Ŋwa'nyə nə ŋkhənyə Yeso Kristo mú David, mú Abraham. Abraham lə tsə́ Isak, Isak tsə́ Yakop, Yakop tsə́ Yuda pu a mfɑ pyə́, Yuda pu Tamar tsə́ Farɛs ba Zora, Farɛs tsə́ Esrom, Esrom tsə́ Aram, Aram tsə́ Aminadab, Aminadab tsə́ Nasoŋ, Nasoŋ tsə́ Salmoŋ, Salmoŋ pu Rahab tsə́ Boos, Boos pu Rut tsə́ Obɛb, Obɛb tsə́ Yese, Yese tsə fo David, David pu jwi Uria tsə́ Salomoŋ, Salomoŋ tsə́ Roboam, Roboam tsə́ Abia, Abia tsə Asaf, Asaf tsə Yosafat, Yosafat tsə́ Yɔram, Yɔram tsə Osia, Osia tsə Yɔatam, Yɔatam tsə́ Akaz, Akaz tsə Ezekias, Ezekias tsə́ Manase, Manase tsə́ Amoŋ, Amoŋ tsə́ Yozia, Yozia tsə́ Yekonia pu a mfɑ pyə, nə cwə yə pu lə lɑ pɑ Israɛl gɔ m Babilon a. Pɑ Israɛl lə fɑ̌ Babilon, Yekonia tsə Salatiɛl, Salatiɛl tsə́ Zorobabɛl, Zorobabɛl tsə́ Abiud, Abiud tsə́ Eliakim, Eliakim tsə Azɔr, Azɔr tsə́ Sadɔk, Sadɔk tsə́ Akim, Akim tsə́ Eliud, Eliud tsə́ Eleazar, Eleazar tsə́ Matan, Matan tsə́ Yakop, Yakop tsə́ Yosɛp dhə́ Maria, ma Yeso yə pu ŋkhe e gɑ Kristo a. Guŋ Ŋkhənyə Yeso tə fɑ nə Abraham gɔ ŋkhəm nə David bɑ m zhəŋ shwɔppfʉə m gham; biŋ fɑ nə David gɔ ŋkhəm nə cwə Babilon bɑ m zhəŋ shwɔppfʉə m gham, fɑ nə cwə Babilon gɔ ŋkhəm nə Kristo bɑ mzhəŋ shwɔppfʉə mgham. Pɑ yu' pa' pu lə tsə Yeso a. Yosɛp lə ko nə map e Maria. Da' gɑ́ pu e lə yɑtə wuŋ dɔmdyə, gʉ' Zhwenyə Dɔlɔ̌ ghə e pɑ tsʉ̌m. Yosɛp, dhə e yə e lə bɑ́ mo dəŋdəŋ, la' e pɑwə shəŋ nə lɑ sǒ ŋkhu Maria sɔsɔ̌ á, lə nyəŋ nə təm nə e pɑ́ m jʉmjʉ̀m. E lə sɛ nə ghə po'o, da'gɑ́ aŋgəle Cyəpɔ sɔ' bi e m nthʉm jʉ̀m gɔm bi e gɑ: Yosɛp mu David, kɑ pwɔk nə lɑ Maria jwi o la' o, nə pa' tsʉ̌m é fɑ m nə Zhwenyə Dɔlɔ̌ a. E nəŋ gɔ sɔ' tsə́ mú mbɛ, o ke é gɑ́ Yeso, nə pa' yʉ́ nə gɔ sɔ' vɔ́k pɔ pyə nə mhɔ máp a. Guŋ mnwə bɔ lə nthəm po'o gɑ guŋ ywə yə Cyəpɔ lə cyə m nə gɔm ghɔm Si gɔm á a pəmtə gɑ: Gò tə wuŋ jyə m bɛ gɔ sɔ' pɑ́ tsʉ́m, tsə mú mbɛ, pú ke tsó tsyə́ gɑ Emanuɛl, a pɑ nthutə' gɑ: Si bɑ cəcɑ̌ pɑ. Yosɛp lə yǎm gə ywə yə aŋgəle Cyəpɔ lə ghɔm bi a: E lə lɑ Maria jwi é dyə é, da' gɑ e lə zhyə e, tə e la' dzə mú mbɛ tə e cwətso tsyə gɑ Yeso. Pú dzə́ Yeso Bɛtəlehɛm m Yudea, nə cwə fo Herode. Shɑ́ mghɛ zhyə́ sɛ fɑ ghəŋ nthəm nam ŋwak Yerusalɛm dzɑ́tə́ gɑ: Fo pɑ Yudea yə pu bɑwə tə́ dzə́ e a hɑ? Nə pa' pyə yɔ sɛ tsyə́ ghəŋ nthəm nam tə́ sɔ' m nə ghamtə e. Fo Herode lə nə yu' mcuŋ bɔ, a va' e, ba guŋ Yerusalɛm awɛ. E lə cu'tə guŋ mkamsi gwyəgwyə awɛ pu a guŋ pɑ zhyɛ mco' awɛ nthʉm guŋ, həŋtə́ wap tsʉ' yə pu lə gɔ la' tsə́ Mesia nə a. Wap ghɔm bi e gɑ: M Bɛtəlehɛm m Yudea, nə pa' ywə yə gɔ̀m ghɔ̀m Si lə və a bɑ gɑ: Wə Bɛtəlehɛm, cǎ' pɑ Yudea, o tə bɑ jʉɔjʉ̀m nə mtisuŋ pɑ Yudea pɑ; nə pa' Fo yə e gɔ sɔ' pɑ cya pɑ Israɛl pɔ pɑ̌ a gɔ sɔ' təm bu. A lə pɑ po'o, fo Herode ghə pu ké mghɛ zhyə sɛ m càm e həŋtə wap kwa' cwə yə sɛ bɔ kɑ təm a, tə biŋ nə təm wap Bɛtəlehɛm gɔm bi pu gɑ́: Po ghɔ shəŋtə həŋtə́ mcuŋ nə mu bɔ̌; cwə yə pɔ yɔ e a po ghə ŋ jyə, po'o gɑ ba myə̀ ghɔ gamtə e yɑ̌. Wap lə yu' ghɔm fo cwəlɔ, ntham məjyə; sɛ tsyə wap kɑ yɔ̌ ghəŋ nthəm nam a ghiŋ bɑ dzə pu tə gɔ nthiŋnyə dəm tsʉ' yə mu bɔ lə bɑ nə a. Wap lə nə yɔ sɛ cwəlɔ kwa' mɑ ŋwɛnyə ko nə pu. Wap lə kodyə, jɔ mú pu Maria map e; ŋkham mkwi'tə map dzə é, gamtə e, biŋ ntha' mpʉə map cwəlɔ, hɑ tʉ́ɔ gɔl, ba phə tʉɔdəŋ pú a mwɑ̌ tʉɔdəŋ bi e. Si lə cyə́ m nthʉm jʉm biŋ gɔm bi pu gɑ́ wap kɑ piŋ bɑnyə bəŋ Herode, wap lə cyə m nə mu' məjyə dyɛ' bɑnyə gǔŋ pú. Mghɛ zhyə sɛ lə cwə́ tə gɔ̌, aŋgəle Cyəpɔ sɔ' bi Yosɛp m nthʉ̌m jʉ̀m gɔm bi e gɑ: Lusi dɑ mú pu map e ŋkhʉ gɔ Egipto, shwə wə tə ŋkhəm cwə yə gɑ ghɔm a, nə pa' Herode wə gɔ cə́ŋ mú nə zhwə e. Yosɛp lə lusi pɑ mtsʉ' dɑ mú pu map e gɔ Egipto. E lə cwə́ wə́ tə ŋkhəm cwə yə Herode lə pfʉ a, po'o gɑ ywə yə Cyəpɔ lə ghɔm shyə m nə gɔm ghɔm Si a, a pəmtə gɑ: Gɑ̌ ke mú a, nthé é Egipto. Herode lə nə yɔ gɑ́ mghɛ zhyə sɛ fʉtə e, nwə pɔk e, e təm gɑ pu ghɔ Bɛtəlehɛm, ba m nthʉm guŋ e awɛ, jwətə guŋ pɔ awɛ tə ŋkhəm nə gu' pʉ́ə, dəŋ pa' mghɛ zhyə sɛ lə siŋ e a. A pɑ po'o ywə yə Yeremia gɔm ghɔm Si lə ghɔm a, a pəmtə gɑ: Pu yu' gi mo Rama, e pɑwə dɔ̌ biŋ bɑwə shwe; Lachɛl nə dɔ po pyə, la' e pɑwə biŋ gɑ mo zhwyətə e, nə pa' po pyə tə yɑwə pɑ́. Herode lə cwə tə pfʉ́, aŋgəle Cyəpɔ sɔ' bi Yosɛp nthʉ́m jʉ̀m Egipto gɔm bi e gɑ: Lusi dɑ mú pú map e bɑnyə Israɛl; pɔ pyə wáp lə bɑ́wə shəŋ nə zhwə mu a pfʉ́tə. Yosɛp lə lusi cwəlɔ dɑ mu pu map e, bɑnyə Israɛl, da' gɑ́ e lə nə yu' gɑ Arkelao nə wə́ sa' guŋ pɑ Yudea nə yə tsʉ' tap e Herode, bwɔk nə ghɔ wə́; Si lə ghɔmnwə bi e m nthʉm jʉm, e lɑ m Galilea gɔ shwə nə mu' tisuŋ pu ke gɑ Nazarɛt po'o gɑ ywə yə mghɔm ghɔm Si lə la' gɔm a pəmtə gɑ: Pu gɔ sɔ' ké é gɑ yə Nazarɛt. A lə pɑ́ cwə o bɔ̌ Yohane nu' pɔ shyə tə́m ghakgo Yudea bɑ siŋ gɑ: po kwyəpnyə: Nəfo kɛbəŋ ghɔptə. Yohane bɑ́ mo yə Esaya gɔm ghɔm Si lə ghɔmnwə nə e nə cwə yə́ e lɑ́ gɔm gɑ: Gi mo ghakgo shwe gɑ: Po nyaptə məjyə Cyəpɔ po siŋ mpim jyə myə́ a tiŋnyə. Dzə Yohane lə́ bɑ dzə mnəŋ Kamelo, tap e pɑ vʉ' e bɑ gwɔp. Ywətsʉ́ e lə bɑ gam biŋ gə ŋwa' gó. Pɑ Yerusalɛm, pu a pɑ Yudea ba guŋ pɑ giŋnyə shyə Yurdɛŋ awɛ lə sɔ' bi e. Wap lə sɔ' po'o bɑ biŋ mhɔnwə map lə Yohane pɑ nu' wap shyə Yurdɛŋ. Yohane lə nə yɔ pa' pɑ Farisai pu a pɑ Sadukai tə́ jɔm wə sɔ' gɑ e nu' wap shyə a gɔm bi pu gɑ: Gwya nɔk mtiŋ, wɑ da'tə wɔ məjyə nə ŋkhʉ yɛluŋ Si yə a wə sɔ'a? Po yam nthɔm myə a ku'nyə nə pɔ pyə wap pʉɔ tʉm tsap a. Ka po pɑ́ gɔm pɑ́ gɑ tá yɔk bɑ Abraham. Nə pa' gɑ siŋ wɔ gɑ pɑ Si lɑ mwɔ' mɔ gɑ nə gə pó bi Abraham. A nə pɑ po'o bɑ jɔm e da' bɑ to ta' thə́. Bǎ ya ta'thə yə a tə jam nthɔm pɑpuŋ a pɑ, pu gɔ ko', to mɔk. Gɑ bɑwə nu' wɔ pɑ nthʉm shyə gɑ po pʉɔ tʉm tsɔ. Da' gɑ mo yə ě wə sɔ' jʉ̌m m̀ a wə bɑ ě tʉɔ shyə́ a; ŋ kha ku'nyə nə tɔk mnthap myə́. E gɔ sɔ' nu' wɔ nthʉm Zhwenyə Dɔlɔ̌ ba m nthʉm mɔk. Mo bɔ bɑ e wim su nə nthyá ywə nə mgha' myə́ pu é. E gɔ khʉm msɛ tʉɔ nyəŋ ŋkhiŋ, piŋ to mgha' myə́ nə mɔk tɑ́ pi. A lə pɑ po'o, Yeso fɑ Galilea, sɔ' Yurdɛŋ bəŋ Yohane, gɑ́ é nu' é shyə. Yohane lə pɑ́ shə́ŋ nə kəŋnyə, bɑ gɔm gɑ: Myə̀ nə kɑ bɑ gɔ cəŋ gɑ o nu' a shyə, wə nə piŋ sɔ' bəm. Da' gɑ́ Yeso pa' bi e gɑ: Tak gɑ pu ghə pɑ́ kwa' po'o tə́ ywə yə Si jáp a pəmtə́. A pɑ po'o Yohane ghə ywə yə Yeso gɔm a Yeso lə wuŋ nə təm shyə pa' pu nu' e shyə a, kɛbəŋ ghyɛ', e yɔ Zhwenyə Si fi' sɔ' nə e pa' səŋgɔpfo a. Gi mo piŋ fɑ kɛbəŋ gɔm gɑ: Mo yəŋ gɑ bɑ Mu a yə gɑ ŋkhuŋ e te' a. Gɑ ŋwɛnyə nə cwɔ' é. A lə pɑ po'o Zhwenyə lɑ Yeso gɔ ghakgo gɑ Sata ləŋtə e. E lə cwə tsʉ'u mtyɛ'dzʉ mghappfʉə ba mnthyatə mghappfʉə tə tsʉ̌ ywə, jikǔ' yɛ́ e. Gɛ ləŋtə sɔ' bəŋ e gɔm bi e gɑ: O pɑ́ Mu Si, o ghɔm gɑ mwɔ' mɔ gɑ cʉ' msɛ. Da' gɑ Yeso ghɔm bi e gɑ: A bɑ pu və gɑ́ mo tɑ́ bvɔk da' nə msɛ̌ pɑ, mo bvɔk m nə ghɔm tsyə a təm shwə̌ Si a. A lə pɑ́ po'o Sata lɑ e gɔ nthʉm tisuŋ Dɔlɔ̌ jap e do Dyə Si, biŋ gɔm bi e gɑ: O pɑ mu Si, o cʉ́msi, nə pa' a bɑ pu və gɑ. Si gɔ pa ghɔm bi pɑ aŋgəle pyə wap pɑ ŋkwa o nə bu map po'o gɑ o kɑ cwɔ' kwə o nə gwɔ'. Yeso ghɔm bi e gɑ: A bɑ pu piŋ bvə ba m gɑ o tɑ gɔ ləŋtə Cyəpɔ Si o pɑ. Sata piŋ dɑ e gɔ dəm mu' sʉəsʉə kuŋ gǒ; da'tə é guŋ nəfo dzʉ awɛ ba mghu' myə́, gɔm bi e gɑ: O kam mkwi'tə mu dzə m gamtə a bɑ gɑ̌ gɔ hɑ guŋ e awɛ bu. A pɑ po'o Yeso ghɔm bi é gɑ: Sata lǔ! Nə pa' a bɑ pu və gɑ o gɔ pɑ ghamtə pɑ da' Cyəpɔ Si o piŋ pɑ fa' da' bi e. Sata lə tak e nəŋ cwəlɔ pɑ aŋgəle sɔ' bəŋ e, bɑ fa' bi e. Yeso lə nə yu' gɑ pu ghəm Yohane nthəm dɑ m Galilea, dú Nazarɛt, gɔ shwə Kapɛrnaum kəŋ shyə lɑpʉə guŋ Zabulon pu Nɛftali, po'o gɑ́ ghɔm tsyə gɔm ghɔm Si Esaya lə ghɔm a, a pəmtə gɑ́: Guŋ Zabulon, guŋ Nɛftali, jyə shyə́ lɑpʉə, guŋ nə yə mu' jʉɔ Yurdɛŋ, Galilea mgùŋ! Pɔ pyə wap lə́ bɑ́ nthʉm jʉ́m á, yɔ ŋkha' gwyə; pɔ pyə wap lə́ bɑ́ nthʉm sə́sə́ guŋ vʉ́ a, ŋkha' sɔ' bi pu. Tə fɑ cwə o bɔ Yeso to' bɑ siŋ gɑ: Po kwyəpnyə: Nəfo kɛbəŋ ghɔptə. Yeso lə pɑ́ giŋ giŋnyə shyə́ lɑpʉə Galilea jɔ shɑ mghəm bapgu pɑpʉə, wap pɑ mfɑ̌. Simon yə pu ŋkhe e gɑ Pɛtrɔ a, pu Andreya fɑ e, wap pɑ́wə ma' nthənthɔm nthʉm shyə́ lɑpʉə. Yeso ghɔm bi pú gɑ: Po yap jʉ̌m m̀, gɑ gɔ sɔ' lɑ wɔ ghə pɑ ghəm pɔmnəŋ. Wap lə wuŋ nthak mnthənthɔm map nə́ŋ Ntham jʉ̀m e. Yeso lə ghɔ tə ŋkho dzə, jɔ shɑ mfɑ pɑpʉə Yakop mu Zebede pu Yohane fɑ e, nthʉm kənu' pu a tá yap Zebede wap pɑwə nyaptə nthənthɔm yap, Yeso ke wap. Wap lə wuŋ nthak kənu' pú tà yap jap jʉ̌m Yeso. Yeso lə́ kǎ nə gùŋ Galilea awɛ bɑ ji'tə pɔmnəŋ ywə sinagogə pú, biŋ bɑ siŋ Cuŋ pɑpuŋ nə́ Nəfo, biŋ bɑ jɛ́ mgho pu a mkho'tə cəcɑ́ pɔmnəŋ. Pu lə cyanyə tso tsyə́ nə gúŋ pɑ Siria awɛ, pù piŋ bɑ dɑ gùŋ pɑ yɔgo' awɛ, mghɛ gho, kɑ kɑ́ nthi gho mɛnyə lɑ́: Mghɛ ghə zhwenyə cwəpùŋ, pɑ vʉwa', mghɛ po'tə nɑ̀ sɔ' bi é. E pɑ jɛ wáp. Vəŋ du pɔ lə biŋ bɑ́ giŋ jʉ̌m Yeso: Pɔ pyə wap lɑ fɑ Galilea bɑ m Dekapoli, bɑ m Yerusalɛm, bɑ m Yudea, bɑ m nə yə mu' jʉɔ Yurdɛŋ. Yeso lə nə yɔ vəŋ pɔmnəŋ ŋkwɔ' dəm kuŋgǒ, shwəsi, pɑkhʉ pyə sɔ' bəŋ e. E lə to' nə ghɔmnwə, bɑ ji'tə wap gɑ: Mpuŋtsé bɑ mpə́ŋ zhwenyə nə pa' nəfo kɛbəŋ bɑ bi pu a. Mpuŋtsé bɑ mghɛ byanyə nə pa' wap gɔ sɔ' tsʉ guŋ, Mpuŋtsé bɑ́ pɔ pyə wáp dɔ á nə pa' pu gɔ sɔ' zhwyə́tə wap. Mpuŋtsé bɑ pɔ pyə jǐ pu a ghak yap ŋkhə nə nwə dəŋdəŋ á nə pa' wap gɔ sɔ' zhwyə́. Mpuŋtsé bɑ́ pɑ cɔmmtso nə pa' pu gɔ sɔ' cɔmmtso map. Mpuŋtsé bɑ pɔ pyə wap ghə tʉm dɔlɔ̌ a, nə pa' wap gɔ sɔ' yɔ Si. Mpuŋtsé bɑ pɑ fa' nə hwitə; nə pa' pu gɔ sɔ' ké wap gɑ pǒ Si. Mpuŋtsé bɑ pɔ pyə pu dɑ wap jɔgo' nə nwə dəŋdəŋ a, nə pa' Nəfo kɛbəŋ bɑ bi pu. Po bɑ mpuŋtsé nə cwə yə pu jəmtə wɔ, bɑ́ cwɔ'mkwə mɔ cwəpuŋ, biŋ bɑ shwatə mnwə cwəpuŋ nə po, po'o nə thə a. Po pɑ ŋwɛnyə́, bɑ sɛnyə́ nə pa' mcwɔ'fa' mɔ ghu' thə kɛbəŋ. Pu lə ghə pɑ po'o nə́ mghɔm ghɔm Si pyə wap lə bɑ́ dzə po a. Pǒ bɑ gwɛ́ dəmcǎ', a bi a gwɛ̌ pi nə tʉ̀m, bɑ a gɔ piŋ pɑ gwɛ m gɑ́ kɑ? Bɑ a tə yɑ sɔmywə pɑ, bɑ pu gɔ ma' pé, pɔmnəŋ pɑ dɑ mkwə nə́ŋtə́. Pǒ bɑ ŋkha' dzʉ́, bi a pɑ tisuŋ dəm ŋkhuŋ lə tʉmnyə. Pú tə́ sumɔk nə lambu nyəŋ cəŋ pɑ́, pu nthʉ dəm kwɔ' lambu, po'o gɑ a kyɛ' guŋ pɔ pyə wap dyə a awɛ. Dəŋdəŋ po'o, ŋkha' yɔ́ pɑ́ ŋkhyɛ' nə mnyə́ pɔmnəŋ po'o gɑ́, wap nə yɔ mfa' pɑpuŋ mɔ bɑ gu'tə Tá yɔ yə e bɑ kɛbəŋ a. Ka po kwɛ gɑ́ gɑ sɔ' ghə gɑ mco' pu nwə yə mghɔm ghɔm Si lə ghɔm a, a mi. Ŋ tə sɔ' m nə ghə gɑ́ a mi pɑ. Gɑ sɔ' nə ghə gɑ́ a pəmtə. Nə pa' gɑ siŋ wɔ kwa' nyənyɔ gɑ, kɛbəŋ pu cǎ' gɔ sɔ' nə mi, bɑ bǎ ta' i, bǎ cwɔ' nə i nə mco' lə mi tɑ́ a bɑ gɑ́ guŋ mnwə awɛ pəmtə pɑ́. Cwəlɔ, mo yə e pɔptə bǎ yɑmu' nə mupfʉ̌ mco', biŋ ji'tə bi pɔmnəŋ nə ghə po'o a, bɑ pu gɔ sɔ' lɑ e ghə mo ŋkho' nthʉm nəfo kɛbəŋ; da' gɑ mo yə e ghiŋ nə mco' bɔ, biŋ ji'tə bi pɔmnəŋ a, pu gɔ sɔ' ke mo bɔ gɑ mo gwyə nthʉm nəfo kɛbəŋ. Nə pa' gɑ siŋ wɔ gɑ yɔ nə pɑ́ dəŋdəŋ pɑ tə cyə yə pɑ zhyə́ mco' pu a pɑ Farisai, bɑ po tə gɔ sɔ' ko nə nəfo kɛbəŋ pɑ. Po lə yu' pa' pu lə ghɔm bi pɑ dzə gɑ: Kɑ zhwə mo; mó yə e zhwə mo a bɑ pu gɔ fyɛ́' e dyə fyɛ̀'. Tɑ gɑ ghɔm bi po gɑ́ bǎ yɑ́ mo yə e yɛluŋ nə fɑ é a, bɑ pu gɔ fyɛ́' e dyə fyɛ'; mo yə e ghɔm bi fɑ e gɑ: ŋkhəŋkhʉɔ a, bɑ pu gɔ fyɛ' e sanedrɛŋ; mo yə e ghɔm bi fɑ e gɑ bʉəpǒ a gɔ sɔ' ko nthʉm mɔk tə pǐ. A bi a o pɑ gɔ m nə nuŋpwɔ', ŋkho tsʉ́' to tsə pwɔ', ŋkhamtə gɑ po fɑ o ghə nwə̀, o tak tsə pwɔ' tsʉ' to tsə pwɔ', biŋ dəŋdzə gɔ po fɑ o wɔ' bvɑnyə tə o sɔ' cwəlɔ̌ hɑ tsə pwɔ'. Cwə yə po yɑ məjyə a, lo'nyə gɑ po gɛ bo o pɑ ŋkwishwə, bwɔk gɑ, ka gɛ bo o bɔ̌ ghɔ fiŋ o bi fyɛ' shɛ, fyɛ' shɛ́ hɑ o bi səŋwi, pu nyeŋ o dyəcɛ̌. Gɑ̌ siŋ o kwa' nyənyɔ gɑ o tə gɔ təm dyəcɛ̌ bɔ tə tuŋ gúŋ jú o awɛ pɑ tə a lə cʉ' bǎ ta' nəŋthə. Po lə yu' pa' pu lə ghɔm gɑ́: kɑ ghə ghap a. Tɑ́ gɑ̌ ghɔm bi po gɑ́ mo yə e lɑ mnyə ghi'nyə dé mjwǐ a, bɑ pu é é da' gə ghap nthʉm tʉm e. A pɑ gɑ bɛtsə o yə tʉɔ fa'tə o nə́ vʉ́ nə mhɔ̀, o té e gwa' tə gʉə sʉəsʉə, nə pa' dzə bu gɑ ta' zhəŋ nə mzhəŋ nɑ mu pfʉ́ po'o gɑ pu kɑ ma' guŋ nɑ o awɛ mɔk tə pi. Biŋ bɑ bi a pú o yə tʉɔ fa'tə o nə́ vʉ nə́ mhɔ, o ya' e gwa' tə gʉə sʉəsʉə, nə pa' dzə̌ bu gɑ ta' zhəŋ nə́ mzhəŋ nɑ mu pfʉ́ po'o gɑ guŋ nɑ́ o awɛ kɑ́ ghɔ nthʉm mɔk tə pi. A bɑ pu lé bǐŋ gɔm gɑ́: mo zhəŋ jwi e, e hɑ ŋwa'nyə nə jəŋ e bi e. Tɑ́ gɑ̌ ghɔm bi po gɑ mo yə e zhəŋ jwi e, tə ně da' gɑ́ e ghə ghap a, bɑ e bɑ si pa' a shya e nə ghap. Bi a mo nəŋ ŋkho mjwǐ yə pu zhəŋ e a bɑ ě ghə ghap. Po lə kwi' ju' gɑ pu lə ghɔm bi pɑ dzə gɑ́: ka mo kɔ́ mkɔ a, da' gɑ́ o kɔ mkɔ bi Cyəpɔ nə nwə a pəmtə. Tə gɑ̌ ghɔm bi po gɑ́ ka po kɔ mkɔ. Kɑ nə kɛbəŋ lə́, nə pa' a bɑ leŋfò Si a. Kɑ nə sicǎ' lə́ nə pa' a bɑ kwɔ' tʉ mkwə Si, kɑ nə Yerusalɛm lə́, nə pa' a bɑ tisuŋ Fo gwyə́. Kɑ kɔ thə o, nə pa' bi a pɑ o lə kwyəpnyə ta' nəŋ thə o a fɔk, kɑ a so lə́. Po pɑ gɔm nwə, a pɑ Əŋ kɑ Gɛ̌ lə́, yə ǎ kwi' nə a fɑ m bi Cwəpùŋ. Po' lə yu' pa' pu lə ghɔm gɑ́: Bɛ́tsə́ nə bɛtsə, suŋ nə́ suŋ. Tɑ́ gɑ̌ ghɔm bi po gɑ ka po a mo shɔkcɔk fəŋnyə nwə. A pɑ gɑ mo cwɔ pu təŋ o nə ghəŋ tʉɔ̀, o nya yə mu' ghəŋ bi e. Mo pɑ gɔ lɑ o nə ghɔ dzə́ ja'shɛ́ nə dzə o yə nthʉm o, o hɑ ba yə o pfɔptə a bi e. Mo thənyə o gɑ́ po e ghiŋ mkwə shǎ', po e ghiŋ mkwə sha'pʉə. Hɑ bi mo yə ě lo a; mo yə e hǔ a, o kɑ fɛ ŋkha'tə o nə ntham e. Po lɑ yu' pa' pu lə ghɔm gɑ́: Kuŋ mo yə e bəŋ o a, bɔ gɛ bo o. Tɑ́ gɑ̌ ghɔm bi po gɑ: Po kuŋ mghɛ bo pɔ́, po pu' bú bi Si nə pɔ pyə wap shwɔ'mkwə mɔ cwəpuŋ a, Po'o gɑ́ po pɑ́ kwa' pǒ Tá yɔ yə ě thə kɛbəŋ a nyənyɔ; nə pa' e gə nàm e tyə́ nə pɔ cwəpuŋ ba m nə pɔ pɑpúŋ, biŋ gə bəŋ lú nə pɔ dəŋdəŋ ba pɔ tə pɑ́ dəŋdəŋ Nə pa' po kúŋ pɑ pɔ pyə wap ŋkhuŋ wɔ a bɑ po gɔ kwi mcwɔ'fa' nə kɑ? Ba mghɛ kwishwɔp gə po'o. A piŋ bɑ gɑ po sha'tə pɑ mfɑ pɔ bɑ po gə kɑ msya? Ba pɑ tə pɑ pɑ Yudea gə pɑ́ po'o. Po pɑ́ tə byà pa' Ta yɔ kɛbəŋ bɑ́ tə bya a. Po pɔmtə gɑ po kɑ pɑ fa' tsɔ fà' nə biŋ Si pɑ dəm sim dzə̌ pɔmnəŋ gɑ wap yɔ́ wɔ́. Po ghə po'o bɑ po tə gɔ sɔ' ghə sɔm mcwɔ'fa' dzə Tá yɔ kɛbəŋ pɑ̀. O pɑ gɔ hɑ ywə nə ŋkwitə́ mpə́ŋ, o kɑ tǔŋ lwɔ́p pa' pɑ tsɛbǔ gə dyə sinagogə ba m məjyə gɑ́ pɔmnəŋ nə gu'tə wap a. Kwa' nyənyɔ gɑ siŋ wɔ gɑ a bɑ wap é da' ŋkwi màp mcwɔ'fa'. Sɔ' m nə o, o pɑ gɔ hɑ ywə nə ŋkwitə mpəŋ, pú ǔ yə kwyap kɑ zhyə̌ ywə yə pú ǔ yə tʉɔ gə a, po'o gɑ ywə yə o hɑ a wuŋ pɑ nthʉm cam, a Tá ɔ yə e jɔ nthʉm cam a, sɔ' shwɔ'fa' o. Po pɑ́ shwyɛ'nyə Si, ka po pɑ́ pa' pɑ tsɛ́bǔ pyə wap ŋkhuŋ nə tiŋnyə thə́ dyə sinagogə ba mhapnyə məjyə tɑ́ shwyɛ'nyə Si, po'o gɑ pɔmnəŋ yɔ wap a. Kwa' nyənyɔ Gɑ siŋ wɔ gɑ́ a bɑ wap kwi map mcwɔ'fa'. Sɔ' m nə o, o pɑ́ gɔ cwyɛ'nyə Si, o ko nə twɔ'dyə̌ dʉmnyətʉmnyə, jo' jyədyə̌ tə́ shwyɛ'nyə Ta ɔ yə e bɑ nthʉm cam a; po'o gɑ Ta ɔ yə e jɔ nthʉm cam a cwɔ'fa' o. Po pɑ shwyɛ'nyə Si, po kɑ́ ghɔm vəŋ mghɔ̀m pa' pɑ tə pɑ́ pɑ́ Yudea a. Wap ŋkwɛ gɑ vəŋ mghɔm nə gɔ ghə tə́ Si pa' bi pú. Ka po hwənyə wap pɑ́, nə pa' Tá yɔ bɑ e zhyə ywə yə a jak bi po a, tə́ po lo bi e. Po'o lə́, po pɑ́ shwyɛ'nyə Si gɑ: Tá yɔk yə o kɛbəŋ, ghə tsó tsǔ pɑ́ dɔlɔ̌. Ghə Nəfo tsǔ sɔ̌'. Ghə́ pu ghə ywə yə o shəŋ a dəmcǎ' pa' pu gə kɛbəŋ a hɑ́ yɔk ywətsʉ yə a ku' nə pyə tyɛ' ɔ a. Lɑ mhɔ mɔk dzə́ o nə shwyɛ' wɔk dəŋdəŋ pa' pyə dɑ mhɔ pyə shɑ́ pɔ dzə̌ pyə nə shwyɛ' wáp a. Biŋ o kɑ́ tak wɔk nə mləŋtə, da' nə kwi wɔk bi Cwəpuŋ Nə pa' po lɑ mhɔ pɔmnəŋ nə shwyɛ' wáp, bɑ Tá yɔ kɛbəŋ gɔ lɑ mhɔ mɔ́ nə cwyɛ' wɔ, tɑ́ po pɑ tɑ lɑ mhɔ pɔmnəŋ nə shwyɛ' wáp, bɑ ba Tá yɔ tə gɔ lɑ mhɔ mo' cwyɛ' wɔ́ pɑ. Po pɑ shwə tə tsu ywə, po kɑ ŋiŋtə́ sə yɔ pa' pɑ tsɛbǔ gə a: Wap ŋiŋtə sə yap po'o tə́ cəŋtə nə la'tə bi pɔmnəŋ gɑ́ wap wə jwiŋ. Kwa' nyənyɔ gɑ̌ siŋ wɔ gɑ a bɑ wap kwi map mcwɔ'fa'. Sɔ' m nə o, cwə yə o wə jwiŋ a, o lɑ mwɑ damnyəlamnyə jwɔ' thə o, sɔk sə o, po' o gɑ o kɑ́ la'tə bi pɔmnəŋ gɑ́ o wə jwiŋ, o la'tə da' bi Ta ɔ yə e bɑ nthʉm càm a; Ta ɔ yə e jɔ nthʉm càm a, e pa' bu. Ka po cu'tə tsə fʉ' tsɔ dəmcǎ' tsʉ' yə mkapfə́ kɑ pu a mcwəcwə lə́ simnyə, mcwúŋ piŋ bɑ nthú dyə ŋkwa nə gɔ a. Da' gɑ po lwɔ' tsə fʉ' tsɔ m kɛ́bəŋ nə tsʉ' yə mkapfə kɑ mcwəcwə lɑ tɑ́ gɔ pɔptə a pɑ, mcwǔŋ lə piŋ bɑ nthú jʉ a. Nə pa' tsʉ' yə fʉ' o nə a, a tsʉ' yə tʉm tsǔ bɑ́ nə a. Lambù nɑ́ mo bɑ bɛtsə́ o. A bi a bɛtsə́ o pɑ pɑpuŋ bɑ guŋ nɑ o awɛ gɔ pɑ nə ŋkha', Da' gɑ́ bɛtsə́ o pɑ jɛ́, bɑ guŋ nɑ o awɛ gɔ pɑ nthʉm jʉ́m. A pɑ gɑ́ ŋkha' yə a nə o ǎ zhi jʉ́m, bɑ a kwa' sə sə jʉ̌m! Bi a pɑ sɔmmo lə fa' bi mtǎ fa' pɑ pʉə: Kɑ bɑ é gɔ pɑ́ pɔ́ mu' piŋ pɑ́ kuŋ mu' lɑ, kɑ bɑ é gɔ kwɑ nɑ é nə mu', pɑ́ wak yə mu' lɑ. Bi a pɑ po lə fa' bi Si pu Ŋkhap. A shyə m po' tə bɑ gɔm bi po gɑ: Ka lam tsɔ pɑ sɔ́ nə vɔk yɔ́ nə ywə yə po gɔ tsʉ a, kɑ nə nɑ yɔ nə ywə yə po gɔ kwa a lə. Vɔk mo tə bɑ a cyə ywətsʉ a? Kɑ nɑ mo nə cyə dzə a? Po lé msəŋ kɛbəŋ tə jɔ́: Wap tə dzə ywə pɑ́, wap lə nəŋ bɑ shwa, wap lə pɑ́ nyəŋ ywə ŋkhíŋ; da' gɑ́ Tá yɔ kɛbəŋ nəŋ bɑ ŋkhim wap. Po tə bɑ po ghə də̀ŋ shyə wap a? A piŋ bɑ̀ po'o bi a ya mo nə po tsɔp pɑ́ nɑ e tɑ ŋkwi' muywə nə vɔk e? Nwə kɑ́ po tsɔp nɑ tsɔ nə dzə̌? Po le mtutuŋ mghe pé tə́ jɔ pa' a ŋkwyə a; wap tə jɔgo' fa' pɑ́, wap lə nəŋ bɑ́ ba' dzə́. Biŋ bɑ siŋ wɔ gɑ́ ba Salomoŋ nə guŋ ghu'tə e awɛ la tə kwa dzə pa' ta' nə mtutuŋ mghe bɔ a. A bi a Si pɑ ŋkwa dzə nə mghě myə a bɑ cwəlɔ, dzʉ̌ pɑ́ gɔ lɔ pu to mɔk a dəŋ po'o, bɑ e tə gɔ ghə nə po cyə pa' e gə nə mghě a pɑ a? Wɔ pɑ ghə múywə piŋnthʉm. Ka po pɑ dzɔp nɑ tsɔ gɑ: Pyə gɔ tsʉ́ kɑ? Pyə gɔ nwə́ kɑ? Pyə gɔ kwa kɑ́ nə pyə? Guŋ tsə ba awɛ ba pɑ́ tə pɑ́ pɑ́ Yudea shəŋ yap yá tə pwa; bɑ Tá yɔ kɛbəŋ nəŋ jyə́ gɑ́ tsə bǎ bɑwə shəŋ bi po. Po ləŋdzə shəŋ Nəfo pu a dəŋdəŋ Si tɑ pu kwi' tsyə bǎ nə́. Ka po pɑ́ dzɔp nɑ tsɔ nə yǒ: Yǒ gɔ ti nyatə nɑ e. Yə dəŋ go' bǎ ya tyɛ'dzʉ a ŋkhu' pɑ nə e. Ka po pɑ ji pɑ fyɛ̀', po'o gɑ pu kɑ fyɛ' wɔ; nə pa' pu gɔ sɔ' lə pɑ nthi fyɛ' yə po nə fyɛ' a nə fyɛ' wɔ, lɑ pɑ fo' yə po nə fo' a nə fo' wɔ. Nwə kɑ́ o lé ghəgha' ywə yə a bɛtsə́ fɑ o a tɑ tə zhyə́ gɑ nthyə̀ bɛtsə o? Kɑ́ o gɔ ghə m gɑ́ kɑ tə ghɔm bi fɑ o gɑ́ tiŋnyə nthé ghəgha' ywə yə a bɛtsə́ o a tə́ nthyə̀ pɑ bɛtsə o? Wə mo dzɛbǔ, ləŋdzə nthé nthyə̀ bɛtsə́ o tɑ̀ jɔ tsʉ' pɑpúŋ nə nthé ghəgha' ywə bɛtsə́ fɑ o. Ka po hɑ ywə dɔlɔ̌ bi mbvʉ̌, kɑ nə ma' mtɔkcyə mo bi pǒ gənɔm lɑ́, bwɔk gɑ wap kɑ́ nəŋtə biŋ fɛ nɑ tsap syatə wɔ. Po ló, pú gɔ hɑ bi po; po cə́ŋ, pǒ gɔ yɔ, po ko'tə jyədyə̌, pu gɔ hé bi po. Nə pa' mo yə e ló a ŋkwi, mo yə e cəŋ a yɔ, pu pɑ́ hé bi mo yə e ko'tə a. A po'o bi a ya mo pɑ́ nə po yə mú e lo e ywətsʉ bɑ e gɔ hɑ gwɔ' bi a? Kɑ bi a e lo e bapgu bɑ e gɔ hɑ́ nɔk bi é? A bi a dəŋ pa' bɑ po pɔk a po zhyə́ nə hɑ tsə pɑpuŋ bi pó pɔ, bɑ mcʉ̌m sʉ'ʉ nə Tá yɔ yə e kɛbəŋ a, pa' e gɔ hɑ tsə pɑpúŋ bi pɔ pyə wap ló bi e a? Po'o, bǎ yɑ ywə lə́ yə po shəŋ gɑ́ pɔmnəŋ ghə bi po a, kwa' wɔ ghə ya bi pú. A bɑ mcò', biŋ bɑ mghɔm mghɔm Si. Po ko dyə m nə pim jyədyə̌. Jyədyə̌ yə a gɔ m nə pi á bɑ ǎ sɛtə biŋ gʉ́ɔnyə; pɔ pyə́ a bɑ wap cyə m nə a yɔm té' o. Tɑ́ jyədyə̌ vɔk bɑ a kɔ́k, məjyə piŋ ŋkhɔmtə, bɑ pɑ yɔ məjyə̀ bɔ ka yɔm. Pó pɔm mghɔm ghɔm Si cwanwə, pyə wap sɔ' bəŋ po pa' jʉ̀jʉ̀ á tə bɑ m nthʉm o bɑ mbvʉ́ gǒ pyə wap sim tsʉ' a. Po gɔ zhyə wap pɑ nə nthɔm map. Pu ŋkhap nthɔm nthə́ nə nu' mlu' nə mka'tə a? Nəŋ bɑ ŋkhap figə nə thə júŋ a? A bɑ po'o tɑ bǎ yá ta'thə pɑpuŋ a jam nthɔm pɑpuŋ; da'gɑ bǎ ya ta' thə yə gho ko nə a pɑ jam nthɔm cwəpuŋ. Bi a pɑ ta'thə pɑpuŋ lə yam nthɔm cwəpuŋ kɑ ta'thə gogho lə yam nthɔm pɑpuŋ. Bǎ ya ta' thə lə́ yə a tɑ́ jam nthɔm pɑpuŋ a pɑ, pú ŋkho', ma' mɔk. A po'o tə́ po pɑ́ gɔ lɑ pɑ nthɔm máp nə zhyə́ wáp. Tə da' nə ghɔm bəm gɑ́: Cyəpɔ, Cyəpɔ! Nə gɔ ghə tɑ́ mo ko nə́ Nəfo kɛbəŋ pɑ. O gɔ ghə ywə yə Tá a kɛbəŋ shəŋ a. Pɔ tə́ jɔm gɔ sɔ' tyɛ'dzʉ́ bɔ ghɔm bəm gɑ: Cyəpɔ, Cyəpɔ! Pyə lé tə lɑ tsó tsǔ gɔm ghɔm Si a? Dɑ tsó tsǔ jəŋ zhwenyə cwəpuŋ a? Dɑ tsó tsǔ nthé vəŋ msya a? Biŋ gɔm bi pú gɑ: Ŋ da m jyə wɔ, po lú bəŋ m̀ wɔ pɑ ghə mnwə cwəpuŋ! A po'o tə bǎ ya mo lə́ yə é ju' mghɔm myə gɑ̌ gɔm á giŋ nə á, bɑ́ dəŋdəŋ pa' mu' mo jyə nwə yə e lə kwɑ pa' e dəm wǔ gwɔ' a. Bəŋ lú, mcɑ tsəŋ; fəfa cʉ' guŋ e awɛ vʉ nə pa' bɔ̌, da' gɑ́ a lə vʉ nə pá' to pa' bɔ̌ bɑ́ dəm wǔ gwɔ' a. Mo yə e nəŋ jú' mghɔm myə gɑ̌ gɔm a la' e ghiŋ nə a, bɑ́ pá' mu' ŋkhəŋkhʉɔ yə e ŋkwɑ pa' e nə bvɛ a. Bəŋ lú, mcɑ tsəŋ; fəfa cʉ', guŋ e awɛ vʉ̀ nə pà' bɔ̌, a vʉ, mkhʉm myə́ yɔm tɑ́. A lə pɑ́ tə Yeso miŋ nə ghɔ̀m mghɔm bɔ, ywə yə e ji'tə a cəŋtə́ ŋkhó nə pɔmnəŋ nə pá' e lə bɑwə ji'tə m pa' mo yə e ghə tʉɔ a, la' e zhi' m pa' pɑ zhyə mco' a pɑ́. Yeso lə nə tsə̌ŋ fɑ dəm kuŋgǒ, vəŋ pɔ pɑ́ jʉm e. Po'o tə mu' gɛ ka'pap sɔ' ŋkham mkwi'tə myə́ dzə e bɑ́ gɔm gɑ: Cyəpɔ, o kuŋ bɑ o gɔ lɔnyə a. Yeso nya pu é, ŋkwak nə é gɔm gɑ: Gɑ̌ kùŋ, lɔ́! E wuŋ dɔ pɑ cwəocwəo nə́ ka' pap. Tɑ́ Yeso piŋ gɔm bi e gɑ: Pɔm tə siŋ sɔmmo; da' gɑ́ ghɔ da'tə nɑ o bi ŋkhamsi, biŋ hɑ́ ywə hɑhɑ̌ yə Mosɛ lə́ yap a: a pɑ́ mkwinthɛ́ bi pu. Yeso lə́ pɑ̌ ŋkho Kapɛrnaum, mu' tadyə msəŋwi pɔ ŋkhə sɔ' bəŋ é, səso é, gɔm gɑ: Cyəpɔ gɛfa' a dyə bɑ e nùŋ bɑ po'tə nɑ kó nə é, é pɑwə jɔgo' te'te'. Yeso ghɔm bi e gɑ: Gɑ̌ gɔ ghɔ yɛ é. Da' gɑ́ tádyə msəŋwi ŋkhə́ piŋ gɔm gɑ: Cyəpɔ ŋ kha ku'nyə nə pa' bi a pɑ́ o ko dyə m̀ a: Ghɔm da' shwəghɔm a gɛfa' a yɛ́. Nə pa' gɑ̌ ju' shwə pɔ pyə wap sa'a biŋ bɑ sa' shɑ́ msəŋwi. Biŋ bɑ gɔm bi mu' nə pyə gɑ̌ sa' wap a gɑ: Ghɔ̌ e ghɔ, gɔm bi mu' gɑ sɔ̌' e sɔ', biŋ gɔm bi ŋkwɔ a gɑ: Ghə gɑ, e ghə. Yeso lə nə́ yu' pa' tádyə msəŋwi ŋkhə bɔ gɔm po'o a, go' e, biŋ gɔm bi pɔ pyə wap lə́ bɑ́ jʉm e a gɑ: Kwa' nyənyɔ gɑ̌ siŋ wɔ gɑ́ Ŋ kha yɔ yəŋ gɑ nthi piŋnthʉm bi sɔmmo Israɛl. A po'o tə bɑ siŋ wɔ gɑ́ pɔ jɔmyɔ̌m gɔ sɔ' fɑ ghəŋ nthəmnam ba m ghəŋ binam pu a Abraham, ba Isak ba Yakop tsʉ́ la'nwə nthʉm Nəfo kɛ́bəŋ. Da' gɑ́ kwa' pɔ nəfo bɔ̌, pu ma' wap dzʉ́ nthʉm jʉ́m; a pɑ́ tsʉ'u bɔ pú pɑ́ dɔ̌ biŋ bɑ pfɑ msuŋ. Yeso lə pǐŋ gɔm bi tadyə msəŋwi pɔ ŋkhə́ gɑ: Pɑnyə la' o! A ghə nə o pa' o nə bìŋ a. Gɛ́ fa' e lə wuŋ jɛ́ pɑ́ cwə o bɔ. Yeso lə nə kodyə Pɛtrɔ, jɔ gám Pɛtrɔ bɑ e nuŋ kodyə mhwi pɑwə səŋ e. Yeso lə kwak pú nə e, mhwi təm nə é, e lúsi biŋ ntho' nə fa' bi e. A lə pɑ́ bwadzʉ̌, pu lɑ mghɛ gho pyə zhwenyə cwəpuŋ lə bɑ nə pu a nə sɔ' bi e, e pɑ́ jəŋ mzhwenyə pɑ ta' shwə ghɔm biŋ bɑ jɛ́ guŋ mghɛ ghɔ awɛ. Po'o gɑ ywə yə gɔ́m ghɔm Si Esaya lə ghɔm a, a pəmtə́ gɑ: E lə ŋkwi mkhʉ́m mɔk pɑ, biŋ ŋa' bɑ mgho mɔk pɑ. Yeso lə nə yɔ vəŋ pɔ bəŋ é, nyəŋ gɑ́ e gɔ ghɔ nə yə mu' jʉɔ shyə́. Mu' jyə́ mco' sɔ' gɔm bi e gɑ: Ta gɑ gɔ yap jʉ̌m o, tə ko bǎ hɑ́ lə yə o ghɔ a. Yeso ghɔm bi e gɑ: Msə́sʉ́m bɑ wap ghə mghʉ̌m map, bɑ pǒmsəŋ to kɛbəŋ piŋ gə mkɔ map. Tɑ́ sɔ' m nə Mú mo, a bɑ̀ e ká ghə tsʉ' yə e jap thə e nə a. Mu' mukhʉ́ e piŋ gɔm bi e gɑ: Cyəpɔ na' nthak a gɔ nthəŋ tá a tə́ sɔ̌'. Da' gɑ́ Yeso ghɔm bi e gɑ: Yap jʉ̌m m̀ biŋ nthak mpfə pɔ wap təŋ mpfə pɔ pap Yeso lə ko nthʉm kənu', pɑkhʉ̌ pyə yap jʉm e. Mu' mɑ fʉ́m wuŋ nthəm dəm shyə, ŋkwa shyə bɑ gɔ nə sə kənu'; Yeso lə bɑwə di. Pɑkhʉ pyə sɔ' bəŋ e, jam e gɔm gɑ: Cyəpɔ kwitə wɔk, pyə pfʉ́. E ghɔm bi pú gɑ, nwə kɑ po pwɔk? Pɑ ghə muywə piŋnthʉm. A lə pɑ́ po'o, e lusi baptə fəfa pu shyə lɑpʉə, tsʉ' wuŋ dɛtə gɑ kǎm. Nwə cyə pɔmnəŋ, wap piŋ bɑ gɔm gɑ: E bɑ m gɑkɑ tɑ́ ba fəfa pu shyə lɑpʉə yu' shwə è! Yeso lə ko nə yəmu' jʉ́ɔ, nthʉm guŋ pɑ Gadarɛno, shɑ́ pɔ pɑ́pʉə, nthəm m thəsì, zhwényə cwəpuŋ pɑ́ nə pú, bɑ wap cɔk tə la' sɔmmo pɑ bi a pɑ e cyə́ nə yə bɔ məjyə̀ sɔ' pu a pu yu'tə. Wap lə́ wuŋ ntho' nə cwé gɑ: O kwi kɑ́ bi pyə̌ Mù Si? Ǒ sɔ' m tsɔ'ɔ nə va' wɔk tɑ́ cwə gúŋ ŋkhu' a? A lə nə pɑ́ po'o mu' ka mgənɔm pɑ́ giŋnyə tsʉ'u bɑwə pfɑ mghé. Mzhwenyə cwəpuŋ cwyɛ'nyə é gɔm gɑ: O zhəŋ wɔk, o cya wɔk nə ka mgənɔm. Yeso ghɔm bi pu gɑ: Po ghɔ nə pú. Mzhwenyə cwəpuŋ bɔ lə təm gɔ ŋkho nə mgənɔm bɔ̌, guŋ ka mgənɔm fɑ kúŋ nə mkə́kə́ŋ cwəlɔ ŋkheŋnyə́ bvʉtə nthʉm shyə lɑpʉə, npfʉtə awɛ nthʉm shyə. Pɑ pyap mgənɔm bɔ lə ŋkhʉ̌ gɔ tisuŋ siŋ pɔmnəŋ guŋ mnwə awɛ, bɑ m nə mzhwenyə cwəpuŋ. A lə pɑ́ po'o guŋ tisuŋ awɛ təm nə ghɔ jɔ́ Yeso. Wap lə cwə tə jɔ e, shwyɛ'nyə e gɑ́ e tə́m nthʉm guŋ yap. Yeso lə́ piŋ ŋkho kənu', biŋ sa'shyə lɑpʉə, bɑnyə tisuŋ e. Pu lɑ mu' gɛ po'tə nɑ́ sɔ' bi e, bɑ pu kwa e dəm kodyə. Yeso lə yɔ piŋnthʉm yap, gɔm bi gɛ po'tə nɑ́ gɑ: Kaktʉɔ m mú a, pu lɑ mhɔ mǔ shwyɛ' o. A lə́ pɑ po'o shɑ pɑ zhyə́ mco' pɑ gɔm cəcɑ̌ pú gɑ: Mbɛ yəŋ gɑ yəmtə Si. Yeso lə́ zhyə́ pa' wap wə sɛ nthʉm tʉm pú a gɔm gɑ: Nwə́ kɑ́ po ghə mɔ gɑ nthi mkwɛnyə́ cwəpuŋ nthʉm tʉm pó? A ghɔ nə́ nə ghɔm gɑ: Pu lɑ mhɔ mǔ nə shwyɛ' o, pu nə ghɔm gɑ: Lusi gǐŋ, bɑ ya yɛ̀? Po'o! Tə́ po nə́ jyə gɑ́ tʉɔ bɑ bi Mú mo dəmcǎ' nə lɑ mhɔ pɔmnəŋ nə shwyɛ' wap, e ghɔm bi gɛ po'tə nɑ́ gɑ: Lusi ŋkwa kodyə o nə gɔ la' o! Bɛ bɔ lə lusi gɔ la' e. Pɔmnəŋ lə nə́ yɔ po'o bwɔk, biŋ gu'tə́ Si pa' e hɑ yə bɔ nthi tʉɔ̀ bi pɔmnəŋ a. Yeso lə lǔ tsʉ'u, biŋ nə cyə jɔ mu' mbɛ pu pɑ ŋkhe é gɑ Matio. Bɑ e cwə́si dyə ma' shwɔp. Yeso ghɔm bi e gɑ: Yap jʉ̌m m̀, Matio lusi jap jʉm é. Pú Yeso lə́ pɑ́ tɑpe dyə e, pɑ kwi shwɔ̀p pu a mghɛ mhɔ jɔmyɔ̌m sɔ' pu a pɑkhʉ Yeso pɑ yap Si. Pɑ Farisai lə nə yɔ po'o, gɔm bi pɑkhʉ̌ Yeso gɑ: Nwə kɑ́ tá yɔ pu a pɑ kwi shwɔ̀p ba mghɛ mhɔ pəmtə dzʉ́ywə? Da'gɑ́ Yeso yu' gɔm gɑ: Tɑ́ pɑ nɑ nthʉ̀ɔ nə shəŋ gəgɛ pɑ̀, mghɛ ghó nə shəŋ e. Po ghɔ ji'tə nwə nə ywə yə yəŋ nwə nthutə a gɑ: Ywə yə gɑ̌ shəŋ a, a bɑ́ cɔmmtso, a tə bɑ nə nuŋpwɔ' pɑ́. Nə pa' ŋ da tə sɔ' m nə ké pɔ dəŋdəŋ pɑ́, ŋ də sɔ' m nə ké mghɛ mhɔ. Pɑkhʉ̌ Yohane lə sɔ' jɔ Yeso gɔm bi e gɑ: Nwə kɑ́ wɔk pyə a pɑ Farisai pɑ́ shwə tə tsʉ̌ywə, la' pɑkhʉ pǔ pɑ shwə yap tə tsʉ̌ywə? Yeso ghɔm bi pú gɑ: Bi a pɑ msǒ la'nwə pyə pú gó wap la'nwə á zhwiŋ nə cwə yə tá la'nwə cəcɑ̌ pu a? Da' gɑ tyɛ'dzʉ́ wə yə pu gɔ té tá la'nwə cəcɑ̌ pu a? A gɔ pɑ́ tyɛ' o bɔ, wap zhwiŋ. Sɔmmo tə dɑ pak dzə́ sə ntham bvo dzə pɑ́. Nə pa' bɑ pak dzə́ bɔ gɔ fəŋ dzə, a piŋ ŋkhi pɑ́ bɔkbɔk e. Pu tə nyəŋ mlu' sə nthʉm mvo nthǔ' pɑ́, tak po'o bɑ mvo nthǔ' gɔ vyətə, mlu' pfyə́, pú pi mnthu'. Pu nyə́ŋ mlu' sə́ pɑ nthʉm mnthu' sə́, guŋ e awɛ cwə pɑpuŋ. Yeso lə́ pɑ́ gɔm bi pú po'o, mu' ŋkhám sɔ' bəŋ e, ŋkhám mkwi'tə myə́ si gɔm bi e gɑ: Mú a yə mjwǐ pfʉ pɑ cwəlɔ. Da' gɑ sɔ' jap pu nə é e vɔk. Yeso lə́ lusi, pu a pɑkhʉ pyə́ jap jʉm e. Wap lə pɑ gɔ, mu' mjwǐ gho mcyə pɑ nə e tə fɑ gu' shwɔppʉə mgham təm m jʉ́m, sho' pú nə mto dzə́ Yeso. Nə pa' mjwǐ bɔ lə bɑwə gɔm nthʉm tʉm é gɑ: Ŋ gɔ sho' pú nə dzə́ e bɑ gɑ gɔ vɔk. Da' gɑ Yeso lə fɛ́ nɑ́ e, jɔ e gɔm bi e gɑ: Kaktʉɔ m go a! Piŋnthʉm o vɔk o. Mjwǐ bɔ lə wuŋ bvɔk pɑ cwəo. Yeso lə́ nə́ ŋwak dyə ŋkhǎm bɔ̌, jɔ pɑ túŋdúŋ pu a zhəzhəŋ pɔmnəŋ gɔm gɑ: Po təm; go yɑ́ ka pfʉ, e bɑwə diti; pɔmnəŋ piŋ bɑ jəmtə é. Pú lə cwə tə nthe pɔmnəŋ dyə, Yeso kó dyə́ nthɔm pú mú gò, e yàm. Mcùŋ bɔ sɛ̀ nə ghə̌ŋ tsʉ'u bɔ awɛ. Cwə yə Yeso lə pɑ gɔ a, shɑ mfʉ̀ pɑpʉ́ə yapjʉ̀m e bɑ shwé gɑ: Cɔmmtso mɔk m Mú David! Yeso lə kodyə́ cwəlɔ, mfʉ bɔ fʉ'tə nɑ tsap sɔ' bəŋ e, e piŋ gɔm bi pu gɑ: Po kwɛ gɑ bi a pɑ́ gə ywə bǎ a? Wap ghɔm bi e gɑ əŋ m Cyəpɔ. A pɑ po'o e co' pu nə mnyə map gɔm gɑ: A nwə yə po wə shəŋ a pəmtə nə piŋnthʉm yɔ. Mnyə map lə ghyɛ̌'. Yeso piŋ gɔm shɔkcɔk bi pu gɑ: Pɔm gɑ sɔmmo kɑ zhyə. Da' gɑ́ wap lə́ wuŋ nə təm dyə gɔm nwə é nə guŋ ghəŋ tsʉ'u awɛ. Wap lə́ nə́ təm pu lɑ mu' təghɔm, zhwenyə cwəpuŋ pɑ́ nə e sɔ' bi Yeso. E lə zhəŋ zhwenyə cwəpuŋ nə́ tə ghɔm bɔ, e to' nə ghɔmnwə. Pɔmnəŋ pɑ́ ŋwɛnyə nə́, bɑ gɔm gɑ: pu la m jɔ nwə po'o nthʉm guŋ Israɛl. Da' gɑ pɑ Farisai pɑ́ gɔm gɑ: E shyə a m nə tadyə mzhwenyə cwəpuŋ jəŋ mzhwenyə cwəpuŋ. Yeso lə́ giŋ nə guŋ mtisuŋ pu a m nə guŋ mla' awɛ, bɑ ji'tə pɔmnəŋ dyə sinagogə pú, bɑ siŋ cuŋ pɑpuŋ nə Nəfò, biŋ bɑ́ jɛ́ guŋ mghɛ gho pu a guŋ mkhʉm awɛ. Yeso lə nə yɔ pɔmnəŋ, mtso map kú e nə pa' a lə bɑ wap pwa, gʉ' lə piŋ jɑ nə pú, wap pɑwə shwə pa' jʉ̀jʉ̀ tə gɛ pyap wap a. A pɑ́ po'o, Yeso ghɔm bi pɑkhʉ pyə gɑ: Tsə́ lɑ nyəŋ dyə yɔm pe, mghɛ fa' kɔk. Po cwyɛ'nyə Ta tsə dɑlɑ gɑ e cya mghɛ fa' nə tsə dɑlɑ tsyə́. Yeso lə́ ke pɑkhʉ́ pyə shwɔppʉ́ə mghǎm hɑ tʉ̀ɔ bi pú nə́ nə jə́ŋ mzhwenyə cwəpuŋ, biŋ jɛ guŋ mgho awɛ ba mŋkho'tə. Mtsǒ mghɛ nthəm bɔ shwɔppʉə mgham bɑ́ gɑ: Dəŋdzə: Simon yə pú ŋkhe e gɑ Pɛtrɔ a, ba Andreya fɑ e. Yakop mú Zebede ba Yohane fɑ e; Filipo ba Bartelemi; Tomasi ba Matio gɛ kwishwɔp. Yakop mu Alfeo ba Tadeo. Simon mú e guŋ ba Yuda Iskariɔt yə e hɑ Yeso bi mghɛ bo pyə a. Yeso lə nə təm pɔ shwɔppʉə mghǎm gɔm bi pu gɑ: Po kɑ́ ghɔ nə mguŋ myə pɑ tə pɑ́ pɑ Yudea nə a, po kɑ́ nəŋ ŋkho nə tisuŋ pɑ Samaria. Po ghɔ m bəŋ jʉ̀jʉ̀ pyə wap lə la' bi nə tuŋdyə Israɛl a. Po ghiŋ məjyə bɑ shyanyə gɑ́ Nəfo kɛbəŋ ghɔptə. Po yɛ́ mghɛ ghɔ́, jám mpfə pɔ, dɔnyə mghɛ ka'pap, jəŋ mzhwenyə cwəpuŋ. Po kɑ kwǐ pɑ něné, po hɑ pɑ́ něné. Po kɑ́ lɑ gɔl, kɑ ŋkhap, kɑ bʉ̌m nthʉm pètə yɔ lə. Kɑ pʉə ghiŋ lə́, kɑ dzə ŋkwakwa tsɑ pʉə́ lə́, kɑ mthap, kɑ pəŋ lə́, nə pá' bǎ yá gɛfa' lə́ byap mcwɔ'fa' myə́ a. Po kò bǎ nə ya tisuŋ lə́, kɑ bǎ nə tsa la' lə, po cəŋ tə jɔ mo yə bi a pɑ́ e nyəŋ wɔ dyə a, shwə pɑ́ ywə e tə ŋkhəm cwə nə ghɔ. Po nə́ kǒ nə dyə̌ sha'tə é. Bi a pɑ gɑ́ dyə bɔ ŋkhu'nyə, bɑ hwitə yɔ gɔ wuŋ nə e bi a e ka nə́ŋ ŋkhu'nyə a, bɑ hwitə yɔ gɔ pɑnyə nə́ po. Pú ko bɑ tə lɑ wɔ, biŋ bɑ́ tə yu' ghɔm tsɔ, po nə təm dyə̌, kɑ nə tisuŋ bɔ lə, dzɔp vɔp nə mkwə mɔ. Gɑ siŋ wɔ kwa' nyənyɔ gɑ́ a gɔ la' pɑ́ nə tyɛ' fyɛ', go' Sodɔm pu Gomora lə pɑ ywə nə yə tisuŋ bɔ. Po yɔ́, gɑ́ nthəm wɔ pa' mjʉ́jʉ́ a cəcɑ́ mbvʉ̌ gǒ. Po ghə fʉ́ pa' mnɔk a, biŋ dɛtə́ pa' msəŋgɔpfo a. Po pɔ́mtə́ pɔmnəŋ! Wap gɔ pɑ́ hɑ wɔ dyə fyɛ̀', pɑ́ lɑ mshɔm cwɔ wɔ dyə sinagogə pu gɔ sɔ' pɑ lɑ wɔ́ ghɔ dzə mgɔpna' pu a mfomfò nə tsǒ tsɑ̌. A gɔ sɔ' pɑ bi pu ba m bi pɑ tə pɑ́ pɑ Yudea pɑ́ mtiŋ nə ŋkwinthɛ̌. Pú sɔ' bɑ dɑ wɔ gɔ po'o, lam tsɔ kɑ sɔ nə ywə yə po gɔ ko ghɔm a ba pa' po gɔ nə ghɔm a. Po gɔ sɔ' kwi ywə yə pɔ gɔ ghɔm a pɑ́ cwə o bɔ. Nə pa' tə́ wɔ nə gɔ sɔ' pɑ ghɔm ǎ pɑ́, Zhwenyə Tá yɔ nə gɔ sɔ' pɑ ghɔm nə po. Fɑ́ gɔ sɔ' hɑ fɑ́ nə vʉ̌. A tá hɑ mú nə vʉ̌; pǒ gɔ sɔ' fɛ́jʉ́m pɑ tsə́ wap ghə pú zhwə wap. Guŋ pɔ awɛ gɔ sɔ' pɔ wɔ nə tso tsɑ̌; tə mo yə e tɔm tə́ nə miŋ a gɔ sɔ' vɔk. Cwə yə pu gɔ sɔ' zhəŋ wɔ nə mu' tisuŋ a, po ŋkhʉ́ gɔ nə yə mu'. Gɑ̌ siŋ wɔ kwa' nyənyɔ gɑ pǒ gɔ sɔ' nə kǎ nə mtisuŋ Israɛl tə miŋ bɑ Mú mo sɔ'. Mukhʉ̌ tə bɑ m dzə tap e pɑ́; ba gɛfa' lə pɑ m dzə ta fa'. Tə bi a múkhʉ̌ pɑ̌ pa' tap e, gɛfa' pɑ́ pa' ta fa' e. Pu ké gɛ dyə gɑ́ Beɛlzəbul bɑ mtsǒ pó gɔ piŋ pɔk tə cyə. Ká po pwɔk! Sɔmywə yə pu hwyətə́ tə la' pu ghɔ sɔ' ghyɛ' a tə wə pɑ, sɔmywə yə pu tʉm tə́ la' pu ghɔ sɔ' zhyə a lə pɑ́wə. Ywə yə gɑ̌ siŋ wɔ cwə jʉ́m a, po ghɔm yá dɔdzʉ̌. Ywə yə po ju' bhə tə̌ŋ po a, po ghɔm ya do dyə̌. Ka po pwɔk pɔ pyə bi a pɑ́ wap zhwə nɑ mo, tə bi a pɑ wap lə zhwə lam tsu a; po pwɔk pɑ́ mo yə bi a pɑ e zhwə lam tsɔ mo ba nɑ e nthʉm mɔk tə mi a. Pu tə́ fiŋ mcici pɑpʉə nə bɛ́ ywə á lə? A nəŋ bɑ po'o, bi a pɑ́ bǎ yɑ́mu' lə vʉ́ si nə pu tə a ba gɑ Ta yɔ piŋ. Sɔ' m nə po, a bɑ pú sɛ mnəŋ thə mɔ awɛ. Ka po pwɔk, a bɑ po cyə guŋ mcici awɛ. Mo yə e piŋ a dzə pɔmnəŋ á bɑ gɑ̌ gɔ sɔ' piŋ e dzə Ta a thə kɛbəŋ. Da' gɑ́ mo yə e kəŋnyə a dzə pɔmnəŋ a, bɑ gɑ̌ gɔ sɔ' kəŋnyə e dzə Tá a thə kɛbəŋ. Ka po kwɛ gɑ́ gɑ sɔ' nə hɑ hwitə dəmcǎ', ŋ tə́ sɔ' m nə hɑ hwitə pɑ, gɑ̌ sɔ' m nə hɑ nyə. Əŋ, gɑ̌ sɔ' hapnyə mo pu tap e, hap mú mjwǐ pu map e, hap jwi mu nə má dhə́. Mghɛ bò gɔ sɔ' pɑ́ pɑ̀ pǒ dyə. Mo yə́ e ŋkhuŋ tap e kɑ map e tə shyə a bɑ e ka ku'nyə nə m̀. Mo yə́ e ŋkhuŋ mú e yə mbɛ kɑ yə mjwǐ lə tə shyə a, bɑ e ka ku'nyə nə m̀. Mo yə e ka kwa yə bɛnyəpɛnyə nə jap jʉ̌m m̀ a ba e ka ku'nyə nə m̀. Mo yə e lwɔ' vɔk e a gɔ sɔ' pi, tɑ́ mo yə e pi vɔk e nə m̀ a gɔ sɔ' vɔk. Mo yə e lɑ wɔ dyə a dɑ pa' pɑ myə̀. Mo yə e nəŋ dɑ a, bɑ e dɑ pa' mo yə e nthəm a. Mo yə e lɑ gɔm ghɔm Si pa' gɔm ghɔm Si a gɔ sɔ' ŋkwi mcwɔ'fa' bi gɔm ghɔm Si. Mo yə e nəŋ dɑ mo dəŋdəŋ pa' mo dəŋdəŋ a sɔ' ŋkwi mcwɔ'fa' mo dəŋdəŋ. Mo yə e hɑ bǎ nthu' shyə nə nwə bi mu' mú nə pǒ pɔ́ gɑ m nə pa' e mukhʉ ǎ, bɑ gɑ siŋ wɔ kwa' nyənyɔ gɑ́ e tə gɔ sɔ' pi myə́ mcwɔ'fa' pɑ̀. Yeso lə́ miŋ nə siŋ pɑkhʉ̌ pyə shwɔppʉə́ mghǎm pa' wap gɔ nə fa' a, du gɔ ji'tə pɔ nthʉm mtisuŋ map, bɑ́ siŋ wap Cuŋ pɑpuŋ. A lə pɑ́ po'o Yohane tiŋnyə dyəcɛ̌ ju' mfa' Kristo, nthəm pɑkhʉ̌ pyə gɑ wap ghɔ́ həŋtə́ e gɑ: O bɑ́ mo yə e bɑ́wə gɔ sɔ' a, kɑ pyə gɔ piŋ pyap mu' mo? Yeso pa' bi pu gɑ: Po ghɔ siŋ Yohane ywə yə po ju' a, ba yə po jɔ a: Mfʉ̀ wə jɔ tsʉ', mkho'tə pɑwə gǐŋ dəŋdəŋ, mghɛ ka'pap pɑ́wə dɔ, mbu'mtəŋ piŋ bɑwə ju', mpfə́ pɔ pɑ́wə jam nə vʉ̌, pu piŋ bɑwə siŋ Cuŋ pɑpuŋ bi mpə̌ŋ. Buŋtsě bɑ mo yə ŋ tə gɔ pɑ ywə fa'tə yə e gɔ cyə m nə vʉsi a pə. Cwə yə pɑkhʉ̌ Yohane lə ghɔ a, Yeso ghɔmnwə bi pɔmnəŋ nə é gɔm gɑ: Pó lə gɔ m ghakgo le kɑ? Shʉɔ ka' yə fəfa wə ŋʉ'nyə a lə? Po lə gɔ m nə yɔ kɑ? Mo bɑ́ e kwa dzə mkwìŋ lə? Pɑ kwa dzə mkwìŋ shwə́ m dyə̌ mfo Tə po lə̀ gɔ m nə yɔ kɑ? Gɔm ghɔm Si lə? Əŋ gɑ siŋ wɔ gɑ e cyə gɔm ghɔm Si. A bɑ́ mo yə a bɑ pú və nə e gɑ: Po yɔ, gɑ̌ təm shwiŋkhʉɔ a dzə o; e gɔ nyaptə məjyə o dzə̌ o. Gɑ siŋ wɔ kwa' nyənyɔ gɑ̌, cəcɑ̌ pɔ pyə mjwǐ dzə a, sɔmmo ka təm nə tɑ shyə́ Yohane nu' pɔ shyə; da' gɑ́ mukəcɔk mò nthʉm Nəfo kɛbəŋ bɑ e cyə e. Tɑ́ fɑ nə cwə Yohane nu' pɔ shyə gɔ ŋkhəm tyɛ' ɔ, Nəfo kɛbəŋ bɑ a cʉ' nwə gʉ', mghɛ gʉ' nə́ pɑwə dɑ́. Nə pa' guŋ mghɔm ghɔm Si ba mco' lə ghɔ̌m tə ŋkhəm nə Yohane. Po pɑ gɔ yu' kwa' pɑpúŋ, po zhyə́ gɑ Yohane nə bɑ̀ Elia yə e gɔ piŋ sɔ' a. Mo yə e ghə mtəŋ a, e yu'! Gɑ gɔ fo' pɔ nə́ yəŋ wɔ̌ dzʉ́ nə kɑ? Bi a pɑ́ pú fo' pɔ nə́ yəŋ wɔ̌ dzʉ́ nə pɑkhʉ̌ bɑ wap cwə tətɔ bɑwə gɔm cəcɑ̌ pu gɑ: Pyə tuŋ duŋ bi po, po lə nəŋ! Ŋkwa vʉ́, po lə tsɔp kəkɔp yɔ! Nə pa' Yohane kě sɔ̌', e lə pɑ dzʉ́ ywə, e lə nəŋ nwə́ ywə, pu ghɔm gɑ zhwenyə cwəpuŋ nə e. Mú mo sɔ', bɑ́ dzʉ́ ywə, biŋ bɑ́ nwə ywə pu ghɔm gɑ: E bɑ dzʉ́ ywə, bɑ nwə mlù', so pɑ kwishwɔp pu a mghɛ mhɔ̀. Da' gɑ́ mfa' myə́ le gə pú zhyə zhyənwə yə a fɑ bi Si a. A lə pɑ po' Yeso to' nə́ ghɔmtə mtisuŋ myə e lə́ té msya nə a, nə pa' wap lě tə pʉɔ tʉm tsap a gɑ: Ghəghʉɔ o Korazin! Ghəghʉɔ o Betsaida! Nə pa' msya myə pu lə ghə cəcɑ̌ po a, lə pe' bɑ́ m Tiro pu Sidon, bɑ wap lě da' shi' və́ ŋkwá mpʉə, bʉɔ tʉm tsap. Əŋ gɑ siŋ wɔ kwa' nyənyɔ gɑ́ tyɛ'dzʉ nə fyɛ', go' Tiro pu Sidon lə pɑ ywə nə yɔ. Sɔ' m nə o m Kapɛrnaum, o kwɔ' tə ŋkho pɑ kɛbəŋ, bɑ o gɔ sɔ' fi' tə ko guŋ a vʉ̌. Nə pa' msya myə pu lə ghə ywə o a lə pé'e bɑ́ m Sodɔm, bɑ Sodɔm jɑ pɑwə tyɛ' ɔ. A po' tə bɑwə siŋ o gɑ tyɛ' fyɛ', go' Sodɔm lə pɑ́ ywə nə go' o. A lə pɑ cwə o bɔ, Yeso lɑ ghɔm gɔm gɑ: Gɑ sé o m Ta, Cyəpɔ kɛbəŋ pu cǎ', nə pa'ǒ tʉm ywə bɔ bi mzhyə́ fʉ́ pu a mzhyənwə, da' gɑ biŋ da'tə bi pǒ mkəcɔk pó. Əŋ m Ta, o gə po'o pa' o yɔ a. Tá bɑ e hɑ guŋ ywə awɛ bəm. Sɔmmo ka zhyə́ Mú tə ně da' Tá, sɔmmo lə piŋ nə́ŋ jyə́ Tá tə́ ně da' Mú, biŋ gə mo yə Mú ghə gɑ́ e zhyə́ e a. Po sɔ' bəm guŋ yɔ awɛ pyə ŋkhəm bɑ́wə dzá wɔ a, hɑ hwitə bi po. Po kwa kəlo' á nə po, sɔ ji'tə nwə a, nə pa' gɑ bɑ gɑ ghə tʉm byányə́ ba nə fi'nɑ hɑ Si, po gɔ ghə hwitə nə tʉm tsɔ. Əŋ, kəlo' a bɑ a yɛ̀ nə kwa, ŋkhəm a piŋ jɛ́ gɑ fǎ. A lə pɑ cwə o bɔ, Yeso pɑ shyə́ nə mu' pé msɛtʉ̀ɔ tyɛ' Sabat. Jikǔ' yɛ pɑkhʉ̌ pyə́. Wap to' nə pɑ bo' mcɛ́ msɛ́tʉ̀ɔ bɑ pfɑ. Pɑ Farisai lə nə yɔ po'o, gɔm bi Yeso gɑ: Yɔ, pɑkhʉ̌ wə́ gə ywə yə a bɑ̀ pu ka piŋ gɑ́ pu ghə tyɛ' Sabat a. E pa' bi pu gɑ: Po la m ŋkhe ywə yə David lə́ ghə cwə yə jiku'u lə yɛ́ e pu a mso ghiŋ pyə a? Pa' e lə kǒ Dyə Si, pu a mso pyə, pfɑ msɛ̌ nə nuŋpwɔ' myə a lə́ bɑ pu ka piŋ gɑ sɔmmo nə pú pfɑ, kɑ yʉ́, kɑ mso pyə lə, tə ne da' mkamsi a? Kɑ pó la m ŋkhe nə mcò' gɑ́ a bɑ́ tyɛ' Sabat Dyə Si, mkamsi pɔptə mcò' la' a pɑ bɑ wap hɔ nwə̀ a? Tə gɑ siŋ wɔ gɑ ywə tsɔ'ɔ bɑ ǎ ghu' shyə Dyə Si. Po la' pe' ju' ywə yə ghɔm tsyə a gɔm gɑ: Gɑ̌ shəŋ cɔmmtsò, ŋ tə́ shəŋ tsə pwɔ' a gɔm a, bɑ po ka nyəŋ shɛ thə pɔ pɔ̀ gɑ pyə wap ka hɔnwə a. Nə pa' Mú mò bɑ́ ta Sabat. Yeso lə lǔ tsʉ'u gɔ ŋkho sinagogə pú. Mu' mo lə bɑ dyə bɔ bɑ pu é cwyəm Pɑ Farisai həŋtə Yeso nə dəŋtə e gɑ: A bɑ pú piŋ gɑ pú yɛ́ gho tyɛ' Sabat a? Da' gɑ́ Yeso ghɔm bi pú gɑ: Wɑ nə po bi a pɑ́ e ghə mú jʉ̀jʉ̀ e yɑmu', e vʉ̀ ghʉm tyɛ' Sabat, bɑ é tə́ gɔ kwa é, té é ghʉm a? Tə mcʉ̌m sʉ' nə mo yə a bɑ e cyə jʉ̀jʉ̀ a! A bɑ́ pú piŋ gɑ́ pú ghə nwə pɑpuŋ tyɛ' Sabat. E lə piŋ gɔm bi bɛ bɔ gɑ: Siŋ pu ǒ. Bɛ bɔ lə siŋ pù e, a cwə pɑpuŋ pa' yə mu' ghəŋ a. Pɑ Farisai lə təm cwəlɔ, shu'tə shɔm pa' wap gɔ ghə tə́ zhwə Yeso a. Yeso lə nə yu' po'o, dú tsʉ'u, vəŋ du pɔ yap jʉ̀m e, e pɑ́ jɛ̀ wap awɛ. Bɑ gɔm bi pu gɑ́ ka wap ghə pu zhyə e, po'o gɑ ywə yə gɔm ghɔm Si Esaya lə ghɔm a pəmtə́ gɑ: Yəŋ bɑ gɛfa' a yə gɑ shi e a, mo yə gɑ ŋkhùŋ e té' a, yə a buŋ gɑ shwɔ' e a. Gɑ gɔ sɔ' nyəŋ Zhwenyə a nə é, e piŋ bɑ da'tə nwə dəŋdəŋ bi nthəm nthə̌m. E tə gɔ sɔ' pɑ́ cəŋ nwə pɑ; e lə pɑ́ shɔk pu lə pɑ́ ju' gi e nə sɔmtsʉ'. E tə gɔ sɔ' po' ka' tsyə a pɔ a pɑ́, e lə pí səsa' mɔk, tə nwə dəŋdəŋ cyə́ shù. Nthəm nthə̌m gɔ sɔ' pɑ́ yap mkwɛnyə map pɑ́ nə tsó tsyə̀. Pú lə lɑ̌ mu' mo sɔ' bi Yeso, zhwenyə cwəpùŋ pɑ́ nə e, e pɑ́ fʉ̀ biŋ bɑ́ tə ghɔm; Yeso yɛ̀ é tə e ghɔmnwə, biŋ jɔ tsʉ'. Nwə lə cyə̌ pɔmnəŋ, wap pɑ́ gɔm gɑ: Mo yəŋ gɑ tə́ bɑ́ Mu David a lə? Da' gɑ pɑ Farisai lə́ nə yu' yap gɔm gɑ: Mo yɑ̌ dɑ pɑ́ Beɛlzəbul tá mzhwenyə cwəpuŋ tə́ nə́ jəŋ mzhwenyə cwəpuŋ. Yeso lə zhyə́ mkwɛnyə map gɔm bi pu gɑ: Guŋ nəfo tsyə a ghaptə a bɑ guŋ bipǐ. Bi a pɑ́ sɔm tisuŋ, kɑ sɔm tuŋdyə lə yə ŋkhyɛ'nyə ko nə a lə vɔk. A pɑ gɑ́ Sata zhəŋ Sata, bɑ e ghaptə nɑ e, bɑ nəfo tsyə́ gɔ piŋ pɑwə m gɑ kɑ? A pɑ gɑ́ gɑ dɑ Beɛlzəbul tə́ nə́ jəŋ mzhwenyə cwəpuŋ bɑ pɑkhʉ pɔ dɑ kɑ́ jəŋ wap ɑ? Wap nə gɔ cwɔ'tə wɔ pɑ́ wap wap. Da' gɑ́ a pɑ gɑ́ gɑ̌ dɑ Zhwenyə Si tə́ nə jəŋ mzhwenyə cwəpuŋ bɑ nəfo Si sɔ' tə́ ŋkhəm nə po. A nəŋ bɑ́ bi a pɑ mo ko dyə gɛ gʉ̌' jʉ tsə́ tsyə m gɑ́ kɑ? Tə ləŋdzə kwɑ e? E kwɑ e bɑ e gɔ sim dyə e. Mo yə pyə e tə bɑ a pɑ́ bɑ́ gɛ bo a, mo yə pyə e tə nəŋ bəmtə shu'tə́ a pɑ sa'tə. A po'o tə gɑ̌ siŋ wɔ gɑ́ pu gɔ sɔ' lɑ guŋ mhɔ bɑ guŋ mcap nə cwyɛ' pɔmnəŋ, da' gɑ pu tə gɔ sɔ' cwyɛ' mo nə nə cap Zhwenyə pɑ. Mo yə e ghɔmnwə nə Mú mo a pu gɔ sɔ' nə cwyɛ' e, da' gɑ bi a pɑ́ e ghɔmnwə nə Zhwenyə Dɔlɔ̌ bɑ pu tə gɔ sɔ' nə cwyɛ' e nthʉm yəŋ dzʉ̌ kɑ yə dzʉ̌ yə a gɔ tə sɔ' a lə. Mo ghə ta'thə pɑpúŋ, bɑ e gɔ ghə tɔmthə́ pɑpuŋ, biŋ gə ta'thə cwəpùŋ bɑ o gɔ ghə tɔmthé cwəpuŋ. Pù jyə ta'thə pɑ nə tɔm é. Wɔ gwya mnɔk mtìŋ, bi a pɑ́ po ghɔmnwə pɑpuŋ m gɑ́ kɑ̀, bɑ po pɔk tiŋ pá' a? Nə pá' ywə yə mo gɔm a bɑ ywə yə a nthəm nthʉm tʉm e a. Mo pɑpúŋ nthé tsə pɑpuŋ nthʉm nthɛ́ pɑpuŋ e; mo cwəpuŋ pɑ́ nthé tsə cwəpuŋ nthʉm nthɛ cwəpuŋ e. Tɑ́ gɑ siŋ wɔ gɑ́ pɔmnəŋ gɔ sɔ' pa' nwə nə mghɔm cwəpuŋ myə a lə təm shwə́ pu a. Nə pa' a gɔ sɔ' cyə pɑ́ m nə mghɔm mǔ tɑ́ o təm nə shɛ́, piŋ cyə pɑ́ m nə mghɔm mǔ tɑ́ o kó nə shɛ́. A lə pɑ́ po'o shɑ́ pɑ zhyə́ mco' pu a pɑ Farisai lɑ ghɔm gɔ́m gɑ: Ta pyə wə shəŋ gɑ́ o ghə pyə yɔ ta' mtiŋ. Yeso pa' bi pu gɑ: Pɔ nə wɔdzʉ cwəpuŋ pɑ́ ghə ghap həŋtə́ mtiŋ! Pu tə gɔ piŋ la'tə sɔm mtiŋ bi pu pɑ́ tə ně da' myə́ gɔm ghɔm Si Yona. Nə pa' dəŋdəŋ pá' Yona lə ghə mtyɛ'dzʉ́ məthá ba mtsʉ̌' məthá vam mɑ bapgu a, a dəŋdəŋ po'o tɑ́ Mú mo gɔ sɔ' ghə mtyɛ'dzʉ́ məthá ba mtsʉ̌' məthá nthʉm ca'. A gɔ sɔ' pɑ́ tyɛ'dzʉ́ nə fyɛ', pɑ́ Ninivə lusi pu a pɔ nə yəŋ wɔdzʉ́ pɑ́ Ninivə pɑ nyəŋ shɛ thə̀ pú nə pa' a bɑ wap lě ju' ghɔm Yona bʉɔtʉ́m tsap a. Tə́ po zhyə gɑ́ mo yə e tsɔ' a cyə Yona. A gɔ sɔ' pɑ́ nə tyɛ̌' dzʉ nə fyɛ́' shɛ, Mɑfo guŋ Mto dzʉ́ lusi pu a pɔ nə yəŋ wɔdzʉ, e nyəŋ shɛ thə pú, nə pa' e lə fɑ tə dhə́ dzʉ́ sɔ' jú' zhyənwə Salomoŋ. Tə po zhyə gɑ mo yə e tsɔ' a bɑ e cyə Salomoŋ. A bɑ́ cwə yə zhwenyə cwəpuŋ təm nə mo a, e pɑ ŋkha nə mghak tsʉ́', bɑ shəŋ tsʉ' hwitə̀, da' gɑ́ e lə yɔ pɑ́. A pɑ́ po'o e ghɔm gɑ: Gɑ̌ gɔ pɑnyə nə tsʉ' shwə a yə dɑ təm nə a. E bɑnyə cwəlɔ, jɔ tsʉ' la' ywə pɑ nə, bɑ pu khʉ́m, jap ŋkhɛ nə. E ghɔ cwəlɔ dɑ shɑ mzhwenyə sɔmbʉə bɑ wap pɔk shyə e, pu a pú sɔ' ŋkho nə mo bɔ; mo bɔ piŋ bɔk shyə́ pa' e lə ji bɑ́ a. A gɔ sɔ' pɑ́ pɑ dəŋdəŋ po'o nə yəŋ wɔ̌ dzʉ̀ cwəpuŋ. Cwə yə́ Yeso lə pɑ́ gɔm nwə bi pɔmnəŋ a, map e pu a mfɑ pyə tiŋnyə dzʉ̀ bɑwə shəŋ nə ghɔmnwə bi e. Mu' mo ghɔm bi e gɑ: Mɔ̌ pu a mfɑ pǔ tíŋnyə̀ dzʉ́, bɑwə shəŋ nə ghɔmnwə bu. Yeso pa' bi mo yə́ e lə ghɔm bi e po'o a gɑ: Wɑ̌ bɑ́ ma a? Pɑ wɑ̌ pɑ mfɑ pɑ̌? Biŋ nya pu e nə pɑkhʉ̌ pyə gɔm gɑ: Yɔ ma a bɑ mfɑ pɑ̌ pɔ gɑ; Bǎ wɑlə́ yə e ghə ywə yə Tá a thə kɛbəŋ shəŋ a bɑ e bɑ́ fɑ a yə mbɛ ba yə mjwǐ, biŋ bɑ́ ma á. A lə pɑ́ tyɛ'dzʉ bɔ̌, Yeso təm dyə, shwə kə́ŋ shyə lɑpʉə. Mɑ vəŋ pɔ lə cu'tə bəŋ e tɑ́ e kwɔ' shwə nthʉm kənu'; guŋ pɔmnəŋ awɛ cwə kə́ŋ shyə. E lə lɑ̌ ghɔm tə́ tutə̀ gɔm mnwə bi pú tɑ́ a yɔm gɑ: Mu' dzəywə́ lə tə̌m bɑ́ dzə́ ywə́. Pa' e lə pɑ́ dzə́ ywə́ a, mu' gwya ywə lə vʉ giŋnyə mə́jyə̀; pǒmsəŋ kɛbəŋ sɔ', pfɑ́. Mu' vʉ nə tsʉ' mwɔ', la' cǎ' pɑ́ tsʉ'u sàk, a lə wuŋ sá', pa' cǎ' la tə bɑ́ bɑ ǎ cu a pɑ́, nam cwə tə sa', ntho, a yak mŋɛ́ jə́m. Mu' vʉ nthʉm júŋ; jǔŋ kwɑ, a fám. Mu' vʉ nə ca' pɑpuŋ jam nthɔm, mu' yam nthɔm ŋkhə, mu' yam mghamnthɔk, mu' yám mghamnthá. Mo yə e ghə mtəŋ a e yu'. Pɑkhʉ Yeso lə sɔ' bəŋ e həŋtə́ é gɑ: Nwə́ kɑ́ o pɑ dɑ ghɔm tə tútə̀ gɔm nwə bi pú? Yeso pa' bi pú gɑ́: Nə pa' a sɔ' m bi po bɑ pú ghə gɑ po zhyə nwə cyə zhyə́nwə nə Nəfò kɛbəŋ, tə sɔ' m nə pú, a lə pɑ po'o. Nə pa' pu gɔ sɔ' hɑ́ ywə bi mo yə e ghə ywə a, é cəŋtə ji, tɑ́ sɔ' m nə́ mo yə e ka ghə ywə a, pù kwi ba yə à bi a. Ywə yə a gə bɑ́ gɔm pɑ́ ghɔm tə tutə bi pú a bɑ gɑ wap dé tə yɔ̀, bɑ ju' tə yu'. Ghɔm gɔm ghɔm Si Esaya piŋ bɑ bəmtə nə pù ghɔm tsyə a gɔm gɑ: Pǒ gɔ sɔ' yu' pɑ gɑ kɑ́lə́, po lə yu', lé pɑ́ gɑ kɑlə́ po lə yɔ. Nə pa' mtʉ̌m pɔ pɔŋ gɑ bɑ a tsɑ̀, bɑ mtəŋ map sɔk. A bɑ wap cɑ́ mnyə map, po'o gɑ wap kɑ́ lɑ mnyə map jɔ tsʉ' wap lə lɑ mtəŋ map jú', wap lə nəŋ dɑ mtʉm map ju', po'o gɑ wap kɑ pʉɔtʉm tsap, biŋ jɛ wap. Tɑ́ sɔ' m nə po, mnyə mɔ ghə puŋtse, nə pa' a jɔ, ba mtəŋ mo ghə puŋtsé nə pá' a ju'. Kwa' nyənyɔ gɑ̌ siŋ wɔ gɑ́ mghɔm ghɔm Si jɔmyɔ̌m, ba bo'gwyə́ pɔ dəŋdəŋ lə cə́ŋ nə yɔ ywə yə po wə jɔ a, wap lə́ yɔ, biŋ ju' ywə yə po wə ju' a, wap lə yu'. Pó yu' pa' ghɔm tə tútə̀ dzə̀ywə́ nthutə a: Mo yə e ju ghɔm Nəfo la' e kyəp a, a bɑ cwəpuŋ sɔ' kwi ywə yə a bɑ pú tsə nə tʉm tsyə́ a, a bɑ mo yə pu dzə ywə nə e m kəŋ məjyə a. Mo yə pú dzə ywə nə e m pa' tsʉ' mwɔ' a, a bɑ mo yə e ju' ghɔm, gúŋ dɑ ŋwɛnyə ŋkwi. Da' gɑ la' gɛ́ pɑ́ nə é, e pɑ́ yə pɑ́ mo cwə bɔ̌, ghəghʉɔ kɑ nə cwɔ' mkwə cwəpuŋ nə ghɔm cwə́ tə sɔ̌' e wuŋ bvʉ. Mo yə pu dzə ywə nə e m nthʉm juŋ á, a pɑ́ mo yə e ju' ghɔm, da' gɑ́ nə zhwiŋ dzʉ́, ba ghi'nyə fʉ' fam ghɔm bɔ, e lə yam tɔm e. Mo yə pu dzə ywə nə e m nə ca' pɑpuŋ a, a pɑ mo yə e ju' Ghɔm, ŋkhyəp; gə nthɔm, jám ŋkhə́ nə ta', mu' yam mgham nthɔ̌k, mu' yam mgham ntha. Yeso lə kwi' gɔm mu' ghɔ̀m tə tútə̀ gɑ́: Nəfo kɛbəŋ bɑ́ pa' mu' mo yə e tsə̀ gwyà ywə pɑ́puŋ pé e a. Cwə yə pɔmnəŋ lə pɑ́wə di a, gɛ bo e ya' sɔ' dzə ghé cwəpuŋ tuŋ msɛ́tʉ̀ɔ cwəlɔ, gɔ̌. Cwə yə msɛtʉ̀ɔ lə sa' tə du' cwɔ' e ghé cwəpuŋ təm yə́. Mghɛ fa' tá gɛ lǎ' sɔ' gɔm bi e gɑ: Cyəpɔ o ka tə tsə̀ pɑ gwya ywə pɑpuŋ pé o lə̀? Tɑ́ ghé cwəpuŋ fɑ m hɑ nthʉm o? E ghɔm bi pú gɑ́: Gɛ́ bo nə gə́ pa' a. Mghɛ fa' ghɔm bi e gɑ: O kuŋ gɑ pyə ghɔ shwɔ' a? E ghɔm bi pú gɑ: Gɛ̌, bwɔk gɑ́ bi a pɑ́ po nə cwɔ' ghɛ́ cwəpuŋ, shwɔ' ba msɛtʉɔ. Po tak guŋ e awɛ nəŋ a pəmtə ŋkwyə. Tə ŋkhəm tyɛ' nə lɑ tsə́ pé; a piŋ bɑ cwə nə lɑ tsə́ gɔm bi pɑ lɑ tsə́ pé gɑ: Po lə̀ŋdzə̀ shwɔ' mghɛ́ cwəpuŋ, ŋkwɑ́ bo'bò' nthó mɔk; tɑ́ sɔ' m nə́ msɛtʉɔ, po cwa nyəŋ ŋkhiŋ. E lə kwi' gɔm mu' ghɔm tə tútə̀ bi pú gɑ: Nəfo kɛbəŋ bɑ pa' sɔm thə́ tsəsɔk yə mu' mo dzə́ pé é a. A bɑ a kɔk shyə guŋ gwya ywə awɛ. Da' gɑ́ a shwə tə sa', ji shyə guŋ mthə́ jap awɛ ji tà' thə́ pǒ msəŋ sɔ' bɑ́ ba' mkɔ máp nə bú myə́. E lə kwi' gɔm mu' ghɔm tə tútə̀ bi pu gɑ: Nəfo kɛbəŋ bɑ́ pá' ywə nə gə msɛ̌ kwɔ' yə mjwǐ nyəŋ muywə nə msɛ́ bǔ ntha nə gə a cəŋtə kwɔ' a. Guŋ mnwə bɔ awɛ, Yeso lə́ dɑ pɑ ghɔm tə̀ tutə̀ gɔm bi pɔmnəŋ, e lə ghɔm sɔm nwə bi pú tə lɑ pɑ́ ghɔm tə́ tutə̀ gɔm pɑ́. Po'o gɑ ywə yə gɔm ghɔm Si lə́ ghɔm a a pəmtə gɑ: Gɑ gɔ sɔ' ŋa' shwə a ghɔm pɑ ghɔm tə́ tutə̀, siŋ tsə tsyə a lə tʉmnyə tə fɑ cwə nə́ tʉ dzʉ a. Yeso lə tak pɔmnəŋ cwəlɔ bɑnyə dyə́, pɑkhʉ̌ pyə́ sɔ' bəŋ é gɔm bi e gɑ: Tutə́ ghɔm tə́ tutə̀ ghé cwəpuŋ pé bi pyə. E ghɔm bi pu gɑ: Mo yə e dzə gwya ywə pɑpuŋ a bɑ Mú mo. Pě pɑ́ dzʉ̌, gwya ywə pɑpuŋ pɑ́ pɔ Nəfo, ghé cwəpùŋ pɑ́ pɔ mo cwəpuŋ. Gɛ̀ bò yə e dzə́ a, e pɑ́ Sata; cwə nə lɑ tsə̀ a pɑ́ jʉɔjʉ̀m tyɛ'dzʉ́; pɑ lɑ tsə́ a pɑ́ pɑ aŋgəle. Dəŋdəŋ pa' pu shwɔ' mghe cwəpuŋ nthó mɔk a, a gɔ sɔ' pɑ́ pɑ́ po'o nə jʉɔjʉ̀m tyɛ'dzʉ́. Mú mo gɔ sɔ' təm pɑ aŋgəle pyə́ wap cwɔ' guŋ tsə fa'tə awɛ pu a guŋ pɑ ghə mnwə cwəpuŋ, thé wap nə Nəfo biŋ ma' wap nthʉm mɔk gwyə́, tsʉ' u bɔ gɔ sɔ' pɑ tsʉ' lɔ̀ ba nə mpfɑ msuŋ. Pɔ dəŋdəŋ gɔ sɔ' pɑ ləŋnyə pa' nàm a nthʉm Nəfo Tá yap. Mo yə e ghə mtəŋ a é yu'. Nəfo kɛ́bəŋ bɑ pa' mu' fʉ' yə a lə bɑ a tʉmnyə nthʉ́m mu' pé, mu' mo yɔ a: E lə piŋ shəŋtə́ dʉ́m fʉ' bɔ. Dɑ ŋwɛnyə gɔ fiŋ guŋ tsə́ tsyə́ awɛ, nə sɔ' jó pé bɔ. Nəfo kɛbəŋ ŋkwi' bɑ́ pa' mu' nthɛ mtɔ̌ yə e lə shəŋ tsə́dzə nthʉɔ. E lə́ cwə́ tɑ́ jɔ tsə́dzə́ nthʉɔtʉɔ gɔ fiŋ tsə tsyə awɛ nə jó. Nəfo kɛbəŋ ŋkwi' bɑ́ pa' nthənthɔm yə pu ma' shyə lɑpʉə nə nthé nthi nthi bapgu a. A shwə́ tə do, pu fəŋ jap kəŋ shyə, shwə́ bəŋ o cwəlɔ dɑ sap dak yə pɑpuŋ, biŋ gwa' yə a tə sɔmywə a pɑ́. A gɔ sɔ' pɑ́ pɑ́ po'o nə jʉɔjʉm tyɛ'dzʉ: Pɑ aŋgəle gɔ sɔ' təm, té pyə pɔ cwəpuŋ nə pyə dəŋdəŋ, ma' wap nthʉm mɔk gwyə́; tsʉ'u bɔ gɔ sɔ' pɑ tsʉ' lɔ̀ ba nə npfɑ msuŋ. Yeso lə hə́ŋtə wáp gɑ: Tə́ pǒ yu' guŋ mnwə bɔ awɛ lə? Wap pa' bi e gɑ: Əŋ. E piŋ gɔm bi pu gɑ: Bǎ ya gɛ zhyə́ mco' lə yə ě zhyə́ nwə nə́ Nəfo kɛbəŋ a, bɑ́ pa' mu' gɛ lǎ' yə e nthé ywə sə́ ba yə bvò nthɛ é a. Yeso lə́ mǐŋ nə́ ghɔm mghɔm tə́ tutə̀, tsʉ'u bɔ, du gɔ. E lə́ kó la' pú, bɑ ji'tə ywə bi pɑ wə́ pú dyə sinagogə, bɑ shə́ŋtə ji'tə wap tə nwə cyə wap; wap pɑ gɔm gɑ: Yəŋ nthi zhyənwə pu a msya nwə̀ fɑ m hɑ́ bi e? E tə́ bɑ mú ŋkham mthə́ pa' a lə́? Pu tə́ ŋkhe map e gɑ Maria a lə́? Mfɑ pyə́ lə pɑ́ pɑ Yakop pu a Yosɛp ba Simon ba Yuda lə̀? Ba mfɑ pyə́ pyə pɑ jwǐ lə pɑ́ pɑ́ cəcɑ̌ pɑ́ lə̀? Tə mɔ gə nthi mnwə fɑ hɑ bi é? Yeso lə bɑ bi pú bɑ́ pa' ywə fa'tə a. E lə ghɔm bi pú gɑ: Pu gwak gɔm ghɔm Si pɑ nthʉm gùŋ pú ba m dyə̌ é. A lə́ pɑ́ po'o Yeso lə ghyɛ' gə msya wə́ pɑ́ nə pa' wap la tə bɑ wap ghə piŋnthʉm a pɑ́. A lə́ pɑ́ cwə o bɔ, fo Herode yu' dəŋ pa' pu lə bɑwə gu'tə́ tsó Yeso a, biŋ gɔm bi pɔ pyə gɑ: Bɛ bǎ bɑ́ Yohane nu' pɔ shyə́! A bɑ́ e yam nə vʉ̌; a ywə yə a gə tɑ e pɑwə nthé msya a. Nə pa' a lə́ bɑ Herode lě gə̀ pu ghəm Yohane dɑ́ gwɑ́ mtʉɔ shəŋ é, nyəŋ e dyəcɛ̌, po'o dú nə nwə Herodia jwi fɑ Herode yə tso tsyə bɑ Filipo a. Nə pa' Yohane lə bɑ́ gɔm bi Herode gɑ́, pú ká piŋ gɑ́ o lɑ jwi fɑ o. A lə bɑ́ po'o Herode pɑ shəŋ nə zhwə Yohane, da' gɑ́ bɑwə bwɔk pɔmnəŋ, nə pa' wap lə́ bɑwə dɑ Yohane gə gɔm ghɔm Si a. Da' gɑ́ a ti bɑ nə ŋwɛ́nyə tyɛ' tsə Herode, mú gò Herodia nə̀ŋ ywə dzə̌ msǒ Herode, a puŋ e te'te'. A lə pɑ̌ po'o, Herode kɔ́ mkɔ nə gɔm bi mú mjwǐ bɔ gɑ́ e həŋtə́ pɑ kɑ bi lə́ bɑ e gɔ hɑ bi e. Map e lə thənyə e, e ghɔm bi Herode gɑ́: Hɑ́ thə́ Yohane nu' pɔ shyə bəm tsɔ'ɔ nthʉm pak kɛ́. Nwə lə pɔk fo Herode. Da' gɑ a cyə́ m nə mkɔ myə e lə kɔ a, ba m nə mso pyə́, e ghɔm gɑ pu hɑ́ bi e. Tə́ nthəm pu ghɔ dyə́ cɛ̌ ja' thə Yohane. Pú lə lɑ̌ thə́ e nə sɔ' nthʉm pak kɛ hɑ bi mǔ mjwǐ, e lɑ nɑ gɔ hɑ bi map e. Pɑkhʉ̌ Yohane lə sɔ' ŋkwa pfə e nə gɔ nthəŋ; biŋ gɔ siŋ Yeso. Yeso lə nə yu' mcuŋ bɔ, dɑ kənu' nə gɔ nə mu' ghakgo, tsʉ' tsiŋ, pɔmnəŋ lə nə yu', nthəm nə mtisuŋ jyəjyə̀ jap jʉ̀m e, giŋ mkwə̀. E lə̀ nə təm kənu', jɔ mɑ du pɔ mtsò map kú e, e piŋ bɑ jɛ́ mŋkho'tə. A lə kú' bwadzʉ̌, pɑkhʉ̌ Yeso ghɔ bəŋ e, gɔm bi e gɑ: Tsɔ'ɔ yəŋ yə pɑ nɑ a wə bɑ ghakghak tsʉ', ya'dzʉ̌ piŋ bɑ́ bà ǎ cyə̀; zhəŋ pɔmnəŋ wap ghɔ nthʉm la' jó ywətsʉ. Da' gɑ Yeso ghɔm bi pu gɑ: A ka kwitə̀ gɑ̀ wap ghɔ tsʉ'u. Kwa' wɔ hɑ ywətsʉ bi pú. Wap ghɔm bi Yeso gɑ: Pyə ghə da' msɛ́ mta' tɔ biŋ gə bapgu duŋ pʉə tsɔ'ɔ. Yeso ghɔm gɑ: Po hɑ bəm. E lə ghɔm gɑ́ pɔmnəŋ cwə́tə́ dəm mghě, biŋ kwi msɛ́ mta' tɔ ba bapgu duŋ pʉə, bʉ' mnyə myə́ de thə́ nyəŋ byanyə nə́. Bo' msɛ cwəlɔ, hɑ bi pɑkhʉ̌ pyə, wap hɑ bi pɔmnəŋ. Guŋ yap awɛ lə pfɑ, jwyə. Pu piŋ daktə bo' myə́ a lo nə msap shwɔppʉə mghǎm. Pɔ̀ pyə́ wap lə pfɑ a, lə́ bɑ́ gwɛ a pɔ̀ sha'tɔ, tə̀ sɛ pɑ jwǐ pu a pǒ mkəcɔk pó. Yeso lə́ wuŋ nthənyə pɑkhʉ̌ pyə gɑ́ wap ko nthʉm kənu', bɑ́ sa' gɔ nə́ yə mu' jʉɔ, e cʉ' bɑ da'nyə pɔmnəŋ. E lə́ miŋ nə́ la'nyə pɔmnəŋ, bʉɔ gɔ dəm kúŋ, tsʉ' tsiŋ shwyɛ'nyə Si. A lə pɑ̌ bwadzʉ̌, e pɑ tsʉ'u do é. Kənu' tsə́ pɑ̀ tə gʉə sʉəsʉə dəm shyə. Fa shyə́ pɑ́wə mɛnyə, fəfa pɑwə ŋkwa é nə biŋ m jʉ̀m. A lə nə pɑ́ gwɛ a ŋkwɔ'dzʉ̌, Yeso ghiŋ dəm shyə pɑpʉə bɑ sɔ' m bəŋ pú. Pɑkhʉ̌ pyə lə́ nə yɔ pa' e wə giŋ dəm shyə, səŋ te', wap ghɔm gɑ: A ghɛnyə́ mo, bwɔk, shwé tə thə́. Da' gɑ́ Yeso wuŋ gɔm bi pu gɑ: Po kyəp tʉm tsɔ, a bɑ́ myə̀, ka po pwɔk. Pɛtrɔ ghɔm bi e gɑ: Cyəpɔ a pɑ́ gɑ́ a bɑ kwa' wə, o ghɔm gɑ́ giŋ dəm shyə sɔ̌' bəŋ o. Yeso ghɔm bi e gɑ: Sɔ̌'. Pɛtrɔ tə̀m kənu' giŋ dəm shyə́ bɑ gɔ m bəŋ Yeso, da' gɑ gʉ' fəfa ghə̀ e pwɔk, ntho' nə nuŋtə m shyə, shwé gɑ: Cyəpɔ, vɔk a! Yeso wuŋ nya pu e, ŋkhyəp e, gɔm gɑ Mo mu ywə piŋnthʉm, nwə kɑ́ bɑ o zhʉ'nyə́? Wap pu e lə̀ ko nthʉm kənu' cwəlɔ, fəfa mǐ. Pɔ pyə́ wap lə bɑ́ nthʉm kənu' a kam mkwi'tə dzə é gɔm bi e gɑ: Kwa' nyənyɔ, o bɑ́ Mǔ Si. Wap lə sa' shyə, ŋkhəm nə cǎ' guŋ Genezarɛt. Pɑ́ tsʉ'u bɔ zhyə́ Yeso, siŋ guŋ pɑ́ ghəŋ tsʉ'u awɛ, pu pɑ dɑ guŋ mghɛ gho awɛ sɔ' bi e. Bɑ shwyɛ'nyə e da' gɑ́ e piŋ nə tak gɑ wap kwak mcwǐŋ dzə e, a piŋ bɑ po'o guŋ pɔ pyə wap lə́ bɑwə́ ŋkwak a pɑ́ jɛ́. A lə́ pɑ̌ po'o pɑ Farisai pu a pɑ zhyə mco' pyə wap lə́ bɑ́ Yerusalɛm a sɔ' bəŋ Yeso gɔm bi e gɑ: Nwə́ kɑ́ pɑkhʉ̌ pǔ pɑ́ bɔptə́ mà gùŋ? Nə pa' wap tə sɔk bú map cwə nə́ tsʉ̀ ywə pɑ́. Yeso pa' bi pu gɑ: Kwa' wɔ, nwə kɑ́ po pɑ́ bɔptə mcò' Si shyə m nə́ mà gùŋ yɔ? Nə pa' a bɑ Si lə́ ghɔ̌m gɑ: ghə mku' tɔ̌ pu mɔ̌, ba m gɑ: Mo yə ě nyəŋ do thə́ tap é kə́ map e a lə, bɑ pu gɔ nyəŋ shɛ́ vʉ thə é. Da' gɑ́ po gɔm gɑ́: Mo yə e ghɔm bi tap e kɑ bi map e gɑ̀ ywə kwitə̀ yə ŋ khɑ́ bɑ́ gɔ hɑ bu a zhi tsə́ pwɔ' dɔlɔ̌ a, bɑ mo bɔ tə́ gɔ piŋ ghə mku' tap e pɑ́. A bɑ po'o bɑ po lɑ mà gùŋ yɔ, bvɑnyə́ mco' Si. Pɑ tsɛbǔ! Esaya lə la' shəŋtə́ gɔm ghɔm Si nə po pa' e lə gɔm gɑ: Pɔ pɔ̌ gɑ gə mku' mə̌ pɑ shyə shwə̀. Da' gɑ tʉm tsáp pɑ́ tə gʉə sʉəsʉə nə m̀ wap shu'tə se á pɑ pɔpɔ, nə pa' ywə yə wap ji'tə a bɑ pɑ́ mco' monəŋ. Ywə yə a bviŋ mo a. Yeso lə́ piŋ ŋkhe pɔmnəŋ gɔm bi pú gɑ: Po yu', tə jú'! Tə ywə yə a ŋkho shwə mo a nə bviŋ é pɑ́; ywə yə a nthəm shwə mo a nə bviŋ é. A lə pɑ́ po'o pɑkhʉ pyə fʉ'tə nɑ́ hɑ bəŋ é gɔm bi e gɑ: Tə́ o zhyə́ gɑ́ pɑ Farisai nə yu' ghɔm bǎ a fa'tə wáp lə? E pa' bi pú gɑ: Gwya ywə yə Tǎ thə́ kɛbəŋ ka tsə̀ a, pu gɔ cwɔ́' Po tak wap nə́ŋ: A bɑ̀ mfʉ̀, wap pɑwə shya mfʉ̀; bi a fʉ̀ nəŋ bɑ shya fʉ bɑ wap gɔ pəmtə vʉ́ tɔ́m pɑpʉə. Pɛtrɔ lɑ ghɔm gɔm bi e gɑ: Tútə tsɔ ghɔm tə́ tútə bi pyə. Yeso ghɔm gɑ: Ba wɔ yɔ jɑ́ pɑ́ mfʉmnyə pɔ a? Po ka zhyə́ gɑ́ ywə yə a ŋkho shwə́ mo a, shyə́ vam e, gɔ pu wa' ghʉm a? Tə́ ywə yə a nthəm shwə mo a fɑ m nthʉm tʉm e, biŋ bɑ ywə yə a bviŋ mo a. Nə pa' mkwɛnyə cwəpuŋ, nə zhwə mo, nə ghə ghap, cǔŋ, cwanwə̀, mcap, bɑ́ tsə tsyə̀ a nthəm nthʉm tʉm mo a. A bɑ ywə yə a bviŋ mo a; da' gɑ́ nə tsʉ̀ ywə́ tə sɔk bú tə́ bviŋ mo a. Yeso lə́ lǔ tsʉ'u bɔ gɔ m nə ghəŋ Tiro pu Sidon. A lə́ pɑ́ po'o mu' mjwǐ yə́ Kana fɑ́ nə yə bɔ ghə̌ŋ bɑ shwé gɑ: Cɔmmtso mə̌ m Cyəpɔ mú David! Zhwenyə cwəpùŋ wə mɛnyə mu a tə́ a pɑ́ pɑ̀ vʉ̌. Da' gɑ́ Yeso lə pa' sɔm nwə bi e. Pɑkhʉ̌ pyə fʉ'tə nɑ hɑ bəŋ e gɔm bi e gɑ: Zhəŋ é nə pa' e wə dɑ gì e nə baknyə wɔk pɑ̀. Yeso pa' gɑ: Pú lə́ nthəm a pɑ́ bi mjʉ̀jʉ̀ pyə wap lə la' bi nə tuŋdyə Israɛl a. Da' gɑ́ mjwǐ bɔ sɔ' ŋkham mkwi'tə myə́ dzə e gɔm bi e gɑ: Cyəpɔ, kwitə a! Yeso ghɔm gɑ: A ka puŋ nə pé ywətsʉ po mkəcɔk po hɑ bi pǒ bvʉ́. Mjwǐ bɔ pa' bi Yeso gɑ: A nyənyɔ m Cyəpɔ! Da' gɑ́ pǒ bvʉ́ npfɑ msəsia ywə yə a bvʉsi nə tɑpe mta pap a. A pɑ́ po'o, Yeso pa' bi e gɑ: Mamjwǐ, piŋnthʉm o zhi! Nwə o pəmtə́! Go é lə́ wuŋ jɛ pɑ́ cwəocwə̀ó. Yeso lə́ lǔ tsʉ'u bɔ, gɔ kəŋ shyə́ lɑpʉə Galilea. Ŋkwɔ' dəm kúŋ gǒ, shwəsi. Pɔmnəŋ pɑ́ sɔ' bi é kwa' du é pú a mŋkho'tə, mfʉ̀, mkhʉ̌m, mtə́ghɔm, ba shɑ mthi tə́ jɔm, è pɑ́ jɛ wap. Nwə pɑ́ sya pɔmnəŋ nə́ yɔ pa' mtə́ghɔm ghɔm, mkhʉ̌m zhi pɔ mtʉɔ, mko'tə ghiŋ dəŋdəŋ mfʉ yɔ tsʉ'; wap pɑ́ gu'tə Si Israɛl. Yeso lə́ ke pɑkhʉ̌ pyə gɔm bi pu gɑ: Mtsò vəŋ pɔ pɔ̌ gɑ wə ŋkhú a, nə pa' a cwəlɔ̀ tyɛ'dzʉ tá pa' wap pɑ́ bəŋ m̀ a; bɑ wap ka nəŋ gə ywətsʉ, bi a pɑ́ dɑ nəŋ jəŋ wap, bwɔk gɑ wap kɑ kǒ məjyə bvʉ́. Pɑkhʉ pyə ghɔm bi é gɑ: Msɛ̌ gɔ fɑ́ hɑ́ dəŋ ywə́ bi pyə́ ghakgo tsɔ'ɔ tə́ pyə nə ŋkhim dəŋ vəŋ pɔ pɔ̌? Yeso ghɔm bi pu gɑ: Pǒ wim msɛ́ mta' sʉ'ʉ? Wap ghɔm bi e gɑ: mta' sɔmbʉə, gə po mduŋ bapgu ŋkho'ŋkho' Yeso ghɔm bi pɔmnəŋ gɑ́ wap cwətəsi, ŋkwi msɛ́ mtá sɔmbʉə ba bapgu, biŋ shwyɛ'nyə Si, bo'tə́ hɑ bi pɑkhʉ̌ pyə́, pɑkhʉ pyə́ hɑ bi pɔmnəŋ. Guŋ pɔ awɛ pfɑ tə́ jwyə́; pu piŋ daktə́ bvʉ' mbó' myə́, a ló nə msap sɔmbʉə. Pɔ pyə wap lə́ tsʉ̌ ywə a, lə bɑ́ pɑ́bɛ́ pɔ sha'pfʉə, tə́ sɛ pɑjwǐ ba pǒ mkəcɔk po. Yeso lə́ la'nyə pɔmnəŋ cwəlɔ, ŋkho nthʉm kənu' dɑ m nthʉm guŋ Magadan. Pɑ Farisai pu a pɑ Sadukai lə sɔ' bəŋ Yeso, dəŋtə e gɔm bi e gɑ é la'tə wap mtiŋ myə a fɑ m kɛbəŋ a. E pa' bi pu gɑ: A bɑ bwadzʉ̌ po ghɔm gɑ: Dzʉ̌ gɔ puŋ nə pa' po yɔ dzʉ̌ pɑwə bɛ pa' mɔk a, a piŋ bɑ fɔkdzʉ̌ pɔ ghɔm gɑ dzʉ́ gɔ pɔk tyɛ' ɔ nə pa' kɛbəŋ wə bɛ sónyə̀ sǒnyə́ a. A bɑ po zhyə nə yu' mtiŋ kɛbəŋ, da' gɑ bɑ po ka ku' nə zhyə mtiŋ cwədzʉ̌. Pɔ nə wɔdzʉ́ cwəpùŋ, pɑ ghə ghap həŋtə mtiŋ. Sɔ' m nə mtiŋ, pu tə́ gɔ piŋ la'tə wap sɔm mtiŋ a tə́ né da' mtiŋ Yona pɑ̀. E lə̀ ghɔm po'o nthak wáp tsʉ'u gɔ̌. Pɑkhʉ̌ Yeso lə́ nə́ sa' ghɔ nə yə mu' jʉɔ, dʉɔnyə nə lɑ̀ msɛ. Yeso ghɔm bi pu gɑ: Po pɔm! Po pɔm ywə pɑ Farisai pu a pɑ Sadukai. E lə ghɔm po'o pɑkhʉ̌ pyə pɑwə sɛ gɑ́: A dù pa' pɑ ka lɑ msɛ́ a. Da' gɑ̀ Yeso zhyə, gɔm bi pu gɑ: Wɔ mghɛ piŋnthʉm ŋkho', nwə kɑ po sɛ gɑ pa' po ka lɑ msɛ a? Po jɑ tə́ yu' a? Po ka kamtə́ nwə msɛ mta' tɔ nə pɔ sha'tɔ biŋ gə dəŋ msap myə́ po lə lak bo' myə́ nə́ a? Kɑ msɛ mta' sɔmbʉə nə pɔ sha' pfʉə ba dəŋ mkhəkhʉə bo' myə́ a? Nwə kɑ́ po lə yu' gɑ ŋ kha tə́ gɔmnwə m nə sɛ́ pɑ́ nə cwə yə ŋ khɑ gɔm bi po gɑ́ po pɔm kwɔ'msɛ̌ pɑ Farisai pu a pɑ Sadukai! A lə pɑ́ po'o wap yu' gɑ e katə̀ gɔm m gɑ́ wap pɔm ŋkwɔ'msɛ pɑ́; gɑ e gɔm gɑ wap pɔm ywə yə pɑ Farisai pu a pɑ Sadukai ji'tə pɔmnəŋ a. Yeso lə́ ŋwak nthʉm guŋ Kaesarea Filipo, həŋtə pɑkhʉ pyə gɑ: Pɔmnəŋ gɔm gɑ Mú mo bɑ wɑ? Wap ghɔm bi é gɑ: Shɑ́ pɔ gɔm gɑ́ o bɑ́ Yohane nu' pɔ shyə̀; pyə shɑ̀ ghɔm gɑ́ o bɑ́ Elia; shɑ̀ ghɔm gɑ́ o bɑ́ Yeremia kɑ mu' gɔm ghɔm Si lɑ́. Yeso piŋ gɔm bi pu gɑ: Kwa' wɔ, pǒ gɔm gɑ́ gɑ̌ bɑ́ wɑ? Simon Pɛtrɔ lɑ́ ghɔm gɔm gɑ: O bɑ́ Kristo Mú Si nthʉɔtʉɔ. Yeso piŋ dɑ́ ghɔm gɔm bi e gɑ: Simon mu Yona o bɑ́ bùŋtsě, nə pa' tə́ bapnɑ kɑ́ mcyə lə́ nə gə o zhyə po'o pɑ̀, Tá a yə e kɛbəŋ a nə́ gə́. Biŋ sɔ' m nə m̀, gɑ ghɔm gɑ o bɑ́ Pɛtrɔ yəŋ la'tə gɑ́ ghǔ gwɔ', biŋ gɔ́ sɔ' kwɑ cu'tə a dəm ghǔ gwɔ' bɔ, mtʉ̀ɔ vʉ lə nəŋ gɔ sɔ' ghə sɔm gʉ' nə̀. Gɑ̌ gɔ sɔ' hɑ ki Nəfo kɛbəŋ bu; guŋ ywə awɛ yə ǒ kwɑ́ dəmcǎ' a, pú gɔ sɔ' kwɑ́ kɛbəŋ, a guŋ ywə awɛ yə ǒ kyɛ' dəmcǎ' a, pu sɔ' ŋkhyɛ' kɛbəŋ. A lə pɑ̌ po'o Yeso ghɔm bi pɑkhʉ̌ pyə gɑ wap pɔm nə siŋ sɔmmo gɑ e bɑ́ Kristo. Tɑ́ fɑ cwə o bɔ Yeso Kristo to' nə siŋ pɑkhʉ pyə gɑ e lə́ gɔ ghɔ Yerusalɛm, yɔgó' té' o bi mghətso, bɑ m bi mkamsi gwyəgwyə pu a pɑ zhyə́ mco', wap ghə pu zhwə e, tə́ e piŋ jam nə vʉ̌ nə batə tyɛ'dzʉ́ yɑtá. Pɛtrɔ fəŋ e nə gɔ jʉ̀m, shɔk e gɔm bi e gɑ: Si pfɔptə o m Cyəpɔ! Gɛ̌, bi a lə pɑ́ nə o pa' a. Da' gɑ́ Yeso fɛ́ nɑ e gɔm bi Pɛtrɔ gɑ: Lu jʉ̌m m̀ m Sata! O wə bɑ bəŋ m̀ bɑ pɑ ywə fa'tə, nə pa' mkwɛnyə mǔ tə́ wə bɑ́ myə́ Si pɑ́, a pɑ́ myə́ pɔmnəŋ. Yeso lə piŋ gɔm bi pɑkhʉ̌ pyə̀ gɑ: Mo pɑ́ gɔ yap jʉ̌m m̀, e kəŋnyə thə́ nɑ e, biŋ ŋkwa yə bɛnyəpɛnyə, nə jap jʉ̀m m̀. Nə pa' mo pɑ́ shəŋ nə vɔk vɔ́k e bɑ e gɔ pi vɔk e bɔ; da' gɑ́ mo yə e pi vɔk é nə m̀ a gɔ sɔ' ghə vɔk. A po' bi a pɑ a piŋ ŋkwitə mo nə kʉ̌ gɑ guŋ dzʉ awɛ pɑ bi e, tə́ bɑ ě lɑ vɔk e nə jo? Kɑ bi a pɑ́ mo hɑ kɑ a pɑ́ dəŋ vɔk é? Nə pa' Mú mo gɔ sɔ' sɔ' pu a pɑ aŋgəle pyə nthʉm ghu'tə Si a, hɑ bǎ myə́ mcwɔ'fa' wɑlə́ pa' e nə giŋ yə a. Kwa' nyənyɔ gɑ̌ siŋ wɔ gɑ, cəcɑ́ pɔ pyə wap tsɔ' a, shɑ pɔ tə́ gɔ sɔ' pfʉ tə yɔ̌ pa' Mu mo sɔ' pa' fo a pɑ́. A lə nə cyə́ tyɛ' nthɔk Yeso lɑ Pɛtrɔ, ba Yakop pu Yohane fɑ é pu a pú təm gɔ dəm sʉəsʉə kuŋ dǒ pú. Yeso sɑnyə dzə̌ pú: Sə́ é ləŋnyə pa' sə́ nam a, dzə tsyə fɔk pa' ŋkha' a. Wap piŋ jɔ Mosɛ pu Elia ŋwak pu a Yeso pɑwə shɔm nwə̀. Pɛtrɔ wuŋ ŋkho nə́ gɔm bi Yeso gɑ: Cyəpɔ, a puŋ gɑ́ pɑ pɑ́ pɑ́ tsɔ'ɔ; o kuŋ bɑ́ gɑ́ gɔ zhɔk mpfɑ̀ tsɔ'ɔ mɑ ntha. Mu' pɑ́ yǔ, mu' pɑ́ yə Mosɛ, mu' pɑ yə Elia. Cwə yə e lə pɑ́ gɔm po'o a, guŋ nə yɔ mlwa dəŋnyələŋnyə pfɔptə wap. E yu' gi mo nthʉm mlwa ghɔm gɑ: Mo yəŋ bɑ Mu a yə gɑ̌ ŋkhuŋ e pɑpuŋ a, mo yə e buŋ a nə cwɔ' e. Po yu'nyə e. Pɑkhʉ̌ Yeso lə nə yu' po', bwɔk té', bvʉtə si pfɔppfɔp. Yeso sɔ' bəŋ pú, sho' pu nə pú gɔm gɑ: Po lusi! Ka po pwɔk! Wap lə pʉ' mnyə map, biŋ jɔ pɑ́ da' Yeso dó é. Pa' wap lə pɑ́ dzəŋ fɑ kuŋgó nə pɑnyə a, Yeso co' bi pú gɑ: Po pɔm nə siŋ sɔmmo nwə nə ywə yə a shyə po yɔ a, tə́ ŋkhəm cwə yə́ Mu mo yam nə vʉ̌ a. Pɑkhʉ̌ Yeso lə piŋ həŋtə́ e gɑ: Nwə kɑ́ pɑ zhyə́ mcò' pɑ́ gɔm gɑ́ Elia gɔ sɔ' ləŋdzə sɔ̌'? E pa' bi pu gɑ: A nyənyɔ gɑ Elia gɔ sɔ' sɔ' piŋ nyap guŋ mnwə awɛ. Da' gɑ́ gɑ siŋ wɔ gɑ́, Elia le da' sɔ̌', wap lɑ nthə nə piŋ e, gə nə e pa' wap zhyə a. Ba Mu mo yə gɔ yɔgo' bi pú pɑkhʉ̌ pyə yu' gɑ e lə́ gɔm Yohane nu'pɔ shyə́. Wap pu a pú lə ghɔ tə́ ŋkhəm bəŋ pɔmnəŋ, mu' mbɛ sɔ' ŋkham kwi'tə dzə e gɔm gɑ́. Cyəpɔ, cɔmmtso mu a, e bvʉ, biŋ bɑwə́ jɔgo' té' o; e bɑ̀ mu'cwə bvʉ mɔk, bɑ mu'cwə bvʉ̀ shyə. Gɑ cəŋtə dɑ e gɔ bi pɑkhʉ̌ pǔ, da' gɑ́ la' wap ku' nə yɛ̀ é Yeso lɑ ghɔm gɔm gɑ: Wɔ pɑ tə́ zhyə nə́ piŋ, mghɛ mhɔ, gɑ̌ gɔ pɑ́ bəŋ po tə kəm sǒ? Gɑ gɔ ŋkhyəp tʉ́m nə po tə kəm sǒ? Po lɑ e sɔ̌' tsɔ'ɔ bəŋ m̀. Yeso lə cɔk zhwenyə cwəpuŋ, e təm nə mu, mu bɔ wuŋ jɛ́ pɑ́ cwə o bɔ. A lə pɑ́ po'o pɑkhʉ̌ pyə sɔ' bəŋ é gɔm bi é gɑ: Nwə kɑ́ bɑ pyə ka kú' nə zhəŋ e? Yeso pa' bi pu gɑ: Bɑ piŋnthʉm yɔ kɔk. Nə pa' gɑ̌ siŋ wɔ kwa' nyənyɔ gɑ́ tyɛ'dzʉ yə po ghə piŋnthʉm dəŋ msɔm jap a, bɑ po gɔ ghɔm bi kuŋ go yəŋ gɑ: Lu tsɔ'ɔ gɔ tsi' i, a ghɔ̌. A sɔmywə lə piŋ shyə́ wɔ. A piŋ bɑ po'o nə zhəŋ yəŋ nthi zhwenyə cwəpuŋ pɑ pɑ̌ m nə́ nə cwyɛ'nyə Si pu nə cwə tɑ́ tsʉ̌ ywə́ Cwə yə́ wap lə cu'tə Galilea, Yeso ghɔm bi pú gɑ: Pú gɔ hɑ Mù mo nə bǔ pɔmnəŋ; wap zhwə e, a piŋ nə pɑ́ batə tyɛ'dzʉ yɑtá e yàm nə vʉ̌. Wap lə yú' po'o, nwə pɔk wap té' o. Cwə yə́ wap lə́ kəm Kapɛrnaum a, pɑ kwishwɔp Dyə Si ghɔ bəŋ Pɛtrɔ gɔm bi é gɑ: Tà yɔ tə́ ma' shwɔp a? Pɛtrɔ ghɔm gɑ: bɑkɔ. Pɛtrɔ lə́ pɑnyə dyə cwəlɔ, Yeso ləŋdzə gɔm bi é gɑ̌ O yɔ yǔ gɑ́ kɑ̀? Mfo mfo dəmcǎ' ŋkwi shwɔp bi pɑ wɑ? Bi pɔ pap kɑ m bi mcyə́nyə̀? Pa' Pɛtrɔ lə̀ pa' gɑ́ bi mcyə́nyə̀ a, Yeso lə ghɔm bi é gɑ́: Nə kəlɑ́ pǒ tə́ bɑ mtho' pɑ́. Da' gɑ́ nə cyətə fa'tə pɔ bǎ, ghɔ shyə lɑpʉə, má' bà', gəm dəŋdzə̀ bápgù yə́ e gɔ cɔk a, biŋ ŋa' shwə̀ é: O gɔ yɔ́ bʉm nthʉm o. Lɑ nə́ gɔ hɑ bi pu nə́ yɑ̀ shwɔp ba yù. A lə́ pɑ́ cwə o bɔ, pɑkhʉ̌ pyə́ sɔ' bəŋ é həŋtə e gɑ: wɑ̌ bɑ mo gwyə nthʉm Nəfo kɛbə̀ŋ? Yeso lə ké muywə mú, jap e cəcɑ́ pú biŋ gɔm gɑ: Gɑ̌ siŋ wɔ kwa' nyənyɔ gɑ́ po pɑ́ tə́ kwyəpnyə biŋ shʉ' pa' pǒmkəcɔk po a, bɑ gɛ̌, po tə́ gɔ sɔ' kó nə́ Nəfo kɛ́bə̀ŋ pɑ. Mo yə e gɔ sɔ' zhi mo ŋkho' pa' mú yəŋ gɑ a, bɑ̀ mo gwyə nthʉm Nəfo kɛbəŋ. Mo yə e lɑ muywə mú pa' yəŋ gɑ nə tso tsɑ̌ a, bɑ e dɑ pa' pɑ́ kwa' myə̀. Da' gɑ́ mo yə́ e fa'tə bǎ tá' mo nə pǒmkəcɔk po pɔ gɑ pyə wap biŋ a, bɑ dzə̀ bi mo bɔ gɑ pu cə̀ŋ mɑ gwɔ' nthuŋ e ma' e nthʉ́m tsʉ̀m shyə́ lɑpʉə. Ghəghʉɔ bi dzʉ̌ yə a fa'tə pɔmnəŋ po'o a, əŋ, a buŋ gɑ fa'tə pɑ wə́, da' gɑ́ ghəghʉɔ bɑ bi mo yə fa'tə shyə m nə́ e a. A pɑ gɑ pú u kə́ kwə ó lə́ gɔ fa'tə o, o ya' gwa' tə́ gʉə sʉəsʉə; nə pa' dzə gɑ o ko nə́ vɔk m kam kwə kə́ m kam pu lə́, shyə́ pa' bi a pɑ́ pu ma' o nthʉm mɔk mamà pu a bú mǔ məbʉə kə́ pu a mkwə mǔ məbʉə lə́. Biŋ bɑ́ bi a bɛtsə o pɑ̀ gɔ fa'tə o nə vʉ nə mhɔ, o té e gwa' e tə́ gʉə sʉəsʉə; dzə gɑ o kó nə vɔk kəpitsə shyə pa' bi a pɑ́ pu ma' o nthʉ̀m mɔk mama pu a mnyə mǔ məbʉə a. Pó pɔm nə wak sɔm mú nə pǒmkəcɔk po pɔ̌ gɑ, nə pa' gɑ siŋ wɔ gɑ a bɑ́ kɛbəŋ m aŋgəle pap pɑ nthiŋnyə tə́ pwa dzə̌ Tá ǎ. Nə pa' Mu mò lə́ sɔ' nə vɔk ywə yə a lə́ pi a. Pǒ jɔ̌ yɔ́ gɑ́ kɑ̀? A po'o bi a pɑ mo ghə jʉ̀jʉ̀ tsyə́ ŋkhə́, mu' ta' piŋ nthəm nə pú bi, bɑ́ e tə́ gɔ tak pyə shwɔpvʉ̌' mgham vʉ̌' dəm kuŋ, ghɔ cəŋ yə é bi a pa a? Gɑ̌ siŋ wɔ kwa' nyənyɔ gɑ́ e cwə tə jɔ́ e bɑ e gɔ ŋwɛnyə nə e tə́ cyə nə pyə shwɔpvʉ̌' mgham vʉ̌'. A dəŋdəŋ po'o tə́ Tá yɔ kɛbəŋ shəŋ gɑ́ sɔmmo nə pǒ pɔ gɑ kɑ́ pi. A pɑ́ gɑ́ fɑ o hɔ́nwə̀, o ghɔ jɔ e, po e pɑ́ pɑ́ pɑ́pʉə, o cɔktə e. E yu' bɑ o tsʉ́ fɑ o. E pɑ́ tə yu' bù, o piŋ dɑ ta' mo kɑ pɔ pʉə lə́ po'o gɑ mghɔm pɔ pʉə kɑ pɔ tá lə nyap nwə bɔ. Bi a e kəŋnyə, nə yu' bi pu a, o siŋ cu'tə pɔ Kristo, bi a e piŋ ŋkhəŋnyə nə yu' bi cu'tə, o yɔ e cwəlɔ m pa' tə́ pɑ yə Yudea kə́ pa' ŋkwi shwɔp a lə. Nə pa' gɑ siŋ wɔ kwa' nyənyɔ gɑ́: Guŋ ywə awɛ yə pǒ kwɑ dəmcǎ' a pu gɔ sɔ' kwɑ kɛbəŋ, a guŋ ywə awɛ yə po ŋkhyɛ' dəmcǎ' a pu sɔ' kyɛ' kɛbəŋ. Gɑ piŋ siŋ wɔ kwa' nyənyɔ gɑ pɔ pɑpʉə cəcɑ́ po dəm cá' pɑ ŋkwishwə dó pɑ́ kə́lə́, bɑ Tá a yə e kɛbəŋ a gɔ hɑ́ bi pù. Nə pa' tsʉ' yə́ pɔ pʉə kɑ pɔ tá lə cu'tə́ nə́ nə́ tsǒ tsɑ á bɑ́ gɑ bɑ́ cəcɑ́ pú. Pɛtrɔ lə fʉ'tə nɑ e gɔ bəŋ Yeso gɔm bi e gɑ: Cyəpɔ, cwə yə́ fɑ a hɔnwə bəm a, bɑ gɑ̌ gɔ nə cwyɛ' e mcʉm sʉ'ʉ? Mcʉm sɔmbʉə lə́? Yeso ghɔm bi e gɑ: Ŋ tə gɔ ghɔm bu gɑ́ tə́ ŋkhəm da' mcʉm sɔmbʉə pɑ́ o gɔ nə cwyɛ'e mcʉm mgham sɔmbʉə jyə sɔmbʉə. Nə pa' Nəfo kɛbəŋ shwə pa' nwə mu' fo yə e lə pɑ́ ŋkhʉə ju bi mco' pyə́ a. Pú lə́ to' dɑ mu' co' e sɔ' bɑ pu e ghə tsə talɑŋto sha' ghǎm. Pa' a lə́ bɑ e ka ghə́ ywə nə nthuŋ a, fo lə́ ghɔm gɑ́ pu fiŋ e, ba jwi e pu a po pyə́, ba guŋ tsə tsyə awɛ nə nthuŋ jú e. Gɛfa' bɔ lə̀ nǔŋ mkwə fo gɔm gɑ: Na' byap a, gɑ gɔ tuŋ. Mtso myə́ lə kú tap e, e lɑ jú e nə shwyɛ' e, nthak e nəŋ e ghɔ. Gɛfa' bɔ lə nə təm dzʉ́, pu mu' só e yu'tə, e pɑwə ŋkhʉə e tsə bɛ ŋkhə. E tɔm e nə nthuŋ e, nwɔ' nthuŋ e pɑ nə zhwə e, bɑ́ gɔm gɑ: Tuŋ ywə yə pǔ ya a. Só e lə́ núŋ mkwə e, biŋ shwyɛ'nyə e gɔm gɑ: Na' byap a gɑ̌ gɔ tuŋ. Da' gɑ́ e kə́ŋnyə̀, biŋ gə pú nyəŋ e cɛ́ tə nə byap gɑ́ e tuŋ jú e. Mso pyə́ lə nə yɔ ywə yə a shyə́ a, nwə pɔk wap té' o; wap ghɔ siŋ tà yap nwə yə a nthəm a. Tá yap lə ké gɛfa' e bɔ gɔm bi e gɑ: Gɛfa' cwəpùŋ, o lə́ cwyɛ'nyə a, ŋ də jú o nə shwyɛ' o awɛ. O la tə bɑ́ pɑ́ o cɔmmtso sò o pa' ŋ də cɔ́mmtso mu a pɑ a? Tap e lə yɛluŋ nə e, hɑ e bi fəfə, tə nə byap gɑ́ e túŋ guŋ ywə awɛ yə pu lə bɑwə ŋkwi bi a. A dəŋdəŋ po' tə́ Tá a kɛbəŋ gɔ sɔ' ghə nə po, bi a pɑ́ gɑ́ bǎ ya mo lə nə po ka lɑ mhɔ fɑ e nə shwyɛ' e tə nthʉ́m tʉ́m e a. Cwə yə́ Yeso lə́ miŋ nə ghɔmmnwə a, dú Galilea gɔ Yudea nə yə mu' jʉɔ Yurdɛŋ pɔmnəŋ jɔmyɔ̌m lə́ bɑ jʉ̀m e, e piŋ bɑ́ jɛ́ wap tsʉ'ʉ. Pɑ Farisai ghɔ bəŋ e dəŋtə e gɔm gɑ: A bɑ pu piŋ gɑ bi a pɑ mbɛ zhəŋ jwi e bǎ nə kə́ a? Yeso pa' gɑ: Po ká ké gɑ nə́ nə́ to' Nyap dzʉ́ lə̀ ghə wap Mbɛ pu mjwǐ, biŋ gɔm gɑ: A shyə̀ m po'o mbɛ pɑ́ gɔ sɔ' təm nə tap e ba nə map e, piŋ kwɑ́ m nə jwi e, wap pɑ́pʉə piŋ bɑ́ pɑ́ ta' bapnɑ́ yɑmu'. A bɑ́ po'o wap lə́ piŋ bɑ́ pɑpʉə pɑ, wap bɑ pɑ ta' bapnɑ yɑmu'. A po'o tə́ ywə yə Si tamtə a mo kɑ́ haptə. Pɑ Farisai piŋ gɔm bi Yeso gɑ: Nwə kɑ́ bɑ Mosɛ lě bvə gɑ pu pɑ́ hɑ ŋwa'nyə nə jəŋ mjwǐ cwə nə zhəŋ mjwǐ? Yeso ghɔm bi pu gɑ: A lə shyə m nə pa' a bɑ́ tʉm tsɔ sɔk gɑ́ kùŋ a, tə̀ Mosɛ piŋ gɑ po pɑ́ jəŋ pɑ jwǐ pɔ. Da' gɑ́ nə́ nə́ to' a lá tə́ bɑ̀ po'o pɑ. Gɑ ghɔm bi po gɑ: Mo zhəŋ jwi e tə a bɑ́ pɑ́ da' nə nwə nə ka thə a biŋ ŋkho mu' mjwǐ bɑ e ghə ghap. Pɑkhʉ pyə ghɔm bi e gɑ: A pɑ́ gɑ́ vɔk mbɛ bəŋ mjwǐ nthʉm lɔmdyə bɑ m pa' a, bɑ a ka kwitə nə lɔmdyə̌. E ghɔm bi pu gɑ: Guŋ pɔ awɛ tə́ ju' ghɔm tsɔ pɑ̀ tə né da' pɔ pyə a hɑ gɑ́ wap yù' a. Nə pa' shɑ́ msʉ̌ pɔ si bɑ mmʉ́ə pap nə́ dzə wap. Shɑ̀ mkwì piŋ bɑ yap bɑ pɔmnəŋ nə dɑ wap gə mkwi; shɑ́ piŋ bɑ́ bɑ pɑ́ wap nə dɑ nɑ tsap gə mkwi dù nə́ Nəfo kɛbəŋ. Jú'yǔ' yú'. A lə́ pɑ́ po'o pɔmnəŋ lɑ pǒmkəcɔk pó nə sɔ' bi Yeso gɑ́ e nyəŋ byanyə nə pú, biŋ shwyɛ'nyə Si. Pɑkhʉ̌ Yeso pɑ jəŋ wap. Yeso ghɔm gɑ: Po tak pomkəcɔk pó pɑ́ nəŋ, ka po kɔ gɑ́ wap kɑ sɔ' bəm, nə pa' Nəfo kɛbəŋ bɑ bi pɔ pyə wap pɑ́ pa' wap a. Yeso lə yap bǔ nə pú cwəlɔ dú tsʉ'u gɔ̌. A lə pǐŋ bɑ, mu' mbɛ sɔ' bəŋ Yeso gɔm bi e gɑ: Ta, gɑ̌ gɔ ghə gɑ́ kɑ pɑpuŋ tə́ ghə vɔk mama? Yeso ghɔm bi e gɑ: Nwəkɑ́ o həŋtə a nwə̀ nə̀ ywə pɑpuŋ? Da' ta' mo nə́ bɑ́ mo pɑpuŋ. O pɑ́ shəŋ nə pɑ́ nthʉm vɔk, o pɑ ŋkhyəp mco' E həŋtə́ Yeso gɑ: Má mco'? Yeso pa' gɑ: Kɑ zhwə mò. Kɑ ghə́ ghàp. Kɑ zhʉ̀. Kɑ kwinthɛ cwanwə̀. Ghə mku' tɔ̌ pu mɔ̌. Nə́ nɑ miŋ. O kúŋ mo yə e bəŋ o a pa' o ŋkhuŋ thə́ nɑ o a. Mú səm bɔ ghɔm bi e gɑ: Gɑ́ zhyə̀ guŋ e bǎ awɛ. A wə biŋ jak a kɑ? Yeso ghɔm bi e gɑ: O pɑ́ shəŋ nə pɑ́ dɔlɔ̌ o ghɔ fiŋ guŋ tsə́ tsyə o ghə awɛ, hɑ bi mpə̌ŋ, tə sɔ' gə fʉ́' thə kɛbəŋ. Biŋ sɔ' jap jʉ̌m m̀. Mu səm bɔ lə yu' ghɔm tsɔ, sə é fi' e ghɔ, nə pa' a lə́ bɑ e ghə tsə tɑ́' a. Yeso piŋ gɔm bi pɑkhʉ pyə gɑ: kwa' nyənyɔ gɑ siŋ wɔ gɑ̌ a gɔ sɔ' tʉɔ bi gɛ ywə́ nə ko nə Nəfo kɛbəŋ. Gɑ piŋ kwi' siŋ wɔ gɑ, a yɛ̀ bi kamelo nə cyə nə fǎ dàp syap shyə pa' bi a pɑ gɛ ywə ko nə̀ Nəfo Si a. Pɑkhʉ pyə́ lə nə yu' ghɔm tsɔ̌, a cyə wap, wap pɑ́ gɔm gɑ: Tə́ a po'o wɑ́ ghɔ sɔ' vɔk? Yeso lə le wap dəŋdəŋ gɔm gɑ: Ywə yə a shyə̀ pɔmnəŋ a tə́ shyə Si pɑ́. Pɛtrɔ lə́ lɑ ghɔm gɔm gɑ: Pyə le ŋthak guŋ tsə awɛ jap jʉm o. Tə́ a gɔ sɔ' pɑ́ nə́ pyə pɑ́ m gɑ́ kɑ? Yeso ghɔm bi e gɑ: Kwa'nyənyɔ gɑ ghɔm bi po gɑ: Cwə yə pu gɔ sɔ' ghə guŋ ywə awɛ msə a, cwə yə Mu mo gɔ sɔ' cwə́ dəm kwɔ' wu'tə̀ é a, wɔ pyə po lə yap jʉ̌m m̀ a, po cwə nə mkwɔ' shwɔppʉə mgham, bɑ́ sa' mtuŋ dyə Israɛl shwɔppʉə mgham. Biŋ bɑ bi a bǎ wɑlə́ pɑ́ bɑ e lé nthak la' tsyə, mfɑ pyə́ pyə pɑ bɛ ba pyə pɑ jwǐ, tap e, map e, pó pyə, kɑ be myə́ po' nə tso tsɑ̌ bɑ e gɔ sɔ' kwi tsə bɔ tə a yɔm piŋ kwi ba vɔk mama. Bo'gwyə pɑ dzə̀ gɔ sɔ' cʉ' pɑ jʉ̀m, a pɑ jʉ̀m cʉ' pɑ dzə̀. Nəfo kɛbəŋ shwə pa' mu' mo gɛ lǎ' yə e lə́ təm mɑfɔkdzʉ̌ bɑ dɑ mghɛ fa' pé mthə mlu' e a. Pú a mghɛ fa' lə́ yap gɑ e gɔ hɑ bɛ ŋkhap bi pú nə tyɛ'dzʉ́ cwəlɔ̌, e cya wap pé mthə mlu' e. A lə piŋ nə cyə mnam tá e təm jɔ shɑ pɔ bɑ wap tiŋnyə tsʉ'u tɑ pɑwə gə ywə, e ghɔm bi pu gɑ: Ba wɔ yɔ ghɔ pe mthə mlu' m̀, gə hɑ ywə yə a ku'nyə a bi pò. Wap lə ghɔ̌. E lə piŋ nthəm nə batə́ mnam nthɔk, ba mnam vʉ̌', kwi' gə pɑ po'o. A lə pɑ nə gwɛ a jyə mnam shwamu' mgham e kwi' nthəm, biŋ jɔ́ shɑ pɔ̀ bɑ wap tiŋnyə tsʉ'u, gɔm bi pu gɑ: Nwə kɑ bɑ po ywɔk tsɔ'ɔ tə ghə sɔmywə? Wap pa' bi e gɑ, sɔmmo bɑ e ka lɑ wɔk fa'. E ghɔm bi pu gɑ: Ba wɔ yɔ ghɔ pé m̀. A lə kəm bwadzʉ̌, gɛ pě ghɔm bi ŋkho nthɛ é gɑ: Ké mghɛ fa', hɑ ŋkhap fa' bǎ ya mo lə bi é, ntho' nə pɔ pyə wap sɔ' jʉm a, miŋ nə pyə wap la' dəŋdzə sɔ' a. Pɔ pyə wap lə sɔ' nə batə mnam shwamu' mgham a, lə sɔ̌', bǎ ya mo lə nə́ pu kwi ta' bɛ ŋkhap. Pɔ pyə wap lə́ tsə́ pé a lə́ nə sɔ' bɑwə ŋkwɛ gɑ́ pu gɔ kwi' yáp dəŋ ŋkhap; da' gɑ bǎ ya mo lə́ nə pu lə kwi pɑ ta' bɛ ŋkhap. Wap lə́ nə kwǐ bɑ ŋkhuku nthuŋ pú nə gɛ la' a bɑ gɔm gɑ: Pɔ pyə wap sɔ' m jʉm a bɑ wap fa' da' nə ta' nam, o piŋ gə nə pu pɑ́ pá' wɔk pyə́ pyə ywɔk fa', mɑ nam tyə́ wɔk a. Da' gɑ gɛ la' a ghɔm bi mu' mo nə́ pu gɑ: So a, ŋ kha hɔ sɔmywə bu, pu ké tə́ ka'nyə nə bɛ ŋkhap a? Pé ywə yə a yu a gɔ. Gɑ̌ gɔ hɑ pɑ dəŋ yə gɑ hɑ bu a bi yə́ŋ mò. Pù ka piŋ gɑ́ gə nə ywə yə a yɑ̌ a pa' gɑ kuŋ a? Kɑ bɛtsə o bɔk pa' gɑ mo pɑpuŋ a? A po'o tə́ pɑ jʉ̀m gɔ sɔ' cʉ' pɑ dzə, a pɑ dzə piŋ shʉ' pɑ jʉ̀m. Yeso lə́ nə́ pʉɔ ghɔ Yerusalɛm ŋkhe pɑkhʉ̌ pyə nə gɔ tsʉ' tsiŋ, biŋ giŋ mə́jyə̀ gɔm bi pú gɑ: Pó yɔ, pɑ si po' bʉɔ m Yerusalɛm, pu hɑ Mú mo bi mkamsi gwyəgwyə pu a pɑ zhyə́ mcò'; wap ya'shɛ e gɑ pu gɔ zhwə e, piŋ hɑ e bi pɑ tə pɑ pɑ Yudea gɑ́ wap yəmtə é, biŋ dɑ mshɔ̀m shwɔ́ é, ŋkham é thə́ bɛnyəpɛnyə; a piŋ bɑ nə batə́ tyɛ'dzʉ́ yɑtá e yam nə vʉ̌. A lə pɑ́ po'o, ma pǒ Zebede sɔ' bəŋ Yeso pu a pó pyə, ŋkham mkwi'tə myə́ dzə é nə lo mu' ywə bi e. Yeso həŋtə é gɑ: O shəŋ gɑ́ kɑ̀? E ghɔm bi e gɑ́, yap gɑ́ nthʉm Nəfo tsǔ po pɑ pɔ gɑ pɑpʉ́ə mu' cwə nə́ ghə̌ŋ pú u yə tʉɔ, yə mu' cwə nə ghə̌ŋ pú u yə kwyap. Yeso pa' gɑ: Po ka zhyə ywə yə pó wə dó a. Bi a pɑ́ po nwə́ nthú' yə gɑ gɔ nwə́ a? Wap ghɔm gɑ bi a pɑ́ pyə nwə́. E ghɔm bi pú gɑ: Po gɔ la' nwə nthu' a, da' gɑ́ sɔ' m nə nə́ cwə nə ghə́ŋ pu a yə tʉɔ ba yə kwyap, tə́ myə̀ nə hɑ bi mo pɑ̀: Pù gɔ la' hɑ bi pɔ pyə Tá a lə nyaptə bi pú a. Pyə pɔ gham lə nə yu' po'o jɛ́luŋ nə mfɑ̌ pɔ pɑ́pʉ́ə. Da' gɑ́ Yeso ké wap gɔm bi pu gɑ: Pó zhyə gɑ́ pɑ sa' mguŋ dɑ tʉɔ̀ yap nə nthɔm mguŋ, pɔ gwyəgwyə pɑ́ hya guŋ. A tə́ bɑ pɑ́ po'o cəcɑ̌ po pɑ́, mo pɑ́ gɔ pɑ mo gwyə cəcɑ̌ po e pɑ́ gɛfa' yɔ. Biŋ bɑ bi a mo pɑ shəŋ nə pɑ́ dzə̀ cəcɑ́ po e pɑ ŋkwɔ yɔ. A po'o tə́ Mu mo la tə́ sɔ' gɑ pu fa' bi e pɑ, e lə́ sɔ' m nə fa', piŋ hɑ vɔk é nə kwyəpnyə pɔ jɔmyɔ̌m. Yeso lə́ nə́ təm Yeriko vəŋ pɔ yap jʉ̀m e. Shɑ́ mghɛ fʉ̀ pɑ́pʉ́ə pyə a lə́ bɑ wap cwə kəŋ məjyə̀ a lə́ nə yu' gɑ́ Yeso nə wə shyə̀, shwe gɑ: Cyəpɔ Mu David cɔmmtsò mɔk! Pɔmnəŋ lə́ pɑ shɑnyə wap gɑ wap lɛtə, wap piŋ shwe tɑ thə gɑ: Cyəpɔ Mu David cɔmmtso mɔk Yeso lə́ tiŋnyə̀, ŋkhe wap gɔm bi pu gɑ: Po shəŋ gɑ gə gɑ kɑ́ bi pǒ? Wap ghɔm bi e gɑ: Cyəpɔ, gɑ mnyə mɔk ghyɛ'. Mtso map lə kǔ Yeso, e co' pǔ nə mnyə map. Wap wuŋ jɔ tsʉ' biŋ jap jʉ̀m e. Wap lə ghɔ tə bɑ gwɔk nə Yerusalɛm, bɑ wap kəm bəŋ Bɛtfage kúŋ mthə Olivə, Yeso təm pɑkhʉ̌ pɑ́pʉ̌ə gɔm bi pú gɑ: Po ghɔ nə la' tsyə a dzə po a; po gɔ wuŋ yɔ jwi jakasi pú mú e bɑ pu cəŋ e; po kyɛ' é dɑ wap nə sɔ' hɑ bəm. Bi a mo ghɔmnwə bi po, po pa' gɑ: nwə é nə́ Cyəpɔ, é tak wap nəŋ po wuŋ dɑ e nə́ sɔ'. A lə təm po'o tə ywə yə gɔm ghɔm Si lə ghɔm a pəmtə gɑ: Po ghɔm bi go Sion gɑ: Yɔ fǒ o yəŋ bɑwə sɔ' m bu, dɑ byanyə sɔ̌', bɑ e kwɔ' nə jwi jakasi ba m nə́ mu jakasi. Pɑkhʉ̌ Yeso lə ghɔ pa' e lə́ ghɔm bi pu a. Dɑ jwi jakasi pu mú jakasi sɔ̌'; biŋ jap mdzə map dəm pú, Yeso cwə dəm o. Pɔmnəŋ kwa' vəŋ e lə siŋ mdzə map məjyə; pyə shɑ́ pɔ pɑ́ ŋkho' mcɛ̌ thə ma'tə́ məjyə. Vəŋ pɔ pyə wap lə bɑ dzə e gǐŋ, ba pyə wap lə bɑ jʉ̀m e a lə bɑwə shwe gɑ: Hozana bi Mu David! Byanyə pɑ bi mo yə e wə sɔ' nə tsǒ Cyəpɔ a. Hozana pɑ tə́ thə̀ kɛbə̀ŋ. Yeso lə cwə tə ŋkho Yerusalɛm, guŋ tisuŋ awɛ cʉ'nyə; pu pɑ́ həŋtə gɑ: A bɑ́ wɑ? Lɑ vəŋ pɔ pɑ ba' gɑ: A bɑ́ gɔm ghɔm Si Yeso, yə Nazarɛt m Galilea. Yeso lə ko Dyə Si jə́ŋ guŋ pɔ pyə wáp lə bɑwə fiŋ kɑ jo ywə Dyə Si a lə; npfyə tsə́ tsyə a lə bɑ dəm mkwɔ' pɑ kwyəpnyə ŋkhap a, ba dəm kwɔ' mtɔ pɑ fiŋ mzhwə kúkú a. Biŋ gɔm bi pu gɑ: A bɑ̀ pu və gɑ: Pu gɔ sɔ' pɑ ke Dyə a gɑ dyə mcwyɛ'nyə; da' gɑ po nə gə dyə msamshwə! Mfʉ́ pu a mkho'tə lə ghɔ bəŋ e Dyə Si e piŋ bɑ jɛ́ wap. Mkamsi gwyəgwyə pu a pɑ zhyə́ mco' lə̀ nə́ yɔ msya myə Yeso lə lu m nə ghə a, ba pǒ mkəcɔk po pyə wap lə bɑwə jwyanyə gɑ: Hozana bi Mú David, nwə pɔk wap, wap ghɔm bi e gɑ: O yu' ywə yə wap wə gɔm a lə? Tə́ Yeso ghɔm bi pú gɑ: əŋ, po la m ŋkhe tsʉ' ŋwa'nyə yə a bɑ pu və gɑ. A cyə m nə́ shwə pomkəcɔk pó pu a po bwǎ o ghə pú ghu'tə o a? Yeso lə tak wap tsʉ'u nthəm tisuŋ gɔ Betanya, di wə. E lə́ pɑ́ bɑnyə m tisuŋ mɑfɔk dzʉ̌, jiku'u yɛ́ é. E yɔ mu' ta'thə nthɔmthə́ bəŋ məjyə̀, gɔ bəŋ o, da' gɑ́ e lə ko jɔ sɔmywə nə́ tə́ ně da' mhwə myə́. Gɔm bi e gɑ: O tə̀ dà' tə biŋ jam nthɔm pɑ. Ta'thə́ bɔ lə wuŋ jəm pɑ cwəocwəo. Pɑkhʉ̌ pyə lə nə yɔ po'o nwə cyə wap, wap ghɔm gɑ: A gə m gɑ́ kɑ tə́ thə nthɔmthə wuŋ jəm pɑ cwəocwəo? Yeso pa' bi pu gɑ: Kwa' nyənyɔ gɑ̌ ghɔm bi po gɑ́, a pɑ gɑ po ghə piŋnthʉm tə la' po zhʉ'nyə, bɑ po tə́ gɔ ghə da' ywə yə gɑ dú m nə ghə nə thə́ nthɔmthə́ a pɑ́, bɑ po ghɔm pɑ bi kuŋgǒ yəŋ gɑ̀ gɑ́, lù tsa' a gɔ bvʉ́ shyə lɑpʉə, bɑ a gɔ pəmtə pɑ́ po'o. Guŋ ywə awɛ yə po ló nthʉm mcwyɛ'nyə pu piŋnthʉm a bɑ pu gɔ hɑ bi po. Yeso lə ko Dyə Si, mkamsi gwyəgwyə pu a mghətso nthʉm gùŋ sɔ' bəŋ é cwə yə e lə bɑwə ji'tə pɔmnəŋ ywə a, gɔ́m bi e gɑ: O dɑ ya tʉɔ gə ywə bǎ? Wɑ hɑ tʉɔ bɔ bu? Yeso pa' bi pu gɑ: Ba myə̀ yɑ̌ gɑ̌ gɔ həŋtə wɔ nwə, pɑ́ da' ta' ywə; po la' ba' bəm, bɑ ba myə̀ gɑ̌ gɔ siŋ wɔ yɑ̌ gʉ' yə gɑ̌ nə gə ywə bɔ a. Nə nu' mo shyə Yohane lə fɑ m hɑ? A lə fɑ m kɛbəŋ kɑ́ m bi pɔmnəŋ? Wap lə́ sɛ̌ wap wap gɑ: Pɑ ghɔm gɑ kɛbəŋ bɑ e gɔ həŋtə wɔk pɑ gɑ́: Tə nwə ka bɑ po lé tə́ piŋ e. Bi a pɑ nəŋ gɔm gɑ bi pɔmnəŋ, bɑ pɔmnəŋ tə́ gɔ nəŋ wɔk pɑ pɑ nə pa' guŋ yap awɛ bɑwə jɔ Yohane pa' gɔm ghɔm Si a. Wap lə pa' bi Yeso gɑ́: pyə ka zhyə. Yeso ghɔm bi pú gɑ: Ba myə̀ yɑ̌ ŋ tə́ gɔ siŋ wɔ gʉ' yə gɑ̌ nə gə ywə bɔ a pɑ. Po sɛ́ m gɑ́ kɑ? Mu' mbɛ lə́ ghə̀ pó pyə́ pɑ́pʉə. E lə́ ghɔ bəŋ dəŋdzə gɔm bi e gɑ: Ghɔ pé mthə mlu' m̀ tyɛ' ɔ fa' a. E lə ghɔm bi e gɑ ŋ tə́ gɔ ghɔ pɑ́, da' gɑ́ a piŋ nə cwə mu ywə e pʉɔ tʉm tsyə́, gɔ̌. Bɛ bɔ lə́ ghɔ bəŋ batə mu e yɑpʉə, gɔm bi e pá' e lá' gɔm bi yə mu'mú a. Yə bɔ ghɔm bi e gɑ: Gɑ̀ gɔ ghɔ m Ta, da' gɑ́ la' e ghɔ̌. Yǎ mo nə pu po'o bɑ́ e ghə pa' tá yap shəŋ a? Wap lə̀ pa' bi Yeso gɑ: Dəŋdzə. Yeso piŋ gɔm bi pu gɑ: Gɑ̌ siŋ wɔ kwa' nyənyɔ gɑ mghɛ kwishwɔp pu a pɑ kathə pɑjwǐ gɔ sɔ' tamdzə po nthʉm Nəfo Si. Nə pa' Yohane le sɔ' bi po nə məjyə dəŋdəŋ po lə̀ lɑ e. Da' pɑ kwishwɔp pu pɑ kathə pɑjwǐ nə lɑ e. Po yɔ ba tə po'o la' po pʉɔtʉm tsɔ biŋ e. Po kwi' ju' mu' ghɔm tə tutə̀. Mu' mo lə ghə pé e. Dzə mthə mlu' nthʉm o. Ŋkwɑ ŋkhɛpé nə́ nə dzam shu'; ntəŋ tsʉ' nə nu' mlù', biŋ ŋkwɑ tsʉ'nə cwə nə dé pě, tə́ jo' pé bɔ bi pɑ tsʉ' mthə́ mlu' cwəlɔ, gɔ tə́m. Cwə nthɔm mthə lə kǔ', gɛ pě təm mghɛ fa' pyə gɑ wap ghɔ ŋkwi myə́ nthɔm mthə bi pɑ tsʉ' mthə mlu'. Da' gɑ́ mtsʉ' mthə mlu' lə́ ghəm mghɛ fa' bɔ: Shwɔ́ mu'; jwə́ yə mu'; dɑ mwɔ' nthamtə́ yə mu'. Gɛ pě lə́ kwi' nthəm shɑ́ mghɛ fa' kwa' vəŋ e nə pyə shɑ́ dzə̀; wap lə ko gə nə pu pɑ pa' pyə dzə̀ a. Gɛ pě lə nə́ miŋ nthəm mù e, bɑ sɛ gɑ: Wap gɔ ghə mku' mu a. Da' gɑ pɑ́ tsʉ' mthə mlu' lə́ nə́ yɔ mu e gɔm cəcɑ̌ pu gɑ: Yɔ dzʉ̌dyə̌ yə̌. Pɑ zhwə̀ é, mcʉ̌' cʉ' tsɔk pɑ! Wap lə ghəm e cwəlɔ, dɑ e nthəm pe jwə é. Yeso lə həŋtə gɑ: Cwə yə gɛ pě gɔ sɔ' sɔ' a, e gɔ ghə lǎ m pɑ tsʉ' mthə mlu' bɔ? Mkamsi gwyə́gwyə́ pu a mghətso pa' bi e gɑ: E gɔ sɔ' lɑ ghəghʉɔ zhwə mghɛ ghəghʉɔ bɔ, yo' pé bi shɑ pɑ tsʉ' mthə mlù' pyə wap gɔ sɔ' pɑ hɑ myə́ nthɔm mthə cwə nthɔm mthə a. Yeso lə kwi' gɔm bi pu gɑ: Po la m ŋkhe pa' a bɑ nthʉm ŋwa'nyə bɑ pu və gɑ: Gwɔ' yə pɑ pə́m pa' lə wa' a, nə lè ji gwɔ' phə́ pa' a; a bɑ fa' Cyəpɔ: Msya nwə nə́ mnyə mɔk pɑ̀. A po' tə̀ gɑ siŋ wɔ gɑ́ pu gɔ sɔ' kwi Nəfo Si bi po hɑ́ bi pɔ pyə wap gɔ yam nthɔm a. Mo yə e gɔ sɔ' vʉ̀ nə gwɔ' bɔ a gɔ sɔ' po'tə; a mo yə gwɔ' bɔ vʉ̀ nə e a, a tsa'tə e. Mkamsi gwyəgwyə pu a pɑ Farisai lə́ nə̀ yu' mghɔm tə̀ tutə̀ bɔ, jyə gɑ́ Yeso lə gɔm po'o nə pú. Wap lə̀ pɑ shəŋ nə ghəm e, da' gɑ bɑwə bwɔk pɔmnəŋ nə pa' pɔmnəŋ lə bɑwə dɑ Yeso pa' gɔm ghɔm Si a. Yeso lə piŋ ntho' nə́ lɑ ghɔm tə́ tútə̀ gɔmnwə bi pú gɑ: Nəfo kɛbəŋ bɑ pa' mu' fo lə da'nwə mu e yə mbɛ a. E lə̀ təm mghɛ fa' pyə gɑ wap ghɔ ŋkhe pɔ pyə e lə́ gho wap la'nwə bɔ a. Da' gɑ́ wap ko wap lə kuŋ nə sɔ'. E lə̀ piŋ nthəm shɑ mghɛ fa' gɑ wap ghɔm bi po pyə e lə́ gho wap a gɑ: Gɑ nyap tsə́ la'nwə, gɑ̌ wà mpɔp m na' ba mcɑ̌ nɔm, guŋ tsə awɛ pəmtə̀, po sɔ' nə la'nwə. Da' gɑ wap lə̀ nə sɛ sɔmywə; mu' mo lɑ m pě é, yə mu' mo lɑ m sim pyə shɑ pɔ ghəm mghɛ fa', dɑ wap jɔgo', jwətə wap. Fo lə̀ yɛluŋ, nthəm msəŋwì pyə wap zhwə̀ pɑ zhwə pɔ bɔ̌, biŋ ntho tisuŋ yap. Biŋ gɔm bi mghɛ fa' pyə́ gɑ: Tsə ghap ghʉɔ pəmtə, da' gɑ pɔ pyə dɑ ghó wap a lə́ bɑ wap ka ku'nyə. Po ghɔ mthə́ jyə̀, ŋkhe guŋ pɔ awɛ pyə po yɔ wap a nə̀ nə ghap ghʉɔ. Mghɛ fa' bɔ lə ghɔ mməjyə̀, shu'tə guŋ pɔ awɛ pyə wap yɔ wap a, pɔ cwəpuŋ ba pɔ pɑpuŋ tə̀ dyə ghap ghʉɔ lo pɔmnəŋ. Fo lə ko dyə cwəlɔ nə yɔ pɔ pyə wap sɔ' nə la'nwə; jɔ mu' mbɛ bɑ e ka kwadzə la'nwə nə é. Fo bɔ ghɔm bi e gɑ: So a, o shyə m gɑ kɑ tə́ ŋkho dyə ɔ tə́ dzə la'nwə nə o? Bɛ bɔ lə́ ŋa' shwə é. Fo ghɔm bi mghɛ fa' pyə gɑ: Po kwɑ bú myə́ pu a mkwə myə́, ma' e pé nthʉm jʉ́m, tsʉ' nə lɔ̀, biŋ mpfɑ msuŋ. Nə pa' a nyənyɔ gɑ́ á bɑ pú ke pɔ jɔmyɔm da' gɑ pɔ pyə pu ci wap a lə yɔm. A lə́ pɑ po'o, pɑ Farisai cu'tə sɛ pa' wap gɔ ghə tə Yeso ghɔmnwə wap nə gəm e nə yo' a. Wap lə́ təm pɑkhʉ pap pu a pɑ Herode gɑ́ wap ghɔ gɔm bi e gɑ: Ta, pyə zhyə́ gɑ o bɑ nyənyɔ, bɑ da'tə məjyə Si dəŋdəŋ tə́ pwɔk sɔmywə, nə pa' dəŋ mo tə́ hɛ́ o pɑ́. O yɔ yǔ gɑ́ kɑ̀? A bɑ pù piŋ kɑ ŋkhəŋnyə nə ma' shwɔp bi Kasa? Yeso lə̀ yɔ fʉ́ yap gɔm gɑ: Pɑ tsɛbǔ, nwə kɑ́ po ləŋtə a? Po la'tə a ŋkhap yə pu nə ma' shwɔp a. Wap lə́ la'tə bɛ ŋkhap. E ghɔm bi pu gɑ: Thə mò ba ywə bvəvə yə a nə́ a bɑ́ tsyə wɑ? Wap pa' gɑ: Tsyə Kasa: Yeso ghɔm bi pu gɑ: A pɑ́ pa' a po pa' ywə yə a yə́ Kasa a bi Kasa, ba' yə a yə Si a bi Si. Wap lə yu' tsɔ ghɔm, a cyə́ wap té', wap piŋ nthak Yeso cwəlɔ, gɔ̌. A lə́ pɑ́ tyɛ'dzʉ bɔ̌, pɑ Sadukai sɔ' bəŋ Yeso; pɑ Sadukai gɔm gɑ́ nə yam nə vʉ̌ tə̀ bɑwə pɑ́. Wap lə sɔ' bəŋ Yeso həŋtə e gɑ: Ta, Mosɛ gɔm gɑ: Mo pfʉ tə́ tsə mu, fɑ e sɔk pfɔk e, po' o gɑ e ghə yə gwya fɑ e bɔ. A po'o bɑ shɑ mfɑ lə́ pɑ̌ wə pyə pɔ sɔmbʉə. Shyədzə yap lə́ lɔmdyə̌, pfʉ tə́ tsə̀, nthak jwi e bi fɑ e; A pɑ́ pɑ́ po'o nə mo batə yɑpʉə ba batə yɑtá, tə́ gɔ ŋkhəm nə batə sɔmbʉə. Wap lə pfʉ awɛ, ba mjwǐ piŋ pfʉ yə́. A bɑ̀ po'o, a ghɔ sɔ' pɑ cwə yə pu yam nə vʉ̌ a, e pɑ jwi ya mo nə pù? Pa' wap nəŋ dɔm e guŋ yap awɛ a? E pa' bi pu gɑ: Po fʉmnyə, nə pa' po ka zhyə́ ŋwa'nyə Si ba gʉ' Si. Nə pa' cwə nə yam nə vʉ̌ pu lə ghə mjwǐ kɑ dhə lə. Pu bɑ́ pɑ́ pa' pɑ aŋgəle thə kɛbəŋ a. Biŋ sɔ' m nə́ nə́ yam nə vʉ̌, bɑ po ka ké ghɔm tsyə Si gɔm bi po a gɑ: Gɑ bɑ Si Abraham, Si Isak, ba Si Yakop a? E tə bɑ Si mpfə́ pɔ́ pɑ̀, e bɑ Si pɔmtʉɔ. Pɔmnəŋ lə́ nə̀ yu' po' o ywə yə Yeso lə bɑwə ji'tə wap a cəŋtə ŋkhonyə wap. Pɑ Farisai lə́ nə́ yu' gɑ́ Yeso cɑ shwə pɑ Sadukai, shu'tə. Mu' mo nə́ pú, bɑ́ jyə́ mco' ləŋtə Yeso həŋtə e gɑ: Ta, dəŋdzə mco' nə mco' bɑ ma mco'? Yeso ghɔm bi e gɑ: O gɔ pɑ́ kuŋ Cyəpɔ Si o nə guŋ tʉm tsǔ awɛ, nə guŋ lam tsǔ a awɛ, ba nə guŋ zhwenyə o awɛ. Mɔ̌ bɑ mco' gwyə, bɑ dəŋdzə. Shɑ́ batə mɑ́bʉ́ə bɑ a kwi' gə dəŋ pɑ́ gɑ: O gɔ pɑ́ kuŋ mo yə e bəŋ o a pá' thə nɑ o. Guŋ mco' awɛ pu guŋ ywə awɛ yə mghɔm ghɔm Si lə́ ghɔm a miŋ pɑ nə mco' mɔ mɑ́bʉ́ə. Pa' pɑ Farisai lə bɑ wap cu'tə a, Yeso lə həŋtə wap gɑ: Pó gɔm gɑ kɑ nə Mesia? E bɑ mu wɑ? Wap pa' bi e gɑ mu David. Yeso piŋ gɔm bi pu gɑ: Tə́ nwə kɑ a cyə m nə Zhwenyə, David ké e gɑ́ Cyəpɔ nə cwə yə e gɔm gɑ: Cyəpɔ ghɔm bi Cyəpɔ a gɑ: cwə́ nə ghəŋ tʉɔ a tə́ nyəŋ mghɛ bo pǔ to mkwə o? A pɑ gɑ David ŋkhe Yeso gɑ Cyəpɔ e bɑ e biŋ bɑ́ mú é m gɑ́ kɑ̀? Sɔmmo la tə ku' nə pa' shwə ghɔm bi e, tə́ fɑ tyɛ' o bɔ sɔmmo lə kwi' həŋtə e nwə. A lə pɑ̌ po'o Yeso ghɔmnwə bi lǎ' ba m bi pɑkhʉ̌ pyə gɑ: Pɑ zhyə́ mco' pu a pɑ Farisai bɑ wap cwə nə kwɔ' Mosɛ: Po ghə̌ biŋ jyə̌ ywə yə wap gɔm bi po a, da' gɑ ka po fo' mghənyə mnwə map, nə pa' wap gɔm tə́ la' wap ghə́ a. Wap ŋkwɑ bò' ywə dzɑtsɑ jap bò' pɔ, da' gɑ bɑ ŋkhəŋnyə kwa' wáp nə lɑ nthə pu yap ŋaknyə bò' ywə bɔ. Guŋ mfa' map awɛ bɑ́ wap pɑ gə pɑ́ gɑ́ pu yɔ wap. Wap gwim pak ŋwa'nyə nthʉm twɔ' bɑ pu və mkam ghɔm Si nə nə́ pu ba mɑ sʉəsʉə mcwǐŋ dzə. Wap ŋkhuŋ nə cwə dzə̀ tsʉ' la'nwə, ba nə mdəŋdzə mkwɔ' dyə sinagogə. Ŋkhuŋ gɑ́ pu ca'tə wap dəm sim, ba m gɑ pu ke wap gɑ Rabi. Sɔ' m nə po, ka po cə́ŋ gɑ́ pu ké wɔ gɑ́ Rabi; nə pa' a bɑ po ghə da' tá' tá gɛ la'tə, po piŋ bɑ́ pɑ́ mfɑ̌ mfɑ́. Ka po ke sɔmmo dəmcǎ' gɑ tá yɔ; nə pa' a bɑ po ghə da' ta' tá, Tá kɛbəŋ. Ka po cəŋ gɑ́ pu ke wɔ gɑ́ mtadyə nə pa' a ba po ghə da' ta' tadyə, Kristo. Mɑ mo gwyə cəcɑ̌ po pɑ gɛfa' yɔ. Mo yə e ŋa' nɑ e a pu gɔ sɔ' fi' e, mo yə e fi' nɑ e hɑ si a pu sɔ' ŋa' e hɑ thə́. Ghəghʉɔ yɔ, pɑ zhyə mco' pu a pɑ Farisai mtsɛ bǔ, wɔ pyə po shɑ məjyə̀ nə ŋkho nə̀ Nəfo kɛbəŋ bi pɔmnəŋ a! Kwa' wɔ tə̀ bɑwə ŋkho nə̀ pɑ́, po lə nəŋ nthak pɔ pyə wap bɑwə shəŋ nə ko nə̀ a nə́ŋ. Ghəghʉɔ yɔ, pɑ zhyə́ mco' pu a pɑ Farisai mtsɛ bǔ, wɔ pyə̀ po dɑ tsə mpfɔk pɑ jwǐ, biŋ gə msʉəsʉə mcwyɛ'nyə nə fʉtə pɔmnəŋ. Pu gɔ sɔ' nyəŋ kwa' mɑ shɛ thə po. Ghəghʉɔ yɔ, pɑ zhyə́ mco' pu a pɑ Farisai mtsɛ bú, wɔ pyə pǒ ŋkha nə guŋ mshyə lɑpʉə pu a guŋ dzʉ̌ awɛ tə́ gə ta' mo jʉ̀m po a, mo nəŋ shwə tə́ jap jʉ̀m po, po lɑ e gə pɑ́ mo mɔk tə pi, e pɔk shyə wɔ mcʉm bʉ̌ə! Ghəghʉɔ yɔ, mfʉ̀ la'tə jyə. Po gɔm gɑ: Mo lɑ tsʉ' dɔlɔ̌ Dyə Si ŋkhɔ mkɔ bɑ a tə nwə pɑ, da' gɑ́ dɑ gɔl tsʉ' dɔlɔ̌ Dyə Si ŋkhɔ mkɔ e tɔ́m. Po bɑ́ mfʉmnyə pɔ biŋ bɑ́ mfʉ! A ghɔ nə gɔl pu tsʉ' dɔlɔ̌ Dyə Si bɑ yá cyə̀ yá? Tsʉ' dɔlɔ̌ yə a dɔ́nyə̀ gɔl a kɑ gɔl? Pǒ ŋkwi' gɔm gɑ́ mo lɑ tsʉ' nuŋpwɔ' ŋkhɔ́ mkɔ bɑ a tə nwə a, tə́ dɑ tsə pwɔ' tsyə a dəm tsʉ' nuŋpwɔ' a ŋkhɔ́ mkɔ e tɔ́m. Mfʉ̀! A gɔ nə tsə pwɔ' pu tsʉ' nuŋpwɔ' yə a dɔnyə tsə pwɔ' a bɑ yá cyə̀ yá? Nə pa' mo yə e dɑ tsʉ' nuŋpwɔ' ŋkhɔ́ mkɔ a dɑ ba ywə yə a dəm o a nə ŋkhɔ́ mkɔ. Mo yə e dɑ tsʉ' dɔlɔ̌ Dyə Si ŋkhɔ́ mkɔ dɑ ba mo yə e shwə nə̀ a ŋkhɔ́ mkɔ. Mo yə e dɑ kɛbəŋ ŋkhɔ́ mkɔ a dɑ pa' a leŋfo Si ba mo yə e dəm lɛŋfo bɔ a ŋkhɔ́ mkɔ. Ghəghʉɔ yɔ pɑ́ zhyə mco' pu a pɑ́ Farisai mtsɛbú. Po gap ba mcɛ́ jap nə gə jyə̀ gham hɑ tá' jyə̀ Dyə Si da' gɑ bɑ gwak kwa' ywə gwyə yə a bɑ́ nə mco' a nwə dəŋdəŋ, cɔ̌mmtso, nyənyɔ yəŋ bɑ́ ywə yə po kɑ bɑ gɔ ghə tə̀ ghə yə bɔ a. Mfʉ̀ pɑ cya, po nthya mshwəlu', da' gɑ bɑ mi mkamelo. Ghəghʉɔ yɔ pɑ́ zhyə́ mco' pu a pɑ Farisai mtsɛbú. Po sɔk jʉm mthǔ' pu a pak kɛ dzʉ̀ a lɔ́ da' gɑ nthʉm e pɑ bɑ a lo tsə cwuŋ pu a nwə tə́ dhə. Mfʉ pɑ Farisai! Po ləŋdzə sɔk nthʉm nthu' tə́ jʉm dzʉ̌ lɔ́. Ghəghʉɔ yɔ pɑ zhyə́ mco' pu a pɑ Farisai mtsɛbú, po hwə́ mthəsì ba pu lɑ bʉ̀m fəfə shi': A bɑ́ m jʉm dzʉ̌ hwə ywə pɑpuŋ da' gɑ bɑ m nthʉm o bɑ mkwe mpfə pɔ pu a bɔkbɔk tsə́ lo nə́. A po'o pɔmnəŋ pɑ jɔ wɔ də̀m po hwə pɔ dəŋdəŋ, da' gɑ bɑ m nthʉm o bɑ po lo mnwə tsɛbǔ pu a mnwə cwəpùŋ. Ghəghʉɔ yɔ pɑ zhyə́ mco' pu a pɑ Farisai mtsɛbú, wɔ pyə po bəm mghʉ̌m mghɔm ghɔ̀m Si, bɑ ŋkwiŋ mthəsì pɔ dəŋdəŋ, biŋ bɑ gɔm gɑ: Pyə lə́ pe' bvɔk m nə cwə mta pɔk, bɑ pyə le tə́ tamtə nə pu, pyə a pu pfyə mcyə mghɔm ghɔ̀m Si. A bɑ po'o po pɑ nə nyəŋ shɛ pɑ thə po gɑ́: Pó bɑ po pɔ pyə wap lə́ zhwə mghɔm ghɔ̀m Si a. Po donyə pɑ ywə yə mta pɔ lə fo' a. Mnɔk, mnɔk mtiŋ, po gɔ sɔ' vɔk go' mɔk tə pi m gɑ kɑ̀? A po' tə́ gɑ̌ wə nthəm mghɔm ghɔ̀m Si bi pó, ba mzhyə fʉ́, pu a pɑ zhyə mco'. Po gɔ zhwətə wap, kam wap thə bɛnyəpɛnyə, cwɔ wap mdyə sinagogə po, piŋ cʉm jʉ̀m pú nə mtisuŋ, po'o gɑ mcyə̀ guŋ pɔ dəŋdəŋ myə pu lə pfyətə dəmcǎ' a ko nə po, tə fɑ nə mcyə Abɛ mo dəŋdəŋ gɔ ŋkhəm nə mcyə Sakaria mù Barakia yə po kɑ zhwə e cə́cɑ̌ tsʉ́' dɔlɔ̌ Dyə Si pu tsʉ' nuŋpwɔ' a. Gɑ siŋ wɔ kwa'nyənyɔ gɑ́ guŋ e awɛ gɔ ko nə pɔ nə̀ yəŋ wɔ̌ dzʉ̌. Yerusalɛm, Yerusalɛm, wə yə o jwə mghɔm ghɔm Si, biŋ dɑ mwɔ' mthamtə́ pɔ pyə pu nthəm wap bu a, gɑ̌ cəŋ nə cu'tə pó pǔ pa' mɑgɔp shu'tə pó pyə bap e a mcʉm sʉ'ʉ, o lə piŋ? Pa' ǎ pɑ́ po'o a, pu gɔ sɔ' tak la' tsǔ bu pa' ghakgo a, nə pa' gɑ siŋ wɔ gɑ́ tə́ fɑ cwəlɔ po tə́ gɔ piŋ yɔ a pɑ́ tə̀ kəm cwə yə po ghɔm gɑ: Bianyə bi mo yə e wə sɔ' a shyə́ m nə́ tso Cyəpɔ. Yeso lə təm Dyə Si cwəlɔ bɑ́ gɔ̌. Pɑkhʉ̌ pyə lə sɔ̌' bəŋ e bɑ da'tə e nthi pa' pu nə bəm Dyə Si a. Yeso lɑ ghɔm gɔm bi pu gɑ: Po ka yɔ guŋ e bǎ awɛ a? Kwa' nyənyɔ gɑ siŋ wɔ gɑ́ sɔm gwɔ' tə gɔ sɔ' cwə dəm mu' tsɔ'ɔ pɑ. Pu gɔ sɔ' sa'tə guŋ e awɛ. Cwə yə e lə́ cwə́si kuŋ mthə bɛ a, pɑkhʉ̌ pyə sɔ' bəŋ é m càm gɔm bi e gɑ: Siŋ wɔk cwə yə a gɔ sɔ' pɑ́ po' a, ba mtiŋ myə a gɔ sɔ' la'tə yù cwə a, ba cwə yə dzʉ̌ gɔ mi a. Yeso pa' bi pu gɑ: Po pɔmtə gɑ́ ka sɔmmo kɑ̀ ghə po hɔ́jyə̀ Nə pa' pɔ̀ tə jɔm gɔ sɔ' lɑ tso tsɑ̌ nə sɔ' pɑ̀ ghɔm gɑ: Myə̀ nə́ bɑ Kristo. Wap gɔ sɔ' ghə pɔ jɔmyɔm hɔ́jyə̀. Po gɔ sɔ' yu' shù, pú piŋ bɑ gɔmnwə nə shù. Po kɑ pwɔk. A puŋ gɑ tsə bɔ təm awɛ, da' gɑ a lə wuŋ bɑ́ nə́ miŋ. Nə pa' mu' guŋ gɔ sɔ' pɑ lo' yə mu' guŋ. Mu' Nəfo pɑ do' tsyə mu' nəfo; kəya' gɔ sɔ' təm bapbǎp, ba cǎ' cʉ'nyə bapbǎp. Guŋ e bɔ awɛ gɔ sɔ' pɑ́ pɑ nə to' go' nə dzə. Pu gɔ sɔ' nyeŋ wɔ nə gǒ', pɑ zhwətə wɔ, guŋ pɑ́ tə pɑ pɑ Yudea pɑ bɔ wɔ nə tso tsɑ̌. A gɔ sɔ' pɑ po'o pɔ jɔmyɔm pfʉtə́, wap pɑ hɑ nɑ tsǎp wap wap cəcɑ̌ pú pa' mghɛ bo a, piŋ pɑ pɔnyə cəcɑ̌ pú. Mfʉtə mghɔm ghɔm Si gɔ sɔ' təm pɑ́ ghə pɔ jɔmyɔm pi. Mnwə cwəpuŋ jɔmyɔ̌m gɔ sɔ' ghə ŋkhuŋnyə pɑ mimmim cəcɑ̌ pɔmnəŋ; da' gɑ́ mo yə e kaktʉɔ tə ŋkhəm nə miŋ a gɔ sɔ' vɔk. Pu gɔ sɔ' siŋ Cùŋ pɑpuŋ yəŋ nə Nəfo nthʉm guŋ dzʉ̌ awɛ. A pɑ mkwinthɛ bi pɑ tə pɑ́ pɑ Yudea. Tɑ dzʉ̌ mi. Cwə yə́ po gɔ sɔ' yɔ Bɔkbɔk zhwiŋ tsʉ' yə gɔm ghɔm Si Dania lə ghɔm a bɑ ě cwə́ nə tsʉ' dɔlɔ̌ — ŋkhékě cəŋtə ju'! — A pɑ́ cwə o bɔ pɔ pyə wap Yudea a, ŋkhʉ gɔ m dəm mkuŋ gó; mo yə e gɔ sɔ' pɑ́ m zhəŋ dyə thə́ a, kɑ fi' gɑ e gɔ m dyə lɑ ywə́. Mo yə e gɔ sɔ' pɑ m pě a kɑ pɑnyə jʉ̀m nə lɑ dzə́ e. Ghəghʉɔ pɑ jwǐ tsʉm pu a mʉəmvə̀ nə tyɛ'dzʉ́ bɔ! Po cwyɛ'nyə gɑ po kɑ sɔ' bɑ gɔ ŋkhʉ cwə ŋʉ́m kɑ tyɛ' Sabat lə. Kwa' tiŋ ghəghʉɔ yə a gɔ sɔ' pɑ tyɛ' o a, a la m bɑwə tə́ fɑ pa' pu ghə dzʉ̌ a tə́ gɔ ŋkhəm tyɛ' ɔ, a lə nəŋ gɔ la'tə pɑwə pɑ́. Mtyɛ'dzʉ bɔ ka pɑ gɔ sɔ' cwanyə cwanyə a bɑ sɔmmo tə́ gɔ sɔ' vɔk pɑ́; da' gɑ a cyə m nə mci pɔ̀, mtyɛ'dzʉ bɔ ghɔ sɔ' cwanyə cwanyə. A pɑ́ po'o, bi a pɑ́ mo ghɔm bi po gɑ: Kristo mtsɔ'ɔ kɑ m gɑ e mtsi'i lɑ, ka po piŋ. Nə pa' Kristo nə fʉtə pu a mfʉtə́ mghɔm ghɔm Si gɔ sɔ' təm pɑ ghə mtiŋ pu a msya tə́ shɑ pɔ hɔ məjyə tə́ bɑ mci pɔ̀. Tə́ gɑ̌ ləŋdzə gə́ gɑ́ po zhyə́. Pú la' gɔm bi po gɑ: E yəŋ gɑ m ghǎk gó, ka po ghɔ tsʉ'ʉ. Kɑ m gɑ: E yəŋ tsʉ' tsìŋ, ka po piŋ. Nə pa' dəŋdəŋ pa' pəpa' bə̀ŋ nthəm ghəŋ nthəm nam ŋwɛ ŋkhəm bi nam a, a gɔ sɔ' pɑ nə Mú mo pɑ́ po'o nə cwə yə e gɔ sɔ' a. Tsʉ' yə pfə ywə nə a, mghə́m mpfə tsə́ shu'tə tsʉ'. Ghəghʉɔ tyɛ'dzʉ́ bɔ gɔ sɔ' nə cyə̀, a nam sonyə, mɑŋwə́ pi, msɛ fɑ kɛbəŋ bvʉ́tə́, guŋ mtʉɔ kɛbəŋ cʉ'nyə. A pɑ́ po'o mtiŋ Mu mo təm kɛbəŋ, a guŋ gwya monəŋ dəmca' tsɔp kəkɔp yap jɔ pa' Mu mo fɑ kɛbəŋ dəm mlwa a bɑ gʉ̌' lo nə e a, bɑ e ghu'. E gɔ sɔ' təm pɑ aŋgəle pyə́ pu a mthɛ gwyə́gwyə́, wap cu'tə pɔ pyə pu ci wap nə dzʉ́ msak pfʉ̀ə a. Po yu' fo' nə thə nthɔmthə, bú myə́ shwə tə́ ntwɔp tə́ gə mhwə, po zhyə gɑ́ shwɔ'dzʉ̌ wə sɔ̌'. Dəŋdəŋ po'o, ba wɔ la' tə́ jɔ mtiŋ bɔ po zhyə gɑ́ Mù mo ghɔptə bəŋ po, gɑ e jyədyə̌ po. Kwa' nyənyɔ gɑ siŋ wɔ gɑ́ pɔ nə wɔ̌dzʉ̀ yəŋ tə̀ gɔ sɔ' cyə tə́ mnwə bɔ sɔ' pɑ́. Kɛbəŋ pu cǎ' gɔ sɔ' mi, tə́ mghɔm mə̌ tə gɔ la' mi pɑ. Da' gɑ́ sɔ' m nə tyɛ'dzʉ́ bɔ, ba nə cwə dzʉ̌ bɔ, bɑ sɔmmo ka zhyə́, kɑ pɑ aŋgəle kɛbəŋ, kɑ Mú lɑ́, sɔmmo, tə́ ně da' Tá yʉ̀ dò e. Dəŋdəŋ pa' a lə pɑ nə cwə Noe a, nwə Mu mo gɔ sɔ' pɑ́ pɑ po'o. Nə pa' dəŋdəŋ pa' a lə pɑ nə cwə dzʉ̌ yə dɔmnyə bəŋ mwé lə jɑ tə wɛ dù a, pu pɑ́ dzʉ́, biŋ nwə́, bɑ ŋkho m jwǐ biŋ bɑ hɑ m jwǐ lɔmdyə tə́ ŋkhəm nə tyɛ'dzʉ yə Noe lə kǒ kənu' a, pɔmnəŋ lə pɑwə shɔ́m sɔmywə, tə́ dɔmnyə bəŋ mwé lù ŋkwa wap nə gɔtə awɛ: tyɛ' nə sɔ' Mù mo gɔ sɔ' pɑ̀ po'o. A gɔ sɔ' pɑ cwə o bɔ pɑbɛ pɑpʉə pɑ́ pé pu lɑ tá' mo nthak ta' mo pɑjwǐ pɑpʉə gɔ sɔ' pɑ ləŋ msɛ, pu lɑ ta' nthak ta'. Po pɑ̀ di tə́ ti nə pa' po ka zhyə tyɛ'dzʉ́ yə Cyəpɔ gɔ sɔ' sɔ' nə a. Po zhyə gɑ́ gɛ lǎ' lá' pé' e bɑ jyə cwə yə shwǔŋ gɔ sɔ' nə̀ a, ba e di tə ti, e lə tak dyə e shwuŋ tù pɑ. A po'o tə̀ ba wɔ yɔ pɑ́ byap nə pa' Mu mo gɔ sɔ' pɑ nə cwə yə po kɑ zhyə a. Wɑ́ bɑ gɛfa' nyənyɔ, jyənwə yə tap e jap e dzə́ la' é nə pɔ gɑ e pɑ́ ŋkhim wap nə́ cwə yə e jap á? Buŋtsé gɛfa' bɔ yə tap e gɔ nə sɔ' e pɑwə fá' fa' bɔ a. Gɑ̌ siŋ wɔ kwa' nyənyɔ gɑ tap e gɔ lɑ e nə ghə tadyə nə guŋ tsə tsyə awɛ. Da' gɑ́ gɛfa' cwəpuŋ bɔ ghɔm nthʉm tʉm e gɑ: Ta á gɔ nə sɔ' cwə biŋ ntho' pɑ nə cwɔ msǒ fa' pyə, bɑ dzʉ́ biŋ nwə pu a mnwə̌ mlu', bɑ tá gɛfa' bɔ gɔ sɔ' nə tyɛ'dzʉ yə e tə́ wə byap e a pɑ, nə cwə yə é ka zhyə a; a zhəŋ e, yap e nə tsʉ' mtsɛbú, tsʉ' yə lɔ̀ pu a nə pfɑ msùŋ bɑ́ nə a. Nəfo kɛbəŋ gɔ sɔ' pɑ́ pa' pó gò ghǎm pyə wap lə lɑ mlambù map gɔ́ nə pyap ta jwigʉɔ a. Pɔ pɑtɔ nə pu lə bɑ mkəkʉɔ, pyə pɑtɔ pɑ mzhyənwə. Mkəkʉɔ mgò lə lɑ̌ mlambu map gɔ tə́ lɑ mwɑ́; mgò mzhyənwə nə lɑ mlambu map, dɑ ba mwɑ̌ nthʉm mthu'. Ta jwi gʉɔ lə cwə́ nə sɔ̀', guŋ mgò awɛ ti. A lə pɑ̀ tiŋ mtsʉ', pú yu' cwé gɑ: Tá jwigʉɔ yə̌ŋ, po sɔ' dɑ e. Guŋ mgo bɔ awɛ lə yǎm, nyaptə mlambu map. Mkəkʉɔ gò lə́ ghɔm bi mzhyənwə gò gɑ: Pó hɑ mɔk mwɑ́ nə mwɑ́ mɔ, nə pa' mlambu mɔk wə́ bi pi a. Mzhyənwə ghɔm gɑ: Gɛ̌, nə pa' bɑ a tə́ gɔ ku' nə́ pɑ̀ pɑ̀! Pó ghɔ m ywə mtɛ̌mtɔ jo mɔ. Wap lə̀ nə ghɔ m nə yo mwɑ̌, ta jwi gʉɔ sɔ'; wap pu a pɔ pyə wap lə bɑ́ si byap a ko dyə la'nwə, jo' jyədyə̌. Pyə shɑ mgo lɑ cwə sɔ' yap gɔ́m gɑ: Cyəpɔ, Cyəpɔ, cwɔ' jyədyə̌. Da' gɑ̀ e ghɔm bi pu gɑ: Kwa' nyənyɔ gɑ̌ siŋ wɔ gɑ́ ŋ kha wɔ zhyə. Po pɑ́ di tə́ tì nə pa' po ka zhyə tyɛ'dzʉ kɑ cwə̀ lə. Nəfo Si biŋ bɑ́ pa' mu' mo yə e lə pɑ̌ gɔ m tə̌m, ŋkhe mghɛ fa' pyə, hɑ tsə tsyə bi pú a. E lə́ hɑ mtalɑŋto mənthɔ bi mu', hɑ məbʉə bi mu', hɑ da' yɑmu' bi yə mu' mo, bǎ yə wɑlə́ dəŋ yə ǎ ku' nə e a; biŋ guŋ gɔ. Mo yə e lə̀ kwi mtalɑŋto mənthɔ a lə̀ ghɔ nthɛ dzʉ́ shɑ́ mənthɔ. Ba mo yə e lə kwi məbʉ́ə a tsʉ shɑ məbʉ́ə. Da' gɑ mo yə e lə kwi pɑ da' ta' talɑŋto a, ghɔ nthəŋ ghʉ́m, dʉm ŋkhap tap e nə́. Tá mghɛ fa' bɔ lə cwə tə a ku', e pɑnyə pu a pú pɑ sɛ tsə tsyə. Mò yə e lə́ kwi mtalɑŋto mənthɔ a, lə sɔ' bəŋ e pu a shɑ́ mənthɔ gɔm gɑ: Ta o lə́ hɑ mtalɑŋto bəm mənthɔ; yɔ shɑ mənthɔ myə ŋ dɑ́ ko dzʉ a mɔ̌. Tap é ghɔm bi e gɑ: A puŋ m gɛfa' pɑpúŋ biŋ bɑ nyənyɔ. O kě bɑ nyənyɔ nə muywə ywə́, gɑ̌ gɔ sɔ' yap o nə́ ywə gwyə́. Sɔ̌' po tɔ̌ ɔ ŋwɛnyə. Mo yə é lə́ kwi mtalɑŋto məbʉə a lə̀ sɔ' nə yə cʉm gɔm gɑ: Ta, o lə́ hɑ mtalɑŋto məbʉə bəm; yɔ shɑ məbʉə myə ŋ dɑ́ kǒ dzʉ a mɔ̌. Tap e ghɔm bi e gɑ: A puŋ m gɛfa' pɑpùŋ biŋ bɑ nyənyɔ. O ké bɑ nyənyɔ nə muywə ywə, gɑ̌ gɔ sɔ' yap o nə ywə gwyə. Sɔ̌' po Tɔ ɔ ŋwɛnyə. Mo yə e lə kwi ta' talɑŋto a lə sɔ̌' nə yə cʉ́m gɔm gɑ: Ta, ŋ də zhyə gɑ́ o bɑ mbɛ bɑ e tʉɔ: O shwa ywə tsʉ' yə o la m dzə ywə nə a, bɑ ŋwa ywə tsʉ' yə o ka tə sɛtə ywə nə a; ŋ kě bwɔk, dɑ talɑŋto o nə gɔ dwɔ' nthʉm ca': Yɔ ywə yə a yǔ a yəŋ. Da' gɑ́ tap e ghɔm bi e gɑ: Gɛfa' cwəpuŋ, dǔŋ! O lə̀ zhyə̌ gɑ́ gɑ̌ shwa ywə tsʉ' yə da m dzə ywə nə a, biŋ bɑ ŋwa ywə nə tsʉ' yə da m sɛtə sɔmywə nə a. O lə́ bɑ gɔ yap ŋkhap a ywə gɛ baŋk; a di biŋ jʉ̀m nthé ŋkhap a pu a mcwɔp myə́. Po kwi talɑŋto yə a bi e a, hɑ bi mo yə e gə mtalɑŋto gham a. Nə pa' mo yə e ghə ywə a pu gɔ sɔ' hɑ ywə bi e, e ghə a yɔm; da' gɑ mo yə e ka ghə ywə a pu kwi ba yə e ghə a. Sɔ' m nə gɛfa' tə kwitə sɔmywə yəŋ gɑ, po ma' e nthʉm jʉ́m dzʉ́: tsʉ' nə lɔ̀ pu a nə pfɑ msuŋ. Cwə yə Mú mo gɔ sɔ' sɔ' nthʉm ghu'tə e, pu a pɑ aŋgəle jʉm e, cwə nə leŋ ghu'tə e. Guŋ mguŋ awɛ gɔ sɔ' cu'tə dzə e, e tya wap pa' byap dzə nthya jʉ̀jʉ̀ nə dzə́ nthʉɔ a. E gɔ sɔ' yap jʉ̀jʉ̀ nə ghə̌ŋ pú tʉɔ, yap dzə nthʉɔ nə ghə̌ŋ pú kwyap. A pɑ po'o Fo ghɔm bi pɑ ghəŋ pú tʉɔ gɑ: Po sɔ̌', wɔ pyə Tá ǎ bɑ e le nyəŋ byanyə nə po a, ŋkwi Nəfo yə pu lə la' nyaptə bi po tə fɑ cwə nə ghə dzʉ̌ a. Nə pa' jiku'u lə yɛ́ a, po hɑ ywə pfɑ́; ji shyə lə yɛ́ a, po hɑ nwə́; dɑ́ pɑ́ gʉɔ po nyəŋ a dyə. Bɑ kəcyəŋ e po kwa dzə̀ nə m̀, bɑ gǒ, po sɔ' dé a, bɑ dyəcɛ̌ po sɔ' bəŋ m̀. A gɔ sɔ' pɑ́ po'o, pɔ nyənyɔ pa' bi e gɑ: Cyəpɔ, pyə lə́ bɑ́ hɑ́ sǒ jɔ o bɑ jìkǔ' yɛ́ o pyə kim o, bɑ ghak o ŋkhə pyə hɑ shyə bu? Pyə lə́ bɑ́ hɑ́ sǒ jɔ o o pɑ gʉ̀ɔ pyə nyəŋ o dyə? Kəcyəŋ e, pyə kwa dzə nə o? Pyə lə bɑ̀ hɑ sǒ jɔ o o pɑ gó kɑ dyəcɛ̌ lə, pyə sɔ' bəŋ o? Fo gɔ sɔ' pa' bi pu gɑ: Kwa' nyənyɔ gɑ siŋ wɔ gɑ́ bǎ cwəkəlɑ yə po lə̀ gə bi mukəcɔk mú nə pǒ pɔ̀ pyə wap bɑ mfɑ pɑ̌ a, po lə́ gə pɑ́ bəm. E gɔ sɔ' piŋ ghɔm bi pɑ ghəŋ kwyap gɑ: Mghɛ do, po fɑ bəŋ m̀ gɔ nthʉm mɔk tə pi, yə pu lə nyaptə bi Sata pu a pɑ aŋgəle pyə a. Nə pa' jiku'u lə́ yɛ́ a, po lə hɑ ywə npfɑ; ji shyə lə́ yɛ́ a, po lə hɑ nwə́ Ŋ dɑ́ pɑ́ gʉɔ po lə nyəŋ a dyə; bɑ kəcyəŋ e po lə kwa dzə nə m̀ gǒ biŋ bɑ dyəcɛ̌ po lə lé a. A pɑ́ po'o wap pa' bi e gɑ: Cyəpɔ, pyə lə́ bɑ́ hɑ́ sǒ jɔ o bɑ jiku'u kɑ ji shyə lə, kɑ gʉɔ lə, kɑ kəcyəŋ e lə, kɑ m nə gho lə kɑ m dyəcɛ̌ lə pyə lə kwitə o? E pa' bi pu gɑ: Kwa' nyənyɔ gɑ siŋ wɔ gɑ bǎ cwəkəlɑ yə po lě tə ghə bi mu' nə pǒ mkəcɔk po pɔ a, bɑ po lə̀ shyətə ghə pa' pɑ̀ bəm. Pɔ bɔ gɔ sɔ' ghɔ nthʉm go' tə mì, a pɔ nyənyɔ ghɔ nthʉm vɔk tə mi. Yeso lə́ nə́ miŋ nə ghɔm guŋ mghɔm nthɔk bɔ awɛ, gɔm bi pɑkhʉ̌ pyə gɑ: Pǒ zhyə gɑ Paska gɔ pɑ nə batə tyɛ' pʉə: Pù hɑ Mú mǒ pu kam é thə̀ bɛnyəpɛnyə. A lə̀ pɑ́ po'o, mkamsi gwyəgwyə, ba mghətso cəcɑ̌ pɔmnəŋ, cu'tə tətɔ ŋkhamsi gwyə yə pu lə́ ŋkhe é gɑ́ Kaifa a. Wap lə tɛ́ bɑ ŋkwi shwə̀ nə lɑ fʉ̌ gəm Yeso jwə́ e. Da' gɑ wap lə́ bɑwə gɔm gɑ: Ka pɑ ghəm e nthʉm la'nwə, po'o gɑ a kɑ paknyə pɔmnəŋ. Cwə yə́ Yeso lə̀ pɑ́ Betanya dyə Simon gɛ ka'pap, mu' mjwǐ sɔ' bəŋ e, bɑ e wim duŋ mwɑ damnyəlamnyə, myə tʉɔdəŋ, pfyə thə Yeso, cwə yə wap lə́ bɑ tɑpe a. Pɑkhʉ̌ Yeso lə́ nə yɔ po'o, sə́ yap fi', wap ghɔm gɑ, yəŋ pí gɔ kwitə kʉ? Pu kɑ́ bɑ gɔ fiŋ mwɑ́ bɔ mtʉɔdə̀ŋ, hɑ ŋkhap bi mpə̌ŋ. Yeso lə́ zhyə̌, gɔm bi pu gɑ: nwə kɑ́ po paknyə yəŋ mjwǐ? A kwa' fa' pɑpuŋ tə e fa' nə m̀. A ghɔ nə mpə̌ŋ, po a pú nə gɔ pɑ́ pɑ́ guŋ mcwə awɛ, tə́ sɔ' m nə m̀, tə́ pɑ nə gɔ pɑ́ pɑ́ guŋ mcwə awɛ pɑ́. E nə nyəŋ mwɑ damnyəlamnyə mɔ gɑ nə m̀, nə́ nyaptə nə təŋ a. Kwa' nyənyɔ gɑ̌ siŋ wɔ gɑ guŋ mtsʉ' awɛ myə pu gɔ la' siŋ Cuŋ pɑpuŋ yəŋ gɑ́ nə́ nthʉm guŋ dzʉ awɛ a, pu pɑ gɔm ba ywə yə e lə ghə a nə ŋkhamtə e. A lə pɑ̀ po'o, mu' mo nə pɔ shwɔppʉə mgham yə tso tsyə bɑ Yuda Iskariɔt a ghɔ ywə mkamsi gwyə, gɔm bi pu gɑ: Po gɔ hɑ́ kɑ́ bəm a, biŋ hɑ e bi pǒ? Wap lə pǐŋ ŋkhap bɛ mgham ntha bi e. Tə̀ fɑ po'o Yuda pɑ shəŋ sɔ̀ pɑpuŋ nə hɑ Yeso bi pú. A lə̀ pɑ́ nə dəŋdzə tyɛ'dzʉ msɛ tə kwɔ' msɛ̌, pɑkhʉ̌ Yeso sɔ' gɔm bi e gɑ: O wə́ shəŋ gɑ́ pyə nyaptə ywətsʉ Paska bu m hɑ̀? E ghɔm bi pu gɑ: Po ghɔ tisuŋ, gɔm bi mu' mo gɑ́: Ta ghɔm gɑ: Cwə wə bɑ a ghɔptə, pyə a pɑkhʉ̌ pɑ̌ gɔ ghə Paska ywə o Pɑkhʉ̌ Yeso lə ghə pa' e lə́ ghɔm bi pu a, nyaptə Paska. A lə pɑ bwadzʉ̌, Yeso pu a pɔ shwɔppʉə mgham pɑ tɑpe pu a pu lə pɑ̀ dzʉ̀ywə, e ghɔm gɑ: Kwa' nyənyɔ gɑ̌ siŋ wɔ gɑ mu' mo nə po gɔ hɑ a bi pu. Nwə lə pɔk wap té'o, bǎ ya mo lə́ nə pu pɑ gɔm bi e gɑ: A bɑ a à Cyəpɔ? E pa' bi pu gɑ pu yɔk pyə mo yə e gɔ hɑ a bɑ a pəmtə́ ŋkho kɛ́. Mú mo gɔ ghɔ pa' pu lə́ və nə́ e a; da' gɑ ghəghʉɔ bi mo yə pu shyə m nə́ e tə́ hɑ Mú mo a! Dzə lə́ bɑ bi mo bɔ gɑ pu kɑ tsə́ e. Yuda yə e lə́ bɑwə hɑ e a lə ghɔm gɔm gɑ: Bi a pɑ a pɑ ǎ Rabi? Yeso pa' bi e gɑ: Ǒ ghɔm! Wap lə pɑ dzʉ̀ ywə, Yeso pe msɛ̌, nyəŋ byanyə nə, bo', biŋ hɑ bi pɑkhʉ̌ pyə gɔm gɑ: Po kɑ̀ pfɑ́, yəŋ gɑ bɑ́ bapnɑ a. Biŋ ŋkwa nthú' mlu' go'tə Si nə hɑ bi pu gɔm gɑ: Po nwə́ guŋ yɔ awɛ. Nə pa' moŋ gɑ bɑ mcyə́ mə̌, mcyə kɔ̀ myə pu pfyə nə thə́ pɔ jɔmyɔ̌m, nə nə́ lɑ mhɔ pɔ shwyɛ' wap a. Gɑ siŋ wɔ gɑ: Ŋ tə gɔ piŋ kwi' nwə́ mlu' nthɔm thə̀ mɔ gɑ́ pɑ̀, tə́ kəm tyɛ'dzʉ́ yə pɑ̀ gɔ la' kwi' nwə́ myə sə́, nthʉm Nəfò Tà ǎ a. Wap lə zhwɔp shyə, nthəm gɔ kuŋ mthə́ bɛ. A pɑ po'o, Yeso ghɔm bi pu gɑ: Kwa' mtsʉ' ɔ gɑ, po gɔ cyə m nə m̀ vʉtəsi awɛ, nə pa' a bɑ pu lé bvə gɑ: Gɑ̌ gɔ sɔ' cwɔ byap dzə́, mjʉ̀jʉ̀ sɛtə́ kà. Da' gɑ̀ gɑ̌ gɔ cwə tə yam nə vʉ̌, po kwyatə a Galilea. Pɛtrɔ lɑ ghɔm gɔm gɑ: Guŋ pɔ awɛ cyə m nə o bvʉtə́ bɑ ŋ tə gɔ vʉ̀ pɑ́. Yeso ghɔm bi e gɑ: Kwa nyənyɔ gɑ̌ siŋ o gɑ́ ko' gɔ nə tuŋ m tsʉ' ɔ bɑ ǒ kəŋnyə a mcʉm ntha. Pɛtrɔ ghɔm bi e gɑ: A pɑ pɑ́ gɑ́ pǔ gɔ pəmtə pfʉ́ bɑ ŋ tə gɔ kəŋnyə o pɑ̀. Ba guŋ pɑkhʉ̌ awɛ lə ghɔm pɑ́ po'o. Yeso pu a pɑkhʉ̌ pyə lə ghɔ tə́ ŋkhəm nə́ mu' tsʉ' yə pú ŋkhe gɑ́ Gətsemane a, e ghɔm bi pú gɑ: Po cwə tsɔ'ɔ tə́ a gɔ tsi' i shwyɛ'nyə Si. E lə́ lɑ̌ Pɛtrɔ pu a pǒ Zebede pɑpʉə. Biŋ ntho' nə zhwiŋ, lam tsyə́ pɑ sɔ́. A lə pɑ po'o e ghɔm bi pu gɑ: Lam tsɑ̌ wə jwiŋ m zhwiŋ vʉ̌. Pó cwə tsɔ'ɔ pɑ̀ pəmtə disɛ́. E lə piŋ na' gɔ dzə, bvʉ́ pfɔppfɔp shwyɛ'nyə Si gɑ: Ta ǎ, a ghɔ̀ bɑ̀ gɑ bi a pɑ yəŋ gɑ̀ nthǔ' cyə̀ gʉə sʉəsʉə nə m̀! Da' gɑ́ tə m pa' gɑ̌ kuŋ a pɑ́, pa' o kuŋ a! E lə sɔ' bəŋ pɑkhʉ̌ pyə́, wap pɑwə di; e ghɔm bi Pɛtrɔ gɑ: A pɑ̀ po'o tə́ po lə ghə tʉɔ gɑ̀ pɑ nə disɛ nə ta' nam! Po tisɛ, bɑ́ shwyɛ'nyə Si gɑ̀ po kɑ̀ vʉ̀ nə mləŋtə. Zhwenyə wə bɑ a ló kaktʉɔ, da' gɑ bɑ bap nɑ́ pwa. E lə piŋ ŋkwi' dù bəŋ pú batə m cʉm bʉ́ə gɔ shwyɛ'nyə́ Si gɔm gɑ: Ta ǎ a pɑ gɑ bi a pɑ yəŋ gɑ nthu' lə cyə tə́ gɑ nwə́, ywə yə o shəŋ a, a pəmtə̀. E lə piŋ bɑnyə, jɔ wap, wap pɑwə di nə pa' mnyə map lə bɑ ǎ tsɑ̀ nə lwɔk a. E lə tak wap nəŋ, biŋ ŋkwi' gɔ nə batə mcʉm ntha' shwyɛ'nyə Si, gɔm pɑ́ mghɔm myə e ji gɔm a. E lə piŋ sɔ' bəŋ pɑkhʉ̌ gɔm bi pu gɑ: Po ti nə gɔ dzə biŋ hwitə́! Yɔ̀, cwə yə pu gɔ hɑ Mù mo nə̀ bǔ pɔ cwəpuŋ a ku'. Po lusi! Pɑ ghɔ, yɔ́, mo yə e hɑ́ a wə sɔ'. E lə́ pɑ́ gɔm po'o, Yuda mu' mo nə pɔ shwɔppʉə mgham ŋwak pu a vəŋ pɔ bɑ wap wim mnyədwɔp pu a mwya; bɑ mkamsi gwyəgwyə pu a mghətsó nthʉm guŋ nə́ nthəm wap. Mo yə é lə bɑwə gɔ hɑ Yeso a lə bɑ pu a pu yap mtiŋ, e ghɔm bi pu gɑ: Mo yə gɑ gɔ nuŋ mgho' myə́ a, a gɔ pɑ yʉ Yeso, po ghəm é. E lə wuŋ gɔ bəŋ Yeso gɔm gɑ: Gɑ ca'tə m Ta. E lə piŋ nuŋ mgho' myə́. Yeso ghɔm bi e gɑ: Só a, ghə ywə yə o tsɔ' nə a. Wap lə̀ sɔ' cwəlɔ, jap bù nə Yeso gəm e. Mu' mo yə pu a Yeso lə bɑ́ a, lə̀ cwɔ' nyə́ e, nə̀ nɔk gɛfa' ŋkhamsi gwyə, nthe təŋ e. A pɑ po'o Yeso ghɔm bi e gɑ: Nyəŋ nyə o nə tsʉ' e, nə pa' pɑ̀ cwɔ' nyə́ gɔ la' pfʉ́ pɑ́ nyə. Ǒ kwɛ gɑ́ ŋ khá ku' nə ké Tá ǎ e wuŋ hɑ shwə̀ shù aŋgəle shwɔppʉə mgham bəm a. Bi a pɑ̀ po'o bɑ ywə yə pu lə və gɑ́ a gɔ pɑ̀ po'o a gɔ pəmtə m gɑ́ kɑ̀? Yeso lə́ ghɔm bi pɔmnəŋ pɑ cwə o bɔ gɑ: Pa' cwə yə pu gɔ ghəm samshwə a, po lɑ mnyə pu a mwya nə sɔ' m nə ghəm a! Ŋ dɑ̀ bɑ guŋ mtyɛ'dzʉ́ awɛ bɑ̀ gɑ cwə Dyə Si bɑ ji'tə pɔmnəŋ ywə, po lə ghəm a. Da' gɑ́ guŋ ywə awɛ bɑ́ po'o tə́ ywə yə mghɔm ghɔm Si lə və a a pəmtə. A lə pɑ̀ po'o pɑkhʉ̌ pyə wa' e, ŋkhʉ̌. Pɔ pyə wap lə ghəm Yeso a lə lɑ e gɔ ywə Kaifa, ŋkhamsi gwyə yə pɑ zhyə́ mco' pu a mghətso lə bɑ wap cu'tə ywə e a. Sɔ' m nə Pɛtrɔ, e lə bɑ ě yap jʉm, tə bɑwə giŋ tə gʉə sʉəsʉə; e lə ghɔ tə́ ŋkhəm ywə ŋkhamsi gwyə; ŋkho ywə e, shwə pu a mghɛ fa', bɑ gɔ yɔ yə pa' a lə gɔ nə miŋ a. Mkamsi gwyə́gwyə́ pu a Sanedrɛŋ lə bɑwə shəŋ kwinthɛ cwanwə yə wap gɔ ghɔm tə pu cyə m nə ja' gɑ pu gɔ zhwə e a. Ba tə pa' mkwinthɛ cwanwə lə sɔ' tə jɔm a, wap la tə yɔ sɔmywə pɑ́. A lə nə miŋ, shɑ pɔ̀ pɑpʉə sɔ' gɔm gɑ̀: Bɛ yəŋ kɑ́ ghɔm gɑ̀: Gɑ̌ ku' nə sa'tə tsʉ' Si, biŋ ŋkwɑ nə mtyɛ'dzʉ́ mənthá. Ŋkhamsi gwyə lə lǔsi gɔm bi Yeso gɑ: O ka ghə sɔmywə yə o gɔ pa' nə a? Pɔ pɔ gɑ̀ butə o gɑ́ kɑ? Da' gɑ Yeso lɛ́tə̀ lɛ̌tə́. Ŋkhamsi gwyə ghɔm bi e gɑ: Gɑ̌ ghɔm bu nə tso Si nthʉɔtʉɔ gɑ o siŋ wɔk bi a o bɑ Kristo Mù Si a. Yeso pa' bi e gɑ: Ǒ ghɔm. Da' gɑ́ tə fɑ cwəlɔ po gɔ pɑ yɔ Mu mo bɑ e cwə nə ghəŋ tʉɔ Si nthʉɔtʉɔ e fi' dəm mlwa kɛbəŋ. A lə pɑ po'o, ŋkhamsi gwyə khi dzə e gɔm gɑ: E cap Si, pɑ biŋ shəŋ ya nthi mkwǐnthɛ! Po yu' mcap. Pǒ yɔ́ yɔ gɑ́ kɑ? Wap pa' bi e gɑ: E ku'nyə nə vʉ̌. A lə̀ pɑ̀ po'o wap thə́tə mtǐ nə sə́ e, shap e, shɑ pɔ cwɔ mfe təŋ e, bɑ gɔm bi e gɑ: Gɔm ghɔm Si siŋ wɔk mò yə e shwɔ o a m Kristo. A lə̀ nə̀ pɑ po'o Pɛtrɔ pɑ́ shwədyə̌ bɑ e cwə́si. Mu' mú mjwǐ gɛfa' lə̀ sɔ' bəŋ e gɔm gɑ: Ba wə yǔ kɑ́ bɑ po Yeso yə Galilea. Da' gɑ e kəŋnyə dzə guŋ pɔ awɛ gɔm gɑ: Ŋ kha zhyə ywə yə o shəŋ nə ghɔm a. Pɛtrɔ lə lǔ tsʉ'u bɑ gɔ m shwə pù, mu' mu mjwǐ gɛfa' yɔ e gɔm bi pɔ pyə wap lə́ bɑ tsʉ'u a gɑ: Mo yəŋ gɑ pu Yeso nə kɑ̀ bɑ̀. Pɛtrɔ kɔ mkɔ nə ŋkhəŋnyə gɔm gɑ: ŋ kha zhyə bɛ bǎ! A lə̀ na' shwə muywə, pɔ pyə́ wap lə bɑ tsʉ'u a sɔ' bəŋ Pɛtrɔ gɔm gɑ: A kwa' nyənyɔ gɑ o bɑ̀ mo yap! Ba gi o pɑwə nthɛ mnɛ mǔ. Pɛtrɔ lə to' nə kɔ mkɔ bɑ̀ gɔm gɑ: ŋ kha zhyə bɛ bǎ! A lə̀ pɑ po'o ko' wuŋ nthúŋ. Pɛtrɔ piŋ ŋkhamtə ghɔm tsyə Yeso la' gɔm bi e gɑ: Ko' gɔ nə tùŋ bɑ o kəŋnyə a mcʉm ntha. E lə̀ təm biŋ dɑ mtso dɔ̌. Dzʉ́ lə lɔ̌, guŋ mkamsi gwyəgwyə awɛ pu a mghətso cɔmnwə nə Yeso nə ja'shɛ e gɑ̀ pu zhwə e. Wap lə piŋ shə̀ŋ e cwəlɔ, dɑ e nə gɔ hɑ e bi gɔpna' Pilato. A lə pɑ́ po'o Yuda yə e lə hɑ Yeso a nə yɔ gɑ́ pu nyəŋ shɛ thə́ e zhwìŋ ko nə e, e lɑ ŋkhap bɛ mgham nthá nə bɑnyə hɑ bi mkamsi gwyəgwyə pu a mghətso gɔm gɑ: Ŋ khé hɔ nə hɑ mcyə́ tə bya. Da' gɑ wap ghɔm bi e gɑ: A ghə la m wɔk! A yu shɛ. A lə pɑ̀ po'o e təm, ma' ŋkhap nə ghəŋ tsʉ' Si, cwəlɔ gɔ shəŋnyə. Mkamsi gwyə lə pé ŋkhap gɔm gɑ: Pu ka piŋ gɑ́ pɑ ŋkhap yəŋ ko nthɛ nə pa' a ŋkhap mcyə. Wap lə tɛ̌, dɑ ŋkhap bɔ nə jo pe bə̌m mcǎ' nə gə tsʉ' nə nthəŋ mghʉɔ. A ywə yə a gə tə́ pu pɑ́ ŋkhe pé bɔ gɑ pé mcyə tə ŋkhəm cwəlɔ a. A pɑ́ po'o ywə yə gɔm ghɔm Si Yeremia lə ghɔm a pəmtə gɑ: Wap lě biŋ ŋkwi ŋkhap bɛ̀ mgham nthá: A bɑ dəŋ mo yə pu lə tɛ a, mo yə pǒ pɑ Israɛl lə tɛ a. Wap lə hɑ nə́ pě bə̌mmcǎ' dəŋdəŋ pa' Cyəpɔ lə ghɔm bəm a. Pu lə fyɛ' Yeso dzə gɔpna' həŋtə e gɑ: O bɑ fo pɑ Yudea a? Yeso ghɔm bi e gɑ: Wə nə gɔm, tə́ sɔ' m nə mnwə myə mkamsi gwyəgwyə pu a mghətso lə gɔm nə e a, e lə pa' sɔmywə nə́. A pɑ́ po'o Pilato ghɔm bi e gɑ: O tə́ bɑwə ju' guŋ mnwə myə pu bɑwə gɔm nə́ o a pǎ? Yeso lə̀ pa' sɔm nwə bi gɔpna', tə́ nwə cyə e. A lə bɑ mɑ̀ gɑ́ a pɑ bǎ nə ya ŋwɛnyə lə, gɔpna' té ta' mo cɛ́, bi pɔmnəŋ, mo yə wap həŋtə a. A lə bɑ pu ghə̀ mu' mgha'mgha' gɛ cɛ̌, tso tsyə pɑ Yeso Barabas Pilato lə həŋtə pɔmnəŋ pyə wap lə bɑ wap cu'tə a gɑ: Pǒ wə shəŋ gɑ nthak ya mo bi pǒ? Yeso Barabas ká Yeso yə pu ŋkhe e gɑ Kristo a? Nə pa' Pilato lə bɑ e zhyə gɑ́ pu lə̀ ŋkhiŋ Yeso kǐŋ tə̀ hɑ é bi e a. Cwə yə Pilato lə pɑ́ dyə fyɛ' a, jwi e təm gɑ́ pu ghɔm bi e gɑ: Kɑ ko nə nwə mo nyənyɔ yɑ! Nə pa' jʉ̀m kwɔ' la' tyɛ' ɔ baknyə a nə nwə e te'te'. Mkamsi gwyəgwyə pu a mghətso lə́ tɔk pɔmnəŋ gɑ pu həŋtə bi Pilato gɑ e tak Barabas nəŋ, gə pu zhwə Yeso. Gɔpna' lə piŋ dɑ ghɔm həŋtə wap gɑ: A ghɔ nə wap pɑpʉə po pɑwə shəŋ gɑ nthak ya mo neŋ? Wap pa' bi e gɑ Barabas. Pilato həŋtə wap gɑ: Gɑ gɔ ghə la m Yeso yə pu ŋkhe é gɑ Kristo a? Guŋ yap awɛ pa' gɑ: Kam e thə́ bɛnyəpɛnyə! E piŋ həŋtə wap gɑ: A bɑ e ghə kɑ yə a pɔk a? Da' gɑ wap cwé tə thə̀ gɑ: Kam e thə́ bɛnyəpɛnyə. Pilato lə nə yɔ gɑ́ ywə yə e wə gɔm a ka kwitə, pɔmnəŋ piŋ bɑwə shaktə nɑ tsap, ŋkwi shyə nə sɔk bu myə́ dzə pɔmnəŋ gɔm gɑ: Ŋ kha zhyə sɔmywə nə mcyə mɔ̌; a yɔ shɛ̀. Guŋ pɔ awɛ pa' gɑ: Mcyə myə́ ko nə pyə ba m nə́ pó pɔk. A lə pɑ́ po'o e tak Barabas nəŋ bi pu. Tə sɔ' m nə Yeso; e lə ghə̀ pu lɑ nthě shwɔ e, biŋ hɑ e gɑ pu kam e thə bɛnyəpɛnyə. Msəŋwi gɔpna' lə lɑ Yeso ŋkho dyə fyɛ' cwəlɔ, shu'tə guŋ msəŋwi awɛ bəŋ e. Wap lə tɔk dzə nə e ŋkwa pɛ dzə nə̌m nə e. Dɑ mka'tə ba' ntheŋ nthʉ́ thə é; biŋ hɑ ka'cyə bi e nə pù tʉɔ; wap lə kam mkwi'tə dzə e, shap é gɔm gɑ: Pyə ca'tə o bɑ fo pɑ Yudea! Wap lə thə́tə mtǐ nə e, biŋ ŋkwi ka' pu e shwɔ thə e. Wap lə cap e po'o nthɔk dzə́ nə́m nə e, ŋkwa kwa' dzə tsyə nə e, biŋ dɑ e gɔ nə kam e thə̀ bɛnyəpɛnyə. Wap lə pɑ́ nthəm jɔ mu' mbɛ, yə Kirena, tso tsyə pɑ Simon wap ghəm e gɑ e kwa bɛnyəpɛnyə Yeso. Wap lə ghɔ tə ŋkho tsʉ' yə pu ŋkhe gɑ Gɔlgota, a pɑ̀ nthùtə gɑ tsʉ' kəlo' thə́ mò. Wap hɑ mlu' bɑ pú ŋi'nyə mcyə́ nə́ bi e gɑ e nwə. E lə́ zhwi'tə, ŋkhəŋnyə nə́ nwə́ wap lə kam e thə bɛnyəpɛnyə cwəlɔ, nthamnthùŋ nə gap mdzə myə́. Wap lə piŋ shwə̀ tsʉ' u bɑ byap e. Wap lə ŋwa' ywə yə a gə tə̀ pu zhwə e a jap dəm thə́ e gɑ: Mo yə̌ŋ gɑ bɑ Yeso, fo pɑ Yudea. Pu lə pəmtə̀ ŋkham wap pu a shɑ̀ msamshwə pɑ́pʉə, mu' nə ghəŋ tʉɔ gə yə mu' nə ghəŋ kwyap. Mcyə́ jyə̀ lə nə cyə̀ bɑ jəmtə, bɑ ŋʉ' thə yap, gɔm gɑ: Wə yə o sa'tə tsʉ' Si biŋ ŋkwɑ nə tyɛ' tá a, o pɑ Mu Si o vɔk thə nɑ o, fi' thə bɛnyəpɛnyə! Ba pɑ zhyə mco' pu a mghətso, ba mkamsi gwyəgwyə lə yəmtə e gɑ: E lə̀ vɔk shɑ pɔ; bi a pɑ e lə vɔk thə nɑ e a! E bɑ fo pɑ Israɛl, e fi' thə bɛnyəpɛnyə cwəlɔ̌, pyə piŋ e! Pu Si nə bɑ́, a Si vɔk e cwəlɔ, a pɑ zhyə́ gɑ́ e ŋkhuŋ e, nə pa' e gɔm gɑ: Gɑ̌ bɑ́ Mu Si! Ba msam shwə̀ pyə pu lə kam wap pu a pù a lə kwi' jəmtə e yap pɑ po'o. Tə́ fɑ mɔkcʉ gɔ ŋkhəm nə mnam tá, jʉ́m lə lɑ guŋ dəmca' awɛ. A lə nə kəm nə mnam tá Yeso cwé tə́ thə̀ gɑ: Eli, Eli, lama sabaktani. A pɑ́ nthutə gɑ: Si a, Si a, o gwa' a gɑ kɑ? Shɑ pɔ nə pɔ pyə wap lə bɑ tsʉ' u a lə nə yu' e po'o gɔ́m gɑ: E yə́ bɑwə ŋkhe Elia, Mu' mo nə pu lə wuŋ ŋkhʉ̀dʉ́ be cù ywə nyəŋ cɔ́kmlu' nə, su nə́ kam kà' nya gɑ e nwə. Pyə shɑ́ pɔ ghɔm gɑ: Tiŋnyə! Pɑ yɔ bi a Elia gɔ sɔ' vɔk e a. Da' gɑ Yeso lə piŋ shwe tə́ thə cwəlɔ, zhwenyə é təm. Pu nə yɔ dzə́ Dyə Si sɔ pak pʉə fɑ thə̀ ŋkhəm si; cǎ' cu'nyə. Mghwɔ' sɔtə, mthəsì ghyɛ', mnɑ pɔ dɔlɔ̌ tə jɔm yam nə vʉ̌: Jam nə vʉ̌, nthəm mthəsì po'o ŋkho tisuŋ dɔlɔ̌ pɔ jɔmyɔm yɔ wap. Tadyə msəŋwi ŋkhə pu a pɔ pyə pu a pu lə bɑwə byap Yeso a lə nə yɔ pa' ca' shʉ'nyə a, ba ywə yə a lə cyə a, bwɔk té' o gɔm gɑ: kwa' nyənyɔ mo yəŋ kɑ bɑ Mu Si. Vəŋ pɑ jwǐ lə bɑ tsʉ'u, bɑ wap tiŋnyə gʉə sʉəsʉə bɑwə jɔ; wap lə̀ bɑ jʉm Yeso tə fɑ cwə yə́ é lə́ bɑ́ Galilea, bɑ fa' bi e; Maria yə Makdala ba Maria ma Yakop pu Yosɛp, ba ma pǒ Zebede lə bɑ cəcɑ pù. A lə̀ kəm bwadzʉ̌, mu' mbɛ yə Arimatea mo jizhǐ tso tsyə pɑ Yosɛp, bɑ e lə bɑ yə mukhʉ̌ Yeso sɔ'. Bɛ bɔ lə ghɔ jɔ Pilato, həŋtə gɑ e hɑ pfə Yeso bi e. Pilato lə ghɔm gɑ pu hɑ pfə Yeso bi e. Yosɛp lə kwi pfə Yeso dzʉmtə nə kam dzə́ dɔlɔ̌, nyəŋ nthʉm sì sə́ yə e lə ghə pu təŋ nthʉm ghu gwɔ' a; biŋ ŋkhəŋnyə mɑ gwɔ̀' nə shɑ thəsì cwəlɔ gɔ. Da' gɑ Maria yə Makdala pu yə mu' Maria lə́ bɑ tsʉ'u bɑ wap cwə dzə sì. Tyɛ' nə nyaptə paska lə cyə̌, dzʉ lɔ cwəlɔ, mkamsi gwyəgwyə pu a pɑ Farisai pəmtə gɔ ywə Pilato, gɔm bi e gɑ: Cyəpɔ, pyə kamtə́ gɑ shwanwə yəŋ lə pɑ cwə yə e lə jɑ tə pfʉ̌ a gɔm gɑ: A gɔ la' cyə tyɛ'dzʉ́ yɑtá jam nə vʉ̌. Ghɔm gɑ pu pyap thəsì e tə ŋkhəm nə tyɛ' tá, bwɔk gɑ pɑkhʉ̌ pyə kɑ sɔ' jʉ pfə́ e, gɔm bi pɔmnəŋ gɑ́ e yam nə vʉ̌. Nə pa' bɑ yə bɔ cwanwə gɔ piŋ pɔk tə cyə yə dzə. Pilato lə ghɔm bi pu gɑ: A bɑ pǒ ghə pɑ pyap tsʉ'. Po ghɔ byap thəsì e pa' po zhyə a. Wap lə ghɔ cwəlɔ jap stam nə gwɔ' thəsì e, biŋ jap pɔ gɑ wap pyap. Sabat lə cyə̌, a pɑ mɑ mpʉm dzʉ́ nə dəŋdzə tyɛ'dzʉ́ nə gap dzʉ, Maria yə Makdala pu yə mu' Maria ghɔ jɔ thəsì Yeso. A lə pɑ po'o cǎ' cʉ'nyə té' o: Aŋgəle Cyəpɔ fi' fɑ thə kɛbəŋ sɔ' ŋkhəŋnyə gwɔ' shwə́ dəm o. E lə bɑwə hwə pa' pəpa' bəŋ a, dzə tsyə piŋ bɑwə fɔk pa' mwe bəŋ a. Pɑ pyap thəsì lə pwɔk tə shʉ' pa' pɔ pyə wap pfʉ a. Da' gɑ aŋgəle lɑ ghɔm gɔm bi pɑjwǐ gɑ: Ka po pwɔk. Gɑ̌ zhyə gɑ́ po shəŋ Yeso yə pu kɑ kam e thə́ bɛnyəpɛnyə a. E tə̌ tsɔ'ɔ pɑ̀ nə pa' a bɑ e yam nə vʉ̌ pa' e lə ghɔm a. Po sɔ' jɔ tsʉ' yə a kɑ bɑ e nuŋ nə a. Po khʉdʉ gɔ gɔm bi pɑkhʉ pyə gɑ: E yam nə vʉ̌. Po kwyatə e Galilea; po gɔ ko wə yɔ e. Gɑ siŋ wɔ. Wap lə wuŋ nthəm thəsì, bwɔk, da' gɑ́ ŋwɛnyə ŋkhʉdʉ gɔ nə siŋ pɑkhʉ̌ pyə́. Cùŋ bɔ. A lə pɑ̌ po'o Yeso piŋ sɔ' pu a pu yu'tə e ghɔm bi pu gɑ: Gɑ̌ ca'tə wɔ. Wap lə sɔ' nthɔm mkwə myə́, ŋkham mkwi'tə dzə e. A pɑ po'o Yeso ghɔm bi pu gɑ: Ka po pwɔk, po ghɔ siŋ mfɑ pɑ̌ gɑ wap gɔ ghɔ Galilea; a tsʉ' yə wap gɔ yɔ a nə a. Cwə yə pɑjwǐ lə pɑ məjyə a, shɑ pɔ nə́ pɑ pyap sɔ' tisuŋ siŋ mkamsi gwyəgwyə guŋ mnwə myə a shya. Wap pu a mghətso lə cu'tə cwəlɔ, shɔm hɑ ŋkhap bi msəŋwi tə a yɔm, gɔm bi pu gɑ: Po ghɔm gɑ: Pɑkhʉ pyə ke sɔ' mtsʉ', pyə pɑwə di wap zhʉ e. Bi a pɑ a tam təŋ gɔpna', bɑ pyə gɔ ghə e lɛtə, pyə piŋ gə tə e lə ghə́ sɔmywə nə po. Wap lə kwi ŋkhap, gə pa' pu gɔm bi pu a; nwə bɔ bɑ ǎ sɛ cəcɑ̌ pɑ Yudea tə ŋkhəm tyɛ' ɔ. Sɔ' m nə pɑkhʉ shwɔp a mu' mgham, wap lə ghɔ Galilea, nə kúŋ yə Yeso lə ghɔm gɑ wap ghɔ nə a. Wap lə nə yɔ e, ŋkham mkwi'tə si da' gɑ shɑ pɔ zhʉ'nyə. Yeso sɔ' bəŋ pu gɔm bi pu gɑ: Tá hɑ guŋ tʉ̀ɔ bəm awɛ kɛbəŋ ba m dəmcǎ'. Po ghɔ, dɑ guŋ mguŋ awɛ gə pɑkhʉ, bɑ nu' wap shyə nə tsǒ Tá ba Mù, ba Zhwenyə Dɔlɔ̌. Bɑ ji'tə wap nə tɔm guŋ ywə awɛ yə gɑ jap bi po a. Sɔ' m nə m̀ pɑ gɔ pəmtə pɑ́ pɑ tə kəm nə cwə yə dzʉ̌ gɔ mi a. Nə́ zhi Cuŋ pɑpuŋ Yeso Kristo, Mu Si; dəŋdəŋ pa' a bɑ́ pu və nthʉ́m ŋwa'nyə gɔm ghɔm Si Esaya gɑ: Yɔ, gɑ̌ tə́m shwiŋkhʉɔ a dzə o, gɑ e nyaptə́ məjyə̀ o. Gì mo ghakgo shwé gɑ: Po nyaptə́ məjyə̀ Cyəpɔ. Po ghə mpim jyə̀ tiŋnyə dəŋdəŋ. Yohane nu'pɔ shyə lə təm ghakgo bɑ siŋ nwə́ kwishyə pʉɔtʉ́m nə́ nə lɑ mhɔ mo shwyɛ' e. Gùŋ guŋ Yudea awɛ ba guŋ pɑ Yerusalɛm awɛ lə ghɔ bə́ŋ é, bɑ gə e nu' wap shyə Yurdɛŋ, wap pɑ̀ biŋ mhɔ máp. Yohane lə́ bɑ ě kwadzə́ mnəŋ kamelo, gə tap gwɔp vʉ' e; e lə́ pfɑ́ pɑ gǎmmthɔ biŋ dzʉ ŋwa' gó. Yohane lə́ bɑ siŋ gɑ̀: Mo yə ě ghə tʉɔ shyə́ á a wə sɔ' jʉ̌m m̀, bɑ ŋ kha kú' nə pɔnyəsi ŋkhyɛ' ŋkhə nə mthap myə́. Kwa' myə̀ gɑ̌ bɑ gɑ̌ nu' wɔ pɑ shyə, tə́ yʉ́, e gɔ la' nu' wɔ nthʉm Zhwenyə Dɔlɔ̌. A lə pɑ̌ nə mtyɛ'dzʉ́ bɔ, Yeso fɑ́ Nazarɛt m Galilea sɔ' gə Yohane nu' e shyə Yurdɛŋ. E lə pɑ̌ nthəm shyə, jɔ kɛbəŋ ghyɛ', Zhwenyə piŋ fi' pá' səngɔpfo a sɔ' nə é. Pu piŋ jú' gi mo fɑ kɛbəŋ gɔm gɑ: O bɑ Mú a yə gɑ̌ ŋkhuŋ e a, ǎ púŋ a nə cwɔ' o. Zhwenyə lə wuŋ nthə́ Yeso shya e ghakgo. Sata lə́ lə̌ŋtə́ e nə tyɛ'dzʉ́ mghappfʉə. Pu a mnɔm go nə lə́ bəmtə bɑ́, pɑ aŋgəle piŋ bɑ fa' bi e. Pú lə cwə̌ tə́ hɑ Yohane, Yeso sɔ' Galilea. E lə bɑwə siŋ Cùŋ pɑpuŋ Si bɑ gɔm gɑ: Cwə̌ ku', Nəfo Si ghɔptə́: Po pʉɔtʉ́m tsɔ́ biŋ bíŋ Cùŋ pɑpúŋ. Yeso lə pɑ̌ shyə́ giŋnyə shyə lɑpʉə Galilea, jɔ́ Simon pu Andreya fɑ e. Wap pɑwə ma' nthənthɔm shyə lɑpʉə nə pa' wap lə bɑ pɑ ghəm bapgu a. Yeso ghɔm bi pu gɑ: po ntham jʉ̌m m̀, a biŋ dɑ wɔ gə pɑ ghəm pɔmnəŋ. Wap lə wuŋ nthak mnthənthɔm map jap jʉ̀m e. E lə na' giŋ, jɔ́ Yakop, mu Zebede pu fɑ e Yohane wap pɑ́ nthʉm kənu' yap bɑwə nyaptə mnthənthɔm map. E lə wuŋ ŋkhe wap. Wap lə tǎk tá yap Zebede pu a mghɛ fa' nthʉm kənu', jap jʉ̀m e. Wap lə kǒ tisuŋ Kapɛrnaum, a nə pɑ̌ tyɛ' Sabat, Yeso ko Sinagogə bɑ̀ ji'tə́ ywə bi pɔmnəŋ. Ywə yə e lə́ bɑwə ji'tə wap a pɑ shəŋtə ŋkhonyə wap shyə m nə yə́ nthi nə ji'tə́; nə pá' e lə́ bɑwə ji'tə pa' mo yə́ e ghə tʉɔ á, la' e zhi'tə m pa' pɑ zhyə mco' a. Mu' mbɛ lə guŋ bɑ sinagogə pú pɑ́ cwə o bɔ, zhwenyə cwəpuŋ pɑ nə e; mo bɔ cwé gɑ: A yɔk pɑ̀ kʉ? Yeso yə Nazarɛt. O sɔ' m nə ghə gɑ́ pyə́ pí. Gɑ̌ zhyə́ mo yə o bɑ yʉ́ a: O bɑ̀ Dɔlɔ̌ Si. Yeso paptə e gɑ: Lɛtə́ biŋ nthəm nə bɛ yə̌ŋ! Zhwenyə cwəpuŋ bɔ lə lɑ̌ bò shʉ'nyə bɛ bɔ, biŋ nə təm nə́ é bɑ shwé tə́ thə́. Nwə̀ lə cyə̌ wap té' o, wap pɑ́ gɔm cəcɑ̌ pu gɑ: Yəŋ nwə bɑ m gɑ́ kɑ? Yɔ mu' nə zhi'tə̀ yə̌ sə́, tʉɔ pɑ bɑ ǎ ló nə́! E gɔmnwə ba m bi mzhwenyə cwəpuŋ, wap yu'nyə bi e! Tso tsyə́ lə wuŋ sɛ nə́ guŋ mtsʉ' awɛ ghə́ŋ Galilea. Wap lə́ wuŋ nə təm sinagogə, wap pu a Yakop ba Yohane ghɔ dyə́ Simon pu Andreya. A lə́ nə pɑ̌ po'o ma jwi Simon pɑ̀ wə bɑ ě nùŋ, mhwi pɑ̀ nə́ e; pu lə wuŋ gɔm bi Yeso. Yeso lə́ sɔ' bəŋ e, nthɔm pú e nə́ bʉ' e, mhwi tə̀m nə e, e to' nə fa' bi pú. A lə pɑ̌ bwadzʉ̌, tə bɑ nǎm pi, pu pɑ́ dɑ guŋ mghɛ gho awɛ ba pɑ ghə zhwenyə cwəpuŋ sɔ' bi e. Guŋ tisuŋ awɛ lə bɑ a cu'tə jyədyə̌ tisuŋ. E lə yɛ̌ mghɛ gho tə wap yɔm, nthinthi mgho pɑ́ nə pú, biŋ jə́ŋ mzhwenyə cwəpuŋ jɔmyɔm, tɑ́ pǐŋ gɑ wap ghɔmnwə nə pa' wap lə bɑ wap zhyə é a. A lə pɑ fɔkdzʉ̌, tə dzʉ̌ yɑwə sonyə sonyə, Yeso lusi, nthəm gɔ tsʉ' tsìŋ bɑ tsʉ'u shwyɛ'nyə Si. Simon pu a mso fa' pyə to' nə cəŋ é biŋ jɔ é. Gɔm bi e gɑ: Guŋ pɔ awɛ bɑwə shəŋ o. E ghɔm bi pu gɑ: Pɑ ghɔ nə mu' tsʉ', nthʉ́m shɑ mtisuŋ, a siŋ Cuŋ pɑpúŋ ba m wə, nə pa' a bɑ mə̌ mnthə̌mdyə́. E lə pǐŋ gɔ nə guŋ Galilea awɛ, bɑ siŋ Cuŋ pɑpuŋ nthʉm msinagogə biŋ bɑ jə́ŋ mzhwenyə cwəpuŋ. Mu' ta' gɛ ka'pap lə sɔ' bəŋ Yeso shwyɛ'nyə e, biŋ ŋkham mkwi'tə myə́ si gɔm gɑ: O kùŋ bɑ ǒ ku' nə ghə ŋ dɔ́. Mtso myə́ lə kù e, e nya pú ě, ŋkwak e, gɔm bi e gɑ: gɑ̌ kùŋ, lɔ́. Ka'pap lə wuŋ nthəm nə e pɑ cwə o bɔ, e lɔ́. Yeso lə wuŋ shaktə nɑ e nə é, jəŋ é. Gɔm bi e gɑ: Pɔm tə́ ghɔm sɔmywə bi sɔmmo, da' gɑ ghɔ da'tə nɑ o bi ŋkhamsi, biŋ hɑ ywə yə́ Mosɛ lə yap a, nə pa' o dɔ́ a, a nə́ bɑ́ bi pú bɑ mtìŋ. Da' gɑ mo bɔ lə cwə̌ tə́ gɔ̌, guŋ bɑ siŋ tə́ thə́, bɑ sɛ mcuŋ bɔ, tə bi a pɑ Yeso lə piŋ ŋkho nthʉm sɔm tisuŋ dəŋdəŋ, bɑ shwə pɑ m jʉ̀mdzʉ̌, nə mtsʉ' tsìŋ, pu pɑ fɑ ba'bà' sɔ' bi e. A lə nə cyə̀ po mtyɛ'dzʉ́, Yeso pɑnyə Kapɛrnaum, pu yu' gɑ ě dyə́. Pɔmnəŋ piŋ shu'tə tsʉ'u tə la' sɔmtsʉ' yɑwə́, ba m jyədyə̌; e lə bɑwə siŋ wap Ghɔm. Shɑ̀ pɔ lə ŋwǎk, bɑwə dɑ ta' gɛ po'tə nɑ sɔ' m bi e, bɑ pɔ papfʉə kwa e. A pǐŋ bɑ pa' a lə bi a pɑ́ wap lə lɑ e gɔ tə ŋkhəm bəŋ e, bi du pɔ a, wap cwɔ' thə́ pa' nə kwa' tsʉ' yə́ Yeso lə bɑ nə a, gə jyə tsʉ'u, fi' kodyə yə gɛ po'tə nɑ lə bɑ nə bɑ pu nùŋ e a. Yeso lə yɔ piŋnthʉm yap gɔm bi gɛ po'tə nɑ́ gɑ: Mú a, pu lɑ mhɔ mǔ shwyɛ' o. Shɑ́ pɑ zhyə mcò' lə bɑ wap cwəsi tsʉ'u; wap lə sɛ̌ nthʉm tʉm tsap gɑ: Nwə kɑ́ bɛ́ yəŋ ghɔm po'o? E yəmtə́ Si. Pɑ́ wɑ̌ lɑ mhɔ mo shwyɛ' e, tə ně da' Si do e? Yeso lə wuŋ jyə́ nə zhwenyə é gɑ̀ wap lə bɑwə sɛ́ nthʉm tʉ́m pu po'o, gɔm gɑ: Nwə kɑ po sɛ́ yɑ nthi nwə̀? A ghɔ nə nə ghɔm bi gɛ po'tə nɑ gɑ: Pu lɑ mhɔ mǔ shwyɛ' o kɑ nə ghɔm gɑ lusi ŋkwa kodyə o gɔ̌ bɑ ya yɛ̀? Po'o tə́ po nə́ jyə́ gɑ́ Mú mo ghə tʉɔ nə lɑ mhɔ mo shwyɛ' e dəmcǎ'. E ghɔm bi gɛ po'tə nɑ̀ gɑ: Gɑ̌ ghɔm bu: Lusǐ, ŋkwa kodyə ó biŋ gɔ dyə o. Bɛ bɔ lə lǔsi, guŋ ŋkwa kodyə e, biŋ nthəm pɑ dzə̌ guŋ pɔmnəŋ awɛ, tə nwə va' guŋ pɔ awɛ, wap pɑ hɑ ghú'tə bi Si, bɑ gɔm gɑ: Pyə lǎ m jɔ sɔmywə pa' yə̀ŋ a! Yeso lə kwi' gɔ kəŋ shyə́ lɑpʉə. Guŋ du pɔ awɛ pɑ sɔ' bi e, e pɑ́ ji'tə wap. E lə́ pɑ̌ shyə́, jɔ Levi, mu Alfeo, bɑ ě cwəsi dyə shwɔ̀p. E ghɔm bi é gɑ: Yap jʉ̌m m̀. E wuŋ dusi biŋ jap jʉ̀m e. E lə pɑ̌ tɑpe dyə Levi. Bo'gwyə pɑ kwishwɔp pu a mghɛ mhɔ jɔmyɔ̌m pɑ yap tɑpe, ba Yeso pu a pɑkhʉ̌ pyə́ nə pa' pɔmnəŋ lə bɑ si tə́ jɔ́m, ba pɑ zhyə́ mco' pɑ Farisai pɑ́ jʉ̌m pú. Wap lə nə́ yɔ̌ gɑ Yeso pu a mghɛ mhɔ ba pɑ kwishwɔp wə bəmtə́ dzʉ́ywə, gɔm bi pɑkhʉ̌ pyə́ gɑ: Nwə kɑ e tsʉywə pu a pɑ kwishwɔp ba mghɛ mhɔ m pa' a? Yeso lə yǔ' gɔm bi pú gɑ: Tɑ́ pɑ nɑ Nthʉɔ nə shəŋ gəgɛ pɑ̀, mghɛ gho nə shəŋ é; ŋ da tə́ sɔ' nə́ ke pɔ dəŋdəŋ pɑ́, ŋ də sɔ' m nə mghɛ mhɔ. Pɑkhʉ̌ Yohane ba pɑ Farisai lə pɑ̌ shwə tə́ pɑ̌ dzʉ́ywə, sɔ' gɔm bi Yeso gɑ: Nwə kɑ pɑkhʉ̌ Yohane ba pyə pɑ Farisai pɑwə shwə tə́ tsʉ̌ ywə, pu pɑkhʉ̌ lə pɑ shwə yap tə tsʉ̌ ywə? Yeso ghɔm bi pu gɑ: Pɑ pɔ pyə pu ke wap nə nə́ ghapghʉɔ a cwə́ tə tsʉ̌ ywə nə cwə yə tá jwigʉɔ cəcɑ̌ pu a? Cwə yə pu a tá jwigʉɔ bəmtə bɑ a, wap tə gɔ cwə́ tə tsʉ̌ ywə pɑ. Da' gɑ shɑ mtyɛ'dzʉ wə sɔ̌' yə pu gɔ kwi tá jwigʉɔ bi pu a; a gɔ pɑ tyɛ' o bɔ wap cwə tə tsʉ̌ ywə. Sɔmmo tə́ dɑ pàk dzə́ sə́ ntham dzə́ bvò pɑ̀; a pɑ̀ po'o bɑ pak dzə́ sə́ gɔ fəŋ yə bvò a piŋ hʉə kwa' bɔkbɔk e. Sɔmmo tə́ nyə́ŋ mlù' sə́ nthʉm mnthu' bvò pɑ̀; a pɑ́ po'o bɑ mlu' gɔ ghə mnthǔ' vyə́tə́, pu pi mlu' ba mnthǔ'; da' gɑ nə mlu' sə́ a shə́ŋ mnthǔ' sə́. A lə piŋ bɑ mu' tyɛ'dzʉ sabat Yeso pɑ shyə nə mpě msɛ́tʉ̀ɔ, pɑkhʉ̌ pyə pɑ giŋ bo' mcɛ́ msɛtʉɔ. Pɑ Farisai ghɔm bi e gɑ: Yɔ ywə yə pɑkhʉ́ pǔ wə gə tyɛ' sabat! A tə́ bɑ pu piŋ po'o pɑ̀. Yeso piŋ gɔm bi pu gɑ: Po la m ŋkhe ywə yə David lə ghə nə cwə yə́ ywə lə pɑ jak bi e, jikǔ' yɛ́ e, wap pu a mso pyə́ a? Pa' a lə pɑ́ cwə ŋkhamsi gwyə Abiatar, e ko dyə Si, pfɑ msɛ tsə pwɔ' bɑ pu ka piŋ gɑ sɔmmo pfɑ́ tə́ ně da' mkamsi, biŋ hɑ ba m bi pɔ pyə́ pu a pu lə bɑ a? E lə piŋ gɔm bi pu gɑ: Pu lə gə sabat m bi mo, tə mo m bi sabat pɑ̀. A pɑ po'o tə Mú mo pɑ́ ba tá sabat. Yeso lə kwi' ŋkho nə mu' sinagogə; mu' mbɛ lə bɑ sinagogə bɔ bɑ pu é cwyə́m. Wap lə bɑwə dé Yeso, yɔ bi a e gɔ yɛ mo bɔ tyɛ' sabat á, tə wap té byà nə é. Yeso ghɔm bi bɛ bɔ yə pú ě lə bɑ ǎ cwyəm a gɑ: Lusí! Sɔ' tùŋ. Biŋ gɔm bi pu gɑ̀: Ywə yə a bɑ pú piŋ tyɛ' sabat a bɑ nə ghə nwə pɑpuŋ kɑ́ nə ghə nwə cwəpùŋ? Nə vɔk mò kɑ́ nə zhwə é? Da' gɑ̀ wap lɛ́tə lɛ̌tə́. E lə́ lɑ mnyə́ yɛluŋ shʉ́ wap, nwə̀ tʉm sɔksɔk tsap cyə é, e ghɔm bi bɛ bɔ gɑ: Siŋ pu ó. E siŋ pu é a tʉɔ. Pɑ Farisai pu a pɔ Herode lə wuŋ nə təm sinagogə, ŋkho cu'tə nə Yeso, nə yɔ nthi pa' wap gɔ ghə tə́ zhwə é a. Yeso pu a pɑkhʉ̌ pyə́ lə təm gɔ kəŋ shyə lɑpʉə. Vəŋ dú pɔ pyə wap lə fɑ Galilea a lə yap jʉ̀m e. Vəŋ dú pɔ lɑ nə yu' ywə yə e lɑ ghə a, bɑ fɑ Yudea, ba m Yerusalɛm, ba m Idumea, ba m nə yə́ mu' jʉɔ Yurdɛŋ, ba m nthʉ̌m guŋ Tiro ba m Sidon bɑ sɔ' bi e shyə́ nə mcuŋ guŋ ywə awɛ yə e lə́ gə a. E ghɔm bi pɑkhʉ̌ pyə gɑ̀ wap cə́ŋ kənu' bi e, bwɔk gɑ vəŋ pɔ kɑ́ tsa'tə e. Nə pa' a lə bɑ ě yɛ pɔmnəŋ tə́ bǎ wɑ̌lə́ yə ywə lə bɑwə gə́ e a pɑ sɔ' nthə́nyə e nə kwak e. Pɔ pyə Mzhwenyə cwəpuŋ lə bɑ nə pu a lə nə yɔ e, bɑ bvʉ́ nə mkwə myə́, bɑ shwé gɑ: O bɑ Mú Si. E pǐŋ bɑ́ sho' bi pu shɔkcɔ̌k gɑ́ wap kɑ́ ghə pu zhyə́. E lə kwɔ̌' dəm kúŋ, biŋ ŋkhe pɔ pyə́ e kuŋ a, wap sɔ' bi e. E piŋ shwɔ' pɔ shwɔppʉə mghǎm pu a pú pɑ bəmtə bɑ́, e piŋ bɑ nthəm wap gɑ wap ghɔ siŋ Cuŋ pɑpúŋ, biŋ hɑ tʉ̀ɔ nə jə́ŋ zhwenyə cwəpuŋ bi pú. E lə yap pɔ́ shwɔppʉə mghǎm pɔ gɑ: Pɛtrɔ, tsɔ̌ bɑ́ mu' tsó tsyə e lə kwi' nə tso Simon a. Yakop mú Zebede pu Yohane fɑ Yakop pyə e lə kě wap gɑ Boanɛrges a pɑ da'tə gɑ mu hɛbəŋ. Andreya, Filipo, Batəlemi, Matio, Tomasi, Yakop mú Alfeo, Tadeo pu Simon mu é gùŋ ba Yuda Iskariɔt yə e lə la' hɑ Yeso a. Yeso lə sɔ' dyə́, pɔmnəŋ piŋ shu'tə bəŋ e tə bi a pɑ e lə piŋ dzʉ́ ywə́. Mfɑ pyə́ lə nə yu' po'o sɔ' m nə ghəm e. Nə pa' wap lə bɑwə gɔm gɑ: Thə é pi. Pɑ́ zhyə́ mco' pyə wap lə tsə̌ŋ fɑ Yerusalɛm a lə́ bɑwə gɔm gɑ̀: A bɑ ě ghə Beɛlzəbul nə é; e shyə m nə tádyə́ mzhwenyə cwəpuŋ tə́ jə́ŋ mzhwenyə cwəpuŋ. E lə ghə wap sɔ', e piŋ dɑ ghɔm tə́ tútə̀ gɔm bi pú gɑ: Pɑ̀ Sata zhə̀ŋ Sata m gɑ́ kɑ? A bi a ta' nəfo ghap ghə́ŋ pʉə, bɑ pɑ yə bɔ nəfo lə piŋ shwə pɑ́. A bi a ta' tuŋdyə́ ghap ghə̌ŋ pʉə, bɑ tuŋdyə bɔ tə gɔ piŋ pɑwə pɑ́. A piŋ bɑ bi a Sata pɑ bɑ ě té shu nə thə́ nɑ e, biŋ bɑ́ bɑ e ghap ghə́ŋ pʉə, bɑ e tə́ gɔ piŋ pɑwə pɑ́, bɑ ě mi. Da' gɑ̀ pɑ mo lə kodyə́ gɛ gʉ̌', dɑ tsə́ tsyə tə́ a bɑ gɑ ě ləŋdzə ŋkwɑ gɛ gʉ̌' bɔ, po' tə sím dyə́ e. Kwa' nyənyɔ gɑ̌ siŋ wɔ gɑ́ pu gɔ sɔ' lɑ mhɔ pɔmnəŋ ba yap nə cap Si nə cwyɛ' wap, kɑ a la' jɔm pɑ́ gɑ́ kɑlɑ́. Da' gɑ̀ mo cap Zhwenyə Dɔlɔ̌, bɑ nə nə shwyɛ' e tə wə́ pɑ: Bɑ a bɑ e hɔnwə̀ mama. E lə gɔm po'o nə pa' wap lə bɑwə gɔm gɑ: E ghə zhwenyə cwəpuŋ. Map é pu a mfɑ pyə́ lə ŋwǎk, nthiŋnyə dzʉ́, gə pu ké e. Nə pa' pɔmnəŋ lə bɑ wap cwətəsi nə dzam é; pu ghɔm bi e gɑ: Yɔ mɔ̌ pu a mfɑ pǔ dzʉ́ bɑwə shəŋ o. E pa' bi pu gɑ: Wɑ́ bɑ pɑ mǎ á pu a mfɑ pɑ̌? E lə cʉ̌ pɔ pyə wap lə bɑ wap cwətəsi dzam e a gɔm gɑ: Yɔ ma á pu a mfɑ pɑ̌ pɔ̌. Bɑ̌ wɑlə́ yə e ghə ywə yə Si a shəŋ a bɑ e bɑ fɑ a yə́ mbɛ, fɑ a yə́ mjwǐ ba ma á. Yeso lə kwi' nthó' nə zhi'tə pɔmnəŋ ywə m sə́ kəŋ shyə lɑpʉə. Pɔmnəŋ lə cu'tə bəŋ e kwa' vəŋ e, tə e kwɔ' shwə nthʉm kənu' dəm shyə lɑpʉə. Guŋ dú pɔ awɛ lə bɑ m dəmcǎ', bɑwə shʉ́ m nə shyə́. E lə zhi'tə wap ywə tə ǎ yɔm m nə́ ghɔm tə tútə. E lə zhi'tə wap gɔm gɑ: Po yú', yɔ, mu' dzəywə́ lə təm bɑ dzə́ ywə. Pa' e lə pɑ dzə́ ywə́ a, mu' gwya ywə lə vʉ̌ gìŋnyə məjyə; pǒmsə́ŋ sɔ' pfɑ́. Mu' vʉ nə tsʉ' mwɔ', tsʉ' la' cǎ' ghyɛ' bɑ nə́; a lə wuŋ sa' nə pa' a lə bɑ ca' ka ghyɛ' ŋkho si a. Nàm lə cwə̌ tə́ sa', a pónyə̀, jak gɛ, jə́m. Mú' lə kwi' bvʉ́ nthʉ́m mjuŋ; mjǔŋ kwɔ', fám e, e lə yám nthɔm. Mu' vʉ nə ca' pɑpúŋ, sa' biŋ nə kwyə, jám mthɔm, mghǎm ntha nə ta', ba mgham nthɔ̌k nə tà', ba ŋkhə́ nə tà'. Yeso lə piŋ gɔm gɑ: Mo yə́ ě ghə mtə́ŋ nə jú' a yú'. Cwə yə Yeso lə tə́m cəcɑ̌ pɔmnəŋ tə bɑ́ tsʉ' tsiŋ a, pɔ pyə wap lə bɑ́ bəŋ e a, ba pɔ shwɔppʉ́ə mghǎm to' nə həŋtə́ e nwə nə ghɔm tə tútə. E pɑ̀ gɔm bi pu gɑ: A bɑ pu hɑ nə zhyə nwə cyə́ zhyənwə Nəfo Si bi po, da' gɑ sɔ' m nə pɔ pyə wap m dzʉ̌ a, guŋ mnwə awɛ pɑ́ pɑ nə ghɔm tə́ tútə. Po'o gɑ wap lé wap lə yɔ́, biŋ jú' wap lə yú' bwɔk gɑ wap kɑ pʉɔtʉ́m pu lɑ mhɔ map shwyɛ' wap. E lə ghɔm bi pu gɑ: Po ka yu' ghɔm tə́ tùtə tsɔ̌! Tə́ po gɔ yu' guŋ myə shɑ mghɔm tə tútə m gɑ́ kɑ? Mo yə e dzə̀ ywə a dzə Ghɔm. Yɔ pɔ pyə wap bɑ giŋnyə məjyə a, tsʉ' yə pu dzə́ Ghɔm nə a, a bɑ pɔ pyə wap ju' Ghɔm, Sata wuŋ sɔ' biŋ nthé ghɔm tsyə pú dzə́ nə́ pú a. Bɑ́ nə pɔ pyə wap bɑ tsʉ' mwɔ' a: Pɔ bɔ ju' Ghɔm, guŋ dɑ ŋwɛnyə nə kwí, da' gɑ́ la' mŋɛ pɑ́ nə pú, bɑ yáp pɔ̀ pɑ cwə o bɔ; ghəghʉɔ kɑ nə cwɔ' mkwə nə Ghɔm lə cwə́ tə sɔ̌', wap wuŋ bvʉ́tə si. Pyə pu dzə m nthʉ̌m mjúŋ á, a pɑ́ pɔ pyə wap ju' Ghɔm, da' gɑ́ nə zhwiŋ dzʉ̌, fʉtə fʉ', pu a ghi'nyə sɔ' ŋkho nə e, famnyə Ghɔm bɔ, a lə yám nthɔm. Pɔ pyə pu tsə̀ wap nə ca' pɑpuŋ a wap ju' Ghɔm, ŋkwi ghɔm bɔ, jam mthɔm mgham ntha nə ta', ba mgham nthɔk nə ta', ba ŋkhə nə ta'. E lə ghɔ̌m bi pu gɑ: Lambù sɔ' gɑ pú nyəŋ m nthʉm cə́ŋ kɑ m kəsǐ kodyə? Pu tə nthʉ́ m dəm kwɔ' lambù a? Nə pa' sɔmywə yə ǎ tʉmnyə tə la' pu pɑ gɔ zhyə́ a tə̌ wə́ pɑ́, sɔmywə yə ǎ tʉmnyə̀ tə la' pu pɑ gɔ la' zhyə a a tə̌ wə pɑ́. Mo yə e ghə mtə́ŋ nə ju' a e yú'. E lə ghɔm bi pu gɑ: Po pɔmtə nə ywə yə́ po ju' a. Fo' yə po nə fo' a tə́ pu gɔ sɔ' nə fo' wɔ, piŋ hɑ bi po tə́ a yɔm. Nə pa' mo yə e ghə ywə a pu gɔ sɔ' hɑ ywə bi e, piŋ sɔ' nə mo yə e ka ghə ywə a, pu kwi bɑ yə muywə yə a bɑ bi é a. E lə ghɔm gɑ: Nəfo Si hwə pa' mu' mo yə e ma' gwya ywə si a. Kɑ e di ti, kɑ giŋ ghiŋ, kɑ a bɑ pɑ mtsʉ̌' kɑ a bɑ pɑ mɔkcʉ lə, bɑ gwya ywə bɔ sa' biŋ ŋkwyə́ tə gɛ jyə́ sɔmywə nə́. Cǎ' gə pɑ dò é ghě sa', gə cwɔ' e, biŋ gə nthɔm myə́. Msɛ̌ nəŋ shwə́ tə ŋkwyə́, pu yap nyə́ nə shwa nə́, nə pa' a bɑ cwə nə lɑ tsə́. E lə ghɔm gɑ: Nəfo Si bɑ pa' kɑ́ ywə a? Pɑ gɔ lɑ tsa ghɔm tə tútə la'tə pa' a bɑ a? A bɑ pa' sɔm thə́ tsə́ sɔ́k a. Pu nə tsə̀ si bɑ ǎ kɔk shyə gùŋ gwya ywə awɛ nthʉm dzʉ́. Da' gɑ́ pu shwə tə́ dzə̌, a kwɔ' gɔ thə́ tə shyə gúŋ mthə́ jap awɛ, biŋ gə bú myə́ a zhi tə́ pǒmsə́ŋ to kɛbəŋ pɑ gə mkɔ map nə ciŋnyə e. E lə́ lɑ̌ nthinthi mghɔm tə tutə́ nə siŋ Ghɔm bi pu nə dəŋ yə wáp lə́ bɑ wap ku'nyə nə yu' a. E lá tə́ gɔm nwə bi pu tə lɑ pɑ́ ghɔm tə́ tutə gɔm pɑ́, da' gɑ bɑ nthútə́ guŋ e awɛ bi pɑkhʉ̌ pyə́. A lə pɑ̌ tyɛ' o bɔ, bɑ bwadzʉ̌, Yeso ghɔm bi pɑkhʉ̌ pyə́ gɑ: Pɑ cyə́ gɔ nə yə́mu' jʉɔ. Wap lə təm cəcɑ̌ pɔmnəŋ, dɑ Yeso nthʉm kənu' yə e lə bɑ nthʉm o a, pu a shɑ́ mkənu' nə lə bəmtə́ bɑ́. Mu' mɑ fʉ́m fəfa lə wuŋ nthəm dəm shyə. A lə bɑwə ŋkwá shyə nə ntham kənu', tə shyə́ pɑ́ gɔ ló nthʉm kənu' bɔ. Yeso pɑ jʉ̀m dəm hya bɑwə dí. Wap lə yam e gɔm bi gɑ: Ta a tə wə gə sɔmywə nə o gɑ pɑ pfʉtə́ a? E lə́ yǎm, baptə́ fəfa biŋ gɔm bi shyə lɑpʉə gɑ: Nǎ'! Lɛtə́! Fəfa mì, tsʉ' wuŋ dɛtə́ gɑ kǎm. Yeso ghɔm bi pú gɑ: Nwə kɑ́ po pwɔk tə́ pa' a? Po jɑ tə́ wuŋ gə́ piŋnthʉm a? Mɑ pwɔk lə́ ko nə́ pú, wap piŋ bɑ gɔm cəcɑ̌ pú gɑ: Yə̌ŋ bɑ́ wɑ́, tə́ ba fəfa pu a shyə lɑpʉə yu'nyə̀ e? Wap lə ko nə yə́ mu' jʉɔ shyə lɑpʉə, nthʉ́m gúŋ pɑ Gerasa. Yeso lə pɑ̌ nthəm nthʉm kənu', mu' mo zhwenyə cwəpuŋ pɑ́ nə é wuŋ sɔ' pu e yu'tə. Mo bɔ lə nthəm m mthəsì. E lə shwə̀ nthʉ́m mthəsì, sɔmmo lə piŋ bɑ́ bɑ ě ku' nə kwɑ́ e, kɑ dɑ́ pɑ́ gwɑ mtʉ̌ɔ ŋkwɑ e lə. Nə pa' a lə bɑ pu lə lɑ mkəlo' pu a gwɑ́ mtʉ̌ɔ ŋkwɑ́ é mcʉmmcʉ̌m, e cwa gwɑ̀ mtʉ̌ɔ, biŋ bo' mkəlo', tə́ la' sɔmmo piŋ gə gʉ' nə nthɔm é. E lə bɑ́ mtsʉ' bɑ m mɔkcʉ́, bɑ nthʉ́m mthəsì ba m kúŋgǒ, bɑ shwé, bɑ dɑ mwɔ' shàktə nɑ́ é. E lə yɔ Yeso gʉə sʉəsʉə, ŋkhʉ́dʉ́, sɔ' bvʉ́ dzə e. Shwé tɑ́ thə̀ gɑ: O ŋkwi kɑ bəm Yeso Mú Si tə Thə́ Kɛbəŋ? Gɑ ghɔm bu nə tsǒ Sí, kɑ́ paknyə a. Nə pa' Yeso lə bɑwə gɔm bi e gɑ: Zhwenyə cwəpuŋ təm nə bɛ yə̌ŋ. E lə həŋtə̌ é gɑ: Tso tsǔ bɑ wɑ? E pa' bi e gɑ: Tso tsɑ̌ bɑ́ jɔmyɔ̌m, nə pa' a bɑ pyə̌ yɔ́m. E lə pǐŋ shəŋtə́ shwyɛ'nyə é gɑ́ e kɑ té wap nthʉ́m gùŋ. A lə́ nə pɑ̌ po'o mu' kà mgənɔ̀m pɑ tsʉ̌'u bɔ m nə ghəŋ kúŋgǒ bɑwə pfɑ́ mghé. Mzhwenyə cwəpuŋ bɔ lə cwyɛ'nyə Yeso gɔm gɑ: Cya wɔk nə mgənɔm, pyə ko nə pú. E lə pǐŋ bi pú. Wap piŋ nthəm ŋkho nə mgənɔm, guŋ ka mgənɔm awɛ piŋ fɑ kúŋ nə mkəkəŋ bvʉ́tə nthʉm shyə lɑpʉə; wap lə bɑ gwɛ a mnɔm shǎ' pʉə, wap fá nthʉm shyə lɑpʉə. Pɑ pyap mgənɔm bɔ lə khʉ̌ biŋ gɔ siŋ ywə bɔ nthʉm tisuŋ ba m nthʉm mla'. Pɔmnəŋ lə sɔ̌' jɔ ywə́ yə a lə təm a. Wap lə́ sɔ' bə́ŋ Yeso, jɔ mo yə́ zhwenyə cwəpuŋ lɑ bɑ nə e a bɑ ě cwə́ si, bɑ e kwa dzə́, bɑ zhyənwə e sɔ' bi e, yʉ yə mzhwenyə cwəpuŋ yə pu ŋkhe gɑ jɔmyɔ́m lə bɑ nə e a. Wap lə pwɔk té' o. Pɔ pyə wap lə yɔ pa' a lə nə shyə a lə siŋ wap ywə yə a lə cyə́ nə mo yə zhwenyə cwəpùŋ lə bɑ nə é a ba nə mgənɔm a. Wap piŋ ntho' cwəlɔ nə cwyɛ'nyə Yeso gɑ e təm nə ca' tsap gɔ gʉə sʉəsʉə. Yeso lə pɑ ŋkwɔ' nə ko nthʉm kənu', mo yə zhwenyə cwəpùŋ lə təm nə e a cwyɛ'nyə é həŋtə́ e gɑ e gɔ wuŋ bəŋ e. Yeso kəŋnyə bi e, da' gɑ́ gɔm bi e gɑ: Ghɔ la' o, bəŋ pɔ pǔ, siŋ wap guŋ ywə awɛ yə́ Cyəpɔ gə nə o shyə́ m nə cɔ̌mmtso e a. Bɛ bɔ lə ghɔ́, ntho' nə cyanyə guŋ ywə awɛ yə Yeso gə nə e a nthʉ́m Dekapoli. Nwə pɑ̀ shyə́ guŋ pɔ awɛ. Yeso lə́ lɑ̌ kənu' sa' tə́ ŋkho nə yə mu' jʉɔ, dú pɔ cu'tə bəŋ é. E lə́ bɑ kəŋ shyə. Mu' mo nə mtadyə sinagogə tso tsyə́ pɑ Yairos lə nə yɔ Yeso, bvʉ́ nə mkwə myə́ biŋ shəŋtə shwyɛ'nyə gɔm gɑ: Mú go a yə ŋkho' wə gɔ pfʉ́, sɔ' jap bú nə é, é vɔk, bɑwə́. Pu Yeso lə ghɔ̌; vəŋ du pɔ lə bɑ́ jʉ́m e bɑwə nthənyə. Mu' mjwǐ lə bɑ si bɑ gɛ gho tə fɑ́ nə gu'dzʉ́ shwɔppʉ́ə mghǎm, mcyə pɑ nthəm nə e. E lə́ bɑ e yɔgo' té' nə mbú mgəgɛ, sim guŋ ywə yə a lə bɑ ě ghə a awɛ, e lə yu' hwítə; gho e pɑ gɔ pɑ m dzə̀. Mɑmjwi bɔ lə yu' guŋ ywə awɛ yə pu lə gɔm nə Yeso a, sɔ̌' cəcɑ̌ pɔmnəŋ, nthəm m jʉ̀m, ŋkwak dzə e. Nə pa' e lə bɑwə sɛ gɑ: Ŋ da' gɔ ŋkwak bǎ da' mdzə myə́, bɑ gɑ gɔ vɔk. A lə wuŋ bɑ́ pɑ́ cwə o bɔ mcyə ya' nə təm nə é, e yu' nthʉ́m nɑ́ e gɑ́ ě yɛ̀ nə gho é. Yeso lə wuŋ ju' gɑ́ mu' gʉ' təm nə e. E lə fɛnyə̀ nɑ́ e cəcɑ̌ pɔmnəŋ biŋ gɔm gɑ: Wɑ̌ ŋkwak mdzə mə̌? Pɑkhʉ̌ pyə lə ghɔm bi e gɑ: O bɑwə jɔ vəŋ pɔ pu pɑwə nthənyə ó, o həŋtə gɑ wɑ kwak a m gɑ́ kɑ? Da' gɑ e lé giŋnyə e nə yɔ mo yə e lə ghə nwə bɔ a. A lə pɑ̌ po'o mjwǐ bɔ, pwɔk, səŋ gɑ taktak, bɑwə jyə́ ywə yə a lə təm nə e a, sɔ' bvʉ́ nə mkwə myə́, siŋ e guŋ nwə awɛ nyənyɔ. Tə́ Yeso ghɔm bi e gɑ: Go a, piŋnthʉm o vɔk o; ghɔ nə hwítə̀, jɛ́ nə guŋ ghó o awɛ. E lə pɑ̌ gɔm po', shɑ́ pɔ fɑ́ ywə tadyə sinagogə sɔ' gɔm bi e gɑ: Gò o pfʉ́, o gɔ nəŋ piŋ paknyə́ Tá gɑ́ kɑ̀? Da' gɑ́ la' Yeso lɑ tsɔ ghɔm sɛ sɔmywə, gɔm bi tádyə̌ sinagogə gɑ: Kɑ́ pwɔk, piŋ piŋ. A lə piŋ bɑ po'o, e lə́ piŋ gɑ́ sɔmmo yap jʉm e tə ně da' Pɛtrɔ pu Yakop ba Yohane fɑ Yakop. Wap lə ŋwak dyə tadyə̌ sinagogə. Yeso yɔ mɛnyə̀, pɔmnəŋ pɑwə dɔ̌, biŋ bɑwə shwe tə́ thə́. E lə́ kǒdyə́ gɔm bi pu gɑ: Yəŋ mɛnyə pu a lɔ̀ bɑ gɑ́ kɑ̀? Mu bɑ e ka pfʉ́, e di ti. Wap pɑ jə̀mtə é. Da' gɑ́ e lə tě guŋ pɔ awɛ dyə́, dɑ da' tá mú pu map e, ba pɔ pyə wap lə bɑ jʉm e a, pu a pu ko tsʉ' yə mú lə́ bɑ nə a. E lə tɔm pǔ mú, gɔm bi e gɑ: Talita kumi, a pɑ́ nthútə́ gɑ: Mú go, gɑ̌ ghɔm bu, yǎm. Mú mjwǐ bɔ lə wuŋ dusi ntho' nə ghìŋtə, nə pa' a lə bɑ e ghə gu' shwɔppʉ́ə mghǎm. Nwə lə cyə̌ guŋ yap awɛ cwə o bɔ. Yeso piŋ shəŋtə́ sho' bi pu gɑ sɔmmo kɑ́ zhyə biŋ gɔm gɑ́ pu hɑ ywətsʉ bi mu mjwǐ. Yeso lə́ lǔ tsʉ'u bɔ, gɔ nthʉm gǔŋ pu; pɑkhʉ̌ pyə yap jʉ̌m e. A lə pɑ̌ tyɛ'dzʉ sabat, e to' nə zhi'tə ywə bi pɔmnəŋ dyə sinagogə. Nwə lə pɑ̌ shyə́ pɔ jɔmyɔ̌m pyə wap lə bɑwə ju' e a, wap pɑ gɔm gɑ: E dɑ yə bɔ m hɑ́? Yəŋ piŋ bɑ ya nthi zhyə̌nwə yə pu hɑ bi e tə e pɑwə gə ba msya pu a bú myə? Mo bɔ tə́ bɑ ŋkham mthə́ pa', mu Maria, biŋ bɑ fɑ́ Yakop, ba Yozɛt, ba Yuda, pu Simon a lə́? Tə́ pá mfɑ́ pyə́ pyə pɑjwǐ nə bɑ́ tsɔ' a lə? E lə pǐŋ bɑ bi pu bɑ pɑ ywə fa'tə. Yeso lə ghɔ̌m bi pu gɑ: Pu gwak gɔm ghɔ̌m Si pɑ nthʉm gǔŋ pú, cəcɑ̌ ŋkhənyə e, pɑ kwa' dyə́ é. A lə pɑ̌ po'o, bi a pɑ́ e lə ghə sɔm msya tsʉ'u. Da' gɑ ba tə́ po'o e lə yap bǔ nə shɑ mghɛ gho nə jɛ́ wap. Nwə lə cyə é nə yap nə́ cyətə ghə piŋnthʉm. E lə́ ghǐŋ giŋnyə tsʉ'u, bɑ ji'tə ywə bi pɔmnəŋ. E lə ghə pɔ shwɔppʉə mghǎm sɔ' bəŋ e, e to' nə pɑ nthəm wap pɑpʉə pɑpʉə, hɑ tʉɔ bi pú nə mzhwenyə cwəpúŋ. E lə ghɔm bi pú gɑ wap kɑ nə́ ghɔ dɑ sɔmywə tə́ ně da' pə̀ŋ: Gɑ wap kɑ́ lɑ ywətsʉ kɑ pʉə lə, kɑ ŋkhap nthʉm tap yap lə; biŋ sɔ' m nə mntháp wap su pɑ mntháp ŋkhə, wap kɑ kwa dzə yɑpʉə. E lə ghɔ̌m bi pu gɑ: A pɑ́ gɑ po ŋwak nə tsʉ', ŋkho nə dyə̌, po cwə pɑ tsʉ'u tə́ da' nthəm wə́. A pɑ gɑ́ mu' tsʉ' ka lɑ́ wɔ, pú lə piŋ ju' ywə yə po gɔm a, po nə fɑ tsʉ'u ghɔ dzɔp vɔp nə mkwə mɔ. A gɔ sɔ' pɑ yɔ nə ŋkwinthɛ̌ bi pú. Wap lə ghɔ bɑ siŋ gɑ pɔmnəŋ pʉɔtʉ́m. Wap lə zhə̌ŋ mzhwenyə cwəpuŋ jɔmyɔ̌m, biŋ bɑ dɑ mwɑ shi' mghɛ gho jɔmyɔ̌m, bɑ jɛ́ wap. Fo Herode lə yu' pa' pu gɔmnwə nə Yeso a, nə pa' tso tsyə́ lə bɑ gə̌ŋnyə ko nə té' a. Pu pɑ gɔm gɑ: Yohane nu' pɔ shyə́ bɑ ě yám nə vʉ̌; a shyə m po'o tə tʉɔ nə gə msya pɑwə shyə m nə é fǎ'. Shɑ́ pɔ lə bɑwə gɔm gɑ: A bɑ́ Elia, shɑ pɑ́ gɔm gɑ: A bɑ mu' gɔm ghɔm Si pa' mghɔm ghɔm Si pɔk pɑ a. Herode lə nə yu' guŋ mghɔm bɔ awɛ bɑ gɔm gɑ: A bɑ Yohane yə ŋ dɑ́ sə̌ thə́ e a, yʉ́ nə jam nə vʉ̌. Nə pa' Herode lə bɑ e lə ghə̌ pu ghəm Yohane biŋ dɑ gwɑ́ mtʉɔ shə́ŋ é dyəcɛ̌ po'o nə nwə Herodia jwi fɑ e Filipo yə e lə lɔm e a. Nə pa' Yohane lə bɑ gɔm bi Herode gɑ: Pu ka piŋ bu gɑ o lɑ jwi fɑ́ o. A lə pɑ̌ po'o, Herodia wuŋ bɔ é pɔ tə bɑ shəŋ pɑ nə zhwə é, da' gɑ́ la' e ku' nə zhwə e. Nə pá' Herode lə bɑwə bwɔk Yohane, bɑ ě zhyə gɑ́ e bɑ mo dəŋdəŋ, biŋ bɑ dɔlɔ̌, e piŋ bɑwə pfoptə e. E lə nə yǔ' po' nwə cyə e; da' gɑ e la tə́ ŋkhəŋnyə́ nə yu' ywə yə Yohane lə gɔm a pɑ́. Da' gɑ́ mu' búŋ tyɛ'dzʉ́ lə tǐ bɑwə, Herode pɑ́ ŋwɛnyə nə nə ŋkhamtə tyɛ' nə tsə̀ e, bɑ da'nwə ŋkhé mkam pyə́ pyə gwyə́gwyə́, ba mtadyə msəŋwi, ba mkam pɑ Galilea nə khim wap nə la'nwə̀. A lə pɑ̌ po'o gò Herodia bɔ sɔ' nəŋ mu' nə̀ŋ, a puŋ Herode biŋ buŋ ba pɔ pyə́ e lə kě wap nə la'nwə é a. Fo bɔ ghɔm bi mu go gɑ: Ló a ywə yə ǒ kùŋ a, gɑ̌ gɔ hɑ bu. E lə kɔ́ mkɔ gɔm bi e gɑ: O lo a pɑ́ kɑ lə́ bɑ gɑ̌ gɔ hɑ bu, kɑ a la' bɑ́ pɑ́ mu' ghəŋ nəfo lə. Go lə́ tə̌m gɔm bi map e gɑ: Gɑ̌ gɔ ló kɑ? Map e pa' bi e gɑ: thə́ Yohane nu' pɔ shyə́. Go lə wuŋ bɑnyə bəŋ fo biŋ do bi e gɑ: Gɑ̌ wə shə́ŋ gɑ o wuŋ hɑ thə Yohane nu' pɔ shyə bəm pɑ cwəlɔ nthʉm pak kɛ́. Sə́ fo lə fǐ', da' gɑ́ a cyə m nə mkɔ myə e lə kɔ a, ba nə pɔ pyə a lə bɑ é ke wap a, e lə yɔ nə kəŋnyə̀ bi e. Fo lə wuŋ nthəm msəŋwi pɑ pyap gɔm gɑ wap lɑ thə Yohane sɔ̌'. Msəŋwi ghɔ dyə́ cɛ̌ cwəlɔ sə thə e. Wap lə lɑ thə e sɔ' nthʉm pak kɛ́ hɑ bi mu go, mu go hɑ bi map e. Pɑkhʉ̌ Yohane lə́ nə yu' po'o, sɔ' dɑ pfə e nə gɔ nyəŋ nthʉm thəsì. Mghɛ nthəm lə cu'tə bəŋ Yeso biŋ siŋ e gùŋ ywə yə wap lə ghə a ba guŋ ywə yə wap lə zhi'tə bi pɔmnəŋ a. E lə ghɔ̌m bi pu gɑ: Po na' sɔ' m tsʉ' tsiŋ, tsʉ' yə mo tə̌ nə́ a pɑ na' hwitə́. Nə pá' pɔmnəŋ lə bɑ si tə jɔm, bɑwə sɔ' a lə gɔ tə la' wap ghə bɑ cwə nə dzʉ́ ywə. Wap lə lɑ kənu' gɔ nə tsʉ' yə mo tə nə a pɑ́, m tsʉ' tsiŋ. Pɔmnəŋ lə yɔ pa' wap gɔ a pɔ jɔmyɔ̌m zhyə́ wap. Pɔ jɔmyɔm lə lɑ mkwə ŋkhʉ́dʉ́ shwanyə wap, dzə́ tsʉ̌'u bɔ, nthəm po'o nə guŋ mtsʉ' awɛ tisuŋ. Yeso lə nə́ təm nthʉm kənu', jɔ mɑ du vəŋ pɔ. Mtso map kú e nə pa' wap lə bɑwə shwə́ pa' jʉ̀jʉ̀ tə gɛ pyap wap a. E lə to' nə zhi'tə wap mnwə jɔmyɔ̌m. A piŋ bɑ́ pá' ya' dzʉ̌ lə bɑ ǎ cyə a, pɑkhʉ̌ pyə sɔ' bəŋ e gɔm bi é gɑ: Tsɔ'ɔ gɑ wə bɑ ghakghak tsʉ́', ya' dzʉ̌ piŋ bɑ́ bɑ ǎ cyə. La'nyə wap; a wap ghɔ nthʉm mla' ba pǒ mtisuŋ giŋnyə tsɔ'ɔ jó ywətsʉ. Da' gɑ Yeso pa' bi pu gɑ: Kwa' wɔ hɑ ywətsʉ bi pú. Wap ghɔm bi e gɑ: Pɑ pu lɑ ŋkhap tsə́ bɛ ŋkhəpʉə nə jo msɛ nə ŋkhim wap a? Yeso həŋtə wap gɑ: Pǒ ghə msɛ́ dəŋ gɑ́ kɑ? Po ghɔ jɔ́! Wap lə lě, gɔm gɑ: msɛ́ mta' tɔ ba bapgu duŋ pʉ̌ə. E piŋ gɔm bi pu gɑ́ wap yap gùŋ pɔ awɛ mpfə mpfə dəm mghe hwǐ. Wap lə cwə̌tə̀ nə mkhɛ pɔ ŋkhə pu a pɔ mgham nthɔ. Yeso kwi msɛ mta' tɔ ba bapgu duŋ pʉ́ə, bʉ' mnyə myə́ kɛ́bəŋ, nyəŋ byanyə́, bo'tə msɛ́ hɑ bi pɑkhʉ̌ gɑ wap hɑ bi pɔmnəŋ biŋ gap bapgu duŋ pʉ́ə bi guŋ pɔ awɛ. Wap lə pfɑ̌ gùŋ yàp awɛ tə jwyə́. Pu piŋ daktə mbo' myə́ a lò nə msap shwɔppʉə mghǎm, ba ywə yə a lə vʉ̌' nə bapgu a. Pɔ pyə wap lə pfɑ̌ msɛ bɔ a lə bɑ́ pɑ bɛ sha'tɔ. Yeso lə wuŋ nthə́nyə pɑkhʉ̌ pyə́ gɑ wap kó kənu' nə ntham dzə e sa' gɔ nə yə mu' jʉ́ɔ, ghə̌ŋ Betsaida, e cʉ' bɑ da'nyə pɔ. Pu a pu lə hapnyə, e ghɔ dəm kúŋ nə cwyɛ'nyə Si. A lə pɑ̌ bwadzʉ̌, kənu' pɑ́ cəcɑ́ shyə lɑpʉə, e yɑ dəmcǎ' do e. E lə yɔ pa' wap wə nthégʉ' nə sɔp kənu' pu a fəfa pɑ̀wə do', a pɑ́wə dɑ wap biŋ m jʉm a. A lə pɑ̌ dɔdzʉ̌, e ghiŋ dəm shyə lɑpʉə gɔ m bə̌ŋ pú nə tam m dzə̌ pu tə bɑ gɔ fiŋnyə wap. Wap lə nə yɔ pa' e wə giŋ dəm shyə lɑpʉə a, ŋkwɛ gɑ́ a ghɛnyə́ mo, biŋ bɑ shwé. Nə pa' guŋ yáp awɛ lə yɔ é, tʉm tsap va'. Da' gɑ́ é wuŋ gɔmnwə́ bi pú gɔm gɑ: Po kyəp tʉm tsɔ, a bɑ a, ka po pwɔk. E lə kwɔ̌' bəŋ pú nthʉm kənu', fəfa mi. Nwə lə zhʉ̌m wap te' o. Nə pa' a lə bɑ wap ka yu' sɔmywə nə nwə msɛ́, bɑ tʉm tsáp sɔk. Wap lə sa'a shyə, ŋkhə́m Gənezarɛt nthiŋnyə́ kə́ŋ shyə tsʉ'u. Wap lə wuŋ nə təm kənu' pɔmnəŋ tíŋ Yeso. Wap lə kəka nthʉm gùŋ mgúŋ awɛ, bɑ ŋkwa mghɛ gho nthʉm mkodyə nə gɔ tsʉ' yə pu lə bɑ̀ jú' gɑ́ e nə a. Bǎ yá tsʉ' lə́ yə e lə́ ŋkho nə a, kɑ m nthʉ̌m po mtisuŋ, kɑ m nthʉm mtisuŋ, kɑ m nthʉm mla' lə, pu lə jap mghɛ gho tsʉ'u bɔ; biŋ bɑ shwyɛ'nyə e gɑ e tak gɑ́ wap kwak pu bǎ da' nə mcwǐŋ dzə myə́; a piŋ bɑ po'o pɔ pyə wap lə ŋkwak pu nə e a pɑ jɛtə. Pɑ Farisai pu a shɑ pɑ zhyə́ mco' pyə́ wap lə fɑ́ Yerusalɛm a lə cú'tə bəŋ Yeso. Wap lə bɑwə jɔ gɑ shɑ pɑkhʉ̌ Yeso dzʉ ywə́ yap pu a bǔ mviŋ, yəŋ la'tə gɑ́ bú tə sɔk. Nə pa' pɑ Farisai pá' guŋ pɑ Yudea a, tə́ dzʉ́ ywə tə́ cəŋtə́ sɔ́k bú map pɑ́, bɑ gə po'o nə́ nə nthɔ́m mà pɑ́ dzə̀. Wap tə fɑ sìm dzʉywə tə sɔk nɑ pɑ; bɑ wap piŋ nthɔm shɑ nthinthǐ mnwə myə a bɑ nwə mà? gùŋ a: Yap nthi nə sɔk mthǔ', ba mghʉ̌ɔ pu a mkɛ̌. A lə pɑ̌ po'o pɑ Farisai pu a pɑ zhyə́ mco' həŋtə́ Yeso gɑ: Nwə kɑ la' pɑkhʉ pǔ ghiŋ nə mà pɑ dzə̀? Wap dɑ bu mvíŋ dzʉ́ ywə́. Yeso ghɔm bi pu gɑ: Esaya gɔm ghɔm Si lə́ cəŋtə́ gɔmnwə nə po, pɑ tsɛbǔ, nə pa' a bɑ pu və gɑ: Pɔ pɔ gɑ gə mkù' mə̌ pɑ́ shyə shwə̀ da' gɑ́ tʉ́m tsap pɑ tə́ gʉə sʉəsʉə nə́ m̀; Wap shu'tə sé a pɑ pɔpɔ nə pa' ywə yə wap ji'tə bi pɔmnəŋ a bɑ pɑ́ nwə monəŋthə́. Pǒ bak ywə yə Si jap a hɑ jʉ̀m, biŋ bɑ́ da nɑ́ pɑ́ nə́ mà pɔmnəŋ. E lə kwi' gɔm bi pú gɑ: Pǒ shəŋtə ŋkhəŋnyə mco' myə Si jap a, bɑ nthɔm pɑ́ mà yɔ́. Nə pa' Mosɛ lə ghɔm gɑ: Ghə mku' tɔ̌ pú mɔ̌; biŋ gɔm gɑ: Mo wak tap e pu map e bɑ pu gɔ nyəŋ shɛ thə e, zhwe e. Da' gɑ́ po gɔm gɑ: Mo ghɔm bi tap e kɑ bi map e lə gɑ: Ywə nə ŋkwitə́ o yə o bɑ gɔ pyap bəm a zhi korban, yəŋ la'tə gɑ tsə pwɔ' dɔlɔ̌, bɑ pǒ biŋ bi e gɑ e kɑ́ piŋ gə sɔmywə bi tap e kɑ bi map e lə. Pǒ dɑ po'o má guŋ yə pǒ ji'tə a nə bɔptə ghɔm Si. Pǒ biŋ gə shɑ nthi mnwə po'o tə a yɔ́m. E lə pǐŋ ŋkhe pɔmnəŋ gɔm bi pú gɑ: Po teŋtə mtəŋ guŋ yɔ awɛ ju' a. Sɔmywə yə a fɑ m dzʉ̌ ŋkho nə mo bviŋ e a tə bɑwə pɑ; ywə yə a nthəm mthʉ̌m nɑ́ mo a nə bviŋ mò. E lə cwə̌ tə́ ŋkho dyə, nə́ tsʉ' gʉɔ sʉəsʉə nə pɔmnəŋ, pɑkhʉ̌ pyə́ həŋtə e nwə nə tsɔ ghɔm tə́ tútə̀. *** E ghɔm bi pu gɑ: Ba wɔ yɔ́ bɑ po ka ghə zhyənwə a? Po ka zhyə́ gɑ́ pɑ sɔmywə lə fɑ m dzʉ̌ ŋkho nə mo tə bviŋ é a? Nə pa' ywə bɔ tə ŋkho nthʉm tʉ́m tsyə pɑ́, a ŋkho m vam é, biŋ shyə gɔ m kwa. E lə́ gɔm po'o gɑ guŋ ywətsʉ awɛ bɑ ǎ puŋ. E lə gɔm gɑ: Ywə yə a nthəm nə mo a nə bɑ ywə yə a bviŋ e a. Nə pa' ywə yə a nthəm nə mo a, nthəm nthʉm tʉm é, bɑ mkwɛnyə cwəpùŋ, ghiŋ cwəpùŋ, cǔŋ, nə zhwə mo. Ghap, nə cəŋ fʉ', yǎpnwə̀, fʉ̌, nwə cʉ̀', ghi'nyə, mcàp, ŋa'nɑ́, nwə tə ŋkhɛ̀. Guŋ nwə cwəpuŋ bɔ nthəm m nthʉ̌m tʉ̀m mo, bviŋ è. Yeso lə lǔ tsʉ'u gɔ nthʉm gùŋ Tiro. E lə kó nə mu' dyə́ la' e pɑwə ŋkhúŋ gɑ mo zhyə; da' gɑ a lə pɑ̌ bi a pɑ pu lə cyə́ tə zhyə̀. Mu' mjwǐ yə́ gò e lə bɑ́ bɑ zhwenyə cwəpúŋ ko nə e á lə wuŋ nə yu' pa' pú gɔmnwə nə e a, sɔ' bvʉ́ nə mkwə myə́. Mjwǐ bɔ lə bɑ tə pɑ yə Yudea, bɑ yə Siro Fenikia nə nə́ tsə é. E lə bɑwə dó bi Yeso gɑ e zhəŋ zhwenyə cwəpuŋ nə mu e. Yeso lə ghɔm bi e gɑ: Cu' kwa' pǒ zhwyə́, nə pa' a ka púŋ nə pé msɛ̌ pó ma' bi pǒ bvʉ́. Mjwǐ bɔ lə pa' bi Yeso gɑ: A nyə́nyɔ m Cyəpɔ, da' gɑ́ pǒ bvʉ́ bɑ to tɑpe pfɑ́ msəsia ywətsʉ pó. Yeso ghɔm bi e gɑ: Shyə m nə ghɔm bǎ, ghɔ̌, zhwenyə cwəpuŋ tə́m nə gò o. Mjwǐ bɔ lə pɑnyə la' e, biŋ jɔ mú e bɑ ě nuŋ kodyə, bɑ zhwenyə cwəpǔŋ təm nə é. Yeso lə́ tə̌m nthʉ́m gùŋ Tiro nə pɑnyə ghəŋ shyə lɑpʉə Galilea shyə́ m Sidon, ntwɔk nthʉ́m Dekapoli. Pú lə lɑ́ mu' bu' mtəŋ e piŋ bɑwə́ gɔm kəkɔ sɔ' bi e, biŋ shwyɛ'nyə e gɑ́ e yap bú nə e. Yeso lə lɑ e fɑ cəcɑ̌ pɔmnəŋ nthəm, gɔ tə́ jʉ̀m, tsʉ' tsìŋ, ntwɔk nthə́ bú myə́ mtə́ŋ e, nthətə́ mti, jap nə tʉm e. Biŋ bʉ' mnyə myə́ dé kɛbə̀ŋ, mpfə̌ biŋ gɔm bi mo bɔ gɑ: Efata, à pɑ da'tə gɑ ghyɛ'. Mtəŋ myə́ lə wuŋ gyɛ', tʉm é kyɛ' e piŋ gɔmnwə̀ pɑpúŋ. Yeso co' bi pú gɑ́ wap kɑ́ ghɔmnwə bi sɔm mò; da' gɑ́ e lə bɑ sho' bi pú po'o, tə wap pɑ́ shyanyə nwə bɔ. Nwə̀ pɑ shyə wáp, wap pɑ́ gɔm gɑ: Ě cəŋtə gə gùŋ ywə awɛ pɑ pɑpúŋ; e gə mbu' mtə̀ŋ yu' nwə̀, tə ghɔm pɑ́ gɔm. A lə pɑ̌ tyɛ'dzʉ́ bɔ, və́ŋ dù pɔmnəŋ pɑ́ si, tə́ ghə ywə yə wap gɔ tsʉ́ a; Yeso ké pɑkhʉ́ pyə́ gɔm bi pú gɑ: Gɑ̌ wə shɔ́mmtso vəŋ pɔ pɔ̌, nə pa' a tyɛ̌' tá pa' wap pɑ̌ bəŋ m̀, bɑ wap ka nəŋ gə ywə yə wap gɔ tsʉ́ a. Myə̀ la da'nyə́ wap gɑ wap ghɔ mla' máp tə wap dzʉ́ ywə, bɑ wap gɔ ko məjyə̀ vʉ, shɑ́ pɔ piŋ bɑ cəcɑ̌ pú bɑ wap fɑ tə́ gʉə sʉəsʉə. Pɑkhʉ́ pyə́ pa' bi é gɑ: Pú gɔ yɔ də̀ŋ msɛ́ myə pɑ pu nə ŋkhim wap tə wap zhwyə́ a hɑ́ ghakgo tsɔ'ɔ? Yeso hə́ŋtə wap gɑ: Pǒ ghə msɛ́ dəŋ gɑ́ kɑ? Wap pa' bi e gɑ mta' sɔmbʉə. E piŋ gɔm gɑ pɔmnəŋ cwətə si, biŋ ŋkwi msɛ mta' sɔmbʉə, nyəŋ byanyə, biŋ bo'tə, hɑ́ bi pɑkhʉ̌ pyə́ gɑ wap ghaptə; wap ghaptə bi pɔmnəŋ. A lə bɑ wap ghə po mduŋ bapgu. Yeso nyə́ŋ byanyə́ nə́, gɔm gɑ wap ghaptə. Wap lə pfɑ̌ tə jwyə. Pú piŋ daktə mbo' myə́ a lə cʉ̌' a msap sɔmbʉə. A lə nə pɑ̌ po'o wap pɑ́ gwɛ a pɔ sha' pfʉə. Yeso lə la'nyə wap, biŋ gúŋ ŋkho nthʉm kənu' pu a pɑkhʉ̌ pyə, pú a pú ghɔ m nə ghə̌ŋ Dalmanuta. Pɑ Farisai lə́ sɔ̌' biŋ bɑ nthɛ́shwə́ pu a Yeso; wap hə́ŋtə e mtiŋ myə a fɑ kɛbə̀ŋ a nə dəŋtə́ é. Yeso lə pfə̌ sʉəsʉə pfə́, gɔm bi pú gɑ: Nwə kɑ́ gwya pɔ nə yəŋ wɔ̌dzʉ́ hə́ŋtə mtìŋ? Kwa' nyənyɔ, gɑ̌ siŋ wɔ gɑ́ pu tə́ gɔ sɔ' hɑ sɔm mtiŋ bi gwya pɔ nə yəŋ wɔ̌dzʉ́ pɑ. E lə lǔ bəŋ pú, ŋkhó kənu' gɔ nə yə mu' jʉɔ. Pɑkhʉ̌ Yeso lə tʉɔnyə́ nə lɑ msɛ̌ tə́ gə da' ta' msɛ̌ yɑmu' nthʉm pɛ. Yeso lə ghɔ̌m bi pú gɑ: Po pɔmtə́ ywə kwɔ'msɛ̌ pɑ Farisai ba yə Herode. Wap lə tǒ' nə tɛshwə̀ cəcɑ̌ pu nə pa' a lə bɑ wap ka ghə msɛ́ a. Yeso zhyə́ gɔm bi pú gɑ: Nwə kɑ po tɛshwə̀ nə pa' po ka ghə msɛ́ a? Jyə́ gɑ́ pǒ jɑ̀ tə tɔm cwyəŋ nwə, tə yu' nwə lə̀? Tʉm tsɔ bɑ a sɔk pɑ́ m gɑ́ kɑ? Po bɑ po ghə mnyə́, la' po pɑwə jɔ a? Po bɑ po ghə mtə́ŋ la' po pɑwə ju'nwə a? Po ka kamtə́ cwə yə ŋ də pǒ' msɛ mta' tɔ bi pɔ sha' tɔ a, po lə laktə̀ bo' myə́ nə msap məsʉ'ʉ? Wap ghɔm bi e gɑ: Shwɔppʉə mghǎm. Po piŋ ŋkhamtə cwə yə ŋ də pǒ' msɛ mta' sɔmbʉə bi pɔ sha' pfʉə̀ a, po lə laktə mbo' myə́ nə́ mkhəkhʉə mə sʉ'ʉ? Wap ghɔm gɑ mkhəkhʉə sɔmbʉə. E lə pǐŋ gɔm bi pu gɑ́ po jɑ tə́ yu' a? Wap lə ŋwak Betsaida; pú lɑ mu' fʉ̀ sɔ' bi Yeso, shwyɛ'nyə e gɑ e kwak e. E lə́ tɔm pǔ fʉ bɔ dɑ e nthəm nthʉm lá'; sho' mtǐ nə mnyə́ myə́, jap bú nə e, hə́ŋtə́ é gɑ: O wə jɔ ywə a? E lə́ ghyɛ' mnyə́ myə́, gɔm bi Yeso gɑ: Gɑ̌ wə́ na' jɔ pɔmnəŋ, jɔ́ wap pa' mta'thə́ a, da' gɑ́ wap pɑwə giŋtə́. Yeso lə kwi' sho' bú myə́ nə mnyə́ bɛ bɔ, e yɔ tsʉ' kwa' dɔlɔ̌, bɑ ě yɛ̀, bɑwə jɔ guŋ ywə awɛ jyə́ yá. Yeso lə nə la'nyə e gɑ́ e pɑnyə la' e gɔm gɑ: Pɔm tə ko bǎ nthʉm gùŋ. Yeso pu a pɑkhʉ̌ pyə́ lə ghɔ nə mpfə́ la' giŋnyə Kaesarea Filipo. Pu a pú lə pɑ̌ mə́jyə, e hə́ŋtə pɑkhʉ̌ pyə gɑ: Pɔmnəŋ gɔm gɑ́ gɑ̌ bɑ́ wɑ? Wap ghɔm bi e gɑ: Shɑ́ pɔ gɔm gɑ o bɑ́ Yohane nu' pɔ shyə; shɑ́ ghɔm gɑ́ o bɑ Elia; pyə shɑ́ pɑ́ gɔm gɑ́ o bɑ mu' gɔm ghɔm Si. E kwi' həŋtə wap gɑ: Sɔ' m nə po, pǒ gɔm gɑ́ gɑ̌ bɑ̀ wɑ́? Pɛtrɔ lə́ lɑ̌ ghɔ̀m ba' gɑ: O bɑ Kristo. E lə cǒ' bi pú gɑ wap kɑ́ ghɔmnwə nə é nə bi sɔmmo. E lə to' nə zhi'tə wap gɑ́ Mú mo lə bɑ gɔ sɔ' yɔgo' té', mghətso wa' e, ba mkamsi gwyəgwyə pu a pɑ zhyə mco'. Pú zhwə é, a piŋ nə pɑ̌ tyɛ'dzʉ́ yɑtá e yám nə vʉ̌. E lə́ gɔm tsɔ ghɔ̀m po' pɑ sɔsɔ̌; Pɛtrɔ lə fəŋ e nə gɔ jʉ̀m ntho' nə cɔktə e. Da' gɑ e lə fɛ̌ nɑ e jɔ pɑkhʉ̌ pyə́, biŋ shɔk Pɛtrɔ gɔm bi e gɑ: Lu jʉ̌m m̀ m Sata, nə pa' yù nə yɔ tə́ yə nə́ yɔ Si pɑ́, ǎ pɑ́ yə́ monəŋ. E lə pǐŋ ŋkhe pɔmnəŋ pu a pɑkhǔ pyə gɔm bi pú gɑ: Mo pɑ́ gɔ yap jʉ̌m m̀, e kəŋnyə thə́ nɑ é biŋ ŋkwa yə bɛnyəpɛnyə nə jap jʉm m̀. Nə pa' mo yə ě cəŋ nə vɔk vɔ́k e a gɔ sɔ' pi vɔk e bɔ; da' gɑ́ mo yə e pi vɔk e nə m̀ ba m nə Cúŋ pɑpuŋ a gɔ sɔ' vɔk vɔ́k e bɔ. A po'o bi a pɑ mo ghə guŋ dzʉ́ awɛ, tə dɑ vɔk e nə jó, bɑ a gɔ kwitə é nə kɑ? Pɑ mo hɑ kɑ bi mo tə a pɑ́ dəŋ vɔk e. Nə pa' mo kuso nə m̀ ba nə ghɔm tsɑ̌ dzə̌ gwya pɔ nə yəŋ gɑ wɔ̌dzʉ́ pɑ ghə ghàp, pɑ hɔnwə bɑ ba Mú mo gɔ sɔ' kuso nə e nə cwə yə́ e gɔ sɔ́' sɔ' nthʉm ghu'tə Tap e pu a pɑ aŋgəle dɔlɔ̌ a. Yeso lə ghɔm bi pú gɑ: Kwa' nyənyɔ gɑ̌ siŋ wɔ gɑ́ cəcɑ̌ pɔ pyə wap si tsɔ' a, shɑ́ pɔ tə gɔ sɔ' pfʉ́ tə yɔ yə nə sa'dzʉ̌ Si pa' a sɔ' m nə́ tʉɔ a pɑ́. A lə cyə tyɛ'dzʉ́ nthɔk, Yeso lɑ Pɛtrɔ ba Yakop pu Yohane, pu a pu ghɔ tsʉ' tsiŋ, dəm mu' mɑ sʉəsʉə kuŋgǒ. Yeso lə ko tsʉ'u sɑ́nyə́ dzə̌ pú, dzə́ tsyə́ fɔk dəŋnyələŋnyə pa' pɑ̀ sɔm nu'dzə́ dəmcǎ' lə ghə dzə fɔk po' a. Elia pu Mosɛ ŋwak dzə̌ pú, pu a Yeso pɑwə shɔm nwə́. Pɛtrɔ lə lɑ ghɔm, gɔm gɑ: Rabi, ǎ puŋ bi pɑ nə pɑ́ tsɔ'ɔ. Pɑ zhɔk mnthap mɑnthá, mu' pɑ yǔ, mu' pɑ yə Mosɛ, mu' pɑ yə́ Elia. Pɛtrɔ la tə́ bɑwə jyə ywə yə e gɔ ghɔm a pɑ́, nə pa' pwɔk lə bɑ ǎ ko nə pú. Mlwa lə sɔ' pfɔptə wap, pu yu' gi mo fɑ nə mlwa gɑ: Mo yə̌ŋ bɑ Mu a yə gɑ̌ ŋkhuŋ é te' a, po yu'nyə e. Wap lə wuŋ détə́ giŋnyə̌ pú, wap lə piŋ jɔ sɔm mò tə́ ně da' Yeso do e, biŋ gə wap. Cwə yə́ pu a pú lə pɑ dzə́ŋ fɑ kúŋgǒ a, Yeso co' bi pu gɑ wap kɑ siŋ sɔmmo ywə yə wap jɔ́ a, tə̌ Mu mo la' jám nə vʉ̌. Wap lə ghiŋ nə mco' bɔ, da' gɑ bɑ həŋtə́ cəcɑ̌ pú kwa' ywə yə e lə gɔm gɑ́ nə yám nə vʉ̌ a. Wap lə pǐŋ həŋtə́ Yeso gɑ: Nwə kɑ̀ pɑ zhyə́ mco' pɑ gɔm gɑ́ Elia gɔ sɔ' ləŋdzə sɔ̌'? E ghɔm bi pu gɑ: Ǎ kwa' pa', Elia gɔ ləŋdzə́ sɔ', piŋ yap guŋ ywə awɛ pa' a shəŋ a, da' gɑ́ a bɑ pu və nə nwə Mú mo gɑ e gɔ sɔ' yɔgo' te' pu piŋ gwak e. A po'o tə gɑ̌ siŋ wɔ, Elia lě sɔ', wap piŋ gə guŋ ywə yə́ wap kuŋ a nə e, dəŋdəŋ pa' a bɑ pu lə və̌ a. Wap lə nə pɑnyə bə́ŋ pyəshɑ́ pɑkhʉ̌ jɔ mɑ vəŋ pɔ pɑ bəŋ pu pu a pɑ zhyə́ mco' pɑwə nthɛshwə̀. Wap lə wuŋ nə yɔ Yeso, guŋ pɔmnəŋ awɛ zhəzhə̀ŋ, pu pɑ́ ŋkhʉdʉ́ nə ca'tə e. E həŋtə pɑkhʉ̌ pyə gɑ: Pu a pú nthɛshwə nə kʉ́? Mu' mo cəcɑ̌ pɔmnəŋ pa' bi e gɑ: Ta gɑ̌ bɑ gɑ̌ lɑ mu a sɔ' bu, zhwényə tə ghɔm pɑ́ nə é. Zhwenyə bɔ nthɔm e bǎ hɑ lə́, ma' e si, e sə́ dhə̀dhə̀, pfɑ́ msúŋ, nthiŋ. Gɑ̌ ghɔm bi pɑkhʉ̌ pǔ gɑ wap zhə́ŋ e, la' wap ghə gʉ' nə jə́ŋ e. Yeso lɑ ghɔ̀m gɔm bi pu gɑ: Gwya pɑ tə piŋ, gɑ̌ gɔ pɑ bə́ŋ po tə́ kəm sǒ? Gɑ̌ gɔ kyəp tʉm tsɑ̌ nə po tə kəm sǒ? Po lɑ e nə sɔ' bəm. Wap lə́ lɑ e nə sɔ' bi Yeso. Mu bɔ̌ lə cwə̌tə́ jɔ Yeso, zhwenyə to' nə cʉ'nyə é, gə e tiŋ; bvʉsi, ŋkheŋnyə lə́ sə́ dhə̀dhə̀. Yeso həŋtə tap e gɑ: A cwə dəŋ pǎ' pa' a pɑ̌ gə nə e po' a? E ghɔm gɑ: Tə fɑ bwa a bɑ mcʉmmcʉ̌m, zhwenyə bɔ ma' e mɔk kɑ m nthʉ̌m shyə lə, po'o gɑ e pfʉ́. Tə a pɑ gɑ́ pɑ o ghə ywə nə́, o kwitə wɔk shyə m nə cɔmmtso. Yeso ghɔm gɑ: A pɑ̀ gɑ́! Gɛ piŋnthʉm bɑ́ ě ku' nə ghə guŋ ywə awɛ. Tá mú bɔ lə wuŋ shwe gɑ: Gɑ̌ bíŋ! Sɔ' ŋkwitə yɑ nə yak piŋnthʉm. Yeso lə yɔ̌ pa' pɔmnəŋ shu'tə a, shɔktə zhwenyə cwəpuŋ gɔm gɑ: Zhwenyə bu'mtəŋ ba tə ghɔm, gɑ̌ ghɔm bu, təm nə mu yə̌ŋ, o kɑ piŋ tə́ bɑnyə nə e! Zhwenyə lə lɑ cwé pu a mtiŋ nə nthəm nə mú bɔ. Mu bɔ cwə pa' cwə yə ě pfʉ̀ a, tə́ guŋ pɔ awɛ pɑwə gɔ́m gɑ: Ě pfʉ́. Da' gɑ́ Yeso tɔm pú e, bʉ' e, e tiŋnyə thə́. Cwə yə Yeso lə pɑnyə dyə a, pɑkhʉ̌ pyə həŋtə e gɑ: Kɑ gə tə la' pyə ku' nə zhəŋ zhwenyə bɔ? E ghɔm bi pu gɑ: Nthi zhwenyə yəŋ gɑ bɑ bi a pɑ́ sɔmywə lə té é nə́ mo, tə ně da' mcwyɛ'nyə. Yeso pu a pɑkhʉ̌ pyə lə lǔ tsʉ'ú, shyə m Galilea ba m Yudea; Yeso la tə́ bɑwə shəŋ gɑ sɔmmo zhyə pɑ́. Nə pa' e lə́ bɑwə ji'tə pɑkhʉ̌ pyə gɔm gɑ: Pu gɔ hɑ Mú mo nə bǔ pɔmnəŋ; a wap zhwə é, cwə yə́ wap zhwə é á, a nə cyə̀ tyɛ'dzʉ́ yɑtá e yám nə vʉ̌. Da' gɑ pɑkhʉ̌ pyə la tə́ yu' tsɔ ghɔm tə tútə, biŋ bwɔk nə hə́ŋtə é nwə nə́. Wap lə ghɔ̌ Kapɛrnaum; cwə yə wap lə pɑ̌ dyə́ a, Yeso hə́ŋtə wap gɑ: Po kɑ́ bɑ́ mə́jyə nthɛ́shwə nə kɑ? Da' gɑ́ wap lɛtə lɛ̌tə́; tə́ bɑ wap la' bɑ mə́jyə bɑwə fəŋnyə́ nə zhyə́ mo yə́ e bɑ mo gwyə́ a. Yeso lə cwə̌si, biŋ ŋkhe pɔ shwɔppʉə mghǎm, gɔm bi pú gɑ: Mo pɑ shə́ŋ nə pɑ́ dəŋdzə̀, e pɑ́ jʉɔjʉm nə guŋ pɔ awɛ, biŋ bɑ gɛfa' bi guŋ pɔ awɛ. E lə pǐŋ dɑ ta' muywə mú, jap e cəcɑ̌ pú, nthɛtə́ e, gɔm bi pú gɑ: Mo yə e lɑ muywə mú pa' yəŋ gɑ́ a dɑ nə tso tsɑ̌, bɑ é dɑ pɑ kwa' myə̀; mo yə e nəŋ nyə́ŋ a dyə́ a, bɑ e tə́ nyəŋ pɑ́ myə̀ dyə pɑ́, e nyəŋ Mo yə e nthəm a a. Yohane lə ghɔ̌m bi e gɑ: Ta pyə̌ yɔ mu' mo, e pɑwə́ dɑ tso tsǔ jə́ŋ mzhwenyə cwəpùŋ, pyə pɑ shəŋ nə kɔ bi e, nə pa' tə pyə a pu nə lə bəmtə bɑ́ a pɑ. Tə́ Yeso ghɔm gɑ: Ka po kɔ bi e, nə pa' pɑ sɔmmo lə lɑ́ tso tsɑ̌ gə msya, biŋ gúŋ pɑ cwə o bɔ, ŋkhe tso tsɑ̌ cwəpùŋ. Mo yə́ e tə bɑ gɛ bo yɔk pɑ a pɑ́, bɑ́ mo yɔk pɑ̀. Gɑ̌ siŋ wɔ gɑ́ bǎ wɑlə́ yə e gɔ sɔ' hɑ nthu' shyə bi po gɑ po nwə shyə́ m nə pa' pǒ bɑ pɔ Kristo a, tə gɔ sɔ' pi myə́ mcwɔ'fa' pɑ̀. Da' gɑ mo yə e fa'tə bǎ ta' mo nə pɔmkəcɔk po pɔ gɑ pyə́ wap biŋ a, bɑ dzə̌ wə bɑ bi mo bɔ gɑ́ pu cə́ŋ gwɔ' gwyə nthúŋ é, ma' e shyə lɑpʉə. A pɑ gɑ́ pú ó gɔ ghə o fa'tə bvʉ́si, o ya' e; dzə̌ bɑ gɑ́ o ko nə vɔk kam pu, shyə́ nə lɑ bʉ́ mǔ məbʉ́ə gɔ nthʉm gehɛnə̀, nthʉm mɔk tə́ pi. A pɑ gɑ́ kwə̀ o gɔ ghə o fa'tə bvʉ́si, o ya' e; dzə̌ bɑ gɑ́ o ko nə́ vɔk kam kwə, shyə pá' pu gɔ ma' o pu a mkwə mǔ məbʉ́ə nthʉm gehɛnə̀ a. *** Bi á a piŋ bɑ gɑ́ bɛtsə o fa'tə o nə vʉ nə mhɔ o té e; dzə́ gɑ́ o ko nthʉ́m Nəfo Si kəpi bɛtsə shyə́ pa' pu gɔ ma' o nthʉ́m gehɛnə̀ pu a mnyə mǔ məbʉə a, *** tsʉ' yə́ nənəŋdam tə́ pfʉ́ a pɑ́, ba mɔk lə piŋ bɑ bi a. Nə́ pa' pu gɔ sɔ' lɑ mɔ́k pa' gwɛ́ á, nyəŋ bǎ nə wɑ̌lə́. Gwɛ̌ bɑ́ ywə pɑpúŋ, tə́ gwɛ̌ pi yə́ nə tʉ̀m bɑ pu gɔ piŋ lɑ kɑ́ nyəŋ nə é? Po ghə gwɛ́ nə po, biŋ bɑ bvɔk nə hwitə̀ cəcɑ̌ po. Yeso lə́ lǔ tsʉ'u, gɔ nthʉm guŋ Yudea nə yə mu' jʉɔ Yurdɛŋ. Pɔmnəŋ tə jɔm lə pǐŋ ŋkwi' shu'tə bəŋ é, é piŋ ŋkwi' bɑ ji'tə wap ywə́ pa' e lə gə a. Pɑ Farisai lə sɔ' bəŋ e, biŋ nə lə̀ŋtə é, həŋtə é bi a bɑ pú pǐŋ gɑ mbɛ zhə́ŋ jwi e a. E pa' bi pu gɑ: Mosɛ bɑ e lě bvə nə́ bi po gɑ́ kɑ? Wap ghɔm gɑ: Mosɛ bɑ e lě biŋ gɑ́ mbɛ və ŋwa'nyə nə jəŋ mjwǐ bi jwi e nə jə̀ŋ e. Yeso ghɔm bi pú gɑ: A lə́ dú m nə́ tʉm sɔksɔk tsɔ́ tə́ e və mɑ́ mco' bi po. Da' gɑ cwə nə nə to', Si lə ghə mbɛ pu mjwǐ; a po'o tə́ mbɛ gɔ sɔ' tə́m nə tap é pu map e piŋ kwɑ́ nə jwi é, pu e pɑpʉə́ cʉ' pɑ́ ta' bap nɑ́ yɑmu'. A po'o tə́ wap tə́ biŋ bɑ pɔ pɑpʉə pɑ́, wap bɑ pɑ́ ta' mo. A po'o tə mo kɑ́ haptə ywə yə Si nthamtə a. Pɑkhʉ̌ pyə lə kodyə biŋ ŋkwi' həŋtə é ywə nə́ nwə́ bɔ. E ghɔm bi pu gɑ: Mo zhəŋ jwi e, biŋ dɔm mu' mjwǐ, bɑ e bi yə mu' mjwǐ bɑ e ghə ghap; a piŋ bɑ bi a mjwǐ zhəŋ dhə́ e biŋ dɔm bi mu' bɑ ě ghə ghap. Pɔmnəŋ lə lɑ pɔ̌ mkəcɔk pó nə sɔ' bi Yeso gɑ́ e yap bu nə pú, da' gɑ́ pɑkhʉ̌ pyə́ pɑ baptə wap. Yeso lə nə yɔ̌ po' o a pɔ́k é, e ghɔm bi pu gɑ: Po tak pó mkəcɔk po wap sɔ' bəm, ka po kɔ bi pú, nə pa' Nəfo Si bɑ bi pɔ pyə wap hwənyə wap a. Kwa' nyənyɔ gɑ̌ siŋ wɔ gɑ́ mo pɑ́ tə lɑ Nəfo Si pa' mu kəcɔk mu a, bɑ e tə gɔ sɔ' ko nə́ pɑ́. E lə tɛ̌tə wap, jap bú nə pú nə nyəŋ byanyə nə pú. Pa' e lə pɑ̌ ntham məjyə a, mu' mo lə khʉdʉ̌ sɔ' ŋkham mkwi'tə myə́ si dzə e; gɛ lə bɑ həŋtə́ e gɑ: Tá pɑpúŋ, gɑ̌ gɔ ghə gɑ kɑ tə́ sɔ' kwi vɔk mamà pa' mcʉ' a? Yeso ghɔm bi é gɑ: Nwə kɑ́ o ké a gɑ mo pɑpúŋ? Sɔmmo tə bɑ mo pɑpúŋ pɑ́ tə́ ně da' Si dò é. O bɑ ǒ zhyə mco' gɑ: Kɑ zhwə mo, kɑ ghə ghap, kɑ zhʉ, kɑ kwǐnthɛ́ cwanwə̀, kɑ ghə ywə yə a ka tiŋnyə a bi sɔmmo, ghə mku' tɔ́ ɔ pu mɔ́ ɔ. Bɛ bɔ ghɔm bi e gɑ: Ŋ dɑ́ jyə guŋ nwə bǎ awɛ fɑ cwə yə ŋ dɑ́ jɑ̀ mú səm a. Yeso lə lě é, bɑ ŋkhúŋ é; gɔm bi e gɑ: Ta' ywə wə́ jak bu; ghɔ̌, tsə tsyə o gə a, o fiŋ, hɑ bi mpə̌ŋ, biŋ sɔ' gə fʉ' kɛbə̀ŋ, biŋ sɔ' jap jʉ̌m m̀. Da' gɑ bɛ bɔ lə yú' ghɔm tsɔ gɑ, sə é fi' e piŋ nə ghɔ bɑ ŋiŋtə sə e, nə pa' a lə bɑ ě ghə fʉ́' jɔmyɔ̌m a. Yeso lə lě pɑkhʉ̌ pyə giŋnyə é gɔm bi pu gɑ: A gɔ sɔ' tʉɔ bi mghɛ fʉ́' té' o nə́ ko nə́ Nəfo Si. Nwə lə pɑ̌ shyə́ pɑkhʉ̌ Yeso nə mghɔm bɔ, da' gɑ Yeso kwi' gɔm bi pú gɑ: Pó pɑ, a bɑ ǎ tʉɔ nə ko nə́ Nəfo Si te' o. Ǎ yɛ̀ bi kamelo nə twɔk nə fǎ syap shyə bi gɛ ywə nə ko nə́ Nəfo Si. Nwə lə pɑ̌ shyə wap nə gɔ pɑ́ dzə̀, wap pɑ gɔm cəcɑ̌ pu gɑ: Tə́ wɑ̌ gɔ sɔ' vɔ̌k? Yeso lə lě wap dəŋdəŋ gɔm bi pu gɑ: A bɑ a cyə pɔmnəŋ, da' gɑ a tə́ bɑ ǎ cyə Si pɑ́, nə pa' ywə yə a cyə́ Si a tə̌ wə́ pɑ́. Pɛtrɔ to' nə ghɔm bi e gɑ: Yɔ, a bɑ pyə lě nthak guŋ pǒtsə awɛ nə́ŋ jap jʉm o. Yeso ghɔm bi e gɑ: Kwa' nyənyɔ gɑ̌ siŋ wɔ gɑ́ sɔmmo tə̌ wə yə ě tak pa' e ba mfɑ pyə́ pyə pɑ bɛ ba pyə pɑ jwi, nthak map e, nthak tap e, po pyə kɑ mbé myə́ lə nə nwə a ba nə́ Cùŋ pɑpúŋ lə, la' e kwi tsə bɔ jyə́ ŋkhə cwəlɔ nə yəŋ cwə dzʉ̌ a; kɑ mpa' lə, kɑ mfɑ̌ lə, kɑ mmʉə lə, kɑ pǒ lə́, kɑ mbě lə́ cwə nə́ nə cwɔ'mkwə yə̌ŋ, biŋ sɔ' ŋkwi vɔk màmà a. Bo'gwyə pɑ dzə́ gɔ sɔ' cʉ' pɑ jʉ̀m a pɑ jʉ̀m piŋ shʉ' pɑ dzə̀. Wap lə pɑ̌ mə́jyə bɑwə bʉɔ m Yerusalɛm, Yeso pɑ́ dzə̌ pu; wap lə bɑwə shwɔ̌', pɔ pyə wap lə bɑ jʉ̌m pu a pɑwə bwɔk. Yeso lə kě pɔ shwɔppʉə mghǎm pu a pú kwi' bɑ mu' cʉm, e to' nə siŋ wap nwə yə a lə́ bɑwə gɔ təm a, gɔm bi pu gɑ: Po yɔ́, pɑ̌ wə́ bʉɔ m Yerusalɛm, pu piŋ hɑ Mú mo bi mkamsi gwyə́gwyə́ pu a pɑ zhyə mco'; wap ya'shɛ e gɑ pu gɔ zhwə e, piŋ hɑ e bi pɑ tə́ pɑ pɑ́ Yudea, wap gɔ yəmtə é, thə́tə mti nə é, lɑ mshɔ̀m cwɔ é, a zhwə é, a piŋ nə cyə̀ tyɛ'dzʉ́ yɑtá e yám. Yakop pu Yohane pǒ Zebede lə fʉ'tə nɑ tsap hɑ́ bəŋ Yeso gɔm bi e gɑ: Ta pyə wə shəŋ gɑ o ghə ywə yə pyə gɔ lo bu a bi pyə. Yeso ghɔm bi pu gɑ: Pǒ shəŋ gɑ́ ŋ gə gɑ kɑ bi pǒ? Wap ghɔm bi e gɑ: Piŋ gɑ nthʉm ghu'tə o, pyə cwə́, mu' mo nə ghəŋ tʉɔ, yə mu' mo nə ghə́ŋ kwyap. Yeso ghɔm bi pú gɑ: Po ka zhyə ywə yə́ pǒ wə do a. Pǒ ku' nə nwə́ nthǔ' yə gɑ gɔ nwə́ a? Kɑ pǒ ku' nə kwishyə yə gɑ gɔ kwi a? Wap ghɔm bi e gɑ: Pyə̌ ku'nyə̀. Yeso ghɔm bi pu gɑ: Nthǔ' yə gɑ gɔ nwə a po gɔ la' nwə́, ba shyə yə gɑ̌ gɔ kwi a po ghɔ la' kwi. Tə́ sɔ' m nə nə́ cwə nə́ ghəŋ tʉɔ kɑ ghə́ŋ kwyap bəm lə, myə̀ nə́ lə pɑ́ hɑ bi mo: Pu gɔ sɔ' hɑ bi pɔ pyə́ pu lə la' nyaptə́ po'o bi pu a. Pyə́ shɑ̀ pɔ ghǎm pyə wap lə yu' po'o a lə tǒ' nə yɛlúŋ nə Yakop pu Yohane. Yeso ké wap gɔm bi pu gɑ: Pǒ zhyə́ gɑ pɔ pyə pu jɔ wap pa' mtadyə nə mguŋ mguŋ á dɑ pɑ tʉɔ tə́ nə sa' gùŋ, ba pɔ gwyəgwyə pɑ hya mgùŋ. A tə bɑ́ pɑ po'o cəcɑ̌ po pɑ́. Mo pɑ gɔ pɑ mo gwyə cəcɑ po e pɑ gɛ fa' yɔ. Mo pɑ shə́ŋ nə pɑ dəŋdzə̀ cəcɑ̌ po, e pɑ ŋkwɔ guŋ yɔ awɛ. Nə pa' Mú mo la tə́ sɔ' m gɑ pu fa' bi é pɑ́, e lə sɔ' m nə fa' biŋ hɑ vɔk e nə́ nə ŋkwyəpnyə thə pɔ jɔmyɔ̌m. Wap lə ŋwak Yeriko. Yeso pu a pɑkhʉ̌ pyə́ ba mɑ vəŋ pɔ pɑ nthəm Yeriko, Bartimeo, gɛ fʉ̀, mú Timeo pɑ́ bɑ ě cwə kə́ŋ məjyə̀ bɑwə do ywə. E lə nə yǔ' gɑ̀ a Yeso yə Nazarɛt, ntho' nə cwe gɔm gɑ: Mu David, Yeso, cɔmmtso mə̌! Pɔ tə́ jɔm pɑ baptə e gɑ́ e lɛtə́; da' gɑ́ e piŋ shwé tə́ thə́ gɑ: Mu David cɔmmtso mə̌! Yeso lə tiŋnyə, gɔm gɑ: Po ké é. Pu lə kě gɛ fʉ́ bɔ gɔm bi e gɑ: Kaktʉɔ, lusi ě wə ŋkhe o. E lə wǎ' sʉə dzə e, déŋ dusi gɔ bəŋ Yeso. Yeso ghɔm bi e gɑ: O shə́ŋ gɑ́ ŋ gə la bu? Gɛ fʉ pa' bi e gɑ: Rabuni gɑ myə̀ piŋ jɔ tsʉ'. Yeso ghɔm bi e gɑ: Ghɔ̌, piŋnthʉm o vɔk o. Fʉ bɔ lə wuŋ jɔ tsʉ', jap jʉ̌m Yeso mə́jyə. Wap lə ghɔ tə́ bɑ ŋkhəm bə́ŋ Yerusalɛm, bəŋ Bɛtfage ba Betanya, nə ghə̌ŋ kúŋ mthə Olivə, Yeso tə́m pɔ pʉ́ə nə pɑkhʉ̌ pyə́, biŋ gɔm bi pu gɑ: Po ghɔ nə́ pfə́la' yə ǎ dzə̌ po a; po gɔ cwə tə ko wə́, yɔ mú jakasi bɑ pu cə̀ŋ é, bɑ sɔmmo ka wuŋ ŋkwɔ' nə é; a po kyɛ' é nə sɔ' bi a mo ghɔm bi po gɑ: Nwə ka po ghə pa' a? Po pa' bi e gɑ: Cyəpɔ wə hə́ŋtə́ yá, e wuŋ shya e tsɔ'ɔ. Wap lə ghɔ̌, jɔ mu jakasi ba pu cəŋ e dzʉ́ bə́ŋ mu' jyədyə̌ mə́jyə. Wap lə kyɛ' e. Shɑ pɔ nə́ pɔ pyə wap lə tsʉ'u a lə ghɔ̌m bi pú gɑ: Pǒ ŋkhyɛ' mu jakasi yɑ́ gɑ kɑ̀? Wap pa' pá' Yeso la' gɔm a, pu tak wap, wap ghə po'o. Wap lə lɑ̌ mu jakasi gɔ bi Yeso, jap mdzə map dəm é, Yeso cwə nə́. Bo'gwyə́ pɔ lə sǐŋ mdzə map məjyə, ba shɑ pɔ piŋ bɑ́ bo' mcɛ́ tsə pé sɛ məjyə. Pɔ pyə wap lə bɑ dzə é a, ba pyə wap lə bɑ jʉ̀m é a ghiŋ bɑ nthógə̀ŋ gɑ: Hozana! Byanyə́ bi mo yə e sɔ' nə tsǒ Cyəpɔ a! Byanyə pɑ nə́ yə nə sa'dzʉ̌ yə a wə sɔ' a, yə nə sa'dzʉ̌ David tá yɔk pɑ̀! Hozana tə́ thə́ kɛbə̀ŋ. E lə kǒ Yerusalɛm, ŋkho Dyə Si, jɔ guŋ mtsʉ' awɛ giŋnyə e; pa' a lə bɑ́ bwadzʉ̌ a, e tə́m, pu a pɔ shwɔppʉə mghǎm ghɔ Betanya. Dzʉ̌ lə lɔ̌, wap pɑ́ nthəm Betanya jikù'u yɛ́ Yeso e lə yɔ mu' ta' thə́ nthɔmthə́ gʉə sʉəsʉə, mhwə́ pɑ́ nə́ tə jɔ́m, e ghɔ bəŋ o nə yɔ bi a ywə nə a. E lə ghɔ tə ŋkhəm bəŋ o, jɔ pɑ́ da' mhwə nə́, nə pa' a la tə́ bɑ cwə nthɔ̌m mthə́ pɑ́. Yeso ghɔm gɔm bi e gɑ: Sɔmmo kɑ́ la'tə́ pfɑ́ mnthɔm mǔ! Pɑkhʉ̌ pyə lə bɑwə jú'. Wap lə ŋwak Yerusalɛm, Yeso ko Dyə Si, ntho' nə zhəŋ pɔ pyə wap lə bɑwə fiŋ bìŋ jo potsə́ Dyə Si a; ŋkwɔk mtɑpe pɑ kwyəpnyə bʉm pu a mkwɔ' pɑ tɛ msəŋgɔpfò. La' e piŋ gɑ sɔmmo kwa sɔmywə nə shyə́ Dyə Si. E lə zhi'tə wap bɑ gɔm gɑ: A tə́ bɑ pu və̀ gɑ: Pu gɔ sɔ' pɑ ke Dyə a gɑ dyə mcwyɛ'nyə bi gùŋ mgùŋ awɛ a? Tə́ a bɑ́ yə̌ŋ bɑ po nə gə túŋ msamshwə̀. Mkamsi gwyə́gwyə́ pu a pɑ zhyə́ mco' lə yǔ', bɑwə shəŋ pa' wap gɔ ghə tə zhwə e a. Nə pa' wap lə bɑwə bwɔk e, nə kɑlɑ́ ywə yə e lə bɑwə ji'tə a lə bɑwə ŋkhonyə vəŋ pɔ. A lə pɑ̌ bwadzʉ̌, Yeso pu a pɑkhʉ̌ pyə təm tisuŋ. Wap lə nə́ cyə̀ fɔkdzʉ̌, jɔ thə́ nthɔmmthə bɑ ǎ yəm tə́ ŋkhəm nə gɛ tsyə́. Pɛtrɔ kamtə gɔm bi Yeso gɑ: Rabi, yɔ thə́ nthɔmmthə́ yə o kɑ nyəŋ dò nə a yəŋ bɑ ǎ yə́m awɛ. Yeso pa' bi pu gɑ: Po ghə piŋnthʉm nə Si. Kwa' nyənyɔ gɑ̌ siŋ wɔ gɑ mo ghɔm bi kuŋgǒ yə̀ŋ gɑ gɑ́: Lu tsa' a gɔ ŋkho shyə lɑpʉə, biŋ bɑ tə zhʉ'nyə nthʉm tʉ́m é, da' gɑ biŋ gɑ́ ywə yə e gɔm a a gɔ pɑ po'o, bɑ ywə bɔ gɔ pəmtə. A po'o tə gɑ̌ siŋ wɔ gɑ: Guŋ ywə awɛ yə pǒ lo nə mcwyɛ'nyə̀ a, po piŋ gɑ po e da' ŋkwi ywə bɔ, a Si hɑ ywə bɔ bi po. Bi a po nəŋ biŋ nthiŋnyə thə́ bɑ shwyɛ'nyə Si a pɑ gɑ po a mo ghə nwə̀, po nə shwyɛ' é, po'o gɑ tá yɔ yə ě kɛbə̀ŋ a lɑ mɔ mhɔ nə shwyɛ' wɔ. Nə pa' po pɑ tə́ lɑ mhɔ pyə shɑ́ pɔ shwyɛ' wap bɑ Ta yɔ yə́ ě kɛbəŋ a tə́ gɔ lɑ mɔ mhɔ cwyɛ' wɔ pɑ́. Wap lə pɑ̌nyə Yerusalɛm, Yeso pɑ Dyə Si bɑwə giŋtə́, mkamsi gwyəgwyə, ba pɑ zhyə́ mco' pu a mghətso lə sɔ' bəŋ e. Həŋtə é gɑ: O dɑ ya tʉɔ gə ywə bǎ? Kɑ wɑ̌ hɑ tʉɔ bu tə́ o nə gə? Yeso ghɔm bi pu gɑ: Gɑ̌ gɔ həŋtə́ wɔ ta' nwə̀. Po la ba' bəm bɑ gɑ gɔ siŋ wɔ tʉɔ yə gɑ̌ nə gə nwə bɔ a. Kwǐshyə́ Yohane lə fɑ m kɛbəŋ kɑ m bi pɔmnəŋ? Po pa' bəm. Wap lə sɛ̌ cəcɑ̌ pu gɑ: Pɑ̀ ghɔm gɑ́ kɛbə̀ŋ bɑ e gɔ ghɔm bi pɑ̀ gɑ́ tə nwə kɑ́ bɑ po lě tə́ piŋ e? Pɑ gɔ nəŋ ghɔm gɑ́ bi pɔmnəŋ a? Nə pa' wap lə bɑwə bwɔk vəŋ pɔ pyə wap lə bɑ si a, nə pa' guŋ yap awɛ lə́ bɑwə sɛ gɑ́ Yohane lə bɑ́ kwa' gɔm ghɔm Si. A lə pɑ̌ po'o wap pa' bi Yeso gɑ: Pyə ka zhyə́. Yeso piŋ gɔm bi pú gɑ: Ba myə̀ yɑ̌ pɑ́ ŋ dɑ́ siŋ wɔ tʉ̀ɔ yə gɑ̌ nə gə mnwə bɔ a. E lə to' nə lɑ ghɔm tə́ tútə̀ gɔmnwə bi pú gɑ: Mu' mo lə tsə̌ mthə nə nú' mlù' pé e, ŋkwɑ ŋkhɛpé nə dzám, biŋ nthə́ŋ tsʉ' nə nú' mlù' pé bɔ bə́m; biŋ ŋkwɑ tsʉ' nə cwə nə́ bɑ dé pé; e lə yo' gùŋ é awɛ bi pɑ tsʉ' mthə́ nə nú' mlù' cwəlɔ, gɔ̌. Cwə lə kǔ' e tə́m ta' gɛ fà' bi pɑ tsʉ' mthə́ nə nú' lù' gɑ e ghɔ ŋkwi yə ywə yə a nthəm pé a. Pɔ bɔ lə́ ghəm é shwɔ é, jə́ŋ é tɑ́ hɑ sɔmywə bi e. E lə́ kwi' nthəm mu' gɛ fà' bi pú; wap cwɔ yə bɔ mo nə́ thə́ é, biŋ jəmtə é. E piŋ nthəm mu' gɛ fà'; wap zhwə yə bɔ; e piŋ nthəm shɑ́: Wap cwɔ shɑ, biŋ jwətə́ shɑ. A lə cʉ' da' mú e yə e lə ŋkhuŋ é té' a. E nə təm e bi pú bɑ gɔm gɑ: Wap gɔ ghə mku' mu a. Da' gɑ pɑ tsʉ' pě mthə́ nə nú' mlù' bɔ ghɔm cəcɑ̌ pu gɑ: E bɑ́ dzʉdyə̌! Pɑ̀ zhwe é, mcʉ̌' cʉ' mɔk pɑ̀. Wap lə ghəm e, jwə́ é, dɑ pfə́ e nə nthəm pé mǎ'. Gɛ pě bɔ gɔ ghə gɑ́ kɑ̀? E gɔ sɔ́' sɔ', ghə̌ pu zhwə pɑ tsʉ' pě mthə nə nú' mlù' bɔ, e piŋ hɑ pé bɔ bi shɑ pɔ̀. Po ka ké tsʉ' ŋwa'nyə̀ yə a gɔm gɑ: Gwɔ' yə pɑ pə́m pa' lə wa' á, ya nə lě ji gwɔ' phə pa'. A bɑ́ fa' Cyəpɔ: Msya nwə nə mnyə́ mɔk pɑ̀! Wap lə pɑ̌ shəŋ nə ghəm é, da' gɑ́ bɑwə́ bwɔk pɔmnəŋ. A lə bɑ wap cəŋtə ju' gɑ nwə yə e lə ghɔm a, e lə gɔm nə pú. Wap lə tak Yeso cwəlɔ, gɔ̌. Wap lə təm shɑ pɑ Farisai pu a shɑ pɔ Herode bi Yeso po'o gɑ wap cyə́ m nə ghɔm tsyə́ gəm é. Wap lə sɔ' gɔm bi e gɑ: Ta, pyə̌ zhyə́ gɑ o bɑ nyənyɔ, la' o piŋ bɑ biŋ gɑ sɔmmo hya o: O tə́ bwɔk mnyə sɔmmo pɑ̀, bɑ da'tə məjyə̀ Si dəŋdəŋ. A bɑ pu piŋ nə ma' shwɔp bi Kasa kɑ gɛ̌? Pyə̌ gɔ ma' kɑ pyə tə́ gɔ ma' a? Da' gɑ Yeso zhyə́ gɑ́ wap bɑ pɔ jʉm pʉə gɔm bi pu gɑ: Nwə kɑ po ləŋtə a? Po hɑ ta' bɛ ŋkhap bəm tə́ jɔ. Wap lə hɑ ta' bɛ ŋkhap bi Yeso. E ghɔm bi pu gɑ: Thə́ mo ba ywə yə pu bvə nə a bɑ yə wɑ? Wap pa' bi é gɑ: Yə Kasa. Yeso ghɔm bi pu gɑ: Po pa' ywə yə a yə Kasa a bi Kasa, ba' yə Si bi Si. Nwə lə piŋ shyə́ wap té' nə Yeso. Pɑ Sadukai lə sɔ' bəŋ Yeso. Wap pyə wap gɔm gɑ nə yám nə vʉ̌ tə bɑwə a pɑ́ həŋtə é gɑ: Ta, Mosɛ bɑ é lě bvə bi pyə gɑ: Mbɛ ghə fɑ e yə mbɛ, e nə pfʉ nthak mjwǐ tə́ tak mú, e sɔk npfɔk e po'o gɑ e ghə gwya mo bi fɑ e bɔ̌. Shɑ mfɑ lə pɑ̌ sɔmbʉə. Dəŋdzə̀ lɔmdyə́, npfʉ́ tə tak gwya mo. Batə yɑpʉə sɔk mjwǐ bɔ, npfʉ́ tə tak gwya mo. Ba batə yɑtá, ba guŋ yap sɔmbʉə awɛ, wap lə tak gwya mo. Guŋ yap awɛ lə pfʉ̌, ba mjwǐ ti npfʉ yə́ jʉ̌m pú. A gɔ sɔ' pɑ cwə nə yám nə vʉ̌, wap yám nə vʉ̌, mjwǐ bɔ pɑ́ yə wɑ̌ nə pú, pa' wap lě nəŋ dɔm é awɛ a? Yeso ghɔm bi pu gɑ: A tə́ shyə m pa' a tə bɑ pǒ zhyə́ ywə yə pu lə və a, ba tʉɔ si a, tə po pɑwə hɔjyə pa' lə? Nə pa' cwə yə pu jam nə vʉ̌ a, pu lə ghə mjwǐ kɑ dhə́ lə. Pu bɑ m pa' pɑ aŋgəle kɛbəŋ a. Sɔ' m nə nə́ yam nə vʉ̌, bɑ po la m ŋkhe nthʉm ŋwa'nyə Mosɛ, nə ywə yə pu lə və nə nwə cu' mghé mɔk tə́ ŋkhə, pa' Si lə ghɔm bi e gɑ: Gɑ̌ bɑ Si Abraham, Si Isak ba Si Yakop a? E tə bɑ Si mpfə́ pɔ pɑ̀; é bɑ Si pɔmtʉɔ. Pǒ bɑ pǒ cəŋtə hɔ məjyə. Mu' jyə́ mco' lə sɔ' bəŋ Yeso. A lə bɑ ě yu' pa' Yeso pu a pɑ Sadukai nthɛshwə̀, e pa' bi pu pɑpuŋ a. E lə həŋtə Yeso gɑ: Də̀ŋdzə̀ mco' nə gùŋ mco' awɛ bɑ ma? Yeso pa' gɑ: Dzə̀ mco' bɑ gɑ: Yu' m Israɛl Cyəpɔ Si yɔk pɑ̀ bɑ da' Cyəpɔ. O gɔ pɑ kuŋ Cyəpɔ Si o nə guŋ tʉm tsʉ̌ awɛ, nə guŋ lam tsʉ̌ awɛ, nə guŋ kwɛnyə o awɛ ba nə guŋ gʉ' o awɛ. Batə məbʉ̌ə́ bɑ gɑ: O gɔ pɑ́ kuŋ mo yə e bəŋ o a pa' thə nɑ o a. Sɔm mco' ka cyə́ mɔ mco' məbʉə́. Jyə́ mco' ghɔm bi e gɑ: Ǎ pùŋ m Ta, o ghɔm nyənyɔ. E bɑ́ da' yʉ́ dǒ é, sɔm lə kwi' bɑwə́, nə kùŋ e nə guŋ tʉ̌m mo awɛ, nə guŋ zhyə̌nwə mo awɛ, nə guŋ gʉ' mo awɛ, biŋ ŋkhuŋ mo yə e bəŋ mo a pa' thə nɑ́ mo a pɑ́ bɑ ǎ cyə guŋ tsə tsyə pu ntho bi Si a ba tsə pwɔ' awɛ. Yeso lə yɔ̌ gɑ e lɑ fʉ́ nə ba', gɔm bi e gɑ: O tə̌ gʉə sʉəsʉə nə Nəfo Si pɑ́. A piŋ bɑ po'o sɔmmo lə kwi' həŋtə́ e sɔmywə. Yeso lə lɑ̌ ghɔm, bɑ ji'tə pɔmnəŋ ywə Dyə Si bɑ gɔm gɑ: Pɑ zhyə́ mco' gɔm gɑ Kristo bɑ mú David m gɑ́ kɑ̀? Zhwenyə Dɔlɔ̌ lə ghə David zhyə biŋ gɔm gɑ: Cyəpɔ ghɔm bi Cyəpɔ a gɑ: Cwə́ nə ghəŋ tʉɔ a tə́ a nyəŋ mghɛ bò pǔ to mkwə o. Kwa' David ŋkhe e gɑ Cyəpɔ e; tə́ é biŋ bɑ mu e m gɑ kɑ? Vəŋ dú pɔ lə bɑwə ŋwɛnyə nə yu' e. Yeso lə bɑ ji'tə pɔ ywə bɑ gɔm gɑ: Po pɔm pɑ zhyə́ mco' pyə wap ŋkwa msʉə́ dzə́ nə giŋ, bɑ shə́ŋ gɑ pú ca'tə wap dəm sim, bɑ ŋkho sinagogə shwə nə dəŋdzə mkwɔ', biŋ bɑ tsʉ' la'nwə shwə pɑ́ nə dəŋdzə tsʉ' a. Wap pyə wap mitə tsə mpfɔk, biŋ bɑ gə msʉəsʉə mcwyɛ'nyə nə fʉtə wap a. Pu gɔ sɔ' nyəŋ shɛ yə ǎ cyə a thə́ pú. Yeso lə cwə̌ bəŋ kak yə pú nyəŋ ywə nə fa' Dyə Si nə a, bɑwə jɔ pa' pɔmnəŋ wə nyəŋ ŋkhap nthʉm o a. Pɔ jizhǐ tə jɔm lə sɔ̌' bɑ́ nyəŋ ywə nthʉm o tə a yɔm. Mu' npfɔk bəŋ mjwǐ lə sɔ' nyəŋ po mpfʉ́ tsə bɛ pʉ̌ə, kwa' jʉ̀m ŋkhap. Yeso lə kě pɑkhʉ̌ pyə́ gɔm bi pu gɑ: Kwa' nyənyɔ gɑ̌ siŋ wɔ gɑ́ npfɔk bəŋ mjwǐ yə̌ŋ nyəŋ shyə guŋ pɔ pyə wap bɑwə nyəŋ ywə nthʉm kak a. Nə pa' gùŋ yap awɛ nə nyəŋ nthé pɑ nə dziak tsə tsap, tə́ sɔ' m nə é bɑ ě nə nyəŋ yə́ nthe m nə ghəghʉɔ e, nyəŋ guŋ yə́ ywə yə a bɑ bi a, guŋ ywə yə a kɑ́ bɑ ě ghə nə́ nə bvɔk a. Cwə yə Yeso lə pɑ̌ nthəm Dyə Si a, mu' mukhʉ́ é ghɔm bi e gɑ: Ta yɔ də́ŋ mwɔ', yɔ dəŋ pa' pu ŋkwɑ́ ywə. Yeso ghɔm bi e gɑ: Ǒ yɔ tsə́ gwyəgwyə tsɑ́ tsyə pu ŋkwɑ́ a! Sɔm gwɔ' tə gɔ sɔ' cwə dəm sɔm pɑ̀. Pu gɔ sɔ' sa'tə guŋ e awɛ. Yeso pu a Pɛtrɔ, ba Yakop, ba Yohane pu Andreya lə cwə dəm kuŋ mthə Olivə, dzə̌ Dyə Si, tsʉ' tsiŋ wap həŋtə e gɑ: Siŋ wɔk cwə yə nwə bǎ gɔ sɔ' sɔ' a, ba mtiŋ myə a gɔ sɔ' la'tə gɑ tsə bǎ gɔ mi a. Yeso to' nə ghɔm bi pu gɑ: Po pɔmtə gɑ sɔmmo kɑ́ ghə po hɔ́jyə̀, bo'gwyə pɔ gɔ sɔ' lɑ tso tsɑ̌ sɔ', pɑ ghɔm gɑ: A bɑ a, ghə̌ pɔ jɔmyɔ̌m hɔ́jyə̀. Po gɔ sɔ' yu' shù, pu pìŋ bɑ gɔmnwə nə shù. Po kɑ pwɔk. A puŋ gɑ tsə bɔ təm awɛ, da' gɑ a lə wuŋ bɑ nə mìŋ. Nə pa' mu' guŋ gɔ sɔ' pɑ lo' yə mu' guŋ. Mu' Nəfo pɑ do' tsyə mu' nəfo. Cǎ' pɑ shʉ'nyə́ nə mtsʉ' jɔmyɔ̌m. Kəya' pɑ jɛ́; a gɔ sɔ' pɑ pɑ́ nə to' go' nə dzə́. Po pɔmtə́. Pu gɔ sɔ' pɑ hɑ wɔ nə mdyə́ fyɛ' pu a msinagogə, pu pɑ shwɔ wɔ, bɑ fyɛ' wɔ dzə̌ mgɔpna' pu a mfomfo po'o nə thə́ a. A pɑ mtiŋ nə ŋkwithɛ bi pu. Nə pa' a bɑwə shəŋ gɑ pu ləŋdzə siŋ Cùŋ pɑpuŋ bi gùŋ mgùŋ awɛ. Pu sɔ' bɑ dɑ́ wɔ nə gɔ m nə hɑ po'o, ka lam tsɔ wuŋ sɔ́ nə ywə yə pǒ gɔ kó ghɔm a; nə pa' ywə yə pu gɔ sɔ' hɑ bi po cwə o bɔ a, po ghɔm ya bɔ; nə pa' tə wɔ nə gɔ sɔ' ghɔm pɑ́, Zhwenyə Dɔlɔ̌ nə gɔ sɔ' ghɔm nə yɔ tsʉ'. Fɑ́ gɔ sɔ' hɑ fɑ́ nə vʉ̌. Ǎ ta hɑ mú nə vʉ̌; pǒ gɔ sɔ' fɛjʉ́m pɑ tsə́ wap ghə pu zhwə wap. Guŋ pɔ awɛ gɔ sɔ' pɔ wɔ nə tso tsɑ̌. Tə́ mo yə ě tɔm tə nə miŋ a gɔ sɔ' vɔk. Po sɔ' jɔ́ Bɔkbɔ́k zhwìŋ nə tsʉ' yə e ka tə́ bɑ gɔ pɑ́ nə a pɑ: mo yə ě wə ŋkhe a cəŋtə ju' a: a sɔ' tə bɑ po'o, pɔ pyə wap Yudea a khʉ̌ gɔ dəm mkúŋ; mo yə ě gɔ sɔ' pɑ m̀ zhəŋ dyə thə́ a kɑ fi'si, e kɑ nə̌ŋ ŋkho dyə é nə pe ywə. Mo yə ě gɔ sɔ' pɑ m pé a kɑ pɑnyə jʉ̀m nə lɑ dzə e. Ghəghʉɔ pɑjwǐ tsʉ̌m pu a mmʉə po nə tyɛ'dzʉ́ bɔ! Po cwyɛ'nyə Si gɑ a kɑ sɔ' bɑ ŋkhàp ŋʉm. Nə pa' mtyɛdzʉ́ bɔ gɔ sɔ' pɑ mtyɛ' ghəghʉɔ yə a la m bɑ tə fɑ pa' Si lə la' nyaptə dzʉ a tə ŋkhəm tyɛ' ɔ, a lə nəŋ bɑ gɔ la'tə piŋ pɑwə pɑ́. A ka pɑ́ gɑ́ Cyəpɔ ghə gɑ tyɛ'dzʉ bɔ sɔ' shwanyə cwanyə a, bɑ sɔmmo tə gɔ sɔ' vɔk pɑ́. Da' gɑ a cyə m nə pɔ̀ pyə e lə cwɔ' wap a e ghə gɑ mtyɛ'dzʉ́ bɔ sɔ' shwanyə. A pɑ́ po'o, bi a pɑ mo ghɔm bi po gɑ Kristo m tsɔ'ɔ, kɑ m gɑ é m tsi' é lə ka po piŋ. Pɑ mkristo nə fʉtə pu a pɑ mghɔm ghɔm Si nə fʉtə gɔ sɔ' təm jyəjyə̀, pɑ ghə mtíŋ pu a nthinthi msya, nə ghə pɔ jɔmyɔ̌m hɔjyə, ba shɑ pɔ pyə pu lě shi wap a. Tə́ sɔ' m nə po, po pɔmtə́ nə pa' gɑ̌ siŋ wɔ gùŋ ywə awɛ. A gɔ sɔ' pɑ nə mtyɛ'dzʉ bɔ, tə bɑ ghəghʉɔ yə̌ŋ cyə, a nam sonyə́, mɑŋwə́ pi, msɛ́ to' nə pɑ fɑ kɛbəŋ bvʉtə́ si, mtʉ̀ɔ kɛbəŋ cʉ'nyə́. A pɑ́ po'o pú yɔ Mú mo e sɔ' nthʉ́m mlwa, nthʉ́m guŋ mtʉ̀ɔ awɛ pu ghu'tə. A pɑ po'o, é tə́m pɑ aŋgəle wap ghɔ nə guŋ dzʉ mghəŋ pfʉ̀ə awɛ nə dhə́ sicǎ' ba m nə dhə kɛbə̀ŋ, shu'tə pɔ pyə́ pyə e lě shi wap a. Po yu' fó' yə̌ŋ yə gɑ̌ dɑ nə́ thə nthɔm thə́ a. Bú myə́ shwə tə ntwɔp, tə mhwə pɑ nthəm nə́, po zhyə gɑ́ cwə dzʉ́ pɑpúŋ wə sɔ̌'. A dəŋdəŋ po'o tə ba wɔ la'tə jɔ mnwə bɔ sɔ̌', po zhyə gɑ Mú mo ghɔptə́, gɑ ě jyədyə̌ po. Kwa' nyənyɔ gɑ̌ siŋ wɔ gɑ pɔ nə yəŋ wɔ̌dzʉ́ tə gɔ cyə tə gúŋ mnwə bɔ awɛ sɔ' pɑ́. Kɛbəŋ pu cǎ' gɔ sɔ' mi, tə mghɔm mə tə́ gɔ sɔ' mi pɑ́. Da' gɑ́ sɔ' m nə tyɛ'dzʉ́ bɔ, kɑ cwə dzʉ̌ bɔ̌ lə, sɔmmo ka zhyə, ba pɑ aŋgəle kɛbəŋ, ba Mú, tə ně da' Tá. Po pɔmtə́, po ti tə tǐ nə pa' po ka zhyə cwə yə́ a gɔ sɔ' pɑ yá a. A shwə pa' mu' mo yə e gɔ m tə́m a: E nə ghɔ nthak la' tsyə, hɑ fa' bi mghɛ fa' pyə, biŋ jap byap jyədyə̌ gɑ e pɑ byap tə tǐ. Po ti tə tǐ nə pa' po ka zhyə cwə yə gɛ lǎ' gɔ sɔ' a: Kɑ bwadzʉ̌, kɑ tə́ŋ mtsʉ̌', kɑ cwə yə ko' nthuŋ, kɑ fɔkdzʉ̌ lə. Po pɔmtə gɑ e kɑ vo'nyə wɔ vo'nyə, nə sɔ' po pɑwə dí. Ywə yə gɑ̌ gɔm bi po a, gɑ gɔm bi gùŋ pɔ̀ awɛ: Po ti tə ti. A lə jɑwə́ jak tyɛ'dzʉ́ yɑpʉə a pɑ́ tyɛ' Paska pu ŋwɛnyə msɛ̌ tə kwɔ' msɛ̌; mkamsi gwyəgwyə pu a pɑ zhyə́ mco' pɑwə shəŋ pa' wap gɔ ghə tə lɑ fʉ́ ghəm Yeso zhwə é a. Wap lə bɑwə gɔm gɑ: A kɑ́ pɑ cwə ŋwɛ́nyə bwɔk gɑ a kɑ ma' và' cəcɑ̌ pɔmnəŋ. Yeso lə pɑ̌ Betanya dyə Simon gɛ ka'pap, wap pɑ́ tɑpe, mu' mjwǐ lɑ dúŋ mwɑ̌ tʉ́ɔdəŋ, mwɑ́ damnyəlamnyə, mwɑ nardu tə mo ŋi'nyə sɔ̌'. Shwɔ' dúŋ mwɑ̌ bɔ, pfyə thə Yeso. A lə pɔ̌k shɑ pɔ, wap pɑ gɔm cəcɑ̌ pú gɑ: Pú bi mɔ mwɑ̌ po'o gɑ́ kɑ̀? Pu é jyə nə fiŋ mwɑ̌ bɔ nə tsə bɛ ŋkhətá, hɑ ŋkhap bɔ bi mpə̌ŋ. Wap lə ghɔ̌m po'o bɑ jɛlúŋ nə mjwǐ bɔ. Da' gɑ́ Yeso ghɔm bi pú gɑ: Po tak é nə́ŋ; pǒ baknyə é gɑ kɑ̀. Ywə yə e gə nə m a bɑ fa' pɑpúŋ. Po a mpə̌ŋ nə gɔ pəmtə pɑ pɑ́ guŋ mcwə awɛ, bi a pɑ́ po ghə nwə pɑpuŋ bi pú. Tə́ sɔ' m nə m pɑ lə ghɔ pəmtə pɑ pɑ́ guŋ mcwə awɛ pɑ́. Ywə yə a kɑ́ bɑ bi a pɑ́ e ghə a, ě ghə̀: A po'o bɑ ě ləŋdzə jwɔ' pfə á tə pu la' nthəŋ a. Gɑ̌ siŋ wɔ kwa' nyənyɔ gɑ́ nə gùŋ mtsʉ' awɛ myə pu gɔ la' siŋ Cùŋ pɑpuŋ nə́ nthʉm dzʉ́ a, pu gɔ la' pɑ ghɔm ywə yə é gə a nə kamtə é. Yuda Iskariɔt, mu' mo nə pɔ shwɔppʉə mgham lə ghɔ̌ jɔ mkamsi gwyəgwyə nə hɑ Yeso bi pú. Wap lə nə yu' po'o, ŋwɛnyə, ŋkha' gɑ wap gɔ hɑ ŋkhap bi e. Yuda pɑ shəŋ cwəlɔ pa' e gɔ ghə tə hɑ e bi pú kwa' nə cwə pɑpúŋ a. A lə pɑ̌ nə dəŋdzə tyɛ'dzʉ msɛ tə kwɔ' msɛ̌, tyɛ'dzʉ́ yə pu lə jwə po jʉ̀jʉ̀ nə Paska a, pɑkhʉ̌ Yeso ghɔm bi e gɑ: Ǒ wə shə́ŋ gɑ́ pyə ghɔ nyaptə tsʉ' m hɑ o nə dzʉ́ Paska? E lə tə̌m shɑ pɑkhʉ̌ pyə pɑpʉə, gɔm bi pu gɑ: Po ghɔ tisuŋ; po a mu' mbɛ gɔ yu'tə bɑ ě kwa ghʉɔ shyə. Po yap jʉm e, biŋ tsʉ' yə ě ko nə a po ghɔm bi gɛ lǎ' bɔ gɑ: Tá ghɔm gɑ: Twɔ'dyə́ a yə gɑ̌ gɔ tsʉ́ Paska nə, pyə a pɑkhʉ̌ pɑ̌ a hɑ? E gɔ la'tə wɔ ta' twɔ'dyə̌ zhəŋ thə́ bɑ ǎ ghyɛ'nyə, tsə dyə pɑ nthʉm o, bɑ pu nyaptə. A tsʉ' yə po gɔ nyap gùŋ ywə awɛ nə́ bi pɑ á. Pɑkhʉ̌ pyə lə lǔ gɔ tisuŋ, ŋkho jɔ guŋ ywə awɛ pa' e la' gɔm a, biŋ nyaptə tsʉ' yə wap gɔ tsʉ́ Paska nə a. A lə pɑ̌ bwadzʉ̌, Yeso sɔ' pu a pɑkhʉ̌ pyə́. Pu a pu lə pɑ̌ tɑpe bɑ́ dzʉ́ ywə, e lɑ ghɔ̌m gɔm gɑ: Kwa' nyənyɔ gɑ̌ siŋ wɔ gɑ mu' mo nə po gɔ̀ hɑ á, mo yə pyə̀ e wə dzʉywə a. Sə́ guŋ yap awɛ lə fǐ', bǎ ya mo lə nə pú pɑ gɔm bi e gɑ: A bɑ a? E ghɔm bi pú gɑ: A mu' mo nə pɔ shwɔppʉə mghǎm yə pyə e gɔ pəmtə́ nyəŋ pu nthʉm kɛ a. Nə pa' Mu mo gɔ ghɔ pɑ́ pa' pu lə və nə é a; tə́ ghəghʉɔ bi mo yə pu gɔ cyə m nə e tə hɑ Mu mo a. Dzə lə́ bɑ bi mo bɔ gɑ pu kɑ tsə é. Wap lə pɑ̌ dzʉywə e pé msɛ̌ nyəŋ byanyə nə́ bo' hɑ bi pu gɔm gɑ: Yə̌ŋ bɑ́ bap nɑ́ a. Biŋ ŋkwa nthu', go'tə Si nə hɑ bi pu, wap nwə guŋ yap awɛ. E ghɔm bi pu gɑ: Yə̌ŋ bɑ mcyə́ mə̌, mcyə kɔ myə pu pfyə nə thə́ pɔ jɔmyɔ̌m a. Kwa' nyənyɔ gɑ̌ siŋ wɔ gɑ́ ŋ tə́ gɔ la' tə kwi' nwə́ mɔ mlù' nthɔm mthə pɑ tə kəm tyɛ'dzʉ yə gɑ̌ gɔ la' piŋ nwə m sə́ nthʉm Nəfo Si a. Wap lə miŋ nə zhwɔp mzhwɔp gho'tə̀ nthəm gɔ kúŋ mthə́ Olivə. Yeso ghɔm bi pú gɑ: Guŋ yɔ awɛ, pǒ gɔ vʉtə si nə pa' bɑ pu lě bvə gɑ: Gɑ̌ gɔ sɔ' cwɔ' byap dzə, mjʉ̀jʉ̀ sɛtə́. Da' gɑ́ gɑ̌ gɔ cwə tə yám nə vʉ̌, tamdzə̌ po Galilea. Pɛtrɔ ghɔm bi e gɑ: Wap vʉtə pɑ wɛ bɑ ŋ tə́ gɔ vʉ pɑ́! Yeso ghɔm bi e gɑ: Kwa' nyənyɔ, gɑ siŋ o, kwa' wə̀, mtsʉ' tyɛ' ɔ, ko' gɔ nə tǔŋ mcʉm bʉ̌ə, bɑ ǒ kəŋnyə a mcʉm nthá. Da' gɑ́ Pɛtrɔ cəŋtə biŋ gɑ́: A pɑ pɑ́ gɑ pu gɔ pəmtə́ pfʉ́, bɑ pɑ ŋ də kəŋnyə́ o. Ba guŋ yap awɛ lə bɑwə gɔm pɑ po'o. Wap lə ŋwak nthʉm mu' pé yə pu ŋkhe gɑ Gətsemane a, Yeso ghɔm bi pɑkhʉ̌ pyə gɑ: Po cwə́ tsɔ'ɔ gɑ shwyɛ'nyə Si. E lə lɑ̌ Pɛtrɔ, Yakop ba Yohane pu a pu ghɔ. E lə tǒ' nə pwɔk, bɑ jwiŋ. Gɔm bi pu gɑ: Lam tsɑ̌ wə jwiŋ tə bɑ pɑ vʉ̌. Po cwə tsɔ'ɔ bɑ di tə tì. E lə na' gɔ dzə̀, bvʉsi biŋ bɑ shwyɛ'nyə Si gɑ a pɑ gɑ́ pɑ cwə bɔ cyə m gʉ́ə sʉəsʉə nə e. E lə bɑwə gɔm gɑ: Aba, Ta, sɔmywə tə shyə o pɑ́, ghɔ́ bak nthu' yəŋ nə m̀. Tə́ tə ywə yə myə̀ nə shəŋ a pɑ́, ywə yə wə nə ŋkhuŋ a! E lə sɔ̌' biŋ jɔ wap, wap pɑwə di; e ghɔm bi Pɛtrɔ gɑ: Simon o wə di tsʉ̌! O ka ghə bǎ gʉ' nə di tə tì nə ta' nam yɑmu'. Po ti tə ti, bɑ shwyɛ'nyə Si po'o gɑ po kɑ vʉ̀ nə tʉɔ mləŋtə̀. Zhwenyə wə bɑ ě ghə kaktʉɔ, da' gɑ́ bapnɑ pwá. E lə kwi' du bəŋ pu gɔ ŋkwi' shwyɛ'nyə Si gɔm pɑ́ ywə yə e la' jì gɔm a. Biŋ ŋkwi' nə sɔ' wap pɑwə di, nə pa' lwɔk lə bɑ ǎ lo nə mnyə map a. La' wap zhyə ywə yə wap gɔ ghɔm bi e a. E lə pǐŋ sɔ' batə mcʉ̌m nthá, gɔm bi pu gɑ: Po ti nə gɔ dzə̀ bɑ hwitə́. Nwə mì. Cwə̌ ku'. Yɔ, pu hɑ Mu mo nə́ bǔ pɔ cwəpuŋ. Po lúsi! Pɑ ghɔ̌! Yɔ! Mo yə e hɑ a wə sɔ'. E lə pɑ gɔm po'o, pɑ cwə o cwə o Yuda mu' mo nə pɔ shwɔppʉə wuŋ ŋwak pu a msə̌ŋwi bɑ wap wim mnyə́ mcɔk pu a mwya; bɑ mkamsi gwyə́gwyə́ pu a pɑ zhyə mco' ba mghətso nə nthəm wap. A lə bɑ́ pu a mo yə e lə bɑ́ gɔ hɑ e a nyaptə, e ghɔm bi pu gɑ: Mo yə gɑ gɔ núŋ mgho' myə́ a po zhyə gɑ́ a yʉ́, po ghəm e, dɑ e nə gɔ. E lə wuŋ ŋwak gɔm gɑ: Rabi! Biŋ núŋ mgho' myə́. Pyə shɑ pɔ yap bǔ nə e, gəm e. Mu' mo nə pɔ pyə wap lə bɑ́ tsʉ'u a, té nyə́ e nə nɔk gɛfa' ŋkhamsi gwyə, ja' tə́ŋ e. Yeso lɑ ghɔ̀m gɔm bi pu gɑ: Pǒ lɑ mnyə pu a mwya nə sɔ' nə ghəm a pa' pu gɔ nə samshwə a. A kɑ bɑ́ guŋ mtyɛ'dzʉ́ awɛ bɑ́ cəcɑ̌ po, bɑ Dyə Si, bɑ ji'tə́ wɔ, po lə ghəm a. Da' gɑ a bɑ po'o tə ywə yə pu lə və á a pəmtə́. Guŋ pɔ awɛ lə wa' e ŋkhǔ. Mu' mú səm da' pak dzə nə pɑ nə e lə yap jʉm e, pu ghəm e. Da' gɑ e tak pak dzə e bi pú ŋkhʉ̌ kəcyəŋ e. Wap lə lɑ̌ Yeso gɔ ywə ŋkhamsi gwyə́. Mkamsi gwyə pu a mghətso ba pɑ zhyə́ mcò' lə cu'tə guŋ yap awɛ. Pɛtrɔ lə yap jʉ̌m pú, tə́ bɑ giŋ tə gʉə sʉəsʉə, gɔ tə ŋkhəm la' ŋkhamsi gwyə. E lə cwə̌ cəcɑ̌ mghɛ fa', bɑ jwɔk mɔk. Mkamsi gwyəgwyə pu a gùŋ Sanedrɛŋ awɛ lə bɑwə shəŋ ywə yə pu gɔ ghɔm nə Yeso tə nə ya' shɛ é gɑ pu zhwə e a, pu lə yɔ. Nə pa' pɔ jɔmyɔ̌m lə bɑwə sɔ' gɔm nthinthi mnwə nə é, da' gɑ́ a pɑ́ mcwanwə nə pa' a la tə bɑwə hwənyə pɑ́. Shɑ pɔ lə lǔsi bɑ nthʉ́ nwə thə́ e bɑ gɔm gɑ: Pyə lə yu' pa' e gɔm gɑ: Myə̀, gɑ̌ gɔ sa'tə Dyə Si yəŋ yə́ pu lə lɑ bú ŋkwɑ a, piŋ kwɑ́ mu' nə tyɛ'dzʉ́ tsɑ ta yə a tə́ gɔ pɑ́ fa' bú mo a pɑ́. Tə́ ba tə po'o, wap la tə pɑ́ ŋkwishwə nə mghɔm map. Ŋkhamsi gwyə́ lə lǔsi cəcɑ̌ cu'tə pɔmnəŋ həŋtə́ Yeso gɑ: O tə́ ba' sɔmywə nə mnwə mɔ myə pu gɔm nə o a pɑ a? Da' gɑ e lə ghɔm sɔmywə, e lə pa' sɔm nwə̀. Ŋkhamsi gwyə́ lə kwi' həŋtə́ e gɑ: O bɑ́ Kristo Mú Si byanyə a? Yeso ghɔm bi e gɑ: Gɑ̌ bɑ e. Pǒ gɔ yɔ́ Mú mo bɑ ě cwə nə ghəŋ tʉɔ Si Nthʉɔtʉɔ, e sɔ' nthʉm mlwa fɑ kɛbəŋ. A lə pɑ̌ po'o ŋkhamsi gwyə́ khi dzə́ e gɔm gɑ: Pɑ̌ biŋ bɑwə shə́ŋ ya nthi ŋkwǐnthɛ? Pǒ yu' mcap. Pǒ yɔ gɑ kɑ̀? Guŋ yap awɛ lə nyə̌ŋ shɛ́ thə́ e gɑ́ ě ku' pa' bi a pɑ pu zhwə é a. Shɑ pɔ lə to' nə́ thə́tə mtǐ nə e; bɑ sam sə́ e, biŋ bɑ shwɔ é lə bɑ gɔm gɑ: Tú mo yə e shwɔ o a. Mghɛ fa' lə lɑ̌ mfé nə dɑ e. Pa' Pɛtrɔ lə bɑ zhəŋ si shwədyə̌ a, mu' gɛfa' ŋkhamsi gwyə yə mjwǐ lə sɔ̌', jɔ Pɛtrɔ e pɑwə jwɔk mɔk, e lé é gɔm bi é gɑ: Ba wə yǔ, po yə́ Nazarɛt, Yeso nə bɑ! Da' gɑ Pɛtrɔ kəŋnyə gɔm gɑ: Ŋ ka zhyə́, ŋ də nəŋ bɑwə ju' ywə yə ǒ wə gɔm a. E lə ghɔm po'o nthəm gɔ m jʉ̀m dzʉ̌ nə shwədyə̌, shwə tsʉ' u. Gɛfa' mjwǐ lə pǐŋ ŋkwi' jɔ e biŋ gɔm bi pɔ pyə́ wap lə bɑ tsʉ'u a gɑ: Mo yə́ gɑ bɑ mo yap. Da' gɑ Pɛtrɔ kwi' ŋkhəŋnyə. A lə nə cyə mu ywə pɔ pyə wap lə bɑ tsʉ'u a piŋ gɔm bi Pɛtrɔ gɑ: Ǎ nyənyɔ gɑ o bɑ mo yap, o bɑ́ ba yə Galilea. Da' gɑ Pɛtrɔ to' nə kɔ mkɔ bɑ gɔm gɑ́ ŋ ka zhyə bɛ bɔ yə pǒ gɔm e a. E lə pɑ̌ gɔm po'o ko' wuŋ nthuŋ nə batə mcʉ̌m bʉə. Pɛtrɔ piŋ ŋkhamtə́ ghɔm tsyə́ Yeso la' gɔm bi e a gɑ́: Ko' gɔ nə tǔŋ mcʉm bʉə bɑ ǒ kəŋnyə a mcʉm ntha. E lə wuŋ nthəm cwəlɔ bɑ dɔ̌. A lə́ nə pɑ̌ mɑ fɔkdzʉ̌, mkamsi gwyəgwyə pu a mghətso ba pɑ zhyə́ mco' pu a guŋ Sanedrɛŋ awɛ ko cu'tə nə jap yɑ nwə pa' wap yɔ a. Wap lə cə̀ŋ Yeso, dɑ e nə gɔ hɑ bi Pilato. Pilato lə həŋtə é gɑ: O bɑ fo pɑ Yudea a? Yeso pa' bi e gɑ: Wə nə gɔm. Mkamsi gwyəgwyə lə ghɔm nthinthi mnwə nə e nə butə e. Pilato lə kwi' həŋtə é m sə́ gɑ: O tə́ ba' sɔmywə a? Yɔ dəŋ guŋ mnwə myə wap bɑwə nə butə o. Da' gɑ́ la' Yeso piŋ ba' sɔmywə tə nwə cyə Pilato. A lə bɑ nə guŋ mtyɛ' ŋwɛnyə awɛ Pilato pɑ nthak ta' gɛ cɛ̌ yə wap həŋtə gɑ e tak é nə́ŋ a bi pú. A lə nə pɑ̌ po'o mu' mo pu pɑ ŋkhe é gɑ Barabas pɑ dyəcɛ̌ pu a shɑ mghɛ va', bɑ wap lě bɑ bva' tsʉ' jwə mo. Pɔmnəŋ lə sɔ̌' bɑ həŋtə Pilato ywə yə e lə bɑ ě ghə mà nə ghə bi pu cwə o bɔ a. Pilato pa' bi pú gɑ: Pǒ piŋ gɑ nthak fo pɑ Yudea nəŋ bi po a? Nə pa' Pilato lə bɑwə jɔ gɑ́ mkamsi gwyəgwyə lə shyə pɑ m nə nə khiŋ tə hɑ Yeso bi e a. Mkamsi gwyəgwyə lə thənyə pɔmnəŋ gɑ wap həŋtə́ gɑ e tak pɑ Barabas bi pu. Pilato lə piŋ dɑ ghɔm həŋtə́ wap gɑ́: Tə gɑ̌ gɔ ghə la m mo yə po ŋkhe é gɑ fo pɑ Yudea a? Wap lə pǐŋ ŋkwi' shwé gɑ: Kwe é thə bɛnyəpɛnyə. Pilato lə ghɔm bi pú gɑ: A bɑ ě ghə kɑ yə ǎ pɔk a? Wap lə cwé tə́ thə́ nə gɔ dzə bɑ gɔm gɑ: Kwe é thə bɛnyəpɛnyə. Pilato lə pɑ̌ shəŋ nə ghə nwə puŋ pɔmnəŋ, nthak Barabas nə́ŋ, biŋ gə pu cwɔ Yeso, e hɑ e gɑ pu ghɔ ŋkwe é thə bɛnyəpɛnyə. Msə̌ŋwi lə lɑ e nə gɔ nthʉ́m bùŋdyə̌ tsʉ' yə pu ŋkhe gɑ́ Praitorion a. Wap lə kě guŋ msəŋwi awɛ. Wap lə kwǎ dzə pəpɛ nə e biŋ su co'fo thə é bɑ wap lɑ mjúŋ nə bá'. Wap lə to' nə pɑ bu'tə bu bi e bɑ gɔm gɑ: Pyə ca'tə o m fo pɑ Yudea. Wap lə lɑ̌ ka'cyə shwɔ é nə thə́ é, nthətə́ mti nə é, bɑ bɔnyə ŋkham mkwi'tə dzə̌ e. Wap lə nə miŋ nə yəmtə e, nthɔk dzə pəpɛ yə wap lə kwa nə e a, ŋkwa kwa' tsyə dzə́ nə e. Biŋ gə e təm nə kwe é thə bɛnyəpɛnyə. Wap lə tɔm mu' shyəjyə̀ e pɑ fɑ m gǒ gɑ e kwa bɛnyəpɛnyə e. Mo bɔ lə bɑ Simon yə Kirena, tá Aleksandrə pu Rufo. Wap lə lɑ Yeso gɔ nə tsʉ' yə pu khé gɑ́ Gɔlgota, a pɑ dá'tə gɑ tsʉ' kəlo' thə mo a. Wap lə pɑ̌ gɔ hɑ mlu' bi e bɑ pu ŋi'nyə mu' ywə nə, pu pɑ ŋkhe gɑ mira. Da' gɑ e kəŋnyə. Wap lə kwe e thə bɛnyəpɛnyə, biŋ nthamnthúŋ nə nə gaptə mdzə myə́ tə nə jyə́ yə bǎ ya mo lə gɔ ghə a. Wap lə́ ŋkwe é thə po'o nə mnam vʉ̌'. Pu lə və̌ nwə yə pu lə jwə e nə a gɑ́: Fo pɑ Yudea. Wap lə kwe é thə bɛnyəpɛnyə pu a shɑ́ msamshwə pɑpʉ́ə. Ŋkwe mu' nə ghəŋ tʉɔ e, ŋkwe mu' nə ghəŋ kwyap e, po'o gɑ ywə yə pu lə və a pəmtə gɑ: Pu lě sɛ é nə dəŋ pɑ ghə mnwə cwəpùŋ. Pɑ cyəjyə lə cyə́ bɑ ŋʉ' thə nə jəmtə é bɑ gɔm gɑ: He! Wə yə o sa'tə Dyə́ Si ŋkwɑ nə tyɛ' tá a, vɔk kwa' thə́ nɑ o pɑ wə fi' thə́ bɛnyəpɛnyə. Ba mkamsi gwyə́gwyə́ pu a pɑ zhyə mco' lə pɑ gwi e yap cəcɑ̌ pu bɑ gɔm gɑ: E lě bvɔk shɑ́ pɔ, pɑ kwa' yʉ lə vɔk thə́ nɑ é. Kristo, fo pɑ Yudea, e fi' thə bɛnyəpɛnyə cwəlɔ̌ pyə yɔ́ biŋ é. Ba pɔ pyə pu lə kwe wap pu a pu a lə yə̌mtə e yap. A lə kə̌m mɔkcʉ́, jʉ̌m lɑ guŋ dəmca' awɛ tə ŋkhəm nə nam tá. A lə kəm nə nam tá Yeso cwé tə thə́ gɑ: Eloi, Eloi lama sabaktani? A pɑ́ nthútə́ gɑ: Si a, Si a, o gwa' a gɑ kɑ̀? Shɑ̀ pɔ pyə wap lə̌ tsʉ'u a lə nə yu' po'o bɑ gɔm gɑ: E yɑ́ bɑwə ŋkhe Elia. Mu' mo lə ŋkhʉ̌dʉ́ gɔ nyəŋ cù'ywə́ nə mlu' shɔkcɔ̌k, sú nə ka'cyə, nya bi e gɑ e nwə biŋ gɔm gɑ: Cʉ' pɑ̀ yɔ pa' Elia gɔ sɔ' fi' e thə a. Da' gɑ́ Yeso lə cwě tə thə́, pfʉ́. Dzə Dyə Si lə sɔ bak bʉ́ə fɑ thə́ ŋkhəm si. Tádyə msə̌ŋwi pɔ ŋkhə yə e lə bɑ ě tiŋnyə dzə e a lə nə yɔ gɑ ě pfʉ̀ po'o gɔm gɑ: Kwa' nyənyɔ bɛ yəŋ kɑ bɑ Mu Si. Ba shɑ pɑ jwǐ lə bɑ yap tsʉ'u bɑ wap tiŋnyə gʉə sʉəsʉə bɑwə jɔ. Maria yə Makdala, ba Maria ma Yakop mo ŋkho' pu Yoze, ba Salome lə bɑ cəcɑ̌ pú. Wap lə bɑ pɑ jwǐ pyə wap lə bɑ jʉ̌m Yeso bɑ fa' bi e cwə yə e lə bɑ Galilea pu a pyə shɑ́ pɔ tə jɔm pyə wap lə pʉɔ pu a pú sɔ' Yerusalɛm a. A lə wuŋ nə pɑ́ bwadzʉ̌, pa' a lə bɑ tyɛ' nə nyaptə nɑ, dzʉ̌ pɑ gɔ lɔ a pɑ́ Sabat a, mu' mo gwyə́ nə cu'tə, tso tsyə pɑ Yosɛp yə Arimatea sɔ'. Ba yʉ́ yə́ lə bɑwə byap Nəfo Si. E lə ghə kaktʉɔ nə ko ywə́ Pilato nə həŋtə pfə́ Yeso. Nwə lə cyə Pilato gɑ ě da' pfʉ́. E lə ke tadyə msə̌ŋwi pɔ ŋkhə həŋtə e gɑ pa' e la' pfʉ́ a ǎ cwə te' kilə́? Tadyə msəŋwi lə siŋ e pa' a bɑ a, e piŋ gɑ Yosɛp lɑ pfə e. Yosɛp lə ghɔ̌ jo dzə cwəlɔ, fi' pfə Yeso thə́ bɛnyəpɛnyə, dzʉm e nthʉm dzə bɔ, nyəŋ e nthʉm thəsì yə a lə bɑ pu təŋ nə wǔ gwɔ' a, biŋ ŋkheŋnyə mu' gwɔ' jap shwə thəsì bɔ. Maria yə Makdala pu Maria má Yoze lə bɑwə jɔ tsʉ' yə pú jap pfə Yeso nə a. Sabat lə cyə̌, Maria yə Makdala ba Maria ma Yakop pu a Salome yó mwɑ́ damnyəlamnyə nə́ nə gɔ shi' pfə Yeso. A lə pɑ̌ mɑ fɔkdzʉ̌ nə dəŋdzə tyɛ'dzʉ́ nə gapdzʉ́, wap ghɔ thəsì, nə cwə yə nàm sa' a. Wap lə bɑwə gɔm cəcɑ̌ pu gɑ: Wɑ̌ gɔ ko kéŋnyə gwɔ' nə shwə thəsì bi pu? Wap lə nə pʉ' mnyə map jɔ bɑ pú kéŋnyə gwɔ', mɑ wǔ gwɔ'. Wap lə kǒ nthʉm sì, jɔ mú sə̀m bɑ ě kwa fə́fə́ dzə́, shwəsi nə ghə̌ŋ tʉɔ. Wap lə pwɔk. Da' gɑ gɛ ghɔm bi pu gɑ: Ka po pwɔk. Pǒ shə́ŋ Yeso yə Nazarɛt, yə pú kɑ kwé e thə bɛnyəpɛnyə a, e yam nə vʉ̌, e tə̌ tsɔ pɑ̀; po yɔ tsʉ' yə pu kɑ yap e nə a yə̌ŋ. Da' gɑ́ po ghɔ gɔm bi pɑkhʉ̌ pyə ba m bi Pɛtrɔ gɑ: E tamdzə̌ po Galilea; po gɔ ko wə́ yɔ e pa' e lə ghɔm bi po a. Wap lə tə̌m cwəlɔ ŋkhʉ́ gɔ gʉə sʉəsʉə nə́ thəsì, nə pa' wap bɑ sə̀ŋ, nwə pɑ jʉm wap; da' gɑ la' wap ghɔm sɔm nwə bi sɔmmo nə pa' wap lə bɑwə bwɔk. Yeso lə yám nə vʉ̌ fɔkdzʉ̌ nə də̀ŋdzə tyɛ'dzʉ́ nə gap dzʉ́, də́ŋdzə da'tə nɑ e bi Maria yə Makdala yə e lə zhə́ŋ mzhwenyə cwəpùŋ sɔmbʉə nə e a. Maria bɔ ghɔ siŋ pɔ pyə pu a Yeso lə pɑ nə vʉ̌ bɑwə dɔ a. Da' gɑ́ pɔ bɔ lə nə yǔ' bi Maria gɑ Yeso pɑ nthʉɔ, gɑ e yɔ é, wap lə piŋ. E lə kwi' da'tə nɑ e bi shɑ pɔ nə pú pɑpʉə m nə mu' nthi; pɔ bɔ lə bɑ məjyə bɑwə gɔ m gǒ. Pɔ bɔ lə pɑnyə siŋ pyə shɑ́ pɔ. Da' gɑ́ la' wap piŋ. E lə pǐŋ ŋkwi' da'tə nɑ e bi pɔ shwamu' mghǎm. Wap lə bɑ tɑpe bɑwə dzʉ́ ywə́. E lə paptə wap nə zhʉ'nyə pu a sɔk tʉ́m yə wap bɑ wap ghə a, nə pa' wap la tə piŋ pɔ pyə wap lə yɔ e bɑ ě yam nə vʉ̌ a. E lə ghɔm bi pu gɑ: Po ghɔ nə guŋ dzʉ́ awɛ siŋ Cùŋ pɑpuŋ bi guŋ tsə tsyə Si lə nyaptə á. Mo yə ě piŋ ŋkwishyə a gɔ sɔ' vɔk, mo yə e ka piŋ a, bɑ pu gɔ sɔ' nyəŋ shɛ thə́ e. Mtìŋ myə a gɔ sɔ' pɑ bi pɔ pyə́ wap piŋ a bɑ gɑ: Wap gɔ sɔ' pɑ lɑ tso tsɑ̌ zhəŋ mzhwenyə cwəpuŋ, pɑ ghɔ́m mghɔ̀m sə́, pɑ lɑ bú map ghəm mnɔk, bi a wap nwə pɑ mcɔp myə a jwə mo a bɑ a tə gɔ ghə sɔmywə nə pu pɑ́; wap gɔ sɔ' pɑ yap bù map nə mghɛ gho wap yɛ́tə. Cyəpɔ Yeso lə cwə̌ tə gɔm bi pu po'o, pu lɑ e m kɛbə̀ŋ e cwə́ nə ghəŋ tʉɔ Si. Sɔ' m nə pú, wap lə ghɔ̌ bɑ siŋ Cùŋ pɑpúŋ nə guŋ mtsʉ' awɛ: Pu a Cyəpɔ pɑ bəmtə fǎ', e pɑ dɑ mtìŋ myə a lə́ nthəm jʉ̀m Ghɔm á gə pu cəŋtə biŋ Ghɔm tsyə́. Pa' pɔ jɔmyɔ̌m lə to' nə və mnwə myə a lə cyə cəcɑ̌ pɑ a, bvə ywə yə pyə lə yu' bi pɔ pyə wap lə́ bɑ́ si tə fɑ cwə nə to', jɔ nwə bɔ, shʉ' mghɛ ŋkwinthɛ̌ nə́, bɑwə dɑ mghɔm bɔ sa dzʉ á, a lə́ puŋ gɑ́ ŋ de mnwə nə́ pa' a pɑ nyənyɔ tə fɑ nə zhitə a, tə́ bvə bu nə ŋkhɛ dəŋdəŋ, wə tá Teofilə, tə o nə jyə́ nyənyɔ nə mnwə myə pu siŋ o gɑ o zhyə a. A lə pɑ̌ nə́ cwə yə Herode lə́ bɑ́ fo pɑ Yudea á, mu' ŋkhamsi pɑ wə tso tsyə pɑ́ Sakaria, e pɑ́ nə kam Abia. Jwi é lə́ bɑ́ gwya mo Aaron, tso tsyə pɑ Elisapet. Wap lə́ bɑ́ pɔ dəŋdəŋ dzə̌ Si, bɑ giŋ nə mco' Cyəpɔ nyənyɔ bɑ́ gə pa' Si shəŋ a. Wap lə́ bɑ wap ka wim mú, nə pa' Elisapet lə́ bɑ́ ŋkhíŋ, bɑ wap vò. A lə kəm nə cwə yə yə́ kam pɔ Sakaria lə́ bɑ́ gɔ fa' fà' Si a, nthuŋ tsʉ́ e pa' mà mkamsi lə́ bɑ́ cwə o bɔ a, gɑ́ yʉ́ nə gɔ ko nə tsʉ' yə pu ntho phə̀ damnyəlamnyə nə shwyɛ'nyə Si dyə Cyəpɔ a. Guŋ pɔ awɛ lə́ bɑ́ dzʉ cwə nə to ywə nə shwyɛ'nyə Si bɑwə shwyɛ'nyə Si. Aŋgəle cyəpɔ lə ŋwak dzə̌ Sakaria, nthiŋnyə nə́ ghəŋ pu tʉ̀ɔ, bəŋ tuŋmɔk nə ntho ywə damnyəlamnyə. Sakaria lə nə yɔ e, lam tsyə sɔ, e pwɔk. Aŋgəle ghɔm bi é gɑ: Kɑ́ pwɔk m Sakaria, Si bɑ ě yu' mcwyɛ'nyə mǔ; jwi o Elisapet gɔ sɔ' tsə ta' mu mbɛ bu, o ke tso tsyə gɑ́ Yohane. O gɔ sɔ' ŋwɛnyə nə é te', ba bo'gwyə pɔ ŋwɛnyə yap nə cwə yə pu tsə é a. E gɔ sɔ' pɑ́ mo gwyə́ dzə̌ Cyəpɔ. E tə gɔ sɔ' pɑ́ nwə mlu' pɑ, kɑ bǎ kɑ́ ywə́ nwə yə a fɛnyə mo a lə, é lə nwə́. Pu gɔ sɔ' nə tsə é bɑ Zhwenyə Dɔlɔ̌ lo nə é. E gɔ piŋ sɔ' lɑ bo'gwyə pɑ Israɛl nə sɔ' dzə̌ Cyəpɔ Si yap. E gɔ sɔ' pɑ ghiŋ nə zhwenyə, ba gʉ' Elia, dzə̌ Si, yáp kwishwə cəcɑ̌ mtǎ pu a po pap; ghə pɑ tə yu'shwə ghə́ zhyənwə pɔ nyənyɔ. Po'o gɑ́ wap cʉ' pɔ pyə pu nyaptə wap bi Cyəpɔ a. Sakaria ghɔm bi aŋgəle gɑ: Gɑ̌ gɔ lɑ kɑ́ zhyə gɑ́ nwə yə o gɔm a, ǎ nyənyɔ? Gɑ̌ bɑ gɑ̌ vo, mgu'dzʉ jwi a piŋ bɑ́ bɑ ǎ ghɔ dzə. Aŋgəle pa' bi e gɑ: Gɑ̌ bɑ́ Gapriya, gɑ̌ shwə bəŋ Si. E nthəm a gɑ sɔ' gɔm bu po'o, siŋ o yəŋ cuŋ pɑpúŋ. Cwəlɔ o gɔ zhi tə ghɔ̀m, o lə piŋ gɔm tə kəm tyɛ'dzʉ́ yə yəŋ nwə pəmtə a. Nə pa' ǒ tédʉ' nə ghɔm tsɑ̌ tsyə a gɔ sɔ' pəmtə a. Pɔmnəŋ lə́ bɑ́ dzʉ́ byap Sakaria, nwə pɑwə shyə wap, nə tiŋ pa' e nə shwə tsʉ' to ywə a. E lə təm dyə, bi a pɑ́ é lə ghɔmnwə jyə. Pɔmnəŋ zhyə gɑ e kodyə nə yɔ m nthʉm zhwenyə. E cʉ' bɑ gə pɑ nthinthi mtìŋ, shwə pɑ tə ghɔm. Myə́ mtyɛ' fa' lə́ mǐ, e pɑnyə la' é. A nə cwə muywə, jwi e Elisapet fə̀ŋ. Dʉmnyə nə mŋwə nthɔkə, bɑ gɔm gɑ: Si bɑ ě lɑ mnyə cɔmmtso dé a, nthé kuso nə m̀ dzə pɔmnəŋ. A lə pɑ̌ nə́ mŋwə nthɔkə, Si tə́m aŋgəle Gapriya nthʉm mu' tisuŋ Galilea, tso tisuŋ bɔ pɑ́ Nazarɛt, bəŋ mu' mú gò, bɑ mǒ ko nə é, tso tsyə́ pɑ Yosɛp, mo nə́ tuŋdyə́ David. Tsǒ gò bɔ lə́ bɑ́ Maria. Aŋgəle kodyə é gɔm gɑ: Ŋwɛnyə! Wə yə Si jɔ o pɑpuŋ a, po Cyəpɔ nə bɑ. Ghɔm tsɔ gɑ lə sɔlam Maria, tɑ e pɑ həŋtə gɑ: Yəŋ nthi ca'tə po'o bɑ́ da'tə gɑ́ kɑ̀? Aŋgəle ghɔm bi e gɑ: Kɑ́ pwɔk m Maria. O bɑ Si gho' o. O gɔ pɑ tsʉ́m, tsə mú mbɛ, cwə̀ tso tsyə́ gɑ́ Yeso. E gɔ sɔ' zhi tə', pu pɑ ŋkhe e gɑ Mú Si tə́ thə́ kɛbəŋ. Cyəpɔ Si gɔ sɔ' hɑ Nəfo tap e David bi é. E gɔ sɔ' pɑ́ fo mama nə gwya Yakop, yə nə sa' tə́ gɔ la' mi pɑ. Maria ghɔm bi aŋgəle gɑ: Yəŋ nwə gɔ cyə m gɑ́ kɑ tə́ pəmtə̌, nə pa' ŋ kha zhyə mbɛ a? Aŋgəle pa' bi e gɑ: Zhwenyə Dɔlɔ̌ gɔ sɔ' pɑ́ nə́ o, gʉ' Si thə kɛbəŋ pɑ pfɔptə o. A shyə m po'o tə́ mu yə o gɔ sɔ' tsə e á pɑ Dɔlɔ̌, pu pɑ ŋkhe é gɑ Mú Si. Zhyə gɑ́ fɑ o Elisapet yə a bɑ e vo a kě fəŋ tə ǎ wə́ bɑ́ mŋwə nthɔkə pa' e pɑ tsʉm á, yʉ yə pu lə́ ŋkhe é gɑ ŋkhiŋ mjwǐ a, nə pa' sɔmywə yə a cyə Si a, a tə̌ wə pɑ́. Maria ghɔm gɑ; gɑ̌ bɑ́ ŋkwɔ Cyəpɔ. Ywə yə o gɔm nə m̀ a pəmtə! Aŋgəle ghɔ. Maria lə lǔ pɑ́ cwə o bɔ, bʉɔ m gʉ̌' gɔ nə mu' tisuŋ Yudea ŋkho dyə Sakaria; sha'tə Elisapet. Elisapet lə nə yu' ca'tə Maria, mú ŋaknyə vam é, e lonyə nə Zhwenyə Dɔlɔ̌. E cwe tə thə́ gɔm gɑ: O bɑ mjwǐ byanyə cəcɑ̌ pɑ jwǐ, Mu yə e vam o a, pɑ mu byanyə. A shyə m gɑ́ kɑ̀ tə́ má Cyəpɔ a piŋ nə́ sɔ' bəŋ m̀? Nə pa' gɑ̌ nə yu' gi ca'tə o, mú a ŋaknyə vam m̀, ŋwɛnyə́. Buŋtsě bɑ́ mjwǐ yə e piŋ a, nə pa' ywə yə Cyəpɔ gɔm bi a gɔ sɔ' pəmtə. Maria ghɔm gɑ: Lam tsɑ ghamtə Cyəpɔ ba zhwenyə a ŋwɛnyə nə Si gɛvɔk a. E le ŋkwɔ e yə e fi' nɑ e hɑ si a; tə fɑ́ cwəlɔ guŋ pɔ nə guŋ mwɔ dzʉ awɛ gɔ ghɑ pɑ ke a gɑ buŋtse mjwǐ. Nə pa' Gʉ' gwyə bɑ e ghə msya nə m. Tsó tsyə bɑ dɔlɔ̌. Puŋnthʉm e bɑ́ nə pɔ pyə wap bwɔk e a mzhəŋ mzhə̀ŋ. E lě dɑ gʉ' bu myə́ nə́ sa'tə mghɛ ŋa'nɑ. E lě ŋkwɔktə mfomfo nə́ mkwɔ' map, ŋa' pɔ pyə wap fi' nɑ hɑ Si a hɑ thə́. E lě gə mghɛ jikǔ' cʉ́' pɑ ghə ywə, mghɛ ywə pʉɔ shʉ' mpəŋ. E lě ŋkwitə Israɛl ŋkwɔ e. E lě ŋkhamtə cɔmmtso e. Pa' e lə ka' bi mta pɔk pɑ Abraham, ba gwya e nə guŋ mcwə awɛ. Maria pu Elisapet lə cwə gwɛ a mŋwə tá. E pɑnyə la' é. Cwə yə Elisapet lə bɑwə gɔ tsə́ a lə kǔ', e tsə́ mú mbɛ. Mghɛ dhə dyə pu a mfɑ pyə lə nə yu' gɑ́ Cyəpɔ cɔmmtso myə́, pu a pu ŋwɛnyə. A lə nə́ kəm tyɛ'dzʉ hɔ̌m pu sɔ' m nə́ vo mú, pu pɑ́ gɔ ké tso tsyə́ gɑ Sakaria, nə tsǒ tap e map e ghɔm gɑ: Pu gɔ ke é gɑ Yohane. Pu ghɔm gɑ: Sɔmmo tə̌ nə́ tuŋdyə o tsó tsyə pɑ́ Yohane pɑ̀. Wap lə lɑ mtiŋ həŋtə ta mú pa' pu gɔ ke tso mú a. Sakaria lə́ kwi tɑ̌fi ŋwa' nə gɑ: Tso tsyə bɑ Yohane. A zhʉ̌m pɔmnəŋ. Shwə é lə́ wuŋ gyɛ', tʉm é kyɛ' e to' nə ghɔmnwə, go'tə Si. Pɑ giŋnyə tsʉ'u pwɔk, pu pɑ shyanyə mnwə bɔ kuŋ Yudea awɛ. Bǎ wɑlə lə́ yu' nwə bɔ bɑ ŋkhamtə, lə́ bɑ gɔm gɑ: Yəŋ mú gɔ sɔ' pɑ́ m gɑ́ kɑ? Mtʉɔ Si cəŋtə bɑ nə e. Zhwenyə Dɔlɔ̌ lə lo nə tap e Sakaria e ghɔm ghɔ̀m Si gɑ: Byǎnyə bi Cyəpɔ, Si pɑ Israɛl, nə pa' e sɔ' ŋkwi pɔ pyə. E hɑ gɛvɔk pɔ bi pɑ, shyə nə́ tuŋdyə́ fo David ŋkwɔ e. Ywə yə e lə la' shyə m nə shwə mghɛ ghɔm ghɔ̀m tsyə́ cwə dzə̀ gɔm a, ywə vɔk yə a ŋkwi wɔk pɑ bi mghɛ bo pɔk pɑ a. E la'tə cɔmmtso e bi mta pɔk pɑ, ŋkhamtə kɔ tsyə pu a pu lə wɑ á, kɔ dɔlɔ̌, e ka' bi Abraham ta yɔk pɑ gɑ́ cwə yə e gɔ sɔ' te wɔk pɑ dyə mkwɔ a pɑ pɑ́ fá' bi e tə pwɔk. Bɑ giŋ dzə e, dɔlɔ̌, dəŋdəŋ, nə guŋ mtyɛ'dzʉ vɔk mɔk pɑ awɛ. Sɔ' m nə wə mubwǎ, pu gɔ sɔ' ké o gɑ gɔ̀m ghɔm Si tɑ́ thə́ kɛbəŋ. Nə pa' o gɔ sɔ' pɑ ghiŋ dzə Cyəpɔ nyaptə məjyə e. Ghə pɔ pyə́ zhyə́ ywə vɔk shyə m nə́ nə lɑ mhɔ map shwyɛ' wap! A bɑ́ nwə cɔmmtso Si yɔk pɑ. Tə́ nam fɑ thə́ ŋkhyɛ' wɔk pɑ. A ŋkhyɛ' pɔ pyə wap lə bɑ wap cwə nthʉm jʉm vʉ a, da'tə wɔk pɑ məjyə hwitə Sɔ' m nə́ mú bɔ̌, é lə́ pɑ̌ kwyə, bɑ́ gə gʉ' nə zhwenyə e. E lə cwə̌ ghakgo tɑ́ ŋkhəm tyɛ'dzʉ yə e lə la'tə nɑ́ e bi Israɛl a. A lə́ pɑ̌ cwə o bɔ, Kasa Ogwisto ghɔm gɑ́ pu sɛ́ guŋ pɔ awɛ dəm sicǎ'. Yəŋ dəŋdzə nə́ sɛ pɔ lə́ bɑ́ cwə yə Kirinus lə́ bɑ́ gɔpna' Siria lə. Bǎ wɑ̌ lə́ pɑ́ gɔ la' pú, pú və tso tsyə́ nə ŋwa'nyə nə sɛ́ pɔ̀. A lə́ pɑ̌ po'o ba Yosɛp lu Nazarɛt, nthʉm guŋ Galilea, gɔ nthʉm guŋ Yudea, tisuŋ Bɛtəlehɛm pfəla' fo David, nə pa' e lə bɑ mo nə́ ŋkhədyə fo David a. Po'o gɑ pu sɛ́ wap pu Maria jwi e yə é lə́ bɑ́ m tsʉ̌m a, bvə mtso map nə ŋwa'nyə nə sɛ́ pɔ. Wap lə ko tsʉ'u, cwə yə Maria lə́ bɑ́wə gɔ tsə́ a ku'. E tsə́ mu mbɛ, thə́sə e. Dɑ mkam dzə́ nə dzʉmtə é, nuŋ é nthʉm kɔp ywətsʉ mnɔm, nə pa' tsʉ' lá tə́ jɑ dyə mghʉɔ bi pu pɑ́. Shɑ mghɛ pyapdzə́ lə́ bɑ́ kwɛ tsʉ'u, bɑ pé mtsʉ' bɑ́wə de dzə́ tsap. Wap lə nə yɔ aŋgəle ŋwak dzə̌ pú, ghu'tə Cyəpɔ ləŋnyə nə pu, wap pwɔk te' o, sə́ŋ. Aŋgəle ghɔm bi pu gɑ: Ka po pwɔk, gɑ̌ sɔ' siŋ wɔ cùŋ pɑpuŋ yə bǎ ya mo lə́ gɔ nə yu' pɑ ŋwɛnyə a. A bɑ gɑ nthʉm tisuŋ fo David tyɛ' ɔ pu tsə́ gɛvɔk pɔ, yə e bɑ Kristo, bɑ Cyəpɔ a. Mtiŋ myə po gɔ ko nə zhyə e á bɑ́ gɑ́ po gɔ ko wə yɔ mubwǎ bɑ pu lə mkam dzə́ nə dzʉmtə é, nuŋ é nthʉm kɔp ywətsʉ mnɔm. Wap lə nə yɔ, vəŋ m aŋgəle sɔ' nthamtə nə aŋgəle bɔ pu a pu pɑ jwɔpshyə gamtə Si gɔm gɑ. Ghu'tə bi Si thə́ kɛbəŋ, byanyə pɑ dəmcǎ' bi pɔ pyə é ŋkhuŋ wap a. Cwə yə pɑ aŋgəle lə pɑnyə m kɛbəŋ á, mghɛ pyapdzə ghɔm cəcɑ̌ pu gɑ: Pɑ ghɔ tə ŋkhəm Bɛtəlehɛm, jɔ ywə yə a nthəm wə a, ywə yə Cyəpɔ gə gɑ́ pɑ zhyə a. Wap lə ŋkhʉdʉ̌ gɔ wə́, ŋkho jɔ Maria pu Yosɛp ba mú bɑ pu nuŋ é nthʉm kɔp ywətsʉ mnɔm. Wap lə yɔ e po'o, gɔm guŋ mnwə awɛ myə wap la' ju' nə mu bɔ a. Bǎ wɑlə yə e lə yu' nwə bɔ bi mghɛ pyapdzə́ a, a lə zhʉm é te'. Maria lwɔ' guŋ mnwə bɔ awɛ nthʉm tʉm e bɑ ŋkhamtə. Mghɛ pyapdzə lə nə́ pɑnyə giŋ jwɔp nə ghu' Si nə pa' ywə yə wap jɔ biŋ ju' a pəmtə nə ywə yə pu lǎ' siŋ wap a. A lə nə́ kəm tyɛ'dzʉ hɔ̌m, tyɛ' nə vo mú; pu ké tso tsyə gɑ Yeso; tso tsyə aŋgəle lə ghɔm tə́ pu la' fəŋ mú bɔ a. Dəŋ mtyɛ'dzʉ nə sɔk mviŋ nə pu lə nə́ ku', pa' a bɑ nə mco' Mosɛ a, Yosɛp pu Maria kwa é nə́ gɔ Yerusalɛm nə la'tə é bi Cyəpɔ. Pa' a bɑ nə́ mco' Si bɑ pu və gɑ: Guŋ mthəsə po pɑ bɛ gɔ sɔ' pɑ́ bi Cyəpɔ! Biŋ hɑ́ ywə yə mco' gɔm a nə nuŋpwɔ' bi Si; a pɑ pǒ msəŋgɔpfo pɑpʉə kɑ pǒ mzhwəkuku pɑpʉə lɑ. A lə́ nə́ pɑ̌ po'o mu' mo pɑ́ Yerusalɛm, tso tsyə́ pɑ́ Simeon. E lə́ bɑ́ kwa' biŋ Si mkù', bɑ́ mo dəŋdəŋ, Zhwenyə Si pɑ nə é. E lə́ bɑ́wə byap gɑ Si gɔ sɔ' zhwyətə́ Israɛl. Zhwenyə Dɔlɔ̌ lə́ bɑ ǎ ghə e zhyə gɑ́ e tə gɔ sɔ' pfʉ tə yɔ Kristo yə Cyəpɔ nthəm é a pɑ. Zhwenyə Dɔlɔ̌ lə ghə e sɔ' Dyə Si tyɛ'dzʉ bɔ. Pa' tá Yeso pu map e lə lɑ̌ é sɔ' Dyə Si nə ghə ywə yə mco' gɔm nə e a. E lə kwi é, go'tə Si, gɔm gɑ: Cyəpɔ, bi a pɑ o tak ŋkwɔ o nəŋ cwəlɔ e ghɔ, pa' o lə ghɔm a nə hwitə. Nə pa' mnyə́ mə̌ yɔ ywə vɔk. Ywə vɔk yə o nyaptə bi guŋ pɔ awɛ, ŋkha' nə ŋkhyɛ' mgùŋ. Ghu'tə bi Israɛl pɔ pǔ. Nwə lə zhʉ̌m ta Yeso pu map e nə mnwə myə pú lə bɑwə gɔm nə é a. Simeon nyəŋ byanyə nə e, gɔm bi Maria map e gɑ: Shɑ pɔ gɔ sɔ' cyə m nə mu yə̌ŋ vʉtə sí, pyə shɑ pɔ cyə m nə é bvɔ̌k nthʉm guŋ Israɛl. E gɔ sɔ' pɑ mtiŋ fəŋnyə́ nwə. Pɛ nyə́ gɔ sɔ' swɔp tʉm tsǔ m Maria. E gɔ sɔ' ghə gɑ́ guŋ mfʉ̀m myə pɔ jɔmyɔ̌m dʉm nthʉ́m tʉ́m pu a tə́m pu yɔ. Mu' gɔ̀m ghɔm Si, mjwǐ, lə bɑ́ yə́ Dyə Si tyɛ'dzʉ bɔ. Tso tsyə́ pɑ́ Ana, mu Fanuɛl, nə gwya pɑ Asɛr. E lə́ bɑ́ gətso mjwǐ, bɑ e lə lɔmdyə, pu dhə e cwə da' gu' sɔmbʉə. Dhə e pfʉ tə fɑ po'o e zhi pfɔ̌k. E lə nəŋ biŋ dɔmdyə. A lə́ bɑ ě ghə gu' shwɔppfʉə mgham hɔm, bɑ shwə pɑ Dyə Si. Bɑ fa' bi Si guŋ nthyatə ba m mɔkcʉ; bɑ shwə tə tsʉ̌ ywə nthʉm cwyɛ'nyə Si. E lə ŋwak yə cwə o bɔ, go'tə Si, siŋ mcuŋ Yeso bi guŋ pɔ awɛ pyə wap lə bɑwə byap gɑ Si kwi Yerusalɛm a. Yosɛp pu Maria lə miŋ guŋ ywə yə mco' Cyəpɔ lə yap gɑ́ pu ghə a awɛ, bɑnyə Nazarɛt nthʉm guŋ Galilea la' pu. Mú pɑ ŋkwyə́, bɑ nthʉɔ, gə zhyənwə; gho' Si pɑ nə e. A lə́ bɑ́ nə guŋ mgu'dzʉ awɛ, ta Yeso pu map e pɑ gɔ Yerusalɛm nə́ ŋwɛnyə Paska. Yeso lə ghə gu' shwɔppʉə mgham pu a pu pəmtə gɔ nə́ Paska pa' a lə bɑ́ nə mà á. Paska lə mǐ, wap nə pɑnyə, Yeso mú səm wuŋ Yerusalɛm la' wap zhyə. Wap kwɛ gɑ e m̀ dzə̀ pu a pyə shɑ pɔ̀. Wap lə ghiŋ ta' tyɛ'dzʉ, shəŋ e cəcɑ̌ mfɑ pap kəkɔ. Wap lə pɑ tə yɔ é, bɑnyə Yerusalɛm nə cəŋ e. Wap lə cəŋ é nə mtyɛ'dzʉ mɑntha, jɔ e Dyə Si, cəcɑ̌ pɑ la'tə ywə́ e pɑwə ju' ywə yə wap lə bɑwə gɔm a biŋ bɑwə həŋtə wap nwə nə́. Bǎ wɑlə́ lə́ bɑwə nə yu' pa' e gɔm nwə á, a zhʉm é, nə tiŋ zhyənwə pu a mpʉɔnwə myə́. Tap e pu map e lə́ nə yɔ é, nwə cyə wap, map e ghɔm gɑ: Yə o gə nə pyə po'o a bɑ kɑ? Pyə tɔ̌ bɑ́wə nə cəŋ o lam tsɔk pɑ́wə sɔ. E ghɔm bi pu gɑ: Po shəŋ a gɑ kɑ? Po ka zhyə gɑ gɑ̌ gɔ pɑ́ pɑ́ pɑ́ ywə Tá a? E lə ghɔm po'o la' wap yu' kwa' pɑpuŋ. Pu a pu lə pɑnyə Nazarɛt. E pɑ ju'shwə yap. Map e lwɔ' guŋ mnwə bɔ awɛ nthʉm tʉm e. Yeso pɑ kwyə nə zhyənwə, nə gʉ̌', ba nə byanyə Si, dzə Si, ba m dzə pɔmnəŋ. Kasa Tibɛrə lə nə ghə gu' shwɔptɔ mghǎm dəm nəfo, cwə yə Pontio Pilato lə́ bɑ́ gɔpna' pɑ Yudea; cwə yə Herode lə́ bɑ́ fo Galilea; cwə yə Filipo fɑ Herode lə́ bɑ́ fo Trashonitə, cwə yə Lizanias lə́ bɑ́ fo Abilena a; gu' yə Ana pu Kaifa lə́ bɑ́ mtadyə mkamsi a. Ghɔm Si sɔ' bi Yohane mú Sakaria e pɑ ghakgo. E ghɔ nə mguŋ giŋnyə Yurdɛŋ bɑ shyanyə nwə nə kwishyə pʉɔtʉm, po'o gɑ si lɑ mhɔnwə mo nə shwyɛ' e. Dəŋdəŋ pa' a bɑ̀ pu və nthʉm ŋwa'nyə mghɔm Esaya gɔm ghɔ̀m Si gɑ: Gi mo ghakgo shwe gɔm gɑ: po nyaptə məjyə Cyəpɔ. Siŋ mpim jyə pú gɔ sɔ' lonyə msʉ̀m, sɛtə́ mkǔŋgó sʉəsʉə ba myə ŋkho'ŋkho', siŋ mtsìŋ a tiŋnyə, ghə mlo'mló' jyə sɛ́tə́. Guŋ pɔ awɛ yɔ ywə vɔk Si. Pɔmnəŋ lə sɔ' tə jɔm gɑ é nu' wap shyə. E pɑ́ gɔm bi pu gɑ: Gwya nɔk mtiŋ. Wɑ̌ da'tə́ wɔ nə ŋkhʉ yɛluŋ Si yə a wə sɔ' a? Po yam nthɔm myə a ku'nyə nə pɔ pyə wap pʉɔtʉm tsap a. Ka po pɑ́ gɔm pɑ́ gɑ́ pǒ bɑ́ po Abraham, gɑ̌ wə siŋ wɔ gɑ́ bi a pɑ́ Si lɑ mwɔ' mɔ nə gə po Abraham. Po zhyə gɑ́ jɔm é da' bɑ to mthə. Yə́ ta'thə yə a tə́ jam nthɔm pɑpuŋ a pɑ, pu gɔ ko' to mɔk. Pɔmnəŋ lə bɑ həŋtə Yohane gɑ: Pyə gɔ ghə m gɑ́ kɑ? E ghɔm bi pu gɑ: Mo yə e ghə dzə́ yɑpʉə a e ghap hɑ́ yə mo yə e ka ghə ywə a. Mo yə e ghə ywətsʉ a ghə pɑ po'o. Shɑ mghɛ kwishwɔp lə sɔ'yap nə kwishyə gɔm bi e gɑ: Ta tə pyə gɔ ghə yɔk gɑ́ ka? E ghɔm bi pu gɑ: Ka po kwi' dəŋ ywə yə pu gɑ po kwi a. Msə̌ŋwi lə həŋtə e yap gɑ: Pyə gɔ ghə yɔk gɑ ka? E ghɔm bi pu gɑ: Ka po hya mo, kɑ nə fʉtə é lɑ. Po wuŋ yo da' nə dəŋ ŋkhap fa' yɔ. A lə́ bɑ́ cwə o bɔ guŋ pɔmnəŋ awɛ pɑwə byap Kristo. Pu zhi nə pɑ həŋtə gɑ́ jyə gɑ Yohane tə bɑ́ Kristo a kilɑ́? Tə́ Yohane pɑ ba' bi guŋ pɔ awɛ gɑ: Ŋ gɑ̌ bɑwə nu' wɔ pɑ shyə; Mu'mo jʉ̌m m̀ bɑwə sɔ̌', bɑ e tʉɔ shyə a, bɑ ŋ kha ku'nyə nə kyɛ' ŋkhə mthap myə́. E gɔ sɔ' pɑ nu' wɔ nthʉm Zhwenyə Dɔlɔ̌ pu mɔk. A bɑ ě wim ywə nə nthya pu é. E gɔ tya mduŋ tsə́ pɑpuŋ nyəŋ ŋkhiŋ. A cʉ' mgha' tsə e su mɔk tə la' bi nə́. Yohane lə lɑ̌ nthinthi mghɔm sə́sò nə siŋ Cùŋ pɑpuŋ bi pɔmnəŋ. A lə pɑ̌ po'o fo Herode yə Yohane lə bɑwə shɔk e, bɑ e té Herodia jwi fɑ́ e nə gə jwǐ e, ba nə shɑ́ mbɔkbɔk nwə tə a yɔm a nə miŋ ma'nə, gəm Yohane nyəŋ e dyəcɛ̌. Pa' guŋ pɔmnəŋ awɛ lə pɑ̌ ŋkwishyə á, ba Yeso lə kwi yə shyə tə bɑ́ shwyɛ'nyə Si, kɛbəŋ ghyɛ' Zhwenyə Dɔlɔ̌ fi' sɔ' nə e pa' səŋgɔp fo a: Pu yu' gi mo fɑ kɛbəŋ gɔm gɑ: O bɑ mú a yə gɑ ŋkhuŋ e te' a, gɑ cwɔ' o tyɛ' ɔ. Yeso lə nə to' fa' bɑ é ghə gu' mghǎm nthá. E lə bɑ mu Yosɛp pa' pu lə ŋkwɛ á, mu Heli mú Mata, mú Levi, mú Meleki, mú Yanái, mú Yosɛp, mú Matatias, mú Amɔs, mú Naum, mú Esli, mú Nagai, mú Maat, mú Matatias, mu Semei, mu Yosɛk, mú Yoda, mú Yohanan, mú Resa, mú Zorobabɛl, mú Salatiɛl, mú Neris mú Meleki, mú Addi, mú Kosam, mú Elmadam, mú Er mú Yeso, mú Eliezer, mú Yorim, mú Mata, mú Levi mú Simeon, mú Yuda, mú Yosɛp, mú Yonam, mú Eliakim, mú Melea, mú Meŋna, mú Matata, mú Natam, mú David, mú Esaya, mú Yɔbɛd, mú Boos, mú Sala, mú Naasɔm, mú Aminadab, mú Admiŋ, mú Arni, mú Esrom, mú Farɛs, mú Yuda mú Yakop, mú Isak, mú Abraham, mú Tara, mú Nakor, mú Seruk, mú Rago, mú Falek, mú Ebɛr, mú Sala, mú Kainam, mú Arfatsad, mú Sem, mú Noe, mú Lamek mú Matusala, mú Enɔk, mú Yaret, mú Malelɛl, mú Kainam Enɔs, mú Sɛt, mú Adam, mú Si. Yeso lə nə́ fɑ Yurdɛŋ bɑ Zhwenyə Dɔlɔ̌ ló nə é. Zhwenyə bɔ lə lɑ́ é gɔ ghakgo Sata ləŋtə é nə tyɛ'dzʉ mghappfʉə. E lə cwə nə mtyɛ'dzʉ bɔ tə tsʉ sɔmywə. Cwə lə cyə̌, jikǔ' yɛ e. A pɑ́ po'o Sata ghɔm bi é gɑ: O pɑ Mú Si, o ghɔm gɑ́ gwɔ' yəŋ gɑ pʉɔ ji msɛ o tsʉ. Yeso pa' bi é gɑ: A bɑ pu və gɑ: Mo tə́ bvɔk da' nə msɛ́ pɑ́. Sata ka' é thə́, guŋ da'tə é guŋ nəfo dəmca' awɛ, gɔm bi e gɑ: Gɑ̌ gɔ hɑ guŋ nə́ sa' ba ghú'tə nə nəfo tsɔ bu. Nə pa' bɑ pu lě hɑ bəm, bɑ́ hɑ bi mo yə gɑ̌ kuŋ a. O kam mkwitə mǔ dzə̌ m̀ gamtə a, bɑ a gɔ cʉ' tsǔ. Yeso pa' bi e gɑ: A bɑ pú lé bvə gɑ: O gɔ pɑ ghamtə da' Cyəpɔ Si o, pɑ fa' da' bi e. Sata lɑ e gɔ Yerusalɛm; jap e dò Dyə Si, gɔm bi e gɑ: O pɑ Mú Si, o léŋ tsa' a shʉm si nə pa' a bɑ pu və gɑ: E gɔ pɑ ghɔm bi pɑ aŋgəle pyə́, wap pɑ byap o, bɑ ŋkwa o nə bu map, bwɔk gɑ o kɑ cwɔ'kwə o nə gwɔ̀'. Yeso pa' bi e gɑ: Pu gɔm gɑ o kɑ ləŋtə Cyəpɔ Si o. Sata lə lɑ̌ guŋ nthinthi mləŋtə awɛ dəŋtə é tə a mi, e lu bəŋ e gɔ̌ tə́ ŋkhəm cwə yə pu lə yap a. Gʉ' Zhwenyə Dɔlɔ̌ lə lǒ nə Yeso. E pɑnyə Galilea. Dəŋ e sɛ nə guŋ mtsʉ' awɛ. E pɑ ji'tə pɔ dyə́ sinagogə. Pu pɑ gu'tə é nə guŋ mtsʉ' awɛ. E lə ghɔ Nazarɛt, tsʉ' yə e lə kwyə̌ nə a. A pɑ tyɛ' Sabat, e ko sinagogə pa' a lə bɑ́ mɑ̀ bi a. E lə lǔsi nə̌ ke ŋwa'nyə. Pu hɑ ŋwa'nyə gɔm ghɔm Si Esaya bi e. E kyɛ', jɔ tsʉ' yə a lə́ bɑ pu və gɑ: Zhwenyə Cyəpɔ bɑ nə m. A bɑ e cwɔ' a gɑ gɔ shwi ŋkhʉɔ pɑpuŋ bi mpə̌ŋ. E nthəm a gɑ siŋ mkwɔ̀ gɑ wap tə yɑ mkwɔ́ pɑ́. Mfʉ yɔ tsʉ', pɔ pyə pu hya wap a, wap lusi, gɔm nwə gʉ' cɔmmtso Cyəpɔ. E lə pǔ ŋwa'nyə hɑ bi gɛfa' sinagogə, shwə́si cwəlɔ. Guŋ pɔ pyə wap lə bɑ sinagogə á pʉ' mnyə map nthʉ nə é. A pɑ po'o e ghɔm bi pu gɑ. Ghɔm tsɔ tsyə́ po du m̌ sí nə́ yu' nthʉ́m ŋwa'nyə a pəmtə tyɛ' ɔ. Guŋ yap awɛ pɑ gɔm pɑpuŋ nə e. A pɑ po'o nwə cyə wap nə́ nthi mghɔm gho' myə a lə́ bɑ́wə nthəm shwə é a. Wap pɑ gɔm gɑ: E tə bɑ mú Yosɛp a lə́? Yeso ghɔm bi pu gɑ: Po gɔ ghɔm kwa' ghɔ̀m tə tutə tsyə a bɑ gɑ: Gəgɛ pá nɑ o á, bəm. Po gɔ ghɔm bə̀m gɑ: Ghə ywə yə pyə ju' gɑ ǒ ghə Kapɛrnaum á tsɔ'ɔ, gǔŋ po. Tə gɑ̌ gɔ siŋ wɔ kwa' nyənyɔ gɑ pu tə biŋ sɔm gɔm ghɔm Si guŋ pu pɑ. Gɑ̌ siŋ wɔ kwa' nyənyɔ gɑ, nə dzʉ gu' tá mŋwə nthɔk nə cwə Elia, yə bəŋ lə cyətə lú nthʉm guŋ Israɛl, jiku'u yɛ́ nə́ guŋ dəmca' awɛ a, mpfɔk pɑ jwi lə́ bɑ́ nthʉm guŋ Israɛl tə jɔm da' gɑ pu la tə́ təm Elia ywə sɔmmo nə pu tə ne ywə pfɔk mjwǐ yə Sarɛpta, nthʉm guŋ Sidon. Ba m nə́ cwə Elize, gɔm ghɔm Si, mghɛ ka'pap lə bɑ nthʉm guŋ Israɛl tə jɔm. Tə́ sɔm la tə́ yɛ̌ tə ně da' Naaman yə Siria. Wap lə yu' po'o luŋ guŋ yap awɛ sə́ sinagogə, wap lusi, jəŋ e nə nthəm tisuŋ tə khəm shyə́ ŋkhuŋ nə kə̌ŋ yə a lə bɑ wap kwɑ tisuŋ yap nə a, bɑ gɔ kwɔk e ma' kʉm. Tə e cyə cəcɑ̌ pu, gɔ tsyə́. Yeso lə tsə̌ŋ gɔ Kapɛrnaum, tisuŋ Galilea bɑ ji'tə pɔmnəŋ tyɛ' Sabat. Nwə yə e lə bɑwə gɔm a pɑ ŋkhonyə pɔmnəŋ nə pa' e lə nə ghɔm nyəŋ dəŋ nə́. Mu' mbɛ lə bɑ sinagogə bɔ, zhwenyə cwəpuŋ pɑ nə e. E cwé tə́ thə́ gɔm gɑ: Wɛ̌, o ŋkwi kʉ̌, Yeso yə Nazarɛt? O sɔ' pɑ m nə ghə gɑ pyə pi a? Gɑ̌ zhyə mo yə o bɑ e a. O bɑ Dɔlɔ̌ Si. Yeso paptə e gɔm gɑ: Lɛtə! Təm nə bɛ yə̌ŋ! Zhwenyə bɔ ma' bɛ bɔ si cəcɑ̌ pɔmnəŋ. Nthəm nə é, tə ghə sɔmywə nə é. Nwə cyə wap awɛ. Wap pɑ gɔm cəcɑ̌ pu gɑ: Yɔ mu' nthi ghɔm. E dɑ tʉɔ ba gʉ' e nɔ́ mzhwenyə cwəpuŋ. Wap təm nə pɔmnəŋ. Pu pɑ gɔm nwə nə Yeso geŋnyə tsʉ'u awɛ. E lə təm sinagogə bɔ, gɔ dyə́ Simon. Mhwi lə́ bɑ́wə səŋ ma jwi Simon tə' o. Pu cwyɛ'nyə Yeso gɑ e kwitə e. E pɔ nɑ e nə é, baptə mhwi, mhwi təm nə e. E lusi pɑ cwə o bɔ ntho' nə fa' bi pu. Nam lə cwə tə bi, guŋ pɔ awɛ pɑ́ dɑ nthinthi mghɛ gho sɔ' bi é, e pɑ jap bu bǎ nə ya lə, jɛ wap. Zhwenyə cwəpuŋ pɑ nə təm nə bo'gwyə pɔ, lə́ bɑ shwé gɑ: O bɑ Mú Si. Yeso pɑ baptə wap, e lə piŋ gɑ́ wap ghɔmnwə, nə pa' a lə́ bɑ́ wap zhyə gɑ e bɑ Kristo. Dzʉ lə nə lɔ, e təm gɔ m ghakgo. Pɔmnəŋ cə́ŋ é tə jɔ é. Shəŋ nə ghə gɑ e kɑ piŋ gɔ mu' tsʉ'. E ghɔm bi pu gɑ: A shəŋ gɑ gɔ siŋ Cuŋ pɑpuŋ nə́ Nəfo Si bi pyə shɑ́ mtisuŋ yap, nə pa' a bɑ ywə yə pu lə təm a nə́ a. E lə́ pǐŋ bɑ́ gɔm nwə Si nə msinagogə Yudea. Yeso lə pɑ bəŋ mʉ'nyə Genezarɛt mu' tyɛ'dzʉ́, pɔmnəŋ pɑ bəŋ e tə jɔm bɑwə nthənyə nə yu' Ghɔm Si. E yɔ pɛ̌ yɑpʉə bəŋ mʉ'nyə bɑ mghɛ pɛ fi'si bɑwə sɔk mnthənthɔm bapgu map. E ko nə yə́ pɛ pɑ Simon. Gɔm bi e gɑ e na' dɑ pɛ bɔ gɔ dəm shyə. E nə gɔ dəm shyə, e cwə nthʉm o bɑ ji'tə́ pɔmnəŋ. E lə miŋ nə ghɔmnwə, gɔm bi Simon gɑ: Ghɔ tə cəcɑ́ shyə ma' mnthənthɔm mɔ shyə nə gəm bapgu. Simon ghɔm bi e gɑ: Ta pyə ti pɑ nə yɔgǒ', la' pyə ghəm sɔmywə. Tə́ shyə m nə ghɔm tsǔ, gɑ gɔ ma' mnthənthɔm shyə. Wap lə ma' mnthənthɔm shyə. A ghəm bapgu tə ŋkhitə́. Wap ghə mtiŋ bi pyə shɑ mso pap pyə wáp lə bɑ nthʉm yə mu' pɛ a gɑ́ wap sɔ' ŋkwitə wap. Wap lə́ sɔ̌' pu a pu nyəŋ bapgu tə mpɛ map mɑbʉə lo, tə bɑ́ gɔ nuŋtə m shyə. Simon Pɛtrɔ lə́ nə yɔ̌ po'o, bvʉ nə mkwə Yeso, gɔm bi e gɑ: Cyəpɔ gɑ bɑ gɛ mhɔ lu bəŋ m̀. Nə pa' lam tsyə lə bɑ ǎ sɔ, ba tsyə pyə shɑ pɔ pyə pu a pu lə́ bɑ́ a, shyə m nə dəŋ bapgu yə wap lə ghəm a. Ba tsyə lam Yakop, bɑ Yohane, pǒ Zebede msǒ Simon lə sɔ. Yeso ghɔm bi Simon gɑ: Ka lam tsu sɔ, tə fɑ́ cwəlɔ, o gɔ pɑ ghəm pɑ pɔmnəŋ. Wap lə fəŋ mpɛ map gɔ tə ŋkho kəŋ shyə, nthak guŋ potsə awɛ tsʉ'u, ntham jʉm é. Yeso lə ko nthʉm mu' tisuŋ, mu' gɛ ka'pap yɔ e, nuŋ dzə e shwyɛ'nyə e gɑ: Cyəpɔ, o kuŋ bɑ o gɔ lɔnyə a. Yeso nya pu e, ŋkwak e, gɔm gɑ: Gɑ kuŋ; lɔ́. Ka'pap wuŋ nthəm nə é. Yeso ghɔm bi é gɑ: Pɔm tə siŋ sɔmmo, ghɔ da'tə nɑ o bi mkamsi biŋ hɑ ywə yə Mosɛ lə́ və gɑ mo yə ka'pap yɛ nə é a hɑ a, wap nə jyə́ nyənyɔ gɑ ǒ yɛ. Pɔmnəŋ lə pɑ gɔm nwə nə tsǒ Yeso nə gɔ dzə̀. Vəŋ pɔ sɔ' nə́ yu' ywə yə é lə́ bɑwə gɔm a, ba m gɑ́ e yɛ́ wap. E lə lu gɔ ghakgo shwyɛ'nyə Si. A lə pɑ mu' tyɛ'dzʉ, Yeso pɑ ji'tə pɔmnəŋ. Pɑ Farisai, pu a mtadyə pɑ zhyə mco' pyə gwyə́gwyə́ pɑ yap sí bɑ wap fɑ́ nə guŋ mlǎ' Galilea, Yudea, ba m Yerusalɛm. Tʉɔ Cyəpɔ lə́ bɑwə bɑ nə e, gə e yɛ́ mgho. Shɑ pɔ lə sɔ̌', bɑ wap kwa mo, e pɑ gɛ po'tə nɑ́. Wap pɑwə shəŋ gɑ Yeso yɔ e. Wap lə cəŋ jyə nə dɑ e shyə tɑ ŋkhə́m bəŋ Yeso kəkɔ, bɑ pɔmnəŋ jɔm yɔm. Wap lɑ e shyə m do pa'. Ntwɔk e shya dyə pu a kodyə e cəcɑ̌ pɔmnəŋ dzə Yeso. Yeso yɔ piŋnthʉm yap, gɔm bi bɛ bɔ gɑ: Pu lɑ mhɔnwə mǔ shwyɛ' o. Pɑ zhyə́ mco' pu a pɑ Farisai pyə wap lə bɑ si a pɑ gɔm cəcɑ̌ pu gɑ: Yəŋ bɑ ya nthi mo yə e jəmtə si po' a. Wɑ yə bi a pɑ́ e lɑ mhɔnwə mo shwyɛ' e tə ně da' Si? Yeso zhyə pa' wap wə ŋkwɛnyə a, gɔm bi pu gɑ: Nwə kɑ́ po ghə yɑ nthi kwɛnyə nthʉm tʉm pǒ? A ghɔ nə nə́ ghɔm gɑ: Pu lɑ mhɔnwə mǔ nə shwyɛ' o, pu nə ghɔm gɑ: Lusi gǐŋ, bɑ yá yɛ̀? Po'o tə po nʉ jyə gɑ́ Mú mo bɑ ě ghə tʉɔ nə dɑ mhɔnwə pɔmnəŋ nthʉm dzʉ́ shwyɛ' wap. E ghɔm po'o gɔm bi bɛ bɔ gɑ: Gɑ̌ ghɔm bu: lusi ŋkwa kodyə o, bɑnyə dyə́ o. E lə wuŋ dusi pɑ cwə o cwə o, dzə̌ pu, ŋkwa kodyə yə pu la' nə ŋkwa e a, giŋ gamtə Si bɑnyə dyə e. Nwə cyə guŋ pɔmnəŋ awɛ. Wap pɑ gamtə Si; bɑ bwɔk, lə bɑ gɔm gɑ. Pyə yɔ msya tyɛ' ɔ. Yeso lə tə̌m, ŋkho jɔ mu' gɛ kwishwɔp tso tsyə pɑ Levi, bɑ e cwə dyə shwɔ̀p. Yeso ghɔm bi e gɑ: Yap jʉ̌m m̀. E tak guŋ potsə tsyə awɛ nəŋ jap jʉm e. Levi lə lɑ̌ Yeso gɔ la' e pu a pú ŋwɛnyə, pu a pyə shɑ vəŋ mghɛ kwishwɔp, ba shɑ pɔ lə pɑ dzʉ̌ywə pɑ Farisai pu a pɑ zhyə mco' pɑ ŋkhunyə nthuŋ pú; gɔm bi pɑkhʉ Yeso gɑ: Nwə kɑ́ pu a mghɛ kwishwɔp pu a pɔ cwəpuŋ pɑ bəmtə dzʉywə biŋ nwə ba m lǔ'? Yeso ghɔm bi pu gɑ: Pɑ nɑ́ nthʉɔ tə shəŋ gəgɛ pɑ. Mghɛ gho nə shəŋ gəgɛ. Ŋ da tə́ sɔ' ghɔm gɑ pɔ nyənyɔ pʉɔtʉm tsap pɑ, dɑ sɔ' ghɔm gɑ mghɛ mhɔ pʉɔtʉm tsap. Wap ghɔm bi Yeso gɑ: Pɑkhʉ̌ Yohane, ba pyə pɑ Farisai shwə tə tsʉ̌ywə, bɑ́ shwyɛ'nyə Si. Pú pɑkhʉ̌ pɑ́ dzʉ tsap pɑ́ ywə lə́ nwə mlu'. Yeso pa' bi pu gɑ: Bi a pɑ́ po ghə gɑ mso tajwigʉɔ cwə́ tə tsʉywə nə́ cwə yə tajwigʉɔ cəcɑ̌ pu a? Mtyɛ'dzʉ wə sɔ̌' yə pú gɔ kwi tajwigʉɔ bi pu a. A gɔ pɑ nə mtyɛ'dzʉ bɔ, wap cwə tə tsʉ̌ywə. E lə́ kwi' gɔm bi pú nə ghɔm tə tutə gɑ: Pɑ sɔmmo lə hʉə pakdzə́ nə dzə́ sə́ nə ntham yə bvo; bɑ a tə gɔ hwənyə pɑ́, piŋ kitə. Sɔmmo tə nyəŋ mlu' sə́ nthʉm bvo nthǔ' pɑ; tak po'o bɑ mlu' sə́ gɔ sɔ bvo nthǔ', pfyə e sɔm nthu'. Pu nyəŋ mlu' sə nthʉm nthu' sə. Sɔmmo tə nwə́ bvo mlu' biŋ nwə́ mlu' sə́ pɑ́. E gɔm pɑ́ gɑ bvo mlu' bɑ ǎ puŋ. A lə pɑ̌ mu' tyɛ'dzʉ Sabat, Yeso pu a pɑkhʉ pyə pɑ́ shyə nə mu' pé msɛtʉɔ, pɑkhʉ̌ pyə po' mcɛ̌ msɛtʉɔ, si'nyə pu pú pfɑ. Shɑ pɑ Farisai ghɔm bi pu gɑ: Nwə kɑ́ po ghə ywə yə a bɑ pu ka piŋ nə ghə tyɛ'dzʉ Sabat a? Yeso pa' bi pu gɑ: Po la m ŋkhe ywə yə jikǔ' lə yɛ David pu a pɔ pyə́ pu a pu lə́ bɑ́ a, e ghə a? Pa' e lə ko dyə Si, be msɛ myə pu hɑ nə nə gamtə Si a pfɑ, biŋ hɑ myə́ pɔ pyə pu a pu lə bɑ a? A nə pɑ po'o da' mkamsi nə pɑ pfɑ a? Yeso lə kwi' gɔm bi pu gɑ: Mú mo bɑ Ta Sabat. A lə kwi' bɑ mu' tyɛ'dzʉ Sabat Yeso ko sinagogə, bɑ́ ji'tə pɔmnəŋ ywə. Mu' mo pɑ sinagogə bɔ bɑ pu tʉɔ e cwyəm, pɑ Farisai pu a pɑ zhyə mco' pɑ́wə byap nə yɔ bya Yeso gɔ yɛ mo bɔ tyɛ'dzʉ Sabat a; wap ho ywə nə nthé bya nə é. Yeso zhyə mkwɛnyə map; gɔm bi mo bɔ gɑ: Lusi nthiŋnyə tùŋ; e lusi nthiŋnyə thə́. Yeso ghɔm bi pu gɑ: Pu bíŋ tyɛ'dzʉ Sabat nə ghə nwə pɑpuŋ kɑ nə ghə nwə cwəpuŋ? Nə vɔk mo kɑ nə zhwə mo? E lə lě wap, dzam shu' gɔm bi mo bɔ gɑ: Siŋ pu o; e siŋ pu é, a tʉɔ. Luŋ yap sə, wap sɛ kwa' pa' wap gɔ ghə nə Yeso a. Yeso lə lǔ cwə o bɔ gɔ dəm kuŋgǒ nə cwyɛ'nyə Si. E lə ti pɑ nə cwyɛ'nyə Si tə dzʉ̌ lɔ́. Dzʉ lə lɔ, e cu'tə pɑkhʉ pyə, shwɔ' pɔ shwɔppʉə mgham cəcɑ̌ pu, ŋkhe wap gɑ mghɛ nthəm; wap lə bɑ: Simon yə e lɑ ke e gɑ Pɛtrɔ a, pu fɑ e Andreya; Yakop, Yohane, Filipo pu Batəlemi Matio pu Tomasi. Yakop mu Alfeo pu Simon mu e guŋ. Yuda mu Yakop pu Yuda Iskariɔt yə e gɔ sɔ' tɛ mnɛ Yeso a. Pu a pu lə fi' fɑ kúŋgǒ, tə ŋkho nə tsʉ' ŋkhʉ'kʉ̌', e tiŋnyə tsʉ'u pu a pɑkhʉ pyə, ba vəŋ pɔ: Fɑ́ nə́ guŋ mtsʉ' awɛ, pɑ Yudea, pɑ Yerusalɛm, pɑ giŋnyə shyə Tiro ba Sidon. Sɔ' nə yu' nwə é, e piŋ jɛ wap nə mgho map; pɔ pyə́ mzhwenyə cwəpuŋ lə bɑwə baknyə wap a pɑ jɛ. Guŋ pɔ awɛ lə́ bɑ́wə shəŋ nə kwak e, nə pa' mu' gʉ' lə bɑwə nthəm nə é bɑ jɛ wap. Yeso lə pu' mnyə myə́, de pɑkhʉ pyə gɔm gɑ: Mpuŋtsé bɑ́ wɔ mpə́ŋ nə pa' Nəfo si bɑ bi po. Mpuŋtsé bɑ́ wɔ pyə jikǔ' wə jɛ wɔ cwəlɔ a, pǒ gɔ sɔ' zhwyə́. Mpuŋtsé bɑ wɔ pyə po wə dɔ̌ cwəlɔ a, po gɔ sɔ' wí. Po bɑ mpuŋtsé, nə cwə yə pɔmnəŋ gɔ pɑ pɔ wɔ́, wa' wɔ́, pɑ́ yəmtə wɔ́, pɑ́ wak wɔ́, pɑ pɔptə mtso mɔ pa' pɔ bɔkpɔk a, nə Mu mo a. Po ŋwɛnyə nə cwə bɔ, po ŋwɛnyə nə pa' mcwɔ'fa' gwyə wə byap wɔ thə́ kɛbəŋ. Ba mtá pap lə lɑ̌ mghɔm ghɔ̀m Si jɔgo' pɑ po'o. Tə ghəghʉɔ yɔ, wɔ mghɛ tsə́. Po bɑ po e da' gə yɔ nə puŋ. Ghəghʉɔ yɔ, wɔ pyə po wə jwyə cwəlɔ ji gɔ ti yɛ́ wɔ; ghəghʉɔ yɔ, wɔ pyə po wə gwi cwəlɔ a, po gɔ ti lɔ̀. Ghəghʉɔ yɔ́ nə cwə yə guŋ pɔ awɛ gɔ pɑ gho'tə wɔ a; mta pap lə gə pɑ po'o nə mghɔm ghɔm Si cwanwə̀. Tə gǎ wə gɔm bi po pyə pó wə ju' a gɑ́ pò kuŋ mghɛ bo pɔ; po ghə nwə pɑpuŋ bi pɔ pyə wap bɔ wɔ́ a po nyəŋ byanyə́ nə pɔ pyə wap nyəŋ do nə po a, po cwyɛ'nyə Si nə thə pɔ pyə wap nthɛmnɛ mɔ a. Mo cwɔ pǔ nə́ mu' ghəŋ təŋ o, o nya yə mu' ghəŋ bi. Mo lɑ dzə fɔk o, o kɑ kɔ gɑ e kɑ lə yə nthʉm o. Mo kwi ywə bu, o hɑ bi e. Mo lɑ ywə ó, o tak bi e. Ywə yə pǒ shəŋ gɑ pɔmnəŋ ghə nə po a, po ghə ywə bɔ nə pu. Po pɑ ŋkhuŋ pɑ́ pɔ pyə wap ŋkhúŋ wɔ a, bɑ pu gɔ gho'tə wɔ nə kɑ́ ywə? Ba pɔ cwəpuŋ ŋkhuŋ pɔ pyə́ wap ŋkhuŋ wap a. Po pɑ gə nwə pɑpuŋ pɑ bi pɔ pyə wap gə nwə pɑpuŋ bi po a, bɑ pu gɔ gho'tə wɔ nə kɑ́ ywə? Ba pɔ cwəpuŋ gə yap pɑ́ po'o. Po pɑ hu pɑ bi pɔ pyə wap gɔ ti pa' bi po a, bɑ pu gɔ piŋ gho'tə wɔ nə kɑ ywə? Ba pɔ cwəpuŋ hu ywə bi pɔ cwəpuŋ, po'o gɑ wap ti ba' bi pu. Sɔ' m̀ nə po, po kuŋ mghɛ bo pɔ́, gə́ nwə pɑpuŋ bi pu, bɑ hu tə pyap gɑ pu gɔ ti pa' bi po. Po gɔ sɔ' ghə mcwɔ'fa' gwyə́, po gɔ sɔ' pɑ pó Si yə e shɔm ba pɔ cwəpuŋ a. Po pɑ mghɛ cɔmmtso dəŋdəŋ pa' Tá yɔ bɑ gɛ cɔmmtso a! Ka po pɑ nthé bya nə pɔmnəŋ, Si kɑ sɔ' nthé bya nə po. Ka po pɑ nyəŋ shɛ thə́ pɔmnəŋ, Si kɑ sɔ' nyəŋ shɛ thə po! Po pɑ dɑ mhɔ pɔ shwyɛ' wap, Si sɔ' dɑ mhɔ mɔ nə shwyɛ' wɔ. Po pɑ hɑ ywə bi pyə shɑ́ pɔ, Si sɔ' hɑ ywə bi po; pu gɔ sɔ' nyəŋ pʉə dzə́ yɔ, hya, cʉ'nyə, a lo tə pfyə. Si gɔ sɔ' lɑ pɑ fo' yə po nə fo' pɔ a nə fo' wɔ. Yeso lə kwǐ' gɔm ghɔm tə tutə bi pú gɑ: Bi a pɑ́ fʉ̀ tɔm pǔ mu' fʉ a? Bɑ wap tə gɔ pəmtə vʉ tɔm a lə́? Bi a pɑ́ mukhʉ̌ lə cyə Tap e. Tə bǎ yɑ mukhʉ lə yə pu cəŋtə ŋkwyə e a gɔ sɔ' pɑ pa' tap é a. Nwə kɑ o yɔ sisya ghe bɛtsə fɑ o tə́ bi a pɑ o lə yɔ nthyə̌ yə a bɛtsə o a? Bi a pɑ o ghɔm bi fɑ o gɑ: Cʉ' nthe sisya ywə bɛtsə o m gɑ kɑ, wə yə o tə bɑwə́ jɔ gak bɛtsə o a? Dabǔ, te gak tsə o, tə jyə nə te sisya ghe tsə fɑ o. Thə́ nthʉɔ tə jam nthɔm cwəpuŋ pɑ; thə́ cwəpuŋ lə pɑ́ jam nthɔm pɑpuŋ. Pú jyə ba ya ta' thə́ lə pɑ nə nthɔm myə́. Bi a pɑ pu lə kap nthɔm thə́ nə mka'tə, kɑ nə kap nthɔm thə mlu' nə jǔŋ lɑ? Mo pɑpuŋ nthé nwə pɑpuŋ nə nthɛ nwə pɑpuŋ yə a bɑ nthʉm tʉ́m tsyə́ a, mo cwəpuŋ pɑ nthé go' nə nthɛ go' e. Nə pa' ywə yə mo gɔm a bɑ ywə yə a fɑ nthʉm tʉm e a. Nwə kɑ po pɑ ŋkhe a gɑ Cyəpɔ, Cyəpɔ, tə́ tə pɑ̌ gə ywə yə gɑ gɔm a? Gɑ̌ gɔ siŋ wɔ nthi mo yə́ mo yə́ é ju' ghɔm tsǎ giŋ nə a, hwə́ e a. E bɑ pa' mo yə e pɑ gɔ kwɑ pa' pe é, nthəŋ cyə e təŋ tə ji to pa' nə wǔ gwɔ' a; bəŋ sɔ' dú, shyə sa gʉ̀ə, dzə́ŋ ŋkho nə pa', a lə ghə sɔmywə nə́ pa' bɔ, nə pá' a bɑ pu kwɑ a lɛtə a. Mo yə e ju' ghɔm tsɑ, la' e ghiŋ nə a shwə pa' mo yə e kwɑ pa' e tə təŋ cyə e a; shyə cwə tə ŋkho nə a wuŋ bvʉ, sa'tə awɛ a. Yeso lə mǐŋ nə́ ghɔmnwə bi pɔmnəŋ, gɔ Kapɛrnaum. Mu' Tadyə msəŋwi pɔ ŋkhə lə bɑ wə bɑ e ghə ŋkwɔ e, bɑ ŋkhúŋ é té' o. Ŋkwɔ é bɔ lə́ bɑwə go tə bɑwə gɔ pfʉ́pfʉ́. Tadyə msəŋwi bɔ lə nə́ yu' pa' pu gɔmnwə nə Yeso a, nthəm shɑ mghətso pɑ Yudea gɑ wap ghɔ shwyɛ'nyə e gɑ e sɔ' jɛ ŋkwɔ é bɔ. Wap lə kə̌m bəŋ Yeso shwyɛ'nyə gɔm gɑ: E ku'nyə mo yə bi a pɑ o ghə ywə yə e həŋtə á bi a. E ŋkhuŋ pɔ pɔ́k pɑ. Yʉ́ nə lə́ gə tə pu kwɑ sinagogə yɔk pɑ. Yeso pu a pɔ bɔ lə ghɔ tə bɑ gɔ kəm nə́ pa' bɔ, Tadyə msəŋwi tə́m mso pyə́ wap ghɔm bi é gɑ: Ta, kɑ ywɔk baknyə nɑ o pɑ té'; nə pa' ŋ kha ku'nyə mo yə bi a pɑ́ o ko dyə e a. A ywə yə a la' gə tə jɔ gɑ ŋ kha ku'nyə nə sɔ' pɑ kwa' myə̀ jɔ o a. Ghɔm da' nwə mukhʉ a yɛ. Nə pa' myə̀ yə gɑ̌ ju'shwə pɔ pyə́ wap sa' a, gɑ̌ bɑ gɑ̌ ghə msəŋwi pyə gɑ sa' wap a: Gɑ̌ gɔm bi mu' gɑ ghɔ̌, e ghɔ; gɔm bi mu' gɑ sɔ̌', e sɔ'; gɔm bi ŋkwɔ a gɑ: Ghə yə̌ŋ, e ghə. Yeso lə yu' mghɔm mɔ̌ gɑ, nwə Tadyə msəŋwi bɔ puŋ e. E fɛ nɑ gɔm bi pɔ pyə wap lə́ bɑ́ jʉm é a gɑ: Gɑ̌ siŋ wɔ gɑ tə ŋkhəm pɑ́ Israɛl ŋ kha wuŋ jɔ yəŋ nthi piŋnthʉm. Pɔ pyə pu lə təm wap a lə nə pɑnyə dyə Tadyə msəŋwi bɑ ŋkwɔ e yə e kɑ bɑwə go a yɛ̀. Yeso lə piŋ gɔ nthʉm tisuŋ Naim. Pɑkhʉ pyə́ pu a vəŋ pɔ pɑ jʉm e. E lə ghɔ tə nə ko shwə pù' tisuŋ, pu pɑwə dɑ pfə mo gɔ m nthəŋpɔ təŋ e. A lə bɑ pfə ŋkwi mu mu' npfɔk mjwǐ. Pu a pɑ tisuŋ bɔ nə lə bɑ. Cyəpɔ lə nə yɔ npfɔk mjwǐ bɔ, mtso myə kú é; e ghɔm bi e gɑ: Kɑ kwi' dɔ. E lə ghɔm po'o gɔ jap pu é nə ŋkwɔp pfə mo. Pɔ pyə wap lə́ bɑwə ŋkwa a tiŋnyə; e ghɔm gɑ: Mu səm, gɑ̌ ghɔm bu yǎm! Pfə mo bɔ lə lu shwə si, ntho' nə ghɔmnwə. Yeso hɑ e bi map e. Nwə cyə guŋ pɔ awɛ, wap pɑ gamtə Si gɔm gɑ: Kwa' gɔm ghɔm Si gwyə cəcɑ̌ pɑ. Si bɑ e lé pɔ pyə. Mghɔm mɔ nə Yeso lə ghɔ tə ŋkho Yudea ba nə guŋ mtsʉ' awɛ. Pɑkhʉ̌ Yohane lə siŋ e mcuŋ bɔ awɛ, e ke pɔ pʉə nə pu, nthəm wap bi Cyəpɔ gɑ wap ghɔ gɔm bi é gɑ: O bɑ mo yə e bɑwə sɔ' a, kɑ pyə gɔ kwi' pyap mu' mo? Wap lə kəm bəŋ Yeso gɔm bi e gɑ: Yohane nu' pɔ shyə təm wɔk bu gɑ pyə ghɔm gɑ: O bɑ mo yə e bɑwə sɔ' a, kɑ pyə gɔ kwi' pyap mu' mo? A lə pɑ̌ pɑ́ cwə o bɔ, Yeso yɛ mgho nə pɔ jɔmyɔ̌m, jɛ mkho'tə, jɛ pɔ pyə zhwenyə cwəpuŋ lə ba ǎ ko nə pu a, biŋ gə mfʉ pɑ jɔ tsʉ'. E lə pa' bi pu gɑ: Po ghɔ siŋ Yohane ywə yə po jɔ a ba yə po ju' a. Mfʉ yɔ tsʉ', mkho'tə ghiŋ, mghɛ ka'pap lɔ́, mbu'mtəŋ yu'nwə. Mpfə pɔ yám nə vʉ̌, mpə̌ŋ yu' yap Cùŋ pɑpuŋ. Buŋtsě bɑ mo yə ŋ tə gɔ pɑ ywə fa'tə yə e gɔ cyə m nə vʉsi a pɑ. Mghɛ nthəm Yohane lə cwətə gɔ, Yeso ghɔm bi pɔmnəŋ nə nwə Yohane gɑ: Po lə gɔ m ghakgo nə yɔ kɑ? Shʉɔ ka' yə fəfa wə ŋu 'nyə a lə̀? Po lə gɔ m nə yɔ kɑ? Mo bɑ e kwa dzə mkwiŋ lə̀? Pɑ kwa dzə mkwiŋ shwə m dyə̌ mfo. Tə po lə gɔ m nə yɔ kɑ? Gɔm ghɔm Si lə? Əŋ gɑ siŋ wɔ gɑ e cyə gɔm ghɔm Si. A bɑ mo yə a bɑ pu və nə é gɑ! Gɑ̌ təm shwiŋkhʉɔ a dzə o gɑ e nyaptə məjyə o dzə o. Yeso ghɔm gɑ: Gɑ̌ siŋ wɔ gɑ sɔmmo tə́ cəcɑ̌ pɔ pyə mjwǐ dzə́ wap a bɑ e cyə Yohane a; tə́ mukəcɔk mo nthʉm Nəfo Si bɑ ě cyə é. Guŋ pɔ awɛ pyə wap lə yu' gi e a, ba mghɛ kwishwɔp, gə Yohane nu' wap shyə a bɑ wap zhyə nwə dəŋdəŋ Si. Tə́ pɑ Farisai pu a pɑ mtadyə nə mco' Si lě ŋkhəŋnyə ywə yə si shəŋ bi pu a, ŋkhəŋnyə kwishyə Yohane. Yeso lə kwi' gɔm gɑ: Bi a pɑ fo' pɔmnəŋ nə yəŋ wɔdzʉ nə wɑ? Wap hwə́ wɑ́? Wap hwə shɑ́ pɔ pyə wap shwəsi dəm sim a, bɑ gɔm cəcɑ̌ pu gɑ: Pyə túŋ dúŋ la' po nə̌ŋ. Ŋkwa vʉ, la' po lɔ, nə pa' Yohane nu'pɔ shyə́ sɔ' la' e pɑ dzʉ msɛtʉɔ, e lɑ pɑ nwə mlu': Po ghɔm gɑ zhwenyə cwəpuŋ nə e. Mu mo sɔ', bɑ dzʉ́ biŋ nwə́; po ghɔm gɑ: E bɑ pɑ dzʉywə́, bɑ nwəywə. E bɑ so mghɛ kwishwɔp ba mghɛ ghə mnwəcwəpuŋ. Tə pɑkhʉ pyə' bɑ wap zhyə́ zhyənwə yə a fɑ bi Si a. Mu' Farisai lə ke Yeso gɑ pu e tsʉywə. Yeso ghɔ ywə e, ŋkho dyə e shwə́ tɑpe. Mu' mjwǐ lə́ bɑ nthʉm tisuŋ bɔ bɑ mjwǐ cwəpuŋ. E lə yu' gɑ Yeso dyə Farisai, dɑ shəŋ mwɑ damnyəlamnyə nə sɔ'. Nthiŋnyə jʉm mkwə Yeso. Dɔ̌, dɑ shyətsə e nə bvyə mkwə Yeso, dɑ nəŋthə e nə shi' biŋ núŋ mkwə myə́, dɑ mwɑ damnyəlamnyə bɔ nə shi'. Farisai yə e lɑ kě Yeso a, yɔ gɔm nthʉm tʉm e gɑ: Bɛ yəŋ lá' pe' bɑ gɔm ghɔm Si bɑ e zhyə mjwǐ yə̌ŋ, jyə́ gɑ́ e mjwǐ cwəpùŋ. Yeso ghɔm bi e gɑ: Simon gɑ̌ gɔ siŋ o mu' nwə. Simon ghɔm bi Yeso gɑ: Ta ghɔ̌m. Yeso ghɔm gɑ: Mu' mo lə pɑ̌ ŋkhʉə jú bi pɔ pɑpʉə. Pu dəŋdzə mo pɑ tsə ŋkhətɔ. Pu batə mo yɑpʉə pɑ tsə bɛ mǔthɔ. Pa' pɔ bɔ la tə ghə ywə nə nthuŋ ju yap á, bɛ bɔ lə́ lɑ̌ ju bɔ nə shwyɛ' wap. Ya mo nə pɔ bɔ pɑpʉə gɔ kuŋ bɛ bɔ cyə yá? Simon pa' gɑ: Gɑ kwɛ gɑ́ mo yə pu nthak ŋkhap jɔmyɔm bi a. Yeso ghɔm bi e gɑ: O sɛ kwa' pɑpuŋ. Biŋ fɛ nɑ e dé mjwǐ bɔ gɔm bi Simon gɑ: O ka yɔ mjwǐ yəŋ a? Gɑ ko dyə́ o, o lə hɑ́ shyə nə sɔk mkwə mə̌: Tə́ mjwǐ yə̌ŋ lɑ shyətsə e nə́ bvyə́ mkwə mə̌, dɑ nəŋthə e nə shi'. O ka núŋ mgho' mə̌ tə́ tə fɑ pa' ŋkho dyə́ ɔ á, e bɑwə núŋ mkwə mə̌. O kɑ pfyə mwɑ thə́ m̀; tə́ e pfyə mwɑ damnyəlamnyə nə́ mkwə mə̌. A cyə m po'o siŋ o gɑ́ pu lɑ guŋ mhɔnwə myə́ awɛ nə shwyɛ' e. A ywə yə a gə tə́ e la'tə yəŋ tiŋ mɑ kuŋnyə a. Tə́ mo yə pu dɑ pɑ muywə mhɔnwə shwyɛ' e a, ŋkhuŋnyə e tə́ jɔm pɑ́. Yeso ghɔm bi mjwǐ bɔ gɑ: Pu lɑ mhɔnwə mǔ shwyɛ' o. Pɔ pyə pu a pu lə bɑ́ tɑpe a ghɔm cəcɑ̌ pu gɑ: Yəŋ bɑ wɑ yə e dɑ ba mhɔnwə pɔ shwyɛ' wap a? Yeso ghɔm bi mjwǐ bɔ gɑ: Piŋnthʉm ó vɔk o, ghɔ nə hwitə. Yeso lə ghɔ nthʉm mtisuŋ ba m nthʉm mguŋ, bɑ gɔm nwə nə Nəfo Si. Pu a pɑkhʉ pyə́ shwɔppʉə mgham nə́ lə́ bɑ. Ba pɑ jwǐ pyə e lə yɛ wap nə mgho, ba nə zhwenyə cwəpuŋ a: Maria yə Makdala yə é lə té mzhwenyə cwəpuŋ sɔmbʉə nə e a. Yohana jwi Shuza ŋkhónthɛ Herode, Susana, ba pyə shɑ pyə wap lə dɑ tsə tsap nə kwitə Yeso pu a pɑkhʉ pyə a. Pɔmnəŋ lə fɑ nə mtisuŋ sɔ' bi Yeso. Wap lə́ pɑ̌ shu'tə bəŋ e kwa' vəŋ e. E lɑ ghɔm tə tútə̀ gɔm bi pu gɑ: Mu' dzəywə lə tə̌m bɑ́ dzə́ tsə́. Pa' e lə pɑ dze ywə a, mu' vʉ giŋnyə mə́jyə. Pɔmnəŋ nəŋtə, pǒmsəŋ kɛbəŋ pfɑ. Mu' gwya ywə bɔ vʉ dəm gwɔ', sa', jak shyə, jə́m. Mu' vʉ cəcɑ̌ mká'tə, pu a mká'tə pəmtə ŋkwyə́, mká'tə ŋkwɑ. Mu' gwya ywə bɔ vʉ nə tsʉ' cá' pɑpúŋ, sa', ŋkwyə, bɑ jam nthɔm jyə khə. Yeso lə ghɔm po'o nə miŋ gɔm tə thə́ gɑ: Mo yə ě ghə mtəŋ nə ju' a é yu'. Pɑkhʉ pyə́ həŋtə é pá' ghɔm bɔ nthutə a. E pa' bi pú gɑ: A bɑ pú lě gə gɑ́ po zhyə càm nə nwə Nəfo Si; tə́ sɔ' m nə pyə shɑ pɔ, pú pɑ dɑ pɑ ghɔm tə́ tutə̀ nə́ siŋ wap. Po'o gɑ wap yɔ tə yɔ, ju' tə yu'. Ghɔm tə tutə̀ bɔ nthutə gɑ: Gwya ywə bɑ Ghɔm Si. Pɔ pyə wap bɑ pa' kəŋ məjyə a, bɑ pɔ pyə wap jú', Sata sɔ' nthé ghɔm bɔ nthʉm tʉm pú. Po'o gɑ wáp kɑ́ piŋ sɔ' bvɔk. Pɔ pyə wáp bɑ dəm gwɔ' a bɑ pɔ pyə wáp ju' ghɔm Si, biŋ nə́ ŋwɛnyə; tə bɑ wáp ka ghə gɛ́, wáp biŋ yap pɑ cwə o, mləŋtə cwə tə ŋkho nə pu, wap wuŋ gwa' nə piŋ. Ywə yə a bvʉ tùŋ mka'tə a, a bɑ pɔ pyə wap ju' ghɔm Si, nə tsɔp nɑ, fʉ', nə ŋwɛnyə nthʉm dzʉ fam; la' wap yam nthɔm tə a kwyə. Ywə yə a bvʉ nə tsʉ' ca' pɑpuŋ a, pɑ pɔ pyə wap ju' ghɔm Si, nə́ tʉm dəŋdəŋ, tʉ́m pɑpuŋ, bíŋ, bɑ ŋkhaktʉɔ jam nthɔm a. Sɔmmo tə́ su mɔk nə lambu, dɑ kɔp nə pfɔptə pɑ́, kɑ nyəŋ kɑsikodyə pɑ. E jap dəm kwɔ' lambu po'o gɑ pɔ pyə wap gɔ ko dyə a yɔ dɔlɔ̌. Nə pa' sɔmywə yə a tʉmnyə tə la' pu ghɔ la' zhyə a, a tə wə pɑ́, sɔm cam yə pu tə gɔ la' tu a, a tə wə pɑ́. Po pɔmtə nə nthi pa' po nə ju' nwə a: Nə pa' pu gɔ sɔ' hɑ ywə bi mo yə e ghə ywə a. Sɔ' m nə mo yə e ka ghə ywə á, pu kwi ba yə muywə yə é bɑ́wə ŋkwɛ gɑ e ghə a. Má Yeso pu a mfɑ pyə lə sɔ' nə cə́ŋ e da' gɑ la' wap kəm bəŋ e, bɑ pɔmnəŋ nə́ jɔm. Pu ghɔm bi Yeso gɑ: Mɔ̌ pu a mfɑ pǔ dzʉ bɑwə shəŋ nə́ yɔ ó. Yeso pa' gɑ: Ma á pu a mfɑ pɑ bɑ pɔ pyə wap ju' ghɔm Si bɑ giŋ pa' a gɔm a. A lə pɑ mu' tyɛ'dzʉ, Yeso pu a pɑkhʉ pyə ko nthʉm kənu'. E ghɔm bi pú gɑ: Pɑ sa' gɔ nə yəmu' jʉɔ mʉ'nyə. Pu a pu ghɔ. Wap lə pɑ sɔp shyə nə sa', Yeso ti. Fʉ́m təm dəm mʉ'nyə, ŋkwa shyə nyəŋ nthʉm kənu', nwə pɑ gɔ ghə wap. Wap ghɔ bəŋ Yeso jam e gɔm gɑ: Ta, Ta, pɑ si gɔ pfʉ́. Yeso yam, baptə́ fəfa ba fá shyə wap na', tsʉ' wuŋ dɛtə́ gɑ kǎm. Yeso ghɔm bi pɑkhʉ pyə gɑ: Piŋnthʉm yɔ hɑ? Wap pwɔk, nwə cyə wap. Wap pɑ gɔm cəcɑ̌ pu gɑ: Yəŋ bɑ wɑ yə e gɔm nwə bi fəfa bɑ m bi shyə wap yu' shwə e a? Wap lə kə̌m kəŋ shyə nthʉm guŋ pa Gerasa yə a bɑ nə yə mu' jʉɔ Galilea a. Yeso lə fi'si, mu' mo, nthəm m tisuŋ, mzhwenyə cwəpuŋ pɑ nə é sɔ' dzə é. Mo bɔ la tə́ ŋkwa dzə́ a tə fɑ tə tyɛ̌', e lə nəŋ bɑ́ dí dyə; e lə́ shwə pɑ nthʉm mthəsì. E lə yɔ Yeso, sɔ' bvʉ nə mkwə myə́ shwé tə thə́ gɔm gɑ: O kwi kɑ bəm Yeso Mu Si tə́ thə kɛbəŋ? Səso kɑ mɛnyə a. Yeso ghɔm bi zhwenyə cwəpuŋ gɑ e təm nə mo bɔ. Nə pa' e lə́ ŋkho nə e mcʉmmcʉ̌m; pu lə́ dɑ pɑ gwɑ mtʉɔ pu a mkəlo' mtʉɔ tə́ nə́ kwɑ mkwə myə́. E pɑ shwa mgwɑ bɔ; zhwenyə cwəpuŋ pɑ nthənyə é shya pɑ m ghakgo. Yeso həŋtə bɛ bɔ gɑ: Tso tsu bɑ wɑ? E pa' bi e gɑ jɔmyɔ̌m nə́ pa' mzhwenyə cwəpuŋ lə bɑ nə e tə jɔm a. Wáp lə cwyɛ'nyə Yeso gɑ́ e kɑ ghə wap ko tsʉ̀m. Mu' mɑ ka mgənɔm lə bɑ kuŋgo tsʉ'u bɑwə pfɑ́ mghe. Mzhwenyə cwəpuŋ bɔ cwyɛ'nyə Yeso gɑ e piŋ gɑ wap ko nə pǒ mgənɔm bɔ. E piŋ. Mzhwenyə cwəpuŋ təm nə bɛ bɔ, ŋkho nə mgənɔm. Ka mgənɔm, keŋnyə nə́ mkəkəŋ bvʉtə nthʉm shyə mʉ'nyə, npfʉ́tə́. Pɔ pyə wap lə́ bɑwə byap mgənɔm bɔ a lə nə́ yɔ ywə yə a shyə a, ŋkhʉ giŋ sɛ nwə bɔ tisuŋ bɑ m nthʉm guŋ. Pɔmnəŋ lə sɔ' nə yɔ ywə yə a shyə a. Wap lə ŋwak bəŋ Yeso, jɔ mo yə mzhwenyə cwəpuŋ nthəm nə e a, bɑ e cwə bəŋ e, dzə pɑ nə e, zhyənwə e pɑ bɑ a sɔ' bi e cwəlɔ kwa' pɑpuŋ. Wap pwɔk. Pɔ pyə wap la' jɔ pa' a shyətə a, siŋ wap pa' gɛ mzhwenyə cwəpuŋ la' nə jɛ a. A pɑ́ po'o, pɑ Gerasa cwyɛ'nyə Yeso gɑ é ghɔ, nə pa' wap lɑ bɑwə bwɔk te'. Yeso lə kǒ nthʉm kənu' nə́ gɔ. Mo yə mzhwenyə cwəpuŋ nthəm nə e a, həŋtə e gɑ e gɔ wuŋ bəŋ e. Da' gɑ Yeso la'nyə é gɔm bi e gɑ: Pɑnyə la' o, ŋkho siŋ pɔmnəŋ ywə yə Si gə nə o a. Bɛ bɔ pɑnyə, shyanyə ywə yə Yeso gə nə e a nthʉm guŋ tisuŋ awɛ. Yeso lə nə pɑnyə, vəŋ pɔ pɑwə byap é. Wap lɑ e. A pɑ po'o mu' mo sɔ', tso tsyə pɑ Yairos. E pɑ tadyə sinagogə. E lə sɔ' bvʉ nə́ mkwə Yeso, shwyɛ'nyə e gɑ e sɔ' ywə e. Nə pa' mú e, ŋkwi mú e mjwǐ, gu' shwɔppʉə mgham lə́ bɑwə gɔ pfʉpfʉ. Yeso lə pɑ gɔ m wə́, pɔmnəŋ pɑ nthənyə e, mu' mjwǐ bɑ pa' mcyə pɑ̌ nthəm nə e á ǎ ghə gu' shwɔppʉə mgham, bɑ e sím guŋ yə́ ywə awɛ wə́ mgəgɛ̀, la' sɔmmo yɛ́ é. E lə́ sɔ̌' nthəm m jʉ̌m Yeso, ŋkwak pu e nə dzə Yeso, mcyə ya' nə təm nə é. Yeso ghɔm gɑ: Wɑ̌ kwak a? Sɔmmo lə piŋ. Pɛtrɔ ghɔm gɑ: Ta a bɑ pɔ pyə́ wap bɑwə nthənyə biŋ hyapnyə o a. Yeso ghɔm gɑ: Mǒ kwak a. Gɑ̌ yú' bɑ mu' gʉ' təm nə m. Mjwǐ bɔ yɔ gɑ pu zhyə e. E sɔ' nə vʉ nə mkwə Yeso, bɑ səŋ. Siŋ Yeso dzə̌ guŋ pɔ awɛ ywə yə a gə tə́ e kwak e, ba pa' e ŋkwak é guŋ jɛ a. Yeso ghɔm bi e gɑ: Gò a, piŋnthʉm o vɔk o, ghɔ nə hwitə. Yeso lə pɑ gɔm po'o mu' mo fɑ́ ywə Yairos tadyə msinagogə gɔm bi e gɑ: Gò o pfʉ́. Kɑ piŋ baknyə Ta. Yeso yu', gɔm bi Yairos gɑ: Kɑ pwɔk. Piŋ piŋ, e gɔ yɛ. Yeso lə ŋwak wə Yairos, e lə piŋ gɑ pu sɔmmo pəmtə ŋkho dyə tə ně da' Pɛtrɔ pu Yohane ba Yakop biŋ gə ta mú pu ma mú. Guŋ pɔ awɛ lə́ bɑwə dɔ̌, bɑwə dzɔp nɑ tsap nə mú bɔ. Yeso ghɔm gɑ: Ka po lɔ; e ka pfʉ́, é diti. Wap yəmtə Yeso, nə pa' wap lə́ bɑwə jyə́ gɑ ě pfʉ́. Yeso tɔm pu e, ŋkhe e gɑ: Mú ǎ yǎm! Zhwenyə e pɑnyə nə é, e wuŋ du si. Yeso ghɔm gɑ pu hɑ ywətsʉ bi e. Nwə cyə́ tap e pu map e. Tə Yeso co' bi pu gɑ wap kɑ siŋ sɔmmo ywə yə a shyə a. Yeso lə cu'tə pɑkhʉ pyə́ shwɔppʉə mgham hɑ gʉ' ba tʉɔ bi pu nə́ nə jə́ŋ guŋ mzhwenyə cwəpuŋ awɛ ba nə nə jɛ mgho. E lə́ təm wap gɑ́ wap ghɔ shyanyə nwə Nəfo Si, bɑ jɛ mgho. Bǐŋ gɔ́m bi pu gɑ: Ka po nə ghɔ dɑ sɔmywə, kɑ pə̀ŋ, kɑ pʉ̀ə, kɑ ywətsʉ, kɑ ŋkhǎp lə, ka sɔmmo ghə dzə́ yɑpʉə. Po ko bǎ nə ya dyə lə, po cwə pɑ wə́ tə da' gɔ̌. Tisuŋ yə po ko nə la' pu lɑ wɔ a, po nə ghɔ dzɔp ca' nə mkwə mɔ, a pɑ yɔ nə kwinthɛ nə pú. Wap lə ghɔ, bɑ giŋ nthʉm mla', bɑ siŋ Cuŋ Pɑpuŋ, biŋ bɑ jɛ mgho. A lə pɑ̌ po'o, fo Herode yu' yə́ nwə yə á bɑwə shyə́ a nwə zhʉm é; nə pa' shɑ pɔ lə bɑwə gɔm gɑ́ Yohane yám nə vʉ̌. Shɑ pɔ pɑwə gɔm gɑ á bɑ Elia piŋ sɔ̌'. Shɑ pɔ ghɔm gɑ a bɑ mu' gɔm ghɔm Si piŋ jám nə vʉ̌. Herode ghɔm gɑ, a bɑ dě gə pu ya' thə Yohane pɑ kwa' myə̀. Mo yə gɑ̌ ju' pu pɑ gɔm yəŋ tiŋ nwə nə é a bɑ wɑ? E lə ghɔm po'o bɑ shə́ŋ jyə nə́ nə yɔ é. Pɑkhʉ Yeso lə pɑnyə siŋ e guŋ ywə yə wap gə á awɛ. E lɑ wáp, pu a pú ghɔ m Betsaida tsʉ' tsiŋ. Pɔmnəŋ lə́ zhyə, jap jʉ̌m pu. Yeso lɑ wap, siŋ wap nwə nə Nəfo Si biŋ jɛ wap. Dzʉ lə to' nə pwa, Pɑkhʉ Yeso shwɔppʉə mgham sɔ' bəŋ e gɔm bi e gɑ. Tak pɔmnəŋ nə́ŋ wap ghɔ nthʉm gúŋ shəŋ ywətsʉ ba tsʉ' yə wap gɔ ti nə a, nə pa' tsɔ̌' si bɑ ghak tsʉ' a. Yeso ghɔm bi pu gɑ: Kwa' wɔ hɑ ywətsʉ bi pú. Wap ghɔm bi e gɑ: Pyə ghə da' msɛ mta' tɔ, ba bapgu duŋ pʉ̌ə, tə́ ně da' pa' bi a pɑ pyə ghɔ jo ywətsʉ nə dəŋ pɔ pɔŋ gɑ a. Pɔmnəŋ lə bɑ gwɛ a pɔ sha'tɔ. Yeso ghɔm bi pɑkhʉ pyə gɑ: Po ghə́ wap cwətə si pɔ mghǎmthɔ mghǎmthɔ. Wap lə ghə po'o, pɔmnəŋ cwətə si awɛ. Yeso lə kwi msɛ̌ mta' tɔ ba bapgu duŋ pʉə, bʉ' mnyə kɛbəŋ, nyəŋ byanyə nə́, bo'tə, hɑ bi pɑkhʉ pyə gɑ wap ghaptə bi pɔmnəŋ. Pɔmnəŋ lə pfɑ ywə tə jwyə; pu lak bo' tsə nə msap shwɔppʉə mgham. Yeso pu a pɑkhʉ pyə lə pɑ̌ tsʉ' tsiŋ bɑ shwyɛ'nyə si, e həŋtə wáp gɑ: Pɔmnəŋ gɔm gɑ gɑ̌ bɑ wɑ́? Wap pa' gɑ: Shɑ pɔ gɔm gɑ o bɑ Yohane nu' pɔ shyə, shɑ pɑ́ gɔm gɑ́ o bɑ́ Elia. Pyə shɑ pɑ gɑ o bɑ mu' gɔm ghɔm Si bɑ e yám nə vʉ̌. Yeso həŋtə wap gɑ: Sɔ' m nə po, po gɔm gɑ gɑ̌ bɑ wɑ? Pɛtrɔ ghɔm gɑ: O bɑ Kristo Si. Yeso co' bi pu gɑ wap kɑ siŋ sɔmmo. Biŋ gɔm gɑ: Mú mo gɔ yɔgo' tə', mghətso ba mtadyə mkamsi pu a pɑ zhyə mcò' wa' e, pu zhwə e, a pɑ batə tyɛ'dzʉ yɑtá e yám nə vʉ̌. E lə piŋ gɔm bi guŋ yap awɛ gɑ: Mo pɑ gɔ yap jʉ̌m m̀, e kəŋnyə thə nɑ e, biŋ ŋkwa yə bɛnyəpɛnyə nə jap jʉ̌m m̀ guŋ mtyɛ'dzʉ awɛ. Mo yə ě cəŋ nə vɔk vɔ́k é a gɔ pi, mo yə e pi vɔk e nə thə́ ǎ gɔ sɔ' vɔk. A po'o bi a pɑ mo nyəŋ guŋ dzʉ awɛ pʉə e tə bi vɔk, kɑ sa'tə vɔk e lə bɑ a gɔ kwitə e m kɑ? Mo yə ě kuso nə m̀ ba nə ghɔm tsɑ̌ a, bɑ Mu mo gɔ sɔ' kuso nə e nə cwə yə e gɔ sɔ' sɔ' nthʉm ghu'tə e, ba yə Tap e pu a pɑ aŋgəle dɔlɔ̌ a. Gɑ̌ siŋ wɔ kwa' nyənyɔ gɑ shɑ pɔ cəcɑ̌ pɔ pyə wap tsɔ' á, tə gɔ sɔ' pfʉ́ tə yɔ Nəfo Si pɑ. A lə nə cyə tyɛ'dzʉ hɔ̌m pá' Yeso gɔm mɔ mnwə a, e lɑ Pɛtrɔ, ba Yohane pu Yakop pu a pu ghɔ dəm kuŋgo nə cwyɛ'nyə Si. Yeso lə pɑ shwyɛ'nyə Si, sə e sɑnyə̀, dzə e fɔk dəŋnyələŋnyə. Pu yɔ shɑ pɔ pɑpʉə pu a pu pɑ wə gɔmtə. A lə bɑ Mosɛ pu Elia. Bɑ wap ŋwak nthʉm ghu'tə̀. Wap lə bɑwə gɔm pa' cwə yə Yeso gɔ pɑnyə a si gɔ ku' Yerusalɛm a. Pɛtrɔ pu a mso pyə lə bɑwə gʉɔnyə lwɔk. Wap lə cwə tə jǎm, jɔ ghu'tə̀ Yeso ba pɔ pɑpʉə pyə pu a pu lə́ bɑ́wə gɔm a. Pɔ bɔ pu a Yeso lə nə hapnyə, Pɛtrɔ ghɔm bi e gɑ: Ta, a puŋ nə pɑ tsɔ'ɔ; pɑ zhɔk mpfɑ tsɔ'ɔ mɑntha: Yǔ, yə Mosɛ ba yə Elia. E lə gɔm po'o tə pɑwə jyə́ ywə yə e gɔm a. E lə pɑ gɔm po'o mlwa təm sam pɔ bɔ. Pɑkhʉ Yeso nə yɔ pa' mlwa sam wap a bwɔk te' ó. Wap yu' gi mo nthʉm mlwa ghɔm gɑ: Mo yəŋ gɑ bɑ Mú a, bɑ gɑ cwɔ' e. Po yu'nyə é. Wap lə nə yu' gi mo po'o, biŋ jɔ pɑ́ da' Yeso do é. Pɑkhʉ pyə lɛtə gɑ kǎm. Wap lə siŋ sɔmmo ywə yə wap jɔ́ a cwə o bɔ. Dzʉ lə́ lɔ, wap fi' dəm ŋkhuŋ gɔ̌. Pɔmnəŋ tə jɔm sɔ' dzə Yeso. Mu' mo cəcɑ̌ vəŋ pɔ ghɔm tə thə́ gɑ: Ta, səso ma' mnyə mǔ nə mú a yə̌ŋ. E bɑ pɑ duŋ e do é bəm. Mu' zhwenyə cwəpuŋ ŋkho nə é. E cwe, sɛtə́ mnyə, sə́ mkəkak, nə təm nə e a tʉɔ, nə təm bɑ e pwa. Gɑ̌ cwyɛ'nyə pɑkhʉ pǔ, gɑ wap zhəŋ zhwenyə bɔ, la' wap ghə jyə́. Yeso ghɔm gɑ: Gwya msɔk tʉ́m, pɑ tə́ ghə piŋnthʉm, pɔ cwəpuŋ. Pɑ gɔ piŋ cwə dəŋ pa' po pɑ dzá nə m̀? Lɑ mu o nə́ sɔ'. Mu lə pɑ sɔ', zhwenyə bɔ ma' e si. Shʉ'nyə e m bò. Yeso cɔk zhwenyə cwəpuŋ bɔ, jɛ mu bɔ, hɑ e bi tap e. Guŋ pɔ awɛ yɔ pa' gʉ' Si bɑ a tʉɔ a, a sya wap. Wap lə pɑ ŋwɛnyə nə guŋ tsə tsyə, Yeso lə gə a, e ghɔm bi pɑkhʉ pyə gɑ: Po cəŋtə ju' ywə yə gɑ gɔ ghɔm bi po a: Pu gɔ hɑ mu mo nə bu pɔmnəŋ. Da' gɑ la' pɑkhʉ pyə yu' ywə yə e bɑwə gɔm bi pu a, bɑ ǎ tʉmnyə nə zhyənwə yap. Wap piŋ bwɔk nə həŋtə e nwə nə́. Pɑkhʉ pyə lə pɑ̌ fəŋnyə cəcɑ̌ pu nə zhyə mo gwyə nə pú. Yeso zhyə́ ywə yə wap lə bɑwə ŋkwɛ a, ŋkhe mu' múywə mú jap e bəŋ e. Gɔm bi pú gɑ: Mo yə é lɑ tso tsɑ̌ nyəŋ múywə mú yəŋ dyə a, bɑ e nyəŋ pa' pɑ myə̀ dyə́. Mo yə e nyəŋ a dyə a, bɑ e nyəŋ mo yə e nthəm a dyə́; nə pa' mo yə e cəcɑ̌ po bɑ mo ŋkho' a nə bɑ mo gwyə́. Yohane ghɔm gɑ: Ta, pyə yɔ mu' mo e pɑwə dɑ́ tso tsú jəŋ mzhwenyə cwəpuŋ pyə cə́ŋ nə́ kɔ bi é, nə pa' tə pyə a pu nə bəmtə bɑ jʉm o pɑ. Tə́ Yeso ghɔm gɑ: Ka po kɔ bi e nə pa' mo yə e tə bɑ gɛ bo yɔ a pɑ bɑ so yɔ. Cwə yə Yeso lə bɑ gɔ təm nthʉ́m dzʉ́ lə ku' a, e yap gɑ e gɔ ghɔ Yerusalɛm. Nthəm mghɛ nthəm dzə e. Wap lə ghɔ tə ŋkho nthʉm mu' pfə la' nthʉm guŋ Samaria nə nyaptə tsʉ' bi Yeso. Pɑ tsʉ'u bɔ kəŋnyə nə lɑ wap, nə pa' wap lə bɑwə gɔ m Yerusalɛm a. Yakop pu Yohane lə yɔ po'o, gɔm gɑ: Cyəpɔ, o piŋ gɑ pyə ke mɔk, a fi' fɑ thə́ kɛbəŋ sɔ' si'nyə wap a? Yeso fɛ nɑ e de wap, shɔktə wap pu a pu ghɔ nə mu' guŋ dyɛ'. Wap lə pɑ mə́jyə, mu' mbɛ ghɔm bi Yeso gɑ: Gɑ gɔ yap jʉ̌m o, tə ko bǎ hɑ́ lə́ yə o ghɔ a. Yeso ghɔm bi e gɑ: Msə́sʉm bɑ wap ghə mghʉ̌m map, pǒmsəŋ to kɛbəŋ ghə mkɔ máp, tə́ Mú mo bɑ e ka ghə tsʉ' nə yap thə́ é nə́. Biŋ gɔm bí mu' mo gɑ: Yap jʉ̌m m̀. Mo bɔ ghɔm gɑ: Ta piŋ gɑ də́ŋdzə gɔ nthəŋ ta á, Yeso ghɔm bi e gɑ: Tak mpfə pɔ wap təŋ mpfə pɔ pap, sɔ' m nə o, ghɔ siŋ Nəfo Si. Mu' mo kwi' gɔm bi e gɑ: Ta gɑ gɔ yap jʉm o, da' gɑ piŋ bəm gɑ́ gɔ pyə a mfɑ pɑ̌ la'nyə. Yeso ghɔm bi e gɑ: Mo yə ě kyəp sú nə dzʉ'ne, dé jʉm a, ka ku'nyə nə́ Nəfo Si. A lə pɑ po'o, Cyəpɔ cwɔ' shɑ pɑkhʉ pyə shwɔppʉə mgham sɔmbʉə, nthəm wap pɑpʉə pɑpʉə dzə e, nthʉm guŋ mtisuŋ awɛ ba guŋ myə shɑ mtsʉ' myə kwa' yʉ Cyəpɔ lə́ bɑ gɔ ghɔ nə a. E lə ghɔm bi pu gɑ: Tsə́ lɑ nyə́ŋ dyə yɔm, mghɛ fa' kɔk; po cwyɛ'nyə Cyəpɔ gɑ e cya shɑ mghɛ fa' pe é nə lɑ tsə nyə́ŋ dyə. Po ghɔ̌! Gɑ̌ nthəm wɔ pa' mjʉ̀jʉ̀ a cəcɑ̌ mbvʉ̌ go. Ka po lɑ pétə́, ka po lɑ pʉ̀ə, ka po lɑ mthap; po kɑ ca'tə sɔmmo məjyə. Po ko bǎ nə ya dyə́ lə po ləŋdzə gɔm gɑ: Hwitə̀ bi dyə yəŋ gɑ. Bya mo hwitə pɑ dyə bɔ bɑ hwitə́ yɔ gɔ ko nə e, tak po'o bɑ́ hwitə́ yɔ gɔ wuŋ nə po. Po cwə dyə bɔ, dzʉ́ biŋ nwə ywə yə pu hɑ bi po a nə pa' bǎ ya gɛfa' lə bɑ e ku' nə mcwɔ'fa' myə́. Ka po ko mdyə́dyə̌. Po ko bǎ nə ya tisuŋ lə́ tə pu nyəŋ wɔ dyə́, po tsʉ ywə yə pu gɔ hɑ bi po a. Jɛ mghɛ gho pyə wap gɔ pɑ nthʉm tisuŋ bɔ a, gɔm bi pu gɑ: Nəfo Si sɔ' tə bɑ bəŋ po. Tə bǎ ya tisuŋ lə́ yə po ko nə la' pu piŋ nə nyəŋ wɔ dyə a, po ghɔ̀ məjyə, gɔm gɑ: Pyə tsɔp vɔp tsɔ́ nə mkwə mɔk tə́ po zhyə gɑ Nəfo Si sɔ'. Ga siŋ wɔ gɑ a gɔ la' pɑ tyɛ'dzʉ bɔ, Sodɔm lə pɑ sɔmywə nə yə go' tisuŋ bɔ. Korazin, o bɑ gɛ ghəghʉɔ! Betsaida, o bɑ gɛ ghəghʉɔ! Nə pa' msyanwə myə pu gə bi po a, a lə pe' bɑ m Tiro pu Sidon bɑ wap lě da' bʉɔtʉm tsap tə shi' və biŋ ŋkwa mko' pʉ̀ə. A po'o tə a gɔ sɔ' pɑ tyɛ'dzʉ nə fyɛ', go' Tiro pu Sidon lə pɑ sɔmywə nə yù. Sɔ' m nə o Kapɛrnaum, o kwɔ' tə ŋkho pɑ kɛbəŋ, bɑ o gɔ sɔ' fi' tə ko guŋ mpfə a vʉ̌. Yeso lɑ kwi' gɔm bi pɑkhʉ pyə gɑ: Mo yə e piŋ wɔ a, bɑ e piŋ a. Mo yə e kəŋnyə wɔ a, bɑ e kəŋnyə a; mo yə e kəŋnyə a á, bɑ e kəŋnyə mo yə e nthəm á a. Mghɛ nthəm pɔ shwɔppʉə mgham sɔmbʉə lə lɑ́ ŋwɛnyə bɑnyə, gɔm bi e gɑ: Cyəpɔ: Ba mzhwenyə cwəpuŋ yu' shwə yɔk nə cwə yə pyə dɑ tso tsu gɔm nwə bi pu a. Yeso ghɔm bi pu gɑ: Ŋ də yɔ Sata e fɑ kɛbəŋ bvʉ pa' pəpa' bəŋ a. Po yu', ŋ də hɑ tʉɔ bi po nə́ nə giŋ nə mnɔk ba m nə́ mgɔmsǐ, nə́ nə hya gʉ' gɛ bo tə sɔmywə cwəpuŋ gə wɔ. Tə ka po ŋwɛnyə pɑ́ gɑ mzhwenyə cwəpuŋ yu'shwə yɔ; po ŋwɛnyə m gɑ́ pu və mtso mo kɛbəŋ. Pɑ kwa' cwə o bɔ, Zhwenyə Dɔlɔ̌ ghə Yeso ŋwɛnyə gɔm gɑ: O Ta, Cyəpɔ kɛbəŋ ba m sicǎ'; gɑ̌ gho'tə o, nə pa' o tʉ́m nwə bɔ bi mzhyənwə, da' gɑ gə po mkəcɔk po zhyə́. Əŋ m Ta a puŋ bu gɑ a gɔ pɑ po'o. Ta o lě hɑ guŋ ywə awɛ bəm, bɑ sɔmmo ka nəŋ jyə mo yə Mú bɑ e a tə ně da' Tá, sɔmmo lə nəŋ jyə Tá, tə ně da' Mú, biŋ gə mo yə Mú ghə gɑ e zhyə é a. Biŋ fɛ nə e gɔm bi pɑkhʉ pyə gɑ: Mpuŋtsé mnyə myə a wə jɔ ywə yə po wə jɔ a! Nə pa' gɑ siŋ wɔ sɔsɔ̌ gɑ mghɔ́m ghɔ̀m Si ba mfo tə jɔm lə cəŋ nə yɔ ywə yə pǒ wə jɔ a, la' wap yɔ, nə yu' ywə yə pǒ wə ju' a, la' wap yu'. Mu' tadyə nə nə zhyə mco' lə lǔsi dəŋtə e gɔm bi e gɑ: Ta, gɑ gɔ ghə gɑ kɑ tə sɔ' kwi vɔk mama a? Yeso ghɔm bi e gɑ: A bɑ pu və gɑ kɑ nthʉm mcò' o? O ŋkhe nthʉm o gɑ́ kɑ? E pa' bi e gɑ: O gɔ pɑ kuŋ Cyəpɔ Si o nə guŋ tʉm tsʉ awɛ, nə guŋ lam tsʉ awɛ, nə guŋ gʉ' o awɛ, bɑ nə guŋ mkwɛnyə mu awɛ piŋ kuŋ mo yə e bəŋ o a pa' o ŋkhuŋ thə́ nɑ o a. Yeso ghɔm bi e gɑ: O pa' tə a puŋ. Pa gə pɑ pa' a, sɔ' bvɔk. Tə mo bɔ pɑ shəŋ nə la'tə gɑ e bɑ mo dəŋdəŋ gɔm bi Yeso gɑ: Mo yə e bɑ bəŋ m̀ a bɑ wɑ? Yeso piŋ gɔm gɑ: Mu' mo lə tsə̌ŋ fɑ Yerusalɛm bɑ gɔ m Yeriko. Bvʉ nə bǔ msamshwə, wap lɑ tsə tsyə́ awɛ, dzɔp e tə e cʉ' pɑ pfə, wap ma' e si gɔ. A pɑ́ po'o mu' ŋkhamsi pɑ dzəŋ m tsʉ' o bɔ: Jɔ é, kwyəpnyə məjyə, la' e cyə bəŋ é. Mu' mo nə ŋkhənyə pɑ Levi lə pɑ shyə yə́ jɔ é, ŋkwyəpnyə məjyə. Tə́ mu' yə Samaria lə pɑ gɔ m tə̌m, ŋwak bəŋ mo bɔ, jɔ́ e, mtso myə́ ku e, e ghɔ tə́ bəŋ e, ŋkwɑ mfiŋ myə́, nə ŋkwɑ nyəŋ mlu' ba mwɑ nə́, ŋkwá é dəm leŋ é, pu e ghɔ dyə mghʉɔ, e nyaptə e. Dzʉ lə lɔ̌ e té ŋkháp bɛ pʉə hɑ bi gɛ dyə̌, gɔm gɑ, cʉ' bɑ nə nyaptə e. O sim ŋkhap a cyə pɑ pa', bɑ gɑ ti nə cyə tùŋ. O yɔ yu gɑ ya mo nə pɔ pɔ gɑ pɑtá lě da'tə gɑ e bɑ bəŋ mo yəŋ gɑ yə e lə vʉ nə bu msamshwə a? Tadyə jyə mco' ghɔm gɑ: Mo yə e lɑ cɔmmtso myə́ a. Yeso ghɔm bi e gɑ: Ghɔ̌ biŋ ŋkho bɑ gə po'o ba wə yǔ. Pa' Yeso pu a pɑkhʉ pyə́ lə pɑ məjyə e ko nthʉm mu' guŋ, mu' mjwǐ, tso tsyə pɑ Marta lɑ e dyə. Mu' fɑ mjwǐ bɔ, tso tsyə pɑ Maria lə cwə dzə cyəpɔ bɑwə ju' ghɔm tsyə. Marta pa' e lə bɑwə jəzhəŋ nə mfa' dyə a sɔ' gɔm gɑ: Cyəpɔ ja a tə́ po'o bɑwə gə sɔmywə nə o gɑ fɑ a tak guŋ mfa' awɛ bəm do m̀ a lə? Ghɔm bi é gɑ é sɔ' ŋkwitə a. Cyəpɔ ghɔm bi e gɑ: Marta, Marta, o bɑwə jwiŋ, bɑ dzɔp nɑ o nə tsə yɔ̌m. Tə a pɑwə shəŋ da' ta' ywə yɑmu'. Maria bɑ e cwɔ' yə nthʉɔ, bi a pɑ́ pú lɑ́ kwi bi e. Yeso lə pɑ mu' tyɛ'dzʉ nə mu' tsʉ' bɑ́wə shwyɛ'nyə Si. E lə miŋ nə cwyɛ'nyə Si, mu' mukhʉ e ghɔm bi e gɑ: Cyəpɔ zhi'tə wɔk nə cwyɛ'nyə Si pa' Yohane lə zhi'tə bi pɑkhʉ pyə a. E ghɔm bi pu gɑ: Po pɑ shwyɛ'nyə Si po ghɔm gɑ: Ta, ghə̌ tso tsʉ̌ pɑ dɔlɔ̌. Ghə̌ Nəfo tsǔ sɔ̌'. Pɑ hɑ yɔk dəŋ ywətsʉ bǎ nə ya tyɛ'dzʉ lə́ Lɑ mhɔ mɔk nə shwyɛ' wɔk nə pa' pyə dɑ mhɔ pyəshɑ pɔ shwyɛ' wap. Kɑ piŋ gɑ mləŋtə ko nə pyə. Yeso lə kwi' gɔm bi pu gɑ: A bi a pɑ mu' mo nə po ghə so e, biŋ gɔ jɔ e téŋ mtsʉ̌' gɔm bi e gɑ: So a, cwyɛ' a msɛ mta' tá nə pa' mu' so a fɑ məjyə la' gə ywə yə gɑ gɔ hɑ bi e a. So e bɔ piŋ nthiŋnyə dyə gɔm gɑ kɑ paknyə a, gɑ é da' jo' dyə, pyə a po pɑ é da' nuŋ kodyə; bi a pɑ́ ŋ də lusi nə hɑ msɛ bu pɑ̀. Gɑ̌ siŋ wɔ gɑ; e pɑ tə lusi hɑ msɛ bi e pa' e so e a, bɑ e gɔ lusi pa' e nə baknyə e a, hɑ guŋ ywə awɛ bi e. Tə gɑ ghɔm bi po gɑ: Po ló pu gɔ hɑ bí po; po cə́ŋ, po gɔ yɔ; po kǒ'tə jyədyə̌, pu gɔ hé bi po. Nə pa' mo yə e lo a pu hɑ bi e; mo yə e cəŋ a, bɑ e gɔ yɔ, mo yə e ko'tə jyə dyə a, pu gɔ he dyə bi e. Yǎ tá mú cəcɑ̌ po bi a pɑ́ mú é lo bapgu bi e, e hɑ nɔk bi é nə tsʉ' bapgu? Kɑ bi a pɑ́ mú lo pəm gɔp bi e, e hɑ gɔmsí bi e? A bi a dəŋ pa' a bɑ pǒ pɔk a, po zhyə nə hɑ tsə pɑpuŋ bi pó pɔ́, bɑ mcʉ̌m sʉ'ʉ nə Ta yə e kɛbəŋ a, pa' e gɔ hɑ Zhwenyə Dɔlɔ̌ bi pɔ pyə wap lo a? Yeso lə zhə̌ŋ mu' zhwenyə cwəpuŋ yə a dɑ mo gə təghɔm a. Zhwenyə bɔ lə təm nə təghɔm, təghɔm ghɔmnwə. A sya pɔmnəŋ. Tə́ shɑ pɔ cəcɑ̌ pu ghɔm gɑ: E shyə m nə Beɛlzəbul, tadyə̌ mzhwenyə cwəpuŋ tə́ jəŋ zhwenyə cwəpuŋ. Shɑ pɔ pɑ shəŋ nə ləŋtə e gɔm bi e gɑ e la'tə wap mtiŋ myə a fɑ́ m kɛbəŋ a. Yeso zhyə pa' wap lə́ bɑwə ŋkwɛ a gɔm bi pu gɑ: Gúŋ Nəfo tsyə a ghaptə a bɑ guŋ bipǐ; mlǎ' simnyə, bvʉtə pɑ ta' do ta' dò, shɑ́ də̌m shɑ́. A pɑ gɑ ba sata ghaptə nɑ é nə gə mghəŋ bʉə nthʉm shù, bɑ nəfo e gɔ piŋ pɑwə m gɑ ka? Nə pa' po bɑwə gɔm gɑ́ gɑ̌ dɑ pɑ Beɛlzəbul tə nə jəŋ mzhwenyə cwəpuŋ. A pɑ gɑ́ gɑ̌ dɑ Beɛlzəbul tə nə jəŋ mzhwenyə cwəpuŋ bɑ pɑkhʉ pɔ́ dɑ yap kɑ tə nə jəŋ wáp? Pɑkhʉ pɔ gɔ pɑ m ya'shɛ yɔ́. Tə a bi a pɑ gɑ́ gɑ̌ dɑ nthəpǔ Si tə nə jəŋ mzhwenyə cwəpuŋ bɑ Nəfo Si sɔ' tə ŋkho nə po. Mbɛ ghə gʉ̌' pu a tsə shu, bɑ byap la' tsyə́ bɑ bi a pɑ sɔmywə lɑ ghə tsə tsyə́. Tə mu' mbɛ yə e ghə gʉ' shyə́ é a la sɔ̌' gəm e, bɑ e gɔ kwi tsə shu tsyə e kɑ nə byap nɑ é a ghaptə tsə tsyə́. Mo yə pyə é tə́ bɑ a pɑ bɑ gɛ bo a, Mo yə pyə̌ tə bəmtə shu'tə a pɑ sa'tə. Cwə yə zhwenyə cwəpuŋ nthəm nə mo a, bɑ́ ŋkha mghakgo shəŋ tsʉ' hwitə a, bɑ́ tə yɔ tsʉ' hwitə gɔm gɑ: Gɑ̌ gɔ pɑnyə dyə m̀ tsʉ' yə ŋ də təm nə a. E nə sɔ' jɔ dyə bɔ bɑ pu khʉm, nyəŋ m səm nə. E ghɔ dɑ shɑ mzhwenyə cwəpuŋ sɔmbʉə bɑ wap pɔk shyə e; wap pu a pu sɔ' ŋkho nə mo bɔ bɑ shwə nə e, yə nə pɑ mo bɔ piŋ bɔk shyə pa' e lə ji bɑ́ a. Pa' Yeso lə pɑ gɔm po'o a, mu' mjwǐ tiŋnyə cəcɑ̌ pɔmnəŋ gɔm bi e gɑ: Buŋtsě mjwǐ yə e lə kwa o vam é biŋ núŋ o a. Tə Yeso ghɔm gɑ: Mpuŋtsé bɑ pɔ pyə wap ju' ghɔm Si bɑ giŋ pa' a gɔm a. Vəŋ pɔ lə cu'tə bəŋ Yeso, e to' nə ghɔm bi pu gɑ: Yəŋ gɑ wɔ̌dzʉ pɔ, bɑ́ wɔdzʉ́ pɔ cwəpuŋ. Wap wə həŋtə́ msya myə a gɔ pɑ mtiŋ fɑ m bi Si a. Bi a pɑ wap lə piŋ jɔ shɑ msya tə ně da' myə́ Yona. Nə pa' dəŋdəŋ pa' Yona lə pɑ̌ mtiŋ bi pɑ Ninivə a, dəŋdəŋ po'o, Mú mo gɔ sɔ' pɑ mtiŋ bi wɔ̌dzʉ yəŋ gɑ. A gɔ sɔ' pɑ tyɛ'dzʉ nə fyɛ' shɛ, Mɑfo guŋ Mto dzʉ lusi pu a pɔ nə yəŋ wɔdzʉ, é nyəŋ shɛ thə pu, nə pa' e lə fɑ tə dhə dzʉ́ sɔ' ju' zhyənwə Salomoŋ. Tə po zhyə gɑ mo yə e tsɔ'ɔ a bɑ e cyə Salomoŋ. A gɔ sɔ' pɑ tyɛ'dzʉ nə fyɛ', pɑ Ninivə lusi pu a pɔ nə yəŋ wɔdzʉ, pɑ Ninivə pɑ nyəŋ shɛ thə pu nə pa' a bɑ wap lě ju' ghɔm Yona bʉɔtʉm tsap a. Tə po zhyə gɑ́ mo yə ě tsɔ'ɔ a bɑ e cyə Yona. Sɔmmo tə sumɔk nə lambu nyəŋ cəŋ pɑ́, pu nthʉ́ dəm kwɔ' lam po'o gɑ pɔ pyə wap dyə a yɔ tsʉ'. Lambu nɑ mo bɑ bɛtsə o. Bɛtsə o pɑ nthʉ̀ɔ bɑ guŋ nɑ́ o awɛ gɔ pɑ nthʉ́m dɔlɔ̌; tə bɛtsə o pɑ jɛ́, bɑ guŋ nɑ o awɛ gɔ pɑ nthʉ́m jʉ́m. Pɑ́ dé bi a ŋkha' yə a bɑ nə o a ka pʉɔ shʉ' jʉ́m a. A pɑ́ gɑ guŋ nɑ o awɛ wə bɑ nthʉm ŋkha' awɛ, tə muywə jʉm bɑ nə e, bɑ e bɑ nthʉm ŋkha' pa' lam dɑ ŋkha' e nə ŋkhyɛ' o a. Yeso lə pɑ gɔm po'o mu' yə Farisai ke e gɑ pu e tsʉ ywə dyə e. E lə ko dyə e shwə́ tɑpe. Yə farisai e bɔ yɔ pa' Yeso dzʉywə tə sɔk bu a, nwə cyə e. Cyəpɔ ghɔm bi e gɑ: Wɔ pɑ Farisai, pǒ sɔk yɔ kɛ pú nthǔ' pɑ jʉmdzʉ, tə bɑ m nthʉm o bɑ cǔŋ pu a yapnwə lo nə po. Wɔ mfʉ́mnyə́ pɔ! Tə́ mo yə́ e lə ghə jʉm dzʉ̌ a, nə lə́ gə jʉm nthʉ̌m o a? Po hɑ pɑ ywə yə ǎ m nthʉ̌m tʉm po a nə ŋkwitə mpəŋ, po'o gɑ guŋ ywə awɛ pɑ dɔlɔ̌ bi po. Tə́ ghəghʉɔ bɑ bi po, wɔ pɑ Farisai. Po gaptə tsə́ tsyə po dzʉ' a nə gə jyə ghǎm bɑ hɑ ta' jyə bi Si: Po gə po'o biŋ dʉɔnyə nə pɑ dəŋdəŋ ba nə kuŋ Si. Yəŋ gɑ bɑ dzə ywə yə́ po kɑ́ bɑ gɔ to' m nə tə́ ghə pyə shɑ tsə a. Ghəghʉɔ yɔ, wɔ pɑ Farisai wɔ pyə po ŋkhuŋ dəŋdzə ŋkwɔ' dyə Sinagogə pu a nə ca'tə pɔ dəm sim a. Ghəghʉɔ yɔ, wɔ pyə pǒ bɑ pa' mthəsì myə pu giŋ dəm o tə zhyə, la' pu pɑ jɔ a. Mu' tadyə́ jyə mco' ghɔm bi Yeso gɑ: Ta o gɔm pǎ' bɑwə jəmtə ba wɔk yɔk! Yeso pa' bi e gɑ: Ghəghʉɔ bɑ bi po yɔ, wɔ mtadyə nə zhyə mco'. Po nthʉ́ ŋkhəm dzɑtsɑ thə pɔmnəŋ tə bi a pɑ po lə co' nthə pu yɔ nə pɑ́. Ghəghʉɔ yɔ, nə pa' po bəm mthəsì mghɔm ghɔ̀m Si pyə mta pɔ lə zhwə wap a. Po biŋ ywə yə mta pɔ lə ghə a nə pa' wap le jwə mghɔm ghɔ̀m Si, po nəŋ bɑwə bəm mthəsì map. A pɑ po'o bɑ Si yə e bɑ e zhyə awɛ a ghɔm gɑ: Gɑ gɔ sɔ' təm mghɛ ghɔm ghɔ̀m Si ba mghɛ nthəm Si bi pu, wap zhwə shɑ́, biŋ dɑ pyə shɑ́ jɔgo'. Po'o gɑ Si sɔ' həŋtə nwə bi pɔ nə́ yəŋ wɔdzǔ nə mcyə guŋ mghɛ ghɔm ghɔ̀m Si awɛ myə pu lə pfyə tə fɑ nə́ nyaptə dzʉ̌ a. Tə fɑ́ nə́ mcyə Abɛ gɔ ŋkhəm nə́ mcyə Sakaria yə pu lə zhwə e bəŋ tsʉ' nə to ywə nə gamtə Si Dyə Si a, pɔ nə yəŋ gɑ wɔ́dzʉ́ gɔ sɔ' ghɔmnwə nə́. Ghəghʉɔ yɔ, wɔ mtadyə nə mcò'. Po bɑ po pe ki nə shwɔ' jyədyə̌ zhyənwə: po lə nəŋ ŋkho dyə po lə nəŋ biŋ gɑ pyə shɑ pɔ kodyə pɑ́. Yeso lə lǔ tsʉ'u bɔ, pɑ zhyə mcò' ba pɑ Farisai pɑ shú'mshwə nə é, bɑ həŋtə e nthinthi mnwə nə dəŋtə é Po'o tə́ nə ghəm é nə nwə yə e ghɔm a. A lə nə pɑ̌ po'o bɑ pɔmnəŋ cu'tə pɔ sha' shǎ', mpfɑ mpfɑ̌ tə bɑwə nthənyə. Yeso pɑ gɔm bi pɑkhʉ pyə gɑ: Po pɔmtə ywə kwɔ'msɛ̌ pɑ Farisai, yə a bɑ nə tsɛ bu jʉm pʉə a. Bǎ kɑ́lə́ yə pu tʉm a, pu gɔ sɔ' la'tə; bǎ kɑ́lə́ yə a mcàm a, pu gɔ sɔ' zhyə́. A po'o tə guŋ ywə yə po ghɔm m nthʉm jʉ́m a pu ghɔ sɔ' yu' dɔdzʉ̌; ywə yə po camtə təŋ mo m dyə̌ a, pu ghɔ sɔ' tiŋnyə do pa' tə́ ghɔm. Gɑ̌ wə gɔm bi wɔ mso pɑ̌ gɑ: Ka po pwɔk pɔ pyə bi a pɑ wap zhwə́ bap nɑ́ tə bi a pɑ wap lə piŋ gə sɔmywə a. Gɑ gɔ la'tə wɔ mo yə bi a pɑ po pwɔk e a: Po pwɔk mo yə bi a pɑ e zhwə mo biŋ nyəŋ e nthʉm tsʉ' go' a. Gɑ siŋ wɔ gɑ a mo yə bi a pɑ po pwɔk é a. Pu tə́ fiŋ mcici pɑtɔ nə tsə bɛ pʉ̌ə a? Tə́ Si lə nəŋ bɑ dʉɔnyə sɔm nə pú. Tə́ ŋkhəm pɑ nə nəŋ thə́ yɔ, Si bɑ e sɛ wɛ. Ka po pwɔk. Pǒ bɑ pǒ cyə́ mcící. Gɑ siŋ wɔ gɑ bǎ ya mo lə yə e piŋ dzə pɔmnəŋ gɑ pyə e nə bɑ a, bɑ Mú mo gɔ piŋ dzə pɑ aŋgəle Si gɑ pu e bəm bɑ. Tə mo yə e kəŋnyə a dzə pɔmnəŋ a bɑ pu gɔ sɔ' kəŋnyə e dzə pɑ aŋgəle Si. Bɑ̌ wɑlə́ yə e ghɔmnwə cwəpuŋ nə Mú mo a, bɑ pu gɔ sɔ' nə cwyɛ' e; tə mo yə e cap Zhwenyə Dɔlɔ̌ a bɑ pu tə gɔ sɔ' nə cwyɛ' é pɑ. Pu pɑ dɑ wɔ gɔ m dzə̌ pɑ ya' shɛ Sinagogə ka lam tsɔ́ sɔ́ nə ywə yə pǒ gɔ ko tsʉ'u ghɔm a. Nə pa' Zhwenyə Dɔlɔ̌ gɔ kó tsʉ'u pɑ́ cwə o bɔ siŋ wɔ́ ywə yə po gɔ ghɔm a. Mu' mo lə tiŋnyə cəcɑ̌ pɔmnəŋ gɔm bi Yeso gɑ: Ta: Ghɔm bi fɑ a gɑ e ghaptə tsə mcʉ' mɔk pyə e hɑ mə̌. Yeso ghɔm bi e gɑ: Wɑ bɑ e lɑ á nə gə gɛ ya' shɛ yə é gɔ ghaptə tsə mcʉ' mɔ cəcɑ̌ po a? E lə piŋ gɔm bi pu gɑ: Po pɔm ghi'nyə, nə pa' vɔk mo tə bɑ m nə dəŋ tsə tsyə́ pɑ, kɑ e la' ji pɑ gɑ kɑ́ lə. E lə ghɔ́m ghɔm tə tutə bi pu gɑ: Mu' gɛ ywə lə ghə pe é; potsə puŋ nthʉm o te' ó. E sɛ nthʉ́m tʉm e gɑ: Gɑ̌ gɔ ghə gɑ́ kɑ? Nə pa' ŋ kha ghə tsʉ' yə gɑ̌ gɔ nyəŋ tsə tsɑ̌ nə a. E lə piŋ gɔm gɑ: Ywə yə gɑ gɔ ghə a, gɑ̌ gɔ sa'tə mthɛ mə̌, piŋ pəm shɑ myə gwyə́gwyə́, nyəŋ guŋ msɛtʉɔ ba guŋ tsə tsɑ̌ nthʉm o awɛ. Piŋ ghɔm bi tʉm tsǎ gɑ: A yɑ bɑ o ghə tsə tə a yɔm, tsə tsyə a gɔ cwə nə mgu' jɔmyɔ̌m a. Hwitə nɑ o, bɑ dzʉ́ pɑ ywə́, biŋ nwə́ pɑ ywə́, bɑ ŋwɛ́nyə́. Tə́ Si ghɔm bi é gɑ: Fʉmnyə́ mo! Pɑ kwa' mtsʉ' tyɛ'ɔ́, pu gɔ kwi vɔk o, tsə tsyə o dwɔ' a, a cʉ' tsyə wɑ? Yɔ ywə yə a nthəm nə mo yə e gə tsə́, a pɑ́ pɑ tsyə, la' a pɑ́ bɑ é zhi nə Si a yəŋ. Yeso piŋ gɔm bi pɑkhʉ pyə gɑ: Á ywə yə á gə tə́ gɔm bi po gɑ́: Ka lam tsɔ pɑ sɔ nə vɔk yɔ nə ywə yə po gɔ ti tə tsʉ a, ba nə́ nɑ tsɔ nə́ dzə́ yə po gɔ kwa a. Nə pa' vɔk bɑ ǎ tʉɔ shyə ywətsʉ, ba nɑ mo piŋ nthʉɔ shyə dzə́. Po yɔ mŋwə́ŋwə tə jɔ: Wap tə dzə ywə pɑ, wap lə piŋ bɑ dɑ ywə nyəŋ dyə; bɑ wap ka nəŋ gə́ mthɛ kɑ ŋkhiŋ lə; tə Si ŋkhim wap, tə mcʉ́m sʉ'ʉ nə́ wɔ pyə́ á bɑ pó cyə́ pǒ msə́ŋ a? Tə ba tə po'o bi a ya mo nə po sɔlam nə vɔk po'o tə ŋkwi' muywə nə vɔk e. A bi a pɑ gɑ́ po ka ghə gʉ' nə gə sɔm muywə bɑ po biŋ sɔlam dəŋ po'o nə kʉ̌. Po yɔ mtutuŋ mghe. Wap tə si' dap a, wap lə nəŋ bɑ ba' dzə. Tə gɑ siŋ wɔ gɑ fo Salomoŋ nthʉm guŋ nəfo tsyə́ awɛ, la tə kwa buŋ dzə́ pa' sɔm a. A bi a Si pɑ ŋkwa dzə́ nə mghe po'o, mghe myə pu gɔ ti to mɔk a, bɑ a gɔ pɑ m gɑ́ kɑ nə pǒ? Wɔ pyə piŋnthʉm yɔ bɑ a kɔk a? Tə wɔ, ka po pɑ shəŋ pɑ ywə yə po gɔ tsʉ a, ba yə po gɔ nwə́ a! Ka po pɑ dzɔp nə tsɔ. Pɑ tə́ pɑ́ pɑ Yudea shəŋ yap tə pwa. Tə Tá yɔ bɑ ě zhyə gɑ tsə bo wə jak wɔ. Po ləŋdzə shəŋ Nəfo tsyə́, guŋ tsyə shɑ awɛ ne sɔ' ŋkwi' nə́. Wə̀ mú kadzə, ka lam tsǔ sɔ́ nə pa' Tá yɔ́ yɔ gɑ́ ǎ puŋ nə hɑ Nəfo bi po. Po fiŋ ywə yə po ghə a, hɑ nə́ nə ŋkwitə mpəŋ. Po ghə pétə yə ywə tə mi nthʉm o a pɑ, po ghə fʉ' yə a tə mi a pɑ́ thə́ kɛbəŋ; tsʉ' yə mcǔŋ tə̌ nə́ a pɑ, msɔkgwɔ' lə pɑ dzʉ́ a. Nə pa' tsʉ' yə fʉ' o nə á, a tsʉ̌ yə tʉm tsʉ̌ bɑ nə a. Po zhwé tap vʉ' po, a mɔ̌k nəŋ bɑ́ pɑ nə mlam mɔ. Po cwə pa' pɔ pyə wap bɑwə byap Ta yap e fɑ́ la'nwə a, wap he jyədyə̌ bi e cwə yə e sɔ' ŋkho'tə jyədyə̌ a. Mpuŋtse bɑ mghɛ fa' pyə Ta yap gɔ nə sɔ' tə wap bɑwə di a. Gɑ̌ siŋ wɔ kwa' nyənyɔ gɑ e gɔ kwa dzə́ fà', yap wap tɑpe, khim wap. Kɑ e la' sɔ' pɑ téŋ mtsʉ' kɑ ŋkwɔ'dzʉ lɑ; nə sɔ' tə wap di, bɑ wap bɑ mpuŋtse! Po zhyə pɑpuŋ gɑ gɛ dyə̌ zhyə cwə yə shuŋ gɔ sɔ' a, bɑ e gɔ pyap, e lə piŋ gɑ shuŋ tu e pɑ́. Ba wɔ yɔ po nə cwə̌ bɑ byap nə pa' Mu mo gɔ sɔ' sɔ' m nə cwə yə po ka zhyə a. Pɛtrɔ ghɔm bi é gɑ: Cyəpɔ, o gɔm ghɔm tə tutə tsɔ pɑ bi pyə kɑ m bi guŋ pɔ awɛ? Cyəpɔ ghɔm gɑ: Kwa' ya ŋkhonthɛ nyənyɔ biŋ bɑ gɛ fʉ̌ yə Ta gɔ yap e dzə nə pɔ pyə gɑ e pɑ gap ywətsʉ bi pu nə cwə yə a puŋ a? Buŋtsě gɛfa' bɔ yə ta gɔ nə sɔ' e pɑwə fá'fà' a. Gɑ siŋ wɔ nyənyɔ gɑ é gɔ yap é dzə̀ nə guŋ tsə tsyə́ awɛ. Tə́ gɛfa' bɔ ghɔm nthʉ́m tʉm e gɑ: Ta á gɔ nə sɔ' cwə, ntho' nə cwɔ mso fa' pyə́ pyə pɑ bɛ ba pyə pɑ jwǐ, bɑ dzʉ́, bɑ nwə́, bɑ bam, bɑ tap e gɔ la' sɔ' tyɛ'dzʉ yə e tə wə byap e a pɑ, cwə yə e ka zhyə a, zhəŋ e, ghə nə e pa' e gə nə́ pɑ tsɛbu jʉm pʉə́ a. Gɛfa' yɑ yə a bɑ e zhyə ywə yə tap e shəŋ a, la' e nəŋ nyaptə sɔmywə, la' e ghə pá' tap e shəŋ a, mgwa mshɔm myə́ gɔ sɔ' yɔm te' o. Tə mo yə e ka zhyə a, la' e nəŋ gə a, pu tə́ gɔ sɔ' ghyɛ' cwɔ e pɑ. Pu gɔ sɔ' kwi a yɔm bi mo yə pu le hɑ bi e a yɔm a, həŋtə a yɔm bi mo yə pu le dwɔ' bi e tə a yɔm a! Gɑ̌ sɔ m nə́ ma' mɔk dəmcǎ'; biŋ bɑ si sʉ́m bi a a ka' pé'e bɑ pu e da' su mɔk bɔ? Mu' kwishyə sí yə gɑ̌ gɔ kwi ya a, ŋ biŋ bɑwə do'nyə gɑ a pəmtə. Po ŋkwɛ gɑ ŋ də́ sɔ' hɑ hwitə dəmca' a? Gɑ̌ ghɔm bi po gɑ gɛ̌, ŋ də́ dɑ ŋkhyɛ'nyə sɔ̌'. Nə pá' tə fɑ cwəlɔ, dyə yə pɔ pɑtɔ nə a, wap gɔ ghap ghəŋ pʉə́: Pɔ tá pɑ bɔ pɔ pʉə, pɔ pʉə pɑ bɔ pɔ tá; tá pɑ bɔ sə̀m, səm pɑ bɔ ta, má pɑ bɔ go, gó pɑ bɔ má. Shyə́ pɑ bɔ jwi mu, jwi mu pɑ bɔ shyə́ yap. E lə pǐŋ gɔm bi lǎ' gɑ: Pǒ jɔ mlwa yaptə mghəŋ Binam po wuŋ gɔm gɑ bə̌ŋ wə sɔ̌', a sɔ'. Jɔ fəfa fɑ mto dzʉ po ghɔm gɑ nam gɔ tyə́, nam nə́ŋ nthyə́. Pɑ tsɛ bǔ, po jyə́ nə zhyə́ ywə yə mtiŋ sicǎ' ba kɛbəŋ da'tə a; kɑ́ gə po lə zhyə mtiŋ cwə dzʉ yəŋ gɑ̌? Nwə kɑ la' po nəŋ jyə ywə yə a bɑ dəŋdəŋ a? Po gɛ bo o pɑ gɔ m dzə ja' shɛ́, o ko məjyə gə́ shɛ mi; bwɔk gɑ e kɑ lɑ o gɔ dzə ja' shɛ, ja' shɛ́ hɑ o bi byapcɛ̌, byapcɛ̌ nyəŋ o cɛ́. Gɑ̌ siŋ o gɑ o gɔ la' nə təm cɛ́ bɑ o tuŋ ju tə nthuŋ bɑ mcwɔp myə́. A lə pɑ pɑ́ cwə o bɔ, shɑ pɔ sɔ' siŋ e ywə yə a lə təm nə pɑ Galilea pyə Pilato lə lɑ mcyə map ŋi'nyə myə́ tsəpwɔ' tsap a. E ghɔm bi pu gɑ: Po kwɛ gɑ pɑ Galilea bɔ̌ bɑ wap lə hɔnwə shyə guŋ pyə shɑ pɑ Galilea awɛ tə jɔgo' tiŋ po' a? Gɑ siŋ wɔ gɑ gɛ̌. Tə́ po pɑ tə pʉɔtʉm tsɔ, bɑ ba wɔ yɔ gɔ sɔ' pfʉ pɑ po'o awɛ. Kɑ po kwɛ gɑ pɔ shwɔp hɔm mgham pyə sʉəsʉə pa' Siloe lə vʉ̀ nə pu jwə́ wap a, lə bɑ wap hɔnwə shyə guŋ pɑ Yerusalɛm a? Gɑ̌ siŋ wɔ gɑ gɛ̌; tə́ po pɑ tə pʉɔtʉm tsɔ, bɑ ba wɔ yɔ gɔ sɔ' pfʉ pɑ po'o awɛ. É lə́ ghɔ́m ghɔ̀m tə́ tútə gɑ. Mu' mo lə ghə́ ta' thə́ nthɔmmthə pe e bɑ e tsə ka e. E lə́ sɔ' de nthɔm myə́, e lə yɔ sɔmywə nə. E lə́ ghɔ́m bi byap ka ga: Yəŋ gɑ si bɑ batə́ gu'dzʉ́ tsɑtá pa' bǎ sɔ' nə le nthɔm nə thə nthɔmmthə́ yəŋ gɑ, ŋ də yɔ sɔmywə a. Nwə ka e lɑ yəŋ gɑ tsʉ' ca' néné? Byap kà pa' bi e gɑ: Ta: Kwi' nthak e nəŋ gu' ɔ, po'o gɑ̀ nthəŋ giŋnyə e, nyəŋ dziak nə, pɑtyɛ' a yam nthɔm; tak po'o, o ko' e ma' si. Yeso lə pɑ̌ ji'tə ywə bi pɔmnəŋ sinagogə tyɛ' Sabat. Mu' mjwǐ pɑ dyə o bɑ mú' zhwenyə lɑ é gə ŋkho'tə tə fɑ nə gu' shwɔp hɔm mgham. Bɑ e lě bɔnyə, la' e pɑ bʉ' nɑ́ e jyə́ Yeso lə yɔ e gɔm bi e gɑ: Mɑmjwi, o vɔk po'tə o. Gɔm po'o jap bu myə́ nə e; e wuŋ bʉ' nɑ e, go'tə Si. Tə tadyə Sinagogə yɛluŋ pa' Yeso jɛ mo po'o tyɛ' Sabat a, gɔm bi pɔmnəŋ gɑ: Mtyɛ'dzʉ fa' wə nthɔkə, po sɔ' pu yɛ wɔ tyɛ' o bɔ. Ka po sɔ' m tyɛ' sabat. Cyəpɔ pà' bi e gɑ: Mlǎbu! Bǎ ya mo lə nə po tə bɑ tyɛ' sabat ŋkhyɛ' nɔmna' e kɑ jakasi e lə́ dɑ e gɔ e nwə́ shyə a? Tə mɑmjwi yəŋ gɑ, yə e bɑ go Abraham a, yə sata bɑ e le shəŋ e tə fɑ nə gu' shwɔp hɔm mgham a, a ké tə puŋ gɑ pu kyɛ' e tyɛ' sabat a? E lə pɑ gɔm po'o, sǒ pɑ ŋkhú mghɛ bo pyə; tə pɔmnəŋ pɑ ŋwɛnyə nə mnwə pɑpuŋ myə e lə́ gə a. E lə kwi' gɔm gɑ: Nəfo Si hwə́ kɑ, bi a pɑ ŋ də kɑ fǒ'? A hwə́ pá' sɔm sɔk yə mo dzə ka é: A ŋkwyɛe, ji ta' thə́, pǒmsəŋ to kɛbəŋ pɑ ba' mkɔ map nə bu myə́ a. E lə kwi' gɔm gɑ: Nəfo Si bɑ pa' kɑ a? Nəfo Si bɑ pa' ywə nə gə msɛ kwɔ', yə mjwǐ nyə́ŋ muywə nə msɛ bǔ ntha nə gə a cəŋtə ŋkwɔ' a. Yeso lə pɑ gɔ m Yerusalɛm, nə cyə́ mla' ba mtisuŋ, giŋ ji'tə pɔmnəŋ ywə́. Mu' mo ghɔm bi é gɑ: Cyəpɔ, jyə gɑ́ da' pó mduŋ pɔ nə gɔ sɔ' vɔk lə? Yeso pa' bi pu gɑ: Po kaktʉɔ nə cyə m nə jyədyə̌ ŋkho dyə́. Nə pa' gɑ̌ siŋ wɔ gɑ pɔ tə jɔ́m gɔ sɔ' cəŋ nə ko dyə, wap lə ku' nə ko. Cwə yə gɛ la' gɔ sɔ' lusi yo' jyədyə̌ nə cɑ wɔ dzʉ a, po to' nə pɑ ŋkho'tə jyədyə̌ bɑ gɔm gɑ: Cyəpɔ hé jyədyə̌ bi pyə. E pa' bi po gɑ: ŋ kha zhyə́ wɔ. A po to' nə ghɔm gɑ: Pyə lə tsʉ́ biŋ nwə dzə o. O lə ji'tə ywə guŋ pyə. E piŋ ba' bi po gɑ: Ŋ kha zhyə wɔ. Po lu bəŋ m̀ wɔ mghɛ ghə nwə cwəpuŋ. Po gɔ sɔ' pɑ lɔ piŋ pɑ pfɑ msuŋ mɔ nə tyɛ'dzʉ yə po gɔ sɔ' yɔ Abraham, yɔ Isak ba Yakop ba guŋ mghɔ́m ghɔm Si awɛ nthʉm Nəfo Si, bɑ pu wa' wɔ m pé a. Pu gɔ sɔ' fɑ ghəŋ nthəmnam, ba m ghəŋ binam, fɑ shyə́dzʉ̌ ba m mto dzʉ pɑ tsʉ́ nthʉm Nəfo Si. A po'o tə́ shɑ pɑ jʉm gɔ sɔ' cʉ' pɑ dzə̀, shɑ́ pɑ dzə cʉ' pɑ jʉm. A lə pɑ̌ pɑ́ cwə o bɔ, shɑ́ pɑ Farisai sɔ' gɔm bi e gɑ: Ghɔ̌! Lu si tsɔ'ɔ nə pa' Herode bɑwə shəŋ nə zhwə o a. E ghɔm bi pu gɑ: Po ghɔ gɔm bi sʉ́sʉm bǎ gɑ: Yɔ: Gɑ wə jəŋ mzhwenyə cwəpuŋ, biŋ bɑwə jɛ mgho tyɛ' ɔ ba m yǒ. A piŋ bɑ nə batə tyɛ' ta, á yɑ dəŋ ku'u. Tə', a puŋ gɑ giŋ tyɛ' ɔ, ba m yǒ, ba m yəmu' yo, nə pa' a ka puŋ gɑ sɔm gɔm ghɔm Si pfʉ́ tə pfʉ́ pɑ Yerusalɛm pɑ. Yerusalɛm, Yerusalɛm, wə yə o jwə mghɔm ghɔ̀m Si, bɑ dɑ mwɔ' nthamtə pɔ pyə pu nthəm wap bu a, ŋ də cəŋ nə cu'tə pó pǔ pa' mɑgɔp shu'tə po pyə bap e a la' po kuŋ. Tə́ pú gɔ sɔ' tak la' tsɔ bi po. Po lə nəŋ biŋ jɔ a tə ŋkhəm cwə yə po gɔ sɔ' ghɔm gɑ: Byanyə nə tso Cyəpɔ bi mo yə e wə sɔ' a. Yeso lə ko dyə mu' tadyə pɑ Farisai tyɛ' Sabat nə tsʉ ywə. Pɑ Farisai pɑ dé é nə pa' mu' mo lə́ bɑ dzə e, gho vam pɑ nə e. Yeso lə lɑ́ ghɔm gɔm bi mtadyə nə mco' ba m bi pɑ Farisai gɑ: A bɑ pu piŋ kɑ ŋkhə́ŋnyə nə yɛ gho tyɛ' Sabat? Wáp lə kwé. Yeso ké gɛ gho jɛ é, gə e ghɔ. Biŋ gɔm bi pu gɑ: Yǎ mo nə pó yə mú e kə nɔmna' e lə vʉ̀ ghʉ́m shyə tyɛ' Sabat bɑ e tə́ wuŋ té e a? La' wap ku' nə pa' nwə nə́. E lə yɔ pa' pɔ pyə pu lə ke wap a lə́ bɑwə ŋkho dyə shwə pɑ dzə a, gɔm bi pú nə ghɔm tə tutə gɑ: Mo ke o nə la'nwə e, o kɑ sɔ' ŋkho dyə shwə nə dəŋdzə kwɔ'; nə pá' bi a pɑ bɑ pu ké mu' mo yə e cyə o a, e sɔ' mo yə é ŋkhe wɔ a sɔ' gɔm bu gɑ o hɑ yu tsʉ' bi é, sǒ kú u nə ghɔ shwə jʉ̀m. Tə́ mo ke o, o ko dyə, o ghɔ shwə jʉ̀m; po'o gɑ mo yə e ŋkhe o a sɔ', e ghɔm bu gɑ: So a, ghɔ dzə shwə́. A gɔ pɑ́ cwə o bɔ pɑ gu'tə ghǔ'tə bu dzə̌ pɔ pyə pu ŋkhe wɔ pu a pu a. Nə pa' mo yə e ŋa'nɑ é a pu gɔ sɔ' fi' e hɑ si, a mo yə e fi'nɑ e hɑ si a, pu ŋa' e hɑ thə́. E lə piŋ gɔm bi mo yə é lə ké é á gɑ: O pɑ gɔ la'nwə o kɑ ké mso pǔ, kɑ mfɑ pǔ, kɑ mta pǔ, kɑ mghɛ dhə la' o pyə wap zhi a lə, bwɔk gɑ wap kɑ ti ŋkhe o yap, a pɑ mù mcwɔ'fa'. Tə́ o pɑ dá'nwə, o ké mpə̌ŋ, ŋkké mghɛ po'tə ba mkho'tə, pu a mfʉ, po'o gɑ o pɑ pɑpuŋ nə pa' wap ka ghə sɔmywə nə shwɔ'fa' o a, Si nə ghɔ sɔ' cwɔ'fa' o a. Mu' mo nə pɔ pyə pú a pú lə ké wap a lə nə yu' mghɔm bɔ gɔm bi Yeso gɑ: Buŋtse mo yə e gɔ sɔ' tsʉ ywə nthʉm Nəfo Si a. Yeso piŋ gɔm bi e gɑ: Mu' mo lə pɑ da'nwə, ŋkhe pɔmnəŋ tə wap yɔm. A lə ku' cwə nə tsʉ ywə, e təm gɛfa' gɑ e ghɔ gɔm bi pɔ pyə e lə ké wap a gɑ: Po sɔ̌' nə pa' tsə pəmtə. Da' gɑ guŋ yap awɛ lɑ ŋkwishwə da'nyə: Dəŋdzə mo ghɔm gɑ: Gɑ yo pé, a pɑwə shəŋ gɑ gɔ jɔ. Səso la'nyə a. Yə mu' mo ghɔm gɑ: Gɑ yo mna' ghǎm, bɑ si po'o bɑ m məjyə nə ghɔ jɔ́, səso la'nyə a. Yə mu' mo kwi' gɔm yə gɑ: Gɑ bɑwə tə dɔmdyə, bi a pɑ də ghɔ tsʉ'. Gɛfa' pɑnyə jʉm siŋ tap e. Tap e yɛlúŋ gɔm bi é gɑ: Khʉdʉ́ gɔ mthə jyə pu a m məjyə, ŋkhe mpə́ŋ, pu a mghɛ po'tə, ba mfʉ̀ pu a mkho'tə. Gɛfa' ghɔm gɑ: Ta, pu ghə pá' o gɔm a, da' gɑ tsʉ' yɑ̌ pɑ dyə. Tá ghɔm bi gɛfa' gɑ: Ghɔ nə mpim jyə nthə́nyə pɔ wap ko dyə tə̌ dyə̌ lo. Nə pa' gɑ siŋ wɔ gɑ sɔmmo nə pɔ pyə dɑ kě wap a tə gɔ la' zhwi' cəŋ tsɑ̌ pɑ. Yeso pu a pɔ tə jɔm lə pɑ̌ giŋ məjyə, e fɛ nɑ e jʉ̀m gɔm bi pu gɑ: Mo yə e yap jʉ̌m m̀ tə́ la' e wa' tap e, gwa' map e, gwa' jwi e, gwa' po pyə gwa' mfɑ́ pyə pyə pɑ bɛ ba pɑjwǐ, ba bə̌ŋ nɑ é a, ka ku' nə pɑ mukhʉ a. Mo yə e ka kwa yə bɛnyəpɛnyə nə jap jʉ̀m m̀ a, bi a pɑ gɛ lə pɑ mukhʉ a. Nə pa' wɑ nə po yə e pɑ gɔ kwɑ shəŋ bɑ e tə gɔ ləŋdzə cwəsi, sɛ yɔ bi a e ghə dəŋ tsə́ nə ŋkwɑ́ shəŋ tə miŋ a? Bwɔk gɑ e kɑ ma' cyə shəŋ gwa' pu nə gwi e, bɑ gɔm gɑ: Bɛ yəŋ lě ma' shəŋ miŋ kəkɔ. Kɑ ya fo yə e pɑ gɔ ghɔ lo' yə mu' fo shù, bɑ e tə gɔ ləŋdzə cwə́si lé, tə yɔ gɑ e ghə gʉ' nə dɑ msəŋwi pɔ sha' gham tə nə gɔ do' mo yə e ghə msəŋwi pɔ sha' mghambʉə a? A tak po'o bɑ cwə yə yə mu' fo yɑ̌ gʉə sʉəsʉə a, bɑ e gɔ təm gɛ nthəm bi e gɑ e ghɔm bi e gɑ pu e ghə hwitə. A po' gɑ po zhyə gɑ bǎ ya mo lə nə po pɑ tə kəŋnyə guŋ tsə tsyə e gə a awɛ bɑ e tə gɔ pɑ mukhʉ a pɑ. Gwɛ̌ bɑ kwa' ywə pɑpuŋ; tə gwɛ̌ pɑ tə piŋ dʉ̌m, bɑ pu gɔ lɑ kɑ ghə a tʉ̌m? Bɑ bi á pɑ́ a lə piŋ ŋkwitə bi cǎ', kɑ nə nə dwɔp cá' lə; pu gɔ ma' gwɛ bɔ pé. Mo yə e ghə mtəŋ nə ju' a yu'! Guŋ mghɛ kwishwɔp pu a mghɛ mhɔ lə cu'tə bəŋ Yeso bɑ ju' nwə yə e bɑwə gɔm a. Pɑ Farisai pu a pɑ zhyə́ mco' khukhu nthúŋ pu gɔm gɑ: Mo yəŋ wə shu'tə mghɛ mhɔ, pu a pu pɑ dzʉywə. Yeso lə ghɔ̌m ghɔ̀m tə tutə gɔm bi pu gɑ: Ya mbɛ nə po bi a pɑ e ghə jʉ̀jʉ̀ tsyə́ ŋkhə, mu' ta' təm nə bi, bɑ e tə gɔ tak pyə shɑ shwɔp vʉ̌' mgham vʉ̌' gó, ghɔ cəŋ yə bɔ̌ yə e bi a tə yɔ e a? Cwə yə e yɔ é a, e dɑ ŋwɛnyə ŋkwa é jap e kəbo' e, bɑnyə la' e, ŋkhe mso pyə́ pu a mghɛ dhə la' pyə́ gɔm bi pu gɑ: Pɑ ŋwɛnyə nə pa' gɑ yɔ mu jʉ̀jʉ̀ a yə e lə pi a. Dəŋdəŋ po'o tə́ gɑ̌ siŋ wɔ gɑ ŋwɛnyə gɔ sɔ' pɑ thə́ kɛbəŋ nə thə́ ta' gɛ mhɔ yə e pʉɔtʉm tsyə a tə cyə nə pɔ shwɔp vʉ̌' mgham vʉ̌' pyə wap tə wə byap nə pʉɔtʉm a pɑ́. Kɑ ya mjwǐ yə e ghə drashəma gham, ta' drashəma pi nə, bɑ e tə gɔ khyɛ' lambu, kʉm dyə tə yɔ drashəma bɔ a? Cwə yə e yɔ a, e ke mso pyə pu a mghɛ dhə la' pyə gɔm bi pu gɑ: Pɑ ŋwɛnyə nə pa' gɑ yɔ drashəma yə a lə pi a. Dəŋdəŋ po'o tə́ gɑ̌ siŋ wɔ gɑ ŋwɛnyə bɑ dzə̌ pɑ́ aŋgəle nə ta' gɛ mhɔ yə e pʉɔtʉm tsyə a. E lə kwi' gɔm bi pu gɑ: Mu' mbɛ lə ghə pǒ pyə pɑpʉə. Yə mo ŋkho' ghɔm bi tap e gɑ: Tá hɑ tsɑ tsə tsyə o bɑ gɔ la'tə hɑ bəm a. E lə ghɔm po'o ta yap ghaptə tsə tsyə́ bi pu. A lə nə cyə po mtyɛ'dzʉ, yə mo ŋkho' cu'tə tsə tsyə gɔ nə mu' guŋ tə gʉə sʉəsʉə, sim tsə tsyə bɔ nə vɔk tə ŋkhɛ. Cwə yə e lə pɔptə́ tsə bɔ tə a mi a, mu' mɑ kəya' vʉ nthʉm gúŋ. E cʉ' bə̌ŋ. E lə ghɔ jɔ mu' yə́ guŋ bɔ, dɑ fa' bi e, e təm e gó gɑ e ghɔ bɑ byap mgənɔm pyə. E lə bɑwə shəŋ nə pɑ dzʉ tsyə nə ywətsʉ mnɔm, da' gɑ la' sɔmmo pɑ hɑ ywətsʉ mnɔm m bi e. E lə ghəmnɑ e gɔm gɑ: Mghɛ fa' ta á pɑ́ sʉ'ʉ shəŋtə dzʉywə tə́ nthak bvʉ'? Sɔ' m nə m, gɑ̌ yəŋ tsɔ'ɔ bɑwə pfʉ́ jikǔ'. Gɑ gɔ lusi ghɔ bəŋ ta á ghɔm bi e gɑ: Ta ŋ de hɔnwə nə kɛbəŋ ba m bú. Ŋ kha piŋ ŋkhu' pá' bi a pɑ o ké a gɑ mú o a. Lɑ a pa' mu' gɛfa' o a. E lə lusi cwəlɔ gɔ nə yɔ tap e. E lə yɑ gʉə sʉəsʉə tap e yɔ e, mtso myə́ kú e, e kʉdʉ̌ nthɛtə nthuŋ e, nuŋ mgho' myə́. Mu é bɔ ghɔm bí e gɑ: Ta ŋ dě hɔnwə nə kɛbəŋ ba m bǔ, ŋ kha piŋ ŋkhu'nyə nə pa' bi a pɑ pu ke a gɑ mu o a. Tə́ tap e ghɔm bi mghɛ fa' pyə gɑ: Po lo'nyə dé kwa' dzə pɑpuŋ nə sɔ' ŋkwa nə é, biŋ jwe kwɛ nthə pu e, biŋ su ba mthap mkwə e. Po lɑ mu hùŋ mhə̌m sɔ' jwə e, pɑ pfɑ́, ŋwɛnyə; nə pá' mu a yəŋ gɑ lə pfʉ̌, e piŋ sɔ̌' nə vɔk, e lə pǐ, pu piŋ jɔ é. Wap lə to' nə ŋwɛnyə. A lə nə pɑ po'o shyə̀dzə é pɑ m pě. E lə pɑ bɑnyə, sɔ' tə ŋkhəm be dyə̌, jʉ' pa' pu dyə jwɔp lə́ nəŋ a, ŋkhe mu' gɛfa', həŋtə é ywə yə a bɑ ya a. E ghɔm bi e gɑ: Fɑ o bɑ ě pɑnyə; pa' e nə sɔ' bɑ pɑ́ nthʉɔ a tɔ ɔ zhwə mú hùŋ mhə̌m. E lə yu' po'o, luŋ e yɛ, e lə kuŋ nə ko dyə. Tap e tə́m byɛ'tə e. E ghɔm bi tap e gɑ. Pa' bɑ fa' bu a, a cwəlɔ mgu' jɔmyɔ̌m, ŋ də m nthʉɔthə́ bu; tə o la m hɑ mu dzə́ bəm gɑ pyə a mso pɑ nə ŋwɛnyə. Tə mu o yɑ yə é sɔ' a, yʉ yə́ e lə sǐm tsə́ tsǔ pu a pɑ mcʉ'ma' a, o zhwə́ mú hùŋ mhə̌m nə e! Tap e ghɔm bi e gɑ: Mú a, pu nə́ bɑ guŋ mcwə awɛ, guŋ ywə yə gɑ gə a, a pɑ yǔ. Tə́ a bɑwə shəŋ gɑ pu ŋwɛnyə nə pá' fɑ o yɑ lə́ pfʉ̌ e piŋ jam nə vʉ̌, e lə pǐ, pu piŋ ho é. Yeso lə pǐŋ gɔm bi pɑkhʉ pyə gɑ: Mu' zhi mo lə ghə mukhʉ mtɔ e, pú sɔ' siŋ e gɑ e wə bɔptə potsə tsyə́ pɔptə. E ké é gɔm bi é gɑ: Gɑ ju' gɑ kɑ nə o lé? Sɛ tsə tsɑ̌ siŋ a pa' o nə gə a, nə pa' tə́ wə ne gɔ piŋ pɑ lé tsə́ tsɑ̌ pɑ. Mukhʉ mtɔ bɔ sɛ nthʉm tʉm e gɑ: Gɑ̌ gɔ pɑ fa' kɑ, nə pa' ta á kwi fa' bəm a? Gɑ̌ gɔ tsʉ' ca' lə? Ŋ kha ghə gʉ́'. Gɑ̌ gɔ cʉ' do ywə lə? Sǒ gɔ ku a. Gɑ̌ zhyə pa' gɑ gɔ ghə tə ghə pɔ pyə wap gɔ nyəŋ a mdyə map cwə yə pu te a fa' a. A lə pɑ po'o, e ke mghɛ ju tap e yɑmu' yɑmu' gɔm bi dəŋdzə mo gɑ: Po ta á ghə kʉ̌? E pa' bi e gɑ pyə e ghə mwɑ mta' ŋkhə. E ghɔm bi e gɑ: Cwəsi, pe ŋwa'nyə o bvə nə gɑ mghǎmthɔ. Biŋ gɔm bi yə mu' gɑ: Po ta a ghə kʉ̌? E pa' bi e gɑ́ msɛ msap ŋkhə. E ghɔm bi e gɑ: Pé ŋwa'nyə o bvə nə gɑ mgham hɔ̌m. Bɛ bɔ lə gho'tə fʉ́ mukhʉ́ mtɔ̌ bɔ, nə pa' e lɑ ghə nwə pa' sɛ nwə a. Nə pa' pɑ dzʉ bɑ wap zhyə fʉ tə' shyə pɔ pyə wap giŋ nthʉm ŋkha' a. Gɑ̌ ghɔm bi po gɑ po lɑ́ tsə mfʉm ŋkho mso pɔ. Po'o gɑ tyɛ'dzʉ yə po ka ghə ywə a, wap nyəŋ wɔ dyə vɔk mama. Mo yə e bɑ nyənyɔ nə mu ywə ywə́ a, bɑ nyənyɔ nə ywə gwyə. Mo yə e tə bɑ nyənyɔ nə muywə ywə́ a pɑ, e tə bɑ nyənyɔ nə yə gwyə pɑ́. A bi a pɑ gɑ po ka pɑ nyənyɔ nə tsə mfʉm bɑ wɑ gɔ sɔ' hɑ tsə nyənyɔ bi pǒ? A piŋ bɑ gɑ po ka pɑ́ nyənyɔ nə ywə yə a yə mo dyɛ' a bɑ wɑ gɔ hɑ ywə yə a yɔ a bi pǒ? Bi a pɑ sɔm gɛfa' lə fá' bi mtǎ fa' pɑpʉə, nə pa' bɑ e gɔ pɑ pɔ mu', pɑ kuŋ mu', pɑ la nɑ́ e nə mu', pɑ wa' mu'. Bi a pɑ po lə fa' bi Si pu ŋkhap. Pɑ Farisai pyə wap lə ŋkhuŋ ŋkhap a lə nə yu' po'o, bɑ gwi Yeso. E ghɔm bi pu gɑ: Po da'tə bi pɔmnəŋ gɑ po bɑ pɔ nyənyɔ. Tə Si bɑ e zhyə mtʉm mɔ. Nə pa' ywə yə pɔmnəŋ nyəŋ dəŋ nə a bɑ dzə Si bɑ kwa' mzhʉ̌m. Mco' ba mghɔ́m ghɔm Si lə́ miŋ nə Yohane. Tə fɑ po'o pu pɑ ju' Cuŋ Pɑpuŋ Nəfo Si nə guŋ mtsʉ' awɛ. Bǎ ya mo lə pɑ nthé gʉ' nə ko nə́. Kɛbəŋ pu cǎ' gɔ sɔ' cyə; tə bi a pɑ sɔm ta' cwɔ' lə təm nə mco'. Bǎ yá mbɛ lə yə e zhəŋ jwi e biŋ ŋkho mu' a, bɑ e ghə ghap. Mo yə e nəŋ ŋkho nə mjwǐ yə pu zhəŋ e a bɑ gɛ ghə ghap. Mu' gɛ ywə lə bɑ wə, bɑ ŋkwa dzə nə̌m, dzə dap də̀ŋ, bɑ ŋwɛnyə guŋ mtyɛ'dzʉ awɛ. Mu' bə́ŋ, bɑ mshwə tsə səŋ e awɛ, tso tsyə pɑ Lazaro pɑ nuŋ jyədyə̌ e. E lə bɑ shəŋ nə pɑ dak msisya ywə yə a lə bvʉ si nə tɑpe gɛ ywə bɔ a nə bvɔk yə; da' gɑ́ bvʉ́ tsyə pɑ sɔ' dzɛ mshwə tsə myə́. A lə pɑ po'o, bə̌ŋ bɔ ti pfʉ, pɑ aŋgəle lɑ é jap bəŋ Abraham. Gɛ ywə lə ti pfʉ yə pu təŋ e. E lə ko guŋ mpfə pɔ, bɑ jɔgo', bʉ' mnyə jɔ Abraham ba Lazaro bəŋ e tə gʉə sʉəsʉə. E lə cwě gɔm gɑ: Ta a Abraham cɔmmtso mə̌, nthəm Lazaro e co' pu e nə shyə nə sɔ' bvyə ghak a nə pa' gɑ si tsɔ'ɔ bɑwə jɔgo' te' o nthʉm mɔk. Abraham pa' bi é gɑ: Mú a, kamtə gɑ o lə kwi tsu tsə pɑpuŋ nthʉm vɔk o dəŋdəŋ pa' Lazaro lə yɔgo' a. Cwəlɔ, e tsɔ'ɔ pu pɑwə nə zhwyə̌tə e o pɑwə jɔgo'. A piŋ nə pɑ̌ po'o ta' tsʉm pɑ cəcɑ̌ pɑ, po'o gɑ pɔ pyə wap gɔ fɑ tsɔ'ɔ ghɔ tsa'a, kɑ tsa' a sɔ' tsɔ'ɔ a kə cyə. Gɛ ywə ghɔm gɑ: Gɑ̌ wə shwyɛ'nyə o m ta gɑ o təm Lazaro la' ta á. Nə pa' mfɑ pɑ̌ yɑ́ la' pɑ́ tɔ, e ghə wap zhyə, po'o gɑ wap kə la' sɔ' tsɔ'ɔ nthʉm go'. Abraham pa' bi e gɑ. Mosɛ pu a mghɔm ghɔm Si bəŋ pu. Wap yu' ywə yə wap gɔm bi pu a. Gɛ ywə ghɔm gɑ: Gɛ m ta a Abraham, mo nə ghɔ bəŋ pu fɑ m guŋ a vʉ̌ bɑ wap gɔ pʉɔtʉm tsap. Abraham ghɔm bi e gɑ: Wap pɑ́ tə yu'shwə Mosɛ ba mghɔm ghɔm Si, bɑ mo yam pɑ nə vʉ̌ bɑ wap tə gɔ pʉɔtʉm tsap pɑ́. Yeso ghɔm bi pɑkhʉ̌ pyə gɑ: Sɔmywə yə bi a pɑ a kɔ ywə fa'tə á a tə̌ wə pɑ́, tə gǒ' bɑ bi mo yə a gɔ cyə m nə e a. Dzə̌ bi mo bɔ gɑ pu cəŋ ləŋ nthuŋ e, ma' e nthʉm shyə lɑpʉə. Shyə pa' bi a pɑ e ghə mu' nə pɑkhʉ pɔ gɑ vʉ́ si a. Po pɔmtə: fɑ́ o hɔnwə bu, o tɔk e, bi a e kwyəpnyə a, o lɑ mhɔ myə́ nə shwyɛ' e. E hɔnwə bu mcʉm sɔmbʉə nə tyɛ'dzʉ, tə sɔ' dzə o kwyəpnyə mcʉm sɔmbʉə, o lɑ mhɔ myə́ shwyɛ' e. Mghɛ nthəm ghɔm bi Cyəpɔ gɑ: Kwi' piŋnthʉm yɔk. Cyəpɔ ghɔm bi pu gɑ: Po la' gə piŋnthʉm dəŋ msɔm sɔ́k bɑ po ghɔ̀m bi ta' thə́ yəŋ gɑ gɑ́: Cwɔ' nɑ o gɔ nthʉ́m shyə lɑpʉə. Bɑ a gɔ yu' shwə yɔ. Wǎ nə po yə e la gə ŋkwɔ e, e pɑ́ dzʉ'ne kɑ byap dzə́ lə, bɑ cwə yə e fɑ pé a, é gɔ ghɔm bi e gɑ sɔ' shwə dəm tɑpe? Gɛ̌. E gɔ ghɔm bi m gɑ: Nyaptə ywətsʉ nə sɔ' hɑ bəm. Cwə yə gɑ̌ tsʉ ywə tə jwyə biŋ nwə́ a, o gɔ ghɔ tsʉ yǔ cwəlɔ. E gɔ gho'tə ŋkwɔ e bɔ nə pa' e ghə ywə yə e gɔm bi e a? Bɑ wɔ yɔ, cwə yə po ghə guŋ ywə awɛ yə pu lə ghɔm gɑ po ghə a, po ghɔm gɑ: Pyə̌ bɑ pɑ́ sobo mghɛ fa', pyə̌ ghə pɑ ywə yə pyə kɑ bɑ gɔ ghə a. Yeso lə pɑ gɔ m Yerusalɛm, shyə m Samaria pu Galilea. E lə pɑ ŋkho nthʉm mu' guŋ, shɑ mghɛ ka'pap pɔ gham sɔ' pu a pu yu'tə, wap tiŋnyə gʉə sʉəsʉə. Shwé gɑ: Yeso ta, cɔmmtso mɔ́k. Yeso lə nə yɔ wap gɔm bi pu gɑ: Po ghɔ da'tə nɑ tsɔ bi mkamsi. Wap lə pɑ̌ gɔ, nɑ tsap lɔ́. Mu' mo nə pu lə yɔ bɑ ě yɛ, bɑnyə nə mkwə myə́, giŋ gu'tə Si tə́ thə́, sɔ' bvʉ nə mkwə Yeso, pfɔptə sə é si go'tə e; mo bɔ lə bɑ yə Samaria. A pɑ́ po'o Yeso ghɔm gɔm gɑ: Guŋ pɔ gham awɛ ka yɛ a? Pyə shɑ pɔ vʉ̌' hɑ? Sɔmmo ka təm cəcɑ̌ pu sɔ' gu'tə Si, tə ně da' gʉɔ yəŋ gɑ. Biŋ gɔm bi e gɑ: Lusi gɔ; Piŋnthʉm o vɔk o. Pɑ Farisai lə həŋtə Yeso cwə yə Nəfo Si gɔ sɔ' sɔ' a; e pa' bi pu gɑ: Nəfo Si tə gɔ sɔ' sɔ' tə pu pɑ dɑ mnyə jɔ a. Pu tə gɔ sɔ' ghɔm gɑ: A yəŋ gɑ bɑ m tsɔ' gɑ a, kɑ gɑ́, a yə́ gɑ bɑ mtsi'i gɑ a. Nə pa' Nəfo Si dzə́ pɑ cəcɑ̌ po. E lə piŋ gɔm bi pɑkhʉ pyə gɑ: Cwə̌ wə́ sɔ́' yə po gɔ sɔ' ti' nə yɔ mu' tyɛ'dzʉ nə mtyɛ'dzʉ Mú mo a, da' gɑ po lə yɔ. Pu gɔ sɔ' pɑ ghɔm bi po gɑ: A m tsɔ'ɔ gɑ, kɑ a m tsi' i gɑ: Ka po ghɔ tsʉ'u, dəŋdəŋ pa' pəpa' bəŋ ŋwɛ kɛbəŋ kwicʉ̌m nə guŋ mghəŋ dzʉ́ awɛ a, dəŋdəŋ pa' a gɔ sɔ' pɑ nə tyɛ'dzʉ Mu mo a. Da' gɑ a bɑwə shəŋ gɑ e ləŋdzə jɔgo' te'te', tə pɔ nə yəŋ wɔ̌ dzʉ wa' e. Ywə yə a lə pɑ̌ nə cwə Noe a gɔ sɔ' piŋ pɑ nə cwə Mú mo. A lə bɑ cwə o bɔ pɔmnəŋ pɑ dzʉ́, nwə́, bɑ dɔmdyə, biŋ hɑ po pap lɔmdyə tə ŋkhəm tyɛ'dzʉ yə Noe lə ko kənu' dɔmnyə̀ bəŋ mwe lú, mshyə sagʉə jwətə pɔ a. Ba dəŋdəŋ pa' a lə pɑ nə cwə Lɔt a, pu lə dzʉ́, nwə́, bɑ jó, bɑ fiŋ, bɑ dzə ywə biŋ bɑ ŋkwɑ mpa' tə' tyɛ'dzʉ yə Lɔt lə təm Sodɔm a, Si ghə bəŋ mɔk pu a mwɔ' hwéhwě lú, jwətə wap awɛ. A gɔ sɔ' pɑ pɑ́ po'o nə tyɛ'dzʉ yə Mú mo gɔ sɔ' sɔ' a. A tyɛ'dzʉ bɔ, mo yə e m̀ zhəŋ dyə thə́ a kɑ fi' gɑ e gɔ ghɔ lɑ tsə tsyə zhəŋ Dyə Si; mo yə e m pe a kɑ pɑnyə la'. Po kamtə jwi Lɔt, mo yə e gɔ sɔ' pɑ cəŋ nə vɔk a gɔ sɔ' pi. Mo yə e pi vɔk e a, vɔ́k. Gɑ siŋ wɔ gɑ a gɔ sɔ' pɑ mtsʉ' bɔ, pɑ bɛ pɑ dəm ta' kodyə pɑpʉə; pu lɑ mu', nthak yə mu'. Pɑjwǐ pɑpʉə gɔ sɔ' pɑwə pəmtə wɔ' msɛ. Pu lɑ mu' ta', nthak yə mu'. Pɑ bɛ pɑpʉ́ə gɔ sɔ' pɑ́ pé, pu lɑ ta' mo nthak ta' mo. Pɑkhʉ pyə həŋtə e gɑ: A gɔ sɔ' pɑ po'o hɑ Cyəpɔ? E ghɔm bi pu gɑ: Tsʉ' yə pfə ywə nə a, a tsʉ' yə mŋwə̌ŋwə shu'tə nə a. Yeso lə ghɔm mu' ghɔm tə tutə bi pɑkhʉ pyə nə́ nə siŋ wap gɑ a puŋ gɑ wap pɑ shwyɛ'nyə Si tə pwa. E lə ghɔm bi pu gɑ: Mu' gɛ fyɛ' lə bɑ nthʉm mu' tisuŋ e lə pɑ bwɔk Si, e lə nəŋ bɑ shɔm nə sɔmmo. Mu' npfɔk mjwǐ lə bɑ nthʉm tisuŋ bɔ bɑ sɔ' guŋ mcwə awɛ gɔm bi é gɑ: Ya'shɛ yɔk pyə gɛ bo a. A lə cwə́ te', la' e kuŋ nə ya' shɛ bɔ. Biŋ di gɔm gɑ: Ba pa' ŋ tə́ bwɔk Si a, ŋ də nəŋ bɑwə shɔm nə sɔmmo a pɑ, npfɔk mjwǐ yəŋ nəŋ bɑwə sɔ' baknyə a guŋ mcwə awɛ a, a puŋ gɑ ja' shɛ e. A taktə pɑ po'o bɑ e gɔ pɑ sɔ' guŋ mcwə awɛ paknyə a pɑ po'o tə shwə bwa bi e. Cyəpɔ ghɔm po'o biŋ ŋkwi' gɔm gɑ: Po yú' ywə yə ba'sa' cwəpuŋ gɔm a! Já Si tə gɔ ya'shɛ́ pɔ pyə wap bɑ e lě ŋkhe wap, wap pɑ pɔ pyə, bɑ sɔ' shwé bi e mɔkcʉ́ ba mtsʉ' a lə? Já e gɔ cwə te' tə kwitə wap lə? Gɑ siŋ wɔ gɑ: E gɔ lo'nyə ya'shɛ yap. Da' gɑ tə Mú mo gɔ la' nə sɔ' kwyatə mghɛ piŋnthʉm dəmcǎ' lə? E lə kwi' gɔm mu' ghɔm tə tutə nə pɔ pyə wap ŋkwɛ gɑ wap bɑ pɔ dəŋdəŋ tə́ bɑ gwak pyə shɑ pɔ a gɔm gɑ: Shɑ pɑ bɛ pɑpʉə lə ghɔ Dyə Si nə cwyɛ'nyə Si. Mu' mo nə pu lə bɑ Farisai, yə mu' mo pɑ gɛ kwishwɔp. Farisai lə tiŋnyə thə́ shwyɛ'nyə Si gɔm gɑ: Si, gɑ gho'tə nə pa' ŋ tə bɑ pa' pyə shɑ pɑ bɛ a pɑ: Wap bɑ mcúŋ, bɑ pɑ ghə nwə cwəpuŋ, pɑ ghə ghap. Ŋ tə bɑ pa' gɛ kwishwɔp yəŋ gɑ a pɑ. Gɑ̌ shwə tə tsʉ̌ ywə mcʉm bʉə nə gapdzʉ biŋ bɑ hɑ bɑtə jyə gham nə tsə́ tsǎ bu. Gɛ kwishwɔp tiŋnyə gʉə sʉəsʉə, la' e zhyə bɑ nə́ pʉ' mnyə myə́ de kɛbəŋ, dɑ mtso dzɔp kəkɔp e gɔm gɑ: Si kɑ yɛluŋ nə m̀, myə̀ gɛ mhɔ. Gɑ siŋ wɔ gɑ bɛ yəŋ lə nə́ pɑnyə la' e bɑ si lɑ mhɔ myə́ shwyɛ' e; tə sɔ' m nə yə mu' mo la' Si lɑ mhɔ myə́ shwyɛ' e pɑ. Nə pa' mo yə e ŋa' nɑ e á pu gɔ sɔ' fi' e hɑ si, mo yə e fi' nɑ e hɑ si a pu ŋa' e hɑ thə́. Shɑ pɔ lə lɑ ba po bwa nə sɔ' bi Yeso gɑ e yap bu nə pu. Pɑkhʉ pyə lə nə yɔ po'o shɔktə po bɔ. Da' gɑ Yeso ghə pu lɑ po bwa bɔ sɔ̌', e ghɔm gɑ: Po tak po mkəcɔk po wap sɔ' bəm, ka po kɔ bi pu; nə pa' Nəfo Si bɑ yə pɔ pyə wap hwənyə wap a. Kwa' nyənyɔ gɑ̌ siŋ wɔ gɑ mo yə e ka lɑ Nəfo Si m pa' mú kəcɔk mú a bɑ e tə gɔ sɔ' ko nə pɑ. Mu' ŋkhám biŋ si lə həŋtə Yeso gɑ: Tá pɑpúŋ gɑ̌ gɔ ghə gɑ kɑ tə sɔ' kwi vɔk mama a? Yeso ghɔm bi e gɑ: Nwə kɑ o ke a gɑ mo pɑpuŋ? Sɔmmo tə bɑ mo pɑpuŋ pɑ tə ně da' Si do e. O bɑ o zhyə́ mco' gɑ: Kɑ ghə ghap; kɑ zhwə mo; kɑ zhʉ; kɑ cwanwə; ghə mku' tɔ ɔ pu mɔ ɔ. Ŋkhǎm bɔ pa' gɑ: Ŋ dɑ́ jyə mco' bǎ tə fə mubwǎ. Yeso lə yu' po'o gɔm bi e gɑ: A yɑ̌wə jak o ta' ywə yɑmu': Fiŋ tsə tsyə o ghə a, gaptə bi mpə̌ŋ, biŋ sɔ' jap jʉ̌m m̀; o gɔ sɔ' ghə fʉ' kɛbəŋ. E lə nə yu' po'o sə e fi', nə pa' a lə bɑ e zhi té' o. Yeso yɔ e po'o gɔm gɑ: Nə ko nə Nəfo Si bɑ a tʉɔ té' bi mghɛ ywə. Nə pa' a yɛ̀ bi kamelo nə twɔk nə fǎ syap shyə́ pa' bi a pɑ gɛ ywə ko nə Nəfo Si a. Pɔ pyə wap lə yu' a həŋtə e gɑ: Tə́ a bɑ po'o wɑ ghɔ sɔ' vɔk? Yeso pa' gɑ: Ywə yə a shyə pɔmnəŋ a tə shyə Si pɑ! Pɛtrɔ ghɔm gɑ: Yɔ, pyə lě gwa' tsə tsɔk awɛ jap jʉm o. Yeso pa' bi pu gɑ: Kwa' nyənyɔ gɑ ghɔm bi po gɑ́ sɔmmo tə̌ wə yə e le gwa' la' tsyə, ba jwi e, bɑ pǒmmʉə pyə, bɑ mtǎ pu a mʉə, bɑ po pyə nə́ Nəfo Si, la' e ghə fʉ' cwəlɔ tə a yɔm, piŋ sɔ' cwə jʉm ko nə vɔk mama a pɑ. Yeso lə ke pɔ shwɔppʉə mgham bəŋ e, gɔm bi pu gɑ: Po yu', pɑ si po'o bʉɔ m Yerusalɛm; guŋ mnwə awɛ yə mghɔm ghɔ̀m Si lə və nə Mu mo a, a pəmtə. Pu gɔ hɑ e bi pɑ tə pɑ pɑ Yudea, pu yəmtə e, dɑ e jɔgo', nthətə́ mti nə e. Piŋ cwɔ e, zhwə e, tə́ a nə pɑ tyɛ'dzʉ yɑtá e yam nə vʉ̌. Yeso lə ghɔm po'o la' pɑkhʉ pyə yu' kwa' pɑpuŋ. Mghɔm bɔ̌ pa' bɑ ǎ tʉmnyə, wap lə pɑwə jyə sɔmywə nə́. Yeso lə nə kəm bəŋ Yeriko, mu' fʉ pɑ kəŋ məjyə bɑ e cwə, bɑwə do ywə. Fʉ bɔ lə yu' pa' pɔmnəŋ wə shyə a həŋtə ywə yə a bɑ ya a. Pu siŋ e gɑ: Yeso bɑwə shyə̌. E cwe tə thə́ gɑ: Yeso Mú David cɔmmtso mə̌. Pɔ pyə wap lə bɑ dzə́ e ɑ cɔktə e gɑ e lɛ́tə́; da' gɑ e piŋ shwé tə thə́ gɑ: Mu David cɔmmtso mə̌. Yeso tiŋnyə, gɔm gɑ pu lɑ e sɔ' bi e. E lə kəm bəŋ e, e həŋtə e gɑ: O shəŋ gɑ gə la m wu? E pa' bi e gɑ: Cyəpɔ gɑ jɔ tsʉ'. Yeso ghɔm bi é gɑ: Yɔ tsʉ'; piŋnthʉm o vɔk o. E lə wuŋ jɔ tsʉ', jap jʉm Yeso, giŋ gu'tə Si. Guŋ pɔ awɛ lə nə yɔ po'o, go'tə Si. Yeso lə ko Yeriko, bɑ shyə tisuŋ. Mu' ta' mbɛ tso tsyə pɑ Sakio, bɑ gɛ kwishwɔp, bɑ e zhi té' ŋwak. E lə bɑwə shə́ŋ nə yɔ Yeso, da' gɑ e lə ku' nə yɔ e nə pa' é lə bɑ tutu' mo, bɑ pɔmnəŋ piŋ jɔm té' o. E lə khʉdʉ̌ gɔ dzə ŋkwɔ' nə shʉm thə. Nə tsʉ' yə Yeso lə́ bɑ gɔ cyə nə a, nə yɔ e. Yeso lə kəm tsʉ'u, bʉ' mnyə myə́, gɔm bi e gɑ: Sakio fi' mgʉ̌'; nə pa' a wə shəŋ gɑ shwə dyə o tyɛ' ɔ. Sakio lə fi' mgʉ̌', ŋwɛnyə, pu e ghɔ la' e. Pu lə nə yɔ po'o, ŋkhukú, gɔm gɑ, e wə shwə́ m ywə mo cwəpuŋ. Sakio lə nə yɔ po'o sɔ' bəŋ Cyəpɔ gɔm gɑ: Cyəpɔ gɑ gɔ ghaptə tsə tsɑ nə ghə dəŋdəŋ jyə pʉə, hɑ ta' jyə bi mpə̌ŋ. Bi a pɑ bɑ gɑ̌ hɔnwə bi mo, bɑ gɑ gɔ pa' bi e m cʉm pfʉə. A pɑ po'o Yeso ghɔm bi e gɑ: Kwa' tyɛ' ɔ vɔk ko nə yəŋ dyə, nə pa' ba mo yəŋ gɑ bɑ pɑ mu' mú Abraham. Nə pa' Mu mo lə sɔ' nə cəŋ piŋ vɔk ywə yə a lə pi a. Pu lə pɑ nthéŋmtəŋ nə nwə yə e lə bɑwə gɔm a, pa' pu a pu lə bɑ wap kəm bəŋ tisuŋ Yerusalɛm a, pu pɑwə ŋkwɛ gɑ Nəfo Si wə sɔ' a, e ghɔm mu' ghɔm tə tutə bi pu, gɔm gɑ: Mu' mbɛ nə ŋkhənyə Nəfo lə pɑ gɔ m nə mu' guŋ gʉə sʉəsʉə pu hɑ Nəfo bi e, tə e piŋ bɑnyə jʉm. E lə nə ghɔ ŋkhe shɑ mco' pyə pɔ gham su ntwa yap hɑ tsə bɛ gham bɛ gham bi pu, biŋ gɔm bi pu gɑ: Po ghɔ nthɛ ŋkhap ba tə̌ ŋ da' sɔ̌'. Da' gɑ pɑ guŋ pu lə bɑwə bɔ e. Wap lə təm pɔ gɑ wap ghɔ gɔm gɑ: Pyə ka kuŋ gɑ e sa' wɔk. Pu lə hɑ nəfo bi e, e piŋ jʉm, ŋkhe mco' pyə́ pyə e lə hɑ ŋkhap bi pu a, nə zhyə pa' wap le nə nthɛ a. Dəŋdzə co' e lə sɔ' gɔm gɑ: Bʉm myə o lə hɑ bəm ǎ, tsə tsə́ bɛ ghǎm. E ghɔm bi e gɑ: A puŋ m co' fo pɑpuŋ. Pa' o kě bɑ nyənyɔ nə muywə ywə́ á, gɑ̌ gɔ hɑ mtisuŋ gham bu o pɑ sa'. Batə mo yɑpʉə lə sɔ' gɔm bi e gɑ: Ta, bʉm myə o lə hɑ bəm a tsə́ tsə bɛ tɔ. E ghɔm bi e gɑ: Ba wə yu gɔ pɑ sa' mtisuŋ mənthɔ. Yə mu' mo sɔ' gɔm gɑ: Cyəpɔ yɔ ŋkhap o yə̌ŋ; gɑ̌ bɑ ŋ dě ŋkwɑ́ nə pak dzə́ dwɔ́', nə pa' ŋ də bɑwə bwɔk o, nə kɑlə o bɑ mo shɔkcɔ̌k, bɑ dɑ ywə yə o ka yap a, dɑ ywə tsʉ' yə o le tə tsə ywə nə a. E ghɔm bi e gɑ: Gɛfa' cwəpuŋ gɑ gɔ cyə pɑ nə ghɔm tsǔ tə ghəm o. O lə zhyə gɑ́ gɑ̌ bɑ mo shɔkcɔ̌k; bɑ dɑ tə yap, dɑ tə tsə; nwə kɑ bɑ o lě tə́ nyəŋ ŋkhap a baŋk? Bɑ ŋ də gɔ pɑnyə nə té bɑ ǎ tsə́. E lə piŋ gɔm bi pɔ pyə pu a pu lə bɑ tsʉ'u a gɑ: Po kwi ŋkhap yə a bi a, hɑ bi mo yə e gə tsə gham a. Wap ghɔm bi é gɑ: Cyəpɔ a bɑ e tsə ghə tsə ghǎm. E ghɔm bi pu gɑ: Gɑ siŋ wɔ gɑ pu gɔ sɔ' hɑ ywə bi mo yə e ghə ywə a, sɔ' m nə mo yə e ka ghə ywə a, ba yə muywə yə a bi a pu kwi. Ba po'o, po lɑ mghɛ bo pɑ̌ pyə wap ka tə bɑwə biŋ gɑ sa' wap a pɑ sɔ' dzə m̀ a, gwatə wap. Yeso lə ghɔm po'o, nthamdzə nə pʉɔ dɑ m Yerusalɛm. E lə ghɔ tə bɑ ŋkhəm Befage pu Betanya nə ghəŋ kuŋ yə pu ŋkhe gɑ kúŋ mthə olivə a, Yeso təm shɑ pɑkhʉ pyə pɑpʉə gɔm bi pu gɑ: Po ghɔ nə la' tsyə ǎ dzə a; po gɔ ko wə yɔ mú jakasi yə pu ka wuŋ ŋkwɔ' nə e a, bɑ pu cəŋ é, po kyɛ' e nə sɔ'. Mo həŋtə wɔ gɑ: Po ŋkhyɛ' e gɑ kɑ? Po ghɔm gɑ: Cyəpɔ wə shəŋ. Pɔ pyə pú lə təm wap a, lə ghɔ biŋ jɔ guŋ ywə awɛ pɑ pa' Yeso la' gɔm a. Wap lə pɑ̌ ŋkhyɛ' mú jakasi, mghɛ pyə́ ghɔm bi pú gɑ: Po ŋkhyɛ' e gɑ kɑ? Wap ghɔm gɑ: Cyəpɔ wə shə́ŋ. Wap lə ma' mdzə́ map dəm mú jakasi, dɑ e nə gɔ hɑ bi Yeso, Yeso kwɔ́' dəm e. Wap lə nə ghiŋ, lə pɔmnəŋ pɑ siŋ mdzə́ map mə́jyə wap lə ghɔ tə bɑ ŋkhəm bəŋ Yerusalɛm, nə məjyə yə a dzəŋ fɑ m nə kuŋ mthə olivə, guŋ vəŋ pɑkhʉ pyə awɛ ŋwɛnyə, bɑ go'tə Si tə thə nə guŋ msya myə wap lə yɔ a. Wap lə bɑwə gɔm gɑ: Byanyə bi mo yə e wə sɔ' a, nə fo, tso Cyəpɔ! Hwitə pɑ kɛbəŋ, ghamtə pɑ bi Si. Shɑ pɑ Farisai pyə wap lə bɑ́ cəcɑ̌ pɑkhʉ pyə́ a lə ghɔm bi Yeso gɑ: Ta, ghɔm gɑ pɑkhʉ pu lɛ́tə́. Yeso ghɔm bi pú gɑ: Gɑ siŋ wɔ gɑ wap la dɛtə bɑ mwɔ' gɔ zhwɔp! Yeso lə ghɔ tə bɑ ŋkhəm bəŋ tisuŋ, jɔ tisuŋ, dɔ̌ nə é, gɔm gɑ: Ba wə yǔ la' pe' jyə ywə yə bi a pɑ a hɑ hwitə bu! Da' gɑ ǎ cwəlɔ bɑ ǎ tʉmnyə, o lə pɑwə jɔ. Shɑ mtyɛ'dzʉ wə sɔ́' myə mghɛ bo pǔ gɔ tsam o nyəŋ tuŋ, hyanyə o mghəŋ mghə̌ŋ tsa'tə o, pu a po pǔ, sa'tə o, wap lə nə tak o, sɔm gwɔ' yɑ dəm mú', pa' o lě tə́ zhyə́ tyɛ'dzʉ́ yə pu lə kəka o a. E lə ko Dyə Si ntho' nə zhəŋ pɑ tɛmtɔ, lə bɑ gɔm bi pu gɑ: A bɑ pu lě bvə́ gɑ dyə a gɔ sɔ' pɑ dyə mcwyɛ'nyə tə po nə gə dyə msamshwə. E lə bɑ Dyə Si guŋ mtyɛ'dzʉ awɛ bɑ ji'tə pɔmnəŋ. Mtadyə mkamsi, pu a pɑ zhyə mco', ba mfo pɑ shəŋ nə zhwə e. Da' gɑ la' wap zhyə pa' wap gɔ ghə a, nə pa' pɔmnəŋ lə bɑwə shəŋtə́ biŋ nwə yə e lə bɑwə gɔm a. A lə pɑ nə mu' tyɛ'dzʉ nə mtyɛ'dzʉ myə e lə bɑwə ji'tə pɔmnəŋ ywə Dyə Si bɑ siŋ wap Cuŋ pɑpuŋ a, mtadyə mkamsi pu a pɑ zhyə mco', ba mghətso ŋwak. Gɔm bi e gɑ: Siŋ wɔk tʉɔ yə o nə gə mɔ mnwə a, kə mo yə e hɑ tʉɔ bɔ bu a lə. E ghɔm bi pu gɑ: Ba myə gɑ̌ gɔ həŋtə wɔ nwə: Po siŋ a: Kwǐshyə Yohane lə fɑ m kɛbəŋ kɑ bi pɔmnəŋ? Wap lə sɛ cəcɑ̌ pu gɑ: Pɑ ghɔm gɑ a lə fɑ m kɛbəŋ, bɑ e gɔ ghɔm gɑ: tə nwə kɑ bɑ po lě tə piŋ e? Pɑ nəŋ gɔm gɑ a lə fɑ m bi pɔmnəŋ, bɑ pu gɔ lɑ mwɔ' tamtə wɔk pɑ nə pa' a bɑ pu zhyə gɑ Yohane lə bɑ gɔm ghɔm Si. Wap lə pa' gɑ wap ka zhyə tsʉ yə a lə fɑ m nə a. Yeso piŋ gɔm yə́ bi pu gɑ: Bi a pɑ́ ba myə̀ lə siŋ wɔ tʉɔ yə gɑ̌ nə gə mnwə bɔ a. Yeso lə ghɔm po'o biŋ dɑ ghɔm tə tutə gɔm bi pɔmnəŋ gɑ: Mu' mo lə tsə̌ mthə nə nu' mlu' pe e, jo' bi pɑ nu' mlu', nthəm nthʉm guŋ gɔ m nə́ mu' tsʉ'. Cwə lə ku'u e təm mu' gɛfa' e bi pɑ nu' mlu' gɑ e ghɔ kwi ywə yə a nthəm pe a. Pɑ nu' mlu' lə ko shwɔ e, jəŋ e tə hɑ sɔmywə bi e. E lə piŋ nthəm mu' gɛfa' e bi pu. Wap ko ŋkwi' shwɔ bɑ yʉ́, jəmtə e, jəŋ e tə hɑ sɔmywə bi e. E lə piŋ ŋkwi' nthəm mu' mo batə yɑtá, wap ko bo' fiŋ nə e, tə jəŋ e. Gɛ pě sɛ gɑ: Gɑ̌ gɔ ghə gɑ kɑ? Gɑ̌ gɔ təm mú a yə gɑ ŋkhuŋ e té' a; bǎ yʉ́, wap gɔ ko ghə mku' myə́. Da' gɑ pɑ nu' mlu' lə nə yɔ mú é sɛ cəcɑ̌ pu gɑ: E bɑ dzʉdyə̌; pɑ zhwə e, a tsə mcʉ́' cʉ́' tsɔk pɑ. Wap lə lɑ e nthəm pé cwəlɔ, jwə e. Gɛ pe gɔ po'o ghə m gɑ kɑ nə pú? E gɔ sɔ' sɔ' zhwətə pɑ nu' mlu' bɔ pyə a bɑ wap ka ku' nə sɔmywə a; hɑ pe bi shɑ pɔ. Wap lə nə yu' po'o gɔm gɑ: Bi a lə pɑ pa' a. Yeso lə lě wap dəŋdəŋ, həŋtə wap gɑ: Ghɔm tsɔ tsyə pu lə və nthʉm ŋwa'nyə Si a nthutə gɑ́ kɑ̀? Gwɔ' yə pɑ pəm pa' lə wa' a lě dí ji gwɔ' phə pa'. Bǎ ya mo lə yə e vʉ nə gwɔ' bɔ a, gɔ po'tə nɑ́ e, mo yə gwɔ' bɔ vʉ nə e a, a tsa'tə e. A lə pɑ po'o mtadyə mkamsi pu a pɑ zhyə́ mco' cəŋ nə ghəm e pɑ cwə o bɔ, da' gɑ biŋ bɑwə bwɔk pɔmnəŋ. Nə pa' a lə bɑ wap zhyə gɑ Yeso lə gɔm ghɔm tə tutə bɔ pɑ nə́ pú. Wap lə to' nə na' Yeso, nthəm mjuŋ gɑ wap ghɔ dəŋtə e dɑ pɑ ghɔm tsyə nə gəm e, tə hɑ e bi pɑ sa' guŋ pu a bi gɔpna'. Wap lə ghɔ gɔm bi e gɑ: Ta pyə zhyə gɑ ghɔm tsǔ ba nwə yə o da'tə a bɑ dəŋdəŋ. O bɑ nyənyɔ nə guŋ pɔ awɛ. O da'tə məjyə Si nyənyɔ. A po'o bi a pɑ pyə ma' shwɔp bi kasa kɑ gɛ̌? Yeso lə zhyə yo' yə wap lə bɑ wap tʉ' nə e a gɔm bi pú gɑ: Po la'tə a bɛ ŋkhǎp. Wap la'tə e. E həŋtə wap gɑ: Thə́ mo ba ywə bvəvə yə a nə a bɑ yə wɑ? Wap pa' gɑ yə kasa. Yeso ghɔm bi pú gɑ: Po pa' ywə kasa bi kasa, ba' yə Si bi Si. Wap lə yu' po'o la' wap zhyə nə lɑ ghɔm tsyə gəm e, nwə cyə wap, mshwə map cɑ. Shɑ pɑ Sadukai, pɔ pyə wap gɔm gɑ nə yam nə vʉ̌ tə bɑ wə a pɑ lə sɔ' yap bəŋ Yeso nə həŋtə e shɑ mnwə. Wap lə ghɔm bi e gɑ: Ta, Mosɛ lə və bi pyə gɑ. Mbɛ pɑ bɑ e ghə mumap e yə mbɛ bɑ e lɔmdyə̌, pfʉ tə tsə mú, e sɔk npfɔk e, pu e ghə yə gwya fɑ e bɔ. A nəŋ bɑ po'o bɑ mu' mɑmjwi lə ghə pwabɛ sɔmbʉə. Dəŋdzə lɔmdyə pfʉ tə tsə́, ba batə yɑpʉə batə yɑtá sɔk npfɔk; pɑ po'o nə pɔ sɔmbʉə; sɔm lə nə pfʉ dzə́ mú. Mjwi ti pfʉ yə. Wap nə́ miŋ həŋtə Yeso gɑ: A gɔ sɔ' pɑ́ nə tyɛ' nə yam nə vʉ̌ mjwǐ bɔ pɑ yə wɑ nə pú? Nə pa' guŋ yap sɔmbʉə lə lɔm e dyə. Yeso ghɔm bi pu gɑ: Pɔ pyə wap bɑ m nə yəŋ wɔ dzʉ a, dɔmdyə. Da' gɑ pɔ pyə wap bɑ wap ku'nyə nə sɔ' bɑ nə yə wɔ dzʉ yə a gɔ tə sɔ' a, piŋ pɑ ba m nə yam nə vʉ̌ a tə dɔmdyə pɑ. Vʉ̌ tə jɑ nə pu pɑ, nə pa' wap bɑ wap cʉ' m pá' pɑ aŋgəle a, shʉ' po Si, pǒ nə yam nə vʉ̌. Nə pa' mpfəsi gɔ sɔ' yam nə vʉ̌, nə pa' Mosɛ bɑ e le da'tə yá nə cwə cu' mghé mɔk tə khə tsʉ' yə e ŋkhe Cyəpɔ gɑ Si Abraham, Si Isak, Si Yakop a. Si tə bɑ Si mpfə pɔ pɑ, e bɑ Si pɔmtʉɔ pyə wap bɑ pyə a. Shɑ pɑ zhyə́ mco' ghɔm gɔm gɑ: Ta o ghɔm a puŋ nə pa' wap la tə ku' nə piŋ həŋtə e sɔmywə a. Yeso lə kwi' gɔm bi pu gɑ: Pu gɔm gɑ Kristo bɑ mu David m gɑ kɑ? Nə pa' ba David yə gɔm nthʉm ŋwa'nyə mzhwɔp gɑ: Cyəpɔ ghɔm bi Cyəpɔ a gɑ: Cwə nə ghəŋ pu tʉɔ a tə gə o ghiŋ də̌m mghɛ bo pǔ. David ŋkhe e gɑ Cyəpɔ e, e piŋ bɑ mú e m gɑ kɑ? Yeso lə piŋ gɔm bi pɑkhʉ pyə dzə guŋ pɔ awɛ gɑ: Po pɔm pɑ zhyə́ mco' pyə wap ŋkwa nsʉə dzə nə giŋ, bɑ shəŋ gɑ pu ca'tə wap dəm sim, ba ŋkho sinagogə shwə nə dəŋdzə kwɔ', biŋ bɑ tsʉ la'nwə shwə pɑ nə dəŋ dzə tsʉ' a. Wap pyə wap mitə tsə mpfɔk ndyə map, biŋ bɑ gə msʉəsʉə mcwyɛ'nyə nə fʉtə wap a. Pu gɔ sɔ' nyəŋ shɛ yə ǎ cyə a thə' pú. Yeso lə pʉ' mnyə, jɔ pɔ pyə wap lə bɑwə nyəŋ ywə nthʉm kak yə pu nyəŋ ywə nə́ fa' Dyə Si nə a. E lə yɔ bɑ mu' npfɔk mjwǐ sɔ' nyəŋ tsə bɛ pʉə nthʉm ó. E ghɔm gɑ: Kwa' nyənyɔ gɑ̌ siŋ wɔ gɑ bəŋ npfɔk mjwǐ yəŋ gɑ nyəŋ shyə guŋ pɔ awɛ. Nə pa' guŋ pɔ awɛ lɑ pɑ dzyak nə sɔ' hɑ, tə sɔ' m nə e, e ghɔ nə pəŋ é hɑ guŋ yə ywə yə e kɑ gɔ nə vɔk a. Shɑ́ pɔ lə pɑ gɔmnwə nə Dyə Si ba nə tsə mkwiŋ myə a lə bɑ nə Dyə Si a, mwɔ' pu a guŋ tsə tsyə pu lə hɑ Dyə Si a, Yeso ghɔm gɑ: Mtyɛ'dzʉ wə sɔ́', myə a gɔ ghɔ nə mwɔ' bǎ, sɔm lə piŋ shwə nə sɔm á, bɑ pu kwɔk ma'tə si awɛ. Wap həŋtə Yeso gɑ: Ta, a gɔ sɔ' pɑ po'o sǒ? Pu gɔ sɔ' lɑ kɑ nə zhyə mnwə bɔ̌? Yeso ghɔm bi pu gɑ: Po pɔmtə gɑ mo kɑ ghə po hɔjyə̀. Nə pa' pɔ tə jɔm gɔ sɔ' sɔ' nə tso tsɑ̌ piŋ pɑ ghɔm gɑ: A bɑ a, cwə̌ ghɔptə. Po pɔmtə nə cʉ́m jʉ̌m pú. Pɔ gɔ sɔ' yu' shu, pu piŋ bɑ gɔmnwɔ nə shu. Po kɑ pwɔk. A puŋ gɑ tsə bɔ təm awɛ. Da' gɑ a lə wuŋ bɑ nə miŋ. E lə piŋ gɔm bi pu gɑ: Mu' guŋ gɔ sɔ' lo' yə mu' guŋ; mu' nəfo pɑ do' yə mu' nəfo. Ca' gɔ sɔ' pɑ cʉ'nyə po'o té', mu' bɔkbɔk gho pɑ gəm pɔmnəŋ jwətə wap, a kəya' vʉ nə shɑ mtsʉ'. Msya pu a shɑ mtiŋ təm kɛbəŋ. A gɔ sɔ' nə təm po'o, bɑ pu ghəm wɔ, pɑ́ lɑ wɔ yɔgo' sinagogə, nyəŋ wɔ dyəcɛ̌. Pɑ́ lɑ wɔ ghɔ dzə mfomfo pu a mgɔpna' nə tso tsɑ̌. A cyə m po'o po pɑ mghɛ kwinthɛ pɑ̌. Ka lam tsɔ́ sɔ́ nə ywə yə po gɔ sɔ' nə kwinthɛ a. Gɑ gɔ sɔ' hɑ ghɔm ba fʉ̌ yə bi a pɑ sɔm gɛ bo yɔ lə ghə ya a bi po. Mfɑ pɔ ba mso pɔ gɔ sɔ' pɑ tɛ́mnɛ́ mɔ, zhwə bo'gwyə pɔ cəcɑ̌ po. Guŋ pɔ awɛ gɔ sɔ' pɔ wɔ nə tso tsɑ̌. Da' gɑ sɔm ta' nəŋ thə́ yɔ lə pi pɑ. A gɔ sɔ' cyə m nə kaktʉɔ yɔ po vɔk tʉm tsɔ. Cwə yə po gɔ sɔ' yɔ bɑ msəŋwi lɑ Yerusalɛm a, pɔ zhyə́ gɑ cwə ghəghʉɔ é ku'. A la' tə bɑ po'o, pɔ pyə wap Yudea a khʉ gɔ m dəm khuŋgɔ̌; pɔ pyə wap nthʉm tisuŋ a khʉ nthəm, ba pɔ pyə wap m go a kɑ pɑnyə tisuŋ. Nə pa' a gɔ sɔ' pɑ tyɛ'dzʉ nə pa' bo, ywə yə pu lə və a, a pəmtə. Ghəghʉɔ pɑjwǐ tsʉ̌m pu a mʉə po nə tyɛ' dzʉ bɔ, nə pa' mɑzhwiŋ gɔ sɔ' pɑ́ nthʉm guŋ, lúŋ Si yɛ nə pɔmnəŋ. Pu pɑ dɑ mnyədwɔp pəpɛ gwatə wap, mguŋ mguŋ pɑ gəm wap nə gɔ gə mkwɔ pap, pɑ tə́ pɑ pɑ Yudea nəŋtə Yerusalɛm tə̌ yap cwədzʉ̌ kǔ'. Mtiŋ təm nə nam, ba nə mɑŋwə́, ba m nə msɛ́, a piŋ bɑ dəm sicǎ' mguŋ pɑ jwiŋ. Lam tsap pɑ sɔ nə́ nə cu' shyə lɑpʉə ba fa é. Pɔmnəŋ gɔ sɔ' pfʉ́ cwɔ', bɑ bwɔk ywə yə a gɔ cyə dəmca' a, nə pa' mtʉɔ kɛbəŋ gɔ sɔ' cʉ'nyə. A gɔ pɑ cwə o bɔ pu yɔ Mú mo e sɔ' dəm mlwa nthʉm ghu'tə ba tʉɔ. Cwə yə mnwə bɔ gɔ təm a, po tiŋnyə dəŋdəŋ, bʉ' mthə́ mɔ, nə pa' cwə nə vɔk wɔ ghɔptə. Yeso ghɔ́m mu' ghɔm tə tutə bi pu gɑ: Po le thə́ nthɔmmthə pu a guŋ mthə́ awɛ tə jɔ. Cwə yə po jɔ bɑ mhwə to' nə twɔp nə a po ghɔm gɑ cwədzʉ pɑpuŋ wə sɔ́'. A dəŋdəŋ po'o, po la' jɔ mnwə bɔ təm po zhyə gɑ Nəfo Si wə sɔ̌'. Gɑ wə siŋ wɔ kwa' nyənyɔ: Pɔmnəŋ nə yəŋ wɔdzʉ́ tə gɔ sɔ' cyə tə mnwə bɔ sɔ́' pɑ. Kɛbəŋ pu ca' gɔ sɔ' mi, da' gɑ́ mghɔm mə tə gɔ la' mi pɑ. Po pɔmtə gɑ́ mlu' pu a ywətsǔ ba m nə zhwiŋ kɑ ghə tʉm tsɔ pwa. Bwɔk gɑ tyɛ'dzʉ bɔ kɑ sɔ' bvonyə́ wɔ vonyə. A gɔ sɔ' vʉ dəm guŋ pɑ nthʉm dzʉ awɛ pa' ŋkhə vʉ́m a. Ka po ti, po pɑ shwyɛ'nyə Si guŋ mcwə awɛ po'o gɑ e hɑ gu' bi po, po vɔk mnwə bɔ myə a gɔ sɔ' sɔ' a, tə ŋwak yɔ dzə Mú mo dəŋdəŋ. Yeso lə jwɔk ji'tə pɔmnəŋ nwə Dyə Si, á cwə bɑ bwadzʉ̌ e ghɔ dəm kuŋ mthə olivə. Guŋ pɔ awɛ piŋ bɑ sɔ' Dyə Si kwa' mɑmpʉm dzʉ bɑ ju' ywə yə e gɔm a. Tyɛ'dzʉ ŋwɛnyə msɛ tə ŋkwɔ' msɛ yə pu ŋkhe gɑ paska a lə pɑ sɔ', mtadyə mkamsi pu a pɑ zhyə mco' pɑwə shəŋ pa' wap gɔ ghə tə zhwə Yeso a, nə pa' wap lə bɑwə bwɔk pɔmnəŋ. A lə pɑ po'o Sata ko nə Yuda Iskariɔt yə e lə bɑ mu' nə pɑkhʉ Yeso shwɔppʉə m gham a. E ghɔ pu a mtadyə mkamsi ba mtadyə səŋwi cɔm pa' wap gɔ ghə tə e hɑ Yeso bi pu a. Wap lə ŋwɛnyə, biŋ gɑ wap gɔ hɑ ŋkháp bi e. E lə piŋ cwəlɔ, bɑwə shəŋ kwa' pá' e gɔ nə hɑ Yeso bi pu tə pɔmnəŋ jyə a. Tyɛ'dzʉ msɛ tə kwɔ'msɛ, tyɛ'dzʉ yə pu lə bɑwə gɔ zhwə dzə́ nə paska a lə kú'. Yeso təm Pɛtrɔ pu Yohane gɔm bi pu gɑ: Po ghɔ nyaptə Paska pɑ tsʉ́. Wap həŋtə e gɑ: O shəŋ gɑ pyə nyaptə Paska tsʉ' kʉ́? E ghɔm bi pu gɑ: Po gɔ nə ko tisuŋ po a mu' mbɛ yu'tə bɑ e kwa ghʉɔ shyə. Po yap jʉm e po a pu ghɔ dyə tsʉ' yə e dɑ m nə a. Po ghɔm bi gɛ dyə gɑ: Tá ghɔm gɑ: Twɔ'dyə̌ yə gɑ gɔ tsu paska nə pyə a pɑkhʉ pɑ̌ a hɑ? Bɛ bɔ gɔ la'tə wɔ twɔ'dyə̌ bɑ a cəŋtə gyɛ́'nyə m zhəŋ thə́ nə pa' e. A po nyaptə guŋ ywə awɛ tsʉ'u. Wap lə ghɔ̌ ŋkho jɔ guŋ ywə awɛ pɑ pa' e la' gɔm a. Wap nyaptə Paska. Cwə lə ku'u e cwə tɑpe pu a mghɛ nthəm pyə; e ghɔm bi pu gɑ: Tə zhyə dəŋ pa' gɑ sʉm gɑ́ pɑ pəmtə dzʉ Paska yəŋ gɑ tə ŋ jɔgo'. Nə pa' gɑ siŋ wɔ gɑ ŋ tə gɔ la' piŋ tsʉ yá pɑ tə a la' bəmtə nthʉm Nəfo Si. E lə kwi nthǔ' go'tə Si nə́ gɔm gɑ: Po kɑ gaptə cəcɑ̌ po. Gɑ̌ siŋ wɔ gɑ ŋ tə gɔ la' tə piŋ nwə mlu' nthɔm mthə pɑ tə kəm tyɛ'dzʉ yə Nəfo Si sɔ' a. E lə pe msɛ̌, go'tə Si, bo'tə, hɑ bi pu gɔm gɑ: Yəŋ bɑ nɑ́ a yə pu hɑ nə po a. Po ghə po'o nə ŋkhamtə a. E lə kwi' gə po'o ba m nə nthǔ', cwə yə wap lə miŋ nə tsʉywə a, gɔm gɑ: Nthǔ' yəŋ gɑ bɑ kɔ sə́ nə mcyə mə̌, myə pu pfyə nə po a. Tə́ yɔ: Pǔ mo yə e hɑ́ a yəŋ tɑpe tsɔ'ɔ pyə e pɑwə bəmtə dzʉywətsʉ. Nə pa' Mú mo gɔ pɑ pa' Si lə yap a; tə́ ghəghʉɔ bi mo yə e hɑ é a. Pɑkhʉ pyə lə to' nə həŋtə cəcɑ̌ pu gɑ ya mo nə pu lə́ gɔ ghə po'o. Wap lə pɑ̌ nthɛshwə cəcɑ̌ pu nə mo yə e gɔ pɑ mo gwyə́ cəcɑ̌ pu a. Yeso ghɔm bi pu gɑ: Mfomfo sa' mguŋ map, pɑ́ cya pɑ gə pu ke wap gɑ pɔ pɑpuŋ. Da' gɑ po tə bɑ yɔ m po'o pɑ: A puŋ gɑ Mo gwyə cəcɑ̌ po cwə nə tsʉ' mukhʉ̌, a gɛ sa' cwə nə tsʉ' gɛfa'. A po'o mo gwyə pɑ́ pɑ mo yə e tɑpe a kɑ mo yə e dɑ ywə sɔ' tɑpe a? A tə bɑ mo yə e tɑpe a pǎ? Tə́ gɑ̌ bɑ cəcɑ̌ po bɑ́ pɑ gɛfa'. Po bɑ́ pɔ pyə wap do' tə pwa jʉ̌m m̀ nthʉm go' a. A gɔ cyə m po'o a hɑ Nəfo bi po dəŋdəŋ pa' Ta hɑ Nəfo bəm a. Po'o gɑ po sɔ' nwə́ biŋ pfɑ tɑpe m̀ nthʉm Nəfo a. A jap wɔ nə mleŋfo shwɔppʉə mgham. Po pɑ sa' mtuŋdyə Israɛl shwɔppʉə mghǎm. Cyəpɔ ghɔm gɑ: Simon Simon, yɔ, sata wə shəŋ nə cʉ' o pa' pu shʉ' msɛ a. Da' gɑ́ gɑ̌ cwyɛ'nyə Si nə thə́ o, po'o gɑ piŋnthʉm o kɑ mi. Tə́ sɔ́' m nə́ wə, cwə yə o gɔ sɔ' pɑnyə bəm a o pʉ' mfɑ pǔ. Pɛtrɔ ghɔm bi e gɑ: Cyəpɔ gɑ wə byap tə bi a pu pəmtə gɔ dyəcɛ̌ kɑ nə́ pfʉ lə. Yeso ghɔm bi é gɑ: Pɛtrɔ, gɑ siŋ o gɑ ko' gɔ cwə nə tuŋ tyɛ' ɔ bɑ o e da' ŋkhəŋnyə gɑ o ka zhyə a mcʉm mənthá. Yeso lə piŋ gɔm bi pu gɑ: Cwə yə ŋ də təm wɔ po ghɔ tə lɑ petə́, tə́ lɑ pʉə, tə lɑ mthap a, ywə lə ko jak bi po a? Wap pa' gɑ gɛ̌. E piŋ gɔm bi pu gɑ: Sɔ' m nə cwəlɔ, mo yə e ghə petə́ a lɑ, ba mo yə e ghə pʉə a e lɑ. A mo yə e ka ghə nyədwɔp a fiŋ dzə́ dəm e nə jo nyədwɔp. Nə pa' gɑ wə siŋ wɔ gɑ ghɔm tsyə pu lə la' bvə gɑ: Pu lě sɛ́ é m cəcɑ̌ pɑ ghə nwə cwəpuŋ a gɔ pəmtə nə m. Nə pa' guŋ ywə yə a bɑwə de a gɔ pəmtə. Pɑkhʉ pyə lə ghɔm bi e gɑ: Cyəpɔ mnyədwɔp mɔ gɑ mɑbʉə. E ghɔm bi pu gɑ: A ku'. E lə təm pa' e ji nthəm a gɔ m kúŋ mthə olivə, pɑkhʉ pyə yap jʉm e. Pu a pu lə kəm tsʉ'u, e ghɔm bi pu gɑ: Po cwyɛ'nyə Si gɑ po kɑ vʉ nə mləŋtə. E lə lu bəŋ pu, giŋ nthə pa' bi a pɑ mo ma' gwɔ' a vʉ nə a; ŋkham mkwi'tə myə́ si shwyɛ'nyə Si gɔm gɑ: Ta, o kuŋ gɑ yəŋ gɑ nthǔ' kɑ cyə bəŋ m̀. Da' gɑ tə ywə yə myə̀ nə ŋkhuŋ a pɑ, ywə yə wə nə ŋkhuŋ a nə pəmtə́. A lə pɑ po'o ta' aŋgəle fɑ kɛbəŋ, sɔ' bɑ bʉ' é, e pɑ nyəŋ gʉ' nə mcwyɛ'nyə. Mtsi'nyə pɑ nthəm nə e pa' mcyə á, lə shʉmtə si. E lə miŋ nə cwyɛ'nyə Si, dusi gɔ bəŋ pɑkhʉ pyə, nə sɔ' wap pɑwə di nthʉm zhwiŋ. E ghɔm bi pu gɑ: Po wə di tsɔ! Po lusi shwyɛ'nyə Si gɑ po kɑ vʉ nə gʉ' mləŋtə. E lə pɑ̌ gɔm po'o nə yɔ vəŋ pɔ ŋwak, mu' nə pɑkhʉ pyə shwɔppʉə mgham yə pu ŋkhe e gɑ Yuda a pɑ thə́dzə. E lə sɔ' bəŋ Yeso, nuŋ mgho' myə́. Yeso ghɔm bi e gɑ: Yuda, o shyə m nə nə́ nùŋ mgho' tə́ hɑ Mú mo lə? Pɔ pyə wap lə bɑ bəŋ Yeso a, lə yɔ ywə yə a lə bɑwə gɔ cyə a, həŋtə Yeso gɑ: Cyəpɔ, pyə lɑ mnyədwɔp mɔk do' a? Mu' mo nə pu lɑ nyədwɔp e nɔk gɛfa' tadyə mkamsi, ja' təŋ e yə tʉɔ. Da' gɑ Yeso ghɔm gɔm gɑ: Po tak pa' a, e ghɔm po'o, sho' pu e nə təŋ gɛ a tʉɔ. Yeso piŋ gɔm bi pɔ pyə wap lə sɔ' nə ghəm e a, pɑ mtadyə mkamsi, mtadyə pɑ pyap Dyə Si, ba mghətso Dyə Si gɑ: Pa' nə ghəm samshwə a po nə́ sɔ' dɑ mnyədwɔp pu a mwya! Cwə yə ŋ də bɑ cəcɑ̌ po Dyə Si guŋ mtyɛ'dzʉ awɛ a, po lě tə yap pu nə m̀. Tə yəŋ bɑ yɔ cwə, gʉ' jʉ̌m. Wap lə ghəm e, dɑ e gɔ dyə tadyə mkamsi. Pɛtrɔ pɑ jʉ̀m, tə́ na' bɑ gʉə sʉəsʉə. Pa' pɔ bɔ lə su mɑ mɔk shwədyə̌ shwə bəŋ o a, Pɛtrɔ lə bɑ yə cəcɑ̌ pu bɑ e cwə. Mú' mjwǐ gɛfa' lə lɑ sɛ mɔ̌k jɔ Pɛtrɔ, de é dəŋdəŋ gɔm gɑ: Ba pu mo yə gɑ nə kɑ bɑ. Pɛtrɔ kəŋnyə gɔm gɑ: Mɑmjwi, ŋ khɑ zhyə́ e. A lə nə cwə muywə mu' mo kwi' jɔ e gɔm gɑ: Ba wə o bɑ mo yap. Pɛtrɔ pa' gɑ a tə bɑ a pɑ́. A lə nə cyə ta' nam mu' mo piŋ shəŋtə gɔm gɑ: Kwa' nyənyɔ pu mo yə gɑ nə kɑ bɑ; e nəŋ bɑ yə Galilea. Pɛtrɔ lə pa' gɑ: Ŋ kha zhyə ywə yə o bɑwə shəŋ nə ghɔm a. Pɛtrɔ lə pɑ gɔm po'o ko' tuŋ Cyəpɔ fɛ nɑ e de Pɛtrɔ. Pɛtrɔ kamtə ghɔm tsyə Cyəpɔ la' gɔm bi e a gɑ: Ko' gɔ nə tuŋ tyɛ' ɔ bɑ o kəŋnyə a m cʉm ntha a. E lə tə̌m dɑ mtso dɔ̌. Pɔ pyə wap lə bɑwə byap Yeso a, lə yəmtə e, dɑ mshɔm shwɔ e. Pa' a lə bɑ wap kwɑ mnyə myə́ a, wáp lə həŋtə e gɑ, wɑ̌ shwɔ o, tu e. Wap lə lɑ mcap nthinthi nə shap e. Dzʉ lə lɔ̌, mghətso Dyə Si pu a mtadyə mkamsi, pu a pɑ zhyə mco' cu'tə dɑ Yeso gɔ dzə cu'tə gwyə yə pu ŋkhe gɑ Sanedrɛŋ a. Gɔm bi e gɑ: O pɑ Mesia o siŋ wɔk. E ghɔm bi pu gɑ: Siŋ wɔ́ bɑ po tə gɔ piŋ pɑ. Bi a nəŋ həŋtə wɔ nwə bɑ po tə gɔ pa' pɑ. Da' gɑ tə fə cwəlɔ, Mu mo gɔ cwə́ nə́ ghəŋ tʉɔ Si nthʉɔtʉɔ. Guŋ yap awɛ ghɔm gɑ: Yəŋ gɑ́ la'tə gɑ o bɑ Mú Si. E ghɔm bi pu gɑ: Pɑ kwa' wɔ nə gɔm, gɑ̌ bɑ e. Wap piŋ gɔm gɑ: Pɑ biŋ bɑwə byap ya nthi nə ŋkwinthɛ? E ghɔmnwə tə pɑ nə́ŋ jú'. Guŋ yap awɛ lə lusi cwəlɔ dɑ e gɔ dzə Pilato. Wáp lə pɑ bútə e bɑ gɔm gɑ: Pyə yɔ tambɛ yəŋ gɑ e pɑwə ma' paknyə nthʉm gùŋ, ŋkhəŋnyə gɑ pu kɑ ma' shwɔp, biŋ bɑwə gɔm gɑ e bɑ Mesia, bɑ fo. Pilato həŋtə e gɑ: O bɑ fo pɑ Yudea a? Yeso pa' bi e gɑ: Wə nə gɔm. Pilato ghɔm bi mkamsi gwyəgwyə, ba bi lǎ' gɑ: Ŋ kha yɔ ywə yə bi a pɑ pu nyəŋ shɛ thə bɛ yəŋ nə a. Wap piŋ shəŋtə gɔm gɑ: E bɑwə nthənyə pɔmnəŋ nə va' pu a nwə yə e bɑwə ji'tə wap Yudea a, tə ntho' fɑ Galilea ŋkhəm tsɔ'ɔ. Pilato lə yu' po'o həŋtə bi a bɛ bɔ lə bɑ yə Galilea. E lə yu' gɑ Yeso nthəm nə guŋ yə́ Herode nə sa'a, gɔm gɑ pu lɑ e nə gɔ jɔ Herode, nə pa' e lə bɑ Yerusalɛm nə tyɛ'dzʉ bɔ. Herode lə nə yɔ Yeso nwə puŋ é, nə pa' a lə bɑ e yu' pa' pu gɔm nwə nə Yeso a, bɑwə shəŋ nə yɔ e tə fɑ tə́ tyɛ̌', bɑwə ŋkwɛ gɑ e gɔ yɔ pa' e gə msya a. E lə həŋtə e mnwə jɔmyɔm da' gɑ la' Yeso pa' sɔm nwə bi e. Mkamsi gwyəgwyə pu a pɑ zhyə́ mco' pyə wap lə bɑ tsʉ'u a lə bɑwə shwɔp nthinthi mnwə nə Yeso. Herode pu a msəŋwi pyə́ lə yəmtə́ é, biŋ shap e, ŋkwa dzə dəŋnyə ləŋnyə nə e, ba' e bi Pilato. Tyɛ'dzʉ bɔ, Herode pu Pilato pyə wap lə bɔnyə a pʉɔ shʉ' msó. Pilato lə ke mkamsi gwyəgwyə, ba mfomfo, ba pɔmnəŋ gɔm bi pu gɑ: Po lɑ bɛ yəŋ sɔ' jɔ a, gɔm gɑ e bɑwə fɛ pɔmnəŋ gɑ wap kɑ ghiŋ nə məjyə dəŋdəŋ; da' gɑ́ gɑ̌ təŋtə e nwə dzə po, la' jɔ ywə yə e hɔ nə́ mnwə myə po gɔm nə e a, tə bi a pɑ pu nyəŋ shɛ thə e a pɑ. Ba Herode ka yɔ sɔmywə yə e hɔ a, a ywə yə a gə tə e pa' e bi pɑ a. E ka ghə sɔmywə tə a pɑ́ pɑ nwə vʉ́. Gɑ gɔ ghə pu cwɔ e nthak e nə́ŋ. A lə bɑ mà gɑ e tak ta' gɛ cɛ̌ nəŋ nə tyɛ'dzʉ ŋwɛnyə. Wap lə cwé guŋ yap awɛ gɑ: Zhwə e, hɑ Barabas bi pyə. Barabas bɔ lə bɑ e lə zhwə̌ mo biŋ ma' paknyə tisuŋ, pu ghəm e nyəŋ cɛ́. Pilato lə kwi' gɔm nwə bi pu nə nə tak Yeso nəŋ. Da' gɑ wap cu' gɑ: Kwě, kwé é thə bɛnyəpɛnyə. E lə kwi' gɔm bi pu batə m cʉ̌m ntha gɑ: Bɛ yəŋ gɑ bɑ e hɔ kɑ? Ŋ khɑ yɔ sɔmywə yə e ghə tə a pɑ pɑ́ nwə vʉ a. Gɑ gɔ ghə pu cwɔ e, nthak e nəŋ. Tə wap kwi' nthegʉ' gɔm pɑ gɑ, pu kwe e thə bɛnyəpɛnyə, gɔm po'o bɑ nə gɔ pɑ́ m dzə. A pɑ́ po'o Pilato yap gɑ ywə yə wap wə həŋtə a gɔ pəmtə. E lə tak mo yə pu lə nyəŋ e cɛ́ nə paknyə, ba nə zhwə mo a, yə wap lə bɑwə həŋtə́ á nə́ŋ; tə sɔ' m nə Yeso e hɑ e bi pu pa' wap lə bɑwə həŋtə́ á gɑ́ wap ghə nə é pa' wap yɔ a. Wap lə pɑ dɑ e gɔ, gəm mu' Simon yə Kirena, e pɑ fɑ m gǒ jap bɛnyəpɛnyə Yeso dəm e gɑ e kwa nə jap jʉm e. Pɔmnəŋ lə bɑ jʉm é tə jɔm té' o ba pɑjwǐ, wap lə ghiŋ bɑ dzɔp kəkɔp yap, bɑ dɔ̌ nə e. Yeso fɛ nɑ e gɔm bi pu gɑ: Gogo Yerusalɛm ka po lɔ m nə́ m̀. Po lɔ m nə po, bɑ m nə́ pó pɔ́. Nə pa' mtyɛ'dzʉ wə sɔ̌' yə pu gɔ ghɔm gɑ: Mpuŋtsé bɑ mkíŋ pɑ jwǐ, ba pyə wap ka tsə, wap lə nə́ŋ núŋ pó a. Pu gɔ la' pɑ ghɔm bi m kǔŋgo gɑ, po vʉtə nə pyə. Piŋ ghɔm bi pǒ mkuŋgo gɑ: Po tʉ̌m wɔk. Nə pa' a bɑ bi a a pɑ po'o nə ta' thə hwǐ, bɑ a gɔ sɔ' pɑ nə ta' thə yə̌mtə m gɑ kɑ? Pu lə lɑ̌ shɑ mghɛ ghə nwə cwəpuŋ pɑpʉə, nə gɔ nə zhwə wap pu a pu. Wap lə ko nə tsʉ' yə pu ŋkhe gɑ kəlo' thə mo a. Wap kam e thə bɛnyəpɛnyə ba mghɛ ghə nwə cwəpuŋ pɑpʉə. Mu' ghəŋ pu tʉɔ, mu' ghəŋ pu kwyap. Yeso lə ghɔm gɑ: Ta lɑ mhɔ map shwyɛ' wap nə pa' wap ka zhyə́ ywə yə wap bɑwə gə a. Wap lə ghɔ m̌ nə ghaptə mdzə́ myə́, nə nthamnthuŋ. Pɔmnəŋ lə tiŋnyə bɑ jɔ: Mtadyə pɑ gwi é bɑ gɔm gɑ: E lě bvɔk shɑ pɔ, e vɔk nɑ e, a pɑ yə e bɑ Mesia, Si a, bɑ Si ci e a. Msəŋwi lə yəmtə́ é yap, dɑ cɔk mlu' sɔ' bəŋ é hɑ bi é gɔm gɑ: O pɑ fo pɑ Yudea o vɔk thə́ nɑ o. Mu' ywə́ bvə və́ lə bɑ thə é bɑ pu və gɑ: E bɑ fo pɑ Yudea. Mu' gə nwə cwəpuŋ yə pu lə kamtə wap pu a pu a lə yəmtə é yə́ gɑ: O tə bɑ Mesia a lə? Vɔk thə́ nɑ o, bɑ wɔk yɔk. Da' gɑ yə mu' cɔk e gɔm gɑ: O tə bwɔk Si a, wə yə o bɑwə jɔgo' pɑ pa' yʉ́ a? Yɔk pu gǒ' bɑ ǎ ku' nə pu. Pu bɑwə ŋkwi pɑ mcwɔ'fa' mɔk pu. Tə sɔ' m nə é, a bɑ e ka hɔ sɔmywə. E lə ghɔm bi Yeso gɑ: La' ŋkhamtə a nə tyɛ'dzʉ yə o gɔ sɔ' sɔ' pa' fo a. Yeso pa' bi e gɑ: Kwa' nyənyɔ gɑ siŋ o gɑ tyɛ' ɔ, pu gɔ pɑ nthʉm Paradisi. Mɔkcʉ́ lə kǔ' dzʉ̌ so nə guŋ mtsʉ' awɛ dəmcǎ' tə gɔ ŋkhəm nə m nam tá. Nam lə pǐ. A pɑ po'o dzə́ nə sam Dyə Si sɔnyə dəŋdəŋ. Yeso cwé tə thə́ gɔm gɑ: Tá a, gɑ̌ yap zhwenyə a nə bu mǔ. E lə ghɔm po'o pfʉ́. Tadyə msəŋwi ŋkhə lə nə yɔ ywə yə a shyə a, gu'tə Si gɔm gɑ: kwa' nyənyɔ bɛ yəŋ kɑ bɑ mo dəŋdəŋ. Guŋ pɔ awɛ pyə wap lə cu'tə bɑwə jɔ yəŋ nwə a, lə yɔ pa' a shyə a, bɑnyə bɑ dzɔp pu kəkɔp pu. Guŋ pɔ pyə wap lə bɑ wap zhyə́ Yeso a lə tiŋnyə gʉə sʉəsʉə ba pɑjwǐ pyə wap lə bɑ jʉm é tə fɑ Galilea bɑ de. A lə pɑ po'o mu' mo tso tsyə pɑ Yosɛp, bɑ mo cəcɑ̌ mghətso, bɑ mo pɑpuŋ, mo dəŋdəŋ sɔ́': Bɑ e la tə piŋ nwə mso pyə ba mfa' map. E lə bɑ yə Arimatea, tisuŋ pɑ Yudea. E lə bɑwə byap Nəfo Si. Bɛ bɔ lə ghɔ jɔ Pilato həŋtə gɑ é hɑ pfə Yeso bi e. E lə fi' é thə bɛnyəpɛnyə, dɑ mkam dzə dzʉmtə e jap e nthʉm sì bɑ pú təŋ yá nə wǔ gwɔ', bɑ pu la m nyəŋ sɔmmo nthʉm o. Sabat lə bɑwə sɔ̌', a pɑ tyɛ'dzʉ nə nyaptə. Pɑjwǐ pyə wap pu a Yeso lə bɑ tə fɑ Galilea lə yap jʉm Yosɛp; wap lə yɔ thəsì biŋ jɔ pa' pu lə yap pfə Yeso nthʉm o a. Wap lə pɑnyə cwəlɔ, nyaptə mwɑ́ damnyəlamnyə; a pɑ Sabat, wap hwitə pa' mco' lə yap a. A lə pɑ̌ nə dəŋdzə tyɛ'dzʉ nə gapdzʉ, kwa' mɑfɔkdzʉ̌ pɑjwǐ bɔ ghɔ thəsì pu a mwɑ myə wap lə nyaptə a. Wap lə yɔ bɑ pu keŋnyə gwɔ' dzə thəsì, wap ko nthʉm o, da'gɑ la' wap yɔ pfə Cyəpɔ Yeso. Pa' nwə lə pɑ̌ shyə wap a, wap wuŋ nə yɔ jɔ pɔ pɑpʉə dzə pu bɑ wap kwa dzə dəŋnyələŋnyə. Wap lə pwɔk shʉ m sǐ; da' gɑ pɔ bɔ ghɔm bi pu gɑ: Nwə kɑ po cəŋ mo nthʉɔ cəcɑ̌ mpfə pɔ́? E tə tsɔ' pɑ, é bɑ e yam. Po kamtə nthi pa' e lə nə gɔm bi po cwə yə e lə jɑ Galilea a. Pa' e lə gɔm gɑ: A puŋ gɑ pu hɑ Mú mo nə bǔ mghɛ bo, pu kwé e thə́ bɛnyəpɛnyə, e yám nə batə tyɛ'dzʉ yɑtá. Wap lə kamtə mghɔm myə́. Wap lə fɑ̌ thəsì cwəlɔ, siŋ guŋ ywə awɛ bi pɔ shwɔp yɑmu' mgham ba m bi guŋ pyə shɑ pɔ awɛ. A lə bɑ Maria Makdala ba Yohana, bɑ Maria ma Yakop. Pyə shɑ mso pap lə ko siŋ mghɛ nthəm. Mghɔm bɔ lə pɑ nə mnyə́ map bɑwə hwə a tsə yɔjʉm, la' wap piŋ ywə yə pɑ jwǐ gɔm a. A lə pɑ po'o Pɛtrɔ lusi ŋkhʉdʉ gɔ thəsì bɔnyə jɔ pɑ mbak dzə́. Nə ghɔ nə yə ghəŋ nwə pɑ shyə é nə ywə yə a nthəm a. A lə piŋ bɑ pɑ tyɛ'dzʉ bɔ, shɑ pɔ pɑpʉ̌ə cəcɑ̌ pu pɑ gɔ m nə mu' guŋ yə pu ŋkhe gɑ Emaʉs nə nthə́ jyə mnam mɑbʉə nə ghɔ Yerusalɛm. Giŋ bɑ gɔm nwə nə mnwə bɔ myə a kɑ təm a cəcɑ̌ pu. Pa' wap lə pɑ gɔm lə fəŋnyə́ a, Yeso pɑ kwa' yʉ́ lə kwyatə wap, pu a pu pɑ cʉ̌m jyə. Da' gɑ bɑ mnyə map cɑnyə nə zhyə e. E lə ghɔm bi pu gɑ: Yə po giŋ fəŋnyə dəŋ po'o a bɑ kɑ? A lə pɑ̌ po'o wap tiŋnyə bɑwə shʉ cwəpuŋ. Mu' mo nə pú, tsó tsyə́ pɑ Kleopas pa' bi e gɑ: Ja o da' mo yə e Yerusalɛm nə tyɛ'dzʉ yəŋ gɑ, bɑ e ka zhyə́ mnwə myə a shyə a lə? E həŋtə wap gɑ: A kɑ? Wap pa' bi e gɑ: Nwə nə Yeso yə Nazarɛt yə e lə bɑ gɛ ghɔmnwə Si, bɑ e tʉɔ nə mfa' myə́, ba nə ghɔm tsyə dzə Si ba m dzə guŋ pɔ awɛ, pa' mkamsi pɔk pyə gwyə, ba mtadyə pɔk kɑ hɑ e nə vʉ̌, ŋkham e thə bɛnyəpɛnyə a. Bɑ pyə lə́ bɑwə ŋkwɛ gɑ e lə bɑ mo yə e lə́ bɑ gɔ kwi Israɛl a. A piŋ bɑ po'o bɑ pa' mnwə bɔ təm a a cwəlɔ mtyɛ'dzʉ mɑntha', bɑ shɑ pɑjwǐ pyə pyə a pu bɑ a kě sɔlam tsɔk, nə pa' wap kɑ ghɔ thəsì mɑfɔkdzʉ̌ biŋ ŋkho wap lə yɔ pfə e, sɔ' gɔm gɑ pɑ aŋgəle ŋwak bi pu, gɔm bi pu gɑ e bɑ pɑwə. Shɑ mso pɔk kɑ ghɔ yap thəsì, ŋkho jɔ ywə yə pɑjwǐ kɑ ghɔm a a pɑ́ nyənyɔ da' gɑ la' wap yɔ e. Yeso ghɔm bi pu gɑ: Pɑ tə ghə zhyənwə, tʉ̌m bɑ́ ǎ tsonyə nə piŋ nwə yə mghɛ ghɔm ghɔ̀m Si lə ghɔm a! Kristo la tə bɑ gɔ yɔgo' po'o tə ko nə ghu'tə e a? E lə piŋ ntho' nə Mosɛ, ba nə guŋ mghɛ ghɔm ghɔ̀m Si awɛ, bɑ nthutə ywə yə a lə bɑwə dé e a nthʉm gùŋ Mŋwa'nyə awɛ. Wap lə ghɔ̌ tə bɑ ŋkhəm bəŋ guŋ yə wap lə gɔ m nə a, Yeso ghə pa' e shyəcyə a, wap cwyɛ'nyə gɔm gɑ: Pɑ cwə, nə pa' bwadzʉ wə sɔ̌', bɑ ya'dzʉ̌ cyə. E lə ko nthʉm tisuŋ bɔ nə cwə. Cwə yə pu a pu lə pɑ tɑpe a, e pé msɛ, nyəŋ byanyə nə, bo' hɑ bi pu. Mnyə map ghyɛ', wap piŋ jyə́ e, e wuŋ bi dzə̌ pú. Wap ghɔm cəcɑ̌ pu gɑ: Tʉm tsɔk pu katə bɑwə ŋkhə nthʉm o məjyə cwə yə e la' bɑwə nthútə ŋwa'nyə bi pu a? Wap lə wuŋ gɔ pɑ cwə o bɔ, bɑnyə Yerusalɛm jɔ pyə shɑ pɔ shwɔp yɑ mu' mgham, bɑ wap cu'tə pu a pyə shɑ mso pap wap ghɔm bi pu gɑ: A bɑ nyənyɔ, Cyəpɔ bɑ e yam nə vʉ̌, nə pa' a bɑ e ŋwak bi Simon. Wap piŋ siŋ wap yap ywə yə a la' shyə məjyə a, ba pa' e la' bo' msɛ wap zhyə́ e a. Wap lə pɑ̌ gɔm po'o, kwa' yʉ́ ŋwak bi pu gɔm gɑ: Hwitə pɑ́ bi po. Wap cwɔ', ŋkwɛ gɑ wap yɔ ghɛnyə́ mo. E ghɔm bi pu gɑ: Nwə kɑ́ nwə va' wɔ̌? Nwə kɑ po kwɛ yɑ nthi nwə nthʉm tʉm pǒ? Po yɔ bu mə̌ pu a mkwə mə̌. A bɑ pɑ kwa' myə̀. Po kwak a, po le a tə́ jɔ, zhwenyə tə bɑ ě ghə bapnɑ pu a mkwě pa' po wə jɔ bɑ gɑ̌ ghə a pɑ́. E lə nə ghɔm po'o da'tə bu myə́ pu a mkwə myə́ bi pu. Pa' ŋwɛnyə lə́ bɑ nə pu tə la' wap wuŋ biŋ a, nwə yɑwə shyə wap cyə a, e lɑ ghɔm bi pu gɑ: Po ghə ywə pfɑpfɑ̀ si tsɔ' a? Wap lə hɑ po' bapgu nthoto bi e, e lə kwǐ pfɑ pɑ dzə̌ pu. Biŋ gɔm bi pu gɑ: Yə̌ŋ bɑ ywə yə ŋ də ghɔm bi po cwə yə pɑ lə bəmtə bɑ a: Ywə yə pu lə və nə m̀ nthʉm mco' Mosɛ, nthʉm ŋwa'nyə mghɔm ghɔm Si, ba nthʉm mzhwɔp dɔlɔ̌ a pəmtə. A lə pɑ po'o e ghyɛ' zhyə̌nwə yap nə́ nə̀ ju' ywə yə pu lə və a. Biŋ gɔm bi pu gɑ: A bɑ pa' pu lə və a: Kristo gɔ sɔ' yɔgo', yam nə vʉ nə batə tyɛ'dzʉ yɑtá. Pu pɑ dɑ tso tsyə́ gɔm nwə pʉɔtʉm ba nwə nə lɑ mhɔnwə pɔmnəŋ shwyɛ' wap bi guŋ mguŋ awɛ tə ntho' fɑ Yerusalɛm. Po nə̌ŋ bɑ mkwinthɛ nə. Sɔ' m nə m, gɑ gɔ təm ywə yə Tá a lə ka'nyə a bi po. Sɔ' m nə po, po cwə pɑ nthʉm tisuŋ tɑ̌ tʉɔ fɑ́ thə́ kɛbəŋ ŋkho nə po. E lə lɑ̌ wap gɔ tə ŋkho Betanya, bʉ' bu myə́ thə́, nyəŋ byanyə nə pu. Cwə yə e lə pɑ nyəŋ byanyə nə pu a, hap nə pu, ŋkwɔ' m kɛbəŋ. Sɔ' m nə pu, cwə yə wap lə ghamtə e a, bɑnyə m Yerusalɛm, nthʉm ŋwɛnyə. Wap lə biŋ bɑ guŋ mcwə awɛ bɑ pɑ Dyə Si bɑ gamtə Si. Nə nə to', Ghɔm lə́ bɑ́, Ghɔm lə biŋ bɑ pu Si, Ghɔm lə bɑ Si. Ghɔm lə́ bɑ́ nə to' bɑ́ pu Si. Si lə́ dɑ pɑ Ghɔm nə́ gə guŋ ywə awɛ. Sɔmywə yə Si lə ghə a, e la tə́ cyətə lɑ pɑ yʉ nə gə pɑ́. Vɔk lə́ bɑ́ nə é; vɔk bɔ lə́ biŋ bɑ́ ŋkha' bi pɔmnəŋ. Ŋkha' piŋ ŋkhyɛ' nthʉm jʉ́m, da' gɑ́ jʉ́m lə yu' é pɑ́. Mu' mo lə pɑwə́, bɑ Si nə nthəm e; tso tsyə lə́ bɑ́ Yohane. E lə sɔ' pa' ŋkwinthɛ̌ a, nə ŋkwinthɛ̌ nə ŋkhá', po'o gɑ́ guŋ pɔmnəŋ awɛ cyə m nə e biŋ ŋkha'. E la tə́ bɑ ŋkha' pɑ, da' gɑ e lə bɑ́ ŋkwǐnthɛ bi ŋkha'. Ghɔm lə́ bɑ́ kwa' ŋkha' nyənyɔ. E lə́ nə sɔ' nthʉm dzʉ, bɑ ŋkhyɛ' guŋ pɔmnəŋ awɛ. E lə́ bɑ́ nthʉm dzʉ, Si lɑ́ dɑ pɑ yʉ́ gə dzʉ́, da' gɑ la' dzʉ̌ zhyə é biŋ. E sɔ' kwa' nthʉ̌m gùŋ e, da' gɑ la' pɔ pyə́ lɑ́ e. Tə́ sɔ' bi pɔ pyə wap lə lɑ̌ e a, bi pɔ pyə wap biŋ tso tsyə a, e hɑ gʉ' nə jí pó Si bi pú. Pu tə́ dzə́ pɔ bɔ̌ m nə mcyə pɑ́, kɑ́ m pá' bap nɑ́ nə ŋkhuŋ a lə, kɑ́ m pá' mo nə ŋkhuŋ a lə. Pu dzə́ wap m pa' Si nə ŋkhuŋ a. Ghɔm lə cʉ' mo, biŋ shwə́ cəcɑ̌ pɑ́, pɑ́ piŋ jɔ ghu'tə e; ghu'tə bɔ, ŋkwi Mú Si yə gho' ba nyənyɔ bɑ ǎ lo nə é a ŋkwi bi Si. Yohane ŋkwinthɛ̌ é, bɑ gɔm gɑ: Yə̌ŋ bɑ́ mo yə gɑ̌ gɔm nə é gɑ: Mu' mo gɔ təm jʉ̌m m̀, bɑ e lě da' bɑ dzə̌ m̀, nə pa' ŋ də́ nə pɑwə bɑ é lě da' bɑwə. A shyə m pa' a bɑ ě lonyə nə gho' a, tə pɑ ghə gho' mzhəŋ mzhəŋ. A pɑ gɑ́ Mosɛ, lə hɑ mco', bɑ gho' pu a nyənyɔ sɔ̌' shyə́ m nə Yeso Kristo. Sɔm mó la m jɔ Si; ŋkwi Mu Si yə e bɑ nə Tá a lě gə pɑ zhyə́ e. Yəŋ bɑ nə kwinthɛ̌ yə Yohane lə kwǐ nə cwə yə pɑ Yudea Yerusalɛm lə tə̌m mkamsi pu a pɑ Levi bi e, wap həŋtə́ e gɑ: o bɑ wɑ? E lə ghɔ̌m sɔsɔ̌, gɔm gɑ: ŋ tə́ bɑ́ Kristo pɑ. Wap piŋ həŋtə é gɑ: O bɑ wɑ? O bɑ Elia a? E pa' bi pú gɑ: ŋ tə bɑ é pɑ́. O bɑ gɔm ghɔm Si a? E pa' gɑ gɛ. Wap ghɔm bi e gɑ: O bɑ wɑ? Nə́ ko hɑ piŋ ghɔm bi pɔ pyə wap nthəm wɔk a, kwa' wə gɔm gɑ́ o bɑ wɑ? Yohane ghɔm bi pú gɑ: Gɑ̌ bɑ gi mo yə é shwe ghakgo gɑ: Po sɛtə məjyə cyəpɔ pa' gɔm ghɔm Si Esaya lə́ ghɔm a. A lə nə pɑ́ po'o pɔ pyə pú lə təm wap a pɑ́ pɑ Farisai. Wap lə tə́ŋtə́ Yohane nə gɔ dzə́, bɑ həŋtə́ e gɑ: A pɑ́ gɑ́ o tə́ bɑ Kristo a, kɑ Elia, kɑ gɔm ghɔm Si lə, bɑ o nu' pɔ shyə gɑ kɑ? Yohane pa' bi pu gɑ: Myə̀, gɑ̌ nu' pɔ nthʉm shyə. Mu' mo cəcɑ̌ po bɑ po ka zhyə e; ě jʉ̌m m̀ bɑwə sɔ̌', bɑ ŋ kha ku'nyə nə kyɛ' ŋkhə mthap myə́. A lə shyətə po'o Betanya, nə yə mu' jʉɔ shyə́ Yurdɛŋ, tsʉ' yə Yohane lə́ bɑ́ nə bɑwə nu'pɔ shyə a. Dzʉ́ lə lɔ̌, Yohane yɔ Yeso e pɑwə sɔ́' m bi e, gɔm gɑ: Yɔ mu jʉ̀jʉ̀ Si yə e nthé mhɔnwə dzʉ a yə̌ŋ. A bɑ́ nə é tə́ ŋ dɑ́ gɔm gɑ: Mu' mo jʉ̌m m̀ bɑwə sɔ̌', bɑ dzə m̀, nə pa' ŋ də nə pɑwə bɑ́ e le da' bɑwə a. Kwa' myə̀, ŋ dá tə bɑwə jyə é pɑ; da' gɑ ŋ də nu' pɔ shyə, bɑ nə nyaptə pa' e gɔ təm cəcɑ̌ pɑ Israɛl a. Yohane lə ŋkwinthɛ̌ gɔm gɑ: Gɑ̌ yɔ Zhwenyə, a fi' fɑ kɛbəŋ pa' səŋgɔp fo a, shwə nə e. Ŋ da tə́ bɑwə jyə e pɑ; da' gɑ́ mo yə e lə təm a gɑ nu' pɔ shyə a lə ghɔm bəm gɑ: Mo yə o yɔ Zhwenyə fi' shwə nə e a, a bɑ mo yə e nu' pɔ nthʉ́m Zhwenyə Dɔlɔ̌ a. Myə̀, gɑ̌ yɔ, biŋ bɑwə biŋ gɑ e bɑ Mú Si. Dzʉ́ lə́ lɔ̌, Yohane kwi' bɑ tsʉ'u bɔ pu a shɑ pɑkhʉ̌ pyə pɑpʉə. E lə tʉ̌ mnyə nə Yeso e pɑwə shyə̌, gɔm gɑ: Yɔ mu jʉ̀jʉ̀ Si yə̌ŋ. Pɑkhʉ̌ pyə pɑpʉə lə yǔ' tsɔ ghɔm, jap jʉm Yeso. Yeso lə fɛ nɑ́ e jɔ gɑ wap yap jʉm e, gɔm bi pu gɑ: Po shəŋ kɑ? Wap pa' gɑ: Rabi a pɑ́ da'tə gɑ Tá; gɔm gɑ: O shwə hɑ́? E ghɔm bi pu gɑ: Po sɔ̌', pǒ gɔ yɔ. Wap lə ghɔ̌ jɔ tsʉ' yə e shwə nə a, biŋ shwə bəŋ e nə tyɛ'dzʉ bɔ; a lə bɑ́ gwɛ a nə batə mnam ghǎm. Andreya, fɑ Simon Pɛtrɔ lə bɑ mu' mo nə pɔ pyə wap lə yu' gi Yohane, jap jʉm Yeso a. E ghɔ, dəŋdzə̀ jɔ kwa' fɑ e Simon gɔm bi e gɑ: Pyə yɔ Mesia, a pɑ da'tə gɑ́ Kristo. E lə́ lɑ é nə gɔ bi Yeso. Yeso lə lé é dəŋdəŋ gɔm gɑ: O bɑ Simon, mú Yohane; pu gɔ pɑ ke o gɑ Kefas, a la'tə gɑ́ Pɛtrɔ. Dzʉ lə lɔ̌, Yeso yap gɑ e gɔ ghɔ Galilea. E lə yɔ Filipo gɔm bi e gɑ: Yap jʉ̌m m̀. A lə nə pɑ po'o Filipo pɑ yə Betsaida, tisuŋ Andreya pu Pɛtrɔ. E lə ghɔ jɔ Natanaɛl gɔm bi e gɑ: Mo yə a bɑ pu və nwə nə é nthʉm mco' Mosɛ ba m nə ŋwa'nyə mghɔ́m ghɔ̀m Si a, pyə yɔ é: A bɑ Yeso Mu Yosɛp, yə Nazarɛt. Natanaɛl pa' bi e gɑ: Bi a pɑ́ sɔmywə pɑpuŋ tə́m Nazarɛt a? Filipo ghɔm bi é gɑ: Sɔ̌', biŋ jɔ́. Yeso lə lé Natanaɛl cwə yə e lə pɑ̌ sɔ' m bəŋ e a gɔm nə e gɑ: Yɔ kwa' yə Israɛl yə nyənyɔ, yə mfʉm tə̌ nə e a yə̌ŋ. Natanaɛl həŋtə e gɑ: O jyə́ a hɑ? Yeso piŋ ba' bi e gɑ: Filipo e nə ké o, ba cwə yə o la' bɑ to thə nthɔmthə́ a bɑ gɑ e jɔ o. Natanaɛl piŋ gɔm bi e gɑ: Rabi, o bɑ Mú Si, o bɑ fo pɑ Israɛl. Yeso pa' bi e gɑ: Pa' gɑ̌ gɔm gɑ gɑ̌ e jɔ o to ta'thə nthɔmthə a ǒ piŋ. O gɔ sɔ' yɔ tsə tsyə a cyə po' a. Biŋ ŋkwi' gɔm gɑ: Kwa' nyənyɔ nyənyɔ gɑ̌ siŋ wɔ gɑ po gɔ sɔ' yɔ kɛbəŋ ghyɛ', a pɑ aŋgəle Si pɑ ŋkwɔ' lə fi' dəm Mú mo. A lə nə pɑ̌ nə batə tyɛ'dzʉ yɑtá, pú ghə la'nwə̀ lɔmdyə́ Kana Galilea, má Yeso pɑ́ tsʉ'u. A lə bɑ pu ké ba Yeso pu a pɑkhʉ̌ pyə nə la'nwə bɔ̌. Pá' mlu' lə pɑ jak a, má Yeso ghɔm bi e gɑ: wap ka piŋ gə mlu'. Da' gɑ́ Yeso ghɔm bi e gɑ: Pǔ kɑ́ mɑmjwi? Yɑ cwə̌ jɑ tə́ wuŋ sɔ̌'. Map e lə ghɔm bi mghɛ fa' gɑ: E ghɔm gɑ́ po ghə pɑ gɑ kɑ́ lə, po ghə pɑ́ po'o. A lə́ nə pɑ̌ po'o mkɔ́p pɑ tsʉ'u nthɔk bɑ mkɔ́p mwɔ', mkɔp myə pɑ Yudea lə́ nə sɔk mnwə map a. Bǎ ya kɔp lə́ lə bɑ bi a pɑ́ ywə ko nə mfo' məbʉ̌ə kɑ mfo' mənthá lə. Yeso lə́ ghɔm bi mghɛ fa' gɑ: Po nyəŋ shyə nthʉm mkɔ́p mɔ̌ tə a lo; wap lə nyəŋ shyə nə́ tə a kəm shwə o. Yeso ghɔm bi pu gɑ: Pó tu' cwəlɔ nə gɔ hɑ́ bi tá la'nwə́. Wap lə nə̌ gɔ hɑ bi e; e zhwi'tə shyə bɑ ǎ zhi mlu', la' e zhyə tsʉ' yə a fɑ nə a, nə pa' da' pɔ pyə wap lə tu' a nə lə́ bɑwə jyə́, a pɑ po'o e ghɔm bi tá jwigʉɔ gɑ: Guŋ pɔ awɛ də́ŋdzə hɑ pɑ mlu' pɑpuŋ, pu nwə́ tə bam tə́ e hɑ myə a ka ghyɛ' buŋ a; tə sɔ' m nə o, bɑ ǒ lwɔ' myə pɑpuŋ tə ŋkhəm cwəlɔ! Yəŋ bɑ dzə̀ mtiŋ myə Yeso lə pɑ Kana Galilea gə lə. E lə la'tə ghu'tə e, pɑkhʉ̌ pyə pìŋ biŋ e. A lə cyə̌ cwəlɔ, e tsəŋ gɔ Kapɛrnaum pu a map e, ba mfɑ pyə pu a pɑkhʉ̌ pyə, da' gɑ ŋkho wə shwə pɑ nə pǒ mtyɛ'dzʉ́. Paska pɑ Yudea lə pɑ̌ sɔ' Yeso pʉɔ gɔ Yerusalɛm. E lə yɔ pɑ tɛmtɔ Dyə Si bɑ wap cwətə́: Pɑ tɛ mna', ba mjʉ̀jʉ̀, ba mzhwə̀ pu a pɑ kwyəpnyə ŋkhap. E lə́ lɑ̌ gwɑ gə nthé, nə jəŋ guŋ yap awɛ Dyə Si, ba mjʉ̀jʉ̀, ba mna'; sa'tə ŋkhap pɑ kwyəpnyə ŋkhap, ŋkwɔk mtɑpe map; biŋ gɔm bi pɑ tɛ mzhwə gɑ: Po té guŋ tsə bǎ awɛ tsɔ'ɔ, po kɑ piŋ dɑ Dyə Ta á gə dyə mtɔ̌. Pɑkhʉ̌ pyə lə kámtə gɑ́ a bɑ pu lě bvə gɑ: Ji dyə o wə shəŋtə jɛ́ a. Da' gɑ́ pɑ Yudea pa' gɑ: O gɔ la'tə wɔk ya nthi mtiŋ msya tə́ gə po'o? Yeso pa' bi pu gɑ: Po sa'tə Dyə Si yəŋ gɑ, a biŋ bʉ' nə mtyɛ'dzʉ mɑnthá. A pɑ po'o pɑ Yudea ghɔm bi e gɑ: Pu lə lɑ gu' shwɔp nthɔk mghap pfʉə tə́ nə ŋkwɑ Dyə Si yə̌ŋ, ǒ piŋ gɔm gɑ́ o gɔ pu' nə mtyɛ'dzʉ mɑnthá lə́? Da' gɑ e lə́ gɔm Dyə Si yə a bɑ nɑ e a. A po'o tə́ cwə yə Yeso lə yǎm nə vʉ̌ a, pɑkhʉ̌ pyə kamtə gɑ́ e lə́ ghɔm po'o, bíŋ ywə yə pu lə və a, biŋ bíŋ ba ghɔm tsyə e lə ghɔm a. Bó'gwyə pɔ lə yɔ mtiŋ msya myə Yeso lə ghə nə cwə yə e lə̌ bɑ́ Yerusalɛm nə cwə ŋwɛnyə Paska a, biŋ tso tsyə. Da' gɑ́ la' Yeso tak nɑ e bi pú, nə pa' a lə bɑ e zhyə wap awɛ. Tə la' e yɑwə́ byap gɑ pu siŋ e sɔm nwə nə nwə mo pɑ́! Nə pa' a lə bɑ e zhyə́ ywə yə a bɑ nə mo a. Mu' mo lə bɑ cəcɑ̌ pɑ Farisai tso tsyə pɑ Nikodemo. E lə bɑ́ ŋkham pɑ Yudea. E lə sɔ' mtsʉ́', jɔ Yeso, gɔm bi é gɑ: Rabi, pyə̌ zhyə gɑ o bɑ gɛ zhi'tə yə Si nə nthəm é a, nə pa' bi a pɑ sɔmmo lə té mtiŋ msya myə o gə a, tə a bɑ gɑ́ pǔ Si nə bɑ. Yeso pa' bi é gɑ: Kwa' nyənyɔ nyənyɔ gɑ̌ siŋ o gɑ tə da' nə tsə mo m nə tsə sə́ a, bɑ bi a pɑ sɔmmo lə yɔ Nəfo Si. Nikodemo ghɔm bi e gɑ: Bi a pɑ́ pu tsə mò m gɑ kɑ̀ bɑ ě tsə vò? Bi a pɑ́ e piŋ ŋkho vam map e mu' cʉ́m tə́ pu tsə é a? Yeso ghɔm bi é gɑ: Kwa' nyənyɔ nyənyɔ, gɑ̌ siŋ o gɑ: Sɔmmo yə́ pu ka tsə é m nə́ shyə ba m nə Zhwenyə á, bi a pɑ́ e lə ko nə Nəfo Si. Ywə yə pu tsə é m nə bapnɑ a bɑ pɑ bapnɑ, ywə yə pu piŋ dzə é nə Zhwenyə a bɑ́ zhwenyə. Ka nwə cyə o pa' gɑ gɔm bu gɑ: A shəŋ gɑ pu tsə o m nə tsə sə́ a. Fəfa shʉ' nə́ tsʉ' yə e kuŋ a, o piŋ bɑ ju' gi e, da' gɑ́ la' o zhyə tsʉ' yə a fɑ m nə a, o lə nəŋ jyə tsʉ' yə a gɔ m nə a. A bɑ dəŋdəŋ po'o nə mo yə pu tsə é m nə Zhwenyə a. Nikodemo ghɔm bi e gɑ: A bi a a pɑ́ po'o m gɑ́ kɑ? Yeso pa' bi e gɑ: O bɑ gɛ zhi'tə Israɛl, biŋ bɑ́ bɑ o ka zhyə́ mnwə bɔ a? Kwa' nyənyɔ nyənyɔ gɑ̌ siŋ o gɑ: Pyə̌ gɔm ywə yə pyə̌ zhyə a, pyə̌ ŋkwinthɛ̌ nə ywə yə pyə̌ yɔ a; da' gɑ́ po lə piŋ mkwinthɛ mɔ́k. A bi a gɔmnwə dəmcǎ' bi po, po lə piŋ, bɑ gɔm yə kɛbəŋ bɑ po gɔ piŋ m gɑ́ kɑ? A nə pɑ po'o bɑ sɔmmo la m ŋkwɔ' kɛbəŋ tə ně da' mo yə e lə fi' fɑ kɛbəŋ, Mu mo a. A piŋ bɑ po'o, dəŋdəŋ pa' Mosɛ lə cyə̌ŋ nɔk thə́ ghakgo a, a shəŋ gɑ pu cyəŋ Mu mo thə́. Po'o gɑ́ bǎ ya mo lə yə e piŋ a, e cyə m nə e gə vɔk mama. Nə pa' Si bɑ é kuŋ dzʉ té' o, tə hɑ Mu e, ŋkwi Mu e, po'o gɑ bǎ ya mo lə́ yə e piŋ é a e kɑ pfʉ́, e ghə vɔk mama. Nə pa' Si la tə́ nthəm Mu é nthʉm dzʉ gɑ e sɔ' fyɛ' dzʉ pɑ, e lə nthəm e gɑ dzʉ̌ cyə m nə e bvɔk. Mo yə e piŋ é a, pu tə gɔ fyɛ' e pɑ; mo yə e ka piŋ e a bɑ pu é da' fyɛ' e nə pa' a bɑ e ka piŋ tsó ŋkwi Mu Si. Fyɛ' bɑ́ gɑ: Ŋkha' bɑ ǎ sɔ' nthʉm dzʉ, da' gɑ pɔmnəŋ cwɔ' jʉ̌m nə pa' mfa' map bɑ mfa' bɔkpɔ̌k. Nə pa' mo yə e gə bɔkbɔk nwə a bɔ ŋkha', biŋ bɑ ŋkhə́ŋnyə nə sɔ' nə ŋkha', bɑ bwɔk gɑ pu kɑ yɔ mfa' myə́. Mo yə e gə nwə nyənyɔ a sɔ' nə ŋkha' po'o gɑ pu yɔ mfa' myə́, mfa' myə pu lə́ ghə m nə Si a. A lə nə cyətə, Yeso pu a pɑkhʉ̌ pyə ghɔ nthʉm guŋ Yudea; pú a pú lə cwə̌ wə́, e pɑ nu' pɔ shyə. Yohane lə bɑ nə yə́ ghə́ŋ Enoŋ bəŋ Salim tsʉ' yə shyə bɑ ǎ yɔm nə a, bɑwə nu' pɔ shyə. Pɔmnəŋ lə bɑwə sɔ̌' lə e nu' wap shyə. Nə pa' pu lə jɑ́ tə́ wuŋ nyəŋ Yohane dyəcɛ̌. A lə pɑ̌ po'o, nə tɛshwə̀ təm cəcɑ̌ mu' yə Yudea pu a pɑkhʉ̌ Yohane nə nə sɔk mnwə. Wap lə ghɔ jɔ Yohane gɔm bi e gɑ: Rabi, mo yə po e lə bɑ nə mu' jʉɔ Yurdɛŋ, mo yə o lə ŋkwinthɛ̌ nə e a, e yəŋ gɑ ba yʉ yə́ pɑwə nu' pɔ shyə, guŋ pɔ awɛ pɑwə gɔ pɑ́ m bi e. Yohane pa' bi pú gɑ: Pɑ sɔmmo lə ghə sɔmywə tə a cyə dəŋ yə́ Si hɑ bi e a. Kwa' wɔ wə bɑ mkwinthɛ gɑ ŋ də ghɔm gɑ: Ŋ tə bɑ Kristo pɑ. Gɑ̌ bɑ pɑ mo yə pu lə təm e dzə e a. Mo yə mjwǐ bɑ bi a, bɑ́ dhə e; sɔ' m nə so dhə, e pɑ nthiŋnyə ju' ywə yə e ghɔm a, dhə cwə tə gɔmnwə, so e ŋwɛnyə. A po'o tə́ gɑ̌ bɑwə ŋwɛnyə, ŋwɛnyə pɑpuŋ. A shəŋ gɑ e nə wu', a bɑ syaptə syaptə̀. Mo yə́ é fɑ m thə́ kɛbəŋ á, bɑ m̀ dəm guŋ mnwə awɛ. Mo yə́ é bɑ dəmcǎ' á pɑ mo dəmcǎ', bɑ gɔmnwə pɑ pa' pɑ dəmcǎ' á; Mo yə́ e fɑ kɛbəŋ a ŋkwinthɛ̌ nə ywə yə e jɔ́ a, ba nə yə e ju' a. Da' gɑ sɔmmo lə piŋ mkwinthɛ. Mo yə ě piŋ yə nə́ ŋkwinthɛ̌ a, e biŋ gɑ Si bɑ nyənyɔ. Nə pa' mo yə Si nthəm e a gɔm ghɔ̀m Si yə e hɑ Zhwenyə tə dhə̀ bi a. Tá ŋkhuŋ Mú, biŋ bɑ́ bɑ ě nyəŋ guŋ mnwə awɛ pu é. Mo yə́ e piŋ Mú a, bɑ e ghə vɔ̀k mama; mo yə e kəŋnyə̀ nə piŋ Mú a tə́ gɔ la' yɔ vɔ̀k pɑ̀; luŋ Si piŋ bɑ jɛ́ nə é guŋ mcwə awɛ. Cwə yə́ Yeso lə́ yu' gɑ pɑ Farisai yu' pa' pu gɔm gɑ́ pɑkhʉ pyə́ wə jɔ́m gɔ dzə, e piŋ bɑwə nu' pɔ shyə shyə́ Yohane, ba tə pa' a nyənyɔ gɑ́ tə Yeso nə lə́ bɑwə nu' pɔ shyə a pɑ, pɑkhʉ̌ pyə nə lə́ bɑwə nu' pɔ shyə a. E təm Yudea gɔ Galilea. E lə́ bɑ gɔ cyə m Samaria. A lə pɑ po'o e kəm nthʉm mu' tisuŋ Samaria yə pu ŋkhe gɑ Sikar a, bəŋ ca' tsyə Yakop lə hɑ bi mu e Yosɛp a, tsʉ' yə ghʉ̌m shyə Yakop bɑ nə a. Pa' Yeso lə bɑ e ghiŋ tə bwa a, e lə cwə dəm kə̌ŋ ghʉ̌m shyə. A lə bɑ nə khɛ̌ a mɔkcʉ́. Mu' mjwǐ Samaria lə sɔ' m nə tu' shyə; Yeso ghɔm bi e gɑ: Hɑ yɑ shyə nwə́. A lə nə pɑ po'o bɑ pɑkhʉ̌ pyə ghɔ m tisuŋ nə yo ywətsʉ. Da' gɑ mjwǐ bɔ, mjwǐ Samaria bɔ ghɔm bi e gɑ: M gɑ́ kɑ́ lé? Wə yə́ o bɑ́ yə́ Yudea a, lo a shyə, myə̀, mjwǐ Samaria! Pɑ Yudea tə shəŋ gɑ pu a pɑ Samaria tamtə́ nə sɔmywə pɑ́. Yeso pa' bi é gɑ: O lǎ' pe' jyə ywə yə Si hɑ́ a, ba mo yə e gɔm bu gɑ: hɑ yɑ shyə nwə́ a, bɑ wə nə lo é shyə, e hɑ́ shyə́ dzəŋ tsəŋ bu. Mjwǐ bɔ ghɔm bi e gɑ: Cyəpɔ o ka ghə ywə nə nthé shyə, bɑ ghʉ̌m nəŋ shú; tə́ o gɔ lɑ yə bɔ shyə vɔk hɑ? A bɑ ǒ cyə tá yɔk Yakop yə e lə hɑ̌ ghʉ̌m shyə yəŋ bi pyə, yə ba yʉ yə́ lə nwə̌, ba mnɔm pyə́ a? Yeso pa' bi e gɑ: Mo yə ě nwə́ shyə yəŋ a, bɑ ghak e gɔ kwi' khə́. Da' gɑ́ mo yə e gɔ sɔ' nwə́ shyə yə gɑ̌ gɔ hɑ́ bi e a, bɑ ghak e tə gɔ la'tə́ kwi' khə pɑ́; bɑ shyə́ bɔ yə gɑ̌ gɔ hɑ bi e a gɔ sɔ' pʉɔ cʉ' sa' sǐ shyə yə vɔk mama fə nə a. Mjwǐ bɔ ghɔm bi e gɑ: Cyəpɔ hɑ shyə bɔ bəm po'o gɑ ghak a kɑ kwi' ŋkhə, a ŋ khɑ piŋ bɑ sɔ' tsɔ'ɔ nə tu' shyə. Yeso ghɔm bi e gɑ: Ghɔ ŋkhe dhə́ o po e pəmtə́ sɔ' tsɔ'ɔ. Mjwǐ bɔ pa' bi e gɑ: Ŋ kha ghə dhə́. Yeso ghɔm bi e gɑ: Ǒ ghɔm pɑpúŋ gɑ: Ŋ kha ghə dhə́; a bɑ ǒ tsə ghə pɑtɔ, ba bɛ yə o gə e cwəlɔ a lə nəŋ bɑ dhə́ o. Nə yə bǎ, o ghɔm nyənyɔ. Mjwǐ bɔ ghɔm bi e gɑ, Cyəpɔ gɑ̌ yɔ gɑ o bɑ gɔm ghɔm Si. Mtá pɔk lə́ gamtə Si dəm kuŋ gǒ tsɔ'ɔ, pǒ nəŋ biŋ gɔm m gɑ tsʉ' nə́ ghámtə Si bɑ m Yerusalɛm. Yeso ghɔm bi e gɑ: Yu' ywə yə gɑ̌ gɔm a m mɑmjwi; cwə wə sɔ̌', yə po tə́ gɔ piŋ ghamtə Tá m dəm kuŋgǒ kɑ m Yerusalɛm a lə. Pǒ gamtə ywə yə́ po ka zhyə́ ya a; tə́ pyə̌ gamtə ywə yə pyə̌ zhyə a, nə pa' ywə vɔ̀k fɑ m bi pɑ Yudea. Da' gɑ́ cwə wə sɔ̌', bɑ a tsə́ sɔ' cwəlɔ, cwə yə́ pɑ ghamtə pyə nyənyɔ gɔ pɑ ghamtə Tá m nə zhwenyə ba m nə́ nyənyɔ a; nthi pɑ ghamtə pyə Tá shəŋ a bɑ po'o. Si bɑ zhwenyə, a piŋ shyə m po'o tə́ pɔ pyə wap gamtə é a ghɔ pɑ́ ghamtə é m nə zhwenyə ba m nə́ nyənyɔ. Mjwǐ bɔ ghɔm bi e gɑ: Gɑ̌ zhyə gɑ́ ta' Mesia gɔ sɔ' sɔ', mo yə pu ŋkhe e gɑ Kristo a. Cwə yə e gɔ sɔ' sɔ' a, e siŋ wɔk pɑ̀ guŋ mnwə awɛ. Yeso ghɔm bi é gɑ: Gɑ̌ bɑ é, myə̀ yə gɑ̌ bɑwə gɔmnwə bu a. A lə pɑ po'o pɑkhʉ̌ pyə ŋwak. Nwə cyə wap nə yɔ gɑ́ Yeso pu mjwǐ wə gɔmnwə; da' gɑ́ la' sɔmmo ghɔm bi e gɑ: O shəŋ kɑ? Kɑ m gɑ: Nwə kɑ́ o ghɔmnwə bi e? Mjwǐ bɔ lə tak kɔp nə nthu' shyə é tsʉ'u, khʉdʉ́ gɔ tisuŋ gɔm bi pɔmnəŋ gɑ: Po sɔ' tə́ jɔ mu' mbɛ, bɑ ě siŋ a guŋ ywə yə dɑ̌ ghə a awɛ. Tə é tə gɔ pɑ Kristo a lə́? Wap lə təm tisuŋ, gɔ bəŋ é. A lə nə pɑ̌ po'o bɑ pɑkhʉ̌ pyə́ cu' bɑwə nthənyə e gɑ: Rabi tsʉ́ ywə lə. Da' gɑ́ e ghɔm bi pú gɑ: Gɑ̌ gɔ tsʉ́ ywətsʉ yə po ka zhyə yá a! A pɑ́ po'o pɑkhʉ̌ pyə pɑ gɔm cəcɑ̌ pu gɑ: Jyə gɑ́ a gɔ pɑ́ bɑ mu' mo hɑ ywətsʉ bi e lə́? Yeso ghɔm bi pu gɑ: Ywətsʉ́ á bɑ nə ghə ywə yə mo yə é nthəm á shəŋ a, biŋ gə fa' tsyə́ pəmtə̀. Kwa' wɔ tə́ gɔm gɑ: A cʉ' mŋwə́ pfʉ̀ə pú lɑ tsə pé a? Tə́ gɑ̌ ghɔm bi po gɑ: Po pʉ' mnyə mɔ biŋ dé pé; a bɑ cwə nə lɑ tsə́ e da' ŋkhǔ'! Mo yə e dɑ tsə́ pé a bɑ ě da' ŋkwi ŋkhap fa' e, biŋ bɑwə shu'tə potsə́ nə vɔk mama, tə mo yə e dzə tsə́ a, pu mo yə e dɑ a pɑwə bəmtə ŋwɛnyə. A bɑ po'o tə́ ghɔm tsyə a gɔm gɑ: Mu' mo dzə̀ ywə, mu' mo lɑ a, pɑ́ nyənyɔ. Dě nthəm wɔ gɑ́ po ghɔ dɑ tsə́ tsyə po la tə yɔgo' nə a; shɑ́ pɔ lě jɔgo', po ko nə ywə yə wap lə cəŋtə́ jɔgo' nə a. Bo'gwyə pɑ Samaria tisuŋ bɔ lə́ piŋ Yeso, shyə m nə ghɔm mjwǐ yə e lə́ bɑwə biŋ gɑ: E siŋ a guŋ ywə yə dɑ̌ ghə a awɛ. Cwə yə pɑ Samaria lə kəm bəŋ e a, shwyɛ'nyə e gɑ e cwə cəcɑ̌ pú. E lə cwə wə́ tyɛ'dzʉ tsɑpʉ́ə. Pɔ jɔmyɔ̌m piŋ shyə́ m nə ghɔm tsyə́ biŋ é, biŋ bɑ gɔm bi mɑmjwi bɔ gɑ: Pyə tə̌ wə́ shyə pɑ da' nə mghɔm mǔ tə́ biŋ pɑ́; kwa' wɔk yu' ghɔm tsyə́, biŋ bɑwə jyə nyənyɔ gɑ e bɑ Gɛvɔk dzʉ. A lə́ cyə̌ mtyɛ'dzʉ́ mɑbʉə, Yeso lu tsʉ'u bɔ, gɔ Galilea. A nə pɑ̌ po'o bɑ kwa' Yeso lě biŋ gɑ pu tə́ gə mku' sɔm gɔm ghɔm Si gǔŋ pú pɑ́. Tə́ ba tə po'o bɑ e lə ŋwak Galilea, pɑ Galilea lɑ e kwa' pɑpuŋ: A lə bɑ ba wap yap lə ghɔ̌ Yerusalɛm nə́ ŋwɛnyə, ŋkho wə́ jɔ guŋ ywə awɛ yə Yeso lə́ ghə a. Yeso lə pɑnyə Kana Galilea tsʉ' yə e lə lɑ shyə gə mlu' nə a. Mu' tadyə msəŋwi fò lə bɑ wə́, mú e pɑ Kapɛrnaum bɑwə gǒ. E lə yu' pa' pu gɔm gɑ Yeso fɑ Yudea sɔ' Galilea a, gɔ jɔ e, biŋ shwyɛ'nyə e gɑ e tsəŋ jɛ́ mu e yə e lə bɑwə npfʉ́ a. Yeso ghɔm bi e gɑ: Po pɑ tə yɔ mtiŋ pu a msya bɑ po tə́ gɔ la' piŋ pɑ! Tadyə msəŋwi ghɔm bi e gɑ: Cyəpɔ, tsəŋ mu a nə pfʉ! Yeso ghɔm bi e gɑ: Ghɔ̌, mú o vɔk. Bɛ bɔ lə́ piŋ ghɔm tsyə Yeso gɔm bi a, cwəlɔ, ntham məjyə̀. E lə pɑ dzəŋ cwəlɔ, mghɛ fa' pyə sɔ' pu a pú yu'tə, wap ghɔm bi e gɑ: Mú o vɔk. E lə həŋtə wap cwə yə é kɑ yɛ a, wap pa' bi e gɑ: Mhwi kɑ nthəm nə e nə ta' nam yó. Tá mú bɔ yɔ gɑ a cwə yə Yeso kɑ ghɔm bi e gɑ: Mu o vɔk a. Tə fɑ po'o e piŋ, ba guŋ tuŋdyə́ e awɛ. Yəŋ bɑ batə mtiŋ msya mɑbʉə myə Yeso lə́ ghə cwə yə e lə́ fɑ Yudea gɔ Galilea a. Yə bɔ lə nə cyə, a pɑ nə mu' ŋwɛnyə́ pɑ Yudea, Yeso pʉɔ Yerusalɛm. A nə pɑ po'o, mú' tam shyə pɑ Yerusalɛm bəŋ jyədyə̌ jʉ̀jʉ̀, tsǒ tam shyə bɔ pɑ Bezata nə ghɔm Ebraika. Mpə̌ŋ lə bɑ nə mɑnthɔ. Mghɛ ghó kwa' vəŋ e pɑ nuŋtə nthʉm mpəŋ bɔ: Mfʉ́, mkho'tə, pɑ tə ŋaknyə jyə́, bɑ byap gɑ́ shyə nəŋnyə. Nə pa' a lə bɑ shɑ mcwə, aŋgəle Cyəpɔ fi' nthʉm tam shyə bɔ; shyə nəŋnyə, nə pa' dəŋdzə mo yə e lə́ ŋkho nthʉm shyə cwə yə a sə a lə jɛ́, kɑ gho e la' bɑ pɑ́ gɑ kɑlə́. Mu' mo lə bɑ tsʉ'u bɑ ŋkho'tə tə fɑ nə gu' mgham ntha. Yeso lə yɔ e bɑ ě núŋ, biŋ nə yu' gɑ́ e bɑ pɑ po'o tə fɑ tə tyɛ̌', gɔm bi e gɑ: O shəŋ nə yɛ́ a? Ŋkho'tə bɔ ghɔm bi e gɑ: Ŋ kha ghə sɔmmo yə bi a pɑ́ e nyəŋ a shyə cwə yə tam shyə to' nə nəŋnyə a; nə pa' cwə nə ghɔ tə ŋkho bɑ shɑ pɔ tam dzə m̀. Yeso ghɔm bi e gɑ: Lusi ŋkwa ko'tə kodyə o gǐŋ! Mo bɔ lə́ wuŋ jɛ; ŋkwa ko'tə kodyə e, gǐŋ. A lə nə pɑ̌ po'o tyɛ'dzʉ bɔ pɑ tyɛ' sabat. Tə pɑ Yudea wuŋ gɔm bi mo yə pu jɛ́ e a gɑ: Yəŋ gɑ bɑ tyɛ' sabat, mco' kɑ piŋ gɑ o kwa ko'tə kodyə o. Da' gɑ e pa' bi pu gɑ: Mo yə e gə jɛ á, yʉ nə gɔm bəm gɑ: Kwa ko'tə kodyə o gǐŋ. Wap həŋtə e gɑ: Bɛ bɔ yə e gɔm bu gɑ: Kwa ko'tə kodyə o giŋ a bɑ wɑ́? Da' gɑ mo yə Yeso lə yɛ e a la tə bɑwə jyə mo yə bɛ bɔ bɑ e a pɑ, nə pa' Yeso lə́ bɑ ě lu bəŋ vəŋ pɔ pyə wap lə́ bɑ tsʉ'u a. Yeso lə cwə biŋ jɔ mo bɔ Dyə Si, gɔm bi e gɑ: Ǒ yɑ́ bɑ o cəŋtə jɛ: Kɑ piŋ hɔnwə, bwɔk gɑ mu' bɔkbɔk nwə kɑ piŋ ŋkho nə o. Bɛ bɔ lə ghɔ gɔm bi pɑ Yudea gɑ Yeso nə la' jɛ e. Tə fɑ po'o pɑ Yudea to' nə khiŋ Yeso gɑ e ghə po'o tyɛ' Sabat. Da' gɑ Yeso pa' bi pu gɑ: Tǎ a bɑwə fǎ' tə ŋkhəm cwəlɔ; ba myə̀ yɑ̌ piŋ bɑwə fǎ'. Tə fɑ po'o, pɑ Yudea pɑ shəŋ nə zhwə̀ Yeso nə gɔ pɑ m dzə, nə pa' é lá tə́ bɔptə́ pɑ da' mco' Sabat pɑ́; e lə́ biŋ bɑwə ŋkhe Si gɑ tap e dəŋdəŋ, po'o nə da'tə gɑ e bɑ́ pa' Si a. Yeso lə́ lɑ̌ ghɔm gɔm gɑ: Kwa' nyənyɔ nyənyɔ gɑ̌ siŋ wɔ gɑ́ bi a pɑ Mú lə ghə sɔmywə nə yə thə; e gə pɑ́ ywə yə ě yɔ pa' Tá gə a; nə pa' ywə yə Tá gə a, ba Mú gə yə pɑ́ po'o. Nə pa' Tá ŋkhuŋ Mú, biŋ bɑ da'tə é guŋ ywə awɛ yə é gə a; é gɔ sɔ' kwi' la'tə é mfa' myə ǎ kwi' gu' té' a, tə̌ nwə pɑ shyə́ wɔ. Dəŋdəŋ pa' Tá jám mpfə pɔ, gə wap vɔk a, ba Mú gə mo yə e kuŋ a vɔk. Tá tə́ fyɛ' sɔmmo pɑ, nə pa' a bɑ e hɑ guŋ nə fyɛ' awɛ bi Mú; Po'o gɑ guŋ pɔ awɛ hɑ mku' bi Mú dəŋdəŋ pa' wap hɑ mku' bi Tá a. Mo yə e tə hɑ mku' bi Mú a tə hɑ mku' bi Tá yə e nthəm e a pɑ́. Kwa' nyənyɔ nyənyɔ, gɑ̌ wə siŋ wɔ, mo yə ě yu' ghɔm tsɑ̌, biŋ mo yə e nthəm a, vɔk mɑmɑ bɑ bi e; e tə́ gɔ sɔ' sɔ' nə fyɛ' pɑ́, nə pa' a bɑ ě cyə nə vʉ̌ ŋkho nə vɔk. Kwa' nyənyɔ nyənyɔ gɑ̌ wə siŋ wɔ, cwə wə sɔ̌', bɑ é da' sɔ̌', cwə yə mpfə pɔ gɔ yu' gí Mǔ Si a. Pɔ pyə wap nəŋ gɔ la' yu' a pɑ gɔ sɔ' vɔk. Nə pa' dəŋdəŋ pa' Tá bɑ ě ghə vɔk nə e a, a bɑ e hɑ gɑ ba Mu ghə vɔk nə e. Tá bɑ ě hɑ gʉ' nə fyɛ' pɔ bi e, nə pa' e bɑ Mu mo. A mnwə mɔ kə́ cyə wɔ nə pa' cwə wə sɔ̌', yə pɔ pyə wap bɑ m nthʉm mthəsì a gɔ yu' gi e a. A pɔ pyə wap lə́ ghə nwə pɑpuŋ a təm nə yam nə vʉ̌ yə a dɑ mo gɔ nə vɔk a; pɑ ghə bɔkbɔk nwə təm yap nə yam nə vʉ̌ yə a dɑ mo gɔ m nə fyɛ' a. Sɔ' m nə m̀, bi a pɑ ŋ də ghə sɔmywə pɑ nə yɑ thə pɑ́; gɑ fyɛ' m pa' gɑ ju' a; yɑ nə fyɛ' piŋ bɑ nyənyɔ nə pa' ŋ tə́ gə pɑ ywə yə myə̀ nə shəŋ a pɑ; gɑ gə ywə yə mo yə e nthəm a shəŋ a. Ŋ da' bɑ ŋkwinthɛ̌ a pɑ́ myə̀ bɑ pu tə́ gɔ piŋ yɑ nə ŋkwinthɛ̌ pɑ́. Mu' mo nə ŋkwinthɛ̌ a, nəŋ bɑwə jyə gɑ mkwinthɛ myə e ŋkwi nə m̀ a bɑ kwa' pa' a shəŋ a. Po lě nthəm pɔ bəŋ Yohane, e nəŋ ŋkho ŋkwinthɛ̌ nə nyənyɔ. Sɔ' m nə m̀ a tə́ bɑ m gɑ́ gɑ̌ bɑwə byap gɑ mo ŋkwinthɛ̌ a pɑ́; da' gɑ́ gɑ̌ gɔm po'o tə́ po vɔk. Yohane lə́ bɑ́ lambù yə pú su mɔk nə́ a kyɛ́' a: Po lě ŋwɛnyə tsɔ' pɑ nə mu kam cwə nə ŋkha' e. A nə pɑ̌ po'o bɑ gɑ̌ ghə mu' nə ŋkwinthɛ̌, bɑ a cyə yə Yohane; a bɑ́ mfa' myə Ta hɑ́ gɑ́ gə a. Gɑ̌ gə má a piŋ bɑ́ mkwinthɛ gɑ Tá nə nthəm a. Tá yə e nthəm a bɑ e ŋkwinthɛ̌ a. Da' gɑ la' po yu' gi e kɑ nə yɔ ywə yə a da'tə é a lə. Ghɔm tsyə lə piŋ bɑ shwə nə po, nə pa' po tə́ biŋ mo yə e nthəm e a pɑ́. Po nthàk ywə yə pu lě bvə a, bɑ́ ŋkwɛ gɑ po gɔ cyə m nə́ ghə vɔk mama: A nəŋ bɑ po'o, ywə yə pu lə və a pɑ ŋkwinthɛ̌ nə m̀. Po lə nəŋ ŋkhuŋ nə sɔ' bəm, gɛvɔk mama. Ghú'tə a tə fɑ m bi pɔmnəŋ pɑ; ba tə́ po'o, a bɑ gɑ̌ zhyə wɔ. Ŋkhuŋnyə Si tə́ bɑ nə po pɑ́. Gɑ̌ sɔ' m nə́ tsǒ Tá a, po piŋ ŋkhəŋnyə nə lɑ a. Mu' mo sɔ̀' pɑ kwa' nə tsyə́ tso bɑ pǒ gɔ lɑ e. Wɔ pyə pǒ gu'tə nɑ tsɔ́, la' po pɑ shəŋ ghu'tə yə a fɑ m bi Si a, a bi a po piŋ m gɑ́ kɑ? Ka po kwɛ gɑ́ myə̀ nə́ gɔ sɔ' putə́ wɔ bi Tá: Mo yə e gɔ sɔ' putə́ wɔ a bɑ́ Mosɛ yə po jap tʉm tsɔ nə é a. Nə pa' po la' pé e biŋ Mosɛ, bɑ a bɑ po piŋ ba myə̀, nə pa' ywə yə e lə və a, e lə́ bvə pɑ nə m̀. Po pɑ́ tə piŋ ywə yə é lə və a, bɑ po gɔ piŋ ywə yə gɑ̌ gɔm a m gɑ́ kɑ? Yə bɔ lə nə cyə, Yeso ghɔ nə yə mu' jʉɔ shyə lɑpʉə Galilea yə pu ŋkwi' ŋkhe gɑ shyə lɑpʉə Tiberia a. Mɑ vəŋ pɔ lə́ bɑ jʉm e, nə pa' pɔmnəŋ lə́ bɑ wap yɔ mtiŋ msya myə e lə ghə nə mkho'tə a. A lə pɑ̌ po'o Yeso kwɔ' dəm kuŋ, pu a pɑkhʉ̌ pyə cwə́ dəm o. A lə bɑwə shʉ' pɑ muywə paska yə a bɑ ŋwɛnyə pɑ Yudea a sɔ̌'. A lə pɑ po'o Yeso pu' mnyə myə́, jɔ mɑ vəŋ pɔ wap pɑwə sɔ' m bi e. E ghɔm bi Filipo gɑ: Pɑ gɔ yó msɛ hɑ tə́ wap ghə ywə yə wap gɔ tsʉ a? E gɔm po' nə dəŋtə Filipo, nə pa' e lə́ bɑwə jyə ywə yə e gɔ ghə a. Filipo ghɔm bi e gɑ: Pu yò msɛ̌ pɑ nə bɛ ŋkhap ŋkhəpʉə bɑ a tə gɔ ku' dəŋ yə bǎ ya mo lə́ gɔ kwi muywə po' ě a pɑ. Mu' mukhʉ̌ e yə tso tsyə bɑ Andreya, fɑ Simon Pɛtrɔ ghɔm bi é gɑ: Mu' mú mbɛ si tsɔ'ɔ bɑ e ghə msɛ mta' tɔ ba bapgu dùŋ pʉə; tə́ ǎ ku' kʉ̌ nə dəŋ pɔ pɔŋ gɑ ɑ? Yeso ghɔm gɑ: Po ghə wap cwətə si. Pa' mghě lə bɑ a yɔm tsʉ'u a, wap lə cwətə si; wap lə bɑ gwɛ a pɔ sha' tɔ. A lə pɑ̌ po'o Yeso kwi msɛ̌, go'tə Si, gaptə́ bi pɔ pyə wap lə bɑ si a; biŋ gə pɑ̀ po'o nə bapgu hɑ bǎ yə́ wɑlə́ dəŋ yə ě kuŋ a. Wap lə cəŋtə jwyə, Yeso ghɔm bi pɑkhʉ̌ pyə gɑ: Po laktə́ mbo' myə́ tə̌ sɔmywə kɑ pǐ nə́. Wap lə laktə mbo' myə́ bɔ, a lo nə msap shwɔppʉə mghǎm, mbo' myə́ myə a lə cʉ' a. Pɔ bɔ lə́ nə yɔ mtiŋ msya bɔ myə Yeso gə a gɔm gɑ: Mo yəŋ gɑ bɑ kwa' gɔm ghɔm Si yə nyənyɔ yə e sɔ' nthʉm dzʉ a. Da' gɑ Yeso nə zhyə gɑ́ pu gɔ sɔ' ghəm e nə ghə fo, biŋ kwi' nthəm do e, gɔ m dəm kúŋ. A lə pɑ̌ bwadzʉ̌, pɑkhʉ̌ pyə tsəŋ tə́ ŋkhəm shyə lɑpʉə. Wap lə ko kənu' nə́ nə sa' gɔ Kapɛrnaum nə yə mu' kəŋ shyə. Dzʉ̌ lə wuŋ só, tə́ Yeso ŋkwyatə́ wap. Mu' mɑ fəfa lə bɑwə shʉ̌' tə shyə pɑwə bʉɔnyə. Wap lə́ bɑ wap sɔp shyə tə ŋkhəm nə gwɛ a mstadə shwɔptɔ mghǎm bʉə kɑ mgham ntha lə, jɔ Yeso, e pɑwə giŋ dəm shyə lɑpʉə, bɑwə sɔ' m bə̌ŋ kənu' yap. Wap pwɔk, da' gɑ́ tə́ Yeso ghɔm bi pu gɑ: A bɑ a, ka po pwɔk. Wap lə́ pɑ̌ shəŋ nə kwa e nthʉm kənu', da' gɑ́ nə yɔ bɑ wap kəm kəŋ shyə. A lə́ pɑ yə mu' jʉm dzʉ̌, pɔ pyə wap lə cʉ̌' nə yə mu' jʉɔ a, yɔ gɑ kənu' lə bɑ tsʉ'u pɑ yɑmu', bɑ Yeso kě tə yap jʉm pɑkhʉ̌ pyə nthʉm yap kənu', nə pa' wap lə́ bɑ wap ghɔ pɑ̀ dǒ pú a. A piŋ bɑ po'o bɑ shɑ mkənu' fɑ Tiberia ŋwak bəŋ tsʉ' yə pɔmnəŋ lə pfɑ̌ msɛ, bɑ Cyəpɔ gho'tə Si nə a. Pɔmnəŋ lə nə́ yɔ gɑ Yeso pu a pɑkhʉ̌ pyə tə yɑ̌ tsʉ'u pɑ̀, biŋ ŋkho nthʉm mkənu' gɔ Kapɛrnaum nə cəŋ Yeso. Cwə yə wap lə yɔ e nə yə mu' jʉɔ shyə lɑpʉə a, gɔm bi e gɑ: Rabi o sɔ' cwə kɑ? Yeso pa' bi pu gɑ: Kwa' nyənyɔ nyənyɔ, po tə shəŋ a m pa' po jɔ mtiŋ msya a pɑ̀, po shəŋ a m pa' po npfɑ́ msɛ tə jwyə a. A shəŋ gɑ̀ po fǎ' tə́ m nə ghə yəŋ ywətsʉ yə a bɔptə a pɑ̀; po fa' m nə ghə ywətsʉ yə a shwə nə vɔk mama a, ywətsʉ yə Mú mo gɔ sɔ' hɑ bi po a, nə pa' a bɑ yʉ tə Ta yə e bɑ Si a bɑ e yap mtiŋ myə́ nə e. Wap ghɔm bi e gɑ: Pyə gɔ ghə gɑ́ kɑ tə́ fa' nə mfa' Si? Yeso pa' bi pu gɑ: fa' Si bɑ nə piŋ mo yə e nthəm e a. Wap pa' yap bi e gɑ: Kwa' wə gɔ ghə mǎ mtiŋ msya tə́ pyə yɔ nə biŋ o? Fa' tsʉ̌ bɑ tsa a? Mtá pɔk lə pɑ̌ ghakgo npfɑ mana pa' bɑ pu və gɑ: E lə hɑ ywətsʉ bi pu, a pɑ́ msɛ̌ myə a fi' fɑ kɛbəŋ a. Da' gɑ́ Yeso ghɔm bi pú gɑ: Kwa' nyənyɔ nyənyɔ, gɑ̌ siŋ wɔ, Mosɛ lě tə hɑ msɛ myə a fɑ kɛbəŋ a bi po; nə pa' Tá a nə hɑ kwa' msɛ nyənyɔ myə a fɑ kɛbəŋ a. Nə pa' msɛ̌ Si, bɑ mo yə é fi' fɑ kɛbəŋ biŋ bɑ hɑ vɔk bi dzʉ̌ a. Wap lə ghɔm bi e gɑ: A pɑ po'o m Cyəpɔ o pɑ hɑ msɛ bɔ bi pyə guŋ mcwə awɛ. Yeso ghɔm bi pu gɑ: Myə̀ nə bɑ́ msɛ vɔk; mo yə e sɔ' bəm a bɑ jikǔ' tə gɔ kwi' yɛ e pɑ; mo yə e piŋ a, bɑ ji shyə tə gɔ la' kwi' yɛ e pɑ́. Tə́ a bɑ gɑ̌ siŋ wɔ yá: Pǒ yɔ, ba tə́ po'o po lə piŋ. Guŋ pɔ awɛ pyə Tá hɑ wap bəm a gɔ sɔ' sɔ' bəm, a mo yə ě nəŋ sɔ' bəm a, ŋ də wa' e pɑ́. Nə pa' ŋ da tə́ fi' fɑ kɛbəŋ nə ghə ywə yə gɑ̌ shəŋ a pɑ́, ŋ də fi m nə ghə ywə yə mo yə e nthəm a shəŋ a. Ywə yə mo yə e nthəm a shəŋ a nəŋ bɑ gɑ́ ŋ khɑ ghə sɔmmo nə pɔ pyə e hɑ wap bəm a pi, gɑ̌ gɔ sɔ' yám wap nə jʉɔjʉ̀m tyɛ'dzʉ́. Ywə yə Tá a shəŋ a bɑ gɑ mo yə ě yɔ Mú biŋ e a, vɔk mama pɑ́ bi e; a sɔ' jám e nə jʉɔjʉ̀m tyɛ'dzʉ́. Tə́ fɑ pa' Yeso lə ghɔm gɑ: Gɑ̌ bɑ msɛ myə a fi' fɑ kɛbəŋ a, pɑ Yudea lə to' nə pɑ́ gɔmtə nə é. Biŋ bɑ gɔm gɑ: E tə́ bɑ Yeso mú Yosɛp a lə́? Pɑ̀ ka zhyə tap e pu map e a? Tə bi a pɑ e ghɔm cwəlɔ gɑ: Gɑ̌ fi' fɑ m kɛbəŋ m gɑ kɑ? Yeso lə́ piŋ dɑ ghɔm gɔm bi pu gɑ: Ka po kwi' gɔmtə cəcɑ̌ po. Bi a pɑ sɔmmo lə sɔ' bəm tə́ a bɑ́ gɑ Tá yə e nthəm a, nə fəŋtə́ e nə sɔ', a nəŋ sɔ' jám e nə́ jʉɔjʉ̀m tyɛ'dzʉ́. A bɑ nthʉm ŋwa'nyə pɑ ghɔm ghɔm Si bɑ pú lě bvə gɑ: Si gɔ sɔ' zhi'tə wap awɛ. Bǎ wɑlə́ yə ě yu' ywə yə a fɑ bi Tá á, bíŋ ŋkwi ywə yə e ji'tə a, mo bɔ sɔ' bəm. Nə pa' sɔmmo la m jɔ Tá tə ně da' mo yə e fɑ m nə Si a. Mo bɔ bɑ ě yɔ Tá. Gɑ̌ siŋ wɔ kwa' nyənyɔ nyənyɔ gɑ mo yə ě piŋ á a, vɔk màmà bɑ bi e. Gɑ̌ bɑ́ msɛ vɔk. Mtá pɔ lə pfɑ mǎnà ghakgo, wap lě pfʉtə́. Pa' msɛ myə a fi' fɑ kɛbəŋ nə bɑ a, mo yə e gɔ la' pfɑ a tə gɔ la' pfʉ pɑ́. Gɑ̌ bɑ́ msɛ vɔk myə a fi' fɑ kɛbəŋ a. Mo yə ě pfɑ msɛ bɔ a gɔ la' vɔk pɑ́ màmà. Msɛ̌ bɔ myə gɑ gɔ hɑ a, a piŋ bɑ́ bap nɑ́ a, yə pú hɑ gɑ́ dzʉ̌ nə gɛvɔk a. A lə́ pɑ̌ po'o pɑ Yudea to' nə́ tɛshwə cəcɑ̌ pu tə thə́ gɑ: Bi a pɑ mo bǎ hɑ bap nɑ́ e bi pɑ gɑ́ pɑ pfɑ́ m gɑ́ kɑ? Yeso ghɔm bi pu gɑ: Kwa' nyənyɔ nyənyɔ gɑ̌ siŋ wɔ gɑ́ po pɑ tə́ pfɑ́ bapnɑ Mú, biŋ bɑ tə nwə mcyə myə́ bɑ po tə́ gɔ ghə vɔk nə po pɑ. Mo yə ě pfɑ bapnɑ a biŋ nwə mcyə mə̌ a bɑ ě ghə vɔk màmà, a biŋ sɔ' jám e nə jʉɔjʉ̀m tyɛ'dzʉ. Nə pa' bapnɑ a bɑ kwa' ywətsʉ nyənyɔ mcyə mə̌ a piŋ bɑ kwa' ywə nwənwə̌ yə nyənyɔ. Mo yə ě pfɑ bapnɑ a, biŋ nwə mcyə mə̌ a shwə́ nə m̀, bɑ shwə́ nə e. Dəŋdəŋ pa' Tá yə e shwə nthʉɔ a nthəm a, ŋ biŋ bɑ bvɔk m nə Tá, a dəŋdəŋ po'o tə́ mo yə e gɔ sɔ' pfɑ bapnɑ a gɔ sɔ' vɔk m nə m̀. Pa' msɛ myə a fi' fɑ kɛbəŋ a nə bɑ a: A tə bɑ pa' myə mtá pɔ lə pfɑ̌ biŋ pfʉtə a pɑ́. Nə pa' mo yə ě pfɑ́ msɛ mɔ gɑ á gɔ sɔ' vɔk màmà. Mɔ̌ bɑ́ mnwə myə Yeso lə́ ji'tə nthʉm sinagogə Kapɛrnaum a. Pɑkhʉ̌ pyə tə jɔm lə́ nə yu' ghɔm tsyə, ntho' nə ghɔm gɑ: Ghɔm tsɔ gɑ tʉɔ! Pɑ̀ wɑ̌ piŋ ŋkwi' ju' e? Da' gɑ Yeso zhyə nthʉm tʉm e gɑ́ pɑkhʉ̌ pyə lə́ bɑwə gɔmtə nwə nə ghɔm bɔ, gɔm bi pu gɑ: Jyə gɑ́ ǎ cʉ' pɑ ywə fa'tə̀ bi po lə́? Tə́ po piŋ jɔ Mú mo kwɔ́' tsʉ' yə e lə́ da' bɑ́ nə a o? Zhwenyə nə gə́ mo vɔk, bapnɑ tə́ ŋkwitə́ pɑ. Mghɔm myə gɑ̌ gɔm bi po a bɑ zhwenyə pú vɔk. Da' gɑ shɑ pɔ bɑ cəcɑ̌ po wap lə pɑwə biŋ. Yeso lə́ bɑwə jyə́ pɔ pyə wap la tə́ bɑwə biŋ a pɑ ba mo yə e lə́ bɑ gɔ la' hɑ e tə fɑ tə̀ tyɛ' nə to'. E lə kwi' gɔm gɑ: A bɑ ywə yə a gə tə́ gɔm bi po gɑ: Sɔmmo ka ku' nə sɔ' bəm tə a bɑ́ gɑ Tá nə hɑ bi e a. Tə fɑ cwə o bɔ, bo'gwyə pɔ nə pɑkhʉ̌ pyə́ təm, pu a pu lə kwi' bəmtə́ gǐŋ. A pɑ́ po'o tə Yeso ghɔm bi pɔ shwɔppʉə mgham gɑ: Ba wɔ yɔ, po ka sɛ yɔ nə ghɔ a? Da' gɑ Simon Pɛtrɔ ghɔm bi e gɑ: Cyəpɔ pyə gɔ ghɔ m bi wɑ? Mghɔm vɔk mama bɑ́ bu. A piŋ bɑ́ bɑ pyə̌ piŋ, bɑ pyə̌ piŋ jyə́ gɑ́ o bɑ Mo Dɔlɔ̌ fɑ m bi Si. Yeso pa' bi pu gɑ: Tə myə nə lə́ shwɔ' wɔ, wɔ shwɔppʉə mgham a lə? Da' gɑ́ mu' mo nə́ po bɑ Sata. E lə́ gɔm po'o bɑ gɔm Yuda mu Simon yə Iskariɔt; nə pa' yʉ yə e bɑ mu' nə pɔ shwɔppʉə mgham a nə lə bɑ gɔ la' hɑ e. A lə pɑ̌ po'o Yeso pɑ́ ŋkəká pɑ́ Galilea; la' e piŋ biŋ nə ghɔ Yudea tsʉ' yə pɑ Yudea lə bɑwə shəŋ nə zhwə e nə a. A lə́ nə pɑ̌ po'o tyɛ' ŋwɛnyə pɑ Yudea nə lɑ tsə pé pɑwə sɔ̌'. Mfɑ pyə ghɔm bi e gɑ: Bi a pɑ́ o lə cwə́ pɑ́ tsɔ'ɔ, ghɔ Yudea, po'o tə́ pɑkhʉ̌ pǔ yɔ yap mfa' mǔ. Mo tə́ bɑ shəŋ gɑ pu piŋ e gə ywə dʉmnyətʉmnyə pɑ́. Pa' o wə fa' yəŋ nthi mfǎ' a ghə gɑ dzʉ̌ zhyə o. A lə́ nə pɑ̌ po'o la' ba kwa' mfɑ pyə pɑwə biŋ e pɑ́. Yeso ghɔm bi pu gɑ: Yɑ cwə ka wuŋ ŋkhu'; sɔ' m nə wɔ, yɔ cwə bɑ bǎ cwə kələ́ bɑ pɑ́ pɑpuŋ. Bi a pɑ́ dzʉ̌ lə pɔ wɔ pɑ; tə́ sɔ' m nə́ m̀, dzʉ̌ bɔ a nə pa' gɑ̌ ŋkwinthɛ̌ gɑ mfa' dzʉ pɔk. Po pʉɔ gɔ nə ŋwɛnyə bǎ, tə́ sɔ' m nə́ m̀ bɑ yɑ cwə ka wuŋ bəmtə. Yeso lə ghɔm po'o gúŋ Galilea. Da' gɑ mfɑ pyə lə cwə̌ tə gɔ m̀ nə ŋwɛnyə, e tam yə́ məjyə̀, da' gɑ la' e ghə tə́ mo yɔ é, guŋ bɑ dʉmnyətʉmnyə. A lə́ pɑ̌ cwə ŋwɛnyə, pɑ Yudea pɑ shəŋ Yeso, bɑ gɔm gɑ: Bɛ bɔ̌ hɑ́? A lə́ bɑ cəcɑ̌ pɔmnəŋ, pu pɑwə nthɛshwə nə e te' o; shɑ́ pɔ pɑwə gɔm gɑ: E bɑ mo pɑpuŋ da' gɑ́ pyə shɑ pɔ pɑ gɔm gɑ: Gɛ̌ e bɑwə fʉtə́ pɔmnəŋ. Tə ba tə po'o sɔmmo la tə́ bɑwə gɔm sɔsɔ̌ pɑ́, bɑ bwɔk pɑ Yudea. Ŋwɛnyə lə́ nə ko cəcɑ̌, Yeso pʉɔ gɔ Dyə Si ntho' nə zhi'tə pɔmnəŋ. Nwə cyə pɑ Yudea, wap pɑ gɔm gɑ: E nə zhyə ŋwa'nyə m po'o gə la, yʉ yə e la m ji'tə ŋwa'nyə a? Yeso pa' bi pu gɑ: Ywə yə gɑ̌ ji'tə á a tə́ fɑ m bəm pɑ; a fɑ m bi mo yə e nthəm ǎ. Mo pɑ gɔ ghə ywə yə́ Si shəŋ a, bɑ e gɔ zhyə bi a ywə yə gɑ̌ ji'tə a fɑ m bi Si a, kɑ bi a gɑ gɔm pɑ́ nə yɑ thə á lə. Mo yə e gɔmnwə pɑ́ nə yə thə a shəŋ nə ghu'tə pɑ nɑ é; da' mo yɑ́ yə e shəŋ nə ghú'tə mo yə e nthəm e á nə bɑ nyənyɔ, cwanwə tə́ biŋ bɑ nə e pɑ́. Tə́ Mosɛ nə lə́ hɑ mcò' bi po a lə? Sɔmmo nə́ po lə nəŋ bɑwə giŋ nə mcò'; nwə kɑ po pɑwə shəŋ nə zhwə á? Pɔmnəŋ pa' bi e gɑ: Zhwenyə cwəpuŋ nə o! Wɑ̌ bɑwə shəŋ nə zhwə o? Yeso piŋ dɑ ghɔm gɔm bi pu gɑ: Gɑ̌ fa' da' ta' fa' yɑmu', a pɑwə sya guŋ yɔ̀ awɛ. Mosɛ bɑ e lě hɑ nə vó mo bi po, ba tə pa' a tə́ fɑ bi Mosɛ a pɑ, a fɑ m bi mtá pɔk pɑ̀, po nəŋ bɑ bvo mo tyɛ' sabat. A bi a pɑ gɑ́ bi a pɑ́ pu vó mo tyɛ' sabat tə pɔptə mcò' Mosɛ, bɑ nwə kɑ̀ po yɛluŋ nə m̀ gɑ̀ gɑ̌ yɛ̀ mo nə tyɛ' Sabat? Po tak nə pɑ fyɛ' mo m nə pa' po nə jɔ yɔ sə e a nə́ŋ, bɑ fyɛ' mo m nə́ dəŋdəŋ. Pɑ Yerusalɛm lə́ bɑwə gɔm gɑ: Yɑ́ tə́ bɑ mo yə wap bɑwə shəŋ nə zhwə e á pɑ́ lə́? Ě yəŋ bɑwə gɔmnwə pɑ tə tʉmnyə, sɔmmo lə nəŋ gɔmnwə bi é. Pɑ́tyɛ' bɑ pɑ sa' guŋ pɔk pɑ zhyə cwəlɔ gɑ e bɑ Kristo a? Da' gɑ̀ a bɑwə sɔ' m nə mo yəŋ bɑ pɑ̌ zhyə tsʉ' yə e fɑ m nə a. Tə́ sɔ' m nə́ Kristo, cwə yə e gɔ la' sɔ' a, sɔmmo lə zhyə tsʉ' yə e fɑ m nə a. A lə pɑ̌ po'o, Yeso pá' e lə bɑ Dyə Si bɑwə ji'tə pɔmnəŋ á, ghɔm tə thə́ gɑ: Po bɑ pǒ zhyə a! Bɑ pǒ zhyə tsʉ' yə gɑ̌ fɑ m̀ nə a! A nəŋ bɑ po'o bɑ ŋ tə sɔ' pɑ nə yɑ thə́ pɑ́: Mo yə e nthəm a bɑ nyənyɔ, yʉ́ yə a bɑ po ka zhyə e a. Tə́ a bɑ gɑ̌ zhyə e, nə pa' gɑ̌ fɑ m bəŋ é, yʉ nə nəŋ nthəm a. Wap lə pɑ̌ shəŋ nə ghəm e, da' gɑ́ la' sɔmmo ku' nə yap pǔ nə e, nə pa' yə cwə̀ lə́ jɑ tə wuŋ ŋkhǔ'. Bo'gwyə pɔ lə piŋ e cəcɑ̌ pɔmnəŋ, biŋ bɑ gɔm gɑ: Kristo gɔ la' sɔ' ghə mtiŋ msya tə a cyə myə mo yəŋ gɑ́ gə á? Guŋ ywə awɛ yə pɔmnəŋ lə́ bɑwə shamtə́ nə Yeso a lə tǎm mtəŋ pɑ Farisai: Wap pu a mkamsi gwyəgwyə təm msə̌ŋwi gɑ wap ghɔ gəm e. Yeso ghɔm gɑ: gɑ̌ jɑ́ pɑ́ cəcɑ̌ po nə muywə cwə tə́ piŋ ghɔ bəŋ mo yə e nthəm a. A gɔ pɑ cwə o bɔ po cəŋ a, po lə yɔ a pɑ́; nə pa' tsʉ' yə gɑ̌ gɔ pɑ̀ nə a, bi a pɑ́ po lə sɔ' tsʉ' u. Pɑ Yudea lə to' nə pɑ gɔm gɑ: E gɔ ghɔ hɑ tə́ bi a pɑ́ pɑ lə piŋ ŋkhu' nə yɔ e? E gɔ ghɔ kwyatə pɔ pyə wap bɑ wap sɛ cəcɑ̌ pɑ́ Grikia ǎ? E gɔ zhi'tə pɑ Grikia a. Tə́ ghɔm tsɔ tsyə e gɔm gɑ̀: Po gɔ cəŋ a po lə yɔ a, tsʉ' yə gɑ̌ nə a bi a pɑ po lə́ sɔ' nə a, po'o da'tə gɑ́ kɑ̀? A lə pɑ̀ nə jʉɔjʉ̀m tyɛ' ŋwɛnyə yə a bɑ̀ tyɛ'dzʉ gwyə a, Yeso tiŋnyə thə́ ntho' bɑ gɔm tə́ thə́ gɑ: A pɑ gɑ̀ ghǎk mo khə́, e sɔ' bəm po'o gɑ mo yə e piŋ á, e nwə́ shyə. Dəŋdəŋ pa' ywə yə pu lə və a gɔm a, mta'mta' shyə dzəŋtsə̌ŋ nthəm nə e dzə́ŋ. E lə́ gɔm po' gɔm Zhwenyə yə pɔ pyə wap piŋ e a lə bɑ gɔ kwi a, nə pa' Zhwenyə lə́ jɑ tə wuŋ bɑwə, bɑ pu ka wuŋ gu'tə Yeso. Shɑ̀ pɔ cəcɑ̌ vəŋ pɔ pyə wap lə yu' mghɔm myə a, lə́ pɑ̌ gɔm gɑ: Kwa' nyənyɔ yəŋ bɑ gɔm ghɔm Si. Shɑ pɔ pɑ́ gɔm gɑ: E bɑ́ Kristo. Da' gɑ shɑ pɔ piŋ bɑ gɔm yap m gɑ: Bi a pɑ Kristo təm m Galilea a? Ywə yə pu lə və a tə́ gɔm gɑ́ e gɔ sɔ' pɑ mo nə ŋkhənyə David, piŋ təm m Bɛtəlehɛm, muywə tisuŋ nə guŋ yə David lə́ nthəm m nə́ a lə́? A lə pɑ po'o pɔmnəŋ ghap ghəŋ pʉə nə́ é. Shɑ pɔ nə́ pu pɑ shəŋ nə ghəm e, da' gɑ́ la' sɔmmo yap pu nə e. Pɑ msəŋwi lə sɔ' jɔ mtadyə mkamsi pu a pɑ Farisai; wap həŋtə msə̌ŋwi gɑ: Nwə kɑ́ bɑ po ka ghəm e? Msəŋwi pa' gɑ: Sɔmmo la m gɔmnwə pá' bɛ yəŋ gɑ̀ a. Pɑ Farisai ghɔm bi pu gɑ: Pɑ́tyɛ' ba e fʉ̀ bɑ wɔ yɔ a? A ghɔ cəcɑ̌ mghətso ba m cəcɑ̌ pɑ Farisai, bǎ ta' mo piŋ é a? Da' vəŋ pɑ tə zhyə́ mco' pɔ gɑ! Mghɛ dò. Da' gɑ mu' mo nə pɑ Farisai, Nikodemo yə e lə ghɔ jɔ́ Yeso a ghɔm gɑ: Bi a pɑ̀ mco' mɔk pɑ nyəŋ shɛ́ thə́ mo tə́ yu' e biŋ jyə ywə yə ě ghə a? Wap pa' bi e gɑ: Pɑ́tyɛ' bɑ bǎ wə yǔ zhi yə Galilea? Cə́ŋ, o gɔ yɔ gɑ̀ sɔm gɔm ghɔm Si tə́ nthəm Galilea pɑ. Bǎ ya mo á nə pú lə ghɔ m la' e. Yeso lə pɑnyə kúŋ mthə́ Olivə. Dzʉ̌ lə nə́ lɔ, e pɑnyə Dyə Si, a piŋ bɑ́ pa' pɔmnəŋ lə́ bɑwə sɔ' bi e a, e cwə́si, ntho' nə zhi'tə ywə́. Pɑ zhyə́ mcò' pu a pɑ Farisai lə lɑ̌ mu' mjwǐ bɑ pu ghəm é nə ghap sɔ̌' jap e tǔŋ pɔ pyə́ wap lə́ bɑ wap cu'tə tsʉ'u a. Gɔm gɑ: Ta pu yɔ mjwǐ yəŋ e pɑwə gə ghap. A bɑ́ nthʉm mcò' bɑ Mosɛ lě bvə gɑ́ pu lɑ mwɔ' nthamtə nthi pɑjwǐ bǎ. Kwa' wə ghɔm yǔ gɑ́ kɑ? Wap lə́ gɔm po'o, a pɑ́ yo' bɑ wap tʉ' nə e tə́ nə pútə e. Da' gɑ́ Yeso lə pɔnyə si, bɑ dɑ nthə́ pu e nə ŋkhʉə ŋkhɛ nə cǎ'. Pa' wap lə́ pɑ həŋtə é nwə nə gɔ pɑ́ m dzə a, e lə pʉ' nɑ e gɔm bi pu gɑ: Mo yə ě cəcɑ̌ po bɑ e la m hɔnwə a, ma' dəŋdzə gwɔ' nə e. E lə piŋ kwi' bɔnyə si, biŋ bɑ ŋkhʉə ŋkhɛ nə cǎ'. Wap lə́ cwə̌ tə ju' mghɔm, gɔ pɑ yɑmu' yɑmu' tə́ ntho' fɑ nə mghətso, tə́ Yeso cʉ' dǒ e. Mjwǐ bɔ lə bɑ́ pɑ́ tùŋ. Yeso lə pʉ' nɑ e gɔm bi e gɑ: Mɑmjwi, wap m hɑ́? Sɔmmo ka nyəŋ shɛ thə o a? E pa' gɑ: Sɔmmo m Cyəpɔ; Yeso piŋ gɔm bi e gɑ: Ba myə̀ yɑ̌ ŋ kha nyəŋ shɛ thə o. Ghɔ, tə́ fɑ cwəlɔ, kɑ piŋ hɔnwə. Yeso lə́ kwi' gɔm ghɔm bi pú gɑ: Gɑ̌ bɑ́ ŋkha' nthʉm dzʉ, mo yə ě yap jʉ̌m m̀ a tə́ gɔ sɔ' ghiŋ nthʉm jʉ́m pɑ́; e gɔ ghə ŋkha' yə a dɑ mo gɔ nə vɔk a. Pɑ Farisai ghɔm bi e gɑ: Wə nə bɑ ŋkwinthɛ̌ thə́ nɑ o; bi a pɑ́ pu lə piŋ yu nə́ ŋkwinthɛ̌. Yeso pa' bi pu gɑ: A nyənyɔ gɑ́ myə̀ nə bɑwə ŋkwinthɛ̌ nə nɑ a, da' gɑ pu gɔ piŋ yɑ nə ŋkwinthɛ̌ nə pa' a bɑ gɑ̌ zhyə́ tsʉ' yə gɑ̌ fɑ m nə á, biŋ bɑ gɔ m nə a; tə́ sɔ' m nə po, a bɑ po ka zhyə́ tsʉ' yə gɑ̌ fɑ a, po lə nəŋ jyə́ tsʉ' yə gɑ̌ gɔ a. Pǒ fyɛ' yɔ pɑ pa' monəŋthə́ a; tə́ sɔ' m nə m̀ ŋ tə fyɛ' sɔmmo pɑ. Bi a nəŋ bɑ gɔ fyɛ' mo bɑ yɑ nə fyɛ' gɔ pɑ pa' nyənyɔ shəŋ a, nə pa' ŋ tə bɑ do m̀ pɑ, ba mo yə e nthəm a bɑ́ si. A bɑ́ nthʉm mcò' mɔ bɑ pu və gɑ pu biŋ mkwinthɛ pɔ pɑpʉə. Gɑ̌ ŋkwinthɛ̌ nə thə nɑ a, ba Tá a yə e nthəm a piŋ ba ŋkwinthɛ̌ a yə́. Wap ghɔm bi e gɑ: Tɔ ɔ bɔ hɑ? Yeso pa' gɑ: Pǒ bɑ po ka zhyə a, po lə nəŋ jyə Tá a. Po la' pé' jyə a, bɑ po zhyə ba Tá a. E lə gɔm mɔ mghɔm po'o nə tsʉ' yə pu ŋkhe gɑ́ Nthɛ a; da' gɑ bɑ ji'tə pɔmnəŋ m Dyə Si. Sɔm mò lə nəŋ sho' pu nə e nə pa' yə cwə lə jɑ tə wuŋ sɔ̌'. Yeso lə kwi' gɔm bi pu gɑ: Gɑ̌ gɔ ghɔ, po gɔ sɔ' cəŋ a bà cə̌ŋ, da' gɑ́ nəŋ pfʉ́ pɑ́ nə mhɔnwə mɔ. Tsʉ' yə gɑ̌ gɔ m nə a bi a pɑ́ po lə ghɔ nə́. A lə pɑ̌ po'o pɑ Yudea to' nə pɑ gɔm cəcɑ̌ pu gɑ: Bi a pɑ e pɑwə ŋkwɛnyə nə zhwə nɑ e a? Nə pa' e du m si nə ghɔm gɑ: Tsʉ' yə́ gɑ̌ gɔ nə a, pɑ po lə ghɔ nə́. Yeso pa' bi pu gɑ: Pǒ bɑ pɑ dəmcǎ', myə, gɑ̌ bɑ mo kɛbəŋ. Po bɑ pɑ nthʉm yəŋ dzʉ̌, ŋ də́ pɑ mo yəŋ dzʉ̌ pɑ́. A ywə yə a gə tə́ gɔm gɑ́ po gɔ sɔ' pfʉ́ pɑ́ pu a mhɔnwə mɔ a. Nə pa' po pɑ tə́ pǐŋ gɑ́ gɑ̌ bɑ, bɑ po gɔ pfʉ́ nə mhɔ mɔ. Wap ghɔm bi e gɑ: O bɑ́ wɑ́? Yeso pa' bi pu gɑ: Gɑ̌ bɑ́ ywə yə́ ŋ də́ siŋ wɔ tə́ fɑ nə to' a. Sɔ' m nə ywə yə ǎ wə́ dé wɔ a, nwə gɔmghɔm yɔm, ba fyɛ' piŋ jɔ́m; tə́ mo yə e nthəm a bɑ nyənyɔ, ywə yə gɑ siŋ dzʉ́ á, a nəŋ bɑ ywə yə gɑ̌ ju' bi a. Wap la tə́ yu' gɑ́ e lə́ gɔm po'o bɑ gɔm Tá pɑ́. Yeso ghɔm bi pú gɑ: Cwə yə po gɔ sɔ' cyəŋ Mú mo thə́ a, po zhyə gɑ́ gɑ̌ bɑ, ba m gɑ́ ŋ tə́ gə sɔmywə nə yɑ thə́ pɑ́. Gɑ̌ gɔm ywə yə Ta ji'tə a. Pyə mo yə é nthəm a nə bəmtə bɑ: A bɑ é kɑ tak a dó m̀ pɑ, nə pa' gɑ̌ gə pɑ ywə yə a buŋ e a, guŋ mcwə awɛ. E lə́ pɑ̌ gɔm po'o pɔ jɔmyɔm piŋ e. Yeso ghɔm bi pɑ Yudea pyə wap lə piŋ e a gɑ: A pɑ́ gɑ́ pǒ wuŋ nə ghɔm tsɑ̌, bɑ po bɑ́ pɑkhʉ̌ pɑ̌ nyənyɔ, bɑ pǒ gɔ zhyə nyənyɔ, a nyənyɔ ghə po lə pɑ̀ mkwɔ pɑ́. Wap pa' bi e gɑ: Pyə bɑ gwya Abraham. Bɑ sɔmmo lǎ m dɑ́ wɔk gə mkwɔ pɑ́: Tə́ o gɔm gɑ pyə tə gɔ piŋ pɑ́ mkwɔ pɑ́ m gɑ́ kɑ̀? Yeso pa' bi pu gɑ: Kwa' nyənyɔ nyənyɔ, mo yə é hɔnwə̀ a bɑ ŋkwɔ mhɔ. Ŋkwɔ tə́ guŋ dyə pɑ́; tə mú dyə̌ guŋ pɑ dyə. A bɑ po'o tə́ bi a Mú nə te wɔ́ nə ŋkwɔ, bɑ po tə́ gɔ piŋ pɑ mkwɔ pɑ́. Pó bɑ gwya Abraham, bɑ gɑ̌ zhyə; da' gɑ pa' ghɔm tsɑ̌ tə́ bɑwə ŋkho thə́ po a pɑ́, po bɑwə shəŋ nə zhwə a. Ywə yə gɑ̌ gɔm a, a bɑ ywə yə gɑ jɔ bəŋ Tá a lə; tə sɔ' m nə po, po pɑ̀ gə ywə yə po jú' bəŋ tá yɔ a. Wap pa' gɑ: Tá yɔk bɑ Abraham. Yeso ghɔm bi pu gɑ: Po pɑ pǒ Abraham, po fá' mfa' Abraham. Po bɑwə shəŋ cwəlɔ nə zhwə a, myə̀ yə gɑ siŋ wɔ nyənyɔ yə gɑ ju' bəŋ Si a; Abraham la tə ghə po'o. Po bɑwə fá' mfa' ta yɔ. Wap ghɔm bi Yeso gɑ: Pyə tə́ bɑ pó pyə́ pu dzə wap m pě a pɑ́! Pyə̌ bɑ pyə ghə da' ta' tá yɑmu', e pɑ́ Si. Yeso ghɔm bi pu gɑ: Si lǎ' bɑ́ pé'e bɑ́ tá yɔ, bɑ po kuŋ a, nə pa' gɑ̌ nthəm m nə Si tə́ sɔ̌'; ŋ tə sɔ' m nə yɑ thə́ pɑ́. Yʉ́ nə nthəm a. Pǒ shyətə́ zhyə́ ghɔm tsɑ̌ nə kɑ? Nə pa' po ka ku' nə yu' ywə yə gɑ̌ gɔm a. Tá yɔ bɑ́ Sata, po piŋ bɑ shəŋ pɑ nə ghə ywə yə tá yɔ shəŋ a. Tə́ fɑ pɑ́ nə to' e pɑ́ shəŋ pɑ nə zhwə mo; e lě tə́ ku' nə wuŋ nthʉm nyənyɔ pɑ́, nə pa' nyənyɔ tə́ bɑ nə́ é pɑ. Cwə yə e bɑ gɔm mcwanwə á, e té pɑ nə pa' e nə bɑ á, nə pa' e bɑ shwanwə, biŋ bɑ tá mcwanwə. Tə́ sɔ' m nə m̀, po tə́ biŋ a pɑ́ nə pa' gɑ gɔm nyənyɔ a. Bi a pɑ wɑ̌ nə po la'tə mhɔ mə̌ a? A bi a bɑwə gɔm nyənyɔ, bɑ kɑ́ gə tə́ la' po piŋ a? Mo yə e bɑ m nə Si a ju' ghɔm Si; a biŋ shyə́ m nə pá' po tə́ bɑ m nə Si a pɑ́ tə́ po lə yu' a. Pɑ Yudea pa' bi e gɑ: Pyə̌ hɔ nə ghɔm gɑ́ o bɑ yə Samaria, biŋ bɑ́ bɑ ǒ ghə zhwenyə cwəpuŋ a? Yeso pa' bi pu gɑ: Gɛ̌, ŋ tə́ bɑ gɑ̌ ghə zhwenyə cwəpuŋ pɑ; gɑ̌ bɑwə hɑ mku' bi Tá a, da' gɑ po pɑwə nɔm a nɔ̀m! Ŋ tə́ shəŋ nə ghu'tə nɑ a pɑ: Mo yə e fa' nə a bɑ si, biŋ bɑ fyɛ̌'. Kwa' nyənyɔ nyənyɔ gɑ̌ siŋ wɔ gɑ mo yə ě tɔm ghɔm tsɑ̌ a bɑ e tə gɔ la' yɔ vʉ́ pɑ. Pɑ Yudea ghɔm bi e gɑ: Pyə zhyə cwəlɔ gɑ́ zhwenyə cwəpuŋ bɑ nə o. Abraham bɑ e lě npfʉ́, ba mghɔm ghɔm Si piŋ pfʉ́tə́ yap, o nə́ŋ biŋ dù m sǐ nə ghɔm gɑ́ mo yə ě tɔm ghɔm tsʉ̌ a, bɑ e tə gɔ la' yɔ vʉ pɑ. A bɑ ǒ cyə tá yɔ́k Abraham yə e lə́ pfʉ a? Bɑ ba mghɔm ghɔm Si lě nəŋ pfʉtə́. O ŋkhe gɑ́ o bɑ wɑ́? Yeso pa' bi pu gɑ: ŋ dǎ' pe' e bɑ́ gu'tə nɑ a pɑ myə̀ bɑ yɑ ghu'tə tə bɑ sɔmywə pɑ. Tá a nə gu'tə a, yʉ́ yə po biŋ gɑ́ e bɑ Si yɔ a. A bɑ po kɑ zhyə é, tə́ bɑ gɑ̌ zhyə é. Ŋ dǎ' pe' gɔm gɑ́ ŋ kha zhyə é, bɑ gɑ̌ bɑ́ shwanwə pɑ́ pa' wɔ a; tə́ a bɑ gɑ̌ zhyə́ é, bɑ nthɔm ghɔm tsyə. Abraham, tá yɔ lə ŋwɛnyə te'o nthʉm mɔktə nə́ yɔ Tyɛ'dzʉ a: E lě jɔ, shəŋtə ŋwɛnyə. A pɑ́ po'o pɑ Yudea ghɔm bi e gɑ: O ka ghə bǎ gu'dzʉ mgham nthɔ, bɑwə gɔm gɑ o yɔ Abraham! Yeso pa' bi pu gɑ: kwa' nyənyɔ nyənyɔ, gɑ̌ siŋ wɔ gɑ́ Abraham lə́ nə pɑwə bɑ ŋ dé da' bɑwə. A lə pɑ̌ po'o wap pé mwɔ' bɑ gɔ nə ma' e, da' gɑ Yeso tʉmnyə nthəm Dyə Si. Yeso lə́ nə́ cyə jɔ́ mu' mbɛ, e pɑ́ fʉ̀ tə́ fɑ́ nə tyɛ' nə tsə é. Pɑkhʉ̌ pyə həŋtə é gɑ: Rabi wɑ lə́ hɔnwə tə́ bɛ yəŋ pɑ́ fʉ̀? A lə́ bɑ pɑ yʉ kɑ pɑ tsə́ é? Yeso pa' bi pú gɑ: Kɑ yʉ kɑ pɑ tsə́ e lə, sɔmmo ka hɔnwə. A bɑ́ po'o m gɑ pu yɔ mfà' Si nə e! Pɑ fa' mfà' mo yə e nthəm á cwə yə dzʉ̌ yɑ̌ wə a; nə pa' mtsʉ̌' wə sɔ̌', cwə yə sɔmmo tə́ fa' a pɑ́. Ŋ shwə nthʉm dzʉ́ pɑ dəŋ gɑ kɑlə, bɑ gɑ̌ bɑ ŋkha' nthʉm dzʉ́. Yeso lə cwə tə́ gɔm po'o, nthətə́ mti si nə gə mtwətwɔp jáp nə mnyə́ fʉ̀, biŋ gɔm bi e gɑ: Ghɔ sɔk nɑ o nthʉm tam shyə Siloe, a la'tə gɑ́ gɛ̀ nthə̌m. Fʉ̀ lə́ ghɔ̌ tsʉ'u, sɔk nɑ e, biŋ nə pɑnyə, bɑwə jɔ tsʉ'. Pɑ giŋnyə tsʉ'u ba pɔ pyə wap lə́ bɑ jɔ é guŋ mcwə awɛ a, nə pa' e lə́ bɑ dǒ ywə a, pɑ́ gɔm gɑ: Yəŋ tə́ mo yə e kɑ́ bɑ ě cwə si tsɔ'ɔ bɑ do ywə a pɑ̀ lə́? Shɑ́ pɔ pɑ́ gɔm gɑ: A bɑ e. Pyə shɑ́ pɔ pɑ́ gɔm yap gɑ: Gɛ̌, a mu' mo hwə́ é hwə́. Tə́ fʉ̀ bɔ ghɔm gɑ: A bɑ́ kwa' myə̀. Wap ghɔm bi e gɑ: Tə́ mnyə mǔ gyɛ' m gɑ́ kɑ̀? E ghɔm bi pu gɑ: Bɛ yə pu ŋkhe e gɑ Yeso a ghə mtwətwɔp, nə shi'nyə mnyə mə̌, biŋ gɔm bəm gɑ: Ghɔ Siloe sɔk nɑ o. A pɑ́ po'o ŋ gɔ tsʉ'u, sɔk nɑ a, nəŋ jɔtsʉ'. Wap ghɔm bi e gɑ: Mo bɔ hɑ? E pa' bi pu gɑ: Ŋ khɑ zhyə sɔmywə nə́. Pu lə́ lɑ̌ fʉ̀ bɔ nə gɔ ywə́ pɑ Farisai. A lə́ nə pɑ̌ po'o bɑ Yeso lə́ nthaknyə mtwətwɔp nə gyɛ' mnyə bɛ bɔ po'o tyɛ' Sabat. Pɑ Farisai lə́ həŋtə é yap pa' a lə́ cyə tə́ e yɔ tsʉ' a. E pa' bi pú gɑ: E yap mtwətwɔp nə mnyə mə̌, sɔk nɑ a, jɔ tsʉ'. Shɑ pɔ cəcɑ̌ pɑ Farisai lə́ ghɔm gɑ: Mo bǎ tə́ mo Si pɑ́, nə pa' e tə̌ wə jyə Sabat pɑ̀. Da' gɑ̀ pyə shɑ pɔ pɑ gɔm gɑ: Bi a pɑ́ gɛ mhɔ lɑ gʉ' nə gə́ yəŋ nthi mtiŋ msya hɑ? A lə pɑ̌ po'o ŋkhyɛ'nyə ko cəcɑ̌ pu. Wap piŋ ŋkwi' gɔm bi fʉ̀ bɔ gɑ: Kwa' wə ghɔm yǔ gɑ kɑ́ nə mo yə e gyɛ' mnyə mu a? E pa' bi pu gɑ: E gɔm ghɔm Si. Pɑ Yudea la tə piŋ gɑ bɛ bɔ lə bɑ fʉ̀ tə́ biŋ jɔ tsʉ', tə́ ŋkhəm cwə yə wap lə ké pɑ tsə e a. Wap lə həŋtə pɑ tsə e gɑ: Bɛ yə̌ŋ bɑ mú yɔ yə po gɔm gɑ̀ po lə nə tsə é e pɑ́ fʉ̀ a lə́? Tə é jɔ tsʉ' cwəlɔ m gɑ́ kɑ? Wap pa' bi pɑ Yudea gɑ: Pyə̌ zhyə́ nyənyɔ gɑ e shəŋtə bɑ́ mu yɔk, bɑ pyə lə nə tsə́ é e pɑ fʉ̀. Tə́ sɔ' m cwəlɔ pa' e wə jɔ tsʉ' a, pyə ka zhyə sɔmywə nə́. Sɔ' m nə mo yə e gyɛ' mnyə myə́ a, bɑ pyə ka zhyə e. Po həŋtə e, e bɑ pɑ́ gətso. Kwa' yʉ siŋ wɔ nwə̀ nə. Pɑ tsə é lə́ gɔm po'o nə pa' wap lə bɑwə bwɔk pɑ Yudea. Nə pa' pɑ Yudea lə́ bɑ wap tsə́ yap gɑ́ bǎ wɑlə́ yə e piŋ gɑ́ Yeso bɑ Kristo a bɑ wap gɔ té é dyə Sinagogə. A ywə yə a lə gə tə́ pɑ tsə́ é ghɔm gɑ́ po həŋtə é, e bɑ gətso a. Pɑ Farisai lə́ piŋ ŋkwi' ŋkhe mo bɔ̌ yə e lə́ bɑ fʉ̀ a, gɔm bi e gɑ: Ghú'tə́ Si! Wɔk, pyə̌ zhyə gɑ mo bǎ bɑ́ hɔnwə. E pa' bi pu gɑ: Ŋ kha zhyə bi a e bɑ́ hɔnwə a, gɑ̌ zhyə da' gɑ́ ŋ khɑ́ bɑ́ fʉ̀, nəŋ bɑ cwəlɔ bɑwə jɔ tsʉ'. Wap ghɔm bi e gɑ: E gə nə o m gɑ́ kɑ? E gyɛ' mnyə mǔ m gɑ́ kɑ? E pa' bi pú gɑ: Gɑ̌ é da' siŋ wɔ, da' gɑ́ la' po yu'! Nwə kɑ̀ po piŋ bɑwə shəŋ nə piŋ ŋkwi' ju' mu' cʉm é? Pɑ́tyɛ' ba wɔ yɔ pɑwə shəŋ nə zhi pɑkhʉ pyə́ a? Pɑ Farisai lə tó' nə yəmtə é bɑ gɔm gɑ: O bɑ mukhʉ é! Wɔk, pyə bɑ pɑkhʉ̌ Mosɛ. Pyə zhyə́ gɑ Si bɑ e lé gɔmnwə bi Mosɛ, tə́ sɔ' m nə mo yəŋ gɑ, bɑ pyə ka zhyə́ tsʉ' yə e fɑ m nə a. Mbɛ bɔ pa' bi pu gɑ: Msya nwə bɑ́ gɑ po ka zhyə́ e, bɑ é nəŋ gyɛ' mnyə mə̌! Pɑ zhyə gɑ́ Si tə́ ju' gi mghɛ mhɔ pɑ, da' gɑ bɑ ju' mcwyɛ'nyə mo yə e dɑ mku' biŋ e biŋ bɑ gə ywə e shəŋ a. Pú la m ju' pá' pu gɔm gɑ́ mo ghyɛ' mnyə mo bɑ pu lə nə tsə́ é e pɑ fʉ̀ a pɑ́. Bɛ yəŋ la' pe' e lɑ pɑ m nə́ Si pɑ, bɑ e ka ghə sɔmywə. Pɑ Farisai lə pa' bi e gɑ: Wə yə o bɑ gɛ mhɔ tə́ fɑ tyɛ' nə tsə o a, o gɔ la'tə kɑ? Wap lə ghɔm po'o nthé é ma' pé. Yeso lə́ nə yu' gɑ wap zhəŋ é, sɔ' jɔ é gɔm bi é gɑ: O piŋ Mu mo a? Mo bɔ pa' bi Yeso gɑ: Mu mo bɔ bɑ̀ wɑ Cyəpɔ tə́ biŋ e? Yeso ghɔm bi e gɑ: A bɑ ǒ yɔ e. A bɑ mo yə e bɑwə gɔmnwə bu a. Mo bɔ ghɔm gɑ: Gɑ̌ piŋ m Cyəpɔ, e lə́ ghɔm po'o biŋ ŋkham mkwi'tə dzə é. Yeso piŋ gɔm bi e gɑ: Ŋ də́ sɔ' m nthʉm dzʉ́ nə fyɛ', po'o gɑ́ mfʉ̀ yɔ tsʉ', a pɑ yɔ tsʉ' zhi mfʉ̀. Pɑ Farisai pyə pu a pu lə bɑ a, lə́ nə yu' mghɔm bɔ gɔm bi Yeso gɑ: Pɑ́ tyɛ' ba wɔk yɔk bɑ pɑ mfʉ̀ a? Yeso ghɔm bi pu gɑ: Po la' pe' bɑ mfʉ̀ bɑ mhɔ tə̌ nə po pɑ̀. Da' gɑ́ po bɑwə cwəlɔ gɔm gɑ pyə wə jɔ tsʉ' a cyə m po'o, mhɔ mɔ́ wuŋ nə po. Kwa' nyənyɔ nyənyɔ gɑ̌ siŋ wɔ gɑ mo yə e nthak jyə̀ ka dzə́ nəŋ ja' m nə mu' ghəŋ pé tə́ ŋkho ka dzə a, mo bɔ bɑ́ shuŋ biŋ bɑ́ samshwə. Tə́ mo yə e shyə m jyədyə̌ tə́ ŋkho ka a, mo bɔ bɑ́ byap dzə. Mo yə é dé jyədyə̌ a, gyɛ' jyədyə̌ bi e. Mjʉ̀jʉ̀ jyə́ gi e; mjʉ̀jʉ̀ pyə wap bɑ tsyə a, e ŋkhe bǎ ya lə pɑ mtsǒ, biŋ dɑ wap nthəm pé. E shwə tə́ nthe wap awɛ, bɑ dzə̀, wap yap jʉm e, nə pa' a bɑ wap zhyə gi é. Bi a pɑ́ wap lə yap jʉm gʉɔ pɑ̀; wap gɔ khʉ é khʉ, nə pa' wap tə jyə gi mghʉɔ pɑ. Yeso lə́ ghɔ̌m tsɔ ghɔ̀m tə tútə̀ bi pú, da' gɑ́ la' wap yu' kwa' ywə yə e lə́ bɑwə gɔm a. Yeso piŋ ŋkwi' gɔm gɑ: Kwa' nyənyɔ nyənyɔ gɑ̌ siŋ wɔ gɑ́ gɑ̌ bɑ́ jyədyə̌ mjʉ̀jʉ̀. Guŋ pɔ awɛ pyə wap lə sɔ' m dzə̌ m̀ a bɑ mcúŋ, biŋ bɑ msamshwə, da' gɑ́ mjʉ̀jʉ̀ lě tə́ yu' gi yap pɑ̀. Gɑ̌ bɑ́ jyədyə̌, mo yə e cyə m nə m̀ a, bɑ e gɔ sɔ' vɔk, e gɔ pɑ̀ kə́ká, yɔ ywətsʉ. Shwǔŋ sɔ' yə pɑ̀ nə zhʉ̀, nə zhwə, kɑ nə ghə a pi lə; tə́ gɑ̌ sɔ' po'o gɑ́ pɔmnəŋ ghə vɔ̀k, biŋ shəŋtə gə a yɔm. Gɑ̌ bɑ́ byap dzə́ pɑpúŋ: Byap dzə́ pɑpùŋ hɑ vɔk e nə thə́ jʉ̀jʉ̀ tsyə́. Mo yə e fa' yə pɑ́ ŋkhap e, la' e pɑ kwa' byap dzə, la' mjʉ̀jʉ̀ pɑ́ tsyə a, shwə tə́ jɔ bvʉ́ gǒ, gwa' mjʉ̀jʉ̀, ŋkhʉ; bvʉ́ gǒ lɑ́ tsʉ' sɛtə mjʉ̀jʉ̀. A bɑ gɑ́ e fa' yə pɑ ŋkhǎp, bɑ mjʉ̀jʉ̀ ka ghə də̀ŋ bi e. Gɑ̌ bɑ byap dzə pɑpuŋ. Gɑ̌ bɑ gɑ̌ zhyə́ jʉ̀jʉ̀ tsɑ̌, jʉ̀jʉ̀ tsɑ̌ piŋ jyə́ a, dəŋdəŋ pa' Tá a bɑ ě zhyə́ a, biŋ jyə́ Tá a á, biŋ bɑ́ hɑ vɔ̀k á nə mjʉ̀jʉ̀. Gɑ̌ bɑ gɑ̌ ghə shɑ́ mjʉ̀jʉ̀ pyə wap tə́ wuŋ bɑ nthʉm ka dzə yəŋ a pɑ̀, ba pyə bɔ yap, bɑ́ gɔ cya wap yap; wap gɔ sɔ' yu' gi a, á ka dzə piŋ bɑ pɑ yɑmu', ba byap dzə piŋ bɑ pɑ yɑmu'. Tá ŋkhuŋ a nə pa' gɑ̌ hɑ vɔk a tə́ biŋ ŋkwi. Tə́ sɔmmo nə́ ŋkwi bəm pɑ̀, pɑ́ myə̀ nə hɑ. Gɑ̌ bɑ gɑ̌ ghə tʉ̀ɔ nə nthak, biŋ gə tʉɔ nə biŋ ŋkwi: A pɑ́ mco' myə gɑ ŋkwi bi Tá a lə. Mghɔm mɔ gɑ lə piŋ ŋkwi' gaptə pɑ Yudea. Bo'gwyə pɔ pɑ̀ gɔm gɑ: Zhwenyə cwəpuŋ bɑ̀ nə e, zhyənwə e tə yɑ̌wə pɑ́, nwə kɑ́ po pɑ̀wə jú' ywə yə e gɔm a. Da' gɑ̀ shɑ́ pɔ pɑ́ gɔm yap m gɑ: Ghɔm tsɔ tə́ ghɔm mo yə zhwenyə cwəpuŋ nə e a pɑ̀; zhwenyə cwəpuŋ tə́ gyɛ' mnyə mo pɑ̀. Pú lə pɑ̌ ŋkhap ŋʉm, bɑ Yerusalɛm bɑwə ŋwɛnyə nə ŋkhamtə́ pa' pu lə cwɔ' Dyə Si a. Yeso lə bɑ Dyə Si, bɑwə giŋtə nthʉm pəŋ Salomoŋ. Pɑ Yudea lə́ tsam e nyəŋ tùŋ gɔm bi e gɑ: O gɔ kyə wɔk thə́ po'o tə kəm sǒ? O pɑ Kristo, o siŋ wɔk sɔsɔ̌! Yeso pa' bi pu gɑ: Gɑ̌ siŋ wɔ, la' po piŋ. Mfa' myə gɑ̌ gə nə tsǒ Tá a a bɑwə ŋkwinthɛ̌ a; da' gɑ́ po ka piŋ a, nə pa' po tə bɑ nə́ mjʉ̀jʉ̀ tsɑ̌ pɑ́. Mjʉ̀jʉ̀ tsɑ̌ ju' gi a, biŋ bɑ jyə wap. Wap pɑ̀ jap jʉ̌m m̀. Biŋ bɑ hɑ vɔk mama bi pú; wap tə́ gɔ la' pfʉ pɑ́, a sɔmmo lə nəŋ ŋkwi wap nə bu mə̌. Tá a yə e hɑ wap bəm a bɑ e ghu' shyə guŋ ywə awɛ, a piŋ bɑ bi a pɑ́ sɔmmo lə kwi ywə pu e. Pyə Tá a bɑ pɑ́ yɑmu'. Pɑ Yudea lə pǐŋ ŋkwi' bé mwɔ' nə tamtə́ é. Da' gɑ́ Yeso piŋ gɔm gɑ: Gɑ̌ ghə po yɔ vəŋ mfa' pɑpuŋ myə a fɑ bi Tá a. Pǒ gɔ lɑ mwɔ' tamtə́ a nə ma nə mfa' bɔ? Pɑ Yudea pa' bi e gɑ: Pyə tə́ dɑ mwɔ' nthamtə́ o nə fa' pɑpuŋ pɑ́. Pyə dɑ mwɔ' nthamtə́ o nə́ nə yəmtə Si; nə pá' wə yə o bɑ pɑ̀ monəŋ a, o bɑwə dɑ nɑ o gə́ Si. Yeso pa' bi pu gɑ: A tə́ bɑ pú lě bvə nə mco' mɔ gɑ: Gɑ̌ ghɔm gɑ: Po bɑ msi a? Mco' ŋkhe pɔ pyə Si lə́ shyə m nə́ pu gɔmnwə a gɑ msǐ. A nəŋ bɑ po'o bi a pɑ sɔmmo lə kwyəpnyə ywə yə pu lě bvə a. Po gɔm bi mo yə Si jwɔ' é biŋ nthəm é nthʉm dzʉ́ a gɑ: O yəmtə Si, nə pa' gɑ̌ piŋ gɑ́ gɑ̌ bɑ Mú Si a. A pɑ gɑ́ ŋ tə̌ wə fa' mfà' Tá a pɑ́, po pɑ ŋkhəŋnyə a kəŋnyə́. Da' gɑ́ a pɑ gɑ́ gɑ̌ wə fa' mfà' bɔ, bɑ̀ po pɑ́ tə piŋ a piŋ, po piŋ mfa' bɔ; a cyə m po'o tə po zhyə́, biŋ shəŋtə jyə́ gɑ́ Tá bɑ bəm dəŋdəŋ pa' gɑ̌ bɑ bi Tá a. A lə pɑ̌ po'o, wap kwi' shəŋ nə ghəm é, da' gɑ e təm nə bu map. Bɑnyə nə yə mu' jʉɔ Yurdɛŋ, tsʉ' yə Yohane lə to' nə nu' pɔ shyə nə a, bɑ shwə tsʉ'u. Pɔ tə jɔm pɑ sɔ' bi e, biŋ bɑ gɔm gɑ: A nyənyɔ gɑ Yohane la tə́ té sɔm mtiŋ msya, da' gɑ́ guŋ ywə awɛ yə e lə ghɔm nə bɛ yəŋ á lə́ bɑ nyənyɔ. Wap lə piŋ bɑ vəŋ é nə piŋ é. Mu' mbɛ lə bɑ́wə, bɑ gɛ gho; mo bɔ lə bɑ Lazaro, yə Betanya, la' pɑ Maria pu fɑ e Marta. Pu gɔm Maria yə é lə́ lɑ mwɑ damnyəlamnyə nə jwɔ' Cyəpɔ, biŋ dɑ nə̀ŋ thə́ e nə shi' mkwə myə́ a. Fɑ e Lazaro nə lə́ bɑwə gǒ. Mfɑ pyə́ pyə pɑ jwǐ lə́ təm gɑ́ pu ghɔ gɔm bi Yeso gɑ: Cyəpɔ, mo yə o ŋkhuŋ e a wə gǒ. Yeso lə cwə́ tə ju' po'o gɔm gɑ: Gho bǎ tə gɔ miŋ m nə vʉ̌ pɑ́, pu gɔ cyə m nə́ yɔ ghu'tə̀ Si: A gɔ cyə m nə́ tə pu ghu'tə Mu Si. A lə nə pɑ̌ po'o Yeso pɑ́ ŋkhuŋ Marta pu fɑ e yə mjwǐ ba Lazaro. Tə́ ba tə pa' e lə zhyə̌ gɑ Lazaro wə go a, e lə pǐŋ shwə tsʉ' yə e lə́ bɑ nə a tyɛ'dzʉ tsɑ pʉ̌ə. Tə́ biŋ gɔm bi pɑkhʉ̌ pyə gɑ: Pɑ̀ pɑnyə Yudea. Pɑkhʉ̌ pyə lə ghɔm bi e gɑ: Rabi, a ka sak pa' pɑ Yudea kɑ bɑwə shəŋ nə lɑ mwɔ' nthamtə o a; o biŋ shəŋ nə pɑnyə wə́ lə́? Yeso pa' bi pu gɑ: Ta' tyɛ'dzʉ tə́ bɑ ǎ ghə mnàm shwɔppʉə mgham a lə? Mo pɑ́ giŋ dɔdzʉ̌ bɑ e tə́ gɔ cwɔ' kwə e pɑ, nə pa' e bɑwə jɔ ŋkha' yəŋ dzʉ̌. Da' gɑ́ mo pɑ giŋ mtsʉ' bɑ e gɔ cwɔ' kwə e nə́ pa' ŋkha' tə bɑ nə e pɑ. Yeso lə́ ghɔ́m mghɔm mɔ biŋ gɔm gɑ: So yɔk pɑ̀ Lazaro ti, da' gɑ́ gɑ̌ gɔ ghɔ yàm e. Pɑkhʉ̌ pyə ghɔm bi e gɑ: Cyəpɔ e pɑwə di bɑ e gɔ sɔ' vɔk. Yeso lə gɔm po'o bɑ gɔm vʉ́ Lazaro tə wap kwɛ yap gɑ́ e gɔm pɑ́ lwɔ̌k. Yeso ghɔm bi pu sɔsɔ̌ gɑ: Lazaro pfʉ́, tə ŋ bɑwə ŋwɛnyə nə po nə pa' ŋ kě tə pɑ tsʉ'u a, po'o gɑ a ghə po piŋ. Da' gɑ́ pɑ́ ghɔ bəŋ e. A lə pɑ̌ po'o, Tomasi, mo yə́ pu ŋkhe e gɑ́ Didimə a ghɔm bi pyə shɑ pɑkhʉ̌ gɑ: Pɑ ghɔ ba yɔk pɑ̀, po'o gɑ́ pɑ̀ a pú pəmtə́ pfʉ́. Yeso lə nə ŋwak, jɔ Lazaro m nthʉ̌m sì, bɑ ě cwə́ sí tyɛ' pfʉə. Nə pa' nthə́ Betanya bɑ̀ kilo pʉə mkam nə Yerusalɛm. Pɑ Yudea tə́ jɔ̀m lə́ bɑ wap sɔ' ywə Marta pu Maria nə zhwyətə wap nə vʉ̌ fɑ́ yap. Marta lə nə yu' gɑ Yeso wə sɔ̌' gɔ məjyə jɔ e; da' gɑ Maria pɑ pɑ́ dyə bɑ ě cwəsi. Marta lə ghɔm bi Yeso gɑ: Cyəpɔ, o kɑ pé' e bɑ tsɔ'ɔ bɑ fɑ a kě tə pfʉ́. Tə́ ba cwəlɔ gɑ̌ zhyə́ gɑ́ bǎ kɑ lə́ yə o gɔ ló bi Si a, Si gɔ hɑ bu. Yeso ghɔm bi e gɑ: Fɑ o gɔ yam. Marta pa' bi e gɑ: Gɑ̌ zhyə́ gɑ́ e gɔ sɔ' yam nə tyɛ' nə yam nə vʉ̌ nə jʉɔjʉ̀m tyɛ'dzʉ. Yeso ghɔm bi é gɑ: Gɑ̌ bɑ nə yam nə vʉ̌, biŋ bɑ vɔk: Mo yə e piŋ a, é pfʉ́ ba pfʉ̀pfʉ̌ bɑ e gɔ vɔk; a mo yə e nəŋ bvɔk biŋ biŋ a lə nəŋ da' pfʉ́. Ǒ piŋ po' a? Marta pa' bi é gɑ: É m Cyəpɔ, gɑ̌ piŋ gɑ o bɑ Kristo, gɑ̌ piŋ gɑ o bɑ Mu Si Mo yə e sɔ' nthʉm dzʉ́ a. E lə ghɔm po'o dú gɔ ŋkhe fɑ e Maria shamtə́ bi e gɑ: Tá tsi' e bɑwə ŋkhe o. Maria lə nə yǔ' gúŋ dusi gɔ bəŋ e. A lə́ nə pɑ̌ po'o Yeso yɑ́ tə wuŋ ŋkho nthʉm la' bɔ; e lə jɑ́ pɑ tsʉ' yə pú Marta lə yu'tə nə a. Pɑ Yudea lə bɑ dyə, bɑwə jwyətə Maria. Wap lə́ nə yɔ pá' e gúŋ dusi nthəm a jap jʉ̀m é, bɑwə ŋkwɛ gɑ e gɔ m thəsì nə lɔ̀. Maria lə ŋwak tsʉ' yə Yeso lə́ bɑ nə a, shwə tə jɔ e, bvʉ nə mkwə myə́ gɔm bi e gɑ: Cyəpɔ, o kɑ pe' bɑ tsɔ'ɔ bɑ fɑ à kě tə̀ pfʉ́. Yeso lə́ nə yo pa' Maria pu a pɑ Yudea pyə wap lə́ bɑ jʉ̀m e a wə dɔ́ a, tʉm tsyə sə́ŋ, lam tsyə sɔ. E ghɔm gɑ: Pǒ yap é hɑ? Wap pa' bi e gɑ: Cyəpɔ, sɔ' jɔ́. A pɑ́ po'o Yeso lɔ̀. Pɑ Yudea lə bɑ́ gɔm gɑ: Po yɔ́ pa' e kɑ ŋkhuŋ e. Da' gɑ shɑ̀ pɔ cəcɑ̌ pu ghɔm gɑ: Mo yə e lə ghyɛ' mnyə fʉ̀ a, e kě tə kú' nə kɔ̀ gɑ Lazaro kɑ pfʉ. A pɑ po'o tʉm Yeso kwi' səŋ, e ghɔ thəsì; thəsì bɔ lə́ bɑ túŋ ghú gwɔ̀', bɑ pu lɑ mú' gwɔ' nə pfɔptə shwə é. Yeso ghɔm gɑ: Po cʉ́ɔ gwɔ' yə̌ŋ. Marta, fɑ npfə́ ghɔm bi e gɑ: Cyəpɔ, e gɔ tsə́ pɑwə lam, nə pa' a cwəlɔ tyɛ' pfʉə. Tə́ Yeso ghɔm bi e gɑ: Ŋ khě tə ghɔm bu gɑ́ o piŋ, bɑ o gɔ yɔ ghu'tə Si lə́? Pu lə́ cʉ̌ɔ gwɔ'. Yeso piŋ bʉ' mnyə myə́ gɔm gɑ: Ta gɑ̌ gho'tə ó nə pa' ǒ yu' a lə. Gɑ̌ zhyə́ gɑ o ji ju' a guŋ mcwə awɛ, da' gɑ́ gɑ̌ gɔm po'o shyə m nə vəŋ pɔ̀ pɔ̌ pyə wap bə́ŋ m̀ a, po'o gɑ wap piŋ gɑ́ a bɑ ǒ təm a! E lə́ ghɔm po'o shwé tə thə́ gɑ: Lazaro, tə́m! Mo yə e lə́ bɑ ě pfʉ́ a tə̌m, bɑ pu kwɑ́ mkwə̀ myə́ pu a bu myə́, biŋ dɑ dzə́ sam sə́ e. Yeso ghɔm bi pɔmnəŋ gɑ: Po kyɛ' e, nthak e nəŋ e ghɔ. Bo'gwyə pɑ Yudea pyə wap lə sɔ' bəŋ Maria biŋ jɔ ywə yə Yeso lə ghə a lə piŋ é. Da' gɑ́ pyəshɑ́ ghɔ jɔ́ pɑ Farisai siŋ wap ywə yə Yeso gə a. Mkamsi gwyəgwyə pu a pɑ Farisai lə ko cu'tə gɔm gɑ: Pɑ̌ gə kɑ? Bɛ yə̌ŋ wə gə mtiŋ msya yɔ̌m. Pɑ̀ tak é nəŋ e nə gɔ dzə̀ po'o bɑ guŋ pɔ awɛ gɔ piŋ e, pɑ Roma ko nə́, sɔ' sa'tə tsʉ' dɔlɔ̌ yɔk pɑ̀ ba guŋ yɔk pɑ̀. Mu' mo cəcɑ̌ pú, Kaifa yə e lə́ bɑ tádyə mkamsi gǔ' bɔ a ghɔm gɑ: Po tə wə jú' sɔmywə pɑ́. Po lə piŋ bɑwə sɛ ba m gɑ́ dzə bi po gɑ́ ta' mo pfʉ́ nə thə́ pɔmnəŋ, po'o gɑ́ gùŋ kɑ simnyə̀ awɛ a? Mghɔm bɔ myə e lə ghɔm a lá tə́ bɑ myə́ pɑ́. Da' gɑ́ pa' e lə bɑ tadyə mkamsi gǔ' bɔ a, e lə gɔm pɑ ghɔm Si gɑ a lə́ bɑwə shəŋ gɑ́ Yeso pfʉ́ nə thə́ guŋ, ba tə da' nə thə́ guŋ pɑ, ba m nə nə́ shu'tə́ po Si pyə wap bɑ wap sɛ dzʉ́ dzʉ̌ a nthʉm nthamtə. A tyɛ'dzʉ bɔ tə́ wap lə́ nyə̌ŋ gɑ wap gɔ zhwə é. Tə fɑ po' Yeso nə yə ghə́ŋ lə na' nə́ŋtə nə pɑ ŋkhəka cəcɑ̌ pɑ Yudea sɔsɔ̌; e lə təm gɔ m̀ ghə̌ŋ ghakgo, m nthʉ̌m tisuŋ Efraim pu a pɑkhʉ pyə́ pɑ́ shwə́ wə́. A lə́ nə pɑ̌ po'o Paska pɑ Yudea pɑwə sɔ̌'. Bo'gwyə pɔ lə wuŋ yə mu' jʉ̀m dzʉ̌ fɑ go bʉɔ gɔ Yerusalɛm nə nə lɔnyə nɑ tsap. Wap lə bɑwə shəŋ Yeso, biŋ bɑ Dyə Si tsʉ' yə wap lə bɑ nə a bɑ gɔm cəcɑ̌ pú gɑ: Pǒ sɛ gɑ kɑ̀? E tə́ gɔ sɔ' nə Paska pɑ̀. A lə́ bɑ mkamsi gwyəgwyə ba pɑ Farisai hɑ mco' gɑ: Bǎ wɑlə́ yə ě zhyə́ tsʉ' yə e nə́ a la'tə́, pu ghɔ gəm é. A lə́ pɑ jak tyɛ'dzʉ nthɔ̌k tə́ a pɑ tyɛ' Paska, Yeso ŋwak Betanya, tsʉ' yə Lazaro yə e lə yam é nə vʉ̌ a lə́ bɑ nə a. Pu ghə ŋwɛnyə nə thə́ e: Marta pɑ́ gap ywətsʉ, Lazaro pɑ cəcɑ̌ mghʉɔ. Maria lɑ dúŋ mwɑ damnyəlamnyə, mwɑ tʉɔdə̀ŋ, nə jwɔ' mkwə Yeso, dɑ nəŋ thə́ e nə shi'. Zhwyə mwɑ bɔ ló Dyə̌. A pɑ po'o, Yuda Iskariɔt, mu' mo nə́ pɑkhʉ̌ pyə́, mo yə e lə bɑ gɔ la' hɑ́ e á ghɔm gɑ: Nwə kɑ̀ bɑ pú ka fiŋ mwɑ damnyəlamnyə mə́ nə́ bɛ ŋkhap ŋkhətá, hɑ bi mpə̌ŋ? E la tə́ gɔm po'o bɑ nwə mpə́ŋ nə nthəŋ e pɑ́. E lə́ gɔm po'o nə pa' e lə́ bɑ shúŋ, pétə́ pɑ m̀ bi é. E pɑ́ jʉ ywə́ yə pu lə́ nyəŋ nthʉm o a. A pɑ́ po'o Yeso ghɔm gɑ: tak e nə́ŋ; ywə yə e gə a bɑ nə́ nə nthəŋ a. Po a mpə̌ŋ nə gɔ pɑ pɑ́ guŋ mcwə awɛ; tə́ sɔ' m nə m̀, pɑ́ lə ghɔ pɑ́ pɑ́ guŋ mcwə awɛ. A lə́ nə pɑ̌ po'o bɑ kwa' vəŋ pɑ Yudea yu' gɑ Yeso tsʉ'u, sɔ̌', po'o tə da' nə Yeso pɑ, sɔ' ba nə yɔ Lazaro yə́ e lə́ yǎm é nə vʉ̌ a. Mkamsi gwyəgwyə nyəŋ gɑ wap gɔ zhwə ba Lazaro yə́, nə pa' a lə bɑwə shyə́ pɑ nə e tə pɑ Yudea tə jɔm pɑwə nthəm nə pú, biŋ bíŋ Yeso. Dzʉ̌ lə́ lɔ̌, vəŋ pɔ pyə́ wap lə sɔ' nə ŋwɛnyə á yu' gɑ́ Yeso wə́ sɔ' m Yerusalɛm; wap lə lɑ̌ mcɛ́ yɛ bɛ nə nthəm tisuŋ gɑ pu a pu yu'tə, wap lə bɑwə jwɔp gɑ: Hozana, byanyə pɑ́ bi mo yə ě wə sɔ' a, shyə m nə́ tsǒ Cyəpɔ, fo pɑ Israɛl. Yeso lə́ yɔ mu jakasi, shwə́ dəm e, dəŋdəŋ pa' a ba pu lě bvə gɑ: Kɑ́ pwɔk, gò Sion: Yɔ fo o yəŋ bɑwə sɔ̌', bɑ ě kwɔ' dəm mu jakasi. Pɑkhʉ̌ pyə́ lə ləŋdzə la' wap yu' kwa' ywə yə ǎ wə shyətə a, da' gɑ́ pu lə cwə̌ tə gu'tə Yeso, wap kamtə́ gɑ́ a lə́ bɑ́ pu lě bvə nə e po'o, a pɑ ywə bɔ tə́ pu lə́ bɑwə gə nə e. A lə́ bɑ po'o, vəŋ pɔ pyə́ pu a pu lə́ bɑ́ cwə yə́ é lə́ kě Lazaro nthʉm sì, jám é nə vʉ̌ a pɑwə ŋkwinthɛ̌ e. Nə pa' a lə́ shyə m pa' wap lə yǔ' gɑ e ghə mtiŋ msya bɔ a, tə́ wap ghɔ gɑ́ pu a pu yu'tə. A lə́ pɑ̌ po'o pɑ Farisai pɑ́ gɔm cəcɑ̌ pu gɑ: Po yɔ, po ka ku' nə ghə sɔmywə: Ǎ yɑ́ gùŋ pɔ̀ awɛ pɑwə jap jʉ̀m e. Shɑ́ pɑ Grikia lə́ bɑ wap pʉ̀ɔ yap Yerusalɛm nə ŋwɛnyə paska nə́ nə ghamtə̀ Si. Wap lə ghɔm bi Filipo yə e bɑ yə́ Betsaida m Galilea á gɔm gɑ: Cyəpɔ, pyə wə́ shəŋ nə yɔ Yeso. Filipo lə́ ghɔ gɔm bi Andreya, pu e pəmtə gɔm bi Yeso. Yeso pa' bi pu gɑ: Cwə yə pu gɔ ghu'tə mú mo a ku'. Kwa' nyənyɔ nyənyɔ, gɑ̌ siŋ wɔ gɑ́ tɔ̌m msɛ́ ko si bɑ tə́ pfʉ, bɑ a gɔ pɑ́ pɑ do e; da' gɑ a pfʉ bɑ a gɔ ghə nthɔm tə́ a yɔm. Mo yə ě kuŋ vɔk e a, gɔ pi vɔk e bɔ, tə́ mo yə e ka kuŋ vɔk é bɔ nthʉm yəŋ dzʉ̌ a, gɔ sɔ' lwɔ' vɔk e bɔ nə vɔk mama. Mo pɑ gɔ fá' bəm, e yap jʉ̌m m̀, nə pa' tsʉ' yə gɑ̌ gɔ pɑ́ nə a, gɛfa' a gɔ pɑ́ tsʉ'u. Mo fa' bəm bɑ Ta a gɔ sɔ' ghə mku' myə́. Cwəlɔ lam tsɑ̌ wə sɔ́; gɑ̌ gɔ piŋ ghɔm gɑ́ kɑ̀? Ta vɔk a cwəlɔ̀ lə? Da' gɑ ŋ də́ sɔ' pɑ kwa' nə cwə dzʉ yə̌ŋ. Ta ghu'tə tso tsǔ. A lə pɑ̌ po'o gi mò fɑ kɛbəŋ gɔm gɑ: Gɑ̌ ghu'tə tsá, biŋ gɔ kwi' pɑ ghu'tə tsá. Vəŋ pɔ pyə wap lə̌ tsʉ'u a lə nə yǔ' gɔm gɑ́: a m̀ hɛbəŋ; pyə́ shɑ pɔ pɑ gɔm yap m gɑ aŋgəle nə́ gɔmnwə bi e. Yeso piŋ dɑ́ ghɔm gɔm gɑ: Gi yəŋ tə́ gi po' m bəm pɑ̀; a gi m bi po. Cwəlɔ pu gɔ fyɛ' yəŋ dzʉ̌; cwəlɔ pu gɔ zhəŋ fò yəŋ dzʉ̌ cya e pé. Tə́ sɔ' m nə m̀, cwə yə pu gɔ sɔ' ka' á thə́ á, gɑ gɔ fəŋ guŋ pɔ awɛ wap sɔ' bəŋ m̀. Yeso lə shyə m nə́ mghɔm mɔ gɑ bɑ da'tə nthi vʉ̌ tsyə e lə bɑ gɔ pfʉ́ tsa a. Pɔmnəŋ lə pa' bi e gɑ: Pyə lə yu' nə mcò' gɑ́ Kristo gɔ la' cwə pɑ mama. Tə a biŋ shyə́ m gɑ̀ kɑ o ghɔm gɑ́ pu gɔ ká' Mú mo thə́? Mú mo bɔ bɑ́ wɑ? Yeso pa' bi pu gɑ: Ŋkha' jɑ̀ cəcɑ̌ po nə muywə cwə dzʉ̌. Po ghiŋ nə cwə yə ŋkha' yɑ̌ bi po a, po'o gɑ dzʉ̌ jʉ̌m kɑ́ lɑ wɔ, nə pa' mo yə e giŋ nthʉm jʉ̀m a tə́ jyə́ tsʉ' yə e gɔ m nə a pɑ. Cwə yə́ ŋkha' yɑ̌ bi po a, po piŋ ŋkha' po' gɑ po zhi pó ŋkha'. Yeso lə́ ghɔm bi pú po'o, fɑ cəcɑ̌ pú nthəm gɔ dʉmnyə. Ba tə́ pa' Yeso lə́ ghə mtiŋ msya cəcɑ̌ pu tə' a, wap la tə piŋ é; po'o tə́ ghɔm tsyə́ gɔm ghɔm Si Esaya lə́ ghɔm a pəmtə gɑ: Cyəpɔ, wɑ̌ piŋ nwə yə pu lə yu' pa' pú gɔm a? Si bɑ e lě da'tə gʉ' e bi wɑ? Kwa' yʉ Esaya lə ghɔm ywə yə a lə́ gə tə́ bi a pɑ́ wap lə piŋ a, gɑ: Si bɑ ě ma' fʉ̀ mnyə pú, biŋ gə tʉm tsap sɔk, po'o gɑ́ wap kɑ lɑ mnyə map jɔ, tʉm tsap kɑ yu' sɔmywə, wap kɑ nə̌ŋ bʉɔ tʉm tsap, gə gɑ jɛ́ wap! Esaya lə́ gɔm po'o nə pa' a lə́ bɑ́ bɑ e yɔ nə ghu' Yeso, bɑ gɔm po'o nə. Ba tə po'o, ba m cəcɑ̌ pɑ cya, bo'gwyə pɔ lə bɑ wap piŋ e; da' gɑ a cyə m nə pa' wap lə́ bɑwə bwɔk gɑ́ pɑ Farisai kɑ té wap sinagogə a, wap lə piŋ e sɔsɔ̌. Nə pa' wap lə bɑwə ŋkhuŋ ghu'tə yə a fɑ m bi pɔmnəŋ a shyə́ yə a fɑ bi Si a. A nə́ pɑ̌ po'o bɑ Yeso lə ghɔm gɑ: Mo yə e piŋ á, bɑ́ e tə́ biŋ pɑ myə̀ pɑ̀, bɑ e biŋ mo yə e nthəm a, ba mo yə́ e yɔ a, bɑ́ e yɔ mo yə e nthəm a. Myə̀ yə gɑ̌ bɑ ŋkha' a, gɑ̌ sɔ' nthʉm dzʉ́ po'o gɑ mo yə e piŋ a kɑ́ cwə̌ nthʉm jʉ́m. A pɑ́ gɑ́ mo yu' mghɔm mə̌, la' e kyəp, bɑ tə́ myə̀ nə gɔ fyɛ' e pɑ́: Nə pa' da tə́ sɔ' m nə fyɛ' dzʉ̌ pɑ́, ŋ də sɔ' m nə vɔk dzʉ̌. Mo yə́ e wa' a, la' e kwi mghɔm mə̌ a, bɑ e ghə gɛ fyɛ' e: Mghɔm myə gɑ gɔm a gɔ sɔ' fyɛ' e nə jʉɔjʉ̀m tyɛ'dzʉ. Ŋ da tə́ gɔmnwə m nə yɑ thə́ pɑ́; Tá yə e nthəm a nə bvə ywə yə gɑ̌ gɔ ghɔm a. Bɑ gɑ̌ nəŋ jyə́ gɑ́ mco' myə́ bɑ́ vɔk mama. Ywə yə gɑ̌ gɔm a, gɑ̌ gɔm pa' Tá ghɔm bəm a. Ŋwɛnyə Paska lə nə ku' Yeso zhyə gɑ yə cwə wə bɑ ǎ ku', cwə yə e gɔ təm nə yəŋ dzʉ̌ ghɔ bəŋ Ta a, yʉ́ yə e lə́ bɑ e kuŋ pɔ pyə́ pyə wap bɑ nthʉm dzʉ a, e piŋ ŋkhuŋ wap tə́ miŋ. Pu a pu lə́ nə pɑ tsʉ̌ ywə, bɑ Sata tsə́ nyəŋ mkwɛnyə nə hɑ Yeso bi mghɛ bó pyə nthʉm tʉm Yuda Iskariɔt mu Simon. Yeso zhyə́ gɑ Tá nyəŋ guŋ ywə awɛ tuŋ pú e; jyə́ gɑ e nthəm nə Si, biŋ bɑ gɔ m bi yʉ Si, dusi dəm tɑpe, nthɔk dzə e jap si, shəŋ mu' kamdzə vʉ' e. Biŋ nyəŋ shyə nthʉm kɛ́, ntho' nə́ nə sɔk mkwə pɑkhʉ̌ pyə́, biŋ bɑ dɑ kamdzə yə a vʉ' e a nə shi'. E lə́ kəm nə Simon Pɛtrɔ, e ghɔm bi e gɑ: Wə Cyəpɔ sɔk mkwə mə̌ lə? Yeso pa' bi e gɑ: Ywə yə gɑ̌ wə gə a, bi a pɑ o lə zhyə́ cwəlɔ, da' gɑ́ o gɔ sɔ' yu' m jʉ̀m. Pɛtrɔ ghɔm gɑ: Tə o sɔk mkwə mə lə́! Gɛ̌, gɛ̌! Yeso ghɔm bi e gɑ: Bɑ tə sɔk o bɑ pu tə́ yɑ̌ nə sɔmywə pɑ́. Simon Pɛtrɔ ghɔm bi e gɑ: A pɑ́ pa' m Cyəpɔ, o kə́ sɔk da' mkwə mə̌, o sɔk ba bú mə̌ ba thə́ a. Yeso ghɔm bi e gɑ: Mo yə a bɑ e sɔk nɑ e a tə́ biŋ shəŋ gɑ́ pu sɔk e pɑ́, nə pa' a bɑ ě lɔ: Sɔ' m nə wɔ, a bɑ pǒ lɔ da' gɑ tə guŋ yɔ awɛ pɑ́. Yeso lə́ bɑwə jyə́ mo yə́ e lə́ bɑwə gɔ hɑ e a; a cyə m po'o tə́ e ghɔm gɑ: Tə́ guŋ yɔ awɛ pɑ. Yeso lə́ miŋ nə sɔk mkwə máp, ŋkwa dzə e, biŋ shwə dəm tɑpe, gɔm bi pu gɑ: Pǒ yu' ywə yə gɑ̌ gə nə po a lə́? Pǒ ŋkhe a gɑ Tá, ba m gɑ́ Cyəpɔ, bɑ̀ po ka hɔ, nə pa' gɑ̌ bɑ e. Bi a pɑ gɑ myə̀ Cyəpɔ, bíŋ bɑ́ Tá, gɑ̌ sɔk mkwə mɔ, bɑ pǒ gɔ pɑ́ sɔk mkwə mɔ cəcɑ̌ po, nə pa' a fo' yə gɑ hɑ́ bi po a: Ywə yə gɑ gə bi po a, po ghə po'o bi pyəshɑ pɔ. Kwa' nyənyɔ nyənyɔ, gɑ̌ siŋ wɔ gɑ gɛfa' tə́ bɑ ě cyə tá fa' e pɑ́, kɑ mo yə pu nthəm e nə cyə mo yə é nthəm e a lə. Po zhyə po'o, bɑ pǒ bɑ mpuŋtsé, bi a pǒ ghiŋ po'o a. Ŋ tə gɔm nə guŋ yɔ awɛ pɑ́; gɑ̌ bɑ gɑ̌ zhyə́ pɔ pyə́ gɑ shwɔ' wap a. Da' gɑ́ ywə yə pu lə və a, a pəmtə́ gɑ: Mo yə pyə é lə́ pəmtə́ dzʉ̌ ywə a lě fɛ jʉm a. Gɑ̌ siŋ wɔ cwəlɔ po'o tə́ nwə tə́m, po'o gɑ a cwə tə́ nthəm po piŋ gɑ́ Gɑ̌ bɑ. Kwa' nyənyɔ nyənyɔ gɑ̌ ghɔm bi po gɑ nə lɑ mo yə gɑ̌ gɔ sɔ' təm é a bɑ nə lɑ kwa' myə̀. Nə nəŋ dɑ́ a pɑ nə lɑ Mo yə e nthəm a lə́. Yeso lə́ ghɔm po'o, lam tsyə sɔ, e piŋ gɔm sɔsɔ̌ gɑ: Kwa' nyənyɔ nyənyɔ mu' mo nə po gɔ hɑ a. Pɑkhʉ̌ pyə cʉnyə́, bɑ́ həŋtə́ cəcɑ̌ pú mo yə e gɔm é a. Mu' mukhʉ̌ yə Yeso lə́ ŋkhuŋ e a lə bɑ bəŋ e. Simon Pɛtrɔ nwɔ'tsə bi gɑ: Tsɑtə e gɑ e gɔm wɑ́lə? Mukhʉ̌ bɔ lə pɔ̌ nɑ e nə́ kəkɔp Yeso, gɔm bi e gɑ: Cyəpɔ, a bɑ wɑ́? Yeso pa' gɑ: A mo yə́ gɑ gɔ co' bo'ywə hɑ bi a. E lə ghɔm po'o sho' bo' ywə hɑ bi Yuda Iskariɔt, mu Simon. Tə́ fɑ cwə yə Yeso lə hɑ̌ bo'ywə bɔ bi Yuda á, Sata ko nə e. Yeso ghɔm bi e gɑ: Ywə yə o gɔ ghə a, lo'nyə gə̌. Sɔmmo nə pɔ pyə wap lə bɑ tsʉ'u a la tə yu' ywə yə a gə tə́ Yeso ghɔm po'o a pɑ́. Pa' Yuda lə́ gwim peté a, shɑ pɔ lə́ kwɛ m gɑ Yeso gɔm bi e gɑ́ e yó ywə yə a gɔ kwitə nə ŋwɛnyə, kɑ m gɑ e hɑ ywə bi mpə̌ŋ lə. Da' gɑ sɔ' m nə Yuda, e lə cwə tə ŋkwi bó' ywə bɔ, guŋ nthəm: A lə́ bɑ mtsʉ'. Yuda lə́ cwə tə́ nthəm, Yeso ghɔm gɑ: Pu e da' gu'tə Mu mo a piŋ bɑ́ bɑ pu lě shyə m nə e gu'tə Si. Si gɔ ghu'tə e cyə pɑ m nə yʉ Si. Ǎ cʉ' muywə Si ghu'tə e. Pǒ mkəcɔk po pɑ̌, jɑ̌ cəcɑ̌ po pɑ́ nə muywə cwədzʉ̌. Pó gɔ sɔ' cəŋ a; dəŋdəŋ pa' ŋ də ghɔm bi pɑ Yudea gɑ: Tsʉ' yə gɑ gɔ m nə a, bi a pɑ́ po lə sɔ' tsʉ'u a, ba m bi po yɔ gɑ̌ wə gɔm po'o cwəlɔ. Gǎ wə hɑ ta' mco' sə bi po: Po kuŋnyə wɔ wɔ. Dəŋdəŋ pa' dɑ kuŋ wɔ a, po pɑ ŋkhuŋnyə wɔ wɔ. A pɑ gɑ̀ po ghə ŋkhuŋnyə cəcɑ̌ po, bɑ guŋ yap awɛ gɔ zhyə́ gɑ́ po bɑ pɑkhʉ̌ pɑ̌. Simon Pɛtrɔ ghɔm gɑ: Cyəpɔ o gɔ m hɑ́? Yeso pa' bi e gɑ tsʉ' yə gɑ̌ gɔ m nə a, bi a pɑ́ o lə yap jʉ̀m m̀ cwəlɔ, da' gɑ o gɔ lá' yap jʉ̀m m̀. Pɛtrɔ ghɔm gɑ: Cyəpɔ, nwə kɑ́ tə́ bi a pɑ ŋ də yap jʉm o cwəlɔ? Gɑ̌ gɔ sɔ' wa' vɔk a nə o. Yeso pa' bi e gɑ: Wa' vɔk o nə m̀! Kwa' nyənyɔ nyənyɔ gɑ̌ siŋ o gɑ: O gɔ kəŋnyə a mcʉm ntha tə́ ko' túŋ. A lam tsɔ kɑ sɔ; po piŋ Si, po piŋ ba myə̀ yɑ̌. Mtsʉ' bɑ dyə Tá a tə́ jɔ́m; ka po'o a bɑ gɑ̌ ghɔm bi po gɑ́ gɑ̌ gɔ ghɔ nyaptə tsʉ' bi po yə po gɔ sɔ' pɑ́ nə á lə? Cwə yə gɑ̌ gɔ ghɔ tə nyaptə tsʉ' bi po a, a biŋ sɔ' dɑ wɔ pɑ ghɔ̌, po'o gɑ́ tsʉ' yə gɑ̌ nə a, ba wɔ yɔ sɔ' bɑ́ tsʉ'u. Sɔ' m nə tsʉ' yə gɑ̌ gɔ m nə́ a, a bɑ po zhyə məjyə. Tomasi ghɔm bi e gɑ: Cyəpɔ, pyə bɑ pyə ka zhyə́ bǎ tsʉ yə o gɔ m nə a, tə̀ pyə gɔ zhyə́ məjyə m gɑ́ kɑ? Yeso ghɔm bi e gɑ: Gɑ̌ bɑ məjyə, bíŋ bɑ́ nyənyɔ, bíŋ bɑ vɔk. Sɔmmo tə́ gɔ bi Tá tə cyə pɑ m nə m̀ pɑ. Po la' pé'e jyə́ a, bɑ po zhyə ba Tá a. Tə fɑ cwəlɔ pǒ bɑ pǒ zhyə e, biŋ bɑ́ bɑ pǒ yɔ e. Filipo ghɔm bi e gɑ: Cyəpɔ, la'tə wɔk Tá, a ku' bi pyə. Yeso ghɔm bi e gɑ: Myə, gɑ̌ bɑ́ cəcɑ̌ po tə fɑ tə tyɛ̌', ba tə po'o wə Filipo o lə piŋ jyə a lə? Mo yɔ a, bɑ ě yɔ Tá: Nwə kɑ o ghɔm gɑ: La'tə wɔk Tá a? O tə́ biŋ gɑ́ gɑ̌ bɑ nə́ Tá, Ta piŋ bɑ nə m̀ a? Mghɔm myə gɑ̌ gɔm bi po a, ŋ tə gɔm nə́ yɑ thə́ pɑ́. Tá yə e bɑ nə m̀ a nə fá' mfà' myə́. Po piŋ gɑ́ gɑ̌ bɑ nə Tá, Tá pɑ nə m̀; bi a pɑ pɑ́ gɑ́ po tə gɔ piŋ ghɔm tsɑ̌ pɑ́, po piŋ shyə m nə mfa' myə́ mɔ gɑ. Kwa' nyənyɔ nyənyɔ, gɑ̌ siŋ wɔ gɑ́ mo yə ě piŋ a bɑ ba yʉ́ gɔ fa' mfá' myə gɑ̌ fa' a. E gɔ fa' a cyə ba m po'o, nə pa' gɑ̌ gɔ m bi Tá. Gúŋ ywə awɛ yə po gɔ lɑ tsó tsɑ̌ lo a, bɑ gɑ̌ gɔ ghə, po'o gɑ a cyə m nə Mú pu ghu'tə Tà. Po lo ywə bəm m nə tso tsɑ̌ bɑ gɑ̌ gɔ ghə po'o. Po kuŋ a bɑ po gɔ kaktʉɔ nə ghiŋ nə́ mco' mə̌; a shwyɛ'nyə Tá, e hɑ mu' Parakle yə pu a pu gɔ pɑ́ guŋ mcwə awɛ a bi po. Yú nə bɑ Zhwenyə nyənyɔ, mo yə dzʉ̌ bɑ e ka ku' nə kwi e a, nə pa' dzʉ̌ tə́ jɔ e pɑ́, e lə nəŋ jyə́ e. Po bɑ pǒ zhyə e nə pa' e shwə bəŋ po, biŋ bɑ nə po. Ŋ tə gɔ tak wɔ pa' pǒmcyə a pɑ́, gɑ̌ wə sɔ' m bi po. Ǎ cʉ' muywə dzʉ̌ lə piŋ jɔ a; tə́ po gɔ pɑ yɔ a, bɑ pɑ wə́, ba wɔ yɔ pɑ́ pɑ wə́. A gɔ sɔ' pɑ́ tyɛ'dzʉ́ bɔ, po zhyə gɑ́ gɑ̌ bɑ nə Tá a, po pɑ nə m̀, bɑ nə po. Mo yə ě tɔm mco' mə̌, biŋ bɑ giŋ nə a, mo bɔ ŋkhuŋ a: Mo yə ě nəŋ ŋkhuŋ a, bɑ Tá a gɔ kuŋ e, ba myə̀ yɑ̌ piŋ ŋkhuŋ e, Ta piŋ gə e zhyə a. Yuda yə e tə bɑ yə Iskariɔt a pɑ́ ghɔm bi e gɑ: Cyəpɔ kɑ gə o ghɔ ghə pyə zhyə o, tə́ o lə ghə dzʉ̌ zhyə o? Yeso pa' bi e gɑ: Mo kùŋ á, bɑ e gɔ zhyə̀ ghɔm tsɑ̌, a Tá a kuŋ é; A pyə sɔ̌' bi e, gə tsʉ' shwə yɔk ywə e. Mo yə e tə́ ŋkhuŋ a a pɑ́ tə jyə̀ ghɔm tsɑ̌ pɑ́. A nəŋ nə́ pɑ̌ po'o, ghɔm bɔ tsyə po jú' a lə pɑ́ ghɔm tsɑ̌, a bɑ́ tsyə Tá a yə e nthəm a. Dě siŋ wɔ mnwə bǎ nə cwə yə ŋ də bɑ́ bəŋ po a. Tə́ Parakle, Zhwenyə Dɔlɔ̌ yə Tá gɔ təm bi po cyə m nə́ tso tsɑ̌ a gɔ sɔ' zhi'tə wɔ guŋ mnwə awɛ, piŋ ghə po kamtə myə də ghɔm a awɛ. Gɑ wə nthak hwitə bi po; gɑ̌ hɑ hwitə a bi po. Ŋ tə hɑ m nthi pa' dzʉ̌ hɑ a pɑ́. Lam tsɔ kɑ kwi' sɔ, po kɑ kwi' bwɔk. Po yu' nwə bɔ, gɑ ghɔm bi po gɑ: Gɑ̌ gɔ ghɔ, piŋ sɔ' bi po. Po la' pe' e bɑ ŋkhuŋ a bɑ po gɔ ŋwɛnyə pa' gɑ gɔ m bi Tá a, nə pa' Tá bɑ é cyə a. Gɑ̌ gɔm bi po cwəlɔ tə́ nwə bɔ cwə́ sɔ̌', po'o gɑ a cwə́ tə sɔ́' po piŋ. Tə́ fɑ cwəlɔ, pɑ̀ tə gɔ kwi' pəmtə cɔm nwə pɑ, nə pá' fo yəŋ dzʉ̌ wə sɔ̌'. A nyənyɔ gɑ e ka ghə sɔm gʉ' nə m̀; Tə́ e bɑwə sɔ' po'o tə́ dzʉ̌ zhyə gɑ gɑ̌ ŋkhuŋ Tá a, biŋ bɑ gə bǎ kɑ lə pɑ pa' Tá jap a. Po lusi, pɑ fɑ tsɔ̌' gɔ̌! Gɑ̌ bɑ thə́ mlù' nyənyɔ, Tá a pɑ mo yə é dé thə́ bɔ a. Bǎ ya pú thə́ lə́ yə a la nə m̀, tə́ la' á pɑ jam nthɔm a, e nthé é; tə́ yə pǔ thə yə a jam nthɔm a, é pɑ só tə́ a cəŋtə́ jam. Ghɔm tsyə gɑ gɔm a bɑ a e da' só wɔ. Po cwə nə m̀ pá' gɑ̌ shwə nə po a! Dəŋdəŋ pa' pǔ thə pɑ tə la nə to thə ba a tə́ gɔ yam nthɔm do e a pɑ̀, a bɑ dəŋdəŋ po'o nə po bi a pɑ gɑ po ka cwə nə m̀. Gɑ̌ bɑ thə́ mlù', po pɑ́ bǔ thə́. Mo yə ě cwə nə m̀ biŋ shwə nə e a, mo bɔ gɔ yam nthɔm jɔmyɔ̌m, nə pa' po cyə tə́ pɑ̌ nə m̀ bɑ po tə́ gɔ ku' nə ghə sɔmywə pɑ́. Mo pɑ tə́ cwə nə m̀ bɑ pú gɔ ma' e pé pa' bǔ mthə́ a, e yə́m, pú lak ma' mɔk, é khə́. Po cwə nə m̀, ghɔm tsɑ̌ piŋ shwə nə po, bɑ po gɔ ló ywə yə po wə shəŋ a, a sɔ' bi po. Ywə yə a gu'tə Tá a bɑ gɑ́ po yam nthɔm a yɔ́m, biŋ bɑ pɑkhʉ̌ pɑ̌. Dəŋdəŋ pa' Ta nə̀ ŋkhuŋ á, a dəŋdəŋ po' tə́ gɑ̌ ŋkhuŋ wɔ: Po cwə nthʉm kuŋnyə a. Po zhyə̀ mco' mə̌, bɑ po gɔ cwə nthʉm kuŋnyə a, dəŋdəŋ pa' gɑ̌ jyə́ mco' Tá a shwə nthʉm kuŋnyə e a. Gɑ̌ siŋ wɔ mnwə bɔ awɛ po'o gɑ́ yɑ̀ nə ŋwɛnyə pɑ́ yɔ, a yɔ nə ŋwɛnyə pɑ́ yɑ̀. Mco' mə̌ bɑ gɑ: Po pɑ́ ŋkhuŋnyə wɔ wɔ pa' ŋ də ŋkhuŋ wɔ a. Bi a pɑ sɔmmo lə́ ghə kuŋnyə tə́ shyə́ mo yə e hɑ vɔk e nə thə́ pɔ pyə é ŋkhuŋ wap a. Po ghə̀ ywə yə́ gɑ̌ gɔm bi po a bɑ po bɑ mso pɑ̌. Bi a pɑ́ dɑ́ piŋ ŋkhe wɔ gɑ mghɛ fa', nə pa' gɛfa' tə́ jyə́ ywə yə́ tap e gə a pɑ; gɑ̌ ŋkhe wɔ gɑ́ mso pɑ̌ nə pa' guŋ ywə awɛ yə gɑ jú' bəŋ Tá ǎ gɑ̌ ghə po zhyə́ yá. Tə wɔ nə lə́ shwɔ' a pɑ́, myə̀ nə lə́ shwɔ' wɔ, biŋ jap wɔ gɑ po ghɔ jam nthɔm, a nthɔm mɔ pɑ pɑ́wə tə bi a po lò pɑ́ kɑ́ lɑ́ bi Tá shyə m nə́ tso tsɑ̌ bɑ e gɔ hɑ bi po. Ywə yə gɑ̌ gɔm bi po a bɑ́ gɑ́ po kuŋnyə wɔ wɔ. A pɑ gɑ̀ dzʉ̌ pɔ wɔ́, po zhyə́ gɑ e lə́ də́ŋdzə bɔ a. Po lə́ pe' bɑ́ pɔ̀ dzʉ́, bɑ dzʉ̌ ŋkhuŋ ywə yə a bɑ́ yə́ a; da' gɑ po tə́ bɑ́ pɔ̀ dzʉ́ pɑ́: Myə̀ nə lə́ nthé wɔ nə dzʉ̌, a ywə yə a gə tə́ dzʉ̌ pɔ wɔ a. Po kamtə ghɔm tsyə ŋ də ghɔm bi po a gɑ: Gɛfa' tə́ bɑ ě cyə tá fà' pɑ̀; a pɑ́ gɑ́ wap lě shwɔ' mkwə mə̌, bɑ wap gɔ cwɔ' ba mɔ mkwə; a pɑ̀ gɑ́ wap lé ghɔm tsɑ̌ cwəpuŋ, bɑ wap gɔ le ba tsɔ ghɔm cwəpuŋ. Wap gɔ ghə guŋ yá awɛ nə po po'o cyə́ m nə́ tso tsɑ̌, nə pa' a bɑ wap ka zhyə mo yə e nthəm a. Ŋ də́ pe' bɑ́ tə sɔ', ŋ də pe' bɑ́ tə ghɔmnwə bi pú, bɑ mhɔ tə́ bɑ́ nə pu pɑ́; tə cwəlɔ pɑ́ pu lə́ lɑ mhɔ map shwyɛ' wap pɑ́. Mo yə e bɔ ǎ, bɔ ba Tá ǎ. Ŋ də́ pe' bɑ́ tə́ fa' mfa' mɔ gɑ́ myə sɔmmo lɑ̌ m fa' á cəcɑ̌ pu, bɑ mhɔ tə́ bɑ́ nə pú pɑ́; da' gɑ cwəlɔ yə wap yɔ a á, wap jɑwə́ bɔ wɔk pɔ, wɔk pyə̀ Tá ǎ; po'o gɑ ghɔm tsyə a bɑ pu lé bvə nthʉm mco' a pəmtə́ gɑ: Wap bɔ a pɑ́ něné. Cwə yə Parakle yə gɑ̌ gɔ təm é bi po e fɑ bəŋ Tá a gɔ sɔ' sɔ' a, a Zhwenyə nyənyɔ yə a fɑ nə Tá, e gɔ sɔ' pɑ́ ŋkwinthɛ̌ a. A ba wɔ yɔ pɑ́ ŋkwinthɛ̌ a, nə pa' pɑ̀ nə́ bəmtə́ bɑ́ tə fɑ nə to'. Gɑ̌ gɔm guŋ mnwə bǎ awɛ po'o gɑ po kɑ̀ vʉ̀ nə mləŋtə̀. Pú gɔ sɔ' pɑ́ té wɔ msinagogə. Cwə nəŋ bɑwə sɔ̌' yə mo yə e gɔ zhwə wɔ́ a gɔ pɑ kwɛ m̀ gɑ e pa' a bɑwə nuŋpwɔ' bi Si a. Wap gɔ sɔ' pɑ ghətə po'o nə pa' a bɑ wap ka zhyə́ Tá, wap lə́ nəŋ jyə ba myə̀. Tə́ gɑ̌ siŋ wɔ po'o gɑ cwə bɔ cwə tə sɔ̌', po kamtə gɑ́ ŋ dě siŋ wɔ. Ŋ dě tə siŋ wɔ́ tə fɑ cwə nə́ to', nə pa' pɑ lə bəmtə bɑ́. Tə́ cwəlɔ gɑ̌ gɔ m̀ bə̌ŋ mo yə e lə təm a á, la' sɔmmo yɔ nəŋ həŋtə a gɑ́: O gɔ m hɑ? Cwəlɔ yə gɑ̌ siŋ wɔ a, nə zhwíŋ lo nthʉm tʉm po. Tə́ a bɑ́ po'o bɑ gɑ̌ siŋ wɔ nwə nyənyɔ; dzə̀ bɑ bi po bɑ gɑ ŋ gɔ̌, nə pa' bɑ́ tə ghɔ bɑ Parakle tə́ gɔ sɔ' bi po pɑ́; tə́ da gɔ̌ bɑ gɑ gɔ təm e bi po. Sɔ' m nə e, nə yə nə sɔ', e gɔ ghə dzʉ̌ zhyə́ mhɔ, jyə́ nwə dəŋdəŋ ba nə fyɛ': Nə mhɔnwə. Wap tə́ biŋ a pɑ; nə nwə dəŋdəŋ nə pa' gɑ̌ gɔ̀ m bəŋ Tá, po lə ghɔ piŋ pɑ́ yɔ a. Nə nə́ fyɛ' nə pa' a bɑ pu tsə fyɛ' mu fo yəŋ dzʉ̌. Shɑ mnwə yɑ̌ si myə gɑ̌ gɔ siŋ wɔ a, da' gɑ cwəlɔ po ka wuŋ ŋkhu' nə yu'; cwə yə́ Zhwenyə nwə nyənyɔ gɔ sɔ' sɔ' bi po a, e ghə po zhyə guŋ nwə nyənyɔ awɛ, nə pa' e tə́ gɔ sɔ' pɑ́ ghɔmnwə pɑ́ nə yə́ thə́ pɑ. E gɔ sɔ' pɑ́ ghɔmnwə yə e yu' a, pɑ siŋ wɔ guŋ ywə awɛ yə a gɔ sɔ' a. E gɔ sɔ' ghu'tə a nə pa' e gɔ sɔ' pɑ́ kwi ywə yə á bɑ bəm a tə́ siŋ wɔ. Guŋ tsə́ tsyə Tá a bɑ é ghə a bɑ pɑ bəm; á shyə m po'o tə́ bɑ gɔm gɑ́ e gɔ sɔ' ghə po zhyə ywə yə é ŋkwi bəm a. A cʉ' muywə́ po lə piŋ jɔ a, biŋ shʉ' muywə po piŋ jɔ a. Shɑ pɑkhʉ̌ pyə lə bɑ gɔm cəcɑ̌ pú gɑ: E shəŋ nə ghɔm bí pɑ̀ gɑ́ kɑ tə́ gɔm gɑ: A cʉ' muywə po lə piŋ jɔ a, biŋ shʉ' múywə po yɔ a? Kɑ nə ghɔm gɑ́: Gɑ gɔ m bi Tá á? Wap lə bɑwə gɔm gɑ: Muywə bɔ da'tə gɑ kɑ̀? Pyə tə̌ wə ju' ywə yə é bɑwə shəŋ nə ghɔm a pɑ́. Yeso lə́ zhyə́ gɑ́ wap wə́ shəŋ nə həŋtə e nwə, gɔm bi pu gɑ: Po wə shəŋ cəcɑ̌ po nə zhyə ywə yə́ ghɔm tsɑ̌ gɑ́: A cʉ' muywə po lə piŋ jɔ a, biŋ shʉ' muywə po piŋ jɔ a da'tə a. Kwa' nyənyɔ nyənyɔ gɑ̌ siŋ wɔ gɑ́ po gɔ pɑ zhwíŋ piŋ pɑ lɔ̀, a dzʉ̌ pɑ ŋwɛnyə; po gɔ sɔ' pɑ zhwiŋ, da' gɑ zhwìŋ yɔ gɔ sɔ' pʉɔ cʉ' ŋwɛnyə̀. Cwə yə mjwǐ bɑ dzə́ a, jwiŋ nə pa' yə cwə bɑ ǎ ku'; da' gɑ́ e shwə tə́ dzə́ mú, e lə piŋ ŋkhamtə́ ghəghʉɔ e, e ŋwɛnyə ŋwɛnyə nə pa' e tsə mo a. A bɑ po'o tə́ pǒ cwəlɔ̀ bɑwə jwiŋ; da' gɑ gɑ̌ gɔ sɔ' piŋ yɔ wɔ m sə, tʉm tsɔ ŋwɛnyə, ŋwɛnyə yə bi a pɑ́ sɔmmo lə kwi bi po a. A po'o tə́ a gɔ sɔ' pɑ́ nə tyɛ'dzʉ́ bɔ, po lə piŋ həŋtə a sɔmywə. Kwa' nyənyɔ nyənyɔ gɑ̌ siŋ wɔ gɑ̀ po ló bǎ kɑ̀ lə bi Tá a m nə tso tsɑ̌ bɑ e gɔ hɑ bi po. Tə́ ŋkhəm cwəlɔ po ka lo sɔmywə bi Ta a m nə tso tsɑ̌: Po ló, pu gɔ hɑ bi po tə́ ŋwɛnyə yɔ pɑ tə dzə. Gɑ̌ lɑ pɑ̀ mghɔm tə tútə nə siŋ wɔ guŋ mnwə bɔ awɛ, da' gɑ́ cwə wə sɔ̌' yə ŋ tə́ gɔ piŋ ghɔmnwə bi po m nə nthi bɔ a pɑ́, yə gɑ̌ gɔ siŋ wɔ nwə nə́ Tá sɔsɔ̌ a. A gɔ sɔ' pɑ nə tyɛ'dzʉ́ bɔ po ló ywə bi Tá nə tsó tsɑ̌, da' gɑ ŋ tə́ gɔm bi po gɑ́ gɑ̌ gɔ sɔ' cwyɛ'nyə Tá nə po pɑ́, nə pa' kwa' yʉ Tá ŋkhuŋ wɔ, shyə́ m nə pa' a bɑ pǒ kuŋ a, biŋ bíŋ gɑ́ gɑ̌ nthəm m̀ nə́ Si. Gɑ̌ nthəm m nə́ Tá sɔ' nthʉm dzʉ́, biŋ bɑwə cwəlɔ nthəm nthʉm dzʉ́ gɔ m bi Tá. Pɑkhʉ̌ pyə́ ghɔm bi e gɑ: Cwəlɔ ǒ wə gɔmnwə sɔsɔ̌, o lə piŋ bɑwə gɔm ghɔm tə tútə́ pɑ; Cwəlɔ pyə̌ zhyə́ gɑ́ o bɑ o zhyə́ guŋ ywə awɛ, pyə̌ zhyə gɑ́ o tə́ yɑ̌ wə byap ga pu həŋtə́ o sɔmywə pɑ́. A ywə́ yə a gə tə́ pyə piŋ gɑ́ o nthəm m nə Si a. Yeso pa' bi pú gɑ: Pǒ piŋ cwəlɔ a? Po yɔ́, cwə̌ wə́ sɔ̌', cwə bɔ tsə pɑ̀ yə̌ŋ, yə́ po gɔ sɛtə, bǎ yà mo lə́ ghɔ nə yə məjyə, po tak á do m̀ a. Da' gɑ ŋ tə́ bɑ́ dǒ m̀ pɑ. Pyə́ Tá nə bɑ. Gɑ̌ siŋ wɔ nwə bɔ po'o gɑ́ po cyə m nə m̀ gə hwitə̀. Nthʉm yəŋ dzʉ̌ po bɑwə jɔ ghəghʉɔ. Tə́ po kaktʉɔ, gɑ̌ bɑ gɑ̌ ló' shyə́ dzʉ́. Yeso lə́ nə mìŋ nə ghɔm po'o, bʉ' mnyə myə́ kɛbəŋ gɔm gɑ: Tǎ, cwə̌ ku', ghu'tə́ Mú u tə́ Mú u ghu'tə o. Tə́ a piŋ shyə m nə gʉ' yə o hɑ bi e nə́ guŋ monəŋ awɛ a, e hɑ vɔk mama bi guŋ pɔ awɛ pyə o hɑ wap bi e a. Vɔk mama bɔ pɑ́ gɑ́ wap zhyə́ o, wə da' Si nyənyɔ, biŋ jyə́ mo yə́ o nthəm e a, Yeso Kristo. Gɑ̌ ghu'tə o dəmcǎ', gɑ̌ miŋ fa' tsyə o lə́ hɑ̌ gɑ́ gə a. Cwəlɔ, m Ta, ghu'tə a bəŋ o, nə mtiŋ ghu'tə yə a lə bɑ gɑ̌ ghə bəŋ o tə́ dzʉ̌ la' bɑwə a. Gɑ̌ ghə pɔ pyə o lə hɑ wap bəm nthʉm dzʉ a zhyə tso tsʉ̌. Wap lə́ bɑ́ bu, o hɑ́ wap bəm, wap lě giŋ nə pa' ghɔm tsǔ gɔm a. Wap bɑ wap zhyə́ cwəlɔ gɑ́ guŋ ywə awɛ yə́ o hɑ bəm a fɑ́ pɑ́ bu. Wap zhyə́ gɑ́ mghɔm myə gɑ̌ gɔm bi pú a bɑ mghɔm myə o hɑ bəm a. Wap kwi mghɔm bɔ; wap zhyə́ nyənyɔ gɑ́ gɑ̌ nthəm nə o nə́ŋ biŋ bíŋ gɑ́ wə nə nthəm a. Gɑ̌ shwyɛ'nyə o nə pú, ŋ tə́ shwyɛ'nyə o m nə dzʉ̌ pɑ́; gɑ̌ shwyɛ'nyə o nə pɔ pyə́ o hɑ́ wap bəm a: Wap bɑ́ bu, a piŋ bɑ guŋ ywə yə ǎ bəm a pɑ́ bu, guŋ ywə yə a bu a pɑ bəm, a po'o tə́ pu lə́ gu'tə a shyə m nə́ pú. Tə fɑ cwəlɔ ŋ tə́ jɑ nthʉm dzʉ́ pɑ́; tə́ wap shwə pɑ nthʉm dzʉ́; tə́ sɔ' m nə́ m̀ gɑ̌ bɑwə sɔ' m bu. Ta dɔlɔ̌, pyap wap shyə́ m nə́ tso tsǔ tsyə o lə́ hɑ̌ bəm a, po'o gɑ wap pɑ yɑmu' pa' wɔk pú bɑ́ yɑmu' a. Cwə yə pyə a pú lə́ bəmtə́ bɑ a, ŋ bɑ́ byap wap shyə m nə́ tsò tsǔ tsyə o lə́ hɑ bəm a: Ŋ dě pfɔ́ptə wap tə́ la' sɔ́m mo yap pi tə́ ně da' mú bi pǐ, po' gɑ ywə yə pu lə və a pəmtə̀. Cwəlɔ gɑ̌ wə sɔ' m bəŋ o, tə́ ba tə́ po'o, nthʉm yəŋ dzʉ̌, jɑ́wə siŋ wap mnwə mɔ̌ po'o gɑ wap ghə ŋwɛnyə a, guŋ ŋwɛnyə awɛ nə pú. Ŋ dě hɑ ghɔm tsʉ̌ bi pú, dzʉ̌ piŋ bɔ wap nə pá' wap tə́ bɑ pɑ dzʉ́ pɑ́, dəŋdəŋ pa' ŋ tə́ bɑ́ yə dzʉ́ a pɑ́. Ŋ tə́ dó bu gɑ́ o té wap nthʉm dzʉ́ pɑ. Gɑ̌ dó bu gɑ́ o pfɔptə wap nə Cwəpuŋ. Wap tə́ bɑ pɑ dzʉ́ pɑ́, dəŋdəŋ pa' ŋ tə́ bɑ yə dzʉ́ a pɑ́. Lɑ́ nyənyɔ dɔnyə wap: Ghɔm tsǔ bɑ́ nyənyɔ. Dəŋdəŋ pa' o nthəm a nthʉ́m dzʉ́ a, gɑ̌ tə́m wap nthʉm dzʉ́. Gɑ̌ guŋ bɑ yɑ̌ pɑ nə pú, po'o gɑ ba wap yap wuŋ bɑ́ pɑ nə nyənyɔ. Ŋ tə́ shwyɛ'nyə o da' nə pu pɑ́, gɑ̌ shwyɛ'nyə bɑ m nə pɔ pyə á gɔ cyə m nə ghɔm tsap wap piŋ á a; gɑ́ guŋ yap awɛ pɑ́ yɑmu' pa' wə Tá o bɑ bəm biŋ bɑ́ bu á, gɑ́ ba wap yap pɑ́ nə pu tə́ dzʉ̌ piŋ gɑ́ wə̀ nə́ nthəm a. Gɑ̌ bɑ gɑ hɑ ghu'tə yə o lə́ hɑ bəm a bi pú, po'o gɑ́ wap pɑ yɑmu' pa' pu bɑ́ yɑmu' a. A bɑ bi pú pa' o bɑ́ bəm a, po'o gɑ wap pɑ́ kwa' nə ŋkwishwə pɑpuŋ tə́ a cyə m po'o a dzʉ̌ zhyə gɑ́ wə nə́ nthəm a, ba gɑ́ a bɑ ǒ kuŋ wap dəŋdəŋ pa' o ŋkhuŋ a lə. Ta, gɑ̌ shəŋ gɑ́ tsʉ' yə gɑ̌ nə́ a, pɔ pyə o hɑ wap bəm a, pyə a pú pəmtə́ bɑ́ tsʉ'u, po'o gɑ́ wap yɔ ghu'tə yə́ o hɑ bəm a, nə pa' o le ŋkhuŋ a tə́ dá' nyaptə dzʉ́. Tá dəŋdəŋ, a bɑ dzʉ̌ ka zhyə́ o, gɑ̌ bɑ gɑ̌ zhyə o, ba pɔ pɔ zhyə́ gɑ o təm a. Gɑ̌ ghə̀ wap zhyə́ tsó tsǔ, biŋ bɑ gɔ kwi' ghə wap zhyə po'o gɑ́ ŋkhuŋnyə yə o nə ŋkhuŋ a pɑ̀ bi pú ba myə̀ piŋ bá bi pú. Yeso lə́ ghɔ̌m po'o, gɔ̌ pu a pɑkhʉ̌ pyə́ nə yəmu' jʉɔ cwɛ mcɑ Kedroŋ; mu' kà lə bɑ tsʉ'u yə e lə ko nə pu a pɑkhʉ̌ pyə́ a. A lə́ nə pɑ bɑ Yuda, yə e lə bɑ gɔ hɑ Yeso a zhyə́ tsʉ'u bɔ. Nə pa' Yeso pu a pɑkhʉ pyə lə́ bɑ wap lə cu'tə tsʉ'u mcʉm jɔmyɔ̌m. E lə tiŋnyə thə́dzə̀, msəŋwi pu a pɑ pyap pɑ́ jʉ̀m e, bɑ mkamsi gwyəgwyə pu a pɑ Farisai nə́ nthəm wap. Wap lə kǒ kà, bɑ wap wim mcu' khá' pu a mlǎmbù, ba tsə shù. Pa' Yeso lə́ bɑ ě zhyə́ ywə yə́ a wə gɔ sɔ' nə́ é a, e lə fʉ'tə nɑ́ e gɔ bəŋ pú, gɔm bi pú gɑ: Pǒ shəŋ wɑ̀? Wap pa' bi e gɑ: Yeso yə́ Nazarɛt. E ghɔm bi pú gɑ gɑ̌ bɑ́ é. A lə́ nə pɑ̌ po'o Yuda yə e lə bɑ gɔ hɑ Yeso a pɑ cəcɑ̌ pu. Yeso lə́ cwə tə́ gɔm bi pu gɑ́ gɑ̌ bɑ́ e, wap fʉ' jʉ̀mjʉ̀m bvʉtə́ si. Yeso lə kwi' həŋtə́ wap m sə gɑ: Pǒ shəŋ wɑ? Wap pa' gɑ: Yeso yə́ Nazarɛt. Yeso pa' bi pú gɑ: Gɑ̌ siŋ wɔ gɑ́ gɑ̌ bɑ e. A pɑ gɑ́ po shəŋ pɑ́ myə̀, po tak pɔ pɔ gɑ wap ghɔ. A lə pɑ̌ po'o, ghɔm tsyə Yeso lə ghɔm gɑ: Ŋ kha pi sɔmmo nə́ pɔ pyə o lə hɑ̌ wap bəm á, a pəmtə. A lə pɑ̌ po'o Simon Pɛtrɔ yə a lə bɑ ě tyəp nyə a té nyə bvɔ nə nɔk gɛ fá' ŋkhamsi gwyə́, ja' təŋ ě yə tʉɔ; tsǒ gɛ fà' bɔ lə́ bɑ Malkos. Yeso ghɔm bi Pɛtrɔ gɑ: Nyəŋ piŋ nyə́ o bvɔ! Ŋ tə́ gɔ nwə́ nthu' yə Tá hɑ bəm a pɑ a? Msə̌ŋwi pu a tadyə yap ba pɑ pyap pɑ Yudea lə ghəm Yeso cwəlɔ ŋkwɑ e. Wap lə́ ləŋdzə dɑ é gɔ dzə̌ Hana. Hana lə́ bɑ́ tá jwi Kaifa yə e lə́ bɑ́ ŋkhamsi gwyə gu' bɔ a. Kaifa bɔ nə lə gɔm bi pɑ Yudea gɑ́ dzə gɑ́ ta' mò pfʉ̀ nə thə́ pɔmnəŋ. Simon Pɛtrɔ pu mu' mukhʉ̌ lə yap jʉ̌m Yeso. Pa' a lə́ bɑ́ bɑ ŋkhamsi gwyə zhyə́ e a, pu Yeso lə pəmtə ŋkho shwədyə̌ e. Pɛtrɔ wuŋ dzʉ́, bə́ŋ jyədyə̌; mukhʉ̌ yə a lə bɑ ŋkhamsi gwyə zhyə́ e a lə tə̌m, jɔ gò yə́ e lə́ bɑwə byap jyədyə̌ a, gɔm é ghə Pɛtrɔ ko dyə. Múgò gɛ fà' yə e lə́ bɑwə byap jyədyə̌ a lə ghɔm bi Pɛtrɔ gɑ: Ba wə yǔ tə́ bɑ̀ múkhʉ̌ bɛ yəŋ á? Pɛtrɔ pa' gɑ: A tə a pɑ́. Mghɛ fà' pu a pɑ́ pyap tsʉ' lə bɑ wap sumɔ́k bɑ̀ bəŋ o bɑwə jwɔk, nə pá' fɔk lə́ bɑwə ŋkhú. Bà Pɛtrɔ lə bɑ yə́ tsʉ'u bɑwə jwɔk mɔk. Ŋkhamsi gwyə lə to' nə́ tə́ŋtə Yeso nwə̀ nə pɑkhʉ̌ pyə ba nə ywə yə e ji'tə wap a. Yeso pa' bi e gɑ: Ŋ də gɔmnwə bi guŋ pɔ awɛ pɑ́ sɔsɔ̌, ŋ də ji'tə ywə guŋ mcwə awɛ dyə́ sinagogə ba m Dyə Si, tsʉ' yə guŋ pɑ Yudea awɛ lə shu'tə nə a, la' gɔm sɔmywə m càm. Nwə̀ kɑ́ o həŋtə pɑ́ myə̀ nwə̀ nə ywə yə ŋ də ghɔm a? Ywə yə́ ŋ də ghɔm a, həŋtə bi pɔ pyə wap lə́ yu' a. Wap zhyə ywə yə ŋ də ghɔm a kwa' pɑpúŋ. Yeso lə cwə̌ tə́ gɔm po'o, mu' səŋwì gɛ pyap yə e lə bɑ tsʉ'u a cwɔ pǔ təŋ é gɔm gɑ: A pa' o gɔmnwə bi ŋkhamsi gwyə a lə́? Yeso pa' bi é gɑ: A pɑ́ gɑ́ gɑ̌ ghɔm a pɔk, o la'tə a yə ǎ pɔk nə́ a; nəŋ bɑ́ gɑ́ gɑ̌ ghɔm a puŋ, bɑ o nəŋ shwɔ a gɑ́ kɑ̀? A lə́ pɑ̌ po'o pu kwɑ̀ Yeso, Hana cya é bi Kaifa, ŋkhamsi gwyə. A lə́ nə pɑ̌ po'o Pɛtrɔ pɑwə jwɔk pɑ́ mɔ̌k. Pú ghɔm bi e gɑ: Ba wə yǔ tə́ bɑ mu' mukhʉ̌ é a lə́? Pɛtrɔ pa' gɑ: Ŋ tə́ bɑ e pɑ́. Mu' mo nə mghɛ fa' ŋkhamsi gwyə, fɑ́ mo yə Pɛtrɔ lə́ yá' təŋ e a lə ghɔm bi Pɛtrɔ gɑ: Ŋ khě tə́ yɔ wɔ pò é nthʉm kà lə̀? Pɛtrɔ lə̀ pǐŋ ŋkwi' ŋkhəŋnyə é m nə́ kəŋnyə sə́, a wuŋ bɑ pɑ̀ cwə o bɔ, ko' túŋ. A lə́ nə́ pɑ̌ po'o bɑ pu lɑ Yeso fɑ wə Kaifa gɔ m wə gɔpna'. A lə́ bɑ mɑfɔkdzʉ̌. Pɔ pyə wap lə lɑ e nə gɔ a lə ko la' wap ko wə gɔpna', bɑ bwɔk pa' wap gɔ viŋ nɑ tsap tə ghɔ tsʉ́ paska a. Pilato lə tə̌m dzʉ́ jɔ wap, gɔm bi pú gɑ: Pǒ butə bɛ yəŋ nə kɑ? Wap pa' gɑ: Mo yəŋ la' pe' bɑ́ bɑ e ka ghə nwə bɔkpɔ̌k bɑ pɑ́ pyə hɑ é bu a? Pilato ghɔm bi pú gɑ: Pɑ́ kwa' wɔ nə lɑ e gɔ fyɛ' e nə mco' mɔ. A tə́ bɑ́ bɑ pu piŋ gɑ̀ bi a pɑ́ pyə ghə mo pfʉ́ pɑ́. A lə́ bɑ̀ po' tə́ ghɔm tsyə́ Yeso lə́ ghɔm nə́ nthi vʉ̌ yə e lə bɑ̀ gɔ la' pfʉ́ a pəmtə̀. Pilato lə́ pɑ̌nyə́ ŋkhó wə e, ŋkhe Yeso, gɔm bi gɑ: O bɑ fò pɑ Yudea? Yeso pa' bi e gɑ: Pɑ́ kwa' wə̀ nə gɔm kɑ shɑ́ pɔ nə gɔm bu nə m̀? Pilato pa' bi e gɑ: Gɑ̌ bɑ yə Yudea a? Guŋ o pu a mkamsi gwyə hɑ́ o bəm! A bɑ o ghə la? Yeso pa' gɑ: Nəfo tsɑ̌ tə́ bɑ nə yəŋ dzʉ̌ pɑ́. Nəfo tsɑ̌ la' bɑ́ nə yəŋ dzʉ̌ bɑ pɑ pyap a lo'shù gɑ pu kɑ hɑ̌ a bi pɑ Yudea. Da' gɑ́ cwəlɔ Nəfo tsɑ̌ tə̌ nə yəŋ dzʉ̌ pɑ. A pɑ́ po'o Pilato ghɔm bi é gɑ: O bɑ fo a? Yeso pa' bi é gɑ: Wə nə gɔm gɑ́ gɑ̌ bɑ̀ fo. Pu lə dzə́ a, sɔ' nthʉm yəŋ dzʉ̌ pɑ ŋkwinthɛ̌ nyənyɔ. Mo yə e bɑ nə nyənyɔ a ju' gi a. Pilato ghɔm bi e gɑ: Nyənyɔ bɑ́ kɑ? E lə ghɔm po'o gɔ dzʉ́ jɔ pɑ Yudea gɔm bi pu gɑ: Sɔ' m nə m̀ ŋ khɑ yɔ́ sɔmywə yə po butə é nə a. Da' gɑ́ pa' a bɑ́ mà gɑ a pɑ nə paska a ŋthak ta' mo nəŋ bi po a, pǒ kùŋ gɑ ŋthak fo pɑ Yudea nəŋ bi po a? Wap lə to' nə cwe gɑ: Tə́ mo bǎ pɑ, tak pɑ́ Barabas. A lə nə pɑ̌ po'o Barabas pɑ̀ Samshwə. A lə́ pɑ̌ po' Pilato lɑ Yeso bɑnyə, gə pu lɑ shɔm shwɔ e. Msəŋwi lə sǔ co' thə́ e, bɑ wap lɑ júŋ nə bá', ŋkwa sʉəsʉə pɛ dzə́ fɔk nə e. Wap lə́ bɑwə gɔ bəŋ e lə́ bɑ gɔm gɑ: Ca'tə, m fo pɑ Yudea! Biŋ bɑ shwɔ mshɔm nə e. Pilato lə pǐŋ ŋkwi' nthəm dzʉ́ gɔm bi pɑ Yudea gɑ: Po yɔ, gɑ̌ lɑ e nthəm dzʉ́ dzə po. Po zhyə gɑ́ ŋ kha yɔ sɔmywə yə pu butə e nə a. Yeso lə́ nə tə̌m dzʉ́ cwəlɔ, bɑ pu su co' júŋ thə́ e biŋ ŋkwa pɛ dzə́ nə e. Pilato ghɔm bi pu gɑ: Mbɛ yəŋ. Da' gɑ́ mkamsi gwyə pu a pɔ pap lə́ cwə̌ tə jɔ e, guŋ bɑ shwe gɑ: Kwe e bɛnyəpɛnyə! Kwe e bɛnyəpɛnyə! Pilato ghɔm bi pu gɑ: Pɑ kwa' wɔ ŋkwe e thə bɛnyəpɛnyə nə pa' myə̀, ŋ kha yɔ sɔmywə yə bi a pɑ́ pú putə e nə a. Pɑ Yudea pa' bi e gɑ: Pyə bɑ pyə ghə mu' tɑ̀' mcò', a pɑ gɔ cyə m nə́ mcó' bɔ pu zhwə e, nə pa' a bɑ ě ke nɑ e gɑ Mú Si. Pilato lə cwə̌ tə ju' ghɔm tsɔ, bwɔk nə gɔ dzə. E lə pɑnyə dyə e, gɔm bi Yeso gɑ: Kwa' wə nthəm hɑ? Da' gɑ́ Yeso lə ghɔm sɔm nwə bi e. A pɑ po'o Pilato ghɔm bi e gɑ: O ŋkhəŋnyə pa' nə ghɔmnwə bəm. O ka zhyə gɑ́ gɑ̌ bɑ gɑ̌ ghə tʉɔ nə gə pu tak o nəŋ kɑ nə ghə pu kwe o bɛnyəpɛnyə a? Da' gɑ Yeso pa' bi e gɑ: O kě tə ku' nə ghə sɔm tʉɔ nə m̀ tə a bɑ gɑ kɛbəŋ nə hɑ bu; a shyə m po'o tə́ mo yə e hɑ a bu a pɑ́ bɑ e kwà kwa' mɑ mhɔnwə myə ǎ cyə a! Tə́ fɑ po'o, Pilato pɑ shəŋ nə tak e nəŋ, da' gɑ́ pɑ Yudea to' nə pɑ́ shwe biŋ bɑ gɔm bi Pilato gɑ́: O tak e nəŋ bɑ o tə̌ wə giŋ pa' so Kasa a pɑ́! Nə pa' mo ghɔm gɑ e fo bɑ e gɛ bo Kasa. Pilato lə cwə̌ tə́ ju' po'o dɑ Yeso nthəm jap e dəm kwɔ' shɛ́, tsʉ' yə pu ŋkhe gɑ́ Litostrotos, a pɑ nə Ebraika bɑ gɑ Gabata. A lə́ bɑ tyɛ' nyaptə̀ mnɑ́ nə Paska, gwɛ́ a nə mɔkcʉ́. Pilato ghɔm bi pɑ Yudea gɑ: Yɔ́ fo yɔ̌ yə̌ŋ. Da' gɑ wap to' nə pɑ shwe gɑ: E pfʉ́! E pfʉ́! Kwe e bɛnyəpɛnyə! Pilato piŋ gɔm gɑ: Gɑ̌ gɔ kwé fo yɔ bɛnyəpɛnyə lə́? Mkamsi gwyəgwyə pa' bi e gɑ: Pyə ka ghə mu' fo tə ně Kasa. A lə pɑ̌ po'o e hɑ Yeso bi pú gɑ pú kwé e bɛnyəpɛnyə. Wap fɔm e cwəlɔ. Yeso lə kwa bɛnyəpɛnyə e pɑ́ kwa' yʉ́ nə nthəm gɔ tsʉ' yə pu ŋkhe gɑ́ tsʉ' kwé thə mó a, a pɑ nə Ebraika bɑ gɑ Gɔlgota a. Pu lə́ kwe é nə bɛnyəpɛnyə tsʉ'u bɔ, biŋ ŋkwe ba shɑ pɔ pɑpʉə; Yeso pɑ cəcɑ̌ pú. Pilato lə́ ba e və mu' ŋwa'nyə gə pu yap thə bɛnyəpɛnyə; a lə bɑ̀ pu və nə́ gɑ́: Yeso yə Nazarɛt, fo pɑ Yudea. Bo'gwyə pɑ Yudea lə kě ŋwa'nyə bɔ, nə pá' tsʉ' yə pu lə kwe Yeso nə a lə́ bɑ bəŋ tisuŋ. Ŋwa'nyə piŋ bɑ́ bɑ pu və nə́ ghɔm Ebraika ba nə ghɔm Roma, ba nə Grikia. Mkamsi gwyə pɑ Yudea ghɔm bi Pilato gɑ: Pu ka bɑ́ gɔ və gɑ́ fo pɑ Yudea pɑ̀. Pu kɑ̀ bɑ̀ gɔ və m gɑ: Mo yə̌ŋ bɑ e ghɔm gɑ e bɑ́ fo pɑ Yudea. Pilato pa' bi pu gɑ: Ywə yə gɑ̌ və a, gɑ é da' bvə́! Msəŋwi lə mǐŋ nə kwe Yeso nə bɛnyəpɛnyə, dɑ dzə́ tsyə́ nə gap jyə́ pfʉə, tá' jyə̀ pɑ́ bi tà' mo. A cʉ' sʉəsʉə dzə é yə a lə bɑ pu pá' la' pu ya' sɔmtsʉ' nə tə fɑ thə́ a. Msə̌ŋwi lə ghɔm cəcɑ̌ pu gɑ: Ka pɑ khitə, pɑ tam nthuŋ nə jɔ mo yə ě tsʉ a: A pɑ̀ po'o ywə yə pu lə və a pəmtə gɑ́: Wap ghaptə dzə tsɑ̌, dɑ sʉəsʉə dzə a ntham nthuŋ. Yəŋ bɑ ywə yə msəŋwi lə ghə a. A lə bɑ bəŋ bɛnyəpɛnyə Yeso map e pɑ tsʉ'u bɑ ě tiŋnyə ba Maria fɑ map e, jwi Clopas ba Maria yə Makdala. Yeso lə nə́ yɔ̌ map e ba mukhʉ e yə e lə ŋkhuŋ e a bəŋ e gɔm bi map e gɑ: Mɑmjwi yɔ mú o yə̌ŋ. Biŋ gɔm bi mukhʉ e gɑ: Yo mɔ yə̌ŋ. Tə́ fɑ cwə o bɔ mukhʉ e lɑ e dyə e. A lə pɑ po'o, Yeso zhyə gɑ guŋ ywə awɛ mi, po'o gɑ ywə yə pu lə və a pəmtə́ tə́ ŋkhəm cwiŋ, gɔm gɑ: Ghak a wə ŋkhə. Mu' ghʉɔ lə bɑ tsʉ'u bɑ pu nyəŋ mcyə́ nə tə a ló. Pu lə sǔ cu' ywə nə mcyə́ bɔ, nthə́ŋ nə́ thə́ kam ywə yə pu ŋkhe gɑ izopə a, nya bəŋ shwə e. Yeso lə cwə̌ tə́ nwə mcyə, gɔm gɑ: Guŋ ywə awɛ mì; biŋ shiŋ thə e, hɑ zhwenyə. Pa' a lə́ bɑ tyɛ' nə nyaptə nɑ a, pɑ Yudea lə pɑ bwɔk gɑ pfə mo kɑ cwə̌ nə bɛnyəpɛnyə nə cwə sabat nə pa' tyɛ' sabat bɔ lə bɑ m dəŋ, wap ghɔ jɔ Pilato gɔm gɑ e ghə pu po'tə mkwə map, gə pu cʉɔ wap. Msə̌ŋwi lə sɔ' cwəlɔ bo'tə mkwə dəŋdzə ba batə mo yə pu lə kwe wap pu a pu a. Wap lə nə kəm nə Yeso jɔ gɑ́ ě da' pfʉ́; a pɑ́ po'o la' wap po'tə mkwə myə́. Da' gɑ́ mu' ta' səŋwi lə lɑ kuŋ swɔp be é, mcyə ba shyə wuŋ nthəm. Mo yə e lə yɔ a ŋkwinthɛ̌ nə ywə yə e lə yɔ a, kwǐnthɛ e piŋ bɑ nyənyɔ, ba po'o mo bɔ jyə gɑ e gɔm ywə yə ǎ pɑ nyənyɔ a, po'o gɑ́ ba wɔ yɔ piŋ. Guŋ ywə bɔ awɛ nthəm po'o tə ywə yə pu lə və a a pəmtə; bɑ pu lě bvə gɑ: Pu tə́ gɔ la' po' sɔm kwé ě pɑ́. Ba mu' tsʉ' ŋwa'nyə ŋkwi' bɑ́ gɔm gɑ: Wap gɔ sɔ' yɔ mo yə wap swɔp e a. Mnwə bɔ lə cyə̌, Yosɛp yə Arimatea, yə e lə bɑ mukhʉ Yeso, da' gɑ́ bɑ dʉmnyətʉmnyə, bɑ bwɔk pɑ Yudea, lo bi Pilato gɑ́ e piŋ gɑ e cʉɔ pfə́ Yeso. Pilato piŋ, Yosɛp sɔ' shʉɔ pfə Yeso. Ba Nikodemo yə e lə́ ghɔ jɔ Yeso mtsʉ́' a lə sɔ' yə; nə sɔ' gwim mu' ŋi'nyə mwɑ mira pu aloɛs gwɛ a nə kilo shwɔpta mgham tha. Wap lə́ lɑ pfə Yeso cwəlɔ gɔ dɑ mbak dzə dzʉm pu a mwɑ damnyəlamnyə pa' a bɑ nə ma pɑ Yudea nə lə nthəŋ mo a. A lə bɑ́ nə́ tsʉ' yə pu lə kwe Yeso nə bɛnyəpɛnyə nə a, kà pɑ tsʉ'u, mu' thəsì pɑ nthʉm kà bɔ tə pu guŋ nyəŋ sɔmmo nə́. A lə cyə m pa' pɑ Yudea lə bɑwə nyaptə nɑ tsap a, ba pa' ghʉ̌m bɔ lə bɑ̀ pɑ́ tsʉ' u a pu nyəŋ Yeso nthʉ́m o. A lə pɑ̌ nə dəŋdzə̀ tyɛ'dzʉ́ nə gap dzʉ́, kwa' mɑ́ mpʉmdzʉ̀, tə tsʉ́' yɑwə sonyə, Maria yə Makdala ghɔ thəsì, jɔ bɑ̀ pú cʉɔ gwɔ' nə thəsì. E khʉdʉ̌ ŋkwyatə́ Simon Pɛtrɔ pu yəmu' mukhʉ̌ yə́ Yeso lə ŋkhuŋ e a gɔm bi pu gɑ: Pú té Cyəpɔ thəsì, la' pyə zhyə tsʉ' yə pú yap é nə a. A lə́ pɑ̌ po' Pɛtrɔ pu yəmu' mukhʉ̌ tə́m gɔ thəsì. Pa' wap pɑpʉə lə bɑwə́ bəmtə́ khʉdʉ a, yəmu' mo lə ŋkhʉdʉ̌ shyə Pɛtrɔ dəŋdzə ŋwak thəsì, bɔnyə, jɔ mbak dzə́ bɑ pu yap tsʉ'u. Da' gɑ́ e lə ko nthʉm sì. Simon Pɛtrɔ yə e lə bɑ jʉ̀m e a, lə ŋwak yə thəsì ŋkho nthʉm sì, jɔ mbak dzə bɑ pu yap. Ba dzə yə pu lə nə hwyə thə e a, bɑ pu ka yap bəŋ mbak dzə, bɑ pu tsʉmtə jap pɑ nə yə́ tsʉ'. A lə pɑ̌ po'o tə́ yəmu mukhʉ̌ yə e lə ləŋdzə ŋwak a piŋ ŋkho yə́ nthʉm sì; jɔ́ biŋ bíŋ. A lə nə pɑ̌ po'o bɑ wap ka wuŋ ju' ywə yə a bɑ pu lé bvə gɑ́ Yeso gɔ la' yam nə vʉ̌ a. A pɑ́ po'o pɑkhʉ̌ pɑnyə mla' map. Maria lə́ bɑ ě wuŋ bəŋ thəsì m dzʉ̌ bɑwə dɔ̌. E lə pɑ̌ dɔ, bɔnyə bɑ de thəsì biŋ jɔ pɑ aŋgəle pɑpʉə, bɑ wap kwa dzə fə́fə́, shwə tsʉ' yə pu lə yap pfə Yeso nə a, mu' pɑ nə thə́ e, yə mu' pɑ nə mkwə myə́. Wap lə ghɔ̌m bi e gɑ: Mɑmjwi o dɔ kɑ? E pa' bi pu gɑ: Wáp bɑ wáp té Cyəpɔ à, la' jyə́ tsʉ' yə wap yap e nə a. E lə pɑ gɔm po'o, fɛ nɑ e jɔ Yeso bɑ ě tiŋnyə tsʉ'u, da' gɑ̀ e la tə bɑwə jyə gɑ e Yeso pɑ̀. Yeso ghɔm bi e gɑ: Mɑmjwi, o dɔ kɑ? O shəŋ wɑ? Pa' e lə́ bɑwə ŋkwɛ gɑ pɑ byap kà nə lə́ bɑwə gɔm a, e lə pǎ' bi e gɑ: Cyəpɔ a pɑ́ bɑ wə nə nthé é, o siŋ a tsʉ' yə́ o jap e nə a gɔ dɑ e. Yeso ghɔm bi e gɑ: Maria. E wuŋ fɛ nɑ e gɔm bi e nə ghɔm Ebraika gɑ: Rabuni, a pɑ́ da'tə gɑ: Tá gɛ zhi'tə. Yeso ghɔm bi e gɑ: Kɑ̀ kyəp á! Nə pa' ŋ kha wuŋ ŋkwɔ' bəŋ Tá ǎ. Sɔ' m nə wə, ghɔ jɔ mfɑ pɑ̌ gɔm bi pú gɑ gɑ̌ kwɔ' m bə̌ŋ Tá ǎ yə e bɑ Tá yɔ a, bəŋ Si a yə e bɑ Si yɔ a. Maria yə Makdala lə sɔ' cwəlɔ siŋ pɑkhʉ̌ gɑ: Gɑ̌ yɔ Cyəpɔ, e ghɔm bəm po'o. A lə pɑ̌ pɑ́ bwadzʉ̌ bɔ yə a lə bɑ́ dəŋdzə̀ tyɛ'dzʉ nə gap dzʉ́ a, jyədyə̌ nə pa' yə pɑkhʉ̌ Yeso lə bɑ́ nthʉ́m o a pɑ́ bɑ pu yo', bɑ bwɔk pɑ Yudea. Yeso lə ŋwak cəcɑ̌ pú gɔm bi pú gɑ: Hwitə̀ pɑ́ bi po. E lə́ nə ghɔm bɑ́ da'tə wap bú myə́ ba be é. Pɑkhʉ̌ lə nə yɔ Cyəpɔ ŋwɛnyə̀ ló nə́ pú. Yeso piŋ gɔm bi pu m sə́ gɑ: Hwitə̀ pɑ́ bi po. Dəŋdəŋ pa' Tá nthəm a, ba myə̀ yɑ̌ gɑ̌ təm wɔ. E lə ghɔm po'o fɔk zhwenyə e nə́ pu biŋ gɔm bi pu gɑ: Po kwi Zhwenyə Dɔlɔ̌. Pɔ pyə pǒ lɑ mhɔ map shwyɛ' wap a bɑ pu gɔ lɑ mhɔ map cwyɛ' wap. Pɔ pyə́ pǒ sɛ́ mhɔ map a, bɑ pú gɔ sɔ' sɛ mhɔ map. A lə́ nə pɑ̌ po'o Tomasi, mu' mo nə pɔ shwɔppʉə mghǎm, mo yə pú ŋkhe e gɑ Didimə a lə pɑ́ pu a pú nə cwə yə Yeso lə́ ŋwak a. Pyə shɑ́ pɑkhʉ̌ lə ghɔm bi e gɑ: Pyə̌ yɔ Cyəpɔ. E pa' bi pu gɑ: Ŋ bɑ́ tə yɔ mfa mtʉɔ nə bú myə́, bɑ́ tə twɔk nthə́ pu a nə tsʉ' mtʉɔ, biŋ bɑ́ tə́ twɔk pú a nə be é, bɑ ŋ tə́ gɔ piŋ pɑ́. A lə pɑ́ po'o, a nə cyə tyɛ'dzʉ hɔ̌m, pɑkhʉ̌ kwi' shu'tə dyə, pu a Tomasi nə pɑ́ dyə́, Yeso lə ŋwǎk, nə ŋwak bɑ pu yo' guŋ mjyədyə̌ awɛ. E lə tiŋnyə cəcɑ̌ pú, gɔm bi pu gɑ: Hwitə́ pɑ́ bi po. Biŋ gɔm bi Tomasi gɑ: Lɑ nthə pu o nə sɔ' tsɔ'ɔ biŋ dé bu mə̌ tə́ jɔ; lɑ pú o nə sɔ' nyəŋ bě m̀; tak nə zhʉ'nyə nə́ŋ, ji mbɛ gɛ piŋnthʉm. Tomasi pa' bi e gɑ: Cyəpɔ a biŋ bɑ́ Si a. Yeso ghɔm bi e gɑ: A cyə m pa' o jɔ a á o piŋ: Mpùŋtse bɑ́ pɔ pyə wap piŋ tə yɔ a. Yeso lə piŋ gə shɑ mtiŋ msya dzə̌ pɑkhʉ̌ pyə, myə a bɑ pú ka və́ nthʉm ŋwa'nyə yəŋ a. Mɔ myə pú lə və a, pú lə́ bvə po'o gɑ po nə biŋ gɑ Yeso bɑ Kristo, Mu Si, cwə yə́ po piŋ po'o a, pó cyə m nə tso tsyə gə́ vɔk. Mnwə́ bɔ lə cyə̌, Yeso kwi' da'tə nɑ e bi pɑkhʉ̌ pyə́ kə́ŋ shyə́ lɑpʉə Tiberia. Pá' a lə́ nə shyə́ a bɑ gɑ́: Simon Pɛtrɔ ba Tomasi yə́ pú ŋkhe e gɑ Didimə ba Natanaɛl mú e Kana m Galilea pu a pǒ Zebede ba shɑ́ pɑkhʉ̌ pɑpʉə lə tǎmtə sí. Simon Pɛtrɔ ghɔm bi pú gɑ: Gɑ gɔ m nə ghəm bapgu. Wap ghɔm bi e gɑ: Pɑ̀ gɔ pəmtə́ ghɔ. Wap lə təm cwəlɔ, ŋkho kənu', da' gɑ wap la tə́ ghəm sɔmywə mtsʉ́' bɔ. A lə pɑ̌ fɔkdzʉ̌, Yeso sɔ' nthiŋnyə kəŋ shyə, da' gɑ la' pɑkhʉ̌ pyə pɑwə jyə gɑ a yʉ́ Yeso. E ghɔm bi pú gɑ: Pɑkhʉ, pó ka ghə múywə bapgu a? Wap pa' bi e gɑ: gɛ̌. E ghɔm bi pu gɑ: Po ma' nthənthɔm yɔ m nə́ ghə̌ŋ tʉɔ nə kənu' tə́ jɔ! Wap lə́ mǎ', gəm bapgu tə la' wap piŋ fəŋ nthənthɔm yap jyə nə́ nə nthəm shyə pɑ̀. Mukhʉ̌ yə Yeso lə ŋkhuŋ é a ghɔm bi Pɛtrɔ gɑ: A bɑ́ Cyəpɔ! Pɛtrɔ lə cwətə ju' gɑ a Cyəpɔ, pa' dzə la tə́ bɑ nə e a pɑ, e wuŋ jwe tap e, ja' bvʉ́ shyə. Pyə shɑ pɑkhʉ̌ lə lɑ̌ kənu' sɔ' kəŋ shyə, bɑwə fəŋ nthənthɔm bɑ bapgu lo nə́, nə pa' wap la tə́ bɑ́ gʉə sʉəsʉə nə kə̌ŋ shyə pɑ́, wap lə bɑ̀ gwɛ a nə meta ŋkhə. Wap cwə̌ tə́ fi' si kəŋ shyə cwəlɔ, jɔ mɔ́k bɑ pu sù, jap bapgu ba pu' msɛ nə́. Yeso ghɔm bi pu gɑ: Po lɑ bapgu yə po gəm cwəlɔ a nə sɔ̌'. Simon Pɛtrɔ lə ko nthʉm kənu' cwəlɔ, fi' nthənthɔm, mmʉəmmʉ́ə bapgu duŋ shwɔptá m potɔ mŋkhə pɑ́ bɑ ǎ lo nthʉm o; tə́ ba tə pa' bapgu lə bɑ́ nthʉm o dəŋ po'o a, nthənthɔm lə hʉə pɑ̀. Yeso ghɔm bi pu gɑ: Pó sɔ' dzʉ́ywə; la' sɔm mukhʉ̌ ghə kaktʉɔ nə həŋtə́ é gɑ: O bɑ́ wɑ? Da' gɑ wap lə bɑwə shəŋtə jyə́ gɑ e lə́ bɑ Cyəpɔ. A lə pɑ̌ po'o Yeso sɔ'; bé msɛ́ hɑ bi pú; biŋ ŋkwi' hɑ ba bapgu bi pú. A lə́ bɑ́ po'o bɑ́ batə mcʉ̌m mnthá pa' Yeso da'tə nɑ e bi pɑkhʉ́ pyə a, tə fɑ pa' e lə yǎm nə vʉ̌ a. Nə tsʉ́ ywə lə nə mì, Yeso ghɔm bi Simon Pɛtrɔ gɑ: Simon mú Yohane tə́ o ŋkhùŋ a tə shyə́ pɔ pɔŋ gɑ́ lə? E pa' bi e gɑ: Əŋ m Cyəpɔ, o bɑ ǒ zhyə́ gɑ́ gɑ̌ ŋkhùŋ o. Yeso piŋ gɔm bi e gɑ: Khim pó jʉ̀jʉ̀ pɑ̌. Yeso lə kwi' gɔm bi e batə mcʉ̌m bʉ́ə gɑ: Simon mú Yohane tə́ o ŋkhúŋ a lə́? E pa' bi e gɑ: Əŋ m Cyəpɔ, ǒ bɑ ǒ zhyə gɑ́ gɑ̌ ŋkhùŋ o. Yeso ghɔm bi e gɑ: Pɑ́ gɛ pyap jʉ̀jʉ̀ tsɑ̌. E lə kwi' gɔm bi e batə mcʉ̌m nthá gɑ Simon mú Yohane tə́ o ŋkhùŋ a lə́? Simon lə́ yɛ̌lúŋ pa' e həŋtə e batə mcʉ̌m nthá gɑ o ŋkhùŋ a lə́? Biŋ gɔm bi e gɑ: Cyəpɔ, wə yə́ ó bɑ ǒ zhyə́ guŋ ywə awɛ a, ǒ zhyə́ pɑpuŋ gɑ́ gɑ̌ ŋkhùŋ o. Yeso piŋ gɔm bi e gɑ: Khim jʉ̀jʉ̀ tsɑ̌. Kwa' nyənyɔ nyənyɔ gɑ̌ ghɔm bu, cwə yə́ o lə́ bɑ mú səm a, o pɑ́ jwé tap o, bɑ gɔ tsʉ' yə o kuŋ a; cwə yə o gɔ sɔ' vo a, o pɑ ŋkhá' bú mǔ, mu' mo nə zhwe tap o, bɑ dɑ o gɔ tsʉ' yə o ka kuŋ a. Yeso lə́ gɔm po'o bɑ nə da'tə nthi vʉ̌ yə Pɛtrɔ lə bɑ gɔ sɔ' nə ghu'tə Si a; e lə ghɔ́m ghɔm bɔ biŋ ŋkwi' gɔm bi Pɛtrɔ gɑ: Yap jʉ̌m m̀. Pɛtrɔ lə fɛ̌ nɑ́ e jɔ mukhʉ̌ yə́ Yeso lə ŋkhuŋ e a jʉm e. Mo yə e lə pɔ nɑ e nə kəkɔp e cwə yə́ wap lə́ bɑwə dzʉ́ywə a gɔm bi e gɑ́: Cyəpɔ mo yə e bɑwə gɔ hɑ o bɑ wɑ? Pɛtrɔ lə yɔ e, gɔm bi Yeso gɑ: Sɔ' m nə e, e gɔ sɔ' pɑ m gɑ́ kɑ? Yeso pa' bi e gɑ́: Ŋ ŋkhuŋ gɑ e pɑ́ pɑwə tə̌ ŋ da' sɔ̌', bɑ a gɔ ghə la m wə̀? Sɔ' m nə wə, yap jʉ̌m m̀. A lə́ fɑ nə́ ghɔm tsɔ gɑ tə pu pɑ gɔm cəcɑ̌ mfɑ mfɑ́ gɑ mukhʉ̌ bɔ tə́ gɔ la' pfʉ́ pɑ́. Tə a pɑ́ nyənyɔ gɑ Yeso la tə ghɔm bi e gɑ́ e tə́ gɔ la' pfʉ́ pɑ́; da' gɑ́ e lə shəŋtə gɔm m gɑ́: Ŋ da ŋkhuŋ gɑ e pɑ́ pɑwə tə̌ ŋ da' sɔ̌' bɑ a gɔ ghə la m wə̀? Mukhʉ̌ bɔ nə ŋkwinthɛ̌ nə mɔ mnwə, biŋ bvə má; bɑ pyə̌ nəŋ jyə́ gɑ mkwinthɛ myə́ bɑ pa' nyənyɔ shəŋ a. Yeso lə́ ghə̌ shɑ mnwə tə ǎ yɔ́m: tə bi a pɑ́ pu lə pé'e bɑ gɔ və pɑ yɑmu' yɑmu' bɑ guŋ dzʉ̌ awɛ gɔ kɔk nə pa' bi a ŋwa'nyə yə pu gɔ və nə á gɔ ko nə a. Teofilə, guŋ ywə awɛ yə Yeso lə ghə biŋ ji'tə tə fɑ nə́ nə ntho' tə gɔ́ ŋkhəm nə tyɛ'dzʉ yə e lə cyə m nə Zhwenyə Dɔlɔ̌ siŋ pɑkhʉ pyə pyə̀ e lə cwɔ' wap a ywə yə e shəŋ a, tə ŋkwɔ' kɛbəŋ a, dě bvə nthʉm dzə ŋwa'nyə a. Cwə yə e lə yɔgo' npfʉ́ biŋ jam nə vʉ̌ bɑ pɑ́ nthʉɔ a, e lə la'tə nɑ e pɑ bi pɑkhʉ pyə bɔ, da'tə nthinthi mtiŋ bi pu, gɑ wap nə jyə́ é; e lə la'tə nɑ e bi pu nə mtyɛ'dzʉ mghappfʉə, bɑ siŋ wap nwə nə Nəfo Si. Cwə yə pu a pú lə pɑwə dzʉywə a, e hɑ mco' bi pu gɑ ka wap təm Yerusalɛm, gɑ wap cwə pɑ wə́ byap ywə yə Ta lə ka'nyə bi pu a. Gɔm bi pu gɑ: mka'nyə myə po lə yu' bəm a, nə pa' Yohane lə nu' pɔ pɑ shyə, tə a cʉ' po mtyɛ'dzʉ pu nu' wɔ nthʉm Zhwenyə Dɔlɔ̌. Wap lə cu'tə həŋtə e gɑ: Cyəpɔ, a bɑ cwəlɔ tə o gɔ piŋ tʉ Nəfo Israɛl a? E ghɔm bi pu gɑ: A tə yɔ shɛ nə zhyə cwə ba wɔ dzʉ yə Ta jap nə pa' e zhyə a pɑ̀. Da' gɑ po gɔ sɔ' kwi tʉɔ, a tʉɔ Zhwenyə Dɔlɔ̌ yə a gɔ sɔ' nə po á, po cʉ' mghɛ kwinthɛ pɑ̌ Yerusalɛm, ba m nthʉm guŋ Yudea awɛ, ba m Samaria, tə gɔ ŋkhəm nə dhə dzʉ́. E lə ghɔm po'o, wap yɔ pa' e ŋkwɔ' gɔ a, mlwa sɔ' sam e, nthé é nə mnyə map. Pa' wap lə pɑ nthʉ mnyə map nə dé kɛbəŋ pa' Yeso wə gɔ a, wap wuŋ jɔ pɔpʉə bəŋ pu bɑ wap kwa mfə dzə. Pɔ bɔ ghɔm bi pu gɑ: Pɑ Galilea, nwə kɑ po cwə tsa' a bɑ de kɛbəŋ? Yeso yɑ yə pu nthé e cəcɑ̌ po nə gɔ m kɛbəŋ a gɔ la' kwi' sɔ' pɑ pa' po jɔ e ghɔ m kɛbəŋ a. Pɑkhʉ̌ pyə lə fɑ kuŋ mthə Olivə gɔ Yerusalɛm. Kuŋ bɔ bɑ nə nthə ghiŋ yə pu biŋ nə ghiŋ nə Sabat a. Wap lə pɑnyə, ŋkwɔ' mtwɔ'dyə̌ nə zhə̀ŋ dyə́ thə́, tsʉ' yə wap lə shu'tə nə a. Wap pyə wap lə bɑ tsʉ'u a lə bɑ Pɛtrɔ, gə Yohane, gə Yakop pu Andreya; Filipo pu Tomasi; Batəlemi pu Matio. Yakop mu Alfeo, Simon Zelot ba Yuda mu Yakop. Guŋ yap awɛ lə bɑ pɑ ŋkwishwə, bɑ nthamtə shwyɛ'nyə Si guŋ mcwə awɛ pu a shɑ pɑ jwǐ pa' Maria má Yeso a bɑ mfɑ̌ Yeso. A lə pɑ nə mtyɛ'dzʉ bɔ Pɛtrɔ lusi cəcɑ̌ mfɑ̌mfɑ bɑ wap cu'tə tə bɑ gwɛ a pɔ popʉə m ŋkhə gɔm gɑ: Mfɑmfɑ, a lə bɑ shəŋ gɑ ywə yə Zhwenyə Dɔlɔ̌ lə ghɔm nthʉm ŋwa'nyə shyə̀ m nə shwə David gɔm tə tyɛ' a pəmtə nə Yuda yə e kɑ cʉ' gɛ la'tə məjyə bi pɔ pyə wap kɑ ghəm Yeso a. Pɑ a pu lə́ nə́ bəmtə bɑ, bɑ ě kwi tsyə́ fa' nə fa' tsɔk pɑ. A bɑ bɛ bɔ lě dɑ ŋkhap mnwə cwəpuŋ jo ca'; biŋ dɑ thə e bvʉ̌ bvyə́, tsə vam tsyə sɛ pě. Guŋ pɑ Yerusalɛm lə zhyə́ awɛ, a cyə m po'o wap ke cǎ' bɔ nə ghɔm tsap gɑ Hakəldama, a la'tə gɑ cǎ' mcyə. A bɑ pu le shəŋtə bvə nthʉm ŋwa'nyə mzhwɔp gɑ: La' tsyə cʉ' famla', sɔmmo kɑ cwə nə. Biŋ kwi' bvə gɑ: Mu' mo kwi tsyə fa'. Shɑ pɔ sì pyə pa pú lə bəmtə bɑ̀ nə guŋ mcwə awɛ yə pa Cyəpɔ Yeso lə pɑ̌ e pɑ́ sa' wɔk pɑ a, tɑ fɑ nə kwishyə Yohane gɔ ŋkhəm nə tyɛ'dzʉ yə e lə tə̌m cəcɑ̌ pɑ a. A ta' mo nə pu cʉ' mu' gɛ kwinthɛ pa' wɔk pɑ a, nə nə́ yam nə vʉ̌ é. Pu lə la'tə pɔpʉə: Yosɛp yə pu ŋkhe e gɑ Barsabas ba m gɑ Yustos, biŋ gə Matiasi. Pu lə piŋ shwyɛ'nyə Si gɔm gɑ: Wə Cyəpɔ yə o bɑ o zhyə mtʉm guŋ pɔ awɛ a, la'tə yə mo yə o cwɔ' e nə pɔ pɔgɑ pɑpʉə a, po'o gɑ e ko nthʉm fa' mghɛ nthəm nə tsʉ' yə Yuda kɑ wa' a, gɔ m nə yə nthi tsʉ' a. Pu lə tǎmnthuŋ a tsʉ Matiasi; tə fɑ cwə bɔ pu nyəŋ e cəcɑ̌ mghɛ nthəm pɔ shwɔp a mu' mgham. Tyɛ'dzʉ Pantekɔtə lə nə sɔ', bɑ guŋ yap awɛ cu'tə́ nə ta' tsʉ', pu lə wuŋ nə yu' ywə zhwyanyə kɛbəŋ pa' mɑ fəfa gwyə a: Dyə tsʉ' yə wap lə bɑ nə a lo ywə bɔ̌, a ŋwa' pa' mgwa mɔk a, gaptə bɔnyə ba a nə ya mo lə́ nə pu. Zhwenyə Dɔlɔ̌ lo nə guŋ yap awɛ. Wap pɑ gɔm shɑ́ mghɔm dyɛ', myə Zhwenyə Dɔlɔ̌ hɑ gɑ wap ghɔm a. A lə nə pɑ̌ po'o bɑ pɑ Yudea, pɑ lə mku' biŋ Si pɑ bɑ wap fɑ nə guŋ mguŋ to kɛbəŋ awɛ bɑ Yerusalɛm. Pɔmnəŋ lə nə yu' zhwyanyə sɔ' kwa' vəŋ e. Nwə pɑ shyə wap nə pa' bǎ ya mo lə lə bɑwə ju' ywə yə wap lə bɑwə gɔm a pɑ nə ghɔm tsyə. Nwə pɑ shyə wap bɑ jʉm wap wap pɑ́ gɔm gɑ: Guŋ pɔ pɔ́ gɑ pyə wap bɑwə gɔm a tə bɑ pɑ Galilea a lə? Tə a shyə m gɑ kɑ tə ba a ya mo lə nə pɑ̀ pɑwə ju' wap pɑ nə ghɔm tsyə? Pɑ Parta, pɑ Mɛdo, ba pɑ Elamita, ba pɑ Mesopotamia, pɑ Yudea ba pɑ Kapadokia, pɑ Ponto ba pɑ Azia pɑ Frugia ba pɑ Pamfilia; pɑ Egipto ba pɑ ghəŋ Libia, pɑ Kirena ba pɑ Roma pyə wap tsɔ' a. Guŋ pɔ awɛ, pɑ Yudea ba pɑ piŋ nwə yap; pɑ Kreta ba pɑ Arabya, pɑ si bɑwə ju' pa' wap wə gɔm msya Si a nə ghɔm tsɔk pɑ̀. Nwə pɑ shyə wap, wap yak ywə yə wap ghɔm a gɔm cəcɑ̌ pu gɑ: yəŋ kɑ nthi nwə? Shɑ pɔ pɑ gwi wap gɔm gɑ: pyanyə́ mlu' bɑ a lo nə pu. Pɛtrɔ yə pu a pɔ shwɔp ya mu' mgham lə bɑ a lə ghɔm tə thə gɑ: Wɔ pɑ Yudea, ba guŋ yɔ awɛ pyə pǒ shwə Yerusalɛm a, po cəŋtə ju' ywə yə a wə shyə a, biŋ nthéŋ mtəŋ nə mghɔm mə̌. Gɛ̌! Pɔ pɔ gɑ ka nwə́ pa' pǒ wə ŋkwɛ a, nə pa' pɑ jɑ pɑ́ fɔkdzʉ̌, nə mnam vʉ̌'. Ywə yə a bɑwə shyə a, bɑ ywə yə gɔm mghɔm Si Yoɛl lə la' gɔm a: Nə pa' Si lə ghɔ̌m gɑ: A gɔ sɔ' pɑ nə jyɔjʉm tyɛ'dzʉ a sɛ Zhwenyə a nə guŋ bapnɑ pɔ awɛ. Pó pɔ́ pyə pɑ bɛ ba pyə pɑ jwǐ cʉ' mghɛ ghɔm ghɔ̀m Si. Mŋkhɛ mo pɔ́ pɑ jɔ nə yɔ m nthʉm zhwenyə, mvo pɔ pɔ́ pɑ jɔjʉm. Əŋ, gɑ gɔ sɔ' sɛ Zhwenyə a nə mghɛ fa' pɑ̌ pyə pɑ bɛ bɑ pyə pɑ jwǐ, nə Tyɛ'dzʉ bɔ a sɛ Zhwenyə a nə pu, wap cʉ' mghɛ ghɔm ghɔ̀m Si Gɑ̌ gɔ sɔ' te msya kɛbəŋ piŋ la'tə mtiŋ dəmcǎ', a pɑ mcyə, mɔ̌k ba dhə mɔk. Nam gɔ sɔ' kwyəpnyə cʉ' jʉ́m. Mɑŋwə́ cʉ' mcyə. Tə tyɛ'dzʉ Cyəpɔ sɔ', tyɛ'dzʉ gwyə́, tyɛ'dzʉ ghu'tə. Po'o bǎ ya mo lə yə é gɔ sɔ' ké tso Cyəpɔ a gɔ sɔ' vɔk. Pɑ Israɛl po yu' mghɔm mɔ gɑ: Yeso yə Nazarɛt, bɛ yə̌ŋ yə Si lə cwɔ' e nthəm e bəŋ po, shyə́ m nə e gə nthinthi msya pu a nthinthi mtiŋ cəcɑ́ po pa' po zhyə a, nə da'tə mtʉ̀ɔ myə́. Bɛ bɔ, pa' Si lə tsə zhyə biŋ jap a, po le fiŋ e, nə zhwə e, gə pɔ cwəpuŋ kam e thə bɛnyəpɛnyə, da' gɑ́ Si lé jam e nə vʉ̌, ŋkwi e bi gǒ' vʉ̌, nə pa' a lə bɑ́ bi a pɑ́ vʉ̌ lə lɑ́ gʉ' e nə nthɔm e pɑ. David gɔm nə e gɑ: Ŋ də́ bɑ́wə jɔ Cyəpɔ pɑ dzə̌ m̀ nə pa' e bɑ́ nə ghə̌ŋ pu a yə tʉɔ po'o gɑ ka lam tsɑ̌ sɔ. A pɑ́ po' o tʉm tsɑ pɑ nthʉm ŋwɛ́nyə̀, shwə̀ a pɑ jwɔp mŋwɛ́nyə̀. A kwi' bɑ́ pó'o gɑ́ ŋ sɔ' bɑ shwə nə mɔktə nə bapnɑ a. Nə pa' o tə gɔ sɔ' tak vɔk á bi vʉ̌ pɑ, o lə nəŋ bíŋ gɑ mo dɔlɔ̌ o pi. A bɑ o la'tə á məjyə̀ vɔk o gɔ sɔ' lə pa' o gɔ pɑ bəŋ m̀ a nə nyəŋ ŋwɛ́nyə̀ nə m̀ tə a ló. Mfɑ́mfɑ́, a puŋ nə siŋ wɔ sɔ́sɔ̌ gɑ́ ta yɔk pɑ David bɑ e lě pfʉ́, pú lé nthəŋ e, thəsì é nəŋ jɑ pɑ́ cəcɑ̌ pɑ. Tə é lə bɑ gɔm ghɔ̀m Si, jyə gɑ ɑ́ bɑ Si lě ŋkha' bi é, biŋ ŋkhɔ mkɔ gɑ é gɔ sɔ' yap mo nə kwɔ' é, e təm pɑ nə ŋkhənyə e, bɑ́ gwya é. E lɑ́ ləŋdzə jɔ nə́ yam nə vʉ̌ Kristo, tə́ gɔm nə́ é gɑ: Pu lé tə wa' é guŋ a vʉ̌, la' nɑ é nəŋ bǐ pɑ́ Yeso bǎ, Si lé jam é nə vʉ̌. Guŋ yɔk pɑ awɛ nəŋ bɑ́ mkwinthɛ́. Pú tʉɔ Si lé ŋa' é hɑ thə́, Tá hɑ́ Zhwenyə Dɔlɔ̌ yə é lə ka' á bi e, e sɛ pa' po wə jɔ biŋ ju' a. David lě tɑ́ kwɔ' kɛbəŋ, da' gɑ e le gɔm gɑ: Cyəpɔ ghɔm bì Cyəpɔ a gɑ: cwə nə ghəŋ pu a yə tʉɔ. Tɑ̌ ŋ də mghɛ bò pǔ nə gə kwɔ̀' tʉ mkwə mǔ. Guŋ tuŋdyə́ Israɛl zhyə́ nyənyɔ: Si bɑ é lé dɑ Yeso bɔ yə po lə kwé é thə́ bɛnyəpɛnyə a nə gə Cyəpɔ ba Kristo! Wáp lə yú' mghɔm bɔ̌ á paknyə tʉm tsap. Wap hə́ŋtə̀ Pɛtrɔ, ba pyə shɑ mghɛ nthəm gɑ: Mfɑ̌mfɑ́ pyə gɔ́ ghə̀ gɑ́ kɑ? Pɛtrɔ pa' bi pu gɑ: Po kwyəpnyə́ bǎ ya mo lə́ nə po kwishyə nə tso Yeso Kristo nə lɑ mhɔ myə́ shwyɛ́' é, po piŋ kwi Zhwenyə Dɔlɔ̌. Nə pa' mka'nyə bɔ bɑ̀ bi po ba m bi pó pɔ́, ba m bi pɔ pyə wap tə gʉə sʉəsʉə a nə dəŋ pa' Cyəpɔ Si yɔk pɑ gɔ sɔ' nə kè wap a. Pɛtrɔ lə́ lɑ shɑ nthinthi mghɔm nyəŋ gʉ' nə pu biŋ bɑ ŋkwinthɛ̌ bɑ gɔm gɑ: Po vɔk nɑ tsɔ nə yəŋ wɔ̌ dzʉ cwəpuŋ. Pɔ pyə wap lə piŋ ghɔm tsyə́ a, lə kwishyə, pɔ gwɛ a sha'tá piŋ nthamtə nə pu tyɛ'dzʉ bɔ. Wap lə bɑ si guŋ mcwə awɛ bɑ ŋkhaktʉɔ nə jí' nwə mghɛ nthəm, bɑ nthamtə́ nə dzʉ̌nyə́ mfɑ̌mfɑ́, ba nə po'nyə msɛ̌, ba nə cwyɛ'nyə Si. Pwɔk lɑ bɑ́ nə gúŋ pɔ̀ awɛ: mghɛ nthəm pɑ gə msya pwa mtiŋ nthinthi. Guŋ pɔ pyə wap lə piŋ a lə bɑ́ pɑ́ ŋkwishwə, bɑ nthamtə guŋ tsə tsap tamtə. Wap lə bɑ fiŋ mbé map ba tsə́ tsap, gaptə ŋkhap cəcɑ̌ guŋ yap awɛ, hɑ bǎ yə wɑlɑ nə dəŋ mnwə myə́. Wap lə bɑ guŋ mtyɛ'dzʉ awɛ bɑ gɔ Dyə Si, bɑ bo'tə msɛ mdyə map, bɑ dɑ ŋwɛ́nyə̀ dzʉywə, tə ŋa'nɑ. Wap lə bɑ go'tə Si, guŋ pɔ awɛ pɑ dɑ wap kwá' pɑpuŋ. Cyəpɔ pɑ guŋ mtyɛ'dzʉ awɛ ŋkwi' pɔ pyə wap kwi ywə vɔk a nə cu'tə pɔ pyə. Pɛtrɔ pu Yohane lə pɑ bʉɔ gɔ m Dyə Si, cwə nə cwyɛ'nyə Si nə mnam tá, bwádzʉ̌. Pu lə bɑwə dɑ mu' mbɛ e pɑ ŋkho'tə tə fɑ tyɛ'dzʉ́ yə pu lə tsə e a, nə gɔ m wə, nə pa' a lə bɑ́ guŋ mtyɛ'dzʉ awɛ, pu pɑ jap bɛ bɔ jyə Dyə Si yə pu ŋkhe gɑ buŋ jyə dyə a, e pɑ do ywə hɑ́hɑ̌ bi pɔ pyə wap lə ŋkho Dyə Si a. E lə nə yɔ Pɛtrɔ pu Yohane pa' wap lə bɑ́wə gɔ ko Dyə Si a, ma' bu bi pu nə do ywə hɑ́hɑ̌. Pɛtrɔ pu Yohane lə lě e dəŋdəŋ gɔm bi gɑ: Cʉ wɔk. Bɛ bɔ lə pɑ diŋtə wap bɑ byap gɑ wap hɑ ywə bi e. Pɛtrɔ ghɔm bi e gɑ: Ŋ khɑ ghə gɔl kɑ ŋkhap lə, tɑ́ ywə yə gɑ̌ ghə a, gɑ gɔ hɑ bu: Nə tso Yeso Kristo yə Nazarɛt, ghǐŋ! E lə piŋ nthɔm e nə ghə̌ŋ pu tʉɔ bʉ' e si. Pɑ cwəo cwəo mkwə bɛ bɔ pu a mlɔm myə́ wuŋ nthʉɔ. E léŋ nthiŋnyə thə, biŋ giŋ. Pu a pu pəmtə ŋkho Dyə Si, e pɑwə giŋ, dhə́tə̀, jwɔp tso Si. Guŋ pɔmnəŋ awɛ lə yɔ e pa' e wə giŋ a, bɑ jwɔp tso Si. Pu tiŋ e, yʉ yə e lə shwə́ shwə̀ Buŋ jyə dyə bɑ do ywə a. Nwə lə cyə pɔmnəŋ, bva' wap nə mu' nthi nə nwə yə a lə təm nə bɛ bɔ a. Bɛ́ bɔ lə bɑ́ guŋ mcwə awɛ bɑ pɑ́ pu a Pɛtrɔ pu Yohane; guŋ pɔ awɛ pɑ ŋkhʉdʉ́ sɔ' bəŋ pu, nthʉm pəŋ yə pu ŋkhe gɑ́ pəŋ Salomoŋ, nwə pɑ́ shyə wap. Pɛtrɔ lə yɔ po'o gɔm nwə bi pɔmnəŋ gɑ: Pɑ Israɛl, nwə kɑ nwə yə a nthəm a pɑ shyə wɔ? Nwə kɑ po cʉ wɔk mtiŋ pá' pyə dɑ pɑ́ yɔk gʉ́' kɑ yɔk nə lɑ mku' biŋ lə, tə nə gə bɛ yəŋ gɑ̀ ghiŋ a? Si Abraham, ba Isak pu Yakop, Si mtá pɔk pɑ̀ bɑ̀ e ghu'tə Ŋkwɔ e, Yeso, yə po lə fiŋ e, ŋkhəŋnyə e dzə Pilato yə e lə bɑwə shəŋ nə tak e nəŋ a. Po lě ŋkhəŋnyə mo dɔlɔ̌, mo dəŋdəŋ, həŋtə gɑ pu tak jwə mo nəŋ nə yə tsʉ'. Mu fo vɔk yə po lə zhwə e a, Si lě jám e nə vʉ̌. Pyə bɑ mghɛ ŋkwinthɛ̌ nə́. A shyə m nə piŋnthʉm nə tsǒ Yeso. Tso bɔ nə gə tə bɛ yə̌ŋ, yə po wə jɔ e bɑ po nəŋ jyə e a tʉɔ. Bɑ piŋnthʉm yə a fɑ bi Yeso a ghə e yɛ dzə̌ po. Mfɑ́mfɑ: Gɑ̌ zhyə́ gɑ po lə dɑ pɑ fʉmnyə nə gə, ba mtadyə pɔ. Si bɑ e lə ləŋdzə shyə́ nə mshwə mghɛ ghɔmnwə pyə gɔm gɑ Mesia gɔ sɔ' yɔgo', ě nəŋ gə a pəmtə̀. Po pʉɔ mtʉm mɔ, bɑnyə bi Si po'o gɑ pu vɑnyə mhɔnwə mɔ; a pɑ po'o cwə hwitə yə Cyəpɔ hɑ a, a sɔ' nə cwə yə e gɔ təm Kristo yə e lə la' ŋkha' e bi po a, Yeso yə kɛbə̀ŋ gɔ lɑ e tə kəm cwə yə guŋ ywə awɛ yə Si lə ghɔm shyə m nə mshwə mghɔm ghɔ̀m tsyə pyə dɔlɔ̌ cwə dzə á pəmtə a. Mosɛ lə ləŋdzə gɔm gɑ: Cyəpɔ Si gɔ sɔ' cwɔ' gɔm ghɔm tsyə pa' myə̀ a cəcɑ̌ mfɑ pɔ. Po gɔ sɔ' pɑ yu' guŋ ywə awɛ yə e gɔ ghɔm bi po a. Bǎ ya mo lə yə e ka yu' shwə gɔm ghɔm Si bɔ a, bɑ pu gɔ té é cəcɑ̌ pɔ Si. Guŋ mghɔ́m ghɔm Si awɛ tə fɑ nə Samuɛl pu a mtsʉdyə pyə nə map mzhəŋ lə ghɔm ghɔm nə mtyɛ'dzʉ mɔ gɑ myə pɑ nə a. Kwa' wɔ nə́ bɑ po mghɛ mghɔm ghɔm Si, ba kɔ tsyə̀ Si lə wa pu a mtá pɔ á, nə cwə yə e lə gɔm bi Abraham gɑ: A gɔ sɔ' cyə m nə gwya o byanyə pɑ nə guŋ mtuŋdyə dəmca' awɛ. Si bɑ e ləŋdzə shwɔ' biŋ nthəm ŋkwɔ e gɑ e nyəŋ byanyə bǎ nə ya mo lə nə po, bi a pɑ́ yə pó fɛ mnyə mɔ nə mnwə cwəpùŋ mɔ a. Cwə yə́ Pɛtrɔ pu Yohane lə pɑwə gɔm nwə bi pɔmnəŋ a, mkamsi, ba tádyə dé Dyə Si ba pɑ Sadukai sɔ' bəŋ pu. Nwə lə́ bɑwə bɔk wap nə yɔ gɑ wap wə nthɔk pɔmnəŋ, ba nə nwə yə wap lə bɑwə gɔm nə Yeso gɑ mpfə pɔ jam nə vʉ̌ a. Wap lə ghə pu ghəm wap nyəŋ dyəcɛ̌, wap ti pɑ dyə cɛ tə dzʉ lɔ́, nə pa' a lə bɑ́ bwadzʉ̌ lə. Cəcɑ̌ pɔ pyə wap lə yu' ghɔm bɔ̌ a, pɔ tə jɔ́m lə pǐŋ. Pɑ piŋ lə bɑ gwɛ a pɔ sha'tɔ. Dzʉ lə lɔ̌, guŋ mthədzə awɛ, pu a mghətso, ba pɑ zhyə́ mco' pyə wap lə bɑ́ Yerusalɛm a cu'tə. Hana ŋkhamsi gwyə lə bɑ si, ba Kaifa, gə Yohane pu Aleksandrə ba guŋ pɔ awɛ nə mtuŋdyə mkamsi gwyəgwyə. Wap lə ghə pu lɑ Pɛtrɔ pu Yohane sɔ' dzə̌ pú. Wap həŋtə wap nwə gɑ: Po shyə m nə ya tʉ̀ɔ kɑ m nə tsǒ wɑ tə gə yəŋ gɑ nwə? Zhwenyə Dɔlɔ̌ lə lo nə Pɛtrɔ e ghɔm bi pu gɑ: Wɔ mthə́dzə guŋ ba mghətso, po bɑwə fyɛ' wɔk tyɛ' ɔ gɑ pyə ghə nwə pɑpuŋ bi ŋkho'tə, gɑ pyə ghɔm pa' a shyə tə bɛ yəŋ gɑ vɔk a. Guŋ yɔ̀ awɛ, ba guŋ pɑ Israɛl awɛ zhyə́ gɑ a shyə m nə tso Yeso Kristo yə Nazarɛt yə po lə́ kamtə e thə bɛnyəpɛnyə, Si piŋ jám é nə vʉ̌ a, tə bɛ yəŋ gɑ yə e dzə po a yɛ. Yʉ Yeso bɔ nə bɑ gwɔ̀' yə wɔ pɑ pə́m pà' lə wa' a, bɑ ǎ zhi gwɔ' phə pa'. Sɔmywə vɔ̀k tɑ́ bɑ nə sɔmtsʉ' pɑ́ tə ně da' nə Yeso Kristo. Nə pa' sɔm mu' tso tə to kɛbəŋ tsyə pu hɑ bi pɔmnəŋ bi a pɑ a kwitə wɔk pɑ nə hɑ vɔk bi pɑ a pɑ́. Wap lə yɔ mtiŋ pa' Pɛtrɔ pu Yohane wə nə shəŋtə gɔm nwə a, biŋ jɔ gɑ a pɔ bɑ wap ka zhi'tə ywə dəŋ ywə, bɑ pɔ tə pu jyə wap, nwə cyə wap. Wap zhyə̀ gɑ pu a Yeso lə ghǐŋ, wap lə lě mo yə e lə bɑ bəŋ pu a bɑ e cəŋtə jɛ̌, la' wap piŋ jyə̀ ywə yə wap gɔ ghɔm a. Wap lə ghɔm gɑ pu te Pɛtrɔ pu Yohane Sanedrɛŋ hɑ pé, biŋ sɛ́ cəcɑ̌ pu bɑ həŋtə gɑ: Pɑ gɔ ghə la m pɔ pɑ? Nə pa' wap nə gə mɔ gɑ msya nwə tə bɑ guŋ Yerusalɛm zhyə awɛ bi a pɑ pɑ̀ lə kə́ŋnyə. A puŋ gɑ́ pɑ ghə gɑ́ a kɑ piŋ sa pé cəcɑ̌ pɔmnəŋ. Pɑ gɔ paptə wap, wap kɑ piŋ ŋkhe tso bɔ dzə̌ sɔmmo. Wap lə piŋ ŋkhe wap dyə, sho' bi pu nə piŋ ŋkhe kɑ nə piŋ ji'tə tso Yeso lə́. Da' gɑ Pɛtrɔ pu Yohane pa' bi pu gɑ: Ywə dəŋdəŋ dzə Si bɑ pɑ nə yu' shwə yɔ kɑ nə yu' kwa' yə Si? Po yap pa' po yap a! Tɑ bi a pɑ pyə lə lɛtə nə ywə yə pyə jɔ biŋ ju' a. Pu lə paptə wap mcʉ́mmcʉ̌m, da' gɑ jak ywə yə pu gɔ cyə m nə nə́ nyəŋ shɛ thə pu a, nthak wap nəŋ. Bɑ́ bwɔk pɑ pɔmnəŋ nə pa' guŋ pɔ awɛ lə bɑwə gu'tə Si nə ywə yə a lə cyə a. Bɛ yə e lə yɛ́ msya yɛ̀ po' a lə bɑ e ghə gu'dzʉ mghappfʉə tə ntwɔk. Pu lə cwə tə nthak Pɛtrɔ pu Yohane nə́ŋ wap ghɔ nthɑ mso pap, siŋ wap ywə yə mkamsi gwyəgwyə pu a mghətso gɔm bi pu a. Pu lə yu' ywə yə wap gɔm a; guŋ pɔ awɛ tamtə gɔm bi Si gɑ: Ta, wə nə lə nyaptə kɛbəŋ pu cǎ', ba shyə lɑpʉə pu a tsə tsyə a nthʉm o a. O lě shyə m nə Zhwenyə Dɔlɔ̌ nyəŋ mghɔm mɔ gɑ shwə ta yɔk David gɛfa' o gɑ: Guŋ guŋ jwyanyə kɑ pu a mfa' pɔpɔ pɔmnəŋ? Mfo mfo ghə ŋkwishwə, mtadyə cu'tə, wap cʉ' ta' ywə yɑmu' tə lo' Cyəpɔ pu Kristo e. A nyənyɔ gɑ a bɑ wap cu'tə nthʉm tisuŋ yəŋ: Herode, Pontio pilato, pu a guŋ mguŋ awɛ, bɑ guŋ pɔ awɛ cʉ́m jʉ̌m Yeso, gɛfa' o yə Dɔlɔ̌, yə o lə zhwɔ' e a. Wap ghə guŋ ywə yə pǔ o pu a mkwɛnyə mǔ lə ləŋdzə jap á, a pəmtə. Cwəlɔ m Cyəpɔ, yɔ pa' wap wə baptə mghɛ fa' pǔ, hɑ gʉ' bi pu gɑ wap cəŋtə nə gɔm Ghɔm tsǔ. Siŋ pǔ m Ta, mgho yɛ̌, mtiŋ pu a msya təm shyə m nə tso Yeso gɛfa' o yə dɔlɔ̌. Wap lə mǐŋ nə cwyɛ'nyə Si, dyə yə wap lə bɑ nthʉm o a cʉ'nyə; Zhwenyə Dɔlɔ̌ lo nə pu awɛ, wap pɑ shəŋtə gɔm ghɔm Si. Vəŋ du pɔ pyə wap lə cʉ' pɑ piŋ a lə́ bɑ wap ghə pɑ ta' tʉ̌m tsɑ mu', ba ta' zhwenyə yɑmu'. Sɔmmo lə piŋ jɔ sɔm yə́ ywə pa' yə a pɑ. Wap lə́ biŋ bɑ nthamtə guŋ ywə awɛ tamtə. Tʉɔ gwyə pɑ́ bɑ́ nə ŋkwinthɛ̌ nə yam nə vʉ Cyəpɔ Yeso yə mghɛ nthəm lə gɔm a, mɑ gho' pɑ cəcɑ̌ guŋ yap awɛ nə fà' fɑ́ bi Si. Sɔmmo cəcɑ̌ pu la tə bɑ bə́ŋ pɑ, nə pa' pɔ pyə wap lə bɑ wap ghə mbe kɑ mpa' lə lə bɑ́ fǐŋ, bɑ dɑ ŋkhap e nə sɔ' jap dzə mghɛ nthəm, bǎ ya mo lə pɑ biŋ ŋkwi pɑ ywə yə a ku'nyə nə e a. A lə pɑ po'o bɑ Yosɛp yə mghɛ nthəm lə ŋkwi' ŋkhe é gɑ Barnabas, a pɑ̀ da'tə gɑ mo yə e hɑ kaktʉɔ a, pɑ̀ bɑ e ghə pé. E lə bɑ mo nə tuŋdyə pɑ Levi, ba yə Kipro. E lə fiŋ pě é, dɑ ŋkhap nə gɔ jap dzə mghɛ nthəm. Mu' mbɛ tso tsyə pɑ Ananias pu jwi e Safira lə pɑ̌ kwishwə, fiŋ ca' tsap. Pu e piŋ bɑ́ kwishwə e lwɔ' mu' nə ŋkhap pě, tə dɑ bvʉ' nə gɔ jap dzə mghɛ nthəm. Da' gɑ́ Pɛtrɔ ghɔm bi é gɑ: Ananias, nwə kɑ́ bɑ Sata lo nə tʉm tsǔ po'o? Ǒ cwanwə bi Zhwenyə Dɔlɔ̌ biŋ dwɔ' mu' nə ŋkhap pě. O kě tə zhyə nə tak pě nəŋ tə fiŋ a? Kɑ nə fiŋ gə nə ŋkhap e pa' o kuŋ a? Nwəkɑ bɑ yəŋ nthi ŋkwɛnyə sɔ' nthʉm tʉm tsǔ? O tə shwanwə m bi pɔmnəŋ pɑ, o shwanwə m bi Si. Ananias lə nə yu' mghɔm mɔ gɑ, bvʉ̌si pfʉ. Mɑ pwɔk ko nə guŋ pɔ awɛ pyə wap lə yu' yəŋ nwə a. Ŋkhɛ́ mo lə sɔ' dzʉmtə é ŋkwa é nə gɔ nthəŋ. A lə cyə gwɛ́ a m nam tá, jwi é kodyə tə zhyə ywə yə a nthəm a. Pɛtrɔ həŋtə é gɑ: Siŋ a! Yəŋ kwa' dəŋ yə po fiŋ pé a lə? E ghɔm gɑ əŋ a dəŋ é. A pɑ̀ po'o Pɛtrɔ piŋ gɔm bi e gɑ: Nwə kɑ bɑ po tɛ bɑ ŋkwishwə ŋkham Zhwenyə Cyəpɔ? Yu', mkwə pɔ pyə wap fɑ m nə təŋ dhə o a mɑ jyədyə̌. Wap gɔ kwa ba wə yǔ. E lə wuŋ bvʉ dzə Pɛtrɔ npfʉ́. Ŋkhɛ mo lə nə kodyə jɔ e, bɑ ě pfʉ, wap kwa e nə gɔ nthəŋ é bəŋ dhə e. Pwɔk gwyə ko nə guŋ cu'tə pɑ piŋ ba m nə guŋ pɔ awɛ pyə wap lə yu' yəŋ nwə a. Mtiŋ jɔmyɔm pu a msya lə bɑ nthəm cəcɑ̌ pɔmnəŋ shyə m nə bu mghɛ nthəm. Guŋ pɑ piŋ awɛ pɑ́ shwə nthʉm pə́ŋ Salomoŋ, bɑ ŋkwishwə. Da' gɑ́ la' sɔmmo dyɛ' kuŋ nə tamtə nə pu, da' gɑ pɔmnəŋ pɑ go'tə wap. Vəŋ pɔ jɔmyɔ̌m pɑ bɛ ba pɑ jwǐ pɑ shyə m nə piŋnthʉm jap jʉ̌m Cyəpɔ lɑ di lə kwi'. Lɑ pu pɑ dɑ mghɛ gho sɔ' məjyə bɑ pu kwa wap nə mkodyə ba m nə pɛtə̀ po'o gɑ Pɛtrɔ nə cyə̌ cyə̀ŋnyə̀ e kwak mu' mo nə pu. Pɔ tə jɔm lə nthəm jyə jyə gəŋnyə Yerusalɛm sɔ' bɑ wap kwa mghɛ gho ba pɔ pyə zhwenyə cwəpuŋ lə bɑwə baknyə wap a, a wap pɑ jɛtə gùŋ yap awɛ. A lə pá po'o luŋ ŋkhamsi gwyə pu a pɔ pyə pu a pu bɑ a: Pɑ Sadukai yɛ. Wap ghə pú ghəm mghɛ nthəm nyə̀ŋ wap cɛ́ pɑ sɔsɔ̌. Da' gɑ a pɑ mtsʉ́' aŋgəle Cyəpɔ cwɔ' mjyədyə̌ cɛ̌ gə wap tə́m, e ghɔm bi pu gɑ: Po ghɔ nthiŋnyə Dyə Si siŋ ghɔm vɔk tsɔ gɑ bi pɔmnəŋ. Wap lə yu' ywə yə e gɔm a, dzʉ̌ nə lɔ wap wuŋ gɔ Dyə Si, bɑ ji'tə pɔmnəŋ. Ŋkhamsi gwyə pu a pɔ pyə́ lə sɔ', e ké Sanedrɛŋ, guŋ pɑ ya' shɛ pɑ Israɛl, biŋ nthəm gɑ pu ghɔ dyəcɛ̌ shəŋ mghɛ nthəm. Mghɛ fa' pyə pu lə təm wap a, lə ko dyəcɛ̌ la' wap yɔ wap. Wap lə pɑnyə gɔm gɑ: Pyə ko jɔ dyəcɛ̌ bɑ pu cəŋtə jo', ba pɑ pyap pɑ́ pɑ jyədyə̌; da' gɑ pyə cwɔ' jyədyə̌ ŋkho dyə̀ pyə lə yɔ́ sɔmmo dyə́. Tadyə̀ byap Dyə Si ba mkamsi gwyəgwyə lə nə yu' mcuŋ mɔ gɑ, nwə cyə wáp nə mghɛ nthəm, wap lə zhyə pa' a nə shyə a. Da' gɑ́ mu' mo sɔ' siŋ wap gɑ: Yɔ́ pɔ pyə po kɑ nyə̌ŋ wap dyəcɛ̌ a pɔ thə Dyə Si bɑ́wə ji'tə pɔmnəŋ. A lə pɑ po'o tadyə byap Dyə Si lɑ mghɛ fa' pu a pu ghɔ Dyə si dɑ mghɛ nthəm pɑ̀ gɑ zhyə̀ nə sɔ', nə pa' wap lə bɑwə bwɔk gɑ pɔmnəŋ kɑ lɑ mwɔ' nthamtə wap a. Wap lə lɑ̌ wap sɔ' Sanedrɛŋ; ŋkhamsi gwyə təŋtə wap gɑ: Pyə kɑ cəŋtə sho' bi po gɑ ka po kwi' ji'tə tsǒ bǎ? A yəŋ bɑ po lɑ mzhi' nwə mɔ sa Yerusalɛm; po bɑ́wə shəŋ gɑ mcyə bɛ̀ bǎ ko nə pyə! Da' gɑ̀ Pɛtrɔ pu a mghɛ nthəm ghɔm gɑ: Mo gɔ yu'nyə m bi Si, tə m bi pɔmnəŋ pɑ̀. Si mta pɔk pɑ bɑ ě yám Yeso yə po kɑ cəŋ e nə́ thə jwə e a. Si bɑ e lɑ pu tʉɔ e ŋa' e pa' Mu Fò, biŋ bɑ gɛvɔk pɔ a. Po' gɑ Israɛl kwyəpnyə, pu lə mhɔ̀ myə́ shwyɛ' e. Pyə bɑ mghɛ kwinthɛ nə mnwə bɔ̌, wɔk, ba Zhwenyə Dɔlɔ̌ yə Si hɑ́ bi pɔ pyə wap ju'nyə e a. Wap lə yu' ghɔm tsɔ gɑ, luŋ yap sə̀, wap piŋ sɛ nə zhwə mghɛ nthəm. Da' gɑ mu' mo lusi Sanedrɛŋ bɑ̀ mo nə pɑ Farisai, tso tsyə pɑ́ Gamaliɛl bɑ́ Tádyə nə́ mco', bɑ guŋ pɔ awɛ kùŋ e; gɔm gɑ pu na' dɑ mghɛ cɛ́ nthəm mu ywə, biŋ gɔm gɑ: Pɑ Israɛl, po pɔmtə nə ywə yə po gɔ ghə nə pɔ pɔŋ gɑ a. Nə cwə dzʉ̌ yəŋ gɑ, pu kɑ yɔ Teʉdas təm, bɑ gɔm gɑ e bɑ kwa' Mo, gwɛ a pɔ ŋkhəpfʉə cʉ́m jʉ̀m ě; pu kě jwə é guŋ pɔ pyə wap kɑ tam jʉ̀m é a sɛ́tə. Pu piŋ jɔ Yuda yə Galilea təm yə cwə yə pu lə bɑwə sɛ́ pɔ a. Fəŋtə vəŋ pɔ jʉ̀m é; ba yʉ́ yə kě npfʉ, guŋ pɔ pyə wap kɑ tam jʉ̀m é a sɛtə. A po'o tə gɑ gɔm bi po gɑ ka po kwi' jap jʉ̀m pɔ pɑ̌, pɑ tak wap nəŋ wap ghɔ. A pɑ gɑ́ mkwɛnyə map kɑ mfa' map lə fɑ m bi pɔmnəŋ bɑ a gɔ mi pɑ dǒ e, nəŋ bɑ gɑ́ a fɑ m bi Si, bɑ bi a pɑ po lə ghə tə a mi pɑ̀. Po pɔmtə gɑ ka po à Si lo' shù! Wap lə piŋ ywə yə e gɔm a, ŋkhe mghɛ nthəm gə pu lɑ nthé nə shwɔ wap, biŋ sho' bi pu gɑ ka wap kwi' ŋkhe tso Yeso nə́ŋ wap. Mghɛ nthəm lə nə təm Sanedrɛŋ bɑ ŋwɛnyə̀ pa' Si yɔ gɑ wap ku' pa' bi a pɑ wap yɔgǒ' nə tso Yeso a. Wap lə bɑ nə gùŋ mtyɛ' dzʉ awɛ Dyə Si, pa' mdyə map a, wap lə pɑ bwa nə zhi'tə ba nə ghɔm mcuŋ Yeso Kristo. A lə pɑ́ cwə o bɔ, dəŋ pɑkhʉ̌ pɑ ŋkwi'. Pɑ Elenistə to' nə ghɔmtə nə́ pɑ Ebraika nə pa' pu lə bɑ dʉɔnyə mpfɔk pap nə cwə nə ghap ywətsʉ nə tyɛ'dzʉ. Mghɛ nthəm shwɔppʉə mgham ke guŋ pɑkhʉ̌ awɛ nə mɑ cu'tə gwyə gɔm gɑ: A ka puŋ gɑ pyə tak fa' Si nəŋ nə fa' ywətsʉ. Mfɑ̌mfɑ́ po ghɔ pɑ cəcɑ̌ po shəŋ pɔ sɔmbʉə, pɔ dəŋdəŋ pyə Zhwenyə ba zhyənwə lo nə pu a, pyə yap wap nə fa' mfa' bɔ. Tə̀ sɔ' m nə pyə, pyə gɔ pɑ lɑ nə cwyɛ'nyə Si ba fa' Ghɔm nə ghɔ dzə. Guŋ cu'tə awɛ lə piŋ mkwɛnyə bɔ: Pu cwɔ' Etiennə, ta' mbɛ bɑ piŋnthʉm ba Zhwenyə Dɔlɔ̌ lo nə e, shwɔ' Filipo, ba Prokor ba Nikanor pu Timon ba Parməna biŋ gə Nikola yə Antiokia yə e lə kǒ nə mà pɑ Yudea tə biŋ a. Pu lə la'tə wap bi mghɛ nthəm, shwyɛ'nyə Si, jap bu thə pu. Ghɔm Si lə bɑ ŋkwyə, dəŋ pɑkhʉ̌ pɑ ŋkwi' té' o Yerusalɛm, kwa' vəŋ mkamsi pɑ ju'nyə nə piŋnthʉm. Gho' ba tʉɔ lə lo nə Etiennə, e pɑ́ nthé msya, ba mtiŋ gwyə́ cəcɑ̌ pɔmnəŋ. Da' gɑ a lə cyə m nə mnwə bɔ, pɔ pyə wap lə bɑ nə Sinagogə pɑ təm ŋkwɔ, pu a pɔ nə guŋ Kirena, ba Aleksandria, pɑ kilikia ba pɑ Azia to' fəŋnyə pu a Etiennə. Tə wap yɔ gɑ bi a pɑ wap lə tsɔp zhyənwə pu a Zhwenyə yə a lə bɑ nə mghɔm myə́ a. Wap thənyə pɑ bɛ gɑ wap ghɔm gɑ: Pyə yu' e ghɔm ghɔ̀m nə́ jəmtə́ nə Mosɛ ba m nə Si. Wap lə cu'tə pɔ, mghətsó ba pɑ zhyə mco'. Gəm Etiennə tə e jyə, dɑ e nə gɔ Sanedrɛŋ ŋkho tsʉ̌', gə́ mghɛ kwinthɛ cwanwə. Wap ghɔm gɑ: Bɛ yəŋ gɑ bɑ̀wə gɔm bɔkbɔk mghɔ̀m nə tsʉ' dɔlɔ̌ ba nə mco'. Nə pa' pyə yu' pa' e gɔm gɑ yəŋ Yeso yə Nazarɛt gɔ sa'tə tsɔ' gɑ, piŋ kwyəpnyə mkhɛ mnwə myə Mosɛ lə hɑ bi pyə a. Guŋ pɔ awɛ pyə wap lə bɑ wap cwə dyə Sanedrɛŋ a lə bɑ wap tʉ mnyə map nə Etiennə wap lə yɔ sə e a pɑwə hwə pa' sə aŋgəle. Ŋkhamsi gwyə lə həŋtə Etiennə gɑ: A kwa' nyənyɔ po'o lə? Etiennə pa' gɑ: Mfɑ̌mfɑ́, ba mtǎmtá, po yu', Si ghú'tə lə la'tə nɑ e bi ta yɔk pɑ Abraham cwə yə e lə bɑ Mesopotamia tə gɔ Karan shwə́ á, gɔm bi é gɑ: Təm gǔŋ o, ba nə tuŋdyə o, biŋ gɔ nə gùŋ yə gɑ gɔ la'tə bu a. Abraham lə təm gùŋ Kaldea gɔ shwə́ Karan. E lə ko wə tap e pfʉ́, Si cya e nthʉm gùŋ yə po shwə̀ nə cwəlɔ a. Si la tə hɑ sɔmywə bi e nthʉm gùŋ yəŋgɑ pɑ, bǎ tsʉ' yə bi a pɑ e tʉ́ kwə é nə a. Da' gɑ e lə ka' bi e gɑ e gɔ la' hɑ guŋ bɔ bi e, bɑ m bi gwya e jʉm e ba tə pa' Abraham lə bɑ e ka ghə mu a. Nə pa' Si lə ghɔm gɑ: Gwya e gɔ sɔ' cwə nthʉm guŋ pɔ dyɛ'. Pu lɑ wap gə mkwɔ, biŋ dɑ wap jɔgo' nə gu'dzʉ ŋkhəpfʉə. Dá' gɑ́ Si lə piŋ gɔm gɑ: Guŋ yə wap gɔ sɔ' pɑ mkwɔ bi a, gɑ gɔ la' cwɔ'tə shɛ́ é, a nə mi wap təm mkwɔ bɑ shu'tə gamtə a si tsɔ'ɔ. Pu e lə wakɔ, mtiŋ myə pɑ nə̀ vó mò; a cyə m po'o Abraham tsə́ Isak bvo e nə batə tyɛ'dzʉ hɔm; Isak lə ti gə pɑ po'o nə Yakop, ba Yakop nə mtʉ̌ gùŋ shwɔppʉə m gham. Mtʉ gùŋ lə kǐŋ Yosɛp, fiŋ e, pu lɑ e gɔ m Egipto. Da' gɑ pu Si pəmtə bɑ; e kwitə é nə guŋ go' é awɛ, hɑ gho' pu a zhyənwə bi e dzə Faraon, fo pɑ Egipto, e lɑ e gə gɛ sa' gùŋ Egipto ba gùŋ dyə e awɛ. A lə pɑ̌ po'o kəya' ti ŋkho nthʉm gùŋ Egipto awɛ, ba m nthʉm gùŋ Kanaan. Ghəghʉɔ lə yɔm tə la' mtá pɔk pɑ piŋ gə ywətsʉ. Yakop lə yu' gɑ ywətsʉ Egipto, nthəm mtá pɔk pɑ wə dəŋdzə cʉ̌m. A lə pɑ́ nə batə mcʉm bʉə, Yosɛp ghə mfɑ pyə piŋ jyə é, ba Faraon piŋ jyə yə́ tsʉ' yə Yosɛp lə nthəm nə a. Yosɛp lə tə̀m gɑ pu ghɔ shəŋ tap e Yakop pu a tuŋdyə̀ e, pɔ shwɔptɔ mgham sɔmbʉə. Yakop lə tsəŋ gɔ Egipto cwəlɔ, di pfʉ́ wə, ba mta pɔk pɑ. Pú kwa wap nə gɔ Sikem, nyəŋ wap nə thəsì yə Abraham lə lɑ ŋkhap nə jó bi pǒ Emmor, ta pɑ Sikem a. Cwə yə mka'nyə myə Si lə ka' bi Abraham gɔ pəmtə a lə pɑ gɔ ku', pɔmnəŋ kwi', biŋ sé Egipto, tə gɔ ŋkhəm nə mu' fo, bɑ e la tə zhyə̀ Yosɛp pɑ̀. Fo bɔ lə lɑ fʉ̌ ŋkho jʉ̌m gwya yɔk pɑ; dɑ mtá pɔk pɑ jɔgo' tə gə wap yɔnyə po pap po'o bɑ nə ŋkhɔ́ gɑ wap kɑ vɔk. A pɑ cwə o bɔ pu tsə Mosɛ. E lə bɑ buŋ mu nə mnyə Si. Pú lɑ wim e dyə tap e nə mŋwə̀ tá. Cwə yə pu lə yɔnyə̀ e a, gò Faraon hò e, gwim e kwa' pa' tsə mù é a. Pu lə guŋ zhyənwə pɑ Egipto awɛ nə nthɔk Mosɛ. E lə bɑ ě tʉɔ nə ghɔm tsyə̀ ba nə mfa' myə́. E lə kəm gu' mghappfʉə dəŋdəŋ, mkwɛnyə sɔ' bi e gɑ e ghɔ cəcɑ̌ mfɑ pyə̀ pɑ Israɛl. E lə ko jɔ̀ mu' fɑ e pu pɑ̀wə dɑ e jɔ́go', e lə twɔk nwə è, ba' bo nə yə Egipto jwə e. E lə bɑ̀wə ŋkwɛ gɑ e gɔ ghə mfɑ pyə̀ zhyə gɑ Si gɔ cyə m nə pu e vɔk wap, da' gɑ la' wap yu' e pɑpuŋ. Dzʉ lə lɔ̌ pu yɔ e, e pɑwə haptə shɛ shɑ pɔ pɑpʉə, shəŋ gɑ wap pɑ ŋkwishwə gɔm bi pu gɑ: mso pɑ, pǒ bɑ mfɑ, biŋ bɑwə nthuŋkwɑ kʉ̌? Da' gɑ mo yə e lə bɑ̀ wə hya yə mu' mo a nə zhəŋ Mosɛ, gɔm bi e gɑ: Wɑ bɑ ě lɑ o gə tadyə̌ gɛ ya'shɛ cəcɑ̌ pyə̌? O gɔ zhwə a pa' o kɑ zhwə yə Egipto yo a? Mosɛ lə yu' po'o ŋkhʉ̌ gɔ dʉmnyə nthʉm guŋ pɑ Madiaŋ, bɑwə bɑ́ gʉɔ. E lə ko wə gə po pyə pɑpʉə. A lə cyə gu'dzʉ mghappfʉə, ta' aŋgəle ŋwak bi e ghakgo, kuŋ Sinai nthʉm gwa mɔkə nə mu' cu' mghé, mɔkə pɑ nə. Yɔ m nthʉm Zhwenyə bɔ lə cyə Mosɛ, e cəŋ nə ghɔ tə bəŋ o tə dé. E lə yu' gi Cyəpɔ gɑ: Gɑ bɑ Si mtá pǔ, Si Abraham, Isak ba Yakop. Mosɛ lə səŋ taktak, la' e piŋ ŋkwi' shəŋ nə lé. A pɑ po'o Cyəpɔ ghɔm bi e gɑ: Tɔk mtháp mkwə́ o, nə pa' tsʉ' yə o tiŋnyə̀ nə a, bɑ ca' dɔlɔ̌. Əŋ, gɑ̌ yɔ ghəghʉɔ pɔ pɑ̌ Egipto, gɑ̌ yu' lɔ tsap. Gɑ̌ fi' sɔ' po'o nə vɔk wap. Cwəlɔ̌, ghɔ̌, gɑ̌ gɔ təm o Egipto. Yəŋ Mosɛ yə wap lə ghɔm bi gɑ wɑ̌ jap o nə gə tadyə gɛ ya'shɛ nə nə́ ŋkhəŋnyə e a, a yʉ tə Si təm e pa' tádyə, gɛ kwi pɔ a, shyə m nə aŋgəle yə e lə ŋwak bi e nthʉm cu' mghe a. Yʉ nə lě nthé wap Egipto, gə msya pu a mtiŋ Egipto, ba m shyə lɑpʉə pəpɛ, ba m ghakgo nə gu'dzʉ mghappfʉə. Pɑ yʉ Mosɛ nə lə gɔm bi pɑ Israɛl gɑ: Si gɔ la' ghə mu' ta' gɔm ghɔm Si pa' myə̀ a təm cəcɑ̌ mfɑ pɔ bi po. Yʉ nə lə bɑ̀ nə cu'tə ghakgo bɑ nthiŋnyə cəcɑ mta pɔk pɑ pu a aŋgəle yə e lə gɔm nwə bi e kúŋ Sinai a. Yʉ nə lə ŋkwi mghɔm vɔk tə hɑ bi pɑ. Da' gɑ mtà pɔk pɑ la tə piŋ nə yu'nyə bi e, wap lə kəŋnyə e, mkwɛnyə map lɑ wap bɑnyə m Egipto. Wap lə ghɔm bi Aaron gɑ: Ghə msi pyə wap gɔ pɑ sa' wɔk a. Nə pa' Mosɛ yə e lə té wɔk nthʉm guŋ Egipto a, pyə ka zhyə ywə yə a kě gə e a. Wap lə nyaptə mú hùŋ tyɛ'dzʉ bɔ, núŋpwɔ' bi kətwɔk bɔ biŋ ŋwɛnyə nə mfa' bu map. A cyə m po'o Si tak wap nəŋ, wap pɑ gamtə pɑ tsə ŋkhyɛ'kyɛ' kɛbəŋ, dəŋdəŋ pa' a bɑ nthʉm ŋwa'nyə mghɛ ghɔm ghɔm Si a gɑ: Nə gʉ'dzʉ mghappfʉə myə po lə̌ ghakgo a, po lə zhwə kɑ́ bəm kɑ nuŋ kɑ pwɔ' bəm. Wɔ gwya Israɛl? Po lə kwɑ nthap Molɔk, bɑ sé si yɔ yə pu ŋkhe é gɑ Rəfaŋ a, mkətwɔk myə́ myə po lə nyaptə bɑ gamtə a. Pa' a pɑ po'o a gɑ gɔ sɔ' cwɔ' wɔ nə ghɔ tə twɔk Babilon. Mtá pɔk pɑ ghakgo lə bɑ wap ghə nthap a pɑ ŋkwinthɛ̌; mo yə e lə ghɔmnwə bi Mosɛ a lə cwi'tə gɑ e ghə nthap bɔ kwa' fo' pa' e lə yɔ a. Pa' mtá pɔk pɑ lə kwi ya bɔ a, Yoswa lə cya wap, wap nə ŋkho nthʉm guŋ yə wap lə kwi bi pɔ pyə Si lə zhəŋ wap dzə pu a. A lə cwə́ pɑ wə́ tə ŋkhəm nə cwə David. David lə ghə gho' dzə Si; həŋtə gɑ e piŋ gɑ e ghə tsʉ' cwə bi Si Yakop. Da' gɑ Salomoŋ e lə la' bəm pa' bi e. Ba tə po'o, Si gwyə tə thə́ lə pɑ shwə nə mtsʉ' cwə myə bu pɔmnəŋ nə ŋkwɑ a. Dəŋdəŋ pa' gɔm ghɔ̀m Si gɔm a gɑ: Kɛbəŋ bɑ leŋfo a, Sicǎ' pɑ kwɔ' tʉ mkwə mə̌. Po gɔ kwɑ́ ma mnthi pa' bəm? Cyəpɔ nə gɔm po'o. Ba tsʉ' hwitə a gɔ́ pɑ ya a? Tə pú ǎ nə lə gə guŋ tsə awɛ a lə́? Pɔ bɑ nthuŋ yap lě nthiŋ, pɔ bɑ pu ka vó mtʉm map pu a mtəŋ map. Po bɑ guŋ mcwə awɛ bɑ shɑ̀ jyə̀ bi Zhwenyə Dɔlɔ̌, po bɑ̀ pɑ̀ pa' mtà pɔ a. Mtà pɔ lə cyətə cwɔ' mkwə ya gɔ̀m ghɔm Si cwəpuŋ? Wap le jwə ba pɔ pyə wap lə la' dəŋdzə bhə gɑ Mo dəŋdəŋ gɔ sɔ' sɔ' a, Mo yɑ yə po kɑ tɛ̌mnɛ́ myə́ jwə é a. Po le ŋkwi mcò' shyə̀ m nə pɑ aŋgəle po lə ghiŋ nə. Mghɔm mɔ lə ghə̌ lúŋ yap sə́, wap pfɑ msuŋ nə Etiennə. Da' gɑ sɔ' m nə yʉ Etiennə, Zhwenyə Dɔlɔ̌ lə lo nə e, e le kɛbəŋ jɔ nə ghu' Si ba Yeso bɑ e tiŋnyə nə ghəŋ pu tʉɔ Si. A pɑ po'o, e ghɔm gɑ: Gɑ wə jɔ́ kɛbəŋ bɑ a ghyɛ' ba Mú mo bɑ e tyəŋnyə nə ghəŋ pu tʉɔ Si. A lə pɑ po'o wap togə̀ŋ, jʉ́ɔ mtəŋ map, nthamtə guŋ yap wɛ, bvʉ nə Etiennə fəŋ e nə nthəm tisuŋ ntho' nə lɑ mwɔ' nə nthamtə e. Mkwinthɛ lə nuŋ dzə tsap dzə mu' mú sə̀m tso tsyə pɑ Saulo. Cwə yə wap lə pɑ dɑ mwɔ' nthamtə Etiennə a é cwyɛ'nyə gɑ: Cyəpɔ Yeso, kwi zhwenyə a. Biŋ ŋkham mkwitə myə́ si shwé tɑ thə gɑ: Cyəpɔ kɑ sɛ mhɔnwə mɔ bi pú. E lə ghɔm po' pfʉ. Saulo lə bɑ mo nə pɔ pyə wap lə bɑwə biŋ vʉ Etiennə a. A lə to' pɑ̌ nə tyɛ'dzʉ bɔ, pu to' nə cwɔ' mkwə cwəpuŋ Yerusalɛm. Guŋ pɔ awɛ tə ně da' mghɛ nthəm lə sɛtə́ gɔ m jyə̀ Yudea pu a m Samaria. Shɑ pɑ bɛ pɑ lɑ mku' biŋ lə tə̌ŋ Etiennə biŋ dɔ e kwa' pɑpuŋ. Nəŋ sɔ' m nə Saulo e pɑ sa'tə Cu'tə pɔ Kristo, bɑ ŋkho dyə dyə̌, nthé pɑ bɛ pu a pɑ jwǐ, ma'tə wap dyəcɛ̌. Pɔ pyə pu lə sɛtə wap a lə́ bɑ gɔ jyə́ jyə̀, giŋ bɑ siŋ Cuŋ pɑpúŋ Ghɔm. A lə pɑ po'o Filipo, pa' e lə tsəŋ gɔ nə mu' tisuŋ Samaria a, ko wə́ shyanyə Kristo. Du pɔ pɑ ŋkwishwə, nthɔm ghɔm Filipo nə pa' pu lə bɑwə ju' nwə msya myə e lə gə á, biŋ bɑwə jɔ má. A pɑ po'o bo'gwyə mzhwenyə cwəpuŋ pɑ nthəm nə pɔ pyə a lə bɑ ǎ ko nə pu a, nə təm bɑ shwé. Ba bo'gwyə mkhʉm pu a ŋkho'tə pɑ jɛ. Kwa' mɑ ŋwɛ́nyə lə pɑ̀ nthʉm tisuŋ bɔ. A lə́ nə pɑ po'o mu' mbɛ tsə pɑ nthʉm tisuŋ bɔ tso tsyə̀ pɑ́ Simon, e pɑ gə kɛ, a pɑ̀ sya pɔmnəŋ nthʉm guŋ Samaria awɛ. E lə gə po'o bɑ ŋkwɛ gɑ e bɑ kwa' gha' mo. Guŋ pɔ awɛ pɑ jʉm e tə fɑ nə pɑkhʉ̌ gɔ ŋkhəm nə mghətso lɑ bɑ gɔm gɑ: Bɛ yəŋ gɑ bɑ gʉ' Si yə pu ŋkhe gɑ Gʉ' gwyə a. A pɑ gɑ́ wap lə bɑ́ jʉ̌m é po'o, bɑ a lə du gɑ e lə dɑ kɛ tsyə́ nə sya wap tə fɑ́ tə́ tyɛ'. Da' gɑ wap lə cwə̌ tə biŋ Cùŋ pɑpùŋ nə Nəfo Si ba nə tsǒ Yeso Kristo yə Filipo lə bɑwə gɔm a, guŋ yap awɛ kwishyə, pɑ bɛ ba pɑ jwǐ. Ba Simon lə cʉ' yə biŋ Si, ŋkwi yə shyə, bɑ pɑ jʉm Filipo, bɑ jɔ mtiŋ gwyəgwyə pu a msya myə a lə bɑwə nthəm a, nwə pɑ shyə e. Mghɛ nthəm pyə wap lə bɑ Yerusalɛm a lə nə yu' gɑ pɑ Samaria piŋ ghɔm Si, nthəm Pɛtrɔ pu Yohane wə. Wap lə cwə tə ŋwak wə, shwyɛ'nyə Si nə pɑ Samaria gɑ wap kwi Zhwenyə Dɔlɔ̌. Nə pa' Zhwenyə Dɔlɔ̌ lə jɑ́ tə wuŋ ŋkho nə sɔmmo yap, a lə bɑ wap kwi da' shyə nə tso Cyəpɔ Yeso. Pɛtrɔ pu Yohane lə to' nə yap bǔ nə pɑ Samaria, wap pɑ ŋkwi Zhwenyə Dɔlɔ̌. Da' gɑ Simon lə cwə tə jɔ̀ pa' mghɛ nthəm wə jap bu nə pɔ̀, wap kwi Zhwenyə Dɔlɔ̌ a, bhə́ ŋkhap bi pu gɔm gɑ: Po hɑ tʉɔ bǎ bəm po'o gɑ pɔ pyə gɑ̌ yap bu nə pu a, wap kwi Zhwenyə Dɔlɔ̌. Pɛtrɔ ghɔm bi e gɑ: Tə la' po ŋkhàp o pəmtə pfʉ́, nə pa' o ŋkwɛ gɑ bi a pɑ pu lɑ ŋkhàp jò ywə yə Si hɑ bi mo tə kwǐ ŋkhap nə a. Yu tsʉ' kɑ yu ywə lɑ tə̌ nə ywə yə a wə shyə tsɔ' a pɑ́, nə pa' tʉm tsǔ tə dəŋdəŋ dzə̌ Si a. Kwyəpnyə nə tʉm shɔkcɔk tsǔ, biŋ shwyɛ'nyə Si. Mu'cwə e lɑ mkwɛnyə cwəpuŋ myə a sɔ' nthʉm tʉm o a nə shwyɛ' o. Nə pa' gɑ wə jɔ gɑ́ o nthʉm bɔkbɔk nwə dzəzə ba m̀ nthʉm mgwɑ mnwə cwəpuŋ. Simon piŋ ba' gɑ: Pɑ kwa' wɔ nə cwyɛ'nyə Cyəpɔ nə m̀ po'o gɑ sɔmywə yə po gɔm a kɑ sɔ' nə m̀. Pɛtrɔ pu Yohane lə cwətə hɑ ŋkwinthɛ̌, biŋ gɔm ghɔm Cyəpɔ cwəlɔ, bɑnyə Yerusalɛm giŋ bɑ siŋ Cúŋ pɑpuŋ bi mpfə́ la' jɔmyɔ̌m Samaria. Aŋgəle Cyəpɔ ghɔm bi Filipo gɑ: Lusi gɔ m mto dzʉ nə məjyə yə a dzəŋ fɑ Yerusalɛm gɔ Gaza a, a wə bɑ a ghaknyə cwəlɔ. Filipo lə wuŋ dusi gɔ. A nə pɑ̌ po'o, mu' sʉ̌ mo yə́ Etiopia gɛfa' Kandakos Mɑfo Etiopia, ŋkho nthɛ Mɑfo yə e lə̀ bɑ e ghɔ Yerusalɛm nə ghiŋ piŋnthʉm pɑ məjyə bɑnyə m la' e, bɑ e cwə dəm kɑlik bɑwə ŋkhe ŋwa'nyə gɔm ghɔm Si Esaya. Zhwenyə ghɔm bi Filipo gɑ: Ghɔ ŋkwyatə́ kɑlik yɑ. Filipo khʉdʉ̌ ŋkwɔ' nə, ju' pa' sʉ̌ mo bɔ wə ŋkhe ŋwa'nyə gɔm ghɔm Si Esaya a, biŋ gɔm bi e gɑ: Tə́ o bɑwə ju' ywə yə o wə ŋkhe a kwa' pɑpuŋ lə? E pa' bi e gɑ, gɑ gɔ yu' m gɑ́ kɑ̀, bi a pɑ gɑ́ ŋ ka ghə mo yə e gɔ tutə bəm a? E lə ghɔm po'o cwəlɔ ŋkhe Filipo gɑ e kwɔ' shwə bəŋ é. Tsʉ' ŋwa'nyə yə e lə bɑwə ŋkhe a bɑ gɑ: Dəŋdəŋ pa' jʉ̀jʉ̀ yə pu wə dɑ e gɔ m nə wa é a dəŋdəŋ pa' mu jʉ̀jʉ̀ tə gi dzə̌ pɔ pyə wap wə ŋkhəm é a a bɑ dəŋdəŋ po'o tɑ e tə ŋa' shwə e pɑ. Yə nə fi' nɑ hɑ si lě gə e pi shɛ́. Wɑ̌ gɔ la' ghɔmnwə nə pɔ nə yə́ wɔdzʉ́? Nə pa' bɑ pu le nthé vɔk e nə dəmca' a. Sʉ̌ mo lə piŋ gɔm bi Filipo gɑ: Sə́só, gɔm ghɔ̀m Si gɔm po'o nə wɑ? Pɑ nə é kɑ nə mu' mǒ. Filipo cwɔ' shwə é, ntho' nə tsʉ' ŋwa'nyə bɔ nə siŋ e Cuŋ pɑpuŋ Yeso. Pu a pu lə pəmtə gɔ̌ tə ŋkhəm nə mu' kəŋ shyə, Sʉ̌ mo piŋ gɔm gɑ: Yɔ shyə̌ yəŋ gɑ; kɑ wə ŋkhɔ pa' gɑ kwishyə a? E lə ghɔm gɑ pu lɑ kɑlik e nthiŋnyə wap pɑpʉə tsəŋ shyə, Filipo pu Sʉ̌ mo. Filipo nu' e shyə. *** Wap lə cwə tə nthəm shyə, Zhwenyə Cyəpɔ kwa Filipo nə gɔ la' Sʉ̌ mo piŋ jɔ e, da' gɑ nə ghɔ cwəlɔ giŋ bɑ ŋwɛnyə. Sɔ' m nə Filipo, e lə yɔ bɑ m Azoto, biŋ bɑ giŋ bɑ siŋ Cuŋ pɑpúŋ nthʉm guŋ mtisuŋ awɛ, biŋ gɔ m Kaesarea. Cɔk pú nə zhwə mghɛ zhi'nwə Cyəpɔ lə jɑ pɑ nə Saulo. E pɑ gɔ ywə ŋkhamsi gwyə ŋkwi mŋwa'nyə nə̀ nə gɔ nə msinagogə Damasi po'o gɑ e yɔ pɔ pyə wap m nə Məjyə a, pɑ bɛ kɑ pɑ jwǐ lə, e cə́ŋ wap nə gɔ Yerusalɛm. E lə ghɔ tə bɑ gɔ kəm Damasi, mu' ŋkha' wuŋ fɑ kɛbəŋ dɑ sɛ é sam e. E lə vʉ̌ si, ju' pa' gi mo wə gɔm bi gɑ: Saulo, Saulo, o shwɔ'mkwə mə̌ cwəpuŋ gɑ́ kɑ? E həŋtə gɑ: O bɑ wɑ Cyəpɔ? Gɑ̌ bɑ Yeso, o bɑwə shwɔ' pa' a pɑ mkwə mɑ cwəpuŋ. Da' gɑ lusi ŋkho tisuŋ, pu gɔ siŋ o ywə yə́ o gɔ ghə a. Msǒ ghiŋ pyə́ lə tiŋnyə, pwɔk cɑ́ mshwə map. Wap lə bɑ́wə ju' gi mo, da' gɑ la' wap pɑ́wə jɔ sɔmmo. Saulo lə lusi, ba tə pá' mnyə myə́ lə bɑwə gyɛ'ghyɛ' a, e lə pɑwə biŋ jɔ sɔmywə, mso pyə tɔm pɑ pu e tɑ dɑ e ŋkho Damasi. E cwə wə tə yɔ tsʉ' dzʉ̌ tyɛ' tà, tə tsʉ̌ ywə, tə nwə́ shyə. Mu' gɛ zhi'nwə lə bɑ Damasi tso tsyə pɑ Ananias; Cyəpɔ ké e nthʉm nə yɔ m nthʉ̀m zhwenyə gɑ Ananias, e pa' gɑ: gɑ̌ yəŋ m Cyəpɔ. Cyəpɔ piŋ gɔm gɑ: Lusi gɔ Damasi nə məjyə yə pu ŋkhè gɑ jyə dəŋdəŋ a, dyə Yuda, həŋtə mu' mo yə pu ŋkhe e gɑ Saulo yə Tarso a. E tsʉ̌' bɑwə shwyɛ'nyə Si, E du m nə yɔ pa' mu' mbɛ yə pu ŋkhe e gɑ Ananias a ŋkho dyə jap bu nə e gɑ e piŋ jɔ tsʉ' a. Ananias pa' gɑ: Cyəpɔ, gɑ̌ yu' pa' pɔ jɔmyɔm gɔm nwə nə bɛ bǎ, bɑ gɔm guŋ mnwə cwəpuŋ myə é gə nə pɔ dɔlɔ̌ pǔ Yerusalɛm a. E piŋ bɑ tsɔ'ɔ bɑ mkhamsi gwyə hɑ guŋ gʉ' bi awɛ nə nə shə̌ŋ guŋ pɔ pyə́ wap ŋkhe Tso tsʉ̌ a awɛ. Da' gɑ Cyəpɔ ghɔm bi e gɑ: Ghɔ̌, nə pa' bɛ bǎ bɑ́ ywə fa' yə gɑ shwɔ' nə nə gɔm nwə nə Tso tsɑ̌ dzə mguŋ dyɛ', dzə mfomfo, ba dzə pɑ Israɛl a. Pɑ kwa' myə̀ nə gɔ sɔ' la'tə e go' yə e gɔ yɔ nə tso tsɑ̌ a. Ananias lə ghɔ̌ ŋkho dyə, jap bu nə e, gɔm gɑ: Saulo, fɑ a, Cyəpɔ nə nthəm a, gɑ gɔm Yeso yə e ŋwak bu məjyə yə o kɑ bɑwə giŋ nə a, po'o gɑ o piŋ jɔ tsʉ', Zhwenyə Dɔlɔ̌ lo nə o. Ywə lə tə̌m nə mnyə Saulo pa' gwɔp a guŋ bvʉsi, e piŋ jɔ tsʉ', ŋkwishyə, biŋ dzʉywə cwəlɔ, gʉ̌' sɔ' bi e. Pu a pɑ piŋ lə cwə nə pǒ mtyɛ'dzʉ Damasi. E wuŋ ntho' nə cyanyə dyə sinagogə gɑ Yeso bɑ Mǔ Si. Nwə lə pɑ shyə guŋ pɔ awɛ pyə wap lə ju' pa' Saulo wə gɔm po'o a. Lə́ wap pɑ gɔm gɑ: Tə́ yʉ nə lə bɑ Yerusalɛm ŋkho jʉm pɔ pyə wap lə ŋkhe tso tsɔ gɑ a lə? E ka tə biŋ sɔ' po'o nə cə̀ŋ wap nə ghɔ hɑ bi mkamsi a lə? Da' gɑ Saulo pɑ shəŋtə biŋ, biŋ bɑ siŋ ɑ tsɑ bi pɑ Yudea pyə wap lə bɑ Damasi, gə wap zhyə gɑ Yeso shəŋtə bɑ Mesia. A lə nə cwə́ muywə pɑ Yudea tɛ nə zhwə Saulo. Da' gɑ Saulo zhyə gɑ wap wə shəŋ nə zhwə é. A lə bɑ wap ghə tə bɑ byap məjyə nə ŋkho tisuŋ mɔkcʉ bǎ mtsʉ' po'o tə zhwə Saulo. Da' gɑ a pɑ mu' mtsʉ' pɑkhʉ pyə lə ŋkhəkhʉɔ ja' e m thə ŋkhɛ pe bəmpə̌m shya é nə yə mu' jʉ̀m. Saulo lə ghɔ tə́ ŋkho Yerusalɛm bɑ ŋkhaktʉɔ nə pɑ cəcɑ̌ pɑkhʉ Yeso. Da' gɑ guŋ yap awɛ pɑ bwɔk pwɔk nə pa' wap la tə bɑwə bíŋ nyənyɔ gɑ e cʉ' mukhʉ Yeso a. Barnabas lə lɑ e, pu e ghɔ cəcɑ̌ mghɛ nthəm, e piŋ siŋ wap pa' e lə yɔ Cyəpɔ məjyə̀ e ghɔmnwə bi e, ba m pa' e lə cəŋtə gɔm nwə nə tsǒ Yeso Damasi a. Tə fɑ po'o Saulo pu a mghɛ nthəm pɑ bəmtə giŋ Yerusalɛm, bɑ gɔm nwə nə tsǒ Cyəpɔ tə pwɔk. Saulo pu a pɑ Elenistə pɑ gɔm biŋ bɑ fəŋnyə nwə; da' gɑ wap pɑ shəŋ pɑ nə zhwə e. Mfɑ̌ mfɑ́ lə nə yu' po'o dɑ e nə gɔ Kaesarea, shya e Tarso. Cu'tə pɔ Kristo nthʉm gúŋ Yudea, ba m Galilea pu a m Samaria pɑ shwə nə hwitə̀, bɑ ŋkwyə, biŋ bɑ giŋ nthʉm nə pwɔk Cyəpɔ, a pɑ shyə m nə Zhwenyə Dɔlɔ̌ bɑ sé. A lə pɑ̌ po'o Pɛtrɔ yə e lə bɑ guŋ mcwə awɛ bɑ pɑ məjyə a, tsə̌ŋ ba m Lidia wə pɔ dɔlɔ̌ pyə wap lə shwə́ wə́ a. E lə ko wə̀ jɔ mu' mbɛ tso tsyə pɑ Enea, e pɑ dəm ko'tə kodyə tɑ fɑ gu'dzʉ́ hɔm bɑ po'tə lě ŋkho nə e. Pɛtrɔ ghɔm bi e gɑ: Enea, Yeso Kristo yɛ́ o. Lusi nyaptə kódyə o pɑ́ kwa' wə: E lə wuŋ dusi. Gúŋ pɑ Lidia ba pɑ hù Saron lə nə yɔ po'o, biŋ Cyəpɔ. Mu' mjwǐ lə bɑ́ Yope, bɑ biŋ Si, tso tsyə pɑ Tabita, a pɑ̀ nthutə gɑ Dorkas. Mfa' pɑpuŋ myə́ lə bɑ ǎ yɔm, ba m nə kwitə hɑ ywə yə e lə hɑ a. A lə pɑ mu' tyɛ'dzʉ e nuŋ gho, pfʉ. Pu sɔk nɑ e, jap e twɔ'dyə̌ zhəŋ thə́. Pa' Lidia bɑ pɑ bəŋ Yope a, pɑ piŋ lə yu' gɑ Pɛtrɔ Lidia, nthəm pɔ bi e gɑ wap ghɔ wə gɔm bi é gɑ: Lo'nyə sɔ' ŋkwyatə wɔk. A lə pɑ̌ po'o pu a Pɛtrɔ lə wuŋ gɔ. E lə ŋwak pu lɑ e bʉɔ nə twɔ'dyə̌ zhə̀ŋ thə. Guŋ mpfɔk awɛ tiŋnyə dzə é, bɑ dɔ̌, lə da'tə e msʉəsʉə dzə myə Dorkas lə ba' cwə yə pu a pu lə bɑ a. Pɛtrɔ lə ghə guŋ pɔmnəŋ awɛ tə́m dyə. E kam mkwi'tə myə́ si, shwyɛ'nyə Si; biŋ fɛ nɑ e de pfə Dorkas gɔm gɑ: Tabita lusi. E ghyɛ' mnyə myə́, nə yɔ̌ Pɛtrɔ, bʉ' nɑ e, shwəsi. Pɛtrɔ nya pu e bi e, nə ŋa' e si cwəlɔ, ŋkhe pɑ piŋ, pu a mpfɔk, da'tə e bi pu, bɑ e tʉɔ. Guŋ yap awɛ lə yǔ', bo'gwyə pɔ piŋ Cyəpɔ. Pɛtrɔ lə na' shwə Yope ywə mu' Simon yə e lə bɑ ntham gwɔp a. Mu' mo lə bɑ Kaesarea tso tsyə pɑ Kornəlio, e pɑ tadyə msəŋwi pɔ ŋkhə, pu pɑ ŋkhe yə kam msəŋwi bɔ gɑ Italia. E lə dɑ mku' biŋ, bɑ bwɔk Si pu a tuŋdyə é, bɑ hɑ ywə kwitə bi pɑ Yudea kwa' pɑpuŋ, bɑ shwyɛ'nyə Si guŋ mcwə awɛ. A lə pɑ mu' tyɛ'dzʉ, nə mnam tá bwadzʉ e yɔ nthʉm zhwenyə kwa' pa' mo dɑ mnyə myə́ jɔ ywə a, jɔ aŋgəle Si ko dyə e, ŋkhe é jɔkzhɔk gɑ: Kornəlio! Kornəlio le e dəŋdəŋ, nə lě bɑ bwɔk, gɔm gɑ: A kɑ Cyəpɔ? E ghɔm gɑ: Mcwyɛ'nyə mǔ pu a nə ghap tə kəŋ pu ǔ kəm dzə Cyəpɔ. Cwəlɔ̌, təm pɔ wap ghɔ Yope dɑ Simon yə pu ŋkhe e gɑ Pɛtrɔ a nə sɔ̌'. E wə mu' Simon yə e bɑ ntham gwɔp a bɑ shwə nə mu' dyə kəŋ shyə lɑpʉə. Aŋgəle yə e lə ghɔmnwə bi Kornəlio a lə cwə tə gɔ̌, Kornəlio ke pɔ pɑpʉə nə pɔ pyə pu a pù lə bɑ̀ dyə a, biŋ gə ta' səŋwi, e pɑ dɑ mku' biŋ yə pu e lə fa' fɑ tə tyɛ' a. E lə nə təm wap Yope, siŋ wap mtiŋ pa' wap gɔ nə ghiŋ a. A lə pɑ yə mu' jʉ̀m dzʉ̌, wap ghiŋ tɑ bɑ ŋkhəm bəŋ tisuŋ, a pɑ bɑ Pɛtrɔ kwɔ' m nə zhəŋ dyə́ thə́ bɑ́wə́ shwɛ'nyə Si, a lə bɑ po'o nə gwɛ a mɔkcʉ. Jikǔ' yɛ́ é, e pɑ shəŋ nə tsʉ ywə, pu pɑ gə ywə yə e gɔ tsʉ a, e wuŋ ŋkhó nthʉm nə yɔ tsʉ' m nthʉm zhwenyə. Jɔ kɛbəŋ ghyɛ': Mu' nthi ywə yə pɑ mo lə zhyə nə nə ghɔm a, mu' ywə pa' mɑ gheŋghěŋ kam dzə a nə mtɔk mapfʉə a fi' sɔ' bɔnyə dəmcǎ'. Guŋ mnɔm awɛ pyə wap giŋ mkwə pfʉə a, pyə wap fəŋ vam tsap si a, ba pyə wap ntha to kɛbəŋ a lə bɑ nthʉm kam dzə bɔ. Mu' gi ghɔm bi Pɛtrɔ gɑ: Pɛtrɔ zhwətə wap pfɑ. Pɛtrɔ ghɔm gɑ bi a lə pɑ pa' a m Cyəpɔ, nə pa' da m dzʉywə bɔkpɔ̌k kɑ ywə mviŋ lɑ nthʉm vɔk a. Gi bɔ̌ lə kwi' gɔm bi e nə batə mcʉm bʉə gɑ: Ywə yə Si ghə a lɔ a, bi a pɑ o lə ghɔm gɑ a pɔk pɑ́. Ywə bɔ̌ lə cyə po'o mcʉm ntha, tə biŋ bɑnyə m kɛbəŋ. Cwə yə Pɛtrɔ lə pɑ shəŋ nə zhyə ywə yə yəŋ nə yɔ m nthʉ̌m zhwenyə yə e jɔ a da'tə a, pɔ pyə Kornəlio lə təm wap a, wap ghiŋ bɑ həŋtə dyə Simon ŋwak shwə̀ kə̀ŋ. Wap lə kě, həŋtə bi a Simon yə pu ŋkhe e gɑ Pɛtrɔ a shwə̀ dyə̀ bɔ a. Pɛtrɔ lə̀ jɑ wə sɛ́ nwə pɑ nə yɔ m nthʉ̌m Zhwenyə yə e jɔ a, tə Zhwenyə ghɔm bi e gɑ: Yɔ, pɔ pɑpʉə wə shəŋ o. Wuŋ fi' pu a pu ghɔ, kɑ pwɔk sɔmywə nə pa' myə̀ nə nthəm wap. Pɛtrɔ lə fǐ', gɔ bəŋ pɔ bɔ̌, gɔm bi pu gɑ: Gɑ̌ yəŋ, gɑ̌ bɑ mo yə po shəŋ e a. Pǒ sɔ' m nə nwə kɑ? Wap pa' bi e gɑ: Kornəlio, yə e bɑ tádyə̌ msəŋwi pɔ ŋkhə, bɑ mo dəŋdəŋ bɑ bwɔk Si, pɑ Yudea pɑ ŋkhuŋ e guŋ yap awɛ a nə nthəm wɔk. Ta' aŋgəle dɔlɔ̌ ghə e zhyə̀ gɑ e gɔ ghə o sɔ' dyə́ e, e yu' o, o siŋ e mcùŋ nə Ghɔm. Pɛtrɔ ghə wap ko dyə, e hɑ tsʉ' bi pu nə ti. Dzʉ lə lɔ̌ pu a pu ba shɑ mfɑ pɑ Yope ghɔ. A piŋ di bɑ yə mu' jʉ̀m dzʉ̌ wap kəm Kaesarea. A lə nə pɑ̀ po'o Kornəlio pɑ̀wə byap wap, bɑ ě ké guŋ ŋkhənyə e ba mso pyə awɛ. Cwə yə Pɛtrɔ lə pɑ sɔ' a, Kornəlio ghɔ məjyə, pu e yu'tə, e vʉ dzə e, sé e, Pɛtrɔ ghɔm bi e gɑ: Lusi, gɔm po'o, bʉ' e si, biŋ gɔm bi e gɑ, ba myə̀ yɑ̌ gɑ bɑ pɑ mo. Pu e lə ghǐŋ bɑ shɔmnwə tə ŋkhəm dyə Kornəlio, Pɛtrɔ nə yɔ dəŋ pɔ pyə wap dyə a, gɔm gɑ: Po zhyə gɑ a bɑ bi yə Yudea bɑ kwa' nə zhwə e, gɑ pu gʉɔ na' shwə̀ ŋkwi tsʉ'. Da' gɑ sɔ' m nə m̀ Si dú m nə ghə gɑ jyə gɑ pu la tə́ bɑ gɔ ghɔm gɑ́ sɔmmo bɑ mo bɔkpɔ̌k kɑ təlɔ̀ pɑ. A ywə yə a gə tə o ke a, guŋ sɔ' pa tə ghə dziŋ a. Da' gɑ cwəlɔ gɑ̌ wə shəŋ nə zhyə ywə yə o gɔm gɑ a sɔ' nə a. Kornəlio pa' bi e gɑ: A cwəlɔ dzʉ tyɛ' tá pa' bɑ̌ dyə́ ŋkhɛ a cwəlɔ, nə mnam tà bwadzʉ̌, bɑ shwyɛ'nyə Si, gùŋ nə yɔ mu' mɑ mo, dzə tsyə pɑ̀wə dəŋnyələŋnyə ŋwak dzə m̀, gɔm bəm gɑ: Si yu' mcwyɛ'nyə mǔ m Kornəlio, ba mfa' kwitə mǔ pɑ bɑ a kəm dzə e. Təm mo gɑ e ghɔ Yope ŋkhe Simon yə pu ŋkhe é gɑ Pɛtrɔ a gɑ e sɔ' tsɔ'ɔ. E dyə Simon gɛfa' nə gwɔp kəŋ shyə lɑpʉə pa' gʉɔ a. Pɑ cwə o bɔ, gɑ e guŋ nthəm gɑ pu sɔ' ŋkhe o, o nəŋ shəŋtə ŋkhuŋ a, sɔ' po'o ŋkwyatə wɔk. Cwəlɔ, pyə pɔ gɑ dzə o awɛ nə yu' ywə yə Cyəpɔ gɔm bu gɑ o siŋ wɔk a. Pɛtrɔ ŋa' shwə é gɔm gɑ: Gɑ̌ zhyə cwəlɔ nyənyɔ gɑ Si tə ŋkhyak mo pɑ ba m gɑ bǎ nə ya guŋ lə, mo yə ě pwɔk e, biŋ bɑ gə nwə dəŋdəŋ a, e ŋkhuŋ e. E lě shya ŋkhʉɔ e bi pɑ Israɛl: Cuŋ pɑpuŋ hwitə̀ shyə m nə Yeso Kristo, yʉ́ yə é bɑ Cyəpɔ guŋ pɔ awɛ a. Pǒ zhyə́: nwə bɔ bɑ ǎ sa guŋ Yudea awɛ, bɑ a lə to' Galilea, fɑ nə kwǐshyə yə Yohane lə́ shyanyə a. Yəŋ Yeso yə Nazarɛt, po zhyə́ pa' Si lə lɑ Zhwenyə Dɔlɔ̌ ba tʉɔ nə jwɔ' e a. E lə cyə nə guŋ mtsʉ' awɛ pa' gənwə pɑpuŋ a. E lə jɛ guŋ pɔ awɛ pyə sata lə bɑ e kwɑ wap a, nə pa' pu Si lə nə bəmtə bɑ. Pyə bɑ mghɛ kwinthɛ nə guŋ fa' tsyə́ awɛ nthʉm guŋ pɑ Yudea, ba m Yerusalɛm, yʉ yə wap lə ciŋ e thə nə bvɑnyə e a, Si yám é nə vʉ̌ nə bàtə dzʉ tyɛ̀' tá gə gɑ e la'tə nɑ e, da' gɑ́ tə m bi gùŋ pɔ awɛ pɑ́, da' m bi mghɛ kwinthɛ pyə Si lə ləŋdzə shwɔ' wap a, bi wɔk pyə pyə a pu lə tsʉ̌ ywə biŋ nwə̀ ywə tə bɑ ě yam nə vʉ̌ a. E le gɔm bi pyə gɑ pyə ghɔ shyanyə bi gùŋ pɔ awɛ, biŋ bɑ ŋkwinthɛ̌ gɑ Si bɑ e cwɔ' e nə gə gɛ fyɛ' pɔ mtʉɔ ba pɔ pyə wap lě pfʉ a. Mkwǐnthɛ́ gùŋ mghɔm ghɔm Si awɛ bɑ pɑ nə e gɑ: A shyə m nə tso tsyə́ pu lɑ mhɔ mo yə e piŋ e a nə shwyɛ' e. Pɛtrɔ lə pɑ gɔm po'o, Zhwenyə Dɔlɔ̌ sɔ' nə pɔ pyə wap lə yu' ghɔm a nwə pɑ shyə mghɛ piŋ pyə a lə bɑ pu vo wap a, pyə wap lə sɔ' shya Pɛtrɔ a, nə pa' nə hɑ Zhwenyə Dɔlɔ̌ ko ba m nə guŋ pɑ tə pɑ́ pɑ Yudea a. Wap lə bɑ́wə ju' pɔ bɔ, wap pɑ gɔm mghɔm, bɑ jwɔp nə ghu' Si. Pɛtrɔ piŋ dɑ ghɔm gɔm gɑ: Bi a pɑ mo kəŋnyə kwishyə bi pɔ pyə a bɑ wap kwi Zhwenyə Dɔlɔ̌ pa' wɔk pɑ a? E lə ghɔm gɑ wap kwishyə nə tso Yeso Kristo, wap piŋ həŋtə e gɑ pu a pu na' shwə nə shɑ mtyɛ'dzʉ. Mghɛ nthəm pu a mfɑ̌mfɑ́ pyə wap lə shwə Yudea a lə yu' pa' pu gɔm gɑ ba pɑ tə pɑ́ pɑ̌ Yudea kwi Ghɔm Si a. Pɛtrɔ lə pʉɔ tə ŋkho Yerusalɛm cwəlɔ, pu a pɑ piŋ Si pyə a lə bɑ pu vo wap pɑ nthɛshwə̀. Wap pɑ gɔm bi e gɑ: O ko dyə pɔ pyə a bɑ pu ka vo wap a tə pu a pu tsʉ ywə. A pɑ po'o Pɛtrɔ piŋ ntho' pa' a lə pɑ̌ a, tɑ fɑ nə cwiŋ e, siŋ wap nə mzhə̀ŋ gɑ: Ŋ də pɑ̌ tisuŋ Yope bɑwə shwyɛ'nyə Si, jɔ m nə yɔ nthʉm zhwenyə, jɔ mu' nthi ywə yə pɑ́ mo lə zhyə nə ghɔm a, mu' ywə pa' mɑ gheŋghěŋ pak dzə a pɑwə fi' fɑ kɛbəŋ nə mtɔk mapfʉə, sɔ' tə́ ŋkhəm bəm. Ŋ də lě ywə bɔ dəŋdəŋ, diŋtə, jɔ́ nthinthi mnɔm mkwə pfʉə pyə wap dəmcǎ', mnɔm gó, pyə wap fəŋ vam tsap pɑ si a, ba pyə wap ntha to kɛbəŋ a biŋ ju' gi mo ghɔm bəm gɑ: Pɛtrɔ, zhwə pfɑ. Ba' gɑ: gɛ̌ m Cyəpɔ! Nə pa' sɔm bɔkbɔk ywə kɑ ywə mviŋ lɑ nthʉm vɔk a la m ŋkho shwə m̀. Gi bɔ kwi' gɔm batə mcʉm bʉə tɑ́ kɛbəŋ gɑ: Ywə yə Si lɔnyə ya á, kɑ ghɔm gɑ a bɔkbɔk e! A lə ghə pɑ po'o mcʉm nthà, bɑnyə kɛbəŋ. A wuŋ bɑ pɑ cwə o bɔ̌, pɔ pɑtá ŋwak dyə tsʉ' yə pyə lə bɑ̀ nə a, bɑ pu nthəm wap fɑ m Kaesarea. Zhwenyə ghɔm bəm gɑ pyə a pu ghɔ tə zhʉ'nyə. Mfɑ pɔk pɑ̀ pɔ gɑ nthɔk lə ghɔ shya a. Pyə a pu lə ko dyə Kornəlio. E siŋ wɔk pá' e kɑ yɔ̌ aŋgəle e ghɔm bi e gɑ: Təm mo e ghɔ Yope ŋkhe Simon yə pu ŋkhe é ga Pɛtrɔ a. E gɔ siŋ o mnwə myə a gɔ lɑ nə vɔk nə sɔ' bu ba m bi guŋ tuŋdyə o awɛ a. Ŋ də nə ŋa'shwə a Zhwenyə Dɔlɔ̌ wuŋ fi' sɔ' nə pu pá' a lə sɔ' nə pɑ nə cwə nə jitə a. A pɑ̀ po'o ŋkhamtə pa' Cyəpɔ lə ghɔm gɑ: Yohane lə nu' pɔ shyə, pu gɔ nu' wɔ nthʉm Zhwenyə Dɔlɔ̌. A pɑ gɑ Si hɑ gho' e bi pɔ pɔ̌ pyə wap biŋ Yeso Kristo a, pa' e lə hɑ bi pɑ̌ a, bɑ gɑ̌ bɑ wɑ tə kɔ pa' Si gɔ ghə ywə a. E lə ghɔm po'o pɔ pyə wap lə bɑ si ju' e a lɛtə cwəlɔ gu'tə́ Si gɑ: A yɑ bɑ Si hɑ nə pʉɔtʉ̌m ŋkho nə vɔk ba bi mguŋ pɑ tə pɑ́ pɑ Yudea. A lə́ nə pɑ̌ po'o bɑ pɔ pyə paknyə yə a lə təm pa' pu lə zhwə Etiennə a lə sɛtə wap a, bɑ wap lě gɔ tə ŋkho Fenikia, ba m Kipro pu Antiokia tə ghɔm mcuŋ pɑpuŋ bi sɔmmo tə ne da' pɑ Yudea. Da' gɑ shɑ pɔ cəcɑ̌ pu pyə wap lə bɑ́ pɑ Kipro ba pɑ Kirena a lə ko Antiokia gɔm Cuŋ pɑpuŋ Yeso Cyəpɔ. Cyəpɔ pɑ ŋkwitə wap, tə dəŋ pɔ pyə wap lə yapjʉ̌m Cyəpɔ biŋ e a pɑ gɔ dzə. Cu'tə pɑ piŋ yə a lə bɑ Yerusalɛm a lə nə yu' mɔ mcuŋ, nthəm Barnabas Antiokia. E lə ŋwak tsʉ'u, nə yɔ pa' gho' Si wə fa' a, ŋwɛ́nyə, biŋ shwi'tə bi pu gɑ wap la nə Cyəpɔ tə nthʉm tʉm pu. Barnabas lə́ bɑ mo dəŋdəŋ, Zhwenyə Dɔlɔ̌ ba piŋnthʉm pɑ bɑ a lonyə nə e. A lə cyə m po'o kwa' mɑ vəŋ pɔ yap jʉ̌m Cyəpɔ. Barnabas lə lu cwəlɔ gɔ Tarso nə cəŋ Saulo. E lə́ yɔ e, pu e ghɔ Antiokia, shwə wə tá' gu'dzʉ̌, bɑ fa' nthʉm cu'tə pɑ piŋ, biŋ bɑ ji'tə pɔmnəŋ. A lə bɑ Antiokia tə pu to' nə ké pɑ piŋ gɑ pɔ Kristo. A lə pɑ̌ nə mtyɛ'dzʉ bɔ mghɔm ghɔm Si fɑ Yerusalɛm dzəŋ Antiokia. Mu' mo nə pu, pu pɑ ŋkhe e gɑ Agabo, cyə m nə́ Zhwenyə gə pu zhyə́ gɑ kwa' mɑ kəya' Si gɔ vʉ dəmcǎ' awɛ, kəya' bɔ lə təm nə cwə fo Klaudia. Mghɛ zhi'tə nwə yap gɑ wap gɔ təm ywə́ nə ŋkwitə mfɑmfɑ pyə wap lə bɑ Yudea a, dəŋ e bǎ ya mo a ku'nyə nə ghə a. Wap lə ghə po'o nthəm bi mghətso, shyə m nə bǔ Barnabas pu Saulo. A lə pɑ nə wɔ̌dzʉ bɔ, fo Herode to' nə lɑ shɑ pɔ pyə wap lə bɑ nthʉm cu'tə pɔ Kristo a jɔgo'. E lə ghə̌ pu wà Yakop fɑ Yohane. E lə nə yɔ gɑ ǎ puŋ pɑ Yudea, gə pu kwi' gəm Pɛtrɔ, a lə bɑ nə tyɛ' msɛ́ tə kwɔ'msɛ̌. E lə ghə tə pu kyəp e cwəlɔ, e nyəŋ e dyəcɛ̌, jap gɑ msəŋwi mkam pfʉə pɔ pfʉə pɔ pfʉ̀ə pɑ dé e. E lə bɑwə shəŋ gɑ Paska cyə tə e putə e bi pɔmnəŋ. Cwə yə Pɛtrɔ lə bɑ dyəcɛ̌ a, mcwyɛ'nyə Si tə pwa nthʉm mcu'tə pɔ Kristo pɑ ŋkwɔ' gùŋ mcwə awɛ bəŋ Si nə tso tsyə. Herode lə pɑ gɔ ghə pu fyɛ' e. A pɑ mtsʉ', Pɛtrɔ pɑ dyəcɛ̌, tuŋ msəŋwi pɑpʉ̌ə bɑ e nuŋ bɑwə di, bɑ pu lɑ mgwɑ mtʉ̌ɔ məbʉə shəŋ e, shɑ msəŋwi pɑ jyədyə̌ bɑwə byap. Da' gɑ aŋgəle Cyəpɔ lə wuŋ ŋwak, ŋkha' lo dyə̌. Aŋgəle pu'tə bhə be Pɛtrɔ nə jam e, gɔm bi e gɑ: Lusi m gʉ̌'. Mgwɑ mtʉɔ lə kyɛ́' nə bu myə́. Aŋgəle piŋ gɔm bi e gɑ: Zhwé tap o, biŋ ŋkwɑ ŋkhə̀ mthap mǔ e ghə po'o, e piŋ ŋkwi' gɑ ŋkwa dzə o yə jʉm dzʉ̌ jap jʉ̌m m̀. Pɛtrɔ yap jʉ̀m e nthəm. E la tə bɑwə jyə nyənyɔ gɑ aŋgəle nə lə́ bɑwə bvɔk e pɑ, é bɑwə ŋkwɛ gɑ e jɔ pɑ nə yɔ m nthʉ̌m zhwenyə. Wap lə twɔk dəŋdzə nthap pyap, ba bátə nthap pyap yɑpʉə. Ŋwak nə jyədyə̌ mtʉ̌ɔ yə a de m tisuŋ a, a hé pɑ dǒ e dzə̌ pú; wap lə ko dzʉ cwəlɔ, gɔ tə ŋkhəm nə dhə təŋjyə gwyə, aŋgəle wuŋ fiŋ Pɛtrɔ gɔ tsyə. E zhyə nɑ e, gɔm gɑ: cwəlɔ gɑ wə ju' kwa' nyənyɔ gɑ Cyəpɔ təm aŋgəle e, e sɔ' bvɔk a nə bǔ Herode pu a nə ywə yə pɑ Yudea kɑ bɑwə byap a. E lə́ lə̌ŋtə jyə cwəlɔ, ŋkhəm wə Maria ma Yohane yə pu ŋkhe e gɑ Markusi a. Pɔ tə jɔm lə bɑ wə bɑwə shwyɛ'nyə Si. E lə ko'tə vi' pù', mu' mú go, gɛfa', tso tsyə pɑ Rode sɔ' de. E lə tǐŋ gi Pɛtrɔ, ŋwɛnyə, ŋthak nə he pù' nəŋ ŋkhʉdʉ́ bɑnyə gɔm gɑ Pɛtrɔ shwə pú'. Pu ghɔm bi e gɑ o wə bʉə, da' gɑ e lə nə fʉ' m jʉ̀m. Wap ghɔm gɑ a aŋgəle e. Pɛtrɔ lə bɑ pɑ shwə pu' bo ŋkho'tə, wap cwɔ' cwəlɔ, jɔ a pɑ yʉ́. Nwə cyə wáp. Pɛtrɔ ma'tə pǔ gɑ wap lɛtə. Siŋ wap pa' Cyəpɔ bvɔk e á, nə mìŋ gɔm gɑ: Po ghɔ siŋ Yakop ba mfɑ̌mfɑ́. Biŋ ntham məjyə cwəlɔ gɔ m nə mu' tsʉ'. Dzʉ lə lɔ̌, va' ko cəcɑ̌ msəŋwi nə ywə yə Pɛtrɔ zhi ya a. Herode ghə gɑ pu cəŋ e, da' gɑ mo lə yɔ e. E ghə pu cəŋtə fyɛ' pɑ pyap cɛ́, e piŋ gɔm gɑ pu lə wap gɔ jwətə wap. Pɛtrɔ lə pǐŋ fɑ Yudea cwəlɔ dzəŋ gɔ Kaesarea na' shwə wə́. Shɛ́ lə bɑ cəcɑ̌ Herode pu a pɑ Tiro ba pɑ Sidon. Wap lə cɔ̌m bɑ ŋkwishwə gɔ dzə e, Wap lə cyə̌ m nə yə nə ghiŋkǎm Blasto gɛfa' nthʉm twɔ'dyə̌ fò yə e lə bɑ nə yap jʉm a, gɔm gɑ pu a pu nyaptə pɑ tə nə gə shɛ. Nə pa' ywətsʉ lə fɑ m guŋ fò Herode tə sɔ' gǔŋ pu. A lə kǔ' tyɛ' mka'nyə, fo Herode kwadzə fo nə e, shwə dzə, sa' la'. Cwə yə pɔmnəŋ lə pɑ̌ bu' bu gɑ a gi Si, a tə gi monəŋ pɑ̀! Aŋgəle Cyəpɔ wuŋ dzɔp Herode nə pa' e ka hɑ ghu'tə bi Si a, mcwəcwə tsʉnyə e, e pfʉ. Da' gɑ ghɔm Si pɑ ŋkwyə, bɑ sé. Sɔ' m nə Barnabas pu Saulo, wap fɑ Yerusalɛm gɔ nə lɑ fa' tsap gɔ dzə̀; wap lə nə pɑnyə dɑ Yohane yə pu lə ŋkhe e gɑ Markusi a. A lə bɑ dyə̀ cu'tə pɔ Kristo Antiokia, shɑ pɑ mghɔ́m ghɔm Si ba pɑ la'tə nwə Si pɑ wə: Bɑ Barnabas, Simon yə pu ŋkhe e gɑ Niger, Lukios yə Kirena, Manahɛm yə pu Fo Herode lə̀ bɑ mso cwə bwa á, biŋ gə Saulo. A lə pɑ mu' tyɛ'dzʉ bɑ wap cu'tə bɑ gamtə Cyəpɔ, biŋ bɑ shwə tə tsʉ́ ywə, Zhwenyə Dɔlɔ̌ ghɔm gɑ: Pò tak Barnabas pu Saulo bəm nə fa' tsyə dɑ ké wap nə a. A lə pɑ̌ po'o wap cwə tə tsʉ̀ ywə, biŋ shwyɛ'nyə Si cwəlɔ, jap bu thə pu, nthak wap, wap ghɔ. Barnabas pu Saulo lə nə yɔ gɑ Zhwenyə Dɔlɔ̌ təm wap cwəlɔ, dzəŋ gɔ Səlʉkia, ŋkho kənu' gwyə, gɔ m Kipro, guŋ cəcɑ shyə. Wap lə ko Salamina, siŋ ghɔm Si, dyə msinagogə pɑ Yudea. Pu a Yohane nə lə bɑ, e pɑ̀ ŋkwipǔ yap. Wap lə twɔk guŋ guŋ cəcɑ shyə awɛ, ŋkhəm Pafos. Ŋkwyatə mu' gɛ kɛ, e pɑ gɔm gɑ e bɑ gɔm ghɔm Si. A lə bɑ yə Yudea tso tsyə pɑ Bar-Yeso. E lə bɑ mo nə pɔ gɔpna' Sergio Polo. Mo bɑ e ghə zhyənwə. Gɔpna' bɔ lə kě Barnabas pu Saulo, bɑ shəŋ nə yu' ghɔm Si. Da' gɑ gɛ kɛ Elima yə̌ŋ pa' tso tsyə lə nə nthutə a kɔ, bɑ shəŋ nə fɛ gɔpna' nə piŋnthʉm. A lə pɑ po'o Zhwenyə Dɔlɔ̌ lo nə Saulo, yəŋ la'tə gɑ Polo. E le gɛ kɛ bɔ dəŋdəŋ biŋ gɔm bi e gɑ: Wə yə a bɑ fʉ̌ pu a mfʉm lo nə o, wə mu Sata, gɛ bo nwə dəŋdəŋ, o tə gɔ tak nə sɔknyə məjyə Si nəŋ a. Tə́ yɔ, pu Cyəpɔ yap nə o, o gɔ vʉ fʉ̀, o lə piŋ jɔ nam tə ŋkhəm nə cwə yə pu piŋ gɔm a. Pɑ́ cwə o bɔ, jʉ̀m lə kwɑ e, e cʉ' bɑ dzamnyə pɑ ŋkwi tsʉ', bɑ shəŋ mo yə e gɔ la'tə e məjyə a. Gɔpna' lə nə yɔ nwə yə a shyə a, shʉ' gɛ piŋ, nə pa' ghɔm Cyəpɔ lə bɑ a cəŋtə ŋkhonyə e. Polo pu a mso pyə lə ko kənu' gwyə Pafos nə́ nə gɔ Pɛrge m Pamfilia. A pɑ po'o Yohane hap nə pu, bɑnyə m Yerusalɛm. Sɔ' m nə pɑ Polo pu a mso pyə, wap lu Pɛrge, gɔ tə ŋkhəm Antiokia m Pisidia. A pɑ tyɛ' Sabat wap kodyə Sinagogə, shwə́si. Pu lə miŋ nə ke Mco' ba Mghɔ́m ghɔm Si, mtadyə Sinagogə ghɔm bi pu gɑ: Mfɑ̌mfɑ, a pɑ gɑ̌ po ghə mghɔm nə nyəŋ gʉ́' po ghɔm bi pɔmnəŋ cwəlɔ. Polo lusi, nya pu e gɔm gɑ: Pɑ Israɛl, ba wɔ pɑ pwɔk Si po yu' a. Si pɑ Israɛl pɔ̀ pɔk pɑ lə cwɔ' mtá pɔk pɑ̀. E lə ghə̌ wap zhi nthʉm guŋ Egipto, e piŋ dɑ gʉ' pu e nə nthe wap. E lə khǐm wap ghakgo nə gwɛ a gu'dzʉ́ mghappfʉə. Biŋ simnyə pɔ nə mgùŋ sɔmbʉə Kanaan, hɑ bi pu pa' tsə mcʉ' a, Guŋ mnwə bɔ awɛ lə cwə gwɛ a gu'dzʉ́ potɔ mkhə pfʉə; e piŋ hɑ mghɛ cya wap, tə gɔ ŋkhəm nə gɔm ghɔm Si Samuɛl. Wap piŋ həŋtə pɑ fo, Si hɑ Saulo mu Kis, gwya mo Bɛnyamɛn bi pu. E sa' wap gu' mghappfʉə. Si lə́ nə̀ te e, shwɔ' David nə gə fo bi pu. A bɑ nə é tə Si gɔm gɑ: gɑ̌ ho David mu Yese, kwa' mo pa' tʉm tsɑ shəŋ a, yə e gɔ sɔ' ghə guŋ ywə yə gɑ̌ ŋkhuŋ a. Nə ŋkhənyə e pa' Si lə ka' a, e lě gə Yeso təm bɑ gɛvɔk pɑ Israɛl. E lə́ nə sɔ', bɑ Yohane tamdzə e, gɔm nwə kwishyə pʉɔtʉm bi guŋ pɑ Israɛl awɛ, tə biŋ nə miŋ mfa' myə́ həŋtə gɑ: po ŋkwɛ gɑ gɑ̌ bɑ̀ wɑ? Ŋ tə bɑ mo bɔ pɑ. Da' gɑ mu' mo jʉ̌m m̀ bɑwə sɔ', bɑ ŋ ka ku'nyə nə kyɛ' ŋkhə mthap myə́. Mfɑ̌mfɑ́, kɑ po bɑ pɑ̀ pǒ Abraham, kɑ pǒ pɔ pyə wap bwɔk Si a lə, bɑ ghɔm ywə́ bvɔ́k tsɔ̀ gɑ bɑ tsɔk pɑ. Pɑ́ Yerusalɛm pu a mtadyə pap lě ŋkhəŋnyə Yeso; biŋ nə nyəŋ shɛ thə e, gə mghɔm myə mghɔm ghɔm Si myə pu ŋkhe guŋ mtyɛ' Sabat awɛ a pəmtə. Ba tə pa' wap la tə yɔ ywə yə bi a pɑ wap cyə m nə jwə e a, wap lə həŋtə bi Pilato gɑ e zhwə e. A piŋ bɑ po'o wap ghə guŋ ywə awɛ yə pu lə və nə e a pəmtə, wap fi' e thə ntha' bǔ, nyəŋ e ghʉm sì. Da' gɑ Si lě jám e nə vʉ cəcɑ̌ mpfə pɔ. E piŋ da'tə nɑ e bi pɔ pyə pu a pu lə pəmtə fɑ Galilea gɔ Yerusalɛm nə mtyɛ'dzʉ jɔmyɔm a. Wap nə bɑ tyɛ' ɔ bɑ mghɛ ŋkwinthɛ̌ pyə́ dzə̌ pɔmnəŋ. Ba wɔk yɔk pyə wə siŋ wɔ yəŋ Cuŋ pɑpuŋ: a pɑ gɑ mka'nyə myə a lə la' bɑ̀ bi mta pɔk pɑ a, Si ghə a cəŋtə bəmtə nə pɑ, pó pap, nə pa' e jám Yeso dəŋdəŋ pa' a bɑ pu və nə batə zhwɔp dɔlɔ̌ yɑpʉə a gɑ: O bɑ mù a, gɑ tsə o tyɛ' ɔ. Pa' Si jam e nə vʉ̌, e lə pɑ gɔ la'tə piŋ pì a, a bɑ ywə yə e lə la' gɔm a gɑ: Gɑ̌ gɔ la' hɑ pɔ dɔlɔ̌, kwa' pa' David nə bɑ nyənyɔ a. A ywə yə a gə e piŋ gɔm nə mu' tsʉ' gɑ: O tə̀ gɔ la' tàk Dɔlɔ̌ o e simnyə pɑ̀ A nəŋ bɑ po'o bɑ David yə e lə bɑ gɛfa' nə yə cwə dzʉ̌ nə ŋkhɛ pa' Si nə jap nwə e a lě pfʉ́, pu təŋ e cəcɑ̌ mtá pyə, e simnyə. Tɑ́ mo yə Si jám e nə vʉ̌ a ka zhyə nə simnyə. Po zhyə cwəlɔ gɑ a shyə pɑ m nə e tə pu siŋ wɔ nwə nə lɑ mhɔ mo shwyɛ' e, yəŋ nə pɑ́ dəŋdəŋ yə po lě tə yɔ́ yá nə mco' Mosɛ a. A shyə m nə e tə́ bɑ bi bǎ ya mo lə yə e piŋ a. Po pɔmtə gɑ ghɔm mghɔm ghɔm Si kɑ pəmtə nə po gɑ: Wɔ mghɛ ŋa' nɑ, po yɔ, po pwɔk, simnyə! Cwə yə po yɑ pɑwə a, gɑ̌ gɔ ghə mu' fa' pəmtə fa' tsɑ̀ tsyə mo lə siŋ wɔ siŋ bɑ po la tə piŋ a. Pù lə tə̌m cwəlɔ, shwyɛ'nyə Polo pu Barnabas gɑ wap ti nə yə mu' Sabat biŋ gɔm nwə pɑ nə nwə bɔ. Pu lə cwə́ tə haptə, shɑ pɑ Yudea ba shɑ mghʉɔ pyə wap lə piŋ a cya Polo pu Barnabas. Pu a pu lə pɑ shɔmnwə wap cwi'tə bi pu gɑ wap tɔm gho' Si kwa' pɑpuŋ. Yə mu' Sabat lə sɔ', guŋ po awɛ tisuŋ cu'tə nə yu' ghɔm Cyəpɔ. Pɑ Yudea lə nə yɔ dəŋ vəŋ pɔ bɔ, luŋ yap sə́. Polo piŋ bɑ gɔm nwə wap yə́mtə yə́mtə. Polo pu Barnabas sɑ́tə nɑ tsap gɔm bi pu gɑ: Pu kɑ bɑ gɔ ləŋdzə ghɔm ghɔm Si tsɔ gɑ bi po. Pa' pǒ kəŋnyə biŋ jɔ pɑ wɔ gɑ po ka ku'nyə nə vɔk mama á, pyə gɔ fɛ cwəlɔ ghɔ m nə pɑ tə pɑ pɑ́ Yudea. Nə pa' ywə yə Cyəpɔ gɔm pi pyə a bɑ gɑ: Gɑ̌ bɑ gɑ̌ lɑ o gə ŋkha' guŋ, po'o gɑ o lɑ ywə vɔk nə gɔ tə ŋkhəm dhə̀ dzʉ́. Pɑ tə pɑ pɑ́ Yudea lə nə yu' po'o, ŋwɛnyə, nyəŋ dəŋ nə ghɔm Cyəpɔ, guŋ pɔ awɛ pyə wap lə zhyə́ gɑ a bɑ pu ká' vɔk mama bi pu a zhí pɑ piŋ. A pɑ po'o ghɔm Cyəpɔ lɑ guŋ mghəŋ tsʉ' o bɔ awɛ. Da' gɑ pɑ Yudea ma' paknyə cəcɑ̌ mkam pɑ jwǐ ba mkam tisuŋ, ji nə cwɔ'mkwə Polo pu Barnabas cwəpuŋ nə jəŋ wap gǔŋ pú. Polo pu Barnabas lə tsɔp vɔp tsap nə mkwə map cwəlɔ gɔ m Ikonya. Sɔ' m nə mghɛ zhi'nwə, ŋwɛnyə ba Zhwenyə Dɔlɔ̌ lo nə pú. A lə ko Ikonya bɑ pɑ́ pa' a kɑ zhí bɑ a: Polo pu Barnabas ghɔ dyə Sinagogə pɑ Yudea, gɔm nwə tə pɑ Yudea ba pɑ Grikia pʉɔtʉm tsap shʉ' pɑ piŋ kwa' vəŋ e. Da' gɑ pɑ Yudea pyə wap la tə piŋ a nyəŋ bo nthʉm tʉm pɑ tə pɑ pɑ Yudea pyə wap lə piŋ a nə mfɑ̌mfɑ. Polo pu Barnabas la tə cyətə na' shwə́ wə́ pɑ; tʉm sap lɑ bɑwə shəŋtə jap nə Cyəpɔ yə e lə bɑwə ŋkwinthɛ̌ nə ghɔm gho' tsyə́, bɑ gə wap lɑ bu map gə mtiŋ ba msya. Pɑ tisuŋ lə ghap m ghə̌ŋ bʉə. Shɑ pɔ pɑ jʉ̀m pɑ Yudea, pyə shɑ pɔ pɑ jʉm mghɛ nthəm. Pɑ tə pɑ pɑ Yudea pu a pɑ Yudea lə yap gɑ wap gɔ lɑ gʉ' ko nə, lɑ mwɔ' tamtə mghɛ nthəm. Polo pu Barnabas lə zhyə ywə yə a si a, shəŋ tsʉ' tʉmnyə tisuŋ Likonya, ba m Listra, ba m Dɛrbe pu a m géŋnyə tsʉ'u. Ba m tsʉ'u bɔ wap pɑ siŋ Cuŋ pɑpuŋ. Mu' mbɛ lə bɑ Listra bɔ bi a pɑ e lə tiŋnyə nə mkwə myə́, bɑ ŋkho'tə tə fɑ vam, bɑ e la m giŋ. E lə pɑ̀ mu' tyɛ'dzʉ bɑwə ju'nwə yə Polo lə bɑ̀wə́ gɔm a, Polo lé é dəŋdəŋ biŋ jɔ gɑ e ghə piŋnthʉm yə bi a pɑ a vɔ́k e a, gɔm bi e tɑ thə́ gɑ: Lusi nthiŋnyə dəŋdəŋ nə mkwə mu! Bɛ bɔ léŋ, giŋ. Pu lə nə yɔ ywə yə Polo gə a, shɑ pɔ cəcɑ̌ pɔmnəŋ ghɔm nə ghɔm pɑ Likonya gɑ: Msi sɑnyə shʉ' pa' pɔmnəŋ a, fi' sɔ' bəŋ pɑ. Wap lə ké Barnabas gɑ Zʉs, ŋkhe Polo gɑ Hɛrmɛs nə pa' yʉ nə lə bɑ gɔm nwə. Ŋkhamsi dyə Zʉs lə́ ghə pu lɑ mpɔp mhuŋ pu a co' fo nə sɔ' mshwə tisuŋ. Pu a pɔmnəŋ pɑ ŋkwishwə nə nuŋpwɔ'. Mghɛ nthəm, Barnabas pu Polo lə nə yu' mɔ mcuŋ ŋkhitə dzə nə pù, ntham jʉ̌m pɔmnəŋ shwé gɑ: Mso mso! Po gə kɑ pa' a? Ba wɔk yɔk, pyə̌ bɑ pɑ̀ pɔmnəŋ pa' wɔ a! Cúŋ pɑpuŋ yə pyə siŋ wɔ a, bɑ gɑ po tak tsə mzhʉm ba nəŋ, ŋkwyəpnyə, fɛ de m nə Cyəpɔ Si nthʉɔtʉɔ yə e lə nyaptə kɛ̀bəŋ, ba sicǎ', ba shyə́ lɑpʉə pu a guŋ tsə tsyə a bɑ nthʉm o a. E le nthak guŋ mguŋ awɛ nə mwɔdzʉ myə a lě shyə a, bǎ ya lə ghiŋ nə yə məjyə̀ nə piŋ. Da' gɑ nə ghə po'o bɑ da'tə nwə pɑpuŋ e bi pu, nə pa' e gə bə̀ŋ fɑ kɛbəŋ, gə tsə puŋ, e hɑ bi pó, mtʉm mɔ́ pɑ ŋwɛnyə. Mghɔm mɔ gɑ lə ghə pɔmnəŋ lɛtə cwəlɔ, nthak pwɔ' tsyə wap kɑ́ bɑ̀ gɔ nuŋ bi pu a nəŋ. Shɑ pɑ Yudea lə fɑ Antiokia ba m Ikonya sɔ' ŋkho cəcɑ̌ pɔmnəŋ, gə wap piŋ mkwɛnyə map. Pu lə lɑ̌ mwɔ' nthamtə Polo, fəŋ e nə nthəm tisuŋ ma' e pa' pfə mo a. Da' gɑ mghɛ zhi'nwə lə sɔ' shu'tə bəŋ e, e lusi cwəlɔ, biŋ ŋkho tisuŋ. Dzʉ lɔ, pu Barnabas lɑ m Dɛrbe. Wap lə kǒ wə siŋ Cuŋ pɑpuŋ. Gə mghɛ zhi'nwə jɔmyɔ̌m, wap lu, biŋ shyə m Listra, Ikonya, ba m Antiokia. Wap lə ko wə bɑ kwyətə́ piŋnthʉm mghɛ zhi'nwə, bɑ shwi'tə gɑ wap kaktʉɔ nthʉm piŋnthʉm bɑ gɔm gɑ: Pɑ gɔ cyə m nə mghəghʉɔ jɔmyɔ̌m tə ko nə̀ Nəfo Si. Wap lə ko bǎ nə ya cu'tə pɑ piŋ a, shwɔ' mghətso bi pù, shwə tə tsʉywə nə shwyɛ'nyə Si, tə nthak wap nə bǔ cyəpɔ yə wap lə piŋ e a. Wap lə cyə Pisidia, gɔ Pamfilia siŋ Ghɔm bi pɑ Pɛrge, dzəŋ m Atalea ŋwak wə ŋkho kənu' gwyə nə gɔ m Antiokia tsʉ' yə wap lə lu nə tə pu cyə m nə gho' Si hɑ fa' tsyə wap lə lu m nə fa' a bi pu a. Wap lə ŋwak wə cwəlɔ, shu'tə pɑ piŋ siŋ wap ywə yə Si lə ghə shyə m nə pu a, pa' e lə ghyɛ' jyədyə̌ piŋnthʉm bi pɑ tə pɑ pɑ Yudea a. Wap pu a mghɛ zhi'nwə lə na' shwə. Shɑ pɔ lə fɑ Yudea dzəŋ, nyəŋ thə mfɑ̌mfɑ́ gɑ: po pɑ tə ghə pu vo wɔ pa' mco' Mosɛ gɔm a bɑ po tə gɔ sɔ' vɔk pɑ́. A lə pɑ̌ po'o, shɛ təm, fəŋnyə gwyə ko cəcɑ̌ Polo ba Barnabas pu a pɔ bɔ̌. Pu ghɔm jap gɑ Polo pu Barnabas ba shɑ pɔ pʉ́ɔ gɔ Yerusalɛm jɔ mghɛ nthəm pu a mghətsó nə shɛ bɔ. A lə pɑ po'o, cu'tə pɑ piŋ Antiokia cya wap. Wap lə cyə Fenikia, ba m Samaria, bɑ siŋ mfɑmfɑ pa' pɑ tə pɑ pɑ Yudea bʉɔtʉm tsap a, wap pɑ ŋwɛnyə. Wap lə ŋwak Yerusalɛm, cu'tə pɑ piŋ, mghɛ nthəm ba mghətso lɑ wap. Wap piŋ siŋ wap ywə yə pu a Si lə pəmtə gə a. Shɑ pɑ piŋ pyə wap lə təm m cəcɑ̌ pɑ Farisai lə nyəŋ yap gɑ pu vo pɑ tə pɑ pɑ Yudea pyə wap biŋ a, biŋ jap gɑ wap zhyə mco' Mosɛ. Mghɛ nthəm ba mghətso lə cu'tə nə yɔ nwə nə nwə bɔ. Pu lə pɑ fəŋnyə nwə bɔ nə gɔ pɑ m dzə tə Pɛtrɔ ghɔm gɑ: Mfɑ́mfɑ, po zhyə gɑ tə fɑ nə mtyɛ'dzʉ nə ntho', Si lə cwɔ' a, shyə m nə shwə a tə gə pɑ tə pɑ pɑ Yudea wə po yu' ghɔm Cuŋ pɑpuŋ tə shʉ' pɑ piŋ. Si yə e bɑ ě zhyə mtʉm pɔ a, lě ŋkwinthɛ̌ yap, hɑ Zhwenyə Dɔlɔ̌ bi pu dəŋdəŋ pa' e lə hɑ̌ bi pɑ a. E lə shyə̀ a m nə piŋnthʉm tə́ shu' tʉm tsap, tə ghə ŋkhyɛ'nyə cəcɑ̌ pu. Pa' a bɑ po' a, nwə kɑ pɑ ghɔ ləŋtə Si nə́ nyəŋ kəlo' yə mtà pɔk pɑ, ba wɔk pɑ ka kwa jyə́ a nthuŋ mghɛ zhi' nwə? Pɑ kwi' biŋ gɑ a lə shyə a nə nə gho' Cyəpɔ Yeso tə pɑ vɔk dəŋdəŋ pa' wap a. Guŋ pɔ awɛ nthʉm cu'tə lə lɛtə gɑ kǎm. Ju' pa' Barnabas pu Polo siŋ wap mtiŋ pu a msya myə Si shyə́ m nə pu gə wə́ pɑ tə pɑ́ pɑ Yudea. Wap lə ghɔm awɛ, Yakop lɑ yə ghɔm gɔm gɑ mfɑmfɑ po yu': Simon du m si nə kamtə bi pɑ pa' tə fɑ pɑ́ nə nə ntho', Si ghɔ cəcɑ̌ mguŋ pɑ tə pɑ pɑ Yudea shwɔ' mu' guŋ nə tso tsyə a. Nwə yəŋ bə̀mtə nə ghɔm mghɔm ghɔm Si, nə pa' bɑ pu le bvə gɑ: A gɔ sɔ' pɑ po'o a biŋ sɔ' ŋkwɑ nthap David yə a lə vʉ a. Gɑ gɔ sɔ' piŋ kwɑ mkhʉ̀m myə a shʉ' nə a, pu' a tiŋnyə thə́. Tə fɑ po'o bvʉ' pɔ cəŋ Cyəpɔ pu a guŋ mguŋ awɛ myə tso tsɑ̌ bɑ nə a. Yə̌ŋ bɑ ywə yə Cyəpɔ gɔ̀m a, e bɑwə gə mka'nyə myə́ pə́mtə, mka'nyə myə pu lə zhyə tɑ fɑ tə tyɛ' a. Gɑ piŋ yɑ gɑ ka pɑ̀ cwɔptə mkəlo' dzə̌ pɑ tə pɑ pɑ Yudea pyə wap fɛ tʉm tsap de Si a. Pɑ və bi pu da' gɑ wap pwɔk mviŋ mkətwɔk, ba nwə ghap, ba nə báp yə e fám a, ba mcyə. Tə fɑ tə tyɛ', Mosɛ lě gə́ Mghɛ ghɔmnwə nthʉm guŋ mtisuŋ awɛ, nə pa' pu ŋkhe ŋwa'nyə e nə guŋ mtyɛ' Sabat awɛ mdyə Sinagogə. Cu'tə pɑ piŋ pu a mghɛ nthəm, ba mghətso lə́ pɑ ŋkwishwə jap gɑ wap gɔ cwɔ' pɔ cəcɑ̌ pú təm wap Antiokia pu a Polo ba Barnabas. Wap lə cwɔ' Yuda yə pu biŋ ŋkhe e gɑ Barnabas a, ba Silas pɔ pyə a lə bɑ mfɑ̌mfɑ́ yap tʉm nə pu a. Ŋwa'nyə yə pu lə hɑ bi pu a bɑ gɑ: Mghɛ nthəm, ba mghətso pu a mfɑ̌mfɑ́ ca'tə mfɑ̌mfɑ́ pyə wap nthəm m nə pɑ tə pɑ pɑ Yudea a, pyə wap Antiokia, ba m Siria, ba m kilikia a. Pyə kɑ yu' gɑ shɑ pɔ pɔk kě sɔ' baknyə biŋ bva' mzhwenyə mɔ pu a mghɔm map. Tə sɔmmo nə lə́ nthəm wap pɑ. Pyə ké bɑ ŋkwishwə, shwɔ' pɔ pyə́ pyə nthəm wap bi po pu a Polo ba Barnabas. Pɔ pyə a bɑ wap hɑ vɔk yap nə tso Cyəpɔ Yeso Kristo a. A po'o tə pyə tə́m Yuda pu Silas bi po gɑ pɑ kwa' wap siŋ wɔ pɑ m shwə pa' po gɔ nə ghiŋ a. Zhwenyə Dɔlɔ̌ ba wɔk yɔ gɑ a ka puŋ gɑ pu lɑ sɔmywə hya wɔ tə ně da' ywə yə bi a pɑ po lə cyətə ghə a: Gɑ po pwɔk nə pfɑ bap yə pu nə nuŋpwɔ' pɑ tə pɑ pɑ Yudea, jyə mcyə, ba fǎm bap ba nwə ghap. Po zhyə tsə bɔ kwa' pɑpuŋ bɑ a pùŋ. A cʉ' pɑ po'o. Pɔ pyə pu lə təm wap a, lə la'nyə cwəlɔ, dzəŋ gɔ Antiokia, shu'tə pɑ piŋ hɑ ŋwa'nyə bi pu. Pu lə̀ ké ŋwa'nyə bɔ, ŋwɛnyə nə kaktʉɔ yə a lə bɑwə hɑ a. Yuda pu Silas pyə pu lə təm wap, wap piŋ bɑ mghɔm ghɔm Si a, lə hɑ kaktʉɔ bi pù, nthʉ nthəm nə pù. Pu a pù lə na' shwə, biŋ nə hapnyə cwəlɔ, mfɑ̌mfɑ́ ghɔm gɑ wap pɑnyə nə hwitə̀ bəŋ pɔ pyə wap lə təm wap a. [ *** Da' gɑ Polo pu Barnabas wuŋ Antiokia pu a shɑ pɔ tə jɔm pɑ́ ji'tə pɔ, bɑ siŋ Cuŋ pɑpuŋ nə ghɔm Cyəpɔ. A lə nə cwə muywə Polo ghɔm bi Barnabas gɑ: Pu pɑnyə bǎ nə yá tisuŋ lə yə pu lə siŋ ghɔm Cyəpɔ nə a; pu ghɔ jɔ dhə tsʉ' yə wap nə a. Barnabas lə pɑ shəŋ nə lɑ Yohane yə pu ŋkhe é gɑ Markusi a. Da' gɑ Polo lə piŋ nə pìŋ dɑ mo yə e lə kəŋnyə Pamfilia gɑ ka pu a pu pəmtə fa' a nthəm jʉm pu a, nə gə so fa' yap. A lə ko fəŋnyə̀. Fə̌ŋnyə gha' bǔ tə Polo pu Barnabas hapnyə, ba ya mo a lɑ m nə yə məjyə. Barnabas lə lɑ̌ Markusi, pu e ko kənu' gwyə dɑ m Kipro. Sɔ' m nə Polo e lə lɑ Silas pu e nə ghɔ, mfɑ̌mfɑ́ tak wap nə gho' Cyəpɔ. Polo lə kǎ Siria, ba m kilikia, bɑ hɑ kaktʉɔ bi mcu'tə pɔ Kristo. Polo lə ghɔ tə ŋkhəm Dɛrbe ba m Listra. Mu' gɛ zhi'nwə lə bɑ̀ wə tso tsyə pɑ Timotio, mú mu' mjwǐ Yudea, gɛ piŋ tap e pɑ yə Grikia. Mfɑ̌mfɑ́ pyə wap lə bɑ Listra ba m Ikonya á lə́ gɔm nwə nə é pɑ̀ pɑpuŋ. Polo lə pɑ shəŋ nə lɑ e pu e ghɔ, bvo é, bɑ bwɔk pɑ Yudea pyə wap lə bɑ tsʉ' u a. Nə pa' a lə bɑ̀ guŋ yap awɛ zhyə́ gɑ́ tap e lə bɑ yə Grikia. Nə guŋ mtisuŋ awɛ myə Polo pu Silas lə shyə nə a, wap lə siŋ wap ywə yə mghɛ nthəm pu a mghətso Yerusalɛm lə yap a, biŋ bɑ həŋtə gɑ pu ghiŋ pɑ́ po'o. Mcu'tə pɑ piŋ lə bɑ ŋkwyə nə piŋnthʉm. Də̀ŋ e pɑ ŋkwi' mtyɛ́'mtyɛ̌'. Polo pu Silas lə ghɔ̌ Frugia ba m Galata, bɑ Zhwenyə Dɔlɔ̌ kɔ́ gɑ ka wap siŋ Ghɔm Azia. Wap lə ŋwak dhənyə pɑ Misia, dəŋtə nə ghɔ m Bitinya, da' gɑ Zhwenyə Yeso lə piŋ. A lə pɑ po'o wap cyə Misia, dzə́ŋ gɔ Troas. A lə pɑ̀ mu' mtsʉ', Polo yɔ nə yɔ m nthʉ̌m zhwenyə, jɔ yə Makedonya bɑ e tiŋnyə thə bɑwə shwyɛ'nyə e gɑ: Cyə m Makedonya sɔ' ŋkwitə wɔk. A lə cyə m nə yɔ m nthʉm zhwenyə yə Polo lə yɔ a, pyə wuŋ shəŋ nə ghɔ Makedonya nə pa' pyə lə zhyə̀ nyənyɔ gɑ Si ke wɔk gɑ pyə ghɔ wə́ siŋ cuŋ pɑpuŋ. Pyə lə ko kənu' gwyə Troas, dɑ̀ m nə ghə̌ŋ Samotrake, dzʉ̀ lɔ́, pyə kəm Neapolis, dù wə̀ gɔ guŋ Filipo yə a lə bɑ tisuŋ gwyə̀ nə pfəla' Makedonya a, bɑ ntho' bi pɑ Roma a. Pyə lə na' shwə nthʉm tisuŋ bɔ. A lə pɑ̌ tyɛ' Sabat, pyə təm tisuŋ bɔ, giŋ geŋnyə mu' shyə́, tsʉ' yə pyə bɑwə sɛ gɑ pyə gɔ yɔ tsʉ' mcwyɛ'nyə tsʉ'u a; pyə lə ko tsʉ'u shwəsi cwəlɔ, gɔm nwə bi pɑjwǐ pyə wap lə bɑ wap cu'tə tsʉ'u a. Mu' nə pɑjwǐ bɔ, tso tsyə pɑ Lidia, e pɑ nthɛ́ dzə nə̌m, bɑ yə Tiatira bɑ biŋ Si; e lə těŋ mtə̌ŋ nə pyə, nə pa' a lə bɑ Cyəpɔ ghyɛ' tʉm tsyə nə ghɔm Polo. E lə cwə tə ŋkwishyə pu a guŋ dyə e awɛ, nə ké wɔk gɑ pyə sɔ' dyə e gɔm gɑ: Pa' po yɔ gɑ gɑ piŋ Cyəpɔ a, po sɔ' shwə̀ la' m̀. E lə thənyə wɔk, pyə piŋ. A lə pɑ mu' tyɛ'dzʉ pyə pɑ gɔ m tsʉ' mcwyɛ'nyə, mu' mu go gɛfa', zhwenyə gɔ́m pɑ nə e, e sɔ' nthɑ wɔk. Mpǐŋ mghɔm gɔm myə é lə gɔm a lə gə ŋkhǎp pɑ ŋkho pʉə mtǎ fa' pyə tə jɔm. E lə bɑ pɑ jʉ̀m kwə pyə a Polo gùŋ mcwə awɛ bɑ shwè gɔm gɑ: Pɑ bɛ pɔ gɑ bɑ mghɛ fa' Si tɑ thə. Wap bɑwə siŋ məjyə nə gɛvɔk. E lə ghə pɑ po'o nə mtyɛ'dzʉ jɔmyɔm. A lə pɑ po'o, Polo yɔ kəkɔ fɛ nɑ e gɔm bi zhwenyə bɔ gɑ: Nə tso Yeso Kristo, gɑ̌ ghɔm bu gɑ́ o təm nə mjwǐ yɑ. Zhwenyə wuŋ nthəm nə e pɑ cwə o bɔ. Mta pyə lə nə yɔ pa' fʉ' yə wap kɑ bɑwə byap a mi a, gəm Polo pù Silas fəŋ wap nə gɔ nə tsʉ' yə pu fyɛ' shɛ́ nə dəm sim a, dzə pɑ ya' shɛ́. Wap lə la'tə wap bi pɑ ya'shɛ́ gɔm gɑ: Pɔ pɔ gɑ wə ma' paknyə nthʉm tisuŋ pyə. Wap bɑ pɑ Yudea. Bɑwə da'tə shɑ mkhɛ nwə myə bi a pɑ wɔk pɑ Roma lə piŋ kɑ biŋ giŋ nə a. A pɑ́ po'o, lǎ' ŋkheŋtə wap; pɑ ya'shɛ́ ghə̀ pu tɔk dzə nə pu, wap ghɔ̀m gɑ́ pu lɑ ka'cyə shwɔ wap. Wap cəŋtə shwɔ wap, ma' wap cɛ́. Gɔm bi byap dyəcɛ̌ gɑ e pyap wap kwa' pɑpuŋ. Pa' wap gɔm bi e po'o a, e lɑ mghɛ nthəm nə gɔ tɑ nə mu' túŋ tsʉ' dyə̀ cɛ̌ shəŋ wap nə mkəlo' nə mkwə map. A lə pɑ nə gwɛ a téŋ mtsʉ̌' Polo pu Silas pɑ shwyɛ'nyə Si, biŋ bɑ jwɔp ghamtə Si. Pyə shɑ̀ mghɛ cɛ́ pɑ ju' pa' wap wə jwɔp a. Pu lə wuŋ nə yu' cǎ' cʉ'nyə tɑ mto dyəcɛ̌ nəŋnyə. Guŋ jyədyə̌ awɛ wuŋ he pɑ cwə o bɔ, mgwɑ mghɛ cɛ́ cɑtə nə mkwə map. Byap cɛ́ lə vonyə, jɔ bɑ guŋ mjyədyə̌ cɛ́ awɛ ghyɛ́'; e lə kwɛ́ gɑ guŋ mghɛ cɛ́ khʉ̀, bé nyə e bɑ gɔ nə zhwə nɑ́ e. Tɑ́ Polo cwé tə thə gɑ: Kɑ ghə sɔm nwə cwəpuŋ nə nɑ o. Pyə̌ pɑ si awɛ. Byap cɛ́ lə həŋtə ŋkha', deŋ ntham dyə, nə vʉ nə mkwə Polo pu Silas bɑ səŋ. Biŋ nthé wap dyə cwəlɔ, gɔm bi pu gɑ: Mcyəpɔ gɑ̌ gɔ ghə gɑ kɑ̀ tə̀ vɔk? Wap ghɔm bi e gɑ piŋ Cyəpɔ Yeso, pu a tuŋdyə o sɔ' bvɔk. Polo pu Silas lə siŋ ghɔm Cyəpɔ bi byap cɛ̌ pu a pɑ dyə e. Byap cɛ́ lə lɑ́ wap gɔ pɑ mtsʉ' bɔ, sɔk mfiŋ map, guŋ ŋkwishyə pu a guŋ pɔ pyə awɛ tə piŋ byap sɔmywə. E lə lɑ Polo pu Silas bʉɔ cwəlɔ gɔ dyə e, ŋkhim wap, pu a pu ŋwɛnyə nthʉm tuŋdyə pa' wap piŋ Si a. Dzʉ lə nə́ lɔ, pɑ ya' shɛ́ təm mco' pap gɑ wap ghɔ gɔm bi byap cɛ́ gɑ: Nəŋ pɔ pɑ̌. Byap cɛ lə siŋ Polo cuŋ bɔ gɑ: pɑ ya'shɛ́ təm gɔm gɑ pu nəŋ wɔ. Pa' a pɑ po' a po təm gɔ nə hwitə! Da' gɑ Polo ghɔm gɑ: Wap ké gə pu cwɔ wɔk dəm sim tə fyɛ' wɔk wɔk pyə pyə̌ bɑ po pɑ Roma, biŋ nyəŋ wɔk cɛ. Wap bɑwə shəŋ nə nəŋ wɔk pɑ̀ m jʉ̀mjʉ̀m a? Bi a lə pɑ̀ pa'! Pɑ̀ kwa' wap nə sɔ' nəŋ wɔk. Mcò' pɑ ya'shɛ́ lə ghɔ siŋ pɑ ya'shɛ́ pa' Polo gɔm a. Wap nə yu' gɑ Polo bɑ mù e Roma bwɔk biŋ sɔ' dó gɑ wap wa' mhɔ map, biŋ nə nə̌ŋ wap gɔm gɑ wap fɑ nthʉm tisuŋ nthəm. Polo pu Silas lə cwə tə nthəm cɛ cwəlɔ, gɔ ywə Lidia, jɔ mfɑ̌mfɑ́, hɑ kaktʉɔ bi pu tə gɔ̌. Polo pu Silas lə cyə m Amfipoli ba m Apolinya, ŋwak Tesalonika tsʉ' yə pɑ Yudea lə bɑ wap ghə Sinagogə yap nə a. Pa' a lə bɑ mà bi Polo a, e lə ghɔ jɔ wap nə msabat mənthá tə ya', bɑ siŋ wap mghɔm; bɑ shyə m nə Mŋwa'nyə dɔlɔ̌, bɑ nthútə biŋ da'tə gɑ Mesia lə bɑ gɔ yɔgo' piŋ yam nə vʉ̌, biŋ gɔm gɑ: Mesia bɔ bɑ Yeso yə gɑ bɑwə siŋ wɔ a. Shɑ́ pɑ Yudea lə pǐŋ, jap jʉm Polo pu Silas, ba vəŋ pɑ Grikia pɑ ghamtə Si, ba bo'gwyə́ mkam pɑ jwǐ. Da' gɑ pyə shɑ pɑ Yudea lə yɛlúŋ, shù'tə mcúŋ pyə wap lə jwɔk yap pɑ məjyə a, shyə́ pɔmnəŋ, ma' và' tisuŋ; gɔ dyə Yasoŋ nə cəŋ Polo pu Silas, dɑ wap gɔ dzə cu'tə, pu fyɛ' wap. Wap lə pɑ tə yɔ Polo pu Silas dɑ Yasoŋ pu a shɑ mfɑ̌mfɑ́ gɔ dzə pɑ ya'shɛ tisuŋ shwé gɔm gɑ: Pɔ pyə wap bva' dzʉ́ awɛ a pɔ tsɔ'ɔ bɑ Yasoŋ nyəŋ wap dyə. Guŋ pɔ́ pɔ́ gɑ̀ bɑwə nthé pɑ bya nə Kasa, bɑwə gɔm gɑ mu' fo wə, tso tsyə pɑ Yeso. Cwè tsap lə kwak pɔmnəŋ ba pɑ ya'shɛ, wap ghɔm gɑ Yasoŋ pu a pyə shɑ pɔ hɑ ywə nə nthʉcwyə tə pu tak wap nəŋ. Mfɑmfɑ lə ghə Polo pu Silas ghɔ pɑ mtsʉ̀' m Berea. Wap lə ko Berea gɔ Sinagogə pɑ Yudea. Pyə bɔ pɑ Yudea lə ghə mku' shyə́ pyə Tesalonika, dɑ tʉm pɑpuŋ nə ŋkwi ghɔm. Bɑ guŋ mtyɛ'dzʉ awɛ bɑ de nthʉm Mŋwa'nyə bi a ghɔm bɑ pɑ kwa' po'o a. Pɔ tə jɔm cəcɑ̌ pu lə cʉ' pɑ piŋ, ba mkam pɑ jwǐ Grikia, ba pɑ bɛ kwa' vəŋ e. Da' gɑ pɑ Yudea Tesalonika lə nə yu' gɑ Polo ko Berea siŋ ghɔm Si, biŋ sɔ' bɑ m wə ma' và' cəcɑ̌ pɔmnəŋ. Da' gɑ mfɑ̌mfɑ́ lə wuŋ gə Polo ghɔ tɑ ŋkhəm shyə lɑpʉə, a cʉ' Silas pu Timotio wə́. Pɔ pyə Polo lə bɑ bi pu a lə ghɔ tə ŋkhəm Atenya. Shya Polo, nə pɑnyə e ghɔm bi pu gɑ wap ghɔm bi Silas pu Timotio gɑ wap sɔ' m gʉ̌' ŋkwiatə e. Polo lə nə pyap wap Atenya nwə pɑ shyə e nə yɔ gɑ mkətwɔk lə bɑ ǎ ló tisuŋ bɔ. E lə bɑ siŋ pɑ Yudea ghɔm dyə sinagogə, ba m bi gúŋ pyə shɑ pɑ ghamtə Si, ba guŋ mtyɛ'dzʉ awɛ dəm sim bǎ bi wɑ̌lɑ́. Pu a pɑ sɛnwə pɑ Epikuria ba pɑ Stoikia lə pɑ̌ shɔmnwə, shɑ pɔ nə pu pɑ gɔm gɑ yəŋ zhwya ghɔ́m da'tə gɑ kɑ? Pyə shɑ pɔ pɑ gɔm gɑ a gɔ pɑ mu' siŋ nwə msi dyɛ'. Polo lə bɑwə siŋ nwə Yeso, ba nə yám nə vʉ̌. Wap lə ghəm é, dɑ é gɔ dzə Areopago həŋtə é gɑ: Bi a pɑ pyə zhyə́ nwə nə yəŋ kam sə yə o bɑwə sa'a? Nə pa' o bɑwə dɑ mnwə sə́ baknyə mtəŋ mɔk, pyə wə́ shəŋ nə zhyə ywə yə a bɑ yá a. Nə pa' guŋ pɑ Atenya awɛ, ba mghʉɔ pyə wap lə shwə́ wə́ a lə jwɔk gɔ́m ghɔm biŋ bɑ nthéŋ pɑ mtə̌ŋ nə mcuŋ sə. Polo lə tiŋnyə thə́ dzə Areopago gɔm gɑ: Pɑ Atenya, gɑ̌ yɔ wɔ nə guŋ mghəŋ awɛ, po pɑ kwa' pɑ piŋ Si. Nə pa' gɑ̌ pɑ giŋtə nə məjyə, jɔ mcwyəp mɔ, gɑ yɔ mu' cwyəp bɑ pu və nə gɑ: Bi si yə pu ka zhyə e a. Ywə yə po gamtə yá tə zhyə̌ yá a, a ywə yə gɑ̌ sɔ' nə siŋ wɔ a. Si yə e lə pə̌m dzʉ́ ba guŋ tsə tsyə́ a nthʉ̀m o a, yʉ̀ yə e bɑ Cyəpɔ kɛ́bə̀ŋ ba cǎ' a ka ghə nə cwə nə dyəsi yə pu dɑ bù tɑ nə bəm a. Ba fa' tsyə lə pɑ̀ shəŋ bu monəŋ, pa' cwə yə mu' ywə́ jak e a, yʉ́ yə e hɑ vɔk pu Zhwenyə pu a guŋ ywə awɛ a. E le shyə m nə ta' mbɛ́, bəm guŋ pɔ̀ awɛ po'o gɑ wap cwə nə guŋ dəm sica' awɛ. E lə jap mcwə dzʉ̀ tɑ kwyəpnyə, ja' dhə̀ tsʉ' yə mo gɔ kəm nə a. Po'o gɑ mo cəŋ Si. Mu'cwə e nə yɔ e məmtə́ məmtə, yʉ̀ yə e tə nəŋ bɑ gʉə sʉəsʉə nə sɔmmo nə pɑ a pɑ́. Nə pa' pɑ bvɔk, ŋaknyə, biŋ bɑwə pɑ nə e, dəŋdəŋ pa' shɑ mghɛ zhwɔp pɔ lə́ gɔm a: nə pa' pɑ bɑ gwyá e. Po'o pa' pɑ̌ bɑ gwya Si a, pɑ lá tə́ bɑ gɔ kwɛ gɑ Si hwə́ tʉɔ gɔl kɑ tʉɔ ŋkhap, kɑ gwɔ' tʉɔdəŋ yə mo ŋthɔmtə tɔmtə dɑ və ŋkhəm a pɑ. Po yɔ, cwəlɔ, Si ka sɛ́ fʉ̀mnyə̀ pɔmnəŋ, e wə siŋ gɑ guŋ pɔ awɛ, nə guŋ mtsʉ' awɛ ŋkwyəpnyə. Nə pa' a bɑ e yap ta' tyɛ'dzʉ yə é gɔ sɔ' fyɛ' dzʉ nthʉm dəŋdəŋ, cyə m nə mo yə e shwɔ' e a, pa' e jam e nə vʉ̌ a nə shəŋtə da'tə mtiŋ bi guŋ pɔ awɛ. E lə cwə̌ tə gɔm gɑ: nə yam nə vʉ̌, shɑ pɔ yəmtə e, pyə shɑ pɔ ghɔm gɑ: Pyə gɔ tì tə piŋ yù' o nə́ nə mu' cʉm. A pɑ po'o Polo təm cəcɑ̌ pu. Da' gɑ shɑ pɔ la nɑ tsap nə Polo, shʉ' pɑ piŋ; mu' mo lə bɑ cəcɑ̌ pɔ bɔ̌ tso tsyə pɑ Denis, mo nə Areopago, ba mu' mjwǐ tso tsyə pɑ Damaris, ba shɑ pɔ. Polo lə fɑ Atenya, gɔ Korinto. E lə ko ywə́ jɔ mu' yə Yudea tso tsyə́ pɑ Akilas, e pɑ nthəm Ponto, bɑwə tə fɑ m Italia pu jwǐ e Priska. Nə pa' a lə bɑ Klaudia yap mcò' gɑ guŋ pɑ Yudea awɛ təm Roma. Polo lə lɑ́ Akila pu Priska gə mso pyə̀. A piŋ bɑ̀ pa' pu a pú lə fa' pɑ ta' ywə a. Wap lə bɑ́ pɑ pa' dzə́ nə sǎm mnthap. Polo lə cwə wə pù biŋ bɑ fa'. A lə bɑ̀ nə guŋ msabat awɛ, Polo pɑ dɑ̀ ghɔm dyə sinagogə bɑ siŋ pɑ Yudea pu a pɑ Grikia nwə gɑ wap kwyəpnyə. Da' gɑ́ cwə yə Silas pu Timotio lə fɑ Makedonya sɔ' a, Polo cʉ' cwəlɔ bɑ jap guŋ yə cwə awɛ pɑ nə Ghɔm. Bɑ gɔm dzə pɑ Yudea gɑ Yeso bɑ Mesia. Pa' pɑ Yudea bɔ lə pɑ ŋkhəŋnyə biŋ bɑ shap Polo a, e lə cʉ' mdzə́ myə́, gɔm bi pu gɑ: Mcyə mɔ́ ko pɑ nə po; tə sɔ' m nə m̀, gɑ wə bɑ dɔlɔ̌. Tə fɑ cwəlɔ gɑ gɔ pɑ ghɔ pɑ wə pɑ tə pɑ pɑ Yudea. E lə lù tsʉ'u gɔ m ywə mu' Tito Zhusto biŋ Si, la' tsyə́ pɑ̀ bəŋ sinagogə. Krispo tadyə sinagogə lə piŋ Cyəpɔ pu a tuŋdyə e awɛ, ba shɑ pɑ Korinto tə jɔm yu' gi Polo, shʉ' pɑ piŋ, ŋkwi shyə́. A lə pɑ mu' mtsʉ' Cyəpɔ ghɔm bi Polo nthʉm nə yɔ m nthʉm zhwenyə gɑ: Kɑ pwɔk, ghɔm nə gɔ pɑ dzə, kɑ lɛ́tə. Nəpa' pu nə bəmtə bɑ́, bi a pɑ́ sɔmmo lə yap pu nə o nə lɑ o jɔgo', nə pa' pɔ pɑ̌ nthʉm tisuŋ yəŋ gɑ tə jɔ́m. Polo lə cwə wə ta' gu'dzʉ mkàm, bɑ̀ ji'tə wap ghɔm Si. A lə pɑ nə cwə yə Galion lə pɑ̀ gɛ sa' Akaya, guŋ pɑ Yudea awɛ pɑ́ ŋkwishwə nə cwɔ'mkwə Polo cwəpuŋ; wap piŋ dɑ e nə gɔ dyə fyɛ'. Gɔm gɑ: Bɛ yə̌ŋ gɑ bɑwə shəŋ nə lɑ pɔ̀ gɔ m nə mu' cu'tə pɑ piŋ Si yə mco' ka zhyə́ ya a. Polo lə pɑ̀ gɔ ghɔmnwə, Galion pa' bi pɑ Yudea gɑ: A la' bɑ nə́ hɔ mco' kɑ́ nwə kuso lɑ bɑ gɑ̌ yu' wɔ m pɑ Yudea dəŋdəŋ. Tə pa' shɛ́ yɔ bɑ́ pɑ́ nwə nə piŋ, pu a nwə mtso ba m nə mco' myə a bɑ́ pɑ́ mɔ a, yɑ nwə wə de pɑ wɔ. Bi a pɑ ŋ də ko nə mɑ mnwə nə fyɛ' pɑ. E lə ghɔm po'o, jəŋ wap dyə fyɛ'. A pɑ po'o guŋ yap awɛ ghəm Sostɛnə tadyə sinagogə, shwɔ e dzə̌ dyə fyɛ', da' gɑ la' Galion ko nə mnwə bɔ̌. Polo lə pǐŋ na' shwə́ Korinto biŋ nthəm cəcɑ̌ mfɑ̀mfɑ́, ŋkho kənu' gwyə nə gɔ m Siria, nə ghɔ po'o pu a Priska ba Akilas pəmtə bɑ̀. A lə nə pɑ bɑ ě kəm thə e Kɛnkrea, shyə̀ m nə shɑ̀ mka'nyə myə e lə ghə a. Wap lə ko Efeso, Polo pu a mso pyə hapnyə. E ghɔ sinagogə gɔm bi pɑ Yudea. Wap lə pɑ gɔm bi Polo gɑ pu a pu na' shwə́, e kəŋnyə. Da' gɑ́ nə ghɔ gɔ́m bi pu gɑ: Gɑ̌ gɔ la' piŋ sɔ' wə po mu' cʉ́m bi a Si piŋ a. E lə ko shyə lɑpʉə Efeso, nthəm Kaesarea, bʉɔ sha'tə cu'tə pɑ piŋ, dzəŋ gɔ Antiokia ŋkho wə na' shwə̀, biŋ gɔ ŋkhəka ghəŋ Galata ba m Frugia bɑ nyəŋ gʉ́' nə mghɛ zhi'nwə. Mu' yə Yudea tso tsyə pɑ́ Apolos, nthəm m Aleksandria lə sɔ' Efeso. E lə́ bɑ mo bɑ e ghə Zhyənwə, bɑ e zhyə́ ŋwa'nyə Si. A lə bɑ bɑ̀ pu lě siŋ e Məjyə Cyəpɔ, e piŋ bɑ ŋkhaktʉ̀ɔ, bɑ siŋ biŋ bɑ ji'tə pɔmnəŋ nwə kwa' dəŋdəŋ nə Yeso da' gɑ bɑ e zhyə da' kwishyə Yohane. E lə to' nə cəŋtə gɔmnwə dyə Sinagogə. Da' gɑ Priska pu Akilas lə cwətə ju' pa' e gɔm nwə a, dɑ̀ é shəŋtə da'tə e məjyə Si. Pa' e lə pɑ̀ shəŋ nə ghɔ Akaya a, mfɑ̌mfɑ̀ piŋ, bvə ŋwa'nyə bi mghɛ zhi' nwə nə da'tə e bi pu gɑ wap lɑ̀ e pɑpúŋ. E lə cwətə ŋkho wə́, a cyə m nə gho' Si e cəŋtə ŋkwitə pɑ piŋ, nə pa' gʉ' ghɔm tsyə lə bɑ hya tsyə pɑ Yudea pɑ dəm sim nə cwə yə e lə bɑ shyə́ m nə ŋwa'nyə da'tə gɑ Yeso bɑ Mesia a. Polo lə tsəŋ fɑ m nə gùŋ mkúŋ ŋkhəm Efeso, cwə yə Apolos lə bɑ Korinto a. E lə ko wə jɔ shɑ mghɛ zhi'nwə biŋ həŋtə wap gɑ: Po kě ŋkwi Zhwenyə Dɔlɔ̌ cwə yə po kɑ cʉ' mghɛ piŋ a? Da' gɑ wap pa' bi e gɑ̀, pyə lam ju' bɑ pa' pu gɔm nwə nə Zhwenyə Dɔlɔ̌ a. Polo həŋtə wap gɑ, pu lə nu' wɔ pɑ nə kɑ? Wap ghɔm gɑ: Pyə lə ŋkwi pɑ shyə Yohane. Polo piŋ gɔm gɑ: Yohane lə nu' pɔ shyə pʉɔtʉm, biŋ həŋtə bi pɔmnəŋ gɑ wap piŋ Mo yə e gɔ sɔ' təm jʉ̀m e a; yəŋ la'tə gɑ Yeso. Wap lə yu' shwə e, ŋkwishyə nə tsǒ Cyəpɔ Yeso, Polo yap bu nə pu, Zhwenyə dɔlɔ̌ sɔ' nə pu. Wap ghɔm mghɔ̀m, gɔm nwə nə tso Si. Guŋ yap awɛ lə bɑ pɔ shwɔppʉə mghǎm. Polo lə́ bɑ gɔ dyə sinagogə guŋ mcwə awɛ, po'o nə mŋwə̀ tà, bɑ gɔm nwə nə Nəfo Si tə pwɔk, ŋkhaktʉɔ nə ghə gɑ pɔ pyə wap lə bɑ si ju' ywə yə é gɔm a piŋ. Cwə yə shɑ pɔ lə pɑ̀ sɔksɔk, dɑ nthə nə piŋ, bɑ shap məjyə̀ Si pɑ cəcɑ̌ pɔmnəŋ a, Polo tə́m nə pu, biŋ dɑ mghɛ zhi'nwə nə gɔ jʉ̀m, bɑ gɔm nwə bi pù guŋ mtyɛ'dzʉ awɛ dyə zhi'tə Tirano. A lə pɑ̌ pɑ po'o nə gu' pʉ̌ə, tɑ guŋ pɑ Azia, pɑ Yudea ba pɑ Grikia yu' ghɔm Cyəpɔ. Si lə shyə́ m nə bǔ Polo bɑ́ gə kwa' msya. Tə́ pu pɑ dɑ bak dzə myə a kwak nə bəŋ nɑ Polo, jap nə mghɛ ghó, mghò map mi, mzhwenyə cwəpuŋ pɑ nthəm nə pù gɔ̌. Shɑ̀ pɑ Yudea, pɑ kəka jəŋ mzhwenyə cwəpuŋ lə to' yap nə pɑ ŋkhe tso Cyəpɔ Yeso nə pɔ pyə mzhwenyə cwəpuŋ lə bɑ̀ nə pu a. Wap lə gɔm gɑ: Gɑ gɔm bu nə tso Yeso yə Polo shyanyə a. Pǒ mu' tadyə mkamsi yə Yudea tso tsyə pɑ Seva, pó sɔmbʉə lə fo' yap mghətsə bɔ. Zhwenyə cwəpuŋ ghɔm bi pu gɑ: Gɑ zhyə́ Yeso biŋ jyə́ mo yə Polo bɑ yʉ̀ a. Tɑ sɔ' m nə po, pó bɑ̀ pɑ wɑ? Bɛ yə zhwenyə cwəpuŋ lə bɑ̀ nə e a lə piŋ deŋ ntham nə pu, shyə̀ wap awɛ, shwɔ wap tə wap nə thə́tə tam pe, dzə lə yɑ dəm sɔmmo, bɑ mfiŋ lo nə pu. Guŋ pɑ Efeso awɛ, ba pɑ Yudea pu a pɑ Grikia lə yu' nwə bɔ, pwɔk ko nə guŋ yap awɛ, wap pɑ jwɔp dəŋ pa' a bɑ tso Cyəpɔ Yeso ghú' a. Pɑ piŋ kwa' vəŋ e lə sɔ' bɑ biŋ mnwə map tə thə́. Bo'gwyə pɔ pyə wap lə bɑ wap ko nə mkɛ a pɑ shu'tə mŋwa'nyə map pfɑ́ e, pɑ cəcɑ̌ pɔmnəŋ ntho. Pu pɑ sɛ dəŋ e jɔ gɑ ŋkhap lə bɑ nə bi a pɑ a twɔk tsə bɛ sha' mghamnthɔ́. A pɑ po' o bɑ shyə́ m nə gʉ' Cyəpɔ ghɔm pɑ ŋkwyə gɔ dzə biŋ bɑ gə dəŋ. A lə cyə́ m nə mnwə bɔ, Polo cyə m nthʉm Zhwenyə jap gɑ̀ e gɔ ghɔ Yerusalɛm, nə ghɔ cyə m Makedonya ba m Akaya. E lə piŋ gɔm gɑ: Gɔ tə ŋkho Yerusalɛm bɑ gɑ̌ gɔ piŋ ghɔ Roma. E lə təm Timotio pu Erasto pyə wap lə bɑ mkwipu pyə a Makedonya, biŋ na' shwə Azia. A lə pɑ̀ cwə o bɔ, kwa' mu' mɑ paknyə təm du nə nwə məjyə. Nə pa' Demetrio, mu' gɛfa' və nə mtʉɔ́ gɔl yə e lə dɑ mtʉɔ ŋkhap nthə mfo' pa' dyə Artemis lə shyə m nə və bɔ pu a mghɛ fa' pyə pɑ gə mɑ fʉ' gwyə. E lə cu'tə mghɛ fa' pyə pu a pɔ pyə wap lə fa' pɑ nə tsə bɔ a, gɔm bi pu gɑ: Mso pɑ pó zhyə́ gɑ pɑ̌ vɔk pɑ nə fa' tsɔ gɑ tsyə pɑ fa' a. A nəŋ bɑ po'o po pɑ̀wə jɔ̀ biŋ jù' pa' pu wə gɔm, tə da' Efeso pɑ̀, ba m nthʉm guŋ Azia awɛ, pa' Polo wə ŋkhenyə la'lǎ' gə gɑ̀ wap zhyə pa' e gɔm a gɑ́ msi pyə wap fɑ nə bu mɔk pɑ á tə bɑ msi pɑ̀. A pɑ̀ po'o pu lə pɑ̀wə gwi da' fa' tsɔk pɑ pɑ̀, a pɑwə shʉ' muywə ba mɑ dyəsi Artemis lə piŋ bɑ sɔmywə pɑ́, dəŋ mɑ ghamtə yə guŋ Azia ba gùŋ dzʉ awɛ kɑ nə gamtə a, a mǐ. Pɔmnəŋ lə nə yu' ghɔm tsɔ gɑ, luŋ yap sə́, wap cwé pɑ dɔmnyə e gɑ: Artemis Efeso bɑ ě ghu'. Va' lə lɑ̌ guŋ tisuŋ awɛ, pu hyànyə̀ gɔ tsʉ' yə la' shu'tə nə a, nə cyə̀ gəm Gayo pu Aristarko pɑ Makedonya mso ghiŋ Polo. Polo yap gɑ e gɔ ghɔ tsʉ' cu'tə́, da'gɑ la' mghɛ zhi'nwə piŋ pɑ́. Bɑ shɑ́ mso pyə mtadyə Azia tɔk é gɑ e kɑ́ ghɔ tsʉ'u, nə pa' bi a pɑ̀ ywə ghə é. Bǎ ya mo lə́ lə́ bɑ̀wə shwé pɑ yə nthi tə la' sɔmmo pɑ́wə ju' yə́ yə mu' mo. Bɑ va' yɔm tə la' shɑ pɔ pɑ́wə jyə̀ ba ywə yə pu shù'tə nə a. Shɑ pɔ cəcɑ̌ vəŋ po lə ghɔm gɑ a bɑ nwə Aleksandrə: Pɑ Yudea thə́ e shya dzə. Aleksandrə lə lɑ̌ pu e gə mtiŋ gɑ e gɔ ghɔmnwə dzə cu'tə. Pu lə nə yu' gɑ e bɑ yə Yudea, guŋ pɔ awɛ zhwyanyə nə mnam pʉ̌ə bɑ gɔm gɑ: Artemis Efeso bɑ ě ghu'! Dwɔ'cam lə ghə̌ tə pɔmnəŋ lɛ́tə, e ghɔm gɑ: Wɔ pɑ Efeso mu' mo wə bɑ e ka zhyə gɑ tisuŋ Efeso bɑ tisuŋ dɔlɔ̌ bi Artemis bɑ bi kətwɔk e yə a lə fɑ kɛbəŋ shʉm a? Pa' sɔmmo tə wə ŋkhəŋnyə a pɑ, a puŋ gɑ po lɛ́tə́ bwɔk va'. Pɔ pyə po dɑ wap sɔ' a, sɔmmo nə pu kɑ hɔ mcò', e lə̀ nəŋ jəmtə si yɔk pɑ. A pɑ gɑ Demetrio ba mghɛ fa' pyə̀ wap jʉm e a pu a mo ghə shɛ́, bɑ tyɛ' nə fyɛ' shɛ́ bɑ wə̀, pɑ ya'shɛ́ piŋ bɑwə, Guŋ yap awɛ ghɔ dyə fyɛ'. Bi a shɑ̀ mnwə piŋ jɑ si a, bɑ cu'tə nə gɔ ti nyaptə. Pɑ si po'o bi a pɑ̀ pu putə wɔk pɑ nə cu'tə yə̌ŋ gɑ́ pɑ̌ tʉɔthə́ bi pɑ sa' guŋ, nə pa' sɔmywə yə bi a pɑ́ pɑ̀ ghɔm gɑ́ ya nə gə tə pɑ cu'tə tə bɑ mco' zhyə́ biŋ bíŋ a, a tə wə pɑ. E lə ghɔm pɔ cwəlɔ, shwɔ' cu'tə. Paknyə lə cwə tə̀ mǐ Polo ke mghɛ zhi'nwə, hɑ kaktʉɔ bi pu. Biŋ da'nyə wap, tə ntham məjyə Makedonya. E lə kəka nə yə bɔ ghəŋ awɛ, hɑ kaktʉɔ bi mfɑ̌mfɑ́; gɔ tə ŋkhəm Grikia, shwə̀ wə̀ nə mŋwə́ tá. Cwə yə e lə pɑ̀ gɔ ko shyə lɑpʉə ghɔ Siria a, pɑ Yudea ko cu'tə cwəpuŋ nə e. E yap cwəlɔ gɑ̀ e gɔ piŋ cyə́ m Makedonya. Mso ghiŋ pyə pyə pu a pu lə bɑ a, lə bɑ Sopater mu Piro, yə Berea, Aristarko pu Sekundo pɑ̀ Tesalonika, Gayo yə Dɛrbe pu Timotio; pɔ pɔ gɑ̀ lə tamdzə, ŋkho Troas byap wɔk. Sɔ' m nə pyə, bɑ tyɛ' Paska lə cyə̌ tə pyə lù guŋ Filipo, ŋkho kənu' gwyə; a cyə mtyɛ'dzʉ mənthɔ̀ tə pyə kwyatə wap Troas, biŋ nthiŋnyə wə nə ta' gap dzʉ́. A lə pɑ̌ nə dəŋdzə tyɛ'dzʉ́ nə gapdzʉ́, pyə cu'tə bɑ bo'nyə msɛ. Pa' dzʉ lə bɑ gɔ lɔ Polo ghɔ a, e lə ghɔmnwə bi mfɑ̌mfɑ́ a sak tə ŋkhəm teŋ mtsʉ̌'. Mlámbù lə bɑ nə yə zhəŋ dyə thə́ yə pyə lə bɑ pyə cu'tə nə a. Mú mu' səm tsò tsyə̀ pɑ Etiko yə a lə bɑ̀ e cwə nə kə̌ŋ shwə fǎdyə́ a, lə ti tə ŋʉ̌', Polo yɑwə gɔmghɔ́m. Lwɔk lə ghə mù bɔ fɑ nə zhəŋ dyə́ yɑtá bvʉ́ si, pu nə ghɔ m nə pʉ' e bɑ e pfʉ́. Polo lə wuŋ fi' cwəlɔ gɔ bəŋ é, ŋkwa e nə bu myə́ gɔm gɑ: Ka po tsɔp nɑ tsɔ, e ka pfʉ̀. Polo lə piŋ ŋkwɔ' thə̀ cwəlɔ, bo' msɛ, pfɑ, biŋ gɔm nwə tə ŋkhəm fɔkdzʉ, gɔ̌. Sɔ m nə́ mù mbɛ, pu lɑ é nthʉɔnthʉɔ nə bɑnyə, a pɑ kwa' nə hɑ kaktʉɔ. Pyə lə tamdzə cwəlɔ, ŋkho kənu' gwyə nə gɔ Asos tsʉ' yə pyə lə gɔ lɑ Polo nə a, nə pa' a lə bɑ ě cyə m məjyə̀ dəmcǎ' pa' e lə yǎp nə́ nə gɔ wə́ a. Polo lə kwyatə wɔk Asos, pyə kwa e nthʉm kənu' gwyə pyə a pu ghɔ m Mitilene. Pyə lə kǒ wə́, dzʉ̌ lɔ̀ pyə lɑ kənu' gwyə gɔ tə ŋkhəm Kios; a lə pɑ̀ yə mu' jʉ̀m dzʉ̌, pyə cyə Samos, a piŋ nə cyə ta' tyɛ'dzʉ pyə tiŋnyə Trogilion tə ŋwak Mileto. Polo lə yap gɑ e tə gɔ tiŋnyə pɑ̀, nə pa' e lə bɑwə do'nyə, shəŋ nə kəm Yerusalɛm nə tyɛ' Pantekɔtə Polo lə ko Mileto ŋkhe mghətso cu'tə pɔ Kristo Efeso. Wap lə kwyatə e, e ghɔm bi pu gɑ: Po zhyə́ pa' ghiŋ tsɑ̌ lɑ pɑ̌ cəcɑ̌ pó tə fɑ tyɛ'dzʉ́ yə ŋ də ŋwak Azia a. Dɑ lɑ nə fi'nɑ hɑ si pu a shyə̀tsə fa' bi Cyəpɔ nthʉm mləŋtə pu a cu'tə cwəpùŋ yə pɑ Yudea lə ŋkho nə m̀ a. Ŋ da tə wak sɔmywə yə a lə bi a pɑ̀ a kwitə wɔ a; ŋ də siŋ Cúŋ, ji'tə wɔ dəm sim bɑ m tsʉ' cam. Mkwinthɛ mə̌ lə bɑ nə ghɔm bi pɑ Yudea ba bi pɑ Grikia gɑ wap kwyəpnyə, shʉ' pɔ Si, biŋ Cyəpɔ yɔk pɑ̀ Yeso. Cwəlɔ, gɑ̌ wə bɑ̀ gɛ cɛ̌ Zhwenyə, bɑ̀ məjyə̀ nə ghɔ m Yerusalɛm. Ŋ khɑ zhyə ywə yə́ a wə̀ bɑ̀wə byap a. Da' gɑ nə guŋ mtisuŋ awɛ Zhwenyə Dɔlɔ̌ bɑwə siŋ a gɑ gwɑ̀ mtʉ̌ɔ pu a ghəghʉɔ wə byap a. Ŋ tə yɑwə nyəŋ bɑ sɔm dəŋ nə vɔk a pɑ. Ywə yə gɑ shəŋ a wə bɑ da' gɑ dɑ fa' tsyə Cyəpɔ Yeso lə hɑ bəm a nə ŋkwinthɛ̌ nə mcuŋ pɑpuŋ nə gho' si a, gɔ tə ŋkhəm nə pɑpuŋ. Gɑ̌ wə jyə kwa' pɑpuŋ gɑ̀ wɔ pyə ŋ də siŋ wɔ nwə Nəfo a, tə gɔ la'tə kwi' yɔ sə̀ a pɑ̀. Bi a pɑ̀ gɔm cwəlɔ dzə po sɔsɔ̌ gɑ gɑ̌ pɑ dɔlɔ̌ nə mcyə mɔ. Ŋ khɑ lɑ msənyə gə sɔmywə pɑ̀. Gɑ̌ siŋ wɔ guŋ ywə yə Si lə yap a awɛ. Po wim nɑ̀ tso pɑpuŋ biŋ gwim ka dzə̀ yə Zhwenyə Dɔlɔ̌ dɑ wɔ gə pɑ pyap a. Po khim Cu'tə po Si yə e lə lɑ̀ mcyə myə́ jó a. Gɑ zhyə́ pɑpuŋ gɑ cwə yə gɑ gɔ ghɔ a, mbvʉ̌ go shɔ́kcɔ̌k gɔ ko cəcɑ̌ po, ka dzə lə vɔk wap. Mghɛ ghɔm cwəpuŋ gɔ təm pɑ cəcɑ̌ po fəŋ mghɛ zhi' nwə yap jʉ̌m pú. Po ti tə tì bɑ ŋkhamtə gɑ̀ nə dzʉ̀ gu' tá mtsʉ' ba m mɔkcʉ, da tə pwa nə lɑ̀ shyətsə́ nthɔk bǎ ya mo lə nə po. Cwəlɔ gɑ̌ tak wɔ bi Si ba m nə ghɔm gho' tsyə́ tsyə a bɑ ǎ ghə gʉ' nə ŋkwɑ̀ biŋ gə guŋ pɔ dɔlɔ̌ awɛ sɔ' dzʉ m cʉ' Si a. Ŋ dě tə ghi'nyə ŋkhap, kɑ gɔl, kɑ dzə sɔmmo lɑ. Bǔ mɔ gɑ, pa' po nə̀ jyə́ a, lé hɑ ywə yə a lə jak ǎ bəm ba m bi mso pɑ̌. Ŋ də bɑ guŋ mcwə awɛ bɑ da'tə wɔ gɑ́ pu jɔgo' po'o tə ŋkwitə pɔ bwapwǎ, biŋ bɑ̀ ŋkhamtə ghɔm tsyə́ Cyəpɔ Yeso lə ghɔm a, gɑ́ nə hɑ bɑ ǎ ŋwɛnyə shyə nə kwi. Mghɔm mɔ gɑ lə mǐ, pu a pù kam mkwi'tə si, shwyɛ'nyə Si. A nə mi guŋ yap awɛ lɔ̀, bvʉtə nə Polo nthɛtə e. Lɔ́ tsap lə dù pa' e lə ghɔm gɑ wap tə gɔ la' tə piŋ yɔ sə é a pɑ́. Wap lə lɑ́ e nə gɔ tə nə kənu' gwyə shya. Pyə a pù lə hapnyə, pyə kó shyə, dé jyə Kos; dzʉ̌ lə nə lɔ́ bɑ pyə ko Rodos, biŋ gɔ tə ŋkho Patara. Pyə lə ko wə jɔ kənu' gwyə a pɑ̀wə gɔ m Fenikia ŋkho nə́. Pyə lə ghɔ tə bɑ jɔ Kipro, biŋ fɛ̀ dɑ m Siria, ŋkho Tiro nthəm, a pɑ̀ tsʉ' yə kənu' gwyə lə bɑwə nthé pɔ nə a. Pyə lə cwə̌ wə tyɛ'dzʉ sɔmbʉə, nə pa' pyə lə ko wə jɔ shɑ mghɛ zhi'tə nwə. Zhwenyə lə thənyə wap, wap ghɔm bi Polo gɑ e kɑ́ pʉɔ Yerusalɛm. Dəŋ pa' pyə lə bɑ gɔ cwə́ wə́ a lə kǔ', pyə lú nə ghɔ̀, ntham məjyə̀, guŋ pɔ awɛ, pɑ jwǐ, ba pɑkhʉ̌ yap ghɔ shya wɔk nə dhə tisuŋ. Pyə a pu ko tsʉ'u ŋkham mkwi'tə si kəŋ shyə́ lɑpʉə shwyɛ'nyə Si. Pyə a pu piŋ da'nyə cwəlɔ, pyə nə ko kənu' gwyə wap pɑnyə wə pú. Pyə lə sa'shyə fɑ Tiro ŋkho Ptolemaida, sha'tə mfɑmfɑ, pyə a pu piŋ shwə̀ ta' tyɛ'dzʉ. Dzʉ̌ lə lɔ̌ pyə ghɔ ŋkho Kaesarea, gɔ dyə́ Filipo, yə e lə bɑ mu' mo nə pɔ sɔmbʉə, bɑ siŋ Cuŋ pɑpuŋ biŋ shwə́ ywə́ é. A lə bɑ ě ghə po pɑ jwǐ tə zhyə mbɛ papfʉə wap pɑ gɔm ghɔm Si. Pyə lə na' nə cwə ywə́ nə pǒ mtyɛ'dzʉ́ mu' gɔm ghɔm Si nə tso Si fɑ Yudea sɔ̌', tso tsyə pɑ Agabo. E lə sɔ' jɔ wɔk, bé tap Polo nə ŋkwɑ bu myə́ pu a mkwə myə́ gɔm gɑ: Zhwenyə Dɔlɔ̌ ghɔm gɑ: Mbɛ yə yəŋ gɑ tap é a yɔ pa' pɑ Yudea gɔ ko Yerusalɛm kwɑ é piŋ hɑ é bi pɑ tə pɑ pɑ Yudea a yəŋ. Pyə lə yu' po'o, pyə a mfɑmfɑ nthʉm tisuŋ cwyɛ'nyə Polo gɑ̀ e kɑ pʉɔ Yerusalɛm. A pá po'o e pa' bi pyə gɑ: nwə kɑ́ po lɔ̀ biŋ bɑ́ bwa tʉm tsɑ̌? Gɑ̌ e dá' bɑwə byap tə da' gɑ̀ pu kwɑ a pɑ̀, ba m nə pfʉ Yerusalɛm nə tso Cyəpɔ Yeso. Pa' é lə kəŋnyə nə yù' bi pyə a, pyə la tə nə gɔ dzə pɑ̀. Pyə lə ghɔm da' gɑ̀ ywə yə Si wə shəŋ a pəmtə́. Mtyɛ'dzʉ bɔ lə nə cyə̀, pyə miŋ nə nyaptə tsə tsɔk, bʉɔ gɔ Yerusalɛm. Mghɛ zhi'nwə pyə wap lə fɑ Kaesarea bɑ gɔ yap m Yerusalɛm pyə a pu a, lə lɑ̀ wɔk gɔ dyə Mnason yə Kipro mu' mo nə dzə mghɛ zhi'nwə. Pyə ko Yerusalɛm mfɑ̌mfɑ́ lɑ kwa' tʉm pɑpuŋ tə́ nə́ dɑ wɔk. Dzʉ lə lɔ̌ pyə a Polo ghɔ ywə Yakop. Tsʉ́' yə gúŋ mghətso awɛ lə bɑ nə a. Polo lə ca'tə wap biŋ siŋ guŋ mfa' awɛ myə Si shyə́ m nə e gə nə gǔŋ pɑ tə pɑ pɑ Yudea a, pɑ m zhəŋ. Pɔ pyə wap lə bɑ̀wə ju' nwə yə e gɔm a lə hɑ ghu'tə bi Si, biŋ gɔm bi Polo gɑ: Fɑ yɔk, o yɔ dəŋ vəŋ pɑ piŋ pyə wap cəcɑ̌ pɑ Yudea a, guŋ yap awɛ nəŋ bɑ pɑ́ pɔ pyə wap ŋkhaktʉɔ nə mco' a. A nə́ pɑ̀ po'o bɑ wap tsə yu' ywə yə pú bɑ́wə gɔm nə o a: Gɑ ywə yə o bɑwə ji'tə pɔ a bɑwə gə́ gɑ́ pɑ Yudea pyə wap shwə cəcɑ̌ pɑ tə pɑ pɑ Yudea a wap wa' mco' Mosɛ, wap lə piŋ bɑ bvo po pap pɑ́, wap lə piŋ giŋ nə ŋkhɛ mco'. Pù gɔ ghə m gɑ̀ kɑ̀? Wap gɔ yu' gɑ o tsɔ'ɔ. Ghə ywə yə pyə gɔ ghɔm bu a. Pyə̌ ghə pɔ̀ pápfʉ̀ə tsɔ'ɔ bɑ wap lě ŋkhà' mka'nyə bi Si. Lɑ wap pu a pú pə́mtə́ dɔ́nyə́ nɑ tsɔ, a wə nə ghə ywə nə dɔ́nyə̀ bi guŋ yap awɛ, wap gɔ cwə tə kəm mthə màp, pu zhyə̀ gɑ guŋ ywə awɛ yə pu gɔm nə o a tə bɑ̀ nwə pɑ; gɑ ba wə yǔ bɑwə giŋ nə mcò'. Sɔ' m nə pɑ tə pɑ pɑ Yudea pyə́ wap shʉ' pɑ piŋ a, pyə kě bvə bi pu gɔm gɑ: Po kɑ pfɑ bap tsə pwɔ' pɑ tə pɑ pɑ Yudea, kɑ mcyə bap yə e fám a lə, kɑ ghiŋ cwəpuŋ lɑ. A lə pɑ̀ nə yə mù' jʉ̀mdzʉ̌, Polo lə pɑ bɛ bɔ pú a pú to' nə lɔnyə nɑ tsap. E lɑ ghɔ Dyə Si nə ghɔm tyɛ'dzʉ yə mlɔ́nyə̀ gɔ nə mi wap hɑ bǎ yə ywə nə gamtə Si ya mo a nə pu a. Tyɛ'dzʉ batə sɔmbʉə lə nə́ mi, pɑ Yudea nə ghəŋ Azia, pyə wáp lə tyəŋ Polo Dyə Si a, cyə́ guŋ pɔ awɛ biŋ jap bú nə e. Wáp lə bɑwə shwé gɑ: Pɑ Israɛl, po kwitə́ wɔk. Yɔ mo yə é bɑ̀wə nthé shù nə pɔ pɔk pɑ, ba m nə mco' mɔk pɑ, ba nə tsɔ'ɔ yəŋ gɑ yə pɑ nɑ a, shyə́ m nə ywə yə é bɑwə ji'tə nə guŋ mtsʉ' awɛ bi guŋ pɔ̀ awɛ a yə̌ŋ. E bɑ̀ e lɑ ba pɑ Grikia ŋkho Dyə Si, po'o nə jəmtə yəŋ tsʉ' dɔlɔ̌. A lə̀ bɑ̀ wap yɔ̌ wap pù Trofimo yə Efeso tisuŋ, bɑ̀wə ŋkwɛ gɑ e lɑ e ŋkho Dyə Si. Guŋ tisuŋ awɛ lə tə̌m, pɔmnəŋ piŋ sɔ' kwa' vəŋ e. Pù ghəm Polo biŋ fəŋ e nə nthəm Dyə Si, biŋ gùŋ jo' mjyədyə̌. Cwə yə pu lə pɑ shəŋ nə zhwə Polo, mcuŋ ŋwak ywə tá sa' msəŋwi gɑ guŋ Yerusalɛm awɛ si bɑ a va'. E lə wuŋ shu'tə msəŋwi pu a pɑ tadyə́ sa' pɔ ŋkhə pu a pù ghɔ nə pwa pɔ. Wap lə nə yɔ tá sa' msəŋwi pu a msəŋwi, wap lə piŋ shwɔ Polo. Tà sa' msəŋwi lə ghɔ bəŋ Polo cwəlɔ, gəm e, gɔm gɑ̀ pu lɑ gwɑ mtʉɔ mɑbʉ́ə nə shəŋ e. E lə pɑ̌ shəŋ nə zhyə mo yə e bɑ e, ba ywə yə e gə a. Da' gɑ a ghɔ cəcɑ̌ pɔmnəŋ sɔmmo lə ghɔm yə́ a hwənyə yə́ yəmu' mo yə e bəŋ e a. A cyə m nə zhwyanyə bi a pɑ tadyə̌ sa' msəŋwi lə yu' sɔm nwə nyənyɔ. E ghɔm gɑ pu lɑ Polo nə gɔ nthʉ̀ɔdyə̌. Cwə yə Polo lə ghɔ tə ŋkho nə zhəŋ mkwə̀ ŋkwɔ' nə ŋkho dyə a, pɔmnəŋ nyɔnyə̀ nyɔ̌nyə́ tə msəŋwi cʉ' ŋkwa Polo kwa. Nə pa' guŋ pɔ awɛ lə bɑ̀ jʉm e bɑwə shwe gɑ: Pu zhwə e! Pu zhwə e! Pu lə pɑ̀ tə bɑ̀ gɔ nyəŋ Polo nthʉɔdyə e ghɔm bi tadyə msəŋwi gɑ: Bi a pɑ gɔm shwə nwə bu a? E pa' bi e gɑ, a bɑ o zhyə ghɔm pɑ Grikia a? E piŋ həŋtə e gɑ: Wə né tə bɑ yə Egipto yə e kɑ thə́nyə gwɛ a pɔ sha' pfʉə, pɑ tʉɔthə́ bi Roma, fəŋ wap nə gɔ ghakgo a pɑ a? Polo ghɔm gɑ: Myə̀ lə? Gɑ̌ bɑ yə Yudea, yə Tarso m Kilikia, mù e tisuŋ yə ɑ bɑ̀ a ghə tso a. Sə́so, piŋ gɑ gɔm nwə bi pɔmnəŋ. Pu lə̀ pìŋ bi Polo gɑ̀ e ghɔmnwə. E tiŋnyə nə mzhəŋ ŋkwɔ' nə ŋkho nthʉɔdyə, dɑ pú é gə mtiŋ bi pɔmnəŋ gɑ wap lɛtə́, wap lɛtə gɑ kǎm. Polo lɑ ghɔm Ebraika gɔm bi pu gɑ. Mfɑ̌mfɑ́ pu a mtǎmtá, po yu' mkwinthɛ mə̌ myə gɑ gɔ ghɔm bi po cwəlɔ a. Pu lə yu' pa' e gɔm ghɔm Ebraika a, pɔmnəŋ cəŋtə dɛtə gɑ kǎm. Polo ghɔm gɑ: Gɑ̌ ba yə Yudea, bɑ pu dzə a Tarso m Kilikia. Da' gɑ pú kwyə́ a pɑ si tsɔ'ɔ, nthʉm tisuŋ yə̌ŋ, bəŋ Gamaliɛl, e zhi'tə a mco' mta pɔk pɑ̀ kwa' pɑpuŋ. Ŋ də bɑ́ kwa' mo Si tɑ mǐŋ, kwa' pa' po wə cwəlɔ nə bɑ́ awɛ a. Ŋ də́ pɔ́ jyə́ bǎ tə shyə̀ vʉ́, gə pu ghəm pɑ bɛ́ ba pɑ jwǐ dɑ́ mtʉ́ɔ shəŋ wap nyəŋ cɛ́. Ŋkhamsi gwyə ba guŋ mghətso awɛ si bɑ̀ mkwinthɛ́ nə́. Ŋ də ŋkwi ŋwa'nyə pɑ bi pu tə bɑ nə gɔ m Damasi nə ghəm mfɑ̌mfɑ́, cəŋ wap nə ghɔ Yerusalɛm pu nyəŋ shɛ thə pu. Ŋ də ghɔ tə bɑ̀ gɔ kəm Damasi, a pɑ gwɛ a mɔkcʉ́, gúŋ nə yɔ̀ mɑ ŋkha' fɑ́ kɛbəŋ, dɑ sɛ̀ e nə sam a. Ŋ bvʉ̀si, ju' pa' gi mo wə gɔm bəm gɑ: Saulo! Saulo, o shwɔ'mkwə mə̌ cwəpuŋ gɑ̀ kɑ̀? Ŋ ba' gɑ: O bɑ̀ wɑ̀ Cyəpɔ? Gi bɔ piŋ gɔm gɑ: Gɑ bɑ Yeso yə Nazarɛt yə o bɑwə shwɔ' mkwə myə́ cwəpuŋ a. Pɔ pyə pyə a pu lə bɑ̀ a lə yɔ̌ ŋkha' bɔ da' gɑ la' wap yu' gì yə a lə bɑwə gɔm nwə bəm a. Ŋ də həŋtə gɑ: Gɑ gɔ ghə gɑ kɑ̀ Cyəpɔ? Cyəpɔ ghɔm bəm gɑ: Lusi gɔ Damasi, pu gɔ ko wə́ siŋ o fa' tsyə a wə byap o a. Da' gɑ pa' sɛ ŋkha' bɔ lə bɑ a pi mnyə mə̌ a, pɔ pyə pyə a pu lə bɑ a lə tɔm pɑ pu a tə dɑ́ a nə ŋkho Damasi. Mu' mo lə bɑwə tsó tsyə pɑ̀ Ananias. E lə bɑ̀ kwa' dɑ mku' biŋ, bɑ giŋ nə mco' pɑ Yudea. Nwə tsyə́ pɑ buŋ guŋ pɑ Yudea pyə wap lə shwə́ tsʉ' u a. E lə sɔ' jɔ a, gɔm bəm gɑ: Saulo, fɑ a, piŋ jɔ́ tsʉ'! Pɑ cwə o bɔ ŋ guŋ jɔ tsʉ́', jɔ e. Ananias piŋ gɔm bəm gɑ: Si mtá pɔ́k pɑ cwɔ' o gɑ o zhyə ywə yə e shəŋ a, gɑ o yɔ nwə dəŋdəŋ, biŋ ju' pɑ gi yʉ Si. O gɔ pɑ yə ŋkwinthɛ̌ dzə guŋ pɔ awɛ nə ywə yə o gɔ yɔ piŋ yu' a. O biŋ jʉ'nyə nə kɑ? Kwi shyə, ŋkwi ba nə cǔ' o nə mhɔ mǔ shyə m nə tso tsyə́. Ŋ də́ pɑnyə Yerusalɛm, bɑ̀ Dyə Si bɑwə shwyɛ'nyə Si mu' tyɛ'dzʉ, jɔ nə yɔ m nthʉm zhwenyə. Biŋ jɔ Cyəpɔ e ghɔm bəm gɑ: Təm Yerusalɛm kwa' mgʉ' ʉ nə pa' wap tə gɔ piŋ kwinthɛ yə o gɔ kwi nə m̀ a pɑ. Ŋ ba' bi e gɑ. Cyəpɔ wap zhyə gɑ myə̀ nə lə gɔ msinagogə gə pu nyəŋ pɑ piŋ dyə cɛ́, biŋ dɑ mka' cyə shwɔ wap. A piŋ nə pɑ bɑ po'o, bɑ cwə yə pu lə pfyə mcyə Etiennə ŋkwinthɛ̌ o a, ba myə̀ yɑ ŋ də bɑ́ si, nwə pɔ pyə wap lə zhwə Etiennə a puŋ a, nə pa' myə̀ nə lə dwɔ' dzə tsap. Da' gɑ Cyəpɔ piŋ gɔm bəm gɑ: Ghɔ̌, gɑ gɔ təm o tə gʉə sʉəsʉə, nə mguŋ pɑ tə pɑ pɑ Yudea. Mguŋ pɑ Yudea pyə́ wap lə yu' ywə yə Polo lə ghɔm tə ŋkhəm cwə bɔ a, lə nə yu' mghɔm mɔ̌, bɑ shwé gɔm gɑ: Pu zhwə mó bǎ, e tə mo yə bi a pɑ̀ tak é tə zhwə e a pɑ̀. Cwə yə wap lə pɑ shwé po'o, bɑ ma' mdzə map pu a vɔp thə a, tadyə sa' msəŋwi ghɔm gɑ́ pu nyəŋ Polo nthʉɔdyə dɑ pɑ nthé tɑ nə həŋtə e nwə; po'o gɑ pu zhyə̀ kwa' ywə yə a gə tɑ pu pɑwə shwe jʉm e a. Pù lə ghɔ m nə siŋ Polo si tə cwɔ e, e ghɔm bi tádyə msəŋwi ŋkhə yə e lə bɑ nə fa' a gɑ: Mu e Roma yə pu ka wuŋ fyɛ' e, o ghə nə cwɔ e a? Tádyə msəŋwi ŋkhə lə nə yu' po' gɔ siŋ tà sa' msəŋwi, gɔm bi e gɑ: O bɑ gɔ ghə kɑ̀ pe' e! Bɛ bɔ bɑ mù e Roma. Tá sa'msəŋwi lə piŋ sɔ', həŋtə Polo gɑ: Siŋ a, o bɑ mù e Roma nyənyɔ a? Polo ghɔm gɑ ŋ. Tá sa'msəŋwi piŋ gɔm gɑ: Ŋ də yǒ m tʉɔdə̀ŋ tə́ biŋ tso bǎ. Polo piŋ gɔm gɑ tə sɔ' m pa' myə̀ a pu lə́ nə dzə̀ a. Pɔ pyə wap lə̀ bɑ gɔ təŋtə e a lə wuŋ nə̀ŋ é. Tə sɔ' m nə tádyə sa' msəŋwi lam tsyə sɔ' nə zhyə gɑ à bɑ mù è Roma tə á bɑ̀ é cəŋ é. Dzʉ lə lɔ̌, tádyə sa' msəŋwi pɑ shəŋ nə zhyə kwa' ywə yə pɑ Yudea bútə Polo nə á kwa' nyənyɔ, gə pu kyɛ́' mgwɑ mtʉɔ mkwə e biŋ shu'tə mkamsi gwyəgwyə ba guŋ Sanedrɛŋ awɛ cwəlɔ gə Polo fi' sɔ' dzə pù, wap fyɛ' e. Polo lə̀ le Sanedrɛŋ dəŋdəŋ gɔm gɑ: Mfɑ̌mfɑ́, gɑ̌ dɑ́ pɑ tʉ́m tə bya nə giŋ dzə́ Si tə́ ŋkhəm cwəlɔ. Da' gɑ Ananias, ŋkhamsi gwyə lə̀ ghɔm bi mkwipu pyə gɑ wap cwɔ Polo nə shwə e. Tɑ Polo ghɔm bi gɑ: Si gɔ cwɔ pɑ wə̀ m fə́fə́ sak ywə! O bɑ̀ tsa' a nə lɑ mco' tə nə fyɛ' a, da' gɑ o nəŋtə mco' bɔ, gɔm gɑ pu cwɔ a. Mkwipu lə ghɔm bi Polo gɑ: O jəmtə pa' ŋkhamsi gwyə Si. Polo pa' bi pu gɑ: Mfɑ pɑ̀, ɑ kɑ bɑ ŋ khɑ zhyə gɑ e bɑ ŋkhamsi gwyə nə pa' ɑ bɑ pu lé bvə gɑ̀ o tə gɔ yəmtə tadyə pɔ pǔ pɑ̀. Pa' a lə̀ bɑ Polo zhyə gɑ̀ cu'tə lə bɑ̀ mghəŋ bʉə: Pɑ Sadukai ba pɑ Farisai a, e cwé cəcɑ́ Sanedrɛŋ gɑ: Gɑ̌ bɑ Farisai, mu Farisai. A shyə̀ m nə nə́ piŋ nə yam nə vʉ̌ yə pɑ biŋ a, tə pú pɑ̀wə fyɛ' a. Polo lə nə miŋ nə ghɔm po'o, shɛ́ wuŋ bvʉ̀ cəcɑ̌ pɑ Farisai pu a pɑ Sadukai, cu'tə ghaptə m ghə̌ŋ bʉə nə pa' pɑ Sadukai gɔm gɑ nə yam nə vʉ̌ tə bɑ̀wə pɑ̀, ba aŋgəle pu zhwenyə lə pɑ̀wə, da' gɑ̀ pɑ Farisai pɑ biŋ gɑ a bɑwə. Va' lə kǒ cəcɑ̌ pú. Shɑ́ pɑ zhyə́ mco' nə yə́ ghəŋ pɑ Farisai cəŋtə gɔm gɑ: Pyə ká yɔ ywə yə bɛ́ yəŋ hɔ a. Kɑ zhwenyə ghɔmnwə bi e? Kɑ aŋgəle lɑ ghɔmnwə bi e? Va' lə pɑ gɔ pɑ́ m dzə, ta sa' msəŋwi pwɔk pa' pu syatə Polo, gɔm bi msəŋwi gɑ wap fi' sɔ' fəŋ Polo nthé e cəcɑ̌ pɔmnəŋ nə ŋkwɔ' m zhəŋ dyə thə́. A lə cwə bɑ́ mtsʉ́' Cyəpɔ sɔ' bi Polo gɔm bi e gɑ: Kaktʉɔ! O du m nə kwinthɛ nə nwə a Yerusalɛm. O gɔ ko ba Roma kwinthɛ pɑ̀ pa' a. Dzʉ̌ lə lɔ̌, pɑ Yudea tɛ, tə ŋkhɔmkɔ nə́ gɑ wap pɑ̀ tə zhwə Polo bɑ wap tə tsʉ̀ ywə pɑ́, wap lə nəŋ nwə sɔmywə. Pɔ pyə wap lə nthɛ́ po' a lə bɑ̀ pɔ mghappfʉə tə ntwɔk. Wap lə ghɔ jɔ mkamsi gwyə pu a mghətso gɔm bi pu gɑ: Pyə kɔmkɔ nyəŋ gɑ̀ pyə pɑ̀ tə zhwə Polo bɑ pyə tə gɔ tsʉ ywə pɑ́. Pyə lə nəŋ nwə́. Sɔ' m nə yɔ ghəŋ pu a Sanedrɛŋ, po ghɔm bi tá sá' msəŋwi gɑ e piŋ dɑ Polo sɔ', po piŋ shəŋtə de yə nwə. Sɔ' m nə pyə, pyə tsə nyaptə gɑ e gɔ nə kodyə bɑ pyə e da' jwə e. Da' gɑ yo' bɔ lə tam təŋ mú' fɑ Polo yə mjwǐ, mú mbɛ, e ghɔ nthʉɔ dyə ŋkhó dyə siŋ Polo. Polo lə́ ké mu' ta' tadyə sa' pɔ ŋkhə gɔm bi e gɑ, lɑ mu səm yəŋ gɑ gɔ bəŋ tá sa' msəŋwi. E ghə nwə yə e gɔ siŋ e a. Ta sa' pɔ ŋkhə lə lɑ́ səm bɔ nə gɔ bəŋ tá sa' msəŋwi gɔm bi e gɑ: Gɛ cɛ́ Polo ké á gɔm gɑ̀ ŋ dɑ̀ səm yəŋ sɔ' bu. Ě ghə̀ ywə yə é gɔ siŋ o a. Tá sa' msəŋwi lə tɔm pǔ mù bɔ, pu e ghɔ jʉ̀m, e həŋtə e gɑ: Yə o gɔ siŋ a bɑ kɑ? Mù səm bɔ ghɔm bi e gɑ: Pɑ Yudea tɛ gɑ wap gɔ həŋtə o gɑ dzʉ̌ lɔ́ o lɑ̀ Polo sɔ' Sanedrɛŋ gɑ pu piŋ shəŋtə de yə nwə, a pɑ́ yo'. Da' gɑ̀ pɔm tə vʉ̀ nə yo' bɔ; nə pa' wap si tə bɑ pɔ mghappfʉə pyə wap si gɔ sù e a. Nə pa' wap yap tə ŋkhɔmkɔ nə gɑ wap pɑ tə zhwə Polo bɑ wap tə gɔ tsʉ̀ kɑ nwə̀ ywə pɑ́. Wap e da' jap po' o tə bɑwə byap pɑ pa' o piŋ a. Tá sa' msəŋwi lə nə la'nyə mù səm bɔ̌ gɔm bi e gɑ: Kɑ̀ siŋ sɔmmo gɑ o ghə tə ŋ jyə nwə yo' yap. Tá sa' msəŋwi lə ké pɑ sa' pɔ ŋkhə pɑpʉ́ə gɔm bi pu gɑ: Po nyaptə msəŋwi pɔ ŋkhəpʉə, gə́ pɑ kwɔ' leŋ pɔ mgham nthɔk, gə mkwipu pap ŋkhəpʉə pu a pu pyap nə ghɔ Kaesarea nə mnam vʉ̌' bwadzʉ̌. Po nyaptə ba ywə yə a gɔ kwa Polo nə ghɔ tə kəm bəŋ gɔpna' Feliksə tə sɔmywə gə e a. Tá sa' msəŋwi lə və ŋwa'nyə bi gɔpna' Feliksə gɔm gɑ: Klaudios Lusias bi gɔpna' gwyə Feliksə gɑ̌ ca'tə! Pɑ Yudea kɑ ghəm bɛ yəŋ yə gɑ wə shya e bu a bɑ gɔ zhwə́ e tɑ dɑ msəŋwi ŋkwi e bi pu, bɑ gɑ̌ yu' gɑ̀ é bɑ́ mú e Roma. Ŋ khɑ pɑ̌ shəŋ nə zhyə kwa' ywə yə pu gɔm gɑ e hɔ á, gə pù fyɛ' e dzə Sanedrɛŋ. Ŋ khe jɔ gɑ ywə yə wap butə e nə a bɑ fəŋnyə nə mco' map, da' gɑ́ sɔm nwə lə pɑ̀ nə tə bɑ́ pɑ́ nwə vʉ́ kɑ gwɑ mtʉɔ lə. Pa' ŋ khɑ yu' gɑ́ pu wə nthɛ nə zhwə́ bɛ bɔ a, gɑ́ wə nə cya e bu po' o, bɑ gɑ ghɔm bi pɑ putə e gɑ wap putə e m bu. Msəŋwi lə ghə pa' pu lə ghɔm bi pu a, dɑ Polo gɔ tə ŋkhəm Antipatri pɑ mtsʉ'. Dzʉ̌ lə lɔ̌, Polo pu a pɑ kwɔ' mleŋ nə ghɔ, msəŋwi piŋ jʉ̀m nthʉɔdyə̌. Pɑ kwɔ' mleŋ lə ghɔ tə ŋkho Kaesarea, hɑ ŋwa'nyə bi gɔpna', biŋ da'tə ba Polo bi e. Gɔpna' lə kě ŋwa'nyə, biŋ həŋtə gɑ Polo nthəm nə yɑ ghəŋ guŋ lə̀. Pu siŋ e gɑ́ ghə̌ŋ Kilikia. E ghɔm bi Polo gɑ: Gɑ gɔ ti yu' o nə cwə yə ba pɑ putə o sɔ' tə bɑ̀ si a. Biŋ gɔm gɑ pu lwɔ' Polo nthʉm buŋ dyə Herode. A lə nə cyə dzʉ́ tyɛ' tɔ̀ Ananias ŋkhamsi gwyə pu a mghətso ba mu' Tertulo, giŋjyə̀, wap tsəŋ gɔ Kaesarea bùtə Polo bi gɔpna'. Pù lə ké é cwəlɔ, Tertulo to' nə ghɔmnwə nə e gɔm gɑ: Feliksə tá tʉɔdəŋ! A cyə m nə wə, ba nə́ nə piŋ gə ŋkhɛ nwə yə o gə nə́ nə nyaptə pɔmnəŋ á, pyə pɑ̀wə shwə kwa' nə hwitə. A nə guŋ mtsʉ' awɛ, nə guŋ mcwə awɛ cwəlɔ pu pɑ̀wə go'tə o nə mnwə pɑpuŋ bɔ. Da' gɑ nə cyə́tə ywɔk baknyə o pɑ̀ te'te', gɑ̌ wə shwyɛ'nyə gɑ o lɑ tʉ̀m cɔmmtso yə a bɑ̀ bu a tə nə jù' ywə yə gɑ gɔ ghɔm a. Pyə ké jɔ bɛ yəŋ gɑ e pɑ̀ kwa' ywə cwəpuŋ, bɑ̀wə ma' paknyə cəcɑ̌ guŋ pɑ Yudea awɛ nthʉm dzʉ́, biŋ bɑ́ tadyə́ cu'tə va' pɑ Nazarɛt. E kɑ lə́ŋtə ba nə viŋ Dyə́ Si tə pyə ghəm é [ *** O gɔ nə təŋtə e yɔ gɑ guŋ ywə awɛ yə pyə gɔm a bɑ̀ pɑ̀ nyənyɔ. Pɑ Yudea lə piŋ gɑ guŋ mnwə bɔ awɛ bɑ̀ pɑ̀ dəŋdəŋ po'o. Gɔpna' lə hɑ ghɔm bi Polo e ghɔm gɑ: Gɑ zhyə́ gɑ tə fɑ nə mgu'dzʉ jɔmyɔm wə nə bɑ gɛ ya' shɛ́ guŋ pyə. A cyə m po'o tə bɑ gɔ tɛ nwə bu a tə pwɔk. O le bɑ o gɔ yɔ gɑ́ a ka wuŋ ntwɔk tyɛ'dzʉ shwɔppʉə mghǎm pa' ŋ khɑ pʉɔ Yerusalɛm nə ghamtə Si a. Sɔmmo ka tə yɔ a Dyə Si, kɑ dyə msinagogə, kɑ m tisuŋ lɑ pyə mo pɑwə nthɛshwə, kɑ bɑwə shyə pɔmnəŋ lə. Pɔ́ pɔ gɑ ka ku' nə la'tə gɑ nwə yə wap wə gɔm nə m̀ á nyənyɔ. Ywə yə gɑ zhyə a bɑ gɑ̀ gɑ bɑ̀wə fa' bi Si mtá pɔk pɑ m nə Jyə yə́ wap bɑwə ŋkhe m gɑ cu'tə va' a. Gɑ̌ biŋ guŋ ywə awɛ yə a bɑ pu və nthʉm Mco' ba nthʉm ŋwa'nyə mghɔm ghɔ̀m Si a; Gɑ̌ gə mɔktə nə sǐ ba wap yap gɑ pɔ dəŋdəŋ ba pɔ tə pɑ dəŋdəŋ gɔ sɔ' yam nə vʉ̌. A ywə yə á gə tə bɑ ŋkhaktʉɔ gɑ gə tʉm tə bya dzə̌ Si ba m dzə pɔmnəŋ. Mgu'dzʉ̌ yɔm lə cyə̌, bɑnyə Yerusalɛm nə hɑ ywə nə ŋkwitə bi pɔ pɑ̌ ba ywə hɑhɑ̌. A pɑ̀ po'o tə̀ pu yɔ a Dyə Si, bɑ̀ gɑ miŋ nə sɔk vɔk a; nə yɔ a po'o tə a bɑ́ bɑ pɔmnə̌ŋ cu'tə kɑ ma' va' lə. Da' gɑ shɑ pɑ Yudea fɑ Azia. Wap e kɑ bɑ gɔ sɔ' putə a bu, bi a pɑ gɑ̀ wap lə yɔ ywə yə wap gɔ la' a nə a! Tak po'o, pɔ pɔ gɑ ghɔm ywə yə wap kɑ̀ yɔ bɑ gɑ ghə a pɔk nə pa' pu kɑ fyɛ' a dzə̌ Sanedrɛŋ a. Kɑ á nə̌ŋ bɑ pɑ da' nə shwə ghɔm tsyə ŋ khɑ tyəŋnyə thə dzə pu shwé gɑ: nə nə́ yam nə vʉ̌ tə pu bɑwə fyɛ' a nə tyɛ' ɔ? Feliksə yə a lə bɑ̀ ě cəŋtə jyə́nwə nə Jyə̀ bɔ a lə nə lwɔ' shɛ́ gɔm gɑ: Gɑ gɔ ti fyɛ' shɛ́ yɔ tyɛ' yə tá sa' msəŋwi tsəŋ sɔ́' a. E lə ghɔm bi tádyə msəŋwi ŋkhə gɑ́ e lɑ Polo gɔ nyəŋ cɛ, da' gɑ tə́ tə pɑ de e pɑ́ te', e kɑ nəŋ ŋkhɔ bi sɔmmo nə pɑ fa' nə e. Shɑ mtyɛ'dzʉ́ lə cyə̌, Feliksə pu jwi e Drusila yə e lə́ bɑ̀ yə Yudea a pɑ. E ghə pu ké Polo gɑ e sɔ' siŋ wap nwə nə nə piŋ Kristo Yeso. Da' gɑ pa' wap lə ko biŋ bɑ gɔm nwə pɑ nə nwə dəŋdəŋ, ba nə nə kyəp nɑ, ba nə nə́ fyɛ' yə a lə bɑwə gɔ sɔ' a, Feliksə pwɔk, ja' ghɔm Polo gɔm bi e gɑ: nə cwəlɔ, ghɔ̌. Ŋ gɑ̌ gɔ ti tə piŋ ké o. E lə bɑ̀wə cəŋtə mɔktə gɑ Polo gɔ hɑ ŋkhap bi e. A cyə m po'o e ké e mcʉ̀m mcʉ̌m pu e pəmtə. A lə nə cyə gu' pʉə Porkio Festo kwyəpnyə Feliksə bɑ shəŋ nə puŋ pɑ Yudea nthak Polo dyəcɛ̌. Festo lə ŋwák ghəŋ guŋ é, a nə cyə tyɛ' tá, e lú Kaesarea bʉɔ gɔ Yerusalɛm. Mkamsi gwyə pu a mkam guŋ pɑ Yudea sɔ' jɔ́ é butə Polo bi e. Wap lə shəŋtə biŋ həŋtə é pa' cwə yə wap shwyɛ'nyə e cwyɛ'nyə a tə a pɑ mfʉ̌ gɑ̀ e ghə Polo pɑnyə Yerusalɛm: wap lə bɑ̀wə dʉ' pɑ yo' nə Polo, bɑ́ shəŋ nə zhwə e məjyə. Da' gɑ Festo pa' bi pu gɑ̀ tsʉ́' cɛ́ Polo bɑ́ pɑ́ Kaesarea, a piŋ nə pɑ̌ po'o e pɑwə gúŋ bɑnyə m wə. Biŋ gɔm bi pu gɑ: Pɔ pyə wap cəcɑ̌ po bɑ̀ wap ghə tʉɔ a, pyə a pu pəmtə dzəŋ Kaesarea, po'o gɑ nwə pɑ nə bɛ bɔ, wap pùtə e. Festo la tə cwə wə pu tə a kəm tyɛ'dzʉ hɔm kɑ gham lə. E lə tsəŋ tə ŋkho Kaesarea cwəlɔ, dzʉ́ nə lɔ́ e wuŋ gɔ dyə fyɛ̀' gɔm gɑ̀ pú lɑ Polo sɔ̌'. Polo lə sɔ̌' tə bɑ tsʉ'u, pɑ Yudea pyə wap lə tsəŋ fɑ Yerusalɛm a, tsam e nyəŋ tùŋ, gɔm nthinthi mnwə cwəpuŋ nə e, da' gɑ wap lə kú' nə la'tə gɑ ywə yə wap gɔm a nyənyɔ pɑ. Polo tɔm ghɔm nə nthɛ tsyə́ gɑ: Ŋ khɑ hɔ mco' pɑ Yudea, ŋ də nəŋ hɔ bi Dyə Si, kɑ bi Kasa lə. Festo pɑ shəŋ nə puŋ pɑ Yudea, gɔm bi Polo gɑ: O piŋ nə pʉɔ Yerusalɛm po'o gɑ pu fyɛ' nwə o dzə̌ m̀ a? Da' gɑ Polo pa' gɑ: Gɑ po'o bɑ dzə dyə fyɛ' Kasa, a pɑ̀ tsʉ' yə pu gɔ fyɛ' a nə a. Sɔ' m nə pɑ Yudea, bɑ ŋ kha hɔ sɔmywə bi pu pa' kwa' wə̌ wə shəŋtə jɔ a. A pɑ nyənyɔ gɑ gɑ̌ hɔ mu' nwə, bɑ gɑ gɑ̌ ghə nwə yə a wə shəŋ pɑ gɑ́ pú zhwə ǎ, bɑ ŋ tə wə ŋkhəŋnyə vʉ́ pɑ́. Nəŋ bɑ́ gɑ́ guŋ mnwə myə pɔ pɔ̌ gɑ gɔm nə m̀ a tə ywə pɑ́, bɑ sɔmmo ka ghə nə hɑ a bi pù. Gɑ̌ si bɑwə nthéŋ Kasa. Festo lə həŋtə mkwɛnyə pɔ pyə wap lə bɑ̀ bəŋ e a, biŋ gɔm bi Polo gɑ: Pa' o ntheŋ Kasa a, o gɔ ghɔ dzə̌ Kasa. Shɑ mtyɛ'dzʉ lə nə cyə, fo Agripa pu Bernike sɔ' Kaesarea, gɔ de Festo. Pa' wap lə bɑ gɔ na' cwə wə́ a, Festo lə siŋ fo nwə Polo gɑ: Mu' mo bɑ dyəcɛ̌ tsɔ'ɔ bɑ Feliksə lə nyəŋ e. Pa' ŋ khɑ pɑ́ Yerusalɛm, mkamsi gwyə pu a mkam guŋ pɑ Yudea kɑ sɔ' butə e bəm, gɔm gɑ pu nyəŋ shɛ thə̀ é. Ŋ gɔm bi pu gɑ a tə bɑ ma bi pɑ Roma gɑ pù pùtə mo pù wuŋ nyəŋ pɑ shɛ thə́ e tə yu' wap pu a pɑ putə e biŋ fyɛ' e, ju' mtɛ myə́ nə nwə yə pu gɔm nə e a pɑ. A kě bɑ po'o wap sɔ' tsɔ'ɔ, guŋ gə dzʉ̌ nə lɔ guŋ gɔ pɑ dyə fyɛ' gɔm gɑ pu lɑ bɛ bɔ sɔ̌'. E sɔ', pɑ putə́ e tsam e nyəŋ tùŋ, da' gɑ la' wap hɑ sɔm mhɔ nə e myə ŋ khɑ bɑwə ŋkwɛ a pɑ bɔkbɔk e pɑ́. Pu a pu lə bɑwə fəŋnyə nwə pɑ da' nə nwə Si yap biŋ bɑwə fəŋnyə nwə mu' Yeso yə e kɑ pfʉ̌, tə Polo pɑ́wə gɔm gɑ e bɑ pɑ wə a. Pa' ŋ ka tə zhyə pa' bi a pɑ gɔm nə yəŋ gɑ nthi nwə a, ŋ khɑ ghɔm bi Polo gɑ e ghɔ Yerusalɛm tɑ pu fyɛ' yəŋ nwə. Da' gɑ Polo kəŋnyə gɔm gɑ e gɔ ké pɑ Kasa nə yə́ shɛ. A pɑ po'o dwɔ' e dyəcɛ̌ tə nə byap cwə yə gɑ gɔ cya e dzə Kasa a. Agripa lə yu' po'o gɔm bi Festo gɑ: Ba myə̀ yɑ̌ gɑ̌ gɔ yu' mo bǎ. Festo pa' bi e gɑ: A gɔ pɑ yo' o yu' e. Dzʉ̌ lə lɔ̌, Agripa pu Bernike lɑ msəm kwiŋ ŋwak, ŋkho dyə fyɛ', mtadyə msəŋwi pu a mkam tisuŋ pɑ jʉ̌m pú, Festo ghɔm pu lɑ Polo sɔ'. Festo piŋ dɑ ghɔm, gɔm gɑ: Fo Agripa ba guŋ yɔ awɛ pɑ́ pyə́ pɑ pə̌mtə bɑ a, po yɔ bɛ yəŋ gɑ. Guŋ pɑ Yudea awɛ kɑ sɔ' jɔ a nə e Yerusalɛm ba m tsɔ'ɔ bɑ shwe gɑ pu zhwə e. Sɔ' kwa' m nə m̀, ŋ khɑ yɔ sɔmywə nə mfa' myə́ yə bi a pɑ a ghə pu zhwə e a. Da' gɑ pa' e kɑ téŋ Kasa á, gɑ gɔ cya e bi e. Pa' ŋ khɑ zhyə ywə yə gɑ gɔ nə cyə e bi Kasa və bi e kwa' pɑpuŋ a, gɑ̌ lɑ e sɔ' dzə po, dzə̌ o, wə fo Agripa fyɛ' tə yɔ ywə yə gɑ̌ gɔ və bi Kasa nə nwə yəŋ a. Nə pa' gɑ yɔ gɑ shya gɛ cɛ̌ bi Kasa tə və ywə yə pu butə e nə a, bɑ a gɔ pɑ kwa' mzhʉ̌m. Agripa ghɔm bi Polo gɑ: Pu piŋ gɑ o tɛ yù nwə̀. Polo siŋ pu e, nthɛ nwə e gɑ: Fo Agripa, a bəm tyɛ' ɔ bɑ kwa' nwə pɑpuŋ gɑ nthiŋnyə dzə o ŋkwinthɛ̌ nə mnwə myə pɑ Yudea nthʉ́ thə m̀ a. Nə pa' a bɑ o zhyə guŋ mà pɑ Yudea awɛ pu a mfəŋnyə mnwə map. Səso ghɔ dɑ kwa' tʉ̌m pɑpúŋ tə nə ju' yɑ nwə. Guŋ pɑ Yudea awɛ zhyə pa' ŋ də nə bvɔk Yerusalɛm tə fɑ cwə yə ŋ də bɑ mú bwa a. Wap zhyə́ tə fɑ tə tyɛ̌' tə bi a pɑ wap kùŋ bɑ wap gɔ pɑ mkwinthɛ gɑ ŋ də vɔk kwa' dəndəŋ pa' nə piŋ Si yɔk shəŋ a, bvɔk pa' tà' Farisai a. A pǐŋ bɑ tyɛ' ɔ pu pɑ̀wə dɑ a sɔ' dyə fyɛ' po'o gɑ gɑ̌ mɔktə mka'nyə myə Si lə la' ŋkha' bi mtá pɔk a. Mka'nyə myə mtùŋdyə mɔk shwɔppʉə mgham nə fa' bi Si mtsʉ' ba mɔkcʉ tə pwa, bɑ́ mɔktə gɑ a gɔ la' pəmtə a; pɑ Yudea butə a po'o nə nə́ piŋ bɔ̌ m fo pɑ lɔ'. Nwə kɑ̀ po pɑ̀ cəcɑ̌ pó bɑwə gɔm gɑ bi a pɑ́ Si lə yam mo nə vʉ̌? Gɑ a msya nwə? Sɔ' m nə m̀, bɑ ŋ də cəŋtə nyəŋ gɑ́ gɑ gɔ ma' tsó Yeso yə Nazarɛt shù nə guŋ mməjyə̀ awɛ. A nə́ŋ bɑ̀ ywə yə ŋ də ghə Yerusalɛm a; nə pa' ŋkhamsi gwyə lə hɑ tʉɔ bəm, gɔ Yerusalɛm gəm pɑ piŋ nyəŋ wap cɛ́, biŋ bíŋ gɑ pú zhwə wap. Ŋ də kǎ nə guŋ msinagogə awɛ bɑ shɔ́k nə pú, nthənyə wap gɑ̀ wap kəŋnyə piŋnthʉm yap; ŋ də nə miŋ ma' nə, jə́ŋ wap zhəŋ tə ŋkho ba tisuŋ dyɛ'. A po'o tə ŋ də kwi ŋwa'nyə bi ŋkhamsi gwyə, ŋwa'nyə yə a lə hɑ guŋ tʉɔ awɛ bəm a, bɑ nə gɔ m Damasi. Ŋ də pɑ̌ məjyə m fò yɔ̀k, a pɑ̀ ŋkhɛ a mɔ́kcʉ, guŋ nə yɔ mú' ŋkha' fɑ kɛbəŋ bɑ̀wə dəŋnyə tə shyə́ nam, dɑ́ sɛ e nə dzʉm wɔk pyə a mso ghiŋ pɑ̌. Pyə a pú awɛ vʉsi, ju' gi mo ghɔm bəm nə ghɔm pɑ Ebraika gɑ: Saulo, Saulo! O shwɔ' mkwə mɑ cwəpuŋ gɑ̀ kɑ̀? A tʉɔ bu nə tʉɔthə́ bi shyə syap. Ŋ də pa' gɑ: O bɑ̀ wɑ̀ Cyəpɔ? Cyəpɔ ghɔm gɑ̀: gɑ̌ bɑ́ Yeso yə o shwɔ'mkwə myə́ cwəpuŋ a. Da' gɑ lusi, tiŋnyə thə́. Ywə yə a gə tə sɔ' bu a bɑ gɑ́ gɑ̌ cwɔ' o nə gə gɛfa' biŋ bɑ ŋkwinthɛ̌ nə nə́ yɔ m nthʉ̀m zhwenyə yə o jɔ a nə a, ba myə́ shɑ myə o gɔ sɔ' yɔ à nə a. Gɑ̌ tsə vɔk o nə pɔmnəŋ ba m nə mguŋ pɑ tə pɑ pɑ Yudea myə gɑ̌ gɔ təm o nə̀ a, gɑ o ghyɛ' mnyə map, fɛ wap nə jʉ̌m shya wap nə ŋkha', fɛ wap nə guŋ Sata shya wap bi Si, po'o ga Si lɑ mhɔnwə map nə shwyɛ' wap, hɑ yap ywə yə e hɑ bi pɔ dɔlɔ̌ nthʉm piŋnthʉm shyə m nə m̀ a. Fo Agripa tə fɑ cwə o bɔ ŋ khɑ tʉɔthə́ bi yɔ m nthʉ̀m Zhwenyə kɛbəŋ. Tə fɑ po'o ŋ bɑ siŋ tɑ ntho' bi pɑ Damasi, ba m bi pɑ Yerusalɛm, nthʉ́m guŋ Yudea awɛ ba m bi mguŋ pɑ tə pɑ́ pɑ Yudea gɑ́ wap pʉɔtʉm tsap, fɛ́ bɑ shʉ m nə Si, bɑ bvɔk pɑ nə pa' pʉɔtʉm shəŋ a. A ywə yə a lə́ gə tə́ pɑ Yudea ghəm a Dyə Si bɑ gɔ zhwə a. Shyə m nə pa' Si kwitə a tə ŋkhəm cwəlɔ a, gɑ bɑwə jɑ́ ŋkwi pɑ nthɛ̌ nə nwə bɔ dzə mghətso ba pɑkhʉ̌. Nə pa' mghɛ ghɔ̀m ghɔ́m Si ba Mosɛ lə la' gɔm nwə yə a gɔ la' pɑ a. Gɑ̌ nəŋ bɑwə gɔm pɑ ya, gɑ Kristo gɔ yɔgo', pɑ̀ dəŋdzə mo nə yam nə vʉ̌, la'tə ŋkha' bi pɔ pɔk pɑ ba m bi mguŋ pɑ tə pɑ́ pɑ Yudea. Pa' Polo lə pɑ̀ gɔm po'o a, Festo lə́ wuŋ gɔm tə thə gɑ: Polo ǒ pʉə́! Mɑ zhyənwə ó lɑ ó gə bʉəpǒ. Da' gɑ Polo pa' bi é gɑ, Festo, Fo gwyə ŋ kha pʉə́. Ghɔm tsyə gɑ wə gɔm a bɑ nyənyɔ biŋ bɑ dəŋdəŋ; nə pa' fo yə gɑ bɑwə shəŋtə gɔm bi po'o a, bɑ̀ e tsə zhyə mnwə bɔ, biŋ bɑwə jyə gɑ e ka tʉɔnyə sɔmywə nə pɑ́, nə pa' mnwə bɔ la tə́ nthəm dʉmnyətʉmnyə pɑ̀. Fo Agripa, o biŋ ghɔm mghɛ ghɔm ghɔ̀m Si a? Gɑ zhyə kwa' gɑ̀ o biŋ. Agripa lə pa' bi Polo gɑ: A cʉ' mù ywə o kwɛ gɑ́ ǒ lɑ á gə mo Kristo. Polo pa' gɑ: kɑ ǎ cʉ' pɑ mù ywə, kɑ ǎ cʉ' pɑ té' lɑ, pa' Si yɔ a, wə̀ pu a guŋ pɔ awɛ pyə wap wə ju' gi a tyɛ' ɔ a; po cʉ' kwa' dəŋdəŋ pa' gɑ wə bɑ a, tə ně da' gɑ gwɑ kɑ pɑ mkwə̌ po. Fo lə lusi ba gɔpna' pu Bernike, ba guŋ pɔ awɛ pyə pu a pú lə bɑ̀ dyə fyɛ' a. Wap lə nə təm bɑ gɔm cəcɑ̌ pu gɑ: Bɛ yəŋ gɑ ka ghə sɔmywə yə bi a pɑ pu zhwə e, kɑ shə́ŋ e nə a lə. Agripa lə́ ghɔ̌m bi Festo gɑ: Bɛ yəŋ kɑ pe' bɑ tə ké Kasa bɑ pu tak e nəŋ. Pu lə cwə tə nyəŋ gɑ́ pyə gɔ lɑ kənu' gwyə nə ghɔ Italia, pù hɑ Polo pu a shɑ́ mghɛ cɛ́ bi tá sá' msəŋwi ŋkhə yə tso tsyə lə bɑ̀ Yulio a. E lə bɑ nə kam msəŋwi Kasa Ogwisto. Pyə a pu lə kó nə kənu' gwyə pɑ Adramuteno, a pɑ gɔ m Azia; pyə lə tam shyə lɑpʉə. Pyə a Aristarko yə Makedonya m Tesalonika. A lə pɑ̌ yə mu' jʉm dzʉ̌, pyə tiŋnyə Sidon. Yulio yə e lə bɑwə dɑ msəm tɑ nə gwim Polo a piŋ gɑ e ghɔ jɔ mso pyə wap kwitə e. Pyə lə piŋ dù wə de jyə m Kipro nə pá' fəfa lə bɑwə nthəm m dzə pyə a. Pyə lə sa' shyə lɑpʉə yə a dzamnyə́ Kilikia ba Pamfilia a, ŋkhəm Mira m Likia, nthiŋnyə wə́. Tà sa' msəŋwi ŋkhə lə ko wə jɔ kənu' gwyə pɑ Aleksandria, a pɑ gɔ m Italia, e nyəŋ wɔk nthʉm o. Pyə lə lɑ́ shɑ mtyɛ'dzʉ bɑ giŋ pɑ gɑ zhyə̀ dəm shyə, tə́ nə́ kó Knido bɑ pyə yɔgo' té' o, nə pa' fəfá lə bɑwə dɑ wɔk biŋ pɑ mjʉ̀m, pyə cyə bəŋ Kreta, m ghəŋ Salmoneŋkhǒ cǎ' shyə. Biŋ guŋ nə fiŋnyə tsʉ'u bɔ, pyə ŋwak nə mu' tsʉ' yə pu ŋkhe gɑ Buŋ tsʉ' tiŋnyə kənu' gwyə a, bəŋ tisuŋ Lasaya. Da' gɑ a lə nə cyə múywə nə piŋ jwɔ'shyə pɑ vʉ̌, nə pa' cwə̀ nə cwə tə tsʉ̌ywə lə bɑ a cyə́. Polo lə hɑ myə́ mkwɛnyə nə gɔm gɑ: Msó pɑ, gɑ̌ yɔ́ gɑ́ nə piŋ jwɔ'shyə si gɔ sím tsə nə kənu' gwyə yɔk pɑ, nə tsə tsyə a nthʉm o a ba m nə nɑ tsɔk pɑ. Tá sa' msəŋwi ŋkhə lə bɑwə ju'nyə bi tadyə kənu' gwyə pu gɛ kənu' gwyə biŋ bɑwə ŋkhəŋnyə nə yu' nthɔk Polo. Pa' a lə nə pɑ̌ po'o a pɑ́ ŋkhap ŋʉ́m, bɑ tsʉ' yə kənu' gwyə nthiŋnyə nə́ a ka nəŋ buŋ nə cwə tzʉ̌' bɔ a, guŋ pɔ awɛ lə pɑ̌ ŋkwishwə gɑ́ pu tam shyə gɔ̌ bi a pu kəm Feniksə, tsʉ' nə tiŋnyə kənu' gwyə Kreta yə mkənu' gwyə fɑ mto dzʉ ghəŋ nthəm nam kɑ shyə dzʉ̌ ghəŋ bi nam nthiŋnyə tsʉ'u a nthiŋnyə. Muywə fəfa lə na' bɑwə nthəm m mto dzʉ, wap kwɛ́ gɑ̀ bi a pɑ wap ghiŋ pa' wap sɛ́ a. Wap lə lǔsi tə bɑ gɔ m nə ghəŋ Kreta. Guŋ nə yɔ mu' mɑ fʉ̀m yə pu ŋkhe gɑ Eʉrakilon a fɑ nə mu' guŋ cəcɑ shyə bvʉ nə pù. Nthə kənu' gwyə nə gɔ tə pyə́ lə piŋ jyə́ nə yap kənu' gwyə dəŋdəŋ, bɑ giŋ pɑ khʉ'tə khʉ'tə. Pyə lə cyə m mto mu' guŋ cəcɑ̌ shyə yə pu ŋkhe gɑ Koda a, a ghə pyə na' jap kənu' gwyə dəŋdəŋ nə yap bɑ bvɔk vɔk. A lə cwə tə bɑ̀ dəŋdəŋ, pu cəŋtə́ mgwɑ nə́, biŋ bɑ̀ bwɔk nə ghɔ bvʉ nə Sirta, ma' gwɔ' nə nthɔm kənu' gwyə shyə cwəlɔ, kənu' pɑ giŋ dəm shyə pɑ gɑ zhyə̀. Fʉ́m lə piŋ shʉ' cʉ' tə dzʉ̌ nə lɔ́ pu to' nə ma' tsə tsyə a lə bɑ nthʉ́m kənu' gwyə a shyə. A lə nə kəm nə batə tyɛ' tá mghɛ fa' nthʉm kənu' gwyə kwa tsə kənu' gwyə pɑ m mbu map ma'tə shyə. Fʉ́m lə cɔ̀k cɔ̌k nə mtyɛ'dzʉ jɔmyɔ̌m, tə mo jɔ tsə nam kɑ sɛ mɑŋwə́ lə tə pyə lə yɑwə sɛ́ vɔk nə pyə. Pu lə cwə te' tə tsʉ́ sɔmywə, Polo lə tiŋnyə thə́ cəcɑ̌ pu gɔm gɑ: Mso pɑ, po ka yɔ a: A lə bɑ buŋ gɑ po yu' nthɔk mə̌, pɑ kɑ tə́m Kreta, sí yə̀ŋ gɑ pí. Da' gɑ̀ cwəlɔ, gɑ səso wɔ gɑ po kaktʉɔ; nə pa' ywə tə gɔ ghə sɔmmo nə po a, da' tsə tsyə a gɔ pɔptə nə kənu' gwyə a. Nə pa' a pɑ́ mtsʉ́' tyɛ' ɔ, aŋgəle Si yə gɑ̌ bɑ bi e, biŋ bɑ gɛfa' e a sɔ' bəm, jɔ e, e piŋ gɔm bəm gɑ: Polo kɑ pwɔk. Pu gɔ fyɛ' o dzə Kasa. Si pɑ́ bɑ ě tak vɔk pɔ pyə pu a pu pɑ̌ a bu. Mso pɑ, po kaktʉɔ. Gɑ zhyə gɑ ywə yə Si gɔm a, a gɔ pəmtə. Pɑ si gɔ vɔk nə fa shyə tiŋnyə nə mu' guŋ cəcɑ́ shyə. A lə pɑ nə batə mtsʉ' shwɔppfʉə mgham pa' pyə pɑ jwɔ' shyə lɑpʉə Adria a, ŋkhɛ a teŋ msʉ̌', mghɛ fa' nthʉm kənu' gwyə yu' zhwyə̌ ca'; wap lə na' si, ju' gɑ cǎ' tə̀ sishyə nə bú mgham bʉə; wap kwi' na' giŋ, kwi' sí ju' ca' nə bú shwɔptɔ mgham. Wap lə pɑ bwɔk gɑ kənu' gwyə yɔk kɑ càm nə mwɔ', shəŋtə mwɔ' nə ŋkhyəp kənu' gwyə mapfʉə jʉ̀m kənu' gwyə ma' shyə, shwə, byap gɑ dzʉ̌ lɔ́. Mghɛ fa' nthʉm kənu' gwyə lə pɑ shəŋ nə kʉ̀, nthəm nthʉm kənu' gwyə, ma' pó mpɛ nə ŋkwitə shyə; gɔm gɑ wap nə gɔ mdzə kənu' cəŋ kənu' gwyə. Da' gɑ Polo ghɔm bi Tá sa' msəŋwi ŋkhə ba bi msəŋwi pɑ Roma gɑ̀: mghɛ fa' nthʉm kənu' gwyə pɑ tə wuŋ nthʉm kənu' gwyə bɑ bi a pɑ po lə vɔk. A lə pɑ̌ po'o, msəŋwi ya'tə mkhə nə po mkənu' gwyə nthak nəŋ a ghɔ. Pú lə nə́ pyap gɑ dzʉ̌ lɔ́, Polo ghɔm bi guŋ pɔ awɛ gɑ wap tsʉywə gɔm gɑ: Yəŋ gɑ̀ bɑ̀ batə tyɛ' shwɔppfʉə mgham yə po shwə pɑ̀ nthʉm sɔlam tə tsʉ sɔmywə a, po yɑ tə tsʉ́ sɔmywə. Gɑ wə gɔm bi pó gɑ̀ po tsʉ ywə, ǎ wə bɑ nwə nə vɔk yɔ. Gɑ wə ŋkwi' siŋ wɔ gɑ̀ sɔmmo nə po tə gɔ pi bǎ ta' nəŋ thə e pɑ́. Polo lə ghɔm po'o, bé msɛ, go'tə Si nə́ dzə̌ guŋ pɔ awɛ, bo' cwəlɔ ntho' nə tsʉ. Guŋ yap awɛ lə kaktʉɔ cwəlɔ dzʉ yap ywə. Pyə lə bɑ̀ guŋ yɔk awɛ pɔ shwɔp nthɔk m gham sɔmbʉə dəm khə pʉə. Pu lə tsʉ̌ ywə tə jwyə cwəlɔ, bɑ̀ shəŋ pa' kənu' gwyə na' yɛ a, nthe msɛtʉɔ ma' shyə. Dzʉ̌ lə lɔ̌, pɑ fəŋ kənu' gwyə lə piŋ jyə tsʉ' yə ca' m nə́ a, da' gɑ wap lə yɔ mu' nthɔ shyə kəŋ shyə, bɑ shəŋ nə lɑ kənu' gwyə nthiŋnyə tsʉ'u. Pɑ fəŋ kənu' gwyə lə ŋkhyɛ' mwɔ' nə shəŋ kənu' gwyə ma' shyə, biŋ ŋkhyɛ' ba mtsə nə nthɔm kənu' gwyə cwəlɔ, fɛ́ kənu' gwyə shya nə ghəŋ nthɔ shyə. Wap lə kəm nə́ bvɛ̌, a tɔm kənu' gwyə, dzə e ko nə bvɛ̌, jʉ̀m e sa'tə bɑ fa shyə nə́ gə. Msəŋwi lə sɛ̌ gɑ wap gɔ zhwə mghɛ cɛ́ bɑ bwɔk pa' wap gɔ zhwɔ' shyə kʉ́ a. Da' gɑ̀ pa' tá sa' msəŋwi ŋkhə lə bɑ̀wə shəŋ nə vɔk Polo, e lə kɔ gɑ ka səŋwi ghə ywə yə wap sɛ́ a; gɔm gɑ pɔ pyə wap zhyə nə zhwɔ'shyə a ləŋdzə deŋ ntham shyə, jwɔ'shyə ŋkhəm kəŋ shyə. A sɔ' m nə pyə shɑ pɔ, wap cyə yap m nə mbak pələŋ kɑ m nə bak tsə tsyə a nthəm nə sa'tə kənu' gwyə a lə. A lə cyə m po' guŋ yap awɛ ghɔ tə ŋkhəm nə cǎ' tə ywə gə sɔmmo. Pyə lə cwətə bvɔk, ju' gɑ̀ tso guŋ cəcɑ shyə bɔ bɑ̀ Malta. Pɑ guŋ bɔ̌ lə́ lɑ̌ wɔk kwa' pɑpuŋ. Wap lə sǔ mɑ mɔk, shu'tə wɔk bəŋ o, nə pa' bə̀ŋ lə bɑwə dú, fɔ̌k piŋ bɑwə ŋkhú. Polo lə ŋwǎ pǔ ŋkwyə́ bɑ gɔ m nə tò mɔk, tsʉ̀' ləmnyə, nɔk mtiŋ təm nə ŋkwyə́ bɔ̌, shiŋnyə nə pu Polo. Pɑ guŋ bɔ́ lə nə́ yɔ pa' nɔk shiŋnyə nə pú Polo a bɑ gɔm cəcɑ̌ pu gɑ: Bɛ yəŋ gɑ jwə́ mò kwa' nyənyɔ. E vɔk nə shyə lɑpʉə da' gɑ̀ yə nə ya'shɛ Si ka piŋ gɑ e vɔk. Polo lə nɔk pu e nɔ́k bɔ vʉ̌ mɔ́k, tə ghə sɔmywə cwəpuŋ nə é. Pɔ bɔ lə bɑwə byap nə yɔ pa' Polo gɔ mʉ́ə a, kɑ pa' e gɔ tiŋ vʉ pfʉ a lə. Wap lə pyap tə bwa, la' wap yɔ sɔmywə bɔkpɔ̌k yə a sɔ' nə Polo a, biŋ fɛ bɑ gɔm cəcɑ̌ pu gɑ: E bɑ sí. A lə bɑ̀ giŋnyə tsʉ'u bɔ, mlǎ' pɑ tsʉ'u, bɑ myə́ dəŋdzə ŋkham guŋ bɔ tso tsyə pɑ Publio. E lə cəŋtə dɑ wɔk ghʉɔ pa' mso pyə a, nə tyɛ'dzʉ́ tá. Tap e lə bɑ̀wə gǒ; mhwi ba cupú pɑ́wə gə e. Polo lə ghɔ̌ bəŋ e, shwyɛ'nyə Si, biŋ jap bu dəm e, jɛ̌ e. A lə pɑ̌ po'o guŋ pyə shɑ mghɛ ghó pyə wap lə bɑ nthʉ́m guŋ bɔ a sɔ' yap jɔ Polo, bɑ jɛ̌ ba yap. Wap lə cəŋtə gə mku mɔk tə́ pyə nə ko shyə́ nə tyɛ' nə ghɔ, wap hɑ ywə yə a lə bɑwə jak wɔk a bi pyə. A lə cyə mŋwə tá, tə pyə ko kənu' gwyə yə a lə cwə guŋ cəcɑ̌ shyə́ ŋkhàp ŋʉ́m a, kənu' gwyə pɑ Aleksandria yə a lə bɑ pu və Mdioskuri nə́, a pɑ̀ mtiŋ myə́ a. Pyə lə ko Sirakus nthiŋnyə nə tyɛ'tá. Pyə lə lǔ wə́ giŋ pɑ́ giŋnyə kəŋ shyə tə ŋkhəm Régio. A lə pɑ̀ yə mu' jʉ̀m dzʉ̌ fəfa cʉ' nthəm m mto dzʉ, pyə ghiŋ nə tyɛ'dzʉ yɑpʉə ŋkhəm Potioli. Pyə lə ko tisuŋ bɔ jɔ mfɑ̌mfɑ; wap həŋtə gɑ pyə a pu na' shwə nə ta' gapdzʉ́ yəŋ pa' pyə lə nə gɔ Roma a. Mfɑ̌mfɑ pyə wap lə yu' tisuŋ bɔ gɑ pyə wə sɔ̌' a, lə sɔ' pyə a pú yu'tə Sim Apios ba m Triɔn Tabɛrnɔn. Polo lə nə yɔ wap go'tə Si, lam tsyə kó dyə. Pyə lə kǒ Roma pú piŋ gɑ Polo ghə yə tsʉ' cwə dó e, pu tá' sə́ŋwi, e pɑ byap e. A lə cyə tyɛ'dzʉ́ tá Polo ke mkǎm pɑ Yudea gɑ pu a pú cu'tə tsʉ́'u. Cwə yə wap lə cu'tə a e ghɔm bi pu gɑ: Mfɑ̌mfɑ myə̀ yə gɑ bɑ ŋ khɑ ghə sɔm nwə cwəpuŋ kɑ nə pɔ̀ pɔk pɑ, kɑ nə mco' myə a lə fɑ̌ bi mtá pɔk pɑ a lə, gɑ̌ yəŋ bɑ gɛ cɛ̌ tə fɑ pá' pu kɑ ghəm a Yerusalɛm hɑ bi pɑ Roma a. Wap kɑ tiŋtə nwə a, jɔ gɑ ŋ kha hɔ sɔmywə yə bi a pɑ pu zhwə a nə a, bɑ́ gɔ tak a nəŋ. Da' gɑ pa' pɑ Yudea kɑ pɑ nthé pɑ dʉ' nə a, ŋ khě ŋkhe Kasa nə, tə a lə pɑ da'tə m gɑ gɑwə da' guŋ yɔk nə mu' ywə pɑ. Yɔ ywə yə a gə tə ŋkhe wɔ gɑ̀ pɑ cɔmnwə a yəŋ. Kwa' nyənyɔ a du m nə mɔktə Israɛl tə gwɑ mtʉɔ pɑ nə bu mɑ po'o. Wap pa' bi e gɑ: Sɔm ŋwa'nyə ka fɑ Yudea sɔ́' bi pyə nə nwə o, biŋ bɑ po'o bɑ sɔmmo yə e fɑ Yudea, ka siŋ wɔk sɔm nwə cwəpuŋ nə o. Da' gɑ pyə wə həŋtə gɑ pɑ kwa' wə nə siŋ wɔk ywə yə o wə ŋkwɛ a, nə pa' pyə zhyə gɑ sɔmmo tə bɑwə biŋ yu cu'tə nə sɔmtsʉ' pɑ. Pu a pu lə yap mu' tyɛ'dzʉ́, wap sɔ' tyɛ' o bɔ tə jɔm, jɔ Polo dyə e, e ghɔmnwə bi pu, bɑ siŋ wap nwə nə Nəfo Si, bɑ guŋ mcwə awɛ, fɔkdzʉ̌ ba m bwadzʉ̌ bɑ ŋkhaktʉɔ shəŋ gɑ wap piŋ ywə yə e la gɔm nə Yeso a, bɑ shyə m nə mco' Mosɛ, ba ŋwa'nyə mghɛ ghɔm ghɔ̀m Si a. Shɑ pɔ lə pǐŋ nwə yə Polo lə bɑwə gɔm a, pyə shɑ pɔ kəŋnyə nə piŋ. Wap lə hapnyə tə pɑ ŋkwishwə cəcɑ̌ pù. Polo kwi' dɑ́ ta' shwə ghɔm gɑ, ghɔm Zhwenyə Dɔlɔ̌ bɑ nyənyɔ, ghɔm tsyə gɔm ghɔm Si Esaya lə́ ghɔm bi mtá pɔ a gɑ: Ghɔ jɔ pɔ pɑ́ gɔm bi pu gɑ: Pǒ gɔ la' yu' pɑ gɑ kɑlə pò lə yu', le, po lə yɔ. Nə pa' tʉ̌m pɔ pɑ́ bɑ ǎ tsɑ, bɑ mtəŋ map tʉɔ nə yu' nwə, bɑ wap cá mnyə map po'o gɑ wap kɑ yɔ nə mnyə map. Wap kɑ lɑ mtəŋ map ju' nwə. Wap kɑ nəŋ dɑ tʉm tsap ju', wap kɑ fɛ̌ de m nə Si. Gɑ̌ go ghə gɑ wap yɛ̌ lə? Po zhyə gɑ nwə nə bvɔk yə a fɑ bi Si bɑ pu hɑ cwəlɔ m bi pɑ tə pɑ pɑ Yudea. Wap gɔ yu' nwə bɔ. Polo lə cwətə gɔm po'o, pɑ Yudea nə ghɔ giŋ bɑ shəŋtə nthɛshwə cəcɑ́ pu. Polo lə cwə́ gu' pʉə́ pɑ́ nə yə̀ thə, biŋ bɑ dɑ guŋ pɔ awɛ pyə wap lə sɔ' jɔ e a; bɑ shəŋtə siŋ nwə nə Nəfo Si, biŋ bɑ ji'tə nwə nə́ Cyəpɔ Yeso Kristo pɑ sɔsɔ̌ tə́ sɔm fa'tə. Myə Polo, gɛfa' Yeso Kristo, bɑ Si ké a gɑ̀ bɑ́ gɛ nthəm, shwɔ' a gɑ bɑ siŋ Cuŋ pɑpuŋ ě. Cuŋ pɑpuŋ yə e lə la' shyə m nə mghɛ ghɔm ghɔ̀m tsyə́ ŋkha' nthʉm Mŋwa'nyə dɔlɔ̌ a. Cuŋ pɑpuŋ bɔ gɔmnwə nə Mú e yə e nthəm nə ŋkhənyə David nə bap nɑ́ a. E shyə m̀ nə Zhwenyə Dɔlɔ̌ bɑ Mu sǐ, bɑ e ghə tʉɔ shyə m nə yə nə yam nə vʉ̌, yʉ Yeso Kristo Cyəpɔ yɔk pɑ. A lě shyə m nə e pyə kwi gho' nə pɑ́ gɛ nthəm nə cya pɔ nə nə́ yu'nyə nə piŋnthʉm, nə́ ghu'tə tso tsyə, shya gúŋ pɑ tə pɑ́ pɑ Yudea, pyə ba wɔ yɔ bɑ wap a, wɔ pyə Yeso Kristo ŋkhe wɔ a. A gho' ba hwitə yə a fɑ bi Si, Tá yɔk pɑ, ba m bi Cyəpɔ Yeso Kristo a pɑ bi guŋ pɔ pyə Si ŋkhuŋ wap Roma a, bi pɔ dɔlɔ̌ shyə m pa' Si ŋkhe wap a, bi po. Gɑ̌ wə də́ŋdzə go'tə Si a nə guŋ yɔ awɛ shyə m nə́ Yeso Kristo: Pu nthʉm gùŋ dzʉ awɛ shyanyə gɑ pǒ bíŋ. Nə pa' Si wə bɑ ŋkwinthɛ̌ a, yʉ yə gɑ fa' bi e nthʉm zhwenyə á nə cwə nə siŋ Cuŋ pɑpuŋ Mú e a: gɑ̌ nthʉ tso tsɔ tə pwa; bɑ do nthʉm mcwyɛ'nyə mə̌ nə ghə sɔ̀ nə sɔ' wə po pa' e yɔ a. Nə yɔ wɔ́ wə́ nthəŋ a te', po'o gɑ a hɑ shɑ potsə tsyə a fɑ m bi Zhwenyə a bi po, po nə ŋkwyə nə piŋnthʉm, po'o tə́ pɑ nə ŋkhaktʉɔ wə po, shyə m nə piŋnthʉm yə a bɑ yɔ́k pɑ, yɔ ba yɑ̌. Mfɑmfɑ bi a pɑ́ ŋ də cyətə siŋ wɔ gɑ́ gɑ̌ ka' nə sɔ' wə po tə la' jɔ sɔ tə ŋkhəm cwəlɔ, nə sɔ' jɔ mnthɔm fa' wə po pa' wə pyəshɑ pɑ tə pɑ pɑ Yudea a. Gɑ̌ sɔlam nə pɑ Grikia ba nə pɑ tə pɑ́ pɑ Grikia, nə pɑ zhyənwə ba nə m mfʉmnyə pɔ; a ywə́ yə a gə tə bɑ shəŋ nə siŋ Cuŋ pɑpuŋ ba m bi po yɔ, wɔ pyə pǒ Roma a. Nə pa' ŋ tə ŋkhuso nə Cuŋ pɑpuŋ pɑ́: A bɑ tʉɔ Si nə ywə vɔk bi bǎ ya mo lə́ yə ě piŋ a. Də́ŋdzə̀ nə pɑ Yudea biŋ bɔtə́ nə pɑ Grikia. A shyə m nə́ e tə́ pu yɔ nwə dəŋdəŋ Si, shyə m nə́ piŋnthʉm biŋ bɑ́ ba m nə piŋnthʉm, shyə m nə pa' a bɑ pu və gɑ́: Mo yə e bɑ dəŋdəŋ nə piŋnthʉm a gɔ sɔ' vɔk. Nə pa' Si da'tə yɛluŋ e kɛbəŋ nə guŋ mhɔnwə ba nə guŋ msɔkmsɔk nwə pɔmnəŋ, myə a nyəŋ nyənyɔ cɛ́ bi msɔkmsɔk nwə a; nə pa' ywə yə bi a pɑ pu zhyə́ nə Si a, a bɑ wap zhyə, a bɑ Si la'tə wap. Nə pa' tə fɑ nə nə́ nyaptə dzʉ̌, tsə dɔlɔ̌ Si tsyə́ pú tə́ jɔ a pɑ, yə a bɑ tʉɔ mama, ba pa' e nə bɑ a, pu jɔ nə mfa' myə, nə zhyənwə; a po'o tə bi a pu lə lɑ sɔmywə nə shwyɛ' wap pɑ. Nə pa' wap lə bɑ wap zhyə Si, da' gɑ la' wap ghu'tə́ e, wap lə nəŋ go'tə e nə mfa' pa' a shəŋ bi Si a. Wap le hɔ pɑ́ jyə̀ nthʉm msɛ́nwə tə kwitə̀ map, tʉ̌m fʉ̀mnyə tsap cʉ' ywə jʉ́m. Wap lě bɑ sɛ gɑ́ wap bɑ mzhyənwə, shʉ' mpʉəpó. Wap lə dɑ fó' mo pfʉpfʉ̌ pu a pǒmsəŋ, ba mnɔm mkwə pfʉə pu a pyə wap fəŋ mvam map si a nə ŋkwyəpnyə ghu'tə Si yə e tə npfʉ a pɑ. A ywə yə a lə ghə tə́ Si cyə m nə́ ghi'nyə nthʉm tʉm tsap hɑ wap nə nwə mviŋ myə́ wap nə dɑ nɑ tsap gə ywə tə ywə a. Wap lě dɑ cwanwə ŋkwyəpnyə nyənyɔ Si, wap lě gamtə biŋ fa' m̀ bi ywə yə Si nyaptə nə cwə yə wap lə bɑ gɔ ghamtə Si nyaptə dzʉ̌ yə byanyə bɑ nə e mama a. Amɛn. A ywə yə a lə ghə́ Si hɑ gɑ́ wap yap mtʉm map pɑ́ nə ywə yə a dɑ mo gə mzhʉm a: Pɑjwǐ pap lě ŋkwyəpnyə pa' Si lə yap gɑ wap pɑ gə a, gə pɑ́ ywə yə pu nthé bya nə a. Ba pɑ bɛ tak yap nə ghə pa' pu lə yap nə nwə mbɛ pu mjwǐ a, pɑ bɛ pɑ di' pɑ́ pɑ bɛ, gə bɔkbɔ̀k nwə cəcɑ̌ pu, tə ŋkwi mcwɔ'fa' go' yap myə ǎ ku' nə pu a. A cyə m pa' wap lě tə kúŋ nə tɔm nwə nə zhyə́ Si a, Si le nthak wap bi zhyə̌nwə yap yə a tə́ nthya sɔmywə a pɑ: A po'o tə wap pɑ gə pɑ ywə yə wap ka tə́ bɑ gɔ ghə a pɑ́. Wap bɑ wap lo nə nthinthi msɔknyə nwə̀, nə pɔptə nwə, ghi'nyə, tʉm shɔkcɔ̌k, nə khiŋ, nə zhwə mo; nə cəŋ mshɛ́, fʉ̌, nə cyə́tə́ ghə mku', nə ghɔmnwə bɔkpɔ̌k nə pɔ, nə tʉ tsǒ pɔ cwəpuŋ, nə pɑ́ mghɛ bo Si, nə kam shɛ́, ŋa'nɑ́, ka'tə̀, fʉ̌ nwə cwəpuŋ, nə tʉɔthə́ bi tá pu má. Nə cyə́tə ghə zhyənwə, nə cyə́tə zhyə nə ghiŋ nə mco', tə ghə tʉm, nə cyə́tə ghə nə piŋ. Ba pa' a bɑ wap zhyə gɑ yə nə ya'shɛ Si bɑ gɑ́ pɔ pyə wap gə mɔ mnwə a bɑ wap ku' pɔ vʉ́ a, ba tə po'o wap tə gə da' mnwə bɔ pɑ. Wap biŋ bíŋ ba pyə pɔ pyə wap gə mnwə bɔ a. Nə́ nə shwyɛ' o tə bɑwə pɑ́, kɑ o bɑ pɑ́ wɑ̌ lə, wə yə o fyɛ' pyəshɑ́ pɔ a; nə pa' o nə fyɛ' yə mu' mo, bɑwə nyəŋ shɛ kwa' thə o. Nə pa' o bɑwə gə yǔ pɑ́ po'o. Tə́ a bɑ pɑ̌ zhyə gɑ yə nə fyɛ' Si bɑ nyənyɔ nə pɔ pyə wap gə nthi mfa' bɔ a. O bɑwə ŋkwɛ gɑ wə yə o fyɛ' pɔ pyə wap gə po'o, biŋ bɑwə gə yǔ pɑ pa' wap a, o gɔ sɔ' vɔk nə yə fyɛ' Si a? Kɑ́ o bɑwə gwak mɑ dəŋ puŋnwə Si, ba nə kyəptʉm e pu a nə ghə pɑpuŋ? O tə bɑwə jyə gɑ puŋnwə Si bɔ bɑwə nthənyə o gɑ o pʉɔtʉm tsʉ̌ a? A bɑwə shyə m nə tʉɔthə́ o ba m nə yu nə cyə́tə pʉɔtʉm o pɑwə shu'tə́ yɛ̀luŋ Si thə o nə tyɛ' yɛluŋ, tyɛ'dzʉ́ yə́ e gɔ sɔ' fyɛ' dəŋdəŋ a. Tyɛ'dzʉ yə́ Si gɔ sɔ' pa' bǎ yə nwə wɑlɑ́ pɑ nə dəŋ mfa' myə́ a: E gɔ sɔ' hɑ vɔk mama bi pɔ pyə wap lě ŋkhaktʉɔ nə́ nə ghə nwə pɑpúŋ, bɑ shə́ŋ ghu'tə, mku' ba nə cyətə piŋ npfʉ a. Hɑ yɛluŋ ba nə ŋiŋtə sə́ bi pɔ pyə wap lə nthʉɔthə bi nwə nyənyɔ, biŋ msɔkmsɔk nwə a. Ghəghʉɔ pu a zhwiŋ bi mo yə e gə nwə bɔkpɔ̌k, də́ŋdzə ntho' nə yə́ Yudea tə́ bɔtə́ nə yə Grikia. Ghu'tə, mku' ba hwitə bɑ bi bǎ ya mo lə yə e gə nwə pɑpuŋ a, dəŋdzə bɑ bi yə Yudea, biŋ bɔtə bɑ bi yə Grikia. Nə pa' nə ghap ŋkheŋ pú tə bɑ nə Si pɑ́. Guŋ pɔ pyə wap lə hɔnwə tə zhyə mco' a, wap gɔ sɔ' pfʉ pɑ tə zhyə mco'; pɔ pyə wap lə nə hɔnwə bɑ wap zhyə mco' a, pu gɔ sɔ' lɑ mco' fyɛ' wap. Tə pɔ pyə wap ju' mco' a nə bɑ dəŋdəŋ dzə Si pɑ́; pɔ pyə wap bɑ dəŋdəŋ a bɑ pɔ pyə wap ju' mco' giŋ nə a. A bɑ́ cwə yə pɑ tə pɑ pɑ Yudea, pɑ tə zhyə mco' gə ywə yə mco' shəŋ a, wap bɑ́ pa' mco' a nə pu, wap pyə́ wap bɑ wap ka ghə mco' a. Wap da'tə gɑ a bɑ pu və ywə yə mco' shəŋ a nthʉm tʉm pú; ba kwa' zhyənwə yap sa' wap po'o, ba yap nə sɛnwə nthʉm tʉm pú pɑ butə wap biŋ bɑ giŋkǎm yap. Yəŋ bɑ ywə yə́ a gɔ sɔ' tə́m nə tyɛ'dzʉ́ yə Cuŋ pɑpuŋ gɔm gɑ́ Si gɔ sɔ' cyə m nə Yeso Kristo fyɛ' mfa' dʉmnyətʉmnyə bǎ yá mo a. Tə wə yə́ a bɑ o ghə tso yə Yudea, bɑ jap tʉm tsǔ pɑ nə mco', biŋ bɑ dɑ Si o ŋa'nɑ o a, wə yə́ a bɑ ǒ zhyə́ ywə yə́ e shəŋ a, wə yə a bɑ mco' zhi'tə o nə cwɔ' ywə pɑpúŋ, wə yə́ o jyə yə nthʉɔ yə a bɑ nə a, wə yə a bɑ ǒ zhyə́ gɑ o da'tə məjyə bi mfʉ̀, bɑ ŋkhà' pɔ pyə wap bɑ nthʉ́m jʉm a, bɑ gɛ zhi'tə pɑ tə zhyənwə, ba gɛ zhi'tə pɑkhʉ̌, nə pa' a bɑ ǒ zhyə́ ywə yə a shəŋ nə zhyə nthʉm mco', biŋ jyə́ nwə nyənyɔ... A bɑ po'o! Wə yə́ o ji'tə mo tə́ o lə zhi'tə thə nɑ o! O siŋ gɑ ka mo zhʉ, bɑ jʉ̌! O sho' nwə ghap, biŋ bɑ gə ghap! O bɔ nwə nə ghamtə mkətwɔk biŋ bɑ jʉ́ mdyə map! O dɑ mco' ŋa' nɑ́ o, biŋ bɑ bɔptə mco' nə nɔm Si! Nə pa' a bɑ pu lě bvə́ gɑ: a cyə m nə po pú yəmtə tsǒ Si cəcɑ̌ pɑ tə́ pɑ́ pɑ Yudea. Nə vo mo bɑ ǎ puŋ bɑ́ yə́ o ghiŋ nə mco' a, tə o pɑ bɔptə́ mco' bɑ pu vó o, bɑ o bɑ́ pɑ mo yə pu ka vo é a. Tə mo yə pu ka vo é a pɑ gə ywə yə mco' həŋtə́ a, bɑ pu tə gɔ sɔ' sɛ yə nə cyə́tə vo e pa' pu vo e a pɑ a? Da' gɑ́ yʉ yə pu ka vo é nə bapnɑ, tə e pɑ gə ywə yə mco' gɔm a, e gɔ sɔ' fyɛ' o, wə yə o bɔptə mco' bɑ pu vo o a. Nə pa' tə ywə yə pu jɔ a nə dɑ mo gə yə Yudea pɑ̀, kɑ mtiŋ nə bapnɑ nə́ ghə mo yə pu vo e a pɑ́. Ywə yə a dɑ mo gə yə Yudea á bɑ́ ywə dʉmnyətʉmnyə, ba nə vo mo pɑ m nə́ tʉ̌m, yə a bɑ m nə Zhwenyə, la' a pɑ m nə mco' a. Yɑ́ nə bɑ nthi mo yə e tə ŋkwi yə nə ghu'tə m bi pɔmnəŋ a pɑ, e ŋkwi m bi Si a. Yə Yudea bɑ e lɑ kɑ́ shyə pyə shɑ pɔ? Nə vo mò ŋkwitə nə kɑ ywə? Wap bɑ m dzə̀! Nə pa' pu lə dəŋdzə̀ hɑ nə ghə pu zhyə Si m bi pú. Po'o m gɑ́ kɑlə́? A pɑ gɑ́ shɑ pɔ nə pu lě tə pɑ nyənyɔ bɑ a gɔ kɔ nə pɑ nyənyɔ Si a? Gɛ̌! Pɑ gɔ zhyə gɑ Si bɑ nyənyɔ, guŋ pɔ awɛ pɑ mcwanwə dəŋdəŋ pa' a bɑ pu və gɑ: A buŋ gɑ pu zhyə o pa' mo dəŋdəŋ a nə mghɔm mǔ, bi a pu pɑ fyɛ' o o tsʉ́. Tə a bi a yɔk pɑ nwə nə cyətə pɑ dəŋdəŋ ká' nwə dəŋdəŋ Si hɑ thə, gɑ gɔ ghɔm gɑ kɑ̀? Si tə shyə́tə pɑ dəŋdəŋ nə pɑ̀ nə lɑ yɛluŋ é shwɔ wɔk pɑ a? Gɑ gɔm po'o m nə pa' monəŋthə́ nə jɔ a. Tə́ gɛ̌! Nə pa' a pɑ po'o bɑ Si gɔ sɔ' fyɛ' dzʉ́ m gɑ́ kɑ? Tə́ à cyə m̀ nə́ mcwanwə mə̌ nyənyɔ Si la'tə pa' e bɑ́ a nə ghu'tə é bɑ pu gɔ piŋ nyəŋ shɛ thə m pa' gɛ mhɔ a m gɑ́ kɑ? Tə nwə kɑ́ pɑ lə ghə nwə cwəpùŋ tə nwə pɑpuŋ təm pa' shɑ pɑ tɛmnɛ gɔm a? Nə nyəŋ shɛ thə pɔ bɔ bɑ ǎ ku' nə pú. Tə́ kɑ? Wɔk pɑ pɑ Yudea bɑ pɑ̌ pìŋ gə kɑ nə nə́ shyə pyə shɑ pɔ? Tə́ sɔmywə pɑ́! Nə pa' á bɑ pɑ tsə́ yɔ̌ gɑ́ guŋ pɑ Yudea awɛ pa' pɑ Grikia a bɑ pɑ mghɛ mhɔ. Dəŋdəŋ pa' a bɑ pu və gɑ́: Sɔmmo dəŋdəŋ tə bɑwə pɑ́, bǎ ta' mo. Sɔm jyənwə tə̌ wə́ pɑ́, bǎ ta' mo nə cə́ŋ Si. Wap bɑ wap hɔ məjyə guŋ yap awɛ, bɑ wap pɔptə awɛ. Sɔmmo nə pu lə pɑ gə nwə pɑpuŋ bǎ ta' mo. Nthʉm ghak yap bɑ pa' thəsì yə pu ghyɛ' a: Wap dɑ tʉm yap dzə mfʉ̀m jəŋ nɔk mtìŋ pɑ́ nə mkwɔptəshwə̀ map. Shwə yáp bɑ ǎ lo nə mdo pu a nwə dzə́zə́. Mkwə map ŋkhʉdʉ́ nə pfyə mcyə; nə sim pu a ghəghʉɔ bɑ nə məjyə yap. Bɑ wap ka zhyə tsap məjyə hwitə. Sɔm nə pwɔk Si tə bɑ dzə mnyə map pɑ́. A nəŋ nə pɑ̌ po'o bɑ pɑ zhyə́ gɑ ywə yə́ mco' gɔm a, a gɔm bi pɔ pyə wap bɑ nthʉm mco' a, po'o gɑ́ guŋ mshwə pɔ awɛ cɑ, tə pu zhyə gɑ guŋ dzʉ̌ awɛ bɑ ǎ hɔnwə dzə̌ Si. A ywə yə́ a gə tə sɔmmo lə ghɔ sɔ' pɑ dəŋdəŋ dzə e, cyə m nə mfa' mco' a; nə pa' mco' gə mo zhyə pɑ mhɔ. Da' gɑ́ cwəlɔ, a bɑ pu zhyə nwə dəŋdəŋ Si, la' pu cyə ba m nə mco'; mco' pu a mghɔm ghɔm Si bɑ mkwǐnthɛ myə. A bɑ nwə dəŋdəŋ Si shyə m nə piŋnthʉm nə Yeso Kristo bi guŋ pɔ pyə wap biŋ a. Wap bɑ pɑ ta' ywə. Guŋ yap awɛ bɑ wap lě hɔnwə, la' ghu'tə Si yɑ bi pú. Da' gɑ bɑ a lé shyə m nə pa' Yeso Kristo lə kwi pɔ a pu lɑ wap gə pɔ dəŋdəŋ, tə wap hɑ sɔmywə, shyə m nə gho' Si. Si bɑ e lě dɑ e nuŋpwɔ' shyə m nə mcyə myə, shyə m nə piŋnthʉm, nə nə́ da'tə ywə yə nwə dəŋdəŋ lə bɑ ya a, pa' e lə tak mhɔnwə pɔ nəŋ tə nyəŋ shɛ thə pu nə cwə dzə, cwə yə e lə bɑ e tɔm tʉm tsyə a. E da'tə nwə dəŋdəŋ e cwəlɔ, po'o gɑ e pɑ dəŋdəŋ tə jap mo yə e bvɔk m nə piŋnthʉm nə Yeso Kristo a dəŋdəŋ. Tə bi a pɑ mo nə ŋa' nɑ e a? Gɛ̌, shyə m nə̀ kɑ? M nə mfa' lə? Gɛ̌, da' m nə piŋnthʉm. Pyə zhyə gɑ mo shyə m nə́ piŋnthʉm tə bɑ dəŋdəŋ. E tə shyə m nə fa' mco' pɑ. Kɑ Si bɑ pɑ da' Si pɑ Yudea? E tə́ bɑ ba Si pɑ tə pɑ pɑ́ Yudea a? Bɑkɔ! E bɑ ba Si pɑ tə pɑ́ pɑ Yudea nə pa' Si bɑ pɑ yɑmu' yə e dɑ pɔ pyə pu vo wap a ba pɔ pyə pu ka vo wap a nə gə pɔ dəŋdəŋ a. Tə pɑ dɑ piŋnthʉm nthé də̀ŋ nə mco' a? Gɛ̌, pɑ nyəŋ pɑ dəŋ nə mco'. Pɑ gɔ ghɔm gɑ́ kɑ́ nə Abraham tá yɔk pɑ̀? E lě gwim kɑ́ shyə m nə bap nɑ́? Abraham lə pé' e shyə m nə mfa' myə tə́ bɑ mo dəŋdəŋ bɑ bi a pɑ e ŋa' nɑ e, tə̀ gɛ̌ dzə̌ Si. Nə pa' ŋwa'nyə gɔm gɑ́ kɑ? Abraham lə ghə piŋnthʉm nə Si, pu sɛ yə bɔ bi e pa' nwə dəŋdəŋ a. Tə sɔ' m nə mo yə e fa' fa' a, mcwɔ'fa' tə bɑ́ pu sɛ m pa' gho' pɑ, pu sɛ m gɑ́ ywə yə a bɑ yə́ a. Tə sɔ' m nə mo yə e ka fá' sɔm fá' a da' gɑ biŋ mo yə́ e dɑ gɛ mhɔ gə mo dəŋdəŋ a, pu sɛ piŋnthʉm pa' dəŋdəŋ a. A po' o tə David jwɔp ŋwɛnyə mo yə́ Si sɛ e gɑ mo dəŋdəŋ tə cyə m nə mfa' myə a gɑ: Mpuŋtsé bɑ pɔ pyə pu lɑ yap nə cyətə ghiŋ nə mco' shwyɛ' wap biŋ pfɔptə mhɔ map a. Buŋtsě bɑ mo yə Cyəpɔ tə́ jɑwə sɛ́ mhɔ myə a pɑ́. Ghɔm mka'nyə pɑpuŋ tsɔ gɑ po'o bɑ pɑ́ bi pɔ pyə́ pu vo wap a kɑ ba pɔ pyə pu ka vo wap a? Pyə gɔm gɑ: Pu lě sɛ piŋnthʉm Abraham bi e pa' dəŋdəŋ a. Pu lə sɛ po'o cwəkʉ̌? Tə pu bvo e kɑ bɑ pu tsə vo e? Gɛ̌, tə pu bvo e, tə́ pu la' bvo e! Si lə hɑ mtiŋ nə́ vo mo bi e, a pɑ́ stam nə pɑ dəŋdəŋ yə e lə kwǐshyə m nə piŋnthʉm cwə yə pu lə jɑ tə́ vo e a; a pɑ́ po'o e zhi tá guŋ pɑ piŋ awɛ pyə́ wap lə bɑ pɔ bɑ pu ka vo wap a, po'o gɑ pu sɛ wap gɑ́ pɔ dəŋdəŋ, ba ta pɔ pyə pu vo wap, ba pyə wap nə pɑ̌ nə gwya pɔ pyə pu vo wap a biŋ bɑ giŋ nə mkwə tá yɔk pɑ Abraham pa' e lə giŋ nthʉm piŋnthʉm tə pu la' bvo e a. Nə pa' a tə́ shyə m̀ nə́ mco' tə́ pu ka' bi Abraham ba m bi gwya e gɑ wap gɔ sɔ' kwi dzʉ̀ pa' tsə mcʉ' a pɑ̀; a lə shyə m nə dəŋdəŋ piŋnthʉm. A pɑ́ gɑ́ pɑ tsʉ mcʉ́' shyə m nə mco', bɑ piŋnthʉm ka kwitə́ sɔmywə ba mka'nyə piŋ mǐ nə pa' mco' hɑ yɛlúŋ; tsʉ' yə mco' tə nə a pɑ́, nə pɔptə mco' lə pɑ́ tsʉ'u. A bɑ po'o tə pu pɑ̀ shyə pɑ m̀ nə́ piŋnthʉm tə́ bɑ dzʉmcʉ̌', gɑ a cyə a m nə̀ gho', po'o gɑ mka'nyə pɑ̀ pɑwə nə ŋkhənyə Abraham, tə da' nə pɔ pyə wap shyə m nə́ mco' a pɑ, ba m nə́ pɔ pyə wap shyə m nə piŋnthʉm Abraham tá guŋ yɔk pɑ awɛ a. Nə pa' á bɑ pu lě bvə gɑ: Ŋ dě dɑ o gə tá pɔ jɔmyɔ̌m. E bɑ tá yɔk pɑ̀ dzə̌ Mo yə e lə pǐŋ e a, Si yə e gə pɔ pyə wap pfʉ a vɔk, e piŋ bɑ̀ gə ywə yə a la m bɑwə a, a pɑwə. Mɔktə ba nə cwə yə bi a pɑ́ mo lə piŋ mɔk sɔmywə a, e lě biŋ, shyə m po'o ji tá pɔ jɔmyɔ̌m pa' ghɔm tsyə a gɔm gɑ: Gwya o gɔ sɔ' pɑ po'o. E lě tə́ yɔ dəŋ gu'dzʉ́ tsyə bwa nə piŋnthʉm e, nə pa' a lə bɑ ě ghə gwɛ a gu' ŋkhə́, ba pa' nɑ e pu a vam Sara lə bɑ ǎ cu' pɑ pfə́ ywə a. E la tə zhʉ'nyə nə mka'nyə Si pɑ́; e lə pǐŋ ŋkhak pɑ tʉɔ nthʉm piŋnthʉm, bɑ gu'tə́ Si jyə́ nyənyɔ gɑ ywə yə Si ŋkha'nyə a, e ghə tʉɔ nə gə a pəmtə̀. A lə shyə m po'o tə pu sɛ bi e pa' nwə dəŋdəŋ a. A tə́ bɑ po'o da' bi e do e tə pu bvə gɑ́: Pu lě sɛ bi e; a bɑ́ ba m bi pɑ̀, wɔk pɑ̀ pyə piŋnthʉm yɔk pɑ̀ gɔ sɔ' sɛ́ a, nə pa' pɑ biŋ Mo yə e lə yam Yeso, Cyəpɔ yɔk pɑ nə vʉ̌ a, Mo yə pu lə hɑ e nə mhɔnwə mɔk pɑ̀ e piŋ jam nə vʉ̌ gɑ pɑ cʉ' pɔ dəŋdəŋ a. A po'o tə pɑ̌ cyə m nə piŋnthʉm bɑ dəŋdəŋ a, hwitə bɑ cəcɑ̌ pɑ a Si shyə m nə Yeso Kristo Cyəpɔ yɔk pɑ̀. A shyə m nə́ e, biŋ shyə m nə piŋnthʉm, yɔk pɑ tsʉ' pɑ nə gho' yə a bɑ̀ pu yap wɔk pɑ̀ nə̀ a, biŋ bɑ jap yɔk pɑ̀ nə ghə dəŋ pɑ nə mɔktə nə ghu' Si. Pɑ biŋ ŋkwi' jap yɔk pɑ̀ ŋa'nɑ pɑ̀ nə mghəghʉɔ mɔk pɑ jyə gɑ ghəghʉɔ hɑ kaktʉɔ kaktʉɔ pɑ hɑ nə pɑ nyənyɔ, nyənyɔ pɑ hɑ mɔktə. Mɔktə lə nəŋ bɑ fʉtə́ mo, nə pa' a bɑ ŋkhuŋnyə Si lě sɛ̀ nthʉm mtʉm mɔk pɑ shyə m nə Zhwenyə Dɔlɔ̌ yə pu lə hɑ bi pɑ a. Əŋ, cwə yə́ pɑ lə́ bɑ́ tə́ wuŋ gə gʉ' a, Kristo pfʉ́ nə cwə yə́ pu lə yap a nə thə pɔ cwəpuŋ. A tə bɑ ǎ yɛ nə piŋ nə pfʉ nə thə́ mo dəŋdəŋ pɑ́; pɑtyɛ' bi a pɑ mo piŋ bǎ nə pfʉ̀ nə thə́ mo pɑpuŋ. Tə ywə yə Si nə da'tə ŋkhuŋnyə nə pɑ a bɑ gɑ: Kristo bɑ e lə nə pfʉ̌ nə thə́ yɔk pɑ̀, pɑ̀ yɑ̀ pɑ̀ mghɛ mhɔ. Pa' a biŋ bɑ cwəlɔ bɑ mcyə myə́ lɑ wɔk pɑ gə pɔ dəŋdəŋ, tə dəŋ pa' a tə e gɔ vɔk wɔk pɑ nə yɛlúŋ Si? A bi á a pɑ́ gɑ́ cwə yə́ pɑ lə́ jɑ mghɛ bò Si a, pa pú lə wɔ'bvɑnyə shyə m nə vʉ́ Mú e, bɑ cwə yə́ pɑ a pu wɔ'bvɑnyə a, pɑ tə gɔ cyə m nə vɔ́k e vɔk a? A bɑ po'o pɑ̀ pɑ́ jap yɔk pɑ ŋa'nɑ́ nə Si shyə m nə Yeso Kristo Cyəpɔ yɔk pɑ̀ yə pɑ shyə m nə e cwəlɔ ŋkwi bvɑnyə a. A po'o tə́ dəŋdəŋ pa' a lé shyə́ m nə ta' mo mhɔ ko nthʉm dzʉ a, a piŋ shyə m nə mhɔ vʉ̌ ko yə a, vʉ̌ bɑ ǎ ko nə guŋ pɔ awɛ nə pa' guŋ pɔ awɛ bɑ wap hɔnwə. Mco' lə nə sɔ' mhɔnwə pɑ pɑ́ nthʉm dzʉ́, da' gɑ bi a pɑ pu lə nyəŋ shɛ thə́ mo nə mhɔ cwə yə mco' tə wə a pɑ. Tə́ tə fɑ nə Adam gɔ ŋkhəm nə Mosɛ vʉ̌ pɑ pɑwə, ba nə pɔ pyə wap lě tə hɔ sɔmywə nthi pa' Adam á, yə e bɑ cyəŋnyə mo yə e lə bɑwə gɔ la' sɔ' a. Tə gho' Si tə bɑ pa' mhɔ a pɑ́; nə pa' a bi a pɑ̀ bɑ a lě shyə m nə mhɔ ta' mo pɔ tə́ jɔm ko nə vʉ̌, bɑ dəŋ pa' a nə gho' Si, gho' e yə e hɑ shyə m nə ta' mo, Yeso Kristo, bɑ ǎ sɛ nə dú pɔ̀ kwa' du e. Tə gho' bɔ tə́ bɑ pa' mhɔnwə ta' mo a pɑ: Nə pa' a bɑ a lě shyə m nə mhɔ da' ta' mo, pu fyɛ', biŋ nyəŋ shɛ thə mo, da' gɑ a piŋ shyə nə vəŋ mhɔ, gho' ghə mo pɑ dəŋdəŋ. Nə pa' a bi a pɑ bɑ a le shyə da' nə ta' mo, shyə m nə mhɔ da' ta' mo vʉ̌ sá' dzʉ̌, bɑ dəŋ gɑ kɑ̀, shyə m nə Yeso Kristo, pɔ pyə wap ŋkwi gho' Si ba dəŋdəŋ a gɔ sɔ' sa' nthʉm vɔk. A po'o tə pa' a lě shyə m nə mhɔ ta' mo pu nyəŋ shɛ thə guŋ pɔ awɛ a, a cyə m nə mfa' dəŋdəŋ ta' mo, guŋ pɔ awɛ pɑ dəŋdəŋ, dəŋdəŋ yə a hɑ vɔk a. Dəŋdəŋ pa' a lě shyə m nə tʉɔthə́ ta' mo du pɔ zhi mghɛ mhɔ a, a dəŋdəŋ po'o tə a gɔ sɔ' cyə m nə́ nə yu'nyə ta' mo du pɔ pɑ pɔ dəŋdəŋ. Mco' bɑ a lě sɔ' gə gɑ mhɔ lɔmnyə́, tə tsʉ' yə mhɔ lɔmnyə nə a gho' Si bɑ ǎ sɛ tsʉ'u. Po'o gɑ pa' mhɔ lə sǎ' shyə m nə vʉ̌ a, a dəŋdəŋ cyə m nə gho' sá' nə vɔk mama shyə m nə Yeso Kristo Cyəpɔ yɔk pɑ. A po'o bɑ da'tə́ gɑ kɑ? Pɑ gɔ wuŋ pɑ nthʉm mhɔ tə gho' yɔm a? Gɛ̌! Cwə yə a bɑ pɑ̌ pfʉ́ nə mhɔ a, pɑ̌ gɔ piŋ vɔk nthʉm mhɔ m gɑ́ kɑ? Kɑ pǒ bɑwə dʉɔnyə gɑ guŋ yɔk pɑ̌ awɛ pyə́ pɑ lə kwishyə m̀ nə Yeso Kristo a, pɑ lə ŋkwishyə po'o nə vʉ́ é? A shyə m nə kwishyə, nə vʉ e, bɑ pú lé nthə̀ŋ wɔk pa pú, po'o gɑ́ pa' Kristo lə yǎm nə vʉ̌ a, nə́ nə ghu' Tá a, ba wɔk pɑ̀ yɔk pɑ̀ vɔ́k m nə vɔ̀k sə́. Nə pa' a pɑ gɑ pɑ lě nthamtə nə e nthʉm vʉ́ é, bɑ pa pú gɔ sɔ' piŋ tamtə pɑ́ po'o nthʉm nə yam nə vʉ́ e. Pɑ cəŋtə ju' nwə yə̌ŋ: A bɑ pu lə ŋkham e pu a bvo mo yə a bɑ nə pɑ̀ a thə́ bɛnyəpɛnyə po'o gɑ nɑ́ mhɔ yɔk pɑ̀ sa'tə, tə́ pɑ lə piŋ bɑ ŋkwɔ mhɔ pɑ̀. Nə pa' mo yə ě pfʉ́ a tə́ jɑ ŋkwɔ mhɔ̀ pɑ̀. Tə́ a bi a pɑ bɑ pa Kristo pəmtə npfʉ́ bɑ pɑ̌ biŋ gɑ ba pa pu gɔ sɔ' pəmtə vɔk. Pɑ bɑ̀ pɑ̌ cəŋtə jyə gɑ́ Yeso yam nə vʉ̌, e lə ghɔ tə́ piŋ pfʉ́ pɑ́; nə pa' vʉ̌ ka piŋ gə sɔm gʉ' nə e. Nə pa' e nə pfʉ̌ po'o, pfʉ́ m nə mhɔ ŋkwi cʉ̌m; biŋ bvɔk cwəlɔ bɑ bvɔk m nə Si. Ba wɔ yɔ po sɛ gɑ̀ po lě pfʉ́ nə mhɔ, biŋ bvɔk m nə Si shyə m nə Yeso Kristo. Pa' ǎ pɑ po'o a, ka mhɔ piŋ sa' nɑ tsɔ tsyə a bɑ̀ nɑ vʉ̌ a, gə po pɑ̀ ju'nyə bi e nə tsə ghi'nyə tsyə. Ka po piŋ hɑ bú mɔ bi mhɔ pa' tsə shù msɔkmsɔk mnwə myə a; po hɑ bú mɔ nə gə tsə shù nwə dəŋdəŋ, bɑ fa' bi Si pa' pɔ pyə wap yam nə vʉ̌, bvɔk a. Nə pa' mhɔ tə gɔ sɔ' kwi' ghə sɔm gʉ' nə po pɑ̀, nə kɑlɑ́ po tə́ jɑ m nə nwə mco' pɑ, po bɑ m nə gho'. Tə́ kɑ́? Tə jyə gɑ́ pɑ gɔ hɔnwə pa' pɑ tə́ jɑ m nə nwə mco' a lə́? Pa' pɑ bɑ m nə gho' a lə́? Gɛ̌! Po ka zhyə gɑ po piŋ bi mo gɑ po gɔ fa' bi e pa' ŋkwɔ a, pɑ yu'nyə e, bɑ po bɑ mkwɔ mo yə́ po ju'nyə e a, kɑ mkwɔ mhɔ myə a dɑ mo gɔ nə vʉ̌ a, kɑ nə yu'nyə yə a dɑ mo gɔ nə nwə dəŋdəŋ a? Pɑ hɑ gho'tə Si: Po lə́ bɑ mkwɔ bi mhɔ, da' gɑ po lě ju'nyə nə guŋ tʉm tsɔ awɛ nə́ ywə yə pu lə zhi'tə wɔ, nthak wɔ nə a. Po lě nthəm ŋkwɔ bi mhɔ, ji ŋkwɔ nwə dəŋdəŋ. Gɑ bɑwə gɔm pɑ ghɔm monəŋthə́ bi po, nə pa' a bɑ pǒ pwa. Dəŋdəŋ pa' a bɑ po lě hɑ bú mɔ pa' mkwɔ a bi nwə cwəpuŋ ba nə paknyə yə a gə pu tʉɔthə́ bi Si a, cwəlɔ po hɑ bú mɔ pa' mkwɔ a nə nə fa' fà' dəŋdəŋ yə a dɔnyə mo a. Cwə yə po lə bɑ mkwɔ bi mhɔ a, nwə dəŋdəŋ pɑ bɑ a ka ghə sɔm shɛ nə́ po. Po lě jám ma nthi nthɔ̌m? So bɑwə tyɛ' ɔ ŋkhú wɔ nə, nə pa' a gɔ miŋ nə vʉ̌. Tə́ cwəlɔ yə a bɑ po təm ŋkwɔ bi mhɔ biŋ shʉ' mkwɔ bi Si a, pǒ jam nthɔm myə a gɔ m nə nə lɔnyə mo a, myə a gɔ miŋ nə vɔk mama a. Nə pa' mcwɔ'fa' mhɔ bɑ vʉ́; tə ywə yə Si hɑ bi mo pɑ́ néné a a bɑ vɔk mama shyə m nə Yeso Kristo Cyəpɔ yɔk pɑ̀. A bɑ po tʉɔnyə̀ a mfɑ pɑ — gɑ̌ gɔm bi pɔ pyə a bɑ wap cəŋtə jyə mco' a — gɑ mco' gə tʉɔ nə mo pɑ cwə yə e ka wuŋ pfʉ a? A bɑ po'o tə mjwǐ yə e lɔmdyə a, mco' da e nə dhə́ e pɑ cwə yə dhə e yɑ̌wə a. Da' gɑ dhə́ e pfʉ́ bɑ mco' lɔmdyə́ ka piŋ gə sɔm shɛ́ nə e. Tə́ dhə e yɑwə́, e ghɔ m bi mu' mbɛ, bɑ ě ghə ghap; tə́ dhə e pfʉ bɑ mco' ka piŋ gə sɔm gʉ' nə e, tə bi a e ghɔ jɔ mu' mbɛ bɑ e ka ghə ghap pɑ. Ba wɔ yɔ, dəŋdəŋ po'o mfɑ pɑ, a bɑ pu lě gə po pfʉ́ nə mco', shyə m nə nɑ Kristo, po'o gɑ po pɑ́ m bi mu' mo, Mo yə e lə yǎm nə vʉ̌ a, po'o gɑ pɑ yam mthɔm bi Si. Nə pa' cwə yə pɑ lə́ jɑ pɑ nthʉm bap nɑ́ a, mnwə myə a gə mo hɔnwə a pɑ shyə m nə́ mco' fa' nə pɑ po'o gɑ pɑ́ yam nthɔm vʉ́. Tə cwəlɔ yə a bɑ pɑ lě pfʉ́ nə ywə yə a lə dɑ wɔk pɑ gə mkwɔ a, a bɑ pɑ lě nthəm ŋkwɔ nə mco', tə biŋ bɑwə cwəlɔ bɑ m nə nə́ sa' sə́ yə a bɑ m nə Zhwenyə, la' pɑ piŋ jɑ m nə bvo nə sa' mco' myə pu lə və a. A po'o bɑ da'tə gɑ kɑ? Gɑ mco' bɑ mhɔ lə̀? Gɛ̌! Tə́ gɑ̌ jyə́ mhɔ pɑ nə mco'. Nə pa' mco' lə pě' bɑ tə ghɔm gɑ: Kɑ́ ghi'nyə, bɑ ŋ tə jyə́ ghi'nyə pɑ. Mhɔ bɑ a lě shyə m po'o nyəŋ nthinthi ghi'nyə nə m̀, shyə m nə mco'. Nə pa' ka mco' a bɑ mhɔ bɑ pɑ̀ pfə ywə. A lə bɑ cwə dzə ŋ bɑ bvɔk tə mco'. Tə mco' lě sɔ', mhɔ pɑwə́. Tə myə piŋ pfʉ́: Mco' myə a dɑ mo gɔ nə vɔk a lě bɑ bəm, ŋ gɔ m nə vʉ̌. Nə pa' mhɔ bɑ a lě jɔ məjyə shyə́ m nə mco' fʉtə a hɑ a nə vʉ̌. A bɑ po'o mco' pɑ dɔlɔ̌, ba ywə yə a gɔm gɑ pu ghə a piŋ bɑ dɔlɔ̌, bɑ dəŋdəŋ, bɑ ǎ púŋ. Jyə gɑ a bɑ po'o bɑ ywə yə a bɑ ywə pɑpúŋ a piŋ jí nwə vʉ́ bəm lə́? Gɛ̌! Mhɔ nə shyə m nə ywə pɑpuŋ nyəŋ a nə vʉ̌, po'o tə́ pú cəŋtə́ jɔ mhɔ, jɔ bɔkbɔk nwə shyə m nə mco'. Pɑ zhyə́ gɑ mco' bɑ m nə zhwenyə. Tə́ gɑ̌ bɑ mo bap nɑ́, bɑ pú fiŋ a pa' ŋkwɔ a bi mhɔ. A nyənyɔ gɑ ŋ tə́ bɑwə jú' sɔmywə nə ywə yə gɑ̌ gə a pɑ́: Ywə yə gɑ̌ shəŋ a, ŋ tə́ gə ya pɑ́, da' gɑ ywə yə gɑ̌ bɔ ya a, yá tə gɑ̌ gə. Bi a pɑ gɑ́ gɑ̌ gə pɑ ywə yə ŋ tə́ shəŋ ya a pɑ, bɑ a bɑ́ gɑ̌ piŋ mco', biŋ jyə́ gɑ a bɑ ǎ pùŋ. Tə́ myə nə gə po'o pɑ, mhɔ myə a shwə nə m̀ a nə gə. Nə pa' gɑ̌ zhyə gɑ́ pɑpuŋ tə́ shwə nə m̀ pɑ: Gɑ̌ gɔm nə bap nɑ́ a. Gɑ̌ bɑ gɑ̌ zhyə nə cəŋ pɑpùŋ, tə nə ghə lə pɑwə. Nə pɑ pɑpuŋ yə gɑ̌ shəŋ a ŋ tə́ gə yá pɑ, cwəpuŋ yə ŋ tə́ shəŋ a pɑ̀ bɑ gə. A bi a pɑ gɑ́ ywə yə ŋ tə shəŋ a pɑ, gɑ̌ gə yá bɑ tə́ myə nə gə pɑ́, bɑ mhɔ myə a shwə nə m̀ a nə gə. Myə yə gɑ̌ shəŋ nə ghə pɑpuŋ a, gɑ̌ wə jɔ m nə mco' mɔ: cwəpuŋ nə bɑ dzə m̀. Nə pa' gɑ̌ ŋwɛnyə nə mco' Si m pa' mo m nə zhwenyə a. Da' gɑ nə mzhəŋ nɑ mǎ biŋ bɑ jɔ shɑ mco' a pɑwə do' myə́ mco' myə zhyə̌nwə a biŋ a; myə bɔ dɑ a gə gɛ cɛ̌ bi mco' mhɔ myə a bɑ nə bapnɑ a a. Gɑ̌ bɑ gɛ ghəghʉɔ! Wɑ́ gɔ sɔ' kwi a bi nɑ yəŋ yə́ a bɑ́ yə vʉ̌ a? Pa'lə pɑ bi Si shyə m nə Yeso Kristo Cyəpɔ yɔk pɑ! Gɑ̌ bɑ yəŋ bɑ ŋkwɔ bi mco' Si shyə m nə zhyə̌nwə a biŋ bɑ ŋkwɔ bi mco' mhɔ shyə m nə bapnɑ a. Sɔm shɛ tə bɑ cwəlɔ jɑ́ thə́ pɔ pyə wap bɑ m nə Yeso Kristo a pɑ. Nə pa' mco' Zhwenyə yə a hɑ vɔk shyə m nə Yeso Kristo a bɑ ɑ lě ŋkwi a bi mco' mhɔ ba m̀ bi vʉ̌. Ywə yə mco' lě tə ku' nə ghə, nə pa' a bɑ bap nɑ́ lě bwa mco' a, Si ghə̀: Shyə m nə pa' e nthəm Mú e nthʉm bapnɑ mhɔ pa' yɔk pɑ a, dɑ e nuŋpwɔ' nə mhɔ, e lě nyəŋ shɛ thə mhɔ, nthʉm bap nɑ́. Po'o gɑ nwə dəŋdəŋ yə mco' shəŋ a, a pəmtə́ nə́ pɑ̀ pyə pɑ tə́ jɑwə giŋ m nə bap nɑ́ a pɑ́, bɑwə giŋ m nə́ Zhwenyə. Nə pa' mo bɑ giŋ nə bap nɑ́ bɑ gə pɑ tsə bap nɑ́, da' gɑ́ bɑ giŋ nə Zhwenyə, gə ywə Zhwenyə. Bap nɑ́ gɔ m nə vʉ̌, da' gɑ Zhwenyə pɑ gɔ m nə vɔk ba m nə hwitə. Nə pa' nə yu'nyə bi bapnɑ bɑ nə tʉɔthə́ bi Si; bapnɑ tə́ ju'nyə nə mco' Si pɑ́, bɑ a ka ku' nə yu'nyə pɑ. A bɑ m nə bap nɑ́ bi a pɑ́ mo lə puŋ Si. Tə po tə jɑ bvɔk m nə bap nɑ́ pɑ́, po bɑ m nə Zhwenyə, nə pa' Zhwenyə Si shwə nə po. A pɑ́ gɑ mo ka ghə Zhwenyə Kristo, bɑ́ e tə́ mo Kristo pɑ. A pɑ gɑ Kristo bɑ́ nə po, bɑ ba pa' ǎ nyənyɔ gɑ́ nɑ́ bɑ ywə vʉ́ shyə m nə mhɔ a, bɑ Zhwenyə bɑ vɔk yɔ́ shyə m nə nwə dəŋdəŋ. Bi á a piŋ bɑ́ gɑ Zhwenyə Mo yə e lə́ yam Yeso nə vʉ̌ a shwə nə po, bɑ Mo yə e lə yam Yeso Kristo a gɔ sɔ' hɑ vɔk nə́ nɑ tsɔ tsyə a bɑ ywə pfʉ̀pfʉ̌ a, cyə m nə Zhwenyə e yə a shwə nə po a. A po'o mfɑ́mfɑ́ tə a bɑ́ bɑ pɑ̌ ghə jú, la' a pɑ jú bapnɑ yə a gɔ ghə pɑ vɔk m nə bapnɑ a pɑ. Nə pa' po pɑ bvɔk a nə bap nɑ́ bɑ po gɔ sɔ' pfʉ́; da' gɑ́ po cyə m nə Zhwenyə jwə́ mfa' bap nɑ́, bɑ po gɔ sɔ' vɔk. Nə pa' pɔ pyə Zhwenyə Si nə shya wap a bɑ po Si. Pǒ bɑ po ka kwi Zhwenyə yə a dɑ wɔ gə mkwɔ, po pɑ́ bwɔk a pɑ. A bɑ po kwi Zhwenyə yə a dɑ wɔ gə mcwə po, Zhwenyə yə a gə po cwe gɑ: Aba, Ta. Zhwenyə bɔ biŋ bi mzhwenyə mɔk pɑ gɑ pɑ bɑ́ po Si. Bɑ pó biŋ bɑ mtsʉ́ mcʉ', mtsʉ̌ mcʉ' Si, pa Kristo, nə pa' pɑ ghə yɔk pɑ tsʉ' nə go' e, bɑ pɑ gɔ sɔ' ghə yɔk pɑ tsʉ' nə ghu' e. Gɑ zhyə gɑ gǒ' yə a si nə yəŋ gɑ́ cwə dzʉ̌ a ka ku' sɔmywə nə ghu'tə yə Si gɔ sɔ' la'tə nə pɑ a. Nə pa' dzʉ̌ bɑwə byap tə səŋnyə nə pa' pu gɔ ghə wap zhyə Mu Si a: Nə pa' dzʉ̌ bɔ bɑ pu hɑ nə gʉ' simnyə, tə m pa' yʉ nə ŋkhuŋ a pɑ́, m pa' mo yə e nyəŋ e nə́ a nə ŋkhuŋ a; tə́ e yɑwə mɔktə. Nə pa' ba yʉ́ yə pu gɔ sɔ' kwi e bi ŋkwɔ vʉ̌, e ghə yə tsʉ' nə nə cyətə pɑ ŋkwɔ ba nə ghu'tə yə a bɑ yə po Si a. Pyə bɑ pyə̌ zhyə́ gɑ guŋ dzʉ awɛ jɑwə cwəlɔ bɑwə pfə́ nə ywələ̌m nə dzə́. A tə bɑ da' yʉ́ do e pɑ́, ba wɔk pɑ yɔk pɑ pyə a bɑ pɑ ghə zhwi'tə Zhwenyə a, pɑ bɑwə pfə̌ nthʉm tʉm pɑ, byap gɑ pɑ pɑ́ mcwə po, byap nə vɔk nɑ tsɔk pɑ. Nə pa' a bɑ pu lě bvɔk wɔk pɑ, tə́ bvɔk wɔk pɑ po'o m nə mɔktə. Tə bi a pɑ mo yɔ ywə yə o mɔktə ya a bɑ o tə́ gɔ piŋ mɔktə pɑ: Bi a pɑ mo yɔ ywə biŋ mɔktə m gɑ kɑ? Tə nə mɔktə ywə yə pɑ tə jɔ a pɑ́, a bɑ nə cəŋtə byap. Zhwenyə ŋkwitə wɔk pɑ nə pwa yɔk pɑ, nə pa' a bɑ pɑ ka zhyə nə cwyɛ'nyə pa' a shəŋ a; da' gɑ́ Zhwenyə giŋkam nə pɑ̀, bɑ shwiŋ tə dhə, bɑ Mo yə é jyə́ tʉm mo a zhyə ywə yə Zhwenyə sɛ a: nə pa' Zhwenyə bɑ giŋkam pɔ dɔlɔ̌ m pa' Si shəŋ a. Pɑ́ piŋ jyə́ gɑ guŋ ywə awɛ nyaptə pɑ nwə pɑpuŋ bi pɔ pyə wap ŋkhuŋ Si a, pɔ pyə́ a bɑ e ke wap pa' e jap a. Pɔ pyə a bɑ e lě dəŋdzə jyə wap a, e lě jap gɑ́ wap gɔ pɑ hwə́ pa' Mú e bɑ a, po'o gɑ e pɑ́ thə́sə mu nə dú mfɑ, pɔ pyə a bɑ e lě dəŋdzə̀ shwɔ' wap a, a bɑ e lě ŋkhe wap; pɔ pyə e lə ké wap a pɑ́ bɑ e lě jap wap dəŋdəŋ; pɔ pyə e lə yap wap dəŋdəŋ a, a pɑ bɑ e lě gu'tə́ wap. Pɑ gɔ kwi' ghɔm gɑ́ kɑ? Si pɑ bi pɑ̀ bɑ wɑ gɔ pɔ wɔk pɑ̀? Yʉ yə e lě tə́ gho' kwa' Mú e, da' gɑ e lě hɑ é nə thə́ yɔk pɑ awɛ a, a gɔ ghə m gɑ kɑ tə́ e lə hɑ guŋ ywə awɛ bi pa Mu é? Wɑ̌ gɔ putə pɔ pyə Si bɑ ě cwɔ' wap a? Si nə́ jap mo dəŋdəŋ. Wɑ̌ gɔ nyəŋ shɛ̌? Yeso Kristo bɑ e lě pfʉ́, biŋ jam nə vʉ̌; e bɑ nə ghə̌ŋ tʉɔ Si, bɑ gìŋkám nə pɑ. Wɑ gɔ té wɔk pɑ nə ŋkhuŋnyə Kristo? Ghəghʉɔ lə? Kɑ nə zhwiŋ? Kɑ nə cwɔ' mkwə mo cwəpuŋ? Kɑ jikǔ'? Kɑ pə̌ŋ? Kɑ ywə vʉ? Kɑ nyədwɔp? Nə pa' a bɑ pú lě bvə gɑ: A shyə m nə o pu pɑ jwɔk jwətə wɔk zhwətə; pu pɑ jɔ wɔk pɑ pa' mnɔm pyə pu dɑ wap gɔ m nə wa wap a. Da' gɑ́ nə guŋ e awɛ pɑ̌ shyə m nə mo yə́ e lə kuŋ wɔk pɑ a, bɑ pɑ cyəshù. Əŋ, gɑ̌ zhyə nyənyɔ gɑ: Kɑ vʉ́, kɑ vɔk, kɑ pɑ aŋgəle, kɑ nə hya mo, kɑ cwəlɔ, kɑ cwə yə a gɔ tə sɔ' a lə, kɑ mtʉɔ, kɑ mgʉ' tə́ thə, kɑ mgʉ' tsʉ̀m, kɑ bǎ kɑ yə pu lə nyaptə a lə, pɑ́ sɔmywə lə haptə́ wɔk pɑ̀ nə ŋkhuŋnyə Si yə pu da'tə nə Yeso Kristo Cyəpɔ yɔk pɑ̀ a! Nə Kristo, gɑ gɔmnwə nyənyɔ, ŋ tə́ shwanwə pɑ̀; tʉ́m tsɑ̌ nə Zhwenyə Dɔlɔ̌ ŋkwinthɛ̌ a: tʉ́m tsɑ̌ bɑwə jɛ a tə́ dhə̀, mɑ zhwiŋ pɑ nthʉ́m o, Əŋ, gɑ̌ di' gɑ́ bi a pɑ simnyə, gɑ bi a pɑ Si hap a nə Kristo nə nwə mfɑ pɑ̌, gwya yɔk nə ŋkhənthú. Wap pyə wap bɑ pɑ Israɛl a, wap pyə nə pɑ cwə̌ mú bɑ nwə yap, ghu'tə, mwakɔ, mco', nə sé Si, mka'nyə bɑ bi pú, ba mtǎ, wap pyə Yeso nthəm nə pu shyə m nə bapnɑ a, yʉ́ yə e bɑ m dzə̀ nə guŋ ywə awɛ a, Si byanyə mama. Amɛn. Tə́ a bɑ ghɔm Si ka cyətə fa' pɑpuŋ pɑ̀ nə pa' guŋ pɔ pyə wap bɑ gwya Israɛl a tə bɑ pɑ Israɛl pɑ̀. Wap piŋ nə pɑ gwya Abraham, guŋ yap awɛ lə pɑ ŋkhənthú e pɑ. Gɛ̌, pu gɔ sɔ' ke pɑ́ pó Isak gɑ gwya o. A po'o bɑ da'tə́ gɑ: Tə pó nə bap nɑ́ nə bɑ pó Si pɑ́; pu sɛ pɑ́ po mka'nyə pa' gwya pǒ Si a. Nə pa' mka'nyə lə bɑ ghɔm tsɔ gɑ: Nə ŋkhɛ a cwəlɔ gu' po'o, gɑ̌ gɔ sɔ' piŋ sɔ', piŋ nə sɔ' bɑ Sara ghə ta' mú. A tə́ bɑ da' po'o pɑ; ba Rebeka bɑ si, bɑ e lə shyə m nə́ Isak tá yɔk pɑ̀ tə́ fə̌ŋ; a piŋ nə pɑ̌ po'o, bɑ pu lə́ yɑ̌ tə wuŋ dzə́ po bɔ, wap yɑ tə ghə nwə pɑpuŋ kɑ nwə bɔkpɔ̌k lə, bɑ ywə yə Si jap a, bɑ ě da' bəmtə, ywə yə Si jap tə mo nthənyə e la' a pɑ shyə m nə mfa', bɑ shyə m nə Mo yə e shwɔ' mo; bɑ pu lě da' gɔm gɑ: Yə́ mo dzə gɔ sɔ' yu'nyə yə mo jʉm. Nə pa' a bɑ pu lě bvə gɑ: Gɑ̌ bɑ gɑ̌ kuŋ Yakop biŋ bɔ Esau. A po'o bɑ da'tə gɑ́ kɑ̀? Gɑ́ nə cyətə pɑ dəŋdəŋ bɑ nə Si lə? Gɛ̌! Nə pa' e gɔm bi Mosɛ gɑ: Gɑ̌ gɔ sɔ' cɔmmtso mo yə́ gɑ̌ gɔ cɔmmtso myə a, zhwiŋ nə mo yə gɑ gɔ zhwiŋ nə e a. A tə shyə m nə yə nə kuŋ mò kɑ m nə mfa' myə pɑ́, a shyə m nə cɔmmtso Si. A po'o tə ywə yə pu lə və a gɔm bi Faraon gɑ: Gɑ̌ bɑ gɑ cwɔ' pɑ kwa' wə nə cyə m nə o da'tə yɑ tʉɔ, á piŋ bɑ po'o pu cyanyə tso tsǎ nə guŋ mtsʉ' awɛ dəmcǎ'. A pɑ́ gɑ e shɔmmtso mo yə ě kuŋ a, biŋ gə tʉm mo yə ě kuŋ a sɔk. Da' o gɑ o gɔ ghɔm gɑ́ tə ě biŋ da' gɑ kɑ́? Nə pa' bi a pɑ pu wɑ fəŋnyə nwə? Wə monəŋthə bɑ wɑ tə bi a pɑ́ po Si fəŋnyə ywə? Bi a pɑ ywə nyapnyap həŋtə mo yə́ e nyap ywə a gɑ: Nwə kɑ o nyap á a? Bəm cǎ' tə bɑ ě ghə shɛ nə ca' tsyə nə́ nə bəm ywə mkwiŋ kɑ sobo ywə a? A pɑ́ gɑ Si pɑ́ gɔ la'tə yɛluŋ e, piŋ ghə pu zhyə tʉɔ e, da' gɑ biŋ shəŋtə nthɔm nɑ e nə mkɔp yɛlúŋ, pɔ wap pɑ si gɔ wuŋ pi, biŋ gə po'o tə wap nə jyə́ dəŋ ghu'tə e, mkɔ̌p cɔmmtso, wap pyə e lə ləŋdzə́ nyaptə wap nə́ ghu'tə, wɔk pɑ̀ pyə e tə shwɔ́' wɔk pɑ pɑ́ da' cəcɑ̌ pɑ Yudea pɑ́, ba m cəcɑ̌ pɑ tə pɑ́ pɑ Yudea. A bɑ kwa' ywə yə e gɔm nthʉm ŋwa'nyə Ose a gɑ: Guŋ yə e la tə́ bɑ pɔ pɑ̌ a pɑ, ŋ gɑ gɔ ké e gɑ pɔ pɑ̌, mɔ yə e la tə́ bɑ ŋkhùŋ a pɑ, ŋ khe e gɑ ŋkhùŋ. A piŋ bɑ pɑ́ tsʉ' yə pu lə ghɔm bi pu gɑ: Po tə́ bɑ pɔ pɑ̌ pɑ́, pu ke wap gɑ pǒ Si yə e shwə nthʉɔ a. Esaya ghɔm yə́ nə pɑ Israɛl gɑ: Dəŋ pó pɑ Israɛl pɑ pɑ́ pa' dəŋ bvɛ shyə lɑpʉə a, bɑ pɑ́ bvʉ' e nə gɔ sɔ' vɔk; nə pa' Cyəpɔ gɔ sɔ' ghə ghɔm tsyə wuŋ cəŋtə́ guŋ bəmtə́ dəmca' a. A kwi' bɑ ywə yə Esaya lə tsə́ ghɔm a gɑ: Cyəpɔ mshwəshù lə pe' e bɑ tə tak gwya mo bi pɑ̀, bɑ pɑ lě ji pa' Sodɔm pu Gomora a. Pɑ gɔ miŋ gɑ kɑ? Pɑ gɔ miŋ gɑ: Pɑ tə pɑ́ pɑ Yudea pyə wap la tə shəŋ nwə dəŋdəŋ a pɑ́, wap lě jɔ, gɑ gɔm nwə dəŋdəŋ yə a fɑ nə piŋnthʉm a. Tə́ Israɛl yə e lɑ bɑwə shəŋ mco' myə́ bi a pɑ́ a hɑ nwə dəŋdəŋ a lě tə cyə bəŋ mco'. Nwə kɑ? Nə pa' nwə dəŋdəŋ bɔ wap la tə bɑwə byap m nə piŋnthʉm pɑ, wap lə bɑwə ŋkwɛ gɑ wap gɔ cyə m nə mfa' tə ghə. Wap lě sham nə gwɔ' fa'tə. Dəŋdəŋ pa' bɑ pu və gɑ: Yɔ gɑ̌ yap gwɔ' fa'tə Sion, ghǔ gwɔ' yə a gə mo vʉ̀si a; tə mo yə e piŋ e a bɑ sǒ tə́ gɔ sɔ' kù e pɑ́. Mfɑ̌mfɑ́, ywə yə tʉm tsɑ̌ shəŋ a, ba yɑ nə cwyɛ'nyə Si nə pú bɑ gɑ́ wap kəm nə ywə vɔk. Nə pa' gɑ̌ wə bɑ ŋkwinthɛ̌ gɑ wap ŋkhaktʉɔ te' nə Si: Da' gɑ́ a pɑ́ kaktʉɔ tə zhyə̌nwə! Wap lə pɑwə jyə dəŋdəŋ yə á fɑ bi Si a pɑ, biŋ bɑwə shəŋ pɑ́ nə yáp yap nthi, wap lə pɑwə ju'nyə bi nwə dəŋdəŋ yə a bɑ yə́ Si a. Nə pa' Kristo bɑ nə myə̀ŋ mco', po'o gɑ dəŋdəŋ pɑ́ bi bǎ ya mo lə yə e piŋ a. Pɑ̀ kwa' Mosɛ bvə nə dəŋdəŋ yə a fɑ m nə mco' a gɑ: Mo yə e gə pa' a gɔm a gɔ sɔ' vɔk pɑ nə́. Tə nwə dəŋdəŋ yə a fɑ m nə piŋnthʉm a gɔm gɑ: Kɑ ghɔm nthʉm tʉm o gɑ: Wɑ gɔ sɔ' kwɔ' kɛbəŋ? O ghɔm po'o bɑ o nə shəŋ gɑ Kristo fi'. Kɑ nəŋ gɔm gɑ: Wɑ gɔ tsəŋ ko tsʉ̀m? O ghɔm po'o bɑ o nə shəŋ gɑ Kristo pʉɔ fɑ wə mpfə pɔ. Tə e gɔm gɑ́ kɑ̀? E gɔm gɑ́: Ghɔm bɑ pɑ́ bəŋ o, ǎ shwə o, nthʉm tʉm o. Ghɔm bɔ bɑ ghɔm piŋnthʉm tsyə pyə siŋ a. O lɑ shwə ó gɔm gɑ́ Yeso bɑ Cyəpɔ nəŋ biŋ bíŋ nthʉm tʉm o gɑ Si lě jam e nə vʉ̌, bɑ o gɔ sɔ' vɔk. Nə pa' nə piŋ nthʉm tʉm o dɑ o gɔ nə dəŋdəŋ, nə pǐŋ dɑ shwə ó gɔm pɑ́ dɑ o gɔ nə ywə vɔk. Nə pa' ywə yə pu lə və a gɔm gɑ: Mo yə e piŋ e a, bɑ sǒ tə́ gɔ sɔ' kú e pɑ́. A po'o tə yə Yudea pu yə Grikia bɑ pɑ́ ta' ywə: Guŋ yap awɛ bɑ wap ghə pɑ́ ta' Cyəpɔ, fʉ' bi pɔ pyə wap ŋkhe é a. Nə pa' bǎ ya mo lə́ yə ě ke tso Cyəpɔ a bɑ e gɔ sɔ' vɔk. A po'o bi a pɑ́ wap ké é m gɑ kɑ tə́ piŋ é? Wap pɑ gɔ piŋ é m gɑ kɑ tə̀ yu' gi é? Wap pɑ gɔ yu' gi e m gɑ kɑ tə mo siŋ? Mo pɑ gɔ siŋ m gɑ́ kɑ tə́ pu nthəm é? Nə pa' a bɑ pu və gɑ: Mkwə pɔ pyə wap siŋ Cuŋ pɑpúŋ a bɑ ǎ pùŋ. Tə́ guŋ pɔ awɛ bɑ wap ka yu'nyə nə Cùŋ pɑpuŋ. Nə pa' Esaya gɔm gɑ: Cyəpɔ, wɑ̌ bɑ ě piŋ ghɔm tsyə pyə̌ siŋ a? Nə pa' piŋnthʉm fɑ nə ghɔm ju'yǔ', ghɔm bɔ pɑ nə siŋ ghɔm Kristo. Po'o tə gɑ̌ həŋtə́ gɑ: jyə gɑ a bɑ wap lě tə́ yu' lə? Tə əŋ! Nə guŋ mtsʉ' awɛ dəmcǎ', gi yap lě gi, ba mghɔm map, tə gɔ ŋkhəm nə dhə̀ dzʉ́. Gɑ̌ bɑwə həŋtə gɑ: Jyə gɑ a bɑ Israɛl lě tə́ yu' lə́? Tə Mosɛ bɑ e lə ghɔm gɑ: Gɑ̌ gɔ sɔ' ghə o khiŋ ywə yə a tə bɑ guŋ a pɑ; gɑ gɔ sɔ' ghə o ghi'nyə guŋ yə a ka ghə zhyənwə a. Esaya gɔ tə gɔm ba m gɑ: Pɑ tə cəŋ a lě jɔ a; ŋ dě gə pɔ pyə wap la tə́ həŋtə a zhyə a. Tə sɔ' m nə pɑ Israɛl e gɔm gɑ: Guŋ mtyɛ'dzʉ awɛ ŋ də nyǎ pu a bi pɔ, pɑ tə yu'nyə, mtʉɔthə́. Gɑ̌ həŋtə gɑ́: Si bɑ é lě gwa' pɔ pyə́ a? Gɛ̌! Nə pa' kwa' myə gɑ̌ bɑ yə Israɛl, gwya Abraham, nə tuŋdyə Bɛnyamɛn. Si bɑ e ka wa' pɔ pyə́, wap pyə e lə ləŋdzə jyə́ wap a. Kɑ a bɑ po ka zhyə pa' ywə yə́ pu lə və a gɔm nə tsʉ' yə Elia dɔ bi Si nə pɑ Israɛl a gɑ: Cyəpɔ, wap zhwə mghɔ́m ghɔm tsu, sa'tə mtsʉ' to tsə pwɔ'; gɑ cʉ' da' myə dǒ m̀, wap piŋ bɑwə shəŋ nə zhwə a. Tə́ Si ba' bi e gɑ kɑ? Gɑ̌ lwɔ' pɑbɛ sha' sɔmbʉə, pɔ pyə wap ka kam mkwi'tə map dzə̌ Baal a. Ba m nə cwə dzʉ̌ yəŋ gɑ, bvʉ' pɔ pa' gho' nə shwɔ' wap a. A pɑ gɑ a shyə pɑ́ m nə́ gho' bɑ a tə bɑ nwə mfa' pɑ, a pɑ nwə mfa', bɑ gho' tə yɑ̌ gho' pɑ. A po'o bɑ gɔm gɑ́ kɑ? Ywə yə Israɛl shəŋ a, a bɑ e ka kəm nə́; tə pɔ pyə pu cwɔ' wap a bɑ wap kəm nə́. Tə́ sɔ' m nə pyə shɑ́ pɔ, a bɑ pu lě gə tʉm tsap sɔk. Dəŋdəŋ pa' a bɑ pu və gɑ: Si bɑ ě hɑ zhwenyə pwɔk bi pú, mnyə́ tə nə jɔ, mtəŋ tə nə ju', tə ŋkhəm tyɛ' ɔ. David biŋ gɔm yə́ gɑ: A tɑpe yap pɑ́ yo' nə pú, bɑ́ ŋkhəvʉm, ywə yə wap gɔ cyə m nə vʉ̀ si a, biŋ bɑ shɛ dəŋdəŋ yə pu nyəŋ thə pu a! Mnyə map sonyə sonyə tə bi; ghə̌ ŋkha'tə yap ŋwɔ' guŋ mcwə awɛ. Gɑ həŋtə gɑ: Jyə gɑ a bɑ́ wap vʉ̀si pɑ mama lə? Tə gɛ̌! Da' gɑ́ a bɑ a lě shyə m nə mhɔ map pɑ tə pɑ́ pɑ Yudea ko nə ywə vɔk, po'o gɑ Israɛl lǎ'. A bi a pɑ gɑ mhɔ map lě ji fʉ' bi dzʉ̌, yap nə kəŋnyə pɑ fʉ' bi pɑ tə pɑ́ pɑ Yudea, bɑ yap nə cəŋtə ŋkho nə ywə vɔk gɔ cyətə ghə kɑ? Gɑ gɔm bi po, wɔ pɑ tə pɑ́ pɑ Yudea gɑ: Pa' gɑ̌ bɑ gɛ nthəm bi pɑ tə pɑ Yudea a, gɑ da'tə dəŋ ghu'tə yə a bɑ nə fa' tsɑ̌ a, po'o tə nə thənyə mfɑ pɑ̌ ŋkhənthú nthʉm ghi'nyə gɑ a vɔk shɑ pɔ nə pú. A pɑ gɑ́ nə fʉ'tə wap hɑ jʉ̀m lě bɑ nə́ nə gwɔ' bvɑnyə dzʉ́, bɑ yap nə piŋ ŋkhó ŋkhɛ gɔ sɔ' pɑ kɑ́ tə pɑ̌ pɑ nə cyə nə vʉ̌ ŋkho nə vɔk? Nə pa' a pɑ gɑ́ zhwi'tə pɑ dɔlɔ̌, bɑ guŋ ywətsʉ awɛ gɔ pɑ dɔlɔ̌; biŋ bɑ gɑ́ gɛ thə́ pɑ dɔlɔ̌ bɑ bǔ thə gɔ pɑ yə́ pɑ́ po'o. Tə a bi a a pɑ gɑ pu le ŋkho' shɑ bu thə́, biŋ sɔ' m nə wə yə o bɑ pu ta' thə vó a pu la o cəcɑ̌ bvʉ' bu thə olivə myə a lɑ cʉ' a, po'o gɑ po a pu pəmtə gə fʉ́' yə a fɑ nə gɛ́ tsyə́ a, o kɑ ŋa'nɑ o cəcɑ bǔ thə́ olivə. Bi a pɑ́ o ŋa'nɑ́ o! Tə́ tə wə nə ŋkwa gɛ́ thə́ pɑ́, gɛ́ thə́ nə ŋkwa o. Bi a pɑ o ghɔm gɑ: Pu lě ŋkho' shɑ bu thə́ tə́ jap a. A puŋ. Tə́ pu lə ŋkho' wap nə yap nə cyətə pɑ̌ nyənyɔ. Tə sɔ' m nə o, a shyə m nə piŋnthʉm tə o tɔm. Kɑ́ ŋa'nɑ́ o, dzə nə pwɔk. Nə pa' a pɑ gɑ Si lě tə tak kwa' bu thə olivə nəŋ, bɑ ba wə e tə́ gɔ sɔ' tak o nəŋ pɑ. Yɔ tʉm pɑpúŋ pu tʉm shɔkcɔ̌k Si: Tʉm shɔkcɔ̌k nə pɔ pyə wap lě bvʉtə a, puŋnwə e nə o, a pɑ gɑ o cwə nə puŋnwə e bɔ; tak po'o bɑ pu gɔ té o ba wə. Tə sɔ' m nə wap, wap pɑ tə wuŋ nthʉm nə cyətə pɑ̌ nyənyɔ, bɑ pu gɔ la ba wap yap nə thə. Nə pa' Si bɑ e ghə tʉɔ nə piŋ da wap nə ta' thə́. A pɑ gɑ́ wə yə pu ja' o nə thə vo a, pu la o nə thə olivə, bɑ a gɔ pɑ m gɑ kɑ kwa' nə bǔ thə olivə myə́ pu gɔ la' la wap kwa' nə to thə́ yə wap bɑ bú myə a? Mfɑmfɑ̌, ŋ tə̌ wə shəŋ nə tʉ̀m wɔ yəŋ nwə cyə zhyənwə pɑ̀, bwɔk gɑ́ po kɑ kě nɑ tsɔ gɑ mzhyənwə. Mu' kam pɑ Israɛl gɔ ghə tʉm sɔksɔk ghə tə̌ gùŋ pɑ tə pɑ́ pɑ Yudea la' ŋkho dyə awɛ. A pɑ́ po'o guŋ Israɛl awɛ vɔk dəŋdəŋ pa' a bɑ pu və gɑ: Gɛvɔk pɔ gɔ sɔ' fɑ m Sion, e gɔ sɔ' té nə cyətə pǐŋ Si nə gwya Yakop. Yəŋ gɑ́ bɑ̀ pa' kɔ tsɑ̌ gɔ sɔ' pɑ nə pyə a pú nə cwə yə gɑ̌ té mhɔnwə map a. Pu yɔ wap m nə́ Cuŋ pɑpuŋ bɑ wap bɑ mghɛ bo, a pɑ́ pɑpuŋ bi po; tə́ jɔ wap m nə́ ghə̌ŋ Ci, bɑ a bɑ pu kuŋ wap, shyə́ m nə mtǎ. Nə pa' ywə hɑ hɑ̌ ba nə ké yə a fɑ m bi Si a tə ŋkwyəpnyə pɑ. A lə pɑ̌ cwə̀ dzə̀, po kəŋnyə nə yu'shwə bi Si, tə́ cwəlɔ a cyə m nə nə́ kəŋnyə nə yu'shwə yàp po ghə cɔmmtso Si. Ba wap yap cyətə yu'shwə cwəlɔ po'o tə a cyə m nə cɔ̌mmtso yə pu gə nə po a ba wap yap ghə cɔmmtso. Nə pa' Si bɑ e nyəŋ guŋ pɔ awɛ nə tʉɔthə́ po'o tə nə cɔmmtso guŋ pɔ awɛ. Fo' fʉ' Si tə̌ wə pɑ, fo' zhyə̌nwə e lə pɑwə, a bɑ ǎ zhi te'! Pɑ wɑ̌ zhyə́ yə nə fyɛ'! Pɑ́ sɔmmo lə cyə nə́ mjyə myə́! Kwa' wɑ lə zhyə mkwɛnyə Cyəpɔ? Kɑ kwa' wɑ̌ lə pɑ gɛ hɑ nthɔk bi e? Kɑ wɑ lə ləŋdzə hɑ kɑ bi é tə bɑwə byap gɑ é pa' bi é? Nə pa' guŋ ywə awɛ bɑ pɑ nə e, bɑ shyə́ pɑ m nə e, biŋ bɑ pɑ bi e. Ghu'tə pɑ bi e mama! Amɛn. Mfɑ̌mfɑ́, gɑ̌ wə səso wɔ shyə m nə́ cɔmmtso Si gɑ po hɑ nɑ tsɔ pa' tsə́ pwɔ' nthʉɔtʉɔ, tsə́ pwɔ' dɔlɔ̌, tsə́ pwɔ' pɑpuŋ bi Si: A gɔ pɑ pɑ yɔ nə sé m nə zhwenyə. Ka po ghiŋ m nə pa' yəŋ dzʉ̌ wə bɑ a. A zhyə̌nwə yɔ kwyəpnyə wɔ, po zhyə ywə yə Si shəŋ a: Ywə yə a bɑ a puŋ a, ywə yə a ŋwɛnyə bi e a, ywə yə a bɑ ǎ cəŋtə buŋ a. Shyə m nə gho' yə Si lə hɑ bəm a, gɑ̌ gɔm bǎ bi ya mo a nə po gɑ́: Ka po ka'tə tə́ nthwɔk, po ghə zhyənwə po'o gɑ po kɑ ghə ŋa'nɑ́. Bǎ wɑ lə́ pɑ nə yə də̀ŋ piŋnthʉm yə Si hɑ bi e a. Dəŋdəŋ pa' a bɑ pɑ̀ ghə mzhəŋnɑ́ jɔmyɔ̌m nə ta' nɑ́ a, mzhəŋnɑ́ bɔ lə piŋ bɑ fa' pɑ́ tá ywə a, a dəŋdəŋ po'o tə pɑ bɑ ta' nɑ́ nə Kristo biŋ bɑ mzhəŋnɑ́ cəcɑ̌ pɑ, bǎ ya mo lə nə yə dəŋ. A bɑ pɑ̌ piŋ gə mfʉ' nthinthi myə gho' Si hɑ bi pɑ a. Kɑ a bɑ e hɑ pɑ́ nə pɑ gɔm ghɔm Si bi mo lɑ? Mo nə ghɔm pu piŋnthʉm pɑ́ ŋkwishwə. Kɑ e hɑ pɑ gɑ́ mo pɑ́ gɛfa' lə, mo fa'. Kɑ e hɑ bi yə mu' mo nə pɑ́ gɛ zhi'tə lə, e pɑ ji'tə́. Kɑ e hɑ bi mu' mo nə pɑ səso lɑ e pɑ səso. Mo yə é hɑ́ ywə a hɑ́ tə sɛ, mo yə́ e shya a nə cya a pɑ buŋ e, a shɔmmtso lɑ ŋwɛnyə tə́ nə shɔmmtso. A ŋkhuŋnyə̀ pɑ́ nyənyɔ. Po cəŋtə ŋkhʉ́ cwəpuŋ, dá nɑ tsɔ́ nə pɑpuŋ. A ŋkhuŋnyə mfɑ́mfɑ kwɑ wɔ, po pɑ shəŋtə ŋkhuŋnyə́ wɔwɔ. Po fa' bi Cyəpɔ tə pwa, nə pɑpuŋ nthʉm zhwenyə. Po pɑ ŋwɛnyə nthʉm mɔktə̀, ŋkhyəptʉm cwə ghəghʉɔ, ŋkhaktʉɔ nthʉm mcwyɛ'nyə. Po a pɔ dɔlɔ̌ pɑ giŋ ŋkwikwə̀, nə ywə yə po ghə a; po pɑ nyəŋ mghʉɔ dyə́. Po pɑ̀ nyəŋ byanyə nə pɔ pyə́ wap dɑ wɔ jɔgo' a; po pɑ nyəŋ byanyə, ka po nyəŋ dò. Po pɑ ŋwɛnyə pu a pɔ pyə wap wə ŋwɛnyə á, bɑ̀ dɔ pu a pɔ pyə wap wə dɔ a. Po pɑ́ ŋkwishwə cəcɑ̌ po; ka po ghə mkwɛnyə̀ ŋa'nɑ́, po piŋ gɑ nə fi'nɑ́ hɑ si pɑ nə po. Ka po lɑ nɑ tsɔ gə mzhyənwə. Ka po lɑ cwəpuŋ ba' cwəpuŋ bi sɔmmo. Po kaktʉɔ nə ghə nwə pɑpuŋ dzə guŋ pɔ awɛ. Po kaktʉɔ gɑ á miŋnyə m wɔ po pɑ bvɔk pɑ nthʉm hwitə. Ka po pa' sʉ̌' mnwə cwəpuŋ myə pu ghə bi po a pɑ kwa' wɔ, wɔ pyə gɑ̌ ŋkhuŋ wɔ a; da' gɑ po tak bi yɛlúŋ Si e pǎ', nə pa' a bɑ pu lě bvə gɑ: Nə pa' bo bɑ m bəm, myə nə pɑ gɔ la' hɑ mcwɔ'fa' Cyəpɔ nə gɔm po'o. Da' gɑ́ jikǔ' yɛ gɛ bo o, o hɑ ywətsʉ bi é, bi a ji shyə́ yɛ é o hɑ shyə́ bi é e nwə́, nə pa' o gə po'o bɑ ǒ cu'tə mgho' mɔk hwə́hwə̌ thə́ é. Kɑ tak gɑ̀ nwə cwəpuŋ cyə́ o, da' gɑ lɑ nwə pɑpuŋ do' shyə nwə cwəpuŋ. Bǎ yá mo lə́ yu'nyə́ bi pɑ sa' gùŋ pyə wap sa' a, nə pa' nə sa' fɑ pɑ bi Si, yʉ́ nə jap bǎ ya nə sa' lə̀. A po'o tə mo yə é nthʉɔthə bi sa' guŋ a nthʉɔthə pa' a pɑ́ nə ŋkhɛ yə Si jap a, mtʉɔthə́ pɑ́ fəŋ pa' shɛ nyəŋ nə pú. Nə pa' mo tə́ bwɔk pɑ fyɛ' nə cwə yə ǒ gə nwə pɑpúŋ a pɑ́, mo bwɔk wap nə cwə yə o gə nwə cwəpùŋ a. O pɑ́ tə pɑ̌ shəŋ nə pwɔk gɛ sa' o ghə nwə pɑpúŋ; pu gɔ gho'tə o, nə pa' gɛ sa' bɑ gɛfa' Si nə ghə gɑ́ o ghə nwə pɑpúŋ. Da' gɑ́ o ghə cwəpuŋ o pwɔk gɛ sa'. Nə pa' e tə gwim nyədwɔp pɑ pɔpɔ pɑ́. Gɛ sa' fa' pa' a pɑ́ bi Si, fa' tsyə pɑ nə la'tə yɛ̌lúŋ Si. A po'o tə a puŋ gɑ mo yu'nyə, e lə nə yu'nyə bɑ bwɔk pɑ lúŋ pɑ́, e yu'nyə m pa' a ŋkwɔ' fɑ nthʉm tʉm e a. A biŋ bɑ ywə yə a gə tə́ po pɑ́ ma' shwɔp a: Pɔ pyə wap ŋkwi shwɔp a, Si nə jap wap gɑ wap cəŋtə́ fa' nə́ fa' bɔ. Po pa' bǎ yə wɑlə́ bi e: nthinthi mshwɔp bi gɛ mshwɔp; bwɔk mo yə pu gɔ pwɔk e a, mku' bi gɛ mku'. Ká po a sɔ́m mo pɑ́ jǔ tə ně da' jú kuŋnyə̀ cəcɑ̌ po; nə pa' mo yə e ŋkhuŋ yə mu' mo a bɑ ě ghiŋ nə mco'. Nə pa' mco' gɑ: kɑ́ ghə ghap, kɑ́ zhwə mo, kɑ̀ zhʉ̀, ba gùŋ myə́ shɑ mco' awɛ ŋkwɑ mthə́ myə nə ghɔm tsɔ gɑ: Kuŋ mo yə e bəŋ o a pa' o ŋkhuŋ thə nɑ o a. Kuŋnyə tə gə sɔmywə bɔkpɔ̌k bi mo yə ě bəŋ mo a pɑ; kuŋnyə bɑ nə ghiŋ nə mco'. Pa' bɑ pǒ zhyə cwə dzʉ̌ yə́ pɑ bɑ nə a: Yɔ cwə yə́ po gɔ yàm nə lwɔk a yə̌ŋ. Kwa' tyɛ' ɔ gɑ, ywə vɔk ghɔptə́ bəŋ pɑ tə́ shyə́ cwə yə́ pɑ lə́ piŋ a. Təŋ dzʉ́ sʉəsʉə cyə, dzʉ̌ pɑwə gɔ lɔ́. Pɑ wa' mfa' jʉ́m, be tsə́ shù ŋkha'. Pɑ ghiŋ tə ghə mfʉ̀m, pa' nə dɔdzʉ̌ a, tə tsʉ̌ kʉ́ə ywə́, tə pám, tə pɑ gəgəm kɑ nə ghə ghap lə, tə sa' mshɛ kɑ nə kiŋ mo lɑ. Da' gɑ́ po kwa Cyəpɔ Yeso Kristo nə po pa' dzə a, po kɑ tak nɑ tsɔ m̀ nə tsə bapnɑ kɑ m gɑ́ tsə́ ghi'nyə pəmtə nə po lə́. Po nyəŋ mo yə piŋnthʉm é pwa a dyə́ tə tébya nə́ yə nə sɛnwə. Yə́ piŋnthʉm mu' mo biŋ gɑ e tsʉ́ guŋ dzʉ́ awɛ. Da' gɑ yə mu' mo pɑ shyə m nə pwa bɑ pfɑ́ pɑ́ da' jap. Mo yə e dzʉ guŋ dzʉ awɛ a kɑ wak mo yə e tə́ dzʉ́ a pɑ́; a mo yə́ e tə́ dzʉ́ a pɑ́ kɑ tebya nə mo yə e dzʉ́ a, nə pa' a bɑ Si nyəŋ e dyə́. O bɑ wɑ́ tə bɑ fyɛ' gɛfa' yə e tə bɑ yù a pɑ? Kɑ ě tiŋnyə thə́, kɑ ě vʉ̀ pɑ si lɑ, bɑ a bɑwə dé pɑ́ kwa' ta fa' e. Tə́ e gɔ tiŋnyə thə́ pɑpuŋ nə pa' Cyəpɔ bɑ ě ghə tʉɔ nə gə e tiŋnyə thə́. A bɑ́ bi mu' mo mtyɛ'dzʉ pɑ nthinthi; bɑ bi yə mu' mo mtyɛ'dzʉ pɑ pɑ́ ŋkwi nthi. Tə bǎ wɑlə́ nə́ yə nə sɛnwə cəŋtə́ biŋ tə bǐŋ. Mo yə e tə jɔ mtyɛ'dzʉ ŋkwi nthi a pɑ́ gə po'o pɑ bi Cyəpɔ. Mo yə e dzʉ́ guŋ dzʉ awɛ pɑ gə po'o pɑ bi Cyəpɔ, nə pa' e go'tə Si. Ba mo yə́ e tə́ dzʉ́ guŋ dzʉ awɛ a pɑ pɑ́ gə po'o bi Cyəpɔ. Biŋ bɑ go'tə Si. Nə pa' sɔmmo nə́ pɑ tə bvɔk nə yə thə́ pɑ́, sɔmmo lə nəŋ bɑ́ pfʉ́ nə yə thə́ pɑ́. Nə pa' pɑ vɔk bɑ pɑ̌ bvɔk m bi Cyəpɔ; bi a pɑ nəŋ pfʉ́ bɑ pɑ̌ pfʉ m nə Cyəpɔ. Kɑ pɑ bvɔkvɔk kɑ pɑ pfʉ́ pfʉ́ lə bɑ pɑ m bi Cyəpɔ. Nə pa' Kristo lə pfʉ́ biŋ bɑnyə nə vɔk po'o gɑ e pɑ Cyəpɔ pɔ pyə wap pfʉ́ a ba pɔ pyə wap pɑwə. Tə wə̀! Nwə kɑ̀ o fyɛ' fɑ o? Ba wə! Nwə́ kɑ o wak fɑ o? Guŋ yɔk pɑ awɛ pu gɔ sɔ' fyɛ' wɔk pɑ dyə fyɛ' Si. Nə pa' a bɑ pu və gɑ: Dəŋ pa' ǎ nyənyɔ gɑ́ gɑ̌ bɑwə a, Cyəpɔ nə gɔm, guŋ mkwi'tə awɛ gɔ sɔ' kam dzə m̀, ba guŋ mghɔm awɛ sɔ' gu'tə Si. A bɑ po'o tə bǎ ya mo lə nə pɑ̀ pɑ́ gɔ sɔ' siŋ myə́ mcùŋ bi Si pɑ́ nə yə thə́. Pɑ ya' nə pɑ fyɛ' nɑ́ tsɔk pɑ cəcɑ̌ pɑ. Pɑ pɑ sa' m gɑ ka fɑ mo pɑ ywə yə yə mu' fɑ gɔ cyə m nə́ vʉ̀si a, kə ywə fa'tə lə. Gɑ̌ zhyə́ kwa' pɑpuŋ shyə́ m nə Cyəpɔ Yeso gɑ sɔmywə tə̌ nə pɑ guŋ bɑ pɑ ywə mviŋ pɑ́. Da' gɑ ywə bɑ́ ywə mviŋ bi mo yə́ ě yɔ gɑ́ a ywə mviŋ a. A bi a o pɑ gɔ tsʉ mu' ywə, tə fɑ o yɛluŋ nə́ bɑ o tə wə́ giŋ nə kuŋnyə pɑ̀. Pɔmtə́ gɑ o kɑ cyə m nə nwə ywətsʉ gə mo yə Kristo lə pfʉ̌ nə e a pfʉ́. Kɑ́ lɑ yu ywə yə ǎ bu bɑ ywə pɑpuŋ a gə ywə yə pyə shɑ pɔ gɔ ghɔm cwəpuŋ nə a. Nə pa' Nəfo Si tə́ bɑ nwə ywətsʉ kɑ mlu' pɑ; a bɑ́ nwə dəŋdəŋ, bɑ hwitə́, ba ŋwɛnyə nthʉm Zhwenyə Dɔlɔ̌. Mo bɑ́ fa' bi Kristo m̀ nthi po'o tə buŋ Si, ba pɔmnəŋ kuŋ o. Pɑ pɑ́ shəŋ pɑ ywə yə a buŋ nə hwitə á ba yə a ŋkwɑ́ pɔ nthamtə́ wap a. Kɑ cyə m nə nwə ywətsʉ sa'tə fa' Si. Guŋ ywə awɛ bɑ a puŋ, da' gɑ́ a ka puŋ nə tsʉ́ sɔmywə yə bi a pɑ a fa'tə yə mu' mo a. Ywə yə a bɑ pɑpúŋ a bɑ gɑ o kɑ pfɑ bap, kɑ nwə́ mlú' kɑ sɔmywə lə yə a gɔ ghə fɑ o vʉ́si a. Lwɔ' ywə yə piŋnthʉm o gə o kyəp ya a pɑ da' bu dzə̌ Si. Buŋtsě bɑ mo yə e tə dɑ yə nthi nə piŋ nə nyəŋ pɑ shɛ thə e a pɑ. Da' gɑ́ mo yə e nə tsʉ̌ ywə bɑ jʉ'nyə a bɑ mo yə bi a pɑ́ pu nyəŋ shɛ thə e a, nə pa' ghiŋ tsyə tə fɑ m nə piŋnthʉm e pɑ́. A nəŋ nə pɑ̌ po'o guŋ ywə awɛ yə a tə́ fɑ m nə nwə piŋnthʉm pɑ pɑ́ mhɔ. Da' gɑ a bɑ fa' bi pɑ, wɔk pɑ pyə pɑ bɑ pɔ nthʉɔtʉɔ a, nə pɑ ŋkwa tsə mkʉ́m pɔ bwapwǎ, ba nə cyətə pɑ̌ shəŋ pɑ́ ywə yə ǎ puŋ wɔk pɑ a. Bǎ yá mo lə nə pɑ cəŋ nə puŋ mo yə ě bəŋ e a, nə nwə pɑpúŋ nə nə kwɑ. Kristo lě tə́ cəŋ pɑ́ ywə yə a lə buŋ e a pɑ́, dəŋdəŋ pa' a bɑ pu lě bvə gɑ: Mcap pɑ cap o lě ŋkho nə m̀. A nə pɑ̌ po'o bɑ ywə yə pu lə la' bvə a, nə cwə yə a lə cyə a bɑ pu lə́ bvə nə́ nə nthɔk wɔk pɑ, po'o gɑ pɑ cyə m nə́ nə kaktʉɔ ba zhwyətə̀ yə ywə yə pu lə və a nə sɔ' a gə mɔktə̀. A Si yə e hɑ kaktʉɔ ba zhwyətə a hɑ ŋkwishwə cəcɑ po pa' Yeso Kristo shəŋ a; po'o gɑ po lɑ ta' tʉ̌m ba ta' gi nə hɑ ghu'tə bi Si yə é bɑ Tá Cyəpɔ Yeso Kristo yɔk pɑ a. Po pɑ dɑ wɔ wɔwɔ dəŋdəŋ pa' Kristo lə lɑ wɔ a nə ghu'tə Si. Gɑ̌ wə biŋ: a shyə m nə nyənyɔ Si tə Kristo cʉ' gɛfa' pɔ pyə pu le bvo wap a, po'o gɑ́ mka'nyə myə pu lə ka' bi mtá pɔk pɑ á a pəmtə; tə sɔ' m nə pɑ tə pɑ́ pɑ Yudea, wap gu'tə yap Si shyə pɑ́ m̀ nə́ cɔ̌mmtso e, dəŋdəŋ pa' a bɑ pu lě bvə gɑ: A po'o tə gɑ gɔ sɔ' pɑ́ zhwɔp o cəcɑ mguŋ pɑ tə pɑ́ pɑ Yudea piŋ pɑ́ zhwɔp nə hɑ mku' nə tsó tsǔ. A bɑ pu kwi' bvə gɑ: Mguŋ mguŋ, pǒ ŋwɛnyə wɔ ba pɔ pyə. Ba m̀ gɑ: Mguŋ mguŋ po gho'tə Cyəpɔ guŋ yɔ awɛ, guŋ pɔ awɛ piŋ nthogəŋ bi e. Esaya ŋkwi' gɔm gɑ: Twɔp Yese gɔ sɔ' təm, mo yə e dusi nə sa' mguŋ mguŋ a. Mguŋ mguŋ gɔ sɔ' pɑ́ yáp yap mɔktə pɑ nə é. Si mɔktə fi'tə ŋwɛ́nyə ba hwitə nə po nthʉm piŋnthʉm po'o gɑ mɔktə lonyə nə po shyə́ m̀ nə́ tʉɔ Zhwenyə Dɔlɔ̌. Tə sɔ' m̀ nə wɔ mfɑ pɑ a bɑ gɑ̌ zhyə nyənyɔ gɑ́ kwa' wɔ bɑ po ghə tʉm pɑpuŋ, bɑ nə zhyə́ pɑpuŋ lo nə po, po ku'nyə nə pɑ nthɔknyə nɑ tsɔ. Da' gɑ nə ghə gɑ́ po kamtə́ ywə yə a bɑ pǒ zhyə a, ŋ də lɑ̌ pɑ́ ka'tə̀ tə nə bvə ŋwa'nyə bi po nə shɑ mcwə, shyə m̀ nə gho' yə Si gə bəm, gɑ́ myə pɑ́ gɛfa' Yeso Kristo bi pɑ tə pɑ́ pɑ Yudea, bɑ gɛfa' Cuŋ pɑpuŋ Si, po'o gɑ pɑ tə pɑ pɑ Yudea cʉ' ywə hɑ hɑ̌ yə Zhwenyə Dɔlɔ̌ dɔnyə yá a puŋ bi Si a. A po'o tə bi a pɑ́ ŋ ŋa'tə tsɑ̌ shyə m nə Yeso Kristo nə fa' Si. Nə pa' bi a pɑ ŋ də ghɔm sɔmywə tə ně da' yə Kristo shyə m nə m̀ gə po'o gɑ pɑ tə pɑ pɑ Yudea yu'nyə e shyə m nə ghɔm ba m nə nə ghə̀, shyə m nə gʉ' mtiŋ pu a msya nə tʉɔ Zhwenyə Dɔlɔ̌. A po'o tə́ tə fɑ Yerusalɛm gɔghɔ tə ŋkhəm Iliria gɑ cəŋtə́ siŋ Cuŋ pɑpuŋ Kristo. Da' gɑ ŋ də kaktʉɔ nə siŋ Cuŋ pɑpuŋ pɑ nə tsʉ' yə pu lə jɑ tə́ wuŋ nthʉ tso Kristo nə a, po'o gɑ ŋ khɑ kwɑ nə cyə́ pa' yə́ mu' mo nə lə yap a. A pɑ po'o bɑ giŋ nə ywə yə a bɑ pu və gɑ: Pɔ pyə pu lě tə siŋ wap a gɔ sɔ' yɔ, ba pɔ pyə wap lě tə yu' nə ghɔm a yu'. A ywə yə a ŋkhɔ mcʉm jɔmyɔ̌m gɑ́ ŋ khɑ ghɔ wə po a. Tə cwəlɔ yə ŋ kha piŋ gə tsʉ' fa' nə yə bɔ ghə̌ŋ, a piŋ bɑ́ bɑ tə fɑ tə tyɛ̌' bɑ shəŋ nə sɔ' wə po a, cwə yə́ gɑ gɔ ghɔ Spanya a gɑ̌ wə ŋkwɛ gɑ́ gɑ gɔ nə cyə yɔ wɔ, piŋ kwi yɔ ywə kwitə tə́ nə ghɔ, piŋ na' ŋwɛnyə bǎ muywə é nə pɑ bəŋ po. Da' gɑ́ cwəlɔ, gɑ wə gɔ m Yerusalɛm nə fa' pɔ dɔlɔ̌, nə pa' pɑ Makedonya ba pɑ Akaya yáp gɑ wap gɔ la'tə yap nə tɔmnyə bǔ nə pɔ dɔlɔ̌ pyə wap Yerusalɛm nthʉm pə́ŋ a. Nə pa' a bɑ wap nyəŋ po'o biŋ bɑwə giŋ po'o. Nə pa' a pɑ gɑ́ pɑ tə pɑ́ pɑ Yudea lě ŋkwitə wap nə mfa' zhwenyə bɑ ǎ puŋ gɑ wap piŋ ŋkwitə wap yap nə ywə yə ǎ wə jak wap a. Cwə yə gɑ gɔ miŋ nwə bɔ, piŋ hɑ ywə yə wap shwɔp a bi pu sɔsɔ̌ a, gɑ gɔ nə ghɔ Spanya cyə wə po. Gɑ biŋ bɑwə jyə gɑ́ gɑ gɔ nə sɔ' wə po lɑ́ pɑ byanyə Kristo nə sɔ'. Tə́ gɑ̌ wə səso wɔ mfɑmfɑ shyə m nə́ Cyəpɔ Kristo yɔk pɑ, ba m nə́ ŋkhuŋnyə Zhwenyə gɑ́ pɑ pəmtə do' shyə m nə mcwyɛ'nyə, myə po hɑ bi Si nə thə́ a, po'o gɑ ŋ bvɔk nə pɑ ghə tʉm sɔksɔk pɑ Yudea, ba m gɑ ywə kwitə yə gɑ̌ nə gɔ m Yerusalɛm a pɔ dɔlɔ̌ kwi nə pɑpuŋ. A gɔ cyə m po'o ŋ ŋwak wə po nthʉm ŋwɛnyə, a piŋ shyə m pa' Si nə jap a, a ná' hwitə nɑ a wə po. A Si hwitə pɑ bi po! Amɛn. Gɑ̌ nyəŋ Fɛbɛ fɑ yɔk pɑ yə mjwǐ gɛfa' mfa' dyə cu'tə pɔ Kristo yə a Kɛnkrea a nə bu mɔ. Po cyə m nə Cyəpɔ dɑ́ mku' tə nə dɑ e kwa' pa' pɔ dɔlɔ̌ a; po kwitə e nə guŋ ywə awɛ yə e wə shəŋ gɑ po kwitə e a nə pa' e lə́ pfɔptə pɔ jɔmyɔ̌m ba myə. Po ca'tə Priska ba Akilas msǒ fa' pɑ̌ nə Kristo. Wap lə nə vɔk a bɑ́ gɔ hɑ thə yap; tə da' myə nə wə go'tə wap pɑ, ba guŋ mcu'tə pɔ Kristo awɛ nthʉm guŋ pɑ tə pɑ́ pɑ Yudea. Po ca'tə ba cu'tə pɔ Kristo yə a shu'tə wə pu a. Sha'tə Epainetos, gɛ ŋkhuŋ a, dəŋdzə mo nə ghə̌ŋ Azia nə piŋ Kristo. Po ca'tə Maria yʉ yə e lɑ cəŋtə dzɔp nɑ́ e nə po a. Sha'tə Androniko pu Yunyas pɔ nə ŋkhənyə a, pɔ pyə pu lə ghəm wɔk pyə a pu a. Wap bɑ mghɛ nthəm gwyə, bɑ wap lə dəŋdzə̀ bɑ bi Kristo m dzə̌ m̀. Po ca'tə Ampliatos ŋkhuŋ a te' nə Cyəpɔ. Sha'tə Urbano so yɔk pɑ nthʉm fa' Kristo ba ŋkhuŋ a Stakos. Po ca'tə Apelɛ yə e da'tə mfa' myə jʉ̌m Kristo a. Sha'tə pɔ pyə wap wə́ Aristobulu a. Po ca'tə Erodion, ŋkhənyə a, sha'tə pɑ dyə Narsisə pyə wap m nə Cyəpɔ a. Po ca'tə Trifena pu Trifosa pyə wap lə cəŋtə dzɔp nɑ tsap nə Cyəpɔ a. Sha'tə ŋkhuŋ a Pɛrsi yə e kɑ cəŋtə dzɔp nɑ e nə Cyəpɔ a. Sha'tə Rufo yə pu shi e m nə Cyəpɔ a ba map e yə e bɑ ba ma ǎ lə. Po ca'tə Aziŋkritos, Flegos, Ermes, Patrobas ba Ermas pu a mfɑ̌mfɑ pyə pu a pu bɑ a. Sha'tə Filologos ba Yulia, Nɛreos pu fɑ e yə mjwǐ Olimpas pu a guŋ pɔ dɔlɔ̌ pyə pu a pu bɑ a. Po lɑ nə nuŋ mgho' dɔlɔ̌ sha'tə wɔwɔ cəcɑ̌ po. Guŋ mcu'tə pɔ Kristo awɛ ca'tə wɔ. Mfɑmfɑ, gɑ̌ səso wɔ gɑ po pɔm pɑ ma' ŋkhyɛ'nyə pu a fa'tə nə cwə yə wap fʉ'tə nɑ tsap hɑ jʉm nə ywə yə pu lə zhi'tə wɔ a; po khʉ́ wap. Nə pa' pɔ bǎ tə bɑwə fa' m bi Kristo Cyəpɔ yɔk pɑ pɑ̀; wap fa' m bi vam tsap; biŋ bɑwə shyə m nə́ mghɔm pɑpuŋ map pu a mghɔm zhɔ'tə fʉtə pɔ pyə a bɑ wap ghə tʉm bwapwǎ a. Guŋ pɔ awɛ zhyə yɔ nə yu'nyə; gɑ̌ wə ŋwɛnyə nə po, da' gɑ́ gɑ̌ wə shəŋ gɑ́ po zhyə ywə pɑpuŋ, bɔmtə́ nə ŋi'nyə nə yə cwəpuŋ. A cʉ' muywə Si hwitə̀ tsa'tə Sata to mkwə po. A gho' Cyəpɔ Yeso yɔk pɑ pɑ́ nə po. Timotio só fa' a ca'tə wɔ ba Lukios pu Yasoŋ ba Sozipatros ŋkhənyə a. Myə Tɛrtios yə gɑ bvə yəŋ ŋwa'nyə a, gɑ̌ ca'tə wɔ nə Cyəpɔ. Gaios, gʉɔ a ba yə guŋ cu'tə pɔ Kristo awɛ ca'tə wɔ. Erasto gwim petə tisuŋ ca'tə wɔ, ba Kartus fɑ yɔk pɑ. [ *** Ghu'tə pɑ bi mo yə e gə tʉɔ nə gə piŋnthʉm yɔ kwyə́ shyə m nə Cuŋ pɑpuŋ yə gɑ̌ siŋ, bɑ shyanyə Yeso Kristo shyə m nə nə ghə ŋ jyə mu' nwə cyə zhyənwə yə pu lə la' dwɔ' tə fɑ tə tyɛ', a pɑ cwəlɔ bɑ pu la'tə biŋ gə guŋ pɑ tə pɑ pɑ́ Yudea zhyə, shyə m̀ nə ywə yə pu lə və, a fɑ bi mghɔm ghɔm Si shyə m pa' Si lə ghɔm tə nə shya wap nə nə yu'nyə piŋnthʉm a, bi Si da' jyənwə, shyə m nə Yeso Kristo nə mgu' nə gu'! Amɛn. Myə Polo yə Si ŋkhe a pa' yʉ́ nə ŋkhuŋ a nə gə gɛ nthəm Kristo Yeso, pyə Sostɛnə, fɑ́ yɔk pɑ: Bi cu'tə Si yə a Korinto, bi pɔ pyə pu lɔnyə wap nə Kristo Yeso, wap ghɔ pɑ́ pɔ dɔlɔ̌ pu a pɔ pyə wap ŋkhe tso Cyəpɔ yɔk pɑ Yeso Kristo, Cyəpɔ yap ba yɔk pɑ a; gho' ba hwitə pɑ bi po shyə́ m nə́ Si Tá yɔk pɑ ba m nə Cyəpɔ Yeso Kristo. Gɑ̌ go'tə Si guŋ mcwə awɛ nə po nə gho' Si yə e lə ghə bi po shyə m nə Yeso a. Nə pa' Si bɑ e lé shyə m nə é hɑ guŋ fʉ' awɛ bi po, guŋ fʉ' nə ghɔ̀m ba guŋ fʉ' nə zhyə. A bɑ kwǐnthɛ Kristo kwyə nə po, tə́ sɔmywə yə Si hɑ bi mo a lə yɑwə jak bi po, wɔ pyə po bɑwə byap gɑ́ pu ghə po zhyə Cyəpɔ yɔk pɑ Yeso Kristo a. Yʉ́ nə gɔ pɑ kwyətə́ wɔ tə kəm nə́ nə miŋ po'o gɑ́ po sɔ' bɑ tə bya nə tyɛ'dzʉ Cyəpɔ yɔk pɑ Yeso Kristo. E bɑ nyənyɔ, yʉ́ Si yə e ŋkhe wɔ gɑ po a Yeso Kristo Cyəpɔ yɔk pɑ Mu e tsʉnyə a. Tə́ gɑ wə səso wɔ mfɑmfɑ́ shyə m nə tsǒ Cyəpɔ yɔk pɑ̀ Yeso Kristo gɑ: Po pɑ ŋkwishwə, a ŋkhyɛ'nyə kɑ pɑ cəcɑ̌ po; po cəŋtə nthamtə́ nthʉm ta' zhwenyə, ba m nthʉ̌m ta' ŋkwɛnyə. Nə pa' a bɑ pɑ Kloe siŋ a mfɑmfɑ gɑ́ fəŋnyə cəcɑ̌ po. A pɑ́ gɑ́ bǎ ya mo lə cəcɑ̌ po bɑwə gɔm gɑ: Gɑ̌ bɑ́ mo Polo, myə pɑ́ mo Apolos, myə pɑ́ mo Kefas, myə pɑ́ mo Kristo. Kristo bɑ ě ghaptə a? Pu lə́ ŋkham pɑ́ Polo thə́ bɛnyəpɛnyə nə thə yɔ a? Po lə́ ŋkwishyə m nə tsǒ Polo a? Ca'nyə Si gɑ́ ŋ dě tə nu' sɔmmo yɔ shyə tə ně da' Krispo pu Gayo. A po'o tə pɑ sɔmmo lə ghɔm gɑ́ po lə ŋkwishyə nə tso tsɑ̌. Əŋ ŋ də kwi' nu' tuŋdyə Stefana shyə. Sɔ' m nə pyəshɑ́ pɔ, bɑ ŋ kha zhyə gɑ́ gɑ̌ kwi' nu' mu' mo shyə pɑ́. Nə pa' Kristo la tə́ nthəm a gɑ́ gɔ nu' pɔ shyə pɑ́, e lə nthəm a m gɑ gɔ siŋ Cùŋ pɑpuŋ, siŋ po'o tə́ cyə m̀ nə́ fʉ̌ mghɔm pɑ̀, bɑ bwɔk nə lɑ bɛnyəpɛnyə Kristo sɑnyə ywə pɔpɔ. Ghɔm bɛnyəpɛnyə bɑ pʉə bi pɔ bipǐ da' gɑ bi pɔ pyə wap wə gɔ vɔk a, bi pɑ̌, a pɑ́ mtʉɔ Si. Nə pa' a bɑ pu lě bvə gɑ: Gɑ gɔ sɔ' sa'tə fʉ́ pɑ zhyə fʉ́, simnyə zhyənwə mzhyənwə. Jyəfʉ̌ hɑ́? Tadyə mco' hɑ? Sɛnwə nə yəŋ wɔ̌dzʉ́ hɑ? Si tə́ bɑ e pʉɔ fʉ́ dzʉ́ nə gə pʉə a? Pa' dzʉ̌ lé shyə m nə fʉ̌ la' e zhyə Si nthʉm fʉ́ si a, Si bɑ e cyə m nə pʉə nə́ siŋ Cuŋ pɑpúŋ tə́ jɔ gɑ e gɔ vɔk pɔ pyə wap piŋ a. Pɑ Yudea həŋtə́ msya, pɑ Grikia pɑ shəŋ fʉ́. Tə́ sɔ' m nə pyə, pyə̌ siŋ Mesia yə pu lə kam e thə bɛnyəpɛnyə a, ywə fa'tə bi pɑ Yudea biŋ bɑ pʉə bi pɑ tə pɑ́ pɑ Yudea; Da' gɑ sɔ' m bi pɔ pyə a bɑ pu ké wap a, kɑ pɑ Yudea, kɑ pɑ Grikia lə, bɑ́ Kristo, mtʉɔ Si, ba fʉ́ Si. Nə pa' ywə yə a bɑ pʉə Si a, a bɑ fʉ́ yə a bɑ ǎ cyə monəŋ, ywə yə a biŋ bɑ nə pwa Si a a pɑ bɑ ǎ tʉɔ shyə monəŋ. Mfɑmfɑ pǒ zhyə́ pɔ pyə pǒ bɑ wap a, wɔ pyə Si bɑ é ke wɔ po piŋ a: Pɑ zhyə́ fʉ́ nə mnyə pɔmnəŋ tə ghyɛ̌' bɑ cəcɑ̌ po pɑ́, kɑ pɔ nthʉɔtʉɔ lə, kɑ pɔ nə mtuŋdyə gwyəgwyə lə. Tə ywə yə a bɑ pʉə bi dzʉ̌ a Si bɑ e cwɔ' yá nə nə jʉ́m mzhyə́fʉ́; ywə yə́ a bɑ ywə bwapwǎ bi dzʉ́ a, Si pɑ bɑ ě cwɔ' ya nə nə jʉ́m ywə nthʉɔtʉɔ. Ywə yə a bɑ nthʉm dzʉ́ bɑ ywə tə́ dəŋ pu piŋ bɑ gwak a, ywə yə a bɑ ywə tə ywə a, Si bɑ e cwɔ' ya nə nə dɑ ywə yə a ywə a gə mzhʉm. Po'o gɑ sɔmmo yə Si lə nyaptə e a kɑ ŋa' nɑ e dzə Si. A shyə m nə E tə́ po pɑ nə́ Kristo Yeso yə e bɑ bi pɑ bɑ́ fʉ́ yə a fɑ m bi Si a, nwə dəŋdəŋ, lɔ́nyə, nə vɔk mo. Po'o gɑ́ dəŋdəŋ pa' ywə yə pu lə və a gɔm a gɑ: mo yə e gɔ ŋa' nɑ e a ŋa' nɑ e m nə Si. Mfɑmfɑ́, kwa' myə, cwə yə ŋ khɑ sɔ' wə po a, ŋ də lɑ́ pɑ gʉ' mghɔm kɑ fʉ̌ lə tə nə siŋ wɔ nwə cyə zhyənwə Si bi po. Nə pa' a bɑ gɑ̌ nyəŋ gɑ tə da' Yeso, pɑ́ da' yʉ a, ŋ tə́ gɔ piŋ zhyə sɔmywə wə́ po pɑ. A ywə yə a lə gə tə bɑ dzə̌ po pɑ́ bwapwǎ, bɑwə bwɔk biŋ bɑwə səŋ a; ǎ po' tə́ sɔm mghɔm nə nthənyə kɑ mghɔm fʉ́ lə la tə́ pɑ́ nə ghɔm tsɑ̌ pu a siŋ a; a lə bɑ́ pɑ́ nə la'tə wɔ nwə shyə m nə mtʉɔ̀ Zhwenyə, po'o gɑ piŋnthʉm yɔ kɑ fɑ m nə fʉ̌ monəŋ pɑ, a piŋnthʉm yɔ fɑ m nə mtʉɔ Si. Ba tə po'o pyə̌ ji'tə pɑ kwa' fʉ̌ bi pɔ Kristo pyə wap bɑ wap ghəmtə a, fʉ̌ yə a tə́ bɑ yə́ yəŋ dzʉ̌ a pɑ́, kɑ yə́ mfo nə dzʉ̌, mfo pyə pu gɔ sɔ' sa'tə wap lə. Pyə ji'tə fʉ́ yə a bɑ́ yə́ Si a, nwə cyə zhyənwə, yə a lə bɑ ǎ tʉmnyə, bɑ Si lə la' ŋkha' tə tyɛ̌' gɑ a gɔ sɔ' pɑ ghu'tə bi pɑ a. Sɔm fo yəŋ dzʉ̌ la tə́ zhyə́ yá, nə pa' wap lə pe' jyə bɑ wap lě tə́ kam Cyəpɔ ghu'tə thə bɛnyəpɛnyə. Da' gɑ a bɑ pu lě bvə gɑ: A bɑ́ ywə yə bɛtsə́ ka yɔ a, ywə yə mtə̌ŋ ka yu' a, ywə yə a ka kwɔ' nthʉm tʉ̀m sɔmmo a, guŋ ywə awɛ yə Si lə nyaptə bi pɔ pyə wap ŋkhuŋ e a. Tə́ Si bɑ e ghə pɑ zhyə nwə bɔ shyə m nə́ Zhwenyə. Nə pa' Zhwenyə jyə guŋ ywə awɛ ba yə a bɑ m nə si a. Wɑ̌ cəcɑ̌ pɔmnəŋ bɑ e zhyə ywə yə́ a bɑ nthʉm mo a, tə ně da' zhwenyə mo yə a bɑ nə́ e a? A bɑ dəŋdəŋ po'o tə́ ywə yə a bɑ nə Si a, sɔmmo ka zhyə ya tə ně da' Zhwenyə Si. Sɔ' m nə pɑ, pɑ tə́ bɑ pɑ̌ kwi zhwenyə dzʉ́ pɑ́, pɑ̌ bɑ pɑ kwi Zhwenyə yə a fɑ m bi Si a, po'o gɑ pɑ zhyə gho' yə Si hɑ bi pɑ a. Pɑ tə biŋ gɔm m nə ghɔm tsyə́ fʉ̌ dzʉ́ ji'tə a pɑ, pɑ gɔm m nə tsyə́ Zhwenyə, bɑ gɔm nwə Zhwenyə m nə́ zhwenyə. Mo yə é bɑ yə́ pɑ nə mà monəŋthə́ a tə́ biŋ ywə yə a fɑ m bi Zhwenyə Si a pɑ. A shwə bi e m pa' pʉə a, bi a pɑ́ e lə yu', nə pa' pu dɑ pɑ zhwenyə tə nə sɛnwə. Mo yə e bɑ mo zhwenyə a fyɛ' guŋ ywə awɛ da' gɑ́ la' sɔmmo pɑ fyɛ' e. Nə pa' wɑ̌ bɑ ě zhyə mkwɛnyə Cyəpɔ tə bi a pɑ e hɑ nthɔ̌k bi e? Tə a bɑ pɑ̌ nəŋ gə mkwɛnyə Kristo. Mfɑmfɑ́ a sɔ' m nə m̀ bɑ ŋ kha ghɔmnwə bi po m pa' bi pɔ zhwenyə a pɑ́, gɑ̌ ghɔm m pa' bi pɔ bap nɑ́ a, pa' bi pǒ mkəcɔk pó nə Kristo a. Gɑ̌ bɑ gɑ hɑ pɑ bʉ̌ɔ bi po gɑ po nwə́, a tə́ bɑ ywətsʉ nthʉɔtʉɔ pɑ́: Nə pa' bɑ po la tə gɔ tsʉ́ zhyə pɑ́; ba m tyɛ' ɔ pɑ po lə tsʉ́ jyə́ nə pa' po jɑ̀ pɑ́ pɔ bapnɑ: Nə pa' nə khiŋnyə ba nə sa' mshɛ bɑ cəcɑ̌ po. Po tə́ bɑ pɑ pɔ bapnɑ biŋ bɑ giŋ pɑ pa' monəŋthə a pɑ a? Cwə yə́ mu' mo gɔm gɑ: Gɑ̌ bɑ mo Polo, yə mu' mo ghɔm yə gɑ: Gɑ̌ bɑ pɑ yə mo Apolos a, po lə pɑwə gə yɔ pɑ́ pa' pɔmnəŋ a pɑ a? Apolos bɑ wɑ? Polo pɑ wɑ́? Wap bɑ mghɛ fa' pyə po lə́ cyə m nə́ pu tə gə piŋnthʉm a. Bǎ ya mo nə pu lə́ lə fǎ' nə yə́ dəŋ yə Cyəpɔ lə́ hɑ̌ bi a. Myə ŋ dě nthʉ́, Apolos fi'tə shyə nə́, da' gɑ Si nə́ gə a kwyə. Nə pa' mo yə e nthʉ a tə bɑ ywə pɑ́, mo yə e fi' a lə pɑ ywə. Da' Si yə e gə a kwyə́ a nə́ sɛ. Mo yə e nthʉ́ a pu mo yə e fi' a bɑ pɑ ta' ywə. Bǎ ya mo lə́ nə pu pɑ gɔ sɔ' kwi myə mcwo'fa' nə də́ŋ fa' tsyə́. Nə pa' guŋ yɔk awɛ nthamtə fá' pɑ nə fà' Si, po piŋ bɑ pé yə Si dzʉ' a, pa' yə e ŋkwɑ a. Shyə m nə́ dəŋ gho' yə Si hɑ bəm a, dəŋdəŋ pa' gɛ və pɑpuŋ a, gɑ̌ yap to pà', mu' mo kwɑ́ pa' dəm o. Da' gɑ́ bǎ ya mo lə́ cəŋtə́ sɛ pá' e nə ŋkwɑ́ a. Sɔ' m nə to pá', bi a pɑ sɔmmo lə piŋ jap mǔ' tə ně yə ǎ dzə́ pɑ a: Yeso Kristo. Mo lɑ pɑ́ tʉ̌ɔ gɔl kə tʉɔ ŋkhap kə mwɔ' tʉɔdəŋ, kə ŋkwyə́, kə mghě, kə pǐŋ lə́ tə́ nə ŋkwɑ́ dəm to pa' bɔ bɑ pu gɔ sɔ' cʉ'nyə bǎ tsyə fa' wɑlɑ́. Tyɛ' fyɛ' gɔ sɔ' ghə pu zhyə, nə pa' tyɛ'dzʉ́ bɔ gɔ sɔ' cyə m nə mɔ̌k, mɔk la'tə tiŋ fa' bǎ yá mo lə̀. Mo yə fà' tsyə́ tə gɔ sɔ' sim a pɑ́ gɔ sɔ' kwi mcwɔ'fà'. Mo yə fà' tsyə́ khə a tə́ gɔ sɔ' kwi sɔmywə pɑ́; kwa' yʉ́ gɔ sɔ' vɔk, tə́ vɔk m pá' mo bvɔk mɔk a. Po tə́ jyə gɑ po bɑ dyə́ Si, Zhwenyə Si piŋ bɑ shwə́ nə́ po a? Mo yə ě sa'tə dyə́ Si a bɑ Si gɔ sɔ' sa'tə e. Nə pa' dyə Si bɑ dɔlɔ̌, wɔ nə piŋ bɑ bɔ. Ka sɔmmo fʉ́tə nɑ e: Mo pɑ cəcɑ̌ po bɑwə ŋkwɛ gɑ e ghə fʉ m nə nthi fʉ̌ dzʉ́, e cʉ' bʉəpǒ tə gə fʉ́; nə pa' fʉ̌ yəŋ dzʉ̌ bɑ pʉə dzə̌ Si. Nə pa' a bɑ pu və gɑ: E dɑ pɑ́ fʉ̌ mghɛ fʉ́ tə gəm wap, ba m gɑ: Cyəpɔ bɑ ě zhyə mkwɛnyə mghɛ fʉ́, jyə gɑ a bɑ pɔpɔ. A po'o tə sɔmmo nə po kɑ lɑ monəŋ ŋa'tə nə pa' guŋ e awɛ bɑ bi po: Polo, Apolos, Kefas, dzʉ̌, vɔk kɑ vʉ̌ lə, cwəlɔ kɑ yǒ lə, guŋ e awɛ bɑ bi po, da' gɑ po pɑ bi Kristo, Kristo pɑ bi Si. Pu yɔ wɔk pɑ pa' mghɛ fa' Kristo biŋ bɑ pɑ pyap nwə cyə zhyənwə Si a. A nə́ŋ bɑ po'o ywə yə́ pu həŋtə́ bi byap ywə a, a bɑ́ gɑ́ e kɑ ghə mfʉ̀m. Tə́ sɔ' m nə m̀, kɑ wɔ, kɑ pɔmnəŋ nə́ fyɛ' a lə, bɑ a tə shɛ pɑ́. Kwa' myə ŋ tə́ fyɛ' nɑ a pɑ. Tʉm tsǎ tə́ wə sa' a nə sɔmywə pɑ́, tə́ tə ya nə da'tə gɑ́ gɑ̌ bɑ dəŋdəŋ pɑ́; mo yə́ e fyɛ' a a bɑ Cyəpɔ. A po'o tə gɑ̌ gɔm bi po gɑ́ ka po fyɛ' tə cwə ŋkhu', tə Cyəpɔ guŋ sɔ̌'. Yu nə gɔ sɔ' khyɛ' ywə yə a bɑ ǎ tʉmnyə̀ nthʉm jʉm a, ghə pu yɔ mkwɛnyə myə́ ǎ nthʉm tʉ́m mo a. A pɑ́ po'o bǎ yɑ mo lə kwi yə gho'tə bi Si. A du pɑ nə po mfɑ́mfɑ́ tə́ ŋ da'tə ya bi po m nə mu' nthi, shyə m nə́ Apolos ba m nə́ myə, po'o gɑ po lɑ yɔk fo', ji'tə nə cyətə pɑ̌ ŋa'nɑ́ nə cwə yə pǒ piŋ mɑki kɑ mɑsɔk lə. Wɑ̌ da'tə gɑ o bɑ yu nthi dǒ o? A bɑ o wim kɑ yə pu tə hɑ bu hɑ̌ a pɑ? Bi a pɑ gɑ́ pu hɑ bu hɑ̌, bɑ nwə kɑ́ o nə ŋa'nɑ́ o pa' cwə yə́ pu tə hɑ bu hɑ̌ a pɑ? Po bɑ po tsə zhwyə! Po tsə zhi! A ka pɑ wɔk a bɑ pǒ bɑ mfo! Ah! Tə́ po pɑ́ mfo, bɑ pɑ nə bəmtə sa' nə pa' gɑ̌ kwɛ gɑ Si tʉ wɔk thə́, wɔk mghɛ nthəm, jap wɔk nə jʉɔjʉ̀m tsʉ' pa' pɔ pyə pu gɔ cyə́ŋ wap thə a: Pu le jwɔk jɔ wɔk, dzʉ̌, pɑ aŋgəle ba pɔmnəŋ. Pyə bɑ mpʉəpo shyə m nə Kristo. Tə wɔ, a bɑ po ghə fʉ́ shyə m nə Kristo; pyə bɑ pɔ bwapwǎ, po pɑ pɔ nthʉɔtʉɔ; pu bɑwə hɑ mku' bi po, bɑwə gwak wɔk. Kwa' cwəlɔ, jikǔ' bɑwə jɛ́ wɔk, ghak yɔk pɑwə ŋkhə́, tə dzə́ nə pyə, bɑwə jɔgo', tɑ pɑ̌ dyə, bɑwə jɔgo' nə mfa' bú. Pu bɑwə jəmtə wɔk, pyə ma' pɑ́ hwitə; pu dɑ wɔk jɔgo' pyə sɔksɔk. Pu bɑwə nthɛmnɛ mɔk, pyə lə la'. Tə́ ŋkhəm cwəlɔ pyə bɑwə bɑ́ pá' netsə́ dzʉ́ a, mkaknyə́ tsə́ bi dzʉ̌. Ŋ tə́ bvə nwə bɔ bi po po'o m nə́ lɑ so ŋkhu wɔ pɑ́, gɑ̌ bvə nə́ nə nthɔk wɔ pó pɑ̌ pyə gɑ̌ ŋkhuŋ wap a. Nə pa' po ghə pɑ cya wɔ pɑ shǎ' nə Kristo, bɑ po ka ghə vəŋ mtá pɑ́. Myə nə lə́ shyə m nə́ Cuŋ pɑpuŋ dzə́ wɔ nə Yeso Kristo. A po'o tə gɑ səso wɔ gɑ po pɑ́ pɑ fo'msə́nyə́ mə̌. A ywə yə gɑ̌ nthəm Timotio mú ŋkhuŋ a biŋ bɑ nyənyɔ nə Cyəpɔ nə́ a; e gɔ kamtə wɔ yɑ vɔk nə Kristo, pa' gɑ nə ji'tə nə guŋ mtsʉ' awɛ nthʉm mcu'tə pɔ Kristo a. Shɑ pɔ kě bɑ nthɔmtə́ gɑ ŋ tə gɔ piŋ sɔ' wə po a, ntho' nə ŋa' nɑ tsap. Tə́ Cyəpɔ piŋ bɑ gɑ gɔ sɔ' wə po, tə zhyə mghɔm pu a mfa' pɑ ŋa'nɑ bǎ. Nə pa' Nəfo Si tə́ bɑ pɑ mghɔm pɑ̀, a bɑ́ mfa'. Pǒ lɑ yá nə? Gɑ́ dɑ pɑ mshɔm sɔ' bi po kɑ ŋkhuŋnyə kɑ m nthʉm zhwenyə bwatə pwǎtə? Pu bɑwə ju' nə guŋ mtsʉ' awɛ gɑ́ mu' ghìŋ cwəpùŋ wə po, bɑ́ nthi ghiŋ cwəpùŋ yə́ pú tə́ jɔ́ yá ba m wə pɑ tə pɑ pɑ Yudea a pɑ́: A pɑ̌ gɑ́ mu' mo cəcɑ̌ po bɑwə bvɔk pu jwi tap e. A piŋ bɑ bi po pɑ́ ywə́ ŋa'nɑ! Bɑ po katə bɑ gɔ lə́ŋ nwə bɔ lə̌ŋ pa' pu dəŋ vʉ́ a po'o gɑ́ mo yə́ e gə nthi nwə bɔ a təm cəcɑ̌ po a lə́? Myə yə ŋ tə wə bɑ cəcɑ̌ po pɑ́ tə́ zhwenyə a pɑ́ pɑ cəcɑ̌ po a gɑ̌ e da' fyɛ' mo yə́ e fa' mɔ nthi mfà' a pɑ pa' cwə yə́ gɑ̌ bɑ pɑ́ cəcɑ̌ po a: Cwə yə́ po gɔ cu'tə a biŋ bɑ cəcɑ̌ po m nə zhwenyə a, a cyə m nə tsǒ Cyəpɔ ba m nə́ tʉɔ e, pu hɑ yə bǎ nthi mo bi Sata gɑ e sa'tə́ bap nɑ́ e po'o tə́ zhwenyə é sɔ' bvɔk nə tyɛ'dzʉ Cyəpɔ. Ywə yə po wə́ ŋwɛnyə nə́ a ka puŋ! Po ka zhyə gɑ muywə ywə kwɔ'msɛ̌ gə guŋ msɛ awɛ kwɔ' a? Po sɔk bvò ywə kwɔ'msɛ̌ nə po, shʉ' msɛ́ sə́, nə pa' ywə kwɔ'msɛ̌ tə jɑ nə po pɑ́. Nə pa' Kristo, paska yɔk pɑ bɑ́ pu lě dɑ é nuŋpwɔ'. Pɑ ŋwɛnyə́, tə lɑ pɑ bvo kwɔ'msɛ̌, kɑ́ kwɔ'msɛ̌ tʉm shɔkcɔk, kwɔ'msɛ̌ nə gə nwə cwəpùŋ lə́ tə́ nə ŋwɛnyə́; pɑ lɑ pɑ msɛ tə kwɔ'msɛ̌, nthʉ́m dɔlɔ̌, nthʉm nyənyɔ tə́ nə́ ŋwɛnyə́. Ŋ də və bi po nthʉm dəŋdzə ŋwa'nyə a gɑ ka po a mgəgə́m pɑ́ nə sɔmywə. Ŋ da tə́ gɔm pɑ́ da' mgəgə́m nə yəŋ dzʉ̌, kɑ msamshwə, kɑ mcǔŋ pu a pɑ ghamtə́ kətwɔk pɑ́, nə pa' a pɑ po'o bɑ po gɔ təm nə yəŋ dzʉ̌. Ŋ də bvə bi po gɑ ka po a mo yə e biŋ tso fɑ tə bɑ gəgəm, kɑ samshwə, kɑ gamtə kətwɔk, kɑ nthɛmnɛ, kɑ bam mlu', kɑ shǔŋ lɑ pɑ nə sɔmywə kɑ ba nə tsʉnyə lɑ. Myə nə́ gɔ fyɛ' pɑ dzʉ a? Po tə́ gɔ fyɛ' pɑ pɑ dyə a lə́? Si nə́ gɔ sɔ' fyɛ' pɑ dzʉ́. Po té mo shɔkcɔ̌k cəcɑ̌ po. Cwə yə shɛ bɑ cəcɑ̌ po a, nwə kɑ po piŋ gɑ pɔ pyə wap tə bɑ nyənyɔ nə fyɛ' nə cwə yə pɔ dɔlɔ̌ nə́ bɑ gɔ fyɛ' a? Po ka zhyə gɑ pɔ dɔlɔ̌ nə́ gɔ sɔ' fyɛ' dzʉ a? Bi a pɑ gɑ wɔ nə gɔ sɔ' fyɛ' dzʉ́, bɑ a gə m gɑ́ kɑ tə po lə ku' nə fyɛ' muywə nwə cəcɑ̌ pǒ? Po ka zhyə gɑ pɑ gɔ sɔ' fyɛ' pɑ aŋgəle a? Tə́ mcʉ̌m sʉ'ʉ nə nwə yə̀ŋ vɔk? Po gə mu' nwə po'o jap pɔ pyə Cu'tə pɔ Kristo gwak wap a gɑ́ wap sa' lə? Sǒ pɑ ŋkhu wɔ! Jyə gɑ sɔmmo tə́ bɑ cəcɑ̌ po bɑ e ghə dəŋ fʉ́ yə bi a pɑ́ e nə fyɛ' nwə cəcɑ̌ mfɑmfɑ́ a lə? Tə mfɑmfɑ pɑ sa' mshɛ cəcɑ́ pú dzə̌ pɑ tə ghə piŋnthʉm! Kwa' nə ghə shɛ cəcɑ̌ po bɑ ǎ tsə pɔk. Po tə́ biŋ yɔ nwə yə a ka tiŋnyə́ bi po a shwə ne a? Po tə́ biŋ yɔ gɑ́ pu lɑ ywə yɔ ne shwə a? Pɑ́ wɔ nə gə nwə yə a ka tiŋnyə a, bɑ dɑ́ tsə pyə shɑ pɔ, wap piŋ bɑ mfɑ pɔ́! Po ka zhyə gɑ pɔ pyə wap tə gə nwə dəŋdəŋ a pɑ́ tə gɔ sɔ' ko nə́ Nəfo Si a? Ka mo fʉtə wɔ! Kɑ mgəgə́m, kɑ pɑ ghamtə mkətwɔk, kɑ pɑ ghə ghap, kɑ nthinthi pɔ bwapwǎ lə, kɑ mcǔŋ, kɑ msamshwə, kɑ mpǎm mlu', kɑ pɑ tɛmnɛ, kɑ pɑ lɑ ywə tə yap lə tə́ gɔ sɔ' ko nə Nəfo Si pɑ́. Tsə bɔ nə nəŋ bɑ ywə yə po lə́ bɑ́ yá, kɑ shɑ́ pɔ cəcɑ̌ pó lə. Tə́ a bɑ pu lě sɔk wɔ, a bɑ pu lě shu' wɔ, a bɑ pu lě jap wɔ dəŋdəŋ shyə m nə́ tsǒ Cyəpɔ Yeso Kristo ba m nə́ Zhwenyə Si yɔk pɑ. Pɑ́ ŋ gə guŋ ywə awɛ, tə guŋ ywə awɛ tə gəm nə́ myə pɑ. Pɑ ŋ gə guŋ ywə awɛ tə pɑ ŋ də piŋ nə pɑ ŋkwɔ́ sɔmywə. Tsətsʉ bɑ tsyə vàm, vam pɑ́ nə tsətsʉ, Si piŋ bɑ gɔ sa'tə tsətsʉ pu a vàm. Tə́ nɑ́ mo tə bɑ m nə ghəm pɑ, a bɑ m nə́ Cyəpɔ, Cyəpɔ pɑ yə nɑ́ mo a nəŋ bɑ po'o, Si yə e lə yám Cyəpɔ nə vʉ̌ a pɑ gɔ sɔ' lɑ tʉɔ e nə yám wɔk pɑ. Po ka zhyə gɑ́ nɑ́ tsɔ bɑ́ bú Kristo a? Tə́ gɑ̌ gɔ lɑ bú Kristo nə ghə bú gəgəm a? Gɛ̌! Po ka zhyə gɑ́ mo yə e nthamtə pu gəgəm a bɑ pu e cʉ' ta' nɑ́ a? Nə pa' a bɑ pu lě bvə gɑ: Wap pɑpʉə gɔ cʉ' pɑ da' ta' nɑ. Tɑ mo yə e nthamtə pu Cyəpɔ a bɑ pu e cu' ta' zhwenyə. Po khʉ́ nwə ghap. Myə shɑ mhɔ mo bɑ m jʉmdzʉ̌ nə nɑ́ e. Tə gə ghap hɔnwə pɑ kwa' nə́ nɑ e. Kɑ a bɑ po ka zhyə gɑ́ nɑ tsɔ bɑ dyə Zhwenyə Dɔlɔ̌ yə a bɑ nə po a, bɑ fɑ m bi Si, nɑ tsɔ lə yɑ tsɔ a? Mo bɑ e lě nuŋ dəŋ ŋkhap nə jo wɔ. Po lɑ nɑ́ tsɔ gu'tə Si. Pɑ pɑ̀nyə nə ywə yə po kɑ və bəm a. A puŋ bi mbɛ nə cyətə kwak mjwǐ da' gɑ́ nə pwɔk va', bǎ yá mbɛ lə́ ghə yə mjwǐ, ba yɑ mjwǐ lə́ ghə yə́ dhə́. A dhə́ fá' mfà' mbɛ nə jwi e, ba mjwǐ ghə pɑ́ po' nə dhə́ e. Tə́ mjwǐ nə gə nɑ e pá, dhə́ e nə gə e; dəŋdəŋ po'o tə́ mbɛ nə gə nɑ e pɑ́, jwi e nə gə e. Ka po kəŋnyə̀ nɑ tsɔ cəcɑ̌ po, tə ně da' cwə yə po cɔm bɑ ŋkwishwə, da' gɑ pɑ nə mu kam cwə, nə cwə nə cwyɛ'nyə Si; tə́ guŋ bɑnyə nthamtə, bwɔk gɑ́ pa' po ka ku'nyə nə tɔm nɑ́ tsɔ a, a ka hɑ sɔ bi sata gɑ́ e ləŋtə wɔ. Gɑ̌ gɔm pɑ da' nə mu kam cwə bi po. Ŋ tə nə jap pɑ mco' pɑ. Kɑ miŋnyə m myə bɑ guŋ pɑbɛ awɛ cwə pɑ́ pa' myə a; da' gɑ Si bɑ e hɑ bǎ yə nə pɑ́ wɑlə́ bi e, hɑ yəŋ bi yə̌ŋ, hɑ yə bi yə̌. Bi pɔ pyə wap ka lɔmdyə a, ba bi mpfɔk, gɑ ghɔm gɑ́ a puŋ gɑ wap cwə pa' myə a: Tə a pɑ́ gɑ́ bi a pɑ́ wap lə tɔm nɑ tsap, wap lɔmdyə̌; nə pa' dzə nə́ lɔmdyə̌ shyə nə pɑ́ di'. Sɔ' m nə́ pɔ pyə wap lɔmdyə a, gɑ yap gɑ́, tə́ tə myə nə jap pɑ́ Cyəpɔ nə jap gɑ: Mjwǐ kɑ haptə nə dhə́ e. Bi a nəŋ bɑ́ gɑ ě tsə́ hap nə é, e kɑ pìŋ dɔmdyə́, a taktə pɑ̌ po'o pu dhə́ e piŋ nyaptə lɔmdyə yap, a ba mbɛ kɑ zhə̀ŋ jwi e. Bi pyə shɑ́ pɔ gɑ̌ wə́ gɔm gɑ́, myə nə́ gɔm tə́ Cyəpɔ nə́ gɔm pɑ́; gɑ wə́ gɔm gɑ: A pɑ́ gɑ́ mu' fɑ ghə jwi e, e lə pɑ mo Kristo, tə biŋ gɑ́ pu e gɔ cwə́, e kɑ́ zhə̀ŋ é. Bi a nəŋ bɑ gɑ́ mjwǐ ghə dhə́ e, e lə pɑ mo Kristo, tə biŋ gɑ pu e cwə e kɑ təm bi e nə pa' piŋnthʉm mjwǐ gɔ lɔnyə dhə yə e kɑ wuŋ biŋ a; a piŋnthʉm mbɛ lɔnyə jwi e, nə pa' a ka pɑ́ po'o a bɑ po pɔ bɑ wap ka lɔ́, tə a bɑ wap lɔ́. Tə mo yə e ka piŋ a pɑ́ gɔ tə́m, e ghɔ, nə pa' sɔmywə tə̌ wə shəŋ fɑ yə mbɛ kɑ yə mjwǐ lə nə cwə o bɔ pɑ̀. Si ŋkhe wɔk pɑ m gɑ pɑ cwə nə hwitə̀. Nə pa' wə mjwǐ, ǒ zhyə́ bi a o gɔ sɔ' vɔk dhə o a? Ba wə mbɛ ǒ zhyə́ bi o gɔ sɔ' vɔk jwi o a? A piŋ bɑ́ po'o, bǎ yá mo lə́ vɔk pɑ́ nə nthi pa' Cyəpɔ nə hɑ bi a, nthi pa' e lə bɑ tə́ Si ké e a; a ywə yə gɑ̌ gɔm bi guŋ mcu'tə pɔ Kristo awɛ a. Mo yə a lə́ bɑ pu vó é tə́ Si ké e a, e kɑ́ tʉm gɑ pu vó é. Yə́ mo yə́ a lə bɑ pu ka vó e a é kɑ́ cəŋ gɑ pu vó e. Nə vo mo kɑ nə cyətə vǒ e lə tə bɑ sɔmywə pɑ́. Nwə bɑ pɑ́ gɑ́ mo ghiŋ nə mco' Si. Bǎ yá mo lə́ wuŋ pɑ́ pa' é lə bɑ́ tə́ Si ké é a. Si lə nə kě o, o pɑ ŋkwɔ, a kɑ paknyə o; lɑ nthə́ pa' o kɑ́ bɑ gɔ cəŋ nə təm ŋkwɔ a shəŋ m gɑ yu nə pɑ ŋkwɔ kwitə́. Nə pa' ŋkwɔ yə Cyəpɔ ké é a, bɑ nə Cyəpɔ e lə yɑ́ ŋkwɔ; ba mo yə pu lə́ nə ké é e lə́ pɑ ŋkwɔ pɑ́ bɑ ě cʉ' ŋkwɔ Cyəpɔ. Mo bɑ e lě nuŋ dəŋ ŋkhap nə biŋ jó wɔ, kɑ po piŋ bʉɔ shʉ' mkwɔ bi pɔmnəŋ. Mfɑmfɑ́ bǎ ya mo lə cwə dzə́ Si pɑ pa' e lə bɑ́ tə́ é ké e a. Sɔ' m nə́ pɔ pyə wap ka wuŋ dɔmdyə a, mco' myə gɑ gɔ hɑ a fɑ m bi Cyəpɔ a tə̌ wə́ pɑ; ywə yə gɑ̌ gɔm a pɑ́ mə̌ mkwɛnyə, mkwɛnyə mo yə bi a pɑ pu cyə m nə cɔmmtso yə Si gə bi a ju' ywə yə e gɔm a. Gɑ̌ yɔ gɑ́ nə pɑ́ po'o pùŋ, bwɔk zhwiŋ nthi nthi nə yəŋ cwə dzʉ̌; ə̌ŋ, gɑ̌ kwɛ gɑ́ a puŋ bi mbɛ nə cwə po'o. A pɑ́ bɑ po mjwǐ tamtə́ o kɑ cə́ŋ haptə. Bɑ́ bɑ po mjwǐ kɑ tamtə, o kɑ cə́ŋ mjwǐ. Tə a pɑ́ po'o ǒ lɔmdyə̌ bɑ o ka hɔnwə; bi a múgò nəŋ dɔmdyə́ bɑ e ka hɔnwə. Nə pa' pɔ pyə wap lɔmdyə a gɔ sɔ' kwa kwa' mɑ ghəghʉɔ, a piŋ bɑ ywə yə gɑ bɑwə shəŋ nə te wɔ nə a. Mfɑ́mfɑ́ ywə yə gɑ gɔm a bɑ gɑ: Cwədzʉ̌ ghɔptə́. Tə́ fɑ cwəlɔ, pɔ pyə wap ghə mjwǐ a, cwə pa' cwə yə wap ka ghə mjwǐ a, pɔ pyə wap wə dɔ a cwə pa' wap tə́ wə dɔ a pɑ́, pɔ pyə wap wə ŋwɛnyə a cwə́ pa' cwə yə wap tə wə ŋwɛnyə a pɑ́, pɔ pyə wap wə jó ywə a pa' pɔ pyə wap ka ghə ywə a; pɑ tsʉ́pe nə yəŋ dzʉ̌ cwə pa' wap tə̌ wə dzʉ sɔm pé a pɑ́. Nə pa' tsə́ yəŋ dzʉ̌ shyəcyə́. Gɑ̌ shəŋ gɑ́ ka sɔm nə zhwiŋ pɑ́ nə po. Mo yə e ka lɔmdyə a e jwiŋ nə mnwə Cyəpɔ: E shə́ŋ pa' e gɔ ghə tə́ puŋ Cyəpɔ a. Tə́ mbɛ yə ě lɔmdyə a e jwiŋ nə mnwə dzʉ́: E shə́ŋ pa' e gɔ ghə tə puŋ jwi e a, biŋ bɑ nə́ fəŋnyə. A bɑ dəŋdəŋ po'o nə mjwǐ yə e ka lɔmdyə a ba m nə múgò. Wap jwiŋ nə mnwə Cyəpɔ shəŋ pa' wap gɔ pɑ dɔlɔ̌ nə nɑ tsap ba m nə zhwenyə yap a. Tə́ mjwǐ yə e lɔmdyə a jwiŋ nə mnwə dzʉ́. É shəŋ pa' e gɔ ghə tə́ puŋ dhə́ e a. Gɑ̌ siŋ wɔ po'o bɑ nə ŋkwitə́ pɑ́ wɔ, ŋ tə nə dʉ' yo' nə po pɑ́, gɑ siŋ wɔ gɑ́ po ghə yə ywə́ yə po yɔ gɑ́ ǎ puŋ bi po a, biŋ da nɑ tsɔ nə Cyəpɔ, tə piŋ bɑ nə́ fəŋnyə. Mo yə e yɔ pɑpúŋ gɑ́ e tə́ gɔ tak gò yə pu e ŋkha'nyə lɔmdyə a nəŋ a pɑ́, e lɔmdyə̌, bɑ e ka hɔnwə. Tə́ mo yə ě cəŋtə́ jɔ nthʉm tʉm tsyə tə́ pu nthə́nyə́ e thə́nyə gɑ e tə́ gɔ lɑ mjwǐ mka'nyə́ lɔmdyə pɑ́, nthak e nə́ŋ bɑ é ghə a cəŋtə búŋ. A po'o tə mo yə ě kwi jwi mka'nyə e bɑ e ghə a puŋ ba mo yə e ka kwi e a bɑ e ghə a cəŋtə́ buŋ. Mjwǐ bɑ e tamtə nə dhə́ e nthʉm lɔmdyə́ nə cwə yɑ́ yə e ka wuŋ pfʉ a; tə́ e cwə tə pfʉ́ bɑ sɔmywə tə yɑ̌ wə da e nə́ e pɑ; bɑ e yɔ gɑ e gɔ kwi' lɔmdyə́ e lɔmdyə̌, da' gɑ e lɔm pɑ da' bi mo Kristo. Tə́ gɑ̌ gɔm gɑ́ e cyətə piŋ dɔmdyə bɑ e ghə kwa' pɑpúŋ; gɑ wə ŋkwɛ gɑ ba myə yɑ̌ gɑ̌ ghə Zhwenyə Si. Sɔ' m nə bap yə pu nə nuŋpwɔ' bi mkətwɔk á, a nyənyɔ gɑ a bɑ guŋ yɔk pɑ̀ awɛ ghə zhyənwə. Da' gɑ Zhyə̌nwə nyəŋ ŋa'nɑ nə mo, tə́ ŋkhuŋnyə ŋkwyə piŋnthʉm mo. Mo pɑwə sɛ gɑ́ e zhyə ywə́ bɑ́ e bɑ̀ e ka wuŋ shəŋtə́ jyə́. Tə́ mo kùŋ Si, bɑ Si bɑ ě zhyə́ e. A po'o bi a pɑ mo pfɑ bap yə pu nə núŋ pwɔ' bi mkətwɔk a? Pɑ̌ zhyə́ gɑ́ sɔm kətwɔk tə́ bɑ nthʉm dzʉ́ pɑ́, ba mu' si lə piŋ bɑwə tə́ né da' Si do é. Nə pa' ba pá' pu sɛ́ gɑ́ shɑ́ msi bɑ́ kɛbəŋ ba m dəmca' a, ba pa' nthinthi msi ba nthinthi mcyəpɔ bɑwə a, pɑ bɑ pɑ̌ zhyə da' ta' Si, Tá yə guŋ ywə awɛ fɑ́ pɑ bi e, guŋ yɔk pɑ awɛ piŋ bɑ gɔ pɑ́ m bi e a, ba ta' Cyəpɔ Yeso Kristo yə guŋ ywə awɛ bɑ pɑ́ nə e, pɑ piŋ bɑ bi e a. Tə́ guŋ pɔ awɛ bɑ wap ka ghə zhyənwə. Shɑ́ pɔ pyə wap kɑ́ guŋ jɑwə́ gɔ pɑ dyə mkətwɔk, pfɑ̀ bap mkətwɔk bɑ pa' cwə yə́ pu hɑ po'o kwa' bi mkətwɔk a, a viŋ piŋnthʉm yap yə a bɑ pwatə́ piŋnthʉm a. Tə́ sɔm ywətsʉ nə gɔ sɔ' fʉ'tə wɔk pɑ̀ nə ghɔ bə́ŋ Si pɑ́: Nə pa' pɑ pɑ́ tə́ pfɑ́ bɑ pɑ tə gɔ sonyə pɑ, nəŋ biŋ pfɑ́ bɑ pɑ tə́ gɔ pɑ́ dzə pɑ. Da' gɑ́ po pɔmtə gɑ́ yɔ nə cyətə pɑ ŋkwɔ kɑ pɑ ywə fa'tə bi pɔ bwapwǎ. Nə pa' pu la jɔ o, wə yə a bɑ ǒ zhyənwə a, bɑ o cwə dyə mkətwɔk bɑwə dzʉywə, bɑ nwə bɔ yə a puŋ bu a tə́ gɔ ghə gɑ́ mo bwapwǎ pfɑ bap pwɔ' mkətwɔk a lə? A piŋ shyə m nə yu zhyə̌nwə mo bwapwǎ yəŋ yə Kristo lə́ pfʉ̌ nə́ e a e pfʉ́? O hɔnwə po'o nə mfɑ pǔ, bo' fiŋ nə piŋnthʉm yap yə bwapwǎ, bɑ o hɔnwə po'o pɑ bi Kristo. A po'o tə a bi a ywətsʉ pɑ gɔ fa'tə fɑ a bɑ gɑ gɔ kəŋnyə nə pfɑ́ bap shyə́ nə fa'tə fɑ a bɔ e vʉsi. Gɑ̌ bɑ ŋkwɔ a? Ŋ tə bɑ gɛ nthə̌m a? Ŋ tə bɑ ŋ dě jɔ Yeso Cyəpɔ yɔk pɑ a? Po tə́ bɑ mfa' mə̌ nə Cyəpɔ a? A pɑ́ bi shɑ́ pɔ ŋ də pɑ gɛ nthə̌m, bɑ gɑ̌ bɑ gɛ nthə̌m bǎ bi po; nə pa' po bɑ́ mtiŋ tsɑ fa' jʉ̌m Cyəpɔ. Po yɔ yɑ nə́ tɛ dzə̀ mghɛ bo pɑ̌ yəŋ gɑ: A bɑ mco' bi pyə nə tsʉ̀ ywə́ kɑ nə nwə́ lə a? A bɑ mco' bi pyə nə́ nə ghiŋ dɑ mjwǐ yə e mo Kristo a pyə a pu ghɔ pa' pyə́ shɑ mghɛ nthəm a, pa' mfɑ̌ Cyəpɔ ba Kefas a? A bɑ mco' gɑ́ bi a pɑ pu lə té wɔk pyə Barnabas nə fa' a? Wɑ̌ fa' fá' səŋwi tə guŋ bɑ́ ŋkhim e? Wɑ̌ dzʉ' mthə nə nú' mlù' tə pɑ̌ dzʉ́ nthɔm myə? Kɑ wɑ̌ byap mnɔm tə pɑ nwə́ bʉɔ map? Yəŋ bɑ́ da' nwə̀ monəŋthə́, ba mco' tə́ gɔm po'o a? Nə pa' a bɑ pu və nthʉm mco' Mosɛ gɑ: Kɑ́ kwɑ́ shwə nɔm na' yə po e bɑwə dɑ tsə́ pe a. Si shɔm pɑ́ mna' a? E la tə́ gɔm po'o m nə́ pɑ á lə́? Əŋ, pu lə́ bvə po'o m nə́ pɑ; nə pa' a buŋ gɑ dzʉ'né nə tsʉ̌' bɑ mɔktə, dɑ tsə́ nyəŋ dyə nə lɑ bɑ mɔktə gɑ́ pu gɔ hɑ yə́ ywə nə́. A pɑ́ gɑ pyə tsə́ ywə pɑpuŋ zhwenyə nə po, bɑ pyə la ŋkhap nthɔm mfa' bú mɔ bɑ pyə ghənwə tə́' a? A bi a pɑ́ gɑ pyə shɑ pɔ ŋkhap nthɔm bɔ nə po, bɑ mcʉ̌m sʉ'ʉ nə pyə̌? Da' gɑ pyə kɑ kwi ywə yə a bɑ yɔk a. Pyə nthɔm nɑ́ tsɔk nə guŋ ywə awɛ po'o gɑ pyə kɑ́ nyəŋ sɔm kəlo' nə Cuŋ pɑpuŋ Kristo. Po ka zhyə́ gɑ́ pɔ pyə wap fa' Dyə Si a, Dyə Si nə ŋkhim wap a? Ba gɑ pɔ pyə wap fa' nə tsʉ' nə to tsə pwɔ' a yap ywə ba nə ywə yə́ pu hɑ nə tsə pwɔ' a? A bɑ́ pɑ́ po'o tə a bɑ Cyəpɔ yap gɑ pɑ siŋ Cuŋ pɑpúŋ gɔ pɑ vɔk pɑ́ nə Cuŋ pɑpúŋ. Tə sɔ' m nə́ myə, ŋ kha həŋtə sɔmywə nə ywə yə a bɑ yɑ̌ a, ŋ də nəŋ bɑwə bvə po'o nə həŋtə yá pɑ́. Tə cʉ' po'o ŋ pfʉ́. Pɑ sɔmmo lə kwi yə bɔ bəm. Nə pa' nə siŋ Cùŋ pɑpuŋ tə bɑ nwə ŋa'nɑ́ bəm pɑ, a bɑ pɑ kwa' ywə yə a cəŋ gɑ a pɑ́ a; ghəghʉɔ a nə cwə yə ŋ khá siŋ Cuŋ pɑpuŋ a. Myə nə lə́ pé'e tə bɑ ŋkhuŋ nə siŋ, bɑ gɑ̌ byap mcwɔ'fa'; tə́ a pɑ gɑ Si nə hya a hya bɑ a bɑ ŋkhəm bɑ pu hɑ bəm. Tə mə̌ mcwɔ'fa' bɑ gɑ kɑ? A bɑ nə hɑ Cuŋ pɑpuŋ yə gɑ̌ siŋ a tə kwi sɔmywə, tə́ ba yə a bɑ pu yap gɑ ŋ kwi a. Əŋ ŋ dě tə pɑ ŋkwɔ bi sɔmmo, da' gɑ́ ŋ dě ji ŋkwɔ guŋ pɔ awɛ tə́ nə́ fəŋtə bo'gwyə pɔ. Ŋ dě bɑ cəcɑ̌ pɑ Yudea bɑ yə Yudea tə́ nə fəŋtə pɑ Yudea; bɑ cəcɑ̌ pɑ zhyə̀ mco' pa' jyə̀ mco' a, ba tə pa' a ŋ tə jyə̀ mco' a pɑ, tə́ nə fəŋtə pɑ zhyə̀ mco'. Bɑ cəcɑ̌ pɑ tə ghə mco' pa' tə ghə mco' a ba tə pa' ŋ tə bɑ tə ghə mco' Si a pɑ́, nə pa' Kristo bɑ́ mə̌ mco' tə́ nə fəŋtə́ pɑ tə ghə mco'. Ŋ də́ bɑ pwá mo pyə a mpwǎ pɔ tə nə́ fəŋtə mpwá pɔ. Ŋ dé bɑ̀ guŋ ywə awɛ nə pyə a guŋ pɔ awɛ tə́ nə bvɔk shɑ́ pɔ̀. Bɑ gə guŋ e awɛ po'o nə Cuŋ pɑpuŋ po'o gɑ ŋ gə yɑ tsʉ' nə́. Po ka zhyə́ gɑ pɑ khʉ́dʉ̌ bɑ sim dʉ́ ŋkhʉ́dʉ́ guŋ yap awɛ tə́ da' ta' mo nə təm dəŋdzə́ a? Po khʉ́dʉ̌ m pa' po gɔ cyə́ dzə a. Guŋ pɑ khʉ́dʉ́ awɛ nthya dzʉ kwa' pɑpuŋ. Wap gə po'o nə co'fò yə́ a mi a. Pɑ pɑ gə yɔk pɑ nə co'fò mama. Kwa' myə gɑ̌ ŋkhʉdʉ po'o: La' gɔ m pa' fʉ̀ a pɑ́; biŋ bɑ do'mkəŋ, dɑ nɔk pɑ́ tɑ́ jyə pɑ̀. Tə gɑ̌ shəŋtə ŋkhyəp nɑ́ a, jap e nə ŋkhɛ̀ po'o bwɔk gɑ́ ŋ khɑ tǔŋ lwɔp nə siŋ nwə pu ti nthé a nə́. Mfɑ̌mfɑ́ pɑ́ ŋ də tʉ́m wɔ: Guŋ mtá pɔk pɑ lə bɑ nthʉm mlwa, guŋ yap awɛ lə cyə́ nthʉm shyə lɑpʉə, biŋ shyə m nə Mosɛ ŋkwishyə guŋ yap awɛ nthʉm mlwa ba nthʉ̌m shyə lɑpʉə. Guŋ yap awɛ lə tsʉ pɑ ta' ywə tsʉ́ zhwenyə. Biŋ nwə́ guŋ yap awɛ pɑ́ ta' shyə zhwenyə, nə pa' wap lə nwə́ shyə bɔ a pɑ nthəm nə ghǔ gwɔ' zhwenyə yə a lə bɑwə giŋ jʉ̌m pu a: Ghǔ gwɔ' bɔ lə bɑ́ Kristo. Tə ba tə́ po'o, bo'gwyə́ pɔ nə pú lě tə puŋ Si nə pa' mpfə map lě sa ghakgo. Guŋ mnwə mɔ awɛ lə nthəm po'o gɑ pɑ lɑ́ fo' nə́, po'o gɑ pɑ kɑ́ ghi'nyə cwəpùŋ pa' wap lə ghi'nyə cwəpùŋ a. Ka po zhi pɑ ghamtə̀ kətwɔk pa' shɑ́ pɔ cəcɑ̌ pu a, dəŋdəŋ pa' a bɑ pu və gɑ: Pɔmnəŋ lə cwətə si dzʉ́ ywə biŋ nwə́, biŋ dú si ŋwɛnyə. Ka pɑ hɑ nɑ tsɔk pɑ nə gəgəm pa' shɑ́ pɔ cəcɑ̌ pu lə ghə a: Wap lə pfʉ̌tə pɔ sha' shwɔptɔ mgham bʉə nə ta' tyɛ̌'. Ka pɑ nəŋ dəŋtə́ Cyəpɔ pa' shɑ́ pɔ cəcɑ̌ pu lə́ ghə a: Mnɔ́k lě gə wap pfʉ́tə. Ka po ghə kùkùnthúŋ pa' shɑ pɔ cəcɑ̌ pu lə ghə a: gɛ si'nyə pɔ lé gə wap pfʉ́tə. Guŋ mnwə mɔ awɛ lə nthəm nə pú po'o ba fo', pu piŋ bvə po'o gɑ a tɔk wɔk pɑ, wɔk pɑ pyə pɑ po'o bɑ nə jʉɔjʉ̀m cwə dzʉ̌ a. Pa' ǎ pɑ po'o a, mo yə ě wə ŋkwɛ́ gɑ́ e tiŋnyə thə́ a pɔmtə gɑ e kɑ vʉ̀si. Mləŋtə myə a lə ləŋtə wɔ a lə bɑ ǎ ku' nə mo. Si bɑ̀ nyənyɔ; e tə́ gɔ piŋ gɑ mləŋtə myə a cyə́ gʉ' yɔ a ko nə po pɑ́. Nə mləŋtə, e gɔ hɑ jyə nə nthəm nə́ ba gʉ' nə ŋkwǎ. A po'o tə wɔ pyə gɑ̌ ŋkhuŋ wɔ a, po kʉ́ nə ghamtə kətwɔk. Gɑ̌ gɔm bi mzhyənwə; po sɛ nwə pɑpuŋ nə ywə yə gɑ̌ gɔm a. Nthu' byǎnyə yə pɑ nyəŋ byanyə nə a tə bɑ yɔk pɑ nə tamtə nə mcyə Kristo a? Msɛ myə pɑ bo' a tə bɑ́ yɔk pɑ nə tamtə nə nɑ́ Kristo a? Pa' msɛ̌ bɑ́ pɑ yɑmu' a, pɑ bɑ guŋ yɔk pɑ awɛ pɑ́ ta' nɑ yɑmu'; nə pa' guŋ yɔk pɑ awɛ nthamtə pɑ́ nə da' ta' msɛ̌ bɔ. Po yɔ pɑ Israɛl, pɔ pyə wap pfɑ bap tsə pwɔ' mkətwɔk a tə nthamtə nə tsʉ' to tsə pwɔ' a? Gɑ̌ po'o bɑ gɔm gɑ́ kɑ? Gɑ́ bap nə nuŋpwɔ' bi mkətwɔk kɑ mkətwɔk lə ku' mu' ywə lə́? Gɛ̌! Tə pa' pu nuŋpwɔ' bɔ m bi mzhwenyə cwəpuŋ, la' pu pɑ nuŋ m bi Si a pɑ, ŋ kha kuŋ gɑ po a mzhwenyə cwəpuŋ tamtə́. Bi a pɑ́ po lə nwə nthu' Cyəpɔ pu yə mzhwenyə cwəpuŋ ŋkwi cʉ̌m pɑ́. Kɑ pɑ́ bɑwə shəŋ nə sitə yɛ̌luŋ Cyəpɔ? Pɑ̌ bɑ pɑ̌ ghə gʉ' shyə́ é a? Pɑ́ mo ghə guŋ ywə awɛ, tə́ guŋ ywə awɛ tə gəm nə pɑ pɑ. Pɑ́ mo ghə guŋ ywə awɛ tə́ guŋ ywə awɛ tə kwitə pɑ. Sɔmmo kɑ cəŋ pɑ́ da' yə nwə, e cəŋ ba yə pyə shɑ́ pɔ. Guŋ tsə tsyə pu fiŋ sim a po pfɑ tə́ ywɔk sɔlam nə piŋnthʉm, nə pa' dəmcǎ' pu a guŋ tsə tsyə a bɑ nə́ a bɑ pɑ tsə́ Cyəpɔ. Mo yə e tə mo Kristo pɑ ké o, o piŋ gɔ ywə́ é, o ko dzʉ́ bǎ kɑlɑ́ yə e hɑ bu a tə ywɔk sɔlam nə piŋnthʉm. Tə mo ghɔm bu gɑ: Yəŋ bɑ́ bap tsə pwɔ' mkətwɔk, o kɑ pfɑ, shyə m nə mo yə e siŋ o a ba m nə piŋnthʉm. Ŋ tə gɔm tsɔ' po'o m nə piŋnthʉm o pɑ́, gɑ gɔm m nə yə́ mo bɔ. Nə pa' a gɔ ghə m gɑ kɑ̀ tə piŋnthʉm mo tebya nə yɑ nə cyətə pɑ ŋkwɔ̌. Ŋ nə tsʉ̌ ywətsʉ hɑ gho'tə bɑ nwə kɑ mo gɔ cɔk a gɑ́ gɑ̌ hɑ gho'tə? Kɑ́ po dzʉ́ pɑ ywə́ lə, kɑ́ po nwə́ pɑ ywə lə́, kɑ a bɑ pɑ́ kɑ́ lə́, po ghə guŋ ywə awɛ nə́ nə gu'tə Si. Ka po pɑ́ bi sɔmmo bɑ ywə fa'tə̀, kɑ bi yə Yudea lə, kɑ bi yə Grikia lə, kɑ bi Cu'tə pɔ Si lə. A po'o tə kwa' myə gɑ̌ ŋkhaktʉɔ nə puŋ guŋ pɔ awɛ nə guŋ ywə awɛ, nə cyətə cəŋ pɑ da' yɑ̌ pɑ, nə cəŋ yə́ pɔ jɔmyɔ̌m, po'o gɑ wap vɔ̌k. Po pɑ́ pɑ fo'msə́nyə a pa' gɑ̌ fo'msə́nyə Kristo a. Gɑ̌ gho'tə wɔ́ nə pa' po ŋkhamtə́ a nə guŋ mcwə awɛ biŋ bɑ nthɔm guŋ ywə́ awɛ pɑ́ pa' ŋ də hɑ bi po a. Tə́ gɑ̌ wə́ shəŋ gɑ́ po zhyə́ gɑ́: fo bǎ yá mbɛ lə́ bɑ Kristo; fo mjwǐ pɑ́ mbɛ; fo Kristo pɑ́ Si. Bǎ ya mbɛ lə yə e pfɔptə́ thə́ e tə́ shwyɛ'nyə Si kɑ tə́ gɔm ghɔm Si a lə jəmtə́ pa' fo e. Tə́ bǎ ya mjwǐ lə́ yə e shwyɛ'nyə Si kɑ gɔ́m ghɔm tə pfɔptə́ thə́ é a jəmtə pa' fo e; nə pa' a shwə pa' ě kəm thə e a. Mjwǐ pɑ́ bɑ e tə́ gɔ kwɑ thə é a, e ghə pu yá'tə nəŋ thə́ e. Tə́ a pɑ́ kuso bi mjwǐ nə ya'tə nəŋ thə́ e kɑ nə́ kəm lə e kwɑ́. Tə sɔ' m nə mbɛ, e tə́ gɔ kwɑ́ thə́ e pɑ́: É bɑ́ cyəŋnyə Si biŋ bɑ mghu'tə myə; tə́ mjwǐ bɑ ghu'tə mbɛ. Nə pa' tə mbɛ tə́ pú lə́ nthé é nə mjwǐ pɑ́, mjwǐ tə́ pú lə́ nthé é nə mbɛ. A biŋ bɑ́ bɑ pu la tə bə́m mbɛ m bi mjwǐ pɑ́, pu lə bəm pɑ́ mjwǐ bi mbɛ. A po'o tə́ mjwǐ ghɔ pɑ́ yap mtiŋ thə́ é nə la'tə gɑ́ e ju'nyə mbɛ, nə bwɔk pɑ aŋgəle. A bɑ́ po'o bi a pɑ́ pu lə haptə́ mjwǐ nə mbɛ ba mbɛ nə́ mjwǐ dzə Cyəpɔ. Nə pa' a pɑ́ gɑ́ pu lə nthé mjwǐ nə́ mbɛ bɑ mjwǐ nə dzə́ mbɛ, guŋ e awɛ fɑ́ bi Si. Kwa' wɔ yɔ sɛ, ǎ puŋ gɑ pɑ́ mjwǐ cwyɛ'nyə Si tə kwɑ̌ thə́ a? Ba kwa' pa' mǒ nə bɑ́ a tə wə da'tə bi pɑ gɑ́ a bɑ́ kuso bi mbɛ nə cap thə é a? A nə́ŋ biŋ bɑ bi mjwǐ bɑ ghu'tə nə pa' pu lə́ hɑ nəŋ thə́ bi e pa' kwɑthə́ a. Bi a nəŋ bɑwə buŋ bi mo pɑ́ nə tédʉ', bɑ a tə́ mɑ yɔk pɑ́ pɑ̀, a lə nəŋ bɑ́ yə́ dyə mcu'tə Si pɑ́. Pa' gɑ nyaptə yəŋ tə́ jap po'o a, ŋ tə́ gɔ gho'tə wɔ pɑ; mcu'tə mɔ tɑ̌ wə dɑ wɔ gɔ m dzə pɑ. A wə́ gə́ pɑ́ cwəpuŋ nə́ po. Dəŋdzə nwə nə wə bɑ́ gɑ́ pú siŋ a gɑ́ cwə yə́ po shu'tə a, ŋkhyɛ'nyə pɑ́ cəcɑ̌ po, bɑwə ŋkwɛ gɑ́ a nə mu' ghəŋ bɑ nyənyɔ. Nə pa' ǎ cəŋ gɑ́ mghaptə pɑ cəcɑ̌ po tə́ pu nə jyə́ pɔ pyə bi a pɑ́ wap lə vʉ́ nə mləŋtə a. Da' gɑ́ cwə yə po nthamtə shu'tə a, ywə yə po dɑ a tə́ bɑ ywətsʉ Cyəpɔ pɑ. Nə pa' bǎ ya mo lə́ do'nyə pɑ́ nə tsʉ́ kwa' ywətsʉ e tə́ jikǔ' pɑwə nə yɛ pyə shɑ́ pɔ, pyə shɑ́ pɔ pɑwə bam. A tə́ bɑ po ghə mdyə mɔ nə tsʉ́ywə biŋ nwə nə a? Kɑ po gwak cu'tə Si, bɑ shəŋ gɑ́ po a pɔ pyə́ wap ka ghə ywə a twɔ'nyə? Gɑ̌ gɔ ghɔm bi po gɑ́ kɑ? Gɑ̌ gɔ gho'tə wɔ lɑ? Gɛ̌ pɑ ŋ də gho'tə wɔ nə nwə yə̌ŋ. Myə, ywə yə ŋ də kwǐ bi Cyəpɔ biŋ hɑ bi po a yəŋ bɑ gɑ: Cyəpɔ Yeso Kristo nə mtsʉ̌' yə pu lə́ hɑ̌ e a, lə́ pé msɛ̌ biŋ go'tə Si, bo' gɔm gɑ: Yəŋ gɑ bɑ bapnɑ a yə pu hɑ nə po a. Po ghə po'o bɑ nə ŋkhamtə a. E lə kwi' gə pɑ́ po'o nə nthu' cwə yə́ ywətsʉ lə myə a gɔm gɑ: Nthǔ' yəŋ gɑ bɑ kɔ sə́ nə mcyə mə̌; po pɑ́ gə po'o guŋ mcwə awɛ myə po nwə́ a bɑ nə́ ŋkhamtə a. Nə pa' guŋ mcwə awɛ myə po tsʉ́ mɔ gɑ msɛ̌ biŋ nwə yəŋ gɑ nthǔ' a, pǒ siŋ vʉ́ Cyəpɔ tə̌ e la' sɔ̌'. A po'o tə́ mo yə e gɔ sɔ' tsʉ́ msɛ piŋ nwə́ nthú' Cyəpɔ tə́ ku'nyə nə a, bɑ ě hɔ bi nɑ́ ba bi mcyə́ Cyəpɔ. Bǎ ya mo lə́ cəŋtə́ dyəŋtə nɑ́ e tə dzʉ́ mɔ msɛ̌ biŋ nwə yəŋ nthǔ'. Nə pa' mo yə́ e dzʉ́ biŋ nwə́ tə tiŋtə nɑ Cyəpɔ a dzʉ́ biŋ nwə pa' yə nə nyəŋ shɛ thə́ e. A bɑ ywə yə́ a gə tə mghɛ gho pu a mkʉ̌m yɔm cəcɑ̌ po a, bɑ ba mu' dəŋ pɔ̌ piŋ npfʉtə́ a. Pɑ pɑ́ dé nɑ tsɔk pɑ, bɑ pú tə gɔ sɔ' fyɛ' wɔk pɑ pɑ; Tə́ Cyəpɔ fyɛ' wɔk pɑ nə nə nthɔk wɔk pɑ po'o gɑ pu kɑ nyəŋ shɛ thə wɔk pa dzʉ̌. A po'o mfɑmfɑ́ tə́ cwə yə́ pǒ shu'tə bɑ gɔ tsʉ́ ywə a, po pyap wɔ́ wɔwɔ. Jikǔ' yɛ́ mo é tsʉ́ywə la' e, po'o gɑ po kɑ cu'tə m nə nyəŋ shɛ thə po. Sɔ' m nə yə a shʉ' a, gɑ̌ gɔ sɔ' sɔ' tə́ ko wə po tə nyaptə. Mfɑmfɑ́, sɔ' m nə tsə́ tsyə Zhwenyə hɑ a, ŋ tə gɔ tak wɔ pa' mkəkhʉɔ a pɑ. Pǒ zhyə gɑ́ cwə yə́ po lə́ jɑ pɑ pɑ tə́ pɑ pɑ Yudea a, pu pɑ fəŋ wɔ nə gɔ pa' pɑ tə zhyə́ jyə̀ a bəŋ mkətwɔk pyə wap tə gɔmnwə a pɑ́. A po'o tə gɑ siŋ wɔ gɑ́ pɑ sɔmmo lə cyə m nə́ Zhwenyə Si gɔm gɑ́: Dò nə Yeso. Bi a pɑ́ sɔmmo lə nə́ŋ gɔm gɑ: Yeso bɑ́ Cyəpɔ tə́ cyə pɑ nə Zhwenyə Dɔlɔ̌. Tsə́ tsyə́ Zhwenyə hɑ á bɑ nthinthi da' gɑ́ Zhwenyə bɑ́ pɑ́ yɑmu'. Mfa' bɑ́ nthinthi da' gɑ Cyəpɔ pɑ́ pɑ yɑmu', nə ghə pɑ́ nthinthi da' gɑ́ pɑ da' ta' Si nə pɑ́ gə guŋ ywə awɛ nə guŋ pɔ awɛ. Bǎ yá mo lə́ ŋkwi ywə yə Zhwenyə hɑ bi a nə nə fa' pɑpuŋ bi guŋ pɔ awɛ. Zhwenyə hɑ ghɔm fʉ́ bi mu' mo, biŋ hɑ ghɔm zhyənwə bi yə mu' mo. Pɑ Zhwenyə bɔ nə hɑ nə ghə piŋnthʉm bi mu' mo biŋ hɑ nə yɛ́ mgho bi yə mu' mo pɑ Zhwenyə bɔ nə hɑ tʉ̀ɔ nə gə msyà bi mu' mo, biŋ hɑ nə ghɔ́m ghɔm Si bi yə mu' mo, hɑ nə zhyə tiŋtə mzhwenyə bi mu' mo, hɑ mghɔm nthinthi bi yə mu' mo, biŋ hɑ nə tútə mghɔm bɔ bi mu' mo. Da' gɑ́ guŋ e bɔ awɛ, pɑ da' ta' Zhwenyə nə́ gə biŋ gaptə, hɑ bǎ yə nə pɑ wɑ̌lə pa' e nə jɔ a. Pɑ̌ zhyə́ gɑ nɑ́ bɑ yɑmu' biŋ bɑ́ bɑ e ghə mkamtə jɔmyɔ̌m; tə́ mkamtə nɑ yɔm pɑ gɑ́ kɑlə́ bɑ wap bɑ pɑ́ nə́ ta' nɑ́ yɑmu' a bɑ́ dəŋdəŋ po'o nə Kristo. Nə pa' guŋ yɔ̀k pɑ̀ awɛ, pɑ̀ lə ŋkwishyə pɑ nə ta' Zhwenyə yɑmu', nɑ nəŋ bɑ́ ta' nɑ́ yɑmu': Kɑ pɑ̌ bɑ́ pɑ́ yə Yudea kɑ yə Grikia lə, kɑ ŋkwɔ kɑ tə pɑ ŋkwɔ lə, a piŋ bɑ́ bɑ pu lě dɑ pɑ́ ta' Zhwenyə nwɔk wɔk pɑ̀. Nɑ tə́ bɑ da' ta' kam pɑ̀, a bɑ́ mkam mkàm. A bi a kwə́ mo ghɔm gɑ: Pa' ŋ tə bɑ pu mo a pɑ, ŋ tə nə́ nɑ mo pɑ, bɑ e tə́ jɑ́ nə́ nɑ mo a? A bi a tə̌ŋ mo ghɔm gɑ: Pá' ŋ tə bɛtsə mo a pɑ́, ŋ tə yɑ̌ nə́ nɑ́ mo pɑ bɑ́ e tə́ jɑ́ nə́ nɑ́ mo a? Guŋ nɑ́ mo awɛ lǎ' pe' e bɑ pɑ́ bɛtsə́, bɑ tə̌ŋ bɑ m hɑ́? Bi a guŋ e awɛ lǎ' pe' bɑ pɑ tə̌ŋ bɑ mtsə́ mo bɑ m hɑ́? Tə́ Si bɑ é lě jap bǎ ya kam nɑ́ lə́ nə nɑ́ pa' ě nə jɔ a. Guŋ e awɛ lǎ' pe' e bɑ pɑ́ ta' kam bɑ nɑ mo bɑ m hɑ? Mkam nɑ́ mo bɑ ǎ yɔm tə́ nɑ mo pɑ pɑ́ yɑmu'. Pɑ́ bɛtsə lɑ ghɔm bi pǔ mo gɑ: Nwə o tɑ̌ nə m̀ pɑ̀. Kɑ thə́ mo nə ghɔm bi mkwə myə gɑ: Nwə yɔ tɑ̌ nə m̀ pɑ̀. A nə́ pɑ̌ po'o mkam nɑ́ mo myə a shwə́ pa' myə́ bwapwǎ a nə pɑ myə a ŋkwitə́ te'te' a, a piŋ bɑ́ po'o myə pɑ jɔ gɑ mku' tə́ gyɛ' bɑ nə a pɑ nə́ pɑ myə pɑ̌ nyəŋ mku' nə te'te' a. Myə́ tə dəŋ nə bɑ́ myə́ pɑ̌ nyə́ŋ dəŋ nə a. Myə́ mkam nɑ́ myə dəŋ bɑ nə a tə jwɔk shəŋ pɑ́ gɑ pu fa' nə pɑ́. Tə́ Si bɑ e lě nə nyaptə nɑ mo shəŋtə́ nyəŋ mku' nə́ yə kam yə mku' tə̌ nə́ a pɑ́, po'o gɑ́ ŋkyɛ́'nyə kɑ́ pɑ̌ nə́ nɑ́ mo, tə́ mkam nɑ myə pɑ shɔm dzənyə́. Ta' kam nɑ mo pɑ́ jɔgo' bɑ pu a guŋ mkam nɑ mo awɛ bəmtə́ jɔgo'; bi a ta' kam nɑ mo pɑ nə mku' bɑ pu a guŋ mkam nɑ awɛ bəmtə́ ŋwɛnyə. A nəŋ bɑ́ po'o po pɑ nɑ́ Kristo, biŋ bɑ mkam nɑ́ myə́, bǎ yá mo lə́ nə́ yə zhəŋ. Pɔ pyə Si bɑ ě yap wap dzə̀ nthʉm cu'tə pɔ Kristo a dəŋdzə bɑ mghɛ nthəm, bɔtə bɑ mghɔm ghɔ̀m, biŋ bɔtə bɑ pɔ pyə́ a bɑ e yap wap gɑ́ wap pɑ́ ji'tə pɔ ywə a; nthəm jʉ̀m cwəlɔ bɑ pɔ pyə a bɑ pu hɑ nə ghə msyanwə bi pu a, ba nə́ yɛ́ mgho, ba nə kwitə, ba nə́ cya pɔ, biŋ gə nə ghɔm mghɔ̀m. Guŋ yap awɛ bɑ pɑ́ mghɛ nthəm a? Guŋ yap awɛ gə msya a? Guŋ yap awɛ bɑ wap kwi nə yɛ mgho a? Guŋ yap awɛ gɔm mghɔm a? Guŋ yap awɛ nthútə́ mghɔm a? Po cə́ŋ ywə hɑ hɑ̌ yə pɑpúŋ. Gɑ̌ gɔ piŋ la'tə wɔ kwa' məjyə yə ǎ tə dzə a. A pɑ́ gɑ gɑ̌ ghɔm mghɔ̀m, gɔm myə pɔmnəŋ ba myə pɑ aŋgəle tə́ tɑ́ ghə ŋkhuŋnyə bɑ gɑ̌ bɑ pɑ́ kam tʉɔ yə a wə gi a, kɑ mbak kɔm myə ǎ wə gi a lə. A pɑ gɑ́ gɑ̌ kwi nə ghɔm ghɔm Si, gɑ gɑ̌ zhyə guŋ ywə cyə zhyə̌nwə, jyə́ guŋ zhyə̌nwə awɛ, gə guŋ piŋnthʉm awɛ ba yə a shwɔ' mkǔŋgó a, tə́ la' ŋkhuŋnyə pɑ bəm bɑ ŋ tə sɔmywə pɑ́. A pɑ gɑ́ gɑ̌ ghap guŋ potsə tsɑ̌ awɛ bi mghɛ jikǔ', bɑ gɑ́ gɑ̌ tò nɑ́ a pɑ́ mɔk, tə́ la' ŋkhuŋnyə pɑ bəm, bɑ ŋ tə gɔ tsʉpè sɔmywə nə́ pɑ. Ŋkhuŋnyə ŋkhyəp tʉm; ŋkhuŋnyə fa' fà' kwitə. E tə ŋkhíŋ mo pɑ, e lə pɑ́ da'tə nɑ é, e lə pɑ ŋa' nɑ́ e. E lə pɑ gə sɔmywə yə ǎ pɔk a, e lə pɑ shəŋ pɑ yə́ fʉ', e lə pɑ́ jɛlúŋ, e lə pɑ́ dwɔ' bò. E lə pɑ ŋwɛnyə nə nwə yə a ka tiŋnyə a, da' gɑ́ bɑ ŋwɛnyə nə nwə nyənyɔ. E pfɔptə guŋ mnwə awɛ, biŋ guŋ mnwə awɛ, bɑ mɔktə guŋ mnwə awɛ, bɑ sɔk nə guŋ mnwə awɛ. Ŋkhuŋnyə tə mi pɑ́. Nə ghɔm ghɔm, pu gɔ sɔ' ghə a mi, nə ghɔm mghɔm dyɛ' gɔ sɔ' mi, zhyə̌nwə mǐ. Nə pa' zhyənwə yɔk pɑ́ bɑ a ghə dhə̀ e, ba dhə nə ghɔm ghɔm pɑ wə́. Da' gɑ́ cwə yə ywə dɔlɔ̌ gɔ sɔ' sɔ' a, ywə yə dhə̀ e bɑ wə a mǐ. Cwə yə ŋ də jɑ̀ mu a, bɑ gɔm nwə pa' mu a, bɑ ŋkwɛnwə pɑ́ pa' mu a, bɑ sɛ nwə pɑ́ pa' mu a. Ŋ dé shwə́ tə bɑ gətso gwa' ywə yə a bɑ yə mu a. Cwəlɔ pɑ́ jɔ guŋ ywə awɛ m nthʉ̌m kyɛ', bɑ jɔ pɑ́ sonyə sǒnyə́, da' gɑ pɑ gɔ sɔ' yɔ kwa' dəŋdəŋ. Kwa' cwəlɔ yɑ nə zhyə́ ghə dhə̀, tə gɑ gɔ sɔ' zhyə́ pa' pu jyə́ a. Cwəlɔ, mnwə̀ mɔ gɑ́ mənthá: piŋnthʉm, mɔktə, ŋkhuŋnyə tə́ mi pɑ́, tə yə gwyə yə a bɑ́ nə́ a bɑ ŋkhuŋnyə. Po cə́ŋ ŋkhuŋnyə; shəŋ tsə́ tsyə Zhwenyə hɑ a, shə́ŋ te'te' shəŋ nə́ ghɔm ghɔm Si. Nə pa' mo yə e gɔm mghɔm dyɛ' a, tɑ́ gɔm m bi pɔmnəŋ pɑ, e gɔm m bi Si: Sɔmmo tə́ ju' ywə yə́ e gɔm a pɑ́. Zhwenyə e pɑ gɔm ywə́ cyə zhyə̌nwə. Tə́ mo yə e gɔm ghɔm Si a, gɔm nwə bi pɔmnəŋ, bɑ nə ŋkwyətə wap, səso wap, hɑ kaktʉɔ bi pú. Mo yə e gɔm mghɔm dyɛ' a ŋkwyətə pɑ da' thə́ nɑ́ e, tə́ mo yə e gɔm mghɔm Si a ŋkwyətə́ guŋ cu'tə awɛ. Kɑ miŋnyə̀ m myə̀ bɑ guŋ yɔ awɛ gɔm mghɔm dyɛ' da' gɑ́ gɑ cwɔ' m gɑ́ po ghɔm ghɔm Si. Mo yə́ e gɔm ghɔm Si a bɑ e cyə́ mo yə e gɔm mghɔm dyɛ' a, tə́ ně da' yə ě tútə mghɔm bɔ gɑ a kwyətə́ cu'tə a. Mfɑmfɑ, po nyəŋ gɑ́ gɑ̌ sɔ' jɔ́ wɔ gɔm mghɔm dyɛ' bi po: A pɑ gɑ ghɔm tsɑ̌ ka ghə́ po zhyə́ sɔmywə, kɑ zhyə̌nwə, kɑ ghɔm Si lə́, kɑ ywə ji'tə zhi'tə lə bɑ gɑ̌ kwitə́ wɔ m kɑ̀? Pɑ lɑ fo' nə tsə́ nə bu' ywə pa' dǔŋ kɑ bətu' lɑ: A pɑ gɑ́ bǎ ya lə ka ghi nə yə nthi bɑ pu tə gɔ zhyə ywə yə́ dǔŋ nthuŋ a pɑ́, pu lə zhyə́ ywə yə́ bətu' bu' a. A bi a lwɔp nəŋ bɑ tə́ ghi pa' lwɔp a, bɑ wɑ̌ gɔ nyaptə́ shù? A bɑ dəŋdəŋ po'o nə po. A bi a ghɔm tsɔ pɑ́ tə́ pɑ ghɔm tsyə pu zhyə́ tsá a bɑ pu gɔ yu' ywə yə po gɔm a m gɑ́ kɑ̀? Mshwə́ ghɔm bɑ nthʉm dzʉ́ tə mo lə zhyə́ də̀ŋ e. Bǎ yɑ shwə́ ghɔm lə́ pɑ́ bɑ ǎ ghə nwə yə a gɔm a. Tə bɑ́ tə zhyə̌ ywə yə shwə́ ghɔm bɔ gɔm a bɑ gɑ̌ bɑ bi mo yə́ a bɑ́ ghɔm tsyə́ a bɑ gʉɔ gɛ ghɔm bɔ piŋ bɑ́ bəm bɑ gʉɔ. A pɑ́ dəŋdəŋ po'o nə po: Po cə́ŋ nə cəŋtə ju' tə gɔ̌m, pa' ǎ wə buŋ wɔ nə́ ghɔm mghɔm dyɛ' a. Da' gɑ a pɑ́ nə́ nə ŋkwyətə cu'tə̀. A po'o tə mo yə́ e gɔm ghɔm dyɛ' a gɔ pɑ́ cəŋtə cwyɛ'nyə Si gɑ e hɑ nə tùtə mghɔm bɔ bi e. Ŋ bɑ shwyɛ'nyə Si nə mghɔm dyɛ' bɑ zhwenyə a wə shwyɛ'nyə Si da' gɑ zhyənwə a lə́ pɑ́ nə́. Tə́ gə gɑ́ kɑ? Gɑ gɔ lɑ zhwenyə a cwyɛ'nyə da' gɑ piŋ lɑ ba zhyə̌nwə a cwyɛ'nyə. Gɑ gɔ lɑ zhwenyə a zhwɔp da' gɑ piŋ lɑ ba zhyə̌nwə a zhwɔp. Nə pa' a bi a da' zhwenyə o nə pɑwə fa' nə cwə yə o nyəŋ byanyə a, bɑ mo yə e bɑ yə si cəcɑ̌ pɑ yu' pɑ da' nə yú' a gɔ nə ghɔm gɑ amɛn nə mcwyɛ'nyə mǔ bɑ ě zhyə́ gɑ o ghɔm gɑ́ kɑ? Pɑ́tyɛ' bɑ mcwyɛ'nyə mǔ cəŋtə buŋ te'te', da' gɑ a lə kwi' sɔmywə bi yə mu' mo. A shyə nə gho' Si bɑ gɔm mghɔm dyɛ' tə shyə́ guŋ pɔ awɛ. Da' gɑ nthʉm cu'tə, gɑ̌ lɑ nə́ ghɔm ghɔm mshwə nthɔ myə pu gɔ yu', a tɔk pyə shɑ pɔ a, shyə nə ghɔm mghɔm dyɛ' sha' ghǎm. Mfɑmfɑ́ ka po sɛ nwə̀ pa' pǒ mkəcɔk po a, da' gɑ sɔ' m nə nwə cwəpuŋ po pɑ́ pa' pǒ mkəcɔk po a. Tə sɔ' m nə́ nə sɛ nwə po pɑ́ mghətsó. A bɑ pú və nə́ mco' gɑ: Gɑ̌ gɔ sɔ' cyə m nə́ pɑ ghɔm mu' mghɔm dyɛ' tə ghɔmnwə bi pɔ́ pɔ gɑ, piŋ cyə m nə mkwɔptəshwə mghʉɔ; a pɑ po'o wap lə yu' ywə yə gɑ̌ gɔm a; Cyəpɔ nə gɔm po'o. A bɑ po'o tə la' mghɔm dyɛ' pɑ mtiŋ bi pɑ piŋ pɑ̀, a bɑ mtiŋ m bi pɑ tə piŋ: Ghɔm gɔm ghɔm Si lə pɑ́ mtiŋ bi pɑ tə piŋ pɑ, a bɑ mtiŋ m bi pɑ piŋ. A bi a guŋ pɔ Kristo awɛ cu'tə si, guŋ yap awɛ pɑ gɔm pɑ mghɔm dyɛ', bɑ pɔ pyə́ wap sɔ' da' nə yu', pu a pɔ pyə wap ka wuŋ biŋ a tə́ gɔ kwɛ m gɑ pǒ pʉə a? Tə guŋ yap awɛ piŋ bɑ gɔm pɑ́ ghɔm Si, bɑ mo yə e ka wuŋ biŋ a, kɑ mo yə e sɔ' yə da' nə yu' yǔ' a gɔ yɔ gɑ guŋ pɔ awɛ bɑwə gɔm nwə bi e, bɑwə nthe bya nə e, nthú ywə yə a bɑ ě tʉ́m nthʉ́m tʉ́m e a, bɑ e gɔ vʉ́si, mpfɔptə́ sə é si ghamtə́ Si, nəŋ piŋ ghɔm gɑ Si bɑ cəcɑ̌ po kwa' nyənyɔ. Mfɑ̌mfɑ́ tə̌ pɑ ghə gɑ kɑ̀? Cwə yə́ po shu'tə a, bǎ ya mo lə́ nə́ po ghə̀ nə zhwɔp ta' zhwɔpshyə, dɑ ta' ywə ji'tə zhi'tə kɑ yə da'tə la'tə lə nə́ sɔ̌', kɑ gɔm mghɔm dyɛ', kɑ nthutə lə. Da' gɑ guŋ e awɛ pɑ́ gɑ po nə ŋkwyə cəcɑ̌ po. Sɔ' m nə́ nə ghɔm mghɔm dyɛ̌', da' pɔ pɑpʉə́ nə ghɔ̌m kə́ pɔ pɑtá lə; a mu' mo nəŋ nthutə. A pɑ gɑ mo yə e gɔ tútə a tə̌ si pɑ́, yə bɔ fɑ lɛ́tə nthʉm cu'tə. E ghɔm pɑ da' bi tʉ́m tsyə́ ba m bi Si. Sɔ'm nə mghɔm pɑ ghɔm ghɔ̀m Si pɔ pɑpʉə kə pɔ pɑtá lə lɑ ghɔm. Pyə́ shɑ pɔ sɛ nwə nə́. Bi a pɑ gɑ mu' mo yə ě sɔ́' yə́ bɑ si a kwi ywə yə e gɔ ghɔm a, yə mo yə e ji bɑwə gɔm a lɛ́tə. Pɑ guŋ yɔ awɛ ghɔ́m ghɔ̀m Si, da' gɑ́ gɔm mkhɛ, bǎ ya mo lə́ nə́ yə́ cʉ́m, po'o gɑ a tɔk guŋ pɔ awɛ, biŋ hɑ kaktʉɔ bi guŋ pɔ awɛ. Gɔm ghɔm Si nə gə zhwenyə ghɔm Si yə a bɑ nə e a. Nə pa' Si tə́ bɑ Si va' pɑ, e bɑ Si hwitə. Dəŋdəŋ pa' pu gə nə guŋ mcu'tə pɔ dɔlɔ̌ a, pɑ jwǐ lɛtə́ nthʉm cu'tə; pu ka piŋ gɑ wap ghɔmnwə pɑ; wap yu'nyə pa' mco' gɔm a. Wap pɑ gɔ həŋtə́ ywə yə wap ka yu' a wap ko m dyə máp tə́ həŋtə mthə́ páp. A ka puŋ gɑ mjwǐ ghɔmnwə nthʉm cu'tə́. Ghɔm Si lə ntho' fɑ wə po a? A bɑ da' wɔ nə lě ŋkwi ghɔm Si bɔ. Mo yə e kwɛ gɑ e bɑ gɔm ghɔm Si a, kɑ m gɑ ywə bi e fɑ bi Si a, e zhyə́ gɑ ywə yə́ gɑ̌ bvə́ bi po a bɑ mco' Cyəpɔ. Mo pɑ tə zhyə po'o bɑ Si ka zhyə e. Pa' ǎ pɑ po'o a, mfɑ́mfɑ, po yɛ́nɑ́ nə nə́ ghɔ̀m ghɔm Si da' gɑ po kɑ kɔ gɑ pu kɑ ghɔm mghɔm dyɛ', da' gɑ́ guŋ ywə awɛ cyə́ pɑ́ pɑpuŋ, giŋ nə ŋkhɛ. Mfɑ́mfɑ gɑ̌ wə ŋkhamtə Cuŋ pɑpuŋ yə ŋ də siŋ wɔ a bi po, Cuŋ pɑpuŋ yə po lə kwǐ biŋ ŋkwɑ nɑ tsɔ nə́ a, a piŋ bɑ́ ywə yə́ po gɔ sɔ' cyə m nə vɔk, bi a pɑ gɑ po tɔm pɑ kwa' pa' ŋ də nə siŋ wɔ a; a taktə pɑ̌ po'o bɑ po le biŋ yɔ pɑ pɔpɔ. Ŋ də lə́ŋdzə̀ siŋ wɔ yə́ ŋ də yu' a gɑ: Kristo bɑ ě pfʉ́ nə mhɔ mɔk pɑ̀ pa' pu lə́ və a. Pu lə təŋ e, e yam nə vʉ̌ dəŋdəŋ pa' pu lə və a. E lě da'tə nɑ́ e bi Kefas ba m bi pɔ shwɔppʉə mgham. E lə piŋ da'tə nɑ́ e bi shɑ mfɑ tə wap twɔk ŋkhətɔ ŋkwi cʉ̌m. Bo'gwyə pɔ cəcɑ̌ pu yɑ̌ pɑ wə́, bɑ shɑ́ pɔ nə pú nəŋ pfʉ̀tə́. E lə piŋ da'tə nɑ́ e bi Yakop ba m bi pyə shɑ́ mghɛ nthəm. E lə nə miŋ biŋ da'tə nɑ e ba m bəm yɑ̌, myə yə gɑ̌ bɑ pɑ pa' mú yə pú nthe e té a. Nə pa' gɑ̌ bɑ mo ŋkho' nə mghɛ nthəm, myə yə a bɑ ŋ kha ku' pa' bi a pu ké a gɑ́ gɛ nthəm a, myə yə́ ŋ də cwɔ'mkwə cu'tə pɔ Si a. Ywə yə gɑ̌ bɑ ya a, gɑ bɑ ya m pa' Si lə gho' a, gho' Si bɔ la tə bɑ pɑ néně bəm pɑ. Ŋ də fa' shyə guŋ pyə shɑ́ pɔ awɛ, tə́ tɑ myə nə lə fa' pɑ: Gho' Si nə lə fa'. Po'o lə́ kɑ a fɑ pɑ m̀ bəm kɑ m bi pu lə, bɑ yə̌ŋ ywə yə pyə̌ siŋ a, bɑ ywə yə pǒ biŋ a. A bi a pu pɑ́ shyanyə gɑ́ Kristo yám nə vʉ̌, bɑ a gə́ la shɑ́ pɔ cəcɑ̌ po pɑ́ gɔm gɑ nə yam nə́ vʉ̌ tə́ bɑwə a? A pɑ́ gɑ́ nə yam nə vʉ̌ tə́ bɑwə pɑ́, bɑ ba Kristo ka yam nə vʉ̌. Bi a nəŋ bɑ́ gɑ́ Kristo ka yam nə vʉ̌ bɑ msiŋ mɔk tə́ ywə pɑ́, ba piŋnthʉm yɔk lə pɑ̀ ywə. Pyə piŋ bɑ pɑ mkwinthɛ̌ cwanwə nə Si, nə pa' pyə kwinthɛ́ cwanwə nə Si, nə piŋ gɑ́ Si yam Kristo nə vʉ̌ tə a bɑ́ gɑ e yam e nə vʉ̌, bi a pɑ́ nyənyɔ gɑ́ mpfə́ pɔ tə jam nə vʉ̌ a pɑ́. A pɑ́ gɑ́ mpfə́ pɔ tə́ jam nə vʉ̌ a, bɑ ba Kristo bɑ e ka yam nə vʉ̌. Bi a nəŋ bɑ́ gɑ́ Kristo ka yam nə vʉ̌ bɑ piŋnthʉm yɔ tə́ ywə pɑ́, po yɑ pɑ́ nthʉm mhɔnwə mɔ. Cwə yə ǎ pɑ́ po'o a, bɑ pɔ pyə wap pfʉ́ m nə Kristo a bɑ wap pi. A pɑ gɑ́ pɑ̌ yap yɔk pɑ mɔktə nə Kristo pɑ́ da' nthʉm yəŋ dzʉ̌, bɑ pɑ̌ bɑ́ kwa' dzə mghɛ ghəghʉɔ cəcɑ̌ pɔmnəŋ. Tə gɛ̌; Kristo bɑ ě yam nə vʉ̌, bɑ də̀ŋdzə̀ mo nə pɔ pyə́ wap lě npfʉ a nə yam nə vʉ̌. Nə pa' vʉ̌ lə cyə́ m nə́ ta' mo tə́ sɔ' a, ǎ po'o tə nə yam nə vʉ̌ shyə m nə mu' ta' mo tə́ sɔ̌'. Dəŋdəŋ pa' guŋ pɔ awɛ shyə m nə Adam pfʉ́ a, a dəŋdəŋ pa' guŋ pɔ awɛ gɔ sɔ' cyə m nə Kristo kwi vɔk a. Tə́ bǎ ya mo lə́ gɔ sɔ' kwi pɑ́ nə yə́ cʉ́m: Mləŋdzə, a pɑ Kristo biŋ gə pɔ pyə wap bɑ pyə́ Kristo a, nə cwə yə e gɔ sɔ' sɔ' a. A pɑ po'o jʉɔjʉm tyɛ'dzʉ sɔ̌': nə cwə yə ě hɑ nəfo bi Si Ta nə hɑ̌ po'o, bɑ e sa'tə guŋ nə hya pɔ hyǎ, guŋ nə sa' ba guŋ tʉɔ awɛ. Nə pa' Kristo gɔ sa' tə́ kəm cwə yə Si yap guŋ mghɛ bo pyə to mkwə e a. Jʉɔjʉ̀m gɛ bo yə e gɔ sɔ' sa'tə e a bɑ vʉ́, nə pa' Si bɑ e yap guŋ ywə awɛ to mkwə e a. Tə cwə yə e gɔ sɔ' ghɔm gɑ: Guŋ ywə awɛ yu'nyə a, e tə́ gɔm ba Mo yə e gə pu yu'nyə e a pɑ́. Cwə yə́ guŋ ywə awɛ gɔ sɔ' yu'nyə bi a, a pɑ po'o kwa' yʉ́ Mú yu'nyə bi Mo yə e gə pu yu'nyə bi a, po'o gɑ Si sa' guŋ ywə awɛ. A lǎ' shyətə́ pɑ̌ m po'o bɑ pɔ pyə wap gə pu nu' wap shyə nə yə tsʉ' mpfə́ pɔ a shəŋ gɑ́ kɑ̀? A bi a pɑ gɑ́ mpfə pɔ tə jam nə vʉ̌ a bɑ nwə kɑ́ wap kwishyə nə pú? Tə ba kwa' wɔk pɑ, nwə kɑ a pɑ guŋ mcwə awɛ pɑ pɑ́ bɑ́ pɑ́ nə tsʉ' yə pɑ́ ywə ghə wɔk pɑ nə́ a? Mfɑmfɑ́ a bɑ́ guŋ mtyɛ'dzʉ́ awɛ myə pɑ bɑ pɑ shwə̌ vʉ̌, a pɑ nyənyɔ gɑ́ pó bɑ yɑ ywə nə ŋa'tə nə Yeso Kristo Cyəpɔ yɔk pɑ̀. Ŋ də pe' bɑ́ sɛnwə pɑ pa' monəŋ a, bɑ nə lo'shù nə mnɔm yə ŋ dɑ́ lo' Efeso a lě ŋkwitə a nə kɑ́? A pɑ́ gɑ mpfə́ pɔ tə jám nə vʉ̌ a, pɑ tsʉ biŋ nwə́ nə pa' pɑ gɔ ti yó pfʉ́. Ka mo fʉtə wɔ: Mso cwəpuŋ bɔptə mà pɑpuŋ. Po tak nə pam mlu' nəŋ ŋkwicʉ̌m, nthak nə hɔnwə nəŋ! Nə pa' shɑ́ pɔ cəcɑ̌ po la' wap pɑ biŋ nə zhyə́ Si; gɑ̌ gɔm po'o a pɑ kuso nə po. Tə pu gɔ ghɔm gɑ mpfə pɔ jám nə vʉ̌ m gɑ kɑ a? Wap dɑ ya nɑ́ nə jám a? Ŋkhəŋkhʉɔ! Ywə yə o dzə̀ si a nə sa' bɑ a pfʉ́. Ywə yə o dzə̀ si a, a tə bɑ shʉɔ ywə yə a gɔ sa'a pɑ́, a bɑ́ tɔm gəfɑ kɑ tɔm kɑ́ ywə lə, bɑ kwɔkkwɔk e. Si piŋ hɑ nɑ́ bi é pa' e nə jɔ a, hɑ bǎ yə ya gwya ywə lə́ nə yə nthi. Sɔm bap nɑ́ tə bɑ pa' yə́ mu' a pɑ́. Bǎ ya lə́ bɑ pɑ́ yə nthi. Bap nɑ mo bɑ yə nthi, yə nɔ̀m pɑ yə nthi, yə səŋ pɑ yə nthi, yə bapgu pɑ yə nthi. Mnɑ́ kɛbəŋ bɑwə, mnɑ dəmcǎ' a pɑwə, da' gɑ la' wap pɑ́ dəŋnyə́ dəŋ. Yə nə́ ləŋnyə nam bɑ do é, yə mɑŋwə́ pɑ do e, yə nə ləŋnyə sɛ pɑ do e, msɛ piŋ bɑ dəŋnyə nthinthi. A bɑ pɑ po'o nə́ nə yam nə vʉ̌: Pu nə nyə̌ŋ nɑ si a pɑ ywə bipi, biŋ nə yǎm nə vʉ̌ bɑ ywə tə pì; Nə nyəŋ e si a pɑ ywə gwakwǎk, da' gɑ nə yǎm nə vʉ̌ bɑ ywə gu'tə ghǔ'tə; nə nyəŋ si a pɑ ywə bwa pwǎ, da' gɑ́ nə yam nə vʉ̌ bɑ ywə gʉ̌' pɑ́ nə́; nə nyəŋ si a pɑ nɑ́ bap a piŋ nə yam nə vʉ̌ bɑ nɑ́ zhwenyə. Nə pa' a pɑ́ gɑ nɑ́ bap bɑwə bɑ ba nɑ́ zhwenyə bɑwə. A po'o tə́ a bɑ pú və̀ gɑ́: Dəŋdzə̀ mo, Adam lə bɑ mo bap nɑ, vɔk pɑ́ nə e, jʉɔjʉ̀m Adam pɑ mo zhwenyə yə a hɑ vɔk a. Da' gɑ a dəŋdzə bɑ mo bap, a tə́ bɑ́ mo zhwényə pɑ̀; e nthəm pɑ m jʉ̀m. Dəŋdzə mo yə e lə tə̌m nə cǎ' a bɑ mo dəmcǎ'. Batə̀ mǒ, fɑ m̀ kɛbə̀ŋ. Pa' mo dəmcǎ' lə nə bɑ á, a dəŋdəŋ pa' pɑ dəmcǎ' nə bɑ a, a piŋ bɑ po'o, dəŋdəŋ pa' mo yə e fɑ m kɛbəŋ gɔ sɔ' nə pɑ́ a. Pɑ dəŋdəŋ pa' pɑ lə hwənyə mo dəmcǎ' a, pɑ gɔ piŋ sɔ' hwənyə mo kɛbəŋ. Mfɑmfɑ́ ywə yə gɑ̌ biŋ bi po a yəŋ gɑ: Bap nɑ ba mcyə tə gɔ sɔ' pɑ́ nə́ Nəfo Si pɑ́, a ywə yə a bɑ ywə bipi á lə pɑ ywə tə pì. Gɑ̌ gɔ ghə po zhyə mu' ta' nwə cyə zhyənwə mo. Pɑ tə́ gɔ sɔ' pfʉ́tə awɛ pɑ́, da' gɑ pɑ gɔ sɔ' sɑnyə guŋ yɔk pɑ awɛ, pɑ kwa' ŋkwi cʉ̌m, nə ta' nyə́, nə gi lwɔ̌p. Nə pa' pú gɔ sɔ' túŋ lwɔ́p, mpfə pɔ yám tə pɑ ywə bipi, a piŋ sɔ' m nə pɑ̌, pɑ sɑnyə. A shə́ŋ gɑ́ mo bipi kwa nɑ tə pi pa' dzə́ a, a mo npfʉpfʉ̌ kwa nɑ tə́ npfʉ. Cwə yə mo bipi yə̌ŋ gɔ sɔ' kwa nɑ tə pi a, a ba mo pfʉpfʉ̌ cʉ' mo tə pfʉ́ a, a ghɔm bvə́və́ pəmtə́ gɑ: Vʉ̌ bɑ e lě nuŋtə nthʉm nə cyəshù. Vʉ yu nə cyə́shu hɑ? Vʉ shyə́ syap tsʉ̌ hɑ? Shyə syap vʉ́ bɑ mhɔ, gʉ' mhɔ, a pɑ mco'. Pɑ gho'tə Si yə e hɑ nə cyə́shu bi pɑ shyə m nə Cyəpɔ yɔk pɑ Yeso Kristo a. Mfɑmfɑ́ ŋkhuŋnyə, a pɑ́ po'o po tɔm, ka po səŋ; po kaktʉɔ nə fa' Cyəpɔ bɑ gɔ pɑ dzə, bɑ jyə́ gɑ yɔ nə yɔgo' tə gɔ sɔ' cyə́ néné nə Cyəpɔ pɑ. Sɔ' m nə ma'tə ywə hɑ bi pɔ dɔlɔ̌ pyə wap Yerusalɛm, po pɑ gɔ ghiŋ nə ŋkhɛ yə ŋ də yap bi cu'tə po Kristo Galata lə. A pɑ nə dəŋdzə̀ tyɛ'dzʉ́ nə guŋ mgap dzʉ́ awɛ, bǎ ya mo lə́ nə po yap ywə yə e dwɔ' a jʉ̀m, po'o gɑ po kɑ pyap pɑ́ cwə yə gɑ̌ gɔ sɔ' a tə bɑ shu'tə ywə hɑ́hɑ̌ pɑ. Cwə yə gɑ gɔ sɔ' tə́ kəm wə po a, bvə ŋwa'nyə nə nthəm pɔ pyə pǒ cwɔ' wap a pu a ywə yə po cu'tə a Yerusalɛm; bi a nyəŋ gɑ́ kwa' myə ghɔ̌, bɑ pyə a pú gɔ pəmtə́ ghɔ. Gɑ̌ gɔ sɔ' sɔ' wə po, nə sɔ' cyə m Makedonya; gɑ gɔ sɔ' cyə wə cyə tə piŋ cwə wə po mu' cwə tə̌ cwə̀ ŋʉm cyə́ tə po hɑ sɔ̀ pa' gɑ gɔ nə ghɔ nə myə shɑ́ mtsʉ' a. Ŋ tə wə shəŋ nə́ nə yɔ wɔ cwəlɔ bɑ shyə cyə pɑ́, gɑ wə mɔktə́ nə na' shwə wə po a pɑ yə Cyəpɔ piŋ a. Da' gɑ́ gɑ gɔ cwə Efeso tə́ kəm nə Pantekɔtə nə pa' pu ghyɛ' mu' jyə bəm wə́ nə mfa' mə̌, mghɛ bò piŋ bɑ wə bɑ wap yɔm. Timotio la sɔ' wə po, po pɔmtə gɑ e kɑ nə pɑ cəcɑ̌ po bɑ bwɔk, nə pa' e bɑwə fá' nə fa' Cyəpɔ pa' myə a. Ka sɔmmo wak e. Po hɑ sɔ bi e gɑ́ e lɑ pɑ hwitə tə nə́ bɑnyə bəŋ m̀, nə pa' gɑ̌ wə byap e pu a mfɑmfɑ́. Sɔ' m nə fɑ yɔk pɑ Apolos, gɑ̌ ghɔm bi gɑ e sɔ' wə po pu a mfɑmfɑ́; da' gɑ e tə wə shəŋ nə sɔ' wə po cwəlɔ pɑ̀; e gɔ cwə sɔ' nə cwə yə e yɔ sɔ a. Po ti tə́ tì, po tɔm piŋnthʉm a puŋ, po pɑ́ pɑbɛ, po tʉɔ. Po ghə bǎ kɑ ywə lə́ pɑ́ nə ŋkhuŋnyə̀. Mfɑmfɑ́, mu' ywə yə gɑ̌ gɔ kwi' ghɔm bi po a yəŋ gɑ: Po zhyə gɑ Stefana pu yə́ tuŋdyə bɑ dzə nthɔ̌m Akaya; wap cəŋtə́ fa' bi pɔ dɔlɔ̌. Po yu'shwə nthi pɔ bɔ̌ ba yə pɔ pyə pu a pú nthamtə nə mfa' map ba nə ghəghʉɔ yap a. Nwə puŋ á pa' Stefana, Fortunatos ba Akakus bəŋ m̀. Wap bɑ́ nə yɔ tsʉ' pa' po ka pɑ́ si a. Wap kě nyəŋ lam tsɑ̌ ba tsɔ dyə́. Po zhyə nə piŋ pɔ pa' pyə bɔ a. Mcu'tə po Kristo Azia ca'tə wɔ. Akilas pu Priska wə shəŋtə́ sha'tə wɔ m nə Cyəpɔ ba cu'tə pɔ Kristo yə a ŋkho wə pú a. Guŋ mfɑmfɑ́ awɛ ca'tə wɔ. Po lɑ nə nuŋ mgho' dɔlɔ̌ nə sha'tə cəcɑ̌ po. Kwa' myə Polo nə dɑ pu a bvə ca'tə bi po. Mo pɑ tə kuŋ Cyəpɔ bɑ do thə́ e. Marana tà. Gho' Cyəpɔ Yeso pɑ́ bi po. Gɑ̌ ŋkhuŋ wɔ awɛ nə Yeso Kristo. Myə Polo, gɛ nthəm Kristo Yeso, pa' Si nə́ ŋkhùŋ a, pyə fɑ yɔk pɑ̀ Timotio, bi cu'tə pɔ Si yə ǎ Korinto a, ba m bi guŋ pɔ dɔlɔ̌ pyə wap nthʉm guŋ Akaya awɛ: gho' ba hwitə̀ pɑ bi po shyə m nə́ Si Tá yɔk pɑ̀ ba m nə́ Cyəpɔ Yeso Kristo. Byanyə bi Si, Tá Cyəpɔ yɔk pɑ Yeso Kristo, Tá cɔ́mmtso biŋ bɑ Si gɛ zhwyə́tə. E jwyətə wɔk pɑ̀ nə ghəghʉɔ, gə́ gɑ́ pɑ ku' nə zhwyətə guŋ pɔ awɛ pyə wap nthʉm ghəghʉɔ, shyə m̀ nə zhwyə́tə yə kwa' wɔk pɑ̀ ŋkwi bi Si a. Dəŋdəŋ pa' go' Kristo jɔm nə pɑ̀ a, a dəŋdəŋ pa' a shyə́ m nə Kristo nə zhwyətə yɔm nə pɑ̀ a. Pyə pɑ́ jɔ́go' bɑ pyə jɔgo' po'o nə yɔ zhwyətə ba nə ywə vɔk yɔ́. Pu zhwyətə wɔk bɑ á bɑ́ nə́ yɔ zhwyətə, yə a gə po piŋ nə yɔgǒ' yə pyə jɔ a. Pyə shəŋtə́ mɔktə nwə nə thə́ yɔ gɑ́: Pyə zhyə́ gɑ pɑ nthamtə nthʉm go' yɔk, biŋ nthamtə nthʉm zhwyətə yɔk. Mfɑmfɑ, pyə tə́ gɔ tʉm wɔ pɑ́: Go' yə pyə kɑ yɔ Azia a, kɑ cəŋtə dzɑ́ nə pyə tə́ shyə yɔk gʉ', tə la' pyə zhyə bɑ gɑ́ pɑ pyə vɔk. Pyə lə́ bɑwə byap pɑ vʉ̌. Pyə lá tə jɑwə́ jap tʉm nə yɔk gʉ' pɑ́, pyə bɑwə jap tʉm tsɔk da' nə Si yə e jam mo nə vʉ̌ a. Yʉ́ nə kɑ ŋkwi wɔk nə nthi vʉ̌ bɔ, biŋ bɑ gɔ la' pɑ kwi wɔk kwi; á bɑ pyə̌ yap yɔk nə mɔktə pɑ́ nə e, e gɔ la' kwi' kwi wɔk. Ba wɔ yɔ, po pɑ fa' nə́ nə́ pa' Si nə ŋkwi wɔk a shyə m̀ nə́ mcwyɛ'nyə̀ mɔ́ nə pyə. A pɑ po'o gho' yə pyə gɔ ghə cyə m̀ nə mcwyɛ'nyə pɔ jɔmyɔ̌m a cʉ' mfa' gho' nə pyə. Ywə yə pyə ŋwɛnyə nə a bɑ gɑ́ tʉ́m tsɔk ŋkwinthɛ́ mɔk gɑ: Ghiŋ tsɔk nthʉm dzʉ́ ba m̀ bə̌ŋ po bɑ ghiŋ tə ŋa'tə, ghiŋ nə́ dɔlɔ̌ Si, la' pɑ ghiŋ m̀ nə fʉ̌ monəŋ pɑ́; bɑ ghiŋ m̀ nə gho' Si. Ywə yə pyə bvə bi po á bɑ pɑ ywə yə po ŋkhe biŋ ju' a. Tə́ gɑ̌ kwɛ gɑ́ po ju' wɔk tə la' ywə tʉ nə́, nə pa' a kɑ́ bɑ pǒ yu' wɔk nthʉ́: Pyə bɑ yɔ ywə nə ŋa'tə dəŋdəŋ pa' po gɔ sɔ' pɑ yɔk ywə nə ŋa'tə nə tyɛ'dzʉ́ Cyəpɔ Yeso a. A kɑ́ shyə m̀ pa' gɑ shəŋtə jyə po'o a tə shəŋ nə ləŋdzə shyə wə po po'o gɑ po piŋ gə gho' m cʉm mbʉə. Piŋ lu wə po ghɔ Makedonya, a fɑ Makedonya pɑnyə wə po tə́ po ghə guŋ ywə yə a shəŋ tə myə nə̀ gɔ Yudea a. Ŋ khɑ ka'nyə po'o tə cəŋtə́ sɛ a? Kɑ guŋ mə̌ mka'nyə awɛ bɑ́ pɑ́ mka'nyə monəŋ tə́ a pɑ nə m̀ bɑ əŋ ba gɛ̌? Si bɑ ŋkwinthɛ̌ a: Ghɔm tsɔk nə po tə bɑ əŋ ba gɛ̌ pɑ̀. Nə pa' Mu Si, Kristo Yeso yə pyə a Silvano ba Timotio lə siŋ e bì po a la tə bɑ əŋ ba gɛ̌ pɑ́, é bɑ pɑ əŋ! Guŋ mka'nyə Si awɛ bɑ a lě bəmtə pɑ nə é. A shyə pɑ m nə é tə́ pɑ pɑ́ gɔm bi Si gɑ amɛn nə ghu'tə é. Mo yə e nyəŋ gʉ' nə pɑ shyə m nə Kristo a, biŋ bɑ jɔ wɔk pɑ a bɑ Si, yʉ́ yə e lə lɑ stam é gə́ mtiŋ nə pɑ biŋ nyəŋ zhwi'tə̀ zhwenyə nthʉ́m tʉm pɑ a. Sɔ' m nə́ myə, Si bɑ ŋkwinthɛ̌ nə vɔk a gɑ ŋ də shəŋ pɑ pɑpuŋ nə po tə la' biŋ bɑnyə Korinto. A tə́ bɑ m gɑ pyə lə́ bɑwə sa' piŋnthʉm yɔ pɑ́, pyə lə bɑwə bəmtə́ fa' m̀ nə yɔ ŋwɛnyə̀, nə pa' sɔ' m nə piŋnthʉm po bɑwə nthɔm pɑpúŋ. Sɔ' m nə m̀, gɑ̌ yap gɑ ŋ tə gɔ pɑnyə wə po nthʉm yɛlúŋ pɑ. A bi a pɑ́ gɑ́ gɑ̌ ghə po yɛlúŋ, bɑ wɑ́ gɔ ghə̌ myə ŋwɛnyə́ tə́ pɑ̌ pɑ́ mo yə́ gɑ gə e yɛlúŋ a? Nwə ŋwa'nyə a lə bɑ́ nə nə́ bwɔk gɑ ŋ khɑ nə ŋwak wə po bɑ jɛlúŋ nə pɔ pyə wap lə́ ghə ŋwɛnyə a. Gɑ̌ zhyə́ gɑ ŋwɛnyə a bɑ ŋwɛnyə yɔ. A po'o tə́ kwa' nthʉm ghəghʉɔ pu a nə kwɑ tʉ̌m tə́ ŋ khɑ bvə ŋwa'nyə bi po nthʉm shyətsə́, la' bvə po'o m nə nɑ dwɔplúŋ yɔ pɑ́, bvə po'o gɑ po nə jyə dəŋ ŋkhuŋnyə yə a bɑ gɑ̌ ghə nə́ po a. Mo hɔnwə, bɑ e tə́ hɔnwə́ da' bəm pɑ, da' gɑ ka pɑ ghə a sak pɑ té', e hɔnwə bi guŋ yɔ awɛ. A sɔ' m nə mo bɔ bi a cu'tə cɔktə e bɑ ǎ ku' pa' a. A po'o tə́ gɑ̌ gɔm bi po m̀ gɑ́ po nə shwyɛ' e, biŋ jwyətə e, po'o gɑ e kɑ ko nthʉm sʉəsʉə yɛ̌lúŋ. A po'o tə́ gɑ̌ wə gɔm bi po gɑ́ po la'tə e pɑ ŋkhuŋnyə̀, nə pa' gɑ̌ nə və bi po po'o nwə yə gɑ̌ shəŋ a pɑ nə yɔ bi a yɔ nə yu'shwə bɑ ŋkwicʉ̌m nthʉm mləŋtə a. Mo yə́ po cɔm e a bɑ gɑ̌ gɔ cɔm e! Nə pa' a pɑ gɑ́ gɑ̌ cɔm mo, bi a gɑ̌ cɔm e a, bɑ a lə bɑ m̀ nə po, Kristo pɑwə jɔ. Po'o gɑ Sata kɑ fʉ́tə wɔk pɑ. Nə pa' pɑ ka tʉɔnyə myə́ mkwɛnyə. Ŋ də́ ŋwak Troas nə siŋ wap Cùŋ pɑpuŋ Kristo, tə́ ba tə́ pa' Cyəpɔ lə́ ghyɛ' jyədyə̌ awɛ bəm, tʉm tsɑ̌ la tə́ kodyə, nə pa' ŋ da tə yɔ fɑ a Tito. A pɑ́ po'o da'nyə wap, dɑ m Makedonya. Pa'lə pɑ bi Si yə e shyə m nə Kristo bɑ nyəŋ wɔk pɑ nə yə́ nə cyə shù guŋ mcwə awɛ biŋ bɑ shyə m nə pɑ̀ sa zhwyə́ damnyəlamnyə nə zhyə́ é nə guŋ mtsʉ' awɛ. A po'o tə pɑ bɑ bi Si bɑ zhwyə́ Kristo yə pɑpúŋ bi pɔ pyə wap bvɔk nɑ tsap, ba m̀ bi pɔ bipǐ, bɑ zhwyə́ vʉ́ yə a dɑ mo gɔ nə vʉ̌ bi shɑ́ pɔ, biŋ bɑ zhwyə́ vɔk yə a dɑ mo gɔ nə vɔk a bi pyə́ shɑ pɔ. Tə wɑ̌ po'o bi a pɑ́ e ku' nə tsɔ fa' a? Pyə tə́ bɑ pa' pyə shɑ pɔ pyə wap fiŋ ghɔm Si a pɑ́. Pyə gɔm yɔk pɑ nyənyɔ, shyə m nə Si, dzə́ Si nə Kristo. Pyə gɔ piŋ ghə tə́ pú zhyə wɔk a? Kɑ dəŋdəŋ pa' shɑ pɔ a, pyə gɔ ghə ŋwa'nyə nə gə pu zhyə wɔk a fɑ m bi po tə pu nə jyə́ wɔk? Ŋwa'nyə yɔk bɑ wɔ, ŋwa'nyə bɑ pu və nthʉm mtʉ́m mɔk, ŋwa'nyə bɑ guŋ pɔ awɛ zhyə́ biŋ ŋkhé. Bǎ kɑlə ghə bɑ pǒ bɑ́ ŋwa'nyə Kristo bɑ e nə nthəm wɔk, ŋwa'nyə bɑ pu ka lɑ pɑ́ shyə ŋwa'nyə bvə pɑ́, bɑ pu lɑ pɑ́ Zhwenyə Si nthʉɔtʉɔ bvə̌. La' pu və m̀ nə mpak gwɔ' pɑ́, bɑ pu və m nə mbak tʉ́m mo. Yə̌ŋ bɑ ywə yə a bɑ pyə cəŋtə jyə́, shyə m̀ nə Kristo, dzə Si a. Yɔk gʉ' tə fɑ bi pyə pɑ, yɔk gʉ' fɑ m̀ bi Si. Yʉ́ nə́ gə tə́ pyə ku' nə pɑ mghɛ fa' Kɔ sə́, la' e ghə po'o shyə m̀ nə ywə bvə və̌ pɑ́, e shyə m̀ nə Zhwenyə, nə pa' ywə bvəvə̌ jwə́, Zhwenyə pɑ hɑ́ vɔk. A bi á pɑ gɑ́ fa' bú tsyə́ pu lə və nə gwɔ' á lě bɑ ywə gu'tə ghǔ'tə, tə bi a pɑ́ pɑ Israɛl lə lé sə Mosɛ dəŋdəŋ bɑ bwɔk ghu' yə a lə bɑ nə a, ba tə́ pa' ghú' bɔ lə bɑ́ pɑ́ ywə shyəcyə́ a, bɑ a gɔ pɑ m̀ gɑ kɑ nə fa' Zhwenyə? A bi a pɑ gɑ́ pu lě gu'tə fa' tsyə a nyə́ŋ shɛ a, bɑ á gɔ pɑ́ m gɑ́ kɑ nə fa' dəŋdəŋ? Pu gɔ ghu'tə tsa nə ghɔ pɑ́ m dzə. Gɛ̌, ywə yə ghu'tə lə pɑ̌ nə cwə dzə a, sɔm ghu'tə tə̌ nə cwəlɔ á, dzə̌ yəŋ ma ghu'tə tə́ fo'. Nə pa' a pɑ gɑ pu lə ghu'tə ywə yə a shyəcyə̌ a, bɑ dəŋ ghu'tə nə ywə yə a shwə mama a gɔ pɑ m gɑ́ kɑ? A shyə m nə dəŋ yəŋ mɔktə yə pyə mɔktə a pyə cəŋtə jyə gɑ́, pyə tə bɑwə gə m̀ pa' Mosɛ a pɑ; yʉ yə e lə dɑ pak ywə hwyə́ sə é, bɑ bwɔk gɑ pɑ Israɛl kɑ yɔ nə́ myəŋ ŋkha' yə a lə pɑ nə sə́ e po'o bɑ shyəcyə a. Da' gɑ zhyənwə yap lě ŋkho nthʉm jʉ́m! Nə pa' tə ŋkhəm tyɛ' ɔ, pu bɑ ŋkhe Bvo Kɔ pak ywə nə hwyə́ sə bɔ pɑ pɑ́ nə́. A bɑ pu ka wuŋ ŋa', nə pa' a gɔ la' mi pɑ nə Kristo. Əŋ, tə ŋkhəm cwəlɔ, wap bɑ ŋkhe ŋwa'nyə Mosɛ pak ywə pɑ pɑ́ nə tʉm tsap. A shyə pɑ da' nə pʉɔtʉ̌m biŋ Cyəpɔ tə pak ywə bɔ vʉ̀ si. Nə pa' Cyəpɔ bɑ Zhwenyə, tsʉ' yə Zhwenyə Cyəpɔ nə a nə́ nəŋ bɑ tsʉ' yə nə pɑ ŋkwɔ tə jɑ nə a pɑ́. A piŋ bɑ po'o, guŋ yɔk pɑ awɛ pyə a bɑ pɑ kɑ hwyə sə yɔk pɑ a, pɑ da'tə ghu'tə Cyəpɔ, bɑ pɑ̌ sɑnyə hwə cyəŋnyə bɔ, gə mɑ ghu'tə shyə m̀ nə Cyəpɔ yə e bɑ Zhwenyə a. A po'o pa' a shyə m nə cɔ̌mmtso tə́ fa' tsɔ pɑ bi pyə a, pɑ pyə lə pwá nə kaktʉɔ. Pyə lě ŋkhəŋnyə́ mfa' jʉ́m pu a mfa' kuso; pyə̌ giŋ tə nyəŋ mfʉ́m nə ghiŋ tsɔk, pyə lə nəŋ bɑ ŋkwyəpnyə ghɔm Si, nə pa' a shyə m̀ nə́ nə pɑ nyənyɔ tə́ guŋ pɔ awɛ yap tʉ̌m nə pyə dzə̌ Si. Bi a nəŋ bɑ gɑ yɔk Cuŋ pɑpuŋ yɑ̌ pɑ nthʉm jʉ́m bɑ a bɑ nthʉm o po'o m bi pɔ bipǐ, bi pɑ tə piŋ pyə a bɑ si yəŋ dzʉ̌ sonyə zhyənwə yap a, po'o gɑ wap kɑ yɔ ŋkha' Cùŋ pɑpuŋ nə ghu'tə Kristo, yʉ́ Kristo yə e bɑ cyəŋnyə̀ Si a. Gɛ̌, pyə tə siŋ pɑ thə nɑ yɔk pɑ, pyə̌ siŋ Yeso Kristo, Cyəpɔ. Sɔ' m nə pyə, pyə pɑ́ siŋ wɔ gɑ́ pyə bɑ mkwɔ́ pɔ, shyə m nə Yeso. Nə pa' Si yə e lə́ ghɔm gɑ́ khá' kyɛ' cəcɑ̌ jʉ̌m a, yʉ nə ŋkhyɛ' nthʉm tʉm pɑ tə́ gə pɑ zhyə́ ghu'tə yə a dəŋnyə nə sə́ Kristo a. Da' gɑ fʉ' bɔ, pɑ ŋkwa pɑ nə mkɔp cǎ', po'o gɑ tʉɔ gwyə yə a gə á, a pɑ pɑ́ yə Si, a kɑ pɑ yɔk pɑ́. Pu hyanyə wɔk mghəŋ mghə̌ŋ, da' gɑ pu ka wuŋ dzɑtə wɔk; pyə bɑ ba m nə thə́kə́ŋ, da' gɑ shwə shyəcyə; gɑ pu pɑ́ jəŋ wɔk, da' gɑ la' pu kwyatə wɔk; ntham wɔk sí, da' gɑ la' pu wuŋ miŋ wɔk. A bɑ guŋ mcwə awɛ pyə pɑ ŋkwa ghəghʉɔ vʉ̌ Yeso nə nɑ́ tsɔk, po'o gɑ vɔk Yeso pɑ nə nɑ tsɔk. A bɑ́ guŋ mcwə awɛ, wɔk pɑ pyə pɑ bɑ pɔ mtʉɔ a, pu pɑ hɑ wɔk pɑ nə vʉ̌ shyə m nə Kristo po'o tə́ vɔk Yeso ghə pu zhyə e nə vɔk yɔk pɑ yə a bɑ vɔk npfʉ́pfʉ̌ a. A po'o tə vʉ̌ bɑwə fa' nə pyə, da' gɑ́ vɔk nə pɑwə fa' nə po. Tə́ shyə m nə zhwenyə piŋnthʉm yə a bɑ pu və gɑ: Gɑ̌ biŋ, a shyə m po'o tə́ gɔmnwə a. Ba wɔk yɔk biŋ, a shyə m po'o tə pyə ghɔmnwə. Nə pa' pyə zhyə gɑ́ mo yə e lə yám Cyəpɔ Yeso nə vʉ̌ a gɔ sɔ' piŋ yam wɔk pa Yeso nə vʉ̌, piŋ yáp wɔk pa pu bəŋ é. A piŋ bɑ po'o, tə́ guŋ ywə awɛ yə pyə̌ bvɔk nə a, a bɑ po'o pɑ nə po, tə́ byanyə lo nə po shyə m nə cu'tə gwyə, fa' gho' nə ghu'tə Si. A po'o tə pyə tə bɑwə bwa nə kaktʉɔ pɑ; tə bi a pɑ pɑ́ gɑ mò m nə bap wə gɔ mimi bɑ mò m̀ nthʉm o syanyə guŋ mcwə awɛ. Nə pa' ghəghʉɔ yɔk pɑ cwəlɔ ka ku' sɔmywə nə dəŋ mɑ ghu'tə mama yə a bɑwə nyaptə yá bi pɑ a. Ywə yə pɑ shəŋ a tə bɑ ywə yə pu wə jɔ a pɑ́, a bɑ ywə yə pu tə jɔ a pɑ, nə pa' ywə yə pu jɔ a gɔ sɔ' mi, tə́ ywə yə pu tə́ jɔ a pɑ́ bɑ mama. Nə pa' a bɑ pɑ̌ zhyə gɑ a bi a tsʉ' shwə́ yɔk pɑ dəmcǎ' yə a bɑ pɑ nthap a sa'tə, bɑ pɑ̌ ghə ta' pà', yə a bɑ mfa' Si, tsʉ' shwə́ mama thə́ kɛbəŋ yə tə bú mo nə ŋkwɑ ya a pɑ́. Pyə piŋ bɑwə shwiŋ biŋ sʉ́m te'te' nə kwá yə tsʉ' shwə yɔ́k yə a bɑ kɛbəŋ a də̌m pyə nə yə tsʉ' cwə dəmcǎ', po'o gɑ pu nə yɔ̌ wɔk pyə pɑ́ bɑ pyə̌ kwa dzə́, pyə kɑ pɑ soso é. Nə pa' wɔk pyə́ pyə̌ bɑ nthʉm yəŋ nthap a, pyə bɑwə shwiŋ, bɑ jɔgo'. A pɑ́ gɑ pyə tə bɑwə shəŋ nə tɔk dzə nə pyə pɑ́, pyə shəŋ pɑ nə kwa mu' dzə́ dəm yə́ mu', po'o gɑ ywə yə a bɑ ywə pfʉpfʉ̌ a, nuŋtə́ nthʉm vɔk. Mo yə́ é nyaptə wɔk pɑ nə ywə yə a gɔ ti tə sɔ' a, a bɑ́ Si yə e hɑ zhwi'tə Zhwenyə bi pɑ a. A po'o tə pyə̌ shəŋtə bɑwə jyə́ gɑ sɔmywə tə gɔ ghə pɑ́, ba tə pa' pyə wə jyə́ gɑ guŋ cwə awɛ yə pyə wə shwə nthʉm nɑ́ yəŋ gɑ̀ a, bɑ pyə tə bɑ kwa' nə tsʉ' shwə yɔk pɑ, bɑ pyə̌ bɑ tə gʉ́ə sʉəsʉə nə Cyəpɔ. Nə pa' pɑ giŋ m̀ nə́ piŋnthʉm, pɑ tə́ giŋ m nə ywə yə pɑ wə́ jɔ a pɑ́. Əŋ pyə cəŋtə jyə́ gɑ́ ywə tə gɔ ghə pɑ́, biŋ bɑwə sʉ́m nə təm nə yəŋ tsʉ' cwə yə a bɑ nɑ́ tsɔk a gɔ shwə bəŋ Cyəpɔ. A po'o tə ywə yə pyə shəŋ a, kɑ pyə təm pɑ́ nə yɔk tsʉ' cwə́, kɑ pyə wuŋ pɑ nə lə, bɑ a bɑ́ gɑ́ pyə púŋ Cyəpɔ. Nə pa' pu gɔ sɔ' fyɛ' wɔk pɑ̀ dzə̌ dyə fyɛ' Cyəpɔ, pɑ jɔ́jɔ́, po'o gɑ bǎ wɑlɑ́ kwi mcwɔ'fa' nə ywə yə e lə ghə cwə yə e lə́ jɑ nthʉm nɑ́ e a, gə a pɑ yə pɑpuŋ kɑ yə cwəpuŋ lə. Pyə bɑ pyə̌ zhyə nə pwɔk Cyəpɔ biŋ bɑ shəŋ nə ghə gɑ́ pɔmnəŋ zhyə́. Pyə bɑ dzə̌ Cyəpɔ tə pɑ̌ dʉm sɔmywə; biŋ bɑwə sɛ gɑ́ gɑ̌ bɑ nthʉm tʉm po tə tʉm sɔmywə. Pyə tə́ bɑwə siŋ wɔ pɔ pyə pyə̌ bɑ wap a pɑ́. Pyə shəŋ da' nə hɑ sɔ bi po gɑ po ŋwɛnyə nə pyə, biŋ jyə́ ywə yə bi a pɑ́ po pa' bi pɔ pyə yap ywə́ ŋwɛnyə̀ bɑ pɑ də̀m sə́, a lɑ pɑ tə nthʉ́m o a pɑ́. A pɑ gɑ pyə lě jʉ̌m bɑ a lə bɑ nə Si, bi a pyə nəŋ gə́ zhyənwə, bɑ a bɑ nə po. A ŋkhuŋnyə Kristo cəŋtə́ ŋkwɑ wɔk pɑ nə zhyə́ gɑ́ ta' mo lě pfʉ́ nə thə guŋ pɔ awɛ, a pɑ da'tə gɑ́ guŋ pɔ awɛ lě pfʉ́. A piŋ bɑ́ bɑ e lě pfʉ́ po'o tə pɔ pyə wap yɑ̌ nthʉɔ a kɑ piŋ bvɔk pɑ da' nə yap nə pɑ́ pɑ; wap vɔk m nə yə nə pɑ mo yə e lə pfʉ̌ biŋ jám nə vʉ̌ nə pu a. A po'o tə́ tə fɑ cwəlɔ, ka pɑ piŋ jyə́ sɔmmo m̀ nə nthi nə zhyə́ monəŋthə́ pɑ. A pɑ gɑ́ pɑ lě jyə́ Kristo m pa' monəŋthə a, bɑ cwəlɔ, pɑ tə gɔ piŋ zhyə e m pa' monəŋthə a pɑ́. A bɑ po'o tə a bi a mo pɑ m nə́ Kristo bɑ a bɑ e cʉ' mo sə́. Bvo dzʉ̌ bɑ ǎ cyə, ywə yə a bɑ cwəlɔ a bɑ pɑ ywə sə́. Guŋ e awɛ fɑ m̀ bi Si yə e lə́ cyə m nə Kristo pa pú wɔ' bvɑnyə, e piŋ hɑ fa' bvɑnyə bi pɑ a. Nə pa' Si nə lə shyə m nə Kristo tə gwɔ' bvɑnyə cəcɑ̌ wap pu dzʉ̌, e lə piŋ nyəŋ mhɔ pɔmnəŋ nə pu pɑ́, e nyəŋ pɑ ghɔm bvɑnyə nə pɑ̀. A shyə m̀ nə tsǒ Kristo tə pyə pɑ mghɛ nthəm, da' gɑ pɑ kwa' Si nə pɑ́ shyə m̀ nə pyə gɔm nwə bi po. Pyə̌ cwyɛ'nyə wɔ nə tsǒ Kristo, po tak gɑ po a Si wɔ'bvɑnyə́. Mo yə e la tə zhyə mhɔ a, e lé shyə m̀ nə pɑ̀ dɑ e gə mhɔ, po'o gɑ pɑ cyə́ m̀ nə é shʉ' dəŋdəŋ Si. Pa' pǎ pú nə bɑwə bəmtə́ fa' a, pyə wə səso wɔ gɑ po kɑ́ tak gho' yə po ŋkwi bi Si a a cyə́ pɔpɔ. Nə pa' e gɔm gɑ: A gɔ cwə ku' cwə pɑpuŋ ŋ ju' gi o, a piŋ bɑ nə tyɛ' ywə vɔk a sɔ' ŋkwitə o. Yɔ cwə pɑpuŋ yə̌ŋ. Yɔ tyɛ' ywə vɔk yə̌ŋ. Pyə tə́ bɑwə shəŋ nə fa'tə sɔmmo pɑ̀, po'o gɑ fa' tsɔk pɑ́ tə bya. Pyə̌ bɑwə gə nə zhyə wɔk pa' mghɛ fa' Si a nə guŋ ywə awɛ. Bɑwə ŋkhaktʉɔ nə gǒ', nə ghəghʉɔ, nə zhwiŋ, nə mshɔm, nə cɛ̌, nə va', nə pwá, nə lwɔk sɛ́, nə cwə tə tsʉ̌ ywə́, shyə m nə́ nə pɑ tə mviŋ, nə zhyə̌nwə, nə nə kyəp tʉ̌m, nə cɔ̌mmtso, shyə m nə Zhwenyə dɔlɔ̌, nə ŋkhuŋnyə tə ghə mfʉ́m, nə ghɔm nyənyɔ, tʉɔ Si, nə tsə shù nə do' ba tsyə nə byap tsyə dəŋdəŋ, nthʉm nə ghu'tə ba nə wak, nthʉm nə la'tə wɔk nə pɑpǔŋ, bɑ m̀ nə cwəpùŋ, nə lɑ wɔk gə mcwanwə tə́ pyə pɑ pɔ nyənyɔ. Nə́ nə cyətə zhyə̌ wɔk tə bɑ pu cəŋtə jyə́ wɔk, nə pɑ pɑ́ nə cʉ' nə pfʉ́ tə jɑwə nthʉɔtʉɔ. Nə nyəŋ shɛ́ thə pyə da' gɑ jɑ tə zhwətə wɔk. Nə lwɔp lúŋ yɔk da' gɑ pyə pɑ ŋwɛnyə ŋwɛnyə, pyə pɑ mpə̌ŋ tə bɑ́ gə pɔ jɔmyɔ̌m zhí, bɑ pyə ka ghə ywə da' gɑ́ guŋ tsə awɛ pɑ bi pyə́! Pyə ghɔmnwə bi po, pɑ Korinto tə pwɔk, gyɛ' guŋ tʉm tsɔ awɛ bi po. Pyə ka kɔmtə́ tʉm tsɔk nə po, wɔ nə ŋkhɔmtə tsɔ. Po pa' bi pyə: Gɑ̌ gɔm bi po pa' bi po pɑ̌ a, ba wɔ yɔ, po ghyɛ' tʉm tsɔ. Ka po a pɑ tə piŋ ko msǒ; pɑ nwə dəŋdəŋ pu nə cyətə pǐŋ Si yu'tə nə kɑ? Pɑ́ ŋkha' pu jʉ̌m tamtə nə kɑ? Pɑ́ Kristo pu Beliar pɑ́ ŋkwishwə nə kɑ? Pɑ́ biŋpǐŋ pu tə piŋ pɑ́ nə kɑ? Pɑ́ Dyə Si pu a mkətwɔk pəmtə nə́ kɑ? Nə pɑ pɑ̀ bɑ Dyə Si nthʉɔtʉɔ dəŋdəŋ pa' yʉ́ Si gɔm gɑ: Gɑ gɔ sɔ' cwə́ cəcɑ̌ pú, piŋ pɑ́ ghiŋ cəcɑ̌ pú, gɑ gɔ sɔ' pɑ́ Si yap, wap pɑ pɔ pɑ̌. Cyəpɔ gɔm gɑ: Po təm cəcɑ̌ pɔ bǎ, shwə nə yɔ tsʉ'; ka po kwak sɔmywə mviŋ, tə̌ kwa' myə̀ sɔ' nyəŋ wɔ dyə́. Gɑ gɔ sɔ' pɑ́ tá yɔ, po pɑ́ po pɑ̌ pyə pɑ bɛ ba pyə pɑ jwǐ, Cyəpɔ nthʉɔtʉɔ nə gɔm po'o. Pa'a bɑ pɑ̌ ghə mɔ mka'nyə a, wɔ pyə gɑ̌ ŋkhuŋ wɔ pɑpuŋ a, pɑ lɔnyə nɑ tsɔk pɑ nə guŋ mviŋ awɛ nə bap nɑ́ ba m nə́ zhwenyə, pɑ miŋ nə lɔnyə nɑ́ tsɔk pɑ nthʉm nə pwɔk Si. Po ghə ta' tsʉ' bi pyə nthʉm mtʉm mɔ́; pyə kɑ hɔnwə bi sɔm mò; pyə ka tsʉ́ sɔm mò, pyə kɑ lɑ ywə sɔm mò. Ŋ tə gɔm po'o bɑ nə nyəŋ pɑ́ shɛ thə po pɑ́ nə pa' a bɑ ŋdě da' siŋ wɔ: Po bɑ nthʉm tʉm pyə nə vɔk ba nə vʉ̌. Yɑ nə yap tʉm nə po bɑ a ghu' té', dəŋ pa' gɑ̌ dɑ wɔ fyə́ a bɑ a ghu'; gɑ bɑ gɑ ló nə Zhwyətə, yɑ nə ŋwɛnyə̀ nthʉm ghəghʉɔ ghu' tə'. Nə pa' pyə lə ŋwak Makedonya pyə lə ghə bǎ muywə ŋwɛnyə, pyə lə yɔ pɑ nthinthi ghəghʉɔ: Shù pɑ́ dzʉ́, pwɔk pɑ dyə. Da' gɑ Si yə e jwyətə pɔ pyə wap fi'nɑ́ tsap hɑ si a, lə́ lɑ̌ pa' Tito sɔ' a nə jwyətə wɔk, tə da' pa' e lə sɔ' a pɑ, m nə́ kaktʉɔ yə po lə hɑ bi a; e lə siŋ wɔk dəŋ pa' a lə bɑwə nthəŋ wɔ a, siŋ wɔk shyətsə yɔ, yɔ nə ŋkhʉ́dʉ̌ nə fa', siŋ wɔk po'o tə biŋ ŋwɛnyə nə dɑ m dzə̀. Əŋ, a pɑ́ gɑ́ ŋwa'nyə a lě gə po yɛluŋ bɑ ŋ tə̌ wə́ di' pɑ́. Bi a nəŋ bɑ gɑ́ gɑ̌ wə dǐ', pa' gɑ nə jyə́ gɑ́ ŋwa'nyə bɔ lə ghə po yɛluŋ a, bɑ gɑ̌ wə ŋwɛnyə cwəlɔ, la' ŋwɛnyə m pa' a lə ghə po yɛluŋ a pɑ, ŋwɛnyə m pa' a lə ghə po pʉɔtʉm a. Nə pa' yɔ nə yɛluŋ lə bɑ yə Si; a po'o tə nə yɔk nə pɑ́, pyə lě tə ghə sɔmywə bɔk pɔ̌k nə po. Nə pa' nə yɛluŋ yə Si shəŋ a, gə mo pʉɔtʉ̌m yə a shya mo nə ywə vɔk, la' a ghə mo ti' pi a. Yɛluŋ yə a bɑ yə́ dzʉ́ yəŋ a hɑ vʉ́. Po yɔ pɑ ywə yə nə yɛ́luŋ pa' Si shəŋ á gə nə po: Mu'nthi nə lo'nyə! Mu'nthi nə tɛ nɑ́ tsɔ́! Mu'nthi kuso! Mu'nthi pwɔk! Mu'nthi nə cəŋ nə yɔ! Mu'nthi kaktʉɔ! Mu'nthi nə nyəŋ shɛ! Pǒ la'tə pɑ kwa' wɔ gɑ́ po la tə́ bɑ pó hɔ sɔmywə pɑ̀. Nə cyətə ywɔk nə́, a bi a pɑ́ gɑ ŋ dě bvə bi po, bɑ a lá tə́ bɑ nə nə ŋkham shɛ kɑ m̀ nə mo yə pu ŋkham e a pɑ́. Ŋ də nə gə gɑ kwa' wɔ zhyə dzə̌ Si dəŋ e po nə ŋkhaktʉɔ nə pyə a. Yəŋ bɑ ywə yə a jwyətə wɔk a. Mu' piŋ ŋkwi' nə nə zhwyətə̀ bɔ gɑ̀ pyə̌ cəŋtə ŋwɛnyə́ nə zhyə́ gɑ nthi pa' po lə nə gə nə Tito a le ŋwɛ́nyə tʉm tsyə́. Bi a pɑ̀ gɑ kwa' myə lě dɑ wɔ fyə́ dzə̌ e, bɑ sǒ kɑ kú a, nə pa' cwə yə́ pyə gɔm pɑ nwə nyənyɔ bi po a, yɑ nə lɑ wɔ fyə́ dzə Tito lə bɑ kwa' nə tsʉ' é. Nə pa' cwə yə́ e ŋkhamtə pa' po lə́ nə́ ju'nyə́ é nə guŋ mnwə awɛ, ŋkhamtə yɔ nə pwɔk bɑ nə səŋ tə nə́ dɑ é po'o a, biŋ shəŋtə ŋkhuŋ wɔ. Gɑ̌ wə ŋwɛnyə nə zhyə gɑ nə guŋ mnwə awɛ pɑ̀ nə bəmtə́ bɑ́. Pyə̌ shəŋ nə́ ghə po zhyə gho' yə Si lə nə go' mcu'tə Makedonya. Nthʉm ghəghʉɔ nthinthi yə a shʉ'nyə wap a, ŋwɛnyə gwyə yap pu a pə́ŋ yap tə dhə̀ lé do tə ja' nə hɑ ywə nə́ fa'. Wap ghə dəŋ yə wap ku'nyə nə a, tə́ a cyə ba ywə yə wap ku'nyə nə a, gə po'o pɑ cwə o cwə o, shəŋtə́ həŋtə bi pyə gho' gɑ́ wap yáp yap pu nə fa' bɔ po'o nə́ nə ŋkwitə́ pɔ dɔlɔ̌. Wap lě gə ywə yə pyə la tə́ kwɛ a, nə ləŋdzə hɑ nɑ tsap bi Cyəpɔ, ba m bi pyə, shyə m nə pa' Si lə nə jap a. A po'o tə pyə cwi'tə bi Tito gɑ́ fa' kwitə tsyə e lə tǒ' wə po a, e nə gɔ tə miŋ pɑpúŋ pa' e lə to' a. Tə́ dəŋdəŋ pa' a bɑ po ghə guŋ ywə awɛ: gə Pǐŋnthʉm, gə nə zhyə nə ghɔmnwə, gə nə ləmnyə nə fa', gə ba ŋkhuŋnyə yə á fɑ bi pyə à a yɔm a, po ghə bɑ nə fá'fa' kwítə̀ a yɔm nə́ yəŋ sɔ. Ŋ tə gɔm m̀ gɑ́ gɑ̌ yap po'o pɑ, gɑ̌ siŋ wɔ yə nə ləmnyə nə fa' pyə shɑ pɔ po'o tə a hɑ́ bi po nə la'tə gɑ́ kwa' wɔ bɑ po zhyə nə hɑ ywə. Po zhyə yə nthi nə hɑ ywə Cyəpɔ yɔk pɑ Yeso Kristo, yʉ́ yə e bɑ ě zhi da' gɑ bʉɔ shʉ' bəŋ tə́ po cyə m nə pə́ŋ e shʉ' pɔ jizhǐ a. Yɑ̀ pa' gɑ̌ wə nə jɔ́ a wə bɑ gɑ́: Po lə́ bɑ́ dəŋdzə nə yap fa' bɔ, biŋ gə po'o tə́ gu' po'o; a pɑ ywə yə ǎ ku'nyə nə po a. Kwa' cwəlɔ, po miŋ nə ghə fa' tsɔ, po'o gɑ ywə pɑpuŋ yə po jap a po fa' pa' ǎ ku'nyə nə po a. A bi a ywə yə mo sɛ nə ghə a pɑ kwa' ywə pɑpuŋ, bɑ pu gɔ kwi o ba ywə yə o ghə a kwa' pɑpuŋ; tə́ sɔ' m nə yə mo ka ghə á, a lə pɑ́ shɛ. A tə bɑ gɑ pu gɔ lɑ wɔ yɔgo' tə́ pyə shɑ́ pɔ pɑ́ pɑpuŋ pɑ́, a bɑ̀ da' gɑ a kɑ tsɑ́ ŋkwi thə́. Nə cwəlɔ ywə yə pǒ ghə a cyə́ a gɔ cu'nyə yə wap ghə a kɔk a, po'o gɑ a la' bɑ mu' tyɛ'dzʉ́ ywə yə wap ghə a cyə a cu'nyə yə po ghə a kɔk a: Po'o gɑ nwə pɑ́ dəŋdəŋ, pa' a bɑ pu və gɑ: Mo yə e lə cu'tə́ tə a yɔm a la tə ghə tə a cyə; mo yə e shu'tə a kɔk a lə yak sɔmywə. Pa' lə́ bi Si yə e lə nyəŋ nə ləmnyə nthʉm tʉm Tito nə po a. E lě bíŋ pa' pyə lə nə ŋkhe e a, biŋ do'nyə, tə mo nthənyə e thə́nyə nə ghɔ wə pó. Pyə lě nthəm wap pu mu' fɑ̀ yɔk pɑ yə́ guŋ mcu'tə awɛ gu'tə tso tsyə nə cúŋ pɑpuŋ a. Pɑpúŋ kwi' bɑ gɑ́ mcu'tə nə lə́ shwɔ' e gɑ e pɑ so ghiŋ yɔk nə ghɔ nə tsɔ fa' tʉm pɑpuŋ nə hɑ ywə, fa' tsyə pyə gə po'o nə nə gu'tə Cyəpɔ ba m gɑ́ mkwɛnyə pɑpuŋ mɔk pəmtə́ a. Pyə́ wə shəŋtə bɔmtə́ gɑ sɔm bya kɑ pɑ̌ nə pyə nə nə́ lɑ yəŋ mɑ dəŋ ŋkhap yə pu jap wɔk nə a nə fǎ'. Pyə wə shəŋ gɑ́ a pɑ pɑpuŋ nə mnyə Si ba nə mnyə pɔmnəŋ. Pyə á pyə́ shɑ pɔ pyə pu shwɔ wap a pəmtə́ nthəm fɑ́ yɔk pɑ yə pyə jɔ yə nə ləmnyə nə fa' mcʉmmcʉ̌m, e piŋ bɑwə cwəlɔ ŋkwi' bɑwə da'tə a, nə pa' ě yap tʉm nə pó. Tito bɑ so ghiŋ a biŋ bɑ so fa' a bəŋ po. Mfɑ pɔk pɔ gɑ pɑ́ pɔ pyə mcu'tə nthəm wap a, bɑ ghu'tə Kristo. Po la'tə mtiŋ yɔ nthi ŋkhuŋnyə ba mtiŋ pa' pyə dɑ wɔ nə fyə́ bəŋ pu a bi pu dzə̌ cu'tə. A sɔ' m̀ nə ywə nə ŋkwitə́ pɔ dɔlɔ̌ bɑ a ka kwitə gɑ bvə bi po nə́. Gɑ̌ zhyə́ mkwɛnyə pɑpuŋ mɔ, a piŋ bɑ ywə yə gɑ nə fyə́ nə po dzə̌ pɑ Makedonya a; ŋ də́ siŋ wap gɑ́ yə wə pɑ Akaya lə́ bəmtə tə́ gu' po'o, bɑ yɔ nə kaktʉɔ nə́ lə jam bo'gwyə mcu'tə. Gɑ̌ wə nthəm mfɑmfɑ bi po po'o gɑ nə fyə́ yə gɑ̌ gə nə po a kɑ pɑ́ pɔpɔ, a piŋ bɑ pa' ŋ də ghɔm a po nə cwə̌ bɑ byap nyənyɔ. Gɑ wə bwɔk da' gɑ pɑ́ tyɛ' pyə a pɑ Makedonya pəmtə sɔ̌', nə ŋwak tə nwə guŋ bəmtə́, yɑ pa' ŋ khɑ cəŋtə gɔm a cʉ' kuso bi pyə ba m̀ bi po. A po'o tə́ ŋ khɑ ləŋdzə nthəm mfɑmfɑ́ gɑ wap pɑ nthamdzə wə po, nyaptə yɔ ywə hɑhɑ̌, po'o gɑ cwə yə ywə yə po lə ka'nyə nə hɑ a, po cwə tə hɑ a kɑ pɑ̌ pɑ́ tsə nám. Po kamtə́ gɑ mo yə e dɑ́ nám dzə ywə a da' ŋkhap pɑ tsə nám, mo yə e nəŋ dzə ywə a yɔm a la' ŋkhap a yɔm. Bǎ ya mo lə́ nə po hɑ ywə pa' tʉm tsyə́ nə sa' e a, hɑ tə pɑ̌ jwiŋ, e kɑ hɑ m pa' pu nthənyə é thənyə a, nə pa' Si ŋkhuŋ mo yə e dɑ ŋwɛ́nyə̀ tə́ nə hɑ ywə a. Si ghə tʉɔ nə nə́ shəŋtə́ ŋkwi tsə gho' bi po po'o gɑ́ po ghə ywə yə a gɔ kwitə wɔ á a yɔm tə biŋ bvʉ' yə po gɔ hɑ nə mfa' pɑpúŋ a. Dəŋdəŋ pa' a bɑ pu və gɑ: Ě ghap, e hɑ ywə bi mpə̌ŋ nwə dəŋdəŋ e shwə mama. Mo yə e hɑ gwya ywə bi dzə̀ywə́ biŋ bɑ hɑ msɛ́ pa' ywətsʉ a gɔ hɑ́ gwya ywə bi po, piŋ ghə a sé, piŋ ghə̌ nthɔ̌m nwə dəŋdəŋ yɔ kwyə́. E gɔ ghə po zhi nə guŋ ywə awɛ yə a bɑ yə pɑpuŋ a, po'o gɑ pɑ pɑ̀ hɑ pa'lə bi Si. Fa' ywə yə pu shu'tə hɑ a tə bɑ da' nə hɑ bi pɔ dɔlɔ̌ pɑ, a bɑ ba nə ghə pu hɑ pa'lə bi Si. Wap gɔ piŋ fa' bɔ, ghu'tə Si nə yɔ nthi nə yu'nyə nə Cùŋ pɑpuŋ Kristo ba nə yɔ nthi nə hɑ ywə nə cwə tamtə po a pú ba guŋ pɔ awɛ. Wap shyə m nə nə cwyɛ'nyə Si nə thə yɔ, la'tə gɑ wap ŋkhuŋ wɔ, shyə m nə mɑ du gho' yə Si hɑ bi po a. Pa'lə pɑ bi Si nə pa' e hɑ tə sɛ dəŋ a. Kwa' myə̀ Polo gɑ wə dɑ byanyə́ ba tʉm pɑpuŋ nə Kristo nə həŋtə wɔ, myə̀ yə gɑ fi' nɑ́ a hɑ si cwə yə gɑ̌ cəcɑ̌ po a tə bɑ́ gɛ ŋʉ'tə nə yɔ nwə cwə yə gɑ̌ bɑ gʉə sʉəsʉə a; Gɑ̌ səso wɔ, a ka puŋ gɑ́ cwə yə gɑ̌ pɑ́ cəcɑ̌ po a dɑ ŋʉ'tə bɔ ŋkho nə pɔ pyə wap jɔ yap gɑ pɑ nwə monəŋthə́ nə shya wɔk pɑ a. Ba pa' pyə bɑ pɑ pɔmnəŋthə́ a, pyə tə do'shù m pa' monəŋthə́ a pɑ́. Gɛ̌, tsə shù tsɔk tə fɑ m bi monəŋthə́ pɑ, gʉ' tsə shù tsɔk fɑ m bi Si nə nə́ sa'tə pɔ pyə wap sɛ gɑ a bɑ wap ku' a. Pyə sa'tə msɛnwə ŋa'nɑ́, ba guŋ tʉɔ ŋa'nɑ́ yə a ŋkhɔ nə zhyə Si a. Pyə gəm guŋ kwɛnyə awɛ, gə gɑ a yu'nyə Kristo, biŋ nə cwə̌ bɑ byap nə nyəŋ shɛ thə guŋ nə cyətə yu'nyə nə cwə yə po gɔ la'tə gɑ po yu'nyə kwa' pɑpuŋ a. Po le nwə pɑ kwa' dəŋdəŋ. Mo yə e sɛ́ gɑ́ e bɑ m̀ bi Kristo a, e zhyə po'o ŋkwi cʉ̌m gɑ e pɑ bi Kristo bɑ ba wɔk yɔk bɑ bi Kristo. A pɑ́ gɑ gɑ̌ wə ŋa' nɑ a nə tʉɔ yə́ Cyəpɔ hɑ bi pyə nə nə ŋkwyətə wɔ, tə́ la' a pɑ nə nə gə cwəpuŋ nə po, bɑ sǒ tə wə ŋkhú a pɑ́. Ŋ tə bɑwə shəŋ m nə́ lɑ mŋwa'nyə mə̌ hɛ́ wɔ pɑ̀. Nə pa' pu gɔm gɑ́ mŋwa'nyə bɔ tsɑ́ biŋ nthʉɔ té', da' gɑ cwə yə ě si a, e pɑ mo bwapwǎ, ba ghɔm tsyə́ lə pɑ sɔmywə. Tə mo bɔ cəŋtə jyə́ gɑ́ pyə pɑ gʉɔ sʉəsʉə bɑ pɑ́ gɑ kɑlə́ nə ghɔm tsɔk nə mŋwa'nyə, bɑ pyə gɔ sɔ' tə pɑ́ si pɑ́ pɑ po'o nə mfà' mɔk. Pyə tə́ bɑwə shəŋ nə fo' shɑ pɔ kɑ nə pɑ́ pa' wap a pɑ́, shɑ pɔ pyə wap da'tə nɑ́ tsap pɑ wap; bɑ jɔ nɑ tsap pa' fo guŋ ywə awɛ a, wap bɑ mpʉə pó! Sɔ' m nə pyə̌, pyə tə gɔ fyə́ tə twɔk dhə̀ pɑ̀; pyə gɔ fyə́ pɑ nə dəŋ fo' pa' Si hɑ bi pyə tə pyə sɔ' tə ŋkhəm bi po a. Nə pa' pyə tə́ gɔ twɔk yɔk dhə̀ pa' cwə yə a bɑ pyə ka sɔ' tə́ ŋkhəm wə po a pɑ́. A nyənyɔ gɑ wɔk nə dəŋdzə̀ dɑ Cuŋ pɑpuŋ Kristo nə sɔ' ywə po. Pyə tə bɑwə dɑ pɑ́ fa' mo dyɛ' fyə pɑ́. Pyə bɑwə mɔktə́ m gɑ́ pyə gɔ cyə m nə́ nə lɑ yɔ piŋnthʉm gɔ dzə̀ kwyə́ nə po, nə yɔk nthi fo', kwyə nə ghɔ m̀ dzə̀, po'o nə lɑ Cuŋ pɑpuŋ gɔ tə ntwɔk yɔ dhə̀; tə́ tə lɑ mfa' mo dyɛ' ŋa' nɑ yɔk. Mo yə e gɔ ŋa'tə nɑ e a lɑ Cyəpɔ ŋa'tə́ mo yə e da'tə nɑ e pɑ yʉ a tə bɑ e ghə ywə tə bi a pɑ mo yɔ pɑ́; mo yə Cyəpɔ da'tə e a nə bɑ mo yə e ghə ywə a. A la' pe' bi a pɑ po na' biŋ pʉə a! Po piŋ a po'o! Gɑ̌ wə go' wɔ pa' Si a; ŋ də phə̌ wɔ bi mu' mbɛ pa' pu bhə́ go a, bɑ gɔ la'tə wɔ bi Kristo pa' go tə zhyə́ mbɛ a; tə́ gɑ̌ wə bwɔk gɑ dəŋdəŋ pa' nɔ́k lə lɑ fʉ́ é fʉ́tə Eva a, pɑ́ mkwɛnyə mɔ lə pəmtə nə yə nə fi' nɑ hɑ́ si Kristo. Nə pa' mu' mo wuŋ sɔ' siŋ wɔ mu' Yeso yə dyɛ' tə e bɑ yə pyə lə siŋ e bi po a, kɑ po kwi pɑ mu' zhwenyə dyɛ', a lə pɑ yə po lə kwi a lə, kɑ mu' Cuŋ pɑpuŋ tə a bɑ yə po lə kwi a lə, pǒ guŋ nthɔm pɑpuŋ. Tə́ gɑ̌ yɔ gɑ mu' ywə yə pɑ ya'nyə mghɛ nthəm ba ghə bɑ ŋ kha ghə a tə̌ wə pɑ. A sɔ' m̀ nə nə́ yɛshwə, pyə lə pɑ́ ywə! Da' gɑ sɔ' m nə zhyə̌nwə, bɑ pyə̌ ghə zhyənwə. Pyə la'tə bi po nə guŋ ywə awɛ. A lə bɑ mhɔ bəm nə́ fi' nɑ́ a hɑ si tə́ nə ŋa' wɔ hɑ thə shyə m nə nə siŋ wɔ Cuŋ pɑpuŋ Si tə kwǐ ywə a? Ŋ dě ŋkwi ywə bi pyə shɑ́ mcu'tə, biŋ yɑ ywə nə bvɔk bi pú tə́ nə fa' bi po. A piŋ bɑ po'o bɑ cwə yə ŋ də pɑ wə po tə ywə bəm a da tə kwi ywə bi sɔmmo, nə pa' mfɑ̌ pyə wap lə fɑ Makedonya a, lə hɑ ywə yə a lə bɑwə jak a; a pɑ́ po'o la' ŋ biŋ nə tsɑ nə po nə sɔmywə, la' bɑ gɔ ti tə́ piŋ pɑ́. Shyə m nə nyənyɔ Kristo yə a nə m̀ a, gɑ̌ zhyə po'o: pɑ mo lə kwi yəŋ gɑ fyə bəm wə pɑ Akaya. Nə nwə kɑ? Gɑ ŋ kha kuŋ wɔ lə? Si nə jyə́! Ywə yə gɑ̌ gə́ a, gɑ̌ gɔ kwi' ghə tə́ nə cɑ́ guŋ msɔ awɛ bi pɔ pyə wap shəŋ ywə yə wap gɔ nə ghɔm gɑ wap bɑ pa' wɔk a. Pɔ bɔ bɑ mghɛ nthəm mfʉm, pɑ fʉtə pɔ, bɑ wap kwa dzə́ mghɛ nthəm Kristo. A tə bɑ pɑ nwə sya sya pɑ́, ba Sata ŋkwa dzə̀ aŋgəle ŋkha'. A tə́ bɑ pɑ́ gha'nwə pɑ́ gɑ mghɛ fa' bɔ fʉ́tə́ gɑ wap bɑ mghɛ fa' nwə dəŋdəŋ pɑ́. Yap nə miŋ gɔ sɔ' pɑ́ pɑ́ pa' mfa' map a. Gɑ̌ wə ŋkwi' gɔm gɑ́ ka mo kwɛ gɑ́ gɑ̌ pʉə́, tak po'o po piŋ gɑ́ gɑ bʉə tə ba myə na' nə ŋa'tə yɑ̌. Ywə yə gɑ gɔ ghɔm a, ŋ tə́ gɔm m nə tsǒ Cyəpɔ pɑ, gɑ gɔm m pa' bʉəpǒ a, kwa' pa' gɑ shəŋtə nə jyə gɑ́ gɑ̌ ghə ywə yə bi a pɑ́ ŋ nə ŋa'tə a. Nə pa' Bo'gwyə́ pɔ dɑ pɑ yap tsʉ' cəcɑ̌ pɔmnəŋ nə ŋa'tə, ba myə yɑ̌ gɑ̌ gɔ ŋa'tə́. Wɔ pyə zhyə̌nwə yɔ shəŋtə bɑwə a, po biŋ nwə bi pɔ pyə thə́ yap tə̌ wə a pɑ́. Po biŋ gɑ pu lɑ wɔ́ gə mkwɔ, gɑ pu syatə wɔ́ npfɑ́, gɑ pu lɑ tsə tsɔ́, pu yɔ pa' mku' a gɑ pu cwɔ wɔ́ nə sə yɔ. Gɑ̌ gɔm po'o a pɑ kǔso nə pɑ, pa' cwə yə pɑ bɔk pɔk a. Ywə yə pu gɔm a, gɑ gɔm po' pa' bʉəpo a, ba myə yɑ̌ pɑ́ gɔm. Wap bɑ pɑ Ebraika lə̀? Ba myə yɑ̌; pɑ Israɛl lə̀? Bɑ myə yɑ̌, gwya Abraham lə? Ba myə yɑ̌. Nə pɑ gɛ nthəm Kristo lə? Gɑ gɔm ghɔm pʉə: Gɑ̌ bɑ tə́ dzə̀ nə́! Nə fa' tə bwá lə́? Bɑ́ tə́ dzə̀ nə́, nə ko cɛ̌ lə? Bɑ pɑ tə́ dzə̀ nə́. Nə mgwa mshɔm lə? A yɔm nə m̀ té', nə pɑ shwə̌ vʉ̌ lə? Bɑ nə mcʉ̀mmcʉ̌m! Pɑ Yudea lə cwɔ a mshɔm gwa shwɔpvʉ̌' mghǎmthá mcʉ́m nthɔ. Pu lə pǐŋ ŋkwi' shwɔ a mcʉm nthá, dɑ mghwɔ' nthamtə á ta' cʉ̌m; ŋ də fashyə mcʉ̌m nthá, jwɔk biŋ di ta' tyɛ̌' tsʉ̀m. Dɑ ghiŋ si mcʉm jɔmyɔ̌m, bi a pɑ mta' shyə gwyəgwyə ghə ywə cwəpuŋ nə m̀, kɑ msamshwə lə, kɑ mfɑ pɑ̌ gwya yɔk lə, kɑ pɑ tə pɑ́ pɑ Yudea lə, kɑ nthʉm tisuŋ lə, kɑ ghakgo lə, kɑ shyə lɑpʉə lə, kɑ mfɑ̌ fʉtə lə. Kɑ pwa ba gǒ' lə, kɑ nə ti tə ti lə, kɑ jìkǔ' pu jì shyə lə, kɑ nə cwə tə tsʉ̌ ywə lə, kɑ fɔ̌k kɑ pə̌ŋ lə; tə sɛ guŋ myə shɑ mnwə awɛ, bɑ lam tsɑ̌ sɔ guŋ cwə awɛ, biŋ bɑ jwiŋ pɑ nə nwə guŋ mcu'tə awɛ. Wɑ̌ bwa, tə la' bwa yɑ̌? Wɑ̌ vʉ̀sǐ, tə lǎ' cəŋtə jɛ a? Bɑ gɔ ŋa'tə́ bɑ gɑ dɑ pɑ pwa a nə ŋa'tə́. Si Tá Cyəpɔ Yeso yə byanyə bɑ nə e mama a zhyə gɑ̀ ŋ tə shwanwə pɑ. Ŋ də pɑ̌ Damasi, gɔpna' fo Aratas ghə pu cɑ guŋ mthə́ tisuŋ awɛ nə ghəm a. Da' gɑ pu nyəŋ a nthʉm sapgó, ntwɔk a nə fǎdyə́, fi' a nə bə̌ŋ pa' shya si tə nthəm nə bú myə́. Pɑ mo ŋa'tə a? A ka kwitə̀! Da' gɑ bɑ́ gɔ piŋ pɑnyə nə nə yɔ m̀ nthʉ̌m zhwenyə ba ywə yə Cyəpɔ gə mo zhyə́ a. Gɑ̌ zhyə mu' mbɛ nə Kristo, a cwəlɔ gu' shwɔppfʉə mghǎm, kɑ́ e lə bɑ pɑ nə nɑ́ e lə bɑ ŋ khá zhyə́; kɑ́ e la tə bɑ nə nɑ́ e a lə bɑ ŋ kha zhyə, Si nə zhyə́; pu lə ká' bɛ́ bɔ tə́ ŋkhəm nə batə kɛbəŋ yɑtá. Biŋ jyə́ gɑ́ bɛ́ bɔ — kɑ e lə bɑ pɑ nə nɑ é lə, ŋ kha zhyə Si nə zhyə́ — bɛ́ bɔ pu lə lɑ e ŋkwɔ' tə ŋkho paradisi, e yu' ghɔm tsyə mo tə gɔm a pɑ́, ghɔm tsyə pu ka piŋ gɑ pɑ mo piŋ gɔm a. Gɑ wə ŋa'tə nə bɛ bɔ, tə́ sɔ' m̀ nə́ myə yɑ nə ŋa'tə pɑ m nə yɑ pwa. Myə la' pe' bɑ gɔ ŋa'tə, bɑ ŋ tə bɑ̀ bʉəpǒ pɑ́; bɑ gɑ̌ gɔm pɑ́ nwə nyənyɔ; da' gɑ gɑ bɑwə nthɔm nɑ a, po'o gɑ pu kɑ́ sɛnwə̀ nə m̀ a cyə́ yə pu jɔ a, kɑ yə pu ju' pa' gɑ̌ gɔm a lə. Pa' ywə bɔ yə Si lə́ ghə myə zhyə a lə bɑ msya nwə a, pú lě nyəŋ ka'tə̀ nthʉm bapnɑ a, a pɑ́ ta' aŋgəle Sata yə e gɔ pɑ swɔp a po'o gɑ ŋ khɑ́ ŋa'tə̀ a. Nə nwə bɔ, gɑ̌ cwyɛ'nyə Cyəpɔ mcʉ̌m nthá gɑ e kwi a bi e. Da' gɑ e pa' bəm gɑ́ gho' a ku' bu, nə pa' pu jyə́ tʉɔ a shyə m nə pwá. A po'o tə gɑ gɔ pɑ ŋa'tə yɑ̌ m̀ nə pwatə yə a bɑ nə m̀ a tə́ tʉɔ Kristo pɑ nə m̀. A po'o tə gɑ̌ ŋwɛnyə́ nthʉm pwatə, nə nə cap a, nə nə hya a, nə nə cwɔ'mkwə mə̌ ba m̀ nə nə zhwiŋ nə Kristo; nə pa' gɑ̌ nthʉɔ pɑ nə cwə yə gɑ pwatə́ a. A yəŋ bɑ gɑ̌ cʉ' bʉəpǒ! Wɔ nə nthənyə a tə́ bɑ po'o; wɔ nə lə bɑ gɔ la'tə a. Nə pa' ba tə́ pa' ŋ tə ywə a pɑ́, ŋ kɑ cyətə ghə sɔmywə yə́ pɑ ya'nyə mghɛ nthəm bá a gə a. Mtiŋ nə jyə gɛ nthəm lə tə̌m cəcɑ̌ po: Nə tɔm nɑ́ nə guŋ mləŋtə awɛ, mtiŋ msya, mtiŋ nwə cyə́ mu'u, fa' mtʉɔ. Po lě shyətə kwi kʉ́ yə pyə shɑ mcu'tə lə kwi a tə ně da' pa' kwa' myə ŋ dě tə kwi sɔmywə bi po a? Da' gɑ po nə shwyɛ' a pa' ŋ dě tə́ pɑ dəŋdəŋ a. Yɔ́, gɑ̌ wə bɑ gɔ sɔ' wə po nə batə́ mcʉ̌m nthá, da' gɑ ŋ də pɑ́ gɔ kwi sɔmywə bi po nə pa' ŋ tə sɔ' m̀ nə tsə́ tsɔ pɑ́, gɑ̌ sɔ' pɑ m nə po. Tə́ pó nə dwɔ' ywə bi m tǎ pɑ́, mtǎ nə dwɔ' ywə bi pǒ. Sɔ' m nə yɑ nə pɑ, gɑ̌ gɔ sim nɑ a piŋ sim ywə nə yɔ thə tə səm. Tə́ dəŋ pa' gɑ̌ nə ŋkhuŋ wɔ a, tə́ po ŋkhuŋ a yɑ̌ lə́? Pǒ zhyə gɑ́ po ka sim sɔmywə nə m̀! Pa' gɑ̌ bɑ́ gɛ fʉ̌ á, ŋ dě dɑ pɑ́ fʉ̌ ŋkho nə po. Po yɔ bǎ ya mo lə́ nə́ pɔ pyə dɑ təm wap bi po a: Ŋ dě dɑ yá mo nə pú nthé ywə pʉ̌ə po o? Ŋ də cəŋtə́ shwi'tə bi Tito tə́ nthəm wap pu fɑ yɔk pɑ̀ yə ŋ də ghɔm a. Tə́ Tito lě nthé ywə pʉə po a? Pyə e lě tə ghiŋ pɑ nə ta' zhwényə a? Biŋ giŋ pɑ̀ nə ta' məjyə́ a? Tə fɑ tə tyɛ' po bɑwə ŋkwɛ gɑ pyə bɑwə nthɛ nɑ tsɔk dzə̌ po a? Gɛ̌, pyə bɑwə gɔm nwə pɑ́ dzə Si, shyə m nə Kristo, po' mfɑmfɑ́ nə nɑ́ ŋkwyətə wɔ. Gɑ̌ wə bwɔk gɑ́ pɑtyɛ' nə ŋwak wə po ŋ də yɔ wɔ kwa' pa' gɑ̌ shəŋ a, ba wɔ yɔ́ lə yɔ a pa' po shəŋ a: Ŋkhyɛ'nyə, pu a nə khíŋnyə, ba nə caktə nɑ́, nə fəŋnyə, nə tʉ tsǒ pyə shɑ pɔ cwəpùŋ, nə cyətə ghə mku' ba paknyə pɑ́ wə po. Gɑ̌ wə́ bwɔk gɑ́ pɑ cwə yə gɑ gɔ piŋ cyə a, Si a fi' a hɑ si dzə̌ po, ŋ də piŋ dɔ nə thə pɔ jɔmyɔ̌m pyə wap lə la' hɔnwə̀, wap lə piŋ bʉɔtʉm tsap nə́ bɔkbɔk mnwə map, nə ghiŋ cwəpuŋ tsap ba nə nwə ghap a! Yəŋ batə mcʉ̌m nthá pa' gɑ gɔ sɔ' wə po a. Pu gɔ nyaptə́ guŋ ywə awɛ dzə pɔ pɑpʉə kɑ pɔ pɑtá lə, wap pɑ́ mkwinthɛ nə́. Ŋ dě da' gɔ̌m, biŋ bɑwə ŋkwi' gɔm tyɛ' ɔ yə ŋ tə́ si a pɑ́ ŋ də zhi gɔm nə cwə yə ŋ də sɔ' wə po nə batə mcʉ̌m bʉ́ə a, gɔm bi pɔ pyə wap lə hɔnwə a ba m bi guŋ pɔ awɛ gɑ́: ŋ dá biŋ sɔ' wə po, bɑ ŋ tə gɔ nə ghə sɔmywə pɑ nə cɔm mo pɑ̀, Nə pa' po wə shəŋ ywə yə a da'tə gɑ́ Kristo nə shyə m nə m̀ gɔmnwə a. E tə́ bɑ ě pwatə nə yɔ nə pɑ́ pɑ̀. E da'tə pɑ̀ tʉɔ shyə m nə po. A nyənyɔ gɑ́ a bɑ pu lě ŋkwé é thə bɛnyəpɛnyə nthʉm pwatə̀, da' gɑ e bɑ pɑ nthʉɔ shyə m nə tʉɔ Si. Ba wɔk pɑ bɑ pɔ bwatə pwǎtə nə é, da' gɑ́ pɑ gɔ sɔ' pɑ pɔ mtʉɔ pa pú, cyə m nə́ tʉɔ Si nə pɑ. Po tiŋtə́ nɑ tsɔ wɔ́ wɔ́, jɔ́ bi a pǒ nə piŋnthʉm a, po ləŋtə́ nɑ̀ tsɔ́; kɑ́ po ka zhyə́ gɑ́ Kristo bɑ nə po? Tə ně yə po vʉ̀ mləŋtə a. Gɑ̌ kwɛ gɑ́ pǒ zhyə́ gɑ pyə lě da'tə ywə yə pyə ku' nə́ a. Pyə shwyɛ'nyə gɑ po kɑ ghə sɔm nwə cwəpuŋ; pyə tə́ shəŋ pɑ nə la'tə wɔ ywə yə pyə ku' nə a pɑ́, pyə shəŋ pɑ̀ nə yɔ pa' po gə nwə pɑpuŋ a, tə́ nə̌ da' yə pǒ bvʉ nə mləŋtə a. Nə pa' a bɑ pyə ka ghə tʉɔ nə bɔ nwə nyənyɔ, yɔk tʉɔ bɑ pɑ yə́ nwə nyənyɔ. Pyə bɑ guŋ mcwə awɛ bɑ ŋwɛnyə pa' pyə pwatə́ tə po tʉɔ a. Ywə yə pyə̌ shwyɛ'nyə Si nə a bɑ yɔ nə pɑ́ pɔ dɔlɔ̌. A ywə yə a gə tə́ pyə yɑ tə́ gʉə sʉəsʉə myə və yəŋ ywə bi po, po'o gɑ́ ŋ kɑ́ cwətə bɑ si ja'nwə mhwémhwé shyə m nə tʉɔ yə Cyəpɔ hɑ bəm m̀ nə́ nə ŋkwɑ́, a lə pɑ́ m nə́ nə sa'tə a. Mfɑ̌mfɑ́, po pɑ nə ŋwɛnyə̀, po fa' nə pɑ dɔlɔ̌, po pɑ ŋkhaktʉɔ, bɑ ŋkwishwə, po vɔk nə hwitə̀, a Si ŋkhuŋnyə̀ ba hwitə pɑ bi po. Po lɑ nə nuŋ mgho dɔlɔ̌ nə sha'tə cəcɑ̌ po. Guŋ pɔ dɔlɔ̌ awɛ ca'tə wɔ́. Gho' Cyəpɔ Yeso Kristo, ŋkhuŋnyə Si ba tsʉnyə Zhwenyə Dɔlɔ̌ pɑ bi guŋ yɔ awɛ. Myə Polo, bɑ gɛ nthə̌m, la' bɑ gɛ nthə̌m pɔmnəŋ kɑ yə mu' mo pɑ́. Gɑ̌ bɑ́ gɛ nthə̌m m nə Yeso Kristo pú Si Tá yə é lə yam e nə vʉ̌ a, pyə a guŋ mfɑ̌mfɑ́ pyə́ pyə a pú bɑ a, bi mcu'tə pɔ Kristo myə́ ǎ Galata a: Gho' pú hwitə pɑ́ bi po shyə́ m nə Si, Tá yɔk pɑ, bɑ m nə Cyəpɔ Yeso Kristo, yʉ́ yə e lə hɑ̌ thə́ nɑ e nə́ mhɔ mɔk pɑ, tə́ nə ŋkwi wɔk pɑ bi yəŋ dzʉ́ cwəpuŋ a, dəŋdəŋ pa' Si yə e bɑ Tá yɔk pɑ á shəŋ a. Ghu'tə pɑ́ bi e nə mgu' nə gu'. Amɛn. Nwə̌ zhʉm á nə nthi pa' po nə nthəm nə mo yə e lə kě wɔ shyə m nə gho' Kristo, nthəm po'o gɔ m nə mu' Cuŋ pɑpúŋ a. A tə́ bɑ m gɑ́ mu' Cuŋ pɑpúŋ bɑwə pɑ́; da' gɑ shɑ́ pɔ bɑ cəcɑ̌ po bɑwə má' và' biŋ bɑwə shə́ŋ nə́ kwyəpnyə́ Cuŋ pɑpúŋ Kristo. Da' gɑ mu' mo, kə nə pyə́, kə aŋgəle fɑ kɛbəŋ lə́ siŋ wɔ́ mu' Cuŋ pɑpúŋ, tə́ a bɑ́ yə pyə lə́ sǐŋ wɔ a, bɑ dǒ thə́ e! Pyə lě da' gɔ̌m, bìŋ ŋkwi' bɑwə gɔm cwəlɔ gɑ mo siŋ wɔ mu' Cuŋ pɑpuŋ tə a bɑ yə po lə la' ju' a bɑ dǒ thə́ e! Nə pa' cwəlɔ, gɑ̌ shəŋ pɑ́ nə puŋ pɔmnəŋ kɑ nə́ púŋ Si? Gɑ̌ shəŋ nə puŋ pɔmnəŋ a? Ŋ də pe' bɑ shəŋ pɑ́ nə́ puŋ pɔmnəŋ bɑ ŋ tə́ jɑ gɛfa' Kristo pɑ. Nə pa' gɑ̌ wə́ siŋ wɔ mfɑ̌mfɑ́ gɑ́ Cuŋ pɑpúŋ yə gɑ̌ siŋ wɔ a, a tə́ fɑ m bi monəŋthə́ pɑ́, bɑ pu lá tə nəŋ shyə́ m nə mo tə ji'tə a kə tə́ hɑ bəm pɑ́; Yeso Kristo nə́ gə tə́ myə zhyə́. Nə pa' po lə yǔ' pu ghɔmnwə nə tsɑ̀ ghiŋ pa' ŋ də nə gə́ nə nə́ piŋ pɑ Yudea a: nthi pa' ŋ də lɑ Cu'tə pɔ Si jɔgo' biŋ bɑ shəŋ nə sa'tə yá a. Ŋ də dɑ yɑ́ nə piŋ pa' pɑ Yudea biŋ a, nə gɔ pɑ́ dzə̀, tə shyə bo'gwyə ŋkhɛ yɔk ba pɔ nə gwya yɔk nə nə́ səŋnyə nə kyəp ma mtá pɑ̌ a. Da' gɑ mo yə́ e lə ci a tə jɑ vǎm ma á, e gho' a á lə cwə̌ tə jɔ gɑ́ a puŋ gɑ́ e ghə ŋ jyə́ Mu é, po'o gɑ siŋ e bi pɑ tə́ pɑ́ pɑ Yudea, ŋ gúŋ dusi, tə hə̌ŋtə nthɔk monəŋthə́ pɑ́, la' nəŋ bʉɔ Yerusalɛm bəŋ pɔ pyə́ wap lə bɑ mghɛ nthəm m dzə̌ m̀ a pɑ́. Ŋ də ghɔ Arabya, biŋ bɑnyə Damasi. A lə pǐŋ nə cyə́ gu' tá ŋ bʉɔ gɔ Yerusalɛm nə yɔ Kefas. Ŋ dɑ́ pǐŋ shwə́ bəŋ e tyɛ' shwɔp tɔ mghǎm tə yɔ sɔm gɛ nthə̌m tə́ ně da' Yakop fɑ́ Cyəpɔ. Ywə yə gɑ̌ bvə bi po a, gɑ̌ wə gɔm po'o dzə̌ Si, a tə́ bɑ cwanwə pɑ̀. Ŋ də pǐŋ gɔ nə ghə̌ŋ mgùŋ Siria ba m̀ Kilikia. Da' gɑ a lə́ bɑ mcu'tə pɔ Kristo Yudea ka zhyə́ sə a pɑ́. Wap lə bɑ wap yu' yap da' pa' pu gɔm gɑ: Mo yə e lə cwɔ'mkwə mɔk pɑ a cwəlɔ bɑwə siŋ piŋnthʉm yə e lə sa'tə cwə o bɔ a. Biŋ bɑ gu'tə Si nə thə́ a. A lə pǐŋ shyə́ gu' shwɔppfʉə mghǎm, ŋ bʉɔ gɔ Yerusalɛm, pyə Barnabas; ŋ də nə ghɔ dɑ́ ba Tito. A lə́ dú m nə ywə yə Zhwenyə Si lə ghə ŋ jyə́ a tə́ bʉɔ wə́ nə la'tə wap Cuŋ pɑpúŋ yə ŋ də bɑwə siŋ bi pɑ tə pɑ́ pɑ Yudea a bi pú; ŋ də piŋ da'tə ya bɔ bi pɔ pyə́ pu lə bɑwə shəŋtə́ nyəŋ də̀ŋ nə pú a, po'o bɑ bwɔk gɑ ŋ khɑ khʉdʉ́ kɑ m gɑ a kɑ́ pɑ́ bɑ gɑ̌ khʉdʉ́ néné lə́. Da' gɑ pú la tə thə́nyə bǎ Tito, só ghìŋ a yə e bɑ yə Grikia a gɑ́ pu vó e pɑ́. Pú lə pé'e gə po'o, bɑ a lə bɑ fɑ m bi mfǎ fʉtə̀ pyə a lə bɑ wap twɔk ŋkho cəcɑ̌ pyə́, bɑwə sa' wɔk nə yɔk nə cyətə́ pɑ ŋkwɔ yə pyə́ gə shyə m nə Yeso a, bɑ shəŋ nə lɑ wɔk gə mkwɔ. A lə pɑ̌ po'o la' pyə yu'nyə wap bǎ mu ywə pɑ́, po'o gɑ̀ pu tɔm nyənyɔ Cuŋ pɑpuŋ bi po. Da' gɑ́ sɔ' m nə́ nwə pɔ gwyə́: pa' Si tə́ dé pɑ dəŋ mo a pɑ́, bi a pɑ wap lə lɑ sɔmywə hyá a pɑ. Wap lə yɔ m gɑ́ a bɑ pu hɑ nə siŋ Cuŋ pɑpuŋ bi pɔ pyə pu ka vo wap a bəm pa' a bɑ pu hɑ nə siŋ Cuŋ pɑpuŋ bi pɔ pyə pu vo wap a bi Pɛtrɔ a. Nə pa' mo yə é lə lɑ Pɛtrɔ gə gɑ nthəm pɔ pyə pu vo wap a lě gə gɑ ba myə yɑ̌ pɑ gɛ nthə̌m pɔ pyə́ wap tə bɑ pɑ Yudea a pɑ́. A lə pɑ̌ po'o Yakop, Kefas ba Yohane pyə́ wap bɑ mgak a zhyə́ gho' yə Si hɑ bəm a, hɑ pú yap bəm ba m bi Barnabas, a pɑ́ mtiŋ gɑ́ pyə a pu pɑ ŋkwishwə po'o gɑ pyə nə ghɔ m bə̌ŋ pɔ pyə́ pu ka vo wap a, wap ghɔ yap m bə̌ŋ pɔ pyə́ pu vo wap. Tə ywə pɑ̀ da' gɑ pyə pɑ ŋkhamtə mpə́ŋ, a nə́ŋ bɑ ywə yə gɑ̌ gə gùŋ mcwə awɛ a. Da' gɑ́ Kefas lə sɔ' Antiokia myə vá é sɔsɔ̌, bɑ ě hɔnwə. Nə kəlɑ́ pɔ nə pɔ pyə́ pu a Yakop lə bɑ́ a lə nə sɔ', Kefas pu a pɑ tə pɑ́ pɑ Yudea pɑ dzʉnyə; da' gɑ́ wap lə cwə̌ tə́ sɔ̌' e to' nə pɑ́ jyə̌ wap, bɑ ŋkhʉ́ wap, bɑ bwɔk pɔ pyə a bɑ pu vó wap a. Ba pyə́ shɑ́ pɑ Yudea lə́ to' yap nə ghə pa' yʉ a, tə ba Barnabas ko yə nə nə fʉtə yap. Da' gɑ́ cwə yə ŋ də yɔ gɑ́ wap tə̌ wə giŋ dəŋdəŋ nə́ nyənyɔ Cuŋ pɑpuŋ a pɑ́, ŋ gɔm bi Kefas dzə̌ guŋ pɔ awɛ gɑ: A pɑ gɑ́ wə yə́ o bɑ yə Yudea a, ǒ wə́ bvɔk pa' pɑ tə pɑ́ pɑ Yudea a, la' o vɔk m pa' yə Yudea a, bɑ o gɔ piŋ thə́nyə pɑ tə́ pɑ́ pɑ Yudea gɑ wap vɔk pa' pɑ Yudea a m gɑ kɑ̀? Pɑ̌ bɑ́ pɑ Yudea pa' pu nə dzə wɔk pɑ a. Pɑ tə bɑ́ pɑ tə pɑ́ pɑ Yudea, mghɛ mhɔ pɑ̀. Pɑ̌ bɑ pɑ̌ zhyə gɑ tə mfa' mco' nə gə mo pɑ́ dəŋdəŋ pɑ́, da' nə piŋ Yeso Kristo nə́ gə mo pɑ́ dəŋdəŋ; ba wɔk pɑ yɔk pɑ bɑ pɑ lě biŋ Yeso Kristo po'o gɑ pɑ cyə́ m nə nə́ piŋ Yeso Kristo bɑ dəŋdəŋ; a lə cyə́ m nə mfa' mco' pɑ, nə pa' sɔmmo tə gɔ sɔ' cyə m nə mfa' mco' pɑ́ dəŋdəŋ pɑ́. Tə́ a pɑ gɑ́ pɑ lě shəŋ nə pɑ́ dəŋdəŋ m nə́ Kristo, pu yɔ gɑ́ pɑ̌ bɑ́ mghɛ mhɔ̀, bɑ á da'tə gɑ́ Kristo fa' bi mhɔ a? Tə́ gɛ̌. A pɑ gɑ́ gɑ̌ piŋ ŋkwɑ ywə yə ŋ də sa'tə a, bɑ myə nə́ bɑ́ gɛ pɔptə mco'. Nə pa' kwa' myə, a lə́ shyə pɑ́ nə mco' tə myə pfʉ́ nə mco', po'o gɑ́ biŋ bvɔk m̀ bi Si. A bɑ pyə Kristo pfʉ́ thə́ bɛnyəpɛnyə; Gɑ bɑwə bvɔ̌k, da' gɑ a tə́ jɑ̌ a pɑ́, Kristo nə bɑwə bvɔk nə m̀. Nə pa' kwa' vɔk a cwəlɔ nthʉm bap nɑ́, gɑ̌ bɑwə bvɔk yá m nthʉ̌m piŋnthʉm, piŋnthʉm nə Mú Si yə e lə kùŋ a tə hɑ vɔk e nə thə a lə. Pɑ ŋ də ghə gɑ́ gho' Si pɑ́ pɔpɔ; nə pa' pu cyə m nə mco' tə bɑ dəŋdəŋ bɑ Kristo lě pfʉ́ pɑ pɔpɔ. Wɔ pɑ Galata, mfʉmnyə́ pɔ, wɑ̌ fɛ́ wɔ? tə bɑ pú lə nə̌ŋ shəŋtə da'tə Yeso Kristo thə bɛnyəpɛnyə dzə̌ po nə mnyə mɔ? Po siŋ a yəŋ nwə̀: Po lə́ shyə pɑ m nə́ nə ghiŋ nə́ mco' tə́ ŋkwi Zhwenyə, kɑ m pa' po lə yu' ŋkhʉɔ piŋnthʉm a? Wɔ pɑ Galata, pǒ fʉmnyə tə́ dəŋ pa' a? Wɔ pyə́ po lə ləŋdzə ntho' m nə Zhwenyə á, já bap nɑ́ nə gɔ ghə tə́ po pɑ́ pɔ lə̀? Po yɔ́ dəŋ fa' e a gɔ cyə fé! Kwa' fě! Mo yə́ é hɑ Zhwenyə bi po biŋ bɑ gə msya cəcɑ̌ po á, e gə po'o pɑ́ nə pa' pǒ ghìŋ nə mco' a kɑ́ m pa' pǒ yu' ŋkhʉɔ piŋnthʉm a? Pa' Abraham lə́ ghə piŋnthʉm nə Si, Si yap gɑ́ e bɑ dəŋdəŋ bi á, po cəŋtə́ ju' gɑ pɔ pyə́ wap ghə piŋnthʉm a nə bɑ́ pó Abraham. A nə pɑ̌ po'o bɑ Ŋwa'nyə lə la' nə yɔ̌ gɑ Si gɔ sɔ' cyə m nə piŋnthʉm ghə pɑ tə pɑ́ pɑ Yudea cʉ' pɔ dəŋdəŋ siŋ Cuŋ pɑpuŋ yəŋ bi Abraham gɑ: Gùŋ mguŋ awɛ gɔ sɔ' cyə m nə o ghə byanyə́. A po'o tə́ pɔ pyə wap biŋ a pɑ́ bɑ wap ghə byanyə́ pu a Abraham gɛ piŋ. Nə pa' guŋ nə fá'fa' mco' awɛ bɑ nwə dò, nə pa' bɑ pu və gɑ: Dǒ bɑ́ thə́ mo yə e tə́ ŋkhaktʉɔ giŋ nə guŋ mco' awɛ myə́ a bɑ pú və nthʉ́m ŋwa'nyə mco' a pɑ́. A nəŋ bɑ́ nyənyɔ gɑ́ sɔmmo tə́ bɑ́ dəŋdəŋ dzə̌ Si shyə́ m nə́ mco' pɑ, nə pa' mo dəŋdəŋ nə piŋnthʉm bɑ mo yə e gɔ sɔ' vɔk a. A nə pɑ̌ po'o, mco' pu piŋnthʉm lə pɑ́ ta' ywə pɑ́. Mo yə e fa' pa' mco' gɔm a gɔ sɔ' vɔk pɑ́ nə mco'. Kristo bɑ e lě jó nə ŋkwi wɔk pɑ bi dò mco', nə kwǐ wɔk pɑ po'o bɑ e pʉɔ shʉ' dò nə pɑ, nə pa' a bɑ pu və gɑ: dǒ bɑ thə́ mo yə pu ciŋ e thə́ a. Po'o gɑ́ byanyə Abraham kə́m nə pɑ tə́ pɑ pɑ́ Yudea, shyə m nə Yeso Kristo, a piŋ bɑ́ po'o pɑ cyə́ m nə́ piŋnthʉm ŋkwi Zhwenyə, ywə yə pu lə ka' a. Mfɑ̌mfɑ́, pɑ lɑ fo' nə́ mnwə myə mo gə a: sobo mka'nyə myə́ mǒ ŋkha' tə npfʉ́ a pɑ́ nə ŋkhɛ bɑ pu tə́ gwa' pɑ́, pu lə nəŋ ŋkwi' sɔmywə nə pɑ́. Tə́ Si lə hɑ mka'nyə̀ bi Abraham ba m bi gwya e; a tə bɑ pu ghɔm m gɑ́ bi mgwya pɑ́ cwə yə́ a bɑ́ mgwyǎ yɔm a, a bɑ nwə ta' gwya yɑmu': bi gwya o. Yəŋ la'tə gɑ Kristo. Kwɛnyə a bɑ́ gɑ: Si bɑ ě ləŋdzə jap ta' kɔ m nə ŋkhɛ. Mco' myə a biŋ nthəm jʉm nə gu' pǒtá mŋkhə pfʉ̀ə a, ka vɑnyə kɔ bɔ pɑ, po'o gɑ́ mka'nyə kɑ cyə fé. Nə pa' a pɑ gɑ́ pú shyə m nə mco' tə́ gə mcʉ', bɑ a tə́ biŋ bɑ́ m nə mka'nyə pɑ. A nəŋ nə pɑ̌ po'o bɑ Si lə shyə pɑ́ m nə mka'nyə tə hɑ gho' e bi Abraham. Tə fɑ po'o mco' biŋ sɔ' m nə ghə gɑ́ kɑ̀? A sɔ' kwi' tə́ nə pɔptə mco' cəŋtə bɑwə́ tə bɑ nə byap gwya yə mka'nyə bɑ myə́ a. Pɑ aŋgəle nə lə gə pu zhyə́ mco' bɔ, shyə m nə pǔ ta' giŋjyə̀. A nəŋ bɑ po'o, giŋjyə̀ bɔ lə pɑ̀ da' yə ta' mo. Si piŋ bɑ́ da' yʉ do e. Tə́ mco' gɔm ywə dyɛ' nə mka'nyə Si a? Gɛ̌. A lə pé'e bɑ gɑ́ pu lě hɑ ta' mco' myə a bɑ ǎ ghə tʉɔ nə gə mo vɔk a, bɑ nwə dəŋdəŋ fɑ nə mco'. Tə́ ŋwa'nyə bɑ a lě nyəŋ mhɔ nə guŋ ywə awɛ, nə tamtə bɑ́ ŋkwɔ, po'o gɑ́ a cyə m nə piŋnthʉm nə Yeso Kristo, mka'nyə pəmtə́ bi pɑ piŋ. Pǐŋnthʉm lə́ nə sɔ' bɑ pɑ lə bɑ mkwɔ bi mco' tə bɑ nə byap piŋnthʉm yə pu lə bɑ gɔ la'tə wɔk pɑ a. A po'o tə mco' lə bɑ gɛ lé wɔk pɑ̀ tə́ bɑ nə byap Kristo, po'o gɑ́ pɑ pɑ́ pɔ dəŋdəŋ shyə m nə piŋnthʉm. Da' gɑ cwə yə́ piŋnthʉm sɔ' a, pɑ tɑ jɑ́ nə bǔ gɛ lé pɑ. Nə pa' gùŋ yɔ awɛ shyə m nə piŋnthʉm bɑ pó Si shyə m nə Yeso Kristo. Əŋ, guŋ yɔ awɛ pyə́ po lə kwishyə nə Kristo a, a bɑ po lě ŋkwa Kristo nə po. A pɑ po'o yə Yudea lə yɑwə́ kə yə Grikia lə; ŋkwɔ lə yɑwə́ kə tə́ pɑ ŋkwɔ lə; mbɛ lə yɑwə́ kɑ mjwǐ lə; nə pa' guŋ yɔ awɛ bɑ pɑ̀ yɑmu' m nə́ Yeso Kristo. Bi a po piŋ bɑ m bi Kristo, bɑ a da'tə gɑ po bɑ̀ gwya Abraham; a cyə m nə mka'nyə po pɑ́ pɑ tsʉ mcʉ'. Mkwɛnyə mə̌ bɑ gɑ: Dzʉmcʉ̌' bɑ cwə yə e yɑ mu a, pu ŋkwɔ pɑ́ pɑ ta' ywə́, ba pa' e bɑ tá guŋ pǒtsə awɛ a; e ju'nyə bi pɑ təmtə é ba m bi pɑ lé é tə́ ŋkhəm cwə yə́ tap é lə yap a. Ba wɔk pɑ yɔk pɑ, cwə yə pɑ lə jɑ pó a, bɑ ju'nyə bi m nwə gʉ' dzʉ́ a, pɑ lə bɑ mkwɔ. Da' gɑ cwə lě shwə́ tə bəmtə́, Si tə́m Mu é, mjwǐ tsə é, e pɑ́ ŋkwɔ mco', tə nə jó gɑ́ pɔ pyə́ wap bɑ mkwɔ bi mco' a wap kɑ piŋ bɑ́ mkwɔ bi mco', a pɑ́ po'o tə́ a ghə pɑ cʉ' mcwəpó. Pǒ bɑ kwa' pǒ bɔ: bɑ Si lé nthəm Zhwenyə Mu é nthʉm tʉ́m pɑ gɑ́ a ghə pɑ pɑ́ shwé gɑ: Aba, a la'tə gɑ: Tá yɔ́k. O tə́ jɑ ŋkwɔ pɑ́, o bɑ mu, cwə yə o bɑ mu a, bɑ mu' dzʉmcʉ̌': a bɑ fa' Si. A lə́ bɑ dzə bɑ po ka zhyə́ Si, po pɑ mkwɔ bi msǐ tə pɑ Si. Tə́ cwəlɔ yə a bɑ pǒ zhyə Si a, yə a bɑ ě zhyə́ wɔ a, tə́ pǒ biŋ bɑnyə nə mnwə gʉ' pɔ pɔ po'o gɑ a piŋ dɑ wɔ gə mkwɔ po'o m gɑ kɑ? Pǒ nyəŋ dəŋ nə shɑ́ mtyɛ'dzʉ́, ba mŋwə́ dzʉ́, ba mwɔ̌ dzʉ́ pu a mgʉ' dzʉ́. Pǒ wə gə myə pɑ́ bwɔk gɑ́ pɑtyɛ' bɑ ŋ dě fá' fà' pí bi po. Po ghiŋ pa' myə a mfɑmfɑ, nə pa' a bɑ gɑ̌ cʉ' pa' wɔ a, gɑ̌ cwyɛ'nyə wɔ. Po ka hɔ kwa' sɔmywə bəm. Pǒ zhyə kwa' pɑpuŋ gɑ a lə shyə m nə gho tə myə siŋ wɔ Cùŋ pɑpuŋ nə də̀ŋdzə̀ cʉ̌m tə ba tə pa' nɑ a lə bɑ cwə o bɔ bɑwə sya wɔ tə' a, po lě tə́ kyak a, myə lə nəŋ hwi wɔ pɑ̀. Gɛ̌ po lə lɑ a m pa' ta' aŋgəle Si a, pa' Kristo Yeso a. Kwa' ŋwɛnyə yɔ cwə o bɔ hɑ? Nə pa' gɑ̌ wə bɑ́ ŋkwinthɛ̌ gɑ: a lə pe' bɑ ywə yə pɑ́ mo ghə a bɑ po lě nthé mnyə mɔ hɑ bəm. Jyə gɑ́ a po'o bɑ gɑ̌ cʉ' gɛ bo yɔ pa' gɑ̌ siŋ wɔ nwə nyənyɔ a lə́? Sə́ŋnyə̀ yə pu wə sə́ŋnyə́ nə po a, a tə nwə pɑpúŋ pɑ́. Wap shəŋ da' nə té wɔ nə m̀ po'o gɑ po piŋ səŋnyə́ yɔ m nə pú. Nwə pɑpuŋ bɑ́ nə yɔ gɑ́ po səŋnyə́ nə mkwɛnyə pɑpuŋ, nə guŋ mcwə awɛ, tə da' nə cwə yə myə lə̌ cəcɑ̌ po a pɑ́, wɔ pó mkəcɔk po pɑ̌ pyə gɑ̌ ŋkwi' dzə́ wɔ nthʉm ghəghʉɔ m nə tsə́ sə́ a pɑ po'o tə̌ Kristo la' bɑ́ nə vɔk yɔ. Tə́ yɔ də̀ŋ pa' gɑ̌ wə sʉ́m gɑ́ da' a pe' bɑ bə́ŋ po cwəlɔ tə jɔ kwa' gi nə gɔm nwə bi po yə a ku' nə po a, nə pa' ŋ tə́ wə jyə pa' gɑ̌ gɔ ghə nə po á pɑ́. Po siŋ á, wɔ pyə́ pǒ shəŋ nə ghiŋ nə mco' a, po tə́ ju' ywə yə mco' bɔ gɔm a pɑ á? A bɑ pu və gɑ́ Abraham lə ghə pǒ pɑpʉə: yə mu' pu mjwǐ yə e lə bɑ ŋkwɔ a, gə yə mu' pu mjwǐ yə e la tə́ bɑ ŋkwɔ a pɑ. Da' gɑ mú mjwǐ yə e lə bɑ ŋkwɔ a lə bɑ mu e shyə m nə bap nɑ̀, tə mu mjwǐ yə e la tə́ bɑ ŋkwɔ a pɑ́ pɑ mu e shyə m nə mka'nyə̀. Yə̌ŋ bɑ pɑ fo'nwə̀: Pɑ jwǐ pɔ pɑpʉə bɑ mkɔ mɑbʉə. Tsyə́ a fɑ m Sinai a, dzə́ po ŋkwɔ: A bɑ́ Agar; nə pa' kúŋgó Sinai bɑ m Arabya, Agar piŋ bɑ́ fo' Yerusalɛm cwəlɔ, yə a bɑ ŋkwɔ pu a po pyə́ a. Da' gɑ́ Yerusalɛm yə a bɑ m thə́ kɛbəŋ a tə́ bɑ ŋkwɔ pɑ́, yʉ́ nə nəŋ bɑ má yɔk pɑ̀, nə pa' a bɑ pu və gɑ: Ŋwɛnyə, wə ŋkhiŋ, wə yə o la tə́ dzə́ a pɑ. Togə̀ŋ ŋwɛnyə̀, wə yə ywə la m jɛ o a; nə pa' pǒ mjwǐ yə pu wa' e a yɔm shyə pyə́ mjwǐ yə ě ghə dhə a. Ba wɔ mfɑmfɑ́, dəŋdəŋ pa' Isak a, pǒ bɑ́ po mka'nyə. Da' gɑ dəŋdəŋ pa' mo yə pu lə́ dzə é m nə bap nɑ́ a lə shwɔ'mkwə mo yə pu lə́ dzə é m nə́ Zhwenyə a, ba m cwəlɔ a bɑ pɑ́ po'o. Tə́ ŋwa'nyə gɔm gɑ́ kɑ? A gɔm gɑ: zhə́ŋ ŋkwɔ pú mu e, nə pa' pɑ́ mu ŋkwɔ pu mu tə pɑ ŋkwɔ lə pəmtə dzʉ́ mcʉ'. Po'o lə mfɑmfɑ pɑ tə́ bɑ po mjwǐ ŋkwɔ pɑ́, pɑ̌ bɑ̀ po mjwǐ yə e tə́ bɑ ŋkwɔ a pɑ́. Kristo lə nthé wɔk pɑ nə ŋkwɔ po'o gɑ pɑ kɑ́ piŋ bɑ ŋkwɔ. Po tɔm pɑpúŋ, po kɑ piŋ bíŋ nə zhwə́ kəlo' ŋkwɔ. Myə Polo, gɑ siŋ wɔ: Po ghə pú vo wɔ bɑ Kristo tə́ gɔ piŋ ŋkwitə wɔ nə sɔmywə pɑ́. Gɑ biŋ bɑwə gɔm bǎ bi yɑ mo lə yə ě ghə pu vo e a gɑ́ e ghiŋ nə guŋ mco' awɛ. Po yap yɔ nə pɑ dəŋdəŋ pɑ nə́ mco' bɑ po a Kristo hapnyə, bɑ pǒ mi nə gho'. Tə́ sɔ' m nə pyə, pyə pɑwə mɔktə gɑ Si gɔ sɔ' ghə pyə pɑ dəŋdəŋ dzə̌ e, shyə m̀ nə Zhwenyə, nə piŋnthʉm, pyə̌ bɑwə shəŋtə byap gɑ a pəmtə́. Nə pa' a sɔ' m nə mo yə ě m nə Yeso Kristo a, nə vo e, kɑ nə cyətə vo e lə lə̀ pɑ́ sɔmywə, da' piŋnthʉm shyə m nə ŋkhùŋnyə nə bɑ nwə. Po lə bɑwə ŋkhʉdʉ́ kwa' pɑpúŋ; wɑ̌ shɑ məjyə bi po, ŋkhɔ pa' nyənyɔ fəŋ wɔ nə ghɔ a? Yə bǎ nthi nwə tə́ fɑ m bi mo yə e ŋkhe wɔ a pɑ́. Mu ywə kwɔ' msɛ̌ gə msɛ̌ kwɔ'. Sɔ' m nə m̀, gɑ̌ zhyə́, shyə́ m nə Cyəpɔ gɑ́ po tə gɔ cwɔ' mu' jyə dyɛ' pɑ̀. Da' gɑ́ mo yə́ e ma' va' cəcɑ̌ po a, gɔ sɔ' kwi mcwɔ'fa' myə́ kɑ e bɑ pɑ pɑ́ gɑ́ kə́lə. Sɔ' m nə m̀ mfɑmfɑ́, a po'o bya biŋ gɔ́m gɑ pu vo mò, tə bɑ gɑ̌ jɔgo' po'o nə kɑ? A la bɑ po'o bɑ kəmnyə fa'tə bɛnyəpɛnyə mì. A pɔ pyə wap ma' va' cəcɑ̌ po a, wap ghɔ tə ja' ba shɑ mkam nə nɑ̀ tsap gwa'! Mfɑmfɑ́, pu bɑ pu lě ŋkhe wɔ gɑ́ po kɑ pɑ mkwɔ. Da' gɑ́ yɔ nə cyətə́ pɑ ŋkwɔ kɑ nyəŋ wɔ m nə mfa' bap nɑ́. Po cyə́ m nə ŋkhuŋnyə bɑ nthɔmnyə bú nə mfa' cəcɑ̌ po. Nə pa' guŋ mco' awɛ bəmtə pɑ́ da' nə ta' ghɔm tsɔ gɑ: O gɔ pɑ kuŋ mo yə ě bəŋ o a pa' o ŋkhuŋ thə nɑ o a. Da' gɑ po pɑ də́mtə́ msuŋ, bɑ pfɑtə nɑ tsɔ́ cəcɑ̌ po, po pɔmtə̀: pǒ gɔ sa'tə nɑ tsɔ pɑ́ wɔ wɔ́. Po yu' ywə yə gɑ̌ gɔm a: Po ghiŋ m nə Zhwenyə, po'o gɑ po kɑ piŋ fa' ywə yə́ bap nɑ́ nə́ shəŋ a. Nə pa' bap nɑ́ nə́ tsə tsyə e shəŋ a, bɑ gɛ bo Zhwenyə, Zhwenyə pɑ́ gɛ bo bap nɑ́, a pɑ cəcɑ̌ pu bɑ pɑ́ fəŋnyə̀; a po'o tə́ la' po pɑ́ gə ywə yə pǒ kuŋ a. Da' gɑ po pɑ gíŋ nə Zhwenyə, bɑ po tə jɑ̀ ŋkwɔ mco' pɑ̀. Mfa' bapnɑ, a bɑ pu zhyə́ má: nə cyətə tɔm nɑ́, nə viŋ nɑ́, nə ghə ghap nə ghamtə̀ kətwɔk, nwə kɛ̀, bò, fəŋnyə, nə kíŋ mo, nə yɛlúŋ, nə twɔ'nyə, nə sa' mshɛ, sɔ́tə, nə ghi'nyə, nə nwə́ mlù', nə tsʉ́ kʉə ywə́ ba myəshɑ nthi mnwə bɔ. Pɔ pyə wap gə mɔ mnwə a, gɑ̌ siŋ wɔ pa' myə lə zhi siŋ wɔ a gɑ́ wap tə gɔ sɔ' pɑ nə Nəfo Si pɑ́. Tə́ mnthɔm Zhwenyə, po yɔ má: a bɑ ŋkhuŋnyə̀, bɑ ŋwɛnyə̀, bɑ hwitə̀, bɑ nə kyəp tʉ̌m, nə ghə nwə pɑpúŋ, nə yɔ yə mu' mo pɑpúŋ, bɑ piŋnthʉm bɑ nə ghə pyanyə́ nwə, bɑ nə tɔm nɑ́; mco' tə nthébya nə mɔ mnwə̀ pɑ. Pɔ pyə wap bɑ pɔ Kristo a bɑ wap kàm bap nɑ́ thə́ bɛnyəpɛnyə pu a tsə tsyə a bùŋ e a ba tsyə e shəŋ a. Pɑ pɑ́ bvɔk nə Zhwenyə, pɑ pɑ́ giŋ pa' Zhwenyə nə shya wɔk pɑ a. Ka pɑ pɑ́ ŋa'nɑ́, ka pɑ pɑ́ ŋkham mshɛ́ cəcɑ̌ pɑ, ka pɑ pɑ́ gi'nyə cəcɑ̌ pɑ. Mfɑmfɑ́, a pɑ́ gɑ po ghəm mo bɑ ě hɔnwə, bɑ wɔ mghɛ Zhwenyə nə gɔ lɑ pɑ́ zhwenyə hwitə nə sìŋ é; kwa' wə pɔmtə́. O ka zhyə́ gɑ́ pɑ mləŋtə ko nə wə yu a? Po pəmtə́ ŋkwa mpi' mɔ cəcɑ̌ po; po'o gɑ́ po ghiŋ nə mco' Kristo. Nə pa' mo yɔ nɑ e pa' mo gwyə́ a, tə́ la' e pɑ sɔmywə́ bɑ e fʉtə pɑ́ nɑ́ e. Da' gɑ bǎ yɑ mo lə́ nə po tiŋtə́ mfa' myə́, kwa' myə́ mfa'; bya e yɔ ywə yə pɑ a hɑ ŋwɛnyə nə bi e a, a pɑ́ pɑ́ kwa' nə thə nɑ e a kɑ pɑ m nə́ nə fo' mu' mo. Nə pa' bǎ yɑ́ mo lə gɔ sɔ' kwa pɑ́ kwa' yə ŋkhəm. Mo yə ě yu' Ghɔm tsyə pu ji'tə a, e té ywə nə guŋ tsə́ tsyə́ awɛ hɑ bi mo yə e ji'tə é ghɔm bɔ a. Ka po fʉtə nɑ́ tsɔ, Si tə nthak gɑ sɔmmo ŋa' e pɑ, nə pa' ywə yə́ mo tsə̀ a bɑ ywə yə e gɔ sɔ' kap a. Mo yə é dzə̀ m nə bapnɑ a gɔ sɔ' kap nthɔm myə bap nɑ́ jám a vʉ̌. Mo yə e dzə̀ m nə Zhwenyə a gɔ sɔ' kap nthɔm myə Zhwenyə jam a: Vɔk mama. Pɑ ghə nwə pɑpúŋ tə pwa; nə pa' cwə gɔ cwə ku', pɑ kap nthɔm pɑpuŋ, a pɑ yə pɑ ka pwa a. A po'o tə cwə pɑ bi pɑ, pɑ fa' nə pɑpúŋ yə a yə́ guŋ pɔ awɛ, te'te' nə yə pɔ pyə́ wap ghɔptə bə́ŋ pɑ nə piŋnthʉm a. Po yɔ́ mnyə́ mŋwa'nyə gwyə́gwyə́ mɔ gɑ: gɑ̌ dɑ pɑ́ kwa' pu a nə bvə bi po. Pɔ pyə́ wap bɑwə shəŋ gɑ́ pu zhyə́ wap nə nwə bapnɑ a, a bɑ pɔ pyə́ wap bɑwə nyəŋ pɑ gɑ pu vo wɔ a. Da' yap ywə yə wap shəŋ a a bɑ nə cyətə yɔ̌go' nə bɛnyəpɛnyə Kristo. Nə pa' pɔ bǎ pyə wap bɑwə gə pu vo wap a, wap tə bɑwə giŋ nə mco' pɑ; wap shəŋ yap da' gɑ pu vo wɔ, wap ghə ghu'tə nə bap nɑ́ yɔ. Sɔ' m nə m̀, bɑ gɛ̌, sɔm tso gu'ghǔ' tə wə pɑ tə ně da' bɛnyəpɛnyə Cyəpɔ yɔk pɑ Yeso Kristo; a shyə m nə́ bɑ pu kam dzʉ́ bɛnyəpɛnyə nə myə, dəŋdəŋ pa' pu ŋkham a bɛnyəpɛnyə nə dzʉ̌ a. Nə pa' ywə nthʉɔ, a tə bɑ nə vo mò kɑ nə cyətə vo mò pɑ̀, a bɑ nə piŋ bəm mo m̀ nə pə́m sə́. Hwitə ba cɔmmtso pɑ nə pɔ pyə wap giŋ nə ŋkhɛ yəŋ a ba m nə Israɛl yə a bɑ yə́ Si a. Po'o lə́, ka sɔmmo piŋ nyə́ŋ mɛ́nyə̀ nə m̀, nə pa' kwa' myə gɑ bɑ gɑ̌ ghə mtiŋ Yeso nə́ nɑ a. A gho' Cyəpɔ yɔk pɑ Yeso Kristo pɑ pu a zhwényə yɔ mfɑmfɑ́. Amɛn. Myə Polo, gɛ nthəm Yeso Kristo, m pa' Si jap a, bi pɔ dɔlɔ̌ ba m bi pɑ piŋ Yeso Kristo pyə wap Efeso a: gho' ba hwitə pɑ bi po shyə m nə Si, Tá yɔk pɑ̀ ba m nə Cyəpɔ Yeso Kristo. Byǎnyə́ bi Si Tá Cyəpɔ yɔk pɑ Yeso Kristo: Ě nyəŋ guŋ byanyə́ zhwenyə nə pɑ̀ thə́ kɛbəŋ shyə m̀ nə Kristo. E lə shwɔ' wɔk pɑ shyə m̀ nə e tə́ dzʉ̌ la' bɑwə́ po'o gɑ pɑ pɑ́ pɔ dɔlɔ̌, pɔ tə bya. Nə́ mnyə́ myə́, nthʉm ŋkhuŋnyə̀. E lě da' gə gɑ́ pɑ pɑ́ mcwəpó pyə́ shyə m̀ nə Yeso Kristo. A pa' puŋnwə e lə yɔ a po'o nə nə́ jwɔp ghu'tə e ba gho' yə e nyəŋ nə wɔk pɑ̀ shyə m̀ nə ŋkhuŋ pɑpuŋ e: M nə é, shyə́ m nə mcyə́ myə, pɑ vɔk, pu lɑ mhɔ mɔk pɑ shwyɛ' wɔk pɑ shyə m̀ nə dəŋ gho' e nə pɑ. Si hɑ bi pɑ tə a yɔ́m, nə pa' e nə da'tə guŋ fʉ̌ awɛ bi pɑ ba zhyə̌nwə yɔk pɑ. E lě gə pɑ zhyə́ nwə cyə zhyə̌nwə yə a bɑ pɑ́ yə nə yap a. Nwə pɑpuŋ yə e lə la' jáp pɑ yʉ́ tə́ dzə̀ a. Po'o nə ghə gɑ cwə pəmtə nə yap guŋ dzʉ̌ awɛ nə bǔ ta'fò gɛ sa': Kristo, ywə yə ǎ kɛbəŋ a ba yə ǎ dəmcǎ' a. Pɑ lə̌ shyə́ m nə é ŋkwi yɔk pɑ tsʉ': Nə pa' shyə m nə́ mka'nyə mo yə e jap guŋ ywə awɛ pa' ě yɔ a a bɑ pú lě shwɔ' wɔk pɑ tə́ dzə̀ po'o gɑ pɑ pɑ nə nə hɑ mku' nə ghu'tə é, bɑ pɔ pyə wap lə ləŋdzə mɔktə Kristo a. Po lě biŋ shyə m nə e, mu'cʉ́m ju' ghɔmnwə nyənyɔ, cuŋ pɑpúŋ yə a bvɔk wɔ a. Po lě biŋ e, pu yap stam Zhwenyə yə pu lə ka' a, Zhwenyə Dɔlɔ̌ yə a bɑ zhwi'tə tsə́ mcʉ' mɔk pɑ tə́ nə gɔ ŋkhəm nə cwə yə pu gɔ sɔ' kwi wɔk pɑ ŋkwi cʉ̌m, pɑ cwə́ nə tsə́ mcʉ' bɔ, nə pɑ́ jwɔp ghu'tə e. A ywə yə a gə tə́ ba myə yɑ̌ tə fɑ́ pa' ŋ dɑ́ yǔ' piŋnthʉm yɔ nə Cyəpɔ Yeso ba yɔ kuŋnyə nə guŋ pɔ dɔlɔ̌ awɛ, ŋ nthɑ́ nthak nə gho'tə Si nə po pɑ́ nə pa' gɑ̌ nyəŋ wɔ nthʉm mcwyɛ'nyə mə̌. A Si Cyəpɔ yɔk pɑ Yeso Kristo, Tá yə́ ghu'tə bɑ m bi a hɑ zhwenyə fʉ́ bi po yə a gɔ la'tə e bi po, piŋ ghə po zhyə e kwa' nyənyɔ a. E ghyɛ' tʉm tsɔ nə ŋkha' é, po'o gɑ́ po zhyə́ ywə mɔktəmoktə yə yə́ nə ke wɔ hɑ bi po a, po zhyə dəŋ ghu' e, dəŋ tsə́ mcʉ' tsyə́ e gə po a pɔ dɔlɔ̌ ghap a. Dəŋ tʉɔ jɔmyɔ̌m yə é lə tě nə wɔk pɑ pyə pɑ̌ biŋ e a; dəŋ gʉ' fa' é, gʉ' nthʉɔtʉɔ e. E lě nthé guŋ e awɛ nə́ Kristo nə cwə yə e lə yam e nə vʉ̌, gə e cwə nə ghə́ŋ tʉɔ e kɛbəŋ tə́ thə́ də̌m guŋ nə sa', guŋ pɑ́ sa', guŋ tʉɔ, guŋ nəfo, ba guŋ mtsǒ awɛ, kɑ pú ŋkhe pɑ́ gɑ kɑlə, tə da' nthʉm yə̀ŋ dzʉ̌ pɑ́, ba yə dzʉ́ yə ǎ wə tə́ sɔ' a. Əŋ, é lě jap guŋ ywə awɛ to mkwə̀ e, hɑ dzə̀ bi e nə guŋ ywə awɛ, e pɑ thə́ cu'tə pɔ Kristo, yə a bɑ nɑ́ e a, bɑ mlonyə̀ Mo yə kwa' Si nə donyə awɛ a. Ba wɔ́, a lə bɑ pǒ pfʉ́tə shyə m nə bɔkbɔk mnwə mɔ́ pu a mhɔnwə mɔ, mɑ́ myə po lə bɑ pǒ kotə́ nə cwə yə po lə jap jʉm si yə̀ŋ dzʉ̌ a, mú fo yə e sa' mtò kɛbə̀ŋ pu cǎ', zhwenyə yə e bɑwə cwəlɔ bɑwə fa' cəcɑ̌ mtʉɔthə́ a... Pɑ̀ lə bɑ cəcɑ̌ pɔ bɔ, ba wɔk pɑ̀ yɔk pɑ̀ awɛ, wɔk pɑ̀ pyə pɑ̀ lə́ jap m̀ jʉ̌m nwə bap nɑ́ a; pɑ lə fa' pa' e shəŋ a, giŋ pa' yʉ́ nə shya wɔk pɑ a; pɑ lə bɑ́ pa' pyə shɑ pɔ a, bɑ pɔ pyə yɛ̌lúŋ é lə bɑ gɔ ko nə pu a. Da' gɑ Si bɑ e ghə cɔmmtso kwa' dù é nə pa' shyə m nə́ mɑ ŋkhùŋnyə yə e lə nə ŋkhúŋ wɔk pɑ nə pa' a lə bɑ́ pɑ lě pfʉ́ shyə m̀ nə mbɔkbɔk mnwə̀ mɔk pɑ a, ě hɑ vɔ̀k bi pɑ̀ shyə m nə Kristo, nə pa' a shyə pɑ́ m nə gho' tə po vɔ́k. E lě jám wɔk pa pú nə vʉ̌, gə pɑ cwə kɛ́bəŋ m̀ nə́ Yeso Kristo. A po'o tə a lě shyə m nə pùŋ nthʉ́m e nə pɑ̀ shyə m̀ nə Yeso Kristo, e yɔ gɑ́ e gɔ la'tə dəŋ mɑ gho' tɑ́ dhə́ e nə cwədzʉ̌ yə a gɔ sɔ' a. Nə pa' a shyə pɑ m nə gho'tə́ po vɔk, shyə m̀ nə piŋnthʉm; tə́ wɔ nə́ gə pɑ́, Si nə hɑ. A tə́ shyə m̀ nə mfa' mɔ pɑ̀, po' gɑ sɔmmo kɑ nə ŋa' nɑ́ e. Nə pa' yʉ́ nə lə́ bəm wɔk pɑ̀; e lě bəm wɔk pɑ̀, shyə m̀ nə Yeso Kristo, po'o m nə́ mfa' pɑpuŋ myə́ Si lə la' nyaptə́ tə tyɛ', po'o gɑ pɑ pɑ́ fa' a. Po kamtə́ gɑ́ wɔ pyə po lə́ bɑ́ dzə bɑ pǒ ghə mtiŋ pɑ tə pɑ pɑ̀ Yudea nə nɑ́ tsɔ a, wɔ pyə pɔ pyə wap sɛ́ gɑ pu vo wap pa' pu ya' mu bap nə bap nɑ́ yap a, jɔ wɔ pa' pɔ pyə pu ka vo wap a. Po kamtə́ gɑ́ po lə bɑ cwə o bɔ, bɑ tə Mesia bɑ po ka ghə nə cwə Israɛl pa' po guŋ a; bɑ mghʉɔ nə kɔ mka'nyə, bɑ tə mɔktə, bɑ tə Si nthʉm dzʉ́. Tə́ cwəlɔ, shyə̀ m̀ nə Yeso Kristo, wɔ pyə po lə́ bɑ gʉə sʉəsʉə a, pú lě gə po sɔ' tə bɑ pɑ́ bəŋ o, shyə m̀ nə mcyə́ Kristo. Nə pa' kwa' yʉ́ Kristo nə bɑ́ hwitə̀ yɔk pɑ̀; nə pa' a bɑ̀ e lě nthamtə ywə yə a lə bɑ pu ghaptə a nə gə yɑmu'. E lě shyə m nə bap nɑ́ e sa'tə sak ywə yə a lə gaptə pɔ a: bò. E lě bi mco' pu a ywə yə a jap a, bi ba nə ghiŋ nə́. E lə gə po'o tə́ lɑ yə Yudea pu yə tə pɑ yə Yudea pəm ta' mo sə́ m̀ nə é nə pa' e lě jap hwitə̀, biŋ gwɔ'bvɑnyə cəcɑ̌ pu a Si, guŋ yap pɑpʉə cʉ' ta' nɑ́ shyə m nə bɛnyəpɛnyə; a pɑ po'o, e zhwə́ bò. E lə sɔ' nə siŋ hwitə bi wɔ pyə po lə bɑ́ gʉə sʉəsʉə a ba m̀ bi pɔ pyə wap lə bɑ bəŋ ó a. A shyə́ m nə é guŋ yɔk pɑ awɛ ghə nə ghɔ bəŋ Tá nthʉm ta' Zhwenyə. A po'o tə po tə́ biŋ bɑ mghʉɔ pɑ̀, po lə nəŋ bɑ́ pɑ khʉlǎ'; po a pɔ dɔlɔ̌ bəmtə bɑ po á gùŋ; po ba pɔ nə́ tuŋdyə́ Si. A bɑ pu lě nyəŋ wɔ nə́ tsə nə ŋkwɑ pa' yə cyə é bɑ́ mghɛ nthəm pu a mghɔm ghɔ̀m Si a, yə pɑ kwa' yʉ́ Yeso bɑ gwɔ' phə e a. A bɑ nə Yeso tə́ guŋ ywə yə pú ŋkwɑ a shu'nyə, biŋ ŋkwɔ ji ta' Dyə Si dɔlɔ̌ nə Cyəpɔ. A shyə pɑ m̀ nə é tə pu tamtə ba wɔ yɔ nyəŋ wɔ nə pà' bɔ yə pu ŋkwɑ a, po'o gɑ po pɑ tsʉ' yə Si shwə́ nə a, shyə m̀ nə́ Zhwenyə. A po'o tə myə, Polo, gɛ cɛ̌ Yeso Kristo, bi po, pɑ tə pɑ pɑ Yudea... Po la' pe' ju' bǎ gho' yə Si hɑ bəm nə pó tə́ ywə yə e lə yap a pəmtə á, ju' pa' a lə cyə m̀ nə nə́ ghə mo zhyə́, myə zhyə mnwə cyə Zhyə́nwə dəŋdəŋ pa' gɑ shwɔtə mthə myə́ bi po a. Po gɔ nə ke ŋwa'nyə a, yɔ dəŋ pa' gɑ nə jyə nwə cyə́ zhyənwə Yeso a. Nwə cyə Zhyənwə bɔ si bɑ e lě tə ghə pɑ cwədzə̀ zhyə́ ya pa' e da'tə cwəlɔ shyə m̀ nə Zhwenyə bi mghɛ nthəm dɔlɔ̌, ba bi mghɔm ghɔ̀m Si a. Ba pɑ tə pɑ́ pɑ Yudea bɑ pu piŋ wap nə tsə mcʉ', dɑ wap gə mkam nɑ́ nə ta' nɑ́, nthamtə́ wap nə ta' mka'nyə nə Yeso Kristo, shyə́ m̀ nə Cùŋ pɑpuŋ. Si bɑ e lě dɑ á nə gə gɛfa' nə bɑ a shyə m nə tʉɔ e nə́ gho'. Myə yə́ gɑ̌ bɑ jʉɔjʉ̀m nə guŋ mzhʉɔjʉ̀m pɔ dɔlɔ̌ awɛ a, Si bɑ e lě go' a, dɑ a gə gɛ siŋ mɑ fʉ' gwyə́ Kristo bi pɑ tə pɑ́ pɑ Yudea. Biŋ da'tə pa' Si gə nwə cyə zhyənwə yə e lə la' dʉm pɑ nə é tə fɑ tə tyɛ' a, a pəmtə a. A po'o tə́ tə fɑ cwəlɔ, pɑ Sa' pu a Mtʉ̀ɔ kɛbəŋ shyə m nə Cu'tə pɔ Kristo jyə́ nthinthi mfʉ́ Si, Shyə m nə mka'nyə mama myə e gə́ a pəmtə̀ nə Yeso Kristo Cyəpɔ yɔk pɑ̀ a. Nə Kristo, pɑ shyə m̀ nə piŋnthʉm nə é gə nə fʉ'tə nɑ tsɔk pɑ̀ hɑ bə́ŋ é tə pwɔk sɔmywə. A po'o tə gɑ̌ wə gɔm bi po gɑ́ ka po tak mɑ gǒ' gwyə yə gɑ wə jɔ nə po a ghə po pwa. A bɑ yɔ ghu'tə. A po'o tə gɑ̌ wə ŋkham mkwitə dzə̌ Tá, yʉ yə́ tsǒ bǎ ya tuŋdyə́ lə́ nthəm pɑ bi, kɛbəŋ bɑ m dəmcǎ' lə. É ghɔ gɔ́ shyə m nə dəŋ ghu'tə e, nyəŋ gʉ' nə po shyə m nə́ Zhwenyə, po'o gɑ mo nthʉ̌m nɑ pɑ nthʉɔ tʉ́ɔ, gɔ pɑ́ dzə. E ghə Kristo ghɔ bɑ shwə́ nthʉm tʉ̀m po shyə m nə piŋnthʉm; po kwigɛ́ biŋ bɑ ŋkwɑ nthʉ̀m ŋkhuŋnyə̀. A po ghə gʉ' nə ju' pu a pyə shɑ́ pɔ dɔlɔ̌ dəŋ pa' a bɑ nthə e yɔm, lɔm e yɔm, dəŋ nthə e pa' a bɑ ǎ sak gɔ thə́ biŋ shú gɔ si... Biŋ jyə́ ŋkhuŋnyə̀ Kristo yə a bɑ ǎ cyə́ guŋ zhyə̌nwə awɛ, po'o gɑ Si ghɔ dó nə po. Ghu'tə pɑ bi mo yə a bɑ ě ku' nə ghə gùŋ ywə awɛ shyə m nə tʉɔ e yə a bɑ nə pɑ a, gə tɑ nthwɔk dəŋ yə pɑ do bi biŋ sɛ a. Ghu'tə pɑ bi e nthʉm Cu'tə pɔ Kristo bɑ m nə Yeso Kristo nə gùŋ mwɔ̌dzʉ́ awɛ, nə mgu'nəgu'. Amɛn. Myə yə gɑ̌ bɑ gɛ cɛ̌ a m nə Cyəpɔ, gɑ̌ səso wɔ gɑ po vɔk m nə nthi pa' pu nə ŋkhe wɔ a. Nə fi' nɑ hɑ sì, nə byanyə́, nə nə́ kyəp tʉ̌m, bɑ bəmtə ŋkwa mnwə mɔ nthʉm ŋkhuŋnyə̀. Po kaktʉɔ nə tɔ̀m ŋkwishwə zhwenyə shyə m̀ nə dʉ́ hwitə̀. Nə bɑ pɑ́ yɑmu', ba Zhwenyə pɑ́ pɑ yɑmu'; a po' tə a bɑ pu ké wɔk pɑ nə ta' mɔktə̀ yɑmu', ta' Cyəpɔ, ta' piŋnthʉm, ta' kwǐshyə yɑmu'; nə ta' Si biŋ bɑ Tá guŋ pɔ awɛ, bɑ sa' guŋ pɔ awɛ, bɑ shyə m̀ nə guŋ pɔ awɛ fǎ' biŋ bɑ shwə́ nə guŋ pɔ awɛ. Gho' bɑ bi ba ya mo lə́ nə pɑ̀ nə dəŋ pa' Kristo nə hɑ bi a. A po' tə pu gɔm gɑ́: E lě ŋkwɔ' tə thə́ gəm mghɛ cɛ́; e lě hɑ tsə bi pɔmnəŋ. E lě ŋkwɔ'! A bɑ gɑ́ kɑ̀ tə pɑ̌ gɑ a bɑ ě piŋ fi' tə ŋkhəm dəmcǎ'? Mo yə e lə fi' tə si a, bɑ mo yə e lě kwɔ' tə thə́ shyə guŋ mkɛbəŋ awɛ tə́ donyə́ nə guŋ dzʉ̌ awɛ a. Yʉ́ nə shwɔ' shɑ pɔ nə gə mghɛ nthəm, dɑ shɑ́ gə mghɔm ghɔm Si dɑ shɑ gə pɑ siŋ cùŋ, biŋ dɑ shɑ gə mpyapdzə́, pɑ zhi'tə pɔ ywə E gə po'o gɑ pɔ dɔlɔ̌ ku' nə fa' fá' nə ŋkwɑ nə Kristo, po'o tə̌ pɑ la' nthamtə́ guŋ yɔk pɑ awɛ nthʉm piŋnthʉm, ba nə zhyə Mú Tá pa' pɔ pyə́ wap ku'nyə pɔ a, bɑ́ nthə́ Kristo nə guŋ lonyə awɛ. A gɔ pɑ́ po'o, pɑ̀ lə piŋ bɑ pomkəcɔkpo, pyə́ wap bvʉ mghə́ŋ mghə́ŋ a pɑ́, pɑ́ ghiŋ nə ŋkhɛ cwəpúŋ, bɑ shʉmjʉ̌m gùŋ mghɔm awɛ, pɔmnəŋ pu a mfʉ́ map pɑ dɑ wap fyə́, wap hɔ məjyə̀. Da' gɑ́ pɑ pɑ́ biŋ nwə nyənyɔ nthʉm ŋkhùŋnyə bɑ pɑ̌ gɔ kwyə́ nə guŋ ywə awɛ jʉ̌m mo yə e bɑ thə nwə: Kristo. A shyə m nə é tə guŋ nɑ́ awɛ pɑ nthamtə́ giŋ ŋkwi ŋkhɛ shyə m nə mzhəŋ myə́, bǎ ya zhə̀ŋ lə pɑ́ fa' tsyə fa' pa' a ku' nə e a, tə gùŋ nɑ́ awɛ nə ŋkwyə́, bɑ ŋkwɑ nthʉm ŋkhùŋnyə̀. Ywə yə gɑ̌ gɔm bi po biŋ bíŋ nə Cyəpɔ á yəŋ gɑ̀: Ka po kwi' bvɔk pa' pɑ tə pɑ̀ pɑ Yudea bvɔk a, wap pyə́ zhyənwə yáp dɑ wap gɔ m nə tsʉ' pɔpɔ a. Mkwɛnyə map bɑ pɑ ywə jʉ́m, wap piŋ bɑ mghʉɔ nə vɔk Si, shyə m̀ nə fʉmnyə̀ yáp yə tʉm sɔk sɔk tsap hɑ bi pú a Nthʉm nə cyətə́ sɛnwə yap, wap lě hɑ nɑ́ tsap nə nwə ghàp, tə guŋ ŋkho nə guŋ bɔkbɔk nwə tə dhə e. Sɔ' m̀ nə po po la tə zhi'tə nə Kristo po'o pɑ̀. A ghɔ bɑ gɑ́ po lě jú' pu ghɔm pɑ́ kwa' yʉ bi po, bɑ gɑ́ pu lə́ zhi'tə pɑ́ kwa' yʉ́ bi po, ji'tə kwa' m nə nyənyɔ yə a bɑ́ nə Yeso a, po kəŋnyə vɔk yɔ yə a lə bɑ a, yə a lə cyə a, sya bvo mò yə a bɔptə shyə m nə fʉtə ghi'nyə a. Po sɑnyə̀, ŋkwyəpnyə zhyənwə yɔ shyə́ m nə zhwenyə. Ŋkwa mo sə́ nə po pa' dzə́ a, mo yə pu pəm e pa' Si shəŋ a, nthʉm dəŋdəŋ ba dɔlɔ̌ yə a fɑ bi nyənyɔ. Pǒ bɑ pú té cwanwə̀ nə po: bǎ wɑlə́ ghɔm pɑ nwə nyənyɔ bi mo yə e bəŋ e, nə pa' pɑ bɑ́ pɑ bǔ ta' nɑ. Po yɛlúŋ, po kɑ́ hɔnwə; a nam kɑ́ nə pi po yɑwə jɛ́lúŋ. Po kɑ hɑ sɔm sɔ̀ bi sata. Mo yə e kɑ jʉ́ a wa' cwúŋ; e kaktʉɔ dɑ bu myə́ fa'fà' dəŋdəŋ tə́ gə ywə yə pu mo yə e ka ghə ywə a gɔ ghap a. A sɔm ghɔ̀m bɔkpɔ̌k kɑ təm shwə̌ po, po pɑ gɔ ghɔmnwə po ghɔm pɑ́ nwə pɑpúŋ, ghɔm nə ŋkwɑ́, ghɔm tsyə a gɔ lɑ hwitə sɔ' bi pɔ pyə wap yu' ghɔm bɔ a. Po kɑ ghə Zhwenyə Dɔlɔ̌ lǎ', Zhwenyə Dɔlɔ̌ yə Si lə nə gə mtiŋ nə po, pa' stam a nə nə byap tyɛ'dzʉ́ yə Si gɔ vɔk wɔk pɑ a. Nə səm, nə kam shɛ, nə yɛlúŋ, nə ŋa' gi, mcap mǐ cəcɑ̌ po, ba guŋ nthi nə cɔk awɛ. Po ghə tʉ́m pɑpuŋ cəcɑ̌ po, po ghə tʉ́m pɑpuŋ, po pɑ́ dɑ mhɔ mɔ shwyɛ' wɔ cəcɑ̌ po dəŋdəŋ pa' Si bɑ e lɑ mhɔ mɔ shwyɛ' wɔ shyə m nə Kristo a. Po fo' Si nə pa' pǒ bɑ pó pyə é ŋkhùŋ wap a. Po vɔk nthʉm ŋkhuŋnyə dəŋdəŋ pa' Kristo lə kuŋ wɔk pɑ tə́ hɑ thə nɑ́ e bi Si pa' tsəpwɔ' a nə pɑ̀, pu lɑ é núŋpwɔ', pa' mwɑ́ damnyəlamnyə bɑ ǎ ghə zhwyə́ pɑpúŋ a. Sɔm nthi nwə ghap, kɑ bɔkbɔk nwə̀, kɑ ghi'nyə lə kɑ pɑ cəcɑ̌ po, yə̌ŋ bɑ pa' pɔ dɔlɔ̌ gɔ pɑ vɔk a. Ka po ghɔm ghɔm mnɔ̀m, kɑ ghɔm mkəkʉɔ̀, kɑ ghɔm mviŋ lə, nə pa' a ka puŋ po'o. Po hɑ nɑ tsɔ m̀ nə mcwyɛ'nyə gho'tə́. Nə pa' po cəŋtə́ jyə́ gɑ́ gə ghap, bɔkbɔk mò, dɑ ywə, yəŋ gámtə kətwɔk, pɔ bɔ bɑ pu tsə́ tě wap nə mcʉ̌' nthʉm Nəfo Kristo ba Nəfo Si. Ka sɔmmo lɑ mghɔm fʉ́ fʉtə wɔ́: Kwa' guŋ ywə bǎ nə fəŋ yɛ́luŋ Si nyəŋ nə pɑ tʉɔthə́. Ka pu a pú pɑ nə sɔmywə. Po lə bɑ dzə̀ bɑ pɑ jʉ̌m; tə́ cwəlɔ pǒ bɑ ŋkha' nə́ Cyəpɔ. Po vɔk pa' pǒ ŋkha' a. Mthɔ̌m ŋkha' bɑ cɔmmtsò, nwə dəŋdəŋ, nwə nyənyɔ́. Po zhyə ywə yə a buŋ bi Cyəpɔ a. Ka po tamtə nə mfa' jʉ́m, mfa' tə yǎm nthɔ̌m, po pɑ nthé pɑ bya nə. Ywə yə pɔ bɔ gə m̀ càm a, a bɑ kuso nə ghɔm. Tə́ guŋ ywə yə pu la'tə ya a, ŋkha' da'tə ya. Nə pa' ywə yə pu da'tə a bɑ ywə ŋkhà', a bɑ po'o tə pu pɑ́ gɔm gɑ̀: Yam, wə yə o bɑwə di a. Lusi cəcɑ̌ mpfə pɔ̀ a Kristo ləŋnyə dəm o. Po cəŋtə́ diŋtə yɔ nə vɔk: Ka po ghə pu yɔ wɔ pa' mkəkʉɔ a, po pɑ pɔ pyə wap ghə zhyənwə a. Pɔ pyə́ wap tə bɔptə map mcwə dzʉ́ a pɑ́, nə pa' cwə dzʉ̌ ka puŋ. Ka po pɑ mkəkʉɔ, po cəŋtə́ jú' ywə yə Cyəpɔ jap a. Ka po nwə́ mlu' tə bám, a dɑ mo gɔ pɑ nə pi, da' gɑ po ló nə Zhwenyə. Po pɑ bəmtə́ gɔm mghɔm zhwɔp dɔlɔ̌ cəcɑ̌ po, bɑ jwɔp mzhwɔpshyə mku', ba mzhwɔpshyə́ zhwenyə; po pɑ jwɔp mzhwɔpshyə biŋ bɑ gu'tə Cyəpɔ nə guŋ tʉm tsɔ awɛ. Nə gùŋ mcwə awɛ, nə gùŋ mnwə awɛ, po pɑ go'tə Si Tá shyə m̀ nə tsǒ Cyəpɔ yɔk pɑ Yeso Kristo. Wɔ pyə́ pǒ bwɔk Kristo a, po pɑ́ ju'nyə cəcɑ̌ po. Pɑjwǐ po pɑ ju'nyə bi mthə́ pɔ pa' bi Cyəpɔ a. Nə pa' dhə́ bɑ tadyə̌ bi mjwǐ dəŋdəŋ pa' Kristo bɑ tadyə̌ Cu'tə́ pɔ pyə á, yʉ́ yə e bɑ gɛvɔk cu'tə e a. Tə́ dəŋdəŋ pa' Cu'tə́ pɔ Kristo ju'nyə bi Kristo a, pɑjwǐ pɑ́ nə guŋ ywə awɛ ju'nyə bi mthə́ páp. Wɔ mthə́, po kúŋ pɑjwǐ pɔ dəŋdəŋ pa' Kristo lə kuŋ Cu'tə pɔ pyə tə biŋ hɑ vɔk e nə é á. E lə shəŋ po'o nə ghə e pɑ dɔlɔ̌ tə́ dɑ shyə yə a sɔk ywə a lɔ a nə shu' é, po'o biŋ shyə́ m̀ nə́ Ghɔ̀m. E lə shəŋ gɑ e nə yɔ e, e pɑwə dəŋnyə, tə pap sɔm mviŋ bɑ nə, tə sɔm mu ŋətə̀, tə sɔm bya. A po'o tə mbɛ gɔ kuŋ jwi é kwa' pa' thə́ nɑ é a. Mo yə e ŋkhuŋ jwi é a ŋkhuŋ pɑ thə nɑ é. Sɔmmo la m bɔ bap nɑ́ e; da' gɑ́ mo ŋkhim nɑ e kǐm, bɑ nyaptə e dəŋdəŋ pa' Kristo gə nə cu'tə pɔ pyə a; pɑ tə́ bɑ mkam nɑ́ myə a lə́? A po'o tə mbɛ gɔ sɔ' təm nə tap e pu map e, a kwɑ nɑ e nə́ jwi e, a wap pɑpʉə piŋ bɑ́ pɑ ta' bap nɑ́ yɑmu'. Yəŋ nwə cyə zhyənwə bɑ ǎ ghu': gɑ̌ ghɔm gɑ́ a bɑwə de Kristo pu a cu'tə pɔ pyə. A bɑ po'o tə bǎ ya mo lə́ nə po gɔ pɑ kuŋ jwi e pa' thə nɑ e a, a mjwǐ nəŋ bɑ gə mku' dhə́ é. Pɑkhʉ́, po pɑ́ ju'nyə bi pɑ tsə́ wɔ shyə m nə Cyəpɔ, a bɑ ywə yə a bɑ dəŋdəŋ a. Ghə mku' tɔ pu mɔ, a bɑ dzə̀ mco' myə a bɑ pu ka' mcwɔ'fa' nə a: po'o tə́ o pɑ pɑpuŋ biŋ shwə mgu' jɔmyɔ̌m dəmcǎ'. Wɔ pɑ tsə pǒ, ka po pɑ dwɔp lúŋ po pɔ, da' gɑ po kwyə wap nə ŋkhɛ bɑ nə nthɔ̌k myə́ a fɑ bi Cyəpɔ a. Wɔ mkwɔ́, po yu'nyə bi mtá pɔ pyə dəmcǎ', nə yu'nyə bɑ bwɔk biŋ bɑ sə́ŋ, gə tʉ́m pɑpuŋ m̀ pa' bi Kristo a. Po kɑ ghə m pa' pu wə dé wɔ a, gə po'o m gɑ po puŋ mo a; po ghə m pa' mkwɔ Kristo pyə wap səŋnyə́ nə ghə ywə yə Si shəŋ a. Po fa' nə tʉm pɑpuŋ pa' cwə yə po fa' m bi Cyəpɔ a, po kɑ ghə m pa' po fa' m bi monəŋ a. Pǒ zhyə: Ywə pɑpuŋ yə mo ghə a, e gɔ la' kwyatə ya bəŋ Cyəpɔ, kɑ e bɑ pɑ ŋkwɔ kɑ e tə bɑ ŋkwɔ a lə. Ba wɔ yɔ mtá mkwɔ, po ghə yɔ pɑ́ po'o nə pú. Po tak paptə nəŋ pǒ zhyə́ gɑ nə pú ba nə po Tá bɑ kɛbəŋ, nə ghə kyə́ lə nə́ŋ bɑ dzə e nə sɔm mò. Nə nə́ mǐŋ, po ghə gʉ' m̀ nə Cyəpɔ, gʉ' nthʉɔtʉɔ yə a bɑ yə́ a. Po kwa dzə́ shù Si tə a ghə po ku' nə cyə Sata nə mgənyə mnwə myə́. Pɑ tə́ bɑwə do' pɑ mu' mo shù pɑ̀, pɑ do' pɑ sa', mtʉɔ ba nə hya yəŋ dzʉ́ jʉ̌m, do' mzhwenyə nwə cwəpuŋ myə́ a bɑ́ kɛbəŋ a. A po'o tə po tɔm dzə́ shù Si tə a sɔ' bɑ nə tyɛ'dzʉ́ bɔkpɔk po kɑ wuŋ bvʉtə si, po ku' nə tiŋnyə thə́ nə cwə yə pǒ ghə guŋ ywə awɛ a. Po lusi! Nyənyɔ pɑ tap yɔ, dəŋdəŋ pa' dzə shù yɔ a, mnthap pɑ mkwə po bɑ nə kʉ́dʉ̌ nə siŋ cùŋ pɑpúŋ hwítə̀. Po ghə kwa' kʉ'shù piŋnthʉm, a gɔ ghə po pimɔk guŋ mkǔŋgó mɔk sata. Po kwi co' ywə vɔk, ba nyə Zhwenyə, yəŋ la'tə gɑ́ Ghɔ̀m Si. A Zhwenyə pɑ shya mcwyɛ'nyə mɔ nə guŋ mghə̌ŋ awɛ, shya ywə yə pǒ do á nə guŋ mcwə awɛ; po pɑ dɑ yɔ lwɔksɛ nə shwyɛ'nyə Si tə pwa nə thə́ pɔ dɔlɔ̌. Ba m nə m̀ yɑ̌: A ghɔm pɑ shwə̌ m̀ nə pɑ nə siŋ nwə cyə zhyənwə Cùŋ pɑpuŋ tə pwɔk. Cùŋ pɑpúŋ yə gɑ̌ bɑ gɛ nthə̌m nə́, bɑ pu cəŋ a nə́. Gɑ̌ gɔ, pa' a bɑ nwə nə m̀ a, pɑ siŋ yá bɔ tə pwɔk. Gɑ wə shəŋ gɑ ba wɔ yɔ zhyə́ pa' gɑ̌ wə nə bɑ a, jyə́ ywə yə gɑ̌ gə̀ a. Tikiko, fɑ́ yə gɑ̌ ŋkhùŋ e a, yʉ̀ yə e bɑ gɛfa' nyənyɔ m nə Cyəpɔ a gɔ siŋ wɔ guŋ mcuŋ awɛ. Gɑ̌ shəŋtə nthəm e pɑ gɑ́ e sɔ' siŋ wɔ tsʉ' yə pyə̌ kəm nə a, biŋ nyəŋ gʉ' nə po. Hwitə̀ pɑ bi mfɑ̌mfɑ, ba ŋkhùŋnyə̀ pu piŋnthʉm shyə m̀ nə Si Tá ba m̀ nə Cyəpɔ Yeso Kristo. Gho' pɑ bi guŋ pɔ awɛ pyə́ wap ŋkhùŋ Cyəpɔ yɔk pɑ Yeso Kristo a pu a ŋkhùŋnyə̀ tə kwyəpnyə a. Myə Polo pyə Timotio, mkwɔ Yeso Kristo, bi guŋ pɔ dɔlɔ̌ awɛ nə Yeso Kristo pyə wap Filipo a, bi pɑ lé wap pu a mghɛ fa' pap: A gho' ba hwitə̀ pɑ bi po shyə m̀ nə Si Tá yɔk pɑ̀ ba m̀ nə Cyəpɔ Yeso Kristo. Guŋ mcwə awɛ myə gɑ̌ ŋkhamtə́ wɔ a, gɑ̌ hɑ pa'lə́ bi Si a; nə pa' nə guŋ nə cwyɛ'nyə yə gɑ̌ shwyɛ'nyə nə po awɛ a, gɑ dɑ pɑ́ ŋwɛnyə̀ shwyɛ'nyə́. Gɑ̌ dɑ ŋwɛnyə shwyɛ'nyə́ po'o, a cyə m̀ nə́ dəŋ pa' po lə nə fa' yɔ́ nə Cuŋ pɑpúŋ tə fɑ́ nə́ dəŋdzə́ tyɛ'dzʉ́ gɔ ŋkhəm cwəlɔ a. Gɑ̌ cəŋtə́ jyə́ gɑ: Mo yə e lə to' fa' pɑpúŋ nə po a gɔ lɑ nə ghɔ dzə̀ tə la' myəŋ nə tyɛ'dzʉ́ Yeso Kristo. A bɑ nwə dəŋdəŋ bəm gɑ́ myə ghə tʉ́m pɑpuŋ nə guŋ yɔ awɛ, nə pa' po bɑ pɑ́ nthʉm tʉm m, wɔ pyə́ gɑ̌ nə pɑ dyəcɛ̌ piŋ pɑ lo'shù gɑ pu cəŋtə́ nthɔm Cùŋ pɑpúŋ po pɑ nthamtə yɔ nə gho' yə Si gə nə m̀ a. Əŋ, Si bɑ ŋkwinthɛ̌ a gɑ́ gɑ̌ byɛ'tə wɔ guŋ yɔ awɛ nthʉm ŋkhuŋnyə Yeso Kristo. Mcwyɛ'nyə mə̌ bɑ́ gɑ kùŋnyə yɔ pɑ gɔ pɑ́ dzə̀, po'o gɑ po zhyə nə yɔ biŋ jyə́ nwə nyənyɔ, tə́ jyə́ ywə yə a bɑ ǎ ku'nyə̀ a, po'o gɑ́ po sɔ' bɑ dɔlɔ̌, pu lə kyak wɔ nə sɔmywə nə tyɛ'dzʉ́ Kristo. A pɑ́ tyɛ' o bɔ bɑ pǒ lo nthɔ́m nwə dəŋdəŋ myə a sɔ' bi pɑ̀, shyə́ m̀ nə Yeso Kristo nə́ nə gu'tə Si biŋ jwɔp tso tsyə́ a. Mfɑ̌mfɑ́, gɑ̌ shəŋ gɑ́ po zhyə gɑ́ nwə yə a nthəm nə m̀ a bɑ ǎ ghə pɑ gɑ́ Cùŋ pɑpuŋ ghɔ dzə̀. Nə pa' nə gùŋ buŋdyə̌ awɛ ba nə guŋ mtsʉ' awɛ cwəlɔ pu cəŋtə́ jyə́ gɑ́ pu gəm a po'o nə Kristo, ba bo'gwyə mfɑ̌ pyə cɛ a hɑ kaktʉɔ bi pu a wə nthégʉ' nə nə́ siŋ Ghɔm nə gɔ pɑ́ dzə̀ tə pwɔk sɔmywə. A nyənyɔ gɑ́ shɑ pɔ gə po'o m nə ghi'nyə pu a twɔ'nyə, da' gɑ́ pyə̀ shɑ́ pɑ́ sìŋ Kristo pɑ́ kwa' nə mkwɛnyə pɑpúŋ. Pɔ bɔ̌ fa' po'o m nthʉm ŋkhùŋnyə̀. Wap bɑ wap zhyə́ gɑ́ gɑ̌ bɑ́ tsɔ'ɔ gɑ́ bɑwə do' gɑ Cùŋ pɑpùŋ ghɔ dzə̀. Pyə shɑ́ pɔ bɑwə dɑ pɑ́ zhwenyə twɔ'nyə tə́ nə siŋ Kristo. Yap ywə yə a hɑ̀ gu' bi pu a tə́ pɑpuŋ pɑ́; wap bɑwə́ ŋkwɛ́ gɑ́ wap gɔ ghə cɛ́ a cəŋtə́ dzɑ́ a. Da' gɑ́ a tə́ shɛ pɑ́? Nwə̌ wə bɑ́ gɑ́ kɑ́ nə mkwɛnyə cwəpùŋ kɑ myə pɑpuŋ lə pú siŋ Kristo bi pɔmnəŋ. A ywə yə gɑ̌ ŋwɛnyə nə nə́ gɔ dzə̀ a. Nə pa' gɑ̌ zhyə gɑ́ ywə bɔ gɔ sɔ' miŋ nə ywə vɔk á, shyə m nə mcwyɛ'nyə mɔ ba m̀ nə zhwenyə Yeso Kristo. Kwa' pa' gɑ̌ wə nə byap ba nə́ yɑ mɔktə a, sǒ tə́ gɔ sɔ' kú a pɑ́, nə pa' gɑ̌ wə shəŋtə́ jyə nə pa' cwəlɔ nɑ a gɔ nyə́ŋ dəŋ nə Kristo cyə m nə vɔk a kɑ nə vʉ́ tsɑ̌ lə́. Nə pa' sɔ' m nə́ m̀, vɔk bɑ Kristo vʉ̌ nə́ŋ bɑ bəm bɑ yɑ pè. Da' gɑ́ a pɑ̀ gɑ́ nə vɔk dəmcǎ' po'o gɔ ghə gɑ́ fa' ghɔ́ dzə̀, bɑ ŋ kha zhyə yə ghə̌ŋ yə gɑ gɔ cwɔ' a Gɑ si cwəlɔ mnwə mɑbʉə pɑwə fəŋnyə a: gɑ bɑwə sʉm nə ghɔ gɑ pyə Kristo pɑ bəmtə bɑ, a pɑ kwa' yə gɑ̌ wə dəŋdzə shəŋ a, da' gɑ shyə m nə thə́ yɔ dzə̀ pɑ gɑ shwə pɑ dəmcǎ'. A po'o tə bɑwə jyə gɑ́ ŋ tə gɔ wuŋ ghɔ pɑ́, gɑ́ gɑ gɔ pɑ cwə pɑ bəŋ po, guŋ yɔ awɛ po'o gɑ po kaktʉɔ nə piŋnthʉm, ba nə ŋwɛnyə̀ nthʉ́m piŋnthʉm. Po'o gɑ a cyə m nə m̀ cwə yə gɑ̌ pɑnyə bə́ŋ po a, yɔ nə ghu'tə Yeso Kristo ghɔ dzə̀. Da' gɑ́ po vɔk nthi vɔk yə a ku'nyə nə Cuŋ pɑpúŋ Kristo a, po'o gɑ ŋ dá sɔ́' pɑ́ nə yɔ wɔ́ kɑ nthak tak lə, nwə yə pɑ́ ju' pu ghɔm nə po a, a pɑ́ pɑ́ gɑ́ pǒ wə nthɔm a tʉɔ nthʉm ta' zhwenyə yɑmu', bɑwə bəmtə́ dɑ ta' tʉ̌m tsɑmu' do' kwa' pa' ǎ pùŋ nə piŋnthʉm nə Cuŋ pɑpúŋ a; po lə piŋ gɑ mghɛ bo hɛ wɔ nə sɔmywə, a pɑ́ bi pu bɑ mtiŋ gɑ wap gɔ simnyə, biŋ bɑ bi po bɑ mtiŋ ywə vɔk yɔ́: a fɑ m bi Si nə pa' a bɑ Si ghə gho' nə po shyə m nə Kristo tə da' gɑ pǒ piŋ é pɑ, ba m gɑ́ po yɔgo' nə e. Bɑ do' pɑ nthi shù yə po jɔ́ ŋ bɑwə do'; bɑ pǒ nəŋ jyə gɑ́ gɑ ŋ gɔ tə kwi' lo' a. A pɑ́ gɑ Kristo nyəŋ gʉ' nə pɔ, bɑ gɑ ŋkhuŋnyə hɑ kaktʉɔ bi po, bɑ gɑ zhwenyə tamtə wɔ, bɑ gɑ po ghə cɔ̌mmtso cəcɑ̌ po, a pɑ nə po po'o, po kwi' yɑ ŋwɛnyə shyə m nə́ nə vɔk nə ta' ŋkhɛ. Po ghə pɑ́ ta' ŋkhuŋnyə yɑmu', gə pɑ́ ta' tʉ̌m; po cəŋ nthamtə; ka po lɑ twɔ'nyə nə gə sɔmywə kɑ ŋǎ'nɑ lə; da' gɑ́ po cyə́ m nə nə fi'nɑ hɑ si bɑ jɔ pyə shɑ pɔ pa' pɔ pyə wap m̀ dzə̌ po a. Ka mo pɑ jɔ pɑ da' yə́ nwə, e pɑ jɔ ba yə́ pyəshɑ pɔ. Po pɑ bvɔk po'o cəcɑ̌ po pa' pú bvɔk nə Yeso Kristo a: Yʉ́ yə e bɑ̀ pa' Si a, la' e yɔ gɑ a mɑ nwə tə' nə pɑ̀ dəŋ pa' Si a. E lě nthé guŋ e bɔ awɛ nə e dɑ vɔk e pa' ŋkwɔ a bʉɔ shʉ' pa' pɔmnəŋ a biŋ shyə m pa' e lə bɑ a pu yɔ e pa' monəŋ a; E lě fi'nɑ́ e hɑ si, ju'nyə yu'nyə tə ŋkho nə vʉ̌ vʉ́ bɛnyəpɛnyə. A ywə yə a lə ghə Si ŋa' e hɑ tə thə́ biŋ hɑ tso tsyə ǎ cyə guŋ mtso awɛ a bi e. Po'o gɑ nə tsǒ Yeso, guŋ mkwi'tə awɛ pɑ ŋwɔ' thə kɛbəŋ, dəmcǎ', ba m̀ nthʉ̌m ca'. A ba guŋ mghɔm awɛ pɑ biŋ gɑ́ Yeso Kristo bɑ Cyəpɔ nə nə gu'tə Si Tá. A po'o tə wɔ pyə gɑ̌ ŋkhuŋ wɔ a, wɔ pyə po ju'nyə́ bi Si tə ŋkhəm cwəlɔ a, po kɑ́ yu'nyə pɑ da' cwə yə gɑ̌ si a pɑ́, po cəŋtə ju'nyə cwəlɔ yə ŋ tə si a pɑ́; po lɑ nə pwɔk pu a nə səŋ nə fa' nə́ ywə vɔk yɔ́. Nə pa' Si nə gə tə nə́ cə́ŋ ba nə ghə pɑ́ nə po pa' e nə jap a. Po ghə guŋ ywə awɛ tə vàmtə̀, tə́ fəŋnyə. Po'o gɑ pu kɑ kyak wɔ nə sɔmywə, po kɑ pɑ nə mnthaknyə, wɔ pyə́ pǒ bɑ́ po Si tə sɔm pap mviŋ nə po, cəcɑ̌ pɔ nə wɔ̌dzʉ́ cwəpuŋ pu nwə bɔkpɔ̌k, wɔ̌dzʉ́ yə pǒ gɔ pɑ́ nə pɑ pa' msa'sǐ ŋkha' nthʉm dzʉ̌ a, wɔ pyə pǒ ŋkwa Ghɔm vɔk a: a bɑ ghu'tə a nə tyɛ'dzʉ Kristo, nə pa' a tə bɑ gɑ̌ khʉdʉ́ pɑ něné pɑ́, ŋ də nəŋ jɔgo' pɑ pɔpɔ. Bi a mcyə́ mə̌ pɑ gɔ pfyə́ pɑ si pa' tsə pwɔ' a ba m̀ nə́ fa' piŋnthʉm yɔ, bɑ ǎ puŋ a, ŋ biŋ bɑwə ŋwɛnyə, ba guŋ yɔk pɑ awɛ. Ba wɔ yɔ po ŋwɛnyə pɑ pəmtə ŋwɛnyə. Gɑ̌ wə mɔktə́ shyə́ m̀ nə Cyəpɔ Yeso gɑ́ gɑ̌ gɔ təm Timotio bi po, po'o gɑ́ mcuŋ myə́ gɑ gɔ yu' nə po a na' ŋkwi' gʉ' nə m̀. Ŋ kha piŋ gə sɔmmo yə e wə giŋ nə mkwɛnyə mə̌ a, sɔmmo yə ě wə shəŋtə sɔlam nə ywə yə ǎ wə dé a a. Guŋ pyə shɑ pɔ awɛ wə sɔlam pɑ́ nə yap nwə̀, wap tə̌ wə sɔlam nə yə́ Yeso Kristo pɑ̀. Da' gɑ sɔ' m̀ nə yʉ́ Timotio bɑ pǒ tsə zhyə dəŋ mfa' myə́: dəŋdəŋ pa' mú bəŋ tap e a, e tamtə nə m̀ nə fa' nə Cùŋ pɑpúŋ. A yʉ́ tə́ gɑ wə sɛ nə təm e bi po nə cwə yə gɑ gɔ zhyə kwa' pa' pu gɔ ghə nə m̀ a. Ba kwa' myə wə́ shəŋtə jyə́, shyə́ m̀ nə́ Cyəpɔ gɑ̀ kwa' myə gɑ̌ wə gɔ sɔ' wuŋ sɔ' wə po. Da' gɑ̌ yɔ gɑ́ ǎ puŋ gɑ́ nthəm fɑ́ a Epafrodito bi po, yʉ́ yə e bɑ só fa' a biŋ bɑ so shù a, yʉ́ yə po lə təm e bəm gɑ e pɑ̀ ŋkwitə a nə cwə yə a lə bɑwə shəŋ po' a. Nə pa' nə pìŋ jɔ wɔ lə bɑwə nthəŋ e te', nə pa' a lə paknyə e nə zhyə gɑ pǒ zhyə gɑ ě gho. A nə pɑ̌ po'o bɑ e lə ghǒ tɑ́ bvɔk vʉ́, da' gɑ Si cɔmmtso myə, tə da' myə́ pɑ́, ba mə̌, po' gɑ́ ŋ khɑ́ tə̌m nə go'o, ŋkho nə go'o. Gɑ̌ do'nyə nə cya e bi po po'o gɑ́ po ŋwɛnyə́ nə yɔ e, ba myə piŋ na' jwenyə yɑ nə go' a. Po cyə́ m̀ nə Cyəpɔ dɑ kwa' ŋwɛnyə dɑ e, biŋ ŋkhúŋ nthi pɔ pa' yʉ a nə pa' a bɑ é lě bɑ́ gɔ pfʉ́ nə fa' Kristo; e lə́ yap vɔk e nə tsʉ' yə pɑ ywə ghə e a, po' tə nə gə ywə yə a lə bɑ kwa' wɔ ka ku' nə ghə bəm a. Po'o lə mfɑ́ pɑ, po ŋwɛnyə nə Cyəpɔ. A ka tsɑ́ bəm nə kwi' bvə ywə yə gɑ̌ zhì bvə a bi po, a piŋ bɑ bi po bɑ nə nə kwyətə́ wɔ. Po pɔm mbvʉ́! Po pɔm mghɛ fa' cwəpùŋ! Po pɔmtə pɔ pyə wap fʉtə gɑ pu vo wap a! Nə pa' pɔ pyə pu vó wap a bɑ wɔk pɑ̀ pyə pɑ̌ sé Si m nə Zhwenyə Si a, wɔk pɑ pyə́ yɔk pɑ ghu'tə bɑ pɑ̌ yap m nə Yeso Kristo, wɔk pɑ pyə pɑ tə jap tʉm tsɔk pɑ pɑ́ nə pɑ a pɑ́. Da' gɑ́ ba tə po'o a bɑ ŋ kha hɔ nə yap tʉm tsɑ̌ nə m̀. A pɑ́ gɑ pɑ́ mo kwɛ gɑ bi a e yap tʉm tsyə nə thə nɑ e bɑ mo bɔ bɑ a. Nə pa' gɑ̌ bɑ pu lě bvo a nə batə tyɛ'dzʉ́ hɔ̌m, gɑ̌ bɑ́ gwya pɑ Israɛl, bɑ́ nə ŋkhənyə Bɛnyamɛn, bɑ̀ yə Ebraika mú e Ebraika; biŋ sɔ' m nə mco' bɑ kwa' Farisai; Sɔ' m nə nə səŋnyə nə nə́ piŋ bɑ ŋ də lɑ Cu'tə pɔ Kristo jɔgo'; gɔ m nə nə́ ghiŋ nə mco' ŋ bɑ mo tə bya nə́ mco'. Da' gɑ́ guŋ tsə bɔ awɛ tsyə́ a lə́ bɑ bəm bɑ kwa mɑ fʉ' a, a lě shyə m̀ nə Kristo, ŋ jɔ tsá pa' pi a. A kwa' po'o, gɑ̌ jɔ gɑ́ guŋ e awɛ bɑ pi bəŋ mɑ fʉ' yə a bɑ nə nə́ zhyə Yeso Kristo Cyəpɔ ǎ. A lě shyə m nə ŋ bi guŋ ywə awɛ, biŋ bɑ jɔ guŋ e awɛ pa' netsə́ á tə nə kwi Kristo pa' fa' a. Po'o gɑ yɑ nə pɑ dəŋdəŋ nə e a kɑ pɑ̌ pɑ́ yɑ dəŋdəŋ yə a bɑ yə mco' a, gɛ̌, a pɑ́ yə a fɑ nə piŋnthʉm nə Kristo a, dəŋdəŋ yə a fɑ́ bi Si, bɑ jo'nyə nə piŋnthʉm a. A bɑ nə nə́ zhyə é, yʉ ba tʉɔ nə yám nə́ vʉ̌, ba nə tamtə nthʉ́m go' e, nə hwə pa' yʉ a nthʉm vʉ e, po'o tə bi a pɑ mǒ la' ŋkhəm nə nə́ yam nə vʉ̌, bɑ yə mǒ ku' nə a. A tə́ bɑ gɑ́ gɑ̌ tsə ghə tsə bɔ awɛ pɑ́, kɑ m̀ gɑ gɑ̌ tsə lɔ pɑ̀; da' gɑ́ gɑ̌ bɑwə́ nthe gʉ' gɑ ŋ gɔ nthɔm e, nə pa' a bɑ yʉ Yeso Kristo lě nthɔm a. Mfɑ̌mfɑ́, a tə́ bɑ gɑ́ gɑ tsə tɔm e pɑ́; yɑ nə zhwíŋ bɑ gɑ́ dʉɔnyə dhə́ jyə̀ yə gɑ tsə́ ghiŋ nə a, bɑ dé pɑ̀ dzə̀, gɑ̌ ŋkhaktʉɔ nə ghɔ dzə̀ nə kwi mcwɔ'fa' myə a bɑ nə nə́ ke mo kɛbəŋ yə Si nə ŋkhe wɔk pɑ shyə́ m̀ nə Yeso Kristo a. Guŋ yɔk pɑ awɛ, wɔk pɑ pɔ dɔlɔ̌, pɑ vɔk pa' pɔ dɔlɔ̌ a; tə́ bi a po pɑ́ tə pɑ́ ŋkwishwə nə mu' nwə, bɑ Si gɔ kyɛ̀' wɔ nə nwə bɔ. Da' gɑ́ pɑ nə pyap, a kwa' tsʉ' yə pɑ giŋ tə ŋkhəm nə a pɑ giŋ dé pɑ nə ta' məjyə́. Guŋ yɔ awɛ mfɑmfɑ́, po fo' a, po pɑ nthʉ́ mnyə mɔ pɑ nə pɔ pyə́ wap giŋ pɑ́ nə fo' yə pǒ jɔ bi pyə a. Ŋ də bɑ sǐŋ wɔ biŋ ŋkwi' bɑwə dɑ́ shyətsə siŋ wɔ, bo'gwyə pɔ giŋ pɑ́ pa' mghɛ bo bɛnyəpɛnyə Kristo a. Wap gɔ sɔ' miŋ m nə pi; si yap bɑ vam tsap; ba yap ghu'tə pɑ kuso yap; nə pa' wap sɛ yap nwə a pɑ́ pɑ́ nwə dəmcǎ' a. Da' gɑ guŋ yɔ́k pɑ bɑ m kɛbəŋ, tsʉ' yə pɑ byap Cyəpɔ Yeso Kristo gɛvɔk pɔ nə a. E gɔ sɔ' kwyəpnyə nɑ́ tsɔk pɑ tsyə a bɑ ywə nə jɔgo' a, nə ghə pa' nɑ e yə a bɑ nɑ ghu'tə̀, po'o cyə m nə gʉ̌' yə a bɑ bi e bɑ gə e ku' nə ghə gɑ gúŋ ywə awɛ yu'nyə e a. Po'o lə mfɑmfɑ́, wɔ pyə gɑ̌ ŋkhùŋ wɔ tə́ biŋ bɑwə shəŋtə sʉ́m nə piŋ jɔ wɔ a, wɔ pyə pǒ bɑ yɑ ŋwɛnyə biŋ bɑ yɑ co'fo a, po tɔm a tʉ̌ɔ shyə m nə Cyəpɔ, wɔ pyə gɑ̌ ŋkhuŋ wɔ tə́' a. Gɑ̌ wə səso Evodia, bɑwə səso Suntuke gɑ wap vɔk pɑ kwa' nə Cyəpɔ. Ba wə So ghiŋ a yə nyənyɔ, gɑ wə həŋtə bu, sɔ' ŋkwitə́ wap, nə pa' pyə a pú lə pə̌mtə nthuŋkwà nə́ Cuŋ pɑpúŋ, ba Klemənt, pu a guŋ pyə shɑ mso fa' awɛ pyə mtso map nthʉ̀m ŋwa'nyə vɔk a. Po pɑ ŋwɛnyə nə Cyəpɔ guŋ mcwə awɛ; gɑ wə ŋkwi' gɔm bi po, po pɑ ŋwɛnyə. Po ghə gɑ́ guŋ pɔ awɛ zhyə tʉm pɑpúŋ tsɔ́. Cyəpɔ bɑ è ghɔptə nə po. Ka lam tsɔ sɔ́ nə sɔmywə, da' gɑ, nə guŋ msɔ́ awɛ, po pɑ dɑ mcwyɛ'nyə̀ pu a nə pu'bǔ, ba mfa' gho'tə gə Si zhyə́ ywə yə pǒ wə do bi a. A piŋ bɑ po' hwitə̀ Si yə a bɑ ǎ cyə gùŋ zhyə̌nwə awɛ a pɑ dwɔ' mtʉm mɔ ba mkwɛnyə̀ mɔ nə Yeso Kristo. Po'o lə́ mfɑmfɑ́, a guŋ ywə yə ǎ nyənyɔ a, guŋ ywə msəm, ywə yə a dəŋdəŋ á, ywə tə́ mvíŋ, ywə yə pɑ mo kuŋ yɑ a, ywə mku', ywə mà pɑpuŋ ywə bi a pɑ́ pu gho'tə a, guŋ ywə bɔ awɛ pɑ nə́ gənyə́nwə̀ mɔ. Ywə yə po lə́ zhi'tə bəm á, ywə yə po lə́ kwǐ bəm á, ywə yə po lə́ yǔ' bəm á, ywə yə po lə́ yɔ̌ nə́ m̀ á, po ghiŋ nə́ guŋ ywə bɔ awɛ po'o gɑ Si hwitə́ pɑ bi po. Myə kɑ́ ŋwɛ̌nyə te' shyə́ m̀ nə́ Cyəpɔ nə pa' po biŋ sɛ nwə nə m̀ a; əŋ gɑ̌ zhyə́ gɑ po lə́ ji ŋkhamtə a, da' gɑ́ la' po pɑ́ jɔ sɔ̀. Tə́ nə yak ywə nə gə tə́ gɔmnwə pɑ̀, nə pa' a bɑ gɑ̌ zhi'tə nə vɔk nə́ bǎ yá nthi cwə dzʉ̌ lə́. Gɑ̌ zhyə nə vɔk nə pə̌ŋ, ba nə vɔk nthʉm fʉ'. Gɑ̌ bɑ gɑ̌ zhi'tə nə zhwyə ba nə cwə jikǔ' bǎ nə yá nthi lə́, bà nə yá cwə̀ lə̀, nə vɔk nthʉ́m fʉ' ba m̀ nthʉ̌m pə́ŋ. Pɑ́ gə guŋ ywə awɛ shyə m̀ nə Mo yə e hɑ gʉ' bəm a. Tə́ ba tə po'o, a bɑ po ghə á puŋ nə ghə yɔ tsʉ' nə́ ghəghʉɔ a: Wɔ pɑ Filipo, pǒ zhyə́ gɑ́ cwə nə to' Cùŋ pɑpúŋ, ŋ də nə təm Makedonya pyə sɔm Cu'tə pɔ Kristo lə fɛnyə sɔmywə tə ně da' wɔ, wɔ pyə po lə cyá ywə yə́ a lə́ bɑwə jak a cwə yə ŋ də bɑ Tesalonika a bəm mcʉ́m mcʉ̌m a. A tə bɑ́ gɑ́ gɑ̌ bɑwə shəŋ ywə yə pu gɔ hɑ bəm pa' mcwɔ'fa' a pɑ́; ywə yə gɑ̌ shəŋ a a bɑ nthɔm myə a gɔ pɑ mɔ a. Gɑ̌ bɑ́ gɑ wim ba ywə yə a bɑwə shəŋ á tə́ a cyə ba də̀ŋ e. Cwəlɔ yə gɑ̌ ŋkwi ywə yə po nə nthəm Epafrodito a, mwɑ̌ damnyəlamnyə myə pɑpuŋ, tsəpwɔ' tsyə́ a buŋ bi Si a, gɑ̌ wə bɑ gɑ̌ ku'. Si a gɔ piŋ kwi' hɑ guŋ ywə awɛ yə ǎ wə shəŋ bi po a, nə dəŋ fʉ' e, nə ghu'tə Yeso Kristo. Ghu'tə pɑ bi Si, Tá yɔk pɑ nə mgu' nə gu'. Amɛn. Po ca'tə bǎ ya mo dɔlɔ̌ lə́ nə Yeso Kristo. Mfɑmfɑ́ pyə́ pyə a pú bɑ́ a ca'tə wɔ. Guŋ pɔ dɔlɔ̌ awɛ ca'tə wɔ, tə kwa' pyə wap dyə Kasa a cəŋtə sha'tə wɔ. A gho Cyəpɔ Yeso Kristo pɑ bi zhwenyə yɔ. Myə Polo, gɛ nthəm Yeso Kristo shyə m̀ nə́ pa' Si nə jap a, ba Timotio fɑ a, bi pɔ dɔlɔ̌ pyə́ wap Kolosai, mfɑ̌ pyə wap biŋ Yeso Kristo a. A gho' ba hwitə pɑ́ bi po shyə́ m̀ nə Si, Tá yɔk pɑ. Pyə̌ wə go'tə Si Tá Cyəpɔ yɔk pɑ Yeso Kristo nthʉ́m mcwyɛ'nyə myə́ pyə tə bwa nə hɑ bi e nə po a pɑ. Nə́ pa' a bɑ pyə̌ yu' nwə piŋnthʉm yɔ nə́ Yeso Kristo ba ŋkhuŋnyə yɔ nə pɔ dɔlɔ̌, shyə m̀ nə́ mɔktə yə a wə byap wɔ kɛbəŋ a; mɔktə bɔ bɑ ghɔm nyənyɔ nə lə siŋ wɔ yá, Cùŋ pɑpuŋ yə a lə sɔ' tə ŋkhə́m bi po a; dəŋdəŋ pa' a bɑwə jam nthɔ́m biŋ bɑwə ŋkwyə́ nthʉ́m guŋ dzʉ́ awɛ a, a bɑwə gə pɑ́ po'o cəcɑ̌ pó tə fɑ́ tyɛ'dzʉ́ yə po lə kwǐ biŋ jyə́ gho' Si nthʉm nyənyɔ a, Shyə́ m̀ nə́ ywə yə Epafra lə zhi'tə wɔ a; yʉ́ yə e bɑ só fa' yɔk, biŋ bɑ bəŋ thə́ yɔk kwa' pɑpúŋ pa' gɛ nthəm Kristo a, e cəŋtə siŋ wɔk kwa' pa' Zhwenyə bɑwə gə po tʉɔ a. A po'o tə nə́ yɔk ghə́ŋ, bɑ tə́ fɑ́ tyɛ'dzʉ́ yə pyə lə́ yu' a, pyə lə pɑ́ bwa nə cwyɛ'nyə̀ Si nə po. Pyə̌ dó bi Si gɑ́ po cəŋtə́ jyə́ ywə yə e shə́ŋ a, guŋ fʉ́ awɛ ba zhyənwə yə a fɑ nə zhwenyə e a, po'o gɑ́ po vɔk vɔk yə ǎ ku' bi Cyəpɔ a, bɑ shə́ŋ pɑ́ ywə yə ě piŋ a. Pǒ gɔ pɑ́ fa' pɑ́ mfà' myə a bɑ myə pɑpúŋ a, a piŋ bɑ ŋkwyə́ nə guŋ mnyə awɛ, a po piŋ dɑ nə zhyə́ Si nə gɔ pɑ́ dzə. Gʉ' ghu' Si gɔ nyəŋ gʉ' nə po, po pɑ ŋkhaktʉɔ, bɑ ŋkhyəp tʉm tsɔ́ nə guŋ go' awɛ. Po lɑ ŋwɛnyə̀ go'tə Tá yə e bíŋ gɑ po ghə yɔ tsʉ' nə mcʉ̌' pɔ dɔlɔ̌ nthʉm ŋkha' a. E bɑ e lě ŋkwi wɔk pɑ bi gʉ' jʉ̌m biŋ shya wɔk pɑ nthʉ́m nəfo Mú ŋkhuŋnyə é, yə é shyə m nə é ŋkwi wɔk pɑ bi mnwə cwəpuŋ dɑ mhɔ mɔk pɑ shwyɛ' wɔk pɑ a. E bɑ fo' Si yə pu tə́ jɔ e a pɑ, thəsə mu nə guŋ ywə awɛ yə Si lə ghə a. Nə pa' Si lə nyaptə guŋ ywə awɛ m nə é kɛbəŋ ba m̀ dəmcǎ', tsə́ tsyə pu jɔ a ba tsyə pu tə́ jɔ a pɑ́. Guŋ mtʉɔ zhwenyə, pɑ sa' dzʉ̌ pu a gʉ' nə sa'dzʉ́. Yʉ́ nə́ nyaptə guŋ ywə awɛ, guŋ ywə awɛ pɑ yə́, Yʉ́ nə́ biŋ bɑ́ dzə nə guŋ ywə awɛ; guŋ ywə awɛ bɑwə cwəlɔ pɑ́ nə é; yʉ́ nə́ biŋ bɑ thə́ nə nɑ́ yə a bɑ Cu'tə pɔ Kristo a. E bɑ́ nə nə́ ntho' thə́sə mu nə nə yam nə vʉ̌ po'o gɑ e pɑ nə guŋ ywə awɛ bɑ́ pɑ́ də̀ŋdzə. Nə pa' a bɑ a lě buŋ bi Si gɑ yʉ Si gɔ pɑ nə mu e tə miŋ. Biŋ gwɔ'bvɑnyə nə guŋ ywə awɛ shyə m̀ nə e dəmcǎ', ba m̀ kɛbəŋ dɑ mcyə bɛnyəpɛnyə e jap hwítə. Ba wɔ pyə́ pó lə bɑ́ mghʉɔ, wɔ pyə́ mfa' mɔ myə́ cwəpuŋ lə dɑ pɑ́ shɛ sɔ' a, ǎ yɑ́ bɑ Si cyə m̀ nə nɑ́ Mu é yə a bɑ nɑ vʉ̌ a, gwɔ'bvɑnyə cəcɑ̌ po shyə m nə vʉ́ e, po'o gɑ po sɔ' ŋwak dzə̌ é bɑ dɔlɔ̌, pɔ tə bya, pyə pɑ mo lə kam wap a. Da' gɑ́ po cyə́ m̀ nə piŋnthʉm nthɔ́m, nthʉ̌ɔ, po kɑ səŋ, po kɑ pǐŋ gɑ́ mo fʉ'tə wɔ nə mɔktə yə po lə ghə shyə m nə Cùŋ pɑpúŋ yə po lə́ yǔ', yə pu lə sǐŋ bi guŋ pɔ awɛ mto kɛbəŋ, yə myə Polo bɑ gɑ̌ cʉ' gɛfa' nə a. Gɑ wə jɔ yɑ ŋwɛnyə̀ cwəlɔ nə gǒ' yə gɑ̌ wə jɔ nə po á, a piŋ bɑ po'o, ywə yə a bɑwə jak nə ghəghʉɔ Kristo a, gɑ wə miŋ yá nə bap nɑ́ a, nə́ nə ŋkhúŋ nɑ́ é yə a bɑ Cu'tə pɔ Kristo a. Gɑ̌ bɑ gɑ̌ zhi gɛfa' shyə m̀ nə fa' tsyə́ Si jap a nə́ nə po a: Fa' bɔ pɑ nə miŋ nə siŋ Ghɔm Si, nwə cyə́ zhyənwə yə pu lə la' dʉ́m ya tə fɑ tə tyɛ̌', mgu'mgu', a piŋ bɑ tyɛ' ɔ bɑ Si la'tə yá bi pɔ dɔlɔ̌ pyə́ a. E bɑ ě yɔ gɑ́ e gɔ ghə̌ wap zhyə́ dəŋ fʉ' ba ghu' nwə cyə zhyənwə bɔ cəcɑ̌ pɑ tə pɑ́ pɑ Yudea, a pɑ́ gɑ́ Kristo bɑ cəcɑ̌ po, bɑ mɔktə ghu'tə. A bɑ yʉ́ Kristo tə́ pyə̌ siŋ é bi pɔmnəŋ, bɑ siŋ gɑ bǎ ya mo lə pɔmtə́, bɑ dɑ fʉ́ nthɔk bǎ ya mo lə, po'o gɑ bǎ ya mo lə pɑ́ dɔlɔ̌ shyə m nə Kristo. A bɑ ywə yə gɑ̌ fa' nə a, ywə yə gɑ̌ dɑ gʉ' Kristo yə a fa' nə m̀ a nə do'shù nə a. Gɑ̌ shə́ŋ gɑ́ po zhyə́ shu nthʉɔtʉɔ yə gɑ̌ do' nə po a, nə pɑ Laodikia, ba nə bo'gwyə́ pɔ pyə wap la m jɔ kwa' myə a. Gɑ̌ shəŋ po'o gɑ wap ghə kaktʉɔ nthʉm tʉ́m pú, biŋ nthamtə nthʉ́m ŋkhuŋnyə, shə́ŋtə́ gə yap zhyənwə nə jyə́ nwə cyə zhyənwə yə a bɑ yə́ Si a: Kristo yə a bɑ guŋ fʉ' ba guŋ fʉ́ awɛ bɑ ǎ tʉmnyə nə é, ba zhyə̌nwə a. Gɑ̌ gɔm po'o gɑ ka sɔmmo lɑ shɑ mghɔm pɑpúŋ fʉtə́ wɔ. Gɑ̌ wə la' bɑ cəcɑ̌ po nə bə̌ŋ nɑ a, da' gɑ pɑ nə bəmtə́ bɑ nə zhwenyə, bɑwə́ ŋwɛnyə nə yɔ́ gɑ pǒ wə nthɔm yɔ tsʉ' kwa' pɑpúŋ, piŋnthʉm yɔ nə Kristo piŋ bɑwə dɛ́tə́. Po pɑ dɑ yɔ nə ghiŋ jʉ̌m Kristo Yeso yə e bɑ Cyəpɔ a nə gɔ pɑ́ dzə, pɑ kwa' pa' po lə nə ŋkwi e a. Po cə́ŋ mgɛ biŋ ŋkwɑ vɔk yɔ nə e, biŋ shəŋtə́ gə́ piŋnthʉm pɑ kwa' pa' pu lə nə ji'tə wɔ a, bɑ go'tə tə dhə. Po pɔmtə́ nə vʉ nə yo' msɛnwə, yə a bɑ pɑ fʉtə, bɑ pɑ nwə nə mà pɔmnəŋ, bɑ pɑ nwə gʉ' dzʉ́, la' a pɑ́ mnwə Kristo a. Nə pa' guŋ pa' Si nə bɑ a bɑ ǎ lonyə nə yʉ́ Kristo nə nɑ é, ba wɔ yɔ pɑ́ bɑ pǒ lonyə nə mo yə e bɑ tadyə̌ nə guŋ nə sa'dzʉ́ ba nə guŋ tʉɔ awɛ a. Pǒ shyə́ m nə e bɑ pɔ pyə́ a bɑ pu vó wap m nə yə nthi nə vo mo yə pǔ mo tə bɑ nə a pɑ́, bɑ yə bɔ nə vo mo lě sya nɑ bap yə a bɑ nə po a: A bɑ yə nə vo mo Kristo. A bɑ pu lě bəmtə́ nthə́ŋ wɔ po a pú nthʉ́m kwishyə, po a pú piŋ bəmtə́ jam nə vʉ̌, nə pa' a bɑ pǒ piŋ gʉ' Si yə a lə yam é nə vʉ̌ a. Biŋ sɔ' m nə wɔ pyə́ a lə bɑ pǒ pfʉ́ shyə́ m nə mhɔnwə mɔ ba m̀ nə pa' a lə bɑ pu ka vo wɔ nə bapnɑ yɔ a, Si bɑ ě hɑ vɔk bi po a pú: E bɑ ě lɑ mhɔ mɔk pɑ shwyɛ' wɔk pɑ. E lě gə ŋwa'nyə nə butə wɔk pɑ mi. Ywə yə mco' lə nə butə wɔk pɑ á e lě gə a símnyə. E lě ŋkham yɑ́ thə́ bɛnyəpɛnyə. E lě gə pɑ sa' pu a yap nə sa' lə piŋ bɑ sɔmywə, ŋkwi gʉ' nə sa' pu a mtʉɔ zhwenyə bi pú, dɑ wap shyə sim, fə́ŋ wap si nə ŋkhɛ pɑ cyə́shù bɛnyəpɛnyə. Tə fɑ po'o, sɔmmo kɑ piŋ nyəŋ shɛ thə po nə nwə ywə tsʉ́ kə nə ywə nwə́nwə̌ kə nə cwə la'nwə nə thə́ ŋwə́, kə nə sabat lə. Guŋ tsə bǎ awɛ bɑ pɑ́ ciŋnyə ywə yə a lə́ bɑ gɔ la' sɔ' a; da' gɑ kwa' ywə bɔ nyənyɔ bɑ m̀ nə́ Kristo. Ka po piŋ gɑ zhwənyə ko nə po shyə m nə yə nə cyəshú pɔ pyə́ wap ŋkhak yap tʉɔ pɑ nə cu'tə nə se pɑ aŋgəle a. Wap ŋkho pɑ nə mkwɛnyə nwə map, bɑ ŋa'tə pɑ nə zhyə̌nwə monəŋthə́ yap. Wap tə́ bɑ wap kwɑ nə Kristo yə e bɑ thə́ nə nɑ, guŋ nɑ awɛ yə mzhəŋtə́ pu a gɛ bɑ nə, a pɑ ŋkwyə m nə ŋkwyə yə Si hɑ a pɑ́. Cwə yə a bɑ po a Kristo pfʉ́, a piŋ bɑ́ bɑ pǒ təm nə mnwə gʉ' dzʉ́ a, nwə kɑ po piŋ giŋ nə nthinthi mco' dzʉ́ pa' cwə yə vɔk yɔ jɑwə bɑ m nə dzʉ̌ a? Nə ghɔm gɑ: Kɑ pě ywə ki, kɑ zhwi'tə́ ywə ki, kɑ kwak ywə ki, guŋ é awɛ po'o nə tsə́ simnyə sǐmnyə; a pa' a bɑ pɑ́ mco' pɔmnəŋthə́ pu a mnwə map. A pɑ gɑ tsə bǎ hwə́ fʉ́: Nə piŋ, nə kaktʉɔ nə piŋ, nə zhyə̀ nə tsʉywə, sɔm nwə nthʉɔ tə bɑ nə pɑ́, a ŋkwitə pɑ da' nə nə gə gɑ bap nɑ́ pɑ ŋwɛnyə. Pa' a bɑ po a Kristo yám nə vʉ̌ a, po cə́ŋ pɑ ywə yə a bɑ m thə́, tsʉ' yə Kristo bɑ nə, bɑ ě cwə nə ghə́ŋ tʉɔ Si a. Ywə yə pǒ shəŋ a bɑ m thə́, a tə bɑ m̀ sǐ dəmcǎ' pɑ́. Nə pa' a bɑ pǒ pfʉ́, vɔk yɔ pu Kristo pɑ́ bɑ ǎ tʉmnyə nə Si. Cwə yə́ Kristo yə e bɑ vɔk yɔ a gɔ sɔ' tə́m pu yɔ e a, ba wɔ yɔ po a pu pəmtə nthəm pu yɔ wɔ po a pú nə ghu'. Po ghə ywə yə a bɑ nə po bɑ yə́ dəmcǎ' a, a pfʉ́: Nwə ghap, mvíŋ, nə yap tʉ̌m nə ywə, nə cəŋ ywə bɔkpɔ̌k, ba ghi'nyə yə a bɑ nə ghamtə kətwɔk a. A bɑ ywə yə a gə Si yɛluŋ a. A bɑ pa' po lə giŋ a, bɑ vɔk yɔ cwə bɔ. Kwa' cwəlɔ ba wɔ yɔ təm nə tsə bɔ: nə yɛlúŋ, nə kamshɛ, nə tʉm shɔkcɔ̌k, nə mcaptə pu a mghɔm nɔm myə a nthəm shwə̌ po a. Cwanwə kɑ́ piŋ bɑ cəcɑ̌ po nə pa' a bɑ pǒ sya bvo mo nə pó pu a mgənyə nwə myə́, biŋ ŋkwa mo sə́ nə po, mo yɑ yə e nə kəm nə zhyə̌nwə bɑ ŋkwyəpnyə guŋ mcwə awɛ pa' gɛ pəm é a. A bɑ nə́ pu lə piŋ bɑ jyə́ yə Grikia kə yə Yudea lə, kə mo yə pu vo e kə mo yə pu ka vo e a lə, kə gʉɔ, kə yə Skita lə, kə ŋkwɔ kə tə pɑ ŋkwɔ lə; pu jyə da' Kristo, e pɑ guŋ ywə awɛ bi guŋ pɔ awɛ. Pa' a bɑ Si ci wɔ, dɔnyə́ wɔ, ŋkhúŋ wɔ a, po ghə tʉm cɔmmtso, tʉm nwə pɑpúŋ, gə nə fi' nɑ́ hɑ́ si, tʉ́m bwatə pwatə gə nə kyəp tʉ̌m. Po pɑ bəmtə́ ŋkwa mnwə mɔ cəcɑ̌ po, bi a pɑ gɑ́ mo la' fɑ e nə ywə, po lɑ mhɔ mɔ́ shwyɛ' wɔ wɔwɔ; dəŋdəŋ pa' a bɑ Cyəpɔ lɑ mhɔ mɔ́ shwyɛ' wɔ a, ba wɔ yɔ́ pɑ́ ghə pɑ po'o. Nə guŋ e awɛ po ŋkwa ŋkhuŋnyə nə po pa' dzə́ a; a bɑ dʉ̀ dɔlɔ̌. A hwítə Kristo yə pu lə kě wɔ nə nə́ gə ta' nɑ́ a pɑ sa' mtʉm mɔ́. Po vɔk nthʉm gho'tə. A Ghɔm Kristo pɑ shwə́ cəcɑ̌ po nə guŋ fʉ' yə a bɑ nə́ awɛ: Po pɑ ji'tə biŋ bɑ nthɔknyə wɔwɔ nə fʉ̌, po pɑ jwɔp nə go'tə Si nthʉm mtʉ́m mɔ, jwɔp mzhwɔp ghamtə ba mzhwɔp myə a fɑ m̀ bi Zhwenyə a. Bǎ kə́lə́ yə pɑ́ po ghə kə gɔm a lə, po ghə pɑ nə́ tsǒ Cyəpɔ Yeso, bɑ shyə m nə e go'tə Si Tá. Pɑ jwí, po yu'nyə mthə́ pɔ́ dəŋdəŋ pa' pu ju'nyə bi Cyəpɔ a. Mthə́, po kuŋ pɑjwǐ pɔ, po kɑ pɑ̌ gə tʉm shɔkcɔ̌k nə pu. Pɑkhʉ, po pɑ́ ju'nyə bi pɑ tsə wɔ nə guŋ mnwə awɛ. Yə̌ŋ bɑ ywə yə Cyəpɔ bɑwə byap bi po a. Pɑ tsə́ pó, ka po pɑ dwɔp luŋ po pɔ́, po' gɑ wap kɑ pwa. Mkwɔ, po pɑ ju'nyə́ bi mtá pɔ nə bap nɑ́. Po kɑ fa' bi pu m pa' pu wə dé wɔ a kə m pa' po shəŋ nə puŋ pɔmnəŋ a lə, po fa' bi pu m pa' pɔ pyə wap bwɔk Cyəpɔ a. Fa' tsɔ pɑ pɑ́ gɑ́ kə́lə́ po lɑ tʉ́m pɑpúŋ fa' a, fa' pa' pǒ fa' m bi Cyəpɔ a, po kɑ fa' m pa' bi pɔmnəŋ a. Po zhyə́ gɑ pǒ gɔ sɔ' kwi mcwɔ'fa' bi Cyəpɔ pa' mcʉ̌' a. Tá fa' bɑ Kristo; po fa' pa' a m bi e. Mo yə e da'tə pɑ nwə yə a tə́ dəŋdəŋ a pɑ́ gɔ sɔ' kwi mcwɔ'fa' nwə yə a tə dəŋdəŋ a pɑ, a bɑ pɑ po'o tə la' a tak sɔmmo. Mtǎ, po wim mkwɔ pɔ pɑ nə dəŋdəŋ ba nyənyɔ po zhyə gɑ́ ba wɔ yɔ́ bɑ pǒ ghə ta' Tá thə́ kɛbəŋ. Po tɔm mcwyɛ'nyə; a pɑ́ byap wɔ gɑ́ po kɑ pwǎ nə mfa' gho'tə̀. Po pɑ shwyɛ'nyə Si ba m nə pyə yɔk gɑ yʉ́ Si ghyɛ' jyədyə̌ bi pyə nə ghɔm tə́ pyə siŋ nwə cyə́ zhyənwə Kristo yə gɑ̌ bɑ dyəcɛ̌ po'o nə a, po'o gɑ́ ŋ shyanyə yá pa' a bɑ ǎ yap gɑ́ nə gɔm a. Po zhyə kwa' nə ghiŋ pɑpuŋ dzə̌ pɑ dzʉ́; po kɑ pi sɔ̀ bɔ yə ǎ bi po a. Mghɔm mɔ́ pɑ́ bɑ́ pɑ́ mghɔm pɑpúŋ, gwɛ̌ pɑ nə́, po zhyə və nə ba'nwə bǎ bi wɑ̌lə́ pa' a shəŋ a. Sɔ' m nə yɑ nə pɑ, po gɔ yu' guŋ mnwə awɛ bi Tikiko, fɑ yə gɑ̌ ŋkhuŋ e, gɛfa' yə nyənyɔ, so fa' a jʉ̌m Cyəpɔ. Gɑ̌ nthəm e bi po po'o gɑ é siŋ wɔ mɔk mcùŋ biŋ hɑ kaktʉɔ bi po. Wap pu Onesimo, fɑ yə nyənyɔ nə pɑ̌. E bɑ mo yɔ, e gɔ siŋ wɔ guŋ ywə awɛ yə á shyə tsɔ' a. Aristarko yə pyə̌ é dyə́ cɛ̌ a ca'tə wɔ, ba Markusi fɑ Barnabas. Pu tsə siŋ wɔ nwə nə e; e sɔ' wə po, po lɑ é kwa' pɑpúŋ. Ba Yeso yə pu ŋkhe é gɑ Yustos a ca'tə wɔ. Da' yʉ́ tə́ pyə é lə fa' cəcɑ̌ pɑ Yudea nə Nəfo Si; wap nə lə́ bɑ ywə nə hwitə tʉm tsa. Epafra, yə́ wə́ po ca'tə wɔ. Yə gɛfa' Yeso Kristo bɔ tə bwa nə lo'shù mcwyɛ'nyə nə po pɑ́, shwyɛ'nyə po'o tə po tɔm pɑpuŋ, bɑ dɔlɔ̌, bɑ shəŋtə́ biŋ ywə yə Si yap a pɑ́ wɛ. Gɑ̌ wə bɑ ŋkwinthɛ̌ é gɑ e shəŋtə́ jɔgo' nə po ba m nə pɑ Laodikia, biŋ gə pɑ Hierapolis. Lukasi só yɔk pɑ yə e bɑ gəgɛ a ca'tə wɔ ba Demas. Po ca'tə mfɑmfɑ́ pyə́ wap Laodikia a, ba Nimfas, ba cu'tə pɔ Kristo yə a ŋkho dyə e a. Cwə yə pǒ ké ŋwa'nyə ǎ po piŋ shya bi pɑ Laodikia gɑ́ wap ké yap. Bɑ wɔ yɔ piŋ ŋkhe yə ŋwa'nyə yə a gɔ fɑ́ Laodikia a. Nə mǐŋ, po ghɔm bi Arkipo gɑ: Lé fa' tsyə o kə kwǐ nə Cyəpɔ a, fa' a púŋ. Yɔ kwa' ca'tə pu ǎ, myə Polo yəŋ gɑ: Po kamtə mgwɑ mtʉɔ̌ myə a bɑ pu nə shəŋ a. Gho' pɑ bi po. Myə̀ Polo pyə Silvano ba Timotio, bi cu'tə pɔ Kristo pɑ Tesalonika, cu'tə yə a bɑ m̀ nə Si Tá ba m̀ nə Cyəpɔ Yeso Kristo a. Gho' pu hwitə pɑ bi po. Pyə̌ go'tə Si guŋ mcwə awɛ nə guŋ yɔ awɛ nə pa' pyə ŋkhe mtso mɔ́ nthʉ́m mcwyɛ'nyə mɔk. Guŋ mcwə awɛ, pyə̌ ŋkhamtə́ piŋnthʉm yɔ yə a bɑ piŋnthʉm fa', ŋkhamtə́ ŋkhuŋnyə̀ fa' yə a bɑ yɔ́, biŋ ŋkhamtə́ yɔ kaktʉɔ nə mɔktə̀ nə Cyəpɔ yɔk pɑ Yeso Kristo dzə́ Si Tá yɔk pɑ̀, bɑ shəŋtə́ jyə m̀ mfɑmfɑ́ gɑ wɔ́ pyə Si ŋkhuŋ wɔ a, a bɑ ě cwɔ' wɔ́. Nə́ pa' Cuŋ pɑpúŋ yə pyə̌ siŋ a, a tə́ bɑ pu lě da'tə yá bi po pɑ́ da' pa' sobo mghɔm a pɑ́, a bɑ a lě shəŋtə́ da'tə gʉ' e shyə m nə Zhwenyə Dɔlɔ̌. A bɑ ywə yə pyə lə ghə cəcɑ̌ po nə pɑpuŋ yɔ a, a bɑ pǒ zhyə. A biŋ bɑ́ bɑ po lě fo' wɔk, fo' wɔk pyə a Cyəpɔ, nə pa' a bɑ po lě ŋkwi Ghɔm nthʉ́m ghəghʉɔ tə dɑ pɑ ŋwɛnyə Zhwenyə Dɔlɔ̌ ŋkwi: A po'o tə a bɑ pǒ cʉ' fo' nwə bi gúŋ pɑ piŋ pyə wap bɑ Makedonya ba m Akaya a. Nə pa' Ghɔm Cyəpɔ tə bɑ a lě fɑ́ wə po gí da' Makedonya pu Akaya pɑ; a bɑ nwə piŋnthʉm yɔ nə Si lě sɛ nə́ guŋ mtsʉ' awɛ tə bi a pɑ́ pyə lə piŋ gɔm pɑ́. Nə pa' bǎ wɑ̌lə́ bɑ gɔmnwə nə́ pyə́, gɔm pɑ nthi pa' po lə nə dɑ wɔk, ba nthi pa' po lə nə fɑ jʉ̌m mkətwɔk fɛ́ jap m jʉ́m Si a, po'o gɑ po pɑ fa' m bi Si nthʉɔtʉɔ, Si nyə́nyɔ́, biŋ bɑ byap Mu e yə e lə yǎm e nə vʉ̌ a kɛbəŋ gɑ́ e sɔ' nthé wɔk pɑ nə yɛ̌lúŋ yə ǎ wə sɔ' a. Kwa' wɔ cəŋtə jyə mfɑmfɑ́ gɑ po lě tə lɑ wɔk pɔpɔ. Nə pa' pǒ cəŋtə jyə gɑ́ cwə yə pyə lə lu m̀ nə yɔgǒ' Filipo, pu pɑ jəmtə wɔk a, Si yɔk pɑ̀ hɑ́ gʉ̌' bi pyə́ nə́ nə siŋ Cuŋ pɑpúŋ é bi po nthʉ́m nthinthi ŋkwà. A du gɑ́ ghɔm tsɔk tə́ bɑ ghɔm fʉmnyə pɑ, a lə pɑ nthəm m̀ nə nwə mvíŋ, a lə pɑ nwə fʉ́tə. Nə pa' a bɑ Si lě shə́ŋtə de wɔk tə́ hɑ Cùŋ pɑpúŋ bi pyə; ǎ po'o tə pyə̌ nə siŋ Cuŋ pɑpuŋ bɔ. Pyə tə́ shə́ŋ m nə́ pùŋ pɔmnəŋ pɑ. Pyə̌ shə́ŋ nə puŋ pɑ Si yə e jyə mtʉ́m mɔk pɑ a. A po'o tə́ pyə la m̀ gɔ́m ghɔm pyɛ'tə, pyə lə nəŋ gə mkwɛnyə fʉ' tə bɑ pǒ zhyə́, Si wə bɑ ŋkwinthɛ̌. Pyə la m̀ nə́ŋ shə́ŋ mku' bi pɔmnəŋ kɑ m̀ wə po kɑ m wə pyə shɑ pɔ lə. A nəŋ nə pɑ̌ po'o bɑ pyə lə ghə̌ nə hya wɔ pa' mghɛ nthəm Kristo a. Da' gɑ pyə lě dɑ pɑ byanyə́ nə bɑ cəcɑ̌ po, dəŋdəŋ pa' má mú shu'tə po pyə́ kəkɔp é a. Pyə lə kǔŋ wɔ kuŋ tə guŋ bɑ́ gɔ pyə lə hɑ da' Cuŋ pɑpúŋ Si bi po pɑ, pyə lə bɑ gɔ hɑ ba vɔk yɔk nə po nə pa' po lə bɑ́ bi pyə bɑ́ kwa' ywə tʉɔdəŋ. Mfɑmfɑ́, pǒ wə ŋkhamtə́ go' yɔk pu a pwa yɔk; nə pa' pyə lə fa' mtsʉ' ba m mɔkcʉ po'o gɑ́ pyə kɑ́ tsɑ sɔmmo nə́ po. Pyə lə fa' po'o tə nə siŋ Cuŋ pɑpúŋ Si bi po. Pǒ wə́ bɑ́ mkwinthɛ, ba Si kwi' bɑ ŋkwinthɛ̌ gɑ pyə lə ghǐŋ dzə̌ wɔ pɑ piŋ pɑ dɔlɔ̌, giŋ dəŋdəŋ, tə bya. Pǒ nə́ŋ jyə gɑ́ pyə lə fa' bǎ nə ya mo lə́ nə po pɑ́ pa' tá fa' nə pó pyə́ a: Pyə lə səso wɔ, hɑ kaktʉɔ bi po, ŋkhe wɔ gɑ po ghiŋ nə nthi pa' ǎ ku'nyə bi Si yə é ŋkhe wɔ nə́ nəfo tsyə́ ba m̀ nə ghu'tə e a. Yɔ ywə yə a gə tə́ pyə pɑ go'tə Si nə yɔk ghəŋ tə pwa a yəŋ gɑ: cwə yə́ po lə kwi ghɔm tsyə́ pyə lə gɔm bi po a, po lə kwǐ m̀ pá' ghɔm mo a pɑ, po kwi pɑ́ kwa' pa' á shəŋtə nə bɑ a: Ghɔm Si tsyə a bɑwə fa' cəcɑ̌ wɔ pɑ piŋ a. Nə pa' mfɑmfɑ, po lě fo' mcu'tə́ pɔ Si myə ǎ Yudea, fo' wap po'o m̀ nə Kristo Yeso, nə pa' po lě jɔgo' bi pǒ pɑ gǔŋ po dəŋdəŋ pa' wap lə yɔ̌go' bi pyə shɑ pɑ Yudea a. Wap pyə wap lə zhwə̌ Cyəpɔ Yeso pu a mghɔm ghɔm Si á, wap lě biŋ shwɔ' mkwə mɔk pɑ. Wap tə búŋ Si pɑ. Wap bɑ mghɛ bo pɔmnəŋ. Wap ŋkhɔ gɑ́ pyə kɑ́ siŋ Cuŋ pɑpúŋ bi pɑ tə pɑ Yudea nə bvɔk wap. Wap gə po'o bɑ nə shwɔp mhɔ map. Da' gɑ a bɑ lúŋ Si lě nə miŋ jɛ́ nə pú. A sɔ' m nə pyə mfɑmfɑ́, pyə pɑ́ bɑ pyə̌ hap nə po nə muywə cwədzʉ̌, bɑ gʉə sʉəsʉə nə mnyə tə bɑ pɑ́ bəŋ pó nə tʉ̌m, pyə̌ bɑ pyə kaktʉɔ nə sɔ' jɔ wɔ, nə pa' nə yɔ wɔ bɑwə nthəŋ wɔk. Pyə lə cə̌ŋ nə sɔ' wə po mcʉm mcʉ̌m ba kwa' myə Polo tə́ Sata kɔ bi pyə. Nə pa' yɔk mɔktə bɑ kɑ? Yɔk ŋwɛnyə, yɔk ŋa'tə yə a gɔ sɔ' pɑ́ yɔk Co'fo dzə̌ Cyəpɔ yɔk pɑ Yeso tyɛ' yə e gɔ sɔ' sɔ' a bɑ kɑ tə pɑ̌ wɔ? Əŋ wɔ nə bɑ yɔk ŋwɛ́nyə, yɔk ghu'tə̀. Cwə yə́ pyə latə́ piŋ ŋkhu' nə pyap nə sɔ' wə po a, pyə sɛ́ gɑ́ pyə gɔ cwə dǒ pyə Atenya, a pɑ́ po'o pyə tə́m Timotio, fɑ́ yɔ, so fa' Si nə nə́ siŋ Cúŋ pɑpúŋ Kristo bi po gɑ́ e nyəŋ gʉ' nə po biŋ hɑ kaktʉɔ nə́ piŋnthʉm yɔ, po'o gɑ go'o yə ǎ si cwəlɔ a kɑ ghə̌ sɔmmo nə po pwa nə pa' pǒ zhyə gɑ a bɑ́ tsʉ' yə pɑ̌ gɔ m̀ nə a. Cwə yə pyə lə bɑ́ wə po a pyə siŋ wɔ gɑ́ po gɔ sɔ' yɔgo'. A gǒ' bɔ tə pǒ bɑwə jɔ cwəlɔ. A po'o tə pa' ŋ khɑ tə ŋku' nə pyap nə sɔ' wə po a, ŋ khě nthəm gɑ́ pu ghə ŋ jyə mcuŋ piŋnthʉm yɔ bɑ bwɔk gɑ pɑtyɛ' bɑ gɛ ləŋtə̀ ləŋtə́ wɔ, go' yɔk cʉ' pɔpɔ. A cwəlɔ tə́ Timotio fɑ wə po ŋwak bə́ŋ pyə; ě siŋ wɔk Cuŋ pɑpúŋ nə piŋnthʉm yɔ, ba nə ŋkhuŋnyə yɔ, biŋ siŋ wɔk gɑ́ pǒ bɑwə shə́ŋ nə yɔ wɔk pa' pyə̌ bɑwə shə́ŋ nə yɔ wɔ́ a. A po'o mfɑmfɑ́ tə pǒ pɑ́ bi pyə bɑ yɔk ywə nə gwak go' pu a ghəghʉɔ shyə m̀ nə piŋnthʉm yɔ. Pyə piŋ bɑ cwəlɔ bɑ gʉ̌' sɔ' bi pyə́ nə pa' pǒ tɔ́m Cyəpɔ kwa' pɑpúŋ. Pɑ pyə hɑ ya nthi gho'tə bi Si nə po nə guŋ ŋwɛnyə yə pyə̌ wə gə shyə m̀ nə po dzə̌ Si a? Nə pa' pyə̌ shwyɛ'nyə é mtsʉ́' ba m̀ mɔkcʉ, shəŋtə́ shwyɛ'nyə e gɑ́ e ghə gɑ pyə piŋ jɔ wɔ biŋ miŋ ywə yə a yɑ̌wə́ jak bi po nə́ piŋnthʉm yɔ a. Kwa' yʉ́ Si Tá yɔk pɑ pu Cyəpɔ yɔk pɑ Yeso Kristo cyá məjyə yɔk m wə po. Á Cyəpɔ ghə ŋkhuŋnyə yə a bɑ pǒ ghə cəcɑ̌ po ba nə́ guŋ pɔ awɛ a kwyə biŋ jɔm pa' ŋkhuŋnyə yə a bɑ pyə̌ ghə nə po a. E yap mtʉ́m mɔ́ nə dɔlɔ̌ tə bya dzə̌ Si Tá yɔk pɑ̀ nə́ cwə yə́ Cyəpɔ yɔk pɑ Yeso Kristo gɔ sɔ' pu a pɔ dɔlɔ̌ a. Mfɑ̌mfɑ́ ywə yə pyə̌ bɑwə do bi po biŋ bɑ səso wɔ nə m̀ nə́ Cyəpɔ Yeso á a bɑ́ gɑ́ pa' a bɑ po lě ji'tə pa' pǒ gɔ nə ghiŋ tə́ puŋ Si, bɑ pó jɔ bi pyə, pǒ nə́ŋ bɑwə giŋ pɑ po'o a, po kwi' ŋkhaktʉɔ m nə kak sə́. Pǒ zhyə́ mnthɔk myə pyə lə hɑ̌ bi po a, a fɑ m̀ bi Cyəpɔ Yeso a. Ywə yə Si shəŋ a bɑ gɑ po vɔ́k vɔk dɔlɔ̌ gɑ po tɔm nɑ tsɔ nə nwə ghap, gɑ bǎ yá mo lə́ nə po zhyə́ nə ghə yə mjwǐ tə bvɔk nə dɔlɔ̌ pu a mku', e kɑ́ wuŋ nthak gɑ́ ghi'nyə lɑ e gɔ pa' pɑ tə pǐŋ Si pyə a tə bɑ wap zhyə Si á gə a. A sɔmmo kɑ ghə sɔmywə yə e gɔ nə nyəŋ nwə nə fɑ e a, e kɑ nə̌ŋ gə sɔmywə yə a gɔ pɔk e a nə yəŋ nwə, nə pa' Si ba' bo nə tsə bǎ awɛ pa' pyə lə sǐŋ wɔ biŋ shəŋtə biŋ a. Nə pa' Si la tə́ ŋkhe wɔk pɑ m nə vɔk mviŋ pɑ́, e lə ŋkhe wɔk pɑ m nə vɔk dɔlɔ̌. A po'o tə mo yə ě wa' mɔ gɑ mnthɔk a bɑ e tə́ gwa' pɑ mo pɑ, bɑ e gwa' pa' Si, yʉ́ yə e hɑ Zhwenyə Dɔlɔ̌ e bi po a. Sɔ' m nə ŋkhuŋnyə mfɑmfɑ́, bɑ po tə̌ yɑ̌wə byap gɑ pu və sɔmywə nə bi po pɑ́, nə pa' a bɑ pǒ zhi'tə nə kuŋnyə cəcɑ̌ po bi Si, pǒ nəŋ bɑwə gə po'o nə mfɑ̌ pyə wap Makedonya a awɛ; pyə wə səso wɔ gɑ po piŋ ŋkhaktʉɔ. Po pɑ gə nthʉ́m tʉm po nə cwə gɑ zhyə̀, bɑ fa' pɑ kwa' nə mɔ mnwə̀, biŋ bɑ dɑ bú mɔ fa' pa' pyə lə ghɔm bi po a, po'o gɑ msəm pɑ nə ghiŋ tsɔ dzə̌ pɑ dzʉ́, a po lə piŋ bɑ byap sɔmmo pɑ. Mfɑ̌mfɑ́, pyə shəŋ nə tak wɔ nthʉm fʉmnyə nə nwə pɔ pyə wap lě pfʉ a pɑ, po'o gɑ po kɑ́ pɑ̌ shwə nə zhwiŋ pa' pyə shɑ pɔ pyə wap tə́ bɑ wap ghə sɔm mɔktə a pɑ. Nə pa' a bi a pɑ piŋ gɑ́ Yeso lě pfʉ́ biŋ jam nə vʉ̌, bɑ a bɑ́ dəŋdəŋ po'o tə pɔ pyə a bɑ wap pfʉ́ a, bɑ Si gɔ sɔ' cyə m̀ nə Yeso yam wap pu a pú. Ywə yə pyə̌ gɔm, shyə m̀ nə ywə yə Cyəpɔ lə zhi'tə wɔk a bɑ gɑ: Wɔk pɑ pyə pɑ gɔ sɔ' pɑ́ pɑwə nə cwə yə́ Cyəpɔ gɔ sɔ' sɔ' a, pɑ tə́ gɔ sɔ' tamdzə̌ pɔ pyə wap lě pfʉ́ a pɑ́. Nə pa' cwə yə tadyə̌ aŋgəle gɔ sɔ' ghə mtiŋ, hɑ gi e thə́ pu piŋ nthuŋ nthɛ Si a, kwa' yʉ́ Cyəpɔ fi' fɑ́ kɛbəŋ: a pɔ pyə wap lě pfʉ́ m̀ nə Kristo a ləŋdzə jám, a piŋ bɔ́tə́, wɔk pɑ pyə́ pɑ yɑ̌ thə́ giŋ a, pu ŋa' wɔk pɑ a pú nə ŋkwɔ' dəm mlwa, po'o gɑ pa Cyəpɔ yu'tə́ nthʉm fɔk, a pɑ́ po'o pa Cyəpɔ pɑ́ bəmtə́ bɑ guŋ mcwə awɛ. Po pɑ dɑ ywə́ yə̌ŋ gɑ yə po ji'tə a nə nyəŋ gʉ' nə piŋnthʉm yɔ cəcɑ̌ po. Sɔ' m nə cwə dzʉ̌, ba m̀ nə wɔ̌ dzʉ́ bɔ mfɑmfɑ́, po lə piŋ bɑwə́ byap gɑ́ pu və ywə nə́ bi po. Kwa' wɔ bɑ pǒ cəŋtə́ jyə́: Tyɛ̌'dzʉ́ Cyəpɔ gɔ sɔ' sɔ' pa' shwǔŋ sɔ' mtsʉ' a. Cwə yə pɔmnəŋ gɔ sɔ' pɑ́ ghɔm gɑ: Yɔ mu' hwítə! Yɔ mu' nə cyə́tə pwɔk a, a pɑ cwə o bɔ tə́ nə pɔ́ptə ko nə pú pa' ywələ̌m gəm mjwǐ tsʉ̌m a, a wap lə vɔk. Tə́ sɔ' m nə po mfɑmfɑ́, po tə́ bɑ́ m̀ nthʉ̌m jʉ́m tə̌ tyɛ'dzʉ́ bɔ sɔ' bvonyə wɔ vonyə m pá' shwǔŋ a pɑ́. Nə pa' guŋ yɔ awɛ pǒ bɑ́ pó ŋkhá', pǒ dɔdzʉ̌: Pɑ tə́ bɑ pɔ mtsʉ' kɑ pɔ jʉ́m pɑ́. A po'o tə́ ka pɑ ti pa' pyə shɑ́ pɔ a; pɑ ti tə́ tì, pɑ kɑ pam mlu'. Pɔ pyə́ wap di a di pɑ́ mtsʉ́', ba pɔ pyə́ wap bam mlu' a pɑ bam pɑ́ mtsʉ́'; Tə́ wɔk pɑ pyə́ pɑ̌ bɑ́ pɔ dɔdzʉ̌ á, pɑ kɑ́ pam; pɑ lɑ piŋnthʉm pu ŋkhuŋnyə gə kʉ́' shu, dɑ mɔktə nə ywə vɔk gə co' shu. Nə pa' Si lá tə́ shwɔ' wɔk pɑ m gɑ́ yɛ̌lúŋ é ko nə́ pɑ pɑ, e lə́ shwɔ' wɔk pɑ m̀ gɑ pɑ ghə ywə vɔk shyə́ m nə́ Cyəpɔ yɔk pɑ Yeso Kristo, yə é lə pfʉ̌ nə pɑ po'o gɑ pɑ pɑ́ tə pɑ̌ diti kɑ bɑ́ diti lə, pɑ pɑ́ nthamtə́ pɑ́ nə e nthʉm vɔk. A po'o tə́ po gɔ pɑ́ təmtə́ wɔ́ wɔ́ cəcɑ̌ po, pɑ kwyətə́ wɔ́ wɔ́ cəcɑ̌ po pa' pǒ ji gə a. Mfɑ̌mfɑ́, po ghə́ mku' pɔ pyə wap jɔgo' cəcɑ̌ po nə́ nə shya wɔ jʉ̌m Cyəpɔ, biŋ bɑ nthɔk wɔ a; po cyə́ m̀ nə fa' tsap ŋkhuŋ wap. Po vɔk nthʉm hwítə cəcɑ̌ po. Mfɑ̌mfɑ́, pyə̌ səsó wɔ: Po tɔk pɔ pyə́ wap wə́ bvɔ́k vɔk va' a, hɑ́ kaktʉɔ bi pɔ pyə́ wap ka ghə́ kaktʉɔ sak a; po tə́mtə́ pɔ bwapwǎ, bɑ nthɔm tʉ́m tsɔ nə pú. Po pɔmtə́ gɑ́ ka sɔmmo pa' cwəpuŋ nə́ cwəpuŋ; po pɑ shəŋ pɑ pɑpúŋ cəcɑ̌ po, bɑ pu a guŋ pɔ awɛ. Po pɑ bɑ́ pɑ nthʉm ŋwɛnyə guŋ mcwə awɛ. Bɑ shwyɛ'nyə Si tə́ pwa, bɑ go'tə e guŋ m cwə awɛ, nə pa' a bɑ ywə́ yə Si shəŋ bi po á shyə m̀ nə Kristo Yeso. Ka po cɑ́jyə̀ bi Zhwenyə, po kɑ wak fa' pɑ ghɔm pa' mghɔm ghɔm Si. Po cəŋtə́ dé guŋ ywə awɛ: Nthɔ́m yə pɑpúŋ. Po tíŋnyə jʉm nə guŋ nwə bɔk pɔ̌k awɛ. A Si hwitə́ ghɔ shəŋtə́ dɔnyə wɔ pɑ́ kwa' yʉ́, biŋ byap zhwenyə yɔ, ba tʉm tsɔ́ pu a nɑ yɔ gɑ́ a sɔ' bɑ tə bya nə cwə yə́ Cyəpɔ yɔk pɑ Yeso Kristo gɔ sɔ' sɔ' a. Mo yə é ŋkhe wɔ a tə ŋkwyəpnyə pɑ́: Pɑ́ yʉ́ nə gɔ sɔ' ghə po'o. Mfɑ̌mfɑ́ po cwyɛ'nyə Si ba m nə pyə yɔk. Po lɑ nə nuŋ mgho dɔlɔ̌ nə sha'tə mfɑ. Nə tsǒ Cyəpɔ, gɑ ghɔm bi po gɑ́ po ké ŋwa'nyə yə̌ŋ bi guŋ mfɑ awɛ. A gho' Cyəpɔ yɔk pɑ Yeso Kristo pɑ bi po. Polo pu Silvano ba Timotio bi Cu'tə pɔ Kristo pɑ Tesalonika yə a bɑ m̀ nə Si, Tá yɔk pɑ ba m̀ nə Cyəpɔ Yeso Kristo a. Gho' ba hwitə̀ pɑ́ bi po shyə m̀ nə Si Tà ba m̀ nə Cyəpɔ Yeso Kristo. Pyə̌ gɔ pɑ́ gho'tə Si nə́ po guŋ mcwə awɛ mfɑmfɑ́, a piŋ bɑ nwə dəŋdəŋ nə pa' piŋnthʉm yɔ wə gɔ m dzə̀, ba ŋkhùŋnyə yə a bɑ pǒ ghə cəcɑ̌ po a piŋ bɑwə ŋkwyə bǎ nə ya mò lə́ nə po awɛ tə́ po pɑ yɔk ŋa'tə cəcɑ̌ mcu'tə Si, shyə́ m̀ nə́ yɔ nə́ kaktʉɔ ba nə piŋnthʉm yɔ nthʉm nə cwɔ'mkwə pu a ghəghʉɔ. A bɑ mtìŋ fyɛ' dəŋdəŋ Si; a bɑ po'o tə́ nə ghə gɑ po pɑ́ pɔ pyə́ wap ku' nə́ Nəfo Si yə po bɑwə jɔgo' nə a. A bɑ nwə dəŋdəŋ gɑ́ Si pa' ghəghʉɔ nə ghəghʉɔ bi pɔ pyə wap bɑwə dɑ wɔ jɔgo' a, biŋ hɑ hwitə̀ bi po, wɔ pyə́ pú hyá wɔ a, ba m̀ bi pyə nə cwə yə Cyəpɔ Yeso Kristo gɔ sɔ' sɔ' a, e gɔ sɔ' fɑ kɛbəŋ pu a pɑ aŋgəle nə nthʉɔtʉɔ nthʉm mɔk ghə̀mghə̀m, sɔ' po'o nə pa' bò nə pɔ pyə́ wap tə bɑ wap zhyə Si a, la' wap pɑ ju'nyə Cùŋ pɑpuŋ Cyəpɔ yɔk pɑ Yeso a. Shɛ yə a gɔ sɔ' ko thə́ pu a gɔ sɔ' pɑ́ nə pɔptə mama, bɔptə po'o gʉə sʉəsʉə nə sə Cyəpɔ ba nə ləŋnyə ghu' e, cwə yə e gɔ sɔ' sɔ', nə tyɛ'dzʉ́ bɔ, gɑ pɔ dɔlɔ̌ pyə́ ghu'tə e, pu piŋ jɔ e biŋ e shyə m̀ nə́ guŋ pɔ awɛ pyə́ wap bɑ wap lě biŋ a: a nə̀ŋ bɑ bɑ̀ po lě biŋ mkwinthɛ mɔk. A biŋ shyə m̀ po'o tə pyə pɑ́ shwyɛ'nyə Si nə po gùŋ mcwə awɛ, shwyɛ'nyə e gɑ e yɔ wɔ pa' pɔ pyə wap ku'nyə nə ke yə e lə nə ŋkhe wɔ a; biŋ shyə́ m nə tʉɔ é hɑ nə ghə ywə́ pɑpúŋ yə pu shəŋ a bi po, gə piŋnthʉm yɔ pɑ fǎ'. A pɑ́ po'o a tsǒ Cyəpɔ yɔk pɑ pɑ gu'tə ghǔ' nə po, ba tsɔ tso nə e, shyə m̀ nə gho' Si yɔk pɑ, ba m nə́ Cyəpɔ Yeso Kristo. Sɔ' m nə nwə nə pa' Cyəpɔ yɔk pɑ Yeso Kristo gɔ sɔ' nə sɔ', ba yɔk pɑ nə cu'tə́ bəŋ e a, pyə pɑ̀wə həŋ bi po mfɑ́mfɑ́ gɑ: Ka thə́ yɔ wuŋ bi mgʉ̌', kɑ nə pwɔk shyə m̀ nə mu' ywə yə pu gə po zhyə́ pa' ywə yə a gɔ ti tə́ pɑ a, kɑ m nə́ mu' ŋwa'nyə yə pu da'tə wɔ gɑ a fɑ́ m bi pyə, bɑwə gə po kwɛ gɑ̀ tyɛ'dzʉ́ Cyəpɔ sɔ' a lə. Sɔmmo kɑ́ fʉtə wɔ́ nə sɔm məjyə. Nə piŋkhəŋ nyə Si gɔ ləŋdzə sɔ', Mo mnwə shɔkcɔk la'tə nɑ́ e, Mú bi pǐ, mo yə e bɔ guŋ ywə yə pu ŋkhe gɑ́ Si kɑ ywə gamtə ghamtə lə, gə po'o tə cwə ba m̀ Dyə́ Si, ghɔm gɑ́ e bɑ́ Si. Po ka kamtə́ gɑ ŋ də́ gɔm nwə nə ywə bɔ cwə yə ŋ də́ jɑ bəŋ po a? Cwəlɔ, pǒ zhyə ywə yə a nthɔm é tə̌ é la' gə pu zhyə́ e pɑ́ nə yə cwə a. Nə pa' nwə cyə zhyənwə nə nə kəŋnyə Si dzə́ pɑwə́ fǎ'; a bɑwə shʉ' da' nə cʉɔ mo yə é bɑwə nthɔm é cwəlɔ a. A pɑ po'o pu zhyə shɔkcɔk yə Cyəpɔ Yeso gɔ lɑ shwə e fɔk é nə sa'tə e, piŋ lɑ nthi ləŋnyə pa' e gɔ nə sɔ' a nə simnyə e a. Sɔ' m nə yə nə sɔ' shɔkcɔk yə pu gɔ sɔ' yɔ nə mfa' sata a, yə nə sɔ' bɔ gɔ sɔ' pɑ nə nthinthi mfa' mtʉɔ, pɑ nə msya nwə ba tsə kɛ̀ nə fʉ́tə mo, ba nə guŋ nə fəŋtə nwə tə pɑ dəŋdəŋ bi pɔ pyə wap bɑ pɔ bipǐ, shyə m pa' wap lě ŋkhəŋnyə nə kwi ŋkhùŋnyə nyənyɔ yə a lə bɑ gɔ vɔk wap a. A ywə yə a gə tə Si hɑ ta' tʉɔ yə a gə mo hɔ məjyə̀ a bi pú gɑ́ a ghə wap pɑ biŋ cwanwə po'o tə pu fyɛ' guŋ pɔ awɛ pyə́ wap lě tə́ piŋ nwə nyənyɔ a, bɑ̀ ŋwɛnyə yap pɑ nə mcwanwə a. Tə sɔ' m̀ nə pyə, pyə̌ gɔ pɑ gho'tə Si nə po guŋ mcwə awɛ, wɔ mfɑ́ pyə Cyəpɔ ŋkhuŋ wɔ a, nə pa' a bɑ Si lě shwɔ' wɔ tə fɑ̀ nə nə́ to', shwɔ' wɔ gɑ po vɔ̌k, shyə m nə Zhwenyə yə a dɔnyə mò, ba m̀ nə piŋnthʉm nə nwə nyənyɔ. A ywə yə e lə kě wɔ nə́, shyə m̀ nə Cuŋ pɑpuŋ yɔk gɑ po sɔ' gə ghu' Cyəpɔ yɔk pɑ, Yeso Kristo. Pa' ǎ pɑ po'o a mfɑmfɑ, po tɔm a púŋ, ŋkhyəp ma yə́ pyə lə zhi'tə wɔ, dɑ shwə siŋ wɔ kɑ bvə və bi po lə a tʉ̌ɔ. A Cyəpɔ yɔk pɑ̀ Yeso Kristo, pɑ́ kwa' yʉ́, ba Si, Tá yɔk pɑ̀ yə é lě ŋkhuŋ wɔk pɑ̀ biŋ shyə m nə gho' hɑ zhwyətə mama, ba mɔktə pɑpuŋ a, zhwyətə́ wɔ biŋ nyəŋ gʉ' nə po nə guŋ ywə awɛ yə pǒ gə, ba yə pǒ gɔm, a pɑ́ nwə pɑpúŋ a. Po'o lə́ mfɑ́mfɑ́, po cwyɛ'nyə Si nə pyə, po'o gɑ ghɔm Cyəpɔ ghɔ dzə̀, gɑ pú ghu'tə ghɔm bɔ pa' pu gu'tə e wə po a. Po cwyɛ'nyə Si nə pyə gɑ pɔ shɔk cɔk, pɔ cwəpùŋ kɑ ghə sɔmywə nə pyə nə pa' guŋ yap awɛ bɑ wap ka ghə piŋnthʉm. Cyəpɔ bɑ nyənyɔ: e gɔ pɑ kwyətə́ wɔ piŋ pɑ pɔmtə́ wɔ nə cwəpùŋ. Sɔ' m̀ nə́ po, bɑ pyə̌ zhyə́ shyə́ m nə́ Cyəpɔ gɑ́ ywə yə pyə̌ gɔm a, pǒ gə pɑ́ po'o, biŋ bɑ gə po'o nə gɔ pɑ́ dzə̀. A Cyəpɔ lɑ́ mtʉ́m mɔ gɔ nə ŋkhuŋnyə Si ba nə kaktʉɔ Kristo. Pyə wə gɔm bi po mfɑmfɑ́ shyə m̀ nə́ tsǒ Cyəpɔ Yeso Kristo gɑ po tiŋnyə tə́ gʉə sʉəsʉə nə mfɑ̌ pyə wap bvɔk vɔ̀k va', vɔk yə a tə́ bɑ́ pa' ma yə po lə yǔ' bi pyə a pɑ́. Po bɑ pǒ cəŋtə́ jyə́ nə pa' po gɔ fo' wɔk a: pyə lě tə vɔ́k cəcɑ̌ po m̀ nə vɔ̀k va'. Pyə lě tə hə́ŋtə́ bi sɔmmo gɑ́ e hɑ ywətsʉ yə pyə lə dzʉ́ a bi pyə; da' gɑ nthʉ́m ghəghʉɔ pu a pwa, mtsʉ̌' pa' mɔkcʉ a, pyə lə́ fa' po'o gɑ́ pyə kɑ́ pɑ pi' bi sɔm mò. A lə́ nə pɑ̌ po'o bɑ pyə̌ ku' kwa' gɑ pɑ́ pú hɑ ywə bɔ bi pyə, da' gɑ pyə lə́ gə po'o gɑ pyə pɑ́ bi po bɑ ywə yə pɑ́ po fo' a. Nə pa' cwə yə pyə lə́ bɑ bəŋ po a, pyə pɑ́ gɔm bi po gɑ̀: a pɑ́ gɑ́ mo ka kúŋ nə fa', ba nə tsʉ ywə́ e kɑ tsʉ́! A nə pɑ̌ po'o pyə pɑwə ju' pu ghɔm gɑ́ shɑ́ pɔ cəcɑ̌ po bɑwə bvɔ́k pɑ vɔk va': bɑwə fa' te' tə tə̀ pɑwə gə sɔmywə. Pyə̌ wə gɔm bi pɔ bɔ, shyə́ m nə́ Cyəpɔ Yeso Kristo, biŋ bɑwə səso wap gɑ́ wap fa' gɑ zhyə̀, bɑ dzʉ́ kwa' ywə yə wap nə fa' a. Tə́ sɔ' m̀ nə́ po mfɑmfɑ́, ka po pwa nə ghə pɑpúŋ. Mo pɑ tə yu'nyə nə ywə yə pyə gɔm bi po nthʉm ŋwa'nyə yə̀ŋ á, po yɔ é, po a pú kɑ pɑ̌ nə sɔmywə, sɔ̌ kú e; da' gɑ̀ ka po yɔ é pa' gɛ bo a, po tɔk é pɑ́ pa' ta' fɑ a. A Cyəpɔ hwitə́ hɑ hwitə bi po pɑ́ kwa' yʉ́ nə gúŋ mcwə awɛ, nə gúŋ nthinthi məjyə awɛ. A Cyəpɔ pɑ bi gúŋ yɔ awɛ. Ca'tə yə̌ŋ bɑ pɑ́ kwa pu a, myə Polo; gɑ̌ nthʉ pu a nə bǎ ya ŋwa'nyə a lə pɑ po'o: myə nə bvə. A gho' Cyəpɔ yɔk pɑ Yeso Kristo pɑ́ bi gùŋ yɔ awɛ. Myə̀ Polo, gɛ nthə̌m Kristo Yeso pa' Si, gɛvɔk wɔk pɑ̀ gɔm a, ba Kristo Yeso, mɔktə yɔk pɑ̀. Bi Timotio mú a yə nyə́nyɔ, nthʉm piŋnthʉm: Gho', cɔmmtso ba hwitə pɑ̀ bu shyə́ m nə́ Si Tá ba m̀ nə́ Kristo Yeso Cyəpɔ yɔk pɑ. Shyə m̀ nə ywə yə ŋ dɑ́ ghɔm bu tə́ gɔ́ Makedonya a, cwə́ Efeso bɑ sho' bi shɑ pɔ gɑ́ wap kɑ zhi'tə mu' zhi'nwə dyɛ', wap kɑ nə̌ŋ biŋ nthɔm tsə po mkəfeli pu a mdɔmnyə nwə khənyə̀ tə cwǐŋ. Ywə bǎ dɑ pɑ nə tɛshwə̀ sɔ̌' shyə ywə yə Si bɑ ě yap gɑ pu ghə̌, a pɑ̀ gɔ sɔ' pəmtə m nthʉ̌m piŋnthʉm a. Tsʉ' yə nwə bɔ yə gɑ̌ jap a gɔ ghə po kəm nə a, a bɑ ŋkhuŋnyə yə a fɑ nə tʉ́m dɔlɔ̌, nə mkwɛnyə̀ pɑpùŋ ba nə piŋnthʉm nyənyɔ a. Shɑ pɔ pyə wap lə ŋé nɑ tsap nə yə̀ŋ ŋkhɛ́ a, wap lě bi nthʉm mghɔm tə nwə nə́. Wap ŋkwɛ gɑ́ wap bɑ mtadyə nə nə́ zhyə mcò', da' gɑ̀ la' wap pɑwə jyə ywə yə wap gɔm a, kə ywə yə wap bɑwə biŋ tə nthégʉ' nə a lə. Pyə̌ zhyə gɑ mco' bɑ ǎ puŋ, a pɑ yə pu lɑ mco' pa' mco' a. Pɑ cəŋtə́ ju', mco' tə bɑwə m̀ nə pɔ dəŋdəŋ pɑ́, mco' bɑ m̀ nə pɑ tə yu'nyə, nə mthʉɔthə́ pɑ tə pǐŋ Si pɑ hɔnwə̀, pɑ pɔptə tsʉ' dɔlɔ̌ pɑ pɔptə mcò' Si, pɑ zhwə mtá, ba pɑ́ zhwə mmʉ́ə, pɑ zhwə pɔ̀. Pɑ ghə ghap, pɑ lɑ mbɛ pa' mjwǐ a, pɑ tɛ mkwɔ, pɑ cwanwə̀, pɑ kɔ́mkɔ kheŋnyə pu a guŋ ywə awɛ yə a ŋkhəŋnyə zhi' nwə dɔlɔ̌. Ywə yə a tə bɑ ɑ̌ pəmtə nə cuŋ pɑpuŋ ghu'tə Si byanyə yə pu lə́ hɑ̌ bəm a. Gɑ̌ hɑ pa'lə bi mo yə e hɑ gʉ' bəm, Kristo Yeso, Cyəpɔ yɔk pɑ̀: yʉ́ nə jɔ gɑ́ gɑ ku'nyə nə kwi fa' tə dɑ a nə fa' tsyə́, myə yə́ ŋ dɑ́ bɑ dzə bɑ shap Si bɑ shwɔ'mkwə pɔ, bɑ mo shɔkcɔk a. Da' gɑ a bɑ ŋ dě gə cɔmmtso, nə kɑ lɑ́ ŋ də́ dɑ pɑ̀ fʉmnyə̀ tə nə fa', bɑ ŋ khɑ ghə piŋnthʉm. Əŋ, gho' Cyəpɔ yɔk pɑ lě donyə nə m ba piŋnthʉm pu ŋkhùŋnyə yə a bɑ nə Kristo Yeso a. Ghɔm tsɔ gɑ bɑ ghɔm tsyə bi a pɑ gùŋ pɔ awɛ yap tʉ̌m nə́ biŋ shəŋtə́ kwi a gɑ: Kristo Yeso lə́ sɔ' nthʉ́m dzʉ́ nə vɔk mghɛ mhɔ̀ pyə gɑ̌ bɑ́ dəŋdzə a. Da' gɑ a bi a pɑ̀ bɑ pu lě shɔmmtso mə̌, bɑ̀ a bɑ́ gɑ a cyə m̀ nə m̀ yə gɑ̌ bɑ də̀ŋdzə a, Kristo Yeso la'tə guŋ yə fo' nə tɔm tʉ̌m nə pɔ pyə wap lə bɑ gɔ sɔ' piŋ é, po' nə vɔk mama a. Mku' ba ghu' pɑ bi fo mgu' nə gu' bɑ bi Si tə pfʉ́, yə mo tə jɔ e a e piŋ bɑ́ pa' da' yʉ́ nə mgʉ' nə gʉ'. Amɛn. Yɔ mthɔk myə gɑ hɑ bu a mə́ m Timotio, mú a; a pɑ́ kwa' pa' gɔmnwə pa' gɔm ghɔm Si lə la' gɔm nə o, po'o gɑ́ a nyəŋ gʉ' nə o, o lo'shù pɑpúŋ, dɑ piŋnthʉm ba tʉ́m pɑpúŋ do'. Shɑ́ pɔ lě gwa' ma, piŋnthʉm yap fá shyə. Himeneo pu Aleksandrə bɑ́ nə pɔ bɔ. Ŋ dě hɑ wap bi Sata, tə wap zhyə nə zhi'tə nə cyətə̀ pɑ̌ shap Si. Ywə yə gɑ̌ wə dəŋdzə̀ gɔm a wə bɑ gɑ pu pɑ́ do bi Si, bɑ shwyɛ'nyə́, bɑ səso, bɑ fa' mfà' gho' nə thə́ guŋ pɔ awɛ, nə mfomfo ba guŋ pɑ sa' awɛ po'o tə́ pɑ vɔk tə paknyə̀, nthʉm hwitə̀, nə́ nə lɑ mku' biŋ. Yəŋ bɑ ywə yə́ a bɑ ǎ pùŋ biŋ búŋ nə mnyə Si Cyəpɔ yɔk pɑ, yə e shə́ŋ gɑ́ guŋ pɔ awɛ sɔ' bvɔk, biŋ jyə́ nwə̀ nyənyɔ a. Nə pa' da' ta' Si nə bɑwə, da' ta' giŋ jyə nə pɑwə bɑ cəcɑ̌ pɔmnəŋ pu a Si ta' mo, Kristo Yeso yə e lə hɑ nɑ́ é nə shu'nyə guŋ pɔ awɛ a. Yə̌ŋ bɑ kwinthɛ yə pu lə kwǐ nə mcwə myə Si lə yap a. Kwǐnthɛ yə pu lə lɑ á gə gɛ cyanyə ba gɛ nthə̌m nə a: Gǎ gɔm nyənyɔ, ŋ tə́ shwanwə pɑ, myə yə gɑ̌ bɑ́ gɛ zhi'tə mguŋ mgúŋ nthʉ́m piŋnthʉm pu nyənyɔ a. Gɑ̌ shəŋ gɑ pɑ bɛ pɑ shwyɛ'nyə Si nə guŋ mtsʉ' awɛ, bɑ ŋkha' bu dɔlɔ̌ kɛbəŋ, tə yɛ̌lúŋ, tə fəŋnyə. Sɔ' nə pɑjwǐ, wap pɑ dɑ msəm ŋkwadzə, wap kwadzə́ mku', tə ŋa'nɑ́: wap kɑ́ pǎ' thə́, kɑ gə mkwɛ gɔl lə, kɑ tsədzə tʉɔdəŋ, kɑ tsə mkwiŋ tʉɔdəŋ lə. Wap kwa pɑ mfa' pɑpúŋ myə a bə̀mtə nə pɑ̀ jwǐ pyə́ wap dɑ mku' biŋ Si a. A pɑ cwə nə zhi'tə ywə́, mjwǐ lɛtə gɑ kǎm, fi' nɑ́ e hɑ́ si. Ŋkha piŋ bi mjwǐ gɑ e zhi'tə mo ywə, kɑ hya mbɛ lə. E lɛtə gɑ kǎm. Nə pa' Si lə də́ŋdzə bəm Adam. Biŋ bɔtə́ nə Eva. A piŋ bɑ po'o bɑ pu la tə fʉtə pɑ́ Adam pɑ, pu lə fʉtə pɑ mjwǐ e hɔ mco'. Ba tə po'o e gɔ cyə pɑ m nə́ nə tsə́ mú tə vɔk, a pɑ yə ě kaktʉɔ nthʉm piŋnthʉm, nthʉm ŋkhùŋnyə ba nə pɑ dɔlɔ̌, bɑ fi' nɑ́ e hɑ́ sí a. Ghɔm tsɔ gɑ bɑ́ ǎ ku' pá' pɑ mo yap tʉ̌m nə a, bɑ gɑ: mo pɑ gɔ pɑ gɛ lé tsʉ' bɑ a kwa' fa' pɑpúŋ tə e bɑwə shə́ŋ. A po' tə dé tsʉ́' gɔ pɑ́ mo yə pu tə wə ŋkhyak e nə sɔmywə a pɑ́; bɑ ě lɔm ta' mjwǐ, e lə pɑ́ kʉ́ə mo, e pɑ gɛ fʉ̌, gɛ mku', bɑ ě zhyə nə lɑ mghʉɔ, bɑ ě ku' nə zhi'tə mo ywə. E tə́ gɔ pɑ́ nwə́ mlu' pɑ̀, e lə pɑ nthuŋkwa, pɑ mo byanyə pyǎnyə; e lə pɑ́ sa' shɛ, e lə pɑ gɛ ghi'nyə. E gɔ zhyə nə cya kwa' dyə é pɑpuŋ, wim pó pyə́ nthʉm yu'nyə, nə mku': Pɑ mo yə e ka zhyə nə cya dyə e a wim cu'tə Si m gɑ kɑ? E kɑ́ pɑ mo yə ě wə tə́ bʉɔtʉm tsyə a, bwɔk gɑ ŋa'nɑ́ kɑ ghə mnyə myə so, e vʉ́ nə bya yə pu nthé nə Sata a. A ba pɑ dzʉ́ pɑ ŋkwinthɛ̌ e pɑpúŋ, po'o gɑ pu kɑ́ wak e, e kɑ vʉ̀ nə yo' Sata lə. Ba mghɛ fa' kwitə̀ gɔ pɑ́ pɔ pyə wap ku'nyə a, ghɔm tsap gɔ pɑ́ pɑ tsamu', wap lə pɑ hɑ nɑ́ tsap nə mlu' kɑ nə cəŋ fʉ' kuso lə. Wap gɔ kyəp nwə cyə zhyənwə piŋnthʉm nə tʉ́m dɔlɔ̌. Pu gɔ cəŋtə́ le wap, tə bi a pu kɑ kyak wap nə sɔmywə a wap pɑ fá' fa' kwitə̀. Ba pɑ jwǐ gɔ pɑ́ yap pɑ́ po'o, wap gɔ pɑ bɑ wap ku'nyə, wap lə pɑ́ pɑ ghɔmnwə cwəpuŋ nə pɔ, wap lə pɑ mkʉə pɑ jwǐ pɑ. Wap gɔ pɑ́ nyənyɔ nə guŋ ywə awɛ. Pɑ fa' fà' kwitə pɑ́ pɑ ghə ta' mjwǐ, wap pɑ shya pó pap pɑpúŋ, ba mdyə́ map. Mghɛ fa' fà' kwitə pyə wap fa' fa' tsap pɑpúŋ a, gə tsʉ' mku', bi a pɑ́ wap cəŋtə gɔmnwə nə piŋnthʉm yə a bɑ pɑ̌ ghə nthʉm nə tamtə nə Yeso Kristo a. Gɑ̌ wə nə və bu, bɑwə mɔktə́ gɑ́ ǎ cʉ' muywə ŋ sɔ' ŋkwyatə o. Da' gɑ bɑ gɔ cwə cwə́ bɑ ǒ zhyə cwəlɔ pa' a shəŋ gɑ́ o nə giŋ nthʉm dyə Si yə a bɑ cu'tə Si yə e bɑ gak ba nthə̌m nwə nyənyɔ a. A kwa' po'o, nwə cyə zhyənwə nə lɑ mku' biŋ bɑ ǎ ghu'. E bɑ e lě gə pu yɔ e nə bap nɑ́ Zhwenyə ghə e pɑ dəŋdəŋ. Pɑ aŋgəle yɔ e, pu siŋ e bi pɑ tə pɑ pɑ Yudea dzʉ̌ piŋ e. Ŋa' e nthʉm ghu'tə. Zhwenyə gɔm sɔsɔ̌ gɑ: A gɔ sɔ' pɑ́ nə mcwə jʉm shɑ́ pɔ kə́ŋnyə́ piŋnthʉm, pɑ la nɑ́ tsap pɑ nə mzhwenyə fʉ́tə̀ pu a nə mnwə myə́ a fɑ m̀ bi msata a, bɑ mcwanwə, pɑ labǔ pyə a bɑ pu lə tʉɔ mɔk gə mtiŋ nə pu nə mtʉm map ghə wap pitə̀. Wap gɔ sɔ' pɑ̀ kɔ lɔmdyə́, pɑ co' nə tsʉ shɑ́ potsə́, tə́ bɑ Si lə nyaptə tsə́ bɔ bi pɑ piŋ, wap pyə wap bɑ wap cəŋtə jyə́ nwə nyənyɔ a pɑ nə tsʉ̌ bɑ go'tə. Nə pa' guŋ tsə́ awɛ tsyə Si lə́ nyaptə á bɑ ǎ púŋ, la' sɔm pɑ́ yə gwa'wǎ', nə cwə yə mǒ lɑ fa' gho'tə tə́ nə dzʉ́ a. Nə pa' ghɔm Si pu a mcwyɛ'nyə̀ dɔnyə́ ywə bɔ. La'tə guŋ nwə bɔ awɛ bi mfɑ̌mfɑ́: tə́ a pɑ́ po'o o pɑ kwa' gɛfa' Kristo Yeso yə pɑpúŋ yə a bɑ pú lɑ ghɔm piŋnthʉm ŋkhim e ba nwə pɑpuŋ yə o lə́ lɑ lo'nyə ji'tə a. Sɔ' m nə tsə pomkəfeli nə kheŋnyə Si, mghɔm mbvo pɑ jwǐ, o wa' má. Pɑ ji'tə nə lɑ mku' biŋ. Nə zhi'tə ywə m̀ nə nɑ́ mo na' ŋkwitə́, da' gɑ nə zhi'tə nə lɑ mku' bíŋ ŋkwitə nə guŋ ywə awɛ. A bɑ ǎ ghə mka'nyə vɔk, vɔk cwəlɔ ba yə vɔk yə a gɔ tə́ sɔ' a. Ghɔm tsɔ̌ bɑ ǎ ku' pɑ bi a pɑ mo yap tʉ̌m nə a, ba m pa' bi a pɑ́ guŋ pɔ awɛ kwi a. Nə pa' a bi a pɑ gɑ pyə̌ wə́ jɔgo' biŋ bɑwə do'shù, ba a bɑ gɑ́ pyə̌ jap yɔk mɔktə̀ nə Si yə e bɑ nthʉɔ, yə e bɑ gɛvɔk guŋ pɔ awɛ a, tə bɑ te'te' bɑ gɛvɔk pɑ piŋ a. Yɔ ywə yə o gɔ yap piŋ zhi'tə a yɑ. A sɔmmo kɑ wak o shyə m̀ nə gu'dzʉ́ tsǔ. O gɔ pɑ̀ cəcɑ̌ pɑpiŋ pɑ́ pɑ fo' nə ghɔ̀m, nə ghìŋ, nə ŋkhùŋnyə̀, nə piŋnthʉm ba nə pɑ dɔlɔ̌. Nə pyap cwə yə gɑ̌ gɔ sɔ' a, bɑ nyəŋ nɑ o pɑ nə ke Ŋwa'nyə, nə səso nə ke pɔ, nə zhi'tə ywə. Kɑ wak ywə gho' yə ǎ nə o, bɑ pu lə shyə m nə gɔmnwə pa' gɔm ghɔm Si a hɑ bu, bɑ m nə yap bǔ thə o yə mghətso lə yap a. Yɔ ywə yə o gɔ cəŋtə́ yap nthʉm tʉm o a yɑ; yɔ ywə yə a gɔ ghə tə́ o pɑ ŋkhaktʉɔ a yə̌ŋ; po'o gɑ mnyə guŋ pɔ awɛ yɔ yu nə́ kaktʉɔ gɔ dzə̀. Pɑ shəŋtə́ de nɑ o, ba ywə yə o ji'tə bi pɔmnəŋ a. Nyə́ŋ kaktʉɔ nə́. O gɔ pɑ́ ghə m po'o tə vɔk thə́ nɑ o ba pɔ pyə wap ju' o a. Kɑ́ lɑ pɑ gʉ̌' tə nə baptə̀ bvò mo, da' gɑ́ tɔk e pɑ pa' ta' tá a. Ghə nə́ ŋkhɛ mo pa' mfɑ̌mfɑ́ a, ghə nə pɑjwǐ pyə wap ghə mgu'dzʉ a pɑ pa' mʉə a, gə nə pó gò pɑ pa' mfɑ́ á, pɑ kwa' nə dɔlɔ̌. Ghə mku' mpfɔk pɑ jwǐ, pyə wap kwa' mpfɔ́k nyənyɔ a. A pɑ̀ gɑ́ pfɔk mjwǐ ghə pó, kə́ pǒ pó lə, bɑ wap nə gɔ ləŋdzə zhi'tə nə lɑ mku' biŋ nə tuŋdyə yap piŋ pɑ kwitə́ pɑ tsə́ wap. Yə̌ŋ bɑ ywə yə́ a bɑ ǎ pùŋ nə mnyə́ Si a. Sɔ' m̀ nə́ yə mjwǐ yə e bɑ kwa' pfɔ̌k nyənyɔ, bɑ e lě guŋ shwə yə pɑ́ do e á, a bɑ ě yap yə mɔktə nə Si, bɑ ŋkhaktʉɔ mtsʉ' ba mɔkcʉ́ nə nə pu' bǔ ba nə mcwyɛ̌'nyə̀. Tə sɔ' m̀ nə yə pfɔ́k yə e sɛ yə́ nwə pɑ́ nə nə yu' pɑpúŋ a, yə bǎ pfɔ̌k bɑ ě pfʉ́ ba tə pa' e jɑ pɑwə a. Yə̌ŋ bɑ mu'ywə yə o gɔ və bi pú pa' mco' a, po'o gɑ pu kɑ pɑ̌ ŋkhyak wap nə sɔmywə. Mo pɑ́ tə pɑ̌ nyaptə́ pɔ pyə́, kwa' pɔ pyə wap shwə dyə e a, bɑ a bɑ ě kəŋnyə piŋnthʉm, bɔk shyə mo yə e ka ghə piŋnthʉm a. Pu gɔ nə və mjwǐ cəcɑ̌ mpfɔ̌k, bɑ e ghə bǎ da' gu' mgham nthɔk biŋ bɑ́ bɑ e lə ghə̌ da' ta' dhə́. A shəŋ gɑ a pɑ́ bɑ pu zhyə́ e nə mfa' pɑpuŋ myə́: E pɑ̀ bɑ ě wim pɑkhʉ̌, dɑ mghʉɔ, sɔk mkwə pɔ dɔlɔ̌, jwyətə mghɛ́ ghəghʉɔ, ŋkhaktʉɔ nə mfa' pɑpúŋ. Sɔ' m nə mpfɔk pyə wap yɑ̌ pɑ pɑkhʉ̌ a, o kɑ pǐŋ wap, nə pa' zhɑzhəŋ gɔ cwə tə ko nə pú, fɛ wap nə Kristo, wap pɑ shəŋ nə lɔmdyə̌, a pɑ po'o pu tébya nə pú nə pa' wap ka tɔm ywə yə wap lə ləŋdzə biŋ a. A piŋ nə pɑ̌ po'o, pa' wap tə fa' ywə a pɑ́, wap pɑ ŋkhəka mdyə́ mdyə̌, biŋ bɑ gɔm tə a cyə, wap lə pɑ́ jyə́ nə tʉm sɔm nwə̀, bɑ gɔm pɑ́ tə ghə ŋkhɛ. Gɑ̌ shəŋ gɑ mpfɔk pyə wap yɑ̌ pɑ po gò a lɔmdyə, gɑ́ wap tzə po, bɑ gwim mdyə map, wap kɑ hɑ sɔ bi gɛ bò nə tebya nə pú. Nə pa' shɑ mpfɔk bɑ wap lě shʉmjʉ̌m sata gɔ bi. A pɑ gɑ mu' gɛ piŋnthʉm ghə mpfɔk pɑ mjwǐ nə ŋkhənyə é, e pɑ ŋkwitə wap. A ka puŋ gɑ cu'tə pɔ Kristo nə pɑ gwim wap, po'o gɑ e kwitə pɑ̀ kwa' pyə wap wə shəŋtə bɑ pɑ kwa' mpfɔk a. Mghətsó pyə wap wə shəŋtə shyá Cu'tə kwa' pɑpúŋ a, pu ghə mku' map ŋkwi' gə, tə kwa' pyə wap jɔgo' nə fa' ghɔ̀m ba nə nə́ zhi'tə ywə bi pɔmnəŋ a. Nə pa' ŋwa'nyə gɔm gɑ: Kɑ kwɑ shwə nɔm na' yə ě wə nu' mko a. Biŋ ŋkwi' gɔm gɑ: Gɛfa' bɑ e ku' nə ŋkhap fa' e. Nə pǐŋ pa' pu nə butə gətso bu a bɑ ǒ yu' bi mkwǐnthɛ pɑpʉə́ kə pɑta lə. Pɔ pyə wap hɔnwə a, o tɔk wap cəcɑ̌ guŋ pɔ awɛ, po'o gɑ pyə shɑ pɔ pwɔk. Gɑ̌ wə gɔm bu dzə̌ Si pu Kristo Yeso ba pɑ aŋgəle pyə a bɑ pu ci wap a gɑ o ghiŋ nə ŋkhɛ yə̌ŋ; o kɑ ghə sɔmywə m̀ pa' nə ŋkhùŋ pɑ mo a. Kɑ lɑ mlo'nyə jap bú thə sɔmmo, kɑ pɑ̌ nə mhɔnwə sɔmmo. Kwa' wə tɔm nɑ o dɔlɔ̌. Tak nə pɑ̀ nwə da' shyə nə́ŋ: Pɑ nwə mú mlu' nə vàm tsǔ pu a nə nthi pa' o nə bwa guŋ mcwə awɛ. Shɑ pɑ bɛ bɑ si mhɔnwə map pɑ́ jɔ̌jɔ́ tə́ pu fyɛ' wap ba fyɛ'. Da' gɑ sɔ' m̀ nə shɑ pɔ pu pɑ da' tə jyə mhɔ map. Mfa' pɑpuŋ bɑ pu zhyə pɑ po'o, tə ba myə a bɑ pu ka zhyə a bi a pɑ a lə tʉmnyə̀. Guŋ pɔ pyə wap wə bɑ mkwɔ a yɔ mtá pap pa' pɔ pyə pɑ́ pu lɑ msə́m jɔ wap a, po'o gɑ tsǒ Si pu a ywə ji'tə mcap kɑ pɑ̌ nə́. Pɔ pyə mta pap wə bɑ wap ghə piŋnthʉm a pɔm tə cyətə pwɔk wap, bɑ gɔm m gɑ pu a pú mfɑ̌. Wap gɔ cəŋtə́ fa' bi pu nə ghɔ pɑ́ m dzə̀, nə pa' wap bɑ pɑ pìŋ, biŋ bɑ́ mfɑ́ ŋkhùŋnyə̀ pyə mta pap gə pɑpuŋ nə pú a. Yə̌ŋ bɑ ywə yə o gɔ zhi'tə piŋ ghɔm gɑ́ pu ghiŋ nə a. Mo zhi'tə mu' nwə dyɛ', e lə la nɑ́ e m̀ nə mghɔm dɔlɔ̌ Cyəpɔ yɔk pɑ Yeso Kristo ba nə ywə yə pu ji'tə, a pɑ nə nə lɑ mku' biŋ a bɑ a bɑ ŋa'nɑ tamfʉm mnyə mo bǎ. Mo bǎ bɑ ŋkhəŋkhʉɔ, bɑ gɛ gho, bɑ shəŋ yə pɑ mfəŋnyə pu a mshɛ nə mshwə́ ghɔ̀m. Ywə yə a nthəm nə tsʉ' bɔ á bɑ ghi'nyə, fəŋnyə, mcaptə Si, nə tɔmtə́ nwə cwəpúŋ mtɛshwə tə dhə cəcɑ̌ pɔ pyə wap bɑ wap ghə zhwenyə mfʉm a, wap lə pɑ́ jyə nwə nyənyɔ, bɑ ŋkwɛ yap gɑ nə lɑ mku' biŋ bɑ nwə fʉ'. Əŋ nə lɑ mku' biŋ bɑ ǎ ghə mɑ fʉ' gwyə́ bi mo yə́ e ŋwɛnyə nə ywə yə ǎ bi a. Nə pa' pɑ la tə lɑ́ sɔmywə sɔ' nthʉm dzʉ́; pɑ lə nəŋ bɑ gɔ ti lɑ sɔmywə nə ghɔ. A bi a pɑ ghə dzə ŋkwakwǎ ba ywə tsʉ́, pɑ ŋwɛnyə̀ nə́. Sɔ' m̀ nə pɔ pyə́ wap shəŋ nə zhi a, wap bvʉ́ nə yo' mləŋtə, nə nthinthi mghi'nyə cwəpùŋ myə a nyəŋ pɔmnəŋ nthʉm msa'tə pu a nə pi a. Guŋ mnwə cwəpuŋ awɛ nthəm nə́ nə kúŋ ŋkhǎp. Shɑ pɔ pyə wap lə hɑ̌ nɑ́ tsap nə a wap lě bi tə gʉə sʉəsʉə nə piŋnthʉm, dɑ nthinthi mɛnyə swɔp mtʉm map. Wə yə o bɑ mo Si a, khʉ̌ mnwə bǎ. Cəŋ nwə dəŋdəŋ pú nə lɑ mku' biŋ ba piŋnthʉm, shəŋ ŋkhuŋnyə̀, shəŋ nə kaktʉɔ pu byanyə. Lo'shù pɑpúŋ, shù piŋnthʉm, lo' vɔk mama yə pu lə ké o nə a, pa' o jyə́ nə nə la'tə piŋnthʉm pɑpúŋ yə o gɔm dzə̌ mkwǐnthɛ jɔmyɔ̌m a. Gɑ̌ wə gɔm bu dzə̌ Si yə e nyəŋ vɔk nə guŋ tsə awɛ a, ba m̀ dzə̌ Kristo Yeso yə e lə kwǐnthɛ dzə̌ Pontio Pilato nə nə la'tə piŋnthʉm pɑpúŋ a gɑ: Tɔ́m mco', giŋ tə viŋ nɑ o, tə ghə sɔmywə yə́ pu gɔ pya o nə a tə ŋkhəm nə cwə yə nə ghə pu yɔ Cyəpɔ yɔk pɑ Yeso Kristo, yə a gɔ sɔ' təm nə cwə yə Si lə yap a: Fo lɑpʉə, Fo mfo mfo, Cyəpɔ mcyəpɔ, da' yʉ yə e bɑ tə pfʉ́, bɑ shwə nə́ ŋkha' yə pɑ mo lə cyə bəŋ o a, yə sɔm mò la m jɔ, bi a pɑ e lə nəŋ jɔ a. A ghu'tə pu tʉ̀ɔ pɑ́ bi e mama. Amɛn. Ghɔm bi mghɛ ywə nə yəŋ dzʉ̌ gɑ ka wap ŋa' nɑ tsap, wap kɑ yáp yap nə mɔktə nə tsə fʉ' tsyə mo tə jyə́ pa' a gɔ ti yó pɑ a; wap yáp m̀ nə Si, yʉ́ yə e hɑ tsə fʉ' bi pɑ tə dhə̀, gɑ pɑ nə́ bvɔk a. Ghɔm bi pú gɑ́ wap ghə nwə pɑpúŋ, ji nə mfa' pɑpuŋ, hɑ ywə tə sɛ, bɑ dzʉnyə pu a pyə́ shɑ̀ pɔ. A pɑ po'o tə́ wap cu'tə kwa' tsə fʉ' nthʉɔ tsyə pɑpuŋ tsyə a tsap a, nə cwə dzʉ̌ yə a gɔ tə sɔ' a, po'o gɑ wap sɔ' gə vɔk nyənyɔ. Wə Timotio tɔm ywə yə pú dwɔ' bu a, kɑ cyə nə zhwya mghɔm tɑ pǐŋ Si pu fəŋnyə̀ yə a hwə zhyənwə tə pɑ̌ ya a. Shɑ pɔ lə pɑ̌ gɔm mthi po'o, hɔ məjyə nə piŋnthʉm. Gho' pɑ́ bi po! Myə Polo, gɛ nthə̌m Kristo Yeso, shyə m̀ pa' Si nə jap a, shyə m̀ nə mka'nyə vɔk myə a bɑ nə Kristo Yeso a, bi Timotio, mu a yə gɑ̌ ŋkhuŋ e te' a: Gho', cɔ̌mmtso ba hwitə pɑ bu shyə́ m nə́ Si Tá, ba m̀ nə Kristo Yeso, Cyəpɔ yɔk pɑ. Gɑ̌ go'tə Si yə gɑ̌ fa' bi e pa' mta pɑ̌ a, fa' bi e nə tʉm dɔlɔ̌, nə pa' mtsʉ̌' ba mɔkcʉ, gɑ̌ ŋkhe tso tsǔ guŋ mcwə awɛ nthʉm mcwyɛ'nyə mə̌. Gɑ̌ nə kamtə́ shyətsə o, bɑ shəŋtə́ sʉ́m nə piŋ jɔ́ o po'o tə ŋwɛnyə̀ o ló nə m̀. Gɑ̌ ŋkhamtə piŋnthʉm yə nyənyɔ yə a bɑ nə o, piŋnthʉm yə a lə ləŋdzə shwə́ nə Lois má mɔ̌ ɔ ba m nə Eʉnik mɔ̌ ɔ a, biŋ bɑwə shəŋtə́ jyə́ gɑ piŋnthʉm bɔ shwə ba m̀ nə o a. A po'o tə́ gɑ̌ wə ŋkhamtə́ bu gɑ o vyə̌ ywə fʉ' yə́ Si hɑ bi mo, a pɑ bu tə fɑ pa' ŋ də yǎp bu nə o a. Nə pa' Si tə bɑ ě hɑ pɑ́ zhwenyə pwɔk bi pɑ pɑ̀; a bɑ ě hɑ zhwenyə gʉ', zhwenyə ŋkhuŋnyə ba zhwenyə nə nthɔm nɑ bi pɑ̀. Ka sǒ kú o nə kwinthɛ̌ nə Cyəpɔ, o kɑ nə̌ŋ ŋkhú so ba m nə m̀ gɛ cɛ̌ shyə m nə é. Da' gɑ pu pəmtə́ jɔgo' nə Cùŋ pɑpuŋ, bɑ dɑ tʉɔ Si nə byap, Si yə e lə vɔk wɔk pɑ̀, biŋ ŋkhe wɔk pɑ m ke dɔlɔ̌, la' e ké wɔk pɑ̀ po'o shyə m̀ nə mfa' pɑpúŋ mɔk pɑ pɑ̀, ŋkhe wɔk pɑ̀ shyə m nə pa' e lə́ yǎp pɑ kwa' yʉ a ba m̀ nə gho' e. Gho' bɔ yə e lə lǎ' gə nə pɑ tə tyɛ̌' mama nə́ Kristo Yeso a, a bɑ pú la'tə ya cwəlɔ bi pɑ shyə m̀ nə pa' gɛvɔk wɔk pɑ̀ Kristo Yeso sɔ' a. Yʉ́ nə sa'tə vʉ́' biŋ kyɛ' vɔk ba nə cyətə pfʉ̌ shyə m̀ nə Cuŋ pɑpúŋ; yə pu lə lɑ a gə gɛ cyanyə nə́, bɑ gɛ nthə̌m biŋ bɑ tadyə̌ nə a. Yə̌ŋ bɑ ywə yə a gə tə́ bɑwə biŋ yəŋ ghəghʉɔ a. Sǒ tə bɑwə ŋkhú a nə pɑ, nə pa' a bɑ gɑ̌ zhyə mo yə gɑ̌ bɑ gɑ̌ yap piŋnthʉm a nə e a, biŋ shəŋtə́ jyə gɑ́ a bɑ ě ghə tʉɔ nə nə dwɔ' ywə yə a bɑ pu hɑ bəm nə tyɛ'dzʉ́ bɔ. Lɑ mghɔm pɑpúŋ myə́ o ju' bəm nthʉm piŋnthʉm a, ba ŋkhuŋnyə̀ yə a bɑ nə Kristo Yeso a, nə gə yu fo' nə fǒ' ywə́. Tɔ́m ywə pɑpuŋ yə pu lə hɑ bu shyə m̀ nə Zhwenyə Dɔlɔ̌ yə a shwə nə o a pɑpúŋ. O zhyə gɑ̀ guŋ pɔ pyə wap bɑ Azia a bɑ wap wa' á, tə ba Figəlo pú Hemogene. A Cyəpɔ sɛ cɔmmtso e nə tuŋdyə Onesiforo nə pa' e lə́ nthəmtə̀ a mcʉmmcʉ̌m la' é nəŋ ŋkhuso nə mgwɑ mtʉɔ myə́ pu lə nə shəŋ a lə. Gɛ̌, e lə ŋwak Roma, shəŋ a tə jɔ a. A Cyəpɔ ghə gɑ́ e sɔ' gə cɔmmtso Cyəpɔ nə tyɛ̌'dzʉ́ bɔ. A bɑ ǒ nəŋ jyə guŋ mfa' myə e lə fa' nə m̀ a tə shyə bǎ wɑ̌lə́. Wə mú a, kaktʉɔ nthʉm gho' yə a bɑ nə́ Kristo Yeso a. Ywə yə o lə yu' bəm dzə̌ mkwǐnthɛ́ jɔmyɔ̌m a, siŋ ywə bɔ bi pɔ nyənyɔ, pɔ pyə wap ku' nə piŋ ji'tə yap ywə bɔ bi shɑ pɔ a. Yɔ yù gǒ' pa' sə́ŋwi Yeso yə pɑpúŋ a. Sɔmmo tə ŋkho nə fa' səŋwi, biŋ bɑ gi'nyə mnwə pyə shɑ pɔ pɑ nə cwə yə e wə shəŋ nə fa' bi mo yə e dɑ é fa' a pɑpuŋ a. A biŋ bɑ dəŋdəŋ po'o nə pɑ khʉdʉ̌; nə pa' mo nə khʉ tə ghə mcwɔ'fa' bɑ ě khʉ̀ m nə ŋkhɛ̀. A biŋ bɑ po'o tə nthɔmmthə́ dəŋdzə bɑ myə dzʉ'né yə e jɔgo' nə né a. Yu' ywə yə gɑ̌ gɔm bu a. Tə́ Cyəpɔ gɔ ghə o yu' guŋ é awɛ. Pɑ́ ŋkhamtə́ Yeso Kristo ye e lə́ yǎm nə vʉ̌, yʉ́ yə e bɑ ŋkhənyə David shyə́ m̀ nə Cuŋ pɑpuŋ yə gɑ̌ siŋ, biŋ bɑ jɔgo' nə́ tə pú cə̀ŋ a pa' mo cwəpuŋ a. Da' gɑ́ ghɔm Si tə bɑ pu cə̀ŋ pɑ. A po'o tə gɑ̌ bi' guŋ ywə awɛ shyə m̀ nə pɔ pyə a bɑ pu lě shi wap a, po'o gɑ ba wap yap sɔ' ŋkwi ywə vɔk yə a bɑ nə Kristo Yeso a, ba ghu'tə mama. Ghɔm tsɔ̌ bɑ ǎ ku' pɑ́ bi a pɑ́ mo yap tʉ̌m nə a gɑ: Pa pú pəmtə pfʉ́ bɑ pɑ pú gɔ sɔ' pəmtə́ vɔk. Pa pú pəmtə jɔgo' bɑ pa pu gɔ sɔ' pəmtə́ sa'. Pɑ kəŋnyə é bɑ ba yʉ gɔ sɔ' kəŋnyə wɔk pɑ̀. A pɑ̀ gɑ́ pɑ ka pɑ́ nyənyɔ bɑ e bɑ̀ pɑ́ nyənyɔ nə pa' pɑ̀ e lə kəŋnyə thə́ nɑ é Pɑ Khamtə́ guŋ ywə bǎ awɛ, gə wap zhyə dzə̌ Si nə pɔmtə̀ tɛshwə nə ghɔ̀m: Nə pa' a tə́ ŋkwitə́ sɔmywə pɑ́, tə nə̌ da' nə́ ghə pɔ pyə́ wap ju' ma a hɔjyə. Kaktʉɔ nə pɑ dzə̌ Si bɑ mo nthʉɔ, gɛfa' yə pɑ e lə ghə tsə kuso a, yə e dɑ nyənyɔ siŋ ghɔm a. Kɑ pɑ̌ nə́ nə fa mghɔm tə piŋ Si. Pɔ pyə wap hɑ nɑ tsap nə a gə pɑ cwəpuŋ. Ghɔm tsap bɑ pa' shwəfiŋ dzʉ̌nyə tsʉ̌nyə a. Himeneo pu Filito dzə pɑ̌ po'o. Wap lě fɑ nə məjyə nyənyɔ dǔ, nə pa' wap lə bɑ gɔm gɑ́ nə yám nə vʉ̌ bɑ a lě da' bɑwə; wap gə po'o nə bɔptə piŋnthʉm bo'gwyə pɔ. Tə́ ba tə po'o, mcyədyə́ nthʉɔtʉɔ myə Si jap a bɑ pɑwə. Stam é bɑ ghɔm tsɔ gɑ: Cyəpɔ jyə pɔ pyə, ŋkwi' gə gɑ: Mo yə e ŋkhe tso Cyəpɔ a ŋkhʉ́ mnwə cwəpùŋ. A bɑ nthʉ́m dyə gwyə pe' e tə da' tsə dyə tʉɔ́ gɔl kə tʉɔ̌ ŋkhap lə nə pɑ dyə pɑ́. Shɑ bɑ bɑ̀ pu lə ŋkwyə nə ŋkhəm, shɑ piŋ bɑ bɑ̀ pu lə pɑ ca' nə bəm. Shɑ pɑ nə nwə msəm, shɑ piŋ bɑ nə sobo nwə. Mo yə ě lɔnyə nɑ e nə mviŋ myə́ a gɔ sɔ' pɑ nthu' msəm, nthu' dɔlɔ̌ yə a gɔ kwitə Tá, pɑ nə guŋ mfa' pɑpuŋ a. Khʉ́ mnwə cwəpuŋ myə ŋkhɛmo ŋkhuŋ ma a, cə́ŋ nwə dəŋdəŋ, shəŋ piŋnthʉm, ba ŋkhuŋnyə, ba hwitə pu a pɔ pyə wap dɑ tʉ̀m dɔlɔ̌ ŋkhe Cyəpɔ a. Pwɔk mfəŋnyə něné o kɑ pɑ̌ nə́. Ǒ zhyə gɑ á dzə́ mshɛ́. Gɛfa' Cyəpɔ tə nəŋ bɑ sa'shɛ pɑ, e gɔ kuŋ guŋ pɔ awɛ, ku'nyə nə zhi'tə mo ywə, pɑ piŋ gɑ pu tenwə nə e. E gɔ lɑ pɑ hwitə nə tɔk pɔ pyə wap gə fəŋnyə a, nə pa' mo ka zhyə: Pɑ́ Si ghə wap pʉɔtʉm tsap jyə nwə nyənyɔ, gəm nɑ tsap, nthəm nə ŋkhə vʉm sata yə e lə bɑ ě nə gəm wap pa' mkwɔ a, wap pɑ gə pɑ ywə yə e kùŋ à. Cəŋtə́ jyə́: A gɔ sɔ' pɑ nə mtyɛ'dzʉ́ jʉm, mcwə dzʉ́ nthʉɔtʉɔ pɑwə́. Pɔmnəŋ gɔ sɔ' pɑ́ nám, pɑ zhə́ŋ fʉ', pɑ cəŋ gɑ pu yɔ wap, pɑ ghə ŋǎ'nɑ́, pɑ́ cap Si, tʉɔthə́ bi pɑ tsə wap, wap lə pɑ jyə nwə pɑpuŋ yə pu ghə bi pu a, wap pɑ bviŋ tso Si. Pɔmnəŋ gɔ sɔ' wap lə ghə tʉm, wap lə ghə cɔmmtso, pɑ ghɔ́m ghɔ̀m cwəpùŋ wap lə ghə ŋkhɛ nwə, bɑ wap ghə tʉm shɔkcɔ́k. Pɑ mghɛ bo nwə pɑpúŋ. Pɔmnəŋ gɔ sɔ' pɑ́ pɑ tɛ́mnɛ́, bɑ ŋa'nɑ lɑ wap, ntham fʉ̀ mnyə́ pú. Wap pɑ̀ pɑ msǒ ŋwɛnyə bapnɑ, bɑ mghɛ bo Si. Wap gɔ sɔ' pɑ ghə pa' pɑ lɑ mku' bíŋ a, da' gɑ bɑ wap kəŋnyə́ tʉɔ piŋnthʉm. Fɛ mnyə́ mǔ nə́ pɔ bɔ́! Nə pa' a bɑ̀ wap ghə pɔ pap. Pɔ pyə́ wap ŋkho dyədyə̌ biŋ bɑ dɑ mkhə vʉm map gəm pwa jwǐ pyə̌ mnwə cwəpuŋ bɑ də̌m pu, ŋwɛnyə bapnɑ nə pɑ dɑ wap giŋ. Wap bɑ guŋ m cwə awɛ bɑwə ji'tə pɑ ywə, da' gɑ́ bɑ wap ka ku'nyə̀ nə zhyə nwə nyənyɔ. Dəŋdəŋ pa' Yannɛs pu Yambrɛs lə kəŋnyə Mosɛ a, a dəŋdəŋ po' tə́ pɔ bɔ ŋkhəŋnyə nwə nyənyɔ; a bɑ pɔ bɑ zhwenyə yap pɔptə, ywə lə pɑ nə piŋnthʉm yap. Da' gɑ wap tə gɔ sɔ' ghɔ tə̌ a sak pɑ́, nə pa' guŋ pɔ awɛ gɔ sɔ' yɔ nə pʉə yap dəŋdəŋ pa' pu lə yɔ yə nə pʉ̌ə pɔpɔ gɑ pɑpʉə a. Da' gɑ sɔ' m̀ nə o, a bɑ o lě dɑ ŋwɛnyə jap jʉ̌m m nthʉ́m nə́ zhi'tə, nə ghiŋ tsǔ, nə mka'nyə, nə piŋnthʉm, nə nə kaktʉɔ, nə nə́ cwɔ'mkwə cwəpuŋ, nə ghəghʉɔ yə ŋdɑ yɔ̌ Antiokia, ba m̀ Ikonya pu Listra a. Pu lə cyə̌tə́ cwɔ mkwə mə̌ nə yá nthi? Da' gɑ nə gúŋ e awɛ Cyəpɔ lě bvɔk a. Ba tə po'o, guŋ pɔ awɛ pyə wap shəŋ nə vɔk vɔ̀k nə lɑ mku' biŋ nə Kristo Yeso a, pu gɔ cwɔ'tə́ mkwə map. Tə sɔ' m̀ nə pɔ cwəpùŋ pu a pɑ cap, wap gɔ pɑ lɑ nwə cwəpuŋ ghɔ pɑ dzə̀, pɑ fʉ́tə pyə shɑ́ pɔ, ba nɑ̀ tsap. Tə sɔ' m nə o, cwə nthʉm ywə́ yə o lə zhi'tə biŋ bíŋ nyənyɔ a, nthɔm a tʉɔ: O zhyə́ mo yə e lə zhi'tə o. O lə jyə ŋwa'nyə dɔlɔ̌ tə fɑ mukhʉ̌. A bɑ ǎ ghə tʉɔ nə hɑ fʉ́ yə a dɑ mo gɔ nə ywə vɔk shyə m̀ nə piŋnthʉm nə Kristo Yeso a bu. Guŋ ywə yə a bɑ pu və nthʉ́m ŋwa'nyə a fɑ m bi Si, biŋ bɑ bɑ ǎ kwitə́ nə zhi'tə̀, nə́ nə ba' ghɔm, nə nə gə ywə tiŋnyə dəŋdəŋ, nə nə nthɔk mo nə nwə dəŋdəŋ, po'o gɑ mo Si pa mo bɑ ě ku'nyə, biŋ gə guŋ ywə nə fa' fà' pɑpúŋ awɛ. Gɑ̌ wə shəŋtə gɔm bu dzə Si ba dzə̌ Kristo Yeso yə e gɔ sɔ' sɔ̀' fyɛ' pɔ mtʉɔ pu a mpfə pɔ a, nə nə́ pa' e gɔ sɔ' la'tə nɑ ba nə nəfo gɑ: Siŋ Ghɔm, shəŋtə shwi'tə nə cwə yə pu wə byap a ba nə cwə yə mo tə̌ wə byap a pɑ́, tɔk pɔ shɔkcɔ́k baptə wap, səso wap, tə́ nə ghə nthɔm tʉ́m tsʉ̌, biŋ dɑ pɑ nə zhi'tə tə́ nə gə. Mu' cwə dzʉ̌ gɔ sɔ' sɔ' yə shɑ pɔ tə gɔ piŋ zhi'nwə dɔlɔ̌ a pɑ́, da' gɑ nə yap nthi yə wap shəŋ nə mtəŋ map a, wap ghə m tá zhi'tə pap wap yɔm. Wap gɔ sɔ' fɛ mtə́ŋ map nə nwə nyənyɔ pɑ yu' pɑ tsə pɔ mkəfeli. Tə sɔ' m̀ nə o, ghə nwə m dəŋ, piŋ ghəghʉɔ, pɑ siŋ cùŋ pɑpuŋ, fa' fà' tsǔ. A sɔ' m nə m̀, bɑ pu tsə hɑ á pa' tsə pwɔ' a; cwə yə gɑ̌ gɔ ghɔ a ku'. Gɑ̌ lo'shù pɑpuŋ, mə̌ dʉ̌ mì, gɑ̌ tɔm piŋnthʉm. Tə fɑ cwəlɔ pu yap co'fo nwə dəŋdəŋ mcwɔ'fa' mə̌ myə Cyəpɔ gɔ sɔ' hɑ bəm tyɛ'dzʉ́ bɔ a; yʉ́ yə e bɑ ta fyɛ' yə dəŋdəŋ a. E tə́ gɔ sɔ' hɑ da' bəm pɑ̀, e gɔ sɔ' hɑ bi guŋ pɔ awɛ pyə wap ŋkhuŋ nə zhyə e a. Kaktʉɔ nə lo'nyə sɔ' mkwyatə a. Nə pa' a bɑ Demas wa' a, shyə m nə pa' ě kuŋ dzʉ́ cwəlɔ a. E bɑ ě ghɔ m̀ Tesalonika, Kresens ghɔ m̀ Galata, Tito ghɔ m̀ Dalmatia. Da' pyə Lukasi do e nə pɑ̌. Lɑ Markusi po e pəmtə́ sɔ' nə pa' ě ghə də̀ŋ bəm nə fa'. Gɑ̌ tə́m Tikiko Efeso. Dzə fɔk a yə dɑ tak Troas wə́ Karpos, nə sɔ' dɑ jap bəm, ba mŋwa'nyə, ba pak gwɔp bvə və. Aleksandrə, talɔm ghə tʉm cwəpuŋ nə m̀ tə'. Cyəpɔ gɔ sɔ' pa' dəŋ mfa' myə bi e. Ba kwa' wə yǔ pɔmtə e nə pa' e bɑwə bɔ mghɔm mɔk pu tə'. Nə dəŋdzə cʉ̌m yə dɑ tɛ̌ shɛ́ a á, sɔmmo lě tə pɑ bə́ŋ m, bɑ guŋ yap awɛ wa' á. Da' gɑ́ ŋkha nə da' wap pɑ́. Cyəpɔ lə bɑ bəŋ m pɑ kwa' yʉ́; e lě nyəŋ gʉ́' nə m̀ tə a cyə m nə m̀ pu siŋ Cuŋ kwa' pɑpuŋ, guŋ pɑ tə pɑ pɑ Yudea yu'. Ŋ dé biŋ nthəm nə shwə nɔm tə ma'! Cyəpɔ gɔ sɔ' té a nə guŋ nwə bɔkpɔ̌k, piŋ vɔk a hɑ nə nəfo tsyə kɛbə̀ŋ. Ghu'tə pɑ bi e nə gu' nə gu'! Amɛn. Ca'tə Priska pu Akila ba tuŋdyə́ Onesiforo. Erasto kě guŋ Korinto. Gɑ̌ nə tak Trofimo Mileto e pɑwə gǒ. Kaktʉɔ nə sɔ' tə́ cwə ŋʉm pɑ́. Eʉbulo pu a Pudens ba Lino, ba Klaudia pu a guŋ mfɑ̌mfɑ́ awɛ ca'tə o. Cyəpɔ pɑ nə zhwenyə o. Gho' pɑ bi guŋ yɔ awɛ. Myə Polo, gɛfa' Si, gɛ nthəm Yeso Kristo, nə lɑ pɔ pyə Si ci wap a nə gɔ nə piŋnthʉm ba nə nə́ zhyə́ nwə nyənyɔ po nə lɑ mku' biŋ, nthʉm nə mɔktə vɔk mama yə Si yə e tə́ shwanwə a pɑ́ lə la' ŋkha'nyə tə nə mɑ fǐ gu', a piŋ bɑ nə cwə yə́ e lə́ yap a, e la'tə̀ ghɔm tsyə nə ŋkhʉɔ yə e lə hɑ̌ bəm shyə m̀ nə pa' Si, Cyəpɔ yɔk pɑ lə yap a. Bi Tito mú a nyənyɔ nthʉm piŋnthʉm yɔk pɑ: a gho' pu hwitə pɑ bú shyə m nə Si Tá ba m nə Kristo Yeso Cyəpɔ yɔk pɑ. A pɑ gɑ́ ŋkhe nthak o Kreta, bɑ a bɑ́ gɑ́ o miŋ nə ghə ŋkhɛ biŋ jap mghətso pɑ cya bǎ nə ya tisuŋ lə́ pa' ŋ də nə da'tə bu a. Bǎ ya mo lə nə pú gɔ pɑ́ mo yə pu tə́ gɔ pɑ kyak e a pɑ́, pɑ́ dhə́ ta' mjwǐ, a po pyə ghə piŋnthʉm tə bi a pɑ pu lə ghɔm gɑ̀ wap ghiŋ cwəpuŋ kɑ m gɑ́ wap tə ju'nyə a lə. Mo yə e dé pɔ a gɔ pɑ mo yə pu tə gɔ kyak e nə yə nə pɑ ŋkho nthɛ Si a pɑ́: E lə pɑ ŋa'nɑ́, e lə pɑ ŋkhamshɛ, e lə pɑ nwə́ mlù', e lə pɑ nthuŋkwà, e lə pɑ shə́ŋ fʉ' kuso. E gɔ pɑ dɑ mghʉ̀ɔ, pɑ so nwə pɑpúŋ pɑ gɛ msə̀m, pɑ dəŋdəŋ, pɑ dɔlɔ̌, pɑ bɑ ě zhyə nə tɔm nɑ é, bɑ ě cəŋtə nthɔm ghɔm piŋnthʉm, tsyə a bɑ ǎ pəmtə nə ywə yə pu ji'tə a. E gɔ pɑ́ bɑ ě ku' nə səso pɔ nə nwə dɔlɔ̌ ba nə kəŋnyə tɛshwə̀. Pɑ tə yu'nyə, pɑ ghɔm vəŋ mghɔ̀m nə fʉtə́ pɔ̀ bɑ wap yɔm cəcɑ̌ pɔ pyə a bɑ pu lě bvo wap a. Cɑ́ mshwə̀ map. Wap ji'tə ywə yə a ka puŋ nə ghə, ywə yə a bɑ pɑ ywə mfʉm, bɑ nwə kuso a bi mtuŋdyə bɑ nə bva' wap. Mu' mo cəcɑ̌ pú, gɔm ghɔm Si yap lə ghɔ̌m gɑ: Pɑ Kreta, mcwanwə nə guŋ mcwə awɛ, mnɔm shɔkcɔk, mvàm tə fa'. Yəŋ kwǐnthɛ bɑ nyənyɔ, a po'o tə o gɔ tɔk wap shɔkcɔ̌k po'o gɑ wap ghə piŋnthʉm dɔlɔ̌. Wap kɑ la nɑ́ tsap nə tsə pomkəfeli pɑ Yudea ba nə mco' pɔ pyə wap fɛ mnyə nə nwə nyənyɔ a. Guŋ ywə awɛ bɑ dɔlɔ̌ bi pɔ pyə́ wap bɑ dɔlɔ̌ a. Da' gɑ́ sɔ' m nə pɔ pyə wap bɑ wap viŋ nɑ tsap, biŋ bɑ ŋkhəŋnyə nə piŋ a, sɔmywə tə́ bɑ dɔlɔ̌ pɑ́; zhyənwə yap pu a tʉm tsap bɑ ǎ viŋ. Wap gə pa' a bɑ wap zhyə Si a da' gɑ bɑ shyə m̀ nə mfa' map bɑ ŋkhəŋnyə e. Wap bɑ wap pɔk, bɑ mtʉɔthə́, bɑ wap ka ku' nə sɔm fa' pɑpúŋ. Da' gɑ sɔ' m nə o, la'tə ywə yə a bɑ ǎ pəmtə zhi'nwə dɔlɔ̌ a. A mvo pɔ kɑ pɑ̌ mkʉə pɔ, wap pɑ pɔ bɑ wap ku'nyə, bɑ jyə dhə nwə, bɑ wap lonyə nə piŋnthʉm dɔlɔ̌, nə ŋkhúŋnyə nə nə́ kaktʉɔ. Ba mvo pɑ jwǐ gɔ pɑ ghiŋ pa' ǎ ku'nyə nə pɔ pyə wap bɑ pɔ dɔlɔ̌: wap lə pɑ gɔm mghɔm cwəpuŋ nə pyə shɑ́ pɔ, wap lə pɑ hɑ nɑ́ tsap nə mlu'. Wap gɔ pɑ́ la'tə nwə pɑpúŋ, pɑ zhi'tə bi mgomgo nə pɑ ŋkhúŋ mthə́ pap pu a po pap. Nə cyətə pɑ̌ gə ya'nyə nwə, nə pɑ nthɔm nɑ tsap, nə pɑ ŋkhaktʉɔ dyə pú, bɑ pɑjwǐ pɑpúŋ, bɑ ju'nyə mthə́ pap po'o gɑ pu kɑ captə ghɔm Si. Tɔk ba pó sə̀m nə pɑ gə nwə m də̀ŋ nə guŋ ywə awɛ. La'tə kwa' nə nɑ́ o mtiŋ fa' pɑpúŋ: nə zhi'nwə dɔlɔ̌, nwə mku'də̀ŋ, nə ghɔm dɔlɔ̌, tsyə pɑ́ mo lə kam tsa a, po'o gɑ gɛ bò kɑ̀ yɔ sɔm cwəpuŋ yə e gɔ ghɔm a, sǒ kú e. Mkwɔ yu'nyə bi mtá pap nə guŋ ywə awɛ, wap kɑ pɑ̌ nthe nwə bi pú, wap kɑ tsǎmnyə sɔmywə. Wap pɑ nyənyɔ bi mtá pap nə guŋ mcwə awɛ; a pɑ po'o a mku' cyə m nə pu bɑ nə zhi'nwə Si gɛvɔk wɔk pɑ̀. Gho' Si bɑ a lě da'tə nɑ e, bɑ tsʉ' yə́ ywə vɔk guŋ pɔ awɛ nthəm nə a. A ji'tə wɔk pɑ nə kəŋnyə nə cyətə́ pǐŋ pɑpúŋ ba nə kəŋnyə nwə dzʉ́ yə̌ŋ, po'o gɑ pɑ cwə̌ nə yəŋ dzʉ̌ tə ghə sɛsɛ nwə, bɑ dəŋdəŋ, gə piŋ pɑpúŋ. Tə bɑ nə byap mɔktə̀ pɑpuŋ ba nə yɔ ghu'tə Si gwyə yɔk pɑ̀, ba gɛvɔk pɔ Yeso Kristo. E lě hɑ thə nɑ e nə pɑ̀ tə́ nə ŋkwi wɔk pɑ bi guŋ mhɔ awɛ, ba m̀ nə nə́ shu' pɔ pyə wap gɔ pɑ̀ pɔ pyə́ a, piŋ pɑ kaktʉɔ nə nə fa' mfa' pɑpúŋ a. Yəŋ gɑ pa' o gɔ ghɔm a, pa' o gɔ səso piŋ lɑ kwa' gʉ̌' nə tɔk pɔ a. A sɔmmo kɑ wak o. Kamtə́ bi guŋ pɔ awɛ gɑ wap gɔ pɑ yu'nyə pɑ fyɛ', yu'nyə pɑ sa' guŋ, gɑ wap gɔ pɑ yu'shwə̀, pɑ nə cwə̌ pɑ pyap nə ghə fa' pɑpuŋ, wap lə yəmtə́ sɔmmo, pɑ wɛ́tə́ msa'shɛ, pɑ la'tə nə yɔ mo pɑpúŋ, pɑ la'tə nə guŋ mcwə awɛ hwitə nə guŋ pɔ awɛ. Nə pa' ba wɔk pɑ̌, pɑ lə́ bɑ dzə̀ bɑ mfʉmnyə́ pɔ, bɑ mtʉɔthə́, pɔ bipǐ, bɑ mkwɔ ŋwɛnyə̀ bap nɑ́ nthinthi, bɑ bvɔk nə tʉm shɔkcɔ̌k ba ghi'nyə, bɑ̀ pɔ bɔkpɔk, bɑ bɔ́nyə cəcɑ̌ pɑ̀. Da' gɑ nə yɔ puŋthʉm Si gɛvɔk wɔk pɑ̀ ba ŋkhùŋnyə e nə pɔmnəŋ lě gə e vɔk wɔk pɑ̀, la' e vɔk wɔk pɑ m nə mfa' dəŋdəŋ myə pɑ̀ gə a pɑ̀, e lə bvɔk wɔk pɑ m nə cɔ̌mmtso e, shyə m nə́ nə sɔk wɔk pɑ, m nə tsə nə tsə sə ba nə kwyəpnyə yə a shyə m nə zhwenyə Dɔlɔ̌ a. Si bɑ ě sɛ Zhwenyə bɔ pɑ dú e nə pɑ shyə m nə Yeso Kristo gɛvɔk wɔk pɑ; po'o gɑ́ a cyə m nə gho' e pɑ pɑ́ pɔ dəŋdəŋ biŋ shyə m̀ nə́ nə mɔktə bɑ pɑ tsʉ́ mcʉ̌' vɔk mama. Ghɔm tsɔ gɑ bɑ ǎ ku' pa' pɑ mo yap tʉ̌m nə a, biŋ bɑwə shəŋ gɑ o cəŋtə jyə tsa bɔ, po'o gɑ guŋ pɔ awɛ pyə a bɑ wap yap piŋnthʉm yap nə Si a kaktʉɔ nə fa' mfà' pɑpuŋ nə gɔ dzə̀. Yɔ ywə yə a pùŋ biŋ ŋkwitə bi pɔmnəŋ a yɑ̌. Da' gɑ wɛtə́ mcə̌ŋnwə pɔpɔ ba nə sɛ nwə ŋkhənyə̀ pu a msa'shɛ́ pu a mfəŋnyə nə nwə mco', a bɑ a ka kwitə biŋ bɑ pɑ̀ pɔpɔ. Mo yə e shəŋnyə yə pɑ́ da' nə ta' nwə yɑmu' a, pak e, da' gɑ̀ nə pak e bɑ ǒ ləŋdzə nthɔk ta' cʉ̌m ba mcʉ̌m bʉ́ə. O zhyə gɑ́ mo bɔ bɑ ě hɔ məjyə, bɑ hɔnwə, bɑ m̀ pɑ̌ nyəŋ shɛ thə e pɑ yʉ́. Cwə yə́ gɑ̌ gɔ təm Artema kɑ Tikiko bu a, o kaktʉɔ nə sɔ' ŋkwyatə a Nikopoli. A tsʉ' yə gɑ jap gɑ́ gɑ gɔ cwə wə́ nə kap ŋʉ́m a. Cəŋtə́ dé nwə nə nwə ghiŋ Zena gɛ zhyə mco' pu Apolos po'o gɑ sɔmywə kɑ yak bi pú. Ba pɔ pɔk pɑ̀ gɔ zhi'tə nə pɑ fa' mfà' pɑpúŋ po'o gɑ wap yap pu nə mfa' myə ǎ wə do'nyə a. Po'o gɑ wap kɑ pɑ tə ghə nthɔm. Guŋ pɔ pyə pyə a pu bɑ a ca'tə o. Ca'tə pɔ pyə wap ŋkhuŋ wɔk pɑ nthʉ́m piŋnthʉm a. Gho' pɑ̀ bi guŋ yɔ awɛ. Myə Polo gɛ Cɛ Yeso Kristo, ba Timotio mu' fɑ́ bi Filemon so fa' yɔk pɑ yə pɑ̌ ŋkhuŋ é te'te' a, ba m bi Apfia fɑ yɔk pɑ yə mjwǐ, ba m bi Arkipo só shù yɔk pɑ ba m bi cu'tə Pɔ Kristo yə a ŋkho dyə o. Gho' pu a hwitə pɑ bi po shyə m nə Si Tá yɔk pɑ̀ ba m̀ nə Cyəpɔ Yeso Kristo. Gɑ̌ go'tə Si a biŋ bɑ ŋkhe tso tsǔ guŋ mcwə awɛ nthʉm mcwyɛ'nyə̀ mə̌, nə pa' gɑ̌ ju' pa' pu gɔmnwə nə ŋkhùŋnyə̀ ba m nə piŋnthʉm yə a bɑ ǒ ghə nə Cyəpɔ Yeso ba m nə pɔ dɔlɔ̌ awɛ a. Yu nə ghiŋ nə piŋnthʉm pɑ kwa' pa' a shəŋ a: ghə̌ pú zhyə guŋ nwə pɑpúŋ awɛ yə pɑ̀ pɑ ghə shyə m̀ nə nwə Kristo a. Pu siŋ a kwa mɑ́ ŋwɛnyə̀ ba hwitə tʉ̌m: a pɑ́ gɑ́ a cyə́ m nə ŋkhùŋnyə o, mfɑ a O nyəŋ gʉ̌' nə tʉm pɔ dɔlɔ̌. Ba m pa' Shyə m nə Kristo gɑ̌ bɑ gɑ̌ zhyə nə yap ywə́ yə o gɔ fǎ', gɑ̌ yɔ m gɑ̌ gɑ gɔ cyə m nə ŋkhuŋnyə̀ lo ywə bu. Əŋ myə Polo, myə yə gɑ̌ bɑ gɑ̌ vò, myə yə gɑ̌ wə bɑ cwəlɔ bɑ gɛ cɛ̌ nə Yeso Kristo a, gɑ wə shwyɛ'nyə o nə mu a, yʉ́ yə gɑ dzə e dyə Cɛ̌ a, Onesimo. Yʉ́ yə e lə bɑ dzə e lə pɑwə ŋkwitə́ o nə sɔmywə a, e piŋ bɑ cwəlɔ bɑwə ŋkwitə́ wɔk pu a. Gɑ wə ba' e bu yʉ yə ě wə bɑ pɑ́ pa' kwa' tʉm tsɑ̌. Ŋ khɑ́ bɑ bi a pɑ́ dwɔ' é bəŋ m̀ e pɑ fa' bəm nə yu tsʉ' dyəcɛ̌ yə gɑ̌ bɑ nə' shyə m nə Cuŋ pɑpúŋ a; da' gɑ́ gɑ̌ yɔ gɑ́ pɑ ŋ də ghə sɔmywə tə́ o biŋ pɑ́, po'o gɑ́ yəŋ nwə pɑpúŋ kɑ hwənyə m pa' pu nə nthənyə o thənyə a, a pɑ m gɑ pɑ pɑ́ kwa' wə nə ŋkhúŋ. Pɑtyɛ' bɑ Onesimo kɑ na' bak nɑ e nə o nə muywə cwə pɑ gɑ́ pu piŋ hɑ e bu ŋkwicʉ̌m pu lə piŋ hɑ e bu pa' ŋkwɔ a pɑ́, pu hɑ e m pa' mo yə é cyə ŋkwɔ a: ta' fɑ yə pú shəŋtə ŋkhúŋ e a; e shəŋtə bɑ bi mʉə po'o, biŋ bɑ gɔ pɑ bu tə́ cyə po'o, wə yə o bɑ monəŋ biŋ bɑ mo Cyəpɔ a. A pɑ gɑ o zhyə gɑ́ gɑ̌ bɑ fɑ o nthʉm piŋnthʉm, o kwi e pɑ́ kwa' pa' myə a. Bi a pɑ e hɔnwə bu kɑ po e ghə pɑ jǔ lə, o sɛ pa' myə nə gə a. Kwa' myə Polo nə dɑ pu a nə bvə bu: myə nə gɔ sɔ' tuŋ. Ŋ də nəŋ bɑ gɔ kamtə bu gɑ a bɑ bɑ̀ pu ghə jú pɑ́, a biŋ bɑ pɑ́ kwa' wə! Ŋ m fɑ́ a, fà' fà' bɔ bəm shyə m̀ nə Cyəpɔ; hɑ gʉ' bi tʉm tsɑ̌ shyə m nə Kristo! Gɑ̌ shyə m nə yu nə yu'nyə tə' bvə bu, gɑ zhyə gɑ o gɔ ghə tə cyə pa' gɑ nə gɔm a. Piŋ nyaptə ba tsʉ' nə cwə bəm, nə pa' gɑ wə mɔktə gə a gɔ cyə́ m nə mcwyɛ'nyə́ mɔ pu pa' a bí po. Epafra, so cɛ́ a nə Yeso Kristo ca'tə o, ba Markusi, ba Aristarko, ba Demas, pu Lukasi msǒ fa' pɑ̌. A Gho' Cyəpɔ Yeso Kristo pɑ́ bi po. Si lə ghɔmnwə bi mtǎ cwədzə mcʉm mcʉ̌m, nthi nthi shyə m̀ nə mghɔm ghɔ̀m Si. A piŋ bɑ nə cwə jʉ̀m yəŋ yə pɑ̌ nə a, e ghɔmnwə bi pɑ, kwa' bi pɑ shyə m nə ta' Mú yə e jap e, e pɑ dzʉ́ mcʉ̌' guŋ ywə awɛ, yə e lə cyə m nə e gə guŋ dzʉ awɛ a. Pu shyə m̀ nə Mú bɔ jɔ dəŋ pa' ghu' Si nə dəŋnyə a, ba pa' Si nə bɑ a. E dɑ́ gʉ' ghɔm tsyə́ ŋkwa dzʉ́. E lě shu' pɔ nə mhɔnwə, shwə nə ghəŋ tʉɔ mo yə a bɑ e zhi a tə́ thə́. E bɑ ě cyə pɑ aŋgəle. Si hɑ tso tsyə́, la' a pɑ pa' tsap a. Si fɑ́ gɔm bi yá aŋgəle gɑ: O bɑ mú a, myə, gɑ̌ tsə o tyɛ' ɔ? Kɑ nə kwi' gɔm gɑ: Myə, gɑ̌ gɔ pɑ bi e pɑ́ tá e pɑ bəm bɑ mu? A piŋ nə pɑ̌ po'o, bɑ cwə yə e shya thə́sə mú nthʉm dzʉ́ a, gɔm gɑ: A guŋ pɑ aŋgəle Si awɛ kam mkwi'tə dzə e. A sɔ' m̀ nə pɑ aŋgəle bɑ ě ghə tsɔ ghɔm gɑ: Mo yə e dɑ pɑ aŋgəle pyə́ gə mzhwenyə, biŋ dɑ mghɛ fa' pyə́ gə mgwa mɔk a. Da' gɑ sɔ' m nə Mu, a pɑ́ bɑ pu ghɔm gɑ: Leŋ fò o m Si bɑ mama! Ba m gɑ: O dɑ pɑ dəŋdəŋ tə nə sá' yu nəfò. O lə kuŋ dəŋdəŋ, bɔ cwəpùŋ. A po'o m̀ Si tə Si o bɑ e lě jwɔ' o. Dɑ mwɑ ŋwɛnyə tə nə jwɔ' o, mwɑ nə ŋkhuŋ o shyə́ mso pǔ. Ba m gɑ: Nə nə́ to' m Cyəpɔ, wə nə lə gə dəmcǎ' ba kɛbə̀ŋ bɑ mfa' bú mǔ. Tsə bɔ gɔ sɔ' pfʉtə da' gɑ wə! O bɑ màmà. Ə̌ŋ, guŋ yap awɛ gɔ sɔ' vo pa' dzə a. O piŋ dzʉm wap nə o pa' dzə bəŋ a. Piŋ kwyəpnyə wap pa' pu ŋkwyəpnyə dzə a. Da' gɑ́ wə̀, o tə ŋkwyəpnyə pɑ. Mgu'dzú mǔ lə pɑ gɔ la' mi. E lə̌ fɑ gɔm bi ya nə pɑ aŋgəle gɑ: Cwə nə ghəŋ tʉɔ a. Gɑ̌ gɔ lɑ mghɛ bò pǔ ghə tʉ́ mkwə o? Guŋ yap awɛ tə́ bɑ́ pɑ́ mzhwenyə, bɑ mghɛ fa' Si, bɑ ě təm gɑ wap fa' po' bi pɔ pyə wap gɔ sɔ' kwi ywə vɔk pa' mcʉ' a pɑ a? Pɑ zhyə́ gɑ́ pɑ gɔ cəŋtə tɔm cuŋ yə pɑ̌ ju' a, bwɔk gɑ pɑ kɑ ghiŋ m jyə dyɛ'. Ghɔm tsyə pɑ aŋgəle lə ghɔm cwə dzə a lě da'tə dəŋ pa' a lə bɑ a. Bǎwɑlə yə e lě tə ghiŋ nə a, yə e lě nthʉɔthə nə a lě ŋkwi mcwɔ'fa' myə a kuŋyə a. Pa gɔ vɔk nə nyəŋ shɛ thə pɑ m gɑ kɑ bi a pɑ yə pɑ kəŋnyə yən nthi ywə vɔk? Pa kwa' yʉ Cyəpɔ bɑ e lě dəŋdzə siŋ yá, ba pɔ pyə wap lə yu' Cyəpɔ a piŋ gɑ ǎ po'o nə dəŋ e. Ba Si piŋ nyəŋ dəŋ nə yap nə kwinthɛ̌ shyə m nə mtiŋ ba m nə msya nthinthi, ba nə nə́ hɑ Zhwenyə Dɔlɔ̌ nə pa' e nə jɔ a. Nə pa' a tə bɑ m̀ bi pɑ aŋgəle tə Si bɑ ě hɑ dzʉ́ yə pɑ gɔm a pɑwə sɔ' a pɑ. A bɑ pu ghɔm nə dzʉ̌ bɔ nə mu' tsʉ' gɑ: Monə̌ŋ bɑ kɑ̀ tə́ o pɑ ŋkhantə é? Kɑ̀ mú mo lə tə o pɑ́ bɔmtə e? A bɑ ǒ na' fi' e hɑ si nə pɑ aŋgəle; O nyəŋ ghu'tə pu a mku' nə e. Si lě jap guŋ ywə awɛ to mkwə e. Si lě nə ghə gɑ́ guŋ ywə awɛ pɑ́ ju'nyə e, é lə tak sɔmywə gɑ a kɑ cyətə yu'nyə e pɑ. Da' gɑ pyə tə́ guŋ bɑwə jɔ gɑ́ guŋ ywə awɛ bɑwə ju'nyə e pɑ́. Pyə wə jɔ ta' ywə: A pɑ gɑ́ mo yə pu lə fi' e hɑ si nə pɑ aŋgəle a, Yeso, e bɑ ě cyə̀ m nə go' vʉ̌ yə e jɔ a ŋkwi co'fò ghu' ba mku'. A po'o tə a shyə m̀ nə gho' Si, go' vʉ́ Yeso pɑ bɑ e jɔ po'o nə guŋ pɔ awɛ. A lə púŋ bi mo yə guŋ ywə awɛ bɑ̀ pɑ yə́, biŋ bɑ shyə́ pɑ m̀ nə é tə bɑwə, yʉ yə e lə biŋ bɑwə shə́ŋ nə lɑ pɔ jɔmyɔ̌m gɔ nə ghu'tə̀ a, gɑ e ghə a pəmtə shyə m̀ nə́ ghəghʉɔ mo yə e gə ywə vɔk yap a. Nə pa' Mo yə e dɔnyə pɔmnəŋ ba pɔ pyə e dɔnyə wap a nthəm pɑ nə ta' tsʉ'. A po'o tə sǒ lə pɑ ŋkhú é nə ké wap gɑ mfɑ́ pyə́ biŋ gɔm gɑ: Gɑ̌ gɔ sɔ' pɑ siŋ tso tsǔ bi mfɑ pɑ̌, gɑ̌ gɔ pɑ zhwɔp mku' mǔ cəcɑ́ cu'tə. Biŋ gɔm gɑ: Myə, gɑ gɔ pɑ́ yaptʉm nə e. Bɑ m gɑ: Gɑ̌ yəŋ, myə ba pǒ pyə Si hɑ wap bəm a. A po'o tə pa' wap bɑ pɔ bapnɑ pu mcyə a, Yeso ba yʉ yə́ bɑ e lě shʉ' pa' wap a nə bapnɑ. A pɑ po'o shyə m̀ nə vʉ é e tsa'tə Sata yə gʉ' vʉ lə bɑ bi a. Biŋ ŋkhyɛ' pɔ pyə nə pwɔk vʉ̌ lə bɑ ǎ lɑ wap gə mkwɔ nə guŋ yap vɔk awɛ a. Nə pa' e tə́ kwitə́ pɑ́ pɑ aŋgəle pɑ̀, e ŋkwitə́ gwya Abraham. A po'o tə e lə bɑ gɔ pɑ nə guŋ ywə awɛ pɑ pɑ pa' mfɑ pyə́ a, po'o tə zhi ŋkhamsi gwyə́ shɔ́mmtso, giŋjyə̀ bi Si nə nə́ vɑnyə mhɔnwə pɔmnəŋ. Nə kɑlə́ pa' kwa' yʉ́ lə yɔ̌go' a, e ku' nə kwitə pɔ pyə́ gǒ' ko nə pu a. A po'o, mfɑ dɔlɔ̌, pyə Si ŋkhe wɔ a, po pɑ dé m nə Yeso, gɛ nthəm Si biŋ bɑ ŋkhamsi gwyə nə piŋnthʉm yɔk pɑ̀ yə pɑ biŋ a. Nə pa' Si bɑ e lě shwɔ' e nə fa' bɔ. E lě ju'nyə bi e, bɑ dəŋdəŋ pa' Mosɛ yə a bɑ pu və nə e gɑ: E lě bɑ dəŋdəŋ nthʉm guŋ dyə Si awɛ. Bǎ ya pa' lə bɑ ě ghə mo yə e lə pəm e a, mo yə e nə́ŋ bəm guŋ ywə awɛ pɑ́ Si. Mosɛ bɑ e lě bɑ dəŋdəŋ nə guŋ dyə Si awɛ, bɑ gɛfa' ŋkwinthɛ̌ nə ywə yə Si lə bɑ gɔ ghɔm a. Da' gɑ Kristo bɑ dəŋdəŋ pa' Mu bɑ pu yap e nə thə dyə Si. Pɑ piŋ bɑ dyə e bi a pɑ gɑ pɑ tɔm piŋnthʉm yɔ pɑ ba mɔktə yə pɑ ŋwɛnyə nə a. A po'o tə dəŋdəŋ pa' Zhwenyə Dɔlɔ̌ gɔm a: Po yu' gi e tyɛ' o, ka po sɔk mtʉ́m mɔ́ pa' cwə yə po lə tʉɔthə́ bi e, tyɛ'dzʉ́ yə po lə ləŋtə é ghakgo a, yə mtá pɔ lə ləŋtə á, bɑ shəŋ nə yɔ ywə yə gɑ̌ bɑ ya a, wap lə yɔ mfa' mə̌, nə gu'dzʉ́ mghappfʉə. A bɑ po'o tə jɛ́luŋ nə pɔ nə́ yəŋ gɑ wɔ̌dzʉ́. Biŋ gɔm gɑ: Tʉm tsap hɔjyə̀ guŋ mcwə awɛ, pɔ bǎ bɑ wap ka yɔ məjyə a. Nə pa' ŋ də yɛ̌lúŋ ŋkhɔ mkɔ gɑ: Pu gɔ la' yɔ pa' wap gɔ ko nə hwitə a lə. Po pɔmtə́ mfɑmfɑ́ gɑ sɔmmo nə́ po kɑ́ ghə tʉ́m cwəpùŋ tsyə nə cyətə ghə piŋnthʉm gɔ té tsa nə Si nthʉ̀ɔnthʉ̀ɔ a. Po pɑ hɑ kaktʉɔ cəcɑ̌ po wɔ wɔ, guŋ mtyɛ'dzʉ awɛ nə nthə́ pa' dzʉ tyɛ' ɔ yə ŋwa'nyə gɔm a gɔ nə cwə a. Po'o gɑ sɔmmo nə po kɑ kəŋnyə nə yu', gə mhɔnwə futə e. Pɑ bɑ pɑ̌ zhi mso ghiŋ Kristo, bi a pɑ gɑ pɑ tɔm pɑpuŋ tə miŋ pa' pɑ lə nə ntho' a. Nə pa' a bɑ pu ghɔm gɑ: Po yu' gi e tyɛ' ɔ, ka po sɔk mtʉm mɔ pa' cwə yə po lə nthʉɔthə́ bi e a. Kwa' pɑ wɑ̌ lə ju' nthʉɔthə́? A la tə́ bɑ guŋ pɔ pyə wap lə cyə m jʉ́m Mosɛ nthəm Egipto a pɑ́ a? E lə yɛ̌lúŋ nə wɑ̌ nə gu'dzʉ́ mghappfʉə? A la tə bɑ nə pɔ pyə wap lə hɔnwə̀, mpfə map vʉtə ghakgo a pɑ́ a? E lə nəŋ ŋkhɔ́ mkɔ bi wɑ̌ gɑ e tə́ gɔ ko nə hwitə̀ e a, tə a bɑ pɑ bi pɑ tʉɔthə́ bɔ? Pɑ̌ piŋ jɔ gɑ wap lě tə ko nə́ bɑ a shyə m̀ nə yap nə cyətə ghə piŋnthʉm. Pɑ pwɔk, nə pa' cwə yə́ mka'nyə̌ nə ko nə hwitə e jɑ pɑ si a, pɑ pwɔk gɑ ka mu' mo nə pɑ kɑ wuŋ nyəŋ yə pɑ gɑ e gɔ wuŋ jʉ̀m. Nə pa' ba wɔk pɑ bɑ́ pɑ́ kwi Cùŋ pɑpuŋ pɑ́ pa' pɔ bɔ a. Da' gɑ ghɔm tsyə wap lə yu' a lě tə kwitə́ wap, nə pa' pɑ yu' ghɔm bɔ lě tə́ ghə́ piŋnthʉm. Wɔk pɑ pyə a bɑ pɑ̌ ghə piŋnthʉm a, pɑ ŋkho nə hwitə́ yə e gɔm nə gɑ́: Nə pɑ ŋ də yɛlúŋ ŋkhɔ́mkɔ̀ gɑ: Pú gɔ la' yɔ pa' wap gɔ ko nə hwitə̀ a lə! Bɑ fa' tsyə lě nəŋ da' bəmtə́ tə́ fɑ nə cwə nə nyaptə dzʉ̌, nə pa' pu gɔm nə tyɛ' sɔmbʉə gɑ: Si lə hwìtə nə guŋ fà' tsyə awɛ nə batə tyɛ' sɔmbʉə. Biŋ ŋkwi' bɑ gɔm nthʉm ŋwa'nyə yɔk pɑ gɑ: Bi a wap la' ŋkho nə hwitə a lə. Pɔ pyə wap lə ləŋdzə ju' ghɔm Si a lě tə ko nə hwitə bɔ, shyə m nə tʉɔthə́ yap. Da' gɑ bi a pɑ shɑ pɔ piŋ ŋkho nə. A ywə yə a gə tə Si piŋ jap mu' tyɛ'dzʉ khe gɑ tyɛ' ɔ, gɔm nthʉm ŋwa'nyə David yə pɑ ji gɔm a gɑ: A pɑ tyɛ' ɔ po yu' gi é, ka po sɔk mtʉm mɔ́. Nə pa' a pɑ gɑ Yoswa lə ghə̌ gɑ pɑ́ hwitə, bɑ e latə́ gɔm a pɑ́ mu' tyɛ'dzʉ́ dyɛ' pɑ̀. Hwitə́ tyɛ' Sabat bɑ pu yap yá bi pɔ̀ Si. Nə pa' mo yə ě ko nə hwitə̀ é a, bɑ ba yʉ́ yə́ to' nə hwitə̀ nə mfa' myə́ dəŋdəŋ pa' Si lə hwitə̀ nə myə a. Pɑ lo'nyə́ nə ko nə hwitə bɔ tə̌ fo' tʉɔthə́ kɑ ghə̌ sɔmmo vʉ́ nə mhɔ. Ghɔm Si bɑ ǎ cwə nthʉɔ, gʉ̌' pɑ nə́, bɑ a pìŋ shɔk tə shyə guŋ mnyə mcɔk bʉə awɛ. A ŋkhonyə tə gap lam mo pu zhwenyə e, gap zhəŋ kwé pu mhə̌m. A fyɛ' ywə yə mo ju' nthʉm tʉm e biŋ ŋkwɛnyə a. A tə́ shyə tə yɔ sɔmywə yə Si lə pə̌m a pɑ́; guŋ ywə awɛ bɑ nə mnyə myə́ bɑ pɑ sòsò, mnyə myə́ pɑ nthɔm guŋ ywə awɛ. Pɑ gɔ sɔ yap guŋ mɔk pɑ mnwə awɛ pɑ́ dzə̌ é. Pa' a bɑ pɑ̌ ghə ŋkhamsi gwyə, bɑ e lə ntwɔk nə mkɛbəŋ, Yeso, Mu Si a, pɑ tɔ́m piŋnthʉm yɔk pɑ pɑpuŋ. Pɑ tə bɑ pɑ̌ ghə ŋkhamsi gwyə yə e tə́ bɑ e ka ku' nə zhyə pwa yɔk pɑ a pɑ. Pu lə lə̌ŋtə́ e nə guŋ mghə́ŋ awɛ pa' wɔk pɑ a, da' gɑ́ la' e hɔnwə̀. Pɑ cəŋtə gɔ pɑ mdzə tə pwɔk bəŋ leŋ fo gho', po'o tə gə cɔmmtso biŋ sɔ' jɔ gho' gɑ cwə ku' pɑ ghə kwitə̀. Bǎ ya ŋkhamsi gwyə lə yə e nthəm cəcɑ̌ pɔmnəŋ a, pu jap e nə nwə pɔmnəŋ, nə nwə pɔmnəŋ pu a Si. Fa' tsyə́ bɑ nə pɑ hɑ ywə biŋ nuŋpwɔ' nə mhɔnwə pɔmnəŋ. Kwa' yʉ́ gɔ ku' nə yu' pɔ pyə a bɑ wap ka zhyənwə, bɑ hɔ məjyə á, nə pa' ba kwa' yʉ́ yə bɑ pwa ko nə e mghəŋghəŋ. A piŋ shyə m nə pwa bɔ e pɑ gɔ pɑ nùŋpwɔ' nə mhɔnwə pɔmnəŋ nuŋpwɔ' bɑ nə myə́ mhɔnwə. Sɔmmo tə shwɔ' nɑ́ é pɑ yʉ́ nə tsɔ gɑ fa' pɑ̀. Pu kwi fa' bɔ m̀ bi Si nə pa' yʉ nə ŋkhe mo, dəŋdəŋ pa' a lə pɑ̌ nə Aaron a. A po'o tə Kristo látə́ shwɔ' nɑ e pɑ yʉ́ nə ghu'tə̀ nə pɑ ŋkhamsi gwyə pɑ́; e lə ŋkwi m bi mo yə e lə ghɔm bi e gɑ: O bɑ mú a, myə tyɛ' ɔ, gɑ̌ tsə o dəŋdəŋ pa' tsɔ ghɔm gɑ̀: O bɑ́ ŋkhamsi mama nə yə̀ nthì Mɛlkisedek. Yʉ́ nə lə bɑ nə cwə vɔk e dəmcǎ' bɑ hɑ mcwyɛ'nyə pu a nə pu'bǔ, dɑ cwe pu a shyətsə́ nə hɑ po'o bi mo yə a lə bɑ pɑ́ e vɔk e nə vʉ̌ a, et piŋ ju' mcwyɛ'nyə myə shyə m nə yə nə yu'nyə̀. Ba pa' e lə bɑ pɑ Mú, e lə cyə̌ nə gǒ' ji'tə nə yu'nyə, pa' e lə piŋ gɔ tə ŋkhəm a, e lě shʉ' nwə ywə vɔk mama bi pɔ pyə wap yu'nyə e a, nə pa' a bɑ Si yap e gɑ ŋkhamsi gwyə́ nə yə nthi Mɛlkisedek. A wə sɔ' m̀ nə́ yəŋ nwə bɑ pɑ̌ ghə mghɔm nə te', bɑ nə nəŋ nthutə mnwə bɔ tʉɔ te' nə pa' po bɑ po zhi pɑ tə lo'nyə ju'nwə. Po lə bɑ gɔ pɑ mghɛ la'tə tə tyɛ̌', tə pǒ ja tyɛ' ɔ bɑwə shə́ŋ gɑ pu zhi'tə wɔ dzə pǒ mnwə̀ nə mghɔm Si. Pǒ bɑ po ghɔ tə biŋ bɑwə byap pɑ bʉɔ mú, nə tsʉ' ywətsʉ nthʉɔtʉɔ. Mo yə e jɑwə núŋ pʉɔ a, pɑ́ e lə zhyə́ nə sɛnwə nə nwə dəŋdəŋ, nə pa' e bɑ pɑ mubwǎ. Tə sɔ' m̀ nə mghətso, wap dzʉ́ ywətsʉ nthʉɔtʉɔ, nə pa' a bɑ wap cyə m nə vɔk yap jyə nə zhyə ywə pɑpuŋ ba ywə cwəpùŋ. Pa' ɑ̌ po' a pɑ fɛnə dé m nə zhi'nwə mghətsó, nthak zhi'nwə po mkəcɔk po nə Kristo nə́ŋ. Pɑ tə gɔ tə́ piŋ zhi cyə ghɔm pɑ, yəŋ la'tə gɑ nə tak mfa' cwəpuŋ nəŋ biŋ Si, nə zhi'tə nwə nə kwǐshyə ba nə nə́ yapbǔ nə mo, nə siŋ nə nə́ yam nə vʉ̌ ba nə jʉɔjʉm fyɛ'. A ywə yə pɑ̌ gɔ ghə bi a pɑ́ gɑ Si piŋ a. Pɔ pyə wap lě ŋkwi ŋkha' biŋ jwi'tə ywə pɑpuŋ yə a fɑ m kɛbəŋ a, pɔ pyə wap lě ŋkwi Zhwenyə Dɔlɔ̌ jwi'tə ghɔm pɑpúŋ Si ba gùŋ yə a wə sɔ' a, da' gɑ biŋ bvʉ́tə si a, pɑ wap lə piŋ bʉɔtʉm tsap jyə́ pɑ́. Wap dɑ mfa' map biŋ jap Mú Si bɛnyəpɛnyə gə pu pɑ shap e. Cwə yə ta' tsʉ' ca' nwə shyə bəŋ yə a du nə e biŋ sa' mghe myə a ŋkwitə pɔ pyə wap dzʉ' tsʉ' ca' bɔ, e ŋkwi ba yə byanyə bi Si. Da' gɑ a pɑ́ sa' pɑ mka'tə́ pu a jǔŋ, bɑ pu gɔ yɔ gɑ e ka kwitə, nyəŋ do nə e nə miŋ to e mɔk. Tɑ́ ba tə pa' pyə wə gɔm po' a, wɔ pɔ ŋkhuŋnyə pɑpúŋ, pyə wə jyə gɑ pǒ bɑ m̀ nə ghəŋ pɑpuŋ bɑ m̀ nə ghə̌ŋ ywə vɔk. Si bɑ pɑ̀ dəŋdəŋ; pɑ e lə tʉɔnyə fa' tsɔ ba ŋkhuŋnyə yə po lə la'tə nə tso tsyə nə pa' po lə nə biŋ nə fa' nə pɔ dɔlɔ̌ tə̀ tyɛ̌' ba m cwəlɔ a. Da' gɑ yɔk ywə yə pyə̌ shəŋ a wə bɑ gɑ́ bǎ ya mo lə nə po ghə pɑ nthi gʉ̌' bɔ nə nə nthɔm yə mɔktə, gɑ e kaktʉɔ tə sɔ' miŋ. Po kɑ lɑ gʉ' yɔ biŋ m̀ jʉ̀m, po lɑ fo' nə pɔ pyə wap shyə m nə piŋnthʉm pu a kaktʉɔ ŋkwi mcʉ' ywə yə Si ŋkha'nyə a. Cwə yə Si lə hɑ mka'nyə bi Abraham a, sɔmmo yə e cyə e tə bi a pɑ́ e lɑ e ŋkhɔ mkɔ a lə pɑwə; a pɑ po' e kɔmkɔ pɑ kwa nə thə nɑ́ é, biŋ gɔm gɑ: Əŋ gɑ gɔ nyəŋ byanyə nə o hɑ dù gwya bu. Pa' Abraham lə kaktʉɔ a, e lě jɔ mka'nyə bɔ a pəmtə. Pɔmnəŋ dɑ pɔ pyə wap cyə́ wap a nə ŋkhɔmkɔ, bɑ dɑ ywə nthʉcwyə nə mka'nyə bwɔk fəŋnyə̀. A po'o tə Si pɑ shəŋ nə la'tə bi pɔ pyə́ e hɑ mka'nyə bi pu a gɑ a tə gɔ kwyəpnyə́ pɑ, ŋkhɔ mkɔ nə. A mnwə məbʉə myə pɑ a lə kwyəpnyə, mnwə myə pɑ cwanwə lə pɑ nə bi Si a, mnwə bɔ hɑ kaktʉɔ nthʉɔtʉɔ bi pɑ̀ pyə a bɑ pɑ lě gwa' guŋ pǒtsə awɛ nthɔm mɔktə yə pu lə ka' bi pɑ a. Mɔktə bɑ bi pɑ bɑ pa' gwɔ' nə shəŋ kənu' dəm shyə nə vɔk yɔ pɑ. Mɔktə bɔ bɑ pɑ a le kwyəpnyə, bɑ ǎ lɛtə́ bɑ nthwɔk dəŋdzə lɔm dzə nə sam dyə Si kɛbəŋ gɔ tə kho nə tsʉ' dɔlɔ̌ nthʉm dyə. A bɑ tsʉ' yə Yeso lə ləŋdzə nə pɑ ŋkhonə bi pɑ a, nə pa' e lə cʉ̌ ŋkhamsi gwyə mama nə yə nthi Mɛlkisedek. Yəŋ Mɛlkisedek, fo Salem, ŋkhamsi Si tə thə́ kɛbəŋ, lə ghɔ̌ pu Abraham yu'tə nə cwə yə́ e lə pɑ̌ fɑ m̀ nə lo' shù nə mfo a, e nyə́ŋ byanyə nə é. Abraham lə́ hɑ ta' jyə nə tsə́ tsyə́ dəŋdəŋ jyə gham bi e. Tsǒ Mɛlkisedek nthútə gɑ́ Fo dəŋdəŋ. E piŋ bɑ fo Salem, a pɑ́ da'tə gɑ fo hwitə̀. Yʉ́ yə a tə bɑ ě ghə ta, e le ghə ma, e lə ghə ŋkhənyə̀, bɑ mtyɛ' dzʉ myə ka ghə tsʉ' yə a ntho' nə a, vɔk e lə nəŋ gə dhə e, da' gɑ́ e bɑ pa' Mú Si a, bɑ ŋkhamsi mama. Po yɔ dəŋ pa' mo bɔ bɑ ě ghu', mo bɔ yə Abraham hɑ ywə ta' jyə nə dəŋdəŋ jyə gham nə tsə tsyə́ tsyə̀ pɑpuŋ bi a, e bɑ tá gɑ̌jʉ' nə ŋkhənyə. A nəŋ nə pɑ̌ po'o, pǒ Levi pyə wap bɑ pɑ nuŋpwɔ' a pɑ̀ bɑ mco' yap gɑ wap gɔ pɑ kwi ta' jyə nə dəŋdəŋ jyə gham bi pɔmnəŋ, yəŋ la'tə̀ gɑ bi mfɑ́ pap pyə́ wap bɑ gwya Abraham a. Da' gɑ yʉ yə e tə bɑ nə gwya yap a pɑ́ lě ŋkwi ta' jyə nə dəŋdəŋ jyə ghǎm bi Abraham biŋ nyəŋ byanyə nə mo yə mka'nyə bɑ myə́ a. Pɑ sɔmmo lə nəŋ nthédʉ' gɑ́ gətso nə nyəŋ byanyə nə́ mo ŋkhò. A piŋ bɑ tsɔ'ɔ pɑ kwi' ta' jyə nə dəŋdəŋ jyə ghǎm pɑ pɔ pfʉ́pfʉ̌, da' gɑ ye mo bɔ pɑ̀ mo yə e bɑ́ pɑwə a. Nə ghɔm awɛ piŋ bɑ́ gɑ́ a bɑ ǎ cyə m̀ nə Abraham, ba Levi yə e ŋkwi ta' jyə nə dəŋdəŋ jyə gham a pɑ bɑ pu lě ŋkwi bi e yə́. Nə pa' e lə jɑ nthʉm vʉ' ta gɑ̌jʉ' e tə wap pú Mɛlkisedek yu'tə. Pu lə pe' shyə m nə nə́ pɑ khamsi pɑ Levi gə nwə pəmtə́, nə pa' yə bɔ nthi nə pɑ khamsi nə lə bɑ kuŋ mco' pɑ Israɛl, bɑ pu lě biŋ gɔ shəŋ mu' ŋkhamsi nə ŋkhənyə Mɛlkisedek m gɑ́ kɑ tə cwɔ' e m̀ nə gwya Aaron? Nə pa' nə kwyəpnyə nthi nə nuŋpwɔ' ŋkwyəpnyə mco'. Mo yə pu nəŋ bɑwə gɔm e nthʉm ŋwa'nyə yəŋ a pɑ mo nə tuŋdyə yə pu la m shwɔ' nuŋpwɔ' nə a. A nəŋ bɑ bɑ́ pu zhyə gɑ Cyəpɔ yɔk pɑ nthəm nə ŋkhənyə Yuda, ŋkhənyə yə a bɑ Mosɛ ka ghɔm sɔm nwə nə́ nthʉ́m ŋwa'nyə mco' nə mkamsi a. Pu nəŋ shəŋtə bɑwə jɔ gɑ́ yə bɔ ŋkhamsi wə hwə́ Mɛlkisedek. E lə nəŋ bɑ ŋkhamsi po'o m nə mco' ŋkhədyə pɑ́, e pɑ ŋkhamsi m pa' vɔk e bɑ mama a. Pu gɔm nə e gɑ: O bɑ ŋkhamsi mama m̀ nə yə nthi Mɛlkisedek. A bɑ tsɔ'ɔ po'o bɑ pu wa' dzə mco' nə pa' a ka kwitə nə sɔmywə nə kɑlə mco' ka ghə sɔm nwə pəmtə̀, biŋ jap mu' mɔktə yə pɑpúŋ yə a dɑ wɔk pɑ gɔ bəŋ Si a. A biŋ bɑ́ bɑ Si lě ŋkhɔ mkɔ nə. Pyə shɑ pɔ bɑ wap lě bɑ mkamsi tə mkɔ nə. Da' gɑ Yeso bɑ e nə pɑ ŋkamsi mkɔ ŋkhɔkɔ pɑ nə pa' Si lə ghɔm bi e gɑ: Cyəpɔ lě ŋkhɔ mkɔ nə́, la' e pɑ gɔ la'tə piŋ pɑnyə nə pɑ ŋkhɔmkɔ gɔm gɑ: O bɑ ŋkhamsi mama. A shyə m po'o tə Yeso pɑ bɑ ě zhi cwyə nə kɔ pɑpuŋ. A piŋ nə pɑ̌ po'o bɑ pyə shɑ pɔ lə pɑ̌ mkamsi tə́ jɔm, nə pa' vʉ̌ lə ŋkhɔ gɑ́ wap kə cwə mama. Da' gɑ yʉ, pa' e bɑ mama a, e bɑ ŋkhamsi yə nə nuŋpwɔ' bɑ da' yə́ a. A po'o tə a bɑ ě ku' nə vɔk pɔ pyə wap shyə m nə é gɔ bəŋ Si a mama, nə pa' e bɑ pɑ́wə mama nə pɑ shwyɛ'nyə Si nə pu. Yə̌ŋ biŋ bɑ kwa' pa' ŋkhamsi gwyə yə a lə bɑ shəŋ bi pɑ a bɑ a: Bɑ dɔlɔ̌, bɑ tə́ bya, bɑ ě təm nə mhɔ, bɑ pu kwɔ' e tə dəm kɛbəŋ. E tə́ nuŋpwɔ' guŋ mtyɛ' awɛ pa' pyə shɑ̀ mkamsi gwyə a pɑ. E lə pɑ nuŋpwo dəŋdzə kwa' nə mhɔ myə, biŋ bɔtə nə myə pɔmnəŋ pɑ. A bɑ e lě da' gə ya bɔ ŋkwi cʉ̌m, dɑ kwa' thə́ nɑ e nə gə. Mco' jap pɔ wap pɑ́ mkamsi gwyəgwyə, da' gɑ la' wap pɑ tə bya. Tə ghɔm kɔmkɔ tsyə a nthəm m jʉ̀m mco' a jap ta' Mú yə e gə guŋ ywə awɛ pəmtə mama a. Kwa' nwə gwyə nə nwə yə pyə̌ gɔm a, a shəŋtə́ bɑ ŋkhamsi gwyə yəŋ yə pɑ gə e, yʉ́ yə a bɑ ě cwə nə ghə́ŋ tʉɔ nə léŋfo fo Si kɛbəŋ á, e fa' mfà' myə tsʉ' u nthʉm nthap dɔlɔ̌ nthap nyənyɔ yə Si nə ŋkwɑ̀ a, la' pɑ́ yə pɔmnəŋ nə ŋkwɑ́ a pɑ́. Bɑ̌ yá ŋkhamsi gwyə lə́ bɑ pú yap e gɑ e pɑ nuŋpwɔ' biŋ hɑ ywə hɑhɑ̌, a pɑwə shəŋ bi é gɑ́ e ghə ywə yə é gɔ hɑ́ a. Kristo lə pe' bɑ pɑ dəmcǎ', bɑ e tə́ bɑ́ bǎ ŋkhamsi pɑ́, nə pɑ pyə shɑ bɑ Si pyə mco' pɑ Yuda jap wap a bɑ nuŋpwɔ. Da' gɑ pɔ bɔ fa' yap pɑ bi mu hwə ywə yə a bɑ kɛbəŋ a, dəŋdəŋ pa' Si lə kamtə́ bi Mosɛ nə cwə yə e bɑ gɔ kwɑ nthap a, e ghɔm bi e gɑ: Yɔ, o gɔ ghə guŋ ywə awɛ pɑ̀ pa' yə ŋ də la'tə o dəm kuŋgǒ a. A nyənyɔ gɑ fa' tsyə a bi Yeso a bɑ kwa' tsyə gwyə nə pa' e bɑ giŋkǎm kwa' nə kɔ̀ pɑpúŋ tsyə nə wà shyə m nə mka'nyə̀ pɑpúŋ a. A lə pe' tə dəŋdzə kɔ pɑ tə bya, bɑ nə lɑ mu' kɔ batə yɑpʉə ŋkwyəpnyə lě tə́ pɑwə. Da' gɑ Si bɑ ě tébya nə pu nə pa' e gɔm gɑ: Yɔ, shɑ mtyɛdzʉ́ wə sɔ̌' yə pyə a tuŋdyə́ Israɛl ba tuŋdyə́ Yuda gɔ wa mu' kɔ sə a. A lə pɑ m pa' kɔ tsyə́ pyə a mtá pap lə wa, nə tyɛ'dzʉ́ yə ŋ də tɔ̌m pu yap dɑ wap nə nthəm Egipto a pɑ. Nə pa' kwa' wap lě tə tɔm kɔ tsɑ̌, ba myə yɑ̌ ŋ dě nthak wap nə́ŋ. Cyəpɔ nə gɔm po'o. Nə pa' yɔ kɔ tsyə a gɔ sɔ' tamtə wɔk pyə a tuŋdyə Israɛl a nə tyɛ'dzʉ́ bɔ a tsɔ gɑ. Cyə pɔ nə gɔm po'o: Gɑ̌ hɑ mco' mə̌ nthʉm mkwɛnyə̀ map. Gɑ̌ gɔ sɔ' və ma nthʉm mtʉm map. Gɑ̌ gɔ sɔ' zhi Si yap wap zhi pɔ pɑ̌. Sɔmmo nə pu tə gɔ sɔ' cəŋ nə zhi'tə yə la' pú kɑ fɑ e lə ghɔm gɑ zhyə Cyəpɔ pɑ. Nə pa' gùŋ yap awɛ gɔ sɔ' zhyə a, tə fɑ́ nə mo ŋkho' kəm nə́ gətso. Nə pa' ŋ tə gɔ sɔ' ghyɛ' cok nə hɔ̀ map pɑ̀. Ŋ də piŋ ŋkhamtə mhɔnwə map. E nə ghɔmnwə nə kɔ sə́, dɑ tsyə dəŋdzə gə tsyə bvò; a piŋ bɑ po'o, ywə yə a ji yə bvo, bɑ bvó a bɑ ywə yə a bɑwə gɔ mi a. Də̀ŋdzə̀ kɔ lə bɑ ě ghə ŋkhɛ nə sé Si ba dyəsi dəmca'. Nə pa' a lə bɑ pu lě ŋkwɑ nthap, dəŋdzə nthap, pu pɑ̀ ŋkhe gɑ́ Dɔlɔ̌, tsʉ' yə kwɔ' lambu pu tɑpe ba msɛ̌ nə nuŋpwɔ' lə bɑ nə a. Mu' nthap lə biŋ bɑ jʉ̌m batə dzə nə sam yɑpʉə pu ke gɑ Dɔlɔ̌ m dɔlɔ̌. Tsʉ' nə ntho phə̀ damnyəlamnyə lɑ bɑ tsʉ̌' bɑ pu lə tʉɔ gɔl nə gə, biŋ gə ŋkwɔp kɔ, bɑ pu lə gɔl nə sam awɛ; mu' kɔp gɔl lə bɑ nthʉm o, mana pɑ́ nthʉm o, ba pəŋ Aaron bɑ a lě gə mtutuŋ, biŋ gə mbak mghwɔ' myə a lə bɑ pu və ghɔm kɔ nə a. Pɑ kerubɛn ghu'tə lə bɑ dəm ŋkwɔp bɔ, bɑwə dɑ cyəŋnyə yap nə pfɔptə tsʉ' nuŋpwɔ' nə mhɔnwə. Da' gɑ yəŋ tə tsʉ' nə gɔmnwə nə guŋ e awɛ pɑ́. Pú jap guŋ e awɛ po'o, mkamsi pɑ̀ nə fa' fa' tsap, ŋkho nə də́ŋdzə̀ nthap guŋ mcwə awɛ. Da' gɑ nə batə nthap yɑpʉə, da' ŋkhamsi gwyə nə pɑ ŋkho nthʉm o nə ta' cʉ̌m nə ta' gu'dzʉ̌, biŋ nə kǒ nə po'o bɑ ě nuŋpwɔ' mcyə́ nə mhɔ myə́ ba nə myə́ pɔmnəŋ. Zhwenyə dɔlɔ̌ shəŋ po'o nə la'tə gɑ məjyə́ tsʉ' cwyəp jɑtə wuŋ gyɛ', nə cwə yə dəŋdzə́ nthap yɑ̌ pɑwə́ a. A bɑ̀ mtiŋ nə yəŋ gɑ cwə dzʉ̌: Pu hɑ ywə́ biŋ nuŋpwɔ' tsʉ'u, da' gɑ́ bɑ a ka ku'nyə nə ghə gɑ tʉ̌m mo yə e fá' tsɔ fà' a pɑ tə bya. A bɑ pɑ nə nwə ywətsʉ, pu a mlu', bɑ nə nthinthi nə sɔ̀k mo a, a bɑ pɑ́ mfa' monəŋthə́, mfa' myə pu jap po'o tə ghɔ kəm nə́ cwə nə biŋ jap ŋkhɛ̀ a. Da' gɑ́ Kristo lě sɔ' bɑ ŋkhamsi gwyə́ nə tsə́ pɑpuŋ myə a bɑ a tsə sɔ' a. E bɑ ě ko nthap bɑ a piŋ gu' biŋ bɑ dɔlɔ̌, nthap yə tə pɔmnəŋ nə ŋkhwɑ a pɑ, yəŋ la'tə gɑ nthap yə a tə bɑ yəŋ dzʉ a pɑ. Cwə yə Kristo ŋkho nthap dɔlɔ m dɔlɔ̌ ŋkwi cʉ̌m nə miŋ a, e lɑ hɑ mcyə mpɔp kɑ mcyə po mna' lə. E hɑ pɑ kwa' mcyə myə́, biŋ hɑ po' o nə nthé wɔk pɑ dyə mkwɔ mhɔ ŋkwi cʉ̌m. Mcyə mpɔp dzə ba mpɔp mna' ba mvə jwi na' nthoto myə pu sɛ nə pɔ pyə wap bɑ wap ka lɔ a shu' wap pɑ nə mviŋ jum dzʉ̌. Bi a nəŋ bɑ po'o bɑ mcʉ̌m sʉ'ʉ nə mcyə Kristo nə nə cu' wɔp pɑ̀? A lě shyə m̀ nə zhwenyə mama, e hɑ nɑ é bi Si pa' tsə pwɔ' dɔlɔ̌ a. Mcyə myə gɔ sɔk tʉm tsɔk pɑ nə mfa' cwəpuŋ, po'o gɑ pɑ pɑ fa' bi Si nthʉɔtʉɔ. A po'o tə e bɑ́ giŋkam kɔ sə́, mtɔk vʉ́ sə; vʉ́ e bɑ nə nə cyə m̀ nə dɑ hɔnwə myə a lə pɑ̌ nə dəŋdzə kɔ a nə shwyɛ' pɔ, po'o gɑ pɔ pyə pu ké wap a tsʉ mcʉ' mama myə pu lə ka'nyə a. Nə pa' nə tɔkvʉ̌ pɑ si, bɑ a shəŋ gɑ pu yɔ vʉ́ nthɔkvʉ̌. Nə tɔkvʉ̌ nəŋ nə pəmtə bɑ nthɔkvʉ̌ pfʉ́; cwə yə nthɔkvʉ̌ jɑ tə wuŋ pfʉ́ a, mtɔkvʉ́ lə wuŋ bɑ ywə. A po'o tə pu la tə cyətə lɑ pɑ mcyə tə́ nə nthʉ də̀ŋdzə̀ kɔ pɑ. Mosɛ lə ləŋdzə hɑ guŋ mco' awɛ bi pɔmnəŋ pa' Si lə bɑ e nə jap a. E lə pǐŋ dɑ mcyə po mna' ba myə mpop dzə́, ba shyə, nɔk nə ŋwa'nyə mco' pu a pɔmnəŋ shyə́ m nə cɛ̌ izopə pu mnəŋ jʉjʉ pəpɛ. Bɑ gɔm gɑ: Mɔ gɑ bɑ́ mcyə́ kɔ tsyə́ Si jap nə po a. E lə pǐŋ dɑ mcyə bɔ shi' nthap ba guŋ tsə nə nuŋpwɔ'. Nə pa' mco' gɔm gɑ́ pu dɑ pɑ́ mcyə tə́ nə shu' guŋ ywə awɛ, nə pa mcyə pɑ̀ tə pfyə bɑ nə lɑ mhɔ shwyɛ' mo tə bɑ wə pɑ̀. Nə pa' pu ghə po'o nə shu' cyə̀ŋnyə̀ ywə yə ǎ kɛbəŋ a, bɑ nə cu' kwa' ywə yə ǎ kɛbəŋ gɔ cəŋ kwa' pwɔ' tsyə ǎ cəŋtə buŋ a. Kristo tə ŋkho m̀ cwyəp tsyə a bɑ pɑ́ fa' bú monəŋ, bɑ fo' tsyə nyənyɔ a pɑ́. Kristo ŋkho m̀ kɛbə̀ŋ po'o gɑ e ŋwak dzə Si cwəlɔ bi pɑ̀. La' e pɑ gɔ hɑ nɑ é mcʉ̀mmcʉ̌m pa' ŋkhamsi gwyə́ ŋkho cwyəp gùŋ mgu' awɛ pu a mcyə́ dyɛ' a pɑ́. A lə pe' bɑ po'o bɑ e lə́ gɔ yɔgo' mcʉmmcʉ̌m tə fɑ nə cwə nə́ nyaptə dzʉ̌. Da' gɑ a bɑ e lě gə po'o ŋkwi cʉ̌m, nə cwə jʉ̀m, po'o gɑ yə nə lɑ kwa' thə nɑ e nuŋpwɔ' vɑnyə mhɔnwə. A piŋ bɑ po'o, ywə yə a bɑwə byap pɔmnəŋ a pɑ nə pfʉ ŋkwi cʉ̌m, a piŋ nə təm jʉ̀m o bɑ nə fyɛ' a. A po'o tə Kristo bɑ é lě hɑ nɑ e ŋkwi cʉ̌m nə nə nthe mhɔnwə pɔ jɔmyɔ̌m, e piŋ bɑ gɔ la' piŋ tə́m batə mcʉ̌m bʉ́ə, tə a lə piŋ bɑ́ nə nwə mhɔ pɑ, ŋwak bi pɔ pyə́ wap byap é nə ywə vɔk a. Mco' da'tə pɑ ciŋnyə mnwə pɑpuŋ myə a bɑwə sɔ' a. A tə́ da'tə kwa' mnwə pɑpuŋ bɔ pɑ; ba tə́ pa' pu nuŋpwɔ' guŋ mcwə awɛ, nə guŋ gu'dzʉ awɛ a, mco' bɑ a ka ku' nə ghə a pəmtə nə pɔ pyə wap gə yá a ŋkwicʉ̌m, wap lə piŋ sɛ sɔm mhɔnwə nthʉm tʉm pu. A lə pe' bɑ po'o bɑ pu lě da' nthak nə núŋ pwɔ' nə́ŋ, nə pa' bɑ a lě da' dɔnyə pɔ pyə wap gə yá a ŋkwicʉ̌m, wap lə piŋ sɛ sɔm mhɔnwə nthʉm tʉm pu. Da' gɑ̀ a shyə m̀ nə yəŋ nə nuŋpwɔ' pu pɑ ŋkhamtə mhɔnwə guŋ mgu' awɛ. Nə pa' mcyə́ mpɔp na ba myə́ mpɔp dzə ka ku' nə té mhɔnwə. A po'o tə́ Kristo nə kǒ nthʉm dzʉ́ gɔm gɑ: O lě tə cəŋ pwɔ' pu ywə hɑhɑ̌, da' gɑ o lě bə́m nɑ́ a. Pwɔ' nthoto ba pwɔ' nə mhɔnwə lě tə púŋ o. A pɑ́ po'o ŋ gɔm gɑ: Gɑ̌ yə̌ŋ, nə pa' ywə yə pu bvə̀ nthʉ̀m ŋwa'nyə dzʉm tsʉ̌m a, pu bvə nə m̀. Ywə bɔ pɑ̀ gɑ: Gɑ̌ sɔ' m Si nə ghə ywə yə o shəŋ a. E də́ŋdzə gɔm gɑ: Pwɔ', ywə hɑhɑ̌, pwɔ' nthoto, ba pwɔ' nə mhɔnwə o lě tə cə́ŋ, a lě tə́ púŋ o. A po'o bɑ ywə yə mco' jap a. E biŋ gɔm gɑ: Yɔ, gɑ̌ sɔ' nə ghə ywə yə o shəŋ a. E bi dzə fa' nə sé Si, biŋ jap mu' batə yɑpʉə. A po' tə a bɑ pɑ lě dɔnyə shyə m nə pwɔ' nɑ́ Yeso Kristo tsyə pu lə nuŋ ŋkwi cʉ̌m mama a. Bǎ ya ŋkhamsi lə́ nthiŋnyə nə tsʉ' fa' é guŋ mtyɛ'dzʉ́ awɛ bɑ fa' fà' tsyə́, bɑ nuŋpwɔ' tsyə a ka ku' nə la' nthe mhɔnwə mo a. Da' gɑ́ kwa' yʉ́ le shwə́ tə nuŋpwɔ' ŋkwi cʉ̌m mama nə mhɔnwə, shwə nə ghə́ŋ tʉɔ Si mama. E bɑwə byap cwəlɔ gɑ mghɛ bò pyə́ cʉ' tsʉ' tʉ́ mkwə myə́. E lě shyə m̀ nə ŋkwi' nuŋpwɔ', dɔnyə pɔ pyə e dɔnyə wap a mama. A ywə yə ba Zhwenyə Dɔlɔ̌ da'tə yə́ bi pɑ a. Nə pa' e lə pɑ̌ tə gɔm gɑ: Yɔ kɔ tsyə gɑ̀ gɔ sɔ' nə tamtə́ nə pu tyɛ' o bɔ a tsǒ, Cyəpɔ ghɔm gɑ: Gɑ̌ gɔ nə hɑ mco' mə̌ və pɑ nthʉ́m mtʉ́m map ba nthʉ́m mkwɛnyə̀ map. Ǎ dɑ la' biŋ ŋkhamtə mhɔnwə map ba mnwə cwəpuŋ map pɑ́. A nəŋ bɑ po'o, tsʉ' yə nə lɑ mhɔ shwyɛ' mo nə a, nə piŋ nuŋpwɔ' nə mhɔ tə bɑwə pɑ. A po'o mfɑmfɑ́ tə́ a bɑ pɑ́ cəŋtə gə nə ko cwyəp shyə m nə mcyə́ Yeso. A bɑ məjyə sə́, məjyə nthʉɔ yə Yeso nthú bi pɑ nə dzə nə sam tsʉ' Dyə Si, yəŋ la'tə gɑ́ nə bapnɑ e a. Pɑ̌ biŋ bɑ́ bɑ̀ pɑ̌ ghə mɑ ŋkhamsi gwyə bɑ pu yap e nə dyə Si. Pɑ lɑ tʉm dəŋdəŋ gɔ bəŋ é, m nthʉ̌m piŋnthʉm tə bya, ba tʉm tsyə a bɑ ǎ lɔ nə guŋ mhɔ tʉm awɛ, ba nɑ yə pu lɑ shyə́ dɔlɔ̌ sɔk a. Ká pɑ pwá, pɑ pɑ́ biŋ mɔktə yɔk pɑ nə gɔ pɑ m dzə̀, nə pa' mo yə e hɑ mka'nyə bi pɑ a bɑ́ nyənyɔ. Pɑ kɑ́ ti cəcɑ̌ pɑ nə nə pɑ nthənyə wɔk wɔk pɑ nə ŋkhùŋnyə bɑ nə mfa' pɑpúŋ. Ka pɑ pɑ̀ ŋkhʉ́ mcu'tə mɔk pɑ̀ pa' shɑ pɔ gə ma nə pɑ ŋkhʉ́ a. Pɑ pɑ́ ŋkhak pɑ tʉɔ nə pa' pǒ wə́ jɔ pa' tyɛ'dzʉ́ wə sɔ' a. Nə pa' pɑ hɔnwə bɑ jyə́, nə cwə yə a bɑ pɑ̌ tsə zhyə nwə nyənyɔ a, bɑ sɔm pwɔ' nuŋnuŋ nə mhɔnwə tə yɑ̌wə pɑ́. Da' nə pyap fyɛ' cwəpùŋ pu mɑ mɔk yə a gɔ sɔ' khə mtʉɔthə́ a. Mo yə ě bvʉ̀ mco' Mosɛ a, pu jwə é tə cɔmmtso, nə cwə yə pɔ pɑpʉə kɑ pɑtá lɑ pɑ́ pɑ kwinthɛ́ nə a. Tə́ mcʉ̌m sʉ'ʉ nə dəŋ go' yə pu gɔ hɑ bi mo yə́ ě nəŋtə Mu Si, jəmtə́ mcyə kɔ myə e lə cyə m nə́ tə́ dɔ, biŋ jəmtə Zhwenyə gho'? Nə pa' a bɑ pɑ̌ zhyə mo yə e gɔm gɑ: Nə pa' bo bɑ bəm myə nə gap mcwɔ'fà'. Biŋ ŋkwi gɔm gɑ: Cyəpɔ gɔ sɔ' fyɛ' pɔ pyə́. A bɑ kwa' mɑ bɔkbɔk nwə nə vʉ nə bu Si nthʉɔtʉɔ. Da' gɑ́ po kamtə́ pa' po lə nə jitə a. Nə pa' po lə wuŋ nə kwi ŋkha' guŋ ŋkho pɑ nə shù yə po lə lǒ' nthʉ́m go' a. Pu pɑ jəmtə wɔ, bɑ shwɔ' mkwə mɔ cwəpùŋ sɔsɔ̌ dəm sim nə mu' ghəŋ biŋ bɑ nə yə́ mu' ghə̌ŋ bɑ pǒ tamtə̀ nə pɔ pyə wap lə jɔ yəŋ nthi go'o a. Po lě biŋ gə yɔ tsʉ' nə ghəghʉɔ mghɛ cɛ́, da' gɑ́ biŋ dɑ ŋwɛ́nyə biŋ gɑ pu lɑ tsə tsɔ, nə pa' po lə bɑwə jyə́ gɑ pǒ ghə mu' fʉ' pɑpuŋ yə a shwə mama a. Ka po pi yɔ nə nə cəŋtə biŋ, a gɔ sɔ' ghə kwa' mcwɔ'fa'. A bɑwə shəŋ gʉ' kaktʉɔ bi po tə po nə gə ywə yə Si shəŋ a, biŋ ŋkwi ywə yə e ŋkhá' bi po a. Nə pa' a cu' kwa' muywə, muywə́ cwə, a mo yə e gɔ sɔ' a sɔ'. E tə gɔ pìŋ cwə pɑ́. Mo a yə dəŋdəŋ gɔ sɔ' vɔk pɑ nə piŋnthʉm, da' gɑ e wa' piŋnthʉm e bɑ tʉm tsɑ̌ tə gɔ piŋ ŋwɛ́nyə nə e pɑ́. Pɑ tə́ bɑ pɔ pyə wap gɔ wa' piŋnthʉm yap sɔ' pi a pɑ́. Pɑ bɑ pɔ pyə a bɑ wap ghə piŋnthʉm nə nə bvɔk mtʉm mɔk pɑ a. Piŋnthʉm bɑ mu' nthi nə ghə mo wim ywə yə o jɑwə mɔktə a, bɑ məjyə nə jyə́ tsə tsyə mo tə́ jɔ a pɑ́. A lə shyə pɑ m̀ nə́ tə pɑ dzə ghə kwǐnthɛ pɑpúŋ. Pɑ̌ shyə́ m̀ nə piŋnthʉm jyə́ gɑ ghɔm Si nə le nyaptə guŋ dzʉ̌ awɛ, a pɑ po'o ywə yə pu jɔ́ a lə pɑ bɑ pu lə́ dɑ pɑ ciŋnyə yɑ nyaptə pɑ́. A lě shyə m nə piŋnthʉm, Abɛ nuŋpwɔ' pɑpuŋ bi Si shyə Kaen. A lě shyə pɑ m nə piŋnthʉm e, e pɑ mo dəŋdəŋ, Si piŋ yə ywə hɑhɑ̌. A shyə m nə tə́ ba tə́ pa' a bɑ ě pfʉ́ a, e yɑwə gɔm pɑ nwə. A lě shyə m̀ nə piŋnthʉm, la' Enɔk cyə nə vʉ̌, la' pu nəŋ biŋ jɔ e, nə pa' Si lə bɑ ě té é; Si le nə té é, bɑ ŋkwinthɛ̌ gɑ yʉ Si kùŋ e. A nəŋ nə pɑ̌ po'o bi a ka piŋnthʉm a, bɑ bi a pɑ́ mo lə púŋ Si, nə pa' mo yə e fʉ'tə nɑ e gɔ bəŋ Si a gɔ ləŋdzə pìŋ gɑ Si bɑwə, biŋ bɑ shwɔ'fà' pɔ pyə wap shəŋ é a. A lě shyə m̀ nə piŋnthʉm, Noe yu' nthɔk Si nə ywə yə pu látə́ guŋ bɑwə jɔ a pɑ́. Noe cəŋtə ju' ywə yə sǐ lə ghɔm bi e a, ŋkhəm pɛ nə́ lə bvɔk tuŋdyə́ e. A pɑ́ po'o e nyəŋ shɛ thə́ dzʉ̌, shʉ' dzʉ́ mcʉ̌' dəŋdəŋ yə a shyə m̀ nə́ piŋnthʉm tə́ bɑ bi mo a. A lě shyə m̀ nə piŋnthʉm, Abraham piŋ pa' Si ŋkhe e a, ju'nyə, gɔ m̀ nə guŋ yə Si lə bɑ́ gɔ sɔ' hɑ bi e a. E lə gɔ pɑ tə zhyə tsʉ' yə e lə gɔ m nə a. A lě shyə m̀ nə́ piŋnthʉm, e ghɔ shwə nthʉm guŋ yə e lə bɑ nə bɑ gʉɔ a, guŋ yə Si lə ka' bi a; shwə nthʉm nthap pu a Isak ba Yakop pɔ pyə mka'nyə lə́ bɑ́ map pu a pu á. Nə pa' wap lə bɑwə byap tisuŋ yə cyə é bɑ ǎ tʉɔ a, yə gɛ və̀ yə e ŋkwɑ tisuŋ bɔ a bɑ pɑ kwa Si a. A lě shyə m̀ nə piŋnthʉm, ba Sara yə́, ba tə pa' e lé bɑ bvo mjwǐ a, e ku'nyə nə ghə gwya e, nə pa' a lə bɑ ě piŋ gɑ mo yə e hɑ́ mka'nyə a bɑ nyənyɔ. A po'o tə a lě shyə m̀ nə́ ta' mbɛ, mo yə e lə bɑ ě wuŋ shʉ' pɑ nə pfʉ́ a, pú e tsə du vəŋ pɔ pa' msɛ kɛbəŋ a kə pa' bvɛ̌ kə́ŋ shyə lɑpʉə a lə. Wap lě pfʉ́ nthʉm piŋnthʉm tə mka'nyə bɔ bəmtə́, da' gɑ́ bɑ wap tiŋnyə gʉɔ sʉəsʉə jɔ má, biŋ jyə́ gɑ wap lə́ bɑ mghʉɔ, bɑ pɑ mkazhùŋ dəmcǎ'. Pɔ pyə wap gɔm po'o a bɑwə shəŋtə da'tə gɑ wap bɑwə shəŋ mu' gùŋ; bi a wap lə́ pe' shyə m̀ nə zhwenyə di'pi yə wap lə tə̌m nə a bɑ wap lě da' bɑnyə nthʉm o. Nə pa' wap biŋ bɑwə shəŋ pɑ mu' gúŋ pɑpúŋ, guŋ m̀ kɛbəŋ. A po'o tə pɑ́ Si lə kuso gɑ pu ké e gɑ Si yap, nə pa' a bɑ ě nyaptə ta' tisuŋ bi pú. A lě shyə m̀ nə piŋnthʉm, Abraham hɑ́ Isak pa' Si lə ləŋtə e a. E lə nə hɑ̌ ŋkwi mú po'o, bɑ e lě ŋkwi mka'nyə̀, Si ghɔm bi e gɑ: A gɔ sɔ' cyə pɑ m̀ nə́ Isak tə o ghə ŋkhənyə̀. E lə bɑwə gɔm gɑ: a pɑ pɑ́ pfə́ mo, bɑ Si ku'nyə nə yam e nə vʉ̌. A lə shyə m po'o tə Si piŋ ba' mú e bi e pa' ta' fo' nwə a. A lə piŋ shyə m̀ nə piŋnthʉm, Isak nyəŋ byanyə nə Yakop ba nə Esau po'o nə nwə yə a gɔ tə́m jʉ́m a. A lě shyə m̀ nə piŋnthʉm, Yakop ku' nə pfʉ, nyəŋ byanyə nə pǒ Yosɛp, biŋ dɑ pəŋ e bʉ' nɑ e ŋwo'nyə gamtə́ Si. A lě shyə m̀ nə piŋnthʉm, Yosɛp ku' nə pfʉ, gɔm pa' pǒ pɑ Israɛl gɔ sɔ' nə tə́m Egipto a, jap pa' pu gɔ sɔ' nə ghə nə mkwe myə́ a. A lě shyə m̀ nə piŋnthʉm, pu tsə Mosɛ, biŋ dwɔ' e nə mŋwə́ tá, nə pa' pɑ tsə e lə bɑ wap yɔ dəŋ pa' mú yap nə búŋ a, wap lə piŋ bwɔk mco' myə fo lə yap a. A lě shyə m̀ nə piŋnthʉm, Mosɛ cwə tə ŋkwyə, ŋkhəŋnyə gɑ pu kɑ́ ke e gɑ mú gò Faraon. E lə cwɔ̌' nə yɔgǒ' pu a pɔ Si, shyə nə cwɔ' ŋwɛnyə nthʉm mhɔnwə nə mu cwə dzʉ̌. E lə yɔ̌ gɑ́ nə yɔgǒ' Kristo bɑ fʉ' bɑ ǎ cyə̀ guŋ mfʉ' myə ǎ Egipto a awɛ, nə pa' mnyə myə́ lə bɑwə jó pɑ mcwɔ'fa' myə a dzə a. A lě shyə m nə piŋnthʉm, e təm Egipto tə pwɔk yɛlúŋ fo, biŋ shyə m pa' e bɑ́ mo bɑ jɔ mo yə pu tə jɔ e a pɑ, e tɔm pɑpúŋ. A lě shyə m nə piŋnthʉm, e tsʉ Paska, biŋ shi' mcyə, po'o gɑ Bɔp tsʉ' kɑ kwak mthəsə po pɑ Israɛl. A lɑ cyə̌ m̀ nə piŋnthʉm, wap sa' Pɛ shyə lɑpʉə m pa' dəmca' jəmtə yəmtə́ a, a piŋ bɑ po'o pɑ Egipto pyə wap lə fo'tə yap a núŋtə nthʉm o. A lě shyə m̀ nə piŋnthʉm, msak pe Yeriko vʉtə si nə cwə yə pu lə tsam e nə mtyɛ'dzʉ́ sɔmbʉə a. A lě shyə m̀ nə piŋnthʉm, Rahab, yə e lə bɑ cʉ'ma' a, e lə pfʉ́ pu a pɑ tʉɔthə́ nə pa' e lə lɑ̌ hwitə dɑ pɑ sitə̀ jɔ́ tsʉ'. Gɑ̌ gɔ kwi' ghɔm gɑ kɑ? Cwə tə̌ wə pɑ́ nə nə siŋ wɔ nwə̀ nə Gedeon, nə Barak, nə Samsom, nə Yɛftə, nə David, nə Samuɛl ba pyə shɑ pɑ ghɔm ghɔm Si pɑ. Wap lě shyə m̀ nə piŋnthʉm do' mnəfo dɑ mguŋ map, gə nwə dəŋdəŋ pɑwə, jɔ pa' mka'nyə Si bəmtə a, shəŋ mnɔm tə ma' nə shwə̀ map. Wap lě shyə m̀ nə piŋnthʉm bi mɔk nthʉɔtʉɔ, bvɔk nə mcɔ̌k mnyə̌dwɔp, jɛ nə mgho biŋ gə gʉ', biŋ nthegʉ' nə shù, jəŋ msəŋwi mghʉɔ. Pɑjwǐ lě shyə m nə piŋnthʉm jɔ pɔ pap pyə wap lə pfʉ̌ a nə yam nə vʉ̌. Da' gɑ shɑ pɔ lě jɔgo', pú fəŋtə mzhəŋ nɑ map shwɔ'tə, wap pfʉtə, ŋkhəŋnyə gɑ pu kɑ kyɛ' wap, po'o gɑ wap sɔ' gə kwa' nə yam nə vʉ̌ yə a puŋ a. Pyə shɑ pɔ lě jɔgo': pu yəmtə wap, dɑ mshɔm shwɔ wap, ŋkwɑ wap, nyəŋ wap cɛ. Pu lə lɑ̌ mwɔ' nthamtə wap, dɑ sɔ́ nə sɔtə wap, wap pfʉ vʉ mnyədwɔp; wap lə bvɔk vɔk pɑ tɑ ghə mla', bɑ ŋkwa gwɔp dzə kɑ mnəŋ dzə lə nə pu, ywə yáp lə pɑwə, pu pɑ hyanyə wap, dɑ wap jɔgo'. Pɔ bɔ lə bɑ dzʉ̌ ka ku'nyə nə pu; wap lə bɑ ŋkha mghakgo pu a mkǔŋgó, bɑ bvɔk nthʉm mtuŋ mwo' pu a m̀ nthʉ̌m ghʉm. Da' gɑ gùŋ yap awɛ pɑ bɑ wap lě gə kwinthɛ pɑpúŋ nə piŋnthʉm yap, bɑ guŋ yap awɛ lě tə yɔ nə pəmtə mka'nyə. Nə pa' cwə yə Si lə bɑ ě pap kwa' ywə pɑpuŋ bi pɑ a, a lə bɑ bi a pɑ wap lə yɔ pa' a bəmtə a tə pa pú bəmtə bɑ pɑ́. Po'o lə, ba wɔk pɑ pyə a bɑ pɑ̌ ghə kwa' du vəŋ mkwinthɛ giŋnyə̌ pɑ pa' pɑ gɔm a, pɑ wa' guŋ pi' ba guŋ mhɔ awɛ myə a bɑ a tsam wɔk pɑ a, biŋ ŋkhaktʉɔ nə khʉdʉ̌ yə pu hɑ gɑ pɑ ŋkhʉ a tə pwa. Pɑ nə khʉdʉ bɑ nthʉ mnyə mɔk pɑ nə Yeso Kristo, mo yə e hɑ piŋnthʉm biŋ gə a pəmtə a. Yʉ́ Yeso yə e lə kəŋnyə ŋwɛnyə yə a lə bɑ yə a, jɔgo' bɛnyəpɛnyə, tə kuso, biŋ shwə nə ghəŋ tʉɔ leŋfo Si a. Əŋ, po kamtə mo yə e lə yɔ yəŋ nthi gǒ' nə thə mghɛ mhɔ a, tə a ghə po kɑ pwa. Pǒ bɑ po ka wuŋ sɔk nthʉm go' tə ŋkhəm nə mcyə nə nə lo'shù nə mhɔ, biŋ bɑ bɑ̀ pǒ tʉɔnyə nthɔk myə pu hɑ bi po pa' bi pǒ a gɑ: Mu a, pɔm tə wak bya Yə Cyəpɔ nthe nə o a. Kə pwa nə cwə yə E shɔktə o a. Nə pa' Cyəpɔ shɔktə Mo yə e ŋkhúŋ e a. E shwɔ mu yə e sɔ' bi e a. Pǒ jɔgo' pa' a a pɑ́ pɑ nə da'tə wɔ jyə pɑpuŋ. Si gə nə po pa' nə po pyə a. A bɑ ya mu yə tap e tə shɔktə e a pɑ? Mo pɑ tə cɔktə wɔ pa' bǎ ya mu a, bɑ pǒ bɑ pó ghɔ́, po lə pɑ pó mò. Pɑ bɑ pɑ̌ ghə mta pɔk pɑ dəmca', wap pɑ́ nthɔk wɔk pɑ, a pɑ buŋ wɔk pɑ. Tə mcʉ̌m sʉ' nə pa' pɑ gɔ fi'nɑ hɑ si bi Ta mzhwenyə tə e hɑ vɔk bi pɑ? Wap nthebya nə pɑ pɑ́ nə mú kam cwə dzʉ̌; tə sɔ' m nə Ta bɔ, e pɑ nthɔk wɔk pɑ bɑ nə ŋkhuŋ pɑ wɔk pɑ po'o gɑ e hɑ dɔlɔ́ e bi pɑ. Pu tə bɑ shɔk mo cwə o bɔ o ŋwɛnyə pɑ. O ŋiŋtə pɑ sə o. Da' gɑ a sɔ' jʉm, pɔ pyə a lě siŋ wap a, a yam nthɔm ŋwɛnyə, nthɔm dəŋdəŋ nə pú. Po ghə bǔ myə a pwa a ba mkwə myə ǎ wə səŋsəŋ a a tiŋnyə dəŋdəŋ. Po piŋ gə məjyə dəŋdəŋ nə mkwə mɔ po'o gɑ ŋkho'tə̀ kɑ vʉsi, e yɛ̌. Po cəŋ gɑ́ hwitə pɑ́ cəcɑ̌ po pu a guŋ pɔ awɛ, biŋ shəŋ ba nə pɑ dɔlɔ̌ yə mo pɑ tə ghə yá bɑ pɑ e lə yɔ Cyəpɔ a. Po pɔmtə gɑ sɔmmo kɑ tə̌m nə gho' Si, bɔmtə gɑ sɔm gɛ́ dzəzə kɑ sa' nthʉm cu'tə, dɑ paknyə sɔ̌' biŋ gə gɑ cu'tə yɔ pǐ tə dǎm. Po pɔmtə gɑ sɔm gəgəm kɑ bɔptə mco' lə kɑ pɑ cəcɑ̌ po pa' Esau yə e lə cyə m nə ta' kɛ̌ ywətsʉ fiŋ nwə shyədzə a. Nə pa' po zhyə gɑ e lə tǐ biŋ bɑ shəŋ nə tsʉ mcʉ̌' byanyə, pu te e nə, tə e piŋ dɔ̌ bǎ gɑ kɑ lə, sɔm nə kwyəpnyə̀ lə pɑwə. Po lě tə ghɔ bəŋ ywə yə pɑ mo kwak pǔ nə a, mɔk gəm ghəm, tsʉ' sosǒ, jʉ̌m, fəfa, gi nthɛ nthuŋtǔŋ ba gi mo. Pɔ pyə wap lə yǔ' tsə bɔ a lě ŋkhəŋnyə nə yu' ghɔm. Nə pa' a lə bɑ wap ka ku'nyə nə tɔm mco' gɑ: Mo yə ě kwak kuŋgo a kə nɔm lə yə e kwak kuŋg a, bɑ pu gɔ lɑ mwɔ' tamtə é. Nə nəŋ jɔ ywə bɔ lə bɑwə gə mo pwɔk tə Mosɛ ghɔm gɑ: Gɑ wə shwɔ̌' biŋ sə́ŋ. Da' gɑ kwa' wɔ bɑ pǒ sɔ bəŋ kúŋ Sion ba m bə̌ŋ tisuŋ Si nthʉɔtʉɔ, yə Yerusalɛm kɛbəŋ, ba mbə̌ŋ pɑ aŋgəle sha'shǔ' bɑ wap cu'tə bɑwə ŋwɛnyə. Pǒ bɑ po sɔ' bəŋ cu'tə mthəsə po pyə a bɑ pu və mtso map thə̀ kɛbəŋ a, bəŋ Si gɛ sa' guŋ dzʉ́ awɛ, ba m bəŋ mzhwenyə pɔ dəŋdəŋ pyə a bɑ wap lɔ a. Pǒ bɑ po sɔ' bəŋ Yeso, giŋjyə̀ kɔ sə́ ba m bə̌ŋ mcyə nə shi' myə a bɑwə gɔm nwə tə shyə myə Abɛ a. Po pɔmtə nə cyətə yu' mo yə ě wə gɔmnwə bi po a! Nə pa' a pɑ gɑ́ pɔ pyə wap lě ŋkhəŋnyə nə yu' nthɔ̌k mo yə e lə bɑwə gɔmnwə bi pu dəmca' a lě tə vɔk shɔ̀m, bɑ ba wɔk pɑ yɔk pɑ, bɑ pɑ tə gɔ sɔ' vɔk nə pɑ́, a pɑ yə pɑ ka yu' mo yə e gɔmnwə bi pɑ kɛbəŋ a. Yʉ́ yə gi e lə ghə cǎ' cʉ'nyə a wə cwəlɔ bɑwə shyanyə gɑ: nə mu' jʉɔjʉm cʉ̌m gɑ gɔ ghə cǎ' ba kɛbəŋ cu'nyə. Nə ghɔm gɑ jʉɔjʉm cʉ̌m po'o bɑ da'tə gɑ guŋ tsə awɛ tsyə a bɑ a ka cwə ŋkwi tsʉ' nə tsə tsyə Si lə nyaptə a gɔ sɔ' mi, a ywə nə yɑwə bɑ pɑ ywə yə pɑ́ a lə ŋaknyə a. Pa' pɑ ŋkwi nəfo tsyə pɑ a lə ŋaknyə a, pɑ tɔm gho' bɔ pɑpuŋ. Pɑ cyə m̀ nə́ fa' bi Si kwa' nə nthi pa' a gɔ puŋ e a, nə fa' bɑ ju'nyə e biŋ bɑ bwɔk e. Nə pa' Si yɔk pɑ bɑ mɔk yə a nkhə guŋ ywə awɛ a. Kuŋnyə mfɑmfɑ pɑ bɑ́ cəcɑ̌ po. Ka po tʉɔnyə nə lɑ mghʉɔ, nə pa' a lě shyə m̀ nə nə lɑ mghʉɔ, shɑ pɔ nyəŋ pɑ aŋgəle dyə. Po pɑ ŋkhamtə pɔ pyə wap m̀ dyə cɛ a, pa' cwə yə po a pú nə bɑ mghɛ cɛ a; bɑ ŋkhamtə pɔ pyə pu wə dɑ wap jɔgo' a, nə pa' ba wɔ yɔ bɑ pǒ ghə nɑ pa' wap a. Lɔmdyə pɑ ywə mku' bi guŋ pɔ awɛ ba kǒdyə lɔmdyə pɑ tə mviŋ nə pa' Si gɔ sɔ' fyɛ' pɑ ghə ghap pu a pɑ kathə́. A nə kùŋ ŋkhǎp nə́ kɑ pɑ shya ghiŋ tsɔ; po pɑ ŋwɛnyə nə ywə yə pǒ ghə a, nə pa' kwa' Cyəpɔ gɔm gɑ: Gɛ̌ ŋ tə gɔ tak o nəŋ pɑ: ŋ də wa' o. Tə bi a pɑ cəŋtə gɔm nə guŋ ywə awɛ gɑ: Cyəpɔ bɑ gɛ kwitə a, ŋ tə́ gɔ pwɔk sɔmywə pɑ Pɑ́ mo ghə kɑ nə myə? Po pɑ ŋkhamtə pɑ cya wɔ pyə wap lə siŋ ghɔm Si bi po a; po yɔ pa' vɔk yap lə nə miŋ a, biŋ bɑ fo' piŋnthʉm yap. Yeso Kristo tə ŋkwyəpnyə pɑ. E bɑ pɑ yʉ yə e lə bɑ a, yə e bɑ cwəlɔ a, biŋ bɑ gɔ pɑ pɑ yʉ́ guŋ mcwə awɛ. Ka po tak gɑ nthinthi tsə ji'tə zhǐ'tə tsyə a fɑ m̀ dzʉ̌ a fʉtə wɔ. Nə pa' a bɑ ǎ puŋ gɑ gho' Si nə nyəŋ gʉ' nə mtʉ̌m mo shyə ywətsʉ, ywətsʉ yə a la m gə sɔm nwə pɑpuŋ bi pɔ pyə wap gə jyə nə a. Pɑ̌ bɑ pɑ̌ ghə tsʉ' nuŋpwɔ' yə bi a pɔ pyə wap fa' nthap a lə te ywətsʉ yap nə. Nə pa' bap mnɔm pyə ŋkhamsi gwyə dɑ mcyə map gɔ cwyəp nə nə sɔk mhɔ a, pu ntho ya m̀ jʉm pě. A po'o tə Yeso lě nə lɑ mcyə myə lɔnyə pɔmnəŋ, jɔgo' pɑ m jʉm pě. Pɑ təm gɔ̌, pa pú yu'tə m̀ jʉm pě, pɑ piŋ gɑ pu yəmtə wɔk pa pú. Nə pa' a tə bɑ pɑ̌ ghə gúŋ mama dəmcǎ' po'o pɑ; pɑ bɑwə shəŋ guŋ yə a gɔ lá'tə pɑ a. Pɑ cyə m nə Yeso nuŋpwɔ' mzhwɔp ghamtə̀ bi Si guŋ mcwə awɛ, yəŋ la'tə gɑ ywə hɑhɑ mshwə myə a ŋkhe tso tsyə a. Ka po tʉɔnyə nə pɑ gə nwə pɑpuŋ biŋ ŋkwitə wɔ wɔ, nə pa' a bɑ nthi pwɔ' tsyə a buŋ Si a. Po pɑ ju'nyə bi pɑ cya wɔ, biŋ bɑ gə ywə yə wap yap a; nə pa' wap byap mtʉm mɔ, bɑ gɔ sɔ' ghɔmnwə nə bi Si. A po'o tə a pɑ́ shəŋ gɑ po ghə wap lɑ ŋwɛnyə̀ fǎ', nə pa' wap lɑ yɛlúŋ fá' bɑ a tə gɔ kwitə wɔ pɑ́. Po cwyɛ'nyə Si nə pyə nə pa' pyə̌ zhyə gɑ́ pyə ghə kwa' tʉm dɔlɔ̌, biŋ bɑwə ŋkhaktʉɔ nə ghiŋ pɑpuŋ nə guŋ ywə awɛ. Gɑ̌ wə shəŋtə́ do bi po gɑ́ po ghə po'o tə pu pa' a bi po. A Si hwitə̀ yə e lə cyə m̀ nə mcyə́ kɔ mama jam byap dzə́ gwyə nə vʉ̌, Cyəpɔ yɔk pɑ Yeso a, Si bɔ ghə́ po ku'nyə nə ghə ywə yə ǎ puŋ nə nə́ fa' pa' e shəŋ a. E ghə ywə yə ǎ púŋ bi e a nə pɑ shyə m̀ nə Yeso Kristo yə ghu'tə bɑ bi nə mgu' nə gu' a. Amɛn. Mfɑ̌mfɑ́, po piŋ mghɔm mɔ̌! A bɑ gɑ̌ cya pɑ pǒ mkam ghɔm bi po. Po zhyə gɑ́ pu kě nthak fɑ yɔk pɑ Timotio nəŋ. E lo'nyə̀ sɔ̌' bɑ pyə e gɔ sɔ' yɔ wɔ. Po ca'tə guŋ pɑ cya wɔ awɛ ba pɔ dɔlɔ̌. Pɔ pyə wap Italia a ca'tə wɔ. Gho' pɑ bi guŋ yɔ awɛ. Amɛn! Myə Yakop, gɛfa' Si pu Cyəpɔ Yeso Kristo bi mtuŋdyə́ shwɔppʉə mgham myə a bɑ a lě sa dzʉdzʉ̌ a: Gɑ̌ ca'tə. Mfɑ̌mfɑ́, po lə kwa' tʉm pɑpuŋ tə́ nə ŋkwi guŋ go' awɛ yə pǒ wə shyə́ m̀ nə a. Po zhyə́ gɑ́ mləŋtə myə ǎ wə sɔ' nə piŋnthʉm yɔ a gɔ hɑ nə kyəptʉ̌m bi po. Da' gɑ nə kyəptʉ̌m bɔ ghə po pɑ́ pɔ dɔlɔ̌, pɔ bɑ wap pə̀mtə, pɔ tə bya. A pɑ gɑ́ fʉ̌ yak bi mo nə po, e lo bi Si yə e hɑ bi mo pɑ́ pɔpɔ, hɑ tə cɔk a. Si gɔ hɑ bi e. Da' gɑ e lɑ piŋnthʉm dó, dó tə zhʉ'nyə̀; nə pa' mo yə e jʉ'nyə́ a hwə pa' shyə lɑpʉə yə fəfa ŋkwa mɛnyə a. Mo bɔ kɑ kwɛ gɑ́ pɑ Cyəpɔ hɑ sɔmywə bi mo yə tʉ́m tsyə bɑ ǎ ghaptə̀, la' a pɑ shwə ŋkwi tsʉ' nə ghìŋ tsyə́ a. A fɑ́ yə e bɑ bə́ŋ a ŋwɛnyə́ pa' pu pʉ' é a. Yə mo yə́ e gɛ ywə á ŋwɛnyə pa' pu fi' e hɑ si, nə pa' e gɔ sɔ' cyə pa' tutuŋ mghe a. Nə pa' nǎm sa', nthyə́, gə mghě yə́m, mtutuŋ myə vʉ yə nə ləŋnyə mǐ. A dəŋdəŋ po'o tə́ gɛ ywə gɔ sɔ' ponyə nə mfa' myə́ awɛ. Bùŋtsě bɑ mo yə ě sɔ̀k nə mləŋtə a, nə pa' mləŋtə gɔ cwə́ tə́ mi, e kwi co' fo vɔk yə Si bɑ ě ka'nyə bi pɔ pyə́ wap ŋkhuŋ e a. Mləŋtə ko nə mo e kɑ́ ghɔm gɑ: Mləŋtə mə̌ fɑ bi Si. Nə pa' pɑ́ Si lə sɛ́ nə́ ghə nwə cwəpuŋ, e lə nəŋ bɑ dəŋtə́ mo. Mləŋtə nə sɔ' bǎ nə wɑ̌lə́ fɑ pɑ nə ghi'nyə yə a fəŋtə e, fʉtə́ e a. Mləŋtə bɑ tsʉ̀m dzə́ mhɔnwə̀, mhɔnwə̀ kwyə, ji vʉ́. Mfɑ pɑ̌ pyə gɑ̌ ŋkhuŋ wɔ te' a, ka po fʉtə nɑ tsɔ: Guŋ ywə pɑpuŋ yə a sɔ' bi mo a, guŋ mcwɔ'fa' pɑpuŋ fɑ m̀ thə́ kɛbə̀ŋ, bi Si, Tá ŋkha' yə e tə́ fɛnyə pɑ́, e lə pɑ gnaknyə, nə kwyəpnyə lə nəŋ bɑ nə e a. E lə̌ shyə m nə yə nə́ kuŋ, nə ghɔm nyənyɔ, dzə́ wɔk pɑ̀, po'o gɑ pɑ pɑ́ mlə́ŋdzə̀ nə ywə yə e lə nyaptə a. Wɔ mfɑ́ pɑ̌ pyə́ gɑ̌ ŋkhuŋ wɔ te' a, pǒ bɑ pɑ zhyə́. Da' gɑ́ ka mo lo'nyə ju'nwə̀, e kɑ lo'nyə gɔmnwə, e kɑ lo'nyə jɛlúŋ. Nə pa' yɛ̌lúŋ monəŋthə́ tɑ́ gə nwə dəŋdəŋ yə a bɑ̀ yə́ Si a pɑ̀. Po'o lə́ po te mviŋ ba cwəpuŋ nə po; po lɑ hwitə tə ŋkwi ghɔm tsyə a bɑ pu tsə̀ nə po á, a pɑ́ bɑ ǎ ku' nə vɔk vɔ̀k yɔ a. Po pɑ̀ pɔ pyə wap fa' pa' ghɔ̌m gɔm a, po kɑ́ pɑ̀ da' pɔ pyə wap ju' da' nə yu', bɑ fʉtə nɑ tsap a. Nə pa' mo yu' ghɔ̀m, bɑ tə ghə pa' a gɔm a bɑ e hwənyə mo yə e de sə é pa' e nə bɑ a nə kyɛ' a. E jɔ sə́ e, da' gɑ́ shwə tə gɔ̌, guŋ dʉɔnyə pa' e bɑwə shʉ́ a. Da' gɑ mo yə ě yu' kwa' mco' pɑpuŋ, mco' myə a tə dɑ mo gə ŋkwɔ a pɑ́, ju' gìŋ nə, e lə ghə m̀ pa' mo yə e nə yu' e lə pɑwə ju' a, ju' gə pa' a gɔm a, mo bɔ gɔ sɔ' yɔ nwə pɑpuŋ nə fa' tsyə́. Mo sɛ gɑ́ e bɑ́ biŋ Si da' gɑ la' e pɑ nthɔm tʉm e nə ghɔm, bɑ e futə pɑ́ thə nɑ é, yə nə piŋ lɑ pɑ sɔmywə. Nə piŋ dɔlɔ̌, tə sɔm pap mviŋ dzə̌ Si Tá; yə bɔ nthi bɑ nə pɑ dé pó mcyə́ pu a m mpfɔ̌k nthʉm ghəghʉɔ; bɑ bɔmtə́ nɑ e nə dzʉ̌ gɑ́ a kɑ viŋ é. Mfɑ pɑ, ka po ŋi'nyə ŋkhyɛ'nyə̀ nə piŋnthʉm yɔ nə Cyəpɔ gu'ghǔ' yɔk pɑ Yeso Kristo. Nə pa' mo ko dyə́ cu'tə po bɑ ě sù mkwɛ́ tʉɔ gɔl, ŋkwa dzə dəŋnyələŋnyə, mu' mo piŋ ŋkho yə bɑ bəŋ, bɑ e kwa mcakmcàk dzə; po yɔ pɑ mo yə e ŋkwa dzə pɑpuŋ a gɔm bi e gɑ: Wə, cwə nə tsʉ' pɑpuŋ yə̌ŋ, biŋ gɔm bi bə̌ŋ gɑ: Wə tiŋnyə thə́, kə m gɑ: Cwə si tsi' i to kwɔ' a, bɑ po ka ghə ŋkhyɛ'nyə nə po a? Bɑ po ka cʉ' pɑ ya'shɛ́ pyə a bɑ wap ghə zhwényə pɑ zhwə́ pɔ a pɑ a? Wɔ mfɑ pɑ̌ pyə gɑ̌ ŋkhùŋ wɔ te' a, po yu'! Tə́ Si nə shwɔ' pɔ pyə wap bɑ̀ m pə́ŋ nə mnyə́ dzʉ́ a, dɑ wap gə mghɛ fʉ' nə piŋnthʉ́m, wap sɔ' dzʉ́ mcʉ' Nəfo yə a bɑ e lě ŋkha'nyə bi pɔ pyə wap ŋkhúŋ e a pɑ a? Pǒ bɑ pǒ té dəŋ nə bə̌ŋ. Tə́ mghɛ fʉ' nə dɑ wɔ jɔgo' a? Tə wap nə dɑ wɔ gɔ dyə fyɛ' a? Tə wap nə jəmtə tso pɑpuŋ tsyə pu ŋkhe nə po a pɑ a? Əŋ, po pɑ giŋ nə fo mco' myə á bɑ pu və gɑ: O gɔ pɑ kuŋ mo yə e bəŋ o a pa' o ŋkhúŋ thə nɑ o a, bɑ pǒ gə kwa' pɑpúŋ. Da' gɑ́ po pɑ mghɛ ŋkhyɛ'nyə bɑ pǒ hɔ, bɑ pɑ hɔ mco'. Nə pa' o ghiŋ nə mco' awɛ tə bɔptə bɑ da' mu cwɔ̀' nə́, bɑ a bɑ ǒ hɔ guŋ mco' awɛ. Nə pa' mo yə e lə ghɔm gɑ kɑ ghə ghap a, lə pǐŋ gɔm ba m gɑ kɑ zhwə mo. Bi a o pɑ tə ghə ghap tə jwə mo bɑ á bɑ ǒ hɔ mco'. Po ghɔm biŋ gə pɑ pa' pɔ pyə mco' myə a tə dɑ mo gə ŋkwɔ a pɑ́ nə gɔ sɔ' sa' wap a. Nə pa' fyɛ' tə́ shɔmmtso mo yə e tə́ shɔmmtso a pɑ. Da' gɑ cɔ̌mmtso tə ŋkhuŋ fyɛ' pɑ. Mfɑ pɑ, pɑ mo ghɔm gɑ́ ě ghə piŋnthʉm tə ghə mfa' a? Pɑ piŋnthʉm vɔk mo cwə bɔ a? A po'o bi a ta' fɑ yə mbɛ kɑ yə mjwǐ lə pɑ bɑ wap ka ghə ywə yə wap gɔ kwa á kɑ yə wap gɔ tsʉ́ nə guŋ mcwə awɛ a lə, mu' mo nə po piŋ gɔm bi pu gɑ: Po ghɔ nə hwitə̀, tsʉ' ləmnyə bi po, a cyə shwə po; gɔm po' tə hɑ sɔmywə nə bvɔk bi pu bɑ ǎ kwitə m kɑ? A dəŋdəŋ po'o tə pǐŋntʉm yə a tə bɑ ǎ ghə mfa' myə a pɑ̀ bɑ piŋnthʉm bɑ ǎ pfʉ́ tə mǐ. Da' gɑ mo gɔ sɔ' ghɔm gɑ: Ǒ ghə piŋnthʉm, ba myə̀, biŋ gə mfa'; la'tə a piŋnthʉm o tə mfa', kwa' myə cyə m̀ nə mfa' da'tə o piŋnthʉm a. O biŋ gɑ Si bɑ pɑ́ yɑmu', bɑ gə pɑpuŋ. Ba mzhwenyə cwəpuŋ biŋ yap po'o, tə bɑ sə́ŋ. Gɛ ghəghʉɔ, tə́ pɑ́ o zhyə gɑ piŋnthʉm tə bɑ sɔmywə a tə mfa' lə? Tə mfa' nə lə gə tə tá yɔk pɑ Abraham pɑ́ dəŋdəŋ a? Nə pa' e lə́ yap mú e Isak dəm tuŋmɔk tsə pwɔ. O wə jɔ gɑ́ piŋnthʉm pu a mfa' nə lə bəmtə́ fǎ', mfa' pɑ shu'nyə piŋnthʉm. A pɑ po'o ywə yə pu lə və a bəmtə́ gɑ: Abraham lə ghə piŋnthʉm nə Si, e sɛ bi e pa' nwə dəŋdəŋ a, e piŋ biŋ tso so Si. Pǒ yɔ gɑ mo bɑ dəŋdəŋ shyə pɑ m̀ nə mfa' myə́, e lə cyə́ pɑ da' nə piŋnthʉm e. Ba yə nə nə pɑ Rahab, mjwǐ kathə́ lə ŋkwi' bɑ pɑ po'o. E lə shyə pɑ nə mfa' tə bɑ́ dəŋdəŋ. Nə pa' e lə nyə́ŋ mghɛ nthəm dyə́ biŋ gə wap cyə́ m̀ nə́ mu' məjyə gɔ̌. Nə pa' dəŋdəŋ pa' nɑ́ tə zhwenyə bɑ́ bɑ́ a pfʉ́ a, a dəŋdəŋ pa' piŋnthʉm tə mfa' bɑ ǎ pfʉ́ a. Mfɑ pɑ, ka guŋ yɔ awɛ pɑ́ pɑ́ pɑ la'tə. Pǒ zhyə́ nthi cɔk yə pu gɔ sɔ' nə fyɛ' wɔk pɑ á nə nthi pa' guŋ yɔk pɑ awɛ nə nthya a. Mo pɑ tə cwɔ' kwə̀ e nə cwə yə e gɔmnwə á, bɑ e bɑ kwa' mo dɔlɔ̌, bɑ ě ku'nyə nə tɔm guŋ nɑ e awɛ. A bi a pɑ nyəŋ tʉ̌ɔ mshwə̌ mnɔmlěŋ nə gə gɑ wap yu'nyə wɔk pɑ̀, bɑ pɑ dɑ guŋ nɑ tsap awɛ gɔ nə məjyə́ yə pɑ̌ kuŋ a. Po yɔ ba mkənu', e ghu' pɑ gɑ kɑ lə́, ba fəfa yə a nthə e dəm shyə a pɑ shɔk pɑ gɑ kɑlə́, bɑ mo yə e shya kənu' bɔ a dɑ pɑ mu pak tʉ́ɔ nə shyɑ e nə məjyə yə e dɑ m̀ nə a. Ba dəŋdəŋ po'o tʉ̌m mo bɑ pɑ mu kam nə zhəŋ nɑ mo, tə bɑ ŋkha'tə nə mɑ mnwə te'. Mɔk yə a ŋkhə mɑ vǒ a tə bɑ sak pɑ. Ba tʉ̌m mo bɑ mɔk, dzʉ nwə cwəpuŋ; tʉ̌m bɑ cəcɑ́ mkam nɑ mɔk pɑ, bɑ bviŋ guŋ nɑ yɔk pɑ awɛ, ntho guŋ ywə awɛ, tə gehɛnə̀ piŋ ntho e yə a. Sɔm nthi nɔm shɔkcɔ̌k, kə sə́ŋ, kə nɔk kɑ bapgu yə mo ghə nə e kəkɔ a tə̌ wə pɑ̌. Tə sɔ' m nə tʉ̌m mo bɑ mǒ ghə nə e kəkɔ: Ghəghʉɔ tə dhə́, mcɔp zhwə mo! Pɑ dɑ pɑ tʉm yɔk pɑ go'tə Cyəpɔ Tá; biŋ bɑ dɑ pɑ yʉ́ nyə́ŋ do nə pɔmnəŋ, mu hwə Si; byanyə ba do nthəm pɑ́ nə ta' shwə yɑmu'. Mfɑ́ pɑ a tə bɑ gɔ pɑ́ po'o pɑ. Pɑ ta' tsəshyə fə shyə́ pɑpuŋ ba shyə dzəzə a? Mfɑ pɑ pɑ́ thə figə yam olivə á? Kɑ thə nthɔm nə gə mlu' yam figə? Pɑ tsə shyə gwɛ lə fə shyə pɑpuŋ. Wɑ̌ cəcɑ̌ po bɑ ě ghə fʉ́ biŋ gə zhyənwə? Mo bɔ lɑ ghiŋ tsyə́ tsyə pɑpuŋ da'tə gɑ́ fʉ̌ gə pɑ mfa' pɑpúŋ. Da' gɑ́ tʉm tsɔ pɑ bɑ ǎ lo nə khiŋ mo dzəzə ba zhwenyə twɔ'nyə po kɑ ghə pa' dzə̌ wə bɑ yɔ a; po kɑ́ nə̌ŋ dɑ mcwanwə mɔ́ baknyə nwə nyənyɔ. Yə bǎ nthi fʉ̌ tə fɑ m̀ kɛbə̀ŋ pɑ̀; a bɑ fʉ́ də̀m ca', fʉ́ nɔm, fʉ́ Sata. Nə pa' paknyə pu a mnwə cwəpùŋ nthəm jʉ̀m nə khiŋ pu a zhwenyə twɔ'nyə. Da' gɑ fʉ̌ yə a fɑ m̀ kɛbəŋ á bɑ tə mviŋ, hwitə̀, bɑ tʉm pɑpuŋ bɑ ŋkwishwə̀, bɑ cɔ̌mmtso ló nə ba nthɔm pɑpúŋ, a tə gə ŋkhyɛ'nyə pɑ, a lə nəŋ bɑ gə mfʉm. Pu dzə nthɔm nwə dəŋdəŋ nthʉ́m hwitə nə pɔ pyə wap fa' mfa' hwitə a. Mshɛ́ fɑ m hɑ́, mshǔ fɑ m hɑ́ cəcɑ̌ pǒ? Tə nə tsə́ tsyə a buŋ wɔ, bɑ do' nə kam nə mɔ a pɑ a? Pǒ gi'nyə, po lə nəŋ gə sɔmywə; pǒ bɑ pɑ zhwə pɔ̀, biŋ bɑ ŋkhíŋ pɔ, da' gɑ la' a pɑ dɑ wɔ dɑ m sɔm jyə̀. Pǒ do'shù nthinthi. Po tɑ́ bɑ pǒ ghə sɔmywə pɑ, nə pa' po tə bɑ pɑ ló ywə pɑ. Pǒ do ba ywə po lə ghə̌ ywə bɔ, nə pa' ywə yə pǒ do a bɑ yə́ pɑ́ da' ywə yə po gɔ sím nə yɔ ŋwɛnyə bapnɑ a. Mgəgə́m! Po ka zhyə́ gɑ nə kùŋ dzʉ́ bɑ nə pɔ̀ Si a? Mo yə e shə́ŋ nə pɑ so dzʉ̌ a, bɑ gɛ bò Si. Kɑ pǒ ŋkwɛ gɑ́ Ŋwa'nyə gɔm pɑ́ pɔpɔ gɑ: Si shəŋ gɑ́ zhwényə yə e gə a cwə nə po a pɑ́ da' bi e do e a? Da' gɑ e ŋkwi' pɑ mɑ gho' bi pɑ̀. A po'o tə ŋwa'nyə gɔm gɑ: Si tə ŋkhuŋ pɑ ŋa'nɑ pɑ́, da' gɑ bɑ shɔm pɔ pyə wap fi' nɑ tsap hɑ si a. Po yu'nyə bi Si; da' gɑ ŋkhəŋnyə sata, e kʉ́ wɔ gɔ gʉə sʉəsʉə. Po fu'tə nɑ tsɔ́ hɑ bəŋ Si, e fʉ'tə nɑ e hɑ bə́ŋ po. Wɔ mghɛ mhɔ, po sɔk bu mɔ́, biŋ shu' mtʉm mɔ, wɔ pyə́ pǒ bvʉ mghə́ŋ mghə̌ŋ a! Po zhyə́ ghəghʉɔ yɔ, nthʉ́ vʉ dɔ̌. Wi tsɔ́ sɑnyə shʉ' lɔ̀, ŋwɛnyə yɔ cʉ' nə cɔ̌m! Po fi' nɑ tsɔ hɑ́ si dzə̌ Cyəpɔ e ŋa' wɔ hɑ thə́. Mfɑmfɑ́ ka po pɑ gɔmnwə nə po cəcɑ̌ po. Mo yə e gɔmnwə nə fɑ é, kɑ fyɛ' fɑ e á lə, gɔmnwə pa' a nə mco', biŋ fyɛ' pa' a mco'; da' gɑ o fyɛ' mco' bɑ o gə m pa' gɛ fyɛ' a, bɑ o tə gə m pa' mo yə e giŋ nə mco' a pɑ̀. A nəŋ nə pɑ̌ po'o da' ta' mo nə pɑ gɛ yap mco', biŋ bɑ gɛ fyɛ': Bɑ mo yə pɑ́ e ghə mo vɔk kɑ gə mo pi a lə. Tə sɔ' m nə o, o bɑ wɑ́ tə bɑ fyɛ' mo yə ě bəŋ o a? Po' o, wɔ pyə pǒ gɔm gɑ tyɛ' ɔ kɑ gɑ yǒ pyə gɔ ghɔ nə yəm tisuŋ, pyə̌ gɔ cwə wə ta'gu' dzʉ̌, pyə gɔ tɛ mtɔ wə, pyə̌ gɔ tsʉ́ bʉ́m; Po ka zhyə pa' vɔk yɔ gɔ ti yo nə pɑ a. Pǒ bɑ pɑ̀ zhwyə̌ yə a nthəm ŋkwi cʉ̌m nəŋ gúŋ mi a! Yɔ̌ pa' po kɑ bɑ gɔ ghɔm gɑ: Cyəpɔ piŋ bɑ pyə ti vɔk, ghə yəŋ kɑ yə lə a, po pɑ ŋwɛnyə pɑ nə ŋa'tə nɑ tsɔ. Guŋ nthi ŋa'tə yə̌ŋ bɑ ǎ pɔk. Mo yə ě zhyə nə ghə nwə pɑpuŋ da' gɑ la' e ghə a, bɑ ě kwa mhɔ. Wɔ mzhí pɔ, po lɔ̌ tə́ thə́ nə ghəghʉɔ yə ǎ wə byap wɔ a! Tsə fʉ' tsɔ bɑ ǎ pì, mdzə mɔ bɑ mcwəcwə tsʉ́nyə́. Gɔl yɔ ba tʉɔ ŋkhap yə ǎ bi po a bɑ ǎ ghəm mkapfə́, mkapfə map pɑ gɔ sɔ' pɑ nyəŋ shɛ thə́ po, khə mnɑ́ mɔ́ pa' mɔk a. Pǒ bɑ pǒ lwɔ' ywə nə byap cwə jʉm! Ŋkhap mghɛ fa' pyə wap dɑ tsə pé po nyəŋ ŋkhiŋ a, pǒ tɔm. Wap cwè, lɔ tsap ghɔ tə ŋkho mtə́ŋ Cyəpɔ Sabaot. Po lě gə vɔk pɑpúŋ, vɔk fʉ́' dəmca'. Po lě jwyə́ tsɔ́ nə cwə nə pfyə́tə mcyə. Po lě nyəŋ shɛ thə́ mo dəŋdəŋ, jwə e: E lə fəŋnyə bǎ muywə dzə̌ po. Mfɑ̌mfɑ́, po kɑ lo'nyə tə̌ Cyəpɔ sɔ̌'. Po lɑ fo' nə́ dzʉ́'nè: E byap nthɔm pɑpuŋ myə a nthəm nə cǎ' a tə lo'nyə́ nə́ nə cwə yə e ka wuŋ ŋkhap dzə nthɔ̌m pu a jʉm nthɔm a. Ba wɔ yɔ, ka po lo'nyə̀, pɔ tɔm tʉ́m tsɔ nə pa' cwə yə Cyəpɔ gɔ sɔ' a wə gɔptə́. Mfɑ̌mfɑ ka po pɑ shwé nə wɔ́ wɔ cəcɑ̌ po, po'o bwɔk gɑ pú kɑ sɔ' fyɛ' wɔ. Po yɔ́: Gɛ fyɛ̌' tiŋnyə jyə̀dyə̌. Mfɑ̌mfɑ́, pɔ pyə pɑ mo fo' wap nə gǒ', ba nə tɔm tʉ̌m a, a bɑ mghɔm ghɔm Si pyə wap lə ghɔmnwə nə tsǒ Cyəpɔ a. Po yɔ́: Pyə̌ go'tə pɔ pyə́ wap nthɔm tʉ́m tsap nə cwə ghəghʉɔ a. Po lě ju' mcuŋ Yob nə nə́ tɔm tʉ̌m biŋ jɔ ywə yə Cyəpɔ lə bɑwə shəŋ a nə pa' tʉ̌m Cyəpɔ bɑ ǎ ghu', e piŋ gə cɔ́mmtso. Da' gɑ mfɑ pɑ, nə ləŋdzə, ka po pɑ ŋkhɔ́ mkɔ, ka po kɔ kɛ́bəŋ, kɑ sicǎ' lə, kɑ bǎ nə ya nthi lə. Yɔ ə̌ŋ pɑ ə̌ŋ, yɔ gɛ̌ pɑ gɛ̌ po'o gɑ po kɑ kǒ nə fyɛ'. Mu' mo nə po pɑ jɔgo', e cwyɛ'nyə̀ Si. E pɑwə ŋwɛnyə́, e zhwɔp mzhwɔpshyə́. Mu' mo nə po pɑwə gǒ, e ghə pu ké mghətso Cu'tə pɔ Kristo, wap lɑ mwɑ̌ jwɔ' e nə tsǒ Cyəpɔ, biŋ shwyɛ'nyə́ Si nə e. Mcwyɛ'nyə̀ piŋnthʉm gɔ yɛ gɛ gho bɔ, a Cyəpɔ pʉ' e, bi a pɑ bɑ e hɔnwə, bɑ Si gɔ nə cwyɛ' e. Po pɑ biŋ mhɔ mɔ cəcɑ̌ po, biŋ bɑ shwyɛ'nyə Si cəcɑ̌ po nə wɔ́wɔ́, po'o gɑ po yɛ̌. Gʉ̌' bɑ nə mcwyɛ'nyə mo dəŋdəŋ, a pɑ́ fa'. Elia lə bɑ mo pa' wɔk pɑ̀ a; e lə lɑ̌ kwa' gʉ' piŋnthʉm shwyɛ'nyə Si gɑ bəŋ kɑ lú, bəŋ lə lú dəmcǎ' nə gu'dzʉ́ tə́ gə mŋwə́ nthɔ̌k. E nəŋ biŋ shwyɛ'nyə Si, kɛbəŋ hɑ bə̀ŋ, cǎ' yam nthɔ̌m. Mfɑ́ pɑ, a pɑ gɑ mu' mo nə po hɔ məjyə, nə nwə nyənyɔ, pu piŋ dɑ e bɑnyə́ nə məjyə, po zhyə gɑ mo yə e dɑ mo yə e hɔ məjyə a nə bɑnyə nə məjyə dəŋdəŋ gɔ vɔk mo bɔ piŋ ghə mhɔnwə jɔmyɔ̌m mi. Myə Pɛtrɔ, gɛ nthəm Yeso Kristo bi mcǐ pɔ pyə wap shwə mtsʉ'mtsʉ' bɑ Ponto, po pyə wap Galata, ba m Kapadokia, ba m Azia, ba m Bitinya, bɑ shwə pa' mghʉɔ, bɑ wap sa mtsʉ'mtsʉ' bɑ pu lě shi wɔ shyə m pa' Si Tá lə la' jap a, shyə m̀ nə pa' Zhwenyə dɔnyə wɔ, gə gɑ́ po pɑ́ ju'nyə Yeso Kristo, tə mcyə myə zhwɔ' wɔ. A gho' ba hwitə sɔ' nə́ po kwa' vəŋ e! Byanyə nə Si, Tá Cyəpɔ yɔk pɑ Yeso Kristo: A cyə m̀ nə cɔ̌mmtso e ghə pu piŋ dzə wɔk pɑ m nə mɔktə yə a gə mo vɔk a shyə m̀ nə́ nə yam nə vʉ̌ Yeso Kristo. Pu biŋ dzə wɔk pɑ nə tsə mcʉ' tsyə bi a pɑ̀ a lə pi, kə nə viŋ, kə nə ponyə lə; mcʉ' bɔ bɑ pu lwɔ' bi po thə́ kɛbəŋ. Pú dwɔ' bi wɔ pyə tʉɔ Si byap shyə m nə piŋnthʉm, nə ywə vɔk yə pu gɔ sɔ' la'tə cwə jʉ̀m a. Po'o lə́, po lo nə ŋwɛnyə̀, tə bi a po pɑ gɔ na' yɔ pɑ gǒ' nə nthinthi mləŋtə. A gɔ pɑ po'o, də̀ŋ yə a bɑ nə piŋnthʉ́m yɔ bɑ ǎ cyə tʉɔ gɔl yə pu dɑ ba mɔk nthə, a cwə bɔptə pɔptə a, də̀ŋ nə piŋnthʉm yɔ bɔ sɔ' bɑ hɑ ghamtə, hɑ ghu'tə, hɑ mku' nə cwə yə Yeso Kristo gɔ sɔ́' ŋwak a. Yú Yeso Kristo yə po ŋkhuŋ e bɑ po la m jɔ e, bɑ biŋ e tə wuŋ jɔ e a. Po lo ŋwɛnyə tə fo' ba tə dhə. Po kwi mcwɔ'fa' piŋnthʉm a pɑ ywə vɔk mtʉ́m mɔ. Mghɔm ghɔm Si pyə wap lə ghɔmnwə nə gho' yə́ a lə bɑ yɔ a lə cə̌ŋ nwə nə ywə vɔk bɔ. Wap lə shəŋ nə zhyə nthi ba cwə yə nwə yə Zhwenyə Kristo yə a lə bɑ nə pu a lə gɔm nə a, nə pa' a lə dəŋdzə, gɔmnwə nə go' yə a lə bɑwə byap Kristo ba m nə mɑ ghu'tə yə a lə gɔ tə́m jʉ̀m o a. Si lə ghə̌ wap zhyə́ gɑ a la tə́ bɑ m̀ nə pú pɑ́, gɑ a lə bɑ m bi po tə wap lə hɑ Cuŋ bɔ yə ǎ cwəlɔ pɑ siŋ Cuŋ pɑpuŋ pɑwə siŋ wɔ a, shyə m̀ nə Zhwenyə Dɔlɔ̌ yə a fɑ kɛbəŋ, pɑ aŋgəle pɑ́wə shəŋ nə yɔ a. A po'o tə po nyatə zhwenyə yɔ nə fa', po kɑ ŋʉ' lwɔk, po yap guŋ yɔ mɔktə awɛ nə gho' yə pu gɔ sɔ' ghə nə po nə cwə yə Yeso Kristo gɔ sɔ' ŋwak a. Dəŋdəŋ pa' pɑkhʉ̌ pyə wap ju'nyə a, kɑ po vɔk vɔ̀k ghi'nyə yə a lə bɑ nə po cwə dzə cwə yə po lə jɑ́ nthʉ́m fʉmnyə̀ a. Da' gɑ́ dəŋdəŋ pa' mo yə e ŋkhe wɔ a bɑ dɔlɔ̌ a, ba wɔ yɔ po cʉ' pɔ dɔlɔ̌ nə guŋ yɔ nə ghìŋ awɛ, nə pa' a bɑ pu və gɑ: Po pɑ́ dɔlɔ̌, nə pa' gɑ̌ bɑ dɔlɔ̌. Bi a po pɑ ŋkhe mo yə e tə gə ŋkhyɛ'nyə a, biŋ bɑ fyɛ' bǎ ya mo lə pɑ̀ nə mfa' myə a gɑ́ Tá yɔ, po nə ghiŋ nə mɔ gɑ mtyɛ'dzʉ́ dəmcǎ' bɑ bɔmtə. Po zhyə gɑ́ pu la tə dɑ pɑ tsə bɔptə pɔptə, kɑ tʉɔ̌ ŋkhap kɑ tʉɔ̌ gɔl lə tə nə shu' wɔ nə vɔk mzhʉ́m yə a lɑ bɑ bi po, fɑ bi mta pɔ a pɑ. Pu lə dɑ pɑ mcyə tʉɔdəŋ, pa' myə mu jʉ̀jʉ̀ tə bya, tə pap mviŋ, mcyə Kristo, yə pu lə la' jap é tə da' gə dzʉ, a piŋ nə pɑ cwə jʉm pu la'tə e, a lu m nə po a. Pǒ shyə m nə é bíŋ Si yə e lə yam e nə vʉ̌ biŋ hɑ ghu'tə bi a, po'o tə piŋnthʉm yɔ́ ba yɔ nə mɔktə pɑ́ bɑ pɑ́ nə Si. Pǒ bɑ pǒ lɔnyə mtʉ̀m mɔ, nə pa' pǒ yu'nyə bi nyənyɔ, gə ŋkhuŋnyə mfɑmfɑ́ tə nyəŋ mfʉ̀m nə́. Po kuŋnyə wɔ wɔ nə tʉm dɔlɔ̌ tə pwa, wɔ pyə a bɑ pu piŋ dzə wɔ m nə tsə sə́ shyə m nə gwya ywə, la' a pɑ yə bipi bɑ yə tə pì, shyə m nə ghɔm Si tsyə a bɑ ǎ cwə nthʉɔ̀, a lə pɑ mi a. Nə pá' guŋ bap nɑ́ awɛ bɑ pa' mghé a, guŋ yə ghu'tə awɛ pɑ pa' tutuŋ mghé a. Ghě jə́m tutuŋ e vʉ̀, da' gɑ́ ghɔm Cyəpɔ shwə́ mama. Ghɔm bɔ nəŋ bɑ Cùŋ pɑpúŋ yə pu lə sǐŋ wɔ a. Po'o lə po wa' guŋ nə cɔk awɛ ba guŋ ŋkhə́ŋkhə́ awɛ, guŋ nthi nə tsɛ bǔ awɛ, guŋ ghi'nyə awɛ, ba guŋ nthi nə tʉ tsǒ mo cwəpuŋ nə́ŋ. Də́ŋdə́ŋ pa' pó bwǎ pyə pú wə tə dzə́ wap a, po cəŋ pʉɔ tə ŋi'nyə ghɔ̀m, po'o gɑ po cyə́ m̀ nə́ e ŋkwyə nə ywə vɔk, bi a pɑ gɑ pǒ zhwi'tə gɑ Cyəpɔ bɑ ě puŋ a. A gɔ cyə m̀ nə yɔ nə fʉ'tə nɑ gɔ bəŋ e, yʉ yə e bɑ gwɔ' yə a tə pfʉ́ a pɑ́, yə pɔmnəŋ lə wǎ', da' gɑ Si cwɔ' e, dəŋ dzə e, tə ba wɔ yɔ́ dəŋdəŋ pa' mwɔ' tə pfʉ a, pu pəm wɔ, po pɑ pa' dyə zhwenyə, po pɑ cu'tə pɑ nuŋpwɔ', cu'tə dɔlɔ̌, nə pɑ nuŋpwɔ' Zhwenyə, pwɔ' pɑpúŋ bi Si shyə m̀ nə Yeso Kristo. Nə pa' a bɑ nthʉ́m ŋwa'nyə gɑ: Yɔ, gɑ̌ wə jap gwɔ' phə pa' Sion gwɔ' shicǐ, gwɔ' mtʉɔdəŋ Mo yə ě yap tʉm tsyə́ nə é a, bɑ sǒ tə́ gɔ sɔ' kú é pɑ́. Bi wɔ pɑ piŋ, mku' pɑ bi po da' gɑ bi pɑ tə piŋ, gwɔ' yə pɑ pə́m pa' lə wa' a, lě ji gwɔ' phə́ pa'. Biŋ bɑ gwɔ' fa'tə̀, ghǔ gwɔ' yə a gə mo vʉ si a. Wap shwɔ' mkwə map nə nə́ kɑlə́ wap kəŋnyə nə nə piŋ ghɔ̀m, a piŋ bɑ pɑ ywə yə a lə bɑwə byap wap a. Da' gɑ sɔ' m̀ nə po, pǒ bɑ gwya shicǐ, cu'tə nuŋpwɔ' fò, guŋ dɔlɔ̌, pɔ pɑ pyə Si lə cwɔ' wap a, po' o gɑ po pɑ shyanyə mnwə gwyə́ gwyə́ mo yə e lə kě wɔ nə nthəm nə jʉ̌m, ŋkho nə ŋkha' e yə pɑpuŋ a. Wɔ pyə́ po lə bɑ dzə̀ po lə pɑ́ pɔ pyə́ a, da' gɑ́ biŋ bɑ cwəlɔ bɑ pɔ Si a; wɔ pyə a lə bɑ po kɑ ghə cɔmmtso, da' gɑ bɑ cwəlɔ bɑ pǒ ghə cɔmmtso Si a. Wɔ pyə́ gɑ̌ ŋkhùŋ wɔ te' a, po pɑ́ pa' mcyəjyə biŋ bɑ mghʉɔ, gɑ̌ wə səso wɔ gɑ po tɔm nɑ tsɔ nə tsə ghi'nyə bap nɑ́ tsyə a do' tʉm mò shù a. Po ghə kwa' ghiŋ pɑpuŋ cəcɑ pɑ tə pɑ́ pɑ Yudea, po'o gɑ́ dəŋ pa' wap nə nthɛmnɛ mɔ gɑ pǒ bɑ pɔ cwə̀pùŋ a, mfa' mɔ myə pɑpuŋ khyɛ' wap, wap ghu'tə Si nə tyɛ'dzʉ́ yə e gɔ sɔ' a. Po pɑ ju'nyə nə guŋ mzhəŋ myə pɔmnəŋ yap nə́ nə sa'a, shyə́ nə Cyəpɔ. Po yu'nyə bi fo yə gʉ' gwyə bɑ m̀ bi a, po yu'nyə bi gɔpna' yə e jap e gɑ́ e pɑ́ nyəŋ shɛ thə pɔ cwəpuŋ, biŋ bɑ go'tə pɔ pɑpúŋ a. Nə pa' ywə yə Si shəŋ a bɑ́ gɑ́ po ghə nwə pɑpuŋ, a cɑ́ mshwə mkhəkhʉɔ pu a mfʉmnyə pɔ̀. Po vɔk pa' pɔ pyə wap tə́ bɑ mkwɔ a pɑ, da' gɑ́ ka po lɑ yɔ nə́ cyətə́ pɑ ŋkwɔ nə gə ywə nə hwyətə tʉm shɔkcɔk tsɔ. Po vɔk pa' mghɛ fa' Si a. Po hɑ́ mku' bi guŋ pɔ awɛ, po kúŋ mfɑ́ pɔ́, po pwɔk Si, po hɑ mku' bi fo. Wɔ mkwɔ, po yu'nyə mtá pɔ nthʉm nə sə́ŋ, po lə yu'nyə da' pyə pɑpuŋ pu a pyə byanyə pyǎnyə pɑ́, po yu'nyə ba pyə́ shɔk cɔk. Nə pa' nə tɔmtʉ̌m nə gǒ' yə mǒ jɔ yá pɑ́ pɔpɔ shyə́ m nə́ nə pwɔk Si a bɑ kwa' gho' Si. Bi a pɑ a kwi' dəŋ mo nə kɑ nə cwə yə o piŋ mshɔm nə nwə yə wə nə shəŋ a? Da' gɑ o ghə nwə pɑpúŋ, tə bɑ jɔgo' nə́, nthʉmtʉm tsǔ, bɑ a bɑ gho' nə mnyə Si. Nə pa' a bɑ ywə yə pu lə́ ŋkhe wɔ nə a. Nə pa' ba Kristo yə́ bɑ e lə́ yɔgo' nə po, nthak fo' bi po, gɑ po pɑ giŋ nə mkwə myə́. Yʉ́ yə e la tə́ hɔ sɔmywə, sɔm mfʉ́m lə nə nthəm shwə e. Yʉ́ yə pu lə yəmtə e, e lə pa', bɑ nthʉm go' e lə cɔ́k, da' gɑ nthak guŋ mnwə awɛ nə bǔ gɛ fyɛ' dəŋdəŋ. Yʉ́ yə e lə lɑ nɑ e ŋkwa mhɔ mɔk pɑ nə ŋkwɔ bɛnyəpɛnyə, po' o gɑ cwə yə ě pfʉ́ nə mhɔnwə mɔk pɑ a, pɑ vɔk nə nwə dəŋdəŋ; yu yə mfiŋ myə lə yɛ̀ wɔ a. Po lə bɑ pǒ pitə pa' pǒ jʉ̀jʉ̀ a, da' gɑ́ cwəlɔ pǒ bɑ pǒ fɛ bɑwə de m nə ghə̌ŋ byap dzə́ biŋ bɑ byap mtʉ́m mɔ. Ba wɔ yɔ, wɔ pɑjwǐ, po yu'nyə bi mthə́ pɔ, po'o gɑ́ shɑ pɔ kəŋnyə pɑ nə piŋ Ghɔm, wap cyə m̀ nə́ ghìŋ pɑjwǐ pap biŋ tə ghɔm, nə pa' wap yɔ ghiŋ tsɔ a pɑ́ ghìŋ tə bya, bɑ ghìŋ msəm. Tsɔ́ tsə́ mkwiŋ kɑ pɑ̌ pɑ ywə yə pu jɔ a: nəŋthə́ ba' pǎ', tsə́dzə́ tʉɔ gɔl, kɑ nə kwa dzə ŋa' nɑ́ lə. A tsɔ́ tsə́ mkwiŋ pɑ ywə yə a bɑ ǎ tʉmnyə̀ nthʉm tʉm po, bɑ tsə́dzə́ tsyə a tə bì a pɑ́, bɑ zhwenyə byanyə, zhwenyə hwítə̀, tsə́dzə́ tsya a bɑ á ghə dəŋ gwyə́ dzə̌ Si a. Yəŋ bɑ nthi mkwiŋ pa' pɑjwǐ dɔlɔ̌ pyə wap lə mɔktə Si, bɑ ju'nyə mthə́ pap a lə ŋkwiŋ a: Dəŋdəŋ pa' Sara a. E lə ju'nyə Abraham bɑ ŋkhe é gɑ Cyəpɔ e; pǒ bɑ pǒ cu' po Abraham pyə pɑjwǐ nə cwə yə pǒ gə nwə pɑpuŋ tə pwɔk sɔmywə a. Ba wɔ mthə́ pɑjwǐ, po a pɑjwǐ pɔ nə pə̌mtə vɔk, po pɑ ŋkhamtə gɑ pɑjwǐ pɔ́ bɑ pɔ̀ bwa pwǎ; po pɑ́ bvɔk nə msə̀m bəŋ pú nə pa' po a pú nə gɔ sɔ' pəmtə́ kwi gho' vɔk pa' mcʉ́' a, po' o gɑ́ sɔmywə kɑ fa'tə mcwyɛ'nyə mɔ. Nə́ nə míŋ, po pɑ́ pɑ́ nə ta' nwə yɑmu', bɑ nthamtə nə ghəghʉɔ pyə shɑ pɔ, ŋkhuŋnyə mfɑmfɑ́ nə pɑ́ sa' wɔ, po ghə tʉm cɔmmtso, bɑ fi'nɑ hɑ si. Ka po pa' nwə cwəpuŋ nə mnwə cwəpuŋ, po kɑ lɑ yəmtə ba' yəmtə. Gɛ̌ po pɑ̀ nyəŋ pɑ byǎnyə́, nə pa' a ywə yə pu lə cwɔ' wɔ nə a, po'o gɑ po sɔ' bɑ pɑ tsʉ́ mcʉ' byanyə. Nə pa' mo pɑ shə́ŋ nə kuŋ vɔk, biŋ jɔ mtyɛ'dzʉ́ pɑpuŋ bɑ e gɔ lwɔ' tʉm e nə nwə cwəpuŋ ba mkwɔptə shwə myə́ nə ghɔm mfʉ̀m. Bɑ e gɔ khʉ́ nwə cwəpuŋ, ghə nwə pɑpúŋ, cəŋ hwitə, pɑ̀ ghiŋ pɑ́ jʉm o. Nə pa' mnyə Cyəpɔ jɔ́ pɔ dəŋdəŋ ba mtə̀ŋ myə pɑ ntheŋ nə mcwyɛ'nyə map. Da' gə sə́ Cyəpɔ tə fɛ́ de pɑ ghə nwə cwəpùŋ pɑ. Pɑ wɑ̌ ghə cwəpùŋ nə po nə cwə yə pǒ wə dəmnyə nə ghə pɑpúŋ? Ba tə po'o, po pɑ gɔ́ yɔ pɑ̀ go'o bi pɔmnəŋ nə nwə dəŋdəŋ bɑ pǒ bɑ mpúŋtsé. Ka po pwɔk wap, tʉm tsɔ kɑ va'. Da' gɑ po hɑ pɑ mku' nthʉm tʉ́m po bi Kristo yə e bɑ Cyəpɔ a. Po nə cwə guŋ bɑ byap nə siŋ ywə yə pǒ mɔktə a bi pɔ pyə wap hə́ŋ wɔ a. Da' gɑ̀ gə po'o pɑ́ nə byǎnyə́ pu a mku', biŋ gə tʉ́m pɑpuŋ, po'o gɑ́ nə nwə yə pu bɑwə nthɛmnɛ mɔ nə a, a sǒ kú pɔ pyə wap nthébya nə ghiŋ pɑpúŋ tsɔ shyə́ m nə́ Kristo a. Nə pa' dzə̌ bɑ́ nə yɔgǒ' nə nə ghə pɑpúŋ bi a pɑ́ pa' Si jap á shyə́ nə́ nə ghə cwəpùŋ. Nə pa' kwa' yʉ́ Kristo bɑ ě pfʉ nə mhɔ, pfʉ́ ŋkwicʉ̌m, yʉ mo dəŋdəŋ nə thə pɔ tə pɑ dəŋdəŋ po'o gɑ́ e lɑ wɔ gɔ dzə̌ Si, yʉ́ yə e bɑ ě pfʉ́ nə bap nɑ́, da' gɑ̀ shyə́ m̀ nə Zhwenyə jam nə vʉ̌ a. A po'o tə a bɑ é lě gɔ siŋ Cuŋ pɑpúŋ ba m̀ bi mzhwenyə myə a bɑ dyə́ cɛ̌ a, bi mtʉɔthə́ pyə wap lə́ bɑ cwə dzə̀, cwə yə Si lə́ jɑwə nthɔm tʉ́m tsyə, nə mtyɛ'dzʉ́ myə Noe lə bɑwə ŋkwɑ pɛ yə da' pǒ mdùŋ pɔ, pɔ hɔ̌m lə vɔk nthʉm o a nə shyə a. A lə́ bɑ́ fo' kwǐshyə́ yə a bvɔk wɔ cwəlɔ a: A tə́ bɑ́ nə nə́ sɔk mviŋ bap ná pɑ́, a bɑ́ nə nə́ biŋ bi Si, nə tʉ́m pɑpuŋ. A bvɔk wɔ shyə́ m nə nə́ yam nə vʉ̌ Yeso Kristo. Yeso Kristo bɔ bɑ kɛ́bəŋ, bɑ nə ghəŋ tʉɔ Si, pɑ aŋgəle, ba guŋ nə sa' pu a guŋ tʉɔ awɛ pɑ ju'nyə e. Pa' a nə pɑ̌ po'o bɑ Kristo yɔgo' nə bapnɑ e, ba wɔ yɔ́ po pɑ́ mɔktə́ gɑ: Mo yə ě yɔgo' nə bapnɑ é a bɑ ě təm nə mhɔ. A gɔ pɑ́ po' bvʉ́' myə mtyɛ'dzʉ myə e gɔ piŋ vɔk nthʉm bapnɑ é a, e lə vɔk m̀ nə mghi'nyə pɔmnəŋ, e vɔk m̀ pa' Si shəŋ a. Po lə bɑ dzə bɑ bvɔk m pa' pɑ tə pɑ pɑ Yudea shəŋ a: Vɔk nə ghap, ghi'nyə, nə pam mlu', dzʉ kʉə ywə, nwə́ kʉə ywə́, mkətwɔk kuso. A shyə m po'o tə́ wap yɔ a sya wap gɑ́ tə pu a pú nə yɑwə bəmtə́ ŋkhʉ́dʉ́ nə nwə ghap pɑ̀, a pɑ́ po'o wap pɑwə bɔ wɔ. Da' gɑ wap gɔ sɔ' ghɔmnwə nə́ bi mo yə e gɔ fyɛ' pɔ mtʉɔ pu a mpfə pɔ a. A lə shyə m̀ po'o tə pú siŋ Cuŋ pɑpuŋ ba m bi mpfə́ pɔ, po'o gɑ pu fyɛ' wap pa' pɔmnəŋ nə bap nɑ́ a, wap vɔk pa' Si shəŋ á nə Zhwenyə. Cwə yə guŋ tsə awɛ gɔ mi á ghɔptə. Po ghə fʉ́, po kɑ piŋ gə sɔmywə tə dhə̀ po'o tə bɑ shwyɛ'nyə Si. Po ləŋdzə gə kwa' ŋkhuŋnyə tə pwa cəcɑ̌ po wɔwɔ, nə pa' ŋkhuŋnyə hwyətə bo'gwyə mhɔ̀. Po pɑ dɑ wɔwɔ cəcɑ̌ po nyəŋ dyə tə ghə kuku nthuŋ. Bǎ ya mo lə́ nə po yap yə́ dəŋ fʉ' yə Si hɑ a, bɑ nə ŋkwi'tə pyə shɑ́ pɔ cəcɑ̌ wɔwɔ pa' mghɛ fa' nə gho' yə a fɑ bi Si a, mfa' myə pɑ̀ nthi nthi a. Mo pɑ gɔ ghɔmnwə cəcɑ̌ po, a pɑ́ pɑ nə ghɔm Ghɔm Si; mo ghə thə́ fa', e pɑ dɑ pɑ́ gʉ̌' yə a fɑ́ bi Si a nə fǎ', po'o gɑ á cyə́ m̀ nə Yeso Kristo Si cəŋtə́ bɑ gu'tə ghu'tə, yʉ́ yə guŋ ghǔ'tə ba nə sa' bɑ pɑ́ bi e nə mgu' nə gu' a, Amɛn! Wɔ pyə gɑ̌ ŋkhuŋ wɔ te' a, a kɑ pɑ̌ bi po bɑ́ nwə sə nə yɔ gɑ́ pǒ nthʉm mɔk go' m pa' cwə yə gǒ' bɔ tə́ bɑ ywə yə́ po kɑ́ bɑwə byap a pɑ́. Po pɑ́ jɔ yɔ ghəŋ go' nə go' Kristo, po pɑ́ ŋwɛnyə, po'o gɑ́ cwə yə pu gɔ sɔ' la'tə ghu'tə e a, ba wɔ yɔ pɑ́ nthuŋ ŋwɛnyə bɑ pɑpúŋ. Pú pɑ dɑ wɔ jɔgo' nə tsǒ Kristo bɑ pǒ bɑ mpuŋtsé, nə pa' Zhwenyə ghu'tə, Zhwenyə Si bɑ nə po. Ka sɔmmo nə po yɔgǒ' m̀ gɑ́ ě zhwə mo, kɑ m̀ gɑ́ ě zhʉ, kɑ gə nwə cwəpùŋ, kɑ ŋkho m̀ nə nwə pyə shɑ pɔ lə. Da' gɑ e pɑ jɔ́go' m pa' mo Kristo a, sǒ kɑ kǔ e, e pɑ́ gù'tə pɑ Si nə tsǒ bɔ. Yəŋ bɑ cwə yə nə fyɛ' ntho' m nə dyə́ Si a; bi a pɑ gɑ ǎ to' m nə pɑ po'o, bɑ a gɔ sɔ' miŋ nə pɔ pyə wap ŋkhəŋnyə nə piŋ Cuŋ pɑpuŋ Si a m gɑ́ kɑ? A piŋ bɑ bi a nə ywə vɔk mo dəŋdəŋ tsɑ́ dəŋ po'o, bɑ a gɔ sɔ' pɑ nə pɔ cwəpuŋ pu a mghɛ mhɔ pɑ m̀ gɑ́ kɑ̀? Po'o lə, pɔ pyə wap wə nə yɔ̌go' a pɑ́ pa' Si jap a, wap tak tʉm tsap bi gɛ Nyaptə dzʉ́ yə e tə ŋkwyəpnyə a, biŋ bɑ gə pɑ nwə pɑpúŋ a. Gɑ̌ wə səso mghətso pyə wap cəcɑ̌ po a, myə yə́ gɑ bɑ gətso pa' wap a, biŋ bɑ ŋkwinthɛ̌ nə go' Kristo a, myə yə yɑ tsʉ' bɑ nə ghu'tə yə ǎ wə sɔ' a, gɑ̌ wə səso mghətso bɔ gɑ: Po cya ka jʉ̀ dzə́ Si tsyə pu hɑ wap bi po a, po kɑ cya wap m̀ pa' pu nthɔm wɔ tɔm a; po cyá wap nə tʉm pɑpuŋ kwa' pa' Si shəŋ a. Po kɑ lɑ ghi'nyə tə́ nə shya wap, po cəŋtə shya nə guŋ tʉm tsɔ awɛ. Ká po lɑ pɑ gʉ̌' tə nə sa' pɔ pyə pu hɑ wap bi po a. Po pɑ cəcɑ̌ pu bɑ́ fo' pa' guŋ kadzə awɛ gɔ nə pɑ́ a. Po'o gɑ cwə yə byap dzə́ gwyə́ gɔ sɔ' ŋwak á po kwi co'fo ghu'tə yə a tə bonyə a pɑ́. Ba wɔ yɔ́, wɔ ŋkhɛ mo, po yu'nyə bi mghətso. Ba guŋ yɔ awɛ, cəcɑ̌ pǒ, po zhyə́ nə fi' nɑ̀ tsɔ hɑ́ si nə pa' Si nthé bya nə pɑ ŋa'nɑ́, bɑ hɑ gho' é bi pɔ pyə́ wap fi' nɑ tsap hɑ́ si a. Po fi' nɑ tsɔ́ hɑ́ sí nə pǔ Si pu nthʉɔtʉɔ tə cwə ŋkhǔ' e ŋa' wɔ hɑ̀ thə́; po tak guŋ mnwə mɔ awɛ nə bǔ Si, nə pa' e byap wɔ. Po pɑ́ gə nwə m̀ də̀ŋ! Po pɑ di tə ti. Gɛbo yɔ, Sata, dəŋdəŋ pa' nɔm tə ma' yə ě wə shu' a wə dzamnyə pɑ bə́ŋ po, shəŋ mo yə é gɔ syatə é a. Po kɑ́ nəŋ gúŋ bi e, po kaktʉɔ nə piŋnthʉm, bɑ jyə́ gɑ kwa' gǒ' yə pǒ wə jɔ yá a, bɑ́ ba yə guŋ mfɑ pɔ awɛ nthʉm dzʉ́. Si guŋ gho' awɛ yə e lə kě wɔ shyə m̀ nə Kristo nə ghu'tə é mama a gɔ sɔ' yap wɔ si pɑ kwa' yʉ́, da' gɑ nə yap wɔ si bɑ pǒ na' jɔgo'. E gɔ sɔ' nyəŋ tʉm tsɔ dyə, nyəŋ gʉ' nə po, ghə gɑ pɑ sɔmywə lə ŋaknyə wɔ. A nə sa' pɑ́ bi e nə́ mgu' nə gu'! Amɛn. Gɑ̌ və mɔ mghɔm bi po shyə́ m nə Silvano. Gɑ̌ jɔ é pa' ta' fɑ yə nyənyɔ a; gɑ̌ bvə po'o nə səso wɔ biŋ gə po zhyə́ gɑ́ pǒ bɑ pǒ lanyə̀ kwa' nə gho' Si yə nyənyɔ. Cu'tə mcǐ pɔ yə ǎ Babilon ba Markusi mú a ca'tə wɔ. Po lɑ nə nuŋ mgho' mfɑ mfɑ nə sha'tə wɔ wɔ cəcɑ̌ po. Hwítə bi guŋ yɔ awɛ pyə pǒ bɑ m̀ nə Kristo! Myə Simon Pɛtrɔ, gɛfa' biŋ bɑ gɛ nthə̌m Yeso Kristo, bi pɔ pyə́ wap lě shyə m̀ nə dəŋdəŋ Si ba Yeso Kristo gɛvɔk pɔ ŋkwi piŋnthʉm m də̀ŋ pa' yɔk pɑ a: A gho' pu hwítə sɔ' bi po kwa' dù é shyə́ m nə́ nə zhyə Si ba Yeso Cyəpɔ yɔk pɑ̀. Tʉɔ Si bɑ ǎ hɑ guŋ ywə awɛ yə a shə́ŋ nə vɔk ba nə́ nə lɑ mku' biŋ a bi pɑ, nə pa' a bɑ ě ghə pɑ zhyə́ mo yə e ŋkhe wɔk pɑ shyə́ m nə ghu' e ba nə gʉ' e nə gɛfa'. A cyə́ m̀ nə́, nwə pɑpuŋ gwyə yə pu lə ka'nyə bi pɑ a, pu hɑ ya bi pɑ; po'o gɑ po cyə m̀ nə́ po a Si tamtə́ nə́ Si pa' é nə bɑ a, bɑ pu té wɔ nə vɔk bipi yə ghi'nyə dzʉ́ hɑ a. Po pìŋ shyə m̀ po'o shu'tə guŋ gʉ' yɔ awɛ, po kwi' mà pɑpuŋ nə piŋnthʉm yɔ, po kwi' nə zhyə́ nə mà pɑpuŋ. Po kwi' nə tɔm nɑ tsɔ́ nə nə́ zhyə, ŋkwi' nə cəŋtə nthɔm nə nə tɔm nɑ tsɔ́, ŋkwi' nə nə́ lɑ mku' bíŋ nə́ nə cəŋtə nthɔm. Po kwi' nwə msó cəcɑ̌ mfɑ́ nə nə́ lɑ mku' bíŋ, biŋ ŋkwi' ŋkhùŋnyə̀ nə nwə msó cəcɑ̌ mfɑmfɑ̀. Nə pa' po ghə gùŋ mmà pɑpuŋ mɔ̌ tə a yɔm, po cəŋtə́ fǎ nə zhyə Cyəpɔ yɔk pɑ Yeso Kristo. Nə pa' mo yə́ mma pɑpuŋ bɔ yak bi a bɑ fʉ̀, e pɑwə məmtə́ məjyə̀: Bɑ ě tʉɔnyə gɑ́ a bɑ pu lě shu' e nə mhɔ myə́ myə dzə̀. A po'o mfɑmfɑ́, po kaktʉɔ nə cəŋtə nthɔm yɔ pa' Si lə kě wɔ a, ba m̀ pá' é lə cǐ wɔ a; po ghə po'o bɑ pɑ́ po lə la' bvʉtə́ sí. A gɔ pɑ po'o tə́ Si sɔ' hɑ nə ko nə́ Nəfo mama Cyəpɔ yɔk pɑ bíŋ bɑ gɛvɔk wɔk pɑ Yeso Kristo. Gɑ̌ wə sɛ nə pɑ ŋkhamtə́ yá bi po guŋ mcwə awɛ, ba tə pa' a bɑ pǒ zhyə́ yá biŋ bɑwə shə́ŋtə́ nthɔm nə cwə nə nwə nyənyɔ yə cwəlɔ a, gɑ̌ yɔ gɑ a nwə dəŋdəŋ nə pɑ jam wɔ nə cwə yə jɑ̌ pɑ dəmcǎ' a, nə pa' cwə nə hapnyə ghɔptə pa' Cyəpɔ yɔk pɑ Yeso Kristo gə jyə́ a. Da' gɑ́ gɑ̌ gɔ cəŋtə́ nyaptə, po'o gɑ cwə yə gɑ̌ ghɔ a, po cʉ' gə sɔ guŋ mcwə awɛ nə pɑ ŋkhamtə́ ywə yə po ji'tə a. Nə pa' pyə lá tə shyə m̀ jʉ̀m tsə pomkəfeli tə́ gə po zhyə tʉɔ ba nə sɔ' Cyəpɔ yɔk pɑ Yeso Kristo pɑ̀, pyə lə́ shyə m nə pa' pyə lə́ lɑ̀ mnyə mɔk jɔ nthʉm ghu' e a. Nə pa' a bɑ Si Tá lé hɑ mku' pu a ghu' bi e nə cwə yə́ gi lə fɑ̌ bi Si gɔm bi e gɑ: Mo yə̌ŋ bɑ́ Mú a yə gɑ̌ ŋkhuŋ e te' a, mo yə a buŋ bəm nə cwɔ' e a. Gi bɔ, ba kwa' wɔk lə yǔ' a fɑ kɛbəŋ, nə cwə yə pyə a pú lə bɑ́ dəm kúŋ dɔlɔ̌ a. A biŋ nə pɑ̌ po'o ghɔm mghɔm ghɔm Si pɑ ywə nthʉɔtʉɔ yə po gɔ tʉ́ mnyə mɔ nə́ pa' lambu ŋkhyɛ' kyɛ' yə a ŋkhyɛ' nthʉm tsʉ' jʉm, ŋkhyɛ' tə dzʉ lɔ́, sɛ dedzʉ̌ sa' nthʉm mtʉ́m mɔ́. Po lə́ŋdzə shəŋtə́ jyə́: sɔm ghɔ̀m gɔm ghɔ̀m Si tsyə ǎ nthʉm ŋwa'nyə a tə bɑ tsyə mò pɑ̀. Nə pa' tɑ́ mkwɛnyə monəŋthə nə hɑ ghɔm bí gɔm ghɔ̀m Si pɑ́. Zhwenyə Dɔlɔ̌ nə gə tə pɔmnəŋ ghɔmnwə yə a fɑ m̀ bi Si a. Ba mghɛ ghɔm ghɔm Si cwanwə lə́ pɑ̌wə cəcɑ̌ pɔmnəŋ; a dəŋdəŋ po'o tə ba mtadyə zhi'tə cwanwə̀ gɔ sɔ' pɑ̀ cəcɑ̌ po pɑ̀ lɑ mfʉm zhi'tə cwanwə. Wap gɔ sɔ' lɑ ywə ji'tə̀zhǐ'tə́ cwəpuŋ nə ko cəcɑ̌ po. Wap gɔ sɔ' ghə tə́ kəŋnyə Tá yə e lə cu'nyə wap a, po'o nə ké vʉ tsyə ǎ wə gɔ wuŋ sɔ' a nyəŋ nə pú. Bo'gwyə́ pɔ gɔ sɔ' yap jʉ̌m pú nə vɔk ghàp tsap: A cyə́ m̀ nə́, pu pɑ́ jə́mtə́ məjyə̀ nwə nyənyɔ̀. Ghi'nyə yap gɔ sɔ' ghə wap pɑ́ dɑ mghɔm cwanwə map jʉ wɔ. Nə fyɛ' bɑ pɑ nə pu tə fɑ tə tyɛ̌', kwa' yap nə pí lə pɑ di pɑ. Nə pa' Si tə bɑ e lě nthak pɑ aŋgəle pyə wap lə hɔnwə a nəŋ tə nyəŋ shɛ thə pu pɑ̀, e lě nyəŋ wap nthʉm tsʉm jʉ́m Tartaron tə́ bɑ nə byap fyɛ'. E lě tə tak ba bvo dzʉ̌ nəŋ tə nyəŋ shɛ thə e pɑ́, da' gɑ cwə yə dɔmnyə bəŋ lə lǔ sə guŋ dzʉ́ pɔ cwəpuŋ awɛ a, e pfɔptə Noe, batə mo hɔ̌m nə pɔ pyə wap lə vɔk dɔmnyə bəŋ, yʉ́ yə e lə gɔmnwə dəŋdəŋ a. Da' gɑ́ yʉ́ Si lě simnyə mtisuŋ Sodɔm pú Gomora, gə a cʉ' və, nə hɑ fo' bi pɑ ghə nwə̀ cwəpùŋ pyə́ wap gɔ tə́m jʉ̀m a. E lě bìŋ bvɔk Lɔt mo dəŋdəŋ yə vɔk pɑ zhwə pɔ, pɑ ghə ghap lə bɑwə dzɑ́ nə é a. Nə pa' yə bɔ mo nyənyɔ lə bvɔk pɑ cəcɑ̌ pú, bɑ jɔ mnwə map bìŋ bɑ ju' ghɔm tsap, biŋ bɑ guŋ mtyɛ'dzʉ́ awɛ, tʉm tsyə́ tsyə a bɑ tʉm mo dəŋdəŋ a pɑ jɔgo' shyə́ m̀ nə mfa' cwəpuŋ map. A po'o bɑ da'tə́ gɑ́ pɑ́ Cyəpɔ té pɔ pyə wap bɑ dəŋdəŋ nə gǒ', da' gɑ biŋ dwɔ' pɔ pyə wap tə́ bɑ dəŋdəŋ a pɑ́ nə byap tyɛ' nə fyɛ̀', nyəŋ shɛ thə́ pú: Tə́ ntho' nə pɔ pyə́ wap jəŋ yap pɑ́ nə ŋwɛnyə̀ bap nɑ́, ywə yə a buŋ wap a pɑ bɑ pɑ́ netsə́, wap piŋ bɑ gwak nə sa' Si a. Wap jɔ gɑ́ a bɑ wap ku', ba mghɛ ŋa'nɑ́, wap lə pɑ bwɔk nə yəmtə Ghu' Si. A nə́ŋ nə pɑ̌ po' pɑ aŋgəle pyə a bɑ wap ghə gʉ' shyə́ pɔ bɔ, biŋ nthʉɔ shyə́ wap a lə pɑ gɔmnwə mcap nə Ghu' bɔ dzə̌ Cyəpɔ. Da' gɑ̀ pɔ bɔ, shwə pa' mnɔm pyə a bɑ wap ka ghə zhyənwə, bɑ né bvʉ nə yo', biŋ bɑ bɔptə a. Wap jəmtə́ ywə yə a bɑ wap ka zhyə́ ya a; biŋ bɑ̀ gɔ sɔ' pɔptə dəŋdəŋ pa' mnɔm bɔ gɔ sɔ' pɔptə a. Wap gɔ sɔ' kap nthɔm nwə tə pɑ dəŋdəŋ. Wap ŋwɛnyə́ nə pɔptə̀ mco' pɑ mɔkcʉ́. Mghɔm map bɑ pɑ mviŋ pu a netsə́, mcwanwə map nə cwə yə po a pú wə dzʉ́ ywə a. Nwə gho' bɑ ǎ ló nə mnyə́ map, wap lə pɑ́ jwyə mhɔnwə, wap fəŋtə́ mtʉm pɔ bwa pwǎ, bɑ mtadyə nə ghi'nyə, bɑ pó dò. Wap lě gwa' məjyə́ dəŋdəŋ, hɔ məjyə̀, jap jʉ̌m Balaam mu Bosor yə é lə pǐŋ mcwɔ'fa' tə a bɑ́ dəŋdəŋ a. Da' gɑ nə pɔptə́ mco' lě nthɔk e: Mu' nɔm tə gì lɑ gì mo nə ja' pʉə gɔm ghɔm Si bɔ. Pɔ bɔ bɑ́ pa' mtsə́ shyə́ tə shyə, mlwa myə fəfa ŋkwa a: Jʉ́m sə́sə́ wə byap wap. Nə pa' wap gɔm kəcʉɔ mghɔm tə nwə nə́, bɑ dɑ bɔkbɔ́k nwə yə bap nɑ́ shəŋ a nə fəŋtə́ pɔ pyə wap jɑwə tə nthəm nə pɔ pyə a bɑ wap lě hɔ məjyə a. Wap ŋkha' nə cyətə pɑ ŋkwɔ bi pú, da' gɑ́ kwa' wap pɑ́ mkwɔ́ pɔptə, nə kɑlə́ mǒ bɑ ŋkwɔ ywə yə á sa' o a. A pɑ gɑ́ pɔ pyə wap təm nə mvìŋ dzʉ́ shyə m̀ nə nə zhyə́ Cyəpɔ yɔk pɑ̀ biŋ bɑ Gɛvɔk wɔk pɑ, Yeso Kristo pìŋ biŋ gɑ mvìŋ bɔ tsʉ́m wap biŋ bɑ shya wap a, bɑ yap nə pɑ gɔ piŋ pɔk cwəlɔ tə cyə́ cwədzə. Nə pa' dzə lə bɑ bi pu nə cyətə zhyə məjyə̀ nwə dəŋdəŋ, shyə́ nə zhyə́ biŋ fɛnyə́ nɑ tsap nə mco' dɔlɔ̌ myə pu lə hɑ̌ bi pu a. A bɑ ywə yə ghɔm pu' gɔm a pəmtə nə pú gɑ: Bvʉ̌ bɑ e pɑnyə nə ywə yə e lə wyɛ'nyə á, ba m gɑ: Pu guŋ nə miŋ nə sɔk gənɔm e wuŋ nùŋ nthʉ́m mtwətwɔp. Msó pɑ, yə̌ŋ gɑ dzə́ pɑ́ batə̀ ŋwa'nyə yɑpʉə yə́ gɑ bvə bi po a. Nthʉm mŋwa'nyə bɔ məbʉə, gɑ gə po kamtə́ myə shɑ mnwə tə jyə nə kwɛ nwə dəŋdəŋ. Po kamtə́ mghɔ̀m myə́ mghɛ ghɔ̀m ghɔm Si pɔ dɔlɔ̌ lə ghɔm a, ba mco' mghɛ nthəm pɔ́, mco' Cyəpɔ biŋ bɑ́ gɛvɔk. Po lə́ŋdzə̀ shəŋtə jyə: A gɔ sɔ' pɑ̀ nə mtyɛ'dzʉ jʉ́m, pɑ kəŋnyə́ nə piŋ pɑ capshwə pyə wap ju' pɑ mgi cwəpuŋ map sɔ̌' bɑ gɔm gɑ: Mka'nyə myə pu lə ka'nyə nə yə nə sɔ' é a hɑ? Nə pa' tə fɑ́ pa' mtǎ lə pfʉ̌tə́ a, guŋ ywə awɛ bɑ pɑ́ pa' a lə la' bɑ́ tə fɑ́ pa' pu lə nyatə dzʉ́ a. Wap nə sɛ̌ po'o bɑwə dʉɔnyə gɑ̀ mkɛbəŋ ba cǎ' lə bɑwə fɑ́ tə tyɛ̌', bɑ a lə nthəm m̀ nə shyə́ biŋ bɑ nthamtə bɑwə pɑ nə shyə shyə́ m nə Ghɔm Si. A lě shyə pɑ m̀ nə yap bɔ nə pɑ, dzʉ́ cwə o bɔ pɔptə, bɑ shyə̌ sə é si. Sɔ' m̀ nə mkɛbəŋ ba sica' cwəlɔ̌, pɑ kwa' ghɔm bɔ nə dwɔ' bɑ nə byap mɔk, dwɔ' bɑ nə byap tyɛ'dzʉ́ fyɛ' ba tyɛ'dzʉ́ yə pɔ cwəpuŋ gɔ pitə́ a, Mu' ta' ywə wə́ msó pɑ yə po tɑ́ gɔ tʉɔnyə a pɑ́: A bɑ bi Cyəpɔ ta' tyɛ'dzʉ́ pɑ́ pa' gu' shǎ' a, gu' shǎ' piŋ bɑ́ pa' ta' tyɛ̌'dzʉ́ a. Cyəpɔ tə́ shwə́ nə ghə gɑ mka'nyə̀ myə́ pəmtə́ pɑ́, ba tə́ pa' shɑ́ pɔ bɑwə jɔ gɑ́ ě cwə a; da' gɑ́ e bɑwə byap wɔ́, la' e pɑwə́ shə́ŋ gɑ́ shɑ́ pɔ pfʉ́tə pɑ́, e bɑwə shəŋ m̀ gɑ́ guŋ pɔ awɛ pʉɔtʉm tsap. Tyɛ'dzʉ́ Cyəpɔ gɔ sɔ' sɔ' pa' shǔŋ a, tyɛ'dzʉ́ yə mkɛbəŋ gɔ sɔ' mi, nə mì pɑ zhwyanyə a, tyɛ'dzʉ́ yə guŋ tsə awɛ gɔ sɔ' khə́ simnyə, tyɛ'dzʉ́ yə ca' pu a guŋ mfa' myə́ awɛ gɔ pɑ nə nə́ fyɛ' a. Tə pa' guŋ tsə awɛ gɔ sɔ' simnyə a, po pɑ́ kwa' pɔ! Po ghə vɔk dɔlɔ̌! Po ghə mku' Si! Wɔ pyə pǒ bɑwə nə pyap bɑ́ do'nyə gɑ́ tyɛ̌'dzʉ̌ Si sɔ' a, tyɛ'dzʉ yə mkɛbəŋ gɔ sɔ' khə́ simnyə́, ba guŋ tsə́ awɛ khə́ dʉ́ a! Pɑ̌ bɑwə byap pa' e lə ka'nyə, byap mkɛbəŋ sə́ ba ca' sə́, tsʉ' yə nwə dəŋdəŋ gɔ pɑ cwə nə a. Po'o lə mso pɑ, po nə pyáp bɑ ŋkhaktʉɔ gɑ e nə sɔ' po pɑ́ nthʉm hwitə̀, bɑ dəŋdəŋ, tə pu bɑwə ŋkhyak wɔ. Po zhyə gɑ dəŋ pa' Cyəpɔ nə byap a sak a, a bɑ yɔ ywə vɔk! A po'o tə fɑ yɔk pɑ Polo biŋ bɑ so yɔk pɑ lə bvə nwə nə́ shyə m nə fʉ̌ yə Si lə hɑ̌ bi e a. A bɑ ywə yə e bvə nthʉ̀m guŋ mŋwa'nyə̀ myə wɛ a. Shɑ bap bɑ nthʉm o bɑ ǎ tʉɔ te'. A bɑ mbap mtsʉ myə́ mkhʉkhʉɔ pu a pɔ pyə wap bɑ wap ka lanyə sɔmywə a sɔp mghəŋ myə, dəŋdəŋ pa' wap sɔp mghəŋ guŋ myə shɑ Mŋwa'nyə po'o nə yap nə sɔ' bi a. Msó pɑ́, ǎ yɑ bɑ pu tɔk wɔ: Po pɔmtə́, po kɑ tak gɑ́ pɔ cwəpuŋ pyə wap bɑ́ pɔ bipǐ a lɑ wɔ gɔ, po kɑ nə̌ŋ biŋ gɑ pú té wɔ nə yɔ nə lə mku' bíŋ. Po kwyə́ nə gho' ba nə zhyə Cyəpɔ yɔk pɑ biŋ bɑ́ Gɛvɔk wɔk pɑ Yeso Kristo. Ghu'tə pɑ̀ bi e tə fɑ cwəlɔ gɔ ŋkhəm nə tyɛ'dzʉ́ mama. Amɛn. Ywə yə a lə bɑ tə fə nə to', ywə yə pyə lə yǔ', ywə yə pyə lə lɑ mnyə mɔk jɔ, ywə yə pyə lə cəŋtə dyəŋtə, ywə yə pyə lə co' pu nə a: Ghɔm vɔk. Nə pa' vɔk lə təm, pyə yɔ e, shʉ' mghɛ kwinthɛ pyə; pyə bɑwə gɔm nwə vɔk bɔ bi po, vɔk mama yə e lə bɑ bəŋ Ta, gə pyə yɔ e a, ywə yə pyə lə yɔ biŋ ju' a, pyə wə siŋ ba wɔ ya po'o gɑ pɑ tamtə. Yɔk pɑ nə tamtə pɑ a Ta, ba nə tamtə pɑ a Mu e Kristo. Pyə bvə ya bi po po'o gɑ ŋwɛnyə yɔk pɑ pəmtə nyənyɔ. Ŋkhʉɔ yə pyə lə yu' bi e, biŋ bɑwə shwi bi po a bɑ gɑ Si bɑ ŋkha', la' sɔmywə jʉ́m pɑ nə e. A bi a pɑ ghɔm gɑ pɑ a pu tamtə tə bɑ giŋ pɑ nthʉm jʉ́m, bɑ pɑ̌ cwanwə, bɑ pɑ tə wə gə nwə nyənyɔ pɑ. Tə a bi a pɑ pɑ ghiŋ nthʉm ŋkha' pa' ba yʉ yə bɑ nthʉm ŋkha' a, bɑ pɑ tamtə cəcɑ pɑ, bɑ mcyə Mu e Yeso shu' wɔk pɑ nə guŋ mhɔ awɛ. A bi a pɑ ghɔm gɑ pɑ ka ghə mhɔ bɑ pɑ fʉtə pɑ nɑ tsɔk pɑ, nyənyɔ lə pɑ nə pɑ. A bi a pɑ pìŋ mhɔ mɔk pɑ, bɑ pa' e tə kwyəpnyə a, biŋ bɑ nyənyɔ a, bɑ e gɔ lɑ mhɔ mɔk pɑ cwyɛ' wɔk pɑ piŋ lɔnyə wɔk pɑ nə guŋ mhɔ awɛ. A bi a pɑ ghɔm gɑ pɑ ka hɔnwə, bɑ pɑ lɑ e gə shwanwə, ghɔm tsyə lə pɑ́ nə pɑ. Pó mkəcɔk pó pɑ, gɑ bvə ywə bɔ bi po po'o gɑ, po kɑ hɔnwə. Da' gɑ mo hɔ pɑ nwə bɑ giŋ jyə̀ yɔk pɑ bəŋ Ta, Yeso Kristo mo nyənyɔ, bɑ ywə nə nuŋpwɔ' nə sɔk mhɔnwə mɔk pɑ, tə da' mɔk pɑ a, ba myə guŋ dzʉ awɛ. Pɑ la ŋkhyəp mthɔk myə bɑ pɑ zhyə gɑ pɑ zhyə e. Tə mo yə e ghɔm gɑ: gɑ zhyə e tə la' e pɑ ŋkhyəp mthɔk myə a bɑ shwanwə, nwə nyənyɔ lə pɑ́ nɑ e. Tə mo yə e ŋkhyəp ghɔm tsyə a, ŋkhuŋnyə Si bɑ a pəmtə nə e nyənyɔ. A shyə m nə tə pɑ zhyə gɑ pɑ bɑ nə e. Mo yə e gɔm gɑ e bɑ nə a, a puŋ gɑ e ghiŋ nə məjyə̀ yə yʉ Yeso lə ghiŋ nə a. Wɔ pyə gɑ ŋkhuŋ wɔ te' a, mcò' myə gɑ wə bvə bi po a tə bɑ mcò' sə pɑ́, a bvò mco' myə a lə bɑ bi po tə fɑ tə tyɛ' a. Mcò' bɔ myə a lə fɑ tə tyɛ' a, a pɑ ghɔm tsyə po lə yu' a. Tə ba tə po'o a bɑ mcò' sə tə gɑ bvə bi po, ǎ nyənyɔ nə e bɑ m nə po nə pa' jʉ̌m wə nə́ cyə̀ kwa' ŋkha' nyənyɔ pɑwə ŋkhyɛ' a. Mo yə e gɔm gɑ e nthʉm ŋkha' tə bɑ bɔ fɑ e a, bɑ pɑ nthʉm jʉm. Mo yə e ŋkhuŋ fɑ e a, shwə nthʉm ŋkha', bi a pɑ sɔmywə nə e lə ghə e vʉ si; Tə mo yə e bɔ fɑ e a, bɑ nthʉm jʉm. E giŋ pɑ nthʉm jʉm. E tə jyə tsʉ' yə e gɔ m nə a pɑ, nə pa' a bɑ jʉ̌m tam fʉ mnyə e a. Gɑ bvə bi po wɔ pò mkəcɔk pò, nə pa' a shyə a m nə tso tsyə tə pu lə mhɔnwə mɔ nə shwyɛ' wɔ. Gɑ bvə bi po, wɔ mta, nə kə lə a bɑ po zhyə mo yə e lə pɑ tə tyɛ' a. Gɑ bvə bi po, wɔ ŋkhɛ mo nə pa' a bɑ po lo' tə shyə. Mo cwəpuŋ. Gɑ bvə ya bi po, wɔ po mkəcɔk po pɑ̌: Pǒ bɑ po zhyə Ta. Bvə bi wɔ mta: Po bɑ po zhyə mo yə e lə la' bɑ tə fɑ nə to' a. Bvə bi wɔ ŋkhɛ mo: Po bɑ po tʉɔ, ghɔm Si bɑ nə po. Po lo' tə shyə Cwəpuŋ. Po kə kuŋ dzʉ pu a tsə́ dzʉ. Mo yə e ŋkhuŋ dzʉ a, kuŋnyə Ta tə bɑ nə e pɑ. Nə pa' tsə dzʉ, ghi'nyə nɑ, ghi'nyə mnyə, ŋa'nɑ nə fʉ dzʉ tə fɑ m bi Ta pɑ. A fɑ m bi dzʉ. Dzʉ ba ghi'nyə e shyə. Tə mo yə e gə ywə yə Si shəŋ a shwə mama. Wɔ pò mkəcɔk pò, cwə wə bɑ a ghɔptə, bɑ po lə yu' gɑ gɛ bo Kristo gɔ sɔ': kwa' cwəlɔ mghɛ bo Kristo si; a ywə yə a gə tə pɑ zhyə gɑ cwə jʉm wə bɑ a ku' a. Wap nthəm pɑ cəcɑ̌ pɑ, Tə wap lə pɑ pɔ pɔk pɑ; nə pa' wap la' pe' bɑ pɔ pɔk pɑ bɑ pa pú nə bəmtə bɑ; tə a lə shəŋ gɑ́ a la'tə gɑ guŋ yap awɛ la tə bɑ pɔ pɔk pɑ́ pɑ. A sɔ' m̀ nə po bɑ po lě ŋkwi mwɑ zhwɔ' mi a fɑ bi Dɔlɔ̌ a, bɑ po nəŋ jyə́. Da tə bvə bi po m gɑ po ka zhyə nwə nyənyɔ pɑ; dɑ bvə bi po nə pa' a bɑ po zhyə nwə nyənyɔ a, sɔm cwanwə lə pɑ fə nə nwə nyənyɔ pɑ. Shwanwə bɑ wɑ, tə pɑ mo yə e ŋkhəŋnyə gɑ Yeso tə bɑ Kristo a pɑ a? Mo bɔ bɑ gɛ bo Kristo, e ŋkhəŋnyə Ta, ŋkhəŋnyə Mu. Mo yə e ŋkhəŋnyə Mu a, ba Tá tə bɑ bi e pɑ. Mo yə e piŋ Mu a, Ta bɑ bi e. Sɔ' m̀ nə po, bɑ ǎ puŋ gɑ Cùŋ yə po lə la' ju' tə fɑ nə to' a pɑ nə po. A pɑ gɑ Cuŋ bɔ cwə nə po, bɑ ba wɔ yɔ shwə nə Mu ba m̀ nə Ta. Ywə yə e lə ka' bi pɑ a bɑ vɔk mama. Gɑ̌ bvə guŋ ywə bɔ awɛ bi po po'o nə pɔ pyə wap bɑwə gɔ ghə po hɔ məjyə a. Sɔ' m nə po, bɑ nə zhwɔ' yə e lə zhwɔ' wɔ a bɑ pɑ nə po, po'o la' sɔmmo ghɔ tə kwi' zhi'tə wɔ sɔmywə pɑ; a gə po zhyə guŋ mnwə awɛ. A bɑ nyənyɔ, a tə shwanwə pɑ; Pa' e ji'tə wɔ a, po wuŋ pɑ nə e. Cwəlɔ, wɔ pó mkəcɔk pó, po'o gɑ cwə yə e gɔ sɔ' təm a pɑ lə pwɔk, so lə ku wɔk pɑ, pɑ kɑ pɑ́ jʉ̀m nə e. A pɑ́ gɑ po zhyə gɑ́ e bɑ nyənyɔ, po zhyə gɑ bǎ ya mo lə yə e gə nwə nyənyɔ a bɑ pu tsə́ e m nə e. Po yɔ mu' nthi kuŋnyə yə ta nə ŋkhuŋ wɔk pɑ tə pu ke wɔk pɑ gɑ pǒ Si. Pɑ nəŋ bɑ wap nyənyɔ. A pɑ gɑ dzʉ ka zhyə wɔk pɑ bɑ a du pa' dzʉ ka zhyə e a. Wɔ pyə gɑ kuŋ wɔ te' a, pɑ bɑ pó Si tə fɑ cwəlɔ, tə kwa' ywə yə pɑ gɔ sɔ' pɑ yá a ka wuŋ bɑ dɔlɔ̌. Pɑ zhyə gɑ cwə yə e gɔ sɔ' təm a, pɑ pɑ́ pa' yʉ a, nə pa' pɑ gɔ sɔ' lɑ mnyə mɔk pɑ nə yɔ e kwa' pa' e bɑ a. Mo yə e piŋ e kwa' po'o a gɔ pɑ dɔlɔ̌ nə pá' yʉ Yeso bɑ dɔlɔ̌. Mo yə e hɔnwə a bɔptə mcò' Si nə pa' nə hɔnwə bɑ nə pɔptə mcò' Si. Tɑ po zhyə gɑ Yeso le sɔ' nə te mhɔ. Mhɔ tə bɑ nə e pɑ́. Mo yə e shwə nə e a tə ŋkwi' hɔnwə pɑ. Mo yə e hɔnwə a tə jɔ e pɑ, e lə nəŋ jyə e. Wɔ pó mkəcɔk pó, ka sɔmmo ghə po hɔ məjyə. Mo yə e gə nwə nyənyɔ a bɑ mo nyənyɔ pa' Yeso bɑ mo nyənyɔ a. Mo yə e hɔ pɑ nwə a bɑ mo Sata nə pa' tə fɑ tə tyɛ̌' Sata bɑ yə pɑ gɛ mhɔ. Mu Si lə sɔ' nə sa'tə mfa' Sata. Mo yə pu tsə e m nə Si a tə biŋ hɔnwə pɑ, nə pa' gwya Si bɑ̀ nə e; bi a pɑ e lə nəŋ biŋ hɔnwə pɑ, nə pa' a bɑ pu tsə e m nə Si a. Pa' pu nə jyə pó Si kɑ pó Sata lə á bɑ gɑ: mo yə e tə gə nwə nyənyɔ a pɑ tə bɑ mo Si pɑ, ba mo yə e tə ŋkhuŋ fɑ e a pɑ. Ŋkhʉɔ yə po lə la' ju' tə tyɛ' a bɑ gɑ pɑ kuŋnyə cəcɑ pɑ. Ka pɑ hwə Kaen, yʉ yə e lə pɑ mo Sata gwa fɑ e a. E lə gwa e gɑ kɑ? Nə kɑlə mfa' myə lə bɑ mfa' cwəpuŋ tə myə́ fɑ e pɑ mfa' nyənyɔ. Mfɑ pɑ, ka nwə cyə wɔ gɑ́ dzʉ̌ pɔ wɔ. Pɑ zhyə gɑ a bɑ pɑ lě da' shyə nə vʉ̌ kho nə vɔk, nə kɑ lə pɑ ŋkhuŋ mfɑ pɔk pɑ; Mo yə e tə ŋkhuŋ mo a pɑ bɑ m nthʉm vʉ. Mo yə e bɔ fɑ e a bɑ jwə mo. Po zhyə gɑ vɔk mama tə bɑ nə sɔm jwə mo pɑ. Ywə yə pɑ nə jyə ŋkhuŋnyə cwəlɔ a bɑ gɑ kwa' yʉ Yeso lě hɑ vɔk e nə thə yɔk pɑ; ba wɔk pɑ, pɑ gɔ hɑ vɔk yɔk pɑ nə thə pyəshɑ mfɑ pɔk pɑ. A po'o bi a mo ghə́ tsə dzʉ, tə jɔ fɑ e, ywə pɑwə jak e, e lə cɔm mtso myə́, bɑ bi a pɑ́ ŋkhuŋnyə Si pɑ nə e m gɑ kɑ? Wɔ pó mkəcɔk pó pɑ, ka pɑ pɑ́ dɑ pɑ́ da' ghɔm kɑ shwə lə nə ŋkhuŋ mo; Pɑ pɑ́ ŋkhuŋ mo nə nə ghə ywə nthʉm nyənyɔ. A gɔ cyə m po'o pɑ zhyə gɑ pɑ bɑ pɔ nyənyɔ, tʉm tsɔk pɑ hwitə dzə e. Nə pa' tʉm tsɔk pɑ pɑ́ sa' wɔk pɑ, bɑ Si bɑ e cyə tʉm tsɔk pɑ, bɑ e zhyə guŋ mnwə awɛ. Wɔ pyə gɑ ŋkhuŋ wɔ te' a, tʉm tsɔk pɑ pɑ́ tə pɑ̌ sa' wɔk pɑ bɑ pɑ́ gɔ ghɔmnwə bi Si tə pwɔk bǎ kɑ lə yə pɑ lo bi e a, e hɑ bi pɑ nə pa' pɑ khyəp mcò' myə, bɑ gə ywə yə a buŋ e a. Mcò' myə bɔ bɑ nə Piŋ Mu e Yeso Kristo biŋ gə kuŋnyə cəcɑ pɑ pa' e lə hɑ mcò' bi pɑ a. Mo yə e nthɔm mco' Si a bɑ bi Si, Si piŋ bɑ bi e. A shyə m nə zhwenyə yə e lə hɑ bi pɑ a, pɑ zhyə gɑ pa pu nə bəmtə bɑ. Wɔ pyə gɑ ŋkhuŋ wɔ te' a, ka po piŋ bǎ ya zhwenyə lə, po cəŋtə dyəŋtə mzhwenyə tə biŋ yə a zhwenyə Si a; nə pa' mghɛ ghɔm ghɔm Si cwanwə sa dzʉ. Ywə yə po gɔ nə zhyə zhwenyə Si a bɑ gɑ bǎ ya zhwenyə lə yə a biŋ gɑ Yeso Kristo bɑ ě sɔ' nthʉm bapnɑ á bɑ zhwenyə Si. Bǎ ya zhwenyə lə yə a gaptə Yeso nə bapnɑ a bɑ zhwenyə gɛ bo Kristo yə po lə yu' gɑ e gɔ sɔ' a; tə fɑ cwəlɔ e bɑ e sɔ' tə bɑ nthʉm dzʉ; Wɔ pó mkəcɔk pó pɑ̌ pyə po bɑ m nə Si a, po bɑ pǒ lo' shyə nthi mghɛ nthəm Si cwanwə bɔ nə pa' mo yə e bɑ cəcɑ̌ po a bɑ e cyə mo yə e bɑ m nə dzʉ a. Wap, wap bɑ m nə dzʉ̌; a shyə m po'o tə wap pɑ gɔm ghɔm dzʉ, dzʉ pɑ ju' wap. Tə sɔ' m nə pɑ̌, pɑ bɑ́ m bi Si. Mo yə e bɑ e zhyə Si a ju' gi yɔk pɑ; mo yə e tə bɑ nə Si a pɑ́ tə ju' gi yɔk pɑ pɑ. A shyə m nə́ tə pɑ pɑ́ jyə zhwenyə nyənyɔ biŋ jyə zhwenyə cwanwə. Wɔ pyə gɑ ŋkhuŋ wɔ te' a, pɑ pɑ́ ŋkhuŋnyə cəcɑ̌ pɑ nə pa' kuŋnyə fə bi Si. Mo yə e ŋkhuŋ mo a bɑ bɑ pu tsə e m nə Si, e zhyə Si. Mo yə e tə ŋkhuŋ mo a pɑ bɑ e ka zhyə Si. Nə pa' Si bɑ kuŋnyə. Yɔ́ nthi pa' nkhuŋnyə Si lə nə bɑ cəcɑ̌ pɑ: Si le nthəm ŋkwi Mu e nthʉm dzʉ gɑ pɑ cyə m nə e bvɔ̌k. Yɔ ywə yə ŋkhuŋnyə̌ bɑ yá: tə wɔk pɑ nə lə ŋkhùŋ Si pɑ, yʉ nə lə ŋkhuŋ wɔk pɑ tə nthəm ŋkwi Mu e nə gə ywə nə nuŋpwɔ' nə sɔk mhɔnwə mɔk pɑ. Wɔ pyə gɑ ŋkhuŋ wɔ te' a, a pɑ gɑ Si kuŋ wɔk pɑ po'o bɑ a puŋ gɑ ba wɔk pɑ ghə kuŋnyə cəcɑ pɑ. Sɔmmo lam fə jɔ Si. A bi a pɑ pɑ́ ŋkhuŋnyə cəcɑ̌ pɑ bɑ Si shwə nə pɑ, kuŋnyə pɑ́ nə pɑ bɑ a pəmtə. Ywə yə pɑ shyə m nə jyə gɑ pa pu nə bəmtə bɑ a bɑ gɑ a bɑ e le hɑ Zhwenyə e bi pɑ. Wɔk pɑ pyə pɑ lə yɔ a, pɑ bɑ́ mghɛ kwinthɛ nə ywə yə pɑ lə yɔ a, gɑ Ta le nthəm Mu e, e pɑ́ gɛvɔk dzʉ. Mo yə e piŋ sɔsɔ̌ gɑ Yeso bɑ Mu Si a, Si shwə́ nə e, e pɑ́ shwə́ nə Si. Pɑ bɑ pɑ zhyə kuŋnyə yə Si da'tə bi pɑ a biŋ biŋ. Si bɑ kuŋnyə: Mo yə e shwə́ nthʉm kuŋnyə a, Si shwə nə e, e pɑ́ shwə nə Si. A pɑ gɑ ŋkhuŋnyə cəŋtə bɑ nə pɑ, bɑ pɑ tə bwɔk tyɛ' fyɛ' pɑ nə pa' vɔk yɔk pɑ nthʉm yəŋ dzʉ̌ bɑ pa' vɔk Yeso a. Pwɔk tə bɑ nə kuŋnyə pɑ, nə pa' kuŋnyə nyənyɔ tə jyə pwɔk pɑ̀. Mo bwɔk go' yə bi a pu nə jɔ e a; mo yə e bwɔk a tə bɑ e ghə kuŋnyə nyənyɔ pɑ. Pɑ̌ ŋkhùŋnyə cəcɑ̌ pɑ nə pa' a bɑ e le dəŋdzə ŋkhuŋ wɔk pɑ. Mo ghɔm gɑ e khuŋ Si tə bɑ bɔ fɑ e bɑ e bɑ shwanwə. Nə pa' mo pɑ tə kuŋ fɑ e yə e jɔ e a, bɑ e gɔ kuŋ Si yə e tə jɔ e a m gɑ kɑ? Mcò' myə e hɑ bi pɑ a bɑ gɑ: Mo yə e ŋkhuŋ Si a, e kuŋ ba fɑ e. Mo yə e piŋ gɑ Yeso bɑ Kristo a, mo bɔ bɑ pu tsə e m nə Si; mo yə e nəŋ ŋkhuŋ Si yə e dzə̀ mo a, ŋkhuŋ mo yə pu tsə e m̀ nə Si a. Ywə yə pɑ shyə m̀ nə jyə gɑ pɑ̌ ŋkhuŋ po Si a, a bɑ nə kuŋ Si, ŋkhyəp mcò' myə́. Nə pa' nə kuŋ Si bɑ gɑ pɑ khyəp mcò' myə́. Mcò' myə́ bɔ tə dzɑ pɑ́. Nə pa' bǎ ya mo lə yə pu tsə́ e m nə Si a bɑ e lo' tə shyə́ dzʉ́; Yə nə cyə́ dzʉ yə e nə shyə́ dzʉ a a pɑ piŋnthʉm. Piŋnthʉm yɔk pɑ. Mo yə a bɑ e lo' tə shyə́ dzʉ a bɑ mo yə e biŋ gɑ Yeso bɑ Mu Si a. Yʉ Yeso Kristo nə lə sɔ' m̀ nə shyə ba m nə mcyə, la' e sɔ' da' m nə shyə pɑ; e le sɔ' m nə shyə ba m nə mcyə; Zhwenyə nə bɑ ŋkwinthɛ̌ nə pá' Zhwenyə bɑ nyənyɔ. Mkwinthɛ bɑ pɑta: Zhwenyə, shyə ba mcyə; wap bɔ pɑta pɑ kwishwə nə ta' nə kwinthɛ̌. Pɑ́ piŋ yə nə kwinthɛ pɔmnəŋ, bɑ yə nə kwinthɛ Si bɑ a ghu' tə shyə̌. Yə nə kwinthɛ Si pɑ gɑ e ŋkwinthɛ̌ Mu e. Mo yə e piŋ Mu Si a bɑ nə kwinthɛ bɔ bɑ nə e; mo yə e ka piŋ Si a, bɑ e lɑ e gə shwanwə nə kɑ lɑ e ka piŋ yə nə kwinthɛ yə e ŋkwi nə Mu e. Ywə yə kwinthɛ bɔ bɑ nə a bɑ gɑ Si bɑ e hɑ vɔk mama bi pɑ, vɔk mama bɔ pɑ́ nə Mu e. Mo yə Mu nə e a, vɔ̌k bɑ nə e; mɔ yə Mu tə nə e a pɑ vɔk tə bɑ nə e pɑ. Gɑ bvə guŋ ywə yəŋ awɛ bi po po'o gɑ po zhyə gɑ a bɑ po ghə vɔk mama, wɔ pyə a bɑ pǒ ghə piŋnthʉm nə tso Mu Si a. Pɑ́ zhyə nyənyɔ gɑ pɑ la do ywə bi e kwa' pa' e shəŋ a, bɑ e go yu' wɔk pɑ. Pa' pɑ zhyə gɑ e ju' wɔk pɑ a, ba kɑ lə yə pɑ do bi e a, a bɑ pɑ e da' gə ywə bɔ. Mo yɔ fɑ e bɑ e hɔnwə, mhɔnwə myə́ a tə dɑ mo gɔ nə vʉ̌ a pɑ́, e cwyɛ'nyə Si nə thə e. Si gɔ hɑ vɔk bi e, bi a pɑ gɑ mhɔnwə bɔ ka lɑ m̀ nə vʉ̌; shɑ mhɔ dɑ mo gɔ m̀ nə vʉ̌; ŋ tə gɑ po cwyɛ'nyə Si nə nthi mhɔnwə bɔ pɑ. Guŋ nə pɔptə mcò' awɛ bɑ nə hɔnwə, tə guŋ mhɔ awɛ tə dɑ mo gɔ m̀ nə vʉ̌ pɑ́. Pɑ zhyə gɑ mo yə pu tsə e m̀ nə Si a tə biŋ hɔnwə pɑ; Mu Si byap e, tə cwəpuŋ lɑ piŋ gə shɛ nə e. Pɑ̌ zhyə gɑ pɑ bɑ m̀ nə Si, dzʉ nəŋ bɑ m nə gʉ' cwəpuŋ. Pɑ̌ piŋ jyə gɑ Mu Si le sɔ' hɑ zhyənwə bi pɑ nə́ nə jyə́ kwa' Si nyənyɔ. Pɑ bɑ m̀ nə Si nyənyɔ bɑ m̀ nə Mu e Yeso Kristo. Yʉ Yeso Kristo bɑ nyənyɔ, e bɑ Si biŋ bɑ vɔk. Wɔ pó mkəcɔk pó, po pɔmtə nə ghamtə mkətwɔk. Myə, Gətso bvə bi Má ba m̀ bi po pyə. Wap pyə gɑ khuŋ wap nthʉm ŋkha' yə a bɑ yə nyənyɔ a. Tə da' myə a, ba guŋ pɔ awɛ pyə a bɑ wap zhyə nwə nyənyɔ a, shyə m nə nyənyɔ yə a bɑ nə pɑ, gɔ la' pɑ pɑ́ nə pɑ. Gho', cɔmmtso, hwitə yə a fɑ bi Si Ta, bi Yeso Kristo Mu Ta, nthʉm nyənyɔ ba m̀ nthʉm khuŋnyə a pɑ bi pɑ̀. Gɑ̌ cəŋtə́ ŋwɛnyə tə', nə yɔ gɑ shɑ po pǔ wə giŋ nə məjyə nyənyɔ, giŋ nə ywə mco' myə Ta lə hɑ̌ bi pɑ a gɔm a. Cwəlɔ Ma, gɑ̌ wə həŋtə bu, ŋ tə́ bvə pɑ́ shɑ mco' sə bu pɑ, a bɑ pɑ myə pɑ lə kwi tə tyɛ' a, gɑ̌ wə həŋtə bu gɑ pɑ pɑ́ khuŋnyə cəcɑ̌ pɑ. Ywə yə khuŋnyə bɑ ya a bɑ gɑ: pɑ ghiŋ nə məjyə mco' myə́. Mco' myə po lə la' ju' tə tyɛ' a bɑ mɔ̌, po'o gɑ po ghiŋ nə jyə bɔ. Nə pa' a bɑ pɑ fʉtə pɔ jɔmyɔm sɛ dzʉ, wap tə siŋ piŋnthʉm gɑ Yeso Kristo bɑ ě sɔ' nthʉm bapnɑ pɑ̀. Fʉtə mo bɑ gɛ bo Kristo. Po khyəp nɑ tsɔ, bɔmtə gɑ mfa' mɔ myə pɑpuŋ kɑ pi, po tɔm nɑ tsɔ sɔ' ŋkwi mcwɔ'fa'. Mo yə e tə́ giŋ nə ywə yə Kristo ji'tə a pɑ, Si tə bɑ bi e pɑ. Mo yə e ghiŋ nə ywə yə Kristo ji'tə a, Ta bɑ bi e ba Mú kwi' bɑ bi e. Mo sɔ' bi po, tə e lə lɑ ywə yə Kristo ji'tə a nə sɔ', ka po piŋ e ywə po, po kɑ ca'tə e ba nə ca'tə. Mo yə ě ca'tə mo bɔ a pa' bɑwə nthamtə nə mfa' cwəpuŋ myə. Mnwə myə gɑ gɔ və bu a yɑwə jɔm tə'; ŋ tə gɔ və pɑ ŋwa'nyə bu pɑ, ŋ gɑ gɔ sɔ' wə po, yɔ o lɑ pɑ shwə a nə ghɔm bu a pɑ ŋwɛnyə ŋwɛnyə. Po fɑ o mjwǐ yə a bɑ pu ci e a ca'tə o. Myə Gətso, gɑ bvə bi Gaios, yʉ yə gɑ̌ khuŋ e tə' khuŋ e nthʉm dɔlɔ̌ ba nə nyənyɔ a. So a yə tʉɔdəŋ, pɑ pɑ nthʉɔ nə nɑ o, ba m nə tʉm tsu. Gɑ ŋwɛnyə tə' nə pa' mfɑmfɑ́ pyə wap sɔ' tsɔ'ɔ a wə bɑ mkwinthɛ gɑ vɔk o bɑ vɔk mo nyənyɔ. O giŋ nthʉm dɔlɔ̌ nyənyɔ́. Yɑ nə cəŋtə ŋwɛnyə te' bɑ nə yu' gɑ po pɑ̌ giŋ nə dɔlɔ̌ nyənyɔ. So a yə tʉɔdəŋ, o fa' m pa' piŋnthʉm o nə bɑ́ a nə mfɑmfɑ́ ba nə mghʉɔ. Wap ŋkwinthɛ̌ nə mfa' bɔ dzə cu'tə pɔ Kristo. Kwitə wap nə nə ghɔ tsʉ' yə wap wə gɔ m nə a kwa' pa' a gɔ puŋ bi Si a. Nə pa' a pɑ gɑ wap tam məjyə tə kwi sɔmywə bi pɑ tə pɑ pɑ́ Yudea, bɑ wap ntham məjyə pa' nə tso Yeso Kristo. Pɑ gɔ kwitə wap tə la'tə gɑ pa pu nə bɑwə bəmtə nə mfa' nyənyɔ. Gɑ və shwə ghɔm bi cu'tə pɔ Kristo, da' gɑ Diotrefe, mo yə e shəŋ gɑ pu yu' pɑ yʉ́ a, ka zhyə wɔk. Tə cwə yə gɑ gɔ sɔ' ghə po zhyə ywə yə e bɑ ya. Jyə mghɔm cwəpuŋ myə e gɔm nə pɑ, ŋkhəŋnyə nə lɑ mfɑ pɔk pɑ, biŋ khɔ ba m bi pɔ pyə bi a wap nyəŋ wap dyə, tə jəŋ wap cu'tə a. So a yə tʉɔdəŋ, kɑ fo' msənyə nwə cwəpuŋ, fo' pɑ nwə pɑpuŋ. Mo yə e gə nwə pɑpuŋ a bɑ nə Si, mo yə e gə nwə cwəpuŋ a, tə jɔ Si pɑ́. Guŋ pɔ awɛ wə kwinthɛ Demetrio. Ba nyənyɔ wə kwinthɛ e. Ba wɔk yɔk pɑwə kwinthɛ e yɔk nə kwinthɛ pɑ nyənyɔ. Shɑ mnwə myə gɑ gɔ və bu a yɑ si tə jɔm; tə ŋ tə gɔ və pɑ ŋwa'nyə bu pɑ. Nə pa' gɑ wə mɔk nə sɔ' jɔ o pu lɑ pɑ shwə nə shɔm. Hwitə pɑ bu, mso mso ca'tə o, ca'tə mso mso, sha'tə bǎ ya mo lə. Myə̀ Yuda, gɛfa' Yeso Kristo, fɑ Yakop, bi pɔ pyə Si bɑ ě ké wap, Si Tá, bɑ Ŋkhúŋ wap, dwɔ' wap bi Yeso Kristo a. A cɔ̌mmtso pu hwítə̀ ba ŋkhuŋnyə pɑ́ bi po kwa' dǔ é. Mso pɑ, ŋ də bɑwə shəŋtə́ shəŋ nə və ŋwa'nyə bi po nə nwə ywə vɔk yə a bɑwə dé guŋ yɔk pɑ awɛ a, jɔ gɑ bvə nə shəŋtə́ nyə́ŋ gʉ' biŋ nə hɑ kaktʉɔ bi po nə lo'shù nə piŋnthʉm yə pu lə hɑ̌ bi pɔ dɔlɔ̌ ŋkwi cʉ̌m mama a. Nə pa' a bɑ shɑ pɔ ko cəcɑ̌ po, bɑ pu lě da' fyɛ' wap tə nyəŋ shɛ thə́ pú. Pɔ bɔ bɑ pɔ cwəpuŋ pyə wap dɑ nwə ghap bɔptə́ gho' Si yɔk pɑ, biŋ bɑ ŋkhə́ŋnyə da' Ta yɔk pɑ biŋ bɑ Cyəpɔ Yeso Kristo a. Gɑ̌ gɔ kamtə́ bi po ba tə pa' a bɑ pǒ zhyə guŋ yɔ awɛ gɑ Cyəpɔ lə cwə̌ tə́ bvɔk pɔ pyə bi gùŋ Egipto, biŋ jwətə́ pɔ pyə wap lə bɑ wap ka yap tʉm nə é a. Ba pɑ aŋgəle pyə wap bɑ wap lě tə cwə nə yap ŋkhɛ̀, pɑ aŋgəle pyə wap lě gwa' yap tsʉ' cwə a, Si bɑ ě cə̀ŋ wap mama nthʉ́m jʉ́m tə bɑ nə byap tyɛ' fyɛ' yə gwyə́. Sɔ' m nə Sodɔm pu Gomora ba mtisuŋ myə́ ǎ giŋnyə̌ pu a, wap pyə wap lə hɑ nɑ tsap pa' wap a nə nwə ghap, shʉ́mjʉ̌m shɑ́ pɔ̀ pyə wap lə́ bɑ pɑ́ mu' nthi a, wap bɑ nthʉm nə nyəŋ shɛ yə a bɑ mɔk màmà bɑ pa' fo' a. A po'o tə pɔ bɔ nthʉm pʉə yǎp nɔm bap nɑ́, bɑ gwak yə nə sa' Cyəpɔ, jəmtə Ghu'tə. A nəŋ nə pɑ̌ po'o, bɑ ba Tadyə̌ pɑ aŋgəle, Mikaɛl cwə yə pu Sata lə pɑ fə́ŋnyə́, bɑ ntwɔ'nyə́ nwə nə pfə Mosɛ á, Sata le fo' ba nə yəmtə e, e ghɔm pɑ́ gɑ: A Cyəpɔ nyəŋ shɛ thə o! Da' gɑ pɔ bɔ jəmtə ywə yə́ wap ka zhyə ya a; ba ywə yə wap jyə ya pɑ nthi pa' nɔm jyə ywə a, kɑ jyə ya cwəpùŋ lə, a pɑ gə wap hɔ məjyə gɔ bí. Ghəghʉɔ nə pú, nə kəlɑ́ a bɑ wap ghiŋ m̀ nə məjyə̀ Kaen. Wap lě shyə́ m̀ nə mcwɔ'fa' map gwa' nɑ tsap nə mhɔ Balaam, biŋ pfʉ́tə́ nə tʉɔthə́ Kore. Wap nə nyəŋ mviŋ nə ywətsʉ ŋkhuŋnyə yɔ, bɑ dzʉ ywə tə dhə̀ e biŋ mitə ywətsʉ tə kuso. Wap bɑ pa' mlwa tə shyə myə fəfa ŋkwa a, mthə ŋkhap cwə́ tə yǎm mnthɔm, bɑ ǎ pfʉ́ mcʉm bʉə, mthə bɑ pu cwɔ' mgɛ myə́. Wap bɑ pa' fashyə́ shyə lɑpʉə, bɑ da'tə tsə́ kuso yap. Wap bɑ pa' tsə ŋkhyɛ'nyə tsyə a tə shwə ŋkwitsʉ' pɑ kɛbəŋ, bɑ nthʉ́m pu' jʉ̌m mama bɑ giŋ a. A nə pú tə́ ba Enɔk gɔm ghɔm Si, mo batə sɔmbʉə tə fɑ́ nə Adam lə gɔm gɑ: Yɔ, Cyəpɔ wə sɔ' pu a msə̌ŋwi pyə́ pyə dɔlɔ̌, sɔ' nə nə fyɛ' guŋ dzʉ́ awɛ, piŋ ghə guŋ pɔ cwəpuŋ awɛ zhyə mnwə cwəpuŋ map nə zhwə́ mo, ba guŋ mghɔm cwəpúŋ myə wap lə ghɔm nə yʉ́ Cyəpɔ a. A bɑ kwa' wap, bɑ pɔ bɑ jɛ pɑ lúŋ biŋ bɑ shwé nɑ tsap guŋ mcwə awɛ. Ywə yə a buŋ wap a nə dɑ wap gíŋ. Wap gɔm pɑ ghɔm ŋa'nɑ́, biŋ bɑ nə sɛ mo nə nwə a pɑ́ pɑ nwə yap. Tə́ sɔ' m̀ nə wɔ mso pɑ̌, po kamtə́ mghɔm myə mghɛ nthəm Cyəpɔ yɔk pɑ Yeso Kristo lə ghɔm bi po a. Wap lə́ gɔ́m bi po gɑ: A gɔ sɔ' pɑ́ nə cwə jʉ̀m, pɑ mcapshwə pɑwə, bɑ ŋkhʉ́dʉ́ jʉm bɔkbɔ́k ywə yə a buŋ wap a. Pɑ́ bɑ wap! Wap bɑwə nyə́ŋ ŋkhyɛ'nyə. Wap bɑ wap ghə pɑ mkwɛnyə̀ dəmcǎ'. Wap bɑ wap ka ghə zhwenyə. Tə́ sɔ' m̀ nə wɔ pyə́ pǒ bɑ mso pɑ̌ a, po kwɑ̀ vɔk yɔ nə piŋnthʉm yɔ́ yə dɔlɔ̌. Po pɑ́ shwyɛ'nyə Si nthʉm Zhwenyə Dɔlɔ̌. Po cəŋtə́ shwə pɑ́ nthʉm ŋkhuŋnyə Si. Po yap yɔ nə pyap nə cɔ̌mmtso Cyəpɔ yɔk pɑ̀ Yeso Kristo nə́ vɔk mama. Pɔ pyə wap yɑ́wə jʉ'nyə a, po lɑ wap nə cɔ̌mmtso. Po té wap mɔk nə bvɔk wap; sɔ' m̀ nə pyə shɑ̀ pɔ̌, po lɑ wap nə cɔ̌mmtso, da' gɑ bɑ bwɔk, bɔmtə́ tə ŋkho nə sʉəsʉə dzə yə bapnɑ yap bɑ ǎ viŋ yá a. Bi mo yə bi a pɑ e pyap wɔ nə guŋ nə vʉsǐ awɛ, biŋ gə po cwə tə ghə pap mviŋ dzə̌ ghu'tə nthʉm ŋwɛnyə, bi Si yə e bɑ da' do e Gɛvɔk wɔk pɑ shyə́ m̀ nə Yeso Kristo Cyəpɔ yɔk pɑ, ghu'tə, nə zhi, tʉɔ, ba nə sa' pɑ bi e cwə yə a lě da' shyə a ba m cwəlɔ ba nə guŋ mcwə dzʉ́ awɛ. Amɛn. Ywə yə Yeso gə pu zhyə́ a: Si nə hɑ ywə bɔ bi e po'o gɑ e nə da'tə ywə yə a məjyə bɑwə sɔ' a bi mghɛ fa' pyə́. E lə́ təm aŋgəle é bi Yohane, gɛfa' e, gɑ́ e ghə pu zhyə́. Yohane biŋ gɑ́ guŋ ywə awɛ yə e jɔ a bɑ́ Ghɔm Si biŋ bɑ́ mkwinthɛ nə Yeso Kristo. Mo yə́ e ŋkhe ba pɔ pyə wap ju' mghɔm mghɔm ghɔm Si biŋ nthɔm ywə yə a bɑ pu və nthʉ́m o a bɑ́ mpuŋtsé nə pa' cwə wə bɑ a ghɔptə́. Yohane bvə bi mcu'tə pɔ Kristo sɔmbʉə myə a Asia a: Gho' ba hwitə́ pɑ́ bi po, fɑ bi mo yə e bɑ́, mo yə́ e lə́ bɑ́, mo yə ě wə sɔ' a, fɑ bi mzhwenyə sɔmbʉə myə ǎ dzə leŋfo e a, ba m bi Yeso Kristo, ŋkwinthɛ̌ nyənyɔ, thə́sə mú nə pɔ vʉ́, mú mfo dəmcǎ'. Ghu'tə pu tʉɔ pɑ̀ bi mo yə e ŋkhuŋ wɔk pɑ, dɑ mcyə́ myə ŋkwi wɔk pɑ bi mhɔ a, biŋ dɑ́ wɔk pɑ gə nəfo mkamsi bi Si tap e a, nə mgu' nə gu', Amɛn. Yɔ́, ě wə sɔ' cəcɑ̌ mlwa, a guŋ mnyə awɛ yɔ é, ba pɔ pyə wap lə swɔp e a: Nə pa' guŋ gwya monəŋ dəmcǎ' gɔ sɔ' pɑ lɔ, cyə pɑ m nə é. Amɛn! Gɑ̌ bɑ́ Alfa ba Omega; Cyəpɔ Si nə gɔm po'o. Mo yə e bɑ́, mo yə e lə́ bɑ́, biŋ bɑwə sɔ' a, Nthʉɔtʉɔ. Myə̀, Yohane fɑ yɔ biŋ bɑ so yɔ nthʉm go' mləŋtə, nthʉm nəfo ba nə kaktʉɔ nthʉm go' jʉ̌m Yeso, ŋ də́ bɑ Patmos nthʉm guŋ tùŋ shyə, bɑ a shyə m nə Ghɔm Si ba m nə kwinthɛ Yeso. A lə pɑ̌ nə tyɛ'dzʉ́ Cyəpɔ, Zhwenyə cù a, ju' gi mo nthʉɔtʉɔ jʉ̌m m̀ pa' pu nthuŋ nthɛ a, a pɑwə gɔm gɑ: Ywə yə o wə jɔ a, və nthʉ́m ŋwa'nyə biŋ shya bi mcu'tə pɔ Kristo sɔmbʉə myə ǎ Efeso, ba Smirna, ba Pergamo, Tiatira, Sardɛs, Filadɛlfia, ba m Laodikia lə. Ŋ də fɛ nɑ a nə́ le gi yə a lə́ bɑwə gɔm nwə bəm a; cwə yə ŋ də fɛ nɑ á, jɔ mkwɔ' lambu tʉɔ gɔl sɔmbʉə; ba mu' mo pɑ́ cəcɑ̌ mkwɔ' lambu bɔ pa' mú mo a. Mo bɔ lə́ bɑ e kwa sʉəsʉə dzə, jwé tap gɔl tə nə zhəŋ kəkɔp e; thə́ e pu a mnəŋ thə myə́ lə bɑwə fɔk pa' mnəŋ jʉ̀jʉ̀ fəfə á, pa' mlwa fə̀fə̀ a, ba mnyə́ myə́ pɑwə shwə́ pa' gwámɔk hwéhwě a; mkwə myə lə bɑwə hwə tʉ́ɔ tsyə pu nə nyap kwɛ pǔ yə tʉɔdəŋ a, bɑ pu lɑ mɔk sɔ̌k, ba gi e pɑwə shwə pa' zhwya shyə lɑpʉə a. A lə́ bɑ ě wim msɛ́ sɔmbʉə nə pú tʉɔ e mu' nyə mcɔk bʉ̌ə pɑwə nthəm shwə e. Sə́ e lə́ bɑwə dəŋnyə pa' nam mɔkcʉ́ a. Ŋ də nə yɔ e po'o, bvʉ́ nə mkwə myə pa' mo npfʉ́pfʉ̌ a, da' gɑ e yap pú é yə tʉɔ nə m̀ gɔm gɑ: Kɑ́ pwɔk, gɑ bɑ Də́ŋdzə biŋ bɑ́ Jʉɔjʉ̀m, bɑ mo yə e bɑ nthʉɔ a; ŋ də pfʉ̌, tə́ gɑ̌ bɑ yəŋ bɑ́ pɑ nthʉɔ nə guŋ mcwə awɛ; mkǐ vʉ́ ba myə́ nəfo vʉ́ bɑ pɑ́ bəm. Və ywə yə o jɔ a, ywə yə a bɑ́, biŋ bɑ ywə yə a gɔ sɔ' sɔ' a. Sɔ' m nə nwə cyə́ zhyənwə yə a bɑ ǎ tʉmnyə jʉ̀m msɛ́ sɔmbʉə myə́ o jɔ nə pú tʉɔ a ba jʉ̀m mkwɔ' lambù gɔl a, a pɑ́ gɑ: Msɛ́ sɔmbʉə bɑ́ pɑ aŋgəle mcu'tə pɔ Kristo sɔmbʉə. Mkwɔ' lambù pɑ mcu'tə pɔ Kristo sɔmbʉə. Və bi aŋgəle cu'tə pɔ Kristo yə a Efeso a gɑ: Mo yə́ e gwim msɛ́ sɔmbʉə nə pú tʉɔ é, mo yə e wə giŋ cəcɑ́ mkwɔ' lambú gɔl a ghɔm gɑ: Gɑ̌ zhyə́ mfa' mǔ, ywə yə o gə a, ba yù nə kaktʉɔ̀, nə pa' bi a pɑ́ o lə piŋ pɔ cwəpuŋ. A bɑ ǒ ləŋtə pɔ pyə wap gɔm gɑ wap bɑ mghɛ nthəm tə́ la' wap pɑ mghɛ nthəm a, jɔ gɑ́ wap bɑ mcwanwə̀. A bɑ ǒ ghə kaktʉɔ̀: O yɔgo' nə tso tsɑ̌, la' o pwá. Tə́ gɑ̌ wə da' o gɑ ǒ wa' dəŋdzə gʉ' ŋkhuŋnyə o Kamtə tsʉ' yə́ o bvʉsi nə a, ŋkwyəpnyə biŋ fa' mfà' myə o lə ji fa' a. A tak tə pɑ̌ po'o, bɑ gɑ̌ gɔ sɔ' bu, bi a pɑ gɑ́ o ka kwyəpnyə, bɑ gɑ gɔ te yu kwɔ' lambù nə tsʉ' e. Tə́ ywə yə o gə a pɑ́ ywə pɑpúŋ a bɑ gɑ́: O bɔ mfa' pɑ Nikolaista pa' ba myə yɑ̌ gɑ̌ bɔ mfa' bɔ a. Mo yə́ ě ghə mtəŋ a yu' ywə yə zhwenyə gɔm bi mcu'tə pɔ Kristo a. Bi mo yə ě ló' tə́ shyə́ a, gɑ̌ gɔ hɑ́ yə́ nə thə́ vɔk yə a nthʉm paradisi Si a bi é, e pfɑ. Və bi aŋgəle cu'tə pɔ Kristo yə ǎ Smirna a gɑ: Dəŋdzə́ biŋ bɑ Jʉɔjʉ̀m, mo yə e lə pfʉ̌ da' gɑ́ biŋ jám nə vʉ̌ a ghɔm gɑ: Gɑ̌ zhyə́ go' o ba pəŋ o, da' gɑ́ o bɑ gɛ ywə́; jyə́ ba mnɛ́ pɔ pyə wap gɔm gɑ́ wap bɑ́ pɑ Yudea a. Wap tə bɑ pɑ Yudea pɑ, a bɑ Sinagogə Sata. Kɑ pwɔk go' yə o gɔ yɔ a. Nə pa' Sata gɔ ma' pɔ pǔ dyəcɛ̌ nə ləŋtə o, ləŋtə o po' nə mtyɛ'dzʉ ghǎm. Pɑ́ nyənyɔ tə́ ŋkhəm tyɛ' vʉ́ a biŋ sɔ' hɑ co'fo vɔk bu. Mo yə ě ghə mtə́ŋ a yu' ywə yə zhwenyə gɔm bi mcu'tə pɔ Kristo a. Mo yə e lo' tə shyə́ a tə́ gɔ sɔ' piŋ yɔgo' batə vʉ̌ tsɑpʉə pɑ́. Və bi aŋgəle cu'tə pɔ Kristo yə ǎ Pergamo a gɑ: Mo yə a bɑ e wim nyə mcɔk bʉə a ghɔm gɑ: Gɑ̌ zhyə́ tsʉ' yə o shwə nə́ a, a bɑ́ tsʉ' yə leŋfo Sata bɑ́ nə a: Tə́ o jɑwə́ dɑ́ nɑ o pɑ́ nə tso tsɑ̌, bɑ o lě tə kəŋnyə piŋnthʉm a ba m nə́ mtyɛ'dzʉ́ myə pu lə zhwə́ Antipas, ŋkwinthɛ̌ a yə nyənyɔ wə po, tsʉ' yə Sata shwə nə a. Tə gɑ̌ wə baptə o nə ta' ywə: A pɑ́ gɑ shɑ pɔ bɑ wə o bɑwə́ nthɔm nwə Balaam yəŋ yə́ e lə tɔk Balak gɑ́ e tʉ'yo' nə pǒ pɑ Israɛl po'o nə nthənyə wap gɑ́ wap pfɑ bap yə a bɑ pu nə núŋpwɔ' bi mkətwɔk a po'o gɑ wap ghə ghap. Ba shɑ́ pɔ kwi' bɑ wə o bɑwə nthɔm nwə pɑ Nikolaista. Kwyəpnyə! A tak po'o bɑ gɑ̌ wə sɔ̌' m bu nə mu da', lɑ nyə mcɔk bʉ̌ə yə ǎ shwə m a nə lo' wap. Mo yə e ghə mtə́ŋ a, yu' ywə yə́ Zhwenyə gɔm bi mcu'tə pɔ Kristo a. Mo yə é lo' tə shyə́ a, bɑ gɑ̌ gɔ sɔ' hɑ́ mana dʉmnyətʉmnyə bi e; gɑ gɔ sɔ' hɑ́ ta' gwɔ' fə́fə́ bi e, bɑ pú və mu' tso sə́ nə́ tsyə sɔmmo ka zhyə tsá á tə ně da' mo yə́ e ŋkwi gwɔ' bɔ a. Və bi aŋgəle cu'tə pɔ Kristo yə ǎ Tiatira a gɑ: Mú Si, mo yə mnyə́ myə́ bɑ́ pa' gwa mɔk hwehwě a, mkwə myə́ pɑ́ pa' tʉ́ɔ tsyə pu nə nyap mkwɛ pǔ a, ghɔm gɑ: Gɑ̌ zhyə́ mfa' mǔ, jyə́ ŋkhuŋnyə o, jyə́ piŋnthʉm o, ywə yə o gə a, ba kaktʉɔ o; mfa' mǔ myə dzə̀ cyə́ myə́ jʉm. Tə́ gɑ wə nthe bya nə o nə pa' o nthak Yezabɛl mjwǐ yəŋ yə́ e ŋkhe nɑ é gɑ gɔm ghɔm Si bɑ gə mghɛ fa' pɑ̌ hɔ mə́jyə, bɑ̀ ji'tə wáp nə ghə ghàp, biŋ bɑ mpfɑ́ bap yə pú nə nuŋpwɔ' bi mkətwɔk a pɑ bəŋ o. Ŋ də tak cwə bi e gɑ e nə ŋkwyə́pnyə, da' gɑ e tə wə shəŋ nə kwyəpnyə nə́ nwə ghap pɑ. Yɔ! Gɑ̌ gɔ ma' e kodyə ghəghʉɔ dzə́zə́ pu a msǒ ghap pyə; tə́ né da' yə wap kwyəpnyə nə mfa' map a. Gɑ̌ gɔ sɔ' lɑ vʉ cwɔ pó pyə́; a pɑ́ po'o guŋ mcu'tə pɔ Kristo zhyə́ gɑ́ gɑ̌ bɑ́ mo yə́ e jɔ ywə vʉ' mo ba m nthʉ̀m tʉm e a; a bǎ bi ya mo lə́ nə́ po a hɑ́ yə́ pɑ́ dəŋ mfa' myə. Tə́ sɔ' m nə wɔ pyə po yɑ̌ Tiatira tə wuŋ biŋ zhinwə futə bɔ, bɑ po ka nəŋ shəŋ nə zhyə ywə yə pɔ bɔ ŋkhe gɑ tʉmnyə nwə Sata, ywə gɑ gɔm a bɑ gɑ: ŋ tə gɔ yap mu' pi də̌m po pɑ. Da' gɑ ywə yə ǎ bi po a, po tɔm a pǔŋ, tə́ ŋkhəm cwə yə gɑ̌ sɔ' a. Mo yə e lo' tə shyə́ a, mo yə ě tɔm mfa' mə̌ tə́ ŋkhəm nə́ nə́ miŋ a, gɑ̌ gɔ sɔ' hɑ tʉ̀ɔ bi e nə mgùŋ, e piŋ bɑ dɑ shɔm tʉɔ̌ dɑ wap gɔ ŋkhim wap, pɑ́ sɔ wap pa' pu sɔ́ mkətu' cǎ', dəŋdəŋ pa' Tá nə hɑ tʉɔ bəm a, piŋ hɑ sɛ́ bhə́ dzʉ̌ bi e. Mo yə ě ghə mtə́ŋ a é yu' ywə yə zhwényə gɔm bi mcu'tə pɔ Kristo a. Və bi aŋgəle cu'tə pɔ Kristo yə ǎ Sardɛs a gɑ: Mo yə e gə mzhwenyə Si sɔmbʉə, ba msɛ́ sɔmbʉə a ghɔm gɑ: Gɑ̌ zhyə mfa' mǔ, vɔk nə́ o tə́ bɑ o e da' pfʉ́! Pɔmtə́! Nyəŋ gʉ' nə yə muywə yə a wə gɔ pfʉ́ a gɑ a kɑ pfʉ̀; nə pa' gɑ̌ yɔ mfa' mǔ a lə pɑ́ dɔlɔ̌ nə́ mnyə́ Si pɑ́. Kamtə́ ywə yə o lə yǔ' biŋ ŋkwi a! Tɔm ywə bɔ, biŋ ŋkwyəpnyə! O pɑ̌ tə nə cwə bɑ byap, bɑ gɑ̌ gɔ cwə́ sɔ' pa' shuŋ á, o lə zhyə cwə yə gɑ́ gɔ sɔ' tə o jyə́ a. Da' gɑ́ ǒ ghə shɑ́ po mduŋ pɔ Sardɛs tə́ wap gúŋ bviŋ dzə tsap. Wap gɔ sɔ' cya á, pu a mfə́ dzə́, nə pa' wap ku' nə́. Ǎ po'o tə́ mo yə ě lo' tə shyə́ a gɔ sɔ' kwa mfə́ dzə́, a dɑ vɑnyə tso tsyə́ nə ŋwa'nyə vɔk pɑ̀, a piŋ sɔ' ghɔmnwə nə́ dzə̌ tá a ba m dzə̌ pɑ aŋgəle pyə́. Mo yə ě ghə mtəŋ a yu' ywə yə Zhwenyə gɔm bi mcu'tə pɔ Kristo. Və bi aŋgəle cu'tə pɔ Kristo yə ǎ Filadɛlfia á gɑ: Mo yə e bɑ́ dɔlɔ̌, mo nyənyɔ yə ki David bɑ́ bi a, mo yə e shwɔ' sɔmmo lə yo', bɑ jo' sɔmmo lə cwɔ' a ghɔm gɑ: Gɑ̌ zhyə́ mfa' mǔ, yɔ́, gɑ̌ yap ta' jyədyə̌ dzə o bɑ pú ghyɛ', bi a pɑ́ sɔmmo lə vi'. Gʉ' tə yɑ̌ bu sak pɑ̀, da' gɑ́ bɑ ǒ tɔm ghɔm tsɑ̌, o lə nə́ŋ ŋkhəŋnyə tso tsɑ̌. Yɔ́, gɑ̌ hɑ́ pɔ pyə wap bɑ́ Sinagogə Sata a bu, pɔ pyə wap gɔm gɑ wap bɑ́ pɑ Yudea tə́ bɑ shwa cwa a. Yɔ́ gɑ̌ gɔ sɔ' ghə wap sɔ' ŋkham mkwi'tə map dzə́ o, po'o tə́ wap nə jyə́ gɑ́ á bɑ gɑ̌ kùŋ o. Pa' o ŋkhaktʉɔ nə tɔm ghɔm tsɑ̌ a, ba myə yɑ̌, gɑ̌ gɔ sɔ' pɑ pɔmtə o nə cwə mləŋtə yə a bɑwə gɔ́ sɔ' nə guŋ dzʉ̌ awɛ, sɔ' ləŋtə pɑ dəmca' a. Gɑ̌ məjyə̀ bɑwə sɔ̌'. Kyəp ywə yə ǎ bu a kwa' pɑpuŋ po' gɑ sɔmmo kɑ kwi có' fò ó. Mo yə ě lo' tə shyə́ a, gɑ̌ gɔ sɔ' lɑ e ghə gàk Dyə̀ Si a, e lə la' tə́ biŋ nthəm pɑ́; a biŋ bvə tso Si a nə e, ba tsǒ guŋ Si a, Yerusalɛm yə sə́ yə a fi' fɑ thə́ bəŋ Si a á, ba tso tsɑ̌ tsyə́ sə́. Mo yə ě ghə mtəŋ a yu' ywə yə Zhwenyə gɔm bi mcu'tə po Kristo. Və bi aŋgəle cu'tə pɔ Kristo yə ǎ Laodikia á gɑ: Amɛn, ŋkwinthɛ̌ yə nyənyɔ, yə dəŋdəŋ, ywə yə Si lə́ nə nyap dzə a ghɔm gɑ: Gɑ̌ zhyə mfa' mǔ: O ka mim, o lə nəŋ hwé. Pě' tə o lə mim kɑ hwé! Da' gɑ pa' o wə na' dəmnyə ləmnyə, o lə pɑwə mim o lə nəŋ bɑwə hwe a, gɑ̌ gɔ wyɛ'nyə o. Pa' o gɔm gɑ́ gɑ̌ zhi, gɑ̌ ghə tsə́, ŋ tə́ wə jak sɔmywə pɑ́, pa' o ka zhyə gɑ́ o bɑ́ gɛ ghəghʉɔ, mo yə bi a pɑ́ pu cɔmmtso myə a, bɑ̌ bəŋ, bɑ fʉ̌ tam o, dzə́ lə pɑ́ nə o a, gɑ̌ wə nthɔk o gɑ o yó tʉɔ gɔl yə pu lɑ mɔk sɔk a bəm, nə́ ji, ba dzə́ fə́fə́, ŋkwa po'o gɑ pu kɑ yɔ o tə́ dzə nə o, a sǒ kú o, ba hwə mnyə́, nə shi' mnyə mǔ, biŋ jɔ tsʉ' kwa' myə̀, guŋ pɔ pyə gɑ̌ ŋkhuŋ wap a gɑ̌ ŋkhe wap, nthɔk wap. Kaktʉɔ, kwyəpnyə́! Yɔ gɑ̌ tiŋnyə jyədyə̌, bɑwə ŋkho'tə. A pɑ gɑ mo yu' gi a, gyɛ' jyədyə̌, bɑ gɑ̌ gɔ ko dyə e pyə e tsʉ́ ywətsʉ dɔlɔ̌, yʉ́ ba myə. Mo yə e lo' tə́ shyə a, gɑ̌ gɔ sɔ' ghə gɑ̌ pyə e cwə nə leŋfò a, dəŋdəŋ pa' ba myə̀ a bɑ gɑ̌ lo' tə shyə̌, gɔ pyə tá á cwə́ nə leŋfo e a. Mo yə́ ě ghə mtə́ŋ a yu' ywə yə́ Zhwenyə gɔm bi mcu'tə pɔ Kristo a. Mnwə bɔ lə cyə́, jɔ́: Bɑ pu ghyɛ' mu' ta' jyədyə̌ kɛbə̀ŋ, dəŋdzə́ gi yə ŋ də yu' a ghɔmnwə bəm pa' pu nthuŋ nthɛ, gɔm gɑ: Kwɔ' tsɔ'ɔ, a biŋ da'tə o ywə yə a məjyə́ bɑwə gɔ sɔ' a. A lə pɑ̌ po'o, Zhwenyə wuŋ gəm a. Jɔ ta' leŋfo bɑ pu tʉ kɛbə̀ŋ mo pɑ́ dəm o bɑ ě cwə́. Mo yə e lə́ bɑ dəm o bɑ ě cwə́ a lə bɑwə́ hwə́ pa' gwɔ' Yaspɛr ba Sardius, ntsɑ nam pɑ́ bɑ ǎ tsam leŋfo bɔ, bɑwə dəŋnyə pa' Smaradius a. Shɑ mleŋfo shwɔppfʉə mgham bʉə lə bɑ ǎ tsam leŋfo bɔ, mghətso shwɔppfʉə mgham bʉə pɑ̀ bɑ wap cwətə dəm o. A lə bɑ wap kwa mfə́fə́ dzə́, mcó' fo gɔl pɑ́ thə́ pu. Mpəpa'bə̀ŋ ba mgi, ba mhɛ bəŋ lə́ bɑwə nthəm nə leŋfo bɔ. Mlam hwehwě sɔmbʉə lə bɑwə ŋkhə́ dzə̀ leŋfo bɔ, bɑ mzhwenyə Si sɔmbʉə. Mu' ywə pa' shyə lɑpʉə dɔlɔ̌, bɑwə pa' mwé bəŋ a lə́ bɑ dzə leŋfo bɔ. Shɑ̀ mnɔm papfʉə lə bɑ́ tuŋ ba m geŋnyə leŋfo bɔ. Mnyə́ lə bɑ a sam wap dzə̀ ba m jʉ̀m. Dəŋdzə̀ nɔm lə́ bɑwə hwə́ a nɔmtəma', yə mu' pɑwə́ hwə́ a mú hùŋ, yə mu' pɑ bɑ e ghə sə́ monəŋ, batə yapfʉə pɑwə hwə́ a mətʉɔya' é pɑwə nthǎ. Mnɔm bɔ papfʉə lə́ bɑ́ bɑ bǎ ya lə ghə mbap nthɔk bɑ a lo mnyə́ geŋnyə o ba m nthʉ̀m o. Wap lə jwɔp mtsʉ' ba m mɔktcʉ́ gɑ: Dɔlɔ̌, Dɔlɔ̌, Dɔlɔ̌, Cyəpɔ, Si Nthʉɔtʉɔ. Mo yə e lə́ bɑ, yə e bɑ, biŋ bɑwə sɔ' a! Bǎ cwə kɑ lə́ yə mnɔm lə́ bɑwə hɑ ghu'tə bi mo yə e bɑ dəm leŋfo, bi mo yə e bɑ mama á, cwə yə wap lə bɑwə hɑ mku' bi e, biŋ bɑwə hɑ mfa' gho'nyə bi a, mghətso shwɔppfʉə mgham bʉə pɑ́ ŋkham mkwi'tə map si, dzə̌ mo yə é lə bɑ dəm leŋfo a, bɑ gamtə́ mo yə́ e bɑ nthʉɔ mama a, ma' mco'fo map dzə̌ leŋfo bɑ gɔm gɑ: A bɑ ǒ ku' m Cyəpɔ Si yɔk nə nə kwi ghu'tə, mku' ba tʉɔ, nə pa' wə nə lə́ gə guŋ tsə́ awɛ; o lə́ yap gɑ́ a pɑ́wə, pu ghə a pɑwə. Ŋ də piŋ jɔ ŋwa'nyə̀ pú tʉɔ mo yə́ é bɑ́ dəm leŋfo a, ŋwa'nyə̀ bɑ pu və̀ ywə nthʉm o ba m dəm o, nthám mstam sɔmbʉə nə́. Biŋ jɔ ta' aŋgəle nthʉɔtʉɔ e pɑwə gɔm tə́ thə́ gɑ: Wɑ̌ ku'nyə nə ghyɛ' ŋwa'nyə, ŋi' mstam nə́? Da' gɑ́ sɔmmo kɛbəŋ, dəmcǎ', ba m nthʉm ca' la tə́ ghə tʉɔ nə́ nə gyɛ' ŋwa'nyə̀ kɑ nə́ ma' mnyə nthʉ̀m o lə. Ŋ də zhwə̌nyə̀ nə yɔ gɑ́ sɔmmo la tə́ ku' nə ghyɛ' ŋwa'nyə̀ kɑ nə́ ma' mnyə nthʉm o lə. Da' gɑ́ mu' ta' mo nə mghətso lə ghɔm bəm gɑ: Kɑ́ lɔ̀! Yɔ́, nɔmtəma' nə gwya pɑ Yudea, twɔp David bɑ ě cyə shù: E gɔ sɔ' ghyɛ' ŋwa'nyə ba stam myə́ sɔmbʉə. A lə́ pɑ̌ po'o jɔ mú jʉ̀jʉ̀ pa' yə pu wa e a tuŋ leŋfo pu a mnɔm papfʉ̀ə, cəcɑ̌ mghətsó. A lə́ bɑ ě ghə nthu' sɔmbʉə ba mnyə sɔmbʉə myə a bɑ mzhwenyə Si bɑ pu təm nə́ guŋ dəmca' awɛ. E lə fʉ'tə nɑ e sɔ' ŋkwi ŋwa'nyə̀ nə pú tʉɔ mo yə e lə́ bɑ dəm leŋfo a. E lə pǐŋ tə́ ŋkwi ŋwa'nyə̀, mnɔm papfʉ̀ə pu a mghətsó shwɔppfʉə mgham bʉə kam mkwi'tə dzə é. Bǎ wɑlə́ nə pú lə́ bɑ ě wim lə́ŋ ba nthu' gɔl pú e, bɑ̀ mwɑ damnyəlamnyə ló nthʉm o, a pɑ̀ mcwyɛ'nyə̀ pɔ dɔlɔ̌. Wap lə bɑwə jwɔ́p zhwɔpshyə sə́ gɑ: O ku' nə́ kwi ŋwa'nyə ŋi' mstam nə́ nə́ pa' pu lě gwa o, o lɑ mcyə́ mǔ nə́ shu' pɔ bi Si, pɔ nə́ guŋ mgwya awɛ ba nə guŋ mghɔ̀m awɛ pu a nə guŋ mgùŋ awɛ. O lě dɑ wap gə nəfo mkamsi bi Si yɔk pɑ, wap ghɔ la' pɑ sa' dəmcǎ'. A lə pɑ̌ po'o ŋ jɔ: Ju' gi m aŋgəle kwa' vəŋ e giŋnyə leŋfo, ba gi mnɔm pu a mghətso. Wap lə́ bɑ kwa' vəŋ e vəŋ e, dù e dù e wap lə bɑwə gɔm tə́ thə́ gɑ: Mú jʉ̀jʉ̀ yə pu lə wa e a ku'nyə nə kwi tʉɔ, fʉ' ba zhyə̌nwə. Gʉ̌', mku', ghu'tə, ba gho'tə. A pɑ́ po'o guŋ tsə́ tsyə Si nyaptə kɛbəŋ, dəmcǎ', nthʉm ca' ba m nthʉm shyə lɑpʉə, guŋ tsə́ awɛ tsyə ǎ nthʉm o a, ju' pa' wap wə gɔm gɑ: gho', mku', ghu'tə ba mtʉɔ nə guŋ mcwə dzʉ́ awɛ pɑ bi mo yə e dəm léŋfo a ba m bi mú jʉ̀jʉ̀. Mnɔm papfʉə lə bɑ gɔm gɑ: Amɛn! Mghətso ŋwo'nyə si gámtə. A lə pɑ̌ po'o: Ŋ jɔ́: Cwə yə́ Mú jʉ̀jʉ̀ lə ghyɛ' dəŋdzə́ stam nə mstam sɔmbʉə a, ju' dəŋdzə nɔm cwe pa' hɛbəŋ a tə thə́ gɑ: Sɔ̌'! Biŋ jɔ a pɑ́ nɔmlěŋ fə́fə́. Mo yə e lə́ bɑ ě kwɔ' dəm é a lə bɑ ě wim kia. Pú lə hɑ co'fo bi e, e ghɔ pa' shyə́shù a, nə́ cyə shù. Cwə yə e lə ghyɛ' batə stam yɑpʉə a, ju' batə nɔm yɑpʉə cwe gɑ: Sɔ̌'! A pɑ́ po'o mu' nɔmlěŋ təm, bɑwə bɛ pa' mɔk a. Pú ghɔm bi mo yə e lə́ bɑ ě kwɔ' dəm e a gɑ e té hwitə̀ dəmcǎ', pɔmnəŋ zhwətə nɑ tsap. Pu lə piŋ hɑ mɑ́ sʉəsʉə nyə bi e. Cwə yə e lə ghyɛ' batə stam yɑtá, ju' batə nɔm yɑtá cwe gɑ: Sɔ̌'! Biŋ jɔ a pɑ́ nɔmlěŋ sə́sə́. Mo yə e lə bɑ ě kwɔ' dəm e a lə́ bɑ ě wim kilo pu e. Biŋ ju' pa' gì mò a cəcɑ̌ mnɔm papfʉə a pɑwə gɔm gɑ: Ta' fo' msɛ̌ nə bɛ ŋkhap biŋ gə msɛtʉɔ mfo' ntha nə bɛ ŋkhap. Tə́ sɔ' m nə mwɑ̌ pu a mlu', o kɑ́ kwak. Cwə yə e lə ghyɛ' batə stam yapfʉə a, ju' batə nɔm yapfʉə cwé gɑ: Sɔ̌'! Biŋ jɔ: A pɑ́ ta' nɔmlěŋ e pɑwə fɔk bviŋviŋ. Mo yə e lə́ bɑ ě kwɔ' dəm e a pu ŋkhe é gɑ vʉ̌, nəfo vʉ pɑ́ jʉm e. Pu lə hɑ tʉɔ bi e nə ta' ghə̌ŋ dəmcǎ' dəŋdəŋ jyə pfʉə nə lɑ mnyədwɔp jwətə pɔ ba jiku'u, ba vʉ̌, ba mnɔm shɔkcɔ̌k dəmcǎ'. Cwə yə e lə ghyɛ' batə stam yɑtɔ a, jɔ mtʉ̌m pɔ pyə pu lə zhwətə́ wap nə ghɔm Si ba m nə́ mkwinthɛ map myə wap lə́ kwi a tó tsʉ' nə to tsə pwɔ' nə a. Wap lə́ bɑwə shwe tə thə́ gɑ: Tá dɔlɔ̌ biŋ bɑ́ nyənyɔ. O gɔ pyap tə kəm cwə kɑ tə́ ya' shɛ piŋ pa' bo mcyə mɔk nə pɑ dəmcǎ'? A lə pɑ̌ po'o, pu hɑ fə́fə́ sʉəsʉə dzə́ bǎ bi ya mo lə́ nə pú, biŋ gɔm bi pu gɑ wap na' byap tə̌ dəŋ mso fa' pap pu a mfɑ pap pyə pu gɔ zhwətə wap yap pa' wap a pəmtə́ Ŋ də piŋ jɔ cwə yə e lə ghyɛ' batə stam nthɔk a, cǎ' cʉ'nyə. Nàm so pa' sə́sə́ dzə a, ba guŋ məŋwə́ awɛ cʉ' pa' mcyə a. Msɛ́ kɛbəŋ lə́ cʉmtə dəmcǎ' pa' nthɔm ta' thə yə fəfa ki nyəŋ si a. Kɛbəŋ ghɔ pa' pu dzʉm ŋwa'nyə dzʉmtsʉ̌m a, guŋ mkǔŋgó pu a pǒ mgùŋ cəcɑ́ shyə cʉ'nyə. Mfo dəmcǎ' pu a pɔ gwyəgwyə, mtadyə shù, mghɛ ywə pu a pɔ nthʉɔtʉɔ, guŋ pɔ awɛ, mkwɔ pu pɑ tə pɑ́ mkwɔ pɑ dʉmnyə nə mtǔŋ pu a mgha' gwɔ' mkǔŋgó. Wap lə́ bɑwə gɔm bi mkǔŋgó pu a ghǔ gɑ: vʉ dəm pyə, dʉm wɔk gʉɔ sʉəsʉə nə mo yə e dəm leŋfo, ba m gʉɔ sʉəsʉə nə yɛluŋ Mu jʉ̀jʉ̀! Nə pa' tyɛ'dzʉ́ yɛlúŋ gwyə sɔ', tə́ wɑ̌ gɔ vɔk? A lə nə cyə̀, ŋ jɔ pɑ aŋgəle papfʉə, bɑ wap tiŋnyə nə mtɔk dzʉ mapfʉə. Wap lə bɑwə nthɔm mfəfa mapfʉə myə a bɑ dəmcǎ', po'o gɑ́ sɔm fəfa kɑ piŋ shʉ' dəmcǎ', ba dəm shyə lɑpʉə ba m nə́ sɔm tá' thə́. Ŋ də́ piŋ jɔ mu' ta' aŋgəle e pʉɔ fɑ m ghə̌ŋ nthəm nàm. E lə bɑ e wim stam Si nthʉɔtʉɔ. E lə́ lɑ gi nthʉɔtʉɔ shwé bi pɑ aŋgəle papfʉə pyə a lə bɑ pu hɑ gʉ' nə baknyə dəmcǎ', ba shyə lɑpʉə a gɑ: Ka po wuŋ baknyə dəmcǎ', kə shyə lɑpʉə, kə mthə́ lə́, tə̌ pyə tam stam nə msə́ mghɛ fa' Si yɔk. Ŋ də́ piŋ jú' dəŋ pɔ pyə pu lə tam stam nə́ msə́ map a: Pɔ sha' shwɔppfʉə mpopfʉə mŋkhə́ pyə a lə bɑ pu yap mtiŋ stam nə́ pu a, nə guŋ mtuŋdyə pɑ Israɛl awɛ. Nə tuŋdyə́ Yuda, pu yap mtiŋ stam nə pɔ sha' shwɔppʉə mghǎm. Nə tuŋdyə́ Rubeŋ pɔ sha' shwɔppʉə mgham. Nə tuŋdyə Gad pɔ sha' shwɔppʉə mgham. Nə tuŋdyə Asɛr: Pɔ sha' shwɔppʉə mgham nə tuŋdyə Nɛftali: Pɔ sha' shwɔppʉə mgham nə tuŋdyə Manase: Pɔ sha' shwɔppʉə mgham nə tuŋdyə Simeon: Pɔ sha' shwɔppʉə mgham nə tuŋdyə Levi: Pɔ sha' shwɔppʉə mgham nə tuŋdyə Isakar: Pɔ sha' shwɔppʉə mgham nə tuŋdyə Zabulon: Pɔ sha' shwɔppʉə mgham nə tuŋdyə Yosɛp: Pɔ sha' shwɔppʉə mgham nə tuŋdyə Penyamɛn: Pu yap mtiŋ stam nə pɔ sha' shwɔppʉə mgham. A lə nə cyə biŋ jɔ: Du pɔmnəŋ tə́ bi a pɑ́ sɔmmo lə sɛ́ wap jyə́, pɔ nə́ guŋ mguŋ awɛ, nə guŋ mtuŋdyə awɛ, nə nthinthi pɔ awɛ, nə guŋ mghɔm awɛ. Wap lə bɑ wap tiŋnyə dzə leŋfo ba m dzə mú jʉ̀jʉ̀, bɑ wap kwa sʉəsʉə mfə́fə́ dzə́ biŋ gwim yɛ bɛ pú pu. Wap lə bɑwə gɔm tə thə́ gɑ: Ywə vɔk bɑ̀ bi Si yɔk pɑ̀ yə e bɑ dəm leŋfo ba m bi mù jʉ̀jʉ̀. Guŋ pɑ aŋgəle awɛ pyə wap lə bɑ giŋnyə leŋfo a ba mghətso pu a mnɔm papfʉə piŋ bvʉtə́ si dzə̌ leŋfo pfɔppfɔp, gamtə Si. Wap lə́ bɑwə́ gɔm gɑ: Amɛn! Gho'tə, ghu'tə, zhyə̌nwə, gho', mku', tʉ̀ɔ, gʉ̌' pɑ̀ bi Si yɔk nə gu' nə gu'! Amɛn! Mu' gətso nə mghətso lə́ lɑ ghɔm gɔm bəm gɑ: Pɔ pɔ̀ gɑ pyə wap bɑ̀ wap kwa msʉəsʉə mfə̌ dzə̀ a, wap bɑ̀ pɑ wɑ? Biŋ bɑ fɑ m hɑ́? Ŋ də pa' bi e gɑ: Cyəpɔ a, a bɑ ǒ zhyə! E ghɔm bəm gɑ: Wap fɑ m nə ghəghʉɔ gwyə. A bɑ̀ wap sɔk mdzə́ map, dɑ mcyə mu jʉ̀jʉ̀ gə a fɔ́k. A ywə yə́ a gə tə wap pɑ́ nthiŋnyə dzə̀ léŋfo Si bɑ sé e dyə e mtsʉ̌' ba m mɔkcʉ́. Mo yə ě dəm léŋfo a gɔ sɔ' nyəŋ wap nthap e. Jikǔ' tə́ gɔ sɔ' piŋ yɛ́ wap pɑ́, a jì shyə̀ lə piŋ jɛ́ wap, a nàm pu a mɔk e lə piŋ hwé wap, nə pa' mú jʉ̀jʉ̀ yə ě tùŋ leŋfo a gɔ sɔ' pɑ́ gɛ pyap wap, pɑ lɑ wap ghɔ m nə́ msa'si shyə̀ dzəŋtsə̌ŋ, a Si piŋ sɔ' shi' guŋ mshyə́tsə́ map awɛ. Cwə yə e lə ghyɛ' batə stam sɔmbʉə a, tsʉ' lɛ́tə thə́ kɛbəŋ nə dəŋdəŋ kam ta' nam. Biŋ jɔ́ pɑ aŋgəle sɔmbʉə pyə wap nthiŋnyə dzə̌ Si a. Pu hɑ nthɛ sɔmbʉə bi pú. Mu' aŋgəle lə sɔ' nthiŋnyə bəŋ tsʉ' nə ntho tsə pwɔ', bɑ e wim nthu' gɔl yə pú nyəŋ phə̀ damnyəlamnyə yə́ pu ntho á nə a, pu piŋ hɑ phə̀ damnyəlamnyə bi e tə́ a yɔm. Po'o gɑ, e lɑ mcwyɛ'nyə pɔ dɔlɔ̌ nə ntho tsʉ' nə nthó tsə̀ pwɔ' dzə̌ leŋfo. A pɑ po'o dhəmɔk mwɑ damnyəlamnyə pɑwə nthəm nə bǔ aŋgəle ŋkwɔ́ dzə́ Si pu a mcwyɛ'nyə pɔ dɔlɔ̌. A lə pɑ̌ po'o, aŋgəle kwa nthu' phə damnyəlamnyə, nyəŋ mɔk yə a fɑ tsʉ' nə tó tsə pwɔ' a nə́ tə a lo, e ma dəmcǎ' a piŋ bɑ́ mhɛbəŋ, bɑ mgi, bɑ mpəpa' bəŋ ba cǎ' cu'nyə. Pɑ aŋgəle sɔmbʉə pyə a lə bɑ wap wim mnthɛ sɔmbʉə a lə nyaptə nɑ tsap nə tuŋ. Dəŋdzə́ e lə tǔŋ nthɛ é: Mwe pu a mɔk bɑ pu ŋi'nyə mcyə nə́ vʉ dəmcǎ'. Ta' kam nə sicǎ' dəŋdəŋ mkam nthá khə́, ba ta' kam nə guŋ mthə́ awɛ dəmcǎ' dəŋdəŋ mkam nthá piŋ ŋkhə yə́, ba guŋ mghě mimnyəmimnyə piŋ ŋkhə awɛ. Batə aŋgəle yɑpʉə lə tuŋ yə nthɛ́: A cwə pa' bi a pɑ pu ghɔm gɑ́ mɑ kuŋ mɔk vʉ̀ shyə́ lɑpʉə a; ta' kam nə shyə lɑpʉə dəŋdəŋ mkam nthá pʉɔ shʉ' mcyə. Ta' kam nə guŋ tsə tsyə a nthʉm shyə a dəŋdəŋ mkam ntha pfʉtə, ba ta' kam nə guŋ mkənu' awɛ dəŋdəŋ mkam ntha sa'tə. Batə aŋgəle yɑtá lə tuŋ yə nthɛ́: Mu' mɑ ywə ŋkhyɛ' kyɛ' fɑ kɛbəŋ bvʉ́ dəmcǎ', bɑwə ŋkhə́ pa' kam mɔk a; bvʉ̀ po'o nə ta' kam nə guŋ mshyə́ gwyə́gwyə́ awɛ dəŋdəŋ mkam nthá; ba nə́ msa'si shyə. Tsǒ ywə ŋkhyɛ'kyɛ' bɔ bɑ gɑ: Absinto. Ta' kam nə guŋ mshyə awɛ dəŋdəŋ mkam nthá cʉ' mɑmzə̀, a pɑ po'o bo'gwyə pɔ pfʉ́tə nə nə mshyə́ dzəzə. Batə aŋgəle yapfʉə lə tuŋ nthɛ́ e: Pu cwɔ ywə nə ta' kam nàm nə nam dəŋdəŋ mkam nthá, ba nə maŋwə́, ba nə msɛ́; guŋ e awɛ sonyə̀ nə́ tá' kam nə dəŋdəŋ mkam nthá. Dzʉ́ dɔlɔ̌ sonyə̀ nə ta' kam nə dəŋdəŋ mkam nthá, ba mtsʉ̌'. Ŋ də pǐŋ jɔ: ju' gi ghə́m e pɑwə nthǎ tə́ thə́ biŋ bɑwə gɔm tə́ thə́ gɑ: Ghəghʉɔ! Ghəghʉɔ! Ghəghʉɔ bi pɑ dəmcǎ' nə́ mnthɛ mənthá myə pɑ aŋgəle pɑtá gɔ piŋ tuŋ a. Aŋgəle batə yɑtɔ lə́ tuŋ nthɛ e: Ŋ jɔ́ ta' sɛ́ fɑ kɛbəŋ bvʉ́ dəmcǎ'. Pu piŋ hɑ kǐ ghʉ̌m mtsʉ̀m bi é. E nə shwɔ' ghʉ́m mtsʉ̀m, dhə́ mɔ́k təm nə́ pa' mɑ mɔk nə nɛ́ mtʉɔ a. Nàm ba fɔk sonyə̀. Gǎmnthɔ piŋ nthəm nə dhəmɔk bɔ sɛ́ dəmcǎ'. Pu hɑ gʉ̌' bi pú pa' gʉ' gɔm mtìŋ a dəmcǎ' á. Pú lə cǒ' bi pu gɑ́ ka wap ghə shɛ́ nə mghě dəmcǎ', nə sɔmywə mimnyə mimnyə, kɑ́ nə sɔm ta' thə́ lə, da' nə pɔ pyə stam Si tə̌ nə́ sə yap a pɑ́. Pu latə piŋ gɑ wap zhwə pɔ bɔ. Da' nə lɑ wap jɔgo' nə́ mŋwə́ tɔ. Gǒ' yə wap nə jɔ mo a, a pɑ́ dəŋdəŋ pa' go' yə a fɑ bi gɔm mtiŋ cwə yə ě cɔk mo a. A gɔ la' pɑ́ nə mtyɛ̌'dzʉ́ bɔ, a pɔmnəŋ cəŋ vʉ́ wap lə yɔ vʉ̀, pɑ cə́ŋ nə pfʉ, a vʉ̌ piŋ ŋkhʉ wap kʉ. Mgǎmnthɔ bɔ lə bɑwə hwə́ mnɔmlěŋ pyə́ pú yap tsə́ shù nə pú a; ywə pɑ thə́ pú pa' co'fo tʉɔ gɔl a, msə́ map pɑwə hwə́ sə mò. A lə́ bɑ wap ghə mnəŋthə́ pa' mnəŋthə pɑjwǐ a, msuŋ map piŋ bɑwə hwə́ msuŋ nɔmtəma'. Wap lə bɑwə shʉ pa' pú kwa dzə́ mtʉɔ nə́ pú a, gi bap map pɑwə shwə pa' gi mnɔmlěŋ pyə́ wap wə ŋkhʉdʉ gɔ mshʉ̀ a. A bɑ wap ghə mŋkho pa' ŋkho gɔm mtiŋ a, mkuŋ pɑ́ nə́, gʉ' nə dɑ pɔ jɔgo' nə mŋwə tɔ piŋ bɑ nə mŋkho map bɔ. Fo yap bɑ aŋgəle yə́ pú ŋkhe é nə Ebraika gɑ́ Abadon, a piŋ bɑ́ nə Grikia tso tsyə́ pɑ Apolion. Dəŋdzə ghəghʉɔ cyə, yɔ shɑ́ mghəghʉɔ mɑbʉə wə sɔ̌'. Batə aŋgəle nthɔk lə tuŋ nthɛ é: Ju' gi mo fɑ nə mnthǔ' tʉɔ gɔl myə a bɑ nə tsʉ' tó tsəpwɔ', yə a bɑ dzə̌ Si a. A lə bɑwə gɔm bi batə aŋgəle nthɔk yə nthɛ lə́ bɑ́ pu e a gɑ: Kyɛ' pɑ aŋgəle papfʉə pyə a bɑ pú cəŋtə wap dəm shyə́ Efrata a. Pú gɔ sɔ' kyɛ' pɑ aŋgəle bɔ pyə wap bɑ wap nyaptə bɑwə byap pɑ cwə̀, kɑ tyɛ'dzʉ́, kɑ ŋwə́, kɑ gu'dzʉ̌ yə wap gɔ zhwətə́ ta' kam pɔ nə guŋ pɔ awɛ dəŋdəŋ mkam nthá á lə. Dəŋ mshwəshu pɑ kwɔ' mleŋ lə bɑ shu'shǔ' nə́ shu'shǔ' jyə̀ pʉə. Ŋ də yu' də̀ŋ yap. Ŋ də yɔ nə yɔ m nthʉm zhwenyə: Jɔ mnɔmlěŋ pu a pɑ kwɔ' mléŋ; wap lə bɑ wap kwadzə́ shù a pɑ́ mɔk, bɑ mwɔ' pɑpɛ biŋ bɑ sufra. Mthə́ mnɔmlěŋ lə bɑwə hwə mthə́ mnɔmtəma', mɔk pu a dhəmɔk ba sufra pɑwə nthəm shwə pú. A lə́ cyə m nə́ mghəghʉɔ mɔ mɑntha: Mɔk, dhəmɔk ba sufra, tá' kam nə guŋ pɔmnəŋ awɛ dəŋdəŋ mkam ntha pfʉ́tə. Nə́ pa' gʉ' mnɔmlěŋ bɔ bɑ m shwə̌ pú ba m nə mŋkho máp. Nə́ pa' mŋkho map hwə pa' mnɔk a, mthə́ map pɑwə, bi a pɑ́ wap nə baknyə́. Sɔ' m nə́ bvʉ' pɔ pyə wap lə cyətə́ pfʉ̌ nə ghəghʉɔ, wap lə kwyəpnyə́ nə mfa' bú map pɑ́, bɑ gamtə́ pɑ́ Sata, pu a mkətwɔk tʉɔ gɔl, ba yə tʉɔ ŋkhap, ba yə tʉɔ mkwɛ, ba yə mwɔ', ba yə kamywə, myə a tə́ jɔ a, a lə nəŋ bɑ ju', a lə nə giŋ a nə gɔ pɑ m dzə̀. Wap lə kwyəpnyə nə́ nə zhwə pɔ, kɑ nə tsə mkɛ, kɑ ghap kɑ cǔŋ lə́. Ŋ dɑ́ piŋ jɔ mu' aŋgəle nthʉɔtʉɔ fi' fɑ kɛbəŋ ba e kwa mlwa pa' dzə́ a. Mɑ ghu'tə lə bɑ a tsam sə́ é: Sə́ é lə bɑwə hwə pa' nam a, mkwə myə piŋ bɑwə hwə mbakmbak mɔ́k. A lə bɑ e wim mupfʉ̌ ŋwa'nyə pu é. E lə tʉ kwə e yə tʉɔ dəm shyə lɑpʉə, nthʉ yə kwyap dəmcǎ', biŋ shwé tə́ thə́ pa' cwə yə nɔmtəma' shu' a. E lə cwə̌ tə́ shwé po'o, mhɛbəŋ sɔmbʉə ghə pu yu' gi yap. Cwə yə́ mhɛbəŋ sɔmbʉə lə vyətə á, ŋ bɑ gɔ və, ju' mu' gi tiŋnyə kɛbəŋ gɔm bəm gɑ: Kɑ́ ghə mo zhyə́ ŋkhʉɔ mhɛbəŋ sɔmbʉə, o kɑ́ nə̌ŋ bvə̌. Aŋgəle yə ŋ də yɔ e bɑ ě tiŋnyə dəm shyə́ lɑpʉə a piŋ ŋkha' pú e yə tʉɔ kɛbə̀ŋ biŋ ŋkhɔ mkɔ nə mo yə e bvɔk nə gu' nə gu' a, mo yə e lə nyaptə́ kɛbə̀ŋ pu a guŋ tsə́ tsyə a nthʉm o a, mo yə e lə nyaptə́ sicǎ' pu a tsə tsyə a nə́ a, nyaptə́ shyə́ lɑpʉə pu a tsə́ tsyə a nthʉm o a gɑ: Cwə tə́ gɔ piŋ sak pɑ. Da' gɑ tyɛ'dzʉ yə pú gɔ yu' batə aŋgəle sɔmbʉə a, cwə yə ě to' nə tùŋ yə nthɛ a, a pɑ cwə o bɔ nwə cyə́ zhyənwə yə a bɑ yə́ Si a a pəmtə pa' e lə la' gɔm, shyə́ m nə́ mghɛ fa' pyə mghɔm ghɔm Si a. Gi yə ŋ də yu'u a fɑ kɛbəŋ a piŋ gɔmnwə bəm msə gɑ: Ghɔ ŋkwi ŋwa'nyə yə a pu aŋgəle bɑ pu ghyɛ' a, aŋgəle yə a bɑ ě tiŋnyə dəm shyə lɑpʉə ba m dəmcǎ' a. Ŋ dɑ́ gɔ bəŋ aŋgəle, səso e gɑ e hɑ mupfʉ̌ ŋwa'nyə bəm. E ghɔm bəm gɑ: Kɑ̀, pfɑ́! A gɔ ko vam o zə́, da' gɑ́ gɔ tʉm pa' ŋwá' a shwə o. Ŋ dɑ́ kwi mupfʉ̌ ŋwa'nyə pú aŋgəle biŋ pfɑ́. A lə pɑ̌ shwə̌ myə ndʉmtə pa' ŋwá' a, da' gɑ́ shwə́ tə́ pfɑ́, tsə́ vam tsɑ̌ zə́zə́. Pú piŋ gɔm bəm gɑ: O gɔ piŋ ghɔm ghɔm Si nə́ pɔmnəŋ, nə mgùŋ, nə́ mghɔ̀m ba nə mfo jɔmyɔ̌m. A lə pɑ̌ po'o pu hɑ ka' bəm, a pɑwə hwə́ pa' kam ywə yə pɑ fo' cǎ' nə fo' cá' a, biŋ gɔm bəm gɑ: Lusi fo' Dyə Si, ba tsʉ' nə tó tsə pwɔ' ba pɔ pyə wap gamtə e nthʉm o a. Da' gɑ́ sɔ' m nə pə̌ŋ giŋnyə dzʉ́ o taknəŋ tə fo' nə pa' a bɑ pu lé hɑ bi mguŋ pyə wap gɔ sɔ' lɑ mkwə nə̀ŋtə guŋ dɔlɔ̌ nə́ mŋwə́ shwɔppʉə mghappfʉə a. Gɑ gɔ sɔ' piŋ ghɔm bi mkwinthɛ pɑ̌ pɑpʉə gɑ wap ghɔm ghɔm Si, nə mtyɛ'dzʉ́ po nthɔk mkhəpʉə dəm shǎ', nə ghɔm bɑ wap kwadzə́ mko'tə́ pʉ̀ə. A bɑ mthə́ Olivə məbʉə ba mkwɔ' lambù məbʉə myə a nthiŋnyə dzə́ Cyəpɔ dəmcǎ' a. Mo pɑ gɔ paknyə wap, bɑ mɔk gɔ təm shwə̌ pú piŋ khə́ mghɛ bò pap awɛ. Əŋ mo pɑ gɔ paknyə wap bɑ e gɔ pfʉ nthi po'o. Wap ghə tʉ̀ɔ nə jo' kɛbəŋ tə tɔ̌m bəŋ lə́ cʉ́m si nə mtyɛ'dzʉ myə wap gɔ ghɔm ghɔm Si a. Wap ghə tʉ̀ɔ nə́ nə kwyəpnyə́ shyə a cʉ' mcyə ba nə piŋ dɑ nthinthi go' shwɔ dzʉ, dəŋ pa' wap kuŋ a. Da' gɑ́ cwə yə wap gɔ sɔ' miŋ nə kwinthɛ a, nɔ̀m yə e nthəm tsʉ̀m bʉɔ a, lo' wap shù. Gwa wap, gə́ wap pfʉtə. Mpfə́ map gɔ sɔ' nuŋtə dəm sím mtisuŋ gwyə tsʉ' yə pu ŋkhe bupǔ gɑ́ Sodɔm pu Egipto, tsʉ' yə pu lə́ kam Cyəpɔ yap thə́ nə a. Pu gɔ sɔ' təm cəcɑ̌ pɔmnəŋ, nə mgwya, nə mghɔm, nə ghɔm, nə mgùŋ, sɔ' yɔ mpfə́ map nə tyɛ' tá m kam, pu lə nəŋ nthəŋ wap. Pɑ dəmcǎ' gɔ sɔ' pɑ́ ŋwɛnyə nə pu, nwə pɑ buŋ wap, wap pɑ hɑnyə tsə́ cəcɑ̌ pú. Nə pa' mghɔm ghɔm Si bɔ pɑpʉ̌ə bɑ wap lə mɛnyə̀ wap te'. Da' gɑ mtyɛ'dzʉ́ mənthá m kam bɔ gɔ sɔ' cyə́ a ta' zhwenyə vɔk fɑ bi Si ŋkho nə pú, wap lutə si. Kwa' mɑ nə cwɔ̀' ko nə pɔ pyə wap lə bɑwə jɔ wap a. Wap lə́ yu' mu' gì nthʉɔtʉɔ fɑ kɛbəŋ gɔm bi pu gɑ: Po kwɔ' tsɔ'ɔ gɑ. Wap lə kwɔ' kɛbəŋ, nə mlwa, dzə̌ mghɛ bò páp. Cǎ' lə wuŋ shʉ'nyə pɑ cwə o bɔ, ta' kam nə guŋ dəŋdəŋ mkam ghǎm vʉsi, pɔ sha' sɔmbʉə pfʉtə nthʉm ghəghʉɔ bɔ. Bvʉ' pɔ lə pwɔk biŋ gu'tə Si kɛbə̀ŋ. Batə gǒ' yɑpʉə cyə; yɔ, batə gǒ' yɑtá wə́ sɔ̌'. Aŋgəle batə sɔmbʉə lə tuŋ nthɛ e: Pu yu' mgi gwyəgwyə kɛbəŋ a pɑ́ gɔm gɑ: Nəfo dzʉ́ wə́ cwəlɔ bɑ bi Cyəpɔ yɔk ba m bi Kristo e; e gɔ sa' nə mgu' nəgu'. Mghətso shwɔppfʉə mghambʉə pyə wap bɑ́ dəm leŋfo dzə Si a lə vʉ̌tə pfɔppfɔp gamtə Si bɑ gɔm gɑ: Gho' bi Cyəpɔ Si nthʉɔtʉɔ yə e bɑwə, bɑ e lə pɑwə fɑ tə̀ tyɛ' a, nə pa' a bɑ ǒ la'tə tʉɔ o yə gwyə́, biŋ nthʉ́ yu nə sa'. Mguŋguŋ lə yɛ̌lúŋ, da' gɑ lúŋ o nə sɔ'. Yəŋ bɑ̀ cwə nə fyɛ' mpfə́ pɔ, cwə nə hɑ mcwɔ'fa' bi mghɛ fa', mghɔm ghɔm Si, pɔ dɔlɔ̌, ba pɔ pyə wap bwɔk tso tsǔ a, pɔ ŋkho'ŋkho' ba pɔ gwyə́gwyə́, cwə nə sa'tə pɔ pyə wap sa'tə́ dəmcǎ' a. A lə pɑ po'o Dyə̌ Si kɛbəŋ ghyɛ', pú yɔ ŋkwɔp kɔ sɔ' Dyə Si. A pɑ́ po'o mpəpa'bəŋ təm ba mgi, ba mhɛbəŋ; cǎ' nə cʉ'nyə̀ mɑ bəŋ mwé təm. Pu lə yɔ mu' mɑ mtìŋ təm kɛbəŋ: Bɑ mjwǐ, bɑ ě kwa nàm pa' dzə a, mɑŋwə́ pɑ to mkwə e, co' fo pɑ thə e, msɛ shwɔppʉə mgham pɑ nə. E lə́ bɑ tsʉm, bɑwə shwě, bɑ monəŋ ghəm e, bɑwə dəm e. A lə pɑ̌ po'o pu piŋ jɔ shɑ mtiŋ təm kɛbəŋ: A lə́ bɑ́ pəpɛ mɑ nɔk mkwə pfʉə. A lə́ bɑ ě ghə mthə́ sɔmbʉə, biŋ gə nthu' ghǎm. Mco'fo sɔmbʉə lə bɑ nə mthə myə sɔmbʉə. Ŋkho é lə bɑwə ŋkhʉm ta' kam nə msɛ kɛbəŋ dəŋdəŋ mkam nthá ma'tə dəmcǎ' a. Nɔk mkwə pfʉə lə tiŋnyə dzə mjwǐ yə e lə́ bɑwə dzəŋnyə a, ga e nə tsə e mi mú. Mjwǐ bɔ lə tsə ta' mú, mú mbɛ; Mú bɔ nə gɔ sɔ' pɑ lɑ guŋ mguŋ awɛ nə ghɔ khim wap, pɑ lə shɔm mtʉ̌ɔ nə cya wap. Pu lə lɑ̌ mú e bɔ nə kwɔ' m bə̌ŋ Si pu leŋfo e. A lə pɑ̌ po'o mjwǐ bɔ ŋkhʉ gɔ m ghakgo tsʉ́ yə Si lə́ ghə pu nyaptə bi a, po'o gɑ pu kim e tsʉ'u nə mtyɛ'dzʉ po nthɔk mŋkhəpʉə dəm shǎ'. A lə́ pɑ̌ po'o shù tə́m kɛbə̀ŋ: Mikaɛl pu pɑ aŋgəle pyə́ pɑ do' nɔk mkwə pfʉə. Nɔk mkwə pfʉə pu a pɑ aŋgəle pyə́ piŋ bɑ̀ do' e, da' gɑ́ la' wap cyə́ é; wap lə piŋ gə yap tsʉ' thə kɛbəŋ pu lə kwɔk nɔk mkwə pfʉə bɔ ma' sì, mɑ kukù nɔk, nɔk yə pu ŋkhe é gɑ Diablə ba gɑ́ Sata a, mo yə e nwɔ' mnyə bi guŋ dzʉ̀ awɛ. Pu lə kwɔk e ma'si pu a guŋ pɑ aŋgəle pyə́ awɛ. A lə pɑ́ po'o ju' ta' gi kɛbə̀ŋ pɑwə gɔm gɑ: Yəŋ gɑ́ bɑ cwə̀ ywə vɔk cwə̀ tʉ́ɔ ba nə sa' Si yɔk pɑ, ba tʉɔ Kristo e, nə pa' e kwɔk nthɛmnɛ mfɑ pɔk pɑ. Ma' e si Mo yə́ e lə nthɛmnɛ map dzə̌ Si mɔkcʉ́ ba mtsʉ̌'. Tə́ wap lě dó' shyə e shyə m nə́ mcyə mú jʉ̀jʉ̀ ba m nə ghɔm myə wap ŋkwinthɛ̌ nə́ gɑ: Wap lě tə kuŋ vɔk tsap tə la' wap pwɔk vʉ́. A po'o tə: Kɛbəŋ ŋwɛnyə ba wɔ pyə mla' mɔ bɑ nthʉm o a! Ghəghʉɔ bi po: cǎ' ba shyə̀ lɑpʉə. Nə pa' Sata bɑ e fi' sɔ' m bəŋ po pu a cɔk yɛ̌lúŋ nə pa' bɑ e zhyə gɑ yə cwə wuɔk. Pu kwɔk nɔk mkwə pfʉə tə́ ma' e si, e cʉm jʉ̌m mɑmjwi yə́ e lə tsə̌ mú mbɛ a, bɑ jəŋ é. Da' gɑ pu hɑ mbáp gwighə́m mɑbʉə bi mjwǐ bɔ, gɑ e nə ntha gɔ ghakgo, tsʉ' yə a bɑ pú yap bi e, gɑ e cwə tsʉ'u, pu khim e, tə gʉə sʉəsʉə nə nɔk, nə cwə, ba m nə mcwə, ba nə ta' kam nə cwə dəŋdəŋ mkam bʉə. A lə pɑ̌ po' nɔk wyɛ́'nyə pa' ta' shyə́ gwyə a jʉ̌m mɑmjwi po'o gɑ e fa nthʉm o. Da' gɑ cǎ' ghyɛ' shwə̌ e mi shyə yə nɔk mkwə pfʉə lə wyɛ́'nyə a. Nthʉm cɔk yɛluŋ e, nɔk mkwə pfʉə lə té shù nə bvʉ' ŋkhənyə mjwǐ bɔ: Pɔ pyə́ wap giŋ nə mcò' Si ba nə pa' Yeso gɔm a. A lə pɑ̌ po'o e cwə dəm mkwa'lɛ myə a nthəm shyə lɑpʉə a. A lə pɑ̌ po'o ŋ jɔ nɔm bɑ ě ghə mnthu' ghǎm, ba mthə́ sɔmbʉə kwɔ́' fɑ shyə lɑpʉə, mco'fò ghǎm lə bɑ nə mnthu' myə biŋ gə tsó mcap nə mthə́ myə. Nɔm bɔ yə ŋ də yɔ e a lə bɑwə hwənyə nɔmgwi, mkwə myə pɑwə shwə́ pa' mkwə́ bvʉ gǒ a, shwə é pɑwə shwə́ pa' shwə nɔmtəma' a. Nɔk mkwə pfʉə lə piŋ hɑ gʉ' e bi e, ba leŋfò e, biŋ gə tʉ̀ɔ gwyə. Mu' thə́ e lə bɑ pa' pu po' fiŋ vʉ̌ nə a, da' gɑ́ pu yɛ̀ fiŋ vʉ̌ bɔ. A lə púŋ pɑ dəmcǎ' wap támjʉm nɔm bɔ awɛ. Pu lə ghamtə nɔk mkwə pfʉə nə pa' e lə hɑ tʉɔ bi nɔm bɔ a, biŋ gamtə nɔm bɔ gɔm gɑ: Wɑ̌ bɑ́ pa' nɔm a? Bi a pɑ́ wɑ̌ piŋ do' e shù? Pu lə hɑ ta' shwə bi e nə́ nə gɔm ghɔm ŋa'nɑ́ ba mcap, biŋ hɑ tʉɔ bi e nə nə fa' nə mŋwə shwɔppʉə mghappfʉə. E lə ŋa' shwə é shap Si, shap tso tsyə ba nthap e ba pɔ pyə tsʉ' shwə́ yap bɑ kɛbəŋ a. Pu lə hɑ̌ gɑ́ e lo' pɔ dɔlɔ̌ shù gwatə wap, biŋ hɑ tʉɔ bi e nə guŋ gwya awɛ, guŋ pɔ awɛ, guŋ mghɔm awɛ ba guŋ mgùŋ awɛ. Guŋ pɔ pyə́ wap shwə́ demcǎ', guŋ po pyə a bɑ pu lě tə la' bvə mtso map nthʉm ŋwa'nyə vɔk mú jʉ̀jʉ̀ yə́ pu lə́ lɑ́ e nuŋpwɔ' a, bvə tə́ cwə nə nyaptə dzʉ̌ a, gɔ sɔ' pɑ ghamtə́ nɔ̀m bɔ. Mo yə e ghə mtəŋ a yu': Mo yə a nyəŋ gɑ é gɔ sɔ' pɑ ŋkwɔ a, gɔ sɔ' ghɔ dyə mkwɔ. Mo yə a nyəŋ gɑ e gɔ sɔ' pfʉ́ vʉ́ mnyə̌dwɔp a, gɔ sɔ' pfʉ́ vʉ́ mnyə̌dwɔp. Yəŋ bɑ cwə nə kaktʉɔ, cwə piŋnthʉm pɔ dɔlɔ̌. A lə pɑ̌ po'o biŋ jɔ mu' nɔm kwɔ' fɑ ca'. E lə́ bɑ ě ghə nthu' məbʉə pa' mú jʉ̀jʉ̀ a, da' gɑ bɑwə gɔm m pa' nɔk mkwə pfʉə a. Guŋ tʉɔ dəŋdzə̀ nɔm lə bɑ bi e, e pɑwə nə fa' dzə e. E gə gùŋ dəmcǎ' awɛ pu a pɔ pyə́ pɑ́ gamtə dəŋdzə̀ nɔm yə pu lə yɛ̀ fiŋ vʉ e a. E gə msya gwyə́gwyə́ tə gə mɔk fi' fɑ kɛbəŋ sɔ' dəmcǎ' tə guŋ pɔ awɛ yɔ́. E dɑ msya bɔ myə a bɑ̀ pu piŋ gɑ́ e ghə dzə nɔm a, nə nwɔ'mnyə bi pɑ dəmcǎ', wap yap jʉ̀m e: E nthənyə wap, wap kə́m ywə́ a hwə́ nɔm bɔ yə fiŋ nyədwɔp bɑ nə e tə e yɑ pɑwə tə wuŋ pfʉ́ a bɑ nə hɑ mku' bi e. Pu lə́ hɑ gɑ́ e ghə fo' nɔm bɔ ŋaknyə tə bi a pɑ̀ e ghɔm ba nwə̀, biŋ gə ba pɔ pyə wap kəŋnyə nə́ ghamtə fo' nɔm bɔ a pfʉ́tə. E jap mtiŋ nə́ pú tʉ̀ɔ ba nə́ sə guŋ pɔ̀ awɛ: Pɔ ŋkho'ŋkho' ba pɔ gwyə́gwyə́, mghɛ ywə́ ba mpə̌ŋ, pɑ tə pɑ mkwɔ ba mkwɔ. Tə bi a pɑ mo pɑ tə ghə mtiŋ nɔm bɔ, ba tsǒ nɔm bɔ kɑ dəŋ tso tsyə́ lɑ bɑ bi a pɑ e lə yo ywə kɑ nə fiŋ ywə lɑ. Mo yə ě ghə zhyənwə a tútə dəŋ nɔm yəŋ bɑ cwə nə́ zhyə nə tya nwə: Nə pa' a bɑ dəŋ mò: Dəŋ e pɑ po shwɔp nthɔk m po nthɔk mŋkhə nthɔk. Ŋ də pǐŋ jɔ: Mú jʉ̀jʉ̀ pɑ́ bɑ ě tiŋnyə dəm kuŋ Sion pu a pɔ sha' shwɔppfʉə po pfʉə m ŋkhə, bɑ pu və tso tsyə́ ba tsyə́ tap e nə mtsé map. Ŋ də pǐŋ ju' gi mo fɑ kɛbəŋ, pa' gì shyə lɑpʉə á, pa' nə vyə́ hɛbəŋ gwyə́ a; gi bɔ yə ŋ də bɑwə ju' a lə bɑwə hwə́ mzhwɔp pɑ pu' lə́ŋ. Wap pɑwə bu' lə́ŋ. Wap lə bɑwə jwɔp zhwɔpshyə sé dzə̌ leŋfo, dzə̌ mnɔm papfʉ̀ə pu a mghətso. Sɔmmo la tə́ ku' nə zhi'tə zhwɔpshyə bɔ tə ně da' pɔ sha' shwɔppfʉə mpo pfʉə m ŋkhə, pɔ pyə a bɑ pú lé shu' wap dəmcǎ' a. A bɑ wap ka lɑ pɑjwǐ bviŋ nɑ tsap nə pa' a bɑ wap lam jyə mjwǐ. Wap jap pɑ jʉ̌m mǔ jʉ̀jʉ̀ nə guŋ mtsʉ' awɛ myə e gɔ nə a. A bɑ pu lě shu' wap cəcɑ̌ pɔmnəŋ pa' dəŋdzə̀ nthɔ̌m bi Si a ba m bi mú jʉ̀jʉ̀. Wap bɑ pɔ tə bya, bɑ sɔm cwanwə lǎm nthəm shwə̌ pú. Ŋ də piŋ jɔ mu' aŋgəle e pɑwə nthá tə́ thə́. Ta' mcuŋ pɑpuŋ mama lə bɑ bi e e pɑwə siŋ bi pɔ pyə́ wap bɑ dəmcá' a, bi guŋ mgùŋ awɛ, bi guŋ mgwya awɛ, bi guŋ mghɔm awɛ, ba bi guŋ pɔ awɛ. E lə bɑwə gɔm nə gi nthʉɔtʉɔ gɑ: Po pwɔk Si, gu'tə e nə pa' cwə fyɛ' e bɑ a sɔ' a. Po ghamtə gɛ nyaptə kɛbəŋ pu cǎ', ba shyə lɑpʉə pu a msa'sǐ shyə. Mu' aŋgəle, batə yɑpʉə pɑ jʉ̀m é bɑwə gɔm gɑ: Ě vʉsi, e vʉsi Babilon gwyə́, yʉ́ yə e kɑ dɑ cɔk nwə ghap e nwɔ́k guŋ mgùŋ awɛ pa' mlu' a. Mu' aŋgəle batə yɑtá lɑ bɑ jʉm e gɔm nə gi nthʉɔtʉɔ gɑ: Mo ghamtə nɔm pu a fo' e, jap mtiŋ myə nə tsé tsyə kɑ nə pu e lə. Bɑ ba yú yə́ gɔ sɔ' nwə nə cɔk yɛluŋ si pa' mlu' a, mlu' bɑ pu nyəŋ tə ŋi'nyə nthʉm nthu' yɛ̌luŋ, e piŋ jɔ mɛnyə̀ nthʉ́m mɔk sufra dzə̌ pɑ aŋgəle dɔlɔ̌ ba dzə̌ mú jʉ̀jʉ̀. Dhəmɔk mɛnyə yap ŋkwɔ' mgu' nəgu', wap lə pɑ́ gə hwitə̀ mɔkcʉ̌ ba mtsʉ̌', pɔ bɔ pyə wap gamtə́ nɔm pu fo' nɔm bɔ a, ba mo yə é ghə mtiŋ nɔm bɔ nə e a. Yə̌ŋ bɑ́ cwə yə́ pɔ pyə wap nthɔm mco' Si ba piŋnthʉm nə Yeso a gɔ kaktʉɔ a. Ŋ də pǐŋ ju' mu' gì kɛbəŋ ghɔm gɑ: Və gɑ: Tə fɑ cwəlɔ mpuŋtsé bɑ pɔ pyə wáp mpfʉ́ m nə Cyəpɔ a! Zhwenyə ghɔm gɑ: əŋ, wap hwitə́ nə mfa' map, nə pa' ywə yə wap lə fa' a jap jʉ̀m pu. Ŋ də pǐŋ jɔ: Jɔ mlwa fə́fə́, mo hwə pa' mú mo a pɑ bɑ ě cwə dəm o. A lə bɑ e su co'fo mtʉɔ gɔl thə e biŋ gwim nyə shɔkcɔ̌k nə shwa msɛ pu e. Mu' aŋgəle lə piŋ nthəm Dyə Si biŋ gɔm tɑ thə́ bi mo yə e lə bɑ dəm mlwa a gɑ: Nɔk nyə nə shwa msɛ́, shwa msɛ; cwə nə lɑ tsə sɔ'; tsə bɑ ǎ kwyə dəmcǎ'. A lə pɑ̌ po'o mo yə e lə bɑ́ dəm mlwa a ma' nyə nə shwa msɛ́ dəmcǎ', pu lɑ tsə dəmcǎ'. Mu' aŋgəle lə piŋ nthəm Dyə Si kɛbəŋ, e lə bɑ ba yʉ́ yə́ wim nyə shɔkcɔ̌k nə shwa gəfɑ pú e. Mu' aŋgəle lə piŋ nthəm yə tsʉ' nə tó tsə pwɔ'. A lə bɑ e ghə tʉ̀ɔ nə mɔk. E lə piŋ shwe tə thə́ bi mo yə a lə bɑ ě wim nyə shɔkcɔ̌k nə shwa msɛ́ pu e a gɑ: Ma' nyə shɔkcɔ̌k o nə shwa msɛ́ nə ja'tə mcɛ mbɛ mthə́ mlu' dəmcǎ', nə pa' bɛ tsyə tsə́ kwyə. A lə pɑ̌ po'o, aŋgəle ma' nyə e dəmcǎ' nə shwa mcɛ bɛ mthə mlu' dəmcǎ', biŋ ma' nthʉm mɑ kɔp yɛ̌luŋ Si. Pú lə tě kɔp bɔ nthʉm gùŋ, mcyə piŋ nthəm nthʉm kɔp bɔ bʉɔ tə ŋkhəm nə nthə tʉ́ɔ shwə nɔmlěŋ, biŋ sɛ nə mstadə sha' mŋkhənthɔk. Ŋ də piŋ jɔ mu' mɑ mtiŋ syasya kɛbəŋ: Jɔ pɑ aŋgəle sɔmbʉə bɑ wap wim mghəghʉɔ sɔmbʉə mjʉm ghəghʉɔ, nə pa' yɛ̌lúŋ Si shyə m nə́ pú bəmtə́. Ŋ də piŋ jɔ ywə pa' shyə́ lɑpʉə bɑ a sɔm pa' mwe bəŋ a, bɑ mɔk ŋi'nyə nə. Pɑ cyə shù nə nɔm, ba nə fó' e, ba nə́ də̀ŋ tso tsyə lə bɑ wap tiŋnyə dəm shyə lɑpʉə bɔ, bɑ wap tɔm mləŋ msʉ' Si. Wap lə bɑwə jwɔp shyə́ Mosɛ, gɛ fà' Si, ba zhwɔp shyə mú jʉ̀jʉ̀ gɑ: Mfa' mǔ bɑ a ghu' biŋ buŋ m Cyəpɔ Si Nthʉɔtʉɔ. Mjyə mǔ bɑ dəŋdəŋ, bɑ nyənyɔ. Fo mgùŋ mgùŋ pɑ wɑ cyətə́ pwɔk biŋ gu'tə tso tsǔ Cyəpɔ? Nə pa' da' wə nə́ bɑ dɔlɔ̌. Guŋ mgùŋ awɛ gɔ sɔ' sɔ' piŋ kam mkwitə dzə o. Nə pa' a bɑ pu yɔ yu nə ya' shɛ́. Ŋ də pǐŋ jɔ Dyə Si yə nthap nə kwinthɛ lə bɑ nthʉm o a ghyɛ' kɛbəŋ, aŋgəle sɔmbʉə pyə wap lə bɑ wap wim mghəghʉɔ sɔmbʉə a təm Dyə Si, bɑ wap kwa mdzə́ pɑpùŋ, dzə́ dəŋnyələŋnyə, biŋ jwe tap tʉɔ gɔl vʉ' pú. Mu' ta' nə mnɔm papfʉ̀ə hɑ mnthu' gɔl sɔmbʉə bi pɑ aŋgəle sɔmbʉə, bɑ ǎ lo yɛluŋ Si yə e shwə mgu'nəgu' a. A lə pɑ̌ po' a cyə m nə ghu'tə Si ba m nə tʉɔ e, dhəmɔk lo Dyə Si. A lə pɑ̌ po'o sɔmmo lə ku' nə ko Dyə Si tə ŋkhəm cwə yə ghəghʉɔ pɑ aŋgəle sɔmbʉə lə pəmtə a. Ŋ də́ yu' mu' mɑ gi mo nthʉm Dyə Si pɑwə gɔm bi pɑ aŋgəle sɔmbʉə gɑ: Po ghɔ pfyə mnthu' yɛ̌luŋ Si sɔmbʉə dəmcǎ'. Dəŋdzə e lə ghɔ biŋ pfyə́ yə́ nthu' dəmcǎ': Ta' shwə ywə́ cwəpuŋ tɔm nə pɔ pyə wap lə bɑ wap ghə mtiŋ nɔm bɔ nə pu biŋ bɑwə gamtə fo' e a. Batə yɑpʉə lə́ pfyə yə nthu' dəm shyə lɑpʉə shyə lɑpʉə cʉ' pa' mcyə́ pfə mo a, guŋ tsə awɛ tsyə a lə bɑ nthʉm o bɑ jwenyə a pfʉtə. Batə yɑtá lə́ pfyə yə nthu' dəm mta'mta' shyə pu a msa'sǐ shyə. A pʉɔ shʉ' mcyə. Biŋ ju' aŋgəle mshyə ghɔm gɑ: O bɑ dəŋdəŋ, wə yə o bɑ, wə yə o lə bɑ, wə Dɔlɔ̌ nə pa' o gə po'o pɑ́ nwə dəŋdəŋ o. Nə pa' wap lə pfyə mcyə pɔ dɔlɔ̌ ba mghɔm ghɔm Si o piŋ hɑ pɑ mcyə gɑ wap nwə́. A ywə yə a ku' nə pú a. Ŋ də pǐŋ ju' tsʉ' tó tsə pwɔ' pɑwə gɔm gɑ: Əŋ m Cyəpɔ yu nə fyɛ' bɑ dəŋdəŋ bɑ nyənyɔ lo nə́. Batə aŋgəle yapfʉə lə pfyə́ yə nthu' nə nam, a hɑ bi nam gɑ e lɑ mɔk e ntho pɔmnəŋ. Tsʉ hwehwě piŋ ntho pɔmnəŋ: Wap captə tso Si yə a bɑ ě ghə tʉ̀ɔ nə mghəghʉɔ a la' wap pʉɔtʉm tsap gu'tə́ e pɑ́. Batə aŋgəle yɑtɔ lə pfyə̌ nthu' e nə léŋfo nɔ̀m, nəfo tsyə́ ko nthʉm jʉ́m. Pɔmnəŋ ləm mtʉm map nthʉm go'. A cyə m nə go' yap pu a mshwətsə map wap cap Si kɛbəŋ, da' gɑ la' wap kwyəpnyə nə mfa' map. Batə aŋgəle nthɔk lə pfyə yə nthu' nə ta' shyə Efrata. Shyə yə́m nə́ nyaptə məjyə bi mfo pyə wap fɑ m ghə̌ŋ nthəmnam a. Ŋ də yɔ mzhwenyə cwəpuŋ mɑntha pa' mtɔ̀m a tə́m shwə̌ nɔk mkwə pfʉə, ba m shwə̌ nɔ̀m ba m shwə̌ mghɔm ghɔm Si cwanwə. A bɑ mzhwenyə Sata. Wap nthe msya, biŋ gɔ jɔ mfomfo awɛ nthʉm dzʉ shu'tə nə shù tyɛ'dzʉ́ gwyə Si Nthʉɔtʉɔ. Yɔ gɑ̌ wə sɔ' pa' shǔŋ a. Buŋtsě bɑ mo yə e di tə ti, bɑ dwɔ' mdzə myə po'o gɑ e kɑ sɔ' gɔ tə kwa dzə, pu yɔ kuso é a. E shu'tə wap nə tsʉ' yə́ pu ŋkhe nə Ebraika gɑ: Harmagədon. Batə aŋgəle sɔmbʉə lə pfyə̌ yə nthu' thə́. Mu' gi nthʉɔtʉɔ fɑ Dyə Si gɔm gɑ: A ku'! A pɑ po'o mpəpa'bə̀ŋ təm, ba mgì pɔmnəŋ pu a mhɛbə̀ŋ ba mu' nthi cǎ' nə cu'nyə yə a la m bɑ tə fɑ pa' mo pɑ̌ dəmcǎ' a. Tisuŋ gwyə po' mkam ntha ba mtisuŋ nə́ mguŋ vʉtəsi. A pɑ́ po'o Si kamtə Babilon gwyə, hɑ nthǔ' yə yɛ̌lúŋ e bɑ nthʉm o sə a bi e. Guŋ mgùŋ dəm shyə awɛ lə kʉ, mkǔŋgó simnyə. Bakbak mwé lə fɑ̌ kɛbəŋ shʉmtə́ dəm pɔmnəŋ pa' mwɔ' a, pɔmnəŋ pɑ shap Si shyə́ m nə go' mwe bɔ, nə pa' gǒ' bɔ lə bɑwə jɛ́ te' o. Mu' ta' nə pɑ aŋgəle sɔmbʉə pyə wap lə bɑ wap wim mnthu' sɔmbʉə lə fʉ' nɑ e sɔ' gɔm bəm gɑ: Sɔ̌' gɑ̌ gɔ la'tə nə fyɛ' mɑmjwi ghap gwyə́ yə e shwə́ kəŋ shyə lɑpʉə a. Nə pa' wap pu a mfo dəmcǎ' ghə ghap, pɑ dəmcǎ' pam mlu' ghap bɔ̌. A lə pɑ̌ po'o e kwà á nthʉm zhwenyə nə́ gɔ ghakgo. Ŋ jɔ mu' mjwǐ bɑ e cwə́ dəm nɔm dəŋnyələŋnyə, bɑ mtso nə shaptə Si pfɔptə e, bɑ e piŋ gə mthə́ myə sɔmbʉə biŋ gə mnthu' ghǎm. Mjwǐ bɔ lə bɑ e kwa dzə́ nə̌m, dzə dəŋnyələŋnyə, bɑwə dəŋnyə pa' tʉɔ gɔl, pa' mwɔ dəŋnyələŋnyə a, ba tsə́dzə́ tʉɔ̀dəŋ. A lə́ bɑ e wim nthu' gɔl pu e bɑ bɔkbɔ́k nwə lo nthʉm o; mviŋ nwə ghap. Mu' tso tsyə a cyə nə yu' nə zhyənwə mo a lə bɑ pu və̀ nə tse tsyə́ gɑ: Babilon gwyə́ ma mghəghap pu a mviŋ ghap dəmcǎ'; A lə pɑ̌ po'o biŋ jɔ mjwǐ bɑ e pam mcyə pɔ dɔlɔ̌ pu a myə mkwinthɛ, ŋ də nə yɔ é nwə vɑ a. A pɑ po'o aŋgəle ghɔm bəm gɑ: Nwə kɑ́ o pwɔk po'o? Gɑ̌ gɔ siŋ o nwə cyə zhyənwə nə mjwǐ ba nə nɔm mthə́ sɔmbʉə pu a mnthu' ghǎm myə́. Nɔm yə o jɔ e lə bɑwə́ da' gɑ́ e tə́ jɑ wə pɑ́. E gɔ ŋkwɔ' fɑ tsʉ̀m ghɔ nə pi. Nwə cyə́ pɑ dəmcǎ' pyə a bɑ pu lě tə́ və mtso map nthʉm ŋwa'nyə vɔk tə fɑ cwə nə nyap dzʉ̌ a, nə yɔ nɔm, nə pa' e lə bɑ́, la' e piŋ bɑwə da'gɑ bɑ gɔ piŋ sɔ' a. Yə̌ŋ bɑ́ cwə nə ghə zhyə̌nwə yə fʉ́ da'tə a: Mthə́ sɔmbʉə ba mkuŋ sɔmbʉə myə mjwǐ bɔ shwə́ nə a. A biŋ bɑ́ ba mfo sɔmbʉə. Pyə pɑtɔ cəcɑ̌ pu bɑ wap vʉtə si, batə nthɔk yɑwə, sa', batə sɔmbʉə yɑ tə wuŋ sɔ̌'. Da' gɑ́ e gɔ cwə sɔ' cwə pɑ́ muywə. Nɔm yə e lə́ bɑwə, e tə piŋ jɑwə́ a pɑ́ piŋ bɑ pɑ́ mu' fo bɑtə hɔ̌m. E bɑ nə pɔ sɔmbʉə bɑwə gɔ a m nə pipǐ. Mthu' gham myə o jɔ a, a bɑ mfo ghǎm pyə a bɑ wap ka wuŋ ŋkwi nəfo a; da' gɑ́ pu a nɔm gɔ pəmtə sa' nə ta' nàm. Nə pa' wap bɑwə shəŋ pɑ́ ta' ywə: Nə tamtə gʉ' yap nə yə nɔm, po'o gɑ wap lo' mú jʉjʉ shù, da' gɑ mu jʉjʉ cyə wap, nə pa' e bɑ Cyəpɔ pɑ cyəpɔ. Fo mfomfo. Pu a pɔ pyə pu lě ŋkhe wap a, ba pɔ pyə pu le shwɔ' wap a, ba pɔ nyənyɔ gɔ sɔ' cyə́ yap shù. E lə pǐŋ gɔm bəm gɑ: Mshyə myə o jɔ́ tsʉ' yə mjwǐ ghap shwə́ nə a, a bɑ̀ pɔmnəŋ, du pɔ, mgùŋ pu a mghɔ̀m. Mnthu' gham myə o jɔ a, ba nɔm gɔ sɔ' pɑ pɔ mjwǐ ghap, tak e do e, tə dzə nə e. Wap gɔ sɔ' pfɑ bap e, to e mɔk. Nə pa' bɑ Si nyəŋ nthʉm tʉ́m pu gɑ wap ghə ywə yə e jap, gɑ a gɔ pɑ a, guŋ ya awɛ: lɑ nəfo tsap nə fa' bi nɔm tə́ kə́m tyɛ'dzʉ yə mghɔm Si pəmtə a. Mjwǐ yə o jɔ e a, a pɑ tisuŋ gwyə yə a sa' mfomfo dəmcǎ' a. Ŋ də piŋ jɔ mu' ta' aŋgəle fi' fɑ kɛbəŋ. A lə bɑ e ghə kwa' tʉɔ gwyə, ghu'tə e piŋ bɑwə ŋkhyɛ' dəmcǎ'. E lə cwé tə thə́ gɑ: Babilon vʉ̀, Babilon vʉ̀ Babilon gwyə. E bɑ e cʉ' tsʉ' cwə̌ msata tsʉ' cwə̌ mzhwenyə cwəpuŋ, tsʉ' cwə́ msəŋ mviŋ, msəŋ cwəpùŋ. Nə pa' a bɑ ě hɑ mlu' yɛlúŋ shɔkcɔ̌k ghap bi mgùŋ. A bɑ pu a fo dəmcǎ' ghə ghap. Pɑ tɛmtɔ dəmcǎ' lɑ gʉ' potsə tsyə ji. Ŋ də pǐŋ ju' mu' gì a pɑ́ kɛbəŋ gɔm gɑ: Po tə́m nthʉm tisuŋ yəŋ m pɔ pɑ̀, bwɔk gɑ po kɑ ko nə mhɔnwə map, a go' yə ǎ wə gɔ sɔ' nə pú a sɔ' ŋkho ba m nə́ po yɔ. Nə pa' mhɔnwə myə cwɔptə tə́ ŋkhəm kɛbəŋ, tə Si kamtə mnwə tə tiŋnyə myə. Po lɑ pɑ ŋkhap e nùŋ ŋkhap bi e, po pa' ywə yə e lə ghə a bi e mcʉm bʉə. Nthʉm nthú' yə e lə nyəŋ mlu' myə́ nə a, po nyəŋ nə mcʉm bʉə. Dəŋ yə pu lə ghu'tə e pu a pa' pu lə nə ŋkhuŋ é a, a dəŋ po'o tə́ pu gɔ hɑ ghəghʉɔ bi e pu a shyə́tsə́. Nə pa' e bɑwə gɔm nthʉ́m tʉ́m e gɑ: Gɑ̌ wə shwə tsɑ̌ pa' mɑfo a, ŋ də piŋ bɑ tsɑ̌ npfɔk, bi a pɑ̀ ŋ də la' dɔ. A po'o tə́ guŋ gǒ' awɛ yə́ pu jap bi a gɔ sɔ́' sɔ' nə e pɑ nə́ ta' tyɛ'dzʉ́. Gǒ' bɔ bɑ vʉ, nə lɔ̀, jikǔ', a ba mɔk piŋ ŋkhə́ é. Nə pa Cyəpɔ Si yə e fyɛ' e a bɑ Si nthʉɔtʉɔ. A pɑ po'o mfo pyə pu a pu lə gə ghap a nə yɔ pa' mɔk ŋkhə́ e a dɔ̌, bɑ dzɔp nɑ tsap. Wap gɔ sɔ' pɑ pwɔk nə yɔgǒ' pa' yʉ a tiŋnyə gʉ́ə sʉəsʉə pɑ ghɔm gɑ: Ghəghʉɔ! Ghəghʉɔ! Wə tisuŋ gwyə, Babilon tisuŋ nthʉɔtʉɔ a yɑ́ bɑ da' ta' nam ku' nə nə fyɛ' o. A pɑ tɛmtɔ dəmcǎ' pɑ dɔ́ tə́ dəŋvʉ́ nə pa' sɔmmo tə́ yɑwə́ jo dù tsə mtɔ tsap pɑ́, du tsə mtɔ tʉɔ gɔl ba tʉ̌ɔ ŋkhap, mwɔ' tʉɔdəŋ ba mtsə́dzə́, dzə́ nə̌m pu a dzə dap cwəcwə, ba dap dəŋnyələŋnyə. Ŋkwyə́ damnyəlamnyə ba tsə́ msuŋ só, ŋkwyə́ tʉɔdəŋ, mtʉ̌ɔ kwɛ ba mwɔ' mkwyəŋ. Tsə və̀ pu a jap pɑpuŋ, mwɑ́ damnyəlamnyə pu a mirta ba phə̀ nthoto; mlu', mwɑ̌, msɛ nthinthi, mná' pu a mjʉ̀jʉ̀, ba mlěŋ pu a mkalɛk. Mkwɔ pu a mpù'. Nthɔ̌m mthə myə tʉm tsǔ shəŋ a kʉ̌ o gɔ gʉə sʉəsʉə, o pi guŋ mzhwimzhwi pu a tsə dəŋnyələŋnyə. Pu tə gɔ la'tə kwi' yɔ ma pɑ́. Pɑ tɛmtɔ pyə e lə lɑ mtɔ myə gə wap zhi a gɔ sɔ' pɑ pwɔk go' e, tiŋnyə tə gʉə sʉəsʉə pɑ ghɔm m̀ nthʉ̌m lɔ pu a vʉ̌ gɑ: Ghəghʉɔ! Ghəghʉɔ! Tisuŋ gwyə wə yə a lə bɑ ǒ kwa dzə dap nthʉɔ dzə nə̌m, pəpɛ dzə́ dəŋnyələŋnyə, a pɑwə dəŋnyə pa' tʉɔ gɔl a, mwɔ' tʉɔdəŋ pu a mtsə́dzə́. Da' ta' nam nə ku' nə nə simnyə guŋ dəŋ fʉ̀' yə̌ŋ! A pǐŋ bɑ po'o, guŋ pɑ fəŋ kənu' awɛ, guŋ pɔ pyə wap bɑ dəm shyə́ giŋnyə tsʉ'u a, guŋ mghɛ fa' nthʉm kənu' pu a guŋ pɔ awɛ pyə wap bvɔk yap pɑ nə shyə lɑpʉə a lɑ nə yɔ dhəmɔk yə a lə bɑwə ŋkhə́ e a, nthiŋnyə gʉə sʉəsʉə, ba shwé gɔm gɑ: Yá tisuŋ lə bɑ pa' tisuŋ gwyə a? Wap lə cǐ' vɔp thə pú, shwe, nthe shyətsə́ dɔ vʉ́ bɑ gɔm gɑ: Ghəghʉɔ! Ghəghʉɔ! Tisuŋ gwyə yə tsə fʉ' tsyə lə ghə guŋ pɔ pyə wap gə mkənu' dəm shyə lɑpʉə zhi a, da' ta' nam nə ku' nə nə simnyə e awɛ. Ŋwɛnyə́ pa' ǎ sa'tə a mkɛbəŋ! Ba wɔ yɔ pɔ dɔlɔ̌, mghɛ nthəm ba mghɔ́m ghɔm Si ŋwɛnyə́ nə pa' Si nə fyɛ' e, bhəkam yɔ pɑpúŋ! A lə pɑ̌ po'o mu' ta' aŋgəle nthʉɔtʉɔ kwa mu' gwɔ' pa' gwɔ' msɛ a ma' shyə nə ma' gɔm gɑ: Pu gɔ sɔ' ma' Babilon shyə́ pɑ́ po'o, a tisuŋ gwyə. Pu tə́ gɔ sɔ' piŋ yɔ e pɑ. Pu tə gɔ sɔ' piŋ yu' mzhwɔpshyə pɑ pu' lə́ŋ pu a mghɛ zhwɔp, pɑ́ túŋ dúŋ pu a pɑ tuŋ nthɛ ywə o pɑ̀. Sɔm gɛ və̀ nə sɔm nthi və tə́ gɔ sɔ' pɑ ywə́ o pɑ. Pu lə piŋ ju' gi lə̀ŋ msɛ ywə́ o. Ŋkha' lambu tə́ gɔ sɔ' piŋ kyɛ' ywə o pɑ. Pu tə gɔ sɔ' piŋ yu' gi tá jwigʉɔ pu jwigʉɔ ywə o pɑ, nə pa' pɑ tɛ mtɔ pǔ lə́ bɑ pɔ gwyə́gwyə́ dəmcǎ', bɑ tsə kɛ tsǔ lě fʉ guŋ mgùŋ awɛ, pú piŋ jɔ mcyə́ mghɔ́m ghɔm Si, mcyə́ pɔ dɔlɔ̌ ba myə pɔ pyə pu lə zhwətə́ wap dəmcǎ' ywə́ o a. Ŋ də pǐŋ ju' kunyə̀ pa' kunyə̀ dú pɔ a, a pɑ́ kɛbəŋ gɔm gɑ: Aleluya! Ywə vɔk, ghu'tə, tʉ̀ɔ bɑ́ m bi Si yɔk pɑ̀. Nə pa' yə́ nə fyɛ' bɑ nyənyɔ, bɑ dəŋdəŋ. A bɑ ě fyɛ' mɑmjwi ghap yə e lə dɑ nwə ghap e fʉ́tə dəmcǎ', ba' bò mcyə mghɛ fa' pyə́ nə e. Wap lə pǐŋ ŋkwi' gɔm msə́ gɑ: Aleluya! Dhəmɔk e ŋkwɔ' nə mgu' nə gu'. Mghətsó shwɔppfʉə mgham bʉə́ pu a mnɔm papfʉə lə́ kam mkwi'tə map si, gamtə́ Si yə e bɑ dəm leŋfo a gɔm gɑ: Amɛn. Aleluya! A lə pɑ̌ po'o mu' gi təm nə leŋfo bɑ gɔm gɑ: Po gho'tə Si yɔk pɑ̀, guŋ yɔ awɛ mghɛ fa' pyə́, wɔ pyə́ pǒ bwɔk e a, pɔ ŋkho'ŋkho' ba pɔ gwyə́gwyə́. Ŋ də piŋ ju' kunyə̀ pa' kunyə du pɔ a, pa' kunyə shyə́ lɑpʉə, ba pa' hɛbəŋ gwyə́ a, wap pɑwə gɔm gɑ: Aleluya! Nə pa' Cyəpɔ Si Nthʉɔtʉɔ yɔk pɑ̀ bɑ ě la'tə yə nə sa'dzʉ̌. Pɑ ŋwɛnyə, pɑ pɑ́ nthʉm ŋwɛnyə̀ biŋ gu'tə́ e, nə pa' yə̌ŋ bɑ̀ la'nwə mú jʉ̀jʉ̀. Jwigʉɔ e bɑ ě kwìŋ, a bɑ pu hɑ dzə́ dap dəŋnyələŋnyə gɑ e kwa nə e, dzə́ bɔ pɑ mfa' dəŋdəŋ pɔ dɔlɔ̌. Mu' aŋgəle ghɔm bəm gɑ: Və̌! Mpuŋtsé bɑ pɔ pyə a bɑ pu ke wap nə la'nwə mu jʉ̀jʉ̀ a: E lə́ pǐŋ gɔm gɑ: Mɔ̌ bɑ́ kwa' mghɔm Si. A lə pɑ̌ po' ŋkham mkwi'tə dzə̌ e gamtə e. Da' gɑ e ghɔm bəm gɑ: Kɑ ghə pa' a. Gɑ̌ bɑ so fa' o, ba yə mfɑ pǔ pyə wap nthɔm mkwinthɛ Yeso a. O gɔ ghamtə pɑ́ da' Si nə pa' kwinthɛ Yeso, a bɑ zhwenyə nə gɔm ghɔ̀m Si. A lə pɑ̌ po'o, ŋ jɔ́ kɛbə̀ŋ ghyɛ': Ŋ jɔ́ fə́fə́ nɔmlěŋ. Mo yə e ŋkwɔ' nɔmlěŋ bɔ a, tso tsyə bɑ tə kwyəpnyə̀ biŋ bɑ Nyənyɔ. E fyɛ' biŋ bɑ dó' shu pɑ́ nə́ dəŋdəŋ. Mnyə́ myə́ bɑ gwà mɔk hwehwě; mco'fò nthinthi bɑ thə́ e, tso tsyə a bɑ pu və̀ nə e a pɑ da' tso tsyə pɑ sɔm mo lə zhyə a. A bɑ ě kwa dzə fɔ̌k bɑ pú nu' nthʉm mcyə, pu piŋ bɑ ŋkhe e gɑ: Ghɔm Si. Mshwə́shù kɛbəŋ lə bɑ jʉm é, dəm mleŋ fə́fə́ bɑ wap kwa mfəfə dzə́ dɔlɔ̌. Ta' nyədwɔp shɔkcɔ̌k nthəm shwə́ e nə́ nə gwa mgùŋ. E gɔ sɔ' lɑ shɔm tʉɔ̌ nə lɑ wap ghɔ kim wap, e gɔ sɔ' ghiŋ dəm kɔp yə mlu' yɛluŋ Si Nthʉɔtʉɔ bɑ nthʉm o sə́ a. A bɑ pú və̀ mu' tso nə dzə e ba m nə nthamdzə e gɑ: Fo mfomfo, Cyəpɔ mcyəpɔ. A lə pɑ̌ po'o ŋ jɔ mu' aŋgəle bɑ é tiŋnyə nə́ nam. E cwé tə́ thə́ bi msə̌ŋ pyə wap ntha tə́ thə kɛbəŋ a gɑ: Po sɔ' shu'tə nə mɑ la'nwə Si; po sɔ' mpfɑ bap nɑ́ mfomfo bap nɑ́ mtadyə, bap nɑ́ pɔ nthʉɔtʉɔ, bap nɑ́ mnɔmlěŋ ba pɑ kwɔ' mleŋ bɔ, bap nɑ́ guŋ pɔ awɛ, pɑ tə pɑ mkwɔ ba mkwɔ, pɔ gwyəgwyə ba pɔ ŋkho'ŋkho' ŋ də piŋ jɔ́ nɔm, jɔ mfo dəmcǎ' pu a mshwə́shù map, bɑ wap cu'tə nə lo' ŋkwɔ' lěŋ pu shwə́shù e. Pu lə kwia nɔm pu pɑ ghɔm ghɔm Si cwanwə pyə́ wap lə té msya dzə̌ e nə pɔmnəŋ pyə́ wap lə piŋ pu və mtiŋ nɔm nə pú wap piŋ gamtə fo' e a. Pu lə pəmtə wap pɑpʉə nthʉɔnthʉɔ ma' nthʉm tamshyə mɔk sufra. Pyə shɑ lə pfʉ̌ nə nyədwɔp yə a lə bɑwə nthəm shwə̌ ŋkwɔ'lěŋ a, guŋ pǒ msəŋ awɛ piŋ pfɑ bapnɑ tsap. A lə pɑ̌ po'o ŋ jɔ mu' ta' aŋgəle e fi' fɑ thə kɛbəŋ. E lə bɑ ě wim ki tsʉ̀m pu e ba mɑ gwɑ́ mtʉ̌ɔ. E lə ghəm nɔk mkwə pfʉə, kukú nɔk yə e bɑ Diablə biŋ ba Sata a, dɑ gwɑ́ mtʉ̌ɔ shəŋ e nə́ mgu' shǎ'. E lə Kwɔk e ma' tsʉ̀m, jo' biŋ ntham stam nə e po'o gɑ e kɑ piŋ fʉtə mgùŋ tə̌ mgu' shǎ' kǔ'. A gɔ cwə tə́ cyə pú piŋ na' nthak e nəŋ. Ŋ də pǐŋ jɔ mleŋfò. Pɔ pyə́ wap lə bɑwə sɔ' shwətə́ dəm o a pu lə hɑ̌ nə fyɛ' bi pu. Ŋ də pǐŋ jɔ ba mtʉ̌m pɔ pyə pu lə ya' mthə́ map shyə́ m nə nə kwinthɛ nə Yeso ba nə ghɔm Si, ba pɔ pyə wap la tə ghamtə nɔm kə fo' e lə pɔ pyə wap lə bɑ wap ka ghə mtiŋ myə nə tsé tsap ba nə bú map a. Wap jám nə vʉ̌, pu a Kristo piŋ sa'dzʉ́ nə mgu' shǎ'. Pyə shɑ́ mpfə pɔ la tə yam nə vʉ̌ tə mgu' shǎ' guŋ shyə́ pɑ. A lə bɑ dəŋdzə̀ nə́ yam nə́ vʉ̌. Mpuŋtsé ba dɔlɔ̌ bɑ pɔ pyə wap bɑ nə́ dzə̀ nə́ yam nə́ vʉ̌ a. Batə vʉ̌ yɑpʉə tə́ bɑ ě ghə sɔm gʉ' nə pu pɑ́. Wap gɔ sɔ' pɑ mkamsi ba Kristo, a pu a pú sa'dzʉ́ nə mgu' shǎ'. Cwə yə mgu' shǎ' gɔ sɔ' ku' a pu té Sata dyə́ cɛ̌ e, e ghɔ nə guŋ dzʉ́ msak pfʉə awɛ fʉ́tə́ mgùŋ mgùŋ, Gog ba Magog. E gɔ sɔ' cu'tə wap nə shù; də̀ŋ yap bɑ pa' mkwa'lɛ shyə́ lɑpʉə a, wap lə́ sǎ guŋ dəmca' awɛ, dɑ tsʉ' shwə pɔ dɔlɔ̌ ba tisuŋ yə pu kuŋ ya té' a. Da' gɑ́ mu' ta' mɔk lə fi' fɑ kɛbəŋ ŋkhə́ wap. A lə pɑ̌ po'o, pu kwɔk Sata yə ba mo yə e fʉ́tə wap ma' e nthʉm tamshyə mɔk pu sufra, bəŋ nɔm pú gɔm ghɔm Si cwanwə. Wap gɔ sɔ' yɔgo' mɛnyə mɔkcʉ ba mtsʉ̌' nə mgu' nə gu'. A lə pɑ̌ po'o ŋ jɔ mu' leŋfò fəfə pu mo yə e lə bɑ ě cwə́ dəm o a: Cǎ' pu kɛbəŋ lə ŋkhʉ́ dzə e tə tak sɔmywə. A lə piŋ bɑ po'o, ŋ jɔ pɔ pyə́ wap lə pfʉ a, pɔ gwyə́gwyə́ ba pɔ ŋkho'ŋkho' bɑ wap tiŋnyə dzə leŋfò; pu lə pǐŋ gyɛ' mŋwa'nyə̀. Pu lə ghyɛ' mu' ŋwa'nyə, ŋwa'nyə vɔk, pu piŋ fyɛ' pɔ pyə wap lə pfʉ̀ a. Fyɛ' bǎ ya mo lə́ pɑ́ nə mfà' myə́, nə ywə yə́ a lə́ bɑ pu və nthʉm ŋwa'nyə a. Shyə́ lɑpʉə lə pa' pyə pɔ pyə wap lə pfʉ́ a, vʉ̌ pu Hadɛs pa' pap pɔ pyə wap lə pfʉ́ a, pu piŋ fyɛ' bǎ ya mo lə́ pɑ nə mfa' myə. A lə pɑ̌ po'o pu ma' vʉ̌ pu Hadɛs nthʉm tamshyə mɔk. Tamshyə mɔk batə vʉ̌ yɑpʉə. Bǎ ya mo lə́ yə pu la tə yɔ bɑ pu lě bvə tsò tsyə nthʉm ŋwa'nyə vɔk a, pu lə ma' e nthʉm tamshyə mɔk. A lə pɑ̌ po'o ŋ jɔ kɛbə̀ŋ pu cǎ' sə́, nə pa' dzə́ kɛbəŋ pu dzə́ cǎ' lə bɑ ǎ mì, ba shyə lɑpʉə lə piŋ jɑwə́. Ŋ də yɔ tisuŋ dɔlɔ̌, Yerusalɛm sə́ fi' fɑ kɛbə̀ŋ bə́ŋ Si, bɑ pu kwiŋ e pa' jwigʉɔ yə pu gɔ hɑ e bi dhə e a. Ŋ də piŋ ju' gì nthʉɔtʉɔ a fɑ bə̌ŋ leŋfo gɔm gɑ: Yɔ nthap Si pu a pɔmnəŋ yə̌ŋ. Pu a pu gɔ pɑ pəmtə́ cwə. Wap gɔ sɔ' pɑ pɔ pyə, é pɑ Si yə pu a pu gɔ pɑ pəmtə cwə a. E gɔ sɔ' ci' guŋ shyətsə́ awɛ nə́ mnyə́ map. Vʉ̌ tə gɔ sɔ' piŋ pɑwə pɑ́. Nə́ lɔ ba nə cwé kə gǒ' lə tə́ gɔ sɔ' piŋ pɑwə pɑ́, nə pa' bvo dzʉ̌ bɑ ǎ cyə. A lə pɑ̌ po'o mo yə e bɑ dəm leŋfo a ghɔm gɑ: Yɔ, gɑ̌ gɔ ghə gùŋ tsə́ awɛ pɑ m sə́. E lə pǐŋ gɔm gɑ: Və̌: Mghɔm mɔ gɑ bɑ́ kwa' ma biŋ bɑ nyənyɔ. E lə pǐŋ gɔm bəm gɑ: Nwə̌ pəmtə̀. Gɑ̌ bɑ́ Alfa biŋ bɑ́ Omega, nə́ to' ba nə́ miŋ. Bi mo yə ji shyə̌ wə jɛ́ e a, gɑ gɔ hɑ sa'sǐ shyə́ vɔk bi e néné. Mo yə ě cyə shù a gɔ sɔ' kwi tsə́ mcʉ' mɔ̌ a biŋ bɑ́ Si é, e pɑ́ mú à. Tə́ sɔ' nə mcwɔ̌'to, nə pɑ tə piŋ, pɑ ghə mɑ̀ cwəpùŋ, pɑ zhwə pɔmnəŋ, pɑ tə kuso, nə mghɛ sʉə, pɑ ghamtə mkətwɔk ba mcwanwə̀, yap tsʉ' bɑ m nthʉ̌m tamshyə́ mɔk pu sufra. A bɑ batə vʉ̌ yɑpʉə. A lə pɑ̌ po'o mu' aŋgəle nə m aŋgəle sɔmbʉə pyə wap lə́ bɑ wap wim mnthu' sɔmbʉə myə jʉ̀m ghəghʉɔ lə́ bɑ nthʉm o a sɔ' gɔm bəm gɑ: Sɔ̌', gɑ gɔ la'tə o mú gò, jwigʉɔ mú jʉ̀jʉ̀. E lə kwa a m nthʉm zhwenyə nə gɔ dəm mu' mɑ sʉəsʉə kúŋ, da'tə a tisuŋ dɔlɔ̌, Yerusalɛm yə a lə fi' fɑ m kɛbə̀ŋ bə́ŋ Si a. A lə bɑwə də́ŋnyə pɑ kwa' ghu'tə Si. Sɛ̀ e lə bɑwə shwə pa' ləŋnyə gwɔ' tʉɔdəŋ a pa' gwɔ' msɔmmsɔ̀m pa' mwe bəŋ a. A lə bɑ pu pəm kwa' mɑ kəpu' sʉəsʉə sakpé nə dzam. Mjyədyə̌ lə bɑ nə́ shwɔppʉə mghǎm, m aŋgəle shwɔppʉə mghǎm lə bɑ nə mjyədyə̌ bɔ, ba mtsǒ bɑ pu və nə: Mtsǒ gwya Israɛl shwɔppʉə mgham. Mjyədyə̌ lə bɑ nə ghə̌ŋ binam mənthá, bɑ nə ghə̌ŋ shyə́ gùŋ məntha, bɑ nə ghə̌ŋ mto dzʉ mənthá, bɑ̀ ghə́ŋ nthəmnam mənthá. Msakpé tisuŋ bɔ lə bɑ a ghə mŋkhɛ shwɔppʉə mghǎm, bɑ pú və mtsó mghɛ nthəm mu jʉ̀jʉ̀ shwɔppʉə mgham. Mo yə e lə bɑwə gɔm nwə bəm a lə bɑ ě tɔm ywə nə fo' ywə, a pɑ kam ka' tʉɔ gɔl, nə nə fo' tisuŋ ba mjyədyə́ myə́ pu a msakpé myə́. Tisuŋ bɔ lə bɑ msak pfʉə dəŋdəŋ nthə e pu lɔm e pɑ́ pɑ dəŋdəŋ; E lə́ lɑ ka' fǒ', a təm mstadə shǎ' shwɔppʉə mghǎm. Lɔm e pu a kəm e lə bɑ pɑ dəŋdəŋ. E lə fǒ' msakpé, a təm mnthə́ fo' pú mo shwɔppfʉə mpopfʉə m ŋkhə́, fo' ywə mo yə aŋgəle nə fo' ywə a. Tsə nə ŋkwɑ msakpe bɔ lə bɑ Yaspɛr tisuŋ bɔ piŋ bɑ gɔl tə bya, bɑwə hwə́ msɔm mwé bə̀ŋ. Mŋkhɛ cyə́ msakpe tisuŋ bɔ lə bɑ pu lɑ mwɔ' tʉɔdəŋ nthinthi nə nyəŋ msəm nə́. Də̀ŋdzə ŋkhɛ cyə́ é lə bɑ Yaspɛr, batə yɑpʉə pɑ safir, batə yɑtá pɑ kalkedon, batə yápfʉə pɑ smaragdo batə yɑtɔ pɑ sardius, batə nthɔk pɑ kardi, batə sɔmbʉə pɑ krisolito, batə hɔ̌m pɑ berito, batə vʉ̌' pɑ topaso, batə ghǎm pɑ krisopaso, batə shwɔp yɑmu' pɑ yakinto, batə shwɔppʉə mgham pɑ ametisto. Mjyədyə̌ shwɔppʉə mghǎm lə bɑ mtsə́dzə́ shwɔppʉə mghǎm. Bǎ ya jyədyə̌ lə lə́ bɑ pɑ ta' tsə́. Tsʉ' tisuŋ piŋ bɑ pa' gɔl tə bya pa' msɔm mwe bəŋ a. Da' gɑ ŋ da tə yɔ Dyə Si nthʉm tisuŋ bɔ. Nə pa' Dyə Si bɑ Cyəpɔ, Si Nthʉɔtʉɔ, bɑ mú jʉ̀jʉ̀. Tisuŋ bɔ tə́ shəŋ nàm kə mɑŋwə́ tə́ nə yɔ tsʉ' pɑ nə pa' ghu'tə Si ŋkhyɛ' e, gwa mɔk e pɑ mú jʉ̀jʉ̀. Mgùŋ gɔ sɔ' pɑ ghiŋ pɑ nə ŋkha' e, a mfo dəmcǎ' pɑ dɑ ghu'tə sɔ' bi e. Pu tə gɔ sɔ' vi' mjyədyə̌ myə́ nə sɔm tyɛ' pɑ́, nə pa' mtsʉ̌' tə gɔ sɔ' pɑ tsʉ̌'u pɑ́. Pu gɔ sɔ' lɑ ghu'tə pu a mku' gùŋ nə sɔ' tsʉ̌'u. Sɔmywə mviŋ tə́ gɔ sɔ' ko tsʉ'u pɑ kə sɔm gənwə cwəpuŋ kə shwanwə lə. Da' pɔ pyə a bɑ pu və wap nthʉm ŋwa'nyə mú jʉ̀jʉ̀ a nə gɔ sɔ' ko tsʉ'u. E lə piŋ da'tə a mu' mɑ ta' shyə dzəŋtsə̌ŋ, a pɑwə dəŋnyə pa' mwé bəŋ a, bɑwə nthəm nə leŋfo Si pu mú jʉ̀jʉ̀. Ta' thə́ vɔk lə bɑ tùŋ tsʉ'u, bɑ shyə bɔ hap ji mta' pʉə nyəŋ e túŋ. Ta' thə vɔk bɔ lə jam nthɔm, mcʉm shwɔppʉə mgham, bɑ jam pɑ nə ŋwə́, pú piŋ bɑ dɑ mhwə́ myə ba mgùŋ. Do tə́ gɔ sɔ' piŋ pɑwə pɑ. Leŋfo Si pu mú jʉ̀jʉ̀ gɔ sɔ' pɑ nthʉm tisuŋ bɔ, mghɛ fa' pyə pɑ se e. Wap gɔ sɔ' yɔ sə é, a tso tsyə pɑ nə tsé tsap. Mtsʉ̌' tə gɔ sɔ' piŋ pɑwə pɑ, a sɔmmo lə piŋ shəŋ ŋkha' gwa mɔk, kə ŋkha' nam lə́. Nə pa' Cyəpɔ Si gɔ sɔ' pɑ sɛ ŋkha' e nə pu, wap pɑ sa'dzʉ mgu'nəgu'. E lə piŋ gɔm bəm gɑ: Mghɔm mɔ bɑ mghɔm tə kwyəpnyə biŋ bɑ nyənyɔ; Cyəpɔ, Si mzhwenyə mghɔm ghɔm Si bɑ ě təm aŋgəle e gɑ e la'tə ywə yə a wə gɔ wuŋ sɔ' a bi mghɛ fa' pyə́. Yɔ, gɑ̌ wə gúŋ sɔ'. Buŋtsě bɑ mo yə e tɔm mghɔ̀m pɑ ghɔ́m ghɔm Si myə ǎ nthʉm ŋwa'nyə yəŋ gɑ a. Myə̀ Yohane, gɑ̌ bɑ́ gɑ̌ yu' biŋ jɔ ywə bɔ̌. Ŋ də piŋ tə́ ju' biŋ jɔ, ŋkham mkwi'tə si dzə̌ aŋgəle yə e lə la'tə a ywə bɔ a nə ghamtə e. Da' gɑ e ghɔm bəm gɑ: pɔm tə ghə pa'! Gɑ̌ bɑ so fa' o, ba yə mfɑ pǔ pɑ ghɔ́m ghɔm Si ba pɔ pyə wap nthɔm mghɔm ŋwa'nyə yəŋ gɑ́ a. O gɔ ghamtə pɑ da' Si. E lə piŋ gɔm bəm gɑ: Kɑ tʉm mghɔm mghɔ́m ghɔm Si myə ǎ nthʉm ŋwa'nyə yəŋ a, nə pa' cwə wə bɑ ǎ ghɔptə. Mo yə e tə́ gə nwə dəŋdəŋ a pɑ lɑ tsiŋnyə nwə e gɔ dzə, mviŋmviŋ mo lɑ mviŋ myə gɔ dzə̀; da' gɑ mo dəŋdəŋ lɑ nwə dəŋdəŋ gɔ dzə̀, mo dɔlɔ̌ cəŋtə dɔnyə. Yɔ, gɑ̌ wə gúŋ sɔ̌', piŋ nə sɔ' ghə mcwɔ'fa', pɑ́ hɑ bǎ myə wɑlɑ́ m nə mfa' myə. Gɑ̌ bɑ Alfa biŋ bɑ Omega, Dəŋdzə̀ biŋ bɑ Jʉɔjʉ̀m, nə to' biŋ bɑ nə mìŋ. Mpuŋtsé bɑ pɔ pyə wap sɔk msʉəsʉə dzə́ map po'o gɑ yap tsʉ' pɑ nə thə́ vɔk, a wap piŋ shyə mjyədyə̌ tə́ ŋkho tisuŋ a. Mbvʉ̌ təm pu a mghɛsʉə̀, pu a pɑ tə kuso, ba pɑ zhwə pɔ̀, pu a pɑ ghamtə kətwɔk, ba mo yə e fa' pɑ cwanwə a. Myə Yeso, gɑ̌ təm aŋgəle a gɑ e lɑ yəŋ gɑ kwǐnthɛ́ nə cu'tə pɔ Kristo nə sɔ' bi po. Gɑ̌ bɑ twɔp gwya David. Sɛ́ bhə dzʉ̌ dəŋnyələŋnyə. Zhwenyə pu jwigʉɔ ghɔm gɑ: Sɔ̌'! Mo yə ě yu' a ghɔm gɑ: Sɔ̌'. Mo yə ghak e khə a sɔ̌'. A mo yə e kuŋ a kwishyə vɔk něné. Gɑ̌ wə gɔm bǎ bi yɑ mo lə́ yə ě yu' ghɔm mghɔ́m ghɔm Si tsɔ nthʉ̀m ŋwa'nyə a gɑ: Mo yə ě kwi' ywə nə a, bɑ Si gɔ sɔ' kwi' ghəghʉɔ yə pu gɔm nthʉm ŋwa'nyə yəŋ a bi e. Mo yə e syaptə̀ ywə nə a, bɑ Si gɔ sɔ' syaptə̀ yə́ nə thə vɔk ba nə tisuŋ dɔlɔ̌ yə pu gɔm nthʉ̀m ŋwa'nyə yəŋ a. Mo yə e gɔm mnwə bɔ a ghɔm gɑ: Əŋ gɑ̌ wə guŋ sɔ̌'. Amɛn sɔ' m Cyəpɔ Yeso! Gho' Cyəpɔ Yeso pɑ bi guŋ pɔ awɛ.