधिकार दियाली, कि जथगा भि लोग तुम पर बिस्वास करदिन ऊंतैं बन्धी बणै के लौ।”</verse>
				<verse number="15">मगर प्रभु न वेकू बोलि, “तू जा, किलैकि मिन वेतैं अपणी सेवा करणु खुणि चुण्यालि, ताकि जु लोग यहूदी जाति का नि छिन वु ऊंका बीच मा, राजा लोगु का बीच मा, अर इस्राएली लोगु का बीच मा मेरु नौ को परचार कैरो।</verse>
				<verse number="16">अर मि वेतैं बतौलु, कि मेरा नौ का बानो वेतैं कथगा जादा दुख उठौण पोड़लु।”</verse>
				<verse number="17">तब हनन्याह उख बटि उठी अर वे घौर जनै गै। अर जब हनन्याह वे घौर मा पौंछी, त वेन अपणु हाथ शाऊल पर रखी के बोलि, “शाऊल भै, जै प्रभु यीशु न त्वेतै वे बाटा मा दरसन दे छौ वेन ही मितैं इख तेरा पास भेजि, ताकि तू फिर से दिखण लगि जै अर पवित्र आत्मा से भरपूर ह्‍वे जै।”</verse>
				<verse number="18">अर जन्‍नि वेन इन बोलि तन्‍नि वेका आंख्यों बटि छिलकों का जन कुछ चीज पोड़ि, अर उ फिर से सब कुछ दिखण लगि गै। तब शाऊल उख बटि उठी अर वेन बपतिस्मा ले।</verse>
				<verse number="19">अर खाणु-खाण का बाद वेका सरील मा जान ऐ। अर कुछ दिनों तक शाऊल दमिश्क नगर मा बिस्वासी लोगु का दगड़ा मा रै।</verse>
				<verse number="20">अर यों सब बातों का बाद शाऊल तुरन्त दमिश्क नगर का प्रार्थना भवनों मा यीशु को परचार करण लगि गै। अर वेन बोलि कि, “यीशु मसीह ही परमेस्वर को पुत्र च।”</verse>
				<verse number="21">अर शाऊल की या बात सुणी के लोग घंघतोळ मा पोड़ि गैनी अर बुलण लगि गैनी कि, “क्या यू उई मनखि नि च जु यरूशलेम नगर मा यीशु पर बिस्वास करण वळो तैं नास कनु छौ? अरे यू त इख भि ये ही मकदस से अयूं छौ, कि बिस्वासी लोगु तैं गिरफ्तार कैरिके मुख्य पुरोहितों का पास लि जौ।”</verse>
				<verse number="22">मगर यों सब बातों का बाद भि शाऊल परचार करण मा और भि जादा मजबूत होणु रै। अर दमिश्क नगर मा रौण वळा यहूदियों तैं साबित कैरी-कैरिके इन बतौणु रै, कि यीशु ही मसीह च। अर इन साबित कैरिके वेन ऊं लोगु की टुपटी बन्द कैरी दिनी।</verse>
				<verse number="23">अर जब भौत दिन ह्‍वे गैनी, तब यहूदियों न वेतैं जान से मरण की जाळसाजि कैरी,</verse>
				<verse number="24">अर यू लोग शाऊल तैं मरणु खुणि दिन-रात वेकी ताक मा नगर का गेट का आस-पास रौन्दा छा, मगर वेतैं ईं जाळसाजि का बारा मा पता चलि गै।</verse>
				<verse number="25">तब शाऊल का चेला राति ऐनी अर वेतैं अफ दगड़ा लि गैनी, अर वेतैं एक ठुफरा मा बैठे के नगर की दिवाल की खिड़की बटि मूड़ी उतारि दिनी।</verse>
				<verse number="26">अर जब शाऊल यरूशलेम नगर मा पौंछी, त वेन बिस्वासी लोगु का दगड़ा मा मिलण को पूरु जतन कैरी, मगर वु सब वेसे डऽरदा छा, किलैकि ऊंतैं वे पर यकीन नि होणु छौ, कि उ भि यीशु मसीह पर बिस्वास करण वळु बणि गै।</verse>
				<verse number="27">तब बरनबास वेतैं खास चेलों का पास लेके गै। अर वेन खास चेलों तैं समझै अर ऊंतैं बतै की शाऊल न प्रभु तैं बाटा मा कनकै देखि, अर प्रभु न वे बटि बाटा मा कनकै बात कैरी, अर वेन ऊंतैं या बात भि बतै कि येन कनकै बिन डऽरयां दमिश्क नगर मा यीशु नौ को परचार कैरी।</verse>
				<verse number="28">अर शाऊल यरूशलेम नगर मा खास चेलों का दगड़ा मा रौण लगि गै, अर जग-जगा जैके बिन डऽरयां प्रभु को परचार करण लगि गै।</verse>
				<verse number="29">अर उ यूनानी भाषा बुलण वळा यहूदियों का दगड़ा बात-चित अर बहसबाजी करदु छौ, पर ऊंन वेतैं जान से मरण की कोसिस कैरी।</verse>
				<verse number="30">मगर बिस्वासी भै-बैंणो तैं ईं बात का बारा मा पता चलि गै, तब ऊ शाऊल तैं कैसरिया नगर मा लि गैनी, अर उख बटि तरसुस नगर कू भेज दिनी।</verse>
				<verse number="31">तब पूरा यहूदिया, गलील अर सामरिया का मुलकों मा रौण वळा बिस्वासी समुदाय का सब लोग बड़ा चैन से रैनी, अर प्रभु मा और भि मजबूत होणा रैनी, अर वु प्रभु तैं पूरु आदर-सम्मान दिणा रैनी, अर पवित्र आत्मा का द्‍वारा ऊंतैं हर दिन हिम्मत मिलणी रै।</verse>
				<verse number="32">अर जब पतरस एक नगर बटि दुसरा नगर मा यात्रा कनु छौ, त उ मुलाकात करणु खुणि ऊं बिस्वासी लोगु का पास ऐ जु लुद्‍दा नगर मा रौन्दा छा।</verse>
				<verse number="33">अर इख वेकी मुलाकात ऐनियास नौ का एक मनखि से ह्‍वे, अर यू आठ सालों बटि लकवा रोग की वजै से बिस्तर मा पोड़्यूं छौ।</verse>
				<verse number="34">तब पतरस न वेकू बोलि, “हे ऐनियास उठ, अर अपणु बिस्तर उठौ, किलैकि यीशु मसीह त्वेतै खूब कनु च।” अर वु तुरन्त उठी के खड़ु ह्‍वे गै।</verse>
				<verse number="35">अर ये मनखि तैं खूब होन्द देखि के लुद्‍दा अर शारोन मुलक का रौण वळा सब लोगु न अपणु-अपणु मन प्रभु की तरफा कैरी अर वे पर बिस्वास करण लगि गैनी।</verse>
				<verse number="36">अर याफा नगर मा तबीता नौ की एक बिस्वासी जनानि रौन्दी छै (अर तबीता तैं यूनानी भाषा मा दोरकास बुल्दिन, दोरकास मतलब हिरणी)। अर वा भौत अच्छा काम करदी छै, अर जरुरतमन्द लोगु तैं दान-दकछिणा देन्दी छै।</verse>
				<verse number="37">अर जौं दिनों मा पतरस उख रौन्दु छौ, ऊं दिनों मा ही वा बिमार ह्‍वेके मोरि गै। अर ऊंन अपणी रीति का मुताबिक वींतैं नह्‍वे अर मंज्यूळ रखी दिनी।</verse>
				<verse number="38">अर याफा नगर का बिस्वासी लोगु न सुणी कि पतरस लुद्‍दा नगर मा च, त ऊंन दुई लोगु तैं वेका पास भेजि के वेसे बिन्ती कैरी कि, “तुम जल्दी से जल्दी हमरा पास ऐ जा।” अर यू लुद्‍दा नगर याफा नगर का नजदीक ही छौ।</verse>
				<verse number="39">तब पतरस उठी के ऊंका दगड़ा मा चलि गै। अर जब उ उख पौंछी, त ऊ लोग वेतैं मंज्यूळ लि गैनी। अर सब विधवा जनानियां वेतैं घेरि के रुंण लगि गैनी, अर वु पतरस तैं कुरता अर कपड़ा दिखौण लगि गैनी, जु की दोरकास न सीली छा, जब वा ज्यून्द छै अर ऊंका दगड़ा मा छै।</verse>
				<verse number="40">तब पतरस न सब लोगु तैं उख बटि भैर भेजि, अर घुंडा टेकी के प्रार्थना कैरी। अर लांश जनै देखि के बोलि, “तबीता उठ जा,” तब वींन अपणा आंखा खुलीनि अर पतरस तैं देखि के वा उठी अर बैठि गै।</verse>
				<verse number="41">अर पतरस न अपणु हाथ देके तबीता तैं खड़ु उठे, तब वेन बिस्वासी लोगु अर ऊं विधवा जनानियों तैं बुलै, अर ऊं सभ्यों न वींतैं ज्यून्द देखि।</verse>
				<verse number="42">अर या बात पूरा याफा नगर मा फैली गै, अर भौत सा लोग प्रभु यीशु पर बिस्वास करण लगि गैनी।</verse>
				<verse number="43">अर पतरस याफा नगर मा शमौन नौ का एक मनखि का इख भौत दिनों तक रै, अर यू शमौन चमड़ा को काम करदु छौ।</verse>
			</chapter>
			<chapter number="10">
				<verse number="1">कैसरिया नगर मा कुरनेलियुस नौ को एक मनखि रौन्दु छौ। अर यू इतालियानी पलटण को सुबेदार छौ।</verse>
				<verse number="2">अर यू परमेस्वर को भक्‍त छौ, अर यू अर येका घौर का सब लोग परमेस्वर पर अपणी पूरि सरदा रखदा छा। अर यू गरीब लोगु तैं भौत दान-दकछिणा देन्दु छौ, अर जादातर परमेस्वर बटि प्रार्थना कनु रौन्दु छौ।</verse>
				<verse number="3">अर एक दिन इन ह्‍वे कि दुफरे तीन बजी का करीब कुरनेलियुस न एक दरसन देखि, कि परमेस्वर को एक स्वर्गदूत वेका पास ऐ अर वेन वेकू बोलि, “हे कुरनेलियुस”</verse>
				<verse number="4">अर वेन स्वर्गदूत की तरफा ध्यान से देखि अर डौऽरी गै अर बोलि, “यू क्या च श्रीमान,” स्वर्गदूत न वेकू बोलि, “परमेस्वर न तेरी प्रार्थनाओं तैं, अर जु दान-दकछिणा तू देन्दी छैई वु सब परमेस्वर का समणि गै अर वेन वु सब अरपण का रुप मा स्वीकार कैरियाली।</verse>
				<verse number="5">अर अब इन कैर की अपणा कुछ लोगु तैं याफा नगर मा भेज अर उख बटि शमौन नौ का मनखि तैं बुलवै के लऽ। अर सुण, वे शमौन कू पतरस भि बुले जान्दु।</verse>
				<verse number="6">अर वु चमड़ा का काम करण वळा शमौन का इख मैमान बणि के रुक्युं च, अर वेको घौर समुन्दर का छाला पर च।”</verse>
				<verse number="7">अर जब वु स्वर्गदूत उख बटि चलि गै जैन वेसे बात कैरी छै, तब कुरनेलियुस न अपणा दुई नौकरों तैं अर जु लोग वेका दगड़ा मा रौन्दा छा ऊंमा बटि एक खास भक्‍त सिपै तैं बुलै,</verse>
				<verse number="8">अर ऊंतैं सब कुछ समझै-बुझै के याफा नगर भेज दिनी।</verse>
				<verse number="9">अर दुसरा दिन कुरनेलियुस का द्‍वारा भेज्यां लोग अपणी यात्रा का दौरान याफा नगर का पास पौंछी गैनी। वे बगत पतरस लगभग दिन की बारह बजी प्रार्थना करणु खुणि छत पर चलि गै।</verse>
				<verse number="10">अर वेतैं भौत तेज भूक लगि अर वेन कुछ खाण चै, मगर खाणुक बणणे की तयारी ही चलणी छै, तब उ अपणा सुद-बुद मा नि रै।</verse>
				<verse number="11">अर वेन देखि की आसमान खुलि गै, अर एक बड़ा चदरा का जन कुई चीज मूड़ी औणी च अर वेतैं चौतरफि बटि पकड़ी के धरती पर लये जाणु छौ।</verse>
				<verse number="12">अर वेमा हरेक किसम का जानबर याने की चार खुटों वळा जानबर, रिंगण वळा, अर पंछि भि छा।</verse>
				<verse number="13">फिर एक आवाज ऐ कि, “हे पतरस उठ, यों तैं मार अर खै ले।”</verse>
				<verse number="14">मगर वेन बोलि, “ना प्रभु कभि भि ना, अगर मितैं कुई भि चीज खाणु कू मिलेली त मिन वींतैं इन्‍नि नि खै देण, किलैकि आज तक मिन ऊं चीजों तैं नि खै जु कि अशुद्ध अर पवित्र नि छिन।”</verse>
				<verse number="15">फिर दुसरि दौं भि वेतैं आवाज सुणै कि, “परमेस्वर न जौं चीजों तैं शुद्ध कैरियाली, तू वेकू अशुद्ध नि बोल।”</verse>
				<verse number="16">अर तिसरी दौं भि इन्‍नि ह्‍वे, अर वेका बाद चदरा जन वा चीज आसमान मा वापस उठये गै।</verse>
				<verse number="17">अर पतरस न दरसन मा जु कुछ देखि छौ, वीं बात तैं लेके उळझण मा पोड़ि गै, कि ईं बात को मतलब क्या ह्‍वे सकदु। अर सुणा, जौं लोगु तैं कुरनेलियुस न भेजि छौ ऊ लोग शमौन चमड़ा वळा का घौर को पता लगौन्द-लगौन्द वेका द्‍वार तक पौंछी गैनी।</verse>
				<verse number="18">अर ऊंन धै लगै के पूछी, “शमौन जैकू पतरस भि बुले जान्दु क्या वु इखि छिन?”</verse>
				<verse number="19">पतरस अभि तक वे दरसन का बारा मा सुचणु ही छौ, कि तबरि पवित्र आत्मा न वेकू बोलि, “सुण, तीन लोग त्वेतै खुज्याणा छिन।</verse>
				<verse number="20">इलै उठ अर हिचकिचौ ना, अर मूड़ी जैके ऊंका दगड़ा मा चलि जा, किलैकि ऊंतैं इख मिन ही भेजि।”</verse>
				<verse number="21">तब पतरस न मूड़ी ऐके ऊं लोगु कू बोलि, “क्या बात भैजी तुम मितैं खुज्याणा छाँ, मि छौं शमौन पतरस, पर भैयों इन बता कि तुमरो इख औण को मकसद क्या च?”</verse>
				<verse number="22">तब ऊंन बोलि, “हमतै सुबेदार कुरनेलियुस न इख भेजि, अर वु एक धरमी अर परमेस्वर पर अपणी पूरि सरदा रखण वळु मनखि च, अर यहूदी लोग भि वेकी भौत तारीफ करदिन। अर परमेस्वर का एक पवित्र स्वर्गदूत न कुरनेलियुस तैं बतै कि तुमतै अपणा घौर मा बुलये जौ, ताकि तुमरा द्‍वारा वु उपदेस सुणी सैको।”</verse>
				<verse number="23">तब पतरस न ऊंतैं भितर बुलै, अर ऊंकी खातिरदारि कैरी। अर दुसरा दिन पतरस तयार ह्‍वे अर ऊंका दगड़ा मा चलि गै, अर याफा नगर का कुछ बिस्वासी भै भि वेका दगड़ा गैनी।</verse>
				<verse number="24">अर दुसरा दिन पतरस अर ऊ सब लोग याफा से कैसरिया नगर मा पौंछिनी। अर कुरनेलियुस ऊंको इंतजार कनु छौ, अर वेन अपणा रिश्तेदारों अर अपणा खास दगड़्यों तैं भि बुलै के अपणा इख इकट्‍ठा कैरी।</verse>
				<verse number="25">अर जब पतरस वे घौर मा पौंछी, त कुरनेलियुस वे बटि मिलणु कू वेका पास ऐ अर वेका खुटों मा पोड़ि के वेको आदर-सम्मान कैरी।</verse>
				<verse number="26">पर पतरस न वेतैं उठे अर बोलि, “अरे भैजी, क्या कना छाँ तुम खड़ा ह्‍वा मि भि त तुम ही जन एक मनखि छौं।”</verse>
				<verse number="27">तब पतरस वेका दगड़ा बात करद-करद घौर का भितर गै, अर उख वेन भौत सा लोगु तैं इकट्‍ठा होयुं देखि,</verse>
				<verse number="28">अर वेन ऊंकू बोलि कि, “तुम लोग त जणदा ही छाँ, कि कै भि यहूदी जाति का मनखि तैं दुसरि जाति का लोगु का दगड़ा मा कन्द्रयो भि मेल-जोल रखण या ऊंका इख जाण, हमरा नियम-कानूनों का खिलाप मा च। मगर फिर भि परमेस्वर न मितैं इन दिखै, कि मि कै भि मनखि तैं इन नि समझु, कि वु पवित्र नि च या परमेस्वर कैतैं स्वीकार नि करदु।</verse>
				<verse number="29">इलै जब मितैं इख बुलये गै, त मिन बिन कुछ बुलयां इख ऐ ग्यों। अर अब तुम मितैं इन बता कि तुमुन मितैं इख किलै बुलै?”</verse>
				<verse number="30">तब कुरनेलियुस न जबाब देई, “आज से ठिक चार दिन पैलि दुफरे तीन बजी का करीब मि घौर मा ये ही बगत पर प्रार्थना कनु छौ, कि तबरि मिन देखि कि एक आदिम चमकिला कपड़ा पैरयूं मेरा समणि खड़ु ह्‍वे गै।</verse>
				<verse number="31">अर वेन मिकू बोलि, ‘हे कुरनेलियुस, परमेस्वर न तेरी प्रार्थनाओं तैं, अर जु दान-दकछिणा तू देन्दी छैई वु सब परमेस्वर का समणि गै अर वेन वु सब अरपण का रुप मा स्वीकार कैरियाली।</verse>
				<verse number="32">अर अब इन कैर की कैतैं याफा नगर मा भेज अर उख बटि शमौन तैं बुलवै के लऽ जैकू पतरस भि बुले जान्दु। अर उ चमड़ा का काम करण वळा शमौन का इख मैमान का रुप मा रुक्युं च।’ अर वेको घौर समुन्दर का छाला पर च।</verse>
				<verse number="33">इलै मिन तुमतै बुलाणु खुणि अपणा लोगु तैं तुरन्त भेजि, अर या बात अच्छी च कि तुम इख ऐ भि ग्यां। अब जु कुछ भि वचन परमेस्वर न तुमतै दिईं, वु सब कुछ सुनणु खुणि ही हम इख इकट्‍ठा होयां छां, अर परमेस्वर भि हमरा बीच मा च।”</verse>
				<verse number="34">तब पतरस न बोलि, “अब मि सच्‍चि मा जाणि ग्यों, कि परमेस्वर कै का दगड़ा मा भि भेदभाव नि करदु,</verse>
				<verse number="35">अर हरेक वु मनखि जु की परमेस्वर पर अपणी पूरि सरदा रखदु अर भलै का काम करदु, अब वु चै कैं भि जाति को किलै नि हो परमेस्वर वे मनखि तैं स्वीकार करदु।</verse>
				<verse number="36">अर यीशु मसीह जु की सभ्यों को प्रभु च वेका द्‍वारा शान्ति को शुभ समाचार सुणौन्द दौं परमेस्वर न इस्राएली लोगु का पास जै वचन तैं भेजि वेतैं त तुम जणदा ही छाँ।</verse>
				<verse number="37">अर यूहन्‍ना बपतिस्मा देण वळा का परचार का बाद गलील मुलक बटि लेके यहूदिया का मुलक मा जु कुछ भि ह्‍वे वेका बारा मा भि तुम जणदा ही छाँ।</verse>
				<verse number="38">अर पिता परमेस्वर न नासरत गौं का यीशु तैं अपणी पवित्र आत्मा अर सामर्थ देके चुणी के ठैरै, अर उ जग-जगा जैके के भलै का काम करदु छौ, अर जु लोग शैतान का द्‍वारा सतयां छा, यीशु ऊं लोगु तैं खूब करदु छौ, अर यू सब उ इलै करदु छौ, किलैकि परमेस्वर वेका दगड़ा मा छौ। अर ईं बात का बार मा भि तुम जणदा ही छाँ।</verse>
				<verse number="39">अर जु काम यीशु न यहूदी लोगु का देस मा अर यरूशलेम नगर मा करिनी, ऊं सब कामों का गवा हम छां। अर लोगु न वेतैं क्रूस पर मरवै दिनी,</verse>
				<verse number="40">मगर परमेस्वर न वेतैं तिसरा दिन मुरदो मा बटि ज्यून्दु कैरी, अर परमेस्वर न वेतैं लोगु पर परगट कैरी। अर हमुन वेतैं देखि,</verse>
				<verse number="41">पर फिर भि वु सब लोगु तैं नि दिखै, बस ऊं लोगु तैं ही दिखै जौं तैं परमेस्वर न पैलि बटि गवा होणु खुणि चुण्यूं छौ, अर वु गवा हम ही छां। किलैकि यीशु की मौत मा बटि ज्यून्द होण का बाद हमुन वेका दगड़ा मा खाणुक-पीणुक खै।</verse>
				<verse number="42">अर वेन ही हमतै इन आज्ञा दिनी कि लोगु का बीच मा जैके परचार कैरा अर इन गवै द्‍या, कि यू उई यीशु च जैतैं परमेस्वर न मुरयां अर ज्यून्दा लोगु को न्याय करण वळु ठैरैयालि।</verse>
				<verse number="43">अर परमेस्वर का सब रैबर्या वेकी गवै देन्दिन, कि जु कुई वे पर बिस्वास करदु ऊंका पाप वेका नौ का द्‍वारा माफ किये जाला।”</verse>
				<verse number="44">अर अभि पतरस यों सब बातों का बारा मा बोन्‍नु ही छौ, कि तबरि पवित्र आत्मा को दान ऊं सभ्यों तैं मिली गै जु वेकी बातों तैं सुनणा छा।</verse>
				<verse number="45">अर खतना कियां बिस्वासी लोग जु कि पतरस का दगड़ा मा अयां छा ऊंन देखि, कि जु लोग यहूदी जाति का नि छिन ऊंतैं भि पवित्र आत्मा को दान दिल खोली के दिये गै। अर यू देखि के वु लोग हकदक ह्‍वे गैनी।</verse>
				<verse number="46">किलैकि ऊं बिस्वासी लोगु न कुरनेलियुस का घौर मा इकट्‍ठा होयां लोगु तैं बन्‍नि-बन्‍नि किसमे की भाषा बुल्द, अर परमेस्वर की बडै करद सुणी।</verse>
				<verse number="47">तब पतरस न बोलि, अब यों लोगु तैं पाणिळ बपतिस्मा लेण से कु रोकी सकदु? किलैकि जन हमतै पवित्र आत्मा दिये गै, ठिक उन्‍नि यों लोगु न भि पयेलि।</verse>
				<verse number="48">तब पतरस न ऊंतैं यीशु मसीह का नौ से बपतिस्मा लेण की आज्ञा दिनी। अर बपतिस्मा लेण का बाद कुरनेलियुस न ऊंतैं कुछ और दिनों तक उख रौण कू बोलि।</verse>
			</chapter>
			<chapter number="11">
				<verse number="1">अर या खबर यहूदिया मुलक का खास चेलों अर बिस्वासी भै-बैंणो तैं पता चलि गै, कि जु हमरि जाति का नि छिन ऊंन भि परमेस्वर का वचन तैं स्वीकार कैरियाली।</verse>
				<verse number="2">अर जब पतरस यरूशलेम नगर मा ऐ, तब खतना कियां बिस्वासी लोग वेका दगड़ा मा वाद-विवाद करण लगि गैनी।</verse>
				<verse number="3">अर ऊंन वेकू बोलि कि, “तू इन्द्रया लोगु का घौर मा गै, जौन अपणा सरील मा खतना का रिवाज तैं पूरु नि कर्युं छौ अर तिन ऊंका दगड़ा मा खाणु भि खै।”</verse>
				<verse number="4">तब पतरस न ऊंतैं एक-एक बात बिंगौण शुरु कैरी अर बोलि,</verse>
				<verse number="5">“जब मि याफा नगर मा प्रार्थना कनु छौ, त मितैं भूक लगणि छै। अर मि अपणी सुद-बुद मा नि छौ, अर मिन एक दरसन देखि की एक बड़ा चदरा का जन कुई चीज मेरा पास मूड़ी औणी च, अर वीं चीज तैं चौतरफि बटि पकड़ी के धरती पर लये जाणु च।</verse>
				<verse number="6">अर जब मिन वीं चीज तैं ध्यान से देखि, त वामा धरती का हरेक किसम का जानबर याने की चार खुटों वळा जानबर, रिंगण वळा, अर पंछि भि छा।</verse>
				<verse number="7">तब एक आवाज न मिकू बोलि, ‘हे पतरस उठ, यों तैं मार अर खै ले।’</verse>
				<verse number="8">पर मिन बोलि, ‘ना प्रभु कभि भि ना, अगर मितैं कुई भि चीज खाणु कू मिलेली त मि वींतैं इन्‍नि नि खै देण, किलैकि आज तक मिन ऊ चीज नि खैनि जु अशुद्ध अर पवित्र नि छिन।’</verse>
				<verse number="9">अर जब मिन इन जबाब दिनी त दुसरि दौं भि आसमान बटि इन आवाज सुणै कि, ‘जौं चीजों तैं परमेस्वर न शुद्ध कैरियाली, तू वेकू अशुद्ध नि बोल।’</verse>
				<verse number="10">अर तीन दौं इन्‍नि ह्‍वे, अर वेका बाद वा चीज आसमान मा वापस उठये गै।</verse>
				<verse number="11">अर सुणा, वे ही बगत जै घौर मा हम छा, उख तीन लोग पौंछी गैनी। अर ऊंतैं मेरा पास कैसरिया नगर बटि भेजि गै छौ।</verse>
				<verse number="12">अर पवित्र आत्मा न मितैं बिन हिचकिचयां ऊंका दगड़ा मा जाणु कू बोलि, अर मेरा दगड़ा मा यू छह बिस्वासी भै भि उख जाणु कू पैटि गैनी। अर तब हम कुरनेलियुस नौ का एक मनखि का घौर कू ग्यां।</verse>
				<verse number="13">अर उख कुरनेलियुस भै न हमतै बतै कि मिन एक स्वर्गदूत तैं अपणा घौर मा खड़ु होयुं देखि अर वे स्वर्गदूत न वेकू बोलि कि, ‘अपणा कुछ लोगु तैं याफा नगर मा भेज अर उख बटि शमौन जैकू पतरस भि बुले जान्दु वेतैं इख बुलवौ।</verse>
				<verse number="14">अर वु ऐके तुम लोगु तैं वचन सुणालु, अर वे वचन तैं सुणी के त्वेतै अर तेरा घौर का लोगु तैं बचयै जालु।’</verse>
				<verse number="15">“अर जब मिन ऊंतैं वचन सुनौण शुरु कैरी, तब पवित्र आत्मा को दान ऊं सभ्यों तैं भि मिली गै, अर यू सब ठिक उन्‍नि ह्‍वे जन शुरु मा हमुन पै छौ।</verse>
				<verse number="16">तब मितैं प्रभु को वु वचन याद ऐ जन कि बुले गै छौ कि, ‘यूहन्‍ना न त पाणिळ बपतिस्मा दिनी, मगर तुम पवित्र आत्मळ बपतिस्मा पैल्या।’</verse>
				<verse number="17">अर जब हमुन प्रभु यीशु मसीह पर बिस्वास कैरी, त परमेस्वर न हमतै पवित्र आत्मा दान का रुप मा दिनी, अर उई दान वेन ऊंतैं भि दिनी, त फिर परमेस्वर तैं रुकण वळु मि कु होन्दु।”</verse>
				<verse number="18">अर जब यहूदी बिस्वासी लोगु न यू सब बात सुणिनी, त वु संट ह्‍वे गैनी। अर ऊंन परमेस्वर की तारीफ कैरिके बोलि, “परमेस्वर की बडै हो, किलैकि वेन सदनि को जीवन पौणु खुणि मन से पस्ताप करण को मौका ऊंतैं भि दियाली जु यहूदी जाति का नि छिन।”</verse>
				<verse number="19">अर स्तिफनुस की मौत का बाद बटि जु सतौ बिस्वासी समुदाय का लोगु पर ऊं दिनों मा किये जाणु छौ, वां की वजै से बिस्वासी लोग तितर-बितर ह्‍वे गै छा। अर वु सब लोग साइप्रस टापू मा, फीनीके मुलक मा इख तक की अन्ताकिया नगर तक चलि गैनी, अर ऊंन केवल यहूदी लोगु तैं ही वचन सुणै।</verse>
				<verse number="20">मगर ऊंमा बटि कुछ बिस्वासी लोग साइप्रस टापू अर कुरेन नगर का छा जु कि अन्ताकिया नगर मा ऐनी, अर ऊंन यूनानियों तैं भि प्रभु यीशु को शुभ समाचार सुनौण शुरु कैरी दिनी।</verse>
				<verse number="21">अर प्रभु की ताकत ऊं लोगु का दगड़ा मा छै, अर भौत सा लोगु न बिस्वास कैरी अर प्रभु की तरफा ह्‍वे गैनी।</verse>
				<verse number="22">अर जब यरूशलेम नगर का बिस्वासी लोगु न यों लोगु की चर्चा सुणी, तब ऊंन बरनबास भै तैं अन्ताकिया नगर मा भेजि।</verse>
				<verse number="23">अर बरनबास एक अच्छु बिस्वासी, पवित्र आत्मा से भरपूर अर एक भलु मनखि छौ। अर जब उ अन्ताकिया नगर मा पौंछी, अर लोगु पर होईं परमेस्वर की किरपा तैं देखि के बड़ु आनन्दित ह्‍वे, अर वेन ऊंतैं ईं बात की शिक्षा दिनी कि वु सब लोग पूरा मन से प्रभु मा बणयां रा, अर एक बड़ी भीड़ प्रभु पर बिस्वास करण लगि गै।</verse>
				<verse number="24"></verse>
				<verse number="25">अर वेका बाद बरनबास, शाऊल तैं खुज्याणु खुणि तरसुस नगर कू गै।</verse>
				<verse number="26">अर जब उ बरनबास तैं मिली त बरनबास वेतैं अन्ताकिया नगर मा अफ दगड़ा लेके ऐ। अर ऊ पूरा एक साल तक बिस्वासी समुदाय का लोगु से मिलणा रैनी, अर लोगु तैं सिखौणा रैनी। अर अन्ताकिया नगर का बिस्वासी लोगु खुणि ही सबसे पैलि “ईसै” बुले गै।</verse>
				<verse number="27">अर ऊं दिनों मा यरूशलेम नगर बटि परमेस्वर का कुछ रैबर्या अन्ताकिया नगर मा ऐनी।</verse>
				<verse number="28">अर ऊंमा बटि एक अगबुस रैबर्या छौ, अर वेन खड़ु ह्‍वेके पवित्र आत्मा का द्‍वारा भविष्यबाणी कैरिके बोलि कि ये पूरि दुनियां मा भौत बड़ु अकाळ पोड़लु (अर ठिक उन्‍नि ह्‍वे, यू अकाळ महाराजा क्लौदियुस का बगत मा पोड़ि)।</verse>
				<verse number="29">अर ये अकाळ का बगत मा ही अन्ताकिया नगर का बिस्वासी लोगु न इन फैसला कैरी, कि हरेक मनखि यहूदिया मुलक मा रौण वळा बिस्वासी लोगु की मदद करणु खुणि जै से जथगा ह्‍वे सकलु, उ उथगा दे सकदु च।</verse>
				<verse number="30">अर ऊंन ठिक इन्‍नि कैरी अर या मदद ऊंन इकट्‍ठा कैरिके बरनबास अर शाऊल का द्‍वारा बिस्वासी समुदाय का अध्यक्षों का पास भेजि।</verse>
			</chapter>
			<chapter number="12">
				<verse number="1">अर ऊं दिनों मा राजा हेरोदेस अग्रिप्पा न बिस्वासी समुदाय का कुछ लोगु तैं सतौण खुणि ऊंतैं जेलखाना मा डलण शुरु कैरी दिनी।</verse>
				<verse number="2">अर वेन यूहन्‍ना का भै याकूब तैं तलवार से मरवै दिनी।</verse>
				<verse number="3">अर जब वेतैं पता चलि, कि ईं बात से यहूदी लोग भौत खुश होणा छिन, त वेन पतरस तैं भि पकड़वै दिनी। अर यू सब अखमीरी रुट्‍टी का त्योवार का दिनों मा ह्‍वे।</verse>
				<verse number="4">अर राजा हेरोदेस अग्रिप्पा न पतरस तैं पकड़वै के जेलखाना मा बन्द करवै दिनी। अर वेकी निगराणी करणु खुणि सोला पैरादारों तैं ठैरै, जु कि चार दलो मा बंटयां छा। अर वेकी इन इच्छा छै कि उ पतरस तैं त्योवार का दिनों का बाद लोगु का समणि पेस कैरो, इलै वेन पतरस तैं जेलखाना मा ही बन्द रखी।</verse>
				<verse number="5">मगर बिस्वासी समुदाय का लोग पतरस खुणि परमेस्वर बटि मन लगै प्रार्थना कना छा।</verse>
				<verse number="6">अर जब राजा हेरोदेस अग्रिप्पा पतरस तैं आम लोगु का समणि लाण वळु छौ वीं ही रात पतरस दुई सिपै का बीच मा सिणु छौ अर वेतैं दुई संगुळोन बन्धयूं छौ। अर पैरेदार जेलखाना का द्‍वार पर पैरा दिणा छा।</verse>
				<verse number="7">तबरि वीं कुठड़ी मा एक स्वर्गदूत उख खड़ु ह्‍वे, अर एक बड़ु उज्याळु चमकी। अर ये स्वर्गदूत न पतरस पर हाथ लगै के वेतैं निन्द बटि बिंजाळी। तब स्वर्गदूत न वेकू बोलि, “पतरस उठ, चल जल्दी कैर।” अर संगुळा वेका हाथों बटि अफि खुलि के भ्वीं पोड़ि गैनी।</verse>
				<verse number="8">अर वेन वेकू इन भि बोलि, “सुण, अपणी कमर बान्ध अर अपणा जुता पैर।” अर पतरस न उन्‍नि कैरी, फिर स्वर्गदूत न वेकू इन भि बोलि, “अपणा कपड़ा पैरि के मेरा पिछनै अऽ।”</verse>
				<verse number="9">अर पतरस वेका पिछनै-पिछनै जेलखाना बटि भैर ऐ गै, मगर वेतैं इन पता नि चलि कि वेका दगड़ा जु कुछ भि स्वर्गदूत का द्‍वारा किये जाणु च वु सब कुछ सच्‍च च, बल्किन मा पतरस इन समझणु छौ कि उ अभि भि दरसन ही दिखणु च।</verse>
				<verse number="10">अर ऊंन पैला पैरादारों तैं, अर दुसरा पैरादारों तैं पार कैरी अर एक लुवा गेट का पास पौंछिनी, जु नगर की तरफा लि जान्दु छौ अर उ गेट ऊं खुणि अफि खुलि गै। अर तब ऊ दुईया का दुई उख बटि चलि गैनी, अर जब ऊ एक सड़क बटि ह्‍वेके गैनी कि तुरन्त स्वर्गदूत वेतैं छोड़ि के चलि गै।</verse>
				<verse number="11">अर जब पतरस तैं सुद ऐ त वेन बोलि, “अब मितैं सच्‍चि मा पता चलि गै, कि प्रभु न अपणा स्वर्गदूत तैं भेजि के मितैं हेरोदेस अग्रिप्पा बटि बचै अर ऊं सब बातों से भि जौं बातों की इच्छा यहूदी लोग कना छा।”</verse>
				<verse number="12">अर सब कुछ बिंगण का बाद उ मरियम का घौर चलि गै। अर या मरियम यूहन्‍ना की माँ छै। अर यू यूहन्‍ना वु च जैकू मरकुस भि बुले जान्दु। अर वींका घौर मा भौत सरा लोग जमा ह्‍वेके प्रार्थना कना छा।</verse>
				<verse number="13">अर जब वेन द्‍वार तैं खखटै, त द्‍वार पर दिखणु खुणि रुदे नौ की एक नौकराणि ऐ।</verse>
				<verse number="14">मगर जब वींन पतरस की आवाज सुणी, त पछ्याण गै कि यू त पतरस च अर इथगा जादा खुश ह्‍वे गै, कि वींन द्‍वार भि नि खोली अर भागी के वापिस गै, अर बोलि, “सुणा, पतरस भै द्‍वार पर खड़ु होयुं च।”</verse>
				<verse number="15">अर ऊंन वींकू बोलि, “तू बौल्या छैई क्या?” पर फिर भि वा अपणी बात पर अड़ी रै, सच्‍चि मा उ पतरस ही च। तब ऊंन बोलि, “अरे वु वेकी हिफाजत करण वळु स्वर्गदूत होलु।”</verse>
				<verse number="16">अर पतरस द्‍वार तैं तभि भि खखटाणु रै। अर जब ऊंन द्‍वार खोली, त वेतैं देखि के हकदक रै गैनी।</verse>
				<verse number="17">तब पतरस न ऊंतैं चुप रौण खुणि हाथळ इसारा कैरी, अर वेन सभ्यों तैं बतै कि प्रभु न वेतैं कनकै जेलखाना बटि भैर निकाळि। अर वेन ऊंकू बोलि, “यू सब बात याकूब अर दुसरा बिस्वासी भै-बैंणो तैं भि बतै दियां।” तब उ उख बटि निकळि के दुसरि जगा कू चलि गै।</verse>
				<verse number="18">अर जब सुबेर ह्‍वे त सिपयों मा खळबळी मची गै कि आखिर मा पतरस कख गै होलु?</verse>
				<verse number="19">अर राजा हेरोदेस अग्रिप्पा न अपणा सिपयों का द्‍वारा वेकी खोज करवै, पर पतरस को कुछ भि अता-पता नि चलि, तब हेरोदेस न ऊं पैरादारों की पूछताछ कैरिके ऊंतैं मरवौण को हुकम दिनी। अर कुछ बगत का बाद हेरोदेस यहूदिया मुलक बटि निकळि के कैसरिया नगर मा रौण लगि गै।</verse>
				<verse number="20">अर राजा हेरोदेस अग्रिप्पा सूर अर सैदा नगर का लोगु पर भौत गुस्सा करदु छौ। तब दुई जगा का कुछ लोग एक मन ह्‍वेके राजा से मिलणु कू ऐनी, मगर पैलि ऊ राजा का करमचारी बलास्तुस तैं मनौण लगि गैनी अर वेसे बिन्ती कैरी, कि हमरु राजा का दगड़ा मा समझौता करवै द्‍या। अर इन ऊंन इलै कैरी, किलैकि राजा हेरोदेस का मुलक बटि ऊंका मुलक खुणि रासन-पाणि औन्दु छौ।</verse>
				<verse number="21">अर एक चुण्यां दिन पर राजा हेरोदेस अग्रिप्पा न अपणा राजा वळा कपड़ा पैरिनी, अर राजगद्‍दी पर बैठि अर लोगु तैं भासण देण लगि गै।</verse>
				<verse number="22">अर भीड़ का लोगु न चिल्‍लै-चिल्‍लै के बोलि, “या मनखि की ना, बल्किन मा एक द्‍यबता की आवाज च।”</verse>
				<verse number="23">अर देखा, प्रभु को एक स्वर्गदूत तुरन्त ऐ, अर वे पर एक बिमारि डाल दिनी, अर वेका सरील पर कीड़ा पोड़ि गैनी ज्यां की वजै से वेकी मौत ह्‍वे गै। अर यू सब त इलै ह्‍वे किलैकि राजा हेरोदेस अग्रिप्पा न परमेस्वर तैं तारीफ देण की वजै लोगु बटि खुद की तारीफ करवै।</verse>
				<verse number="24">अर परमेस्वर का वचन को भि जादा परचार किये गै, अर लोगु का बीच मा फैलदी गै।</verse>
				<verse number="25">अर जब बरनबास अर शाऊल न इकट्‍ठा कियां दान तैं यरूशलेम का बिस्वासी समुदाय का अध्यक्षों मा देण को काम पूरु कैरी दिनी, त जाण दौं वु यूहन्‍ना तैं जैकू मरकुस भि बुल्दिन वेतैं अफ दगड़ा मा लि गै।</verse>
			</chapter>
			<chapter number="13">
				<verse number="1">अन्ताकिया नगर का बिस्वासी समुदाय मा कुछ रैबर्या अर उपदेस देण वळा लोग छा, जन कि बरनबास, शमौन जैकू नीगर भि बुल्दिन, अर कुरेन नगर को लूकियुस, अर मनाहेम जैको पालन-पोसण राजा हेरोदेस अग्रिप्पा का दगड़ा मा ह्‍वे। अर मनाहेम वेको खास दगड़्या छौ, अर शाऊल भि ऊंका दगड़ा मा उखि छौ।</verse>
				<verse number="2">अर एक दिन इन ह्‍वे कि यू लोग उपवास रखी के परमेस्वर की भक्‍ति कना छा। तब पवित्र आत्मा न ऊंकू बोलि, “जै काम तैं करणु खुणि मिन बरनबास अर शाऊल तैं चुण्यूं च, वे काम तैं पूरु करणु खुणि तुम लोग ऊंतैं मि खुणि अलग कैरा।”</verse>
				<verse number="3">अर जब ऊंकी उपवास प्रार्थना खतम ह्‍वे गै, त ऊंन बरनबास अर शाऊल पर हाथ रखी के आसीस देके बिदा कैरी।</verse>
				<verse number="4">तब बरनबास अर शाऊल पवित्र आत्मा का द्‍वारा सिलूकिया नगर कू भेजि गैनी अर इख पौंछण का बाद ऊ एक पाणि का जाज मा बैठि के साइप्रस टापू कू चलि गैनी।</verse>
				<verse number="5">अर ये टापू पर औण का बाद ऊ सलमीस नगर मा पौंछिनी, अर इख ऐके ऊंन यहूदियों का प्रार्थना भवनों मा परमेस्वर का वचन तैं सुणै। अर ऊंकी मदद करणु खुणि यूहन्‍ना जैकू मरकुस भि बुल्दिन ऊंका दगड़ा मा छौ।</verse>
				<verse number="6">अर पूरा टापू की यात्रा का दौरान ऊ जब पाफुस नगर मा पौंछिनी, त ऊंकी मुलाकात बार-यीशु नौ का एक यहूदी मनखि से ह्‍वे जु कि झूठ्‍ठु रैबर्या अर जादु-टोंणा करण वळु छौ।</verse>
				<verse number="7">अर बार-यीशु की जाण-पछ्याण ये नगर का गवर्नर सिरगियुस पौलुस का दगड़ा मा भौत अच्छे से छै। अर यू गवर्नर एक समझदार मनखि छौ, अर ये गवर्नर न बरनबास अर शाऊल तैं बुलै, किलैकि उ परमेस्वर का वचन तैं सुनण चान्दु छौ।</verse>
				<verse number="8">पर इलीमास ऊंको विरोध करण लगि गै, ताकि गवर्नर बरनबास अर शाऊल की बातों पर बिस्वास नि कैरो (बार-यीशु को दुसरो नौ इलीमास च)।</verse>
				<verse number="9">तब शाऊल जैकू पौलुस भि बुल्दिन, वे पर पवित्र आत्मा की सामर्थ ऐ गै अर वेन इलीमास का जनै टक लगै के देखि अर बोलि कि,</verse>
				<verse number="10">“हे शैतान की औलाद, अर सब अच्छे का दुसमन तू त झूठ्‍ठों अर धोखा देण वळु छैई, क्या तू प्रभु का सही बाटा बटि लोगु तैं गळत बाटा पर लि जाण कभि नि छोड़ि सकदी?</verse>
				<verse number="11">सुण, अब प्रभु को हाथ तेरा खिलाप मा च, अर कुछ बगत तक तिन अन्धु रौण अर उज्याळु नि देख सकण।” अर सुणा, तुरन्त इलीमास पर कुयेडा जन अन्धेरु छये गै अर अन्धु ह्‍वे गै, अर उ इनै-उनै जपग लगौण लगि गै, ताकि कुई मनखि वेको हाथ पकड़ी के लि जौ।</verse>
				<verse number="12">अर जु कुछ भि उख ह्‍वे, वेतैं देखि के गवर्नर सिरगियुस न प्रभु यीशु पर बिस्वास कैरी, किलैकि उ प्रभु यीशु की शिक्षा तैं सुणी के हैरान ह्‍वे गै छौ।</verse>
				<verse number="13">यू सब होण का बाद पौलुस अर वेका दगड़्या पाफुस नगर बटि पाणि का जाज मा बैठि के पंफूलिया मुलक का पिरगा नगर मा पौंछिनी। मगर यूहन्‍ना ऊंतैं उखि छोड़ि के यरूशलेम नगर कू ऐ गै।</verse>
				<verse number="14">तब वु पिरगा नगर बटि निकळि के पिसिदिया मुलक का अन्ताकिया नगर मा पौंछिनी, अर सब्त का दिन पर प्रार्थना भवन मा बैठ गैनी।</verse>
				<verse number="15">अर प्रार्थना भवन मा मूसा का दियां नियम-कानून अर रैबर्या की किताबों तैं पढै जाण का बाद उखा मुखियों न ऊंका पास पूछणु कू कैतैं भेजि, “भैयों, अगर तुमरा पास लोगु को हौसला बढौणु खुणि कुई इन्द्रयो उपदेस च, त तुम लोग दे सकद्‍यां।”</verse>
				<verse number="16">तब पौलुस उठी अर लोगु कू बोलि, “मेरा इस्राएली भै-बैंणो, अर परमेस्वर पर अपणी पूरि सरदा रखण वळा लोगु, मेरी बातों तैं ध्यान से सुणा,</verse>
				<verse number="17">हम इस्राएली लोगु का परमेस्वर न हमरा पितरों तैं चुणी, अर जब वु लोग मिस्र देस मा परदेसी ह्‍वेके रौणा छा, त वे बगत पर परमेस्वर न हमरा पितरों तैं भौत बढै, अर परमेस्वर न ही अपणी बड़ी सामर्थ का द्‍वारा वे बगत मा हमरा पितरों तैं मिस्र देस बटि निकाळि।</verse>
				<verse number="18">अर जब हमरा पितर निर्जन जगा मा छा, त लगभग चालीस साल का वे बगत तक परमेस्वर ऊंकी सौणु रै।</verse>
				<verse number="19">अर कनान देस मा सात जातियों को नास करण का बाद, ऊंतैं वे देस को वारिस बणै के लगभग सढ़े चार सौ साल तक ऊंमा सौंप दिनी।</verse>
				<verse number="20">अर येका बाद परमेस्वर न ऊंको न्याय करणु खुणि कुछ न्यायी लोग ठैरैनी, अर वु लोग परमेस्वर का रैबर्या शमूएल का जमना तक लोगु को न्याय कना रैनी।</verse>
				<verse number="21">“तब इस्राएली लोगु न परमेस्वर बटि अफु खुणि एक राजा की मांग कैरी, तब परमेस्वर न कीश का नौना शाऊल तैं चुणी के ऊंतैं दिनी, जु की बिन्यामीन का गोत्र बटि छौ। अर उ चालीस साल तक ऊंको राजा रै।</verse>
				<verse number="22">फिर परमेस्वर न शाऊल तैं वेका पद बटि हटै के दाऊद तैं राजा बणै दिनी। अर दाऊद का बारा मा परमेस्वर न इन बोलि कि, ‘मितैं मेरा मन का मुताबिक एक मनखि मिली गै, जु कि मेरी मनसा तैं पूरि करलु अर उ यिशै को नौनु दाऊद च।’</verse>
				<verse number="23">अर जु करार परमेस्वर न कैरी छौ वेन वेतैं पूरु करणु खुणि राजा दाऊद का वश मा बटि इस्राएली लोगु खुणि छुटकारा देण वळा यीशु तैं भेजि।</verse>
				<verse number="24">अर यीशु का औण से पैलि यूहन्‍ना न इस्राएली लोगु तैं पापों बटि पस्ताप कैरिके बपतिस्मा का बारा मा परचार कैरी।</verse>
				<verse number="25">अर जब यूहन्‍ना का काम को बगत पूरु होण वळु छौ त वेन लोगु तैं पूछी, ‘बता तुमतै क्या लगदु, कि मि कु छौं? मि वु मसीह नि छौं। मगर सुणा, मेरा बाद एक औण वळु च, अर मि इथगा लैख भि नि छौं, कि वेका जुतों का तसमा भि खोली सैकु।’</verse>
				<verse number="26">“हे मेरा भै-बैंणो, तुम जु अब्राहम का वंश मदि छाँ अर तुम लोग भि जु की यहूदी जाति का नि छाँ तुम सब परमेस्वर पर अपणी पूरि सरदा रखद्‍यां, हाँ, हम सब लोगु खुणि ही छुटकारु को यू वचन भेज्यूं च।</verse>
				<verse number="27">किलैकि नऽ त यरूशलेम नगर का लोग अर ना ही अधिकारी लोग यू पछ्याण सकिनी, कि यीशु ही छुटकारु देण वळु च। अर रैबर्यों का वु वचन जु की हरेक सब्त का दिन पर पढै जान्दा छा ऊंतैं भि वु समझि नि सकिनी, फिर भि यीशु तैं दोषी ठैरै के ऊंन सब भविष्यबाणियों तैं पूरु कैर दिनी।</verse>
				<verse number="28">हालांकि ऊंन यीशु मा जान से मरण को कुई दोष नि पै, मगर फिर भि ऊं लोगु न गवर्नर पिलातुस बटि बिन्ती कैरी कि वेतैं मौत की सजा दिये जौ।</verse>
				<verse number="29">“अर जब यीशु का बारा मा लिखीं सब बात पूरि ह्‍वे गैनी, त ऊं लोगु न ही वेतैं क्रूस बटि उतारि के एक कबर मा रखी दिनी।</verse>
				<verse number="30">मगर परमेस्वर न वेतैं मुरदो मा बटि ज्यून्द कैर दिनी।</verse>
				<verse number="31">अर भौत दिनों तक प्रभु यीशु अपणा खास चेलों तैं दिखै जु वेका दगड़ा मा गलील मुलक बटि यरूशलेम नगर मा अयां छा, अर अब यू ही वु लोग छिन जु कि और लोगु का समणि वेका गवा छिन।</verse>
				<verse number="32">“अर परमेस्वर न हमरा पितरों का दगड़ा मा जु करार कैरी छौ, वेका बारा मा हम तुमतै शुभ समाचार सुणौन्द्‍यां।</verse>
				<verse number="33">अर परमेस्वर न यीशु मसीह तैं मुरदो मा बटि ज्यून्दु कैरिके वे करार तैं हम खुणि पूरु कैरी, हम जु की वेकी औलाद छां। अर जन कि राजा दाऊद न अपणा भजन संहिता का दुसरा हिस्सा मा बोलि कि, “‘तू मेरु पुत्र छैई, अर आज से मि तेरु पिता छौं।’</verse>
				<verse number="34">“अर परमेस्वर न यीशु मसीह तैं मुरदो मा बटि ज्यून्द कैरी, ताकि उ वेका सरील तैं कबर मा नि सड़ण द्‍यो, अर येका बारा मा इन भि बोलि कि, “‘मि त्वेतै एक पवित्र आसीस द्‍यूलु, जु करार मिन दाऊद का दगड़ा मा कैरी छौ।’</verse>
				<verse number="35">“इलै भजन संहिता का एक और हिस्सा मा वु इन भि बुल्दु कि, “‘तू अपणा पवित्र मनखि तैं कबरुन्द सड़ण नि दिली।’</verse>
				<verse number="36">“अर राजा दाऊद न अपणा बगत का दौरान परमेस्वर की मनसा तैं लोगु का बीच मा पूरु कैरी। अर वेका बाद उ मोरि गै, अर वेतैं वेका पितरों का दगड़ा मा दफनै गै अर कुछ दिनों मा वेको सरील सैड़ भि गै।</verse>
				<verse number="37">पर परमेस्वर न जैतैं मुरदो मा बटि ज्यून्दु कैरी, वेका सरील तैं सड़ण भि नि देई।</verse>
				<verse number="38">“इलै, हे मेरा भै-बैंणो, हम इन परचार करद्‍यां कि, परमेस्वर का रैबर्या मूसा का दियां नियम-कानूनों का द्‍वारा तुम निरदोष नि ठैरि सकद्‍यां, मगर यीशु मसीह पर बिस्वास करण से ही तुम निरदोष ठैरि सकद्‍यां। अर जु कुई भि यीशु मसीह पर बिस्वास करदु, वे मनखि तैं हरेक पाप बटि माफी मिलदी अर ईं बात का बारा मा तुम जाणि ल्या।</verse>
				<verse number="39"></verse>
				<verse number="40">“अर पौलुस न ऊंकू इन भि बोलि, ‘हे मेरा भै-बैंणो मेरी बात तैं ध्यान से सुणा, रैबर्यों की किताबों मा लिख्यूं च कि, “‘हे मजाक उड़ौण वळा लोगु सुणा, तुम ताजुब कैरा अर तुमरो नास ह्‍वे जौ, किलैकि मिन तुमरा दिनों मा कुछ इन करण की तुमतै बिस्वास नि होलु, हाँ, एक इन काम जैका बारा मा अगर कुई मनखि तुमतै बतै भि द्‍यालु, त तभि भि तुमतै यकीन नि होलु।’ “इलै चौकस रा, कखि इन नि हो कि जु कुछ भि रैबर्यों को बुलयूं च वु सब कुछ कखि तुमरा मुण्ड़ पर नि पोड़ि जौ।”</verse>
				<verse number="41"></verse>
				<verse number="42">अर जब पौलुस अर बरनबास वे प्रार्थना भवन बटि जाण लगि गैनी, तब लोगु न ऊं बटि बिन्ती कैरी कि दुसरा सब्त का दिन भि तुम लोग ईं बात का बारा मा हमतै बतयां।</verse>
				<verse number="43">अर जब वा सभा समाप्‍त ह्‍वे गै, त भौत सा यहूदी, अर जु लोग यहूदी रीति-रिवाज तैं मनण लगि गै छा वु लोग पौलुस अर बरनबास का पिछनै ह्‍वे गैनी। तब ऊं दुईयों न ऊं लोगु का दगड़ा मा बात-चित कैरिके समझै कि परमेस्वर की किरपा मा बणयां रा।</verse>
				<verse number="44">अर दुसरा सब्त का दिन पर इन ह्‍वे, कि तकरीबन पूरु नगर परमेस्वर का वचन तैं सुनणु खुणि उख ऐ गै।</verse>
				<verse number="45">मगर जब यहूदी जाति का लोगु न इथगा भीड़ देखि, त ऊंतैं देखि के यू लोग जलत्यौण लगि गैनी। अर पौलुस जु की परमेस्वर की बातों तैं बतौणु छौ वेका मा खिलाप अनाप-सनाप बुलण लगि गैनी।</verse>
				<verse number="46">तब पौलुस अर बरनबास न बड़ी हिम्मत से ऊंतैं जबाब देई, “या बात भौत जरुरी छै कि परमेस्वर को वचन सबसे पैलि तुमतै ही सुणये जान्दु। मगर जब तुम ही वेतैं नकरणा छाँ अर अफ तैं सदनि का जीवन का लैख नि समझद्‍यां, त सुणा, अब से हम दुसरि जाति का बीच मा परचार करणु कू जाणा छां।</verse>
				<verse number="47">किलैकि प्रभु न हमतै इन आज्ञा दिनी जन कि लिख्यूं भि च, “मिन त्वेतै दुसरि जातियों खुणि उज्याळु ठैर्युं च, ताकि तू पूरि धरती का लोगु खुणि बचयै जाण को द्‍वार बणि जा।”</verse>
				<verse number="48">अर या बात सुणी के दुसरि जाति का लोग भौत खुश ह्‍वे गैनी, अर प्रभु का वचन की बडै करण लगि गैनी। अर ऊं मदि जथगा लोगु तैं सदनि का जीवन जीणु खुणि चुणै गै छौ, ऊं सभ्यों न प्रभु यीशु पर बिस्वास कैरी।</verse>
				<verse number="49">तब प्रभु को वचन वे पूरा मुलक मा फैली गै।</verse>
				<verse number="50">मगर यहूदी लोग न कुछ आदर-सम्मानित भक्‍त जनानियों तैं, अर नगर का मुख्य लोगु तैं भड़कै दिनी, ताकि यू पौलुस अर बरनबास का खिलाप मा ह्‍वे जा। तब यों लोगु न ऊं पर जुलम करण शुरु कैरी दिनी, अर पौलुस अर बरनबास तैं अपणा मुलक बटि भैर निकाळि दिनी।</verse>
				<verse number="51">तब ऊं दुईया का दुईयों न अपणा खुटों पर लगि धूळ तैं झाड़ि अर इकुनियुम नगर कू चलि गैनी।</verse>
				<verse number="52">मगर बिस्वासी लोग पवित्र आत्मा मा भरपूर होण रैनी, अर भौत आनन्द मनौणा रैनी।</verse>
			</chapter>
			<chapter number="14">
				<verse number="1">अर जब पौलुस अर बरनबास इकुनियुम नगर मा पौंछिनी, त यू दुईया का दुई यहूदी लोगु का प्रार्थना भवन मा गैनी, अर इन्द्रयो उपदेस दिनी कि भौत सरा यहूदी अर यूनानी लोगु न प्रभु पर बिस्वास कैरी।</verse>
				<verse number="2">मगर जौं यहूदी लोगु न बिस्वास नि कैरी छौ, ऊंन दुसरि जाति का लोगु तैं भड़कै, अर यों का मनों मा बिस्वासी भै-बैंणो का खिलाप मा बुरै भोरी दिनी।</verse>
				<verse number="3">तब पौलुस अर बरनबास एक लम्बा बगत तक उखि रैनी, अर प्रभु का बारा मा बड़ी हिम्मतळ परचार कना रैनी। अर प्रभु न ऊंका द्‍वारा अदभुत चिन्‍न अर चमत्कार का काम कैरिके इन साबित कैरी दिनी, कि वेकी किरपा का बारा मा जै वचन को परचार वु लोग कन छिन उ सच्‍च च।</verse>
				<verse number="4">तब नगर का लोगु मा फूट पोड़ि गै, अर कुछ लोग प्रभु का चेलों का जनै, अर कुछ लोग यहूदी लोगु का जनै ह्‍वे गैनी।</verse>
				<verse number="5">अर एक दिन इन ह्‍वे, कि यहूदी लोग अर जु यहूदी जाति का नि छा ऊं सब लोगु न अपणा अधिकारी लोगु का दगड़ा मा मिली के पौलुस अर बरनबास को अपमान करण की, अर ऊंतैं ढुंग्योण की जाळसाजि बणै,</verse>
				<verse number="6">मगर ऊंतैं ईं बात का बारा मा पता चलि गै, तब ऊ लुकाउनिया मुलक का लुस्‍त्रा अर दिरबे नगरों मा अर आस-पास का गौं मा चलि गैनी।</verse>
				<verse number="7">अर ऊंन उख भि शुभ समाचार को परचार कैरी।</verse>
				<verse number="8">लुस्‍त्रा नगर मा एक मनखि छौ, जु की जनम से लंगड़ु छौ, अर वेका दुई खुटों मा कुई जान नि छै, अर वु कभि अपणा खुटों पर खड़ु भि नि ह्‍वे छौ।</verse>
				<verse number="9">अर ये मनखि न पौलुस का उपदेस की बातों तैं सुणी। अर पौलुस न वे मनखि जनै टक लगै के देखि, अर वेतैं पता चलि गै, कि ये मनखि तैं बिस्वास च, कि मि ठिक ह्‍वे सकदु छौं।</verse>
				<verse number="10">तब वेन वेकू ऊँची आवाज मा बोलि, “अपणा खुटों पर सीदु खड़ु ह्‍वे जा।” तब उ चड़म खड़ु ह्‍वे अर चलण-फिरण लगि गै।</verse>
				<verse number="11">अर जब लुकाउनिया मुलक का लोगु न पौलुस का द्‍वारा ये काम तैं होन्द देखि, त अपणी भाषा मा ऊँची आवाज मा बोलि, “आज भगवान हमरा बीच मा मनखियों का रुप मा उतरि के ऐ गैनी।”</verse>
				<verse number="12">अर ऊंन बरनबास कू ज्यूस द्‍यबता अर पौलुस खुणि हिरमेस द्‍यबता बोलि किलैकि पौलुस बुलण मा मुखिया छौ।</verse>
				<verse number="13">अर ज्यूस द्‍यबता को मन्दिर नगर का नजदीक छौ। तब ज्यूस मन्दिर को पुज्यरी बल्द अर माला लेके नगर का मुख्य गेट पर ऐ, किलैकि उ भीड़ का लोगु का दगड़ा मा मिली के ऊं खुणि बलि चड़ौण चाणु छौ।</verse>
				<verse number="14">मगर जब खास चेला पौलुस अर बरनबास तैं ईं बात का बारा मा पता चलि, त ऊंतैं बड़ु दुख ह्‍वे इन दिखाणु खुणि ऊंन अपणा कपड़ा फड़िनी, अर भीड़ की तरफा तेजी से भगिनी अर चिल्‍लै-चिल्‍लै के बोलि,</verse>
				<verse number="15">अरे भैयों, रुका-रुका, तुम यू क्या कना छाँ? हम भि त तुमरि तरौं मनखि छां। अर तुमतै यू शुभ समाचार सुनौणा छां ताकि तुम यों सब बेकार की चीजों से दूर रै सैका, अर ज्यून्दा परमेस्वर की तरफा ह्‍वे जा, जैन यू आसमान या धरती अर समुन्दर अर जु कुछ भि यों मा च उ सब कुछ बणै।</verse>
				<verse number="16">अर पुरणा जमना मा परमेस्वर न सब जाति का लोगु तैं ऊंकी मन की इच्छा का मुताबिक चलण दिनी।</verse>
				<verse number="17">अर वेन अपणा भला कामों तैं दिखै के अपणु होण को सबूत दिनी। अर वु ही परमेस्वर बगत-बगत पर बरखा अर रितुओं तैं बदलि के हम मनखियों खुणि अच्छी फसल पैदा करदु, अर अच्छा खाणुक को इंतजाम कैरिके तुमरा मन तैं खुशी से भरी देन्दु।</verse>
				<verse number="18">अर यू सब बुलण का बाद भि ऊंन यू काम करण ही चै, मगर पौलुस अर बरनबास न ऊं लोगु तैं बड़ी मुस्किलन रोकी, कि भीड़ का लोग ऊं खुणि बलिदान नि चड़ा।</verse>
				<verse number="19">मगर कुछ यहूदी जाति का लोग अन्ताकिया अर इकुनियुम नगरों बटि ऐनी, अर ऊंन कुछ लोगु तैं अपणी तरफा कैरी दिनी। तब ऊंन पौलुस तैं जान से मरण खुणि वेतैं ढुंगे, अर वेतैं मुरयूं समझि के खिखोड़ी के लि गैनी अर नगर से भैर ढोळि दिनी।</verse>
				<verse number="20">तब बिस्वासी लोग ऐनी अर पौलुस का चौतरफि खड़ा ह्‍वे गैनी, अर पौलुस उठी अर ऊंका दगड़ा वे ही नगर मा वापिस चलि गै। अर वेका दुसरा दिन उ बरनबास भै का दगड़ा मा दिरबे नगर कू चलि गैनी।</verse>
				<verse number="21">अर दिरबे नगर मा पौंछण का बाद पौलुस अर बरनबास न शुभ समाचार सुणै, अर भौत सा लोगु तैं बिस्वासी बणै दिनी। अर येका बाद ऊ लुस्‍त्रा, इकुनियुम अर पिसिदिया मुलकों का अन्ताकिया नगर मा वापस ऐ गैनी।</verse>
				<verse number="22">अर बिस्वासी लोगु तैं ऊंका बिस्वास मा मजबूत कैरी, अर बिस्वास मा बणयूं रौणु खुणि ऊंकी हिम्मत भि बढै अर ऊंन ऊंकू बोलि, “हमतै बड़ु दुख झेली के परमेस्वर का राज मा जाणु पोड़लु।”</verse>
				<verse number="23">अर ऊंन हरेक बिस्वासी समुदाय मा जैके ऊं लोगु खुणि अध्यक्ष चुणी के ठैरैनी, अर उपवास अर प्रार्थना कैरिके ऊं अध्यक्ष तैं प्रभु का हाथों मा सौंपी दिनी, जै पर ऊंन बिस्वास कैरी छौ।</verse>
				<verse number="24">अर वेका बाद पौलुस अर बरनबास पिसिदिया मुलक बटि ह्‍वेके पंफूलिया मुलक मा पौंछिनी,</verse>
				<verse number="25">अर येका बाद पिरगा नगर मा ऊंन प्रभु को वचन सुणै अर उख बटि अत्तलिया नगर कू ऐ गैनी।</verse>
				<verse number="26">अर उख बटि ऊ पाणि का जाज मा बैठि के सीरिया मुलक का अन्ताकिया नगर मा ऐ गैनी। अर ये ही नगर का बिस्वासी भै-बैंणो न पौलुस अर बरनबास तैं चुणी के भेजि छौ, अर जै काम तैं वु पूरु कैरिके वापस औणा छा, वे काम खुणि ही ये नगर का लोगु न परमेस्वर की किरपा अर मदद मिलणु खुणि वेसे प्रार्थना कैरी छै।</verse>
				<verse number="27">अर अन्ताकिया नगर मा औण का बाद ऊंन बिस्वासी समुदाय का लोगु तैं इकट्‍ठा कैरी अर ऊंतैं हरेक बात का बारा मा बतै, कि परमेस्वर न ऊंका द्‍वारा महान-महान काम करवैनी, अर ऊंतैं इन भि बतै कि बिस्वास करणु खुणि परमेस्वर न ऊं खुणि बाटु खोलियालि।</verse>
				<verse number="28">पौलुस अर बरनबास अन्ताकिया का बिस्वासी लोगु का दगड़ा मा भौत दिनों तक रैनी।</verse>
			</chapter>
			<chapter number="15">
				<verse number="1">अर फिर यहूदिया मुलक बटि कुछ लोग अन्ताकिया नगर मा ऐनी, अर बिस्वासी भै-बैंणो तैं सिखौण लगि गैनी अर ऊंन बोलि, “सुणा, अगर तुम परमेस्वर का सेवक मूसा का दियां नियम-कानूनों का मुताबिक अगर खतना का रिवाज तैं पूरु नि करवैल्या, त तुम लोगु तैं बचयै नि जाण।”</verse>
				<verse number="2">तब पौलुस अर बरनबास की ऊं लोगु का दगड़ा मा ईं बात का बानो वाद-विवाद ह्‍वे, अर यू वाद-विवाद कुछ जादा ही बढी गै। तब बिस्वासी समुदाय का लोगु न ये सवाल का जबाब तैं पौण का बानो पौलुस अर बरनबास तैं अर ऊंका दगड़ा मा बिस्वासी समुदाय का कुछ और लोगु तैं यरूशलेम नगर कू भेजि, ताकि ऊ उख जैके खास चेलों अर अध्यक्षों बटि ईं बात को जबाब पै सैका।</verse>
				<verse number="3">तब समुदाय का कुछ लोग ऊंतैं छुड़णु खुणि कुछ दूर तक गैनी। अर यू लोग फीनीके अर सामरिया मुलकों बटि ह्‍वेके गैनी, अर उखा बिस्वासी भै-बैंणो तैं ऊं लोगु का बारा मा बतै जु यहूदी जाति का नि छा कि ऊंन प्रभु यीशु तैं कनकै अपणा जीवन मा स्वीकार कैरी, अर ईं बात का बाना सब लोग खुश ह्‍वे गैनी।</verse>
				<verse number="4">अर जब ऊ यरूशलेम नगर मा पौंछिनी, त बिस्वासी समुदाय का लोगु न, यीशु का खास चेलों न अर अध्यक्षों न ऊंको स्वागत कैरी। तब पौलुस अर बरनबास न यों लोगु तैं बतै, कि परमेस्वर न ऊंका द्‍वारा लोगु का बीच मा कथगा बड़ा-बड़ा काम करिनी।</verse>
				<verse number="5">मगर बिस्वासी फरीसी लोगु मा बटि कुछ लोग उठनि अर ऊंन बोलि, “जु लोग यहूदी जाति का नि छिन अर प्रभु पर बिस्वास करदिन ऊं लोगु तैं खतना का रिवाज तैं पूरु करण जरुरी च, अर ऊंतैं इन हुकम देण चयेणु कि ऊ मूसा का दियां नियम-कानून को पालन कैरा।”</verse>
				<verse number="6">तब खास चेला अर अध्यक्ष लोग ईं बात का बारा मा बात-चित करणु खुणि इकट्‍ठा ह्‍वेनि।</verse>
				<verse number="7">अर जब भौत बहसबाजी ह्‍वे गै, तब पतरस खड़ु ह्‍वे अर वेन ऊंकू बोलि, “हे मेरा भै-बैंणो, तुम अच्छी तरौं से जणद्‍यां की आज से कुछ दिन पैलि परमेस्वर न मितैं तुम लोगु मा बटि चुणी, ताकि मेरा द्‍वारा ऊं लोगु तैं शुभ समाचार सुणये जौ जु की यहूदी जाति का नि छिन, कि वु लोग भि सुणा अर बिस्वास कैरा।</verse>
				<verse number="8">अर परमेस्वर जु की सब लोगु का विचारों तैं जणदु, जन वेन हमतै पवित्र आत्मा दिनी, ठिक उन्‍नि वेन ऊं लोगु तैं भि पवित्र आत्मा दिनी जु यहूदी जाति का नि छिन। अर वेन इन साबित कैरियाली कि वु ऊंतैं भि स्वीकार करदु।</verse>
				<verse number="9">अर इन कैरिके वेन हम यहूदी लोगु का अर ऊं लोगु का बीच मा कुई भि भेदभाव नि कैरी जु यहूदी जाति का नि छिन। अर यीशु पर बिस्वास करण से ही वेन ऊंका मनों तैं शुद्ध कैरियाली,</verse>
				<verse number="10">त अब तुम ऊं बिस्वासी लोगु का मथि एक गरु जुवा जन बोझ रखी के परमेस्वर तैं किलै अजमौणा छाँ, अर वु बोझ नऽ त हम लोग न अर ना ही हमरा पितरों न उठे सैकी।</verse>
				<verse number="11">मगर हमरु त यू बिस्वास च, जन कि प्रभु यीशु की किरपा से आज हम लोगु तैं बचयै गै, ठिक उन्‍नि ऊं लोगु तैं भि बचयै गै जु यहूदी जाति का नि छिन।”</verse>
				<verse number="12">अर फिर सभा का सब लोग चुपचाप ह्‍वेके बरनबास अर पौलुस की गवै तैं सुनण लगि गैनी, कि परमेस्वर न कनकै दुसरि जाति का लोगु का बीच मा ऊंका द्‍वारा बड़ा-बड़ा काम अर चमत्कार करिनी।</verse>
				<verse number="13">पौलुस अर बरनबास की गवै खतम होण का बाद याकूब न बोलि, “हे मेरा भै-बैंणो मेरी बात तैं सुणा,</verse>
				<verse number="14">जन कि भै शमौन पतरस न बतै कि जु लोग यहूदी जाति का नि छिन ऊंमा बटि कुछ लोगु तैं परमेस्वर न पैलि ही सगु बणौणु खुणि कनकै चुण्यालि,</verse>
				<verse number="15">अर परमेस्वर का रैबर्या भि ईं बात मा सैमत छिन। जन की लिख्यूं च कि,</verse>
				<verse number="16">“‘यों सब बातों का बाद मि वापिस औलु, अर ऐके दाऊद का पोड़यां डेरा तैं फिर से उठौलु। हाँ, वे ही खण्डर तैं बणौलु, अर वेतैं फिर से खड़ु करलु,</verse>
				<verse number="17">ताकि बच्यां लोग अर जु यहूदी जाति का नि छिन, जौं तैं मेरा लोग होणु खुणि चुणै गै वु सब प्रभु तैं खुज्या।</verse>
				<verse number="18">अर जु परमेस्वर भौत सालों पैलि बटि यों बातों तैं बतौन्दी औणु च, उई परमेस्वर यू सब बात बुल्दु।’</verse>
				<verse number="19">“इलै मि इन सोचदु, कि जु लोग यहूदी जाति का नि छिन ऊंमा बटि जथगा भि लोग परमेस्वर की तरफा औणा छिन, ऊं लोगु तैं हम लोग दुख नि द्‍या,</verse>
				<verse number="20">बल्किन अब इन कैरा कि ऊं लोगु खुणि एक चिठ्‍ठी लिखा। अर ऊं लोगु तैं वु खाणु कू मना कैरा जु मूरत का अगनै चड़ये जान्दु, अर ऊंतैं गळत सम्बन्ध बणौण से भि दूर रौण कू लिखा। अर इन भि लिखा कि तुम लोग गौळा दबै के मुरयां जानबरों की सिकार नि खयां, अर ना ही कै जानबर को ल्वे खयां-पीयां।</verse>
				<verse number="21">“किलैकि भौत सालों बटि मूसा का दियां नियम-कानून हरेक सब्त का दिन पर प्रार्थना भवनों मा पढै जाणा छिन, अर वेकी बातों को परचार करण वळा लोग भि नगर-नगर मा पैलि बटि होन्दी औणा छिन।”</verse>
				<verse number="22">अर बिस्वासी समुदाय का सब लोगु तैं, खास चेलों अर अध्यक्ष लोगु तैं याकूब की बुलिं बात अच्छी लगिनी। तब ऊं लोगु न इन फैसला कैरी कि हम मा बटि कुछ लोगु तैं चुणी के पौलुस अर बरनबास का दगड़ा मा अन्ताकिया नगर कू भेजि जौ। तब ऊंन यहूदा तैं जैकू बरसब्बा भि बुल्दिन अर सीलास तैं चुणी, अर यू लोग बिस्वासी भै-बैंणो का मुखिया छा।</verse>
				<verse number="23">अर ऊंका हाथ ऊंन एक चिठ्‍ठी भेजि जैमा इन लिख्यूं छौ कि: सीरिया मुलक, किलिकिया मुलक, अर अन्ताकिया नगर मा रौण वळा हमरा प्यारा भै-बैंणो, तुम जु दुसरि जातियों मदि छाँ, तुम सब लोगु तैं बिस्वासी समुदाय का लोगु की तरफा बटि अर खास चेलों अर अध्यक्षों की तरफा बटि हमरु, सलाम।</verse>
				<verse number="24">दगड़्यों, हमुन सुणी कि हमरा इख बटि कुछ लोगु न ऐके तुमतै अपणी बातों का द्‍वारा भरमै, अर तुमरा मनों तैं बड़ी उळझण मा डालियेली। पर सुणा, हम तुमतै बतै देन्द्‍यां कि हमुन ऊं लोगु तैं इन्द्रयो कुई भि आदेस नि दे छौ।</verse>
				<verse number="25">इलै हमुन एक मन ह्‍वेके इन फैसला कैरी, कि कुछ लोगु तैं चुणी के अपणा प्रिय भै बरनबास अर पौलुस का दगड़ा मा तुमरा पास भेजा।</verse>
				<verse number="26">अर यू चुण्यां मनखि वु छिन जौन प्रभु यीशु मसीह का खातिर अपणी जान की बाजी भि लगै दिनी।</verse>
				<verse number="27">इलै हमुन यहूदा अर सीलास तैं भेजि, ताकि वु खुद भि तुमतै चिठ्‍ठी मा लिखी बात बतै द्‍या।</verse>
				<verse number="28">किलैकि या बात पवित्र आत्मा अर हमतै अच्छी लगि, कि जु कुछ भि खास बात छिन ऊंका अलावा हम लोग तुम पर जादा नियम-कानूनों को भार नि डाला।</verse>
				<verse number="29">बस तुम लोग इन कैरा कि, मूरत का अगनै चड़ये जाण वळी चीजों से, ल्वे खाण-पीण से, अर गौळा दबै के मुरयां जानबरों की सिकार से, अर दुसरा का दगड़ा मा गळत सम्बन्ध बणौण से, इन्दरि सब बातों से तुम दूर रा, अर जब तुम यों सब बातों से दूर रैल्या, त तुमरो भलु ही होलु। “‘अच्छा त फिर सलाम, प्रभु तुमतै आसीस द्‍यो।’”</verse>
				<verse number="30">अर वीं चिठ्‍ठी मा यों बातों तैं लिखण का बाद ऊंन पौलुस, बरनबास अर ऊं चुण्यां लोगु तैं अपणा इख बटि विदा कैरी। अर जब यू लोग अन्ताकिया नगर मा वापस पौंछिनी, त ऊंन बिस्वासी समुदाय का लोगु तैं इकट्‍ठा कैरी अर वा चिठ्‍ठी ऊंतैं दे दिनी।</verse>
				<verse number="31">अर चिठ्‍ठी मा लिखीं बातों तैं पैढी के ऊंतैं भौत आनन्द मिली, किलैकि वामा वीं शिक्षा का बारा मा लिख्यूं छौ जै से ऊं लोगु की हिम्मत बढी।</verse>
				<verse number="32">यहूदा अर सीलास खुद भि परमेस्वर का रैबर्या छा, इलै ऊंन भौत सरी बातों का द्‍वारा बिस्वासी भै-बैंणो की हिम्मत बढै, अर बिस्वास मा ऊंतैं और भि जादा मजबूत कैरी।</verse>
				<verse number="33">अर ऊ कुछ दिनों तक ऊंका इख ही रैनी। अर वेका बाद बिस्वासी लोगु न ऊंतैं अपणा इख बटि शान्ति से विदा कैरी, ताकि चुण्यां मनखि वापिस अपणा भेजण वळा लोगु का पास चलि जा।</verse>
				<verse number="34">[पर सीलास का मन मा इन इच्छा छै कि उ उखि रौ।]</verse>
				<verse number="35">मगर पौलुस अर बरनबास अन्ताकिया नगर मा ही रुकी गैनी, अर उख ऊंन भौत सा लोगु तैं प्रभु को वचन सिखै, अर शुभ समाचार को परचार कैरी।</verse>
				<verse number="36">अर कुछ दिनों का बाद पौलुस न बरनबास कू बोलि, “बरनबास भै, इन करद्‍यां कि जौं-जौं नगरों मा हमुन प्रभु को वचन सुणै, उख जैके बिस्वासी भै-बैंणो बटि मिलद्‍यां अर दिखद्‍यां कि ऊंका हाल समाचार कन छिन।”</verse>
				<verse number="37">अर बरनबास इन चान्दु छौ, कि यूहन्‍ना जै खुणि मरकुस बुल्दिन वेतैं दगड़ा लि जौ।</verse>
				<verse number="38">मगर पौलुस वेतैं अपणा दगड़ा मा नि लि जाण चाणु छौ, किलैकि मरकुस पंफूलिया मुलक मा ऊंतैं छोड़ के चलि गै छौ, अर सेवा का काम मा ऊंको साथ नि दिनी।</verse>
				<verse number="39">अर ईं बात तैं लेके पौलुस अर बरनबास का बीच मा भौत खतरनाक बहसबाजी ह्‍वे गै, अर ऊ दुईया का दुई अलग ह्‍वे गैनी। तब बरनबास मरकुस का दगड़ा पाणि का जाज मा बैठि के साइप्रस टापू कू चलि गै।</verse>
				<verse number="40">अर पौलुस न सीलास तैं चुणी। अर बिस्वासी भै-बैंणो न प्रार्थना कैरिके ऊंतैं प्रभु का सुपुर्द कैरी दिनी, ताकि ऊं पर प्रभु की किरपा बणि रौ। तब ऊ उख बटि चलि गैनी।</verse>
				<verse number="41">अर सीरिया मुलक अर किलिकिया मुलक बटि ह्‍वेके वेन बिस्वासी समुदाय का भै-बैंणो तैं ऊंका बिस्वास मा मजबूत कैरी।</verse>
			</chapter>
			<chapter number="16">
				<verse number="1">अर येका बाद पौलुस दिरबे अर लुस्‍त्रा का नगरों मा भि ऐ। अर उख तीमुथियुस नौ को एक बिस्वासी भै छौ, अर वु एक यहूदी बिस्वासी जनानि को नौनु छौ, पर वेकू बुबा यूनानी जाति को छौ।</verse>
				<verse number="2">अर लुस्‍त्रा अर इकुनियुम नगर का बिस्वासी भै-बैंणा तीमुथियुस की हर बात मा तारीफ करदा छा।</verse>
				<verse number="3">अर पौलुस चान्दु छौ, कि तीमुथियुस वेका दगड़ा मा अऽ। इलै वेन वे मुलक का यहूदी लोगु का बाना वेको खतना करवै, ताकि उ वेकू कुछ नि बोलि सैका। किलैकि यहूदी लोग जणदा छा, कि वेको बुबा यूनानी जाति को च।</verse>
				<verse number="4">अर जब पौलुस अर वेका दगड़्या एक नगर बटि दुसरा नगर जाणा छा, त ऊंन बिस्वासी लोगु तैं बतै कि यरूशलेम नगर मा खास चेलों अर अध्यक्षों न जु-जु आज्ञा ठैरैईं छिन, तुम लोग ऊं बातों को पालन कैरा, अर ऊंन वु सब आज्ञा ऊंतैं बतैनि।</verse>
				<verse number="5">अर इन कैरिके बिस्वासी समुदाय का लोगु को बिस्वास और भि जादा बढदी गै, अर हरेक दिन ऊंकी गिनती और भि जादा होणी रै।</verse>
				<verse number="6">अर येका बाद पौलुस अर वेका दगड़्या फ्रूगिया अर गलाति का मुलक बटि ह्‍वेके गैनी, किलैकि पवित्र आत्मा न ऊंतैं आसिया मुलक मा वचन सुनौणु खुणि मना कर्युं छौ।</verse>
				<verse number="7">अर जब ऊ मूसिया मुलक का नजदीक पौंछिनी त ऊंन बितूनिया मुलक मा जाण को विचार कैरी, मगर यीशु की आत्मा न ऊंतैं उख जाणे की इजाजत नि दिनी।</verse>
				<verse number="8">इलै ऊ मूसिया मुलक बटि ह्‍वेके त्रोआस नगर मा ऐनी।</verse>
				<verse number="9">अर पौलुस न रात मा उख एक दरसन देखि। अर वेन देखि, कि मकिदुनी जाति को एक मनखि खड़ु ह्‍वेके वे बटि बिन्ती कैरिके बोन्‍नु च कि, “इख मकिदुनी मुलक मा ऐके हमरि मदद कैरा।”</verse>
				<verse number="10">अर जब पौलुस न यू दरसन देखि, त हमुन तुरन्त इन विचार कैरी कि हमतै मकिदुनिया मुलक मा जाण चयेणु, किलैकि हम समझि गै छा कि परमेस्वर हमतै उख बुलाणु च, ताकि उख जैके हम शुभ समाचार सुणा।</verse>
				<verse number="11">इलै हम त्रोआस नगर बटि पाणि का जाज मा बैठि के सीदा सुमात्राके टापू मा पौंछयां, अर दुसरा दिन उख बटि नियापुलिस नगर कू ग्यां।</verse>
				<verse number="12">अर उख बटि हम फिलिप्पी नगर मा पौंछयां, अर यू मकिदुनिया मुलक को खास नगर छौ, जख कि रोमी लोग रौन्दा छा।</verse>
				<verse number="13">अर सब्त का दिन पर हम लोग नगर का गेट से भैर गाडा का छाला पर ग्यां। अर हमतै इन लगि कि इख प्रार्थना करण की कुई जगा ह्‍वेलि, अर उख कुछ जनानियां इकट्‍ठा होईं छै अर हम ऊंका दगड़ा मा बात-चित करण लगि ग्यां।</verse>
				<verse number="14">अर ऊंमा बटि लुदिया नौ की एक जनानि छै अर वा थुआतीरा नगर की छै, वा परमेस्वर की भक्‍त छै अर बैंगनि रंग का कपड़ों को व्यापार करण वळी छै। अर प्रभु न वींका मन तैं खोली दिनी, ताकि वा पौलुस की शिक्षा तैं ध्यान से सुणी सैको।</verse>
				<verse number="15">अर जब वींन अपणा घौर का सब लोगु समेत बपतिस्मा ले दिनी, त वींन हम से बिन्ती कैरी कि, “अगर तुम सच्‍चि मा मितैं प्रभु पर बिस्वास रखण वळी समझद्‍यां त आज मेरा घौर मा चलि के बासा रा।” अर वींन अपणा घौर औणु खुणि हमतै मणै दिनी।</verse>
				<verse number="16">अर एक दिन इन ह्‍वे कि हम प्रार्थना करण वळी जगा कू जाणा छा, त हमतै एक गुलाम नौनि मिली जिं मा भविष्य बतौण वळी बुरी आत्मा छै। अर या नौनि लोगु को भविष्य बतै के अपणा मालिक लोगु खुणि भौत कुछ कमै देन्दी छै।</verse>
				<verse number="17">अर वा नौनि पौलुस अर हमरा पिछनै ऐके चिल्‍लै के बोन्‍न लगि गै कि, “यू लोग सबसे महान परमेस्वर का सेवक छिन, जु की तुमतै बचौण वळा बाटा का बारा मा बतौणा छिन।”</verse>
				<verse number="18">अर वा भौत दिन तक इन्‍नि बोन्‍नि रै। अर ईं बात से पौलुस भौत परेसान ह्‍वे गै, तब वेन पिछनै मुड़ि के नौनि का भितर वे आत्मा कू बोलि, “मि त्वेतै यीशु मसीह का नौ से हुकम देन्दु, कि वींका भितर बटि भैर निकळि जा।” अर वु खबेस तुरन्त निकळि गै।</verse>
				<verse number="19">अर जब वींका मालिक लोगु न इन देखि कि अब हमरि कमै करण को जरया खतम ह्‍वे गै, त ऊंन पौलुस अर सीलास तैं पकड़ी अर बजार का बीच बटि ऊंतैं खिखोड़ी के मुख्य लोगु का समणि लि गैनी।</verse>
				<verse number="20">अर ऊ ऊंतैं नगर का मुख्य अधिकारीयों मा लि गैनी अर बोलि, “यू लोग यहूदी जाति का छिन अर हमरा नगर मा उथल-पुथल कना छिन,</verse>
				<verse number="21">अर यू हमतै इन्द्रया रीति-रिवाजों का बारा मा सिखौणा छिन, जौं तैं मनण अर ऊंका मुताबिक चलण हम रोमी लोगु का नियम-कानूनों का खिलाप मा च।”</verse>
				<verse number="22">तब भीड़ का लोग पौलुस अर सीलास का खिलाप मा जमा ह्‍वे गैनी, अर मुख्य अधिकारीयों न हुकम दिनी कि ऊंका कपड़ों तैं फाड़ा अर ऊंतैं जाठोंळ धड़का।</verse>
				<verse number="23">अर भौत धड़कौण का बाद ऊं लोगु न ऊंतैं जेलखाना मा डालि दिनी, अर जेलर तैं आज्ञा दिनी कि ऊंकी पैरेदारी बड़े ध्यान से कर्यां।</verse>
				<verse number="24">अर ये आदेस तैं पौण का बाद जेलर न ऊंतैं जेलखाना का भितर वळी कुठड़ी मा रखवै, अर ऊंका खुटा तैं लखड़े की बड़ी भराड़ पर बान्धि दिनी।</verse>
				<verse number="25">अर अधि रात का लगभग पौलुस अर सीलास प्रार्थना कना छा अर परमेस्वर की भक्‍ति का गीत गाणा छा। अर कैदी ऊंकी सुनणा छा,</verse>
				<verse number="26">कि तबरि अचानक से एक बड़ु भ्वींचळु ऐ, जैकी वजै से जेलखाने की बुनियाद हिली गै, अर जेलखाना का सब द्‍वार खुलि गैनी, इख तक कि सब कैदियों का संगुळा भि खुलि गैनी।</verse>
				<verse number="27">जेलर उठी, अर जेलखाना का द्‍वार खुला देखि के वेन इन समझि की कैदी भागी गैनी। इलै वेन तलवार निकाळि अर अपणी जान लेण वळु ही छौ,</verse>
				<verse number="28">कि तबरि पौलुस न जोर से चिल्‍लै के बोलि, “अरे भैजी, अफ तैं नुकसान नि पौंछौ, किलैकि हम सब इखि छां।”</verse>
				<verse number="29">तब जेलर न उज्याळु मंगवै अर भागी के भितर गै, अर कौंपदी-कौंपदी पौलुस अर सीलास का खुटों मा पोड़ि गै।</verse>
				<verse number="30">अर ऊंतैं भैर लेके ऐ अर बोलि, “श्रीमान, अपणा जीवन तैं बचौणु खुणि मि क्या कैरुं?”</verse>
				<verse number="31">तब ऊंन वेतैं जबाब दिनी, “प्रभु यीशु मसीह पर बिस्वास कैर, तब तू अर तेरा घौर का सब लोग बचयै जाला।”</verse>
				<verse number="32">पौलुस अर सीलास न वेतैं अर वेका घौर का सभि लोगु तैं प्रभु को वचन सुणै।</verse>
				<verse number="33">अर राति का वे ही बगत वु पतरस अर सीलास तैं अफ दगड़ा लि गै अर वेन ऊंका घौ ध्वेनि, अर वेका बाद जेलर न अपणा सब लोगु समेत तुरन्त बपतिस्मा लिनी।</verse>
				<verse number="34">तब जेलर ऊंतैं अपणा घौर लि गै अर ऊंकी दावत कैरी, अर परमेस्वर पर बिस्वास कैरिके जेलर न अर वेका घौर का सब लोगु न बड़ी खुशी मणै।</verse>
				<verse number="35">अर जब सुबेर ह्‍वे, त मुख्य अधिकारीयों न अपणा कुछ सिपयों तैं इन आदेस देके भेजि कि, “पौलुस अर सीलास तैं छोड़ि द्‍या।”</verse>
				<verse number="36">तब जेलर न यू बात पौलुस तैं बतैनि अर वेन बोलि कि, “अधिकारीयों न तुमतै छुड़णे आज्ञा दिईं च, इलै अब तुम हमरा इख बटि निकळि के शान्ति से अपणा इख चलि जा।”</verse>
				<verse number="37">मगर पौलुस न ऊंकू बोलि, “हम त रोमी नागरिक छां, ऊंन हमतै बिना कैं गळती का दोषी ठैरै अर सभ्यों का समणि हमतै पिटवै। अर फिर जेलखाना मा डलवै दिनी, त अब वु हमतै सुरक के किलै निकळणा छिन? इन नि ह्‍वे सकदु ऊंकू बोला कि ऊ खुद इख आ अर हमतै इख बटि भैर लि जा।”</verse>
				<verse number="38">अर सिपयों न उख बटि निकळि के मुख्य अधिकारीयों तैं यू बात बतैनि। अर यू रोमी नागरिक छिन ईं बात तैं सुणी के अधिकारी लोग भौत डौऽरी गैनी।</verse>
				<verse number="39">तब यों अधिकारीयों न ऐके पौलुस अर सीलास बटि माफी मांगि, अर जेलखाना बटि भैर लि जैके ऊंकी खुसामत कैरी, कि तुम ये नगर तैं छोड़ि के चलि जा।</verse>
				<verse number="40">तब ऊ जेलखाना बटि निकळि के लुदिया जनानि का घौर मा ऐनी, अर बिस्वासी भै-बैंणो से मिलिनी अर ऊंकी हिम्मत बढै। अर येका बाद ऊ उख बटि चलि गैनी।</verse>
			</chapter>
			<chapter number="17">
				<verse number="1">अर जब पौलुस अर सीलास लुदिया जनानि का इख बटि निकळिनी, त ऊ दुईया का दुई अम्फिपुलिस अर अपुल्‍लोबनिया नगरों बटि ह्‍वेके थिस्सलुनीकी नगर मा ऐनी। अर उख यहूदी लोगु को एक प्रार्थना भवन छौ।</verse>
				<verse number="2">अर पौलुस हमेसा की तरौं, यहूदी प्रार्थना भवन मा गै। अर तीन हप्‍तों का तीन सब्त का दिनों पर वेन पवित्रशास्‍त्र मा बटि यहूदी लोगु का बीच मा वाद-विवाद कैरी।</verse>
				<verse number="3">अर ऊंतैं समझै के साबित कैरिके बोलि कि, “सुणा, यू जरुरी छौ की मसीह दुख उठौ, अर मुरदो मा बटि ज्यून्दु हो अर उ मसीह यीशु ही च जैको परचार मि तुमरा बीच मा कनु छौ।”</verse>
				<verse number="4">तब ऊं लोगु मा बटि भौत सा लोगु न ऊंकी बातों तैं स्वीकार कैरी, अर पौलुस अर सीलास का दगड़ा मा मिली गैनी। अर परमेस्वर पर सरदा रखण वळा भौत सा यूनानी लोग, अर कुछ खास-खास जनानियां भि ऊंका दगड़ा मा ह्‍वे गै छै।</verse>
				<verse number="5">अर यू देखि के यहूदी लोग पौलुस अर सीलास तैं देखि के फूक्योंण लगि गैनी। तब ऊंन बजार बटि कुछ गुन्ड़ो तैं जमा कैरी अर ऊंकी एक भीड़ बणै, अर नगर मा घपरोळ मचौण लगि गैनी। अर वेका बाद ऊ सभ्या का सभि जबरन यासोन का घौर मा घुसी गैनी। अर पौलुस अर सीलास तैं खुज्याणा लगि गैनी, ताकि ऊ यों दुईयों तैं लोगु का बीच मा लि जै सैका।</verse>
				<verse number="6">मगर जब पौलुस अर सीलास ऊंतैं नि मिलिनी, त ऊंन यासोन अर कुछ और बिस्वासी भै-बैंणो तैं पकड़ी, अर ऊंतैं नगर का अधिकारीयों का पास खिखोड़ी के लैनि। अर चिल्‍लै के बोलि, “साब, यों लोगु न पूरि धरती मा उथल-पुथल मचै के रखी च अर देखा, अब यू इख भि ऐ गैनी।</verse>
				<verse number="7">अर ये यासोन न ऊंतैं अपणा घौर मा रखी। अर यू सभ्या का सभि महाराजा का आदेस को विरोध करदिन अर एक और राजा च जैको नौ यीशु च इन भि बुल्दिन।”</verse>
				<verse number="8">अर ईं बात तैं सुणी के भीड़ का लोगु तैं, अर नगर का अधिकारीयों तैं भौत जादा गुस्सा ऐ गै।</verse>
				<verse number="9">तब ऊं लोगु न यासोन अर दुसरा बिस्वासी भै-बैंणो बटि जमानत की तौर पर रुपया लिनी अर ऊंतैं छोड़ दिनी।</verse>
				<verse number="10">अर फिर बिस्वासी भै-बैंणो न पौलुस अर सीलास तैं रातों-रात बिरीया नगर कू भेजि दिनी, अर उख पौंछण का बाद यू दुईया का दुई यहूदियों का प्रार्थना भवन मा गैनी।</verse>
				<verse number="11">बिरीया नगर का यहूदी लोग थिस्सलुनीकी नगर का यहूदी लोगु से भौत जादा भला छा। अर यों लोगु न परमेस्वर का वचन तैं बड़ी इच्छा से स्वीकार कैरी, अर हर दिन पवित्रशास्‍त्र मा खुज्याणा रैनी कि जु कुछ भि पौलुस बतौणु च वु सब बात इन्‍नि लिखीं छैई भि छिन, कि ना।</verse>
				<verse number="12">इलै ऊं लोगु मा बटि भौत सा यहूदी लोगु न, अर खास-खास यूनानी जनानियों न, अर बैखों न भि ऊंकी बातों पर बिस्वास कैरी।</verse>
				<verse number="13">और जब थिस्सलुनीकी नगर का यहूदी लोगु तैं इन पता चलि कि, पौलुस बिरीया नगर मा भि परमेस्वर का वचन को परचार कनु च, त यों यहूदी लोगु न इख ऐके दंगा मचौण, अर लोगु तैं उकसौणु शुरु कैरी दिनी।</verse>
				<verse number="14">तब उखा बिस्वासी भै-बैंणो न तुरन्त ही पौलुस तैं उख बटि भेजि, कि उ इख बटि निकळि के समुन्दर की तरफा चलि जौ। पर सीलास अर तीमुथियुस उखि रै गैनी।</verse>
				<verse number="15">अर कुछ लोग पौलुस का दगड़ा मा एथेन्स नगर तक वेतैं पौंछाणु खुणि गैनी। तब पौलुस न ऊंमा सीलास अर तीमुथियुस खुणि इन रैबार दिनी, कि ऊंकू बुलयां की जथगा जल्दी ह्‍वे सैको मेरा पास ऐ जयां।</verse>
				<verse number="16">अर पौलुस एथेन्स नगर मा सीलास अर तीमुथियुस को इंतजार कनु छौ, अर ये नगर मा मूरतों की भरमार तैं देखि के उ अपणी आत्मा मा भौत दुखी ह्‍वे।</verse>
				<verse number="17">इलै वु प्रार्थना भवन मा यहूदी लोगु का दगड़ा, अर परमेस्वर की भक्‍ति करण वळा लोगु का दगड़ा, अर बजार मा औण-जाण वळा लोगु का दगड़ा मा, हरेक दिन वाद-विवाद करदु छौ।</verse>
				<verse number="18">अर ये नगर मा इपिकूरी अर स्तोईकी नौ का दुई ज्ञानी दल छा, अर यों दलों मा बटि कुछ लोग पौलुस बटि मिलिनी। अर ऊं बटि कुछ लोगु न बोलि, “यू कचर-कचर करण वळु मनखि क्या च बोन्‍नु?” दुसरो न बोलि, “अरे यू त पता नि कौं द्‍यबतों का बारा मा बतौणु च।” (अर या बात त ऊंन इलै बोलि, किलैकि पौलुस यीशु का बारा मा, अर मुरदो मा बटि मा ज्यून्द होण का बारा मा बतौणु छौ)।</verse>
				<verse number="19">तब यू लोग पौलुस तैं पकड़ी के अरियुप्गुस न्याय की जगा पर लि गैनी, अर ऊंन वेकू बोलि, “तू जिं नयी शिक्षा का बारा मा बतौणी छैई, वा हमतै बतौ, कि वा क्या च?</verse>
				<verse number="20">किलैकि तू हमतै अजीब बात बतौणी छैई, इलै हम यू जनण चाणा छां कि यों सब बातों को क्या मतलब च।”</verse>
				<verse number="21">(अर या बात ऊंन इलै बोलि, किलैकि एथेन्स नगर का लोग अर उख रौण वळा परदेसी लोगु की एक आदत छै, कि वु हमेसा नई-नई बातों तैं सिखण अर बुलण मा ही अपणु पूरु बगत लगौन्दा छा, अर कुछ नि करदा छा)।</verse>
				<verse number="22">तब पौलुस न वीं बैठक मा जमा होंया लोगु का बीच मा खड़ु ह्‍वेके ऊंकू बोलि, “हे एथेन्स नगर का लोगु, मि दिखणु छौं कि तुम हर बात मा द्‍यबतों तैं भौत जादा मनण वळा छाँ।</verse>
				<verse number="23">किलैकि जब मि तुमरा नगर मा घूमणु छौ, त मिन तुमरा पूजा करण वळी चीजों तैं बड़ा ध्यान से देखि अर मिन उख वेदी पर इन लिख्यूं देखि कि, ‘अणजाण ईश्‍वर खुणि।’ इलै जब तुम वे ईश्‍वर की पूजा करद्‍यां जैतैं नि जणद्‍यां, त मि तुमतै वे ही परमेस्वर का बारा मा बतै देन्दु,</verse>
				<verse number="24">कि जै परमेस्वर न पूरि धरती अर वेकी सब चीजों तैं बणै, उई परमेस्वर आसमान अर ईं धरती को मालिक च। अब बता वु परमेस्वर मनखि का द्‍वारा बणयां मन्दिर मा कनकै रै सकदु?</verse>
				<verse number="25">अरे, वे परमेस्वर मा कैं भि चीज की कमी नि च, अर ना ही उ मनखियों बटि अपणी सेवा करौन्दु, बल्किन मा वु त खुद ही सब तैं जीवन अर सांस देन्दु, इख तक की सब कुछ भि।</verse>
				<verse number="26">अर वेन एक ही मनखि बटि सब जाति का लोगु तैं बणै, ताकि वु पूरि धरती मा बसी जा। अर वे ही परमेस्वर न खुद ही फैसला कैरी, अर पैलि बटि ही वेन मनखियों खुणि बगत ठैरै, अर इन भि ठैरै कि कैं जगा मा कैतैं रौण चयेणु,</verse>
				<verse number="27">ताकि लोग वे परमेस्वर तैं खुज्या अर क्या पता वु वेतैं पै भि द्‍या, हालांकि उ हम मा बटि कै से भि दूर नि च।</verse>
				<verse number="28">किलैकि कैन इन बोलि कि, “‘परमेस्वर मा ही हम ज्यून्द छां, अर चलणा-फिरणा छां। अर वेकी वजै से ही हमरु बजूद च।’ अर ठिक उन्‍नि तुमरा कुछ कवियों न भि बोलि कि, ‘हम त वेकी ही औलाद छां।’</verse>
				<verse number="29">“इलै अब जब हम वेकी औलाद छां, त हम लोगु तैं इन नि सुचण चयेणु, कि परमेस्वर सोना, चांदी या ढुंगो की बड़ी मूरत का जन च। अरे, यों मूरतों तैं मनखि अपणा सोच-विचार अर कारिगरी का द्‍वारा बणौन्दु।</verse>
				<verse number="30">अर पुरणा जमना मा लोग परमेस्वर का बारा मा सुनपट छा, पर परमेस्वर न यों सब बातों पर ध्यान कैरी। मगर आज का बगत मा उई परमेस्वर लोगु तैं आज्ञा देन्दु, कि सब लोग सच्‍चा मन से अपणा-अपणा पापों से पस्ताप कैरा।</verse>
				<verse number="31">अर मि तुमतै बतै देन्दु, कि वेन एक दिन ठैर्युं च वे दिन उ पूरि दुनियां को न्याय धरमी रीति से करलु, अर न्याय करणु खुणि परमेस्वर न वे मनखि तैं चुण्यूं भि च, जु कि यीशु ही च। अर परमेस्वर न वेतैं मुरदो मा बटि ज्यून्दु कैरिके या बात साबित भि कैरियाली।”</verse>
				<verse number="32">अर जब ऊं लोगु न मुरदो मा बटि ज्यून्द होण की बात तैं सुणी, त कुछ लोग वेको मजाक उड़ौण लगि गैनी। अर कुछ लोगु न बोलि, “हम या बात त्वे बटि कै दुसरा दिन सुणुला।”</verse>
				<verse number="33">इलै पौलुस ऊंका बीच मा बटि चलि गै।</verse>
				<verse number="34">मगर कुछ लोगु न पौलुस की बातों पर बिस्वास कैरी, अर वेका दगड़ा मा मिली गैनी। अर जु लोग वेका दगड़ा मा ह्‍वे गै छा ऊंमा बटि अरियुप्गुस न्याय बैठक को एक सदस्य छौ जैको नौ दियुनिसियुस छौ, अर दमरिस नौ की एक जनानि, अर यों का अलावा और लोग भि छा।</verse>
			</chapter>
			<chapter number="18">
				<verse number="1">येका बाद पौलुस एथेन्स नगर तैं छोड़ि के कुरिन्थि नगर कू चलि गै।</verse>
				<verse number="2">कुरिन्थि नगर मा अक्‍किला नौ को एक यहूदी मनखि छौ, जु कि पुन्तुस मुलक को मूल निवासी छौ। अर वु हाल ही मा अपणी घरवळी प्रिस्किल्‍ला का दगड़ा मा इटली मुलक बटि अयूं छौ। अर ऊंन इटली इलै छोड़ि, किलैकि महाराजा क्लौदियुस न सब यहूदियों तैं रोम नगर बटि निकळण की आज्ञा दियाली छै। अर जब पौलुस कुरिन्थि नगर मा पौंछी, त वेकी मुलाकात येका दगड़ा मा ह्‍वे, तब पौलुस ऊंका घौर गै।</verse>
				<verse number="3">अर पौलुस ऊंका दगड़ा मा मिली के काम करण लगि गै, किलैकि पौलुस अर यों दुईयों को एक ही काम-धन्धा छौ, अर उ तम्बू बणौण को काम करदा छौ।</verse>
				<verse number="4">अर पौलुस हरेक सब्त का दिन पर प्रार्थना भवन मा जैके यहूदियों अर यूनानी लोगु का दगड़ा मा वाद-विवाद करदु छौ, अर ऊंका मन तैं अपणी तरफा करण की कोसिस करदु छौ।</verse>
				<verse number="5">अर जब सीलास अर तीमुथियुस मकिदुनिया मुलक बटि ऐनी, तब पौलुस प्रभु का वचन तैं सुनौण मा अपणु पूरु बगत लगौण लगि गै, अर यहूदियों तैं गवै दे देके इन साबित कनु रै कि यीशु ही मसीह च।</verse>
				<verse number="6">मगर जब उखा लोगु न वेको विरोध कैरी अर वे खुणि अनाप-सनाप बोलि, तब पौलुस न अपणा कपड़ों तैं झाड़ि के बोलि, “जु दण्ड तुमतै मिलण वळु च वांका जबाबदार तुम खुद ही छाँ, मि बेकसूर छौं। अर सुणा, अब बटि मि ऊं लोगु का बीच मा जौलु जु कि यहूदी जाति का नि छिन।”</verse>
				<verse number="7">तब पौलुस प्रार्थना भवन तैं छोड़ि के परमेस्वर का भक्‍त तीतुस यूस्तुस नौ का मनखि का घौर मा गै, जु कि यहूदी जाति को नि छौ। अर येको घौर प्रार्थना भवन से चिपक्युं छौ।</verse>
				<verse number="8">तब प्रार्थना भवन का मुखिया क्रिस्पुस अर वेका घौर का सब लोग न प्रभु पर बिस्वास कैरी। अर कुरिन्थि नगर का भौत सा लोगु न पौलुस का द्‍वारा वचन तैं सुणी के बिस्वास कैरी, अर बपतिस्मा भि लिनी।</verse>
				<verse number="9">अर एक राति इन ह्‍वे, कि प्रभु न पौलुस तैं एक दरसन मा बोलि, “पौलुस डौऽर ना, बोन्‍नु रौ, चुप नि हो,</verse>
				<verse number="10">किलैकि मि तेरा दगड़ा मा छौ। अर सुण, कुई भि मनखि तेरु नुकसान करणु खुणि त्वे पर हम्‍ला नि करलु, किलैकि ये नगर मा मिन भौत सा लोगु तैं चुण्यूं च।”</verse>
				<verse number="11">इलै पौलुस डेढ़ साल तक ऊं लोगु का बीच मा परमेस्वर को वचन सिखौणु रै।</verse>
				<verse number="12">अर जौं दिनों मा अखया मुलक को गवर्नर गल्‍लियो छौ, ये बगत यहूदी लोग एक मन ह्‍वेके पौलुस का खिलाप मा खड़ा ह्‍वे गैनी, अर वेतैं पकड़ी के न्याय आसन का समणि लि गैनी।</verse>
				<verse number="13">अर वे पर इळजाम लगै के बोलि, “साब, यू मनखि लोगु तैं परमेस्वर की भक्‍ति करण को वु तरीका सिखौणु च, जु कि नियम-कानून का खिलाप मा च।”</verse>
				<verse number="14">मगर जन्‍नि पौलुस कुछ बुलण वळु छौ, कि वेसे पैलि गवर्नर गल्‍लियो न यहूदियों कू बोलि, “हे यहूदियों, अगर यू मनखि कुछ गळत काम या कुई भि खतरनाक अपराध करदु, त मि खुणि या बात भौत जरुरी छै कि मि तुमरि बात मणदु।</verse>
				<verse number="15">मगर तुमरो यू वाद-विवाद तुमरि शिक्षा, अर नियम-कानून, अर नौ का खातिर ही होणु च। इलै मि ये झगड़ा को न्याय नि करण चान्दु, किलैकि यू झगड़ा तुम लोगु को च इलै यां की तुम खुद ही निस्तारा।”</verse>
				<verse number="16">अर इन बोलि के वेन सब लोगु तैं न्याय आसन का पास बटि भैर निकाळि दिनी।</verse>
				<verse number="17">अर सब लोगु न प्रार्थना भवन का मुखिया सोस्थिनेस तैं पकड़ी, अर येतैं न्याय आसन का समणि ही पीटि दिनी। मगर गवर्नर गल्‍लियो न ईं बात पर कुछ भि ध्यान नि देई।</verse>
				<verse number="18">अर येका बाद भौत दिनों तक पौलुस कुरिन्थि नगर मा रै। अर वेका बाद बिस्वासी भै-बैंणो बटि विदै लेके पाणि का जाज से सीरिया मुलक कू चलि गै, अर वेका दगड़ा मा प्रिस्किल्‍ला बैंण अर अक्‍किला भै भि छौ। अर किंख्रिया नगर मा ऐके पौलुस न अपणु मुण्ड़ मुण्ड़वै, किलैकि वेन प्रभु बटि एक मन्‍नत मंगी छै।</verse>
				<verse number="19">अर जब वु इफिसुस नगर मा पौंछिनी, त पौलुस न यों दुईयों तैं इखि छोड़ि दिनी, अर खुद प्रार्थना भवन मा जैके यहूदी लोगु का दगड़ा मा वाद-विवाद करण लगि गै।</verse>
				<verse number="20">अर जब उखा लोगु न वेसे बिन्ती कैरी कि, “पौलुस भै, कुछ दिनों तक हमरा इख ही रुक्यां रा,” त वेन मना कैर दिनी।</verse>
				<verse number="21">अर जब पौलुस उख बटि जाण लगि गै, त वेन इन बोलि के ऊं बटि विदै ले कि, “अगर जु परमेस्वर की इच्छा होलि, त मि तुम लोगु का पास फिर औलु।” तब पौलुस न इफिसुस नगर बटि पाणि का जाज से अपणी यात्रा शुरु कैरी।</verse>
				<verse number="22">अर कैसरिया नगर मा पौंछी, अर उख बटि ह्‍वेके उ यरूशलेम नगर कू गै। अर बिस्वासी समुदाय का लोगु को हाल समाचार पूछी के उख बटि अन्ताकिया नगर कू चलि गै।</verse>
				<verse number="23">अर उ कुछ दिनों तक अन्ताकिया नगर मा ही रै, फिर उख बटि निकळि के गलाति अर फ्रूगिया मुलकों का बिस्वासी लोगु तैं ऊंका बिस्वास मा मजबूत कनु रै।</verse>
				<verse number="24">अपुल्‍लोस नौ को एक यहूदी मनखि जैको जनम सिकन्दरिया नगर मा ह्‍वे छौ। यू भौत अच्छु गुरु अर पवित्रशास्‍त्र को भौत अच्छु जानकार छौ, अर यू इफिसुस नगर मा ऐ।</verse>
				<verse number="25">अर येतैं प्रभु का बाटे की पूरि शिक्षा अच्छे तरौं से दिये गै छै। अर यू यीशु का बारा मा मन लगै के सही-सही सुणान्दु अर सिखौन्दु छौ। मगर येतैं यूहन्‍ना का द्‍वारा दिये जाण वळा बपतिस्मा का बारा मा ही पता छौ।</verse>
				<verse number="26">अर यू प्रार्थना भवन मा बेधड़क ह्‍वेके बुलण लगि गै। अर जब प्रिस्किल्‍ला बैंण अर अक्‍किला भै न येकी बातों तैं सुणी, त वु येतैं अपणा घौर लि गैनी, अर येतैं परमेस्वर का बाटा का बारा मा और अच्छा तरीके से बतै।</verse>
				<verse number="27">अर अप्पुलोस की मनसा छै कि वु समुन्दर का दुसरा छाला अखया मुलक मा जौ। इलै बिस्वासी भै-बैंणो न वेको हौसला बढै, अर अखया का बिस्वासी भै-बैंणो कू चिठ्‍ठी लिखी के बतै कि वेको स्वागत बड़ा प्यार से किये जौ। अर जब अप्पुलोस इख पौंछी, त इख पौंछण पर अखया का जौं लोगु न प्रभु की बड़ी किरपा की वजै से बिस्वास कैरी छौ, वेन ऊं बिस्वासी लोगु की भौत मदद कैरी।</verse>
				<verse number="28">अर वेन सभ्यों का समणि यहूदी लोगु तैं खतरनाक जबाब देके ऊंतैं गळत साबित कैरी दिनी, अर पवित्रशास्‍त्र मा बटि इन साबित कैर दिनी कि यीशु ही मसीह च।</verse>
			</chapter>
			<chapter number="19">
				<verse number="1">अर जब अपुल्‍लोस कुरिन्थि नगर मा छौ, त पौलुस मैंल्या मुलक बटि ह्‍वेके इफिसुस नगर मा पौंछी। अर वेतैं उख कुछ बिस्वासी लोग मिलिनी, अर पौलुस न ऊं बटि पूछी कि,</verse>
				<verse number="2">“जब तुम न बिस्वास कैरी, त क्या वे बगत पर तुमतै पवित्र आत्मा भि मिली?” अर ऊंन बोलि, “अरे क्या च पवित्र आत्मा? हमुन त वेका बारा मा कभि नि सुणी।”</verse>
				<verse number="3">वेन ऊं बटि पूछी, “त फिर तुमुन कन्द्रयो बपतिस्मा लिनी?” ऊंन बोलि, “अरे, जु बपतिस्मा यूहन्‍ना देन्दु छौ।”</verse>
				<verse number="4">तब पौलुस न ऊंकू बोलि, “यूहन्‍ना न त पापों से पस्ताप करण को बपतिस्मा दे छौ वेन बोलि छौ, जु मेरा बाद औण वळु च वे पर बिस्वास कर्यां।” अरे, वु जैका बारा मा बोन्‍नु छौ वु यीशु मसीह ही च।</verse>
				<verse number="5">अर यू सुणी के ऊंन प्रभु यीशु का नौ से बपतिस्मा लिनी।</verse>
				<verse number="6">तब पौलुस न ऊं पर अपणा हाथ रखिनी, त पवित्र आत्मा ऊं लोगु पर ऐ गै अर वु बन्‍नि-बन्‍नि किसमे की भाषा बोन्‍न लगि गैनी।</verse>
				<verse number="7">अर यू सब लगभग बारह लोग छा।</verse>
				<verse number="8">फिर पौलुस तीन मैना तक इफिसुस नगर का प्रार्थना भवन मा जैके बिन डऽरयां प्रभु को वचन सुनौणु रै, अर परमेस्वर का राज का बारा मा ऊंतैं समझौणु रै अर ऊंका मनों तैं अपणी तरफा कनै की पूरि कोसिस कनु रै।</verse>
				<verse number="9">मगर ऊं मदि कुछ लोग जादा ढीट ह्‍वे गैनी, अर ऊंन वे रैबार तैं मनण से इनकार कैर दिनी, अर सब लोगु का समणि प्रभु का बाटा का बारा मा अनाप-सनाप बोन्‍न लगि गैनी। इलै पौलुस प्रार्थना भवन तैं छोड़ि के चलि गै, अर बिस्वासी लोगु तैं अफ दगड़ा मा लि गै। अर तुरन्‍नस मनखि की पाठसाला मा पौलुस हरेक दिन बिस्वासी लोगु का दगड़ा मा बात-चित कनु रै।</verse>
				<verse number="10">अर दुई साल तक इन्‍नि चलणु रै, ताकि आसिया मुलक का लोग, यहूदी लोग, अर यूनानी जाति का लोग प्रभु का वचन तैं सुणी सैका।</verse>
				<verse number="11">अर परमेस्वर न पौलुस का द्‍वारा बड़ा-बड़ा चमत्कारिक काम करिनी, जु कि पैलि कभि नि ह्‍वे छा।</verse>
				<verse number="12">इख तक की जु रूमाल या कपड़ा पौलुस को इस्तेमाल कर्युं रौन्दु छौ जब ऊंतैं बिमारों पर लगये जान्दु छौ, त वु लोग अपणी-अपणी बिमारियों मा बटि खूब ह्‍वे जान्दा छा। इख तक कि जौं लोगु मा खबेस लग्यां रौन्दा छा, ऊ खबेस भि लोगु मा बटि निकळि जान्दा छा।</verse>
				<verse number="13">मगर यहूदियों मा बटि कुछ लोग इन छा जु जग-जगा घूमी के झाड़-फूक कैरिके खबेसों तैं निकळण को काम करदा छा। अर यू लोग इन करण लगि गैनी कि जैमा भि खबेस लग्यूं रौन्दु छौ ऊंकू यीशु को नौ लेके इन बुल्दा छा कि, “जै यीशु को परचार पौलुस करदु, वेका नौ से मि त्वेतै आज्ञा देन्दु कि, ‘निकळ वेमा बटि।’”</verse>
				<verse number="14">अर सिकवा नौ को एक यहूदी मुख्य पुरोहित छौ, जैका सात नौना छा वु भि इन्‍नि काम करदा छा। अर जब ऊ इन कना छा,</verse>
				<verse number="15">त खबेस न ऊं बटि बोलि, “यीशु अर पौलुस तैं मि जणदु छौं, मगर तुम कु छाँ?”</verse>
				<verse number="16">तब वु मनखि जै पर खबेस लग्यूं छौ ऊं पर झपटी अर ऊंतैं अपणा वश मा कैरी दिनी, अर ऊंतैं इन नचै कि वु घैल अर नंगा ह्‍वेके वे घौर बटि भैर भागी गैनी।</verse>
				<verse number="17">अर या बात इफिसुस नगर का सब यहूदी अर यूनानी लोगु तैं पता चलि गै, अर वु लोग भौत जादा डौऽरी गैनी। अर ज्वा बात ह्‍वे छै वां की वजै से प्रभु यीशु की बडै होण लगि गै।</verse>
				<verse number="18">अर भौत सा लोग जौन बिस्वास कैरी, ऊंन सब लोगु का समणि अपणा-अपणा बुरा कामों तैं माणी दिनी, अर सभ्यों तैं बतौण लगि गैनी।</verse>
				<verse number="19">अर जादु-टोंणा करण वळो मा बटि भौत सा लोगु न अपणी-अपणी पोथि-पतरी इकट्‍ठा करिनी, अर सब लोगु का समणि फूकी दिनी। अर जब ऊं पोथि-पतरीयों को हिसाब जुडे़ गै, त ऊंकी कीमत लगभग पचास हजार दिन की ध्याड़ि का बराबर निकळि।</verse>
				<verse number="20">अर इन कैरिके परमेस्वर को वचन और भि जादा तेजी से फैलणु रै, अर मजबूत होणु रै।</verse>
				<verse number="21">अर यों सब बातों का बाद पौलुस न मकिदुनिया अर अखया मुलकों बटि ह्‍वेके यरूशलेम नगर जाण को विचार कैरी, अर वेन अपणा मन मा सोची कि, “वेका बाद त मितैं रोम भि जाण जरुरी च।”</verse>
				<verse number="22">इलै पौलुस न अपणा दुई मददगार लोगु तैं याने की तीमुथियुस अर इरास्तुस तैं पैलि मकिदुनिया मुलक मा भेजि दिनी। अर खुद पौलुस कुछ दिनों खुणि आसिया मुलक मा ही रुक्युं रै।</verse>
				<verse number="23">अर यों ही दिनों मा इफिसुस नगर मा प्रभु का बाटा का बानो दंगा होण लगि गै।</verse>
				<verse number="24">किलैकि इफिसुस नगर मा देमेत्रियुस नौ को एक सुनार रौन्दु छौ, अर वु अरतिमिस देवी खुणि चांदी का मन्दिर बणवौन्दु छौ, अर इन कैरिके उखा कारीगरों तैं फैदा दिलान्दु छौ।</verse>
				<verse number="25">अर वेन इन्‍नि काम करण वळा लोगु तैं, और कारीगरों तैं भि इकट्‍ठा कैरिके बोलि, “हे मेरा भैयों, तुम अच्छी तरौं से जणद्‍यां कि ये काम करण से हमतै कथगा फैदा होन्दु।</verse>
				<verse number="26">अर तुमुन अफि देखि अर सुणी भि च कि ये पौलुस न इफिसुस नगर मा ही ना, मगर आसिया मुलक का लगभग सब नगरों का लोगु तैं भकलैयेलि। अर उ इन बुल्दु, कि हाथों द्‍वारा बणईं मूरत द्‍यबता नि छिन।</verse>
				<verse number="27">अर अगर इन्‍नि होणु रालु, त ईं बात की डौऽर च कि कैन भि हमरा काम तैं आदर-सम्मान नि देण, अर इथगा ही ना बल्किन मा महान अरतिमिस देवी का मन्दिर की सान भि खतम ह्‍वे जाण। अरे, या त वा देवी च जिं की भक्‍ति पूरा आसिया मा, इख तक की पूरि दुनियां का लोग भि करदिन। हे मेरा भैयों वीं की सान-सौकत माटा मा मिली जालि।”</verse>
				<verse number="28">अर देमेत्रियुस सुनार की ईं बात तैं सुणी के वु कारीगर भौत गुस्सा ह्‍वे गैनी अर ऊंन चिल्‍लै के बोलि, “इफिसुस की देवी अरतिमिस ही महान च।”</verse>
				<verse number="29">तब पूरा नगर मा घपरोळ होण लगि गै, अर यों लोगु न मकिदुनिया मुलक का रौण वळा गयुस अर अरिस्तर्खुस तैं पकड़ी दिनी, जु कि पौलुस का दगड़ा मा यात्रा कैरिके इख अयां छा। अर भागी के यों तैं वे घौर मा लि गैनी, जख नाटक होन्दा छा।</verse>
				<verse number="30">अर पौलुस ऊं लोगु का पास जाण चाणु छौ, मगर बिस्वासी लोगु न वेतैं जाणि नि दिनी।</verse>
				<verse number="31">अर आसिया मुलक का कई अधिकारी पौलुस का दगड़्या छा, यों लोगु न वे खुणि रैबार भेजि कि वे घौर मा जैके खतरा मोल नि ले।</verse>
				<verse number="32">अर वे कमरा मा चिल्‍ला-चिल्‍ल मची छै, किलैकि वु लोग भरम मा छा, कुछ लोग एक बात बोन्‍ना छा अर कुछ लोग दुसरि ही बात। अर ऊं मदि भौत सा इन छा जौं तैं त इन भि पता नि छौ, कि आखिर हम इख अयां किलै छां।</verse>
				<verse number="33">अर वीं भीड़ मा बटि कुछ यहूदियों न सिकन्दर तैं अगनै कैरी, तब वेन अपणा हाथ बटि लोगु तैं चुप होण कू इसारा कैरी, अर लोगु मा कुछ बोन्‍न चै।</verse>
				<verse number="34">मगर जब भीड़ का लोगु तैं इन पता चलि कि यू एक यहूदी मनखि च, त वु सभ्या का सभि लगभग दुई घन्टा तक इन बोलि के चिल्‍लाणा रैनी, “इफिसुस की अरतिमिस देवी, महान च।”</verse>
				<verse number="35">तब आखिर मा वे नगर का अधिकारी न ऊं लोगु तैं चुप करै। अर बोलि, “मेरा इफिसुस नगर का भै-बैंणो, कु नि जणदु कि हम इफिसुस नगर का लोग महान देवी अरतिमिस का मन्दिर, अर आसमान बटि वेकी पोड़ि मूरत की रखवळी करद्‍यां।</verse>
				<verse number="36">अर यों बातों तैं कुई नकारी नि सकदु, इलै चुप रा अर जल्दबाजी मा कुई भि कदम नि उठा।</verse>
				<verse number="37">किलैकि तुम इन्द्रया मनखियों तैं पकड़ी के लेके ऐ ग्यां, जौं लोगु न नऽ त मन्दिर मा लूट कैरी, अर ना हमरि देवी का खिलाप मा गळत बात बोलि।</verse>
				<verse number="38">अर अगर जु देमेत्रियुस अर वेका कारीगरों तैं यों मनखियों का खिलाप मा कुई सिकैत करण होलि, त अदालत खुलिं छिन अर ऊंमा जज भि छिन, वु जा अर जैके एक-दुसरा पर दोष लगा।</verse>
				<verse number="39">अर अगर तुम कैं और बात का बारा मा ऊं बटि कुछ पूछण चन्द्‍यां, त वीं बात को फैसला नियम का मुताबिक पंचै चौक मा किये जालु।</verse>
				<verse number="40">अर आज का ये दंगा का खातिर हम पर रोमी सरकार का द्‍वारा आरोप लगण की डौऽर च, किलैकि यों सब बातों को कुई मतलब नि च। अर अगर रोमी सरकार हम बटि कुई जबाब मंगली, त मिन ऊंतैं क्या जबाब देण।”</verse>
				<verse number="41">अर इन बोलि के वेन सभा तैं खारिज कैरी दिनी।</verse>
			</chapter>
			<chapter number="20">
				<verse number="1">अर जब इफिसुस नगर को माहौल जरा शान्त ह्‍वे गै, त पौलुस न बिस्वासी लोगु तैं बुलै अर ऊंकी हिम्मत बढै, अर तब ऊं बटि विदै लेके मकिदुनिया मुलक कू जाण लगि गै।</verse>
				<verse number="2">अर वे पूरा मुलक मा जान्द दौं वेन प्रभु का भौत सा वचनों का द्‍वारा बिस्वासी लोगु की हिम्मत बढै, अर तब पौलुस इख बटि निकळि के यूनान देस कू चलि गै।</verse>
				<verse number="3">अर यूनान देस मा पौंछी के पौलुस तीन मैना तक उखि रै। अर जब वु उख बटि पाणि का जाज को सफर शुरु कैरिके सीरिया मुलक कू जाण वळु छौ, त वेतैं पता चलि गै कि यहूदी लोगु न वेका खिलाप मा जाळसाजि कैरियाली, इलै वेन मकिदुनिया मुलक बटि ही वापिस जाण को विचार बणै दिनी।</verse>
				<verse number="4">अर इन ह्‍वे कि जब पौलुस न अपणी यात्रा शुरु कैरी, त वेका दगड़ा मा बिरीया नगर को पुरूर्स को नौनु सोपत्रुस, अर थिस्सलुनीकी नगर को अरिस्तर्खुस अर सिकुन्दुस, अर दिरबे नगर को गयुस, अर आसिया मुलक को तुखिकुस अर त्रुफिमुस छा, अर ऊंका दगड़ा मा तीमुथियुस भि छौ। अर यों न आसिया मुलक तक वेका दगड़ा मा यात्रा कैरी।</verse>
				<verse number="5">मगर यू भै लोग हम से पैलि त्रोआस नगर मा पौंछी गै छा, अर उख ऊंन हमरु इंतजार कैरी।</verse>
				<verse number="6">अर अखमीरी रुट्‍टी का त्योवार का बाद हम फिलिप्पी नगर बटि पाणि का जाज मा बैठि के पांच दिनों का बाद त्रोआस नगर मा पौंछयां, अर सात दिनों तक उखि रयां।</verse>
				<verse number="7">अर जब हम त्रोआस नगर मा छा, त हप्‍ता का पैला दिन पर इन ह्‍वे कि हम बिस्वासी लोगु का दगड़ा मा प्रभु-भोज खुणि इकट्‍ठा होयां छा। अर पौलुस लोगु तैं उपदेस देण लगि गै किलैकि दुसरा दिन वेतैं उख बटि जाण छौ, इलै अधि राति तक उ उपदेस देणु रै।</verse>
				<verse number="8">अर हम सब तीमंजिल मा इकट्‍ठा होयां छा अर उख भौत सा द्‍यू बळयां छा।</verse>
				<verse number="9">अर यूतुखुस नौ को एक ज्वान मनखि खिड़की मा बैठयूं छौ। अर वेतैं निन्दया टोळा औण लगि गैनी, किलैकि पौलुस भौत देर तक बोन्‍न पर लग्यूं छौ, अर निन्द गैरी होण की वजै से वु तीमंजिल बटि मूड़ी पोड़ि गै। तब लोगु न मूड़ी जैके वेतैं उठे मगर तबरि तक उ मोरि गै छौ।</verse>
				<verse number="10">तब पौलुस मुड़ि गै अर झुकि के वेतैं गौळा लगै, अर ऊं लोगु कू बोलि, “घबरा ना, किलैकि अब वु ज्यून्द च।”</verse>
				<verse number="11">तब ऊ मथि गै, अर जैके पौलुस न ऊंका दगड़ा मा रुट्‍टी तोड़ि अर खै। अर फिर उ ऊंका दगड़ा मा बात करण लगि गै, अर इथगा देर तक बात कैरी कि रात खुलण लगि गै। तब पौलुस ऊं लोगु बटि विदै लेके उख बटि चलि गै।</verse>
				<verse number="12">अर वु लोग वे ज्वान नौना तैं ज्यून्द ही वेका घौर तक लि गैनी, इलै इन कैरिके ऊं लोग तैं बड़ु चैन मिली।</verse>
				<verse number="13">अर इन योजना बणयै गै, कि हम लोग पैलि निकळि के असुस्स नगर कू पाणि का जाज से चलि जां, अर भै पौलुस हमतै सीदा अस्सुस नगर मा ही मिललु। अर जब उ अस्सुस नगर मा पौंछी जालु, त हम वेसे मिली के उख बटि अगनै दगड़ा-दगड़ि निकळि जां। अर या योजना इन इलै बणयै गै, किलैकि भै पौलुस अपणी इच्छा से अस्सुस तक पैदल ही औण चाणु छौ।</verse>
				<verse number="14">अर जब पौलुस भै हम बटि असुस्स नगर मा मिली, तब हम वेतैं लेके मितेलेने नगर कू चलि ग्यां।</verse>
				<verse number="15">अर उख पौंछण का बाद, हम लोग दुसरा दिन उख बटि निकळि के पाणि का जाज का द्‍वारा खियुस टापू का पास एक जगा पौंछयां, अर वेका दुसरा दिन सामुस टापू मा पौंछयां। अर वेका बाद हम लोग मिलेतुस नगर मा ऐ ग्यां।</verse>
				<verse number="16">पौलुस पिन्तेकुस्त का त्योवार तैं मनौण का बानो जथगा जल्दी ह्‍वे सकदु छौ यरूशलेम नगर कू जाण चाणु छौ, इलै वेन इन ठाणि की इफिसुस नगर का पास बटि ह्‍वेके चलि जौ, ताकि आसिया मुलक मा वेतैं जादा बगत नि लगु।</verse>
				<verse number="17">तब पौलुस न मिलेतुस नगर बटि इफिसुस नगर का बिस्वासी समुदाय का अध्यक्षों खुणि रैबार भेजि, कि तुम इख ऐ जा।</verse>
				<verse number="18">अर जब इफिसुस नगर का बिस्वासी समुदाय का अध्यक्ष पौलुस का पास ऐनी। तब वेन ऊंकू बोलि, “सुणा, जब मि पैलि-पैलि बार आसिया मुलक मा ऐ छौ, त वे दिन बटि ही लेके मि तुमरा बीच मा हमेसा कै तरीके से रौंऽऽ, येका बारा मा तुम सब अच्छी तरौं से जणद्‍यां छाँ।</verse>
				<verse number="19">अर यहूदी लोगु की जाळसाजि का द्‍वारा मितैं भौत दुख मिली, अर मिन रुवे-रुवे के अपणा दिन कटिनी, मगर फिर भि मि प्रभु की सेवा कनु रौंऽऽ, अर मिन अपणा सभौ तैं नमर बणै के रखी।</verse>
				<verse number="20">अर तुम जणदा ही छाँ, कि ज्वा-ज्वा बात तुम लोगु का फैदा की छै, वु सब बात तुमतै बतौणु खुणि मि कभि झिझकी नि छौं। अर लोगु का समणि अर घौर-घौर जैके ऊं बातों तैं सिखै।</verse>
				<verse number="21">अर मिन यहूदी अर यूनानी लोगु का बीच मा जैके परमेस्वर का समणि पस्ताप करण का बारा मा, अर हमरा प्रभु यीशु मसीह पर बिस्वास करण का बारा मा ऊंतैं बतै।</verse>
				<verse number="22">पर सुणा, अब मि पवित्र आत्मा की आज्ञा का मुताबिक यरूशलेम नगर कू जाणु छौं, अर मितैं पता नि च कि उख मेरा दगड़ा मा क्या-क्या होण,</verse>
				<verse number="23">अर पवित्र आत्मा न मितैं इन चितैयाली, कि पौलुस हरेक नगर मा त्वेतै कैद मा रौण पोड़लु अर दुख-तकलीफ सौण पोड़लि।</verse>
				<verse number="24">मगर मितैं अपणी जान की भि कुई परवा नि च, ताकि जै काम की शुरुवात मिन कैरी अर जु काम प्रभु यीशु न मि मा सौंपी वेतैं मि पूरु कैरुं, याने कि मि परमेस्वर की किरपा को शुभ समाचार लोगु तैं बतै सैकु।</verse>
				<verse number="25">पर सुणा, मि जणदु छौं कि तुम लोग जौं का बीच मा मिन परमेस्वर का राज को परचार कैरी, अब से तुमुन मितैं फिर नि दिखण।</verse>
				<verse number="26">इलै आज का दिन मि ईं बात की घोसणा कैरिके बुल्दु, कि अगर तुम मा बटि कुई मनखि प्रभु तैं स्वीकार नि करलु अर वेको नास ह्‍वे जालु, त वेको जबाबदार मि नि छौं।</verse>
				<verse number="27">किलैकि परमेस्वर की ज्वा योजना तुम खुणि च वा तुमतै बतौण मा मितैं जरा भि झिझक नि लगि।</verse>
				<verse number="28">इलै अपणी अर अपणा बिस्वासी समुदाय की देख-रेख ढंगल कैरा, किलैकि पवित्र आत्मा न तुमतै यां खुणि ही ठैर्युं च, ताकि तुम परमेस्वर का समुदाय की देख-रेख अच्छे से कैरी सैका, जै समुदाय तैं प्रभु न अपणु बलिदान देके खरीदयाली।</verse>
				<verse number="29">अर मि जणदु छौं कि, मेरा जाण का बाद लोग खतरनाक भेड़िया का जन तुमरा बीच मा आला, अर गळत शिक्षा देके बिस्वासी समुदाय तैं भरमै द्‍याला।</verse>
				<verse number="30">इख तक कि, तुम लोगु मा बटि ही कुछ लोग इन निकळळा, जु कि अपणी गळत शिक्षा देके, बिस्वासी लोगु तैं भि अपणा दगड़ा मा कैरी द्‍याला।</verse>
				<verse number="31">इलै चौकस रा, अर ईं बात तैं याद रखा कि मिन तीन सालों तक दिन-रात रुवे-रुवे के हरेक तैं चितौण कभि नि छोड़ि।</verse>
				<verse number="32">अर अब मि तुमतै परमेस्वर का सुपुर्द कैरी देन्दु, अर वेकी बड़ी किरपा का वचन तैं लगातार याद करण कू बुल्दु, अर वु ही वचन तुमतै बिस्वास मा मजबूत बणै सकदु, अर जौं लोगु तैं परमेस्वर न पवित्र बणयूं च ऊं लोगु तैं यू वचन ही वारिस होण को अधिकार दे सकदु।</verse>
				<verse number="33">अर मिन कभि भि कै का सोना-चांदी या कपड़ों को लालच नि कैरी।</verse>
				<verse number="34">अर तुम लोग त जणदा ही छाँ, कि मिन मेहनत कैरिके अपणु अर अपणा दगड़्यों की सब जरुरतों तैं पूरु कैरी।</verse>
				<verse number="35">मिन तुमतै सब कुछ कैरिके दिखै, मिन दिखै कि कनकै मेहनत करदिन, अर कनकै जरुरतमन्दों की मदद करदिन। अर प्रभु यीशु की बात याद रखण चयेणी, वेन बोलि छौ कि, ‘लेण वळु से जादा देण वळु धन्य च।’”</verse>
				<verse number="36">अर यू सब बोन्‍न का बाद पौलुस न अपणा घुंडा टिकनी, अर ऊं सभ्यों का दगड़ा मा मिली के प्रार्थना कैरी।</verse>
				<verse number="37">अर प्रार्थना खतम होण का बाद इन ह्‍वे, कि ज्वा बात पौलुस न बोलि छै कि अब से तुमुन मितैं फिर नि दिखण, ईं बात तैं याद कैरिके ऊ सब लोग भौत जादा दुखी छा। तब ऊंन पौलुस तैं गौळा लगै अर रुंण लगि गैनी, अर वेकी भूकि पीण लगि गैनी। अर येका बाद ऊ वेतैं छुड़णु खुणि जाज का पास तक ऐनी।</verse>
				<verse number="38"></verse>
			</chapter>
			<chapter number="21">
				<verse number="1">अर बिस्वासी समुदाय का अध्यक्ष लोगु बटि विदै लेण का बाद हमुन पाणि का जाज मा बैठि के अपणी यात्रा फिर से शुरु कैरी, अर उख बटि सीदा कोस टापू पर पौंछयां। अर इख बटि दुसरा दिन निकळि के हम लोग रुदुस टापू मा अयां, अर इख बटि पतरा नगर मा पौंछयां।</verse>
				<verse number="2">अर इख हमतै एक जाज मिली, जु की फीनीके मुलक कू जाणु छौ, अर हम वे जाज मा बैठि ग्यां तब हमुन पाणि का ये जाज से अपणी यात्रा शुरु कैरी।</verse>
				<verse number="3">अर जब हम जाणा छा, त अधा बाटा मा हमतै साइप्रस टापू दिखै जु की हमरा बैं तरफा छौ। मगर हम उख नि ग्यां, बल्किन मा सीरिया देस की तरफा चलदि ग्यां अर सूर नगर मा उतरि ग्यां, किलैकि जाज को समान इख उतरण छौ।</verse>
				<verse number="4">अर इख हमतै कुछ बिस्वासी लोग मिलिनी, अर हम ऊंका दगड़ा मा सात दिनों तक उखि रयां। अर पवित्र आत्मा का द्‍वारा ऊं लोगु न पौलुस कू बोलि कि तुम यरूशलेम नगर कू नि जयां।</verse>
				<verse number="5">अर उख सात दिन रौण का बाद हम उख बटि जाण लगि ग्यां, तब उखा सब बिस्वासी लोग, अपणी जनानियों अर बच्‍चों समेत हमतै छुड़णु कू नगर का भैर तक ऐनी, अर वे समुन्दर का छाला पर हमुन घुंडा टेकी के प्रार्थना कैरी।</verse>
				<verse number="6">तब हमुन एक-दुसरा बटि मिली के विदै लिनी, अर नाव मा बैठि ग्यां। अर वु सब लोग अपणा-अपणा घौर चलि गैनी।</verse>
				<verse number="7">अर जब हम सूर नगर बटि निकळि के पतुलिमयिस नगर पौंछयां, त हमरि समुन्दर की या यात्रा भि पूरि ह्‍वे गै। अर ये पतुलिमयिस नगर मा हमुन बिस्वासी भै-बैंणो का दगड़ा मा मुलाकात कैरी अर इख एक दिन तक रुक्यां रयां।</verse>
				<verse number="8">अर दुसरा दिन हम उख बटि कैसरिया नगर मा पौंछयां अर उख हम शुभ समाचार को परचार करण वळा फिलिप्पुस भै बटि मिल्यां, अर वेका घौर मा रयां, अर यू खास चेला लोगु की मदद करण खुणि चुण्यां सात बिस्वासी लोगु मा बटि एक छौ।</verse>
				<verse number="9">अर वेकी चार कुंवारी नौनि छै जु कि भविष्यबाणी करदी छै।</verse>
				<verse number="10">अर हम लोग इख कई दिनों तक रयां, तब यहूदिया मुलक बटि परमेस्वर को एक रैबर्या ऐ जैको नौ अगबुस छौ।</verse>
				<verse number="11">अर उ हमरा पास ऐ अर वेन पौलुस को पठुगु लिनी अर अपणा हाथ-खुटा बान्धि के बोलि, “पवित्र आत्मा इन बुल्दु कि, ‘जै मनखि को यू पठुगु च, वेतैं यरूशलेम नगर मा यहूदी लोग इन्‍नि बन्धला, अर ऊं लोगु का सुपुर्द कैरी द्‍याला जु लोग यहूदी जाति का नि छिन।’”</verse>
				<verse number="12">अर जब हम लोगु न या बात सुणी, त हमुन अर उखा लोगु न पौलुस बटि बिन्ती कैरी कि यरूशलेम नगर कू नि जा।</verse>
				<verse number="13">मगर पौलुस न ऊंकू बोलि, “तुम रुवे-रुवे के मेरु हौसला किलै कम कना छाँ? मेरी बात को यकीन कैरा, मि प्रभु यीशु का नौ का खातिर यरूशलेम नगर मा बन्धी बणणु खुणि ही ना, बल्किन मा मुरण खुणि भि तयार छौं।”</verse>
				<verse number="14">अर जब हम लोग पौलुस तैं नि मणै सैकी, त हम इन बोलि के चुप ह्‍वे ग्यां कि, “प्रभु की मनसा पूरि हो।”</verse>
				<verse number="15">अर कुछ दिन रौण का बाद हमुन तयारी कैरी, अर फिर यरूशलेम नगर कू निकळ्यां।</verse>
				<verse number="16">अर कैसरिया नगर बटि कुछ बिस्वासी लोग भि हमरा दगड़ा मा ऐनी, अर वु हमतै साइप्रस टापू का एक पुरणा बिस्वासी का इख लि गैनी, जैको नौ मनासोन छौ अर हम इखि रयां।</verse>
				<verse number="17">अर जब हम यरूशलेम नगर मा पौंछयां, त उखा बिस्वासी भै-बैंणो न हमतै बड़ा आनन्द से स्वीकार कैरी।</verse>
				<verse number="18">अर वेका दुसरा दिन पौलुस अर हम सभ्या का सभि याकूब का घौर ग्यां, अर उख बिस्वासी समुदाय का सब अध्यक्ष इकट्‍ठा होयां छा।</verse>
				<verse number="19">तब पौलुस न ऊंतैं सलाम बोलि, अर ऊं सब कामों का बारा मा बतै, जु परमेस्वर न वेका द्‍वारा ऊं लोगु का बीच मा करिनी जु यहूदी जाति का नि छा।</verse>
				<verse number="20">अर यों बातों तैं सुणी के अध्यक्ष लोगु न परमेस्वर की बडै कैरी। तब ऊंन वेकू बोलि, “पौलुस भै, क्या तुमतै पता च, कि यहूदियों मा बटि भौत सरा लोगु न बिस्वास कैरी, पर वु लोग इन सोचदिन कि मूसा का नियम-कानूनों तैं मनण भौत जरुरी च।</verse>
				<verse number="21">अर ऊंतैं तेरा बारा मा इन बतये गै, कि जु यहूदी लोग ऊं लोगु का बीच मा रौनदिन जु यहूदी जाति का नि छिन तू ऊंतैं इन सिखौन्दी, कि तुम लोग मूसा का दियां नियम-कानूनों तैं नि माणा। अर ना ही खतना का रिवाज तैं अपणा-अपणा नौनो खुणि पूरा कैरा, अर ना ही अपणा रीति-रिवाजों तैं माणा।</verse>
				<verse number="22">अर ईं बात का बारा मा त लोगु तैं पता चलि जाण, कि तू इख अईं छैई अब बतौ हम क्या कैरा?</verse>
				<verse number="23">इलै जन हम त्वेकू बुल्द्‍यां तू उन्‍नि कैर, सुण, इख हमरा चार आदिम छिन जौं की मन्‍नत मंगी च।</verse>
				<verse number="24">अर यों लोगु तैं अपणा दगड़ा मन्दिर मा लि जा, अर ऊंका दगड़ा मा शुद्धिकरण का रीति-रिवाजों तैं पूरु कैर, अर ऊंको मुण्ड़न करौण को खर्च-पाणि भि तू ही उठे। अर इन देखि के सब लोग जाणि जाला, कि जु बात तेरा बारा मा बतये गैनी, वु सब झूठ्‍ठी छै। अर इन करण से ऊंतैं इन पता चलि जालु, कि तू भि नियम-कानूनों का मुताबिक चलदि।</verse>
				<verse number="25">अर जख तक ऊं बिस्वासी लोगु की बात च जु यहूदी जाति का नि छिन हमुन अपणु फैसला कैरिके ऊंतैं चिठ्‍ठी मा लिखी के भेजियालि, कि ऊ मूरतों का अगनै बलि करीं चीजों से, अर जानबरों का ल्वे तैं खाण-पीण से, अर गौळु दबै के मुरयां जानबरों की सिकार खाण से, अर गळत सम्बन्ध बणौण से भि दूर रा।”</verse>
				<verse number="26">अर फिर दुसरा दिन पौलुस ऊं चार आदमियों तैं अफ दगड़ा लि गै। अर शुद्धिकरण का रीति-रिवाज पूरा करण का बाद मन्दिर मा गै, अर उख वेन बतै कि शुद्ध होण का दिन कब पूरा होला, अर हम मा बटि हरेक खुणि कब बलिदान चड़ये जालु।</verse>
				<verse number="27">अर जब शुद्धिकरण का सात दिन पूरा होण वळा छा, त आसिया मुलक का कुछ यहूदी लोगु न पौलुस तैं मन्दिर मा देखि। अर ऊंन भीड़ का लोगु तैं पौलुस का खिलाप मा उकसै, अर वेतैं पकड़ी दिनी।</verse>
				<verse number="28">अर चिल्‍लै के बोलि, “हे इस्राएली लोगु, ये मनखि तैं सजा देण मा हमरि मदद कैरा, किलैकि यू उई आदिम च जु हमरा लोगु का खिलाप मा, नियम-कानूनों अर हमरा मन्दिर का खिलाप मा, सब जगा का लोगु तैं शिक्षा देन्दु, इख तक की यूनानी लोगु तैं मन्दिर मा लेके येन ईं पवित्र जगा तैं भि अशुद्ध कैरियाली।”</verse>
				<verse number="29">अर ऊं लोगु न इन इलै बोलि, किलैकि यों लोगु न पैलि इफिसुस नगर का त्रुफिमुस भै तैं नगर मा पौलुस का दगड़ा मा देखि छौ, इलै ऊंन समझि की पौलुस वेतैं भि मन्दिर मा लेके ऐ गै।</verse>
				<verse number="30">तब पूरा नगर का लोग भड़की गैनी, अर मन्दिर की तरफा भागी के इकट्‍ठा ह्‍वेनि। तब ऊंन पौलुस तैं पकड़ी अर खिखोड़ी-खिखोड़ी के मन्दिर बटि भैर निकळि अर तुरन्त द्‍वार बन्द कैरी दिनी।</verse>
				<verse number="31">अर वु लोग पौलुस तैं मरण चान्दा छा। मगर रोमी पलटण का सेनापति तैं पता चलि गै कि, यरूशलेम नगर मा घपरोळ होणु च।</verse>
				<verse number="32">तब उ तुरन्त सिपयों तैं अर कुछ सुबेदारों तैं लेके मूड़ी नगर मा ऊंका पास भागी के ऐ। अर जब लोगु न पलटण का सेनापति अर सिपयों तैं देखि, त ऊंन पौलुस तैं पीटण छोड़ि दिनी।</verse>
				<verse number="33">तब सेनापति पौलुस का पास ऐ, अर वेन वेतैं पकड़ण को अर बेड़ियों मा बन्धण को आदेस दिनी। तब वेन पूछी, “कु च यू अर क्या कैरी येन?”</verse>
				<verse number="34">तब भीड़ का लोगु मा चिल्‍ला-चिल्‍ल मची गै अर ऊंन अलग-अलग बात बोलि, अर इन होण की वजै से वेतैं सच्‍चै को पता नि चल पै, इलै वेन अपणा सिपयों तैं हुकम दिनी कि येतैं किला मा लेके चला।</verse>
				<verse number="35">अर जब सिपै वेतैं लि जाणा छा, त एक बड़ी भीड़ ऊंका पिछनै-पिछनै सिड़ीयों तक ऐ। अर ऊंन चिल्‍लै-चिल्‍लै के बोलि, “येतैं जान से मार द्‍या, येतैं जान से मार द्‍या।” इलै ये दंगा का बाना सिपै लोग पौलुस तैं उठे के लि गैनी।</verse>
				<verse number="36"></verse>
				<verse number="37">अर जब सिपै लोग पौलुस तैं किला का भितर लि जाणा छा, त वेन पलटण का सेनापति कू यूनानी भाषा मा बोलि, “साब, क्या मि कुछ बोलि सकदु छौं?” सेनापति न बोलि, “तू यूनानी भाषा जणदी छैई?</verse>
				<verse number="38">अरे तू त उई मिस्री छैई, जैन कुछ दिन पैलि दंगा कैरी छौ, अर चार हजार लोगु तैं निर्जन जगा मा लि जैके मारी दिनी, क्या तू उई नि छैई?”</verse>
				<verse number="39">तब पौलुस न बोलि, “असल मा साब, मि एक यहूदी नागरिक छौं, अर किलिकिया मुलक का जाणा-माणा नगर तरसुस को वासी छौं। अर मि तुम से बिन्ती करदु, कि मितैं यों लोगु का दगड़ा मा बात करण की इजाजत दे द्‍या।”</verse>
				<verse number="40">अर जब पौलुस तैं इजाजत मिली गै, त वु सिड़ीयों मा खड़ु ह्‍वे अर वेन अपणा हाथळ इसारा कैरी, अर सब लोग चुप ह्‍वे गैनी। तब उ इब्रानी भाषा मा ऊं लोगु का दगड़ा मा बात करण लगि गै।</verse>
			</chapter>
			<chapter number="22">
				<verse number="1">अर पौलुस न ऊंकू बोलि, “हे मेरा भै-बैंणो अर बुजुर्ग लोगु, अब मि अपणा बचाव मा तुमरा समणि कुछ बोन्‍न चाणु छौं।”</verse>
				<verse number="2">अर जब लोगु न पौलुस तैं इब्रानी भाषा मा बुल्द सुणी, त ऊ लोग एकदम संट ह्‍वे गैनी। अर वेन ऊंकू इन बोलि कि:</verse>
				<verse number="3">“मि एक यहूदी जाति को मनखि छौं। मेरी पैदेस त किलिकिया मुलक का तरसुस नगर मा ह्‍वे, अर ये यरूशलेम नगर मा मेरु पालन-पोसण ह्‍वे। अर पितरों का नियम-कानूनों की शिक्षा मितैं गमलीएल गुरुजी बटि बड़ी सख्‍तै से मिली। अर मि मा भि परमेस्वर खुणि जोस छौ, जन की तुम सब लोगु मा च।</verse>
				<verse number="4">“अर मिन यीशु पर बिस्वास करण वळा लोगु तैं भौत सतै, इख तक कि भौतों तैं मार भि दिनी, इख तक कि भौत सि जनानियों अर बैखों तैं बन्धी बणै के जेलखाना मा डलवै दिनी।</verse>
				<verse number="5">अर ईं बात का गवा महा पुरोहित अर सब अध्यक्ष लोग छिन। अर एक दिन इन ह्‍वे कि, मिन महा पुरोहित अर अध्यक्ष लोगु बटि बिस्वासी भै-बैंणो का नौ की चिठ्‍ठी ले, अर दमिश्क नगर मा ऊंका पास जाणु छौ, ताकि उख बटि लोगु तैं बन्धी बणै के इख यरूशलेम नगर मा लौं, अर ऊंतैं दण्ड दिलौं।</verse>
				<verse number="6">अर जब मि दमिश्क नगर का नजदीक पौंछु, त वे दुफरा मा अचानक आसमान बटि एक उज्याळु मेरा चौतरफि चमकण लगि गै,</verse>
				<verse number="7">अर मि भ्वीं मा फरके ग्यों तब एक आवाज न मिकू बोलि, ‘हे शाऊल, तू मितैं किलै सतौणी छैई?’</verse>
				<verse number="8">तब मिन पूछी, ‘प्रभु, तुम कु छाँ?’ अर वेन मितैं बतै कि, ‘मि नासरत गौं यीशु छौं, जैतैं तू सतौणी छैई।’</verse>
				<verse number="9">अर मेरा दगड़्यों न उज्याळु त देखि, पर जु मेरा दगड़ा मा बोन्‍नु छौ वा आवाज ऊंतैं नि सुणै।</verse>
				<verse number="10">“तब मिन बोलि, ‘हे प्रभु अब मि क्या कैरुं?’ प्रभु न मिकू बोलि, ‘खड़ु हो अर दमिश्क नगर कू जा, अर जु काम तेरा करणु खुणि रख्युं च, वु सब त्वेतै उखि बतये जालु।’</verse>
				<verse number="11">अर वीं दिब्य चमक का बाना मितैं कुछ नि दिखै, इलै जु मेरा दगड़ा मा छा ऊंन मेरु हाथ पकड़ी अर मितैं दमिश्क नगर कू लि गैनी।</verse>
				<verse number="12">“दमिश्क नगर मा हनन्याह नौ को एक आदिम छौ, जु की परमेस्वर का नियम-कानून का मुताबिक चलण वळु एक धरमी मनखि छौ। अर उखा यहूदी लोग वेकी भौत तारीफ करदा छा।</verse>
				<verse number="13">अर उ मनखि मेरा पास ऐके खड़ु ह्‍वे अर वेन बोलि, ‘शाऊल भै तू फिर से दिखण लगि जा,’ अर पता, उबरि मेरा आंख खुलि गैनी अर मिन वेतैं देखि।</verse>
				<verse number="14">वेन मिकू बोलि, ‘हमरा पितरों का परमेस्वर न त्वेतै पैलि बटि चुण्यालि छौ, ताकि तू वेकी मनसा अर बातों तैं जाणि सैकी, अर वे धरमी मनखि तैं देखि सैकी,</verse>
				<verse number="15">किलैकि जु तिन देखि अर सुणी च, ऊं सब बातों की गवै तू लोगु का समणि दिलै।</verse>
				<verse number="16">इलै अब कैं बात की देर? चड़म खड़ु उठा, अर बपतिस्मा ल्या, अर यीशु को नौ लेके अपणा पापों तैं ध्वे द्‍या।’</verse>
				<verse number="17">“हे मेरा भै-बैंणो, जब मि यरूशलेम नगर मा वापिस ऐके मन्दिर मा प्रार्थना कनु छौ, त वे बगत मि अपणी सुद मा नि छौ।</verse>
				<verse number="18">तब मिन प्रभु की दिब्य चमक देखि अर वेतैं इन बुल्द सुणी, ‘हे शाऊल, तू यरूशलेम नगर बटि निकळि के जल्दी चलि जा, किलैकि यों लोगु न मेरा बारा मा तेरी गवै तैं स्वीकार नि करण।’</verse>
				<verse number="19">अर मिन बोलि, ‘प्रभु ऊ लोग त खुद ही जणदिन, कि तुम पर बिस्वास करण वळा लोगु तैं मिन प्रार्थना भवनों मा जै-जैके पिटवै अर जेलखाना मा डलवै,</verse>
				<verse number="20">अर जब तुमरा गवा स्तिफनुस तैं जान से मरे जाणु छौ, त वे बगत मि भि उखि खड़ु होयुं छौ। अर ऊं लोगु का कपड़ों की देख-रेख कनु छौ, जौन वेकी हत्या कैरी, हाँ, प्रभु वामा मेरु हाथ भि छौ।’</verse>
				<verse number="21">अर प्रभु न मिकू बोलि, ‘पौलुस, तू जा, किलैकि मि त्वेतै भौत दूर तक, ऊं लोगु का बीच मा भेजलु जु लोग यहूदी जाति का नि छिन।’”</verse>
				<verse number="22">अर भीड़ का लोग अभि तक यों सब बातों तैं सुनणा रैनी, मगर जन्‍नि ऊंन ईं बात तैं सुणी त जोर-जोर से चिल्‍लै के बोलि, “इन्द्रया आदिम तैं त जान से मारी द्‍या, किलैकि यू ईं धरती पर ज्यून्दु रौण का लैख नि च।”</verse>
				<verse number="23">तब अपणु गुस्सा दिखौणु खुणि लोगु न अपणा-अपणा चोळों तैं फाड़ी, अर माटु उठे के उड़ौण लगि गैनी, अर जोर-जोर से चिल्‍लाण लगि गैनी,</verse>
				<verse number="24">तब पलटण का सेनापति न हुकम दिनी कि, “येतैं किला का भितर लि जा अर कोड़ा मारी के पूछताछ कैरा, ताकि मितैं इन पता चलि जौ कि आखिर मा यू लोग येका खिलाप मा किलै चिल्‍लाणा छिन।”</verse>
				<verse number="25">मगर जब सिपै पौलुस तैं कोड़ा मरणु खुणि चमड़ा का ज्यूड़ोळ बान्धि, त पौलुस न उखम खड़ा सुबेदार कू बोलि, “साब, एक बात बता अगर कुई रोमी नागरिक जैको अपराध सिद्ध नि ह्‍वे हो, त क्या या बात नियम का मुताबिक सही च?”</verse>
				<verse number="26">अर या बात सुणी के सुबेदार न पलटण का सेनापति मा जैके बोलि, “साब, यू तुम क्या कना छाँ? अरे यू त एक रोमी नागरिक च।”</verse>
				<verse number="27">तब पलटण का सेनापति न पौलुस का पास ऐके पूछी, “मितैं इन बतौ, कि क्या तू सच्‍चि मा एक रोमी नागरिक छैई?” वेन बोलि, “हाँ, मि छौं।”</verse>
				<verse number="28">तब पलटण का सेनापति न बोलि, “अरे, मितैं त रोमी नागरिकता भौत रुपया देके मिली च।” पर पौलुस न बोलि, “साब, मि त जनम से ही रोमी छौं।”</verse>
				<verse number="29">इलै जु लोग वेतैं पूछताछ कैरिके कोड़ा मरण वळा छा, वु सब पिछनै हटि गैनी। अर पलटण को सेनापति भि ईं बात तैं जाणि के भौत डौऽरी गै, कि मिन एक रोमी मनखि तैं बन्धी बणै के रख्युं च।</verse>
				<verse number="30">अर पलटण को सेनापति ईं बात तैं अच्छे से जनण चाणु छौ, कि आखिर मा यहूदी लोग ये पर दोष किलै लगौण छिन। इलै वेन दुसरा दिन पौलुस की बेड़ियों तैं खोली दिनी, अर मुख्य पुरोहितों अर यहूदी लोगु की न्याय समिति का सब लोगु तैं इकट्‍ठा होण को आदेस दिनी। तब पौलुस तैं किला बटि मूड़ी यों लोगु का समणि लये गै।</verse>
			</chapter>
			<chapter number="23">
				<verse number="1">अर जब पौलुस लोगु का समणि मूड़ी ऐ, त पौलुस न वीं सभा का लोगु जनै टक लगै के देखि अर बोलि, “हे मेरा भैयों, मिन आज तक परमेस्वर का समणि सच्‍चा मनळ अपणु जीवन बितै।”</verse>
				<verse number="2">तब महा पुरोहित हनन्याह न पौलुस का पास खड़ा लोगु तैं आज्ञा दिनी, “वे पर थप्पड मारा।”</verse>
				<verse number="3">तब पौलुस न वेकू बोलि, “परमेस्वर तुमतै यां को दण्ड जरुर द्‍यालु, सुणा, तुम त चुना पूथिं दिवाल का जन छाँ, किलैकि तुम नियम-कानून का आधार पर मेरु न्याय करणु खुणि बैठयां छाँ, पर वे ही नियम-कानून का खिलाप मा जैके मितैं मरण को आदेस भि दिणा छाँ।”</verse>
				<verse number="4">अर जु लोग पौलुस का पास मा खड़ा होयां छा ऊंन बोलि, “हे, क्या तू परमेस्वर का महा पुरोहित की बेजती कनि छैई?”</verse>
				<verse number="5">अर वेन बोलि, “अरे भैयों, मितैं पता नि छौ कि यू महा पुरोहित छिन, निथर मि इन नि बुल्दु। किलैकि पवित्रशास्‍त्र मा इन लिख्यूं च कि, “तुम लोग अपणा अधिकारीयों खुणि, भलु-बुरु नि बुलयां।”</verse>
				<verse number="6">अर पौलुस तैं ईं बात को पता चलि गै कि इख यहूदी लोगु को न्याय करण वळा लोगु का दुई दल जमा होयां छिन फरीसी अर सदूकी। तब वेन ऊँची मा बोलि, “हे मेरा भैयों, मि फरीसियों का वंश मदि छौं। अर मि मुरदो मा बटि ज्यून्द होण की आस रखदु, अर ईं बात का बानो मि पर मुकदमा चलणु च।”</verse>
				<verse number="7">अर ईं बात तैं सुणी के फरीसी अर सदूकी दल का लोग आपस मा भौत बहस करण लगि गैनी, अर यहूदी न्याय समिति का लोगु का बीच मा फूट पोड़ि गै।</verse>
				<verse number="8">अर फूट पोड़ण को कारण यू छौ, किलैकि सदूकी लोग नऽ त मुरयां लोगु का ज्यून्द होण का बारा मा, अर नऽ त स्वर्गदूतों का होण का बारा मा, अर ना ही आत्माओं का होण का बारा मा बिस्वास करदिन, मगर फरीसी दल का लोग यों सब बातों पर बिस्वास करदिन।</verse>
				<verse number="9">अर उखो माहौल और भि जादा बिगड़ि गै। तब फरीसी दल का कुछ शास्‍त्री लोग उठनि, अर चिल्‍लै के बोन्‍न लगि गैनी, “हमतै ये मनखि मा कुई भि बुरै नि लगणि, अर क्या पता कै स्वर्गदूत या कै आत्मा न येका दगड़ा मा बात कैरी हो।”</verse>
				<verse number="10">अर झगड़ा इथगा ह्‍वे गै कि रोमी पलटण का सेनापति तैं डौऽर लगि गै, कि कखि यू लोग पौलुस का टुकड़ा-टुकड़ा नि कैर द्‍या, तब वेन पलटण तैं आज्ञा दिनी की मूड़ी जा अर पौलुस तैं जबरन वीं सभा बटि लेके आ अर किला मा लि जा।</verse>
				<verse number="11">अर वीं रात ही प्रभु न पौलुस का पास खड़ु ह्‍वेके बोलि, “हे पौलुस, हिम्मत रख अर सुण, जन तिन मेरी गवै यरूशलेम मा दिनी, ठिक उन्‍नि गवै त्वेतै रोम मा भि देण होलि।”</verse>
				<verse number="12">अर जब सुबेर ह्‍वे, त यहूदियों न जाळसाजि बणै अर कसम खै, कि जबरि तक हम पौलुस तैं जान से नि मारी द्‍यूला, तबरि तक हमुन कुछ भि खाण-पीण नि च।</verse>
				<verse number="13">अर जौं लोगु न या जाळसाजि बणै छै, ऊं लोगु की गिनती चालीस से जादा छै।</verse>
				<verse number="14">तब वु सब लोग मुख्य पुरोहितों अर अध्यक्ष लोगु का पास जैके बोन्‍न लगि गैनी कि, “हमरि कसम खईं च कि जबरि तक हम पौलुस तैं जान से नि मारी द्‍यूला, तबरि तक हमुन कुछ भि खाण-पीण नि च।</verse>
				<verse number="15">इलै तुम अर न्याय समिति का लोग इन कैरा, कि पलटण का सेनापति तैं समझा, ताकि वु लोग पौलुस तैं तुमरा पास इख लेके आ, अर इन लगण चयेणु कि तुम वेका बारा मा और अच्छी तरौं से जाँच-पड़ताल करण चन्द्‍यां। अर जब उ इख औण वळु होलु, त वेका औण से पैलि ही हम वेतैं जान से मरणु खुणि तयार रौला।”</verse>
				<verse number="16">अर या बात पौलुस का भंणजळ सुणी दिनी, कि ऊ वेतैं मरण खुणि दुबकी जाला, तब वेन किला मा जैके पौलुस तैं ईं बात की खबर दिनी।</verse>
				<verse number="17">अर ईं बात तैं सुणी के पौलुस न सुबेदारों मा बटि कै एक तैं अपणा पास बुलै अर वेकू बोलि, “साब, ये ज्वान नौना तैं पलटण का सेनापति का पास लि जा, किलैकि यू ऊंतैं एक खबर सुनौण चाणु च।”</verse>
				<verse number="18">तब सुबेदार वेतैं सेनापति का पास लि गै अर वेकू बोलि, “साब, पौलुस कैदी न मितैं बुलै अर ये ज्वान नौना तैं तुमरा पास भेजण कि बिन्ती कैरी, किलैकि यू तुम मा कुछ बोन्‍न चाणु च।”</verse>
				<verse number="19">तब सेनापति न वे ज्वान नौना को हाथ पकड़ी अर अलग मा लि जैके वेतैं पूछी, “तू मितैं क्या बतौण चाणि छैई?”</verse>
				<verse number="20">अर वेन वेतैं जबाब दिनी, “साब, यहूदी का मुख्य लोगु की जाळसाजि बणईं च, अर वु बोन्‍ना छा कि वु तुम बटि बिन्ती करला कि तुम पौलुस तैं भोळ यहूदी न्याय समिति मा भेजा। अर ऊंन इन भि बोलि कि इन लगण चयेणु कि हम वेका बारा मा अच्छी तरौं से जाँच-पड़ताल करण चाणा छां।</verse>
				<verse number="21">मगर साब तुम ऊंकी बात नि मणया, किलैकि ऊं लोगु मा बटि चालीस से भि जादा लोग छिन जु पौलुस तैं जान से मरण की ताक मा छिन। अर ऊं लोगु कि इन ठणि च कि जबरि तक हम पौलुस तैं जान से नि मारी द्‍यूला, तबरि तक हमुन कुछ खाण-पीण नि च। अर अब उ तयार छिन, अर तुमरा आदेस को इंतजार कना छिन।”</verse>
				<verse number="22">तब सेनापति न वे ज्वान नौना तैं इन आदेस देके भेजि, “ज्वा बात तिन मितैं बतै, वा कै मा नि बोलि।”</verse>
				<verse number="23">तब सेनापति न अपणा दुई सुबेदारों तैं बुलै अर ऊंकू बोलि, “सुणा दुई सौ सिपै, अर सत्तर घुड़सवार, अर दुई सौ भाला चलौण वळा सिपै तयार कैरा, अर राति नौ बजी तक ऊंतैं कैसरिया नगर जाणु खुणि तयार रखा।</verse>
				<verse number="24">पौलुस तैं लि जाणु खुणि घोड़ो तैं तयार रखा, ताकि उ गवर्नर फेलिक्स का पास ठिक-ठाक से पौंछी जौ।”</verse>
				<verse number="25">अर वे सेनापति न एक इन चिठ्‍ठी लिखी, ज्यां मा इन लिख्यूं छौ कि,</verse>
				<verse number="26">“आदरणीय गवर्नर फेलिक्स, मि सेनापति क्लौदियुस लूसियास या चिठ्‍ठी तुम खुणि लिखणु छौं, तुमतै मेरु नमस्कार।</verse>
				<verse number="27">“श्रीमान, ये मनखि तैं मि तुमरा पास भेजणु छौं, येतैं यहूदी लोग पकड़ी के जान से मरण वळा छा, मगर मिन ठिक बगत पर अपणा सैनिको का दगड़ा मा उख पौंछी के येतैं बचै दिनी, किलैकि मितैं इन पता चलि गै छौ कि यू एक रोमी मनखि च।</verse>
				<verse number="28">अर मि जनण चाणु छौ, कि ऊ कैं बात का बाना ये पर दोष लगौणा छिन, इलै मि येतैं ऊंकी यहूदी न्याय समिति मा लि ग्यों।</verse>
				<verse number="29">तब मितैं पता चलि कि ऊ लोग ये मनखि पर ऊंका अपणा नियम-कानून का मुताबिक कुछ बातों को दोष लगौणा छिन, मगर मिन ये मा इन्द्रयो कुई भि दोष नि पै ज्यां से कि येतैं मौत की सजा दिये जौ या बन्धी बणै जौ।</verse>
				<verse number="30">अर जब मितैं इन खबर मिली, कि वु लोग ये मनखि तैं जान से मरण की फिराक मा जाळसाजि बणौणा छिन, त मिन येतैं तुरन्त तुमरा पास भेज दिनी। अर दोष लगौण वळा लोगु तैं इन आदेस देई कि वु तुमरा समणि ऐके ही ये मनखि पर लग्यां इळजामो का बारा मा बता।”</verse>
				<verse number="31">तब सिपयों न आदेस का मुताबिक रातों-रात पौलुस तैं अन्तिपत्रिस नगर कू लि गैनी।</verse>
				<verse number="32">अर दुसरा दिन सत्तर घुड़सवार सिपयों का दगड़ा मा, जु सिपै पैदल ग्यां छा यों न ऊंतैं पौलुस का दगड़ा मा छोड़ि दिनी अर खुद किला खुणि वापिस ऐ गैनी, ताकि घुड़सवार सिपै वेतैं कैसरिया नगर लि जा।</verse>
				<verse number="33">अर जब घुड़सवार सिपै पौलुस का दगड़ा कैसरिया नगर मा पौंछिनी, तब ऊंन वा चिठ्‍ठी गवर्नर तैं दिनी अर पौलुस तैं वेका समणि खड़ु कैरी।</verse>
				<verse number="34">तब गवर्नर फेलिक्स न चिठ्‍ठी पैड़ी अर वे बटि पूछी कि, “तू कै मुलक को छैई?” तब वेतैं इन पता चलि कि पौलुस किलिकिया मुलक को च।</verse>
				<verse number="35">तब वेन बोलि, “जब त्वे पर दोष लगौण वळा इख ऐ जाला, तब मि तेरु फैसला करलु।” तब पौलुस तैं हेरोदेस का राजमहल मा रखण को आदेस दिये गै, अर सिपयों कू इन भि बुले गै कि, “वेकी पैरेदारी कैरा।”</verse>
			</chapter>
			<chapter number="24">
				<verse number="1">अर यों सब बातों का ठिक पांच दिन बाद महा पुरोहित हनन्याह कुछ अध्यक्षों तैं अर तिरतुल्‍लुस नौ का एक वकील तैं अफ दगड़ि लेके कैसरिया नगर मा ऐ। अर वु गवर्नर फेलिक्स का समणि पौलुस पर इळजाम लगौण लगि गैनी।</verse>
				<verse number="2">तब पौलुस तैं बुलये गै तब वकील तिरतुल्‍लुस न वेका खिलाप मा गवर्नर का समणि इळजाम लगै के बोलि, “साब, तुमरि वजै से हम बड़ी शान्ति से रौणा छां, अर तुमरा अच्छा सासन की वजै से हमरा लोगु मा भौत सा सुधार होणा छिन।</verse>
				<verse number="3">इलै हम तुमरो धन्यवाद करद्‍यां, अर यों सब बातों तैं हरेक जगा स्वीकार करद्‍यां।</verse>
				<verse number="4">इलै श्रीमान फेलिक्स, मि तुमरो जादा बगत नि लेण चान्दु, मि तुम बटि बिन्ती करदु कि किरपा कैरिके हमरि दुई-चार बात सुण ल्या।</verse>
				<verse number="5">“साब, असल मा बात इन च कि ये मनखि को हम खुणि मुण्डरु कैरिके रख्युं च, अर हमुन येतैं पूरि दुनियां का यहूदी लोगु तैं भड़कौन्द अर घपरोळ करद पै। अर नासरत गौं का सिखौण वळा का पिछनै जु लोग चलदिन यू वे नया धरमी दल को एक मुखिया च।</verse>
				<verse number="6">अर येन मन्दिर तैं अशुद्ध करण चै, मगर हमुन येतैं पकड़ी दिनी। (अर हम येको न्याय अपणा नियम-कानूनों का मुताबिक करण चन्द्‍यां</verse>
				<verse number="7">मगर सेनापति लूसियास न येतैं हमरा हाथ बटि जबरन अपणा अधिकार मा ले लिनी, अर इळजाम लगौण वळो तैं आज्ञा दिनी कि तुमरा समणि हाजिरा हो)</verse>
				<verse number="8">अर तुम अफि वे बटि ऊं सब बातों का बारा मा पूछताछ कैरी ल्या, जौं बातों को इळजाम हम वे पर लगौणा छां, तब तुमतै सच्‍चै को पता चलि जालु।”</verse>
				<verse number="9">तब उख अयां यहूदियों न भि वेकी तरफदारी कैरिके बोलि, “हाँ-हाँ, साब यू ठिक बोन्‍नु च अर या बात च।”</verse>
				<verse number="10">तब गवर्नर फेलिक्स न पौलुस तैं बोन्‍नु खुणि इसारा कैरी, अर वेन जबाब देई, “साब, मि जणदु छौ कि तुम कई सालों बटि इखा लोगु को न्याय कना छाँ, इलै मि खुशी से तुमरा समणि अपणा बचौ खुणि बुल्दु।</verse>
				<verse number="11">“साब, मि परमेस्वर की भक्‍ति करणु खुणि यरूशलेम नगर मा अयूं अर अभि मितैं बारह दिन ही ह्‍वे छा, अर ईं बात को पता तुम अफि लगै सकद्‍यां।</verse>
				<verse number="12">अर नऽ त यों न मितैं मन्दिर मा, ना प्रार्थना भवन मा, नऽ त नगर मा कैतैं भड़कौन्द देखि, अर ना ही यों न मितैं इख कै का दगड़ा मा वाद-विवाद करद देखि,</verse>
				<verse number="13">अर यू लोग ऊं बातों तैं सच्‍च भि साबित नि कैरी सकदिन, जौं बातों को इळजाम यू मि पर तुमरा समणि लगौणा छिन।</verse>
				<verse number="14">मगर मि तुमरा समणि ईं बात तैं स्वीकार करदु, कि जु बात नियम-कानूनों अर रैबर्यों की किताबों मा लिखीं छिन, मि ऊं सब बातों पर बिस्वास करदु। अर जै बाटा पर मि चलणु छौं, वेका मुताबिक ही मि अपणा पितरों का परमेस्वर की भक्‍ति कनु छौं। अर साब, ये बाटा कू ही यू लोग गळत बोन्‍ना छिन।</verse>
				<verse number="15">अर मि भि परमेस्वर पर अपणी आस रखदु, जन कि यू लोग खुद भि रखदिन, कि धरमी अर अधरमी लोग मुरदो मा बटि ज्यून्दा होला।</verse>
				<verse number="16">इलै मेरी पूरि कोसिस रौन्दी कि मि परमेस्वर, अर मनखियों खुणि अच्छा सोच-विचार रखूं।</verse>
				<verse number="17">अर भौत सालों का बाद मि अपणा गरीब लोगु मा दान-दकछिणा देणु खुणि, अर परमेस्वर खुणि बलिदान चड़ौणु कू इख ऐ छौं।</verse>
				<verse number="18">“अर जब मि यू काम कनु छौ, त आसिया मुलक का कुछ यहूदी लोग मितैं मन्दिर मा मिलिनी, अर वे बगत तक त मिन अफ तैं शुद्ध कैरियाली छौ। अर उख मेरा दगड़ा मा कुई भीड़ नि छै, अर ना ही उख कई दंगा ह्‍वे,</verse>
				<verse number="19">अर अगर ऊ मेरा खिलाप मा कुछ बोन्‍न चाणा छा, त इख ऐके तुमरा समणि मि पर इळजाम लगौन्दा।</verse>
				<verse number="20">य त यू लोग खुद ही बता, कि जब मि यहूदी न्याय समिति का लोगु का समणि खड़ु किये गै छौ, त वे बगत ऊं लोगु न मि मा क्या दोष पै?</verse>
				<verse number="21">हाँ, मि मणदु छौं कि मिन ऊं लोगु का बीच मा खड़ु ह्‍वेके ऊँची आवाज मा बोलि छौ, ‘मि मुरदो मा बटि ज्यून्द होण को बिस्वास करदु, बस ईं बात का खातिर ही मि पर मुकदमा चलणु च। अर अगर ईं बात का अलावा मि पर अगर कुई दुसरो इळजाम लग्यूं च त यू मितैं बता।’”</verse>
				<verse number="22">मगर गवर्नर फेलिक्स प्रभु यीशु का बाटा का बारा मा अच्छी तरौं से जणदु छौ, इलै वेन ईं बात तैं टाळि दिनी, अर इन बोलि कि, “जब पलटण को सेनापति लूसियास आलु, तब ही तुमरा मुकदमा को फैसला सुणये जालु।”</verse>
				<verse number="23">तब वेन सुबेदार तैं आदेस दिनी कि, ये मनखि तैं पैरेदारी मा रखै जौ, मगर कुछ बातों की वेतैं छुट दियै जौ। अर सुणा, येका दगड़्यों मा बटि कैतैं भि येकी सेवा करण से नि रुक्यां।</verse>
				<verse number="24">अर कुछ दिन का बाद गवर्नर फेलिक्स अपणी घरवळी द्रुसिल्‍ला तैं अफ दगड़ा मा लेके ऐ, अर या यहूदी जनानि छै। तब वेन पौलुस तैं बुलवै, अर यीशु मसीह पर बिस्वास करण का बारा मा वे बटि सुनण चै।</verse>
				<verse number="25">अर जब पौलुस धरमी जीवन जीण का बारा मा, अर खुद तैं अपणा वश मा रखण का बारा मा, अर औण वळा न्याय का बारा मा बतौणु छौ, त फेलिक्स डौऽरी गै अर वेन बोलि, “अभि तू इख बटि चलि जा, अगर मौका मिललु त मि तुमतै बुलाणु खुणि रैबार भेजि द्‍यूलु।”</verse>
				<verse number="26">अर गवर्नर फेलिक्स पौलुस तैं अपणा पास बार-बार बुलान्दु छौ अर वेसे बात-चित करदु छौ, किलैकि वेतैं पौलुस से कुछ रुपया पौण की उम्मीद छै।</verse>
				<verse number="27">अर इन करद-करद दुई साल ह्‍वे गैनी। अर येका बाद गवर्नर फेलिक्स की जगा पर पुरकियुस फेस्तुस नौ को मनखि गवर्नर का पद पर ऐ, मगर फेलिक्स यहूदियों तैं खुश करण चान्दु छौ, इलै वेन पौलुस तैं जेलखाना मा ही छोड़ि दिनी।</verse>
			</chapter>
			<chapter number="25">
				<verse number="1">अर गवर्नर फेस्तुस तैं कैसरिया मुलक मा अयां अभि तीन दिन ह्‍वे ही गै छा, कि उ कैसरिया नगर बटि यरूशलेम नगर कू वापिस चलि गै।</verse>
				<verse number="2">अर उख मुख्य पुरोहित अर यहूदियों का खास लोगु न, गवर्नर फेस्तुस का पास जैके पौलुस का खिलाप मा इळजाम लगै।</verse>
				<verse number="3">अर ऊंन फेस्तुस बटि इन बिन्ती कैरी कि, “साब, वे पौलुस तैं इख यरूशलेम मा बुलै द्‍या।” अर या बात ऊंन इलै बोलि, किलैकि यहूदी लोग न वेतैं अधा बाटा मा जान से मरणे की योजना बणईं छै।</verse>
				<verse number="4">मगर गवर्नर फेस्तुस न जबाब दिनी, “पौलुस, कैसरिया नगर का जेलखाना मा च, अर मि खुद जल्दी उख जाण वळु छौं।</verse>
				<verse number="5">अब इन कैरा, तुम अपणा कुछ खास लोगु तैं मेरा दगड़ा मा भेजा, अर अगर वे मनखि न कुई भि गळत काम कर्युं होलु, त फिर तुम वे पर उख दोष लगै सकद्‍यां।”</verse>
				<verse number="6">अर ऊंका बीच मा लगभग आठ-दस दिन रौण का बाद उ कैसरिया नगर कू वापिस चलि गै। अर जब गवर्नर फेस्तुस कैसरिया नगर मा पौंछी गै, त दुसरा दिन उ अपणा न्याय आसन मा बैठि, अर वेन पौलुस तैं बुलाणु खुणि अपणा सिपयों तैं आदेस दिनी।</verse>
				<verse number="7">अर जब पौलुस ऐ, त यरूशलेम नगर बटि अयां यहूदी लोग वेका चौतरफि खड़ा ह्‍वेके वे पर खतरनाक बातों को आरोप लगौण लगि गैनी, मगर ऊं आरोपों तैं ऊ साबित नि कैरी सकिनी।</verse>
				<verse number="8">तब पौलुस न अपणी सफै मा बोलि, “मिन कै का खिलाप मा कुई भि अपराध नि कैरी, नऽ त यहूदियों का नियम-कानून का, अर ना ही मि ऊंका मन्दिर का खिलाप मा ग्यों, अर ना ही मिन महाराजा का खिलाप मा कुई गळती कैरी।”</verse>
				<verse number="9">पर गवर्नर फेस्तुस न यहूदियों तैं खुश करण की मनसा रखी के बोलि, “तू क्या चाणि छैई, कि यरूशलेम नगर जैके यों सब बातों को न्याय फिर से मेरा समणि उखि किये जौ?”</verse>
				<verse number="10">पौलुस न जबाब दिनी, “ना साब, मि महाराजा का न्याय आसन का समणि खड़ु होयुं छौं, मेरु फैसला इखि होण चयेणु, अर मिन यहूदियों का खिलाप मा कुई भि अपराध नि कैरी, अर तुमतै ईं बात का बारा मा अच्छी तरौं से पता च।</verse>
				<verse number="11">अर साब, अगर जु मेरु कुछ भि अपराध कर्युं होन्दु अर मौत की सजा का लैख होन्दु, त मि मौत तैं भि स्वीकार कैरी देन्दु। अर जौं बातों को यू लोग मि पर इळजाम लगौणा छिन, अगर वु बात सच्‍चि नि होलि, त कुई भि मितैं यों लोगु का सुपुर्द नि कैरी सकदु, इलै साब, मेरी इन मांग च कि मेरु न्याय महाराजा का समणि हो।”</verse>
				<verse number="12">तब गवर्नर फेस्तुस न अपणा सलाकारों का दगड़ा मा बात कैरी। अर वेन पौलुस कू बोलि, “तिन महाराजा की मांग कैरी कि ऊंका द्‍वारा तेरु न्याय हो, इलै त्वेतै ऊंका पास ही भिजे जालु।”</verse>
				<verse number="13">अर कुछ दिनों का बाद, राजा अग्रिप्पा अर वेकी भूली बिरनीके कैसरिया नगर मा गवर्नर फेस्तुस को स्वागत करणु कू ऐनी।</verse>
				<verse number="14">अर यू काफी दिनों तक इखि रैनी। तब गवर्नर फेस्तुस न राजा तैं पौलुस का बारा मा बतै अर बोलि, “महाराज, इख पौलुस नौ को एक आदिम च, जैतैं फेलिक्स जेलखाना मा उन्‍नि छोड़ि के चलि गै छौ।</verse>
				<verse number="15">अर जब मि यरूशलेम नगर मा गै छौ, त यहूदी लोगु का मुख्य पुरोहितों अर अध्यक्षों न पौलुस पर लग्यां आरोपों का बारा मा मितैं बतै, अर मि बटि बिन्ती कैरी कि वेतैं दण्ड दिये जौ।</verse>
				<verse number="16">पर मिन ऊंतैं जबाब दिनी कि, हमरि ज्वा रीति च वेका मुताबिक आरोपी अर आरोप लगौण वळु मनखि जबरि तक अमणि-समणि नि हो, अर आरोपी मनखि अपणी सफै मा नि बोलो, तबरि तक हम वेतैं दण्ड देणु खुणि दुसरा लोगु का सुपुर्द नि कैरी सकद्‍यां।</verse>
				<verse number="17">“इलै जब ऊ इख जमा ह्‍वेनि, त महाराज, मिन भि बिन देर कियां दुसरा दिन ही न्याय आसन मा बैठि के वे मनखि तैं उख लाण को आदेस दिनी।</verse>
				<verse number="18">अर जब इळजाम लगौण वळा वेका खिलाप खड़ा ह्‍वेनि, त महाराज, जन मि सुचणु छौ ऊं लोगु न इन्दरि कुई भि बुरी बातों को इळजाम वे पर नि लगै,</verse>
				<verse number="19">पर ऊंको वाद-विवाद को खास मुद्‍दा ऊंका धरम का बारा मा, अर यीशु नौ का कै मनखि का बारा मा छौ, जु कि मोरि गै छौ अर पौलुस बोन्‍नु छौ कि उ ज्यून्दु च।</verse>
				<verse number="20">तब मि बड़ी उळझण मा पोड़ि ग्यों, कि यों सब बातों को पता कनकै लगये जै सैको? इलै मिन पौलुस बटि पूछी, ‘तू क्या चाणि छैई, कि यरूशलेम नगर जैके यों सब बातों को न्याय उखि किये जौ?’</verse>
				<verse number="21">मगर वेन मिसे मांग कैरी, कि महाराजा का द्‍वारा मेरु न्याय किये जौ अर तब तक मितैं जेलखाना मा ही रखा। इलै मिन आदेस दिनी कि येतैं जेलखाना मा ही रखा, जब तक मि येतैं महाराजा का पास नि भेजि द्‍यूलु।”</verse>
				<verse number="22">तब राजा अग्रिप्पा न फेस्तुस कू बोलि, “फेस्तुस, मि खुद भि वे मनखि की सुनण चान्दु। अर वेन बोलि, ठिक च साब तुम भोळ सुणी लियां।”</verse>
				<verse number="23">फिर दुसरा दिन राजा अग्रिप्पा अर वेकी भूली बिरनीके बड़ी धूम-धाम से दरबार मा पौंछिनी, अर ऊंका दगड़ा मा सेनापति अर नगर का बड़ा-बड़ा लोग भि छा। तब गवर्नर फेस्तुस न आदेस दिनी कि, “पौलुस तैं इख लेके आ।” अर पौलुस तैं ऊंका समणि लये गै।</verse>
				<verse number="24">तब गवर्नर फेस्तुस न बोलि, “महाराज, अर हमरा दगड़ा मा इख जमा होयां सब लोगु, तुम ये मनखि तैं दिखणा छाँ, यू उई मनखि च जैका बारा सब यहूदी लोगु न, अर पूरा यरूशलेम नगर का लोगु न, इख तक कि ये नगर का लोगु न भि चिल्‍लै-चिल्‍लै के मिसे मांग कैरी छै कि अब ये मनखि को ज्यून्द रौण ठिक नि च।</verse>
				<verse number="25">मगर मि जाणि गै छौ कि ये मनखि न कुई अपराध नि कैरी, ज्यां की वजै से येतैं मौत को दण्ड दिया जौ। इलै जब येन अपणा न्याय खुणि खुद ही महाराज की मांग कैरी, त मिन येतैं महाराजा का पास रोम नगर भेजण को फैसला कैरी।</verse>
				<verse number="26">मगर येका बारा मा ठिक-ठिक लिखणु खुणि मि मा कुछ खास बात नि छै, कि मि महाराजा खुणि लिखुं। इलै मि ये मनखि तैं तुम सभ्यों का समणि अर खास कैरिके राजा अग्रिप्पा का समणि लेके अयूं, ताकि येकी जाँच-पड़ताल करण का बाद मितैं येका बारा मा लिखणु खुणि कुछ मिली सैको।</verse>
				<verse number="27">अर या बात मितैं ठिक नि लगदी, कि मि कै कैदी तैं महाराजा का पास भेजि द्‍यो, अर इन भि नि लिख्यूं कि वे पर लग्यूं आरोप क्या च।”</verse>
			</chapter>
			<chapter number="26">
				<verse number="1">तब राजा अग्रिप्पा न पौलुस कू बोलि, “त्वेतै अपणा बचाव मा बोन्‍ने की पूरि इजाजत च।” अर पौलुस न हाथळ इसारा कैरिके अपणी सफै मा इन बोलि कि,</verse>
				<verse number="2">महाराज, यहूदी लोगु न जथगा भि बातों को इळजाम मि लगै, आज मि तुमरा समणि ऊं सब बातों को जबाब देणु खुणि खुद तैं बड़ु खुशनसीब समझणु छौं।</verse>
				<verse number="3">अर खास कैरिके इलै, किलैकि तुम यहूदी लोगु का सब रीति-रिवाजों का बारा मा, अर जु इळजाम मि पर लगये गैनी ऊंका बारा मा भि जणदा छाँ। इलै महाराज, मि तुम से बिन्ती करदु कि मेरी बातों तैं शान्ति से सुणयां।</verse>
				<verse number="4">“महाराज, बचपन बटि लेके मेरी ज्वानी का दिनों तक, मेरु जीवन को पालन-पोसण यरूशलेम नगर मा मेरी अपणी जाति का लोगु का बीच मा ही ह्‍वे, इलै सब यहूदी लोग जणदिन कि मेरु व्यौहार ऊंका बीच मा कन छौ।</verse>
				<verse number="5">अर जु लोग मितैं पैलि बटि पछ्याणदिन अगर ऊ चा, त ईं बात का खातिर मि खुणि गवै दे सकदिन, कि फरीसी होण का नाता मि अपणा धरम तैं मनण वळो मा बटि सबसे कट्‍टर मनखि छौं।</verse>
				<verse number="6">मगर आज मि पर मुकदमा चलणु च, किलैकि मि वे करार पर आस रखदु जु कि परमेस्वर न हमरा पितरों का दगड़ा मा कर्युं छौ।</verse>
				<verse number="7">अर हमरा बारह गोत्रों का लोग वे करार तैं पूरु होण की आस मा लग्यां छिन, अर आज भि वु दिन-रात परमेस्वर की भक्‍ति अपणा पूरा मनळ कना छिन। अर महाराज, आज वा ही आस मेरी भि रखी च अर वांका बानो ही यहूदी लोग मि पर इळजाम लगौणा छिन।</verse>
				<verse number="8">महाराज मि एक सवाल पूछण चान्दु, आखिर तुम लोग ईं बात पर बिस्वास किलै नि करदिन? कि परमेस्वर मुरदो तैं ज्यून्दु करदु।</verse>
				<verse number="9">“अरे साब, मितैं भि इन्‍नि लगदु छौ कि नासरत गौं का यीशु पर जु लोग बिस्वास करदिन, ऊंका खिलाप जैके मिसे जथगा जादा ह्‍वे सैको मि ऊंको विरोध कैरुं अर मिन यरूशलेम नगर मा जैके इन्‍नि कैरी।</verse>
				<verse number="10">मिन त यरूशलेम नगर मा मुख्य पुरोहितों बटि अधिकार पैके भौत सा परमेस्वर का लोगु तैं जेलखाना मा बन्द करवै दिनी, अर जब ऊं लोगु तैं जान से मरे जान्दु छौ, त वीं बात मा मि भि सैमत होन्दु छौ।</verse>
				<verse number="11">इख तक कि यीशु पर बिस्वास करण वळा लोगु तैं मि प्रार्थना भवनों मा जै-जैके दण्ड दिलान्दु छौ, अर मजबूर कर देन्दु छौ कि वु यीशु की बुरै कैरा। इख तक कि मि गुस्सा मा इथगा बौल्या ह्‍वे जान्दु छौ, कि भैर का नगरों मा भि जैके ऊंतैं सतौन्दु छौ।</verse>
				<verse number="12">“मगर साब, एक दिन इन ह्‍वे, कि मि मुख्य पुरोहितों बटि अधिकार अर इजाजत पत्र पैके दमिश्क नगर कू जाणु छौ,</verse>
				<verse number="13">त मिन वे बाटा मा जाण दौं दिन का वे बगत पर सूरज से भि तेज उज्याळा तैं मेरा अर मेरा दगड़्यों का चौतरफि चमकण देखि।</verse>
				<verse number="14">अर हम सब भ्वीं मा फरके ग्यां, तब एक आवाज न इब्रानी भाषा मा मिकू बोलि, ‘हे शाऊल, तू मितैं किलै सतौणी छैई? कुल्हड़ा पर खुटे मरण त्वेकू ठिक नि च।’</verse>
				<verse number="15">तब मिन पूछी, ‘हे प्रभु, तुम कु छाँ?’ प्रभु न बोलि, ‘मि यीशु छौं, जैतैं तू सतौणी छैई।</verse>
				<verse number="16">पर अब उठ अर खड़ु ह्‍वे जा, मिन त्वेतै अपणु दरसन इलै दिखै, ताकि मि त्वेतै अपणु एक सेवक अर गवा बणौ, अर जु कुछ तिन देखि, अर जु कुछ भि अब मि त्वेतै दिखौलु तू ऊं सब बातों को गवा ह्‍वेलि।</verse>
				<verse number="17">अर मि त्वेतै तेरा यहूदी लोगु से अर दुसरि जाति का लोगु से बचौणु रौलु।</verse>
				<verse number="18">अर सुण, मि त्वेतै ऊं लोगु का पास इलै भेजणु छौं, ताकि तू ऊंका आंख्यों तैं खोली दे अर वु अन्धेरा से हटि के उज्याळा की तरफा, अर शैतान की ताकत से हटि के परमेस्वर की तरफा ऐ जा। अर तब ऊंका पाप माफ ह्‍वे जाला अर जु लोग मि पर बिस्वास कैरिके पवित्र बणयां छिन, ऊं लोगु मा ऊंतैं भि वारिस बणयै जौ।’</verse>
				<verse number="19">“महाराज, इलै जु दरसन मितैं स्वर्ग बटि मिली मिन वेतैं नि टाळि।</verse>
				<verse number="20">मिन पैलि दमिश्क नगर मा, अर फिर यरूशलेम नगर मा जैके परचार कैरी। अर येका बाद मि यहूदिया का पूरा मुलक मा, अर ऊं लोगु का बीच मा जैके परचार कनु रौं जु यहूदी जाति का नि छिन। ताकि वु सब अपणा-अपणा पापों से पस्ताप कैरिके परमेस्वर की तरफा ऐ जा, अर इन काम कैरा ज्यां से इन पता चलि जौ, कि ऊंन अपणा-अपणा पापों से पस्ताप कैरियाली।</verse>
				<verse number="21">अर मेरा परचार करण का बानो ही यहूदियों न मितैं मन्दिर मा पकड़ी, अर मितैं जान से मरणे की कोसिस भि कैरी।</verse>
				<verse number="22">मगर साब, परमेस्वर की मदद से ही मि ज्यून्दु छौ, अर आज इख सब छुटा-बड़ा लोगु का समणि गवै देन्दु। अर होण वळी बातों का बारा मा परमेस्वर का रैबर्या मूसा न अर दुसरा रैबर्यों न जन बोलि छौ, ऊं बातों का अलावा मि और कुछ नि बुल्दु,</verse>
				<verse number="23">अर ऊंन इन बोलि छौ कि मसीह तैं दुख झिलण पोड़लु, अर वु ही पैलु होलु जु कि मुरदो मा बटि ज्यून्द ह्‍वेके हमरा लोगु खुणि अर ऊं लोगु खुणि भि उज्याळु को परचार करलु, जु कि हमरि जाति का नि छिन।”</verse>
				<verse number="24">अर जब पौलुस अपणा बचाव मा यों बातों तैं बोन्‍नु छौ, कि तबरि तक गवर्नर फेस्तुस न चिल्‍लै के बोलि, “हे पौलुस, तेरु दिमाग खराब ह्‍वे गै, जादा पैढी-लिखी के तू बौल्या ह्‍वे गै।”</verse>
				<verse number="25">पर पौलुस न बोलि, “श्रीमान फेस्तुस, मि बौल्या नि छौं, बल्किन मा सच्‍चै की अर समझदारी की बात कनु छौं।</verse>
				<verse number="26">अर महाराज तैं भि यों बातों का बारा मा पता च, इलै मि बेधड़क ह्‍वेके ऊंका समणि बोन्‍नु छौं। अर मितैं पूरु यकीन च कि यों बातों मा बटि एक बात भि महाराज से छिपी नि छिन, किलैकि यू सब बात चुपचाप से नि ह्‍वेनि।</verse>
				<verse number="27">“महाराज, अग्रिप्पा तुम परमेस्वर का रैबर्यों की बुलिं बातों पर बिस्वास करद्‍यां, हाँ, मि जणदु छौं कि तुम बिस्वास करद्‍यां।”</verse>
				<verse number="28">तब राजा अग्रिप्पा न पौलुस कू बोलि, “क्या तू ये थुड़ा सा बगत मा मितैं मसीह बणै दिली, ना, इन नि ह्‍वे सकदु।”</verse>
				<verse number="29">वेन बोलि, “मि परमेस्वर से प्रार्थना करदु कि थुड़ा बगत हो या जादा, सिरफ तुम ही ना बल्किन मा जथगा भि लोग मेरी यों बातों तैं सुनणा छिन, सब मि जन मसीह बणि जा अर मेरी इच्छा इन भि च कि ऊ मि जन कैदी नि बणा।”</verse>
				<verse number="30">तब राजा अग्रिप्पा खड़ु ह्‍वे गै, अर वेकी बैंण बिरनीके, अर गवर्नर फेस्तुस अर जथगा भि लोग ऊंका दगड़ा मा बैठयां छा वु सब भि खड़ा ह्‍वे गैनी।</verse>
				<verse number="31">अर जब ऊ दरबार मा जाण लगि गैनी त ऊंन आपस मा बोलि, “ये आदिम न इन्द्रयो कुई भि अपराध नि कर्युं, जैका खातिर येतैं मौत को दण्ड या बेड़ियों मा रखै जौ।”</verse>
				<verse number="32">अर अग्रिप्पा न फेस्तुस कू बोलि, “अगर जु ये मनखि न अपणा न्याय की मांग महाराजा से नि करीं रौन्दी, त हम येतैं छोड़ि देन्दा।”</verse>
			</chapter>
			<chapter number="27">
				<verse number="1">अर जब इन फैसला ह्‍वे गै कि अब हमतै कैसरिया नगर बटि निकळि के जाज को सफर शुरु कैरिके इटली देस कू जाण पोड़लु, त ऊंन पौलुस अर कुछ और कैदियों तैं यूलियुस नौ का एक सुबेदार का सुपुर्द कैरी दिनी। अर यूलियुस महाराजा की पलटण को सुबेदार छौ।</verse>
				<verse number="2">अर हमुन अद्रमुत्तियुम नगर बटि पाणि का एक जाज मा बैठि के अपणु सफर शुरु कैरी। अर ये जाज न आसिया का बंदरगाहों से ह्‍वेके जाण छौ, अर हमरा दगड़ा मा मकिदुनिया मुलक को अरिस्तर्खुस भै भि छौ, जु की थिस्सलुनीकी नगर को रौण वळु छौ।</verse>
				<verse number="3">अर वेका दुसरा दिन हम सैदा नगर मा पौंछयां। अर इख यूलियुस सुबेदार न पौलुस पर बड़ी दया दिखै के वेका दगड़्यों से मिलणे की इजाजत दे दिनी, ताकि वेकी देख-रेख ह्‍वे सैको।</verse>
				<verse number="4">अर येका बाद हमुन इख बटि पाणि का जाज की यात्रा फिर से शुरु कैरी, मगर हवा जाज का खिलाप मा चलणी छै, इलै हम साइप्रस टापू की आड़ मा ह्‍वेके चलयां,</verse>
				<verse number="5">अर फिर हमुन समुन्दर की ईं यात्रा तैं किलिकिया अर पंफूलिया मुलक का अगनै बटि ह्‍वेके कैरी अर तब हम लूसिया मुलक का मूरा बंदरगाह मा पौंछयां।</verse>
				<verse number="6">अर उख सुबेदार यूलियुस तैं सिकन्दरिया नगर को एक जाज मिली, जु इटली देस जाण वळु छौ, तब वेन हमतै वे जाज मा बैठे दिनी।</verse>
				<verse number="7">अर भौत दिन तक हम आराम-आराम से अगनै चलणा रयां, अर आखिरकार हम बड़ी मुस्किलन कनिदुस नगर पौंछयां। अर बथौं इथगा तेज चलणु छौ कि हमरु जाज अगनै नि बढी सैकी, इलै हम सलमोने नगर का पास बटि ह्‍वेके क्रेते टापू की आड़ मा जाण लगि ग्यां।</verse>
				<verse number="8">अर क्रेते टापू का छाला ही छाला बड़ी मुस्किलन हम “सुन्दर बंदरगाह” नौ की एक जगा पर पौंछयां, अर इख बटि लसया नगर नजदीक ही छौ।</verse>
				<verse number="9">अर हमरा काफी दिन इन्‍नि बरबाद ह्‍वे गैनी, इख तक कि हम यहूदी लोगु को उपवास रखण का दिन भि चलि गै छा। अर जाज को यू सफर करण बड़ु खतरनाक होण लगि गै छौ, इलै पौलुस न ऊंतैं सला देके बोलि,</verse>
				<verse number="10">“हे मेरा भैयों, मितैं लगदु कि ईं यात्रा मा ना सिरफ समान अर जाज को नुकसान होलु, बल्किन मा हमरा जीवन भि खतरा मा पोड़ि सकदिन।”</verse>
				<verse number="11">मगर सुबेदार न पौलुस की बातों से जादा जाज का कप्‍तान अर जाज का मालिक की बातों पर ध्यान देई।</verse>
				<verse number="12">अर ह्‍यूँद का दिन होण की वजै से जादातर लोगु न इन सला देई अगर ह्‍वे सैको, त हम कनकै भि जाज को सफर शुरु कैरिके बस फीनिक्स नगर तक पौंछी जां, ताकि हम ह्‍यूँद को मैना उखि काटा। अर फीनिक्स नगर त क्रेते टापू को एक बंदरगाह च, जु की दक्छिण-पच्छिम और उत्तर-पच्छिम दिसा मा च।</verse>
				<verse number="13">अर जब दक्छिण दिसा बटि हवा कम-कम चलण लगि गै, त हमतै लगि, कि अब त हमरि फीनिक्स नगर जाण कि योजना पूरि ह्‍वे जालि। इलै हमुन जाज को लंगर उठे अर क्रेते टापू का छाला ही छाला ह्‍वेके अगनै जाण लगि ग्यां।</verse>
				<verse number="14">मगर कुछ देर बाद मौसम बदलि गै अर वे टापू की तरफा बटि एक बड़ु तूफान ऐ, जैकू “यूरकुलीन” भि बुल्दिन, अर हम छाला से अलग होण लगि ग्यां,</verse>
				<verse number="15">अर तूफान का तेज बथौं का बीच मा हमरु जाज फंसी गै अर जाज अगनै नि बढी सैकी, इलै हमुन हार माणी दिनी अर जाज तैं बथौं का मुताबिक चलण दिनी।</verse>
				<verse number="16">तब हम वे बथौं मा बुगदी-बुगदी कौदा नौ का एक टापू की आड़ मा ऐ ग्यां, अर बड़ी मुस्किलन हमुन जान बचौण वळी नाव तैं जाज पर बान्धि।</verse>
				<verse number="17">अर वेका बाद हमुन जाज तैं मूड़ी बटि ज्यूड़ोळ बान्धि दिनी, ताकि जाज टूटी नि जौ। अर हमतै डौऽर छै कि हमरु जाज सुरतिस टापू का बळा मा फंसी नि जौ अर जाज का टुकड़ा नि ह्‍वे जा, इलै हमुन जाज का बड़ा परदा तैं भि मूड़ी खैंची दिनी, अर जाज तैं बथौं मा बुगण दिनी।</verse>
				<verse number="18">अर तूफान की वजै से हमरा बुरा हाल ह्‍वे गै छा, अर जाज हमरा वस से भैर ह्‍वे गै छौ, इलै हमतै दुसरा दिन जाज को समान पाणि मा ढोळण पोड़ि।</verse>
				<verse number="19">अर तिसरा दिन ऊंन खुद ही जाज मा काम औण वळी चीजों तैं भि ढोळि दिनी।</verse>
				<verse number="20">अर भौत दिनों तक हमतै सूरज अर गैंणा नि दिखैनि, किलैकि मौसम अर तूफान बड़ु खतरनाक होयुं छौ, अर आखिरी मा हमरि बचणै उम्मीद भि खतम होण लगि गै।</verse>
				<verse number="21">अर भौत दिनों बटि कैन भि कुछ नि खै छौ। तब पौलुस न ऊंका बीच मा खड़ु ह्‍वेके बोलि, “हे मेरा भैयों, जरुरी त यू छौ कि अगर तुम लोग मेरी बात तैं क्रेते टापू मा ही माणी जान्दा, कि हमतै समुन्दर को यू सफर नि करण चयेणु, त आज ईं विपदा मा नि पोड़दा, अर ना ही इथगा नुकसान होन्दु।</verse>
				<verse number="22">मगर फिर भि मि तुमतै एक सला देण चान्दु कि हिम्मत रखा, किलैकि तुम मा बटि कुई भि नि मुरलु, मगर जाज को नास ह्‍वे जालु।</verse>
				<verse number="23">किलैकि जै परमेस्वर पर मि बिस्वास रखदु अर जैकी सेवा करदु, वे ही परमेस्वर को स्वर्गदूत राति मेरा पास ऐके खड़ु ह्‍वे। अर वेन बोलि कि,</verse>
				<verse number="24">‘पौलुस डौऽर ना, त्वेतै महाराजा का समणि हाजिर होण जरुरी च। अर सुण, जथगा भि लोग तेरा दगड़ा मा यात्रा कना छिन, तेरी प्रार्थना तैं सुणी के परमेस्वर ऊं लोगु की भि हिफाजत करलु।’</verse>
				<verse number="25">इलै हे मेरा भैयों हिम्मत रखा, किलैकि मितैं परमेस्वर पर बिस्वास च कि जन वेन मितैं बतै उन्‍नि होलु</verse>
				<verse number="26">अर हम जरुर कै टापू पर ठैरि जौला।”</verse>
				<verse number="27">तूफान औण का बाद जब चौदहवीं रात ऐ, त हम अद्रिया समुन्दर की उथल-पुथल मा इनै-उनै जाणा छा, अर अधि रात का करीब जाज चलौण वळो तैं इन लगि कि हम कै छाला पर पौंछण वळा छां।</verse>
				<verse number="28">जब ऊंन पाणि की गैरै नापी त गैरै एक सौ बीस फुट छै, अर जरा अगनै जैके ऊंन फिर गैरै नापी त नब्बे फुट छै।</verse>
				<verse number="29">अर ऊंतैं डौऽर लगण लगि गै कि कखि जाज चटानों पर टकरै नि जौ, इलै ऊंन पिछनै जैके जाज का चार लंगर पाणि मा डालि दिनी ताकि जाज रुकी जौ। अर वीं रात ऊ प्रार्थना करण लगि गैनी कि बस सुबेर ह्‍वे जौ।</verse>
				<verse number="30">अर जाज चलौण वळा लोगु की उख बटि भजणे की इच्छा छै, इलै ऊंन जाज का अगनै का हिस्सा मा लंगर डलण को बहाना कैरिके अर जान बचौण वळी नाव तैं समुन्दर मा उतारि दिनी।</verse>
				<verse number="31">तब पौलुस न सुबेदार अर सिपयों कू बोलि, “अगर यू लोग जाज मा नि राला, त तुम भि नि बचि सकद्‍यां।”</verse>
				<verse number="32">इलै सिपयों न नाव का ज्यूडों तैं काटी के पाणि मा छोड़ि दिनी।</verse>
				<verse number="33">जब सुबेर होण वळी छै, त पौलुस न सभ्यों तैं खाणुक खाणु कू समझै अर बोलि कि, “हे मेरा भैयों, तुमुन चौदह दिनों बटि कुछ नि खै बस इंतजार ही कना रयां,</verse>
				<verse number="34">इलै मि तुम बटि बिन्ती करदु कि तुम कुछ खैल्या ताकि बच्यां रा, अर मि तुमतै बतै देन्दु कि तुमरा मुण्ड़ को एक भि बाळ बाकुं नि होलु।”</verse>
				<verse number="35">अर इन बोलि के वेन रुट्‍टी लेई अर सभ्यों का समणि परमेस्वर को धन्यवाद कैरी अर वीं रुट्‍टी का टुकड़ा कैरिके खाण लगि गै।</verse>
				<verse number="36">तब ऊं सब लोगु की हिम्मत बढी गै, अर ऊंन भि खाणुक खै।</verse>
				<verse number="37">अर वे जाज मा हम सब कुल मिलै के दुई सौ छियत्तर लोग छा।</verse>
				<verse number="38">अर ऊंन पुटगु भोरी के खाणु खै, अर बच्यां ग्यूँ का बोरयों तैं पाणि मा ढोळि दिनी ताकि जाज हलकु ह्‍वे जौ।</verse>
				<verse number="39">अर जब सुबेर ह्‍वे, त ऊंतैं समुन्दर को एक छालु दिखै, पर वु वीं जगा तैं पछ्याणी नि सकिनी। अर या जमीन सूखि छै, अर ऊंन इन ठाणि कि वु जाज तैं उखि खड़ु कैर द्‍या।</verse>
				<verse number="40">तब ऊंन लंगरों तैं खोली के समुन्दर मा डालि दिनी, अर वेका दगड़ा-दगड़ि जु रस्सा हेंडळ से जुड़यां छा ऊंतैं भि खोली दिनी, अर हवा मा जाज को बड़ु परदा फिर से चड़ै के छाला जनै जाण लगि गैनी।</verse>
				<verse number="41">अर अगनै दुई समुन्दर की लैरों का आपस मा मिलण की वजै से बळो का एक ढेर जमा होयुं छौ। अर हमरा जाज को अगनै को हिस्सा वे बळा मा फंसी गै अर हिली नि सैकी, अर पिछनै को हिस्सा तेज लैरों की वजै से टूटण लगि गै।</verse>
				<verse number="42">तब सिपयों न कैदियों तैं मरणे मनसा कैरी, ताकि कुई भि तैरी के भागी नि सैको।</verse>
				<verse number="43">मगर सुबेदार न पौलुस तैं बचौण की मनसा से ऊंतैं इन करण से रोकी अर आदेस देई, “जु तैरी सकदिन उ फाळ मारी के छाला जनै पैलि चलि जा,</verse>
				<verse number="44">अर जौं तैं तैरण नि औन्दु वु लोग तखतों अर जाज का टुटयां हिस्सों की मददळ जा। अर इनकै हम सब लोग बचि के छाला पर पौंछी ग्यां।”</verse>
			</chapter>
			<chapter number="28">
				<verse number="1">अर जब हम वे आंधी-तूफान से बचि ग्यां, त हमतै पता चलि कि ये टापू को नौ माल्टा च।</verse>
				<verse number="2">अर उखा लोगु न हम पर बड़ी दया दिखै, किलैकि बरखा लगीं छै अर भौत जादा ठण्ड लगणि छै, इलै ऊंन हम खुणि आग जगै अर हमरु स्वागत भि कैरी।</verse>
				<verse number="3">अर जब पौलुस भै न लखड़ा इकट्‍ठा कैरिके आग मा रखिनी, त हाळ लगण से एक गुरौ निकळि अर उ पौलुस का हाथ पर काटी के लटक्युं रै।</verse>
				<verse number="4">अर जु लोग उखा छा ऊंन देखि कि गुरौ पौलुस का हाथ पर लटक्युं च, त वु आपस मा बोन्‍न लगि गैनी कि, “पक्‍की बात यू मनखि खूनि च, भले ही यू समुन्दर बटि बचि के ऐ गै, मगर अब न्याय की देवी वेतैं ज्यून्दु नि छुड़ण चाणि।”</verse>
				<verse number="5">तब वेन अपणु हाथ झटकै के वे गुरौ तैं आग मा ढोळि दिनी अर पौलुस तैं कुछ भि नुकसान नि ह्‍वे।</verse>
				<verse number="6">अर लोग ईं बात को इंतजार करणा छा कि उ उसै जालु अर तुरन्त भ्वीं मा पोड़ि के मोरि जालु, मगर वु लोग वेतैं काफी देर तक दिखणा रैनी। अर ऊंन देखि कि वेतैं कुछ भि नि ह्‍वे, त ऊंन अपणु विचार बदलि के बोलि, “पक्‍की बात यू कुई भगवान च।”</verse>
				<verse number="7">अर ईं जगा का नजदीक ही ये टापू का परधान पुबलियुस की जमीन छै। अर येन अपणा घौर लि जैके हमरु स्वागत कैरी, अर तीन दिनों तक हमरि खूब अच्छे से खातिरदारि कैरी।</verse>
				<verse number="8">अर पुबलियुस भै को बुबा तैं खून काट होणा छा, अर यां की वजै से वु पस्त ह्‍वेके बिस्तर पर पोड़्यूं छौ, अर वेतैं जौर भि अयूं छौ। तब पौलुस वेका पास गै अर वे पर हाथ रखी के प्रार्थना कैरी, अर वु खूब ह्‍वे गै।</verse>
				<verse number="9">अर जब लोगु तैं ईं बात का बारा मा पता चलि, त वे टापू का और बिमार लोग भि ऐनी अर वु सब भि खूब ह्‍वे गैनी।</verse>
				<verse number="10">अर ऊं लोगु न हमरु भौत आदर-सम्मान कैरी अर जब हम उख बटि जाण लगि ग्यां, त ऊं लोगु न हमरि जरुरत को समान जाज मा रखी दिनी।</verse>
				<verse number="11">अर तीन मैना का बाद हम सिकन्दरिया नगर कू जाण वळा पाणि का एक जाज मा बैठ ग्यां, अर हमुन जाज को सफर शुरु कैरी अर यू जाज पूरा ह्‍यूँद बटि माल्टा टापू पर ही रुक्युं छौ। अर ये जाज पर दुई जौंळ्या भैयों को चिन्‍न बणयूं छौ, जु कि द्‍यबता छा।</verse>
				<verse number="12">अर फिर सुरकूसा नगर का छाला मा पौंछी के हमुन लंगर डालि अर तीन दिन तक उखि रयां।</verse>
				<verse number="13">अर येका बाद हम घूमी के रेगियुम नगर मा पौंछयां। अर एक दिन बाद दक्छिण दिसा बटि बथौं चलण लगि गै, इलै हम दुसरा दिन पुतियुली नगर मा ऐ ग्यां।</verse>
				<verse number="14">अर उख हमतै बिस्वासी भै-बैंणा मिलिनी, अर ऊंन हम बटि बिन्ती कैरी कि सात दिनों तक इखि रा, अर हम उखि रयां। अर येका बाद हम रोम नगर कू चलि ग्यां।</verse>
				<verse number="15">अर जब रोम नगर का बिस्वासी भै-बैंणो तैं हमरा औण का बारा मा पता चलि, त ऊ हमतै मिलणु खुणि अप्पियुस का बजार तक, इख तक कि कुछ लोग तीन धर्मशाळाओं नौ का नगर तक ऐनी। अर यों लोगु तैं देखि के पौलुस भै की हिम्मत बढी, अर वेन परमेस्वर को धन्यवाद दिनी।</verse>
				<verse number="16">अर जब हम रोम नगर मा पौंछयां, त पौलुस भै तैं इखुली रौण की इजाजत मिली गै, मगर वेकी पैरेदारी करणु खुणि एक सिपै तैं रखै गै।</verse>
				<verse number="17">अर तीन दिन का बाद पौलुस न यहूदियों का खास लोगु तैं एक साथ बुलै। अर जब वु इकट्‍ठा ह्‍वेनि, त वेन ऊंकू बोलि, “हे मेरा भैयों, मिन अपणा लोगु या अपणा पितरों की रीति-रिवाजों का खिलाप मा कुछ भि नि कैरी। फिर भि यरूशलेम नगर का लोगु न मितैं कैदी बणै के रोमियों का सुपुर्द कैरी दिनी।</verse>
				<verse number="18">अर जाँच-पड़ताल करण का बाद ऊंन मितैं छुड़ण चै, किलैकि मौत का दण्ड का लैख मेरु कुई भि अपराध नि कर्युं छौ।</verse>
				<verse number="19">मगर जब यहूदी लोग ईं बात को विरोध कैरिके बोन्‍न लगि गैनी, तब मिन अपणा न्याय खुणि महाराज की मांग कैरी। अर मिन या मांग इलै नि कैरी, कि मि ऊं लोगु पर इळजाम लगौं, ना ही मेरु इन्द्रयो कुई मकसद छौ।</verse>
				<verse number="20">अर मिन तुमतै इख इलै बुलै, ताकि तुम बटि मिलु अर बात-चित कैरी सैकु, अर जै मसीह औण की आस इस्राएली लोगु न रखी च, वे ही मसीह का बारा मा परचार करण का बानो आज मि इख बेड़ियों मा बन्धयूं छौं।”</verse>
				<verse number="21">तब ऊंन वेकू बोलि, “पौलुस, हमुन तेरा बारा मा यहूदिया मुलक बटि कुई चिठ्‍ठी नि पै, अर ना ही कै यहूदी भै न इख ऐके तेरा बारा मा भलु-बुरु बोलि अर ना कुछ बतै।</verse>
				<verse number="22">मगर तू क्या चाणि छैई वा बात हम त्वे बटि ही सुनण चन्द्‍यां, किलैकि हमतै पता च कि हरेक जगा का लोग ये मसीह का बाटा का खिलाप मा बात कना छिन।”</verse>
				<verse number="23">तब ऊंन पौलुस का दगड़ा मा बात-चित करणु खुणि एक दिन ठैरै। अर जब उ दिन ऐ, त भौत सा लोग वे घौर मा जमा ह्‍वेनि, जै घौर मा पौलुस रुक्युं छौ। तब पौलुस ऊंतैं यीशु का बारा मा, मूसा का दियां नियम-कानूनों का बारा मा, अर रैबर्यों की किताबों बटि समझौण लगि गै, अर वेन परमेस्वर का राज का बारा मा भि अपणी गवै दे, अर यू सब बिंगौन्द-बिंगौन्द सुबेर बटि रुमुक ह्‍वे गै।</verse>
				<verse number="24">अर कुछ लोगु न पौलुस की बातों पर बिस्वास कैरी, पर कुछ लोगु न बिस्वास नि कैरी।</verse>
				<verse number="25">अर जब वु लोग आपस मा एकमत नि ह्‍वेनि, अर जाण लगि गैनी, तब पौलुस न ऊंकू बोलि, “जान्द-जान्द मेरी बात तैं सुणिल्या, यशायाह रैबर्या का द्‍वारा पवित्र आत्मा न तुमरा पितरों बटि ठिक ही बोलि छौ कि,</verse>
				<verse number="26">“‘तू जैके यों लोगु कू बोल दे कि, तुम सुणिल्या त सही, मगर तुमरि समझ मा कुछ नि औण, अर तुमतै दिख्यालु त सही, मगर वीं बात को मतलब पता नि चलण,</verse>
				<verse number="27">किलैकि यों लोगु को मन निठुर ह्‍वे गै, अर वु अपणा कन्दूड़ो न सुनण नि चनदिन, अर ऊंन अपणा आंख्यों तैं बन्द कैरियाली, ताकि इन नि हो कि वु अपणा आंख्यों न देखा अर कन्दूड़ो न सुणा, अर अपणा मन मा समझा, अर अपणा-अपणा पापों बटि पस्ताप कैरा, अर मि ऊंतैं खूब कैरी द्‍यो।’</verse>
				<verse number="28">“इलै तुम भि जाणि जा कि परमेस्वर को बचौण वळु वचन अब ऊं लोगु का पास भि भेजि गै, जु कि यहूदी जाति का नि छिन अर वु लोग वेका बारा मा सुणला।” [</verse>
				<verse number="29">अर पौलुस की यों बातों तैं सुणी के यहूदी लोग आपस मा भौत वाद-विवाद करद-करद उख बटि चलि गैनी।]</verse>
				<verse number="30">अर पौलुस पूरा दुई साल तक अपणा किराया का घौर मा रै, अर जु लोग वेका पास औन्दा छा, वु ऊं सब लोगु को स्वागत बड़े प्यार से करदु छौ।</verse>
				<verse number="31">अर बिना रुकावट उ, परमेस्वर का राज को परचार बड़ी हिम्मत से करदु छौ, अर प्रभु यीशु मसीह का बारा मा लोगु तैं सिखौणु रौन्दु छौ।</verse>
			</chapter>
		</book>
		<book number="45">
			<chapter number="1">
				<verse number="1">हे मेरा भै-बैंणो, मि प्रभु यीशु मसीह को सेवक पौलुस छौं अर मि या चिठ्‍ठी इलै लिखणु छौं, किलैकि पिता परमेस्वर न मितैं यीशु मसीह को खास चेला होणु खुणि अर वेका शुभ समाचार तैं लोगु तैं सुनौण खुणि अलग कर्युं च।</verse>
				<verse number="2">अर ये शुभ समाचार को करार परमेस्वर न पैलि बटि अपणा रैबर्यों का द्‍वारा पवित्रशास्‍त्र मा लिखीं बातों मा करवै छौ।</verse>
				<verse number="3">अर यू शुभ समाचार वेका पुत्र यीशु मसीह का बारा मा च, अर उ सरील का रुप मा राजा दाऊद का वंश मा बटि पैदा ह्‍वे।</verse>
				<verse number="4">अर वेतैं पवित्र आत्मा की ताकत से मुरदो मा बटि ज्यून्द किये गै। अर इन कैरिके पिता परमेस्वर न साबित कैरी, कि हमरु प्रभु यीशु मसीह वेको पुत्र च।</verse>
				<verse number="5">अर वेका द्‍वारा हम लोगु न परमेस्वर की किरपा अर वेको खास चेला होण को पद पै, ताकि हरेक जाति का लोग यीशु मसीह का नौ पर बिस्वास कैरा अर वेकी आज्ञाओं तैं माणा।</verse>
				<verse number="6">अर यों जातियों मा बटि तुम भि छाँ, जौं तैं यीशु मसीह न अपणु चेला होणु खुणि बुलयूं च।</verse>
				<verse number="7">हे मेरा भै-बैंणो, या चिठ्‍ठी रोम नगर मा रौण वळा सब बिस्वासी लोगु खुणि च, जु कि हमरा पिता परमेस्वर तैं भौत प्यारा छिन अर वेका द्‍वारा पवित्र होण खुणि चुण्यां छिन। अर हम इन प्रार्थना करद्‍यां कि हमरा पिता परमेस्वर अर प्रभु यीशु मसीह की तरफा बटि तुमतै वेकी किरपा अर शान्ति मिलदी रौ।</verse>
				<verse number="8">सबसे पैलि मि तुम सभ्यों का खातिर अपणा यीशु मसीह का द्‍वारा पिता परमेस्वर तैं धन्यवाद देन्दु, किलैकि तुमरा बिस्वास की चर्चा पूरि दुनियां मा होणी च।</verse>
				<verse number="9">अर पिता परमेस्वर जैकी सेवा मि करदु, वेको पुत्र यीशु मसीह मेरु गवा च किलैकि मि वेको शुभ समाचार लोगु का बीच मा सुणौन्दु। अर मि तुमतै लगातार अपणी प्रार्थना मा भि याद कनु रौन्दु।</verse>
				<verse number="10">अर हमेसा इन बिन्ती करदु कि अगर पिता परमेस्वर की इच्छा होलि, त मि कम से कम अबरि दौं त तुमरा पास ऐ जौ।</verse>
				<verse number="11">किलैकि मितैं तुम बटि मिलण कि भौत मनसा च, ताकि तुमतै परमेस्वर की तरफा बटि कुई आसिरबाद दे सैकु, ज्यां से कि तुम और भि जादा मजबूत ह्‍वे जा।</verse>
				<verse number="12">अर जब मि तुम लोगु का बीच मा रौलु, त वे बगत हम आपस मा एक-दुसरा तैं बिस्वास मा और जादा बढौला।</verse>
				<verse number="13">हे मेरा भै-बैंणो, मि इन चान्दु कि तुम लोग ईं बात तैं जाणि ल्या कि मिन भौत बार तुमरा पास औण की योजना बणै, मगर कुई ना कुई बात मितैं हमेसा रोकी देन्दी। अर तुमरा पास औण की मेरी भौत इच्छा च, किलैकि जन मिन भौत सि जगा जैके लोगु तैं पिता परमेस्वर का रैबार तैं बतै अर ऊंन बिस्वास कैरी, ठिक उन्‍नि तुमरा बीच मा भि हो।</verse>
				<verse number="14">अर मेरु यू फरज बणदु कि मि सब लोगु तैं शुभ समाचार का बारा मा बतौ, अब चै वु सब यहूदी जाति का छिन या कै दुसरि जाति का, अब चै वु अकलमन्द छिन या फिर नासमझ मि पर यों सब बातों को कुई फर्क नि पोड़दु।</verse>
				<verse number="15">इलै तुम लोग जु रोम नगर मा रौन्द्‍यां, तुमरा बीच मा मितैं शुभ समाचार परचार करण की बड़ी इच्छा च।</verse>
				<verse number="16">अर मि शुभ समाचार को परचार करण मा नि सरमान्दु, किलैकि ये परचार मा परमेस्वर की ताकत च अर पैलि यू शुभ समाचार केवल यहूदी जाति का लोगु खुणि छौ, मगर अब यू परचार ऊं लोगु खुणि भि ह्‍वे गै जु यहूदी जाति का नि छिन। अर हरेक वु मनखि जु कि बिस्वास करलु वेतैं छुटकारा मिललु।</verse>
				<verse number="17">किलैकि मनखियों तैं धरमी बणौणु खुणि शुभ समाचार परमेस्वर का द्‍वारा ही मिलदु। अर जब मनखि शुरुवात बटि आखिरी तक बिस्वास करदु तब उ परमेस्वर की नजर मा धरमी साबित होन्दु। अर जन कि पवित्रशास्‍त्र मा भि लिख्यूं च कि, “जु मनखि परमेस्वर की नजर मा धरमी च, उ बिस्वास करण की वजै से ज्यून्द रालु।”</verse>
				<verse number="18">हे मेरा दगड़्यों, पिता परमेस्वर स्वर्ग बटि अपणु गुस्सा ऊं सब लोगु पर दिखान्दु जु कि दुष्‍ट छिन अर वेकी भक्‍ति तैं नि करदिन, अर जु लोग अन्यो कैरिके सच्‍च तैं दबै के रखदिन।</verse>
				<verse number="19">किलैकि जु कुछ भि पिता परमेस्वर का बारा मा जणे जै सकदु वु सब कुछ ऊ जणदा छिन, इख तक कि खुद परमेस्वर न भि ऊंतैं सब कुछ दिखै।</verse>
				<verse number="20">अर या बात मि इलै बोन्‍नु छौं किलैकि पिता परमेस्वर का गुण दुनियां की शुरुवात बटि ही साफ-साफ दिख्यौणा छिन, याने की वेकी सदनि की ताकत ज्यां से की वेन पूरि दुनियां तैं बणै, यू सब हमतै दिखेन्दु च। इलै मनखि अपणा बारा मा कन्दरि भि सफै किलै नि द्‍यो, यां खुणि अब वेका पास कुई बहाना नि रै गै।</verse>
				<verse number="21">किलैकि ऊ परमेस्वर तैं जणदा छिन, मगर ऊंन वेतैं वु आदर-सम्मान नि दिनी जु कि वेको च अर ना ही ऊंन वेको धन्यवाद कैरी। मगर वु लोग त वेका बारा मा बुरा विचार रखण लगि गैनी अर इनकै ऊंका मनों मा अन्धेरु समै गै।</verse>
				<verse number="22">हालांकि वु इन दावा करदिन कि हम समझदार छां मगर वु सब मूरख साबित ह्‍वेनि।</verse>
				<verse number="23">अर ऊं लोगु न सदनि तक रौण वळा पिता परमेस्वर की बडै नि कैरी, बल्किन मा ऊंन त नास ह्‍वे जाण वळा मनखियों, पंछियों, अर चार खुटा वळा जानबरों की पूजा कैरी, अर वेका दगड़ा-दगड़ि ऊंन रिंगण वळा जीव अर जानबरों की मूरत बणैनी, अर ऊंकी पूजा करण लगि गैनी।</verse>
				<verse number="24">इलै परमेस्वर न ऊंका मन की बुरी इच्छाओं का मुताबिक ऊंतैं ऊंका हाल पर छोड़याली, ताकि ऊ अपणा मनों की गळत इच्छाओं तैं पूरु कना रा। अर अपणा-अपणा सरील तैं एक-दुसरा का दगड़ा मा गळत सम्बन्ध रखी के खुद तैं नास कैरी द्‍या।</verse>
				<verse number="25">अर ऊंन परमेस्वर की सच्‍चै का बदला मा झूठ्‍ठ तैं स्वीकार कैरी, अर हाथों की बणि चीजों की सेवा अर वेकी भक्‍ति कैरी, मगर ईं दुनियां तैं बणौण वळा परमेस्वर की भक्‍ति ऊंन नि कैरी, जैकी तारीफ सदनि किये जान्दी। आमीन।</verse>
				<verse number="26">इलै परमेस्वर न ऊंतैं बुरा काम करण खुणि छोड़याली। इख तक की कुछ जनानियों न कुदरत का मुताबिक अपणा पति का दगड़ा मा सरील का सम्बन्ध नि बणैनी, बल्किन मा ऊं जनानियों न कुदरत का खिलाप मा जैके दुसरि जनानियों का दगड़ा मा सरील का सम्बन्ध बणैनी।</verse>
				<verse number="27">अर ठिक इन्‍नि आदमियों न भि जनानियों का दगड़ा मा ना, बल्किन मा कुदरत का खिलाप मा जैके बैखों खुणि इच्छा रखी के ऊंका दगड़ा मा सरील का सम्बन्ध बणैनी। अर ऊ अपणा आपस मा इन्दरि बात बुल्दिन जौं पर सरम औन्दी। अर गळत काम करण वळा इन्द्रया लोगु तैं जरुर दण्ड दिये जाणु रालु।</verse>
				<verse number="28">अर जब ऊं लोगु न अपणा मन मा परमेस्वर का ज्ञान तैं रखण खूब नि समझि, त परमेस्वर न भि ऊंतैं ऊंका भ्रष्‍ट मन का हाल पर ही छोड़ दिनी, ताकि वु बुरा काम करण पर ही लग्यां रा।</verse>
				<verse number="29">किलैकि ऊ हरेक किसम की बुरै से भरपूर छिन जन कि, दुष्‍टता, लालच करण, खार खाण, खून करण, झगड़ा करण, लोगु की छुईं एक-दुसरा मा लगौण,</verse>
				<verse number="30">बदनाम करण, परमेस्वर से नफरत करण, दुसरा लोगु को आदर नि करण, ढीट होण, हरेक बात मा खुद तैं बड़ु मनण वळा, एक-दुसरा का खिलाप मा बुरी चाल चलण, ब्वे-बाब की आज्ञा तैं नि मनण,</verse>
				<verse number="31">नासमझ, धोखा देण, अर इन्द्रया लोग भि जौं का सभौ मा प्यार नि च, दया नि करण, अर एक-दुसरा खुणि निठुर होण।</verse>
				<verse number="32">अर वु पिता परमेस्वर का ये खरा आदेस तैं भौत अच्छे से जणदिन, कि जु लोग इन्द्रया काम करदिन वु सब मौत का दण्ड का लैख छिन। मगर फिर भि ऊ केवल इन्‍नि काम कना रौनदिन, बल्किन मा इन काम करण वळो से खुश भि होनदिन।</verse>
			</chapter>
			<chapter number="2">
				<verse number="1">इलै हे इळजाम लगौण वळा लोगु, अब चै तुम जु कुई भि छाँ, तुम लोगु का पास अब कुई जबाब नि रै गै, किलैकि जौं बातों का खातिर तुम दुसरो पर इळजाम लगौन्द्‍यां, वीं बात मा तुम खुद ही दोषी ठैरैये जैल्या। अर सुणा, तुम दुसरो पर इळजाम लगौन्द्‍यां, जब कि तुम खुद भि ऊं ही कामों तैं करद्‍यां।</verse>
				<verse number="2">हे मेरा भै-बैंणो, तुम इन किलै बुल्द्‍यां कि जु लोग इन्द्रया गळत काम करदिन ऊं सब लोगु तैं परमेस्वर दण्ड द्‍यो, जब कि तुम लोग भि ठिक उन्‍नि काम करद्‍यां। इलै इन्दरि उम्मीद नि रखा की तुम पिता परमेस्वर का दण्ड से बचि जैल्या। अर हम ईं बात तैं भौत अच्छे से जणद्‍यां, कि इन्द्रया बुरा काम करण वळो तैं जब परमेस्वर दण्ड देन्दु त वेको फैसला खरु ही होन्दु।</verse>
				<verse number="3"></verse>
				<verse number="4">अर एक बात बता, क्या तुम लोग परमेस्वर की किरपा, अर वेकी सौण की ताकत, अर हमेसा का धन तैं सुद्‍दी समझद्‍यां? क्या तुम लोग इन नि समझद्‍यां, कि परमेस्वर की किरपा तुमरा मन तैं बदळणु खुणि सिखौणि रौन्दी?</verse>
				<verse number="5">मगर तुम लोग त अपणा निठुर अर ढीट मन का कारण वेका खतरनाक दिन खुणि, याने कि जै दिन मा परमेस्वर को सच्‍चु न्याय परगट होलु, तुम वेका गुस्सा तैं अपणा खिलाप मा और भि जादा बढौणा छाँ।</verse>
				<verse number="6">अर पिता परमेस्वर हरेक मनखि बटि वेका कामों का मुताबिक हिसाब-किताब ल्यालु।</verse>
				<verse number="7">जु लोग लगातार भलै का काम करण मा, पिता परमेस्वर की बडै करण मा, अर सदनि का जीवन की खोज मा लग्यां रौनदिन, पिता परमेस्वर ऊंतैं सदनि को जीवन द्‍यालु।</verse>
				<verse number="8">मगर जु लोग झगड़ा करण वळा छिन अर सच्‍चै तैं नि मणदिन, बल्किन मा पिता परमेस्वर का खिलाप मा ह्‍वेके काम करदिन, ऊं सब लोगु तैं देखि के पिता परमेस्वर तैं गुस्सा आलु, अर वेको परकोप ऊं पर पोड़लु।</verse>
				<verse number="9">अर बुरै करण वळा सब लोग तैं दुख-मुसीबत झिलण पोड़लि सबसे पैलि यहूदी जाति का लोगु तैं अर वेका बाद ऊं लोगु तैं जु यहूदी जाति का नि छिन।</verse>
				<verse number="10">अर ठिक उन्‍नि भलै का काम करण वळा सब लोगु तैं आदर-सम्मान अर शान्ति मिलली, सबसे पैलि यहूदी जाति का लोगु तैं अर वेका बाद ऊं लोगु तैं जु यहूदी जाति का नि छिन।</verse>
				<verse number="11">किलैकि पिता परमेस्वर कै का दगड़ा मा भि पक्षपात नि करदु।</verse>
				<verse number="12">हे मेरा दगड़्यों, जथगा भि लोग पाप करदिन अब चै वु यहूदी जाति का हो या दुसरि जाति का परमेस्वर सभ्यों तैं दण्ड दयालु। इलै सुणा, जौं लोगु का पास मूसा रैबर्या का दियां नियम-कानून नि छिन, ऊंको न्याय बिना नियम-कानून को होलु अर ऊंतैं ऊंका कामों का मुताबिक ही दण्ड दिये जालु। मगर जु लोग यहूदी जाति का छिन ऊंको न्याय नियम-कानून का मुताबिक ही किये जालु, अर वेका मुताबिक ही वु दण्ड पाला किलैकि ऊंका पास मूसा रैबर्या का दियां नियम-कानून छिन।</verse>
				<verse number="13">किलैकि नियम-कानून तैं सुनण वळा परमेस्वर की नजर मा धरमी नि गिणै जाला, बल्किन मा वु लोग धरमी गिणै जाला जु लोग नियम-कानून का मुताबिक चलण वळा छिन।</verse>
				<verse number="14">अर जु लोग यहूदी जाति का नि छिन, ऊंतैं नियम-कानून नि मिली, मगर वु अपणा भला सभौ की वजै से नियम-कानून की बातों पर चलदिन। अर नियम-कानून नि होण का बाद भि वु लोग अफ खुणि खुद ही नियम-कानून बणि जनदिन।</verse>
				<verse number="15">किलैकि वु अपणा अच्छा सभौ का द्‍वारा ही परमाण देन्दिन, कि नियम-कानून ऊंका मनों मा लिख्यां छिन। अर ऊंको मन भि ऊंका बारा मा गवै देन्दु, अर ऊंका विचार भि ऊंतैं कभि-कभि दोषी, अर कभि-कभि निरदोष ठेरौन्दिन,</verse>
				<verse number="16">अर यू सब कुछ आखिरी का दिन मा होलु, जब पिता परमेस्वर यीशु मसीह का द्‍वारा लोगु का गुप्‍त कामों को न्याय करलु। अर जै शुभ समाचार को परचार मि करदु उ यू ही च।</verse>
				<verse number="17">तुम लोग जु कि खुद तैं यहूदी जाति का बतौन्द्‍यां, अर अपणु भरोसा नियम-कानून पर रखद्‍यां। अर तुम बुल्द्‍यां की हमरु रिश्ता पिता परमेस्वर का दगड़ा मा च इलै तुम ईं बात पर बड़ु मोन करद्‍यां,</verse>
				<verse number="18">मगर तुम वेकी मनसा का बारा मा जाणा, अर वेकी भली बातों तैं माणा, किलैकि तुमतै नियम-कानूनों की शिक्षा मिली च।</verse>
				<verse number="19">अर खुद पर भरोसा करद्‍यां कि तुम अन्धों तैं बाटु दिखौण वळा छाँ, अर आत्मिक रुप से जु लोग अन्धेरा मा चलण छिन ऊं खुणि तुम उज्याळु छाँ।</verse>
				<verse number="20">अर मूरख लोगु तैं सिखौण वळा, अर बच्‍चों तैं उपदेस देण वळा गुरु छाँ, अर तुम इन समझद्‍यां की तुम ज्ञान अर सच्‍चै खुणि एक खरु उदारण छाँ, तुम इन भि समझद्‍यां की नियम-कानून मा जु कुछ च, वु सब कुछ तुमतै ही मिल्यूं च।</verse>
				<verse number="21">पर ज्वा शिक्षा तुम दुसरा लोगु तैं सिखौन्द्‍यां, क्या वा शिक्षा तुम खुणि नि च? अरे, तुम लोग त परचार कन दौं बुल्द्‍यां कि, “चोरी नि कैरा” पर तुम खुद चोरी करद्‍यां।</verse>
				<verse number="22">अर तुम बुल्द्‍यां कि, “गळत सम्बन्ध नि रखा,” मगर तुम खुद गळत सम्बन्ध रखद्‍यां। अर मूरतों से तुमतै घिण औन्दी, मगर तुम खुद मन्दिरों तैं लूटी देन्द्‍यां।</verse>
				<verse number="23">तुम अपणा नियम-कानून का खातिर बड़ु मोन करद्‍यां, मगर ऊं ही नियम-कानून तैं नि माणी के परमेस्वर को अपमान भि करद्‍यां।</verse>
				<verse number="24">जन कि पवित्रशास्‍त्र मा भि लिख्यूं च कि, “तुम लोगु की वजै से ऊं लोगु का बीच मा परमेस्वर का नौ की बेजती होन्दी, जु यहूदी जाति का नि छिन।”</verse>
				<verse number="25">अगर जु तुम यहूदी लोग नियम-कानून का मुताबिक चलद्‍यां, त खतना का रिवाज तैं पूरु करौण को फैदा च, पर अगर जु तुम नियम-कानून का मुताबिक नि चलद्‍यां त तुमरो खतना करौण को कुई फैदा नि च।</verse>
				<verse number="26">अर जु लोग यहूदी जाति का नि छिन अगर ऊ बिना खतना कर्यां नियम-कानून मा लिखी बातों को पालन करदिन, त ऊंकी गिनती ऊं लोगु का दगड़ा मा नि होलि जौं लोगु को खतना होयुं च?</verse>
				<verse number="27">अर अगर कुई मनखि सरील को खतना कियां बगैर नियम-कानून को पूरु पालन करदु, त सुणा, वु लोग ही तुम यहूदी लोगु को न्याय करला किलैकि तुम लोगु का पास नियम-कानून की किताब च, अर वामा सब लिख्यूं च। अर अब खतना करौण का बाद भि अगर तुम नियम-कानूनों को पालन नि करद्‍यां, त तुम दोषी ठैरैये जैल्या।</verse>
				<verse number="28">सच्‍चि बात त या च कि जौं लोगु न अपणा सरील का हिस्सा तैं काटी के खतना कर्युं च, अर फिर यहूदियों होण को पूरु दिखावा करदिन असल मा वु लोग यहूदी जाति का नि छिन।</verse>
				<verse number="29">मगर एक सच्‍चु यहूदी त वु च, जु कि अपणा मन से यहूदी हो अर वेका मुताबिक ही वेन अपणु खतना भि कर्युं हो अर यू सब केवल मन अर आत्मा मा च, ना कि नियम-कानून का मुताबिक सरील मा। इन्द्रया लोगु की तारीफ मनखियों का द्‍वारा ना, बल्किन मा पिता परमेस्वर की तरफा बटि होन्दी।</verse>
			</chapter>
			<chapter number="3">
				<verse number="1">त अब मितैं इन बता कि यहूदी लोग दुसरि जाति का लोगु से कनकै जादा बढी के छिन, अर जु खतना ऊंन करवै वेको क्या फैदा ह्‍वे?</verse>
				<verse number="2">हे मेरा भै-बैंणो, या बात हरेक तरौं से भली च, किलैकि परमेस्वर को वचन सबसे पैलि यहूदी लोगु तैं ही दिये गै।</verse>
				<verse number="3">अर अगर यहूदी लोगु मा बटि कुई मनखि बिस्वास नि करलु, त क्या पिता परमेस्वर की सच्‍चै बेकार साबित ह्‍वे गै?</verse>
				<verse number="4">ना इन कभि नि ह्‍वे सकदु। सुणा, दुनियां को हरेक मनखि झूठ्‍ठु साबित ह्‍वे सकदु च, मगर पिता परमेस्वर ही च जु कि अपणा वचन को पालन करदु, इलै वेतैं सच्‍चु साबित होण द्‍या। जन कि पवित्रशास्‍त्र मा भि लिख्यूं च अर वा बात इन च कि, “हे मेरा परमेस्वर तुम अपणा मामला मा सच्‍चा छाँ, अर तुम अपणु फैसला बड़ा न्याय से करद्‍यां।”</verse>
				<verse number="5">पर अगर जु हमरा गळत काम करण से पिता परमेस्वर की अच्छे और भि जादा साफ ह्‍वेके हमरा समणि औन्दी, त फिर परमेस्वर हम पर किलै गुस्सा होन्दु अर किलै हमतै दण्ड देन्दु? (अरे, यू सब त मनखियों का अपणा विचार छिन जु कि गळत छिन)।</verse>
				<verse number="6">अगर इन होन्दु त पिता परमेस्वर फिर ईं धरती का लोगु को न्याय कनकै करलु?</verse>
				<verse number="7">अर अगर मेरा झूठ्‍ठ बोन्‍न की वजै से परमेस्वर को सच्‍चु होण और भि जादा परगट होन्दु, अर इन कैरिके वेकी और भि जादा बडै होन्दी, त फिर मितैं ये काम खुणि पापि ठैरै के परमेस्वर गळत न्याय करण वळु बणि गै।</verse>
				<verse number="8">अर अगर या सच्‍च च त फिर हम भि बोलि सकद्‍यां कि, “चला, हम सब मिली के बुरै करद्‍यां, ताकि वां से भलै हो?” अर कुछ लोग हम पर इन इळजाम लगै के बुल्दिन, “अरे, यू लोग त बुरै की बातों तैं सिखौन्दिन।” अर न्याय का हिसाबळ जु दण्ड ऊं खुणि रख्युं च, उ ऊंतैं जरुर मिललु।</verse>
				<verse number="9">अर ज्वा बात मिन तुमतै बतै त क्या हम इन बोलि सकद्‍यां, कि हम यहूदी लोग दुसरा लोगु से भौत अच्छा छां? नऽ रे ना, इन बात नि च, किलैकि हमुन पैलि ही या बात बतैयालि की हरेक मनखि पाप का वश मा च, अब चै वु यहूदी जाति को हो या कुई और।</verse>
				<verse number="10">अर जन कि पवित्रशास्‍त्र मा भि लिख्यूं च कि, “परमेस्वर की नजर मा कुई भि मनखि धरमी नि च, ना एक भि नि च।</verse>
				<verse number="11">अर कै का बिंगण मा नि औन्दु, कि वेको काम करण को तरीका कन च। अर कुई भि मनखि परमेस्वर तैं जनण कि कोसिस नि करदु।</verse>
				<verse number="12">सब मनखि भटकी गैनी, वु सभ्या का सभि बेकार ह्‍वे गैनी। अर कुई भि भलै का काम नि करदु, एक भि ना।”</verse>
				<verse number="13">“अर ऊंका गौळा इन छिन जन कि एक खुलि कबर, अर अपणी छल-कपट की बातों से वु लोगु तैं भरमौण की कोसिस करदिन।” “अर ऊंका गिच्‍चा बटि निकळण वळी बात गुरौ का बिस जन छिन।”</verse>
				<verse number="14">“ऊंका गिच्‍चा बटि सिरफ दुसरो खुणि असगार अर बुरै ही निकळदि।”</verse>
				<verse number="15">“अर लोगु को कत्ल करणु खुणि वु तुरन्त अटगदिन।</verse>
				<verse number="16">अर जै बाटा पर वु जान्दा छिन, वे बाटा पर विणास अर मुसीबत ही च।</verse>
				<verse number="17">“अर वु लोग शान्ति का बाटा का बारा मा कुछ नि जणदिन।”</verse>
				<verse number="18">“अर ऊंका मनों मा परमेस्वर की डौऽर जरा भि नि च।”</verse>
				<verse number="19">अर अब हम या बात जणदा छां की नियम-कानून हमतै जु कुछ भि बतौन्दिन, वु सिरफ ऊं लोगु खुणि ही च जु नियम-कानूनों तैं मणदिन, ताकि ऊं लोगु की टुपटी बन्द ह्‍वे जौ। अर पिता परमेस्वर ही च जु की सब गळत काम करण वळा लोगु को न्याय करण वळु च।</verse>
				<verse number="20">किलैकि मूसा का नियम-कानूनों का आधार पर कुई भि मनखि परमेस्वर का समणि धरमी नि ठैरैये जालु, इलै परमेस्वर का नियम-कानूनों की वजै से हमतै इन ज्ञान मिलदु कि हम सब लोग पापि छां।</verse>
				<verse number="21">मगर जु मनखि प्रभु यीशु मसीह पर बिस्वास करदु, उ पिता परमेस्वर की नजर मा धरमी मनखि बणदु, अर यू मूसा रैबर्या का दियां नियम-कानून का मुताबिक नि होन्दु। हालांकि नियम-कानून अर परमेस्वर का रैबर्या ईं बात की ही गवै देन्दिन।</verse>
				<verse number="22">अर यू सब कुछ तब होन्दु जब हम यीशु मसीह पर बिस्वास करद्‍यां, अर वेका द्‍वारा ही हम लोग धरमी ठैरैये जन्द्‍यां। अर जु कुई यीशु मसीह पर बिस्वास करदु, पिता परमेस्वर वे मनखि का दगड़ा मा कुई भेदभाव नि करदु।</verse>
				<verse number="23">किलैकि सभ्यों न पिता परमेस्वर का खिलाप मा जैके गळत काम करिनी, अर ऊं पापों की वजै से वु लोग वेसे मिलण वळा आदर-सम्मान से दूर छिन।</verse>
				<verse number="24">मगर तभि भि पिता परमेस्वर की महान किरपा न इन साबित कैरी, कि हम वेकी नजर मा धरमी छां। अर यू वेन अपणा पुत्र प्रभु यीशु मसीह का द्‍वारा कैरी, जब वेन हमतै हमरा पापों से माफी दिनी, अर वे दण्ड से छुटकारु दे जु कि हमतै मिलण वळु छौ।</verse>
				<verse number="25">अर या पिता परमेस्वर की योजना छै, ज्वा कि वेन मनखि का समणि रखी कि लोग अपणा-अपणा पापों से पस्ताप कैरा। इलै वेन यीशु मसीह तैं ईं दुनियां मा भेजि अर वेको ल्वे क्रूस पर बुगये गै, ताकि जु कुई वे पर बिस्वास कैरो, पिता परमेस्वर वेका पापों अर वे पर लग्यां इळजामो तैं माफ कैरी सैको। अर पुरणा जमना मा वेन लोगु का पापों का हिसाब से ऊंतैं जादा दण्ड नि दिनी अर इन वेन इलै कैरी, किलैकि उ धरमी अर सबर रखण वळु च।</verse>
				<verse number="26">मगर अब उ इन नि करदु, बल्किन मा आज का बगत मा उ लोगु का पापों अर ऊं पर लग्यां इळजामो की सजा देन्दु। अर इन उ इलै करदु, ताकि इन साबित ह्‍वे जौ कि उ अपणा हरेक मामला मा सच्‍चु अर सही न्याय करण वळु च। अर जु कुई भि वेका पुत्र यीशु मसीह पर बिस्वास करदु उ वे मनखि तैं स्वीकार करदु।</verse>
				<verse number="27">अर या बात सच्‍च च, इलै बड़ु मोन करण को कुई फैदा नि च, कि हम त नियम-कानूनों का मुताबिक चलद्‍यां, किलैकि अब ईं बात से कुई फर्क नि पोड़दु कि हम नियम-कानून का मुताबिक चलद्‍यां कि ना, बल्किन मा फर्क त ईं बात से पोड़दु कि क्या हम बिस्वास करदा छां कि ना?</verse>
				<verse number="28">इलै हम ये नतीजा पर पौछद्‍यां, कि मनखि नियम-कानून का मुताबिक ना, बल्किन मा यीशु मसीह पर बिस्वास करण से परमेस्वर की नजर मा धरमी ठैरदु।</verse>
				<verse number="29">त अब क्या परमेस्वर बस यहूदी जाति का लोगु को ही परमेस्वर च? क्या उ दुसरि जाति का लोगु को परमेस्वर नि च? हाँ, ये मा कुई भि सक नि च की वु ऊं लोगु को भि परमेस्वर च जु यहूदी जाति का नि छिन।</verse>
				<verse number="30">हाँ, परमेस्वर एक ही च, अर जौं यहूदी लोगु न खतना का रिवाज तैं पूरु कैरी वु ऊंतैं ऊंका बिस्वास का द्‍वारा धरमी ठैरान्दु, अर जौं लोगु को खतना नि च होयुं वु ऊं लोगु तैं भि वु ऊंका बिस्वास का मुताबिक धरमी ठैरान्दु।</verse>
				<verse number="31">अब तुम सुचणा ह्‍वेल्या, कि जु कुछ भि हम बोन्‍ना छां वांको मतलब क्या च? त हम तुमतै बतै देन्द्‍यां कि जब हम इन बुल्द्‍यां की बिस्वास करण से ही हमतै छुटकारा मिलदु, त यां को मतलब यू नि च कि हम नियम-कानूनों तैं रद्‍द कना छां, बल्किन मा हम पिता परमेस्वर की बातों तैं पूरु करणा छां।</verse>
			</chapter>
			<chapter number="4">
				<verse number="1">अर अगर इन च, त हम पितर अब्राहम का बारा मा क्या बोला, जु कि सरील का रिश्ता का मुताबिक हमरु पितर च अर हम वेका वंशज छां।</verse>
				<verse number="2">किलैकि अगर जु पितर अब्राहम अपणा कामों का द्‍वारा धरमी ठैरैये जान्दु, त वु बड़ु मोन कैरी सकदु छौ, मगर जु कुछ भि वेन कैरी ऊं सब बातों का खातिर वेन परमेस्वर का समणि बड़ु मोन नि कैरी सैकी।</verse>
				<verse number="3">अर पवित्रशास्‍त्र मा क्या च लिख्यूं? अरे वेमा त इन लिख्यूं च कि, “अब्राहम न परमेस्वर पर बिस्वास कैरी, अर अपणा बिस्वास की वजै से ही उ धरमी गिणै गै।”</verse>
				<verse number="4">सुणा, काम करण वळा तैं ध्याड़ि देण कुई दान नि होन्दु, बल्किन मा उ त ऊंको हक च।</verse>
				<verse number="5">अर इन्द्रयो कुई भि मनखि नि च जु कि अपणी ताकत से परमेस्वर की नजर मा धरमी साबित ह्‍वे सैको, मगर जु मनखि परमेस्वर पर बिस्वास करदु उ वेतैं माफ करदु अर अपणी नजर मा वेतैं धरमी साबित करदु।</verse>
				<verse number="6">अर जब कुई मनखि भलै का काम नि करदु, पर अपणु बिस्वास पिता परमेस्वर पर बणै के रखदु, त इन्द्रया मनखि तैं पिता परमेस्वर धरमी ठैरान्दु। इलै इन्द्रया मनखि का बारा मा राजा दाऊद भि इन बुल्दु कि, “वु बड़ु धन्य च।”</verse>
				<verse number="7">अर भजन संहिता की किताब मा वु इन लिखदु कि, “धन्य छिन ऊ, जौन परमेस्वर का नियम-कानूनों को पालन नि कैरी, मगर फिर भि परमेस्वर न ऊंतैं माफ कैरी, अर धन्य छिन ऊ, जौं का पापों तैं परमेस्वर न दूर कैरियाली,</verse>
				<verse number="8">अर धन्य च वु मनखि, जैतैं परमेस्वर पापि नि ठैरान्दु।”</verse>
				<verse number="9">अर यहूदी लोग जौन खतना का रिवाज तैं पूरु कर्युं च, आसीस को यू वचन सिरफ ऊं खुणि ही नि च बल्किन मा यू त ऊं लोगु खुणि भि च जौन अपणु खतना नि कर्युं। अर हम त इन बुल्द्‍यां कि, “पितर अब्राहम न पिता परमेस्वर पर बिस्वास कैरी, इलै वेका बिस्वास की वजै से उ धरमी गिणै गै।”</verse>
				<verse number="10">अब तुम सुचणा ह्‍वेल्या, कि पिता परमेस्वर न जब वेतैं धरमी ठैरै, तब पितर अब्राहम को खतना होयुं रै होलु कि ना। हे मेरा भै-बैंणो मि तुमतै बतै देन्दु कि वे बगत वेको खतना नि होयुं छौ।</verse>
				<verse number="11">हाँ, या बात सच्‍च च कि पिता परमेस्वर न वेतैं पैलि स्वीकार कैरिके धरमी ठैरै दिनी, जब कि वे बगत वेको खतना भि नि होयुं छौ। अर इन वेन इलै कैरी, किलैकि पितर अब्राहम न वे पर बिस्वास कैरी। इलै खतना करण हमरा पितर अब्राहम खुणि एक चिन्‍न छौ, ताकि पितर अब्राहम ऊं सभ्यों को बुबा बणि जौ, जु पिता परमेस्वर पर बिस्वास त करदा छिन, मगर अपणु खतना नि करौन्दिन। इलै वु सब लोग अपणा बिस्वास करण की वजै से ही पिता परमेस्वर की नजर मा धरमी मणै जनदिन।</verse>
				<verse number="12">अर येका दगड़ा-दगड़ि जब पिता परमेस्वर न पितर अब्राहम तैं खतना करण को चिन्‍न दिनी, त इन करण की वजै से उ हमरु पितर बणि गै, अर हम लोग वेका वंशज। अर हम लोग भि ठिक उन्‍नि बिस्वास का बाटा पर चलद्‍यां, जन हमरु पितर अब्राहम चलि छौ जब वेको खतना भि नि होयुं छौ।</verse>
				<verse number="13">अर यू सब कुछ मूसा का दियां नियम-कानून का मुताबिक नि ह्‍वे, बल्किन मा पिता परमेस्वर न त वेसे भि पैलि पितर अब्राहम का दगड़ा मा करार कैरी छौं, कि उ अर वेका वंश का लोग ईं दुनियां का वारिस होला। अर यू सब त इलै नि ह्‍वे, किलैकि वेन नियम-कानूनों को पालन कैरी, बल्किन मा यू त इलै ह्‍वे किलैकि पितर अब्राहम न पिता परमेस्वर पर बिस्वास कैरी। अर पिता परमेस्वर न भि वेतैं एक धरमी मनखि का रुप मा स्वीकार कैरी।</verse>
				<verse number="14">अर अगर जु नियम-कानून को पालन करण वळा लोग ही असली वारिस छिन, त बिस्वास करण वळा लोगु को कुई फैदा ही नि ह्‍वे, अर जु करार परमेस्वर न कैरी वु भि खतम ह्‍वे गै।</verse>
				<verse number="15">मगर सच्‍चै त या च कि नियम-कानूनों से लोगु तैं दण्ड मिलदु, किलैकि लोग नियम-कानून को पालन पूरि तरौं से नि कैरी सकदिन। अगर नियम-कानून नि होन्दा, त लोग भि नियम-कानून का खिलाप मा जैके दोषी नि ठैरदा।</verse>
				<verse number="16">इलै ही परमेस्वर का द्‍वारा जु करार किये गै वु मनखि का बिस्वास पर टिक्यूं च, ताकि करार को दान पितर अब्राहम का वंश का सब लोगु तैं पिता परमेस्वर की महान किरपा से मुफत मा मिली सैको। अर केवल यहूदी लोगु खुणि ही ना जु की नियम-कानूनों को पालन करदिन, बल्किन मा हम सभ्यों खुणि भि जु की पितर अब्राहम की तरौं बिस्वास करदिन। इलै ही पितर अब्राहम बिस्वास मा सब लोगु को आत्मिक बुबा च।</verse>
				<verse number="17">अर जन कि पवित्रशास्‍त्र मा भि लिख्यूं च कि, “मिन त्वेतै भौत सा जाति का लोगु खुणि ऊंको बुबा ठैर्युं च।” अर यू करार पिता परमेस्वर न पितर अब्राहम का दगड़ा मा इलै कैरी किलैकि वेन वे पर बिस्वास कैरी। हाँ, वे परमेस्वर पर जु की मुरदो तैं ज्यून्द करदु, अर अपणा बोन्‍न का मुताबिक सब कुछ बणौन्दु।</verse>
				<verse number="18">अर पितर अब्राहम का पास औलाद होण की कुई आस नि छै मगर फिर भि वेन पिता परमेस्वर पर बिस्वास कैरी, इलै उ भौत सि जाति का लोगु को बुबा बणि। अर पिता परमेस्वर न वेसे यू ही करार कैरी छौ कि, “तेरा वंश मा भौत जादा लोग होला।”</verse>
				<verse number="19">जब कि वे बगत मा पितर अब्राहम लगभग सौ साल को बुढ्या ह्‍वे गै छौ, अर वेकी घरवळी सारा बाँझ छै। इलै ऊंका पास कुई उम्मीद नि छै कि ऊंकी कुई औलाद पैदा होलि। मगर यों सब बातों का होन्द भि पितर अब्राहम को बिस्वास कम नि ह्‍वे।</verse>
				<verse number="20">अर जु करार पिता परमेस्वर न वेसे कैरी छौ, वेन वां पर बिस्वास कैरी अर वे पर अपणु बिस्वास बणै के रखी अर सक नि कैरी। अर पितर अब्राहम न जु बिस्वास पिता परमेस्वर पर कैरी वां से वेतैं और भि जादा ताकत मिली, अर पितर अब्राहम न वेकी बडै कैरी।</verse>
				<verse number="21">किलैकि वेतैं पूरु यकीन छौ कि जु करार परमेस्वर न वेका दगड़ा मा कर्युं च, वे करार तैं उ पूरु करण की ताकत भि रखदु।</verse>
				<verse number="22">अर ये ही बिस्वास की वजै से पितर अब्राहम परमेस्वर की नजर मा धरमी गिणै गै।</verse>
				<verse number="23">“उ धरमी गिणै गै” अर पवित्रशास्‍त्र को यू वचन केवल पितर अब्राहम खुणि ही नि च,</verse>
				<verse number="24">बल्किन मा या बात त हम खुणि भि लिखे गै, किलैकि हम वे परमेस्वर पर बिस्वास करद्‍यां जैन हमरा प्रभु यीशु मसीह तैं मुरदो मा बटि ज्यून्द कैरी। इलै या बात हम खुणि भि च, ताकि हम लोग भि बिस्वास करण का द्‍वारा धरमी गिणै जां।</verse>
				<verse number="25">अर यीशु मसीह ही च जु कि हमरा अपराधों का खातिर मरणु खुणि पकड़वै गै, अर पिता परमेस्वर न वेतैं मुरदो मा बटि ज्यून्द कैरी, ताकि हम वे पर बिस्वास कैरिके धरमी ठैरैये जा।</verse>
			</chapter>
			<chapter number="5">
				<verse number="1">इलै, जब हम बिस्वास करण की वजै से धरमी ठैरैये ग्यां, त चला, अब हम अपणा प्रभु यीशु मसीह का द्‍वारा पिता परमेस्वर का दगड़ा मा मेल-जोल को रिश्ता बणा।</verse>
				<verse number="2">अर वेका द्‍वारा बिस्वास से हम परमेस्वर की बड़ी किरपा पौण खुणि पिता परमेस्वर कि छतरछाया मा रै सैका। अर ईं बड़ी किरपा मा हम अब बणयां रा, अर पिता परमेस्वर को आदर-सम्मान मा हिस्सा पौणु की आस पर गर्व कैरा।</verse>
				<verse number="3">अर इथगा ही ना, बल्किन मा दुख-तकलीफ का बगत मा भि हम लोग अपणा पिता परमेस्वर पर गर्व कैरा, किलैकि हम जणदा ही छां, कि दुख-तकलीफ झिलण से हमरा जीवन मा सबर रखण को गुण पैदा होन्दु।</verse>
				<verse number="4">अर सबर रखण से हमरु चाल-चलन खरु होन्दु। अर खरु चाल-चलन होण से हमरा जीवन मा पिता परमेस्वर पर आस रखण की इच्छा पैदा होन्दी।</verse>
				<verse number="5">अर जब हम वे पर अपणी आस बणै के रखद्‍यां, तब हमतै कुई सरम नि औन्दी, किलैकि पिता परमेस्वर न अपणी पवित्र आत्मा का द्‍वारा अपणु प्यार हमरा मनों मा भरपूरी से दियाली।</verse>
				<verse number="6">अर जब हम पिता परमेस्वर से दूर छा, त वे ही बगत मा यीशु मसीह हम सभ्यों का खातिर मरे गै ताकि हमरु मेल-जोल परमेस्वर का दगड़ा मा ह्‍वे जौ।</verse>
				<verse number="7">अर सच्‍चि मा, सायद ही कुई इन्द्रयो मनखि होलु जु कि कै धरमी मनखि खुणि अपणी जान दे द्‍यो। अर भौत ही कम लोग होला जु कि कै इमानदार मनखि का फैदा का खातिर अपणी जान की भि बाजी लगै द्‍या, या इन करणु खुणि मोरि जा।</verse>
				<verse number="8">मगर पिता परमेस्वर अपणा प्यार तैं हम मनखियों का खातिर दिखान्दु, किलैकि जब हम वेका खिलाप मा पाप पर पाप कना छा, त वे ही बगत मा यीशु मसीह मरे गै, ताकि वेकी मौत से हमतै फैदा हो।</verse>
				<verse number="9">इलै जब हम यीशु मसीह का ल्वे का द्‍वारा पिता परमेस्वर की नजर मा धरमी गिणै ग्यां, त अब उ हमतै परमेस्वर का खतरनाक गुस्सा से जरुर बचालु।</verse>
				<verse number="10">किलैकि पैलि त हम पिता परमेस्वर का दुसमन छा, मगर अब यीशु मसीह की मौत का द्‍वारा हमरु मेल-जोल वेका दगड़ा मा ह्‍वे गै। अर हमतै पूरु यकीन च, कि वेका पुत्र यीशु मसीह को मुरदो मा बटि ज्यून्द होण का द्‍वारा हमतै छुटकारा भि मिललु।</verse>
				<verse number="11">अर अब जब हमरु मेल-जोल प्रभु यीशु मसीह का द्‍वारा पिता परमेस्वर का दगड़ा मा ह्‍वे गै, इलै हमतै ईं बात से बड़ी खुशी होन्दी।</verse>
				<verse number="12">हे मेरा भै-बैंणो, जब पितर आदम न पिता परमेस्वर की आज्ञा तैं तोड़ि, त पाप वेका द्‍वारा ईं दुनियां मा ऐ। अर आदम का वे पाप न मौत तैं जनम दिनी, ज्यां की वजै से आज मौत सब लोगु मा फैली गै, इलै सब लोग पापि छिन।</verse>
				<verse number="13">अर परमेस्वर का रैबर्या मूसा का द्‍वारा जु नियम-कानून दिये गैनी, वेसे पैलि बटि पाप ईं दुनियां मा ऐ गै छौ। मगर जबरि तक नियम-कानून नि दिये गैनी, तबरि तक लोगु का पापों को इळजाम ऊं पर नि लगि।</verse>
				<verse number="14">मगर फिर भि पितर आदम बटि लेके मूसा रैबर्या तक मौत न सब लोगु पर राज कैरी, इख तक कि जौं लोगु न पिता परमेस्वर का खिलाप मा आदम का जन अपराध नि कैरी ऊं लोगु तैं भि मुरण पोड़ि। अर पितर आदम वे मनखि खुणि एक चिन्‍न बणि, जु कि औण वळा बगत मा ईं दुनियां मा औण वळु छौ अर उ यीशु मसीह च।</verse>
				<verse number="15">मगर पितर आदम अर वु मनखि एक जन नि छिन, किलैकि पिता परमेस्वर का द्‍वारा दियूं दान आदम का पाप का जन नि च। हे मेरा दगड़्यों, या बात सच्‍च च कि आदम का पाप का द्‍वारा मौत ईं दुनियां मा सब लोगु खुणि ऐ गै, मगर फिर भि पिता परमेस्वर की किरपा हम सभ्यों खुणि भौत बड़ी च, किलैकि अब यीशु मसीह का द्‍वारा सब लोगु तैं अपणा-अपणा पापों से माफी पौण को दान पिता परमेस्वर बटि मुफत मा मिली गै।</verse>
				<verse number="16">अर यू दान वे मनखि का जन नि च, जैकी वजै से पाप ईं दुनियां मा ऐ। अर आदम का द्‍वारा कर्युं पाप सब लोगु तैं दण्ड की तरफा लेके जान्दु, मगर पिता परमेस्वर को दान जु कि मुफत मा मिल्यूं च उ हमतै अफ दगड़ा मा एक भलु मनखि बणौण मा पूरि मदद करदु, अब चै हमुन कथगा भि दौं वेकी आज्ञा तैं तोड़ि हो।</verse>
				<verse number="17">अर या बात सच्‍च च कि एक मनखि का अपराध का द्‍वारा मौत सब लोगु पर राज करण लगि गै। मगर वु लोग जु पिता परमेस्वर की भरपूर किरपा से वेका समणि सच्‍चु होण का दान तैं अपणा जीवन मा स्वीकार करदिन, ऊ लोग यीशु मसीह का द्‍वारा जीवन तैं पाला, अर वेका द्‍वारा राज भि करला।</verse>
				<verse number="18">इलै जन आदम का एक बार अपराध करण का द्‍वारा परमेस्वर न सब मनखियों तैं मौत की आज्ञा दिनी, ठिक उन्‍नि यीशु मसीह का द्‍वारा अपणु जीवन एक बार देण से ही सब लोगु तैं इन मौका मिली गै कि वु पिता परमेस्वर की नजर मा धरमी जीवन ज्या अर सदनि को जीवन तैं पै सैका।</verse>
				<verse number="19">किलैकि जन एक मनखि का आज्ञा नि मनण का बाना सब लोग पापि ठैरैनी, ठिक उन्‍नि एक मनखि का आज्ञा मनण से भौत सा लोग धरमी ठैरि सैका।</verse>
				<verse number="20">अर परमेस्वर न नियम-कानून इलै दिनी, ताकि सब लोगु तैं ईं बात का बारा मा पता चलि जौ कि ऊ भौत बड़ा पापि छिन, मगर वेका दगड़ा-दगड़ि पिता परमेस्वर की किरपा भि ऊं लोगु खुणि और भि जादा बढदी गै।</verse>
				<verse number="21">इलै जन पाप न मौत का द्‍वारा अपणु राज बणै के रखी, ठिक उन्‍नि पिता परमेस्वर की महान किरपा भि राज कनि च, ताकि हम वेका समणि सच्‍चा साबित ह्‍वे सैका। अर हमरा प्रभु यीशु मसीह का द्‍वारा हमतै सदनि को जीवन मिली सैको।</verse>
			</chapter>
			<chapter number="6">
				<verse number="1">हे मेरा भै-बैंणो, त अब इन बता कि हमतै क्या करण चयेणु? क्या हमतै पाप करदी रौण चयेणु, ताकि पिता परमेस्वर की और भि जादा किरपा होणी रौ?</verse>
				<verse number="2">नऽ रे ना इन नि ह्‍वे सकदु। जब एक बार हम पाप करणु खुणि मुरयां मनखि का जन ह्‍वे ग्यां, त फिर हम पाप का अधीन मा कनकै रै सकद्‍यां?</verse>
				<verse number="3">क्या तुम लोग या बात नि जणद्‍यां कि यीशु मसीह का नौ का द्‍वारा पाणि मा डुबकी लेके जु बपतिस्मा हमतै मिली, वेका द्‍वारा हम वेकी मौत मा भि हिस्सेदार बण ग्यां?</verse>
				<verse number="4">इलै जब हमुन पाणि मा डुबकी मारी के जु बपतिस्मा ले वेका द्‍वारा हम भि यीशु मसीह का दगड़ा मा दफनै ग्यां, ताकि वेकी मौत का दगड़ा मा हम भि सामिल ह्‍वे जा। अर जन पिता परमेस्वर की ताकत न यीशु मसीह तैं मुरदो मा बटि ज्यून्द कैरी, ठिक उन्‍नि उ हमतै भि उठालु अर वेका द्‍वारा हम नयू जीवन जी सकद्‍यां।</verse>
				<verse number="5">इलै जब हमुन पाणिळ बपतिस्मा ले, त हम यीशु मसीह की मौत मा सामिल ह्‍वेके एक ह्‍वे ग्यां, अर जब पाणि मा बटि भैर निकळ्यां त जन वु मुरदो मा बटि ज्यून्द किये गै, ठिक उन्‍नि हम भि यीशु मसीह दगड़ा मा ज्यून्दा किये जौला अर वेका दगड़ा मा एक ह्‍वे जौला।</verse>
				<verse number="6">किलैकि हम जणदा छां, कि हमरु पुरणु सभौ यीशु मसीह का दगड़ा-दगड़ि क्रूस पर चड़ये गै, ताकि हमरु पुरणु सभौ खतम ह्‍वे जौ, अर हम औण वळा बगत मा पाप का गुलाम नि रा।</verse>
				<verse number="7">किलैकि जु मनखि मोरि गै वु पाप बटि छुटी गै।</verse>
				<verse number="8">अर अगर जु हम यीशु मसीह का दगड़ा मा मोरि ग्यां, त हमतै यकीन च कि हमतै वेका दगड़ा मा जीवन भि मिललु।</verse>
				<verse number="9">किलैकि हम यू जणदा छां, कि यीशु मसीह मौत मा बटि ज्यून्द ह्‍वे, अर अब वेन कभि नि मुरण किलैकि मौत को अब वे पर कुई भि अधिकार नि च।</verse>
				<verse number="10">अर जब मसीह मोरि त वु इलै ही मोरि, ताकि उ पाप की ताकत तैं खतम कैरी द्‍यो, पर अब जब कि वु मुरदो मा बटि ज्यून्द च, त केवल पिता परमेस्वर की बडै खुणि ही ज्यून्द च।</verse>
				<verse number="11">ठिक इन्‍नि तुम भि अपणा पापि सभौ तैं मारी द्‍या, पर पिता परमेस्वर खुणि अफ तैं यीशु मसीह का द्‍वारा ज्यून्दु समझा।</verse>
				<verse number="12">इलै पाप तैं अपणा नास ह्‍वे जाण वळा सरील पर राज नि करण द्‍या, बल्किन मा तुम पिता परमेस्वर कि इच्छा का अधीन मा रा।</verse>
				<verse number="13">अर नऽ त खुद तैं पाप करणु खुणि सौपा, किलैकि या बात तुम खुणि भली नि च, कखि इन नि हो कि तुम फिर से गळत काम करण लगि जा। इलै खुद तैं पिता परमेस्वर का सुपुर्द कैरी द्‍या, जु कि मुरदो तैं ज्यून्द करण की ताकत रखदु। अर इन तुम इलै कैरा, ताकि उ तुमरा जीवनों का द्‍वारा भलै का काम कैरी सैको।</verse>
				<verse number="14">अगर जु तुम इन करिल्या, त तुम पर पाप को कुई अधिकार नि होलु, किलैकि अब तुम नियम-कानून का अधीन मा नि छाँ, बल्किन मा परमेस्वर की किरपा का अधीन ह्‍वे ग्यां।</verse>
				<verse number="15">हे मेरा भै-बैंणो, त ईं बात को क्या मतलब च, कि हम नियम-कानून का मुताबिक नि चलद्‍यां, इलै हम पाप कना रा? तुम मितैं बता क्या या सही बात च? नऽ रे ना इन नि होण चयेणु। हम लोग त पाप का ना, बल्किन मा पिता परमेस्वर की किरपा का अधीन मा छां।</verse>
				<verse number="16">अर क्या तुम नि जणद्‍यां, जब तुम खुद तैं एक गुलाम की तरौं दुसरो का सुपुर्द कैरी देन्द्‍यां, तब तुम उई काम करद्‍यां, जन तुमरो मालिक चान्दु। अर ठिक उन्‍नि जु मनखि पाप की सेवा करदु वेका बदला मा वे खुणि मौत रखी च, अर जु मनखि पिता परमेस्वर की आज्ञा को पालन करदु वांका बदला मा वे खुणि सदनि को जीवन रख्युं च।</verse>
				<verse number="17">पर पिता परमेस्वर को धन्यवाद हो कि एक बगत छौ, जब तुम लोग पाप का गुलाम छा, तभि भि तुमुन शुभ समाचार की शिक्षा को पूरु पालन कैरी ज्वा की तुमतै सिखये गै।</verse>
				<verse number="18">अर तुम लोग तैं पाप की गुलामी से छुटकारु मिली गै, ताकि तुम पिता परमेस्वर की नजर मा एक धरमी जीवन जी सैका अर वेको सेवक बणि जा।</verse>
				<verse number="19">अर पिता परमेस्वर की बात तुमरा समझ से भैर छिन, इलै मि तुमतै या बात बतौण चान्दु, कि पैलि तुमुन खुद तैं ईं दुनियां का गळत कामों अर वेका विचारों खुणि खुद तैं वेका सुपुर्द कैरिके रख्युं छौ इलै तुम वेका गुलाम बणि गै छा। मगर अब मि तुम से बिन्ती करदु कि तुम परमेस्वर की सच्‍चै खुणि खुद तैं वेका सुपुर्द कैरी द्‍या, ताकि तुम वेका सेवक बणि के पवित्र लोग बणि सैका।</verse>
				<verse number="20">किलैकि जब तुम पाप का गुलाम छा, त वे बगत तुम पिता परमेस्वर की नजर मा धरमी जीवन जीण से भौत दूर छा।</verse>
				<verse number="21">अर जौं कामों का खातिर आज तुमतै सरम औन्दी, जब तुम ऊं कामों तैं कना छा त तुमतै वे बगत मा क्या-क्या फैदा ह्‍वे? अरे, इन्दरि बातों को कुई फैदा नि च यों को नतीजा त केवल मौत ही च।</verse>
				<verse number="22">पर अब पिता परमेस्वर न तुमतै पापों से छुटकारु देके अपणु चेला बणैयालि, अर ईं बात को तुमतै यू फैदा च कि अब तुमरो मन पवित्र ह्‍वे गै। अर ना केवल पवित्र मन, बल्किन मा वेका दगड़ा-दगड़ि तुमतै सदनि को जीवन भि द्‍यालु।</verse>
				<verse number="23">किलैकि पाप की ध्याड़ि मौत च, मगर जु लोग प्रभु यीशु मसीह पर बिस्वास करदिन, ऊं पर पिता परमेस्वर दया कैरिके सदनि को जीवन देन्दु।</verse>
			</chapter>
			<chapter number="7">
				<verse number="1">हे मेरा भै-बैंणो, क्या तुम नि जणद्‍यां, कि नियम-कानून एक मनखि पर तब तक अधिकार रखदिन, जब तक उ ज्यून्दु च? (अर या बात मि तुमतै इलै बतौणु छौं, किलैकि तुम नियम-कानून तैं भौत अच्छे से जणद्‍यां)।</verse>
				<verse number="2">अर अब मि तुमतै एक उदारण देके बतौन्दु, एक ब्यौ करीं जनानि नियम-कानून का मुताबिक अपणा पति का दगड़ा मा तब तक मिली के रौन्दी, जब तक वींको पति ज्यून्द च, पर अगर उ मोरि जौ त वा जनानि अपणा वे नियम-कानून से आजाद ह्‍वे जान्दी, जैकी वजै से वा वेसे जुड़ी च।</verse>
				<verse number="3">अर अगर जु वा अपणा पति का छौंद कै दुसरा आदिम की ह्‍वे जौ, त वीं जनानि कू गळत सम्बन्ध रखण वळी बुले जालु, पर अगर जु वींको पति मोरि जौ त वा जनानि अपणा पति का बन्धन से छुटी गै, मगर वेका बाद भि अगर ज्वा वा कै दुसरे कि ह्‍वे जौ, त वीं खुणि गळत सम्बन्ध रखण वळी नि बुले जालु।</verse>
				<verse number="4">हे मेरा भै-बैंणो, ठिक इन्‍नि जब यीशु मसीह तैं क्रूस पर मरे गै, त तुम भि वेका दगड़ा मा मरे ग्यां। इलै अब से तुम पुरणा नियम-कानूनों का भार से आजाद ह्‍वे ग्यां अर हमरु यीशु मसीह जैतैं पिता परमेस्वर न मुरदो मा बटि ज्यून्द कैरी अब उई तुमरो मालिक च। इलै अब तुम पिता परमेस्वर को सेवक बणि के भलै का काम कैरा।</verse>
				<verse number="5">इलै जब हम ईं दुनियां की रीति-रिवाजों का मुताबिक जीवन जीणा छा त हम पाप पर पाप करदी जाणा छा, अर परमेस्वर का नियम-कानूनों का द्‍वारा ही हमतै पता चलि कि पाप हमरा जीवनों मा काम करदु, अर वेको नतीजा मौत च।</verse>
				<verse number="6">मगर अब हम लोग पुरणा नियम-कानून खुणि जौन हमतै बन्धी बणै के रख्युं छौ, अब हम वां खुणि मोरि ग्यां। अर अब हम पुरणा तरीका से ना, बल्किन मा पवित्र आत्मा की मनसा का मुताबिक पिता परमेस्वर की सेवा करणा छां।</verse>
				<verse number="7">त अब हम क्या जि बोला कि नियम-कानून पाप तैं जनम देन्दिन? ना इन नि ह्‍वे सकदु, मगर सच्‍च त यू च कि नियम-कानून हमतै बतौन्दिन की पाप क्या च। अर जन कि लिख्यूं भि च कि, “ तू लालच नि कैरी” त मितैं कनकै पता चलदु कि लालच क्या च।</verse>
				<verse number="8">मगर पाप आज्ञा को इस्तेमाल कैरिके अफ खुणि एक मौका खुजै देन्दु। अर फिर वेन मितैं हरेक चीज तैं पौण खुणि मेरा मन मा लालच पैदा कैरी, ताकि मि उन्‍नि कैरुं। अर मि तुमतै बतै देन्दु कि जख नियम-कानून नि छिन उख पाप को भि नौ नि च।</verse>
				<verse number="9">अर शुरु मा जब मितैं मूसा का द्‍वारा दियां नियम-कानून का बारा मा पता नि छौ, त वे बगत मा जन मितैं अच्छु लगदु छौ मि वेका मुताबिक ही करदु छौ, मगर जब मितैं पता चलि कि पाप मेरा भितर च तब बटि मि वेका इळजाम मा और भि जादा फंसी ग्यों।</verse>
				<verse number="10">अर वा आज्ञा ज्वा की मेरा हमेसा का जीवन खुणि छै, वा ही मि खुणि मौत की वजा बणि गै।</verse>
				<verse number="11">अर नियम-कानून त अच्छा छिन, मगर जब मि वेको पालन नि करदु त पाप मितैं धोखा देके अपणा जाल मा फंसै देन्दु, अर वेकी वजै से मौत की सजा मिलदी।</verse>
				<verse number="12">इलै नियम-कानून पवित्र छिन, अर आज्ञा भि पवित्र अर धरमी बणौणु खुणि भली छिन।</verse>
				<verse number="13">त क्या उ जु मि खुणि भलु छौ, वु ही मि खुणि मौत को कारण बणि गै? नऽ रे ना इन नि च, बल्किन मा यू त पाप छौ जु कि वीं अच्छे का द्‍वारा मि खुणि मौत की वजा बणि, ताकि पाप परगट ह्‍वे जौ। अर जु कुई भि इन करदु उ पिता परमेस्वर का खिलाप मा जैके वेकी आज्ञाओं को पालन नि करदु।</verse>
				<verse number="14">हे मेरा भै-बैंणो, हम जणदा छां कि पिता परमेस्वर का नियम-कानून पवित्र छिन, मगर मि एक साधारण सि मनखि छौं, अर पाप का वश मा होण की वजै से मि भि वेको गुलाम छौं।</verse>
				<verse number="15">इलै कई बार मि गळत कामों तैं कैरी देन्दु, अर मितैं येका बारा मा पता नि च कि ऊ मिसे कनकै ह्‍वे जनदिन, किलैकि भलै का जु काम मि कन चान्दु उ मिसे नि होनदिन, पर जौं कामों से मितैं नफरत च वु काम मिसे ह्‍वे जनदिन।</verse>
				<verse number="16">इलै मि ईं बात तैं माणी देन्दु, कि पिता परमेस्वर का नियम-कानून भला छिन, किलैकि जौं गळत कामों तैं मि नि करण चान्दु ऊ ही मिसे अकसर ह्‍वे जनदिन।</verse>
				<verse number="17">हे मेरा दगड़्यों, मि तुमतै बतै देन्दु, कि इन करण वळु मि नि छौं, बल्किन मा उ त पाप च जु मेरा सभौ मा च।</verse>
				<verse number="18">किलैकि मि जणदु छौं, कि मेरा सभौ मा कुछ भि भलु नि च, हाँ मेरा भितर कुछ भि अच्छु नि च, किलैकि मेरा मन मा भलै करण की मनसा च, मगर मि फिर भि वीं भलै तैं अच्छे से नि कैरी सकदु।</verse>
				<verse number="19">किलैकि जै भला काम तैं करण की इच्छा मि करदु वु त मि कैरी नि सकदु, पर जै काम तैं करण की मेरी इच्छा भि नि होन्दी उई मिसे ह्‍वे जान्दु।</verse>
				<verse number="20">पर अगर जु मि वु काम करदु जैतैं करण की मेरी इच्छा नि च, त गळत काम तैं करण वळु मि नि छौं, बल्किन मा पाप च जु कि मेरा सभौ मा च।</verse>
				<verse number="21">इलै मितैं ईं सच्‍चै का बारा मा पता चलि जान्दु, कि जब मि भलै करण की इच्छा करदु, त बुरै मेरा पास ऐ जान्दी।</verse>
				<verse number="22">किलैकि मि पिता परमेस्वर का नियम-कानून की वजै से अपणा जमीर मा भौत खुश होन्दु।</verse>
				<verse number="23">मगर मि इन दिखदु कि पाप जैन मेरा मन मा अपणु घौर बणैयालि उ मेरा दगड़ा मा लड़ै करदु, अर इन कैरिके उ मितैं अपणा वश मा करदु।</verse>
				<verse number="24">मेरु त जोग ही खराब च, अब कु जि मितैं छुटकारा द्‍यालु? किलैकि पाप मितैं मौत की तरफा लेके जनदिन।</verse>
				<verse number="25">पर मि हमरा प्रभु यीशु मसीह का द्‍वारा पिता परमेस्वर को धन्यवाद करदु जैन मितैं छुड़ै। अर मि अपणा मन से पिता परमेस्वर का नियम-कानून को पालन करदु, मगर अब मि क्या कैरुं? किलैकि येका दगड़ा-दगड़ि मि पापों का कब्जा मा भि फस्युं छौं।</verse>
			</chapter>
			<chapter number="8">
				<verse number="1">इलै अब जु लोग प्रभु यीशु मसीह का दगड़ा मा एक ह्‍वे गैनी, ऊं पर दण्ड की आज्ञा नि च।</verse>
				<verse number="2">किलैकि जीवन देण वळा परमेस्वर की पवित्र आत्मा न अपणा नियम का मुताबिक तुमतै यीशु मसीह पर बिस्वास करण की वजै से पाप अर मौत का बन्धन से आजाद कैरियाली।</verse>
				<verse number="3">किलैकि पिता परमेस्वर न वु काम कैरिके दिखै दिनी, जु काम नियम-कानूनों न नि कैरी सैकी, अर सरील की इच्छा मा ऊंतैं पूरु करण बड़ु कठिन छौ। इलै वेन ये काम तैं पूरु करणु खुणि अपणा पुत्र तैं ईं दुनियां मा एक मनखि का रुप मा भेजि, ताकि एक पापि सरील तैं लेके उ पाप का दण्ड तैं अपणा मथि ले ल्यो, अर हमतै माफी मिली जौ।</verse>
				<verse number="4">अर यू सब त इलै ह्‍वे, ताकि हम लोग परमेस्वर की नजर मा धरमी जीवन जीण की मांग तैं पूरु कैरी सैका, जु कि नियम-कानून का मुताबिक च। अर खास कैरिके या बात ऊं लोगु मा पूरि हो जु की सरील का मुताबिक ना, बल्किन मा पवित्र आत्मा का मुताबिक चलदिन।</verse>
				<verse number="5">किलैकि ईं दुनियां मा मनखि दुनियां की बातों पर अपणु मन लगौन्दिन, इलै ऊ अपणा सरील की मनसा का मुताबिक ही चलदिन, मगर जु लोग पवित्र आत्मा का मुताबिक अपणा जीवन तैं चलौण चनदिन, वु लोग अपणु मन पवित्र आत्मा की बातों पर लगौन्दिन।</verse>
				<verse number="6">अब जु लोग केवल अपणा सरील की मनसा तैं पूरि करण मा लग्यां रौनदिन, ऊंन मुरण च मगर जु लोग पवित्र आत्मा की मनसा का मुताबिक चलदिन, ऊ ज्यून्दा राला अर एक नयू जीवन पाला अर ऊंतैं अपणा जीवन मा शान्ति मिलली।</verse>
				<verse number="7">किलैकि शरीर पर मन लगौण को मतलब परमेस्वर का दगड़ा मा दुसमनी रखण च, अर मनखि को सरील ना त परमेस्वर का नियम-कानून का अधीन च अर नऽ त कभि ह्‍वे सकदु।</verse>
				<verse number="8">अर जु लोग सरील का मुताबिक चलदिन, वु पिता परमेस्वर तैं खुश नि कैरी सकदिन।</verse>
				<verse number="9">पर अगर जु पिता परमेस्वर को पवित्र आत्मा सच्‍चि मा तुम मा वास करदु, त ईं बात तैं जाणि ल्या, कि तुम लोग ईं दुनियां मा पाप का वस मा नि छाँ, बल्किन तुम मा पवित्र आत्मा को वास च। अर जै मनखि मा प्रभु यीशु को पवित्र आत्मा वास नि करदु, वु मनखि यीशु मसीह को नि ह्‍वे सकदु।</verse>
				<verse number="10">अर अगर जु यीशु मसीह को सभौ तुम मा वास करदु, अब चै तुमरो सरील पाप की वजै से मोरि भि किलै नि जौ, फिर भि पवित्र आत्मा तुमतै सदनि को जीवन द्‍यालु, किलैकि तुमुन बिस्वास कैरी अर पिता परमेस्वर की नजर मा धरमी ठैरि ग्यां।</verse>
				<verse number="11">अर पिता परमेस्वर न यीशु मसीह तैं मुरदो मा बटि ज्यून्द कैरी, अर वेकी पवित्र आत्मा तुम लोगु मा वास करदी, त जन वेन यीशु मसीह तैं मुरदो मा बटि ज्यून्द कैरी, उई तुमरा नास होण वळा सरील तैं भि अपणा पवित्र आत्मा का द्‍वारा मुरदो मा बटि ज्यून्द करलु। अर इन वु इलै करलु, किलैकि वेकी पवित्र आत्मा तुम मा भि वास करदी।</verse>
				<verse number="12">हे मेरा भै-बैंणो, हमरु फरज यू नि च, कि हम अपणा सरील की इच्छा का मुताबिक अपणु जीवन को गुजर-बसर कैरा।</verse>
				<verse number="13">किलैकि अगर जु तुम सरील की इच्छा का मुताबिक अपणा जीवन को गुजर-बसर करद्‍यां, त या बात पक्‍की च कि तुमरि आत्मिक मौत जरुर होण, पर अगर जु तुम पवित्र आत्मा का द्‍वारा सरील की इच्छा को नास करद्‍यां, त तुमतै सदनि को जीवन दिये जालु।</verse>
				<verse number="14">इलै जथगा लोग परमेस्वर की पवित्र आत्मा का मुताबिक अपणु जीवन तैं चलौन्दिन, वु लोग पिता परमेस्वर की औलाद छिन।</verse>
				<verse number="15">अर जु पवित्र आत्मा तुमतै दिये गै, वु तुमतै गुलाम नि बणौन्दु कि तुम फिर से डौऽरी-डौऽरी के अपणा जीवन को गुजर-बसर कैरा। अरे, जु पवित्र आत्मा पिता परमेस्वर न तुमतै देई वां से इन साबित होन्दु, कि हम वेकी औलाद छां। तभि त हम पिता परमेस्वर कू, “हे अब्बा, मेरा पिता” बोलि सकद्‍यां।</verse>
				<verse number="16">अर तब पवित्र आत्मा हमरि आत्मा का दगड़ा मा मिली के इन गवै देन्दी, कि हम परमेस्वर की औलाद छां।</verse>
				<verse number="17">अर अगर जु हम पिता परमेस्वर की औलाद छां, त यां को मतलब यू च कि हम वेका वारिस भि छां। अर स्वर्ग मा जन यीशु मसीह पिता परमेस्वर को वारिस च, ठिक उन्‍नि स्वर्ग मा हमतै भि वेसे वारिस होण को अधिकार मिलण, अर यू अधिकार मिलण की वजै से हम भि यीशु मसीह का दगड़ा मा साझी ह्‍वे जौला। इलै हे मेरा भै-बैंणो, या बात सच्‍च च कि अगर हम यीशु मसीह की तरौं दुख-तकलीफ सौन्द्‍यां, त स्वर्ग मा पिता परमेस्वर हमतै भि जरुर आदर-सम्मान द्‍यालु।</verse>
				<verse number="18">हे मेरा दगड़्यों, मि इन समझदु की आज का ये बगत मा जु दुख-तकलीफ हम झिलणा छां, यू सब कुछ वे आदर-सम्मान का समणि कुछ भि नि च, जु कि हम पर परगट किये जालु।</verse>
				<verse number="19">अर पूरि धरती सबर रखी के परमेस्वर का परगट होण को इंतजार कनि च, कि कब उ अपणा औलादों तैं आदर-सम्मान द्‍यालु।</verse>
				<verse number="20">अर एक बगत छौ, जब पूरि धरती पिता परमेस्वर का द्‍वारा मिल्यां दण्ड का अधीन मा चलि गै छै, अर इनकै सब चीज बेकार ह्‍वे गैनी। अर वे बगत धरती वेका खिलाप मा खुद नि गै छै, मगर फिर भि वेन इन होण दिनी। अर अब पूरि धरती बड़ी आस से वेको इंतजार कनि च,</verse>
				<verse number="21">कि अब वा भि विणास कि गुलामी से आजाद ह्‍वेके छुटकारु पालि, अर पिता परमेस्वर की तरफा बटि वेकी औलादों तैं मिलण वळा आदर-सम्मान मा धरती भि सामिल ह्‍वेके बदलि जालि।</verse>
				<verse number="22">किलैकि हम जणदा छां, कि पूरि धरती अभि तक वीं जनानि का तरौं पीड़ा मा कड़ौणी च, ज्वा कि अपणा बच्‍चा तैं जनम देण वळी होन्दी।</verse>
				<verse number="23">अर या धरती ही ना, बल्किन मा हम बिस्वासी लोग भि जौं तैं वेन पैलि अपणु पवित्र आत्मा दिनी, हम भि ईं धरती का जन पीड़ा अर परेसानियों मा रै के वेको इंतजार कना छां, कि परमेस्वर की औलाद होण का नाता आखिर कब उ हम पर लग्यां इळजामो अर पापों से छुटकारु द्‍यालु?</verse>
				<verse number="24">अर ईं आस का द्‍वारा ही हमरु छुटकारा भि होयुं च। अर आस हमेसा वीं बात की किये जान्दी ज्वा कि दिखौण मा नि औन्दी, मगर जब वा आंख्यों का समणि साफ ह्‍वे जान्दी तब आस रखण को कुई फैदा नि च।</verse>
				<verse number="25">मगर हम वे पर अपणी आस बणै के रखद्‍यां, जु हमुन देखि ही नि छिन। इलै हम सबर रखी के ऊं चीजों तैं पौण को इंतजार करद्‍यां।</verse>
				<verse number="26">अर ठिक इन्‍नि जब हम बिस्वास मा मजबूत नि रौन्द्‍यां, त परमेस्वर को पवित्र आत्मा हमरि मदद करदु। अर वे बगत हमतै इन पता नि रौन्दु कि हमतै क्या प्रार्थना करण चयेणी। तब पवित्र आत्मा हमरि आत्मा मा ह्‍वेके पिता परमेस्वर बटि बात करदु, अर रुवे-रुवे के वेसे हम खुणि प्रार्थना करदु।</verse>
				<verse number="27">अर मनों तैं परखण वळु परमेस्वर जणदु च, कि पवित्र आत्मा की क्या मनसा च, किलैकि उ पवित्र लोगु खुणि परमेस्वर बटि वेकी मनसा का मुताबिक बिन्ती करदु।</verse>
				<verse number="28">अर हम जणदा छां कि जु लोग परमेस्वर से प्यार करदिन, ऊं खुणि सब बात मिलै के भलै ही पैदा करदिन, हाँ, ऊं लोगु खुणि जौं तैं पिता परमेस्वर न अपणी इच्छा का मुताबिक बुलयूं च।</verse>
				<verse number="29">किलैकि पिता परमेस्वर जौं लोगु तैं दुनियां की शुरुवात से भि पैलि बटि जणदु, ऊं खुणि वेन इन योजना बणै कि वु सब लोग वेका पुत्र यीशु मसीह का जन ह्‍वे जा, ताकि उ सब लोगु मा सबसे पैलु बणि जौ, अर वेका बाद सब वेका भै-बैंणा ह्‍वे जा।</verse>
				<verse number="30">अर दुनियां की शुरुवात से भि पैलि जौं लोगु तैं पिता परमेस्वर न चुण्यालि छौ, वेन ऊंतैं बुलै भि च अर ऊंको न्याय कैरिके ऊंतैं अपणी नजर मा धरमी भि ठैरैयालि। अर वेन ऊंतैं अपणी नजर मा केवल धरमी ही नि ठैरै, बल्किन मा ऊंतैं आदर-सम्मान भि दियाली।</verse>
				<verse number="31">हे मेरा भै-बैंणो, अब मि तुमतै इन बतौण चान्दु, कि यों सब बातों की एक ही बात च अर वा या च कि अगर जु पिता परमेस्वर हमरि तरफा च, त हमरु विरोध करण वळु कुई भि नि ह्‍वे सकदु।</verse>
				<verse number="32">अर यू सच्‍च च कि पिता परमेस्वर न हमरि खातिर अपणा पुत्र तैं भि नि छोड़ि, बल्किन मा वेन वेतैं भि हमरि खातिर दे दिनी, त वु ही परमेस्वर हमतै यीशु मसीह का दगड़ा मा सब कुछ द्‍यालु।</verse>
				<verse number="33">अर जब पिता परमेस्वर ही अपणा लोगु तैं निरदोष साबित करदु, त फिर कु च वु, जु कि वेका चुण्यां लोगु पर नियम-कानून तोड़ण को इळजाम लगालु?</verse>
				<verse number="34">किलैकि यीशु मसीह वु मनखि च जैतैं पिता परमेस्वर न हम लोगु तैं बचौणु खुणि ठैरै, अर उई च जैतैं मनखि का पापों का खातिर मरे गै। अर पिता परमेस्वर न वेतैं उन्‍नि नि छोड़ि, बल्किन मा वेतैं मुरदो मा बटि ज्यून्दु कैरी, अर अपणा दैंणी हाथ की तरफा बैठे के वेतैं पूरु आदर-सम्मान दिनी, ताकि वु बिचलु बणि के हमतै पिता परमेस्वर का दगड़ा मा एक कैरो।</verse>
				<verse number="35">अब कुई भि हमतै यीशु मसीह का प्यार से अलग नि कैरी सकदु, नऽ त कुई दुख-तकलीफ, ना ही कुई सतौ, नऽ त अकाळ, अर ना ही कपड़ों की कमी जु की हम नंगा ह्‍वे जा। अर नऽ त नुकसान पौछाण वळु कुई खतरा हमतै वेका प्यार से अलग कैरी सकदु, अर ना ही मौत हमतै वेसे अलग कैरी सकदी।</verse>
				<verse number="36">अर जन की पवित्रशास्‍त्र मा भि लिख्यूं च कि, “त्वे खुणि हम हरेक बगत मौत का खतरा मा रौन्द्‍यां, अर हम त बलिदान का रुप मा चड़ये जाण वळी भेड़ का जन छां।”</verse>
				<verse number="37">मगर यों सब बातों का बारा मा हम यीशु मसीह का द्‍वारा, जैन हम से प्यार कैरी हरेक बात मा जीत हासिल करद्‍यां।</verse>
				<verse number="38">अर मितैं पूरु यकीन च, कि हमतै परमेस्वर का प्यार से कुई भि अलग नि कैर सकदु, नऽ त मौत, ना ही जीवन, नऽ त स्वर्गदूत, अर ना ही अधिकारी, अर नऽ त आज को दिन, ना ही औण वळु दिन, नऽ त ताकत, ना ही कुई ऊंचै,</verse>
				<verse number="39">अर ना ही कुई गैरी जगा, अब चै ईं दुनियां मा कुई भि हो उ हमतै हमरा पिता परमेस्वर का प्यार से, जु की हमरा प्रभु यीशु मसीह का द्‍वारा हम पर परगट ह्‍वे वेसे अलग नि कैरी सकदु।</verse>
			</chapter>
			<chapter number="9">
				<verse number="1">हे मेरा भै-बैंणो, मि यीशु मसीह को छौं, इलै मि तुमतै सच्‍चि बात बतौणु छौं। अर मेरु जमीर भि जैमा पवित्र आत्मा राज करदु, उ भि ईं बात की गवै देन्दु, कि मि तुम से झूठ्‍ठ नि बोन्‍नु छौं।</verse>
				<verse number="2">अर मेरा मन मा भौत दुख च, अर यू लगातार उठण वळी एक पीड़ा का जन च।</verse>
				<verse number="3">कास, मि अपणा यहूदी भै-बन्दों की मदद कैरी सकदु, जु अभि यीशु मसीह से दूर छिन। अर मि इन भि चान्दु, कि कास, ऊंका बदला मा मि मसीह से दूर ह्‍वे जान्दु, अर वेको पूरु असगार मि पर पोड़दु।</verse>
				<verse number="4">अर या बात मि इलै बोन्‍नु छौं, किलैकि हम लोग इस्राएली छां, अर पिता परमेस्वर न हमतै अपणी औलाद होणु खुणि चुण्यूं च। अर हमरा पितरों न निर्जन जगा मा पिता परमेस्वर का बड़ा-बड़ा कामों तैं होन्द देखि। अर वेन ऊंका दगड़ा मा कई करार करिनी, अर मूसा रैबर्या का द्‍वारा हमरा पितरों तैं नियम-कानून दिनी, अर इन भि सिखै की कै तरीका से हमतै पिता परमेस्वर की भक्‍ति करण चयेणी, जु कि वेकी नजर मा सही च। अर वेन ऊंका दगड़ा मा भौत सा करार भि करिनी।</verse>
				<verse number="5">अर हमरा सब पितर लोग, पितर अब्राहम का वंश मदि छा। अर अगर सरील का रिश्ता से देखा, त यीशु मसीह भि एक इस्राएली मनखि च। अर पिता परमेस्वर ही च जु कि सब लोगु पर राज करदु, वेकी तारीफ सदनि होणी रौ। आमीन।</verse>
				<verse number="6">हे मेरा भै-बैंणो, मि तुमतै इन बतौण चान्दु कि भौत सा इस्राएली लोग इन छिन जु कि पिता परमेस्वर का दण्ड से बचि नि सकिनी, त यां को मतलब यू नि च कि पिता परमेस्वर को वचन रद्‍द ह्‍वे गै, किलैकि इस्राएली लोगु का पीढ़ी मा जनम लेण वळा सब लोग सच्‍चा इस्राएली नि छिन।</verse>
				<verse number="7">अर इन नि सोचा, कि अब्राहम की पीढ़ी मा जनम लेण वळा सब लोग वेकी सच्‍चि औलाद छिन, किलैकि पवित्रशास्‍त्र मा लिख्यूं च कि, “तेरा नौना इसहाक का द्‍वारा तेरु वंश चललु।”</verse>
				<verse number="8">अर यां को मतलब यू च कि पितर अब्राहम का वंश मा जथगा भि लोगु को जनम हो ऊंमा सभ्यों खुणि पिता परमेस्वर की औलाद नि बुले जालु, मगर केवल ऊं खुणि ही पिता परमेस्वर की औलाद बुले जालु जौं खुणि वेन करार कैरी छौ।</verse>
				<verse number="9">किलैकि करार को वु वचन पिता परमेस्वर न इन बोलि छौ कि, “औण वळा साल मा ठिक ये ही बगत पर मि फिर से तेरा पास औलु, अर सारा एक नौनु तैं जनम द्‍याली।”</verse>
				<verse number="10">अर जब हमरा पितर इसहाक न रिबका का दगड़ा मा ब्यौ कैरी, त वींन दुई जौंळ्या बच्‍चों तैं जनम देई।</verse>
				<verse number="11">मगर दुई जौंळ्या बच्‍चों तैं जनम देण से पैलि, पिता परमेस्वर न रिबका कू बोलि छौ कि, “बड़ु नौनु अपणा छुटा भै की सेवा करलु।” अर ना ही ऊं नौनो न कुई अच्छु या बुरु काम कैरी छौ। मगर पिता परमेस्वर न इन इलै बोलि, ताकि वेन जैतैं चुण्यूं च, वेका द्‍वारा पिता परमेस्वर की योजना बणि रौ। अर यू सब त इलै ह्‍वे, ताकि इन साबित ह्‍वे जौ कि कै मनखि को चुणै जाण परमेस्वर की मनसा का मुताबिक ही होन्दु। अर पिता परमेस्वर की योजना कै मनखि का काम का मुताबिक नि बणदी, बल्किन मा वेन वेतैं किलै बुलै वेका मुताबिक होन्दी।</verse>
				<verse number="12"></verse>
				<verse number="13">अर ज्वा बात पिता परमेस्वर न वे खुणि बोलि, वा पवित्रशास्‍त्र मा इन लिखीं च कि, “याकूब तैं मिन प्यार कैरी, मगर एसाव तैं नकारी दिनी।”</verse>
				<verse number="14">हे मेरा दगड़्यों, अब ये मामला मा हम क्या बोलि सकद्‍यां? क्या पिता परमेस्वर अन्यो करण वळु च? नऽ रे ना इन नि च।</verse>
				<verse number="15">किलैकि परमेस्वर न मूसा रैबर्या कू बोलि छौ कि, “मि जै पर दया करण चौ, वे पर मि दया करदु, जै पर मि किरपा करण चौ, वे पर मि किरपा करदु।”</verse>
				<verse number="16">इलै या बात मनखि कि इच्छा या वेकी कड़ी मेनत पर नि च टिकी, बल्किन या बात त दया करण वळा पिता परमेस्वर पर टिकी च।</verse>
				<verse number="17">किलैकि मिस्र देस का राजा फिरौन का बारा मा पिता परमेस्वर न बोलि। अर पवित्रशास्‍त्र मा वा बात इन लिखीं च कि, “मिन त्वेतै इलै ही राजा बणै, ताकि मि अपणी ताकत त्वेतै दिखै सैकु। अर इन कैरिके मेरा नौ की चर्चा पूरि धरती पर हो।”</verse>
				<verse number="18">इलै परमेस्वर जै पर दया करण चान्दु वे पर दया करदु, अर जैतैं चौ वेतैं निठुर बणै देन्दु।</verse>
				<verse number="19">अब तुम मा बटि कुछ लोग इन छिन जु कि मि बटि पूछला कि, “त फिर पिता परमेस्वर हमरा भितर कमी किलै खुज्यान्दु? अर कु च उ, जु कि वेकी मनसा का खिलाप मा लड़ी सकदु?”</verse>
				<verse number="20">हे मेरा प्यारा भै-बैंणो, तुम एक साधारण मनखि छाँ, अर पिता परमेस्वर का दगड़ा मा बहस करण को कुई मतलब नि बणदु। अर जब कुई चीज बणयै जान्दी, त वा चीज अपणा मालिक कू इन नि बोलि सकदी कि, “तिन मितैं इन किलै बणै?”</verse>
				<verse number="21">अर माटा का भाँडो तैं बणौण वळु मनखि जन चौ उन भाँडा बणै सकदु। अर वु माटा का एक बड़ा गोळा मा बटि एक सुन्दर भाँडु बणौन्दु, जु कि खास काम मा ही इस्तेमाल किये जान्दु। अर वे ही गोळा मा बटि एक इन भाँडु भि बणौन्दु, जु कि रोज का कामों मा इस्तेमाल किये जान्दु।</verse>
				<verse number="22">ठिक उन्‍नि पिता परमेस्वर भि मनखि का अपराधों तैं देखि के बड़ु गुस्सा च। अगर उ चौ त मनखियों तैं अपणी ताकत से दण्ड दे सकदु, मगर फिर भि वु सबर रखी के लोगु की सौन्दु। अर यू त वु लोग छिन जु कि नास होण का लैख छिन अर ऊंतैं देखि के वेतैं गुस्सा औन्दु, मगर फिर भि पिता परमेस्वर इथगा सबर रखणु च त यां मा वेकी क्या गळती?</verse>
				<verse number="23">अर वेन सबर इलै रखी, ताकि उ अपणी बड़ी दया ऊं लोगु तैं दिखै सैको, जौं तैं उ आदर-सम्मान देण वळु च। अर ऊं लोगु तैं वेन यां खुणि ही तयार कैरिके रख्युं च, कि ऊ वेका बड़ा आदर-सम्मान तैं देखि सैका।</verse>
				<verse number="24">अब चै वु यहूदी छिन या वु लोग जु यहूदी जाति का नि छिन, पिता परमेस्वर न हम सब लोगु मा बटि अफ खुणि लोगु तैं चुणी के रखियालि।</verse>
				<verse number="25">अर जन पिता परमेस्वर न बोलि, होशे रैबर्या न वीं बात तैं ठिक उन्‍नि अपणी किताब मा लिखी। अर वा बात इन च कि, “जु लोग मेरी परजा मा सामिल नि छा, अब वु भि मेरी परजा का लोग होला। अर जौं लोगु तैं मि प्यार नि करदु छौं, अब ऊंतैं भि मि प्यार करलु।”</verse>
				<verse number="26">अर एक जगा मा होशे इन भि लिखदु कि, “तुम मेरी परजा का लोग नि छाँ, मगर वीं ही जगा मा वु ही लोग ज्यून्दा परमेस्वर की औलाद बणि गैनी।”</verse>
				<verse number="27">अर जन यशायाह रैबर्या न इस्राएल लोगु का बारा मा चिल्‍लै-चिल्‍लै के बोलि छौ, “अब चै इस्राएली लोगु की गिनती समुन्दर का बळा का बराबर भि किलै नि ह्‍वे जौ, मगर ऊंमा बटि कुछ ही लोगु तैं बचयै जाण।</verse>
				<verse number="28">किलैकि प्रभु धरती का लोगु तैं भौत जल्द ही पूरु दण्ड द्‍यालु।”</verse>
				<verse number="29">अर या बात ठिक उन्‍नि च, जन यशायाह रैबर्या न पैलि भि बोलि छौ। अर वा बात इन च कि, “सेनाओं पर राज करण वळु हमरु प्रभु, अगर हमरा कुछ लोगु तैं नि छुड़दु, त सदोम अर अमोरा नगरों का जन हम भि नास ह्‍वे जान्दा।”</verse>
				<verse number="30">इलै हम इन बोलि सकद्‍यां, कि ईं बात को मतलब यू च कि जु लोग यहूदी जाति का नि छिन ऊंन जादा कोसिस नि कैरी, कि पिता परमेस्वर ऊंतैं अपणी नजर मा धरमी साबित कैरो, मगर जब ऊंन यीशु मसीह पर बिस्वास कैरी तब पिता परमेस्वर ऊंतैं अपणी नजर मा धरमी ठैरै दिनी।</verse>
				<verse number="31">पर इस्राएली जाति का लोग जौन नियम-कानूनों का मुताबिक पिता परमेस्वर की नजर मा धरमी बणण की पूरि कोसिस कैरी, वु वे नियम-कानून तक पौंछण मा सफल नि ह्‍वे सकिनी।</verse>
				<verse number="32">अर इन त इलै ह्‍वे, किलैकि ऊंन अपणा कामों का द्‍वारा खुद तैं पिता परमेस्वर की नजर मा धरमी साबित करण की कोसिस कैरी, अगर जु वु यीशु मसीह पर बिस्वास करदा, त पिता परमेस्वर ऊंतैं धरमी साबित कैरी देन्दु। मगर ऊंन यीशु मसीह पर बिस्वास नि कैरी, इलै यीशु ऊं लोगु खुणि वे ढुंगा का जन बणि गै जैकी वजै से अकसर लोगु तैं उतेडु़ लगि जान्दु।</verse>
				<verse number="33">अर वे खुणि पवित्रशास्‍त्र मा कुछ इन लिख्यूं च कि, “देखा, मि यरूशलेम नगर का सिय्योन ढौंडा मा एक ढुंगो रखणु छौं, जै कि वजै से लोगु तैं उतेडु़ लगलु, पर जु कुई वे पर बिस्वास करलु, वु कभि निरास नि होलु।”</verse>
			</chapter>
			<chapter number="10">
				<verse number="1">हे मेरा भै-बैंणो, मेरी मनसा इन च कि सब यहूदी लोग बचयै जा, अर पिता परमेस्वर बटि मि ऊं खुणि या ही प्रार्थना करदु।</verse>
				<verse number="2">अर ऊंका बारा मा मि या गवै दे सकदु छौं, कि ऊंका भितर पिता परमेस्वर का पिछनै चलण को जोस भौत जादा च, मगर ऊंतैं यू पता नि च कि वेका पिछनै चलण को सही तरीका क्या च।</verse>
				<verse number="3">अर ऊंतैं यू भि पता नि च, कि पिता परमेस्वर लोगु तैं अपणी नजर मा कनकै धरमी साबित करदु, मगर फिर भि वु लोग अपणा ही तरीका से खुद तैं धरमी साबित करण की पूरि कोसिस कना छिन। इलै ऊंन पिता परमेस्वर का वे तरीका तैं स्वीकार नि कैरी, ज्यां से कि लोग धरमी साबित होनदिन।</verse>
				<verse number="4">अर यीशु मसीह त वु च जैन पिता परमेस्वर का सब नियम-कानूनों को पालन कैरिके पवित्रशास्‍त्र मा लिखी सब बातों तैं पूरु कैरी। इलै आज का बगत मा जु भि मनखि वे पर बिस्वास करदु, उ पिता परमेस्वर की नजर मा धरमी साबित ह्‍वे गै।</verse>
				<verse number="5">हे मेरा दगड़्यों, परमेस्वर को रैबर्या मूसा इन लिखदु, कि नियम-कानून को पालन पूरि तरौं करण से ही पिता परमेस्वर की नजर मा मनखि धरमी साबित ह्‍वे सकदु। अर वेन या बात कुछ इन लिखी कि, “जु मनखि यों बातों को पालन करलु, उ वेकी वजै से जीवन पालु।”</verse>
				<verse number="6">मगर बिस्वास का द्‍वारा पिता परमेस्वर की नजर मा धरमी साबित होण का बारा मा पवित्रशास्‍त्र मा कुछ इन लिख्यूं च कि, “तुम अपणा मन मा इन नि सोचा, कि कु च वु जु कि स्वर्ग जालु?” (अर ईं बात को मतलब यू च कि कु च वु, जु कि मसीह तैं धरती पर मूड़ी लेके आलु)।</verse>
				<verse number="7">अर तुम इन भि नि सोचा कि, “कु च वु जु कि अधलोक मा जालु?” (अर ईं बात को मतलब यू च कि कु च वु, जु कि अधलोक मा जालु अर मसीह तैं मुरदो मा बटि ज्यून्द करलु)।</verse>
				<verse number="8">मगर पवित्रशास्‍त्र मा इन भि लिख्यूं च कि, “वचन तेरा पास च, तेरा गिच्‍चा मा अर तेरा दिल मा भि।” अर यू बिस्वास को वु वचन च, जैको परचार हम करद्‍यां।</verse>
				<verse number="9">अर अगर जु तुम अपणा गिच्‍चा से ईं बात तैं स्वीकार करद्‍यां कि, “यीशु ही प्रभु च,” अर अपणा मन से बिस्वास करद्‍यां कि पिता परमेस्वर न यीशु मसीह तैं मुरदो मा बटि ज्यून्द कैरी, त तुमतै बचयै जालु।</verse>
				<verse number="10">किलैकि पिता परमेस्वर की नजर मा धरमी साबित होणु खुणि एक मनखि तैं मन से बिस्वास करण पोड़दु। अर अपणा गिच्‍चळ इन गवै देण कि, “हाँ मि वे पर बिस्वास करदु।” अर इन करण से ही एक मनखि तैं बचयै जालु।</verse>
				<verse number="11">किलैकि यीशु का बारा मा पवित्रशास्‍त्र मा इन लिख्यूं च कि, “जु कुई वे पर बिस्वास करलु, उ कभि निरास नि होलु।”</verse>
				<verse number="12">अर अब से यहूदी लोगु मा अर ऊं लोगु मा कुई फर्क नि च, जु कि यहूदी जाति का नि छिन, किलैकि प्रभु यीशु मसीह सभ्यों को प्रभु च अर जथगा भि लोग वेका नौ तैं लेन्दिन, वु ऊं सब लोगु तैं आसीस देन्दु।</verse>
				<verse number="13">तभि त पवित्रशास्‍त्र मा इन लिख्यूं च कि, “जु कुई प्रभु को नौ ल्यालु, वेतैं बचयै जालु।”</verse>
				<verse number="14">पर यों सब बातों खुणि लोग पिता परमेस्वर से मदद मांगा, त ऊंतैं यीशु मसीह पर बिस्वास करण पोड़लु। अर लोग यीशु पर बिस्वास तभि कैरी सकदिन जब ऊ वेका बारा मा सुणला। अर यीशु मसीह का बारा मा लोग तभि सुणी सकदिन, जब कुई मनखि ऊंतैं वेका बारा मा बतालु।</verse>
				<verse number="15">अर जब तक पिता परमेस्वर कैतैं ऊंका पास बतौण वळु ही नि भेजलु तब तक लोग वेका बारा मा कनकै सुणी सकदिन? मगर सच्‍चै त या च कि वेन अपणा बारा मा इस्राएली लोगु तैं बतै, जन कि पवित्रशास्‍त्र मा भि लिख्यूं च कि, “कथगा धन्य छिन वु लोग, जु कि शुभ समाचार सुणौन्दिन।”</verse>
				<verse number="16">पर सभ्यों न शुभ समाचार तैं स्वीकार नि कैरी। जन कि परमेस्वर को रैबर्या यशायाह भि बुल्दु। वेन बोलि छौ कि, “हे मेरा प्रभु, कैन हमरा रैबार पर बिस्वास कैरी?”</verse>
				<verse number="17">अर इन कैरिके हमतै पता चलदु, कि शुभ समाचार का सुनण से मनखि का मन मा बिस्वास पैदा होन्दु। अर जु शुभ समाचार सुणये जान्दु, उ यीशु मसीह का बारा मा च।</verse>
				<verse number="18">मगर मेरु सवाल त यू च, कि क्या लोग न शुभ समाचार तैं नि सुणी? हाँ, ऊंन सुणी च, किलैकि पवित्रशास्‍त्र मा लिख्यूं च कि, “ऊंको रैबार पूरि धरती मा फैली गै, अर ऊंका द्‍वारा बुलयां वचन दुनियां मा चौतरफि फैली गैनी।”</verse>
				<verse number="19">पर फिर भि मेरु सवाल यू च, कि क्या इस्राएली लोग का बिंगण मा नि ऐ? अरे ऊंतैं सबसे पैलि त मूसा रैबर्या न बिंगै छौ, किलैकि वेन बोलि कि, “जु लोग कुछ खास जाति का भि नि छिन मि ऊंतैं आसीस द्‍यूलु, अर ऊं लोगु तैं देखि के तुमरा मनों मा जलन तैं पैदा होलि, अर जौं लोगु तैं तुम मूरख समझद्‍यां, तुमरा मनों मा मि ऊंका खिलाप मा गुस्सा पैदा करलु।”</verse>
				<verse number="20">अर यशायाह रैबर्या न भि पिता परमेस्वर की बात तैं पूरि हिम्मत से लिखी। वेन इन लिखी कि परमेस्वर बुल्दु कि, “जौं लोगु न मि बटि मदद नि मांगि, ऊंन मितैं पयेलि। अर जौं लोगु न मितैं नि खुजै, मिन खुद तैं ऊं पर परगट कैरी।”</verse>
				<verse number="21">मगर इस्राएली लोगु का बारा मा पिता परमेस्वर इन बुल्दु कि, “मि पूरा दिन-भर ऊं लोगु तैं स्वीकार करणु खुणि तयार रौंऽऽ, जु कि मेरी आज्ञा को पालन नि करदिन, अर निठुर मन का छिन।”</verse>
			</chapter>
			<chapter number="11">
				<verse number="1">अब मि तुम बटि पूछदु, कि क्या परमेस्वर न अपणा इस्राएली लोगु तैं छोड़याली? ना इन कभि नि ह्‍वे सकदु। अरे, मि खुद एक इस्राएली मनखि छौं, अर मि अब्राहम का वंश मदि छौं अर मेरु गोत्र को नौ बिन्यामीन च।</verse>
				<verse number="2">परमेस्वर न अपणी परजा का लोगु तैं नि छोड़ि, किलैकि वु ऊं लोगु तैं पैलि बटि जणदु। अर क्या तुम नि जणद्‍यां, कि पवित्रशास्‍त्र मा एलिय्याह रैबर्या हमतै क्या बतौन्दु, कि कनकै वेन इस्राएली लोगु का खिलाप मा पिता परमेस्वर से बिन्ती कैरी?</verse>
				<verse number="3">वेन इन बिन्ती कैरी छै कि, “हे मेरा प्रभु, ऊंन तुमरा रैबर्या तैं मारी, अर यू त वु लोग छिन जौन तुमरि वेदी तैं तोड़ि, अर अब मि ही इखुली बच्यूं छौं, अर अब वु मितैं भि मरणु खुणि खुज्याणा छिन।”</verse>
				<verse number="4">मगर पिता परमेस्वर न एलिय्याह रैबर्या तैं कुछ इन जबाब दिनी। वेन वेकू बोलि कि, “मिन अफ खुणि सात हजार लोग रख्यां छिन, अर यू वु छिन, जौन बाल द्‍यबता का अगनै घुंडा नि टिकनी।”</verse>
				<verse number="5">ठिक इन्‍नि आज का ये बगत मा भि च, कुछ इस्राएली लोग इन छिन जौं तैं पिता परमेस्वर न अपणी बड़ी किरपा से चुणी च।</verse>
				<verse number="6">अर अगर जु वेन ऊंतैं अपणी किरपा से चुणी, त यां को मतलब यू च कि वेन ऊंतैं ऊंका कामों की वजै से नि चुणी जु ऊंन करिनी। अगर कामों की वजै से होन्दु, त दान का रुप मा ज्वा किरपा पिता परमेस्वर करदु, वांको कुई मतलब नि होन्दु।</verse>
				<verse number="7">तब यां को मतलब क्या निकळि? हालांकि, इस्राएली लोग न पिता परमेस्वर की नजर मा धरमी होण की पूरि कोसिस कैरी, पर फिर भि वु सफल नि ह्‍वे सकिनी मगर जौं लोगु तैं पिता परमेस्वर न चुणी वु वेकी नजर मा धरमी साबित ह्‍वे गैनी। अर दुसरा लोग निठुर ह्‍वे गैनी, अर वेकी बातों तैं मनण से नकारी दिनी।</verse>
				<verse number="8">अर ऊं लोगु खुणि पवित्रशास्‍त्र मा इन लिख्यूं च कि, “परमेस्वर न आज का दिन तक ऊंतैं एक सुस्त मन दियूं च, ताकि वु समझि नि सैका। अर वेन ऊंका आंखा अर कन्दूड़ बन्द कर्यां छिन, ताकि वु दिखण का बाद भि देखि नि सैका, अर सुनण का बाद भि सुणी नि सैका।”</verse>
				<verse number="9">अर राजा दाऊद भि इन बुल्दु कि, “ऊंको खाणुक ऊं खुणि एक जाल अर फन्दा बणि जौ, अर इथगा ही ना बल्किन मा उतेडु़ अर दण्ड मिलण की वजा भि बणि जौ।</verse>
				<verse number="10">ऊंका आंखा बन्द ह्‍वे जा, ताकि वु देखि नि सैका, अर हरेक विपदा का अगनै ऊंकी पीठ सदनि खुणि झुकि जौ।”</verse>
				<verse number="11">फिर त यू सवाल बणदु कि क्या पिता परमेस्वर न इस्राएली लोगु तैं बिल्कुल छोड़याली? क्या ऊंका पास कुई आस नि च? नऽ रे ना इन्दरि कुई बात नि च। मगर जब ऊंन यीशु मसीह पर बिस्वास नि कैरी, तब शुभ समाचार दुसरि जाति का लोगु तक पौंछी इलै ऊं लोगु तैं बचयै जाण को मौका मिली गै, जु कि इस्राएली लोग नि छिन। अर यू सब त इलै ह्‍वे, ताकि दुसरि जाति का लोगु तैं देखि के इस्राएली लोगु तैं जलन हो।</verse>
				<verse number="12">अर यहूदी लोगु का गळत चलण की वजै से दुसरि जाति का लोगु तैं पिता परमेस्वर की भौत सि आसीस मिली गैनी। अर अगर जु इस्राएली लोग यीशु मसीह पर बिस्वास करला, त पिता परमेस्वर ऊंतैं जरुर आसीस द्‍यालु अर वु भि पैलि से भि जादा।</verse>
				<verse number="13">हे मेरा भै-बैंणो, तुम जु यहूदी जाति का नि छाँ, मि तुमतै बतै देन्दु कि मि ऊं लोगु खुणि ही यीशु मसीह को खास चेला का रुप मा चुणै ग्यों, जु यहूदी जाति का नि छिन। अर अब जब मेरा पास यू काम च, इलै मि बटि जथगा जादा ह्‍वे सकदु मि ईं बात को पूरु फैदा उठौण चान्दु।</verse>
				<verse number="14">अर ईं सेवा का काम का द्‍वारा मि इन कोसिस करदु, कि जु मेरा इस्राएली भै-बन्द छिन ऊंमा इन आग पैदा ह्‍वे जौ, कि भौत लोग यीशु मसीह पर बिस्वास कैरिके बचयै जा।</verse>
				<verse number="15">अर जब पिता परमेस्वर इस्राएली लोगु से दूर ह्‍वे गै, त वेन दुनियां का और लोगु का दगड़ा मा मेल-जोल कैरी। अर जब पिता परमेस्वर इस्राएली लोगु तैं स्वीकार करलु, त उई ऊंतैं मुरदो मा बटि ज्यून्द करण का बाद जीवन दान भि द्‍यालु।</verse>
				<verse number="16">अर अब मि तुमतै उदारण देके बतौन्दु, कि जब फसल को पैलु हिस्सा परमेस्वर तैं अरपण मा चड़ये जान्दु, त पूरि फसल पवित्र ठैरैईं जान्दी। ठिक उन्‍नि कै डाळा का जलुड़ा पवित्र छिन, त पूरु डाळु पवित्र ठैरि जान्दु।</verse>
				<verse number="17">अर जन जैतून डाळा से कुछ फौंका तोड़ि के अलग किये जनदिन, ठिक उन्‍नि कुछ इस्राएली लोग भि छिन जौन यीशु मसीह पर बिस्वास नि कैरी अर इन कैरिके वु पिता परमेस्वर का लोगु से अलग ह्‍वे गैनी। अर जन लोग कै दुसरा डाळा पर कलम लगौन्दिन ठिक उन्‍नि पिता परमेस्वर न तुम लोगु तैं अपणा इस्राएली लोगु का दगड़ा मा मिलै, ताकि तुम लोगु तैं भि वु आसीस मिली सैको जैको करार वेन इस्राएली लोगु का पितरों का दगड़ा मा कैरी छौ।</verse>
				<verse number="18">इलै तुम बड़ु मोन नि कर्यां कि हम ऊं फौंकों से अच्छा छा। अर अगर जु तुम बड़ु मोन करिल्या, त याद रख्यां कि फौंका जलुड़ो तैं समाळि के नि रखदिन, बल्किन मा जलुड़ा फौंकों तैं समाळि के रखदिन,</verse>
				<verse number="19">अर अगर जु तुम बड़ु मोन करिल्या अर खुद का बारा मा इन बोलिल्या कि, “फौंका त इलै तुड़ै गैनी, ताकि मि वेमा कलम की तरौं लगै जौ,”</verse>
				<verse number="20">त मेरी ईं बात तैं समझा, चला मणदा छां कि वु लोग बिस्वास नि करण की वजै से काटी के ढुळै गैनी, अर तुम लोग बिस्वास करण की वजै से वेमा बणयां छाँ, त सुणा, बड़ु मोन नि कैरा बल्किन मा पिता परमेस्वर पर अपणी पूरि सरदा बणै के रखा।</verse>
				<verse number="21">किलैकि जब पिता परमेस्वर न डाळा का असली फौंक्यों तैं नि छोड़ि, त तुम क्या चीज छाँ?</verse>
				<verse number="22">अर यां से इन पता चलदु कि परमेस्वर कथगा निठुर अर कथगा दया करण वळु च। अर जु लोग वेकी आज्ञा को पालन नि करदिन ऊंतैं वु निठुर सजा देन्दु, मगर जथगा भि लोग वेकी आज्ञा को पालन करदिन ऊंकी भलै करणु खुणि उ सदनि अगनै रौन्दु। इलै अगर जु तुम लोग वेकी आज्ञा को पालन नि करिल्या, त तुमरि हालत भि जैतून का ऊं फौंकों का जन ह्‍वे जाण जौं तैं तोड़ि के अलग किये गै।</verse>
				<verse number="23">अर अगर जु यहूदी लोग भि बिस्वास मा ऐ जाला, त ऊंकी कलम भि फिर से लगि जालि, किलैकि पिता परमेस्वर इथगा काबिल च, कि उ फिर से ऊंतैं अफ दगड़ा मा कलम का रुप मा लगै सकदु च।</verse>
				<verse number="24">अर जंगळि फौंका होण का नाता तुम जैतून डाळा मा लगये ग्यां, जु कि वेका सभौ से अलग च। अर तुम जु इस्राएली लोग नि छा, तुम ऊं फौंकों का जन छा, जौं तैं जंगळि डाळों बटि निकळि के जैतून का अच्छा डाळा पर लगये गै। पर यहूदी लोग ऊं फौंकों का जन छा, जु कि जैतून का अच्छा डाळा बटि निकळ्यां छिन। अर या बात पक्‍की च कि वु लोग अपणा अच्छा डाळा बटि फिर से जुड़ी जैल्या।</verse>
				<verse number="25">हे मेरा भै-बैंणो, मि नि चान्दु कि तुम खुद तैं अपणी नजर मा भौत समझदार समझा। पर जबरि तक पिता परमेस्वर की मनसा पूरि नि ह्‍वे जौ, कि उ अपणा चुण्यां लोगु तैं अपणा पास लेके अऽ, वेका बाद ही इस्राएली लोग का निठुर मन टूटी जाला, तब ऊ यीशु मसीह की बातों को पालन करला।</verse>
				<verse number="26">अर इनकै पूरु इस्राएल बचि जालु। जन कि पवित्रशास्‍त्र मा भि लिख्यूं च कि, “बचौण वळु यरूशलेम नगर का सिय्योन ढौंडा बटि आलु, अर उ याकूब का परिवार मा बटि सब बुरै तैं दूर करलु।</verse>
				<verse number="27">अर तब ऊंका दगड़ा मा मेरु जु करार च उ पूरु होलु, अर वु इन च कि मि ऊंका पापों तैं ऊं से दूर कैरी द्‍यूलु।”</verse>
				<verse number="28">हे मेरा दगड़्यों, यहूदी लोगु न शुभ समाचार तैं स्वीकार नि कैरी, इलै वु लोग पिता परमेस्वर का दुसमन बणि गैनी। अर यू त इलै ह्‍वे, ताकि तुम लोगु की मदद किये जै सैको, हाँ तुमरि ही तुम जु यहूदी जाति का नि छाँ। मगर ईं बात तैं याद रखा कि यहूदी लोग अभि भि पिता परमेस्वर की चुणी परजा का लोग छिन, अर वु ऊं से भौत प्यार करदु किलैकि पिता परमेस्वर न ऊंका पितरों से करार कर्युं छौ।</verse>
				<verse number="29">अर पिता परमेस्वर ऊं लोगु खुणि अपणा विचार नि बदल्दु, जौं लोगु तैं वु दान-बरदान देके अपणा पास बुलान्दु।</verse>
				<verse number="30">अर तुम जु यहूदी जाति का नि छा, एक बगत छौ जब तुमुन पिता परमेस्वर को विरोध कैरी, मगर जब यहूदी लोगु न वेको विरोध कैरी, तब पिता परमेस्वर न तुम पर दया कैरी।</verse>
				<verse number="31">अर अब जब यहूदी लोग पिता परमेस्वर की आज्ञा को पालन नि करदिन, मगर उ फिर भि ऊं पर अपणी दया करलु ठिक उन्‍नि जन वेन तुम पर कैरी।</verse>
				<verse number="32">किलैकि परमेस्वर न सब लोगु तैं ऊंकी आज्ञा नि मनण वळी जिद्‍द पर ही छोड़ि दिनी अर इन वेन इलै कैरी, ताकि उ सब लोगु पर अपणी दया दिखै सैको।</verse>
				<verse number="33">पिता परमेस्वर की महानता का बारा मा बतौण बड़ु कठिन च। अर वेकी अकल और ज्ञान को कुई अन्त नि च, किलैकि जौं बातों को फैसला उ लेन्दु, वु लोगु की सोच-समझ से भैर छिन, अर ना कुई वेका तौर-तरीकों तैं समझि सकदु।</verse>
				<verse number="34">अर पवित्रशास्‍त्र मा इन्‍नि लिख्यूं च कि, “कुई भि मनखि प्रभु का मन तैं नि जाणि सकदु, अर ना ही कुई मनखि वेतैं सला दे सकदु।”</verse>
				<verse number="35">“अर कैन भि परमेस्वर तैं कुछ नि दिनी, ताकि उ वे मनखि तैं वापस दे सैको।”</verse>
				<verse number="36">किलैकि सब कुछ पिता परमेस्वर न ही बणै, अर सब कुछ वेका द्‍वारा ही ह्‍वे, अर वे खुणि ही च। अर सदनि तक वेकी तारीफ होणी रौ। आमीन।</verse>
			</chapter>
			<chapter number="12">
				<verse number="1">इलै हे मेरा प्यारा भै-बैंणो, जब बटि पिता परमेस्वर न अपणी बड़ी दया तुम पर कैरी, अर मि तुम से बिन्ती करदु, कि तुम सभ्या का सभि भलै का कामों खुणि अपणा-अपणा जीवनों तैं एक बलिदान का रुप मा वे खुणि चड़ै द्‍या, अर वेकी महान सेवा खुणि खुद तैं दे द्‍या। अर या ही बात तुम खुणि सच्‍चि पूजा का जन च ज्वा की तुमतै करण चयेणी।</verse>
				<verse number="2">अर सुणा, तुमतै ईं दुनियां का मुताबिक अपणु जीवन नि जीण चयेणु, पर पिता परमेस्वर का द्‍वारा तुम अपणा मन तैं नयू बणै के अपणा चाल-चलन तैं बदला। तब जैके तुम पिता परमेस्वर की मनसा तैं जाणि सकिल्या, कि कु जि बात वेतैं अच्छी लगदिन, अर कु जि बात छिन जु कि स्वीकार करण लैख छिन जौं मा कुछ भि गळत नि हो।</verse>
				<verse number="3">अर ज्वा किरपा पिता परमेस्वर न मि पर कैरी, वेका मुताबिक मि तुमतै बतै देन्दु, कि तुम भि भौत कुछ छाँ इन दिखौणु खुणि तुम लोगु का समणि खुद तैं परगट नि कैरा, बल्किन मा जु बिस्वास पिता परमेस्वर न तुमतै सौंपी, वेका बारा मा ध्यान से सोच-विचार कैरा।</verse>
				<verse number="4">किलैकि जन हमरा सरील मा भौत सा अंग छिन, पर सब अंग अलग-अलग काम करदिन,</verse>
				<verse number="5">ठिक उन्‍नि हम भि कई बिस्वासी लोग छां, मगर फिर भि हम सब एक ही यीशु का छां अर एक ह्‍वेके काम करद्‍यां।</verse>
				<verse number="6">अर वेका मुताबिक ज्वा किरपा हम पर किये गै, हमतै अलग-अलग दान-बरदान मिल्यां छिन। इलै जैतैं भविष्यबाणी करण को बरदान मिल्यूं च वु मनखि बिस्वास का मुताबिक वेको इस्तेमाल कैरो।</verse>
				<verse number="7">अर जैतैं सेवा करण को दान मिल्यूं च, उ सेवा करण मा लग्यूं रौ। अर जु मनखि सिखौण वळु च, उ सिखौण मा लग्यूं रौ।</verse>
				<verse number="8">अर जु उपदेस देण वळु च, उ उपदेस देण मा लग्यूं रौ। अर जु मनखि दान देण वळु च, उ खुशी से दान द्‍यो, अर जु लोग सच्‍चै को बाटु पर चलौण वळा छिन वु अपणी पूरि मेनत से ये काम तैं कैरा। अर दया करण वळु मनखि, मन की खुशी से दया कैरो।</verse>
				<verse number="9">हे मेरा दगड़्यों, तुम लोगु का प्यार मा कुई कपट नि हो, अर बुरै से तुम नफरत कैरा, अर भलै का काम करण मा लग्यां रा।</verse>
				<verse number="10">अर अपणा आपस मा भै-बैंणो की तरौं सच्‍चा दिल से प्यार कैरा, अर हमेसा एक-दुसरो को आदर-सम्मान कैरा।</verse>
				<verse number="11">अर तुम लोग मेनत करण मा अळकसि नि बणा, बल्किन मा आत्मिक खुशी से भरपूर रा, अर प्रभु की सेवा कना रा।</verse>
				<verse number="12">अर खुश रा, किलैकि तुमरा पास आस च। अर दुख-तकलीफ औण का बगत मा मजबूत बणयां रा, अर प्रार्थना कना रा।</verse>
				<verse number="13">अर पिता परमेस्वर का लोगु का दगड़ा मा अपणी चीजों को साझा कैरा, अर अणजाण लोगु को भि अपणा घौर मा स्वागत कैरा।</verse>
				<verse number="14">अर ऊं लोगु तैं आसीस द्‍या, जु तुमतै सतौन्दा छिन, हाँ आसीस ही द्‍या कैतैं असगार नि द्‍या।</verse>
				<verse number="15">अर खुशी मनौण वळो का दगड़ा मा तुम भि खुशी मणा, अर जु दुख मा रुंणा छिन तुम भि ऊंका दगड़ा मा रुवा।</verse>
				<verse number="16">अर अपणा आपस मा मेल-जोल से रा अर बड़ु मोन नि कैरा, बल्किन मा ऊं लोगु का दगड़ा मा मेल-जोल कैरा, जौं तैं लोग अकसर कुछ नि समझदिन। अर खुद तैं जादा होसियार समझि के बड़ु मोन नि कैरा।</verse>
				<verse number="17">अगर कुई तुमरा दगड़ा मा बुरु कनु च, त वेका दगड़ा मा बुरु नि कैरा, बल्किन मा वु काम कैरा जु कि सभ्यों की नजर मा भला छिन।</verse>
				<verse number="18">जख तक ह्‍वे सैको, तुम सभ्यों का दगड़ा मा शान्ति से जीवन जीण की कोसिस कैरा।</verse>
				<verse number="19">हे मेरा प्यारा भै-बैंणो, तुम इन्द्रया लोगु का दगड़ा मा खुद बदला नि ल्या, बल्किन मा पिता परमेस्वर को इंतजार कैरा, ताकि वु खुद ऊंतैं दण्ड द्‍यो। किलैकि पवित्रशास्‍त्र मा भि इन्‍नि लिख्यूं च, कि प्रभु बुल्दु कि, “बदला लेण मेरु काम च, मि खुद ही ये काम तैं करलु।”</verse>
				<verse number="20">अर पवित्रशास्‍त्र मा इन्‍नि भि लिख्यूं च कि, “अगर तेरु दुसमन भूकि च, त वेतैं खाणुक खिलै। अर अगर जु वु तिसळु च, त वेतैं पाणि पिलै। किलैकि इन करण से तू वेतैं दोषी साबित कैरी दिली, अर वेतैं खुद पर बड़ी सरम आली।”</verse>
				<verse number="21">अर बुरै का समणि खुद कि हार नि माणा, बल्किन मा भलै का द्‍वारा बुरै पर जीत हासिल कैरा।</verse>
			</chapter>
			<chapter number="13">
				<verse number="1">दगड़्यों, हरेक मनखि अपणा अधिकारीयों का अधीन मा रौ, किलैकि पिता परमेस्वर की इजाजत का द्‍वारा ही मनखियों तैं अधिकार दिये जनदिन। अर आज भि जु अधिकारी लोग छिन वु भि पिता परमेस्वर का द्‍वारा ही ठैरैये गैनी।</verse>
				<verse number="2">इलै जु कुई भि अधिकारी लोगु को विरोध करदु, उ पिता परमेस्वर का नियम-कानून को विरोध करदु, अर विरोध करण वळा लोग दण्ड तैं जरुर पाला।</verse>
				<verse number="3">अर जु लोग सही छिन ऊंतैं अधिकारी लोगु से डऽरण की जरुरत नि च, बल्किन मा अधिकारी लोगु से त वु लोग डऽरदिन जु की गळत काम करदिन। अर अगर जु तुम लोग भि बिन डऽरयां रौण चाणा छाँ, त सिरफ उई काम कैरा जु कि अच्छा छिन, ताकि ऊंका द्‍वारा तुमरि तारीफ हो।</verse>
				<verse number="4">किलैकि अधिकारी लोग पिता परमेस्वर का द्‍वारा ठैरयां सेवक छिन, जौं तैं तुमरि भलै करणु खुणि चुणै गै। अर अगर जु तुम लोग गळत काम कना छाँ, त तुमतै ऊं से डऽरण चयेणु। अर या बात मि इलै बोन्‍नु छौं, किलैकि ऊंका पास तुमतै दण्ड देण की ताकत च। अर वु लोग पिता परमेस्वर का सेवक का रुप मा काम करदिन, अर गळत काम करण वळो तैं दण्ड देन्दिन।</verse>
				<verse number="5">अर अधिकारी लोग कखि कुई दण्ड नि दे द्‍या, ईं डौऽर की वजै से ऊंका अधीन मा नि रौण, बल्किन मा ऊंका अधीन मा इलै रौण किलैकि हमरु जमीर भि ईं बात की गवै देन्दु कि हमतै ऊंका अधीन मा रौण चयेणु।</verse>
				<verse number="6">अर इलै ही हम लोग अपणा राज्य तैं कर देन्द्‍यां, किलैकि जब अधिकारी लोग अपणी जबाबदारी तैं पूरु कना रौनदिन, त वे बगत वु पिता परमेस्वर खुणि काम कना रौनदिन।</verse>
				<verse number="7">इलै जैको जथगा हक बणदु, वु वेतैं दिये जौ। अर जु कर की मांग करदु वेतैं कर दिये जौ, अर जु चुंगी लेण की मांग करदु वेतैं चुंगी दिये जौ। अर जै से डऽरण चयेणु, वेसे डौऽरा, अर जैतैं आदर देण चयेणु वेतैं पूरु आदर-सम्मान द्‍या।</verse>
				<verse number="8">हे मेरा भै-बैंणो, तुमरो यू फरज बणदु कि तुम सब लोगु से प्यार कैरा, अर ऊंतैं ऊंको पूरु हक द्‍या, किलैकि जु मनखि दुसरा लोगु तैं प्यार करदु वेन सब नियम-कानून को पालन कैरियाली।</verse>
				<verse number="9">किलैकि पवित्रशास्‍त्र मा इन आज्ञा देई छिन कि, “तू दुसरा का दगड़ा मा गळत सम्बन्ध नि बणै, तू हत्या नि कैरी, तू चोरी नि कैरी, तू लालच नि कैरी,” अर यों का अलावा जु दुसरि आज्ञा भि छिन, ऊं सब आज्ञाओं को यू मतलब निकळदु की सबसे प्यार कैरा। अर या बात पवित्रशास्‍त्र मा इन्‍नि लिखी च कि, “तू अपणा पड़ोसी से उन्‍नि प्यार कैर जन तू खुद से करदी।”</verse>
				<verse number="10">अर अगर जु तुम दुसरा लोगु से प्यार करद्‍यां, त तुम वेका दगड़ा मा गळत नि करद्‍यां, किलैकि प्यार करण को मतलब ही सब नियम-कानूनों तैं पूरु करण से च।</verse>
				<verse number="11">अर इन इलै कैरा किलैकि हम एक इन्द्रया बगत मा जीणा छां जु कि भौत अनमोल च। हे मेरा दगड़्यों, अब सिण को बगत नि रै गै, उठा, किलैकि बगत नजदीक ऐ गै। अर जब हमुन बिस्वास कैरी छौ, तब से लेके अभि तक हमरु बचयै जाण को बगत भि और नजदीक ऐ गै।</verse>
				<verse number="12">अर जन रात खतम ह्‍वे जाण का बाद एक नयू दिन औन्दु, ठिक उन्‍नि मसीह को औण भि भौत नजदीक च। इलै अन्धेरा मा होण वळा बुरै का कामों तैं छोड़ि द्‍या, अर पिता परमेस्वर का उज्याळा मा चला, अर वेसे मिलण वळी हिम्मत तैं एक हथियार की तरौं इस्तेमाल कैरिके बुरै पर जीत हासिल कैरा।</verse>
				<verse number="13">अर हमरु सभौ दिन का उज्याळा का जन हो। हाँ, जन दिन को उज्याळु सभ्यों पर चमकदु, ठिक उन्‍नि हमरु सभौ भि हो ताकि वेका द्‍वारा हम सब लोगु खुणि अच्छु सभौ वळा बणि जा। अर नऽ त हमतै मौज-मस्ती करण चयेणी, अर ना ही हमतै नसा करण वळु होण चयेणु। अर नऽ त हमतै गळत सम्बन्ध रखण चयेणा, अर ना भोग-बिलास करण चयेणु, अर नऽ त हमतै कै का दगड़ा मा लड़ै-झगड़ा करण चयेणा, अर ना ही हमतै एक-दुसरा तैं देखि के जलत्यौण चयेणु।</verse>
				<verse number="14">बल्किन मा प्रभु यीशु मसीह का सभौ तैं अपणा जीवन मा पूरि तरौं से ले ल्या, अर अपणा सरील की पापि इच्छाओं तैं पूरु करण बन्द कैरी द्‍या।</verse>
			</chapter>
			<chapter number="14">
				<verse number="1">हे मेरा भै-बैंणो, अगर कुई मनखि बिस्वास मा कमजोर च त वेका दगड़ा मा बहसबाजी नि कैरा, बल्किन मा वेतैं अफ दगड़ा मा ले ल्या।</verse>
				<verse number="2">किलैकि कुई मनखि इन बिस्वास करदु कि सब कुछ खाण चयेणु, अर यां मा कुई बुरी बात नि च, मगर जु मनखि बिस्वास मा कमजोर च, वेको मनण इन च कि हमतै केवल सागपात ही खाण चयेणु।</verse>
				<verse number="3">इलै सब कुछ खाण वळा मनखि तैं, सागपात खाण वळा मनखि को अपमान नि करण चयेणु, अर ठिक उन्‍नि सागपात खाण वळा मनखि तैं भि सब कुछ खाण वळा को न्याय नि करण चयेणु, किलैकि न्याय करण परमेस्वर को काम च, अर उ दुई किसम का लोगु तैं स्वीकार करदु।</verse>
				<verse number="4">अर तू कु छैई, जु कि कै दुसरा मनखि का नौकर को न्याय करदी? अरे, ईं बात को फैसला त वेको मालिक ही करलु कि उ अच्छु कनु च या ना। अर परमेस्वर को सेवक अच्छु ही करलु, किलैकि भलै करण मा उ अपणा लोगु की मदद करदु।</verse>
				<verse number="5">कुछ लोग इन मणदिन कि कुई एक दिन कै दुसरा दिन से जादा खास च, अर कुछ लोग इन मणदिन कि हरेक दिन एक ही जन छिन। मेरा दगड़्यों, तुम सब लोग अपणा-अपणा मनों मा ईं बात तैं ठाणि के रखी ल्या,</verse>
				<verse number="6">कि जु मनखि एक दिन तैं कै दुसरा दिन से जादा खास मणदु, उ परमेस्वर खुणि ही इन करदु। अर जु मनखि सब किसम को खाणुक खान्दु, त उ भि पिता परमेस्वर खुणि ही इन करदु, अर वेका दगड़ा-दगड़ि धन्यवाद देन्दु। अर जु मनखि सब किसम को खाणुक नि खान्दु उ भि परमेस्वर खुणि इन करदु, अर परमेस्वर को धन्यवाद देन्दु।</verse>
				<verse number="7">अब चै हम ज्यून्दा छां या मोरि जां, यां को मतलब यू नि च कि हम अपणा फैदा खुणि ही जीवन जीणा छां। किलैकि अगर जु हम ज्यून्दा छां त उ प्रभु यीशु मसीह खुणि च अर अगर जु हम मोरि जां त यू भि वे खुणि ही च, अब जु कुछ च वु सब प्रभु यीशु मसीह खुणि ही च।</verse>
				<verse number="8"></verse>
				<verse number="9">किलैकि यीशु मसीह इलै ही मोरि अर ज्यून्द ह्‍वे, ताकि उ मुरयां अर ज्यून्दा लोगु को प्रभु ह्‍वे जौ।</verse>
				<verse number="10">मगर तू अपणा भै पर इळजाम लगौण को काम किलै करदी? या तू अपणा भै तैं किलै बेकार समझणी छैई? अरे याद रख, कि हम सभ्यों न एक दिन पिता परमेस्वर का न्याय आसन का समणि खड़ु होण,</verse>
				<verse number="11">अर या बात पवित्रशास्‍त्र मा इन लिखीं च कि, “प्रभु इन बुल्दु, मि अपणा जीवन की कसम खान्दु, कि सब लोग मेरा समणि अपणा-अपणा घुंडा टेकी द्‍याला, अर मितैं ही सब लोग परमेस्वर बोलि के स्वीकार करला।”</verse>
				<verse number="12">इलै याद रखा, कि हम लोगु मा बटि हरेक मनखि तैं पिता परमेस्वर का समणि अपणा-अपणा कामों को हिसाब-किताब देण होलु।</verse>
				<verse number="13">इलै अब से एक-दुसरा की गळती निकळण छोड़ि द्‍या, अर ना ही हमतै कुई इन्द्रयो फैसला लेण चयेणु, ज्यां से कि कै बिस्वासी भै या बैंण तैं अपणा जीवन मा उतेडु़ लगु या उ पाप मा पोड़ि जौ।</verse>
				<verse number="14">अर मि प्रभु यीशु का बार मा जणदु छौं, अर वेसे जु बिस्वास मितैं मिलदु वां से इन साबित ह्‍वे जान्दु, कि कुछ खाण से कुई भि चीज मितैं अशुद्ध नि करदी। मगर कुछ लोग इन सोचदिन, कि ऊंका कुछ खाणुक खाण से वु अशुद्ध होणा छिन, त ऊं खुणि वु खाणुक अशुद्ध च।</verse>
				<verse number="15">अगर तुम अपणा खाणुक खाण की वजै से कै बिस्वासी भै या बैंण खुणि उतेडु़ बणण छाँ, त ईं बात तैं जाणि ल्या कि तुम वे बाटा पर नि चलणा छाँ, जु कि दुसरो से प्यार करण को च। अरे जु खाणुक तुम खन्द्‍यां, कखि उ वे मनखि खुणि नास होण की वजा नि बणि जौ, जै मनखि की खातिर यीशु मसीह मरे गै।</verse>
				<verse number="16">इलै ईं बात को ध्यान रखा, कखि जु तुमतै अच्छु लगणु च, उ दुसरा लोगु खुणि बुरी बात नि बणि जौ।</verse>
				<verse number="17">किलैकि पिता परमेस्वर का राज को मतलब खाण-पीण नि च, बल्किन मा वेकी नजर मा धरमी जीवन जीण से च। अर वेकी पवित्र आत्मा का द्‍वारा भलै करण, शान्ति से रौण, अर बड़ी खुशी से अपणु जीवन जीण से च।</verse>
				<verse number="18">अर जु मनखि ये तरीका से अपणा जीवन तैं चलौन्दु, अर वेका दगड़ा-दगड़ि यीशु मसीह की सेवा करदु, उ मनखि पिता परमेस्वर तैं खुश करदु, अर दुसरा लोग भि वेकी तारीफ करदिन।</verse>
				<verse number="19">इलै हम ऊं बातों तैं पूरु करण मा लग्यां रा, जौं बातों से मेल-जोल होन्दु, अर जु बात एक-दुसरा का बिस्वास तैं मजबूत बणौण मा काम औन्दिन।</verse>
				<verse number="20">इलै खाण-पीण का मामला मा तुम पिता परमेस्वर का काम को नास नि कैरा, उन त खाण-पीणु खुणि सब कुछ ठिक ही च, मगर इन्द्रयो खाण-पीण भि गळत च जैकी वजै से दुसरो बिस्वासी भै या बैंण पाप करण लगि जौ।</verse>
				<verse number="21">तुम खुणि भली बात त या ही च, कि नऽ त तुम मांस खा, अर ना ही तुम दारु प्या, अर ना कुई इन्द्रयो काम कैरा ज्यां से की कुई दुसरो बिस्वासी भै या बैंण पाप करण लगि जौ।</verse>
				<verse number="22">अर ईं बात का बारा मा अब जु कुछ भि तुम लोग मणद्‍यां, वेतैं अपणा अर पिता परमेस्वर का बीच मा ही रखा। अर धन्य च वु मनखि जौं को मन ऊंतैं दोषी साबित नि करदु, जब कि उ मनखि उई काम करदु जु कि वेतैं अच्छा लगदिन।</verse>
				<verse number="23">पर जु मनखि सक कैरिके खाणुक तैं खै देन्दु त उ दोषी ठैरि जान्दु, किलैकि वेन इन बिस्वास नि कैरी कि यू सही च। अर मनखि जै काम तैं बिना बिस्वास का करदु, उई त पाप च।</verse>
			</chapter>
			<chapter number="15">
				<verse number="1">हे मेरा दगड़्यों, हम जु अपणा बिस्वास मा मजबूत छां, हमतै ऊं लोगु की कमजोरियों तैं सै लेण चयेणु जु कि बिस्वास मा मजबूत नि छिन। अर हरेक जगा मा हमतै अपणी ही खुशी नि दिखण चयेणी।</verse>
				<verse number="2">हरेक मनखि अपणा-अपणा बिस्वासी लोगु तैं ऊं बातों मा खुश रखो, ज्यां से ऊंकी भलै होणी हो, ताकि वु लोग बिस्वास मा और भि जादा मजबूत होन्दी जा।</verse>
				<verse number="3">किलैकि यीशु मसीह न जु कुछ भि कैरी, वु सब कुछ खुद तैं खुश करणु खुणि नि कैरी बल्किन मा परमेस्वर की मनसा तैं पूरु करणु खुणि सबर रखी के सब कुछ सै, जन कि भजन संहिता मा लिख्यूं च कि, “हे परमेस्वर, लोगु न तुमरो अपमान कैरी मगर ऊंन तुमरो ना, बल्किन मा मेरु अपमान कैरी।”</verse>
				<verse number="4">अर जु कुछ भि पुरणा जमना मा पवित्रशास्‍त्र मा लिखे गै, उ सब हमतै सिखौणु खुणि ही लिखे गै। अर पवित्रशास्‍त्र हमतै सबर रखण अर अपणु हौसला बणै के रखण का बारा मा ही बतौन्दु, ताकि हमरि आस बणि रौ।</verse>
				<verse number="5">अर कै मनखि को सबर रखण अर वेतैं हौसला मिलण यू सब पिता परमेस्वर की तरफा बटि ही औन्दु। अर मि इन प्रार्थना करदु, कि तुम सभ्या का सभि यीशु मसीह का मुताबिक अपणा आपस मा एक मन ह्‍वेके रा, अर या ही वेकी इच्छा च।</verse>
				<verse number="6">ताकि तुम सब एक ह्‍वे जा, अर हमरा प्रभु यीशु मसीह का द्‍वारा पिता परमेस्वर की बडै कैरी सैका।</verse>
				<verse number="7">अर जन यीशु मसीह न तुमतै स्वीकार कैरी, ठिक उन्‍नि तुम भि एक-दुसरा तैं स्वीकार कैरा, ताकि इन कैरिके पिता परमेस्वर की तारीफ हो।</verse>
				<verse number="8">इलै मि तुमतै बतै देन्दु, कि तुमतै याद रखण चयेणु कि यीशु मसीह यहूदी लोगु को सेवक बणि, ताकि वेका द्‍वारा इन साबित ह्‍वे जौ कि जु करार पिता परमेस्वर न ऊंका पितरों का दगड़ा मा कैरी छौ उ सच्‍चु छौ।</verse>
				<verse number="9">अर वेन यू काम इलै भि कैरी, ताकि जु लोग यहूदी जाति का नि छिन, ऊ भि पिता परमेस्वर की बडै कैरी सैका, किलैकि वु सब लोगु पर अपणी दया करदु। अर पवित्रशास्‍त्र मा भि इन्‍नि लिख्यूं च कि, “मि जाति-जाति का लोगु का बीच मा तुमरो धन्यवाद करलु, अर तुमरा नौ का भजन गौलु।”</verse>
				<verse number="10">अर पवित्रशास्‍त्र मा इन भि लिख्यूं च कि, “हे जाति-जाति का सब लोगु, वेकी अपणी परजा का दगड़ा मा आनन्द मणा।”</verse>
				<verse number="11">अर फिर इन भि लिख्यूं च कि, “हे जाति-जाति का सब लोगु, प्रभु की भक्‍ति कैरा, अर हे राज्य-राज्य का सब लोगु वेकी बडै कैरा।”</verse>
				<verse number="12">अर फिर परमेस्वर का रैबर्या यशायाह न भि यीशु मसीह का बारा मा कुछ इन बोलि कि, “यिशै का वंश मदि एक नयू राजा आलु, जु कि जाति-जाति का लोग पर राज करलु, अर लोग वे पर अपणी आस बणै के रखला।”</verse>
				<verse number="13">अर मेरी प्रार्थना च कि परमेस्वर जु की आसा देण वळु च, तुमरा बिस्वास करण की वजै से तुमतै पूरि खुशी अर शान्ति से भरपूर कैरी द्‍यो, ताकि पवित्र आत्मा की ताकत से तुमरि आस वे पर बणि रौ।</verse>
				<verse number="14">हे मेरा प्यारा भै-बैंणो, मितैं पूरु यकीन च कि तुम लोग दुसरो की भलै करण जणदा छाँ, इख तक कि तुमतै पूरु ज्ञान च अर यू सब कनकै किये जाण यू भि तुम जणदा ही छाँ। इलै तुम दुसरा लोगु तैं शिक्षा दे सकद्‍यां।</verse>
				<verse number="15">मगर मि इन चान्दु, कि तुम लोग ऊं सब बातों तैं याद रखा, इलै ही मि तुम खुणि खुलि के लिखदु। अर यू मिन इलै कैरी, किलैकि पिता परमेस्वर न अपणी किरपा से मितैं यू खास दान दियूं च।</verse>
				<verse number="16">अर या किरपा मि पर इलै ह्‍वे, ताकि मि ऊं लोगु का बीच मा काम कैरी सैको जु कि यहूदी जाति का नि छिन। अर ये काम खुणि ही मि यीशु मसीह का सेवक का रुप मा चुणै ग्यों, अर मिन पिता परमेस्वर का शुभ समाचार की शिक्षा तैं लोगु का बीच मा पौछाण को काम कैरी। अर यू सब त इलै ह्‍वे, ताकि जु लोग यहूदी जाति का नि छिन ऊं लोगु तैं पिता परमेस्वर स्वीकार कैरो। अर सब पवित्र आत्मा का द्‍वारा एक भेंट का रुप मा वेतैं चड़ये जा।</verse>
				<verse number="17">इलै जब परमेस्वर की सेवा की कुई भि बात औन्दी, तब मितैं यीशु मसीह को सेवक होण पर भौत बड़ु मोन होन्दु।</verse>
				<verse number="18">पर यू सब कुछ मिन अपणी ताकत से नि कैरी, किलैकि यू सब कुछ करण वळु त पिता परमेस्वर च। मेरु त बस यू ही काम च कि मि जाति-जाति का लोगु का बीच मा जौं, अर ऊंतैं पिता परमेस्वर को वचन बतै के वेका पास लेके औंऽऽ।</verse>
				<verse number="19">अर यू सब चमत्कार अर अदभुत काम मिन पवित्र आत्मा की ताकत से करिनी। इलै मिन भि यरूशलेम नगर अर वेका आस-पास का मुलकों बटि ठिक इल्‍लुरिकुम का मुलक तक यीशु मसीह का शुभ समाचार को परचार अच्छी तरौं से कैरी।</verse>
				<verse number="20">पर मेरा मन कि इच्छा या च कि जख-जख यीशु मसीह का नौ को परचार अभि तक नि ह्‍वे, मि उख-उख जैके शुभ समाचार सुणौ, ताकि कखि इन ना हो कि लोग बोला कि यू त दुसरा लोगु का कर्यां काम मा अपणु हक दिखाणु च।</verse>
				<verse number="21">पर पवित्रशास्‍त्र मा भि त इन्‍नि लिख्यूं च कि, “जौं लोगु तैं अभि तक वेको शुभ समाचार नि मिली ऊ दिखला, अर जौं लोगु न अभि तक नि सुणी ऊंका बिंगण मा आलु।”</verse>
				<verse number="22">हे मेरा दगड़्यों, यों सब बातों की वजै से ही मि कई बार तुमरा पास औण चाणु छौ, मगर हर बार कुई ना कुई बात मितैं उख औण से रोकी देणी छै।</verse>
				<verse number="23">पर अब मिन यों मुलकों मा अपणु काम पूरु कैरियाली, इलै कई सालों से मि इन चाणु छौ कि तुमरा पास औंऽऽ।</verse>
				<verse number="24">अभि मि स्पेन देस जाण की योजना बणौणु छौं, अर जब मि इन करलु त वे बगत पर मि तुमरा पास रोम मा रुकी जौलु। अर कुछ बगत तक तुमरि संगत मा रै के बड़ु आनन्द मणौलु। अर वेका बाद तुम मेरा अगनै का सफर खुणि मेरी मदद भि कैरी सकद्‍यां।</verse>
				<verse number="25">मगर अभि मि बिस्वासी लोगु की सेवा करण खुणि यरूशलेम नगर कू जाणु छौं।</verse>
				<verse number="26">किलैकि मकिदुनिया अर अखया मुलक का बिस्वासी लोगु न चन्दा इकट्‍ठा कर्युं च, अर या बात ऊंतैं अच्छी लगि कि ऊ यरूशलेम नगर का बिस्वासी लोगु मा बटि जु लोग गरीब छिन ऊंकी मदद कैरा।</verse>
				<verse number="27">अर ये काम तैं करणु खुणि ऊ लोग भौत खुश छिन किलैकि ऊ यहूदी लोगु का करजदार छिन। अर पिता परमेस्वर न जु कुछ भि यहूदी लोगु तैं सिखै, अर जु आसीस वेन ऊंतैं दिनी ऊंका द्‍वारा ही वु सब कुछ ऊं लोग तक पौंछी जु यहूदी जाति का नि छिन। इलै तुमरो यू फरज बणदु कि अब तुम लोग यहूदी लोगु की जरुरतों तैं पूरु करणु खुणि मदद कैरा।</verse>
				<verse number="28">इलै जब मि ये काम तैं पूरु कैरी द्‍यूलु, याने कि जब मि वे दान तैं यरूशलेम नगर का बिस्वासी लोगु का हाथों मा सौंपी द्‍यूलु, तब मि तुमरा पास औलु अर वेका बाद मिन स्पेन देस कू चलि जाण।</verse>
				<verse number="29">मि जणदु छौं कि जब मि तुमरा पास औलु, त यीशु मसीह की तरफा बटि हमतै भरपूर आसीस मिलली।</verse>
				<verse number="30">हे मेरा भै-बैंणो, मि तुम से बिन्ती करदु, कि तुम पिता परमेस्वर से प्रार्थना कैरा कि उ मेरा काम मा मेरी मदद कैरो। अर यू सब कुछ उ हमरा प्रभु यीशु मसीह का द्‍वारा वेका प्यार से करदु, जु कि पवित्र आत्मा का द्‍वारा हम तक पौंछदु।</verse>
				<verse number="31">अर पिता परमेस्वर से इन भि प्रार्थना कैरा, कि मि यहूदिया मुलक का ऊं लोगु से बचि जौं, जु कि पिता परमेस्वर की आज्ञा को पालन नि करदिन। अर इन भि प्रार्थना कर्यां, कि यरूशलेम नगर मा रौण वळा बिस्वासी लोग वे दान तैं स्वीकार कैरा जैतैं लेके मि उख जाणु छौं।</verse>
				<verse number="32">अगर पिता परमेस्वर की इच्छा इन्‍नि होलि, त मि तुमरा पास बड़ी खुशी से औलु, अर तुमरा पास ऐके कुछ आराम करलु अर नयू जोस पौलु।</verse>
				<verse number="33">मि तुम सभ्यों खुणि इन प्रार्थना करदु कि शान्ति देण वळु परमेस्वर तुम सभ्यों का दगड़ा मा रौ। आमीन।</verse>
			</chapter>
			<chapter number="16">
				<verse number="1">हे मेरा दगड़्यों, मि या चिठ्‍ठी तुमरा पास हमरि बिस्वासी बैंण फीबे का द्‍वारा भेजणु छौं, ज्वा कि किंख्रिया नगर का बिस्वासी समुदाय मा सेवा को काम करदी। अर मि तुम से बिन्ती कैरिके इन सला देन्दु,</verse>
				<verse number="2">कि तुम लोग वींतैं प्रभु का नौ से स्वीकार कैरा। अर या बात मि इलै बोन्‍नु छौं, किलैकि पवित्र लोगु को स्वागत इन्‍नि किये जाण चयेणु। अर अगर कै भि काम मा वींतैं तुमरि जरुरत पोड़ो त वीं की मदद कर्यां, किलैकि वींन मेरी मदद कैरी अर मेरा दगड़ा-दगड़ि भौत सा लोगु की भि मदद कैरी।</verse>
				<verse number="3">प्रिस्का बैंण अर वींका पति अक्‍किला तैं मेरु सलाम, यू लोग यीशु मसीह की सेवा करण मा मेरा दगड़्या छिन।</verse>
				<verse number="4">अर यू त वु लोग छिन जौन मेरा पराण तैं बचौण खुणि अपणी जान तैं खतरा मा डालि दिनी। इलै मि ऊंको धन्यवाद करदु अर मि ही ना, बल्किन मा मेरा दगड़ा-दगड़ि जु लोग यहूदी जाति का नि छिन बिस्वासी समुदाय का वु लोग भि ऊंको धन्यवाद करदिन।</verse>
				<verse number="5">अर ऊंका घौर मा जमा होण वळा समुदाय का सब लोगु तैं भि मेरु सलाम। अर मेरा प्यारा भै इपैनितुस तैं भि मेरु सलाम, जु कि आसिया मुलक मा पैलु मनखि छौ जैन यीशु मसीह का पिछनै चलण शुरु कैरी।</verse>
				<verse number="6">मरियम बैंण जिं न तुम लोगु खुणि भौत मेनत कैरी, वीं खुणि भि मेरु सलाम बुलयां।</verse>
				<verse number="7">मेरा दगड़ा जेलखाना मा रौण वळा मेरा रिश्तेदार अन्द्रुनीकुस अर यूनीयास भै तैं मेरु सलाम, यीशु का खास चेलों मा बटि यू भौत खास लोग छिन। अर मेरा बिस्वास करण से भि पैलि यू लोग यीशु मसीह पर बिस्वास करदा छा।</verse>
				<verse number="8">अर मेरा प्यारा भै अम्पलियातुस तैं भि मेरु सलाम, जु कि प्रभु यीशु मसीह पर बिस्वास करण की वजै से मेरु दगड़्या च।</verse>
				<verse number="9">अर उरबानुस भै तैं भि मेरु सलाम, जु कि यीशु मसीह की सेवा मा मेरी मदद करण वळु च। अर मेरा प्यारा भै इस्तखुस तैं भि मेरु सलाम।</verse>
				<verse number="10">अर अपिल्‍लेस भै तैं भि मेरु सलाम, जु कि एक भलु मनखि च अर यीशु मसीह वेतैं स्वीकार करदु। अर अरिस्तुबुलुस भै का घौर का सब बिस्वासी लोगु तैं भि मेरु सलाम।</verse>
				<verse number="11">अर मेरा यहूदी भै हेरोदियोन तैं भि मेरु सलाम, नरकिस्सुस का घौर का जु लोग प्रभु पर बिस्वास करदिन तुम सभ्यों तैं भि मेरु सलाम,</verse>
				<verse number="12">अर त्रूफैना अर त्रूफोसा बैंणो तैं भि मेरु सलाम, वु दुई बैंण प्रभु यीशु खुणि भौत मेनत करदिन। अर मेरी प्यारी बैंण पिरसिस तैं भि मेरु सलाम जिं न प्रभु खुणि भौत मेनत कैरी।</verse>
				<verse number="13">अर प्रभु का खास मनखि रूफुस भै, अर वेकी माँ ज्वा की मि खुणि भि एक माँ कि तरौं ही च, ऊं दुईयों तैं भि मेरु सलाम बुलयां।</verse>
				<verse number="14">अर असुंक्रितुस, फिलगोन, हिम्रेस अर पत्रुबास, हिर्मास अर ऊंका दगड़ा-दगड़ि जु और भि बिस्वासी भै छिन ऊंतैं भि मेरु सलाम।</verse>
				<verse number="15">फिलुलुगुस भै अर यूलिया बैंण अर नेर्युस अर वेकी बैंण, अर उलुम्पास भै तैं, अर ऊंका दगड़ा-दगड़ि सब बिस्वासी लोगु तैं भि मेरु सलाम।</verse>
				<verse number="16">अर अपणा आपस मा पवित्र दिल से एक-दुसरे की भूकि पिके सलाम बोला। अर यीशु मसीह का सब समुदाय का लोग तुमतै सलाम बुलणा छिन।</verse>
				<verse number="17">हे मेरा प्यारा भै-बैंणो, मि तुम से बिन्ती करदु कि ऊं लोगु की खोज कैरा, जु कि लोगु तैं एक-दुसरा का खिलाप मा भड़कै देन्दिन, यू लोग इन्द्रया छिन जु कि बिस्वासी लोगु तैं ऊंका बिस्वास मा बटि भटके देन्दिन। अर यू लोग वीं सच्‍चि शिक्षा का खिलाप मा छिन, ज्वा तुम मा च। इलै तुम इन्द्रया लोगु से दूर रा।</verse>
				<verse number="18">किलैकि इन्द्रया लोग हमरा प्रभु यीशु मसीह का नि छिन, अर यू उई काम करदिन जु कि ऊंतैं अच्छा लगदिन। अर जु लोग भला-बुरा का बारा मा नि जणदिन, वु लोग इन्द्रया लोगु तैं अपणी अच्छी-अच्छी बातों का द्‍वारा मूरख बणै देन्दिन, अर ऊंतैं अपणी बातों मा फंसै देन्दिन।</verse>
				<verse number="19">सुणा, तुमरा आज्ञा मनण कि चर्चा सब लोगु मा फैली गै, इलै मि तुमरा खातिर भौत खुश छौं, पर फिर भि मि इन चान्दु कि तुम भलै करण खुणि समझदार बणा, अर बुरै करण मा निरदोष ठैरा।</verse>
				<verse number="20">अर शान्ति देण वळु परमेस्वर जल्द ही शैतान तैं तुमरा खुटा का तौळ कैरी दयालु। अर मि इन प्रार्थना करदु, कि हमरा प्रभु यीशु मसीह की किरपा तुमरा दगड़ा मा बणि रौ।</verse>
				<verse number="21">अर मेरा दगड़ा मा सेवा को काम करण वळु तीमुथियुस भै, अर वेका दगड़ा-दगड़ि मेरा यहूदी भैयों लूकियुस, यासोन, सोसिपत्रुस कू भि मेरु सलाम बुलयां।</verse>
				<verse number="22">ईं चिठ्‍ठी तैं लिखण वळु मि तिरतियुस छौं, अर यू सब बात लिखणु कू पौलुस न मिकू बोलि। मि तिरतियुस की तरफा बटि भि तुम सभ्यों तैं सलाम।</verse>
				<verse number="23">अर गयुस भै न मितैं अर समुदाय का सब लोगु तैं अपणु घौर इस्तेमाल करणु खुणि दियूं च, अर वु सब लोग भि तुम खुणि सलाम बोन्‍ना छिन। अर ये नगर का कोष अध्यक्ष इरास्तुस भै अर हमरु क्‍वारतुस भै भि तुम खुणि सलाम बोन्‍नु च। [</verse>
				<verse number="24">मि इन प्रार्थना करदु, कि प्रभु यीशु मसीह की किरपा तुम पर हो। आमीन।]</verse>
				<verse number="25">हे मेरा प्यारा भै-बैंणो, अब हम यीशु मसीह का द्‍वारा पिता परमेस्वर की बडै हमेसा खुणि कैरा, जु कि सभ्यों मा एकमात्र समझदार च। पिता परमेस्वर तुमतै वे शुभ समाचार का मुताबिक जैको मि परचार करदु, यीशु मसीह का रैबार का द्‍वारा तुमतै बिस्वास मा और मजबूत करण की ताकत देन्दु। अर शुभ समाचार को यू राज सभ्यों खुणि खुल्यूं च, जैतैं एक लम्बा बगत तक छिपै के रखै गै छौ, अब उ उज्याळा मा ऐ गै। अर सदनि तक ज्यून्द रौण वळा पिता परमेस्वर की आज्ञा का द्‍वारा यू सब जाति का लोगु पर परगट ह्‍वे गै, ताकि वु लोग बिस्वास कैरा अर आज्ञा को पालन कैरा, अर यू सब कुछ उई च जु कि रैबर्यों न पवित्रशास्‍त्र मा बोलि छौ। अर हमरा पिता परमेस्वर की बडै सदनि तक होणी रौ। आमीन।</verse>
				<verse number="26"></verse>
				<verse number="27"></verse>
			</chapter>
		</book>
		<book number="46">
			<chapter number="1">
				<verse number="1">हे मेरा भै-बैंणो, मि पौलुस पिता परमेस्वर की मनसा से यीशु मसीह को खास चेला होणु खुणि बुलये ग्यों। अर मि या चिठ्‍ठी हमरा बिस्वासी भै सोस्थिनेस का दगड़ा मा कुरिन्थि नगर का लोगु खुणि लिखणु छौं, हाँ तुम खुणि ही तुम जु कि पिता परमेस्वर का समुदाय का लोग छाँ। अर तुम जु कि यीशु मसीह पर बिस्वास करण की वजै से पवित्र किये ग्यां, अर यां खुणि ही तुमतै बुलये गै। हे मेरा दगड़्यों, मि या चिठ्‍ठी ऊं भै-बैंणो खुणि भि लिखणु छौं, जु कि अलग-अलग जगा रौनदिन, अर हमरा प्रभु यीशु मसीह का नौ तैं लिनदिन। ऊ हमरा अपणा ही लोग छिन, किलैकि ऊ पिता परमेस्वर से हमरा प्रभु यीशु मसीह को नौ लेके प्रार्थना करदिन।</verse>
				<verse number="2"></verse>
				<verse number="3">हमरा पिता परमेस्वर अर प्रभु यीशु मसीह की तरफा बटि तुम सभ्यों पर वेकी किरपा अर वेकी शान्ति मिलणी रौ।</verse>
				<verse number="4">हे मेरा भै-बैंणो, मि तुमरा खातिर अपणा पिता परमेस्वर को धन्यवाद हमेसा करदु, किलैकि परमेस्वर की या किरपा तुम पर यीशु मसीह का द्‍वारा ह्‍वे।</verse>
				<verse number="5">अर अब जब तुम वेका पास ऐ ग्यां, त पिता परमेस्वर न यीशु मसीह का द्‍वारा तुमतै हरेक बात मा काबिल बणैयालि, याने कि अब वेन तुमतै वचन सिखौण की पूरि ताकत, अर वेतैं बिंगणु खुणि ज्ञान भि दियाली।</verse>
				<verse number="6">अर इनकै पिता परमेस्वर न तुमरा दगड़ा मा मिली के ईं बात को सबूत दिनी, कि यीशु मसीह का बारा मा जु कुछ हम बतौन्द्‍यां उ सब सच्‍च च।</verse>
				<verse number="7">अर अब तुम मा कैं भि आत्मिक दान-बरदान की कमी नि च, किलैकि वेन तुम पर किरपा कैरिके तुमतै सब कुछ दान का रुप मा दियाली। इलै तुम भि हमरा प्रभु यीशु मसीह का वापस औण को इंतजार कना छाँ।</verse>
				<verse number="8">अर पिता परमेस्वर तुमतै आखिरी का दिन तक बिस्वास मा और भि जादा मजबूत करलु, ताकि हमरा प्रभु यीशु मसीह का दिन पर जब उ न्याय करलु, त तुम निरदोष ठैरा।</verse>
				<verse number="9">अर पिता परमेस्वर जरुर इन करलु, किलैकि उ भरोसा का लैख च। अर वेन ही तुमतै अपणा पुत्र प्रभु यीशु मसीह का दगड़ा मा रौणु खुणि बुलै।</verse>
				<verse number="10">हे मेरा भै-बैंणो, अब मि तुम से प्रभु यीशु मसीह को नौ लेके बिन्ती करदु, कि तुम सब एकमत ह्‍वेके रा, अर तुमरा बीच मा फूट नि पोड़ो, बल्किन मा तुम सब एक मन ह्‍वेके रा, अर तुम सभ्यों को एक ही मकसद हो।</verse>
				<verse number="11">अर इन मि इलै बोन्‍नु छौं, किलैकि हे मेरा दगड़्यों, हमरि बिस्वासी बैंण खलोए का घौर का लोगु न मितैं तुमरा बारा मा बतै, कि तुमरा बीच मा झगड़ा होणा छिन।</verse>
				<verse number="12">अर मिन इन सुणी कि तुम लोगु मा बटि कुछ इन बुल्दिन कि, “मि पौलुस को चेला छौं,” अर कुई इन बुल्दु कि, “मि त अपुल्‍लोस को चेला छौं,” अर कुई इन बुल्दु कि, “मि त पतरस को चेला छौ” अर कुछ लोग त इन बुल्दिन कि, “हम त मसीह का छां यीशु मसीह का।”</verse>
				<verse number="13">क्या प्रभु यीशु मसीह तुमरा बीच मा टुकड़ा कैरिके बंटे गै? क्या पौलुस तुमरा खातिर क्रूस पर चैड़ि? या तुमतै मेरा नौ को बपतिस्मा दिये गै?</verse>
				<verse number="14">अरे मि त पिता परमेस्वर को धन्यवाद करदु, कि मिन तुमरा बीच मा क्रिस्पुस अर गयुस भै का अलावा और कैतैं भि बपतिस्मा नि दिनी।</verse>
				<verse number="15">ताकि कुई भि इन नि बोलि सैको, कि मितैं त पौलुस का नौ से बपतिस्मा दिये गै।</verse>
				<verse number="16">हाँ, मिन स्तिफनास का घौर का लोगु तैं भि बपतिस्मा दिनी, अर अगर जु मिन यों का अलावा कै दुसरा तैं भि बपतिस्मा दिनी, त उ मितैं याद नि च।</verse>
				<verse number="17">किलैकि मसीह न मितैं बपतिस्मा देणु खुणि ना, बल्किन मा शुभ समाचार सुनौणु खुणि भेज्यूं च। अर ये शुभ समाचार तैं सुनौणु खुणि मि सरल भाषा को इस्तेमाल करदु, ताकि यीशु मसीह की ज्वा मौत क्रूस पर ह्‍वे वा बेकार नि जौ।</verse>
				<verse number="18">अर या सच्‍चि बात च कि जु लोग नास होण वळा बाटा पर चलणा छिन, ऊ इन सोचदिन कि यीशु मसीह को क्रूस पर मुरण की घटना बेकार च। मगर बचयै जाण वळा लोगु खुणि या परमेस्वर की ताकत च।</verse>
				<verse number="19">किलैकि पवित्रशास्‍त्र मा इन लिख्यूं च, “मि ज्ञानी लोगु का ज्ञान तैं नास करलु, अर समझदारों की समझ कै काम की नि राली।”</verse>
				<verse number="20">कख रै गैनी ये जमना का ज्ञानी लोग? अर कख रै गैनी धरम का जानकार? अर कख छिन बहस करण वळा लोग? पिता परमेस्वर न दुनियां का ज्ञान की कीमत तैं ना का बराबर कैरियाली।</verse>
				<verse number="21">अर सच्‍चि मा पिता परमेस्वर ज्ञानी च। अर वेन अपणा ज्ञान का मुताबिक इन कैरी, अब चै मनखि कथगा भि ज्ञानी किलै नि हो, मगर उ अपणा ज्ञान से पिता परमेस्वर तैं नि पछ्याणी सकदु। इलै जब हम यीशु मसीह का बारा मा परचार करद्‍यां, त बिस्वास करण वळा लोगु तैं बचौण पिता परमेस्वर तैं अच्छु लगदु। अर जु लोग पिता परमेस्वर तैं नि पछ्याणदिन वु लोग ये वचन खुणि बेकार की बुल्दिन।</verse>
				<verse number="22">अर यहूदी जाति का लोग त चमत्कारों की मांग करदिन, मगर जु लोग यहूदी जाति का नि छिन वु लोग ये ज्ञान का बारा मा सुनण चनदिन,</verse>
				<verse number="23">मगर हम त क्रूस पर चड़यां यीशु मसीह को परचार करद्‍यां। अर यहूदी लोगु खुणि यू परचार उतेडु़ लगण की वजा च, अर जु लोग यहूदी जाति का नि छिन ऊं खुणि यू बेकार को काम च।</verse>
				<verse number="24">पर जौं लोगु तैं पिता परमेस्वर न बुलै, अब चै वु यहूदी जाति का हो या दुसरि का जाति का सब खुणि यीशु मसीह ही परमेस्वर की ताकत अर परमेस्वर को ज्ञान च।</verse>
				<verse number="25">किलैकि कुछ लोग ये रैबार तैं बेकार की बात समझदिन, पर यू रैबार त लोगु का ज्ञान से कई जादा बढी के च। अर यीशु मसीह का क्रूस पर बलिदान होण की घटना तैं लोग वेकी कमजोरी समझदिन, जब कि यू त परमेस्वर का ज्ञान की ताकत च जैतैं वेन परगट कैरी, ताकि लोग वेका द्‍वारा बचयै जा।</verse>
				<verse number="26">इलै हे मेरा भै-बैंणो, जब पिता परमेस्वर न तुमतै बुलै, तब तुम क्या छा, जरा ईं बात का बारा मा त सोचा, नऽ त तुम ज्ञानी छा, नऽ त ताकतबर अर ना ही समाज मा तुमरो कुछ खास नौ छौ।</verse>
				<verse number="27">अर कुई भि मनखि पिता परमेस्वर का समणि बड़ु मोन नि कैरी सकदु। अर वेन ही ज्ञानी लोगु की बेजती करणु खुणि, दुनियां का ऊं लोगु तैं चुणी जौं तैं कुछ नि समझै जान्दु। अर वेन ही दुनियां का कमजोर लोगु तैं भि चुणी, ताकि ऊ ताकतबर लोगु तैं सरमसार कैरी सैका। अर जु इन बुल्दिन कि हम खास लोग छां पिता परमेस्वर न ऊंतैं ना, बल्किन मा हम जन लोगु तैं जु कि दुनियां की नजर मा कुछ भि नि छा, अर नीच जात का मणै जन्द्‍यां। हाँ, हमतै ही जु कि कुछ नि छां पिता परमेस्वर न अफ खुणि चुण्यालि।</verse>
				<verse number="28"></verse>
				<verse number="29"></verse>
				<verse number="30">हे मेरा भै-बैंणो, अब तुमरा पास बड़ु मोन करण को कुई मौका नि च, किलैकि पिता परमेस्वर न ही तुमतै यीशु मसीह का पास बुलै अर तुमतै बचै भि च। अर वेन ही यीशु मसीह तैं हमरु ज्ञान बणै, अर यीशु मसीह ही च जु कि हमतै पिता परमेस्वर का समणि पवित्र बणौन्दु। अर यीशु मसीह न ही अपणु ल्वे देके हमतै पाप से छुटकारु देई।</verse>
				<verse number="31">ताकि ठिक उन्‍नि हो जन कि पवित्रशास्‍त्र मा लिख्यूं च, “अगर कुई बड़ु मोन कैरो, त उ प्रभु पर बड़ु मोन कैरो।”</verse>
			</chapter>
			<chapter number="2">
				<verse number="1">हे मेरा भै-बैंणो, जब मि पैलि बार तुमरा पास ऐ छौ, त पिता परमेस्वर की योजना का मुताबिक मिन वेका राज्य की बात तुमतै अपणा ज्ञान अर चालाकी से नि बतै।</verse>
				<verse number="2">किलैकि जब मि तुमरा दगड़ा मा छौ, त मिन इन ठाणियालि छौ कि यीशु मसीह अर वेको क्रूस पर चड़ये जाण तैं छोड़ि के, और कैं दुसरि बात मा तुमरो ध्यान तैं नि जाण द्‍यूं।</verse>
				<verse number="3">अर जब मि तुमरा पास ऐ छौ, त वे बगत मि कमजोर, डऽरयुं अर बड़ु कौंपणु छौ।</verse>
				<verse number="4">अर वे बगत जु वचन मिन बोलि या परचार कैरी, उ ऊंका जन नि छौ जु कि अपणी बातों का द्‍वारा लोगु का मनों तैं अफ जनै कैरी देन्दिन, मगर मिन तुमतै पवित्र आत्मा का द्‍वारा सब सच्‍चि बात ही बतैनि।</verse>
				<verse number="5">इलै तुमरो बिस्वास मनखियों का ज्ञान पर ना, बल्किन मा परमेस्वर की ताकत पर टिक्यूं रौ।</verse>
				<verse number="6">हे मेरा दगड़्यों, जब मि कैतैं सिखौन्दु, त वे बगत मि मनखि का ज्ञान का मुताबिक बात नि करदु, मगर यीशु मसीह पर बिस्वास कैरिके जु ज्ञान मितैं मिलदु मि वेका मुताबिक ही बात करदु। अर यू सब त वेका पिछनै अटल ह्‍वेके चलण से मिलदु। अर ना ही मि ईं दुनियां का ज्ञानी अर अधिकारी लोगु का जन बात करदु। पर सुणा, ईं दुनियां का अधिकारीयों को अधिकार खतम होण वळु च।</verse>
				<verse number="7">अर जै ज्ञान का बारा मा हम बतौन्द्‍यां, उ पिता परमेस्वर का राज को ज्ञान च, जु कि पैलि ईं दुनियां का लोगु बटि छिप्यूं छौ, मगर ये ज्ञान तैं पिता परमेस्वर न दुनियां का बणण से भि पैलि बटि ठैरै के रख्युं छौ, ताकि हम वे बटि आदर-सम्मान पा।</verse>
				<verse number="8">अर ये जमना मा राज करण वळा लोगु न वे ज्ञान का बारा नि जाणि, किलैकि अगर वु जाणि जान्दा, त महान प्रभु यीशु तैं क्रूस पर नि चड़ौन्दा।</verse>
				<verse number="9">मगर जन कि पवित्रशास्‍त्र मा भि लिख्यूं च कि, “जु बात आंख्यों न नि दिखिनी अर ना ही कन्दूड़ो न सुणिनी, अर जु बात मनखियों का ख्याल मा भि नि ऐनी, ऊं सानदार बातों तैं परमेस्वर न ऊं खुणि तयार कैरिके रख्युं च, जु वेसे प्यार करदिन।”</verse>
				<verse number="10">अर पिता परमेस्वर न तयार करीं बातों तैं हम पर पवित्र आत्मा का द्‍वारा परगट कैरी, किलैकि वेको पवित्र आत्मा सब बातों की छानबीन करदु, इख तक कि परमेस्वर का सब गैरा राजों को भि।</verse>
				<verse number="11">अर कुई भि मनखि कै का मन कि बात तैं नि जाणि सकदु, केवल उई जाणि सकदु जैका मन मा वा बात हो, ठिक उन्‍नि परमेस्वर का मन मा ज्वा बात होलि, वींतैं केवल पवित्र आत्मा ही जणदु।</verse>
				<verse number="12">अर पिता परमेस्वर न हमतै वेकी सब बात जनणु खुणि अपणु पवित्र आत्मा दियूं च, अर हम मा दुनियां को आत्मा नि च।</verse>
				<verse number="13">इलै जब हम यों सब बातों तैं बतौन्द्‍यां त मनखि का ज्ञान का मुताबिक ना, बल्किन मा पवित्र आत्मा का द्‍वारा दियां ज्ञान का मुताबिक ही परमेस्वर का राज की बातों का बारा मा बिंगौन्द्‍यां।</verse>
				<verse number="14">अर जु लोग सरील की मनसा का मुताबिक चलदिन, ऊ परमेस्वर की पवित्र आत्मा की बातों तैं स्वीकार नि करदिन, इन्द्रया लोगु खुणि यू बात बेमतलब की छिन। मगर यों सब बातों तैं पवित्र आत्मा का द्‍वारा ही बिंगै जै सकदु।</verse>
				<verse number="15">अर पवित्र आत्मा का द्‍वारा बतयां बाटा पर चलण वळु मनखि, सब बातों की जाँच-पड़ताल करदु, मगर उ मनखि कै का द्‍वारा नि परखै जान्दु।</verse>
				<verse number="16">अर जन कि पवित्रशास्‍त्र मा लिख्यूं च कि, “कु च वु मनखि जु कि प्रभु का मन तैं जाणि सकदु? अर कु च वु जु कि वेतैं सला दे सकदु?” मगर हम यों बातों तैं इलै बिंगद्‍यां, किलैकि हम मा मसीह को मन च।</verse>
			</chapter>
			<chapter number="3">
				<verse number="1">हे मेरा भै-बैंणो, जब मि तुमरा इख छौ, त मिन तुमतै यीशु मसीह की सच्‍चि शिक्षा का बारा मा वे तरीके से नि बतै जन मि ऊंतैं बतौन्दु, जु लोग बिस्वास मा मजबूत छिन अर जौं का पास पवित्र आत्मा को दान च। मगर मिन देखि कि तुम लोग अभि भि दुनियां की बातों पर ही चलद्‍यां, इलै मि तुमतै बच्‍चों का जन बिंगौन्दु।</verse>
				<verse number="2">इलै मिन तुमतै बड़ु का जन अन्‍न नि खिलै, बल्किन मा बच्‍चों का जन दूद पिलै, किलैकि उबरि तुम वीं शिक्षा तैं पचै नि सकदा छा अर ना ही तुम अभि भि पचै सकद्‍यां।</verse>
				<verse number="3">किलैकि तुम अभि भि दुनियां की बातों का मुताबिक ही चलद्‍यां। अर या बात मि इलै बोन्‍नु छौं, किलैकि तुम लोग एक-दुसरा तैं देखि के खार खन्द्‍यां अर तुमरा बीच मा झगड़ा भि होनदिन। त अब तुम मितैं इन बता क्या फिर तुम दुनियां का लोगु का जन नि छाँ? अरे, तुम त ऊंका जन ही चाल चलणा छाँ।</verse>
				<verse number="4">अर जब तुम अपणा बीच मा इन बुल्द्‍यां कि, “मि पौलुस को छौं,” अर दुसरो बुल्दु कि, “मि अपुल्‍लोस को छौं” इन बोलि के त तुम एक-दुसरा का खिलाप मा छाँ, अरे तुम त ऊं लोगु का जन छाँ जु बिस्वास नि करदिन।</verse>
				<verse number="5">अर तुमरो यू पौलुस अर अपुल्‍लोस क्या च लगायूं? अरे, हम त सिरफ यीशु मसीह का सेवक छां। अर हमरि बातों तैं सुणी के तुमुन यीशु मसीह पर बिस्वास कैरी, अर हम दुईयों न त सिरफ उई काम कैरी जु कि परमेस्वर न हमतै देई।</verse>
				<verse number="6">मिन सिरफ सच्‍चि शिक्षा की पौद लगै, त अपुल्‍लोस न वीं पौद की देख-रेख कैरी, मगर परमेस्वर ही च जु कि वीं पौद तैं बढौन्दु,</verse>
				<verse number="7">इलै जैन पौद लगै या जैन वेकी देख-रेख कैरी वु कुछ खास नि छिन, मगर पिता परमेस्वर ही सब कुछ च, जु कि वेतैं बढौन्दु।</verse>
				<verse number="8">पौद लगौण वळु अर देख-रेख करण वळु दुईया का दुई एक ही जन छिन, अर ऊंतैं ऊंकी मेनत का मुताबिक ध्याड़ि दिये जालि, हाँ, जु कुछ भि हमुन कैरी।</verse>
				<verse number="9">अर हम पिता परमेस्वर की सेवा करण वळा छां। अर हम तुम लोगु की भलै खुणि ही काम कना छां, किलैकि तुम लोग पिता परमेस्वर को पुंगड़ु छाँ जैमा मेनत किये जाणि च, अर अब वेमा घौर बणण की तयार होणी च।</verse>
				<verse number="10">अर मि वे जानकार मिस्‍त्री का जन छौं, जु कि मजबूत घौर बणौन्दु अर बुनियाद का डांग तैं बड़ी मजबूती से रखदु, अर यू दान मितैं पिता परमेस्वर न देई। अर इन्‍नि और लोग भि छिन, जु कि मेरी रखी बुनियाद पर घौर बणौण को काम कना छिन, मगर जरुरी बात त या च कि हरेक मिस्‍त्री अच्छी चिणैं कनु च।</verse>
				<verse number="11">अर यीशु मसीह पर बिस्वास करण की ज्वा बुनियाद तुम मा रखै गै, अब वेका अलावा कुई दुसरो नि च, अर ना ही कुई अब वेका मथि दुसरि बुनियाद रखी सकदु।</verse>
				<verse number="12">हाँ, इन भि ह्‍वे सकदु च कि कुछ लोग बुनियाद पर सोना, चांदी या मैंगा ढुंगो की चिणैं करला, पर कुछ इन भि छिन जु कि लखड़ा, या घास-घूस रखी के चिणैं करला।</verse>
				<verse number="13">अर जब प्रभु सब लोगु को न्याय करलु, त हरेक मनखि का काम परगट ह्‍वे जाला कि वेन कन काम कैरी, किलैकि जन सोने की परख आग से किये जान्दी, ठिक उन्‍नि आग सब कुछ परगट कैरी द्‍याली अर इन साबित करली कि हरेक मनखि का काम कन्द्रया छिन।</verse>
				<verse number="14">अगर कै मनखि कि चिणीं दिवाल बुनियाद समेत टिकी राली, त न्याय का दिन पर वेतैं वेको इनाम जरुर मिललु।</verse>
				<verse number="15">अर अगर कै को कर्युं काम फुकै जालु, त उ अपणा इनाम से दूर ह्‍वे जालु। अर उ बचि त जालु मगर फुकेन्द-फुकेन्द।</verse>
				<verse number="16">क्या तुम नि जणद्‍यां कि तुम लोग परमेस्वर का मन्दिर छाँ? अर परमेस्वर की पवित्र आत्मा तुम मा वास करदी,</verse>
				<verse number="17">अगर कुई परमेस्वर का मन्दिर तैं नास करलु त परमेस्वर वेतैं नास करलु, किलैकि परमेस्वर को मन्दिर पवित्र च, अर वु मन्दिर तुम छाँ।</verse>
				<verse number="18">हे मेरा दगड़्यों, धोखा मा नि रयां, अगर तुम मा बटि कुई इन सोचदु कि उ ये जमना मा ज्ञानी च, त सबसे पैलि उ परमेस्वर की बात माणी के सच्‍चि मा ज्ञानी बणि जौ, तब चै लोग वेतैं मूरख ही किलै नि समझा।</verse>
				<verse number="19">अर इन उ इलै कैरो किलैकि ईं दुनियां को ज्ञान परमेस्वर की नजर मा मूरखता च, जन कि पवित्रशास्‍त्र मा भि लिख्यूं च कि, “उ ज्ञानी लोगु तैं ऊंका खुद की चालाकी मा फंसै देन्दु।”</verse>
				<verse number="20">अर फिर इन भि लिख्यूं च कि, “प्रभु ज्ञानियों का विचारों तैं जणदु च कि उ बेकार छिन।”</verse>
				<verse number="21">इलै कुई भि मनखि इन दावा नि कैरो, कि उ कै खास मनखि को चेला च, किलैकि तुमरि भलै खुणि ही पिता परमेस्वर न तुमतै सब कुछ दियूं च।</verse>
				<verse number="22">अब चै उ मि छौं या अपुल्‍लोस या पतरस भै, हमतै पिता परमेस्वर न तुमरो सेवक बणै। अर अब या दुनियां अर जु कुछ भि होण वळु च या जु कुछ होणु च, इख तक की जीवन अर मौत भि, यू सब कुछ पिता परमेस्वर न तुमरि भलै खुणि ही दियूं च।</verse>
				<verse number="23">अर ईं बात तैं याद रखा, कि तुम सब यीशु मसीह का छाँ अर मसीह पिता परमेस्वर को च।</verse>
			</chapter>
			<chapter number="4">
				<verse number="1">इलै तुम लोग हमतै प्रभु का सेवक समझा, जौं का पास पिता परमेस्वर न सच्‍चै सिखौण को काम सौप्युं च, जु कि पैलि परगट नि छौ।</verse>
				<verse number="2">अर अगर कै सेवक मा मालिक का द्‍वारा कुई काम सौंपे गै, त वेको यू फरज बणदु कि उ वेकी आज्ञा को पालन कैरो। अर वे सेवक तैं वे काम खुणि भरोसा का लैख बणयूं रौण चयेणु।</verse>
				<verse number="3">अर अगर तुम लोग मि खुणि भरोसेमन्द बुल्द्‍यां या नि भि बुल्द्‍यां, त मि पर वां से कुई फर्क नि पोड़दु। अर ना ही मितैं ईं बात की कुई चिन्ता च कि लोग मि खुणि क्या बुल्दिन। इख तक की मि खुद ईं बात खुणि अपणी जाँच-पड़ताल नि करदु।</verse>
				<verse number="4">किलैकि मेरु मन मितैं कैं भि बात मा दोषी नि ठैरान्दु, मगर फिर भि मि धरमी साबित नि होन्दु, किलैकि जु मेरी जाँच-पड़ताल करदु उ प्रभु ही च।</verse>
				<verse number="5">इलै जबरि तक न्याय को बगत नि ऐ जान्दु, तबरि तक कै का दगड़ा मा कुई गळत काम नि कैरा। अर जब हमरु प्रभु यीशु आलु, त उई ईं बात को न्याय करलु, अर लोगु तैं ऊंका भला-बुरा कामों का बारा मा बतालु, जु ऊंन लुकि-छिपी के करिनी। अर उ इन भि बतालु, कि ऊंका मनों मा क्या च। तब पिता परमेस्वर ऊं लोगु की तारीफ करलु, जु वेका काम खुणि वफादार छिन।</verse>
				<verse number="6">हे मेरा भै-बैंणो, मिन तुमरा फैदा का बानो ही अपणु अर अपुल्‍लोस भै को उदारण देके तुमतै यू बात बतैनि, ताकि तुम लोग हमरा उदारण से या बात सिखी जा कि, “जन लिख्यूं च वेसे भैर नि जाण।” अर या बात अच्छी नि च कि तुम महान बणण कि कोसिस कैरा, अर फिर कै एक मनखि का तरफा ह्‍वे जा, अर दुसरो को तिरिस्कार कैरा।</verse>
				<verse number="7">क्या तुम लोग दुसरा लोगु का मुकाबला मा जादा जानकार छाँ? अर तुमरा पास इन्द्रयो क्या च जु कि तुमतै दुसरा मनखि से अलग करदु? अर जु कुछ भि तुमरा पास च उ सब कुछ पिता परमेस्वर की तरफा बटि ही मिल्यूं च। अर जब यू सब कुछ तुमतै परमेस्वर न देई त फिर तुमरा मोन इथगा जादा किलै चड़यां रौनदिन?</verse>
				<verse number="8">अरे, तुम मा त बिजांम च अर तुम मा ह्‍वे गैनी छक रुपया, मगर तुम त हमरा बगैर ही राज करण लगि ग्यां। कास, या बात सच्‍चि होन्दी, कि तुम राजा बणि के राज कना रौन्दा, अर हम भि तुमरा दगड़ा मा राज करदा।</verse>
				<verse number="9">मगर हम लोग अभि तक धरती का राजा नि बणयां। मितैं त इन लगदु, कि हम खास चेलों तैं पिता परमेस्वर न इन्द्रयो मनखि बणयूं च, जौं की हालत दुनियां का सब लोगु मा बटि सबसे जादा खराब च। हम त वु लोग छां जौं कि बुरै ही किये जान्दी अर तमसो बणयै जान्दु। अर यू सब त इलै च किलैकि पिता परमेस्वर न हमतै खास चेला का रुप मा चुण्यालि, जौं खुणि मौत की आज्ञा ठैरैईं च, इलै हम दुनियां का लोग खुणि अर स्वर्गदूतों खुणि एक तमसो बणि ग्यां।</verse>
				<verse number="10">अर यीशु मसीह को परचार करण की वजै से हम लोगु की नजर मा मूरख मणै जणद्‍यां, मगर तुम यीशु मसीह का दगड़ा मा एक ह्‍वे ग्यां, त ईं वजै से तुम खुद तैं भौत अकलमन्द समझणा छाँ। तुम खुद तैं ताकतबर समझद्‍यां अर हमतै कमजोर, इलै हमरु कुई आदर-सम्मान नि च मगर तुम त खुद दुसरो से आदर-सम्मान पौणा छाँ।</verse>
				<verse number="11">अर हम आज का दिन पर भि भूका अर तिसळा छां, अर फटयां-पुरणा कपड़ा पैरद्‍यां, अर विरोध करण वळा लोगु की मार खन्द्‍यां, अर इनै-उनै भटकणा रौन्द्‍यां।</verse>
				<verse number="12">अर अपणा हाथोंळ बड़ी मेनत कैरिके थकी जन्द्‍यां। अर फिर भि लोग हमरु अपमान करदिन, मगर हम ऊंतैं आसीस देन्द्‍यां। अर वु लोग हमतै सतौन्दा छिन, मगर हम ऊंकी सौन्द्‍यां।</verse>
				<verse number="13">ऊ लोग हमतै बदनाम करदिन, मगर हम ऊंतैं बड़ा प्यार से जबाब देन्द्‍यां हम ईं दुनियां को मैळ अर खौड़-कटग्यार बणि ग्यां।</verse>
				<verse number="14">हे मेरा प्यारा भै-बैंणो, मि तुमतै सरमसार करणु खुणि यू सब बात नि लिखणु छौं, बल्किन मा अपणा प्यारा बच्‍चा समझि के तुमतै चितौणु छौं।</verse>
				<verse number="15">हालांकि, सच्‍चै का बाटा पर चलौणु खुणि तुमरा पास सिखौण वळा हजारों गुरु ह्‍वे सकदिन, मगर तुमरा भौत बुबा नि छिन। ठिक उन्‍नि मि भि तुम खुणि एक बुबा का जन बणि ग्यों, किलैकि मिन ही तुमतै शुभ समाचार का बारा बतै, अर मेरा द्‍वारा ही तुमुन प्रभु यीशु मसीह पर बिस्वास कैरी।</verse>
				<verse number="16">इलै मि तुम से बिन्ती करदु, कि जन मेरु चाल-चलन च, ठिक उन्‍नि तुमरो भि हो।</verse>
				<verse number="17">इलै सुणा, मि तुमरा पास तीमुथियुस भै तैं भेजणु छौं। अर उ मेरा नौना का जन च, जै से मि भौत प्यार करदु अर उ प्रभु का काम खुणि भरोसा का लैख मनखि च। जब उ उख पौंछुलु त उ तुमतै याद दिलौलु, कि यीशु मसीह का पिछनै चलण मा मेरु चाल-चलन कन च। अर जब मि कै बिस्वासी समुदाय मा जान्दु, त उखा लोगु तैं मि कै तरिकळ सिखौन्दु।</verse>
				<verse number="18">अर कुछ लोग त बड़ु मोन कैरिके इन फूली गैनी, जन कि मिन अब तुमरा बीच मा औण ही नि होलु।</verse>
				<verse number="19">पर अगर जु प्रभु कि मनसा ह्‍वेलि, त मि भौत जल्द ही तुमरा पास औलु। अर जु लोग बड़ु मोन कैरिके फूली गैनी, मि उख पौंछी के ऊंतैं दिखलु की ऊंकी शिक्षा क्या च? क्या ऊंमा परमेस्वर की सामर्थ छैई च या ना।</verse>
				<verse number="20">किलैकि परमेस्वर को राज बेकार की बातों मा नि च, बल्किन मा वेका सामर्थ का कामों का द्‍वारा परगट च।</verse>
				<verse number="21">अब मितैं इन बता कि तुम क्या चन्द्‍यां? क्या मि तुमरा पास जांठु लेके औंऽऽ? या फिर प्यार अर नमर सभौ रखी के?</verse>
			</chapter>
			<chapter number="5">
				<verse number="1">हे मेरा दगड़्यों, तुमरा इख बटि मेरा पास इन खबर ऐ, कि तुमरा बीच मा गळत सम्बन्ध रखै जाणा छिन, अर वु भि इन्द्रया गळत सम्बन्ध जु की वु लोग भि नि रखदिन जु कि बिस्वासी नि छिन। किलैकि मिन इन सुणी कि एक आदिम न अपणी सौतेली माँ तैं अपणु बणैयालि।</verse>
				<verse number="2">अर तुम ईं बात पर बड़ु मोन करद्‍यां, जब कि तुमतै दुखी होण चयेणु छौ। अर जै आदिम न यू काम कैरी, वेतैं त तुमरा बीच मा बटि बेदखल कर देण चयेणु।</verse>
				<verse number="3">अर अभि मि तुमरा बीच मा नि छौं, मगर मेरु मन तुम पर ही लग्यूं च, अर जै मनखि न यू काम कैरी उ मेरी नजर मा दोषी ठैरि गै, अर इन समझा कि मि उखि मौजूद छौं।</verse>
				<verse number="4">जब तुम हमरा प्रभु यीशु का नौ से इकट्‍ठा होनद्‍यां, त इन समझि ल्या कि पवित्र आत्मा की ताकत से मि भि तुमरा बीच मा ही छौं।</verse>
				<verse number="5">अर उ आदिम जैन गळत काम कैरी, वेतैं अपणा समुदाय का बीच बटि बेदखल कैरिके शैतान का हवाला कैरी द्‍या, ताकि उ अपणा पाप से पस्ताप कैरो। अर अगर उ पस्ताप करलु, त वे दिन उ बचि जालु जब प्रभु न्याय करलु।</verse>
				<verse number="6">अर तुमतै क्या लगदु, कि बड़ु मोन कन ठिक बात च? अर क्या तुम नि जणद्‍यां कि, “ अगर थुडु सा खमीर तैं आटा मा मिल्ये जौ, त उ पूरा गुन्द्‍यां आटा तैं खमीर बणै देन्दु।”</verse>
				<verse number="7">अर जन यहूदी लोग फसह का त्योवार तैं मनौण से पैलि अपणा-अपणा घौर बटि खमीर तैं निकाळि के ढोळि देन्दिन, ठिक उन्‍नि तुम भि वे आदिम तैं अपणा समुदाय बटि बेदखल कैरी द्‍या, किलैकि तुम यीशु मसीह पर बिस्वास करद्‍यां अर पवित्र छाँ। अर एक उई त च जु हमतै पापों से छुटकारु देण का खातिर मेम्‍ना का रुप मा बलिदान किये गै।</verse>
				<verse number="8">अर तुम जु यीशु मसीह पर बिस्वास करद्‍यां, इलै हरेक किसम कि बुरै अर दुसमनी तैं छोड़ि द्‍या, किलैकि यां मा तुमरि कुई भलै नि च। त आ, हम ईं सच्‍चि शिक्षा को पालन कैरा, अर वु भि बड़ी इमानदारी से।</verse>
				<verse number="9">अर मिन अपणी पैलि चिठ्‍ठी मा लिखी छौ, कि तुम गळत सम्बन्ध रखण वळा लोगु का दगड़ा मा मेल-जोल रखण छोड़ि द्‍या।</verse>
				<verse number="10">अर मेरु बोन्‍न को मतलब यू नि छौ, कि तुम ईं दुनियां का ऊं लोगु से नातु नि रखा जु कि गळत सम्बन्ध रखदिन अर लालची, अर ठगण वळा छिन या मूरत पूजा करण वळा छिन। अगर इन करद्‍यां त फिर त तुमतै दुनियां ही छोड़ि के जाण पोड़लु।</verse>
				<verse number="11">अर यू सब बतौणु खुणि ही मि तुम खुणि इन लिखणु छौं, कि तुमतै इन्द्रया लोगु का दगड़ा मा मेल-जोल नि रखण चयेणु, जु खुद तैं मसीह का लोग बतौन्दिन, मगर दुसरो का दगड़ा मा गळत सम्बन्ध रखदिन, या लालची छिन, अर मूरत पूजा या गळी देण वळा छिन, या फिर दरोळया, दुसरो तैं धोखा देण वळा छिन। अरे, मि तुमतै बतै देन्दु कि इन्द्रया लोगु का दगड़ा मा खाणुक खाण भि छोड़ि द्‍या।</verse>
				<verse number="12">पर जु लोग बिस्वासी समुदाय का हिस्सेदार नि छिन, ऊंको न्याय करण मेरु काम नि च, किलैकि ऊंको न्याय पिता परमेस्वर न ही करण। मगर तुमतै ऊं लोगु को न्याय करण चयेणु, जु कि बिस्वासी समुदाय का लोग छिन। किलैकि पवित्रशास्‍त्र मा लिख्यूं च कि, “तुमतै अपणा बीच मा बटि बुरा लोगु तैं निकाळि देण चयेणु।”</verse>
				<verse number="13"></verse>
			</chapter>
			<chapter number="6">
				<verse number="1">हे मेरा बिस्वासी भै-बैंणो, जब तुमरा बीच मा एक-दुसरा का खिलाप मा कुई भि वाद-विवाद होन्दु, त तुम लोग अपणु फैसला करौणु खुणि पवित्र लोगु का पास किलै नि औन्द्‍यां, मगर तुम ऊं लोगु का पास जन्द्‍यां जु कि सच्‍चै से न्याय नि करदिन?</verse>
				<verse number="2">हे मेरा दगड़्यों, तुम इन किलै करद्‍यां? क्या तुम ईं बात तैं नि जणद्‍यां, कि न्याय का दिन पर पवित्र लोग न दुनियां का लोगु को न्याय करण? इलै जब हम दुनियां का सब लोगु को न्याय करण वळा छां, त क्या तुम लोग इथगा लैख भि नि छाँ, कि छुटी से छुटी बातों को फैसला तुमरा ही बीच मा हो?</verse>
				<verse number="3">अर क्या तुमतै इन भि पता नि च, कि हमुन स्वर्गदूतों को न्याय करण? त तुम मितैं इन बता कि क्या तुम दुनियां की बातों को फैसला नि कैरी सकद्‍यां?</verse>
				<verse number="4">अर जब तुमतै अफ दगड़ा कै भै या बैंण से कुई दिक्‍कत होन्दी, त तुम न्याय मंगणु खुणि इन्द्रया लोगु का पास किलै जन्द्‍यां, जु बिस्वासी समुदाय का नि छिन? तुमरो अर ऊंको क्या सम्बन्ध?</verse>
				<verse number="5">अर या बात मि तुम खुणि इलै बोन्‍नु छौं, ताकि तुमतै खुद पर सरम अऽ। अर एक बात बता, क्या सच्‍चि मा तुमरा इख एक भि समझदार नि च, जु कि तुम बिस्वासी लोगु का वाद-विवाद तैं सुळझै सैको।</verse>
				<verse number="6">अर तुमरा बीच मा एक भै दुसरा भै तैं अदालत मा लेके जान्दु, वु भि ऊं लोगु का बीच मा जु की बिस्वासी नि छिन।</verse>
				<verse number="7">अर अगर तुमरा बीच मा इन्‍नि झगड़ा होणा राला, त ईं बात को मतलब च कि शैतान का दगड़ा तुमरि हार पैलि ही ह्‍वे गै। हे मेरा दगड़्यों, जब कुई तुमरो अन्यो करदु, त तुम सै किलै नि सकद्‍यां? तुम अपणु नुकसान किलै नि उठे सकद्‍यां?</verse>
				<verse number="8">मगर तुम खुद ही अन्यो करद्‍यां अर एक-दुसरो तैं ठगद्‍यां, अर वु भि ऊं लोगु तैं जु कि बिस्वासी छिन।</verse>
				<verse number="9">हे मेरा भै-बैंणो, धोखा मा नि रा। क्या तुम नि जणद्‍यां इन्द्रया लोग परमेस्वर का राज का वारिस नि होला जन कि, अन्यो करण वळा, गळत सम्बन्ध रखण वळा, मूरत पूजा करण वळा, दुसरि जनानि पर गळत नजर रखण वळा, हवस रखण वळा, अर ना ही वु बैख जु कि कै दुसरा बैख का दगड़ा मा गळत सम्बन्ध रखदिन,</verse>
				<verse number="10">चोरी करण वळा, लालची, दरोळया, गळी देण वळा, अर दुसरो तैं ठगण वळा, इन्द्रया लोग पिता परमेस्वर का राज का वारिस नि होला।</verse>
				<verse number="11">अर तुम मा बटि कुछ लोग इन्द्रया ही छा, मगर पिता परमेस्वर न हमरा प्रभु यीशु मसीह का नौ से अर अपणी पवित्र आत्मा से तुमतै ध्वेके शुद्ध कैरी अर धरमी ठैरै।</verse>
				<verse number="12">अर अगर कुई इन बुल्दु कि, “सब धंणि मि खुणि ठिक छिन।” मगर मि तुमतै बतै देन्दु, कि सब धंणि तुमरा फैदे कि नि छिन। अर मि बोलि सकदु छौं कि नियम-कानून का हिसाब से मि खुणि सब कुछ ठिक च, पर मि नि चान्दु कि मि कैं भि चीज को गुलाम बणु।</verse>
				<verse number="13">अर कुछ लोग त इन भि बुल्दिन कि, “पुटगु त इलै ही च कि खाणुक खये जौ, अर खाणुक भि इलै ही च कि पुटगु भुरे जौ।” अर चला, मणद्‍यां कि या बात ठिक च, मगर औण वळा बगत मा पिता परमेस्वर न यों दुईयों को नास कैरी देण। हे मेरा दगड़्यों, जैका दगड़ा मा तुमरो ब्यौ नि कर्युं वेका अलावा कै दुसरा का दगड़ा मा गळत सम्बन्ध नि रखा, किलैकि या बात तुमरा सरील खुणि ठिक नि च। अर तुम मेरी बात तैं ध्यान से सुणा, केवल प्रभु यीशु ही च जु कि हमरा सरील को मालिक च।</verse>
				<verse number="14">अर जन पिता परमेस्वर न प्रभु यीशु मसीह तैं मुरदो मा बटि ज्यून्द कैरी, ठिक उन्‍नि उ हमतै भि अपणी सामर्थ से मुरदो मा बटि ज्यून्द करलु।</verse>
				<verse number="15">अर क्या तुम इन नि जणद्‍यां, कि हमरु सरील यीशु मसीह को अंग च? अर हम जु मसीह का सरील का अंग छां, इलै या बात ठिक नि च कि हम कै दुसरि जनानि का दगड़ा मा गळत सम्बन्ध रखा?</verse>
				<verse number="16">अर क्या तुम यू भि नि जणद्‍यां, कि जब एक मनखि कै वेश्या का दगड़ा मा सिन्दु, त वु दुईया का दुई एक बदन ह्‍वे जनदिन? किलैकि परमेस्वर इन बुल्दु कि, “वु दुईया का दुई एक सरील होला।”</verse>
				<verse number="17">अर जब कुई मनखि हमरा प्रभु का दगड़ा मा एक ह्‍वे जान्दु, तब वेकी अर हमरि सांस एक ह्‍वे जान्दी, इनकै हम वेकी आत्मा मा एक ह्‍वे जन्द्‍यां।</verse>
				<verse number="18">इलै हे मेरा भै-बैंणो, एक-दुसरा का दगड़ा मा गळत सम्बन्ध रखण से भागा, किलैकि दुसरा पाप मनखि का सरील तैं नुकसान नि पौंछन्दिन, मगर जु लोग गळत सम्बन्ध रखण मा लग्यां रौनदिन, वु अपणा सरील का खिलाप मा पाप करदिन।</verse>
				<verse number="19">क्या तुम नि जणद्‍यां, कि तुमरो सरील पवित्र आत्मा को मन्दिर च? जु कि तुमतै पिता परमेस्वर की तरफा बटि मिल्यूं च, अर तुमरा भितर वास करदु,</verse>
				<verse number="20">किलैकि यीशु मसीह न अपणा जीवन देके तुमतै खरीदयाली, इलै मसीह को सरील होण का नाता अपणा-अपणा जीवन से पिता परमेस्वर की बडै कैरा।</verse>
			</chapter>
			<chapter number="7">
				<verse number="1">अब मि तुम खुणि ऊं सवालों को जबाब लिखणु छौं, जौं का बारा मा तुमुन चिठ्‍ठी मा मि बटि पूछी छौ। तुमुन पूछी छौ कि, “क्या एक आदिम खुणि यू अच्छु च कि उ अणविवाक ही रौ?”</verse>
				<verse number="2">मि तुमतै बतै देन्दु, कि या बात अच्छी होलि कि हरेक बैख की अपणी घरवळी, अर ठिक उन्‍नि हरेक जनानि को अपणु पति हो, किलैकि ईं दुनियां मा सरील का सम्बन्ध रखणु खुणि भौत सा गळत विचार निकळि के ऐ गैनी।</verse>
				<verse number="3">हे मेरा भै-बैंणो, सरील का सम्बन्ध तैं पूरु करणु खुणि एक पति अपणी घरवळी खुणि, अर ठिक उन्‍नि एक घरवळी अपणा पति खुणि वफादार रौ।</verse>
				<verse number="4">किलैकि एक जनानि को अपणा सरील पर अधिकार नि च बल्किन मा वींका पति को च, अर ठिक उन्‍नि पति तैं भि अपणा शरीर पर अधिकार नि च, बल्किन मा वेकी घरवळी को च।</verse>
				<verse number="5">अर ये हक तैं पूरु करणु खुणि तुम दुईया का दुई एक-दुसरा से अलग नि रा, अगर जु तुम अलग होणा छाँ त प्रार्थना खातिर इन कैरा, पर यां मा भि तुम दुईयों की रजामंदी होण चयेणी। अर वेका बाद फिर से एक ह्‍वे जा, ताकि शैतान तुमरा सबर रखण की वजै से कखि तुमतै भकलै नि द्‍यो।</verse>
				<verse number="6">अर मि तुमतै आज्ञा नि देणु, मगर या बात मि तुमतै एक सला का तौर पर बतौणु छौं।</verse>
				<verse number="7">फिर भि मेरी सला त या ही च कि कास सब लोग मि जन अणविवाक रौन्दा, त कथगा भलु होन्दु। मगर हरेक मनखि तैं परमेस्वर की तरफा से अलग-अलग दान मिल्यूं च। अब कुछ लोगु तैं ब्यौ करण को अर कुछ तैं मि जन अणविवाक रौण को दान मिल्यूं च।</verse>
				<verse number="8">अब मि अणविवाक लोगु अर विधवा जनानियों कू बोन्‍नु छौं कि ऊं खुणि अच्छु त यू ही च कि जन मि अकेला छौ, ठिक उन्‍नि तुम भि रा।</verse>
				<verse number="9">पर अगर तुम सबर नि रखी सकद्‍यां, त तुम ब्यौ कैरी ल्या किलैकि सरील की इच्छा तैं पूरि करण की आग मा फूक्योंण से त जादा भलु यू च कि तुम ब्यौ कैरी ल्या।</verse>
				<verse number="10">अर जौं को ब्यौ ह्‍वे गै ऊंकू मि बुल्दु, कि प्रभु तुमतै आज्ञा देन्दु कि एक जनानि तैं अपणा पति तैं तलाक नि देण चयेणु।</verse>
				<verse number="11">अर अगर वा तलाक देण चाणि च, त फिर वा ब्यौ नि कैरो य त अपणा पति का दगड़ा मा फिर से मिली जौ, अर ठिक उन्‍नि एक पति तैं भि अपणी घरवळी तैं नि छुड़ण चयेणु।</verse>
				<verse number="12">अर दुसरा लोगु खुणि प्रभु ना, पर मि या बात बुल्दु कि अगर कै बिस्वासी भै कि घरवळी बिस्वास नि करदी हो, अर फिर भि वा अपणा पति का दगड़ा मा रौणु खुणि राजी च, त उ बिस्वासी भै अपणी घरवळी तैं नि छोड़ु।</verse>
				<verse number="13">अर ठिक उन्‍नि अगर कै बिस्वासी बैंण को पति बिस्वास नि करदु हो, अर फिर भि उ अपणी घरवळी का दगड़ा मा रौणु खुणि राजी च, त वा बिस्वासी बैंण अपणा पति तैं नि छोड़ु।</verse>
				<verse number="14">अर इन इलै करण चयेणु, किलैकि हे मेरा बैंण तू जु यीशु मसीह पर बिस्वास करदी, तेरी वजै से तेरु पति पवित्र होलु। अर ठिक उन्‍नि हे मेरा भै तू जु प्रभु पर बिस्वास करदी, तेरी वजै से तेरी घरवळी पवित्र होलि। अर अगर ज्वा या बात सच्‍च नि होन्दी, त तुमरा बच्‍चा अशुद्ध होन्दा, मगर तुमरा बच्‍चा त पवित्र छिन।</verse>
				<verse number="15">अर जु मनखि बिस्वास नि करदु हो अर वु तलाक लेण चौ, त वे भै या वीं बैंण तैं तलाक लेण द्‍या। किलैकि या तुमरि ना बल्किन मा बिस्वास नि करण वळे की इच्छा च। अर पिता परमेस्वर न तुमतै इलै ही बुलै ताकि तुमरा जीवनों मा शान्ति रौ।</verse>
				<verse number="16">हे मेरी बैंण, अगर तू अपणा पति का दगड़ा रैलि, त क्या पता तेरी वजै से तेरा पति तैं बचयै जौ। अर ठिक उन्‍नि हे मेरा भै, अगर तू भि अपणी घरवळी का दगड़ा मा रैलि, त क्या पता तेरी वजै से तेरी घरवळी तैं बचयै मिली जौ।</verse>
				<verse number="17">हे मेरा दगड़्यों, साधारण सि बात च कि पिता परमेस्वर न हरेक मनखि तैं एक अलग हिस्सा दियूं च। अर जै मनखि तैं वेन जिं दसा मा बुलै, वेतैं वीं दसा मा ही चलण चयेणु। अर मि बिस्वासी समुदाय का सब लोगु तैं इन ही आज्ञा देन्दु।</verse>
				<verse number="18">अब चै कै को खतना का रिवाज तैं पूरु कर्युं च, या नि च कर्युं यां से कुई फर्क नि पोड़दु।</verse>
				<verse number="19">किलैकि हरेक मनखि अब चै ऊंको बुलये जाण जिं भि दसा मा हो, पिता परमेस्वर न ऊंतैं इलै ही बुलै कि ऊ यीशु मसीह पर बिस्वास कैरा, अर वेका पिछनै चलि के आज्ञा को पालन कैरा।</verse>
				<verse number="20">अर जब तुम बिस्वासी बणयां त तुम उन्‍नि रा जन तुमतै परमेस्वर न बुलै।</verse>
				<verse number="21">क्या त्वेतै गुलाम की दसा मा बुलये गै? त याद रख कि या बात त्वेतै परेसान नि कैरो, पर अगर जु त्वेतै आजाद होण को मौका मिलणु च त ह्‍वे जा।</verse>
				<verse number="22">अर अगर जु तू गुलाम छैई, अर जब तिन प्रभु यीशु पर बिस्वास कैरी छौ, त पिता परमेस्वर न तेरा दगड़ा मा इन बरतौ नि कैरी, जन एक गुलाम का दगड़ा मा किये जान्दु। अर अगर तू आजाद छैई, अर प्रभु यीशु मसीह पर बिस्वास करदी, त तू मसीह को गुलाम छैई।</verse>
				<verse number="23">अर जब की यीशु मसीह न अपणी जान देके त्वेतै अफ खुणि खरीदयाली, इलै तू वेका अलावा कै और को गुलाम नि बण।</verse>
				<verse number="24">इलै हे मेरा भै-बैंणो, हरेक मनखि जैतैं जिं हालत मा बुलये गै, वु वीं हालत मा ही परमेस्वर का दगड़ा मा उन्‍नि बणयूं रौ।</verse>
				<verse number="25">अर कुंवारियों खुणि मितैं प्रभु बटि कुई आज्ञा नि च मिली, मगर मि तुमतै सला देणु छौं। अर मि पर यकीन किये जै सकदु, किलैकि प्रभु यीशु न मि पर अपणी दया कैरिके मितैं वफादार बणै।</verse>
				<verse number="26">अर आज ब्याळि का हालातों तैं देखि के त मितैं यू ही अच्छु लगदु कि एक आदिम जन च, वु उन्‍नि रौ।</verse>
				<verse number="27">अगर तेरी घरवळी च, त वीं से अलग होण की सोच नि रख, अर अगर तेरी घरवळी नि च, त अफ खुणि घरवळी की खोज नि कैर।</verse>
				<verse number="28">अर अगर कुई अणविवाक ब्यौ करण चाणु च, त यां मा कुई गळत बात नि च। अर अगर कुई अणविवाक नौनि ब्यौ करण चाणि च, त इन करण भि गळत नि च। मगर मि तुमतै बतै देन्दु, कि जु लोग ब्यौ करदिन ऊंतैं अपणा जीवन मा दुख-तकलीफ झिलण पोड़दिन, अर मि त बस इथगा ही चान्दु कि तुमतै कुई परेसानी नि हो।</verse>
				<verse number="29">हे मेरा भै-बैंणो, मि तुमतै इन बतौण चाणु छौं कि अब बगत भौत कम च, इलै जौं को ब्यौ होयुं च ऊंतैं अपणु पूरु ध्यान अपणी जनानि और बाल-बच्‍चों पर ना, बल्किन मा परमेस्वर की सेवा मा लगौण चयेणु।</verse>
				<verse number="30">अर जु लोग दुखी छिन ऊंको पूरु ध्यान अपणा दुख की तरफा नि हो, बल्किन मा परमेस्वर की सेवा की तरफा हो। अर जु लोग खुशी मनौणा रौनदिन ऊंको पूरु ध्यान खुशी मनौण की तरफा ना, बल्किन मा परमेस्वर की सेवा की तरफा हो। अर जु व्यापारी छिन ऊंको ध्यान अपणा व्यापार की तरफा ना, बल्किन मा परमेस्वर की सेवा की तरफा होण चयेणु।</verse>
				<verse number="31">अर जु कुई ईं दुनियां मा अपणु जीवन बसर करणु च वेतैं अपणु पूरु ध्यान दुनियां की चीजों की तरफा ना, बल्किन मा परमेस्वर की सेवा की तरफा लगौण चयेणु, किलैकि ईं दुनियां को नास होण वळु च।</verse>
				<verse number="32">अर मि चान्दु कि इन्दरि कुई भि बात नि च ज्वा कि तुमतै पिता परमेस्वर का काम करण से रोको। अर एक अणविवाक मनखि कि सोच इन होन्दी कि वेको सब काम प्रभु यीशु खुणि हो, ताकि वेका द्‍वारा प्रभु खुश ह्‍वे जौ।</verse>
				<verse number="33">मगर जै मनखि को ब्यौ होयुं रौन्दु, उ दुनियादारि की बातों की चिन्ता मा ही रौन्दु, ताकि कनि ना कनकै उ अपणी घरवळी तैं खुश रखी सैको।</verse>
				<verse number="34">इलै एक पति हमेसा इन सोचदु कि कनकै पिता परमेस्वर तैं खुश किये जौ, अर कनकै घरवळी तैं खुश किये जौ। अर ठिक इन्‍नि एक अणविवाक नौनि सिरफ पिता परमेस्वर का काम का बारा मा सोचदी, कि वा कनकै पिता परमेस्वर तैं खुश कैरो, अर वा खुद तैं पिता परमेस्वर का सुपुर्द कैरी देन्दी, अर इन वा इलै करदी ताकि वींको बदन अर आत्मा दुई पवित्र रा। मगर जिं जनानि को ब्यौ होयुं रौन्दु, वा अपणा परिवार अर अपणा कामों की चिन्ता मा ही रौन्दी, ताकि वा कनि ना कनकै अपणा पति तैं खुश रखो।</verse>
				<verse number="35">अर जु कुछ भि मिन बोलि, वु सब बात तुमरा फैदा की छिन नऽ कि तुमतै फसौणु खुणि, बल्किन मा मि तुमतै वु करणु खुणि उकसौणु छौं, जु कि तुम खुणि सही च। अर इन मि इलै कनु छौं, ताकि तुम जौं को ब्यौ होयुं च या जौं को नि च होयुं, तुम सब लोग अपणु सब कुछ पिता परमेस्वर तैं दे द्‍या, हाँ जु कुछ तुमरा मन मा च।</verse>
				<verse number="36">अर तुम मा बटि कुछ लोगु न अपणी अणविवाक नौन्यों का बारा मा मि बटि पूछी, कि ऊंतैं क्या करण चयेणु त मि ऊंतैं इन सला देन्दु कि, अगर कै अणविवाक नौनि को ब्यौ करण को सही बगत ऐ गै, अर वींका ब्वे-बाब वींतैं ब्यौ करण से रोका, अर वा फिर भि ब्यौ करण चाणि हो त वींतैं ब्यौ करण द्‍या, किलैकि इन कैरिके तुम वींका दगड़ा मा कुछ गळत नि कना छाँ।</verse>
				<verse number="37">पर अगर कै को इरादा मजबूत हो कि उ अणविवाक ही रालु अर उ अपणा ये फैसला पर अटल रौन्दु, अर वेतैं ब्यौ करण की जरुरत मैसूस नि होन्दी, बल्किन मा उ त अपणी इच्छा पर पूरु अधिकार रखदु, अगर उ इन करदु त उ भौत अच्छु काम कनु च।</verse>
				<verse number="38">अर ठिक उन्‍नि अगर कुई मनखि अपणी नौनि को ब्यौ करदु, त ठिक ही करदु अर अगर नि करदु त भौत अच्छु करदु।</verse>
				<verse number="39">हे मेरा भै-बैंणो, एक जनानि अपणा पति का दगड़ा ब्यौ का रिश्ता मा तब तक जुड़ी रौन्दी जब तक उ ज्यून्द च। अर अगर वींका पति की मौत ह्‍वे जौ, त वा फिर आजाद च अर जैका दगड़ा मा चौ ब्यौ कैरी सकदी, मगर उ मनखि प्रभु यीशु पर बिस्वास करण वळु हो।</verse>
				<verse number="40">अर अगर वा नौनि ब्यौ नि करण चाणि च, त मेरी सला इन च कि वा जादा खुश राली। अर मेरु मनण इन च कि जु कुछ भि मि बोन्‍नु छौं, वु पिता परमेस्वर को पवित्र आत्मा मि मा बटि ह्‍वेके बोन्‍नु छौं।</verse>
			</chapter>
			<chapter number="8">
				<verse number="1">हे मेरा दगड़्यों, अब मि ऊं चीजों का बारा मा बतौण चान्दु, जु कुछ भि मूरत का अगनै चड़ये जान्दु, वीं सच्‍चै का बारा मा तुम जणदा ही छाँ, अर वेका बारा मा तुम सभ्यों का पास पूरु ज्ञान च। अर अगर तुम कैं चीज का बारा मा जणदा छाँ, त याद रखा कि जादा ज्ञान होण से मनखि का मोन भौत चैड़ि जनदिन, पर अगर जु हम एक-दुसरा से प्यार करद्‍यां, त यां से एक-दुसरे की तरक्‍की होन्दी।</verse>
				<verse number="2">अर जु लोग अपणा ज्ञान पर बड़ु मोन करदिन ऊ सच्‍चा वचन तैं नि जणदिन।</verse>
				<verse number="3">पर अगर कुई मनखि पिता परमेस्वर से प्यार करदु, त यां को मतलब यू च कि वे मनखि को पिता का दगड़ा मा भौत अच्छा से जाण-पछ्याण होईं च।</verse>
				<verse number="4">अर मूरतों का समणि बलि करीं चीजों तैं खाण का बारा मा हम जणदा ही छां कि ईं दुनियां मा मूरत कुछ भि नि छिन। अर वे एक परमेस्वर तैं छोड़ि के और कुई परमेस्वर छैई नि च।</verse>
				<verse number="5">हालांकि ये आसमान अर धरती पर, भौत सा छिन जौं कू भगवान अर प्रभु बुले जान्दु,</verse>
				<verse number="6">मगर हम खुणि एक ही च जैतैं हम पिता परमेस्वर का रुप मा स्वीकार करद्‍यां, अर उ हमरु ही पिता परमेस्वर च जैन सभ्यों तैं बणै, अर हम वेकी सेवा करद्‍यां। अर हमरु एक ही प्रभु च जु कि यीशु मसीह च जैका द्‍वारा सब कुछ बणि, अर जु कुछ भि च वु वेका ही द्‍वारा बणि, अर जु जीवन वेन हमतै देई उ सदनि को च।</verse>
				<verse number="7">पर फिर भि यू ज्ञान सब लोगु का पास नि च, किलैकि कुछ लोगु का बिंगण मा त अभि तक नि ऐ कि मूरतों मा कुई भि ताकत नि होन्दी। अर इन्द्रया लोग पैलि त मूरतों की पूजा करदा छा, अर ऊंका अगनै चड़ईं चीजों तैं खान्दा छा। अर अब जब वु लोग खाणुक खनदिन, त इन सोचदिन कि कखि यू मूरतों का अगनै चड़यूं खाणुक त नि च। तब ऊंको जमीर कमजोर होण की वजै से ऊंतैं दोषी ठैरान्दु, अर ऊ लोग इन बुल्दिन कि, “अरे, हम पाप कना छां।”</verse>
				<verse number="8">मगर हे मेरा भै-बैंणो, खाणुक हमतै परमेस्वर का नजदीक नि पौंछान्दु। अगर हम नि खा, त हमरा भितर कुई नुकसान नि होन्दु, अर जु हम खा, त तभि भि हमतै कुछ फैदा नि च।</verse>
				<verse number="9">अर भले ही तुम कुई भि चीज खन्द्‍यां, पर ईं बात को ध्यान रखा, कि तुमरि वजै से कुई दुसरो बिस्वास भै या बैंण अपणा बिस्वास मा डगमगै नि जौ। अर इन इलै होलु किलैकि उ भै या बैंण बिस्वास मा मजबूत नि च।</verse>
				<verse number="10">चला, इन माणी लिन्द्‍यां कि त्वेतै भौत ज्ञान च, मगर सुण, अगर जु तू कै मन्दिर मा खाणुक खाणु कू गै, अर वे ही बगत कुई बिस्वासी भै या बैंण जु कि बिस्वास मा कमजोर च, त्वेतै उख देखि द्‍यो, त क्या वेतैं मूरत का समणि बलि करीं चीज तैं खाण की हिम्मत नि होलि?</verse>
				<verse number="11">अर इनकै तेरा ज्ञान की वजै से उ आदिम जु बिस्वास मा मजबूत नि च बरबाद हो जालु, हाँ, तेरु उ भै जैका खातिर मसीह न अपणी जान देई।</verse>
				<verse number="12">अर जब तुम लोग अपणा भै का खिलाप मा इन्द्रयो काम करद्‍यां, अर ऊंका कमजोर जमीर तैं तोड़ि देन्द्‍यां, त या बात जाणि जा कि तुम मसीह का खिलाप मा पाप करद्‍यां।</verse>
				<verse number="13">इलै अगर मेरु खाणुक खाण मेरा बिस्वासी भै-बैंण खुणि उतेडु़ बणण की वजा बणणु च, त इन्दरि दसा मा मि कभि भि मांस नि खौलु। अर बिस्वासी भै-बैंणो खुणि मि कभि भि उतेडु़ नि बणलु।</verse>
			</chapter>
			<chapter number="9">
				<verse number="1">हे मेरा भै-बैंणो, मेरी बात पर ध्यान द्‍या मि एक आजाद मनखि छौं, अर प्रभु यीशु को खास चेला भि, अर हमरा प्रभु यीशु तैं मिन अपणा समणि देखि छौ। अर मेरा काम को नतीजा तुम लोग ही छाँ, जौन यीशु पर बिस्वास कैरी।</verse>
				<verse number="2">अर अगर दुसरा लोग ईं बात तैं स्वीकार नि करदिन, कि मि भि प्रभु यीशु को एक खास चेला छौं त कुई बात नि च, मगर हे मेरा दगड़्यों, तुम ईं बात तैं स्वीकार कैरा किलैकि जब मिन तुमतै शुभ समाचार सुणै, त तुमुन बिस्वास कैरी इलै तुम ईं बात का सबूत छाँ कि मि वेको खास चेला छौं।</verse>
				<verse number="3">अर जु लोग मि पर इळजाम लगौन्दिन, ऊंतैं मि इन ही जबाब देण चान्दु।</verse>
				<verse number="4">अर क्या बरनबास अर मितैं तुमरा दगड़ा मा खाण-पीण को हक नि च?</verse>
				<verse number="5">क्या हमरु यू हक नि च? कि हम भि कैं बिस्वासी बैंण का दगड़ा मा ब्यौ कैरा अर जख भि जा वींतैं अपणा दगड़ा मा लि जा, जन कि और खास चेलों न, अर प्रभु का भैयों न अर पतरस न भि कैरी।</verse>
				<verse number="6">अर क्या हम मा यू हक नि च कि हम अपणा गुजर-बसर खुणि कमै कैरा?</verse>
				<verse number="7">अर इन्द्रयो सिपै कु च, जु सेवा मा हो मगर अपणु खर्च खुद ही उठौन्दु हो? अर इन्द्रयो मनखि कु च, जु अंगूर का बगिचा बणवौ, मगर वेका फल नि खौऽ? या इन्द्रयो चरवाह कु च जु भेड़ों की देखभाल करदु हो, मगर ऊंको दूद नि पीन्दु हो?</verse>
				<verse number="8">अर यू सब बात त मि दुनियां मा होण वळी बातों का मुताबिक ही नि बोन्‍नु छौं, बल्किन मा परमेस्वर का नियम-कानूनों मा भि हमतै या ही शिक्षा मिलदी,</verse>
				<verse number="9">अर पवित्रशास्‍त्र मा भि कुछ इन ही लिख्यूं च कि, “दैं करण का बगत बल्दों का गिच्‍चा पर म्वाळा नि बान्धि।” त क्या हमरु पिता परमेस्वर केवल बल्दों कि ही चिन्ता करदु?</verse>
				<verse number="10">अरे इख मा त उ खास कैरिके हम खुणि ही बोन्‍नु च। अर यू हमरा ही खातिर लिखे गै, किलैकि जु मनखि हौळ लगौन्दु अर जु दैं करदु, वु इन उम्मीद करदिन कि हमतै अनाज मिलण।</verse>
				<verse number="11">इलै जब बटि हमुन तुमरा जीवनों मा एक आत्मिक बीज बूति, त क्या बदला मा हम तुम बटि अपणा फैदा खुणि कुछ पौण की आस नि कैर सकद्‍यां?</verse>
				<verse number="12">अर जब दुसरा लोग तुम पर इन हक जतै सकदिन, त क्या हमरु तुम पर और भि जादा हक नि बणदु? पर फिर भि हमुन इन नि कैरी। अर इन हमुन इलै कैरी, ताकि हम मसीह का शुभ समाचार का परचार मा कुई रुकावट नि बणा, इलै हम हरेक दुख तैं सौणा छां।</verse>
				<verse number="13">अर क्या तुम नि जणद्‍यां, कि जु लोग मन्दिर मा सेवा करदिन, ऊ मन्दिर का खाणुक तैं भि खनदिन, अर जु वेदी का पास सेवा करदिन वु वेदी मा चड़ईं भेंट मा बटि खनदिन?</verse>
				<verse number="14">ये ही ढंग से प्रभु न भि ठैरै कि जु लोग शुभ समाचार सुणौन्दिन, ऊंकी कमै शुभ समाचार का द्‍वारा ही हो।</verse>
				<verse number="15">पर मि यों बातों मा बटि एक भि अधिकार को इस्तेमाल नि करदु। अर या बात मि तुम खुणि इलै नि लिखणु छौं, ताकि तुम मितैं कुछ द्‍या, पर मि त अपणी ईं ही बात पर बड़ु मोन करदु अब चै मि मोरि भि किलै नि जौ।</verse>
				<verse number="16">अर जु शुभ समाचार मि सुणौन्दु, वीं बात पर मिन बड़ु मोन नि कैरी, किलैकि यू काम मेरु अपणु च। अगर जु मि शुभ समाचार नि सुणौलु, त मि पर हाय च।</verse>
				<verse number="17">अर यू काम मि अपणी मरजी से करदु अर वु भि बड़ी खुशी-खुशी से। हे मेरा दगड़्यों, मि खुणि एक इनाम रख्युं च, पर अगर जु मि ये काम तैं अपणी मरजी से नि करलु, त यां को मतलब यू च कि मि केवल अपणी जबाबदारी तैं पूरु कनु छौं।</verse>
				<verse number="18">अर इन्दरि हालत मा मितैं कुई इनाम नि मिलण। मगर जब मि शुभ समाचार को परचार करदु, त वेका बदला मा मि कै बटि कुछ नि लेन्दु। अर ना ही मि शुभ समाचार मा अपणा अधिकारो को इस्तेमाल करदु।</verse>
				<verse number="19">हालांकि, मि आजाद छौं अर कै को गुलाम नि छौं, पर फिर भि मि खुद तैं सभ्यों को गुलाम समझदु, ताकि मि जादा से जादा लोगु तैं मसीह का बाटा पर लेके ऐ सैकु।</verse>
				<verse number="20">इलै जु जन छौ, मि ऊं खुणि उन्‍नि बणि ग्यों। मि खुद त मूसा रैबर्या का द्‍वारा दियां नियम-कानूनों से आजाद ह्‍वे ग्यों। मगर फिर भि जब मि यहूदी लोगु का दगड़ा मा रौन्दु त मि ऊं खुणि नियम-कानून का मुताबिक ही चलदु, ताकि वु यीशु मसीह पर बिस्वास कैरा।</verse>
				<verse number="21">अर जु लोग अलग-अलग जाति का छिन, अर मूसा रैबर्या का दियां नियम-कानूनों को पालन नि करदिन, जब मि ऊंका बीच मा रौन्दु मि ऊंका मुताबिक ही चलदु, ताकि वु भि यीशु मसीह पर बिस्वास कैरा। अर यां को मतलब यू नि च कि मि यीशु मसीह की आज्ञा का खिलाप मा चलणु छौं। किलैकि मि यीशु मसीह की आज्ञा को पालन कैरिके सभ्यों तैं अफ जन ही प्यार कनु छौ।</verse>
				<verse number="22">अर जब ऊं लोगु का बीच मा छौ जु कि बिस्वास मा कमजोर छिन त मि ऊंका जन ही बणि ग्यों, ताकि वु बिस्वास मा और मजबूत ह्‍वे सैका। अर यों सब बातों को मतलब यू च कि मि सब किसम का लोगु खुणि सब कुछ बणि ग्यों, ताकि कनि ना कनि के मि लोगु तैं यीशु मसीह का पास लेके ऐ सैकु, अर वु वीं सजा से बचि जा जु की पाप करण की वजै से मिलदी।</verse>
				<verse number="23">अर यू सब कुछ मि शुभ समाचार की वजै से करदु, ताकि मि शुभ समाचार तैं दुसरो लोगु मा बांटि सैकु।</verse>
				<verse number="24">हे मेरा भै-बैंणो, तुम त जणदा ही छाँ कि दौड़ मा त सब लोग भगदिन, मगर इनाम त एक आदिम लि जान्दु। इलै तुम भि उन्‍नि भागा ताकि जीत जा।</verse>
				<verse number="25">अर हरेक उ मनखि जु दौड़ मा सामिल होण चान्दु, पैलि उ भौत मेनत करदु अर अपणी हरेक इच्छा तैं मरदु अर यू सब कुछ त उ जीतणु खुणि करदु, ताकि उ जीत का इनाम तैं पै सैको जैन एक दिन नास ह्‍वे जाण। मगर मि तुमतै बतै देन्दु कि हम बिस्वासी लोग सब कुछ पिता परमेस्वर खुणि करद्‍यां अर हमतै इन्द्रयो इनाम मिलण जैको नास कभि नि होण।</verse>
				<verse number="26">इलै मि बेमतलब मा नि भगदु, अर ना ही बेमतलब मा हवा मा मुक्‍का मरदु।</verse>
				<verse number="27">अर मि अपणा सरील तैं अपणा वश मा रखदु, अर अपणी इच्छा तैं भि अपणा वश मा रखदु। अर इन मि इलै करदु ताकि कखि इन नि हो कि मि सभ्यों तैं पार लगै द्‍यो अर खुद ही छुटी जौं।</verse>
			</chapter>
			<chapter number="10">
				<verse number="1">हे मेरा भै-बैंणो, मि नि चान्दु कि तुम ईं बात तैं बिसरी जा, कि पिता परमेस्वर न हमरा यहूदी लोगु का पितरों तैं मिस्र देस बटि आजादी दिलै। अर वे बगत मा ऊ बादळ का छैल का तौळ चलिनी, अर लाल समुन्दर का बीचों-बीच चलि के दुसरा छाला पर पौंछयै गैनी। अर इन बुले जै सकदु, कि येका द्‍वारा ऊंको बपतिस्मा ह्‍वे अर वु मूसा रैबर्या का चेला बणि गैनी।</verse>
				<verse number="2"></verse>
				<verse number="3">अर ऊंन उई खाणुक खै जु कि चमत्कारिक रुप से परमेस्वर न ऊंतैं दे।</verse>
				<verse number="4">अर ऊंन उई पाणि पेई जु कि चमत्कारिक रुप से परमेस्वर न ऊंतैं दे। अर वा चटान खुद यीशु मसीह को उदारण छै, जु कि मनखियों तैं छुटकारा देणु खुणि परमेस्वर का द्‍वारा चुण्यूं च। अर वे बगत मा वु ऊंका दगड़ा मा छौ अर वेन ऊं खुणि सब कुछ कैरी।</verse>
				<verse number="5">मगर फिर भि भौत सा लोग पिता परमेस्वर का खिलाप मा छा। इलै वु ऊं लोगु से खुश नि छौ, तब वेन ऊंतैं दण्ड दिनी अर वु निर्जन जगा मा मोरि गैनी।</verse>
				<verse number="6">अर वु सभ्या का सभि हम खुणि एक उदारण बणि गैनी, कि हमतै इन्द्रयो मनखि नि बणण चयेणु जु कि बुरी बातों की इच्छा रखदु हो।</verse>
				<verse number="7">अर ना ही तुम मूरतों की पूजा करण वळा बणा, जन कि ऊंमा बटि कथगा ही लोगु न कैरी। अर जन कि पवित्रशास्‍त्र मा भि ऊं लोगु का बारा मा लिख्यूं च कि, “लोग खाण-पीणु कू बैठिनी, अर उठी के नचण अर मौज-मस्ती करण लगि गैनी।”</verse>
				<verse number="8">अर ना हम कै का दगड़ा मा गळत सम्बन्ध रखा, जन ऊंमा बटि कथगा ही लोगु न कैरी। अर ईं बात की वजै से एक ही दिन मा तेईस हजार लोग मरे गैनी।</verse>
				<verse number="9">अर ना ही हम प्रभु तैं परखा कि उ कब तक हमरा दगड़ा मा च, किलैकि ऊंमा बटि भौत सा लोगु न इन्‍नि कैरी छौ। तब ऊंतैं दण्ड मिली, अर गुरौ न ऐके ऊंतैं काटी अर भौत सा लोग इनकै मोरि गैनी।</verse>
				<verse number="10">अर ना ही तुम कुड़कुड़ करण वळा बणा, जन की कथगा ही लोग ऊंमा बटि कुड़कुड़ै छा, अर नास करण वळा दूत का द्‍वारा मरे गैनी।</verse>
				<verse number="11">अर यू सब बात ऊंका दगड़ा ह्‍वेनि, ताकि वु सभ्यों खुणि एक उदारण बणि जा। अर येका बारा मा पवित्रशास्‍त्र मा भि लिख्यूं च, ताकि हम इन नि कैरा जन ऊंन कैरी, किलैकि हम दुनियां का वे बगत मा जीण छां, जु कि आखिरी को बगत च।</verse>
				<verse number="12">अर जु मनखि इन सुचदु कि मि अपणा बिस्वास मा मजबूत छौं, त वेतैं बड़ी साबधानी से अपणा बिस्वास मा और भि जादा मजबूत होण चयेणु, ताकि उ बिस्वास मा डगमगै नि जौ।</verse>
				<verse number="13">अर तुम अभि तक शैतान की बातों का द्‍वारा भकलै नि ग्यां, जु कि तुमतै कुई परेसानी हो। अर अगर जु तुम भकलै जैल्या, त वा तुमरा सौण की ताकत से जादा नि होलि। किलैकि पिता परमेस्वर जु कि सच्‍चु च उई तुमतै हरेक बात सौण की ताकत द्‍यालु, बल्किन मा उ तुमतै शैतान का भकलौण वळी बातों से भि भैर निकळण को बाटु दिखालु।</verse>
				<verse number="14">इलै हे मेरा प्यारा भै-बैंणो, तुम लोग मूरत पूजा से दूर रा।</verse>
				<verse number="15">अर यू सब बात मि तुम लोगु तैं समझदार समझि के बतौणु छौं। अर ज्वा बात मि बोन्‍नु छौं, तुम खुद ही वेको फैसला कैरा कि वा बात सही च या गळत।</verse>
				<verse number="16">अर जब हम प्रभु-भोज खाणु खुणि इकट्‍ठा होनद्‍यां, त इन याद रखा कि यीशु मसीह हमरा खातिर मरे गै। अर जब हम वेका कटोरा मा बटि पिन्द्‍यां, त यीशु मसीह की तारीफ करद्‍यां कि वेको ल्वे हम खुणि बुगये गै। अर ठिक उन्‍नि जब रुट्‍टी तुड़ै जान्दी, त इन याद किये जान्दु कि वेको बदन हम खुणि तुड़ै गै। अर इनकै हम यू परगट करद्‍यां कि हम यीशु मसीह का छां।</verse>
				<verse number="17">जब कि बिस्वास मा त हम भौत सा लोग छां, मगर फिर भि हमरि रुट्‍टी एक ही च, अर वु यीशु मसीह च। अर अलग-अलग होण का बाद भि हम मसीह मा एक छां।</verse>
				<verse number="18">हे मेरा दगड़्यों, जरा इस्राएली लोगु तैं देखा जु कि पिता परमेस्वर खुणि अरपण मा चड़ईं भेंट मदि खनदिन, यां को मतलब त यू च कि वु लोग पिता परमेस्वर का दगड़ा मा सामिल होणा छिन।</verse>
				<verse number="19">हे मेरा दगड़्यों, मेरु बोन्‍न को मतलब यू नि च कि मूरत ज्यून्द छिन, अर जु बलिदान ऊंका अगनै चड़ये जान्दु उ पवित्र च अर वेसे भौत फर्क पोड़दु।</verse>
				<verse number="20">मेरु बोन्‍न को मतलब यू च कि जु कुछ भि मूरतों का अगनै चड़ये जान्दु उ ज्यून्दा पिता परमेस्वर खुणि ना, बल्किन मा उ सब कुछ ऊं दूतों खुणि चड़ये जान्दु जु शैतान का छिन। अर मि इन चान्दु कि तुम लोग बुरी आत्माओं का दगड़ा मा सामिल नि ह्‍वा।</verse>
				<verse number="21">हे मेरा भै-बैंणो, जु खाणुक शैतान का दूतों खुणि चड़ये जान्दु, तुम वेमा सामिल नि ह्‍वा, किलैकि इन करण से हम प्रभु यीशु तैं गुस्सा दिलौणा छां। अर क्या हम अपणा प्रभु से जादा ताकतबर छां? इलै तुम सिरफ वे ही कटोरा मा सामिल ह्‍वा, जु कि हमतै प्रभु यीशु की याद दिलान्दु।</verse>
				<verse number="22"></verse>
				<verse number="23">हे मेरा भै-बैंणो, सब धंणि मि खुणि खूब छिन, मगर मि तुमतै बतै देन्दु, कि सब धंणि मेरा फैदा कि नि छिन। अर मितैं सब कुछ करण की इजाजत च, मगर सब कुछ से मेरी तरक्‍की नि होन्दी।</verse>
				<verse number="24">हरेक मनखि अपणा ही भलै की चिन्ता नि कैरो, बल्किन मा दुसरो की भलै की भि चिन्ता कैरो।</verse>
				<verse number="25">इलै बजारों मा जु कुछ भि लोग बिकौन्दिन, हम वेतैं लेके खै सकदा छां। अर हमतै यू पूछण कि जरुरत नि च, कि यू मूरत का अगनै चड़ये गै कि ना। हमतै बिना सक कियां खाण चयेणु।</verse>
				<verse number="26">किलैकि यां का बारा मा पवित्रशास्‍त्र मा इन लिख्यूं च कि, “धरती अर जु कुछ भि वेमा च प्रभु को ही च।”</verse>
				<verse number="27">अर अगर बिस्वास नि करण वळु मनखि तुमतै दावत मा बुलौ, त जु कुछ भि तुमरा समणि रखै जौ त वेतैं खा, अर अपणा जमीर की वजै से कुछ भि पूछताछ नि कर्यां।</verse>
				<verse number="28">अर अगर कुई आदिम त्वेकू इन बोलो कि, “यू खाणुक त मूरत का अगनै भेंट मा चड़ये गै छौ।” त त्वेतै वे बुलण वळा मनखि की वजै से नि खाण चयेणु। पर अगर जु तू खाणि छैई त कखि इन नि हो कि उ त्वेतै देखि के अपणा मन मा इन सोचो की यू त द्‍यबतों तैं पूरु आदर-सम्मान देणु च। इलै हे मेरा दगड़्यों, मेरी आजादी दुसरा लोगु का द्‍वारा किलै परखै जौ।</verse>
				<verse number="29"></verse>
				<verse number="30">अर अगर जु मि अपणा खाणु खुणि पिता परमेस्वर तैं धन्यवाद देणु छौं, त फिर लोगु को कुई हक नि बणदु कि ऊ मेरी बुरै कैरा। किलैकि मिन त वीं बात खुणि पिता परमेस्वर को धन्यवाद कैरियाली।</verse>
				<verse number="31">इलै चै तुम खा या प्या, जु कुछ भि कैरा वां से पिता परमेस्वर की बडै हो।</verse>
				<verse number="32">हे मेरा दगड़्यों, तुम इन्द्रयो कुई भि काम नि कैरा ज्या से की लोग अपणा-अपणा बिस्वास से भटकी जा, अब चै वु यहूदी जाति का छिन या फिर ना, अर ना ही तुम बिस्वासी समुदाय का लोगु खुणि इन्दरि वजा बणा।</verse>
				<verse number="33">अर ठिक जन मि सब बातों मा सब लोगु तैं खुश रखदु, अर मि अपणु ही फैदा कि ना, बल्किन मा भौत सा लोगु की चिन्ता करदु, ठिक इन्‍नि तुम भि कैरा ताकि भौत सा लोगु तैं बचयै जौ।</verse>
			</chapter>
			<chapter number="11">
				<verse number="1">हे मेरा भै-बैंणो, मेरु चाल-चलन यीशु मसीह का जन च, इलै तुमरो चाल-चलन भि मि जन हो।</verse>
				<verse number="2">दगड़्यों, तुम मेरी हर बात तैं याद रखद्‍यां, अर ज्वा शिक्षा अर जु-जु नियम मिन तुमतै बतैनि, तुम ऊंको पालन करद्‍यां, इलै ईं बात मा मि तुमरि तारीफ करदु।</verse>
				<verse number="3">पर फिर भि मि तुमतै इन बतौण चान्दु, कि इन जाणि ल्या कि हरेक बैख पर यीशु मसीह को अधिकार च, अर हरेक जनानि पर वींका पति को अधिकार च। अर यीशु मसीह पर पिता परमेस्वर को अधिकार च।</verse>
				<verse number="4">अर हरेक वु बैख जु अपणु मुण्ड़ ढाकी के प्रार्थना या भविष्यबाणी करदु, वु अपणा मसीह को अपमान करदु।</verse>
				<verse number="5">अर ज्वा जनानि मुण्ड़ ढाकी के प्रार्थना या भविष्यबाणी नि करदी, वा अपणा पति को अपमान करदी, किलैकि इन्दरि जनानि वीं जनानि का जन च जिं को मुण्ड़ मुडयु हो।</verse>
				<verse number="6">अर अगर एक जनानि अपणु मुण्ड़ नि ढकौ, त वा अपणा बाळ भि कटै द्‍यो। अर अगर वा बाळ कटौण या मुण्ड़ मुडौण सरम की बात समझदी, त वींतैं अपणु मुण्ड़ ढकौण चयेणु।</verse>
				<verse number="7">एक बैख तैं अपणु मुण्ड़ नि ढकौण चयेणु, किलैकि परमेस्वर न वेतैं अफ जन ही बणै जन उ खुद च अर अपणी महानता वे पर परगट कैरी, मगर एक जनानि त अपणा पति कि महानता तैं परगट करदी।</verse>
				<verse number="8">अर इन इलै च, किलैकि बैख तैं जनानि का द्‍वारा नि बणयै गै, बल्किन मा पिता परमेस्वर न जनानि तैं बैख की पसलि बटि बणै।</verse>
				<verse number="9">अर बैख तैं जनानि का बानो ना, बल्किन मा जनानि तैं बैख की खातिर बणयै गै।</verse>
				<verse number="10">इलै एक जनानि तैं अपणा मुण्ड़ मा कपड़ा रखण चयेणु, ज्यां से इन पता चलु कि वा अपणा पति की इज्‍जत करदी, किलैकि स्वर्गदूत भि सब दिखदिन कि परमेस्वर की भक्‍ति का बगत मा तुमरा इख क्या च होणु।</verse>
				<verse number="11">पर फिर भि प्रभु का इंतजाम का मुताबिक जनानि बैख का बिना कुछ भि नि च, अर ठिक उन्‍नि बैख भि जनानि का बगैर कुछ नि च।</verse>
				<verse number="12">किलैकि हम जणदा छां, कि पैलि जनानि बैख का सरील से बणयै गै, मगर वेका बाद से हरेक बैख को जनम जनानि का सरील बटि ही होन्दु। अर इनकै पता चलदु कि जु कुछ भि बणदु उ सब कुछ परमेस्वर की तरफा बटि च।</verse>
				<verse number="13">अब तुम खुद ही सोचा, कि क्या या सही बात च कि एक जनानि बगैर मुण्ड़ ढक्यां परमेस्वर से प्रार्थना कैरो?</verse>
				<verse number="14">अर मनखि सभौ होण का नाता क्या तुमुन या बात नि सिखी? कि अगर एक बैख बाळ लम्बा रखदु, त यू वे खुणि सरम कि बात च।</verse>
				<verse number="15">अर अगर एक जनानि बाळ लम्बा रखदी, त वा और भि जादा सुन्दर दिख्योन्दि, किलैकि लम्बा बाळ रखण एक जनानि खुणि मुण्ड़ ढकौण खुणि ही छिन।</verse>
				<verse number="16">अर अगर कुई आदिम ईं बात की वजै से बहस कन चान्दु हो, त उ इन जाणि ल्यो कि नऽ त हमरा इख इन्द्रयो दस्तूर च, अर ना ही कै दुसरा बिस्वासी समुदाय मा, कि जनानियां परमेस्वर की भक्‍ति का दौरान प्रार्थना या फिर वचन सुनौण का बगत मा अपणा मुण्ड़ पर कपड़ा नि रखदी हो।</verse>
				<verse number="17">हे मेरा भै-बैंणो, येसे पैलि कि मि तुमतै और आज्ञा द्‍यूं, ईं बात मा मि तुमरि जरा भि तारीफ नि करदु, किलैकि जब तुम इकट्‍ठा होनद्‍यां, त भलै की जगा बुरै ही होन्दी।</verse>
				<verse number="18">किलैकि सबसे पैलि बात त या च, कि मिन तुमरा बारा मा इन सुणी कि जब बिस्वासी लोगु को समुदाय इकट्‍ठा होन्दु, त लोग अपणा आपस मा दल बणौणा छिन। अर जु कुछ भि मितैं पता चलि वामा बटि कुछ-कुछ बातों पर मितैं यकीन च।</verse>
				<verse number="19">फिर तुमरा बीच मा दल को होण भि जरुरी च, ताकि इन पता चलि जौ कि कु-कु छिन जु कि खरै से चलणा छिन।</verse>
				<verse number="20">अर जब तुम एक जगा मा इकट्‍ठा होनद्‍यां कि प्रभु-भोज तैं खौला, मगर यू इथगा भि लैख नि च कि ये कू प्रभु-भोज बुले जौ।</verse>
				<verse number="21">किलैकि जब वेतैं खाण को बगत औन्दु, त तुम मा बटि कुछ लोग पैलि ही प्रभु-भोज तैं खै देन्दिन, अर इन कैरिके ऊ अपणु पुटगु भोरी देन्दिन अर कुछ त धुत भि ह्‍वे जनदिन, मगर कुछ इन होनदिन जौं खुणि यू बचदु भि नि च।</verse>
				<verse number="22">अरे, क्या खाण-पीणु खुणि तुमरा घौर-बार नि छिन या तुम परमेस्वर का समुदाय को अपमान करण चन्द्‍यां? अर क्या तुम ऊं गरीबों पर इन जतौण चन्द्‍यां कि ऊंको समुदाय मा कुई आदर-सम्मान नि च? अर तुम इन चन्द्‍यां कि मि फिर भि तुमरि तारीफ कैरुं? नऽ रे ना, ईं बात मा मिन तुमरि जरा भि तारीफ नि करण।</verse>
				<verse number="23">हे मेरा भै-बैंणो, ज्वा बात प्रभु की तरफा बटि मितैं मिली, वा ही बात मिन तुमतै सिखै कि प्रभु यीशु मसीह जिं रात वेतैं पकड़वै गै, वीं ही रात पकड़वै जाण से पैलि वेन रुट्‍टी ले,</verse>
				<verse number="24">अर प्रार्थना मा धन्यवाद देण का बाद वेन वा तोड़ि अर बोलि, “यू मेरु बदन च, जु कि तुमरा बानो दिये जान्दु, मेरी याद मा तुम इन्‍नि कना रयां।”</verse>
				<verse number="25">अर खाणुक खाण का बाद वेन कटोरा उठे अर बोलि, “यू कटोरा मेरा ल्वे द्‍वारा बणयूं नयू करार को चिन्‍न च, जब भि तुम येतैं पील्या त मेरी याद मा तुम इन्‍नि कना रयां।”</verse>
				<verse number="26">अर जब कभि भि तुम ईं रुट्‍टी तैं खन्द्‍यां या ये कटोरा मा बटि पिन्द्‍यां, अर जब तक प्रभु ऐ नि जौ, तब तक तुम वेकी मौत का बारा मा परचार कना रयां।</verse>
				<verse number="27">इलै अगर जु तुम मा बटि कुई भि मनखि पैलि अपणा मन की जाँच-पड़ताल नि कैरो अर प्रभु-भोज की रुट्‍टी अर वेका कटोरा मा बटि खान्दु-पीन्दु हो, त इन्द्रयो मनखि प्रभु यीशु का सरील अर वेका ल्वे को अपमान कैरिके पाप का इळजाम तैं अपणा मथि लेके औन्दु।</verse>
				<verse number="28">इलै हरेक मनखि पैलि अपणी जाँच-पड़ताल कैरो, कि उ प्रभु-भोज तैं खाण का लैख छैई भि च कि नि च। तब वेका बाद उ मनखि रुट्‍टी मा बटि खौऽ अर वे कटोरा मा बटि प्यों।</verse>
				<verse number="29">इलै जु कुई खान्दु-पीन्दु च, अगर उ प्रभु का सरील की पछ्याण नि रखदु, अर बिना जाँच-पड़ताल कियां खान्दु-पीन्दु, त इन कैरिके उ खुद पर दण्ड लेके औन्दु।</verse>
				<verse number="30">इलै ही तुमरा बीच मा भौत सा लोग कमजोर अर बिमार छिन, अर कई त मोरि भि गैनी।</verse>
				<verse number="31">अगर जु हम खुद की जाँच-पड़ताल कैरा कि हम असल मा कन छां, त हमतै दण्ड नि मिलदु।</verse>
				<verse number="32">मगर प्रभु हमतै इलै दण्ड देन्दु, ताकि हमरा जीवन मा सुधार हो, अर न्याय का दिन मा हम ईं दुनियां का लोगु का दगड़ा मा दोषी ठैरि के दण्ड नि पा।</verse>
				<verse number="33">इलै हे मेरा भै-बैंणो, जब तुम प्रभु-भोज को खाणुक खाणु खुणि इकट्‍ठा होनद्‍यां, त एक-दुसरा का बारा मा सोचा।</verse>
				<verse number="34">अर अगर कैतैं जादा ही भूक लगि च, त वु अपणा घौर मा पैलि ही खै ल्यो, ताकि इकट्‍ठा होण का बगत पर तुम दण्ड पौण की वजा नि बणा। अर जु-जु बात अभि भि रै गैनी ऊं सब बातों तैं मि फिर से तुमरा पास ऐके खुद ही सुधारी द्‍यूलु।</verse>
			</chapter>
			<chapter number="12">
				<verse number="1">अब हे मेरा भै-बैंणो, मि चान्दु छौं कि तुम परमेस्वर की पवित्र आत्मा का द्‍वारा मिलण वळा दान-बरदानों का बारा मा जणदा ही छा।</verse>
				<verse number="2">अर जब तुम ज्यून्दा पिता परमेस्वर तैं नि जणदा छा, तब तुमरो जीवन कन छौ वांका बारा मा भि तुम जणदा ही छाँ। अर वे बगत त तुम बेजान मूरतों की पूजा करदा छा, अर ऊंका पिछनै चलदा छा, अर जन तुमतै बतये जान्दु छौ तुम उन्‍नि करदा छा।</verse>
				<verse number="3">इलै मि तुमतै समझै देन्दु कि अगर कुई इन बुल्दु कि, “यीशु ही प्रभु च” त वु केवल परमेस्वर की आत्मा का बतै जाण का मुताबिक ही इन बुल्दु, अर इन्द्रयो मनखि कभि भि इन नि बोलि सकदु कि, “यीशु पर हाय च।”</verse>
				<verse number="4">अर दान-बरदान कई किसम का छिन, पर परमेस्वर की पवित्र आत्मा एक ही च।</verse>
				<verse number="5">अर सेवा भि कई किसम की छिन, पर प्रभु एक ही च।</verse>
				<verse number="6">अर ठिक उन्‍नि काम भि कई किसम का छिन, मगर पिता परमेस्वर ही च जु कि हरेक काम तैं पूरु करण मा हमरि मदद करदु।</verse>
				<verse number="7">अर बिस्वासी लोगु की भलै खुणि पिता परमेस्वर न हम सभ्यों तैं पवित्र आत्मा को बरदान दिनी।</verse>
				<verse number="8">जन कि कुछ लोगु तैं पवित्र आत्मा का द्‍वारा ज्ञान कि बात करण को बरदान मिल्यूं च, त कुछ लोगु तैं पवित्र आत्मा बटि समझौणु खुणि अकल मिली च।</verse>
				<verse number="9">अर वे ही पवित्र आत्मा का द्‍वारा कुछ लोगु तैं बिस्वास मा और जादा मजबूत होण को बरदान मिलदु, त कैतैं पवित्र आत्मा का द्‍वारा बिमारों तैं खूब करण को बरदान मिल्यूं च।</verse>
				<verse number="10">अर कुछ लोग तैं चमत्कार का काम करण की ताकत मिली च, त कुछ लोगु तैं भविष्यबाणी करण की ताकत, अर कुछ लोगु तैं आत्माओं तैं परखण कि सामर्थ मिली च, अर कुछ लोगु तैं अलग-अलग भाषा मा बुलण को बरदान मिल्यूं च। अर जु लोग अलग-अलग भाषा मा बुल्दिन, कुछ लोगु तैं वीं भाषा तैं आम बोल-चाल मा समझौण को बरदान मिल्यूं च।</verse>
				<verse number="11">अर यू सब काम एक ही पवित्र आत्मा का द्‍वारा होनदिन। अर पिता परमेस्वर कै मनखि तैं क्या बरदान देण चाणु यू सब वु अपणी मनसा का मुताबिक ही करदु।</verse>
				<verse number="12">हे मेरा भै-बैंणो, जन कि हमरा सरील मा कई अंग छिन, फिर भि हमरु एक ही सरील च, ठिक उन्‍नि हम सभ्या का सभि लोग जौन यीशु मसीह पर बिस्वास कैरी वेका अंग छां।</verse>
				<verse number="13">अर हम बिस्वासी लोगु मा कुछ यहूदी जाति का छिन, अर कुछ लोग दुसरि जाति का छिन, अर कुछ लोगु गुलाम, त कुछ लोग आजाद छिन। पर हम सभ्या का सभि एक सरील ह्‍वे जां, इलै हम सभ्यों को एक ही पवित्र आत्मा का द्‍वारा बपतिस्मा ह्‍वे। अर पवित्र आत्मा वे पाणि का जन च जैतैं हम सभ्यों न एक कटोरा मा बटि पै।</verse>
				<verse number="14">हमरा सरील मा एक ही अंग नि च, बल्किन मा ये मा त कई अंग छिन।</verse>
				<verse number="15">अर अगर खुटा इन बुलला कि, “मि हाथ नि छौं, इलै मि सरील को हिस्सा नि छौं,” त इन बोन्‍न से क्या वु सरील को हिस्सा नि च?</verse>
				<verse number="16">अर अगर कन्दूड़ इन बोलो कि, “मि आंख नि छौं, इलै मि शरीर को हिस्सा नि छौं,” त इन बोन्‍न से क्या वु सरील को हिस्सा नि च?</verse>
				<verse number="17">अर अगर जु पूरु सरील आंख ही होन्दु, त सुणदा कनकै? अर अगर पूरु सरील कन्दूड़ ही होन्दु त सुन्घदा कनकै?</verse>
				<verse number="18">अर अगर सरील का सब अंग एक होन्दा, त फिर वेकू सरील नि बुले जान्दु। इलै पिता परमेस्वर ही च जैन सच्‍चि मा अपणी मनसा का मुताबिक हमरा पूरा सरील का सब अंगो तैं एकजुट कैरिके रख्युं च।</verse>
				<verse number="19"></verse>
				<verse number="20">अर अलग-अलग अंग होण का बाद भि सरील एक ही च।</verse>
				<verse number="21">अर आंखा हाथ कू नि बोलि सकदिन, “मितैं तेरी कुई जरुरत नि च,” या मुण्ड़ खुटों कू नि बोलि सकदु कि, “मितैं तुमरि कुई जरुरत नि च।”</verse>
				<verse number="22">मगर हमरा सरील का जु अंग दुसरा अंगो से कमजोर छिन, असल मा वु ही भौत जरुरी छिन।</verse>
				<verse number="23">अर सरील का जौं अंगो तैं हम कम इज्‍जत का लैख समझद्‍यां, ऊंतैं हम ढाकी के रखद्‍यां अर ऊंतैं और भि जादा इज्‍जत देन्द्‍यां। अर इन कैरिके सरील का जु अंग इज्‍जत का लैख नि समझै जनदिन, ऊंतैं और भि जादा इज्‍जत मिलदी।</verse>
				<verse number="24">पर जौं अंगो तैं हम दुसरो तैं दिखौण मा दिक्‍कत नि समझद्‍यां, ऊं अंगो तैं हम कपड़ों से नि ढकौन्द्‍यां। पर पिता परमेस्वर न हमरा सरील तैं कुछ इन बणै कि जौं अंगो तैं हम कम इज्‍जत देन्द्‍यां ऊंतैं ही हम अच्छे से रखद्‍यां।</verse>
				<verse number="25">अर पिता परमेस्वर न इन इलै कैरी, ताकि हमरा सरील का सब अंग एकजुट ह्‍वेके रा। अर एक-दुसरे की पूरि फिकर कैरिके अच्छे से काम कैरी सैका।</verse>
				<verse number="26">अर जब सरील को एक अंग तैं दुख मिलदु, त हमरा पूरा सरील तैं तकलीफ होन्दी। ठिक उन्‍नि अगर एक तैं इज्‍जत मिलदी, त सरील का दुसरा अंग वेका दगड़ा-दगड़ि खुश होनदिन।</verse>
				<verse number="27">अर मि तुमतै बतै देन्दु, कि ठिक इन्‍नि तुम बिस्वासी लोग भि यीशु मसीह का सरील का अंग छाँ।</verse>
				<verse number="28">हे मेरा भै-बैंणो, तुम जु मसीह का अंग छाँ, तुम बिस्वासी समुदाय का लोगु तैं पिता परमेस्वर न चुणी, पैलि त खास चेला का रुप मा, दुसरा रैबर्या का रुप मा, तिसरा शिक्षा देण वळा। अर वेका बाद वेन ऊं लोगु तैं भि चुणी जौं का द्‍वारा वु चमत्कार का काम करदु, बिमारों तैं खूब करदु, अर वेन ऊंतैं भि चुणी जौं का द्‍वारा उ दुसरो की मदद करदु, अर ऊंतैं भि जु कि हर चीज को इंतजाम करौन्दिन, अर अलग-अलग भाषा बुलण वळा सब लोगु तैं वेन ही चुणी।</verse>
				<verse number="29">इलै सब लोग खास चेला नि होनदिन, अर ना ही सब रैबर्या। अर उन्‍नि सब लोग वचन सिखौण वळा नि होनदिन, अर ना ही सब चमत्कार करण वळा छिन।</verse>
				<verse number="30">अर नऽ ही सब लोग बिमारों तैं खूब कैरी सकदिन, अर ना ही सब लोग अलग-अलग भाषा बोलि सकदिन। अर ना ही सब लोगु तैं इन बरदान मिल्यूं च कि वु अलग-अलग भाषा को अनुवाद कैरिके आम बोल-चाल मा वेको मतलब बतै सैका।</verse>
				<verse number="31">इलै पवित्र आत्मा का द्‍वारा बड़ु से बड़ु बरदान पौण की इच्छा रखा। अर अब मि तुमतै जीवन जीण को सबसे अच्छु बाटु बतौन्दु।</verse>
			</chapter>
			<chapter number="13">
				<verse number="1">अगर मितैं मनखियों अर स्वर्गदूतों की भाषा बुलण औन्दी हो, पर मि दुसरो से प्यार नि कैरुं, त क्या फैदा च फिर? तब मि वे पितळा भाँडा जन छौं जु ठन-ठन बजदु, अर वीं डफ का जन छौं ज्वा की डम-डम बजदी।</verse>
				<verse number="2">अर अगर मितैं भविष्यबाणी करण को बरदान मिल्यूं हो अर मि मा सब पवित्र राज की जानकारी या ज्ञान हो, अर अगर मितैं इथगा बिस्वास हो कि मि वेकी ताकत से पाड़ो तैं इख बटि उख कैरी द्‍यूं, पर दुसरा लोगु से मि प्यार नि कैरुं, त फिर मि कुछ भि नि छौं।</verse>
				<verse number="3">अर अगर मि अपणी पूरि धन-दौलत गरीब लोगु मा बांटि द्‍यूं, अर अपणा सरील तैं आग मा भि बलिदान होण खुणि दे द्‍यूं, मगर दुसरा लोगु तैं मि प्यार नि कैरुं त यों सब बातों को कुई भि फैदा नि च।</verse>
				<verse number="4">अर जु मनखि दुसरो बटि प्यार करदु वेका भितर सबर, दया अर दुसरा लोगु से प्यार करण को गुण होन्दु। इन्द्रयो मनखि नऽ त दुसरा लोग तैं देखि के जळतेन्दु, नऽ त डींग मरदु, अर ना ही उ बड़ु मोन करदु।</verse>
				<verse number="5">नऽ त उ गळत बरतौ करदु, अर नऽ त गुस्सा करदु, अर ना ही बुरै करण वळा लोगु बटि बदला लेन्दु, इन्द्रयो मनखि अपणी ही भलै नि सुचदु, बल्किन मा एक-दुसरा तैं माफ करदु।</verse>
				<verse number="6">इन्द्रयो मनखि बुरै से खुश नि होन्दु, बल्किन मा सच्‍चै की बातों मा अपणी खुशी मणौन्द,</verse>
				<verse number="7">अर प्यार लोगु तैं मतलबी ना, बल्किन मा सब कुछ सौण वळु बणै देन्दु इन्द्रयो मनखि दुसरो खुणि अच्छा विचार रखदु, अर हर बात मा सबर रखदु।</verse>
				<verse number="8">प्यार कभि खतम नि होन्दु, मगर भविष्यबाणी करण को बरदान चलि जालु। अर उन्‍नि अलग-अलग भाषा बोन्‍न को बरदान भि चलि जालु। अर चै कै मनखि का पास भौत ज्ञान च, त वु चलि जालु, मगर प्यार कभि भि खतम नि होलु।</verse>
				<verse number="9">किलैकि हमतै जु ज्ञान या भविष्यबाणी करण को बरदान मिल्यूं च, उ पूरु नि च, बल्किन मा अधा ही च।</verse>
				<verse number="10">मगर जब प्रभु यीशु आलु, त जु कुछ भि अधा च वु सब खतम ह्‍वे जालु।</verse>
				<verse number="11">हे मेरा भै-बैंणो, जब मि बच्‍चा छौ, त बच्‍चों की तरौं बात करदु छौ अर मेरी समझ भि बच्‍चों का ही जन छै, पर अब मि स्याणु ह्‍वे ग्यों, इलै मिन अपणु बचपना छोड़याली।</verse>
				<verse number="12">अर जन कुयेडा मा साफ-साफ नि दिखेन्दु ठिक उन्‍नि अभि हमतै पिता परमेस्वर साफ नि दिखेन्दु, पर एक दिन आलु जब हम वेतैं अमणि-समणि दिखुला। अर अभि त हमतै वेका बारा मा कुछ ही पता च, मगर जब वु आलु त जन वेतैं हमरा बारा मा पूरु पता च, ठिक उन्‍नि हमतै भि वेका बारा मा पूरु पता चलि जाण।</verse>
				<verse number="13">इलै हे मेरा दगड़्यों, पिता परमेस्वर पर हमतै अपणी आस अर बिस्वास बणै के रखण चयेणु, अर हमेसा सब लोगु से प्यार करण चयेणु, किलैकि सब बात यों तीनों चीजों पर ही टिकी छिन। मगर यों तीनों मा बटि सबसे बड़ी बात या च कि, हमतै सब लोगु से प्यार करण चयेणु।</verse>
			</chapter>
			<chapter number="14">
				<verse number="1">अर सबसे पैलि बात त या ही च, कि हम अपणा पूरा दिल से सब लोगु से प्यार कैरा। अर पिता परमेस्वर बटि बड़ु बरदान पौण की इच्छा रखा। अर ज्वा बात सबसे भली च वा या च कि भविष्यबाणी करण की ताकत रखा।</verse>
				<verse number="2">किलैकि जु मनखि अलग-अलग भाषा मा बुल्दु, वु मनखियों का दगड़ा मा ना, बल्किन मा पिता परमेस्वर से बात करदु। अर इन्द्रयो मनखि पवित्र आत्मा का द्‍वारा पवित्र राज बतौन्दु, मगर कुई दुसरो मनखि वेकी बातों तैं समझि नि सकदु।</verse>
				<verse number="3">पर जु मनखि भविष्यबाणी करदु, उ अपणी बातों का द्‍वारा बिस्वासी समुदाय का लोगु का दगड़ा मा बात करदु, अर ऊंका बिस्वास तैं मजबूत करदु। अर ऊंकी हिम्मत बढै के ऊंका दिलों तैं दिलासा देन्दु।</verse>
				<verse number="4">इलै जु मनखि अलग-अलग भाषा मा बुल्दु, उ केवल खुद का बिस्वास तैं मजबूत करदु, मगर जु भविष्यबाणी करदु उ समुदाय का लोगु तैं मजबूत करदु।</verse>
				<verse number="5">मि चान्दु, कि तुम सभ्या का सभि ऊं सब भाषाओं मा बात कैरा, जु कि तुमुन सिखी नि छिन, मगर मि इन भि चान्दु, कि तुम सभ्या का सभि भविष्यबाणी कैरा, किलैकि जु मनखि भविष्यबाणी करदु उ वे मनखि से बढी के च जु अलग-अलग भाषा मा बात करदु। अर अगर दुसरि भाषा बोन्‍न वळु मनखि अपणी बातों को मतलब आम बोल-चाल मा नि बतै सैको, त वेकी बुलिं बातों से बिस्वासी समुदाय का लोग मजबूत नि ह्‍वे सकदिन।</verse>
				<verse number="6">इलै हे मेरा भै-बैंणो, अगर अभि मि तुमरा पास ऐके दुसरि भाषा मा बात कैरुं जींतैं तुम नि जणदा हो, त तुमरो भलु कनकै होलु? अर अगर मि तुमरा पास ऐके तुमतै इन बतौ कि पिता परमेस्वर न मितैं क्या-क्या बतै या मि वेका बारा मा मि तुमतै समझौ, त या बात ही तुमरा फैदे की च।</verse>
				<verse number="7">अर अगर कुई बांसुळि बजौन्दु हो, या बीणा बजौन्दु हो, अर अगर वेतैं इन पता नि हो कि आखिर यू कनकै बजौण, त सुनण वळा लोगु तैं कनकै पता चलण कि आखिर यू बजौणु क्या च।</verse>
				<verse number="8">अर अगर बिगुला बटि साफ-साफ आवाज नि निकळो, त लड़ै मा जाणु खुणि कु तयार होलु?</verse>
				<verse number="9">ठिक इन्‍नि जब तुम इन्दरि भाषा मा बुल्द्‍यां, ज्वा कि कै का समझ मा नि अऽ कि तुम बोन्‍ना क्या छाँ, त यू सब कुछ ऊं खुणि हवा चलण का जन च।</verse>
				<verse number="10">हे मेरा दगड़्यों, ईं दुनियां मा कई किसम की भाषा छिन, मगर हरेक भाषा को कुई ना कुई मतलब जरुर होन्दु।</verse>
				<verse number="11">अगर कुई मनखि हमरा पास ऐके इन्दरि भाषा मा बात कैरो, ज्वा हमतै नि औन्दी हो, त हमरि नजर मा वु मनखि परदेसी च, अर ठिक उन्‍नि हम वे मनखि खुणि परदेसी छां।</verse>
				<verse number="12">अर तुम लोग जु कि पूरा जोस से पवित्र आत्मा का बरदान तैं पौण की मनसा करद्‍यां, यों बरदानों से भरपूर होण की पूरि कोसिस कैरा, ताकि बिस्वासी समुदाय का लोगु की तरक्‍की ह्‍वे सैको।</verse>
				<verse number="13">इलै जु मनखि दुसरि भाषा मा बुल्दु, उ पिता परमेस्वर से इन भि प्रार्थना कैरो कि उ वीं भाषा को मतलब आम बोल-चाल मा भि बतै सैको, ताकि सब लोग समझि सैका।</verse>
				<verse number="14">अर इन मि इलै बोन्‍नु छौं, किलैकि अगर मि दुसरि भाषा मा प्रार्थना करदु, त ईं बात तैं जाणि ल्या कि या त केवल मेरी आत्मा च ज्वा कि पिता परमेस्वर से प्रार्थना कनि च, मगर मेरु मन वेमा सामिल नि च।</verse>
				<verse number="15">इलै हे मेरा भै-बैंणो, इन्दरि हालत मा क्या कन चयेणु? मि बस इन चान्दु कि जब मि पवित्र आत्मा का द्‍वारा प्रार्थना कैरुं, त लोग भि वीं बात तैं समझि सैका। अर जब मि पवित्र आत्मा का द्‍वारा आत्मिक भजन गौं, त मेरा दगड़ा का लोग ऊं भजनों को मतलब समझि सैका।</verse>
				<verse number="16">अर जब तू पवित्र आत्मा का द्‍वारा परमेस्वर की बडै दुसरि भाषा मा करली, त जिं भाषा तैं बिस्वासी समुदाय का लोग नि समझदिन, त वु तेरा दियां धन्यवाद मा कनकै “आमीन” बुलला, किलैकि ऊंका बिंगण मा कुछ नि च औणु।</verse>
				<verse number="17">अर ईं बात मा कुई सक नि च, कि तिन पवित्र आत्मा का द्‍वारा पिता परमेस्वर को खूब धन्यवाद देई, पर यां से दुसरा लोगु का बिस्वास मा कुई तरक्‍की नि ह्‍वे।</verse>
				<verse number="18">हे मेरा भै-बैंणो, मि खुद अलग-अलग भाषाओं मा बुल्दु। अर ये मामला मा कुई मनखि भि मेरी बराबर नि कैरी सकदु, अर यों सब बातों खुणि मि पिता परमेस्वर को धन्यवाद देन्दु।</verse>
				<verse number="19">इलै मि बिस्वासी समुदाय मा ऊं भाषाओं को इस्तेमाल नि करदु, किलैकि मि खुणि या बात जादा फैदे की च कि मि अपणा ज्ञान मा बटि जण चर-एक बात ही कैरुं, ताकि सब बिस्वासी लोग समझि सैका अर मजबूत ह्‍वे जा। अर अगर जु मि भौत सरी बात बोललु, अर कै की समझ मा कुछ भि नि अऽ, त फिर क्या फैदा ह्‍वे अर इन करण से कुछ भि नि होण।</verse>
				<verse number="20">हे मेरा भै-बैंणो, तुम अपणी सोच तैं छुटा बच्‍चों की तरौं नि बणा, बल्किन मा समझदार बणा। अर अगर जु तुम बच्‍चों की तरौं ही बणण चन्द्‍यां, त बुरै खुणि बणा। अर या बात मि इलै बोन्‍नु छौं, किलैकि बच्‍चा कै की बुरै का बारा मा नि सोचदिन। अर जख तक पिता परमेस्वर की खासियत का बारा मा बात च, त तुम लोग स्यांणा लोगु की तरौं सोच रखा।</verse>
				<verse number="21">किलैकि पवित्रशास्‍त्र मा भि लिख्यूं च, अर वीं बात तैं खुद प्रभु बुल्दु ज्वा कि इन च कि, “मि अपणा लोगु का दगड़ा मा दुसरि जाति का लोगु का द्‍वारा अलग-अलग भाषा मा बात करलु, पर फिर भि मेरा लोग मेरी बात पर ध्यान नि द्‍याला।”</verse>
				<verse number="22">इलै अलग-अलग भाषा मा बुलण बिस्वासी लोगु खुणि ना, बल्किन मा ऊं लोगु खुणि एक चिन्‍न च जु कि बिस्वास नि करदिन। मगर भविष्यबाणी बिस्वासी लोगु खुणि एक चिन्‍न च यू ऊं लोगु खुणि नि च जु बिस्वास नि करदिन।</verse>
				<verse number="23">इलै अगर जु बिस्वासी समुदाय का सब लोग एक जगा इकट्‍ठा हो, अर ऊ सभ्या का सभि अलग-अलग भाषा मा बोन्‍ना हो, अर अगर कुई मनखि तुमरा बीच मा ऐ जौ जु कि बिस्वास नि हो, त क्या उ इन नि बोललु कि यू लोग बौल्या ह्‍वे गैनी?</verse>
				<verse number="24">अर जब तुम भविष्यबाणी करद्‍यां, अर वे ही बगत बिस्वास नि करण वळु कुई मनखि या कुई भि आम आदिम जैतैं पवित्र आत्मा की ताकत का बारा मा पता नि हो तुमरा बीच मा ऐ जौ, तब उ सब बातों तैं सुणी के मणलु कि, “मि एक पापि मनखि छौं अर परमेस्वर का दण्ड का लैख छौ।”</verse>
				<verse number="25">तब वेतैं इन मैसूस होलु कि पिता परमेस्वर वेका सब कामों का बारा मा जणदु च, जु वेन कैरी छिन। तब उ भ्वीं मा पोड़ि के पिता परमेस्वर की भक्‍ति करलु अर बुललु “सच्‍चि मा ज्यून्द पिता परमेस्वर तुमरा बीच मा च।”</verse>
				<verse number="26">इलै हे मेरा भै-बैंणो, तुमतै क्या-क्या कन चयेणु उ अब मि तुमतै बतौन्दु, जब तुम परमेस्वर की भक्‍ति करणु खुणि एक जगा इकट्‍ठा होनद्‍यां, त पवित्र आत्मा का द्‍वारा तुम मा बटि कई लोग पिता परमेस्वर का भजन गन्दिन, अर कुछ शिक्षा देन्दिन। अर अगर कै मनखि पर कुछ परगट किये गै, त उ वीं बात का बारा मा बतौन्दु। अर कुछ लोग पवित्र आत्मा का द्‍वारा अलग-अलग भाषा मा बात करदिन, त कुछ वीं भाषा को मतलब आम बोल-चाल मा बतौन्दिन। अर यू सब कुछ पिता परमेस्वर का द्‍वारा किये जान्दु, ताकि एक-दुसरे की तरक्‍की हो अर सब लोग आत्मिक रुप से मजबूत होन्दी जा।</verse>
				<verse number="27">अर अगर दुसरि भाषा मा बुलण वळु ही हो, त दुई या जादा से जादा तीन आदिम हो अर वु भि एक-एक कैरिके बोला। अर दुसरो मनखि वीं भाषा को मतलब आम बोल-चाल मा बतौ, ताकि सब लोग समझि सैका।</verse>
				<verse number="28">अर अगर समुदाय का बीच मा आम बोल-चाल मा मतलब बतौण वळु कुई भि नि हो, त इन्द्रयो मनखि तैं समुदाय मा चुपचाप ही रौण चयेणु, अर पिता परमेस्वर का दगड़ा मा अपणा मन मा ही बात करण चयेणी।</verse>
				<verse number="29">अर रैबर्यों मा बटि दुई या तीन लोग ही बोला, अर समुदाय का लोग वेकी बातों तैं परखा की वु क्या च बोन्‍नु।</verse>
				<verse number="30">अर अगर समुदाय का बीच बैठयां लोगु मा बटि कै का द्‍वारा राज की कुई बात परगट किये जाणि हो, त जु पैलि बुलण छौ वेतैं चुप ह्‍वे जाण चयेणु।</verse>
				<verse number="31">अर एक रैबर्या अपणी आत्मा तैं काबू मा रखी सकदु च, किलैकि तुम सब एक-एक कैरिके भविष्यबाणी कैरी सकद्‍यां, ताकि सब लोग सिखी सैका अर सभ्यों तैं हिम्मत मिलु।</verse>
				<verse number="32"></verse>
				<verse number="33">किलैकि परमेस्वर गड़बड़ी कन वळु परमेस्वर नि च, बल्किन मा शान्ति को परमेस्वर च। जन कि पवित्र लोगु का समुदाय मा भि होन्दु,</verse>
				<verse number="34">अर परमेस्वर की भक्‍ति का दौरान जनानियों तैं अपणा आपस मा बात नि करण चयेणी च। अर जन कि मूसा का द्‍वारा दियां नियम-कानून मा इन लिख्यूं च ऊंतैं परचार का दौरान ध्यान से सुनण चयेणु।</verse>
				<verse number="35">अर अगर वु कुछ सिखण चाणि छिन, त अपणा-अपणा घौर मा जैके अपणा पति बटि पूछा, किलैकि बिस्वासी समुदाय का बीच मा सवाल-जबाब कैरिके कखि वा सभा तैं ही भंग नि कैरी द्‍यो।</verse>
				<verse number="36">अर ईं बात तैं याद रखा कि पिता परमेस्वर को वचन सबसे पैलि तुमरा पास नि पौंछी, अर ना ही तुमुन सबसे पैलि वेको परचार कैरी।</verse>
				<verse number="37">अर अगर तुमरा बीच मा कुई मनखि इन सुचदु कि उ पिता परमेस्वर को रैबर्या च, या वेतैं पवित्र आत्मा को बरदान मिल्यूं च, त उ ईं बात तैं स्वीकार कैरो जु मि तुम खुणि लिखणु छौं, यू आदेस मितैं प्रभु की तरफा बटि मिल्यूं च।</verse>
				<verse number="38">अर अगर कुई यों बातों तैं नि माणो, त वेतैं वेका हाल पर छोड़ द्‍या।</verse>
				<verse number="39">इलै हे मेरा भै-बैंणो, पूरा जोस से भविष्यबाणी करण वळा बरदान की खोज मा रा, अर येका दगड़ा-दगड़ि अलग-अलग भाषा बुलण वळा लोगु तैं नि रोका।</verse>
				<verse number="40">मगर बिस्वासी समुदाय का बीच मा सब बात ठिक ढंगल अर अच्छी तरौं से किये जौ।</verse>
			</chapter>
			<chapter number="15">
				<verse number="1">हे मेरा भै-बैंणो, जु शुभ समाचार मिन तुमतै पैलि सुणै छौं, वेतैं तुमुन स्वीकार कैरी, अर वेमा तुम अटल भि छाँ, उई वचन मि तुमतै याद दिलौणु छौं।</verse>
				<verse number="2">अर जु वचन तुमतै दिये गैनी ऊं वचनों तैं याद रखा। अर अगर जु तुम वामा मजबूत नि बणयां रैल्या, त फिर तुमतै कनकै बचयै जालु। अर अगर जु तुम इन नि करिल्या फिर त इन समझा कि तुमरो बिस्वास कन भि बेकार च।</verse>
				<verse number="3">अर सच्‍चै को जु वचन यीशु मसीह का द्‍वारा मितैं बतये गै, उई मिन तुमतै बतै। अर पवित्रशास्‍त्र मा वु वचन इन लिख्यूं च कि, “मसीह हमरा पापों खुणि मरे गै।”</verse>
				<verse number="4">अर वेतैं दफनये गै, अर जन कि पवित्रशास्‍त्र मा लिख्यूं च वेका मुताबिक पिता परमेस्वर न वेतैं तिसरा दिन मुरदो मा बटि ज्यून्दु कैरी।</verse>
				<verse number="5">अर पतरस तैं दिखै, अर ठिक उन्‍नि दुसरा चेलों न भि यीशु तैं देखि।</verse>
				<verse number="6">अर वेका बाद यीशु एक ही बगत मा पांच सौ से भि जादा बिस्वासी लोगु तैं दिखै, अर ऊंमा बटि भौत सा लोग अभि ज्यून्दा छिन, मगर कुछ लोग ईं दुनियां तैं छोड़ि के चलि गैनी।</verse>
				<verse number="7">अर येका बाद उ याकूब भै तैं दिखै, अर फिर सब खास चेलों तैं भि दिखै।</verse>
				<verse number="8">अर ऊं सभ्यों का बाद मि पौलुस न भि वेतैं देखि, अर वे पर बिस्वास कैरी। अर वे बगत मेरी हालत वे बच्‍चा का जन छै जु कि बगत से पैलि ही जनम ले देन्दु।</verse>
				<verse number="9">अर खास चेलों मा मि सबसे छुटो छौं, मि त इथगा लैख भि नि छौ कि मिकू खास चेला बुले जौ। किलैकि मिन ज्यून्दा परमेस्वर का समुदाय तैं सतै, जु की यीशु मसीह पर बिस्वास करदिन।</verse>
				<verse number="10">बल्किन मा पिता परमेस्वर न मि पर अपणी किरपा कैरी, इलै आज मि भि एक खास चेला छौं। अर ज्वा किरपा वेन मि पर कैरी वा बेकार नि गै, किलैकि मिन दुसरा खास चेलों से जादा मेनत कैरी। अर सच्‍चै त या च कि या मेनत पिता परमेस्वर की वीं किरपा न कैरी ज्वा कि मेरा दगड़ा मा च।</verse>
				<verse number="11">अब चै मि छौं या वु सब खास चेला, हम सभ्या का सभि एक ही शुभ समाचार को परचार करद्‍यां, अर वीं ही बात पर तुमुन बिस्वास भि कैरी।</verse>
				<verse number="12">हे मेरा दगड़्यों, जब हम ईं सच्‍चै को परचार करद्‍यां कि यीशु मसीह तैं मुरदो मा बटि ज्यून्द किये गै, त फिर तुमरा बीच मा लोग इन किलै बुल्दिन कि मुरयां लोग फिर से ज्यून्दा नि ह्‍वे सकदिन?</verse>
				<verse number="13">अर अगर जु मुरदा ज्यून्दा नि ह्‍वे सकदिन, त यां को मतलब यू च यीशु मसीह भि मुरदो मा बटि ज्यून्दु नि ह्‍वे।</verse>
				<verse number="14">अर अगर जु मसीह तैं ज्यून्द नि किये गै, त हमरु परचार करण, अर तुमरो वे पर बिस्वास करण भि बेकार च।</verse>
				<verse number="15">अर अगर ज्वा या बात सच्‍च नि होन्दी, कि मुरयां लोगु न मुरदो मा बटि ज्यून्द होण, त यां को मतलब यू च कि पिता परमेस्वर न यीशु मसीह तैं मुरदो मा बटि ज्यून्दु नि कैरी। अर इथगा ही ना फिर त हम लोग भि झूठ्‍ठा गवा ठैरि ग्यां, जौन पिता परमेस्वर का खिलाप मा झूठ्‍ठी गवै दिनी।</verse>
				<verse number="16">इलै मि तुमतै बतै देन्दु कि अगर जु मुरयां लोग ज्यून्दा नि किये जाला, त यां को मतलब च कि मसीह भि ज्यून्द नि किये गै।</verse>
				<verse number="17">अर अगर जु यीशु मसीह ज्यून्दु नि ह्‍वे त फिर तुमरो बिस्वास कन भि बेकार च, अर जु लोग यीशु पर बिस्वासी कैरिके मोरि गैनी ऊंको भि नास ह्‍वे गै। अर तुम सभ्या का सभि अपणा-अपणा पापों मा फंस्यां छाँ, अर वांको दण्ड तुमतै परमेस्वर बटि जरुर मिलण।</verse>
				<verse number="18"></verse>
				<verse number="19">अर ये जीवन मा अगर हमरि आस केवल यीशु मसीह पर ही च त यां को मतलब यू च कि हमुन बेकार मा ही वे पर बिस्वास कैरी, अर अब हमरि हालत दुनियां सब लोगु से जादा खराब च।</verse>
				<verse number="20">मगर हे मेरा भै-बैंणो, मि तुमतै सच्‍च बतै देन्दु कि सबसे पैलु मनखि यीशु मसीह ही च जैतैं पिता परमेस्वर न मुरदो मा बटि ज्यून्दु कैरी। अर वु ईं बात को सबूत च कि पिता परमेस्वर अपणा लोगु तैं भि जरुर मुरदो मा बटि ज्यून्द करलु।</verse>
				<verse number="21">किलैकि जन सबसे पैला मनखि आदम का द्‍वारा पाप किये गै, अर वे पाप की वजै से मौत ईं दुनियां मा ऐ, ठिक उन्‍नि दुसरा मनखि यीशु मसीह का द्‍वारा मौत मा बटि ज्यून्द किये जाण होलु।</verse>
				<verse number="22">अर जन आदम का पाप मा हिस्सेदार बणि के हम सब लोग मोरि जन्द्‍यां, ठिक उन्‍नि यीशु मसीह का द्‍वारा हम सभ्यों तैं मुरदो मा बटि ज्यून्द भि किये जालु।</verse>
				<verse number="23">अर जन पिता परमेस्वर न यीशु मसीह तैं मुरदो मा बटि सबसे पैलि ज्यून्द कैरी, ठिक उन्‍नि जब यीशु वापस आलु त ऊं सभ्यों तैं भि मौत मा बटि ज्यून्द करलु जु वे पर बिस्वास करदिन।</verse>
				<verse number="24">अर येका बाद ईं दुनियां को नास होण को बगत ऐ जाण। तब दुनियां पर राज करण वळा सब अधिकारीयों अर बुरी ताकतों को यीशु मसीह न नास कैरी देण, तब वु अपणा राज्य तैं पिता परमेस्वर का हाथ मा सौंपी द्‍यालु।</verse>
				<verse number="25">किलैकि जब तक उ अपणा सब दुसमनों तैं हरै नि द्‍यो, तब तक यीशु मसीह को राज करण जरुरी च।</verse>
				<verse number="26">अर सबसे आखिरी मा जै दुसमन को नास किये जाण वा मौत च।</verse>
				<verse number="27">किलैकि पवित्रशास्‍त्र मा लिख्यूं च कि, “पिता परमेस्वर न सब कुछ वेका खुटों का तौळ कैरियाली।” अर ईं बात को मतलब बिल्कुल साफ ह्‍वे जान्दु कि पिता परमेस्वर न सब कुछ वेका अधीन कैरियाली। पर जै परमेस्वर न सब कुछ वेका अधीन कैरियाली केवल उई वेका अधीन मा नि च।</verse>
				<verse number="28">अर पिता परमेस्वर न सब कुछ अपणा पुत्र यीशु मसीह का अधीन मा कैरियाली, तब पुत्र भि खुद तैं वे पिता परमेस्वर का अधीन कैरी द्‍यालु, ताकि पिता परमेस्वर ही सभ्यों पर राज कैरो।</verse>
				<verse number="29">अर पिता परमेस्वर मुरयां लोगु तैं जरुर मुरदो मा बटि ज्यून्द करलु। अर अगर तुम लोग ईं बात पर बिस्वास नि करद्‍यां, त तुम लोगु मा बटि जु मुरयां लोगु खुणि बपतिस्मा लिणा छिन वु कैं आस की वजै से इन करणा छिन?</verse>
				<verse number="30">अर अगर पिता परमेस्वर लोगु तैं मुरदो मा बटि ज्यून्द नि करलु, त हम हरेक दिन इथगा दुख-मुसीबत किलै उठौन्दा?</verse>
				<verse number="31">हे मेरा भै-बैंणो, मि कै दिन भि मोरि सकदु, मगर मि कसम खै के बुल्दु कि तुमरि खातिर मेरु मोन भौत बड़ु होन्दु, किलैकि तुम हमरा प्रभु यीशु मसीह पर बिस्वास करद्‍यां, इलै मि कसम खै के बुल्दु कि मितैं हरेक दिन मौत को सामना कन पोड़दु।</verse>
				<verse number="32">अर इफिसुस नगर का लोगु न मेरु बड़ु विरोध कैरी, अर ऊ मि पर जंगळि जानबर की तरौं कटणु कू ऐनी। अर अगर मुरयां लोगु तैं ज्यून्द नि किये जालु, त विरोध करण वळा लोगु का खिलाप मा जु कुछ भि मिन कैरी, वेको कुई फैदा नि ह्‍वे। तब हम भि इन बोलि सकद्‍यां कि, “अरे भोळ त हमुन भि मुरण ही च, चला, हम सब खूब खा-प्या।”</verse>
				<verse number="33">इलै तुम धोखा मा नि रयां किलैकि, “कुसंगति को संग नि करण अर डुण्डी लखड़ी कन्ध नि धरण।”</verse>
				<verse number="34">हे मेरा भै-बैंणो, जरा होस मा आ अर जु कुछ गळत च वेतैं करण छोड़ि द्‍या, किलैकि तुम मा बटि कुछ लोग इन छिन जु कि ईं बात तैं स्वीकार नि करदिन कि परमेस्वर मुरदो मा बटि ज्यून्द करलु। अर या बड़ा सरम की बात च, कि तुम मा बटि कुछ लोगु न अभि तक परमेस्वर तैं नि पछ्याणी।</verse>
				<verse number="35">मगर अब कुछ लोग इन सवाल भि पूछी सकदिन कि, “मुरयां लोग कनकै ज्यून्दा किये जाला, अर कन्द्रयो सरील होलु उ जु कि ऊंतैं मिललु?”</verse>
				<verse number="36">अर ऊं लाटा लोगु तैं मि बतै देन्दु कि जब तुम बीज बुतद्‍यां, त बीज जमीन का भितर जैके मोरि जान्दु अर वेका बाद ही उ ज्यून्द हो होन्दु।</verse>
				<verse number="37">अर जब तुम ग्यूँ का बीज तैं बुतद्‍यां, तब तुम पौद नि लगौन्द्‍यां, मगर बीज ही बुतद्‍यां।</verse>
				<verse number="38">मगर पिता परमेस्वर अपणी इच्छा का मुताबिक ही ऊं बीजों तैं ऊंको सरील देन्दु, अर हरेक बीज को अपणु-अपणु सरील होन्दु।</verse>
				<verse number="39">अर जथगा भि पराण ईं दुनियां मा छिन हरेक को सरील अलग-अलग किसम को च। मनखियों को सरील अलग, त जानबरों को सरील अलग, ठिक उन्‍नि पंछियों को सरील अलग, त माछों को सरील अलग ही किसम को च।</verse>
				<verse number="40">ठिक उन्‍नि स्वर्ग का भि सरील छिन अर धरती पर रौण वळो का भि सरील छिन, मगर स्वर्ग को सरील दिब्य चमक को च अर धरती पर रौण वळो को सरील की चमक दुसरा किसम की च।</verse>
				<verse number="41">अर आसमान मा रौण वळो की चमक अलग-अलग किसम की होन्दी, सूरज कि चमक अलग होन्दी, अर चाँद की चमक अलग होन्दी। इख तक की तारों की चमक भि अलग-अलग किसम की होन्दी, हाँ एक तारे की चमक तेज होन्दी, त दुसरे की कम।</verse>
				<verse number="42">ठिक इन्‍नि मुरदो को ज्यून्दु होण भि च। हाँ, जन एक बीज बुतै जान्दु, त उ जमीन मा पोड़ि के फिर मोरि जान्दु, ठिक उन्‍नि मनखि की मौत का बाद ईं दुनियां का सरील तैं दफनै जान्दु अर उ नास ह्‍वे जान्दु, पर जै सरील मा उ मुरदो मा बटि ज्यून्द किये जान्दु उ सदनि खुणि रौण वळु च।</verse>
				<verse number="43">अर जन अन्धेरु अर उज्याळु दुईया का दुई एक-दुसरा से भौत अलग छिन, ठिक उन्‍नि जै सरील तैं दफनये गै अर जै सरील तैं मुरदो मा बटि ज्यून्द किये गै दुईया का दुई एक-दुसरा से भौत अलग छिन। अर ईं दुनियां को सरील वेका हड़गा अर मांस का दगड़ा मा दफनये जान्दु, पर जब वेतैं मुरदो मा बटि ज्यून्द किये जान्दु, तब उ पिता परमेस्वर की ताकत से मिलण वळु दिब्य सरील च। किलैकि जन ईं दुनियां मा मनखि तैं पिता परमेस्वर का द्‍वारा एक सरील दिये जान्दु, ठिक उन्‍नि वेका द्‍वारा एक दिब्य आत्मिक सरील भि दिये जान्दु।</verse>
				<verse number="44"></verse>
				<verse number="45">इलै पिता परमेस्वर का वचन मा भि इन लिख्यूं च कि, “पैलु मनखि आदम ज्यून्दु पराणी बणि।” मगर आखिरी मनखि याने की यीशु मसीह लोगु तैं पवित्र आत्मा का द्‍वारा सदनि को जीवन देन्दु।</verse>
				<verse number="46">पर जु ईं दुनियां को सरील च उई हमतै पैलि दिये गै, अर वेका बाद ही हमतै दिब्य आत्मिक सरील दिये जालु।</verse>
				<verse number="47">अर पैलु मनखि आदम धरती को च जैतैं माटाळ बणयै गै, अर दुसरो मनखि यीशु मसीह च जु कि स्वर्ग बटि ऐ।</verse>
				<verse number="48">अर जन पैलु मनखि आदम माटा को च, ठिक उन्‍नि और मनखि भि वेकी ही तरौं छिन। पर दुसरो मनखि यीशु मसीह जु कि स्वर्ग को च, इलै जु स्वर्ग मा रौण वळा छिन वु सब भि वेकी तरौं आत्मिक होला।</verse>
				<verse number="49">अर जन आदम तैं माटा बटि बणयै गै, इलै हमरु रुप भि वेकी तरौं ही च। अर ठिक उन्‍नि दुसरो मनखि यीशु जु कि स्वर्ग बटि ऐ, इलै हमरु सरील भि वेकी तरौं स्वर्ग को ही होलु।</verse>
				<verse number="50">हे मेरा भै-बैंणो, यू हड़गा, मांस अर ल्वे का ये सरील तैं लेके हम परमेस्वर का राज मा इन नि जै सकद्‍यां। अर इन मि इलै बोन्‍नु छौं, किलैकि हमरु यू सरील ईं दुनियां को च जैन नास ह्‍वे जाण, पर स्वर्गीय सरील को नास नि होण वेन हमेसा तक रौण।</verse>
				<verse number="51">अर सुणा, मि तुमतै राज की एक बात बतौन्दु, हम मा बटि कुछ लोग इन छिन जौन मुरण नि च बल्किन मा ऊंका सरील बदलि जाण।</verse>
				<verse number="52">हाँ, आखिर बिगुल बजौण का बगत मा झट आंखा झपकौंदि ही इन ह्‍वे जालु। बिगुल बजलु अर मुरदा इन्द्रया सरील मा ज्यून्दा होला जैको नास नि हो सकदु अर हम बदलि जौला।</verse>
				<verse number="53">किलैकि हम नास होण वळा ये सरील तैं लेके स्वर्ग मा नि जै सकद्‍यां, इलै ये सरील को नास होण जरुरी च, ताकि हमतै वु सरील मिली सैको जु कि अजर-अमर च।</verse>
				<verse number="54">अर जब इन होलु, तब पिता परमेस्वर को वु वचन पूरु होण जु कि पवित्रशास्‍त्र मा लिख्यूं च कि, “परमेस्वर की जीत ह्‍वे गै, किलैकि वेन मौत पर जीत हासिल कैरिके वींको नास कैरियाली।”</verse>
				<verse number="55">“हे मौत कख च तेरी जीत? अर अब कख च तेरु डसण?”</verse>
				<verse number="56">अर पाप करण की वजै से मनखि मोरि जान्दु, अर पवित्रशास्‍त्र का नियम-कानून का द्‍वारा हमतै इन पता चलदु कि पापि लोगु तैं दण्ड मिललु।</verse>
				<verse number="57">मगर हम त पिता परमेस्वर को धन्यवाद देन्द्‍यां, किलैकि उ हमतै प्रभु यीशु मसीह का द्‍वारा जीत हासिल करौन्दु।</verse>
				<verse number="58">इलै हे मेरा प्यारा भै-बैंणो, तुम मजबूत बणा अर बिस्वास मा अटल बणयां रा। अर खुद तैं प्रभु का सुपुर्द कैरी द्‍या, किलैकि तुम जणदा ही छाँ कि तुमरि कठिन मेनत प्रभु मा बेकार नि जान्दी।</verse>
			</chapter>
			<chapter number="16">
				<verse number="1">हे मेरा भै-बैंणो, तुमुन चिठ्‍ठी मा यरूशलेम नगर का गरीब बिस्वासी लोगु का बारा मा मि बटि पूछी छौ। अर जन मिन गलाति मुलक का बिस्वासी समुदाय खुणि बोलि ठिक उन्‍नि मि तुम खुणि भि बुल्दु कि,</verse>
				<verse number="2">तुम लोग हरेक इतवार खुणि अपणी-अपणी कमै का मुताबिक कुछ अलग कैरिके रख्यां। अर ये दान तैं समाळि के रख्यां, ताकि जब मि उख औंऽऽ, त तुमतै दान जमा करण की जरुरत नि पोड़ो।</verse>
				<verse number="3">अर जौं लोगु तैं तुम चा ऊंतैं अपणा बीच मा बटि चुणा, ताकि दान ऊं लोगु का द्‍वारा यरूशलेम नगर मा भिजे जौ। अर जब मि तुमरा इख औलु त कुछ चिठ्‍ठीयों तैं लिखी के ऊंका हाथ भेजि द्‍यूलु, ताकि यरूशलेम नगर का बिस्वासी लोग ऊं लोगु की इज्‍जत कैरा।</verse>
				<verse number="4">अर अगर मितैं ऊंका दगड़ा मा जाण पोड़लु त मि जरुर जौलु।</verse>
				<verse number="5">हे मेरा दगड़्यों, मिन मकिदुनिया मुलक कू जाण, अर मि इन सुचणु छौं कि उख बटि मि सीदा तुमरा इख औंऽऽ,</verse>
				<verse number="6">अर कुछ दिनों तक तुमरा ही पास रौ, अर क्या पता मि ह्‍यूँद का पूरा मैना उखि काटु। अर वेका बाद जख मि जौलु तब तुम चा त मेरा यात्रा खुणि मेरी मदद कैरी सकद्‍यां।</verse>
				<verse number="7">अर मि नि चान्दु कि मि अभि बाटा मा तुम से बस मुलाकात कैरिके चलि जौ, अगर प्रभु कि मनसा होलि, त मि तुमरा दगड़ा मा कुछ बगत तक रौण चान्दु।</verse>
				<verse number="8">मगर पिन्तेकुस्त का त्योवार तक मिन इफिसुस नगर मा ही रौण।</verse>
				<verse number="9">किलैकि विरोध करण वळा उख भौत छिन, पर फिर भि शुभ समाचार को परचार करण को एक बड़ु अवसर मिल्यूं च।</verse>
				<verse number="10">अर जब तीमुथियुस भै तुमरा पास कुरिन्थि नगर मा आलु, त वेको स्वागत बड़ा अच्छे से कर्यां। हे मेरा भै-बैंणो, तुम वेका दगड़ा मा कुई भि गळत बरतौ नि कर्यां, किलैकि जन मि छौं ठिक उन्‍नि उ भि प्रभु की सेवा करण वळु च।</verse>
				<verse number="11">इलै कुई भि मनखि वेको तिरिस्कार नि कैरो। अर तुम वेकी यात्रा मा वेकी पूरि मदद कर्यां, ताकि उ ठिक ढंगल मेरा पास पौंछी सैको, किलैकि मि वेको इंतजार कनु छौं, कि उ दुसरा बिस्वासी भैयों का दगड़ा मेरा पास ऐ जौ।</verse>
				<verse number="12">अब हमरा भै अपुल्‍लोस से मिन भौत बिन्ती कैरी कि उ और भै का दगड़ा मा तुमरा पास अऽ, मगर अभि वेकी तुमरा पास औण की बिल्कुल भि इच्छा नि च। पर जब वेतैं मौका मिललु, त तब वु तुमरा पास ऐ जालु।</verse>
				<verse number="13">हे मेरा भै-बैंणो, चौकस रा, बिस्वास मा मजबूत बणा, हौसला रखा अर हिम्मत रखी के अगनै बढणा रा।</verse>
				<verse number="14">अर तुमरा बीच मा सब काम प्यार से किये जा।</verse>
				<verse number="15">हे मेरा दगड़्यों, तुम लोग स्तिफनास भै का घौर मा रौण वळा लोगु का बारा मा त जणदा छाँ, ऊ लोग अखया मुलक का पैला बिस्वासी लोग छिन। अर पिता परमेस्वर का लोगु की सेवा करणु खुणि वु हमेसा तयार रौनदिन।</verse>
				<verse number="16">इलै मि तुम लोगु से इन बिन्ती करदु कि तुम इन्द्रया लोगु का अधीन मा रा। अर जु लोग ऊंका दगड़ा मा मिली के कड़ी मेनत करदिन तुम लोग ऊंका भि अधीन मा रा।</verse>
				<verse number="17">अर तुमरा इख बटि भै स्तिफनास, फूरतूनातुस अर अखइकुस मितैं मिलणु खुणि ऐनी अर ईं बात से मितैं भौत खुशी मिली, किलैकि ऊंन तुमरा इख नि होण की कमी तैं पूरु कैरियाली।</verse>
				<verse number="18">अर ऊं लोगु न तुमरा अर मेरा मन तैं बड़ी खुशी देई, इलै इन्द्रया लोगु की कदर कैरा।</verse>
				<verse number="19">अर इख आसिया मुलक का बिस्वासी लोग तुमकु सलाम बोन्‍ना छिन। अर अक्‍किला अर वेकी घरवळी प्रिस्का बैंण, अर ऊंका घौर मा इकट्‍ठा होण वळा बिस्वासी समुदाय का लोग भि तुमकु दिल से सलाम बुलणा छिन।</verse>
				<verse number="20">सब बिस्वासी भै-बैंणा तुमकु सलाम बोन्‍ना छिन, अर तुम भि ठिक इन्‍नि पवित्र दिल से एक-दुसरे की भूकि पिके सलाम बोला।</verse>
				<verse number="21">मि पौलुस खुद अपणा हाथळ अब तुमकु सलाम लिखणु छौं।</verse>
				<verse number="22">अगर कुई प्रभु से प्यार नि करदु, त वे पर असगार लगु। हे हमरा प्रभु अऽ।</verse>
				<verse number="23">हमरा प्रभु यीशु मसीह की किरपा तुम पर हमेसा बणि रौ।</verse>
				<verse number="24">प्रभु यीशु मसीह मा मेरु प्यार तुम सभ्यों का दगड़ा मा रौ। आमीन।</verse>
			</chapter>
		</book>
		<book number="47">
			<chapter number="1">
				<verse number="1">हे मेरा भै-बैंणो, मि पौलुस पिता परमेस्वर की मनसा से यीशु मसीह को खास चेला होणु खुणि बुलये ग्यों। अर मि या चिठ्‍ठी हमरा बिस्वासी भै तीमुथियुस का दगड़ा मा कुरिन्थि नगर का लोगु खुणि लिखणु छौं, हाँ तुम खुणि ही तुम जु कि परमेस्वर का समुदाय छाँ। अर या चिठ्‍ठी ऊं सब पवित्र मनखियों खुणि भि च जु कि पूरा अखया मुलक मा छिन।</verse>
				<verse number="2">तुमतै हमरा पिता परमेस्वर की तरफा बटि, अर प्रभु यीशु मसीह की तरफा बटि वेकी किरपा अर शान्ति मिलु।</verse>
				<verse number="3">हमतै हमरा प्रभु यीशु मसीह का पिता परमेस्वर की तारीफ करण चयेणी, किलैकि उ हमेसा हम पर दया करदु, अर हमरि मदद करदु। अर हर बात मा दिलासा देण वळु परमेस्वर च।</verse>
				<verse number="4">अर जब दुख-तकलीफ हमरा जीवन मा औन्दिन, त प्रभु हमतै दिलासा देन्दु। अर इन उ इलै करदु, ताकि हम भि ऊंतैं दिलासा दे सैका जु लोग दुख-तकलीफो मा छिन।</verse>
				<verse number="5">किलैकि यीशु मसीह की सेवा करण की वजै से जु दुख-तकलीफ हमतै झिलण पोड़दिन, यीशु मसीह वेका बदला मा हमतै और भि जादा दिलासा देन्दु।</verse>
				<verse number="6">इलै जब हम दुख-तकलीफ उठौन्द्‍यां, तब वां से हम इन सिखद्‍यां कि हमुन तुमतै कनकै दिलासा देण। अर जब हमतै आराम मिलदु, त हम यू सिखद्‍यां कि तुमतै भि आराम मिलु। अर इनकै तुम सबर रखी के ऊं दुख-तकलीफो तैं चुपचाप से स्वीकार करद्‍यां त यां से इन पता चलदु, कि तुम लोग भि हम जन बिस्वास मा मजबूत होण लगि ग्यां।</verse>
				<verse number="7">अर तुमरा बारा मा हमरि आस अटल च किलैकि हम जणदा छां कि तुम भि हमरि तरौं दुख-तकलीफ झिलणा छाँ, अर इन यकीन करद्‍यां कि पिता परमेस्वर ठिक उन्‍नि दिलासा तुमतै भि द्‍यालु जन उ हमतै देन्दु।</verse>
				<verse number="8">हे मेरा भै-बैंणो, हम इन चन्द्‍यां कि तुम ईं बात से अणजाण नि रा, कि हमुन आसिया मुलक मा कन-कन दुख-तकलीफ झिलनी। हाँ, हमुन इथगा दुख-तकलीफ झिलनी कि ऊंतैं सौण हमरि ताकत से भैर छौ, इख तक कि हमुन उम्मीद भि छोड़याली छै, कि अब हम ज्यून्दा भि रौला कि ना।</verse>
				<verse number="9">अर हम अपणा-अपणा मनों मा इन समझण लगि गै छा कि अब हमुन मोरि जाण, अर यू सब त वे बगत इलै ह्‍वे ताकि हम अपणी ताकत पर बड़ु मोन नि कैरा। अर यू सब त पिता परमेस्वर कि मनसा का मुताबिक ह्‍वे, किलैकि उ चान्दु छौ कि हम वे पर भरोसा रखा जु कि मुरदो तैं ज्यून्द करदु।</verse>
				<verse number="10">अर पिता परमेस्वर ही च जु कि हमतै मौत का बड़ा संकट से बचौन्दु, अर अगनै भि बचालु, किलैकि हम वे पर बिस्वास करद्‍यां अर उ हमतै औण वळा बगत मा भि बचालु।</verse>
				<verse number="11">अर हम तुम पर भि भरोसा करद्‍यां, किलैकि तुम लोग हम खुणि प्रार्थना करद्‍यां, किलैकि पिता परमेस्वर प्रार्थनाओं को जबाब देन्दु अर हमतै संकट से बचौन्दु। तब भौत सा लोग हमरा खातिर परमेस्वर को धन्यवाद द्‍याला।</verse>
				<verse number="12">अर हमतै ईं बात पर गर्व च अर हमरु जमीर भि ईं बात की गवै देन्दु, कि ईं दुनियां मा खास कैरिके तुमरा बीच मा हमरु सभौ पिता परमेस्वर का लैख पवित्र अर सच्‍चु छौ। अर यू सब हमुन ईं दुनियां से मिलण वळा ज्ञान का मुताबिक नि कैरी, बल्किन मा पिता परमेस्वर की किरपा पर भरोसा रखी के कैरी।</verse>
				<verse number="13">अर जु चिठ्‍ठी मिन तुम खुणि लिखिनी ऊंमा मिन साफ-साफ लिखी, ताकि जब तुम ऊंतैं पैढा त तुम मेरी बात तैं आसानी से समझि सैका।</verse>
				<verse number="14">अर मितैं इन भि यकीन च कि तुम लोग मेरा बारा मा थुड़ा भौत जाणि ग्यां, अर पूरि तरौं से जाणि के बड़ु मोन करिल्या। अर जब हमरु प्रभु यीशु मसीह वापस आलु, त वे दिन पर हम तुमतै देखि के बड़ु मोन कैरी सकद्‍यां।</verse>
				<verse number="15">अर मितैं ईं बात को पूरु यकीन छौ, इलै मिन पैलि तुमरा पास औण कि सोची, ताकि पिता परमेस्वर बटि तुमतै कुई ना कुई आसिरबाद मिली सैको।</verse>
				<verse number="16">अर मिन इन योजना बणईं छै कि मकिदुनिया मुलक जान्द दौं मि तुमरा पास से ह्‍वेके जौं। अर उख बटि यहूदिया मुलक कू जाण दौं भि मि तुमरा पास ह्‍वेके जौं, अर जब मि यहूदिया मुलक कू जाणु रौलु त तुम लोग मेरी मदद कर्यां, मगर मेरी या योजना सफल नि ह्‍वे सैकी।</verse>
				<verse number="17">अर तुमतै क्या लगदु कि मिन या योजना बेमतलब मा बणै छै? अर तुमतै क्या लगदु कि जन दुनियां का लोग योजना बणौन्दिन क्या मि भि उन्‍नि बणौन्दु। अरे, मि इन नि करदु कि उबरि बोला, “हाँ, हाँ इन करण ठिक रालु,” अर उबरि बोला, “ना, ना इन करण ठिक नि च।”</verse>
				<verse number="18">अर जन परमेस्वर पर बिस्वास किये जै सकदु, ठिक उन्‍नि तुम लोग हम पर भि बिस्वास कैरी सकद्‍यां, किलैकि जब हम “हाँ” बुल्द्‍यां, त वेको मतलब हाँ ही होन्दु, अर जब हम “ना” बुल्द्‍यां त वेको मतलब ना ही होन्दु।</verse>
				<verse number="19">किलैकि पिता परमेस्वर को पुत्र यीशु मसीह जैको परचार सिलवानुस, तीमुथियुस अर मिन तुमरा बीच मा कैरी, वेमा पैलि “हाँ” अर फिर “ना” नि ह्‍वे, बल्किन मा वेमा “हाँ” को मतलब हमेसा “हाँ” ही ह्‍वे।</verse>
				<verse number="20">किलैकि पिता परमेस्वर का जथगा भि करार छिन ऊ सब यीशु का द्‍वारा “हाँ” मा ही पूरा होनदिन। इलै ही हम यीशु मसीह का नौ का द्‍वारा पिता परमेस्वर की तारीफ खुणि “आमीन” बुल्द्‍यां अर यां से परमेस्वर की बडै होन्दी।</verse>
				<verse number="21">अर ईं बात तैं हमेसा याद रखा, कि पिता परमेस्वर उ च जु कि तुमतै अर हमतै यीशु मसीह का द्‍वारा हरेक बात मा मजबूत करदु। अर पिता परमेस्वर ही च जैन हमतै बुलै अर अपणी सेवा खुणि ठैरै।</verse>
				<verse number="22">अर वेन इन दिखौणु खुणि कि हम वेका छां, अपणा पवित्र आत्मा का दान तैं बयना का रुप मा हमरा मनों मा देई, ताकि इन साबित हो कि वेको करार जरुर पूरु होलु।</verse>
				<verse number="23">अर मि तुमतै बतै देन्दु कि मि तुमरा पास कुरिन्थि नगर मा इलै नि औंऽऽ, ताकि तुम मेरी फटकार से बचि जा, अर या बात सच्‍च च अर यां को गवा पिता परमेस्वर च।</verse>
				<verse number="24">अर हम लोगु को मतलब यू नि च कि हम ही तुमरा मालिक छां, अरे हम त केवल तुमरा आनन्द मा साझी छां अर हमरि पूरि कोसिस च कि तुम यीशु मसीह पर अपणु पूरु बिस्वास बणै के रखा।</verse>
			</chapter>
			<chapter number="2">
				<verse number="1">इलै हे मेरा भै-बैंणो मिन इन फैसला कैरियाली, कि ईं दुसरि यात्रा का दौरान मिन तुमरा बीच मा नि औण, किलैकि मि नि चान्दु कि मि तुमरा बीच मा ऐके तुमतै उदास कैरुं।</verse>
				<verse number="2">अर पैलि मिन तुमतै परेसान कैरी, अर अब केवल तुम ही त छाँ जु कि मेरी जिकुड़ी तैं खुश कैरी सकद्‍यां।</verse>
				<verse number="3">अर मिन या चिठ्‍ठी तुमकु ईं बात का खातिर लिखी, कि जब मि औलु त कखि इन नि हो कि जौं लोगु से मितैं खुशी मिलण चयेणी ऊंकी वजै से मि उदास ह्‍वे जौं, किलैकि मितैं ईं बात पर यकीन च कि जौं बातों से तुमतै खुशी मिलदी, ऊं ही बातों से मितैं भि खुशी मिलदी।</verse>
				<verse number="4">अर जब मिन तुम खुणि पैलि चिठ्‍ठी लिखी छै, त वे बगत मि अपणा मन मा भौत परेसान अर दुखी छौ, अर रुवे-रुवे के वा चिठ्‍ठी मिन तुम खुणि लिखीं छै। अर मिन अपणी पैलि चिठ्‍ठी तुमतै दुख देणु खुणि नि लिखी छै, बल्किन मा ईं बात तैं याद दिलौणु खुणि लिखी छै कि मि तुम से कथगा प्यार करदु।</verse>
				<verse number="5">अर अब मि वे आदिम का बारा मा भि लिखण चाणु छौं, जैन दुख देण को काम कैरी। अर वेन मितैं दुख देई यां को मतलब यू च कि वेन सभ्यों तैं दुख दिनी, (मगर अभि मि ईं बात का बारा मा जादा बात नि कन चान्दु)।</verse>
				<verse number="6">मगर अब वेन वु पाप छोड़याली, किलैकि बिस्वासी समुदाय का द्‍वारा ज्वा फटकार वे आदिम तैं दिये गै वा वे खुणि काफी सही छै।</verse>
				<verse number="7">इलै अब तुम वे आदिम तैं माफ कैरी द्‍या, अर अगर जु तुम वेतैं माफ नि करिल्या, त वे आदिम तैं इन लगण कि अब तुमुन वेतैं कभि माफ नि कन, अर फिर कखि इन नि हो कि उ आदिम प्रभु यीशु पर बिस्वास करण छोड़ि द्‍यो।</verse>
				<verse number="8">इलै मि तुम से बिन्ती करदु कि अब तुम वे आदिम तैं अपणु प्यार दिखा, ताकि वेतैं तुम पर यकीन हो कि तुम वेसे प्यार करद्‍यां।</verse>
				<verse number="9">अर जब मिन तुमकु पैलि चिठ्‍ठी लिखी छै त वामा मिन ईं बात का बारा मा इलै लिखी छौ, ताकि मितैं पता चलु कि तुम सब बातों मा आज्ञा को पालन करदा छाँ, कि ना।</verse>
				<verse number="10">अर अभि तक जु कुछ भि मिन बोलि तुमुन वेका मुताबिक ही कैरी, इलै अब तुम वे आदिम तैं माफ कैर द्‍या, किलैकि मिन भि वेतैं माफ कैरियाली। अर अगर कैन भि कुछ बुरु काम कैरी, त हमरु फरज बणदु च कि हम ऊंतैं माफ कैरा अर इन हमतै यीशु मसीह की वजै से करण चयेणु, किलैकि वेन हमतै माफ कैरी। अर यू सब कुछ मि तुमरि भलै खुणि ही बोन्‍नु छौं।</verse>
				<verse number="11">अर यू सब मिन इलै कैरी ताकि शैतान हम मा बटि कै को भि फैदा नि उठे सैको, किलैकि हम अच्छी तरौं से जणद्‍यां कि उ अपणी चालाकी द्‍वारा हम खुणि समस्या खड़ि करदु।</verse>
				<verse number="12">हे मेरा दगड़्यों, जब मि यीशु मसीह का बारा मा शुभ समाचार सुनौणु कू त्रोआस नगर मा पौंछु, त मिन देखि कि प्रभु न उख अपणु काम करणु खुणि पैलि बटि लोगु तैं तयार कैरिके रख्युं च, अर मितैं एक अवसर अच्छु मिली कि मि ऊंतैं शुभ समाचार सुणौ।</verse>
				<verse number="13">पर जब मिन अपणा दगड़्या तीतुस तैं उख नि पै, त मेरु मन बड़ु बेचेन ह्‍वे गै। तब मिन उखा बिस्वासी भै-बैंणो बटि विदै लिनी, अर मकिदुनिया मुलक कू चलि ग्यों।</verse>
				<verse number="14">अर सबसे पैलि मि पिता परमेस्वर को धन्यवाद करदु जु कि एक नेता की तरौं हमेसा हमरा अगनै-अगनै चलदु, अर वेन हम सभ्यों तैं यू मौका दिनी कि हम वेका पिछनै-पिछनै चला। अर जन इतर कि खुशबु सब जगा फैली जान्दी, ठिक उन्‍नि पिता परमेस्वर हमतै अपणा सच्‍चा ज्ञान का द्‍वारा शुभ समाचार तैं फैलाण मा मदद करदु।</verse>
				<verse number="15">इलै यू रैबार भि एक इतर कि तरौं लोगु का बीच मा फैलणु च। अर जु लोग हमरा द्‍वारा शुभ समाचार पर बिस्वास करदिन वु अपणा-अपणा पापों तैं छोड़ि के बचि जनदिन, किलैकि हम ऊंतैं वीं सच्‍चै का बारा मा बतौन्द्‍यां ज्वा कि यीशु मसीह का द्‍वारा परमेस्वर बटि मिलण वळा सदनि का जीवन की तरफा लेके जान्दी। मगर जु लोग वेतैं स्वीकार नि करदिन ऊ सब पिता परमेस्वर बटि दूर होणा छिन, किलैकि वु नास होण वळा बाटा पर चलणा छिन जु की ऊंतैं सदनि की मौत कि तरफा लेके जाणु च। अर कुई भि मनखि ईं जबाबदारी तैं पूरु करण का काबिल नि च।</verse>
				<verse number="16"></verse>
				<verse number="17">अर हम ऊं ठगों की तरौं नि छां जु कि अपणा फैदा खुणि परचार को काम करदिन, पर हम त शुभ समाचार तैं बड़ी इमानदारी से सुणौन्द्‍यां, अर यीशु मसीह का द्‍वारा दियां अधिकार से परमेस्वर का वचन को परचार करद्‍यां। अर यू सब हम इन जाणि के करद्‍यां कि पिता परमेस्वर हमतै दिखणु च।</verse>
			</chapter>
			<chapter number="3">
				<verse number="1">हे मेरा भै-बैंणो, क्या हमतै एक बार फिर से अपणा बारा मा बतौण पोड़लु कि हम कु छां? अर क्या अब हमतै एक-दुसरा की सिपारिस खुणि चिठ्‍ठी लिखण पोड़लि, जन कि ईं दुनियां मा लोग करदिन।</verse>
				<verse number="2">दगड़्यों, सभ्यों तैं पता च कि हम लोगु को तुमरा दगड़ा मा भौत गैरु नातु च, अर तुम लोग एक चिठ्‍ठी की तरौं छाँ, जौं तैं दुसरा लोगु का द्‍वारा पढै जान्दु। अर दुसरा लोग तुमतै देखि के समझि जनदिन कि हमुन बड़ी वफादारी से तुमतै क्या सिखै।</verse>
				<verse number="3">अर या बात सच्‍च च कि तुम लोगु का जीवन बदलि गैनी, इलै अब से तुम लोग यीशु मसीह की एक चिठ्‍ठी की तरौं छाँ जौं तैं हमरा द्‍वारा बंटे गै। अर तुमतै कै कलम या स्याई का द्‍वारा ढुंगो की पाटि पर नि लिखे गै, बल्किन मा तुमतै त पवित्र आत्मा का द्‍वारा लिखे गै जु कि तुमरा दिलों मा च।</verse>
				<verse number="4">अर यू दावा हम इलै करद्‍यां, किलैकि हमतै यीशु मसीह की वजै से पिता परमेस्वर पर पूरु यकीन च।</verse>
				<verse number="5">अर मि इन नि बोन्‍नु छौं कि यू सब कुछ हम अपणी ताकत से करद्‍यां, बल्किन मा यू त पिता परमेस्वर ही च जु की हमतै ताकत देन्दु कि हम यू काम कैरी सैका।</verse>
				<verse number="6">अर या बात सच्‍च च कि परमेस्वर न हमतै ये काबिल बणै, कि हम नया कानून का सेवक बणा। अर नयू कानून कै लिख्यां कानून का रुप मा ना, बल्किन मा पवित्र आत्मा का द्‍वारा पूरु होन्दु। किलैकि लिख्यां कानून का द्‍वारा मौत की सजा औन्दी, मगर पवित्र आत्मा का द्‍वारा हमतै सदनि को जीवन मिलदु।</verse>
				<verse number="7">अर मौत तैं लेके औण वळा कानून त ढुंगो की पाटि पर लिखे गै छा, जु कि परमेस्वर का दिब्य तेज का द्‍वारा हमरा पितर मूसा तैं दिये गैनी। अर वे बगत परमेस्वर का रैबर्या मूसा को मुख भि वेका तेज से चमकदु छौ, अर भले ही वा चमक जरा-जरा कैरिके खतम ह्‍वे गै मगर फिर भि इस्राएली लोग वीं चमक की वजै से पितर मूसा का मुख जनै देखि नि सकिनी।</verse>
				<verse number="8">हे मेरा भै-बैंणो, त अब इन सोचा कि पवित्र आत्मा का द्‍वारा मिलण वळा कानून की दिब्य चमक कथगा जादा होलि?</verse>
				<verse number="9">अर अगर दोषी ठैराण वळु कानून इथगा चमकदार ह्‍वे सकदु, त फिर वे करार का द्‍वारा मनखि का जीवन मा कथगा चमक ह्‍वेलि, जु कि मनखि तैं पिता परमेस्वर की नजर मा धरमी ठैरान्दु।</verse>
				<verse number="10">अर एक बगत वु छौ जब पितर मूसा का मुख तैं चमकदार किये गै, अर एक बगत वु भि छौ जब वा चमक वेसे वापस लिये गै। त हे मेरा भै-बैंणो, जरा सोचा ज्वा चमक औण वळा बगत मा मिलण वळी च वा कथगा जादा चमकदार होलि?</verse>
				<verse number="11">अर जन पितर मूसा का मुख बटि वा चमक बाद मा गैब ह्‍वे गै, ठिक उन्‍नि जु रैबार वेन देई उ भि जादा बगत तक टिक्यूं नि रै। मगर जब परमेस्वर न अपणा लोगु तैं पवित्र आत्मा को दान देई, त जु काम पवित्र आत्मा ऊंका जीवनों मा कनु च वु हमेसा तक रौण वळु च।</verse>
				<verse number="12">अर जब हमरा पास इन्दरि आस च, त इलै ही हम बड़ी हिम्मत से बुल्द्‍यां।</verse>
				<verse number="13">हम पितर मूसा का जन नि छां, जैन अपणी मुखडी मा परदा डालि दिनी, ताकि इस्राएली लोग वीं चमक तैं नि देखा ज्वा कि जरा-जरा कैरिके जाण लगि गै छै।</verse>
				<verse number="14">मगर अभि भि ऊं लोगु का दिमाग सुनपट पोड़यां छिन, किलैकि ऊ परमेस्वर की मनसा तैं स्वीकार नि करण चनदिन। अर जब ऊ पुरणा कानून तैं पढदिन, त आज भि ऊंका बिंगण मा यू नि औन्दु कि परदा किलै डळै गै होलु। मगर यू सब ऊंका बिंगण मा तब औण जब वु यीशु मसीह पर बिस्वास करला।</verse>
				<verse number="15">अर आज का दिन तक जब भि ऊ मूसा रैबर्या की किताब तैं पढदिन, त ऊंका बिंगण मा नि औन्दु किलैकि ऊंका दिमाग सुनपट पोड़यां छिन।</verse>
				<verse number="16">अर यू परदा तब हटयै जालु जब कुई प्रभु यीशु का पास आलु।</verse>
				<verse number="17">अर प्रभु त आत्मा च, अर जख कखि प्रभु को पवित्र आत्मा च उख आजादी च।</verse>
				<verse number="18">अर पिता परमेस्वर न हमरा मुख बटि वु परदा हटैयली, अर अब हम इन देखि सकद्‍यां कि हमरु प्रभु कथगा महान च। अर हम पवित्र आत्मा का द्‍वारा लगातार प्रभु यीशु मसीह कि तरौं बणदी जां, ताकि लोग भि जाणि सैका कि हमरु प्रभु कथगा महान च। अर यू सब काम हमरा प्रभु यीशु मसीह को पवित्र आत्मा करदु।</verse>
			</chapter>
			<chapter number="4">
				<verse number="1">इलै जब परमेस्वर न हम पर अपणी दया कैरी अर हमतै ये लैख बणै कि हम वेकी महान सेवा कैरी सैका, त हम पिछनै किलै हटा।</verse>
				<verse number="2">अर हमुन इन ठाणियालि कि हम इन्द्रयो कुछ भि नि करुला ज्यां से कि हमतै सरम अऽ। अर हमुन कभि भि चालाकी चलि के तुमतै धोखा देण की कोसिस नि कैरी, जन कि कुछ लोग करदिन। अर ना ही हम परमेस्वर का वचन मा मिलावट करद्‍यां, बल्किन मा हम त सच्‍चै से सिखौन्द्‍यां अर उ भि इन जाणि के कि परमेस्वर हमतै दिखणु च। अर यू सब हम इलै करद्‍यां, ताकि हम सब लोगु खुणि एक उदारण बणि जां।</verse>
				<verse number="3">अर जु लोग ये शुभ समाचार तैं स्वीकार नि करदिन वु विणास का बाटा पर चलणा छिन, किलैकि ऊ लोग इन नि मणदिन कि जै शुभ समाचार को परचार हम करद्‍यां वेमा ऊंकी ही भलै च।</verse>
				<verse number="4">अर इन वु इलै बुल्दिन किलैकि ईं दुनियां मा शैतान न बिस्वास नि करण वळा लोगु का दिमाग तैं बन्द कैरियाली। अर वु ऊंतैं शुभ समाचार की महानता तैं स्वीकार करण से रुकदु, किलैकि उ नि चान्दु कि लोग इन जाणा कि यीशु मसीह कथगा महान च अर पिता परमेस्वर को ही रुप च।</verse>
				<verse number="5">अर हम लोग अपणु परचार नि कना छां, बल्किन मा हम त यू परचार कना छां कि यीशु मसीह ही प्रभु च। अर हम भि वेकी आज्ञा को पालन कैरिके दीन बणयां, ताकि हम तुमरि सेवा कैरी सैका।</verse>
				<verse number="6">इलै पिता परमेस्वर ही च जैन इन बोलि कि, “ये अन्धेरा मा उज्याळु हो।” अर उई च जैन हमरा अन्धेरा मनों मा जीवन को उज्याळा तैं चमकै, ताकि जु लोग अन्धेरा मा छिन हम ऊंतैं वे जीवन का उज्याळा का बारा मा बतै सैका। अर परमेस्वर का ज्ञान को यू उज्याळु यीशु मसीह का द्‍वारा चमकदु।</verse>
				<verse number="7">हे मेरा भै-बैंणो, हम लोग माटा का भाँडो की तरौं छां, जौं मा यू उज्याळु एक खजाना की तरौं च। अर यां से इन पता चलदु कि या ताकत मनखियों कि ना, बल्किन मा परमेस्वर की तरफा बटि च जु कि हमरु अपणु नि च।</verse>
				<verse number="8">अर हम हरेक किसम का दुखों तैं सौन्द्‍यां, मगर फिर भि हम यीशु मसीह का शुभ समाचार तैं सुनौण मा कभि भि पिछनै नि हटयां। अर जब हमतै कुछ भि पता नि होन्दु कि क्या करण चयेणु, तब भि हम पिछनै नि हटद्‍यां।</verse>
				<verse number="9">अर हमतै सतयै जान्दु, मगर पिता परमेस्वर हमतै नि छुड़दु। अर कभि-कभि हम भौत घैल ह्‍वेके पोड़यां रौन्द्‍यां, मगर फिर भि हम नि मुरयां।</verse>
				<verse number="10">अर हम जख भि जन्द्‍यां हमतै इन पता रौन्दु कि जन यीशु मसीह तैं मरे गै, ठिक उन्‍नि हमरि जान भि लिये जै सकदी च। मगर हम इन्द्रयो जीवन जीणु खुणि भि तयार छां, ताकि लोगु तैं इन पता चलि जौ कि यीशु मसीह उ च जु कि मनखियों तैं सच्‍चै का बाटा पर चलौन्दु।</verse>
				<verse number="11">अर अभि त हम ज्यून्दा छां मगर हमतै इन पता च कि हम कभि भि मरे सकद्‍यां, किलैकि हम प्रभु यीशु मसीह का पिछनै चलद्‍यां। मगर हमरा मुरण से पैलि पिता परमेस्वर हमरा कामों का द्‍वारा यीशु मसीह का चाल-चलन तैं दुनियां का लोग पर परगट करदु।</verse>
				<verse number="12">अर ईं बात से साफ पता चलदु कि हमरा चौतरफि मौत रिंगणी च, पर हमतै खुशी ईं बात की च कि तुम लोगु खुणि यां को नतीजा सदनि को जीवन च।</verse>
				<verse number="13">अर जन कि पवित्रशास्‍त्र मा भि लिख्यूं च कि, “मितैं परमेस्वर पर बिस्वास च, इलै वेका वचन को परचार करलु।” अर ये ही वचन का मुताबिक मि अर मेरा दगड़्या वेका वचन को परचार करद्‍यां।</verse>
				<verse number="14">अर हमतै यू भि यकीन च कि जै पिता परमेस्वर न प्रभु यीशु तैं ज्यून्दु कैरी, उ हमतै भि वेका दगड़ा मा ज्यून्दु करलु, अर उ हम सभ्यों तैं यीशु का दगड़ा मा रौण खुणि अपणा समणि खड़ु भि करलु।</verse>
				<verse number="15">अर यू सब कुछ तुम खुणि ही होणु च ताकि जै तरीके से पिता परमेस्वर कि किरपा जादा से जादा लोगु पर होणी च, ठिक उन्‍नि पिता परमेस्वर की तारीफ अर धन्यवाद खुणि लोगु की गिनती और भि बढदी जौ।</verse>
				<verse number="16">इलै ही हम भि अपणी हिम्मत तैं नि छुड़द्‍यां अर ना ही हमुन वचन सुनौण बन्द कैरी, अर भले ही हमरा सरील कमजोर छिन, पर फिर भि पिता परमेस्वर हमतै हरेक दिन हिम्मत देन्दु अर हमतै मजबूत कनु रौन्दु।</verse>
				<verse number="17">अर हमतै पूरु यकीन च कि जु आदर-सम्मान हमतै स्वर्ग मा मिलण वळु च वेन सदनि तक रौण। अर जु दुख-तकलीफ अभि हम ईं दुनियां मा झिलणा छां ऊ कुछ भि नि छिन।</verse>
				<verse number="18">इलै हमरि नजर दिखैण वळी चीजों पर नि लगि छिन, बल्किन मा हमरि नजर त ऊं चीजों पर लगीं छिन जु कि दिखैणी नि छिन, किलैकि जु चीज दिखेन्दी छिन वु कुछ देर खुणि ही छिन, मगर जु चीज दिखेन्दी नि छिन ऊ सदनि खुणि बणि रौनदिन।</verse>
			</chapter>
			<chapter number="5">
				<verse number="1">हम जणदा छां कि ईं दुनियां मा हमरु सरील एक तम्बू की तरौं च, जैको कुई ठौ-ठिकाणु नि च अर एक दिन येको नास ह्‍वे जाण। मगर स्वर्ग मा हमरा पास पिता परमेस्वर की तरफा बटि मिलण वळु एक इन्द्रयो सरील होलु जैन सदनि तक रौण। अर यू सरील एक इन्द्रया तम्बू की तरौं च, जु कि मनखि का द्‍वारा ना पर पिता परमेस्वर का द्‍वारा बणयूं च।</verse>
				<verse number="2">अर हम स्वर्ग जाण की इच्छा रखद्‍यां ताकि हमतै स्वर्ग वळु सरील मिली जौ, किलैकि ईं दुनियां का सरील मा हमतै भौत दुख-तकलीफ झिलण पोड़दिन।</verse>
				<verse number="3">अर जब हम वे सरील तैं पै द्‍यूला, तब हमतै स्वर्ग वळा घौर से कुई भि अलग नि कैरी सकलु।</verse>
				<verse number="4">अर जबरि तक हम दुनियां वळा सरील मा रौन्द्‍यां, तबरि तक हमरा मथि बड़ु बोझ च अर हम पीड़ाळ कड़ौणा रौन्द्‍यां। अर हम इन नि बोन्‍नु छां कि हम ये सरील तैं छुड़ण चन्द्‍यां, बल्किन मा हम त स्वर्ग वळा सरील तैं पौण चन्द्‍यां, ताकि जु नास होण वळु सरील च वेतैं सदनि को जीवन मिली सैको।</verse>
				<verse number="5">अर यू त केवल पिता परमेस्वर ही च जैन कि हमतै ये ही मकसद खुणि बणै, अर बयना का रुप मा अपणु पवित्र आत्मा को दान हमतै देई।</verse>
				<verse number="6">इलै हम परमेस्वर पर अपणु बिस्वास हमेसा बणै के रखद्‍यां, अर जणदा छां कि जबरि तक हम ये सरील मा छां, तबरि तक प्रभु का घौर से दूर छां।</verse>
				<verse number="7">अर हम दुनियां की बातों का मुताबिक ना, बल्किन मा यीशु मसीह पर बिस्वास कैरिके अपणु जीवन जीण छां।</verse>
				<verse number="8">इलै ही मि इन बुल्दु कि हम लोग हिम्मत नि छुड़द्‍यां, बल्किन मा हम त ये सरील तैं छोड़ि के प्रभु यीशु का दगड़ा मा रौण चाणा छां।</verse>
				<verse number="9">अर हमरि मनसा या ही च कि हम अपणा प्रभु तैं खुश कैरी सैका, अब चै हम ईं दुनियां मा रा या नि रा।</verse>
				<verse number="10">किलैकि हम मा बटि हरेक तैं मसीह का न्याय आसन का समणि हाजिरा होण पोड़लु, ताकि हर मनखि जैन ये सरील मा रै के जन-जन काम कैरी होला, ऊंतैं ऊंका कामों का मुताबिक बदला दिये जौ अब चै वु अच्छा हो या बुरा।</verse>
				<verse number="11">अर हम जणदा छां कि पिता परमेस्वर पर अपणी पूरि सरदा रखण को मतलब क्या च, इलै ही हम लोगु तैं सच्‍चै का बारा मा बतौन्द्‍यां ताकि वु भि सच्‍चै तैं स्वीकार कैरी सैका। अर परमेस्वर ईं बात का बारा मा जणदु च, अर मितैं पूरि उम्मीद च कि तुम भि वांका बारा मा खूब अच्छे से जणद्‍यां।</verse>
				<verse number="12">अर हम लोग इन नि बोन्‍ना छां कि तुम फिर से खुद तैं साबित कैरा, पर हम त सिरफ तुमतै अपणा बारा मा बतौणा छां ताकि तुम हमरा खातिर बड़ु मोन कैरी सैका। अर तब तुम ऊं लोगु तैं जबाब दे सकद्‍यां जु मनखियों का मनों तैं देखि के ना, बल्किन मा सकल तैं देखि के बड़ु मोन करदिन।</verse>
				<verse number="13">अर अगर जु हमतै अपणी सुद-बुद नि च त यू सब पिता परमेस्वर खुणि च, अर अगर जु हम चेत मा छां त वां से तुमतै ही फैदा च।</verse>
				<verse number="14">हे मेरा दगड़्यों, यीशु मसीह को प्यार हमतै मजबूर करदु, ताकि हम सब भलै का काम कैरा। अर हम जणदा ही छां कि एक यीशु मसीह ही च जु कि सब लोगु का खातिर मरे गै, अर मौत की ज्वा सजा हमतै मिलण वळी छै वा वेन खुद सै दिनी। अर अब हमरु यू फरज बणदु कि हम सभ्या का सभि अपणा-अपणा फैदा खुणि जीवन नि ज्या, बल्किन मा हमतै यीशु मसीह का मुताबिक अपणु-अपणु जीवन जीण चयेणु, जैतैं पिता परमेस्वर न मुरदो मा बटि ज्यून्द कैरी।</verse>
				<verse number="15"></verse>
				<verse number="16">हे मेरा भै-बैंणो, हम कै भि मनखि का बारा मा इन नि सोचद्‍यां, जन कि ईं दुनियां का लोग सोचदिन। पैलि हम लोगु न भि यीशु मसीह का बारा ठिक उन्‍नि सोची छौ जन कि ईं दुनियां का लोग सोचदिन, मगर अब हम वेका बारा मा इन नि सोचद्‍यां।</verse>
				<verse number="17">इलै अगर कुई मनखि यीशु मसीह का दगड़ा मा एक ह्‍वेके रौणु च, त यां को मतलब यू च कि वेका सभौ मा सब कुछ नयू च। अर अब वेको जीवन जीण को तरीका पुरणा सभौ का जन नि च, बल्किन मा अब त सब कुछ नयू ही नयू च।</verse>
				<verse number="18">अर हमरा जीवन तैं बदळण वळु पिता परमेस्वर ही च, जैन हमरु मेल-जोल यीशु मसीह का द्‍वारा अफ दगड़ा मा कैरी। अर वेन हमतै इन जबाबदारी दिनी, कि हम लोगु को मेल-जोल पिता परमेस्वर का दगड़ा मा करै सैका।</verse>
				<verse number="19">याने की जब यीशु मसीह तैं क्रूस पर मरे जाणु छौ, त वे बगत परमेस्वर दुनियां का सब लोगु का दगड़ा मेल-जोल को रिश्ता बणौणु छौ, ताकि लोगु का कियां अपराध को इळजाम ऊं पर नि लगये जौ, अर यू रैबार देणु खुणि ही परमेस्वर न हमतै ठैरै।</verse>
				<verse number="20">अर ईं बात की वजै से ही मि अर मेरा दगड़्या यीशु मसीह का राज्य को परचार करद्‍यां। अर जब हम लोगु तैं बतौन्द्‍यां, त यां को मतलब यू च कि पिता परमेस्वर खुद तुमतै अपणा पास बुलाणु च। इलै हे मेरा भै-बैंणो, यीशु मसीह का होण का नाता हम तुम से बिन्ती करद्‍यां, कि तुमरो रिश्ता पिता परमेस्वर का दगड़ा मा ठिक ह्‍वे जौ, इलै वेका पास औणु खुणि वेका पास वचन तैं स्वीकार कैरा।</verse>
				<verse number="21">किलैकि परमेस्वर न हम पापि लोगु की वजै से यीशु मसीह तैं बलिदान होणु खुणि दे दिनी, ताकि यीशु मसीह जैन कुई भि पाप नि कैरी छौ वेका द्‍वारा हम परमेस्वर की नजर मा धरमी साबित ह्‍वे जा।</verse>
			</chapter>
			<chapter number="6">
				<verse number="1">इलै हे मेरा दगड़्यों, हम लोग परमेस्वर का दगड़ा मा मिली के काम करद्‍यां। अर मि तुमतै समझै देन्दु कि परमेस्वर की महान किरपा तैं पौण का बाद अब वेकी किरपा तैं बेकार नि जाण द्‍या,</verse>
				<verse number="2">किलैकि पवित्रशास्‍त्र मा भि इन लिख्यूं च कि, “ठिक बगत पर मिन तेरी प्रार्थना तैं सुणी, अर छुटकारा का दिन मिन तेरी मदद कैरी।” सुणा, खुशी को वु बगत यू ही च अर बचयै जाण को वु दिन यू ही च।</verse>
				<verse number="3">हे मेरा भै-बैंणो, मि अर मेरा दगड़्या इन्द्रयो कुई भि काम नि करद्‍यां, ज्यां से कि परमेस्वर को रैबार ही बदनाम ह्‍वे जौ।</verse>
				<verse number="4">मगर हम हरेक बगत इन दिखौन्द्‍यां कि हम लोग बड़ी इमानदारी से पिता परमेस्वर कि सेवा करद्‍यां, अर चै कन्दरि भि बात किलै नि ह्‍वे जौ, या दुख-तकलीफ को बगत हो या बगत बड़ु कठिन हो, या मुस्किल पर मुस्किल औणी हो, पर फिर भि सबर रखी के सेवा का काम मा लग्यां रौन्द्‍यां।</verse>
				<verse number="5">अर कई बार हमुन मार खै अर हमतै जेलखानों मा भि डळै गै। अर कभि-कभि त हमरा खिलाप मा भीड़ इकट्‍ठा ह्‍वे जान्दी छै, मगर हमुन फिर भि कड़ी मेनत कैरी। अर कई रात्यों त हम सै भि नि छा, अर कई दिन-रात हमुन भूकि कटिनी।</verse>
				<verse number="6">अर हम पवित्र जीवन जीण की कोसिस करद्‍यां, अर विरोध होण का बाद भि सबर अर समझ रखी के एक-दुसरा पर दया करद्‍यां। अर पवित्र आत्मा का द्‍वारा सब लोगु से सच्‍चु प्यार करद्‍यां,</verse>
				<verse number="7">अर सच्‍चै का ये वचन तैं हम परमेस्वर की ताकत से लोगु तैं सुणौन्द्‍यां। अर परमेस्वर की नजर मा धरमी जीवन जीणु खुणि हम दुई हाथोंळ भलै का काम कना रौन्द्‍यां।</verse>
				<verse number="8">अर कुछ लोग इन छिन जु कि हमतै इज्‍जत देन्दिन, मगर कुछ हम पर इळजाम लगौन्दिन। कुछ हमरि बुरै ही करदिन, मगर कुछ हम खुणि भली-भली बात बुल्दिन। अर कुछ लोग इन्द्रया भि छिन जु कि हमतै झूठ्‍ठु साबित कन चनदिन, मगर कुछ हमरि सच्‍चै तैं बतौन्दिन।</verse>
				<verse number="9">अर कुछ लोग अच्छे से जणदिन कि हम परमेस्वर का सच्‍चा सेवक छां, मगर कुछ लोग ईं बात तैं स्वीकार नि करदिन। अर कई बार लोगु न हमतै मरणे की कोसिस कैरी, मगर हम अभि भि ज्यून्दा छां। अर कई बार हमतै भौत पीटे गै मगर हम फिर भि नि मुरयां।</verse>
				<verse number="10">अर हमरा जीवनों मा जादातर दुख ही रौन्दु, मगर हम हमेसा खुश रौन्द्‍यां। अर भले ही हम गरीब छां, मगर आत्मिक रुप से हमुन भौत सा लोगु तैं सेठ बणैयालि। अर लोगु की नजर मा भले ही हमरि कुई औकात नि च, मगर परमेस्वर का होण का नाता हमरा पास सब कुछ च।</verse>
				<verse number="11">हे कुरिन्थि नगर का लोगु, मिन अपणी बात तैं तुमरा समणि खोली के रखी, अर सुणा, हमरा मनों मा क्या च वु तुम जणदा ही छाँ।</verse>
				<verse number="12">अर हम तुमरा दगड़ा मा कुई गळत बरतौ नि करद्‍यां, किलैकि हम तुम से प्यार करद्‍यां, मगर तुम यू बता कि तुमतै क्या ह्‍वे गै?</verse>
				<verse number="13">अर जन एक बुबा अपणा बच्‍चा से प्यार करदु ठिक उन्‍नि मि भि तुम से प्यार करदु, अर क्या तुम भि मिसे इन्‍नि प्यार करद्‍यां?</verse>
				<verse number="14">हे कुरिन्थि नगर का लोगु, जु लोग यीशु मसीह पर बिस्वास नि करदिन तुम लोग ऊंको साथ हर बात मा नि द्‍या, किलैकि सच्‍चै अर झूठ्‍ठ की कुई दोस्ती नि होन्दी। अर क्या उज्याळु अर अन्धेरु कभि भि दगड़ा मा रै सकदिन?</verse>
				<verse number="15">अर जन यीशु मसीह अर शैतान का बीच मा कुई रिश्ता नि च, ठिक उन्‍नि बिस्वास नि करण वळु अर मसीह पर बिस्वासी करण वळु दुईया का दुई एक नि ह्‍वे सकदिन।</verse>
				<verse number="16">अर मनखि खुद परमेस्वर को मन्दिर च, किलैकि ज्यून्द परमेस्वर अपणी पवित्र आत्मा का द्‍वारा हम मा रौन्दु, इलै मूरतों का दगड़ा मा परमेस्वर का मन्दिर को कुई रिश्ता नि च। अर जन कि पवित्रशास्‍त्र मा भि लिख्यूं च की परमेस्वर इन बुल्दु कि, “मि ऊंमा रौलु, अर ऊंका दगड़ा मा चललु, अर मि ऊंको परमेस्वर होलु, अर ऊ मेरा लोग होला।”</verse>
				<verse number="17">अर परमेस्वर यू भि बुल्दु कि, “ऊंका बीच मा बटि भैर निकळा, अर खुद तैं ऊं से अलग कैरा, अर ऊं सब अशुद्ध चीजों से दूर रा, तब मि तुमतै अपणा पास रखलु।”</verse>
				<verse number="18">अर परमेस्वर न इन भि बोलि कि, “तब मि तुमरो पिता होलु, अर तुम मेरी औलाद। अर यू सर्वसक्‍तिमान प्रभु परमेस्वर को वचन च।”</verse>
			</chapter>
			<chapter number="7">
				<verse number="1">हे मेरा प्यारा भै-बैंणो, जब हमरा पास पिता परमेस्वर का यू करार छिन, इलै हमतै अपणु जीवन पवित्र बणै के रखण चयेणु, अर हम इन्द्रयो कुछ भि नि कैरा ज्यां से कि वेतैं घिण औन्दी। अर हमतै परमेस्वर पर अपणी पूरि सरदा रखी के एक पवित्र जीवन जीण की पूरि कोसिस करण चयेणी।</verse>
				<verse number="2">हे मेरा दगड़्यों, हमतै अपणा दिलों मा जगा द्‍या किलैकि हमुन कै का दगड़ा मा कुछ बुरु नि कैरी, अर ना ही कै को कुछ बिगाड़ि। अर ना ही हमुन कै को फैदा उठे।</verse>
				<verse number="3">अर मि या बात तुमतै दोषी ठैराणु खुणि नि बोन्‍नु छौं, किलैकि मिन पैलि तुमतै बतै छौ कि चै हम ज्यून्दा रा या मोरि जा, तुम हमेसा हमरा दिलों मा रैल्या।</verse>
				<verse number="4">अर मितैं तुम पर पूरु यकीन च, अर तुमतै देखि के मेरु मोन बड़ु ह्‍वे जान्दु। अर तुमरा द्‍वारा मेरा मन तैं बड़ी दिलासा मिलदी, अर हरेक किसम की परेसानी मा भि हमतै बड़ी खुशी मिलदी।</verse>
				<verse number="5">अर जब हम मकिदुनिया मुलक मा अयां, त हमतै उख आराम कन को भि मौका नि मिली। हमुन हर बार दुख ही पै, इख तक कि हमरा मनों मा डौऽर ऐ गै किलैकि दुसमन हमतै परेसान करणा छा।</verse>
				<verse number="6">मगर परेसान होयां लोगु तैं दिलासा देण वळु परमेस्वर च। अर वेन ठिक बगत पर तीतुस भै तैं हमरा पास भेजि, अर वेका द्‍वारा हमतै दिलासा दिये गै।</verse>
				<verse number="7">अर तीतुस को हमरा पास औण से हमतै बड़ी खुशी मिली, अर वेसे बड़ी खुशी या च कि तुम लोगु न वेकी हिम्मत बढै। हाँ, किलैकि वेन हमतै बतै कि तुम लोग मितैं दिखणु खुणि तड़पणा छाँ, अर कुछ भि ह्‍वे वां खुणि तुमतै दुख च अर अब तुम लोग वफादार ह्‍वे ग्यां, इलै ईं बात से मितैं बड़ी खुशी मिलदी।</verse>
				<verse number="8">हालांकि, मेरी पैलि चिठ्‍ठी मा लिखीं बातों न तुमतै दुखी कैरी, पर मितैं वे बगत ईं बात पर कुई अफसोस नि छौ। अर बाद मा मितैं अफसोस ह्‍वे किलैकि चिठ्‍ठी मा लिखी कुछ बातों न तुमतै उदास कैरी दिनी।</verse>
				<verse number="9">पर अब मि खुश छौं, अर मि खुश इलै नि छौं किलैकि तुम दुखी छा, मगर मि त इलै खुश छौं किलैकि तुमरा वे दुख की वजै से तुमरो जीवन ही बदलि गै। अर तुमरो उदास होण से परमेस्वर खुश ह्‍वे अर तुमतै हमरि वजै से कुई नुकसान नि हो।</verse>
				<verse number="10">किलैकि पिता परमेस्वर की तरफा बटि औण वळु दुख हमतै छुटकारा की तरफा लेके जान्दु, मगर दुख औण का बाद भि जु लोग पस्ताप नि करदिन, ऊं खुणि वु दुख मौत की सजा तैं पैदा करदु।</verse>
				<verse number="11">देखा, परमेस्वर की मनसा का मुताबिक जु दुख तुमतै ह्‍वे वां से तुमरा भितर इथगा इच्छा पैदा ह्‍वे, कि तुमुन खुद पर लग्यां कलंक तैं दूर करण की हिम्मत दिखै। अर अपणी गळती पर तुम सरमसार होयां, अर तुमरा भितर परमेस्वर की डौऽर पैदा ह्‍वे, अर यां की वजै से जु जबरदस्त इच्छा अर जोस तुमरा भितर पैदा ह्‍वे, वेकी वजै से तुमुन अपणी गळती सुधारी अर इन साबित कैरी कि तुम ये मामला मा बेदाग छाँ।</verse>
				<verse number="12">अर ज्वा चिठ्‍ठी मिन पैलि भेजि वा मिन वे आदिम की वजै से नि भेजि छै जैन बुरु काम कैरी छौ, अर ना ही वेकी वजै से लिखी जैका दगड़ा मा अन्यो ह्‍वे छौ। बल्किन मा मिन इलै लिखी छै ताकि परमेस्वर का समणि यू साबित ह्‍वे जौ कि तुम हमरि बात को पालन करणु खुणि कन्दरि इच्छा रखद्‍यां।</verse>
				<verse number="13">अर ज्वा तारीफ मिन तुमरि तीतुस भै का पास कैरी वां खुणि मितैं सरमिन्दा नि होण पोड़ि, किलैकि ऊ सब बात सच्‍च छै। अर जु कुछ भि तीतुस तैं बतये गै उ सब कुछ तुमुन साबित कैरिके दिखै। अर जब उ तुमरा इख बटि ऐ, त तीतुस का द्‍वारा हमतै बड़ी दिलासा मिली। अर ना केवल दिलासा ही दिलासा, बल्किन मा हमतै बड़ी खुशी ह्‍वे किलैकि तीतुस भौत खुश छौ। अर ईं बात की वजा तुम लोग छाँ, किलैकि तुमुन वेतैं भौत अच्छे से स्वीकार कैरी।</verse>
				<verse number="14"></verse>
				<verse number="15">अर तुम कथगा आज्ञा को पालन करण वळा छाँ अर तुमुन कनकै डऽरदी-डऽरदी अर कौंपदी-कौंपदी वेको स्वागत कैरी, जब तीतुस यों सब बातों तैं याद करदु त वेको प्यार तुम खुणि और भि जादा बढी जान्दु।</verse>
				<verse number="16">मि खुश छौं किलैकि हरेक बात खुणि मितैं तुम पर पूरु भरोसा च।</verse>
			</chapter>
			<chapter number="8">
				<verse number="1">हे मेरा भै-बैंणो, अब मि तुमतै पिता परमेस्वर की वीं किरपा का बारा मा बतौण चाणु छौं, ज्वा वेन मकिदुनिया मुलक मा रौण वळा बिस्वासी समुदाय का लोगु का जीवनों मा कैरी।</verse>
				<verse number="2">मकिदुनिया का दुसरा लोगु न बिस्वासी लोगु तैं भौत दुख देई। हालांकि यू बिस्वासी लोग गरीब छिन, मगर फिर भि ऊं लोगु न दुसरा बिस्वासी लोगु की मदद हमेसा दिल खोली के कैरी।</verse>
				<verse number="3">अर ईं बात का बारा मा मि तुमतै बतै देन्दु कि ऊंन अपणी हैसियत का मुताबिक दिनी, बल्किन मा जथगा ऊंका पास छौ ऊंन वेसे जादा ही दिनी, अर यू सब कुछ ऊंन अपणी मनसा का मुताबिक कैरी।</verse>
				<verse number="4">अर ऊंन खुद हम से इन बिन्ती कैरी कि ऊंतैं भि बिस्वासी लोगु तक राहत पौंछाणु खुणि मदद करण को मौका दिये जौ। अर या बिन्ती ऊंन हम से बार-बार कैरी, जब की हम ऊंकी हालत तैं अच्छे से जणद्‍यां।</verse>
				<verse number="5">अर हमुन इन सोची छौ कि वु लोग अपणी हैसियत का मुताबिक ही द्‍याला, मगर ऊंन हमरि सोच से भि जादा दिनी, किलैकि ऊंन पिता परमेस्वर की मरजी तैं पूरु होणु खुणि खुद तैं वेका हाथों मा सौंपी दिनी, अर वेका बाद ऊंन मितैं ईं बात का बारा मा बतै कि वु क्या करण चाणा छिन।</verse>
				<verse number="6">इलै हमुन तीतुस भै तैं जैन ये दान तैं इकट्‍ठा करण को काम तुमरा बीच मा शुरु कैरी छौ, मिन वेसे बिन्ती कैरी कि वु फिर से तुमरा बीच मा ऐके वेतैं पूरु कैरो।</verse>
				<verse number="7">अर हम जणदा छां कि तुम हरेक बात मा बढदी जाणा छाँ, जन कि यीशु मसीह पर तुमरो बिस्वास और भि जादा मजबूत होन्दी जाणु च, अर शुभ समाचार तैं बतौण मा, हरेक बात तैं जनण मा, अर हम जणदा छां कि तुम लोग दुसरा की मदद करण चाणा छाँ, अर सबसे प्यार करद्‍यां। इलै मि चान्दु, जु दान तुमुन तयार कैरिके रख्युं च वेतैं दिल खोली के द्‍या।</verse>
				<verse number="8">हे मेरा दगड़्यों, इन बोलि के मि तुमतै कुई आदेस नि देणु छौं, बल्किन मा मि तुमरो ध्यान ईं बात पर लगौण चाणु कि तुमरो प्यार कथगा सच्‍चु च अर तुमतै दुसरो की कथगा चिन्ता च।</verse>
				<verse number="9">अर तुम हमरा प्रभु यीशु मसीह की महान किरपा का बारा मा जणदा ही छाँ, कि स्वर्ग मा वेका पास सब कुछ छौ मगर हम मनखियों तैं फैदा पौछाण का खातिर उ गरीब बणि गै, ताकि हम वेका द्‍वारा हर बात मा सेठ बणि जा।</verse>
				<verse number="10">अर मि तुमतै इन बतौण चाणु छौं अर मेरी या बात तुमरा फैदे की च, किलैकि पिछलै साल जन तुमुन यहूदिया मुलक का बिस्वासी लोगु की मदद करणु खुणि दान जमा कैरिके वेतैं देण की इच्छा कैरी,</verse>
				<verse number="11">अब वे ही जोस का साथ वेतैं पूरु भि कैरा। अर जब तुम इन करिल्या, तब सब लोगु तैं पता चलि जालु कि तुम लोग इन दान देणु खुणि तयार छाँ। अर या बात मि इलै बुलणु छौं, किलैकि तुमुन जमा करण शुरु कैरी छौ अर तुम इथगा लैख छैई भि छाँ च कि तुम यू कैरी सकद्‍यां।</verse>
				<verse number="12">अर ईं बात तैं याद रखा, कि अगर जु तुम सच्‍चि मा मदद करण चाणा छाँ, त अपणी-अपणी हैसियत का मुताबिक दे सकद्‍यां, ताकि या बात देखि के पिता परमेस्वर खुश हो। किलैकि पिता परमेस्वर इन इच्छा नि रखदु कि कु मितैं कथगा द्‍यालु, यू त तुमरि गुंजैस का मुताबिक च कि कु कथगा देण चाणु च।</verse>
				<verse number="13">अर मेरु बोन्‍नु को मतलब यू नि च कि तुम इथगा जादा द्‍या कि तुमरा पास ही नि रौ, पर जथगा तुम चा दे सकद्‍यां। मि त बस इथगा चान्दु, कि सब कुछ हो अर सभ्यों मा बराबर हो।</verse>
				<verse number="14">अर अभि तुमरा पास यहूदिया मुलक का बिस्वासी लोग की मदद करणु खुणि भौत कुछ च, इलै जौं चीजों की जरुरत ऊंतैं च तुम वींतैं पूरु कैरा। अर अगर जु औणु वळा बगत मा तुमतै भि कै चीज की जरुरत होलि त वु भि तुमरि जरुर मदद करला, अर इनकै सभ्यों का पास सब कुछ होलु।</verse>
				<verse number="15">अर जन कि पवित्रशास्‍त्र मा भि लिख्यूं च कि, “जैन जादा बटोळि वेका पास कुछ जादा नि निकळि, अर जैन कम बटोळि वेका पास कुछ कम नि निकळि।”</verse>
				<verse number="16">हे मेरा भै-बैंणो, इलै मि तीतुस तैं तुमरा पास फिर से भेजणु छौं। अर मि पिता परमेस्वर को धन्यवाद देन्दु किलैकि वेका बदौलत ही तीतुस भि दिल से तुमरि उथगा ही चिन्ता-फिकर करदु जथगा मि करदु।</verse>
				<verse number="17">अर तीतुस भै खुद अपणी इच्छा से तुमरा पास औण चाणु छौ, अर जब हमुन वेतैं या बात बतै त वेन तुरन्त “हाँ” बोलि दिनी।</verse>
				<verse number="18">अर मि तीतुस भै का दगड़ा मा एक और बिस्वासी भै तैं भेजणु छौं। अर यू उ च जैन शुभ समाचार तैं फैलाण मा जै तरीके से काम कैरी, वां खुणि बिस्वासी समुदाय का लोग वेकी बड़ी तारीफ करदिन।</verse>
				<verse number="19">अर इथगा ही ना, बल्किन मा समुदाय का सब लोगु न येतैं हमरा दगड़ा मा जाण खुणि ठैर्युं च। अर यू भै हमरा दगड़ा मा यरूशलेम नगर तब जालु, जब बिस्वासी भै-बैंणा दान तैं जमा कैरी द्‍याला। अर यू सब हम प्रभु तैं आदर-सम्मान देणु खुणि करणा छां, अर बिस्वासी लोगु का दगड़ा मा इन कैरिके हम ऊंकी मदद करण चाणा छां।</verse>
				<verse number="20">अर बिस्वासी लोगु न ये दान तैं दिल खोली के दियूं च, इलै हमुन इन सोची कि तीतुस भै का दगड़ा मा वे भै तैं भि भेजि द्‍या। अर इन कैरिके हम इन कोसिस कन चाणा छां कि कुई भि मनखि हम पर दान लेण को दोष नि लगै सैको।</verse>
				<verse number="21">इलै हम सिरफ ऊं बातों की ही चिन्ता नि करद्‍यां जु प्रभु का समणि भली छिन, पर ऊं बातों की भि चिन्ता करद्‍यां जु कि मनखियों का समणि भली छिन।</verse>
				<verse number="22">अर येका दगड़ा-दगड़ि हम एक और बिस्वासी भै तैं ऊंका दगड़ा मा भेजणा छां। अर मिन कई बार प्रभु खुणि ये मनखि का काम तैं देखि, अर मितैं वेका बारा मा पता च कि उ प्रभु कि सेवा मा मदद करणु खुणि हमेसा तयार रौन्दु। अर उ भि ईं बात तैं जणदु च कि तुम लोग ये दान तैं दुसरा बिस्वासी लोगु का समणि देण चाणा छाँ, अर यू आदिम यों दुई भैयों का दगड़ा मा औणु खुणि भौत खुश च।</verse>
				<verse number="23">अर अगर तीतुस भै का बारा मा कुई भि सवाल च, त मि तुमतै बतै देन्दु कि वु मेरु मददगार च अर सेवा का काम मा इमानदार मनखि। अर वेका दगड़ा मा जु दुई भै औणा छिन ऊ बिस्वासी समुदाय का लोगु का द्‍वारा भिजे जाण छिन। अर यू दुईया का दुई यीशु मसीह की सेवा का द्‍वारा वेतैं आदर-सम्मान देन्दिन।</verse>
				<verse number="24">इलै ऊंतैं अपणु प्यार को सबूत द्‍या, ताकि समुदाय का सब लोगु पर तुमरो प्यार परगट ह्‍वे जौ। अर ऊ इन भि जाणि जा कि आखिर हम लोग तुमरि खातिर किलै बड़ु मोन करद्‍यां।</verse>
			</chapter>
			<chapter number="9">
				<verse number="1">अर मि तुमतै वे दान का बारा मा लिखण चाणु छौं, जैकी तयारी तुम लोग दुसरा बिस्वासी लोगु की मदद खुणि कना छाँ। अर येका बारा मा मि तुम खुणि कुछ जादा लिखण जरुरी नि समझदु।</verse>
				<verse number="2">किलैकि मि जणदु छौं, कि तुम मदद करण खुणि तयार छाँ। अर मि मकिदुनिया नगर का बिस्वासी भै-बैंणो तैं बड़ा मोन कैरिके बतौणु छौं, कि अखया मुलक का बिस्वासी लोग पिछलै एक साल बटि मदद करणु खुणि तयार बैठयां छिन। अर तुमरा ये जोस न ऊंका भितर खुशी पैदा कैरियाली।</verse>
				<verse number="3">अर अब वे दान खुणि मि तीतुस अर दगड़ा मा दुई और बिस्वासी भैयों तैं भेजणु छौं, ताकि जु बड़ु मोन हम तुमरा खातिर करद्‍यां वु बेकार नि हो। इलै मेरा दगड़्यों, जन मि बिस्वासी लोगु तैं बतौणु छौ वेका मुताबिक तुम लोग वे दान तैं देणु खुणि तयार रा।</verse>
				<verse number="4">अर अगर जु मकिदुनिया का बिस्वासी लोग मेरा दगड़ा मा आला, त मि इन नि चान्दु कि ऊ ऐके देखा कि जै दान कि बात किये जाणि छै, उ त जमा ही नि च। अर अगर जु इन होलु, त तब मितैं बड़ी बेजती मैसूस होण अर तुमतै भि अफ पर बड़ी सरम आली।</verse>
				<verse number="5">इलै मिन यू जरुरी समझि, कि पैलि मि तीतुस अर वेका दगड़ा मा दुई और भैयों तैं तुमरा पास भेजूँ, ताकि वु ऐके तुम बटि मिला। अर तुमरा दगड़ा मा मिली के वु दान तैं इकट्‍ठा करण मा तुमरि मदद कैरा, जैको करार तुमुन पैलि हमरा दगड़ा मा कैरी छौ। अर जब सब कुछ पैलि बटि तयार रालु, त हमरा पौंछण पर मेरा दगड़ा मा अयां बिस्वासी लोग दिखला कि तुमुन सच्‍चि मा मदद खुणि दान दियूं च, अर या खुणि कैन भि तुमतै मजबूर नि कैरी।</verse>
				<verse number="6">हे मेरा भै-बैंणो, जु मनखि कम बुतदु वेतैं कम ही कटण पोड़लु, अर जैन भौत जादा बूति वेतैं जादा फसल कटण पोड़लि।</verse>
				<verse number="7">इलै जैन अपणा मन मा जथगा देण कि सोच्‍चि वु वेका मुताबिक ही दान द्‍यो। अर जब तुम ये काम तैं करिल्या त कुड़कुड़ा ना, अर ना ही जोर-जबरदस्ती मा ऐके इन कैरा। अर अगर जु तुम खुश ह्‍वेके यू दिल्या, त ईं बात तैं जाणि ल्या कि पिता परमेस्वर ऊं लोगु से भौत खुश होन्दु जु खुशी-खुशी से देन्दिन।</verse>
				<verse number="8">अर पिता परमेस्वर तुमतै हरेक चीज दे सकदु च ज्यां कि तुमतै जरुरत च। अर इन वु इलै करलु, ताकि तुम और भि जादा दिल खोली के दे सैका अर भलै का काम तुमरा द्‍वारा और भि जादा किये जा।</verse>
				<verse number="9">जन कि पवित्रशास्‍त्र मा भि लिख्यूं च कि, “प्रभु न गरीब लोगु तैं दिल खोली के देई, अर उ अपणा लोगु की भलै हमेसा कनु रालु।”</verse>
				<verse number="10">अर जन पिता परमेस्वर बुतण वळा किसानों तैं बीज अर खाणु खुणि रुट्‍टी देन्दु, ठिक उन्‍नि उ तुमतै भि हरेक चीज द्‍यालु अर इन उ हमेसा करलु, ताकि तुमरा पास सब कुछ हो अर तुम दुसरो की मदद कैरी सैका।</verse>
				<verse number="11">अर पिता परमेस्वर तुमतै आसीस देके भरपूर कैरी द्‍यो, ताकि तुम दुसरो खुणि दाता बणि सैका। अर इन कैरिके तुमरा द्‍वारा दुसरा लोगु की मदद होलि, अर ये काम की वजै से वु लोग पिता परमेस्वर को धन्यवाद करला।</verse>
				<verse number="12">हे मेरा भै-बैंणो, तुम ईं बात तैं याद रखा कि जौं बिस्वासी लोगु की मदद खुणि यू दान जमा किये जाणु च, वेका बदला मा वु लोग तुम खुणि अर तुमरा ये काम खुणि पिता परमेस्वर को धन्यवाद करला।</verse>
				<verse number="13">अर दुसरा लोगु की मदद खुणि जु दान तुम देणा छाँ वेकी वजै से बिस्वासी लोग पिता परमेस्वर की बडै करदिन, किलैकि इन कैरिके तुमुन यीशु मसीह का शुभ समाचार की बात तैं पूरु कैरी। अर ऊ ईं बात खुणि पिता परमेस्वर को धन्यवाद करला कि तुमुन दिल खोली के दिनी अर वां से दुसरा लोगु को भलु ही ह्‍वे।</verse>
				<verse number="14">अर वु तुम से भौत प्यार करदिन, इलै वु तुम खुणि प्रार्थना करला, अर इन वु इलै करला किलैकि वु जणदा छिन कि तुम पर पिता परमेस्वर की बड़ी किरपा होईं च।</verse>
				<verse number="15">अर हमरा प्रभु यीशु का खातिर पिता परमेस्वर को धन्यवाद हो, जैको बखान हम शब्दों मा नि कैरी सकद्‍यां।</verse>
			</chapter>
			<chapter number="10">
				<verse number="1">हे मेरा दगड़्यों, मि पौलुस यीशु मसीह की तरौं दया करण वळु, अर दीन सभौ को बणि के हमेसा तुम से बिन्ती करदु, मगर तुमरा बीच मा कुछ लोग इन्द्रया छिन जु कि इन बुल्दिन कि, “अरे, जब पौलुस तुमरा बीच रौन्दु तब उ बिल्कुल सीदु-सादु बणि के रौन्दु, मगर जब उ तुम से दूर चलि जान्दु त अपणी चिठ्‍ठीयों मा इन लिखदु जन कि उ तुमतै धमकी देणु होलु।”</verse>
				<verse number="2">अर मि इन उम्मीद करदु, कि जब मि तुमरा बीच मा औलु त मितैं तुमरा दगड़ा मा सख्‍तै नि दिखौण पोड़लि, मगर सायद ऊं लोगु का दगड़ा मा जरुर सख्‍तै दिखौलु, जौं को मनण इन च कि हम दुनियां का तौर-तरीकों से चलद्‍यां।</verse>
				<verse number="3">अर भले ही हम भि ईं दुनियां मा ही रौन्द्‍यां, मगर फिर भि हम अपणा फैदा खुणि लड़ै नि करद्‍यां।</verse>
				<verse number="4">अर जन एक सिपै लड़ै करण का बगत मा हथियारों को इस्तेमाल करदु, ठिक उन्‍नि मि भि विरोध करण वळा लोगु का दगड़ा मा परमेस्वर की ताकत को इस्तेमाल करदु अर वेका वचन से ऊंका झूठ्‍ठा विचारों को नास कैरी देन्दु।</verse>
				<verse number="5">अर मि तुमतै बतै देन्दु कि बिस्वासी लोगु तैं धोखा देण खुणि जौं बातों को इस्तेमाल वु लोग करदिन, वु पूरि तरौं से गळत छिन। अर जब वु अपणी बातों का द्‍वारा परमेस्वर का ज्ञान को विरोध करदिन, तब हम ऊंका विचारों को नास परमेस्वर का वचन का द्‍वारा करद्‍यां। अर ऊंकी सोच तैं बदलि के उन्‍नि बणौन्द्‍यां जन यीशु मसीह चान्दु।</verse>
				<verse number="6">अर अगर तुम मा बटि कुई यीशु की बात तैं स्वीकार नि करदु, त इन्द्रया लोगु तैं सजा देणु खुणि हम तयार छां। मगर फिर भि हम इन चन्द्‍यां कि तुम सभ्या का सभि वेकी बात को पालन पूरि तरौं से कैरा।</verse>
				<verse number="7">अर तुमरि आंख्यों का समणि जु चीज छिन तुम ऊंतैं स्वीकार करद्‍यां। अर अगर कैतैं पूरु यकीन च कि वु यीशु मसीह को चेला च, त फिर उ इन भि जाणि ल्यो कि जन उ मनखि यीशु मसीह को च ठिक उन्‍नि हम भि वेका छां।</verse>
				<verse number="8">अर कुछ हद तक मि वे अधिकार पर बड़ु मोन कैरी सकदु छौं, जु कि प्रभु यीशु न मितैं तुमरा फैदा का खातिर दियूं च, अर उ तुमरा नुकसान खुणि नि च। इलै मि वे अधिकार को इस्तेमाल करणु खुणि कभि पिछनै नि हटलु अर ना ही सरम मैसूस करलु।</verse>
				<verse number="9">हे मेरा दगड़्यों, मि या चिठ्‍ठी तुम खुणि इलै नि लिखणु, कि तुम यों तैं पैढी के डौऽरी जा।</verse>
				<verse number="10">किलैकि कुछ लोग इन बुल्दिन कि, “पौलुस की चिठ्‍ठी त गम्भीर अर असरदार छिन, मगर जब उ बिस्वासी लोगु का बीच मा रौन्दु तब उ बिल्कुल कमजोर लगदु अर वेका भासण बेकार होनदिन।”</verse>
				<verse number="11">मगर मि तुमतै बतै देन्दु कि जु लोग इन बुल्दिन ऊ सब इन जाणि ल्या कि जन हम तुमरा पीठ पिछनै चिठ्‍ठीयों मा लिखद्‍यां, उई काम हम लोगु का मुख समणि भि करद्‍यां।</verse>
				<verse number="12">हे मेरा भै-बैंणो, तुमरा बीच मा कुछ लोग इन छिन जु कि अपणी बातों पर भौत बड़ु मोन करदिन, मगर हम इन नि करद्‍यां। अर जब वु अपणी तुलना कै दुसरा का दगड़ा मा करदिन त वु इन दिखौन्दिन कि वु भौत सच्‍चा छिन मगर सच्‍चै त या च कि इन्द्रया लोग मूरख छिन।</verse>
				<verse number="13">पर हम लोग इन नि करद्‍यां, अर अगर जु हम बड़ु मोन करद्‍यां त केवल पिता परमेस्वर की सेवा का काम पर। अर सेवा को जु काम हम तुमरा बीच मा कना छां, वु भि पिता परमेस्वर का द्‍वारा दियां काम को एक हिस्सा च।</verse>
				<verse number="14">अर जथगा बड़ु मोन हमतै करण चयेणु हम फिर भि वेका मुताबिक नि करद्‍यां, किलैकि जब हम तुमरा पास यीशु मसीह का शुभ समाचार तैं लेके ऐ छा, त हम वे ही सभौ का मुताबिक अभि तक चलणा छां।</verse>
				<verse number="15">हे मेरा भै-बैंणो, हम दुसरा बिस्वासी लोगु की मेनत पर कभि भि बड़ु मोन नि करद्‍यां, अर या बात मि इलै बोन्‍नु छौं किलैकि हमुन ऊंका काम मा कुई मेनत भि नि कैरी। अर हम इन उम्मीद करद्‍यां कि जन-जन तुम बिस्वास मा मजबूत होन्दी जैल्या, तन-तन तुम ये काम तैं फैलाण मा हमरि मदद जरुर करिल्या।</verse>
				<verse number="16">ताकि मि ऊं मुलकों मा भि शुभ समाचार तैं सुणै सैकु जख अभि तक कुई नि गै, अर हम कै दुसरा का कियां काम मा कभि भि बड़ु मोन नि करद्‍यां।</verse>
				<verse number="17">किलैकि पवित्रशास्‍त्र मा भि लिख्यूं च कि, “जु कुई भि बड़ु मोन कैरो, त उ प्रभु पर बड़ु मोन कैरो।”</verse>
				<verse number="18">किलैकि जु कुई अपणी तारीफ खुद करदु वेतैं स्वीकार नि किये जान्दु, मगर जैकी बडै प्रभु कि तरफा बटि किये जान्दी वेकी बात स्वीकार किये जान्दी।</verse>
			</chapter>
			<chapter number="11">
				<verse number="1">हे मेरा दगड़्यों, जन तुम दुसरा लोगु तैं स्वीकार करद्‍यां जु कि अपणी ही बातों पर बड़ु मोन करदिन, कास, उन्‍नि तुम मितैं भि स्वीकार करदा जब कि मि तुमरि नजर मा एक मूरख मनखि का जन बरतौ करदु।</verse>
				<verse number="2">अर मितैं तुमरि बड़ी परवा च, ठिक उन्‍नि परवा जन पिता परमेस्वर तैं तुमरि च। अर अब तुम एक कुंवारी नौनि का जन छाँ, जिं की मांगण मिन पवित्र यीशु मसीह का दगड़ा मा करीं च।</verse>
				<verse number="3">मगर मितैं ईं बात की बड़ी चिन्ता च कि जन शैतान न गुरौ का द्‍वारा बड़ी चालाकी से हवा तैं अपणा छल मा फंसै दिनी, ठिक उन्‍नि कखि इन नि हो कि झूठ्‍ठा लोग अपणी गळत शिक्षा का द्‍वारा तुमरा पवित्र जीवन तैं जु कि यीशु मसीह का दगड़ा मा च वेतैं बिगाड़ि नि द्‍या।</verse>
				<verse number="4">अर मि तुमतै चितै देन्दु कि तुमरा बीच मा कुछ इन्द्रया लोग ऐ गैनी, जु कि यीशु मसीह का बारा मा कुछ अलग ही शिक्षा देणा छिन, ज्वा कि हमरि दिईं शिक्षा से बिल्कुल अलग च। अर वे बगत मा तुमुन हमरा द्‍वारा शुभ समाचार तैं सुणी अर पवित्र आत्मा तैं पै, मगर अब तुम कै दुसरा ही रैबार तैं सुनणु खुणि अर कै दुसरा ही आत्मा तैं पौणु खुणि तयार होयां छाँ।</verse>
				<verse number="5">अर वु लोग खुद तैं यीशु मसीह को सबसे खास चेला बतौन्दिन, मि इन समझदु कि मि भि ऊंमा बटि कै से कम नि छौं।</verse>
				<verse number="6">अर भले ही मि बोन्‍न मा एक भलु नेता नि छौं, मगर मि पिता परमेस्वर का रैबार का बारा मा खूब अच्छे से जणदु। अर तुमरा बीच मा रै के मिन जु कुछ भि कैरी अर सिखै, वेका मुताबिक मिन हरेक बात तैं तुम खुणि साफ-साफ कैरी।</verse>
				<verse number="7">अर मिन तुमतै पिता परमेस्वर को शुभ समाचार सुणै अर वेका बदला मा मिन तुम से रुपया नि लिनी। अर अब मितैं इन बता कि क्या मिन कुछ गळत कैरी? अरे, मिन तुमरा खातिर खुद तैं छुटो बणै दिनी, ताकि तुमतै पूरु आदर-सम्मान मिली सैको।</verse>
				<verse number="8">अर मिन बिस्वासी समुदाय का दुसरा लोगु से दान मांगि, ताकि तुमरा बीच मा काम कैरी सैकु त क्या मिन कुछ गळत कैरी? मगर कुछ लोग इन बुल्दिन कि मिन तुमरा खातिर दुसरा लोगु तैं लूटी।</verse>
				<verse number="9">अर जब मि तुमरा बीच मा छौ त वे बगत मितैं भौत चीजों की जरुरत छै, मगर मिन तुम लोगु तैं जरा भि परेसान नि कैरी। अर जब मकिदुनिया मुलक बटि कुछ बिस्वासी लोग ऐनी, त वे बगत ऊंन मेरी जरुरतों तैं पूरु कैरी। अर वे बगत मिन पूरि कोसिस कैरी कि मि तुम पर बोझ नि बणु अर अगनै भि मेरी इन्‍नि कोसिस राली कि मि तुम पर बोझ नि बणु।</verse>
				<verse number="10">अर जन सच्‍चै यीशु मसीह मा च वा ही सच्‍चै मि मा भि च, अर ईं बात का खातिर अखया मुलक को कुई भि मनखि मितैं बड़ु मोन करण से रोकी नि सकदु, किलैकि मि प्रभु का वचन तैं तुम लोगु का बीच मा मुफत मा बंटदु।</verse>
				<verse number="11">अर इन मि इलै बोन्‍नु छौं किलैकि मि तुम से भौत प्यार करदु, अर ईं बात का बारा मा पिता परमेस्वर भौत अच्छे से जणदु।</verse>
				<verse number="12">अर तुमरा बीच मा कुछ लोग इन छिन, जु कि बड़ु मोन कैरिके अफ खुणि इन बुल्दिन कि हम भि यीशु मसीह का खास चेला छां। इलै मिन तुम बटि कै भि किसम को दान नि लिनी, ताकि इन्द्रया लोग तैं मौका नि मिलु कि वु हमरा बराबर छिन।</verse>
				<verse number="13">इन्द्रया लोग यीशु को खास चेला होण को ढोंग करदिन अर झूठ्‍ठा छिन, इन्द्रया लोग बुल्दिन कि हम पिता परमेस्वर खुणि काम कना छां, मगर धोखा देण वळा छिन।</verse>
				<verse number="14">अर यां मा हैरान होण कि कुई बात नि च, किलैकि शैतान भि चमकदार स्वर्गदूत को रुप धारण करदु।</verse>
				<verse number="15">अर वेका कई सेवक भि धरमी होण को पूरु ढोंग करदिन, मगर सच्‍चै त या च कि आखिरी का दिन मा ऊंतैं ऊंका कामों को हिसाब से सजा दिये जालि।</verse>
				<verse number="16">हे मेरा भै-बैंणो, मि फिर बोन्‍नु छौं कि कुई यू नि सोचो कि मि मूरख छौं, अगर तुम भि इन्‍नि सोचद्‍यां त मूरख समझि के ही मितैं बरदास कैरी ल्या, ताकि मि जरा बड़ु मोन कैरी सैकु।</verse>
				<verse number="17">अर ये मामला मा मि जु कुछ बोन्‍नु छौं उ प्रभु का दियां अधिकार से ना, बल्किन मा एक नासमझ मनखि का जन बड़ु मोन कैरिके बोन्‍नु छौं।</verse>
				<verse number="18">अर भौत सा लोग त इन छिन जु कि अपणी बातों पर बड़ु मोन करदिन, त मि भि अपणी बातों पर बड़ु मोन करलु।</verse>
				<verse number="19">अर जु तुम खुद तैं भौत समझदार समझद्‍यां, त फिर तुम झूठ्‍ठा लोगु की शिक्षा तैं बड़ी खुशी से किलै स्वीकार करद्‍यां?</verse>
				<verse number="20">अर जब लोग तुमतै अपणु गुलाम बणै देन्दिन, या तुमरा दगड़ा मा अन्यो करदिन अर तुमतै धोखा देन्दिन, त तुमतै लगदु कि सब कुछ ठिक च अर घबराण कि कुई बात नि च, जब ऊ बड़ु मोन कैरिके तुमकु बुल्दिन तब तुम ऊंका मुताबिक ही करद्‍यां अर जब वु तुम पर थप्पड मरदिन तब भि तुम ऊंकी सौन्द्‍यां।</verse>
				<verse number="21">मगर हमुन त तुमरा दगड़ा मा इन कुछ भि नि कैरी, त क्या इलै ही तुम हमतै कमजोर समझद्‍यां? अर अगर ऊंका पास हिम्मत रखी के बड़ु मोन करण की कुई बात च, त मि भि नासमझ मनखि की तरौं हिम्मत रखी के बड़ु मोन करलु। अर जब तुम झूठ्‍ठा लोगु की सुणी सकद्‍यां त अब मेरी भि सुणा,</verse>
				<verse number="22">क्या वु लोग ही इब्रानी छिन? अरे उ त मि भि छौं। अर क्या वु लोग इस्राएली छिन? नऽ रे ना मि भि एक इस्राएली छौं। अर क्या वु ही लोग पितर अब्राहम का वंश मदि छिन? अरे मि भि त पितर अब्राहम का वंश मदि छौं।</verse>
				<verse number="23">अर वु लोग बड़ु मोन करदिन कि वु यीशु मसीह की सेवा करणा छिन। पर अब मि भि एक मूरख की तरौं तुमतै चितै देन्दु, कि मि यीशु मसीह खुणि भौत मेनत कनु छौं अर कई बार जेलखाना डळै ग्यों, अर भौत बार लोगु न मितैं बुरी तरौं से मारी, इख तक की कई बार मुरण वळु भि छौ मगर बचि ग्यों। अर मेरा दगड़ा मा यू सब इलै ह्‍वे किलैकि मि यीशु मसीह को सेवक छौं।</verse>
				<verse number="24">अर यू भि सुणा, कि मिन पांच अलग-अलग बार यहूदी लोगु का द्‍वारा उनचालिस कोड़ो की मार खै।</verse>
				<verse number="25">अर तीन बार त मि जांठों ही जांठों पीटयों, अर एक बार मि पर ढुंग्यो किये गै। अर तीन बार इन ह्‍वे कि मि जाज मा सफर कनु छौ, त जाज अधा समुन्दर मा ही टूटी गै अर एक रात अर एक दिन मिन समुन्दर का बीचों-बीच काटी।</verse>
				<verse number="26">अर मिन भौत सि जगों को सफर करण का बगत अपणा जीवन मा भौत सि मुसीबतों तैं झेली। जन कि, गाड-गदन्यों तैं पार करण को बगत, डाकुओं का द्‍वारा, अर मेरा अपणा यहूदी लोगु का द्‍वारा, अर ऊं लोगु का द्‍वारा भि जु की यहूदी जाति का नि छिन। अर मितैं नगरों मा, निर्जन जगों मा, समुन्दर मा दुख-तकलीफ झिलण पोड़ीनी, इख तक ऊं लोगु का द्‍वारा भि मितैं सतयै गै, जु की झूठ्‍ठ बोलि के खुद तैं यीशु मसीह को बतौन्दिन।</verse>
				<verse number="27">हे मेरा दगड़्यों, ये काम खुणि मिन कड़ी मेनत कैरी, अर कई रात्यों मि उणिन्दु रौंऽऽ। अर कई बार मितैं भौत भूक अर तीस लगि, पर मेरा पास खाण-पीण खुणि कुछ नि होन्दु छौ, अर ह्‍यूँद की कई रात मिन गरम कपड़ों का बगैर ही गुजरिनी।</verse>
				<verse number="28">अर यों सब बातों का अलावा कुछ और बात भि छिन जौं को बखान मिन नि कैरी, पर मि तुमतै बतै देन्दु कि बिस्वासी समुदाय का लोगु खुणि हरेक दिन मितैं बड़ी चिन्ता लगि रौन्दी।</verse>
				<verse number="29">अर जब मि ऊं लोगु का बारा मा सुणदु जु कि बिस्वास मा मजबूत नि छिन त मि ऊंका दगड़ा मा जादा सख्‍तै नि दिखान्दु, पर ऊंकी मदद करण की पूरि कोसिस करदु। अर जब कुई मनखि कै बिस्वासी भै-बैंण तैं पाप मा फंसै देन्दु त मितैं वे देखि के भौत गुस्सा औन्दु।</verse>
				<verse number="30">अर अगर मितैं बड़ु मोन कन ही होलु, त मि अपणी कमजोर बातों पर बड़ु मोन करलु।</verse>
				<verse number="31">हमरु पिता परमेस्वर जु कि हमरा प्रभु यीशु मसीह को पिता च, वेकी तारीफ सदनि होणी रौ, उ सब कुछ जणदु की मि झूठ्‍ठ नि बोन्‍नु छौं।</verse>
				<verse number="32">अर एक बार जब मि दमिश्क नगर मा छौ, त वे बगत पर राजा अरितास का गवर्नर न अपणा सिपयों कू इन बुलयूं छौ कि “तुम लोग नगर का गेट पर पैरेदारी कैरा, ताकि जब पौलुस नगर तैं छोड़ि के जाणु रौलु त तुम वेतैं बन्धी बणै सैका।”</verse>
				<verse number="33">मगर मेरा दगड़्यों न मितैं एक बड़ा ठुफरा मा बैठे, अर नगर की दिवाल जिं पर एक खिड़की छै उख बटि मितैं मूड़ी उतारि दिनी, अर इनकै मि ऊंका हाथोंळ बचि ग्यों।</verse>
			</chapter>
			<chapter number="12">
				<verse number="1">हे मेरा दगड़्यों, मितैं बड़ु मोन करण से कुई फैदा नि च किलैकि या बात मि खुणि खूब नि च। अर अब मि तुमतै प्रभु का द्‍वारा मिल्यां दिब्य दरसनो अर वेका द्‍वारा परगट कियां रैबारों का बारा मा बतौण चाणु छौं।</verse>
				<verse number="2">अर मि यीशु मसीह पर बिस्वास करण वळु भक्‍त छौं, अर चौदह साल पैलि मितैं चाँद, तारों से भि मथि पिता परमेस्वर का पास स्वर्ग मा उठये गै। अर वे बगत मितैं सरील समेत उठये गै या बगैर सरील का यां का बारा मा मितैं अच्छे से पता नि च, मगर पिता परमेस्वर ईं बात का बारा मा भौत अच्छे से जणदु।</verse>
				<verse number="3">हाँ, केवल पिता परमेस्वर ही जणदु कि मि अपणा सरील समेत स्वर्ग मा उठये ग्यों या केवल अपणी आत्मा मा ही यां का बारा मा केवल पिता परमेस्वर ही जणदु। मगर मि त बस इथगा ही जणदु कि,</verse>
				<verse number="4">जब मि स्वर्ग मा उठये ग्यों त उख मिन इन्दरि बातों तैं सुणी जौं को बखान नि किये जै सकदु, अर पिता परमेस्वर न मितैं ऊं बातों तैं बतौण की इजाजत नि दिनी।</verse>
				<verse number="5">हालांकि, मेरु यू तजुर्बा मेरा जीवन खुणि बड़ु मोन करण की वजा बणदु, मगर हे मेरा दगड़्यों, मिन इन नि कैरी बल्किन मा मि त अपणी कमजोर बातों पर ही बड़ु मोन करदु।</verse>
				<verse number="6">उन त मि बड़ु मोन कैरी सकदु छौं अर मितैं मूरख भि नि समझै जालु किलैकि मि सच्‍च बुल्दु, मगर मि खुद तैं बड़ु मोन करण से रुकदु छौं, किलैकि मि चान्दु कि जु कुछ भि मेरा दगड़ा मा ह्‍वे वेकी वजै से लोग मितैं महान नि समझा, मगर मि त बस इथगा ही चान्दु कि लोग मेरा बारा मा वेका मुताबिक ही जाणा अर समझा, जु कुछ भि बुल्दु अर करदु छौं।</verse>
				<verse number="7">अर मि ऊं चीजों का खातिर भि बड़ु मोन कैरी सकदु छौं, जु दिब्य दरसन मा पिता परमेस्वर न मितैं दिखैनि, मगर परमेस्वर न शैतान तैं इन इजाजत दिनी कि वेका दूत का द्‍वारा मेरा सरील मा कष्‍ट हो, ताकि मि जादा बड़ु मोन नि कैरुं।</verse>
				<verse number="8">अर यां का बारा मा मिन प्रभु से तीन बार बिन्ती कैरी, कि उ ये कष्‍ट तैं मेरा सरील बटि दूर कैरी द्‍यो,</verse>
				<verse number="9">पर प्रभु न मिकू बोलि, “पौलुस, मेरी किरपा ही त्वे खुणि काफी च, किलैकि जब तू कमजोर होन्दी तब मेरी ताकत पूरि तरौं से काम करदी।” इलै प्रभु न मिकू जु कुछ बोलि मि वीं बात की वजै से बड़ी खुशी मणौन्दु अर अपणी ईं कमजोरी पर बड़ु मोन करदु, ताकि लोगु तैं इन पता लगि सैको कि यू यीशु मसीह ही च जु कि मितैं अपणी सेवा करण की ताकत देन्दु।</verse>
				<verse number="10">इलै मि अपणी कमी-कमजोरी का बगत मा, बेजती होण का बगत मा, या सतयै जाण अर दुख-तकलीफ का हरेक बगत मा खुश रौन्दु। अर मेरा खुश होण की वजा या च कि जब-जब मि कमजोर होन्दु, त वे ही बगत मा पिता परमेस्वर की ताकत मेरा जीवन मा काम करदी अर मि और भि जादा मजबूत होन्दी जान्दु।</verse>
				<verse number="11">मि तुमरि खातिर नासमझ बणि ग्यों, मगर वां खुणि भि तुमुन ही मितैं मजबूर कैरी, जब तुमतै मेरी तरफा बटि बुलण चयेणु, तब तुम इन नि करद्‍यां। अर भले ही मि लोगु कि नजर मा कुछ नि छौं, मगर फिर मि यीशु मसीह का खास चेलों मा बटि कम भि नि छौं।</verse>
				<verse number="12">किलैकि मेरा द्‍वारा भि भौत सा चिन्‍न, चमत्कार अर सामर्थ का काम किये गैनी, अर यू सब काम इन साबित करदिन कि मि भि यीशु मसीह को एक खास चेला छौं। अर यू सब कुछ मिन तुमरा दगड़ा मा रै के कैरी अर वु भि बड़ु सबर रखी के।</verse>
				<verse number="13">अर या बात सच्‍चि च कि मिन तुमरा दगड़ा मा उन बरतौ नि कैरी जन मि दुसरि जगा मा रौण वळा बिस्वासी समुदाय का लोगु का दगड़ा मा करदु, जौं की शुरुवात मेरा द्‍वारा ही किये गै। अर तुमतै क्या लगदु कि मिन कुछ गळत कैरी? नऽ रे ना, मिन त अपणी जरुरत तैं पूरि करणु खुणि तुम से कुछ नि मांगि, त क्या अब मितैं तुम से माफी मंगण पोड़लि?</verse>
				<verse number="14">हे मेरा भै-बैंणो, मि तिसरी बार तुमरा पास औण खुणि तयार छौं, मगर मि तुम पर बोझ नि बणण चान्दु। अर मितैं वु नि चयेणु जु कि तुमरा पास च, बल्किन मितैं त तुम लोग चयेणा छाँ। अर बच्‍चों से उम्मीद नि किये जान्दी की वु अपणा ब्वे-बाब खुणि बचै के जमा करला, बल्किन मा ब्वे-बाब तैं अपणा बच्‍चों खुणि सब कुछ कन चयेणु।</verse>
				<verse number="15">इलै मि तुमरा फैदा खुणि जु कुछ कैरी सकदु छौ, वु सब कुछ मि खुशी से करलु इख तक कि खुद तैं भि तुम खुणि दे द्‍यूलु। अर जब मि तुम से इथगा प्यार करदु, त क्या तुमतै भि मिसे प्यार नि करण चयेणु?</verse>
				<verse number="16">मिन तुम पर कुई बोझ नि डालि, फिर भि तुम बुल्द्‍यां कि मि चालाक छौं, अर छल-कपट कैरिके तुमतै ठगण चाणु छौं।</verse>
				<verse number="17">अर जौं लोगु तैं भि मिन तुमरा पास भेजि, त क्या ऊंका द्‍वारा मिन तुमरो फैदा उठे? अब ईं बात का बारा मा तुम ही मितैं बता।</verse>
				<verse number="18">अर मिन तीतुस भै तैं समझै-बुझै के तुमरा पास भेजि, अर वेका दगड़ा मा एक और भै तैं भि भेजि त अब मितैं एक बात बता, कि जब तीतुस भै उख पौंछी त क्या वेन तुमरा दगड़ा मा छल-कपट कैरिके तुमतै ठगि? मगर मि अर तीतुस भै हमेसा तुम सभ्यों खुणि बड़ी इमानदारी से काम करद्‍यां।</verse>
				<verse number="19">हे मेरा प्यारा भै-बैंणो, अर तुम अभि तक इन समझणा ह्‍वेल्या कि हम अपणी सफै देणा छां, पर मि यू सब बात इमानदारी से बुलणु छौं, किलैकि मेरु रिश्ता प्रभु यीशु मसीह का दगड़ा मा च अर पिता परमेस्वर मेरी सब बातों तैं सुनणु च। इलै जु कुछ भि मि बुल्दु या करदु छौं वु सब कुछ तुमरा फैदा खुणि ही च, ताकि तुमरो बिस्वास मजबूत ह्‍वे जौ।</verse>
				<verse number="20">अर मितैं ईं बात की डौऽर च कि कखि इन नि हो कि जब मि तुमरा बीच मा औंऽऽ, त जन मि चान्दु तुमतै उन नि पौं, अर जन तुम मिसे चन्द्‍यां उन तुम मितैं नि पा। अर मितैं इन भि डौऽर च कि तुमरा बीच मा झगड़ा करण वळा, खार खाण वळा, जल्दी नाराज होण वळा, अपणु ही भलु चाणा वळा, बदनाम करण वळा, झूठ्‍ठी बात फैलाण वळा, बड़ु मोन करण वळा, अर दंगा करण वळा लोग मौजूद छिन।</verse>
				<verse number="21">अर मितैं ईं बात कि चिन्ता च कि जब मि तुमरा पास फिर से औलु, अर अगर जु तुमरा बीच मा भौत सा लोग अभि भि अपणा पुरणा पापों मा ही फंस्यां छिन, अर अपणा मनों मा गळत विचार रखदिन, या सरील का गळत सम्बन्ध रखणा छिन, जौन अपणा यों पापों से पस्ताप नि कैरी त मितैं तुमरि खातिर दीन होण पोड़लु, अर पिता परमेस्वर का समणि रुंण पोड़लु।</verse>
			</chapter>
			<chapter number="13">
				<verse number="1">हे मेरा भै-बैंणो, अब मि तिसरी दौं तुम से मिलण वळु छौं। अर जन कि पवित्रशास्‍त्र मा लिख्यूं भि च कि, “कै भि इळजाम की सच्‍चै दुई या तीन गवाओ का द्‍वारा ही साबित की जौ।”</verse>
				<verse number="2">अर अभि त मि तुम से दूर छौं पर तुमतै याद होलु, जब मि तुमरा पास दुसरि दौं ऐ छौ त मिन ऊं लोगु तैं चितै छौ कि वु पाप नि कर्यां, अर अब तुम लोगु जु कि वे बगत ऊंमा सामिल नि छा मि तुमतै भि चितै देन्दु, कि जब मि तिसरी दौं तुमरा पास औलु, त वे पाप करण से क्या सजा मिलदी मि तुमतै बतौलु।</verse>
				<verse number="3">अर तुम लोग सबूत मंगद्‍यां, कि यीशु मसीह मेरा द्‍वारा बुल्दु भि च कि ना, मगर मि तुमतै बतै देन्दु कि जब उ तुमरा बीच मा काम करदु त अपणी कमजोरी से ना बल्किन मा अपणी ताकत से करदु।</verse>
				<verse number="4">अर या बात सच्‍च च कि जब यीशु मसीह तैं क्रूस पर चड़ये गै, त उ कमजोर लगणु छौ। मगर या बात भि सच्‍च च कि पिता परमेस्वर न वेतैं अपणी महान ताकत से मुरदो मा बटि ज्यून्द कैरी, अर अब वु सदनि खुणि ज्यून्द च। अर ठिक उन्‍नि हम भि कमजोर मनखि छां, मगर हमरु रिश्ता यीशु मसीह का दगड़ा मा भौत गैरु च, इलै तुमतै अनुसासन मा लौणु खुणि मि पिता परमेस्वर की ताकत को इस्तेमाल करलु।</verse>
				<verse number="5">इलै हे मेरा दगड़्यों, अपणी-अपणी जाँच-पड़ताल कैरा कि तुम बिस्वास मा छैं भि छाँ कि ना, अर आज तुम क्या छाँ वांको सबूत द्‍या। क्या तुमतै इन पता नि च कि यीशु मसीह तुमरा दगड़ा मा एक ह्‍वेके रौन्दु? अर अगर वु तुम मा नि च, त येको मतलब यू च कि तुम मा खोट च।</verse>
				<verse number="6">अर जख तक हमरि बात च, त तुम या बात जाणि जैल्या कि हम मसीह का छां, अर हम मा कुई खोट नि च।</verse>
				<verse number="7">अर मि पिता परमेस्वर से इन प्रार्थना करदु, कि तुम कुछ भि बुरै नि कैरा। अर तुम वु काम कैरा जु की भलै का छिन, अब चै हम लोगु की नजर मा खोटा ही किलै नि दिख्यां।</verse>
				<verse number="8">अर हम सच्‍चै का खिलाप मा कुछ नि करद्‍यां, अर हम जु कुछ भि करद्‍यां वु सब कुछ सच्‍चै खुणि ही च।</verse>
				<verse number="9">अर भले ही हम कमजोर छां मगर हमतै खुशी च कि तुम बिस्वास मा मजबूत छाँ। अर हम पिता परमेस्वर बटि इन्‍नि प्रार्थना करद्‍यां, कि तुम और भि जादा मजबूत होन्दी जा।</verse>
				<verse number="10">अर यू सब कुछ मि तुम खुणि इलै लिखणु छौं, किलैकि अभि मि तुम से दूर छौं, अर जब मि तुमरा पास औलु त कखि मितैं अपणा अधिकार को इस्तेमाल सख्‍तै से नि करण पोड़ो। अर हमरा प्रभु यीशु न मितैं यू अधिकार दियूं च कि मि तुम खुणि बिस्वास मा आसीस की वजा बणु, ना कि उतेडु़ को।</verse>
				<verse number="11">हे मेरा भै-बैंणो, अब मि आखिरी मा तुमकु इन बोन्‍न चान्दु कि तुम खुश रा, अर अपणा-अपणा चाल-चलन मा हरेक दिन सुधार ला, अर जु-जु काम करणु कू मिन तुमकु बोलि ऊंतैं पूरु कैरा। अर एक-दुसरे की बात तैं स्वीकार कैरा अर एकजुट ह्‍वेके रा, अर एक-दुसरा का दगड़ा मा शान्ति से रा। अर पिता परमेस्वर तुमतै एक-दुसरा का दगड़ा प्यार करण मा, अर शान्ति से जीवन जीण मा पूरि मदद करलु।</verse>
				<verse number="12">अर पवित्र दिल से एक-दुसरे की भूकि पिके सलाम बोला।</verse>
				<verse number="13">अर सब पवित्र लोग तुमकु बड़ा प्यार से सलाम बोन्‍ना छिन।</verse>
				<verse number="14">अर मि तुम सभ्यों खुणि इन प्रार्थना करदु, कि प्रभु यीशु मसीह की महान किरपा अर परमेस्वर को प्यार अर वेकी पवित्र आत्मा को साथ तुम सभ्यों का दगड़ा मा रौ। आमीन।</verse>
			</chapter>
		</book>
		<book number="48">
			<chapter number="1">
				<verse number="1">हे मेरा भै-बैंणो, मि पौलुस अर वु सब बिस्वासी भै-बैंणा जु कि मेरा दगड़ा मा छिन, मि या चिठ्‍ठी गलाति मुलक मा रौण वळा बिस्वासी समुदाय का लोगु खुणि लिखणु छौं। मेरा दगड़्यों, मितैं नऽ त कै खास मनखि न, अर ना ही लोगु द्‍वारा खास चेला का रुप मा चुणै गै, बल्किन मा मितैं त यीशु मसीह अर पिता परमेस्वर न खास चेला का रुप मा चुणी, हाँ, वे ही पिता परमेस्वर न जैन यीशु मसीह तैं मुरदो मा बटि ज्यून्द कैरी, अर वेन ही खुद यू काम कैरी।</verse>
				<verse number="2"></verse>
				<verse number="3">अर हमरा पिता परमेस्वर अर प्रभु यीशु मसीह की तरफा बटि वेकी किरपा अर शान्ति तुम पर बणि रौ, या ही हमरि प्रार्थना च।</verse>
				<verse number="4">अर तुम यू जाणि ल्या, कि वे ही यीशु न हमरा पापों का खातिर खुद तैं बलिदान होणु खुणि दे दिनी, ताकि इन कैरिके वु हमरा पिता परमेस्वर की मनसा का मुताबिक हमतै आज ईं दुनियां की बुरी बातों से आजाद कैरो।</verse>
				<verse number="5">वे परमेस्वर की बडै सदनि तक होणी रौ। आमीन।</verse>
				<verse number="6">मितैं ईं बात पर बड़ु ताजुब होणु च, कि जै पिता परमेस्वर न तुमतै यीशु मसीह की किरपा का द्‍वार अपणा पास बुलै, आज तुम वेतैं छोड़ि के कैं दुसरा ही शुभ समाचार को पालन करण लगि ग्यां।</verse>
				<verse number="7">पर मि तुमतै बतै देन्दु कि पिता परमेस्वर को कुई दुसरो समाचार छैई नि च, अर सच्‍चि बात त या च कि कुछ लोग तुमतै भरमौणा छिन, अर इन कैरिके वु लोग मसीह का शुभ समाचार तैं ही बदलण चाणा छिन।</verse>
				<verse number="8">मगर जै शुभ समाचार को परचार हमुन तुमतै सुणै, अगर वेका अलावा कुई तुमतै दुसरो ही समाचार सुणौ, त वे मनखि पर पिता परमेस्वर को असगार औण द्‍या। अब चै ऊ हम हो, या कुई स्वर्गदूत।</verse>
				<verse number="9">अर जन हमुन पैलि ही बोलियालि छौ, ठिक उन्‍नि मि फिर से बोन्‍नु छौं, कि पिता परमेस्वर को जु शुभ समाचार तुमुन स्वीकार कैरी, अगर वेका अलावा कुई दुसरो समाचार तुमतै सिखौन्दु, त वे मनखि पर परमेस्वर को असगार औण द्‍या।</verse>
				<verse number="10">अर तुमतै क्या लगदु, कि क्या अब मि लोगु तैं मनौण की कोसिस कनु छौं? ना, मि त परमेस्वर तैं मनौण चान्दु। अर तुमतै क्या लगदु कि मि मनखियों तैं खुश कनु छौं? नऽ रे ना, अगर जु मि अभि तक मनखियों तैं खुश कनु रौन्दु, त मि परमेस्वर को सेवक नि होन्दु।</verse>
				<verse number="11">हे मेरा भै-बैंणो मि तुमतै बतै देन्दु, कि जै शुभ समाचार को परचार मिन तुमरा बीच मा कैरी, वु कै मनखि का द्‍वारा नि बणयै गै।</verse>
				<verse number="12">किलैकि उ शुभ समाचार नऽ त मितैं कै मनखि न दिनी, अर ना ही मितैं कैन सिखै, बल्किन मा वु त खुद यीशु मसीह न मि पर परगट कैरी।</verse>
				<verse number="13">अर मि पौलुस, जनमजात यहूदी छौ, अर वे बगत मि यीशु पर बिस्वास नि करदु छौ इलै मेरु चाल-चलन कन छौ, वेका बारा मा भि तुमुन भौत सा लोगु का द्‍वारा सुणयूं च। दगड़्यों, वे बगत मि परमेस्वर का समुदाय का लोगु तैं भौत सतौन्दु छौ, अर ऊंतैं नास करणु खुणि मिन भौत जतन भि कैरी।</verse>
				<verse number="14">अर वे बगत त मि अपणा पितरों की रीति-रिवाजों तैं मनण मा, अर अपणी उमर का भौत सा यहूदी लोगु का बीच मा, अर अपणा देस का लोगु मा भि मि सबसे जादा तेज छौ।</verse>
				<verse number="15">मगर परमेस्वर न मितैं माँ का पुटगुन्द ही अफ खुणि चुणी के अलग कैरियाली छौ, अर अपणी महान किरपा का द्‍वारा वेन मितैं बुलै। अर वे परमेस्वर तैं या बात अच्छी लगि कि,</verse>
				<verse number="16">वु अपणा पुत्र तैं मि पर परगट कैरो, ताकि मि वेका पुत्र यीशु मसीह को परचार ऊं लोगु का बीच मा जैके कैरुं जु यहूदी जाति का नि छिन। अर जब मेरा दगड़ा मा इन ह्‍वे, त मि तुरन्त सला लेणु खुणि कै मनखि का पास नि ग्यों।</verse>
				<verse number="17">अर ना ही मि यरूशलेम नगर मा ऊं लोगु का पास ग्यों जु मिसे पैलि खास चेला का रुप मा चुणै गै छा, बल्किन मा मि तुरन्त अरब मुलक कू चलि ग्यों, अर वेका बाद मि फिर दमिश्क नगर कू वापिस ऐ ग्यों।</verse>
				<verse number="18">अर ठिक तीन साल बाद मि पतरस बटि मुलाकात करणु खुणि यरूशलेम नगर कू ग्यों, अर उख पन्द्ररा दिनों तक वेका दगड़ा मा रौंऽऽ।</verse>
				<verse number="19">अर उख मेरी मुलाकात प्रभु यीशु का भै याकूब से ह्‍वे, अर वेका अलावा मेरी मुलाकात कै दुसरा खास चेला का दगड़ा मा नि ह्‍वे।</verse>
				<verse number="20">अर जु बात मि तुम खुणि लिखणु छौं वु सब बात सच्‍चि छिन, किलैकि यों सब बातों को गवा पिता परमेस्वर च।</verse>
				<verse number="21">अर यरूशलेम नगर बटि निकळण का बाद मि सीरिया अर किलिकिया का मुलक कू ग्यों।</verse>
				<verse number="22">अर यहूदिया मुलक मा समुदाय का जु लोग यीशु मसीह पर बिस्वास करण वळा छा, ऊंन मितैं पैलि कभि नि देखि छौ।</verse>
				<verse number="23">पर ऊंन मेरा बारा मा सिरफ इथगा सुणी छौ, कि पौलुस नौ एक मनखि बिस्वासी लोगु तैं भौत सतौन्दु, मगर अब वेन खुद वे पिता परमेस्वर का शुभ समाचार पर बिस्वास कैरियाली। अर वे ही शुभ समाचार का बारा मा अब उ लोगु तैं बतौणु भि च, जै शुभ समाचार तैं नास करण को पूरु जतन उ कनु छौ।</verse>
				<verse number="24">अर अब यहूदिया मुलक का ऊ बिस्वासी लोग मेरा खातिर पिता परमेस्वर की बडै करदिन।</verse>
			</chapter>
			<chapter number="2">
				<verse number="1">अर यों सब बातों का चौदह साल का बाद मि बरनबास भै का दगड़ा फिर से यरूशलेम नगर कू ग्यों, अर अबरि दौं मि तीतुस तैं भि अफ दगड़ा मा लि ग्यों।</verse>
				<verse number="2">अर उख मि इलै ग्यों, किलैकि परमेस्वर न मि पर यू परगट कैरी छौ, कि मितैं उख जाण चयेणु। अर उख मि ऊं लोगु से मिलु, जु कि बिस्वासी समुदाय का अध्यक्ष लोग छा। अर ईं सभा मा मिन ऊंतैं अकेला मा जैके वे शुभ समाचार का बारा मा बतै, जैको परचार मि ऊं लोगु का बीच मा कनु छौं जु यहूदी जाति का नि छिन। अर इन मिन इलै कैरी, ताकि मेरी पैले की मेनत अर ज्वा मि अभि कनु छौं, कखि वा बरबाद नि ह्‍वे जौ।</verse>
				<verse number="3">अर कै भि अध्यक्ष न मेरा दगड़्या मा अयां तीतुस भै का बारा मा नि पूछी, अर ना ही वेका खतना का बारा मा, कि वेन खतना का रिवाज तैं पूरु कर्युं च की ना। जब की उ त एक यूनानी जाति को मनखि छौ।</verse>
				<verse number="4">मगर कुछ झूठ्‍ठा लोग जु कि लुकि-छिपी के सभा का बीच मा अयां छा, ऊंकी वजै से दिक्‍कत खड़ि ह्‍वे गै। अर वु ऊं जासूसों की तरौं छा, जु कि हमरि आजादी अर वे सम्बन्ध का बारा मा भौत अच्छे से जणदा छा, वु जणदा छा कि हम यीशु मसीह का द्‍वारा परमेस्वर का दगड़ा मा सम्बन्ध रखद्‍यां। अर वु लोग ईं आजादी तैं हम बटि छिनण चाणा छा, अर हमतै यहूदी नियम-कानूनों को गुलाम बणौण की पूरि कोसिस कना छा।</verse>
				<verse number="5">पर हम जरा देर खुणि भि ऊं जासूसों की बातों का अगनै नि झुक्यां अर यू सब हमुन इलै कैरी, ताकि शुभ समाचार की ज्वा सच्‍चै तुमुन पै वा तुम मा बणि रौ।</verse>
				<verse number="6">अर मेरा दगड़्यों, शुभ समाचार को जु परचार मिन ऊं लोगु का बीच मा कैरी, जु कि यहूदी जाति का नि छिन। जब मिन ईं बात का बारा अध्यक्ष लोगु तैं बतै, त ऊंन मेरी बातों मा कुई फेर बदल नि कैरी, बल्किन उई बात मितैं वापस बतैनि। जब कि ऊ लोग त खास मणै जनदिन। (अर मितैं ईं बात से कुई फर्क नि पोड़दु, कि ऊंको पद क्या च, किलैकि पिता परमेस्वर कै भि मनखि का दगड़ा मा भेदभाव नि करदु)।</verse>
				<verse number="7">उल्टां ऊंतैं इन पता चलि गै, कि जन परमेस्वर न पतरस तैं यहूदी जाति का लोगु का बीच मा शुभ समाचार परचार करण को काम सौप्युं च, ठिक उन्‍नि मितैं भि उई काम सौंपे गै, कि मि ऊं लोगु का बीच मा परचार कैरुं जु यहूदी जाति का नि छिन।</verse>
				<verse number="8">(किलैकि जै परमेस्वर न पतरस भै तैं खास चेला का रुप मा काम करण की ताकत दिनी, वेन ही मितैं भि ऊं लोगु का बीच मा काम करण की ताकत दिनी, जु यहूदी जाति का नि छिन)।</verse>
				<verse number="9">अर जब भै याकूब, कैफा अर यूहन्‍ना जु कि बिस्वासी समुदाय का खम्बा मणै जनदिन, जब वु वीं किरपा का बारा मा जाणि गैनी ज्वा कि मि पर होईं च, तब ऊंन मितैं अर बरनबास भै तैं परमेस्वर की सेवा मा ऊंकी मदद करण वळो का रुप मा स्वीकार कैरी। अर ऊंन हमतै ऊं लोगु का बीच मा सेवा करणु कू भेजि जु यहूदी जाति का नि छिन, अर खुद वु यहूदी लोगु का बीच मा सेवा कना रैनी।</verse>
				<verse number="10">अर ऊंन हम कू सिरफ इथगा बोलि कि गरीब भै-बैंणो की मदद कना रा, अर मि खुद भि कुछ इन्‍नि चान्दु छौं।</verse>
				<verse number="11">अर जब पतरस भै अन्ताकिया नगर मा अयूं छौ, त मिन वेतैं सब लोगु का समणि वेको विरोध कैरी, किलैकि वे बगत जु वेन कैरी वु गळत छौ।</verse>
				<verse number="12">अर मिन वेको विरोध इलै कैरी, किलैकि पैलि उ ऊं लोगु का दगड़ा मा खान्दु-पीन्दु छौ जु यहूदी जाति का नि छिन, पर जब याकूब भै का दगड़ा का कुछ यहूदी लोग अन्ताकिया नगर मा ऐनी, त कैफा भै यहूदी लोगु की डौऽर की वजै से ऊं लोगु का दगड़ा मा खाण-पीण से पिछनै हटणु छौ अर इन कैरिके वु कनि कटण लगि गै।</verse>
				<verse number="13">अर कैफा भै का देखा-देखि और यहूदी लोगु न भि इन दिखौण शुरु कैर दिनी, इख तक की बरनबास भै भि उन्‍नि करण लगि गै छौ।</verse>
				<verse number="14">पर जब मिन देखि कि उ शुभ समाचार की सच्‍चै का मुताबिक सीदी चाल नि चलणा छिन, त मिन सभ्यों का समणि पतरस कू बोलि, “पतरस, जब तू एक यहूदी जाति को होण का बाद भि ऊंकी तरौं जीवन जीणी छैई, जु यहूदी जाति का नि छिन। त फिर तू ऊं लोगु तैं यहूदी रीति-रिवाजों का मुताबिक चलणु खुणि किलै मजबूर कनि छैई, जु यहूदी जाति का नि छिन?</verse>
				<verse number="15">“अर हम दुईया का दुई जनमजात यहूदी छां, अर एक बगत इन छौ जब हम ऊं लोगु तैं पापि मणदा छा, जु कि यहूदी जाति का नि छिन।</verse>
				<verse number="16">हम जणदा छां कि एक मनखि तैं नियम-कानूनों का मुताबिक ना, बल्किन मा सिरफ यीशु मसीह पर बिस्वास करण का द्‍वारा ही धरमी ठैरैये जान्दु। अर हम दुईयों न भि खुद यीशु मसीह पर बिस्वास कैरी, ताकि हम भि वे पर बिस्वास कैरिके धरमी ठैरैये जां, ना कि नियम-कानूनों का मुताबिक, किलैकि नियम-कानूनों का मुताबिक कुई भि मनखि परमेस्वर की नजर मा धरमी नि ठैरैये जालु।”</verse>
				<verse number="17">अर हम जु यीशु मसीह पर बिस्वास कैरिके परमेस्वर की नजर मा धरमी बणणे की कोसिस करण पर लग्यां छां, अर अगर जु हम खुद ही पाप करण लगि जां, त यां को मतलब त इन ह्‍वे गै कि यीशु मसीह खुद पाप को सेवक च अर हमतै पाप करणु खुणि उकसौन्दु, त क्या इन्दरि बात च? नऽ रे ना इन्दरि बात बिल्कुल भि नि च।</verse>
				<verse number="18">अर अगर जु मि ऊं कामों तैं फिर से करण लगि जौलु, जौं तैं मिन छोड़याली, त इन कैरिके मि खुद दोषी ठैरि ग्यों।</verse>
				<verse number="19">अर नियम-कानूनों को पालन करणु खुणि मि पौलुस नियम-कानून की नजर मा एक मुरयां मनखि का जन ह्‍वे ग्यों, अर अब मि परमेस्वर खुणि जीणु छौं।</verse>
				<verse number="20">अर मि यीशु मसीह का दगड़ा मा क्रूस पर चड़ये ग्यों, इलै अब मि ज्यून्दु नि छौं, पर यीशु मसीह मि मा ज्यून्दु च। अर अब ये सरील मा मि जु जीवन जीणु छौं, वु केवल परमेस्वर का पुत्र पर बिस्वास कैरिके ही जीणु छौं, जैन मि बटि प्यार कैरी अर मि खुणि अफ तैं दे दिनी।</verse>
				<verse number="21">मि परमेस्वर की किरपा तैं नकरणु नि छौं, किलैकि अगर मूसा का दियां नियम-कानूनों का द्‍वारा धरमी बणयै जान्दु, त यीशु मसीह को मुरण बेकार ह्‍वे जान्दु।</verse>
			</chapter>
			<chapter number="3">
				<verse number="1">हे गलाति नगर का बिस्वासी लोगु, क्या तुम नासमझ छाँ अर कु च वु जैन तुम पर जादु कैरियाली? अरे, मिन त तुमतै यीशु मसीह का बारा मा इथगा अच्छे से बतै छौ, जन कि यीशु तैं तुमरि ही आंख्यों का समणि क्रूस पर चड़ये गै हो।</verse>
				<verse number="2">अर मि तुम बटि बस इथगा पूछण चाणु छौं, कि तुमुन पिता परमेस्वर का द्‍वारा दियां पवित्र आत्मा का दान तैं, मूसा का दियां नियम-कानूनों का कामों का मुताबिक पै, या शुभ समाचार पर बिस्वास कैरिके?</verse>
				<verse number="3">अरे, क्या तुम पर इथगा भि दिमाग नि च? कि जु काम तुमुन पवित्र आत्मा का द्‍वारा शुरु करिनी, अब तुम ऊंतैं सरील की ताकत से पूरु करण चाणा छाँ?</verse>
				<verse number="4">अर दुख-तकलीफ का बगत मा जु तजुर्बा तुमतै मिलिनी, क्या ऊ सब बेकार ह्‍वे गैनी? ना, सच्‍चि बात या च कि वु सब कुछ बेकार नि ह्‍वे।</verse>
				<verse number="5">अर मि तुम लोगु बटि इन भि पूछण चाणु छौं, कि जु पिता परमेस्वर तुमतै पवित्र आत्मा को दान देन्दु, अर तुमरा बीच मा सामर्थ का काम करदु, क्या उ यू सब इलै करदु, किलैकि तुम नियम-कानूनों को पालन करद्‍यां? ना इन नि च बल्किन मा वु त इलै करदु, किलैकि तुम लोगु न वेका शुभ समाचार पर बिस्वास कैरी।</verse>
				<verse number="6">“अर हमरा पितर अब्राहम न त परमेस्वर पर बिस्वास कैरी, अर परमेस्वर न वेतैं अपणी नजर मा धरमी पैके वेतैं स्वीकार कैरी।”</verse>
				<verse number="7">इलै ईं बात तैं तुम अच्छे से जाणि ल्या, कि जु लोग परमेस्वर पर बिस्वास करदिन, वु ही अब्राहम की औलाद छिन।</verse>
				<verse number="8">अर परमेस्वर न पवित्रशास्‍त्र का द्‍वारा हमतै पैलि ही इन बतै दिनी, कि जु लोग यहूदी जाति का नि छिन ऊं लोगु तैं पिता परमेस्वर बिस्वास का द्‍वारा धरमी ठैरालु। अर वे बगत मा परमेस्वर न हमरा पितर अब्राहम तैं इन शुभ समाचार दिनी कि, “अब्राहम, तेरा द्‍वारा धरती का सब लोग आसीस पाला।”</verse>
				<verse number="9">इलै जु लोग पितर अब्राहम की तरौं बिस्वास करदिन, वु लोग ईं आसीस तैं जरुर पाला।</verse>
				<verse number="10">पर जु लोग खुद तैं धरमी साबित करणु खुणि केवल नियम-कानून का ही सरा पर टिक्यां छिन, वु सब लोग असगार का अधीन मा छिन। किलैकि पवित्रशास्‍त्र मा यू साफ-साफ लिख्यूं च कि, “जु कुई नियम-कानूनों की किताब मा लिखीं सब बातों का मुताबिक नि करदु, ऊं लोगु पर पिता परमेस्वर को असगार पोड़लु।”</verse>
				<verse number="11">इलै या बात साफ ह्‍वे जान्दी कि नियम-कानूनों का द्‍वारा पिता परमेस्वर की नजर मा कुई भि धरमी नि ठैरदु, किलैकि पवित्रशास्‍त्र मा लिख्यूं च कि, “जु मनखि परमेस्वर की नजर मा धरमी च, उ बिस्वास करण की वजै से ज्यून्दु रालु।”</verse>
				<verse number="12">पर नियम-कानून को मनखि का बिस्वास का दगड़ा मा कुई लेण-देण नि च, किलैकि इन भि लिख्यूं च कि, “जु मनखि यों बातों को पालन करलु, उ वेकी वजै से जीवन पालु।”</verse>
				<verse number="13">अर मसीह न हमतै नियम-कानूनों का असगार से छुड़ै, अर क्रूस पर चैड़ि के हमरा पापों को असगार खुद पर ले दिनी, किलैकि लिख्यूं च, “जु कुई भि क्रूस पर चड़ये जालु वे पर परमेस्वर को असगार लग्यूं च।”</verse>
				<verse number="14">अर यू इलै ह्‍वे कि ज्वा आसीस पितर अब्राहम तैं मिली छै, वा यीशु मसीह का द्‍वारा ऊं लोगु तैं भि मिलु जु यहूदी जाति का नि छिन, अर हम यहूदी लोग भि यीशु मसीह पर बिस्वास का द्‍वारा वे पवित्र आत्मा तैं पा जैतैं देण को करार पिता परमेस्वर न कैरी छौ।</verse>
				<verse number="15">हे मेरा भै-बैंणो, मि तुमतै एक उदारण देके बिंगाण चाणु छौं, जब कै मनखि का द्‍वारा कुई करार किये जान्दु, त कुई भि वे करार तैं टाळि नि सकदु, अर ना ही वे करार मा कुई बात जोड़ी सकदु अर ना ही कम कैरी सकदु।</verse>
				<verse number="16">अर जख तक करार की बात किये जौ, त करार पितर अब्राहम अर वेका वंश बटि किये गै छौ। अर पवित्रशास्‍त्र को यू करार हमतै वंश का भौत सा लोगु का बारा मा नि बतौन्दु, बल्किन मा सिरफ एक वंश का बारा मा बतौन्दु, जन कि लिख्यूं भि च कि, “तेरा वंश तैं” अर यां से या बात साफ ह्‍वे जान्दी कि वु वंशज मसीह च।</verse>
				<verse number="17">दगड़्यों मेरु बोन्‍न को मतलब इन च कि जै करार तैं पिता परमेस्वर न अब्राहम का दगड़ा मा कैरी, वेका चार सौ तीस साल बाद नियम-कानून दिये गैनी। इलै अब यू नियम-कानून वे करार तैं बदलि नि सकदिन अर ना ही रद्‍द कैरी सकदिन।</verse>
				<verse number="18">किलैकि अगर वारिस होण को अधिकार नियम-कानून का द्‍वारा ठैरैये जान्दु, त यू अधिकार करार का द्‍वारा नि मिलदु, पर परमेस्वर न वारिस होण को यू अधिकार पितर अब्राहम तैं करार का द्‍वारा ही दिनी।</verse>
				<verse number="19">अब तुम सुचणा ह्‍वेल्या, कि फिर नियम-कानूनों तैं देण की क्या जरुरत रै होलि? अरे, यू सब त इलै ह्‍वे, ताकि नियम-कानूनों का द्‍वारा मनखियों तैं अपणा सब पापों को पता चलि जौ। अर जबरि तक करार को वंशज यीशु मसीह ऐ नि गै, नियम-कानून भि तबरि तक ही छा। अर वे बगत नियम-कानून स्वर्गदूत का द्‍वारा परमेस्वर का रैबर्या मूसा तैं दिये गैनी, अर वे बगत पितर मूसा न परमेस्वर अर मनखियों का बीच बिचलु होण को काम कैरी।</verse>
				<verse number="20">अर बिचलु त कम से कम दुई लोगु का बीच मा होन्दु, मगर परमेस्वर त एक ही च।</verse>
				<verse number="21">अर तुम क्या सोचद्‍यां कि नियम-कानून परमेस्वर का करारों को विरोध करदिन? ना इन बिल्कुल भि नि च, किलैकि अगर इन्द्रयो नियम-कानून दियूं होन्दु, जु हमतै सदनि को जीवन देन्दु, त नियम-कानून को पालन करण से ही हम लोग धरमी ठैरैये जान्दा।</verse>
				<verse number="22">मगर सब लोग पाप का अधीन मा छिन येका बारा मा पवित्रशास्‍त्र हमतै बतौन्दु। इलै यीशु मसीह पर बिस्वास करण से सदनि को जीवन देण को जु करार किये गै, उ बिस्वास करण वळा लोगु खुणि ही दिये गै।</verse>
				<verse number="23">अर यीशु मसीह पर बिस्वास करण से पैलि हम यहूदी लोग नियम-कानूनों का अधीन मा छा, अर ऊं नियम-कानूनों का द्‍वारा ही हमरि हिफाजत होन्दी छै। अर यीशु मसीह जु कि औण वळु छौ, वे पर ही बिस्वास करण से हम लोग ऊं नियम-कानूनों की गुलामी से आजाद ह्‍वे ग्यां।</verse>
				<verse number="24">इलै जबरि तक हम यीशु मसीह पर बिस्वास करण वळा नि ह्‍वे ग्यां, तबरि तक ऊं नियम-कानूनों न हमतै सिखै अर हमरि इन जबाबदारी छै कि हम ऊं नियम-कानूनों का मुताबिक चला। पर अब यीशु मसीह पर बिस्वास करण से हम नियम-कानूनों से आजाद ह्‍वे ग्यां, अर परमेस्वर की नजर मा धरमी ठैरै ग्यां।</verse>
				<verse number="25">अर अब जब हम खुणि बिस्वास करण को एक बाटु खुलि गै, इलै हम नियम-कानून का अधीन नि छां।</verse>
				<verse number="26">अर यीशु मसीह पर बिस्वास करण का द्‍वारा ही तुम सब लोग परमेस्वर की औलाद छाँ।</verse>
				<verse number="27">अर तुम मा बटि जथगा लोगु न यीशु का नौ से पाणि मा डुबकी लेके बपतिस्मा लिनी, ऊंन यीशु मसीह तैं कपड़ों का जन पैनयालि।</verse>
				<verse number="28">इलै अब नऽ त कुई यहूदी च अर ना ही कुई यूनानी, नऽ त कुई गुलाम च अर ना ही कुई आजाद, अर नऽ त कुई बैख च अर ना ही कुई जनानि, किलैकि तुम सभ्या का सभि यीशु मसीह मा एक छाँ।</verse>
				<verse number="29">अर अगर जु तुम यीशु मसीह का छाँ, त अब्राहम का वंश मदि, अर वे करार का मुताबिक वारिस भि छाँ, जु कि वेका दगड़ा मा किये गै छौ।</verse>
			</chapter>
			<chapter number="4">
				<verse number="1">पर मि तुमतै बतै देन्दु कि बच्‍चा जबरि तक वारिस होण को अधिकार नि पै ल्यो, तबरि तक उ बच्‍चा ही च अर जन गुलाम अपणा मालिक का अधीन रौन्दु ठिक उन्‍नि वु बच्‍चा भि अपणा लोगु का अधीन मा रौन्दु, हालांकि वु बच्‍चा सब चीजों को मालिक च।</verse>
				<verse number="2">पर फिर भि वु बच्‍चा अपणा बुबा का द्‍वारा ठैरयां बगत तक शिक्षा देण वळो, अर अपणा घौर का लोगु का अधीन मा रौन्दु।</verse>
				<verse number="3">अर ठिक उन्‍नि यीशु मसीह का औण से पैलि हम भि बच्‍चों का जन ही छा, अर ईं दुनियां का नियम-कानूनों का गुलामी मा अपणु जीवन जीणा छा।</verse>
				<verse number="4">पर जब परमेस्वर को ठैर्युं बगत ऐ, त वेन अपणा पुत्र यीशु मसीह तैं ईं दुनियां मा भेजि, अर वेको जनम एक मनखि का रुप मा एक जनानि बटि ह्‍वे। अर वेको ईं दुनियां मा औण यहूदी नियम-कानूनों का अधीन मा ह्‍वे।</verse>
				<verse number="5">अर इन इलै ह्‍वे, ताकि पुत्र ऊं लोगु तैं आजाद कैरो जु कि नियम-कानूनों का अधीन मा छिन, अर हमतै भि पिता परमेस्वर की औलाद होण को अधिकार मिली जौ।</verse>
				<verse number="6">अर इन साबित करणु खुणि परमेस्वर न अपणा पुत्र की पवित्र आत्मा हमरा मनों मा भेजि, ताकि इन पता चलि जौ कि हम वेकी औलाद छां। अर आज हम पवित्र आत्मा की मदद से प्रार्थना मा पिता परमेस्वर कू “हे मेरा अब्बा, मेरा पिता” बोलि सकद्‍यां।</verse>
				<verse number="7">इलै हे मेरा भै-बैंणो, अब तुम गुलाम नि छाँ, बल्किन मा पिता परमेस्वर की औलाद छाँ। अर अब जब तुम औलाद छाँ, त पिता परमेस्वर न तुमतै अपणु वारिस भि बणैयालि।</verse>
				<verse number="8">हे मेरा भै-बैंणो, पैलि जब तुम परमेस्वर तैं नि जणदा छा, त वे बगत तक तुम ऊंका गुलाम छा जु कि असल मा ईश्‍वर छैई ही नि छिन।</verse>
				<verse number="9">पर अब जु तुमुन परमेस्वर तैं पछ्याणयालि, या हम इन बोलि सकद्‍यां कि तुम भि परमेस्वर का नौ से जणे जाणा छाँ, त फिर तुम किलै दुनियां की नास होण वळी ऊं बातों का जनै लौटण छाँ जु तुमतै बचै नि सकदिन? अर तुम फिर से किलै गुलामी का सेवक होण चन्द्‍यां? मेरा दगड़्यों, तुम बेकार की बातों पर अपणु मन किलै लगौन्द्‍यां?</verse>
				<verse number="10">अर तुम खास दिन, खास मैना, अर खास सालों तैं बड़ु ध्यान देके मणद्‍यां, या बात ठिक नि च।</verse>
				<verse number="11">अर मितैं ईं बात से डौऽर लगदी, कि ज्वा मेनत मिन तुमरा बानो कैरी कखि वा बेकार नि ह्‍वे जौ।</verse>
				<verse number="12">हे मेरा बिस्वासी भै-बैंणो, तुम जु यहूदी जाति का नि छाँ तुमुन मेरु कुछ नि बिगाड़ि, अर मि एक यहूदी होण का बाद भि तुम लोगु खुणि तुमरि तरौं ही ह्‍वे ग्यों, पर अब मि तुम बटि बिन्ती करदु कि तुम मसीह जीवन मा अब मि जन ह्‍वे जा।</verse>
				<verse number="13">अर तुमतै याद होलु जब मिन पैलि बार तुमतै शुभ समाचार सुणै छौ, अर वे बगत त मि बिमार छौ।</verse>
				<verse number="14">अर मेरी ईं बिमारि का बाना तुम लोगु तैं दिक्‍कत झिलण पोड़ि, मगर फिर भि तुम लोगु न मि बटि नफरत नि कैरी अर ना ही मेरु तिरिस्कार कैरी, मगर तुमुन मितैं परमेस्वर का एक दूत का जन या इन बोलि सकद्‍यां कि यीशु मसीह का जन स्वीकार कैरी।</verse>
				<verse number="15">अर मितैं इन बता, कि जु आसिरबाद तुमतै मिल्यूं छौ उ कख हरचि गै? अर मि खुद ईं बात की गवै देन्दु कि एक बगत वु छौ, कि जब मि तुमकु बुल्दु कि अपणा आंखा निकळि के मितैं दे द्‍या, त तुम मि खुणि उन्‍नि कैरी देन्दा।</verse>
				<verse number="16">अर अब जु मि तुम बटि सच्‍च बोन्‍नु छौं, त मि तुमरो दुसमन बणि ग्यों।</verse>
				<verse number="17">अर वु झूठ्‍ठा लोग तुमतै अफ दगड़ा मिलाणु खुणि बड़ा जोस से तुमरा पिछनै पोड़यां छिन, पर ऊंको मकसद ठिक नि च। अर वु तुमतै अलग करण चाणा छिन, ताकि तुम उन्‍नि कैरा जन वु चाणा छिन।</verse>
				<verse number="18">अर अगर कुई भला कामों का बानो तुमरा पिछनै पोड़्यूं च, त वेतैं दोस्त बणौण कुई गळत बात नि च पर ध्यान रखा कि वेको मकसद ठिक होण चयेणु। अर यू भि याद रखा कि वु भलै का काम हर बगत कैरो, ना कि केवल तब जब मि तुमरा दगड़ा मा रौन्दु।</verse>
				<verse number="19">हे मेरा बच्‍चों, मि तुम खुणि फिर से परसव जन पीड़ा सौंणु छौं। अर या पीड़ा तब तक राली, जबरि तक मसीह को रुप तुमरा भितर फिर से बणि के तयार नि ह्‍वे जौ।</verse>
				<verse number="20">इलै मि तुमरा बानो बड़ी उळझण मा पोड़्यूं छौं, कि तुम लोग दुसरा ही बाटा पर चलण लगि ग्यां, अर मेरी या इच्छा च कि यों सब बातों का बारा मा मि ऐके तुमतै भौत अच्छे से समझौ। मगर अभि मि कुछ नि कैरी सकदु किलैकि मि तुम से भौत दूर छौं।</verse>
				<verse number="21">हे मेरा भै-बैंणो तुम लोग जु नियम-कानूनों का अधीन रौण चन्द्‍यां, तुम मितैं एक बात बता क्या तुम लोग न नियम-कानूनों तैं ढंगल नि सुणी?</verse>
				<verse number="22">सुणा, वेमा इन लिख्यूं च कि अब्राहम का दुई नौना छा, एक को जनम गुलाम नौकराणि बटि ह्‍वे। अर दुसरो को जनम वेकी घरवळी बटि ह्‍वे, ज्वा कि हरेक बात मा आजाद छै।</verse>
				<verse number="23">मगर सारा की इच्छा का मुताबिक जु नौनु नौकराणि से पैदा ह्‍वे, वु मनखि की इच्छा से ह्‍वे। अर जु नौनु वेकी घरवळी बटि ह्‍वे उ परमेस्वर का द्‍वारा कियां करार का मुताबिक ह्‍वे।</verse>
				<verse number="24">अर गुलाम अर आजाद करण वळी बातों को मतलब यों दुई जनानियों से सीखा, किलैकि यू दुई जनानियां दुई करार को चिन्‍न छिन। पैलु चिन्‍न हाजिरा च ज्वा कि नौकराणि छै अर वींका द्‍वारा पैदा होयुं बच्‍चा गुलाम ही च, ठिक उन्‍नि पैलु करार भि च जु कि सीनै नौ का पाड़ पर दिये गै, अर वेको पालन करण वळा लोग गुलामी मा ही पैदा होनदिन।</verse>
				<verse number="25">अर सीनै पाड़ जु कि अरब मुलक मा च अर नौकराणि हाजिरा वे पाड़ का जन च, ठिक उन्‍नि आज यरूशलेम नगर का लोग भि छिन जु कि अपणा जण-बच्‍चों समेत नियम-कानूनों की गुलामी मा जीणा छिन।</verse>
				<verse number="26">मगर दुसरो चिन्‍न अब्राहम की घरवळी सारा च, ज्वा की आजाद छै अर वा हमरि माँ का जन च, किलैकि वा दुसरा करार को उदारण च ज्वा कि आजाद च अर वींका बच्‍चा भि आजाद छिन। अर वा वे यरूशलेम नगर का जन च, जु स्वर्ग बटि औण वळु च।</verse>
				<verse number="27">किलैकि पवित्रशास्‍त्र मा इन लिख्यूं च कि, “हे बाँझ, तू आनन्द मणौ किलैकि तिन बच्‍चा तैं जनम नि दिनी। अर खुश हो अर परमेस्वर खुणि धन्यवाद का गीत गा, किलैकि तिन कभि भि परसव की पीड़ा नि सै, मगर अब तेरा पास वीं जनानि से जादा बच्‍चा होला जिं का पास पति होन्दु।”</verse>
				<verse number="28">हे मेरा भै-बैंणो, हम भि पितर इसहाक की तरौं करार करीं औलाद छां।</verse>
				<verse number="29">अर जन हमतै ऊं लोगु का द्‍वारा सतयै जान्दु, जु इन चनदिन कि हम नियम-कानूनों का मुताबिक चलणा रा, यू ठिक उन्‍नि च जन करार का द्‍वारा पैदा होयां पितर इसहाक तैं इश्माएल द्‍वारा सतयै गै जु कि नौकराणि का द्‍वारा पैदा ह्‍वे छौ।</verse>
				<verse number="30">पर पवित्रशास्‍त्र मा इन लिख्यूं च कि, “अब्राहम अपणी नौकराणि अर वींका नौना तैं निकाळ दे, किलैकि नौकराणि को नौनु तेरी घरवळी का नौना का दगड़ा मा बिल्कुल भि हकदार नि होलु।”</verse>
				<verse number="31">इलै हे मेरा भै-बैंणो, हम नौकराणि का ना पर आजाद जनानि का बच्‍चा छां।</verse>
			</chapter>
			<chapter number="5">
				<verse number="1">अर या आजादी हमतै यीशु मसीह का द्‍वारा मिली च ताकि हम आजादी का जीवन तैं जी सैका। इलै अपणा बिस्वास तैं मजबूत बणै के रखा, अर नियम-कानूनों का बोझ तैं फिर से अपणा कन्धों पर नि उठा।</verse>
				<verse number="2">सुणा, मि पौलुस तुमतै बतै देन्दु कि अगर जु तुम खतना का रिवाज तैं पूरु करैल्या, त यीशु मसीह बटि तुमतै कुई फैदा नि मिलण।</verse>
				<verse number="3">फिर भि मि हरेक खतना करण वळो तैं चितै देन्दु, कि अगर कुई खतना करौन्दु त वेतैं मूसा का दियां सब नियम-कानूनों तैं मनण ही पोड़लु।</verse>
				<verse number="4">अर तुम मा बटि जथगा भि लोग नियम-कानूनों को पालन करण का द्‍वारा परमेस्वर की नजर मा धरमी होण की कोसिस कना छिन, अर यीशु मसीह पर बिस्वास नि करदिन त मि तुमतै बतै देन्दु कि तुम सब वेसे अर परमेस्वर की किरपा से भि दूर ह्‍वे ग्यां।</verse>
				<verse number="5">मगर हम लोग यीशु मसीह पर बिस्वास करण का द्‍वारा परमेस्वर का समणि धरमी होण कि आसा रखद्‍यां। अर पवित्र आत्मा कि मददळ हम ईं बात को इंतजार बेसबरि से कना छां।</verse>
				<verse number="6">अर जब हम यीशु मसीह पर बिस्वास करद्‍यां, त वेका बाद खतना का रिवाज तैं पूरु करण या नि करण से कुई फैदा नि च, पर केवल बिस्वास ही च जु कि दुसरा लोगु पर हमरा प्यार की छाप तैं लगौन्दु।</verse>
				<verse number="7">अर तुम त सच्‍चै का बाटा पर खूब अच्छे से चलणा छा, पर अब इन बता कि कु च उ जैन तुमतै सच्‍चै का बाटा पर चलण से रोकीयाली?</verse>
				<verse number="8">अरे वु पिता परमेस्वर नि ह्‍वे सकदु, किलैकि वेन ही तुमतै सच्‍चै का बाटा पर बुलै।</verse>
				<verse number="9">अर जन थुडु सा खमीर तैं आटा मा मिल्ये जौ, त उ पूरा गुन्द्‍यां आटा तैं खमीर बणै देन्दु, ठिक उन्‍नि गळत शिक्षा भि च।</verse>
				<verse number="10">पर मितैं तुम पर पूरु यकीन च तुम जु प्रभु पर बिस्वास करद्‍यां, मि जणदु छौं कि अगर कुई तुमतै इन्दरि शिक्षा द्‍यालु, त तुम लोग ऊं बातों पर बिस्वास नि करिल्या। अर जु कुई तुमतै इन्द्रया विचारों से भरमै द्‍यालु, त परमेस्वर ऊंतैं जरुर दण्ड द्‍यालु।</verse>
				<verse number="11">हे मेरा भै-बैंणो, अगर मि यहूदी रीति का मुताबिक खतना का रिवाज तैं पूरु करण का बारा मा परचार कनु रौन्दु, त मि पर जुलम नि किये जान्दु। मगर मि त यीशु तैं क्रूस पर चड़ये जाण को परचार करदु, इलै मितैं सतयै जाणु च।</verse>
				<verse number="12">अर भलु त यू ही च कि जु लोग तुमतै खतना का रिवाज तैं पूरु करणु खुणि सिखौणा छिन और परेसान कना छिन, वु खुद ही नपुंसक बणि जा।</verse>
				<verse number="13">हे मेरा भै-बैंणो, तुमतै आजादी को जीवन जीणु खुणि बुलये गै। अर ईं आजादी को इस्तेमाल तुम अपणा सरील की इच्छा तैं पूरि करणु खुणि नि लगा, बल्किन मा ईं आजादी को इस्तेमाल प्यार से एक-दुसरे की सेवा करण मा लगा।</verse>
				<verse number="14">किलैकि पूरु नियम-कानून एक ही बात मा पूरु ह्‍वे जान्दु अर वु इन च कि, “जन प्यार तू अफ बटि करदी उन्‍नि सब लोगु से भि कैर।”</verse>
				<verse number="15">अर अगर जु तुम लोग दुसरो तैं एक जानबर की तरौं काटी फाड़ी के खाणु खुणि तयार छाँ, त ध्यान रखा कखि इन नि हो कि तुम एक-दुसरो को नास कैरी द्‍या।</verse>
				<verse number="16">मगर मि तुमतै बतै देन्दु, कि तुम पवित्र आत्मा तैं अपणा जीवन मा काम करण द्‍या। तब तुम सरील की इच्छा तैं कभि भि पूरु नि करिल्या।</verse>
				<verse number="17">किलैकि सरील की इच्छा त पवित्र आत्मा का खिलाप मा काम करदी, अर पवित्र आत्मा मनखि का सरील की इच्छा का खिलाप मा काम करदु। अर यू दुईया का दुई एक-दुसरा का खिलाप मा छिन, इलै जन तुम करण चन्द्‍यां उन्‍नि नि कैरी सकद्‍यां।</verse>
				<verse number="18">अर अगर जु तुम पवित्र आत्मा का मुताबिक जीवन जिन्द्‍यां, त फिर तुम नियम-कानूनों का अधीन नि छाँ।</verse>
				<verse number="19">किलैकि जब मनखि अपणा सरील की इच्छा तैं पूरि करदु त वेका काम साफ-साफ पता लगि जनदिन, जन कि दुसरा बैख या जनानि पर गळत नजर रखण, गन्दा काम करण, हवस,</verse>
				<verse number="20">अर मूरत पूजा करण, जादु-टोंणा करण, एक-दुसरा का दगड़ा मा दुसमनै रखण, लड़ै-झगड़ा करण, एक-दुसरा तैं देखि के जलत्यौण, गुस्सा करण, हर बात मा अपणु ही फैदा दिखण, फूट डलण, अर दल बणौण,</verse>
				<verse number="21">अर खार खाण, दरोळया होण, गुलछरा उड़ौण, अर इन्‍नि और भि बात छिन। अर अभि भि मि तुमतै यों सब बातों का बारा मा उन्‍नि चितौणु छौं जन मिन तुमतै पैलि चितै छौ, कि जु लोग इन्द्रया काम करदिन वु परमेस्वर का राज का हकदार नि होला।</verse>
				<verse number="22">पर पवित्र आत्मा को हमरा जीवन मा होण से इन गुण परगट होला जन कि, एक-दुसरा से प्यार करण, खुशी से रौण, शान्ति को जीवन, अर सबर रखण, दुसरो पर दया करण, भलै का काम करण, इमानदार रौण,</verse>
				<verse number="23">दीन सभौ रखण, अर खुद तैं अपणा वस मा रखण, यों सब बातों को विरोध करण खुणि कुई भि नियम-कानून नि च।</verse>
				<verse number="24">अर जौं लोगु न यीशु मसीह पर बिस्वास कैरी ऊंन अपणा सभौ अर अपणा सरील की इच्छाओं तैं यीशु मसीह का दगड़ा मा क्रूस पर चड़ैयालि।</verse>
				<verse number="25">अर अगर हमतै पवित्र आत्मा का द्‍वारा नयू जीवन मिल्यूं च, त हमतै वेका मुताबिक चलण भि चयेणु।</verse>
				<verse number="26">अर हमतै खुद पर बड़ु मोन नि करण चयेणु, अर ना ही कैतैं चिडौण चयेणु, अर ना ही एक-दुसरा तैं देखि के अपणा मन मा जलन रखण चयेणी।</verse>
			</chapter>
			<chapter number="6">
				<verse number="1">हे मेरा बिस्वासी भै-बैंणो, अगर तुम लोगु मा बटि कुई मनखि पाप करद पकड़ै जान्दु, त तुम जु पवित्र आत्मा का मुताबिक चलद्‍यां, तुम वे मनखि तैं बड़ा प्यार से सच्‍चै का बाटा पर वापिस लौण की पूरि कोसिस कैरा। अर अपणु भि ध्यान रखा कखि तुम लोग भि वे ही पाप मा नि फंसी जा।</verse>
				<verse number="2">अर दुख-तकलीफ मा एक-दुसरा की मदद कैरा, अर इन कैरिके यीशु मसीह का नियम-कानून तैं पूरु कैरा।</verse>
				<verse number="3">अर अगर कुई मनखि अफ तैं दुसरो से जादा ठिक समझदु पर हो ना, त सुणी ल्या की इन्द्रयो मनखि खुद तैं ही धोखा देणु च।</verse>
				<verse number="4">इलै हरेक मनखि तैं अपणा-अपणा काम की जाँच-पड़ताल करण चयेणी, अर अपणी तुलना दुसरो का कामों का दगड़ा मा नि करण चयेणी, तब जु कुछ भि तुमुन कैरी होलु वे काम पर तुमतै गर्व होलु।</verse>
				<verse number="5">किलैकि हरेक मनखि न अपणी-अपणी जबाबदारी खुद ही उठौण।</verse>
				<verse number="6">अर जु मनखि परमेस्वर का वचन की शिक्षा तैं पौणु च, वु अपणी सब अच्छी चीजों को साझा सिखौण वळा का दगड़ा मा कैरो।</verse>
				<verse number="7">धोखा मा नि रयां, परमेस्वर तैं मजाक मा नि लिये जान्दु, किलैकि जन मनखि बुतदु च वेका मुताबिक लवै भि करदु।</verse>
				<verse number="8">किलैकि जु मनखि अपणा सरील की मनसा का मुताबिक चलदु, उ अपणा जीवन खुणि विणास की फसल कटलु, मगर जु मनखि पवित्र आत्मा का मुताबिक चलदु, उ पवित्र आत्मा का द्‍वारा सदनि का जीवन की फसल कटलु।</verse>
				<verse number="9">इलै हमतै भलै का काम करण मा पिछनै नि हटण चयेणु, किलैकि अगर जु हम सभ्यों का दगड़ा मा भलै कना रौला, त ठिक बगत पर लवै करुला।</verse>
				<verse number="10">इलै जब भि हमतै भलै करण को मौका मिलणु च, त हमतै सभ्यों का दगड़ा मा भलै करण चयेणी। अर खास कैरिके हमतै ऊंकी भि मदद करण चयेणी, जु की यीशु मसीह पर बिस्वास करण की वजै से आज हमरा दगड़ा मा मिली गैनी।</verse>
				<verse number="11">अब मि पौलुस खुद अपणा हाथोंळ आखिरी का यों बड़ा-बड़ा शब्दों तैं तुम खुणि लिखणु छौं यों तैं पैढा।</verse>
				<verse number="12">हे मेरा दगड़्यों, कुछ लोग दिखावा करणु खुणि तुमतै मजबूर करणा छिन, कि खतना का रिवाज तैं पूरु कैरा। अर मि तुमतै बतै देन्दु कि वु इन इलै करणा छिन, ताकि यीशु को परचार करण की खातिर ऊंतैं सतयै नि जौ।</verse>
				<verse number="13">अर खतना का रिवाज तैं पूरु करौण वळा वु लोग खुद त मूसा का दियां नियम-कानून को पालन नि करदिन, मगर तुमरो खतना करौणु खुणि वु बेताब होयां छिन, ताकि वु दावा कैरी सैका कि तुम ऊंका चेला छाँ।</verse>
				<verse number="14">अर अब या दुनियां मेरी नजर मा मोरि गै अर मि ईं दुनियां खुणि मोरि ग्यों, किलैकि मि खुणि केवल प्रभु यीशु मसीह की क्रूस ही च जिं का खातिर मि बड़ु मोन करदु।</verse>
				<verse number="15">अर खतना करण का रिवाज तैं पूरु करण या नि करण येसे कुई फैदा नि च, पर अब जु कुछ भि च उ सब यीशु मसीह मा नयू जीवन ही च।</verse>
				<verse number="16">अर जथगा भि लोग ये नियम पर चलला, वु ही पिता परमेस्वर का सच्‍चा लोग छिन अर वेकी शान्ति अर वेकी दया ऊं पर होणी राली।</verse>
				<verse number="17">अब आखिरी मा मि तुमकु इन ही बोन्‍न चान्दु कि, “कुई भि गळत शिक्षा को परचार कैरिके मितैं और जादा दुख नि द्‍या। किलैकि मेरा सरील पर जु घौ छिन वां से इन पता चलदु कि मि यीशु मसीह को छौं।”</verse>
				<verse number="18">मेरा भै-बैंणो, हमरा प्रभु यीशु मसीह की किरपा तुमरि आत्मा का दगड़ा मा बणि रौ। आमीन।</verse>
			</chapter>
		</book>
		<book number="49">
			<chapter number="1">
				<verse number="1">हे मेरा भै-बैंणो मि पौलुस छौं अर मि पिता परमेस्वर की मनसा से यीशु मसीह को खास चेला छौं। अर मि या चिठ्‍ठी इफिसुस नगर मा रौण वळा बिस्वासी समुदाय का सब लोगु खुणि लिखणु छौं, जु कि यीशु मसीह पर बिस्वास करण वळा पवित्र लोग छिन।</verse>
				<verse number="2">अर मि इन प्रार्थना करदु, कि तुमतै हमरा पिता परमेस्वर अर प्रभु यीशु की तरफा बटि वेकी महान किरपा अर शान्ति मिलदी रौ।</verse>
				<verse number="3">हमरा प्रभु यीशु मसीह का पिता परमेस्वर की तारीफ हो, जैन हमतै यीशु मसीह का पास औण का बाद पवित्र आत्मा का द्‍वारा हरेक किसमे की आत्मिक आसीस दिईं च।</verse>
				<verse number="4">अर दुनियां का बणण से भि पैलि पिता परमेस्वर न अपणी योजना का मुताबिक हम से प्यार कैरी, अर हमतै मसीह खुणि चुणी दिनी, ताकि हम वेका दिखण मा पवित्र अर बेदाग ठैरि सैका।</verse>
				<verse number="5">अर अपणी भली मनसा का मुताबिक जन पिता परमेस्वर न ठाणि छौ, वेन हम से प्यार कैरी। अर हमतै यीशु मसीह का द्‍वारा गोद लिनी, ताकि हम वेकी औलाद बणि जां।</verse>
				<verse number="6">इलै ही हम वेकी महान किरपा की तारीफ करद्‍यां, अर या किरपा वेन अपणा लाडला पुत्र यीशु मसीह का द्‍वारा हम पर बड़ु मेरबान ह्‍वेके कैरी।</verse>
				<verse number="7">अर यीशु मसीह न क्रूस पर अपणु बलिदान देके जु ल्वे बुगै वेका द्‍वारा ही हमतै छुटकारु, अर हमतै हमरा पापों से माफी मिलदी। अर यू सब हमतै पिता परमेस्वर की किरपा अर वेकी बड़ी दया का द्‍वारा मिली,</verse>
				<verse number="8">अर येका द्‍वारा उ हमतै कई बातों की सच्‍चै तैं बिंगण मा अकल देन्दु।</verse>
				<verse number="9">अर पिता परमेस्वर न हमतै अपणी छिपी मनसा का बारा मा बतै, अर ईं बात से खुश ह्‍वे कि उ यीशु मसीह का द्‍वारा अपणी इच्छा तैं पूरि करलु।</verse>
				<verse number="10">अर जब ईं योजना तैं पूरु करण को बगत आलु, तब पिता परमेस्वर स्वर्ग अर धरती की सब चीजों तैं यीशु मसीह का सुपुर्द कैरी द्‍यालु, अर फिर यीशु सब चीजों को मुखिया होलु।</verse>
				<verse number="11">अर पिता परमेस्वर न यीशु मसीह का द्‍वारा हमतै अपणु वारिस बणै। अर परमेस्वर न यू अपणी योजना का मुताबिक कैरी, अर वु सब कुछ अपणी मरजी का हिसाब से करदु।</verse>
				<verse number="12">परमेस्वर न हमतै पैलि इलै चुणी, ताकि हम जु कि यीशु मसीह पर सबसे पैलि आस रखण वळा छां, हमरा द्‍वारा पिता परमेस्वर को पूरु आदर-सम्मान अर बडै हो।</verse>
				<verse number="13">अर जब तुमुन शुभ समाचार का द्‍वारा सच्‍चै का वचन तैं सुणी, कि परमेस्वर यीशु मसीह का द्‍वारा ही बचौन्दु तब तुमुन यीशु मसीह पर बिस्वास कैरी। अर जब तुम वेका पास ऐ ग्यां, त वेन अपणी छाप का रुप मा तुमतै पवित्र आत्मा दिनी, जैको करार वेन पैलि ही कैरियाली छौ।</verse>
				<verse number="14">किलैकि पिता परमेस्वर न हमतै पवित्र आत्मा दियूं च, ज्यां से कि हमरु बिस्वास और भि जादा पक्‍कु ह्‍वे जान्दु। अर हमतै छुटकारु देके के जिं विरासत तैं देण को करार पिता परमेस्वर न कैरी छौ वु वेतैं भि जरुर पूरु करलु, ताकि हम वेतैं अपणा जीवन से पूरु आदर-सम्मान दे सैका अर वेकी बडै भि कैरी सैका।</verse>
				<verse number="15">इलै हे मेरा भै-बैंणो, जब बटि मिन तुमरा वे बिस्वास का बारा मा सुणी जु कि तुम प्रभु यीशु मसीह पर करद्‍यां, अर ठिक उन्‍नि वे प्यार का बारा मा भि सुणी जु कि तुम बिस्वासी लोगु का दगड़ा मा करद्‍यां,</verse>
				<verse number="16">तब बटि मि भि तुम खुणि प्रार्थना मा प्रभु को धन्यवाद कनु रौन्दु। अर तुम सभ्यों तैं याद कैरिके पिता परमेस्वर बटि हमेसा इन्‍नि प्रार्थना कनु रौन्दु कि,</verse>
				<verse number="17">हमरा प्रभु यीशु मसीह को पिता परमेस्वर जु कि सबसे महान च, उ तुमतै ऊं बातों तैं समझणे की अकल द्‍यो जु कि उ परगट करदु, ताकि तुमतै वेका भेदों तैं बिंगण को सच्‍चु ज्ञान मिली सैको।</verse>
				<verse number="18">अर मि इन प्रार्थना करदु कि पिता परमेस्वर तुमरा मनों का आंख्यों तैं खोली द्‍यो, ताकि तुम जाणि सैका कि वा आस क्या च, ज्यां खुणि पिता परमेस्वर न तुमतै बुलै। अर वा बेशुमार दौलत क्या च, ज्वा वेन बिस्वासी लोगु तैं विरासत मा देण खुणि रखी च।</verse>
				<verse number="19">अर मि इन भि प्रार्थना करदु, कि तुम यू समझि सैका कि हम बिस्वास करण वळो का जीवनों मा वेकी ज्वा ताकत काम करदी जु कि भौत ही महान च। अर ईं ताकत की महानता अकसर वेका महान कामों तैं करण की वजै से परगट होन्दी।</verse>
				<verse number="20">अर या वा ही ताकत च जिं का द्‍वारा वेन यीशु मसीह तैं मुरदो मा बटि ज्यून्दु कैरी, अर स्वर्गीय जगा मा अपणी दैंणी तरफा बैठे दिनी।</verse>
				<verse number="21">अर हरेक सासन करण वळु या अधिकार रखण वळु, या जौं का पास कुछ ताकत हो या कुई खास आदिम जैका पास कै मुलक या जगा को अधिकार हो, यों सभ्यों का मथि पिता परमेस्वर न यीशु मसीह तैं सबसे बड़ु पद दिनी, अब चै ये युग मा हो या औण वळा युग मा।</verse>
				<verse number="22">अर पिता परमेस्वर न सब कुछ यीशु मसीह का अधीन कैरी दिनी, अर वेन ही मसीह तैं बिस्वासी समुदाय को मुखिया बणै।</verse>
				<verse number="23">अर समुदाय का लोग यीशु मसीह का सरील का जन छिन, जौं लोगु मा उ पूरि तरौं से रौन्दु अर उई च जु कि सब चीजों मा सब कुछ पूरु करदु।</verse>
			</chapter>
			<chapter number="2">
				<verse number="1">अर जब तुम भि अपणा-अपणा अपराधों अर पापों की वजै से मुरयां लोगु का जन छा, त पिता परमेस्वर न तुमतै ज्यून्दु कैरी अर इथगा ही ना,</verse>
				<verse number="2">बल्किन मा वे बगत त तुम ईं दुनियां का मुताबिक अपणा जीवन तैं बुरै का मुताबिक चलौन्दा छा, अर आसमान पर सासन करण वळा शैतान की बातों तैं मणदा छा। अर आसमान पर सासन करणु वळु वु बुरु आत्मा आज भि ऊं लोगु का जीवनों मा काम करदु, जु आज्ञा को पालन नि करदिन।</verse>
				<verse number="3">अर एक बगत छौ जब हम भि इन्‍नि छा, अर अपणा-अपणा सरील की इच्छाओं का मुताबिक चलदा छा। अर हम लोग उई काम करदा छा, जु की हमरु सरील चान्दु अर सोचदु छौ, अर हम भि ऊं लोगु की तरौं छा, जौं देखि के पिता परमेस्वर गुस्सा छौ।</verse>
				<verse number="4">मगर दया करण मा पिता परमेस्वर को दिल सबसे बड़ु च, किलैकि जब हम अपणा-अपणा अपराध अर पापों की वजै से मुरयां लोगु का जन छा, तब वेन यीशु मसीह का द्‍वारा अपणु प्यार हम पर परगट कैरी, अर हमतै वेका दगड़ा मुरदो मा बटि ज्यून्द कैरिके हमतै नयू जनम देई अर वेकी बड़ी किरपा से हम बचि ग्यां।</verse>
				<verse number="5"></verse>
				<verse number="6">अर पिता परमेस्वर न ही हमतै यीशु मसीह का दगड़ा मा ज्यून्दु कैरी, अर वेका दगड़ा-दगड़ि हमतै स्वर्ग का राज्य मा बैठे,</verse>
				<verse number="7">अर यीशु मसीह का द्‍वारा ज्वा दया वेन हम पर कैरी वा वेन इलै कैरी, ताकि औण वळा जमना मा सब लोग देखि सैका कि पिता परमेस्वर की किरपा कथगा बड़ी च।</verse>
				<verse number="8">किलैकि बिस्वास का द्‍वारा ही तुमतै बचयै गै, अर यू तुमरि तरफा बटि नि होयुं, बल्किन मा यू त परमेस्वर को दान च।</verse>
				<verse number="9">अर तुमतै तुमरा कामों की वजै से नि बचयै गै, कि कुई भि मनखि अपणु बड़ु मोन कैरो।</verse>
				<verse number="10">अरे, यू सब त इलै ह्‍वे किलैकि हम सभ्यों तैं परमेस्वर न यीशु मसीह मा नयू बणै। अर वेन हमतै इलै बणै ताकि हम सब यीशु का दगड़ा मा मिली के ऊ अच्छा काम कैरी सैका, जौं तैं पिता परमेस्वर न पैलि बटि हम खुणि तयार कैरिके रख्युं च।</verse>
				<verse number="11">इलै हे मेरा भै-बैंणो, ईं बात तैं हमेसा याद रखा कि तुम लोग जनम से यहूदी जाति का नि छा। अर जौं यहूदी लोगु न खतना का रिवाज तैं अपणा सरील मा मनखियों का द्‍वारा पूरु करै, उई यहूदी लोग तुम खुणि बुल्दिन कि, “अरे यू त वु लोग छिन जौं को खतना नि च होयुं।”</verse>
				<verse number="12">अर वे बगत तुम लोग मसीह तैं जणदा नि छा। अर तुम लोग इस्राएल का लोगु खुणि एक परदेसी का जन छा, अर परमेस्वर न ऊं लोगु बटि जु करार कर्युं छौ, वामा तुमरो कुई हिस्सा नि छौ। असल मा तुम त ईं दुनियां मा बिना उम्मीद अर बिन परमेस्वर का जीवन जीण छा।</verse>
				<verse number="13">अर एक बगत छौ, जब तुम परमेस्वर से दूर छा, पर अब तुम यीशु मसीह का ल्वे का द्‍वारा पिता परमेस्वर का पास ऐ ग्यां।</verse>
				<verse number="14">यीशु मसीह ही च, जु हमतै एक करदु। अर वेन ही हमरि खातिर खुद तैं दे दिनी, अर अपणी मौत का द्‍वारा वेन हम सब लोगु तैं नियम-कानूनों मा लिखीं आज्ञाओं को पालन करण से आजाद कैरियाली, अर ऊं नियमों तैं रद्‍द कैर दिनी। अर वेन ही यहूदी अर जु लोग यहूदी जाति का नि छिन, ऊंका बीच नफरत की दिवाल तैं ढौलीयालि। इलै हम यहूदी लोग तुमरा दगड़ा मा छां, तुम जु यहूदी जाति का नि छाँ वेन हमतै एकजुट कैरी, ताकि हम सब वेका दगड़ा मा मिल्यां रा।</verse>
				<verse number="15"></verse>
				<verse number="16">अर एक सरील का रुप मा, यीशु मसीह न क्रूस पर अपणी जान दे दिनी, अर वेका द्‍वारा दुई दल का लोगु का बीच की दुसमनी खतम ह्‍वे गै। अर इन कैरिके वेन दुई दल का लोगु को मेल-जोल परमेस्वर का दगड़ा मा करै दिनी।</verse>
				<verse number="17">अर वेन ऐके दुई दल का लोगु तैं शुभ समाचार सुणै। हे मेरा दगड़्यों, हम जु यहूदी जाति का छां, अर वेका नजदीक छां वेन यू शुभ समाचार हमतै सुणै। अर ठिक उन्‍नि तुमतै भि जु की यहूदी जाति का नि छाँ, अर वेसे दूर छाँ वेन तुमतै भि यू शुभ समाचार सुणै।</verse>
				<verse number="18">अर यीशु मसीह का द्‍वारा ही हम दुई दल का लोग, एक ही पवित्र आत्मा का द्‍वारा पिता का समणि जै सकद्‍यां।</verse>
				<verse number="19">इलै अब तुम परदेसी अर मुसाफिर लोग नि छाँ, पर पिता परमेस्वर का चुण्यां पवित्र लोगु का दगड़ा मा हिस्सेदार अर परमेस्वर का घौर का सदस्य छाँ।</verse>
				<verse number="20">तुम लोग एक मन्दिर छाँ। अर जु लोग खास चेला अर परमेस्वर का रैबर्या छिन, वु वेकी बुनियाद छिन। अर ये मन्दिर का कुणों को ढुंगो खुद यीशु मसीह च।</verse>
				<verse number="21">अब मन्दिर का सब हिस्सा यीशु मसीह का दगड़ा मा मिली के मजबूत होन्दी जनदिन, अर पिता परमेस्वर खुणि एक पवित्र मन्दिर बणन्दि जनदिन।</verse>
				<verse number="22">अर अब तुम लोग भि यीशु मसीह का द्‍वारा हम यहूदी लोगु का दगड़ा मा मिली के एक इन मन्दिर बणौणा छाँ, जैमा पिता परमेस्वर अपणी पवित्र आत्मा का द्‍वारा रौन्दु।</verse>
			</chapter>
			<chapter number="3">
				<verse number="1">इलै मि पौलुस, तुम लोगु तैं यीशु मसीह का शुभ समाचार सुनौण की वजै से कैद मा छौं, तुम लोग जु कि यहूदी जाति का नि छाँ।</verse>
				<verse number="2">अर तुम लोगु न यू जरुर सुणी होलु, कि पिता परमेस्वर न मितैं तुम लोगु की भलै खुणि अपणी महान किरपा का मुताबिक सेवा को काम सौप्युं च। हाँ, तुम लोगु खुणि ही तुम जु कि यहूदी जाति का नि छाँ।</verse>
				<verse number="3">अर जन कि मिन तुमतै वे राज का बारा मा थुड़ा भौत पैलि भि लिखी के बतै छौ, कि उ राज मि पर दिब्य दरसन का द्‍वारा परगट किये गै।</verse>
				<verse number="4">अर जब तुम ईं चिठ्‍ठी तैं पढिल्या, त तुम समझि सकिल्या कि मितैं वीं योजना का बारा मा कथगा अच्छे से पता होलु, ज्वा कि पैलि छिपी छै अर पिता परमेस्वर न यीशु मसीह का बारा मा बणईं छै।</verse>
				<verse number="5">अर पैलि जमना का लोगु का बीच मा उ राज ये तरीके से ऊं पर परगट नि किये गै, जन की वेन आज का दिन पवित्र आत्मा का द्‍वारा हम पर परगट कैरी। हम जु कि पवित्र खास चेला अर वेका रैबर्या छां।</verse>
				<verse number="6">अर या को मतलब यू च कि, शुभ समाचार का द्‍वारा यहूदी लोग अर वु लोग भि जु यहूदी जाति का नि छिन, वीं विरासत का हकदार ह्‍वे जा। अर यीशु मसीह का सरील मा सभ्या का सभि एक बदन ह्‍वेके कियां करार का साझी बणा।</verse>
				<verse number="7">अर पिता परमेस्वर न अपणा सामर्थ का द्‍वारा मि पर अपणी महान किरपा को काम कैरी, ताकि मि एक सेवक बणि के वेका शुभ समाचार तैं फैलाण को काम कैरुं।</verse>
				<verse number="8">अर पिता परमेस्वर का सब पवित्र लोगु मा बटि मि सबसे छुटा छौं, मगर फिर भि वेन मि पर अपणी किरपा कैरिके मितैं यू दान दिनी, कि जु लोग यहूदी जाति का नि छिन मि ऊंका बीच मा जैके यीशु मसीह का द्‍वारा मिलण वळी बेशुमार आसिसों को बखान कैरी सैकु।</verse>
				<verse number="9">अर पिता परमेस्वर जैन सब चीजों तैं बणै, अर वेमा ही यू सब बात पैलि छिपी छिन वे ही परमेस्वर न मितैं यू काम सौंपी, कि मि सब लोगु तैं वीं महान योजना का बारा मा बतौ।</verse>
				<verse number="10">अर बिस्वासी समुदाय का द्‍वारा वेको मकसद इन च, कि आसमान का सासक अर सब शक्‍तियाँ पिता परमेस्वर का ज्ञान का बारा मा जाणि सैका, कि वेकी योजना कथगा महान च।</verse>
				<verse number="11">अर या योजना पिता परमेस्वर न दुनियां की शुरुवात से पैलि बणैयालि छै, जींतैं वेन हमरा यीशु मसीह का द्‍वारा पूरु कैरी।</verse>
				<verse number="12">अर यीशु मसीह पर बिस्वास करण की वजै से ही हम लोग यकीन कैरिके, अर बिन डऽरयां पिता परमेस्वर का समणि ऐ-जै सकद्‍यां।</verse>
				<verse number="13">हे मेरा दगड़्यों, तुमरा खातिर जु दुख मि झिलणु छौं, मि तुम से बिन्ती करदु कि तुम मेरा दुख की वजै से निरास नि ह्‍वा। अर पिता परमेस्वर ये बगत मा तुमतै ताकत द्‍यो अर तुम वेमा और भि जादा बढदी जा, किलैकि दुख का ये बगत मा ही तुमरि बडै होन्दी।</verse>
				<verse number="14">इलै मि पिता परमेस्वर का समणि, जैकी बदौलत स्वर्ग अर धरती पर रौण वळा हरेक परिवार तैं जीवन मिलदु, मि घुंडा टेकी के तुम सभ्यों खुणि इन प्रार्थना करदु कि,</verse>
				<verse number="15"></verse>
				<verse number="16">उ अपणी पवित्र आत्मा का द्‍वारा अपणा महान कुठार बटि तुम सभ्यों तैं इन दान द्‍यो, ताकि तुम अपणी आत्मा मा और भि जादा मजबूत होन्दी जा।</verse>
				<verse number="17">अर यीशु मसीह पर बिस्वास करण की वजै से उ तुमरा दिल मा वास कैरो, अर वेका होण से तुमरा भितर को मनखि एक-दुसरा का दगड़ा प्यार से रौण मा और भि जादा मजबूत हो।</verse>
				<verse number="18">अर प्रभु मा अपणी बुनियाद रखी के तुम पक्‍का ह्‍वे जा, ताकि तुम सब पवित्र लोगु का दगड़ा मा मिली के यीशु मसीह का प्यार की लम्बै-चौडै अर ऊंचै कथगा गैरी च, ईं बात का बारा मा भौत अच्छे से समझि सैका।</verse>
				<verse number="19">अर मि इन चान्दु, कि तुम लोग मसीह का वे प्यार तैं जाणि सैका, जु कि मनखि की सोच-समझ से भैर च, अर पूरि हद तक तुम मा पिता परमेस्वर का गुण ऐ जा।</verse>
				<verse number="20">अर अब पिता परमेस्वर अपणी सामर्थ का द्‍वारा हमरा भितर काम कनु च अर जथगा हम मांगि या सोची सकद्‍यां, वु हम खुणि ऊं सब बातों से भि जादा बड़ा-बड़ा काम कैरी सकदु च,</verse>
				<verse number="21">अर बिस्वासी समुदाय का लोगु का द्‍वारा अर यीशु मसीह का द्‍वारा पिता परमेस्वर की बडै पीढ़ी से पीढ़ी तक सदनि तक होणी रौ। आमीन।</verse>
			</chapter>
			<chapter number="4">
				<verse number="1">इलै मि जु कि प्रभु यीशु को चेला होण का नाता कैद मा छौं, तुम बटि बिन्ती करदु कि तुमरो चाल-चलन वीं इच्छा का मुताबिक हो ज्यां खुणि पिता परमेस्वर न तुमतै बुलै।</verse>
				<verse number="2">अर सच्‍चा मन से दीन अर नमर बणा, अर सबर रखण का दगड़ा-दगड़ि प्यार से एक-दुसरे की बातों तैं सौण वळा भि बणा।</verse>
				<verse number="3">अर पवित्र आत्मा का द्‍वारा एकजुट होण को जु दान तुमतै मिली वेका मुताबिक तुम एक-दुसरा का दगड़ा मा शान्ति से रौण की पूरि कोसिस कैरा।</verse>
				<verse number="4">किलैकि पिता परमेस्वर न हमतै एक होणु खुणि ही बुलयूं च, अर फिर मसीह को बदन भि एक ही च, अर एक ही पवित्र आत्मा अर ठिक उन्‍नि हम सभ्यों की भि एक ही आस च।</verse>
				<verse number="5">अर एक ही प्रभु, एक ही बिस्वास अर एक ही बपतिस्मा च,</verse>
				<verse number="6">अर सभ्यों को एक ही पिता परमेस्वर च, जु कि सभ्यों पर राज करदु, अर हम सभ्यों का बीच मा काम करदु, अर पवित्र आत्मा का द्‍वारा हम सभ्यों का भितर रौन्दु।</verse>
				<verse number="7">हे मेरा भै-बैंणो, यीशु मसीह न अपणा दान का मुताबिक हम सभ्यों पर अपणी किरपा कैरी</verse>
				<verse number="8">इलै पवित्रशास्‍त्र मा भि इन लिख्यूं च कि, “जब उ ऊँचा पर चड़ये गै, त कैदियों तैं बान्धि के लि गै। अर मनखियों तैं दान-बरदान दिनी।”</verse>
				<verse number="9">“उ चड़ये गै,” ईं बात को मतलब क्या ह्‍वे सकदु? अरे, यां को मतलब यू च कि उ धरती का मूड़ी अधलोक मा गै।</verse>
				<verse number="10">अर वु जु की अधलोक मा गै उई च जु कि आसमान मा मथि चैड़ि, ताकि वु सभ्यों तैं भरपूर कैरी द्‍यो।</verse>
				<verse number="11">अर वेन कुछ लोगु तैं खास चेला होण खुणि ठैरै, अर कुछ तैं रैबर्या बणै, अर कुछ लोगु तैं शुभ समाचार सुनौण वळु, अर कुछ लोगु तैं देख-रेख करण वळु, अर कुछ लोगु तैं वेन उपदेस देण वळु ठैरै।</verse>
				<verse number="12">अर इन वेन इलै कैरी, ताकि बिस्वासी लोगु तैं सेवा का काम का लैख बणयै जौ अर यीशु मसीह को बिस्वासी समुदाय और भि जादा तरक्‍की कैरो।</verse>
				<verse number="13">अर जबरि तक हम सभ्या का सभि बिस्वास अर परमेस्वर का पुत्र यीशु की पछ्याण मा एक नि ह्‍वे जा, अर पूरि तरौं से एक सिद्ध मनखि नि बणि जां, तबरि तक अगनै बढदी जा ताकि हम यीशु की पूरि कद-काठी का जन ह्‍वे सैका।</verse>
				<verse number="14">अर औण वळा बगत मा हम बच्‍चों का जन नि रा, जु कि झूठ्‍ठा गुरु लोगु की चालाकी अर धोखा देण वळी बातों तैं सच्‍च समझदिन, अर अपणा जीवन मा स्वीकार कैरिके वेका मुताबिक चलदिन। मेरा दगड़्यों, इन्द्रया लोगु को बिस्वास समुन्दर की लैरों का जन च, जु कि इनै-उनै होणी रौनदिन।</verse>
				<verse number="15">मगर मि तुमतै बतै देन्दु, कि प्यार की ताकत से हम सभ्या का सभि हरेक सच्‍चि बात मा यीशु मसीह की तरफा बढदी जा, जु कि बिस्वासी समुदाय को मुखिया च।</verse>
				<verse number="16">अर उ बिस्वासी समुदाय का सब लोगु तैं पूरि तरौं से एक कैरिके रखदु, ज्यां से की हरेक मनखि अपणा-अपणा बुलये जाण का मुताबिक काम कैरी सैको। अर समुदाय को हरेक मनखि इन इलै कैरो, ताकि हरेक बिस्वासी वचन मा अगनै बढी सैको। अर मसीह जु कि बिस्वासी समुदाय को मुण्ड़ च वेको पूरु सरील खूब रौ, हम हरेक दिन बढदी जां अर वेका प्यार मा जड़ भि पकड़दी जां।</verse>
				<verse number="17">इलै प्रभु का नौ से मि तुमतै हुकम देके बुल्दु, कि तुम ईं दुनियां का लोगु का जन नि बणा, जु की अपणा मनों तैं बेमतलब की बातों पर लगौन्दिन, अर वेका मुताबिक चलदिन।</verse>
				<verse number="18">अर ऊ जिद्‍दी छिन अर अपणा-अपणा मनों तैं निठुर बणै के रखदिन, इलै ऊंको निठुर होण की वजै से ऊ आज भि अन्धेरा मा छिन, अर वु सदनि का जीवन से दूर छिन जु कि प्रभु ऊंतैं देण चान्दु।</verse>
				<verse number="19">अर ऊ सुनपट पोड़यां छिन, अर ऊंन खुद तैं गळत चाल-चलन का हवाला कैरियाली, ताकि हर तरौं का गळत काम कैरी सैका, अर गळत कामों तैं करण की इच्छा मा और भि जादा बढदी जां।</verse>
				<verse number="20">मगर तुम न यीशु मसीह का द्‍वारा इन्दरि गळत बातों की शिक्षा तैं नि पै।</verse>
				<verse number="21">मगर ज्वा शिक्षा वेन तुम पर परगट कैरी, तुमुन सच्‍चि मा वींका बारा मा सुणी अर अपणा जीवन मा स्वीकार भि कैरी।</verse>
				<verse number="22">इलै अपणा-अपणा जीवन का वे पुरणा बुरा चाल-चलन तैं छोड़ि द्‍या, जु कि भरमौण वळी इच्छाओं तैं रखदु, अर अपणा बुरा सभौ का मुताबिक बिस्वासी लोगु तैं भ्रष्‍ट कैरी देन्दु।</verse>
				<verse number="23">पर मि तुमतै बतै देन्दु, कि तुम अपणा-अपणा मन अर सभौ तैं पवित्र आत्मा का द्‍वारा नयू बणौन्दि जा,</verse>
				<verse number="24">अर अपणा ये नया सभौ का मुताबिक परमेस्वर की नजर मा एक सच्‍चु धरमी अर पवित्र जीवन जीण वळु बणा।</verse>
				<verse number="25">इलै हे मेरा भै-बैंणो, अपणा-अपणा पड़ोसी बटि झूठ्‍ठ बोन्‍न छोड़ा, अर सच्‍च बोला, किलैकि हम सभ्या का सभि एक ही सरील का अंग छां।</verse>
				<verse number="26">अर जब तुमतै गुस्सा अऽ त पाप नि कर्यां, बल्किन मा घाम अछयौण से पैलि अपणा गुस्सा तैं थूकि द्‍या,</verse>
				<verse number="27">अर शैतान तैं कुई मौका नि द्‍या।</verse>
				<verse number="28">इलै सुणा, जु चोरी करदु उ अब से चोरी नि कैरो, बल्किन मा अपणा हाथोंळ भलै का काम कैरो, ताकि जरुरतमन्द लोगु की मदद करणु खुणि वेका पास कुछ हो।</verse>
				<verse number="29">अर कुई भि गळत बात तुमरा गिच्‍चा बटि नि बुले जौ, पर सिरफ इन्दरि बात ही बुले जौ जु बगत का मुताबिक दुसरा लोगु की हिम्मत बढौणु खुणि अच्छी हो, ताकि वेका द्‍वारा सुनण वळो की भलै हो।</verse>
				<verse number="30">अर परमेस्वर की पवित्र आत्मा तैं अपणा चाल-चलन से दुख नि द्‍या, किलैकि पवित्र आत्मा देके परमेस्वर न तुम पर अपणी मोर लगईं च, ताकि छुटकारा का दिन पर तुमतै छुडयै जौ।</verse>
				<verse number="31">अर अपणा-अपणा जीवनों बटि हरेक किसमे की कड़वाहट, नाराज होण वळु सभौ, गुस्सा करण, चिलाण, गळी देण, इन्दरि भौत सरी बुरै तैं अफ बटि दूर कैरा।</verse>
				<verse number="32">पर एक-दुसरा पर दया दिखा अर मयळु बणा, अर जन परमेस्वर न यीशु मसीह का द्‍वारा तुमरा पापों तैं माफ कैरी, ठिक उन्‍नि तुम भि मयळु बणि के एक-दुसरा का पापों तैं माफ कैरा।</verse>
			</chapter>
			<chapter number="5">
				<verse number="1">इलै हे मेरा प्यारा भै-बैंणो, पिता परमेस्वर की औलाद होण का नाता, तुम वेका मुताबिक चला,</verse>
				<verse number="2">अर प्यार का बाटा पर चलि के एक-दुसरे से प्यार कैरा, ठिक उन्‍नि जन यीशु मसीह न तुम बटि प्यार कैरी। अर वेन हम मनखियों का खातिर खुद तैं पिता परमेस्वर का समणि एक पसन्द औण वळी खुशबुदार भेंट का रुप मा चड़ै दिनी।</verse>
				<verse number="3">अर तुम लोगु का बीच मा गळत सम्बन्ध रखण, कै भि किसम का गन्दा काम करण या लालच करण बिल्कुल भि नि होण चयेणी, किलैकि पिता परमेस्वर न तुमतै पवित्र होण खुणि बुलयूं च, इलै तुमरो सभौ पवित्र हो।</verse>
				<verse number="4">अर नऽ त तुमरा बीच मा गळत बात बुले जौ, अर ना ही मूरखो की तरौं कुई बात, अर ना ही गळत मजाक हो, किलैकि यू सब बात तुम ठिक नि छिन, बल्किन मा तुमरा बीच मा त बस पिता परमेस्वर को धन्यवाद ही सुणै जौ।</verse>
				<verse number="5">किलैकि तुम ईं बात का बारा मा भौत अच्छे से जणद्‍यां, कि गळत सम्बन्ध रखण, अर पवित्र जीवन नि जीण, लालच, यू सब मूरत पूजा करण का बराबर च, अर इन्द्रया लोगु की यीशु मसीह अर पिता परमेस्वर का राज मा कुई जगा नि च।</verse>
				<verse number="6">अर कुई भि मनखि तुमतै बेकार की बातों मा नि फंसौ, किलैकि यों बातों का खातिर ही परमेस्वर को गुस्सा आज्ञा नि मनण वळा लोगु पर पोड़दु।</verse>
				<verse number="7">इलै तुम इन्द्रया लोगु का दगड़ा मा साझा नि ह्‍वा।</verse>
				<verse number="8">अर या बात मि तुमकु इलै बोन्‍नु छौं, किलैकि पैलि तुम अन्धेरा मा छा, पर अब प्रभु यीशु का दगड़ा मा एक होण की वजै से तुम मा भि उज्याळु ऐ गै। इलै हे मेरा दगड़्यों, उज्याळे की औलाद होण की वजै से अपणा जीवन को गुजर-बसर उज्याळा मा कैरा।</verse>
				<verse number="9">किलैकि जै मनखि का जीवन मा परमेस्वर को उज्याळु च, उ हरेक तरौं की भलै करण मा, अर सच्‍चै से धरमी जीवन जीण की कोसिस करदु।</verse>
				<verse number="10">अर हर बगत इन भि जनण की कोसिस कैरा कि प्रभु तैं क्या अच्छु लगदु।</verse>
				<verse number="11">हे मेरा भै-बैंणो, ऊं लोगु का कामों की नकल नि कैरा जु अन्धेरा मा छिन, किलैकि अन्धेरा मा किये जाण वळा काम अच्छे का नि छिन, बल्किन मा वु त बुरै का छिन इलै तुम ऊं कामों की पोल खोली द्‍या।</verse>
				<verse number="12">किलैकि वु लोग ऊं कामों तैं लुकि-छिपी के करदिन, अर ऊं कामों का बारा मा बात करण से भि सरम औन्दी।</verse>
				<verse number="13">पर जब उज्याळु चमकदु तब सब कुछ दिखैण लगि जान्दु अर अन्धेरा का काम परगट ह्‍वे जनदिन।</verse>
				<verse number="14">इलै ही पवित्रशास्‍त्र मा साफ-साफ लिख्यूं च कि, “हे सियां मनखि उठ, मुरदो मा बटि खड़ु हो, तब मसीह को उज्याळु त्वे पर चमकळु।”</verse>
				<verse number="15">इलै हे मेरा दगड़्यों, अपणा-अपणा चाल-चलन पर ध्यान द्‍या, मूरख मनखि की तरौं ना, बल्किन मा अकलमन्द मनखियों की तरौं अपणु जीवन ज्या।</verse>
				<verse number="16">यीशु मसीह की तरौं जीवन जीणु खुणि बगत तैं अच्छु समझि के वेको पूरु इस्तेमाल कैरा, किलैकि दिन बुरा छिन।</verse>
				<verse number="17">इलै नासमझ नि बणा, बल्किन मा प्रभु की इच्छा तैं समझा कि उ क्या चान्दु।</verse>
				<verse number="18">अर झान्‍झियों की तरौं दारु नि घतौळा, किलैकि यां से जीवन बरबाद ह्‍वे जनदिन, पर तुम पवित्र आत्मा की ताकत से भरपूर होन्दी जा।</verse>
				<verse number="19">अर एक-दुसरा का दगड़ा मा पिता परमेस्वर की बडै खुणि धन्यवाद का भजन, अर वेका गुणगान खुणि आत्मिक गीत गा। अर अपणा-अपणा मनों मा प्रभु का गीत गैके वेकी तारीफ कना रा।</verse>
				<verse number="20">अर हरेक बात खुणि हमरा प्रभु यीशु मसीह का नौ से पिता परमेस्वर को हमेसा धन्यवाद कना रा।</verse>
				<verse number="21">अर यीशु मसीह पर पूरि सरदा रखण की वजै से एक-दुसरा तैं पूरु आदर-सम्मान द्‍या।</verse>
				<verse number="22">हे मेरी बैंणो, जन तुम प्रभु यीशु का अधीन मा रौन्द्‍यां ठिक उन्‍नि तुम अपणा-अपणा पति का अधीन मा भि रा।</verse>
				<verse number="23">किलैकि जन प्रभु यीशु बिस्वासी समुदाय को मुखिया च अर वेतैं बचौण वळु भि च, ठिक उन्‍नि तुमरो पति भि तुमरो मुखिया च।</verse>
				<verse number="24">हाँ मेरी बैंणो, जन बिस्वासी समुदाय यीशु मसीह का अधीन मा च, ठिक उन्‍नि तुम भि हरेक बातों मा अपणा-अपणा पति का अधीन मा रा।</verse>
				<verse number="25">हे मेरा भैयों मि तुमतै बतै देन्दु कि तुम अपणी-अपणी घरवळी से प्यार कैरा, हाँ ठिक उन्‍नि प्यार जन यीशु मसीह न बिस्वासी समुदाय का लोगु से कैरी अर बलिदान का रुप मा खुद तैं दे दिनी।</verse>
				<verse number="26">अर जन पाणि का द्‍वारा साफ किये जान्दु, ठिक उन्‍नि वु हमतै अपणा वचन का द्‍वारा शुद्ध करदु।</verse>
				<verse number="27">अर ऊंतैं पूरि सान-सौकत से अपणा समणि खड़ु कैरो, जैमा कुई दाग नि हो, अर ना कुई झुरी अर ना ही कुई बुरै हो, अर उ पवित्र अर बेदाग हो।</verse>
				<verse number="28">इलै हे पतियों तुमतै इन होण चयेणु कि तुम अपणी-अपणी घरवळी से प्यार कैरा, हाँ जन तुम अपणा सरील से करद्‍यां। अर जु मनखि अपणी घरवळी से प्यार करदु उ खुद से भि प्यार करदु।</verse>
				<verse number="29">किलैकि कुई भि मनखि अपणा सरील से नफरत नि करदु, बल्किन मा उ त अपणा सरील तैं खिलान्दु-पिलान्दु अर वेतैं अनमोल जाणि के बड़ा प्यार से वेकी देख-रेख करदु, ठिक उन्‍नि जन यीशु मसीह बिस्वासी समुदाय की करदु।</verse>
				<verse number="30">अर यीशु मसीह इन इलै करदु, किलैकि हम वेका सरील का अंग छां।</verse>
				<verse number="31">जन कि पवित्रशास्‍त्र मा भि लिख्यूं च कि, “इलै मनखि अपणा ब्वे-बाब तैं छोड़ि के अपणी घरवळी का दगड़ा मा रालु, अर ऊ दुईया का दुई एक सरील होला।”</verse>
				<verse number="32">अर यू राज तुम खुणि त बड़ु महान च, जैतैं पैलि छिपै के रखै गै छौ, मगर मि येको इस्तेमाल यीशु मसीह अर बिस्वासी समुदाय का बारा मा कनु छौं।</verse>
				<verse number="33">पर फिर भि तुम मा बटि हरेक मनखि अपणी घरवळी से उन्‍नि प्यार कैरो, जन उ खुद से करदु। अर ठिक उन्‍नि घरवळी भि अपणा पति तैं पूरु आदर-सम्मान द्‍यो।</verse>
			</chapter>
			<chapter number="6">
				<verse number="1">हे मेरा प्यारा बच्‍चों, तुम प्रभु का छाँ इलै अपणा ब्वे-बाब को बुलयूं माणा, किलैकि इन करण तुम खुणि भलु च।</verse>
				<verse number="2">अर तुम खुणि सबसे पैलि आज्ञा या च कि, “अपणा-अपणा ब्वे-बाब को आदर-सम्मान कैरा, अर वेका दगड़ा-दगड़ि इन करार भि कर्युं च कि,</verse>
				<verse number="3">तब तेरु भलु होलु, अर तू ईं धरती पर भौत दिनों तक ज्यून्दु रैलि।”</verse>
				<verse number="4">अर बिस्वासी समुदाय का बीच मा जथगा भि लोग ब्वे-बाब छिन, मि तुमतै भि चितै देन्दु कि अपणा-अपणा बच्‍चों तैं गुस्सा नि दिला, बल्किन मा ऊंतैं वीं शिक्षा का मुताबिक जीवन जीण सीखा जु कि पिता परमेस्वर की तरफा बटि मिलदु, अर इन कैरिके ऊंको पालन-पोसण कैरा।</verse>
				<verse number="5">हे मेरा भै-बैंणो, तुम जु नौकर छाँ, अर ईं दुनियां का मुताबिक जु तुमरा मालिक छिन, ऊंका अधीन मा रा, अर ऊंकी बातों को पालन कैरा। अर यू सब कुछ तुम इन सोची के कैरा जन तुम सच्‍चा दिल से यीशु मसीह की सेवा कना हो।</verse>
				<verse number="6">अर यू सब कुछ तुम मनखियों तैं खुश करणु या दिखौणु खुणि ना, पर यीशु मसीह का सेवकों की तरौं तन-मन से परमेस्वर की मनसा का मुताबिक कैरा।</verse>
				<verse number="7">अर अच्छी मनसा का दगड़ा मा काम करण वळा नौकर बणा, इन सोचा, की तुम या सेवा प्रभु खुणि करणा छाँ, ना की कै मनखि खुणि,</verse>
				<verse number="8">किलैकि तुम जणदा छाँ, कि हरेक मनखि चै ऊ नौकर हो या आजाद, अगर उ अच्छु काम करलु त प्रभु बटि इनाम भि पालु।</verse>
				<verse number="9">अर हे मालिकों, अपणा-अपणा नौकरों को हक ऊंतैं द्‍या अर ऊंतैं डऽरै-धमकै के नि रखा, अर यू याद रखा कि स्वर्ग मा रौण वळु परमेस्वर तुम दुईयों को मालिक च, अर वु कै का दगड़ा मा भेदभाव नि करदु।</verse>
				<verse number="10">इलै हे मेरा भै-बैंणो, प्रभु अर वेकी महान ताकत बटि तुम भि ताकत पैके मजबूत होन्दी जा।</verse>
				<verse number="11">परमेस्वर का दियां सब आत्मिक हथियारों तैं बान्धि ल्या, ताकि तुम शैतान की चालाकी का खिलाप मा टिक्यां रा।</verse>
				<verse number="12">किलैकि हम बिस्वासी लोगु की या लड़ै मनखियों का दगड़ा मा नि च, जौं पर केवल मांस, ल्वे अर हड़गा ही छिन, बल्किन मा हमरि लड़ै त दुष्‍ट खबेसों, अर ऊंका परधानों अर अधिकारीयों का दगड़ा मा च, जु कि ईं अन्धेरी दुनियां पर सासन करदिन अर आसमान मा रौनदिन।</verse>
				<verse number="13">इलै परमेस्वर का दियां सब आत्मिक हथियार बान्धि ल्या, ताकि जब बुरा दिन आला त तुम ऊं सब बुरी बातों से लड़ी सैका, अर सब कुछ पूरु कैरिके अटल बणयां रा।</verse>
				<verse number="14">इलै सच्‍चै का वचन से अपणी कमर कसी ल्या, अर परमेस्वर न तुमतै धरमी ठैरैयालि या बात एक कवच का जन च।</verse>
				<verse number="15">अर जन तयार ह्‍वेके जुता पैनण होन्दु, ठिक उन्‍नि तुम भि मेल-जोल का शुभ समाचार तैं सुनौणु खुणि तयार रा।</verse>
				<verse number="16">अर यों सभ्यों का दगड़ा-दगड़ि हाथों मा बिस्वास की ढाल तैं थामि ल्या, ज्यां से कि तुम शैतान का सब जग्यां तीरों तैं बुझै सैका।</verse>
				<verse number="17">अर छुटकारा तैं स्वीकार कैरा, अर यू हैलमेट पैनण का जन च, अर पवित्र आत्मा की तलवार तैं ले ल्या जु की परमेस्वर को वचन च।</verse>
				<verse number="18">अर हरेक बगत मा पवित्र आत्मा की ताकत से सब किसम का प्रार्थना निवेदन कना रा। अर बिज्यां रा, अर सब पवित्र लोगु खुणि लगातार प्रार्थना कना रा।</verse>
				<verse number="19">हे मेरा भै-बैंणो, मि पौलुस खुणि भि प्रार्थना कर्यां, ताकि मितैं वचन बोन्‍न का बगत मा इन्द्रयो वचन दिये जौ, जैतैं मि हिम्मत से बोलि सैकु अर शुभ समाचार को पवित्र राज लोगु तैं बतै सैकु,</verse>
				<verse number="20">अर मितैं शुभ समाचार को परचार करणु खुणि ही भेजि गै, अर अब मि इख बेड़ियों मा बन्धयूं छौं। हे मेरा दगड़्यों, मि खुणि प्रार्थना कर्यां कि जब मि शुभ समाचार को परचार कैरुं, त बड़ी हिम्मत से कैरी सैकु।</verse>
				<verse number="21">मि इन चान्दु, कि तुम लोग मेरा बारा मा जाणा, कि इख मि कै हालत मा छौं अर क्या कनु छौं। इलै मि तुमरा पास हमरा प्यारा भै तुखिकुस तैं भेजणु छौं, जु कि प्रभु की सेवा का काम मा मेरी मदद करण वळु, अर भरोसामन्द मनखि च। अर जब उ तुमरा पास आलु, त तुमतै हमरि हालत का बारा मा बतालु अर तुमरा दिलों की हिम्मत तैं भि बढालु।</verse>
				<verse number="22"></verse>
				<verse number="23">अर मि इन प्रार्थना करदु, कि पिता परमेस्वर अर प्रभु यीशु मसीह की तरफा बटि तुमतै शान्ति मिलु। अर तुम सब एक-दुसरा से प्यार करण मा अर बिस्वास मा हरेक दिन बढदी जा।</verse>
				<verse number="24">अर जु लोग हमरा प्रभु यीशु मसीह से कभि नि खतम होण वळु प्यार करदिन, ऊं सभ्यों पर परमेस्वर की किरपा होणी रौ। आमीन।</verse>
			</chapter>
		</book>
		<book number="50">
			<chapter number="1">
				<verse number="1">हे मेरा भै-बैंणो, मि पौलुस छौं अर मेरा दगड़ा मा तीमुथियुस भै च अर हम दुईया का दुई यीशु मसीह का सेवक छां। अर मि या चिठ्‍ठी यीशु मसीह पर बिस्वास करण वळा ऊं सब पवित्र लोगु खुणि लिखणु छौं, जु कि फिलिप्पी नगर मा रौनदिन अर बिस्वासी समुदाय का अध्यक्ष, अर सेवा का काम मा मदद करण वळा छिन।</verse>
				<verse number="2">अर हम इन प्रार्थना करद्‍यां कि, हमरा पिता परमेस्वर अर प्रभु यीशु मसीह की तरफा बटि वेकी किरपा अर शान्ति तुमतै मिलदी रौ।</verse>
				<verse number="3">हे मेरा भै-बैंणो मि पौलुस जब तुमतै याद करदु, त तुमरा बानो मि परमेस्वर तैं धन्यवाद देन्दु,</verse>
				<verse number="4">किलैकि जै दिन बटि तुमुन शुभ समाचार तैं सुणी, वे दिन बटि लेके आज तक तुमुन शुभ समाचार तैं फैलाण मा मेरी पूरि मदद कैरी, इलै मि हमेसा अपणी प्रार्थना मा खुश ह्‍वेके तुम सभ्यों खुणि बिन्ती कनु रौन्दु।</verse>
				<verse number="5"></verse>
				<verse number="6">अर मितैं ईं बात पर पूरु यकीन च कि जै परमेस्वर न तुमरा भितर अच्छा काम की शुरुवात कैरी, उई तब तक तुमरा भितर काम कनु रालु जब तक यीशु मसीह को वापस औण को दिन ऐ नि जौ।</verse>
				<verse number="7">अर तुमरा बारा मा मेरु ख्याल बिल्कुल ठिक च, किलैकि तुम खुणि मेरा दिल मा एक खास जगा च, अब चै मितैं संगुळोन बान्धि के कैद होण की बात हो, या शुभ समाचार की हिफाजत कैरिके वेतैं सच्‍चु साबित करण की बात हो, तुम सभि मेरा दगड़ा मा परमेस्वर की महान किरपा का हिस्सेदार छाँ।</verse>
				<verse number="8">अर ईं बात का बारा मा परमेस्वर मेरु गवा च, कि मि तुम सभ्यों बटि मिलणु खुणि कथगा तड़पदु। अर दया कैरिके जन प्यार यीशु न कैरी, ठिक उन्‍नि मि भि तुम से करदु।</verse>
				<verse number="9">अर मि प्रार्थना करदु, कि तुमरो प्यार और भि जादा बढदी जौ, अर ज्ञान अर समझ मा भि तुम और जादा बढदी जा,</verse>
				<verse number="10">ताकि तुम भलै अर बुरै की बातों मा बटि भलै की बातों तैं जादा से जादा स्वीकार कैरी सैका, अर यीशु मसीह का वापस औण का दिन तक एक खरु अर निरदोष मनखि बणि के रै सैका।</verse>
				<verse number="11">अर यीशु मसीह का द्‍वारा परमेस्वर की नजर मा धरमी जीवन जीणु खुणि हर गुण से भरपूर ह्‍वे जा, ताकि तुमरा जीवनों का द्‍वारा परमेस्वर की बडै अर तारीफ हो।</verse>
				<verse number="12">हे मेरा भै-बैंणो मि चान्दु छौं कि तुम या बात जाण जा कि जु कुछ भि मि पर बीती, वेका द्‍वारा शुभ समाचार और भि जादा बढदी गै।</verse>
				<verse number="13">इख तक कि महाराजा का राजमहल की पूरि पलटण तैं अर दुसरा सब लोगु तैं भि इन पता चलि गै, कि मि यीशु मसीह का खातिर कैद होयुं छौं।</verse>
				<verse number="14">इलै जादातर भै-बैंणो न जब यू सुणी कि मि कैद मा छौं त वु डौऽरी नि छिन, बल्किन मा ऊंन अपणु बिस्वास प्रभु यीशु पर बणै के रखदिन, अर बड़ी हिम्मतळ परमेस्वर का वचन को परचार करदिन।</verse>
				<verse number="15">अर कुछ लोग त जलन अर विरोध करण की वजै से यीशु मसीह को परचार कना छिन, मगर कुछ लोग इन छिन जु कि अच्छी मनसा रखी के परचार कना छिन।</verse>
				<verse number="16">अर जु लोग प्यार से परचार को काम कना छिन वु इन इलै कना छिन, किलैकि वु जणदा छिन कि मि शुभ समाचार को बचौ करण की वजै से इख कैद मा रखै ग्यों।</verse>
				<verse number="17">मगर कुछ लोग भला इरादा से मसीह का बारा मा नि सुणौन्दिन, पर विरोध की इच्छा रखी के परचार को यू काम करदिन, अर ऊंतैं इन लगदु कि इन कैरिके वु मितैं ईं कैद मा दुख दे सकदिन।</verse>
				<verse number="18">अर अगर जु वु इन सोचदिन, त क्या ह्‍वे गै त? अब चै ऊंको मकसद गळत तरीके से हो या सच्‍चै से, अब चै जन भि हो बस मसीह को परचार होणु च, अर मि ईं बात से बड़ु खुश छौं अर आनन्द मनौणु छौं।</verse>
				<verse number="19">किलैकि मि जणदु छौं कि तुम लोगु की प्रार्थनाओं का द्‍वारा अर यीशु की पवित्र आत्मा की मदद से मितैं छुटकारु मिललु।</verse>
				<verse number="20">अर मेरी पूरि आस अर इच्छा या च, कि मि वचन तैं फैलाण मा कै भि तरीके से नि सरमौ। अर मितैं इन भि बिस्वास च, कि मेरा जीवन का द्‍वारा यीशु मसीह तैं पूरु आदर-सम्मान हमेसा मिलणु रौ, अब चै मि ज्यून्दु रौ या मोरि जौ।</verse>
				<verse number="21">अगर मि ज्यून्द रौलु त मेरु जीवन जीण केवल यीशु मसीह खुणि ही च, अर अगर जु मि मोरि भि जौलु त मि खुणि यू अच्छु ही च।</verse>
				<verse number="22">अर अगर मि ज्यून्द रौन्दु त मि अपणा कामों का द्‍वारा जादा से जादा फैदा लेके ऐ सकदु, अर अगर मितैं यों दुईयों मा बटि कै एक तैं चुनण होलु, त मितैं नि पता की मि क्या जि चुणु।</verse>
				<verse number="23">अर मि यों दुई बातों तैं लेके बड़ा घंघतोळ मा पोड़्यूं छौं, मोन त मेरु इन बोन्‍नु च कि ईं दुनियां बटि विदै लेके मि यीशु मसीह का पास चलि जौ, किलैकि या ही बात मि खुणि सबसे जादा खूब च।</verse>
				<verse number="24">मगर तुम लोगु का खातिर मि खुणि ईं दुनियां मा ज्यून्द रौण जादा जरुरी च।</verse>
				<verse number="25">अर मितैं ईं बात पर पूरु यकीन च अर मि जणदु छौं, कि मि ज्यून्द रौलु अर तुमरा दगड़ा मा रै के तुमरि मदद करलु, ताकि तुम बिस्वास मा और भि जादा मजबूत ह्‍वे जा अर खुशी मणै सैका।</verse>
				<verse number="26">अर जब मि तुमरा बीच मा फिर से रौलु, त तुम लोग मेरा बानो यीशु मसीह पर और भि जादा बड़ु मोन करिल्या।</verse>
				<verse number="27">बस ईं बात को ध्यान रखा कि तुमरो चाल-चलन यीशु मसीह का शुभ समाचार का मुताबिक हो। अर अब चै मि तुम बटि ऐके मिलु या तुम से दूर रौ, मि तुमरा बारा मा बस इन्‍नि सुनण चान्दु कि तुम सभ्या का सभि एक ही दिल-दिमाग का ह्‍वे ग्यां। अर एक मन ह्‍वेके शुभ समाचार पर रख्यां बिस्वास तैं और जादा मजबूत करणु खुणि कड़ी मेनत कना छाँ।</verse>
				<verse number="28">अर मि इन भि सुनण चाणु छौं, कि तुम विरोध करण वळो से नि डऽरद्‍यां। अर तुमरि या हिम्मत ही ऊं लोगु खुणि विणास को चिन्‍न होलि, अर तुम खुणि इन होलु कि तुमतै परमेस्वर का द्‍वारा बचयै जालु।</verse>
				<verse number="29">अर यीशु मसीह की वजै से ही तुमतै इन हिम्मत मिली कि तुम ना केवल बिस्वास करण मा, बल्किन दुख झिलण का बगत मा भि अपणी हिम्मत बणै के रखी सैका।</verse>
				<verse number="30">किलैकि तुम लोग भि ठिक उन्‍नि परेसानियों तैं झिलणा छाँ, जन तुमुन मितैं झिलद देखि अर मि ऊंतैं अभि भि झिलणु छौं।</verse>
			</chapter>
			<chapter number="2">
				<verse number="1">हे मेरा भै-बैंणो, मि जणदु छौं कि तुम यीशु मसीह पर बिस्वास करद्‍यां, अर वेका द्‍वारा तुमतै प्यार, हौसला अर दिलासा मिलदी। अर वेन तुमरा मनों तैं पवित्र आत्मा का द्‍वारा एक कैरियाली, अर वेन ही तुम पर अपणी किरपा अर दया दिखै।</verse>
				<verse number="2">इलै मि भि इन चान्दु कि तुम एक-दुसरा से और भि जादा प्यार करा। अर एक मन ह्‍वेके रा, अर इन सोच रखा कि तुम सभ्या का सभि एक जन ही छाँ, अर अगर जु तुम इन करिल्या त यां से मितैं बड़ु आनन्द मिललु।</verse>
				<verse number="3">अर याद रखा, कि यू सब तुम अपणा फैदा अर झूठ्‍ठी बडै खुणि नि कैरा, मगर नमर बणि के एक-दुसरा तैं अफ से जादा खूब समझा।</verse>
				<verse number="4">अर तुम मा बटि कुई भि अपणी ही भलै खुणि ना, बल्किन मा दुसरो की भलै का बारा मा भि सोचा।</verse>
				<verse number="5">हे मेरा दगड़्यों, जन मसीह यीशु को सभौ छौ, ठिक उन्‍नि तुमरो भि हो।</verse>
				<verse number="6">किलैकि परमेस्वर का बराबर होण पर भि वेन वे पद की धौंस नि जमै,</verse>
				<verse number="7">बल्किन मा सब कुछ छोड़ि के एक मनखि बणि गै, इख तक की एक गुलाम का बराबर ह्‍वे गै।</verse>
				<verse number="8">अर वु मनखि का रुप मा हमरा बीच मा रै अर वेन खुद तैं नमर बणै दिनी, अर वु इथगा आज्ञा को पालन करण वळु छौ, कि वेन क्रूस की मौत तैं भि स्वीकार कैर दिनी।</verse>
				<verse number="9">इलै परमेस्वर न वेतैं सबसे ऊँचो पद दिनी, अर वेतैं वु नौ दिनी जु सब न्वौं मा सबसे महान च।</verse>
				<verse number="10">ताकि जथगा भि लोग ईं धरती पर छिन या जु लोग अधलोक मा छिन, या जु स्वर्ग मा छिन वु सब लोग यीशु का नौ से घुंडा टेका।</verse>
				<verse number="11">अर पिता परमेस्वर की बडै करणु खुणि हरेक जीब स्वीकार कैरो, कि यीशु मसीह ही प्रभु च।</verse>
				<verse number="12">इलै हे मेरा प्यारा भै-बैंणो, मि जणदु छौं कि जब मि तुमरा दगड़ा छौ त तुम हमेसा से आज्ञा को पालन करदी औणा छाँ। अर अब जब मि तुम से दूर छौं, इलै अब या बात और भि जादा ध्यान रखण वळी ह्‍वे जान्दी कि तुम ऊं सब बातों को पालन और भि जादा कैरा, जु कि बिस्वासी लोगु खुणि सही छिन जैतैं पिता परमेस्वर न बचैयालि।</verse>
				<verse number="13">किलैकि परमेस्वर ही च जु कि अपणी मनसा का मुताबिक तुमरा जीवनों मा काम कनु च, अर उ ही च जु की इन इच्छा पैदा करदु कि तुम वेका मुताबिक चलि सैका।</verse>
				<verse number="14">अर जथगा भि काम तुम कना छाँ वु सब बिना सिकैत कियां, अर बिना वाद-विवाद कियां कैरा,</verse>
				<verse number="15">ताकि तुम हर बात मा निरदोष अर पवित्र बणि सैका, अर परमेस्वर की एक सच्‍चि औलाद का जन ह्‍वे जा, किलैकि तुम भ्रष्‍ट अर पापि लोगु का बीच मा रौन्द्‍यां, इलै तुमरो जीवन ऊंका बीच मा चमकणु रौ जन कि आसमान मा गैंणा चमकदिन।</verse>
				<verse number="16">अर जीवन का वचन तैं अपणा जीवनों मा मजबूती से बणै के रखा, ताकि यीशु मसीह का वापस औण का दिन पर ईं बात पर मि बड़ु मोन कैरी सैकु। अर वे दिन मि समझि जौलु कि मेरी भाग-दौड़ अर मेरा द्‍वारा करीं मेनत बेकार नि गै।</verse>
				<verse number="17">अर प्रभु मा तुमरा बिस्वास अर तुमरा द्‍वारा किये जाण वळी सेवा, परमेस्वर खुणि अरपण मा चड़ईं भेंट का जन च, अर अगर जु मितैं अपणु बलिदान या अपणु खून एक खास तेल की तरौं चड़ौण पोड़लु, त तभि भि मि खुश छौं अर मि ईं खुशी को साझा तुमरा दगड़ा मा भि करदु।</verse>
				<verse number="18">मि तुम बटि बिन्ती करदु, कि तुम भि इन्‍नि खुशी मणा, अर मेरा आनन्द मा सामिल ह्‍वे जा।</verse>
				<verse number="19">हे मेरा भै-बैंणो मितैं प्रभु यीशु मसीह पर आस च कि मि भौत जल्द तीमुथियुस भै तैं तुमरा पास भेजलु, ताकि तुमरा बारा मा समाचार सुणी के मेरु हौसला और भि जादा बढ़ो।</verse>
				<verse number="20">किलैकि मेरा पास तीमुथियुस का जन और कुई भि मनखि नि च जु कि सच्‍चा दिल से तुमरा बारा मा चिन्ता-फिकर करदु हो।</verse>
				<verse number="21">किलैकि सब लोग अपणा ही फैदा की खोज मा लग्यां छिन, ना कि ईं बात की खोज मा की यीशु मसीह क्या चान्दु।</verse>
				<verse number="22">मगर तीमुथियुस कथगा काबिल च ईं बात का बारा मा तुम भौत अच्छे जणद्‍यां, कि वेन परमेस्वर का शुभ समाचार तैं फैलाण मा ठिक उन्‍नि मदद कैरी जन एक नौनु अपणा पिता की मदद करदु।</verse>
				<verse number="23">इलै मितैं इन उम्मीद च कि जन्‍नि मितैं पता चललु कि मेरा दगड़ा मा क्या जि होण वळु च, तन्‍नि मि तीमुथियुस भै तैं तुमरा पास भेज द्‍यूलु।</verse>
				<verse number="24">अर मितैं प्रभु पर पूरु बिस्वास च, कि मि भौत जल्द तुमरा पास आलु।</verse>
				<verse number="25">पर फिर भि मितैं यू जरुरी लगदु कि मि तुमरा पास इपफ्रुदीतुस भै तैं वापस भेजूँ, अर उ मसीह मा मेरु एक भै का जन अर सेवा का काम मा मेरा दगड़ा मा एक सिपै का जन काम करण वळु च। अर तुम लोगु न मेरी जरुरतों तैं पूरु करणु खुणि अपणा खास आदिम का रुप मा वेतैं मेरा पास भेजि छौ, ताकि उ मेरी मदद कैरी सैको।</verse>
				<verse number="26">अर तुमुन इपफ्रुदीतुस भै का बारा मा सुणी कि वु भौत बिमारि च। हाँ, या बात सच्‍चि च कि उ भौत बिमार ह्‍वे गै छौ, इख तक कि उ मुरण वळु छौ, मगर पिता परमेस्वर न वे पर दया कैरी, बस वे पर ही ना बल्किन मा मि पर भि ताकि मितैं और भि जादा दुख नि झिलण पोड़ो। अर अब इपफ्रुदीतुस भै तुम से मिलणु खुणि भौत बेचेन च अर तरसणु च।</verse>
				<verse number="27"></verse>
				<verse number="28">अर मि वेतैं तुमरा पास जल्दी भेजण कि कोसिस इलै कनु छौं, ताकि तुम वेसे मिली के आनन्द मणै सैका, अर मेरी चिन्ता-फिकर भि कम ह्‍वे जौ।</verse>
				<verse number="29">इलै प्रभु यीशु का प्यार का मुताबिक तुम वेको स्वागत बड़ी खुशी से कर्यां, अर इन्द्रया लोगु को स्वागत बड़ा सम्मान से करण चयेणु।</verse>
				<verse number="30">किलैकि यीशु मसीह का काम का खातिर वेन अपणी जान की भि बाजी लगै दिनी इख तक की उ मुरण वळु छौ। अर इपफ्रुदीतुस भै न मि खुणि सेवा को उ काम भि पूरु कैरी जैतैं तुम लोग दूर रै के नि कैरी सकद्‍यां।</verse>
			</chapter>
			<chapter number="3">
				<verse number="1">इलै हे मेरा भै-बैंणो, प्रभु मा आनन्दित रा। मितैं ऊं बातों तैं दुबरा लिखण मा कुई परेसानी नि होन्दी, किलैकि यों सब बातों से तुमरि ही हिफाजत होन्दी।</verse>
				<verse number="2">अर बुरा काम करण वळा ऊं लोगु बटि बचि के रा, जु कि खतरनाक कुकरों का जन छिन, किलैकि वु लोग इन बुल्दिन कि तुमतै खतना का रिवाज तैं पूरु करौण चयेणु।</verse>
				<verse number="3">अर सच्‍चि बात त या च कि आत्मिक रुप से जौं लोगु न खतना का रिवाज तैं पूरु कैरी, वु तुम ही छाँ। अर हम परमेस्वर की भक्‍ति तैं पवित्र आत्मा का द्‍वारा करद्‍यां, अर हम अपणा सरिलों पर कुई भरोसा नि करद्‍यां, बल्किन मा अपणा प्रभु यीशु मसीह तैं देखि के हमरु मोन त और भि जादा बड़ु होन्दु।</verse>
				<verse number="4">पर मि त अपणा सरील पर भि भरोसा रखी सकदु। अर मि त इन्द्रया लोगु से जादा भरोसा रखी सकदु, जु कि अपणा खतना करौण की बात पर बड़ु मोन करदिन।</verse>
				<verse number="5">हे मेरा दगड़्यों, मि इस्राएल देस को छौं। अर मेरु जनम इस्राएल का बिन्यामीन गोत्र मा ह्‍वे, अर मेरा जनम का ठिक आठवां दिन पर मेरु खतना ह्‍वे। इब्रानी भाषा बोन्‍न वळा लोगु खुणि मि इब्रानी छौं, अर नियम-कानूनों का हिसाब से दिखै जौ त मि एक फरीसी मनखि छौं।</verse>
				<verse number="6">अर जख तक जोस की बात की जौ, त मि बिस्वासी समुदाय का लोगु तैं सतौणु वळु छौ। अर मूसा का द्‍वारा दियां नियम-कानूनों की बात किये जौ त मि निरदोष छौ, किलैकि मि नियम-कानूनों को पूरु पालन भौत अच्छे करण वळु मनखि छौ।</verse>
				<verse number="7">पर फिर भि यू सब बात जु कि मेरा फैदे की छै, यों सब बातों तैं अब मि यीशु मसीह की वजै से खुद खुणि नुकसान की समझदु।</verse>
				<verse number="8">अर इथगा ही ना बल्किन मा मि त प्रभु यीशु तैं पछ्याणदु छौं, अर या बात ही मि खुणि सबसे जादा फैदा की च, अर वेतैं पछ्यणन को जु ज्ञान मितैं मिली वेकी वजै से मि यों सब बातों तैं कूड़ा समझदु, अर इन मि इलै समझदु ताकि मि यीशु मसीह तैं पै सैकु अर वेका दगड़ा मा एक ह्‍वे जौ।</verse>
				<verse number="9">अर अब मिन नियम-कानून को पालन कैरिके पिता परमेस्वर की नजर मा धरमी साबित होण बन्द कैरियाली। अर इन मिन इलै कैरी, किलैकि अब मि यीशु मसीह पर बिस्वास करदु, इलै परमेस्वर न मितैं अपणी नजर मा धरमी साबित कैरियाली। अर वेकी नजर मा धरमी बणण यीशु मसीह पर बिस्वास करण का द्‍वारा होन्दु।</verse>
				<verse number="10">अर मि बस इथगा ही चान्दु छौं, कि मि यीशु मसीह तैं अर वेका मुरदो मा बटि ज्यून्द होण की ताकत तैं जाणि सैकु। अर जु दुख अर मौत वेन सै वेमा मि भि भागी ह्‍वे सैकु,</verse>
				<verse number="11">ताकि मि भि कनि ना कनकै मुरदो मा बटि ज्यून्द होण को भागी ह्‍वे जौं।</verse>
				<verse number="12">हे मेरा भै-बैंणो, मि ईं बात को दावा नि करदु, कि मि यों बातों मा सफल ह्‍वे ग्यों, या फिर पैलि बटि ही सिद्ध छौं मगर मि त बस वे इनाम तैं पाणु खुणि मेनत कनु छौं, ज्यां खुणि यीशु मसीह न मितैं पैलि बटि ही चुण्यूं च।</verse>
				<verse number="13">अर मि इन दावा नि करदु कि मि सिद्ध ह्‍वे ग्यों, मगर मि एक बात पर खास ध्यान देन्दु कि जु बात ह्‍वे गैनी ऊंतैं भूली जौं, अर जु नई बात छिन ऊं सब बातों मा अगनै बढदी जौ।</verse>
				<verse number="14">अर मि अपणा मकसद की तरफा अटगंणु छौं, ताकि मि स्वर्ग मा वे इनाम तैं पै सैकु, ज्यां खुणि परमेस्वर न मितैं यीशु मसीह का द्‍वारा बुलयूं च।</verse>
				<verse number="15">इलै हम मा बटि जथगा भि लोग समझदार छिन, ऊंतैं एक जन सोच-विचार रखण चयेणा, अर अगर जु ऊंका सोच-विचार मेल नि खाणा छिन, त पिता परमेस्वर वीं बात तैं तुम पर परगट कैरी दयालु।</verse>
				<verse number="16">इलै आज हम जख तक पौंछी ग्यां, वेका मुताबिक अगनै भि चलण रौला।</verse>
				<verse number="17">हे मेरा भै-बैंणो, मि इन चान्दु कि तुमरो चाल-चलन मि जन ह्‍वे जौ, किलैकि मि तुम खुणि एक नमूना बणि ग्यों। अर जौं लोगु को चाल-चलन मि जन च, तुम ऊं लोगु पर भि ध्यान द्‍या।</verse>
				<verse number="18">किलैकि भौत सा लोगु को चाल-चलन इन्द्रयो च, जौं का बारा मा मिन अकसर तुमतै बतै, अर अब भि मि रुवे-रुवे के तुमतै बतौणु छौं, कि इन्द्रया लोग अपणा चाल-चलन का द्‍वारा इन साबित कैरी देन्दिन कि जु बलिदान यीशु मसीह न क्रूस पर देई वु वेका दुसमन छिन।</verse>
				<verse number="19">अर ऊंका हिसाब-किताब मा अब विणास ही लिख्यूं च, अर ऊं खुणि सरील की इच्छा ही ऊंको ईश्‍वर ह्‍वे गै, अर जौं बातों पर सरम औण चयेणी ऊं बातों पर वु बड़ु गर्व करदिन, अर दुनियां की बातों पर अपणु मन लगौन्दिन।</verse>
				<verse number="20">मगर हम त स्वर्ग का नागरिक छां, जख बटि हम लोगु तैं छुटकारा देण वळा प्रभु यीशु मसीह को वापिस औण को इंतजार बड़ी खुशी से कना छां।</verse>
				<verse number="21">अर वेका पास सब कुछ अपणा वश मा करण की ताकत च, अर वांको इस्तेमाल कैरिके उ हमरा नास होण वळा सरील तैं कभि नास नि होण वळा सरील मा बदलि द्‍यालु।</verse>
			</chapter>
			<chapter number="4">
				<verse number="1">हे मेरा प्यारा भै-बैंणो, मेरु मन तुम लोगु से मिलण को भौत करदु, किलैकि मि तुम से भौत प्यार करदु। अर मि तुम से बिन्ती करदु कि तुम प्रभु का पिछनै इन्‍नि चलणा रा अर यां मा ही मेरी खुशी च, किलैकि तुम लोग मि खुणि एक मुकुट का रुप मा इनाम छाँ।</verse>
				<verse number="2">अर मि यूओदिया अर सुन्तुखे दुई बैंणो बटि इन बिन्ती करदु कि तुम दुई प्रभु मा एक जन सोच-विचार बणै के रखा।</verse>
				<verse number="3">हे मेरा सच्‍चा दगड़्या, मि त्वेसे बिन्ती करदु कि तू ऊं दुई बैंणो की मदद कैर, किलैकि ऊं दुईयों न शुभ समाचार तैं फैलाण मा मेरी पूरि मदद कैरी। अर ऊंन क्लेमेंस अर मेरा दगड़ा मा काम करण वळा दुसरा भैयों का दगड़ा भि बड़ी मेनत कैरी, जौं का नौ जीवन की किताब मा लिख्यां छिन।</verse>
				<verse number="4">हे मेरा दगड़्यों, प्रभु मा हमेसा आनन्दित रा, अर मि फिर से बोन्‍नु छौं कि आनन्दित रा।</verse>
				<verse number="5">अर तुमरा सभौ से लोगु तैं इन पता चलण चयेणु कि तुम कथगा शान्त सभौ का छाँ। प्रभु को औण नजदीक ही च।</verse>
				<verse number="6">अर कै भि बात की चिन्ता-फिकर नि कैरा, बल्किन मा हरेक बात मा प्रार्थना कैरा। अर पिता परमेस्वर से बिन्ती कैरिके मांगा की तुमतै क्या चयेणु, अर हरेक बात मा परमेस्वर को धन्यवाद देणा रा।</verse>
				<verse number="7">तब परमेस्वर की तरफा बटि मिलण वळी शान्ति ज्वा कि मनखियों की समझ से भैर च, यीशु मसीह का द्‍वारा तुमरा मन अर विचारों की हिफाजत करली।</verse>
				<verse number="8">इलै हे मेरा भै-बैंणो, कुछ और बात भि छिन जु की सच्‍चि अर सोच-विचार करण का लैख छिन, अर यू वु बात छिन जु कि साफ अर पवित्र छिन अर यों बातों बटि प्यार किये जान्दु, अर यू खुश कैर देण वळी छिन, अर यों मा हरेक किसम का गुण पये जनदिन, अर यों बातों की तारीफ किये जान्दी, अर यू वु बात छिन जौं पर लगातार तुमतै अपणु ध्यान लगौण चयेणु।</verse>
				<verse number="9">अर जु बात तुमुन मि बटि सिखी के स्वीकार करिनी, अर जु बात तुमुन मि बटि सुणिनी या मि मा दिखिनी, ऊं ही बातों को पालन कना रा, तब शान्ति देण वळु परमेस्वर तुमरा दगड़ा मा रालु।</verse>
				<verse number="10">हे मेरा भै-बैंणो मि प्रभु मा भौत खुश छौं, कि इथगा दिनों का बाद अब तुमतै मेरु ध्यान ऐ। मितैं पता च कि तुमतै मेरु ध्यान ऐ त होलु, मगर तुमतै बगत नि मिली।</verse>
				<verse number="11">अर या बात मि इलै नि बोन्‍नु छौं कि मितैं कैं चीज की जरुरत च, पर यू त मि इलै बोन्‍नु छौं किलैकि मिन हर हालत मा सन्तुष्‍ट होण सिख्यालि।</verse>
				<verse number="12">मि गरीबी की हालत मा गुजर-बसर करण, अर भरपूरी मा भि जीवन जीण जणदु छौं। अर मिन हरेक बात अर हरेक दसा मा रौण भि सिख्यालि, अर जब पुटगी भुरीं रौन्दी या जब भूक लगि रौन्दी तब कन लगदु यू भि मि जाणि ग्यों। अर जब सब कुछ होन्दु या कुछ नि रौन्दु, त यां का बारा मा भि मि भौत अच्छे से जणदु छौं।</verse>
				<verse number="13">किलैकि जु मितैं ताकत देन्दु वेका द्‍वारा मि सब कुछ कैरी सकदु छौं।</verse>
				<verse number="14">मगर फिर भि तुम लोगु न बुरा बगत मा मेरु साथ देके अच्छु काम कैरी।</verse>
				<verse number="15">हे फिलिप्पी नगर का बिस्वासी लोगु, तुम त जणदा ही छाँ, कि शुभ समाचार तैं शुरु करण का ऊं दिनों मा जब मि मकिदुनिया मुलक बटि निकळि छौ, त लेण-देण का काम मा तुमरा बिस्वासी समुदाय का अलावा कैन भि मेरी मदद नि कैरी।</verse>
				<verse number="16">अर मितैं याद च जब मि थिस्सलुनीकी नगर मा छौ, त तुमुन मेरी जरुरत का बगत मा कई बार मेरी मदद कैरी।</verse>
				<verse number="17">अर मेरु मकसद इन नि छौ कि मि सेवा का काम मा तुम बटि मदद ल्यूं, मगर मि त सिरफ इथगा ही चान्दु कि येका बदला मा तुमरा जीवनों मा परमेस्वर तुमतै इनाम द्‍यो।</verse>
				<verse number="18">अर भै इपफ्रुदीतुस का हाथों जौं चीजों तैं तुमुन मि खुणि भेजि, ऊंतैं पैके मि भौत खुश छौं, यू उपहार परमेस्वर तैं पसन्द औण वळा बलिदान का जन छिन ज्यां से की उ भौत खुश होन्दु। हालांकि, मेरा पास सब कुछ च अर मि भरपूर छौं।</verse>
				<verse number="19">मि इन प्रार्थना करदु, कि पिता परमेस्वर तुमरि हरेक जरुरत तैं यीशु मसीह की बेशुमार दौलत मा बटि पूरु कैरो।</verse>
				<verse number="20">हमरा पिता परमेस्वर की बडै सदनि तक होणी रौ। आमीन।</verse>
				<verse number="21">हरेक पवित्र बिस्वासी भै-बैंण तैं जु की यीशु मसीह का छिन, ऊं सभ्यों कू मेरु सलाम बोला। अर मेरा दगड़्यों की तरफा बटि भि तुमतै सलाम।</verse>
				<verse number="22">सभि पवित्र लोगु तैं, अर खास कैरिके महाराजा का घौर का सब लोग भि तुम कू सलाम बुल्दिन</verse>
				<verse number="23">तुम सभ्यों की आत्मा पर प्रभु यीशु मसीह की किरपा बणि रौ। आमीन।</verse>
			</chapter>
		</book>
		<book number="51">
			<chapter number="1">
				<verse number="1">हे मेरा भै-बैंणो मि पौलुस छौं, अर मि पिता परमेस्वर की मनसा से यीशु मसीह की सेवा खुणि खास चेला का रुप मा चुणै ग्यों। अर मि या चिठ्‍ठी तीमुथियुस भै का दगड़ा मा,</verse>
				<verse number="2">कुलुसी नगर मा रौण वळा यीशु मसीह का भक्‍त अर बिस्वासयोग्य लोगु खुणि लिखणु छौं। मि इन प्रार्थना करदु, कि हमरा पिता परमेस्वर की तरफा बटि तुम सभ्यों तैं वेकी किरपा अर शान्ति मिलदी रौ।</verse>
				<verse number="3">हे मेरा भै-बैंणो, जब हम तुम लोगु खुणि प्रार्थना करद्‍यां, त यीशु मसीह का पिता परमेस्वर को धन्यवाद हमेसा देन्द्‍यां,</verse>
				<verse number="4">किलैकि हमुन तुमरा वे बिस्वास का बारा मा सुणी जु कि तुम प्रभु यीशु मसीह पर करद्‍यां, अर वे प्यार का बारा मा भि सुणी जु कि तुम बिस्वासी लोगु से करद्‍यां।</verse>
				<verse number="5">अर यू सब हम इलै करद्‍यां, किलैकि तुमुन वीं आस का बारा मा सुणी ज्वा की तुमतै एक नई उम्मीद देन्दी, अर वा ही आस तुम खुणि स्वर्ग मा रखी च। अर ईं आस का बारा मा तुमुन बिस्वास करण का बगत मा वे सच्‍चा शुभ समाचार का द्‍वारा सुण्यालि।</verse>
				<verse number="6">अर अब यू ही शुभ समाचार पूरि दुनियां मा खूब फैलणु च, अर यू ठिक उन्‍नि फैलणु च जन कि यू पैलि बार तुमरा बीच मा फैली छौ। हाँ, ठिक उन्‍नि जब तुमुन सच्‍चै से पिता परमेस्वर की किरपा का बारा मा सुणी, अर वेका बारा मा समझि भि छौ।</verse>
				<verse number="7">अर ये शुभ समाचार की शिक्षा तुम लोगु न हमरा प्यार भै इपफ्रास बटि पै, जु कि हम खुणि यीशु मसीह को एक भरोसामन्द सेवक च।</verse>
				<verse number="8">अर वेन ही हमतै इन बतै कि पवित्र आत्मा न तुमरा मनों मा एक-दुसरा खुणि कथगा प्यार पैदा कैरी।</verse>
				<verse number="9">इलै हे मेरा भै-बैंणो, जब बटि हमुन तुमरा बारा मा सुणी, त हम भि तुम लोगु खुणि प्रार्थना कना रौन्द्‍यां। अर हम इन प्रार्थना करद्‍यां, कि तुम लोग पूरा आत्मिक तरीके से परमेस्वर का ज्ञान मा अर वेकी मनसा तैं बिंगण मा भरपूर होन्दी जा।</verse>
				<verse number="10">ताकि तुमरो चाल-चलन हरेक बात मा प्रभु तैं खुश करण वळु हो। अर हरेक किसम का भलै का काम अच्छा फलों की तरौं छिन, इलै तुम ऊंतैं अपणा जीवनों मा लेके आ, अर परमेस्वर का ज्ञान मा और भि जादा बढदी जा।</verse>
				<verse number="11">अर तुम पिता परमेस्वर की महान ताकत से अपणा आत्मिक जीवन मा और भि जादा मजबूत होन्दी जा, ताकि मुसीबत का बगत पर खुशी से अर हर बात मा सबर रखी के तुम सब मुसीबतों तैं सै सैका।</verse>
				<verse number="12">अर पिता परमेस्वर को धन्यवाद कना रा, किलैकि वेन तुमतै उज्याळा का राज मा अपणा पवित्र लोगु का दगड़ा मा रौण अर वारिस होण का लैख बणै।</verse>
				<verse number="13">अर वेन ही हमतै अन्धेरा का अधिकार से छुड़ै, अर अपणा प्यारा पुत्र यीशु मसीह का राज मा दाखिल करै,</verse>
				<verse number="14">अर यीशु मसीह का द्‍वारा ही हमतै छुटकारु, अर पापों से माफी मिलदी।</verse>
				<verse number="15">हे मेरा भै-बैंणो, कभि नि दिख्यौण वळा परमेस्वर को एक साक्षात रुप यीशु च, अर हरेक चीज का बणयै जाण मा भि सबसे पैलु यीशु ही च।</verse>
				<verse number="16">किलैकि वेका द्‍वारा ही सब चीजों तैं बणयै गै, याने कि स्वर्ग अर ईं धरती की सब चीज, दिखैण वळी अर नि दिखैण वळी चीज, राजगद्‍दी अर साम्राज्य, सासक अर अधिकारी, सब कुछ वेका ही द्‍वारा बणयै गै अर वे खुणि ही बणयै गै।</verse>
				<verse number="17">अर यीशु ही सब चीजों मा सबसे पैलु च, अर सब चीज वे पर ही टिकी छिन।</verse>
				<verse number="18">अर जन सरील खुणि मुण्ड़ होन्दु, ठिक उन्‍नि बिस्वासी समुदाय को मुखिया यीशु मसीह च। अर वु ही शुरुवात च अर वु ही सबसे पैलि मुरदो मा बटि ज्यून्दु किये गै, ताकि वु ही सब चीजों मा सबसे पैलु हो।</verse>
				<verse number="19">किलैकि पिता परमेस्वर तैं यू ही अच्छु लगि, कि वेकी पूरि भरपूरी यीशु मसीह मा ही हो।</verse>
				<verse number="20">अर वेको जु ल्वे क्रूस पर बुगये गै, वेका द्‍वारा ही परमेस्वर न स्वर्ग अर धरती की सब चीजों को मेल-जोल अपणा दगड़ा मा फिर से कैरी। अर इन कैरिके उ ईं धरती पर शान्ति तैं लेके ऐ।</verse>
				<verse number="21">अर एक बगत वु छौ, जब तुम अपणा बुरा कामों की वजै से पिता परमेस्वर बटि दूर छा, अर तुमरा मनों मा वेका खिलाप बुरै भुरीं छै।</verse>
				<verse number="22">मगर यीशु मसीह न अपणा सरील मा जिं मौत तैं सै, वेका द्‍वारा पिता परमेस्वर न तुमरो मेल-जोल अफ दगड़ा मा कैरियाली। अर अब वु तुमतै अपणा समणि पवित्र अर बेदाग, अर बिना गळती को खड़ु होयुं दिखण चाणु च।</verse>
				<verse number="23">अर यू सब तभि ह्‍वे सकदु, जब तुम बिस्वास मा बणयां रा अर वेकी बुनियाद मा मजबूत ह्‍वेके टिक्यां रा, अर जु शुभ समाचार तुमुन सुणी वां से मिलण वळी आस तैं नि छोड़ा। अर ये ही शुभ समाचार को परचार हर जगा किये जाणु च, अर मि पौलुस ये काम को सेवक छौं।</verse>
				<verse number="24">हे मेरा भै-बैंणो, जु दुख-तकलीफ मि तुमरा खातिर सौंणु छौं, ऊं सब बातों का खातिर मितैं बड़ी खुशी होन्दी। अर हम जणदा छा कि बिस्वासी समुदाय का लोगु खुणि जु दुख-तकलीफ यीशु मसीह न झेली, वेतैं अब पूरु करणु खुणि मि भि ठिक उन्‍नि दुख-तकलीफ झिलणु छौ।</verse>
				<verse number="25">अर परमेस्वर न तुमरि भलै खुणि ज्वा जबाबदारी मि मा सौंपी च, वेका मुताबिक ही मि एक सेवक का रुप मा ठैरैये ग्यों, ताकि मि परमेस्वर का रैबार को पूरि तरौं से परचार कैरी सैकु।</verse>
				<verse number="26">अर यू उ राज छौ जु कि युग-युग अर पीढ़ी-पीढ़ी बटि छिप्यूं छौ, मगर अब वे राज तैं परमेस्वर न अपणा पवित्र लोगु पर परगट कैरियाली।</verse>
				<verse number="27">अर पिता परमेस्वर जौं लोगु तैं इन बतौण चाणु छौ, कि वु सच्‍चु राज कथगा महान च, वेन उ राज अपणा लोगु पर परगट कैरी। अर उ राज सब लोगु खुणि च जु कि इन च कि, पिता परमेस्वर अपणा पुत्र यीशु मसीह की पवित्र आत्मा का द्‍वारा हमरा भितर रौन्दु। अर परमेस्वर का दगड़ा मा रौणु खुणि यीशु मसीह ही हमरि एकमात्र आस च।</verse>
				<verse number="28">अर वे ही मसीह को परचार हम लोग करद्‍यां अर लोगु तैं चितै देन्द्‍यां, अर हरेक मनखि तैं अपणा पूरा ज्ञान से सिखौन्द्‍यां, ताकि हरेक मनखि तैं एकदम सिद्ध बणै के पिता परमेस्वर का समणि खड़ु कैरी सैका।</verse>
				<verse number="29">अर इलै ही मि येतैं पूरु करणु खुणि कड़ी मेनत करदु, अर बड़ी जनतौ-जहैत करदु अर यू मि यीशु मसीह की दिईं सामर्थ का द्‍वारा करदु, ज्वा कि मेरा भितर काम कनि च।</verse>
			</chapter>
			<chapter number="2">
				<verse number="1">हे मेरा बिस्वासी भै-बैंणो, तुम जु कुलुसी अर लौदीकिया नगर मा रौण वळा छाँ, तुमुन अर ठिक उन्‍नि जौं लोगु न मितैं कभि नि देखि, मि चान्दु छौं कि तुम यू जणिल्या, कि मि तुमरा खातिर कथगा कड़ी मेनत करदु।</verse>
				<verse number="2">अर या मेनत मि इलै करदु, ताकि तुम सभ्या का सभि एक-दुसरे कि हिम्मत बढै सैका, अर अपणा आपस मा बड़ा प्यार से मिली-जुली के रा। अर पिता परमेस्वर का ज्ञान का खजाना तैं तुम जाणि सैका ज्यां से की सच्‍चै की समझ मिलदी, अर तुम परमेस्वर का वे राज तैं भि पछ्याणी सैका, जु की यीशु मसीह का द्‍वारा परगट ह्‍वे।</verse>
				<verse number="3">किलैकि वेमा ही अकल अर ज्ञान का सब खजाना छिप्यां छिन।</verse>
				<verse number="4">अर या बात मि इलै बोन्‍नु छौं, ताकि कुई भि मनखि अपणी मिठी-मिठी बात से तुमतै भटके नि द्‍यो।</verse>
				<verse number="5">अर भले ही मि अभि तुम से दूर छौं, पर मेरु मन तुम पर ही लग्यूं च। अर तुमरा जीवन को अच्छु रंग-ढंग अर मसीह पर तुमरा मजबूत बिस्वास तैं देखि के मि भौत खुश छौं।</verse>
				<verse number="6">हे मेरा भै-बैंणो, तुमुन यीशु मसीह तैं प्रभु का रुप मा स्वीकार कैरियाली, इलै वेका मुताबिक ह्‍वेके भि चला।</verse>
				<verse number="7">अर एक डाळा का जन मसीह मा जड़ पकड़दी अर बढदी जा। अर जिं शिक्षा का बारा मा तुमतै सिखये गै, वेका मुताबिक बिस्वास मा मजबूत होन्दी जा। अर हरेक बात मा परमेस्वर को धन्यवाद देणा रा।</verse>
				<verse number="8">अर चौकस रा, कखि कुई अपणी बेकार की बातों अर मन से बणईं शिक्षा का द्‍वारा तुमतै धोखा देके अपणु सिकार नि बणै द्‍यो, अर या शिक्षा मनखियों की बुलिं औखाणों अर दुनियां कि पुरणि शिक्षाओं का मुताबिक च, इन्दरि शिक्षा यीशु मसीह का मुताबिक नि च।</verse>
				<verse number="9">इलै हे मेरा भै-बैंणो, यीशु मसीह का मुताबिक जीवन जीण से तुम लोग भि आत्मिक रुप से भरपूर ह्‍वे ग्यां। हाँ, जु कि सब किसम की ताकत अर अधिकारो को मुखिया च, किलैकि पिता परमेस्वर की पूरि भरपूरी यीशु मसीह मा ही च।</verse>
				<verse number="10"></verse>
				<verse number="11">अर तुमरा सरील मा खतना को रिवाज तैं यीशु मसीह का द्‍वारा पूरु किये गै, जु कि हाथोंळ नि ह्‍वे, बल्किन मा पवित्र आत्मा का द्‍वारा ह्‍वे। अर यू इन्द्रयो खतना च जु कि यीशु मसीह का द्‍वारा ही किये जान्दु, अर मनखि का सरील बटि पाप का सभौ तैं भैर निकळे जान्दु।</verse>
				<verse number="12">अर जब तुमुन बपतिस्मा ले, त तुमुन अपणा पापि सभौ तैं यीशु मसीह का दगड़ा मा दफनै दिनी। अर तुमतै पिता परमेस्वर की ताकत पर बिस्वास च जैन यीशु मसीह तैं मुरदो मा बटि ज्यून्दु कैरी, ठिक उन्‍नि वेन तुमतै भि वेका दगड़ा-दगड़ि नयू जीवन देके ज्यून्दु कैरी।</verse>
				<verse number="13">अर तुम त अपणा-अपणा पापों की वजै से मुरयां लोगु का जन छा, अर तुमुन खतना का रिवाज तैं पूरु नि कैरी, मगर फिर भि पिता परमेस्वर न तुमतै यीशु मसीह का दगड़ा मा नयू जनम देई, अर तुमरा सब पापों तैं माफ कैरी।</verse>
				<verse number="14">अर जु लेख नियम का मुताबिक हमरा खिलाप मा लिख्यां छा, ऊंतैं यीशु न रद्‍द कैरी दिनी अर क्रूस पर किलों का द्‍वारा छिदै के वेन हम पर लग्यां इळजामो तैं हटै दिनी।</verse>
				<verse number="15">अर यीशु मसीह न सासन करण वळी, अर अधिकार रखण वळी सब बुरी ताकतों पर क्रूस का द्‍वारा जीत हासिल कैरिके ऊंको खुलाआम तमसो बणै दिनी।</verse>
				<verse number="16">इलै हे मेरा भै-बैंणो, कुई तुमरा खाणुक खाण-पीण का मामला मा तुमरो न्याय नि कैरो, अर ना ही कुई इन नियम निकाळो कि बार-त्योवार पर, या नया चाँद का दिन पर, या सब्त का दिन पर क्या-क्या कन चयेणु अर क्या नि करण चयेणु।</verse>
				<verse number="17">अर यू सब नियम त केवल औण वळा बगत खुणि केवल छैल का जन च, मगर सच्‍चै यीशु मसीह ही च।</verse>
				<verse number="18">मेरा दगड़्यों, चौकस रा, कखि कुई मनखि अपणी झूठ्‍ठी शिक्षा का द्‍वारा तुमतै पिता परमेस्वर से मिलण वळा इनाम से बेदखल नि कैरी द्‍यो, किलैकि झूठ्‍ठु मनखि लोगु तैं दिखौणु खुणि दीन बणदु अर स्वर्गदूतों की पूजा करण की बात सिखौन्दु, अर उ इन जोर देन्दु कि तुम भि ठिक इन्‍नि कैरा। अर इन्द्रया झूठ्‍ठा लोग बुलला कि ऊंन पिता परमेस्वर से सुपन्या मा दरसन का द्‍वारा यू ज्ञान पै, इलै ऊ अपणा विचारों पर बड़ु मोन करदिन, मगर सच्‍चै त या च कि ऊंका मनों मा यू विचार परमेस्वर की तरफा बटि नि छिन।</verse>
				<verse number="19">किलैकि इन्द्रया लोग यीशु मसीह से जुड़यां नि रौनदिन, यीशु मसीह जु कि हमरु मुण्ड़ की तरौं च। अर हम जणदा छा कि हमरु सरील अर वेकी सब मांस-पेसियाँ अर सब जोड़ मुण्ड़ से ही जुड़यां रौनदिन, अर मुण्ड़ का द्‍वारा ही सब कुछ किये जान्दु। अर पिता परमेस्वर ही च जु कि पूरा सरील को विकास करदु।</verse>
				<verse number="20">हे मेरा भै-बैंणो, तुमरा पापि सभौ तैं यीशु मसीह का दगड़ा क्रूस पर मरे गै, इलै अब बुरी ताकतों को तुम पर कुई अधिकार नि च। अर मितैं इन बता कि अब तुमरो सभौ इन्द्रयो किलै होणा छाँ? अरे, तुम त इन जीवन जीण छाँ जन कि ईं दुनियां का नियम तुम खुणि ही बणयां हो,</verse>
				<verse number="21">जन कि, “अरे वेतैं नि छ्वा, वेतैं नि चखा,” अर इन भि बुल्द्‍यां कि, “वे पर हाथ नि लग्यां।”</verse>
				<verse number="22">जब कि यू सब कुछ त मनखियों का द्‍वारा दियां आदेस अर ऊंका द्‍वारा सिखईं शिक्षा छिन, अर यू त ऊं चीजों का बारा मा च जु कि इस्तेमाल करद-करद नास ह्‍वे जालि।</verse>
				<verse number="23">अर यू सब काम करण वळा लोग अकलमन्द त लगदिन, मगर वु अपणा मन का मुताबिक ही परमेस्वर कि भक्‍ति करदिन, अर यू लोग दीन होण को ढोंग करदिन, अर सन्यासी बणि के अपणा सरील पर काबू त रखदिन, मगर अपणा सरील कि इच्छा पर काबू नि रखी सकदिन।</verse>
			</chapter>
			<chapter number="3">
				<verse number="1">इलै अब जब तुमतै यीशु मसीह मा नयू जनम मिली गै, त स्वर्ग की बातों की खोज मा रा, जख मसीह पिता परमेस्वर की दैंणी तरफा बैठयूं च।</verse>
				<verse number="2">अर अपणु मन दुनियां की बातों पर ना, बल्किन मा स्वर्ग की चीजों पर लगा,</verse>
				<verse number="3">किलैकि अब तुमरो पापि सभौ खतम ह्‍वे गै। अर अब तुमरो जीवन मसीह का द्‍वारा पिता परमेस्वर मा हिफाजत से रख्युं च, अर ये जीवन तैं लोग देखि नि सकदिन।</verse>
				<verse number="4">अर यीशु मसीह जु कि तुमरो जीवन च जब उ पूरि दुनियां का समणि परगट होलु, तब तुम लोग भि वेका दगड़ा-दगड़ि परगट किये जैल्या, अर वेका आदर-सम्मान मा साझेदार ह्‍वेल्या।</verse>
				<verse number="5">इलै तुम दुनियां कि ऊं बातों खुणि अपणा पापि सभौ तैं खतम कैरी द्‍या जु कि पाप करौन्दिन, जन कि सरील का गळत सम्बन्ध रखण, अशुद्धता, हवस, बुरी इच्छा, अर लालच करण जु कि मूरत पूजा का बराबर च।</verse>
				<verse number="6">अर यों ही बातों की वजै से पिता परमेस्वर को परकोप लोगु पर पोड़दु।</verse>
				<verse number="7">अर एक बगत छौ, जब तुम इन्दरि ही बातों मा अपणु जीवन जीणा छा।</verse>
				<verse number="8">पर अब तुम यों सब बातों तैं छोड़ि द्‍या जन कि; एक-दुसरा से नाराज होण, गुस्सा करण, एक-दुसरा की बुरै करण, बेजती करण, गळी देण, इन्दरि कुई भि बात तुमरा गिच्‍चा बटि एक-दुसरा खुणि नि निकळो।</verse>
				<verse number="9">अर एक-दुसरा बटि झूठ्‍ठ नि बोला, किलैकि तुमुन मसीह खुणि अपणा पुरणा बुरा चाल-चलन तैं वेका कामों समेत उतारि के ढोळियाली,</verse>
				<verse number="10">अर तुमुन नयू जीवन जीण शुरु कैरियाली, जु कि तुमतै नयू बणौन्दि जाणु च अर यू तुमतै वेका जन बणौन्दु जै परमेस्वर न तुमतै बणै। अर यू नयू जीवन ही तुमतै पिता परमेस्वर को सच्‍चु ज्ञान देन्दु।</verse>
				<verse number="11">अर अब ये नया जीवन मा सब बिस्वासी लोग एक ही जन छिन, अब चै ऊ यहूदी जाति का छिन या वु लोग जु यहूदी जाति का नि छिन, अब चै वु जंगळि लोग छिन या कुई गवाँर, अब चै वु नौकर छिन या आजाद, कुई फर्क नि पोड़दु किलैकि सब कुछ यीशु मसीह मा च अर वे खुणि ही च।</verse>
				<verse number="12">हे मेरा भै-बैंणो, तुम पिता परमेस्वर का चुण्यां पवित्र अर प्यारा लोग छाँ, इलै अपणा-अपणा मनों मा एक-दुसरा खुणि भली मनसा रखा। अर दया करण, भलै करण, दीन अर नमर बणि के एक-दुसरे की सब बातों तैं सौण वळा भि बणा।</verse>
				<verse number="13">हाँ, तुम एक-दुसरे की सै ल्या, अर अगर तुमरा मन मा कै दुसरा मनखि का खिलाप मा कुई सिकैत हो, त एक-दुसरा तैं माफ कैरा। अर जन प्रभु न तुमतै माफ कैरी, ठिक उन्‍नि तुम भि एक-दुसरा तैं माफ कैरा।</verse>
				<verse number="14">अर यों सब बातों का दगड़ा-दगड़ि, अपणा जीवन तैं प्यार करण वळु बणै द्‍या, किलैकि मसीह प्यार ही सब लोगु तैं एक कैरिके रखदु।</verse>
				<verse number="15">अर यीशु मसीह की शान्ति तैं अपणा दिलों मा काम करण द्‍या, किलैकि ईं शान्ति खुणि ही वेन तुमतै बुलै, ताकि सभ्या का सभि एक बदन ह्‍वे जा। अर हरेक बात मा वेको धन्यवाद द्‍या।</verse>
				<verse number="16">अर यीशु मसीह का वचन तैं अपणा मन मा स्वीकार कैरा, अर वे सिद्ध ज्ञान से एक-दुसरा तैं सीखा, अर चितौणा रा। अर मन से पिता परमेस्वर की बडै खुणि धन्यवाद का भजन गा, अर वेका गुणगान खुणि आत्मिक गीत गा। अर वेतैं आदर-सम्मान देणु खुणि वेकी तारीफ कैरा।</verse>
				<verse number="17">अर जु कुछ भि तुम बोला या कैरा उ सब कुछ प्रभु यीशु मसीह का नौ से हो, अर वेका द्‍वारा ही तुम पिता परमेस्वर को धन्यवाद कना रा।</verse>
				<verse number="18">हे मेरी बैंणो, मि तुमतै समझै देन्दु कि तुम अपणा-अपणा पति का अधीन मा रा, किलैकि प्रभु तैं या ही बात ठिक लगदी।</verse>
				<verse number="19">अर ठिक उन्‍नि हे पतियों, तुम भि अपणी-अपणी घरवळी से प्यार कैरा, अर ऊंतैं धमकै के नि रखा।</verse>
				<verse number="20">बच्‍चों, हरेक बात मा अपणा-अपणा ब्वे-बाब को बुलयूं माणा, किलैकि प्रभु यीशु यों बातों से ही खुश होन्दु।</verse>
				<verse number="21">अर तुम जु ब्वे-बाब छाँ सुणा, तुम अपणा बच्‍चों तैं तंग नि कैरा, कखि इन नि हो कि ऊ अपणी हिम्मत ही ख्वे द्‍या।</verse>
				<verse number="22">हे मेरा भै-बैंणो, तुम जु नौकर छाँ तुम अपणा मालिक की सब बातों को पालन कैरा। अर यू काम तुम मनखि तैं खुश करणु खुणि ना, अर ना ही दिखावा करणु खुणि, बल्किन मा अपणा सीदा मन से पिता परमेस्वर पर अपणी पूरि सरदा रखी के ये काम तैं पूरु कैरा।</verse>
				<verse number="23">अर जु कुछ भि तुम करद्‍यां उ सब अपणा पूरा मन से कैरा, अर उ सब तुम इन समझि के कैरा जन कि तुम अपणा मालिकों खुणि ना, बल्किन मा प्रभु खुणि कना हो।</verse>
				<verse number="24">किलैकि तुमतै पता च, कि येका बदला मा प्रभु तुमतै अपणी विरासत मा से द्‍यालु जैको करार वेन कैरी। अर तुम लोग हमरा प्रभु यीशु मसीह की सेवा करद्‍यां,</verse>
				<verse number="25">इलै सुणा, जु कुई बुरै करदु उ अपणी बुरै को बदला पालु, किलैकि प्रभु कै का दगड़ा मा भि भेदभाव नि करदु।</verse>
			</chapter>
			<chapter number="4">
				<verse number="1">हे मालिकों, अपणा-अपणा नौकरों तैं ऊंको हक द्‍या, अर अपणु सभौ ऊंका दगड़ा मा ठिक रखा। अर यू सब कुछ तुम इन समझि के कैरा, कि स्वर्ग मा तुमरो भि एक मालिक च।</verse>
				<verse number="2">हे मेरा भै-बैंणो, चौकस रा, अर प्रार्थना करण मा लग्यां रा, अर हरेक बात मा प्रभु को धन्यवाद द्‍या।</verse>
				<verse number="3">अर येका दगड़ा-दगड़ि हम खुणि इन प्रार्थना कैरा, ताकि हमतै इन मौका मिलु कि हम पिता परमेस्वर का वचन तैं लोगु का बीच मा और भि जादा फैले सैका। अर हम यीशु मसीह का वे राज का बारा मा बतै सैका, जैका खातिर आज मि कैद मा छौं,</verse>
				<verse number="4">अर मि खुणि भि प्रार्थना कैरा, कि मि वचन का ये राज तैं खूब ढंगल बतै सैकु, ताकि सब लोग ढंगल समझि सैका।</verse>
				<verse number="5">अर बगत तैं अच्छु समझि के वेको पूरु इस्तेमाल कैरा। अर जु लोग प्रभु यीशु पर बिस्वास नि करदिन, ऊं लोगु का दगड़ा मा अपणु बरतौ बड़ा समझदारी से कैरा।</verse>
				<verse number="6">अर बात-चित करण मा तुमतै दीन होण चयेणु, ताकि तुमरि बात सभ्यों तैं अच्छी लगौ, अर तुमतै हरेक बात को जबाब देण भि औण चयेणु।</verse>
				<verse number="7">हे मेरा दगड़्यों, मेरा प्यारु भै तुखिकुस जु कि प्रभु की सेवा का काम मा मेरी मदद करण वळु अर भरोसामन्द मनखि च, जब उ तुमरा पास आलु, त मेरा बारा मा तुमतै सब कुछ बतै द्‍यालु।</verse>
				<verse number="8">अर मि वेतैं तुमरा पास इलै भेजणु छौं, ताकि वेका द्‍वारा तुमतै हमरि हालत का बारा मा पता चलि जौ, अर जब उ तुमरा पास पौंछी जालु त उ तुमरा दिलों की हिम्मत तैं भि बढालु।</verse>
				<verse number="9">अर वेका दगड़ा-दगड़ि मि अपणा प्यारा भै उनेसिमुस तैं भि भेजणु छौं, जु कि तुमरा इख को ही च, अर उ एक भरोसामन्द मनखि च। अर जु कुछ भि इख होणु च, ऊं बातों का बारा मा ऊ दुईया का दुई तुमतै बतै द्‍याला।</verse>
				<verse number="10">अर मेरा दगड़ा कैद होयां अरिस्तर्खुस भै कि तरफा बटि अर मरकुस भै कि तरफा बटि भि तुमतै सलाम, अर मरकुस रिश्ता मा बरनबास को भै लगदु। (अर मरकुस का बारा मा तुमतै इन बतये गै छौ, कि वेको स्वागत बड़ा अच्छे कर्यां)।</verse>
				<verse number="11">अर भै ईसु जैकू यूसतुस बुले जान्दु, तुमकु सलाम बोन्‍नु च। दगड़्यों, हमरा ये भै न खतना का रिवाज तैं पूरु कर्युं च अर यू ही च जु कि परमेस्वर का राज तैं फैलाण मा मेरु दगड़्या च अर यू बगत-बगत पर मेरी हिम्मत तैं भि बढौन्दु।</verse>
				<verse number="12">अर तुमरा इखो इपफ्रास भै भि जु कि यीशु मसीह को सेवक च, उ भि तुमकु सलाम बोन्‍नु च। अर उ मन लगै के तुम खुणि हमेसा प्रार्थना कनु रौन्दु, ताकि तुम हरेक बात मा सिद्ध ह्‍वे सैका अर यीशु मसीह पर पूरु बिस्वास कैरिके परमेस्वर की मनसा तैं पूरि कैरी सैका।</verse>
				<verse number="13">अर मि ईं बात मा इपफ्रास भै को गवा छौं, कि वु तुम खुणि अर लौदीकिया नगर अर हियरापुलिस नगर का लोगु खुणि बड़ी मेनत कनु रौन्दु।</verse>
				<verse number="14">अर हमरु प्यारु भै लूका जु कि बैद च, अर देमास भै तुमकु सलाम बोन्‍ना छिन।</verse>
				<verse number="15">अर लौदीकिया का बिस्वासी भै-बैंणो तैं हमरु सलाम बुलयां, अर हमरि बैंण नुमफास का घौर मा इकट्‍ठा होण वळी समुदाय का लोगु खुणि भि सलाम बुलयां।</verse>
				<verse number="16">अर जब तुम ईं चिठ्‍ठी तैं बिस्वासी समुदाय का लोगु का बीच मा पैढी दिल्या, त इन कर्यां कि लौदीकिया नगर की बिस्वासी समुदाय मा भि पैढी दियां, अर ज्वा चिठ्‍ठी मिन लौदीकिया नगर का लोगु खुणि लिखीं च वा तुमरा बीच मा भि पढै जौ।</verse>
				<verse number="17">अर भै अरखिप्पुस कू बुलयां, कि सेवा को जु काम प्रभु न त्वेमा सौप्युं च वेतैं तू ध्यान से कैरी।</verse>
				<verse number="18">अर मि पौलुस जु कि इख बेड़ियों मा बन्धयूं छौं खुद अपणा हाथळ तुम खुणि सलाम लिखणु छौं, तुम मितैं अपणी प्रार्थनाओं मा याद रख्यां। अर मि इन प्रार्थना करदु कि प्रभु की किरपा तुम पर होणी रौ। आमीन।</verse>
			</chapter>
		</book>
		<book number="52">
			<chapter number="1">
				<verse number="1">हे मेरा भै-बैंणो मि पौलुस छौं, अर मि सिलवानुस अर तीमुथियुस का दगड़ा मा या चिठ्‍ठी लिखणु छौं। अर या चिठ्‍ठी थिस्सलुनीकी नगर मा रौण वळा बिस्वासी समुदाय का लोगु खुणि च, जु की पिता परमेस्वर अर प्रभु यीशु मसीह का लोग छिन। अर हम प्रार्थना करद्‍यां कि, तुम सभ्यों पर परमेस्वर की किरपा अर शान्ति बणि रौ।</verse>
				<verse number="2">दगड़्यों, हम अपणी प्रार्थनाओं मा तुमतै हमेसा याद रखद्‍यां, अर तुम सभ्यों का खातिर पिता परमेस्वर को धन्यवाद हमेसा करद्‍यां।</verse>
				<verse number="3">किलैकि पिता परमेस्वर पर बिस्वास रखी के जु-जु काम तुमुन करिनी, वु सब हम अपणी प्रार्थनाओं मा याद रखद्‍यां। अर जै प्यार का दगड़ा मा तुमुन मेनत कैरी, अर सबर रखी के तुमुन प्रभु यीशु मसीह पर अपणी ज्वा आस रखी च, वु सब भि हम याद करद्‍यां।</verse>
				<verse number="4">इलै हे मेरा भै-बैंणो, हम जणदा छां कि परमेस्वर तुम बटि प्यार करदु, अर तुम लोगु तैं वेन चुण्यालि,</verse>
				<verse number="5">किलैकि हमुन तुमतै जु शुभ समाचार सुणै वु सब केवल बुलण वळी बात ही नि छै, बल्किन मा वु सामर्थ का काम तुमरा बीच मा भि ह्‍वे छिन। अर वु सब काम पवित्र आत्मा का छा, अर पवित्र आत्मा न ही यां को परमाण दिनी कि यू शुभ समाचार सच्‍चु च। अर तुम खुद ही जणद्‍यां, कि तुमरि मदद का खातिर हमरु व्यौहार तुमरा बीच मा कन्द्रयो छौ।</verse>
				<verse number="6">अर भौत दुख-तकलीफ सौण का बगत मा भि तुमुन पवित्र आत्मा का द्‍वारा मिलण वळी खुशी से प्रभु का वचन तैं स्वीकार कैरी। अर अब ठिक इन्‍नि तुमरो जीवन भि हमरा अर प्रभु यीशु का चाल चलण का जन ह्‍वे गै।</verse>
				<verse number="7">अर तुम लोगु न इन कैरी, इलै अखया मुलक का सब बिस्वासी लोगु मा, अर ठिक उन्‍नि मकिदुनिया मुलक का दुसरा हिस्सा का लोगु खुणि भि तुम लोग एक नमूना बणि ग्यां।</verse>
				<verse number="8">अर इन ह्‍वे, कि तुमरा इख बटि प्रभु का वचन की चर्चा ना केवल मकिदुनिया अर अखया का मुलक मा फैली, बल्किन मा सब जगा का लोगु तैं इन भि पता चलि गै कि तुमरो परमेस्वर पर कथगा बिस्वास च। इलै हमतै कुछ भि बोन्‍ने की जरुरत नि च।</verse>
				<verse number="9">किलैकि वु सब लोग ईं बात तैं खुद ही बतौन्दिन, कि जब हम तुमरा इख ऐ छा, त तुमुन हमरु कथगा अच्छु तरीके से स्वागत कैरी छौ। अर इन भि कि कनकै तुमुन मूरत की भक्‍ति करण छोड़ि दिनी, अर ज्यून्दा अर सच्‍चा परमेस्वर की भक्‍ति करण लगि ग्यां।</verse>
				<verse number="10">अर वु इन भि बतौन्दिन, कि तुम परमेस्वर का पुत्र को इंतजार बड़ी आस लगै के कना छां, जु की स्वर्ग बटि औण वळु च याने कि यीशु, जैतैं परमेस्वर न मुरदो मा बटि ज्यून्दु कैरी, अर उई न्याय का दिन पर हमतै औण वळा परकोप से बचालु।</verse>
			</chapter>
			<chapter number="2">
				<verse number="1">हे मेरा भै-बैंणो, तुम खुद ही जणद्‍यां कि हमरु तुमरा पास औण बेकार नि गै।</verse>
				<verse number="2">जन कि तुम जणदा छाँ कि फिलिप्पी नगर मा हमुन भौत पीड़ा सै, अर हमरि बेजती भि किये गै। मगर परमेस्वर न हमतै हिम्मत देई, अर विरोध होण का बाद भि हम तुमरा पास अयां, अर तुमरा नगर मा औण पर भि हमरा दगड़ा मा ठिक इन्‍नि ह्‍वे। पर फिर भि हमुन तुमतै परमेस्वर को शुभ समाचार सुणै।</verse>
				<verse number="3">अर जब हम तुमतै सिखौन्द्‍यां, त यां को मतलब यू नि च कि हम यू सब झूठ्‍ठी बातों से या गळत इरादों से करद्‍यां, अर ना ही इन इच्छा से कि तुमतै ठगि के चलि जां</verse>
				<verse number="4">मगर पिता परमेस्वर न हमतै ये लैख समझि कि ये शुभ समाचार की सेवा हमरा द्‍वारा किये जौ, अर उई शुभ समाचार हम लोगु तैं सुणौन्द्‍यां। अर यू काम हम मनखि तैं खुश करणु खुणि ना, बल्किन मा परमेस्वर तैं खुश करणु खुणि करद्‍यां जु की हमरा मनों का विचारों तैं परखदु।</verse>
				<verse number="5">अर तुम जणदा छाँ, कि हमुन कभि भि तुमतै खुश करणु खुणि तुमरि चापलूसी नि कैरी, अर ना ही लालच कैरिके तुमरा समणि बहाना मरनि। अर यों सब बातों को गवा परमेस्वर च।</verse>
				<verse number="6">अर हमुन कै बटि कुई भि आदर-सम्मान नि चै। नऽ त तुम लोगु बटि, अर ना ही कै दुसरा बटि, जब कि यीशु मसीह का खास चेला होण का नाता हमरु यू अधिकार छौ, कि हम अपणु भार तुम पर डलदा,</verse>
				<verse number="7">पर जन दूद पिलौंण वळी माँ अपणा बच्‍चों को पालन-पोसण करदी, ठिक उन्‍नि हमुन भि तुमरा बीच मा रै के बड़ा प्यार से तुमरि देखभाल कैरी।</verse>
				<verse number="8">अर हमतै तुम बटि इथगा लगौ ह्‍वे गै कि हमुन तुमतै नऽ त केवल परमेस्वर को शुभ समाचार सुणै, बल्किन मा तुम खुणि अपणा पराण तैं भि देणु कू तयार ह्‍वे ग्यां, किलैकि हम तुम बटि प्यार करद्‍यां।</verse>
				<verse number="9">हे मेरा भै-बैंणो, तुमतै हमरि कठिन मेनत अर हमरि ध्याड़ि करण जरुर याद होलि। जब हमुन तुमतै परमेस्वर को शुभ समाचार सुणै त अपणी जरुरतों तैं पूरु करणु खुणि हमुन दिन-रात काम-काज कैरी, ताकि हम तुम मा बटि कै का मथि भि भारु नि बणा।</verse>
				<verse number="10">अर ईं बात का तुम खुद ही गवा छां, अर परमेस्वर भि गवा च कि तुम बिस्वासी लोगु का बीच मा हमरु व्यौहार पवित्र, धरमी अर निरदोष छौ</verse>
				<verse number="11">तुम अच्छी तरौं से ही जणद्‍यां कि जन बुबा अपणा नौनो तैं हिम्मत अर दिलासा देन्दु, ठिक उन्‍नि प्यारु व्यौहार हम भि तुमरा दगड़ा मा रखद्‍यां, ताकि तुमरो चाल-चलन परमेस्वर तैं पसन्द औण वळु हो। अर वु ही च जु कि तुमतै अपणा राज को सदस्य बणाणु खुणि अर अपणी महानता को भागी होणु खुणि बुलान्दु।</verse>
				<verse number="12"></verse>
				<verse number="13">अर जब हम तुमरा पास अयां, त तुमुन परमेस्वर का वचन तैं स्वीकार कैरी। अर वे वचन तैं मनखि को वचन नि समझि, बल्किन मा परमेस्वर को वचन समझि के अपणा जीवन मा स्वीकार कैरी। इलै ईं बात का खातिर हम लगातार परमेस्वर को धन्यवाद करद्‍यां। अर या बात सच्‍च च, किलैकि यू वचन सच्‍चि मा परमेस्वर को ही वचन च जु की तुम बिस्वासी लोगु का बीच मा काम कनु च।</verse>
				<verse number="14">हे मेरा भै-बैंणो, यहूदिया मुलक मा यीशु मसीह पर बिस्वास करण वळा समुदाय का बीच मा जु कुछ भि ह्‍वे, उन्‍नि तुमरा दगड़ा मा भि ह्‍वे। हाँ, जन ऊं लोगु न यहूदी लोगु का द्‍वारा दुख झेली, ठिक उन्‍नि तुमतै भि अपणा लोगु बटि दुख मिली।</verse>
				<verse number="15">अर ऊं यहूदी लोगु न प्रभु यीशु तैं अर पिता परमेस्वर का कुछ रैबर्यों तैं मारी डालि। अर ऊंन हमतै भि भौत सतै च, ऊंन परमेस्वर तैं खुश नि कैरी, बल्किन मा वु त सब मनखियों को विरोध करदिन।</verse>
				<verse number="16">किलैकि यू लोग हमतै ऊं लोगु का बीच मा शुभ समाचार को परचार करण से रुकदिन जु यहूदी जाति का नि छिन। अर इन वु इलै करदिन, कखि ऊंतैं भि बचयै नि जौ, पर इन कैरिके विरोध करण वळा वु लोग न्याय का दिन पर अफु खुणि पाप को घौडु भोरी देन्दिन। मगर ऊं लोगु पर परमेस्वर को खतरनाक गुस्सा दण्ड रुप मा ऐ गै।</verse>
				<verse number="17">हे मेरा भै-बैंणो, अभि हम तुम बटि कुछ बगत तक दूर छां, मगर फिर भि तुम लोग हमरा दिल का करीब छां। इलै तुमरा पास ऐके तुम से मिलण की हमरि बड़ी इच्छा च अर यां खुणि हमुन भौत कोसिस भि कैरी।</verse>
				<verse number="18">अर हमुन खुद इन चै छौ कि ऐके तुम बटि मिला, इख तक कि मि पौलुस न भि भौत कोसिस कैरी कि ऐके तुम से मिलु। अर या कोसिस मिन एक बार ना, बल्किन मा बार-बार कैरी मगर शैतान रुकावट डलणु रै।</verse>
				<verse number="19">अर फिर हमरि आस को कारण तुम ही त छाँ, किलैकि प्रभु यीशु का औण तक अगर जु तुम बिस्वास मा बणयां रैल्या त वेका समणि हिम्मत से खड़ा ह्‍वेल्या। तब तुम ही हम खुणि वु इनाम ह्‍वेल्या जौं तैं देखि के हमतै बड़ु गर्व होलु, अर तब हमरि खुशी को कुई ठिकाणु नि होलु।</verse>
				<verse number="20">हाँ, सच्‍चि मा हमरि बडै अर हमरि खुशी को कारण तुम ही छाँ।</verse>
			</chapter>
			<chapter number="3">
				<verse number="1">अर तुम बटि दूर होण की वजै से जब हम बटि नि रये गै, त तुमरा बारा मा जनणु खुणि हमुन तीमुथियुस तैं तुमरा पास भेजि, ताकि उ तुमतै बिस्वास का बारा मा अच्छा से समझौ अर बिस्वास मा और भि जादा मजबूत बणौ। मिन अर सिलवानुस न एथेन्स नगर मा ही रुकणे की ठाणि। अर तीमुथियुस परमेस्वर को सेवक च, अर मसीह का शुभ समाचार तैं सुनौण मा हमरु एक भै च।</verse>
				<verse number="2"></verse>
				<verse number="3">अर वेतैं भेजण को हमरु यू मकसद च कि जु सतौ तुम लोग सौणा छाँ, ये सतौ की वजै से कखि तुम बिस्वास करण से पिछनै नि हटि जां। अर तुम अफि जणद्‍यां, कि हम बिस्वासी लोगु पर ये सतौल त औण ही औण च।</verse>
				<verse number="4">अर या सच्‍चि बात च कि जब हम तुमरा दगड़ा मा छा, त हमुन पैलि ही बोलियालि छौ कि हमतै दुख-तकलीफ झिलण ही पोड़लि। अर उन्‍नि ह्‍वे अर यू सब तुम जणदा ही छाँ।</verse>
				<verse number="5">अर ईं ही वजै से जब मि बटि और नि रये गै, त मिन यू जनणु खुणि कि तुम बिस्वास मा बणयां छाँ की ना, तीमुथियुस भै तैं तुमरा पास भेजि। अर इन मिन इलै कैरी, ताकि इन पता चलि जौ कि कखि शैतान जु की भकलौण वळु च वेन तुमतै अपणी बातों से भकलै हो, अर हमरि पूरि मेनत बेकार चलि ह्‍वे गै हो।</verse>
				<verse number="6">मगर तीमुथियुस अभि तुमरा इख बटि ऐ, अर वेन तुमरा बिस्वास अर प्यार का बारा मा हमतै बतै के एक अच्छी खबर सुणै। अर वेन हमतै इन भि बतै, कि तुम लोग हमतै हमेसा बड़ा प्यार से याद करद्‍यां। अर जन हम तुमतै मिलणु कू तड़पद्‍यां, तन्‍नि तुम भि हम बटि मिलणु कू तड़पद्‍यां।</verse>
				<verse number="7">इलै हे मेरा भै-बैंणो दुख-तकलीफ अर पीड़ाओं मा होण का वजै से भि जब हम तुमरा बिस्वास का बारा मा सुणद्‍यां त हमतै हिम्मत मिलदी।</verse>
				<verse number="8">किलैकि जब तक तुम बिस्वास मा मजबूत बणयां रैल्या, तब तक हमरु भि ज्यू मा ज्यू बणयूं रौन्दु।</verse>
				<verse number="9">अर तुमरि वजै से परमेस्वर का समणि ज्वा खुशी हम मैसूस कन छां, वां खुणि हम परमेस्वर को जथगा भि धन्यवाद द्‍यूला उ भि कम ही च।</verse>
				<verse number="10">अर हम दिन-रात परमेस्वर बटि तुम खुणि भौत प्रार्थना करद्‍यां, कि तुम बटि मिली सैका, अर अगर तुमरा बिस्वास मा कै भि बात की कमी रै गै होलि त हम वींतैं पूरि कैरी द्‍यूला।</verse>
				<verse number="11">हम पिता परमेस्वर अर यीशु मसीह से इन प्रार्थना करद्‍यां कि हम तुम बटि जल्द से जल्द मिली सैका, अर यां खुणि प्रभु हमरि मदद कैरो।</verse>
				<verse number="12">अर जन हम तुम बटि प्यार करद्‍यां, ठिक उन्‍नि तुम भि एक-दुसरा बटि प्यार कैरा अर तुमरो यू प्यार सभ्यों खुणि जादा से जादा बढदी जौ। अर हम प्रार्थना करद्‍यां की इन होणु खुणि प्रभु तुमरि मदद कैरो।</verse>
				<verse number="13">अर हम तुम खुणि इन्‍नि भि प्रार्थना करद्‍यां, कि प्रभु यीशु तुमरा मनों तैं मजबूत कैरो, ताकि जब उ अपणा पवित्र लोगु का दगड़ा मा अऽ, त तुम हमरा पिता परमेस्वर का समणि वेकी नजर मा पवित्र अर निरदोष ठैरा।</verse>
			</chapter>
			<chapter number="4">
				<verse number="1">हे मेरा भै-बैंणो, कुछ और भि बात छिन जु की मि तुमतै बतौण चाणु छौं। परमेस्वर तैं खुश करणु खुणि मनखि को चाल चलण कन्द्रयो होण चयेणु, ईं बात की शिक्षा हमुन तुमतै दियाली, अर वेका मुताबिक तुम चलणा भि छाँ। अब हम तुम बटि प्रभु यीशु का नौ से बिन्ती करद्‍यां, कि तुम अगनै भि इन्‍नि चलणा रा।</verse>
				<verse number="2">किलैकि प्रभु यीशु का दियां अधिकार से हमुन तुमतै जु-जु आज्ञा सिखैनी, वेका बारा मा त तुम जणदा ही छाँ।</verse>
				<verse number="3">अर परमेस्वर की मनसा इन्‍नि च की तुम पवित्र बणा, अर खुद तैं दुसरो का दगड़ा मा गळत सम्बन्ध रखण से बच्यां रा।</verse>
				<verse number="4">इलै तुम सब अपणा सरील की यों इच्छाओं तैं अपणा वश मा रखण सीखा, अर पवित्र जीवन ज्यऽ, ज्यां से कि लोग तुमरा जीवन तैं देखि के तुमरो आदर-सम्मान कैरा।</verse>
				<verse number="5">अर बिस्वास नि करण वळा लोगु, का जन सरील का गळत सम्बन्ध रखण की इच्छा नि रखा जु की परमेस्वर तैं नि जणदिन।</verse>
				<verse number="6">इलै तुम मा बटि कुई भि कै बिस्वासी भै या बैंण तैं, अपणी बातों मा फंसै के गळत सम्बन्ध रखण को पाप नि कैरो। किलैकि हमुन तुमतै पैलि ही चितैयाली छौ, कि जु कुई भि इन पाप करदु उ प्रभु बटि दण्ड पालु।</verse>
				<verse number="7">किलैकि परमेस्वर न हमतै अशुद्ध कामों खुणि ना, बल्किन मा पवित्र होणु खुणि बुलयूं च।</verse>
				<verse number="8">इलै जु कुई भि ईं शिक्षा तैं नकारी देन्दु, उ मनखि तैं ना बल्किन मा परमेस्वर तैं नकरदु, जु कि अपणु पवित्र आत्मा तुमतै देन्दु।</verse>
				<verse number="9">अर बिस्वासी भै-बैंणो बटि प्यार करण का बारा मा तुमकु कुछ लिखण मि जरुरी नि समझदु, किलैकि परमेस्वर न तुमतै खुद यू सिखैयेलि, कि आपस मा एक-दुसरा बटि प्यार कैरा।</verse>
				<verse number="10">अर सच्‍चि मा तुम पूरा मकिदुनिया मुलक का सब बिस्वासी लोगु बटि उन्‍नि प्यार करद्‍यां। मगर फिर भि मेरा भै-बैंणो, हम तुमतै समझै देन्द्‍यां, कि तुम एक-दुसरा बटि और भि जादा प्यार कैरा।</verse>
				<verse number="11">अर जन हमुन तुमतै आज्ञा दे छै, ठिक उन्‍नि तुम एक-दुसरा तैं बिना तकलीफ दियां अपणु जीवन बसर कैरा। अर अपणा-अपणा काम-काजों मा लग्यां रा, अर अपणा हाथोंळ की मेनत खुद कमै कैरिके अपणु जीवन ज्यां।</verse>
				<verse number="12">ताकि तुमतै कै भि बात की कमी नि हो, अर तुमरा जीवन तैं देखि के बिस्वास नि करण वळा लोग तुमरो आदर-सम्मान करला।</verse>
				<verse number="13">हे मेरा भै-बैंणो, हम इन चन्द्‍यां, कि मुरयां लोगु को क्या जि होलु येका बारा मा तुम जाणा, ताकि तुम बिस्वास नि करण वळा लोगु का जन शोक नि कैरा जौं लोगु का पास कुई भि आस नि च।</verse>
				<verse number="14">किलैकि हम यू बिस्वास करद्‍यां, कि यीशु मोरि अर फिर ज्यून्दु भि ह्‍वे गै। इलै हम इन भि बिस्वास करद्‍यां, कि जब यीशु मसीह वापस आलु तब जु लोग वे पर बिस्वास कैरिके मोरि गैनी, ऊं बिस्वासियों तैं भि परमेस्वर मौत बटि ज्यून्दु करलु, अर वु भि यीशु का दगड़ा मा आला।</verse>
				<verse number="15">अर प्रभु का वचन का मुताबिक हम तुमतै बतै देन्द्‍यां, कि जब प्रभु आलु तब मुरयां लोग ही पैलि वे बटि मिलला। अर वेका बाद हम जु ज्यून्दा छां वे बटि मिलुला।</verse>
				<verse number="16">किलैकि जब एक बड़ी आवाज का साथ एक आज्ञा दिये जालि, अर परमेस्वर का परधान स्वर्गदूत को शब्द सुण्यालु, अर परमेस्वर का बिगुले की आवाज सुण्यालि, तब यीशु मसीह स्वर्ग बटि आलु अर जु लोग वे पर बिस्वास कैरिके मोरि गैनी, ऊ पैलि ज्यून्दा ह्‍वे जाला।</verse>
				<verse number="17">तब वेका बाद जु हम वे बगत पर ज्यून्दा अर बच्यां रौला, त ऊंका दगड़ा मा बादळु मा मथि उठये जौला, ताकि प्रभु बटि हम आसमान मा मिली सैका अर तब सदनि खुणि हम प्रभु का दगड़ा मा रौला।</verse>
				<verse number="18">इलै यों बातों से एक-दुसरे की हिम्मत बढणा रा।</verse>
			</chapter>
			<chapter number="5">
				<verse number="1">हे मेरा भै-बैंणो, ईं बात की कुई जरुरत नि च, कि तुम खुणि प्रभु का औण का वे बगत अर समौ का बारा मा कुछ लिखे जौ।</verse>
				<verse number="2">किलैकि तुम अफि अच्छी तरौं से जणद्‍यां की जन राति चोर औन्दु, ठिक उन्‍नि अचानक से प्रभु को वापस औण को दिन भि होलु।</verse>
				<verse number="3">अर जब लोग इन बुलला, “अरे, सब कुछ ठिक च निस फिकर ह्‍वेके रा,” उबरि अचानक से ऊं लोगु पर विणास ऐ जालु। जन कि गरवति जनानि तैं परसव की पीड़ा अचानक से उठदि, ठिक इन्‍नि विणास को उ दिन ऊं पर ऐ जालु, तब ऊ बचि नि सकला।</verse>
				<verse number="4">मगर हे मेरा भै-बैंणो, तुम अन्धेरा मा नि छाँ इलै उ दिन अगर तुम पर चोर की तरौं अचानक से भि ऐ जालु, त तुमतै कै बात की भि हैरानी नि होलि।</verse>
				<verse number="5">किलैकि हम सभि उज्याळा की संतान छां अर दिन का उज्याळा जन जीवन जीण वळा छां। अर हम पाप का अन्धेरा मा जीवन जीण वळा लोग नि छां।</verse>
				<verse number="6">इलै हमतै दुसरा लोगु का जन नि होण चयेणु, जु कि गैरी निन्द मा सियां छिन, बल्किन मा हमतै बिज्युं अर चौकस रौण चयेणु।</verse>
				<verse number="7">किलैकि जु सिण वळा छिन ऊंकी आदत राति सिंणे की होन्दी, अर जु दारु पीण वळा छिन ऊंकी आदत जादातर राति ही दारु पीणे की होन्दी।</verse>
				<verse number="8">पर हम वु लोग छां, जु उज्याळु को जीवन जीणा छां इलै हमतै चौकस रौण चयेणु। हमतै लगातार यीशु पर बिस्वास करण चयेणु अर एक-दुसरा बटि प्यार करण चयेणु। तब यू हमरि हिफाजत एक कवच की तरौं करलु। अर बचयै जाण की ज्वा आस हमरि यीशु पर लगयीं च वेतैं देणु खुणि उ हमरि हैलमेट जन हिफाजत करलु।</verse>
				<verse number="9">किलैकि परमेस्वर न हमतै इलै नि चुणी कि हम पर दण्ड की आज्ञा हो, बल्किन मा हमतै चुणी के इलै ठैरैयालि कि हम अपणा प्रभु यीशु मसीह का द्‍वारा बचयै जां।</verse>
				<verse number="10">अर यीशु मसीह हम कू इलै मोरि ताकि हम चै ज्यून्दा रा या मोरि जां, हम सब मिली के वेका दगड़ा मा जीवन ज्यूला।</verse>
				<verse number="11">इलै जन की तुम करदी औणा छाँ एक-दुसरा तैं दिलासा दिणा रा, अर एक-दुसरा की हिम्मत बढा।</verse>
				<verse number="12">हे मेरा भै-बैंणो, हम तुम से बिन्ती करद्‍यां, कि तुम ऊं लोगु की कदर कैरा, जु तुमरा बीच तुमतै सच्‍चै की शिक्षा देके वेको बाटु बतौन्दिन। अर ऊंकी या शिक्षा इलै च, ताकि तुम लोग प्रभु मा और अगनै बैढी सैका।</verse>
				<verse number="13">अर ऊंकी ईं मेनत की वजै से तुम ऊं बटि भौत प्यार कैरा, अर ऊंतैं भौत आदर-सम्मान द्‍या। अर एक-दुसरा का दगड़ा मा मेल-जोल से रा।</verse>
				<verse number="14">अर सभ्यों का दगड़ा मा सबर रखण वळा बणयां रा। हे मेरा भै-बैंणो, हम तुमतै उपदेस देके बुल्द्‍यां, कि जु लोग अळकसि छिन, ऊंतैं तुम चितै के समझा, अर जु डऽरपोक छिन ऊंतैं हिम्मत द्‍या, अर जु कमजोर छिन ऊंकी मदद कैरा।</verse>
				<verse number="15">अर ईं बात तैं ध्यान मा रखा, कि अगर कुई तुमरा खिलाप मा बुरै करदु, त तुम वेका बदला मा बुरै नि कर्यां। पर हमेसा भलै करण की कोसिस कैरा, ज्यां से की सब लोगु की भलै हो।</verse>
				<verse number="16">अर हमेसा खुश रा।</verse>
				<verse number="17">अर लगातार प्रार्थना कना रा।</verse>
				<verse number="18">अर हर दसा मा परमेस्वर को धन्यवाद द्‍या, किलैकि तुम यीशु मसीह का छाँ इलै परमेस्वर की मनसा या ही च।</verse>
				<verse number="19">अर पवित्र आत्मा तैं अपणा बीच मा काम करण से नि रोका।</verse>
				<verse number="20">अर जु भविष्यबाणियाँ दुसरा बिस्वासी करदिन, ऊंतैं बेकार नि समझा।</verse>
				<verse number="21">मगर यों भविष्यबाणियों तैं परखा, कि परमेस्वर की तरफा बटि छैं छिन या नि छिन, अर अगर जु परमेस्वर की तरफा बटि छिन त ऊंतैं स्वीकार कैरा।</verse>
				<verse number="22">पर जु बात बुरी छिन ऊंतैं स्वीकार नि कैरा।</verse>
				<verse number="23">हम तुम खुणि प्रार्थना करद्‍यां, कि तुमरि आत्मा, पराण, अर तुमरो सरील हमरा प्रभु यीशु मसीह का औण का दिन तक पूरु निरदोष अर हरेक बुरी बात से बचि के रौ। अर शान्ति देण वळु परमेस्वर तुमतै पूरि तरौं से पवित्र कैरो।</verse>
				<verse number="24">अर उ इन जरुर करलु किलैकि जै परमेस्वर न तुमतै बुलै, उ भरोसा का लैख च।</verse>
				<verse number="25">हे मेरा भै-बैंणो, हम कू भि प्रार्थना कर्यां।</verse>
				<verse number="26">अर पवित्र दिल से एक-दुसरे की भूकि पिके सलाम बोला।</verse>
				<verse number="27">अर मि तुमतै प्रभु कि कसम देणु छौं कि या चिठ्‍ठी सब भै-बैंणो तैं पैड़ी के सुणये जौ।</verse>
				<verse number="28">तुम सभ्यों पर हमरा प्रभु यीशु मसीह की किरपा होणी रौ।</verse>
			</chapter>
		</book>
		<book number="53">
			<chapter number="1">
				<verse number="1">हे मेरा भै-बैंणो, मि पौलुस या चिठ्‍ठी भै सिलवानुस अर तीमुथियुस का दगड़ा मा लिखणु छौं। अर या चिठ्‍ठी थिस्सलुनीकी नगर मा रौण वळा बिस्वासी समुदाय का लोगु खुणि च, जु की पिता परमेस्वर अर प्रभु यीशु मसीह का लोग छिन।</verse>
				<verse number="2">हम प्रार्थना करद्‍यां, कि हमरा पिता परमेस्वर अर प्रभु यीशु मसीह बटि तुमतै वेकी किरपा अर शान्ति मिलदी रौ।</verse>
				<verse number="3">हे मेरा भै-बैंणो, तुमरो बिस्वास भौत बढणु च, अर ठिक उन्‍नि तुमरो प्यार भि एक-दुसरा खुणि बढदी जाणु च। इलै हम खुणि यू जरुरी च कि हम तुमरा खातिर पिता परमेस्वर को धन्यवाद हमेसा कैरा, अर हमतै करण भि चयेणु अर यू जरुरी भि च।</verse>
				<verse number="4">इख तक कि जुलम अर विरोध सौण का बाद भि, तुम लोग अपणु बिस्वास पिता परमेस्वर पर बणै के रखद्‍यां, अर तुमरि ईं बात का बारा मा ही हम लोग परमेस्वर का दुसरा बिस्वासी समुदाय मा बड़ु मोन कैरिके तुमरा बारा मा बतौन्दु।</verse>
				<verse number="5">अर मि तुमतै बतै देन्दु कि परमेस्वर का राज तैं पौण का खातिर जौं दुखों तैं तुम अभि झिलणा छाँ, ऊंका द्‍वारा परमेस्वर भि तुमतै अपणा लैख बणाणु च। अर यू देखि के लोग जाणि जाला कि परमेस्वर न्याय करण मा सच्‍चु च।</verse>
				<verse number="6">अर जु लोग तुम पर जुलम करदिन न्याय का दिन पर बदला मा उ ऊंतैं जुलम मिललु, किलैकि परमेस्वर न्याय कारण मा सच्‍चु च।</verse>
				<verse number="7">अर ज्वा खैरि तुम अर हम अभि खाण छां ऊं सभ्यों बटि उ हमतै जरुर छुटकारु द्‍यालु। अर यू तब होलु, जब प्रभु यीशु अपणा ताकतबर दूतों का दगड़ा मा स्वर्ग बटि खतरनाक आग का दगड़ा मा आलु, अर ऊं लोगु बटि बदला ल्यालु।</verse>
				<verse number="8">अर जब यीशु वापस आलु, त वेका अपणा लोग वेको बड़ु आदर-सम्मान करला अर वे खुणि ताजुब करला, किलैकि जु वचन हमुन तुमतै बतै वे पर तुमुन बिस्वास कैरी। इलै तुम भि ऊं पवित्र लोगु का दगड़ा मा सामिल ह्‍वे जैल्या, मगर जु बिस्वास नि करदिन वु लोग वे दिन पर प्रभु का समणि अर वेकी महानता मा बटि दूर किये जाला, अर सदनि का विणास को दण्ड पाला। किलैकि ऊंन हमरा प्रभु यीशु का बारा मा वेकी ईं अच्छी खबर तैं नि माणी, अर ना ही हमरा परमेस्वर तैं पछ्याणदिन। अर जब यीशु वापस आलु, तब यू सब कुछ होलु।</verse>
				<verse number="9"></verse>
				<verse number="10"></verse>
				<verse number="11">इलै हम तुम खुणि हमेसा इन प्रार्थना करद्‍यां, कि परमेस्वर न तुमतै जै मकसद खुणि बुलै, वे जीवन तैं जीणु खुणि परमेस्वर तुमतै लैख बणौ। अर हम इन भि प्रार्थना करद्‍यां, कि यीशु मसीह पर बिस्वास कैरिके जु सब भलै का काम तुम करण चाणा छाँ, ऊंतैं तुम पूरु कैरी सैका। अर इन करण मा उ तुमतै अपणी सामर्थ देके तुमरि मदद कैरो।</verse>
				<verse number="12">अर हम इन प्रार्थना इलै करद्‍यां, ताकि तुमरा द्‍वारा प्रभु यीशु की बडै हो। अर जै परमेस्वर की सेवा हम करद्‍यां, वेकी किरपा से तुमतै वु आदर-सम्मान मिली जौ जु परमेस्वर देन्दु।</verse>
			</chapter>
			<chapter number="2">
				<verse number="1">हे मेरा भै-बैंणो, अब हम तुमतै अपणा प्रभु यीशु का दुबरा औण का बारा मा, अर वेका पास इकट्‍ठा होण का बारा मा बतै देन्द्‍यां। किलैकि तुमरा बीच मा कुछ इन्द्रया लोग ऐ गैनी, जु कि तुमतै गळत सिखौन्दिन। अर वु बुल्दिन, कि प्रभु को दुबरा औण की बात पूरि ह्‍वे गै अर वु इन भि बुलला, कि हमतै त परमेस्वर का आत्मा न बतै अर भविष्यबाणियाँ भि ह्‍वेनि। अर वु लोग हमरु नौ लेके इन भि बुलला, कि हमतै त चिठ्‍ठी का द्‍वारा बतये गै। मगर हम तुमतै बतै देन्द्‍यां, कि यों बातों तैं सुणी के तुम अचानक से बिस्वास मा डगमगै नि जयां अर ना ही घबरयां।</verse>
				<verse number="2"></verse>
				<verse number="3">इलै कै की भि बातों तैं सुणी के वेकी बातों मा फंसी नि जयां। किलैकि प्रभु का दुबरा औण से पैलि भौत सा लोग परमेस्वर अर वेका नियम-कानूनों को विरोध करला। तब परमेस्वर का नियम-कानूनों तैं तोड़ण वळु एक पाप को पुत्र परगट होलु, जै खुणि नरकलोक को दण्ड अर विणास ठैर्युं च।</verse>
				<verse number="4">अर येसे पैलि की पाप का पुत्र तैं दण्ड मिलु, उ हमरा परमेस्वर को भि विरोध करलु। अर जौं तैं लोग भगवान समझि के ऊंकी भक्‍ति करदिन, ऊ सभ्यों बटि पाप को पुत्र अफ तैं बड़ु बणालु। अर इख तक की उ परमेस्वर का मन्दिर मा बैठि के परमेस्वर होण को दावा करलु।</verse>
				<verse number="5">अर जब मि तुमरा दगड़ा मा छौ, त यू सब बात मिन तुमतै बतै छै, क्या वु तुमतै याद नि च?</verse>
				<verse number="6">अर अब तुम वेका का बारा मा जणदा ही छाँ, कि जैन वे पाप का पुत्र तैं रोकी के रख्युं च, ताकि जब तक परमेस्वर का द्‍वारा ठैर्युं बगत नि ऐ जौ, तब तक उ परगट नि ह्‍वे सकदु।</verse>
				<verse number="7">अर वेन पाप का पुत्र तैं तब तक रोकी के रख्युं च, जब तक की उ वेका बाटा बटि हटये नि जौ। अर या बात सच्‍चि भि च, कि शैतान लुकि-छिपी के लोगु का बीच मा काम कनु च, ताकि लोग परमेस्वर का नियम-कानूनों तैं अपणा जीवनों मा स्वीकार नि कैरी सैका।</verse>
				<verse number="8">अर जब पाप को पुत्र परगट होलु, त उ शैतान का द्‍वारा दिईं ताकत से आलु। अर हरेक किसम का झूठ्‍ठा चमत्कारिक चिन्‍न, अर अदभुत काम कैरिके दिखालु। अर पाप का पुत्र को विणास होण से पैलि उ यू सब कुछ करलु। मगर जब प्रभु यीशु दुबरा आलु, त अपणा औण की ताकत से वेतैं अपणी फूकळ ही नास कैरी द्‍यालु।</verse>
				<verse number="9"></verse>
				<verse number="10">अर जु लोग नास होण वळा बाटा पर चलणा छिन, ऊंतैं अपणा जाल मा फसौणु खुणि पाप को पुत्र हरेक किसम का बुरा काम करलु। तब वु वेका जाल मा फंसी जाला, किलैकि ऊंन परमेस्वर का सच्‍चा प्यार तैं अपणा जीवन मा स्वीकार नि कैरी। अर अगर जु वु यीशु तैं स्वीकार कैरी देन्दा, त ऊंतैं बचयै जान्दु।</verse>
				<verse number="11">इलै परमेस्वर भि ऊंका बीच मा एक भरमौण वळु विचार तैं डललु। तब वु भटकी जाला, अर वे पर बिस्वास करला जु झूठ्‍ठ च।</verse>
				<verse number="12">अर इन उ इलै करलु, ताकि जथगा लोगु न सच्‍चै पर बिस्वास नि कैरी, बल्किन मा अधरम का कामों से खुश ह्‍वेनि, वु सभ्या का सभि दण्ड पा।</verse>
				<verse number="13">मगर हे मेरा भै-बैंणो, तुम जु प्रभु का प्रिय लोग छाँ, हमरि या जिमेदारी बणदी की हम तुमरा खातिर पिता परमेस्वर को धन्यवाद हमेसा कैरा। किलैकि परमेस्वर न तुमतै शुरुवात बटि ही चुण्यालि, कि तुमतै बचयै जौ। अर जब हम वेका सच्‍चा वचन पर बिस्वास करद्‍यां, तब पवित्र आत्मा हमतै पवित्र बणादु ताकि वेका द्‍वारा हम पूरि तरौं से बचि जां।</verse>
				<verse number="14">अर छुटकारा पौण का खातिर ही परमेस्वर न तुमतै बुलै ताकि जु आदर प्रभु यीशु मसीह तैं परमेस्वर न देई, वेका हकदार तुम भि ह्‍वे जा। अर ये शुभ समाचार का बारा मा हमुन ही तुमतै बतै, अर वे पर बिस्वास कैरिके तुम बचयै ग्यां।</verse>
				<verse number="15">इलै हे मेरा भै-बैंणो, बिस्वास मा मजबूत बणयां रा। अर जु-जु बात हमुन तुमतै वचनों का द्‍वारा अर चिठ्‍ठी-पतरीयों का द्‍वारा सिखैनी, ऊं बातों तैं माणा।</verse>
				<verse number="16">हमरु पिता परमेस्वर हम बटि प्यार करदु, अर वेन हमतै सदनि तक रौण वळी दिलासा अर सबसे अच्छी आस दिईं च।</verse>
				<verse number="17">अर हम तुम खुणि प्रार्थना करद्‍यां, कि प्रभु यीशु मसीह अर पिता परमेस्वर तुमतै हिम्मत द्‍यो, ताकि तुम हमेसा अच्छु बोला और अच्छा काम कैरी सैका।</verse>
			</chapter>
			<chapter number="3">
				<verse number="1">हे मेरा भै-बैंणो, आखिरी मा हम तुमकु इन भि बुल्द्‍यां, कि हम खुणि प्रार्थना कर्यां ताकि जन तुम लोगु का बीच मा परमेस्वर को वचन फैली, ठिक उन्‍नि दुसरा लोगु का बीच मा भि परमेस्वर को वचन जल्दी-जल्दी परचार किये जौ। अर वे वचन तैं सुनण वळा बड़ा आदर-सम्मान बटि वेतैं स्वीकार कैरा।</verse>
				<verse number="2">अर इन भि प्रार्थना कैरा, कि बड़ा दुष्‍ट लोग जु हमतै नुकसान पौंछाणे की कोसिस करदिन, ऊं बटि हमतै छुटकारा मिली जौ, किलैकि हरेक मनखि बिस्वास नि करदु।</verse>
				<verse number="3">पर परमेस्वर बिस्वास का काबिल च, इलै उ तुमतै बिस्वास मा मजबूत बणै के रखलु, अर दुष्‍ट शैतान बटि बचै के रखलु।</verse>
				<verse number="4">अर तुम लोगु का बारा मा हमतै परमेस्वर पर पूरु बिस्वास च, कि जु कुछ भि हम लोगु न तुमतै सिखै, वु सब बात तुम मनणा छाँ अर हमेसा मनणा रैल्या।</verse>
				<verse number="5">अर हम तुम लोगु खुणि इन प्रार्थना करद्‍यां, कि यीशु मसीह तुमतै परमेस्वर का प्यार की तरफा लेके जौ, अर जन दुख-तकलीफ प्रभु यीशु न उठे, उन्‍नि दुख-तकलीफ सौणु खुणि प्रभु यीशु तुमरि मदद भि करलु।</verse>
				<verse number="6">हे मेरा भै-बैंणो, हम प्रभु यीशु मसीह का द्‍वारा दियां अधिकार से तुमतै आज्ञा देन्द्‍यां, कि बिस्वासी लोगु मा जु अळकसि छिन अर हमरि दिईं शिक्षा को पालन नि करदिन, ऊंका दगड़ा मा नि रा।</verse>
				<verse number="7">किलैकि तुम खुद जणद्‍यां, कि जन हमुन कैरी उन्‍नि तुमतै भि करण चयेणु। अर जब हम तुमरा दगड़ा मा छा, त हम अळकसि बणि के नि रयां।</verse>
				<verse number="8">अर हमुन मुफत मा कै की रुट्‍टी नि खै, पर दिन-रात खून पसीना बुगै के मेनत कैरी, ताकि कै खुणि हम भारु नि बणि जां।</verse>
				<verse number="9">जब की हमरा पास यू अधिकार च कि हम तुम बटि पूरि मदद ल्या, मगर हम खुद तुम खुणि एक उदारण बणि ग्यां, ताकि तुम सिखी जा कि जन हम लोगु न कैरी उन्‍नि तुम भि कैरा।</verse>
				<verse number="10">अर जब हम तुमरा दगड़ा मा छा, त हमुन तुमतै एक बात सिखै छै, कि अगर कै की काम-धाम करण कि इच्छा नि हो, त वेतैं खाणु भि नि खाण चयेणु।</verse>
				<verse number="11">पर येका बाद भि हमतै इन पता चलि, कि तुम लोगु मा बटि कुछ लोग इन छिन जु की अळकसि जीवन जीणा छिन। अर ऊ कुछ काम-काज नि करदिन, पर दुसरा लोगु का काम-काजों मा टांग अड़ौन्दिन।</verse>
				<verse number="12">अर इन्द्रया लोगु तैं हम प्रभु यीशु मसीह का द्‍वारा दियां अधिकार से आज्ञा देन्द्‍यां, अर समझौद्‍यां कि ऊ चुपचाप काम कैरिके अपणा खाणुक खुणि खुद ही पैसा कमा।</verse>
				<verse number="13">पर हे मेरा भै-बैंणो, तुम भलै करण मा नि थका।</verse>
				<verse number="14">अगर कुई हमरि ईं चिठ्‍ठी मा लिखीं बातों को पालन नि करदु, त वेतैं दिख्यां कि उ छैई कु च, अर वेको साथ नि दियां ताकि उ खुद मा बेजती मैसूस कैरो।</verse>
				<verse number="15">पर तभि भि वेतैं दुसमन नि समझा, पर एक बिस्वासी भै समझि के सीखा।</verse>
				<verse number="16">अब हम इन प्रार्थना करद्‍यां, कि शान्ति देण वळु प्रभु हरेक बात मा तुमतै शान्ति द्‍यो अर तुमरा दगड़ा मा रौ।</verse>
				<verse number="17">अर मि पौलुस खुद अपणा हाथळ तुम खुणि सलाम लिखणु छौं। अर मि अपणी हर चिठ्‍ठी मा इन्‍नि सलाम लिखदु, ताकि हरेक तैं इन पता चलि जौ, कि या चिठ्‍ठी मिन ही लिखीं।</verse>
				<verse number="18">अर हम इन भि प्रार्थना करद्‍यां, कि हमरा प्रभु यीशु मसीह की किरपा तुम सभ्यों पर होणी रौ।</verse>
			</chapter>
		</book>
		<book number="54">
			<chapter number="1">
				<verse number="1">हे मेरा प्यार भै तीमुथियुस, मि पौलुस या चिठ्‍ठी त्वे खुणि लिखणु छौं। अर हमतै बचौण वळा परमेस्वर अर यीशु मसीह न जै पर हमरि अपणी आस रखी च, वेन ही मितैं खास चेला ठैरै के भेजि। तीमुथियुस, तू मेरा सच्‍चा नौना का जन छैई, मि प्रार्थना करदु कि: पिता परमेस्वर अर हमरा प्रभु यीशु मसीह का द्‍वारा त्वे पर वेकी किरपा, शान्ति अर दया होणी रौ।</verse>
				<verse number="2"></verse>
				<verse number="3">अर जब मि मकिदुनिया मुलक कू जाणु छौ, तब मिन त्वेतै इफिसुस नगर मा ही रौणु कू चितै छौ, ताकि उख जु लोग गळत शिक्षा देणा छिन, ऊंतैं तू आदेस देके समझौ, कि तुम लोग इन बेकार कि शिक्षा नि द्‍या।</verse>
				<verse number="4">अर जु मनगणत कथा छिन, अर पितरों का नौ की लिस्ट जु कभि खतम नि होन्दी, यों पर वु मन नि लगा। किलैकि यों पर ध्यान देके बस घपरोळ ही होन्दु, अर यू लोग परमेस्वर की इच्छा पूरि नि करदिन जु की बिस्वास कैरिके होन्दु।</verse>
				<verse number="5">अर आदेस देके समझाणो को कारण यू च, कि हरेक बिस्वासी मनखि आपस मा प्यार से रौ। अर यू प्यार सच्‍चा मन, शुद्ध दिल अर सच्‍चा बिस्वास से होण चयेणु।</verse>
				<verse number="6">अर यों बातों तैं छोड़ि के कुछ लोग भटकी गैनी, अर अब ऊंन फालतु बातों की शिक्षा देण शुरु कैरियाली।</verse>
				<verse number="7">अर वु लोग नियम-कानूनों तैं सिखौण वळा बणण चनदिन, पर जु कुछ भि वु बुल्दिन वेका बारा मा नि जणदिन। अर जु कुछ भि वु बड़ा बिस्वास से बुल्दिन, ऊं बातों तैं भि नि समझदिन।</verse>
				<verse number="8">अर हम जणदा छां कि अगर कुई मूसा का द्‍वारा दियां नियम-कानूनों तैं ढंगल मणदु हो, त नियम-कानून खूब छिन।</verse>
				<verse number="9">अर हम यू भि जणद्‍यां, कि परमेस्वर का नियम-कानून धरमी लोगु खुणि नि दिये गैनी, पर ऊं लोगु खुणि दिये गैनी जु लोग नियम-कानूनों तैं नि मणदिन, अर अधिकारी लोगु की बात नि मणदिन, परमेस्वर को आदर-सम्मान नि करदिन, पाप करदिन, दुष्‍ट जीवन जीण वळा छिन, अर परमेस्वर की बातों तैं नि मणदिन, अर ब्वे-बबों तैं जान से मरण वळा, अर हत्या भि करदिन।</verse>
				<verse number="10">अर जु लोग दुसरो का दगड़ा मा सरील का गळत सम्बन्ध रखदिन, जन कि एक बैख दुसरा बैख का दगड़ा मा अर ठिक उन्‍नि एक जनानि दुसरि जनानि का दगड़ा मा सरील का सम्बन्ध रखदी हो, अर जु गुलाम लोगु तैं बिकौण को काम करदिन, झूठ्‍ठ बुल्दिन अर झूठ्‍ठी कसम खनदिन, अर जु लोग सच्‍चा उपदेस का विरोध मा जाळसाजि बणौन्दिन, इन्द्रया लोगु खुणि परमेस्वर का रैबर्या मूसा का द्‍वारा नियम-कानून दियूं च।</verse>
				<verse number="11">अर या अच्छी शिक्षा वे शुभ समाचार बटि औन्दी, जु आसीस तैं देण वळा महान परमेस्वर को च। अर मितैं वेको परचार करण की जबाबदारी दिईं च।</verse>
				<verse number="12">मि हमरा प्रभु मसीह यीशु को धन्यवाद करदु, जैन मितैं मजबूत बणै। किलैकि वेन मितैं बिस्वासयोग्य समझि के अपणी सेवा करणु खुणि ठैरै।</verse>
				<verse number="13">हालांकि, मि पैलि वेकी बेजती करण वळु, वेका लोगु तैं सतौण वळु अर हुणदंग मचौण वळु छौ, पर फिर भि वेन अपणी दया मि पर कैरी। किलैकि तब मि यीशु मसीह पर बिस्वास नि करदु छौ, अर नि जणदु छौ कि मि क्या कनु छौ।</verse>
				<verse number="14">अर मि पर प्रभु की किरपा भरपूरी से ह्‍वे, अर ईं किरपा का दगड़ा मा मितैं बिस्वास अर प्यार भि मिली, अर यू यीशु मसीह का दगड़ा मा जुड़यां रौण से मिली।</verse>
				<verse number="15">अर या बात सच्‍च च अर पूरि तरौं से मनण का लैख च कि, “यीशु मसीह ईं दुनियां मा पापियों तैं बचौणु खुणि ऐ,” किलैकि ऊं सब पापियों मा बटि सबसे बड़ु पापि मि छौं।</verse>
				<verse number="16">पर तभि भि परमेस्वर न मि पर अपणी दया कैरी। अर यीशु मसीह मा सौणे की कथगा ताकत च इन दिखौण खुणि वेन मि जन सबसे बड़ा पापि तैं चुणी, अर अपणा काम खुणि इस्तेमाल कैरी। ताकि जु लोग सदनि को जीवन जीणु खुणि यीशु पर बिस्वास करदिन, ऊं सब लोगु खुणि मि एक उदारण बणि जौं।</verse>
				<verse number="17">अर हमरु परमेस्वर हमेसा-हमेसा खुणि राजा च। अर वेतैं कभि कैन नि देखि अर ना ही वेन कभि नास होण। वे ही एकमात्र परमेस्वर तैं सदनि आदर-सम्मान मिलु अर वेकी बडै सदनि तक होणी रौ। आमीन।</verse>
				<verse number="18">हे मेरा नौना तीमुथियुस, तू बिस्वास मा मजबूत बणयूं रौ। अर तिन परमेस्वर खुणि जु-जु काम करण छिन, वेका बारा मा भौत सा रैबर्यों न भविष्यबाणियाँ करिनी। अर जु कुछ भि ऊंका द्‍वारा बुले गै ऊंका मुताबिक ही मि त्वेतै आज्ञा देन्दु, कि तू एक सिपै की तरौं झूठ्‍ठा गुरु लोगु की शिक्षा का खिलाप एक अच्छी लड़ै कैर। अर सच्‍चा मन से अर बिस्वास रखी के इन्‍नि कनु रौ, किलैकि कुछ लोग न सच्‍चा मन का विचारों तैं नाकारियाली। फिर जन समुन्दर मा जाज टूटी के नास ह्‍वे जान्दु, ठिक उन्‍नि ऊंका बिस्वास को भि नास ह्‍वे गै।</verse>
				<verse number="19"></verse>
				<verse number="20">अर ऊं मदि हुमिनयुस अर सिकन्दर ही इन्द्रया लोग छिन। अर मिन ऊंतैं शैतान का हाथ मा सौंप्याली। ताकि वु परमेस्वर को अपमान करण को पाठ सिखी सैका।</verse>
			</chapter>
			<chapter number="2">
				<verse number="1">अर अब सबसे पैलि मि तुमतै इन उपदेस देन्दु, कि तुम हरेक मनखि खुणि प्रार्थना कैरा। अर मि तुम बटि बिन्ती करदु, कि तुम राजाओं खुणि अर सबसे बड़ा पद वळो खुणि भि प्रार्थना निवेदन कैरा, अर धन्यवाद की प्रार्थना कैरा। ताकि परमेस्वर को आदर हो अर हम अच्छु अर शान्ति को जीवन जी सैका। किलैकि यू सब हमतै बचौण वळा परमेस्वर की नजर मा भलु च, अर यों बातों से उ खुश होन्दु।</verse>
				<verse number="2"></verse>
				<verse number="3"></verse>
				<verse number="4">अर परमेस्वर की इच्छा या च कि सब मनखियों तैं बचयै जौ, अर ज्वा बात सच्‍च च वेतैं ऊ ढंगल जाणि सैका।</verse>
				<verse number="5">किलैकि परमेस्वर एक ही च, अर वेका अर मनखियों का बीच मा एक ही बिचलु च, अर वु यीशु मसीह च।</verse>
				<verse number="6">अर वेन हरेक मनखि तैं वेका पापों बटि छुटकारा देण खुणि, अफ तैं एक दाम का रुप मा दे दिनी। अर इन कैरिके वेन ठिक बगत पर इन गवै देई, कि वेकी मनसा इन च कि हरेक मनखि तैं बचयै जौ।</verse>
				<verse number="7">इलै ही परमेस्वर न मितैं खास चेला अर परचार करण वळा का रुप मा चुणी। ताकि बिस्वास अर सच्‍च क्या च, वेका बारा मा मि ऊं लोगु तैं सिखौ जु यहूदी जाति का नि छिन। अर मि सच्‍च बोन्‍नु छौं, या बात झूठ्‍ठी नि च।</verse>
				<verse number="8">अर मि यू चान्दु छौं, कि बैख हर जगा मा गुस्सा अर घपरोळ तैं छोड़ि के पवित्र दिल से अपणा हाथों तैं उठे के प्रार्थना कैरो।</verse>
				<verse number="9">अर उन्‍नि मि चान्दु, कि जनानियां भि दुसरो तैं दिखाणु खुणि अपणा बाळो तैं बन्‍नि-बन्‍नि किसम से नि बणा, अर ना दिखाणु खुणि सोना, मोति अर मैंगा कपड़ा पैरा। पर मि तुमतै बतै देन्दु कि तुमतै क्या करण चयेणु, तुम सीदी-सादी बणि के अर ढंग का कपड़ा पैरि के तयार ह्‍वा। अर भलै का कामों का द्‍वारा अपणा जीवन तैं सजा,</verse>
				<verse number="10">किलैकि परमेस्वर की भक्‍ति करण वळी जनानियों खुणि यू ही भलु च।</verse>
				<verse number="11">अर एक जनानि तैं शान्त सभौ को होण चयेणु, अर अधीन मा रै के सिखण चयेणु,</verse>
				<verse number="12">अर मि वींतैं इन अनुमति नि देन्दु कि वा शिक्षा द्‍यो अर बैख पर अधिकार चलौ। पर वा चुपचाप रौ,</verse>
				<verse number="13">किलैकि पैलि परमेस्वर न आदम तैं बणै अर तब हवा तैं बणै छौ।</verse>
				<verse number="14">अर आदम तैं भरमै नि गै, मगर हवा भकलौण मा ऐ गै अर वींन परमेस्वर की आज्ञा तोड़ि।</verse>
				<verse number="15">अगर वा जनानि बच्‍चा पैदा करण का बाद माँ बणण की जिमेदारी तैं पूरु करली, अर अच्छु व्यौहार बणै के रखलि अर बिस्वास मा मजबूत बणि राली, अर एक-दुसरा बटि प्यार करली, अर अपणा चाल-चलन तैं पवित्र बणै के रखलि त वींतैं बचयै मिली जालु।</verse>
			</chapter>
			<chapter number="3">
				<verse number="1">अर या बात सच्‍च च अर पूरि तरौं से मनण लैख च, कि अगर कुई बिस्वासी समुदाय को अध्यक्ष बणण चान्दु, त उ अच्छा काम करण की इच्छा भि रखदु।</verse>
				<verse number="2">इलै एक अध्यक्ष इन जीवन ज्यो कि कुई भि वे पर दोष नि लगै सैको, अर वेकी एक ही घरवळी हो अर उ अपणा सरील तैं अपणा काबू मा रखण वळो हो, अर उ लोगु का दगड़ा मा अच्छु बरतौ कैरो। अर लोग वेको आदर-सम्मान कैरा, अर उ एक अच्छु जीवन ज्यो, अर उ मैमानदारी निभौण मा भि खूब हो, अर अच्छी शिक्षा देण वळो भि हो।</verse>
				<verse number="3">अर उ सराबी ना हो, अर ना ही मार-पीट करण वळु, पर वेतैं शान्त सभौ को होण चयेणु, अर नऽ त उ झगड़ा करण वळु हो, अर ना ही धन को लालच करण वळु।</verse>
				<verse number="4">अर उ अपणा घौर परिवार को पालन-पोसण ढंगल करदु हो, अर अपणा बाल-बच्‍चों तैं अपणा अनुसासन मा रखदु हो। अर वेका बच्‍चा वेको पूरु आदर-सम्मान करदा हो।</verse>
				<verse number="5">अगर कुई अपणा घौर को पालन-पोसण करण ही नि जणदु हो, त उ परमेस्वर का लोगु की देख-रेख कनकै करलु?</verse>
				<verse number="6">अर उ अध्यक्ष एक नयू बिस्वासी मनखि ना हो, निथर उ भौत बड़ु मोन करलु अर जन दण्ड शैतान तैं मिलण उन्‍नि वेतैं भि मिललु।</verse>
				<verse number="7">अर बिस्वास नि करण वळा लोगु मा भि वेको नौ हो, निथर वु लोग वेकी बेजती करला अर उ शैतान का जाल मा फंसी जालु।</verse>
				<verse number="8">अर उन्‍नि बिस्वासी समुदाय की सेवा मा मदद करण वळा सेवकों तैं इन होण चयेणु जौं को लोग आदर-सम्मान कैरा। अर वु दुई किसमे की बात करण वळु अर ना ही दरोळया, अर ना ही बुरा कामों बटि धन-दौलत कमाण की इच्छा रखण वळा हो।</verse>
				<verse number="9">पर बिस्वास का बारा मा जु सच्‍चु रैबार परमेस्वर न दिखै वेतैं अच्छा मन से अपणा जीवन मा रखण चयेणु।</verse>
				<verse number="10">अर बिस्वासी समुदाय की सेवा मा मदद करण वळा बणण से पैलि ऊंतैं परखै जौ, अगर ऊंका खिलाप कुई दोष नि लगलु, त उ समुदाय की सेवा मा मदद करण वळा बणि सकदिन।</verse>
				<verse number="11">अर उन्‍नि बिस्वासी समुदाय की सेवा मा मदद करण वळो की जनानियां भि इन अच्छु जीवन बिता, ज्यां से की लोग ऊंको आदर-सम्मान कैरा। अर ऊ कै पर दोष लगौण वळी नि हो बल्किन शान्त सभौ की अर सब बातों मा बिस्वासयोग्य हो।</verse>
				<verse number="12">अर वे सेवक की एक ही घरवळी होण चयेणी, अर उ अपणा बाल-बच्‍चों अर घौर को एक अच्छु इंतजाम करण वळु हो।</verse>
				<verse number="13">किलैकि अगर एक सेवक बिस्वासी समुदाय मा अच्छी सेवा करदु त वेतैं आदर-सम्मान मिललु, अर जु बिस्वास वेन प्रभु यीशु मसीह पर कैरी, वेका बारा मा और लोगु तैं बतौण मा वेतैं हिम्मत मिलदी।</verse>
				<verse number="14">मि त तेरा पास जल्दी औण चान्दु, पर फिर भि मि या चिठ्‍ठी लिखणु छौं।</verse>
				<verse number="15">किलैकि अगर जु मेरा औण मा देर ह्‍वे जालि त त्वेतै इन पता होण चयेणु, कि परमेस्वर का परिवार मा एक मनखि तैं कनकै रौण चयेणु। किलैकि यू त ज्यून्दा परमेस्वर को बिस्वासी समुदाय च अर यू बिस्वासी लोग शुभ समाचार की सच्‍चै को एक खम्बा अर बुनियाद का जन छिन।</verse>
				<verse number="16">हम जु बिस्वास करद्‍यां वेकी सच्‍चै भौत गम्भीर च अर ईं बात मा कुई भि सक नि च। किलैकि या बात सच्‍च च कि, यीशु मसीह न मनखि का रुप मा जनम ले, अर उ पवित्र आत्मा का द्‍वारा धरमी ठैरै गै, अर स्वर्गदूतों तैं दिखै, अर हर जगा वेको परचार किये गै। तब ईं दुनियां का लोगु न वे पर बिस्वास कैरी, अर बड़ा आदर-सम्मान का दगड़ा मा उ स्वर्ग मा उठये गै।</verse>
			</chapter>
			<chapter number="4">
				<verse number="1">अर पवित्र आत्मा साफ-साफ बुल्दु, कि औण वळा दिनों मा कुछ लोग बिस्वास बटि भटकी जाला, अर भरमौण वळी आत्मा का उपदेसों अर खबेसों की शिक्षा पर मन लगाला।</verse>
				<verse number="2">अर यू सब ऊं झूठ्‍ठा ढोंगि लोगु का द्‍वारा होलु जौं तैं भलै अर बुरै को ज्ञान नि च, यों को मन लुअळ डामी के नास होयां का जन च।</verse>
				<verse number="3">अर यू लोग ब्यौ नि करण की शिक्षा द्‍याला, अर कुछ खाण वळी चीजों खुणि भि मना करला जौं चीजों तैं परमेस्वर न इलै बणै, ताकि बिस्वास करण वळा अर सच्‍चै तैं जनण वळा धन्यवाद कैरिके खै सैका।</verse>
				<verse number="4">अर परमेस्वर न जु कुछ भि बणै वु सब कुछ खूब च, इलै वामा बटि कै को भि तिरिस्कार नि किये जौ, पर वेतैं धन्यवाद देके खाण चयेणु</verse>
				<verse number="5">किलैकि परमेस्वर का दियां वचन अर प्रार्थना का द्‍वारा सब कुछ शुद्ध ह्‍वे जान्दु।</verse>
				<verse number="6">हे तीमुथियुस, अगर तू यों सब बातों तैं परमेस्वर पर बिस्वास करण वळा भै-बैंणो तैं सिखैली, त तू यीशु मसीह को एक अच्छु चेला ठैरीलि। अर जु बिस्वास का वचन अर अच्छी शिक्षा तैं तू अब तक मणदी छैई, वेमा तू बढणी रैलि।</verse>
				<verse number="7">पर तू झूठ्‍ठा उपदेस देण वळो बटि अर फालतु की मनगणत कथा से दूर रै, पर परमेस्वर की भक्‍ति करण की आदत डाल दे।</verse>
				<verse number="8">किलैकि सरील की कसरत कैरिके कुछ फैदा त होन्दु च, पर परमेस्वर की भक्‍ति करण से सब बातों मा फैदा ही फैदा होन्दु। अर जु मनखि परमेस्वर की भक्‍ति करदु, वेतैं ये जीवन मा अर सदनि का जीवन मा भि फैदा होलु, जु की बाद मा मिलण वळु च अर वेको करार परमेस्वर को कर्युं च।</verse>
				<verse number="9">अर जु बात मिन अभि तुम बटि बुलिनी, यू सच्‍च छिन अर मनण का लैख छिन।</verse>
				<verse number="10">इलै हम कठिन मेनत करद्‍यां, किलैकि हम ज्यून्दा परमेस्वर पर अपणी आस रखद्‍यां, जु की सब लोगु तैं बचौण वळु च, खास कैरिके ऊं लोगु तैं जु की वे पर बिस्वास करदिन।</verse>
				<verse number="11">अर यों बातों की आज्ञा देणु रौ अर येका बारा मा सिखौणु रौ।</verse>
				<verse number="12">हे तीमुथियुस, अभि तू ज्वान छैई, अर कुई भि तेरी ज्वानी तैं सुद्‍दी नि समझु। इलै तू बोन्‍न मा अर अपणा चाल चलण मा, प्यार करण मा, अर तेरा खुद का बिस्वासी जीवन मा, अर पवित्र जीवन जीण मा बिस्वासी लोगु खुणि तू एक नमूना बणि जा।</verse>
				<verse number="13">अर जब तक मि ऐ नि जौ, तब तक तू बिस्वासी लोगु का बीच मा वचन पढण मा, उपदेस देण मा अर ऊंतैं शिक्षा देणु खुणि अफ तैं इस्तेमाल कैर।</verse>
				<verse number="14">अर जब बिस्वासी समुदाय का अध्यक्ष लोगु न तेरा मुण्ड़ मा हाथ रखी के भविष्यबाणी कैरी छै, तब त्वेतै जु दान-बरदान मिली छा, ऊं पर ध्यान देणु रौ।</verse>
				<verse number="15">अर तू ऊं बातों पर अपणु मन अर ध्यान भि लगौ। ताकि तेरु फलण-फुलण सब लोगु तैं दिख्यो। अर तू अफ पर अर जौं बातों तैं तू सिखौणि छैई ऊं बातों पर भि ध्यान दे।</verse>
				<verse number="16">हाँ, तू इन्‍नि कनु रै, किलैकि इन कैरिके तू खुद तैं अर सुनण वळो तैं बचै दिली।</verse>
			</chapter>
			<chapter number="5">
				<verse number="1">अर मि त्वेतै इन भि बतै देन्दु, कि कै भि दाना-स्यांणा का दगड़ा मा सख्‍तै से पेस नि ऐ, पर ऊंतैं बुबा का जन समझि के प्यार से समझौ। अर ठिक उन्‍नि ज्वानों तैं भै समझि के समझौ, अर दानी जनानियों तैं अपणी माँ का जन समझि के, अर ज्वान जनानियों तैं बैंण समझि के ऊं बटि पवित्र मन से बात किया कैर।</verse>
				<verse number="2"></verse>
				<verse number="3">अर इन्दरि विधवा जनानियों को ध्यान रखा, जौं को सच्‍चि मा कुई भि मददगार नि च।</verse>
				<verse number="4">अर अगर कै विधवा का बाल-बच्‍चा या नाति-नतेणा हो, त वु बाल-बच्‍चा अर नाति-नतेणा अपणा परिवार का लोगु की देख-रेख कैरा। अर इन ऊ इलै कैरा किलैकि पैलि ऊंका ब्वे-बाब न देख-रेख कैरी छै, अर या ही बात परमेस्वर तैं अच्छी लगदी।</verse>
				<verse number="5">अगर कुई विधवा जनानि इखुली च, अर वीं की देख-रेख करण वळु कुई नि हो, अर वा परमेस्वर पर बिस्वास कैरिके दिन-रात प्रार्थना बिन्ती करणी रौन्दी हो, त इन्दरि जनानि ही सच्‍च मा विधवा च, अर वींतैं ही मदद मिलण चयेणी।</verse>
				<verse number="6">पर जु विधवा जनानि मौज-मस्ती मा रौन्दी, त वा ज्यून्दु होण का बाद भि मुरयां का जन च।</verse>
				<verse number="7">अर यों बातों को पालन करण खुणि बिस्वासी लोगु तैं आज्ञा देणु रौ, ताकि कुई भि मनखि ऊं पर दोष नि लगै सैको।</verse>
				<verse number="8">पर अगर कुई अपणा रिश्तेदारों अर अपणा परिवार की देखभाल नि कैरी सकदु, त वेन इन कैरिके बिस्वास को तिरिस्कार कैरियाली, अर वु बिस्वास नि करण वळा लोगु से भि जादा बुरु मनखि बण गै।</verse>
				<verse number="9">अर ज्वा विधवा साठ साल से मथि हो, अर जिं न एक ही ब्यौ कैरी हो, अर जिं को नौ अच्छा कामों मा हो, अर जिं न अपणा बाल-बच्‍चों को खूब अच्छा से पालन-पोसण कैरी हो, अर मैमानदारी भि खूब अच्छा से निभै हो, अर जिं न नमर सभौ रखी के बिस्वासी लोगु की सेवा कैरी हो, अर दुखी लोगु की मदद कैरी हो, अर सब अच्छा काम करण खुणि तयार रौन्दी हो, इन्दरि विधवाओं को नौ ही वीं मदद करण वळी लिस्ट मा लिखे जौ, अर बिस्वास समुदाय का लोग वीं की मदद कैरा।</verse>
				<verse number="10"></verse>
				<verse number="11">पर ज्वान विधवाओं को नौ वीं लिस्ट मा नि लिखा, किलैकि ऊ अपणा सरील की इच्छा तैं पूरि करण का बाना यीशु मसीह तैं छोड़ि के ब्यौ करण चनदिन।</verse>
				<verse number="12">अर ऊं पर दोष लगै जालु, किलैकि जु करार ऊंन पैलि कैरी छौ, वे करार तैं ऊंन तोड़ि दिनी।</verse>
				<verse number="13">अगर इन्दरि विधवाओं की मदद होलि, त वु अळकसि ह्‍वे जालि। इथगा ही ना पर उ बेमतलब मा घौर-घौर घूमी के एक-दुसरे की छुईं ही लगाली। अर जु-जु बात बोन्‍न ठिक नि होनदिन वु सब बात यू बोललि।</verse>
				<verse number="14">इलै मेरी इच्छा च, कि जु विधवा ज्वान छिन, वु ब्यौ कैरा अर बच्‍चों तैं जनम देके अपणु-अपणु घौर-बार समाळा। ताकि विरोध करण वळा मनखियों तैं इन्द्रयो कुई सवाल नि मिली सैको।</verse>
				<verse number="15">किलैकि कुछ विधवाओं न परमेस्वर की आज्ञा को पालन करण छोड़ि के शैतान की इच्छा का मुताबिक चलण शुरु कैरियाली।</verse>
				<verse number="16">अगर कै बिस्वासी बैंण का घौर मा विधवा छिन, त वा बिस्वासी बैंण ऊंकी देख-रेख कैरो, अर बिस्वासी समुदाय पर भार नि डालु। अर इन वा इलै कैरो, ताकि जौं विधवाओं तैं सच्‍चि मा मदद मिलण चयेणी, ऊंकी मदद बिस्वासी समुदाय कैरी सैको।</verse>
				<verse number="17">अर बिस्वासी समुदाय का अध्यक्ष जु की समुदाय मा अच्छी सेवा करदिन, खास कैरिके वु लोग जु की वचन को परचार करण मा अर वेतैं सिखौण खुणि कठिन मेनत करदिन, हाँ ऊंतैं और भि जादा आदर-सम्मान मिलण चयेणु।</verse>
				<verse number="18">किलैकि पवित्रशास्‍त्र मा इन लिख्यूं च कि, “जब बल्द खल्याण मा दैं करणु खुणि धूमणा रौनदिन, त ऊंका गिच्‍चा पर म्वाळा नि बान्धि” अर ठिक उन्‍नि, “काम करण वळो तैं ऊंकी ध्याड़ि जरुर मिलण चयेणी।”</verse>
				<verse number="19">अर कै भि अध्यक्ष का खिलाप मा लग्यां इळजाम तैं तब तक स्वीकार नि कैरी, जब तक की दुई या तीन लोग गवै नि देन्दिन।</verse>
				<verse number="20">अर बार-बार पाप करण वळा तैं सभि लोगु का समणि झिड़की, ताकि वेतैं देखि के दुसरा बिस्वासी लोग भि पाप करण से डौऽरा।</verse>
				<verse number="21">हे तीमुथियुस, मि परमेस्वर अर यीशु मसीह अर चुण्यां स्वर्गदूतों तैं गवा माणी के त्वेतै या आज्ञा देन्दु, कि तू खुला मन से यों सब बातों को पालन कैर, अर कै का दगड़ा मा भि पक्षपात नि कैरी।</verse>
				<verse number="22">अर कै भि मनखि पर हाथ रखी के वेतैं अध्यक्ष का पद पर रखणु कू जल्दबाजी नि कैर। अर ना ही दुसरो का पापों मा साझी हो, बल्किन मा खुद तैं पवित्र बणै के रख।</verse>
				<verse number="23">अर अपणा पुटगा मा होण वळी बार-बार की पीड़ा से बचणु खुणि पाणि ही पाणि नि पीणु रौ, बल्किन मा जरा-जरा अंगूरों को रस भि पी ले।</verse>
				<verse number="24">अर कुछ लोग पाप करदिन अर ऊंकी जाँच-पड़ताल होण से पैलि ही लोगु तैं पता चलि जान्दु, कि वु लोग पापि छिन। पर कुछ लोग त लुकि-छिपी के पाप करदिन, अर ऊंकी जाँच-पड़ताल होण तक कैतैं भि कुछ पता नि चलदु। अर ठिक उन्‍नि कुछ लोगु का भला काम भि सभ्यों तैं पता चलि जनदिन। अर जौं भला कामों का बारा मा पता नि होन्दु, वु काम भि हमेसा खुणि छिप्यां नि रै सकदिन।</verse>
				<verse number="25"></verse>
			</chapter>
			<chapter number="6">
				<verse number="1">अर जथगा भि लोग गुलामी का जुवा तौळ दबयां छिन, ऊ अपणा-अपणा मालिकों को हरेक बात मा आदर-सम्मान कैरा, ताकि परमेस्वर का नौ अर जु रैबार हम सिखौन्द्‍यां, वेतैं कुई भि भलु-बुरु नि बोल सैको।</verse>
				<verse number="2">अर जौं गुलामों का मालिक बिस्वासी लोग छिन, त ऊ अपणा मालिकों तैं एक बिस्वासी भै समझि के ऊंतैं कम आदर-सम्मान नि द्‍यो, पर ऊ जादा से जादा वेको काम कैरो। किलैकि ऊंका कामों का द्‍वारा जौं मालिकों को फैदा होणु च, उ परमेस्वर पर बिस्वास करण वळा अर परमेस्वर खुणि प्रिय छिन। अर यों सब बातों तैं दुसरो तैं भि समझौण रौ, अर पालन करण खुणि ऊंतैं हिम्मत भि दे।</verse>
				<verse number="3">अगर कुई झूठ्‍ठी शिक्षा देन्दु हो, अर अपणा प्रभु यीशु मसीह का सच्‍चा वचन तैं जु कि परमेस्वर की भक्‍ति करण की शिक्षा तैं नि मणदु हो,</verse>
				<verse number="4">त उ हर बात मा बड़ु मोन करण वळु च, अर वेतैं कुछ भि पता नि च। अर वु एक शब्द की वजै से की वेको मतलब क्या च भौत बहसबाजी करदु हो, अर इन कैरिके उ जलन रखदु, लड़ै-झगड़ा करदु, अर दुसरा लोगु का बारा मा गळत बुल्दु, अर सक करदु।</verse>
				<verse number="5">अर इन्द्रया लोगु को दिमाग खराब ह्‍वे गै, अर सच्‍च क्या च यू ऊंतैं पता नि ही च। अर वु लोग समझदिन कि परमेस्वर की भक्‍ति करण कमै को एक साधन च। इन्द्रया लोगु मा हमेसा लड़ै-झगड़ा होनदिन।</verse>
				<verse number="6">एक मनखि तैं जथगा मिलदु च, अगर उ उथगा मा ही संतुष्‍ट ह्‍वेके परमेस्वर की भक्‍ति करदु हो, त इन कैरिके वेतैं बड़ु फैदा होलु।</verse>
				<verse number="7">किलैकि ना त हम ईं दुनियां मा कुछ लयां, अर ना ही इख बटि कुछ लेके जै सकद्‍यां।</verse>
				<verse number="8">इलै अगर जु हमरा पास खाणुक कू रुट्‍टी अर पैरणु खुणि कपड़ा हो, त इथगा मा ही संतुष्‍ट होण चयेणु।</verse>
				<verse number="9">पर जु सेठ बणण चनदिन ऊ अजमैस मा पोड़दिन, अर जाल अर खतरनाक मनसा मा पोड़ि जनदिन। अर इन मनसा ऊंतैं बिगाड़ि देन्दी, अर विणास का बाटा मा ले जान्दी।</verse>
				<verse number="10">किलैकि पैसौं को लालच सब बुरै की जड़ च, अर येतैं कमाण खुणि कुछ लोग बिस्वास का बाटा बटि भटकी गैनी, अर अफ पर बन्‍नि-बन्‍नि किसमो का दुखों तैं लेके ऐनी।</verse>
				<verse number="11">पर हे तीमुथियुस परमेस्वर का सेवक, तू यों सब बातों बटि अलग रौ। अर धरमी मनखि बणणे की कोसिस कैर, अर हमेसा परमेस्वर की भक्‍ति कैर अर यीशु मसीह पर बिस्वास कैर, अर सभ्यों बटि प्यार कैर। अर सबर रखण अर नमर सभौ को ह्‍वेके जीवन बितौ।</verse>
				<verse number="12">अर बिस्वास का बाटा बटि भटकी नि जै, बल्किन मा कड़ी मेनत कैर। अर वे ही बिस्वास तैं तिन भौत सा लोगु का समणि कबूल कैरी छौ। अर कखि सदनि का जीवन तैं ख्वे नि दे, ज्यां खुणि परमेस्वर न त्वेतै बुलयूं च।</verse>
				<verse number="13">परमेस्वर सभ्यों तैं जीवन देन्दु, अर प्रभु यीशु मसीह जैन पुन्तियुस पिलातुस का समणि भौत अच्छी गवै देई छै, वे परमेस्वर अर यीशु मसीह का समणि मि त्वेतै आज्ञा देन्दु कि,</verse>
				<verse number="14">हमरा प्रभु यीशु मसीह का वापस औण तक, ईं आज्ञा तैं ज्वा त्वेतै दिये जाणि च, तू बिन गळती कर्यां वेको अच्छा से पालन कनु रौ।</verse>
				<verse number="15">अर पिता परमेस्वर जु कि आदर-सम्मान का लैख च, अर जु एकमात्र राजा च। अर उई राजाओं को राजा अर प्रभुओं को प्रभु च, उई परमेस्वर अपणा ठिक बगत पर प्रभु यीशु मसीह तैं लेके आलु।</verse>
				<verse number="16">अर बस उई परमेस्वर हमेसा खुणि ज्यून्द रालु, अर वेतैं कै मनखि न कभि नि देखि, अर ना ही कभि देखि सकदु। अर वु इन उज्याळा मा रौन्दु, कि वेका पास कुई भि नि जै सकदु, अर वेतैं हमेसा आदर-सम्मान मिललु, अर वेको राज्य सदनि खुणि रालु। आमीन।</verse>
				<verse number="17">हे तीमुथियुस, ईं दुनियां का बिस्वासी सेठों तैं आज्ञा देके समझौ, कि जादा बड़ु मोन कैरिके नि रखा। पर भलै का काम कैरा, हाँ भलै का कामों तैं कैरिके सेठ बणा अर दुसरो की मदद कैरा, अर खुला मन से दान द्‍या। अर जै धनळ जल्दी खतम ह्‍वे जाण वे पर अपणी आस लगै के नि रखा, पर परमेस्वर पर ही अपणी आस बणै के रखा, जु की हमरि खुशी का खातिर सब कुछ भरपूरी से देन्दु। अर यों तैं इन भि बतौ, कि इन कैरिके ऊ अफ खुणि स्वर्ग मा एक खजाना जमा करला, जु की भविष्य मा स्वर्ग मा ऊं खुणि एक खास बुनियाद को काम करलु। अर वेका द्‍वारा ऊंतैं सच्‍चु जीवन मिललु।</verse>
				<verse number="18"></verse>
				<verse number="19"></verse>
				<verse number="20">तीमुथियुस, जु सच्‍चै का वचन त्वेतै दिये गैनी, वु वचन लोगु तैं सिखौणु रौ। अर जु लोग ईं सच्‍चि शिक्षा का खिलाप मा सिखौन्दिन, ऊं लोगु बटि अर ऊंकी बातों से दूर रौ। अर कुछ लोग गळती से वीं गळत शिक्षा तैं “ज्ञान” समझदिन अर वेका बारा मा सिखौन्दिन।</verse>
				<verse number="21">अर कुछ लोग ये ज्ञान तैं स्वीकार कैरिके बिस्वास से भटकी भि गैनी। पर मि तुम खुणि प्रार्थना करदु कि, तुम सभ्यों पर परमेस्वर की किरपा हो।</verse>
			</chapter>
		</book>
		<book number="55">
			<chapter number="1">
				<verse number="1">हे मेरा भै-बैंणो मि पौलुस छौं, अर मितैं परमेस्वर न अपणी इच्छा का मुताबिक यीशु मसीह खुणि खास चेला ठैरै के चुण्यालि। अर मि या चिठ्‍ठी तीमुथियुस खुणि लिखणु छौं, जु कि मेरा प्रिय नौना का जन च। अर जु लोग यीशु मसीह पर बिस्वास करदिन, ऊंतैं जीवन देण को करार परमेस्वर को कर्युं च। अर येका बारा मा बतौणु खुणि ही परमेस्वर न मितैं चुणी के भेज्यूं च। तीमुथियुस मि प्रार्थना करदु कि, पिता परमेस्वर अर हमरु प्रभु यीशु मसीह अपणी किरपा, दया अर शान्ति त्वेतै देणु रौ।</verse>
				<verse number="2"></verse>
				<verse number="3">अर जै परमेस्वर की सेवा मेरा पितरों न कैरी मि भि ठिक उन्‍नि सच्‍चा मन से करदु। अर मि तुमतै अपणी प्रार्थना मा लगातार याद कैरिके परमेस्वर को धन्यवाद करदु।</verse>
				<verse number="4">अर तीमुथियुस जब तू मेरा बाना रुवे छै, ऊ सब मितैं याद औन्दु। अर मेरी इच्छा होन्दी कि मि त्वे बटि मिलु, ताकि मेरी खुशी को कुई ठिकाणु नि रौ।</verse>
				<verse number="5">अर मितैं तेरा सच्‍चु बिस्वास याद औन्दु, जु कि पैलि तेरी ननी लोइस अर तेरी माँ यूनीके न परमेस्वर पर कैरी छौ। अर मितैं पूरु यकीन च, कि उई सच्‍चु बिस्वास अब तेरा जीवन मा भि च।</verse>
				<verse number="6">इलै मि त्वेतै याद दिलै देन्दु, कि जब मिन तेरा मुण्ड़ मा हाथ रखी के प्रार्थना कैरी छै, तब परमेस्वर न जु दान-बरदान त्वेतै दिनी ऊंको इस्तेमाल आग सुलगौण की तरौं कैरा।</verse>
				<verse number="7">किलैकि परमेस्वर न हमतै डौऽर की आत्मा नि दिनी, मगर सामर्थ अर एक-दुसरा बटि प्यार करण वळी अर अपणा जीवन तैं वश मा रखण वळी आत्मा दिईं च।</verse>
				<verse number="8">इलै तीमुथियुस एक-दुसरा तैं हमरा प्रभु यीशु का बारा मा बतौण खुणि सरम मैसूस नि कैर। अर मि प्रभु का काम का बानो जेलखाना मा छौं, इलै मि बटि मिलणु खुणि भि सरम मैसूस नि कैर, पर शुभ समाचार का परचार करणु खुणि परमेस्वर की दिईं ताकत से दुख-तकलीफ झिलणु खुणि मेरा दगड़ा मा तयार रौ।</verse>
				<verse number="9">अर परमेस्वर न हमतै इलै नि बचै, कि हमुन भौत अच्छा काम करिनी। पर वेन त हम पर अपणी दया कैरिके अपणी मनसा तैं पूरि करणु खुणि हमतै बुलै। किलैकि परमेस्वर न दुनियां की शुरुवात से ही पैलि अपणी दया यीशु मसीह का द्‍वारा हम पर दिखै, अर हमतै बचौण की योजना बणै। अर वेन हमतै इलै बचै, ताकि हम एक पवित्र जीवन जी सैका।</verse>
				<verse number="10">पर जब हमरु बचौण वळु यीशु मसीह ईं दुनियां मा ऐ, तब वेन परमेस्वर की किरपा हम पर परगट कैरी अर वेन ही मौत की ताकत को नास कैरी। अर जथगा भि लोगु न वेका शुभ समाचार तैं अपणा जीवन मा स्वीकार कैरी, वेन ऊं लोगु तैं परमेस्वर का दगड़ा मा सदनि को जीवन जीण को मौका दियाली।</verse>
				<verse number="11">अर ये ही शुभ समाचार तैं फैलाणु खुणि अर लोगु तैं सिखौणु खुणि वे परमेस्वर न मितैं एक खास चेला का रुप मा चुण्यालि।</verse>
				<verse number="12">इलै मि दुख सौन्दु छौं, अर ईं बात मा मितैं कुई सरम नि औन्दी, किलैकि मिन यीशु पर बिस्वास कैरी अर वेका बारा मि जणदु छौं। अर मितैं पूरु यकीन च कि जु शुभ समाचार पिता परमेस्वर न मि मा सौंपी, वेतैं आखिरी का दिन तक समाळि के रखण मा उ ताकतबर च।</verse>
				<verse number="13">अर ज्वा सच्‍चि शिक्षा मिन तुमतै सिखै, वींमा बणयां रा। अर हे तीमुथियुस, तू भि यीशु मसीह पर बिस्वास कैर अर सभ्यों से प्यार कैर अर ज्वा सच्‍चि शिक्षा मिन त्वेतै सिखै वा ऊंतैं भि सिखौ।</verse>
				<verse number="14">अर जै शुभ समाचार की शिक्षा त्वेतै दिईं च तू वीं शिक्षा तैं ऊं बटि बचै के रख जु गळत शिक्षा तैं देन्दिन, अर यू सब कुछ त्वेमा रौण वळा पवित्र आत्मा की मदद से किये जौ।</verse>
				<verse number="15">अर तू जणदी ही छैई, कि आसिया मुलक का भौत सरा बिस्वासी लोग मितैं छोड़ के चलि गैनी। जौं मा बटि फूगिलुस अर हिरमुगिनेस छिन।</verse>
				<verse number="16">अर मि प्रार्थना करदु, कि उनेसिफुरुस का घौर मा रौण वळा सब लोगु पर परमेस्वर कि दया हो, किलैकि जब मि बेड़ियों मा कैद होयुं छौ, तब उ मितैं मिलण से नि सरमै। पर उ बार-बार मितैं मिलणु कू ऐ अर वेन मेरी हिम्मत भि बढै।</verse>
				<verse number="17">अर जब उ रोम नगर मा छौ, त वेन मितैं बड़ी मुस्किलन खुजै अर मि बटि मिली।</verse>
				<verse number="18">अर मि इन आस रखदु कि आखिरी मा होण वळा न्याय का दिन पर प्रभु उनेसिफुरुस पर दया कैरो। किलैकि तू अच्छे से जणदी छैई, कि इफिसुस नगर मा उनेसिफुरुस न कथगा अच्छी सेवा कैरी छै।</verse>
			</chapter>
			<chapter number="2">
				<verse number="1">हे मेरा नौना तीमुथियुस, तू यीशु मसीह की किरपा मा मजबूत ह्‍वे जा।</verse>
				<verse number="2">अर जु बात तिन भौत सरा लोगु का समणि मि बटि सुणी छिन, ऊं बातों तैं तू ऊं लोगु का हाथों मा सौंप दे जु बिस्वास करण का लैख छिन अर वु दुसरो तैं भि सिखौण वळा हो।</verse>
				<verse number="3">अर यीशु मसीह का एक अच्छा सिपै का जन मेरा दगड़ा मा दुख भोग।</verse>
				<verse number="4">अर जु मनखि परमेस्वर का सिपै को काम करदु, उ दुनियां का कामों मा नि फसदु, किलैकि उ हमेसा अपणा चुनण वळा अधिकारी तैं खुश रखण चान्दु जु कि वेतैं अगनै लि जान्दु।</verse>
				<verse number="5">अर अगर कुई कुस्ति लड़दु, त वेतैं नियमों का मुताबिक लड़ण पोड़लु, निथर वेतैं इनाम नि मिललु।</verse>
				<verse number="6">अर जु किसान कड़ी मेनत करदु, उ फसल की पैलि उपज लेण का लैख च।</verse>
				<verse number="7">अर मेरी यों बातों पर ध्यान दे, अर प्रभु सब बातों तैं बिंगण मा तेरी मदद करलु।</verse>
				<verse number="8">अर मेरा दियां शुभ समाचार मा मिन बोलि छौ, कि यीशु मसीह को जनम राजा दाऊद का वंश मदि ह्‍वे, अर जु मुरण का बाद भि ज्यून्द ह्‍वे गै वेतैं हमेसा याद रखा।</verse>
				<verse number="9">अर ये शुभ समाचार तैं सुनौण का खातिर ही मि दुख-तकलीफ उठाणु छौं। अर इख तक कि यों न मितैं एक कैदी का जन बेड़ियों से बान्धि के जेलखाना मा रख्युं च, पर तभि भि परमेस्वर का वचन तैं फैलण से कुई नि रोकी सकदु।</verse>
				<verse number="10">अर जौं लोगु तैं परमेस्वर न चुण्यूं च, ऊंतैं भि यीशु मसीह का द्‍वारा छुटकारा मिललु। अर जिं जगा मा परमेस्वर का दगड़ा सदनि को आदर-सम्मान मिलदु, वीं जगा पर वु लोग भि जीवन ज्याला। इलै मि ऊं खुणि यू दुख उठाणु छौं।</verse>
				<verse number="11">अर या बात सच्‍च च कि, अगर जु हम यीशु मसीह का दगड़ा मा मोर ग्यां, त वेका दगड़ा मा जीवन भि जीणा रौला।</verse>
				<verse number="12">अर अगर जु हम यीशु मसीह का दगड़ा मा सबर रखी के दुख उठाणा रौला, त वेका दगड़ा मा राज भि करुला। अर अगर जु हम वेतैं स्वीकार नि करुला, त उ भि हमतै स्वीकार नि करलु।</verse>
				<verse number="13">अगर जु हम बिस्वास नि करुला, त तभि भि उ हमरा दगड़ा मा बिस्वास का लैख बणयूं रालु। किलैकि उ अपणी बात बटि मुकुरदु नि च, अर ना ही झूठ्‍ठ बुल्दु।</verse>
				<verse number="14">हे तीमुथियुस, तू यों सब बातों तैं बिस्वासी लोगु तैं याद करै दे। अर परमेस्वर तैं गवा माणी के ऊंतैं आदेस दे, कि यू लोग पवित्रशास्‍त्र का एक-एक शब्द का बानो बहसबाजी नि कैरा। किलैकि इन कैरिके कुई फैदा नि होन्दु, पर सुनण वळो का बिस्वास मा उळझण पोड़ि जान्दी अर ऊंका बिस्वास को नास ह्‍वे जान्दु।</verse>
				<verse number="15">अर तू भौत मेनत कैर, ताकि तेरी मेनत देखि के परमेस्वर त्वेतै सेवा करण का लैख समझु। अर तू अच्छा काम करण वळु, अर परमेस्वर का सच्‍चा वचन तैं अच्छा से सिखौण वळु बण, ताकि वेका द्‍वारा कुई त्वेतै छुटो नि समझु।</verse>
				<verse number="16">अर जु लोग परमेस्वर का वचन का खिलाप मा सिखौन्दिन, तू इन्दरि गळत शिक्षा देण वळो बटि अलग रौ। किलैकि इन्दरि बातों से लोग परमेस्वर बटि दूर ह्‍वे जनदिन।</verse>
				<verse number="17">अर जन ददरो सरील मा भौत जल्दी फैलदी, ठिक उन्‍नि झूठ्‍ठी शिक्षा भि लोगु का बीच मा भौत जल्दी फैलदी च। अर वा झूठ्‍ठी शिक्षा देण वळा हुमिनयुस अर फिलेतुस छिन।</verse>
				<verse number="18">जु इन बोलि के सच्‍चै का बाटा बटि भटक गैनी, कि हम त मुरदो मा बटि ज्यून्दा ह्‍वे ग्यां। इन बोलि के ऊंन कुछ लोगु का बिस्वास को नास कैरियाली।</verse>
				<verse number="19">तभि भि जु लोग परमेस्वर पर बिस्वास करदिन, वु परमेस्वर का द्‍वारा बणयां घौर की मजबूत बुनियाद का जन छिन। अर ऊंका बिस्वास को नास कभि नि होलु, बल्किन मा वु घौर की मजबूत बुनियाद का जन सदनि टिक्यां राला। इलै परमेस्वर का वचन मा इन लिख्यूं च कि, “जु प्रभु का लोग छिन, ऊंतैं उ पछ्याणदु च,” अर जु इन बुल्दा छिन कि, “हम त परमेस्वर का छां, वु लोग बुरै बटि दूर रा।”</verse>
				<verse number="20">अर कै सेठ मनखि का घौर मा केवल सोना-चांदी का भाँडा ही नि होनदिन, बल्किन मा लखड़ा अर माटा का भि होनदिन। अर कुछ त खास काम खुणि इस्तेमाल किये जनदिन, मगर कुछो को इस्तेमाल साधारण काम खुणि किये जान्दु।</verse>
				<verse number="21">अगर कुई मनखि खुद तैं बुरै बटि दूर रखी के खुद तैं शुद्ध करलु, त उ वे भाँडा का जन च जैतैं कै खास काम खुणि इस्तेमाल लिये जान्दु। तब वे मनखि को जीवन पवित्र ह्‍वे जालु, अर वेको इस्तेमाल प्रभु का हरेक अच्छा काम खुणि किये जालु।</verse>
				<verse number="22">हे तीमुथियुस, इलै तू ज्वानी की बुरी इच्छाओं बटि बचि के रौ, अर पिता परमेस्वर की नजर मा एक धरमी जीवन जीण सीख, अर भरोसा का काबिल बण, अर एक-दुसरा का दगड़ा मा मेल-जोल अर प्यार से रौ। अर ऊं लोगु का दगड़ा मा रौ जु साफ मन से प्रभु को नौ लिनदिन, अर वे पर बिस्वास करदिन।</verse>
				<verse number="23">अर जौं बातों को कुई मतलब नि होन्दु अर जु बेकार की छिन तू इन्द्रया वाद-विवादों से दूर रौ, किलैकि तू जणदी ही छैई कि इन्दरि बातों से झगड़ा होनदिन।</verse>
				<verse number="24">अर प्रभु का सेवक तैं झगड़ा करण वळु नि होण चयेणु, पर वेको बरतौ सभ्यों का दगड़ा मा नमर हो। अर उ परमेस्वर का वचन तैं अच्छा से सिखौण वळु, अर हरेक बात तैं सौण वळु हो।</verse>
				<verse number="25">अर जु लोग तुमरि शिक्षा को विरोध करदिन, इन्द्रया लोगु तैं तुमतै नमर बणि के सिखौण वळु होण चयेणु, किलैकि विरोध करण वळा यू लोग शैतान की इच्छा तैं पूरि करणु खुणि वेका जाल मा फंस्यां छिन। अर यों लोगु तैं ईं उम्मीद का दगड़ा मा सिखौ, कि क्या पता परमेस्वर यों तैं भि पस्ताप करण को मन दे द्‍यो, ताकि यू भि सच्‍चै का ज्ञान तैं समझि जा अर चौकस ह्‍वेके शैतान का जाल बटि छुटी जा।</verse>
				<verse number="26"></verse>
			</chapter>
			<chapter number="3">
				<verse number="1">हे तीमुथियुस, तू यू जाणि ले कि आखिरी का दिनों मा बड़ु कठिन बगत औण वळु च,</verse>
				<verse number="2">किलैकि लोग केवल अफ बटि ही प्यार करण वळा, अर अपणा धन-दौलत बटि प्यार करण वळा होला। अर डींग मरण वळा, अपणी सब बातों पर बड़ु मोन करण वळा, अर एक-दुसरा की बेजती करण वळा होला। इख तक की लोग अपणा ब्वे-बबा की बातों तैं भि नि मणला, अर कै का उपकार तैं नि मणला, अर ना ही वु पवित्र जीवन जीण वळा होला।</verse>
				<verse number="3">अर ना वु एक-दुसरा बटि प्यार करणा वळा होला, अर ना ही एक-दुसरा तैं माफ करण वळा होला, बल्किन मा दुसरो पर झूठ्‍ठु दोष लगौण वळा, अर अपणी इच्छाओं तैं पूरि करण वळा होला। अर निठुर जीवन जीण वळा, अर इन्द्रया कामों तैं करण वळा होला जु कि भलै का नि होनदिन।</verse>
				<verse number="4">अर वु लोग एक-दुसरा तैं धोखा देण वळा, बिन सोच्यां काम करण वळा, अर अफ तैं दुसरा से बड़ु समझण वळा। अर परमेस्वर तैं प्यार करण वळा ना, बल्किन मा अपणी मौज-मस्ती की इच्छा तैं रखण वळा ह्‍वे जाला।</verse>
				<verse number="5">अर लोगु तैं दिखाणु खुणि केवल परमेस्वर की भक्‍ति करला, पर परमेस्वर की ताकत तैं नकारी द्‍याला। अर इन्द्रया लोगु बटि तुम अलग रयां।</verse>
				<verse number="6">अर यों मा बटि त कुछ लोग इन्द्रया छिन, जु की सीदी-सादी जनानियों का घौर मा आसानी से घुसी जनदिन। तब यों जनानियों तैं वु अपणी बातों मा फंसै देन्दिन, किलैकि यू जनानियां बन्‍नि-बन्‍नि किसम का पाप मा फंसी रौनदिन, अर हरेक किसम की इच्छाओं तैं रखदिन।</verse>
				<verse number="7">अर यू जनानियां सब किसमे शिक्षाओं तैं सीख जनदिन, पर सच्‍चै क्या च ईं बात तैं नि जणदिन।</verse>
				<verse number="8">अर गळत शिक्षा तैं देण वळा यू लोग भि ठिक यन्‍नेस अर यम्ब्रेस का जन छिन, जौन परमेस्वर का सेवक मूसा को विरोध कैरी छौ। किलैकि गळत शिक्षा तैं देण वळा लोग भि सच्‍चै को विरोध करदिन, अर यों को दिमाग खराब ह्‍वे गै, अर इन के ऊंन अपणा बिस्वास को नास कैरियाली।</verse>
				<verse number="9">पर अब यू लोग कभि अगनै नि जै सकदिन कि लोगु तैं अपणी बातों मा फंसा। किलैकि जन यन्‍नेस अर यम्ब्रेस की मूरखता को पता चलि गै छौ, ठिक उन्‍नि गळत शिक्षा तैं देण वळा लोगु की मूरखता भि सभ्यों का समणि परगट ह्‍वे जालि।</verse>
				<verse number="10">प्रिय तीमुथियुस, तू मेरा चाल-चलन, मेरा मकसद, अर मेरा बिस्वास का बारा मा जणदी ही छैई। अर मि कन्द्रयो प्यार करदु, अर मेरी सौणे की ताकत, अर मेरा सबर रखण का बारा मा त्वेतै पता ही च। अर तू इन भि जणदी छैई, कि लोगु न मितैं सतै अर कन-कन दुख-तकलीफ दिनी।</verse>
				<verse number="11">अन्ताकिया, इकुनियुम अर लुस्‍त्रा का नगरों मा जु-जु दुख मिन उठैनि, ऊंका बारा मा भि तू जणदी ही छैई। फिर भि प्रभु न मितैं यों सब मुसीबतों बटि छुड़ै।</verse>
				<verse number="12">अर या बात सच्‍च च, कि जु लोग यीशु मसीह पर बिस्वास कैरिके परमेस्वर की भक्‍ति करण को जीवन जीण चनदिन, ऊं सभ्यों तैं भि सतयै जालु।</verse>
				<verse number="13">पर दुष्‍ट अर धोखा देण वळा बिगड़दी जाला, अर वु दुसरो तैं धोखा द्‍याला अर खुद भि धोखा खाला।</verse>
				<verse number="14">पर तीमुथियुस जथगा भि बातों तैं तिन सिखी अर ऊं पर बिस्वास कैरी, ऊं सब बातों पर अगनै भि बिस्वास कनु रौ। किलैकि तू अच्छी तरौं से जणदी कि यू सब बात त्वेतै कैन सिखैनी।</verse>
				<verse number="15">अर जब तू छुटो बच्‍चा छे, त तब बटि तू परमेस्वर का पवित्र वचन तैं जणदी औणी छैई। अर वु वचन ही त्वेतै समझौन्दिन, कि यीशु मसीह पर बिस्वास रखण से छुटकारु मिलदु।</verse>
				<verse number="16">अर पवित्रशास्‍त्र की सब बात परमेस्वर न अपणा लोगु का द्‍वारा लिख्वे। इलै पवित्रशास्‍त्र लोगु तैं अच्छी शिक्षा देणु खुणि, अर ऊंका बुरा काम दिखाणु खुणि, जीवन मा सुधार करणु खुणि अर एक धरमी जीवन जीणु खुणि यू मददगार च।</verse>
				<verse number="17">ताकि परमेस्वर का लोग हरेक बात मा सिद्ध ह्‍वे जा, अर भलै का हरेक काम तैं करणु खुणि तयार रा।</verse>
			</chapter>
			<chapter number="4">
				<verse number="1">प्रिय तीमुथियुस, हमरु यीशु मसीह जल्द लोगु पर राज करणु खुणि अर ज्यून्दा अर मुरयां लोगु को न्याय करणु कू औण वळु च। इलै मि पिता परमेस्वर तैं, अर हमरा यीशु मसीह तैं गवा माणी के त्वेतै हुकम देन्दु कि, तू परमेस्वर का वचन को परचार कैर, लोग तेरी सुणा या नि सुणा पर तू हर दसा मा तयार रौ। अर हरेक बात तैं सै के अर लोगु तैं उपदेस देके, जब वु गळत कैरा त ऊंका दोष तैं बतौ अर ऊंतैं झिड़की के सिखौ अर समझौ, कि ऊंतैं क्या करण चयेणु।</verse>
				<verse number="2"></verse>
				<verse number="3">किलैकि इन्द्रयो बगत आलु, कि लोग सच्‍चा उपदेस तैं सुनण पसन्द नि करला। अर अपणा मन की बुरी इच्छाओं का मुताबिक खुद खुणि इन्द्रया उपदेस देण वळो तैं इकट्‍ठा करला, जु कि इन्दरि बात ऊंतैं सिखाला जु ऊंतैं सुनण मा अच्छी लगदी हो।</verse>
				<verse number="4">अर सच्‍चै खुणि यू अपणा कन्दूड़ बुजी द्‍याला, पर यू लोग ऊं कथाओं पर अपणु मन लगाला जु मन से बणयै जनदिन।</verse>
				<verse number="5">मगर तीमुथियुस, तू हरेक बात मा चौकस रौ, अर दुख उठौ अर शुभ समाचार तैं फैलाण को काम कैर, अर जु सेवा को काम त्वेमा सौप्युं च वेतैं पूरु कैर।</verse>
				<verse number="6">अर जख तक मेरी बात च, त या बात मि इलै बोन्‍नु छौं, किलैकि अब मेरा जीवन तैं अरपण करण को बगत याने की अब ईं दुनियां बटि विदै लेण को बगत ऐ गै।</verse>
				<verse number="7">अर जन एक अच्छी कुस्ति लड़ै जान्दी, ठिक उन्‍नि मिन भि परमेस्वर का काम तैं अच्छा से पूरु कैरियाली। अर जन एक खिलाड़ी अपणी दौड़ तैं जीतदु, ठिक उन्‍नि जु-जु काम मेरा हाथों मा सौंपे गै छा, मिन ऊंतैं पूरु कैरी। अर ये दौरान मि बिस्वास मा भि मजबूत बणयूं रौ।</verse>
				<verse number="8">अर अब जीत को इनाम मि खुणि रख्युं च, अर वु इनाम परमेस्वर की नजर मा धरमी जीवन जीण वळो तैं मिलदु, जु कि स्वर्ग मा च। अर जब हमरु धरमी प्रभु न्याय करणु खुणि आलु, त उ मितैं इनाम का तौर पर जीत को मुकुट द्‍यालु अर सिरफ मितैं ही ना, बल्किन मा ऊं लोगु तैं भि द्‍यालु जु वेका इंतजार बड़ी आस लगै के कना छिन।</verse>
				<verse number="9">हे तीमुथियुस, जथगा भि जल्दी ह्‍वे सैको मेरा पास औण की कोसिस कैर।</verse>
				<verse number="10">किलैकि भै देमास न ईं दुनियां की चीजों तैं जादा प्यार कैरी, इलै उ मितैं छोड़ि के थिस्सलुनीकी नगर कू चलि गै। अर क्रेसकेंस भै गलाति नगर कू अर भै तीतुस भि दलमतिया नगर कू चलि गै।</verse>
				<verse number="11">अर बस लूका भै ही इख सेवा मा मेरा दगड़ा मा च। अर जब तू इख ऐलि त मरकुस भै तैं अफ दगड़ा मा लेके ऐ, किलैकि उ सेवा मा मेरा भौत काम आलु।</verse>
				<verse number="12">अर तुखिकुस भै तैं मिन इफिसुस नगर मा भेज्यूं च।</verse>
				<verse number="13">अर त्रोआस नगर मा करपुस भै का घौर मा मिन अपणु कोट छोड़ि दिनी, अर जब तू ऐलि त वे कोट तैं लेके ऐ। अर मेरी किताबों तैं भि खास कैरिके वीं किताब तैं भि ज्वा भेड़ का चमड़ाळ बणि च लेके ऐ।</verse>
				<verse number="14">अर सिकन्दर जु कि भाँडा बणाण वळो च, वेन मितैं भौत दुख देई। अर जु कुछ भि रोज वेन मेरा दगड़ा मा कैरी, वेको बदला प्रभु ही वे बटि ल्यालु।</verse>
				<verse number="15">अर तीमुथियुस तू भि वे बटि बचि के रै, किलैकि जु कुछ भि हमुन सिखै वेन वेको भौत विरोध कैरी।</verse>
				<verse number="16">अर जब पैलि दौं रोम देस मा मेरु न्याय करण खुणि मितैं कचैरी मा खड़ु किये गै छौ, त मितैं बचौणु खुणि कैन भि गवै नि देई, किलैकि सब लोग मितैं छोड़ के चलि गै छा। मगर फिर भि मेरु प्रभु मेरा दगड़ा मा छौ अर वेन मितैं ताकत देई, ताकि मि शुभ समाचार का परचार तैं पूरु कैर सैकु, अर जु लोग यहूदी जाति का नि छिन ऊं सभ्यों तैं शुभ समाचार सुणो। अर परमेस्वर न मितैं मौत का गिच्‍चा बटि बचै, अर मि इन प्रार्थना करदु कि जु लोग मितैं छोड़ि के चलि गै छा, परमेस्वर ऊंतैं माफ कैरो।</verse>
				<verse number="17"></verse>
				<verse number="18">अर अब प्रभु मितैं हर बुरै से दूर करलु, अर अपणा स्वर्ग का राज्य मा हिफाजत से लि जालु वेको आदर-सम्मान सदनि तक होणु रौ। आमीन।</verse>
				<verse number="19">अर बैंण प्रिस्का, अर भै अक्‍किला, अर उनेसिफुरुस का घौर मा रौण वळा सब लोगु तैं मेरु सलाम।</verse>
				<verse number="20">अर इरास्तुस भै कुरिन्थि नगर मा रुकी गै छौ अर त्रुफिमुस भै बिमार ह्‍वे गै, इलै मिन वेतैं मिलेतुस नगर मा छोड़याली।</verse>
				<verse number="21">अर अब ह्‍यूँद को मैना औण से पैलि, जथगा जल्दी ह्‍वे सैको तीमुथियुस तू मेरा पास औण की कोसिस कैर। यूबूलुस, पूदेंस, लीनुस अर क्लौदिया, अर सब बिस्वासी भै-बैंणो की तरफा बटि तुमतै सलाम।</verse>
				<verse number="22">मि प्रार्थना करदु, कि प्रभु तेरा दगड़ा मा रौ, अर तुम सभ्यों पर वेकी किरपा होणी रौ।</verse>
			</chapter>
		</book>
		<book number="56">
			<chapter number="1">
				<verse number="1">हे मेरा भै-बैंणो मि पौलुस, परमेस्वर को सेवक अर यीशु मसीह को खास चेला छौं। मितैं इलै भेजि गै, ताकि मि परमेस्वर का द्‍वारा चुण्यां लोगु तैं बिस्वास अर सच्‍चै का ज्ञान मा मजबूत कैरी सैकु, अर ऊ लोग परमेस्वर की इच्छा का मुताबिक जीवन जी सैका।</verse>
				<verse number="2">अर यू सब मि इलै कनु छौ, ताकि परमेस्वर का लोग ईं आस मा रा, कि ऊंतैं सदनि को जीवन मिली सैको। अर परमेस्वर कभि झूठ्‍ठ नि बुल्दु, दुनियां की शुरुवात से पैलि वेन ही हम खुणि सदनि को जीवन देणो को करार कर्युं च।</verse>
				<verse number="3">अर ठिक बगत पर परमेस्वर न अपणु शुभ समाचार परगट कैरी, अर यू शुभ समाचार हमतै बचौण वळा परमेस्वर का द्‍वारा परचार करणु खुणि मि मा सौंपे गै।</verse>
				<verse number="4">अर तीतुस या चिठ्‍ठी मि त्वे खुणि लिखणु छौं, किलैकि हम दुईया का दुई एक ही प्रभु पर बिस्वास करद्‍यां। इलै तू मेरा सच्‍चा नौना का जन छैई। अर मि प्रार्थना करदु कि, पिता परमेस्वर अर हमतै बचौण वळा प्रभु यीशु मसीह की किरपा अर शान्ति त्वेतै मिलु।</verse>
				<verse number="5">अर मिन तीतुस त्वेतै क्रेते नगर मा इलै छोड़ि, ताकि उख जु कुछ भि कमी छै तू वींतैं ठिक-ठाक कैर दे, अर मेरी दिईं आज्ञा का मुताबिक हरेक नगर की बिस्वासी समुदाय मा अध्यक्ष तैं चुणी के ठैरै दे।</verse>
				<verse number="6">अर वे अध्यक्ष तैं तभि चुणी के ठैरैये जौ, जब उ निरदोष हो अर वेकी एक ही घरवळी हो। अर वेका बाल-बच्‍चा बिस्वासी हो, अर कै बात तैं नि मनण को दोष ऊं पर नि लग्यूं हो अर ना ही ऊंमा कुई जंगळि सभौ हो।</verse>
				<verse number="7">किलैकि कै भि देख-रेख करण वळा तैं परमेस्वर का कर्ता-धर्ता होण खुणि निरदोष होण चयेणु। अर उ अडियल नि हो, नऽ त गुस्सा करण वळु, अर ना दरोळया, अर ना ही झगड़ा करण वळु, अर वेतैं गळत कमै को लालच करण वळु नि होण चयेणु,</verse>
				<verse number="8">पर उ त मैमानों की सेवा-भगत करण वळु, अर भलै तैं पसन्द करण वळु, सबर रखण वळु, ठिक न्याय करण वळु हो, अर खुद पर वस रखण वळु, अर पवित्र हो।</verse>
				<verse number="9">अर देख-रेख करण वळा मनखि तैं परमेस्वर का बिस्वासयोग्य वचन मा पूरि तरौं से बणयूं रौण चयेणु, जां की वेतैं शिक्षा दिईं च, ताकि उ लोगु तैं सच्‍चु उपदेस दे सैको, अर जु लोग वीं सच्‍चि शिक्षा को विरोध करण वळा छिन, ऊंतैं समझै के उ ऊंकी बोलती बन्द कैरी द्‍यो।</verse>
				<verse number="10">अर यू इलै जरुरी च, किलैकि भौत सा लोग छिन, जु आज्ञाओं तैं नि मणदिन अर बेमतलब की बात करदिन, धोखा देन्दिन, अर खास कैरिके यू ऊ यहूदी लोग छिन, जु इन सिखौन्दिन कि खतना का रिवाज तैं पूरा करण जरुरी च।</verse>
				<verse number="11">अर यू लोग गळत कमै करणु खुणि गळत शिक्षा सिखौन्दिन, अर इन शिक्षा देके यू लोग, परिवारों का सब लोगु को बिस्वास खतम कैरी देन्दिन, इन्द्रया लोगु की त बोलती बन्द कैरी देण चयेणी।</verse>
				<verse number="12">अर क्रेते नगर का लोगु मा बटि एक मसूर गुरु न इन बोलि कि, “इखा लोग हमेसा झूठ्‍ठ बोन्‍न वळा, अळकसि, पेटू, अर दुष्‍ट जंगळि जानबर का जन छिन।”</verse>
				<verse number="13">अर या बात बिल्कुल सच्‍चि च, इलै ऊं लोगु तैं ढंगल झिड़कणु रौ, ताकि ऊंको बिस्वास पक्‍कु ह्‍वे जौ।</verse>
				<verse number="14">अर यहूदी लोगु की मनगणत कथा पर, अर सच्‍चै का बाटा बटि भटक्यां लोगु का आदेसों पर ध्यान नि द्‍या।</verse>
				<verse number="15">अर जौं को मन शुद्ध च इन्द्रया लोगु खुणि सब कुछ शुद्ध च, पर जौं लोगु का मन मा बुरै भुरीं च अर जु बिस्वास नि करदिन ऊं खुणि कुछ भि शुद्ध नि च। अर ऊं लोगु की अकल अर मन इन बिगाड़ि गै, अर ऊंतैं इन पता नि च कि क्या जि सही च अर क्या जि गळत।</verse>
				<verse number="16">अर यू लोग इन बुल्दिन कि, हम परमेस्वर तैं जणदा छां, पर ऊंका कामों का द्‍वारा इन पता चलि जान्दु कि ऊ परमेस्वर तैं नि जणदिन, किलैकि वु दुष्‍ट सभौ का, अर आज्ञा नि मनण वळा, अर कुई भि अच्छा काम करण का लैख नि छिन।</verse>
			</chapter>
			<chapter number="2">
				<verse number="1">पर हे तीतुस, तू इन शिक्षा दिया कैर जु की सच्‍चा उपदेस का मुताबिक हो।</verse>
				<verse number="2">अर बुढ्या लोगु तैं तू इन समझौ कि ऊंको सभौ शान्त अर खुद पर काबू रखण वळु होण चयेणु। अर वु गम्भीर, अर समझदार अर प्यार करण वळु हो, अर ऊ बिस्वास मा अर सबर रखण मा भि मजबूत हो।</verse>
				<verse number="3">अर ठिक उन्‍नि बुड्ड़ी जनानि तैं भि समझौ कि ऊंको चाल-चलन पवित्र हो, अर ऊ दुसरो पर दोष लगौण वळी ना हो, अर ना ही दरोळया, पर अच्छी बात सिखौण वळी हो।</verse>
				<verse number="4">ताकि यू ज्वान जनानियों तैं शिक्षा दे सैका, कि वु अपणा पति अर बाल-बच्‍चों से प्यार कैरा।</verse>
				<verse number="5">अर वु समझदार, अर चाल-चलन मा बेदाग अर सुसील हो, अर अपणा घौर की देख-रेख करण वळी हो, अर अपणा पति का काबू मा रौ, ताकि परमेस्वर का वचन की बेजती नि हो।</verse>
				<verse number="6">अर ठिक इन्‍नि ज्वान बैखों तैं भि समझौ, कि ऊ खुद पर काबू रखा।</verse>
				<verse number="7">अर तीतुस, तू खुद हर बात मा ऊंतैं एक अच्छु उदारण बणि के दिखौ। अर जै उपदेस तैं तू सिखैली, वामा तू गम्भीर अर खरु हो,</verse>
				<verse number="8">अर तेरी शिक्षा खरी होण चयेणी, ताकि कुई भि वीं शिक्षा कू बुरु नि बोलि सैको। ज्यां से की विरोध करण वळो तैं, हम पर दोष लगौण को कुई भि मौका नि मिली सैको, अर ऊंकी बेजती ह्‍वे जौ।</verse>
				<verse number="9">अर तू गुलाम लोगु तैं भि इन समझै दे, कि ऊ अपणा मालिक की हरेक बात तैं माणा, अर सब बातों मा अपणा मालिक तैं खुश कैरा अर गळत जबाब नि द्‍या,</verse>
				<verse number="10">अर ऊ चोरी नि कैरा, बल्किन मा बिस्वास का लैख बणयां रा। ताकि इन कैरिके ऊंका द्‍वारा हमतै बचौण वळा परमेस्वर की शिक्षा को मान-सम्मान बढ़ो।</verse>
				<verse number="11">किलैकि सब मनखियों तैं बचौणु खुणि ही परमेस्वर की किरपा परगट किये गै।</verse>
				<verse number="12">अर या किरपा हमतै इन बतौन्दी, कि हमतै कन्द्रयो जीवन जीण चयेणु हमतै परमेस्वर का खिलाप मा नि होण चयेणु, बल्किन मा दुनियां की बुरी इच्छाओं तैं छुड़ण चयेणु, अर खुद तैं अपणा बस मा रखण चयेणु, अर एक धरमी जन बणि के परमेस्वर की भक्‍ति करण को जीवन जीण चयेणु।</verse>
				<verse number="13">अर जब हम वीं धन्य आस का दगड़ा मा, परमेस्वर अर हमतै बचौण वळा यीशु मसीह को बड़ा सम्मान से ईं धरती पर दुबरा वापस औण को इंतजार करद्‍यां, तब ये इंतजार करण का बगत मा भि हमतै यू ही धरमी जीवन जीण चयेणु।</verse>
				<verse number="14">अर हम त धरमी लोग नि छा, मगर वेन हमरा खातिर अफ तैं बलिदान होणु खुणि दे दिनी, अर वेन ही हमतै बुरा कामों बटि छुटकारु देके शुद्ध कैरी, ताकि हम वेका खास लोग बणि जां, अर भला काम करणु खुणि हमेसा तयार रा।</verse>
				<verse number="15">अर तीतुस, तू यों सब बातों तैं पूरा अधिकार से बोल अर समझै दे, अर सभ्यों को हौसला बढौणु रौ, अर विरोध करण वळो तैं झिड़कणु रौ अर कुई भि त्वेतै सुद्‍दी नि समझु।</verse>
			</chapter>
			<chapter number="3">
				<verse number="1">अर तीतुस, ऊं लोगु तैं इन भि याद दिलौ, कि ऊ राजा अर अधिकारी लोगु का अधीन मा रा, अर ऊंकी आज्ञा को पालन कैरा। अर हरेक भला काम करणु खुणि तयार रा।</verse>
				<verse number="2">अर कैतैं बदनाम करण वळा नि बणा, अर लड़ै-झगड़ा करण वळा ना हो पर शान्त सभौ का हो, अर नमर बणि के सब मनखियों का दगड़ा मा रा।</verse>
				<verse number="3">अर मि त्वेतै यू सब इलै बतौणु छौं, किलैकि पैलि हम लोग भि मूरख छा अर बुलयूं नि मणदा छा, अर भक्टयां छा अर भौत सरी मन की इच्छा अर भोग-बिलास का गुलाम छा, अर एक-दुसरा से गळत बरतौ करण वळा अर जलन से भोर्यां छा, अर लोग हम बटि अर हम भि लोगु बटि नफरत करदा छा अर खार खान्दा छा।</verse>
				<verse number="4">पर जब हमतै बचौणु वळा परमेस्वर की दया अर वेकू प्यार सब लोगु पर परगट ह्‍वे,</verse>
				<verse number="5">तब वेन हमरा अच्छा कामों का खातिर ना, पर अपणी दया कैरिके हमतै बचै दिनी अर पवित्र आत्मा का द्‍वारा हमरा सब पापों तैं ध्वेके हमतै नयू जनम देई अर हमतै नयू जीवन मिली।</verse>
				<verse number="6">अर वे ही पिता परमेस्वर न हमतै बचौण वळा यीशु मसीह का द्‍वारा हम पर पवित्र आत्मा तैं भरपूरी से अखणै,</verse>
				<verse number="7">ताकि हम वेकी दया से परमेस्वर की नजर मा धरमी बणि सैका, अर सदनि को जीवन जीण की आस का मुताबिक वेका वारिस बणि जा।</verse>
				<verse number="8">अर यू सब बात सच्‍चि छिन, अर मि चान्दु छौं कि तू यों सब बातों का बारा मा जोर देके बतौ, ताकि जौं लोगु न परमेस्वर पर बिस्वास कैरी, ऊ भलै का कामों तैं करण मा लग्यां रा। अर यू बात खूब अर सब लोगु का फैदे की छिन।</verse>
				<verse number="9">मगर फालतु की बकवास, अर पितरों का वंश का बारा मा, अर नियम-कानूनों का बारा मा घपरोळ करण वळो, अर झगड़ा करण वळो से दूर रौ, किलैकि वु बेकार अर कै काम का नि छिन।</verse>
				<verse number="10">जु मनखि एक-दुसरा का बीच मा लड़ै-झगड़ा करौन्दिन, ऊंतैं एक-दुई बार समझै दे, अर फिर ऊं बटि कुई मतलब ही नि रख।</verse>
				<verse number="11">किलैकि तुम लोग जणदा ही छाँ, कि इन्द्रयो मनखि सच्‍चै का बाटा बटि अलग ह्‍वे गै, अर इन पाप कैरिके ऊ खुद दोषी बणि गै।</verse>
				<verse number="12">अर तीतुस, जब मि तेरा पास अरतिमास या तुखिकुस भै तैं भेजलु, तब तू निकुपुलिस नगर मा औण की कोसिस कैरी। किलैकि अबरि दौं मेरी ह्‍यूँद कटण की इखि सोची च।</verse>
				<verse number="13">अर अपुल्‍लोस भै अर वकील जेनास तैं तुरन्त भेजण को इंतजाम कैर, अर जु कुछ भि ऊंका सफर खुणि जरुरी च वामा कैं भि बात की कमी नि हो।</verse>
				<verse number="14">अर सब बिस्वासी लोग भलै का काम करण सीखा, ताकि ऊ एक-दुसरे की भौत सि जरुरतों तैं पूरु कैरी सैका, तब ऊंका जीवन का द्‍वारा दुसरा लोगु तैं फैदा मिललु।</verse>
				<verse number="15">हे तीतुस, मेरा सब दगड़्यों की तरफा बटि त्वेतै सलाम अर जु बिस्वासी भै हम बटि प्यार करदिन, ऊंतैं हमरु सलाम। परमेस्वर की किरपा हमेसा तुम पर हो।</verse>
			</chapter>
		</book>
		<book number="57">
			<chapter number="1">
				<verse number="1">हे मेरा प्यार भै फिलेमोन, मि पौलुस ईं चिठ्‍ठी तैं हमरा भै तीमुथियुस का दगड़ा मा मिली के त्वे खुणि लिखणु छौं जु कि हमरा दगड़ा मा सेवा को काम करदु। मेरा दगड़्या, मि इख यीशु मसीह की सेवा का बानो कैदी होयुं छौं,</verse>
				<verse number="2">अर मि या चिठ्‍ठी हमरि बिस्वासी बैंण अफफिया, अर हमरा दगड़ा मा सिपै की तरौं काम करण वळा अरखिप्पुस भै खुणि भि लिखणु छौं। हे मेरा भै, या चिठ्‍ठी तुमरा घौर मा जमा होण वळा बिस्वासी समुदाय का लोगु खुणि भि च।</verse>
				<verse number="3">अर मि इन प्रार्थना करदु कि तुम सभ्यों तैं परमेस्वर जु कि हमरु पिता च वेकी अर प्रभु यीशु मसीह की तरफा बटि किरपा अर शान्ति मिलदी रौ।</verse>
				<verse number="4">हे फिलेमोन भै, जब-जब मि प्रार्थना मा त्वेतै याद करदु, त मि हमेसा अपणा परमेस्वर तैं धन्यवाद देन्दु,</verse>
				<verse number="5">किलैकि मिन तेरा वे बिस्वास का बारा मा सुणी जु तू प्रभु यीशु मसीह पर करदी, अर वे प्यार का बारा मा भि सुणी जु तू बिस्वासी लोगु से करदी।</verse>
				<verse number="6">अर मि इन प्रार्थना करदु, कि बिस्वास की ज्वा संगत तू दुसरा लोगु का दगड़ा मा रखदी, वेका द्‍वारा त्वेतै या बात भौत अच्छे से पता चलु कि यीशु मसीह पर बिस्वास करण से हम लोगु तैं क्या-क्या अच्छी आसीस मिलदिन।</verse>
				<verse number="7">हे मेरा दगड़्या, तेरा प्यार का सभौ तैं देखि के मितैं बड़ी तसली अर खुशी मिलदी। किलैकि तेरा द्‍वारा बिस्वासी लोगु का मन भौत खुश ह्‍वेनि।</verse>
				<verse number="8">हे फिलेमोन भै, मि यीशु मसीह को छौं इलै मि त्वेतै बड़ी हिम्मत से आज्ञा दे सकदु, कि त्वेतै क्या-क्या करण चयेणु।</verse>
				<verse number="9">मेरा प्यारा भै, मि त्वेसे भौत प्यार करदु इलै मि त्वेसे बिन्ती करदु कि मि पौलुस जु कि अब बुढ्या ह्‍वे ग्यों, मि यीशु मसीह का खातिर इख जेलखाना मा छौं।</verse>
				<verse number="10">मि त्वेसे तेरा नौकर उनेसिमुस खुणि बिन्ती करदु, जु कि बिस्वास मा अब मेरा नौना का जन च। अर कैद का ये बगत मा ही उ मेरी वजै से यीशु मसीह पर बिस्वास करण वळु बणि। अर आत्मिक बाटा पर वेतैं चलौणु खुणि मि वेको आत्मिक बुबा का जन बणि ग्यों।</verse>
				<verse number="11">पैलि त उ तेरा कै काम को नि छौ, मगर अब उ त्वे खुणि अर मि खुणि बड़ा काम को मनखि ह्‍वे गै।</verse>
				<verse number="12">अर अब मि उनेसिमुस तैं तेरा पास भेजणु छौं, हाँ, वेतैं जु कि मेरा कलेजा को कतर च।</verse>
				<verse number="13">अर मि इख शुभ समाचार का खातिर संगुळों मा बन्धयूं छौं, इलै मि वेतैं अपणा पास ही रखण चान्दु छौ, ताकि उ तेरा बदला मा मेरी मदद कनु रौ।</verse>
				<verse number="14">मगर मि तेरी इजाजत का बगैर कुछ नि करण चान्दु, ताकि भलै का जु काम तू मि खुणि करदी ऊ जोर-जबरदस्ती से ना हो, बल्किन मा तेरा द्‍वारा बड़ी खुशी से किये जा।</verse>
				<verse number="15">अर क्या पता इलै ही उनेसिमुस त्वेसे कुछ बगत तक दूर ह्‍वे गै रे हो, ताकि अब उ हमेसा खुणि तेरु ह्‍वे जौ।</verse>
				<verse number="16">पर अब वु एक गुलाम नि च बल्किन मा गुलाम से भि कई बढी के च, किलैकि अब उ एक बिस्वासी भै च जै बटि मि भौत प्यार करदु। पर अब वु त्वे खुणि जादा लाडलु होलु, किलैकि अब वु त्वे खुणि एक गुलाम का दगड़ा-दगड़ि एक बिस्वासी भै भि च।</verse>
				<verse number="17">इलै अगर जु तू मितैं अपणु खास दगड़्या समझदी, त उनेसिमुस तैं भि उन्‍नि स्वीकार कैर जन तिन मितैं स्वीकार कैरी छौ।</verse>
				<verse number="18">अर अगर जु वेन तेरु कुछ नुकसान कैरी होलु, या तेरु कुछ देण होलु, त उ सब कुछ मेरा खाता मा लिखी दे।</verse>
				<verse number="19">अर मि पौलुस खुद अपणा हाथळ त्वे खुणि लिखणु छौं, कि मि ऐके सब कुछ चुकै द्‍यूलु। अर मितैं यू याद दिलौण कि कुई जरुरत नि च कि तेरु पराण ही मेरु करजदार च।</verse>
				<verse number="20">हे मेरा भै, सच्‍चि मा हम दुईया का दुई प्रभु यीशु मसीह का छां, इलै फैदे की बात या च कि तू उनेसिमुस तैं स्वीकार कैर। अर अगर तू वेतैं स्वीकार करली, त इन कैरिके तू मेरी जिकुड़ी तैं खुश कैरी दिली।</verse>
				<verse number="21">अर मि या चिठ्‍ठी ये यकीन से लिखणु छौं, कि तू मेरी बात तैं जरुर मणिली। अर मि यू भि जणदु छौं, कि जु कुछ भि मि लिखणु छौं तू वेसे भि जादा बढी के करली।</verse>
				<verse number="22">अर यों सब बातों का दगड़ा-दगड़ि मि त्वेसे कुछ और बात भि बोन्‍न चान्दु, कि तू मि खुणि एक घौर को इंतजाम कैर, किलैकि मितैं ईं बात कि आस च कि ज्वा प्रार्थना तुम लोग मि खुणि करद्‍यां, वींतैं पिता परमेस्वर जरुर सुणलु अर जल्दी ही मि तुमरा इख ऐ जौलु।</verse>
				<verse number="23">अर इपफ्रास भै जु कि मेरा दगड़ा मा यीशु मसीह का खातिर जेलखाना मा च, त्वे खुणि सलाम बोन्‍नु च।</verse>
				<verse number="24">अर मेरा दगड़ा मा सेवा को काम करण वळा मरकुस भै अर वेका दगड़ा-दगड़ि अरिस्तर्खुस, देमास अर लूका भै भि त्वे खुणि सलाम बोन्‍ना छिन।</verse>
				<verse number="25">हे मेरा भै-बैंणो, मि इन प्रार्थना करदु, कि हमरा प्रभु यीशु मसीह की किरपा तुम सभ्यों पर होणी रौ। आमीन।</verse>
			</chapter>
		</book>
		<book number="58">
			<chapter number="1">
				<verse number="1">हे मेरा दगड़्यों, जन कि तुम जणदा ही छाँ, कि पुरणा जमना मा पिता परमेस्वर न हमरा पितरों का दगड़ा मा रैबर्यों का द्‍वारा कई बार अलग-अलग तरीका से बात कैरी।</verse>
				<verse number="2">मगर आखिरी का यों दिनों मा पिता परमेस्वर न अपणा पुत्र यीशु का द्‍वारा हम से बात कैरी। अर पिता परमेस्वर न वेतैं सब चीजों को वारिस बणै अर वेका द्‍वारा ही पूरि दुनियां तैं बणै।</verse>
				<verse number="3">अर परमेस्वर को पुत्र अपणा पिता की अदभुत महानता तैं परगट करदु, अर उ हमतै ठिक उन्‍नि दिखेन्दु जन कि परमेस्वर खुद च। अर परमेस्वर को पुत्र सब चीजों तैं अपणा वचन की ताकत से समळ्दु। अर लोगु तैं ऊंका पापों से शुद्ध करण की बात तैं परमेस्वर का पुत्र न पूरु कैरी, अर वेका बाद उ बड़ा आदर-सम्मान से सबसे महान परमेस्वर का दैंणा हाथ की तरफा जैके बैठि गै।</verse>
				<verse number="4">अर इन कैरिके उ सब स्वर्गदूतों मा सबसे महान ह्‍वे गै, किलैकि पिता परमेस्वर न वेतैं वु नौ दिनी जु कि सब नौ मा सबसे महान च।</verse>
				<verse number="5">हे मेरा भै-बैंणो, पिता परमेस्वर न कभि भि कै स्वर्गदूत कू वा बात नि बोलि, ज्वा कि वेन अपणा पुत्र का बारा मा बोलि। वेन इन बोलि कि, “तू मेरु पुत्र छैई, अर आज से मि तेरु पिता छौं।” अर फिर इन बोलि कि, “मि वेको पिता, अर उ मेरु पुत्र होलु।”</verse>
				<verse number="6">अर फिर जब पिता परमेस्वर अपणा इकलौता पुत्र तैं ईं दुनियां मा भेजण वळु छौ, त वेका बारा मा उ इन बुल्दु कि, “मेरा सब स्वर्गदूत वेकी भक्‍ति कैरा।”</verse>
				<verse number="7">अर अपणा स्वर्गदूतों का बारा मा पिता परमेस्वर कुछ इन बुल्दु कि, “मि अपणा स्वर्गदूतों तैं हवा का जन बणौन्दु, अर जु लोग मेरी सेवा करदिन ऊंतैं मि आग की बणांग का जन बणौन्दु।”</verse>
				<verse number="8">मगर अपणा पुत्र का बारा मा उ इन बुल्दु, “हे परमेस्वर तुमरि राजगद्‍दी सदनि तक बणि रौ, अर तुमरा राज मा न्याय सच्‍चै का सासन से किये जौ।</verse>
				<verse number="9">मि परमेस्वर छौं मि वु परमेस्वर छौं जैकी सेवा तू करदी, अर तिन वेसे प्यार कैरी जु कि मेरी नजर मा सही च, अर जु गळत च वेसे तिन नफरत कैरी। इलै मिन तेरा सब दगड़्यों मा बटि तेरु अभिषेक कैरिके त्वेतै सबसे ऊँचो पद दियाली।”</verse>
				<verse number="10">अर पवित्रशास्‍त्र मा पुत्र खुणि इन भि लिख्यूं च कि, “हे प्रभु, शुरुवात मा तुमुन धरती कि बुनियाद रखी, अर आसमान तुमरा हाथों का द्‍वारा बणि।</verse>
				<verse number="11">अर यू सब खतम ह्‍वे जाण, मगर तुमुन सदनि तक ज्यून्द रौण, अर यू सब कपड़ों का जन पुरणा ह्‍वेके फटी जाला।</verse>
				<verse number="12">अर तुमुन ऊंतैं एक चदरा का जन लपेटि देण, अर वु कपड़ों का जन बदलि जाला, मगर तुम उ छाँ जैन सदनि तक ज्यून्द रौण।”</verse>
				<verse number="13">अर परमेस्वर न कभि कै स्वर्गदूत कू नि बोलि कि, “मेरी दैंणी तरफा बैठ, जबरि तक कि मि तेरा दुसमनों तैं हरै के तेरा अधीन मा नि कैरी द्‍यूं।”</verse>
				<verse number="14">अर, यू सब स्वर्गदूत त सेवा करण वळी आत्मा छिन, जु कि बचयै जाण वळा लोगु की सेवा खुणि भिजे जनदिन।</verse>
			</chapter>
			<chapter number="2">
				<verse number="1">इलै जौं बातों तैं हमुन सुणी, ऊं सब बातों पर हमतै और भि जादा ध्यान देण चयेणु, ताकि हम सच्‍चै से दूर नि ह्‍वे जा।</verse>
				<verse number="2">अर ज्वा शिक्षा पिता परमेस्वर न स्वर्गदूतों का द्‍वारा दिनी वा सच्‍च छै, अर जैन भि वेको पालन नि कैरी वेतैं दण्ड मिली।</verse>
				<verse number="3">त सोचा, अगर जु हम छुटकारा पौण वळा बाटा तैं स्वीकार नि करुला, त हम वेका दण्ड से बचण की उम्मीद कनकै कैरी सकद्‍यां? अर सबसे पैलि पिता परमेस्वर न ही ईं बात का बारा मा बतै, अर जौं लोगु न वेका रैबार तैं सुणी, ऊंन हमतै यू साबित कैरिके दिखै दिनी कि वा बात सच्‍चि छै।</verse>
				<verse number="4">अर परमेस्वर न भि अपणी इच्छा का मुताबिक चिन्‍न, चमत्कार अर अलग-अलग किसम से सामर्थ का कामों का द्‍वारा इन कैरिके दिखै कि वेको रैबार सच्‍चु च। अर जौन वेतैं चुणी वेन ऊंतैं अपणा पवित्र आत्मा को दान दिनी।</verse>
				<verse number="5">हे मेरा भै-बैंणो, पिता परमेस्वर न स्वर्गदूतों तैं नि चुणी कि वु औण वळी नयी दुनियां का अधिकारी ह्‍वा, जैकी चर्चा हम लोग करदी औणा छां।</verse>
				<verse number="6">अर पवित्रशास्‍त्र मा राजा दाऊद इन बुल्दु कि, “हे मेरा परमेस्वर, मनखि क्या च कि तुम वेकी चिन्ता करद्‍यां? या मनखि को पुत्र क्या च, कि तुम वेकी परवा करद्‍यां?</verse>
				<verse number="7">तुमुन वेतैं कुछ बगत खुणि ही स्वर्गदूतों से जरा कम कैरी, अर फिर वेतैं आदर-सम्मान को मुकुट पेनै के सब कुछ वेका हाथों मा सौंपी, ताकि सब कुछ वेका अधीन मा रौ।</verse>
				<verse number="8">अर तुमुन सब कुछ वेका अधीन मा कैरियाली।” अर सब कुछ वेका अधीन मा कैरी देण को मतलब यू च कि जथगा भि चीज छिन वु सब कुछ वेका हाथों मा छिन अर जन वु चौ वेको इस्तेमाल कैरी सकदु। मगर फिर भि आज हम इन दिखद्‍यां, कि कुछ बात इन छिन जु कि अभि भि वेका अधीन मा नि छिन।</verse>
				<verse number="9">पर जब हम यीशु मसीह तैं दिखद्‍यां, त इन जणद्‍यां कि पिता परमेस्वर न वेतैं कुछ बगत खुणि ही स्वर्गदूतों से जरा कम कैरी। अर इन वेन इलै कैरी, किलैकि यीशु मसीह न सब मनखियों का खातिर मौत का स्वाद तैं चखी। अर ईं योजना का द्‍वारा पिता परमेस्वर न अपणी दया अर प्यार सब लोगु पर दिखै, मगर अब पिता परमेस्वर न यीशु तैं सबसे महान राजा का रुप मा आदर-सम्मान देके सबसे ऊँचो पद दियाली।</verse>
				<verse number="10">अर जन पिता परमेस्वर न चै, वेन अपणी ताकत का मुताबिक सब कुछ बणै। अर इन वेन इलै कैरी, ताकि उ यीशु मसीह का द्‍वारा भौत सा लोगु तैं अपणी महानता मा सामिल कैरी सैको। अर लोगु तैं बचौणु खुणि वेन अपणी योजना तैं पूरु कैरी, ज्वा कि यीशु तैं मौत का दुख तैं झिलण की छै। अर फिर वेन यीशु तैं मुरदो मा बटि ज्यून्द कैरिके ईं बात तैं सिद्ध कैरियाली, कि वेका द्‍वारा लोग पिता परमेस्वर का पास आ।</verse>
				<verse number="11">इलै यीशु जौं लोगु तैं पवित्र करदु अर जु लोग वेका द्‍वारा पवित्र किये जाण छिन, दुईयों को एक ही पिता च। अर ईं बात की वजै से ही यीशु ईं दुनियां का लोगु तैं अपणु भै-बैंण बोन्‍न मा झिझक मैसूस नि करदु।</verse>
				<verse number="12">इलै ही वेन पिता परमेस्वर कू बोलि, “मि अपणा भै-बैंणो का समणि तुमरा नौ को बखान करलु, अर सभा का समणि मि तुमरो गुणगान करलु।”</verse>
				<verse number="13">अर यीशु न इन भि बोलि कि, “मि अपणु भरोसा परमेस्वर पर रखलु।” अर फिर इन भि बुल्दु कि, “सुणा, मि इख ऊं बच्‍चों का दगड़ा मा छौं, जु कि परमेस्वर न मि मा सौंप्यां छिन।”</verse>
				<verse number="14">अर लोग अभि भि बच्‍चों का जन छिन, इलै यीशु मसीह ईं दुनियां मा सरील को रुप लेके ऐ। अर इन इलै ह्‍वे, ताकि वेकी मौत का द्‍वारा यीशु मसीह शैतान को नास कैरी सैको जैका पास मौत तैं लेके औण की ताकत च।</verse>
				<verse number="15">अर हरेक मनखि का मन मा मौत की डौऽर छै, जैकी वजै से वु गुलामी को जीवन जीणा छा, मगर यीशु मसीह की मौत न ऊंतैं वीं डौऽर से आजाद कैरियाली।</verse>
				<verse number="16">किलैकि यीशु मसीह स्वर्गदूतों की मदद करणु खुणि नि ऐ, बल्किन मा उ त इलै ऐ ताकि ऊं लोगु कि मदद कैरी सैको, जु कि परमेस्वर पर बिस्वास रखण की वजै से पितर अब्राहम का वंशज छिन।</verse>
				<verse number="17">इलै या बात भि भौत जरुरी छै, कि यीशु मसीह सब बातों मा अपणा भै-बैंणो का जन बणि जौ। अर वेन खुद दुख उठे, अर शैतान का द्‍वारा भकलै भि गै मगर फिर भि उ खरु निकळि अर इन इलै ह्‍वे, ताकि उ लोगु पर दया करण वळु हो अर ऊं खुणि एक वफादार महा पुरोहित बणि जौ। अर एक बगत औण पर वेन खुद तैं बलिदान का रुप मा चड़ै दिनी, ताकि वेका द्‍वारा पिता परमेस्वर लोगु का पापों तैं माफ कैरी सैको। इलै हे मेरा दगड़्यों, ईं बात तैं याद रखा कि यीशु ऊं लोगु की मदद जरुर करलु, जौं तैं शैतान का द्‍वारा भकलयै जान्दु।</verse>
				<verse number="18"></verse>
			</chapter>
			<chapter number="3">
				<verse number="1">इलै हे मेरा पवित्र भै-बैंणो, पिता परमेस्वर न तुमतै बुलै के अफ खुणि अलग कैरियाली। इलै मि तुमतै बतै देन्दु, कि तुमतै अपणु ध्यान यीशु पर लगौण चयेणु जैतैं पिता परमेस्वर न अपणी तरफा बटि मनखियों खुणि ठैरै के भेजि। अर उ एक इन्द्रयो महा पुरोहित च, जैका बारा मा हम इन बुल्द्‍यां कि हम वे पर बिस्वास करद्‍यां।</verse>
				<verse number="2">अर वु पिता परमेस्वर खुणि भरोसामन्द च किलैकि वेन ही यीशु मसीह तैं ठैरै के ईं दुनियां मा भेजि। अर मूसा रैबर्या न भि ठिक इन्‍नि कैरी छौ, किलैकि जु कुछ पिता परमेस्वर न पुरणा जमना मा वे खुणि बोलि छौ, पितर मूसा न वेका मुताबिक ही परमेस्वर का सब लोगु की सेवा कैरी।</verse>
				<verse number="3">अर जन एक घौर से जादा वेका मालिक तैं बड़ु आदर-सम्मान मिलदु, ठिक उन्‍नि मूसा रैबर्या से जादा आदर-सम्मान का लैख यीशु मसीह तैं समझै गै।</verse>
				<verse number="4">किलैकि हरेक घौर को कुई ना कुई बणौण वळु होन्दु, मगर जैन सब कुछ बणै उ परमेस्वर च।</verse>
				<verse number="5">हे मेरा दगड़्यों, हम जणदा छां कि परमेस्वर का रैबर्या मूसा न ठिक उन्‍नि कैरी, जन वेकू पिता परमेस्वर न बोलि छौ, अर अपणा जमना मा जब वेन सेवा को काम करण छौ, त वेन पिता परमेस्वर का लोगु की देख-रेख कैरी। अर वे बगत मा ही मूसा रैबर्या न ऊं लोगु तैं बतै छौ कि पिता परमेस्वर न औण वळा बगत खुणि क्‍वा जि योजना बणै के रखी च।</verse>
				<verse number="6">मगर यीशु मसीह पिता परमेस्वर को पुत्र होण का नाता भरोसा का लैख च। अर हम लोग जु कि यीशु मसीह पर बिस्वास करद्‍यां, अगर जु हम अपणी आस अर भरोसा वे पर बणै के रखद्‍यां, त हम पिता परमेस्वर का घौर का छां।</verse>
				<verse number="7">इलै हे मेरा भै-बैंणो, जन कि पवित्रशास्‍त्र मा परमेस्वर बुल्दु कि, “अगर जु तुम आज मेरी आवाज तैं सुणिल्या,</verse>
				<verse number="8">त अपणा मनों तैं निठुर नि कर्यां। जन कि तुमरा पितरों न निर्जन जगा मा मितैं गुस्सा दिलौण का बगत कैरी छौ। वे बगत मा ऊंन मेरु विरोध कैरिके मेरी अजमैस कैरी।</verse>
				<verse number="9">अर वे बगत मा ऊंन मेरा सबर तैं अजमौणु खुणि बार-बार मितैं भकलौण की कोसिस कैरी। अर यू त वु लोग छा जौन चालीस सालो तक मेरा द्‍वारा कियां कामों तैं देखि छौ।</verse>
				<verse number="10">इलै वे बगत का लोगु पर मितैं बड़ु गुस्सा ऐ, तब मिन बोलि, ‘यों लोगु का मन हमेसा मिसे दूर रौनदिन, अर जु कुछ मि ऊंतैं बतौण चान्दु, वेतैं वु स्वीकार नि करण चनदिन।’</verse>
				<verse number="11">तब मिन गुस्सा मा ऐके इन कसम खै कि, ‘यू लोग मेरा आराम की जगा मा कभि भि दाखिल नि होला।’”</verse>
				<verse number="12">इलै हे मेरा प्यारा भै-बैंणो, चौकस रा कखि तुमरो मन बुरु अर बिस्वास करण मा कमजोर नि ह्‍वे जौ, किलैकि इन होण पर लोग ज्यून्दा परमेस्वर का पिछनै चलण छोड़ि देन्दिन।</verse>
				<verse number="13">अर जबरि तक पवित्रशास्‍त्र को “आज” शब्द हमरा दगड़ा मा चलणु च, तबरि तक तुम लोग एक-दुसरा को हौसला बढौणा रा। अर ईं बात तैं ध्यान मा रखा कि कुई भि बिस्वासी मनखि धोखा खै के कखि पाप मा नि पोड़ि जौ, अर इन करण से अपणा मन तैं पिता परमेस्वर खुणि निठुर नि कैरी द्‍यो।</verse>
				<verse number="14">हे मेरा दगड़्यों, हम सभ्या का सभि यीशु मसीह का दगड़ा मा हिस्सेदार छां, इलै हमतै आखिरी तक अपणा बिस्वास तैं मजबूत बणै के रखण चयेणु, ठिक उन्‍नि जन हमुन शुरुवात मा रखी छौ।</verse>
				<verse number="15">अर जन कि पवित्रशास्‍त्र मा परमेस्वर बुल्दु कि, “अगर जु तुम आज मेरी आवाज तैं सुणिल्या, त अपणा मनों तैं निठुर नि कर्यां। जन कि तुमरा पितरों न निर्जन जगा मा मितैं गुस्सा दिलौण का बगत कैरी छौ।”</verse>
				<verse number="16">अर कैन वेकी आवाज तैं सुणी, अर कु छिन वु लोग जौन वेको विरोध कैरी? अरे, यू त वु इस्राएली छा जौं तैं परमेस्वर का रैबर्या मूसा न मिस्र देस बटि भैर निकळि छौ।</verse>
				<verse number="17">अर चालीस साल का वे बगत मा कु छा वु लोग जौं तैं देखि के पिता परमेस्वर तैं गुस्सा ऐ? अरे यू ही छा वु लोग। अर यू वु छा जौन वेका खिलाप मा जैके पाप कैरी इलै ऊंकी लांश निर्जन जगा मा पोड़ि रैनी।</verse>
				<verse number="18">अर या बात पिता परमेस्वर न कै बटि कैरी छै? जब वेन कसम खै के बोलि कि, “मेरी आराम की जगा मा तुमुन दाखिल नि होण।” यू त उई लोग छा, जौन वेकी आज्ञा को पालन नि कैरी।</verse>
				<verse number="19">अर इनकै हमतै पता चलि जान्दु, कि वु लोगु परमेस्वर की आराम की जगा मा दाखिल नि ह्‍वे सकदिन, किलैकि ऊंन वे पर बिस्वास नि कैरी।</verse>
			</chapter>
			<chapter number="4">
				<verse number="1">हे मेरा भै-बैंणो सुणा, पिता परमेस्वर न अपणा लोगु तैं आराम की जगा मा दाखिल होण को जु करार कैरी वु अभि तक बणयूं च। इलै हमतै ईं बात तैं ध्यान मा रखण चयेणु, कि हम मा बटि कुई भि ये करार से दूर नि ह्‍वे जौ।</verse>
				<verse number="2">किलैकि हमुन भि ये शुभ समाचार तैं ठिक उन्‍नि सुणी जन हमरा पितरों न सुणी छौ, मगर जु रैबार ऊंन सुणी वामा बटि भौत सा लोगु तैं कुई फैदा नि ह्‍वे, किलैकि ऊंन बिस्वास नि कैरी।</verse>
				<verse number="3">अर जब पिता परमेस्वर न आराम कैरी, त वीं ही जगा मा औणु खुणि वेन हमतै भि न्यूत्युं च हम जु की वे पर बिस्वास करद्‍यां, ताकि हम भि वीं जगा मा दाखिल ह्‍वे सैका। अर या बात इनकै सच्‍चि साबित होन्दी, किलैकि एक बार पिता परमेस्वर न मनखियों तैं देखि के बोलि कि, “मिन गुस्सा मा ऐके इन कसम खै की, ‘यू लोग मेरा आराम की जगा मा कभि भि दाखिल नि होला।’”</verse>
				<verse number="4">किलैकि हम यू जणद्‍यां छां कि पिता परमेस्वर न दुनियां बणौण का बगत मा अपणा सब काम तैं पूरु कैरी। अर पवित्रशास्‍त्र मा सातवां दिन का बारा मा कुछ इन लिख्यूं च कि, “परमेस्वर न अपणा सब काम करण का बाद सातवां दिन मा आराम कैरी।”</verse>
				<verse number="5">अर वीं ही जगा का बारा मा वु इन भि बुल्दु कि, “यू लोग मेरा आराम की जगा मा कभि भि दाखिल नि होला।”</verse>
				<verse number="6">अर यां को मतलब त यू च कि जौं लोगु तैं शुभ समाचार सुणये गै ऊंन वेतैं नि माणी इलै वु लोग आराम की जगा मा दाखिल नि ह्‍वे सकिनी।</verse>
				<verse number="7">इलै पिता परमेस्वर न एक और मौका दिनी कि लोग आराम की जगा मा आ अर उ “आज” को दिन ही च। अर भौत बाद मा वेन राजा दाऊद का द्‍वारा या बात इन बोलि कि, “अगर जु तुम आज मेरी आवाज तैं सुणिल्या, त अपणा मनों तैं निठुर नि कर्यां।”</verse>
				<verse number="8">किलैकि हम जणदा छां कि पितर यहोशू इस्राएल का लोगु तैं आराम की जगा मा दाखिल करण मा सफल नि ह्‍वे। अर अगर इन ह्‍वे जान्दु, त पिता परमेस्वर भविष्य की बात नि करदु, कि वु मेरी आराम की जगा मा दाखिल होला।</verse>
				<verse number="9">इलै तुम या बात जाणि ल्या, कि पिता परमेस्वर का लोगु खुणि अभि भि आराम को दिन ठिक उन्‍नि ठैर्युं, अर यू ठिक उन्‍नि च जन वेन खुद सातवां दिन मा आराम कैरी।</verse>
				<verse number="10">किलैकि जु कुई वेका आराम की जगा मा दाखिल ह्‍वे जान्दु, ऊ अपणा कामों तैं पूरा करण का बाद ही आराम करदिन, जन कि पिता परमेस्वर न भि दुनियां तैं बणौण का बाद आराम कैरी।</verse>
				<verse number="11">इलै आ, अब हम भि वे आराम की जगा मा दाखिल होण की पूरि कोसिस कैरा, कखि इन नि हो कि हम भि ऊं लोगु कि तरौं आज्ञा नि मनण की वजै से वेसे भैर ह्‍वे जां।</verse>
				<verse number="12">किलैकि परमेस्वर का वचन मा काम करण अर जीवन देण की ताकत च। अर यू वचन एक इन्दरि तलवार का जन च ज्वा कि दुई तरफा बटि पैनी च। अर जन तलवार सरील का मांस तैं हड़गौं से अलग कैरी देन्दी, ठिक उन्‍नि पवित्रशास्‍त्र मा लिखी बात भि हमरा विचार अर मन मा छिप्यां सब राजों तैं परगट कैरी देन्दु।</verse>
				<verse number="13">अर दुनियां मा इन्दरि कुई भि चीज नि च ज्वा कि पिता परमेस्वर की नजर से छिपी हो। अर हम सभ्यों न वेतैं अपणी-अपणी सब बातों को हिसाब-किताब देण च, अर वेकी आंख्यों का समणि सब चीज खुलि अर परगट छिन।</verse>
				<verse number="14">हे मेरा प्यारा भै-बैंणो, हम जणदा छां कि हमरा पास एक महा पुरोहित च जु की सबसे महान च। अर उ पिता परमेस्वर को पुत्र यीशु मसीह च, जु कि वेका पास आसमान मा मथि उठये गै।</verse>
				<verse number="15">किलैकि हमरु महा पुरोहित इन्द्रयो नि च जु कि हमरि कमजोरियों का हमरा दगड़ा मा दुखी नि होन्दु हो, मगर उ त इन्द्रयो च जैतैं हमरि ही तरौं कई बार शैतान का द्‍वारा भकलयै गै, मगर फिर भि वेन कुई पाप नि कैरी।</verse>
				<verse number="16">इलै आ, हम भि अपणा दया करण वळा पिता परमेस्वर की राजगद्‍दी का समणि निस फिकर ह्‍वेके जा, ताकि हम सभ्या का सभि वेसे मदद पौण खुणि वेकी दया अर किरपा तैं हासिल कैरी सैका।</verse>
			</chapter>
			<chapter number="5">
				<verse number="1">अर हम जणदा ही छां, कि यहूदी लोगु मा एक महा पुरोहित तैं मनखियों का बीच मा बटि ही चुणै जान्दु, ताकि उ मनखियों का खातिर पिता परमेस्वर की सेवा कैरो, अर लोगु का कियां पाप खुणि अरपण मा चड़ईं भेंट अर बलिदान तैं पिता परमेस्वर का समणि चड़ै सैको।</verse>
				<verse number="2">अर जब परमेस्वर की मनसा लोगु का बिंगण मा नि औन्दी अर ना ही ऊ इन समझदिन कि जु कुछ भि वु कना छिन उ गळत च, तब महा पुरोहित इन्द्रया लोगु का खातिर दया दिखान्दु, किलैकि उ खुद भि एक कमजोर मनखि च।</verse>
				<verse number="3">इलै उ खुद खुणि अर दुसरा लोगु खुणि बलिदान चड़ौन्दु, ताकि ऊंतैं पापों से माफी मिली जौ।</verse>
				<verse number="4">अर कुई भि मनखि खुद से महा पुरोहित बणण का आदर-सम्मान तैं नि पै सकदु, बल्किन मा यू त परमेस्वर च जु कि मनखि तैं चुणी के ठैरान्दु, जन वेन पितर हारुन तैं ठैरै छौ।</verse>
				<verse number="5">अर ठिक इन्‍नि यीशु मसीह न भि महा पुरोहित का पद तैं पौणु खुणि खुद तैं अफि नि चुणी, मगर यू आदर-सम्मान त वेतैं पिता परमेस्वर न दिनी। अर पवित्रशास्‍त्र की एक जगा मा परमेस्वर वेका बारा मा इन बुल्दु कि, “तू मेरु पुत्र छैई, अर आज से मि तेरु पिता छौं।”</verse>
				<verse number="6">अर पवित्रशास्‍त्र की दुसरि जगा मा परमेस्वर इन बुल्दु कि, “मलिकिसिदक की तरौं तू भि सदनि खुणि पुरोहित रैलि।”</verse>
				<verse number="7">अर जब यीशु मसीह ईं धरती पर छौ त वे बगत वेन ऊँची आवाज मा परमेस्वर तैं बुलै अर रुवे-रुवे के वेसे बिन्ती कैरी जु की वेतैं मौत से बचै सकदु छौ। अर पिता परमेस्वर न वेकी प्रार्थना तैं सुणी, किलैकि यीशु न वे पर अपणी पूरि सरदा रखी के खुद तैं वेका सुपुर्द कैरी दिनी।</verse>
				<verse number="8">अर परमेस्वर को पुत्र होण पर भि वेन दुख-तकलीफो तैं सै अर आज्ञा मनण सिखी।</verse>
				<verse number="9">अर दुख-तकलीफो तैं झिलण पर भि उ खरु निकळि। अर जथगा भि लोग यीशु मसीह की आज्ञा को पालन करदिन वु ऊं सब लोगु खुणि सदनि तक बचयै जाण की वजा बणि गै।</verse>
				<verse number="10">किलैकि पिता परमेस्वर न यीशु मसीह तैं मलिकिसिदक की तरौं सदनि खुणि महा पुरोहित बणैयालि।</verse>
				<verse number="11">हे मेरा भै-बैंणो, यों सब बातों का बारा मा तुमतै बतौणु खुणि हमरा पास भौत सि बात छिन, मगर अभि तुम ऊं बातों तैं समझि नि सकद्‍यां किलैकि तुम बातों तैं सिखण मा अळकस करद्‍यां।</verse>
				<verse number="12">अर अगर बगत का हिसाब से बात किये जौ त अभि तक त तुमतै गुरु बणि जाण चयेणु छौ, मगर तुम त इन ह्‍वे ग्यां कि कुई तुमरा पास अऽ अर तुमतै शुरु से पिता परमेस्वर का वचन का बारा मा फिर से बतौ। अर तुम त ऊं बच्‍चों का जन ह्‍वे ग्यां जौं तैं दूद ही चयेन्दु, अरे तुमुन अन्‍न खाण वळु कब बणण?</verse>
				<verse number="13">अर जु कुई अभि भि दूद ही पीण चाणु च त उ इन जाणि ल्या कि वेन बच्‍चा ही रौण, अर वेतैं सही अर गळत को कुई अता-पता नि च।</verse>
				<verse number="14">पर अन्‍न त बड़ा लोगु खुणि च, जु कि अपणा जीवन का तजुर्बो का द्‍वारा भलै अर बुरै का बीच मा फरक कैरी सकदिन।</verse>
			</chapter>
			<chapter number="6">
				<verse number="1">इलै हे मेरा दगड़्यों, आ, अर जु कुछ भि हमतै यीशु मसीह का बारा मा पैलि सिखये गै हम वीं ही शिक्षा मा नि बणयां रा, बल्किन मा बड़ा होण का नाता और भि जादा अगनै बढा अर मजबूत होन्दी जा। अर अब तुमतै यू सब बात बतौण की जरुरत नि छिन कि आखिर हमतै वु सब काम किलै छुड़ण चयेणा जु कि मौत कि तरफा लेके जनदिन, अर हमतै पिता परमेस्वर पर किलै भरोसा रखण चयेणु।</verse>
				<verse number="2">अर ना ही अब तुमतै ईं बात का बारा मा शिक्षा देण कि जरुरत च। जन कि, पाणि मा डुबकी लेके बपतिस्मा लेण का बारा मा, हाथ रखी के प्रार्थना करण का बारा मा या मुरदो मा बटि ज्यून्द होण का बारा मा, या फिर औण वळा बगत मा न्याय का बारा मा।</verse>
				<verse number="3">इलै अब जब पिता परमेस्वर की मनसा च त तुमतै भि बच्‍चा नि रौण चयेणु, बल्किन मा बड़ु ह्‍वे जाण चयेणु।</verse>
				<verse number="4">अर जथगा भि लोग एक बार पिता परमेस्वर का उज्याळा मा ऐ गैनी, वेन ऊंतैं बयना का रुप मा पवित्र आत्मा अर वेका दगड़ा-दगड़ि दान-बरदान भि दिनी, अर जु लोग शुभ समाचार अर औण वळा बगत मा नई दुनियां का बारा मा जणदिन, अगर इन्द्रया लोग बिस्वास करण से दूर ह्‍वे जा, त इन्द्रया लोगु तैं फिर से बिस्वास मा वापस लौण बड़ु कठिन च। अर तुम ईं बात तैं भि जाणि ल्या कि इन्द्रया लोग परमेस्वर का पुत्र यीशु तैं फिर से क्रूस पर चडौन्दिन, अर सभ्यों का समणि वे पर कलंक लगौन्दिन।</verse>
				<verse number="5"></verse>
				<verse number="6"></verse>
				<verse number="7">हे मेरा भै-बैंणो, अब मि तुमतै दुई किसम का पुंगड़ों का बारा मा बतौन्दु, एक किसम को वु च जु कि बरखा होण का बगत मा खूब पाणि पी जान्दु, अर औण वळा बगत मा वेमा खूब फसल लगदी ज्यां से कि पुंगड़ा का मालिक तैं खूब फैदा होन्दु। अर ठिक उन्‍नि पिता परमेस्वर भि इन्द्रया लोगु से खुश होन्दु, जु की इन्द्रया पुंगड़ा का जन छिन उ इन्द्रया लोगु को भलु ही करदु।</verse>
				<verse number="8">अर कुछ वे पुंगड़ा का जन होनदिन जु कि बरखा होण का बगत मा पाणि त खूब पी जनदिन, मगर जब बगत औन्दु त वेमा केवल झाड़-झंकाड़ ही पैदा होनदिन। अर अगर जु मनखि को जीवन भि इन्‍नि होलु फिर त पिता परमेस्वर जल्द ही दण्ड द्‍यालु अर फूकी के नास कैरी द्‍यालु।</verse>
				<verse number="9">अर मि तुम से प्यार करदु इलै मि कड़क ह्‍वेके तुमरा दगड़ा मा बात कनु छौं, अर मितैं पूरु यकीन च कि तुम इन्द्रया नि छां, किलैकि तुम लोग ऊं बातों को पालन करद्‍यां जौं की वजै से बचयै जान्दु।</verse>
				<verse number="10">अर जै तरीके से तुमुन परमेस्वर का लोगु की सेवा कैरी अर अभि भि कना छाँ, वां से इन साबित होन्दु कि तुम पिता परमेस्वर से कथगा प्यार करद्‍यां, अर उ यों बातों तैं नि बिसरलु, किलैकि उ कै का दगड़ा मा अन्यो नि करदु।</verse>
				<verse number="11">पर हमरि या ही मनसा च कि तुम मा बटि हरेक मनखि आखिरी तक पूरि कोसिस कनु रौ, ताकि जौं बातों की तुमुन आस रखी ऊ पूरि ह्‍वे जौ।</verse>
				<verse number="12">इलै अळकसि नि बणा, बल्किन मा ऊं लोगु की तरौं बणा जु कि बिस्वास अर सबर रखण मा मजबूत छिन। अर इन्द्रया लोग ऊं चीजों तैं पौनदिन, जौं को करार पिता परमेस्वर न कैरी।</verse>
				<verse number="13">हे मेरा दगड़्यों, जब पिता परमेस्वर न पितर अब्राहम बटि करार कैरी त वे बगत मा वेन खुद की ही कसम खै, किलैकि वेन देखि कि मिसे बड़ु त कुई छैई नि च। अर वेन पितर अब्राहम कू बोलि कि,</verse>
				<verse number="14">“अब्राहम, मि त्वेतै सच्‍चि मा भौत आसीस द्‍यूलु, अर तेरा वंश मा भौत जादा औलाद पैदा होलि।”</verse>
				<verse number="15">अर भौत इंतजार करण का बाद पितर अब्राहम तैं वु मिली जैको करार वेका दगड़ा मा परमेस्वर न कैरी छौ।</verse>
				<verse number="16">अर लोग ईं बात तैं भौत अच्छे से जणदिन कि करार करण का बगत मा अफ से बड़े की कसम खनदिन, ताकि बात पक्‍की ह्‍वे जौ।</verse>
				<verse number="17">अर वंश का लोगु खुणि जु-जु करार कियां छिन क्या पिता परमेस्वर ऊं लोगु का खातिर अपणी इच्छा तैं बदलि द्‍यालु, नऽ रे ना इन कभि नि ह्‍वे सकदु। पिता परमेस्वर अपणी मनसा तैं ऊं पर परगट करणु खुणि जरुर पूरि करलु, इलै वेन अपणा करार का बगत मा अपणी ही कसम खै दिनी।</verse>
				<verse number="18">अर करार अर कसम की दुई बातों तैं कभि बदलै नि जै सकदु, किलैकि पिता परमेस्वर कभि भि झूठ्‍ठ नि बुल्दु। इलै हम बिस्वासी लोग जु कि वेकी हिफाजत मा रौणा छां, हम सभ्यों तैं बड़ी हिम्मत रखी के अपणी-अपणी आस वे पर बणै के रखण चयेणी।</verse>
				<verse number="19">अर जन पाणि का जाज तैं एक जगा मा टिकाणु खुणि समुन्दर मा लंगर डळै जान्दु, ठिक उन्‍नि पिता परमेस्वर का द्‍वारा दिईं आस हमतै मजबूत अर वेकी हिफाजत मा रखदी। अर यां से इन पता चलदु की हम खुद वे परदा तैं पार कैरिके परमेस्वर का समणि खड़ा ह्‍वे ग्यां।</verse>
				<verse number="20">अर हमरु यीशु मसीह उख पैलि ही पौंछी गै, अर पिता परमेस्वर न वेतैं मलिकिसिदक की तरौं सदनि खुणि महा पुरोहित ठैरैयालि।</verse>
			</chapter>
			<chapter number="7">
				<verse number="1">हे मेरा भै-बैंणो, अब मि तुमतै मलिकिसिदक पुरोहित का बारा मा बतौन्दु कि वु कु च। मलिकिसिदक नौ को एक मनखि शालेम नगर को राजा अर सबसे महान परमेस्वर को पुरोहित छौ। अर वेका नौ को मतलब इन च कि, “एक इन्द्रयो राजा जु की परमेस्वर की नजर मा धरमी च” अर शालेम को मतलब, “शान्ति” से च, इलै वेकू शालेम को राजा भि बुले जान्दु। अर वेका ब्वे-बाब, अर वेका पितरों को कुई अता-पता नि च, अर ना ही वेका जनम अर मौत को कुई अता-पता। अर पुरणा जमना मा जब पितर अब्राहम राजाओं तैं हरै के वापिस औणु छौ, त वे बगत मा वेकी मुलाकात मलिकिसिदक से ह्‍वे अर वेन पितर अब्राहम तैं आसीस दिनी। तब पितर अब्राहम न राजाओं पर जीत हासिल करण से जु कुछ भि पै छौ वेन ऊं चीजों को दसुं हिस्सा वेतैं दिनी। अर जन परमेस्वर को पुत्र च ठिक उन्‍नि उ भि सदनि खुणि पुरोहित का रुप मा रौण वळु च।</verse>
				<verse number="2"></verse>
				<verse number="3"></verse>
				<verse number="4">अर ईं बात मा कुई सक नि च कि आसीस देण वळु हमेसा आसीस पौण वळा से बड़ु होन्दु। अर तुम हमरि ईं बात पर ध्यान द्‍या, कि वु मनखि कथगा महान रै होलु जैतैं पितर अब्राहम न अपणी जीत का समान मा बटि दसुं हिस्सा दिनी। अर वे बगत मा पितर अब्राहम न बिना कै नियम-कानून तैं जणयां ही अपणु दसुं हिस्सा वेतैं दिनी, अर वेका बदला मा मलिकिसिदक पुरोहित बटि खुद खुणि आसीस पै, जौं को करार पिता परमेस्वर न पितर अब्राहम का दगड़ा मा कर्युं छौ। अर जब मलिकिसिदक पुरोहित की मुलाकात पितर अब्राहम का दगड़ा मा ह्‍वे छै, त वे बगत मा पितर लेवी को जनम नि ह्‍वे छौ। अर लेवी त पितर अब्राहम को नाति को नौनु च, अर वेका वंश मा पैदा होण वळा सब आदिम पुरोहित को काम करदिन अर वु आम लोगु बटि दसुं हिस्सा तैं पौनदिन। अर जब लेवी अर वेका वंश का लोग पुरोहित को काम करदिन, त वु लोग मूसा का दियां नियम-कानून का मुताबिक ज्यून्दा परमेस्वर का लोगु से दसुं हिस्सा लेन्दिन, जब कि दुसरा आम लोग भि पितर अब्राहम का वंश मदि ही छिन। अर ईं बात का मुताबिक इन बुले जै सकदु, कि लेवी नौ का मनखि न खुद वु दसुं हिस्सा मलिकिसिदक पुरोहित तैं दिनी। जब कि लेवी को जनम त भौत बाद मा ह्‍वे छौ अर मलिकिसिदक पुरोहित को लेवी का वंश से कुई लेण-देण नि च। अर जख तक लेवी का वंश का लोगु की बात च त यू वु लोग छिन जौं तैं आम लोगु का द्‍वारा दसुं हिस्सा दिये जान्दु, मगर येतैं पौण वळा सब लोग एक बगत का बाद मोरि जनदिन मगर पवित्रशास्‍त्र का मुताबिक मलिकिसिदक पुरोहित बणयूं रौन्दु।</verse>
				<verse number="5"></verse>
				<verse number="6"></verse>
				<verse number="7"></verse>
				<verse number="8"></verse>
				<verse number="9"></verse>
				<verse number="10"></verse>
				<verse number="11">अर अगर मूसा रैबर्या का दियां नियम-कानूनों का मुताबिक पुरोहित लोग केवल लेवी का वंशज अर पितर हारुन की पीढ़ी का ही होला, त या योजना कै भि मनखि तैं सिद्ध नि कैरी सकदी। अर अगर इन जि ह्‍वे जान्दु त पुरोहित अपणा काम तैं लगातार कना रौन्दा, मगर पिता परमेस्वर न त अपणी सेवा करण खुणि एक अलग ही पुरोहित तैं चुणी जु कि पितर लेवी का वंश मदि नि छौ। इलै मलिकिसिदक की तरौं सदनि को पुरोहित होणु खुणि एक नयू आदिम चुणै गै।</verse>
				<verse number="12">अर जब पुरोहित का चुणै जाण का नियम ही बदलि जनदिन, त या बात भि साफ ह्‍वे जान्दी की अब नियम-कानूनों मा बदळौ होण चयेणा।</verse>
				<verse number="13">अर हम जणदा छां कि हमरु प्रभु यीशु यहूदा का गोत्र मा पैदा ह्‍वे, अर मूसा रैबर्या न इन कभि नि बोलि कि उ पुरोहित यहूदा का गोत्र बटि आलु। अर यीशु का बारा मा पवित्रशास्‍त्र इन बतौन्दु कि उ एक अलग ही गोत्र को च, जैन कभि परमेस्वर की वेदी का समणि वेकी सेवा को काम नि कैरी। अर यीशु मसीह का गोत्र मा कैन कभि भि पुरोहित होण को काम नि कैरी, अर यां से इन साबित होन्दु कि पुरणा नियम-कानून सच्‍चि मा बदलि गैनी।</verse>
				<verse number="14"></verse>
				<verse number="15">अर इनकै या बात और भि जादा साफ ह्‍वे जान्दी, कि एक इन्द्रयो पुरोहित परगट ह्‍वे गै जु कि मलिकिसिदक की ही तरौं सदनि खुणि एक पुरोहित का रुप मा चुणै गै।</verse>
				<verse number="16">अर वेतैं वेका पितरों की वजै से नि ठैरैये गै, मगर इलै ठैरैये गै किलैकि उ पिता परमेस्वर की ताकत की वजै से सदनि तक ज्यून्द रौण वळु च।</verse>
				<verse number="17">अर पवित्रशास्‍त्र का एक हिस्सा मा यीशु मसीह का बारा मा कुछ इन लिख्यूं च कि, “मलिकिसिदक की तरौं तू भि सदनि खुणि पुरोहित रैलि।”</verse>
				<verse number="18">अर परमेस्वर का रैबर्या मूसा का द्‍वारा जु नियम-कानून पिता परमेस्वर न पैलि दे छा, ऊंतैं वेन रद्‍द कैरी दिनी किलैकि जन वु चान्दु छौ वेका मुताबिक कुई भि मनखि वेकी नजर मा धरमी साबित नि ह्‍वे सैकी। मगर अब वेन हमतै एक नई आस दिईं च अर हमतै पूरु यकीन च की वींका द्‍वारा हम परमेस्वर का नजदीक जै सकद्‍यां।</verse>
				<verse number="19"></verse>
				<verse number="20">अर यू नयू करार पैला करार से जादा अच्छु च, किलैकि यू करार पिता परमेस्वर का द्‍वारा कसम खै के किये गै। अर या बात मि इलै बोन्‍नु छौं, किलैकि मूसा रैबर्या का दियां नियम-कानूनों का मुताबिक जु लोग पुरोहित को काम करदिन ऊंतैं ठैराणु खुणि परमेस्वर न कसम नि खै।</verse>
				<verse number="21">किलैकि जब दुसरा लोग पुरोहित का काम खुणि ठैरैये गैनी त परमेस्वर न ऊंका दगड़ा मा कुई करार नि कैरी छौ, मगर जब वेन यीशु तैं ठैरै तब वेन वेका बारा मा करार कैरी छौ। जन की पवित्रशास्‍त्र मा भि लिख्यूं च कि, “प्रभु न कसम खै, कि तू सदनि खुणि एक पुरोहित छैई, अर मिन अपणा मन तैं नि बदळण।”</verse>
				<verse number="22">अर पिता परमेस्वर न कसम खै के एक नयू करार कैरी अर ये करार को जमानती यीशु मसीह च, इलै यू मूसा रैबर्या का दगड़ा मा कियां करार से जादा अच्छु च।</verse>
				<verse number="23">अर यीशु मसीह अर दुसरा पुरोहितों मा यू फरक च कि पुरोहित का पद पर काम करण वळा सब लोग अपणु-अपणु काम लगातार नि कैरी सकिनी, अर एक बगत का बाद मोरि गैनी।</verse>
				<verse number="24">पर यीशु मसीह सदनि कू ज्यून्द च, इलै वेको पुरोहित को यू पद सदनि खुणि रालु अर वेकी जगा कुई नि ले सकदु।</verse>
				<verse number="25">अर जु लोग वे पर बिस्वास करदिन वु ऊंतैं पिता परमेस्वर का पास लेके जान्दु अर ऊंतैं बचौण की ताकत रखदु, किलैकि वु ऊं सभ्यों खुणि हमेसा पिता परमेस्वर से बिन्ती करण वळु एक बिचलु च।</verse>
				<verse number="26">अर यीशु मसीह वु पुरोहित च जैमा कुई कपट नि च अर वु पवित्र अर निरदोष च, अर स्वर्ग मा वेतैं हम सब लोगु से जादा आदर-सम्मान दिये जान्दु, किलैकि वु हम पापि लोगु का जन नि च।</verse>
				<verse number="27">अर जन दुसरा महा पुरोहित पैलि अपणा पापों खुणि, अर फिर परजा का लोगु खुणि हरेक दिन परमेस्वर का समणि बलिदान चडौन्दिन, यीशु मसीह तैं इन करण की जरुरत नि च किलैकि वेन एक बार मा ही सब मनखियों का खातिर पिता परमेस्वर का समणि एक बलिदान का रुप मा खुद तैं दे दिनी।</verse>
				<verse number="28">ईं दुनियां को मनखि कमजोर अर पापि च फिर भि मूसा रैबर्या का द्‍वारा दियां नियम-कानूनों न ऊंतैं मुख्य पुरोहित का रुप मा चुणी, मगर बाद मा पिता परमेस्वर न कसम खै के अपणा पुत्र यीशु तैं पुरोहित ठैरै दिनी, अर यीशु मसीह हमेसा सब बातों मा खरु निकळदु।</verse>
			</chapter>
			<chapter number="8">
				<verse number="1">हे मेरा दगड़्यों, हमरि यों सब बातों को मतलब यू च कि हमरु यीशु मसीह एक इन्द्रयो महा पुरोहित च, जु कि स्वर्ग मा सबसे महान परमेस्वर की राजगद्‍दी की दैंणी तरफा बैठयूं च।</verse>
				<verse number="2">अर वीं पवित्र जगा मा उ महा पुरोहित बणि के पिता परमेस्वर की सच्‍चि सेवा कनु च। अर यू वे तम्बू का जन नि च जख पुरोहित लोग पैलि सेवा करदा छा, किलैकि वेतैं लोगु का द्‍वारा बणयै गै मगर जख यीशु मसीह च वीं जगा तैं स्वर्ग मा खुद पिता परमेस्वर न बणै।</verse>
				<verse number="3">अर हरेक महा पुरोहित तैं इलै ठैर्युं जान्दु ताकि उ पिता परमेस्वर का समणि अरपण मा चड़ईं भेंट अर बलिदान तैं लेके अऽ। अर ईं बात का मुताबिक हमरा महा पुरोहित यीशु का पास भि चड़ौणु खुणि कुछ ना कुछ होण चयेणु।</verse>
				<verse number="4">अगर जु यीशु मसीह ईं धरती पर होन्दु, त उ पुरोहित का पद पर कभि भि काम नि कैरी सकदु छौ, किलैकि इख त पैलि ही दुसरा पुरोहित मौजूद छा जु की मूसा का दियां नियम-कानून का मुताबिक पिता परमेस्वर खुणि भेंट चडौन्दिन।</verse>
				<verse number="5">अर असली पवित्र जगा स्वर्ग मा च अर ईं धरती का पुरोहित जख सेवा करदिन वु सिरफ वेको एक नमूना च। इलै जब मूसा रैबर्या ईं धरती पर पवित्र तम्बू तैं बणौण वळु छौ, त तम्बू बणौण से पैलि ही पिता परमेस्वर न वेतैं चितै दिनी कि, “ईं बात को ध्यान रखी कि जु नमूना त्वेतै सीनै पाड़ पर दिखये गै तू तम्बू तैं वेका मुताबिक ही बणै।”</verse>
				<verse number="6">पर हमरा महा पुरोहित यीशु तैं सेवा को जु काम दिये गै वु दुनियां का दुसरा पुरोहितों से जादा बढी के च, किलैकि यीशु वु च जु कि पुरणा करार का मुताबिक परमेस्वर का दगड़ा मा मनखियों खुणि एक अच्छा बिचलु होण को काम करदु। अर यां से इन पता चलदु कि नयू करार पुरणा से जादा अच्छु च।</verse>
				<verse number="7">अर अगर जु पैला करार मा कुई कमी नि होन्दी, त फिर दुसरा करार की भि कुई जरुरत नि छै।</verse>
				<verse number="8">अर वे बगत का लोगु तैं पिता परमेस्वर न अपणी नजर मा दोषी पैके इन बोलि कि, “प्रभु इन बुल्दु कि वु दिन औण वळा छिन, जब मि इस्राएल का कुटुम्ब का दगड़ा मा अर यहूदा का कुटुम्ब का दगड़ा मा नयू करार करलु।</verse>
				<verse number="9">अर यू वे करार की तरौं नि होलु जु मिन ऊं लोगु का पितरों का दगड़ा मा वे बगत कैरी छौ। जब मि ऊंको हाथ पकड़ी के ऊंतैं मिस्र देस बटि भैर निकाळि के लै छौ। अर प्रभु इन बुल्दु कि वु लोग मेरा करार पर अटल बणयां नि रैनी, इलै मिन ऊंकी परवा करण छोड़याली।</verse>
				<verse number="10">मगर प्रभु इन भि बुल्दु कि, ऊं दिनों का बाद मि इस्राएल का घौर बटि जु करार करलु, उ यू च कि मि अपणा नियम-कानूनों तैं ऊंका जमीर मा डललु, अर ऊंका दिलों मा ऊंतैं लिखी द्‍यूलु, अर मि ऊंको परमेस्वर होलु अर ऊ मेरा लोग होला।</verse>
				<verse number="11">अर अब से ऊंमा बटि कुई भि अपणा देस का लोगु तैं अर अपणा भै-बन्दों तैं इन बोलि के नि सिखालु कि, ‘प्रभु तैं पछ्याणा’ किलैकि छुटा से लेके बड़ा तक सभ्या का सभि मितैं जाणि जाला।</verse>
				<verse number="12">किलैकि जथगा भि गळत काम ऊंन करिनी मि ऊं पर अपणी दया दिखै के ऊंतैं माफ कैरी द्‍यूलु, अर ऊंका पापों तैं फिर कभि भि याद नि करलु।”</verse>
				<verse number="13">अर इनकै एक नया करार तैं ठैरै के परमेस्वर न पैला वळा करार तैं पुरणु ठैरै दिनी। किलैकि जु चीज पुरणि अर कमजोर ह्‍वे जनदिन ऊ रद्‍द ह्‍वे जनदिन अर इनकै ऊंको नास ह्‍वे जान्दु।</verse>
			</chapter>
			<chapter number="9">
				<verse number="1">हे मेरा दगड़्यों, पिता परमेस्वर न पैला करार मा भक्‍ति करण का नियम-कानून दिनी, अर एक पवित्र तम्बू बणौणु कू बोलि।</verse>
				<verse number="2">इलै ईं बात का मुताबिक एक तम्बू बणयै गै जैका पैला हिस्सा मा एक दीपदान, एक मेज अर अरपण मा चड़ईं भेंट की रुट्‍टी छै, ईं जगा कू पवित्र बुले जान्दु छौ।</verse>
				<verse number="3">अर वेका बाद तम्बू का दुसरा हिस्सा मा एक परदा लग्यूं छौ, अर जैकी वजै से उ एक कमरा लगदु छौ। वीं जगा मा धुप जगौणु खुणि सोना की एक वेदी बणि छै, अर उख सोनो को एक बक्सा छौ जैकू करार को बक्सा बुले जान्दु, अर वेमा सोनो को एक कटोरा छौ जैमा “मन्‍ना” नौ को खाणुक रखै गै छौ। वे बक्सा मा पितर हारुन को वु जांठु भि छौ जै पर मौळयार ऐ गै छै। अर जौं पठौलो पर परमेस्वर की आज्ञा लिखीं छै, वु दुई पठाळ भि उखि छै अर वीं जगा कू महा पवित्र जगा बुले जान्दु।</verse>
				<verse number="4"></verse>
				<verse number="5">अर वे बक्सा का मथि दिब्य चमक वळा दुई स्वर्गदूत बणयां छा, जौं का दुई फाँकुड़ बक्सा से लेके पस्ताप करण वळी जगा तक फैल्यां छा। मगर अभि इथगा बगत नि च कि यों सब चीजों को बखान एक-एक कैरिके किये जौ।</verse>
				<verse number="6">अर जब पुरोहित हरेक दिन पवित्र तम्बू का पैला वळा हिस्सा मा अपणा काम तैं पूरु करणु खुणि जान्दा छा त वे बगत मा सब कुछ इन्‍नि छौ।</verse>
				<verse number="7">मगर दुसरा हिस्सा मा केवल महा पुरोहित ही जान्दु छौ, अर हरेक बार उ अपणा पापों खुणि अर दुसरा लोगु का द्‍वारा किये जाण वळा हरेक किसम का पापों खुणि पिता परमेस्वर का समणि बलिदान मा चड़यां ल्वे तैं लेके जान्दु छौ, अर उ भि सालभर मा सिरफ एक बार।</verse>
				<verse number="8">मगर पवित्र आत्मा हमतै इन बतौन्दु कि जब तक तम्बू अर वेका मुताबिक चलौण वळा रीति-रिवाज बणयां छा, तब तक ऊं रिवाजों का द्‍वारा सब लोग महा पवित्र वळी जगा मा दाखिल नि ह्‍वे सकदु छा।</verse>
				<verse number="9">इलै आज का दिन पर ईं बात को मतलब इन च कि हम लोग अपणा दान-बलिदान चड़ै के परमेस्वर की नजर मा अपणा जमीर तैं शुद्ध नि कैरी सकद्‍यां।</verse>
				<verse number="10">अर यू रीति-रिवाज केवल मनखि तैं बन्‍नि-बन्‍नि कार्यक्रमों खुणि खुद तैं धुण अर खाण-पीण का बारा मा ही बतौन्दिन। अर ईं दुनियां मा रीति-रिवाज तब तक ही रौन्दिन जब तक कि ऊंतैं और भि जादा सुधार करण को बगत नि ऐ जौ।</verse>
				<verse number="11">हे मेरा भै-बैंणो, अब जब यीशु मसीह ईं दुनियां मा एक महा पुरोहित बणि के ऐ, त उ हम खुणि भली से भली आसीस लेके ऐ, जु कि आज हमतै मिलणी छिन। अर जख यीशु मसीह न सेवा कैरी उ बड़ु भलु च किलैकि उ पवित्र तम्बू मनखियों का हाथोंळ नि बणि अर ना ही उ ईं दुनियां को च।</verse>
				<verse number="12">अर ईं दुनियां वळा तम्बू मा जब महा पुरोहित सालभर मा एक बार भितर जान्दु छौ, त उ बलिदान मा चड़यां बखरों अर बोड़ो का ल्वे तैं दगड़ा मा लि जान्दु छौ, ताकि लोगु तैं ऊं पर लग्यां पापों का इळजाम से माफी मिली जौ। अर मूसा का दियां नियम-कानूनों का मुताबिक जब लोग परमेस्वर की नजर मा अशुद्ध ह्‍वे जान्दा छा, त वु वेकी भक्‍ति का काबिल नि रौन्दा छा। अर जब तक ऊं लोगु पर बलिदान मा चड़यां बखरों अर सांड़ो को ल्वे, अर बछरों की राख छिड़के नि जौ तब तक ऊ लोग शुद्ध नि मणै जान्दा छा। मगर हमरा यीशु मसीह न इन नि कैरी, बल्किन मा वु खुद अपणु ल्वे देके वीं पवित्र जगा मा एक ही बार गै, अर इन कैरिके वेन सदनि खुणि हमतै पापों से छुटकारु दे दिनी।</verse>
				<verse number="13"></verse>
				<verse number="14">किलैकि यीशु मसीह मा पाप ही नि छौ, अर वेन खुद तैं एक बलिदान का रुप मा पिता परमेस्वर का समणि दे दिनी, अर यू बलिदान आत्मिक अर सदनि तक रौण वळु च। इलै वेको ल्वे भौत जादा महान च, जु कि हमरा जमीर तैं शुद्ध करदु, ताकि हम ज्यून्दा परमेस्वर की पवित्र सेवा कैरी सैका। अर हम इन्द्रयो कुई भि काम नि कैरा, जु की हमतै सदनि की मौत की तरफा लेके जौ।</verse>
				<verse number="15">अर लोगु तैं पाप से छुड़ौण का खातिर यीशु मसीह मरे गै। अर ईं मौत का द्‍वारा वेन पुरणा करार तैं रद्‍द कैरी दिनी, ताकि उ अपणा चुण्यां लोगु तैं पिता परमेस्वर का द्‍वारा मिलण वळी सदनि की आसिसों तैं द्‍यो, अर वेका दगड़ा-दगड़ि एक नयू करार भि द्‍यो जु की सदनि को जीवन च।</verse>
				<verse number="16">असल मा जख वसीयत लिखे रौन्दी उख वींतैं साबित करणु खुणि इन बतये जान्दु कि वींतैं बनबौंण वळे की मौत ह्‍वे गै।</verse>
				<verse number="17">किलैकि बनबौंण वळे की मौत का बाद ही वा वसीयत पक्‍की होन्दी, अर जब तक बनबौंण वळु ज्यून्दु च तब तक वा वसीयत कै काम की नि च।</verse>
				<verse number="18">इलै ही पैला करार तैं पूरु करणु खुणि ल्वे तैं बुगये गै।</verse>
				<verse number="19">अर जु कुछ भि परमेस्वर न मूसा रैबर्या तैं बतै वेन वु नियम-कानून लोगु तैं ठिक उन्‍नि बतैनि, कि ऊंतैं माफी पौणु खुणि इन्‍नि ही करण चयेणु। तब वेन बोड़ो अर बखरों का ल्वे का दगड़ा मा पाणि मिलै अर लाल ऊंन अर जुफा की पौद से करार का दस्तावेजों अर सब लोगु पर छिड़की।</verse>
				<verse number="20">अर वेन बोलि, “यू करार को वु ल्वे च जैको पालन करण की आज्ञा परमेस्वर न हमतै देई।”</verse>
				<verse number="21">अर इनकै वेन पवित्र तम्बू अर सेवा मा काम औण वळा सब समान पर ल्वे छिड़की।</verse>
				<verse number="22">अर सच्‍चि बात त या च कि मूसा का दियां नियम-कानून का मुताबिक अकसर सभि चीज ल्वे का द्‍वारा ही शुद्ध किये जनदिन, अर माफी पौणु खुणि ल्वे बुगण जरुरी च।</verse>
				<verse number="23">हे मेरा दगड़्यों, इख जु चीज छिन वु स्वर्ग की चीजों को एक नमूना च। अर यों चीजों तैं जानबरों का ल्वे से शुद्ध करण पोड़ि, मगर यू ल्वे स्वर्ग की चीजों तैं पवित्र नि बणै सकदु किलैकि यां खुणि और भि अच्छा बलिदान की जरुरत छै।</verse>
				<verse number="24">इलै यीशु मसीह मनखियों का द्‍वारा बणयां मन्दिर की पवित्र जगा मा नि गै, जु कि असली चीजों को एक नमूना च, मगर उ वेका बदला स्वर्ग मा गै जख उ हमरि खातिर पिता परमेस्वर का समणि हाजिर रौन्दु।</verse>
				<verse number="25">अर महा पुरोहित साल मा एक बार लोगु का पापों का खातिर जानबर का ल्वे तैं अफ दगड़ा मा लेके पवित्र जगा मा जान्दु। मगर यीशु मसीह तैं इन करण की कुई जरुरत नि पोड़ि कि वु हरेक साल मा इन कैरो।</verse>
				<verse number="26">अर अगर ज्वा इन बात ही रौन्दी, त यीशु तैं दुनियां की शुरुवात से अभि तक बार-बार दुख उठौण पोड़दु, मगर वेन खुद तैं आखिरी का दिनों मा एक ही बार सदनि खुणि परगट कैरियाली, ताकि अपणा बलिदान का द्‍वारा उ पाप तैं मिटै सैको।</verse>
				<verse number="27">अर जन एक बार मुरण अर वेका बाद न्याय को परगट होण मनखियों खुणि जरुरी च।</verse>
				<verse number="28">ठिक उन्‍नि यीशु मसीह भि भौत सा लोगु का पापों तैं उठौणु खुणि एक ही बार बलिदान ह्‍वे। पर जब उ फिर से वापस आलु त उ मनखि का पापों तैं माफ करणु खुणि ना, बल्किन मा ऊंतैं छुटकारा देणु खुणि आलु जु कि वेको इंतजार कना छिन।</verse>
			</chapter>
			<chapter number="10">
				<verse number="1">दगड़्यों, जु नियम-कानून परमेस्वर का रैबर्या मूसा का द्‍वारा दिये गैनी वु त औण वळा बगत मा भली चीजों को एक नमूना छौ। अर छैल वळी चीज खुद भली नि ह्‍वे सकदिन, किलैकि यहूदी लोगु द्‍वारा हरेक साल बलिदान चड़ये जनदिन, त फिर जु लोग पिता परमेस्वर का पास औन्दिन ऊ कनकै शुद्ध ह्‍वे सकदिन।</verse>
				<verse number="2">अगर पिता परमेस्वर की भक्‍ति करण वळा लोग सच्‍चि मा शुद्ध ह्‍वे जान्दा, त वु खुद तैं पाप खुणि दोषी मैसूस नि करदा अर बलिदान करण भि बन्द ह्‍वे जान्दु।</verse>
				<verse number="3">मगर इन नि ह्‍वे किलैकि बखरों अर सांड़ो को ल्वे मनखि पर लग्यां पापों का इळजाम से माफी नि दिलै सकदु, यू त लोगु तैं हरेक साल सिरफ इन याद दिलान्दु कि अभि तक ऊ पापि अर दोषी छिन।</verse>
				<verse number="4"></verse>
				<verse number="5">इलै जब यीशु मसीह ईं दुनियां मा औण वळु छौ, त वेन अपणा बारा मा इन बोलि जन कि पवित्रशास्‍त्र मा भि लिख्यूं च कि, “हे मेरा परमेस्वर, तुमुन बलिदान अर भेंट नि चै, पर तुमुन मि खुणि एक सरील तयार कैरी।</verse>
				<verse number="6">अर नऽ त तुम हवन करण से खुश होनद्‍यां, अर ना ही ऊं बलियों से जु कि पाप करण की वजै से चड़ये जनदिन।</verse>
				<verse number="7">तब मिन बोलि, ‘देखा, मि इख छौं मि तुमरि मनसा तैं पूरि करणु कू ऐ ग्यों, किलैकि पवित्रशास्‍त्र मा मेरा बारा मा इन ही लिख्यूं च।’”</verse>
				<verse number="8">मूसा का दियां नियम-कानून त इन सिखौन्दिन कि हवन मा चड़ईं भेंट अर बलि पाप से माफी पौण खुणि च, त फिर यीशु मसीह न यों बातों को जिकर इन किलै कैरी कि तुम ना त हवन करण से, अर ना ही पाप खुणि चड़ईं बलि से खुश होनद्‍यां?</verse>
				<verse number="9">चला छोड़ा, यीशु मसीह को परमेस्वर का दगड़ा मा बात करण को यू ही मतलब छौ कि, “मि तुमरि मनसा तैं पूरु करण का खातिर ही अयूं।” अर यां से इन पता चलदु कि पैलु वळु करार जैमा अरपण मा भेंट अर बलियां छै वु सब हटये गैनी।</verse>
				<verse number="10">अर परमेस्वर की मनसा का मुताबिक यीशु मसीह का सरील तैं एक ही बार हमेसा खुणि बलि चड़ये गै अर इन होण से वेन हमतै पवित्र कैरियाली।</verse>
				<verse number="11">हरेक पुरोहित हरेक दिन अपणु-अपणु काम पूरु करदिन, अर इन बलि चडौन्दिन जु कि मनखियों का पापों तैं कभि ऊं से दूर नि कैरी सकदिन।</verse>
				<verse number="12">मगर यीशु मसीह न खुद तैं एक बलि का रुप मा दे दिनी, एक इन्दरि बलि जु कि सदनि तक रौण वळी च। अर वेका बाद उ परमेस्वर का दैंणा हाथ की तरफा आदर-सम्मान वळी जगा मा जैके बैठि गै।</verse>
				<verse number="13">अर उख बैठि के वु वे बगत को इंतजार कनु च, जब तक की वेका दुसमन वेका अधीन मा नि ह्‍वे जा।</verse>
				<verse number="14">किलैकि वेन एक ही बलिदान चड़ै के ऊं लोग तैं पवित्र कैरी जु कि वेकी सेवा खुणि अलग कैरिके रख्यां छा।</verse>
				<verse number="15">अर पवित्रशास्‍त्र मा पवित्र आत्मा भि ईं बात की गवै देन्दु। अर उ पैलि इस्राएली लोगु का बारा मा बुल्दु अर वेन इन बोलि कि,</verse>
				<verse number="16">प्रभु इन बुल्दु, “जब बगत आलु त मि ऊंका दगड़ा मा एक नयू करार करलु, अर मि अपणा नियम-कानूनों तैं ऊंका जमीर मा डललु अर ऊंका दिलों मा ऊंतैं लिखलु।”</verse>
				<verse number="17">अर फिर वु इन भि बुल्दु कि, “मि ऊं लोगु का पापों तैं अर ऊंका द्‍वारा कियां बुरा कामों तैं फिर कभि भि याद नि करलु।”</verse>
				<verse number="18">अर जब परमेस्वर कै का पापों तैं माफ कैरी देन्दु, त फिर वेतैं बलिदान चड़ौण की क्या जरुरत?</verse>
				<verse number="19">इलै हे मेरा भै-बैंणो, अब हमरा पास पिता परमेस्वर का घौर मा एक बड़ु महा पुरोहित याने की यीशु मसीह च। हाँ, यीशु जैन हमरा खातिर अपणु जीवन देई अर अपणा ल्वे की ताकत से वेन मन्दिर का वे परदा तैं हटै दिनी जख आम लोगु नि जै सकदा छा। अर इनकै यीशु मसीह न एक नयू बाटु दिखै जु कि हमतै नया जीवन की तरफा लेके जान्दु। इलै अब एक यीशु मसीह ही च जु कि हमतै हिम्मत देन्दु की हम महा पवित्र जगा मा दाखिल ह्‍वे सैका।</verse>
				<verse number="20"></verse>
				<verse number="21"></verse>
				<verse number="22">इलै आ, अब हम सच्‍चा मन अर पूरा बिस्वास का दगड़ा मा पिता परमेस्वर का नजदीक ऐ जा, किलैकि हमतै पवित्र करण का खातिर हमरा दोषी जमीर पर यीशु मसीह का ल्वे तैं छिड़के गै, ताकि हम पर लग्यूं इळजाम दूर हो अर हम मन से पवित्र अर अपणा सरील तैं बपतिस्मा का पाणिळ ध्वेके शुद्ध ह्‍वे जा।</verse>
				<verse number="23">अर वीं आस तैं अपणा-अपणा जीवन मा बणै के रखा जिं पर हमतै पूरु यकीन च, किलैकि जु करार पिता परमेस्वर न हमरा दगड़ा मा कर्युं च वु जरुर पूरु होलु।</verse>
				<verse number="24">अर हमरा सभौ मा प्यार अर भलै का कामों तैं करण ही हो, अर यां खुणि हम एक-दुसरा की हिम्मत बढा ताकि वु भि इन्‍नि कैरा।</verse>
				<verse number="25">अर एक-दुसरा का दगड़ा बिस्वासी समुदाय मा औण-जाण की संगती तैं नि छोड़ा, किलैकि तुम मा बटि कुछ लोग इन कना छिन, पर तुमतै एक-दुसरे की हिम्मत बढौण चयेणी। अर या बात मि इलै बोन्‍नु छौं किलैकि तुम जणदा छाँ कि प्रभु को वापस औण को दिन नजदीक ऐ गै, इलै इन करण मा लग्यां रा।</verse>
				<verse number="26">अर अगर जु हम सच्‍चा ज्ञान तैं पौण का बाद भि जाणि बुझि के पाप कना रौला, त ईं बात तैं जाणि ल्या कि फिर पापों से माफी पौणु खुणि कुई भि दुसरो बलिदान नि च।</verse>
				<verse number="27">फिर त सिरफ एक ही बात रै जान्दी न्याय को होण अर खतरनाक आग मा जाण को दण्ड अर यू ऊ छिन जु कि पिता परमेस्वर का दुसमनों को नास कैरी देन्दिन।</verse>
				<verse number="28">किलैकि जु मनखि मूसा रैबर्या का दियां नियम-कानून तैं मनण से इनकार कैरी देन्दु छौ, वे पर दया नि किये गै बल्किन मा दुई या तीन लोगु का द्‍वारा देई गवै से वेतैं मरे जान्दु छौ।</verse>
				<verse number="29">त फिर सोचा ऊं लोगु कि सजा कथगा खतरनाक होलि जौन परमेस्वर का पुत्र को अपमान कैरी, अर करार का वे ल्वे तैं सुद्‍दी समझि जैका द्‍वारा ऊंतैं पवित्र किये गै छौ। अर ऊंन पवित्र आत्मा से मिलण वळी किरपा को आदर नि कैरी, बल्किन मा बेजती कैरी।</verse>
				<verse number="30">किलैकि हम जणदा छां, कि परमेस्वर न इन बोलि कि, “बदला लेण मेरु काम च, मि खुद ही ये काम तैं करलु।” अर फिर इन भि बोलि कि, “प्रभु अपणा लोगु को न्याय करलु।”</verse>
				<verse number="31">अर सुणा, ज्यून्दा परमेस्वर का हाथों मा पोड़ण बड़ी खतरनाक बात च।</verse>
				<verse number="32">हे मेरा भै-बैंणो, अपणा पुरणा दिनों तैं याद कैरा, जब तुमुन परमेस्वर का उज्याळा तैं अपणा जीवन मा पै छौ अर वे बगत मा ईं दुनियां का द्‍वारा जु कुछ भि तुमुन सै वेका बदला मा तुमुन हार नि माणी, बल्किन मा बिस्वास मा बणयां रयां।</verse>
				<verse number="33">अर कभि-कभि त तुमतै सतौ सौण पोड़ि अर सभ्यों का समणि तुमरो अपमान किये गै, अर कभि-कभि त तुमुन ऊं लोगु खुणि बड़ी चिन्ता दिखै जौं का दगड़ा मा तुम जन ही बरतौ किये गै।</verse>
				<verse number="34">अर जु लोग जेलखाना मा कैद छा ऊं खुणि तुमुन बड़ी दया दिखै। अर जब लोगु न तुमरि चीजों तैं अपणा कब्जा मा कैर दिनी त तुमुन खुशी से अपणु नुकसान उठे, किलैकि तुम जणदा छा कि तुमरा पास वेसे भि जादा कीमती च जु की सदनि तक रौण वळु च।</verse>
				<verse number="35">इलै प्रभु यीशु पर अपणु बिस्वास बणै के रखा किलैकि वेका बदला मा तुमतै एक बड़ु इनाम मिलण वळु च।</verse>
				<verse number="36">मगर तुमतै सबर रखण की भौत जरुरत च, ताकि तुम परमेस्वर की मनसा तैं पूरु कैरिके करार का इनाम तैं पै सैका।</verse>
				<verse number="37">किलैकि पवित्रशास्‍त्र मा इन लिख्यूं च कि, “जु औण वळु च उ भौत जल्द ही आलु, अर अब वु देर नि करलु।</verse>
				<verse number="38">अर जु लोग मि पर बिस्वास करदिन वु अपणा बिस्वास करण की वजै से ज्यून्दु राला, पर जु पिछनै हटि जनदिन ऊंतैं देखि कर मि दुखी होन्दु।”</verse>
				<verse number="39">हे मेरा दगड़्यों, हम पिछनै हटि के नास होण वळा लोगु मा बटि नि छां। इलै जबरि तक हमतै पूरि तरौं से बचयै नि जौ तब तक हम बिस्वास मा बणयां रौला।</verse>
			</chapter>
			<chapter number="11">
				<verse number="1">हे मेरा भै-बैंणो, सुणा, अब मि तुमतै बतै देन्दु की बिस्वास क्या च, बिस्वास ऊं बातों पर पक्‍कु यकीन च जौं बातों की आस हम रखदा छां, मगर वु दिखेन्दी नि छिन।</verse>
				<verse number="2">अर बिस्वास रखण की वजै से ही हमरा पितर परमेस्वर की नजर मा स्वीकार किये गैनी।</verse>
				<verse number="3">अर हम परमेस्वर पर बिस्वास करद्‍यां अर वां से इन जणद्‍यां कि परमेस्वर का वचन का द्‍वारा पूरि दुनियां बणयै गै, इलै जु कुछ हम दिखणा छा वु ऊं चीजों बटि बणि जु कि दिखेन्दु नि च।</verse>
				<verse number="4">अर बिस्वास का द्‍वारा ही पितर हाबिल न परमेस्वर तैं इन्द्रयो बलिदान चड़ै जु कि वेका भै कैन का बलिदान से उत्तम छौ। अर परमेस्वर न वेका बलिदान तैं अर वेतैं एक धरमी मनखि का रुप मा स्वीकार कैरी, हालांकि पितर हाबिल मोरि गै मगर फिर भि वेको बिस्वास आज हम लोगु खुणि एक सबक च।</verse>
				<verse number="5">अर बिस्वास का द्‍वारा ही पितर हनोक तैं परमेस्वर न ज्यून्द ही स्वर्ग मा उठे दिनी, अर ईं दुनियां का लोगु तैं इन पता ही नि चलि कि वु कख गै। अर परमेस्वर न इन इलै कैरी ताकि वेकी मौत नि हो, किलैकि वेका उठये जाण से पैलि परमेस्वर पितर हनोक से खुश ह्‍वे, अर वेतैं स्वीकार कैरी।</verse>
				<verse number="6">अर बिस्वास का बगैर परमेस्वर तैं खुश करण नामुमकिन च, किलैकि जु परमेस्वर का पास औन्दु, वेतैं इन बिस्वास करण जरुरी च कि परमेस्वर सच्‍चि मा च अर वु ऊं लोगु तैं इनाम देन्दु जु पूरि तरौं से वेतैं खुज्यौदिन।</verse>
				<verse number="7">अर बिस्वास से ही पितर नूह न परमेस्वर की तरफा से वे पाणि की विपदा का बार मा जाणि जैतैं वेन देखि नि छौ, अर वेन परमेस्वर की बात सुणी अर परमेस्वर की आज्ञा माणी के अपणा परिवार तैं बचौणु खुणि पाणि को एक बड़ु जाज बणै। अर इन्द्रया बिस्वास का बानो परमेस्वर न नूह तैं अपणी नजर मा धरमी पै, मगर वे बगत का लोगु न बिस्वास नि कैरी, इलै परमेस्वर न ऊंतैं दण्ड दिनी।</verse>
				<verse number="8">अर बिस्वास का द्‍वारा ही पितर अब्राहम तैं जब परमेस्वर का द्‍वारा बुलये गै, त वु आज्ञा माणी के वीं जगा कू निकळि, जिं जगा को वु हकदार होण वळु छौ। हालांकि वु नि जणदु छौ कि वु कख जाणु मगर फिर भि वु चलि गै।</verse>
				<verse number="9">अर जब उ वे देस मा पौंछी जैतैं देण को करार परमेस्वर न वेतैं कैरी छौ, तब भि उ बिस्वास रखी के वे देस मा एक परदेसी का जन एक तम्बू मा अपणा नौना इसहाक अर याकूब का दगड़ा मा रै, जु कि करार का हकदार छा।</verse>
				<verse number="10">अर अब्राहम बिस्वास रखी के एक इन नगर को इंतजार कनु छौ, जु स्वर्ग मा च जैतैं कुई नास नि कैर सकदु, किलैकि वेतैं रचण अर बणाण वळु खुद परमेस्वर छौ।</verse>
				<verse number="11">अब्राहम अर वेकी जनानि सारा दुईया का दुई बुढ्या ह्‍वे गै छा, अर सारा बाँझ जनानि छै, मगर तभि भि बिस्वास का द्‍वारा ऊंको नौनु ह्‍वे। अर यू सब इलै ह्‍वे किलैकि जु करार परमेस्वर न कैरी छौ, वेन सारा तैं बिस्वास का लैख पै।</verse>
				<verse number="12">अर बुढ्या अब्राहम अपणी मरियल अवस्था मा छौ, मगर तभि भि वेकू एक नौनु ह्‍वे, अर वेका बाद वेका वंश मा इथगा लोग ह्‍वेनि जथगा आसमान का गैंणा अर समुन्दर मा बळो होन्दु याने कि जैतैं कुई गिणी नि सकदु।</verse>
				<verse number="13">अर पिता परमेस्वर न जु करार ऊंका दगड़ा मा कैरी वु ऊंका जीवन मा पूरु नि ह्‍वे, मगर एक बगत औण पर वु मोरि गैनी। फिर भि ऊंन बड़ी खुशी से इन स्वीकार कैरी कि, एक दिन वु करार जरुर पूरु होलु। अर ऊंन इन माणी कि हम लोग ईं दुनियां मा मुसाफिर छां, अर हमरु ठिकणा इख कुछ दिनों तक ही च।</verse>
				<verse number="14">अर जु लोग अफ तैं ईं धरती मा मुसाफिर बुल्दिन, त या बात साफ ह्‍वे जान्दी कि ऊंतैं कै दुसरा देस की आस च।</verse>
				<verse number="15">अर अगर जु वु वे देस का बारा मा सोचदिन जख बटि वु ऐ छिन, त ऊंतैं उख वापिस जाण को मौका भि मिलदु।</verse>
				<verse number="16">मगर अब वु एक इन जगा पौण की आस रखदिन, जैको नातु स्वर्ग से च इलै परमेस्वर भि ऊंको परमेस्वर होण मा सरम मैसूस नि करदु, किलैकि वेन ऊं खुणि एक नगर तयार कैरिके रख्युं च, अर उ नगर स्वर्ग मा च।</verse>
				<verse number="17">अर बिस्वास का द्‍वारा ही पितर अब्राहम की अजमैस का बगत मा उ अपणा नौना इसहाक तैं परमेस्वर खुणि बलि चड़ौणु खुणि तयार छौ। अर भले ही पिता परमेस्वर न पितर अब्राहम बटि करार कैरी छौ कि, “मि इसहाक का द्‍वारा ही तेरु वंश अगनै बढौलु।”</verse>
				<verse number="18"></verse>
				<verse number="19">अर अब्राहम न इन इलै कैरी किलैकि वु या बात समझि गै छौ, कि परमेस्वर लोगु तैं मुरदो मा बटि ज्यून्द कैरी सकदु च, अर जब उ अपणा नौना तैं बलिदान करण वळु छौ त परमेस्वर न वेतैं रोकी दिनी, तब अब्राहम तैं अपणु नौनु इन वापिस मिली गै, जन की वु मुरदो मा बटि ज्यून्द ह्‍वे गै हो।</verse>
				<verse number="20">अर बिस्वास का द्‍वारा ही पितर इसहाक न अपणा नौना याकूब अर एसाव तैं भविष्य मा होण वळी बातों खुणि आसीस दिनी।</verse>
				<verse number="21">अर बिस्वास का द्‍वारा ही पितर याकूब न मुरण दौं परमेस्वर से बिन्ती कैरी कि उ वेका दुई नौनो तैं आसिरबाद द्‍यो, अर अपणा जांठे की टेक पर झुकि के यूसुफ न पिता परमेस्वर तैं आदर-सम्मान दिनी।</verse>
				<verse number="22">अर बिस्वास का द्‍वारा ही यूसुफ न जब उ मुरण वळु छौ, त वेन बोलि इस्राएली लोग मिस्र देस बटि निकळि जाला, “अर वेन ऊंतैं आज्ञा दिनी कि मिस्र बटि जान्द दौं तुम मेरा हड़गा उख ही लि जयां।”</verse>
				<verse number="23">अर बिस्वास का द्‍वारा ही मूसा का ब्वे-बाब न पैदा होण का बाद तीन मैना तक वेतैं लुकै के रखी, ऊंन देखि की मूसा भौत सुन्दर च। अर इस्राएली लोग मिस्र राजा का वे हुकम से भि नि डऽरदा छा कि इस्राएली लोग का छुटा बच्‍चों तैं जान से मार दिये जौ।</verse>
				<verse number="24">अर मिस्र का राजा की नौनि न पितर मूसा तैं गोद लेके वेको पालन-पोसण कैरी, मगर बिस्वास रखण की वजै से ही वेन बड़ु ह्‍वेके वींको नौनु होण से इनकार कैर दिनी।</verse>
				<verse number="25">अर पितर मूसा न कुछ दिनों का भोग-बिलास का सुख तैं पौण से इनकार कैर दिनी, बल्किन मा वेन परमेस्वर का इस्राएली लोगु का दगड़ा मा दुख सौण स्वीकार कैरी।</verse>
				<verse number="26">किलैकि पितर मूसा न ईं बात तैं स्वीकार कैरियाली छौ, कि अगर जु मसीह का खातिर वेकी बेजती भि ह्‍वे जालि तभि भि वा बेजती मिस्र देस की धन-दौलत से भौत जादा बढी के च। अर इन किलैकि मूसा को ध्यान वे इनाम की तरफा छौ, जु कि आखिरी मा परमेस्वर वेतैं देण वळु छौ।</verse>
				<verse number="27">अर बिस्वास का द्‍वारा ही वेन राजा का गुस्सा तैं कुछ नि समझि, बल्किन मा मिस्र देस छोड़ि दिनी अर मजबूत बणयूं रै, किलैकि वेन नि दिखैण वळा परमेस्वर तैं देखि छौ।</verse>
				<verse number="28">अर बिस्वास का द्‍वारा ही मूसा न सबसे पैलि फसह का त्योवार कि शुरुवात कैरी, ताकि इस्राएली लोग एक बखरे की बलि चड़ै के वेकू ल्वे अपणा द्‍वार की चौखटो पर छिड़का, ताकि परमेस्वर का द्‍वारा भेज्यूं नास करण वळु दूत जब अऽ त इस्राएली लोगु की औलादों तैं ना, बल्किन मा मिस्र का लोगु की पैलि जनमी औलादों तैं मार द्‍यो।</verse>
				<verse number="29">अर बिस्वास का द्‍वारा ही इस्राएली लोगु खुणि लाल समुन्दर का दुई हिस्सा ह्‍वे गैनी, तब वु सुख्यां बाटा बटि ह्‍वेके गैनी, मगर जब मिस्र की सेना उख बटि ह्‍वेके जाणि छै, त पाणि ऊंका मथि ऐ गै, अर वु सब डुबी गैनी।</verse>
				<verse number="30">अर बिस्वास का द्‍वारा ही इस्राएली लोग सात दिन तक यरीहो नगर की दिवाल का चौतरफि घुमिनी तब वा पूरि दिवाल टूटी गै।</verse>
				<verse number="31">अर बिस्वास का द्‍वारा ही राहाब नौ की जनानि ज्वा कि पैलि वेश्या छै नास होण से बचि गै, किलैकि वींन इस्राएली जासूसों तैं अपणा घौर मा छिपै के रखी छौ, मगर यरीहो नगर का दुसरा लोग जु कि परमेस्वर तैं नि मणदा छा, वु सब नास ह्‍वे गैनी।</verse>
				<verse number="32">अर अब मिन यां से जादा और क्या बोन्‍न? किलैकि मि मा बगत नि च कि मि गिदोन, बाराक, शिमशोन, यिफतह, दाऊद, शमूएल, अर परमेस्वर का दुसरा रैबर्यों का बारा मा बतौं।</verse>
				<verse number="33">सुणा, यों न बिस्वास का द्‍वारा भौत सा देसों पर जीत हासिल कैरी, अर सच्‍चै से न्याय कैरी, इलै ऊं खुणि परमेस्वर को करार पूरु ह्‍वे गै, अर इख तक कि परमेस्वर न ऊं खुणि शेरों का गिच्‍चों तैं भि बन्द कैर दिनी।</verse>
				<verse number="34">अर कुछ लोग आग की खतरनाक बणांग से बचि गैनी, अर कुछ तलवार की मार से बचि गैनी, अर ऊंमा बटि कुछ जब कमजोर ह्‍वे गै छा, त परमेस्वर न ऊंतैं फिर से ताकत देई, इख तक कि ऊंन युद्ध मा जीत हासिल कैरी अर परदेसी सिपयों तैं भगै।</verse>
				<verse number="35">अर जु जनानियां पिता परमेस्वर पर बिस्वास करदी छै ऊंन अपणा मुरयां लोगु तैं फिर से ज्यून्द पै। मगर बिस्वास करण वळा भौत सा लोगु तैं सतयै गै अर कुछ तैं मरे गै, पर ऊंन बिस्वास करण नि छोड़ि ताकि परमेस्वर ऊंतैं मुरदो मा बटि ज्यून्द कैरो अर सदनि को जीवन द्‍यो।</verse>
				<verse number="36">अर बिस्वास करण वळा कुछ लोगु को मजाक उड़ये गै, अर कुछ लोगु तैं कोड़ा मरे गैनी, इख तक कि कुछो तैं संगुळों मा बान्धि के जेलखाना मा भि बन्द किये गै।</verse>
				<verse number="37">अर बिस्वास करण वळा कुछ लोगु तैं ढुंगे गै अर जान से मरे गै। अर कुछ लोगु का सरील तैं दुई हिस्सों मा चिरे गै, अर कुछ लोगु तैं तलवार का द्‍वारा मरे गै। अर कुछ लोग इन्द्रया भि छा जौन भेड़-बखरों की खाल पैरि के अपणा दिन कटिनी। अर कुछ लोगु न गरीबी की हालत मा अपणा दिन कटिनी अर दुख-मुसीबत अर बुरु बरतौ भि सै।</verse>
				<verse number="38">अर वु लोग कभि निर्जन जगों मा, अर कभि पाड़ पर अर कभि उड़्यारों या खडलो मा भटकणा रौन्दा छा, सुणा, या दुनियां ऊंका लैख नि रै गै छै।</verse>
				<verse number="39">अर यू सब लोग बिस्वास रखण की वजै से ही परमेस्वर का द्‍वारा स्वीकार किये गैनी, मगर तभि भि ऊंतैं वु सब कुछ नि मिली, ज्यां को करार परमेस्वर न कैरी छौ।</verse>
				<verse number="40">किलैकि परमेस्वर न ऊं खुणि यीशु मसीह तैं भेजण की योजना पैलि बटि बणै के रखी छै, ताकि हम सब लोग ऊंका दगड़ा मा एक ह्‍वेके रा अर वेका लैख बणि जां।</verse>
			</chapter>
			<chapter number="12">
				<verse number="1">हे मेरा भै-बैंणो, हम इन्द्रया ही भौत सा लोगु का बारा मा जणदा छां, जु कि बिस्वास का बारा मा हमतै हौसला देन्दा छिन। इलै अब हम पक्‍कु बिस्वास बणै के रखा, ठिक उन्‍नि जन एक खिलाड़ी अपणा बाटा मा औण वळी रुकावट तैं दूर करदु, ठिक इन्‍नि हम भि सब पापों तैं छोड़ि द्‍या अर सबर रखी के हरेक किसम की परेसानी तैं झेली के परमेस्वर का पिछनै चलण वळा बणा।</verse>
				<verse number="2">अर जन एक खिलाड़ी दौड़ मा अपणी नजर जीत की आखिरी रेखा पर टिकै के रखदु, ठिक उन्‍नि हम भि यीशु मसीह पर अपणी नजर रखा, अर वेका पिछनै चला, अर वे बटि सीखा कि हमतै परमेस्वर पर कनकै पूरु बिस्वास बणै के रखण चयेणु। हाँ, किलैकि यीशु न वीं खुशी तैं ज्वा कि वेतैं मिलण वळी छै, वींका समणि क्रूस को दुख अर होण वळी बेजती तैं कुछ भि नि समझि, अर अब वु परमेस्वर की राजगद्‍दी की दैंणी तरफा बड़ा आदर-सम्मान का साथ बैठयूं च।</verse>
				<verse number="3">हाँ, वे ही यीशु मसीह पर अपणी नजर रखा जैन पापि लोगु की बुरी-बुरी बातों तैं सै, इलै तुम ईं बात पर विचार कैरा, ज्यां से तुम परमेस्वर पर बिस्वास करण मा कभि भि निरास नि ह्‍वा।</verse>
				<verse number="4">तुम लोग जु पाप का खिलाप मा संघर्ष कना छाँ, हाँ तुम एक खिलाड़ी का जन लड़णा छाँ, मगर तुम लोगु न इन लड़ै नि कैरी ज्यां से कि तुमतै अपणु ल्वे बुगाण पोड़ो, जन कि यीशु न कैरी छौ।</verse>
				<verse number="5">अर तुम हौसला देण वळा ये उपदेस तैं बिसरी ग्यां, ज्यां मा परमेस्वर तुमतै एक नौना का रुप मा बुल्दु कि, “हे मेरा नौना, प्रभु का अनुसासन को तिरिस्कार नि कैर, अर जब उ त्वेतै झिडकु त निरास नि हो।</verse>
				<verse number="6">किलैकि प्रभु जै से प्यार करदु वेतैं अनुसासन मा लेके औन्दु, अर जैतैं वु अपणु नौनु बणौन्दु वेतैं वु दण्ड भि देन्दु।”</verse>
				<verse number="7">इलै सुणा कुछ अच्छी बातों तैं सिखौणु खुणि परमेस्वर कि तरफा बटि मिलण वळा दुख तैं अपणु अनुसासन समझि के सै ल्या, किलैकि परमेस्वर तुमतै अपणु नौनु समझि के तुमरा दगड़ा मा इन बरतौ करदु। अर कु च वु नौनु जैतैं वेको बुबा अनुसासन नि सिखौन्दु हो?</verse>
				<verse number="8">अर अगर परमेस्वर तुमतै अपणा सभि बच्‍चों का जन अनुसासन नि सिखौन्दु, त यां को मतलब यू च कि तुम कै दुसरा का ही बच्‍चा छाँ, ना कि परमेस्वर का।</verse>
				<verse number="9">सुणा, जब हम छुटा छा त हमरा ब्वे-बाब भि हमतै अनुसासन मा रौण सिखौन्दा छा, अर हम ऊंतैं आदर-समान देन्दा छा। अब एक बात बता क्या हमतै अपणा आत्मिक पिता का अधीन मा और भि जादा नि रौण चयेणु जु कि हमतै ज्यून्द रखदु?</verse>
				<verse number="10">किलैकि ईं दुनियां का ब्वे-बाब कुछ बगत खुणि ही अपणी समझ का मुताबिक अनुसासन सिखौन्दिन, मगर परमेस्वर हमरि भलै खुणि ही हमतै अनुसासन मा रौण सिखौन्दु, ताकि हम वेका जन पवित्र ह्‍वे जां।</verse>
				<verse number="11">सच्‍च त यू च कि जब परमेस्वर हमतै अनुसासन सिखौन्दु त वे बगत हमतै बिल्कुल भि खुशी नि मिलदी, बल्किन मा हमतै पीड़ा होन्दी च, मगर वेका बाद मा उ हमतै धरमी जीवन जीण खुणि अर सदनि को जीवन देण खुणि हमतै अनुसासन सिखौन्दु।</verse>
				<verse number="12">सुणा, खेल मा खिलाड़ी घैल भि होन्दु मगर तभि भि उ हार नि मणदु, बल्किन मा वे खेल मा अगनै बढणु रौन्दु, ठिक उन्‍नि तुम भि हार नि माणा बल्किन मा अगनै बढणा रा।</verse>
				<verse number="13">जन कि पवित्रशास्‍त्र मा भि लिख्यूं च कि, “ठिक बाटा पर चला” तब जु लोग तुमरा पिछनै चलदा छिन, याने कि जु लोग बिस्वास मा कमजोर अपंग मनखि का जन छिन, वु पिछनै नि हटला, बल्किन मा बिस्वास मा मजबूत ह्‍वे जाला।</verse>
				<verse number="14">अब तुम सब लोगु का दगड़ा मा मेल-जोल बणै के रखा अर पवित्र ह्‍वे जा, किलैकि वु लोग ही प्रभु तैं देख सकदिन जु पवित्र छिन।</verse>
				<verse number="15">अर बिस्वासी समुदाय मा तुम एक-दुसरा पर ध्यान द्‍या, ताकि तुम लोगु मा बटि कुई भि परमेस्वर कि किरपा पौण से दूर नि ह्‍वे जौ, अर ईं बात पर भि ध्यान द्‍या कि तुम लोगु मा कुई फूट पैदा नि हो, किलैकि इन्दरि बात दिक्‍कत करदी, अर भौत सा लोगु तैं बिगाड़ि देन्दी।</verse>
				<verse number="16">अर कखि इन नि हो कि तुम लोगु मा बटि कुई भि कै का दगड़ा मा गळत सम्बन्ध रखण वळु ह्‍वे जौ। अर ना ही तुम मा बटि कुई एसाव का जन हो, जैन पवित्र चीजों की कदर नि कैरी, अर एक बगत का खाण का बदला मा वेन अपणु बड़ु नौनु होण को हक अपणा छुटा भै याकूब तैं ही बेचि दिनी।</verse>
				<verse number="17">तुम जणदा ही छाँ कि वेका बाद मा जब वेन विरासत की वीं आसीस तैं पौण चै, त फिर वु वीं आसीस का लैख नि रै। हालांकि वेन रुवे-रुवे के अपणा बुबा इसहाक का फैसला तैं बदलण की पूरि कोसिस कैरी, मगर इन नि ह्‍वे सैकी।</verse>
				<verse number="18">अर जब पिता परमेस्वर न इस्राएली लोगु तैं सीनै नौ का पाड़ पर आज्ञा दे छै, त उख खतरनाक आग जगणी छै अर काळु अन्धेरु होयुं छौ अर आंधी-तूफान चलणु छौ,</verse>
				<verse number="19">अर उख लोगु न बिगुले की तेज आवाज, अर परमेस्वर की आवाज सुणी, तब वु लोग डौऽरी के मूसा बटि भीक मंगण लगि गैनी, कि या आवाज बन्द करवै दे।</verse>
				<verse number="20">किलैकि वु लोग परमेस्वर की आज्ञा तैं सै नि सकिनी अर वा आज्ञा या छै कि, “अगर कुई मनखि या कुई जानबर भि ये पाड़ तैं छुलु, त वेतैं ढुंगे जौ।”</verse>
				<verse number="21">अर यू देखि के खुद पितर मूसा इथगा डौऽरी गै, कि वेन बोलि, “डौऽरा बानो मेरु पूरु बदन कौंपणु च।”</verse>
				<verse number="22">हे मेरा भै-बैंणो, तुम कै इन्दरि जगा पर नि अयां छाँ, बल्किन मा सिय्योन नौ का ढौंडा का पास, ज्यून्द परमेस्वर का नगर याने की स्वर्गीय यरूशलेम का पास अयां छाँ, अर उख इथगा स्वर्गदूत छिन जौं की कुई गिनती नि च, अर वु सब उख आनन्द मणौन्दिन।</verse>
				<verse number="23">अर तुम बिस्वासी समुदाय मा अयां छाँ, अर समुदाय का लोगु का नौ स्वर्ग मा लिख्यां छिन। अर सुणा, परमेस्वर न ऊंतैं अपणी औलाद बणै के अपणा पैला जनम्यां नौना होण को अधिकार ऊंतैं दियाली। तुम वे परमेस्वर का पास अयां छाँ, जु कि सभ्यों को न्याय सच्‍चै से करदु। अर तुम पुरणा जमना का ऊं बिस्वासी लोगु का पास अयां छाँ, जु परमेस्वर की बातों का पिछनै चलि के परमेस्वर का पास औण का लैख बणि गैनी।</verse>
				<verse number="24">अर अब तुम यीशु का पास अयां छाँ, जु कि परमेस्वर अर लोगु का बीच नयू करार को बिचलु च, अर वेका बलिदान मा बुगयां ल्वे से मनखियों तैं पापों से माफी मिलदी, जब कि हाबिल की हत्या मा बुगयूं ल्वे दण्ड की मांग करदु।</verse>
				<verse number="25">इलै ईं बात तैं याद रखा कि, जब पितर मूसा न इस्राएली लोगु तैं परमेस्वर को रैबार सुणै त ऊं लोगु न आज्ञा को पालन नि कैरी अर वु लोग नि बचि सकिनी, इलै चौकस ह्‍वे जा किलैकि अब जब परमेस्वर सीदा स्वर्ग बटि हम से बात करदु, अर अगर अब हम भि आज्ञा नि मणद्‍यां त हम कनकै बचि सकुला।</verse>
				<verse number="26">अर जब परमेस्वर न सीनै पाड़ बटि बात कैरी छै, त वे बगत परमेस्वर कि आवाज न पूरि धरती तैं हिलै दिनी, पर अब परमेस्वर न इन करार कर्युं च कि, “मि एक बार फिर से धरती तैं ही ना, बल्किन मा स्वर्ग तैं भि हिलै दूयुलु।”</verse>
				<verse number="27">यां को मतलब इन च कि पूरि दुनियां तैं हिल्ये जालु अर सब कुछ इनै-उनै ह्‍वे जालु अर बस वु चीज ही रै जालि जु कभि हिल्ये नि जै सकदी।</verse>
				<verse number="28">इलै अब जब हम इन्द्रया राज तैं पौण वळा छां, जु कभि भि हिली नि सकदु, त आ, हम परमेस्वर को धन्यवाद कैरा अर वेकी बातों तैं माणा अर वेको आदर-सम्मान कैरा, अर परमेस्वर की इन सेवा कैरा ज्यां से वु खुश ह्‍वे जौ।</verse>
				<verse number="29">किलैकि हमरु परमेस्वर भसम करण वळी आग च।</verse>
			</chapter>
			<chapter number="13">
				<verse number="1">हे मेरा भै-बैंणो एक-दुसरा का दगड़ा मा प्यार से रा।</verse>
				<verse number="2">अर अणजाण लोगु की भि सेवा-भगत करण नि बिसरयां, किलैकि तुमतै पता होण चयेणु कि सेवा-भगत का खातिर कुछ लोगु न बिना जणयां ही स्वर्गदूतों को भि बड़ु आदर-सम्मान कैरी।</verse>
				<verse number="3">अर जु बिस्वासी लोग कैद मा छिन ऊंकी मदद कैरा, इन सोचा कि तुम भि ऊंका दगड़ा कैद मा छाँ। अर जौं बिस्वासी लोगु का दगड़ा मा बुरु बरतौ होणु च, ऊंतैं याद रखा अर इन मैसूस कैरा, जन कि तुम खुद ऊंका दगड़ा मा दुख झिलणा छाँ।</verse>
				<verse number="4">ब्यौ सब लोगु का बीच मा आदर की बात समझै जौ, अर पति अर पत्‍नी एक-दुसरा खुणि वफादार रा, किलैकि परमेस्वर गळत सम्बन्ध रखण वळा लोगु तैं, अर एक बैख या जनानि पर गळत नजर रखण वळो तैं जरुर दण्ड द्‍यालु।</verse>
				<verse number="5">अर तुम लोग धन को लालच नि कैरा, बल्किन मा जु कुछ भि तुमरा पास च तुम वेमा खुश रा, किलैकि परमेस्वर न खुद इन बोलि कि, “मि त्वेतै कभि भि नि बिसरलु अर ना ही कभि छुड़लु।”</verse>
				<verse number="6">इलै हम हिम्मत रखी के बुल्द्‍यां कि, “प्रभु मेरु मददगार च, मि कभि नि डऽरलु, अब कुई भि मनखि मेरु कुछ नि बिगाड़ि सकदु।”</verse>
				<verse number="7">अर जौन तुमतै परमेस्वर को वचन सुणै, तुम ऊं शिक्षा देण वळो तैं याद रखा। अर तुम ऊंका अच्छा चाल-चलन पर ध्यान द्‍या अर वेका मुताबिक ऊंका बिस्वास तैं देखि के तुम ऊंका जन जीवन भि ज्या।</verse>
				<verse number="8">अर यीशु मसीह अभि भि उन्‍नि च जन वु पैलि छौ, अर वेन सदनि तक एक ही जन रौण।</verse>
				<verse number="9">अर ध्यान द्‍या, कखि तुम बन्‍नि-बन्‍नि किसम की शिक्षा से भरमै नि जा, किलैकि परमेस्वर खाणु-खाण से ना, बल्किन मा अपणी महान किरपा से हमरा बिस्वास तैं मजबूत करदु, किलैकि खाणु-खाण का रीति-रिवाजों तैं मनण से कुई फैदा नि होन्दु।</verse>
				<verse number="10">सुणा, जब यहूदी धरम का पुरोहित पवित्र तम्बू मा बलिदान चड़ौन्दा छा, त वु वेमा बटि कुछ खै सकदा छा, मगर यीशु मसीह एक बलिदान का रुप मा ऐ अर वेन अपणी दया हम पर कैरी। अर या दया ऊं पुरोहितों खुणि ना, बल्किन मा हम बिस्वासी लोगु खुणि च।</verse>
				<verse number="11">अर जब यहूदी लोगु का महा पुरोहित जानबरों का ल्वे तैं पापों से माफी पौणु खुणि पवित्र तम्बू की महा पवित्र जगा मा चड़ौन्दा छा, त वेका बाद ऊं जानबरों का सरील तैं सीमा से भैर फुके जान्दु छौ।</verse>
				<verse number="12">इलै ही यीशु की मौत भि वे नगर कि सीमा से भैर ह्‍वे, ताकि उ अपणा ल्वे का द्‍वारा लोगु तैं पवित्र कैरो।</verse>
				<verse number="13">इलै आ, हम पुरणि बातों तैं छोड़ि के यीशु मसीह का पास ऐ जां, अब चै हमरि बेजती ही किलै नि हो।</verse>
				<verse number="14">किलैकि ईं दुनियां मा इन्द्रयो कुई भि नगर नि च जु सदनि तक रालु, बल्किन मा हम वे नगर को इंतजार कना छां, जु स्वर्ग मा च अर सदनि तक रालु।</verse>
				<verse number="15">इलै हम यीशु मसीह का द्‍वारा हमेसा पिता परमेस्वर की भक्‍ति कैरा अर वेतैं स्वीकार कैरा।</verse>
				<verse number="16">अर भलै करण अर दुसरो की मदद करण नि बिसरा, किलैकि यू भि एक बलिदान का जन च, ज्यां से कि परमेस्वर खुश होन्दु।</verse>
				<verse number="17">अर जु बिस्वासी समुदाय का मुखिया लोग छिन, तुम ऊंकी आज्ञा माणा अर ऊंका अधीन मा रा, किलैकि वु तुमरा जीवन खुणि बड़ी चिन्ता करदिन, अर वु भौत अच्छे से जणदिन कि ऊंतैं तुमरा जीवन को हिसाब-किताब परमेस्वर तैं देण पोड़लु। अर तुम ऊंकी बात को पालन कैरा, ताकि वु खुशी से ये काम तैं कैरी सैका ना कि दुखी ह्‍वेके। किलैकि अगर जु वु दुखी छिन त वां से तुमतै कुई फैदा नि च।</verse>
				<verse number="18">हम खुणि प्रार्थना कना रा, हमरु जमीर साफ च अर हम इन कोसिस करद्‍यां की सब बातों मा इमानदारी से चला।</verse>
				<verse number="19">मि बिन्ती करदु कि तुम और भि जादा प्रार्थना कैरा, ताकि मि तुम लोगु का पास जल्दी ऐ सैकु।</verse>
				<verse number="20">हे मेरा भै-बैंणो, प्रभु यीशु हम खुणि एक चरवाह का जन च, अर उ हम खुणि बलिदान ह्‍वे गै, मगर परमेस्वर न वेतैं मुरदो मा बटि ज्यून्द कैरी अर इन कैरिके वेका ल्वे का द्‍वारा वु करार पूरु कैरी जु कि सदनि तक रौण वळु च। अर मि इन प्रार्थना करदु कि पिता परमेस्वर अपणी शान्ति तुमतै द्‍यो, अर तुमरि हरेक जरुरत तैं पूरु कैरो। अर मि इन भि प्रार्थना करदु कि तुम पिता परमेस्वर की इच्छा तैं जाणि जा, अर यीशु मसीह तुमरा जीवनों मा वु काम कैरो ज्यां से कि परमेस्वर खुश होन्दु, हमरा प्रभु परमेस्वर की बडै सदनि तक होणी रौ। आमीन।</verse>
				<verse number="21"></verse>
				<verse number="22">हे मेरा भै-बैंणो मि तुम बटि बिन्ती करदु, कि तुमतै हौसला देण खुणि जु कुछ भि मिन ईं छुटी चिठ्‍ठी मा लिख्यूं च, तुम ऊं सब बातों तैं सबर रखी के स्वीकार कैरा।</verse>
				<verse number="23">तुमतै यू मालूम होण चयेणु कि हमरा भै तीमुथियुस तैं जेलखाना से छुड़ै गै। अगर उ जल्दी ऐ जालु त मि वेका दगड़ा मा ऐके तुम से मिललु।</verse>
				<verse number="24">अर सुणा, तुम लोग अपणा मुखिया कू अर सब पवित्र लोगु कू मेरु सलाम बुलयां, अर इटली देस का सब मसीह लोग तुमकु सलाम बोन्‍ना छिन।</verse>
				<verse number="25">हमरा पिता परमेस्वर की किरपा तुम सब लोगु पर होणी रौ, आमीन।</verse>
			</chapter>
		</book>
		<book number="59">
			<chapter number="1">
				<verse number="1">हे मेरा भै-बैंणो, मि परमेस्वर अर प्रभु यीशु मसीह को सेवक याकूब छौं। अर पूरि दुनियां मा तितर-बितर होयां इस्राएल का बारह गोत्र का बिस्वासी लोगु खुणि या चिठ्‍ठी लिखणु छौं। तुम सभ्यों कू मेरु सलाम।</verse>
				<verse number="2">हे मेरा भै-बैंणो, जब तुम पर बन्‍नि-बन्‍नि किसमे की अजमैस आली, तभि भि तुम यां तैं बड़ी खुशी की बात समझा।</verse>
				<verse number="3">किलैकि तुमतै पता च, कि जब तुमरा बिस्वास तैं परखै जान्दु, तब तुमरा मन मा सबर रखण कि शक्‍ति पैदा होन्दी।</verse>
				<verse number="4">अर सबर रखण की ईं भावना तैं अपणु पूरु काम अच्छी तरौं से करण द्‍या, ताकि तुम हरेक बात मा समझदार अर मजबूत ह्‍वे जा, अर तुम मा कै भि बात कि कमी नि रौ।</verse>
				<verse number="5">अर अगर तुम मा बटि कै मा भि ज्ञान की कमी हो, त उ परमेस्वर बटि मांगु। तब परमेस्वर वेतैं द्‍यालु, किलैकि परमेस्वर बिना दोष लग्यां हरेक तैं खुला दिल से देन्दु।</verse>
				<verse number="6">पर उ सक नि कैरो, बल्किन मा बिस्वास से मांगु। किलैकि जु कुई सक करदु, उ समुन्दर की लैर का जन च जु कि हवा का दगड़ि इनै-उनै जान्दी अर उठणी-बैठणी रौन्दी।</verse>
				<verse number="7">अर इन्द्रया मनखि तैं या उम्मीद नि रखण चयेणी, कि वेतैं परमेस्वर बटि कुछ मिललु।</verse>
				<verse number="8">किलैकि इन्द्रया मनखि को मन एक बात पर नि लग्यूं रौन्दु, अर उ अपणी सब बातों मा टिक्यूं नि रौन्दु।</verse>
				<verse number="9">अगर कुई बिस्वासी जन दीन सभौ को च, त उ अपणा हाल पर बड़ु मोन कैरो। किलैकि परमेस्वर न वेतैं आदर-सम्मान दियूं च।</verse>
				<verse number="10">अर ठिक उन्‍नि कै बिस्वासी सेठ मनखि तैं अगर परमेस्वर न दीन बणै, त उ अपणा हाल पर बड़ु मोन कैरो। किलैकि सेठ मनखि घास का फूल की तरौं नास ह्‍वे जालु।</verse>
				<verse number="11">फिर जब सूरज निकळदु अर चटकतल्यु घाम घास पर पोड़दु, त उ वेतैं सुखै देन्दु। अर वेका फूल झेड़ी जनदिन, अर वेकी सुन्दरता नास ह्‍वे जान्दी। ठिक उन्‍नि सेठ मनखि भि धन कमौन्द-कमौन्द एक दिन माटा मा मिली जान्दु।</verse>
				<verse number="12">जु मनखि अजमैसों मा भि टिक्यूं रौन्दु उ धन्य च, किलैकि जब उ अजमैसों मा सफल ह्‍वे जान्दु, तब वेतैं जीवन को मुकुट मिललु। किलैकि जु मनखि परमेस्वर से प्यार करदु, वेतैं यू मुकुट देण को करार परमेस्वर न कर्युं च।</verse>
				<verse number="13">जब कुई बुरी इच्छा से अजमैसों मा पोड़दु, त उ इन नि बोलो, कि मेरी या अजमैस परमेस्वर की तरफा बटि होणी च। किलैकि नऽ त बुरी बातों से परमेस्वर तैं अजमैसों मा डळै जै सकदु, अर ना ही उ खुद कैतैं अजमैसों मा डलदु।</verse>
				<verse number="14">पर हरेक मनखि अपणी ही बुरी इच्छाओं की वजै से फंसी जान्दु, अर अजमैस मा पोड़ि जान्दु।</verse>
				<verse number="15">तब वा बुरी इच्छा बढणी रौन्दी अर पाप तैं जनम देन्दी, अर वु पाप बढी के मौत तैं जनम देन्दु।</verse>
				<verse number="16">हे मेरा प्यारा भै-बैंणो, तुम कै भि बात मा धोखा नि खा।</verse>
				<verse number="17">किलैकि हरेक अच्छु अर उत्तम दान-बरदान स्वर्ग बटि औन्दु अर पिता परमेस्वर की तरफा बटि मिलदु च। अर वेन ही आसमान मा चमकण वळी ज्योतियों तैं बणै। अर उ कभि भि नि बदल्दु। अर चै कुई भि अदळौ-बदळौ ह्‍वे जौ, पर वेमा कुई अन्धेरु नि पोड़दु।</verse>
				<verse number="18">अर वेन अपणी इच्छा का मुताबिक सच्‍चा वचन का द्‍वारा हमतै नयू जनम देई, ताकि जु कुछ भि वेन बणै ऊं सभ्यों मा बटि हम पैलु इनाम बणि जा।</verse>
				<verse number="19">हे मेरा प्यारा भै-बैंणो, तुम ईं बात तैं समझि ल्या, कि हरेक मनखि बात सुनणु कू तयार रौ, अर सोची समझि के बुलण वळु अर गुस्सा करण मा कम हो।</verse>
				<verse number="20">किलैकि जु धरमी काम होणु खुणि परमेस्वर की मनसा च, उ मनखि का गुस्सा करण का द्‍वारा पूरा नि होनदिन।</verse>
				<verse number="21">इलै सब बुरी आदतों तैं अर सब बुरा कामों तैं छोड़ा, अर परमेस्वर को जु वचन तुमतै सुणये गै, वेतैं तुम दीन सभौ को बणि के स्वीकार कैरा। किलैकि यू ही वचन तुमतै छुटकारु दे सकदु।</verse>
				<verse number="22">अर तुम परमेस्वर का वचन तैं केवल सुनण वळा ही ना, बल्किन मा वेतैं सुणी के वेको पालन करण वळा भि बणा। किलैकि जु वचन तैं सुणी के वेको पालन नि करदु, उ खुद तैं धोखा देणु च।</verse>
				<verse number="23">किलैकि जु मनखि वचन तैं सुणी के वेको पालन नि करदु, उ वे मनखि का तरौं च जु की अपणा मुख तैं ऐना मा दिखदु।</verse>
				<verse number="24">अर उ वेमा खुद तैं देखि के उख बटि चलि जान्दु, अर झट बिसरी जान्दु कि उ कन्द्रयो दिखेन्दु।</verse>
				<verse number="25">पर जु मनखि परमेस्वर का नियम-कानून पर ध्यान देन्दु, अर ऊंतैं सुणी के भूली नि जान्दु, बल्किन मा पालन करदु तब उ अपणा हरेक काम मा आसीस पौन्दु। किलैकि नियम-कानून उत्तम अर आजाद करण वळा छिन।</verse>
				<verse number="26">अगर कुई भि खुद तैं धरमी समझदु, अर अपणी जीब तैं अपणा वश मा नि रखदु, त उ खुद तैं धोखा देन्दु, अर वेको परमेस्वर की नजर मा धरमी बणण बेकार च।</verse>
				<verse number="27">पर जु मनखि अनाथों अर विधवाओं का दुख मा ऊंकी देख-रेख करदु, अर खुद तैं दुनियां की बुरै से बचै के रखदु उई परमेस्वर की नजर मा सच्‍चु धरमी च। अर इन्द्रया धरमी ही पिता परमेस्वर की नजर मा बेदाग अर सच्‍चा छिन।</verse>
			</chapter>
			<chapter number="2">
				<verse number="1">हे मेरा भै-बैंणो, तुम महान प्रभु यीशु मसीह पर बिस्वास करद्‍यां, इलै तुम एक-दुसरा का दगड़ा मा भेदभाव नि कैरा।</verse>
				<verse number="2">अगर कुई मनखि सोना की अंगुठी अर मैंगा कपड़ा पैरि के तुमरि सभा मा अयूं हो, अर तन्‍नि एक गरीब मनखि भि चिरयां-फटयां कपड़ा पैरि के उख अयूं हो,</verse>
				<verse number="3">अर तुम वे मनखि कू जैन मैंगा कपड़ा पैरयां हो आदर-सम्मान कैरिके बुल्द्‍यां कि, “श्रीमान, तुम ईं अच्छी जगा मा बैठि जा,” पर तुम वे गरीब मनखि कू बुल्द्‍यां, कि “तू इनै खड़ु रौ” या “इख भ्वीं मा बैठि जा,”</verse>
				<verse number="4">त क्या इन कैरिके तुमुन आपस मा भेदभाव नि कैरियाली? अर क्या गळत विचार रखी के तुम न्याय करण वळा नि बणि ग्यां?</verse>
				<verse number="5">हे मेरा प्यारा भै-बैंणो, सुणा, दुनियां का लोगु की नजर मा जु गरीब छिन, ऊंतैं परमेस्वर न चुणी। ताकि ऊ बिस्वास मा भरपूर ह्‍वे जा, अर परमेस्वर बटि प्यार करण वळो तैं जै राज को हकदार होणो को करार वेन कैरी, वेका हकदार वु बणि जा।</verse>
				<verse number="6">पर ऊं गरीबों को अपमान तुमुन कैरी। अर जौं सेठों को तुमुन आदर-सम्मान कैरी, क्या ऊ तुम पर जुलम नि करदिन? क्या ऊ तुमतै खैंची के कचैरीयों मा नि लि जनदिन?</verse>
				<verse number="7">अर जु आदर-सम्मान यीशु मसीह तैं मिलदु जैतैं तुमुन स्वीकार कैरी, क्या वु लोग वेकी बुरै नि करदिन?</verse>
				<verse number="8">अर पवित्रशास्‍त्र मा परमेस्वर का राज का नियम-कानूनों का मुताबिक जु लिख्यूं च, अगर तुम वेको पालन करद्‍यां, त तुम ठिक ही करद्‍यां। अर उ नियम यू च कि, “तुम अपणा पड़ोसी बटि, अफ ही जन प्यार कैरा।”</verse>
				<verse number="9">पर अगर जु तुम भेदभाव करद्‍यां त तुम पाप करद्‍यां, अर तब नियम-कानूनों का मुताबिक तुमतै दोषी ठैरै जान्दु।</verse>
				<verse number="10">किलैकि अगर कुई मनखि पवित्रशास्‍त्र का सब नियम-कानूनों को पालन कैरिके, बस एक ही नियम तैं नि मणदु हो, त उ सब नियम-कानूनों तैं नि मनण वळु च अर दोषी ठैरि गै।</verse>
				<verse number="11">किलैकि जैन इन बोलि, कि “गळत सम्बन्ध नि रखी,” वेन इन भि बोलि, कि “खून नि कैरी।” इलै अगर तुमुन गळत सम्बन्ध नि रखी मगर खून कैरी, त तुम नियम-कानून तैं मनण वळा नि छाँ।</verse>
				<verse number="12">जौं लोगु को न्याय आजाद करण वळा नियम-कानूनों का मुताबिक होण, ऊं लोगु का जन तुमरो बोल-चाल अर चाल-चलन हो।</verse>
				<verse number="13">किलैकि जु दया नि करदु, वेको न्याय भि बिन दया को किये जालु। पर जु दया करदु, न्याय का दिन पर वेतैं जीत मिलली।</verse>
				<verse number="14">हे मेरा भै-बैंणो, अगर कुई बुल्दु कि, “मि बिस्वास करदु छौं,” पर वेका मुताबिक वु काम नि करदु, त क्या फैदा ह्‍वे? क्या इन्द्रयो बिस्वास वेतैं कभि छुटकारु दे सकदु च?</verse>
				<verse number="15">अगर कै भै या बैंण मा पैरणु कू कपड़ा नि हो, या ऊंतैं रोज को खाणुक भि नि मिलदु हो,</verse>
				<verse number="16">अर तुम मा बटि कुई ऊंकू बोललु कि, “निस फिकर ह्‍वेके जा अर अच्छा कपड़ा पैरा, अर अच्छु खाणु खा,” पर जु चीज ऊंका सरील खुणि जरुरी छिन वु सब ऊंतैं नि देई त क्या फैदा ह्‍वे?</verse>
				<verse number="17">अर ठिक उन्‍नि अगर कुई मनखि बिस्वास करदु, पर वेका मुताबिक वेका काम नि छिन, त वेको बिस्वास खतम च।</verse>
				<verse number="18">पर इन ह्‍वे सकदु च कि, “एक मनखि बोलो कि मि बिस्वास करदु, अर दुसरो बोलो कि मि त भलै का काम करदु।” त इन्द्रया लोगु खुणि मि इन बुल्दु कि, “तू बिना काम कियां अपणु बिस्वास दिखौ, अर दुसरो अपणु बिस्वास भलै का काम कैरिके दिखालु।”</verse>
				<verse number="19">तुम इन बिस्वास करद्‍यां की एक ही परमेस्वर च, य त भौत ही अच्छी बात च। पर याद रखा कि खबेस भि ईं बात तैं मणदिन अर थरथरे जनदिन।</verse>
				<verse number="20">हे मूरख मनखियों, क्या तुमतै ईं बात को सबूत चयेणु, कि काम बिना बिस्वास करण बेकार च?</verse>
				<verse number="21">जब हमरु पितर अब्राहम अपणा नौना इसहाक तैं वेदी पर बलि चड़ौणु कू तयार छौ, तब उ अपणा कामों का द्‍वारा परमेस्वर की नजर मा धरमी ठैरै गै।</verse>
				<verse number="22">अर तुमुन देखियाली, कि अब्राहम का बिस्वास न वेका कामों का दगड़ा मा मिली के इन कैरी, कि वेका ऊं कामों का द्‍वारा वेको बिस्वास पूरु ह्‍वे गै।</verse>
				<verse number="23">तब पवित्रशास्‍त्र की या बात पूरि ह्‍वे कि, “अब्राहम न परमेस्वर पर बिस्वास कैरी, अर ईं वजै से उ परमेस्वर की नजर मा धरमी ठैरै गै।” इलै पितर अब्राहम कू परमेस्वर को दगड़्या बुले गै।</verse>
				<verse number="24">अब तुमुन देखियाली की मनखि केवल बिस्वास से ही ना, बल्किन कामों का द्‍वारा भि परमेस्वर की नजर मा धरमी ठैरै जान्दु।</verse>
				<verse number="25">उन्‍नि राहाब नौ की वेश्या न भि पितर यहोशू का द्‍वारा भेज्यां जासूसों तैं बचौणु खुणि ऊंतैं अपणा घौर मा छिपै छौ, अर फिर दुसरा बाटा बटि ऊंतैं भेजि दिनी। अर इन काम करण का द्‍वारा वा परमेस्वर की नजर मा धरमी ठैरै गै।</verse>
				<verse number="26">इलै जन सरील आत्मा का बिना मुरयूं च, उन्‍नि बिस्वास भि कामों का बिना मुरयूं च।</verse>
			</chapter>
			<chapter number="3">
				<verse number="1">हे मेरा भै-बैंणो, तुम मा बटि भौत लोग उपदेस देण वळा नि बणा। किलैकि तुम जणदा छाँ, कि हम उपदेस देण वळो को न्याय दुसरो से भि जादा सख्‍तै से होण।</verse>
				<verse number="2">किलैकि हम सभि लोग भौत बार भूल-चूक कैरी देन्दयां। पर अगर कुई मनखि अपणा बोन्‍न मा भूल-चूक नि करदु, त उई खरु मनखि च। अर उ अपणा पूरा सरील तैं भि अपणा वश मा रखी सकदु च।</verse>
				<verse number="3">अर जन घोड़ो तैं अपणा वश मा करणु खुणि हम ऊंका गिच्‍चों पर लगाम लगौन्द्‍यां, तब हम ऊंका पूरा सरील तैं जनै चा उनै घुमै सकद्‍यां।</verse>
				<verse number="4">उन्‍नि पाणि का जाजों तैं भि देखा, कि उ कथगा बड़ा होनदिन अर तेज बथौं का द्‍वारा ही ऊंतैं चलये जान्दु। पर जाज चलौण वळु एक छुटा सा हेंडळ बटि वेतैं जनै चान्दु उनै लि जान्दु।</verse>
				<verse number="5">ठिक उन्‍नि जीब भि सरील को एक छुटो सि अंग च, फिर भि वा बड़ी-बड़ी बातों पर बड़ु मोन करदी। अर जन एक छुटी सि चिनगारी भौत बड़ा जंगळ मा बणांग लगै देन्दी।</verse>
				<verse number="6">ठिक उन्‍नि जीब भि एक आग की तरौं च। अर हमरा सरील का सभि अंगो मा बटि जीब मा ही सब बुरै भुरीं छिन। अर वा हमरा पूरा सरील तैं पापि बणै देन्दी। फिर हमरा पूरा जीवन मा वा आग लगै देन्दी, अर वा आग नरकलोक की च।</verse>
				<verse number="7">अर हरेक किसम का पशु-पंछि, रिंगण वळा जीव-जन्तु, अर समुन्दर मा रौण वळा जीव-जन्तु, यू सब मनखि का वश मा ह्‍वे सकदिन, अर छैई भि छिन।</verse>
				<verse number="8">पर अपणी जीब तैं कुई भि मनखि अपणा वश मा नि कैरी सकदु। या इन्दरि बुरै च, ज्वा की कभि रुकदी नि च। अर या जान से मरण वळा बिस बटि भोरी च।</verse>
				<verse number="9">अर ईं जीब बटि हम अपणा प्रभु अर पिता की बडै करद्‍यां, अर ईं जीब बटि ही ऊं लोगु तैं असगार देन्दयां, जौं तैं परमेस्वर न अफ जन बणयूं च।</verse>
				<verse number="10">एक ही गिच्‍चा बटि तारीफ अर असगार निकळदु। हे मेरा भै-बैंणो, इन नि होण चयेणु।</verse>
				<verse number="11">क्या एक ही धारा बटि मिठ्‍ठु अर कड़ु पाणि निकळदु च?</verse>
				<verse number="12">हे मेरा भै-बैंणो, क्या तिमला का डाळा पर जैतून का फल लगि सकदिन? अर क्या अंगूर की बेल पर तिमला लगि सकदिन? ठिक इन्‍नि कै कड़ा धारा बटि कभि मिठ्‍ठु पाणि नि निकळि सकदु।</verse>
				<verse number="13">तुम मा बटि ज्ञानी अर समझदार कु च? अर अगर कुई छैई च, त उ अपणा अच्छा चाल-चलन अर ज्ञान से भलु बणु अर अपणु काम पूरु कैरिके दिखौ।</verse>
				<verse number="14">पर अगर जु तुम अपणा मन मा कै से भौत खार खन्द्‍यां अर मतलबी होनद्‍यां, त बड़ु मोन नि कर्यां अर सच्‍चै तैं नकारी के झूठ्‍ठ नि बुलयां।</verse>
				<verse number="15">अर यू सब करण को ज्ञान परमेस्वर की तरफा बटि नि औन्दु, बल्किन मा दुनियां को च। अर उ आत्मिक नि च बल्किन मा शैतान को ज्ञान च।</verse>
				<verse number="16">किलैकि जख खार अर मतलबी होण की इच्छा होन्दी, उख गड़बड़ी अर हरेक किसमे की बुरै ही होन्दी।</verse>
				<verse number="17">पर जु ज्ञान परमेस्वर की तरफा बटि औन्दु, उ सबसे पैलि त पवित्र च। फिर उ ज्ञान मिलणसार, शान्त सभौ को, दुसरो तैं समझण वळु, दया अर अच्छा गुणों से भरपूर च। अर वेमा भेदभाव अर कपट नि होन्दु।</verse>
				<verse number="18">अर जु लोग मेल-जोल करौन्दिन, वु शान्ति का बीज तैं बुतदिन, अर परमेस्वर की नजर मा धरमी होण का गुणों तैं लेके औन्दिन।</verse>
			</chapter>
			<chapter number="4">
				<verse number="1">हे मेरा भै-बैंणो, तुमरा बीच मा लड़ै-झगड़ा कख बटि औणा छिन? अरे, यू सब त ऊं बुरी इच्छाओं बटि औणा छिन, जु कि तुमरा सरील का अंगो मा लड़ै करदिन।</verse>
				<verse number="2">तुम कुछ पौणे की इच्छा रखद्‍यां पर उ तुमतै नि मिलदु। इलै तुम खिरस्योन्दा छाँ अर खून भि कैरी देन्दयां। तभि भि तुमतै उ नि मिलदु, इलै तुम लड़ै-झगड़ा करद्‍यां। अर उ तुमतै इलै नि मिलदु, किलैकि तुम परमेस्वर बटि नि मंगद्‍यां।</verse>
				<verse number="3">तुम मंगदा त छाँ, पर उ तुमतै नि मिलदु। किलैकि तुम बुरी इच्छाओं तैं पूरु करणु खुणि मंगद्‍यां, याने कि तुम अपणी मौज-मस्ती मा उड़ौणु खुणि मंगद्‍यां।</verse>
				<verse number="4">हे बिस्वासघात करण वळा लोगु, क्या तुम नि जणद्‍यां, कि दुनियां की बुरी बातों से प्यार करण को मतलब, परमेस्वर बटि नफरत करण च? इलै जु कुई ईं दुनियां की बुरी बातों से प्यार करदु, उ खुद अफ तैं परमेस्वर को दुसमन बणै देन्दु।</verse>
				<verse number="5">अर तुम क्या सोचद्‍यां कि ज्वा बात पवित्रशास्‍त्र मा लिखीं च वा सुद्‍दी च? “ज्वा आत्मा पिता परमेस्वर न मनखि तैं देई, कखि वा आत्मा वे बटि दूर नि ह्‍वे जौ, वेका खातिर वेतैं जलन होन्दी।”</verse>
				<verse number="6">पर परमेस्वर हम लोगु पर और भि जादा किरपा करदु, इलै पवित्रशास्‍त्र मा इन भि लिख्यूं च कि, “परमेस्वर बड़ु मोन करण वळा लोगु को विरोध करद, पर दीन लोगु पर किरपा करदु।”</verse>
				<verse number="7">इलै खुद तैं परमेस्वर मा सौंपी द्‍या, अर शैतान को सामना कैरा। तब उ तुमरा समणि बटि भागी जालु।</verse>
				<verse number="8">तुम परमेस्वर का नजदीक आ, तब उ भि तुमरा नजदीक आलु। हे पापि मनखियों, खुद तैं पाप करण से रोका। हे दुई मन रखण वळा लोगु, तुम अपणा मन तैं पवित्र कैरा।</verse>
				<verse number="9">तुम दुखी ह्‍वा, अर शोक कैरा अर रुवा। तुमरो हैंसण रुंण मा बदलि जौ, अर तुमरि खुशी दुख मा बदलि जौ।</verse>
				<verse number="10">अर तुम प्रभु का समणि दीन बणि जा, तब उ तुमतै महान बणालु।</verse>
				<verse number="11">हे मेरा भै-बैंणो, एक-दुसरा का खिलाप मा नि बोला। अगर कुई अपणा बिस्वासी भै-बैंणो का खिलाप बुल्दु, या ऊं पर इळजाम लगौन्दु, त उ परमेस्वर का नियम-कानून पर इळजाम लगौन्दु अर अगर जु तुम नियम-कानून पर इळजाम लगौन्द्‍यां, त तुम नियम-कानून का पालन करण वळा नि छाँ, बल्किन मा तुम अफि ही न्याय करण वळा बणि ग्यां।</verse>
				<verse number="12">पर नियम-कानून तैं देण वळु अर न्याय करण वळु एक ही परमेस्वर च। अर वेमा ही बचौण, अर नास करण की ताकत च। पर तुम कु होनद्‍यां, जु कि अपणा पड़ोसीयों पर इळजाम लगौन्द्‍यां?</verse>
				<verse number="13">हे मेरा भै-बैंणो, तुम लोग जु इन बुल्द्‍यां कि, “आज या भोळ हम फलणा नगर मा जैके एक साल तक उखि रौला, अर व्यापार कैरिके छक पैसा कमौला।”</verse>
				<verse number="14">पर तुम त इन भि नि जणद्‍यां, कि भोळ तुमरा दगड़ा मा क्या होण वळु च। तुम त भाप की तरौं छाँ, जु थुड़ी देर तक दिखेन्दु अर फिर गैब ह्‍वे जान्दी।</verse>
				<verse number="15">इलै तुमतै इन बोन्‍न चयेणु कि, “अगर जु प्रभु की मनसा ह्‍वेलि, त हम बच्यां रौला, अर ये काम या वे काम तैं करुला।”</verse>
				<verse number="16">पर तुम डींग मरद्‍यां अर बड़ु मोन भि करद्‍यां, पर इन करण तुम खुणि बुरु च।</verse>
				<verse number="17">इलै अगर कुई भलै का काम करण जणदु हो, पर फिर भि नि करदु हो त वे खुणि उ पाप च।</verse>
			</chapter>
			<chapter number="5">
				<verse number="1">हे सेठ लोगु, सुणा, तुम अफ पर औण वळी मुसीबतों तैं देखि के वे पर चिल्‍लै-चिल्‍लै के रुविल्या।</verse>
				<verse number="2">तुमरो धन सैड़ी गै, अर तुमरा कपड़ों मा कीड़ा पोड़ि गैनी।</verse>
				<verse number="3">अर तुमरा सोना-चांदी पर जंक लगि गै। अर वे पर लग्यूं जंक एक दिन तुमरा खिलाप गवै द्‍यालु अर आग की तरौं तुमरा मांस को नास कैरी द्‍यालु, किलैकि तुमुन आखिरी का दिनों मा धन जमा कैरी।</verse>
				<verse number="4">देखा, जौं मजदूरों न तुमरा पुंगड़ों मा लवै कैरी, ऊंकी ध्याड़ि तुमुन जान बुजी के मारी दिनी। अब वा ध्याड़ि तुमरा खिलाप चिल्‍लाणी च। अर लवै करण वळो की रुंणे की आवाज सेनाओं पर राज करण वळु हमरु प्रभु का कन्दूड़ो तक पौंछी गै।</verse>
				<verse number="5">अर तुमुन ईं दुनियां मा मौज-मस्ती कैरिके जीवन बितै, अर भौत सुख पै। अर तुमुन खुद तैं पाली-पोसि के बलि का दिन खुणि तयार कैरियाली।</verse>
				<verse number="6">जु लोग तुमरा खिलाप मा नि छा, ऊं धरमी मनखियों पर इळजाम लगै के तुमुन ऊंतैं मौत की सजा देई।</verse>
				<verse number="7">इलै हे मेरा भै-बैंणो, प्रभु का फिर से औण वळा दिन तक सबर रखा। अर सुणा, जन किसान पुंगड़ों मा होण वळी कीमती फसल को पैदा होणु खुणि इंतजार करदु। अर अपणु सबर पैलि अर आखिरी बरखा का होण तक बणै के रखदु,</verse>
				<verse number="8">ठिक उन्‍नि तुम भि सबर रखा। अर अपणा मनों तैं मजबूत कैरा, किलैकि प्रभु को औण वळु दिन नजदीक ही च।</verse>
				<verse number="9">हे मेरा भै-बैंणो, तुम एक-दुसरा पर नि कुड़कुड़ावा, ताकि तुम पर इळजाम नि लगये जौ। सुणा, न्याय करण वळु प्रभु द्‍वार पर ही च।</verse>
				<verse number="10">हे मेरा भै-बैंणो, जौं रैबर्यों न प्रभु का नौ से वचन सुणै, ऊंन जु दुख-तकलीफ झिलनी अर सबर रखी, ऊं सब बातों तैं तुम अफु खुणि एक नमूना समझा।</verse>
				<verse number="11">देखा, जु लोग दुख का बगत मा भि सबर रखदिन, ऊंकू हम धन्य बुल्द्‍यां। अर तुमुन अय्यूब का सबर रखण का बारा मा त सुणी ही च, अर आखिरी मा प्रभु न वेतैं क्या कुछ देई वेका बारा मा भि तुम जणदा ही छाँ। अर येसे तुमतै पता चलदु, कि प्रभु कथगा दया करण वळु अर कथगा मयळु च।</verse>
				<verse number="12">हे मेरा भै-बैंणो, सबसे बड़ी बात त या च, कि तुम कै भि बात की कसम नि खा। नऽ त तुम स्वर्ग की, अर ना ही ईं धरती की, अर ना ही कै और चीजे की कसम खा। पर तुम “हाँ” की जगा “हाँ” बोला, अर “ना” की जगा “ना” बोला, ताकि तुम पर इळजाम नि लगै जौ।</verse>
				<verse number="13">जब तुम मदि कुई दुखी हो, त उ प्रार्थना कैरो। अर अगर कुई खुश हो, त उ भक्‍ति का गीत गौ।</verse>
				<verse number="14">अर अगर तुम मदि कुई बिमार हो, त उ बिस्वासी समुदाय का अध्यक्षों तैं बुलौ। अर ऊ लोग प्रभु का नौ से वे पर तेल मळि के वे खुणि प्रार्थना कैरा।</verse>
				<verse number="15">अर बिस्वास से करीं प्रार्थना का द्‍वारा उ बिमार मनखि खूब ह्‍वे जालु, अर प्रभु वेतैं खड़ु उठालु। अर अगर वेन पाप भि कैरी होला, त ऊ भि माफ किये जाला।</verse>
				<verse number="16">इलै तुम एक-दुसरा का समणि अपणा-अपणा पापों तैं मणिल्या, अर एक-दुसरा खुणि प्रार्थना कैरा, ताकि तुम बिमारियों मा बटि खूब ह्‍वे जा। किलैकि जु मनखि परमेस्वर की नजर मा धरमी च वेकी प्रार्थना का द्‍वारा भौत कुछ ह्‍वे सकदु च।</verse>
				<verse number="17">अर एलिय्याह रैबर्या भि त हम ही जन सभौ को मनखि छौ। अर वेन बड़ी आस लगै के प्रार्थना कैरी, कि बरखा नि हो। अर सढ़े तीन साल तक धरती पर बरखा नि ह्‍वे।</verse>
				<verse number="18">अर जब वेन फिर से प्रार्थना कैरी, तब आसमान बरखण लगि गै अर धरती पर फसल ह्‍वे।</verse>
				<verse number="19">हे मेरा भै-बैंणो, अगर जु तुम मदि कुई भि सच्‍चै का बाटा बटि भटकी जौ, अर अगर कुई वेतैं वापिस लेके अऽ,</verse>
				<verse number="20">त उ इन जाणि ल्यो, कि जु कुई एक भटक्यां पापि मनखि तैं सच्‍चै का बाटा पर वापिस लेके औन्दु, त उ वेका पराण तैं मौत बटि बचौन्दु। अर जु मनखि वापिस लौटी के अयूं च, वेका भौत सा पाप माफ ह्‍वे जनदिन।</verse>
			</chapter>
		</book>
		<book number="60">
			<chapter number="1">
				<verse number="1">हे मेरा भै-बैंणो, मि पतरस जु की यीशु मसीह को खास चेला छौं मि या चिठ्‍ठी, ऊं सभि बिस्वासी लोगु खुणि लिखणु छौं, जु की अपणा घौर से दूर पुन्तुस, गलाति, अर कप्पदूकिया, आसिया अर बितूनिया का मुलकों मा तितर-बितर ह्‍वेके रौणा छिन।</verse>
				<verse number="2">पिता परमेस्वर न तुमतै अपणी पैलि बटि बणईं योजना का मुताबिक अपणी औलाद होणु खुणि चुण्यालि छौ। अर वेन अपणु पवित्र आत्मा तुमतै देई, ताकि तुम लोग यीशु मसीह की आज्ञा को पालन कैरी सैका, अर क्रूस पर यीशु मसीह की मौत का बगत जु ल्वे बोगि, वेका द्‍वारा ही वेन तुमतै शुद्ध कैरी। अर मि तुम सभ्यों खुणि इन प्रार्थना करदु, कि वेकी किरपा अर शान्ति तुमतै भरपूरी से मिलदी रौ। आमीन।</verse>
				<verse number="3">हमरा प्रभु यीशु मसीह का पिता परमेस्वर की तारीफ हो, जैन यीशु मसीह तैं मुरदो मा बटि ज्यून्दु कैरी, अर अपणी महान दया कैरिके वेन हमतै नयू जनम दिनी। अर अब हम मा एक ज्यून्द आस च,</verse>
				<verse number="4">ज्वा कि एक विरासत का रुप मा हम खुणि स्वर्ग मा रखी च, अर वा विरासत कभि नि मिटण वळी च, ज्वा कि सदनि तक रौण वळी अर शुद्ध च।</verse>
				<verse number="5">अर तुमरा बिस्वास करण का खातिर ही परमेस्वर अपणी ताकत से तुमरि हिफाजत कनु च, ताकि न्याय को दिन जु कि परगट होण वळु च वेमा उ तुमतै बचै सैको।</verse>
				<verse number="6">अर या ही तुम खुणि बड़ा आनन्द कि बात च, हालांकि, तुमतै अभि बन्‍नि-बन्‍नि अजमैसों की वजै से दुख-तकलीफ झिलण पोड़ीनी छिन, पर यू सब त कुछ ही बगत खुणि च।</verse>
				<verse number="7">अर जन सोना तैं परखणु खुणि आग की जरुरत होन्दी ताकि उ खरु बणौ, ठिक उन्‍नि तुमरा जीवनों मा अजमैस इलै औन्दी, ताकि तुम बिस्वास मा परखै जा अर खरा निकळि सैका। पर हे मेरा दगड़्यों, मि तुमतै बतै देन्दु, कि तुमरो बिस्वास त खतम ह्‍वे जाण वळा सोना से भि भौत जादा कीमती च। इलै जब तुम अजमैसों मा बटि निकळि के मजबूत होनद्‍यां, त यीशु मसीह का औण का बगत मा तुमतै पूरि तारीफ, बडै अर पूरु आदर जरुर मिललु।</verse>
				<verse number="8">अर तुमुन यीशु तैं नि देखि, अर ना ही वेतैं अभि दिखद्‍यां, मगर फिर भि तुम वे पर बिस्वास करद्‍यां, अर वेसे प्यार भि करद्‍यां, मगर सुणा, न्याय का दिन पर उ तुमरा बिस्वास का द्‍वारा ही तुमरि आत्मा तैं बचालु। अर यू बड़ु आनन्द तुमतै भरपूर कैरी द्‍यालु, जैको बखान हम अभि नि कैरी सकद्‍यां, किलैकि यू वु आनन्द च जु कि पिता परमेस्वर की महान आसीस से भरपूर होलु।</verse>
				<verse number="9"></verse>
				<verse number="10">अर बचयै जाण का बारा मा पुरणा जमना मा परमेस्वर का रैबर्यों न भौत लगन लगै के खोजबीन कैरी, अर वेतैं जनण की कोसिस भि कैरी। अर ऊंन वीं किरपा का बारा मा भविष्यबाणी कैरी, ज्वा कि तुम पर होण वळी छै।</verse>
				<verse number="11">अर परमेस्वर का ऊं रैबर्यों मा मसीह को आत्मा छौ, जु कि यीशु मसीह का दुख-तकलीफो का बार मा पैलि बटि ऊंतैं बतौणु छौ। अर परमेस्वर का ऊं रैबर्यों न इन जनण की पूरि कोसिस कैरी, कि मसीह को आत्मा ऊंतैं क्या-क्या दिखौणु च, अर ऊंन सब बातों तैं जनण कि कोसिस कैरी, कि ऊ सब दुनियां मा कब अर कनकै होलि।</verse>
				<verse number="12">अर ऊं लोगु पर इन परगट किये गै, कि सेवा की जौं बातों का बारा मा बतये जाणु च वु ऊं खुणि ना, बल्किन मा औण वळी पीढ़ी का लोगु खुणि छिन, याने कि हम लोगु खुणि। अर जु कुछ भि ऊंन पवित्र आत्मा का द्‍वारा पै, उ शुभ समाचार ऊंन हमतै सुणै, अर यों ही बातों तैं स्वर्गदूत बड़ी इच्छा रखी के दिखण चाणा छिन।</verse>
				<verse number="13">इलै हे मेरा भै-बैंणो, चौकस रा, अर अपणी-अपणी अकल को इस्तेमाल कैरा, अर तयार रा। अर परमेस्वर की वीं किरपा पर यकीन रखा, ज्वा कि यीशु मसीह का परगट होण का बगत पर तुम पर होण वळी च।</verse>
				<verse number="14">इलै तुमतै पिता परमेस्वर की आज्ञा मनण वळा बच्‍चों का जन होण चयेणु। अब अपणी बुरी इच्छा का मुताबिक काम नि कैरा, जन तुम पैलि करदा छा। पर याद रखा यू काम त तुम वे बगत करदा छा, जब तुमरा पास यू ज्ञान नि छौ।</verse>
				<verse number="15">इलै जन तुमतै बुलाण वळु परमेस्वर पवित्र च, ठिक उन्‍नि तुम भि पवित्र बणा।</verse>
				<verse number="16">किलैकि पवित्रशास्‍त्र मा परमेस्वर बुल्दु कि, “पवित्र बणा, किलैकि मि पवित्र छौं।”</verse>
				<verse number="17">अर पिता परमेस्वर सब लोगु को न्याय बिना पक्षपात को करदु, इलै अगर जु तुम वेतैं पिता बोलि के प्रार्थना करद्‍यां, त हे मेरा भै-बैंणो, ईं बात तैं जाणि जा, कि जब तक तुम ईं धरती पर परदेसी लोगु की तरौं जीवन जीणा छाँ, तब तक वे परमेस्वर पर अपणी पूरि सरदा रखी के जीवन ज्या।</verse>
				<verse number="18">किलैकि तुम जणदा ही छाँ, कि तुमुन अपणा पितरों बटि गळत जीवन जीण को तौर-तरीका ही पै, वे तौर-तरीका से अब तुमुन छुटकारु पयेलि। अर यू छुटकारु तुमतै नास होण वळा सोना-चांदी की चीजों से नि मिली,</verse>
				<verse number="19">बल्किन मा यू त तुमतै भौत कीमती ल्वे की वजै से मिली, जु कि यीशु मसीह को च अर वेमा कुई दाग अर दोष नि च, किलैकि उ बेदाग मेम्‍ना च जैन कुई भि पाप नि कैरी।</verse>
				<verse number="20">अर दुनियां का बणण से पैलि ही पिता परमेस्वर न यीशु मसीह तैं चुण्यालि छौ, ताकि उ दुनियां का लोगु तैं ऊंका पापों से माफी द्‍यो। अर पिता परमेस्वर न यीशु मसीह तैं ये जमना का आखिरी का दिनों मा ईं धरती पर परगट कैरी।</verse>
				<verse number="21">अर यीशु मसीह ही च जैका द्‍वारा तुम पिता परमेस्वर पर बिस्वास करद्‍यां, जैन वेतैं मुरदो मा बटि ज्यून्द कैरी अर पिता परमेस्वर न ही वेतैं आदर-सम्मान दिनी। इलै तुमरि आस अर बिस्वास पिता परमेस्वर पर ही बणयूं रौ।</verse>
				<verse number="22">अर अब तुमुन खुद वे सच्‍चा वचन तैं स्वीकार कैरिके अफ तैं शुद्ध कैरियाली। इलै अब तुम लोग अपणा बिस्वासी भै-बैंण का दगड़ा मा दिल से सच्‍चु प्यार कैरा, इन्द्रयो प्यार जैमा कुई कपट नि हो।</verse>
				<verse number="23">किलैकि तुमतै एक नयू जीवन दिये गै, जु कि वे बीज का जन च जु कि कभि खतम नि ह्‍वे सकदु, बल्किन मा यू त पिता परमेस्वर का वचन द्‍वारा दियूं च, जु कि ज्यून्द अर सदनि तक रौण वळु च।</verse>
				<verse number="24">अर जन कि पवित्रशास्‍त्र मा भि लिख्यूं च कि, “सब मनखि घास की तरौं छिन, अर ऊंकी सुन्दरता घास का फूल का जन च। घास सूखि जान्दु, अर फूल झेड़ी जनदिन।</verse>
				<verse number="25">मगर प्रभु को वचन हमेसा तक बणयूं रौन्दु।” अर यू शुभ समाचार यीशु मसीह को वु वचन च जु तुमतै सुणये गै।</verse>
			</chapter>
			<chapter number="2">
				<verse number="1">इलै हे मेरा भै-बैंणो, अपणा जीवनों मा बटि हरेक किसम कि बुरै, छल-कपट अर ढोंग तैं, अर एक-दुसरा बटि जलन रखण अर दुसरो तैं बदनाम करण छोड़ि द्‍या।</verse>
				<verse number="2">अर अब तुम जाणि ग्यां कि पिता परमेस्वर भलु च, इलै जन पैदा होयुं एक बच्‍चा तैं दूद पीण की इच्छा होन्दी, ठिक उन्‍नि तुम लोगु तैं भि पिता परमेस्वर का वचन तैं हरेक दिन स्वीकार करण की इच्छा रखण चयेणी, ताकि तुम लोग बचि जा अर वेमा बढदी जा।</verse>
				<verse number="3"></verse>
				<verse number="4">अर प्रभु यीशु ज्यून्द ढुंगो च, जैतैं मनखियों न नकारी कैरी, मगर पिता परमेस्वर न वेतैं चुणी अर वे खुणि उ भौत जादा कीमती च। अर जब तुम वे ज्यून्दा ढुंगा का पास औन्द्‍यां,</verse>
				<verse number="5">त तुम भि वे ज्यून्दा ढुंगा का जन आत्मिक घौर बणि जन्द्‍यां। अर यू काम इलै किये जान्दु, ताकि तुम पवित्र पुरोहितों को एक दल बणि जा, अर यीशु मसीह का द्‍वारा पिता परमेस्वर खुणि इन आत्मिक बलिदान चड़ा जु कि वेतैं स्वीकार हो।</verse>
				<verse number="6">किलैकि वे ढुंगा बारा मा पवित्रशास्‍त्र मा कुछ इन लिख्यूं च कि परमेस्वर बुल्दु, “देखा मि सिय्योन मा एक चुण्यां कुणों का ढुंगा तैं रखणु छौं, जु की भौत कीमती च, अर जु कुई वे पर बिस्वास करलु, वेतैं कभि बेजती नि सौण पोड़लि।”</verse>
				<verse number="7">इलै तुम लोग जु कि यीशु मसीह पर बिस्वास करद्‍यां, तुम खुणि वु एक भौत कीमती ढुंगा का जन च, पर जु लोग बिस्वास नि करदिन ऊं खुणि वु एक साधारण ढुंगा का जन च, जैका बारा मा इन लिख्यूं च कि, “जै ढुंगा तैं मिस्‍त्रियों न फुंन ढोळि छौ, उई कुणों को खास ढुंगो बणि गै,”</verse>
				<verse number="8">अर ऊं लोगु खुणि इन भि लिख्यूं च कि, “यू ढुंगो ऊं खुणि उतेडु़ बणि गै, अर एक इन्द्रयो पौड़ जै बटि फिसली के वु लमडी गैनी।” किलैकि ऊ लोग परमेस्वर का वचन मा लिखीं बातों को पालन नि करदिन, इलै ऊंतैं उतेडु़ लगि। अर इन्द्रया लोगु खुणि पिता परमेस्वर न या ही योजना बणै के रखी च।</verse>
				<verse number="9">पर तुम लोग परमेस्वर का द्‍वारा चुण्यां वंशज छाँ, अर राजा खुणि खास पवित्र पुरोहितों को समाज, जौं पर पिता परमेस्वर को अधिकार च। अर पिता परमेस्वर न ही तुमतै अन्धेरा मा बटि निकळि के अपणा महान उज्याळा मा बुलै, इलै अब तुम वेका कामों का बारा मा वेकी तारीफ कैरा।</verse>
				<verse number="10">अर पैलि त तुम कुछ नि छा, मगर अब परमेस्वर का अपणा लोग छाँ। पैलि त तुम पर दया नि ह्‍वे छै, मगर अब तुम पर दया ह्‍वे गै।</verse>
				<verse number="11">हे मेरा प्यारा भै-बैंणो, तुम लोग ईं दुनियां मा परदेसी अर मुसाफिर लोगु का जन छाँ, अर मि तुम से बिन्ती करदु कि तुम ईं दुनियां कि बुरी इच्छाओं से बचि के रा, अर यू वु इच्छा छिन जु कि तुमरा आत्मा का दगड़ा मा लड़ै कनि रौनदिन।</verse>
				<verse number="12">हे मेरा दगड़्यों, यीशु मसीह पर बिस्वास नि करण वळा लोगु का बीच मा तुमरो चाल-चलन भलु हो, ताकि जौं-जौं बातों मा वु तुमरा खिलाप मा जैके तुमरि बुरै करदिन, वु लोग ही तुमरा भला कामों तैं देखि के प्रभु का औणा वळा दिन पर परमेस्वर की बडै कैरा।</verse>
				<verse number="13">हे मेरा दगड़्यों, तुम लोग प्रभु का वास्ता ऊं अधिकारीयों का अधीन मा रा जौं तैं मनखियों न ठैरै, जन कि राजा का किलैकि वेको अधिकार सभ्यों पर च।</verse>
				<verse number="14">अर सासन करण वळो का भि किलैकि वु बुरा काम करण वळो तैं दण्ड देण खुणि, अर अच्छा काम करण वळो की तारीफ करणु खुणि ठैरयां छिन।</verse>
				<verse number="15">किलैकि परमेस्वर की इच्छा या ही च कि तुम भलै का काम कैरा, अर भलै का काम कैरिके मूरख लोगु कि बोलती बन्द कैर द्‍या।</verse>
				<verse number="16">अर आजाद होयां लोगु का जन जीवन ज्या, पर याद रखा की अपणी आजादी को इस्तेमाल बुरा कामों तैं छिपाणु खुणि नि कैरा, बल्किन मा परमेस्वर का सेवकों की तरौं जीवन ज्या।</verse>
				<verse number="17">हरेक मनखि को आदर-सम्मान कैरा, अर जु बिस्वासी भै-बैंणा तुमरा दगड़ा मा छिन, ऊं से प्यार कैरा। अर पिता परमेस्वर पर अपणी पूरि सरदा रखा, अर राजा को आदर-सम्मान कैरा।</verse>
				<verse number="18">हे मेरा भै-बैंणो, तुम जु नौकर को काम करद्‍यां, तुम लोग पूरा आदर-सम्मान का दगड़ा मा अपणा मालिकों का अधीन मा रा, अर सिरफ ऊंका ही ना जु कि अच्छा अर शान्त सभौ का छिन, बल्किन मा ऊंका भि जु निठुर सभौ का छिन।</verse>
				<verse number="19">अगर कुई नौकर जणदु हो कि वेको मालिक वेका दगड़ा अन्यो कनु च, मगर फिर भि उ मनखि दुख तैं सौ, त ईं बात तैं देखि के पिता परमेस्वर वेतैं आसीस द्‍यालु।</verse>
				<verse number="20">अर अगर जु तुम गळत काम करण की वजै से मार खन्द्‍यां अर दुख तैं चुपचाप से सौन्द्‍यां, त या मा तुमरि तारीफ कि कुई बात नि च, पर अगर जु तुम भला काम करण का बाद भि दुख सौन्द्‍यां, त ईं बात का बदला मा पिता परमेस्वर तुमतै आसीस द्‍यालु।</verse>
				<verse number="21">अर जन यीशु मसीह न हमरा खातिर दुख झेली, अर हम खुणि एक उदारण बणि गै, ठिक उन्‍नि हमतै भि भला काम करणु खुणि बुलये गै, अर पिता परमेस्वर का मुताबिक हमतै यीशु मसीह का बाटा पर चलण चयेणु, अब चै वेमा कथगा ही दुख किलै नि हो।</verse>
				<verse number="22">अर पवित्रशास्‍त्र मा वेका बारा मा इन लिख्यूं च कि, “वेन कुई पाप नि कैरी, अर ना ही वेका गिच्‍चा बटि कुई छल की बात निकळि।”</verse>
				<verse number="23">वेन गळी का बदला मा कैतैं गळी नि देई, अर ना ही वेन दुख का बगत मा कैतैं धमकी देई, बल्किन मा वेन खुद तैं परमेस्वर का हाथों मा सौंपी दिनी, जु कि सच्‍चै से न्याय करदु।</verse>
				<verse number="24">अर यीशु न हमरा सब पापों तैं अपणा सरील मा ले अर क्रूस कि मौत तैं सै, ताकि हम अपणा पापों खुणि मोरि जां, अर परमेस्वर की नजर मा अच्छा कामों खुणि जीवन ज्या। अर वेका मार खाण से ही तुम खूब होयां।</verse>
				<verse number="25">अर पैलि तुम भटकी भेड़ों का जन छा, मगर अब तुम अपणा चरवाह का पास ऐ ग्यां जु कि तुमरि आत्मा की रखवळी करण वळु च।</verse>
			</chapter>
			<chapter number="3">
				<verse number="1">हे मेरी बैंणो, तुम अपणा-अपणा पति का अधीन मा रा। अर अगर जु तुमरा बीच मा कै को पति, परमेस्वर का वचन को पालन नि करदु हो, त हे मेरी बैंण, अपणा पति कू बिना कुछ बुलयां, तू अपणा पवित्र अर आदर-सम्मान देण वळा चाल-चलन तैं दिखौ, अर इन कैरिके तू अपणा पति तैं बिस्वास मा लेके ऐ सकदी छैई।</verse>
				<verse number="2"></verse>
				<verse number="3">अर तुमरो सौ-सिंगार जन कि बन्‍नि-बन्‍नि किसमो का बाळ बणौण, या सोना-चांदी की मैंगी-मैंगी चीजों तैं पैनण, या किसम-किसम का कपड़ा पैनण यू सब लोगु तैं दिखौणु खुणि ना हो,</verse>
				<verse number="4">बल्किन मा तुमरो सौ-सिंगार त तुमरा जीवन मा होण चयेणु, जन कि शान्त सभौ, अर दीन होण की आत्मा, ज्वा कि कभि खतम नि ह्‍वे सकदी। अर यू ही पिता परमेस्वर का दिखण मा भौत कीमती च।</verse>
				<verse number="5">किलैकि पुरणा जमना मा पवित्र जनानियां भि, जु कि परमेस्वर पर आस रखदी छै वु खुद तैं इन्‍नि सजौन्दी छै, अर अपणा-अपणा पतियों का अधीन मा रौन्दी छै।</verse>
				<verse number="6">जन कि हमरा पितर अब्राहम की घरवळी सारा, ज्वा कि अपणा पति कू स्वामी बुल्दी छै, अर वेकी आज्ञा को पालन करदी छै, ठिक उन्‍नि तुम भि भलै का काम कैरा अर कै से नि डौऽरा, ताकि तुम भि सारा की औलाद ठैरि सैका।</verse>
				<verse number="7">हे मेरा भैयों, ठिक इन्‍नि तुम लोग भि अपणी-अपणी घरवळी का दगड़ा मा बड़ी समझदारी से अपणु जीवन ज्या। अर भले ही वा ताकत मा तुम से थुड़ी कमजोर ह्‍वे सकदी, मगर तुम वींतैं पूरु आदर-सम्मान द्‍या, अर ईं बात तैं समझि ल्या, कि पिता परमेस्वर न अपणी किरपा का द्‍वारा तुम दुईयों तैं वारिस होणु खुणि बुलयूं च। अर इन कैरिके तुमरि प्रार्थनाओं मा कुई रुकावट नि आली।</verse>
				<verse number="8">कुछ और भि बात छिन जु कि मि तुम सभ्यों तैं बतौण चाणु छौं, तुम सभ्या का सभि एक मन ह्‍वेके रा, अर नेक दिल बणा, एक-दुसरा का दगड़ा मा प्यार से रा, अर एक-दुसरा पर दया कैरा, अर दीन सभौ को बणा।</verse>
				<verse number="9">बुरै का बदला मा बुरै नि कैरा अर ना ही गळी का बदला मा गळी द्‍या, मगर इन्द्रया लोगु तैं बदला मा आसीस ही द्‍या, किलैकि पिता परमेस्वर न तुमतै यां खुणि ही बुलयूं च, ताकि तुम आसीस का वारिस बणि जा।</verse>
				<verse number="10">किलैकि पवित्रशास्‍त्र मा इन लिख्यूं च कि, “जु अपणा जीवन से प्यार करदु हो, अर अच्छा दिन दिखण चान्दु हो, त उ मनखि अपणी जीब तैं बुरै करण से रोको, अर अपणा गिच्‍चा बटि छल कि बात नि बोलो।</verse>
				<verse number="11">अर बुरै करण से दूर रौ, अर भलै का काम कैरो, अर शान्ति को जीवन जीणु खुणि वां की खोज कैरो, अर वेका मुताबिक चलु।</verse>
				<verse number="12">किलैकि प्रभु की नजर धरमी लोगु पर लगि रौन्दी, अर वेका कन्दूड़ ऊंकी प्रार्थनाओं पर लग्यां रौनदिन, मगर जु लोग बुरै करदिन प्रभु ऊंका खिलाप मा रौन्दु।”</verse>
				<verse number="13">अर अगर जु तुम मा भलै का काम करण को जोस हो, त फिर तुमतै नुकसान पौछाण वळु कुई भि नि च।</verse>
				<verse number="14">अर अगर जु तुम अच्छा काम करण का बदला मा दुख सौन्द्‍यां, त तुम धन्य छाँ। अर जु लोग तुमतै डऽरौन्दा या धमकौन्दा छिन ऊं से नि डऽरयां अर ना ही घबरयां।</verse>
				<verse number="15">पर यीशु मसीह तैं अपणु प्रभु जाणि के दिल से वेतैं पूरु आदर-सम्मान द्‍या। अर अगर कुई मसीह पर लगईं आस का बारा मा तुम से पूछो, त वेतैं जबाब देणु खुणि हमेसा तयार रा।</verse>
				<verse number="16">मगर ध्यान रखा, कि यों सब बातों को जबाब बड़ी इज्‍जत अर सीदु बणि के दियां, अर अपणा जमीर तैं शुद्ध रखा। अर इन तुम इलै कैरा, ताकि जु लोग तुमरा खिलाप मा जैके बुल्दिन जब वु सुणा, कि तुम यीशु मसीह का छाँ अर तुमरो चाल-चलन कन च त ऊंकी बेजती उबरि ह्‍वे जौ।</verse>
				<verse number="17">अर अगर जु पिता परमेस्वर कि मनसा इन्‍नि हो कि तुम दुख झेला, त तुम भलै का कामों तैं कैरिके दुख तैं झेला, ना कि बुरै का काम तैं कैरिके।</verse>
				<verse number="18">हे मेरा भै-बैंणो, यीशु मसीह जु कि एक धरमी मनखि छौ, वेन सब अधरमी लोगु का पापों का खातिर एक बार ही दुख उठे। अर यू सब वेन इलै कैरी, ताकि उ तुम लोगु तैं पिता परमेस्वर का नजदीक लेके ऐ सैको। हालांकि, यीशु का सरील तैं नास किये गै, मगर वे बगत मा वेन कैद होईं आत्माओं का बीच मा भि जैके परचार कैरी। अर पिता परमेस्वर न अपणी आत्मा की ताकत से यीशु तैं मुरदो मा बटि ज्यून्द कैरी।</verse>
				<verse number="19"></verse>
				<verse number="20">अर जै बगत पितर नूह, पिता परमेस्वर का बुलण का मुताबिक जाज बणौणु छौ, वे बगत का लोगु न परमेस्वर की आज्ञा को पालन नि कैरी, अर पिता परमेस्वर सबर रखी के इन इंतजार कनु छौ, कि ऊ अपणा चाल-चलन मा बदळौ लेके आला, मगर इन नि ह्‍वे। तब पिता परमेस्वर न जल परलय कैरी, अर वे बगत मा कुछ ही लोग जाज मा बैठि के बचयै गैनी, अर ऊं मनखियों की गिनती आठ छै।</verse>
				<verse number="21">अर जै पाणि से वु आठ लोग बचयै गैनी वेको मतलब बपतिस्मा से च, जु कि तुमतै बचौन्दु। अर बपतिस्मा को मतलब यू नि च, कि वां से सरील की गन्दगी दूर ह्‍वे जौ, असल मा वांको मतलब इन च कि तुम लोग जमीर मा शुद्ध ह्‍वेके पिता परमेस्वर का अधीन ह्‍वे जा। अर यू सब यीशु मसीह का मुरदो मा बटि ज्यून्द होण से च।</verse>
				<verse number="22">अर अब वु स्वर्ग मा जैके परमेस्वर की दैंणी तरफा बैठयूं च, अर सब स्वर्गदूत अर अधिकार अर ताकत वेका अधीन मा ही छिन।</verse>
			</chapter>
			<chapter number="4">
				<verse number="1">अर हम जणदा छाँ, कि यीशु मसीह न अपणा सरील मा दुख तैं झेली, इलै हमतै भि वेका जन ही विचार रखण चयेणा, अर हरेक दुख तैं झिलणु खुणि तयार रौण चयेणु, किलैकि जैन शरीर मा दुख झेली उ पाप करण छोड़ि देन्दु।</verse>
				<verse number="2">अर अब हम अपणा बच्यां जीवन तैं ईं दुनियां की इच्छा का मुताबिक ना, बल्किन मा परमेस्वर की मनसा का मुताबिक चला।</verse>
				<verse number="3">किलैकि तुम लोगु न पैलि अपणा जीवन तैं दुनियां का लोगु का दगड़ा मा मिली के बुरी इच्छाओं तैं पूरु करण मा भौत बरबाद कैरियाली, जन कि भोग-बिलास, हवस, दरोळया होण, अर दुनियां की रंगरेलीयों मा, घतोलि-घतोलि के दारु पीण मा, अर मूरत पूजा करण जु कि इन्द्रया काम छिन जौं से की पिता परमेस्वर तैं घिण औन्दी, अर तुम भि पैलि इन्‍नि कामों मा लग्यां रौन्दा छा।</verse>
				<verse number="4">अर अब ऊं लोगु तैं बड़ु ताजुब होन्दु, किलैकि अब तुम इन्द्रया बुरा कामों मा अपणा दगड़्यों को साथ नि देन्द्‍यां, त इलै तुमरा दगड़्या तुमरो अपमान करदिन।</verse>
				<verse number="5">पर एक दिन ऊं सब लोगु तैं अपणु-अपणु हिसाब-किताब पिता परमेस्वर तैं देण पोड़लु, जु कि ज्यून्दा अर मुरयां लोगु को न्याय करणु खुणि तयार बैठयूं च।</verse>
				<verse number="6">अर ईं वजै से ही यीशु मसीह का पिछनै चलण वळा लोगु न वेका बारा मा शुभ समाचार को परचार कैरी, जु कि अब मोरि गैनी, अर भले ही पिता परमेस्वर न ऊंको न्याय कैरी अर वु सब भि आम मनखियों की तरौं ही मोरि गैनी, मगर पिता परमेस्वर का पवित्र आत्मा न ऊंतैं सदनि को जीवन दिनी।</verse>
				<verse number="7">अर सब बातों को अन्त नजदीक ऐ गै, इलै खुद पर काबू रखा अर साफ सोच रखा, ताकि तुम सही तरीके से पिता परमेस्वर से प्रार्थना कैरी सैका।</verse>
				<verse number="8">अर सबसे खास बात या च कि एक-दुसरा का दगड़ा मा प्यार से रा, किलैकि प्यार भौत सा पापों तैं ढकै देन्दु।</verse>
				<verse number="9">अर बिना कचर-कचर कर्यां, एक-दुसरा की मैमानदारी कैरा।</verse>
				<verse number="10">अर पिता परमेस्वर की किरपा से जु-जु दान-बरदान तुमतै मिल्यां छिन, ऊं दान-बरदानों को इस्तेमाल एक-दुसरा की सेवा मा कैरा, अर एक अच्छु सेवक बणा।</verse>
				<verse number="11">जैतैं उपदेस देण को बरदान मिल्यूं च, उ इन बोलो जन कि पिता परमेस्वर का शब्द हो। अर जैतैं सेवा करण को बरदान मिल्यूं च, वेतैं पिता परमेस्वर की दिईं ताकत से सेवा करण चयेणी, ताकि हरेक बात मा यीशु मसीह का द्‍वारा पिता परमेस्वर की बडै हो। हाँ, सब बातों मा पूरु आदर-सम्मान सदनि तक वेतैं ही मिलु। आमीन।</verse>
				<verse number="12">हे मेरा प्यारा भै-बैंणो, तुमरि अजमैस आग का द्‍वारा तुमतै परखणु खुणि किये जाणि च, पर मि तुमतै बतै देन्दु कि तुम ईं बात पर ताजुब नि कैरा,</verse>
				<verse number="13">बल्किन मा खुश ह्‍वा, किलैकि जु सतौ तुम पर होणु च वेका द्‍वारा तुम यीशु मसीह का दुख मा हिस्सेदार होणा छाँ। अर जब यीशु मसीह अपणा पूरा आदर-सम्मान का दगड़ा मा आलु, त तुमतै बड़ु आनन्द मिललु।</verse>
				<verse number="14">अर अगर जु तुमतै यीशु मसीह का नौ का खातिर बदनाम किये जाणु च त तुम धन्य छाँ, किलैकि परमेस्वर को पवित्र आत्मा अर वेकी ताकत तुमरा दगड़ा मा च।</verse>
				<verse number="15">अर तुमतै इन्द्रया काम नि करण चयेणा ज्या से कि कुई तुम पर दोष लगौ जन कि, हत्या करण, चोरी करण, या बुरै का काम अर ना ही दुसरा लोगु का कामों मा दखल द्‍या।</verse>
				<verse number="16">पर अगर कुई मनखि यीशु मसीह पर बिस्वास करण की वजै से दुख उठौन्दु, त वे मनखि तैं खुद पर सरम नि औण चयेणी, बल्किन मा उ यीशु नौ की वजै से पिता परमेस्वर की बडै कैरो।</verse>
				<verse number="17">किलैकि अब न्याय को वु बगत ऐ गै, जब पिता परमेस्वर सबसे पैलि अपणा लोगु को न्याय करलु। इलै जब न्याय कि शुरुवात सबसे पैलि हम बटि होण, त सोचा, ऊं लोगु को क्या जि हाल होलु जौन परमेस्वर का शुभ समाचार तैं स्वीकार नि कैरी?</verse>
				<verse number="18">अर “अगर धरमी मनखि ही बड़ी मुस्किलन बचयै जालु, त सोचा, ऊं लोगु को क्या जि होलु जु पापि छिन अर परमेस्वर की भक्‍ति नि करदिन?”</verse>
				<verse number="19">इलै जु लोग परमेस्वर की इच्छा का मुताबिक दुख उठाणा छिन, तुम भलै का काम कना रा, अर अपणा पराणों तैं वे भरोसामन्द पिता परमेस्वर का हाथों मा सौंपी द्‍या, जु कि दुनियां तैं बणौण वळु च।</verse>
			</chapter>
			<chapter number="5">
				<verse number="1">मि एक अध्यक्ष छौं अर जौं दुख-तकलीफो तैं यीशु मसीह न सै, ऊं सब बातों को मि भि एक गवा छौं, अर प्रभु का औण वळा वे आदर-सम्मान मा मि भि साझेदार छौं। इलै मि तुमरा बीच मा जु अध्यक्ष लोग छिन, ऊं से बिन्ती करदु कि,</verse>
				<verse number="2">जु दल पिता परमेस्वर न तुमरा हाथों मा सौप्युं च, वेकी देख-रेख अच्छी तरौं से कैरा। अर दल की देख-रेख कैं मजबूरी मा ना, बल्किन मा पिता परमेस्वर की मनसा का मुताबिक कैरा। अर सेवा को यू काम तुम कै लालच खुणि ना, बल्किन मा मन लगै के कैरा।</verse>
				<verse number="3">अर जु लोग तुमरा सुपुर्द कियां छिन तुम ऊं पर अधिकार नि जमा, बल्किन मा तुम खुद दल का लोगु खुणि एक उदारण बणा।</verse>
				<verse number="4">अर जब परधान चरवाह यीशु परगट होलु, त तुमतै वु मुकुट मिललु जैकी सान कभि खतम नि होलि।</verse>
				<verse number="5">अर ठिक इन्‍नि, हे ज्वान लोगु, तुम भि अध्यक्षों का अधीन मा रा, अर एक-दुसरा का दगड़ा मा नमर बरतौ रखा, किलैकि पवित्रशास्‍त्र मा इन लिख्यूं च कि, “परमेस्वर बड़ु मोन करण वळा लोगु का खिलाप मा रौन्दु, मगर दीन लोगु पर किरपा करदु।”</verse>
				<verse number="6">इलै परमेस्वर का ताकतबर हाथों का तौळ दीन बणि के रा, ताकि ठिक बगत पर उ तुमतै बड़ु आदर-सम्मान द्‍यो।</verse>
				<verse number="7">अर अपणी सब चिन्ता-फिकर वे पर छोड़ि द्‍या, किलैकि वेतैं तुमरि चिन्ता च।</verse>
				<verse number="8">चौकस अर बिज्यां रा, किलैकि तुमरो बैरी शैतान डुकरताळ मरण वळा शेर का जन च, जु कि इन ताक मा रौन्दु कि कब कैतैं फाड़ी के खै द्‍यो।</verse>
				<verse number="9">हे मेरा भै-बैंणो, तुम लोग बिस्वास मा मजबूत बणयां रा, अर शैतान को मुकाबला कैरा। किलैकि जन दुख-तकलीफ तुम लोग सौणा छाँ, ठिक उन्‍नि दुख-तकलीफ ईं दुनियां मा दुसरा बिस्वासी भै-बैंणा भि सौणा छिन।</verse>
				<verse number="10">इलै अब जु दुख-तकलीफ तुम कुछ देर खुणि सौणा छाँ, वे कष्‍ट बटि पिता परमेस्वर तुमतै भैर निकळळु, अर तुमरा बिस्वास की बुनियाद तैं और भि जादा मजबूत अर पक्‍कु करलु, किलैकि पिता परमेस्वर ही च, जु कि अपणी पूरि किरपा करदु अर वेन ही तुमतै यीशु मसीह का द्‍वारा मिलण वळा आदर-सम्मान मा अपणा पास बुलयूं च, जु कि सदनि को च।</verse>
				<verse number="11">अर वेकी ताकत ही सदनि तक रौ। आमीन।</verse>
				<verse number="12">हे मेरा दगड़्यों, सिलवानुस एक इन भै च जैतैं मि भरोसा का लैख समझदु, वेका द्‍वारा मि या चिठ्‍ठी तुम लोगु खुणि लिखौणु छौं। अर ईं चिठ्‍ठी मा मिन कुछ शब्द ही लिखवैनी, ताकि तुमरा हौसला बढ़ो। अर मि इन गवै देन्दु, कि जु बात ईं चिठ्‍ठी मा लिखीं छिन, ऊ सब बात पिता परमेस्वर की सच्‍चि किरपा से छिन, अर तुम सब यों बातों मा मजबूत बणयां रा।</verse>
				<verse number="13">अर जन पिता परमेस्वर न तुमतै चुणी, ठिक उन्‍नि बिस्वासी लोग बेबीलोन नगर मा भि छिन, जु कि तुमकु सलाम बोन्‍ना छिन। अर मरकुस भै भि जु कि मेरा नौना का जन च तुमकु सलाम बोन्‍नु च।</verse>
				<verse number="14">अर तुम लोग भि प्यार से भूकि पिके एक-दुसरा कू सलाम बोला। अर मि इन प्रार्थना करदु, कि तुम सब लोग जु कि यीशु मसीह पर बिस्वास करद्‍यां, तुम सभ्यों तैं वेकी शान्ति मिलदी रौ। आमीन।</verse>
			</chapter>
		</book>
		<book number="61">
			<chapter number="1">
				<verse number="1">हे मेरा भै-बैंणो, मि शमौन पतरस यीशु मसीह को सेवक अर एक खास चेला छौं। मि या चिठ्‍ठी तुम सभ्यों खुणि लिखणु छौं, जौं तैं पिता परमेस्वर की तरफा बटि यू कीमती मौका मिल्यूं च, कि हम सब छुटकारा देण वळा यीशु मसीह पर बिस्वास कैरा। अर यीशु मसीह ही च, जु कि परमेस्वर की नजर मा धरमी च।</verse>
				<verse number="2">अर मि इन प्रार्थना करदु, कि तुम सभ्या का सभि पिता परमेस्वर अर यीशु मसीह का ज्ञान मा बढदी जा, अर वेकी किरपा अर वेकी शान्ति तुम सभ्यों पर जादा से जादा होणी रौ। आमीन।</verse>
				<verse number="3">हे मेरा दगड़्यों, पिता परमेस्वर न अपणी ताकत से हमतै उ सब कुछ दिनी, जु कि हमतै पवित्र जीवन जीणु खुणि जरुरी च। अर यू सब कुछ हमतै तब मिली जब हमुन यीशु मसीह तैं स्वीकार कैरी, जैन हमतै अपणा अदभुत आदर-सम्मान, अर अपणी महान अच्छे मा अपणा पास बुलै।</verse>
				<verse number="4">अर वे आदर-सम्मान अर वीं अच्छी भावना का मुताबिक ही वेन हमतै कीमती अर अच्छा दान-बरदान दियां छिन, ताकि ये बरदान का द्‍वारा हम दुनियां मा होण वळा गळत सम्बन्ध रखण से, अर गन्दा काम करण से बचि जा, अर पिता परमेस्वर का सभौ का जन चलि सैका।</verse>
				<verse number="5">इलै सुणा, कि तुम यों सब बातों मा बढण की पूरि कोसिस कैरा। याने कि तुम अपणा बिस्वास मा मजबूत, अर अपणा चाल-चलन मा अच्छा होन्दी जा, अर वेका दगड़ा-दगड़ि ज्ञान भि रखा,</verse>
				<verse number="6">अर वे ज्ञान से तुम खुद तैं वस मा रखिल्या, फिर खुद तैं वस मा रखण से सबर रखण जणिल्या, अर सबर रखण से भक्‍ति करण आली,</verse>
				<verse number="7">अर वेकी भक्‍ति करण मा भै-भयात च, अर तुम वीं भै-भयात मा अर वेका प्यार मा और भि जादा बढदी जा।</verse>
				<verse number="8">अर यू वु गुण छिन जौं की तुमतै भौत जरुरत च अर अगर जु यू तुमरा पास भरपूरी से होला, त यू गुण तुमतै हमरा प्रभु यीशु मसीह का ज्ञान मा काम करण वळु अर और भि जादा असरदार बणौन्दिन।</verse>
				<verse number="9">पर जैका पास यू सब गुण नि छिन य त वे मनखि तैं कम दिखेन्दु, य त उ अन्धु च। असल मा वु बिसरी गै कि उ अपणा पुरणा पापों से नहे के साफ ह्‍वे गै।</verse>
				<verse number="10">इलै हे मेरा भै-बैंणो, इन साबित करणु खुणि तुम लोग कड़ी मेनत कैरा, कि तुम सच्‍चि मा वीं इच्छा मदि छाँ, जौं तैं पिता परमेस्वर न बुलै के चुण्यालि। अर वु काम कैरा ज्यां से वु खुश होन्दु, अर अगर जु तुम इन करिल्या त तुम कै पाप अर इळजाम मा नि फसिल्यां।</verse>
				<verse number="11">अर इन कैरिके तुम हमरा पिता परमेस्वर अर बचौण वळा यीशु मसीह का राज्य मा जै सकिल्या जु कि सदनि को च, अर यां को तुमतै पूरु अधिकार दिये जालु।</verse>
				<verse number="12">हालांकि तुम यों सब बातों तैं जणदा ही छाँ, अर जु सच्‍चु वचन तुमतै मिल्यूं च, तुम वेमा मजबूत भि किये ग्यां, मगर फिर भि मि तुमतै यों सब बातों की याद दिलौणु छौं ताकि तुम हमेसा तयार रा।</verse>
				<verse number="13">अर जबरि तक मि ज्यून्दु छौं, तबरि तक मेरु यू फरज बणदु कि तुमतै याद दिलै-दिलै के मजबूत कनु रौंऽऽ अर या ही बात मितैं खूब लगदी।</verse>
				<verse number="14">किलैकि मि यों बातों तैं जणदु छौं कि अब ये सरील तैं छोड़ि के जाण को बगत नजदीक ऐ गै। अर यू सब त मि इलै बोन्‍नु छौं, किलैकि यू सब प्रभु यीशु मसीह न मि पर परगट कैरियाली।</verse>
				<verse number="15">अर मि इन कोसिस कनु छौं, कि जब मि ईं दुनियां तैं छोड़ि के चलि जौलु त तुम मेरा जाण का बाद भि यों सब बातों तैं याद कना रयां।</verse>
				<verse number="16">अर जब हमुन प्रभु यीशु मसीह की ताकत अर वेका वापस औण का बारा मा तुमतै शुभ समाचार सुणै, त हमुन तुमरा दगड़ा मा कुई चालाकी नि चलि। अर ना ही तुमतै झूठ्‍ठी शिक्षा सुणै के तुमरो कुई फैदा उठे, बल्किन मा हमुन त वेका सानदार आदर-सम्मान का बारा मा तुमतै बतै जु खुद हमुन अपणा आंख्यों न देखि छौ।</verse>
				<verse number="17">अर वे बगत हम उखि छा, जख पिता परमेस्वर न यीशु मसीह तैं सानदार आदर-सम्मान देई, अर वे खुणि स्वर्ग बटि इन आवाज ऐ, “यू मेरु लाडलु पुत्र च, अर येसे मि भौत खुश छौं।”</verse>
				<verse number="18">हाँ, हमुन आसमान बटि औण वळा ये शब्द का बारा मा खुद ही सुणी छौ, जब हम यीशु का दगड़ा मा पवित्र पाड़ पर छा।</verse>
				<verse number="19">अर इन कैरिके भविष्यबाणी का जु वचन हमरा पास छिन, ऊं पर भि छाप लगये गै। अर तुम ऊं वचनों पर अपणु मन लगै के अच्छु काम कना छाँ, किलैकि जब तक सुबेर नि होन्दी, तब तक सूरज नि निकळदु, अर यू वचन वे जळ्दा द्‍यू का जन च जु अन्धेरा मा चमकदु, याने कि जु आज तुमरा दिलों मा चमकणु च।</verse>
				<verse number="20">अर सबसे पैलि बात या च, कि पवित्रशास्‍त्र कि हरेक भविष्यबाणी कै रैबर्या का अपणा ख्याल नि छिन।</verse>
				<verse number="21">किलैकि कुई भि भविष्यबाणी मनखि की मनसा का मुताबिक कभि भि नि होन्दी, बल्किन मा परमेस्वर का लोग पवित्र आत्मा का द्‍वारा परमेस्वर का वचनों तैं बुल्दिन।</verse>
			</chapter>
			<chapter number="2">
				<verse number="1">अर जन इस्राएली लोगु का बीच मा झूठ्‍ठा रैबर्या निकळि के ऐ गै छा, अर वु खुद तैं परमेस्वर को रैबर्या बतौन्दा छा, ठिक उन्‍नि तुम लोगु का बीच मा भि कुछ झूठ्‍ठा गुरु निकळि के आला। अर ऊ लोग झूठ्‍ठी शिक्षा को परचार बड़ी चालाकी से तुमरा बीच मा करला, इख तक कि ऊ हमरा यीशु मसीह तैं भि नकारी द्‍याला जैन ऊंतैं अपणु खून देके खरीदी, मगर इन कैरिके ऊ भौत जल्द नास ह्‍वे जाला।</verse>
				<verse number="2">अर इथगा ही ना बल्किन मा भौत सा बिस्वासी लोग त ऊं झूठ्‍ठा गुरु लोगु का पिछनै चलला। तब जु लोग सच्‍चै का बारा नि जणदिन ऊ लोग झूठ्‍ठा गुरु लोगु का चाल-चलन तैं देखि के सच्‍चै का बाटा का बारा मा बुरु बुलला।</verse>
				<verse number="3">अर अपणा लालच का खातिर वु झूठ्‍ठा लोग अपणी झूठ्‍ठी बातों का द्‍वारा तुम बटि पैसा कमौला। मगर परमेस्वर न ऊंतैं भौत पैलि ही दोषी ठैरैयालि, अर अब ऊंको नास होण मा देर नि होलि।</verse>
				<verse number="4">किलैकि परमेस्वर न पाप करण वळा ऊं स्वर्गदूतों तैं भि नि छोड़ि, बल्किन मा वेन ऊंतैं सजा दिनी। वेन ऊंतैं नरकलोक का सबसे अन्धेरा वळी जगा मा ढोळि दिनी, ताकि न्याय का दिन तक ऊंतैं उख रखै जौ, अर वे दिन पर ऊंतैं दण्ड दिये जौ।</verse>
				<verse number="5">अर परमेस्वर न पुरणा जमना मा भि दुनियां का बुरा लोगु तैं नि छोड़ि, वेन त ऊं अधरमी लोगु को जल परलय का द्‍वारा नास कैरी, मगर धरम को परचार करण वळा हमरा पितर नूह अर वेका परिवार का सात लोगु तैं बचै।</verse>
				<verse number="6">अर परमेस्वर न सदोम अर अमोरा नगरों का लोगु तैं नास होण खुणि इन दण्ड दिनी, कि ऊंतैं फूकी के छारो बणै दिनी ताकि पिता परमेस्वर कि भक्‍ति नि करण वळा लोगु खुणि या शिक्षा एक उदारण बणि जौ।</verse>
				<verse number="7">मगर वेन लूत तैं सदोम नगर से बचै, किलैकि उ एक धरमी मनखि छौ, जु कि अपणा आस-पास का दुष्‍ट लोगु का बुरा काम से भौत परेसान ह्‍वे गै छौ।</verse>
				<verse number="8">किलैकि उ धरमी मनखि छौ, अर हरेक दिन ऊंका बीच मा रै के ऊंका बुरा कामों तैं देखि अर सुणी के हमेसा दुखी होन्दु छौ।</verse>
				<verse number="9">अर यू बात ही हमतै इन दिखौन्दिन कि प्रभु परमेस्वर जणदु च कि जु लोग वेकी भक्‍ति करदिन, उ ऊंतैं कनकै भौत सा संकट से भैर निकळदु, अर बुरा लोगु तैं दण्ड देण खुणि कनकै न्याय का दिन तक रखदु।</verse>
				<verse number="10">अर खास कैरिके ऊं लोगु तैं जु अपणा सरील तैं बुरा कामों मा लगौन्दिन, अर परमेस्वर का अधिकार तैं सुद्‍दी समझदिन, परमेस्वर न ऊंतैं दण्ड खुणि रख्युं च। अर यू झूठ्‍ठा गुरु अपणु मोन बड़ु कैरिके रखदिन, अर स्वर्गदूतों की बेजती करण से भि पिछनै नि हटदिन।</verse>
				<verse number="11">जब कि स्वर्गदूत जु ताकत अर सामर्थ मा यों लोगु से कई जादा बड़ा छिन, ऊ भि प्रभु का समणि ऊं लोगु पर कुई इळजाम नि लगौन्दिन।</verse>
				<verse number="12">यू लोग त एक मूरख जानबर का जन छिन, जौं को जनम पकड़ै जाण अर नास होणु खुणि ही होयुं च। अर यू लोग जौं बातों का बारा मा नि जणदिन ऊं बातों का बारा मा दुसरा लोगु कू भलु-बुरु बुल्दिन, यू लोग खुद की ही बातों मा जानबर का जन सैड़ी जाला।</verse>
				<verse number="13">अर यू बुरै करदिन पर याद रखा कि, अगनै जग्यूं मुछयलु पिछनै ही औन्दु। यू लोग त उई छिन जु दिन-दुफरि मा भोग-बिलास करदिन, अर इन करण ऊंतैं अच्छु लगदु। अरे यू लोग त कलंक छिन, अर जब यू लोग तुमरा दगड़ा कै दावत मा जनदिन,</verse>
				<verse number="14">त यों का आंखा हमेसा इन्दरि जनानि कि ताक मा रौनदिन, जिं का दगड़ा मा यू गळत काम कैरी सैका। अर इन कैरिके यों का आंखा पाप करण खुणि ही लग्यां रौनदिन। अर यू लोग चंचल मन वळो तैं भरमै देन्दिन, अर यों का मन मा भौत लालच भोरयूं च। असल मा यू वु लोग छिन जौं पर असगार पोड़्यूं च।</verse>
				<verse number="15">यू लोग अब सीदा बाटा तैं छोड़ि के भटकी गैनी। यू लोग बओर का नौना बिलाम का जन काम कना छिन, बिलाम जैन बुरै की कमै तैं खूब माणी छौ।</verse>
				<verse number="16">मगर वेका बुरा कामों खुणि एक गधा न भि मनखि का जन बात कैरिके बिलाम तैं झिड़की। अर वे बगत वे गधा न परमेस्वर का वे रैबर्या तैं वेका बौल्यापन से रोकी।</verse>
				<verse number="17">अर यू लोग पाणि का एक सुख्यां धारा का जन छिन, अर यू इन बादळों का जन छिन, जौं मा पाणि नि च। अर आंधी ऊं बादळों तैं उड़ै के लि जान्दी, अर यों लोगु का रौण खुणि एक अन्धेरी जगा च।</verse>
				<verse number="18">अर झूठ्‍ठा लोग बेकार कि बात करदिन, अर अपणा गन्दा कामों का द्‍वारा दुसरा लोगु तैं सरील की बुरी इच्छा मा फंसै देन्दिन। अर अभि-अभि जु लोग सच्‍चै का बाटा पर चलण लगि गै छा, यू ऊंतैं फिर से भटके देन्दिन।</verse>
				<verse number="19">अरे, यू झूठ्‍ठा लोग खुद त बुगणा छिन, अर दुसरो तैं बचौण की बात कना छिन। किलैकि इन्द्रया लोग त आजादी दिलौण को करार करदिन, जब कि यू खुद बुरै का गुलाम छिन।</verse>
				<verse number="20">अर या बात सच्‍च च, कि अगर ऊ लोग हमरा प्रभु अर छुटकारा देण वळा यीशु मसीह का बारा मा पूरा ज्ञान का द्‍वारा दुनियां की अशुद्ध चीजों से बचण का बाद, अगर फिर से दुनियां का कामों मा ही लगि जनदिन, त या बात साफ ह्‍वे जान्दी कि अब ऊंकी हालत पैलि से भि जादा खराब ह्‍वे जान्दी।</verse>
				<verse number="21">अर ऊं खुणि भली बात त या ही होन्दी, कि वु धरम का बाटा का बारा मा सच्‍चु ज्ञान ही नि पौन्दा, अर ज्वा पवित्र आज्ञा ऊंतैं दिये गै वींतैं ऊ लोग अच्छी तरौं से नि जनण चनदिन, बल्किन मा वांको पालन करण ही छोड़ि देन्दिन।</verse>
				<verse number="22">इलै ऊं पर या औखाण ठिक बैठणी च कि, “कुकर अपणी ही उल्टी तैं चटणु खुणि फिर वापस जान्दु,” अर “सुंगर तैं कथगा भि नह्‍वा-धुवा, फिर भि उ कीचड़ मा लतपत ह्‍वे जान्दु।”</verse>
			</chapter>
			<chapter number="3">
				<verse number="1">हे मेरा प्यारा भै-बैंणो, मि तुम खुणि या दुसरि चिठ्‍ठी लिखणु छौं। अर जन मिन अपणी पैलि चिठ्‍ठी मा लिखी छौ, ठिक उन्‍नि ईं चिठ्‍ठी मा भि कुछ बातों तैं लिखी के मि तुमरि सोच तैं साफ रखण चान्दु। अर तुमतै काबिल बणाण चाणु छौं,</verse>
				<verse number="2">ताकि तुम परमेस्वर का पवित्र रैबर्यों का द्‍वारा पैलि बटि बुलयां वचन तैं याद कैरा। अर हमरा परमेस्वर अर बचौण वळा प्रभु की आज्ञाओं तैं जु कि तुमतै खास चेलों का द्‍वारा दिये गैनी, ऊं सब बातों तैं अपणा ध्यान मा रखा।</verse>
				<verse number="3">अर सबसे पैलि तुमतै ईं बात का बारा मा जनण चयेणु, कि आखिरी का दिनों मा मजाक उड़ौण वळा लोग आला, अर वु अपणी बुरी इच्छाओं का मुताबिक अपणु जीवन चलला।</verse>
				<verse number="4">अर इन बुलला कि, “अरे, यीशु मसीह न वापस औण को जु करार कैरी छौ वेको क्या ह्‍वे? किलैकि हमरा पितर त मोरि गैनी, अर जब बटि या दुनियां बणि तब बटि लेके अभि तक ठिक उन्‍नि होणु च जन पैलि होन्दु छौ।”</verse>
				<verse number="5">अर वु जाणि बुजी के इन बिसरण चाणा छिन, कि भौत पैलि परमेस्वर का बुलण से ही आसमान अर धरती बणि, अर या धरती पाणि बटि बणि अर पाणि मा ही च।</verse>
				<verse number="6">अर येका द्‍वारा ही वे बगत मा या धरती पाणि का जल परलय से डुबी अर नास ह्‍वे गै।</verse>
				<verse number="7">मगर परमेस्वर का वे ही वचन का द्‍वारा आज को यू आसमान अर या धरती आग का द्‍वारा भसम करणु खुणि रखै गै, अर न्याय का दिन तक याने कि भक्‍ति नि करण वळा लोगु का नास होण तक यू इन्‍नि रखै जाला।</verse>
				<verse number="8">मगर हे मेरा प्यारा भै-बैंणो, तुम ईं बात तैं याद रखा, कि प्रभु कि नजर मा एक दिन हजार साल का बराबर अर हजार साल एक दिन का बराबर होन्दु च।</verse>
				<verse number="9">अर प्रभु अपणा करार तैं पूरु करण मा कभि देर नि करदु, जन कि कुछ लोग समझदिन बल्किन मा वु त हमरा खातिर सबर रखदु, किलैकि परमेस्वर कै भि मनखि तैं नास होन्द देखि नि सकदु। पिता परमेस्वर त इन चान्दु, कि हरेक मनखि तैं पापों बटि पस्ताप करण को मौका मिलण चयेणु।</verse>
				<verse number="10">मगर प्रभु को वु दिन एक चोर का जन अचानक से ऐ जालु, अर वे दिन आसमान बड़ी आवाज कैरिके नास ह्‍वे जालु। अर सब चीज बड़ी खतरनाक गरमी से गैळ जालि, धरती अर जु कुछ भि वेमा च वु सब कुछ खतम ह्‍वे जालु।</verse>
				<verse number="11">अर जब यू सब कुछ इन कैरिके नास होण वळु च, त तुम सोचा तुमरो चाल चलण कन होण चयेणु? अरे तुमतै त पवित्र चाल-चलन रखण चयेणु, अर परमेस्वर की भक्‍ति का काम करण वळु मनखि बणण चयेणु।</verse>
				<verse number="12">अर तुम परमेस्वर का वे दिन को इंतजार कना रा, अर पूरि कोसिस कैरा कि उ दिन जल्द से जल्द ऐ जौ। अर वे दिन आसमान फुकै के नास ह्‍वे जालु, अर वेमा रौण वळी सब चीज भि खतरनाक गरमी से गैळ जालि।</verse>
				<verse number="13">मगर हम परमेस्वर का करार का मुताबिक एक नया आसमान अर एक नई धरती को इंतजार मा छां, जख उई लोग राला जु कि परमेस्वर की नजर मा धरमी छिन।</verse>
				<verse number="14">इलै हे मेरा प्यारा भै-बैंणो, जब तुम यों सब बातों को इंतजार करणा छाँ, त इन कोसिस भि कैरा कि तुम शान्त सभौ रखी के प्रभु का समणि निरदोष अर बेदाग निकळा।</verse>
				<verse number="15">अर जरा ईं बात का बारा मा सोचा कि हमरु प्रभु सबर रखण मा कथगा महान च जु कि हमतै इन मौका देणु च, कि सब बचि जा। अर ईं बात का बारा मा हमरा प्यारा भै पौलुस न भि बड़ी समझदारी से तुम खुणि चिठ्‍ठी मा लिखी, किलैकि पिता परमेस्वर न वेतैं ऊं बातों तैं बिंगणु खुणि अकल दिनी।</verse>
				<verse number="16">जन कि वेन भि अपणी सब चिठ्‍ठी मा यों ही बातों का बारा मा लिख्यूं च, अर ऊं बातों मा बटि कुछ बातों तैं बिंगण बड़ु कठिन च। अर जौं लोगु तैं ज्ञान नि च, अर जु लोग चंचल छिन वु वेकी चिठ्‍ठी का शब्दों को मतलब तैं बिगाड़ि देन्दिन। अर जु बात पवित्रशास्‍त्र का दुसरा भागों मा भि लिखीं छिन, ऊं बातों का दगड़ा मा यू लोग इन्‍नि करदिन। अर इन कैरिके वु अपणा ही खुटों पर कुल्हड़े कि चोट मारी देन्दिन।</verse>
				<verse number="17">इलै हे मेरा प्यारा दगड़्यों, तुम सब लोगु तैं यों बातों का बारा मा पैलि बटि ही पता होण चयेणु, चौकस रा ताकि कखि इन नि हो, कि तुम दुष्‍ट लोगु की गळत शिक्षा तैं स्वीकार कैरिके भटकी जा।</verse>
				<verse number="18">इलै तुम हमरा प्रभु अर बचौण वळा यीशु मसीह की दया अर वेका ज्ञान मा बढदी जा, अर वेको आदर-सम्मान अब बटि लेके हमेसा-हमेसा तक होन्दी रौ। आमीन।</verse>
			</chapter>
		</book>
		<book number="62">
			<chapter number="1">
				<verse number="1">हे मेरा भै-बैंणो, हम ईं चिठ्‍ठी मा तुम खुणि वे जीवन का वचन का बारा मा लिखणा छां, जु कि दुनियां की शुरुवात बटि छौ। अर हमुन वेतैं देखि, बल्किन मा बड़ा ध्यान से देखि अर वेकी बातों तैं सुणी, अर अपणा हाथोंळ हमुन वेतैं छ्वी भि च। अर हम तुमतै वे वचन का बारा मा बतौणा छां जु कि जीवन देण वळु च।</verse>
				<verse number="2">हाँ, उई च जु कि ईं दुनियां मा परगट ह्‍वे, अर हमुन वेतैं देखि, अर हम वेका बारा मा गवै देन्द्‍यां। अर हम तुमतै सदनि का जीवन का बारा मा बतौणा छां जु कि पैलि पिता परमेस्वर का पास छौ, अर अब हम पर परगट किये गै।</verse>
				<verse number="3">अर जैका बारा मा हम तुमतै बतौणा छां उ यीशु मसीह च जैतैं हमुन देखि अर सुणी च, ताकि तुम लोग भि हमरा दगड़ा मा साझेदार बणि जा। अर हमरि या साझेदारी पिता परमेस्वर का दगड़ा मा अर वेका पुत्र प्रभु यीशु मसीह का दगड़ा मा च।</verse>
				<verse number="4">अर या बात हम इलै लिखणा छां, ताकि हम सभ्यों को आनन्द पूरु ह्‍वे जौ।</verse>
				<verse number="5">अर जु वचन हमुन यीशु मसीह बटि सुणी, उई वचन हम तुमतै सुनौणा छां। अर वु वचन इन च कि, परमेस्वर उज्याळु च अर वेमा कुई अन्धेरु नि च।</verse>
				<verse number="6">अर अगर जु हम इन दावा कैरा कि हम वेका दगड़ा मा साझेदार छां, अर फिर भि हम अन्धेरा मा चलणा रा, त हम झूठ्‍ठ छां अर सच्‍चै का मुताबिक नि चलद्‍यां।</verse>
				<verse number="7">हे मेरा दगड़्यों, जन पिता परमेस्वर उज्याळु मा च ठिक उन्‍नि हम भि उज्याळा मा रै के चला, त हम लोगु कि संगत एक-दुसरा का दगड़ा मा बणि राली। अर इथगा ही ना, बल्किन मा यीशु मसीह को ल्वे भि हमतै हमरा सब किसम का पापों बटि शुद्ध करलु।</verse>
				<verse number="8">अर अगर हम इन बुल्द्‍यां कि, “हमरा भितर पाप नि च,” त हम खुद तैं धोखा दिणा छा अर हम मा सच्‍चै छैई नि च।</verse>
				<verse number="9">अर अगर हम अपणा-अपणा पापों तैं माणी द्‍या, त उ हमरा पापों तैं माफ करलु अर हमतै सब बुरै से शुद्ध भि करलु, किलैकि पिता परमेस्वर भरोसा का लैख अर सच्‍चु च।</verse>
				<verse number="10">अर अगर जु हम बुल्द्‍यां कि हमुन पाप नि कैरी, त हमुन परमेस्वर तैं झूठ्‍ठु साबित कैरियाली, इन कैरिके हमुन वेका वचन तैं अपणा मन मा जगा नि दिनी।</verse>
			</chapter>
			<chapter number="2">
				<verse number="1">हे मेरा बच्‍चों, मि तुम खुणि यू सब इलै लिखणु छौं, ताकि तुम पाप नि कैरा। अर अगर कुई पाप करदु त पिता परमेस्वर का पास हम खुणि एक बिन्ती करणु वळु च जु कि वेकी नजर मा धरमी च, याने कि हमरु यीशु मसीह।</verse>
				<verse number="2">अर याद रखा की यीशु मसीह न अपणी इच्छा से हम खुणि अपणु बलिदान देई, ताकि वेका द्‍वारा पिता परमेस्वर हमरा पापों तैं माफ कैर द्‍यो, अर बस हमरा ही पापों तैं ना, बल्किन मा सरी दुनियां का लोगु का पापों तैं भि माफ कैरो।</verse>
				<verse number="3">अर अगर जु हम वेकी आज्ञाओं को पालन करद्‍यां, त यां से इन पता चलदु कि हमुन पिता परमेस्वर तैं जाण्यालि।</verse>
				<verse number="4">अर जु मनखि बुल्दु कि, “मि परमेस्वर तैं जाणि ग्यों,” अर फिर भि वेकी आज्ञाओं को पालन नि करदु, त समझि जा कि उ मनखि झूठ्‍ठु च अर वेमा कुई सच्‍चै नि च।</verse>
				<verse number="5">मगर कुई मनखि पिता परमेस्वर की आज्ञा को पालन करदु, त उ अपणा पूरा दिल से वेसे प्यार करदु। अर यां से इन पता चलदु कि हमरु पिता परमेस्वर का दगड़ा मा कथगा सच्‍चु रिश्ता च।</verse>
				<verse number="6">अर अगर कुई मनखि इन बुल्दु, कि मेरु पिता परमेस्वर का दगड़ा मा एक अच्छु रिश्ता च, त वेको इन फरज बणदु की वेको चाल-चलन भि ठिक उन्‍नि हो जन यीशु मसीह को छौ।</verse>
				<verse number="7">हे मेरा प्यारा दगड़्यों, मि तुमतै कुई नई आज्ञा नि देणु छौं, बल्किन मा वा ही आज्ञा देणु छौं ज्वा कि तुमतै पैलि बटि मिली छै, अर या आज्ञा पुरणि ही च, जिं का बारा मा तुमुन बिस्वास करण का बगत मा सुणी छौ।</verse>
				<verse number="8">मगर फिर भि मि तुम खुणि एक नई आज्ञा लिखणु छौं, ज्वा कि यीशु मसीह मा अर ठिक उन्‍नि तुम भि मा भि सच्‍चि साबित ह्‍वे, किलैकि अब अन्धेरु खतम होण लगि गै, अर सच्‍चै को उज्याळु चमकण लगि गै।</verse>
				<verse number="9">अर जु कुई इन दावा करदु कि मि उज्याळा मा छौ, मगर दुसरा लोगु बटि खार खान्दु हो, त इन्द्रयो मनखि इन समझि ल्यो कि अभि भि वेका जीवन मा अन्धेरु ही च।</verse>
				<verse number="10">मगर जु मनखि सब लोगु से प्यार करदु हो, वेका जीवन मा उज्याळु च अर इन्द्रयो मनखि दुसरा लोगु खुणि पाप करण की वजा नि बणदु।</verse>
				<verse number="11">मगर जु मनखि दुसरा लोगु से नफरत करदु, उ ईं बात तैं जाणि ल्यो कि वेका जीवन मा बुरै च, अर वु अन्धेरा मा चलणु च। अर वे मनखि तैं इन पता नि च कि उ जाणु कख च, किलैकि वे अन्धेर न वेका आंख्यों तैं बन्द कैरियाली।</verse>
				<verse number="12">हे मेरा प्यारा बच्‍चों, या चिठ्‍ठी मि तुम खुणि इलै लिखणु छौं, किलैकि यीशु मसीह का द्‍वारा तुमरा पाप माफ किये गैनी।</verse>
				<verse number="13">अर तुम जु ब्वे-बुबा छाँ मि तुम खुणि इलै लिखणु छौं, किलैकि तुम यीशु मसीह तैं जणद्‍यां, जु कि शुरुवात बटि च। अर तुम जु ज्वान छाँ, मि तुम खुणि इलै लिखणु छौं, किलैकि हम जणदा छाँ कि तुमुन शैतान पर जीत हासिल कैरियाली। अर मेरा प्यारा बच्‍चों, मि तुम खुणि इलै लिखणु छौं, किलैकि हम जणदा छां कि तुम पिता परमेस्वर तैं जणदा छाँ।</verse>
				<verse number="14">अर ब्वे-बबों तैं लिखण को मकसद यू च कि तुम लोग यीशु मसीह तैं जणद्‍यां, जु कि शुरुवात बटि च। अर ज्वानों तैं लिखण को मकसद यू च कि तुम लोग बिस्वास मा ताकतबर छाँ, अर वेका वचन को पालन करद्‍यां, इलै तुम लोगु न शैतान पर जीत हासिल कैरियाली।</verse>
				<verse number="15">अर तुम लोग ईं दुनियां का बुरा चाल-चलन से अर वेकी बुरै से प्यार नि कैरा, किलैकि अगर कुई मनखि दुनियां की बातों से प्यार करदु, त उ ईं बात तैं जाणि ल्यो कि वेमा पिता परमेस्वर को प्यार छैई नि च।</verse>
				<verse number="16">किलैकि दुनियां की तरफा बटि सरील कि बुरी इच्छा, आंख्यों की बुरी इच्छा, अपणा जीवन पर बड़ु मोन करण वळी बात ही औन्दिन, अर यू सब बात ईं दुनियां मा छिन। अरे, इन्दरि बात पिता परमेस्वर की तरफा बटि नि ऐ सकदिन, बल्किन मा यू त दुनियां तरफा बटि औन्दिन।</verse>
				<verse number="17">दुनियां अर वेकी बुरी इच्छा को नास ह्‍वे जाण, पर जु कुई परमेस्वर की इच्छा का मुताबिक चलदु वेको नास कभि नि होण।</verse>
				<verse number="18">हे मेरा बच्‍चों, यू त आखिरी को बगत च अर जन कि तुमुन सुण्यालि कि यीशु मसीह को विरोध करण वळु औण वळु च, अर अगर ईं बात का मुताबिक दिखै जौ त भौत सा लोग इन ऐ गैनी, जु कि यीशु मसीह को विरोध करदिन। अर यां से हमतै इन पता चलदु कि यू आखिरी को बगत च।</verse>
				<verse number="19">असल मा यू लोग हमरा बीच मा बटि ही निकळि के ही ऐनी, मगर वु हमरा अपणा लोग नि छिन किलैकि अगर जु वु हमरा अपणा लोग होन्दा त वु हम दगड़ा मा रौन्दा। मगर ऊंन त हमतै छोड़याली, अर ऊंको इन करण से यू साबित ह्‍वे गै, कि ऊ हमरा अपणा लोग नि छिन।</verse>
				<verse number="20">मगर तुमरो अभिषेक त पवित्र परमेस्वर का द्‍वारा होयुं च, इलै ही तुम पूरि सच्‍चै तैं जणद्‍यां।</verse>
				<verse number="21">अर मेरा लिखण को मकसद यू नि च, कि तुम सच्‍चै तैं नि जणद्‍यां। अरे, तुम त सच्‍चै तैं जणदा छाँ अर कुई भि झूठ्‍ठी बात सच्‍च बटि पैदा नि होन्दी।</verse>
				<verse number="22">अर झूठ्‍ठु कु च? उई मनखि झूठ्‍ठु च जु ईं बात तैं स्वीकार नि करदु कि यीशु ही मसीह च। अर यू त उई च जु कि यीशु मसीह को दुसमन च, अर पिता परमेस्वर अर वेका पुत्र यीशु तैं स्वीकार नि करदु।</verse>
				<verse number="23">अर जु पुत्र तैं स्वीकार नि करदु, वेका पास पिता परमेस्वर भि नि च। पर जु मनखि पुत्र तैं स्वीकार करदु, वेका पास पिता परमेस्वर भि च।</verse>
				<verse number="24">अर जब बटि तुमुन बिस्वास कैरी, तब बटि तुमुन जु कुछ भि सुणी तुम वेमा बणयां रा। अर जु कुछ भि तुमुन सुणी अगर जु तुम वेमा बणयां रैल्या, त पुत्र अर वेका पिता मा बणयां रैल्या।</verse>
				<verse number="25">अर जु करार वेन हमरा दगड़ा मा कर्युं च, उ करार सदनि को जीवन च।</verse>
				<verse number="26">अर यू सब बात मि तुम खुणि इलै लिखणु छौं, ताकि तुम जाणि जा कि भौत सा लोग छिन, जु तुमतै सच्‍चै का बाटा बटि भरमौण चनदिन।</verse>
				<verse number="27">हे मेरा भै-बैंणो, यीशु मसीह न तुमरो अभिषेक पवित्र आत्मा का द्‍वारा कर्युं च। अर जब तक वेको पवित्र आत्मा तुम मा बणु रौन्दु, तब तक तुमतै सिखौणु खुणि कै की जरुरत नि च, किलैकि पवित्र आत्मा को अभिषेक तुमतै हरेक चीज का बारा मा सिखौन्दु, कि कु जि बात सच्‍चि छिन अर कु झूठ्‍ठी। इलै पवित्र आत्मा की शिक्षा तैं स्वीकार कैरिके वेको पालन कैरा, अर यीशु मसीह की संगत मा बणयां रा।</verse>
				<verse number="28">हे मेरा प्यारा बच्‍चों, यीशु मसीह की संगत मा एक ह्‍वेके बणयां रा। अर अगर जु तुम इन करिल्या, त जब यीशु मसीह परगट होलु त तुमतै खुद पर सरम नि आली, बल्किन मा तुमतै बड़ी हिम्मत मिलली।</verse>
				<verse number="29">किलैकि हम सभ्या का सभि जणदा छां, कि यीशु मसीह उई करदु जु पिता परमेस्वर की नजर मा सही च। अर हम यू भि जणद्‍यां, कि जथगा भि लोग वेकी नजर मा धरमी छिन ऊ सब पिता परमेस्वर की औलाद छिन।</verse>
			</chapter>
			<chapter number="3">
				<verse number="1">सुणा, पिता परमेस्वर न हम बटि भौत जादा प्यार कैरी, ईं वजै से ही आज हम खुणि वेकी औलाद बुले जान्दु अर हम छैई भि छां। अर ईं दुनियां का लोग पिता परमेस्वर तैं नि जणदिन, इलै वु हमतै भि नि पछ्याणदिन।</verse>
				<verse number="2">हे मेरा प्यारा लोगु, अब हम परमेस्वर की औलाद छां, अर औण वळा बगत मा क्या जि होला वेका बारा मा परगट नि किये गै। मगर हम त बस इथगा ही जणद्‍यां, कि जब यीशु मसीह परगट होलु त हम भि वेका जन बणि जौला, किलैकि हम वेतैं ठिक उन्‍नि दिखुला जन उ छैई च।</verse>
				<verse number="3">अर हरेक उ मनखि जैन यीशु मसीह पर या आस रखी च, उ खुद तैं उन्‍नि पवित्र बणै के रखदु जन मसीह पवित्र च।</verse>
				<verse number="4">अर हरेक उ मनखि जु पाप कनु रौन्दु, उ परमेस्वर का नियम-कानून को विरोध करदु, किलैकि नियम-कानून का तोड़ण को मतलब ही पाप च।</verse>
				<verse number="5">अर तुम जणदा ही छाँ, कि यीशु मसीह हमरा पापों तैं मिटौणु खुणि ही ईं दुनियां मा ऐ, अर वेका सभौ मा कुई भि पाप नि च।</verse>
				<verse number="6">अर जु कुई मसीह का दगड़ा मा बणयूं रौन्दु उ मनखि लगातार पाप नि करदु, पर जु मनखि पाप करण मा लग्यूं रौन्दु, वेन नऽ त यीशु मसीह तैं देखि अर ना ही वेतैं जणदु।</verse>
				<verse number="7">हे मेरा प्यारा बच्‍चों, ध्यान रखा कखि कुई तुमतै भरमै नि द्‍यो। अर जैको चाल-चलन खरु च उई मनखि पिता परमेस्वर की नजर मा धरमी च, ठिक उन्‍नि जन यीशु मसीह वेकी नजर मा धरमी च।</verse>
				<verse number="8">पर जु मनखि पाप कनु रौन्दु, उ शैतान की औलाद च, किलैकि शैतान शुरु बटि ही पाप करदी औणु च। अर परमेस्वर को पुत्र इलै परगट ह्‍वे, ताकि उ शैतान का कामों तैं नास कैरी द्‍यो।</verse>
				<verse number="9">अर जु मनखि पिता परमेस्वर की औलाद च, उ मनखि लगातार पाप नि कैरी सकदु, किलैकि पिता परमेस्वर को सभौ वेमा रौन्दु। अर उ मनखि पाप कैरी ही नि सकदु, किलैकि उ पिता परमेस्वर बटि जनमियूं च।</verse>
				<verse number="10">अर पिता परमेस्वर की औलादों अर शैतान की औलादों की पछ्याण यां से ही होन्दी, अर हरेक उ मनखि जु परमेस्वर की नजर मा धरमी जीवन नि जीन्दु उ वेकी तरफा बटि नि च, अर जु मनखि सब लोगु से प्यार नि करदु उ भि परमेस्वर की तरफा बटि नि च।</verse>
				<verse number="11">अर जु वचन तुमुन बिस्वास करण का बगत बटि सुणी, उ त यू च कि हमतै एक-दुसरा बटि प्यार करण चयेणु।</verse>
				<verse number="12">हमतै कैन का जन नि बणण चयेणु, जैन अपणा सगा भै तैं जान से मार दिनी। अरे, वु त शैतान की औलाद छौ, अर वेन अपणा सगा भै तैं जान से इलै मारी, किलैकि वेका भै न पिता परमेस्वर की नजर मा भलै का काम कैरी छा मगर कैन न बुरै का काम कैरी छा।</verse>
				<verse number="13">हे मेरा भै-बैंणो, अगर दुनियां का लोग तुम से नफरत करदिन, त ईं बात पर तुम ताजुब नि कैरा।</verse>
				<verse number="14">हम जणदा छां कि हमुन मौत तैं पार कैरिके जीवन पयेलि, अर या बात हम इलै जणद्‍यां किलैकि हम लोग एक-दुसरा से प्यार करद्‍यां। अर जु मनखि एक-दुसरा बटि प्यार नि करदु, त उ ईं बात तैं जाणि ल्यो कि उ मुरयूं च।</verse>
				<verse number="15">अर जु मनखि अपणा दुसरा लोगु से नफरत करदु, उ एक खूनि च। अर ईं बात का बारा मा तुम जणदा ही छाँ कि एक खूनि मनखि मा सदनि को जीवन नि ह्‍वे सकदु।</verse>
				<verse number="16">अर यीशु मसीह न हमरा खातिर अपणी जान दे दिनी, अर यां से ही हमतै इन पता चलि कि प्यार क्या होन्दु? इलै हमतै भि एक-दुसरा खुणि अपणी जान देण चयेणी।</verse>
				<verse number="17">अगर कै मा गुजर-बसर करणु खुणि सब कुछ च। अर उ इन देखो कि कै दुसरो भै या बैंण मा कुछ कमी च, अर वेका बाद भि उ दया नि कैरो, त ईं बात तैं जाणि ल्या कि इन्द्रया मनखि मा परमेस्वर को प्यार नि च।</verse>
				<verse number="18">हे मेरा प्यारा बच्‍चों, हम केवल अपणा गिच्‍चळ ही इन नि बोला कि हम तुम से प्यार करद्‍यां, बल्किन मा हमतै अपणा कामों का द्‍वारा ईं बात तैं सच्‍चै से कैरिके दिखाण भि चयेणी।</verse>
				<verse number="19">अर जब हम एक-दुसरा बटि प्यार करद्‍यां, त हमतै इन पता चलदु कि हम पिता परमेस्वर का छा, जु कि सच्‍चु च। इलै हम वेका समणि हिम्मतळ खड़ा होला।</verse>
				<verse number="20">अर जब हमरु जमीर हमतै गळत साबित करदु, त वे बगत हमतै इन पता चलदु कि पिता परमेस्वर हमरा मन की सोच से भौत बड़ु च, अर उ सब कुछ जणदु च।</verse>
				<verse number="21">हे मेरा प्यारा दगड़्यों, अगर हमरु जमीर हमतै गळत साबित नि करदु, त फिर हमतै पिता परमेस्वर का समणि हिम्मत होलि।</verse>
				<verse number="22">अर जु कुछ भि हम मंगुला पिता परमेस्वर हमतै दयालु, किलैकि हम वेकी आज्ञाओं को पालन करद्‍यां। अर हम उन्‍नि करद्‍यां, जु वेकी नजर मा अच्छु च।</verse>
				<verse number="23">अर या ही त पिता परमेस्वर की आज्ञा च, कि हम वेका पुत्र प्रभु यीशु मसीह पर बिस्वास कैरा। अर ज्वा आज्ञा खुद वेन देई वेका मुताबिक हम एक-दुसरा बटि प्यार कैरा।</verse>
				<verse number="24">अर जु मनखि पिता परमेस्वर की आज्ञा को पालन करदु, उ पिता परमेस्वर का दगड़ा मा अर परमेस्वर वेका जीवन मा वास करदु। अर ईं बात को पता हमतै पवित्र आत्मा का द्‍वारा चलदु, जु कि पिता परमेस्वर न हमतै दियूं च।</verse>
			</chapter>
			<chapter number="4">
				<verse number="1">हे मेरा प्यारा भै-बैंणो, हरेक आत्मा पर बिस्वास नि कैरा बल्किन मा हरेक आत्मा तैं परखा कि वा पिता परमेस्वर की तरफा बटि छैई च कि नि च, किलैकि भौत सा झूठ्‍ठा रैबर्या ईं दुनियां मा फैली गैनी।</verse>
				<verse number="2">अर तुमतै पिता परमेस्वर का पवित्र आत्मा का बारा मा इनकै पता चलण? कि ज्वा आत्मा इन स्वीकार कैरी देन्दु कि यीशु मसीह ईं दुनियां मा एक मनखि का रुप मा ऐ, त समझि जा कि वा आत्मा पिता परमेस्वर कि तरफा बटि च।</verse>
				<verse number="3">मगर जु आत्मा यीशु तैं नि मणदु, त ईं बात तैं जाणि ल्या कि इन्द्रयो आत्मा पिता परमेस्वर की तरफा बटि नि च। अर इन्द्रयो मनखि वे आत्मा का कब्जा मा च, जैका बारा मा तुमुन सुणी छौ कि उ औण वळु च, बल्किन मा उ त ईं दुनियां मा च। हे मेरा दगड़्यों, यू उई च जु कि यीशु मसीह को दुसमन च।</verse>
				<verse number="4">हे मेरा प्यारा बच्‍चों, तुम परमेस्वर का छाँ, अर तुम लोगु न यीशु मसीह को विरोध करण वळा लोगु पर जीत हासिल कैरियाली, किलैकि जु पवित्र आत्मा तुम लोगु मा च उ वे शैतान से जादा ताकतबर च जु कि ईं दुनियां मा च।</verse>
				<verse number="5">इन्द्रया झूठ्‍ठा लोग दुनियां की बातों का बारा मा ही बतौन्दिन, अर दुनियां का लोग ऊंकी सब बातों तैं मणदिन, किलैकि वु लोग ईं दुनियां का छिन।</verse>
				<verse number="6">मगर हम परमेस्वर का छां, अर जु परमेस्वर तैं जणदु उ हमरि बातों तैं मणदु। अर जु मनखि परमेस्वर तैं नि जणदु, उ हमरि बात तैं भि नि मणदु। अर इनकै हम लोग सच्‍चै का आत्मा तैं, अर वे भरमौण वळा आत्मा तैं पछ्याण सकद्‍यां।</verse>
				<verse number="7">हे मेरा प्यारा भै-बैंणो हम सभ्यों तैं एक-दुसरा बटि प्यार करण चयेणु, किलैकि प्यार परमेस्वर की तरफा बटि च। अर हरेक उ मनखि जु एक-दुसरा बटि प्यार करदु, उ परमेस्वर की औलाद च, अर पिता परमेस्वर तैं जणदु च।</verse>
				<verse number="8">पर जु मनखि एक-दुसरा तैं प्यार नि करदु, उ पिता परमेस्वर तैं नि जणदु किलैकि परमेस्वर प्यार च।</verse>
				<verse number="9">अर जु प्यार परमेस्वर हम बटि करदु, उ वेन हम पर कुछ इनकै दिखै कि वेन अपणा इकलौता पुत्र यीशु मसीह तैं हम खुणि ईं दुनियां मा भेजि, ताकि हम वेका द्‍वारा सदनि को जीवन पा।</verse>
				<verse number="10">अर हमुन पिता परमेस्वर से प्यार नि कैरी, पर सच्‍चु प्यार त इन च कि वेन हम से प्यार कैरी। अर हमरा पापों बटि माफी देणु खुणि अपणा पुत्र तैं भेजि।</verse>
				<verse number="11">हे मेरा प्यारा भै-बैंणो, जब पिता परमेस्वर हम लोगु से इथगा जादा प्यार कैरी सकदु च, त हम लोगु तैं भि एक-दुसरा से प्यार करण चयेणु।</verse>
				<verse number="12">अर कैन भि परमेस्वर तैं कभि नि देखि, पर अगर जु हम एक-दुसरा से प्यार करद्‍यां, त पिता परमेस्वर हम मा वास करदु, अर वेको प्यार हम मा सिद्ध ह्‍वे जान्दु।</verse>
				<verse number="13">अर यां से हमतै इन पता चलदु, कि हम पिता परमेस्वर का दगड़ा मा बणयां छां, अर उ हमरा दगड़ा मा बणयूं च, किलैकि वेन हमतै अपणु पवित्र आत्मा दियूं च।</verse>
				<verse number="14">अर पिता परमेस्वर न अपणा पुत्र यीशु मसीह तैं ईं दुनियां मा भेजि। अर हमुन वेतैं देखि, इलै ही हम लोगु का बीच मा इन गवै देन्द्‍यां कि यीशु ही बचौण वळु च।</verse>
				<verse number="15">अर जु कुई इन स्वीकार कैरी देन्दु, कि यीशु मसीह परमेस्वर को पुत्र च, त परमेस्वर वेमा वास करदु अर उ परमेस्वर का दगड़ा मा वास करदु।</verse>
				<verse number="16">इलै अब हम परमेस्वर का प्यार तैं जाणि ग्यां अर वे पर बिस्वास करद्‍यां, किलैकि परमेस्वर प्यार च। अर जु कुई वेका प्यार मा बणयूं रौन्दु, त उ परमेस्वर का दगड़ा मा अर परमेस्वर वेका दगड़ा मा बणयूं रौन्दु।</verse>
				<verse number="17">अर यां से ही प्यार हम मा सिद्ध ह्‍वे ताकि न्याय का दिन पर हमतै हिम्मत मिलु, किलैकि जन यीशु च ठिक उन्‍नि हम भि ईं दुनियां मा छाँ।</verse>
				<verse number="18">अर प्यार मा कुई डौऽर नि होन्दी, पर सच्‍चु प्यार डौऽर तैं निकाळि देन्दु। किलैकि डौऽर को रिश्ता त दण्ड का दगड़ा मा च, अर जु डऽरदु च यां को मतलब यू च कि वेमा प्यार सिद्ध नि ह्‍वे।</verse>
				<verse number="19">अर हम लोग इलै प्यार करद्‍यां, किलैकि पैलि परमेस्वर न हम से प्यार कैरी।</verse>
				<verse number="20">अर अगर कुई इन बुल्दु कि, “मि परमेस्वर से प्यार करदु,” मगर दुसरा लोगु से उ नफरत करदु हो, त ईं बात तैं जाणि ल्या कि इन्द्रयो मनखि झूठ्‍ठों च। किलैकि जौं लोगु तैं वेन अपणा समणि देखि, ऊं से उ प्यार नि कैरी सकणु च। अर जै परमेस्वर तैं वेन कभि नि देखि, त वेसे उ कनकै प्यार कैरी सकलु।</verse>
				<verse number="21">इलै हमतै यीशु मसीह का द्‍वारा इन आज्ञा मिली च कि जु मनखि परमेस्वर से प्यार करदु, वेतैं सब लोगु बटि प्यार करण चयेणु।</verse>
			</chapter>
			<chapter number="5">
				<verse number="1">हे मेरा दगड़्यों, जु मनखि इन बिस्वास करदु कि यीशु ही मसीह च, वेको जनम परमेस्वर की तरफा बटि ह्‍वे, अर जु मनखि जीवन देण वळा तैं प्यार करदु, त उ वेका पुत्र से भि प्यार करदु।</verse>
				<verse number="2">अर जब हम परमेस्वर बटि प्यार करद्‍यां, अर वेकी आज्ञाओं को पालन करद्‍यां, तब यां से इन पता चलदु कि हम वेकी औलादों से भि प्यार करद्‍यां।</verse>
				<verse number="3">किलैकि परमेस्वर को प्यार यां मा ही च कि हम वेकी आज्ञाओं को पालन कैरा, अर वेकी आज्ञा को पालन करण कुछ जादा कठिन नि च।</verse>
				<verse number="4">किलैकि जथगा लोगु को जनम परमेस्वर की तरफा बटि ह्‍वे, ऊ ईं दुनियां पर जीत हासिल कैरी देन्दिन। अर दुनियां पर ईं जीत तैं हम अपणा बिस्वास का द्‍वारा हासिल करद्‍यां।</verse>
				<verse number="5">अर कु च उ जु ईं दुनियां पर जीत हासिल कैरी सकदु? हरेक उई मनखि जु ईं बात पर बिस्वास करदु कि यीशु, परमेस्वर को पुत्र च।</verse>
				<verse number="6">अर यीशु मसीह ही च जु कि ईं दुनियां मा पाणि अर खून का द्‍वारा ऐ। अर पाणि ही पाणि का द्‍वारा ना बल्किन मा पाणि अर ल्वे का द्‍वारा भि। अर पवित्र आत्मा वु च जु कि वेका बारा मा गवै देन्दु, अर जु कुछ वु बतौन्दु उ सब सच्‍च च,</verse>
				<verse number="7">किलैकि पवित्र आत्मा सच्‍चै को आत्मा च।</verse>
				<verse number="8">अर गवै देण वळा तीन छिन, पवित्र आत्मा, पाणि अर ल्वे। अर यू तिन्यां का तीन एक ही बात मा सैमत छिन।</verse>
				<verse number="9">अर हम ईं दुनियां का लोगु कि गवै तैं स्वीकार कैरी देन्द्‍यां, अगर जु हम लोगु की गवै स्वीकार करद्‍यां त जरा सोचा, पिता परमेस्वर की गवै ऊं बातों से कथगा महान होलि। अर वेकी गवै इन च कि वेन खुद अपणा पुत्र का बारा मा गवै दिनी।</verse>
				<verse number="10">अर जु मनखि परमेस्वर का पुत्र यीशु पर बिस्वास करदु, वेन अपणा दिल मा वीं गवै तैं स्वीकार कैरियाली। अर जु मनखि परमेस्वर पर बिस्वास नि करदु वेन वेतैं झूठ्‍ठु ठैरैयालि, किलैकि वेन परमेस्वर की वीं गवै पर बिस्वास नि कैरी ज्वा वेन अपणा पुत्र का बारा मा दे छै।</verse>
				<verse number="11">अर वा गवै या च कि परमेस्वर न हमतै सदनि को जीवन दिनी, अर वु जीवन हमतै वेका पुत्र का द्‍वारा मिलदु।</verse>
				<verse number="12">अर जु पुत्र तैं स्वीकार करदु, वेका पास सदनि को जीवन च। अर जु कुई परमेस्वर का पुत्र तैं स्वीकार नि करदु, वेका पास सदनि को जीवन नि च।</verse>
				<verse number="13">हे मेरा प्यारा भै-बैंणो, तुम लोग जु परमेस्वर का पुत्र पर बिस्वास करद्‍यां, मि तुम खुणि या बात इलै लिखणु छौं, ताकि तुम जाणि जा कि तुमरा पास सदनि को जीवन च।</verse>
				<verse number="14">अर हमतै पिता परमेस्वर पर पूरु यकीन च कि हम वेकी मनसा का मुताबिक जु कुछ भि वेसे मंगद्‍यां, त उ हमरि बात तैं सुणदु च।</verse>
				<verse number="15">अर अगर हम इन जणदा छां, कि जु कुछ भि हम वेसे मंगद्‍यां त उ हमरि सुणदु, तब हम ईं बात तैं जणद्‍यां कि जु कुछ भि हमुन वेसे मांगि वु हमतै मिली गै।</verse>
				<verse number="16">अर अगर तुम मा बटि कुई कै भै या बैंण तैं इन पाप करद देखो, जु की वेतैं परमेस्वर बटि हमेसा खुणि दूर नि करदु, त तुमतै वे खुणि प्रार्थना करण चयेणी। अर परमेस्वर वेतैं जीवन द्‍यालु, जैन इन पाप नि कैरी जैकी वजै से उ मनखि परमेस्वर से दूर ह्‍वे जौ। मगर कुछ पाप इन्द्रया भि छिन जु कि ऊंतैं परमेस्वर बटि हमेसा खुणि दूर कैरी देन्दिन, अर इन्दरि बातों का बारा मा प्रार्थना करणु खुणि मि नि बुल्दु।</verse>
				<verse number="17">हरेक उ काम जु कि पिता परमेस्वर का खिलाप मा च उ पाप च। अर कुछ पाप इन्द्रया छिन, जु कि मनखि तैं पिता परमेस्वर बटि हमेसा खुणि दूर नि लि जनदिन।</verse>
				<verse number="18">अर हम इन जणदा छां कि जै मनखि को जनम पिता परमेस्वर की तरफा बटि होयुं च, उ लगातार पाप नि कैरी सकदु। किलैकि परमेस्वर को पुत्र वेकी हिफाजत करदु। अर शैतान वेको कुछ भि नि कैरी सकदु।</verse>
				<verse number="19">अर हम या बात जणदा छां कि हम परमेस्वर की औलाद छां, अर पूरि दुनियां वे शैतान का वस मा च।</verse>
				<verse number="20">अर हमतै पता च कि परमेस्वर को पुत्र ईं दुनियां मा ऐ, अर वेन हमतै सच्‍चा परमेस्वर तैं पछ्यणनै की समझ दिनी। अर अब हम सच्‍चा परमेस्वर का दगड़ा मा रौन्द्‍यां, किलैकि हम वेका पुत्र यीशु मसीह मा बणयां रौन्द्‍यां। अर उई सच्‍चु परमेस्वर अर सदनि को जीवन च।</verse>
				<verse number="21">हे मेरा प्यारा बच्‍चों, खुद तैं दुसरा द्‍यबताओं से बचै के रखा।</verse>
			</chapter>
		</book>
		<book number="63">
			<chapter number="1">
				<verse number="1">हे मेरी प्यारी बैंण, मि यूहन्‍ना जु की एक अध्यक्ष छौं, मि या चिठ्‍ठी त्वे खुणि अर तेरा बच्‍चों खुणि लिखणु छौ, तुम जु कि पिता परमेस्वर का द्‍वारा चुण्यां छा मि तुम से भौत प्यार करदु। अर केवल मि ही ना, बल्किन मा वु सब त्वेसे प्यार करदिन जु कि सच्‍चै तैं जणदिन।</verse>
				<verse number="2">अर जीवन कि सच्‍चै हमरा दिल मा च, अर वा हमेसा खुणि हमरा दगड़ा मा राली।</verse>
				<verse number="3">अर पिता परमेस्वर अर वेका पुत्र यीशु मसीह की तरफा बटि, वेकी महान किरपा, दया अर वेकी शान्ति हमतै मिलदी रौ, अर यू सब हमतै वेका प्यार अर वेकी सच्‍चै से मिलु।</verse>
				<verse number="4">अर मितैं यू जाणि के भौत खुशी होन्दी कि तेरा कुछ बच्‍चा सच्‍चै का बाटा पर चलणा छिन, ठिक उन्‍नि जन कि हमतै पिता परमेस्वर की तरफा बटि आज्ञा मिली छै।</verse>
				<verse number="5">हे मेरी बैंण, अब मि त्वेतै कुई नई आज्ञा नि देणु, बल्किन मा मि त्वेतै वीं ही आज्ञा का बारा मा लिखणु छौं, ज्वा कि शुरुवात बटि हमतै मिली च, अर मि त्वेसे बिन्ती करदु कि हम एक-दुसरा का दगड़ा मा प्यार से रा।</verse>
				<verse number="6">अर प्यार को मतलब इन च कि हम परमेस्वर की आज्ञाओं को पालन कैरा। अर या वा ही आज्ञा च जिं का बारा तुमुन पैलि बटि सुणी छौ अर तुमतै वेका मुताबिक ही चलण चयेणु।</verse>
				<verse number="7">किलैकि ईं दुनियां मा भौत सा धोखा देण वळा लोग निकळि के ऐ गैनी। अर वु ईं बात तैं स्वीकार नि करदिन, कि यीशु मसीह एक मनखि का रुप मा ईं दुनियां मा ऐ। अर यू उई च जु कि धोखा देण वळु, अर यीशु मसीह को दुसमन च।</verse>
				<verse number="8">अर जै काम खुणि हमुन मेनत कैरी, कखि तुम वेतैं हरचै नि द्‍या, इलै अपणा जीवनों खुणि चेतन रा, ताकि तुमतै वेको इनाम मिली सैको।</verse>
				<verse number="9">अर जु मनखि यीशु मसीह की शिक्षा मा बणयूं नि रौन्दु, बल्किन मा वेतैं छोड़ि के दूर चलि जान्दु, त वेका पास परमेस्वर नि च। पर जु मनखि वेकी शिक्षा मा बणयूं रौन्दु, वेका पास पिता अर पुत्र दुई छिन।</verse>
				<verse number="10">अर अगर कुई मनखि तुमरा पास अऽ, अर इन्दरि शिक्षा तैं द्‍यो, त इन्द्रया मनखि तैं अपणा घौर मा नि औण द्‍या, इख तक की वेकू सलाम भि नि बोला।</verse>
				<verse number="11">किलैकि जु कुई इन्द्रया मनखि कू सलाम बुल्दु, वु वेका बुरा कामों मा साझेदार ह्‍वे जान्दु।</verse>
				<verse number="12">हालांकि, मिन भौत सि बात लिखण छै, मगर मि नि चान्दु कि सब कुछ स्याई से अब यों कागज्दों पर लिखु, बल्किन मा मितैं इन उम्मीद च कि मि तुमरा इख औंऽऽ। अर जब मि उख पौंछुलु, तब अमणि-समणि बात होलि, ताकि तुमरि खुशी पूरि ह्‍वे जौ।</verse>
				<verse number="13">हे मेरी प्यारी बैंण, तेरी चुणी बैंण का बच्‍चा त्वेकू सलाम बोन्‍ना छिन।</verse>
			</chapter>
		</book>
		<book number="64">
			<chapter number="1">
				<verse number="1">हे मेरा प्यारा भै गयुस, मि यूहन्‍ना जु कि एक अध्यक्ष छौं, मि या चिठ्‍ठी त्वे खुणि लिखणु छौं, त्वेसे मि सच्‍चु प्यार करदु।</verse>
				<verse number="2">हे मेरा प्यारा भै, मि इन प्रार्थना करदु कि जन तू आत्मिक रुप से मजबूत होन्दी जाणि छैई, ठिक उन्‍नि हरेक बात से भरपूर होन्दी जा अर खूब रै।</verse>
				<verse number="3">अर जब बिस्वासी भै-बैंणो न मेरा पास ऐके तेरा बारा मा बतै, कि तू सच्‍चै का बाटा पर चलणी छैई, अर या बात च कि तू चलणी भि छैई त मितैं ईं बात से बड़ी खुशी मिली।</verse>
				<verse number="4">अर जब मि इन सुणदु, कि मेरा बच्‍चा सच्‍चै का बाटा पर चलणा छिन, त मितैं ईं बात से जादा खुशी और कैं दुसरि बात मा नि मिलदी।</verse>
				<verse number="5">हे मेरा प्यारा भै गयुस, तू भै-बैंणो की भलै खुणि भौत कुछ कनि छैई, अर ठिक उन्‍नि तू अणजाण लोगु खुणि भि कनि छैई, अर या ही बात तेरी वफादारी को सबूत च।</verse>
				<verse number="6">अर जौं लोगु की भलै खुणि तिन भौत कुछ कैरी ऊं लोगु न समुदाय का समणि तेरा प्यार की गवै दिनी। अर या बात त्वे खुणि अच्छी होलि, कि जब ऊ सफर कैरा त तू ऊं लोगु तैं ठिक उन्‍नि विदा कैर जन कि परमेस्वर का सेवकों खुणि करण चयेणु।</verse>
				<verse number="7">किलैकि वु लोग यीशु मसीह की सेवा करणु खुणि निकळ्यां छिन, अर जु लोग यीशु मसीह पर बिस्वास नि करदिन ऊं लोगु बटि सेवक लोग कुछ नि लेन्दिन।</verse>
				<verse number="8">इलै हमरु यू फरज च कि हम सेवक लोगु की मदद कैरा, ताकि हम लोग भि सच्‍चै का काम मा हिस्सेदार बणि सैका।</verse>
				<verse number="9">अर मिन बिस्वासी समुदाय का लोगु खुणि कुछ लिख्यूं छौ, मगर दियुत्रिफेस जु कि समुदाय का लोगु मा बड़ु बणण चान्दु उ हमरा अधिकार तैं स्वीकार नि कन चान्दु।</verse>
				<verse number="10">अर अब वु हमरा बारा बुरी बात फैलाणु च, अर वेतैं इथगा मा भि चैन नि मिली, इख तक कि वेन भै-बैंणो तैं स्वीकार करण से भि इनकार कैरियाली। अर जु लोग ऊ भै-बैंणो तैं स्वीकार करण चाणा छिन वु ऊं खुणि मना कनु च अर ऊंतैं बिस्वासी समुदाय बटि भैर निकळणु च। इलै जब मि औलु, त यां का बारा मा मि वेसे बात करलु।</verse>
				<verse number="11">हे मेरा प्यारा भै, बुरै करण वळो का ना, पर भलै करण वळो का पिछनै चल किलैकि जु कुई भलै करदु उ परमेस्वर की तरफा च, पर जु कुई बुरै करदु उ परमेस्वर तैं नि जणदु।</verse>
				<verse number="12">अर सब लोग दिमेत्रियुस भै की तारीफ करदिन, अर उ परमेस्वर की सच्‍चै का मुताबिक ही अपणा जीवन तैं चलौन्दु। अर मि भि ईं बात को गवा छौ अर तू जणदी छै कि मेरी गवै सच्‍चि च।</verse>
				<verse number="13">हालांकि, मिन भौत सि बात लिखण छै, मगर मि नि चान्दु कि सब कुछ स्याई से अब यों कागज्दों पर लिखु,</verse>
				<verse number="14">बल्किन मा मितैं इन उम्मीद च कि मि भौत जल्द त्वेसे मिललु, अर तब अमणि-समणि बात होलि।</verse>
				<verse number="15">अर परमेस्वर की शान्ति त्वेतै मिलु। अर सब दगड़्यों की तरफा बटि त्वेतै हमरु सलाम, अर हमरि तरफा बटि उखा सब दगड़्यों से मिली के तू ऊंतैं हमरु सलाम बोलि दे।</verse>
			</chapter>
		</book>
		<book number="65">
			<chapter number="1">
				<verse number="1">हे मेरा भै-बैंणो मि यहूदा छौं, अर मि यीशु मसीह को सेवक अर याकूब को भै छौं। मि या चिठ्‍ठी तुम लोगु खुणि लिखणु छौं जौं तैं पिता परमेस्वर न बुलै, किलैकि पिता परमेस्वर तुम लोगु से भौत प्यार करदु। अर वेन तुम सभ्यों तैं यीशु मसीह की हिफाजत मा रख्युं च।</verse>
				<verse number="2">अर मि इन प्रार्थना करदु, कि पिता परमेस्वर की दया, शान्ति अर वेको प्यार तुम सभ्यों तैं जादा से जादा मिलदु रौ। आमीन।</verse>
				<verse number="3">हे मेरा प्यारा भै-बैंणो, मि भौत चान्दु छौ, कि मि तुमतै बचयै जाण का बारा बतौ, जै बचयै जाण मा हम सब हिस्सेदार छां। मगर अब मितैं यू जरुरी लगदु, कि मि तुमरा हौसला तैं बढ़ो, ताकि तुम लोग वे बिस्वास मा कड़ी मेनत कैरा, जु कि बिस्वासी लोगु तैं हमेसा खुणि एक ही बार सौंपे गै।</verse>
				<verse number="4">किलैकि भौत सा लोग इन छिन, जु कि हम बिस्वासी लोगु का बीच मा चुपचाप से घुसी के ऐ गैनी। अर यू लोग पिता परमेस्वर की भक्‍ति नि करदिन, अर हमरा पिता परमेस्वर की किरपा को गळत फैदा उठे के वेको इस्तेमाल भोग-बिलास मा करदिन। अर यू झूठ्‍ठा लोग हमरा यीशु मसीह तैं नकारी देन्दिन, जु की एकमात्र मालिक अर प्रभु च, पर यों लोग खुणि पैलि बटि दण्ड ठैर्युं के रख्युं च।</verse>
				<verse number="5">हालांकि, यों सब बातों का बारा मा तुम पैलि बटि जणद्‍यां, मगर फिर भि मि तुमतै याद दिलौण चान्दु कि प्रभु न अपणा लोगु तैं मिस्र देस बटि छुड़ै, अर मिस्र देस बटि निकळण का बाद जौं लोगु न बिस्वास नि कैरी, ऊंको नास कैर दिनी।</verse>
				<verse number="6">अर मि तुमतै इन भि याद दिलौण चान्दु, कि जौं स्वर्गदूतों न परमेस्वर की आज्ञा को पालन नि कैरी अर अपणी जगा तैं छोड़ि दिनी, पिता परमेस्वर न ऊं स्वर्गदूतों तैं महान न्याय का दिन तक सदनि खुणि बन्धी बणै के अन्धेरा मा रख्युं च।</verse>
				<verse number="7">हे मेरा भै-बैंणो, मि तुमतै यू भि याद दिलौण चान्दु कि जन सदोम, अमोरा अर वेका आस-पास का नगरों का लोग गळत सम्बन्ध रखण वळा ह्‍वे गै छा, इख तक की उखा लोग अपणा सरील की इच्छा तैं पूरु करण खुणि एक बैख दुसरा बैख का दगड़ा मा सरील का गळत सम्बन्ध रखण लगि गै छा। तब वे बगत मा पिता परमेस्वर न ऊं नगरों को कभि नि बुझण वळी आग का द्‍वारा नास कैर दिनी, अर आज वु सब हम सभ्यों खुणि सदनि खुणि एक उदारण बणि गैनी।</verse>
				<verse number="8">अर ठिक उन्‍नि यू झूठ्‍ठा लोग भि छिन, जु कि बिस्वासी लोगु का दगड़ा मा मिली गैनी, अर अपणा सुपन्यों का पिछनै भागी के अपणा सरील तैं पाप का द्‍वारा अशुद्ध कना छिन। अर यू लोग पिता परमेस्वर का द्‍वारा मिल्यां अधिकार तैं नकारी देन्दिन, इख तक कि स्वर्गदूतों की भि बुरै करदिन।</verse>
				<verse number="9">मगर जब मूसा रैबर्या की लांश का बारा मा परधान स्वर्गदूत मीकाईल की शैतान का दगड़ा मा बहसबाजी ह्‍वे, त मीकाईल स्वर्गदूत न इळजाम लगै के शैतान की बेजती नि कैरी, वेन त बस इथगा बोलि कि, “प्रभु ही त्वेतै झिडकु।”</verse>
				<verse number="10">पर यू लोग जौं बातों का बारा मा नि जणदिन ऊं बातों की बुरै करदिन। अर एक मूरख जानबर की तरौं समझ रखी के खुद खुणि नास होण को कारण बणणा छिन।</verse>
				<verse number="11">अर हाय च यों लोगु खुणि, किलैकि यू कैन का बाटा पर चलण लगि गैनी, जैन अपणा ही भै तैं मारी दिनी। अर रुपयों का लालच मा बिलाम की तरौं धोखा देन्दिन, अर कोरह का जन बगाबत कैरिके नास ह्‍वे गैनी।</verse>
				<verse number="12">अर यू झूठ्‍ठा लोग ढन्ड़ीयों मा छिप्यां चटानों का जन छिन, अर मसीह प्यार से ज्वा दावत तुम अपणा घौरों मा रखद्‍यां, यू लोग वामा तुमरा दगड़ा खान्दा-पीन्दा छिन। अर यू लोग सिरफ अपणु पुटगु ही भोरण चनदिन, अर लोग त बिना पाणि वळा बादळों का जन छिन जौं तैं हवा अफ दगड़ा मा उड़ै के लि जान्दी। अर इन्द्रया डाळों का जन छिन, जौं पर समौ औण पर फल नि लगदिन बल्किन मा यू त दुई बार सूखि गैनी अर जलुड़ो समेत उखड़्यां छिन।</verse>
				<verse number="13">अर यू लोग त समुन्दर की तेज लैरों का जन छिन, जु कि अपणा सरम का कामों की वजै से केवल गाज ही गाज बणौन्दिन। अर यू त भटक्यां तारों का जन छिन, अर यों लोगु का रौण खुणि एक अन्धेरी जगा च।</verse>
				<verse number="14">अर पितर आदम की सातवीं पीढ़ी मा जनम्यां पितर हनोक न भि, इन भविष्यबाणी कैरिके बोलि छौ कि, “देखा, प्रभु अपणा बिजांम पवित्र स्वर्गदूतों का दगड़ा मा औणु च,</verse>
				<verse number="15">ताकि सब मनखियों को न्याय कैरो, अर जु लोग ज्यून्दा परमेस्वर की भक्‍ति नि करदिन, ऊं सब लोगु तैं ऊंकी बुरी बातों खुणि, अर जौं लोगु न वेका खिलाप मा बात बुलिनी ऊं सब पापि लोगु तैं दण्ड द्‍यो।”</verse>
				<verse number="16">अर यू वु लोग छिन जु कि हर बात मा सिकैत करदिन, अर दुसरो का दोष खुज्यौदिन। अर अपणी बुरी इच्छाओं का मुताबिक अपणा जीवन तैं चलदिन अर अपणी बातों पर बड़ु मोन करदिन, अर अपणा फैदा खुणि दुसरा लोगु की चापलूसी भि करदिन।</verse>
				<verse number="17">पर हे मेरा प्यारा भै-बैंणो, तुम ऊं बातों तैं जरुर याद रखा जौं तैं हमरा प्रभु यीशु मसीह का खास चेलों न पैलि ही बोलियालि छौ।</verse>
				<verse number="18">ऊंन तुमकु बोलि छौ कि, “आखिरी का बगत मा मजाक उड़ौण वळा आला, जु अपणी बुरी इच्छाओं का मुताबिक चलला।”</verse>
				<verse number="19">अर यू वु लोग छिन जु की दुसरा तैं अपणी बातों का द्‍वारा एक-दुसरा का खिलाप मा कैरी देन्दिन, यू लोग सरील का मुताबिक चलदिन जौं मा पवित्र आत्मा नि च।</verse>
				<verse number="20">मगर हे मेरा प्यारा भै-बैंणो, तुम अपणा पवित्र बिस्वास मा और भि जादा मजबूत ह्‍वा, अर पवित्र आत्मा का द्‍वारा प्रार्थना कैरिके,</verse>
				<verse number="21">खुद तैं पिता परमेस्वर का प्यार मा और भि जादा मजबूत बणै के रखा। अर सदनि का जीवन तैं पौणु खुणि हमरा प्रभु यीशु मसीह की दया को इंतजार कैरा।</verse>
				<verse number="22">अर जु लोग बिस्वास मा मजबूत नि छिन ऊं पर दया कैरा।</verse>
				<verse number="23">अर भौत सा लोगु तैं नरकलोक कि आग मा बटि झपैटी के निकाळा अर ऊंतैं बचै द्‍या, अर लोगु पर दया कैरा पर चौकस रा, अर ऊंका ऊं कपड़ों से भि नफरत कैरा जौं पर पाप का दाग लग्यां छिन।</verse>
				<verse number="24">अर पिता परमेस्वर ही च, जु कि उतेडु़ लगण पर तुमरि हिफाजत कैरी सकदु, अर अपणा आदर-सम्मान मा तुमतै अपणा समणि बेदाग अर बड़ा आनन्द से खड़ु भि कैरी सकदु।</verse>
				<verse number="25">अर हमरा प्रभु यीशु मसीह का द्‍वारा हमतै छुटकारा देण वळा एकमात्र सच्‍चा परमेस्वर जु कि सानदार, ताकतबर, महान अर बड़ा-बड़ा काम करण वळु च। हाँ, वु ही जु की पैलि बटि छौ, अर अब भि च अर औण वळा बगत मा भि रालु, वेकी बडै हमेसा-हमेसा होणी रौ। आमीन।</verse>
			</chapter>
		</book>
		<book number="66">
			<chapter number="1">
				<verse number="1">ईं किताब मा वु बात लिखी छिन जौं तैं यीशु मसीह न अपणा दिब्य दरसन का द्‍वारा मि पर परगट कैरी। अर यू सब बात वेन पिता परमेस्वर बटि पैनी, ताकि उ अपणा सेवकों पर ऊं घटनाओं का राज तैं परगट कैरो जु कि भौत जल्द पूरि होण वळी छिन। अर यों सब बातों तैं यीशु न अपणा स्वर्गदूत का द्‍वारा मि यूहन्‍ना पर परगट कैरी, मि जु कि यीशु को सेवक छौं।</verse>
				<verse number="2">अर मिन पिता परमेस्वर का वचन अर यीशु मसीह का बारा मा जु कुछ भि देखि, ऊं सब बातों की गवै देन्दु।</verse>
				<verse number="3">धन्य च उ जु ईं भविष्यबाणी का वचनों तैं पढदु, अर धन्य छिन वु लोग भि जु यों वचनों तैं सुणदिन, अर या मा लिखीं बातों को पालन करदिन, किलैकि यू सब बात पूरि होण वळी छिन।</verse>
				<verse number="4">आसिया मुलक मा रौण वळा सात बिस्वासी समुदाय का नौ खुणि इन लिख कि: वे पिता परमेस्वर की तरफा बटि जु कि पैलि बटि छौ, आज भि च अर उई च जु कि औण वळु च, अर ऊं सात आत्माओं की तरफा बटि जु कि वेकी राजगद्‍दी का समणि छिन, तुम पर ऊंकी किरपा अर दया होणी रौ।</verse>
				<verse number="5">अर प्रभु यीशु मसीह की तरफा बटि जु कि भरोसेमन्द गवा च। अर उई च, जु कि मुरदो मा बटि ज्यून्द होण वळो मा पैलु, अर धरती का सब राजाओं को अधिकारी च। अर वेकी किरपा अर वेकी शान्ति तुमतै मिलदी रौ। अर यीशु मसीह ही च जु कि हम से भौत प्यार करदु, अर वेन अपणा ल्वे का द्‍वारा हमतै हमरा पापों बटि छुडैयाली।</verse>
				<verse number="6">अर वेन हमतै परमेस्वर का राज का लोग, अर अपणा पिता परमेस्वर की सेवा करण खुणि पुरोहित भि बणै, अर वेकी बडै अर ताकत सदनि तक रौ। आमीन।</verse>
				<verse number="7">देखा, यीशु बादळों का दगड़ा-दगड़ि औण वळु च, अर हरेक आंख वेतैं दिखली, अर ऊ भि वेतैं दिखला जौन वेतैं मारी छौ। अर धरती मा जथगा भि गोत्र का लोग छिन, ऊ सभ्या का सभि अपणी-अपणी छति भटकाला। हाँ, यू ही सच्‍च च। आमीन।</verse>
				<verse number="8">सर्वसक्‍तिमान प्रभु परमेस्वर इन बुल्दु कि, “मि ही पैलु अर आखिरी छौं।” सभ्यों को मालिक मि ही छौं मि पैलि बटि छौ, आज भि छौं अर मि ही जल्द औण वळु छौं।</verse>
				<verse number="9">मि तुमरो भै यूहन्‍ना छौं, अर मि प्रभु यीशु मसीह खुणि दुख झिलण मा, राज्य अर सबर रखण मा तुमरो साझेदार भि छौं। अर मि यीशु मसीह की गवै देन्दु अर पिता परमेस्वर का वचन का बारा मा बतौन्दु, इलै मितैं जबरन पतमुस नौ का टापू पर भिजे गै।</verse>
				<verse number="10">अर प्रभु की भक्‍ति का दिन मा एक बार मि पवित्र आत्मा की ताकतळ भरपूर ह्‍वे ग्यों। अर मिन अपणा पिछनै एक बिगुले की तेज आवाज सुणी,</verse>
				<verse number="11">“जु कुछ त्वेतै दिख्यौणु च, वेतैं किताब मा लिखी के सात नगरों का बिस्वासी समुदाय का लोगु का पास भेज दे, याने कि इफिसुस, स्मुरना, पिरगमुन, थुआतीरा, सरदीस, फिलदिलफिया, अर लौदीकिया नगरों का बिस्वासी समुदाय का लोगु का पास।”</verse>
				<verse number="12">अर जु मेरा दगड़ा मा बात कनु छौ, जब वेतैं दिखणु कू मि पिछनै मुड़ि, त मिन सोना का सात दीपदान दिखिनी।</verse>
				<verse number="13">अर ऊं दीपदानों का बीच मिन मनखि का पुत्र यीशु तैं खड़ु होयुं देखि, अर वेन खुटों तक एक लम्बो चोळा पैरयूं छौ, वेकी छति पर सोना को एक पठुगु बन्धयूं छौ।</verse>
				<verse number="14">अर वेको मुण्ड़ अर बाळ बरफ की तरौं सफेद छा, अर वेका आंखा आग की झौऽळ की तरौं छा।</verse>
				<verse number="15">अर वेका खुटा इन चमकणा छा जन की भट्‍टी मा पक्यूं पीतळ। अर वेकी आवाज भौत पाणि की छमछयाटों की तरौं छै।</verse>
				<verse number="16">वेका दैंणा हाथ मा सात गैंणा छा, अर वेका गिच्‍चा बटि पैनी तलवार निकळणी छै ज्वा की दुई तरफा बटि भौत तेज छै। अर वेकू मुख इन चमकणु छौ जन की सूरज बटि निकळण वळु घाम।</verse>
				<verse number="17">अर जब मिन यीशु तैं देखि, त मि वेका खुटों मा मुरदो की तरौं पोड़ि ग्यों। तब वेन अपणु दैंणु हाथ मि पर रखी अर बोलि कि, “डौऽर ना, पैलु अर आखिरी मि ही छौं,</verse>
				<verse number="18">अर मि ज्यून्द छौं। मि मोरि गै छौ मगर देख, अब मि हमेसा-हमेसा खुणि ज्यून्दु छौं, अर मि मा मौत अर अधलोक की चाबी छिन।</verse>
				<verse number="19">इलै सुण, जु कुछ भि तिन देखि च, अर जु कुछ भि होणु च, अर जु कुछ भि येका बाद होण वळु च, ऊ सब कुछ तू लिख ले।</verse>
				<verse number="20">याने कि जु सात गैंणा तिन मेरा दैंणा हाथ मा दिखिनी, अर सोना का जु सात दीपदान तिन दिखिनी ऊंको मतलब इन च कि, ऊं सात गैंणो को मतलब बिस्वासी समुदाय का सात दूतों से च, अर सात दीपदानों को मतलब सात समुदाय से च।”</verse>
			</chapter>
			<chapter number="2">
				<verse number="1">तब यीशु न मिकू बोलि कि, “इफिसुस नगर मा रौण वळा बिस्वासी समुदाय का दूत खुणि इन लिख कि: “यीशु जैका दैंणा हाथ मा सात गैंणा छिन, अर जु सोने की सात दीपदानों का बीच मा चलदु च उ इन बुल्दु कि:</verse>
				<verse number="2">“हे इफिसुस नगर का बिस्वासी लोगु, मि तुमरा काम अर तुमरि कड़ी मेनत का बारा मा जणदु छौं, अर दुख का बगत मा तुमरा सबर रखण की ताकत का बारा मा भि मि जणदु छौं, अर मि इन भि जणदु कि तुम बुरा लोगु तैं बरदास नि कैरी सकदी, जु खुद तैं मेरा खास चेला बतौन्दिन, पर असल मा ऊ छैई नि छिन। अर तुमुन ऊं लोगु की जाँच-पड़ताल कैरी अर ऊंतैं झूठ्‍ठु पै।</verse>
				<verse number="3">अर मि इन भि जणदु छौं, कि तुम सबर रखण जणदा छाँ अर मेरा नौ का खातिर तुमुन दुख-तकलीफ झिलनी, पर तुम नि थक्यां।</verse>
				<verse number="4">“मगर फिर भि तुमरा खिलाप मा बुलणु खुणि मि मा इन च कि तुम लोग अब मिसे उन्‍नि प्यार नि करद्‍यां जन तुम पैलि करदा छा।</verse>
				<verse number="5">अर याद कैरा कि तुम पैलि कथगा प्यार करदा छा मगर अब तुमरो प्यार फिको पोड़ि गै, इलै मन से पस्ताप कैरा अर पैलि जन काम कैरा। अर अगर जु तुम पस्ताप नि करिल्या, त मिन तुमरा पास ऐके तुमरा दीपदान तैं वेकी जगा बटि हटै देण।</verse>
				<verse number="6">मगर फिर भि तुम मा एक अच्छी बात या च कि तुम निकुलइयों का दल का कामों से नफरत करद्‍यां, जौं से मि भि नफरत करदु।</verse>
				<verse number="7">“कन्दूड़ खोली के सुणी ल्या अर ईं बात तैं समझा कि पवित्र आत्मा बिस्वासी समुदाय का लोगु खुणि क्या च बोन्‍नु, जु जीत हासिल करलु, मि वेतैं जीवन देण वळा डाळा को फल खाणु कू द्‍यूलु, जु कि स्वर्ग मा परमेस्वर का पास च।”</verse>
				<verse number="8">अर येका बाद यीशु न मिकू इन बोलि कि, “स्मुरना नगर मा रौण वळा बिस्वासी समुदाय का दूत खुणि इन लिख कि: “यीशु जु कि पैलु अर आखिरी च, जु मोरि गै छौ मगर अब ज्यून्दु च उ इन बुल्दु कि:</verse>
				<verse number="9">“मि तुमरा कष्‍ट अर कंगाली का बारा मा जणदु छौं (पर मेरी नजर मा तुम सेठ छाँ), अर जु लोग खुद तैं यहूदी मणदिन (पर ऊ छैई नि छिन, ऊ त शैतान की पूजा करदिन), ऊ तुमरि बदनामी करदिन यू भि मि जणदु छौं।</verse>
				<verse number="10">अर सुणा, जु दुख-तकलीफ तुम पर औणिन ऊं बातों से नि डौऽरा, किलैकि शैतान तुम मा बटि कुछ लोगु तैं जेलखाना मा डलवै द्‍यालु, ताकि तुम पूरि तरौं से परखै जा। अर दस दिनों तक तुमतै भौत पीड़ा दिये जालि, मगर अपणी आखिरी सांस तक तुम भरोसेमन्द बणयां रयां, अर मि तुमतै जीवन को मुकुट द्‍यूलु।</verse>
				<verse number="11">“कन्दूड़ खोली के सुणी ल्या अर ईं बात तैं समझा कि पवित्र आत्मा बिस्वासी समुदाय का लोगु खुणि क्या च बोन्‍नु, जु जीत हासिल करलु वेतैं दुसरि मौत को दुख नि झिलण पोड़लु।”</verse>
				<verse number="12">अर फिर यीशु न मिकू बोलि कि, “पिरगमुन नगर मा रौण वळा बिस्वासी समुदाय का दूत खुणि इन लिख कि: “यीशु वु च जैका पास पैनी तलवार च ज्वा की दुई तरफा बटि भौत पैनी च उ इन बुल्दु कि:</verse>
				<verse number="13">“मि जणदु छौं, कि तुम वे नगर मा रौन्द्‍यां जख शैतान की राजगद्‍दी च, मगर फिर भि तुमरो भरोसा मि पर बणयूं रै। अर जब लोगु न मेरा भरोसामन्द गवा अन्तिपास तैं तुमरा नगर मा जान से मर दिनी, तब भि तुमरो बिस्वास मि पर बणयूं रै।</verse>
				<verse number="14">“मगर फिर भि तुमरा खिलाप मा बुलणु खुणि मि मा कुछ ही बात छिन कि तुमरा बीच मा कुछ लोग इन्द्रया छिन जु कि बिलाम की शिक्षा तैं मणदिन, हाँ, बिलाम जैन राजा बालक तैं सिखै छौ कि कुछ इन कैर, ज्यां से कि इस्राएली लोग मूरतों का अगनै अरपण मा चड़ईं चीजों तैं खा, अर ऊं खुणि इन जाल बिछौ कि ऊंका नौना सरील का गळत सम्बन्ध तैं ही पूरु करण पर लग्यां रा।</verse>
				<verse number="15">ठिक उन्‍नि तुमरा बीच मा कुछ इन्द्रया लोग छिन, जु कि निकुलइयों दल की गळत शिक्षा का मुताबिक चलदिन।</verse>
				<verse number="16">इलै मन से पस्ताप कैरा, अर अगर जु तुम इन नि करिल्या, त मि भौत जल्द तुमरा पास ऐके, अपणा मुख से निकळण वळी तलवार से ऊं लोगु का दगड़ा मा युद्ध करलु।</verse>
				<verse number="17">“कन्दूड़ खोली के सुणी ल्या अर ईं बात तैं समझा कि पवित्र आत्मा बिस्वासी समुदाय का लोगु खुणि क्या च बोन्‍नु, जु जीत हासिल करलु, वेतैं मि वु खाणुक द्‍यूलु जु कि सदनि को जीवन देन्दु, अर एक सफेद ढुंगो भि द्‍यूलु जै पर एक नयू नौ लिख्यूं होलु, अर वेका अलावा वे नौ का बारा मा कैतैं भि पता नि होलु।”</verse>
				<verse number="18">अर येका बाद यीशु न मिकू इन बोलि कि, “थुआतीरा नगर मा रौण वळा बिस्वासी समुदाय का दूत खुणि इन लिख कि: “यीशु जु कि परमेस्वर को पुत्र च अर जैका आंखा आग की झौऽळ की तरौं छिन अर वेका खुटा पीतळे की तरौं चमकदार छिन उ इन बुल्दु कि:</verse>
				<verse number="19">“मि तुमरो प्यार, तुमरा कामों अर तुमरा बिस्वास, अर सेवा करण अर सबर रखण का बारा मा जणदु छौं, अर इन भि जणदु कि तुमुन हाल-फिलाल मा जु काम करिनी, ऊ काम तुमरा पैला का कामों से और भि जादा अच्छा छिन।</verse>
				<verse number="20">“मगर फिर भि तुमरा खिलाप मा बुलणु खुणि मि मा इन च कि तुम लोग वीं इजेबेल जनानि तैं अपणा बीच मा रौण देन्द्‍यां, ज्वा कि खुद तैं परमेस्वर की रैबर्या बतौन्दी, अर मेरा सेवकों तैं भटकौन्दि अर अपणी शिक्षा देके ऊंतैं सरील का गळत सम्बन्ध बणौणु खुणि, अर मूरतों का अगनै अरपण मा चड़ईं चीजों तैं खाणु खुणि उकसौन्दी च।</verse>
				<verse number="21">मिन वींतैं मन से पस्ताप करण को मौका दिनी, मगर वा अपणा बुरै का कामों तैं छोड़ि के पस्ताप करणु खुणि तयार नि च।</verse>
				<verse number="22">देख, मि वींतैं इन बिमार करण वळु छौं कि वा खटुला पर ही पोड़ि राली, अर जु वींका दगड़ा मा सरील का गळत सम्बन्ध बणौन्दिन, अगर ऊ वींका जन कामों तैं करण छोड़ि के पस्ताप नि करला, त मिन ऊंतैं बड़ी तकलीफ देण।</verse>
				<verse number="23">मि वींका बच्‍चों तैं महामारी भेजि के मरलु, ज्यां से कि बिस्वासी समुदाय का सब लोग जाणि जाला कि मि उई छौं जु कि मनखियों का मन अर दिल की बातों तैं जणदु च, अर मि हरेक तैं वेका कामों का हिसाब से द्‍यूलु।</verse>
				<verse number="24">“मगर तुम लोगु मा बटि कुछ लोग इन छिन जु कि इजेबेल की शिक्षा का मुताबिक नि चलदिन। अर तुम लोग शैतान की छिपी बातों का बारा मा भि नि जणद्‍यां। अर मि तुम लोग पर जादा भार नि डललु।</verse>
				<verse number="25">बस इथगा ही बोन्‍न चान्दु कि मेरा वापस औण तक जु कुछ तुमरा पास च तुम लोग अपणा-अपणा बिस्वास मा मजबूत बणयां रा।</verse>
				<verse number="26">“अर जु जीत हासिल करदु अर आखिरी तक मेरी बातों तैं मणदु मि वेतैं सब राज्यों को अधिकार द्‍यूलु।</verse>
				<verse number="27">अर वु लोखरो जांठु लेके बड़ी सख्‍तै से सासन करलु, अर जु लोग परमेस्वर का खिलाप मा छिन वु ऊंतैं चूर-चूर कैरी द्‍यालु जन कि माटा का भाँडो तैं चूर-चूर किये जान्दु।</verse>
				<verse number="28">अर सासन करण को यू अधिकार मितैं पिता परमेस्वर न दियूं च, ठिक उन्‍नि मि ऊं लोगु तैं सासन करण को अधिकार द्‍यूलु। अर मि वेतैं ध्रुव गैंणो भि द्‍यूलु।</verse>
				<verse number="29">“कन्दूड़ खोली के सुणी ल्या अर ईं बात तैं समझा कि पवित्र आत्मा बिस्वासी समुदाय का लोगु खुणि क्या च बोन्‍नु।”</verse>
			</chapter>
			<chapter number="3">
				<verse number="1">अर फिर यीशु न मिकू इन बोलि कि, “सरदीस नगर मा रौण वळा बिस्वासी समुदाय का दूत खुणि इन लिख कि: “यीशु जैका पास परमेस्वर की सात आत्मा छिन अर सात गैंणा भि उ इन बुल्दु कि: “मि तुमरा कामों तैं जणदु छौं अर लोगु की नजर मा तुम ज्यून्दा त छाँ मगर छाँ तुम मुरयां का जन।</verse>
				<verse number="2">इलै चौकस ह्‍वे जा, अर तुमरो बिस्वास जु कि कम च तुम वेमा मजबूत ह्‍वे जा, किलैकि मिन तुमरा कै भि काम तैं अपणा पिता परमेस्वर का समणि पूरु नि पै।</verse>
				<verse number="3">अर याद कैरा कि ज्वा शिक्षा तुमुन पै अर सुणी, वीं शिक्षा को पालन कैरा अर मन से पस्ताप कैरा। अर अगर जु तुम चौकस नि रैल्या, त मि कै बगत तुमरा पास ऐ जौलु तुमतै ईं बात कि खबर नि लगण, किलैकि मिन एक चोर का जन अचानक से तुमरा पास औण।</verse>
				<verse number="4">“पर हाँ, सरदीस मा कुछ लोग पवित्र छिन किलैकि वु सब बुरै का कामों से दूर रैनी, अर वु इथगा लैख छिन कि सफेद कपड़ा पैनी के मेरा दगड़ा मा चला।</verse>
				<verse number="5">जु जीत हासिल करलु वेतैं पैरणु खुणि इन्‍नि सफेद कपड़ा दिये जाला, अर मि वेको नौ जीवन की किताब मा बटि नि मिठौलु, मगर मि अपणा पिता अर वेका स्वर्गदूतों का समणि वेका नौ तैं स्वीकार करलु।</verse>
				<verse number="6">“कन्दूड़ खोली के सुणी ल्या अर ईं बात तैं समझा कि पवित्र आत्मा बिस्वासी समुदाय का लोगु खुणि क्या च बोन्‍नु।”</verse>
				<verse number="7">अर येका बाद यीशु न मिकू इन भि बोलि कि, “फिलदिलफिया नगर मा रौण वळा बिस्वासी समुदाय का दूत खुणि इन लिख कि: “यीशु पवित्र अर सच्‍चु च, अर वेका पास राजा दाऊद की चाबी च जैतैं वु खुलदु वेतैं कुई बन्द नि कैरी सकदु, अर जब उ बन्द करदु त वेतैं कुई खोली नि सकदु, उ इन बुल्दु कि:</verse>
				<verse number="8">“मि तुमरा कामों तैं जणदु छौं। अर देख, मिन तुमरा समणि एक द्‍वार खोली के रख्युं च जैतैं कुई बन्द नि कैरी सकदु, हालांकि तुमरि ताकत कम च, पर फिर भि तुमुन मेरा वचन को पालन कैरी अर मेरा नौ तैं नि नकारी।</verse>
				<verse number="9">देख, जु शैतान का दल का छिन अर खुद तैं यहूदी बतौन्दिन पर छैई नि छिन, बल्किन मा झूठ्‍ठ बुल्दिन ऊंतैं मि तुमरा वश मा कैरी द्‍यूलु। अर सुण, मि ऊं लोगु तैं तुमरा पास लेके औलु अर ऊंतैं तुमरा समणि झुकै द्‍यूलु, अर यां से वु लोग जाणि जाला मि तुम से कथगा प्यार करदु।</verse>
				<verse number="10">किलैकि तुमुन सबर रखी के मेरी बात तैं माणी, इलै अजमैस का वे बगत मा मि भि तुमरि हिफाजत करलु, ज्वा कि धरती का सब लोगु तैं अजमौणु खुणि औण वळी च।</verse>
				<verse number="11">“मि भौत जल्द औण वळु छौं। जु कुछ तुमरा पास च वेतैं थामि के रखा, ताकि कुई भि तुम बटि तुमरो मुकुट नि छिनी सैको।</verse>
				<verse number="12">अर जु जीत हासिल करलु, ऊंतैं मि परमेस्वर का मन्दिर मा एक खम्बा बणौलु, अर ऊ उख बटि कभि भैर नि जाला। अर मि ऊं लोगु पर पिता परमेस्वर को नौ अर स्वर्ग बटि उतरि के औण वळा नया नगर यरूशलेम को नौ ऊं पर लिखलु, अर अपणु नयू नौ भि मि ऊं पर लिखलु।</verse>
				<verse number="13">“कन्दूड़ खोली के सुणी ल्या अर ईं बात तैं समझा कि पवित्र आत्मा बिस्वासी समुदाय का लोगु खुणि क्या च बोन्‍नु।”</verse>
				<verse number="14">यीशु न मिकू इन भि बोलि कि, “लौदीकिया नगर मा रौण वळा बिस्वासी समुदाय का दूत खुणि इन लिख कि: “यीशु जु कि आमीन अर वफादार अर सच्‍चु गवा च, अर जैका द्‍वारा पिता परमेस्वर न सब कुछ बणै उ इन बुल्दु कि:</verse>
				<verse number="15">“मि तुमरा कामों तैं जणदु छौं, कि तुम बिस्वास मा नऽ त ठण्ड़ा छाँ अर ना ही गरम, कास तुम ठण्ड़ा होन्दा य त गरम।</verse>
				<verse number="16">अब जब तुम नऽ त ठण्ड़ा छाँ अर ना गरम, तुम त गुनगुना छाँ इलै मि तुमतै अपणा गिच्‍चा बटि उगळी द्‍यूलु।</verse>
				<verse number="17">किलैकि तुम बुल्द्‍यां कि, मि सेठ छौं अर अपणी कोसिस से मिन भौत दौलत हासिल कैरियाली, अर अब मितैं कैं भि चीज कि जरुरत नि च, मगर तुम इन नि जणद्‍यां कि तुम लाचार, अर बदकिस्मत छाँ अर भौत गरीब, अन्धु अर नंगा छाँ।</verse>
				<verse number="18">इलै मि तुमतै इन सला देन्दु कि तुम मि बटि वु सोना खरीदी ल्या जैतैं आग मा तपै के शुद्ध कर्युं च, ताकि तुम सेठ बणि जा अर सफेद कपड़ा भि ले ल्या, ताकि वेतैं पैरि के तुम नंगि नि दिख्या अर तुमतै सरम नि अऽ। अर अपणी आंख्यों मा लगौणु खुणि सुरमा ले ल्या, ताकि तुम दिखण लगि जा।</verse>
				<verse number="19">“जौं लोगु से मि प्यार करदु ऊं सभ्यों तैं मि डांटदु अर अनुसासन मा लेके औन्दु, इलै पस्ताप कैरा अर बिस्वास मा गरम ह्‍वे जा।</verse>
				<verse number="20">देखा, मि द्‍वार पर खड़ु ह्‍वेके खखटाणु छौं, अगर कुई मेरी आवाज सुणी के द्‍वार तैं खोली द्‍यालु, त मि भितर औलु तब हम दगड़ा मा खाणुक खौला।</verse>
				<verse number="21">“जु जीत हासिल करलु, वेतैं मि अफ दगड़ा राजगद्‍दी पर बिठौलु, ठिक जन मिन जीत हासिल कैरी अर मेरा पिता न मितैं अपणी राजगद्‍दी पर बैठे।</verse>
				<verse number="22">“कन्दूड़ खोली के सुणी ल्या अर ईं बात तैं समझा कि पवित्र आत्मा बिस्वासी समुदाय का लोगु खुणि क्या च बोन्‍न।”</verse>
			</chapter>
			<chapter number="4">
				<verse number="1">यों सब बातों का बाद मिन देखि, कि स्वर्ग मा एक द्‍वार खुल्यूं च अर एक बिगुला का जन आवाज, ज्वा कि मिन पैलि सुणी छै वेन मिकू बोलि, “इख मथि अऽ, मि त्वेतै वु बात दिखौलु जु येका बाद होण वळी छिन, अर वु जरुर पूरि ह्‍वेलि।”</verse>
				<verse number="2">अर मि तुरन्त पवित्र आत्मा से भरपूर ह्‍वे ग्यों, अर मिन देखि कि स्वर्ग मा एक राजगद्‍दी रखी च अर वे पर कुई बैठयूं च।</verse>
				<verse number="3">अर जु वीं राजगद्‍दी पर बैठयूं छौ, उ सूर्यकान्त अर माणिक्य मणि की तरौं लाल चमकणु छौ, अर वेकी राजगद्‍दी का चौतरफि मेघधनुष पन्‍ना मणि की तरौं हरयूं ह्‍वेके चमकणु छौ।</verse>
				<verse number="4">अर वीं राजगद्‍दी का चौतरफि चौबीस राजगद्‍दीयां और भि छै। अर यों राजगद्‍दियों पर मिन चौबीस अध्यक्षों तैं बैठयूं देखि, जौं का सफेद कपड़ा पैरयां छा अर ऊंका मुण्ड़ो पर सोना का मुकुट रख्यां छा।</verse>
				<verse number="5">अर वीं राजगद्‍दी बटि बिजलियाँ निकळणी छै, अर बड़ी गगड़ाट की आवाज औणी छै। अर वीं राजगद्‍दी का समणि आग की सात मसाल जगणी छै, जु कि परमेस्वर की सात आत्मा छिन।</verse>
				<verse number="6">अर वीं राजगद्‍दी का समणि काँच का जन एक समुन्दर छौ। अर राजगद्‍दी का चौतरफि चार ज्यून्दा पराण जौं का अगनै-पिछनै आंखा ही आंखा छा।</verse>
				<verse number="7">पैलु ज्यून्द पराण शेर का जन छौ, अर दुसरो ज्यून्द पराण बल्द का जन, अर तिसरु ज्यून्द पराण को मुख मनखि की तरौं छौ, अर चौथुँ ज्यून्द पराण एक उड्‍दा चील का जन छौ।</verse>
				<verse number="8">अर चरी पराणों का छह-छह फाँकुड़ छा, अर ऊंका चौतरफि अर ऊंका भितर भि आंखा ही आंखा छा। अर वु बिन रुक्यां दिन-रात इन बुल्दिन कि, “पवित्र, पवित्र, पवित्र, सर्वसक्‍तिमान प्रभु परमेस्वर, जु छौ जु आज भि च अर जु औण वळु च।”</verse>
				<verse number="9">अर जब-जब यू पराणी वेतैं जु की राजगद्‍दी पर बैठयूं च, वु जु कि हमेसा-हमेसा खुणि ज्यून्दु च, जब यू वेको धन्यवाद, आदर-सम्मान अर बडै करदिन,</verse>
				<verse number="10">तब ऊ चौबीस अध्यक्ष राजगद्‍दी पर बैठण वळा का समणि भ्वीं मा पोड़ि के वेकी भक्‍ति करदिन, जु कि हमेसा-हमेसा तक ज्यून्द च। अर अपणा-अपणा मुकुट तैं निकळि के वेकी राजगद्‍दी का समणि रखदिन अर इन बुल्दिन कि,</verse>
				<verse number="11">“हे हमरा प्रभु, अर हमरा परमेस्वर, तुमरि ही बडै हो, अर पूरु आदर-सम्मान तुमतै ही मिलु, अर तुमरि ताकत की तारीफ हो, किलैकि तुमुन ही सब चीजों तैं बणै, अर तुमरि मनसा से ही यू सब बणि अर यों सब चीजों को बजूद च।”</verse>
			</chapter>
			<chapter number="5">
				<verse number="1">अर मिन देखि कि जु राजगद्‍दी पर बैठयूं छौ वेका दैंणा हाथ मा एक दस्तावेज च, अर वु भैर अर भितर दुई तरफा बटि लिख्यूं च, अर वे दस्तावेज तैं सात मोर लगै के बन्द करै गै छौ।</verse>
				<verse number="2">फिर मिन एक ताकतबर स्वर्गदूत तैं ऊँची आवाज मा इन बुल्दु सुणी कि, “कु च उ, जु यों मोरों तैं खोली सकदु, अर ये लपेट्यां दस्तावेज तैं खोली सकदु च?”</verse>
				<verse number="3">मगर नऽ त स्वर्ग मा ना ही ईं धरती पर, अर नऽ त ईं धरती का मूड़ी, इन्द्रयो कुई भि लैख नि निकळि जु की ये दस्तावेज तैं खोली या पैढी सैको।</verse>
				<verse number="4">तब मि भकोरि-भकोरि के रुंण लगि ग्यों, किलैकि कुई भि इथगा लैख नि मिली जु ये दस्तावेज तैं खोली या पैढी सैको।</verse>
				<verse number="5">तब ऊं अध्यक्षों मा बटि कै एक न मिकू बोलि, “नि रो, अर देख, यहूदा का गोत्र को उ शेर जैकू राजा दाऊद को वंशज भि बुले जान्दु वेन जीत हासिल कैरी। अर उई च जु कि दस्तावेज अर वे पर लगीं मोरों तैं खोली सकदु च।”</verse>
				<verse number="6">अर मिन वीं राजगद्‍दी अर ऊं चार ज्यून्दा पराणों अर ऊं अध्यक्षों का बीच मा एक मेम्‍ना तैं देखि, अर उ इन दिखैणु छौ जन कि वेतैं बलिदान कर्युं हो। वेका सात सींग अर सात आंखा छा अर जु की परमेस्वर की सात आत्मा छिन जौं तैं धरती पर भेजि गै।</verse>
				<verse number="7">तब मेम्‍ना न ऐके राजगद्‍दी पर बैठण वळा का दैंणा हाथ बटि वु दस्तावेज ले।</verse>
				<verse number="8">अर जब वेन वु ले, त चार ज्यून्द पराण अर चौबीस अध्यक्ष मेम्‍ना का समणि भ्वीं मा पोड़ि गैनी। अर हर अध्यक्ष का हाथ मा बीणा अर सोना का कटोरा छा, जु कि धूबत्ती से भोर्यां छा जैको मतलब बिस्वासी लोगु की प्रार्थना से च।</verse>
				<verse number="9">अर ऊ एक नयू गीत गाण लगि गैनी ऊंन बोलि कि, “ हे हमरा मालिक हे हमरा प्रभु पिता, दस्तावेज तैं लेण का लगीं मोरों तैं खुलण का काबिल छाँ तुम यीशु बलिदान सिरफ तुम होयां। तुमुन ही हरेक गोत्र का, जाति हरेक भाषा का, देस-देस का लोगु तैं, ल्वे से अपणा खरीदी च, तुमुन ही ऊं लोगु तैं बणै एक पुरोहित च, पिता परमेस्वर खुणि राज्य एक बणयूं च राज करला वु सभि, औण वळी धरती मा।”</verse>
				<verse number="10"></verse>
				<verse number="11">तब मिन भौत स्वर्गदूतों की आवाज सुणी, जौं तैं गिणै नि जै सकदु, लाखों अर करोड़ो स्वर्गदूत। यू स्वर्गदूत राजगद्‍दी का अर चार ज्यून्दा पराणों, अर ऊं अध्यक्षों का चौतरफि खड़ा होयां छा।</verse>
				<verse number="12">अर ऊ ऊँची आवाज मा इन गाणा छा कि, “हे बलिदान होयां मेम्‍ना तुमरि ताकत अर सामर्थ, तुमरो धन, अकल अर आदर-सम्मान, अर तुमरि बडै होणी रौ, किलैकि तुम ही तारीफ पौण का लैख छाँ।”</verse>
				<verse number="13">फिर मिन स्वर्ग मा, धरती पर, अर धरती का मूड़ी अर समुन्दर की हरेक जीव-जन्तु तैं अर जु कुछ भि वेमा च, ऊं सभ्यों तैं इन गाण सुणी कि, “तुम जु राजगद्‍दी पर बैठयां छाँ, तुमरि अर मेम्‍ना की तारीफ हो, अर आदर-सम्मान, बडै अर ताकत सदनि तक ऊंकी ही रौ।”</verse>
				<verse number="14">तब ऊं चार ज्यून्दा पराणों न इन बोलि, “आमीन” अर ऊ अध्यक्षों न भ्वीं मा पोड़ि के ऊं दुईयों की भक्‍ति कैरी।</verse>
			</chapter>
			<chapter number="6">
				<verse number="1">फिर मिन देखि कि वे मेम्‍ना न सात मोरो मा बटि एक मोर तैं खोली, अर मिन चार पराणों मा बटि एक तैं बादळों की गगड़ट की तरौं ऊँची आवाज मा इन बुल्द सुणी, “अऽ।”</verse>
				<verse number="2">अर मिन एक सफेद घोड़ा तैं निकळद देखि, अर वेमा एक पराण सवार छौ जैका पास एक धनुष च अर वेतैं एक मुकुट दिये गै, अर उ जीत हासिल करणु खुणि निकळ्यूं च।</verse>
				<verse number="3">जब मेम्‍ना न दुसरि मोर खोली, त मिन दुसरा ज्यून्दा पराण तैं इन बुल्द सुणी, “अऽ।”</verse>
				<verse number="4">फिर एक और घोड़ा निकळि के ऐ जु कि लाल रंग को छौ, अर वेमा एक पराण सवार छौ जैतैं इन अधिकार दिये गै कि उ धरती मा बटि शान्ति तैं उठे द्‍यो, ताकि लोग एक-दुसरा को बेरहम ह्‍वेके कत्ल कैरी द्‍या, अर वे पराण तैं एक बड़ी तलवार दिये गै।</verse>
				<verse number="5">जब मेम्‍ना न तिसरी मोर तैं खोली, त मिन तिसरा पराण तैं इन बुल्द सुणी, “अऽ।” तब मिन एक काळु घोड़ा तैं निकळद देखि, अर वेमा एक पराण सवार छौ जैका हाथ मा एक तराजू छौ।</verse>
				<verse number="6">अर मिन चार ज्यून्दा पराणों का बीच मा इन आवाज सुणी, “इन्द्रयो अकाळ भेजि द्‍या कि सब कुछ मैंगु ह्‍वे जौ, अर एक किलो अनाज की कीमत एक दिन की ध्याड़ि का बराबर, अर तीन किलो जौ कि कीमत एक दिन की ध्याड़ि का बराबर हो, मगर जैतून अर अंगूरों का बगिचो तैं नुकसान नि पौंछै।”</verse>
				<verse number="7">जब मेम्‍ना न चौथी मोर तैं खोली, त मिन चौथा पराण तैं इन बुल्द सुणी, “अऽ”</verse>
				<verse number="8">तब मिन एक हलकु पीला रंग को एक घोड़ा निकळद देखि, अर वेमा सवार पराण को नौ छौ, मौत। अर अधलोक वेका पिछनै-पिछनै छौ। अर वेतैं धरती का चार हिस्सों मा बटि एक हिस्सा पर अधिकार दिये गै, कि ऊ तलवार बटि, अकाळ बटि, जान से मरण वळी महामारी बटि, अर जंगळि जानबरों का द्‍वारा लोगु तैं जान से मारी द्‍यो।</verse>
				<verse number="9">अर जब मेम्‍ना न पांचु मोर खोली, त मिन वेदी का मूड़ी कत्ल होयां लोगु की आत्माओं तैं देखि, जु कि परमेस्वर का वचन पर चलण की वजै से अर गवै देण कि वजै से मरे गै छा।</verse>
				<verse number="10">अर यों आत्माओं न ऊँची आवाज मा इन बोलि, “हे सबसे महान पिता परमेस्वर, तुम जु कि पवित्र अर सच्‍चा छाँ, आखिर तुम कब न्याय करिल्या, अर धरती पर रौण वळो बटि कब तक हमरि हत्या को बदला नि लि ल्या?”</verse>
				<verse number="11">अर ऊंमा बटि हरेक तैं एक सफेद चोळा दिये गै। अर ऊंतैं कुछ देर तक रुकणु कू बुलै गै, जब तक कि ऊंका ही जन दुसरा बिस्वासी भैयों अर सेवकों की गिनती पूरि नि ह्‍वे जौ, जौं की हत्या ऊंकी ही तरौं किये गै।</verse>
				<verse number="12">अर जब मिन मेम्‍ना तैं छटुं मोर खुलद देखि, त एक बड़ु भ्वींचळु ऐ अर सूरज इन काळु पोड़ि गै जन की काळु टाट हो, अर चाँद इन ह्‍वे गै जन की, ल्वे।</verse>
				<verse number="13">अर आसमान का गैंणा धरती मा पोड़ि गैनी, जन कि तेज बथौं चलण पर काचा तिमला डाळा बटि भ्वीं मा पोड़ि जनदिन।</verse>
				<verse number="14">अर आसमान इन सरकी गै जन कि दस्तावेज तैं गोळ लपेटदिन, हरेक पाड़, अर टापू अपणी-अपणी जगा बटि हटि गैनी।</verse>
				<verse number="15">अर धरती का राजा, अधिकारी, सेनापति, सेठ, अर ताकत रखण वळा लोग, हरेक गुलाम, आजाद मनखि न खुद तैं उड़्यारों अर पाड़ो की दरारों मा लुकौण शुरु कैरी दिनी।</verse>
				<verse number="16">अर ऊ लोग उड़्यारों अर पाड़ो पर चिल्‍लै-चिल्‍लै के बुलण लगि गैनी, “हमरा मथि पोड़ि जा, अर हमतै मेम्‍ना का गुस्सा से अर जु राजगद्‍दी पर बैठयूं च वेकी नजरों से बचै द्‍या,</verse>
				<verse number="17">किलैकि ऊं दुईयों का गुस्सा को दिन ऐ गै अर अब कुई भि नि च जु की ऊंका समणि खड़ु रै सकदु।”</verse>
			</chapter>
			<chapter number="7">
				<verse number="1">येका बाद मिन धरती का चरी कुणों पर चार स्वर्गदूत खड़ा होयां दिखिनी। अर ऊंन धरती मा चौतरफि दिसा की हवा तैं रोकी के रख्युं छौ, ताकि नऽ त कै डाळा पर, नऽ त धरती पर अर ना ही समुन्दर मा हवा चलु।</verse>
				<verse number="2">तब मिन एक और स्वर्गदूत तैं पूरब दिसा बटि औन्द देखि, अर वेमा ज्यून्दा परमेस्वर की मोर छै। अर जौं चार स्वर्गदूतों तैं धरती अर समुन्दर मा नुकसान पौंछण को अधिकार दिये गै छौ, वेन ऊंकू ऊँची आवाज मा बोलि कि,</verse>
				<verse number="3">“जबरि तक हम अपणा परमेस्वर का सेवकों का माथा पर मोर नि लगै द्‍या, तब तक डाळों अर धरती पर या समुन्दर मा कुई भि नुकसान नि पौंछ्यां।”</verse>
				<verse number="4">अर जौं पर मोर लगये गै मिन अपणा कन्दूड़ो न ऊंकी गिनती सुणी ऊंकी गिनती एक लाख चवालीस हजार छै। अर ऊ इस्राएल का हरेक गोत्र मा बटि छा।</verse>
				<verse number="5">यहूदा का गोत्र मा बटि बारह हजार पर मोर लगि, अर उन्‍नि रूबेन का गोत्र बटि बारह हजार पर, अर गाद का गोत्र बटि बारह हजार पर मोर लगि।</verse>
				<verse number="6">अर आशेर का गोत्र बटि बारह हजार पर मोर लगि, अर उन्‍नि नप्‍ताली का गोत्र बटि बारह हजार पर, अर मनशेस का गोत्र बटि बारह हजार पर मोर लगि।</verse>
				<verse number="7">अर शमौन का गोत्र बटि बारह हजार पर मोर लगि। अर उन्‍नि लेवी का गोत्र बटि बारह हजार पर, इस्साकार का गोत्र बटि बारह हजारों पर मोर लगि।</verse>
				<verse number="8">अर उन्‍नि जबूलून का गोत्र बटि बारह हजार पर मोर लगि, अर यूसुफ का गोत्र बटि बारह हजार पर, अर बिन्यामीन का गोत्र बटि बारह हजार पर मोर लगि।</verse>
				<verse number="9">अर येका बाद मिन भौत सा लोगु तैं देखि, जौं तैं गिणै नि जै सकदु। अर वु अलग-अलग देसों, गोत्रों अर जातियों का छा जु कि अलग-अलग भाषा बुल्दिन। अर ऊंका सफेद कपड़ा पैरयां छा अर अपणा हाथों मा खजूर का फौंकों तैं लेके राजगद्‍दी अर मेम्‍ना का समणि खड़ा होयां छा,</verse>
				<verse number="10">अर इन नारा लगौणा छा कि, “हमतै बचौण वळा परमेस्वर की, जै हो, जु कि राजगद्‍दी पर बैठयूं च बोला वेकी, जै हो हमतै बचौण वळा मेम्‍ना की, जै हो।”</verse>
				<verse number="11">अर राजगद्‍दी का चौतरफि सब स्वर्गदूत, अध्यक्ष अर चरी पराण खड़ा होयां छा, अर ऊंन राजगद्‍दी का समणि भ्वीं मा पोड़ि के पिता परमेस्वर की भक्‍ति कैरिके बोलि कि,</verse>
				<verse number="12">“हे मेरा परमेस्वर, तुमरि तारीफ, अर तुमरा आदर-सम्मान, अर तुमरो ही धन्यवाद सदनि तक होणु रौ, तुमरो ज्ञान, अर तुमरि ताकत अर तुमरा सामर्थ की बडै सदनि तक होणी रौ। आमीन।”</verse>
				<verse number="13">तब एक अध्यक्ष मा बटि एक न मिसे पूछी, “यू सफेद कपड़ा पैरयां लोग कु छिन, अर इख कख बटि ऐनी?”</verse>
				<verse number="14">अर मिन बोलि कि, “हे मेरा प्रभु, मितैं त नि च पता पर तुमतै पता होलु।” अर वेन मिकू बोलि कि, “यू वु लोग छिन, जौन बड़ी पीड़ा सै अर वामा बटि निकळि के अयां छिन, अर ऊंन अपणा कपड़ों तैं मेम्‍ना का ल्वे मा ध्वेके के खुद तैं सफेद कर्युं च।</verse>
				<verse number="15">इलै यू लोग परमेस्वर का मन्दिर मा रै के वेकी सेवा करदिन। अर वेकी राजगद्‍दी का समणि खड़ा छिन। अर परमेस्वर जु कि राजगद्‍दी पर बैठयूं च उ ऊंका दगड़ा मा च अर ऊंकी देख-रेख करदु।</verse>
				<verse number="16">फिर यों तैं ना कभि भूक लगली अर ना यू तिसाला, नऽ त यों तैं घाम लगलु अर ना ही चटकतळै हाळ,</verse>
				<verse number="17">किलैकि मेम्‍ना जु की राजगद्‍दी का बीच मा च, उ ऊंको चरवाह होलु, अर ऊंतैं जीवन का छोया का पास लेके जालु। अर पिता परमेस्वर ऊंका आंख्यों बटि सब आंसुओं तैं फुंजी द्‍यालु।”</verse>
			</chapter>
			<chapter number="8">
				<verse number="1">जब मेम्‍ना न सातवीं मोर तैं खोली, त स्वर्ग मा अधा घन्टा तक कुछ भि आवाज नि ऐ।</verse>
				<verse number="2">तब मिन ऊं सात स्वर्गदूतों तैं देखि, जु कि परमेस्वर का समणि खड़ा रौनदिन, अर ऊंतैं सात बिगुला दिये गैनी।</verse>
				<verse number="3">फिर एक और स्वर्गदूत ऐ अर उ पिता परमेस्वर की राजगद्‍दी का पास ज्वा वेदी छै, उ वींका समणि खड़ु ह्‍वे गै, अर धूपदेणु खुणि वेका हाथों मा सोनो को एक कटोरा छौ। तब वेतैं भौत सारी धूबत्ती दिये गैनी ताकि वु परमेस्वर का सब लोगु की प्रार्थनाओं तैं भेंट का रुप मा चड़ौ।</verse>
				<verse number="4">अर फिर पिता परमेस्वर का सब पवित्र लोगु की प्रार्थना धूबत्ती का धुंवा मा मिली के एक स्वर्गदूत का हाथोंळ परमेस्वर का पास पौंछिनी।</verse>
				<verse number="5">तब स्वर्गदूत न धूपदेणु वळु कटोरा ले अर वेमा वेदी की आग भोरी, अर धरती की तरफा ढोळि दिनी। तब बादळों मा गगड़ट की तेज आवाज औण लगि गै, अर बिजली चमकी, अर भ्वींचळु ऐ।</verse>
				<verse number="6">अर जौं सात स्वर्गदूतों मा सात बिगुला छा, वु ऊंतैं बजौणु खुणि तयार ह्‍वे गैनी।</verse>
				<verse number="7">अर जब पैला स्वर्गदूत न बिगुला बजै, तब ल्वे मिल्यूं ढांडो अर आग पैदा ह्‍वे, जु की धरती पर ढुळै गै। अर इन होण से जमीन का तीन हिस्सों मदि एक हिस्सा फुकै गै, अर इन्‍नि डाळों को एक हिस्सा फुकै गै, अर पूरि हरीं घास भि फुकै गै।</verse>
				<verse number="8">अर जब दुसरा स्वर्गदूत न बिगुला बजै, तब समुन्दर मा कुई चीज ढुळै गै जन की एक बड़ु पाड़ जै पर आग लगीं छै। अर इन होण से समुन्दर का तीन हिस्सों मदि एक हिस्सा ल्वे बणि गै।</verse>
				<verse number="9">अर पाणि का जीव-जन्तुओं मा बटि तीन हिस्सों मदि एक हिस्सा को नास ह्‍वे गै, अर ठिक इन्‍नि समुन्दर का जाजों का तीन हिस्सों मदि एक हिस्सा को नास ह्‍वे गै।</verse>
				<verse number="10">अर जब तिसरा स्वर्गदूत न बिगुला बजै, तब एक बड़ु गैंणु जु मसाल की तरौं जगणु छौ, आसमान बटि पोड़ि के कई गाडा अर पाणि का छोयों का तीन हिस्सों मदि एक हिस्सा पर पोड़ि।</verse>
				<verse number="11">अर ये गैंणो को नौ धतुरो च, अर येकी बजै से पाणि का तीन हिस्सों मदि एक हिस्सा कड़ु ह्‍वे गै, अर पाणि कड़ु होण की वजै से भौत सा लोग मोरि गैनी।</verse>
				<verse number="12">अर जब चौथा स्वर्गदूत न बिगुला बजै, तब सूरज, चाँद अर गैंणो का तीन हिस्सों मदि एक हिस्सा को नास ह्‍वे गै अर ऊंन उज्याळु देण बन्द कैर दिनी। अर इनकै सूरज न दिन मा चार घन्टा उज्याळु देण बन्द कैरी, अर ठिक उन्‍नि रात मा चाँद अर तारों न भि चार घन्टा उज्याळु देण बन्द कैर दिनी।</verse>
				<verse number="13">तब मिन आसमान मा एक चील तैं उड़ण देखि अर मिन वेतैं ऊँची आवाज मा इन बुल्दु सुणी कि, “धरती पर रौण वळा लोगु, तुम पर हाय च, हाय, किलैकि तीन और स्वर्गदूतों छिन जौन अभि अपणु-अपणु बिगुलो बजौण।”</verse>
			</chapter>
			<chapter number="9">
				<verse number="1">अर जब पांचु स्वर्गदूत न बिगुला बजै, त मिन एक गैंणो देखि जु की स्वर्ग बटि धरती पर पोड़ि, अर वेतैं अधलोक की चाबी दिये गै।</verse>
				<verse number="2">अर वेन अधलोक को द्‍वार खोली अर उख बटि इन धुंवा निकळि जन कै खतरनाक बणांग बटि निकळदु, अर वे धुंवा की वजै से हवा अर सूरज अन्धेरु ह्‍वे गै।</verse>
				<verse number="3">अर वे धुंवा मा बटि टिड़ियां निकळिनी अर जन ताकत बिच्छीयों का बिस मा होन्दी, उथगा ही ताकत परमेस्वर न यों टिड़ियां तैं दिनी।</verse>
				<verse number="4">अर ऊंकू इन बुले गै कि ऊ नऽ त धरती की घास तैं, ना ही कैं हरीं चीज तैं अर ना ही कैं डाळी-बोटी तैं नुकसान पौंछा, पर ऊं लोगु तैं ही नुकसान पौंछा, जौं का माथा पर परमेस्वर की मोर नि च।</verse>
				<verse number="5">अर ऊं टिड़ियों तैं इन अधिकार दिये गै, कि ऊ पांच मैना तक लोगु तैं भौत पीड़ा द्‍या, मगर ऊंतैं जान से नि मारा। अर ऊं लोगु की पीड़ा इन छै, जन बिच्छीयों का कटण से होन्दी।</verse>
				<verse number="6">अर ऊं दिनों मा लोग अफ खुणि मौत मंगला, मगर मौत नि आली, अर ऊंका मनों मा मुरण की तड़प होलि, मगर मौत ऊं से दूर भगेली।</verse>
				<verse number="7">अर टिड़ियों को रुप लड़ै खुणि तयार कियां घोड़ो की तरौं छौ। अर ऊंका मुण्ड़ो मा सोना का मुकुटो की तरौं कुछ छौ, अर ऊंका मुख आदमियों की तरौं छा।</verse>
				<verse number="8">अर ऊं टिड़ियों का बाळ जनानियों की तरौं लम्बा छा, अर ऊंका दांत शेर की तरौं छा।</verse>
				<verse number="9">ऊंका बदन को कवच लोखर की तरौं, अर ऊंका फाँकुड़ो की आवाज इन छै जन कि भौत सा रथ अर घोड़ा लड़ै करणु खुणि अटगंणा हो।</verse>
				<verse number="10">अर ऊंकी पूंच बिच्छीयों की तरौं डसण वळी छै, अर ऊंकी पूंच मा लोगु तैं पांच मैना तक पीड़ा देण की ताकत छै।</verse>
				<verse number="11">अर अधलोक को दूत ऊं टिड़ियों को राजा छौ। अर इब्रानी भाषा मा वेको नौ अबद्‍दोन अर यूनानी भाषा मा अपुल्‍लयोन च अर यों दुईयों को मतलब इन च कि “विणास करण वळु।”</verse>
				<verse number="12">पैलि विपदा बीत गै, देखा, येका बाद दुई और विपदा औण वळी छिन।</verse>
				<verse number="13">अर जब छटुं स्वर्गदूत न बिगुला बजै। तब मिन सोने की वेदी तैं ज्वा की परमेस्वर का समणि च, वेका चरी कुणों बटि एक आवाज ऐ।</verse>
				<verse number="14">अर ईं आवाज न छटुं स्वर्गदूत कू इन बोलि कि, “ऊं चार स्वर्गदूतों का बन्धनों तैं खोली दे, जु फरात गाड का नजदीक बन्धयां छिन।”</verse>
				<verse number="15">तब चरी स्वर्गदूतों तैं आजाद किये गै, जौं तैं वे दिन, वे बगत अर वे मैना अर वे साल खुणि तयार कर्युं च, ताकि वु मनखियों का तीन हिस्सा मा बटि एक हिस्सा तैं मारी द्‍या।</verse>
				<verse number="16">अर ऊं घुड़सवार सैनिको की गिनती बीस करोड़ छै, अर या गिनती मिन खुद सुणी।</verse>
				<verse number="17">अर ये दिब्य दरसन मा मितैं घोड़ा अर ऊं पर सवारों को रुप कुछ इन दिखै, ऊंका कवच जळदी आग की तरौं लाल, नीलमणी की तरौं नीला छा, अर गंधक की तरौं पिंगळा छा। अर ऊं घोड़ो का मुण्ड़ शेरों की तरौं अर ऊंका गिच्‍चों बटि आग अर धुंवा अर गंधक निकळणु छौ।</verse>
				<verse number="18">अर यों तीन विपदाओं की वजै से मनखि जाति का तीन हिस्सा मदि एक हिस्सा को नास ह्‍वे गै। अर यू सब कुछ ऊंका गिच्‍चों बटि निकळण वळी आग, धुंवा अर गंधक की वजै से ह्‍वे।</verse>
				<verse number="19">किलैकि घोड़ो की ताकत ऊंका गिच्‍चों अर पूंच मा छै, अर ऊंका पूंच गुरौ की तरौं छा जौं पर की मुण्ड़ छा, अर वां से वु नुकसान पौंछन्दिन।</verse>
				<verse number="20">मगर जु लोग यों पीड़ाओं मा बटि भि बचि गैनी ऊंन फिर भि अपणा-अपणा कामों से पस्ताप नि कैरी बल्किन मा खबेसों अर सोना-चांदी, पीतळ, ढुंगो अर लखड़े की बणि मूरतों तैं पूजणा रैनी, जु कि नऽ त देखि सकदिन, ना सुणी सकदिन, अर ना ही चलि-फिरी सकदिन।</verse>
				<verse number="21">अर इन्‍नि और भि छा जौन हत्या, जादु-टोंणा, अर गळत सम्बन्ध रखिनी, चोरी कैरी मगर अपणा कामों से पस्ताप नि कैरी।</verse>
			</chapter>
			<chapter number="10">
				<verse number="1">अर येका बाद मिन स्वर्ग बटि एक और ताकतबर स्वर्गदूत तैं उतरद देखि, जैन बादळों तैं कपड़ों की तरौं पैरयूं छौ, अर वेका मुण्ड़ मा मेघधनुष छौ। अर वेको मुख सूरज की तरौं, अर वेका खुटा आग का खम्बों की तरौं छा।</verse>
				<verse number="2">अर वेका हाथ मा एक छुटो दस्तावेज छौ जु कि खुल्यूं छौ। अर वेन अपणु दैंणु खुटों समुन्दर मा रखी, अर अपणु बैं खुटों धरती पर रखी,</verse>
				<verse number="3">अर उ शेर की तरौं डुकरताळ मारी के चिल्‍लै। अर जब उ चिल्‍लै त बादळों मा बटि गगड़ाट की सात आवाज सुणैनी।</verse>
				<verse number="4">अर जब सात आवाज ह्‍वे गैनी, त मि लिखण वळु छौ, मगर मिन स्वर्ग बटि एक आवाज सुणी जैन मिकू बोलि, “सात आवाजों मा जु बुले गै, ऊंतैं लिख ना बल्किन मा छिपै के रख।”</verse>
				<verse number="5">अर परमेस्वर हमेसा खुणि ज्यून्द च जैन आसमान अर वेकी सब चीजों तैं, धरती अर वेकी सब चीजों तैं, समुन्दर अर वेकी सब चीजों तैं बणै। अर जै स्वर्गदूत तैं मिन समुन्दर अर धरती पर खड़ु होयुं देखि, वेन अपणा दैंणा हाथ तैं स्वर्ग की तरफा उठे, अर परमेस्वर की कसम खै के बोलि, “अब जादा देर नि होलि।</verse>
				<verse number="6"></verse>
				<verse number="7">पर जब सातु स्वर्गदूत को बिगुलो बजौण को बगत आलु, त वे बगत परमेस्वर अपणी छिपी योजना तैं पूरि करलु, जैकी घोसणा वेन अपणा सेवकों याने कि अपणा रैबर्यों का द्‍वारा कैरी छै।”</verse>
				<verse number="8">अर ज्वा आवाज मिन पैलि स्वर्ग बटि सुणी छै, वींन मिकू फिर से इन बोलि कि, “जा, जु स्वर्गदूत समुन्दर अर धरती पर खड़ु होयुं च, वेका हाथ बटि वे खुल्यां दस्तावेज तैं ले ले।”</verse>
				<verse number="9">तब मिन वे स्वर्गदूत का पास जैके वेसे वु छुटो दस्तावेज मांगि। अर वेन मिकू बोलि, “ले, अर येतैं खै ले, यू तेरा गिच्‍चा मा शहद की तरौं मिठ्‍ठु लगलु मगर तेरा पुटगा तैं खट्‍टु कैरी द्‍यालु।”</verse>
				<verse number="10">अर मिन स्वर्गदूत का हाथ बटि वु छुटो दस्तावेज लेके खै दिनी अर वा मेरा गिच्‍चा मा शहद की तरौं मिठ्‍ठु लगि, पर जब मिन खै दिनी त मेरु पुटगु खट्‍टु ह्‍वे गै।</verse>
				<verse number="11">अर येका बाद मिकू इन बुले गै कि, “त्वेतै भौत सि जातियों, देसों अर अलग-अलग भाषा का लोगु खुणि, अर भौत सा राजाओं का बारा मा और भविष्यबाणी करण होलि।”</verse>
			</chapter>
			<chapter number="11">
				<verse number="1">तब मितैं नपणु खुणि एक फीता दिये गै, अर कैन मिकू बोलि, “उठ अर परमेस्वर का मन्दिर अर वेदी तैं नाप, अर वामा भक्‍ति करण वळो की गिनती कैर।</verse>
				<verse number="2">पर मन्दिर का भैर वळा बरण्डा तैं छोड़ि दे वेतैं नि नाप, किलैकि उ ऊंतैं दिये गै जु यहूदी जाति का नि छिन, अर यू लोग सढ़े तीन साल तक पवित्र नगर का लोगु पर जुलम करला।</verse>
				<verse number="3">अर मि अपणा दुई गवा तैं इन ताकत द्‍यूलु, कि ऊ टाट पैरि के सढ़े तीन साल तक भविष्यबाणी करला।”</verse>
				<verse number="4">यू दुई गवा जैतून का दुई डाळा अर दुई दीपदान का जन छिन, जु पूरि धरती पर राज करण वळा प्रभु का समणि खड़ा रौनदिन।</verse>
				<verse number="5">अगर कुई ऊंतैं नुकसान पौंछाण चान्दु, त ऊंका गिच्‍चों बटि आग निकळि के ऊंका दुसमनों तैं भसम कैरी देन्दी। अगर कुई ऊंतैं नुकसान पौछाण कि कोसिस करलु, त ऊंतैं भि उन्‍नि मरे जालु।</verse>
				<verse number="6">अर ऊंका पास इन अधिकार च कि ऊ आसमान तैं बन्द कैरी सकदिन, ताकि जौं दिनों मा ऊ भविष्यबाणी करला ऊं दिन मा आसमान नि बरखो, अर पाणि तैं ल्वे बणण को अर जब ऊ चा तब धरती पर बड़ी-बड़ी महामारी भेजि सकदिन।</verse>
				<verse number="7">अर जब वु दुई गवा अपणी गवै देण का काम तैं पूरु कैरी द्‍याला, तब एक दैंत अधलोक बटि भैर निकळ्‍ळु अर ऊं दुई गवाओ का दगड़ा मा युद्ध करलु, अर ऊं पर जीत हासिल कैरिके ऊंतैं जान से मारी द्‍यालु।</verse>
				<verse number="8">अर ऊंन दुईयों की लांश यरूशलेम नगर का बीचों-बीच पोड़ि राली, जख ऊंका प्रभु तैं भि क्रूस पर चड़ये गै छौ। अर उखा लोगु को चाल-चलन सदोम नगर की तरौं बुरु, अर वु लोग मिस्र मुलक का लोगु की तरौं बेरहम छिन।</verse>
				<verse number="9">अर सब जाति, गोत्र, अर सब भाषा अर देस-देस का लोग सढ़े तीन दिन तक ऊंकी लांश तैं दिखणा राला, अर ऊंतैं कबरुन्द नि रखण द्‍याला।</verse>
				<verse number="10">अर धरती मा रौण वळा लोग ऊंकी मौत पर खुशी मणाला अर मगन ह्‍वे जाला, अर वु एक-दुसरा तैं उपहार द्‍याला, अर इन ऊ इलै करला, किलैकि यों दुई रैबर्यों न धरती पर रौण वळो तैं अपणा रैबार का द्‍वारा भौत दुख दिनी।</verse>
				<verse number="11">मगर सढ़े तीन दिन का बाद परमेस्वर न ऊंका सरील मा जीवन की सांस फूकी दिनी, अर ऊ अपणा खुटों पर खड़ा ह्‍वे गैनी। तब जु लोग ऊंतैं दिखण छा ऊं सभ्यों पर बड़ु खौफ ऐ गै।</verse>
				<verse number="12">अर ऊंन स्वर्ग बटि एक तेज आवाज सुणी, जिं न ऊं दुईयों कू इन बोलि, “इख मथि ऐ जा।” अर ऊ दुईया का दुई बादळों मा उठये गैनी, अर ऊंका दुसमन ऊंतैं दिखदी रै गैनी।</verse>
				<verse number="13">अर वे ही बगत एक बड़ु भ्वींचळु ऐ अर नगर का दसुं हिस्सा को नास ह्‍वे गै, अर सात हजार लोग वे भ्वींचळा मा मोरि गैनी। अर बच्यां लोगु मा डौऽर समै गै अर ऊंन स्वर्ग मा रौण वळा परमेस्वर की बडै कैरी।</verse>
				<verse number="14">अर दुसरि विपदा भि पूरि ह्‍वे गै, अर जल्द तिसरी औण वळी च।</verse>
				<verse number="15">अर जब सातवां स्वर्गदूत न बिगुला बजै, त स्वर्ग बटि तेज आवाज ऐ अर वींन इन बोलि कि, “दुनियां पर राज करण को अधिकार अब हमरा परमेस्वर अर वेका मसीह को ह्‍वे गै। अर उ हमेसा-हमेसा तक राज करला।”</verse>
				<verse number="16">अर चौबीस अध्यक्षों न जु की परमेस्वर का समणि अपणी-अपणी राजगद्‍दियों पर बैठयां छा, ऊंन भ्वीं मा पोड़ि के परमेस्वर की भक्‍ति कैरी।</verse>
				<verse number="17">अर इन बोलि कि, “सर्वसक्‍तिमान प्रभु परमेस्वर, जु छौ जु अभि भि च हम तुमरो धन्यवाद करद्‍यां, किलैकि तुमुन अपणी बड़ी ताकत को इस्तेमाल कैरिके राज कन शुरु कैरियाली।</verse>
				<verse number="18">अर जब देस-देस का लोग तुम से गुस्सा ह्‍वेनि, त तुमरो परकोप ऊं पर भड़की गै। अर अब वु बगत ऐ गै जब तुम मुरयां लोगु को न्याय करिल्या, अर अब तुमरा सेवकों, रैबर्यों, अर सब पवित्र लोगु, अर जथगा भि लोग तुमरा नौ पर सरदा रखदिन ऊं सब सेवकों तैं इनाम दिये जालु, चै वु छुटा हो या बड़ा, मगर जौं लोगु न धरती तैं बरबाद कैरी तुम ऊंतैं खतम कैरी दिल्या।”</verse>
				<verse number="19">तब परमेस्वर को मन्दिर जु कि स्वर्ग मा च खुलै गै, अर वे मन्दिर मा करार को बक्सा दिखै। अर फिर बिजली चमकी अर बादळों की गगड़ाट, अर भ्वींचळु ऐ अर भौत ढांडो पोड़ि।</verse>
			</chapter>
			<chapter number="12">
				<verse number="1">अर फिर स्वर्ग मा एक बड़ु चिन्‍न दिखै। एक जनानि जिं को कपड़ा सूरज छौ, अर चाँद वींका खुटों का तौळ छौ, अर वींका मुण्ड़ पर बारह गैंणो को एक मुकुट छौ,</verse>
				<verse number="2">अर वा गरवति छै अर चिल्‍लाणी छै, किलैकि वींतैं परसव पीड़ा उठणी छै।</verse>
				<verse number="3">फिर आसमान मा एक और चिन्‍न दिखै, जु कि लाल रंग को एक बड़ु खुंखार रागस छौ, वेका सात मुण्ड़ अर दस सींग छा, अर वेका हरेक मुण्ड़ पर एक-एक मुकुट छौ।</verse>
				<verse number="4">अर वेन अपणी पूंच से आसमान का गैंणो का तीन हिस्सों मदि एक हिस्सा तैं खैंची के धरती पर ढोळि दिनी। तब उ खुंखार रागस वीं जनानि का समणि खड़ु ह्‍वे गै, ज्वा कि बच्‍चा तैं जनम देण वळी छै, ताकि जब बच्‍चा को जनम हो, त उ वेतैं निगळी द्‍यो।</verse>
				<verse number="5">अर वीं जनानि न एक नौना तैं जनम देई, जु की सब राज्यों पर लोखरो जांठु लेके बड़ी सख्‍तै से सासन करलु। अर वे नौना तैं तुरन्त परमेस्वर अर वेकी राजगद्‍दी का पास उठये गै।</verse>
				<verse number="6">अर वा जनानि निर्जन जगा कू भागी गै जख परमेस्वर न वीं खुणि एक जगा तयार कैरिके रखी छै, ताकि उख वींको पालन-पोसण सढ़े तीन साल तक हो।</verse>
				<verse number="7">फिर स्वर्ग मा युद्ध ह्‍वे, अर मीकाईल नौ का स्वर्गदूत अर वेका दगड़्यों का दूतों न खुंखार रागस का दगड़ा मा लड़ै कैरी, अर खुंखार रागस अर वेका दूतों न मुकाबला कैरी त छौ,</verse>
				<verse number="8">मगर ऊ हारी गैनी, अर फिर स्वर्ग मा ऊं खुणि कुई जगा नि रै।</verse>
				<verse number="9">अर खुंखार रागस अर वेका दूतों तैं धक्‍का मारी के धरती पर ढुळै गै। अर यू वु च जु दुनियां का लोगु का दगड़ा मा छल-कपट करदु, भौत पुरणु गुरौ, दुसरो पर दोष लगौण वळु, जैकू शैतान बुले जान्दु।</verse>
				<verse number="10">तब मिन स्वर्ग मा एक ऊँची आवाज तैं इन ऐलान करद सुणी, “सुणा, अब हमरा परमेस्वर की तरफा बटि मिलण वळु छुटकारा, अधिकार अर राज की स्थापना ह्‍वे गै, अर वेका मसीह को राज कन को अधिकार परगट ह्‍वे गै, किलैकि हमरा बिस्वासी भै-बैंणो पर दोष लगौण वळा तैं मूड़ी ढुळै गै, अर यू वु छौ जैन पिता परमेस्वर का समणि रै के ऊं पर दिन-रात दोष लगौण को काम कैरी।</verse>
				<verse number="11">अर ऊंन प्रभु का रैबार अर मेम्‍ना का ल्वे का द्‍वारा शैतान पर जीत हासिल कैरी, किलैकि ऊंन अपणी जान की भि परवा नि कैरी बल्किन मा मुरणु खुणि भि तयार छा।</verse>
				<verse number="12">इलै हे स्वर्ग मा रौण वळा दूतों, खुशी मणा। पर हे धरती अर समुन्दर तुम पर हाय च, किलैकि शैतान बड़ु गुस्सा ह्‍वेके तुमरा पास मूड़ी औणु च, अब वेतैं पता चलि गै कि अब वेको बगत कम ही रै गै।”</verse>
				<verse number="13">अर खुंखार रागस न देखि कि, “अब मितैं धरती पर ढुळै गै” त वेन वीं जनानि तैं सतौण शुरु कैरी दिनी, जिं न वे नौना तैं जनम दे छौ।</verse>
				<verse number="14">मगर परमेस्वर न वीं जनानि तैं चील की तरौं दुई बड़ा फाँकुड़ दिनी, ताकि वा खुंखार रागस का समणि बटि निर्जन जगा कू उड़ि जौ, ज्वा कि खुद परमेस्वर न वीं खुणि तयार कैरिके रखी छै, ताकि वींको पालन-पोसण सढ़े तीन साल तक किये जौ।</verse>
				<verse number="15">तब वे खुंखार रागस न वीं जनानि का पिछनै अपणा गिच्‍चा से गाड जन पाणि बुगै, ताकि वा जनानि पाणि मा बोगि के मोरि जौ,</verse>
				<verse number="16">मगर धरती न वीं जनानि की मदद कैरी, अर अपणु गिच्‍चु खोली के वीं गाड तैं पी दिनी, ज्वा गाड खुंखार रागस न अपणा गिच्‍चा बटि निकाळि छै।</verse>
				<verse number="17">तब खुंखार रागस तैं वीं जनानि पर बड़ु गुस्सा ऐ। अर उ वेका वंश का लोगु का दगड़ा मा युद्ध करणु खुणि निकळि गै, किलैकि ऊ लोग परमेस्वर की आज्ञाओं को पालन करदिन अर यीशु की गवै सुनौण को काम करदिन।</verse>
				<verse number="18">तब उ खुंखार रागस समुन्दर का बळा मा जैके खड़ु ह्‍वे गै।</verse>
			</chapter>
			<chapter number="13">
				<verse number="1">तब मिन समुन्दर मा बटि एक दैंत तैं निकळद देखि, वेका दस सींग अर सात मुण्ड़ छा। अर वेका दसी सींगों पर दस मुकुट छा, अर वेका मुण्ड़ो पर परमेस्वर की बुरै करण वळा शब्द लिख्यां छा।</verse>
				<verse number="2">मिन देखि कि उ एक चीता की तरौं छौ, मगर वेका खुटा भालु की तरौं छा, अर वेको मुख शेर की तरौं छौ। अर खुंखार रागस न ये दैंत तैं अपणी सामर्थ, राजगद्‍दी अर अपणु पूरु अधिकार दे दिनी।</verse>
				<verse number="3">अर वे दैंत का मुण्ड़ पर एक इन्दरि चोट लगि छै कि वेका बचण की उम्मीद नि छै, मगर वेको उ घौ खूब ह्‍वे गै। अर वेका खूब होण की वजै से पूरि धरती का लोग बड़ु ताजुब कैरिके वेका पिछनै-पिछनै चलण लगि गैनी।</verse>
				<verse number="4">अर लोगु न खुंखार रागस की पूजा कैरी अर ऊंन दैंत की भि पूजा कैरी, किलैकि रागस न वेतैं अपणु अधिकार दियाली छौ। अर ऊं लोगु न इन बोलि कि, “ये दैंत का जन कु च? अर कु च उ जु येका दगड़ा मा युद्ध कैरी सकदु?”</verse>
				<verse number="5">अर वेतैं बड़ी-बड़ी बात बुलण को, अर परमेस्वर की बुरै करणु की इजाजत दिये गै, पर या इजाजत परमेस्वर न वेतैं सिरफ सढ़े तीन साल तक की ही दिनी।</verse>
				<verse number="6">इलै वु दैंत परमेस्वर का खिलाप मा बुलण लगि गै, अर इन्द्रया काम करण लगि गै, ज्यां से कि पिता परमेस्वर की, स्वर्ग अर स्वर्ग मा रौण वळा सब लोगु की बेजती ह्‍वे।</verse>
				<verse number="7">अर वेतैं इन इजाजत दिये गै कि उ बिस्वासी लोगु का दगड़ा मा युद्ध कैरो अर ऊं पर जीत हासिल कैरो, अर हरेक गोत्र, जाति, अर भाषा अर देस-देस का लोगु पर वेतैं अधिकार दिये गै।</verse>
				<verse number="8">अर धरती पर रौण वळा सब लोग वे दैंत पूजा करला, मगर जौं लोगु का नौ दुनियां की शुरुवात से पैलि जीवन की किताब मा लिख्यां छिन वु लोग वे दैंत की पूजा नि करला। अर या किताब बलिदान होयां मेम्‍ने की च जु कि यीशु मसीह च।</verse>
				<verse number="9">कन्दूड़ खोली के सुणी ल्या अर ईं बात तैं समझा कि,</verse>
				<verse number="10">जैतैं कैदी होणु खुणि ठैरैये गै वेतैं जेलखाना मा डळै जालु, जैतैं तलवार से मरे जाण खुणि ठैरैये गै उ तलवार से मरे जालु, इलै ईं बात तैं जाणि ल्या कि बिस्वासी लोगु तैं सबर अर बिस्वास मा बणयूं रौण की जरुरत च।</verse>
				<verse number="11">फिर मिन एक और दैंत तैं धरती बटि निकळद देखि, अर वेका मेम्‍ना का जन दुई सींग छा, अर वेको बुलण खुंखार रागस की तरौं छौ।</verse>
				<verse number="12">अर यू दैंत समुन्दर वळा दैंत की निगराणी मा रै के अपणु पूरु अधिकार चलौणु छौ। अर येन धरती मा रौण वळा सब लोगु तैं समुन्दर वळा दैंत की पूजा करणु खुणि मजबूर कैरी, हाँ वेकी ही पूजा करणु खुणि जैका मुण्ड़ पर एक इन्दरि चोट लगि छै ज्यां से वेका बचण की उम्मीद नि छै, मगर वेको उ घौ खूब ह्‍वे गै छौ।</verse>
				<verse number="13">अर धरती वळु दैंत बड़ा-बड़ा चमत्कारिक काम कैरिके दिखान्दु, इख तक कि उ लोगु का दिखदी-दिखदी आसमान बटि धरती पर आग की बरखा कैरिके भि दिखान्दु छौ।</verse>
				<verse number="14">अर उ धरती का लोगु तैं भरमौणु रै, किलैकि ये दैंत का पास समुन्दर वळा दैंत की तरौं चमत्कार करण को अधिकार दिये गै। अर ये दैंत न धरती का लोगु तैं समुन्दर वळा दैंत की मूरत बणौणु कू बोलि, हाँ वे ही दैंत की जैका मुण्ड़ पर तलवार से एक इन्दरि चोट लगि छै कि वेकी बचण की उम्मीद नि छै, मगर वेको उ घौ खूब ह्‍वे गै छौ।</verse>
				<verse number="15">अर ये दैंत तैं इन भि अधिकार दिये गै कि उ समुन्दर वळा दैंत की मूरत मा जान डालि सैको, ताकि वा मूरत बोन्‍न लगि जौ। अर जथगा भि लोग वीं मूरत की पूजा नि करला, ऊं सभ्यों तैं जान से मरे जौ।</verse>
				<verse number="16">अर वेन सब लोगु तैं अपणा दैंणा हाथ या माथा पर मोर लगौणु खुणि मजबूर कैरी अब चै वु छुटा हो या बड़ा, सेठ हो या गरीब, आजाद हो या गुलाम, सब तैं।</verse>
				<verse number="17">अर जैमा वु चिन्‍न नि होलु वु कुछ भि लेण-देण नि कैरी सकदु यू चिन्‍न समुन्दर वळा दैंत का नौ, अर वेका नौ की संख्या च।</verse>
				<verse number="18">इन्दरि हालत मा ज्ञान की जरुरत च अर जु अकलमन्द च, उ वे समुन्दर वळा दैंत की संख्या को हिसाब लगौ, किलैकि या संख्या मनखि की च अर वेकी संख्या को नौ, छह सौ छियासठ च।</verse>
			</chapter>
			<chapter number="14">
				<verse number="1">अर मिन देखि कि यीशु जु कि मेम्‍ना च यरूशलेम नगर का सिय्योन ढौंडा मा खड़ु होयुं च। अर वेका दगड़ा मा एक लाख चवालीस हजार लोग खड़ा होयां छिन, जौं का माथा पर यीशु अर वेका पिता को नौ लिख्यूं च।</verse>
				<verse number="2">अर फिर मिन स्वर्ग बटि एक आवाज सुणी। अर ईं आवाज मा भौत जादा पाणि को छमछयाट अर बादळों को गगड़ट छौ अर मिन कुछ इन आवाज सुणी ज्वा कि इन छै, जन कि बीणा बजौण वळा अपणी-अपणी बीणा बजौणा हो।</verse>
				<verse number="3">अर वु राजगद्‍दी का समणि, अर चार ज्यून्द पराणों अर अध्यक्षों का समणि एक नयू गीत गाणा छा। अर एक लाख चवालीस हजार लोग का अलावा कुई भि वे गीत तैं नि सिखी सकदु, अर यू वु लोग छिन जौं तैं यीशु न अपणु बलिदान देके खरीदयाली।</verse>
				<verse number="4">अर यू ऊ लोग छिन जु अणविवाक ही रैनी अर यों न खुद तैं जनानियों का दगड़ा मा अशुद्ध नि कैरी। किलैकि यीशु जु कि मेम्‍ना च अर जख-जख वु जान्दु यू वेका पिछनै-पिछनै चलदिन, इलै परमेस्वर की सेवा खुणि यों लोगु तैं धरती का सब लोगु मदि सबसे पैलि चुणी के खरीदे गै।</verse>
				<verse number="5">अर ऊंन कभि झूठ्‍ठ नि बोलि अर वु निरदोष छिन।</verse>
				<verse number="6">फिर मिन एक और स्वर्गदूत तैं देखि जु की आसमान मा उड़णु छौ, अर वेका पास सदनि तक रौण वळु शुभ समाचार छौ, ताकि धरती पर रौण वळा सब देसों, गोत्रों अर हरेक भाषा अर जाति-जाति का लोग तैं यू शुभ समाचार सुणये जौ।</verse>
				<verse number="7">अर वेन ऊँची आवाज मा इन बोलि कि, “परमेस्वर पर अपणी पूरि सरदा रखा अर वेकी बडै कैरा, किलैकि न्याय को बगत ऐ गै, इलै वेकी भक्‍ति कैरा जैन आसमान, धरती अर समुन्दर बणै, अर पाणि का छोया भि वेन ही बणैनी।”</verse>
				<verse number="8">अर पैला स्वर्गदूत का बाद एक-दुसरो स्वर्गदूत उड्‍द दिखै अर वेन इन बोलि कि, “पतन ह्‍वे गै, पतन ह्‍वे गै, बड़ा नगर बेबीलोन को पतन ह्‍वे गै, सब देसों का लोगु न वींका गळत सम्बन्ध बणौण वळी दारु पीयाली, ताकि सब लोगु तैं वीं की लत लगि जौ, अर वींका दगड़ा मा सरील का गळत सम्बन्ध बणौण का कामों तैं पूरु कैरा।”</verse>
				<verse number="9">अर येका बाद एक और स्वर्गदूत उड्‍द दिखै जु कि तिसरु छौ, अर वेन ऊँची आवाज मा इन बोलि कि, “अगर कुई दैंत अर वेकी मूरत की पूजा करदु अर अपणा माथा पर या हाथ पर वेकी मोर लगौन्दु,</verse>
				<verse number="10">त परमेस्वर का परकोप वे पर आलु। अर उ इन्द्रया लोगु तैं अपणा पवित्र स्वर्गदूतों अर मेम्‍ना की नजर का समणि ही आग अर गंधक की पीड़ा मा डालि द्‍यालु, जु ऊं खुणि परमेस्वर का गुस्से की दारु च ज्वा की ऊं पर अखणै जालि।</verse>
				<verse number="11">अर ऊंका तड़पये जाण को धुंवा हमेसा-हमेसा तक उठणु रालु। अर जु लोग वे दैंत या वेकी मूरत की पूजा करदिन अर वेका नौ की छाप तैं स्वीकार करदिन ऊंतैं दिन-रात चैन नि मिललु।”</verse>
				<verse number="12">अर जु लोग यीशु पर बिस्वास रखदिन अर परमेस्वर की आज्ञा को पालन करदिन, इन्द्रया बगत मा परमेस्वर का ऊं पवित्र लोगु तैं सबर रखण की जरुरत च।</verse>
				<verse number="13">फिर मिन स्वर्ग बटि एक आवाज सुणी कि, “हे यूहन्‍ना ईं बात तैं लिख ले, ‘धन्य छिन ऊ लोग जु अब प्रभु पर बिस्वास रखी के मुरदिन।’” अर पवित्र आत्मा भि इन बोन्‍नु च कि, “हाँ धन्य छिन वु लोग, जौन धरती पर दुख-तकलीफ तैं सै अर भलै का काम करिनी, इलै अब ऊंतैं स्वर्ग मा इनाम दिये जालु।”</verse>
				<verse number="14">अर फिर मिन एक सफेद बादळ देखि, जै पर मनखि का पुत्र का जन कुई बैठयूं च, अर वेका मुण्ड़ मा सोनो को मुकुट छौ अर वेका हाथ मा पैनु दथड़ु छौ।</verse>
				<verse number="15">तब स्वर्ग का मन्दिर बटि एक स्वर्गदूत निकळि, अर वेन ऊँची आवाज मा वेकू बोलि जु बादळ मा बैठयूं छौ, “अपणु दथड़ु उठौ अर लवै कैर, किलैकि लवै को बगत ऐ गै अर धरती की फसल पक्‍की गै।”</verse>
				<verse number="16">अर तब जु बादळ मा बैठयूं छौ, वेन अपणु दथड़ु धरती पर चलै अर धरती की फसल कटै गै।</verse>
				<verse number="17">तब स्वर्ग का मन्दिर बटि एक और स्वर्गदूत निकळि, अर वेका पास भि एक पैनु दथड़ु छौ।</verse>
				<verse number="18">फिर एक और स्वर्गदूत वेदी बटि निकळि, जैका पास वेदी का समणि धुप जलौण को अधिकार छौ। अर जैका हाथ मा पैनु दथड़ु छौ, येन वेकू ऊँची आवाज मा बोलि, “अपणा पैना दथुड़ा तैं चलै के धरती पर अंगूर की बेल बटि अंगूरों का गुच्छों तैं काटी के इकट्‍ठा कैरा, किलैकि अंगूर पक्‍की गैनी।”</verse>
				<verse number="19">तब वे स्वर्गदूत न धरती पर अपणु दथड़ु चलै, अर धरती का अंगूर की बेल पर बटि अंगूरों का गुच्छों तैं काटी के रसकुण्ड मा ढोळि दिनी, जैको मतलब इन च कि परमेस्वर को परकोप।</verse>
				<verse number="20">तब नगर का भैर अंगूरों का गुच्छों तैं रसकुण्ड मा निचौणे गै। अरे सुणा, वे रसकुण्ड बटि इथगा ल्वे निकळि कि यू घोड़ो की लगाम तक ऐ गै। अर करीब तीन सौ किलोमीटर लम्बी गाड बोगि।</verse>
			</chapter>
			<chapter number="15">
				<verse number="1">फिर मिन स्वर्ग मा एक और बड़ु अदभुत चिन्‍न देखि की सात स्वर्गदूत छा, जौं का पास सात विपदा छै। अर यू आखिरी विपदा छै, अर येका दगड़ा-दगड़ि परमेस्वर को परकोप पूरु ह्‍वे जान्दु।</verse>
				<verse number="2">तब मितैं काँच का जन एक समुन्दर दिखै, अर वु इन लगणु छौ जन कि वेमा आग मिली हो। अर जौं लोगु न वे दैंत, वेकी मूरत, अर वेका नौ की संख्या पर जीत हासिल कैरी छै, मिन ऊं सब लोगु तैं वे काँच का समुन्दर का मथि खड़ु देखि। अर पिता परमेस्वर न हरेक तैं एक-एक बीणा दिनी।</verse>
				<verse number="3">अर वु परमेस्वर का सेवक मूसा को गीत अर मेम्‍ना जु की यीशु च वेको यू गीत गाणा छा, “सर्वसक्‍तिमान प्रभु पिता, हे हमरा प्यार प्रभु यीशु, छाँ महान पवित्र तुम ही, एकमात्र बाटु तुमरो सच्‍चु, भरोसा का लैख केवल तुम ही, काम अदभुत महान सब ही। सदनि को राजा केवल तुम ही, आदर-सम्मान लोग करला सब ही आला तुमरा समणि, देस-देस का सभि झुकला तुमरा समणि, करला भक्‍ति अर बडै भि जाहीर ह्‍वे गै ऊं सभ्यों पर, करदा छाँ तुम सब कुछ सच्‍चै पर।”</verse>
				<verse number="4"></verse>
				<verse number="5">अर यों सब बातों का बाद मिन स्वर्ग मा परमेस्वर का मन्दिर तैं याने कि पवित्र तम्बू तैं खुलद देखि।</verse>
				<verse number="6">अर सात स्वर्गदूत जौं का पास सात विपदा छै मन्दिर बटि भैर ऐनी। अर ऊंन मखमल का साफ अर चमकिला कपड़ा पैरयां छा, अर ऊंकी छति पर सोना का पठुगा बन्धयां छा।</verse>
				<verse number="7">तब चार ज्यून्दा पराणों मदि एक न यों सात स्वर्गदूतों तैं सोना का सात कटोरा दिनी, जौं मा हमेसा-हमेसा तक ज्यून्द रौण वळा परमेस्वर को परकोप भोर्यां छौ।</verse>
				<verse number="8">अर परमेस्वर का तेज अर ताकत की वजै से पूरु मन्दिर धुंवळ भोरी गै, अर जबरि तक सात स्वर्गदूतों की सात विपदा खतम नि ह्‍वे गैनी, तबरि तक कुई भि मन्दिर मा नि जै सैकी।</verse>
			</chapter>
			<chapter number="16">
				<verse number="1">फिर मिन स्वर्ग का मन्दिर मा बटि कैतैं ऊँची आवाज मा ऊं सात स्वर्गदूतों से इन बुल्द सुणी कि, “जा, परमेस्वर का परकोप से भोर्यां सात कटोरों तैं धरती पर अखणै द्‍या।”</verse>
				<verse number="2">तब पैला स्वर्गदूत न जैके अपणु कटोरा धरती पर अखणै दिनी, अर जौं लोगु पर वे दैंत की मोर लगि छै अर जु वेकी मूरत की पूजा कना छा, ऊं पर बड़ु दुख देण वळु बुरु फोड़ा निकळि गै।</verse>
				<verse number="3">फिर दुसरा स्वर्गदूत न अपणु कटोरा समुन्दर मा अखणै दिनी, अर समुन्दर को पाणि मुरयां मनखियों का ल्वे जन ह्‍वे गै अर ईं वजै से समुन्दर मा रौण वळा सब जीव-जन्तु मोरि गैनी।</verse>
				<verse number="4">तब तिसरा स्वर्गदूत न अपणु कटोरा तैं गाडो अर पाणि का छोयों पर अखणै दिनी, अर वु ल्वे बणि गैनी।</verse>
				<verse number="5">अर पाणि पर अधिकार रखण वळा स्वर्गदूत तैं मिन इन बुल्द सुणी कि, “हे पवित्र परमेस्वर, तुम जु की पैलि छा, अर आज भि छाँ, तुम न्यायी छाँ अर तुमुन ही यू न्याय कैरी।</verse>
				<verse number="6">किलैकि ऊंन बिस्वासी लोगु अर तुमरा रैबर्यों को ल्वे बुगै, इलै तुमुन भि ऊंतैं पाणि का बदला मा ल्वे पीणु खुणि दिनी, अर जन ऊंन कैरी उन्‍नि पै।”</verse>
				<verse number="7">फिर मिन वेदी बटि इन आवाज सुणी, “ हाँ, सर्वसक्‍तिमान प्रभु परमेस्वर, तुम न्याय करण मा सच्‍चा अर धरमी छाँ।”</verse>
				<verse number="8">फिर चौथा स्वर्गदूत न अपणु कटोरा सूरज पर अखणै दिनी, अर सूरज तैं अपणी झौऽळ से मनखियों तैं फूकी देण को अधिकार मिली गै,</verse>
				<verse number="9">अर चटकतळ्या घामों से लोग फुकै गैनी, तब ऊंन परमेस्वर की बेजती कैरी जैका पास यों सब विपदाओं से बचण को अधिकार च, अर ऊं लोगु न पस्ताप नि कैरी अर ना ही ऊंन परमेस्वर की बडै कैरी।</verse>
				<verse number="10">तब पांचु स्वर्गदूत न अपणु कटोरा वे दैंत की राजगद्‍दी पर अखणै दिनी, अर वेका राज्य पर अन्धेरु ह्‍वे गै, अर पीड़ा की वजै से लोग अपणी-अपणी जीब चबौण लगि गैनी।</verse>
				<verse number="11">तब ऊंन अपणी पीड़ा अर फोड़े की वजै से स्वर्ग मा रौण वळा परमेस्वर की बेजती कैरी, मगर फिर भि ऊंन अपणा बुरा कामों से पस्ताप नि कैरी।</verse>
				<verse number="12">तब छटुं स्वर्गदूत न अपणा कटोरा तैं फरात नौ की बड़ी गाड मा अखणै दिनी, अर वेको पाणि सूखि गै, ताकि पूरब दिसा का राजाओं का सिपै ऐ सैका।</verse>
				<verse number="13">फिर मिन खुंखार रागस का गिच्‍चा बटि अर वे दैंत का गिच्‍चा बटि, अर वे झूठ्‍ठा रैबर्या का गिच्‍चा बटि मिढकों का जन तीन अशुद्ध खबेसों तैं निकळद देखि।</verse>
				<verse number="14">अर यू वु खबेस छिन जु कि चमत्कार करदिन, अर यू जैके पूरि दुनियां का राजाओं तैं सर्वसक्‍तिमान परमेस्वर का खिलाप मा युद्ध करणु खुणि जमा करदिन, ताकि परमेस्वर का महान दिन मा यू वेका दगड़ा मा युद्ध कैर सैका।</verse>
				<verse number="15">तब मिन यीशु तैं इन बुल्द सुणी कि, “सुणा, मि अचानक एक चोर की तरौं औणु छौं, धन्य च उ जु चौकस रौन्दु, अर अपणा कपड़ों की हिफाजत करदु, अर वेतैं इनै-उनै नंगि नि घूमण पोड़लु, अर ना ही उ सरम मैसूस करलु।”</verse>
				<verse number="16">अर यों खबेसों न राजाओं तैं वीं जगा जमा कैरी जैकू इब्रानी भाषा मा हरमगिदोन बुल्दिन।</verse>
				<verse number="17">तब सातवां स्वर्गदूत न अपणु कटोरा हवा मा अखणै दिनी, अर मन्दिर की राजगद्‍दी बटि एक ऊँची आवाज ऐ, “पूरु ह्‍वे गै।”</verse>
				<verse number="18">तब चम बिजली चमकी अर ऊँची आवाज ऐ गगड़ाट ह्‍वे, अर एक भैंकर भ्वींचळु ऐ अर इन्द्रयो भ्वींचळु धरती पर मनखियों का बणण से अभि तक कभि नि ऐ छौ।</verse>
				<verse number="19">ये भ्वींचळा का औण से बड़ा नगर बेबीलोन का तीन हिस्सा ह्‍वे गैनी, अर देसों का नगर माटा मा मिली गैनी। तब परमेस्वर न बेबीलोन नगर तैं याद कैरी, अर अपणा परकोप की दारु वेतैं पिलै।</verse>
				<verse number="20">अर सब टापू डुबी गैनी, अर पाड़ो को पता तक नि चलि।</verse>
				<verse number="21">अर आसमान बटि एक-एक दुण बराबर ढांडो लोगु पर पोड़ि, अर ईं विपदा की वजै से लोगु न परमेस्वर की बेजती कैरी, किलैकि या विपदा मनखियों का सौण से भैर छै।</verse>
			</chapter>
			<chapter number="17">
				<verse number="1">अर येका बाद इन ह्‍वे कि जौं सात स्वर्गदूतों का पास सात कटोरा छा ऊं मदि एक न मेरा पास ऐके बोलि कि, “इख अऽ, मि त्वेतै दिखान्दु कि दुनियां की सबसे बड़ी वेश्या तैं मिलण वळु दण्ड क्या च, ज्वा कि भौत सि गाडो का छाला पर बैठि च।</verse>
				<verse number="2">अर वींका दगड़ा मा धरती का राजाओं न गळत सम्बन्ध रखिनी, अर दारु की तरौं वींका ये काम से धरती का रौण वळा वींका नसा मा धुत ह्‍वे गैनी।”</verse>
				<verse number="3">अर जब मि पवित्र आत्मा की ताकत से भरपूर ह्‍वे ग्यों तब उ स्वर्गदूत मितैं एक निर्जन जगा मा लि गै, अर उख मेरी नजर एक जनानि पर पोड़ि ज्वा की लाल रंग का एक दैंत पर बैठि छै। अर वे दैंत का सरील पर वु नौ लिख्यां छा ज्यां से कि परमेस्वर की बेजती होन्दी अर वेका सात मुण्ड़ अर दस सींग छा।</verse>
				<verse number="4">अर वीं जनानि न बैंगनि अर लाल रंग को कपड़ा पैरयां छौ, अर वा सोना अर भौत मैंगा हीरा अर मोतियों से सजीं छै। अर वींका हाथ मा सोनो को एक कटोरा छौ, जु की वींका दगड़ा मा गळत सम्बन्ध बणौण वळी अशुद्ध चीजों से भोरयूं छौ।</verse>
				<verse number="5">अर वीं वेश्या का माथा पर इन लिख्यूं छौ कि, “राज बड़ु नगर बेबीलोन, वेश्याओं अर धरती की गन्दी चीजों तैं जनम देण वळो की माँ।”</verse>
				<verse number="6">अर मिन देखि कि वा जनानि बिस्वासी लोगु को अर यीशु की गवै देण वळो को ल्वे पी के नसा मा धुत होईं च। अर यू देखि के मि भौत हैरान ह्‍वे ग्यों।</verse>
				<verse number="7">पर वे स्वर्गदूत न मिकू बोलि, “तू हैरान किलै होणी छैई? मि त्वेतै वीं जनानि का राज का बारा मा बतौलु, अर वे दैंत का राज का बारा मा भि बतौलु जैका सात मुण्ड़ अर दस सींग छिन।</verse>
				<verse number="8">अर जु दैंत तिन देखि, पैलि उ ज्यून्द छौ पर अब वु मोरि गै, मगर उ फिर से ज्यून्द ह्‍वेके अधलोक बटि निकळि के आलु, अर वेको नास फिर से ह्‍वे जालु। अर धरती पर रौण वळा जौं लोगु का नौ दुनियां की शुरुवात बटि जीवन की किताब मा नि लिख्यां छिन, वु सब लोग वे दैंत का दगड़ा मा जु कुछ भि ह्‍वे देखि के बड़ु ताजुब करला।</verse>
				<verse number="9">“येतैं समझणु खुणि अकल की जरुरत च, उ सात मुण्ड़ सात पाड़ छिन जौं पर वा जनानि बैठि च।</verse>
				<verse number="10">यां को मतलब सात राजा से च, जौं मदि पांच को त पतन ह्‍वे गै, अर एक अभि भि च, अर एक अभि तक नि ऐ, मगर जब उ आलु, त उ भि कुछ बगत तक ही रालु।</verse>
				<verse number="11">अर वु दैंत जु पैलि ज्यून्द छौ पर अब ज्यून्द नि च, मगर फिर से ज्यून्द ह्‍वेके आलु उ खुद आठु राजा होलु। अर वु ऊं सात राजों का जन दुष्‍ट होलु, अर वेन भि नास ह्‍वे जाण।</verse>
				<verse number="12">अर जु दस सींग तिन दिखिनी, वेको मतलब दस राजाओं से च, जौं तैं अभि तक राज करण को अधिकार नि मिली, पर ऊ वे दैंत का दगड़ा मा कुछ देर तक राज करण को अधिकार पाला।</verse>
				<verse number="13">अर यों सभ्यों की सोच एक ही जन च, अर ऊ अपणी-अपणी ताकत अर अपणु अधिकार वे दैंत तैं दे द्‍याला।</verse>
				<verse number="14">अर यू यीशु का खिलाप मा युद्ध करला, मगर यीशु जु कि मेम्‍ना च ऊं पर जीत हासिल करलु, किलैकि च। अर जौं लोगु तैं वेन बुलै के चुणी वु सब बिस्वासी लोग भि जु कि भरोसामन्द छिन मेम्‍ना का दगड़ा मा जीत हासिल करला।”</verse>
				<verse number="15">तब वे स्वर्गदूत न मिकू बोलि, “जु पाणि तिन देखि जख वा वेश्या बैठि च वांको मतलब, लोगु की भीड़, जाति, गोत्र, अर भाषाओं से च।</verse>
				<verse number="16">अर जु दस सींग अर दैंत तिन देखि, ऊ वीं वेश्या से नफरत करला, अर ऊ वींतैं नंगि कैरिके अकेला छोड़ि द्‍याला, अर वींका मांस तैं खै द्‍याला, अर वींका बच्यां हिस्सा तैं फूकी द्‍याला।</verse>
				<verse number="17">अर परमेस्वर ऊंका मनों मा या बात डललु कि वु राजा वेकी मनसा तैं पूरु कैरा, ताकि वु वे दैंत तैं अपणु-अपणु राज्य दे द्‍या, जबरि तक कि परमेस्वर को बुलयूं वचन पूरु नि ह्‍वे जौ।</verse>
				<verse number="18">अर जिं जनानि तैं तिन देखि, वांको मतलब वे बड़ा नगर से च जु कि दुष्‍ट च, अर वेको राजा धरती का राजाओं पर सासन करदु।”</verse>
			</chapter>
			<chapter number="18">
				<verse number="1">अर येका बाद मिन स्वर्ग बटि एक और स्वर्गदूत तैं उतरद देखि जैका पास एक बड़ु अधिकार छौ। अर वेकी चमक से धरती पर उज्याळु ह्‍वे गै।</verse>
				<verse number="2">अर वेन ऊँची आवाज मा चिल्‍लै के बोलि, “पतन ह्‍वे गै, पतन ह्‍वे गै, वीं वेश्या को पतन ह्‍वे गै जु कि बड़ु नगर बेबीलोन च, वु त खबेसों को घौर, अर हरेक किसम की अशुद्ध अर गन्दा पंछियों को घोल च, अर हरेक अशुद्ध अर घिण औणा वळा जानबर को उड़्यार बणि गै।</verse>
				<verse number="3">अर सब देसों का लोगु न वींका गळत सम्बन्ध बणौण वळी दारु पीयाली, ताकि सब लोग तैं वीं की लत लगि जौ, अर धरती का राजाओं न वींका दगड़ा मा सरील का गळत सम्बन्ध बणैनी, अर अपणी बुरी इच्छाओं तैं पूरु कैरिके धरती का व्यापारी लोग मालोमाल ह्‍वे गैनी।”</verse>
				<verse number="4">फिर मिन स्वर्ग बटि एक और आवाज सुणी कि, “हे मेरा लोगु, वे नगर बटि निकळि के भैर ऐ जा, वेका पापों मा वेका हिस्सेदार नि बणा, कखि वेका परकोप मा बटि कुई विपदा तुम पर नि ऐ जौ।</verse>
				<verse number="5">किलैकि वेका पापों को ढेर स्वर्ग तक पौंछी गै, अर परमेस्वर न वींका अधरम का काम तैं याद कैरियाली।</verse>
				<verse number="6">जन वींन दुसरो का दगड़ा मा कैरी, ठिक उन्‍नि वींका दगड़ा मा भि किये जालु, अर वींका कामों का मुताबिक बदला दिये जालु, अर वु भि, डबल। अर जै कटोरा मा वींन घोळ तयार कैरी, वीं खुणि वामा ही दुई गुणा तयार कैरा।</verse>
				<verse number="7">जथगा बड़ु वींन मोन कैरी अर अपणी सान-सौकत बढै, अर जथगा अयासी मा वा रै, उथगा ही जादा दुख अर पीड़ा वींतैं द्‍या, किलैकि वा अपणा दिल मा इन बुल्दी कि, ‘मि त महाराणी बणि के बैठि छौं, मि विधवा नि छौं, अर मिन कभि भि शोक नि मणै।’</verse>
				<verse number="8">इलै एक ही दिन मा वीं पर इथगा बड़ी विपदा आली, याने कि मौत, शोक अर अकाळ, अर वींतैं आग मा फुकै जालु, किलैकि प्रभु परमेस्वर जु वींको न्याय करदु सर्वसक्‍तिमान च।”</verse>
				<verse number="9">“अर धरती का राजा जौन वींका दगड़ा मा गळत सम्बन्ध बणैनी, अर ईं अयासी का हिस्सा तैं आपस मा बांटि छौ जब वु वींका फूक्योंण को धुंवा दिखला, त वीं खुणि रुवाला अर अपणी-अपणी छति तैं भटकाला।</verse>
				<verse number="10">अर वीं की पीड़ा तैं देखि के डऽरला अर दूर खड़ा ह्‍वेके बुलला, “‘हे बड़ा नगर बेबीलोन, त्वे पर हाय च, तू जु ताकतबर नगर छैई एक घन्टा मा ही त्वेतै दण्ड मिली गै।’</verse>
				<verse number="11">“अर धरती का व्यापारी लोग त्वेतै देखि के रुवाला अर शोक मणाला, किलैकि तेरु माल अब कैन नि खरीदण,</verse>
				<verse number="12">वु माल जैमा सोना, चान्दी, हीरा अर मोति अर अच्छु मखमल, बैंगनि कपड़ा, रेशमी अर लाल रंग का कपड़ा छिन। अर हरेक किसम का खुशबुदार लखड़ा, हाथीयों का दांत, इख तक की सबसे मैंगा लखड़ा, अर पीतळ, लोखर अर संगमरमर बटि बणि हरेक चीज छिन,</verse>
				<verse number="13">दालचीनी का बक्‍कल, मसला, धूबत्ती, खुशबुदार तेल, लोबान, दारु, जैतून को तेल, मैदा, ग्यूँ अर गौर, बल्द, भेड़, घोड़ा, रथ, गुलाम, अर और भि लोग छिन।</verse>
				<verse number="14">“हाँ, जौं अच्छी चीजों तैं पौण की तेरी भौत मनसा छै, ऊ अब त्वेसे दूर ह्‍वे गैनी, अर सुख-बिलास अर वैभव की चीज त्वेसे दूर छिन, अर अब ऊ फिर त्वेतै कभि नि मिलेली।</verse>
				<verse number="15">“अर यों चीजों का व्यापारी जु कि तेरी बदौलत से सेठ ह्‍वे गै छा, ऊ तेरी पीड़ा तैं देखि के डौऽरा बानो दूर खड़ा राला। अर रुवाला अर शोक मणाला अर बुलला कि,</verse>
				<verse number="16">“‘हे बड़ा नगर, त्वे पर हाय च, तू जु मखमल, बैंगनि अर लाल रंग का कपड़ा पैरदी, अर सोना, मोति अर मणियों का द्‍वारा भौत अच्छे से सजीं छैई,</verse>
				<verse number="17">हाय च, त्वे पर किलैकि एक घन्टा मा ही तेरी पूरि दौलत बरबाद ह्‍वे गै।’ “अर हरेक जाज को कप्‍तान अर हरेक मुसाफिर, अर जाज चलौण वळु अर वु सब लोग जु समुन्दर की कमै पर गुजर-बसर करदिन, सब का सब दूर खड़ा रैनी।</verse>
				<verse number="18">अर वींका फूक्योंण का धुंवा तैं देखि के ऊंन चिल्‍लै के बोलि, “‘ये बड़ा नगर का जन दुसरो नगर कुई नि छौ।’</verse>
				<verse number="19">“तब ऊ अपणा मुण्ड़ मा माटु डलला, अर रुवाला अर बड़ु शोक करला अर चिल्‍लै-चिल्‍लै के बुलला, “‘हे बड़ा नगर, त्वे पर हाय च, तू जैकी धन-दौलत से सब जाज वळा सेठ ह्‍वे गै छा, तू एक घन्टा मा ही नास ह्‍वे गै।’</verse>
				<verse number="20">अर येका बाद मिन इन सुणी कि, हे स्वर्ग खुशी मणौ। हे परमेस्वर का रैबर्यों, बिस्वासी भै-बैंणो अर वेका खास चेलों खुशी मणा, किलैकि जै नगर का लोगु न तुमतै सतै छौ परमेस्वर न ऊंतैं दण्ड देके तुमरो बदला ऊं से लियाली।</verse>
				<verse number="21">“तब एक ताकतबर स्वर्गदूत न जन्दरा का पाट की तरौं एक बड़ु डांग उठे के समुन्दर मा ढोळि, अर बोलि, “‘हे बड़ा नगर बेबीलोन, त्वेतै भि इन्‍नि ढुळै जालु, अर तेरु फिर कभि भि पता नि चलण।</verse>
				<verse number="22">अर अब बटि त्वेमा फिर से गीत गाण वळो, बीणा अर बांसुळि बजौण वळो, अर ना ही बिगुले की आवाज फिर से कभि सुण्यालि। अर ना ही कै कारीगर को कुई काम त्वेमा होलु, अर ना ही अब से त्वेमा चक्‍की की आवाज सुण्यालि।</verse>
				<verse number="23">अर ना ही त्वेमा फिर कभि द्‍यू को उज्याळु चमकळु, अर ना ही त्वेमा ब्यौला अर ब्यौलि की आवाज सुण्यालि। अर यू सब इलै होलु किलैकि तेरा दगड़ा मा व्यापार करण वळा धरती का परधान छा, अर तेरा जादु का द्‍वारा सब जाति का लोगु तैं भरमै गै छौ।</verse>
				<verse number="24">हे बेबीलोन, तू वु नगर छैई जैमा परमेस्वर का रैबर्यों, बिस्वासी लोगु अर ऊं सब लोगु को खून बुगये गै, जौं को कत्ल धरती पर किये गै।’”</verse>
			</chapter>
			<chapter number="19">
				<verse number="1">येका बाद मिन स्वर्ग मा एक बड़ी भीड़ की सि आवाज सुणी, अर लोग ऊँची आवाज मा इन बोन्‍ना छा कि, “हाल्‍लेलूय्याह, आदर-सम्मान, ताकत अर बचौण वळु हमरु परमेस्वर ही च,</verse>
				<verse number="2">किलैकि वेको न्याय सच्‍चु अर सही च, अर वेन वीं बड़ी वेश्या तैं दण्ड दियाली, जिं न गळत सम्बन्ध बणौण से धरती तैं भ्रष्‍ट कैरी दिनी, अर परमेस्वर का भौत सा सेवकों तैं जान से मार दिनी, इलै परमेस्वर न वीं बटि अपणा सेवकों का ल्वे को बदला लिनी।”</verse>
				<verse number="3">फिर दुसरि बार ऊंन बोलि, “हाल्‍लेलूय्याह, हे बेबीलोन नगर तेरा फूक्योंण को धुंवा हमेसा-हमेसा तक उड़णु रालु।”</verse>
				<verse number="4">तब मिन देखि, कि स्वर्ग मा पिता परमेस्वर राजगद्‍दी पर बैठयूं च, अर चौबीस अध्यक्षों न अर चार ज्यून्दा पराणों न भ्वीं मा पोड़ि के वेकी भक्‍ति कैरिके बोलि, “आमीन, हाल्‍लेलूय्याह।”</verse>
				<verse number="5">फिर राजगद्‍दी बटि एक आवाज ऐ, “हे हमरा परमेस्वर का सेवकों, तुम जु की वे पर अपणी सरदा बणै के रखद्‍यां, अब चै तुम खास छाँ या साधारण, तुम सब परमेस्वर की तारीफ कैरा।”</verse>
				<verse number="6">फिर मिन बड़ी भीड़ की आवाज सुणी, ज्वा की तेज लैरों का जन अर बादळों की गगड़ाट की तरौं छै अर ऊंन बोलि, “हाल्‍लेलूय्याह, हमरु प्रभु परमेस्वर न जु की सर्वसक्‍तिमान च वेन राज करण शुरु कैरियाली।</verse>
				<verse number="7">इलै आ, हम खुशी अर आनन्द मणौन्द्‍यां, अर परमेस्वर की बडै करद्‍यां, किलैकि मेम्‍ना का ब्यौ को बगत ऐ गै, अर वेकी ब्यौलि न खुद तैं तयार कैरियाली।</verse>
				<verse number="8">अर ब्यौलि तैं यू अधिकार दिये गै कि वा चमकदार, साफ अर अच्छु मखमल पैरि के खुद तैं सजौ।” (अर मखमल पैनण को मतलब इन च कि परमेस्वर अपणा लोगु का भलै का कामों से खुश च)।</verse>
				<verse number="9">फिर स्वर्गदूत न मिकू बोलि, “लिख ले, धन्य छिन ऊ, जु मेम्‍ना का ब्यौ की दावत मा न्यूत्यां छिन।” अर वेन इन भि बोलि, “यू परमेस्वर का सच्‍चा वचन छिन।”</verse>
				<verse number="10">तब मि स्वर्गदूत की भक्‍ति करणु खुणि वेका खुटों मा पोड़ि ग्यों। मगर वेन मिकू बोलि, “यूहन्‍ना इन नि कैर, बल्किन मा केवल परमेस्वर की ही भक्‍ति कैर, किलैकि मि भि तेरा अर तेरी ही तरौं बिस्वासी भै-बैंणो का जन एक सेवक छौं, जौन यीशु का बारा मा गवै देण को काम कैरी। मि त केवल परमेस्वर को रैबार देण वळु छौं, अर तुम लोग यीशु की गवै पर बिस्वास करद्‍यां अर हम सब वेका सेवक छां।”</verse>
				<verse number="11">फिर मिन स्वर्ग तैं खुल्यूं देखि, अर एक सफेद घोड़ा छौ अर जु वेमा सवार च वेकू भरोसेमन्द अर सच्‍चु बुले जान्दु। अर वेको न्याय सच्‍चु च अर वेको युद्ध करण को तरीके सही च।</verse>
				<verse number="12">वेका आंखा आग की झौऽळ की तरौं छिन, अर वेका मुण्ड़ पर भौत सा मुकुट रख्यां छिन। अर वेको नौ वे पर लिख्यूं च, जैको मतलब वेका अलावा और कुई भि नि जणदु,</verse>
				<verse number="13">अर वेन ल्वे मा डुबयूं कपड़ा पैरयूं च, अर वेको नौ “परमेस्वर को वचन च।”</verse>
				<verse number="14">अर स्वर्ग की सेना वेका पिछनै-पिछनै चमकिला सफेद मखमल का कपड़ा पैरि के अर सफेद घोड़ो पर सवार ह्‍वेके औणी च।</verse>
				<verse number="15">अर वेका गिच्‍चा बटि एक पैनी तलवार निकळणी छै, ताकि उ देस-देस का बुरा लोगु को नास वीं तलवार से कैरो। अर वु लोखरो जांठु लेके बड़ी सख्‍तै से सासन करलु, अर सर्वसक्‍तिमान परमेस्वर का परकोप का द्‍वारा वे रसकुण्ड मा ऊंतैं एक रस की तरौं पितेड़ द्‍यालु।</verse>
				<verse number="16">अर वेका कपड़ों पर अर जंगुड़ा पर जु नौ लिख्यूं च, उ इन च,</verse>
				<verse number="17">अर फिर मिन एक स्वर्गदूत तैं देखि जु की सूरज का बीच खड़ु होयुं छौ, अर वेन ऊँची आवाज मा सब किसम का पंछियों कू बोलि, “इख आ, अर परमेस्वर की बड़ी दावत खुणि जमा ह्‍वे जा,</verse>
				<verse number="18">ताकि तुम राजाओं अर सेनापतियों को, बलवान अर घोड़ो पर सवारों को, आजाद अर गुलामों को, साधारण अर खास लोगु की सिकार खै सैका।”</verse>
				<verse number="19">फिर मिन दैंत अर धरती का राजाओं अर ऊंकी पलटणो तैं देखि, जु कि सफेद घोड़ा पर सवार अर वेकी पलटण का खिलाप मा युद्ध करणु खुणि जमा होयां छा।</verse>
				<verse number="20">तब दैंत पकड़ै गै, अर वेका दगड़ा-दगड़ि झूठ्‍ठु रैबर्या भि पकड़ै गै जु की दैंत का द्‍वारा चमत्कार दिखै के लोगु तैं भरमै देन्दु छौ। अर यू वु लोग छा जु कि मूरत की पूजा करदा छा अर ऊं पर दैंत की मोर लगीं छै, तब यों दुईयों तैं ज्यून्द ही वीं आग की झील मा डळै गै, ज्वा कि गंधक से जगणी रौन्दी।</verse>
				<verse number="21">अर सफेद घोड़ा पर सवार का गिच्‍चा बटि ज्वा तलवार निकळणी छै वींका द्‍वारा पलटण का लोग मरे गैनी। अर सब पंछियों न पुटगु भोरी के ऊंकी सिकार खै।</verse>
			</chapter>
			<chapter number="20">
				<verse number="1">तब मिन एक स्वर्गदूत तैं स्वर्ग बटि उतरद देखि, अर वेका हाथ मा अधलोक की चाबी अर एक बड़ु संगुळु छौ।</verse>
				<verse number="2">अर वेन खुंखार रागस तैं एक हजार साल तक संगुळों मा बान्धि के रखी। अर यू खुंखार रागस उ च जैकू पुरणु गुरौ, दुसरो पर दोष लगौण वळु, जैकू शैतान बुले जान्दु।</verse>
				<verse number="3">अर स्वर्गदूत न वेतैं अधलोक मा ढोळि दिनी, अर अधलोक तैं बन्द कैरिके वे पर मोर लगै दिनी, ताकि जब तक एक हजार साल पूरा नि ह्‍वे जा, तब तक उ देस-देस का लोगु तैं भरमै नि सैको। अर येका बाद जरुरी च कि वेतैं कुछ देर खुणि छुड़ै जौ।</verse>
				<verse number="4">तब मिन राजगद्‍दी देखि अर ऊं लोग की आत्माओं तैं भि देखि जु कि राजगद्‍दी पर बैठयां छा, जौं का मुण्ड़ यीशु की गवै देण अर परमेस्वर का वचन तैं बतौण की वजै से कटै गै छौ। अर यू वु आत्मा छिन जौं तैं परमेस्वर न न्याय करण को अधिकार दिनी। अर यों न नऽ त दैंत की, अर ना ही वेकी मूरत की पूजा कैरी, अर ना ही अपणा माथा या हाथ पर वेकी मोर लगवै, वु सब ज्यून्दा ह्‍वे गैनी, अर ऊंन राजा बणि के मसीह का दगड़ा मा एक हजार साल तक राज कैरी।</verse>
				<verse number="5">अर मुरदो मा बटि ज्यून्द होण को यू ही पैलु बगत च, अर यू लोग धन्य अर पवित्र छिन किलैकि यों पर दुसरि मौत को कुई अधिकार नि च। अर यू लोग पिता परमेस्वर अर यीशु मसीह का पुरोहित होला, अर एक हजार साल तक वेका दगड़ा मा राज करला। अर जब तक की एक हजार साल पूरा नि ह्‍वे गैनी, तब तक दुसरा मुरयां लोग ज्यून्दा नि ह्‍वेनि।</verse>
				<verse number="6"></verse>
				<verse number="7">अर जब एक हजार साल पूरा ह्‍वे जाला, तब परमेस्वर शैतान तैं कैद से आजाद कैरी द्‍यालु।</verse>
				<verse number="8">अर उ धरती का सब देसों तैं भरमौण खुणि निकळळु, तब गोग अर मागोग दुनियां का लोगु तैं परमेस्वर का लोगु का खिलाप मा युद्ध करणु खुणि इकट्‍ठा करला। अर ऊंकी गिनती समुन्दर का बळा का जन होलि, जौं तैं कुई गिणी नि सकदु।</verse>
				<verse number="9">फिर ऊ पूरि धरती पर फैली गैनी, अर ऊंन परमेस्वर का प्यारा नगर तैं घेरि दिनी जख परमेस्वर का पवित्र लोग रौन्दिन। तब स्वर्ग बटि परमेस्वर की आग ऐ अर वींन ऊंको नास कैरी दिनी।</verse>
				<verse number="10">तब शैतान तैं जैन ऊं लोगु तैं भरमै छौ परमेस्वर का द्‍वारा वीं आग अर गंधक का कुण्ड मा डळै गै, जख दैंत अर झूठ्‍ठा रैबर्या तैं डळै गै छौ। अर उख ऊ दिन-रात हमेसा-हमेसा खुणि पीड़ा मा तड़पणा राला।</verse>
				<verse number="11">तब मिन सफेद रंग की एक बड़ी राजगद्‍दी देखि, और परमेस्वर वेमा बैठयूं छौ। अर वेका होण से धरती अर आसमान भागी गैनी अर ऊंतैं कखि जगा नि मिली।</verse>
				<verse number="12">तब मिन राजगद्‍दी का समणि छुटा-बड़ा सब मुरयां लोगु तैं खड़ु होयुं देखि, अर किताब खुलै गैनी अर वेका बाद एक और किताब खुलै गै ज्वा कि जीवन की किताब च। अर यों किताबों मा लिखी बातों का मुताबिक ही, सब मुरयां लोगु को न्याय ऊंका कामों का मुताबिक किये गै।</verse>
				<verse number="13">अर समुन्दर न अपणा मुरदो तैं खड़ु कैरी दिनी, अर जु अधलोक मा छा अर जु कबरुन्द रखै गैनी, ऊंन भि अपणा मुरदो तैं खड़ु कैरी दिनी, अर हरेक मनखि को न्याय ऊंका कामों का मुताबिक किये गै।</verse>
				<verse number="14">अर येका बाद मौत अर अधलोक तैं भि आग का कुण्ड मा डळै गै अर या ही दुसरि मौत च।</verse>
				<verse number="15">अर जै-जै को नौ जीवन की किताब मा लिख्यूं नि मिली, ऊ भि वीं आग का कुण्ड मा डळै गैनी।</verse>
			</chapter>
			<chapter number="21">
				<verse number="1">तब मिन एक नयू स्वर्ग अर एक नयी धरती देखि, अर पैलु आसमान अर पैलि धरती गैब ह्‍वे गै छै, अर समुन्दर भि नि रै।</verse>
				<verse number="2">फिर मिन पवित्र नगर, नया यरूशलेम तैं, परमेस्वर की तरफा बटि स्वर्ग बटि मूड़ी उतरद देखि। अर उ इन सज्युं छौ जन कि ब्यौलि अपणा ब्यौला खुणि सजीं रौन्दी।</verse>
				<verse number="3">फिर मिन राजगद्‍दी बटि कैतैं एक तेज आवाज मा इन बुल्द सुणी, “देख, परमेस्वर को डेरा मनखियों का बीच मा च, अर अब वु ऊंका बीच मा रालु, अर ऊ वेका लोग होला। अर परमेस्वर खुद ऊंका बीच मा रालु।</verse>
				<verse number="4">अर परमेस्वर ऊंका आंख्यों का सब आंसुओं तैं फुंजी द्‍यालु, फिर नऽ त मौत रैलि, ना शोक, नऽ रुंण-धुण अर ना ही कुई पीड़ा, किलैकि जु बात पैलि छै अब वु सब खतम ह्‍वे जालि।”</verse>
				<verse number="5">तब जु राजगद्‍दी पर बैठयूं छौ वेन बोलि, “देख, मि सब कुछ नयू बणौणु छौं।” अर वेन फिर मिकू बोलि, “लिख ले, किलैकि यू वचन भरोसा का लैख अर सच्‍चा छिन।”</verse>
				<verse number="6">अर वेन मिकू इन भि बोलि, “यू सब बात पूरि ह्‍वे गैनी, मि ही पैलु अर आखिरी छौं, शुरुवात अर आखिरी मि ही छौं। जैतैं तीस लगीं हो वेतैं मि जीवन देण वळा पाणि का छोया मा बटि मुफत मा पिलौलु।</verse>
				<verse number="7">अर जु जीत हासिल करलु वेतैं विरासत मिलेली, अर मि वेको परमेस्वर होलु अर उ मेरु पुत्र होलु।</verse>
				<verse number="8">मगर डऽरपोक अर जु बिस्वास नि करदिन, अर अशुद्ध अर जु घिण वळा काम करदिन, अर कत्ल करण वळा, अर गळत सम्बन्ध बणौण वळा छिन, अर जु लोग जादु-टोंणा अर मूरत पूजा करदिन, अर सब झूठ्‍ठ बोन्‍न वळा लोगु को हिस्सा वीं आग मा होलु, ज्वा की गंधक से जगणी रौन्दी। अर या ही दुसरि मौत च।”</verse>
				<verse number="9">फिर जौं सात स्वर्गदूतों का पास सात आखिरी विपदा से भोर्यां सात कटोरा छा, ऊं मदि एक न मेरा पास ऐके बोलि, “यूहन्‍ना इख अऽ, मि त्वेतै वा जगा दिखान्दु जख बिस्वासी समुदाय का लोग यीशु से मिलणु खुणि तयार छिन, ठिक उन्‍नि जन एक ब्यौलि अपणा ब्यौला खुणि तयार रौन्दी।”</verse>
				<verse number="10">तब पवित्र आत्मा मितैं अपणा ताकत से एक भौत ऊँचा अर बड़ा ढौंडा मा लि गै, अर वेन मितैं पवित्र नगर यरूशलेम दिखै, जु कि स्वर्ग बटि परमेस्वर का पास से मूड़ी उतरणु छौ।</verse>
				<verse number="11">जु कि परमेस्वर की दिब्य चमक से चमकणु छौ। वेकी चमक भौत मैंगा हीरा की तरौं, अर सूर्यकान्त मणि की तरौं चमकीली छै।</verse>
				<verse number="12">नगर की दिवाल भौत बड़ी अर ऊँची छै, अर वेमा बारह गेट छा। अर यों पर बारह स्वर्गदूत बैठयां छा, अर ऊं गेटों पर इस्राएल का बारह गोत्रों का नौ लिख्यां छा।</verse>
				<verse number="13">तीन गेट पूरब दिसा की तरफा, अर तीन गेट उत्तर दिसा की तरफा, तीन गेट दक्छिण दिसा की तरफा छा अर तीन गेट पच्छिम दिसा की तरफा छा।</verse>
				<verse number="14">अर ये नगर की दिवाल बारह बुनियादो पर खड़ि छै, अर ऊं पर यीशु का बारह खास चेलों का नौ लिख्यां छा।</verse>
				<verse number="15">अर जु स्वर्गदूत मेरा दगड़ा मा बात कनु छौ, वेमा ये नगर अर वेकी दिवालों अर वेका गेटों तैं नपणु खुणि सोना को एक फीता छौ।</verse>
				<verse number="16">यू नगर चौकोर छौ अर यू जथगा लम्बो छौ उथगा ही चौड़ु भि छौ। अर वेन वे फीतळ नगर तैं नापी, त बाइस सौ किलोमीटर निकळि। अर ये नगर की लम्बै-चौडै अर वेकी ऊंचै एक ही जन छै।</verse>
				<verse number="17">तब वेन दिवाल तैं नापी, त वा एक सौ चवालीस हाथ की छै, जै नाप से स्वर्गदूत नपणु छौ उ नाप मनखियों का नाप का बराबर छौ।</verse>
				<verse number="18">अर ये नगर की दिवाल सूर्यकान्त मणि की बणि छै, अर नगर साफ काँच की तरौं शुद्ध सोना को छौ।</verse>
				<verse number="19">अर दिवाल की बुनियाद सब किसम का मैंगा मणियों से सजीं छै। लाल रंग को पैलु मणि सूर्यकान्त छौ। नीला रंग को दुसरो मणि नीलम छौ, भूरणयां रंग को तिसरु मणि गौदन्ती छौ। अर हरयां रंग को चौथुँ मणि पन्‍ना छौ।</verse>
				<verse number="20">हल्का लाल रंग को पांचु मणि गोमेद छौ। लाल रंग को छटुं मणि माणिक्य छौ, सोना का रंग की तरौं सातु मणि पीतमणी छौ। अर नीला रंग की तरौं आठु मणि फिरोजे छौ, पीला रंग की तरौं नवु मणि पुखराज छौ। अर खाकी रंग को दसुं मणि लहसुनिया छौ, हल्का नीला रंग को ग्यारु मणि धुम्रकान्त छौ, अर बैंगनि रंग को बारु चन्द्रकान्त को छौ।</verse>
				<verse number="21">अर बारह गेट बारह मोतियों का बणयां छा, हरेक गेट एक-एक मोति को बणयूं छौ। अर नगर की सड़क साफ काँच की तरौं शुद्ध सोना की बणि छै।</verse>
				<verse number="22">मिन वे नगर मा कुई मन्दिर नि देखि, किलैकि सर्वसक्‍तिमान प्रभु परमेस्वर, अर यीशु ही वेको मन्दिर च।</verse>
				<verse number="23">वे नगर तैं उज्याळु देणु खुणि सूरज अर चाँद की जरुरत नि च, किलैकि परमेस्वर को तेज वेतैं उज्याळु देन्दु, अर यीशु वेको द्‍यू च।</verse>
				<verse number="24">अर सब जाति का लोग वे नगर का उज्याळा मा चलला अर धरती का राजा अपणी धन-दौलत मा बटि वेमा लेके आला।</verse>
				<verse number="25">अर वेका गेट कभि भि बन्द नि होला, किलैकि उख कभि भि रात नि होलि।</verse>
				<verse number="26">अर देस की धन-दौलत अर सान-सौकत नगर मा लये जालि।</verse>
				<verse number="27">अर कुई भि अशुद्ध चीज, अर ना ही कुई इन्द्रयो मनखि जु कि इन्द्रया काम करदु हो ज्यां से की घिण अऽ, या झूठ्‍ठ बुल्दु हो इन्द्रया लोग वेमा कभि दाखिल नि ह्‍वे सकला। मगर जौं को नौ जीवन की किताब मा लिख्यां छिन उई लोग वेमा दाखिल होला, अर या किताब यीशु मसीह की च जु कि मेम्‍ना की तरौं बलिदान ह्‍वे गै।</verse>
			</chapter>
			<chapter number="22">
				<verse number="1">अर वेका बाद वे स्वर्गदूत न मितैं जीवन देण वळी गाड दिखै, ज्वा की साफ काँच की तरौं छै, अर या गाड परमेस्वर अर यीशु की राजगद्‍दी बटि निकळि के बुगणी छै।</verse>
				<verse number="2">अर या गाड वे नगर का बाटा का बीचों-बीच बुगणी छै। अर गाड का दुई छालों पर जीवन का डाळा लग्यां छा, जौं पर बारामास बारह किसम का फल लगदिन। अर यों डाळों का पत्ता देस मा रौण वळा लोगु का रोग दूर करणु खुणि छिन, अर ऊंका फल जीवन देणु खुणि छिन।</verse>
				<verse number="3">फिर उख कै पर भि असगार नि लग्यूं होलु, अर ये नगर मा परमेस्वर अर यीशु की राजगद्‍दी होलि, अर परमेस्वर का सेवक वेकी भक्‍ति करला।</verse>
				<verse number="4">अर वु परमेस्वर तैं अपणा समणि दिखला अर वेको नौ ऊंका माथा पर लिख्यूं होलु।</verse>
				<verse number="5">फिर उख कभि भि रात नि होलि अर ना ही ऊंतैं सूरज या द्‍यू का उज्याळा की जरुरत होलि, किलैकि प्रभु परमेस्वर खुद ऊंको उज्याळु होलु, अर ऊ हमेसा-हमेसा तक राज करला।</verse>
				<verse number="6">फिर स्वर्गदूत न मिकू बोलि, “प्रभु परमेस्वर जु कि अपणा रैबर्यों तैं अपणी बातों बतौन्दु। ऊंन मितैं तेरा पास भेजि कि मि त्वेतै ऊं बातों का बारा मा बतौ जु कि जल्द पूरि होण वळी छिन। अर यू सब बात सच्‍चि अर भरोसा करण का लैख छिन।</verse>
				<verse number="7">“तब यीशु न मिकू बोलि कि, ‘देखा, मि जल्द औण वळु छौं। धन्य च उ, जु ईं किताब मा लिखी भविष्यबाणी का वचनों तैं मणदु च।’”</verse>
				<verse number="8">मि यूहन्‍ना न यों सब बातों तैं देखि अर सुणी च। अर जब मिन यू देखि अर सुणी, त जु स्वर्गदूत मितैं यू सब बात दिखाणु छौ, मि वेकी भक्‍ति करणु खुणि वेका खुटों मा पोड़ि ग्यों,</verse>
				<verse number="9">मगर वे स्वर्गदूत न मिकू बोलि, “यूहन्‍ना इन नि कैर, किलैकि मि भि तेरी तरौं एक सेवक छौं। अर ठिक उन्‍नि दुसरा बिस्वासी भै-बैंणो अर जु लोग रैबर्या छिन ऊंकी ही तरौं छौं जु कि ईं किताब मा लिखीं बातों का मुताबिक चलदिन, इलै केवल परमेस्वर की ही भक्‍ति कैर।”</verse>
				<verse number="10">तब वेन मिकू बोलि, “ईं किताब मा लिखीं भविष्यबाणी की बातों तैं नि छिपौ, किलैकि ऊंको पूरु होण को बगत नजदीक ऐ गै।</verse>
				<verse number="11">अर जु अन्यो करदु, वु भले ही अन्यो कनु रौ, अर जैको चाल-चलन ठिक नि च वु भले ही गन्दा काम करण मा लग्यूं रौ, मगर जु मनखि परमेस्वर की नजर मा धरमी च उ भलै का काम करण पर लग्यूं रौ, अर जु पवित्र च उ पवित्र बणयूं रौ।”</verse>
				<verse number="12">तब यीशु न मिकू बोलि, “देख मि जल्द ही औण वळु छौं, अर हरेक मनखि तैं वेका कामों का मुताबिक बदला मा दिये जालु।</verse>
				<verse number="13">‘अल्फा’ अर ‘ओमेगा’ मि ही छौं, पैलु अर आखिरी मि ही छौं। अर मि ही शुरुवात अर आखिरी छौं।”</verse>
				<verse number="14">धन्य छिन ऊ, जौन अपणा कपड़ा धुईन, अब ऊंका पास जीवन का डाळा को फल खाणु को अर गेट से नया यरूशलेम नगर मा दाखिल होण को अधिकार च।</verse>
				<verse number="15">मगर नीच काम करण वळा, जादु-टोंणा करण वळा अर गळत सम्बन्ध रखण वळा, हत्या अर मूरत की पूजा करण वळा, अर झूठ्‍ठ बुलण वळा सब नगर से भैर ही राला।</verse>
				<verse number="16">“मि यीशु छौं, अर यू सब बात तुमतै बतौणु खुणि मिन अपणु स्वर्गदूत भेजि, ताकि बिस्वासी समुदाय का लोगु को भलु हो। मि राजा दाऊद का वंश मदि छौं, अर सुबेर को चमकण वळु गैंणो भि मि ही छौं जु कि एक नया दिन को चिन्‍न च।”</verse>
				<verse number="17">पवित्र आत्मा अर ब्यौलि इन बिन्ती करदी, “अऽ” अर सुनण वळा भि बोला, “अऽ” जु तिसळु च, उ “अऽ” अर जु मेरा पास औण चान्दु वु भि “अऽ” अर मुफत मा जीवन को पाणि लेके जौ।</verse>
				<verse number="18">अर मि ईं किताब मा लिखी भविष्यबाणियों तैं सुनण वळा हरेक तैं इन चितै देन्दु कि अगर कुई यां मा कुछ भि जुड़दु, त यां मा लिखी पीड़ा परमेस्वर वे पर डललु।</verse>
				<verse number="19">अर ठिक इन्‍नि अगर कुई भविष्यबाणियों की ईं किताब मा बटि कुछ हटालु, त परमेस्वर वेतैं सदनि को जीवन देण वळा डाळा मा बटि नि खाण द्‍यालु, अर ना ही अपणा पवित्र नगर मा दाखिल होण द्‍यालु।</verse>
				<verse number="20">अर यीशु जु कि यों सब बातों की गवै देन्दु उ इन बुल्दु, “हाँ, मि जल्द औण वळु छौं।”हे मेरा प्रभु यीशु, जल्द अऽ। आमीन।</verse>
				<verse number="21">प्रभु यीशु की किरपा तुम पर हो। आमीन।</verse>
			</chapter>
		</book>
	</testament>
</bible>